The New Testament of our Lord and Saviour Jesus Christ

Матфей 1

1 Йесо Чырыстийы – Авраам ӕмӕ Давиды байзӕддаджы – хӕдзарвӕндаг. 2 Авраамӕй райгуырд Исаак; Исаакӕй райгуырд Иаков; Иаковӕй райгуырдысты Иудӕ ӕмӕ йе 'фсымӕртӕ; 3 Иудӕйӕн Фамарӕй райгуырдысты Фарес ӕмӕ Зара; Фаресӕй райгуырд Есром; Есромӕй райгуырд Арам; 4 Арамӕй райгуырд Аминадав; Аминадавӕй райгуырди Наассон; Наассонӕй райгуырди Салмон; 5 Салмонӕн Рахавӕй райгуырд Вооз; Воозӕн Руфӕй райгуырд Овид; Овидӕй райгуырд Иессей; 6 Иессейӕ райгуырди паддзах Давид; Давидӕн Урийы усӕй райгуырди Соломон; 7 Соломонӕй райгуырди Ровоам; Ровоамӕй райгуырд Ави; Авийӕ райгуырд Аса; 8 Асайӕ райгуырд Иосафат; Иосафатӕй райгуырд Иорам; Иорамӕй райгуырд Ози; 9 Озийӕ райгуырд Иоафам; Иоафамӕй райгуырд Ахаз; Ахазӕй райгуырд Езеки; 10 Езекийӕ райгуырди Манасси; Манассийӕ райгуырд Амон; Амонӕй райгуырд Иоси; 11 Иосийӕ райгуырдысты Иехони ӕмӕ йе 'фсымӕртӕ. Уыцы рӕстӕг иудейты сыстын кодтой ӕмӕ сӕ арвыстой Вавилонмӕ. 12 Вавилонмӕ арвитыны фӕстӕ Иехонийӕ райгуырди Салафиил; Салафиилӕй райгуырди Зоровавел; 13 Зоровавелӕй райгуырд Авиуд; Авиудӕй райгуырд Элиаким; Элиакимӕй райгуырд Азор; 14 Азорӕй райгуырди Садок; Садокӕй райгуырд Ахим; Ахимӕй райгуырд Элиуд; 15 Элиудӕй райгуырд Элеазар; Элеазарӕй райгуырди Матфан; Матфанӕй райгуырд Иаков; 16 Иаковӕй райгуырди Мариайы мой Иосиф; Мариа ныййардта, Чырысти Кӕй хонынц, уыцы Йесойы. 17 Афтӕмӕй Авраамӕй Давиды онг ӕдӕппӕт уыди цыппӕрдӕс фӕлтӕры; Давидӕй Вавилонмӕ арвитыны онг – цыппӕрдӕс фӕлтӕры; Вавилонмӕ арвитыны заманӕй Чырыстийы онг – цыппӕрдӕс фӕлтӕры. 18 Йесо Чырыстийы райгуырд уыди афтӕ. Йӕ Мад Мариа куырдуаты бадт Иосифӕн, ӕмӕ нӕма баиу сты, афтӕмӕй рабӕрӕг, Мариа Сыгъдӕг Уды хъаруйӕ кӕй банхъӕлцау. 19 Йӕ мой Иосиф раст адӕймаг уыди, фӕлӕ йӕ Мариайы адӕмы цӕсты бафтауын кӕй нӕ фӕндыд, уымӕ гӕсгӕ сфӕнд кодта сусӕгӕй Йӕ ауадзын. 20 Ахӕм хъуыды йӕм куы сӕвзӕрд, уӕд ӕм фыны фӕзынд Хуыцауы зӕд ӕмӕ йын загъта: «Давиды байзӕддаг Иосиф! Ма тӕрс дӕ ус Мариайы дӕ хӕдзармӕ ӕрбахонынӕй – Йӕ гуыбыны Чи сӕвзӕрди, Уый Сыгъдӕг Удӕй у. 21 Ныййардзӕни Фырт ӕмӕ Йӕ схондзынӕ Йесо, уымӕн ӕмӕ Йӕ адӕмы фервӕзын кӕндзӕни сӕ тӕригъӕдтӕй» 22 Ӕппӕт уыдӕттӕ ӕрцыдысты, цӕмӕй сӕххӕст уа, Хуыцау пехуымпары дзыхӕй цы загъта, уый: 23 «Ӕнӕцыд Чызг банхъӕлцау уыдзӕни, ныййардзӕни Фырт, ӕмӕ Йӕ схондзысты Эммануил» (ома, «Хуыцау немӕ ис»). 24 Иосиф куы райхъал, уӕд бакодта, Хуыцауы зӕд ын куыд бафӕдзӕхста, афтӕ – йӕ усы ӕрбахуыдта йӕ хӕдзармӕ. 25 Ӕмӕ Йӕм ӕмгӕрон нӕ бацыд, афтӕмӕй Мариа ныййардта Фырт; ӕмӕ Йӕ Иосиф схуыдта Йесо.

Матфей 2

1 Йесо райгуырд иудейаг Вифлеемы, Ирод паддзахиуӕг куы кодта, уӕд. Уыцы рӕстӕг Иерусалиммӕ скӕсӕнӕй ӕрцыдысты стъалыдӕснытӕ ӕмӕ бафарстой: 2 «Кӕм ис иудейаг ноггуырд Паддзах? Мах ын Йе стъалы федтам скӕсӕнӕй ссӕугӕ, ӕмӕ ӕрцыдыстӕм, цӕмӕй Йӕм бакувӕм». 3 Паддзах Ирод уый куы фехъуыста, уӕд скатай, йемӕ скатай ӕппӕт Иерусалим дӕр. 4 Уӕд ӕрӕмбырд кодта ӕппӕт иудейаг алчерты ӕмӕ динамонджыты, ӕмӕ сӕ бафарста: «Чырысти кӕм хъуамӕ райгуыра?» 5 Уыдон ын дзуапп радтой: «Иудейаг Вифлеемы, уымӕн ӕмӕ афтӕ фыст у пехуымпармӕ: 6 „Ды дӕр, Вифлеем, Иудӕйы зӕхх, ницӕмӕй къаддӕр дӕ Иудӕйы сӕйраг сахартӕй, уымӕн ӕмӕ дӕуӕй рацӕудзӕни Фӕтӕг ӕмӕ хиздзӕни Мӕ адӕмы – Израилы"». 7 Ирод сусӕгӕй басидти стъалыдӕснытӕм ӕмӕ уыдонӕй базыдта, стъалы кӕд фӕзынд, уыцы афон. 8 Уӕд сӕ арвыста Вифлееммӕ ӕмӕ сын бафӕдзӕхста: «Ацӕут ӕмӕ бӕлвырд базонут Сывӕллоны тыххӕй, ӕмӕ Йӕ куы ссарат, уӕд мын фехъусын кӕнут, ӕз дӕр ацӕуон ӕмӕ Йӕм бакувон». 9 Уыдон байхъуыстой паддзахмӕ ӕмӕ ацыдысты. Скӕсӕны цы стъалы федтой, уый цыди сӕ разӕй, ӕппынфӕстаг ӕрбахӕццӕ ӕмӕ ӕрлӕууыди, Сывӕллон кӕм уыди, уыцы бынаты сӕрмӕ. 10 Стъалы куы федтой, уӕд сӕ цинӕн кӕрон нал уыди. 11 Хӕдзармӕ куы бацыдысты, уӕд федтой Сывӕллоны Йӕ Мад Мариаимӕ, ӕрзоныг сты ӕмӕ Йӕм бакуывтой. Стӕй систой сӕ хӕзнатӕ ӕмӕ Йын ракодтой лӕвӕрттӕ: сызгъӕрин, буд ӕмӕ смирнӕ. 12 Ӕмӕ уырдыгӕй ӕндӕр фӕндагыл ацыдысты сӕхи бӕстӕмӕ, уымӕн ӕмӕ сын фыны загъдӕуыд, цӕмӕй мауал аздӕхой Иродмӕ. 13 Уыдон куы ацыдысты, уӕд Хуыцауы зӕд фыны фӕзынд Иосифмӕ ӕмӕ йын загъта: «Сыст, ракӕн Сывӕллоны Йӕ Мадимӕ ӕмӕ алидз Мысырмӕ, ӕмӕ дын цалынмӕ зӕгъон, уӕдмӕ уым цӕр, уымӕн ӕмӕ Иродӕн йӕ зӕрды ис Сывӕллоны ссарын ӕмӕ Йӕ амарын». 14 Иосиф сыстади, уыцы ӕхсӕв ракодта Сывӕллоны Йӕ Мадимӕ ӕмӕ ацыд Мысырмӕ. 15 Ӕмӕ уым фӕци Ироды амӕлӕтмӕ. Афтӕмӕй хъуамӕ сӕххӕст уыдаид, пехуымпары дзыхӕй Хуыцау цы загъта, уый: «Ӕз Мӕ Фырты ракодтон Мысырӕй». 16 Стъалыдӕснытӕ йыл сайдӕй кӕй рацыдысты, уый Ирод куы бамбӕрста, уӕд тынг смӕсты, Вифлееммӕ ӕмӕ йӕ алфамбылаймӕ арвыста, дыууӕ азӕй къаддӕр кӕуыл цыд, ӕппӕт уыцы лӕппуты амарынмӕ. Ирод стъалыдӕснытӕй куыд базыдта, афтӕмӕй Ноггуырд уыди ахӕм кары. 17 Уӕд сӕххӕст, Иереми-пехуымпары дзыхӕй цы загъдӕуыд, уый: 18 «Рамӕйы хъуысы дзыназын, кӕуын ӕмӕ зӕрдӕхалӕн хъарӕг. Рахил кӕуы йӕ хъӕбултыл, ӕмӕ йӕм ныфсӕвӕрӕнтӕ нӕ хъарынц, уымӕн ӕмӕ йӕ хъӕбултӕ ӕгас нал сты». 19 Ироды амӕлӕты фӕстӕ Хуыцауы зӕд фыны фӕзынд Иосифмӕ Мысыры, 20 Ӕмӕ йын загъта: «Сыст, ракӕн Сывӕллоны Йӕ Мадимӕ ӕмӕ ацу Израилы зӕхмӕ – Сывӕллоны амарынмӕ чи хъавыди, уыдон амардысты». 21 Иосиф сыстади, ракодта Сывӕллоны Йӕ Мадимӕ ӕмӕ ӕрцыд Израилы зӕхмӕ. 22 Фӕлӕ Архелай йӕ фыд Ироды бӕсты Иудейӕйы паддзахиуӕг кӕй кӕны, Иосиф уый куы фехъуыста, уӕд уырдӕм цӕуын нал бауӕндыди. Фыны йын загъдӕуыд, ӕмӕ ацыди Галилейы зӕхмӕ. 23 Ӕрцыд ӕмӕ ӕрцарди, Назарет цы сахар хуынди, уым. Афтӕмӕй хъуамӕ сӕххӕст уыдаид, пехуымпарты дзыхӕй цы загъдӕуыд, уый: «Схондзысты Йӕ Назорей». @Hdr Lst Chp = 3

Матфей 3

1 Уыцы рӕстӕг Аргъауӕг Иоанн Иудейаг ӕдзӕрӕг бӕстӕйы райдыдта адӕмӕн дзурын: 2 «Ӕрфӕсмон кӕнут, уымӕн ӕмӕ ӕрхӕстӕг Уӕларвон Паддзахад». 3 Иоанн уыди, Исай-пехуымпар рагагъоммӕ афтӕ кӕй тыххӕй загъта: «Ӕдзӕрӕг ран хъуысы фидиуӕджы хъӕлӕс: „Ӕрцӕттӕ кӕнут Хицауӕн фӕндаг, ӕмраст Ын скӕнут Йӕ цӕуӕнтӕ"». 4 Иоанн дардта теуайы хъуынӕй дарӕс, йӕ астӕуыл та уыди гӕрзӕй рон; йӕ хойраг уыдысты мӕтыхтӕ ӕмӕ хъӕддаг мыд. 5 Иерусалимӕй, ӕгас Иудейӕйӕ, Иорданы алфамбылайӕ ӕппӕт адӕм дӕр цыдысты Иоаннмӕ, 6 Ӕргом кодтой сӕ тӕригъӕдтӕ, ӕмӕ сыл Иоанн аргъуыдта Иорданы цӕугӕдоны. 7 Фарисейтӕ ӕмӕ йӕм саддукейтӕй бирӕтӕ саргъауынмӕ кӕй цӕуынц, уый куы федта, уӕд сын загъта: «Калмы цот! Чи уын бафтыдта уӕ зӕрдӕты ӕрцӕуинаг азарӕй лидзыны хъуыды? 8 Зӕрдиагӕй кӕй ӕрфӕсмон кодтат, уый равдисут хъуыддагӕй. 9 Ахӕм хъуыды уӕм ма ӕрцӕуӕд, ӕмӕ зӕгъат уӕхицӕн: „Нӕ фыдӕл Авраам у". Зӕгъын уын, Хуыцауӕн Йӕ бон у ацы дуртӕй дӕр Авраамӕн цот скӕнын. 10 Фӕрӕт ныридӕгӕн бӕлӕстӕ бындзарӕй акалынмӕ цӕттӕ у: хорз дыргъ цы бӕласыл нӕ зайы, уый акалынц ӕмӕ йӕ баппарынц арты. 11 Уӕ фӕсмоны тыххӕй уыл ӕз донӕй аргъауын, фӕлӕ мӕ фӕстӕ Чи ӕрбацӕуы, Уый мӕнӕй тыхджындӕр у – ӕз Ын Йӕ дзабыртӕ хӕссыны аккаг дӕр нӕ дӕн. Уый уыл аргъаудзӕни Сыгъдӕг Удӕй ӕмӕ артӕй. 12 Йӕ фыййаг Йӕ къухы ис, ӕмӕ ссыгъдӕг кӕндзӕн Йӕ мус. Мӕнӕу бафснайдзӕн Йӕ хордоны, зыгуым та басудздзӕн ӕнӕхуысгӕ арты». 13 Уӕд Йесо Галилейӕ ӕрцыд Иорданмӕ, цӕмӕй Йыл Иоанн саргъауа. 14 Иоанн та Йӕ урӕдта ӕмӕ Йын дзырдта: «Хъуамӕ Ды саргъауай мӕныл, Ды та мӕнмӕ ӕрцыдтӕ?» 15 Фӕлӕ йын Йесо дзуапп радта: «Ныртӕккӕ Мӕ бауадз. Уымӕн ӕмӕ мах Хуыцауы алы домӕн дӕр афтӕ хъуамӕ сӕххӕст кӕнӕм». Ӕмӕ Йӕ уӕд Иоанн бауагъта. 16 Йесо куы саргъуыдта ӕмӕ уайтӕккӕ донӕй куы рахызт, уӕд Йӕ сӕрмӕ фегом арвы дуар, ӕмӕ федта Хуыцауы Уды бӕлонау ӕрцӕйцӕугӕ ӕмӕ Йыл ӕрцӕйбадгӕ. 17 Ӕмӕ уӕлӕрвтӕй ӕрыхъуысти хъӕлӕс: «Ай, Кӕуыл аудын, Мӕ уыцы уарзон Фырт у». @Hdr Fst Chp = 3

Матфей 4

1 Уӕд Сыгъдӕг Уд Йесойы акодта ӕдзӕрӕг бӕстӕмӕ, цӕмӕй Йӕ ракъаха хӕйрӕг. 2 Уым Йесо дыууиссӕдз боны ӕмӕ дыууиссӕдз ӕхсӕвы дардта ком, ӕмӕ фӕстагмӕ сыстонг. 3 Уӕд Ӕм ӕрбацыди хӕйрӕг ӕмӕ Йын загъта: «Кӕд Хуыцауы Фырт дӕ, уӕд зӕгъ, цӕмӕй ацы дуртӕ фестой дзултӕ». 4 Йесо йын дзуапп радта: «Фыст у: „Айдагъ дзулӕй нӕ цӕрдзӕн адӕймаг, фӕлӕ Хуыцауы дзыхӕй рацӕугӕ алы дзырдӕй"». 5 Уӕд Ӕй хӕйрӕг акодта сыгъдӕг сахармӕ, ӕрлӕууын Ӕй кодта Кувӕндоны уӕлхӕдзарыл, 6 Ӕмӕ Йын загъта: «Кӕд Хуыцауы Фырт дӕ, уӕд Дӕхи аппар. Уымӕн ӕмӕ фыст у: „Йӕ зӕдтӕн бафӕдзӕхсдзӕни Дӕу тыххӕй, хӕсдзысты Дӕ сӕ къухтыл, ӕмӕ Дӕ къах дурыл дӕр нӕ ныццӕвдзынӕ"». 7 Йесо йын загъта: «Фыст у афтӕ дӕр: „Ма къах дӕ Хицау Хуыцауы"». 8 Уый фӕстӕ Йӕ хӕйрӕг акодта тынг бӕрзонд хохмӕ, равдыста Йӕм дунейы ӕппӕт паддзахӕдтӕ сӕ намысимӕ, 9 Ӕмӕ Йын загъта: «Дӕ зонгуытыл куы ӕрхауай ӕмӕ мын куы бакувай, уӕд сӕ иууылдӕр ратдзынӕн дӕуӕн». 10 Йесо йын дзуапп радта: «Фесӕф Мӕ цурӕй, хӕйрӕг! Фыст у: „Кув дӕ Хицау Хуыцаумӕ, ӕмӕ кус ӕрмӕстдӕр Уымӕн"». 11 Уӕд Ӕй хӕйрӕг ныууагъта. Уайтӕккӕ Йӕм ӕрцыдысты зӕдтӕ ӕмӕ Йын кӕстӕриуӕг кодтой. 12 Иоанны кӕй ӕрцахстой, уый Йесо куы фехъуыста, уӕд ацыди Галилеймӕ. 13 Назарет ныууагъта, ацыд ӕмӕ ӕрцарди денджызы былгӕрон, Капернаумы сахары, Завулон ӕмӕ Неффалимы зӕххыл. 14 Афтӕ хъуамӕ сӕххӕст уыдаид, Исай-пехуымпары дзыхӕй Хуыцау цы загъта, уый: 15 «Денджызмӕ фӕндагыл Иорданы иннӕ фарс чи ис, Завулоны ӕмӕ Неффалимы уыцы зӕхх, муртаттаг Галилей – 16 Талынджы цӕрӕг адӕм федтой стыр рухс, мӕлӕты талынг бӕстӕйы цӕрӕг адӕмӕн сӕрттывта рухс». 17 Уӕдӕй фӕстӕмӕ Йесо райдыдта фарны уац хъусын кӕнын: «Ӕрфӕсмон кӕнут, уымӕн ӕмӕ ӕрхӕстӕг Уӕларвон Паддзахад». 18 Йесо Галилейы денджызы былгӕрӕтты куы фӕцӕйцыди, уӕд федта дыууӕ ӕфсымӕры – фӕсномыгӕй Петр кӕй хуыдтой, уыцы Симоны, ӕмӕ йе 'фсымӕр Андрейы. Уыдон сӕ хызтӕ ӕппӕрстой денджызмӕ, уымӕн ӕмӕ кӕсагахсджытӕ уыдысты. 19 Йесо сын загъта: «Рацӕут Мӕ фӕдыл, ӕмӕ уӕ скӕндзынӕн адӕмахсджытӕ». 20 Уыдон уайтӕккӕ ныууагътой сӕ хызтӕ ӕмӕ ацыдысты Йӕ фӕдыл. 21 Йесо уырдыгӕй куы рацӕйцыд, уӕд федта иннӕ дыууӕ ӕфсымӕры – Зеведейы фырттӕ Иаков ӕмӕ Иоанны. Уыдон сӕ фыд Зеведеимӕ уыдысты бӕлӕгъы ӕмӕ ӕмпъызтой сӕ хызтӕ. Йесо сӕм басидт. 22 Уыдон уайтӕккӕ ныууагътой сӕ бӕлӕгъ ӕмӕ сӕ фыды, ӕмӕ ацыдысты Йӕ фӕдыл. 23 Йесо зылдис ӕгас Галилейыл, адӕмӕн амыдта синагогӕты, хаста сӕм фарны уац Уӕларвон Паддзахады тыххӕй, дзӕбӕх кодта ӕппӕт рынчынты ӕмӕ ӕнӕфӕразонты. 24 Йӕ кой айхъуыст ӕгас Сирийыл, хуыдтой Йӕм ӕппӕт рынчынты: алы низтӕй сӕйджыты, хӕйрӕджджынты, суртӕгӕнджыты, уӕнгмӕрдты, ӕмӕ сӕ Йесо дзӕбӕх кодта. 25 Йӕ фӕдыл цыди бирӕ адӕм Галилейӕ, Дӕссахарӕй, Иерусалимӕй, Иудейӕйӕ ӕмӕ Иорданы фаллаг фарсӕй.

Матфей 5

1 Йесо адӕмы куы федта, уӕд ссыди хохмӕ. Куы ӕрбадт, уӕд Ыл ӕрӕмбырд сты Йӕ ахуыргӕнинӕгтӕ, 2 Ӕмӕ сӕ райдыдта ахуыр кӕнын: 3 «Тӕхудиаг сты, йе скаст ӕрмӕст Хуыцаумӕ кӕмӕн у – Уӕларвон Паддзахад уыдоны у. 4 Тӕхудиаг сты кӕуджытӕ – уыдон баййафдзысты рӕвдыд. 5 Тӕхудиаг сты ӕвӕлмастӕ – зӕхх уыдоны хай бауыдзӕн. 6 Тӕхудиаг сты, стонгау ӕмӕ дойныйау Хуыцауы рӕстдзинадӕй бафсӕдынмӕ чи бӕллы, уыдон – Хуыцау сӕ бафсаддзӕн. 7 Тӕхудиаг сты хатыргӕнджытӕ – уыдон уыдзысты хатыргонд. 8 Тӕхудиаг сты сыгъдӕгзӕрдӕтӕ – уыдон фендзысты Хуыцауы. 9 Тӕхудиаг сты фидауынгӕнджытӕ – Хуыцау сӕ схондзӕн Йӕ хъӕбултӕ. 10 Тӕхудиаг сты рӕстдзинады тыххӕй ӕфхӕрд ӕййафджытӕ – Уӕларвон Паддзахад уыдоны у. 11 Тӕхудиаг уыдзыстут, Мӕн тыххӕй уын фидис куы кӕной ӕмӕ уӕ куы ӕфхӕрой, алы ӕвзӕртӕ уыл куы мысой, уӕд. 12 Цин кӕнут ӕмӕ райут – уӕлӕрвты уӕм ӕнхъӕлмӕ кӕсы стыр хорзӕх. Афтӕ ӕфхӕрдтой, уӕ размӕ цы пехуымпартӕ уыди, уыдоны дӕр. 13 Сымах стут дунейы цӕхх. Фӕлӕ цӕххӕн йӕ ад куы фесӕфа, уӕд ма йӕ цӕмӕй сцӕхджын кӕндзынӕ? Адӕмы къӕхты бынмӕ аппарыны йеддӕмӕ ницӕмӕнуал бӕззы. 14 Сымах стут дунейы рухс. Хохы сӕрыл цы сахар ис, уымӕн бамбӕхсӕн нӕй. 15 Ӕмӕ цырагъ куы ссудзынц, уӕд ӕй дурыны бын не 'вӕрынц, фӕлӕ цырагъдарӕныл, ӕмӕ хӕдзары алкӕмӕн дӕр рухс кӕны. 16 Афтӕ ӕрттивӕд уӕ рухс адӕмы раз, цӕмӕй уыной уӕ хорз хъуыддӕгтӕ ӕмӕ кад кӕной уӕ Уӕларвон Фыдӕн. 17 Сымах афтӕ ӕнхъӕл ма ут, ӕмӕ Ӕз Моисейы Ӕгъдау кӕнӕ пехуымпарты ахуырад аивынмӕ ӕрцыдтӕн. Ӕз сӕ аивынмӕ не 'рцыдтӕн, фӕлӕ сӕ сӕххӕст кӕнынмӕ. 18 Ӕцӕг уын зӕгъын: цалынмӕ арв ӕмӕ зӕхх сты, уӕдмӕ Ӕгъдауӕй тӕккӕ къаддӕр дамгъӕ кӕнӕ иу хахх дӕр нӕ фӕхъӕудзӕн – ӕппӕт дӕр сӕххӕст уыдзӕни. 19 Уӕдӕ ацы тӕккӕ къаддӕр фӕдзӕхстытӕн сӕ иуы дӕр чи фехала ӕмӕ адӕмы дӕр афтӕ бакӕныныл чи сардауа, уый къаддӕрыл нымад уыдзӕн Уӕларвон Паддзахады. Фӕлӕ сӕ чи сӕххӕст кӕна ӕмӕ сӕ адӕмӕн дӕр чи бацамона, уый Уӕларвон Паддзахады нымад уыдзӕни стырыл. 20 Зӕгъын уын: динамонджытӕ ӕмӕ фарисейтӕй коммӕгӕсдӕр куы нӕ уат Хуыцауӕн, уӕд Уӕларвон Паддзахадмӕ нӕ бацӕудзыстут. 21 Сымах фехъуыстат, рагон адӕмӕн цы загъд уыди, уый: „Ма амар; чи амара, уый дзуапп дӕтдзӕн тӕрхоны раз". 22 Ӕз та уын зӕгъын: йе 'фсымӕрмӕ [ӕнӕхъуаджы] чидӕриддӕр мӕсты кӕна, уый дзуапп дӕтдзӕни тӕрхоны раз; йе 'фсымӕрӕн „ницӕйаг" чи зӕгъа, уый дзуапп дӕтдзӕни синедрионы раз; „ӕнӕзонд" ын чи зӕгъа, уымӕ та ӕнхъӕлмӕ кӕсы зындоны арт. 23 Уӕдӕ ды дӕ нывондимӕ нывондхӕссӕнмӕ куы ӕрцӕуай, ӕмӕ дӕм де 'фсымӕр цӕйдӕр тыххӕй кӕй фӕхъыг, уый дӕ зӕрдыл куы ӕрлӕууа, 24 Уӕд дӕ нывонд ныууадз нывондхӕссӕны раз, ацу, бафидау уал де 'фсымӕримӕ, стӕй раздӕх ӕмӕ ӕрхӕсс дӕ нывонд. 25 Бафидау ӕвӕстиатӕй дӕ зылынгӕнӕгимӕ, цалынмӕ йемӕ тӕрхондонмӕ цӕуыс, уӕдмӕ; науӕд дӕ бакӕндзӕн тӕрхонгӕнӕгмӕ, тӕрхонгӕнӕг дӕ ратдзӕн хъахъхъӕнӕгмӕ, ӕмӕ дӕ баппардзысты ахӕстоны. 26 Ӕцӕг дын зӕгъын: цы бафидын дӕ хъӕуы, уый фӕстаг кодранты онг цалынмӕ раттай, уӕдмӕ нӕ рацӕудзынӕ уырдыгӕй. 27 Сымах фехъуыстат, [рагон адӕмӕн] цы загъд уыди, уый: „Ма хӕт". 28 Ӕз та уын зӕгъын: сылгоймагмӕ мондаджы цӕстӕй чидӕриддӕр кӕсы, уый ныридӕгӕн йӕ мидзӕрдӕйы фӕхӕтыд йемӕ. 29 Дӕ рахиз цӕст дын тӕригъӕды хос куы уа, уӕд ӕй фелвас ӕмӕ йӕ аппар – хуыздӕр дын у дӕ уӕнгтӕй иу фесафын, цӕйнӕфӕлтау дын дӕ буар ӕгасӕй дӕр зындонмӕ баппӕрстӕуа. 30 Ӕмӕ дын дӕ рахиз къух тӕригъӕды хос куы уа, уӕд ӕй акъуыр ӕмӕ йӕ аппар – хуыздӕр дын у дӕ уӕнгтӕй иу фесафын, цӕйнӕфӕлтау дӕ буар ӕгасӕй дӕр зындонмӕ бацӕуа. 31 Ноджыдӕр загъд у: „Йӕ усы чи ауадза, уый йын раттӕд уагъды ӕвдисӕндар". 32 Ӕз та уын зӕгъын: хӕтыны азым ӕм ма уӕд, уымӕй дарддӕр йӕ усы чидӕриддӕр ауадза, уый йӕ хӕтыныл ӕфтауы. Уагъд усы чи ракура, уый дӕр хӕтгӕ кӕны. 33 Сымах ноджыдӕр фехъуыстат, рагон адӕмӕн ма цы загъд уыди, уый: „Дӕ сомы ма басӕтт, фӕлӕ Хуыцауӕн цӕй тыххӕй расомы кодтай, уый бакӕн". 34 Ӕз та уын зӕгъын: ӕппындӕр сомы ма кӕнут – нӕдӕр арвӕй, уымӕн ӕмӕ уый Хуыцауы бадӕн у; 35 Нӕдӕр зӕххӕй, уымӕн ӕмӕ уый Йӕ къӕхты ӕнцой у; нӕдӕр Иерусалимӕй, уымӕн ӕмӕ уый стыр Паддзахы сахар у. 36 Дӕ сӕрӕй дӕр ма сомы кӕн, уымӕн ӕмӕ дӕ сӕрыхъуынтӕй иу ӕрду дӕр урс кӕнӕ сау скӕнын дӕ бон нӕу. 37 Фӕлӕ уӕ „о" хъуамӕ уа „о", уӕ „нӕ" та – „нӕ"; уымӕй уӕлдай цы уа, уый та хӕйрӕгӕй у. 38 Сымах фехъуыстат, цы загъд уыди, уый: „Цӕст къахӕгӕн йӕ цӕст къахинаг у ӕмӕ дӕндаг сӕттӕгӕн йӕ дӕндаг сӕттинаг у". 39 Ӕз та уын зӕгъын: дӕ бафхӕрӕджы ныхмӕ ма рацу. Фӕлӕ дын дӕ рахиз ӕхсӕрфарс чи ныццӕва, уымӕ бадар иннӕ дӕр. 40 Дӕ хӕдон байсыны тыххӕй дыл тӕрхондонмӕ чи бахъаст кӕна, уымӕн ратт дӕ пӕлӕз дӕр. 41 Фӕндагыл дӕ йемӕ ӕвӕндонӕй чи акӕна, уыимӕ дыууӕ хатты фылдӕр ацу. 42 Чи дӕ кура, уымӕн ратт, ӕмӕ дӕуӕй ӕфстау райсын кӕй фӕнды, ууыл дӕхи ма атигъ кӕн. 43 Сымах фехъуыстат, цы загъд уыд, уый: „Уарз хионы ӕмӕ де сӕфт уын де знагӕй". 44 Ӕз та уын зӕгъын: уарзут уе знӕгты, [уе 'лгъитджытӕн хорзӕх курут Хуыцауӕй, хорз кӕнут, сымахӕй йе сӕфт чи уыны, уыдонӕн,] кувут уе 'фхӕрджыты тыххӕй. 45 Ӕмӕ уӕд уыдзыстут уӕ Уӕларвон Фыды хъӕбултӕ – Уый хур скӕсын кӕны хӕрзтыл дӕр ӕмӕ ӕвзӕртыл дӕр, къӕвда рауадзы рӕстытыл дӕр ӕмӕ тӕригъӕдджынтыл дӕр. 46 Уымӕн ӕмӕ сымах чи уарзы, уыдоны куы уарзат, уӕд уын уый тыххӕй цавӕр хӕрзиуӕг уыдзӕни? Хъалонисджытӕ дӕр афтӕ нӕ кӕнынц, ӕви? 47 Ӕмӕ кӕд ӕрмӕстдӕр уе 'фсымӕртӕн салам дӕттут, уӕд цы уадиссаг аразут? Муртаттӕ дӕр афтӕ нӕ кӕнынц, ӕви? 48 Уӕдӕ ут ӕнаипп, уӕ Уӕларвон Фыд ӕнаипп куыд у, афтӕ.

Матфей 6

1 Уӕхи хизут, рӕстгӕнджытӕ кӕй стут, уый адӕмы цӕстмӕ ӕвдисынӕй, науӕд уын хорзӕх нӕ уыдзӕн уӕ Уӕларвон Фыдӕй. 2 Уӕдӕ мӕгуырӕн куы ӕххуыс кӕнай, уӕд ӕй дӕрдты ма ныхъхъӕр кӕн. Афтӕ цӕстмӕхъустӕ кӕнынц синагогӕты ӕмӕ уынгты, цӕмӕй сын адӕм кад кӕной. Ӕцӕг уын зӕгъын: уыдон ныридӕгӕн райстой сӕ хорзӕх. 3 Ды та мӕгуырӕн куы ӕххуыс кӕнай, уӕд дӕ галиу къух ма зонӕд, дӕ рахиз цы гӕнӕг у, уый. 4 Уӕд де 'ххуысы хай уыдзӕни сусӕг, ӕмӕ дӕ Фыд, сусӕггаг уынӕг, дӕу схорзӕхджын кӕндзӕн [ӕргомӕй]. 5 Ӕмӕ куы фӕкувут, уӕд цӕстмӕхъустау ма ут – уыдон уарзынц адӕмы цӕстмӕ синагогӕты ӕмӕ тигътыл лӕугӕйӕ кувын. Ӕцӕг уын зӕгъын: уыдон ныридӕгӕн райстой сӕ хорзӕх. 6 Ды та куы фӕкувыс, уӕд бацу дӕ уатмӕ, сӕхгӕн дӕ дуар ӕмӕ бакув, цӕстӕй Кӕй нӕ уыныс, дӕ уыцы Фыдмӕ. Ӕмӕ дӕ Фыд, сусӕггаг уынӕг, дӕу схорзӕхджын кӕндзӕн [ӕргомӕй]. 7 Кувгӕйӕ та муртаттау уӕлдай ма дзурут – уыдон ӕнхъӕл сты, зӕгъгӕ, бирӕ куы дзурой, уӕд сӕ куывд фехъуысдзӕни Хуыцаумӕ. 8 Уыдоны ма бафӕзмут, уымӕн ӕмӕ Дзы нӕма ракурут, афтӕ уӕ Фыд фӕзоны, цы хъуаг стут, уый. 9 Кувгӕ та кӕнут афтӕ: „Нӕ Уӕларвон Фыд, сыгъдӕг уӕд Дӕ ном. 10 Ӕрцӕуӕд Дӕ Паддзахад. Уӕларвы куыд у, афтӕ зӕххыл дӕр уӕд Дӕ фӕндон. 11 Абон дӕр нын ратт цӕрынваг къӕбӕр. 12 Ныббар нын нӕ хӕстӕ, мах нӕ хӕсджынтӕн куыд барӕм, афтӕ. 13 Ма нӕ бафтау фӕлварӕны, фыдбылызӕй нӕ бахиз. [Уымӕн ӕмӕ Паддзахад, тых ӕмӕ намыс мыггагмӕ дӕр Дӕу сты. Амен.]" 14 Уымӕн ӕмӕ адӕмӕн сӕ тӕригъӕдтӕ куы ныббарат, уӕд сымахӕн дӕр уӕ Уӕларвон Фыд ныббардзӕн уӕ тӕригъӕдтӕ. 15 Фӕлӕ адӕмӕн сӕ тӕригъӕдтӕ куы нӕ ныббарат, уӕд уын уӕ Фыд дӕр уӕ тӕригъӕдтӕ нӕ ныббардзӕн. 16 Ком куы фӕдарут, уӕд цӕстмӕхъустау уӕхи ма хъуынтъыз кӕнут – уыдон ныттар кӕнынц сӕ цӕсгӕмттӕ, цӕмӕй адӕм феной, ком кӕй дарынц, уый. Ӕцӕг уын зӕгъын: уыдон ныридӕгӕн райстой сӕ хорзӕх. 17 Ды та ком куы дарай, уӕд ныффас дӕ сӕр ӕмӕ цӕхс дӕ цӕсгом, 18 Цӕмӕй ком кӕй дарыс, уый адӕм ма феной, фӕлӕ йӕ фена, цӕстӕй Кӕй нӕ уыныс, дӕ уыцы Фыд, ӕмӕ дӕ Фыд, сусӕг хъуыддӕгтӕ уынӕг, дӕу схорзӕхджын кӕндзӕн [ӕргомӕй]. 19 Ма ӕмбырд кӕнут уӕхицӕн хӕзнатӕ зӕххыл – ам сӕ хӕрынц рӕмпӕг ӕмӕ згӕ, баирвӕзынц сӕм хуыснӕджытӕ ӕмӕ сӕ давынц. 20 Фӕлӕ уӕхицӕн хӕзнатӕ ӕмбырд кӕнут уӕларвы – уым сӕ нӕдӕр рӕмпӕг хӕры, нӕдӕр згӕ, хуыснӕджытӕ дӕр сӕм нӕ баирвӕзынц ӕмӕ сӕ нӕ давынц. 21 Уымӕн ӕмӕ уӕ хӕзна кӕм ис, уым уыдзӕн уӕ зӕрдӕ дӕр. 22 Буарӕн йӕ рухсгӕнӕн цӕст у. Ӕмӕ дӕ цӕст сыгъдӕг куы уа, уӕд дӕ буар иууылдӕр рухс уыдзӕн. 23 Фӕлӕ дӕ цӕст чъизи куы уа, уӕд дӕ буар иууылдӕр талынг уыдзӕн. Уӕдӕ дӕумӕ цы рухс ис, уый талынг кӕд у, уӕд талынг цавӕр у, цымӕ! 24 Никӕй бон у дыууӕ хицауӕн кусын – сӕ иуӕй йе сӕфт уындзӕн, иннӕйы та уарздзӕни, кӕнӕ сӕ иуыл иузӕрдион уыдзӕн, иннӕйы та ницӕмӕ дардзӕн. Уӕ бон нӕ бауыдзӕни Хуыцауӕн ӕмӕ мулкӕн кусын. 25 Уымӕ гӕсгӕ уын зӕгъын: ма мӕт кӕнут, фӕцӕрынӕн уӕ цы хойраг ӕмӕ нозт хъӕуы, нӕдӕр ууыл, нӕдӕр уӕ буарӕн дарӕсыл. Мыййаг, цард хойрагӕй ахсджиагдӕр нӕу, буар та – дарӕсӕй? 26 Акӕсут-ма уӕларвон мӕргътӕм: уыдон нӕдӕр тауынц, нӕдӕр кӕрдынц, нӕдӕр хордӕтты хор ӕфснайынц, ӕмӕ сӕ уӕ Уӕларвон Фыд хӕссы. Сымах уыдонӕй бирӕ зынаргъдӕр не стут, ӕви? 27 Стӕй уӕ йӕ мӕтӕй йӕ цардыл бирӕ нӕ, фӕлӕ иу сахат бафтауын дӕр кӕй бон бауыдзӕн? 28 Дарӕсыл дӕр цы мӕт кӕнут? Акӕсут-ма, быдираг дидинджытӕ куыд рӕзынц, уымӕ: нӕдӕр кусынц, нӕдӕр ӕлвисынц. 29 Зӕгъын уын: суанг Соломон, намысджын ӕмӕ хъӕздыг лӕг, уыдонӕй иуы хуызӕн дӕр нӕ арӕзта йӕхи. 30 Абон чи ис, райсом та пецы ӕппӕрст чи уыдзӕн, уыцы быдираг кӕрдӕджы Хуыцау афтӕ кӕм фӕлынды, уым сымах не сфӕлынддзӕн, ӕви, лӕмӕгъ уырнджытӕ! 31 Уӕдӕ мӕт ма кӕнут ӕмӕ ма дзурут: „Цы хӕрӕм?", „Цы нуазӕм?", „Нӕ уӕлӕ цы скӕнӕм?" 32 Ӕппӕт уыдӕттӕ муртаттӕ агурынц; сымахӕн уӕ Уӕларвон Фыд зоны, ӕппӕт уыдӕттӕ уӕ кӕй хъӕуынц, уый. 33 Фыццаджыдӕр агурут Хуыцауы Паддзахад ӕмӕ рӕстдзинад, ӕмӕ уын лӕвӕрд уыдзысты ӕппӕт уыдӕттӕ дӕр. 34 Уӕдӕ мӕт ма кӕнут сомбоныл, уымӕн ӕмӕ сомбон йӕхӕдӕг тыхсдзӕн йӕ хъуагыл. Алы бонӕн дӕр йӕхи сагъӕстӕ ӕгъгъӕд сты.

Матфей 7

1 Иннӕтӕн тӕрхон ма кӕнут, ӕмӕ тӕрхонгонд нӕ уыдзыстут. 2 Уымӕн ӕмӕ иннӕтӕн цы тӕрхон рахӕссут, ахӕм тӕрхон рахастӕуыдзӕн сымахӕн дӕр; ӕмӕ цы барӕнӕй барут, ахӕмӕй сбарстӕуыдзӕн сымахӕн дӕр. 3 Цы кӕсыс де 'фсымӕры цӕсты ӕрдумӕ, дӕхи цӕсты та къалабӕлас нӕ фиппайыс? 4 Кӕнӕ куыд зӕгъдзынӕ де 'фсымӕрӕн: „Ӕри-ма, дӕ цӕстӕй дын ӕрду сисон", дӕхи цӕсты къалабӕлас куы ис, уӕд? 5 Цӕстмӕхъус! Дӕхи цӕстӕй уал къалабӕлас сис, стӕй уӕд фендзынӕ, де 'фсымӕры цӕстӕй ӕрду куыд сисын хъӕуы, уый. 6 Куыйтӕн ма дӕттут, Хуыцауы цы у, уый, ӕмӕ хуыты размӕ ма ӕппарут уӕ налхъуыт, цӕмӕй йӕ уыдон сӕ къӕхты бын ма ныссӕндой, стӕй ма бавдӕлой ӕмӕ уын уӕхи ма ныкъкъуыхтӕ кӕной. 7 Курут ӕмӕ райсдзыстут, агурут ӕмӕ ссардзыстут, хойут ӕмӕ уын байгом уыдзӕн. 8 Уымӕн ӕмӕ алы курӕг дӕр райсы, агурӕг ссары ӕмӕ хойӕгӕн дуар байгом вӕййы. 9 Йӕ фырт дзы дзул куы кура, уӕд ын дур чи ратта, уе 'хсӕн ахӕм исчи ис? 10 Кӕнӕ дзы кӕсаг куы кура, уӕд ын калм ратдзӕн? 11 Сымах фыдзӕрдӕтӕ куы стут, ӕмӕ уӕддӕр уӕ зӕнӕгӕн хорзы цӕуын куы зонут, уӕд уӕ Уӕларвон Фыд куыннӕ ратдзӕни фарн, чи Дзы кура, уыдонӕн! 12 Уӕдӕ адӕммӕ цӕмӕдӕриддӕр ӕнхъӕлмӕ кӕсут, уый сын аразут уӕхӕдӕг дӕр. Ацы ныхӕсты ис Моисейы Ӕгъдауы ӕмӕ пехуымпарты ахуырады мидис. 13 Бацӕут уынгӕг дуарыл. Сӕфтмӕ цы дуар ӕмӕ фӕндаг кӕнынц, уыдон уӕрӕх ӕмӕ парахат сты, ӕмӕ бирӕтӕ цӕуынц уыдоныл; 14 Цардмӕ цы дуар ӕмӕ фӕндаг кӕнынц, уыдон та уынгӕг ӕмӕ нарӕг сты, ӕмӕ сӕ чи ссары, уыдон бирӕ не сты. 15 Уӕхи хизут, фысдзармы уӕм чи ӕрцӕуы, мидӕгӕй та тугдзых бирӕгъ чи у, уыцы мӕнгпехуымпартӕй. 16 Сӕ хъуыддӕгтӕй сӕ базондзыстут. Какон сындзӕй, мыййаг, сӕнӕфсир ӕртонынц, кӕнӕ ичъийӕ – легъуи? 17 Афтӕ алы хорз бӕласыл дӕр хорз дыргътӕ ӕрзайы, низджын бӕласыл та ӕвзӕр дыргътӕ ӕрзайы. 18 Хорз бӕлас ӕвзӕр дыргътӕ не 'рхӕсдзӕн, низджын бӕлас та – хорз дыргътӕ. 19 Хорз дыргъ цы бӕласыл нӕ зайы, уый акалынц ӕмӕ йӕ баппарынц арты. 20 Уӕдӕ мӕнгпехуымпарты сӕ хъуыддӕгтӕй базондзыстут. 21 Мӕнӕн „Хицау! Хицау!" чи дзуры, уыдонӕй алчи нӕ бацӕудзӕн Уӕларвон Паддзахадмӕ, фӕлӕ йӕм Мӕ Уӕларвон Фыды фӕндон ӕххӕстгӕнӕг бацӕудзӕн. 22 Бирӕтӕ Мын уыцы бон зӕгъдзысты: „Хицау, Хицау, мах Дӕ номӕй пехуымпариуӕг нӕ кодтам? Дӕ номӕй дӕлимонты нӕ сырдтам? Дӕ номӕй бирӕ диссӕгтӕ не 'вдыстам?" 23 Уӕд сын цӕхгӕр зӕгъдзынӕн: „Ӕз уӕ никуы зыдтон. Ацӕут Мӕ цурӕй, тӕригъӕдджынтӕ". 24 Уӕдӕ Мӕ ацы ныхӕстӕм чидӕриддӕр хъусы ӕмӕ сӕ ӕххӕст кӕны, уый у, йӕ хӕдзар дурыл чи самадта, уыцы зондджын адӕймаджы хуызӕн. 25 Ӕрцыди уарын, раивылдысты цӕугӕдӕттӕ, сыстади дымгӕ, ӕмӕ ахӕцыдысты уыцы хӕдзарыл, фӕлӕ не 'ркалд, уымӕн ӕмӕ дурыл ӕвӕрд уыди. 26 Мӕ ацы ныхӕстӕм чидӕриддӕр хъусы ӕмӕ сӕ не 'ххӕст кӕны, уый та у, йӕ хӕдзар змисыл чи самадта, уыцы ӕнӕзонд адӕймаджы хуызӕн. 27 Ӕрцыди уарын, раивылдысты цӕугӕдӕттӕ, сыстади дымгӕ, ӕмӕ сӕхи ныццавтой уыцы хӕдзарыл. Хӕдзар ӕркалд ӕмӕ ныппырх и бынтондӕр». 28 Йесо Йӕ ныхас куы фӕци, уӕд адӕмы дисы бафтыдта Йӕ ахуырад, 29 Уымӕн ӕмӕ сын амыдта сӕ динамонджытау нӕ, фӕлӕ барджынӕй.

Матфей 8

1 Йесо хохӕй куы ӕрхызт, уӕд Йӕ фӕдыл ацыди бирӕ адӕм. 2 Ӕрбацыд Ӕм хъотырджын, ӕрзоныгыл Йӕ разы ӕмӕ Йын загъта: «Хицау, кӕд Дӕ фӕнды, уӕд Дӕ бон у, ӕмӕ мӕ ссыгъдӕг кӕнай». 3 Йесо радардта Йӕ къух, бандзӕвыд ыл ӕмӕ загъта: «Фӕнды Мӕ, ссыгъдӕг у». Ӕмӕ уыйадыл ссыгъдӕг йӕ хъотырӕй. 4 Йесо йын загъта: «Хъусыс, макӕмӕн ӕй зӕгъ, фӕлӕ ацу, дӕхи фенын кӕн сауджынӕн, ӕмӕ Моисей куыд бафӕдзӕхста, афтӕ ӕрхӕсс нывонд – кӕй сдзӕбӕх дӕ, уымӕн ӕвдисӕйнагӕн». 5 Йесо Капернауммӕ куы бацыд, уӕд Ӕм ӕрбацыди сӕдӕйыхицау ӕмӕ Дзы куырдта: 6 «Хицау, мӕ фӕсдзӕуин хӕдзары хуыссы уӕнгмардӕй ӕмӕ тынг удхар кӕны». 7 Йесо йын загъта: «Ӕз бацӕудзынӕн ӕмӕ йӕ сдзӕбӕх кӕндзынӕн». 8 Сӕдӕйыхицау Ын зӕгъы: «Хицау, ӕз уый аккаг нӕ дӕн, ӕмӕ Ды мӕ хӕдзармӕ бацӕуай. Фӕлӕ ӕрмӕст Дӕ дзыхӕй ныхас рацӕуӕд, ӕмӕ мӕ фӕсдзӕуин сдзӕбӕх уыдзӕн. 9 Уымӕн ӕмӕ ӕз мӕхӕдӕг дӕр дӕлбар лӕг дӕн, ӕмӕ мӕ дӕлбар дӕр ис ӕфсӕддонтӕ. Иуӕн дзы фӕзӕгъын: „Ацу уырдӕм", ӕмӕ ацӕуы; иннӕмӕн: „Ардӕм рацу", ӕмӕ ӕрбацӕуы; мӕ цагъарӕн фӕзӕгъын: „Уый бакӕн", ӕмӕ йӕ бакӕны». 10 Йесо уый куы фехъуыста, уӕд дисы бафтыд ӕмӕ Йӕ фӕдыл цӕуджытӕн загъта: «Ӕцӕг уын зӕгъын: ахӕм уырнындзинад Израилы Ӕз никӕмӕ федтон. 11 Зӕгъын уын: бирӕтӕ ӕрцӕудзысты скӕсӕн ӕмӕ ныгуылӕнӕй, ӕмӕ Уӕларвон Паддзахады фынгыл ӕрбаддзысты Авраамимӕ, Исаакимӕ ӕмӕ Иаковимӕ. 12 Паддзахад нысангонд кӕмӕн уыди, уыдон та ӕппӕрст ӕрцӕудзысты ӕддӕмӕ, талынгмӕ; уым уыдзӕни кӕуын ӕмӕ дӕндӕгты хъыс-хъыс». 13 Йесо сӕдӕйыхицауӕн загъта: «Ацу, ӕмӕ дӕ уырнындзинадмӕ гӕсгӕ сӕххӕст уӕд дӕ фӕндон». Ӕмӕ уайтӕккӕ йӕ фӕсдзӕуин сдзӕбӕх. 14 Йесо Петры хӕдзармӕ куы бацыди, уӕд ын йӕ усы мады федта тӕвднизӕй сӕйгӕйӕ. 15 Йесо йын бавнӕлдта йӕ къухмӕ, ӕмӕ йӕ тӕвд ӕрхауд; сылгоймаг сыстад ӕмӕ Йын райдыдта кӕстӕриуӕг кӕнын. 16 Куы баизӕр, уӕд Ӕм ӕрхуыдтой бирӕ хӕйрӕджджынты, ӕмӕ Йесо Йӕ ныхасӕй фӕсырдта ӕнӕзӕгъинӕгты ӕмӕ сдзӕбӕх кодта ӕппӕт рынчынты дӕр. 17 Афтӕмӕй хъуамӕ сӕххӕст уыдаид, Исай-пехуымпары дзыхӕй цы загъдӕуыд, уый: «Айста нын нӕ рынтӕ ӕмӕ ахаста нӕ низтӕ». 18 Йесо Йӕ алыварс бирӕ адӕм куы федта, уӕд загъта Йӕ ахуыргӕнинӕгтӕн, цӕмӕй Йемӕ ахизой денджызы фаллаг фарсмӕ. 19 Уӕд Ӕм бацыд иу динамонӕг ӕмӕ Йын загъта: «Ахуыргӕнӕг, Ды кӕдӕм цӕуай, уырдӕм ӕз дӕр ацӕудзынӕн Дӕ фӕдыл». 20 Йесо йын дзуапп радта: «Рувӕстӕн ис хуыккӕмттӕ, уӕларвон мӕргътӕн – ахстӕттӕ. Адӕймаджы Фыртӕн та, Йӕ сӕр кӕм ӕркъул кӕна, уый дӕр нӕй». 21 Йӕ ахуыргӕнинӕгтӕй Йын ӕндӕр загъта: «Хицау, мӕ фыды баныгӕнынмӕ уал мӕ ауадз». 22 Фӕлӕ йын Йесо дзуапп радта: «Мӕ фӕдыл рацу, мӕрдтӕ сӕхӕдӕг баныгӕнӕнт сӕ мӕрдты». 23 Ӕмӕ Йесо бӕлӕгъмӕ куы бахызт, уӕд Йӕ ахуыргӕнинӕгтӕ дӕр бахызтысты Йӕ фӕдыл. 24 Уалынмӕ денджыз афтӕ тынг сабухта, ӕмӕ уылӕнтӕ калдысты бӕлӕгъы сӕрты; Йесо та фынӕй уыди. 25 Уӕд Ӕм Йӕ ахуыргӕнинӕгтӕ бацыдысты, райхъал Ӕй кодтой ӕмӕ Йын загътой: «Хицау, фервӕзын нӕ кӕн, сӕфӕм!» 26 Йесо дзуапп радта: «Афтӕ тӕппуд цӕмӕн стут, лӕмӕгъ уырнджытӕ?» Ӕмӕ сыстади, уад ӕмӕ денджызӕн радта бардзырд, ӕмӕ бӕстӕ ныссабыр. 27 Иууылдӕр дисы бафтыдысты, ӕмӕ дзырдтой: «Уый Чи уа, уад ӕмӕ денджыз Кӕй коммӕ кӕсынц?» 28 Йесо денджызы иннӕ фарсмӕ, Гадарӕйы бӕстӕмӕ, куы бахӕццӕ, уӕд зӕппӕдзтӕй Йӕ размӕ рацыди дыууӕ хӕйрӕджджыны. Уыдон афтӕ знӕт уыдысты, ӕмӕ уыцы фӕндагыл рацӕуынмӕ йӕ ныфс ничи хаста. 29 Хӕйрӕджджынтӕ хъӕр систой: «Цы Дӕ хъӕуы махӕй, Хуыцауы Фырт? Ӕмгъуыдӕй раздӕр нӕ ардӕм хъизӕмарӕй марынмӕ ӕрцыдтӕ?» 30 Уыдонӕй дӕрддзӕф ран хызти хуыты стыр дзуг, 31 Ӕмӕ дӕлимонтӕ куырдтой Йесойӕ: «Кӕд нӕ сургӕ кӕныс, уӕд нӕ хуыты дзуджы бауадз». 32 Йесо сын загъта: «Цӕугӕут». Уыдон рацыдысты уыцы дыууӕ адӕймагӕй, ӕмӕ бацыдысты хуыты. Ӕмӕ хуыты дзуг ӕгасӕй дӕр къардиуӕй денджызмӕ аппӕрста йӕхи, ӕмӕ фесӕфт доны. 33 Хуыгӕстӕ азгъордтой, бацыдысты сахармӕ ӕмӕ радзырдтой алцӕй тыххӕй дӕр, уыимӕ, хӕйрӕджджынтыл цы ӕрцыд, уый тыххӕй дӕр. 34 Сахары ӕппӕт цӕрджытӕ рацыдысты Йесойы размӕ, ӕмӕ Йӕ куы федтой, уӕд Дзы куырдтой, цӕмӕй ацӕуа сӕ зӕххӕй.

Матфей 9

1 Уӕд Йесо бахызти бӕлӕгъмӕ, ахызт иннӕ фарсмӕ ӕмӕ ӕрцыди Йӕ сахармӕ. 2 Хуыссӕныл Ӕм ӕрбахастой уӕнгмарды. Йесо сын федта сӕ уырнындзинад ӕмӕ уӕнгмардӕн загъта: «Ма тӕрс, Мӕ хъӕбул, хатыр дын сты дӕ тӕригъӕдтӕ». 3 Уӕд динамонджытӕй чидӕртӕ хинымӕр загътой: «Уый Хуыцауы фауы». 4 Йесо сын зыдта сӕ хъуыдытӕ, ӕмӕ загъта: «Ахӕм ӕвзӕр хъуыдытӕ уӕм цӕмӕн сӕвзӕрд? 5 Цы ӕнцондӕр у – зӕгъын: „Хатыр дын сты дӕ тӕригъӕдтӕ", ӕви: „Рабад ӕмӕ райдай цӕуын"? 6 Фӕлӕ сымах хъуамӕ зонат, Адӕймаджы Фыртӕн кӕй ис зӕххыл тӕригъӕдтӕ хатыр кӕныны бар». Ӕмӕ загъта уӕнгмардӕн: «Рабад, сис дӕ хуыссӕн ӕмӕ цу дӕ хӕдзармӕ». 7 Уӕнгмард рабадт ӕмӕ ацыд йӕ хӕдзармӕ. 8 Адӕм уый куы федтой, уӕд сӕ тас бацыд, ӕмӕ скад кодтой ахӕм хъару адӕмӕн раттӕг Хуыцауӕн. 9 Йесо уырдыгӕй куы фӕцӕйцыди, уӕд хъалонисӕн бынаты бадгӕ федта иу лӕджы, йӕ ном – Матфей, ӕмӕ йын загъта: «Рацу Мӕ фӕдыл». Уый сыстад ӕмӕ ацыд Йӕ фӕдыл. 10 Йесо Матфейы хӕдзары фынгыл куы бадти, уӕд ӕрцыди бирӕ хъалонисджытӕ ӕмӕ тӕригъӕдджынтӕ, ӕмӕ ӕрбадтысты Йесоимӕ ӕмӕ Йӕ ахуыргӕнинӕгтимӕ. 11 Фарисейтӕ уый куы федтой, уӕд Ын Йӕ ахуыргӕнинӕгтӕн дзырдтой: «Уӕ Ахуыргӕнӕг хъалонисджытӕ ӕмӕ тӕригъӕдджынтимӕ цӕмӕн хӕры [ӕмӕ нуазы]?» 12 Йесо уый куы фехъуыста, уӕд сын загъта: «Дохтыр ӕнӕнизты нӕ, фӕлӕ рынчынты хъӕуы. 13 Ацӕут ӕмӕ базонут, ацы ныхӕстӕ цы амонынц, уый: „Нывонд Мӕ нӕ хъӕуы, фӕлӕ уарзӕгой зӕрдӕ". Ӕз ӕрцыдтӕн рӕстыты нӕ, фӕлӕ тӕригъӕдджынты ӕрхонынмӕ». 14 Уӕд Ӕм ӕрцыдысты Иоанны ахуыргӕнинӕгтӕ ӕмӕ Йын загътой: «Мах ӕмӕ фарисейтӕ бирӕ ком куы дарӕм, уӕд Дӕ ахуыргӕнинӕгтӕ цӕуылнӕ дарынц ком?» 15 Йесо сын загъта: «Чындзхӕсджытимӕ сиахсаг цалынмӕ вӕййы, уӕдмӕ ӕнкъард фӕкӕнынц, мыййаг? Фӕлӕ ралӕудзӕни, сиахсаджы сын куы байсой, уыцы афон, ӕмӕ уӕд дардзысты ком. 16 Ног хъуымацӕй зӕронд дарӕсыл ничи ӕвӕры ӕмпъузӕн, уымӕн ӕмӕ ӕмпъузӕн ратондзӕн дарӕсӕй, ӕмӕ скъуыд фестырдӕр уыдзӕн. 17 Ногдыгъд сӕн дӕр зӕронд лалымты нӕ ныккӕнынц, науӕд лалымтӕ аскъуыйынц, ӕмӕ сӕн дӕр акӕлы, лалымтӕ дӕр фесӕфынц. Ногдыгъд сӕн ныккӕнынц ног лалымты, ӕмӕ уӕд дыууӕ дӕр баззайынц ӕнӕхъӕнӕй». 18 Йесо сын уыцы ныхӕстӕ куы кодта, уӕд Ӕм ӕрбацыди хицӕуттӕй иу, ӕрзоныгыл Йӕ разы ӕмӕ Йын загъта: «Ныртӕккӕ амарди мӕ чызг, фӕлӕ ӕрцу, Дӕ къух ыл ӕрӕвӕр, ӕмӕ райгас уыдзӕн». 19 Йесо сыстад, ӕмӕ Йӕ ахуыргӕнинӕгтимӕ ацыд йӕ фӕдыл. 20 Иу сылгоймагӕн дыууадӕс азы дӕргъы йӕ туг цӕуынӕй не 'нцад. Уый чъылдымырдыгӕй бацыд Йесомӕ ӕмӕ Йын бандзӕвыд Йӕ пӕлӕзы коцорайыл. 21 Уымӕн ӕмӕ хинымӕр дзырдта: «Ӕрмӕст Йӕ дарӕсыл Ын куы бандзӕвон, уӕд дӕр сдзӕбӕх уыдзынӕн». 22 Йесо акаст фӕстӕмӕ, федта йӕ ӕмӕ загъта: «Ма тӕрс, Мӕ чызг, дӕ уырнындзинад дӕ фервӕзын кодта». Ӕмӕ сылгоймаг уайтӕккӕ сӕнӕниз. 23 Йесо уыцы хицауы хӕдзармӕ куы ӕрцыд, уадындзӕй цӕгъдджыты ӕмӕ адӕмы тыхстӕй куы федта, 24 Уӕд загъта: «Ацӕут ардыгӕй; чызг мард нӕу, фынӕй у». Ӕмӕ Йыл худтысты. 25 Адӕмы ӕддӕмӕ куы рарвыстӕуыд, уӕд Йесо бацыд, ныххӕцыди чызджы къухыл, ӕмӕ чызг рабадт. 26 Хабар айхъуыст ӕппӕт уыцы бӕстӕйыл. 27 Йесо уырдыгӕй куы араст, уӕд дыууӕ куырмы цыдысты Йӕ фӕдыл ӕмӕ хъӕр кодтой: «Батӕригъӕд нын кӕн, Давиды Фырт!» 28 Хӕдзармӕ куы бацыд, уӕд Ӕм ӕрбацыдысты куырмытӕ. Йесо сӕ бафарста: «Мӕ бон афтӕ саразын кӕй у, уый уӕ уырны?» Уыдон Ын загътой: «О, Хицау!» 29 Уӕд сын бавнӕлдта сӕ цӕстытӕм ӕмӕ загъта: «Уӕдӕ уын уӕ уырнындзинадмӕ гӕсгӕ рардӕуӕд». 30 Ӕмӕ ракастысты сӕ цӕстытӕй. Йесо сын карзӕй бафӕдзӕхста: «Хъусут, уый тыххӕй мачи хъуамӕ базона». 31 Уыдон та ацыдысты, ӕмӕ Йын ӕппӕт уыцы бӕстӕйыл айхъуысын кодтой Йӕ кой. 32 Уыдон куы рацӕйцыдысты, уӕд Йесомӕ ӕрбакодтой ӕгомыг хӕйрӕджджыны. 33 Ӕмӕ Йесо дӕлимоны куы фӕсырдта, уӕд ӕгомыг дзурын райдыдта. Адӕм дисы бафтыдысты ӕмӕ дзырдтой: «Ахӕм хъуыддаг Израилы никуы ӕрцыди». 34 Фарисейтӕ та дзырдтой: «Уый дӕлимонты суры дӕлимонты ӕлдары хъаруйӕ». 35 Йесо зылди ӕппӕт сахартӕ ӕмӕ хъӕутыл, адӕмӕн амыдта синагогӕты, хаста фарны уац Уӕларвон Паддзахады тыххӕй, дзӕбӕх кодта ӕппӕт рынчынты ӕмӕ ӕнӕфӕразонты. 36 Адӕмы куы федта, уӕд сын фӕтӕригъӕд кодта, ӕнӕфыййау фыстау фӕлмӕцыд ӕмӕ ӕвӕгӕсӕг кӕй уыдысты, уый тыххӕй. 37 Уӕд Йӕ ахуыргӕнинӕгтӕн загъта: «Кӕрдинаг – бирӕ, фӕлӕ хуымгӕрдджытӕ нӕ фаг кӕны. 38 Уӕдӕ курут хуымы Хицауӕй, цӕмӕй рарвита хуымгӕрдджытӕ Йӕ хуым кӕрдынмӕ».

Матфей 10

1 Йесо басидт Йӕ дыууадӕс ахуыргӕнинагмӕ ӕмӕ сын радта тых, цӕмӕй сӕ бар цӕуа ӕнӕзӕгъинӕгтыл ӕмӕ сӕ сурой, дзӕбӕх кӕной ӕппӕт рынчынты ӕмӕ ӕнӕфӕразонты. 2 Мӕнӕ уыцы дыууадӕс апостолы нӕмттӕ: уыдонӕй фыццаг – фӕсномыгӕй Петр кӕй хуыдтой, уыцы Симон, ӕмӕ йе 'фсымӕр Андрей, Зеведейы фырт Иаков ӕмӕ йе 'фсымӕр Иоанн, 3 Филипп ӕмӕ Варфоломей, Фома ӕмӕ хъалонисӕг Матфей, Алфейы фырт Иаков ӕмӕ [фӕсномыгӕй Леввей кӕй хуыдтой, уыцы] Фаддей, 4 Симон Кананит ӕмӕ Йесойыл гадзрахатӕй рацӕуӕг Иудӕ Искариот. 5 Уыцы дыууадӕсы Йесо арвыста ахӕм фӕдзӕхстимӕ: «Ма бацӕут нӕдӕр муртаттӕм, нӕдӕр искӕцы самариаг сахармӕ, 6 Фӕлӕ ацӕут сӕфт фыстӕм – Израилы адӕммӕ. 7 Цӕугӕут ӕмӕ хӕссут, Уӕларвон Паддзахад кӕй ӕрхӕстӕг, уыцы уац. 8 Дзӕбӕх кӕнут рынчынты, ӕгас кӕнут мӕрдты, сыгъдӕг кӕнут хъотырджынты, сурут дӕлимонты. Лӕвар райстат – лӕвар дӕттут. 9 Уемӕ ма райсут нӕдӕр сызгъӕрин, нӕдӕр ӕвзист, нӕдӕр ӕрхуы уӕ рӕтты, 10 Нӕдӕр хордзен, нӕдӕр дыууӕ хӕдоны, нӕдӕр дзабыртӕ, нӕдӕр лӕдзӕг. Уымӕн ӕмӕ фӕллойгӕнӕг у йӕ фӕдарыны аккаг. 11 Кӕцыфӕнды сахар кӕнӕ хъӕумӕ дӕр куы бацӕуат, уӕд-иу дзы ссарут аккаг адӕймаг, ӕмӕ-иу ӕм баззайут, цалынмӕ уырдыгӕй рацӕуат, уӕдмӕ. 12 Хӕдзармӕ куы бацӕуат, уӕд-иу арфӕ ракӕнут. 13 Ӕмӕ хӕдзар аккаг куы уа, уӕд ыл уӕ арфӕ ӕрцӕудзӕни. Кӕд аккаг нӕ уа, уӕд уӕ арфӕ раздӕхдзӕн уӕхимӕ. 14 Исчи уӕ куы не суазӕг кӕна ӕмӕ уын уӕ ныхасмӕ куы нӕ байхъуса, уӕд-иу, уыцы хӕдзарӕй кӕнӕ уыцы сахарӕй рацӕугӕйӕ, ацӕгъдут уӕ къӕхты рыг. 15 Ӕцӕг уын зӕгъын: Содом ӕмӕ Гоморрӕйӕн тӕрхоны бон уыцы сахарӕй ӕнцондӕр уыдзӕни. 16 Мӕнӕ уӕ Ӕз ӕрвитын, фысты бирӕгъты ӕхсӕнмӕ ӕрвитӕгау. Уӕдӕ кӕлмытау ут зондджын ӕмӕ бӕлӕттау ӕнӕхин. 17 Уӕхи хизут адӕмӕй: уыдон уӕ дӕтдзысты тӕрхондӕттӕм ӕмӕ уӕ нӕмдзысты ехсӕй сӕ синагогӕты; 18 Мӕн тыххӕй уӕ кӕндзысты хицӕуттӕм ӕмӕ паддзӕхтӕм, цӕмӕй Мын уыдоны ӕмӕ муртатты раз уат ӕвдисӕнтӕ. 19 Куы уӕ ӕрцахсой, уӕд-иу ма мӕт кӕнут, куыд кӕнӕ цы зӕгъын хъӕуы, ууыл: цы зӕгъын уӕ хъӕуа, уый уын рардӕуыдзӕн уайсахат. 20 Уымӕн ӕмӕ сымах нӕ дзурдзыстут, фӕлӕ уӕ дзыхӕй дзурдзӕн уӕ Фыды Уд. 21 Ратдзӕн ӕфсымӕр ӕфсымӕры ӕмӕ фыд хъӕбулы мӕлӕтмӕ; сыстдзысты зӕнӕг сӕ ныййарджыты ныхмӕ ӕмӕ сӕ амарын кӕндзысты. 22 Мӕ номы тыххӕй алкӕмӕн дӕр уыдзыстут ӕнӕуынон; фӕлӕ кӕронмӕ чи бафӕраза, уый фервӕздзӕн. 23 Иу сахары уӕ куы ӕфхӕрой, уӕд лидзут иннӕмӕ. Ӕцӕг уын зӕгъын: Израилы сахартыл зылд нӕма фӕуыдзыстут, афтӕ ӕрцӕудзӕн Адӕймаджы Фырт. 24 Ахуыргӕнинаг йӕ ахуыргӕнӕгӕй уӕлдӕр нӕу, ӕмӕ цагъар йӕ хицауӕй уӕлдӕр нӕу. 25 Ахуыргӕнинаг йӕ ахуыргӕнӕджы хуызӕн куы суа, уӕд ын ӕгъгъӕд у. Цагъар дӕр йӕ хицауы хуызӕн куы суа, уӕд уымӕн дӕр ӕгъгъӕд у. Кӕд хӕдзары хицауы веелзевул схуыдтой, уӕд ын йӕ хӕдзаронты ноджы цыфыддӕртӕ не схондзысты, ӕви? 26 Уӕдӕ ма тӕрсут уе 'фхӕрджытӕй. Уымӕн ӕмӕ цы нӕ раргом уа, ахӕм сусӕггаг нӕй, ӕмӕ цы нӕ рахъӕр уа, ахӕм сусӕгдзинад нӕ вӕййы. 27 Талынджы уын цы дзурын, уый зӕгъут боны рухсмӕ; ӕмӕ уын уӕ хъусы цы бацагъдӕуа, уый дзурут уӕлхӕдзӕрттӕй. 28 Ӕмӕ ма тӕрсут, буар чи мары, уды амарын та кӕй бон нӕу, уыдонӕй. Фӕлӕ тӕрсут, уд дӕр ӕмӕ буар дӕр зындоны фесафын Кӕй бон у, Уымӕй. 29 Дыууӕ сырддонцъиуы ассарийыл нӕ уӕй кӕнынц, ӕви? Ӕмӕ дзы уӕ Фыды ӕвастӕй иу дӕр не 'рхаудзӕни зӕхмӕ. 30 Сымахӕн та уӕ сӕрыхъуынтӕ дӕр ӕрдуйы онг нымад сты. 31 Уӕдӕ ма тӕрсут: сымах бирӕ сырддонцъиутӕй дӕр зынаргъдӕр стут. 32 Мӕныл кӕй ӕууӕнды, уый тыххӕй адӕмӕн ӕргомӕй чи зӕгъа, уый Ӕз дӕр мӕхионыл банымайдзынӕн Мӕ Уӕларвон Фыды раз. 33 Адӕмы раз Мыл йӕхи чи атигъ кӕна, ууыл та Ӕз дӕр Мӕхи атигъ кӕндзынӕн Мӕ Уӕларвон Фыды раз. 34 Уый ӕнхъӕл ма ут, ӕмӕ зӕхмӕ фидыд ӕрхӕссынмӕ ӕрцыдтӕн. Ӕз ӕрцыдтӕн фидыд нӕ, фӕлӕ цирхъ ӕрхӕссынмӕ. 35 Уымӕн ӕмӕ Ӕз ӕрцыдтӕн фырты йӕ фыдӕй, чызджы йӕ мадӕй, чындзы йе 'фсинӕй фӕхицӕн кӕнынмӕ; 36 Ӕмӕ адӕймагӕн йӕ хӕдзаронтӕ суыдзысты йе знӕгтӕ. 37 Йӕ фыды кӕнӕ йӕ мады Мӕнӕй фылдӕр чи уарзы, уый Мӕн аккаг нӕу. Йӕ фырты кӕнӕ йӕ чызджы Мӕнӕй фылдӕр чи уарзы, уый дӕр Мӕн аккаг нӕу. 38 Йӕ дзуар чи нӕ райса ӕмӕ Мӕ фӕдыл чи нӕ рацӕуа, уый Мӕн аккаг нӕу. 39 Йӕ цард чи бахъахъхъӕна, уый йӕ фесафдзӕн; йӕ цард Мӕ сӕраппонд чи фесафа, уый та йӕ ссардзӕн. 40 Сымахыл зӕрдиаг чи у, уый Мӕныл у зӕрдиаг; Мӕныл зӕрдиаг чи у, уый та Мӕ Рарвитӕгыл у зӕрдиаг. 41 Пехуымпар пехуымпар кӕй у, уый сӕраппонд ыл зӕрдиаг чи у, уый хорзӕхджынгонд уыдзӕн пехуымпарау. Рӕстгӕнӕг рӕстгӕнӕг кӕй у, уый сӕраппонд ыл зӕрдиаг чи у, уый дӕр хорзӕхджынгонд уыдзӕн рӕстгӕнӕгау. 42 Мӕ ахуыргӕнинаг кӕй у, уый сӕраппонд ацы кӕстӕртӕй иуӕн ӕрмӕст уазал доны къус чи ратта, уый, ӕцӕг уын зӕгъын, ӕнӕ хӕрзиуӕгӕй нӕ баззайдзӕн».

Матфей 11

1 Йесо Йӕ дыууадӕс ахуыргӕнинагӕн уыдӕттӕ куы бафӕдзӕхста, уӕд уырдыгӕй ацыди бӕстӕйы сахартӕм амонынмӕ ӕмӕ фарны уац хъусын кӕнынмӕ. 2 Иоанн ахӕстоны куы фехъуыста Чырыстийы хъуыддӕгты тыххӕй, уӕд Ӕм йӕ ахуыргӕнинӕгты рарвыста бафӕрсынмӕ: 3 «Ӕрцӕуинаг Чи у, Уый Ды дӕ, ӕви ӕндӕрмӕ ӕнхъӕлмӕ кӕсӕм?» 4 Йесо сын дзуапп радта: «Цӕут ӕмӕ зӕгъут Иоаннӕн, цы хъусут ӕмӕ цы уынут, уый: 5 Куырмытӕ райдыдтой уынын, къуылыхтӕ – цӕуын, хъотырджынтӕ дзӕбӕх кӕнынц, къуырматӕ райдыдтой хъусын, мӕрдтӕ ӕгас кӕнынц, мӕгуыртӕ хъусынц фарны уац. 6 Ӕмӕ тӕхудиаг у, Мӕныл чи нӕ фӕкӕла, уый». 7 Уыдон куы ацыдысты, уӕд Йесо адӕмӕн райдыдта Иоанны тыххӕй дзурын: «Цы уынынмӕ цыдыстут ӕдзӕрӕг бӕстӕмӕ? Дымгӕ кӕй ӕнкъусы, уыцы хъӕз уынынмӕ? 8 Уӕддӕр цы уынынмӕ цыдыстут? Зынаргъ дарӕс кӕуыл ис, ахӕм лӕджы уынынмӕ? Зынаргъ дарӕс чи дары, уыдон паддзӕхты галуанты цӕрынц. 9 Фӕлӕ уӕддӕр цы уынынмӕ цыдыстут? Пехуымпары? О, зӕгъын уын, пехуымпарӕй дӕр уӕлдӕры. 10 Иоанн у, Сыгъдӕг Фыст афтӕ кӕй тыххӕй зӕгъы: „Мӕнӕ Ӕз Мӕ фидиуӕджы ӕрвитын Дӕ разӕй, ӕмӕ Дын уый ӕрцӕттӕ кӕндзӕни Дӕ развӕндаг". 11 Ӕцӕг уын зӕгъын: сылгоймагӕй чи райгуырд, уыдонӕй ничи уыд Аргъауӕг Иоаннӕй уӕлдӕр, фӕлӕ Уӕларвон Паддзахады тӕккӕ къаддӕр Иоаннӕй уӕлдӕр у. 12 Аргъауӕг Иоанны заманӕй фӕстӕмӕ Уӕларвон Паддзахад райсыныл архайын хъӕуы, ӕмӕ чи архайы, уыдон Ӕй райсынц 13 Уымӕн ӕмӕ пехуымпартӕ сеппӕт дӕр ӕмӕ Моисей дӕр Иоанны заманы онг пехуымпариуӕг кодтой. 14 Ӕмӕ уӕ кӕд баууӕндын фӕнды, уӕд ӕрцӕуинаг чи уыд, Иоанн уыцы Илиа у. 15 Хъустӕ кӕуыл ис, уый хъусӕд! 16 Фӕлӕ кӕуыл абарон ацы фӕлтӕр? Сывӕллӕтты хуызӕн у, сахары фӕзы чи бады ӕмӕ се 'мбӕлттӕн афтӕ чи зӕгъы: 17 „Мах уын уадындзӕй цагътам, ӕмӕ сымах нӕ кафыдыстут; мах уын хъарджытӕ кодтам, ӕмӕ сымах нӕ дзынӕзтат". 18 Уымӕн ӕмӕ ӕрцыд Иоанн, нӕдӕр хӕргӕ кӕны, нӕдӕр нуазгӕ, ӕмӕ дзы зӕгъынц: „Хӕйрӕдж-джын у". 19 Ӕрцыд Адӕймаджы Фырт, хӕры ӕмӕ нуазы, ӕмӕ Дзы зӕгъынц: „Мӕнӕ гуыбындзӕл ӕмӕ расыггӕнаг, хъалонисджыты ӕмӕ тӕригъӕдджынты лымӕн". Фӕлӕ Хуыцауы уӕлзонд цы хъуыддӕгтӕ аразы, йӕ растгӕнӕг уыдон сты». 20 Уӕд Йесо уайдзӕф кӕнын райдыдта, фылдӕр диссӕгтӕ кӕм равдыста, фӕлӕ фӕсмон чи нӕ фӕкодта, уыцы сахартӕн: 21 «Сар дӕ сӕр, Хоразин! Сар дӕ сӕр, Вифсаидӕ! Уымӕн ӕмӕ сымахмӕ кӕй равдыстӕуыд, уыцы диссӕгтӕ Тир ӕмӕ Сидоны куы равдыстӕуыдаид, уӕд уыцы сахартӕ, хъисын скӕнгӕйӕ ӕмӕ сӕ сӕртыл фӕнык байзӕрдгӕйӕ, раджы ӕрфӕсмон кодтаиккой. 22 Фӕлӕ уын зӕгъын: Тир ӕмӕ Сидонӕн тӕрхоны бон сымахӕй ӕнцондӕр уыдзӕн. 23 Ӕмӕ дӕу, Капернаум, уӕларвмӕ систӕуыдзӕни? Нӕ, дӕлдзӕхмӕ ныххаудзынӕ. Уымӕн ӕмӕ дӕуӕн кӕй равдыстӕуыд, уыцы диссӕгтӕ Содомы куы равдыстӕуыдаид, уӕд ма цӕрид абон дӕр. 24 Фӕлӕ уын зӕгъын: Содомы зӕххӕн тӕрхоны бон дӕуӕй ӕнцондӕр уыдзӕн». 25 Уӕд Йесо загъта: «Стауын Дӕ, Мӕ Фыд, арв ӕмӕ зӕххы Хицау, Ды адӕттӕ зондджынтӕ ӕмӕ ӕмбаргӕтӕй кӕй басусӕг кодтай ӕмӕ сӕ сывӕллӕттӕн кӕй раргом кодтай, уый тыххӕй. 26 О, Мӕ Фыд, Дӕу афтӕ бафӕндыд. 27 Мӕ Фыдӕй Мын лӕвӕрд у ӕппӕт дӕр. Фыды йеддӕмӕ Фырты ничи зоны, ӕмӕ Фыды дӕр ничи зоны – зоны Йӕ ӕрмӕстдӕр Фырт ӕмӕ, Уый Йӕ Фыды раргом кӕнын кӕмӕн фӕнды, уыдон. 28 Ӕрцӕут Мӕм, ӕппӕт фӕлмӕцыдтӕ ӕмӕ уаргъджынтӕ, ӕмӕ уын Ӕз ратдзынӕн ӕнцой. 29 Сӕвӕрут Ме 'фсондз уӕхиуыл ӕмӕ сахуыр ут Мӕнӕй – Ӕз сабыр ӕмӕ ӕвӕлмас дӕн, ӕмӕ ссардзыстут удӕнцой. 30 Уымӕн ӕмӕ ӕнцонхӕссӕн у Ме 'фсондз, ӕмӕ рог у Мӕ уаргъ».

Матфей 12

1 Уыцы рӕстӕг Йесо сабаты фӕцӕйцыд ӕфсирджын хуымты. Йӕ ахуыргӕнинӕгтӕ сыстонг сты, райдыдтой ӕфсиртӕ тонын ӕмӕ хӕрын. 2 Фарисейтӕ уый куы федтой, уӕд Йесойӕн загътой: «Кӕс-ма, Дӕ ахуыргӕнинӕгтӕ кӕнынц, сабаты цы нӕ фӕччы, уый». 3 Йесо сын дзуапп радта: «Давид йе 'мбӕлттимӕ куы сыстонг, уӕд цы бакодта, уый тыххӕй нӕ кастыстут, ӕви? 4 Бацыди Хуыцауы хӕдзармӕ ӕмӕ бахордта, йӕхицӕн дӕр ӕмӕ йе 'мбӕлттӕн дӕр бахӕрын кӕй не 'мбӕлд, уыцы нывонд дзултӕ – ӕрмӕстдӕр сауджынтӕм уыди уыдон хӕрыны бар. 5 Кӕнӕ Моисейы Ӕгъдауы, мыййаг, нӕ бакастыстут, алы сабат дӕр сауджынтӕ сабаты фӕтк Кувӕндоны куыд халынц, фӕлӕ аххосджын кӕй не сты, уый тыххӕй? 6 Фӕлӕ уын зӕгъын, ам ис, Кувӕндонӕй уӕлдӕр Чи у, Уый. 7 „Нывонд Мӕ нӕ хъӕуы, фӕлӕ уарзӕгой зӕрдӕ" – уымӕн йӕ мидис куы зониккат, уӕд ӕназымты нӕ фӕзылын кодтаиккат. 8 Уымӕн ӕмӕ Адӕймаджы Фырт сабатӕн йӕ хицау у». 9 Йесо уырдыгӕй куы рацыд, уӕд баздӕхти синагогӕмӕ. 10 Уыди дзы, йӕ къух хуыскъ кӕмӕн уыд, ахӕм адӕймаг. Ӕмӕ цӕмӕй Йесойы фӕзылын кӕной, уый тыххӕй Йӕ бафарстой: «Сабаты дзӕбӕх кӕнын ӕмбӕлы ӕви нӕ?» 11 Уый сын загъта: «Искӕмӕ уӕ иу фыс куы уа, ӕмӕ йын сабаты уӕрмы куы ныххауа, уӕд ӕй уырдыгӕй не сласдзӕн, ӕви? 12 Адӕймаг та цас зынаргъдӕр у фысӕй! Уӕдӕ сабаты хорз кӕнын ӕмбӕлы». 13 Ӕмӕ уыцы лӕгӕн загъта: «Радар дӕ къух». Уый радардта йӕ къух, ӕмӕ йын сдзӕбӕх, сси иннӕ къухы хуызӕн. 14 Фарисейтӕ рацыдысты ӕмӕ уынаффӕ кодтой, Йесойы цы амалӕй амарой, ууыл. Фӕлӕ сын Йесо сӕ фӕнд базыдта, ӕмӕ ацыди уырдыгӕй. 15 Йӕ фӕдыл цыди бирӕ адӕм, ӕмӕ Уый сдзӕбӕх кодта ӕппӕт рынчынты дӕр, 16 Фӕлӕ сын карзӕй бафӕдзӕхста, цӕмӕй Йын Йӕ кой ма кӕной. 17 Афтӕмӕй хъуамӕ сӕххӕст уыдаид, Исай-пехуымпары дзыхӕй цы загъдӕуыд, уый: 18 «Мӕнӕ Мӕ уарзон Лӕггадгӕнӕг – Кӕй сӕвзӕрстон ӕмӕ Кӕуыл аудын, Уый. Бахай Йын кӕндзынӕн Мӕ Удӕй, ӕмӕ адӕмтӕн фехъусын кӕндзӕн Мӕ рӕстдзинад. 19 Быцӕу ӕмӕ хъӕр нӕ кӕндзӕн, Йӕ хъӕлӕс ын ничи фехъусдзӕн уынгты. 20 Цъӕл хъӕз нӕ асӕтдзӕн, гӕзӕмӕ судзгӕ цырагъ нӕ ахуыссын кӕндзӕн, цалынмӕ рӕстдзинад уӕлахизмӕ ӕркӕна, уӕдмӕ. 21 Ӕмӕ ӕппӕт адӕмтӕ Йӕ номӕй уыдзысты ныфсджын». 22 Уӕд Йесомӕ ӕркодтой куырм ӕмӕ ӕгомыг хӕйрӕджджыны. Йесо йӕ сдзӕбӕх кодта, ӕмӕ ӕгомыг райдыдта дзурын ӕмӕ уынын. 23 Адӕм иууылдӕр дисы бафтыдысты ӕмӕ дзырдтой: «Уый Давиды Фырт нӕу?» 24 Фарисейтӕ уый куы фехъуыстой, уӕд загътой: «Уый дӕлимонты ӕрмӕстдӕр дӕлимонты ӕлдар веелзевулы хъаруйӕ суры». 25 Фӕлӕ сын Йесо зыдта сӕ хъуыдытӕ, ӕмӕ сын загъта: «Алы паддзахад дӕр куы ныддихтӕ уа ӕмӕ йӕ адӕм кӕрӕдзи ныхмӕ куы фӕуой, уӕд федзӕрӕг уыдзӕн; ӕмӕ алы сахар кӕнӕ хӕдзар дӕр куы ныддихтӕ уа ӕмӕ йӕ цӕрджытӕ кӕрӕдзи ныхмӕ куы фӕуой, уӕд уый дӕр нӕ фӕлӕудзӕн. 26 Уӕдӕ кӕд хӕйрӕг хӕйрӕджы суры, уӕд йӕхи ныхмӕ тох кӕны. Ӕмӕ афтӕмӕй куыд фӕлӕудзӕн йӕ паддзахад? 27 Кӕд Ӕз дӕлимонты веелзевулы хъаруйӕ сурын, уӕд сӕ уӕ фӕдонтӕ та кӕй хъаруйӕ сурынц? Уымӕ гӕсгӕ уын уыдон уыдзысты тӕрхонгӕнджытӕ. 28 Фӕлӕ кӕд Ӕз Хуыцауы Уды хъаруйӕ сурын дӕлимонты, уӕд уӕм, бӕгуыдӕр, ӕрхӕццӕ Хуыцауы Паддзахад. 29 Кӕнӕ искӕмӕн йӕ бон куыд бауыдзӕн тыхджыны хӕдзармӕ бацӕуын ӕмӕ йын йӕ дзауматӕ рахӕссын, раздӕр уал тыхджыны куы нӕ сбӕтта, уӕд? Ӕрмӕст ын уӕд фӕкъахдзӕн йӕ хӕдзар. 30 Мемӕ чи нӕу, уый Мӕ ныхмӕ у; ӕмӕ Мемӕ чи не 'мбырд кӕны, уый хӕлӕттаг кӕны. 31 Уымӕ гӕсгӕ уын зӕгъын: алы тӕригъӕд ӕмӕ фауын адӕмӕн уыдзысты хатыргонд, фӕлӕ Сыгъдӕг Уды фауын хатыргонд нӕ уыдзӕн. 32 Исчи Адӕймаджы Фырты куы рафауа, уӕд ын уыдзӕни хатыр; фӕлӕ Сыгъдӕг Уды чи рафауа, уымӕн хатыр нӕ уыдзӕни нӕдӕр ацы дунейы, нӕдӕр фидӕны дунейы. 33 Бӕласӕн йӕхи дӕр ӕмӕ йӕ дыргъ дӕр кӕнӕ хорзыл банымайут, кӕнӕ та йын йӕхи дӕр ӕмӕ йӕ дыргъ дӕр ӕвзӕрыл банымайут. Уымӕн ӕмӕ бӕлас йӕ дыргъӕй бӕрӕг вӕййы. 34 Калмы цот! Фыдзӕрдӕтӕ куы стут, уӕд уӕ бон куыд у хорз дзурын? Уымӕн ӕмӕ зӕрдӕ цӕмӕй дзаг вӕййы, дзыхӕй дӕр уый рацӕуы. 35 Хорз адӕймаг хорз хӕзнадонӕй рахӕссы хорзӕх; фыдзӕрдӕ адӕймаг та фыдӕхы къӕбицӕй рахӕссы фыдӕх. 36 Зӕгъын уын: алы ӕнӕууылд ныхасы тыххӕй дӕр адӕм тӕрхоны бон ратдзысты дзуапп. 37 Дӕ ныхӕстӕ дӕ сраст кӕндзысты, йе та дӕ ныхӕсты тыххӕй тӕрхонгонд уыдзынӕ». 38 Уӕд динамонджытӕй ӕмӕ фарисейтӕй иуӕй-иутӕ загътой Йесойӕн: «Ахуыргӕнӕг, исты ӕвдисӕйнаг нын куы равдисис, уый нӕ фӕнды». 39 Йесо сын дзуапп радта: «Хуыцауы ныууадзӕг хӕлд фӕлтӕр ӕвдисӕйнаг домы, фӕлӕ йын Ионӕ-пехуымпары диссагӕй дарддӕр ӕндӕр ӕвдисӕйнаг нӕ рардӕуыдзӕн. 40 Уымӕн ӕмӕ Ионӕ стыр кӕсаджы гуыбыны ӕртӕ боны ӕмӕ ӕртӕ ӕхсӕвы куыд фӕци, афтӕ Адӕймаджы Фырт дӕр ӕртӕ боны ӕмӕ ӕртӕ ӕхсӕвы уыдзӕни зӕххы зӕрдӕйы. 41 Ниневиӕгтӕ тӕрхоны бон рацӕудзысты ацы фӕлтӕры ныхмӕ ӕмӕ йӕ фӕзылын кӕндзысты, уымӕн ӕмӕ уыдон Ионӕйы ныхасӕй ӕрфӕсмон кодтой; ныр та ам ис, Ионӕйӕ уӕлдӕр Чи у, Уый. 42 Хуссары ус-паддзах тӕрхоны бон рацӕудзӕн ацы фӕлтӕры ныхмӕ ӕмӕ йӕ фӕзылын кӕндзӕн, уымӕн ӕмӕ зӕххы кӕронӕй ӕрцыди Соломоны зондджын ныхӕстӕм байхъусынмӕ; ныр та ам ис, Соломонӕй уӕлдӕр Чи у, Уый. 43 Ӕнӕзӕгъинаг адӕймагӕй куы рацӕуы, уӕд ӕнцой агурӕг фӕзилы ӕнӕдон рӕтты, фӕлӕ йӕ не ссары. 44 Уӕд фӕзӕгъы: „Раздӕхон, цы хӕдзарӕй рацыдтӕн, уырдӕм". Ӕмӕ куы ӕрцӕуы, уӕд ӕй ӕрӕййафы афтидӕй, марзт ӕмӕ ӕфснайдӕй. 45 Уӕд ацӕуы ӕмӕ йемӕ ӕркӕны ӕндӕр авд ӕнӕзӕгъинаджы, йӕхицӕй фыддӕрты, бацӕуынц уырдӕм ӕмӕ дзы ӕрцӕрынц; ӕмӕ уыцы адӕймаг бахауы, раздӕр цы уыди, уымӕй ноджы ӕвзӕрдӕр уавӕры. Афтӕ уыдзӕн ацы фыдзӕрдӕ фӕлтӕры хабар дӕр». 46 Йесо ма адӕмимӕ куы ныхас кодта, уӕд Йӕ Мад ӕмӕ Йе 'фсымӕртӕ лӕууыдысты ӕдде, ӕмӕ сӕ фӕндыди Йемӕ аныхас кӕнын. 47 Ӕмӕ Йын чидӕр загъта: «Дӕ Мад ӕмӕ Де 'фсымӕртӕ лӕууынц ӕдде, Демӕ аныхас кӕнын сӕ фӕнды». 48 Уый зӕгъӕгӕн Йесо дзуапп радта: «Чи у Мӕ мад, ӕмӕ чи сты Ме 'фсымӕртӕ?» 49 Ӕмӕ, Йӕ къухӕй Йӕ ахуыргӕнинӕгтӕм бацамонгӕйӕ, загъта: «Мӕнӕ Мӕ мад ӕмӕ Ме 'фсымӕртӕ. 50 Уымӕн ӕмӕ Мӕ Уӕларвон Фыды фӕндон чи ӕххӕст кӕны, уый у Ме 'фсымӕр, Мӕ хо ӕмӕ Мӕ мад».

Матфей 13

1 Уыцы бон Йесо рацыди хӕдзарӕй ӕмӕ ӕрбадти денджызы был. 2 Уыйас бирӕ адӕм ӕрӕмбырд, ӕмӕ Уый бахызти бӕлӕгъмӕ ӕмӕ дзы ӕрбадт; адӕм та иууылдӕр лӕууыдысты былгӕрон. 3 Бирӕ сын амыдта фӕсномыг ныхӕстӕй: «Мӕнӕ тауӕг рацыди тауынмӕ. 4 Таугӕ-тауын иуӕй-иу нӕмгуытӕ ӕрхаудысты фӕндаггӕрон, ӕртахтысты мӕргътӕ ӕмӕ сӕ рауыгътой. 5 Иуӕй-иутӕ дзы ӕрхаудысты, сыджыт бирӕ кӕм нӕ уыд, ахӕм дурджын ран, ӕмӕ уайтагъд сӕвзӕрдысты, уымӕн ӕмӕ зӕхх арф нӕ уыд. 6 Ӕмӕ хур куы скаст, уӕд сӕ басыгъта ӕмӕ бахус сты, уымӕн ӕмӕ сын уидаг нӕ уыд. 7 Иуӕй-иутӕ дзы ӕрхаудысты сындзыты ӕхсӕн, сындзытӕ сзадысты ӕмӕ сӕ ныххурх кодтой. 8 Иуӕй-иутӕ та дзы ӕрхаудысты бӕзнаг мӕрыл ӕмӕ радтой: иу – фондзыссӕдз хатты, иннӕ – ӕртиссӕдз хатты, аннӕ – дӕс ӕмӕ ссӕдз хатты фылдӕр тыллӕг. 9 Хъустӕ кӕуыл ис, уый хъусӕд!» 10 Йесомӕ бацыдысты Йӕ ахуыргӕнинӕгтӕ ӕмӕ Йӕ бафарстой: «Цӕй тыххӕй сын амоныс фӕсномыг ныхӕстӕй?» 11 Йесо сын дзуапп радта: «Уый тыххӕй, ӕмӕ Уӕларвон Паддзахады сусӕгдзинӕдтӕ зонын сымахӕн лӕвӕрд у, уыдонӕн та лӕвӕрд нӕу. 12 Кӕмӕ ис, уымӕн рардӕуыдзӕн ӕмӕ йӕм уыдзӕни бирӕ; кӕмӕ нӕй, уымӕй та ист ӕрцӕудзӕн, цы йӕм ис, уый дӕр. 13 Фӕсномыг ныхӕстӕй сын уый тыххӕй дзурын, ӕмӕ уыдон „кӕсынц, фӕлӕ нӕ уынынц, хъусынц, фӕлӕ сӕм нӕ хъуысы, ӕмӕ не 'мбарынц". 14 Уыдоныл ӕрцыд Исайы пехуымпар ныхас: „Хъусӕй хъусдзыстут, фӕлӕ нӕ бамбардзыстут, цӕстӕй кӕсдзыстут, фӕлӕ нӕ фендзыстут. 15 Уымӕн ӕмӕ ацы адӕмӕн сӕ зӕрдӕ ныддур, хъусӕй зынтӕй хъусынц, сӕхгӕдтой сӕ цӕстытӕ, цӕмӕй цӕстӕй ма феной, хъусӕй ма фехъусой, зӕрдӕйӕ ма бамбарой, ма раздӕхой Мӕнмӕ ӕмӕ сӕ Ӕз ма сдзӕбӕх кӕнон". 16 Сымахӕн та тӕхудиаг сты уӕ цӕстытӕ – уынгӕ чи кӕны; ӕмӕ уӕ хъустӕ – хъусгӕ чи кӕны. 17 Ӕцӕг уын зӕгъын: бирӕ пехуымпартӕ ӕмӕ рӕстгӕнджытӕ тӕхуды кодтой, сымах цы уынут, уый фенынмӕ, фӕлӕ йӕ нӕ федтой; сымах цы хъусут, уый фехъусынмӕ, фӕлӕ йӕ нӕ фехъуыстой. 18 Сымах та байхъусут, тауӕджы тыххӕй фӕсномыг ныхас цы амоны, уымӕ. 19 Хуыцауы Паддзахады тыххӕй ныхас чидӕриддӕр фехъусы ӕмӕ йӕ нӕ бамбары, уымӕ ӕрцӕуы хӕйрӕг ӕмӕ аскъӕфы, уымӕн йӕ зӕрдӕйы цы байтыдӕуыд, уый. Уыцы адӕймаг у, фӕндаггӕрон кӕй байтыдӕуыд, ахӕм нӕмыгау. 20 Дурджын ран кӕй байтыдӕуыд, уый ахӕм у: фехъусы ныхас ӕмӕ йӕ уыйадыл цингӕнгӕ айсы йӕ зӕрдӕмӕ, 21 Фӕлӕ ӕнӕуидаг у ӕмӕ бирӕ нӕ бафӕразы. Тыхст рӕстӕг куы ралӕууы, кӕнӕ Хуыцауы ныхасы тыххӕй ӕфхӕрын куы райдайынц, уӕд уайтагъд ныууадзы йӕ уырнындзинад. 22 Сындзыты ӕхсӕн кӕй байтыдӕуыд, уый та ахӕм у: фехъусы ныхас, фӕлӕ зӕххон царды мӕт ӕмӕ мулчы бӕллиц ныххурх кӕнынц уыцы ныхас, ӕмӕ пайда нӕ ратты. 23 Бӕзнаг мӕрыл кӕй байтыдӕуыд, уыдон ахӕмтӕ сты: фехъусынц ныхас ӕмӕ йӕ бамбарынц; ӕмӕ сӕ иу ратты фондзыссӕдз хатты, иннӕ – ӕртиссӕдз хатты, аннӕ та – дӕс ӕмӕ ссӕдз хатты фылдӕр пайда». 24 Йесо ма сын радзырдта ӕндӕр фӕсномыг ныхас дӕр: «Уӕларвон Паддзахад у, йӕ хуымы хорз мыггаг чи байтыдта, уыцы адӕймаджы хуызӕн. 25 Адӕм куы бафынӕй сты, уӕд ӕрцыд йе знаг, мӕнӕуы ӕхсӕн байтыдта мӕгъӕлда ӕмӕ ацыди. 26 Мӕнӕу куы равзӕрд ӕмӕ ӕфсир куы рафтыдта, уӕд фӕзынд мӕгъӕлда дӕр. 27 Хуымы хицаумӕ ӕрцыдысты йӕ цагъартӕ ӕмӕ йын загътой: „Хицау, дӕ хуымы хорз мыггаг куы байтыдтай, уӕд дзы мӕгъӕлда куыд фӕзынди?" 28 Сӕ хицау сын дзуапп радта: „Уый знаг бакодта". Цагъартӕ йӕ бафарстой: „Фӕнды дӕ, уӕд мах ацӕуӕм ӕмӕ сӕ срӕдувӕм?" 29 Фӕлӕ сын уый загъта: „Нӕ хъӕуы, мыййаг, мӕгъӕлдаимӕ мӕнӕу дӕр куы срӕдуват. 30 Сӕ иуы дӕр ӕмӕ сӕ иннӕйы дӕр ныууадзут хуымгӕрдӕнтӕм. Ӕмӕ хуымгӕрдӕнты рӕстӕг ӕз зӕгъдзынӕн хуымгӕрдджытӕн: фыццаг ӕрӕмбырд кӕнут мӕгъӕлда, скӕнут дзы куыристӕ ӕмӕ сӕ басудзут; мӕнӕу та бафснайут мӕ хордоны"». 31 Йесо ма сын радзырдта ӕндӕр фӕсномыг ныхас дӕр: «Уӕларвон Паддзахад у, адӕймаг йӕ хуымы кӕй байтыдта, уыцы хъыцъыйы нӕмыгау. 32 Кӕд уый ӕппӕт мыггӕгтӕн сӕ къаддӕр у, уӕддӕр куы сзайы, уӕд цӕхӕрадоны иннӕ зайӕгойтӕй фӕбӕрзонддӕр вӕййы. Ахӕм бӕлас дзы рауайы, ӕмӕ йӕм ӕртӕхынц уӕларвон мӕргътӕ ӕмӕ йӕ къалиутыл саразынц ахстӕттӕ». 33 Йесо ма сын радзырдта ӕндӕр фӕсномыг ныхас дӕр: «Уӕларвон Паддзахад у, сылгоймаг ссады ӕртӕ сасирыл кӕй бафтыдта ӕмӕ хыссӕ ӕгасӕй дӕр кӕмӕй сӕнхъызт, уыцы ӕнхъизӕнау». 34 Ӕппӕт уыдӕттӕ Йесо адӕмӕн дзырдта фӕсномыг ныхӕстӕй, ӕнӕ фӕсномыг ныхӕстӕй та сын ницы дзырдта. 35 Афтӕмӕй хъуамӕ сӕххӕст уыдаид, пехуымпары дзыхӕй цы загъдӕуыд, уый: «Дзурдзынӕн фӕсномыг ныхӕстӕй; фехъусын кӕндзынӕн, дуне сфӕлдисынӕй нырмӕ сусӕг цы уыди, уый». 36 Йесо ауагъта адӕмы ӕмӕ бахызти хӕдзармӕ. Уӕд Ӕм бацыдысты Йӕ ахуыргӕнинӕгтӕ ӕмӕ Йын загътой: «Бамбарын нын кӕн фӕсномыг ныхас хуымы тыд хӕмпӕлгӕрдӕджы тыххӕй». 37 Йесо сын дзуапп радта: «Хорз мыггаг тауӕг Адӕймаджы Фырт у. 38 Хуым у дуне, хорз мыггаг – Хуыцауы Паддзахады хъӕбултӕ, хӕмпӕлгӕрдӕг та – хӕйрӕджы хъӕбултӕ. 39 Хӕмпӕлгӕрдӕг байтауӕг знаг у хӕйрӕг, хуымгӕрдӕнтӕ сты дунейы кӕрон, хуымгӕрдджытӕ та – зӕдтӕ. 40 Хӕмпӕлгӕрдӕг куыд ӕмбырд кӕнынц ӕмӕ йӕ арты куыд басудзынц, афтӕ уыдзӕн, дунейӕн йӕ кӕрон куы ӕрцӕуа, уӕд дӕр: 41 Адӕймаджы Фырт рарвитдзӕн Йӕ зӕдты, ӕмӕ Йын Йӕ Паддзахадӕй ӕрӕмбырд кӕндзысты, тӕригъӕды ӕфтыд чи уыди ӕмӕ иннӕты дӕр тӕригъӕды чи ӕфтыдта, уыдоны иууылдӕр; 42 Ӕмӕ сӕ баппардзысты судзгӕ пецы. Уым уыдзӕни кӕуын ӕмӕ дӕндӕгты хъыс-хъыс. 43 Уӕд рӕстытӕ хурау сӕрттивдзысты сӕ Фыды Паддзахады. Хъустӕ кӕуыл ис, уый хъусӕд! 44 Уӕларвон Паддзахад у быдыры ныгӕд хӕзнайы хуызӕн. Адӕймаг ӕй ссардта, фӕстӕмӕ йӕ баныгӕдта, цингӕнгӕ ацыд, ӕмӕ йӕм цыдӕриддӕр уыди, уый ауӕй кодта ӕмӕ балхӕдта уыцы быдыр. 45 Уӕларвон Паддзахад ма у хорз налхъуыт агурӕг сӕудӕджеры хуызӕн. 46 Уый иу зынаргъ налхъуыт куы ссардта, уӕд ацыд ӕмӕ йӕм цыдӕриддӕр уыди, уый ауӕй кодта ӕмӕ йӕ балхӕдта. 47 Уӕларвон Паддзахад ма у, денджызмӕ кӕй баппӕрстой ӕмӕ алыхуызон кӕсӕгтӕ чи ӕрцахста, ахӕм хызы хуызӕн дӕр. 48 Хыз куы байдзаг, уӕд ӕй раластой былмӕ, стӕй ӕрбадтысты ӕмӕ кӕсӕгтӕн сӕ дзӕбӕхтӕ нывӕрдтой чыргъӕдты, ӕвзӕрты та аппӕрстой. 49 Афтӕ уыдзӕни, дунейӕн йӕ кӕрон куы ӕрцӕуа, уӕд дӕр: ӕрцӕудзысты зӕдтӕ, тӕригъӕдджынты фӕхицӕн кӕндзысты рӕстытӕй 50 Ӕмӕ сӕ баппардзысты судзгӕ пецы. Уым уыдзӕни кӕуын ӕмӕ дӕндӕгты хъыс-хъыс». 51 Йесо Йӕ ахуыргӕнинӕгты бафарста: «Ӕппӕт уыдӕттӕ бамбӕрстат ӕви нӕ?» Уыдон Ын дзуапп радтой: «О, Хицау». 52 Йесо та сын загъта: «Уӕдӕ Уӕларвон Паддзахады ахуыргӕнинаг чидӕриддӕр сси, уыцы динамонӕг у, йӕ хӕзнадонӕй ног ӕмӕ зӕронд хӕзнатӕ чи райсы, ахӕм хӕдзары хицауы хуызӕн». 53 Йесо уыцы фӕсномыг ныхӕстӕ дзырд куы фӕци, уӕд ацыди уырдыгӕй. 54 Ӕрцыд Йӕ сахармӕ ӕмӕ адӕмӕн амыдта синагогӕйы. Уыдон дисы ӕфтыдысты ӕмӕ дзырдтой: «Кӕцӕй Йӕм ис ахӕм зонд, ахӕм диссӕгтӕ аразын Йӕ бон куыд у? 55 Ай хъӕддӕсныйы фырт нӕу, мыййаг? Йӕ Мад Мариа нӕ хуыйны? Иаков, Иосиф, Симон ӕмӕ Иудӕ Йе 'фсымӕртӕ не сты? 56 Йӕ хотӕ дӕр иууылдӕр не 'хсӕн не сты, ӕви? Гъемӕ Йын уӕдӕ ӕппӕт адӕттӕ кӕцӕй сты?» 57 Ӕмӕ Йыл не 'ууӕндыдысты. Йесо сын загъта: «Пехуымпар йӕ фыдыбӕстӕ ӕмӕ йӕ хӕдзарӕй дарддӕр ӕгад никуы вӕййы». 58 Ӕмӕ уым бирӕ диссӕгтӕ нӕ сарӕзта, уырнындзинад сӕм кӕй нӕ уыд, уый тыххӕй.

Матфей 14

1 Уыцы рӕстӕг ӕлдариуӕггӕнӕг Ирод фехъуыста Йесойы кой, 2 Ӕмӕ йӕ фӕсдзӕуинтӕн загъта: «Уый Аргъауӕг Иоанн у. Мӕрдтӕй райгас ӕмӕ уый тыххӕй аразы диссӕгтӕ». 3 Уымӕй размӕ Ирод йе 'фсымӕр Филиппы ус Иродиадӕйы тыххӕй ӕрцахста Иоанны, сбаста йӕ рӕхыстӕй, ӕмӕ йӕ бакодта ахӕстоны. 4 Уымӕн ӕмӕ йын Иоанн дзырдта: «Нӕ дын ӕмбӕлы уыимӕ цӕрын». 5 Ироды фӕндыд Иоанны амарын, фӕлӕ тарст адӕмӕй, уымӕн ӕмӕ йӕ пехуымпарыл нымадтой. 6 Фӕлӕ Иродӕн йӕ райгуырӕн бон куы уыд, уӕд Иродиадӕйы чызг кафыд уазджыты раз. Уымӕй Ироды зӕрдӕ балхӕдта, 7 Ӕмӕ Ирод расомы кодта, цы ракура, уый йын раттыны тыххӕй. 8 Чызг йӕ мады ардыдӕй загъта: «Гъертӕккӕ мын ардӕм тӕбӕгъы Аргъауӕг Иоанны сӕр ӕрбахӕсс». 9 Паддзах фенкъард, фӕлӕ йӕ сомымӕ гӕсгӕ ӕмӕ йемӕ минасгӕнджыты ӕфсӕрмӕй радта йӕ курдиат ын сӕххӕст кӕныны бардзырд. 10 Арвыста Иоаннмӕ, ӕмӕ йын ахӕстоны акъуырын кодта йӕ сӕр. 11 Иоанны сӕр ӕрбахастой тӕбӕгъы ӕмӕ йӕ радтой чызгмӕ, уый та йӕ ахаста йӕ мадмӕ. 12 Иоанны ахуыргӕнинӕгтӕ ӕрцыдысты, ахастой йын йӕ мард ӕмӕ йӕ баныгӕдтой, стӕй ацыдысты ӕмӕ уый тыххӕй радзырдтой Йесойӕн. 13 Йесо уый куы фехъуыста, уӕд уырдыгӕй бӕлӕгъы иунӕгӕй ацыд хибар ранмӕ. Адӕм уый куы базыдтой, уӕд сахартӕй фистӕгӕй ацыдысты Йӕ фӕдыл. 14 Йесо былмӕ куы рахызт, уӕд федта бирӕ адӕм ӕмӕ сын фӕтӕригъӕд кодта ӕмӕ сдзӕбӕх кодта сӕ рынчынты. 15 Куы баизӕр, уӕд Ӕм ӕрбацыдысты Йӕ ахуыргӕнинӕгтӕ ӕмӕ загътой: «Ам фӕсвӕд ран у, ноджы банафон. Ауадз адӕмы, ацӕуой хъӕутӕм ӕмӕ сӕхицӕн хӕринаг балхӕной». 16 Фӕлӕ сын Йесо загъта: «Цӕуын сӕ нӕ хъӕуы. Сымах сын раттут хӕринаг». 17 Дзуапп Ын радтой: «Ам махмӕ ис ӕрмӕстдӕр фондз дзулы ӕмӕ дыууӕ кӕсаджы». 18 Уый сын загъта: «Ардӕм Мӕм сӕ рахӕссут». 19 Йесо адӕмы ӕрбадын кодта кӕрдӕгыл, стӕй райста фондз дзулы ӕмӕ дыууӕ кӕсаджы, скаст уӕларвмӕ, арфӕ ракодта, асаста дзултӕ ӕмӕ сӕ радта ахуыргӕнинӕгтӕм, уыдон та сӕ байуӕрстой адӕмӕн. 20 Сеппӕт дӕр бахордтой ӕмӕ бафсӕстысты. Ӕмӕ ма цы уӕлдӕйттӕ баззад, уыдонӕй байдзаг дыууадӕс чыргъӕды. 21 Хӕргӕ чи кодта, уыдон та, сылгоймӕгтӕ ӕмӕ сывӕллӕтты нӕ нымайгӕйӕ, уыдысты фондз мин лӕджы бӕрц. 22 Йесо ахуыргӕнинӕгты уайтагъд сбадын кодта бӕлӕгъы ӕмӕ сӕ Йӕ разӕй арвыста денджызы иннӕ фарсмӕ; Йӕхӕдӕг уал баззади, цалынмӕ адӕмы ауадза, уӕдмӕ. 23 Ӕмӕ адӕмы куы ауагъта, уӕд хибарӕй бакувынмӕ ссыди хохмӕ, ӕмӕ куы баизӕр, уӕд дӕр ма уым уыд иунӕгӕй. 24 Бӕлӕгъ та уыцы рӕстӕг адард и денджызы былӕй, ӕмӕ йӕ уылӕнтӕ хостой, уымӕн ӕмӕ цыди дымгӕйы ныхмӕ. 25 Боныцъӕхты размӕ сӕм Йесо денджызыл бацыди къахӕй. 26 Ӕмӕ Йӕ ахуыргӕнинӕгтӕ денджызыл цӕугӕ куы федтой, уӕд фӕтарстысты ӕмӕ дзырдтой: «Уый цӕстылуайӕн у». Ӕмӕ сӕ фыртӕссӕй ныхъхъӕр кодтой. 27 Фӕлӕ сӕм Йесо уайтӕккӕ сдзырдта: «Фидар фӕлӕуут, уый Ӕз дӕн! Ма тӕрсут». 28 Петр Ын загъта: «Хицау, кӕд уый Ды дӕ, уӕд мын зӕгъ, цӕмӕй Дӕм доныл къахӕй бацӕуон». 29 Йесо йын дзуапп радта: «Рацу». Петр рахызти бӕлӕгъӕй, къахӕй араст доныл, ӕмӕ бацыд Йесомӕ. 30 Фӕлӕ дымгӕ куыд тыхджын уыди, уый куы федта, уӕд фӕтарсти, райдыдта дӕлдон кӕнын ӕмӕ хъӕр систа: «Хицау, фервӕзын мӕ кӕн!» 31 Йесо йӕм уайтагъд Йӕ къух бадардта, ныххӕцыд ыл ӕмӕ йын загъта: «Лӕмӕгъ уырнӕг, цӕмӕн фӕдызӕрдыг дӕ?» 32 Ӕмӕ бӕлӕгъмӕ куы бахызтысты, уӕд дымгӕ банцади. 33 Бӕлӕгъы чи уыд, уыдон ӕрзоныгыл сты Йесойы раз ӕмӕ Йын загътой: «Ды ӕцӕгӕй Хуыцауы Фырт дӕ». 34 Бахӕццӕ сты денджызы иннӕ фарсмӕ, Геннисареты цурмӕ. 35 Уымы адӕм Йесойы куы базыдтой, уӕд фехъусын кодтой ӕппӕт алфамбылайы дӕр. Ӕрхастой Йӕм ӕппӕт рынчынты, 36 Хатыдысты Йӕм, цӕмӕй сӕ бауадза уӕд та Йӕ пӕлӕзы коцорайыл бандзӕвын; ӕмӕ-иу чидӕриддӕр бандзӕвыд, уыдон-иу сдзӕбӕх сты.

Матфей 15

1 Уӕд Иерусалимӕй Йесомӕ ӕрцыдысты фарисейтӕ ӕмӕ динамонджытӕ, ӕмӕ Йын загътой: 2 «Дӕ ахуыргӕнинӕгтӕ цӕмӕн халынц фыдӕлты ӕгъдау? Сӕ къухтӕ не 'хсынц, афтӕмӕй хӕрынц». 3 Йесо сын дзуапп радта: «Ӕмӕ сымах та уӕхи ӕгъдауы сӕраппонд цӕмӕн халут Хуыцауы фӕдзӕхст? 4 Уымӕн ӕмӕ Хуыцау загъта: „Нымай дӕ фыд ӕмӕ дӕ мады", ӕмӕ: „Йӕ фыды кӕнӕ йӕ мады ӕфхӕрӕг амӕлӕд". 5 Сымах та дзурут: „Йӕ фыдӕн кӕнӕ йӕ мадӕн афтӕ чи зӕгъа, мӕнӕй цы хъуамӕ айстаис, уый мын Хуыцауӕн лӕвар у, зӕгъгӕ, 6 Уыцы адӕймаджы йӕ фыды кӕнӕ йӕ мады нымайыны сӕр нал хъӕуы". Афтӕмӕй Хуыцауы ныхас баивтат уӕхи ӕгъдауӕй. 7 Цӕстмӕхъустӕ! Сымах тыххӕй Исай-пехуымпар хорз загъта: 8 „Ацы адӕм Мын кад кӕнынц дзыхӕй, сӕ зӕрдӕ та дард у Мӕнӕй. 9 Дзӕгъӕлы Мӕм кувынц; цӕуыл ахуыр кӕнынц, уыдон адӕймаджы ӕрхъуыдыгонд ӕгъдӕуттӕ сты"». 10 Йесо басидт адӕммӕ ӕмӕ сын загъта: «Байхъусут ӕмӕ бамбарут! 11 Дзыхмӕ цы цӕуы, уый нӕ чъизи кӕны адӕймаджы, фӕлӕ дзыхӕй цы рацӕуы, уый йӕ кӕны чъизи». 12 Уӕд Ӕм ӕрбацыдысты Йӕ ахуыргӕнинӕгтӕ ӕмӕ Йын загътой: «Дӕ ныхӕстӕ фарисейтӕн кӕй фӕхъыг сты, уый зоныс?» 13 Йесо сын дзуапп радта: «Мӕ Уӕларвон Фыд кӕй нӕ ныссагъта, уыцы зайӕгой рӕдывд ӕрцӕудзӕн ӕд уидӕгтӕ. 14 Ныууадзут сӕ, уыдон куырмыты куырм фӕтӕгтӕ сты. Ӕмӕ куырм куырмы куы хона, уӕд сӕ дыууӕ дӕр ныххаудзысты уӕрмы». 15 Уӕд Ӕм Петр бахатыд: «Бамбарын нын кӕн ацы фӕсномыг ныхас». 16 Йесо загъта: «Ау, сымах дӕр ныр дӕр ма афтӕ ӕнӕмбаргӕ стут? 17 Ӕви йӕ нӕ зонут, дзыхмӕ цыдӕриддӕр бацӕуы, уый гуыбынмӕ кӕй ныфты, стӕй ӕддӕмӕ кӕй рацӕуы? 18 Дзыхӕй цы рацӕуы, уый та зӕрдӕйӕ рацӕуы, ӕмӕ уый чъизи кӕны адӕймаджы. 19 Уымӕн ӕмӕ зӕрдӕйӕ рацӕуынц фыдвӕндтӕ, марын, хӕтын, давын, мӕнгӕвдисӕн лӕууын, хахуыр. 20 Ӕппӕт уыдӕттӕ чъизи кӕнынц адӕймаджы, ӕнӕхсад къухтӕй хӕрын та йӕ нӕ кӕны чъизи». 21 Йесо араст уырдыгӕй, ӕмӕ ӕрцыд Тир ӕмӕ Сидоны зӕхмӕ. 22 Рацыд Ӕм уырдыгон ханаанаг сылгоймаг ӕмӕ хъӕр кодта: «Батӕригъӕд мын кӕн, Хицау, Давиды Фырт! Мӕ чызг хӕйрӕджджын у ӕмӕ удхар кӕны». 23 Фӕлӕ йын Йесо иу ныхасӕй дӕр дзуапп нӕ лӕвӕрдта. Уӕд Ӕм бацыдысты Йӕ ахуыргӕнинӕгтӕ ӕмӕ Йӕм ӕрхатыдысты: «Байхъус ӕм, ӕмӕ ацӕуа, науӕд нӕ фӕдыл бафтыд ӕмӕ хъӕр кӕны». 24 Йесо дзуапп радта: «Ӕз ӕрмӕстдӕр Израилы адӕммӕ, сӕфт фыстӕм, ӕрвыст дӕн». 25 Фӕлӕ Йӕм сылгоймаг бацыд, ӕрзоныгыл Йӕ разы ӕмӕ загъта: «Хицау, баххуыс мын кӕн». 26 Йесо йын дзуапп радта: «Хорз нӕу сывӕллӕтты къӕбӕр райсын ӕмӕ йӕ куыйтӕн аппарын». 27 Сылгоймаг загъта: «О, Хицау, фӕлӕ куыйтӕ дӕр, сӕ хицӕутты фынгӕй цы муртӕ ӕрхауы, уыдон фӕхӕрынц». 28 Уӕд ын Йесо дзуапп радта: «Хорз ус, стыр у дӕ уырнындзинад! Сӕххӕст уӕд дӕ фӕндон». Ӕмӕ йӕ чызг уайтӕккӕ сдзӕбӕх. 29 Йесо араст уырдыгӕй, ӕрцыди Галилейы денджызмӕ, ссыди хохмӕ ӕмӕ уым ӕрбадти. 30 Ӕрбацыд Ӕм дзӕвгар адӕм къуылыхтимӕ, куырмытимӕ, цӕнкуылтимӕ, ӕгомыгтимӕ ӕмӕ бирӕ ӕндӕр рынчынтимӕ, ӕрӕвӕрдтой сӕ Йесойы къӕхты цур, ӕмӕ сӕ Уый сдзӕбӕх кодта. 31 Адӕм куы федтой ӕгомыгты дзургӕйӕ, цӕнкуылты ӕнӕнизӕй, къуылыхты цӕугӕйӕ ӕмӕ куырмыты сӕ цӕстӕй ракӕсгӕйӕ, уӕд дисы бафтыдысты, ӕмӕ кад кодтой Израилы Хуыцауӕн. 32 Йесо басидт Йӕ ахуыргӕнинӕгтӕм ӕмӕ сын загъта: «Тӕригъӕд кӕнын ацы адӕмӕн, ныр ӕртӕ боны дӕргъы Мемӕ сты, ӕмӕ цы бахӕрой, уый сӕм нӕй. Ӕххормагӕй сӕ ауадзон, уый та Мӕ нӕ фӕнды, науӕд бастайдзысты фӕндагыл». 33 Йӕ ахуыргӕнинӕгтӕ Йын загътой: «Утӕппӕт адӕм бафсадыны фаг дзултӕ ам, ӕдзӕрӕг ран, куыд самал кӕнӕм?» 34 Йесо сӕ бафарста: «Цал дзулы уӕм ис?» Уыдон Ын загътой: «Авд, стӕй ма цалдӕр гыццыл кӕсаджы». 35 Уӕд Йесо адӕмы ӕрбадын кодта зӕххыл, 36 Райста авд дзулы ӕмӕ кӕсӕгтӕ, арфӕ ракодта, асаста сӕ ӕмӕ сӕ радта Йӕ ахуыргӕнинӕгтӕм, ахуыргӕнинӕгтӕ та сӕ байуӕрстой адӕмӕн. 37 Сеппӕт дӕр бахордтой ӕмӕ бафсӕстысты. Ӕмӕ ма цы уӕлдӕйттӕ баззад, уыдонӕй байдзаг авд чыргъӕды. 38 Хӕргӕ чи кодта, уыдон та, сылгоймӕгтӕ ӕмӕ сывӕллӕтты нӕ нымайгӕйӕ, уыдысты цыппар мин лӕджы. 39 Уӕд Йесо ауагъта адӕмы, бахызт бӕлӕгъмӕ, ӕмӕ ӕрцыди Магдалӕйы зӕхмӕ.

Матфей 16

1 Йесомӕ бацыдысты фарисейтӕ ӕмӕ саддукейтӕ, ӕмӕ Дзы Йӕ бафӕлварыны тыххӕй домдтой уӕларвӕй сын ӕвдисӕйнаг равдисын. 2 Йесо сын дзуапп радта: «Изӕрӕй сымах фӕзӕгъут: „Боныхъӕд хорз уыдзӕн – арв сырх у". 3 Райсомӕй та фӕзӕгъут: „Къӕвда уыдзӕн абон – арв сырх ӕмӕ хъуынтъыз у". [Цӕстмӕхъустӕ!] Арвыл цы уынут, уый иртасын куы зонут, уӕд ацы рӕстӕджы цаутӕ раиртасын нӕ фӕразут? 4 Хуыцауы ныууадзӕг хӕлд фӕлтӕр ӕвдисӕйнаг домы, фӕлӕ йын Ионӕйы диссагӕй дарддӕр ӕндӕр ӕвдисӕйнаг нӕ рардӕуыдзӕн». Уыйадыл сӕ ныууагъта ӕмӕ ацыд уырдыгӕй. 5 Йӕ ахуыргӕнинӕгтӕ бӕлӕгъы бацыдысты денджызы иннӕ фарсмӕ. Семӕ сӕ дзултӕ райсын ферох. 6 Йесо сын загъта: «Хъусут, уӕхи хизут фарисейты ӕмӕ саддукейты ӕнхъизӕнӕй». 7 Ӕмӕ ахуыргӕнинӕгтӕ кӕрӕдзийӕн дзырдтой: «Дзул нӕ райстам немӕ». 8 Йесо сӕ бамбӕрста, ӕмӕ сын загъта: «Цӕмӕн дзурут, лӕмӕгъ уырнджытӕ, дзул уӕм кӕй нӕй, уый тыххӕй? 9 Ау, нӕма йӕ бамбӕрстат? Фондз мин лӕгӕн фондз дзулы куыд сфаг ӕмӕ цал чыргъӕды байдзаг кодтат, уый уӕ зӕрдыл нал лӕууы? 10 Цыппар минӕн авд дзулы куыд сфаг ӕмӕ уӕлдӕйттӕй цал чыргъӕды байдзаг кодтат, уый дӕр уӕ ферох? 11 Ау, Мӕ ныхас дзулы тыххӕй кӕй нӕ уыд, уый куыд нӕ ӕмбарут? Уӕхи хизут фарисейты ӕмӕ саддукейты ӕнхъизӕнӕй». 12 Уӕд бамбӕрстой: Йесо сын дзырдта дзулы ӕнхъизӕнӕй нӕ, фӕлӕ фарисейты ӕмӕ саддукейты ахуырадӕй сӕхи бахизыны тыххӕй. 13 Йесо Филиппы Кесарийы зӕхмӕ куы ӕрцыди, уӕд бафарста Йӕ ахуыргӕнинӕгты: «Мӕн, Адӕймаджы Фырты, адӕм кӕуыл нымайынц?» 14 Уыдон Ын загътой: «Иутӕ – Аргъауӕг Иоанныл, иннӕтӕ – Илиайыл, аннӕтӕ та – Иеремийыл кӕнӕ пехуымпартӕй иуыл». 15 Йесо сӕ бафарста: «Сымах та Мӕ кӕуыл нымайут?» 16 Симон Петр Ын дзуапп радта: «Ды Чырысти дӕ, цардӕгас Хуыцауы Фырт». 17 Уӕд ын Йесо загъта: «Тӕхудиаг дӕ, Ионӕйы фырт Симон, уымӕн ӕмӕ дын уый адӕймаг нӕ раргом кодта, фӕлӕ Мӕ Уӕларвон Фыд. 18 Ӕз дын зӕгъын: ды дӕ Петр ӕмӕ уыцы дурыл Ӕз сараздзынӕн Мӕ аргъуан, ӕмӕ йӕ зындоны тыхтӕ нӕ басӕтдзысты. 19 Ӕз дӕм ратдзынӕн Уӕларвон Паддзахады дӕгъӕлтӕ. Зӕххыл бар цӕмӕн нӕ раттай, уымӕн уӕлӕрвты дӕр бар лӕвӕрд нӕ уыдзӕн; зӕххыл бар цӕмӕн раттай, уымӕн та уӕлӕрвты дӕр рардӕуыдзӕн бар». 20 Уӕд Йесо бафӕдзӕхста Йӕ ахуыргӕнинӕгтӕн, цӕмӕй макӕмӕн зӕгъой, Уый Чырысти кӕй у, уый тыххӕй. 21 Уӕдӕй фӕстӕмӕ Йесо Йӕ ахуыргӕнинӕгтӕн ӕргом кӕнын райдыдта: хъуамӕ ацӕуа Иерусалиммӕ ӕмӕ бирӕ хъизӕмӕрттӕ бавзара адӕмы хистӕртӕ, алчертӕ ӕмӕ динамонджыты къухтӕй; амардӕйӕуыдзӕн ӕмӕ ӕртыккаг бон райгас уыдзӕн. 22 Уӕд Ӕй Петр фӕхибар кодта ӕмӕ Йын райдыдта уайдзӕф кӕнын: «Хуыцау Дӕ уымӕй бахизӕд, Хицау! Уыцы бӕллӕх дыл ма ӕрцӕуӕд!» 23 Йесо разылд ӕмӕ Петрӕн загъта: «Фесӕф Мӕ цурӕй, хӕйрӕг! Ды Мын цӕлхдур дӕ, уымӕн ӕмӕ дӕ хъуыдытӕ, Хуыцауы фӕндон цы у, ууыл нӕ, фӕлӕ адӕймаджы фӕндон цы у, ууыл сты». 24 Уӕд Йесо Йӕ ахуыргӕнинӕгтӕн загъта: «Мӕ фӕдыл цӕуын кӕй фӕнды, уый йӕхи ферох кӕнӕд, райсӕд йӕ дзуар ӕмӕ рацӕуӕд Мӕ фӕдыл. 25 Уымӕн ӕмӕ йӕ цард бахъахъхъӕнын кӕй фӕнды, уый йӕ фесафдзӕн; йӕ цард Мӕ сӕраппонд чи фесафа, уый та йӕ ссардзӕн. 26 Адӕймаг ӕгас дуне йӕхи куы бакӕна, йӕ уд та куы фесафа, уӕд ын уый цы пайда у? Кӕнӕ йӕм цы разындзӕн, йӕ уд цӕмӕй балхӕна, ахӕмӕй? 27 Уымӕн ӕмӕ Адӕймаджы Фырт ӕрцӕудзӕн Йӕ Фыды намысимӕ, Йӕ зӕдтимӕ, ӕмӕ алкӕмӕн дӕр ратдзӕн йӕ хъуыддӕгтӕм гӕсгӕ. 28 Ӕцӕг уын зӕгъын: ам чи лӕууы, уыдонӕй иуӕй-иутӕ нӕ амӕлдзысты, цалынмӕ Адӕймаджы Фырты паддзахы бартимӕ ӕрцӕугӕ феной, уӕдмӕ».

Матфей 17

1 Ӕхсӕз боны фӕстӕ Йесо Йемӕ рахуыдта Петры, Иаковы ӕмӕ уый ӕфсымӕр Иоанны, скодта сӕ бӕрзонд хохмӕ, ӕмӕ уым уыдысты хибарӕй. 2 Сӕ разы Йӕ хуыз аивта – Йӕ цӕсгом сӕрттывта хурау, Йӕ дарӕс та рухсау фестади сӕнтурс. 3 Фӕзындысты сӕм Моисей ӕмӕ Илиа, ӕмӕ ныхас кодтой Йемӕ. 4 Уӕд Петр загъта Йесойӕн: «Хицау, ам кӕй стӕм, уый цы хорз у! Кӕд Дӕ фӕнды, уӕд ам саразон ӕртӕ халагъуды: иу Дӕуӕн, иу Моисейӕн, иу Илиайӕн». 5 Петр йӕ ныхас нӕма фӕци, афтӕ сӕ ӕрӕмбӕрзта рухскалгӕ ӕврагъ, ӕмӕ ӕврагъӕй райхъуысти хъӕлӕс: «Ай, Кӕуыл аудын, Мӕ уыцы уарзон Фырт у. Хъусут Ӕм». 6 Ахуыргӕнинӕгтӕ уый куы фехъуыстой, уӕд фыртӕссӕй ӕрхаудысты дӕлгоммӕ. 7 Фӕлӕ сӕм Йесо бацыди, бавнӕлдта сӕм ӕмӕ сын загъта: «Сыстут, ма тӕрсут». 8 Ӕмӕ сӕ цӕстытыл куы схӕцыдысты, уӕд, Йесойы йеддӕмӕ, никӕйуал федтой. 9 Хохӕй куы ӕрцӕйцыдысты, уӕд сын Йесо бафӕдзӕхста: «Цы федтат, уый тыххӕй макӕмӕн зӕгъут, цалынмӕ Адӕймаджы Фырт мӕрдтӕй райгас уа, уӕдмӕ». 10 Уӕд Ӕй Йӕ ахуыргӕнинӕгтӕ бафарстой: «Уӕдӕ динамонджытӕ цӕмӕн афтӕ дзурынц, Чырыстийы размӕ Илиа хъуамӕ ӕрцӕуа, зӕгъгӕ?» 11 Йесо сын дзуапп радта: «Раст у, Илиа хъуамӕ ӕрцӕуа ӕмӕ ӕппӕт дӕр банывыл кӕна. 12 Фӕлӕ уын зӕгъын: Илиа ӕрцыди ныридӕгӕн, фӕлӕ йӕ нӕ базыдтой, ӕмӕ сӕ цы бафӕндыд, уый йын бакодтой. Афтӕ Адӕймаджы Фыртӕн дӕр уыдон бавзарын кӕндзысты хъизӕмӕрттӕ». 13 Уӕд ахуыргӕнинӕгтӕ бамбӕрстой, Йесо сын Аргъауӕг Иоанны тыххӕй кӕй дзырдта, уый. 14 Адӕммӕ куы ӕрыздӕхтысты, уӕд Йесомӕ бацыд иу лӕг, ӕрзоныгыл Йӕ разы 15 Ӕмӕ загъта: «Хицау, батӕригъӕд кӕн мӕ фыртӕн. Фӕсур вӕййы ӕмӕ тынг удхар кӕны; арӕх йӕхи ӕппары артмӕ ӕмӕ донмӕ. 16 Ӕз ӕй ӕркодтон Дӕ ахуыргӕнинӕгтӕм, фӕлӕ йе сдзӕбӕх кӕнын сӕ бон нӕ баци». 17 Йесо дзуапп радта: «Ӕнӕуырнӕг ӕмӕ хӕлд фӕлтӕр! Кӕдмӕ уыдзынӕн уемӕ? Кӕдмӕ уын быхсдзынӕн? Ардӕм Мӕм ӕй ӕрбакӕнут». 18 Йесо дӕлимонӕн радта бардзырд, дӕлимон рацыди лӕппуйӕ, ӕмӕ уый уайтӕккӕ сдзӕбӕх. 19 Уӕд ахуыргӕнинӕгтӕ хибарӕй бацыдысты Йесомӕ, ӕмӕ Йын загътой: «Дӕлимоны расурын нӕ бон цӕуылнӕ баци?» 20 Йесо сын загъта: «Уӕ уырнындзинад лӕмӕгъ кӕй у, уый тыххӕй. Ӕцӕг уын зӕгъын: хъыцъыйы гагайыйас уырнындзинад уӕм куы уа ӕмӕ ацы хохӕн афтӕ куы зӕгъат: „Ардыгӕй уӕртӕ уырдӕм ацу", уӕд ацӕудзӕн. Ӕмӕ ахӕмӕй ницы уыдзӕн, сымахӕн цы нӕ бантыса. 21 [Ацы уды мыггагӕн та ӕрмӕст кувын ӕмӕ ком дарыны фӕрцы ис фӕсурӕн.]» 22 Йесо ӕмӕ Йӕ ахуыргӕнинӕгтӕ Галилейы куы ӕрӕмбырд сты, уӕд сын Йесо загъта: «Адӕймаджы Фырт лӕвӕрд ӕрцӕудзӕн адӕмы къухтӕм, 23 Амардзысты Йӕ, ӕмӕ ӕртыккаг бон райгас уыдзӕн». Ахуыргӕнинӕгтӕ тынг фенкъард сты. 24 Капернауммӕ куы ӕрцыдысты, уӕд Кувӕндонӕн хъалон ӕмбырдгӕнджытӕ ӕрбацыдысты Петрмӕ ӕмӕ йын загътой: «Уӕ Ахуыргӕнӕг дыууӕ драхмӕйы нӕ ратдзӕн, ӕви?» 25 Уый сын загъта: «Ратдзӕн». Ӕмӕ Петр хӕдзармӕ куы бацыди, уӕд Йесо фӕраздӕр ӕмӕ йын загъта: «Куыд дӕм кӕсы, Симон, зӕххон паддзӕхтӕ фиддон кӕнӕ хъалон кӕмӕй исынц? Сӕхи адӕмӕй ӕви ӕцӕгӕлӕттӕй?» 26 Симон Ын дзуапп радта: «Ӕцӕгӕлӕттӕй». Йесо йын загъта: «Уӕдӕ фырттӕ сӕрибар сты. 27 Фӕлӕ ныл цӕмӕй сӕ зӕрдӕ ма фӕхуда, уый тыххӕй ацу денджызмӕ, баппар ӕнгуыр ӕмӕ, фыццаг цы кӕсаг ӕрцахсай, уый райс. Ӕмӕ йын йӕ дзых куы байгом кӕнай, уӕд дзы ссардзынӕ статир. Рахӕсс ӕй ӕмӕ сын ӕй ратт Мӕн тыххӕй ӕмӕ дӕхи тыххӕй».

Матфей 18

1 Уыцы рӕстӕг ахуыргӕнинӕгтӕ ӕрбацыдысты Йесомӕ ӕмӕ Йӕ бафарстой: «Уӕларвон Паддзахады уӕлдӕр чи у?» 2 Йесо басидти сывӕллонмӕ, ӕрлӕууын ӕй кодта уыдоны раз, 3 Ӕмӕ загъта: «Ӕцӕг уын зӕгъын, куы нӕ аиват ӕмӕ сывӕллӕтты хуызӕн куы нӕ суат, уӕд Уӕларвон Паддзахадмӕ нӕ бацӕудзыстут. 4 Уӕдӕ йӕхи чи ӕрныллӕг кӕна ӕмӕ ацы сабийы хуызӕн чи суа, уый уӕлдӕр уыдзӕн Уӕларвон Паддзахады. 5 Ӕмӕ иу ахӕм сывӕллоныл Мӕ номы сӕраппонд зӕрдиаг чи уа, уый Мӕныл у зӕрдиаг. 6 Фӕлӕ ацы кӕстӕртӕй – Мӕныл ӕууӕндджытӕй – иуы дӕр тӕригъӕды чи бафтауа, уымӕн йӕ бӕрзӕйыл куыройыфыд куы ӕрцауындзиккой ӕмӕ йӕ денджызы куы фӕдӕлдон кӕниккой, уӕд ын хуыздӕр уаид. 7 Сар йӕ сӕр дунейӕн, тӕригъӕдмӕ мондаггӕнӕнтӕ дзы кӕй ис, уый тыххӕй. Уыцы мондаггӕнӕнтӕ ӕнӕмӕнг хъуамӕ уой, фӕлӕ сар йӕ сӕр, кӕй аххосӕй ӕрцӕуой, уыцы адӕймагӕн. 8 Дӕ къух кӕнӕ дын дӕ къах тӕригъӕды хос куы уа, уӕд ӕй акъуыр ӕмӕ йӕ аппар: хуыздӕр дын у ӕнӕ къух кӕнӕ ӕнӕ къахӕй мыггагмӕйы цардмӕ бацӕуын, цӕйнӕфӕлтау дӕ дыууӕ къухы кӕнӕ дыууӕ къахимӕ баппӕрстӕуа ӕнӕхуысгӕ арты. 9 Кӕнӕ дын дӕ цӕст тӕригъӕды хос куы уа, уӕд ӕй фелвас ӕмӕ йӕ аппар: хуыздӕр дын у иу цӕстимӕ цардмӕ бацӕуын, цӕйнӕфӕлтау дӕ дыууӕ цӕстимӕ баппӕрстӕуа зындоны арты. 10 Хъусут, ацы кӕстӕртӕй иунӕгыл дӕр ӕнӕрвӕссон ма ут. Зӕгъын уын: уыдонӕн сӕ зӕдтӕ уӕлӕрвты ӕдзух уынынц Мӕ Уӕларвон Фыды цӕсгом. 11 [Уымӕн ӕмӕ Адӕймаджы Фырт ӕрцыди сӕфтыты бацагурынмӕ ӕмӕ сӕ фервӕзын кӕнынмӕ.] 12 Куыд уӕм кӕсы? Искӕмӕ фондзыссӕдз фысы куы уаид ӕмӕ дзы иу куы фӕдзӕгъӕл уаид, уӕд, мыййаг, йӕ нудӕс ӕмӕ цыппарыссӕдз фысы хӕхты нӕ ныууадзид ӕмӕ йӕ дзӕгъӕл фысы агурӕг нӕ ацӕуид? 13 Ӕмӕ йӕ куы ссара, ӕцӕг уын зӕгъын, уӕд чи нӕ фӕдзӕгъӕл, уыцы нудӕс ӕмӕ цыппарыссӕдз фысӕй ауыл тынгдӕр фӕцин кӕндзӕн. 14 Афтӕ уӕ Уӕларвон Фыды дӕр нӕ фӕнды ацы кӕстӕртӕй иуы мӕлӕт дӕр. 15 Де 'фсымӕр дӕ тӕригъӕды куы бацӕуа, уӕд бавдӕл ӕмӕ йын хибарӕй бауайдзӕф кӕн. Ӕмӕ дӕм кӕд байхъуса, уӕд ногӕй ссардтай де 'фсымӕры. 16 Кӕд дӕм нӕ байхъуса, уӕд та демӕ акӕн иу кӕнӕ дыууӕ адӕймаджы, цӕмӕй, алы ныхас дӕр раст кӕй у, уымӕн уа дыууӕ кӕнӕ ӕртӕ ӕвдисӕны. 17 Уыдонмӕ дӕр куы нӕ байхъуса, уӕд зӕгъ аргъуанӕн. Ӕмӕ кӕд аргъуанмӕ дӕр нӕ байхъуса, уӕд ӕм кӕс, муртатмӕ ӕмӕ хъалонисӕгмӕ цы цӕстӕй кӕсыс, ахӕм цӕстӕй. 18 Ӕцӕг уын зӕгъын: зӕххыл бар цӕмӕн нӕ раттат, уымӕн уӕларвы дӕр бар лӕвӕрд нӕ уыдзӕн; зӕххыл бар цӕмӕн раттат, уымӕн та уӕларвы дӕр рардӕуыдзӕн бар. 19 Ноджы ма уын зӕгъын: сымахӕй дыууӕ адӕймаджы куы сфӕнд кӕной зӕххыл цавӕрфӕнды хъуыддаджы тыххӕй дӕр иумӕ бакувыныл, уӕд цы ракурой, уый сын лӕвӕрд уыдзӕни Мӕ Уӕларвон Фыдӕй. 20 Уымӕн ӕмӕ Мӕ номыл дыууӕ кӕнӕ ӕртӕ адӕймаджы кӕм ӕрӕмбырд уой, уым Ӕз дӕр семӕ уыдзынӕн». 21 Уӕд Петр бацыди Йесомӕ ӕмӕ Йын загъта: «Хицау, мӕ тӕригъӕды цы ӕфсымӕр бацӕуа, уымӕн цал хатты хъуамӕ ныббарон? Авд хатты онг?» 22 Йесо йын загъта: «Авд хатты онг дын нӕ зӕгъын, фӕлӕ дӕс ӕмӕ ӕртиссӕдзгӕйттӕй авд хатты онг. 23 Уымӕн ӕмӕ Уӕларвон Паддзахад у, йӕ цагъартӕй дзы чи цас дары, уый банымайыны фӕнд цы паддзах скодта, уый хуызӕн. 24 Уый нымайын куы райдыдта, уӕд ӕркодтой, дӕс мин таланты дзы чи дардта, уыцы адӕймаджы. 25 Ӕмӕ цӕмӕй бафида, уый йӕм кӕй нӕ уыди, уымӕ гӕсгӕ паддзах радта хӕсджынӕн йӕхи, йӕ усы, йӕ сывӕллӕтты, стӕй ма йӕм цыдӕриддӕр уыд, ӕппӕт уыдӕттӕ ауӕй кӕныны ӕмӕ хӕс бафидыны бардзырд. 26 Уӕд уыцы цагъар йӕ разы ӕрхауд йӕ зонгуытыл ӕмӕ йын дзырдта: „[Ме 'лдар!] Банхъӕлмӕ кӕс, ӕмӕ дын дӕ хӕс ӕнӕхъӕнӕй дӕр бафиддзынӕн". 27 Паддзах фӕтӕригъӕд кодта уыцы цагъарӕн, ауагъта йӕ ӕмӕ йын йӕ хӕс дӕр ныууагъта. 28 Уыцы цагъар та рацыд ӕмӕ ссардта, фондзыссӕдз динары дзы чи дардта, йӕ уыцы ӕмбалы, ӕрцахста йӕ, ныххӕцыд ын йӕ хурхыл ӕмӕ йын загъта: „Цы мӕ дарыс, уый мын бафид". 29 Уӕд йе 'мбал йӕхи уый къӕхтӕм ӕрӕппӕрста ӕмӕ йын лӕгъстӕ кодта: „Банхъӕлмӕ кӕс, ӕмӕ дӕ цы дарын, уый дын бафиддзынӕн". 30 Фӕлӕ уый не сразы, ацыд ӕмӕ йӕ бакодта ахӕстоны, цалынмӕ йын йӕ хӕс бафида, уӕдмӕ. 31 Ацы хабар йе 'мбӕлттӕ куы федтой, уӕд сын тынг фӕхъыг и. Ӕрцыдысты сӕ паддзахмӕ ӕмӕ йын радзырдтой, цы ӕрцыди, уый. 32 Уӕд ӕм паддзах басидт ӕмӕ йын загъта: „Фыдзӕрдӕ цагъар! Ды мын балӕгъстӕ кодтай, ӕмӕ дын ӕз дӕ хӕс ӕнӕхъӕнӕй дӕр куы ныббарстон, 33 Уӕд дӕуӕн дӕр не 'мбӕлд, ӕви, де 'мбалӕн батӕригъӕд кӕнын, ӕз дын куыд батӕригъӕд кодтон, афтӕ?" 34 Мӕсты паддзах ӕй радта хъизӕмарӕй марынмӕ, цалынмӕ йӕ хӕс ӕнӕхъӕнӕй бафида, уӕдмӕ. 35 Мӕ Уӕларвон Фыд дӕр уын афтӕ бакӕндзӕн, алчидӕр уӕ йе 'фсымӕрӕн йӕ тӕригъӕдтӕ зӕрдиагӕй куы нӕ ныббара, уӕд».

Матфей 19

1 Йесо Йӕ ныхас куы фӕци, уӕд араст Галилейӕ, ӕмӕ ӕрцыд Иудейӕйы зӕхмӕ, Иорданы иннӕ фарсмӕ. 2 Йӕ фӕдыл ацыди бирӕ адӕм, ӕмӕ сӕ уым сдзӕбӕх кодта. 3 Бацыдысты Йӕм фарисейтӕ ӕмӕ Йӕ ракъахыны охыл бафарстой: «Алы азымы тыххӕй ӕмбӕлы лӕгӕн йӕ усы ауадзын, ӕви нӕ?» 4 Йесо сын дзуапп радта: «Сфӕлдисӕг тӕккӕ райдианӕй „уыдоны нӕлгоймаг ӕмӕ сылгоймагӕй кӕй сфӕлдыста", уый тыххӕй нӕ бакастыстут, ӕви? 5 Ӕмӕ Сфӕлдисӕг загъта: „Уымӕ гӕсгӕ адӕймаг ныууадздзӕн йӕ фыд ӕмӕ йӕ мады, баиу уыдзӕн йӕ усимӕ, ӕмӕ дыууӕ уыдзысты иу буар". 6 Афтӕмӕй уыдон дыууӕ нал сты, фӕлӕ сты иу буар. Уӕдӕ Хуыцау цы сиу кодта, уый адӕймаг ма ахицӕн кӕнӕд». 7 Уыдон Йесойӕн загътой: «Уӕдӕ Моисей цӕмӕн бафӕдзӕхста уагъды ӕвдисӕндар раттын ӕмӕ усы ауадзын?» 8 Йесо сын дзуапп радта: «Хивӕнд кӕй стут, уый тыххӕй уын радта Моисей уӕ устыты уадзыны бар. Фыццаг та афтӕ нӕ уыди. 9 Фӕлӕ уын Ӕз зӕгъын: хӕтыны азым ӕм ма уӕд, уымӕй дарддӕр йӕ усы чи ауадза ӕмӕ ӕндӕр ус чи ракура, уый хӕтгӕ кӕны. [Уагъд усы чи ракура, уый дӕр хӕтгӕ кӕны.]» 10 Йӕ ахуыргӕнинӕгтӕ Йын загътой: «Кӕд йӕ усы тыххӕй лӕгмӕ ахӕм хӕс хауы, уӕд хуыздӕр у ус нӕ ракурын». 11 Йесо сын загъта: «Ӕппӕты бон нӕу ацы ныхас ӕххӕст кӕнын, фӕлӕ Хуыцауӕй лӕвӕрд кӕмӕн уа, уый йӕ сӕххӕст кӕндзӕн. 12 Уымӕн ӕмӕ ис, мады гуыбынӕй ӕрдызт чи рахаста, ахӕмтӕ. Ис, адӕм кӕй бардызтой, ахӕм ӕрдызтытӕ дӕр. Ноджы ма ис, Уӕларвон Паддзахады сӕраппонд йӕхи чи бардызта, ахӕмтӕ дӕр. Ацы ныхас сӕххӕст кӕнын кӕй бон у, уый йӕ сӕххӕст кӕнӕд». 13 Уӕд Йесомӕ ӕрхуыдтой сывӕллӕтты, цӕмӕй сыл ӕрӕвӕра Йӕ къухтӕ ӕмӕ бакува, фӕлӕ сӕ ахуыргӕнинӕгтӕ нӕ бауагътой. 14 Йесо сын загъта: «Ӕрбауадзут Мӕм сывӕллӕтты, ма сӕ хъыгдарут, уымӕн ӕмӕ Уӕларвон Паддзахад уыдоны хуызӕтты у». 15 Йесо сывӕллӕттыл Йӕ къухтӕ ӕрӕвӕрдта ӕмӕ ацыди уырдыгӕй. 16 Йесомӕ ӕрбацыд иу лӕппу ӕмӕ Йӕ бафарста: «Ахуыргӕнӕг, мыггагмӕйы цард райсынӕн хорзӕй цы саразон?» 17 Йесо йын дзуапп радта: «Цӕмӕн Мӕ фӕрсыс хорз саразынӕй? Иунӕг Хуыцауы йеддӕмӕ хорз ничи у. Фӕлӕ дӕ кӕд мыггагмӕйы цардмӕ бацӕуын фӕнды, уӕд сӕххӕст кӕн фӕдзӕхстытӕ» 18 Уый Йӕ бафарста: «Цавӕр фӕдзӕхстытӕ?» Йесо йын дзуапп радта: «„Ма амар", „Ма хӕт", „Ма дав", „Мӕнгӕвдисӕн ма ныллӕуу", 19 „Нымай дӕ фыд ӕмӕ дӕ мады" ӕмӕ „Уарз хионы, дӕхи куыд уарзыс, афтӕ"». 20 Лӕппу Йын загъта: «Ӕппӕт уыдӕттӕ сӕххӕст кодтон. Ноджы ма мӕ цы бакӕнын хъӕуы?» 21 Йесо йын зӕгъы: «Кӕд дӕ фӕнды, ӕмӕ ӕнаипп уай, уӕд ацу, ауӕй кӕн дӕ мулк, ратт ӕй мӕгуыртӕн, ӕмӕ дын уӕлӕрвты уыдзӕни хӕзна. Стӕй-иу раздӕх ӕмӕ цу Мӕ фӕдыл». 22 Лӕппу уый куы фехъуыста, уӕд ацыд ӕнкъардӕй, уымӕн ӕмӕ йӕм бирӕ мулк уыд. 23 Йесо загъта Йӕ ахуыргӕнинӕгтӕн: «Ӕцӕг уын зӕгъын: зын у хъӕздыгӕн Уӕларвон Паддзахадмӕ бацӕуын. 24 Ноджы ма уын зӕгъын: хъӕздыгӕн Хуыцауы Паддзахадмӕ бацӕуынӕй теуайӕн судзины быны иннӕрдӕм ахизын ӕнцондӕр у». 25 Ахуыргӕнинӕгтӕ уый куы фехъуыстой, уӕд сӕм тынг диссаг фӕкаст, ӕмӕ загътой: «Уӕдӕ уӕд чи фервӕздзӕн?» 26 Йесо сӕм бакаст ӕмӕ сын загъта: «Уый адӕмы бон нӕу, фӕлӕ Хуыцауӕн Йӕ бон ӕппӕт дӕр у». 27 Уӕд Ын Петр загъта: «Мӕнӕ мах ныууагътам алцыдӕр ӕмӕ рацыдыстӕм Дӕ фӕдыл. Цы нӕм ӕнхъӕлмӕ кӕсы?» 28 Йесо сын дзуапп радта: «Ӕцӕг уын зӕгъын: Адӕймаджы Фырт ног дунейы Йӕ намысджын бынаты куы сбада, уӕд сымах дӕр, Мӕ фӕдыл рацӕуджытӕ, сбаддзыстут дыууадӕс бадӕны Израилы дыууадӕс хӕдзарвӕндагӕн тӕрхон кӕнынмӕ. 29 Ӕмӕ Мӕ номы сӕраппонд йӕ хӕдзӕрттӕ, кӕнӕ йе 'фсымӕрты, кӕнӕ йӕ хоты, кӕнӕ йӕ фыды, кӕнӕ йӕ мады, кӕнӕ йӕ усы, кӕнӕ йӕ сывӕллӕтты, кӕнӕ йӕ зӕххытӕ чи ныууадза, уый райсдзӕни фондзыссӕдз хатты фылдӕрӕй, ӕмӕ схайджын уыдзӕн мыггагмӕйы цардӕй. 30 Фӕлӕ фыццӕгтӕй бирӕтӕ уыдзысты фӕстӕгтӕ, фӕстӕгтӕй та бирӕтӕ уыдзысты фыццӕгтӕ.

Матфей 20

1 Уымӕн ӕмӕ райсомӕй раджы йӕ сӕнӕфсирдонмӕ кусджытӕ ӕххуырсынмӕ чи рацыд, Уӕларвон Паддзахад уыцы хицауы хуызӕн у. 2 Уый кусджытимӕ бафидыдта бон фӕйнӕ динарыл, ӕмӕ сӕ арвыста йӕ сӕнӕфсирдонмӕ. 3 Ӕртыккӕгӕм сахатмӕ хӕстӕг та рацыд ӕмӕ федта, сахары фӕзы ӕгуыстӕй чи лӕууыд, ахӕмты. 4 Ӕмӕ уыдонӕн дӕр загъта: „Ацӕут сымах дӕр мӕ сӕнӕфсирдонмӕ, ӕмӕ цы ӕмбӕла, уый уын бафиддзынӕн". Уыдон ацы- дысты. 5 Ноджы рацыд ӕмбисбонмӕ хӕстӕг, стӕй фарӕстӕм сахатмӕ хӕстӕг, ӕмӕ та баххуырста ӕндӕрты. 6 Ӕппынфӕстаг рацыд иуӕндӕсӕм сахатмӕ хӕстӕг, федта та ӕндӕр ӕгуыст адӕм ӕмӕ сӕ бафарста: „Ам ӕнӕхъӕн бон ӕгуыстӕй цы лӕуут?" 7 Уыдон ын дзуапп радтой: „Ничи нӕ баххуырста". Уый сын загъта: „Ацӕут сымах дӕр мӕ сӕнӕфсирдонмӕ [ӕмӕ цы ӕмбӕлы, уый райсдзыстут]". 8 Куы баизӕр, уӕд сӕнӕфсирдоны хицау йӕ исбонӕн уынаффӕгӕнӕгӕн загъта: „Басид кусджытӕм ӕмӕ сын мызд ратт; фӕстӕдӕр чи ӕрбацыди, уыдонӕн раздӕр бафид, раздӕр чи ӕрбацыди, уыдонӕн та – фӕстӕдӕр". 9 Иуӕндӕсӕм сахатмӕ хӕстӕг чи ӕрбацыд, уыдон райстой фӕйнӕ динары. 10 Раздӕр чи ӕрбацыд, уыдон ӕнхъӕл уыдысты, фылдӕр райсдзысты, зӕгъгӕ, фӕлӕ уыдон дӕр райстой фӕйнӕ динары. 11 Ӕмӕ мызд куы райстой, уӕд сӕнӕфсирдоны хицауыл райдыдтой бустӕ кӕнын. 12 Уыдон дзырдтой: „Фӕстӕдӕр кӕй баххуырстай, уыдон иунӕг сахат бакуыстой, фидгӕ та сын махимӕ ӕмхуызон бакодтай, мах та ӕнӕхъӕн бон ӕнтӕфы фӕфыдӕбон кодтам". 13 Уӕд ай сӕ иуӕн ахӕм дзуапп радта: „Хӕлар, ӕз дӕ хъыджы нӕ бацыдтӕн. Мемӕ динарыл нӕ бафидыдтай? 14 Цы дӕм ӕмбӕлы, уый айс ӕмӕ ацу. Дӕуӕн цас радтон, мӕн та фӕстӕдӕр ӕрбацӕуӕгӕн дӕр уыйбӕрц раттын фӕнды. 15 Мӕн цы у, ууыл мӕ бар нӕ цӕуы? Ӕви ӕз рӕдау кӕй дӕн, уый дӕ цӕст нӕ уарзы?" 16 Афтӕ фӕстӕгтӕ уыдзысты фыццӕгтӕ, фыццӕгтӕ та уыдзысты фӕстӕгтӕ. [Уымӕн ӕмӕ хуындтытӕ бирӕ сты, ӕвзӕрстытӕ та – чысыл.]» 17 Йесо Иерусалиммӕ куы цыди, уӕд фӕндагыл фӕхибар кодта дыууадӕсы ӕмӕ сын загъта: 18 «Ныр мах цӕуӕм Иерусалиммӕ, ӕмӕ Адӕймаджы Фырт лӕвӕрд ӕрцӕудзӕн алчертӕм ӕмӕ динамонджытӕм. Рахӕсдзысты Йын марыны тӕрхон 19 Ӕмӕ Йӕ ратдзысты муртаттӕм, цӕмӕй Дзы уыдон фӕхынджылӕг кӕной, ехсӕй Йӕ фӕнӕмой ӕмӕ Йӕ байтындзой, ӕмӕ ӕртыккаг бон райгас уыдзӕн». 20 Уӕд Ӕм бацыди Зеведейы ус йӕ фырттимӕ, Йӕ разы ӕрзоныгыл ӕмӕ Йӕм хатыди цӕйдӕр тыххӕй. 21 Йесо йӕ бафарста: «Цы дӕ хъӕуы?» Уый Йын дзуапп радта: «Бар ратт, цӕмӕй Дӕ Паддзахады мӕ ацы дыууӕ лӕппуйӕ иу сбада Дӕ рахиз фарс, иннӕ та – Дӕ галиу фарс». 22 Йесо сын загъта: «Цы курут, уый уӕхӕдӕг дӕр не 'мбарут. Ӕз цы хъизӕмӕртты кӕхц нуаздзынӕн, уый баназын [кӕнӕ Мӕныл цы аргъуыдӕй аргъуыдӕуы, ахӕм аргъуыд райсын] суыдзӕн уӕ бон?» Уыдон Ын дзуапп радтой: «Суыдзӕн». 23 Уый сын загъта: «Мӕ хъизӕмӕртты кӕхц нуаздзыстут [ӕмӕ Мӕныл цы аргъуыдӕй аргъуыдӕуы, уымӕй уыл саргъуыдӕуыдзӕн]. Мӕ рахиз фарс ӕмӕ Мӕ галиу фарс сбадын та Мӕнӕй аразгӕ нӕу, фӕлӕ уыцы бынӕттӕ Мӕ Фыд кӕмӕн ӕрцӕттӕ кодта, уыдон дзы сбаддзысты». 24 Уый дӕс ахуыргӕнинаджы куы фехъуыстой, уӕд смӕсты сты дыууӕ ӕфсымӕрмӕ. 25 Йесо басидти сеппӕтмӕ дӕр ӕмӕ сын загъта: «Сымах зонут, ӕлдӕрттӕ адӕмтӕн кӕй хицауиуӕг кӕнынц, ӕмӕ хицӕуттӕ адӕмтыл барджын кӕй сты, уый. 26 Сымахмӕ та афтӕ ма уӕд. Фӕлӕ уӕ уӕлдӕр уӕвын кӕй фӕнды, уый уын уӕд лӕггадгӕнӕг; 27 Ӕмӕ уӕ фыццаг уӕвын кӕй фӕнды, уый уын уӕд цагъар. 28 Адӕймаджы Фырт дӕр уый тыххӕй не 'рцыд, ӕмӕ Йын лӕггад кӕной, фӕлӕ цӕмӕй Йӕхӕдӕг балӕггад кӕна ӕмӕ бирӕты ссӕрибары сӕраппонд ратта Йӕ цард». 29 Иерихонӕй куы рараст сты, уӕд Йесойы фӕдыл цыди бирӕ адӕм. 30 Дыууӕ куырмы бадтысты фӕндаггӕрон. Йесо сӕ рӕзты кӕй ӕрцӕуы, уый куы фехъуыстой, уӕд ныхъхъӕр кодтой: «Батӕригъӕд нын кӕн, Хицау, Давиды Фырт!» 31 Адӕм уыдонӕй домдтой, цӕмӕй ныссабыр уой, фӕлӕ ноджы тынгдӕр хъӕр кодтой: «Батӕригъӕд нын кӕн, Хицау, Давиды Фырт!» 32 Йесо ӕрлӕууыди, басидти сӕм ӕмӕ сӕ бафарста: «Цы уӕ фӕнды? Цы уын саразон?» 33 Уыдон Ын загътой: «Хицау, мах фӕнды нӕ цӕстытӕй ракӕсын». 34 Йесо фӕтӕригъӕд кодта куырмытӕн ӕмӕ сын бавнӕлдта сӕ цӕстытӕм. Уыдон уайтӕккӕ ракастысты сӕ цӕстытӕй ӕмӕ ацыдысты Йӕ фӕдыл.

Матфей 21

1 Иерусалиммӕ сӕ бирӕ нал хъуыд. Елеоны хохы фахсыл чи ис, уыцы Виффагимӕ куы бахӕццӕ сты, уӕд Йесо арвыста дыууӕ ахуыргӕнинаджы, 2 Ӕмӕ сын загъта: «Ацӕут, уӕ ныхмӕ цы хъӕу ис, уырдӕм. Уым уайтӕккӕ ссардзыстут баст хӕрӕджы къӕлӕуимӕ. Суадзут сӕ ӕмӕ сӕ ӕркӕнут Мӕнмӕ. 3 Исчи уын исты куы зӕгъа, уӕд дзуапп раттут, уыдон Хицауы хъӕуынц, зӕгъгӕ, ӕмӕ уын сӕ уайтӕккӕ ратдзысты». 4 Ӕппӕт уыдӕттӕ ӕрцыдысты, цӕмӕй сӕххӕст уа, пехуымпары дзыхӕй цы загъдӕуыд, уый: 5 «Зӕгъут Сионы чызгӕн: мӕнӕ дӕм дӕ ӕвӕлмас Паддзах фӕцӕуы хӕрӕгыл ӕмӕ ӕрыгон къӕлӕуыл – кусӕг хӕрӕджы лӕппыныл – бадгӕйӕ». 6 Ахуыргӕнинӕгтӕ ацыдысты ӕмӕ бакодтой, Йесо сын куыд бафӕдзӕхста, афтӕ. 7 Ӕркодтой хӕрӕг ӕмӕ къӕлӕуы, ӕрӕвӕрдтой сыл сӕ дарӕстӕ, ӕмӕ Йесо сӕ уӕлӕ сбадти. 8 Бирӕ адӕм сӕ дарӕстӕ байтыдтой фӕндагыл, иннӕтӕ та лыг кодтой бӕлӕсты къалиутӕ ӕмӕ сӕ калдтой фӕндагмӕ. 9 Йесойӕн Йӕ разӕй ӕмӕ Йӕ фӕстӕ цы адӕм цыд, уыдон хъӕр кодтой: «Осаннӕ Давиды Фыртӕн! Арфӕгонд уӕд Хуыцауы номӕй Ӕрцӕуӕг! Осаннӕ уӕлӕрвты!» 10 Йесо Иерусалиммӕ куы бахӕццӕ, уӕд ӕгас сахар дӕр базмӕлыд ӕмӕ фарстой: «Уый Чи у?» 11 Адӕм та дзырдтой: «Уый Йесо-пехуымпар у, галилейаг Назаретӕй». 12 Йесо Кувӕндонмӕ бацыд ӕмӕ – уӕйгӕнӕгӕй, ӕлхӕнӕгӕй – сеппӕты дӕр ратардта, ӕхцаивджытӕн афӕлдӕхта сӕ фынгтӕ, бӕлӕттӕ уӕйгӕнджытӕн та – сӕ бандӕттӕ. 13 Ӕмӕ сын загъта: «Фыст у: „Мӕ хӕдзар кувӕн хӕдзар схуындӕуыдзӕн"; сымах та дзы абырджыты лӕгӕт аразут». 14 Кувӕндоны Йӕм бацыдысты куырмытӕ ӕмӕ къуылыхтӕ, ӕмӕ сӕ Уый сдзӕбӕх кодта. 15 Йесо цы диссӕгтӕ сарӕзта, уыдӕттӕ алчертӕ ӕмӕ динамонджытӕ куы федтой, стӕй Кувӕндоны «Осаннӕ Давиды Фыртӕн!», зӕгъгӕ, чи хъӕр кодта, уыцы сывӕллӕтты, уӕд смӕсты сты, 16 Ӕмӕ Йын загътой: «Хъусыс, цытӕ дзурынц?» Йесо сын дзуапп радта: «Хъусын! Ау, никуы бакастыстут: „Ды бакодтай афтӕ, ӕмӕ сабитӕ ӕмӕ дзидзидайтӕ стауынц Дӕу"?» 17 Йесо сӕ ныууагъта, сахарӕй ацыди Вифанимӕ ӕмӕ Йе 'хсӕв арвыста уым. 18 Райсомӕй раджы сахармӕ куы здӕхтысты, уӕд Йесо сыстонг. 19 Фӕндаггӕрон федта иу легъуибӕлас, бацыд ӕм, фӕлӕ йыл сыфтӕрты йеддӕмӕ ницы ссардта. Уӕд ын загъта: «Нырӕй фӕстӕмӕ дыл мыггагмӕ иу гага дӕр мауал ӕрзайӕд». Ӕмӕ легъуибӕлас уайтӕккӕ бахус. 20 Ахуыргӕнинӕгтӕ уый куы федтой, уӕд сӕм диссаг фӕкаст ӕмӕ дзырдтой: «Легъуибӕлас уайтӕккӕ куыд бахус?» 21 Йесо сын дзуапп радта: «Ӕцӕг уын зӕгъын: уырнындзинад уӕм куы уа ӕмӕ куы нӕ фӕгуырысхо уат, уӕд бакӕндзыстут, легъуибӕласыл цы ӕрцыд, ӕрмӕст уый нӕ, фӕлӕ ацы хохӕн дӕр куы зӕгъат: „Фӕхицӕн у зӕххӕй ӕмӕ денджызы дӕхи баппар", – уӕд уыдзӕн афтӕ. 22 Ӕмӕ уӕм уырнындзинад куы уа, уӕд уӕ куывды цы ракурат, уый райсдзыстут». 23 Йесо Кувӕндонмӕ куы ӕрцыд ӕмӕ адӕмы куы ахуыр кодта, уӕд Ӕм бацыдысты алчертӕ ӕмӕ адӕмы хистӕртӕ, ӕмӕ Йӕ бафарстой: «Ды цавӕр хъаруйӕ кӕныс ӕппӕт уыдӕттӕ? Уыцы бар Дын чи радта?» 24 Йесо сын дзуапп радта: «Ӕз дӕр уӕ бафӕрсдзынӕн цӕмӕйдӕр, ӕмӕ Мын дзуапп куы раттат, уӕд уын зӕгъдзынӕн, цавӕр хъаруйӕ сӕ кӕнын, уый. 25 Иоанн цы аргъуыдӕй аргъуыдта, уый кӕмӕй уыд: уӕларвӕй ӕви адӕмӕй?» Уыдон кӕрӕдзийӕн дзырдтой: «„Уӕларвӕй" куы зӕгъӕм, уӕд бафӕрсдзӕн: „Уӕдӕ цӕуылнӕ баууӕндыдыстут Иоанныл?" 26 „Адӕмӕй" куы зӕгъӕм, уӕд та нын адӕмӕй тӕссаг у, уымӕн ӕмӕ сеппӕт дӕр Иоанны пехуымпарыл нымайынц». 27 Ӕмӕ дзуапп радтой Йесойӕн: «Нӕ зонӕм». Йесо дӕр сын загъта: «Уӕдӕ уын Ӕз дӕр нӕ зӕгъдзынӕн, цавӕр хъаруйӕ сӕ кӕнын, уый. 28 Куыд уӕм кӕсы? Иу лӕгӕн уыди дыууӕ фырты. Бацыди сӕ иумӕ ӕмӕ йын загъта: „Мӕ хъӕбул, ацу ӕмӕ абон бакус мӕ сӕнӕфсирдоны". 29 Уый дзуапп радта: „Нӕ мӕ фӕнды", фӕлӕ фӕстӕдӕр ӕрхудт йӕхиуыл ӕмӕ ацыди. 30 Бацыд иннӕ фыртмӕ, ӕмӕ уымӕн дӕр загъта афтӕ. Уый йын дзуапп радта: „Фӕцӕуын, ме 'лдар", фӕлӕ нӕ ацыди. 31 Уыцы дыууӕйӕ йӕ фыды фӕндон чи сӕххӕст кодта?» Уыдон Ын загътой: «Фыццаг». Йесо сын загъта: «Ӕцӕг уын зӕгъын, хъалонисджытӕ ӕмӕ хъахбайтӕ уӕ разӕй цӕуынц Хуыцауы Паддзахадмӕ. 32 Уымӕн ӕмӕ Иоанн ӕрцыди сымахӕн раст фӕндаг бацамонынмӕ, ӕмӕ йыл нӕ баууӕндыдыстут, хъалонисджытӕ ӕмӕ йыл хъахбайтӕ та баууӕндыдысты. Сымах уый федтат, фӕлӕ уӕддӕр не 'рфӕсмон кодтат ӕмӕ йыл нӕ баууӕндыдыстут. 33 Байхъусут ӕндӕр фӕсномыг ныхасмӕ. Иу хицау ныссагъта сӕнӕфсирдон, йӕ алыварс ын сарӕзта ӕмбонд, скъахта дзы сӕндуцӕн, самадта дзы мӕсыг, радта йӕ ӕххуырст кусджытӕм ӕмӕ ацыди балцы. 34 Гагадыргъты рӕгъӕдафон куы ӕрхӕстӕг, уӕд йӕ цагъарты йӕ сӕнӕфсир райсынмӕ арвыста ӕххуырст кусджытӕм. 35 Ӕххуырст кусджытӕ йын ӕрцахстой йӕ цагъарты, ӕмӕ дзы кӕй нӕмгӕ фӕкодтой, кӕй дзы маргӕ акодтой, кӕй та дзы дуртӕй фӕхостой. 36 Арвыста сӕм ӕндӕр цагъарты – фыццӕгтӕй фылдӕр. Ӕмӕ уыдонӕн дӕр бакодтой афтӕ. 37 Ӕппынфӕстаг сӕм арвыста йӕ фырты; загъта, мӕ фыртӕй мын фефсӕрмы уыдзысты, зӕгъгӕ. 38 Фӕлӕ йын ӕххуырст кусджытӕ йӕ фырты куы федтой, уӕд кӕрӕдзийӕн загътой: „Уый йӕ бындар у. Цом, амарӕм ӕй, ӕмӕ йын йӕ бынтӕ нӕхи бакӕнӕм". 39 Ӕмӕ йӕ ӕрцахстой, раппӕрстой йӕ сӕнӕфсирдонӕй ӕмӕ йӕ амардтой. 40 Ныр сӕнӕфсирдоны хицау куы ӕрцӕуа, уӕд цы бакӕндзӕн уыцы ӕххуырст кусджытӕн?» 41 Йесойӕн дзуапп радтой: «Уыцы фыдгӕнджыты амардзӕни хъизӕмары мӕлӕтӕй, сӕнӕфсирдон та ратдзӕн ӕндӕр ӕххуырст кусджытӕм, афоныл ын сӕнӕфсир чи дӕтта, ахӕмтӕм». 42 Йесо сын загъта: «Ау, Сыгъдӕг Фысты никуы бакастыстут: „Аразджытӕ цы дурыл нӕ барвӕссыдысты, уый сси сӕрӕвӕрӕн. Уый Хуыцауы фӕндӕй у, ӕмӕ уыцы диссаг мах уынӕм"? 43 Уымӕ гӕсгӕ уын зӕгъын, сымахӕй ист ӕрцӕудзӕни Хуыцауы Паддзахад ӕмӕ лӕвӕрд уыдзӕни, пайда чи дӕтты, уыцы адӕмӕн. 44 Уыцы дурыл чи ӕрхауа, уый ныппырх уыдзӕн, йӕхӕдӕг кӕуыл ӕрхауа, уый та ныцъцъӕл кӕндзӕн». 45 Алчертӕ ӕмӕ фарисейтӕ Йесойы фӕсномыг ныхӕстӕ куы фехъуыстой, уӕд бамбӕрстой, уыдоны тыххӕй кӕй дзырдта, уый. 46 Ӕмӕ Йӕ хъавыдысты ӕрцахсынмӕ, фӕлӕ адӕмӕй нӕ бауӕндыдысты, уымӕн ӕмӕ Йӕ адӕм пехуымпарыл нымадтой.

Матфей 22

1 Йесо сын фӕсномыг ныхӕстӕй дзырдта дарддӕр: 2 «Йӕ фыртӕн чындзӕхсӕв чи сарӕзта, Уӕларвон Паддзахад уыцы паддзахы хуызӕн у. 3 Уый йӕ цагъарты арвыста хуындтыты чындзӕхсӕвмӕ ӕрхонынмӕ, фӕлӕ уыдоны ӕрцӕуын нӕ бафӕндыди. 4 Ноджы арвыста ӕндӕр цагъарты ӕмӕ сын загъта: „Зӕгъут хуындтытӕн: мӕнӕ ӕз ӕрӕвӕрдтон фынгтӕ, мӕ галтӕ ӕмӕ мӕ хаст фос ӕргӕвст сты, алцыдӕр цӕттӕ у, рацӕут чындзӕхсӕвмӕ". 5 Фӕлӕ йӕ уыдон ницӕмӕ ӕрдардтой ӕмӕ ацыдысты – чи йӕ хуыммӕ, чи та сӕудӕджер кӕнынмӕ. 6 Иннӕтӕ та йын ӕрцахстой йӕ цагъарты, бафхӕрдтой сӕ ӕмӕ сӕ амардтой. 7 Паддзах смӕсты, арвыста йе 'фсад, ныццагъта уыцы лӕгмарты ӕмӕ сын сӕ сахар басыгъта. 8 Уӕд йӕ цагъартӕн загъта: „Чындзӕхсӕвы фынг цӕттӕ у, фӕлӕ хуындтытӕ аккаг нӕ разындысты. 9 Уӕдӕ ацӕут фӕндӕгты тигътӕм, ӕмӕ-иу кӕйдӕриддӕр фенат, уыдоны ӕрхонут чындзӕхсӕвмӕ". 10 Уыцы цагъартӕ ацыдысты фӕндӕгтӕм ӕмӕ ӕрбахуыдтой, кӕуылдӕриддӕр сӕмбӕлдысты, уыдоны – фыдзӕрдӕты дӕр ӕмӕ хӕрзгӕнджыты дӕр. Ӕмӕ чындзӕхсӕв байдзаг фынгыл бадӕг адӕмӕй. 11 Паддзах фынджы адӕмы фенынмӕ куы бацыд, уӕд дзы бафиппайдта, бӕрӕгбоны дарӕс кӕуыл нӕ уыд, ахӕм адӕймаджы, 12 Ӕмӕ йын загъта: „Мӕ хӕлар, ӕнӕ бӕрӕгбоны дарӕсӕй ардӕм куыд ӕрбацыдтӕ?" Уый ныхъхъус и. 13 Уӕд паддзах загъта йӕ фӕсдзӕуинтӕн: „Сбӕттут ын йӕ къухтӕ ӕмӕ йӕ къӕхтӕ ӕмӕ йӕ ап- парут ӕддӕмӕ, талынгмӕ: уым уыдзӕни кӕуын ӕмӕ дӕндӕгты хъыс-хъыс". 14 Уымӕн ӕмӕ хуындтытӕ бирӕ сты, ӕвзӕрстытӕ та – чысыл». 15 Уӕд фарисейтӕ ацыдысты ӕмӕ бауынаффӕ кодтой, цӕмӕй Йесойы ракъахой ӕмӕ Йын Йӕ ныхӕстӕ Йӕхи ныхмӕ фӕцаразой. 16 Ӕмӕ Йӕм барвыстой сӕ ахуыргӕнинӕгты Ироды фарсдарджытимӕ, ӕмӕ Йын уыдон загътой: «Ахуыргӕнӕг, мах зонӕм, Ды раст кӕй дӕ ӕмӕ Хуыцауы фӕндаг ӕцӕгадмӕ гӕсгӕ кӕй амоныс; искӕй зӕрдӕ балхӕныныл нӕ архайыс, уымӕн ӕмӕ никӕй хъулон кӕныс. 17 Уӕдӕ нын зӕгъ: куыд Дӕм кӕсы? Кесӕрӕн хъалон фидын ӕмбӕлы ӕви нӕ?» 18 Фӕлӕ сын Йесо бамбӕрста сӕ фыдвӕнд ӕмӕ загъта: «Цы Мӕ къахут, цӕстмӕхъустӕ? 19 Равдисут Мӕм, хъалон цы ӕхцайӕ фидынц, уый». Уыдон Ӕм ӕрбахастой динар. 20 Ӕмӕ сын загъта: «Кӕй ныв ӕмӕ йыл кӕй ном ис?» 21 Уыдон Ын дзуапп радтой: «Кесӕры». Уӕд сын Йесо загъта: «Уӕдӕ кесӕры цы у, уый дӕттут кесӕрӕн, Хуыцауы цы у, уый та – Хуыцауӕн». 22 Уый куы фехъуыстой, уӕд сӕм диссаг фӕкасти, ныууагътой Йӕ ӕмӕ ацыдысты. 23 Уыцы бон Йесомӕ ӕрбацыдысты саддукейтӕ (саддукейтӕ дзурынц, мӕрдтӕ нӕ райгас уыдзысты, зӕгъгӕ), ӕмӕ Йӕ бафарстой: 24 «Ахуыргӕнӕг, Моисей загъта: „Исчи ӕнӕзӕнӕгӕй куы амӕла, уӕд ын йе 'фсымӕр ракурӕд йӕ усы ӕмӕ цот рауадзӕд йе 'фсымӕрӕн". 25 Махмӕ уыд авд ӕфсымӕры. Хистӕр ӕрхаста ус, амард ӕнӕзӕнӕгӕй ӕмӕ йӕ ус баззади йе 'фсымӕрӕн. 26 Афтӕ рауад сӕ хабар дыккаг ӕмӕ ӕртыккагӕн дӕр, стӕй иннӕтӕн дӕр суанг ӕвдӕм ӕфсымӕрмӕ. 27 Сеппӕты фӕстӕ ус дӕр амард. 28 Ныр мӕрдтӕ куы райгас уой, уӕд уыцы авд ӕфсымӕрӕй уый кӕй ус уыдзӕни? Сеппӕты ус дӕр куы уыд». 29 Йесо сын дзуапп радта: «Сымах рӕдийут, нӕдӕр Сыгъдӕг Фыст, нӕдӕр Хуыцауы тых кӕй нӕ зонут, уымӕ гӕсгӕ. 30 Уымӕн ӕмӕ мӕрдтӕ куы райгас уой, уӕд нӕдӕр ус курдзысты, нӕдӕр мой кӕндзысты, фӕлӕ уыдзысты уӕларвон зӕдтау. 31 Мӕрдты райгасы тыххӕй уын Хуыцау цы загъта, уый нӕ бакастыстут, ӕви: 32 „Ӕз дӕн Авраамы Хуыцау, Исаакы Хуыцау ӕмӕ Иаковы Хуыцау"? Хуыцау мӕрдты Хуыцау нӕу, удӕгӕсты Хуыцау у». 33 Адӕм уый куы фехъуыстой, уӕд дисы ӕфтыдысты Йесойы ахуырадыл. 34 Йесо Йӕ дзырдӕй саддукейты кӕй басаста, уый фарисейтӕ куы фехъуыстой, уӕд ӕрӕмбырд сты иумӕ. 35 Уыдонӕй иу, динамонӕг, Йесойы къахгӕйӕ, загъта: 36 «Ахуыргӕнӕг, Моисейы Ӕгъдауы сӕйрагдӕр фӕдзӕхст кӕцы у?» 37 Йесо йын дзуапп радта: «„Уарз дӕ Хицау Хуыцауы ӕппӕт зӕрдӕйӕ, ӕппӕт удӕй ӕмӕ ӕппӕт зондӕй". 38 Уый у фыццаг ӕмӕ сӕйрагдӕр фӕдзӕхст. 39 Дыккаг дӕр уый хуызӕн у: „Уарз хионы, дӕхи куыд уарзыс, афтӕ". 40 Моисейы ӕппӕт Ӕгъдауӕн ӕмӕ пехуымпарты ахуырадӕн ацы дыууӕ фӕдзӕхсты сты сӕ бындур». 41 Фарисейтӕ куы ӕрӕмбырд сты, уӕд сӕ Йесо бафарста: 42 «Цы хъуыды кӕнут Чырыстийы тыххӕй? Кӕй байзӕддаг у?» Уыдон Ын загътой: «Давиды». 43 Йесо сын загъта: «Уӕдӕ Йӕ Давид, Сыгъдӕг Удӕй разӕнгардӕй, цӕмӕн хоны Хицау? Мӕнӕ афтӕ куы дзуры: 44 „Хуыцау загъта мӕ Хицауӕн: сбад Мӕ рахиз фарс, цалынмӕ Дын Де знӕгты Дӕ къӕхты бын ӕрӕвӕрон, уӕдмӕ"? 45 Уӕдӕ Йӕ кӕд Давид Хицау хоны, уӕд Уый йӕ байзӕддаг куыд у?» 46 Ӕмӕ Йесойӕн никӕй бон уыди дзуапп раттын. Уыцы бонӕй фӕстӕмӕ Йӕм бафӕрсынмӕ йӕ ныфс ничиуал хаста.

Матфей 23

1 Уӕд Йесо дзурын райдыдта адӕмӕн ӕмӕ Йӕ ахуыргӕнинӕгтӕн: 2 «Моисейы бадӕны ӕрбадтысты динамонджытӕ ӕмӕ фарисейтӕ. 3 Ӕмӕ уын цы зӕгъынц, уый кӕнут, фӕлӕ сын сӕ хъуыддӕгтӕ ма фӕзмут, уымӕн ӕмӕ уыдон цы фӕзӕгъынц, уый сӕхӕдӕг нӕ кӕнынц. 4 Бӕттынц уӕззау, зынхӕссӕн уӕргътӕ ӕмӕ сӕ ӕвӕрынц адӕмы ӕккой, сӕхӕдӕг та сӕм сӕ ныхы кӕронӕй дӕр не 'вналынц. 5 Сӕ алы хъуыддаг дӕр адӕмы цӕстмӕ кӕнынц. Ӕфтауынц се 'вӕрӕнты уӕрхыл ӕмӕ сӕ дарӕсы коцоратыл. 6 Уарзынц минасы фынгтыл уӕле ӕмӕ синагогӕты раззаг бынӕтты бадын; 7 Уарзынц, цӕмӕй сын сахарты фӕзты адӕм кӕной арфӕтӕ ӕмӕ сӕ хоной: „Ахуыргӕнӕг! Ахуыргӕнӕг!" 8 Сымах та ахуыргӕнджытӕ ма хонӕнт, уымӕн ӕмӕ уын ис иу Ахуыргӕнӕг – Чырысти, сымах та уеппӕт дӕр ӕфсымӕртӕ стут. 9 Ӕмӕ зӕххыл уӕ фыд дӕр макӕй хонут, уымӕн ӕмӕ уын иу фыд ис – Уӕларвон Фыд. 10 Зондамонджытӕ дӕр уӕ ма хонӕнт, уымӕн ӕмӕ уын ис иу Зондамонӕг – Чырысти. 11 Уе 'хсӕн уӕлдӕр чи у, уый уын уӕд лӕггадгӕнӕг. 12 Уымӕн ӕмӕ йӕхи чи бӕрзонд кӕны, уый ӕрныллӕг уыдзӕни. Йӕхи чи ныллӕг кӕны, уый та сбӕрзонд уыдзӕни. 13 Сар уӕ сӕр, динамонджытӕ ӕмӕ фарисейтӕ, цӕстмӕхъустӕ! Адӕмӕн ӕхгӕнут Уӕларвон Паддзахадмӕ дуар; уӕхӕдӕг дӕр ӕм нӕ цӕут, ӕмӕ йӕм бацӕуын кӕй фӕнды, уыдоны дӕр нӕ уадзут. 14 [Сар уӕ сӕр, динамонджытӕ ӕмӕ фарисейтӕ, цӕстмӕхъустӕ! Сымах хӕрут идӕдзты хӕдзӕрттӕ ӕмӕ бирӕ кувут цӕстмӕ. Уый тыххӕй баййафдзыстут карз ӕфхӕрд.] 15 Сар уӕ сӕр, динамонджытӕ ӕмӕ фарисейтӕ, цӕстмӕхъустӕ! Сымах ӕрзилут денджыз ӕмӕ зӕххыл, цӕмӕй иу адӕймаджы уӕддӕр раздахат уӕ динмӕ, ӕмӕ уый уӕ къухы куы бафты, уӕд дзы скӕнут зындоны хъӕбул – уӕхицӕй дыууӕ хатты ӕвзӕрдӕр. 16 Сар уӕ сӕр, куырм фӕтӕгтӕ! Сымах дзурут: „Исчи Кувӕндонӕй куы басомы кӕна, уӕд уый ницы у, фӕлӕ Кувӕндоны сызгъӕринӕй чи басомы кӕна, уый йӕ сомы ма басӕттӕд". 17 Ӕнӕзӕндтӕ ӕмӕ куырмытӕ! Ахсджиагдӕр цы у, сызгъӕрин ӕви Кувӕндон – сызгъӕрин сыгъдӕггӕнӕг? 18 Ноджы фӕзӕгъут: „Нывондхӕссӕнӕй исчи куы басомы кӕна, уӕд уый ницы у, фӕлӕ нывондхӕссӕныл цы нывонд ис, уымӕй чи басомы кӕна, уый йӕ сомы ма басӕттӕд". 19 [Ӕдылытӕ ӕмӕ] куырмытӕ! Ахсджиагдӕр цы у, нывонд ӕви нывондхӕссӕн – нывонд сыгъдӕггӕнӕг? 20 Уӕдӕ нывондхӕссӕнӕй сомыгӕнӕг сомы кӕны нывондхӕссӕнӕй дӕр ӕмӕ йыл цы ӕвӕрд ис, ӕппӕт уыдӕттӕй дӕр. 21 Кувӕндонӕй сомыгӕнӕг сомы кӕны кувӕндонӕй, стӕй дзы Чи цӕры, Уымӕй дӕр. 22 Арвӕй сомыгӕнӕг сомы кӕны Хуыцауы бадӕнӕй ӕмӕ уыцы бадӕны Бадӕгӕй. 23 Сар уӕ сӕр, динамонджытӕ ӕмӕ фарисейтӕ, цӕстмӕхъустӕ! Моисейы Ӕгъдаумӕ гӕсгӕ суанг битъына, хъонтхора ӕмӕ зирайы дӕсӕймаг хай дӕттут, йӕ ахъаззӕгтӕ – рӕстдзинад, иннӕйы барӕвдауын ӕмӕ уырнындзинад та ницӕмӕ дарут. Сымахӕн ӕмбӕлд адӕттӕ кӕнын ӕмӕ уыдӕттӕ дӕр рохуаты нӕ ныууадзын. 24 Куырм фӕтӕгтӕ, къогъойы чи фӕрсудзы ӕмӕ теуайы чи ныхъуыры! 25 Сар уӕ сӕр, динамонджытӕ ӕмӕ фарисейтӕ, цӕстмӕхъустӕ! Сымах къус ӕмӕ тӕбӕгъ ӕддейӕ сыгъдӕг кӕнут; дзаг цӕмӕй сты, уый та уӕ къухы бафтыд, кӕрӕф ӕмӕ ӕнӕфсис кӕй стут, уый руаджы. 26 Куырм фарисей! Фыццаг уал къус ӕмӕ тӕбӕгъ ссыгъдӕг кӕн мидӕгӕй, ӕмӕ уӕд ӕддейӕ дӕр уыдзысты сыгъдӕг. 27 Сар уӕ сӕр, динамонджытӕ ӕмӕ фарисейтӕ, цӕстмӕхъустӕ! Сымах чъырӕйцагъд зӕппӕдзты хуызӕн стут – уыдон ӕддейӕ рӕсугъд зынынц, мидӕгӕй та дзаг сты мӕрдты стджытӕ ӕмӕ алы чъизитӕй. 28 Афтӕ сымах дӕр уӕ бакастӕй адӕммӕ рӕстгӕнджытӕ кӕсут, мидӕгӕй та дзаг стут цӕстмӕми ӕмӕ тӕригъӕдӕй. 29 Сар уӕ сӕр, динамонджытӕ ӕмӕ фарисейтӕ, цӕстмӕхъустӕ! Пехуымпартӕн аразут зӕппӕдзтӕ, рӕсугъд кӕнут рӕстыты цыртытӕ, 30 Ӕмӕ фӕзӕгъут: „Нӕ фыдӕлты рӕстӕг куы цардаиккам, уӕд пехуымпарты туг ныккалджытимӕ ӕмдзӕхдон нӕ уыдаиккам". 31 Афтӕмӕй ӕвдисӕн лӕуут уӕхи ныхмӕ, пехуымпарты марджыты байзӕддаг кӕй стут, уый тыххӕй. 32 Уӕдӕ бафтаут уӕ фыдӕлты азымыл. 33 Кӕлмытӕ ӕмӕ калмы цот! Куыд фервӕздзыстут зындонмӕ уӕ ныппарыны тӕрхонӕй? 34 Уый тыххӕй уӕм мӕнӕ Ӕз ӕрвитын пехуымпарты, зондджынты ӕмӕ динамонджыты. Иуты дзы амардзыстут ӕмӕ байтындздзыстут, иннӕты нӕмдзыстут ехсӕй уӕ синагогӕты ӕмӕ сӕ сурдзыстут иу сахарӕй иннӕ сахармӕ. 35 Уымӕ гӕсгӕ уын, зӕххыл цы рӕстаг туг фӕкалд, уый иууылдӕр фидинаг у: рӕстгӕнӕг Авелы тугӕй, Кувӕндонӕй нывондхӕссӕны ӕхсӕн кӕй амардтат, уыцы Варахийы фырт Захарийы туджы онг. 36 Ӕцӕг уын зӕгъын, ӕппӕт уыцы фыдракӕндты тыххӕй ӕфхӕрд баййафдзӕн ацы фӕлтӕр. 37 Иерусалим, Иерусалим, пехуымпарты марӕг ӕмӕ дӕумӕ ӕрвыстыты дуртӕй цӕгъдӕг! Цал хатты Мӕ фӕндыди, маргъ йӕ лӕппынты йӕ базырты бын куыд бакӕны, афтӕ дӕ хъӕбулты ӕрӕмбырд кӕнын, фӕлӕ сымах нӕ бафӕндыди! 38 Ныр уын уӕ хӕдзар уагъдӕуы ӕнӕхицау ӕмӕ афтидӕй. 39 Уымӕн ӕмӕ уын зӕгъын, цалынмӕ афтӕ зӕгъат: „Арфӕгонд уӕд Хуыцауы номӕй Ӕрцӕуӕг!", уӕдмӕ Мӕ нал фендзыстут».

Матфей 24

1 Йесо Кувӕндонӕй куы рацӕйцыд, уӕд Ӕм бацыдысты Йӕ ахуыргӕнинӕгтӕ, цӕмӕй Йын фенын кӕной Кувӕндоны бӕстыхӕйттӕ. 2 Йесо сын загъта: «Уынут ӕппӕт уыдӕттӕ? Ӕцӕг уын зӕгъын: афтӕ ныппырх уыдзысты, ӕмӕ дзы ам дур дурыл нал баззайдзӕн». 3 Йесо Елеоны хохыл куы бадт, уӕд Ӕм Йӕ ахуыргӕнинӕгтӕ хибарӕй бацыдысты ӕмӕ Йӕ бафарстой: «Зӕгъ-ма нын, уый кӕд уыдзӕн ӕмӕ цӕмӕй бӕрӕг уыдзӕни Де 'рцыды ӕмӕ дунейы фӕуды афон?» 4 Йесо сын дзуапп радта: «Уӕхи хизут, цӕмӕй уӕ мачи фӕсайа. 5 Уымӕн ӕмӕ бирӕтӕ ӕрцӕудзысты ӕмӕ дзурдзысты: „Ӕз Чырысти дӕн", ӕмӕ бирӕты фӕсайдзысты. 6 Ноджы ма фехъусдзыстут ӕввахс ӕмӕ дард хӕстыты тыххӕй. Ма тӕрсут – ӕппӕт уыдӕттӕн ӕнӕрцӕугӕ нӕй, фӕлӕ уый кӕрон нӕма уыдзӕни. 7 Сыстдзысты адӕм адӕмы ныхмӕ ӕмӕ паддзахад паддзахады ныхмӕ, ранӕй-рӕтты скӕндзӕни стонг рӕстӕг, уыдзӕни зӕххӕнкъуыстытӕ. 8 Ӕппӕт уыдӕттӕ арӕг сылгоймаджы хъизӕмӕртты райдайӕнау уыдзысты. 9 Уӕд уӕ ӕгъатырӕй ӕфхӕрдзысты ӕмӕ уӕ мардзысты, ӕмӕ Мӕ номы тыххӕй ӕппӕт адӕмтӕн уыдзыстут ӕнӕуынон. 10 Уӕд бирӕтӕ ныууадздзысты уырнындзинад, кӕрӕдзийыл рацӕудзысты гадзрахатӕй ӕмӕ кӕрӕдзийӕ уындзысты се сӕфт. 11 Фӕзындзӕни бирӕ мӕнгпехуымпартӕ ӕмӕ бирӕты асайдзысты. 12 Ӕмӕ тӕригъӕды сарӕхы аххосӕй бирӕтӕн бамынӕг уыдзӕни сӕ уарзондзинад. 13 Фӕлӕ кӕронмӕ чи бафӕраза, уый фервӕздзӕн. 14 Ӕмӕ ацы фарны уац фӕхӕццӕ уыдзӕни дунейы ӕппӕт кӕрӕттӕм, ӕппӕт адӕмтӕ дӕр фехъусдзысты Уӕларвон Паддзахады тыххӕй, ӕмӕ уӕд ӕрцӕудзӕни кӕрон. 15 Уӕдӕ Даниил-пехуымпары дзыхӕй Хуыцау куыд загъта, афтӕ Сыгъдӕг Бынаты „ӕлгъаг гӕныстон" куы фенат, – чиныгкӕсӕг ӕй бамбарӕд, – 16 Уӕд Иудейӕйы чи уа, уыдон лидзӕнт хӕхтӕм. 17 Уӕлхӕдзар чи уа, уый йӕ хӕдзармӕ ма ӕрхизӕд уырдыгӕй исты рахӕссынмӕ. 18 Быдыры чи уа, уый дӕр ма раздӕхӕд йӕ дарӕс рахӕссынмӕ. 19 Уӕд додоййаг уыдзысты сывӕрджынтӕ ӕмӕ дзидзидарджытӕ. 20 Кувут, цӕмӕй уӕ ма бахъӕуа зымӕджы кӕнӕ сабаты лидзын. 21 Уымӕн ӕмӕ уӕд уыдзӕни, Хуыцау дуне куы сфӕлдыста, уӕдӕй нырмӕ чи нӕма уыд ӕмӕ нал уыдзӕн, ахӕм стыр бӕллӕх. 22 Ӕмӕ уыцы бонтӕ Хуыцау куы нӕ фӕцыбыр кодтаид, уӕд иу адӕймаг дӕр нӕ фервӕзтаид. Фӕлӕ ӕвзӕрстыты сӕраппонд Хуыцау уыцы бонтӕ фӕцыбыр кӕндзӕн. 23 Уӕд уын исчи куы зӕгъа: „Мӕнӕ ам ис Чырысти", кӕнӕ: „Уым ис", – ма уӕ бауырнӕд. 24 Уымӕн ӕмӕ фӕзындзысты мӕнгчырыститӕ ӕмӕ мӕнгпехуымпартӕ, равдисдзысты стыр ӕвдисӕйнӕгтӕ ӕмӕ диссӕгтӕ, цӕмӕй, гӕнӕн ӕмӕ амалӕй, асайой ӕвзӕрстыты дӕр. 25 Ныр уын уыдӕтты тыххӕй загътон рагацау. 26 Уӕдӕ уын куы зӕгъой: „Чырысти ӕдзӕрӕг ран ис", – ма ацӕут, кӕнӕ: „Мӕнӕ рӕбинаг уаты ис Уый", – ма уӕ бауырнӕд. 27 Уымӕн ӕмӕ, ӕрвӕрттывд скӕсӕнӕй суанг ныгуылӕнмӕ куыд фӕзыны, афтӕ уыдзӕн Адӕймаджы Фырты ӕрцыд дӕр. 28 Холы кӕм уа, уым ӕрӕмбырд уыдзысты цӕргӕстӕ. 29 Уыцы бӕллӕхты хӕдуӕлвӕд баталынг уыдзӕни хур, мӕй нал ратдзӕн йӕ рухс, стъалытӕ ӕрхаудзысты арвӕй, ӕмӕ уӕларвон тыхтӕ нынкъуысдзысты. 30 Уӕд арвыл фӕзындзӕн Адӕймаджы Фырты ӕвдисӕйнаг. Скӕудзысты ӕппӕт зӕххон адӕмтӕ ӕмӕ Адӕймаджы Фырты фендзысты стыр тых ӕмӕ намысимӕ уӕларвон ӕврӕгътыл ӕрцӕйцӕугӕ. 31 Сыкъауадындз хъӕрӕй ныууасдзӕн, ӕмӕ Адӕймаджы Фырт рарвитдзӕн Йӕ зӕдты, ӕмӕ Йын Йе 'взӕрстыты ӕрӕмбырд кӕндзысты алы рӕттӕй – арвы иу кӕронӕй иннӕ кӕронмӕ. 32 Райсут цӕвиттонӕн легъуибӕлас: йӕ къалиутӕ куы сфӕлмӕн вӕййынц ӕмӕ сыфтӕр куы рафтауынц, уӕд фӕзонут, сӕрд кӕй ӕрӕввахс. 33 Уӕдӕ сымах ӕппӕт уыдӕттӕ куы фенат, уӕд-иу зонут, афон кӕй ӕрӕввахс, ныридӕгӕн къӕсӕрыл кӕй ис, уый. 34 Ӕцӕг уын зӕгъын: ацы фӕлтӕр нӕма аивгъуыйдзӕни, цалынмӕ ӕппӕт уыдӕттӕ ӕрцӕуой. 35 Арв ӕмӕ зӕхх нал уыдзысты, Мӕ ныхӕстӕ та мыггагмӕ дӕр уыдзысты сӕ тыхы. 36 Уыцы бон ӕмӕ сахаты тыххӕй ничи зоны: нӕдӕр уӕларвон зӕдтӕ, нӕдӕр Фырт – ӕрмӕст ӕй Фыд зоны. 37 Фӕлӕ Нойы бонты куыд уыдис, афтӕ уыдзӕн Адӕймаджы Фырты ӕрцыды рӕстӕг дӕр. 38 Цалынмӕ Ной наумӕ нӕ бацыд ӕмӕ доны хъаймӕт нӕ райдыдта, уӕдмӕ хордтой ӕмӕ нуӕзтой, хастой устытӕ ӕмӕ цыдысты моймӕ. 39 Ӕмӕ ӕнхъӕл нӕ уыдысты, цалынмӕ доны хъаймӕт ӕрцыд ӕмӕ сеппӕты дӕр фесӕфта, уӕдмӕ. Адӕймаджы Фырты ӕрцыд дӕр афтӕ уыдзӕн. 40 Уӕд дыууӕ лӕджы уыдзысты быдыры – сӕ иу ист ӕрцӕудзӕн, иннӕ та баззайдзӕн. 41 Дыууӕ сылгоймаджы ӕрмгуыройыл сдзысты хор – сӕ иу ист ӕрцӕудзӕн, иннӕ та баззайдзӕн. 42 Уӕдӕ къӕрцхъус ут, уымӕн ӕмӕ уӕ Хицау кӕд ӕрцӕудзӕн, уый нӕ зонут. 43 Сымахӕн зындгонд у: хуыснӕг кӕцы сахатыл ӕрцӕудзӕн, уый хӕдзары хицау куы зыдтаид, уӕд уыдаид къӕрцхъус ӕмӕ йӕ хӕдзар фӕкъахын нӕ бауагътаид. 44 Уымӕ гӕсгӕ сымах дӕр цӕттӕ ут, уымӕн ӕмӕ ӕнхъӕл кӕд нӕ уат, уӕд ӕрцӕудзӕн Адӕймаджы Фырт. 45 Чи у иузӕрдион ӕмӕ зондджын цагъар? Хӕринаг сын афоныл дӕттыны тыххӕй хӕдзары хицау йӕ цагъартӕн хистӕрӕй кӕй сӕвӕрдзӕн? 46 Тӕхудиаг уыдзӕн уыцы цагъар, йӕ хицау куы ӕрцӕуа, уӕд афтӕмӕй кӕй ӕрӕййафа. 47 Ӕцӕг уын зӕгъын, йеппӕт исбон бакӕндзӕн уый бар. 48 Фӕлӕ уыцы цагъар фыдзӕрдӕ куы уа ӕмӕ хинымӕр афтӕ куы зӕгъа: „Мӕ хицау рӕхджы не 'рцӕудзӕн", 49 Ӕмӕ куы байдайа йе 'мбӕлтты нӕмын, расыггӕнджытимӕ хӕрын ӕмӕ нуазын, 50 Уӕд уыцы цагъарӕн йӕ хицау ӕрцӕудзӕн, кӕд ӕм не 'нхъӕлмӕ кӕса, уыцы бон, ӕмӕ ӕнхъӕл кӕд нӕ уа, уыцы сахат, 51 Ӕгъатырӕй йӕ бафхӕрдзӕн ӕмӕ йын цӕстмӕхъусты хал ахӕрын кӕндзӕн. Уым уыдзӕни кӕуын ӕмӕ дӕндӕгты хъыс-хъыс.

Матфей 25

1 Уӕд Уӕларвон Паддзахад уыдзӕн, сӕ цырӕгътӕ семӕ чи рахаста ӕмӕ сиахсаджы размӕ чи рацыди, уыцы дӕс чызджы хуызӕн. 2 Уыдонӕй фондз зондджынтӕ уыдысты, фондз та – ӕнӕзонд. 3 Ӕнӕзонд чызджытӕ сӕ цырӕгътӕ бӕргӕ рахастой, фӕлӕ зети семӕ нӕ райстой. 4 Зондджынтӕ та цырӕгътимӕ сӕ дурынты рахастой зети дӕр. 5 Ӕмӕ сиахсаг куы афӕстиат, уӕд чызджыты хуыссӕг ӕрцахста ӕмӕ сеппӕт дӕр бафынӕй сты. 6 Фӕлӕ ӕмбисӕхсӕв райхъуыст хъӕр: „Сиахсаг ӕрбацӕуы, йӕ размӕ рацӕут". 7 Уӕд уыцы чызджытӕ сеппӕт дӕр сыстадысты, ӕрцӕттӕ кодтой сӕ цырӕгътӕ. 8 Ӕнӕзонд чызджытӕ зондджынтӕн загътой: „Раттут нын уӕ зетийӕ, кӕннод нӕ цырӕгътӕ фӕхуыссынц". 9 Зондджынтӕ сын дзуапп радтой: „Цӕмӕй мах дӕр ӕмӕ сымах дӕр зетийӕ ма схъуаг уӕм, уый тыххӕй фӕлтау ацӕут уӕйгӕнджытӕм ӕмӕ балхӕнут уӕхицӕн". 10 Уыдон ӕлхӕнынмӕ куы ацыдысты, уӕд ӕрхӕццӕ сиахсаг, цӕттӕ чызджытӕ йемӕ бацыдысты чындзӕхсӕвмӕ, ӕмӕ дуар сӕхгӕдӕуыд. 11 Уӕдмӕ ӕрцыдысты иннӕ чызджытӕ дӕр ӕмӕ загътой: „Хицау, Хицау, дуар нын бакӕн!" 12 Фӕлӕ сын уый дзуапп радта: „Ӕцӕг уын зӕгъын: нӕ уӕ зонын". 13 Уӕдӕ къӕрцхъус ут, уымӕн ӕмӕ нӕ зонут [Адӕймаджы Фырт кӕд ӕрцӕудзӕни,] нӕдӕр уыцы бон, нӕдӕр уыцы сахат. 14 Цӕвиттон, иу лӕг балцы ацӕуыны размӕ басидт йӕ цагъартӕм ӕмӕ сын бафӕдзӕхста йӕ исбон. 15 Сӕ иуӕн радта фондз таланты, иннӕмӕн – дыууӕ, ӕртыккагӕн – иу, алкӕмӕн дӕр – йӕ арӕхст- дзинадмӕ гӕсгӕ. Ӕмӕ ацыди. 16 Фондз таланты чи райста, уый уайтӕккӕ ацыди, спайда сӕ кодта ӕмӕ ма ноджыдӕр бакуыста фондз таланты. 17 Дыууӕ таланты чи райста, уый дӕр бакуыста дыууӕ таланты. 18 Иу талант чи райста, уый та ацыди, скъахта уӕрм ӕмӕ дзы йӕ хицауы ӕвзист баныгӕдта. 19 Бирӕ рӕстӕджы фӕстӕ ӕрцыд уыцы цагъарты хицау ӕмӕ сӕ дзуапп ӕрдомдта. 20 Фондз таланты чи райста, уый бацыди, бахаста йӕм иннӕ фондз таланты дӕр ӕмӕ загъта: „Хицау, ды мын радтай фондз таланты, ӕз сӕ спайда кодтон ӕмӕ ма сӕм мӕнӕ бафтыдтон фондз таланты". 21 Йӕ хицау ын загъта: „Хорз, мӕ дзӕбӕх ӕмӕ иузӕрдион цагъар! Гыццыл хъуыддаджы уыдтӕ иузӕрдион, стыр хъуыддаг дын бабар кӕндзынӕн. Рацу мидӕмӕ ӕмӕ цин кӕн дӕ хицауимӕ". 22 Дыууӕ таланты чи райста, уый дӕр ӕм бацыд ӕмӕ йын загъта: „Хицау, ды мын радтай дыууӕ таланты, ӕз сӕ спайда кодтон ӕмӕ ма сӕм мӕнӕ бафтыдтон дыууӕ таланты". 23 Йӕ хицау ын загъта: „Хорз, мӕ дзӕбӕх ӕмӕ иузӕрдион цагъар! Гыццыл хъуыддаджы уыдтӕ иузӕрдион, стыр хъуыддаг дын бабар кӕндзынӕн. Рацу мидӕмӕ ӕмӕ цин кӕн дӕ хицауимӕ". 24 Иу талант чи райста, уый дӕр бацыд ӕмӕ йын загъта: „Хицау, ӕз зыдтон, ды карз лӕг кӕй дӕ, уый. Кӕм нӕ байтыдтай, уым кӕрдыс, кӕм нӕ байдзӕгътай, уым ӕмбырд кӕныс. 25 Ӕмӕ фӕтарстӕн, ацыдтӕн ӕмӕ дын дӕ талант баныгӕдтон зӕххы. Мӕнӕ айс дӕхион". 26 Йӕ хицау ын загъта: „Ӕвзӕр ӕмӕ зивӕггӕнаг цагъар! Кӕм нӕ байтыдтон, уым кӕй кӕрдын, ӕмӕ кӕм нӕ байдзӕгътон, уым кӕй ӕмбырд кӕнын, кӕд уый зыдтай, 27 Уӕд дын ӕмбӕлди ме 'взист сӕудӕджертӕм раттын, куы ӕрцыдтӕн, уӕд ӕй ӕфтиагимӕ куыд райстаин, афтӕ. 28 Уӕдӕ йын райсут йӕ талант ӕмӕ йӕ раттут, дӕс таланты кӕмӕ ис, уымӕн. 29 Уымӕн ӕмӕ кӕмӕ ис, уымӕн рардӕуыдзӕн ӕмӕ йӕм уыдзӕни бирӕ; кӕмӕ нӕй, уымӕй та ист ӕрцӕудзӕн, цы йӕм ис, уый дӕр. 30 Ницӕйаг цагъары та аппарут ӕддӕмӕ, талынгмӕ: уым уыдзӕни кӕуын ӕмӕ дӕндӕгты хъыс-хъыс"». [Уыцы ныхӕсты фӕстӕ Йесо хъӕрӕй загъта: «Хъустӕ кӕуыл ис, уый хъусӕд!»] 31 «Адӕймаджы Фырт ӕппӕт зӕдтимӕ намысджынӕй куы ӕрцӕуа, уӕд сбаддзӕн Йӕ намысджын бынаты. 32 Йӕ разы ӕрӕмбырд уыдзысты ӕппӕт адӕмтӕ ӕмӕ иуты ахицӕн кӕндзӕн иннӕтӕй, фыййау фысты сӕгътӕй куыд ахицӕн кӕна, афтӕ. 33 Фысты ӕрлӕууын кӕндзӕн Йӕ рахиз фарс, сӕгъты та – Йӕ галиу фарс. 34 Уӕд Йӕ рахиз фарс чи ис, уыдонӕн Паддзах зӕгъдзӕн: „Ӕрцӕут, Мӕ Фыды арфӕйӕ хайджынтӕ, ӕмӕ райсут, дуне сфӕлдисынӕй нырмӕ уын цӕттӕгонд цы Паддзахад у, уый. 35 Уымӕн ӕмӕ уыдтӕн стонг, ӕмӕ Мӕ бафсӕстат. Дойны Мын уыд, ӕмӕ Мын радтат дон. Бӕлццон уыдтӕн, ӕмӕ Мӕ суазӕг кодтат. 36 Уыдтӕн бӕгънӕг, ӕмӕ Мыл скодтат дарӕс. Уыдтӕн рынчын, ӕмӕ Мыл батыхстыстут. Уыдтӕн ахӕстоны, ӕмӕ Мӕм ӕрцыдыстут". 37 Уӕд Ын рӕстытӕ зӕгъдзысты: „Хицау, кӕд Дӕ федтам стонгӕй ӕмӕ Дӕ кӕд бафсӕстам? Кӕнӕ Дӕ кӕд федтам дойныйӕ, ӕмӕ Дын дон кӕд радтам? 38 Кӕд Дӕ федтам бӕлццонӕй, ӕмӕ Дӕ кӕд суазӕг кодтам? Кӕнӕ Дӕ кӕд федтам бӕгънӕгӕй, ӕмӕ Дыл дарӕс кӕд скодтам? 39 Кӕд Дӕ федтам рынчынӕй, кӕнӕ ахӕстоны, ӕмӕ Дӕм кӕд ӕрцыдыстӕм?" 40 Ӕмӕ сын Паддзах дзуапп ратдзӕн: „Ӕцӕг уын зӕгъын: кӕд уый Мӕ ацы кӕстӕр ӕфсымӕртӕй иуӕн бакодтат, уӕд ӕй Мӕнӕн бакодтат". 41 Уӕд Йӕ галиу фарс чи ис, уыдонӕн та зӕгъдзӕн: „Ацӕут Мӕнӕй, ӕлгъыстытӕ, хӕйрӕгӕн ӕмӕ йӕ зӕдтӕн цӕттӕгонд цы мыггагмӕйы арт ис, уырдӕм. 42 Уымӕн ӕмӕ уыдтӕн стонг, ӕмӕ Мын хӕринаг нӕ радтат. Дойны Мын уыд, ӕмӕ Мын дон нӕ радтат. 43 Уыдтӕн бӕлццон, ӕмӕ Мӕ не суазӕг кодтат. Уыдтӕн бӕгънӕг ӕмӕ Мыл дарӕс не скодтат. Уыдтӕн рынчын ӕмӕ ахӕстоны, ӕмӕ Мыл нӕ батыхстыстут". 44 Уӕд Ын уыдон дӕр зӕгъдзысты: „Хуыцау, кӕд Дӕ федтам стонгӕй, кӕнӕ дойныйӕ, кӕнӕ бӕлццонӕй, кӕнӕ бӕгънӕгӕй, кӕнӕ рынчынӕй, кӕнӕ ахӕстоны ӕмӕ Дын кӕд нӕ балӕггад кодтам?" 45 Ӕмӕ сын Паддзах дзуапп ратдзӕн: „Ӕцӕг уын зӕгъын: кӕд уый ацы кӕстӕртӕй иуӕн нӕ бакодтат, уӕд ӕй Мӕнӕн нӕ бакодтат". 46 Ӕмӕ уыдон ацӕудзысты мыггагмӕ удхар кӕнынмӕ, рӕстытӕ та – мыггагмӕйы цардмӕ».

Матфей 26

1 Йесо Йӕ ныхас куы фӕци, уӕд Йӕ ахуыргӕнинӕгтӕн загъта: 2 «Сымах зонут: дыууӕ боны фӕстӕ уыдзӕни Куадзӕн, ӕмӕ Адӕймаджы Фырт лӕвӕрд ӕрцӕудзӕни байтындзынмӕ». 3 Уыцы рӕстӕг алчертӕ ӕмӕ адӕмы хистӕртӕ ӕрӕмбырд сты алчер Каиафӕйы галуанмӕ, 4 Ӕмӕ рахастой Йесойы хинӕй ӕрцахсыны ӕмӕ Йӕ амарыны уынаффӕ. 5 Фӕлӕ дзырдтой: «Ӕрмӕст бӕрӕгбоны нӕ, науӕд адӕм сызмӕнтдзысты». 6 Йесо уыди Вифанийы, хъотырджын Симоны хӕдзары. 7 Уым Ӕм ӕрбацыд иу сылгоймаг зынаргъ хӕрздӕфгӕнӕнӕй дзаг дурынимӕ, ӕмӕ Йесо фынгыл куы бадт, уӕд Ын хӕрздӕфгӕнӕн райдыдта Йӕ сӕрыл уадзын. 8 Йӕ ахуыргӕнинӕгтӕ уый куы федтой, уӕд смӕсты сты ӕмӕ дзырдтой: «Цӕмӕн хъуыди уыйбӕрц хардз кӕнын? 9 Ацы хӕрздӕфгӕнӕнӕн уыди стыр аргъыл ауӕйгӕнӕн ӕмӕ ӕхца мӕгуыртӕн раттӕн». 10 Йесо уый бамбӕрста ӕмӕ сын загъта: «Цӕмӕн къӕмдзӕстыг кӕнут сылгоймаджы? Уый Мын хорз хъуыддаг сарӕзта. 11 Мӕгуыртӕ ӕдзух уӕ фарсмӕ сты, Ӕз та ӕдзух уемӕ нӕ уыдзынӕн. 12 Ацы хӕрздӕфгӕнӕн Мӕ буарыл кӕй ауагъта, уымӕй Мӕ ӕрцӕттӕ кодта ныгӕнынмӕ. 13 Ӕцӕг уын зӕгъын: ацы фарны уац ӕппӕт дунейы хъуыстгонд кӕмдӕриддӕр уа, уым ацы сылгоймаджы ӕрымысынӕн загъдӕуыдзӕн, цы сарӕзта, уый тыххӕй». 14 Уӕд дыууадӕс ахуыргӕнинагӕй иу, Иудӕ Искариот, ацыди алчертӕм 15 Ӕмӕ сын загъта: «Цы мын ратдзыстут, уӕ къухы уын Ӕй куы бафтын кӕнон, уӕд?» Уыдон ын радтой дӕс ӕмӕ ссӕдз ӕвзист ӕхцайы. 16 Ӕмӕ уӕдӕй фӕстӕмӕ Иудӕ агуырдта Йесойы сын сӕ къухтӕм раттыны фадат. 17 Донгонд дзулты бӕрӕгбоны фыццаг бон Йесомӕ бацыдысты Йӕ ахуыргӕнинӕгтӕ ӕмӕ Йын загътой: «Куыд Дӕ фӕнды, кӕм Дын ӕрӕвӕрӕм Куадзӕны фынг?» 18 Уый сын загъта: «Ацӕут сахармӕ, иу адӕймагмӕ, ӕмӕ йын зӕгъут: „Ахуыргӕнӕг зӕгъы: Мӕ рӕстӕг хӕстӕг у. Куадзӕн Мӕ ахуыргӕнинӕгтимӕ дӕ хӕдзары бӕрӕг кӕндзынӕн"». 19 Ахуыргӕнинӕгтӕ бакодтой, Йесо сын куыд загъта, афтӕ, ӕмӕ ӕрӕвӕрдтой Куадзӕны фынг. 20 Куы баизӕр, уӕд Йесо ӕрбадти фынгыл Йӕ дыууадӕс ахуыргӕнинагимӕ. 21 Ӕмӕ хӕргӕ куы кодтой, уӕд Йесо загъта: «Ӕцӕг уын зӕгъын, уӕ иу Мыл рацӕудзӕни гадзрахатӕй». 22 Уыдон тынг ӕрӕнкъард сты ӕмӕ Йын радыгай райдыдтой дзурын: «Уый ӕз уыдзынӕн, мыййаг, Хицау?» 23 Йесо сын загъта: «Цӕхдоны Мемӕ йӕ къӕбӕр чи стылдта, уый Мыл рацӕудзӕни гадзрахатӕй. 24 Ӕниу, Адӕймаджы Фырт фӕивгъуыйы, Сыгъдӕг Фыст Дзы куыд зӕгъы, афтӕ. Фӕлӕ сар йӕ сӕр, Адӕймаджы Фыртыл гадзрахатӕй цы адӕймаг рацӕуа, уымӕн. Уыцы адӕймаг фӕлтау куы нӕ райгуырдаид, уӕд ын хуыздӕр уыдаид». 25 Уӕд Йӕ уӕйгӕнӕг Иудӕ дӕр загъта: «Уый ӕз уыдзынӕн, мыййаг, Равви?» Йесо йын дзуапп радта: «Дӕхӕдӕг ӕй куы зӕгъыс». 26 Хӕргӕ куы кодтой, уӕд Йесо райста дзул, арфӕ ракодта, асаста йӕ, радта йӕ ахуыргӕнинӕгтӕн ӕмӕ загъта: «Айсут ӕмӕ хӕрут – уый Мӕ Буар у». 27 Стӕй райста сӕны кӕхц, арфӕ ракодта, радта сын ӕй ӕмӕ загъта: «Уеппӕт дӕр дзы баназут, 28 Уымӕн ӕмӕ уый Мӕ Туг у – уымӕй фидаргонд цӕуы ног фидыд, ӕмӕ акӕлдзӕни бирӕтӕн сӕ тӕригъӕдтӕ ныббарыны сӕраппонд. 29 Зӕгъын уын, нырӕй фӕстӕмӕ нал баназдзынӕн ацы сӕнӕфсиры сӕнӕй, цалынмӕ Мӕ Фыды Паддзахады уемӕ ног сӕн баназон, уӕдмӕ». 30 Стӕй азарыдысты арфӕйы зарӕг ӕмӕ ацыдысты Елеоны хохмӕ. 31 Уӕд сын Йесо загъта: «Ахсӕв Мӕ уеппӕт дӕр ныууадздзыстут, уымӕн ӕмӕ Сыгъдӕг Фыст зӕгъы: „Амардзынӕн фыййауы, ӕмӕ ныххӕлиу уыдзӕни фысты дзуг". 32 Фӕлӕ Мӕ райгасы фӕстӕ уӕ разӕй ацӕудзынӕн Галилеймӕ». 33 Петр афтӕ бакодта: «Сеппӕт дӕр Дӕ куы ныууадзой, уӕддӕр Дӕ ӕз никуы ныууадздзынӕн». 34 Йесо йын загъта: «Ӕцӕг дын зӕгъын, ахсӕв уасӕг нӕма ныууасдзӕн, афтӕ Мыл ӕртӕ хатты атигъ кӕндзынӕ дӕхи». 35 Петр Ын загъта: «Демӕ мӕ амӕлын куы бахъӕуа, уӕддӕр Дыл мӕхи нӕ атигъ кӕндзынӕн». Афтӕ дзырдтой иннӕ ахуыргӕнинӕгтӕ дӕр. 36 Уый фӕстӕ Йесо ахуыргӕнинӕгтимӕ ӕрцыди, Гефсимани чи хуыйны, уыцы бынатмӕ, ӕмӕ сын загъта: «Цалынмӕ ацӕуон ӕмӕ бакувон, уӕдмӕ уал ам абадут». 37 Йемӕ ахуыдта Петры, стӕй Зеведейы дыууӕ фырты, ӕмӕ райдыдта хъынцъым ӕмӕ ӕрхӕндӕг кӕнын. 38 Ӕмӕ сын загъта: «Мӕ уд мӕлӕтон хъынцъым кӕны; фӕлӕуут ам Мӕ фарсмӕ, ма-иу бафынӕй ут». 39 Иучысыл ӕддӕдӕр рацыд, зӕххыл дӕлгоммӕ ӕрхауд ӕмӕ куывта: «Мӕ Фыд, кӕд гӕнӕн ис, уӕд Мӕ ацы хъизӕмӕртты кӕхцӕй бахиз. Ӕниу, Мӕн куыд фӕнды, афтӕ нӕ, фӕлӕ Дӕу куыд фӕнды, афтӕ фӕуӕд». 40 Йесо бацыд Йӕ ахуыргӕнинӕгтӕм, ӕмӕ сӕ фынӕйӕ куы баййӕфта, уӕд Петрӕн загъта: «Ау, ӕнӕ фынӕйӕ иу сахат Мемӕ нӕ бафӕрӕзтат? 41 Ма ныффынӕй ут ӕмӕ кувут, цӕмӕй фӕлварӕны ма бахауат. Уд цӕрдӕг у, буар та – ӕдых». 42 Ногӕй та фӕхибар ӕмӕ куывта: «Мӕ Фыд, кӕд Мын ацы хъизӕмӕртты кӕхцӕн ӕнӕ баназгӕ нӕй, уӕд Дӕу куыд фӕнды, афтӕ фӕуӕд». 43 Бацыди сӕм ӕмӕ та сӕ баййӕфта фынӕйӕ, уымӕн ӕмӕ сӕ цӕстытӕ ӕруӕззау сты. 44 Ӕмӕ та сӕ ныууагъта, фӕхибар ӕмӕ бакуывта ӕртыккаг хатт, уымӕй размӕ куыд куывта, афтӕ. 45 Уӕд бацыд Йӕ ахуыргӕнинӕгтӕм ӕмӕ сын загъта: «Ныр дӕр ма фынӕй кӕнут ӕмӕ уӕ фӕллад уадзут? Мӕнӕ ӕрцыди рӕстӕг, ӕмӕ Адӕймаджы Фырт лӕвӕрд цӕуы тӕригъӕдджынты къухтӕм. 46 Сыстут ӕмӕ цӕуӕм. Мӕнӕ ӕрбаввахс и Мӕ уӕйгӕнӕг». 47 Йесо Йӕ ныхас нӕма фӕци, афтӕ ӕрбацыд Иудӕ, дыууадӕс ахуыргӕнинагӕй иу. Алчертӕ ӕмӕ йын адӕмы хистӕртӕ йемӕ рарвыстой бирӕ адӕм кӕрдтӕ ӕмӕ хъилтимӕ. 48 Йесойы уӕйгӕнӕг сын радта ахӕм нысан: «Кӕмӕн аба кӕнон, Уый у, ӕмӕ Йӕ ӕрцахсут». 49 Ӕмӕ уайтӕккӕ бацыд Йесомӕ ӕмӕ Йын загъта: «Дзӕбӕх у, Равви!» Ӕмӕ Йын аба кодта. 50 Йесо йын загъта: «Хӕлар, цӕй тыххӕй ӕрбацыдтӕ?» Уӕд бацыдысты Йесомӕ, фӕлӕбурдтой Йӕм ӕмӕ Йӕ ӕрцахстой. 51 Йесоимӕ чи уыд, уыдонӕй иу фелвӕста йӕ кард, ныццавта дзы алчеры цагъары ӕмӕ йын йӕ хъус ахауын кодта. 52 Уӕд ын Йесо загъта: «Нывӕр дӕ кард йӕ кӕрддзӕмы, уымӕн ӕмӕ кард чи сиса, уыдон сеппӕт дӕр кардӕй бабын уыдзысты. 53 Ӕви афтӕ ӕнхъӕл дӕ, ӕмӕ ныртӕккӕ Мӕ Фыдӕй куы ракурин, уӕд Мын Уый дыууадӕс легионӕй фылдӕр зӕдтӕ нӕ рарвитид? 54 Уӕдӕ куыд сӕххӕст уыдзӕн, ӕппӕт уыдӕтты ӕрцыды тыххӕй Сыгъдӕг Фыст цы зӕгъы, уый?» 55 Уӕд Йесо адӕмӕн загъта: «Цыма абырӕджы ахсут, уыйау Ме 'рцахсынмӕ кӕрдтӕ ӕмӕ хъилтимӕ куы рацыдыстут. Ӕз ӕрвылбон Кувӕндоны [уемӕ] бадтӕн, ахуыр кодтон адӕмы, ӕмӕ Мӕ нӕ ахстат. 56 Ӕппӕт уыдӕттӕ та уымӕн цӕуынц, цӕмӕй сӕххӕст уа, пехуымпартӕ цы ныффыстой, уый». Уӕд Ӕй ахуыргӕнинӕгтӕ сеппӕт дӕр ныууагътой ӕмӕ фӕлыгъдысты. 57 Йесойы чи ӕрцахста, уыдон Ӕй акодтой алчер Каиафӕмӕ. Уым ӕрӕмбырд сты динамонджытӕ ӕмӕ адӕмы хистӕртӕ. 58 Петр дӕрддзӕф цыди Йӕ фӕдыл ӕмӕ бацыд алчеры кӕртмӕ. Уым ӕрбадти хъахъхъӕнджытимӕ, цӕмӕй фена, хъуыддаг цӕуыл ахицӕн уыдзӕн, уый. 59 Алчертӕ ӕмӕ ӕппӕт синедрион Йесойы ныхмӕ агуырдтой мӕнг ӕвдисӕйнӕгтӕ, цӕмӕй Йын рахӕссой амарыны тӕрхон, 60 Фӕлӕ не ссардтой, кӕд бирӕ мӕнгӕвдисӕнтӕ ӕрбацыд, уӕддӕр. Ӕппынфӕстаг, ӕрбацыди дыууӕ мӕнгӕвдисӕны 61 Ӕмӕ загътой: «Уый дзырдта: „Мӕ бон у Хуыцауы Кувӕндон фехалын ӕмӕ йӕ ӕртӕ бонмӕ саразын"». 62 Уӕд алчер сыстад ӕмӕ Йесойӕн загъта: «Дӕ ныхмӕ Дын цы ӕвдисӕнтӕ хӕссынц, уыдонӕн ницы дзуапп дӕттыс?» 63 Йесо ныхъхъус. Алчер Ын загъта: «Ард бахӕр цардӕгас Хуыцауы раз, раст нын кӕй зӕгъдзынӕ, уый тыххӕй: Ды дӕ Чырысти, Хуыцауы Фырт?» 64 Йесо йын дзуапп радта: «Дӕхӕдӕг ӕй куы зӕгъыс. Фӕлӕ уын зӕгъын: нырӕй фӕстӕмӕ Адӕймаджы Фырты уындзыстут Ӕппӕтхъомысы рахиз фарс бадгӕ ӕмӕ уӕларвон ӕврӕгътыл ӕрцӕйцӕугӕ». 65 Уӕд алчер арӕмыгъта йӕ дарӕс ӕмӕ загъта: «Хуыцауы рафаудта! Цӕй ӕвдисӕнтӕ ма нӕ хъӕуы? Мӕнӕ уӕхӕдӕг куы фехъуыстат, Хуыцауы куыд фауы, уый! 66 Цы хъуыды уӕм ис?» Уыдон ын дзуапп радтой: «Зылын у, хъуамӕ амӕла». 67 Уӕд Ын тутӕ кодтой Йӕ цӕсгомыл, цавтой Йӕ. Иннӕтӕ та Йӕ дзӕхстытӕ кодтой 68 Ӕмӕ Йын дзырдтой: «Чырысти, кӕд пехуымпар дӕ, уӕд Дӕ чи ныццавта, уый базон». 69 Ныр Петр та кӕрты бадт. Бацыд ӕм иу лӕггадгӕнӕг сылгоймаг ӕмӕ загъта: «Ды дӕр Галилейаг Йесоимӕ уыдтӕ». 70 Фӕлӕ Йыл Петр сеппӕты раз атигъ кодта йӕхи: «Цы дзурыс, уый нӕ зонын». 71 Петр кулдуармӕ куы рацыд, уӕд ӕй федта ӕндӕр лӕггадгӕнӕг сылгоймаг, ӕмӕ уым чи уыд, уыдонӕн загъта: «Ай Назаретаг Йесоимӕ уыди». 72 Петр та Йыл атигъ кодта йӕхи ӕмӕ расомы кодта: «Ӕз уыцы Адӕймаджы нӕ зонын». 73 Уым чи лӕууыд, уыдон чысыл фӕстӕдӕр бацыдысты Петрмӕ ӕмӕ йын загътой: «Ды дӕр бӕлвырд уыдонӕй дӕ – де 'взаджы здӕхт дыл комдзог цӕуы». 74 Уӕд Петр райдыдта ард хӕрын ӕмӕ Хуыцауӕй сомы кӕнын: «Ӕз уыцы Адӕймаджы нӕ зонын». Ӕмӕ уыйадыл уасӕг ныууасыд. 75 Ӕмӕ Петры зӕрдыл ӕрлӕууыд, Йесо йын цы загъта, уый: «Уасӕг нӕма ныууасдзӕн, афтӕ Мыл ӕртӕ хатты атигъ кӕндзынӕ дӕхи». Петр рацыд ӕддӕмӕ ӕмӕ судзаг цӕссыгтӕй ныккуыдта.

Матфей 27

1 Куы сбон, уӕд алчертӕ ӕмӕ адӕмы хистӕртӕ сеппӕт дӕр бауынаффӕ кодтой Йесойы тыххӕй, цӕмӕй Йӕ раттой амарынмӕ. 2 Уӕд Ӕй сбастой, акодтой Йӕ ӕмӕ Йӕ радтой иудейаг бӕстӕйы хицау Пилаты къухтӕм. 3 Йесойӕн кӕй стӕрхон кодтой, уый Йӕ уӕйгӕнӕг Иудӕ куы базыдта, уӕд ӕрхудт йӕхиуыл, дӕс ӕмӕ ссӕдз ӕвзист ӕхцайы фӕстӕмӕ радта алчертӕм ӕмӕ адӕмы хистӕртӕм, 4 Ӕмӕ загъта: «Ӕз фӕтӕригъӕдджын дӕн, ӕназым туг кӕй ауӕй кодтон, уымӕй». Фӕлӕ йын уыдон дзуапп радтой: «Уый махмӕ нӕ хауы. Дӕхи хъуыддаг у». 5 Иудӕ ӕвзист ӕхцатӕ аппӕрста Кувӕндоны, рацыд ӕмӕ йӕхи ӕрцауыгъта. 6 Алчертӕ систой ӕвзист ӕхцатӕ ӕмӕ загътой: «Кувӕндоны хӕзнадоны сын нывӕрын нӕ фӕччы, уымӕн ӕмӕ туджы аргъ сты». 7 Бауынаффӕ кодтой ӕмӕ дзы бӕлццӕтты ныгӕнынӕн балхӕдтой, дурынгӕнӕджы зӕхх кӕй хуыдтой, уый. 8 Уымӕ гӕсгӕ уыцы зӕхх абон дӕр хуыйны «Туджы зӕхх». 9 Уӕд сӕххӕст, Иереми-пехуымпар цы загъта, уый: «Ӕмӕ райстой дӕс ӕмӕ ссӕдз ӕвзист ӕхцайы – израилӕгтӕ Йын цы аргъ скодтой, уый. 10 Ӕмӕ сӕ бафыстой дурынгӕнӕджы зӕххыл, Хуыцау мын куыд загъта, афтӕ». 11 Ныр Йесо та ӕрлӕууыди бӕстӕйы хицауы раз. Бӕстӕйы хицау Ӕй бафарста: «Ды дӕ иудейаг Паддзах?» Йесо йын дзуапп радта: «Дӕхӕдӕг ӕй куы зӕгъыс». 12 Ӕмӕ Йӕ алчертӕ ӕмӕ адӕмы хистӕртӕ куы зылын кодтой, уӕд сын Йесо ницы дзуапп радта. 13 Уӕд Ын Пилат загъта: «Дӕ ныхмӕ куыд бирӕ ӕвдисӕн кӕнынц, уый нӕ хъусыс?» 14 Йесо йын йӕ иу фарстӕн дӕр дзуапп нӕ радта, ӕмӕ бӕстӕйы хицау стыр дисы бафтыд. 15 Бӕстӕйы хицаумӕ уыд ӕгъдау: бӕрӕгбоны-иу рауагъта, адӕмы-иу кӕй бафӕндыд, иу ахӕм ахӕсты. 16 Уыцы рӕстӕг сӕм уыди зындгонд ахӕст, йӕ ном – Вараввӕ. 17 Ӕмӕ адӕм куы ӕрӕмбырд сты, уӕд сын Пилат загъта: «Куыд уӕ фӕнды, кӕй уын рауадзон: Вараввӕйы, ӕви Чырысти Чи хуыйны, уыцы Йесойы?» 18 Пилат зыдта, Йесойы йын йӕ къухтӕм сӕ хӕлӕгӕй кӕй радтой, уый. 19 Ӕмӕ ма Пилат тӕрхонгӕнӕджы бынаты куы бадти, уӕд ӕм йӕ ус барвыста зӕгъынмӕ: «Мацы Йын ракӕн, уымӕн ӕмӕ уыцы Рӕстгӕнӕджы тыххӕй дысон бирӕ фӕудхар кодтон мӕ фыны». 20 Фӕлӕ алчертӕ ӕмӕ адӕмы хистӕртӕ сардыдтой адӕмы, цӕмӕй ракурой Вараввӕйы, Йесойы та амарын кӕной. 21 Бӕстӕйы хицау сӕ бафарста: «Куыд уӕ фӕнды, ацы дыууӕйӕ уын кӕй рауадзон?» Уыдон загътой: «Вараввӕйы». 22 Пилат сӕ бафарста: «Ӕмӕ уӕд Чырысти Чи хуыйны, уыцы Йесойӕн та цы бакӕнон?» Сеппӕт дӕр ын загътой: «Дзуарыл тыгъд ӕрцӕуӕд!» 23 Пилат бафарста: «Уагӕр ӕвзӕрӕй цы ракодта?» Фӕлӕ уыдон тынгдӕр хъӕр кодтой: «Дзуарыл тыгъд ӕрцӕуӕд!» 24 Пилат федта, адӕммӕ кӕй ницы хъары, уый; нӕ фӕлӕ ма змӕнтын дӕр райдыдтой. Уӕд райста дон, цӕхсадта йӕ къухтӕ адӕмы раз ӕмӕ загъта: «Ӕз аххосджын нӕ дӕн ацы тугкалды. Уӕ бар уӕхи». 25 Адӕм иууылдӕр дзуапп радтой: «Йӕ туг махӕн ӕмӕ нӕ зӕнӕгӕн фидинаг фӕуӕд». 26 Уӕд сын рауагъта Вараввӕйы, Йесойы та ехсӕй фӕнӕмын кодта ӕмӕ Йӕ радта дзуарыл байтындзынмӕ. 27 Уӕд бӕстӕйы хицауы ӕфсӕддонтӕ Йесойы акодтой уый галуанмӕ, ӕмӕ Йыл ӕрӕмбырд кодтой ӕгас ӕфсӕддон хай. 28 Раластой Йын Йӕ дарӕс ӕмӕ Йыл скодтой сырх пӕлӕз. 29 Сбыдтой сындзын кадыхуд ӕмӕ Йын ӕй ӕркодтой Йӕ сӕрыл, Йӕ рахиз къухмӕ та Йын радтой лӕдзӕг. Йӕ разы ӕрлӕууыдысты сӕ зонгуытыл ӕмӕ Йыл худтысты: «Ӕгас цӕуӕд иудейаг Паддзах!» 30 Фӕтутӕ Йыл кодтой, стӕй райстой лӕдзӕг ӕмӕ Йын цавтой Йӕ сӕр. 31 Куы Йӕ бафхӕрдтой, уӕд пӕлӕз раластой, скодтой Йыл Йӕхи дарӕс ӕмӕ Йӕ акодтой байтындзынмӕ. 32 Куы рацыдысты, уӕд сӕмбӕлдысты иу кириниаг лӕгыл, йӕ ном – Симон; ӕмӕ йын ахӕссын кодтой Йесойы дзуар. 33 Голгофӕ (ома, Сӕргӕхцы бынат) чи хуыйны, уырдӕм куы бахӕццӕ сты, 34 Уӕд Ын нуазынӕн радтой сӕн мастимӕ хӕццӕйӕ. Фӕлӕ дзы куы ацахуыста, уӕд ӕй нӕ бакуымдта. 35 Дзуарыл Ӕй чи байтыгъта, уыдон Ын хӕлттӕ сӕппӕрстой Йӕ дарӕстыл ӕмӕ сӕ се 'хсӕн байуӕрстой. 36 Стӕй сбадтысты ӕмӕ Йӕ хъахъхъӕдтой. 37 Йӕ сӕрмӕ Йын дзуарыл ныххуыдтой фӕйнӕг; фыст ыл уыди Йӕ азым: «Ай у Йесо, иудейаг Паддзах». 38 Уӕд Ын Йемӕ байтыгътой дыууӕ абырӕджы, иуы рахизырдыгӕй, иннӕйы та галиуырдыгӕй. 39 Йӕ цурты чи цыди, уыдон тылдтой сӕ сӕртӕ ӕмӕ Йӕ фаудтой: 40 «Кувӕндон халӕг ӕмӕ йӕ ӕртӕ бонмӕ аразӕг! Кӕд Хуыцауы Фырт дӕ, уӕд Дӕхи фервӕзын кӕн ӕмӕ дзуарӕй ӕрхиз». 41 Афтӕ Дзы хынджылӕг кодтой алчертӕ дӕр динамонджытимӕ ӕмӕ адӕмы хистӕртимӕ: 42 «Иннӕты ирвӕзын кодта, Йӕхи фервӕзын кӕнын та Йӕ бон нӕу! Израилы Паддзах у; ныртӕккӕ дзуарӕй ӕрхизӕд, ӕмӕ Йыл баууӕнддзыстӕм. 43 Хуыцауыл Йӕ зӕрдӕ дардта, ӕмӕ Йӕ ныр фервӕзын кӕнӕд, кӕд Хуыцауӕн фӕндон у, уӕд. Уымӕн ӕмӕ афтӕ загъта: „Ӕз Хуыцауы Фырт дӕн"». 44 Йемӕ тыгъд абырджытӕ дӕр Ӕй фаудтой. 45 Ӕхсӕзӕм сахатӕй фарӕстӕм сахаты онг бӕстӕ ӕгасӕй дӕр баталынг. 46 Фарӕстӕм сахатмӕ хӕстӕг Йесо хъӕрӕй ныууынӕргъыдта: «Эли, Эли, лема сабахтани?» Ома: «Мӕ Хуыцау, Мӕ Хуыцау, цӕмӕн Мӕ ныууагътай?» 47 Уым чи лӕууыд, уыдонӕй чидӕртӕ уый фехъуыстой ӕмӕ дзырдтой: «Илиамӕ дзуры». 48 Сӕ иу уайтӕккӕ азгъордта, губкӕ стылдта туаг сӕны, ӕрсагъта йӕ лӕдзӕгыл ӕмӕ йӕ Йесомӕ бадардта баназынмӕ. 49 Иннӕтӕ та дзырдтой: «Фӕлӕуу-ма, бакӕсӕм, кӕддӕра Йӕм Илиа фервӕзын кӕнынмӕ ӕрцӕуид». 50 Йесо та ноджы хъӕрӕй ныууынӕргъыдта ӕмӕ Йӕ уд систа. 51 Ӕмӕ Кувӕндоны мидӕг ӕмбӕрзӕн дыууӕ дихы фӕци уӕлейӕ бынмӕ. Зӕхх нынкъуыст, ӕмӕ къӕдзӕхтӕ ныскъуыдтӕ сты. 52 Ингӕнтӕ байгом сты, ӕмӕ чи амард, уыцы сыгъдӕджытӕй бирӕтӕ райгас сты, 53 Ӕмӕ Йесойы райгасы фӕстӕ сыстадысты сӕ ингӕнтӕй, сыгъдӕг сахармӕ бацыдысты, ӕмӕ сӕ бирӕтӕ федтой. 54 Сӕдӕйыхицау, стӕй уыимӕ Йесойы чи хъахъхъӕдта, уыдон зӕххӕнкъуыст ӕмӕ, цы ӕрцыди, ӕппӕт уыдӕттӕ куы федтой, уӕд тынг фӕтарстысты ӕмӕ дзырдтой: «Уый ӕцӕгӕй Хуыцауы Фырт уыди». 55 Уым уыдысты ӕмӕ дӕрддзӕфӕй кастысты, Йесойӕн лӕггад кӕнынмӕ Галилейӕ Йӕ фӕдыл чи рацыд, уыцы сылгоймӕгтӕ дӕр; 56 Уыдонимӕ – магдалӕйаг Мариа, Иаковы ӕмӕ Иосифы мад Мариа, стӕй Зеведейы фыртты мад. 57 Куы баизӕр, уӕд ӕрцыд аримафейаг хъӕздыг лӕг Иосиф. Уый дӕр Йесойы ахуыргӕнинаг уыди. 58 Бацыди Пилатмӕ ӕмӕ дзы куырдта Йесойы мард. Пилат радта мард раттыны бардзырд. 59 Иосиф райста марды, батыхта йӕ сыгъдӕг уӕздан кӕттаджы 60 Ӕмӕ йӕ бавӕрдта, къӕдзӕхы кӕй скъахта, йӕ уыцы ног зӕппадзы. Зӕппадзмӕ бацӕуӕныл бафӕлдӕхта стыр дур ӕмӕ ацыди. 61 Магдалӕйаг Мариа ӕмӕ иннӕ Мариа уыдысты уым ӕмӕ бадтысты зӕппадзӕн йӕ бакомкоммӕ. 62 Майрӕмбоны фӕстӕ, дыккаг бон, алчертӕ ӕмӕ фарисейтӕ ӕрӕмбырд сты Пилатмӕ, 63 Ӕмӕ загътой: «Не 'лдар, нӕ зӕрдыл ӕрлӕууыд, уыцы фӕливӕг ма ӕгас куы уыд, уӕд афтӕ загъта: „Ӕртӕ боны фӕстӕ райгас уыдзынӕн". 64 Уӕдӕ ратт зӕппадз ӕртыккаг бонмӕ хъахъхъӕныны бардзырд, цӕмӕй Йӕ ахуыргӕнинӕгтӕ ма ӕрцӕуой, ма Йӕ адавой ӕмӕ адӕмӕн ма зӕгъой: „Мӕрдтӕй райгас". Уӕд фӕстаг сайд фыццагӕй ӕвзӕрдӕр уыдзӕни». 65 Пилат сын загъта: «Акӕнут ӕфсӕддонтӕ, ацӕут ӕмӕ уӕ куыд фӕнды, афтӕ Йӕ хъахъхъӕнут». 66 Уыдон ацыдысты ӕмӕ зӕппадзмӕ бацӕуӕны сӕвӕрдтой хъахъхъӕнджытӕ, дурыл та – мыхуыр.

Матфей 28

1 Сабат куы аивгъуыдта, уӕд, къуырийӕн йӕ фыццаг бон, магдалӕйаг Мариа ӕмӕ иннӕ Мариа сӕударӕй ӕрцыдысты зӕппадз фенынмӕ. 2 Ӕвиппайды зӕхх тынг нынкъуысти: Хуыцауы зӕд ӕрцыд уӕларвӕй, афӕлдӕхта дур ӕмӕ йыл бадти. 3 Йӕ хуыз уыдис арвӕрттывдау, йӕ дарӕс – митау урс-урсид. 4 Хъахъхъӕнджытӕ фыртӕссӕй ныррызтысты ӕмӕ мӕрдтау фесты. 5 Зӕд сылгоймӕгтӕн загъта: «Сымах ма тӕрсут. Ӕз зонын, дзуарыл тыгъд Йесойы кӕй агурут, уый. 6 Ам нӕй: куыд загъта, афтӕ райгас. Ӕрбацӕут ӕмӕ фенут, кӕм ӕвӕрд уыд, уыцы бынат. 7 Ӕмӕ ӕвӕстиатӕй ацӕут ӕмӕ Йын зӕгъут Йӕ ахуыргӕнинӕгтӕн, райгас мӕрдтӕй, уӕ разӕй цӕуы Галилеймӕ, ӕмӕ Йӕ уым фендзыстут, зӕгъгӕ. Гъеныр уын загътон мӕ зӕгъинаг». 8 Сылгоймӕгтӕ уайтӕккӕ рацыдысты зӕппадзы цурӕй, ӕмӕ цинӕмхӕццӕ тасимӕ азгъордтой Йӕ ахуыргӕнинӕгтӕн фехъусын кӕнынмӕ. 9 Фӕндагыл сыл ӕнӕнхъӕлӕджы фембӕлд Йесо ӕмӕ сын загъта: «Цин кӕнут!» Уыдон Ӕм базгъордтой, ӕрхаудтой сӕ зонгуытыл ӕмӕ Йын Йӕ къӕхтыл ныттыхстысты. 10 Уӕд сын Йесо загъта: «Ма тӕрсут. Ацӕут, фехъусын кӕнут Ме 'фсымӕртӕн, цӕмӕй цӕуой Галилеймӕ; уым Мӕ фендзысты». 11 Сылгоймӕгтӕ ма фӕндагыл уыдысты, афтӕ хъахъхъӕнджытӕй иуӕй-иутӕ бахӕццӕ сты сахармӕ ӕмӕ алчертӕн радзырдтой, цы ӕрцыди, уый тыххӕй. 12 Уыдон ӕрӕмбырд сты адӕмы хистӕртимӕ, бауынаффӕ кодтой ӕмӕ ӕфсӕддонтӕн радтой бирӕ ӕхца, 13 Ӕмӕ сын бафӕдзӕхстой: «Зӕгъут афтӕ: „Йӕ ахуыргӕнинӕгтӕ ӕрцыдысты ӕхсӕвы ӕмӕ Йӕ адавтой, мах фынӕй куы уыдыстӕм, уӕд". 14 Кӕд уыцы хабар бӕстӕйы хицаумӕ байхъуыса, уӕд ӕй мах ууыл баууӕндын кӕндзыстӕм ӕмӕ уӕ мастӕй бахиздзыстӕм». 15 Уыдон райстой ӕхца ӕмӕ бакодтой, куыд сын бацамыдтой, афтӕ. Ӕмӕ уыцы хабар иудейты ӕхсӕн хъуыстгонд у суанг абон дӕр. 16 Иуӕндӕс ахуыргӕнинаджы та ацыдысты Галилеймӕ, Йесо сын цы хохмӕ загъта, уырдӕм. 17 Ӕмӕ Йӕ куы федтой, уӕд Йӕ разы ӕрхаудтой сӕ зонгуытыл. Сӕ иуӕй-иутӕ та фӕгуырысхо сты. 18 Йесо сӕм куы ӕрбахӕстӕг, уӕд сын загъта: «Арв ӕмӕ зӕххыл ӕппӕт бартӕ Мӕнмӕ лӕвӕрд сты. 19 Уӕдӕ ацӕут ӕмӕ ӕппӕт адӕмты скӕнут Мӕ ахуыргӕнинӕгтӕ. Аргъаут сыл Фыды, Фырты ӕмӕ Сыгъдӕг Уды номыл; 20 Сахуыр сӕ кӕнут, Ӕз уын цы бафӕдзӕхстон, ӕппӕт уыдӕттӕ ӕххӕст кӕныныл. Ӕз та дунейы фӕудмӕ кӕддӕриддӕр уыдзынӕн уемӕ».

Марк 1

1 Хуыцауы Фырт Йесо Чырыстийы фарны уацы райдайӕн. 2 Исай-пехуымпармӕ фыст у: «Мӕнӕ Мӕ фидиуӕджы ӕрвитын Дӕ разӕй, ӕмӕ Дын уый ӕрцӕттӕ кӕндзӕни Дӕ фӕндаг». 3 «Ӕдзӕрӕг ран хъуысы фидиуӕджы хъӕлӕс: „Ӕрцӕттӕ кӕнут Хицауӕн фӕндаг, ӕмраст Ын скӕнут Йӕ цӕуӕнтӕ"». 4 Афтӕ ӕдзӕрӕг бӕстӕйы фӕзынд Иоанн, аргъуыдта донӕй ӕмӕ амыдта, зӕгъгӕ, цӕмӕй тӕригъӕдтӕ хатыргонд уой, уый тыххӕй сыл хъӕуы ӕрфӕсмон кӕнын ӕмӕ аргъуыд райсын. 5 Цыдысты йӕм ӕппӕт иудейаг бӕстӕйы адӕм ӕмӕ ӕппӕт иерусалимӕгтӕ, ӕргом кодтой сӕ тӕригъӕдтӕ, ӕмӕ сыл Иоанн аргъуыдта Иорданы цӕугӕдоны. 6 Иоанн дардта теуайы хъуынӕй дарӕс, йӕ астӕуыл та уыди гӕрзӕй рон; хордта мӕтыхтӕ ӕмӕ хъӕддаг мыд. 7 Адӕмӕн дзырдта: «Мӕ фӕдыл ӕрбацӕуы мӕнӕй Тыхджындӕр. Ӕз ӕргуыбыр кӕнон ӕмӕ Йын Йӕ дзабыры бос райхалон, уый аккаг дӕр нӕ дӕн. 8 Ӕз сымахыл донӕй аргъуыдтон, Уый та уыл аргъаудзӕни Сыгъдӕг Удӕй». 9 Уыцы рӕстӕг Йесо ӕрцыди галилейаг Назаретӕй, ӕмӕ Йыл Иоанн саргъуыдта Иорданы цӕугӕдоны. 10 Йесо донӕй куы рацӕйхызт, уӕд уайтӕккӕ федта, арвы дуар куыд фегом, уый, ӕмӕ Хуыцауы Уды бӕлонау Уымӕ ӕрцӕйцӕугӕ. 11 Ӕмӕ уӕлӕрвтӕй ӕрыхъуысти хъӕлӕс: «Ды Мӕ уарзон Фырт дӕ, Ӕз Дӕуыл аудын». 12 Уыйадыл Сыгъдӕг Уд Йесойы акодта ӕдзӕрӕг бӕстӕмӕ. 13 Ӕдзӕрӕг бӕстӕйы Йесо фӕци дыууиссӕдз боны, ӕмӕ Йӕ къахта хӕйрӕг. Йесо уыди сырдты ӕхсӕн, зӕдтӕ Йын лӕггад кодтой. 14 Иоанны куы ӕрцахстой, уӕд Йесо ӕрцыди Галилеймӕ ӕмӕ хъусын кодта Хуыцауы фарны уац: 15 «Ӕрцыд афон ӕмӕ ӕрхӕстӕг Хуыцауы Паддзахад! Ӕрфӕсмон кӕнут уӕ тӕригъӕдтыл ӕмӕ ӕууӕндут фарны уацыл». 16 Йесо Галилейы денджызы былгӕрӕтты куы фӕцӕйцыди, уӕд федта Симоны йе 'фсымӕр Андреимӕ. Уыдон сӕ хызтӕ ӕппӕрстой денджызмӕ, уымӕн ӕмӕ кӕсагахсджытӕ уыдысты. 17 Йесо сын загъта: «Рацӕут Мӕ фӕдыл, ӕмӕ уӕ скӕндзынӕн адӕмахсджытӕ». 18 Уыдон уайтӕккӕ ныууагътой сӕ хызтӕ ӕмӕ ацыдысты Йӕ фӕдыл. 19 Йесо уырдыгӕй иуцасдӕр куы ауад, уӕд федта Зеведейы фырт Иаковы йе 'фсымӕр Иоаннимӕ сӕ хызтӕ бӕлӕгъы ӕмпъузгӕйӕ. 20 Йесо сӕм уайтӕккӕ басидт. Уыдон сӕ фыд Зеведейы ӕмӕ ӕххуырст кусджыты ныууагътой бӕлӕгъы ӕмӕ ацыдысты Йӕ фӕдыл. 21 Ӕрцыдысты Капернауммӕ. Куыддӕр сабат ралӕууыд, афтӕ Йесо бацыди синагогӕмӕ ӕмӕ ахуыр кодта адӕмы. 22 Ӕмӕ сӕ дисы ӕфтыдта Йӕ ахуырад, уымӕн ӕмӕ сын амыдта динамонджытау нӕ, фӕлӕ барджынӕй. 23 Сӕ синагогӕйы уыди хӕйрӕджджын адӕймаг. Уый ныхъхъӕр кодта: 24 «Цы Дӕ хъӕуы махӕй, Назаретаг Йесо? Ды нӕ фесафынмӕ ӕрцыдтӕ! Ӕз зонын, Чи дӕ, уый – Ды Хуыцауы Сыгъдӕг дӕ». 25 Йесо ӕнӕзӕгъинагӕн бардзырд радта: «Банцай ӕмӕ дзы рацу». 26 Ӕнӕзӕгъинаг ныууыгъта уыцы адӕймаджы, ныхъхъӕр кодта ӕмӕ дзы рацыд. 27 Ӕппӕт адӕм дӕр дисы бафтыдысты ӕмӕ кӕрӕдзи фарстой: «Уый цы уа? Уый цавӕр ног ахуырад у? Барджынӕй куы дзуры. Ӕнӕзӕгъинӕгтӕн дӕр дӕтты бардзырд, ӕмӕ кӕсынц Йӕ коммӕ». 28 Ӕппӕт Галилейыл уайтагъд айхъуыст Йесойы кой. 29 Уыйадыл рацыдысты синагогӕйӕ. Ӕмӕ Йесо Иаков ӕмӕ Иоаннимӕ бацыди Симон ӕмӕ Андрейы хӕдзармӕ. 30 Симоны усы мад тӕвднизӕй сади. Ӕмӕ сылгоймаджы тыххӕй уайтӕккӕ загътой Йесойӕн. 31 Йесо йӕм бацыди, рахӕцыд ын йӕ къухыл ӕмӕ йӕ сыстын кодта. Сылгоймагӕн ӕрхауд йӕ тӕвд, ӕмӕ сын райдыдта кӕстӕриуӕг кӕнын. 32 Хур куы аныгуылд ӕмӕ куы баизӕр, уӕд Ӕм хӕссын райдыдтой ӕппӕт рынчынты ӕмӕ хӕйрӕджджынты. 33 Ӕмӕ ӕгас сахар ӕрӕмбырд дуары цурмӕ. 34 Йесо сдзӕбӕх кодта, алыхуызон низтӕй чи сади, бирӕ ахӕмты, ӕмӕ адӕмӕй расырдта бирӕ дӕлимонтӕ. Дӕлимонтӕн нӕ лӕвӕрдта дзурыны бар, уымӕн ӕмӕ Йӕ зонгӕ кодтой. 35 Сӕударӕй Йесо сыстад ӕмӕ рацыд, араст хибар ранмӕ ӕмӕ уым куывта. 36 Симон йе 'мбӕлттимӕ ацыди Йӕ агурӕг. 37 Ӕмӕ Йӕ куы ссардтой, уӕд Ын загътой: «Адӕм иууылдӕр Дӕу агурынц». 38 Йесо сын загъта: «Цом хӕстӕг хъӕутӕ ӕмӕ сахартӕм, ӕмӕ уым дӕр хъусын кӕнон фарны уац, уымӕн ӕмӕ Ӕз уый тыххӕй ӕрцыдтӕн». 39 Ӕмӕ ӕппӕт Галилейы синагогӕты хъусын кодта фарны уац, адӕмӕй сырдта дӕлимонты. 40 Йесомӕ ӕрцыди хъотырджын, Йӕ разы ӕрхауди зонгуытыл ӕмӕ Йын лӕгъстӕ кодта: «Кӕд Дӕ фӕнды, уӕд Дӕ бон у, ӕмӕ мӕ ссыгъдӕг кӕнай». 41 Йесо йын фӕтӕригъӕд кодта, Йӕ къух радардта, бандзӕвыд ыл ӕмӕ йын загъта: «Фӕнды Мӕ, ссыгъдӕг у». 42 Хъотыр ӕй уыйадыл ныууагъта, ӕмӕ ссыгъдӕг. 43 Уыйадыл ӕй Йесо уырдыгӕй арвыста. Карз ын бафӕдзӕхста: 44 «Хъусыс, макӕмӕн мацы зӕгъ, фӕлӕ ацу, дӕхи фенын кӕн сауджынӕн, ӕмӕ кӕй ссыгъдӕг дӕ, уый тыххӕй ӕрхӕсс нывонд, Моисей куыд бафӕдзӕхста, афтӕ – кӕй сдзӕбӕх дӕ, уымӕн ӕвдисӕйнагӕн». 45 Уый та ацыд, ӕмӕ йыл цы ӕрцыд, уый тыххӕй дзурын райдыдта алы ран дӕр. Уӕд Йесойӕн ӕргомӕй сахартӕм бацӕуӕн нал уыд, ӕмӕ-иу баззад фӕссахар, адӕм кӕм нӕ уыд, уым. Фӕлӕ Йӕм уӕддӕр цыдысты алырдыгӕй.

Марк 2

1 Цалдӕр боны фӕстӕ Йесо ногӕй ӕрцыди Капернауммӕ ӕмӕ, хӕдзары кӕй ис, уый айхъуыст адӕмыл. 2 Уыйбӕрц адӕм ӕрӕмбырд, ӕмӕ суанг дуӕртты цур дӕр бынат нал уыд. Ӕмӕ сӕ Йесо ахуыр кодта. 3 Ӕрцыдысты Йӕм уӕнгмардимӕ, хастой йӕ цыппарӕй. 4 Адӕм уыйас бирӕ уыдысты, ӕмӕ Йӕм рынчыны бахӕссын сӕ бон нӕ уыд. Уӕд байгом кодтой, Йесо кӕм уыди, уыцы хӕдзары сӕр, ныххуынкъ кодтой цар ӕмӕ дзы хуыссӕныл уӕнгмарды ӕруагътой. 5 Йесо сын федта сӕ уырнындзинад ӕмӕ уӕнгмардӕн загъта: «Мӕ хъӕбул, хатыр дын сты дӕ тӕригъӕдтӕ». 6 Уым бадтысты динамонджытӕ цалдӕрӕй ӕмӕ хинымӕр дзырдтой: 7 «Уый цытӕ дзуры? Хуыцауы куы фауы. Иунӕг Хуыцауы йеддӕмӕ тӕригъӕдтӕ хатыр кӕнын кӕй бон у?» 8 Йесо сын уайтӕккӕ базыдта сӕ хъуыдытӕ, ӕмӕ загъта: «Цӕмӕн афтӕ хъуыды кӕнут? 9 Цы ӕнцондӕр у – зӕгъын уӕнгмардӕн: „Хатыр дын сты дӕ тӕригъӕдтӕ", ӕви: „Рабад, сис дӕ хуыссӕн ӕмӕ райдай цӕуын"? 10 Фӕлӕ сымах хъуамӕ зонат, Адӕймаджы Фыртӕн кӕй ис зӕххыл тӕригъӕдтӕ хатыр кӕныны бар». Ӕмӕ загъта уӕнгмардӕн: 11 «Дӕумӕ дзурын: рабад, сис дӕ хуыссӕн ӕмӕ цу дӕ хӕдзармӕ». 12 Уӕнгмард рабадт, уайтӕккӕ систа йӕ хуыссӕн, ӕмӕ йӕ сеппӕт дӕр федтой рацӕугӕ. Адӕм иууылдӕр дисы бафтыдысты, кад кодтой Хуыцауӕн ӕмӕ дзырдтой: «Ахӕмӕй никуыма ницы федтам». 13 Йесо та ногӕй рацыди денджызы былмӕ. Уырдӕм Ӕм ӕрцыди бирӕ адӕм ӕмӕ сӕ ахуыр кодта. 14 Куы фӕцӕйцыди, уӕд хъалонисӕн бынаты бадгӕ федта Алфейы фырт Левийы, ӕмӕ йын загъта: «Рацу Мӕ фӕдыл». Уый сыстад ӕмӕ ацыд Йӕ фӕдыл. 15 Йесо Йӕ ахуыргӕнинӕгтимӕ Левийы хӕдзары фынгыл куы бадти, уӕд семӕ уыдысты бирӕ хъалонисджытӕ ӕмӕ тӕригъӕдджынтӕ – Йесойы фӕдыл бирӕ ахӕм адӕм цыди. 16 Динамонджытӕ ӕмӕ Йӕ фарисейтӕ фынгыл хъалонисджытӕ ӕмӕ тӕригъӕдджынтимӕ бадгӕ куы федтой, уӕд Ын Йӕ ахуыргӕнинӕгтӕн дзырдтой: «Уый хъалонисджытӕ ӕмӕ тӕригъӕдджынтимӕ куыд хӕры?» 17 Йесо уый куы фехъуыста, уӕд сын загъта: «Дохтыр ӕнӕнизты нӕ, фӕлӕ рынчынты хъӕуы. Ӕз ӕрцыдтӕн рӕстыты нӕ, фӕлӕ тӕригъӕдджынты ӕрхонынмӕ». 18 Иоанны ахуыргӕнинӕгтӕ ӕмӕ фарисейтӕ ком дардтой. Уӕд чидӕртӕ ӕрцыдысты Йесомӕ ӕмӕ Йын загътой: «Иоанны ахуыргӕнинӕгтӕ ӕмӕ фарисейты ахуыргӕнинӕгтӕ ком куы дарынц, уӕд Дӕ ахуыргӕнинӕгтӕ та цӕуылнӕ дарынц ком?» 19 Йесо сын загъта: «Чындзхӕсджытимӕ сиахсаг цалынмӕ вӕййы, уӕдмӕ ком фӕдарынц, мыййаг? Сиахсаг цалынмӕ семӕ вӕййы, уӕдмӕ ком нӕ фӕдарынц. 20 Фӕлӕ ралӕудзӕни, сиахсаджы сын куы байсой, уыцы афон, ӕмӕ уӕд дардзысты ком. 21 Ног хъуымацӕй зӕронд дарӕсыл ничи ӕвӕры ӕмпъузӕн, науӕд ӕмпъузӕн ратондзӕн дарӕсӕй – ног ратондзӕн зӕрондӕй, ӕмӕ скъуыд фестырдӕр уыдзӕн. 22 Ногдыгъд сӕн дӕр зӕронд лалымты ничи ныккӕны, науӕд ногдыгъд сӕн арӕмудздзӕни зӕронд лалымтӕ, ӕмӕ сӕн дӕр акӕлдзӕни, лалымтӕ дӕр фесӕфдзысты. Ногдыгъд сӕн ног лалымты ныккӕнын хъӕуы». 23 Йесо сабаты фӕцӕйцыд ӕфсирджын хуымты. Йӕ ахуыргӕнинӕгтӕ фӕндагыл райдыдтой ӕфсиртӕ тонын. 24 Ӕмӕ Йын фарисейтӕ загътой: «Кӕс-ма! Сабаты цы нӕ фӕччы, уый цӕмӕн кӕнынц?» 25 Йесо сын дзуапп радта: «Давид йе 'мбӕлттимӕ куы сыстонг ӕмӕ сӕм хойраг куы нӕ уыд, уӕд цы бакодта, уый тыххӕй нӕ кастыстут, ӕви? 26 Авиафар алчер куы уыд, уыцы рӕстӕг Давид бацыди Хуыцауы хӕдзармӕ ӕмӕ бахордта, ӕрмӕст сауджынтӕн хӕрын кӕй ӕмбӕлд, уыцы нывонд дзултӕ, ӕмӕ ма дзы йе 'мбӕлттӕн дӕр радта». 27 Йесо ма сын загъта: «Сабат адӕймагӕн у, адӕймаджы сабатӕн не сфӕлдыстӕуыд. 28 Уымӕ гӕсгӕ Адӕймаджы Фырт сабатӕн дӕр хицау у».

Марк 3

1 Йесо ногӕй бацыди синагогӕмӕ. Уыди дзы, йӕ къух хуыскъ кӕмӕн уыд, ахӕм адӕймаг. 2 Йесомӕ сӕ цӕст дардтой, кӕд ӕй сабаты сдзӕбӕх кӕнид, зӕгъгӕ, цӕмӕй Йӕ фӕзылын кӕной. 3 Йӕ къух хуыскъ кӕмӕн уыди, уыцы адӕймагӕн Йесо загъта: «Рацу адӕмы размӕ». 4 Ӕмӕ сӕ бафарста: «Сабаты хорз кӕнын ӕмбӕлы ӕви ӕвзӕр? Уд фервӕзын кӕнын ӕви йӕ фесафын?» Ӕмӕ ницы дзырдтой. 5 Йесо сыл тызмӕгӕй ахаста Йӕ цӕст, сӕ зӕрдӕтӕ кӕй ныддур сты, ууыл хъыг кӕнгӕйӕ. Ӕмӕ загъта цӕнкуылӕн: «Радар-ма дӕ къух». Уый радардта йӕ къух, ӕмӕ йын сдзӕбӕх. 6 Фарисейтӕ рацыдысты, ӕмӕ уыйадыл Ироды фарсдарджытимӕ уынаффӕ кӕнын райдыдтой, Йесойы цы амалӕй амарой, ууыл. 7 Йесо Йӕ ахуыргӕнинӕгтимӕ араст денджызмӕ. Йӕ фӕдыл бирӕ адӕм ацыди Галилейӕ, Иудейӕйӕ, 8 Иерусалимӕй, Идумейӕ, Иорданы фаллаг фарсӕй, Тир ӕмӕ Сидоны алфамбылайӕ – ӕрцыд Ӕм бирӕ адӕм, цы хъуыддӕгтӕ аразы, уыдоны тыххӕй куы фехъуыстой, уӕд. 9 Ӕмӕ Йӕ ахуыргӕнинӕгтӕн бафӕдзӕхста бӕлӕгъ Ын цӕттӕйӕ дарын, утӕппӕт адӕм Ӕй куыд нӕ ныцъцъист кӕной, афтӕ. 10 Уымӕн ӕмӕ Йесо сдзӕбӕх кодта бирӕты, ӕмӕ Йыл ӕппӕт рынчынтӕ ӕппӕрстой сӕхи, цӕмӕй Йыл бандзӕвой. 11 Ӕнӕзӕгъинӕгтӕ-иу Ӕй куы федтой, уӕд-иу Йӕ разы сӕхи аппӕрстой дӕлгоммӕ, ӕмӕ хъӕр кодтой: «Ды Хуыцауы Фырт дӕ!» 12 Фӕлӕ-иу сын Йесо бардзырд радта, цӕмӕй ма дзурой, Чи у, уый тыххӕй. 13 Уый фӕстӕ Йесо ссыди хохмӕ ӕмӕ басидти, Йӕхи кӕй фӕндыд, уыдонмӕ. Ӕмӕ Йӕм ӕрбацыдысты. 14 Сӕ дыууадӕсы дӕр сӕвӕрдта апостолтӕй, цӕмӕй уой Йемӕ, ӕрвита сӕ Хуыцауы ныхас хъусын кӕнынмӕ, 15 Уа сӕм адӕмӕй дӕлимонтӕ сурыны тых. 16 Сӕвӕрдта Симоны ӕмӕ йӕ схуыдта Петр; 17 Зеведейы фырт Иаковы ӕмӕ уый ӕфсымӕр Иоанны, ӕмӕ сӕ схуыдта Воанергес (ома, Ӕрвнӕрды фырттӕ); 18 Андрейы, Филиппы, Варфоломейы, Матфейы, Фомайы, Алфейы фырт Иаковы, Фаддейы, Симон Кананиты 19 Ӕмӕ Йесойыл гадзрахатӕй рацӕуӕг Иудӕ Искариоты. 20 Йесо бацыд хӕдзармӕ. Уыйбӕрц адӕм та ӕрӕмбырд, ӕмӕ Йесойӕн Йӕ ахуыргӕнинӕгтимӕ бахӕрыны фадат дӕр нал уыди. 21 Йӕ хӕстӕджытӕ уыдӕттӕ куы фехъуыстой, уӕд Ӕм ацыдысты ӕркӕнынмӕ, уымӕн ӕмӕ айхъуыст, Йӕ зонд фӕцыди, зӕгъгӕ. 22 Иерусалимӕй ӕрцӕуӕг динамонджытӕ дзырдтой, веелзевулы дӕлбар у, зӕгъгӕ, ӕмӕ дӕлимонты суры дӕлимонты ӕлдары хъаруйӕ. 23 Йесо сӕм басидт ӕмӕ сын райдыдта фӕсномыг ныхӕстӕй дзурын: «Хӕйрӕг йӕхӕдӕг йӕхи куыд хъуамӕ расура? 24 Паддзахад куы ныддихтӕ уа ӕмӕ йӕ адӕм кӕрӕдзи ныхмӕ куы фӕуой, уӕд уыцы паддзахад нӕ фӕлӕудзӕн. 25 Хӕдзар дӕр куы ныддихтӕ уа ӕмӕ хӕдзаронтӕ кӕрӕдзи ныхмӕ куы фӕуой, уӕд уыцы хӕдзар дӕр нӕ фӕлӕудзӕн. 26 Уӕдӕ кӕд хӕйрӕг йӕхи ныхмӕ тох кӕны, уӕд ӕрцыд йӕ кӕрон. 27 Никӕй бон бауыдзӕн тыхджыны хӕдзармӕ бацӕуын ӕмӕ йын йӕ дзауматӕ рахӕссын, раздӕр уал тыхджыны куы нӕ сбӕтта, уӕд. Ӕрмӕст ын уӕд фӕкъахдзӕн йӕ хӕдзар. 28 Ӕцӕг уын зӕгъын: адӕмӕн хатыргонд уыдзысты ӕппӕт тӕригъӕдтӕ ӕмӕ алы хуызы фауӕнтӕ, 29 Фӕлӕ Сыгъдӕг Уды чи рафауа, уымӕн мыггагмӕ дӕр нӕ уыдзӕни хатыр – уыцы тӕригъӕды тыххӕй азымджын уыдзӕни мыггагмӕ». 30 Йесо афтӕ уый тыххӕй загъта, ӕмӕ Дзы дзырдтой, ӕнӕзӕгъинаджы дӕлбар у, зӕгъгӕ. 31 Ӕрцыдысты Йесойы Мад ӕмӕ ӕфсымӕртӕ. Лӕууыдысты ӕдде ӕмӕ Йӕм фӕдзурын кодтой. 32 Йӕ алыварс бирӕ адӕм бадти. Йесойӕн загътой: «Дӕ Мад, Де 'фсымӕртӕ, Дӕ хотӕ лӕууынц ӕдде ӕмӕ Дӕ агурынц». 33 Йесо сын дзуапп радта: «Чи сты Мӕ мад ӕмӕ Ме 'фсымӕртӕ?» 34 Ӕмӕ, Йӕ алыварс бадджытыл Йӕ цӕст ахӕсгӕйӕ, загъта: «Мӕнӕ Мӕ мад ӕмӕ Ме 'фсымӕртӕ. 35 Уымӕн ӕмӕ Хуыцауы фӕндон чи ӕххӕст кӕны, уый у Ме 'фсымӕр, Мӕ хо ӕмӕ Мӕ мад».

Марк 4

1 Йесо ногӕй амонын райдыдта денджызы былыл. Уыйас бирӕ адӕм ӕрӕмбырд, ӕмӕ Уый бахызти бӕлӕгъмӕ ӕмӕ дзы ӕрбадт; адӕм та иууылдӕр денджызы былгӕрон уыдысты. 2 Бирӕ сын амыдта фӕсномыг ныхӕстӕй ӕмӕ сӕ ахуыр кодта: 3 «Байхъусут: мӕнӕ тауӕг рацыди тауынмӕ. 4 Таугӕ-тауын иугай нӕмгуытӕ ӕрхаудысты фӕндаггӕрон, ӕртахтысты мӕргътӕ ӕмӕ сӕ рауыгътой. 5 Иуӕй-иутӕ дзы ӕрхаудысты, сыджыт бирӕ кӕм нӕ уыд, ахӕм дурджын ран, ӕмӕ уайтагъд сӕвзӕрдысты, уымӕн ӕмӕ зӕхх арф нӕ уыд. 6 Ӕмӕ хур куы скаст, уӕд сӕ басыгъта ӕмӕ бахус сты, уымӕн ӕмӕ сын уидаг нӕ уыд. 7 Иуӕй-иутӕ дзы ӕрхаудысты сындзыты ӕхсӕн, сындзытӕ сзадысты, ныххурх сӕ кодтой, ӕмӕ нӕмгуытӕ тыллӕг нӕ радтой. 8 Иуӕй-иутӕ та дзы ӕрхаудысты бӕзнаг мӕрыл, схӕцыдысты сӕхиуыл, сырӕзыдысты ӕмӕ радтой: иу – дӕс ӕмӕ ссӕдз хатты, иннӕ – ӕртиссӕдз хатты, ӕртыккаг – фондзыссӕдз хатты фылдӕр тыллӕг». 9 Ӕмӕ сын ноджы загъта: «Хъустӕ кӕуыл ис, уый хъусӕд!» 10 Адӕм куы ацыдысты, уӕд дыууадӕс ахуыргӕнинаджы, стӕй ма уым чи баззади, уыдон дӕр Ӕй фӕсномыг ныхӕсты тыххӕй бафарстой. 11 Йесо сын загъта: «Сымахӕн Хуыцауы Паддзахады сусӕгдзинад зонын лӕвӕрд у, уыдонӕн та, ӕддагӕттӕн, ӕппӕт дӕр фӕсномыг ныхӕстӕй амындӕуы, 12 Цӕмӕй „цӕстӕй кӕсой, фӕлӕ ма уыной, хъусӕй хъусой, фӕлӕ ма ӕмбарой, ӕмӕ ма раздӕхой Хуыцаумӕ ӕмӕ сын барст ма уой сӕ тӕригъӕдтӕ"». 13 Загъта ма сын: «Ацы фӕсномыг ныхас не 'мбарут, ӕви? Уӕд иннӕ фӕсномыг ныхӕстӕ та куыд бамбардзыстут? 14 Тауӕг ныхас тауы. 15 Мӕнӕ фӕндаггӕрон чи ӕрхауд, уыдон: куыддӕр ныхас фехъусынц, афтӕ ӕрцӕуы хӕйрӕг ӕмӕ сын ахӕссы сӕ зӕрдӕйы тыд ныхас. 16 Мӕнӕ дурджын ран кӕй байтыдӕуыд, уыдон дӕр: ныхас куы фехъусынц, уӕд ӕй уыйадыл цингӕнгӕ айсынц сӕ зӕрдӕмӕ, 17 Фӕлӕ ӕнӕуидаг сты ӕмӕ бирӕ нӕ бафӕразынц. Тыхст рӕстӕг куы ралӕууы, кӕнӕ Хуыцауы ныхасы тыххӕй ӕфхӕрын куы райдайынц, уӕд уайтагъд ныууадзынц сӕ уырнындзинад. 18 Иннӕтӕ та сты, сындзыты ӕхсӕн кӕй байтыдӕуыд, уыдон: ныхас фехъусынц, 19 Фӕлӕ сын зӕххон царды мӕт, мулчы бӕллиц ӕмӕ ӕндӕр мондӕгтӕ бацахсынц сӕ зӕрдӕ, ныххурх кӕнынц ныхас, ӕмӕ пайда нӕ ратты. 20 Мӕнӕ бӕзнаг мӕрыл кӕй байтыдӕуыд, уыдон дӕр: фехъусынц ныхас ӕмӕ йӕ айсынц сӕ зӕрдӕмӕ; ӕмӕ сӕ иу ратты дӕс ӕмӕ ссӕдз хатты, иннӕ – ӕртиссӕдз хатты, аннӕ та – фондзыссӕдз хатты фылдӕр пайда». 21 Йесо сын загъта: «Цырагъ агъуыстмӕ уый тыххӕй, мыййаг, бахӕссынц, цӕмӕй йӕ дурыны кӕнӕ сынтӕджы бын бавӕрой? Цырагъдарӕныл ӕй нӕ сӕвӕрынц, ӕви? 22 Цы нӕ раргом уа, ахӕм сусӕггаг нӕй, ӕмӕ цы нӕ рахъӕр уа, ахӕм сусӕгдзинад нӕ вӕййы. 23 Хъустӕ кӕуыл ис, уый хъусӕд!» 24 Ӕмӕ сын загъта: «Цы хъусут, ууыл-иу ахъуыды кӕнут. Цы барӕнӕй барут, ахӕмӕй сымахӕн дӕр сбарстӕуыдзӕн ӕмӕ ма уын ноджыдӕр рардӕуыдзӕн. 25 Уымӕн ӕмӕ кӕмӕ ис, уымӕн рардӕуыдзӕн; кӕмӕ нӕй, уымӕй та ист ӕрцӕудзӕн, цы йӕм ис, уый дӕр». 26 Йесо загъта: «Уӕларвон Паддзахад ахӕм у. Адӕймаг зӕххы байтауы йӕ тауинаг, 27 Ӕхсӕвыгон вӕййы фынӕй, бонӕй та сысты; уӕдмӕ мыггаг суадзы ӕвзар ӕмӕ рӕзы. Куыд рӕзы, уый та адӕймаг нӕ зоны. 28 Уымӕн ӕмӕ зӕхх йӕхӕдӕг ратты тыллӕг: фыццаг ӕвзар, стӕй ӕфсир, уый фӕстӕ та – нарст нӕмыг ӕфсирыл. 29 Ӕмӕ хуым куы фӕбур вӕййы, уӕд адӕймаг уайтагъд рауадзы йе 'хсырф, уымӕн ӕмӕ ралӕууыд кӕрдыны афон». 30 Йесо дарддӕр дзырдта: «Цӕуыл абарӕм Хуыцауы Паддзахад? Кӕнӕ йӕ цавӕр фӕсномыг ныхасӕй равдисӕм? 31 Уый хъыцъыйы нӕмыгау у. Таугӕ йӕ куы фӕкӕнынц, уӕд зӕххыл цы мыггӕгтӕ ис, ӕппӕт уыдонӕн сӕ къаддӕр вӕййы. 32 Фӕлӕ йӕ куы байтауынц, уӕд сзайы ӕмӕ цӕхӕрадоны ӕппӕт зайӕгойтӕй дӕр фӕбӕрзонддӕр вӕййы, рауадзы стыр къалиутӕ, ӕмӕ йӕ аууоны уӕларвон мӕргътӕн сӕ бон вӕййы ахстӕттӕ аразын». 33 Ахӕм фӕсномыг ныхӕстӕй сын Йесо амыдта бирӕ, сӕ бон бамбарын цас уыд, уыйас. 34 Ӕнӕ фӕсномыг ныхасӕй сын ницы дзырдта, Йӕ ахуыргӕнинӕгтӕн та хибарӕй ӕмбарын кодта ӕппӕт дӕр. 35 Уыцы бон изӕрӕй Йесо Йӕ ахуыргӕнинӕгтӕн загъта: «Ахизӕм денджызы фаллаг фарсмӕ». 36 Ахуыргӕнинӕгтӕ ауагътой адӕмы ӕмӕ, Йесо цы бӕлӕгъы уыди, уым араст сты Йемӕ. Йесоимӕ ма рацыд ӕндӕр бӕлӕгътӕ дӕр. 37 Сыстади тыхджын уад, уылӕнтӕ бӕлӕгъыл афтӕ тынг цавтой сӕхи, ӕмӕ бӕлӕгъ фӕцӕйдзаг кодта донӕй. 38 Йесо та фӕстаг къуымы кодта фынӕй, Йӕ сӕр базыл ӕрӕвӕргӕйӕ. Райхъал Ӕй кодтой ӕмӕ Йын загътой: «Ахуыргӕнӕг, сӕфгӕ кӕй кӕнӕм, уый Дӕм нӕ хъары, ӕви?» 39 Йесо сыстади, бардзырд радта уадӕн ӕмӕ загъта денджызӕн: «Банцай, ныссабыр у». Уад банцад, ӕмӕ бӕстӕ ныссабыр. 40 Йесо Йӕ ахуыргӕнинӕгтӕн загъта: «Цӕмӕн афтӕ тӕппуд стут? Нырма дӕр уӕм уырнындзинад нӕма ис?» 41 Уыдон тынг фӕтарстысты, ӕмӕ кӕрӕдзийӕн дзырдтой: «Уый Чи уа, уад ӕмӕ денджыз Кӕй коммӕ кӕсынц?»

Марк 5

1 Бахӕццӕ сты денджызы иннӕ фарсмӕ, Гадарӕйы бӕстӕмӕ. 2 Йесо бӕлӕгъӕй куыддӕр рахызт, афтӕ зӕппӕдзтӕй Йӕ размӕ рацыди хӕйрӕджджын лӕг. 3 Уый царди зӕппӕдзты. Суанг ӕй рӕхыстӕй сбӕттын дӕр ничиуал фӕрӕзта – 4 Бирӕ хӕттыты-иу баст ӕрцыди хъадамантӕ ӕмӕ рӕхыстӕй, фӕлӕ-иу арӕдывта йӕ рӕхыстӕ ӕмӕ-иу ныссаста йӕ хъадамантӕ. Уый басӕттыны хъару никӕмӕ уыд. 5 Иудадзыг, ӕхсӕвӕй-бонӕй, хъӕр кодта зӕппӕдзты ӕмӕ хӕхты, йӕхи хоста дуртыл. 6 Йесойы дардмӕ куы ауыдта, уӕд Ӕм ӕрбазгъордта, ӕрзоныгыл 7 Ӕмӕ ныхъхъӕр кодта: «Цы Дӕ хъӕуы мӕнӕй, Йесо, Дунедарӕг Хуыцауы Фырт? Хуыцауы хатыр бакӕн, хъизӕмарӕй мӕ ма мар!» 8 Уымӕн ӕмӕ йын Йесо афтӕ загъта: «Ӕнӕзӕгъинаг, рацу ацы адӕймагӕй». 9 Йесо йӕ бафарста: «Дӕ ном куыд у?» Уый Йын загъта: «Мӕ ном – легион, уымӕн ӕмӕ мах бирӕ стӕм». 10 Ӕмӕ лӕгъстӕ кодта Йесойӕн, цӕмӕй сӕ уыцы бӕстӕйӕ ма арвита. 11 Уым уӕлхох хызти хуыты стыр дзуг, 12 Ӕмӕ дӕлимонтӕ куырдтой Йесойӕ: «Хуытӕм нӕ барвит, цӕмӕй сӕ мидӕг бацӕуӕм». 13 Йесо сын бар радта. Ӕнӕзӕгъинӕгтӕ рацыдысты уыцы лӕгӕй, ӕмӕ бацыдысты хуыты. Ӕмӕ уыцы дзуг (уыдаид дзы иу дыууӕ мины бӕрц) къардиуӕй денджызмӕ фехста йӕхи, ӕмӕ фӕдӕлдон. 14 Хуыгӕстӕ азгъордтой, ӕмӕ хабар радзырдтой сахар ӕмӕ хъӕуты. Ӕмӕ цы ӕрцыд, уый фенынмӕ рацыдысты адӕм. 15 Ӕрбацыдысты Йесомӕ, ӕмӕ дӕлимонты легион кӕй мидӕг уыд, уыцы хӕйрӕджджыны федтой йӕ дарӕсы бадгӕ, йӕ зонд йӕхимӕ уыд, афтӕмӕй. Ӕмӕ старстысты. 16 Цы ӕрцыд, уый фенӕг адӕм сын ракодтой хӕйрӕджджыны ӕмӕ хуыты хабар. 17 Уӕд Йесомӕ райдыдтой хатын, цӕмӕй ацӕуа сӕ зӕххӕй. 18 Йесо бӕлӕгъмӕ куы бацӕйхызт, уӕд Дзы раздӕры хӕйрӕджджын куырдта, цӕмӕй йӕ уадза Йемӕ. 19 Фӕлӕ Йесо не сразы ӕмӕ йын загъта: «Ацу дӕ хӕдзармӕ ӕмӕ дӕ бинонтӕн радзур, Хуыцау дын цы сарӕзта ӕмӕ дӕм Йӕ хорзӕх куыд равдыста, уый тыххӕй». 20 Уый ацыд, ӕмӕ Дӕссахары райдыдта дзурын, Йесо йын цы сарӕзта, уый тыххӕй. Ӕмӕ иууылдӕр дисы ӕфтыдысты. 21 Йесо бӕлӕгъы денджызы иннӕ фарсмӕ куы ӕрбаздӕхт, уӕд Ӕм ӕрӕмбырд бирӕ адӕм. Денджызы былгӕрон ма куы уыд, 22 Уӕд Ӕм ӕрцыди синагогӕйы хицӕуттӕй иу, йӕ ном Иаир. Йесойы куы федта, уӕд Ын Йӕ къӕхтӕм йӕхи ӕрӕппӕрста, 23 Ӕмӕ Йын тынг лӕгъстӕ кодта: «Мӕ чызг мӕлгӕ кӕны; ӕрцу ӕмӕ йыл ӕрӕвӕр Дӕ къухтӕ, цӕмӕй сдзӕбӕх уа ӕмӕ цӕра». 24 Йесо араст йемӕ. Йӕ фӕдыл цыди бирӕ адӕм, ӕмӕ Йӕ цъист кодтой. 25 Иу сылгоймагӕн дыууадӕс азы дӕргъы йӕ туг цӕуынӕй не 'нцад. 26 Бирӕ дохтыртӕ йын бирӕ хъизӕмар бавзарын кодтой, цыдӕриддӕр ӕм уыди, уый иууылдӕр бахардз кодта, фӕлӕ йын ницы феххуыс – ӕрцыди фыддӕр уавӕрмӕ. 27 Йесойы тыххӕй куы фехъуыста, уӕд чъылдымырдыгӕй ӕрбацыд адӕмы ӕхсӕнты ӕмӕ Йын бандзӕвыд Йӕ дарӕсыл. 28 Уымӕн ӕмӕ хинымӕр дзырдта: «Ӕрмӕст Йӕ дарӕсыл Ын куы бандзӕвон, уӕд дӕр сдзӕбӕх уыдзынӕн». 29 Туг уайтӕккӕ банцад йӕ цӕуынӕй, ӕмӕ сылгоймаг буарӕй банкъардта, йӕ низӕй кӕй сдзӕбӕх, уый. 30 Тых Дзы кӕй рацыд, уый Йесо уыйадыл банкъардта, разылд адӕммӕ ӕмӕ загъта: «Чи бандзӕвыд Мӕ дарӕсыл?» 31 Йӕ ахуыргӕнинӕгтӕ Йын загътой: «Адӕм Дӕ куыд цъист кӕнынц, уый уыныс, уӕддӕр ма фӕрсыс: „Чи Мыл бандзӕвыд?"» 32 Фӕлӕ Йыл чи бандзӕвыд, уыцы сылгоймаджы феныны тыххӕй Йесо адӕмыл хаста Йӕ цӕст. 33 Сылгоймаг та, цы йыл ӕрцыд, уый зонгӕйӕ, тӕрсгӕ-ризгӕйӕ бацыд Йесомӕ, Йӕ къӕхтӕм ӕрӕппӕрста йӕхи, ӕмӕ Йын ӕппӕт дӕр радзырдта, куыд уыд, афтӕ. 34 Йесо йын загъта: «Мӕ чызг, дӕ уырнындзинад дӕ фервӕзын кодта. Цу фарнимӕ ӕмӕ ӕнӕниз у». 35 Йесо Йӕ ныхас нӕма фӕци, афтӕ синагогӕйы хицаумӕ ӕрцыдысты йӕ хӕдзарӕй, ӕмӕ йын загътой: «Дӕ чызг амард. Ахуыргӕнӕджы ма цы фӕлмӕцын кӕныс?» 36 Фӕлӕ Йесо, уыцы ныхӕстӕ ницӕмӕ даргӕйӕ, синагогӕйы хицауӕн загъта: «Ма тӕрс, ӕрмӕст ӕууӕнд». 37 Петр, Иаков ӕмӕ Иаковы ӕфсымӕр Иоанны йеддӕмӕ Йесо никӕй бауагъта Йемӕ ацӕуын. 38 Ӕрцыдысты синагогӕйы хицауы хӕдзармӕ. Йесо адӕмы федта тыхстӕй, кӕугӕйӕ, сӕ хъӕлӕсыдзаг дзыназгӕйӕ. 39 Бацыди мидӕмӕ ӕмӕ сын загъта: «Цы стыхстыстут ӕмӕ цӕуыл кӕут? Саби мард нӕу, фынӕй у». 40 Ӕмӕ Йыл худтысты. Фӕлӕ Йесо сеппӕты дӕр рарвыста ӕддӕмӕ, Йемӕ райста сабийы фыд ӕмӕ мады, стӕй Йе 'мбӕлццӕтты, ӕмӕ бацыди, саби кӕм уыд, уырдӕм. 41 Ныххӕцыд сабийӕн йӕ къухыл, ӕмӕ йын загъта: «Талита, кум». Ома: «Чызгай, дӕумӕ дзурын, рабад». 42 Чызг уайтӕккӕ рабадт ӕмӕ райдыдта цӕуын. Цыдаид ыл иу дыууадӕс азы. Сеппӕт дӕр стыр дисы бафтыдысты. 43 Фӕлӕ сын Йесо тынг бафӕдзӕхста, уый тыххӕй мачи базонӕд, зӕгъгӕ. Стӕй ма сын загъта, цӕмӕй чызгӕн раттой хӕринаг.

Марк 6

1 Йесо уырдыгӕй араст Йӕ ахуыргӕнинӕгтимӕ ӕмӕ ӕрцыд Йӕ сахармӕ. 2 Сабат куы ралӕууыд, уӕд райдыдта амонын синагогӕйы, ӕмӕ Йӕм цы бирӕ адӕм хъуыста, уыдон дисы ӕфтыдысты ӕмӕ дзырдтой: «Ӕппӕт адӕттӕ Йын кӕцӕй сты? Уагӕр Ын цавӕр зонд рардӕуыд, ӕмӕ ахӕм диссӕгтӕ аразын Йӕ бон куыд у? 3 Ай хъӕддӕсны нӕу, мыййаг, Мариайы фырт, Иаковы, Иосифы, Иудӕйы ӕмӕ Симоны ӕфсымӕр? Йӕ хотӕ дӕр ам, не 'хсӕн, не сты, ӕви?» Ӕмӕ Йыл не 'ууӕндыдысты. 4 Йесо сын загъта: «Пехуымпар йӕ фыдыбӕстӕ, йӕ хӕстӕджытӕ ӕмӕ йӕ хӕдзарӕй дарддӕр ӕгад никуы вӕййы». 5 Ӕмӕ уым иу диссаг саразын дӕр Йӕ бон нӕ уыд; ӕрмӕст Йӕ къухтӕ ӕрӕвӕрдта цалдӕр рынчыныл ӕмӕ сӕ сдзӕбӕх кодта. 6 Дисы Йӕ ӕфтыдта се 'нӕуырнындзинад. Уый фӕстӕ зылди хӕстӕг хъӕутыл ӕмӕ ахуыр кодта адӕмы. 7 Йесо басидт Йӕ дыууадӕс ахуыргӕнинагмӕ, арвыста сӕ дыгӕйттӕй, ӕмӕ сын радта тых, цӕмӕй сӕ бар цӕуа ӕнӕзӕгъинӕгтыл. 8 Ӕмӕ сын бафӕдзӕхста: «Лӕдзӕг йеддӕмӕ фӕндагмӕ уемӕ мацы райсут – нӕдӕр хойраг, нӕдӕр хордзен, нӕдӕр ӕхца уӕ роны. 9 Фӕлӕ дзабыртӕ дарын уӕ бон у, ӕрмӕст-иу уӕ уӕлӕ дыгай хӕдӕттӕ ма скӕнут». 10 Загъта ма сын: «Цы хӕдзармӕ-иу бацӕуат, уым-иу баззайут, цалынмӕ уырдыгӕй рацӕуат, уӕдмӕ. 11 Кӕм уӕ не суазӕг кӕной ӕмӕ уӕм кӕм нӕ байхъусой, уырдыгӕй куы рацӕуат, уӕд та-иу ацӕгъдут уӕ къӕхты рыг – аххосджын кӕй сты, уымӕн ӕвдисӕйнагӕн. [Ӕцӕг уын зӕгъын: Содом ӕмӕ Гоморрӕйӕн тӕрхоны бон уыцы сахарӕй ӕнцондӕр уыдзӕн.]» 12 Ахуыргӕнинӕгтӕ ацыдысты ӕмӕ адӕмӕн дзырдтой, цӕмӕй ӕрфӕсмон кӕной сӕ тӕригъӕдтыл. 13 Адӕмӕй-иу расырдтой бирӕ дӕлимонты, бирӕ рынчынты сӕрстой зетийӕ ӕмӕ сӕ дзӕбӕх кодтой. 14 Паддзах Ирод фехъуыста Йесойы тыххӕй, уымӕн ӕмӕ Йӕ кой айхъуыст дардыл. Иутӕ дзырдтой: «Аргъауӕг Иоанн райгас мӕрдтӕй ӕмӕ уый тыххӕй аразы диссӕгтӕ»; 15 Иннӕтӕ дзырдтой: «Уый Илиа у»; аннӕтӕ та дзырдтой: «Уый раздӕры пехуымпарты хуызӕн пехуымпар у». 16 Фӕлӕ Ирод, уыдӕттӕ фехъусгӕйӕ, загъта: «Ӕз кӕй сӕр акъуырдтон, уыцы Иоанн райгас». 17 Уымӕн ӕмӕ уымӕй размӕ Ирод арвыста Иоаннмӕ, ӕрцахста йӕ, ӕмӕ йӕ бакодта ахӕстоны йе 'фсымӕр Филиппы ус Иродиадӕйы тыххӕй. Ирод ракуырдта Иродиадӕйы, 18 Ӕмӕ йын Иоанн дзырдта: «Де 'фсымӕры усимӕ цӕрын дын не 'мбӕлы». 19 Иродиадӕ йӕм мӕстӕй марди, фӕндыд ӕй йӕ амарын, фӕлӕ ницы йӕ бон уыд. 20 Уымӕн ӕмӕ Ирод тарст Иоаннӕй; раст ӕмӕ сыгъдӕг адӕймаг кӕй у, уый зыдта, ӕмӕ йӕ хъахъхъӕдта. Кӕд-иу ӕй Иоанны ныхӕстӕ фӕкъӕмдзӕстыг кодтой, уӕддӕр ӕм хъуыста зӕрдиагӕй. 21 Иродиадӕйӕн фӕзынди фадат. Ирод йӕ райгуырӕн боны фӕдыл йе 'лдӕрттӕн, ӕфсӕддон хицӕуттӕн ӕмӕ Галилейы уӕздӕттӕн скодта куывд. 22 Иродиадӕйы чызг сӕм бацыд ӕмӕ кафыд. Уымӕй балхӕдта Ироды ӕмӕ уазджыты зӕрдӕ, ӕмӕ паддзах загъта чызгӕн: «Цы дӕ хъӕуы, уый ракур, ӕмӕ дын ӕй ратдзынӕн». 23 Ирод ын расомы кодта: «Цыдӕриддӕр мӕ ракурай, уый дын ратдзынӕн, суанг мӕ паддзахады ӕмбисы онг». 24 Чызг рацыд ӕмӕ бафарста йӕ мады: «Цы ракурон?» Уый йын загъта: «Аргъауӕг Иоанны сӕр». 25 Чызг уайтагъд бацыди паддзахмӕ ӕмӕ йын загъта: «Фӕнды мӕ, цӕмӕй мын гъертӕккӕ тӕбӕгъы ӕрбахӕссай Аргъауӕг Иоанны сӕр». 26 Паддзах ӕрӕнкъард, фӕлӕ йӕ сомымӕ гӕсгӕ ӕмӕ йемӕ минасгӕнджыты ӕфсӕрмӕй чызгӕн «нӕ» зӕгъын не сфӕрӕзта. 27 Уайтӕккӕ йӕ хъахъхъӕнджытӕй иуы арвыста Иоанны сӕр ӕрбахӕссыны бардзырдимӕ. 28 Хъахъхъӕнӕг ацыд, ахӕстоны Иоаннӕн акъуырдта йӕ сӕр, ӕмӕ йӕ тӕбӕгъы ӕрбахаста чызгӕн, чызг та йӕ радта йӕ мадмӕ. 29 Иоанны ахуыргӕнинӕгтӕ уый куы фехъуыстой, уӕд ӕрцыдысты, йӕ мард ын ахастой ӕмӕ йӕ зӕппадзы бавӕрдтой. 30 Апостолтӕ ӕрӕмбырд сты Йесомӕ ӕмӕ Йын радзырдтой, цы сарӕзтой ӕмӕ адӕмы цӕуыл сахуыр кодтой, ӕппӕт уыдӕттӕ. 31 Йесо сын загъта: «Хибар ранмӕ иунӕгӕй ацӕут ӕмӕ иучысыл уӕ фӕллад суадзут». Уымӕн ӕмӕ ӕрцӕуӕг ӕмӕ фӕстӕмӕ здӕхӕг адӕм уыйас бирӕ уыдысты, ӕмӕ сӕ суанг хӕрынмӕ дӕр не 'вдӕлд. 32 Йесо ӕмӕ апостолтӕ иунӕгӕй бӕлӕгъы араст сты хибар ранмӕ. 33 Уӕддӕр сӕ бирӕтӕ федтой фӕцӕйцӕугӕ ӕмӕ сӕ базыдтой. Уӕд ӕппӕт сахартӕй азгъордтой фистӕгӕй ӕмӕ сӕ разӕй фесты. 34 Йесо былмӕ куы рахызт, уӕд федта бирӕ адӕм ӕмӕ сын фӕтӕригъӕд кодта, уымӕн ӕмӕ уыдысты ӕнӕфыййау фыстау. Ӕмӕ сын бирӕ фӕцамыдта. 35 Бонӕй бирӕ куы нал баззади, уӕд Йесомӕ бацыдысты Йӕ ахуыргӕнинӕгтӕ ӕмӕ Йын загътой: «Ам фӕсвӕд ран у, бон та фӕивгъуыйы. 36 Ауадз адӕмы, ацӕуой хӕстӕг хъӕутӕм ӕмӕ сӕхицӕн хӕринаг балхӕной». 37 Йесо сын дзуапп радта: «Сымах сын раттут хӕринаг». Загътой Йын: «Уӕд та фӕцӕуӕм ӕмӕ дзул дыууӕсӕдӕ динары аргъ балхӕнӕм, утӕппӕт адӕмы бафсадынӕн?» 38 Йесо сӕ бафарста: «Цал дзулы уӕм ис? Ацӕут ӕмӕ фенут». Уыдон федтой ӕмӕ загътой: «Фондз дзулы ӕмӕ дыууӕ кӕсаджы». 39 Уӕд сын бафӕдзӕхста ӕппӕт адӕмы дӕр цъӕх кӕрдӕгыл къордгай ӕрбадын кӕнын. 40 Адӕм ӕрбадтысты къордгай – фондзыссӕдзгӕйттӕй ӕмӕ дӕс ӕмӕ дыууиссӕдзгӕйттӕй. 41 Йесо райста фондз дзулы ӕмӕ дыууӕ кӕсаджы, скаст уӕларвмӕ, арфӕ ракодта, асаста дзултӕ ӕмӕ сӕ радта Йӕ ахуыргӕнинӕгтӕм адӕмӕн байуарынмӕ. Дыууӕ кӕсаджы дӕр байуӕрста сеппӕтыл дӕр. 42 Сеппӕт дӕр бахордтой ӕмӕ бафсӕстысты. 43 Ӕмӕ ма дзул ӕмӕ кӕсагӕй цы баззад, уыдонӕй байдзаг дыууадӕс чыргъӕды. 44 Хӕргӕ чи кодта, уыдоны ӕхсӕн айдагъ лӕгтӕ уыди фондз мины. 45 Йесо Йӕ ахуыргӕнинӕгты уайтагъд сбадын кодта бӕлӕгъы ӕмӕ сӕ арвыста денджызы иннӕ фарсмӕ, Вифсаидӕмӕ; Йӕхӕдӕг уал баззади, цалынмӕ адӕмы ауадза, уӕдмӕ. 46 Ӕмӕ адӕмы куы ауагъта, уӕд хохмӕ ссыди бакувынмӕ. 47 Изӕрдалынгты бӕлӕгъ бахӕццӕ денджызы хӕдастӕумӕ, Йесо та иунӕгӕй уыди денджызы был. 48 Ӕмӕ федта, ахуыргӕнинӕгтӕ бӕлӕгъ зынтӕй кӕй тардтой, уый, уымӕн ӕмӕ дымгӕ дымдта сӕ ныхмӕ. Боныцъӕхты размӕ сӕм Йесо денджызыл бацыди къахӕй, ӕмӕ Йӕ фӕндыди сӕ иувӕрсты аивгъуыйын. 49 Уыдон Ӕй денджызыл цӕугӕ куы федтой, уӕд Ын цӕстылуайӕн ӕнхъӕл уыдысты, ӕмӕ хъӕр систой. 50 Уымӕн ӕмӕ Йӕ сеппӕт дӕр федтой ӕмӕ фӕтарстысты. Фӕлӕ сӕм Йесо уайтӕккӕ сдзырдта: «Фидар фӕлӕуут, уый Ӕз дӕн! Ма тӕрсут». 51 Бахызт сӕм бӕлӕгъмӕ, ӕмӕ дымгӕ банцади. Уыдон стыр дисы бафтыдысты, 52 Уымӕн ӕмӕ не 'мбӕрстой, дзултимӕ цы диссаг сарӕзтӕуыд, уый; сӕ зӕрдӕтӕ ӕхгӕд уыдысты. 53 Бахӕццӕ сты денджызы иннӕ фарсмӕ, Геннисареты цурмӕ, ӕмӕ уым ӕрлӕууыдысты. 54 Бӕлӕгъӕй куы рахызтысты, уӕд адӕм уайтагъд базыдтой Йесойы, 55 Рӕвдз ӕрзылдысты ӕппӕт бӕстӕйыл, ӕмӕ-иу Йесо Йӕ коймӕ гӕсгӕ кӕм уыд, уырдӕм хуыссӕнтыл ӕрхастой сӕ рынчынты. 56 Кӕдӕмфӕнды ма ӕрцыдаид Йесо, хъӕутӕм кӕнӕ сахартӕм, рынчынты-иу ӕрӕвӕрдтой фӕзты, хатыдысты Йӕм, цӕмӕй сӕ бауадза уӕд та Йӕ пӕлӕзы коцорайыл бандзӕвын; ӕмӕ-иу Ыл чидӕриддӕр бандзӕвыд, уыдон-иу сдзӕбӕх сты.

Марк 7

1 Йесомӕ ӕрӕмбырд сты фарисейтӕ, стӕй ма цалдӕр динамонӕджы, Иерусалимӕй чи рацыд, ахӕмтӕ. 2 Йӕ ахуыргӕнинӕгтӕй Йын иуӕй-иуты федтой чъизи, ома, ӕнӕхсад къухтӕй, хӕринаг хӕргӕ. 3 Фарисейтӕ та, ӕппӕт иудейтау, сӕ фыдӕлты ӕгъдауыл хӕст сты, ӕмӕ сӕ къухтӕ цалынмӕ бӕстон цӕхсой, уӕдмӕ нӕ хӕрынц. 4 Базарӕй куы ӕрцӕуынц, уӕд дӕр нӕ хӕрынц, цалынмӕ сӕхи цӕхсой, уӕдмӕ. Ӕмӕ ма хӕст сты бирӕ ӕндӕр ӕгъдӕуттыл дӕр: ӕхсынц къустӕ, дурынтӕ, ӕгтӕ ӕмӕ бандӕттӕ. 5 Ӕмӕ фарисейтӕ ӕмӕ динамонджытӕ бафарстой Йесойы: «Дӕ ахуыргӕнинӕгтӕ фыдӕлты ӕгъдаумӕ гӕсгӕ цӕуылнӕ цӕрынц, чъизи къухтӕй цӕмӕн хӕрынц?» 6 Йесо сын дзуапп радта: «Цӕстмӕхъустӕ, сымах тыххӕй Исай-пехуымпар Сыгъдӕг Фысты хорз загъта: „Ацы адӕм Мын кад кӕнынц дзыхӕй, сӕ зӕрдӕ та дард у Мӕнӕй. 7 Дзӕгъӕлы Мӕм кувынц; цӕуыл ахуыр кӕнынц, уыдон адӕймаджы ӕрхъуыдыгонд ӕгъдӕуттӕ сты". 8 Сымах ныууагътат Хуыцауы фӕдзӕхст, ӕмӕ хӕст стут адӕймаджы ӕрхъуыдыгонд ӕгъдӕуттыл». 9 Ноджыдӕр сын загъта: «Уӕхи ӕгъдау ӕххӕст кӕныны сӕраппонд Хуыцауы фӕдзӕхст аивын хорз зонут. 10 Уымӕн ӕмӕ Моисей загъта: „Нымай дӕ фыд ӕмӕ дӕ мады", ӕмӕ: „Йӕ фыды кӕнӕ йӕ мады ӕфхӕрӕг амӕлӕд". 11 Сымах та куыд дзурут? Йӕ фыдӕн кӕнӕ йӕ мадӕн афтӕ чи зӕгъа, мӕнӕй цы хъуамӕ айстаис, уый корбан (ома, Хуыцауӕн лӕвар) у, зӕгъгӕ, 12 Уымӕн нал дӕттут йӕ фыдӕн кӕнӕ йӕ мадӕн хорз ракӕныны бар. 13 Афтӕмӕй Хуыцауы ныхас баивут, иннӕты дӕр кӕуыл ахуыр кӕнут, уӕ уыцы ӕгъдауӕй. Ноджы ма аразут бирӕ ӕндӕр ахӕм хъуыддӕгтӕ дӕр». 14 Йесо ногӕй басидт адӕммӕ ӕмӕ сын загъта: «Байхъусут Мӕм уеппӕт дӕр ӕмӕ бамбарут! 15 Адӕймаджы ӕддейӕ цы бацӕуы, уый йӕ нӕ чъизи кӕны, фӕлӕ дзы ӕддӕмӕ цы рацӕуы, уый йӕ кӕны чъизи. 16 [Хъустӕ кӕуыл ис, уый хъусӕд!]» 17 Йесо адӕмы куы ныууагъта ӕмӕ хӕдзармӕ куы бацыд, уӕд Ӕй Йӕ ахуыргӕнинӕгтӕ бафарстой, цы фӕсномыг ныхас загъта, уымӕй. 18 Уый сын дзуапп радта: «Ау, сымах дӕр афтӕ ӕнӕмбаргӕ стут? Ӕви йӕ нӕ зонут, адӕймаджы ӕддейӕ цы бацӕуы, уый йӕ кӕй нӕ чъизи кӕны? 19 Уымӕн ӕмӕ йӕ зӕрдӕмӕ нӕ бацӕуы, фӕлӕ йӕ гуыбынмӕ ныфты, стӕй рацӕуы ӕддӕмӕ». Афтӕмӕй Йесо алы хӕринагӕй дӕр загъта, сыгъдӕг у, зӕгъгӕ. 20 Ноджы ма загъта: «Зӕрдӕйӕ цы рацӕуы, уый чъизи кӕны адӕймаджы. 21 Уымӕн ӕмӕ адӕймагӕн йӕ зӕрдӕйӕ рацӕуынц фыдвӕндтӕ, хӕтын, давын, марын, 22 Кӕрӕф, фыдӕх, фӕлывд, ӕлгъаг хъуыддӕгтӕ, хӕлӕгцӕст, хахуыр, сӕрыстырдзинад, ӕдылы митӕ. 23 Ӕппӕт уыцы хӕрам рацӕуы зӕрдӕйӕ ӕмӕ чъизи кӕны адӕймаджы». 24 Йесо араст уырдыгӕй, ӕмӕ ӕрцыди Тиры зӕхмӕ. Уым бацыд иу хӕдзармӕ. Фӕндыд Ӕй, уым кӕй ис, уый куыд мачи базона, фӕлӕ Йӕ къухы нӕ бафтыд. 25 Йесойы тыххӕй уайтӕккӕ фехъуыста, йӕ чызг хӕйрӕджджын кӕмӕн уыд, иу ахӕм сылгоймаг; ӕрцыд ӕмӕ йӕхи Уый къӕхтӕм ӕрӕппӕрста. 26 Уыцы сылгоймаг та уыди муртат, Сириаг Финикийӕ. Ӕмӕ Йесойӕн лӕгъстӕ кодта йӕ чызгӕй йын дӕлимоны расурыны тыххӕй. 27 Йесо йын загъта: «Уадз ӕмӕ уал сывӕллӕттӕ бафсӕдой. Хорз нӕу сывӕллӕтты къӕбӕр райсын ӕмӕ йӕ куыйтӕн аппарын». 28 Сылгоймаг Ын дзуапп радта: «О, Хицау, фӕлӕ куыйтӕ дӕр фынджы бын фӕхӕрынц, сывӕллӕтты фынгӕй цы муртӕ ӕрхауы, уыдон». 29 Уӕд ын Йесо загъта: «Ахӕм дзуаппы фӕстӕ цу, дӕлимон рацыди дӕ чызгӕй». 30 Сылгоймаг хӕдзармӕ куы ӕрцыд, уӕд федта: йӕ хъӕбул хуыссы хуыссӕныл, дӕлимон дзы рацыд. 31 Йесо Тиры зӕххӕй рацыди Сидоныл, ӕмӕ, Дӕссахарыл цӕугӕйӕ, рахызти Галилейаг денджызмӕ. 32 Ӕркодтой Йӕм гуылӕвзаг къуырмайы ӕмӕ Дзы куырдтой, цӕмӕй йыл Йӕ къух ӕрӕвӕра. 33 Йесо йӕ фӕхибар кодта, Йе 'нгуылдзтӕ къуырмайы хъусты фӕтъыста, ӕрту кодта ӕмӕ йын бавнӕлдта йе 'взагмӕ. 34 Стӕй скаст уӕларвмӕ, арф ныуулӕфыд ӕмӕ загъта: «Эффата». Ома: «Байгом у». 35 Ӕмӕ уайтӕккӕ байгом сты къуырмайы хъустӕ, йе 'взаг суӕгъд, ӕмӕ райдыдта сыгъдӕг дзурын. 36 Йесо сын бафӕдзӕхста, цӕмӕй уый тыххӕй макӕмӕн зӕгъой. Фӕлӕ сын цас фылдӕр фӕдзӕхста, уыйас фылдӕр хӕлиу кодтой уыцы хабар. 37 Адӕм стыр дисы ӕфтыдысты ӕмӕ дзырдтой: «Ӕппӕт дӕр хорз кӕны. Къуырматӕн гом кӕны сӕ хъустӕ, ӕгомыгтӕн дӕтты ӕвзаг».

Марк 8

1 Уыцы рӕстӕг ногӕй ӕрӕмбырд бирӕ адӕм, ӕмӕ цы бахордтаиккой, уый сӕм нӕ уыд. Уӕд Йесо басидт Йӕ ахуыргӕнинӕгтӕм ӕмӕ сын загъта: 2 «Тӕригъӕд кӕнын ацы адӕмӕн, ныр ӕртӕ боны дӕргъы Мемӕ сты, ӕмӕ цы бахӕрой, уый сӕм нӕй. 3 Сӕ хӕдзӕрттӕм сӕ ӕххормагӕй куы ауадзон, уӕд фӕндагыл бастайдзысты, уымӕн ӕмӕ дзы бирӕтӕ дардӕй ӕрцыдысты». 4 Йӕ ахуыргӕнинӕгтӕ Йын загътой: «Чи самал кӕндзӕн ацы ӕдзӕрӕг ран сӕ бафсадыны фаг дзултӕ?» 5 Йесо сӕ бафарста: «Цал дзулы уӕм ис?» Уыдон Ын загътой: «Авд». 6 Уӕд Йесо адӕмы ӕрбадын кодта зӕххыл, райста авд дзулы, арфӕ ракодта, асаста сӕ ӕмӕ сӕ радта Йӕ ахуыргӕнинӕгтӕм адӕмӕн байуарынмӕ. Уыдон сӕ байуӕрстой. 7 Уыди ма сӕм цалдӕр гыццыл кӕсаджы дӕр. Йесо раарфӕ кодта, ӕмӕ бафӕдзӕхста уыдоны дӕр байуарын. 8 Адӕм бахордтой ӕмӕ бафсӕстысты. Ӕмӕ ма цы уӕлдӕйттӕ баззад, уыдонӕй байдзаг авд чыргъӕды. 9 Хӕргӕ чи кодта, уыдон та уыдысты цыппар мины бӕрц. Йесо сӕ ауагъта, 10 Уайтӕккӕ Йӕ ахуыргӕнинӕгтимӕ бахызт бӕлӕгъмӕ, ӕмӕ ӕрцыди Далмануфаг зӕхмӕ. 11 Ӕрцыдысты фарисейтӕ ӕмӕ Йесоимӕ райдыдтой быцӕу кӕнын. Йӕ бафӕлварыны тыххӕй Дзы домдтой уӕларвӕй ӕвдисӕйнаг равдисын. 12 Йесо арф ныуулӕфыд ӕмӕ загъта: «Ацы фӕлтӕр ӕвдисӕйнаг цӕмӕн домы? Ӕцӕг уын зӕгъын: ацы фӕлтӕрӕн ӕвдисӕйнаг нӕ рардӕуыдзӕн». 13 Уыйадыл сӕ ныууагъта, ногӕй бахызт бӕлӕгъмӕ, ӕмӕ араст иннӕ фарсмӕ. 14 Йӕ ахуыргӕнинӕгтӕй ферох семӕ дзултӕ райсын; бӕлӕгъы сӕм иу дзул йеддӕмӕ нӕ уыд. 15 Йесо сын фӕдзӕхста: «Хъусут, уӕхи хизут фарисейты ӕнхъизӕнӕй ӕмӕ Ироды ӕнхъизӕнӕй». 16 Ӕмӕ ахуыргӕнинӕгтӕ кӕрӕдзийӕн дзырдтой, дзул нӕм нӕй, зӕгъгӕ. 17 Йесо сӕ бамбӕрста, ӕмӕ сын загъта: «Цӕмӕн дзурут, дзул уӕм кӕй нӕй, уый тыххӕй? Ау, нырма дӕр ӕй нӕма зонут ӕмӕ не 'мбарут? Нырма дӕр уӕ зӕрдӕтӕ ӕхгӕд сты? 18 Цӕстытӕ уын куы ис, уӕд нӕ уынут? Хъустӕ уыл куы ис, уӕд нӕ хъусут? Уӕ зӕрдыл нал лӕууы, ӕви: 19 Ӕз фондз мин лӕгӕн фондз дзулы куы асастон, уӕд уӕлдӕйттӕй цал чыргъӕды байдзаг кодтат?» Загътой Йын: «Дыууадӕс». 20 «Цыппар минӕн авд дзулы куы асастон, уӕд та уӕлдӕйттӕй цал чыргъӕды байдзаг кодтат?» Загътой: «Авд». 21 Уӕд сын загъта: «Ау, ныр дӕр ӕй нӕма ӕмбарут?» 22 Ӕрцыдысты Вифсаидӕмӕ. Йесомӕ ӕркодтой куырмы ӕмӕ Дзы куырдтой, цӕмӕй йыл бандзӕва. 23 Йесо ныххӕцыди куырмы къухыл, ракодта йӕ хъӕуӕй, батутӕ йын кодта йӕ цӕстытыл, ӕрӕвӕрдта йыл Йӕ къухтӕ ӕмӕ йӕ бафарста, исты уыны ӕви нӕ. 24 Уый акаст ӕмӕ загъта: «Уынын адӕмы, зынынц мӕм цӕугӕ бӕлӕстау». 25 Йесо йын дыккаг хатт йӕ цӕстытыл ӕрӕвӕрдта Йӕ къухтӕ, куырм ногӕй акаст ӕмӕ сдзӕбӕх, уынын райдыдта хорз. 26 Йесо йӕ арвыста йӕ хӕдзармӕ ӕмӕ йын бафӕдзӕхста: «Хъӕумӕ ма бацу [ӕмӕ ацы хабар хъӕуы макӕмӕн радзур]». 27 Йесо Йӕ ахуыргӕнинӕгтимӕ ацыди Филиппы Кесарийы алыварс хъӕутӕм. Фӕндагыл бафарста Йӕ ахуыргӕнинӕгты: «Кӕуыл Мӕ нымайынц адӕм?» 28 Уыдон Ын загътой: «Иутӕ – Аргъауӕг Иоанныл, иннӕтӕ – Илиайыл, аннӕтӕ та – пехуымпартӕй иуыл». 29 Йесо сӕ бафарста: «Сымах та Мӕ кӕуыл нымайут?» Петр Ын дзуапп радта: «Ды Чырысти дӕ». 30 Ӕмӕ сын Йесо бафӕдзӕхста, цӕмӕй Йӕ макӕмӕн схъӕр кӕной. 31 Йесо сын райдыдта амонын: Адӕймаджы Фырт хъуамӕ бавзара бирӕ хъизӕмӕрттӕ; адӕмы хистӕртӕ, алчертӕ ӕмӕ Йӕ динамонджытӕ бафхӕрдзысты, амардӕйӕуыдзӕн ӕмӕ ӕртыккаг бон райгас уыдзӕн. 32 Уый тыххӕй сын дзырдта ӕргомӕй. Уӕд Ӕй Петр фӕхибар кодта ӕмӕ Йын райдыдта уайдзӕф кӕнын. 33 Йесо разылди, бакаст Йӕ ахуыргӕнинӕгтӕм ӕмӕ тызмӕгӕй загъта Петрӕн: «Фесӕф Мӕ цурӕй, хӕйрӕг! Дӕ хъуыдытӕ, Хуыцауы фӕндон цы у, ууыл нӕ, фӕлӕ адӕймаджы фӕндон цы у, ууыл сты». 34 Йесо басидт адӕммӕ ӕмӕ Йӕ ахуыргӕнинӕгтӕм, ӕмӕ сын загъта: «Мӕ фӕдыл цӕуын кӕй фӕнды, уый йӕхи ферох кӕнӕд, райсӕд йӕ дзуар ӕмӕ рацӕуӕд Мӕ фӕдыл. 35 Уымӕн ӕмӕ йӕ цард бахъахъхъӕнын кӕй фӕнды, уый йӕ фесафдзӕн; йӕ цард Мӕ сӕраппонд ӕмӕ фарны уацы сӕраппонд чи фесафа, уый та йӕ бахъахъхъӕндзӕн. 36 Адӕймаг ӕгас дуне йӕхи куы бакӕна, йӕ уд та куы фесафа, уӕд ын уый цы пайда у? 37 Кӕнӕ йӕм цы разындзӕн, йӕ уд цӕмӕй балхӕна, ахӕмӕй? 38 Ацы ӕнӕхуыцау тӕригъӕдджын фӕлтӕры ӕхсӕн Мӕнӕй ӕмӕ Мӕ ныхӕстӕй чи фефсӕрмы уа, уымӕй фефсӕрмы уыдзӕн Адӕймаджы Фырт дӕр, сыгъдӕг зӕдтимӕ Йӕ Фыды намысимӕ куы ӕрцӕуа, уӕд».

Марк 9

1 Загъта ма сын: «Ӕцӕг уын зӕгъын: ам чи лӕууы, уыдонӕй иуӕй-иутӕ нӕ амӕлдзысты, цалынмӕ Хуыцауы Паддзахад хъомысджынӕй ӕрцӕугӕ феной, уӕдмӕ». 2 Ӕхсӕз боны фӕстӕ Йесо Йемӕ рахуыдта Петры, Иаковы ӕмӕ Иоанны, скодта сӕ бӕрзонд хохмӕ, ӕмӕ уым уыдысты хибарӕй. Сӕ разы Йӕ хуыз аивта; 3 Йӕ дарӕс сӕрттывта ӕмӕ Йын фестади сӕнтурс – зӕххыл иу адӕймагӕн дӕр хъуымац афтӕ сурс кӕнын йӕ бон нӕ бауыдзӕн. 4 Фӕзындысты сӕм Илиа ӕмӕ Моисей, ӕмӕ ныхас кодтой Йесоимӕ. 5 Уӕд Петр загъта Йесойӕн: «Равви, ам кӕй стӕм, уый цы хорз у! Саразӕм ӕртӕ халагъуды: иу Дӕуӕн, иу Моисейӕн, иу Илиайӕн». 6 Цы загътаид, уый нӕ зыдта, уымӕн ӕмӕ тынг фӕтарстысты. 7 Ӕмӕ фӕзынд ӕврагъ, ӕрӕмбӕрзта сӕ, ӕмӕ ӕврагъӕй райхъуысти хъӕлӕс: «Ай Мӕ уарзон Фырт у. Хъусут Ӕм». 8 Ахуыргӕнинӕгтӕ фӕйнӕрдӕм акастысты ӕмӕ никӕйуал ауыдтой – ӕрмӕст ма Йесо баззади семӕ. 9 Хохӕй куы ӕрцӕйцыдысты, уӕд сын Йесо бафӕдзӕхста, цӕмӕй, цы федтой, уый тыххӕй макӕмӕн радзурой, цалынмӕ Адӕймаджы Фырт мӕрдтӕй раста, уӕдмӕ. 10 Йесойы фӕдзӕхст сӕ зӕрдыл бадардтой, кӕрӕдзи та фарстой, цы амоны «мӕрдтӕй растын», зӕгъгӕ. 11 Ӕмӕ Йӕ бафарстой: «Уӕдӕ динамонджытӕ цӕмӕн дзурынц, Чырыстийы размӕ Илиа хъуамӕ ӕрцӕуа, зӕгъгӕ?» 12 Йесо сын дзуапп радта: «Раст у, раздӕр Илиа хъуамӕ ӕрцӕуа ӕмӕ ӕппӕт дӕр банывыл кӕна. Ӕмӕ уӕдӕ Фыст цӕмӕн афтӕ зӕгъы, Адӕймаджы Фырт хъуамӕ бавзара бирӕ удхар ӕмӕ хынджылӕггаг фӕуа, зӕгъгӕ? 13 Фӕлӕ уын зӕгъын: Илиа ныридӕгӕн ӕрцыд, ӕмӕ сӕ цы фӕндыд, уый йын бакодтой, Фыст дзы куыд зӕгъы, афтӕ». 14 Иннӕ ахуыргӕнинӕгтӕм куы ӕрцыдысты, уӕд сын сӕ алыварс федтой бирӕ адӕм, стӕй динамонджыты ахуыргӕнинӕгтимӕ быцӕугӕнгӕ. 15 Адӕм Йесойы куыддӕр федтой, афтӕ сеппӕт дӕр скатай сты, згъордтой Йӕм ӕмӕ Йын салам лӕвӕрдтой. 16 Йесо сӕ бафарста: «Цӕуыл у уӕ быцӕу?» 17 Адӕмӕй Йын иу дзуапп радта: «Ахуыргӕнӕг, ӕз Дӕм ӕркодтон, ӕнӕзӕгъинаг кӕй багомыг кодта, мӕ уыцы лӕппуйы. 18 Кӕм ӕй ӕрцахсы, уым ӕй зӕххыл ныццӕвы, ӕмӕ лӕппуйӕн йӕ комы фынк скӕлы, йӕ дӕндӕгты хъыс-хъыс ссӕуы, нындзыг вӕййы. Дӕ ахуыргӕнинӕгтӕн загътон, цӕмӕй расурой дӕлимоны, фӕлӕ сӕ бон нӕ баци». 19 Йесо дзуапп радта: «Ӕнӕуырнӕг фӕлтӕр! Кӕдмӕ уыдзынӕн уемӕ? Кӕдмӕ уын быхсдзынӕн? Ӕрбакӕнут Мӕм ӕй». 20 Ӕмӕ Йӕм ӕй ӕрбакодтой. Дӕлимон куыддӕр Йесойы ауыдта, афтӕ лӕппуйы йӕ гӕндзӕхтӕ цӕгъдыныл бафтыдта; лӕппу адӕргъ и зӕххыл ӕмӕ, йӕ комы фынк калгӕйӕ, ратул-батул кодта. 21 Йесо йын бафарста йӕ фыды: «Рагӕй афтӕ у?» Уый Йын дзуапп радта: «Сывӕллонӕй нырмӕ. 22 Дӕлимон ӕй бирӕ хӕттыты ӕппӕрста арты ӕмӕ доны, цӕмӕй йӕ фесафа. Кӕд Дӕ бон у, уӕд нын батӕригъӕд кӕн ӕмӕ нын баххуыс кӕн». 23 Йесо йын загъта: «Кӕд Дӕ бон у, зӕгъыс? Уырнӕгӕн ӕппӕт дӕр у йӕ бон». 24 Лӕппуйы фыд [цӕссыгкалгӕ] уайтӕккӕ хъӕрӕй загъта: «Уырны мӕ! Баххуыс кӕн мӕ лӕмӕгъ уырнындзинадӕн». 25 Йесо адӕмы ӕрбацӕйзгъоргӕ куы федта, уӕд ӕнӕзӕгъинагӕн радта бардзырд: «Ӕгомыг ӕмӕ къуырма уд! Ӕз дын зӕгъын: рацу уымӕй ӕмӕ дзы макуыуал бацу». 26 Уӕд дӕлимон ныхъхъӕр кодта, тынг ныууыгъта лӕппуйы, ӕмӕ дзы рацыд. Лӕппу мардау фӕци, ӕмӕ бирӕтӕ дзырдтой, амарди, зӕгъгӕ. 27 Фӕлӕ йын Йесо схӕцыд йӕ къухыл, рабадын ӕй кодта, ӕмӕ лӕппу сыстад. 28 Йесо хӕдзармӕ куы бацыд, уӕд Ӕй Йӕ ахуыргӕнинӕгтӕ хибарӕй бафарстой: «Дӕлимоны расурын нӕ бон цӕуылнӕ баци?» 29 Йесо сын загъта: «Ацы уды мыггагӕн ӕрмӕст кувын ӕмӕ ком дарыны фӕрцы ис фӕсурӕн». 30 Рацыдысты уырдыгӕй ӕмӕ сӕ фӕндаг акодтой Галилейыл. Ӕрмӕст Йесойы нӕ фӕндыд, уым кӕй ис, уый исчи базона. 31 Уымӕн ӕмӕ Йӕ ахуыргӕнинӕгтӕн амыдта ӕмӕ сын дзырдта: «Адӕймаджы Фырт лӕвӕрд ӕрцӕудзӕн адӕмы къухтӕм, амардзысты Йӕ, ӕмӕ ӕртыккаг бон райгас уыдзӕн». 32 Фӕлӕ уыдон уыцы ныхӕстӕ не 'мбӕрстой, бафӕрсын та Йӕ нӕ уӕндыдысты. 33 Ӕрцыдысты Капернауммӕ. Хӕдзары куы уыдысты, уӕд сӕ Йесо бафарста: «Фӕндагыл цӕй тыххӕй быцӕу кодтат?» 34 Уыдон ныхъхъус сты, уымӕн ӕмӕ фӕндагыл фӕбыцӕу сты, уӕлдӕр сӕ чи у, уый тыххӕй. 35 Йесо ӕрбадти, басидти дыууадӕсмӕ ӕмӕ сын загъта: «Уӕлдӕр уӕвын кӕй фӕнды, уый ӕппӕтӕй дӕлдӕр уӕд ӕмӕ лӕггад кӕнӕд алкӕмӕн дӕр». 36 Стӕй сын сӕ размӕ ӕрбахуыдта сывӕллоны, ӕрбахъӕбыс ӕй кодта, ӕмӕ сын загъта: 37 «Ахӕм сывӕллӕттӕй иуыл Мӕ номы сӕраппонд зӕрдиаг чи уа, уый Мӕныл у зӕрдиаг; Мӕныл зӕрдиаг чи уа, уый та Мӕныл зӕрдиаг нӕу, фӕлӕ Мӕ Рарвитӕгыл». 38 Уӕд Ын Иоанн загъта: «Ахуыргӕнӕг, мах федтам, Дӕ номӕй дӕлимонты чи суры, ахӕм адӕймаджы, ӕмӕ йын бар нӕ лӕвӕрдтам, уымӕн ӕмӕ нӕ фӕдыл нӕ цӕуы». 39 Йесо загъта: «Ма йӕ хъыгдарут. Мӕ номӕй диссаг чи равдиса, уымӕн уыйадыл Мӕнӕй ӕвзӕр зӕгъын йӕ бон нӕ бауыдзӕн. 40 Уымӕн ӕмӕ нӕ ныхмӕ чи нӕу, уый нӕ фарс у. 41 Чырыстийы кӕй стут, уый тыххӕй уын Мӕ номы сӕраппонд доны къус чи ратта, уый, ӕцӕг уын зӕгъын, ӕнӕ хӕрзиуӕгӕй нӕ баззайдзӕн. 42 Фӕлӕ ацы кӕстӕртӕй – Мӕныл ӕууӕндджытӕй – иуы дӕр тӕригъӕды чи бафтауа, уымӕн йӕ бӕрзӕйыл куыройыфыд куы ӕрцауындзиккой ӕмӕ йӕ денджызы куы баппариккой, уӕд ын хуыздӕр уаид. 43 Дӕ къух дын тӕригъӕды хос куы уа, уӕд ӕй акъуыр: хуыздӕр дын у уӕнгхъуагӕй цардмӕ бацӕуын, цӕйнӕфӕлтау дыууӕ къухимӕ зындоны ӕнӕхуысгӕ артмӕ бацӕуай. 44 [Уым сӕ къуыдыркалм нӕ мӕлы ӕмӕ дзы арт нӕ хуыссы.] 45 Ӕмӕ дын дӕ къах тӕригъӕды хос куы уа, уӕд ӕй акъуыр: хуыздӕр дын у уӕнгхъуагӕй цардмӕ бацӕуын, цӕйнӕфӕлтау дӕ дыууӕ къахимӕ зындонмӕ баппӕрстӕуа. 46 [Уым сӕ къуыдыркалм нӕ мӕлы ӕмӕ дзы арт нӕ хуыссы.] 47 Ӕмӕ дын дӕ цӕст тӕригъӕды хос куы уа, уӕд ӕй фелвас: хуыздӕр дын у иу цӕстимӕ Хуыцауы Паддзахадмӕ бацӕуын, цӕйнӕфӕлтау дӕ дыууӕ цӕстимӕ зындонмӕ баппӕрстӕуа. 48 Уым сӕ къуыдыркалм нӕ мӕлы ӕмӕ дзы арт нӕ хуыссы. 49 Уымӕн ӕмӕ алчидӕр фӕлвӕрд ӕрцӕудзӕн артӕй, Хуыцауӕн хаст нывонд цӕххӕй ссыгъдӕггӕнӕгау. 50 Цӕхх хорз у. Фӕлӕ цӕхх цӕхджын куы нӕ уа, уӕд ӕй цӕмӕй сцӕхджын кӕндзынӕ? Ӕдзӕхх ма ут ӕмӕ кӕрӕдзиимӕ цӕрут фидыдӕй».

Марк 10

1 Йесо араст уырдыгӕй, ӕрцыд Иудейӕйы зӕхмӕ ӕмӕ ахызт Иорданы иннӕ фарсмӕ. Ӕрӕмбырд та Йыл сты адӕм, ӕмӕ та сын иннӕ хӕттытау ныр дӕр амыдта. 2 Бацыдысты Йӕм фарисейтӕ ӕмӕ Йӕ ракъахыны охыл бафарстой: «Лӕгӕн йӕ усы ауадзын ӕмбӕлы?» 3 Йесо сын дзуапп радта: «Моисей уын цы бафӕдзӕхста?» 4 Уыдон загътой: «Моисей радта уагъды ӕвдисӕндар ныффыссыны ӕмӕ ус ауадзыны бар». 5 Йесо сын дзуапп радта: «Хивӕнд кӕй стут, уый тыххӕй уын ныффыста Моисей ацы фӕдзӕхст. 6 Фӕлӕ тӕккӕ райдианӕй, дуне сфӕлдисынӕй, Хуыцау „уыдоны нӕлгоймаг ӕмӕ сылгоймагӕй сфӕлдыста". 7 „Уымӕ гӕсгӕ адӕймаг ныууадздзӕн йӕ фыд ӕмӕ йӕ мады, 8 Баиу уыдзӕн йӕ усимӕ, ӕмӕ дыууӕ уыдзысты иу буар". Афтӕмӕй уыдон дыууӕ нал сты, фӕлӕ сты иу буар. 9 Уӕдӕ Хуыцау цы сиу кодта, уый адӕймаг ма ахицӕн кӕнӕд». 10 Хӕдзары та Йӕ ахуыргӕнинӕгтӕ ногӕй бафарстой уый тыххӕй. 11 Йесо сын загъта: «Йӕ усы чи ауадза ӕмӕ ӕндӕр ус чи ракура, уый хӕтгӕ кӕны ӕмӕ уымӕй цӕуы йӕ усы тӕригъӕды. 12 Йӕ мойы чи ныууадза ӕмӕ ӕндӕрмӕ чи ӕрцӕуа, уый дӕр хӕтгӕ кӕны». 13 Йесомӕ хуыдтой сывӕллӕтты, цӕмӕй сыл бандзӕва, фӕлӕ сӕ ахуыргӕнинӕгтӕ нӕ уагътой. 14 Йесо уый куы федта, уӕд смӕсты ӕмӕ сын загъта: «Ӕрбауадзут Мӕм сывӕллӕтты, ма сӕ хъыгдарут, уымӕн ӕмӕ Хуыцауы Паддзахад уыдоны хуызӕтты у. 15 Ӕцӕг уын зӕгъын: Хуыцауы Паддзахадыл сывӕллонау чи нӕ баууӕнда, уый йӕм нӕ бацӕудзӕн». 16 Ӕмӕ сывӕллӕтты Йӕ хъӕбысы ӕрбатыхта, ӕрӕвӕрдта сыл Йӕ къухтӕ ӕмӕ сыл Йӕ арфӕ бафтыдта. 17 Йесо Йӕ фӕндагыл куы араст, уӕд ӕрбазгъордта иучидӕр, Йӕ разы ӕрхауд йӕ зонгуытыл ӕмӕ Йӕ бафарста: «Хорз Ахуыргӕнӕг, мыггагмӕйы цард райсынӕн цы саразон?» 18 Йесо йын дзуапп радта: «Цӕмӕн Мӕ хоныс хорз? Иунӕг Хуыцауы йеддӕмӕ хорз ничи у. 19 Фӕдзӕхстытӕ зоныс: „Ма амар", „Ма хӕт", „Ма дав", „Мӕнгӕвдисӕн ма ныллӕуу", „Макӕй бастигъ", „Нымай дӕ фыд ӕмӕ дӕ мады"». 20 Уый Йесойӕн загъта: «Ахуыргӕнӕг, ӕппӕт уыдӕттӕ ме 'взонджы бонтӕй нырмӕ ӕххӕст кӕнын». 21 Йесо йӕм бакаст, бауарзта йӕ ӕмӕ йын зӕгъы: «Иу бакӕнинаг дын баззад: ацу, цыдӕриддӕр дӕм ис, уый ауӕй кӕн, ратт ӕй мӕгуыртӕн, ӕмӕ дын уӕларвы уыдзӕни хӕзна. Стӕй-иу раздӕх, [райс дӕ дзуар,] ӕмӕ цу Мӕ фӕдыл». 22 Уыцы ныхӕстӕй уый хорзау нал уыд ӕмӕ ацыд ӕнкъардӕй, уымӕн ӕмӕ йӕм бирӕ мулк уыд. 23 Йесо акаст фӕйнӕрдӕм ӕмӕ загъта Йӕ ахуыргӕнинӕгтӕн: «Ӕвӕдза, бонджынтӕн куыд зын у Хуыцауы Паддзахадмӕ бацӕуын!» 24 Йӕ ныхӕстӕ дисы бафтыдтой ахуыргӕнинӕгты. Фӕлӕ сын Йесо ноджыдӕр загъта: «Мӕ хъӕбултӕ, ӕвӕдза, [мулкӕй ныфс кӕй ис, уымӕн] куыд зын у Хуыцауы Паддзахадмӕ бацӕуын! 25 Хъӕздыгӕн Хуыцауы Паддзахадмӕ бацӕуынӕй теуайӕн судзины быны иннӕрдӕм ахизын ӕнцондӕр у». 26 Ахуыргӕнинӕгтӕм уый тынг диссаг фӕкаст, ӕмӕ сӕ кӕрӕдзийӕн дзырдтой: «Уӕдӕ чи фервӕздзӕн?» 27 Йесо сӕм бакаст ӕмӕ загъта: «Уый адӕмы бон нӕу, Хуыцауӕн та бантысдзӕн, уымӕн ӕмӕ Хуыцауӕн Йӕ бон ӕппӕт дӕр у». 28 Петр Ын райдыдта дзурын: «Мӕнӕ мах ныууагътам алцыдӕр ӕмӕ рацыдыстӕм Дӕ фӕдыл». 29 Йесо сын загъта: «Ӕцӕг уын зӕгъын: Мӕ сӕраппонд ӕмӕ фарны уацы сӕраппонд йӕ хӕдзар, кӕнӕ йе 'фсымӕрты, кӕнӕ йӕ хоты, кӕнӕ йӕ мады, кӕнӕ йӕ фыды, [кӕнӕ йӕ усы,] кӕнӕ йӕ сывӕллӕтты, кӕнӕ йӕ зӕххытӕ чи ныууадза, уыдонӕй иунӕг ахӕм дӕр нӕй, 30 Ӕмӕ, кӕд ӕфхӕрд ӕййафдзӕн, уӕддӕр ныридӕгӕн, ацы заманы, фондзыссӕдз хатты фылдӕрӕй чи нӕ райса хӕдзӕрттӕ, ӕфсымӕртӕ, хотӕ, мадӕлтӕ, сывӕллӕттӕ ӕмӕ зӕххытӕ, ӕрцӕуинаг дунейы та – мыггагмӕйы цард. 31 Фӕлӕ фыццӕгтӕй бирӕтӕ уыдзысты фӕстӕгтӕ, фӕстӕгтӕй та бирӕтӕ уыдзысты фыццӕгтӕ». 32 Йесо ӕмӕ Йӕ ахуыргӕнинӕгтӕ сӕ фӕндаг дардтой Иерусалиммӕ; Йесо цыди сӕ разӕй. Ахуыргӕнинӕгтӕ дисы ӕфтыдысты, Йӕ фӕдыл цӕуӕг адӕмы та тас бацыд. Йесо ногӕй фӕхибар кодта дыууадӕсы ӕмӕ сын дзурын райдыдта, цы Йыл ӕрцӕудзӕн, уыдӕтты тыххӕй: 33 «Ныр мах цӕуӕм Иерусалиммӕ, ӕмӕ Адӕймаджы Фырт лӕвӕрд ӕрцӕудзӕн алчертӕм ӕмӕ динамонджытӕм. Рахӕсдзысты Йын марыны тӕрхон ӕмӕ Йӕ ратдзысты муртаттӕм. 34 Уыдон Ӕй ӕфхӕрдзысты, тутӕ Йыл кӕндзысты, нӕмдзысты Йӕ ехсӕй ӕмӕ Йӕ амардзысты, ӕмӕ ӕртӕ боны фӕстӕ райгас уыдзӕн». 35 Йесомӕ бацыдысты Зеведейы фырттӕ Иаков ӕмӕ Иоанн, ӕмӕ Йын загътой: «Ахуыргӕнӕг, фӕнды нӕ, цӕмӕй нын сӕххӕст кӕнай нӕ курдиат». 36 Йесо сӕ бафарста: «Цы уӕ фӕнды, ӕмӕ уын ӕй саразон?» 37 Уыдон Ын дзуапп радтой: «Дӕ намысджын Паддзахады нӕ иуы Дӕ рахиз фарс, иннӕйы та Дӕ галиу фарс сбадын бауадз». 38 Йесо сын загъта: «Цы курут, уый уӕхӕдӕг дӕр не 'мбарут. Ӕз цы хъизӕмӕртты кӕхц нуазын, уый баназын, кӕнӕ Мӕныл цы аргъуыдӕй аргъуыдӕуы, ахӕм аргъуыд райсын суыдзӕн уӕ бон?» 39 Уыдон Ын дзуапп радтой: «Суыдзӕн». Йесо та сын загъта: «Ӕз цы хъизӕмӕртты кӕхц нуазын, уый нуаздзыстут, ӕмӕ Мӕныл цы аргъуыдӕй аргъуыдӕуы, уымӕй уыл саргъуыдӕуыдзӕн. 40 Мӕ рахиз фарс ӕмӕ Мӕ галиу фарс сбадын та Мӕнӕй аразгӕ нӕу, фӕлӕ уыцы бынӕттӕ кӕмӕн ӕрцӕттӕчындӕуыд, уыдон дзы сбаддзысты». 41 Уый дӕс ахуыргӕнинаджы куы фехъуыстой, уӕд смӕсты сты Иаков ӕмӕ Иоаннмӕ. 42 Йесо басидти сеппӕтмӕ дӕр ӕмӕ сын загъта: «Сымах зонут, ӕлдӕрттӕ кӕй хонынц, уыдон адӕмтӕн кӕй хицауиуӕг кӕнынц, ӕмӕ хицӕуттӕ адӕмтыл барджын кӕй сты, уый. 43 Сымахмӕ та афтӕ ма уӕд. Фӕлӕ уӕ уӕлдӕр уӕвын кӕй фӕнды, уый уын уӕд лӕггадгӕнӕг; 44 Ӕмӕ уӕ фыццаг уӕвын кӕй фӕнды, уый уеппӕтӕн дӕр уӕд цагъар. 45 Адӕймаджы Фырт дӕр уый тыххӕй не 'рцыд, ӕмӕ Йын лӕггад кӕной, фӕлӕ цӕмӕй Йӕхӕдӕг балӕггад кӕна ӕмӕ бирӕты ссӕрибары сӕраппонд ратта Йӕ цард». 46 Ӕрцыдысты Иерихонмӕ. Йесо Йӕ ахуыргӕнинӕгтӕ ӕмӕ бирӕ адӕмимӕ Иерихонӕй куы рацӕйцыди, уӕд куырм мӕгуыргур Вартимей, Тимейы фырт, бадти фӕндаггӕрон. 47 Ӕмӕ куы фехъуыста, уый Назаретаг Йесо у, зӕгъгӕ, уӕд райдыдта хъӕр кӕнын: «Йесо, Давиды Фырт, батӕригъӕд мын кӕн!» 48 Бирӕтӕ дзы домдтой, цӕмӕй ныссабыр уа, фӕлӕ уый ноджы тынгдӕр хъӕр кодта: «Давиды Фырт, батӕригъӕд мын кӕн!» 49 Йесо ӕрлӕууыд ӕмӕ загъта: «Фӕдзурут ӕм». Фӕдзырдтой куырммӕ ӕмӕ йын загътой: «Ма тӕрс, сыст, дзуры дӕм». 50 Уый феппӕрста йӕ пӕлӕз, фӕгӕпп ласта ӕмӕ бацыд Йесомӕ. 51 Йесо йӕ бафарста: «Цы дӕ фӕнды? Цы дын саразон?» Куырм Ын дзуапп радта: «Раввуни, мӕн фӕнды мӕ цӕстытӕй ракӕсын». 52 Йесо йын загъта: «Ацу, дӕ уырнындзинад дӕ фервӕзын кодта». Куырм уайтӕккӕ ракаст йӕ цӕстытӕй ӕмӕ ацыд Йесойы фӕдыл.

Марк 11

1 Иерусалиммӕ сӕ бирӕ нал хъуыд. Елеоны хохы фахсыл чи ис, уыцы Виффаги ӕмӕ Вифанимӕ куы баввахс сты, уӕд Йесо арвыста Йӕ ахуыргӕнинӕгтӕй дыууӕйы, 2 Ӕмӕ сын загъта: «Ацӕут, уӕ ныхмӕ цы хъӕу ис, уырдӕм. Куы бацӕуат, уӕд уайтӕккӕ ссардзыстут, адӕймаг кӕуыл нӕма сбадт, ахӕм къӕлӕу бастӕй. Суадзут ӕй ӕмӕ йӕ ракӕнут. 3 Исчи уӕ куы бафӕрса: „Уый цы ми кӕнут?", уӕд дзуапп раттут, Хицауы хъӕуы, зӕгъгӕ, стӕй йӕ, зӕгъ, Хицау уыйадыл рарвитдзӕн фӕстӕмӕ». 4 Ахуыргӕнинӕгтӕ ацыдысты, ӕмӕ уынджы, кулдуармӕ бастӕй, ссардтой къӕлӕу, ӕмӕ йӕ суагътой. 5 Уым чи лӕууыди, уыдонӕй сын чидӕртӕ загътой: «Цы ми кӕнут? Къӕлӕуы цӕмӕн уӕгъд кӕнут?» 6 Уыдон сын дзуапп радтой, Йесо сын куыд бафӕдзӕхста, афтӕ. Ӕмӕ сӕ ауагътой. 7 Ӕркодтой къӕлӕуы Йесомӕ, сӕвӕрдтой йыл сӕ дарӕстӕ, ӕмӕ йыл Йесо сбадт. 8 Бирӕтӕ сӕ дарӕстӕ байтыдтой фӕндагыл, иннӕтӕ та – быдырты кӕй ралыг кодтой, уыцы къалиутӕ. 9 Йесойӕн Йӕ разӕй ӕмӕ Йӕ фӕстӕ чи цыд, уыдон хъӕр кодтой: «Осаннӕ! Арфӕгонд уӕд Хуыцауы номӕй Ӕрцӕуӕг! 10 Арфӕгонд уӕд нӕ фыдӕл Давиды ӕрцӕуинаг паддзахад! Осаннӕ уӕлӕрвты!» 11 Йесо Иерусалиммӕ куы бахӕццӕ, уӕд бацыди Кувӕндонмӕ, ӕрзылд ыл, ӕмӕ ӕнафон кӕй уыд, уымӕ гӕсгӕ дыууадӕс ахуыргӕнинагимӕ ацыди Вифанимӕ. 12 Дыккаг бон Вифанийӕ куы рацыдысты, уӕд Йесо сыстонг. 13 Дардӕй ауыдта, сыфтӕр чи рафтыдта, ахӕм легъуибӕлас, ӕмӕ йӕм ацыд, кӕд ыл исты ссарид, зӕгъгӕ. Фӕлӕ йӕм куы бацыд, уӕд ыл сыфтӕрты йеддӕмӕ ницы ссардта, уымӕн ӕмӕ йын дыргъафон нӕма уыд. 14 Уӕд ын Йесо загъта: «Нырӕй фӕстӕмӕ дын мыггагмӕ дӕр дӕ гагатӕй мачиуал бахӕрӕд». Ӕмӕ уый фехъуыстой Йӕ ахуыргӕнинӕгтӕ. 15 Ӕрцыдысты Иерусалиммӕ. Йесо Кувӕндонмӕ бацыд ӕмӕ уырдыгӕй тӕрын райдыдта уӕйгӕнджытӕ ӕмӕ ӕлхӕнджыты, ӕхцаивджытӕн афӕлдӕхта сӕ фынгтӕ, бӕлӕттӕ уӕйгӕнджытӕн та – сӕ бандӕттӕ. 16 Ницы дзаума уагъта Кувӕндоныл хӕссын. 17 Ӕмӕ сӕ ахуыр кодта: «Афтӕ фыст нӕу, ӕви: „Мӕ хӕдзар ӕппӕт адӕмтӕн кувӕн хӕдзар схуындӕуыдзӕн"? Сымах та дзы абырджыты лӕгӕт сарӕзтат». 18 Алчертӕ ӕмӕ динамонджытӕ уый куы фехъуыстой, уӕд агуырдтой Йӕ амарыны фадат. Уымӕн ӕмӕ Дзы тарстысты, Йӕ ахуырад ӕппӕт адӕмы дисы кӕй ӕфтыдта, уый тыххӕй. 19 Куы баизӕр, уӕд Йесо Йӕ ахуыргӕнинӕгтимӕ рацыди сахарӕй. 20 Райсомӕй легъуийы цурты куы фӕцӕйцыдысты, уӕд федтой, бӕлас йӕ уидӕгтӕм кӕй бахус, уый. 21 Петр ӕрымысыди зноны хабар ӕмӕ загъта Йесойӕн: «Равви, акӕс-ма, Ды кӕй ралгъыстай, уыцы легъуибӕлас бахус». 22 Йесо сын загъта: 23 «Ӕууӕндут Хуыцауыл. Ӕцӕг уын зӕгъын, исчи ацы хохӕн куы зӕгъа: „Фӕхицӕн у зӕххӕй ӕмӕ денджызы дӕхи баппар", ӕмӕ ӕппындӕр куы нӕ фӕгуырысхо уа, фӕлӕ фидарӕй куы ӕууӕнда, уӕд цы зӕгъа, уый ӕрцӕудзӕн. 24 Уый тыххӕй уын зӕгъын: уӕ куывды цыдӕриддӕр ракурат, уый ныридӕгӕн кӕй райстат, ууыл ӕууӕндут, ӕмӕ йӕ райсдзыстут. 25 Ӕмӕ-иу Хуыцауы раз кувгӕйӕ куы лӕууат, уӕ зӕрдӕ та искӕуыл куы худа, уӕд-иу ын ныббарут, ӕмӕ уын уӕ Уӕларвон Фыд дӕр ныббардзӕн уӕ тӕригъӕдтӕ. 26 [Кӕд нӕ барут, уӕд уын уӕ Уӕларвон Фыд дӕр нӕ ныббардзӕн уӕ тӕригъӕдтӕ.]» 27 Йесо Йӕ ахуыргӕнинӕгтимӕ ногӕй ӕрцыд Иерусалиммӕ. Кувӕндоныл куы зылди, уӕд Ӕм бацыдысты алчертӕ, динамонджытӕ ӕмӕ адӕмы хистӕртӕ, 28 Ӕмӕ Йӕ бафарстой: «Ды цавӕр хъаруйӕ кӕныс ӕппӕт уыдӕттӕ? Афтӕ кӕныны бар Дын чи радта?» 29 Йесо сын загъта: «Ӕз дӕр уӕ бафӕрсдзынӕн цӕмӕйдӕр. Дзуапп Мын раттут, ӕмӕ уын зӕгъдзынӕн, цавӕр хъаруйӕ сӕ кӕнын, уый. 30 Иоанн цы аргъуыдӕй аргъуыдта, уый уӕларвӕй уыд ӕви адӕмӕй? Зӕгъут-ма Мын ӕй». 31 Уыдон кӕрӕдзийӕн дзырдтой: «„Уӕларвӕй" куы зӕгъӕм, уӕд бафӕрсдзӕн: „Уӕдӕ цӕуылнӕ баууӕндыдыстут Иоанныл?"» 32 «Адӕмӕй» зӕгъынӕй та адӕмӕй тарстысты, уымӕн ӕмӕ сеппӕты дӕр уырныдта, Иоанн ӕцӕгӕй пехуымпар кӕй уыд, уый. 33 Ӕмӕ дзуапп радтой Йесойӕн: «Нӕ зонӕм». Уӕд сын Йесо загъта: «Уӕдӕ уын Ӕз дӕр нӕ зӕгъдзынӕн, цавӕр хъаруйӕ сӕ кӕнын, уый».

Марк 12

1 Йесо адӕмӕн райдыдта фӕсномыг ныхӕстӕй дзурын: «Иу адӕймаг ныссагъта сӕнӕфсирдон, йӕ алыварс ын сарӕзта ӕмбонд, скъахта дзы сӕндуцӕн, самадта дзы мӕсыг, радта йӕ ӕххуырст кусджытӕм ӕмӕ ацыд балцы. 2 Афон куы ралӕууыди, уӕд ӕххуырст кусджытӕм йӕ сӕнӕфсиры хай райсынмӕ арвыста йӕ цагъары. 3 Уыдон ӕй ӕрцахстой, фӕнадтой йӕ ӕмӕ йӕ афтидармӕй раздӕхтой. 4 Арвыста сӕм ӕндӕр цагъары, ӕмӕ уымӕн дӕр асастой йӕ сӕр ӕмӕ дзы фӕхынджылӕг кодтой. 5 Арвыста ма сӕм ӕндӕры дӕр, ӕмӕ йӕ амардтой. Ноджы ма сӕм бирӕты арвыста, ӕмӕ уыдонӕй дӕр кӕй нӕмгӕ фӕкодтой, кӕй та дзы маргӕ акодтой. 6 Иу ма йын баззад – йӕ уарзон фырт; ӕмӕ сӕм ӕппынфӕстаг уый дӕр арвыста, мӕ фыртӕй мын фефсӕрмы уыдзысты, зӕгъгӕ. 7 Фӕлӕ ӕххуырст кусджытӕ загътой кӕрӕдзийӕн: „Уый йӕ бындар у. Цом, амарӕм ӕй, ӕмӕ мах бауыдзысты йӕ бынтӕ". 8 Ӕрцахстой йӕ ӕмӕ йӕ амардтой, ӕмӕ йын йӕ мард сӕнӕфсирдонӕй раппӕрстой. 9 Цы бакӕндзӕни сӕнӕфсирдоны хицау? Ӕрцӕудзӕн, амардзӕн ӕххуырст кусджыты ӕмӕ сӕнӕфсирдон ратдзӕн ӕндӕртӕм. 10 Ау, Сыгъдӕг Фысты нӕ бакастыстут: „Аразджытӕ цы дурыл нӕ барвӕссыдысты, уый сси сӕрӕвӕрӕн. 11 Уый Хуыцауы фӕндӕй у, ӕмӕ уыцы диссаг мах уынӕм"?» 12 Йесо фӕсномыг ныхас уыдоны тыххӕй кӕй загъта, уый бамбӕрстой, ӕмӕ Йӕ хъавыдысты ӕрцахсынмӕ, фӕлӕ адӕмӕй нӕ бауӕндыдысты. Уӕд Ӕй ныууагътой ӕмӕ ацыдысты. 13 Ӕмӕ Йӕм барвыстой фарисейтӕй ӕмӕ Ироды фарсдарджытӕй кӕйдӕрты, цӕмӕй Йӕ ракъахой ӕмӕ Йын Йӕ ныхӕстӕ Йӕхи ныхмӕ фӕцаразой. 14 Уыдон Ӕм ӕрцыдысты ӕмӕ Йын загътой: «Ахуыргӕнӕг, мах зонӕм, Ды раст кӕй дӕ ӕмӕ искӕй зӕрдӕ балхӕныныл кӕй нӕ архайыс, уымӕн ӕмӕ никӕй хъулон кӕныс, фӕлӕ ӕцӕгадмӕ гӕсгӕ амоныс Хуыцауы фӕндаг. Кесӕрӕн хъалон фидын ӕмбӕлы ӕви нӕ? Фидӕм ын ӕви йын ма фидӕм?» 15 Йесо сын зыдта сӕ цӕстмӕхъусдзинад ӕмӕ сын загъта: «Цы Мӕ къахут? Рахӕссут-ма Мӕм динар ӕмӕ йӕм ӕркӕсон». 16 Ӕрбахастой Йӕм. Ӕмӕ сын загъта: «Кӕй ныв ӕмӕ йыл кӕй ном ис?» Уыдон Ын дзуапп радтой: «Кесӕры». 17 Йесо сын загъта: «Кесӕры цы у, уый дӕттут кесӕрӕн, Хуыцауы цы у, уый та – Хуыцауӕн». Ӕмӕ Йыл дис кодтой. 18 Уӕд Йесомӕ ӕрбацыдысты саддукейтӕ (саддукейтӕ дзурынц, мӕрдтӕ нӕ райгас уыдзысты, зӕгъгӕ), ӕмӕ Йӕ бафарстой: 19 «Ахуыргӕнӕг, Моисей махӕн ныффыста: „Искӕмӕн йӕ усджын ӕфсымӕр куы амӕла, зӕнӕг та йын куы нӕ баззайа, уӕд ын йе 'фсымӕр ракурӕд йӕ усы ӕмӕ цот рауадзӕд йе 'фсымӕрӕн". 20 Уыд авд ӕфсымӕры. Хистӕр ӕрхаста ус ӕмӕ ӕнӕзӕнӕгӕй амард. 21 Ракуырдта йӕ дыккаг ӕфсымӕр ӕмӕ уый дӕр амарди, йӕ фӕстӕ зӕнӕг нӕ ныууадзгӕйӕ. Афтӕ рауад ӕртыккаджы хабар дӕр. 22 Авдӕй йӕ алчидӕр ракуырдта, фӕлӕ дзы зӕнӕг ничи ныууагъта. Сеппӕты фӕстӕ ус дӕр амард. 23 Ныр мӕрдтӕ куы райгас уой, уӕд сӕ кӕй ус уыдзӕни? Сӕ авды ус дӕр куы уыд». 24 Йесо сын дзуапп радта: «Нӕдӕр Сыгъдӕг Фыст, нӕдӕр Хуыцауы тых кӕй нӕ зонут, уый уӕ нӕ рӕдийын кӕны, ӕви? 25 Уымӕн ӕмӕ мӕрдтӕ куы райгас уой, уӕд нӕдӕр ус курдзысты, нӕдӕр мой кӕндзысты, фӕлӕ уыдзысты уӕларвон зӕдтау. 26 Мӕрдтӕ райгас уыдзысты, зӕгъгӕ, уый тыххӕй та Моисейы чиныджы нӕ бакастыстут, Хуыцау ӕм сындзкъутӕрӕй цы радзырдта, уый: „Ӕз дӕн Авраамы Хуыцау, Исаакы Хуыцау ӕмӕ Иаковы Хуыцау"? 27 Хуыцау мӕрдты Хуыцау нӕу, удӕгӕсты Хуыцау у. Уӕдӕ сымах тынг рӕдийут». 28 Динамонджытӕй сын иу фехъуыста сӕ ныхас ӕмӕ бафиппайдта, Йесо уыдонӕн хорз дзуапп кӕй радта, уый. Ӕмӕ бацыд Йесомӕ ӕмӕ Йӕ бафарста: «Ӕппӕт фӕдзӕхстытӕй сӕйрагдӕр кӕцы у?» 29 Йесо йын дзуапп радта: «Тӕккӕ сӕйрагдӕр мӕнӕ ацы фӕдзӕхст у: „Байхъус, Израил! Нӕ Хицау Хуыцауы йеддӕмӕ ӕндӕр Хуыцау нӕй. 30 Ӕмӕ уарз дӕ Хицау Хуыцауы ӕппӕт зӕрдӕйӕ, ӕппӕт удӕй, ӕппӕт зондӕй ӕмӕ ӕппӕт хъаруйӕ". 31 Дыккаг фӕдзӕхст та ахӕм у: „Уарз хионы, дӕхи куыд уарзыс, афтӕ". Уыдонӕй ахсджиагдӕр фӕдзӕхст нӕй». 32 Динамонӕг Ын загъта: «Раст зӕгъыс, Ахуыргӕнӕг. Хуыцау иу кӕй у ӕмӕ ӕндӕр Хуыцау кӕй нӕй, уымӕй иттӕг раст зӕгъыс. 33 Ӕмӕ Уый ӕппӕт зӕрдӕйӕ, ӕппӕт зондӕй, ӕппӕт хъаруйӕ уарзын, хионы дӕр, дӕхи куыд уарзыс, афтӕ уарзын у ӕппӕт иууылсудзинаг нывондтӕй ӕмӕ ӕппӕт иннӕ нывондтӕй дӕр ахсджиагдӕр». 34 Йесо йын йӕ раст дзуапп куы фехъуыста, уӕд ын загъта: «Хуыцауы Паддзахадӕй дард нӕ дӕ». Уый фӕстӕ Йесойы бафӕрсынмӕ йӕ ныфс ничиуал хаста. 35 Йесо Кувӕндоны дарддӕр ахуыр кодта адӕмы ӕмӕ дзырдта: «Динамонджытӕ куыд зӕгъынц Чырыстийӕ, Давиды байзӕддаг у, зӕгъгӕ? 36 Сыгъдӕг Удӕй разӕнгардӕй Давид йӕхӕдӕг куы дзырдта: „Хуыцау загъта мӕ Хицауӕн: сбад Мӕ рахиз фарс, цалынмӕ Дын Де знӕгты Дӕ къӕхты бын ӕрӕвӕрон, уӕдмӕ". 37 Давид Ӕй кӕд Хицау хоны, уӕд Уый йӕ байзӕддаг куыд у?» Адӕм хъуыстой Йесомӕ зӕрдиагӕй. 38 Ӕмӕ сӕ Йесо ахуыр кодта: «Уӕхи хизут динамонджытӕй. Уыдон уарзынц даргъ дарӕс дарын ӕмӕ сахарты фӕзты адӕмы арфӕтӕм хъусын; 39 Уарзынц синагогӕты раззаг бынӕтты ӕмӕ минасы фынгтыл уӕле бадын; 40 Хӕрынц идӕдзты хӕдзӕрттӕ, цӕстмӕ кувынц бирӕ. Уыдон баййафдзысты карз ӕфхӕрд». 41 Йесо ӕрбадти Кувӕндоны хӕзнадоны бакомкоммӕ ӕмӕ каст, адӕм дзы ӕхца куыд ӕвӕрдтой, уымӕ. Бирӕ хъӕздгуытӕ дзы ӕвӕрдтой бирӕ ӕхца. 42 Ӕрцыд иу мӕгуыр идӕдз ус ӕмӕ нывӕрдта дыууӕ лептӕйы – иу кодрант. 43 Йесо басидт Йӕ ахуыргӕнинӕгтӕм ӕмӕ сын загъта: «Ӕцӕг уын зӕгъын, ацы мӕгуыр идӕдз ус, ӕппӕт адӕм цас нывӕрдтой, уымӕй фылдӕр нывӕрдта хӕзнадоны. 44 Иннӕтӕ иууылдӕр сӕ исбоны уӕлдайӕ нывӕрдтой; ацы мӕгуыр сылгоймаг та нывӕрдта, цыдӕриддӕр ӕм уыдис, уый, йӕ хойраджы аргъ».

Марк 13

1 Йесо Кувӕндонӕй куы рацӕйцыд, уӕд Ын Йӕ ахуыргӕнинӕгтӕй иу загъта: «Ахуыргӕнӕг, акӕс-ма, мӕнӕ цы дуртӕ ӕмӕ бӕстыхӕйттӕ ис!» 2 Йесо йын дзуапп радта: «Уыныс ацы стыр бӕстыхӕйттӕ? Уыдон афтӕ ныппырх уыдзысты, ӕмӕ дзы ам дур дурыл нал баззайдзӕн». 3 Йесо Елеоны хохыл Кувӕндоны бакомкоммӕ куы бадт, уӕд Ӕй хибарӕй фарстой Петр, Иаков, Иоанн ӕмӕ Андрей: 4 «Зӕгъ-ма нын, уый кӕд уыдзӕн, ӕмӕ ӕппӕт уыдӕттӕн се 'рцыды афон цӕмӕй бӕрӕг уыдзӕн?» 5 Йесо сын райдыдта дзурын: «Уӕхи хизут, цӕмӕй уӕ мачи фӕсайа. 6 Бирӕтӕ ӕрцӕудзысты ӕмӕ дзурдзысты: „Ӕз Чырысти дӕн", ӕмӕ бирӕты фӕсайдзысты. 7 Ӕввахс ӕмӕ дард хӕстыты тыххӕй куы фехъусат, уӕд ма фӕтӕрсут – ӕппӕтт уыдӕттӕн ӕнӕрцӕугӕ нӕй, фӕлӕ уый кӕрон нӕма уыдзӕни. 8 Сыстдзысты адӕм адӕмы ныхмӕ ӕмӕ паддзахад паддзахады ныхмӕ, ранӕй-рӕтты уыдзӕни зӕххӕнкъуыстытӕ, скӕндзӕни стонг рӕстӕг. Ӕппӕт уыдӕттӕ арӕг сылгоймаджы хъизӕмӕртты райдайӕнау уыдзысты. 9 Фӕлӕ сымах цӕттӕ дарут уӕхи: дӕтдзысты уӕ тӕрхондӕттӕм ӕмӕ уӕ нӕмдзысты синагогӕты; Мӕн тыххӕй уӕ кӕндзысты хицӕуттӕм ӕмӕ паддзӕхтӕм, цӕмӕй Мын уыдоны раз уат ӕвдисӕнтӕ. 10 Фӕлӕ уал уыдӕтты размӕ ӕппӕт адӕмтӕм хъуамӕ фӕхӕццӕ уа фарны уац. 11 Тӕрхонмӕ уӕ куы кӕной, уӕд цы зӕгъдзыстут, ууыл-иу рагацау ма мӕт кӕнут, фӕлӕ-иу дзурут, уайтӕккӕ уын цы рардӕуа, уый. Уымӕн ӕмӕ сымах нӕ дзурдзыстут, фӕлӕ уӕ дзыхӕй дзурдзӕни Сыгъдӕг Уд. 12 Ратдзӕн ӕфсымӕр ӕфсымӕры ӕмӕ фыд хъӕбулы мӕлӕтмӕ; сыстдзысты зӕнӕг сӕ ныййарджыты ныхмӕ ӕмӕ сӕ амарын кӕндзысты. 13 Мӕ номы тыххӕй алкӕмӕн дӕр уыдзыстут ӕнӕуынон; фӕлӕ кӕронмӕ чи бафӕраза, уый фервӕздзӕн. 14 Кӕм не 'мбӕлы, уым „ӕлгъаг гӕныстон" куы фенат, – чиныгкӕсӕг ӕй бамбарӕд, – уӕд Иудейӕйы чи уа, уыдон лидзӕнт хӕхтӕм. 15 Уӕлхӕдзар чи уа, уый йӕ хӕдзармӕ ма ӕрхизӕд уырдыгӕй исты рахӕссынмӕ. 16 Быдыры чи уа, уый дӕр ма раздӕхӕд йӕ дарӕс рахӕссынмӕ. 17 Уӕд додоййаг уыдзысты сывӕрджынтӕ ӕмӕ дзидзидарджытӕ. 18 Кувут, цӕмӕй уӕ ма бахъӕуа зымӕджы лидзын. 19 Уымӕн ӕмӕ уыцы бонты уыдзӕни, Хуыцау дуне куы сфӕлдыста, уӕдӕй нырмӕ чи нӕма уыд ӕмӕ нал уыдзӕн, ахӕм стыр бӕллӕх. 20 Ӕмӕ Хицау уыцы бонтӕ куы нӕ фӕцыбыр кодтаид, уӕд иу адӕймаг дӕр нӕ фервӕзтаид. Фӕлӕ Йӕхӕдӕг кӕй сӕвзӕрста, уыдоны сӕраппонд сӕ фӕцыбыр кодта. 21 Уӕд уын исчи куы зӕгъа: „Мӕнӕ ам ис Чырысти", кӕнӕ: „Уым ис", – ма уӕ бауырнӕд. 22 Уымӕн ӕмӕ фӕзындзысты мӕнгчырыститӕ ӕмӕ мӕнгпехуымпартӕ, равдисдзысты ӕвдисӕйнӕгтӕ ӕмӕ диссӕгтӕ, цӕмӕй, гӕнӕн ӕмӕ амалӕй, асайой ӕвзӕрстыты. 23 Уӕхи хизут – ӕппӕт уыдӕтты тыххӕй уын Ӕз загътон рагацау. 24 Уӕд, уыцы бӕллӕхты фӕстӕ, баталынг уыдзӕни хур, мӕй нал ратдзӕн йӕ рухс, 25 Стъалытӕ хаудзысты арвӕй, ӕмӕ уӕларвон тыхтӕ нынкъуысдзысты. 26 Уӕд Адӕймаджы Фырты фендзысты стыр тых ӕмӕ намысимӕ ӕврӕгътыл ӕрцӕйцӕугӕ. 27 Рарвитдзӕн зӕдты ӕмӕ Йе 'взӕрстыты ӕрӕмбырд кӕндзӕн алы рӕттӕй – зӕххы кӕронӕй арвы кӕронмӕ. 28 Райсут цӕвиттонӕн легъуибӕлас: йӕ къалиутӕ куы сфӕлмӕн вӕййынц ӕмӕ сыфтӕр куы рафтауынц, уӕд фӕзонут, сӕрд кӕй ӕрӕввахс. 29 Уӕдӕ сымах ӕппӕт уыдӕттӕ ӕххӕстгӕнгӕ куы фенат, уӕд-иу зонут, афон кӕй ӕрӕввахс, ныридӕгӕн къӕсӕрыл кӕй ис, уый. 30 Ӕцӕг уын зӕгъын: ацы фӕлтӕр нӕма аивгъуыйдзӕни, цалынмӕ ӕппӕт уыдӕттӕ ӕрцӕуой. 31 Арв ӕмӕ зӕхх нал уыдзысты, Мӕ ныхӕстӕ та мыггагмӕ дӕр уыдзысты сӕ тыхы. 32 Уыцы боны кӕнӕ сахаты тыххӕй ничи зоны: нӕдӕр уӕларвон зӕдтӕ, нӕдӕр Фырт – ӕрмӕст ӕй Фыд зоны. 33 Цырд лӕуут ӕмӕ фынӕй ма кӕнут, уымӕн ӕмӕ уыцы афон кӕд ӕрцӕудзӕн, уый нӕ зонут. 34 Цӕвиттон, иу лӕг цыди балцы ӕмӕ йӕ хӕдзар ныууагъта йӕ цагъарты ӕвджид, алкӕмӕн дӕр дзы бахӕс кодта бӕлвырд хъуыддаг ӕмӕ дуаргӕсӕн бафӕдзӕхста къӕрцхъусӕй лӕууын. 35 Уӕдӕ сымах дӕр ут къӕрцхъус, уымӕн ӕмӕ нӕ зонут, хӕдзары хицау кӕд ӕрцӕудзӕн, уый: изӕры, ӕмбисӕхсӕв, кӕркуасӕнты ӕви райсомӕй. 36 Ӕваст куы ӕрцӕуа, уӕд уӕ фынӕйӕ цӕмӕй ма ӕрӕййафа. 37 Сымахӕн цы зӕгъын, уый хауы алкӕмӕ дӕр: ут къӕрцхъус».

Марк 14

1 Дыууӕ боны фӕстӕ хъуамӕ уыдаид Куадзӕны ӕмӕ Донгонд дзулты бӕрӕгбон. Алчертӕ ӕмӕ динамонджытӕ агуырдтой Йесойы хинӕй ӕрцахсыны ӕмӕ Йӕ амарыны фадат. 2 Ӕмӕ тӕрхӕттӕ кодтой: «Ӕрмӕст бӕрӕгбоны нӕ, науӕд адӕм сызмӕнтдзысты». 3 Йесо уыди Вифанийы, хъотырджын Симоны хӕдзары. Ӕмӕ фынгыл куы бадт, уӕд ӕрбацыд иу сылгоймаг, нард цы зайӕгой хонынц, уымӕй ист сыгъдӕг ӕмӕ зынаргъ хӕрздӕфгӕнӕнӕй дзаг дурынимӕ. Сылгоймаг дурыны хъуыр асаста ӕмӕ хӕрздӕфгӕнӕн райдыдта Йесойы сӕрыл уадзын. 4 Иуӕй-иутӕ смӕсты сты ӕмӕ дзырдтой: «Цӕмӕн хъуыди уыйбӕрц хӕрздӕфгӕнӕн хардз кӕнын? 5 Уыди йын ӕртӕсӕдӕ динарӕй фылдӕрыл ауӕйгӕнӕн ӕмӕ ӕхца мӕгуыртӕн раттӕн». Ӕмӕ бустӕ кодтой сылгоймагыл. 6 Фӕлӕ сын Йесо загъта: «Ныууадзут ӕй, цӕмӕн ӕй къӕмдзӕстыг кӕнут? Уый Мын хорз хъуыддаг сарӕзта. 7 Мӕгуыртӕ ӕдзух уӕ фарсмӕ сты, ӕмӕ уӕ куы фӕнда, уӕд сын уӕ бон у баххуыс кӕнын; Ӕз та ӕдзух уемӕ нӕ уыдзынӕн. 8 Сылгоймагӕн йӕ бон цы уыди, уый бакодта: Мӕ баныгӕныны размӕ Мын хӕрздӕфгӕнӕнӕй байсӕрста Мӕ буар. 9 Ӕцӕг уын зӕгъын: фарны уац ӕппӕт дунейы хъуыстгонд кӕмдӕриддӕр уа, уым ацы сылгоймаджы ӕрымысынӕн загъдӕуыдзӕн, цы сарӕзта, уый тыххӕй». 10 Уӕд Иудӕ Искариот, дыууадӕс ахуыргӕнинагӕй иу, ацыди алчертӕм, цӕмӕй сын ауӕй кӕна Йесойы. 11 Куы йӕм байхъуыстой, уӕд бацин кодтой ӕмӕ йын зӕрдӕ бавӕрдтой ӕхцайӕ. Ӕмӕ Иудӕ агуырдта сӕ къухтӕм сын Ӕй раттыны фадат. 12 Донгонд дзулты бӕрӕгбоны фыццаг бон, Куадзӕны уӕрыкк ӕргӕвдыны бон, Йесойӕн Йӕ ахуыргӕнинӕгтӕ загътой: «Куыд Дӕ фӕнды, кӕдӕм Дын ацӕуӕм Куадзӕны фынг ӕрӕвӕрынмӕ?» 13 Уый арвыста Йӕ ахуыргӕнинӕгтӕй дыууӕйы ӕмӕ сын загъта: «Ацӕут сахармӕ. Уым уыл сӕмбӕлдзӕн иу адӕймаг доны дурынимӕ, ӕмӕ-иу араст ут йӕ фӕдыл. 14 Кӕдӕм бацӕуа, уыцы хӕдзары хицауӕн-иу зӕгъут: „Ахуыргӕнӕг зӕгъы: Мӕ ахуыргӕнинӕгтимӕ Куадзӕн кӕм бахӕрон, Мӕ уыцы уат кӕм ис?" 15 Ӕмӕ уын уый уӕллаг уӕладзыджы фенын кӕндзӕн стыр ӕфснайд уат; уым-иу нын ӕрӕвӕрут фынг». 16 Ахуыргӕнинӕгтӕ араст сты, бацыдысты сахармӕ ӕмӕ ӕппӕт дӕр ссардтой, Йесо сын куыд загъта, афтӕ; ӕмӕ ӕрӕвӕрдтой Куадзӕны фынг. 17 Куы баизӕр, уӕд Йесо ӕрцыд Йӕ дыууадӕс ахуыргӕнинагимӕ. 18 Ӕмӕ фынгыл куы бадтысты, уӕд Йесо загъта: «Ӕцӕг уын зӕгъын, уӕ иу Мыл рацӕудзӕни гадзрахатӕй – ныртӕккӕ Мемӕ чи хӕры, уый». 19 Уыдон ӕрӕнкъард сты ӕмӕ Йын иу иннӕйы фӕдыл райдыдтой дзурын: «Уый ӕз уыдзынӕн, мыййаг?» 20 Йесо сын загъта: «Дыууадӕсӕй иу, цӕхдоны Мемӕ йӕ къӕбӕр чи тулы, уый. 21 Адӕймаджы Фырт фӕивгъуыйы, Сыгъдӕг Фыст Дзы куыд зӕгъы, афтӕ. Фӕлӕ сар йӕ сӕр, Адӕймаджы Фыртыл гадзрахатӕй цы адӕймаг рацӕуа, уымӕн. Уыцы адӕймаг фӕлтау куы нӕ райгуырдаид, уӕд ын хуыздӕр уыдаид». 22 Хӕргӕ куы кодтой, уӕд Йесо райста дзул, арфӕ ракодта, асаста йӕ, радта сын ӕй ӕмӕ загъта: «Айсут ӕмӕ хӕрут – уый Мӕ Буар у». 23 Стӕй райста сӕны кӕхц, арфӕ ракодта, радта сын ӕй, ӕмӕ дзы сеппӕт дӕр банызтой. 24 Ӕмӕ сын загъта: «Уый Мӕ Туг у – уымӕй фидаргонд цӕуы ног фидыд, ӕмӕ акӕлдзӕни бирӕты сӕраппонд. 25 Ӕцӕг уын зӕгъын, нал баназдзынӕн сӕнӕфсиры сӕнӕй, цалынмӕ Хуыцауы Паддзахады ног сӕн баназон, уӕдмӕ». 26 Стӕй азарыдысты арфӕйы зарӕг ӕмӕ ацыдысты Елеоны хохмӕ. 27 Йесо сын загъта: «Уеппӕт дӕр Мӕ ныууадздзыстут, уымӕн ӕмӕ Сыгъдӕг Фыст зӕгъы: „Амардзынӕн фыййауы, ӕмӕ фыстӕ ныххӕлиу уыдзысты". 28 Фӕлӕ Мӕ райгасы фӕстӕ уӕ разӕй ацӕудзынӕн Галилеймӕ». 29 Петр афтӕ бакодта: «Сеппӕт дӕр Дӕ куы ныууадзой, уӕддӕр Дӕ ӕз нӕ ныууадздзынӕн». 30 Йесо йын загъта: «Ӕцӕг дын зӕгъын, ахсӕв уасӕг дыууӕ хатты нӕма ныууасдзӕн, афтӕ Мыл ӕртӕ хатты атигъ кӕндзынӕ дӕхи». 31 Фӕлӕ Петр ноджы ныфсджындӕрӕй дзырдта: «Демӕ мӕ амӕлын куы бахъӕуа, уӕддӕр Дыл мӕхи нӕ атигъ кӕндзынӕн». Афтӕ дзырдтой иннӕтӕ дӕр. 32 Уӕд ӕрцыдысты, Гефсимани чи хуынди, уыцы бынатмӕ. Йесо Йӕ ахуыргӕнинӕгтӕн загъта: «Цалынмӕ бакувон, уӕдмӕ уал ам абадут». 33 Йемӕ ахуыдта Петры, Иаковы ӕмӕ Иоанны, бафтыди мӕлӕтон тасы ӕмӕ райдыдта ӕрхӕндӕг кӕнын. 34 Ӕмӕ сын загъта: «Мӕ уд мӕлӕтон хъынцъым кӕны; фӕлӕуут ам, ма-иу бафынӕй ут». 35 Иучысыл ӕддӕдӕр рацыд, зӕххыл дӕлгоммӕ ӕрхауд ӕмӕ куывта, цӕмӕй, гӕнӕн ӕмӕ амалӕй, ацы тухӕн ма бавзара: 36 «Аввӕ, Мӕ Фыд, ӕппӕт дӕр у Дӕ бон. Ацы хъизӕмӕртты кӕхц Мын ма бадар. Ӕниу, Мӕн куыд фӕнды, афтӕ нӕ, фӕлӕ Дӕу куыд фӕнды, афтӕ фӕуӕд». 37 Йесо бацыд Йӕ ахуыргӕнинӕгтӕм, ӕмӕ сӕ фынӕйӕ куы баййӕфта, уӕд Петрӕн загъта: «Симон, фынӕй дӕ? Ӕнӕ фынӕйӕ иу сахат нӕ бафӕрӕзтай? 38 Ма ныффынӕй ут ӕмӕ кувут, цӕмӕй фӕлварӕны ма бахауат. Уд цӕрдӕг у, буар та – ӕдых». 39 Ногӕй та фӕхибар ӕмӕ бакуывта, уымӕй размӕ куыд куывта, афтӕ. 40 Бацыди сӕм ӕмӕ та сӕ баййӕфта фынӕйӕ, уымӕн ӕмӕ сӕ цӕстытӕ ӕруӕззау сты, ӕмӕ Йын цы дзуапп раттаиккой, уый нӕ зыдтой. 41 Бацыди сӕм ӕртыккаг хатт дӕр, ӕмӕ сын загъта: «Ныр дӕр ма фынӕй кӕнут ӕмӕ уӕ фӕллад уадзут? Ӕгъгъӕд у, ӕрцыди рӕстӕг. Мӕнӕ Адӕймаджы Фырт лӕвӕрд цӕуы тӕригъӕдджынты къухтӕм. 42 Сыстут ӕмӕ цӕуӕм. Мӕнӕ Мӕ уӕйгӕнӕг ӕрбаввахс». 43 Йесо Йӕ ныхас нӕма фӕци, афтӕ ӕрбацыд Иудӕ, дыууадӕс ахуыргӕнинагӕй иу. Алчертӕ, динамонджытӕ ӕмӕ йын адӕмы хистӕртӕ йемӕ рарвыстой бирӕ адӕм кӕрдтӕ ӕмӕ хъилтимӕ. 44 Йесойы уӕйгӕнӕг сын радта ахӕм нысан: «Кӕмӕн аба кӕнон, Уый у. Ӕрцахсут Ӕй, акӕнут Ӕй ӕмӕ Йӕ уӕгъд ма суадзут». 45 Ӕмӕ куыддӕр ӕрбахӕццӕ, афтӕ бацыд Йесомӕ ӕмӕ Йын загъта: «Равви!» Ӕмӕ Йын аба кодта. 46 Уӕд фӕлӕбурдтой Йесомӕ ӕмӕ Йӕ ӕрцахстой. 47 Йемӕ чи лӕууыд, уыдонӕй иу фелвӕста кард, ныццавта дзы алчеры цагъары ӕмӕ йын йӕ хъус ахауын кодта. 48 Уӕд Йесо адӕмӕн загъта: «Цыма абырӕджы ахсут, уыйау Ме 'рцахсынмӕ кӕрдтӕ ӕмӕ хъилтимӕ куы рацыдыстут. 49 Ӕз ӕрвылбон Кувӕндоны уемӕ уыдтӕн, ахуыр кодтон адӕмы, ӕмӕ Мӕ нӕ ахстат. Фӕлӕ Сыгъдӕг Фыст цы зӕгъы, уый хъуамӕ сӕххӕст уа». 50 Уӕд Ӕй ахуыргӕнинӕгтӕ сеппӕт дӕр ныууагътой ӕмӕ фӕлыгъдысты. 51 Иу ӕрыгон лӕппу, йӕ бӕгънӕг буарыл хъуымац тыхт, афтӕмӕй цыд Йӕ фӕдыл, ӕмӕ йӕ ӕфсӕддонтӕ ӕрцахстой. 52 Фӕлӕ сын лӕппу хъуымац сӕ къухы фӕуагъта ӕмӕ бӕгънӕгӕй алыгъд. 53 Йесойы акодтой алчермӕ. Уым ӕрӕмбырд сты алчертӕ, адӕмы хистӕртӕ ӕмӕ динамонджытӕ иууылдӕр. 54 Петр дӕрддзӕф цыди Йӕ фӕдыл ӕмӕ бацыд алчеры кӕртмӕ. Уым ӕрбадти хъахъхъӕнджытимӕ ӕмӕ йӕхи тавта артмӕ. 55 Алчертӕ ӕмӕ ӕппӕт синедрион Йесойы ныхмӕ агуырдтой ӕвдисӕйнӕгтӕ, цӕмӕй Йын рахӕссой амарыны тӕрхон, фӕлӕ нӕ ардтой. 56 Бирӕтӕ лӕууыдысты мӕнгӕвдисӕн Йӕ ныхмӕ, фӕлӕ цы дзырдтой, уый сын кӕрӕдзийыл нӕ бадт. 57 Цалдӕр мӕнгӕвдисӕны сыстадысты ӕмӕ дзырдтой Йӕ ныхмӕ: 58 «Мах фехъуыстам, цы дзырдта, уый: „Ӕз фехалдзынӕн лӕджыкъухӕйконд ацы Кувӕндон ӕмӕ ӕртӕ бонмӕ сараздзынӕн ӕндӕр, лӕджыкъухӕйконд чи нӕу, ахӕм"». 59 Фӕлӕ уыдонӕн дӕр се 'вдисӕйнӕгтӕ кӕрӕдзийыл нӕ бадтысты. 60 Уӕд алчер размӕ ралӕууыд ӕмӕ бафарста Йесойы: «Дӕ ныхмӕ Дын цы ӕвдисӕнтӕ хӕссынц, уыдонӕн ницы дзуапп дӕттыс?» 61 Йесо ныхъхъус ӕмӕ ницы дзуапп лӕвӕрдта. Алчер Ӕй ногӕй бафарста: «Ды дӕ Чырысти, Арфӕгонды Фырт?» 62 Йесо загъта: «Ӕз дӕн. Ӕмӕ Адӕймаджы Фырты уындзыстут Ӕппӕтхъомысы рахиз фарс бадгӕ ӕмӕ уӕларвон ӕврӕгътыл ӕрцӕйцӕугӕ». 63 Уӕд алчер арӕмыгъта йӕ дарӕс ӕмӕ загъта: «Цӕй ӕвдисӕнтӕ ма нӕ хъӕуы? 64 Сымах фехъуыстат, Хуыцауы куыд фауы, уый. Цы хъуыды уӕм ис?» Сеппӕт дӕр Ӕй банымадтой аххосджыныл ӕмӕ амарыны аккагыл. 65 Уӕд Ыл иуӕй-иутӕ райдыдтой тутӕ кӕнын, бамбӕрзтой-иу Ын Йӕ цӕсгом, цавтой Йӕ ӕмӕ Йын дзырдтой: «Кӕд пехуымпар дӕ, уӕд Дӕ чи ныццавта, уый базон». Дзӕхстытӕ Йӕ кодтой хъахъхъӕнджытӕ дӕр. 66 Ныр Петр та уыди бынӕй, кӕрты. Уырдӕм ӕрбацыд алчеры лӕггадгӕнӕг сылгоймӕгтӕй иу, 67 Петры федта йӕхи артмӕ тавгӕ, ӕдзынӕг ӕм ныккаст, ӕмӕ йын загъта: «Ды дӕр Назаретаг Йесоимӕ уыдтӕ». 68 Фӕлӕ Йыл Петр атигъ кодта йӕхи: «Цы дзурыс, уый нӕ зонын ӕмӕ не 'мбарын». Петр рацыд ӕддаг кӕртмӕ, ӕмӕ уасӕг ныууасыд. 69 Лӕггадгӕнӕг сылгоймаг та йӕ федта уым дӕр, ӕмӕ йӕ фарсмӕ лӕуджытӕн дзурын райдыдта: «Ай уыдонӕй у». 70 Петр та Йесойыл атигъ кодта йӕхи. Уым чи лӕууыд, уыдон дӕр чысыл фӕстӕдӕр загътой Петрӕн: «Ӕнӕмӕнг уыдонӕй дӕ, уымӕн ӕмӕ ды дӕр галилейаг дӕ. [Де 'взаджы здӕхт дыл комдзог цӕуы.]» 71 Уый райдыдта ард хӕрын ӕмӕ Хуыцауӕй сомы кӕнын: «Сымах Кӕмӕй зӕгъут, ӕз уыцы Адӕймаджы нӕ зонын». 72 Ӕмӕ уыйадыл уасӕг ныууасыди дыккаг хатт. Ӕмӕ Петр ӕрымысыд, Йесо йын цы загъта, уый: «Уасӕг дыууӕ хатты нӕма ныууасдзӕн, афтӕ Мыл ӕртӕ хатты атигъ кӕндзынӕ дӕхи». Ӕмӕ райдыдта кӕуын.

Марк 15

1 Куыддӕр сбон, афтӕ алчертӕ, адӕмы хистӕртӕ, динамонджытӕ ӕмӕ ӕппӕт синедрион рахастой уынаффӕ. Йесойы сбастой, акодтой Йӕ ӕмӕ Йӕ радтой Пилаты къухтӕм. 2 Пилат Ӕй бафарста: «Ды дӕ иудейаг Паддзах?» Йесо йын дзуапп радта: «Дӕхӕдӕг ӕй куы зӕгъыс». 3 Ӕмӕ Йӕ алчертӕ зылын кодтой бирӕ хъуыддӕгты. 4 Пилат та Йӕ бафарста: «Ницы дзуапп дӕттыс? Уыныс, куыд бирӕ азым Дӕм хӕссынц». 5 Фӕлӕ йын Йесо дзуапп нал радта, ӕмӕ Пилат дисы бафтыд. 6 Пилат-иу бӕрӕгбоны рауагъта, адӕм кӕй куырдтой, иу ахӕм ахӕсты. 7 Уӕд ахӕстоны уыд иучидӕр, йӕ ном – Вараввӕ; бадти, змӕсты рӕстӕг туг чи ныккалдта, уыцы змӕнтджытимӕ. 8 Адӕм ӕрӕмбырд сты ӕмӕ Пилатӕй райдыдтой курын, цӕмӕй та ацы хатт дӕр сараза, куыд-иу сын кодта, афтӕ. 9 Уый сын загъта: «Фӕнды уӕ, цӕмӕй уын иудейаг Паддзахы рауадзон?» 10 Пилат зыдта, алчертӕ йын Йесойы йӕ къухтӕм сӕ хӕлӕгӕй кӕй радтой, уый. 11 Фӕлӕ алчертӕ сардыдтой адӕмы, Вараввӕйы сын рауадзыныл куыд дзурой, афтӕ. 12 Пилат сын ногӕй загъта: «Уӕдӕ сымах иудейаг Паддзах Кӕй хонут, Уымӕн та цы бакӕнон?» 13 Уӕд уыдон ныхъхъӕр кодтой: «Байтындз Ӕй!» 14 Пилат сын загъта: «Уагӕр ӕвзӕрӕй цы ракодта?» Фӕлӕ уыдон ноджы тынгдӕр ныхъхъӕр кодтой: «Байтындз Ӕй!» 15 Пилаты фӕндыд адӕмы зӕрдӕ балхӕнын, ӕмӕ сын рауагъта Вараввӕйы, Йесойы та ехсӕй фӕнӕмын кодта ӕмӕ Йӕ радта дзуарыл байтындзынмӕ. 16 Ӕфсӕддонтӕ Йесойы акодтой бӕстӕйы хицауы галуаны мидӕггаг кӕртмӕ, ӕмӕ ӕрӕмбырд кодтой ӕгас ӕфсӕддон хай. 17 Скодтой Йыл сӕнтсырх дарӕс, сбыдтой сындзын кадыхуд ӕмӕ Йыл ӕй ӕркодтой. 18 Ӕмӕ Йын райдыдтой арфӕ кӕнын: «Ӕгас цӕуӕд иудейаг Паддзах!» 19 Йӕ сӕр Ын цавтой лӕдзӕгӕй, тутӕ Йыл кодтой, Йӕ разы-иу ӕрлӕууыдысты сӕ зонгуытыл ӕмӕ Йын куывтой. 20 Куы Йӕ бафхӕрдтой, уӕд сӕнтсырх дарӕс раластой, скодтой Йыл Йӕхи дарӕс ӕмӕ Йӕ акодтой байтындзынмӕ. 21 Уыцы рӕстӕг фӕссахарӕй ӕрбацӕйцыд иу кириниаг лӕг Симон, Александр ӕмӕ Руфы фыд; ӕмӕ йын ахӕссын кодтой Йесойы дзуар. 22 Йесойы ӕркодтой, Голгофӕ (ома, Сӕргӕхцы бынат) чи хуыйны, уырдӕм. 23 Ӕмӕ Йын лӕвӕрдтой сӕн смирнӕимӕ хӕццӕйӕ, фӕлӕ йӕ Йесо нӕ бакуымдта. 24 Дзуарыл Ӕй байтыгътой, ӕмӕ Йын Йӕ дарӕстыл ӕппӕрстой хӕлттӕ, кӕмӕ дзы цы ӕрхауа, ууыл, ӕмӕ сӕ се 'хсӕн байуӕрстой. 25 Куы Йӕ байтыгътой, уӕд цыди ӕртыккаг сахат 26 Йӕ азымы тыххӕй фыст уыди фӕйнӕгыл: «Иудейаг Паддзах». 27 Йемӕ Йын байтыгътой дыууӕ абырӕджы, иуы Йӕ рахиз фарс, иннӕйы та Йӕ галиу фарс. 28 [Ӕмӕ сӕххӕст, Сыгъдӕг Фыст цы зӕгъы, уый: «Фыдгӕнджыты хыгъдмӕ Йӕ бахастӕуыд».] 29 Йӕ цурты чи цыди, уыдон тылдтой сӕ сӕртӕ ӕмӕ Йӕ фаудтой: «Гъей, Кувӕндон халӕг ӕмӕ йӕ ӕртӕ бонмӕ аразӕг! 30 Дӕхи фервӕзын кӕн – дзуарӕй ӕрхиз». 31 Афтӕ Дзы хынджылӕг кодтой алчертӕ дӕр динамонджытимӕ, ӕмӕ кӕрӕдзийӕн дзырдтой: «Иннӕты ирвӕзын кодта, Йӕхи фервӕзын кӕнын та Йӕ бон нӕу! 32 Чырысти, Израилы Паддзах, ныр дзуарӕй ӕрхизӕд, цӕмӕй йӕ фенӕм нӕхи цӕстӕй ӕмӕ Йыл баууӕндӕм». Йемӕ тыгъд чи уыд, уыдон дӕр Ӕй фаудтой. 33 Ӕхсӕзӕм сахат куы ралӕууыд, уӕд бӕстӕ ӕгасӕй дӕр баталынг, ӕмӕ афтӕ ахаста фарӕстӕм сахаты онг. 34 Фарӕстӕм сахатыл Йесо хъӕрӕй ныууынӕргъыдта: «Элои, Элои, лема сабахтани?» Ома: «Мӕ Хуыцау, Мӕ Хуыцау, цӕмӕн Мӕ ныууагътай?» 35 Уым чи лӕууыд, уыдонӕй чидӕртӕ уый фехъуыстой ӕмӕ дзырдтой: «Илиамӕ дзуры». 36 Иучидӕр та азгъордта, губкӕ стылдта туаг сӕны ӕмӕ йӕ ӕрсагъта лӕдзӕгыл. Баназынмӕ Йӕм ӕй бадардта ӕмӕ загъта: «Фӕлӕуут-ма, бакӕсӕм, кӕддӕра Илиа ӕрцӕуид дзуарӕй Йӕ ӕрисынмӕ». 37 Йесо та хъӕрӕй ныууынӕргъыдта ӕмӕ Йӕ уд систа. 38 Ӕмӕ Кувӕндоны мидӕг ӕмбӕрзӕн дыууӕ дихы фӕци уӕлейӕ бынмӕ. 39 Йесо хъӕрӕй куыд ныууынӕргъыдта ӕмӕ Йӕ уд куыд систа, уый Йӕ разы лӕууӕг сӕдӕйыхицау куы федта, уӕд загъта: «Ацы Адӕймаг ӕцӕгӕй Хуыцауы Фырт уыди». 40 Уым уыдысты ӕмӕ дӕрддзӕфӕй кастысты сылгоймӕгтӕ дӕр; уыдонимӕ – магдалӕйаг Мариа, кӕстӕр Иаковы ӕмӕ Иосийы мад Мариа, стӕй Саломи. 41 Ацы сылгоймӕгтӕ цыдысты Йӕ фӕдыл ӕмӕ Йын лӕггад кодтой, Йесо ма Галилейы куы уыди, уӕд. Уыди ма дзы, Иерусалиммӕ Йемӕ чи ӕрцыд, бирӕ ахӕм сылгоймӕгтӕ дӕр. 42 Ныридӕгӕн баизӕр, ӕмӕ майрӕмбон кӕй уыд – сабатмӕ цӕттӕ кӕныны бон, – 43 Уымӕ гӕсгӕ синедрионы дзырддзӕугӕ уӕнг, аримафейаг Иосиф (уый дӕр Хуыцауы Паддзахадмӕ ӕнхъӕлмӕ каст), йӕ ныфс бахаста Пилатмӕ бацӕуынмӕ ӕмӕ Йесойы мард ракурынмӕ. 44 Йесо ныридӕгӕн кӕй амарди, уый Пилатмӕ диссаг фӕкаст, басидт сӕдӕйыхицаумӕ ӕмӕ йӕ бафарста: «Раджы амард?» 45 Ӕмӕ сӕдӕйыхицауӕй хабар куы базыдта, уӕд Йесойы мард раттын кодта Иосифӕн. 46 Иосиф балхӕдта уӕздан кӕттаг, ӕриста Йесойы, батыхта Йӕ кӕттаджы ӕмӕ Йӕ бавӕрдта, къӕдзӕхы цы зӕппадз къахт уыди, уым; ӕмӕ йын йӕ бацӕуӕныл бафӕлдӕхта дур. 47 Магдалӕйаг Мариа ӕмӕ Иосийы мад Мариа уыдтой, кӕм Ӕй бавӕрдтой, уый.

Марк 16

1 Сабат куы аивгъуыдта, уӕд магдалӕйаг Мариа, Иаковы мад Мариа ӕмӕ Саломи балхӕдтой хӕрздӕфгӕнӕнтӕ, цӕмӕй ацӕуой ӕмӕ байсӕрдой Йесойы. 2 Ӕмӕ къуырийӕн йӕ фыццаг бон, сӕумӕйӕ, хур куыддӕр скаст, афтӕ ӕрцыдысты зӕппадзмӕ. 3 Кӕрӕдзийӕн дзырдтой: «Зӕппадзмӕ бацӕуӕнӕй нын дур чи афӕлдахдзӕн?» 4 Фӕлӕ куы бакастысты, уӕд ӕй федтой фӕлдӕхтӕй; дур тынг стыр уыди. 5 Зӕппадзмӕ куы бацыдысты, уӕд уым федтой урс дарӕсджын лӕппуйы рахизырдыгӕй бадгӕ; ӕмӕ фӕтарстысты. 6 Фӕлӕ сын уый загъта: «Ма тӕрсут. Дзуарыл тыгъд Назаретаг Йесойы агурут сымах – ам нӕй, райгас и. Мӕнӕ, кӕм Ӕй бавӕрдтой, уыцы бынат. 7 Фӕлӕ ацӕут, зӕгъут Ын Йӕ ахуыргӕнинӕгтӕн ӕмӕ Петрӕн, уӕ разӕй цӕуы Галилеймӕ, зӕгъгӕ. Уым Ӕй фендзыстут, куыд уын загъта, афтӕ». 8 Сылгоймӕгтӕ рацыдысты зӕппадзӕй ӕмӕ згъорынмӕ фесты. Фыртӕссӕй сӕхи дӕр нал ӕмбӕрстой ӕмӕ никӕмӕн ницы загътой, уымӕн ӕмӕ сӕ тас бацыд. 9 [Къуырийӕн йӕ фыццаг бон, сӕумӕраджы, Йесо куы райгас, уӕд фыццаг фӕзынд, авд дӕлимоны кӕмӕй расырдта, уыцы магдалӕйаг Мариамӕ. 10 Мариа ацыд ӕмӕ хабар радзырдта, раздӕр Йесоимӕ чи уыд, ныр та кӕугӕ ӕмӕ ӕрдиаг чи кодта, уыдонӕн. 11 Фӕлӕ Йесо кӕй райгас ӕмӕ Йӕ Мариа кӕй федта, уый куы фехъуыстой, уӕд сӕ нӕ бауырныдта. 12 Уый фӕстӕ уыдонӕй дыууӕ хъӕумӕ куы фӕцӕйцыдысты, уӕд сӕм Йесо Йӕхи равдыста ӕндӕр хуызы. 13 Уыдон раздӕхтысты ӕмӕ уый тыххӕй радзырдтой иннӕтӕн дӕр. Фӕлӕ адоныл дӕр нӕ баууӕндыдысты. 14 Ӕппынфӕстаг Йесо фӕзынд иуӕндӕс ахуыргӕнинагмӕ, фынгыл куы бадтысты, уӕд. Ӕмӕ сын уайдзӕф кодта, уырнындзинад сӕм кӕй нӕ уыди, сӕ зӕрдӕтӕ ӕхгӕд кӕй разындысты ӕмӕ, Йӕ райгасы фӕстӕ Йӕ чи федта, уыдоныл кӕй нӕ баууӕндыдысты, уый тыххӕй. 15 Йесо сын загъта: «Ӕрзилут ӕгас дунейыл ӕмӕ хъусын кӕнут фарны уац ӕппӕт адӕмӕн. 16 Чи баууӕнда ӕмӕ кӕуыл саргъуыдӕуа, уый фервӕздзӕни; чи нӕ баууӕнда, уый та уыдзӕни тӕрхонгонд. 17 Уырнджытӕ та ӕвдисдзысты ахӕм диссӕгтӕ: Мӕ номӕй сурдзысты дӕлимонты, дзурдзысты ног ӕвзӕгтыл, 18 Сӕ къухтӕм исдзысты кӕлмытӕ, марг куы баназой, уӕд сын ницы уыдзӕн; рынчынтыл ӕвӕрдзысты сӕ къухтӕ, ӕмӕ-иу уыдон сдзӕбӕх уыдзысты». 19 Семӕ фӕныхас кӕныны фӕстӕ Йесойы систӕуыд уӕларвмӕ, ӕмӕ ӕрбадти Хуыцауы рахиз фарс. 20 Ахуыргӕнинӕгтӕ ацыдысты ӕмӕ алы ран дӕр хъусын кодтой фарны уац. Хицау сын ӕххуыс кодта ӕмӕ, сӕ ныхас раст кӕй у, уый ӕвдыста, Йӕ фӕрцы кӕй арӕзтӕуыд, уыцы диссӕгтӕй.]

Лука 1

1 Махмӕ цы цаутӕ ӕрцыд, уыдоны фӕдыл ныридӕгӕн бирӕтӕ ныффыстой. 2 Уыцы цауты тыххӕй нын радзырдтой, тӕккӕ райдианӕй сӕ йӕхи цӕстӕй чи федта ӕмӕ Хуыцауы ныхас адӕммӕ хӕссыны куыст кӕмӕ ӕрхауд, уыдон. 3 Ӕмӕ ӕз дӕр, ӕппӕт уыдӕттӕ сӕрӕй кӕронмӕ бӕстон раиртасыны фӕстӕ, сфӕнд кодтон дӕумӕ сӕ фӕд-фӕдыл ныффыссын, кадджын Феофил, 4 Цӕмӕй базонай, цы ахуырад дын бацамындӕуыд, уымӕн йӕ фидар бындур. 5 Иудейаг паддзах Ироды заман уыд иу сауджын, йӕ ном Захари – Авийы мыггагӕй чи уыд, уыцы сауджынты къордӕй. Йӕ ус дӕр уыд Аароны байзӕддагӕй, йӕ ном Елисаветӕ. 6 Сӕ дыууӕ дӕр Хуыцауы раз уыдысты рӕстаг, ӕнаиппӕй ӕххӕст кодтой Хуыцауы ӕппӕт фӕдзӕхстытӕ ӕмӕ амындтӕ. 7 Сывӕллӕттӕ сын нӕ уыд, уымӕн ӕмӕ Елисаветӕ уыдис ӕнӕзӕнӕг; сӕ дыууӕ дӕр тынг базӕронд сты. 8 Иухатт Захари лӕггад кодта Хуыцауы раз, уымӕн ӕмӕ ӕрӕййӕфта сӕ сауджынты къорды рад. 9 Ӕмӕ Захарийӕн, сауджынты ӕгъдаумӕ гӕсгӕ, схауд йӕ хал, ӕмӕ буд судзынмӕ бацыди Хуыцауы Кувӕндонмӕ. 10 Буд судзыны афон кӕрты уыди бирӕ кувӕг адӕм. 11 Уӕд Захаримӕ фӕзынд Хуыцауы зӕд. Зӕд лӕууыди будсудзӕн нывондхӕссӕны рахиз фарс. 12 Захари йӕ куы федта, уӕд фӕджих ӕмӕ тынг фӕтарст. 13 Фӕлӕ йын зӕд загъта: «Ма тӕрс, Захари, уымӕн ӕмӕ дӕ куывд фехъуыст Хуыцаумӕ. Дӕ ус Елисаветӕ дын ныййардзӕн фырт ӕмӕ йӕ схондзынӕ Иоанн. 14 Дӕ фырт дын ӕрхӕсдзӕн стыр цин, йӕ райгуырдыл бацин кӕндзысты бирӕтӕ, 15 Уымӕн ӕмӕ цытджын уыдзӕни Хуыцауы раз. Нӕ нуаздзӕн сӕн ӕмӕ ӕндӕр карз нозт, Сыгъдӕг Удӕй схайджын уыдзӕн йӕ мады гуыбынмӕ. 16 Ӕмӕ израилаг адӕмӕй бирӕты раздахдзӕн сӕ Хицау Хуыцаумӕ. 17 Илиайы уд ӕмӕ тыхимӕ цӕудзӕни Хицауы разӕй, цӕмӕй фыдӕлты зӕрдӕтӕ раздаха цотмӕ, хивӕндтӕн ратта рӕстгӕнджыты зонд, адӕмы ӕрцӕттӕ кӕна Хицауы ӕрцыдмӕ». 18 Захари бафарста зӕды: «Ӕз ууыл куыд баууӕндон? Уымӕн ӕмӕ зӕронд дӕн, мӕ ус дӕр ӕгӕр базӕронд». 19 Зӕд ын дзуапп радта: «Ӕз дӕн Хуыцауы раз лӕууӕг Гавриил ӕмӕ ӕрвыст дӕн дӕуӕн ацы хорз хабар зӕгъынмӕ. 20 Афон куы ралӕууа, уӕд ӕнӕмӕнг чи сӕххӕст уыдзӕн, мӕ уыцы ныхӕстыл кӕй нӕ баууӕндыдтӕ, уый тыххӕй ныртӕккӕ багомыг уыдзынӕ, ӕмӕ цалынмӕ уыцы хъуыддаг ӕрцӕуа, уӕдмӕ не сдзурдзынӕ». 21 Адӕм та ӕнхъӕлмӕ кастысты Захаримӕ ӕмӕ дис кодтой, Кувӕндоны кӕй ныффӕстиат, ууыл. 22 Куы рацыд, уӕд та семӕ ныхас кӕнын йӕ бон нӕ уыд. Ӕмӕ бамбӕрстой, Кувӕндоны диссаг кӕй федта, уый. Йӕ зӕгъинӕгтӕ ӕмбарын кодта къухӕй, ӕмӕ баззад ӕгомыгӕй. 23 Кувӕндоны йӕ лӕггад кӕныны бонтӕ куы фесты, уӕд ӕрбаздӕхт хӕдзармӕ. 24 Уый фӕстӕ йӕ ус Елисаветӕ банхъӕлцау, фондз мӕйы йӕхи ӕмбӕхста ӕмӕ дзырдта: 25 «Уый мын Хуыцау сарӕзта – ӕркаст мӕм, цӕмӕй адӕмы ӕхсӕн фидиссаг мауал уон». 26 Елисаветӕ ӕхсӕзӕм мӕй ӕнхъӕлцау куы уыди, уӕд Хуыцау Йӕ зӕд Гавриилы арвыста галилейаг сахар Назаретмӕ, 27 Ӕнӕцыд Чызгмӕ, Давиды байзӕддаг Иосифӕн куырдуаты Чи бадт, Уымӕ; Чызгӕн Йӕ ном – Мариа. 28 Зӕд Ӕм бацыд ӕмӕ Йын загъта: «Цин кӕн, Фӕрнӕйдзаг! Хуыцау Демӕ ис. [Арфӕгонд дӕ сылгоймӕгты ӕхсӕн.]» 29 Мариа зӕды ныхӕстӕй фӕджих ӕмӕ хъуыдыты бафтыд, уыцы арфӕ цы амона, зӕгъгӕ. 30 Зӕд ын загъта: «Ма тӕрс, Мариа, уымӕн ӕмӕ Дӕ Хуыцау схайджын кодта йӕ хорзӕхӕй. 31 Банхъӕлцау уыдзынӕ, ныййардзынӕ Фырт ӕмӕ Йӕ схондзынӕ Йесо. 32 Уый уыдзӕни цытджын, схуындӕйӕуыдзӕн Дунедарӕджы Фырт, ӕмӕ Йын Хицау Хуыцау ратдзӕн Йӕ фыдӕл Давиды паддзахад. 33 Иаковы байзӕддагӕн паддзахиуӕг кӕндзӕн мыггагмӕ, ӕмӕ Йӕ Паддзахадӕн кӕрон никуы ӕрцӕудзӕн». 34 Мариа зӕдӕн загъта: «Ӕз мойы хъӕстӕ куы нӕ дӕн, уӕд уый куыд уыдзӕн?» 35 Зӕд Ын дзуапп радта: «Ды схайджын уыдзынӕ Сыгъдӕг Удӕй, ӕмӕ Дунедарӕджы тых Дӕу бакӕндзӕн йӕ дӕлбазыр. Уымӕ гӕсгӕ Дын цы Хъӕбул райгуыра, Уый уыдзӕни сыгъдӕг ӕмӕ Йӕ схуындӕуыдзӕн Хуыцауы Фырт. 36 Мӕнӕ Дӕ хӕстӕг Елисаветӕ дӕр ма зӕрондӕй куы банхъӕлцау ӕмӕ ныр ӕхсӕзӕм мӕй цӕуы лӕппуйыл, афтӕмӕй йӕ ӕнӕзӕнӕг хуыдтой. 37 Уымӕн ӕмӕ Хуыцауӕн ӕппӕт дӕр Йӕ бон у». 38 Уӕд Мариа загъта: «Ӕз Хицауы цагъар дӕн; ды цы загътай, уый Мыл ӕрцӕуӕд». Ӕмӕ Йӕ зӕд ныууагъта. 39 Уыцы бонты Мариа бавдӕлд ӕмӕ атындзыдта хӕхбӕстӕм, иудейаг сахармӕ. 40 Уым бацыд Захарийы хӕдзармӕ ӕмӕ салам радта Елисаветӕйӕн. 41 Елисаветӕ Мариайы салам куы фехъуыста, уӕд сывӕллон йӕ гуыбыны базмӕлыд, Елисаветӕ схайджын Сыгъдӕг Удӕй 42 Ӕмӕ хъӕрӕй загъта: «Арфӕгонд дӕ сылгоймӕгты ӕхсӕн, ӕмӕ арфӕгонд у, Дӕ гуыбыны цы Сывӕллон ис, Уый! 43 Мӕ Хицауы Мад мӕм ӕрбацӕуа, ахӕм хорзӕх мӕм цӕмӕн ӕрхауд? 44 Дӕ салам Дын куы фехъуыстон, уӕд мӕ гуыбыны сывӕллон цингӕнгӕ базмӕлыд. 45 Тӕхудиаг у, Хуыцау Ын цы загъта, уый кӕй ӕрцӕудзӕн, ууыл баууӕндӕг Чызг». 46 Уӕд Мариа загъта: «Стауы Мӕ зӕрдӕ Хицауы. 47 Мӕ уд цин кӕны Хуыцауыл, Мӕ Ирвӕзынгӕнӕгыл – 48 Уый ӕркаст Йӕ сӕрныллӕг цагъар Чызгмӕ; ӕппӕт фӕлтӕртӕ Мӕ нырӕй фӕстӕмӕ арфӕгонд хондзысты. 49 Уымӕн ӕмӕ Ӕппӕтхъомыс стыр хъуыддаг сарӕзта Мӕнӕн. Сыгъдӕг у Йӕ ном! 50 Чи Дзы тӕрсы, уыдон фӕлтӕрӕй-фӕлтӕрмӕ Йӕ хорзӕхӕй хайджын сты. 51 Стыр хъуыддӕгтӕ сарӕзта Йӕ къухӕй, ныххӕлиу кодта, сӕ зӕрдӕты хъал хъуыдытӕ чи нывӕнды, уыдоны, 52 Тыхджынты раппӕрста сӕ бадӕнтӕй ӕмӕ сбӕрзонд кодта сӕрныллӕгты. 53 Ӕххормӕгты бафсӕста хорзӕхтӕй, бонджынты та ауагъта ницӕимӕ. 54 Ӕрцыд ӕххуысмӕ Йӕ лӕггадгӕнӕг Израилмӕ, нӕ Дзы ферох хорзӕхтӕй йӕ мыггагмӕ хайджын кӕнын, 55 Нӕ фыдӕлтӕн – Авраамӕн ӕмӕ йӕ байзӕддагӕн – зӕрдӕ куыд бавӕрдта, афтӕ». 56 Мариа Елисаветӕмӕ фӕци ӕртӕ мӕйы бӕрц ӕмӕ раздӕхт Йӕ хӕдзармӕ. 57 Елисаветӕйӕн та ӕрхӕццӕ йӕ афон ӕмӕ ныййардта фырт. 58 Хуыцау ыл стыр арфӕ кӕй бафтыдта, уый фехъуыстой йӕ сыхӕгтӕ, йӕ хӕстӕджытӕ ӕмӕ цин кодтой йемӕ. 59 Ӕстӕм бон ӕрцыдысты сывӕллоны сунӕт кӕнынмӕ, ӕмӕ сӕ фӕндыд йӕ фыды ном Захари йыл сӕвӕрын. 60 Фӕлӕ йӕ мад загъта: «Нӕ, схонӕм ӕй Иоанн». 61 Уӕд ын загътой: «Дӕ хӕстӕджытӕй ахӕм ном никӕуыл ис». 62 Нысӕнттӕй йын фарстой йӕ фыды, цы ном сӕвӕрын ӕй фӕнды, зӕгъгӕ. 63 Уый ракуырдта фӕйнӕг ӕмӕ йыл ныффыста: «Йӕ ном Иоанн у». Ӕмӕ сеппӕт дӕр дисы бафтыдысты. 64 Уайтӕккӕ райхӕлдысты Захарийы дзых ӕмӕ ӕвзаг, ӕмӕ райдыдта дзурын, Хуыцауы стауын. 65 Сӕ алыварс цӕрджыты бацыди тас. Ӕппӕт уыдӕтты тыххӕй дзырдтой уӕлхох Иудейӕйы алы кӕрӕтты. 66 Хабар чи фехъуыста, уыдон ӕй сӕ зӕрдыл бадардтой ӕмӕ дзырдтой: «Чи уыдзӕн ацы сывӕллон?» Ӕмӕ Хуыцау уыдис Иоаннимӕ. 67 Иоанны фыд Захари схайджын Сыгъдӕг Удӕй, райдыдта пехуымпариуӕг кӕнын ӕмӕ дзырдта: 68 «Арфӕгонд уӕд Израилы Хицау Хуыцау – ӕркаст Йӕ адӕммӕ ӕмӕ сын ӕрхаста сӕрибар. 69 Йӕ цагъар Давиды байзӕддагӕй нын радта домбай Ирвӕзынгӕнӕджы, 70 Рагзаманы сыгъдӕг пехуымпарты дзыхӕй куыд фехъусын кодта, афтӕ. 71 Уый мах фервӕзын кӕндзӕн не знӕгтӕй, ӕмӕ ӕнӕуынон кӕмӕн стӕм, уыдоны къухӕй. 72 Хуыцау зӕрдӕ бавӕрдта, Йӕ хорзӕхӕй нӕ фыдӕлты кӕй схайджын кӕндзӕн, Йӕ сыгъдӕг фидыд Дзы кӕй нӕ ферох уыдзӕн, уымӕй. 73 Расомы кодта нӕ фыдӕл Авраамӕн, 74 Байсдзӕни нӕ знӕгты къухӕй, зӕгъгӕ, 75 Ӕмӕ Йын нӕ цӕргӕбонты кусдзыстӕм ӕдасӕй, Йӕ цӕсты уыдзыстӕм сыгъдӕг ӕмӕ раст адӕм. 76 Дӕу та, саби, схуындӕуыдзӕн Дунедарӕджы пехуымпар, уымӕн ӕмӕ цӕудзынӕ Хицауы разӕй фӕндаг Ын ӕрцӕттӕ кӕнынмӕ. 77 Йӕ адӕммӕ ӕрхӕсдзынӕ уац сӕ фервӕзыны тыххӕй – сӕ тӕригъӕдтӕ уыдзысты хатыргонд, 78 Уымӕн ӕмӕ нӕ Хуыцау уарзӕгой ӕмӕ хорзӕхджын у. Йӕ хорзӕхмӕ гӕсгӕ уӕлӕрвтӕй ӕркӕсдзӕни Хур ӕмӕ нӕ бабӕрӕг кӕндзӕн, 79 Ныррухс кӕндзӕни мӕлӕты талынг бӕстӕйы цӕрджыты, ӕмӕ нӕ сараздзӕн Хуыцауимӕ фидыды фӕндагыл». 80 Сывӕллон рӕз хаста ӕмӕ фидар кодта удӕй. Цалынмӕ Израилы адӕмы размӕ рацыди, уӕдмӕ цардис ӕдзӕрӕг бӕстӕйы.

Лука 2

1 Уыцы рӕстӕг кесӕр Август бафӕдзӕхста ӕппӕт бӕстӕйы адӕмы сфыссын. 2 Ацы сфыст уыди фыццаг; арӕзт ӕрцыди, Квирини Сирийӕн хицауиуӕг куы кодта, уыцы заман. 3 Ӕмӕ алчидӕр йӕхи ныффыссын кӕнынмӕ ацыд йӕ сахармӕ. 4 Иосиф дӕр галилейаг сахар Назаретӕй ацыд Иудейӕмӕ, Вифлеем кӕй хонынц, Давиды уыцы сахармӕ, уымӕн ӕмӕ Давиды къонайӕ уыди, йӕ байзӕддаг. 5 Ныффыссын кӕнынмӕ ацыди куырдуаты йын бадӕг Мариаимӕ; Мариа та ӕнхъӕлцау уыди. 6 Вифлеемы куы уыдысты, уӕд Мариайӕн ӕрхӕццӕ арынафон. 7 Ӕмӕ ныййардта Йӕ Фыццаг Фырты, батыхта Йӕ хӕцъилты ӕмӕ Йӕ нывӕрдта кӕвдӕсы, уымӕн ӕмӕ сын фысымуаты бынат нӕ разынд. 8 Уыцы ран, быдыры, уыдысты фыййӕуттӕ. Уыдон ӕхсӕвы хъахъхъӕдтой сӕ дзуг. 9 Фыййӕутты раз февзӕрд Хуыцауы зӕд; Хуыцауы намыс сӕ ныррухс кодта, ӕмӕ стыр тасы бафтыдысты. 10 Фӕлӕ сын зӕд загъта: «Ма тӕрсут, ӕз уӕм ӕрхастон, ӕппӕт адӕм кӕмӕй схайджын уыдзысты, ахӕм стыр цин: 11 Абон уын Давиды сахары райгуырд Ирвӕзынгӕнӕг – Хицау Чырысти. 12 Мӕнӕ Йӕ уымӕй базондзыстут: Сывӕллоны ссардзыстут хӕцъилты тыхтӕй, кӕвдӕсы хуысгӕйӕ». 13 Зӕдимӕ ӕваст баиу ӕнӕнымӕц уӕларвон ӕфсад, ӕмӕ кад кодтой Хуыцауӕн: 14 «Намыс Хуыцауӕн уӕлӕрвты, зӕххыл та фӕрнджын уӕнт, Хуыцау кӕуыл ауды, уыдон». 15 Зӕдтӕ сӕ цурӕй уӕларвмӕ куы сивгъуыдтой, уӕд фыййӕуттӕ кӕрӕдзийӕн загътой: «Уӕдӕ фӕцӕуӕм Вифлееммӕ ӕмӕ фенӕм, цы ӕрцыди – Хуыцау нын цӕй тыххӕй фехъусын кодта, уый». 16 Атындзыдтой уырдӕм; куы бахӕццӕ сты, уӕд дзы баййӕфтой Мариа ӕмӕ Иосифы, ӕмӕ Сывӕллоны кӕвдӕсы хуысгӕйӕ. 17 Куы Йӕ федтой, уӕд радзырдтой, уыцы Сывӕллоны тыххӕй сын цы загъдӕуыд, уый. 18 Фыййӕуттӕ сын цы загътой, уый дисы бафтыдта, чи сӕ фехъуыста, уыдоны сеппӕты дӕр. 19 Мариа та ӕппӕт уыдӕттӕ дардта Йӕ зӕрдӕйы, ӕмӕ сыл нывӕзта Йӕ хъуыдытӕ. 20 Фыййӕуттӕ раздӕхтысты, ӕмӕ цы фехъуыстой, цы федтой, уый тыххӕй кад кодтой Хуыцауӕн. Ӕппӕт дӕр рауади, куыд сын загъдӕуыд, афтӕ. 21 Аст боны фӕстӕ, Сывӕллонӕн сунӕты афон куы ралӕууыд, уӕд Ӕй схуыдтой Йесо. Зӕд Ын уыцы ном рагацау радта, Йӕ Мады гуыбыны дӕр куы нӕма уыд, уӕд. 22 Моисейы Ӕгъдаумӕ гӕсгӕ се ссыгъдӕг кӕныны бонтӕ куы аивгъуыдтой, уӕд Йесойы ӕрхастой Иерусалиммӕ, Хуыцауы раз Ӕй ӕрлӕууын кӕнынмӕ, 23 Хуыцауы Ӕгъдауы куыд фыст у, афтӕ: «Фыццаг сывӕллон лӕппу куы уа, уӕд лӕвӕрд ӕрцӕуӕд Хуыцауӕн». 24 Стӕй Хуыцауы Ӕгъдаумӕ гӕсгӕ нывондӕн хъуамӕ ӕрхастаиккой дыууӕ ӕхсинӕджы кӕнӕ дыууӕ лӕппын бӕлоны. 25 Уӕды заман Иерусалимы уыд иу лӕг, йӕ ном – Симеон. Уый уыди раст ӕмӕ Хуыцауыл ӕнувыд адӕймаг, ӕнхъӕлмӕ каст, Хуыцау Израилы кӕд барӕвдаудзӕн, уымӕ; хайджын уыди Сыгъдӕг Удӕй. 26 Сыгъдӕг Уд ын раргом кодта, Хуыцау Кӕй рарвита, цалынмӕ уыцы Чырыстийы фена, уӕдмӕ нӕ амӕлдзӕн, зӕгъгӕ. 27 Ӕмӕ йын Сыгъдӕг Уд йӕ зӕрдӕйы нывӕрдта Кувӕндонмӕ ӕрцӕуын. Моисейы Ӕгъдау бакӕныны тыххӕй ныййарджытӕ Саби Йесойы Кувӕндонмӕ куы ӕрхастой, 28 Уӕд Ӕй Симеон райста йӕ хъӕбысмӕ, арфӕ ракодта Хуыцауӕн ӕмӕ загъта: 29 «Зӕрдӕ мын куыд бавӕрдтай, Дунедарӕг, афтӕ ныр Дӕ цагъары ӕрвитыс фарнимӕ, 30 Уымӕн ӕмӕ мӕхи цӕстӕй федтон Дӕуӕй лӕвӕрд ирвӕзындзинад. 31 Ӕрцӕттӕ йӕ кодтай ӕппӕт адӕмтӕн; 32 Муртаттӕн уый уыдзӕни Дӕу ӕргомгӕнӕг рухс, Дӕ адӕмӕн, Израилӕн та – намыс». 33 Йесойы тыххӕй цы загъдӕуыд, уый диссаг фӕкасти Сабийы фыд ӕмӕ Мадмӕ. 34 Симеон сыл Хуыцауы арфӕ бафтыдта, ӕмӕ Йесойы Мад Мариайӕн загъта: «Мӕнӕ ацы Сывӕллоны тыххӕй израилаг адӕмӕй бирӕтӕ фӕкӕлдзысты, бирӕтӕ та сбӕрзонд уыдзысты. Уый расайдзӕн быцӕутӕ, 35 Ӕмӕ афтӕмӕй бирӕтӕн раргом уыдзысты сӕ зӕрдӕты арф ӕвӕрд хъуыдытӕ; Дӕуӕн та Дӕ риуы ахиздзӕни цирхъ». 36 Уым уыд Аннӕ-пехуымпар дӕр, Фануилы чызг, Асиры хӕдзарвӕндагӕй. Уыди тынг зӕронд; йӕ лӕгимӕ фӕцард авд азы, 37 Баззад идӕдзӕй ӕмӕ йыл ныр цыди цыппар ӕмӕ цыппарыссӕдз азы. Кувӕндон никуы ныууагъта, ком дардта ӕмӕ куывта, ӕхсӕвӕй-бонӕй куыста Хуыцауӕн. 38 Уый дӕр сӕм бацыд уыцы рӕстӕг, кад кодта Хуыцауӕн, Иерусалимы ссӕрибармӕ чи ӕнхъӕлмӕ каст, уыдонӕн дзырдта Йесойы тыххӕй. 39 Иосиф ӕмӕ Мариа Хуыцауы Ӕгъдаумӕ гӕсгӕ ӕппӕт дӕр куы бакодтой, уӕд раздӕхтысты Галилеймӕ, сӕ сахар Назаретмӕ. 40 Сывӕллон та рӕзыд ӕмӕ фидар кодта, ӕфтыд Йӕ зондыл, хайджын уыди Хуыцауы фарнӕй. 41 Йӕ ныййарджытӕ Куадзӕны бӕрӕгбонмӕ ӕрвылаз Иерусалиммӕ цыдысты. 42 Йесойыл дыууадӕс азы куы сӕххӕст, уӕд дӕр бӕрӕгбонмӕ ацыдысты Иерусалиммӕ. 43 Бӕрӕгбоны фӕстӕ сӕхимӕ куы здӕхтысты, уӕд ӕнахъом Йесо баззади Иерусалимы, ӕмӕ уый Йӕ ныййарджытӕ нӕ бафиппайдтой. 44 Ӕнхъӕл уыдысты, иннӕтимӕ ӕрбацӕуы, зӕгъгӕ, ӕмӕ иу бонцау куы ацыдысты, уӕд Ӕй агурын райдыдтой хӕстӕджыты ӕмӕ зонгӕты ӕхсӕн. 45 Куы нӕ Йӕ ссардтой, уӕд Йӕ агурӕг аздӕхтысты Иерусалиммӕ. 46 Ӕртӕ боны фӕстӕ Йӕ ссардтой Кувӕндоны. Йесо бадтис ахуыргӕнджыты ӕхсӕн, хъуыста сӕм ӕмӕ сӕ алцӕмӕйты фарста. 47 Чи Йӕм хъуыста, уыдон сеппӕт дӕр дис кодтой Йӕ зонд ӕмӕ дзуаппытыл. 48 Ныййарджытӕ Йӕ куы федтой, уӕд бафтыдысты дисы. Йӕ Мад Ын загъта: «Хъӕбул, ай нын цы бакодтай? Дӕ фыдимӕ Дӕ стыр тыхстӕй агуырдтам». 49 Йесо сын загъта: «Цӕмӕ Мӕ агуырдтат? Ӕви сымах нӕ зыдтат, Ӕз Мӕ Фыды хӕдзары кӕй хъуамӕ уон, уый?» 50 Фӕлӕ сын цы загъта, уый нӕ бамбӕрстой. 51 Йесо араст семӕ, ӕрцыд Назаретмӕ ӕмӕ сын уыди коммӕгӕс. Цы ӕрцыд, ӕппӕт уыдӕттӕ Йӕ Мад дардта йӕ зӕрдӕйы. 52 Йесо та кодта зондджынӕй-зондджындӕр, рӕз хаста Хуыцауӕн ӕмӕ адӕмӕн уарзонӕй.

Лука 3

1 Уый уыди, кесӕр Тивери фынддӕсӕймаг аз паддзахиуӕг куы кодта, уӕд. Понтий Пилат уыди Иудейӕйы хицау, Ирод – Галилейы ӕлдариуӕггӕнӕг, йе 'фсымӕр Филипп та – Итурейы ӕмӕ Трахониты бӕстӕйы ӕлдариуӕггӕнӕг, Лисани – Авилинийы ӕлдариуӕггӕнӕг; 2 Анна ӕмӕ Каиафӕ та алчертӕ уыдысты. Уыцы рӕстӕг Захарийы фырт Иоанн уыди ӕдзӕрӕг бӕстӕйы, ӕмӕ йын Хуыцау загъта Йӕ ныхас. 3 Уый фӕстӕ Иоанн зылди Иорданы ӕппӕт алфамбылайыл ӕмӕ амыдта, зӕгъгӕ, цӕмӕй тӕригъӕдтӕ хатыргонд уой, уый тыххӕй сыл хъӕуы ӕрфӕсмон кӕнын ӕмӕ аргъуыд райсын. 4 Афтӕ загъд у Исай-пехуымпары чиныджы: «Ӕдзӕрӕг ран хъуысы фидиуӕджы хъӕлӕс: „Ӕрцӕттӕ кӕнут Хицауӕн фӕндаг, ӕмраст Ын скӕнут Йӕ цӕуӕнтӕ. 5 Алы дӕлвӕз дӕр байдзаг уӕд, алы хох ӕмӕ къуыбыр дӕр ӕрныллӕг уӕнт, гакъон фӕндӕгтӕ сраст уӕнт ӕмӕ гуыргъахъхъ фӕндӕгтӕ слӕгъз уӕнт. 6 Ӕмӕ алы адӕймаг дӕр фендзӕн Хуыцауӕй лӕвӕрд ирвӕзындзинад"». 7 Аргъауынмӕ йӕм цы бирӕ адӕм цыди, уыдонӕн Иоанн дзырдта: «Калмы цот! Чи уын бафтыдта уӕ зӕрдӕты ӕрцӕуинаг азарӕй лидзыны хъуыды? 8 Зӕрдиагӕй кӕй ӕрфӕсмон кодтат, уый равдисут хъуыддагӕй. „Нӕ фыдӕл Авраам у" – ахӕм хъуыды уӕм ма ӕрцӕуӕд. Зӕгъын уын: Хуыцауӕн Йӕ бон у ацы дуртӕй дӕр Авраамӕн цот скӕнын. 9 Фӕрӕт ныридӕгӕн бӕлӕстӕ бындзарӕй акалынмӕ цӕттӕ у: хорз дыргъ цы бӕласыл нӕ зайы, уый акалынц ӕмӕ йӕ баппарынц арты». 10 Адӕм фарстой Иоанны: «Цы гӕнгӕ нын у?» 11 Уый сын дзуапп радта: «Дыууӕ хӕдоны кӕмӕн ис, уый дзы раттӕд, кӕмӕн нӕй, уымӕн; ӕмӕ хойраг кӕмӕ ис, уый дӕр бакӕнӕд афтӕ». 12 Ӕрцыдысты саргъауынмӕ хъалонисджытӕ дӕр ӕмӕ йын загътой: «Ахуыргӕнӕг, цы гӕнгӕ нын у?» 13 Уый сын дзуапп радта: «Цы ӕмбӕлы, уымӕй уӕлдай адӕмӕй ма домут». 14 Фарстой йӕ ӕфсӕддонтӕ дӕр: «Махӕн та цы гӕнгӕ у?» Иоанн сын загъта: «Макӕй стигъут, макӕмӕй мацы исут ӕртхъирӕнӕй – разы ут уӕ мыздӕй». 15 Адӕм Чырыстимӕ кӕй ӕнхъӕлмӕ кастысты, уымӕ гӕсгӕ сеппӕт дӕр хъуыды кодтой, Иоанн кӕд, мыййаг, Чырысти у, зӕгъгӕ. 16 Иоанн сеппӕтӕн дӕр дзуапп лӕвӕрдта: «Ӕз уыл аргъауын донӕй, фӕлӕ ӕрбацӕуы мӕнӕй Тыхджындӕр – ӕз Ын Йӕ дзабыры бос райхалыны аккаг дӕр нӕ дӕн. Уый уыл аргъаудзӕни Сыгъдӕг Удӕй ӕмӕ артӕй. 17 Йӕ фыййаг Йӕ къухы ис, ӕмӕ ссыгъдӕг кӕндзӕн Йӕ мус. Мӕнӕу бафснайдзӕн Йӕ хордоны, зыгуым та басудздзӕн ӕнӕхуысгӕ арты». 18 Иоанн бирӕ ӕндӕр ныхӕстӕй разӕнгард кодта адӕмы, амыдта сын фарны уац. 19 Фӕлӕ ӕлдариуӕггӕнӕг Иродӕн йе 'фсымӕры ус Иродиадӕйы ӕмӕ йеппӕт фыдракӕндты тыххӕй уайдзӕфтӕ куы кодта, 20 Уӕд ма Ирод ӕппӕт уыдӕттӕм бафтыдта ноджыдӕр иу: Иоанны бакодта ахӕстоны. 21 Иоанн ӕппӕт адӕмыл куы аргъуыдта, уӕд саргъуыдта Йесойыл дӕр. Аргъуыды фӕстӕ Йесо кувгӕ куы кодта, уӕд арвы дуар фегом, 22 Сыгъдӕг Уд Ӕм ӕрцыди бӕлоны хуызы, ӕмӕ уӕларвӕй ӕрыхъуысти хъӕлӕс: «Ды Мӕ уарзон Фырт дӕ, Ӕз Дӕуыл аудын». 23 Йесо Йӕ хъуыддаг куы райдыдта, уӕд Ыл цыди дӕс ӕмӕ ссӕдз азы бӕрц. Куыд ӕнхъӕл уыдысты, афтӕмӕй уыди Иосифы фырт, Илийы, 24 Матфаты, Левийы, Мелхийы, Ианнайы, Иосифы, 25 Маттафийы, Амосы, Наумы, Еслийы, Наггейы, 26 Маафы, Маттафийы, Семеины, Иосихы, Иодайы, 27 Иоананы, Рисайы, Зоровавелы, Салафиилы, Нирийы, 28 Мелхийы, Аддийы, Косамы, Элмадамы, Иры, 29 Йесойы, Элиезеры, Иоримы, Матфаты, Левийы, 30 Симеоны, Иудӕйы, Иосифы, Ионӕмы, Элиакимы, 31 Мелеайы, Меннайы, Маттафайы, Нафаны, Давиды, 32 Иессейы, Овиды, Воозы, Салайы, Наассоны, 33 Аминадавы, Админы, Арнийы, Есромы, Фаресы, Иудӕйы, 34 Иаковы, Исаакы, Авраамы, Фарайы, Нахоры, 35 Серухы, Рагавы, Фалекы, Эверы, Салайы, 36 Каинаны, Арфаксады, Симы, Нойы, Ламехы, 37 Мафусалы, Енохы, Иареды, Малелеилы, Каинаны, 38 Эносы, Сифы, Адамы, Хуыцауы.

Лука 4

1 Йесо Иорданӕй ӕрбаздӕхт Сыгъдӕг Удӕй хайджынӕй, ӕмӕ Йӕ Сыгъдӕг Уд акодта ӕдзӕрӕг бӕстӕмӕ. 2 Уым Ӕй дыууиссӕдз боны къахта хӕйрӕг. Уыцы бонты Йесо ницы хордта, ӕмӕ куы ахицӕн сты, уӕд тынг сыстонг. 3 Ӕмӕ Йын хӕйрӕг загъта: «Кӕд Хуыцауы Фырт дӕ, уӕд зӕгъ ацы дурӕн, ӕмӕ феста дзул». 4 Йесо йын дзуапп радта: «Фыст у: „Айдагъ дзулӕй нӕ цӕрдзӕн адӕймаг [фӕлӕ Хуыцауы алы дзырдӕй]"». 5 Уӕд Ӕй хӕйрӕг акодта бӕрзонд ранмӕ, цӕстыфӕныкъуылдмӕ Йын фенын кодта дунейы ӕппӕт паддзахӕдтӕ, 6 Ӕмӕ Йын загъта: «Дӕ дӕлбар Дын бакӕндзынӕн ӕппӕт ацы паддзахӕдтӕ сӕ намысимӕ, уымӕн ӕмӕ мӕнӕн лӕвӕрд сты, ӕмӕ мӕ кӕмӕн бафӕнды, уымӕн сӕ раттын. 7 Гъемӕ мын куы бакувай, уӕд иууылдӕр уыдзысты Дӕу». 8 Йесо йын дзуапп радта: «Фыст у: „Кув дӕ Хицау Хуыцаумӕ ӕмӕ кус ӕрмӕстдӕр Уымӕн"». 9 Уӕд Ӕй хӕйрӕг акодта Иерусалиммӕ, ӕрлӕууын Ӕй кодта Кувӕндоны уӕлхӕдзарыл, ӕмӕ Йын загъта: «Кӕд Хуыцауы Фырт дӕ, уӕд Дӕхи аппар ардыгӕй. 10 Уымӕн ӕмӕ фыст у: „Йӕ зӕдтӕн бафӕдзӕхсдзӕни Дӕу тыххӕй, цӕмӕй Дӕ бахъахъхъӕной"; 11 Ноджыдӕр ма: „Хӕсдзысты Дӕ сӕ къухтыл, ӕмӕ Дӕ къах дурыл дӕр нӕ ныццӕвдзынӕ"». 12 Йесо йын дзуапп радта: «Загъд у: „Ма къах дӕ Хицау Хуыцауы"». 13 Хӕйрӕг Йесойы алы хуызы дӕр куы фӕкъахта, уӕд уал Ӕй ныууагъта рӕстӕгмӕ. 14 Сыгъдӕг Уды хъаруйӕ хайджын, Йесо ӕрбаздӕхти Галилеймӕ, ӕмӕ Йӕ кой айхъуыст ӕппӕт бӕстӕйыл. 15 Адӕмы ахуыр кодта сӕ синагогӕты, ӕмӕ Йын кад кодтой сеппӕт дӕр. 16 Йесо ӕрцыд, кӕм схъомыл, уыцы Назаретмӕ. Ӕмӕ куыд ахуыр уыд, афтӕ та ацы хатт дӕр сабаты бацыд синагогӕмӕ, ӕмӕ сыстад чиныджы бакӕсынмӕ. 17 Радтой Йӕм Исай-пехуымпары чиныг. Байгом ӕй кодта ӕмӕ ссардта, мӕнӕ афтӕ фыст кӕм уыд, уыцы бынат: 18 «Мӕнмӕ Хуыцауы Уд ис, уымӕн ӕмӕ Хуыцау Мӕн байсӕрста. Ӕмӕ Мӕ рарвыста мӕгуыртӕн фарны уац фехъусын кӕнынмӕ, [зӕрдӕсаст чи у, уыдоны сдзӕбӕх кӕнынмӕ,] уацайрӕгтӕн сӕрибары, куырмытӕн цӕстӕй ракӕсыны афон кӕй ралӕууыд, уый тыххӕй сын зӕгъынмӕ, фӕлмӕцыдты суӕгъд кӕнынмӕ, 19 Хуыцауы хӕрзаудӕны аз кӕй ралӕууыд, уый фехъусын кӕнынмӕ». 20 Йесо сӕхгӕдта чиныг, радта йӕ лӕггадгӕнӕгмӕ ӕмӕ сбадт. Синагогӕйы чидӕриддӕр уыди, уыдоны цӕстытӕ баззадысты Йесойыл. 21 Ӕмӕ сын Уый райдыдта дзурын: «Ацы пехуымпар ныхас сӕххӕст абон – куы йӕм хъуыстат, уӕд». 22 Сеппӕт дӕр Дзы уыдысты разы, дисы сӕ бафтыдтой Йӕ фӕрнӕйдзаг ныхӕстӕ, ӕмӕ дзырдтой: «Ай Иосифы фырт нӕу, мыййаг?» 23 Йесо сын загъта: «Кӕй зӕгъын ӕй хъӕуы, сымах Мын ӕрхӕсдзыстут ӕмбисонд: „Дохтыр, сдзӕбӕх кӕн Дӕхи", ӕмӕ зӕгъдзыстут: „Мах фехъуыстам, Капернаумы цы сарӕзтай, уый, ӕмӕ йӕ сараз ам дӕр, Дӕ сахары". 24 Фӕлӕ уын ӕцӕг зӕгъын: иу пехуымпар дӕр нымад нӕ вӕййы йӕ фыдыбӕстӕйы. 25 Ӕцӕг уын зӕгъын: бирӕ идӕдз сылгоймӕгтӕ уыдис Илиайы заман Израилы, арвы дуар ӕртӕ азы ӕмӕ ӕхсӕз мӕйы ӕхгӕд куы уыд ӕмӕ ӕппӕт зӕххыл стыр стонг рӕстӕг куы скодта, уӕд. 26 Фӕлӕ уыдонӕй иумӕ дӕр ӕрвыст нӕ уыд Илиа – арвыстӕйӕуыд идӕдз сылгоймагмӕ сидойнаг Сарептӕмӕ. 27 Бирӕ хъотырджынтӕ уыди Елисей-пехуымпары заман Израилы, фӕлӕ дзы иу дӕр не ссыгъдӕг – сириаг Нееман ссыгъдӕг». 28 Уый куы фехъуыстой, уӕд синагогӕйы чи уыди, уыдон сеппӕт дӕр тынг смӕсты сты. 29 Сыстадысты сӕ бынӕттӕй, сахарӕй Йӕ ратардтой, ӕмӕ Йӕ акодтой, сӕ сахар цы хохыл арӕзт уыд, уый рындзӕй раппарынмӕ. 30 Фӕлӕ Йесо рацыд се 'хсӕнты ӕмӕ аивгъуыдта уырдыгӕй. 31 Ӕрцыд галилейаг сахар Капернауммӕ ӕмӕ сабаты ахуыр кодта адӕмы. 32 Дисы сӕ ӕфтыдта Йӕ ахуырад, уымӕн ӕмӕ барджынӕй дзырдта. 33 Синагогӕйы уыди хӕйрӕджджын адӕймаг. Уый ныхъхъӕр кодта: 34 «Цы Дӕ хъӕуы махӕй, Назаретаг Йесо? Ды нӕ фесафынмӕ ӕрцыдтӕ! Ӕз зонын, Чи дӕ, уый – Ды Хуыцауы Сыгъдӕг дӕ». 35 Йесо дӕлимонӕн бардзырд радта: «Банцай ӕмӕ дзы рацу». Дӕлимон уыцы адӕймаджы синагогӕйы хӕдастӕу зӕххыл ныццавта ӕмӕ дзы рацыд, ницы зиан ын ракодта, афтӕмӕй. 36 Ӕппӕт адӕм дӕр дисы бафтыдысты ӕмӕ дзырдтой кӕрӕдзийӕн: «Цавӕр хъомыс ӕмӕ тых ис Йӕ ныхасы? Ӕнӕзӕгъинӕгтӕн бардзырд дӕтты, ӕмӕ рацӕуынц хӕйрӕджджынтӕй». 37 Ӕмӕ Йесойы кой айхъуыст Капернаумы алфамбылай. 38 Йесо синагогӕйӕ куы рацыди, уӕд бацыди Симоны хӕдзармӕ. Симоны усы мад тынг удхар кодта тӕвднизӕй. Ӕмӕ Йесомӕ бахатыдысты сылгоймаджы тыххӕй. 39 Йесо йӕ цуры слӕууыд, бардзырд радта тӕвднизӕн, ӕмӕ йӕ тӕвдниз ныууагъта. Уыйадыл сылгоймаг сыстад ӕмӕ сын райдыдта лӕггад кӕнын. 40 Алы низӕй рынчынтӕ кӕмӕдӕриддӕр уыд, уыдон Ӕм сӕ хурныгуылдыл ӕрхуыдтой. Уый-иу сӕ алкӕуыл дӕр ӕрӕвӕрдта Йӕ къухтӕ ӕмӕ-иу ӕй сдзӕбӕх кодта. 41 Бирӕ хӕйрӕджджынтӕй-иу дӕлимонтӕ рацыдысты ӕмӕ-иу хъӕр систой: «Ды Хуыцауы Фырт дӕ!» Фӕлӕ сын Йесо нӕ лӕвӕрдта дзурыны бар, уымӕн ӕмӕ зыдтой, Чырысти кӕй у, уый. 42 Куы ӕрбабон, уӕд Йесо рацыд ӕмӕ араст хибар ранмӕ. Адӕм Ӕй агуырдтой, ӕмӕ Йӕм ӕрцыдысты, ӕмӕ Йӕ нӕ уагътой сӕ цурӕй ацӕуын. 43 Фӕлӕ сын Уый загъта: «Иннӕ сахартӕн дӕр Мӕ хъӕуы Хуыцауы Паддзахады фарны уац фехъусын кӕнын, уымӕн ӕмӕ Ӕз уый тыххӕй ӕрвыст дӕн». 44 Ӕмӕ фарны уац хъусын кодта Иудейӕйы синагогӕты.

Лука 5

1 Иухатт Йесо лӕууыди Геннисареты цады былыл ӕмӕ Йӕм бырстой адӕм, цӕмӕй байхъусой Хуыцауы ныхасмӕ. 2 Уыцы рӕстӕг Йесо федта дыууӕ бӕлӕгъы цады лӕугӕ; кӕсагахсджытӕ рахызтысты бӕлӕгътӕй ӕмӕ ӕхсадтой сӕ хызтӕ. 3 Йесо бахызт бӕлӕгътӕй иумӕ, Симоны бӕлӕгъмӕ, ӕмӕ йӕм бахатыди, былӕй иучысыл фӕхибар уӕм, зӕгъгӕ. Стӕй сбадт бӕлӕгъы ӕмӕ уырдыгӕй ахуыр кодта адӕмы. 4 Йӕ ныхас куы фӕци, уӕд загъта Симонӕн: «Арфдӕр кӕм у, уырдӕм бацу, баппарут уӕ хызтӕ ӕмӕ ӕрцахсдзыстут». 5 Симон Ын дзуапп радта: «Хицау, мах фӕтухӕн кодтам ӕгас ӕхсӕв ӕмӕ ницы ӕрцахстам. Фӕлӕ Дӕ ныхасӕй баппардзынӕн хыз». 6 Хыз куы баппӕрстой, уӕд ӕрцахстой афтӕ бирӕ кӕсӕгтӕ, ӕмӕ суанг сӕ хыз скъуыйын райдыдта. 7 Иннӕ бӕлӕгъы чи уыди, сӕ уыцы ӕмбӕлттӕм фӕтылдтой сӕ къухтӕ, цӕмӕй сӕм ӕрбацӕуой ӕххуысмӕ. Ӕрбацыдысты сӕм ӕмӕ дыууӕ бӕлӕгъы дӕр афтӕ байдзаг кодтой, ӕмӕ сын райдыдтой дӕлдон кӕнын. 8 Симон Петр уый куы федта, уӕд ӕрхауд Йесойы уӕрджытӕм ӕмӕ загъта: «Ныууадз мӕ, Хицау, ӕз тӕригъӕдджын адӕймаг дӕн». 9 Петры, стӕй йемӕ чи уыди, уыдоны сеппӕты дӕр стыр тасы бафтыдта, уыйбӕрц кӕсӕгтӕ кӕй ӕрцахстой, уый. 10 Тас бацыди Симоны ӕмбӕлтты дӕр – Зеведейы фырттӕ Иаков ӕмӕ Иоанны. Уӕд Йесо загъта Симонӕн: «Ма тӕрс. Нырӕй фӕстӕмӕ адӕмахсӕг уыдзынӕ». 11 Дыууӕ бӕлӕгъы дӕр раластой былмӕ, ныууагътой ӕппӕт дӕр ӕмӕ ацыдысты Йесойы фӕдыл. 12 Йесо сахартӕй иуы куы уыди, уӕд фембӕлд, йӕ буар ӕнӕхъӕнӕй дӕр хъотыры бын кӕмӕн фӕци, ахӕм лӕгыл. Уый Йесойы куы федта, уӕд ӕрхауди дӕлгоммӕ ӕмӕ Йын лӕгъстӕ кодта: «Хицау, кӕд Дӕ фӕнды, уӕд Дӕ бон у, ӕмӕ мӕ ссыгъдӕг кӕнай». 13 Йесо радардта Йӕ къух, бандзӕвыд ыл ӕмӕ загъта: «Фӕнды Мӕ, ссыгъдӕг у». Ӕмӕ йӕ уыйадыл хъотыр ныууагъта. 14 Йесо йын бафӕдзӕхста: «Макӕмӕн ӕй зӕгъ, фӕлӕ ацу, дӕхи фенын кӕн сауджынӕн, ӕмӕ кӕй ссыгъдӕг дӕ, уый тыххӕй ӕрхӕсс нывонд, Моисей куыд бафӕдзӕхста, афтӕ – кӕй сдзӕбӕх дӕ, уымӕн ӕвдисӕйнагӕн». 15 Фӕлӕ уӕддӕр Йӕ кой хӕлиу кодта, цыдис Ӕм тынг бирӕ адӕм байхъусынмӕ ӕмӕ сӕ низтӕй дзӕбӕх кӕнынмӕ. 16 Йесо та-иу ацыди хибар рӕттӕм ӕмӕ куывта. 17 Иухатт Йесо ахуыр кодта адӕмы. Уым бадтысты фарисейтӕ ӕмӕ динамонджытӕ – ӕрцыдысты Галилейы ӕмӕ Иудейӕйы алы хъӕутӕй ӕмӕ Иерусалимӕй. Хуыцауы хъаруйӕ Йесо дзӕбӕх кодта рынчынты. 18 Уӕд чидӕртӕ хуыссӕныл ӕрхастой уӕнгмард адӕймаджы, ӕмӕ архайдтой хӕдзармӕ йӕ бахӕссыныл ӕмӕ йӕ Йесойы раз ӕрӕвӕрыныл. 19 Фӕлӕ дзы бирӕ адӕм кӕй уыди, уымӕ гӕсгӕ йӕ бахӕссын сӕ бон нӕ баци. Уӕд схызтысты уӕлхӕдзармӕ, систой ӕмбӕрзӕндуртӕй, ӕмӕ рынчыны ӕд хуыссӕн уаты хӕдастӕумӕ, Йесойы размӕ ӕруагътой. 20 Йесо сын федта сӕ уырнындзинад ӕмӕ уӕнгмардӕн загъта: «Хорз лӕг, хатыр дын сты дӕ тӕригъӕдтӕ». 21 Уӕд динамонджытӕ ӕмӕ фарисейтӕ райдыдтой кӕрӕдзийӕн дзурын: «Уый Хуыцауы Чи фауы? Иунӕг Хуыцауы йеддӕмӕ тӕригъӕдтӕ ныххатыр кӕнын кӕй бон у?» 22 Йесо сын базыдта сӕ хъуыдытӕ, ӕмӕ сын загъта: «Цӕмӕн афтӕ хъуыды кӕнут? 23 Цы ӕнцондӕр у – зӕгъын: „Хатыр дын сты дӕ тӕригъӕдтӕ", ӕви: „Рабад ӕмӕ райдай цӕуын"? 24 Фӕлӕ сымах хъуамӕ зонат, Адӕймаджы Фыртӕн кӕй ис зӕххыл тӕригъӕдтӕ хатыр кӕныны бар». Ӕмӕ загъта уӕнгмардӕн: «Дӕумӕ дзурын: рабад, сис дӕ хуыссӕн ӕмӕ цу дӕ хӕдзармӕ». 25 Уӕнгмард уайтӕккӕ рабадти сӕ разы, систа йӕ хуыссӕн ӕмӕ, Хуыцауӕн кад кӕнгӕйӕ, ацыд йӕ хӕдзармӕ. 26 Уӕд сеппӕт дӕр дисы бафтыдысты, ӕмӕ кад кодтой Хуыцауӕн. Тас сӕ бацыд ӕмӕ дзырдтой: «Диссаджы хъуыддӕгтӕ федтам абон». 27 Уый фӕстӕ Йесо рацыд уырдыгӕй ӕмӕ федта иу хъалонисӕджы, йӕ ном – Левий; уый бадти хъалонисӕн бынаты. Йесо йын загъта: «Рацу Мӕ фӕдыл». 28 Левий ныууагъта ӕппӕт дӕр, сыстад ӕмӕ ацыд Йӕ фӕдыл. 29 Левий йӕ хӕдзары Йесойӕн ӕрӕвӕрдта хъӕздыг фынг. Фынгыл Йемӕ бадтысты бирӕ хъалонисджытӕ, стӕй ма бирӕ ӕндӕртӕ. 30 Фарисейтӕ ӕмӕ динамонджытӕ хъуыр-хъуыр кодтой ӕмӕ Йесойы ахуыргӕнинӕгтӕн дзырдтой: «Хъалонисджытимӕ ӕмӕ тӕригъӕдджынтимӕ цӕмӕн хӕрут ӕмӕ нуазут?» 31 Йесо сын дзуапп радта: «Дохтыр ӕнӕнизты нӕ, фӕлӕ рынчынты хъӕуы. 32 Ӕз ӕрцыдтӕн рӕстытӕм нӕ, фӕлӕ тӕригъӕдджынтӕм фӕсидынмӕ, цӕмӕй ӕрфӕсмон кӕной». 33 Уӕд Ын фарисейтӕ ӕмӕ динамонджытӕ загътой: «Иоанны ахуыргӕнинӕгтӕ ӕдзух дарынц ком ӕмӕ кувынц, уыдонау – фарисейты ахуыргӕнинӕгтӕ дӕр; Дӕ ахуыргӕнинӕгтӕ та хӕрынц ӕмӕ нуазынц». 34 Йесо сын загъта: «Сиахсаг чындзхӕсджытимӕ цалынмӕ уа, уӕдмӕ сӕ ком дарыныл бафтаудзыстут, мыййаг? 35 Фӕлӕ ралӕудзӕн афон, ӕмӕ сын сиахсаджы куы байсой, уӕд дардзысты ком». 36 Радзырдта сын фӕсномыг ныхас дӕр: «Ног дарӕсӕй гӕбаз ничи раскъуыны, цӕмӕй дзы зӕронд дарӕс бампъуза. Науӕд ног дарӕс дӕр ныскъуыдтӕ уыдзӕн, зӕронд дарӕсыл дӕр ног дарӕсӕй ӕмпъузӕн не сбаддзӕн. 37 Ногдыгъд сӕн дӕр зӕронд лалымты ничи ныккӕны, науӕд ногдыгъд сӕн арӕмудздзӕни лалымтӕ, ӕмӕ йӕхӕдӕг дӕр акӕлдзӕни, лалымтӕ дӕр фесӕфдзысты. 38 Ногдыгъд сӕн ног лалымты ныккӕнын хъӕуы. [Уӕд дыууӕ дӕр баззайынц ӕнӕхъӕнӕй.] 39 Зӕронд сӕнӕй чи баназы, уый ногдыгъд сӕн нал фӕхъӕуы, уымӕн ӕмӕ фӕзӕгъы: „Зӕронд хуыздӕр у"».

Лука 6

1 Йесо сабаты фӕцӕйцыд ӕфсирджын хуымты. Йӕ ахуыргӕнинӕгтӕ тыдтой ӕфсиртӕ, ӕууӕрстой сӕ къухтӕй ӕмӕ хордтой. 2 Фарисейтӕй сын чидӕртӕ загътой: «Сабаты цы нӕ фӕччы, уый цӕмӕн кӕнут?» 3 Йесо сын дзуапп радта: «Давид йе 'мбӕлттимӕ куы сыстонг, уӕд цы бакодта, уый тыххӕй нӕ кастыстут, ӕви? 4 Бацыди Хуыцауы хӕдзармӕ, райста ӕмӕ бахордта, ӕрмӕст сауджынтӕн хӕрын кӕй ӕмбӕлд, уыцы нывонд дзултӕ, ӕмӕ ма дзы йе 'мбӕлттӕн дӕр радта». 5 Йесо ма сын загъта: «Адӕймаджы Фырт сабатӕн йӕ хицау у». 6 Иннӕ сабаты бацыди синагогӕмӕ ӕмӕ ахуыр кодта адӕмы. Уыди дзы, йӕ рахиз къух хуыскъ кӕмӕн уыд, ахӕм адӕймаг. 7 Динамонджытӕ ӕмӕ фарисейтӕ сӕ цӕст дардтой Йесомӕ, кӕд сабаты сдзӕбӕх кӕнид, зӕгъгӕ, цӕмӕй Йӕ фӕзылын кӕной. 8 Фӕлӕ сын Йесо зыдта сӕ хъуыдытӕ ӕмӕ, йӕ къух хуыскъ кӕмӕн уыди, уыцы адӕймагӕн загъта: «Сыст ӕмӕ адӕмы размӕ рацу». Уый сыстад ӕмӕ рацыд адӕмы размӕ. 9 Уӕд сын Йесо загъта: «Ӕз уӕ фӕрсын: сабаты хорз кӕнын ӕмбӕлы ӕви ӕвзӕр? Уд фервӕзын кӕнын ӕви йӕ фесафын?» 10 Йесо сеппӕтыл дӕр ахаста Йӕ цӕст, ӕмӕ загъта цӕнкуылӕн: «Радар дӕ къух». Уый бакодта афтӕ, ӕмӕ йӕ къух сдзӕбӕх. 11 Динамонджытӕ ӕмӕ фарисейтӕн сӕ маст рафыхт, ӕмӕ уынаффӕ кодтой, Йесойӕн цы бакӕной, ууыл. 12 Уыцы рӕстӕг Йесо хохмӕ ссыди бакувынмӕ, ӕмӕ ӕнӕхъӕн ӕхсӕв уым куывта Хуыцаумӕ. 13 Куы ӕрбабон, уӕд басидт Йӕ ахуыргӕнинӕгтӕм, равзӕрста дзы дыууадӕсы ӕмӕ сӕ схуыдта апостолтӕ: 14 Петр, зӕгъгӕ, кӕй схуыдта, уыцы Симоны ӕмӕ уый ӕфсымӕр Андрейы, Иаковы, Иоанны, Филиппы, Варфоломейы, 15 Матфейы, Фомайы, Алфейы фырт Иаковы, фӕсномыгӕй Зилот кӕй хуыдтой, уыцы Симоны, 16 Иаковы фырт Иудӕйы ӕмӕ Иудӕ Искариоты – Йесойыл фӕстӕдӕр гадзрахатӕй чи рацыди, уый. 17 Йесо семӕ хохӕй ӕрцыд ӕмӕ ӕрлӕууыди тъӕпӕны. Уым уыдысты Йӕ бирӕ ахуыргӕнинӕгтӕ дӕр, ноджы ма ӕппӕт Иудейӕйӕ, Иерусалимӕй, стӕй денджызы былгӕрон Тир ӕмӕ Сидоны зӕххытӕй ӕрцӕуӕг бирӕ адӕм. 18 Уыдон Ӕм ӕрцыдысты байхъусынмӕ ӕмӕ сӕ низтӕй фервӕзынмӕ. Ӕнӕзӕгъинӕгтӕ хъизӕмарӕй кӕй мардтой, уыдон дӕр-иу сдзӕбӕх сты. 19 Ӕмӕ адӕм иууылдӕр архайдтой Йесойыл бандзӕвыныл, уымӕн ӕмӕ-иу Дзы рацыди тых ӕмӕ дзӕбӕх кодта сеппӕты дӕр. 20 Йесо Йӕ ахуыргӕнинӕгтыл ахаста Йӕ цӕст ӕмӕ райдыдта дзурын: «Тӕхудиаг стут, мӕгуыртӕ, – Хуыцауы Паддзахад сымах у. 21 Тӕхудиаг стут, абоны ӕххормӕгтӕ, – Хуыцау уӕ бафсаддзӕни. Тӕхудиаг стут, абоны кӕуджытӕ, – сымах сцин кӕндзыстут. 22 Тӕхудиаг уыдзыстут, Адӕймаджы Фырты тыххӕй адӕмӕн ӕнӕуынон куы уат, куы уыл бахъоды кӕной, цъыф уыл куы калой ӕмӕ уын уӕ ном куы сӕгад кӕной, уӕд. 23 Цин кӕнут уыцы бон ӕмӕ райут – уӕларвы уӕм ӕнхъӕлмӕ кӕсы стыр хорзӕх. Ацы адӕмы фыдӕлтӕ пехуымпартӕн дӕр афтӕ кодтой. 24 Фӕлӕ сар уӕ сӕр, хъӕздгуытӕ, – сымах ныридӕгӕн райстат уӕ хорзӕхы хай. 25 Сар уӕ сӕр, абоны ӕфсӕстытӕ, – сымах сыстонг уыдзыстут. Сар уӕ сӕр, абоны цингӕнджытӕ, – сымах скӕудзыстут ӕмӕ ныдздзыназдзыстут. 26 Сар уӕ сӕр, ӕппӕт адӕм дӕр уӕ хорзы кой куы кӕной, уӕд. Ацы адӕмы фыдӕлтӕ мӕнгпехуымпартӕй дӕр афтӕ ӕппӕлыдысты. 27 Фӕлӕ сымахӕн, Мӕнмӕ хъусджытӕн, зӕгъын: уарзут уе знӕгты, хорз кӕнут, сымахӕй йе сӕфт чи уыны, уыдонӕн, 28 Уе 'лгъитджытӕн хорзӕх курут Хуыцауӕй, кувут уе 'фхӕрджыты тыххӕй. 29 Де 'хсӕрфарс дын чи ныццӕва, уымӕ бадар иннӕ дӕр. Ӕмӕ дын исчи дӕ пӕлӕз куы иса, уӕд ын ратт дӕ хӕдон дӕр. 30 Чидӕриддӕр дӕ кура, уымӕн ратт, ӕмӕ дӕ чи цы айса, уый-иу фӕстӕмӕ ма ӕрцагур. 31 Адӕммӕ цӕмӕ ӕнхъӕлмӕ кӕсут, уый сын аразут уӕхӕдӕг дӕр. 32 Сымах чи уарзы, уыдоны куы уарзат, уӕд уый тыххӕй цавӕр хорзӕхы аккаг стут? Тӕригъӕдджынтӕ дӕр уарзынц, чи сӕ уарзы, уыдоны. 33 Ӕмӕ сымахӕн хорзы чи бацӕуы, кӕд уыдонӕн кӕнут хорз, уӕд уый тыххӕй цавӕр хорзӕхы аккаг стут? Тӕригъӕдджынтӕ дӕр афтӕ кӕнынц. 34 Ныфс уӕ кӕмӕй ис, бафиддзысты уын ӕй, зӕгъгӕ, кӕд ӕфстау уыдонӕн дӕттут, уӕд уый тыххӕй цавӕр хорзӕхы аккаг стут? Тӕригъӕдджынтӕ дӕр тӕригъӕдджынтӕн ӕфстау фӕдӕттынц, цӕмӕй фӕстӕмӕ райсой, цас радтой, уый бӕрц. 35 Фӕлӕ уарзут уе знӕгты, хорз кӕнут ӕмӕ ӕфстау дӕттут, фӕстӕмӕ исты кӕй райсдзыстут, уымӕ ӕнхъӕлмӕ нӕ кӕсгӕйӕ. Уӕд уын уыдзӕни стыр хӕрзиуӕг, ӕмӕ уыдзыстут Дунедарӕджы хъӕбултӕ – Уый хорз цӕстӕй кӕсы ӕбузныгтӕм дӕр ӕмӕ фыдзӕрдӕтӕм дӕр. 36 Уӕдӕ ут хӕрзгӕнджытӕ, уӕ Фыд хӕрзгӕнӕг куыд у, афтӕ. 37 Иннӕтӕн тӕрхон ма кӕнут, ӕмӕ тӕрхонгонд нӕ уыдзыстут. Тӕрхон макӕмӕн рахӕссут, ӕмӕ уын тӕрхон нӕ рахастӕуыдзӕн. Хатыр кӕнут, ӕмӕ уын уыдзӕни хатыр. 38 Дӕттут ӕмӕ райсдзыстут – уӕ фӕдджийы уын ӕркалдӕуыдзӕни раст, хӕрзнад ӕмӕ йемыдзаг барӕнӕй. Уымӕн ӕмӕ цы барӕнӕй барут, ахӕмӕй сбарстӕуыдзӕн сымахӕн дӕр». 39 Йесо сын загъта фӕсномыг ныхас дӕр: «Куырмӕн куырмы хонын йӕ бон куыд бауыдзӕн? Сӕ дыууӕ дӕр уӕрмы нӕ ныххаудзысты, ӕви? 40 Ахуыргӕнинаг йӕ ахуыргӕнӕгӕй уӕлдӕр нӕу; фӕлӕ ӕппӕт дӕр чи сахуыр кӕна, уый суыдзӕн йӕ ахуыргӕнӕджы хуызӕн. 41 Цы кӕсыс де 'фсымӕры цӕсты ӕрдумӕ, дӕхи цӕсты та къалабӕлас нӕ фиппайыс? 42 Куыд у дӕ бон де 'фсымӕрӕн зӕгъын: „Ме 'фсымӕр, ӕри-ма, дӕ цӕстӕй дын ӕрду сисон", дӕхи цӕсты къалабӕлас куы нӕ уыныс, уӕд? Цӕстмӕхъус! Дӕхи цӕстӕй уал къалабӕлас сис, стӕй уӕд фендзынӕ, де 'фсымӕры цӕстӕй ӕрду куыд сисын хъӕуы, уый. 43 Ӕвзӕр дыргъ кӕуыл зайы, ахӕм хорз бӕлас нӕй, стӕй хорз дыргъ кӕуыл зайы, ахӕм низджын бӕлас дӕр нӕй. 44 Алы бӕлас дӕр йӕ дыргъӕй бӕрӕг вӕййы: какон сындзӕй не 'ртонынц легъуи, сындзкъутӕрӕй та – сӕнӕфсир. 45 Хорз адӕймаг йӕ зӕрдӕйы хорз хӕзнадонӕй рахӕссы хорзӕх; фыдзӕрдӕ адӕймаг та фыдӕхы къӕбицӕй рахӕссы фыдӕх. Уымӕн ӕмӕ зӕрдӕ цӕмӕй дзаг вӕййы, дзыхӕй дӕр уый рацӕуы. 46 Цы уын зӕгъын, уый куы нӕ кӕнут, уӕд Мӕ „Хицау, Хицау!" цы хонут? 47 Мӕнмӕ ӕрцӕуджытӕй Мӕ ныхӕстӕм чи хъусы ӕмӕ сӕ чи ӕххӕст кӕны, уыцы адӕймаг кӕй хуызӕн у, уый уын зӕгъон. 48 Арф чи скъахта ӕмӕ йӕ хӕдзар дурыл чи сӕвӕрдта, ахӕм хӕдзаргӕнӕджы хуызӕн у. Дон куы раивылд ӕмӕ уыцы хӕдзарыл куы ахӕцыд, уӕд ӕй фенкъуысын кӕнын йӕ бон нӕ баци, уымӕн ӕмӕ фидар бындурыл ӕвӕрд уыди. 49 Мӕ ныхӕстӕм чи хъусы ӕмӕ сӕ чи не 'ххӕст кӕны, уый та у, йӕ хӕдзар зӕххыл ӕнӕ бындурӕй чи сарӕзта, ахӕм адӕймаджы хуызӕн. Хӕдзарыл дон куы ахӕцыд, уӕд уайтӕккӕ ӕркалд ӕмӕ ныппырх и бынтондӕр».

Лука 7

1 Чи Йӕм хъуыста, уыцы адӕмимӕ Йесо Йӕ ныхас куы фӕци, уӕд бацыди Капернауммӕ. 2 Иу сӕдӕйыхицауӕн йӕ уарзон цагъар уыди рынчын, мӕлӕты къахыл ныллӕууыд. 3 Йесойы тыххӕй куы фехъуыста, уӕд Ӕм иудейты хистӕрты арвыста ӕрхатынмӕ, цӕмӕй ӕрцӕуа ӕмӕ йын йӕ цагъары сдзӕбӕх кӕна. 4 Уыдон ӕрцыдысты Йесомӕ ӕмӕ Йын лӕгъстӕ кодтой: «Сӕдӕйыхицау у Дӕ ацы ӕххуысы аккаг – 5 Уарзы нӕ адӕмы ӕмӕ нын сарӕзта синагогӕ». 6 Йесо рацыди семӕ. Йӕ хӕдзармӕ йын куы баввахс, уӕд Ӕм сӕдӕйыхицау рарвыста йӕ хӕлӕртты зӕгъынмӕ: «Хицау, Дӕхи ма тыхсын кӕн! Уымӕн ӕмӕ ӕз уый аккаг нӕ дӕн, ӕмӕ Ды мӕ хӕдзармӕ бацӕуай. 7 Уымӕ гӕсгӕ нӕ банымадтон мӕхи Дӕумӕ фӕцӕуыны аккагыл дӕр. Фӕлӕ ӕрмӕст Дӕ дзыхӕй ныхас рацӕуӕд, ӕмӕ мӕ фӕсдзӕуин сдзӕбӕх уыдзӕн. 8 Уымӕн ӕмӕ ӕз мӕхӕдӕг дӕр дӕлбар лӕг дӕн, ӕмӕ мӕ дӕлбар дӕр ис ӕфсӕддонтӕ. Иуӕн дзы фӕзӕгъын: „Ацу уырдӕм", ӕмӕ ацӕуы; иннӕмӕн: „Ардӕм рацу", ӕмӕ ӕрбацӕуы; мӕ цагъарӕн фӕзӕгъын: „Уый бакӕн", ӕмӕ йӕ бакӕны». 9 Йесо уый куы фехъуыста, уӕд дисы бафтыд, Йе 'ргом разылдта, Йӕ фӕдыл цы бирӕ адӕм цыд, уыдонмӕ, ӕмӕ загъта: «Зӕгъын уын, Израилы дӕр Ӕз ахӕм уырнындзинад нӕ федтон». 10 Ӕрвыст лӕгтӕ хӕдзармӕ куы ӕрбаздӕхтысты, уӕд рынчын цагъары баййӕфтой дзӕбӕхӕй. 11 Уый фӕстӕ Йесо араст, Наин кӕй хуыдтой, уыцы сахармӕ. Йемӕ цыдысты Йӕ ахуыргӕнинӕгтӕ ӕмӕ бирӕ ӕндӕр адӕм. 12 Ӕмӕ сахары кулдуармӕ куы баввахс, уӕд рацӕйхастой марды, идӕдз усы иунӕг лӕппуйы. Сылгоймагимӕ сахарӕй рацыд бирӕ адӕм. 13 Йесо идӕдз усы куы федта, уӕд ын фӕтӕригъӕд кодта ӕмӕ йын загъта: «Ма ку». 14 Бацыд ӕмӕ бавнӕлдта сынтмӕ. Сынтхӕсджытӕ ӕрлӕууыдысты. Уӕд Йесо загъта: «Лӕппу, дӕуӕн зӕгъын, рабад». 15 Мард йӕхиуыл схӕцыд, рабадт ӕмӕ райдыдта дзурын. Уӕд ӕй Йесо радта йӕ мадмӕ. 16 Сеппӕты дӕр тас бацыд ӕмӕ кад кодтой Хуыцауӕн: «Стыр пехуымпар фӕзынди не 'хсӕн, ӕмӕ Хуыцау ӕркаст Йӕ адӕммӕ». 17 Йесойы кой айхъуыст ӕгас Иудейӕйы ӕмӕ йӕ алфамбылай. 18 Иоаннӕн йӕ ахуыргӕнинӕгтӕ радзырдтой ӕппӕт уыдӕтты тыххӕй. 19 Иоанн басидт йӕ ахуыргӕнинӕгтӕй дыууӕмӕ ӕмӕ сӕ арвыста Хицауы бафӕрсынмӕ: «Ӕрцӕуинаг Чи у, Уый Ды дӕ, ӕви ӕндӕрмӕ ӕнхъӕлмӕ кӕсӕм?» 20 Уыдон ӕрцыдысты Йесомӕ ӕмӕ Йын загътой: «Аргъауӕг Иоанн нӕ Дӕумӕ рарвыста бафӕрсынмӕ: „Ӕрцӕуинаг Чи у, Уый Ды дӕ, ӕви ӕндӕрмӕ ӕнхъӕлмӕ кӕсӕм?"» 21 Йесо уыцы рӕстӕг бирӕ адӕмы фервӕзын кодта алыхуызон низтӕй, ӕнӕзӕгъинӕгтӕй, бирӕ куырмыты ракӕсын кодта сӕ цӕстытӕй. 22 Ӕмӕ ӕрвыст лӕгтӕн дзуапп радта: «Цӕут ӕмӕ зӕгъут Иоаннӕн, цы федтат ӕмӕ цы фехъуыстат, уый: куырмытӕ райдыдтой уынын, къуылыхтӕ – цӕуын, хъотырджынтӕ дзӕбӕх кӕнынц, къуырматӕ райдыдтой хъусын, мӕрдтӕ ӕгас кӕнынц, мӕгуыртӕ хъусынц фарны уац. 23 Ӕмӕ тӕхудиаг у, Мӕныл чи нӕ фӕкӕла, уый». 24 Иоанны минӕвӕрттӕ куы аздӕхтысты, уӕд Йесо адӕмӕн райдыдта Иоанны тыххӕй дзурын: «Цы уынынмӕ цыдыстут ӕдзӕрӕг бӕстӕмӕ? Дымгӕ кӕй ӕнкъусы, уыцы хъӕз уынынмӕ? 25 Уӕддӕр цы уынынмӕ цыдыстут? Зынаргъ дарӕс кӕуыл ис, ахӕм лӕджы уынынмӕ? Хъӕздыг дарӕс чи дары ӕмӕ бухъцард чи кӕны, уыдон паддзӕхты галуанты цӕрынц. 26 Фӕлӕ уӕддӕр цы уынынмӕ цыдыстут? Пехуымпары? О, зӕгъын уын, пехуымпарӕй дӕр уӕлдӕры. 27 Иоанн у, Сыгъдӕг Фыст афтӕ кӕй тыххӕй зӕгъы: „Мӕнӕ Ӕз Мӕ фидиуӕджы ӕрвитын Дӕ разӕй, ӕмӕ Дын уый ӕрцӕттӕ кӕндзӕни Дӕ развӕндаг". 28 Зӕгъын уын: сылгоймагӕй чи райгуырд, уыдонӕй ничи у Аргъауӕг Иоаннӕй уӕлдӕр, фӕлӕ Хуыцауы Паддзахады тӕккӕ къаддӕр Иоаннӕй уӕлдӕр у. 29 Иоаннмӕ чи хъуыста, ӕппӕт уыцы адӕм, суанг хъалонисджытӕ дӕр, сӕххӕст кодтой Хуыцауы фӕнд ӕмӕ аргъуыд райстой Иоаннӕй. 30 Фарисейтӕ ӕмӕ динамонджытӕ та Хуыцауы коммӕ нӕ бакастысты ӕмӕ нӕ саргъуыдтой. 31 Уӕдӕ кӕуыл абарон ацы адӕмы фӕлтӕр? Кӕй хуызӕн сты? 32 Сывӕллӕтты хуызӕн сты, сахары фӕзы чи бады ӕмӕ кӕрӕдзийӕн афтӕ чи зӕгъы: „Мах уын уадындзӕй цагътам, ӕмӕ сымах нӕ кафыдыстут; мах уын хъарджытӕ кодтам, ӕмӕ сымах нӕ куыдтат". 33 Уымӕн ӕмӕ ӕрцыд Аргъауӕг Иоанн, дзул дӕр нӕ хӕры, сӕн дӕр нӕ нуазы, ӕмӕ дзы зӕгъут: „Хӕйрӕджджын у". 34 Ӕрцыд Адӕймаджы Фырт, хӕры ӕмӕ нуазы, ӕмӕ Дзы зӕгъут: „Мӕнӕ гуыбындзӕл ӕмӕ расыггӕнаг, хъалонисджыты ӕмӕ тӕригъӕдджынты лымӕн". 35 Фӕлӕ Хуыцауы уӕлзондӕн йӕ растгӕнӕг сты йеппӕт сывӕллӕттӕ». 36 Фарисейтӕй иучидӕр Йесойы ахуыдта сихормӕ. Йесо бацыд фарисейы хӕдзармӕ ӕмӕ ӕрбадти фынгыл. 37 Уыцы сахарӕй иу тӕригъӕдджын сылгоймаг базыдта, Йесо фарисейы хӕдзары фынгыл кӕй бады, уый, ӕмӕ ӕрхаста хӕрздӕфгӕнӕнӕй дзаг дурын. 38 Ӕрлӕууыд Йесойы фӕстӕ, Йӕ къӕхты цур, ӕмӕ кӕугӕйӕ райдыдта Йесойы къӕхтыл йӕ цӕссыг калын, сӕрфта сӕ йӕ дзыккутӕй, батӕ Йын кодта Йӕ къӕхтӕн ӕмӕ сӕ сӕрста хӕрздӕфгӕнӕнӕй. 39 Йесойы бахонӕг фарисей уый куы федта, уӕд ахъуыды кодта: «Ай пехуымпар куы уаид, уӕд Ӕм чи ӕмӕ цавӕр сылгоймаг ӕвналы, уый зонид, уымӕн ӕмӕ ацы сылгоймаг тӕригъӕдджын у». 40 Уӕд ын Йесо загъта: «Симон, иу ныхас дын куы зӕгъин, уый Мӕ фӕнды». Уый дзуапп радта: «Зӕгъ ӕй, Ахуыргӕнӕг». 41 Йесо загъта: «Иу ӕфстаудӕттӕгӕн уыди дыууӕ хӕсджыны: иу дзы дардта фондзсӕдӕ динары, иннӕ та – дӕс ӕмӕ дыууиссӕдз. 42 Фӕлӕ сӕ цӕмӕй бафыстаиккой, уый сӕм нӕ уыд, ӕмӕ дыууӕйӕн дӕр ныххатыр кодта. Зӕгъ-ма, уыдонӕй йӕ кӕцы бауарздзӕн фылдӕр?» 43 Симон дзуапп радта: «Мӕнмӕ гӕсгӕ, фылдӕр кӕмӕн ныххатыр кодта, уый». Йесо йын загъта: «Дӕ хъуыды раст у». 44 Йесо разылди сылгоймагмӕ ӕмӕ Симонӕн загъта: «Уыныс ацы сылгоймаджы? Ӕз ӕрбацыдтӕн дӕ хӕдзармӕ, ӕмӕ Мын ды Мӕ къӕхтӕ цӕхсынӕн дон дӕр нӕ раттай. Уый та Мын йӕ цӕссыгтӕй ӕрӕнхъӕвзта Мӕ къӕхтӕ ӕмӕ сӕ ныссӕрфта йӕ дзыккутӕй. 45 Ды Мын нӕ аба кодтай. Уый та Мын, куы ӕрбацыдтӕн, уӕдӕй фӕстӕмӕ Мӕ къӕхтӕн батӕ кӕнынӕй не 'нцайы. 46 Ды Мын Мӕ сӕр зетийӕ нӕ байсӕрстай. Уый та Мын Мӕ къӕхтӕ хӕрздӕфгӕнӕнӕй байсӕрста. 47 Уымӕ гӕсгӕ дын зӕгъын: бирӕ кӕй бауарзта, уый тыххӕй йын барст сты йӕ бирӕ тӕригъӕдтӕ. Чысыл барст кӕмӕн у, уымӕн та йӕ уарзт дӕр чысыл у». 48 Сылгоймагӕн та загъта: «Барст дын сты дӕ тӕригъӕдтӕ». 49 Йесоимӕ фынгыл чи бадти, уыдон хинымӕр райдыдтой дзурын: «Уый Чи у, суанг тӕригъӕдтӕ дӕр Чи хатыр кӕны?» 50 Йесо та сылгоймагӕн загъта: «Дӕ уырнындзинад дӕ фервӕзын кодта; цу фарнимӕ».

Лука 8

1 Уый фӕстӕ Йесо зылди сахартыл ӕмӕ хъӕутыл, хъусын кодта фарны уац Хуыцауы Паддзахады тыххӕй. Йемӕ уыдысты Йӕ дыууадӕс ахуыргӕнинаджы, 2 Стӕй ӕнӕзӕгъинӕгты кӕмӕй расырдта ӕмӕ низтӕй кӕй сдзӕбӕх кодта, уыцы сылгоймӕгтӕ: авд дӕлимоны кӕмӕй рацыд, магдалӕйаг кӕй хуыдтой, уыцы Мариа, 3 Ироды хӕдзарӕн уынаффӕгӕнӕг чи уыди, уыцы Хузайы ус Иоаннӕ, Сусаннӕ ӕмӕ бирӕ ӕндӕр сылгоймӕгтӕ. Сеппӕт дӕр сӕ мулкӕй лӕггад кодтой Йесойӕн ӕмӕ Йӕ ахуыргӕнинӕгтӕн. 4 Адӕм кодтой фылдӕрӕй-фылдӕр – цыдысты Йӕм ӕппӕт сахартӕй. Йесо сын радзырдта фӕсномыг ныхас: 5 «Рацыд тауӕг йӕ тауинаг тауынмӕ. Таугӕ-тауын иугай нӕмгуытӕ ӕрхаудысты фӕндаггӕрон, къӕхты бын фесты, ӕмӕ сӕ уӕларвон мӕргътӕ рауыгътой. 6 Иуӕй-иутӕ дзы ӕрхаудысты дурджын ран, ӕмӕ куы сӕвзӕрдысты, уӕд бахус сты, уымӕн ӕмӕ донхъуаг разындысты. 7 Иуӕй-иутӕ дзы ӕрхаудысты сындзыты ӕхсӕн, сындзытӕ сзадысты семӕ ӕмӕ сӕ ныххурх кодтой. 8 Иуӕй-иутӕ дзы ӕрхаудысты бӕзнаг мӕрыл, сзадысты ӕмӕ радтой фондзыссӕдз хатты фылдӕр тыллӕг». Уый радзурыны фӕстӕ Йесо хъӕрӕй загъта: «Хъустӕ кӕуыл ис, уый хъусӕд!» 9 Йӕ ахуыргӕнинӕгтӕ Йӕ бафарстой: «Цы амоны ацы фӕсномыг ныхас?» 10 Йесо сын загъта: «Сымахӕн Хуыцауы Паддзахады сусӕгдзинӕдтӕ зонын лӕвӕрд у, иннӕтӕн та сӕ фӕсномыг ныхӕстӕй амындӕуы, цӕмӕй „кӕсой, фӕлӕ ма уыной, хъусой, фӕлӕ ма ӕмбарой". 11 Мӕнӕ цы амоны ацы фӕсномыг ныхас: тауинаг – Хуыцауы ныхас у. 12 Фӕндаггӕрон чи ӕрхауд, уыдон ахӕмтӕ сты: фехъусынц ныхас, фӕлӕ сӕм фӕстӕдӕр ӕрцӕуы хӕйрӕг ӕмӕ сын сӕ зӕрдӕйӕ ахӕссы ныхас, цӕмӕй сӕ ма бауырна ӕмӕ ма фервӕзой. 13 Дурджын ран чи ӕрхауд, уыдон та ахӕмтӕ сты: ныхас куы фехъусынц, уӕд ӕй цингӕнгӕ айсынц сӕ зӕрдӕмӕ, фӕлӕ ӕнӕуидаг сты – ӕууӕндынц рӕстӕгмӕ, фӕлварӕнты куы бахауынц, уӕд та ныууадзынц сӕ уырнындзинад. 14 Сындзыты ӕхсӕн чи ӕрхауд, уыдон ахӕмтӕ сты: фехъусынц ныхас, фӕлӕ сын фӕстӕдӕр царды мӕт, мулк ӕмӕ зӕххон хиирхӕфсӕнтӕ сӕ хурхыл ныххӕцынц, ӕмӕ пайда нӕ раттынц. 15 Бӕзнаг мӕрыл чи ӕрхауд, уыдон та ахӕмтӕ сты: фехъусынц ныхас, дарынц ӕй сӕ фӕлмӕн ӕмӕ сыгъдӕг зӕрдӕйы, ӕмӕ, фӕразон кӕй сты, уый фӕрцы раттынц пайда. 16 Цырагъ чи ссудзы, уый йыл мигӕнӕн не 'рдӕлгом кӕны, сынтӕджы бын дӕр ӕй нӕ бавӕры, фӕлӕ йӕ сӕвӕры цырагъдарӕныл, бацӕуджытӕ рухс куыд уыной, афтӕ. 17 Уымӕн ӕмӕ цы нӕ раргом уа, ахӕм сусӕггаг нӕй, ӕмӕ цы нӕ рахъӕр уа ӕмӕ кӕй нӕ базындӕуа, ахӕм сусӕгдзинад нӕ вӕййы. 18 Уӕдӕ-иу ӕркӕсут, куыд хъусут, уымӕ. Уымӕн ӕмӕ кӕмӕ ис, уымӕн рардӕуыдзӕн; кӕмӕ нӕй, уымӕй та ист ӕрцӕудзӕн, ис мӕм, зӕгъгӕ, ӕнхъӕл цӕмӕй у, уый дӕр». 19 Йесомӕ ӕрцыдысты Йӕ Мад ӕмӕ Йе 'фсымӕртӕ, ӕмӕ дзы бирӕ адӕм кӕй уыди, уымӕ гӕсгӕ Йӕм бацӕуын сӕ къухы не 'фтыд. 20 Ӕмӕ Йын загътой: «Дӕ Мад ӕмӕ Де 'фсымӕртӕ ӕдде лӕууынц, Дӕу фенын сӕ фӕнды». 21 Йесо сын дзуапп радта: «Хуыцауы ныхасмӕ чи хъусы ӕмӕ йӕ чи ӕххӕст кӕны, уыдон сты Мӕ мад ӕмӕ Ме 'фсымӕртӕ». 22 Иухатт Йесо Йӕ ахуыргӕнинӕгтимӕ бахызт бӕлӕгъмӕ, ӕмӕ сын загъта: «Ахизӕм цады фаллаг фарсмӕ». Ӕмӕ араст сты. 23 Сӕ фӕндаг дардтой, ӕмӕ уалынмӕ Йесо афынӕй. Цады та сыстади тыхджын уад, дон калди бӕлӕгъмӕ, ӕмӕ уыдысты тӕссаг уавӕры. 24 Уӕд ахуыргӕнинӕгтӕ Йесомӕ бацыдысты, райхъал Ӕй кодтой ӕмӕ Йын загътой: «Хицау, Хицау, сӕфӕм!» Йесо сыстади, бардзырд радта уад ӕмӕ уылӕнтӕн; уыдон банцадысты, ӕмӕ бӕстӕ ныссабыр. 25 Йесо Йӕ ахуыргӕнинӕгтӕн загъта: «Кӕм ис уӕ уырнындзинад?» Уыдон фӕтарстысты, ӕмӕ дисгӕнгӕ кӕрӕдзийӕн дзырдтой: «Уый Чи уа, уад ӕмӕ донӕн бардзырд Чи дӕтты, ӕмӕ уыдон Кӕй коммӕ кӕсынц?» 26 Бахӕццӕ сты, Галилейы акомкоммӕ цады фаллаг фарс чи ис, Гадарӕйы уыцы бӕстӕмӕ. 27 Йесо былмӕ куы рахызт, уӕд Ыл сӕмбӕлди, раздӕр хӕстӕг сахары чи цард, ахӕм хӕйрӕджджын лӕг. Уый рагӕй дӕр дарӕс нӕ дардта, царди хӕдзары нӕ, фӕлӕ зӕппӕдзты. 28 Йесойы куы федта, уӕд ныхъхъӕр кодта, ӕрхауд Йӕ разы, ӕмӕ хъӕрӕй загъта: «Цы Дӕ хъӕуы мӕнӕй, Йесо, Дунедарӕг Хуыцауы Фырт? Лӕгъстӕ Дын кӕнын, хъизӕмарӕй мӕ ма мар!» 29 Уымӕн ӕмӕ Йесо ӕнӕзӕгъинагӕн радта уыцы адӕймагӕй рацӕуыны бардзырд. Ӕнӕзӕгъинаг уый рагӕй тухӕнӕй мардта. Сбастой-иу ӕй рӕхыстӕ ӕмӕ хъадамантӕй, хъахъхъӕдтой йӕ, фӕлӕ-иу арӕдывта йӕ бӕттӕнтӕ, ӕмӕ-иу ӕй дӕлимон атардта ӕдзӕрӕг ранмӕ. 30 Йесо йӕ бафарста: «Дӕ ном куыд у?» Уый загъта: «Легион», уымӕн ӕмӕ дзы бирӕ дӕлимонтӕ бацыд. 31 Ӕмӕ уыдон куырдтой Йесойӕ, цӕмӕй сӕ дӕлдзӕхмӕ ма арвита. 32 Уым хохыл хызти хуыты стыр дзуг, ӕмӕ дӕлимонтӕ Йесойӕ куырдтой хуыты бацӕуыны бар. Йесо сын бар радта. 33 Дӕлимонтӕ рацыдысты уыцы адӕймагӕй, ӕмӕ бацыдысты хуыты. Ӕмӕ дзуг къардиуӕй йӕхи фехста цадмӕ, ӕмӕ фӕдӕлдон. 34 Цы ӕрцыд, уый хуыгӕстӕ куы федтой, уӕд азгъордтой, ӕмӕ хабар радзырдтой сахар ӕмӕ хъӕуты. 35 Ӕмӕ цы ӕрцыд, уый фенынмӕ рацыдысты адӕм. Ӕрбацыдысты Йесомӕ, ӕмӕ дӕлимонтӕ кӕмӕй рацыдысты, уыцы лӕджы федтой йӕ дарӕсы Йесойы къӕхты цур бадгӕ, йӕ зонд йӕхимӕ уыд, афтӕмӕй. Ӕмӕ старстысты. 36 Цы ӕрцыд, уый фенӕг адӕм сын радзырдтой, хӕйрӕджджын куыд сдзӕбӕх, уый тыххӕй. 37 Ӕмӕ Гадарӕйы алфамбылай ӕппӕт цӕрджыты дӕр стыр тас кӕй бацыд, уый тыххӕй уыдон куырдтой Йесойӕ, цӕмӕй уырдыгӕй ацӕуа. Йесо бахызт бӕлӕгъмӕ ӕмӕ раздӕхт фӕстӕмӕ. 38 Дӕлимонтӕ кӕмӕй рацыдысты, уыцы лӕг Ын лӕгъстӕ кодта, цӕмӕй йӕ уадза Йемӕ. Фӕлӕ йӕ Йесо арвыста ӕмӕ йын загъта: 39 «Аздӕх дӕ хӕдзармӕ ӕмӕ радзур, Хуыцау дын цы сарӕзта, уый». Лӕг ацыд, ӕмӕ ӕгас сахары дӕр дзырдта, Йесо йын цы сарӕзта, уый тыххӕй. 40 Йесо куы раздӕхт, уӕд Ыл адӕм сӕмбӕлдысты ӕхсызгонӕй, уымӕн ӕмӕ Йӕм сеппӕт дӕр ӕнхъӕлмӕ кастысты. 41 Ӕрцыд Ӕм иу лӕг, йӕ ном – Иаир, синагогӕйы хицау. Йӕхи ӕрӕппӕрста Йесойы къӕхтӕм, ӕмӕ Йын лӕгъстӕ кодта, йӕ хӕдзармӕ йын цӕмӕй бацӕуа, уый тыххӕй, 42 Уымӕн ӕмӕ йӕ иунӕг чызг марди; цыдаид ыл дыууадӕс азы. Йесо куы фӕцӕйцыд, уӕд Ӕй адӕм фӕйнӕрдыгӕй цъист кодтой. 43 Иу сылгоймагӕн дыууадӕс азы дӕргъы йӕ туг цӕуынӕй не 'нцад. Йеппӕт мулк дӕр дохтыртыл бахардз кодта, фӕлӕ йе сдзӕбӕх кӕнын никӕй бон баци. 44 Сылгоймаг чъылдымырдыгӕй бацыд Йесомӕ, бандзӕвыд Ын Йӕ пӕлӕзы коцорайыл, ӕмӕ уайтӕккӕ туг банцад йӕ цӕуынӕй. 45 Уӕд Йесо загъта: «Чи Мыл бандзӕвыд?» Ӕмӕ сеппӕт дӕр «нӕ» куы дзырдтой, уӕд Ын Петр загъта: «Хицау, адӕм Дыл ӕрӕмбырд сты ӕмӕ Дӕ цъист кӕнынц». 46 Фӕлӕ Йесо загъта: «Чидӕр Мыл бандзӕвыд – Ӕз банкъардтон, тых Мӕ кӕй рацыд, уый». 47 Сылгоймаг, кӕй нӕ фӕсусӕг, уый куы федта, уӕд Ӕм тӕрсгӕ-ризгӕйӕ бацыд ӕмӕ Йын Йӕ къӕхтӕм ӕрӕппӕрста йӕхи. Цӕй тыххӕй Йыл бандзӕвыд ӕмӕ уайтӕккӕ куыд сдзӕбӕх, уый радзырдта ӕппӕт адӕмы раз. 48 Йесо йын загъта: «Мӕ чызг, дӕ уырнындзинад дӕ фервӕзын кодта. Цу фарнимӕ». 49 Йесо Йӕ ныхас нӕма фӕци, афтӕ синагогӕйы хицаумӕ иучидӕр ӕрцыд йӕ хӕдзарӕй, ӕмӕ йын загъта: «Дӕ чызг амард. Ахуыргӕнӕджы мауал фӕлмӕцын кӕн». 50 Фӕлӕ Йесо уый куы фехъуыста, уӕд синагогӕйы хицауӕн загъта: «Ма тӕрс, ӕрмӕст ӕууӕнд, ӕмӕ фервӕздзӕн». 51 Ӕмӕ йын йӕ хӕдзармӕ куы ӕрцыд, уӕд Петр, Иоанн ӕмӕ Иаковы, стӕй сабийы фыд ӕмӕ мады йеддӕмӕ никӕй бауагъта Йемӕ мидӕмӕ бацӕуын. 52 Адӕм иууылдӕр куыдтой ӕмӕ хъарӕг кодтой чызгыл. Фӕлӕ сын Йесо загъта: «Ма кӕут; мард нӕу, фынӕй у». 53 Ӕмӕ Йыл худтысты, уымӕн ӕмӕ, кӕй амард, уый зыдтой. 54 Фӕлӕ йын Йесо ныххӕцыд йӕ къухыл, ӕмӕ йӕм фӕдзырдта: «Саби, рабад!» 55 Чызгмӕ ӕрыздӕхт йӕ уд, ӕмӕ уыйадыл рабадт. Йесо бафӕдзӕхста, цӕмӕй йын раттой хӕринаг. 56 Чызджы ныййарджытӕ дисы бафтыдысты. Фӕлӕ сын Йесо бафӕдзӕхста, цӕмӕй, цы ӕрцыд, уый тыххӕй макӕмӕн зӕгъой.

Лука 9

1 Йесо басидт Йӕ дыууадӕс ахуыргӕнинагмӕ ӕмӕ сын радта тых, цӕмӕй сӕ бар цӕуа ӕппӕт дӕлимонтыл дӕр ӕмӕ адӕмы дзӕбӕх кӕной сӕ низтӕй. 2 Ӕмӕ сӕ арвыста Хуыцауы Паддзахады уац адӕммӕ фӕхӕссынмӕ ӕмӕ рынчынты дзӕбӕх кӕнынмӕ. 3 Йесо сын бафӕдзӕхста: «Мацы райсут фӕндагмӕ – нӕдӕр лӕдзӕг, нӕдӕр хордзен, нӕдӕр хойраг, нӕдӕр ӕхца, нӕдӕр дыгай хӕдӕттӕ. 4 Кӕцыфӕнды хӕдзармӕ дӕр куы бацӕуат, уӕд-иу дзы баззайут, цалынмӕ уырдыгӕй рацӕуат, уӕдмӕ. 5 Исчи уӕ куы не суазӕг кӕна, уӕд та-иу, уыцы сахарӕй рацӕугӕйӕ, ацӕгъдут уӕ къӕхты рыг – аххосджын кӕй сты, уымӕн ӕвдисӕйнагӕн». 6 Ахуыргӕнинӕгтӕ ацыдысты ӕмӕ зылдысты хъӕутыл, алы ран дӕр хъусын кодтой фарны уац ӕмӕ дзӕбӕх кодтой рынчынты. 7 Ӕппӕт уыцы цауты тыххӕй фехъуыста ӕлдариуӕггӕнӕг Ирод, ӕмӕ цытӕ цыди, уый бамбарын йӕ бон нӕ уыд. Уымӕн ӕмӕ иутӕ дзырдтой, уый Иоанн райгас мӕрдтӕй, зӕгъгӕ; 8 Иннӕтӕ – Илиа, дам, ӕрцыд; аннӕтӕ та дзырдтой, рагон пехуымпартӕй, дам, чидӕр райгас. 9 Фӕлӕ Ирод загъта: «Иоаннӕн ӕз йӕ сӕр куы акъуырдтон, уӕд уыдӕттӕ Кӕй тыххӕй хъусын, Уый та чи у?» Ӕмӕ архайдта Йесойы феныныл. 10 Апостолтӕ куы ӕрбаздӕхтысты, уӕд Йесойӕн радзырдтой, цы сарӕзтой, уыдӕттӕ. Йесо сӕ Йемӕ рахуыдта, ӕмӕ хибарӕй ацыдысты, Вифсаидӕ кӕй хуындӕуыд, уыцы сахарырдӕм. 11 Фӕлӕ адӕм уый куы базыдтой, уӕд ацыдысты Йӕ фӕдыл. Йесо фембӕлд семӕ, дзырдта сын Хуыцауы Паддзахады тыххӕй ӕмӕ дзӕбӕх кодта, дзӕбӕх кӕнын кӕй хъуыд, уыдон. 12 Бон изӕрырдӕм фӕкъул. Ӕрбацыдысты Йӕм дыууадӕс ахуыргӕнинаджы ӕмӕ Йын загътой: «Ауадз адӕмы ацӕуын хӕстӕг хъӕутӕм бахсӕвиуат кӕнынмӕ ӕмӕ сӕхицӕн хойраг самал кӕнынмӕ. Уымӕн ӕмӕ ам фӕсвӕд ран стӕм». 13 Фӕлӕ сын Йесо загъта: «Сымах сын раттут хӕринаг». Уыдон дзуапп радтой: «Махмӕ фондз дзулы ӕмӕ дыууӕ кӕсаджы йеддӕмӕ ницы ис. Ӕмӕ ныр утӕппӕт адӕмы фаг хойраг балхӕнынмӕ хъуамӕ ацӕуӕм?» 14 (Уым уыди фондз мин лӕджы бӕрц.) Фӕлӕ Йесо Йӕ ахуыргӕнинӕгтӕн загъта: «Ӕрбадын сӕ кӕнут къордгай – алы къорды дӕр дӕс ӕмӕ дыууиссӕдзы бӕрц куыд уа». 15 Сеппӕты дӕр ӕрбадын кодтой, куыд загъд сын уыд, афтӕ. 16 Йесо райста фондз дзулы ӕмӕ дыууӕ кӕсаджы, скаст уӕларвмӕ, арфӕ ракодта, асаста сӕ, ӕмӕ сӕ ахуыргӕнинӕгтӕм радта адӕмӕн байуарынмӕ. 17 Бахордтой сеппӕт дӕр ӕмӕ бафсӕстысты. Ӕмӕ ма цы уӕлдӕйттӕ баззад, уыдонӕй байдзаг дыууадӕс чыргъӕды. 18 Иухатт Йесо куывта хибарӕй; Йемӕ уыдысты ӕрмӕстдӕр Йӕ ахуыргӕнинӕгтӕ. Йесо сӕ бафарста: «Кӕуыл Мӕ нымайынц адӕм?» 19 Уыдон дзуапп радтой: «Иутӕ – Аргъауӕг Иоанныл, иннӕтӕ – Илиайыл, аннӕтӕ та зӕгъынц, рагон пехуымпартӕй чидӕр райгас, зӕгъгӕ». 20 Йесо сӕ бафарста: «Сымах та Мӕ кӕуыл нымайут?» Петр Ын дзуапп радта: «Хуыцауы Чырыстийыл». 21 Ӕмӕ сын Йесо тынг бафӕдзӕхста, цӕмӕй уый тыххӕй макӕмӕн дзурой. 22 Загъта ма сын: «Адӕймаджы Фырт хъуамӕ бавзара бирӕ хъизӕмӕрттӕ; адӕмы хистӕртӕ, алчертӕ ӕмӕ Йӕ динамонджытӕ бафхӕрдзысты, амардӕйӕуыдзӕн ӕмӕ ӕртыккаг бон райгас уыдзӕн». 23 Уый фӕстӕ сеппӕтӕн дӕр загъта: «Мӕ фӕдыл цӕуын кӕй фӕнды, уый йӕхи ферох кӕнӕд, алы бон дӕр-иу райсӕд йӕ дзуар ӕмӕ цӕуӕд Мӕ фӕдыл. 24 Уымӕн ӕмӕ йӕ цард бахъахъхъӕнын кӕй фӕнды, уый йӕ фесафдзӕн; йӕ цард Мӕ сӕраппонд чи фесафа, уый та йӕ бахъахъхъӕндзӕн. 25 Адӕймаг ӕгас дуне йӕхи куы бакӕна, йӕхи та куы фесафа, кӕнӕ йӕхиуыл зиан куы ӕруадза, уӕд ын уый цы пайда у? 26 Мӕнӕй ӕмӕ Мӕ ныхӕстӕй чи фефсӕрмы уа, уымӕй фефсӕрмы уыдзӕн Адӕймаджы Фырт дӕр, Йӕхи, Йӕ Фыды ӕмӕ сыгъдӕг зӕдты намысимӕ куы ӕрцӕуа, уӕд. 27 Ӕцӕг уын зӕгъын: ам чи лӕууы, уыдонӕй иуӕй-иутӕ нӕ амӕлдзысты, цалынмӕ Хуыцауы Паддзахад феной, уӕдмӕ». 28 Уыцы ныхӕстыл аст боны бӕрц куы рацыд, уӕд Йесо Йемӕ рахуыдта Петры, Иоанны ӕмӕ Иаковы, ӕмӕ хохмӕ ссыди бакувынмӕ. 29 Куы куывта, уӕд Йӕ цӕсгомы хуыз аивта, Йӕ дарӕс та сси сӕнтурс ӕмӕ калдта тӕмӕнтӕ. 30 Ӕмӕ дын мӕнӕ дыууӕ лӕджы ныхас кӕнынц Йемӕ; уыдон уыдысты Моисей ӕмӕ Илиа. 31 Фӕзындысты уӕларвон намысимӕ, ӕмӕ дзырдтой Йесойы ахицӕныл – Уый Хуыцауы фӕндон Иерусалимы куыд сӕххӕст кӕндзӕн, ууыл. 32 Петрыл ӕмӕ йе 'мбӕлццӕттыл та хуыссӕг фӕтых. Куы райхъал сты, уӕд федтой Йесойы намыс, ӕмӕ дыууӕ лӕджы Йемӕ лӕугӕйӕ. 33 Ӕмӕ уыдон Йесойӕ хицӕн куы кодтой, уӕд Ын Петр загъта: «Хицау, ам кӕй стӕм, уый цы хорз у! Саразӕм ӕртӕ халагъуды: иу Дӕуӕн, иу Моисейӕн, иу Илиайӕн». Цы дзырдта, уый йӕхӕдӕг дӕр не 'мбӕрста. 34 Петр йӕ ныхас нӕма фӕци, афтӕ фӕзынд ӕврагъ ӕмӕ сӕ ӕрӕмбӕрзта. Ӕврагъы куы аныгъуылдысты, уӕд фӕтарстысты. 35 Ӕмӕ ӕврагъӕй райхъуысти хъӕлӕс: «Ай, Кӕй сӕвзӕрстон, Мӕ уыцы Фырт у. Хъусут Ӕм». 36 Хъӕлӕс куы райхъуыст, уӕд Йесоимӕ ничиуал уыд. Ахуыргӕнинӕгтӕ цы федтой, уый басусӕг кодтой, ӕмӕ йӕ уыцы бонты никӕмӕн радзырдтой. 37 Дыккаг бон хохӕй куы ӕрцыдысты, уӕд Йесойы размӕ рацыд бирӕ адӕм. 38 Адӕмы ӕхсӕнӕй чидӕр рахъӕр кодта: «Ахуыргӕнӕг, лӕгъстӕ Дын кӕнын, баххуыс кӕн мӕ фыртӕн, иунӕг хъӕбул мын у! 39 Дӕлимон ӕй ӕрцахсы, лӕппу ӕваст ныхъхъӕр кӕны, йӕ гӕндзӕхтӕ ныццӕгъды ӕмӕ йӕ комӕй фынк ракӕлы. Дӕлимон ӕй хъизӕмарӕй куы амары, уӕд ма йӕ тыххӕйты ныууадзы. 40 Ӕз куырдтон Дӕ ахуыргӕнинӕгтӕй, цӕмӕй дӕлимоны расурой, фӕлӕ сӕ бон нӕ баци». 41 Йесо дзуапп радта: «Ӕнӕуырнӕг ӕмӕ хӕлд фӕлтӕр! Кӕдмӕ уыдзынӕн уемӕ ӕмӕ уын кӕдмӕ быхсдзынӕн? Ӕрбакӕн ардӕм дӕ фырты». 42 Лӕппу Йесомӕ нӕма бахӕццӕ, афтӕ йӕ дӕлимон ныццавта зӕххыл, ӕмӕ лӕппу йӕ гӕндзӕхтӕ цагъта. Фӕлӕ Йесо бардзырд радта ӕнӕзӕгъинагӕн, сдзӕбӕх кодта лӕппуйы ӕмӕ йӕ радта йӕ фыдмӕ. 43 Адӕм иууылдӕр дисы бафтыдысты, Хуыцау куыд хъомысджын у, ууыл. Йесо цыдӕриддӕр арӕзта, уыдоныл сеппӕт дӕр куы дис кодтой, уӕд Йесо Йӕ ахуыргӕнинӕгтӕн загъта: 44 «Ныртӕккӕ цы зӕгъдзынӕн, уымӕ байхъусут лӕмбынӕг: Адӕймаджы Фырт лӕвӕрд ӕрцӕудзӕн адӕмы къухтӕм». 45 Фӕлӕ уыдон уыцы ныхӕстӕ не 'мбӕрстой – ӕргом сын нӕ уыдысты ӕмӕ сӕм нӕ бахъардтой; уыцы ныхӕстӕй Йӕ бафӕрсын та нӕ уӕндыдысты. 46 Ахуыргӕнинӕгтӕм рауад быцӕу, уӕлдӕр сӕ чи у, уый тыххӕй. 47 Йесо сын зыдта сӕ мидхъуыды, ӕмӕ ӕрбахуыдта сывӕллоны, ӕрлӕууын ӕй кодта Йӕ фарсмӕ, 48 Ӕмӕ сын загъта: «Ацы сывӕллоныл Мӕ номы сӕраппонд зӕрдиаг чи уа, уый Мӕныл у зӕрдиаг; Мӕныл зӕрдиаг чи уа, уый та Мӕ Рарвитӕгыл у зӕрдиаг. Уеппӕты ӕхсӕн тӕккӕ къаддӕр чи у – цытджын уый у». 49 Уӕд Ын Иоанн загъта: «Хицау, мах федтам, Дӕ номӕй дӕлимонты чи суры, ахӕм адӕймаджы, ӕмӕ йын бар нӕ лӕвӕрдтам, уымӕн ӕмӕ немӕ нӕ цӕуы». 50 Йесо йын загъта: «Ма йӕ хъыгдарут, уымӕн ӕмӕ уӕ ныхмӕ чи нӕу, уый уӕ фарс у». 51 Уӕлӕрвтӕм Йӕ сисыны афон куы ӕрхӕстӕг, уӕд Йесо скарста Иерусалиммӕ фӕцӕуын. 52 Йӕ разӕй арвыста минӕвӕрттӕ, ӕмӕ уыдон бацыдысты самариаг хъӕумӕ, цӕмӕй Йесойы ӕрцыдмӕ ӕрцӕттӕ кӕной ӕппӕт дӕр. 53 Фӕлӕ Йӕ не суазӕг кодтой, Иерусалиммӕ кӕй цыди, уый тыххӕй. 54 Йӕ ахуыргӕнинӕгтӕ Иаков ӕмӕ Иоанн уый куы федтой, уӕд загътой: «Хицау, фӕнды Дӕ, уӕд зӕгъӕм, ӕмӕ уӕларвӕй ӕрцӕуа арт ӕмӕ сӕ фесафа [Илиа куыд бакодта, афтӕ]?» 55 Фӕлӕ сӕм Йесо Йе 'ргом разылдта ӕмӕ сын бауайдзӕф кодта. [Загъта сын: «Цавӕр уд уӕм ис, уый нӕ зонут. 56 Адӕймаджы Фырт адӕмы сафынмӕ не 'рцыд, фӕлӕ сӕ фервӕзын кӕнынмӕ».] Ӕмӕ ацыдысты ӕндӕр хъӕумӕ. 57 Фӕндагыл куы уыдысты, уӕд Йесойӕн чидӕр загъта: «Ды кӕдӕм цӕуай, уырдӕм ӕз дӕр ацӕудзынӕн Дӕ фӕдыл». 58 Йесо йын дзуапп радта: «Рувӕстӕн ис хуыккӕмттӕ, уӕларвон мӕргътӕн – ахстӕттӕ. Адӕймаджы Фыртӕн та, Йӕ сӕр кӕм ӕркъул кӕна, уый дӕр нӕй». 59 Иннӕмӕн Йесо загъта: «Рацу Мӕ фӕдыл». Уый Йын дзуапп радта: «Хицау, мӕ фыды баныгӕнынмӕ уал мӕ ауадз». 60 Фӕлӕ йын Йесо загъта: «Мӕрдтӕ сӕхӕдӕг баныгӕнӕнт сӕ мӕрдты. Ды та цу ӕмӕ хъусын кӕн Хуыцауы Паддзахады тыххӕй». 61 Иннӕ дӕр Ын загъта: «Хицау, ӕз ацӕудзынӕн Дӕ фӕдыл, фӕлӕ уал мӕ ауадз мӕ бинонтӕн хӕрзбон зӕгъынмӕ». 62 Фӕлӕ йын Йесо дзуапп радта: «Гутоныл хӕцгӕйӕ фӕстӕмӕ чи кӕсы, уый Хуыцауы Паддзахадӕн нӕ бӕззы».

Лука 10

1 Уый фӕстӕ Йесо сӕвзӕрста иннӕ дӕс ӕмӕ ӕртиссӕдз ахуыргӕнинаджы дӕр ӕмӕ сӕ Йӕ разӕй дыгӕйттӕй арвыста, цӕуинаг кӕдӕм уыди, уыцы сахартӕ ӕмӕ хъӕутӕм. 2 Ӕмӕ сын загъта: «Кӕрдинаг – бирӕ, фӕлӕ хуымгӕрдджытӕ нӕ фаг кӕны. Уӕдӕ курут хуымы Хицауӕй, цӕмӕй рарвита хуымгӕрдджытӕ Йӕ хуым кӕрдынмӕ. 3 Цӕут! Мӕнӕ уӕ Ӕз ӕрвитын, уӕрыччыты бирӕгъты ӕхсӕнмӕ ӕрвитӕгау. 4 Уемӕ ма хӕссут нӕдӕр ӕхцайы дзӕкъул, нӕдӕр хордзен, нӕдӕр дзабыртӕ, стӕй фӕндагыл салам дӕр макӕмӕн дӕттут. 5 Цы хӕдзармӕ бацӕуат, уым фыццаг зӕгъут: „Фарн ацы хӕдзары!" 6 Ӕмӕ уым фарны аккаг адӕймаг куы уа, уӕд ыл уӕ арфӕ ӕрцӕудзӕни; куы нӕ дзы уа, уӕд уӕ арфӕ раздӕхдзӕн уӕхимӕ. 7 Баззайут уыцы хӕдзары, хӕрут ӕмӕ нуазут, цы сӕм уа, уый. Уымӕн ӕмӕ фӕллойгӕнӕг у йӕ куыстӕн мызд райсыны аккаг. Хӕдзари-хӕдзар ма цӕут. 8 Цы сахармӕ бацӕуат, уым уӕ куы суазӕг кӕной, уӕд хӕрут, цы уын ӕрӕвӕрой, уый. 9 Уым цы рынчынтӕ уа, уыдоны дзӕбӕх кӕнут ӕмӕ адӕмӕн дзурут: „Ӕрӕввахс уӕм Хуыцауы Паддзахад". 10 Искӕцы сахармӕ куы бацӕуат ӕмӕ уӕ куы не суазӕг кӕной, уӕд-иу, уынгмӕ рацӕугӕйӕ, зӕгъут: 11 „Уӕ сахары ныл цы рыг ӕрбадт, уый дӕр цӕгъдӕм нӕ къӕхтӕй, уӕхицӕн уын ӕй уадзӕм. Фӕлӕ зонут, Хуыцауы Паддзахад уӕм кӕй ӕрӕввахс, уый". 12 Зӕгъын уын, тӕрхоны бон Содомӕн уыцы сахарӕй ӕнцондӕр уыдзӕн. 13 Сар дӕ сӕр, Хоразин! Сар дӕ сӕр, Вифсаидӕ! Уымӕн ӕмӕ сымахмӕ кӕй равдыстӕуыд, уыцы диссӕгтӕ Тир ӕмӕ Сидоны куы равдыстӕуыдаид, уӕд уыцы сахартӕ, хъисын скӕнгӕйӕ ӕмӕ фӕнычы сбадгӕйӕ, раджы ӕрфӕсмон кодтаиккой. 14 Фӕлӕ Тир ӕмӕ Сидонӕн тӕрхоны бон сымахӕй ӕнцондӕр уыдзӕн. 15 Ӕмӕ дӕу, Капернаум, уӕларвмӕ систӕуыдзӕни? Нӕ, дӕлдзӕхмӕ ныххаудзынӕ. 16 Сымахмӕ чи хъусы, уый Мӕнмӕ хъусы, ӕмӕ сымахыл йӕхи чи тигъ кӕны, уый Мӕныл тигъ кӕны йӕхи. Мӕныл йӕхи чи тигъ кӕны, уый та Мӕ Рарвитӕгыл тигъ кӕны йӕхи». 17 Дӕс ӕмӕ ӕртиссӕдз ахуыргӕнинаджы ӕрыздӕхтысты цингӕнгӕ ӕмӕ дзырдтой: «Хицау, Дӕ номӕй куы фӕзӕгъӕм, уӕд дӕлимонтӕ дӕр кӕсынц нӕ коммӕ». 18 Йесо сын загъта: «Ӕз федтон хӕйрӕджы уӕларвӕй ӕрвӕрттывдау ӕрхаугӕ. 19 Мӕнӕ уын Ӕз радтон кӕлмыты ӕмӕ скорпионты уӕ къӕхты бын ссӕндыны бар, знаджы ӕппӕт тыхтыл уӕлахизы хъомыс, ӕмӕ уын ницы ӕрхӕсдзӕн зиан. 20 Дӕлимонтӕ уӕ коммӕ кӕй кӕсынц, ууыл ма цин кӕнут, фӕлӕ цин кӕнут, уӕ нӕмттӕ уӕлӕрвты фыст кӕй сты, ууыл». 21 Уайтӕккӕ Йын Сыгъдӕг Уд ӕрхаста цин ӕмӕ Йесо загъта: «Стауын Дӕ, Мӕ Фыд, арв ӕмӕ зӕххы Хицау, Ды адӕттӕ зондджынтӕ ӕмӕ ӕмбаргӕтӕй кӕй басусӕг кодтай ӕмӕ сӕ сывӕллӕттӕн кӕй раргом кодтай, уый тыххӕй. О, Мӕ Фыд, Дӕу афтӕ бафӕндыд. 22 Мӕ Фыдӕй Мын лӕвӕрд у ӕппӕт дӕр. Фырт чи у, уый ничи зоны Фыды йеддӕмӕ; Фыд чи у, уый дӕр ничи зоны – зоны Йӕ ӕрмӕстдӕр Фырт ӕмӕ, Уый Йӕ Фыды раргом кӕнын кӕмӕн фӕнды, уыдон». 23 Йесо Йе 'ргом разылдта Йӕ ахуыргӕнинӕгтӕм ӕмӕ сын хибарӕй загъта: «Тӕхудиаг сты, сымах цы уынут, уый уынӕг цӕстытӕ! 24 Зӕгъын уын: бирӕ пехуымпартӕ ӕмӕ паддзӕхты фӕндыд, сымах цы уынут, уый фенын, фӕлӕ йӕ нӕ федтой; сымах цы хъусут, уый фехъусын, фӕлӕ йӕ нӕ фехъуыстой». 25 Сыстад иу динамонӕг ӕмӕ, Йесойы къахгӕйӕ, загъта: «Ахуыргӕнӕг, мыггагмӕйы цард райсынӕн мӕ цы бакӕнын хъӕуы?» 26 Йесо йӕ бафарста: «Моисейы Ӕгъдауы цы фыст ис? Уым цы кӕсыс?» 27 Уый Йын дзуапп радта: «Уарз дӕ Хицау Хуыцауы ӕппӕт зӕрдӕйӕ, ӕппӕт удӕй, ӕппӕт хъаруйӕ, ӕппӕт зондӕй, ӕмӕ уарз хионы, дӕхи куыд уарзыс, афтӕ». 28 Йесо йын загъта: «Раст дзуапп радтай. Кӕн афтӕ ӕмӕ цӕрдзынӕ мыггагмӕ». 29 Фӕлӕ уый, йӕхи сраст кӕныныл архайгӕйӕ, загъта Йесойӕн: «Мӕ хион та чи у?» 30 Йесо йын дзуапп радта: «Иу адӕймаг фӕцӕйцыд Иерусалимӕй Иерихонмӕ ӕмӕ бахауд абырджыты къухтӕм. Уыдон ын раластой йӕ дарӕс, фӕнадтой йӕ, ӕрдӕгмардӕй йӕ ныууагътой ӕмӕ ацыдысты. 31 Рауад афтӕ, ӕмӕ уыцы фӕндагыл фӕцӕйцыд иу сауджын, федта йӕ, фӕлӕ йӕ рӕзты аивгъуыдта. 32 Афтӕ левит дӕр фӕцӕйцыд ууылты, федта йӕ, фӕлӕ йӕ рӕзты аивгъуыдта. 33 Уыцы фӕндагыл ма фӕцӕйцыд иу самариаг дӕр. Куы йӕм баввахс, уӕд ӕй федта ӕмӕ йын батӕригъӕд кодта. 34 Бацыд ӕм, йӕ хъӕдгӕмттӕ йын цӕхсадта зетийӕ ӕмӕ сӕнӕй, бабаста йын сӕ; йӕ хӕрӕгыл ӕй сӕвӕрдта, ӕрбаласта йӕ фысымуатмӕ ӕмӕ йӕм базылд. 35 Дыккаг бон систа дыууӕ динары, радта сӕ фысымуаты хицаумӕ ӕмӕ йын загъта: „Базил ӕм, ӕмӕ кӕд уӕлдай бахардз кӕнай, бафиддзынӕн дын ӕй, куы раздӕхон, уӕд". 36 Абырджыты къухтӕм чи бахауд, уымӕн, дӕумӕ гӕсгӕ, уыцы ӕртӕйӕ хион чи у?» 37 Уый дзуапп радта: «Чи йын батӕригъӕд кодта, уый». Уӕд ын Йесо загъта: «Ацу, ӕмӕ ды дӕр афтӕ кӕн». 38 Фӕндагыл куы уыдысты, уӕд Йесо бацыд иу хъӕумӕ. Уым Ӕй иу сылгоймаг, йӕ ном Марфӕ, бахуыдта йӕ хӕдзармӕ. 39 Марфӕйӕн уыди хо, хуынди Мариа. Мариа сбадти Хицауы къӕхты цур ӕмӕ Йын хъуыста Йӕ ныхасмӕ. 40 Марфӕйӕн та йӕ мӕт ӕгасӕй дӕр лӕггадыл уыд. Бацыд Йесомӕ ӕмӕ Йын загъта: «Хицау, мӕ хо мӕ иунӕгӕй лӕггадгӕнгӕ кӕй ныууагъта, уый нӕ уыныс? Зӕгъ ын, ӕмӕ мӕм фӕкӕса». 41 Йесо йын дзуапп радта: «Марфӕ, Марфӕ, ды мӕт кӕныс ӕмӕ тыхсыс бирӕ цӕуылдӕртыл, 42 Хъӕугӕ та ӕрмӕст иунӕг хъуыддаг кӕны. Мариа хуыздӕр хай равзӕрста, ӕмӕ йын ӕй ничи байсдзӕн».

Лука 11

1 Иухатт Йесо иу ран куы куывта ӕмӕ куывд куы фӕци, уӕд Ын Йӕ ахуыргӕнинӕгтӕй иу загъта: «Хицау, сахуыр нӕ кӕн кувын, Иоанн йӕ ахуыргӕнинӕгты куыд сахуыр кодта, афтӕ». 2 Йесо сын загъта: «Куы фӕкувут, уӕд-иу дзурут: „Нӕ Фыд, сыгъдӕг уӕд Дӕ ном. Ӕрцӕуӕд Дӕ Паддзахад. [Уӕларвы куыд у, афтӕ зӕххыл дӕр уӕд Дӕ фӕндон.] 3 Алы бон дӕр нын дӕтт цӕрынваг къӕбӕр. 4 Ныббар нын нӕ тӕригъӕдтӕ, уымӕн ӕмӕ мах дӕр барӕм неппӕт хӕсджынтӕн. Ма нӕ бафтау фӕлварӕны, [фыдбылызӕй нӕ бахиз]"». 5 Йесо сын загъта: «Зӕгъӕм, сымахӕй искӕмӕн хӕлар куы уаид. Ӕмбисӕхсӕв куы бацӕуид уыцы хӕлармӕ ӕмӕ йын куы зӕгъид: „Мӕ хӕлар, ратт мын ӕртӕ дзулы ӕфстау. 6 Мӕ хӕлар мӕм фӕндагӕй фездӕхт, ӕмӕ йӕ цӕмӕй суазӕг кӕнон, уый мӕм нӕй". 7 Ӕмӕ йӕм уый мидӕгӕй куы радзурид: „Ма мӕ хъыгдар, мӕ дуар ныридӕгӕн ӕхгӕд у, мӕ сывӕллӕттӕ дӕр хуыссӕны мемӕ сты. Мӕ бон нӕу сыстын ӕмӕ дын раттын". 8 Зӕгъын уын: уый сӕ хӕлардзинады тыххӕй куы нӕ сыста ӕмӕ йын куы нӕ ратта, фӕлӕ йӕ ай уӕддӕр куынӕуал уадза, уӕд сыстдзӕн ӕмӕ йын ратдзӕни, цас дзы кура, уыйбӕрц. 9 Уӕдӕ уын Ӕз дӕр зӕгъын: курут ӕмӕ райсдзыстут, агурут ӕмӕ ссардзыстут, хойут ӕмӕ уын байгом уыдзӕн. 10 Уымӕн ӕмӕ алы курӕг дӕр райсы, агурӕг ссары ӕмӕ хойӕгӕн дуар байгом вӕййы. 11 Йӕ фырт дзы дзул куы кура, уӕд ын дур чи ратта, уе 'хсӕн ахӕм фыд ис? Кӕнӕ йын кӕсаджы бӕсты калм ратдзӕн? 12 Кӕнӕ дзы айк куы кура, уӕд ын скорпион ратдзӕн? 13 Уӕдӕ сымах фыдзӕрдӕтӕ куы стут, ӕмӕ уӕддӕр уӕ зӕнӕгӕн хорзы цӕуын куы зонут, уӕд Уӕларвон Фыд куыннӕ ратдзӕни Сыгъдӕг Уд, чи Дзы кура, уыдонӕн!» 14 Иухатт Йесо иу адӕймагӕй сырдта ӕгомыггӕнӕг дӕлимоны. Дӕлимон дзы куы рацыд, уӕд ӕгомыг райдыдта дзурын, ӕмӕ адӕм дисы бафтыдысты. 15 Иуӕй-иутӕ та загътой: «Уый дӕлимонты суры дӕлимонты ӕлдар веелзевулы хъаруйӕ». 16 Иннӕтӕ та Дзы Йӕ бафӕлварыны тыххӕй домдтой уӕларвӕй ӕвдисӕйнаг равдисын. 17 Фӕлӕ сын Йесо зыдта сӕ хъуыдытӕ, ӕмӕ сын загъта: «Алы паддзахад дӕр куы ныддихтӕ уа ӕмӕ йӕ адӕм кӕрӕдзи ныхмӕ куы фӕуой, уӕд федзӕрӕг уыдзӕн, ӕмӕ иу хӕдзар иннӕйыл рафӕлдӕхдзӕн. 18 Уӕдӕ кӕд хӕйрӕг йӕхи ныхмӕ тох кӕны, уӕд йӕ паддзахад куыд фӕлӕудзӕн? Сымах та афтӕ дзурут, цыма Ӕз веелзевулы хъаруйӕ сурын дӕлимонты. 19 Кӕд Ӕз дӕлимонты веелзевулы хъаруйӕ сурын, уӕд сӕ уӕ фӕдонтӕ та кӕй хъаруйӕ сурынц? Уымӕ гӕсгӕ уын уыдон уыдзысты тӕрхонгӕнджытӕ. 20 Фӕлӕ кӕд Хуыцауы хъаруйӕ сурын дӕлимонты, уӕд уӕм, бӕгуыдӕр, ӕрхӕццӕ Хуыцауы Паддзахад. 21 Тыхджын йӕ хӕдзар ӕдхӕцӕнгарз куы хъахъхъӕна, уӕд йӕ исбонӕн тас нӕу. 22 Фӕлӕ йӕм йӕхицӕй тыхджындӕр куы бабырса ӕмӕ йыл куы фӕуӕлахиз уа, уӕд ын байсдзӕн, йӕ зӕрдӕ цы хӕцӕнгӕрзтыл дардта, уыдон, ӕмӕ дзы цы рахӕсса, уый байуардзӕн. 23 Мемӕ чи нӕу, уый Мӕ ныхмӕ у; ӕмӕ Мемӕ чи не 'мбырд кӕны, уый хӕлӕттаг кӕны. 24 Ӕнӕзӕгъинаг адӕймагӕй куы рацӕуы, уӕд ӕнцой агурӕг фӕзилы ӕнӕдон рӕтты, ӕмӕ куы не ссары, уӕд фӕзӕгъы: „Раздӕхон, цы хӕдзарӕй рацыдтӕн, уырдӕм". 25 Ӕмӕ куы ӕрцӕуы, уӕд ӕй ӕрӕййафы марзт ӕмӕ ӕфснайдӕй. 26 Уӕд ацӕуы ӕмӕ йемӕ ӕркӕны ӕндӕр авд ӕнӕзӕгъинаджы, йӕхицӕй фыддӕрты, бацӕуынц уырдӕм ӕмӕ дзы ӕрцӕрынц; ӕмӕ уыцы адӕймаг бахауы, раздӕр цы уыди, уымӕй ноджы ӕвзӕрдӕр уавӕры». 27 Йесо уый куы дзырдта, уӕд Ын адӕмы ӕхсӕнӕй иу сылгоймаг хъӕрӕй загъта: «Тӕхудиаг сты, Дӕу чи хаста, уыцы гуыбын, ӕмӕ Ды кӕй дадтай, уыцы риутӕ!» 28 Йесо та загъта: «Тӕхудиаг сты, Хуыцауы ныхасмӕ чи хъусы ӕмӕ йӕ чи ӕххӕст кӕны, уыдон». 29 Адӕм фылдӕрӕй-фылдӕр куы кодтой, уӕд Йесо райдыдта дзурын: «Ацы фӕлтӕр хӕлд фӕлтӕр у. Ӕвдисӕйнаг домы, фӕлӕ йын Ионӕйы диссагӕй дарддӕр ӕндӕр ӕвдисӕйнаг нӕ рардӕуыдзӕн. 30 Уымӕн ӕмӕ Ионӕ ниневиӕгтӕн ӕвдисӕйнаг куыд уыди, ацы фӕлтӕрӕн дӕр Адӕймаджы Фырт афтӕ уыдзӕн. 31 Хуссары ус-паддзах тӕрхоны бон рацӕудзӕн ацы адӕмы фӕлтӕры ныхмӕ ӕмӕ сӕ фӕзылын кӕндзӕн, уымӕн ӕмӕ зӕххы кӕронӕй ӕрцыди Соломоны зондджын ныхӕстӕм байхъусынмӕ; ныр та ам ис, Соломонӕй уӕлдӕр Чи у, Уый. 32 Ниневиӕгтӕ тӕрхоны бон рацӕудзысты ацы фӕлтӕры ныхмӕ ӕмӕ йӕ фӕзылын кӕндзысты, уымӕн ӕмӕ уыдон Ионӕйы ныхасӕй ӕрфӕсмон кодтой; ныр та ам ис, Ионӕйӕ уӕлдӕр Чи у, Уый. 33 Цырагъ чи ссудзы, уый йӕ хибар къуымы нӕ сӕвӕры, дурыны бын дӕр ӕй нӕ бавӕры, фӕлӕ йӕ сӕвӕры цырагъдарӕныл, бацӕуджытӕ рухс куыд уыной, афтӕ. 34 Буарӕн йӕ рухсгӕнӕн цӕст у. Ӕмӕ дӕ цӕст сыгъдӕг куы уа, уӕд дӕ буар ӕгасӕй дӕр рухс уыдзӕн. Фӕлӕ дӕ цӕст чъизи куы уа, уӕд дӕ буар дӕр талынг уыдзӕн. 35 Уӕдӕ дӕхимӕ кӕс, цӕмӕй дӕм цы рухс ис, уый ма разына талынг. 36 Кӕд дӕ буар иууылдӕр рухс у, иунӕг талынг уӕнг дӕр ыл нӕй, уӕд иууылдӕр уыдзӕни рухс, рухсгӕнӕн дӕ цыма рухс кӕны, афтӕ». 37 Йесо Йӕ ныхас куы фӕци, уӕд Ӕй иу фарисей бахуыдта йӕхимӕ сихор хӕрынмӕ. Йесо бацыд ӕмӕ ӕрбадт фынгыл. 38 Сихоры размӕ Йесо Йӕ къухтӕ кӕй нӕ цӕхсадта, уый фарисей куы федта, уӕд дисы бафтыд. 39 Фӕлӕ йын Хицау загъта: «Сымах, фарисейтӕ, къус ӕмӕ тӕбӕгъ ӕддейӕ сыгъдӕг кӕнут, мидӕгӕй та кӕрӕф ӕмӕ хӕрамӕй дзаг стут. 40 Ӕнӕзӕндтӕ! Ӕддейӕ цы ис, уый Скӕнӕг не скодта, мидӕгӕй цы ис, уый дӕр, ӕви? 41 Цы уӕм ис, уымӕй иннӕтӕн дӕр фӕхай кӕнут, ӕмӕ уӕд уӕ алы-алцы дӕр уыдзӕни сыгъдӕг. 42 Фӕлӕ сар уӕ сӕр, фарисейтӕ! Моисейы Ӕгъдаумӕ гӕсгӕ суанг битъына, рутӕ ӕмӕ ӕппӕт иннӕ кӕрдӕджыты дӕсӕймаг хай дӕттут, Хуыцауы рӕстдзинад ӕмӕ уарзт та ницӕмӕ дарут. Сымахӕн ӕмбӕлд адӕттӕ кӕнын ӕмӕ уыдӕттӕ дӕр рохуаты нӕ ныууадзын. 43 Сар уӕ сӕр, фарисейтӕ! Сымах уарзут синагогӕты раззаг бынӕтты бадын ӕмӕ сахарты фӕзты адӕмы арфӕтӕм хъусын. 44 Сар уӕ сӕр! Сымах стут, бӕрӕг чи нал дары ӕмӕ, уый нӕ зонгӕйӕ, адӕм кӕуыл хӕтынц, уыцы ингӕнты хуызӕн». 45 Уӕд Йесойӕн иу динамонӕг загъта: «Ахуыргӕнӕг, Ды афтӕ кӕй зӕгъыс, уымӕй мах дӕр ӕфхӕрыс». 46 Йесо дзуапп радта: «Сар уӕ сӕр сымахӕн дӕр, динамонджытӕ! Адӕмыл ӕвӕрут зынхӕссӕн уӕргътӕ, уӕхӕдӕг та сӕм уӕ ныхы кӕронӕй дӕр не 'вналут. 47 Сар уӕ сӕр! Уӕ фыдӕлтӕ цы пехуымпарты фӕцагътой, уыдонӕн аразут зӕппӕдзтӕ – 48 Уымӕй сымах ӕвдисут, уӕ фыдӕлты хъуыддӕгтӕ растыл кӕй нымайут, уый. Уыдон сӕ фӕцагътой, сымах та сын зӕппӕдзтӕ аразут. 49 Уымӕ гӕсгӕ Хуыцауы уӕлзонд загъта: „Арвитдзынӕн сӕм пехуымпарты ӕмӕ минӕвӕртты, ӕмӕ дзы кӕйдӕрты ӕфхӕрдзысты ӕмӕ сӕ амардзысты". 50 Уӕдӕ ацы фӕлтӕрӕн фидинаг у, дуне сфӕлдисынӕй нырмӕ цы пехуымпарты туг фӕкалд, уый: 51 Авелы тугӕй, нывондхӕссӕнӕй Кувӕндоны ӕхсӕн кӕй амардӕуыд, уыцы Захарийы туджы онг. О, зӕгъын уын, уый ацы фӕлтӕрӕн фидинаг у. 52 Сар уӕ сӕр, динамонджытӕ! Сымах байстат зонынады дуары дӕгъӕл; уӕхӕдӕг дӕр нӕ бацыдыстут, стӕй бацӕуын кӕй фӕндыд, уыдоны дӕр нӕ бауагътат». 53 Йесо куы рацыд, уӕд динамонджытӕ ӕмӕ фарисейтӕ райдыдтой Йӕ ныхмӕ дзурын ӕмӕ Йыл фарстытӕ ныккалдтой – 54 Къахтой Йӕ, цӕмӕй йын Йӕ ныхӕстӕ Йӕхи ныхмӕ фӕкӕной.

Лука 12

1 Уӕдмӕ ӕрӕмбырд дуне адӕм, ӕмӕ кӕрӕдзи цъист кодтой; Йесо уал дзурын райдыдта фыццаджыдӕр Йӕ ахуыргӕнинӕгтӕн: «Уӕхи хизут фарисейты ӕнхъизӕнӕй – цӕстмӕхъусдзинадӕй. 2 Цы нӕ раргом уа, ахӕм сусӕггаг нӕй, ӕмӕ цы нӕ рахъӕр уа, ахӕм сусӕгдзинад нӕ вӕййы. 3 Уымӕ гӕсгӕ талынджы цы загътат, уый айхъуысдзӕн бонрухсы; ӕмӕ хӕдзары искӕй хъусы цы дзырдтат, уый ӕргомӕй дзырдӕуыдзӕн уӕлхӕдзӕрттӕй. 4 Зӕгъын сымахӕн, Мӕ хӕлӕрттӕн: ма тӕрсут, буар чи мары ӕмӕ уымӕй дарддӕр кӕй бон ницы у, уыдонӕй. 5 Фӕлӕ уын зӕгъдзынӕн, кӕмӕй уӕ тӕрсын хъӕуы, уый: тӕрсут, амарыны фӕстӕ зындоны ныппарын Кӕй бон у, Уымӕй. О, зӕгъын уын, Уымӕй тӕрсут. 6 Фондз сырддонцъиуы дыууӕ ассарийыл нӕ уӕй кӕнынц, ӕви? Ӕмӕ дзы иу дӕр рох нӕу Хуыцауӕй. 7 Сымахӕн та уӕ сӕрыхъуынтӕ дӕр ӕрдуйы онг нымад сты. Уӕдӕ ма тӕрсут: сымах бирӕ сырддонцъиутӕй дӕр зынаргъдӕр стут. 8 Зӕгъын уын: Мӕныл кӕй ӕууӕнды, уый тыххӕй адӕмӕн ӕргомӕй чи зӕгъа, уый Адӕймаджы Фырт дӕр йӕхионыл банымайдзӕн Хуыцауы зӕдты раз. 9 Адӕмы раз Мыл йӕхи чи атигъ кӕна, уый та хъодыгонд уыдзӕн Хуыцауы зӕдты раз. 10 Ӕмӕ Адӕймаджы Фырты чидӕриддӕр рафауа, уымӕн уыдзӕни хатыр, фӕлӕ Сыгъдӕг Уды чи рафауа, уымӕн хатыр нӕ уыдзӕн. 11 Куы уӕ ӕркӕной синагогӕтӕм, хицӕуттӕм ӕмӕ ӕлдариуӕггӕнджытӕм, уӕд-иу ма мӕт кӕнут, куыд кӕнӕ цавӕр дзуапп ратдзыстут, кӕнӕ цы зӕгъдзыстут, ууыл. 12 Уымӕн ӕмӕ уын уайсахат Сыгъдӕг Уд бацамондзӕн, цы зӕгъын хъӕуы, уый». 13 Адӕмӕй Йын чидӕр загъта: «Ахуыргӕнӕг, зӕгъ-ма ме 'фсымӕрӕн, ӕмӕ мын бынтӕй хай ратта». 14 Йесо уыцы адӕймагӕн дзуапп радта: «Чи Мӕ сӕвӕрдта сымахӕн тӕрхонгӕнӕгӕй кӕнӕ уарӕгӕй?» 15 Ӕмӕ ма сын загъта: «Уӕхи бахизут кӕрӕфӕй ӕмӕ хъӕздыгдзинад уарзынӕй, уымӕн ӕмӕ адӕймаджы цард йӕ бирӕ мулкӕй аразгӕ нӕу». 16 Уӕд сын загъта фӕсномыг ныхас: «Иу хъӕздыг лӕгӕн йӕ быдыры ӕрзади бирӕ хор. 17 Ӕмӕ хъуыды кодта: „Цы кӕнон? Мӕ хор кӕм бафснайон, ахӕм бынат мын нӕй". 18 Уӕд загъта: „Бакӕнон афтӕ: бавдӕлон ӕмӕ фехалон мӕ хордӕттӕ, саразон стырдӕртӕ ӕмӕ уым бафснайдзынӕн меппӕт хор ӕмӕ меппӕт мулк. 19 Ӕмӕ зӕгъдзынӕн мӕхицӕн: мӕнӕй уый, бирӕ азты фаг дӕм ис мулк. Цӕр ӕнцад-ӕнцойӕ, хӕр, нуаз, рай дӕ цардӕй". 20 Фӕлӕ йын Хуыцау загъта: „Ӕнӕзонд, ахсӕв дын дӕ уд айстӕуыдзӕн. Дӕхицӕн цы ӕрцӕттӕ кодтай, уый та кӕмӕн баззайдзӕн?" 21 Афтӕ рауайы, йӕхицӕн хӕзнатӕ чи ӕмбырд кӕны, Хуыцауы хъӕздыгдзинадӕй та ӕнӕхай чи у, уыдоны хъуыддаг». 22 Ӕмӕ Йӕ ахуыргӕнинӕгтӕн загъта: «Уымӕ гӕсгӕ уын зӕгъын: ма мӕт кӕнут, фӕцӕрынӕн уӕ цы хойраг хъӕуы, нӕдӕр ууыл, нӕдӕр уӕ буарӕн дарӕсыл. 23 Цард хойрагӕй ахсджиагдӕр у, буар та – дарӕсӕй. 24 Акӕсут-ма халӕттӕм: уыдон нӕдӕр тауынц, нӕдӕр кӕрдынц, нӕдӕр сын гонтӕ ӕмӕ хордӕттӕ ис, ӕмӕ сӕ Хуыцау хӕссы. Сымах та цас зынаргъдӕр стут мӕргътӕй! 25 Стӕй уӕ йӕ мӕтӕй йӕ цардыл бирӕ нӕ, фӕлӕ иу сахат бафтауын дӕр кӕй бон бауыдзӕн? 26 Уӕдӕ кӕд гыццыл исты скӕнын уӕ бон нӕу, уӕд ӕндӕр хъуыддӕгтыл цы тыхсут? 27 Акӕсут-ма, дидинджытӕ куыд рӕзынц, уымӕ: нӕдӕр кусынц, нӕдӕр ӕлвисынц. Зӕгъын уын: суанг Соломон, намысджын ӕмӕ хъӕздыг лӕг, уыдонӕй иуы хуызӕн дӕр нӕ арӕзта йӕхи. 28 Абон чи ис, райсом та пецы ӕппӕрст чи уыдзӕн, уыцы быдираг кӕрдӕджы Хуыцау афтӕ кӕм фӕлынды, уым сымах та цас аивдӕр сфӕлынддзӕн, лӕмӕгъ уырнджытӕ! 29 Уӕдӕ цы хӕрат, кӕнӕ цы нуазат, ууыл ма мӕт кӕнут ӕмӕ ма тыхсут. 30 Ӕппӕт уыдӕттӕ агурынц ацы дунейы муртаттӕ, сымахӕн та уӕ Фыд зоны, уыдӕттӕ уӕ кӕй хъӕуынц, уый. 31 Агурут Йӕ Паддзахад, ӕмӕ уын лӕвӕрд уыдзысты уыдӕттӕ дӕр. 32 Ма тӕрс, чысыл дзуг – уӕ Фыды фӕндон у сымахӕн Паддзахад раттын. 33 Ауӕй кӕнут уӕ мулк ӕмӕ йӕ мӕгуыртӕн раттут. Уӕхицӕн саразут, хӕррӕгъ чи нӕ кӕны, ахӕм ӕвӕрӕндӕттӕ; ӕрӕмбырд кӕнут ӕнӕихсигӕ хӕзнатӕ уӕлӕрвты – уым сӕм хуыснӕг нӕ баирвӕзы ӕмӕ сӕ рӕмпӕг нӕ хӕры. 34 Уымӕн ӕмӕ уӕ хӕзна кӕм ис, уым уыдзӕн уӕ зӕрдӕ дӕр. 35 Цӕттӕ ут алцӕмӕй дӕр – ут ронӕлвӕст ӕмӕ судзӕнт уӕ рухсгӕнӕнтӕ. 36 Чындзӕхсӕвӕй сӕ хицауы ӕрцыдмӕ чи ӕнхъӕлмӕ кӕсы, ут уыцы адӕмы хуызӕн – хицау куы ӕрцӕуа ӕмӕ куы бахойа, уӕд ын уайтӕккӕ дуар байгом кӕндзысты. 37 Тӕхудиаг сты, хӕдзары хицау куы ӕрцӕуа, уӕд фынӕйӕ кӕй нӕ ӕрӕййафа, уыцы цагъартӕ. Ӕцӕг уын зӕгъын, йӕхи бафистӕг кӕндзӕн, фынгмӕ сӕ бахондзӕн ӕмӕ сын райдайдзӕн кӕстӕриуӕг кӕнын. 38 Суанг ӕмбисӕхсӕв кӕнӕ фӕсӕмбисӕхсӕв куы ӕрцӕуа ӕмӕ сӕ фынӕйӕ куы нӕ ӕрӕййафа, уӕд уыцы цагъартӕ уыдзысты тӕхудиаг. 39 Сымахӕн зындгонд у: хуыснӕг кӕцы сахатыл ӕрцӕудзӕн, уый хӕдзары хицау куы зыдтаид, уӕд йӕ хӕдзар фӕкъахын нӕ бауагътаид. 40 Ӕмӕ сымах дӕр цӕттӕ ут, уымӕн ӕмӕ ӕнхъӕл кӕд нӕ уат, уӕд ӕрцӕудзӕн Адӕймаджы Фырт». 41 Уӕд Петр загъта: «Хицау, махӕн дзурыс ацы фӕсномыг ныхас ӕви ӕппӕтӕн дӕр?» 42 Хицау загъта: «Чи у иузӕрдион ӕмӕ зондджын хӕдзаргӕс? Хӕринаг сын афоныл дӕттыны тыххӕй хӕдзары хицау йӕ цагъартӕн хистӕрӕй кӕй сӕвӕрдзӕн? 43 Тӕхудиаг уыдзӕн уыцы цагъар, йӕ хицау куы ӕрцӕуа, уӕд йӕ фӕдзӕхст ӕххӕстгӕнгӕ кӕй ӕрӕййафа. 44 Ӕцӕг уын зӕгъын, йеппӕт исбон бакӕндзӕн уый бар. 45 Фӕлӕ уыцы цагъар хинымӕр афтӕ куы зӕгъа: „Мӕ хицау рӕхджы не 'рцӕудзӕн", ӕмӕ куы байдайа фӕсдзӕуин нӕлгоймӕгтӕ ӕмӕ сылгоймӕгты нӕмын, нуазын ӕмӕ расыг кӕнын, 46 Уӕд уыцы цагъарӕн йӕ хицау ӕрцӕудзӕн, кӕд ӕм не 'нхъӕлмӕ кӕса, уыцы бон, ӕмӕ ӕнхъӕл кӕд нӕ уа, уыцы сахат, ӕгъатырӕй йӕ бафхӕрдзӕн ӕмӕ йын мӕнгӕрдты хал ахӕрын кӕндзӕн. 47 Йӕ хицауы фӕнд чи зыдта, афтӕмӕй цӕттӕ чи нӕ разынд ӕмӕ йын йӕ фӕндон чи нӕ сӕххӕст кодта, уыцы цагъар баййафдзӕн тынг над. 48 Йӕ хицауы фӕнд чи нӕ зыдта, афтӕмӕй нады аккаг митӕ чи бакодта, уый та къаддӕр над баййафдзӕн. Бирӕ лӕвӕрд кӕмӕн у, уымӕй бирӕ домд цӕудзӕн, ӕмӕ йӕ бӕрны бирӕ кӕмӕн ис, уымӕй фылдӕр ӕрцагурдзысты. 49 Ӕз ӕрцыдтӕн зӕххыл арт бандзарынмӕ, ӕмӕ Мӕ куыд тынг фӕнды, цӕмӕй ссудза ныридӕгӕн! 50 Хъизӕмӕртты аргъуыдӕй Мыл хъуамӕ саргъуыдӕуа, ӕмӕ цӕй уынгӕджы дӕн, цалынмӕ уый не 'рцӕуа, уӕдмӕ! 51 Сымах афтӕ ӕнхъӕл стут, ӕмӕ зӕхмӕ фидыд ӕрхӕссынмӕ ӕрцыдтӕн? Уый нӕ, зӕгъын уын, фӕлӕ байуарынмӕ. 52 Уымӕн ӕмӕ нырӕй фӕстӕмӕ иу хӕдзары фондз фӕхицӕнтӕ уыдзысты: ӕртӕйӕ – дыууӕйы ныхмӕ, дыууӕйӕ та – ӕртӕйы ныхмӕ. 53 Фыд уыдзӕн йӕ фырты ныхмӕ, фырт йӕ фыды ныхмӕ, мад йӕ чызджы ныхмӕ, чызг йӕ мады ныхмӕ, ӕфсин йӕ чындзы ныхмӕ, чындз йе 'фсины ныхмӕ». 54 Йесо ма адӕмӕн дӕр загъта: «Ныгуылӕнӕй мигъ ссӕугӕ куы фенут, уӕд уайтӕккӕ фӕзӕгъут: „Къӕвда уыдзӕн", ӕмӕ вӕййы афтӕ. 55 Хуссарӕй дымгӕ куы фӕдымы, уӕд фӕзӕгъут: „Ӕнтӕф уыдзӕн", ӕмӕ вӕййы афтӕ. 56 Цӕстмӕхъустӕ! Зӕххыл ӕмӕ арвыл цы уынут, уый иртасын куы зонут, уӕд ныры рӕстӕг раиртасын уӕ бон цӕуылнӕ у? 57 Раст цы у, уый уӕхӕдӕг цӕуылнӕ зонут? 58 Дӕ зылынгӕнӕгимӕ хицӕуттӕм куы цӕуай, уӕд архай фӕндагыл йемӕ бафидауыныл; науӕд дӕ бакӕндзӕн тӕрхонгӕнӕгмӕ, тӕрхонгӕнӕг дӕ ратдзӕн хъахъхъӕнӕгмӕ, ӕмӕ дӕ уый баппардзӕн ахӕстоны. 59 Зӕгъын дын: цы бафидын дӕ хъӕуы, уый фӕстаг лептӕйы онг цалынмӕ раттай, уӕдмӕ нӕ рацӕудзынӕ уырдыгӕй».

Лука 13

1 Уыцы рӕстӕг ӕрцыдысты Йесомӕ ӕмӕ Йын радзырдтой, галилейӕгтӕй чидӕртӕ нывонд куы хастой, уӕд сӕ Пилат ныццагъта ӕмӕ сын сӕ туг схӕццӕ кодта сӕ нывондты тугимӕ. 2 Йесо сын загъта: «Афтӕ ӕнхъӕл стут, ӕмӕ уыцы галилейӕгтӕ иннӕ галилейӕгтӕй тӕригъӕдджындӕр уыдысты ӕмӕ уымӕн афтӕ бабын сты? 3 Зӕгъын уын, нӕ уыдысты. Фӕлӕ куы не 'рфӕсмон кӕнат, уӕд уеппӕт дӕр афтӕ фесӕфдзыстут. 4 Кӕнӕ афтӕ ӕнхъӕл стут, ӕмӕ Силоамы мӕсыг кӕуыл ныккалд ӕмӕ кӕй ныммардта, уыцы ӕстдӕс лӕджы Иерусалимы ӕппӕт цӕрджытӕй аххосджындӕр уыдысты? 5 Зӕгъын уын, нӕ уыдысты. Фӕлӕ куы не 'рфӕсмон кӕнат, уӕд уеппӕт дӕр афтӕ фесӕфдзыстут». 6 Ӕмӕ сын загъта ацы фӕсномыг ныхас: «Иу адӕймагӕн йӕ сӕнӕфсирдоны уыди легъуибӕлас, ӕрцыд ӕм гагатӕ ӕртонынмӕ, фӕлӕ йыл не ссардта. 7 Уӕд загъта сӕнӕфсирдонгӕсӕн: „Ныр ӕртыккаг аз цӕуын ацы легъуибӕласыл гагатӕ фенынмӕ, ӕмӕ йыл нӕ арын. Акал ӕй, дзӕгъӕлы ма зӕхх дӕр цы ахсы". 8 Фӕлӕ йын уый дзуапп радта: „Ме 'лдар, ныууадз-ма йӕ ацы аз. Ӕз ын йӕ алфамбылай скъахдзынӕн ӕмӕ йыл фаджыс ныккӕндзынӕн, 9 Кӕд ыл инназ гагатӕ ӕрзаид; кӕд нӕ, уӕд ӕй акалдзынӕ"». 10 Сабаты Йесо адӕмы ахуыр кодта синагогӕтӕй иуы. 11 Уым уыди, хъарусӕттӕг ӕнӕзӕгъинаг ӕстдӕс азы дӕргъы уӕгъд кӕй нӕ уагъта, ахӕм сылгоймаг; уый ныкъкъӕдз ӕмӕ ӕмраст слӕууын йӕ бон нӕ уыд. 12 Йесо йӕ куы федта, уӕд ӕм басидт ӕмӕ йын загъта: «Хорз ус, дӕ низӕй сӕрибар дӕ». 13 Ӕрӕвӕрдта йыл Йӕ къухтӕ, сылгоймаг уайтӕккӕ ӕмраст слӕууыд ӕмӕ райдыдта Хуыцауы стауын. 14 Уӕд синагогӕйы хицау смӕсты, Йесо сылгоймаджы сабаты кӕй сдзӕбӕх кодта, уый тыххӕй, ӕмӕ адӕмӕн загъта: «Хъуыддаг кӕнынӕн ис ӕхсӕз боны. Уыцы бонты цӕут уӕхи дзӕбӕх кӕнынмӕ, сабаты та ма цӕут». 15 Йесо йын дзуапп радта: «Цӕстмӕхъустӕ, мыййаг сымахӕй алчидӕр сабаты йӕ гал кӕнӕ йӕ хӕрӕджы кӕвдӕсӕй не суадзы ӕмӕ йӕ донмӕ нӕ аскъӕры? 16 Уӕдӕ хӕйрӕг ӕстдӕс азы дӕргъы бастӕй кӕй фӕдардта, Авраамы уыцы чызджы дӕр йӕ бӕттӕнтӕй сабаты суӕгъд кӕнын не 'мбӕлди, ӕви?» 17 Йесо уый куы загъта, уӕд Йӕ ныхмӕлӕуджытӕ иууылдӕр фефсӕрмы сты; ӕппӕт адӕмӕн та Йӕ диссаджы хъуыддӕгтӕ цин ӕрхастой. 18 Уый фӕстӕ Йесо загъта: «Цӕй хуызӕн у Хуыцауы Паддзахад? Цӕуыл ӕй абарон? 19 Уый у, адӕймаг йӕ цӕхӕрадоны кӕй байтыдта, уыцы хъыцъыйы нӕмыгау. Нӕмыг сзади, сбӕлас и, ӕмӕ йын уӕларвон мӕргътӕ йӕ къалиутыл сарӕзтой ахстӕттӕ». 20 Йесо ноджы загъта: «Цӕуыл абарон Хуыцауы Паддзахад? 21 Уый у, сылгоймаг ссады ӕртӕ сасирыл кӕй бафтыдта ӕмӕ хыссӕ ӕгасӕй дӕр кӕмӕй сӕнхъызт, уыцы ӕнхъизӕнау». 22 Йесо цыди сахартӕ ӕмӕ хъӕутыл, ахуыр кодта адӕмы; Йӕ фӕндаг уыд Иерусалиммӕ. 23 Чидӕр Ӕй бафарста: «Хицау, чи фервӕздзӕн, уыдон чысыл сты?» Йесо дзуапп радта: 24 «Архайут уынгӕг дуарыл бацӕуыныл. Уымӕн ӕмӕ, зӕгъын уын, бирӕтӕ архайдзысты бацӕуыныл, фӕлӕ сӕ бон нӕ бауыдзӕн. 25 Хӕдзары Хицау куы сыста ӕмӕ дуӕрттӕ куы сӕхгӕна, уӕд сымах, ӕдде лӕугӕйӕ, райдайдзыстут дуар хойын ӕмӕ дзурын: „Хицау, Хицау, байгом нын кӕн!" Фӕлӕ уын Уый дзуапп ратдзӕн: „Кӕцӕй стут, уый нӕ зонын". 26 Уӕд райдайдзыстут дзурын: „Мах хордтам ӕмӕ нуӕзтам Дӕ разы, нӕ уынгты ахуыр кодтай адӕмы". 27 Фӕлӕ уын Уый зӕгъдзӕни: „Зӕгъын уын: кӕцӕй стут, уый нӕ зонын. Ацӕут Мӕ цурӕй уеппӕт дӕр, тӕригъӕдджынтӕ". 28 Уым уыдзӕни кӕуын ӕмӕ дӕндӕгты хъыс-хъыс. Авраамы, Исаакы, Иаковы ӕмӕ ӕппӕт пехуымпарты фендзыстут Хуыцауы Паддзахады, уӕхи та уын раппардзысты ӕддӕмӕ. 29 Адӕм ӕрцӕудзысты скӕсӕн ӕмӕ ныгуылӕнӕй, цӕгат ӕмӕ хуссарӕй, ӕмӕ ӕрбаддзысты Хуыцауы Паддзахады фынгыл. 30 Ӕмӕ абоны фӕстӕгтӕй бирӕтӕ уыдзысты фыццӕгтӕ, фыццӕгтӕй та бирӕтӕ уыдзысты фӕстӕгтӕ». 31 Уыцы рӕстӕг фарисейтӕй чидӕртӕ ӕрцыд ӕмӕ Йесойӕн загътой: «Ацу ардыгӕй ӕндӕр ранмӕ, уымӕн ӕмӕ Дӕ Ирод амарынмӕ хъавы». 32 Йесо сын загъта: «Ацӕут ӕмӕ зӕгъут уыцы рувасӕн: „Мӕнӕ абон ӕмӕ райсом сурын дӕлимонты, дзӕбӕх кӕнын рынчынты, ӕмӕ ӕртыккаг бон фӕуыдзынӕн Мӕ хъуыддаг". 33 Ӕниу, абон, райсом ӕмӕ иннӕбон дӕр фӕндагыл хъуамӕ уон: уымӕн ӕмӕ Иерусалимы нӕ, фӕлӕ ӕндӕр ран амарой пехуымпары, уымӕн уӕвӕн нӕй. 34 Иерусалим, Иерусалим, пехуымпарты марӕг ӕмӕ дӕумӕ ӕрвыстыты дуртӕй цӕгъдӕг! Цал хатты Мӕ фӕндыди, маргъ йӕ лӕппынты йӕ базырты бын куыд бакӕны, афтӕ дӕ хъӕбулты ӕрӕмбырд кӕнын, фӕлӕ сымах нӕ бафӕндыди! 35 Ныр уын уӕ хӕдзар уагъдӕуы ӕнӕхицауӕй. Зӕгъын уын, цалынмӕ афтӕ зӕгъат: „Арфӕгонд уӕд Хуыцауы номӕй Ӕрцӕуӕг!", уӕдмӕ Мӕ нал фендзыстут».

Лука 14

1 Иухатт Йесо фарисейты хистӕртӕй иуы хӕдзармӕ сабаты бацыд хӕрынмӕ ӕмӕ Йӕм фарисейтӕ сӕ цӕст дардтой. 2 Уым Йӕ разы фӕци, доннизӕй чи сади, ахӕм лӕг. 3 Йесо бафарста динамонджыты ӕмӕ фарисейты: «Сабаты дзӕбӕх кӕнын фӕччы ӕви нӕ?» 4 Уыдон ныхъхъус сты. Уӕд бавнӕлдта рынчынмӕ, сдзӕбӕх ӕй кодта ӕмӕ йӕ ауагъта. 5 Стӕй сын загъта: «Искӕмӕн уӕ сабаты йӕ хӕрӕг кӕнӕ йӕ гал цъайы куы ныххауа, уӕд ӕй уыйадыл не сласдзӕн, ӕви?» 6 Ӕмӕ Йын дзуапп раттын сӕ бон нӕ уыд. 7 Йесо бафиппайдта, хуындтытӕ уӕле сбадыныл куыд архайдтой, уый, ӕмӕ сын загъта фӕсномыг ныхас: 8 «Исчи дӕ чындзӕхсӕвмӕ куы ӕрхона, уӕд уӕле ма сбад, науӕд хуындтыты ӕхсӕн дӕуӕй кадджындӕр куы разына, 9 Уӕд уӕ дыууӕйы дӕр чи ӕрхуыдта, уый бацӕудзӕн ӕмӕ дын зӕгъдзӕн: „Ратт ын дӕ бынат". Уӕд къӕмдзӕстыгӕй сбаддзынӕ фӕстаг бынаты. 10 Фӕлӕ хуынд куы уай, уӕд ӕрцу ӕмӕ сбад фӕстаг бынаты, цӕмӕй дӕм фысым бацӕуа ӕмӕ дын зӕгъа: „Мӕ хӕлар, уӕлдӕр сбад". Уӕд скадджын уыдзынӕ, демӕ чи бады, уыдоны цӕсты. 11 Уымӕн ӕмӕ йӕхи чи бӕрзонд кӕны, уый ӕрныллӕг уыдзӕн; йӕхи чи ныллӕг кӕны, уый та сбӕрзонд уыдзӕн». 12 Чи Йӕ ӕрхуыдта, уымӕн та Йесо загъта: «Сихор кӕнӕ ӕхсӕвӕр куы аразай, уӕд дӕ хӕлӕртты, де 'фсымӕрты, дӕ хӕстӕджыты ӕмӕ хъӕздыг сыхӕгты ма ӕрхон, науӕд дӕ уыдон дӕр ӕрхондзысты ӕмӕ дын ӕй бафиддзысты. 13 Фӕлӕ куывд куы кӕнай, уӕд ӕрхон мӕгуырты, цӕнкуылты, къуылыхты, куырмыты. 14 Ӕмӕ тӕхудиаг уыдзынӕ, сӕ бон дын йӕ бафидын кӕй нӕу, уый тыххӕй. Уымӕн ӕмӕ дӕ мызд райсдзынӕ рӕстыты райгасы бон». 15 Йесоимӕ фынгыл чи бадт, уыдонӕй иу уый куы фехъуыста, уӕд Ын загъта: «Тӕхудиаг у, Хуыцауы Паддзахады къӕбӕр чи бахӕра, уый!» 16 Йесо йын загъта: «Иу адӕймаг арӕзта стыр куывд ӕмӕ ӕрхуыдта бирӕты. 17 Куывды афон куы ӕрцыд, уӕд арвыста йӕ цагъары хуындтытӕн зӕгъынмӕ: „Рацӕут, алцыдӕр цӕттӕ у". 18 Сеппӕт дӕр, цыма ӕмдзырд бакодтой, уыйау райдыдтой хатыр курын. Фыццаг загъта: „Зӕхх балхӕдтон ӕмӕ хъуамӕ ацӕуон йӕ фенынмӕ. Курын дӕ, хатыр мын бакӕн". 19 Дыккаг загъта: „Фондз цӕды галтӕ балхӕдтон ӕмӕ сӕ фӕлварынмӕ цӕуын. Курын дӕ, хатыр мын бакӕн". 20 Ӕртыккаг загъта: „Ус ӕрхастон, ӕмӕ мын уымӕ гӕсгӕ нӕй цӕуӕн". 21 Цагъар ӕрбаздӕхт ӕмӕ уый тыххӕй радзырдта йӕ хицауӕн. Хицау смӕсты ӕмӕ йӕ цагъарӕн загъта: „Рӕвдздӕр ауай сахары уынгтӕ ӕмӕ къуымтӕм, ӕмӕ ӕрхон мӕгуырты, цӕнкуылты, куырмыты ӕмӕ къуылыхты". 22 Цагъар загъта: „Ме 'лдар, цы мын загътай, уый бакодтон, фӕлӕ ма дзы бынӕттӕ ис". 23 Хицау загъта йӕ цагъарӕн: „Ауай фӕндӕгтӕ ӕмӕ къахвӕндӕгтӕм, ӕмӕ адӕмы сразы кӕ, цӕмӕй ӕрцӕуой ӕмӕ байдзаг уа мӕ хӕдзар. 24 Зӕгъын уын, раздӕры хуындтытӕй иу дӕр нӕ фӕхъӕстӕ уыдзӕн мӕ куывдӕй. [Уымӕн ӕмӕ хуындтытӕ бирӕ сты, ӕвзӕрстытӕ та – чысыл.]"» 25 Йесоимӕ цыди бирӕ адӕм; Йе 'ргом сӕм разылдта ӕмӕ сын загъта: 26 «Чи Мӕм ӕрцӕуа, уый йӕ фыды, йӕ мады, йӕ усы, йӕ зӕнӕджы, йе 'фсымӕрты, йӕ хоты, уӕлдайдӕр та йӕ цард, Мӕнӕй фылдӕр куы уарза, уӕд Мын ахуыргӕнинагӕн нӕ бӕззы. 27 Йӕ дзуар чи нӕ хӕссы ӕмӕ Мӕ фӕдыл чи нӕ цӕуы, уый Мын ахуыргӕнинагӕн нӕ бӕззы. 28 Сымахӕй мӕсыг самайын кӕй бафӕнда, уый, йӕ саразынӕн цытӕ хъӕуы, уыдӕттӕ рагацау бахынцыны тыххӕй, мыййаг, не 'рбаддзӕн ӕмӕ йӕ хӕрдзтӕ нӕ банымайдзӕн? 29 Науӕд ын бындур куы ӕрӕвӕра, фӕлӕ йӕ кӕронмӕ самайын куы нӕ бафӕраза, уӕд ӕй чидӕриддӕр фена, уыдон ыл фӕхуддзысты: 30 „Ацы лӕг амайын райдыдта, ӕмӕ йын кӕронмӕ нӕ бантыст". 31 Кӕнӕ иу паддзах иннӕйы ныхмӕ хӕстмӕ куы цӕуа, уӕд уал, мыййаг, не 'рбаддзӕн ӕмӕ, ссӕдз минимӕ йӕ размӕ чи рацӕуы, уый ныхмӕ дӕс минимӕ фӕлӕууын йӕ бон бауыдзӕн ӕви нӕ, уый тыххӕй рагацау нӕ бауынаффӕ кӕндзӕн? 32 Ӕмӕ йӕ бон куы нӕ уа, уӕд, цалынмӕ ма уый дард у, уӕдмӕ йӕм бафидауыны тыххӕй арвитдзӕн минӕвӕрттӕ. 33 Уӕдӕ Мын сымахӕй дӕр ахуыргӕнинагӕн ничи бӕззы, цыдӕриддӕр ӕм ис, уый куы нӕ ныууадза, уӕд. 34 Цӕхх хорз у. Фӕлӕ цӕххӕн йӕ ад куы фесӕфа, уӕд ма йӕ цӕмӕй сцӕхджын кӕндзынӕ? 35 Уый суанг зӕхх ӕмӕ фаджысыл ныккӕнынӕн дӕр нал фӕбӕззы ӕмӕ йӕ аппарынц. Хъустӕ кӕуыл ис, уый хъусӕд!»

Лука 15

1 Хъалонисджытӕ ӕмӕ тӕригъӕдджынтӕ сеппӕт дӕр цыдысты Йесомӕ байхъусынмӕ. 2 Фарисейтӕ ӕмӕ динамонджытӕ та хъуыр-хъуыр кодтой ӕмӕ дзырдтой: «Ай тӕригъӕдджынты суазӕг кӕны ӕмӕ хӕры семӕ». 3 Уӕд сын Йесо радзырдта ацы фӕсномыг ныхас: 4 «Сымахӕй искӕмӕ фондзыссӕдз фысы куы уаид ӕмӕ дзы иу куы фесӕфид, уӕд, мыййаг, йӕ нудӕс ӕмӕ цыппарыссӕдз фысы ӕдзӕрӕг ран нӕ ныууадзид ӕмӕ йӕ сӕфт фысы агурӕг нӕ ацӕуид, цалынмӕ йӕ ссара, уӕдмӕ? 5 Ӕмӕ йӕ куы ссара, уӕд ӕй цингӕнгӕ сӕвӕрдзӕн йӕ уӕхскыл, 6 Ӕрцӕудзӕн хӕдзармӕ, ӕрбахондзӕн йӕ хӕлӕртты, йӕ сыхӕгты, ӕмӕ сын зӕгъдзӕн: „Цин кӕнут мемӕ, ӕз ссардтон мӕ сӕфт фысы". 7 Зӕгъын уын, фӕсмоны сӕр кӕй нӕ хъӕуы, ахӕм нудӕс ӕмӕ цыппарыссӕдз рӕстгӕнӕгӕй иу фӕсмонгӕнӕг тӕригъӕдджыны тыххӕй фылдӕр цин уыдзӕн уӕларвы. 8 Кӕнӕ сылгоймагмӕ дӕс драхмӕйы куы уа, ӕмӕ йын дзы иу куы фесӕфа, уӕд, мыййаг, цырӕгътӕ не ссудздзӕн ӕмӕ нӕ райдайдзӕн хӕдзар мӕрзын ӕмӕ зӕрдиагӕй агурын, цалынмӕ йӕ ссара, уӕдмӕ? 9 Ӕмӕ йӕ куы ссара, уӕд ӕрӕмбырд кӕндзӕн йӕ хӕлар ӕмӕ сыхаг сылгоймӕгты ӕмӕ зӕгъдзӕн: „Цин кӕнут мемӕ, ӕз ссардтон мӕ сӕфт драхмӕ". 10 Зӕгъын уын, афтӕ цин кӕнынц Хуыцауы зӕдтӕ иу фӕсмонгӕнӕг тӕригъӕдджыны тыххӕй». 11 Йесо дзырдта дарддӕр: «Иу лӕгӕн уыди дыууӕ фырты. 12 Кӕстӕр йӕ фыдӕн загъта: „Мӕ фыд, ратт мын, дӕ мулкӕй мын цы ӕмбӕлы, уыцы хай". Ӕмӕ сын фыд байуӕрста йӕ мулк. 13 Цалдӕр боны фӕстӕ кӕстӕр фырт бамбырд кодта, цыдӕриддӕр ӕм уыди, уый, ацыди дард бӕстӕмӕ, уым бафтыд хӕлд цардыл, йӕ мулк бахордта. 14 Ӕмӕ йӕм куы ницыуал баззад, уӕд уыцы бӕстӕйы скодта тынг ӕххормаг рӕстӕг, ӕмӕ лӕппу райдыдта хъуаг ӕййафын. 15 Уӕд ӕрцыд уыцы бӕстӕйы цӕрджытӕй иумӕ, ӕмӕ йӕ уый арвыста йӕ быдыртӕм хуытӕ хизынмӕ. 16 Лӕппу райгонд уыдаид суанг хуыты холлагӕй дӕр йӕ гуыбын бафсадынӕй, фӕлӕ йын уый дӕр ничи лӕвӕрдта. 17 Йӕхи куы ӕрӕмбӕрста, уӕд загъта: „Мӕ фыдмӕ цас ӕххуырстытӕ ис, ӕмӕ хойрагӕй сӕ уӕлдӕйттӕ уадзынц, ӕз та стонгӕй мӕлын! 18 Сыстон, ацӕуон мӕ фыдмӕ ӕмӕ йын зӕгъон: мӕ фыд, ӕз мӕ тӕригъӕдӕй бафхӕрдтон уӕларв ӕмӕ дӕу, 19 Ӕмӕ дӕ фырты ном хӕссыны аккаг нал дӕн. Де 'ххуырстытау мӕ исты куыстыл бафтау". 20 Уӕд сыстад ӕмӕ ацыд йӕ фыдмӕ. Фыд ӕй дардмӕ ауыдта ӕмӕ йын фӕтӕригъӕд кодта, разгъордта йӕм, ныттыхсти йын йе 'фцӕгыл ӕмӕ йын батӕ кодта. 21 Фырт ын загъта: „Мӕ фыд, ӕз мӕ тӕригъӕдӕй бафхӕрдтон уӕларв ӕмӕ дӕу, ӕмӕ дӕ фырты ном хӕссыны аккаг нал дӕн". 22 Фыд загъта йӕ цагъартӕн: „Рӕвдздӕр рахӕссут тӕккӕ хуыздӕр дарӕс ӕмӕ йӕ сфӕлындут, бакӕнут ын йӕ къухыл къухдарӕн, йӕ къӕхтыл ын скӕнут дзабыртӕ. 23 Ракӕнут хӕрзхаст род ӕмӕ йӕ аргӕвдут; кӕнӕм минас ӕмӕ цин. 24 Уымӕн ӕмӕ мӕ ацы фырт уыди мард ӕмӕ райгас, уыди сӕфт ӕмӕ разынд". Ӕмӕ бӕрӕгбон райдыдта. 25 Хистӕр фырт та быдыры уыди. Уырдыгӕй куы ӕрбацӕйцыд ӕмӕ хӕдзармӕ куы ӕрбаввахс, уӕд фехъуыста фӕндыры цагъд ӕмӕ кафын. 26 Басидти фӕсдзӕуинтӕй иумӕ ӕмӕ йӕ бафарста: „Ай цы у?" 27 Уый йын загъта: „Де 'фсымӕр ӕрцыд ӕмӕ дӕ фыд аргӕвста хӕрзхаст род, дзӕбӕхӕй йыл кӕй сӕмбӕлд, уый тыххӕй". 28 Ӕфсымӕр смӕсты ӕмӕ йӕ мидӕмӕ цӕуын нал фӕндыд. Уӕд ӕм фыд рацыд ӕмӕ йын райдыдта лӕгъстӕ кӕнын. 29 Уый йӕ фыдӕн дзуапп радта: „Ныр дын цал ӕмӕ цал азы кусын, ӕмӕ дӕ иу дзырды сӕрты дӕр никуы ахызтӕн, ды та мын мӕ хӕлӕрттимӕ фӕминас кӕнынӕн сӕныкк дӕр никуы радтай. 30 Фӕлӕ хъахбайтимӕ дӕ мулк чи бахордта, дӕ уыцы фырт куы ӕрцыд, уӕд ын ды аргӕвстай хӕрзхаст род". 31 Фыд ын загъта: „Мӕ хъӕбул, ды кӕддӕриддӕр мемӕ дӕ, ӕмӕ мӕм цыдӕриддӕр ис, уый дӕу у. 32 Фӕлӕ цины бӕрӕгбон саразын ӕмбӕлд, уымӕн ӕмӕ дӕ уыцы ӕфсымӕр уыди мард ӕмӕ райгас, уыди сӕфт ӕмӕ разынд"».

Лука 16

1 Уӕд Йӕ ахуыргӕнинӕгтӕн Йесо загъта: «Иу хъӕздыг лӕг йӕ исбонӕн дардта уынаффӕгӕнӕг, ӕмӕ йын загътой, дӕ мулк дын хӕлӕттаг кӕны, зӕгъгӕ. 2 Уӕд ӕм басидт ӕмӕ йын загъта: „Уый цытӕ хъусын дӕу тыххӕй? Дӕ бӕрны цы уыди, уый мын нымадӕй равдис. Уымӕн ӕмӕ нырӕй фӕстӕмӕ исбонӕн уынаффӕгӕнӕг нал уыдзынӕ". 3 Уӕд уынаффӕгӕнӕг хинымӕр загъта: „Цы кӕнон? Мӕ хицау мӕ йӕ исбонӕн уынаффӕгӕнӕджы бынатӕй исы. Зӕхх къахын мӕ бон нӕу, мӕгуыргурӕй цӕрын мӕм худинаг кӕсы. 4 Фӕлӕ уынаффӕгӕнӕг куы нал уон, уӕд-иу мӕ цӕмӕй суазӕг кӕной, уый тыххӕй цы бакӕнын хъӕуы, уый зонын". 5 Ӕмӕ йӕ хицауы хӕсджынтӕй алкӕмӕ дӕр фӕдзырдта хицӕнӕй. Фыццаджы бафарста: „Мӕ хицауӕй цас дарыс?" 6 Уый йын дзуапп радта: „Фондзыссӕдз дурыны зети". Уӕд ын загъта: „Айс дӕ гӕххӕтт, сбад ӕмӕ рӕвдздӕр ныффысс: дӕс ӕмӕ дыууиссӕдз". 7 Уый фӕстӕ бафарста иннӕйы: „Ды та цас дарыс?" Уый дзуапп радта: „Фондзыссӕдз гуыффӕйы мӕнӕу". Загъта йын: „Айс дӕ гӕххӕтт ӕмӕ ныффысс: цыппарыссӕдз". 8 Ӕмӕ хицау раппӕлыд мӕнгард уынаффӕгӕнӕгӕй, ӕрхъуыдыджын ми кӕй бакодта, уый тыххӕй. Уымӕн ӕмӕ ацы дунейы хъӕбултӕ сӕхи хуызӕттимӕ хъуыддӕгтӕ куы фӕкӕнынц, уӕд рухсы хъӕбултӕй ӕрхъуыдыджындӕр вӕййынц. 9 Ӕз дӕр уын зӕгъын: скӕнут уӕхицӕн хӕлӕрттӕ ӕнӕраст мулчы фӕрцы, цӕмӕй уӕм мулк куы нал уа, уӕд уӕ уыдон суазӕг кӕной мыггагмӕйы хӕдзӕртты. 10 Чысыл хъуыддаджы иузӕрдион чи у, уый стыры дӕр иузӕрдион у, чысыл хъуыддаджы мӕнгард чи у, уый стыры дӕр мӕнгард у. 11 Уӕдӕ кӕд ӕнӕраст мулкыл иузӕрдион нӕ разындыстут, уӕд уын ӕцӕг мулк уӕ бӕрны чи бакӕндзӕн? 12 Ӕмӕ кӕд искӕй мулкыл иузӕрдион нӕ разындыстут, уӕд уын уӕхи мулк чи ратдзӕн? 13 Никӕцы цагъары бон у дыууӕ хицауӕн кусын – сӕ иуӕй йе сӕфт уындзӕн, иннӕйы та уарздзӕни, кӕнӕ сӕ иуыл иузӕрдион уыдзӕн, иннӕйы та ницӕмӕ дардзӕн. Уӕ бон нӕ бауыдзӕни Хуыцауӕн ӕмӕ мулкӕн кусын». 14 Ӕппӕт уыдӕттӕ фехъуыстой ӕхцауарзӕг фарисейтӕ ӕмӕ Йыл худтысты. 15 Йесо сын загъта: «Адӕмы раз уӕхи рӕстгӕнджытӕй ӕвдисут, фӕлӕ уын Хуыцау уӕ зӕрдӕтӕ зоны. Уымӕн ӕмӕ адӕммӕ кадджын цы у, уый Хуыцауы цӕсты ӕлгъаг у. 16 Моисейы Ӕгъдау ӕмӕ пехуымпартӕ Иоанны заманы онг уыдысты. Уӕдӕй фӕстӕмӕ хъуыстгонд цӕуы Хуыцауы Паддзахады уац, ӕмӕ йӕм алчидӕр ӕппӕт хъарутӕй архайы бацӕуыныл. 17 Фӕлӕ Ӕгъдауӕй иу хахх фӕхъӕуыны фӕлтау арв ӕмӕ зӕхх ӕнцондӕрӕй фесӕфдзысты. 18 Йӕ усы чи ауадза ӕмӕ ӕндӕр ус чи ракура, уый хӕтгӕ кӕны. Йӕ мойӕ хицӕнгонд усы чи ракура, уый дӕр хӕтгӕ кӕны. 19 Уыдис иу хъӕздыг лӕг, йӕхи фӕлыста зынаргъ ӕмӕ рӕсугъд дарӕсӕй, кодта бухъцард. 20 Йӕ кулдуары цур та хуыссыд иу мӕгуыр лӕг, йӕ ном – Лазыр. Йӕ буар ӕгасӕй дӕр фӕци хӕфдзӕстыты бын. 21 Лазыр бӕллыд, хъӕздыджы фынгӕй цы муртӕ хауд, уыдонӕй бафсӕдынмӕ; ӕрбацыдысты-иу ӕм куыйтӕ ӕмӕ йын стӕрдтой йӕ хӕфдзӕстытӕ. 22 Амард мӕгуыр лӕг, ӕмӕ йӕ зӕдтӕ ахастой Авраамы хъӕбысмӕ. Амард хъӕздыг дӕр ӕмӕ йӕ баныгӕдтой. 23 Зындоны хъизӕмар кӕнгӕйӕ, уый акаст ӕмӕ дардмӕ ауыдта Авраамы, йӕ фарсмӕ та – Лазыры. 24 Ӕмӕ ныхъхъӕр кодта: „Мӕ фыдӕл Авраам! Фӕтӕригъӕд мын кӕн ӕмӕ мӕм Лазыры рарвит, йе 'нгуылдз стула доны ӕмӕ мын ме 'взаг асатӕг кӕна, уымӕн ӕмӕ ӕз хъизӕмар кӕнын ацы арты". 25 Фӕлӕ йын Авраам загъта: „Мӕ хъӕбул, ды дӕ царды хорзӕхтӕ кӕй райстай, Лазыр та дзы хъизӕмар кӕй бавзӕрста, уый ӕрымыс. Ныр Лазыр ам рӕвдыд у, ды та удхар кӕныс. 26 Стӕй ма не 'хсӕн ис стыр сӕрсӕфӕн, цӕмӕй, ардыгӕй сымахмӕ ацӕуын кӕй бафӕнда, уыдонӕн ма бантыса, ӕмӕ сымахӕй дӕр махмӕ ма цӕуой". 27 Уӕд хъӕздыг загъта: „Уӕдӕ дын лӕгъстӕ кӕнын, мӕ фыдӕл, Лазыры арвит мӕ фыды хӕдзармӕ. 28 Фондз ӕфсымӕры мын ис; уадз ӕмӕ сын зӕгъа, цӕмӕй уыдон дӕр ацы удхары бынатмӕ ма бахауой". 29 Авраам ын загъта: „Уыдонӕн ис Моисей ӕмӕ пехуымпартӕ; хъусӕнт сӕм". 30 Уый йын загъта: „Нӕ, мӕ фыдӕл Авраам! Мӕрдтӕй сӕм исчи куы ӕрцӕуа, уӕд ӕрфӕсмон кӕндзысты". 31 Авраам ын дзуапп радта: „Моисей ӕмӕ пехуымпартӕм кӕм нӕ хъусынц, уым, мӕрдтӕй исчи райгас, зӕгъгӕ, уӕд ууыл дӕр нӕ баууӕнддзысты"».

Лука 17

1 Йесо Йӕ ахуыргӕнинӕгтӕн ноджыдӕр загъта: «Тӕригъӕдмӕ мондаггӕнӕнтӕ ӕнӕмӕнг хъуамӕ уой, фӕлӕ сар йӕ сӕр, кӕй аххосӕй ӕрцӕуой, уымӕн. 2 Ацы кӕстӕртӕй иуы тӕригъӕды чи бафтауа, уымӕн фӕлтау йӕ хъуырыл куыройыфыд куы ӕрцауындзиккой ӕмӕ йӕ денджызы куы баппариккой, уӕд ын хуыздӕр уаид. 3 Кӕсут уӕхимӕ. Де 'фсымӕр дӕ тӕригъӕды куы бацӕуа, уӕд ын бауайдзӕф кӕн, ӕмӕ кӕд ӕрфӕсмон кӕна, уӕд ын ныббар. 4 Бон авд хатты дӕ тӕригъӕды куы бафта ӕмӕ дӕм бон авд хатты куы бацӕуа ӕмӕ дын куы зӕгъа: „Фӕсмон кӕнын", – уӕд ын ныххатыр кӕн». 5 Апостолтӕ Йесойӕ куырдтой: «Фӕфылдӕр нын кӕн нӕ уырнындзинад». 6 Йесо загъта: «Хъыцъыйы гагайыйас уырнындзинад уӕм куы уаид ӕмӕ ацы тутабӕласӕн куы зӕгъиккат: „Ӕд уидӕгтӕ дӕхи срӕдув ӕмӕ денджызы ныссӕдз", уӕд уӕм байхъусид. 7 Зӕгъӕм, сымахӕй искӕмӕн ис, хуым чи кӕны кӕнӕ фос чи хизы, ахӕм цагъар. Ӕмӕ уый быдырӕй куы ӕрбацӕуа, уӕд ын зӕгъдзынӕ, мыййаг: „Рӕвдздӕр рацу ӕмӕ фынгыл ӕрбад"? 8 Уый нӕ, фӕлӕ йын афтӕ, мыййаг, нӕ зӕгъдзынӕ: „Сцӕттӕ мын кӕн ӕхсӕвӕр, бафистӕг кӕн дӕхи ӕмӕ, цалынмӕ хӕрон ӕмӕ нуазон, уӕдмӕ мын лӕггад кӕн; уый фӕстӕ ды дӕр хӕр ӕмӕ нуаз"? 9 Цы йын бафӕдзӕхстӕуыд, уый кӕй сарӕзта, уый тыххӕй уыцы цагъарӕн арфӕтӕ кӕндзынӕ? [Ӕнхъӕл нӕ дӕн.] 10 Афтӕ сымах дӕр – цыдӕриддӕр уын бафӕдзӕхстӕуыд, уый куы бакӕнат, уӕд зӕгъут: „Мах ницӕйаг цагъартӕ стӕм – цы нын ӕмбӕлд, айдагъ уый сарӕзтам"». 11 Йесо Иерусалиммӕ куы цыди, уӕд Йӕ фӕндаг уыди Самарийы ӕмӕ Галилейы ӕхсӕн арӕныл. 12 Ӕмӕ Йыл иу хъӕуы сӕмбӕлдысты дӕс хъотырджын лӕджы. Уыдон дӕрддзӕф ӕрлӕууыдысты, 13 Ӕмӕ хъӕр кодтой: «Хицау Йесо, батӕригъӕд нын кӕн!» 14 Йесо сӕ куы федта, уӕд сын загъта: «Ацӕут, уӕхи фенын кӕнут сауджынтӕн». Ӕмӕ ма фӕндагыл куы уыдысты, уӕд ссыгъдӕг сты. 15 Кӕй сдзӕбӕх, уый сӕ иу куы федта, уӕд раздӕхт ӕмӕ хъӕлӕсыдзагӕй кад кодта Хуыцауӕн. 16 Адӕлгом Йесойы къӕхты раз ӕмӕ Йын арфӕ кодта. Уый уыди самариаг. 17 Уӕд Йесо загъта: «Дӕсӕй не ссыгъдӕг сты, ӕви? Иннӕ фараст адӕймаджы кӕм сты? 18 Ацы ӕндӕрбӕстаг куы раздӕхт, уӕд уыдон цӕуылнӕ раздӕхтысты Хуыцауӕн кад скӕнынмӕ?» 19 Ӕмӕ йын загъта: «Сыст ӕмӕ ацу. Дӕ уырнындзинад дӕ фервӕзын кодта». 20 Иухатт фарисейтӕ Йесойы бафарстой, Хуыцауы Паддзахад кӕд ӕрцӕудзӕн, зӕгъгӕ. Уый сын дзуапп радта: «Хуыцауы Паддзахады ӕрцыдӕн цӕстӕй фенӕн нӕ уыдзӕн. 21 Афтӕ ничи зӕгъдзӕн: „Мӕнӕ ам ис", кӕнӕ: „Уӕртӕ уым ис". Уымӕн ӕмӕ Хуыцауы Паддзахад уӕ зӕрдӕйы ис» 22 Йӕ ахуыргӕнинӕгтӕн загъта: «Скӕндзӕн ахӕм рӕстӕг, ӕмӕ уӕ бафӕнддзӕн Адӕймаджы Фырты Паддзахады бонтӕй иу уӕддӕр фенын, фӕлӕ йӕ нӕ фендзыстут. 23 Уӕд уын зӕгъдзысты: „Мӕнӕ ам ис", кӕнӕ: „Уӕртӕ уым ис". Ма цӕут уырдӕм, ма згъорут сӕ фӕдыл. 24 Уымӕн ӕмӕ ӕрвӕрттывд арвы иу кӕронӕй иннӕ кӕронмӕ куыд ныррухс кӕны, афтӕ уыдзӕн Адӕймаджы Фырты ӕрцыд дӕр. 25 Фӕлӕ уал фыццаг хъуамӕ бавзара бирӕ хъизӕмӕрттӕ ӕмӕ Йыл ацы фӕлтӕр йӕхи атигъ кӕна. 26 Ӕмӕ Нойы бонты куыд уыдис, афтӕ уыдзӕн Адӕймаджы Фырты ӕрцыды рӕстӕг дӕр. 27 Хордтой, нуӕзтой, хастой устытӕ, цыдысты моймӕ, цалынмӕ Ной наумӕ нӕ бацыд ӕмӕ доны хъаймӕт сеппӕты дӕр нӕ фесӕфта, уӕдмӕ. 28 Афтӕ уыди Лоты бонты дӕр: хордтой, нуӕзтой, ӕлхӕдтой, уӕй кодтой, тыдтой хуымтӕ, арӕзтой. 29 Фӕлӕ Лот Содомӕй куы рацыд, уыцы бон уӕларвӕй ӕруарыд цӕхӕр сондонимӕ ӕмӕ сеппӕты дӕр фесӕфта. 30 Адӕймаджы Фырт куы ӕрцӕуа, уӕд дӕр афтӕ уыдзӕн. 31 Уыцы бон уӕлхӕдзар чи уа, уый хӕдзармӕ ма ӕрхизӕд уырдыгӕй йӕ дзаумӕттӕ рахӕссынмӕ. Быдыры чи уа, уый дӕр ма раздӕхӕд. 32 Уӕ зӕрдыл дарут Лоты усы. 33 Йӕ цард бахъахъхъӕнынмӕ чи бӕллы, уый йӕ фесафдзӕн; йӕ цард чи фесафа, уый та йӕ бахъахъхъӕндзӕн. 34 Зӕгъын уын: уыцы ӕхсӕв дыууӕ уыдзысты иу хуыссӕны – сӕ иу ист ӕрцӕудзӕн, иннӕ та баззайдзӕн. 35 Дыууӕ сылгоймаджы иумӕ сдзысты хор – сӕ иу ист ӕрцӕудзӕн, иннӕ та баззайдзӕн. 36 [Дыууӕ лӕджы уыдзысты быдыры – сӕ иу ист ӕрцӕудзӕн, иннӕ та баззайдзӕн.]» 37 Уӕд Ӕй бафарстой: «Уый кӕм уыдзӕн, Хицау?» Йесо сын загъта: «Холы кӕм уа, цӕргӕстӕ дӕр уым ӕрӕмбырд уыдзысты».

Лука 18

1 Ӕдзух кувын кӕй ӕмбӕлы ӕмӕ хъынцъым кӕнын кӕй нӕ хъӕуы, уый тыххӕй сын Йесо загъта фӕсномыг ныхас: 2 «Иу сахары уыди, Хуыцауӕй чи нӕ тарст ӕмӕ адӕмӕй дӕр ӕфсӕрмы чи нӕ кодта, ахӕм тӕрхонгӕнӕг. 3 Уыцы сахары цардис иу идӕдз сылгоймаг. Уый-иу арӕх ӕрцыди тӕрхонгӕнӕгмӕ ӕмӕ йын дзырдта: „Мӕ ныхмӕлӕууӕгӕй мӕ фервӕзын кӕн". 4 Фӕлӕ йӕм тӕрхонгӕнӕг цасдӕр рӕстӕг йӕ хъус не 'рдардта. Ӕппынфӕстаг загъта йӕхицӕн: „Ӕз Хуыцауӕй дӕр нӕ тӕрсын ӕмӕ адӕмӕй дӕр не 'фсӕрмы кӕнын. 5 Фӕлӕ мӕ уыцы идӕдз ус ӕнцой нал уадзы ӕмӕ йын баххуыс кӕнон, цӕмӕй мӕм мауал цӕуа, мауал мӕ фӕлмӕцын кӕна"». 6 Хицау загъта: «Хъусут, ӕнӕраст тӕрхонгӕнӕг цы зӕгъы, уымӕ? 7 Уӕдӕ Хуыцауӕн ӕхсӕвӕй-бонӕй лӕгъстӕ чи кӕны, Йӕ уыцы ӕвзӕрстыты нӕ бахъахъхъӕндзӕн, ӕви? Мыййаг, афтӕ бакӕндзӕн, ӕмӕ Йӕм бирӕ ӕнхъӕлмӕ кӕсой? 8 Зӕгъын уын, рӕхджы сын баххуыс кӕндзӕн. Фӕлӕ Адӕймаджы Фырт куы ӕрцӕуа, уӕд ма зӕххыл уырнындзинад ссардзӕн, цымӕ?» 9 Йӕхи рӕстгӕнӕгыл чи нымадта ӕмӕ иннӕты чи ницӕмӕ дардта, уыдонӕн дӕр Йесо загъта ахӕм фӕсномыг ныхас: 10 «Дыууӕ адӕймаджы бацыдысты Кувӕндонмӕ бакувынмӕ: сӕ иу – фарисей, иннӕ – хъалонисӕг. 11 Фарисей ӕрлӕууыд ӕмӕ куывта хинымӕр: „Хуыцау, бузныг дӕн Дӕуӕй, ӕз иннӕ адӕмау стигъӕг, ӕнӕраст, хӕтаг, кӕнӕ ацы хъалонисӕджы хуызӕн кӕй нӕ дӕн, уый тыххӕй. 12 Ком дарын къуыри дыууӕ хатты; меппӕт ӕфтиаджы дӕсӕймаг хай дӕттын Дӕуӕн". 13 Хъалонисӕг та лӕууыди дӕрддзӕф, уӕларвмӕ скӕсын дӕр нӕ уӕндыд, фӕлӕ йӕ риу хоста ӕмӕ дзырдта: „Хуыцау, ныббар мын, ӕз тӕригъӕдджын дӕн". 14 Зӕгъын уын, йӕ хӕдзармӕ Хуыцауӕй хатыргондӕй хъалонисӕг ацыди, фарисей та – нӕ. Уымӕн ӕмӕ йӕхи уӕлдӕр чи ӕвӕры, уый ӕрныллӕг уыдзӕн, йӕхи чи ныллӕг кӕны, уый та сбӕрзонд уыдзӕн». 15 Йесомӕ хуыдтой сабиты дӕр, цӕмӕй сыл бандзӕва, фӕлӕ ахуыргӕнинӕгтӕ уый куы федтой, уӕд сӕ нӕ уагътой. 16 Йесо сабитӕм басидт ӕмӕ загъта: «Ӕрбауадзут Мӕм сывӕллӕтты, ма сӕ хъыгдарут, уымӕн ӕмӕ Хуыцауы Паддзахад уыдоны хуызӕтты у. 17 Ӕцӕг уын зӕгъын: Хуыцауы Паддзахадыл сывӕллонау чи нӕ баууӕнда, уый йӕм нӕ бацӕудзӕн». 18 Иу хицау Йесойы бафарста: «Хорз Ахуыргӕнӕг, мыггагмӕйы цард райсынӕн цы саразон?» 19 Йесо йын дзуапп радта: «Цӕмӕн Мӕ хоныс хорз? Иунӕг Хуыцауы йеддӕмӕ хорз ничи у. 20 Фӕдзӕхстытӕ зоныс: „Ма хӕт", „Ма амар", „Ма дав", „Мӕнгӕвдисӕн ма ныллӕуу", „Нымай дӕ фыд ӕмӕ дӕ мады"». 21 Уый Йесойӕн загъта: «Ӕппӕт уыдӕттӕ ме 'взонджы бонтӕй нырмӕ ӕххӕст кӕнын». 22 Йесо уый куы фехъуыста, уӕд ын зӕгъы: «Иу бакӕнинаг ма дын баззади: цыдӕриддӕр дӕм ис, уый ауӕй кӕн, байуар ӕй мӕгуыртыл, ӕмӕ дын уӕлӕрвты уыдзӕни хӕзна. Стӕй-иу раздӕх ӕмӕ цу Мӕ фӕдыл». 23 Уый уыцы ныхӕстӕ куы фехъуыста, уӕд ӕрӕнкъард, уымӕн ӕмӕ тынг хъӕздыг уыди. 24 Кӕй ӕрӕнкъард, уый Йесо куы федта, уӕд загъта: «Ӕвӕдза, бонджынтӕн куыд зын у Хуыцауы Паддзахадмӕ бацӕуын! 25 Уымӕн ӕмӕ хъӕздыгӕн Хуыцауы Паддзахадмӕ бацӕуынӕй теуайӕн судзины быны иннӕрдӕм ахизын ӕнцондӕр у». 26 Уыцы ныхӕстӕ чи фехъуыста, уыдон загътой: «Уӕдӕ чи фервӕздзӕн?» 27 Йесо сын загъта: «Адӕмы бон цы нӕу, уый Хуыцауы бон у». 28 Петр загъта: «Мӕнӕ мах ныууагътам алцыдӕр ӕмӕ рацыдыстӕм Дӕ фӕдыл». 29 Йесо сын дзуапп радта: «Ӕцӕг уын зӕгъын: Хуыцауы Паддзахады сӕраппонд йӕ хӕдзар, кӕнӕ йӕ усы, кӕнӕ йе 'фсымӕрты, кӕнӕ йӕ ныййарджыты, кӕнӕ йӕ сывӕллӕтты чи ныууадза, уыдонӕй иунӕг ахӕм дӕр нӕй, 30 Ӕмӕ ацы заманы дзӕвгар фылдӕр, ӕрцӕуинаг дунейы та мыггагмӕйы цард чи нӕ райса». 31 Йесо фӕхибар кодта дыууадӕсы ӕмӕ сын загъта: «Ныр мах цӕуӕм Иерусалиммӕ, ӕмӕ Адӕймаджы Фырты тыххӕй пехуымпартӕ цыдӕриддӕр ныффыстой, уый сӕххӕст уыдзӕн: 32 Адӕймаджы Фырт лӕвӕрд ӕрцӕудзӕни муртаттӕм, ӕмӕ Дзы фӕхынджылӕг кӕндзысты, бафхӕрдзысты Йӕ, фӕтутӕ Йыл кӕндзысты, 33 Ехсӕй Йӕ фӕнӕмдзысты ӕмӕ Йӕ амардзысты, ӕмӕ ӕртыккаг бон райгас уыдзӕн». 34 Фӕлӕ Йын Йӕ ныхӕстӕн ницы бамбӕрстой. Цӕуыл дзырдта, уыдӕттӕ сын ӕргом нӕ уыдысты ӕмӕ сӕм нӕ бахъардтой. 35 Йесо Иерихонмӕ куы баввахс, уӕд иу куырм мӕгуыргур бадти фӕндаггӕрон. 36 Йӕ цурты адӕм кӕй фӕцӕуынц, уый куы фехъуыста, уӕд бафарста: «Цы хабар у?» 37 Загътой йын: «Назаретаг Йесо ӕрбацӕуы». 38 Уӕд ныхъхъӕр кодта: «Йесо, Давиды Фырт, батӕригъӕд мын кӕн!» 39 Разӕй цӕуджытӕ дзы домдтой, цӕмӕй ныссабыр уа, фӕлӕ уый ноджы тынгдӕр хъӕр кодта: «Давиды Фырт, батӕригъӕд мын кӕн!» 40 Йесо ӕрлӕууыд ӕмӕ загъта, цӕмӕй Йӕм ӕй ӕрбакӕной. Ӕмӕ Йӕм куы ӕрбацыд, уӕд ӕй Йесо бафарста: 41 «Цы дӕ фӕнды? Цы дын саразон?» Уый загъта: «Хицау, мӕн фӕнды мӕ цӕстытӕй ракӕсын». 42 Йесо йын загъта: «Ракӕс! Дӕ уырнындзинад дӕ фервӕзын кодта». 43 Куырм уайтӕккӕ ракаст йӕ цӕстытӕй ӕмӕ, Хуыцауы стаугӕйӕ, ацыд Йесойы фӕдыл. Адӕм уый куы федтой, уӕд сеппӕт дӕр скад кодтой Хуыцауӕн.

Лука 19

1 Уый фӕстӕ Йесо бацыд Иерихонмӕ ӕмӕ фӕцӕйцыд уынджы. 2 Уым уыдис иу адӕймаг, йӕ ном Закхей – хъалонисджыты хицау ӕмӕ хъӕздыг лӕг. 3 Фӕндыд ӕй Йесойы фенын, фӕлӕ Йӕ адӕмӕй нӕ уыдта, цыбыр лӕг кӕй уыд, уымӕ гӕсгӕ. 4 Уӕд азгъордта размӕ ӕмӕ Йӕ феныны тыххӕй схызти легъуи бӕласмӕ, уымӕн ӕмӕ Йесойӕн уыцы бӕласы цурты цӕугӕ уыд. 5 Йесо уырдӕм куы бахӕццӕ, уӕд скаст уӕлӕмӕ, федта йӕ ӕмӕ йын загъта: «Закхей, ӕрхиз рӕвдздӕр, абон дӕ хӕдзары хъуамӕ уон». 6 Закхей ӕрхызт рӕвдз ӕмӕ Йӕ суазӕг кодта ӕхсызгонӕй. 7 Ӕмӕ адӕм уый куы федтой, уӕд сеппӕт дӕр райдыдтой хъуыр-хъуыр кӕнын ӕмӕ дзырдтой, Уый бацыд тӕригъӕдджын адӕймагмӕ, зӕгъгӕ. 8 Закхей та сыстад ӕмӕ загъта Йесойӕн: «Хицау, мӕ мулкӕн йе 'мбис ратдзынӕн мӕгуыртӕн, ӕмӕ кӕд искӕй хъыджы бацыдтӕн, уӕд ын ӕй цыппар ахӕмӕй бафиддзынӕн». 9 Йесо йын загъта: «Абон ирвӕзындзинад ӕрцыд ацы хӕдзармӕ, уымӕн ӕмӕ ацы адӕймаг дӕр Авраамы байзӕддаг у. 10 Адӕймаджы Фырт сӕфтыты бацагурынмӕ ӕмӕ сӕ фервӕзын кӕнынмӕ ӕрцыд». 11 Адӕм байхъуыстой, цы загъта, уымӕ. Йесойы Иерусалиммӕ бирӕ кӕй нал хъуыд, уымӕ гӕсгӕ уыдон ӕнхъӕл уыдысты, Хуыцауы Паддзахад рӕхджы ӕрцӕудзӕн, зӕгъгӕ. Ӕмӕ ма сын уый тыххӕй Йесо радзырдта фӕсномыг ныхас дӕр. 12 Загъта: «Иу лӕг, уӕздан мыггагӕй, цыди дард бӕстӕмӕ, цӕмӕй йӕ уым сӕвӕрдӕуа паддзахӕй ӕмӕ раздӕха фӕстӕмӕ. 13 Басидт йӕ дӕс цагъармӕ, радта сын дӕс минӕйы ӕмӕ сын загъта: „Пайда сӕ кӕнут ме 'рцыдмӕ, цӕмӕй райсат ӕфтиаг". 14 Фӕлӕ йе 'мбӕстӕгтӕн ӕнӕуынон кӕй уыди, уымӕ гӕсгӕ йын йӕ фӕдыл арвыстой минӕвӕрттӕ зӕгъынмӕ: „Мах нӕ фӕнды, цӕмӕй нын уый паддзахиуӕг кӕна". 15 Паддзахӕй йӕ сӕвӕрыны фӕстӕ куы ӕрыздӕхт, уӕд чи цас ӕфтиаг райста, уый базоныны тыххӕй басидт, ӕхца кӕмӕн радта, уыцы цагъартӕм. 16 Ӕрцыд фыццаг ӕмӕ загъта: „Хицау, дӕ минӕ ӕфтиаг ӕрхаста дӕс минӕйы". 17 Уый йын загъта: „Хорз, мӕ дзӕбӕх цагъар! Чысыл хъуыддаджы иузӕрдион кӕй уыдтӕ, уымӕ гӕсгӕ дӕ хицауӕй ӕвӕрын дӕс сахарӕн". 18 Ӕрцыд дыккаг ӕмӕ загъта: „Хицау, дӕ минӕ ӕфтиаг ӕрхаста фондз минӕйы". 19 Уымӕн дӕр загъта: „Дӕу та хицауӕй ӕвӕрын фондз сахарӕн". 20 Ӕрцыд ӕртыккаг ӕмӕ загъта: „Хицау, мӕнӕ дӕ минӕ, ӕз ӕй хӕцъилы тыхтӕй фӕдардтон. 21 Тӕрсгӕ дӕ кодтон, уымӕн ӕмӕ карз лӕг дӕ. Цы нӕ нывӕрдтай, уый дӕхи бакӕныс, цы нӕ байтыдтай, уый ӕркӕрдыс". 22 Хицау ын загъта: „Дӕхи ныхӕстӕй дын тӕрхон кӕндзынӕн, ӕвзӕр цагъар! Ӕз карз лӕг кӕй дӕн, ӕмӕ цы нӕ нывӕрдтон, уый мӕхи кӕй бакӕнын, цы нӕ байтыдтон, уый кӕй ӕркӕрдын, уыдӕттӕ куы зыдтай, 23 Уӕд цӕуылнӕ радтай ме 'хца пайда дзы скӕнынмӕ, куы ӕрцыдтӕн, уӕд ӕй ӕфтиагимӕ куыд райстаин, афтӕ?" 24 Ӕмӕ уым чи лӕууыд, уыдонӕн загъта: „Райсут ын йӕ минӕ ӕмӕ йӕ раттут, дӕс минӕйы кӕмӕ ис, уымӕн". 25 Уыдон ын загътой: „Хицау, уымӕ дӕс минӕйы куы ис". 26 Уый дзуапп радта: „Зӕгъын уын, кӕмӕ ис, уымӕн рардӕуыдзӕн; кӕмӕ нӕй, уымӕй та ист ӕрцӕудзӕн, цы йӕм ис, уый дӕр. 27 Паддзах сын уон, уый кӕй нӕ фӕндыд, мӕ уыцы знӕгты та ӕркӕнут ӕмӕ сӕ мӕ разы амарут"». 28 Уый зӕгъыны фӕстӕ Йесо араст Йӕ фӕндагыл Иерусалиммӕ. 29 Елеон цы хох хуындӕуы, уымӕн йӕ фахсыл чи ис, уыцы Виффаги ӕмӕ Вифанимӕ куы баввахс, уӕд арвыста Йӕ ахуыргӕнинӕгтӕй дыууӕйы, 30 Ӕмӕ сын загъта: «Ацӕут, уӕ ныхмӕ цы хъӕу ис, уырдӕм. Куы бацӕуат, уӕд ссардзыстут, адӕймаг кӕуыл нӕма сбадт, ахӕм къӕлӕу бастӕй. Суадзут ӕй ӕмӕ йӕ ӕркӕнут. 31 Исчи уӕ куы бафӕрса: „Цӕмӕн ӕй уӕгъд кӕнут?", уӕд-иу ын зӕгъут: „Хицауы хъӕуы"». 32 Ахуыргӕнинӕгтӕ ацыдысты ӕмӕ ӕппӕт дӕр ссардтой, Йесо сын куыд загъта, афтӕ. 33 Къӕлӕуы куы уӕгъд кодтой, уӕд сын йӕ хицӕуттӕ загътой: «Цӕмӕн уӕгъд кӕнут къӕлӕуы?» 34 Уыдон дзуапп радтой: «Хицауы хъӕуы». 35 Ӕмӕ къӕлӕуы ӕркодтой Йесомӕ, ӕрӕфтыдтой йыл сӕ дарӕстӕ ӕмӕ йыл Йесойы сбадын кодтой. 36 Йесо куы фӕцӕйцыд, уӕд Ын адӕм сӕ дарӕстӕ тыдтой Йӕ фӕндагыл. 37 Елеоны хохы ӕруайӕнмӕ куы баввахс, уӕд Йӕ ахуыргӕнинӕгтӕ сеппӕт дӕр райдыдтой цингӕнгӕ хъӕрӕй Хуыцауы стауын, кӕй федтой, ӕппӕт уыцы диссӕгты тыххӕй: 38 «Арфӕгонд уӕд Хуыцауы номӕй ӕрцӕуӕг Паддзах! Фарн ӕмӕ намыс Хуыцауӕн уӕлӕрвты!» 39 Адӕмимӕ чи уыди, уыцы фарисейтӕй Йын чидӕртӕ загътой: «Ахуыргӕнӕг, ныхъхъус кӕн Дӕ ахуыргӕнинӕгты». 40 Фӕлӕ сын Йесо дзуапп радта: «Зӕгъын уын: уыдон куы ныхъхъус уой, уӕд дуртӕ ныхъхъӕр кӕндзысты». 41 Йесо сахармӕ куы баввахс ӕмӕ йӕ куы федта, уӕд ыл скуыдта 42 Ӕмӕ загъта: «Гъӕй-джиди, ды дӕр абон куы базонис, фарны хос дын цы у, уый! Фӕлӕ дын ныр ӕргом нӕу. 43 Уымӕн ӕмӕ дыл скӕндзӕн ахӕм бонтӕ, ӕмӕ де знӕгтӕ дӕ къулты алыварс ныккалдзысты сыджыты рӕгътӕ, ӕртыхсдзысты дыл ӕмӕ дӕ цъист кӕндзысты алырдыгӕй. 44 Дӕу ӕмӕ дын дӕ хъӕбулты дӕ мидӕг сӕмвӕз кӕндзысты зӕххимӕ, ӕмӕ дӕ дур дурыл нал ныууадздзысты, Хуыцау дӕм куы ӕрцыд, уыцы афон кӕй нӕ базыдтай, уый тыххӕй». 45 Йесо Кувӕндонмӕ бацыд ӕмӕ уырдыгӕй тӕрын райдыдта уӕйгӕнджыты. 46 Дзырдта сын: «Фыст у: „Мӕ хӕдзар кувӕн хӕдзар уыдзӕн"; сымах та дзы абырджыты лӕгӕт сарӕзтат». 47 Йесо алы бон дӕр адӕмы ахуыр кодта Кувӕндоны. Алчертӕ, динамонджытӕ ӕмӕ Йӕ адӕмы хистӕртӕ хъавыдысты амарынмӕ, 48 Фӕлӕ Йын уыцы ми цы амалӕй бакодтаиккой, уый нӕ зыдтой, уымӕн ӕмӕ Йӕм ӕппӕт адӕм дӕр ӕнӕрынцойӕ хъуыстой.

Лука 20

1 Йесо иухатт адӕмы ахуыр кодта Кувӕндоны ӕмӕ сын хъусын кодта фарны уац. Бацыдысты Йӕм алчертӕ ӕмӕ динамонджытӕ адӕмы хистӕртимӕ, 2 Ӕмӕ Йӕ бафарстой: «Зӕгъ нын, ӕппӕт уыдӕттӕ цавӕр хъаруйӕ кӕныс? Дӕуӕн уыцы бар чи радта, уый чи у?» 3 Йесо сын дзуапп радта: «Ӕз дӕр уӕ бафӕрсдзынӕн цӕмӕйдӕр. Зӕгъут-ма Мын, 4 Иоанн цы аргъуыдӕй аргъуыдта, уый уӕларвӕй уыд ӕви адӕмӕй?» 5 Уыдон тӕрхӕттӕ кодтой: «„Уӕларвӕй" куы зӕгъӕм, уӕд бафӕрсдзӕн: „Уӕдӕ цӕуылнӕ баууӕндыдыстут Иоанныл?" 6 „Адӕмӕй" куы зӕгъӕм, уӕд та нӕ адӕм дуртӕй амардзысты, уымӕн ӕмӕ сеппӕты дӕр уырны, Иоанн пехуымпар кӕй у, уый». 7 Ӕмӕ дзуапп радтой: «Кӕцӕй у, уый нӕ зонӕм». 8 Уӕд сын Йесо загъта: «Уӕдӕ уын Ӕз дӕр нӕ зӕгъдзынӕн, цавӕр хъаруйӕ сӕ кӕнын, уый». 9 Ӕмӕ адӕмӕн дзурын райдыдта ахӕм фӕсномыг ныхас: «Иу адӕймаг ныссагъта сӕнӕфсирдон, радта йӕ ӕххуырст кусджытӕм ӕмӕ ацыди дӕргъвӕтин ӕмгъуыдмӕ. 10 Афон куы ралӕууыди, уӕд ӕххуырст кусджытӕм арвыста йӕ цагъары, цӕмӕй йын йӕ сӕнӕфсирдонӕй раттой йӕ хай. Фӕлӕ йӕ ӕххуырст кусджытӕ фӕнадтой ӕмӕ йӕ афтидармӕй аздӕхтой. 11 Арвыста сӕм ӕндӕр цагъары, ӕмӕ уый дӕр фӕнадтой, фӕхынджылӕг дзы кодтой ӕмӕ йӕ афтидармӕй аздӕхтой. 12 Арвыста сӕм ӕртыккаджы дӕр, фӕлӕ уый дӕр фӕцӕфтӕ кодтой ӕмӕ йӕ ратардтой. 13 Уӕд сӕнӕфсирдоны хицау загъта: „Цы кӕнон? Арвитон мӕ уарзон фырты; чи зоны, ӕмӕ уымӕй фефсӕрмы уой". 14 Фӕлӕ йӕ ӕххуырст кусджытӕ куы федтой, уӕд кӕрӕдзийӕн дзырдтой: „Уый йӕ бындар у. Амарӕм ӕй, ӕмӕ мах бауыдзысты йӕ бынтӕ". 15 Сӕнӕфсирдонӕй йӕ раппӕрстой ӕмӕ йӕ амардтой. Цы сын бакӕндзӕни сӕнӕфсирдоны хицау? 16 Ӕрцӕудзӕн, амардзӕн уыцы ӕххуырст кусджыты ӕмӕ сӕнӕфсирдон ратдзӕн ӕндӕртӕм». Уый чи фехъуыста, уыдон загътой: «Хуыцау бахизӕд!» 17 Йесо сӕм бакаст ӕмӕ загъта: «Уӕдӕ Сыгъдӕг Фысты ацы дзырдтӕ цы амонынц: „Аразджытӕ цы дурыл нӕ барвӕссыдысты, уый сси сӕрӕвӕрӕн"? 18 Уыцы дурыл чидӕриддӕр ӕрхауа, уый ныппырх уыдзӕн, йӕхӕдӕг кӕуыл ӕрхауа, уый та ныцъцъӕл кӕндзӕн». 19 Йесо ацы фӕсномыг ныхас уыдоны тыххӕй кӕй загъта, уый бамбӕрстой динамонджытӕ ӕмӕ алчертӕ, ӕмӕ Йӕ хъавыдысты ӕвӕстиатӕй ӕрцахсынмӕ, фӕлӕ адӕмӕй нӕ бауӕндыдысты. 20 Ӕмӕ Йесомӕ райдыдтой сӕ цӕст дарын, ӕмӕ Йӕм барвыстой, сӕхи рӕстгӕнджытӕй чи ӕвдыста, ахӕм лӕгты. Сӕ нысан уыди Йӕ ракъахын ӕмӕ Йын Йӕ ныхӕстӕ Йӕхи ныхмӕ фӕцаразын, бӕстӕйы хицауы къухтӕм Ын раттӕн куыд уыдаид, афтӕ. 21 Ӕмӕ Йӕ уыдон бафарстой: «Ахуыргӕнӕг, мах зонӕм: Ды раст дзурыс ӕмӕ ахуыр кӕныс, никӕй хъулон кӕныс, фӕлӕ ӕцӕгадмӕ гӕсгӕ амоныс Хуыцауы фӕндаг. 22 Кесӕрӕн нын хъалон фидын ӕмбӕлы ӕви нӕ?» 23 Йесо сын бамбӕрста сӕ хинвӕнд ӕмӕ загъта: «[Цы Мӕ къахут?] 24 Равдисут Мӕм динар: кӕй ныв ӕмӕ йыл кӕй ном ис?» Уыдон дзуапп радтой: «Кесӕры». 25 Уӕд сын загъта: «Уӕдӕ кесӕры цы у, уый дӕттут кесӕрӕн, Хуыцауы цы у, уый та – Хуыцауӕн». 26 Ӕмӕ сын адӕмы раз Йӕ ныхӕстӕ Йӕхи ныхмӕ фӕцаразын нӕ бантыст. Йӕ дзуапп сӕ бафтыдта дисы ӕмӕ ныхъхъус сты. 27 Уӕд ӕрбацыдысты саддукейтӕй чидӕртӕ (саддукейтӕ дзурынц, мӕрдтӕ нӕ райгас уыдзысты, зӕгъгӕ) ӕмӕ Йӕ бафарстой: 28 «Ахуыргӕнӕг, Моисей махӕн ныффыста: „Искӕмӕн йӕ усджын ӕфсымӕр ӕнӕзӕнӕгӕй куы амӕла, уӕд ын ракурӕд йӕ усы ӕмӕ цот рауадзӕд йе 'фсымӕрӕн". 29 Уыд авд ӕфсымӕры. Хистӕр ӕрхаста ус ӕмӕ ӕнӕзӕнӕгӕй амард. 30 Уыцы усы ракуырдта дыккаг ӕфсымӕр ӕмӕ уый дӕр ӕнӕзӕнӕгӕй амард. 31 Ракуырдта йӕ ӕртыккаг, стӕй – иннӕ ӕфсымӕртӕ. Ӕмӕ сеппӕт дӕр амардысты, зӕнӕг та нӕ ныууагътой. 32 Сеппӕты фӕстӕ ус дӕр амард. 33 Ныр мӕрдтӕ куы райгас уой, уӕд сӕ кӕй ус уыдзӕни? Сӕ авды ус дӕр куы уыд». 34 Йесо сын дзуапп радта: «Ацы дунейы адӕм курынц устытӕ ӕмӕ цӕуынц моймӕ. 35 Фидӕны цард кӕмӕн рардӕуа ӕмӕ мӕрдтӕй чи райгас уа, уыдон та нӕдӕр ус курдзысты, нӕдӕр мой кӕндзысты. 36 Мӕлӕт дӕр сын нӕ уыдзӕни. Фӕлӕ суыдзысты зӕдты хуызӕн, Хуыцауы хъӕбултӕ, уымӕн ӕмӕ сӕ Хуыцау райгас кодта. 37 Мӕрдтӕ кӕй райгас уыдзысты, уый та Моисей равдыста, судзгӕ сындзкъутӕры тыххӕй куы дзырдта, Хуыцауы Авраамы Хуыцау, Исаакы Хуыцау ӕмӕ Иаковы Хуыцау куы схуыдта, уӕд. 38 Хуыцау та мӕрдты Хуыцау нӕу, фӕлӕ удӕгӕсты Хуыцау у, уымӕн ӕмӕ Йын иууылдӕр удӕгас сты». 39 Уый тыххӕй Йесойӕн динамонджытӕй чидӕртӕ загътой: «Ахуыргӕнӕг, Ды хорз загътай». 40 Истӕмӕй бафӕрсынмӕ Йӕм сӕ ныфс нал хастой. Йесо та сын дзырдта: 41 «Куыд зӕгъынц Чырыстийӕ, Давиды байзӕддаг у, зӕгъгӕ? 42 Давид йӕхӕдӕг Псаломты чиныджы куы дзуры: „Хуыцау загъта мӕ Хицауӕн: сбад Мӕ рахиз фарс, 43 Цалынмӕ Дын Де знӕгты Дӕ къӕхты бын ӕрӕвӕрон, уӕдмӕ". 44 Уӕдӕ Йӕ кӕд Давид Хицау хоны, уӕд Уый йӕ байзӕддаг куыд у?» 45 Ӕппӕт адӕм Йесомӕ куы хъуыстой, уӕд Йӕ ахуыргӕнинӕгтӕн загъта: 46 «Уӕхи хизут динамонджытӕй. Уыдон уарзынц даргъ дарӕс дарын ӕмӕ сахарты фӕзты адӕмы арфӕтӕм хъусын; уарзынц синагогӕты раззаг бынӕтты ӕмӕ минасы фынгтыл уӕле бадын; 47 Хӕрынц идӕдзты хӕдзӕрттӕ, цӕстмӕ кувынц бирӕ. Уыдон баййафдзысты карз ӕфхӕрд».

Лука 21

1 Йесо акаст ӕмӕ федта, Хуыцауы номыл лӕвӕрттӕ Кувӕндоны хӕзнадоны чи ӕвӕрдта, уыцы хъӕздгуыты. 2 Федта дзы, дыууӕ лептӕйы чи нывӕрдта, уыцы мӕгуыр идӕдз усы дӕр. 3 Йесо загъта: «Ӕцӕг уын зӕгъын, ацы мӕгуыр идӕдз ус сеппӕтӕй дӕр фылдӕр нывӕрдта. 4 Иннӕтӕ иууылдӕр хӕзнадоны сӕ исбоны уӕлдайӕ нывӕрдтой; ацы мӕгуыр сылгоймаг та нывӕрдта, цыдӕриддӕр ӕм уыдис, уый, йӕ хойраджы аргъ». 5 Иуӕй-иутӕ афтӕ куы дзырдтой, Кувӕндон зынаргъ дуртӕй ӕмӕ, Хуыцауӕн цы ӕрхастӕуыд, уыдонӕй фӕлыст у, зӕгъгӕ, уӕд Йесо загъта: 6 «Ралӕудзӕн ахӕм рӕстӕг, ӕмӕ ам цы уынут, уыдон афтӕ ныппырх уыдзысты, ӕмӕ дзы дур дурыл нал баззайдзӕн». 7 Уӕд Ӕй бафарстой: «Ахуыргӕнӕг, уый кӕд уыдзӕн, ӕмӕ уыдӕттӕн се 'рцыды афон цӕмӕй бӕрӕг уыдзӕн?» 8 Йесо сын загъта: «Уӕхи хизут, цӕмӕй сайды ма фӕуат. Уымӕн ӕмӕ бирӕтӕ ӕрцӕудзысты ӕмӕ дзурдзысты: „Ӕз Чырысти дӕн", „Афон ралӕууыд". Ма-иу ацӕут сӕ фӕдыл. 9 Хӕстыты ӕмӕ змӕстыты тыххӕй куы фехъусат, уӕд ма фӕтӕрсут – фыццаг уал ӕппӕт уыдӕттӕн ӕрцӕуын ӕмбӕлы, фӕлӕ уыйадыл кӕрон нӕма уыдзӕн». 10 Загъта ма сын: «Сыстдзысты адӕм адӕмы ныхмӕ ӕмӕ паддзахад паддзахады ныхмӕ, 11 Уыдзӕни стыр зӕххӕнкъуыстытӕ, ранӕй-рӕтты – стонг ӕмӕ емынӕ; уыдзӕни ӕвирхъау цаутӕ ӕмӕ стыр ӕвдисӕйнӕгтӕ уӕларвӕй. 12 Ӕппӕт уыдӕтты разӕй сымах ахсдзысты, ӕфхӕрдзысты уӕ, кӕндзысты уӕ синагогӕтӕм ӕмӕ ахӕстӕттӕм; Мӕ номы тыххӕй ӕрлӕудзыстут паддзӕхты ӕмӕ хицӕутты раз. 13 Уӕд уын уыдзӕни Мӕн тыххӕй ӕвдисӕн лӕууыны фадат. 14 Цы дзуапп ратдзыстут, уый тыххӕй уӕ рагацау сагъӕс кӕнын кӕй нӕ хъӕуы, уый дарут уӕ зӕрдыл. 15 Уымӕн ӕмӕ уын Ӕз ратдзынӕн, уӕ ныхмӕлӕуджытӕ сеппӕт дӕр кӕй ныхмӕ фӕлӕууын ӕмӕ кӕй ныхмӕ сдзурын нӕ бафӕраздзысты, ахӕм ӕвзаг ӕмӕ зонд. 16 Гадзрахатӕй уыл рацӕудзысты уӕ ныййарджытӕ, уе 'фсымӕртӕ, уӕ хӕстӕджытӕ, уӕ хӕлӕрттӕ, ӕмӕ уӕ кӕйдӕрты амардӕуыдзӕн. 17 Мӕ номы тыххӕй алкӕмӕн дӕр уыдзыстут ӕнӕуынон. 18 Фӕлӕ уӕ сӕрӕй иу ӕрду дӕр нӕ фӕхъӕудзӕн. 19 Уӕ фӕразонӕй фервӕзын кӕнут уӕ удтӕ. 20 Иерусалимыл ӕфсӕдтӕ кӕй ӕртыхстысты, уый куы фенат, уӕд-иу зонут, рӕхджы гӕныстон кӕй фӕуыдзӕн, уый. 21 Уӕд Иудейӕйы чи уа, уыдон лидзӕнт хӕхтӕм. Иерусалимы чи уа, уыдон дӕр уырдыгӕй лидзӕнт, йӕ алфамбылай чи уа, уыдон та йӕм ма бацӕуӕнт. 22 Уымӕн ӕмӕ уыцы бонтӕ мастисӕн бонтӕ сты, цӕмӕй сӕххӕст уа, Сыгъдӕг Фыст цы зӕгъы, уый ӕгасӕй дӕр. 23 Уӕд додоййаг уыдзысты сывӕрджынтӕ ӕмӕ дзидзидарджытӕ. Стыр бӕллӕх ӕрцӕудзӕн ацы зӕхмӕ, ӕмӕ Хуыцауы фыдӕх баййафдзӕн ацы адӕмы. 24 Цагъды фӕуыдзысты карды комӕй, уацары сӕ акӕндзысты алы адӕмтӕм. Иерусалим ссӕнддзысты муртаттӕ, цалынмӕ сӕ рӕстӕг фӕуа, уӕдмӕ. 25 Уыдзӕн ӕвдисӕйнӕгтӕ хурыл, мӕйыл ӕмӕ стъалытыл; зӕххыл та адӕм сау катайы бафтдзысты, фӕйлаугӕ денджызы уынӕрӕй ницыуал зондзысты сӕ сӕрӕн. 26 Адӕм фыртӕссӕй фӕзӕрдӕ-дзӕф уыдзысты, дунейыл цы бӕллӕхтӕ хъуамӕ ӕрцӕуа, уыдонмӕ ӕнхъӕлмӕ кӕсгӕйӕ, уымӕн ӕмӕ уӕларвон тыхтӕ нынкъуысдзысты. 27 Ӕмӕ уӕд Адӕймаджы Фырты фендзысты стыр тых ӕмӕ намысимӕ ӕврагъы ӕрцӕйцӕугӕ. 28 Уыдӕттӕ ӕххӕст кӕнын куы райдайой, уӕд-иу уырдыг слӕуут ӕмӕ уӕ сӕртыл схӕцут, уымӕн ӕмӕ ӕрхӕстӕг уӕ фервӕзыны афон». 29 Ӕмӕ сын Йесо загъта фӕсномыг ныхас: «Акӕсут-ма легъуибӕласмӕ ӕмӕ иннӕ бӕлӕстӕм. 30 Уыдоны сыфтӕр рафтаугӕ куы фенут, уӕд ӕй уӕхӕдӕг дӕр фӕзонут, сӕрд кӕй ӕрӕввахс. 31 Уӕдӕ сымах ӕппӕт уыдӕттӕ ӕххӕстгӕнгӕ куы фенат, уӕд-иу зонут, Хуыцауы Паддзахад кӕй ӕрӕввахс, уый. 32 Ӕцӕг уын зӕгъын: ацы фӕлтӕр нӕма аивгъуыйдзӕни, цалынмӕ ӕппӕт уыдӕттӕ ӕрцӕуой. 33 Арв ӕмӕ зӕхх нал уыдзысты, Мӕ ныхӕстӕ та мыггагмӕ дӕр уыдзысты сӕ тыхы. 34 Кӕсут уӕхимӕ, цӕмӕй уӕ зӕрдӕтӕ ма суӕззау уой ӕнӕуаг цардӕй, фырнозтӕй, царды мӕтӕй, ӕмӕ уӕ уыцы бон ма ӕрӕййафа ӕнӕнхъӕлӕджы. 35 Уымӕн ӕмӕ уый къӕппӕгау ӕрцахсдзӕн ӕппӕт зӕххон цӕрджыты. 36 Уӕдӕ иудадзыг ут цӕттӕ ӕмӕ кувут, цӕмӕй уӕ бон бауа ӕппӕт уыцы ӕрцӕуинаг бӕллӕхты сӕрты ахизын ӕмӕ Адӕймаджы Фырты раз ӕрлӕууын». 37 Боныгон Йесо адӕмы ахуыр кодта Кувӕндоны, изӕрӕй та-иу ацыд ӕмӕ-иу Йе 'хсӕв арвыста, Елеон кӕй хуындӕуы, уыцы хохыл. 38 Ӕмӕ Йӕм ӕппӕт адӕм сӕумӕйӕ цыдысты Кувӕндонмӕ байхъусынмӕ.

Лука 22

1 Ӕрхӕстӕг Донгонд дзулты бӕрӕгбон, Куадзӕн кӕй хуындӕуы, уый. 2 Алчертӕ ӕмӕ динамонджытӕ агуырдтой, цӕсты сӕ чи нӕ бафтауа, Йесойы амарыны ахӕм фадат, уымӕн ӕмӕ адӕмӕй тӕрсгӕ кодтой. 3 Хӕйрӕг бацыд, Искариот кӕй хуындӕуыд, уыцы Иудӕйы – дыууадӕс ахуыргӕнинагӕй иуы. 4 Ӕмӕ Иудӕ ацыд, Йесойы куыд ауӕй кӕна, уый тыххӕй алчертимӕ ӕмӕ Кувӕндон хъахъхъӕнджыты хицӕуттимӕ баныхас кӕнынмӕ. 5 Уыдон бацин кодтой ӕмӕ сразы сты Иудӕйӕн ӕхца раттыныл. 6 Уый сын зӕрдӕ бавӕрдта ӕмӕ агуырдта, Йесо адӕмимӕ куыд нӕ уа, афтӕмӕй сын Ӕй сӕ къухтӕм раттыны фадат. 7 Ӕрхӕццӕ Донгонд дзулты бӕрӕгбон, Куадзӕны уӕрыкк ӕргӕвдыны бон. 8 Йесо арвыста Петр ӕмӕ Иоанны ӕмӕ сын загъта: «Ацӕут ӕмӕ нын ӕрӕвӕрут Куадзӕны фынг». 9 Уыдон Ӕй бафарстой: «Куыд Дӕ фӕнды, кӕм ӕй ӕрӕвӕрӕм?» 10 Уый сын загъта: «Сахармӕ куы бацӕуат, уӕд уыл сӕмбӕлдзӕн иу адӕймаг доны дурынимӕ. Цы хӕдзармӕ бацӕуа, уырдӕм-иу бацӕут йӕ фӕдыл, 11 Ӕмӕ-иу хӕдзары хицауӕн зӕгъут: „Ахуыргӕнӕг дын зӕгъы: Мӕ ахуыргӕнинӕгтимӕ Куадзӕн кӕм бахӕрон, уыцы уат кӕм ис?" 12 Ӕмӕ уын уый уӕллаг уӕладзыджы фенын кӕндзӕн стыр ӕфснайд уат; уым-иу ӕрӕвӕрут фынг». 13 Уыдон ацыдысты ӕмӕ ӕппӕт дӕр ссардтой, Йесо сын куыд загъта, афтӕ; ӕмӕ ӕрӕвӕрдтой Куадзӕны фынг. 14 Афон куы ӕрцыд, уӕд Йесо ӕмӕ апостолтӕ ӕрбадтысты фынгыл. 15 Йесо сын загъта: «Мӕ хъизӕмары размӕ Мӕ тынг фӕндыд ацы Куадзӕн уемӕ бахӕрын. 16 Уымӕн ӕмӕ уын зӕгъын: нал бахӕрдзынӕн Куадзӕн, цалынмӕ Хуыцауы Паддзахады алцӕмӕй дӕр сӕххӕст уа, уӕдмӕ». 17 Райста сӕны кӕхц, арфӕ ракодта ӕмӕ загъта: «Айсут ӕй ӕмӕ дзы алчидӕр баназӕд. 18 Уымӕн ӕмӕ уын зӕгъын, нал баназдзынӕн сӕнӕфсиры сӕнӕй, цалынмӕ Хуыцауы Паддзахад ӕрцӕуа, уӕдмӕ». 19 Уый фӕстӕ райста дзул, арфӕ ракодта, асаста йӕ, радта сын ӕй ӕмӕ загъта: «Ай Мӕ Буар у, ӕмӕ уӕ сӕраппонд лӕвӕрд цӕуы мӕлӕтмӕ. Афтӕ кӕнут Мӕ ӕрымысынӕн». 20 Ӕхсӕвӕры фӕстӕ райста сӕны кӕхц дӕр ӕмӕ загъта: «Ацы кӕхц у ног фидыд – уый фидаргонд цӕуы, сымах сӕраппонд чи акӕлдзӕни, Мӕ уыцы Тугӕй. 21 Фӕлӕ мӕнӕ Мӕ уӕйгӕнӕг Мемӕ иу фынгыл бады. 22 Адӕймаджы Фырт фӕивгъуыйы, нысангонд Ын цы фӕндаг у, ууыл. Фӕлӕ сар йӕ сӕр, гадзрахатӕй Йыл цы адӕймаг рацӕуа, уымӕн». 23 Уӕд райдыдтой кӕрӕдзи фӕрсын, Йӕ уӕйгӕнӕг чи уыдзӕни, зӕгъгӕ. 24 Рауад сӕм быцӕу дӕр, уӕлдӕрыл нымад сӕ чи хъуамӕ уа, ууыл. 25 Йесо сын загъта: «Паддзӕхтӕ хицауиуӕг кӕнынц адӕмтӕн, ӕмӕ адӕмтыл барджын чи у, уыдоны хӕрзгӕнджытӕ хуындӕуы. 26 Сымахмӕ та афтӕ ма уӕд, фӕлӕ уе 'хсӕн уӕлдӕр чи у, уый уын уӕд кӕстӕрау, хистӕр та – лӕггадгӕнӕгау. 27 Чи у уӕлдӕр – фынгыл бадӕг ӕви кӕстӕриуӕггӕнӕг? Фынгыл бадӕг уӕлдӕр нӕу, ӕви? Ӕз та уын кӕстӕриуӕггӕнӕгау дӕн. 28 Сымах Мӕ фӕлварӕнты Мемӕ уыдыстут. 29 Мӕ Фыд Мын Паддзахад куыд радта, афтӕ уын ӕй Ӕз дӕр дӕттын, 30 Цӕмӕй Мӕ Паддзахады хӕрат ӕмӕ нуазат Мӕ фынгыл. Ӕмӕ сбаддзыстут уӕле Израилы дыууадӕс хӕдзарвӕндагӕн тӕрхон кӕнынмӕ. 31 Симон, Симон, хӕйрӕг ракуырдта, цӕмӕй уӕ балуӕрстӕуа мӕнӕуау. 32 Фӕлӕ Ӕз куывтон дӕу тыххӕй, цӕмӕй дӕ уырнындзинад ма слӕмӕгъ уа. Ӕмӕ Мӕм куы раздӕхай, уӕд-иу сфидар кӕн де 'фсымӕрты уырнындзинад». 33 Петр Ын дзуапп радта: «Хицау, ӕз цӕттӕ дӕн Демӕ цӕуынмӕ ахӕстонмӕ дӕр ӕмӕ амӕлынмӕ дӕр». 34 Фӕлӕ Йесо загъта: «Зӕгъын дын, Петр, ахсӕв уасӕг нӕма ныууасдзӕн, афтӕ Мыл ӕртӕ хатты атигъ кӕндзынӕ дӕхи, ӕз Ӕй нӕ зонын, зӕгъгӕ». 35 Йесо сӕ бафарста: «Ӕз уӕ ӕнӕ ӕхцайы дзӕкъулӕй, ӕнӕ хордзенӕй, ӕнӕ дзабыртӕй куы ӕрвыстон, уӕд истӕмӕй хъуаг ӕййӕфтат?» Уыдон дзуапп радтой: «Ницӕмӕй». 36 Уӕд сын загъта: «Ныр та ӕхцайы дзӕкъул кӕмӕ ис, уый йӕ айсӕд йемӕ; хордзен кӕмӕ ис, уый дӕр ӕй айсӕд йемӕ. Ӕхца кӕмӕ нӕй, уый та ауӕй кӕнӕд йӕ пӕлӕз ӕмӕ балхӕнӕд кард. 37 Зӕгъын уын, Сыгъдӕг Фыст цы зӕгъы, уый Мыл хъуамӕ ӕрцӕуа: „Фыдгӕнджыты хыгъдмӕ Йӕ бахастӕуыд". Мӕн тыххӕй фыст цы ис, уый рӕхджы сӕххӕст уыдзӕн». 38 Уыдон загътой: «Хицау, мӕнӕ ам ис дыууӕ карды». Уый сын загъта: «Ӕгъгъӕд у!» 39 Йесо рацыд ӕмӕ иннӕ хӕттытау ныр дӕр та араст Елеоны хохмӕ. Йӕ ахуыргӕнинӕгтӕ дӕр ацыдысты Йӕ фӕдыл. 40 Бынатмӕ куы бахӕццӕ сты, уӕд сын загъта: «Кувут, цӕмӕй фӕлварӕны ма бахауат». 41 Дур кӕйонг фехсӕн ис, Йесо уыйбӕрц фӕхибар, ӕрзоныгыл ӕмӕ куывта: 42 «Мӕ Фыд, кӕд Дын фӕндон разына, уӕд Мын ацы хъизӕмӕртты кӕхц ма бадар. Ӕниу, Мӕн куыд фӕнды, афтӕ нӕ, фӕлӕ Дӕу куыд фӕнды, афтӕ фӕуӕд». 43 [Уӕд Ӕм уӕларвӕй ӕрцыди зӕд ӕмӕ Йӕ удвидар кодта. 44 Утӕхсӕн кӕнгӕйӕ, Йесо куывта зӕрдиагдӕрӕй; ӕмӕ Йӕ хид туджы ӕртӕхтау тагъди зӕхмӕ.] 45 Куывд куы фӕци, уӕд бацыд Йӕ ахуыргӕнинӕгтӕм ӕмӕ сӕ баййӕфта фынӕйӕ, уымӕн ӕмӕ сын мӕт сӕ тых асаста. 46 Йесо сын загъта: «Цы фынӕй кӕнут? Сыстут ӕмӕ кувут, цӕмӕй фӕлварӕны ма бахауат». 47 Йесо Йӕ ныхас нӕма фӕци, афтӕ фӕзындысты адӕм; дыууадӕс ахуыргӕнинагӕй иу, Иудӕ, цыди сӕ разӕй. Уый бацыд Йесомӕ аба Йын кӕнынмӕ. 48 Йесо йын загъта: «Иудӕ, байӕ гадзрахатӕй цӕуыс Адӕймаджы Фыртыл?» 49 Хъуыддаг цӕмӕ цӕуы, Йесойы ахуыргӕнинӕгтӕ уый куы федтой, уӕд Ын загътой: «Хицау, кардӕй цӕвӕм?» 50 Ӕмӕ сӕ иу кардӕй ныццавта алчеры цагъары ӕмӕ йын йӕ рахиз хъус ахауын кодта. 51 Уӕд Йесо загъта: «Ӕрсабыр ут». Бавнӕлдта цагъары хъусмӕ ӕмӕ йын ӕй сдзӕбӕх кодта. 52 Йе 'рцахсынмӕ ӕрцӕуӕг алчертӕн, Кувӕндон хъахъхъӕнджыты хицӕуттӕн ӕмӕ адӕмы хистӕртӕн Йесо загъта: «Цыма абырӕджы ахсут, уыйау Мӕм кӕрдтӕ ӕмӕ хъилтимӕ куы рацыдыстут. 53 Ӕз ӕрвылбон Кувӕндоны уемӕ уыдтӕн, ӕмӕ Мыл уӕ къух нӕ андзӕвыд. Фӕлӕ ныр уӕ рӕстӕг ӕрцыд – талынг хицауиуӕг кӕны». 54 Уӕд Йесойы ӕрцахстой ӕмӕ Йӕ акодтой алчеры хӕдзармӕ. Петр дӕрддзӕф цыди сӕ фӕдыл. 55 Кӕрты астӕу арт куы скодтой ӕмӕ куы сбадтысты, уӕд Петр дӕр сбадти семӕ. 56 Иу лӕггадгӕнӕг сылгоймаг Петры федта арты рухсмӕ, ӕдзынӕг ӕм ныккаст ӕмӕ загъта: «Ай дӕр Йемӕ уыд». 57 Фӕлӕ Йыл Петр атигъ кодта йӕхи: «Хорз ус, ӕз Ӕй нӕ зонын». 58 Чысыл фӕстӕдӕр ӕй федта ӕндӕр чидӕр ӕмӕ йын загъта: «Ды дӕр уыдонӕй дӕ». Петр уымӕн дӕр загъта: «Нӕ дӕн». 59 Рацыд сахаты бӕрц, ӕмӕ та иу ӕндӕр адӕймаг дӕр фидарӕй дзырдта: «Ай дӕр ӕнӕмӕнг Йемӕ уыд, уымӕн ӕмӕ галилейаг у». 60 Фӕлӕ Петр уымӕн дӕр загъта: «Цы дзурыс, уый нӕ зонын». Петр йӕ ныхас нӕма фӕци, афтӕ уасӕг ныууасыд. 61 Уӕд Хицау Йе 'ргом разылдта ӕмӕ бакаст Петрмӕ. Ӕмӕ Петр ӕрымысыд, Хицау ын цы загъта, уый: «Ахсӕв уасӕг нӕма ныууасдзӕн, афтӕ Мыл ӕртӕ хатты атигъ кӕндзынӕ дӕхи». 62 Петр рацыд ӕддӕмӕ ӕмӕ судзаг цӕссыгтӕй ныккуыдта. 63 Йесойы чи хъахъхъӕдта, уыцы адӕм Дзы хынджылӕг кодтой ӕмӕ Йӕ надтой. 64 Сӕхгӕдтой-иу Ын Йӕ цӕстытӕ ӕмӕ Йӕ фарстой: «Кӕд пехуымпар дӕ, уӕд Дӕ чи ныццавта, уый базон». 65 Ӕмӕ Йын дзырдтой бирӕ ӕндӕр фауӕн ныхӕстӕ. 66 Куы сбон, уӕд ӕрӕмбырд сты адӕмы хистӕртӕ, алчертӕ, динамонджытӕ, ӕмӕ Йӕ бакодтой сӕ синедрионмӕ. 67 Бафарстой Йӕ: «Зӕгъ-ма нын, Ды дӕ Чырысти?» Уый сын загъта: «Куы уын зӕгъон, уӕд дӕр уӕ нӕ бауырндзӕн; 68 Куы уӕ бафӕрсон, уӕд дӕр Мын дзуапп нӕ ратдзыстут. 69 Нырӕй фӕстӕмӕ Адӕймаджы Фырт ӕрбаддзӕн Ӕппӕтхъомыс Хуыцауы рахиз фарс». 70 Уӕд сеппӕт дӕр загътой: «Уӕдӕ Ды Хуыцауы Фырт дӕ?» Уый сын дзуапп радта: «Уӕхӕдӕг ӕй куы зӕгъут, Ӕз Хуыцауы Фырт кӕй дӕн, уый». 71 Уыдон загътой: «Цавӕр ӕвдисӕйнаг ма нӕ хъӕуы? Йӕхи дзыхӕй йын ӕй куы фехъуыстам!»

Лука 23

1 Уӕд сыстадысты сеппӕт дӕр ӕмӕ Йӕ акодтой Пилатмӕ. 2 Уым Ӕй райдыдтой зылын кӕнын: «Мах сбӕлвырд кодтам, Ай нын халы нӕ адӕмы, кесӕрӕн хъалон фидын нӕ уадзы ӕмӕ Йӕхи хоны Чырысти, ома, Паддзах». 3 Пилат Ӕй бафарста: «Ды дӕ иудейаг Паддзах?» Йесо йын дзуапп радта: «Дӕхӕдӕг ӕй куы зӕгъыс». 4 Пилат алчертӕн ӕмӕ адӕмӕн загъта: «Ӕз ацы Адӕймагмӕ ницы азым арын». 5 Фӕлӕ уыдон сӕ фӕнд тардтой, зӕгъгӕ, Йӕ ахуырадӕй адӕмы змӕнты ӕппӕт Иудейӕйы – Галилейӕ райдай, ӕмӕ суанг мӕнӕ ацы бынаты онг. 6 Пилат уый куы фехъуыста, уӕд бафарста: «Ацы Лӕг галилейаг у?» 7 Ӕмӕ Ироды дӕлбар бӕстӕйӕ кӕй у, уый куы базыдта, уӕд Йесойы арвыста Иродмӕ – уыцы рӕстӕг Ирод дӕр Иерусалимы уыд. 8 Ирод Йесойы куы федта, уӕд тынг бацин кодта, уымӕн ӕмӕ йӕ рагӕй фӕндыд Йӕ фенын. Йесойы тыххӕй бирӕ хӕттыты фехъуыста, стӕй Йӕм ӕнхъӕлмӕ каст исты диссаг равдисынмӕ. 9 Ӕмӕ Йӕ фарста бирӕ цӕмӕйдӕрты, фӕлӕ йын Йесо ницы дзуапп радта. 10 Алчертӕ ӕмӕ динамонджытӕ та лӕууыдысты уым ӕмӕ Йӕ тынг зылын кодтой. 11 Ирод Ӕй бафхӕрдта йе 'фсӕддонтимӕ, фӕхынджылӕг Дзы кодтой, зынаргъ дарӕс Ыл скодтой ӕмӕ Йӕ фӕстӕмӕ арвыстой Пилатмӕ. 12 Ӕмӕ уыцы бон Пилат ӕмӕ Ирод балымӕнтӕ сты, уымӕй размӕ та кӕрӕдзимӕ фыдӕх хастой. 13 Пилат басидт алчертӕм, хицӕуттӕм ӕмӕ адӕммӕ, 14 Ӕмӕ сын загъта: «Сымах мӕм ӕркодтат ацы Лӕджы, цыма адӕмы халы. Ӕз уӕ разы равзӕрстон хъуыддаг, ӕмӕ ацы Лӕджы цы фыдракӕндты азымджын кӕнут, ахӕмӕй Йӕм ницы ссардтон. 15 Ирод дӕр Ӕм ницы азым ссардта ӕмӕ нӕм Ӕй раздӕхта. Гъемӕ уӕдӕ, мӕлӕтмӕ Йӕ цӕй тыххӕй рардӕуа, ахӕмӕй ницы сарӕзта. 16 Ныр Ӕй фӕнӕмын кӕндзынӕн ехсӕй, ӕмӕ Йӕ рауадздзынӕн». 17 [Пилаты та бӕрӕгбоны тыххӕй уыдонӕн иу ахӕсты рауадзын хъуыд.] 18 Фӕлӕ адӕм сеппӕт дӕр хъӕр систой: «Амар Ӕй! Вараввӕйы нын рауадз!» 19 Вараввӕйы та ахӕстонмӕ баппӕрстӕуыд, сахары цавӕрдӕр змӕст кӕй сарӕзта ӕмӕ туг кӕй ныккалдта, уый тыххӕй. 20 Пилат адӕмимӕ ногӕй райдыдта ныхас кӕнын – фӕндыд ӕй Йесойы рауадзын. 21 Фӕлӕ уыдон хъӕр кодтой: «Байтындз Ӕй, байтындз Ӕй!» 22 Пилат сын ӕртыккаг хатт загъта: «Уагӕр ӕвзӕрӕй цы ракодта? Мӕлӕтмӕ Йӕ цӕй тыххӕй рардӕуа, ахӕмӕй Йӕм ницы ссардтон. Гъемӕ Йӕ фӕнӕмын кӕндзынӕн ехсӕй, ӕмӕ Йӕ рауадздзынӕн». 23 Фӕлӕ хъӕрӕй сӕ фӕнд тардтой – домдтой Йесойы байтындзын. Сӕ хъӕрӕй басастой Пилаты, 24 Ӕмӕ Пилат хъуыддаг алыг кодта, уыдон куыд домдтой, афтӕ: 25 Змӕсты ӕмӕ туг ныккалыны азымимӕ ахӕстонмӕ кӕй баппӕрстӕуыд ӕмӕ адӕм кӕй тыххӕй хатыдысты, уыцы Вараввӕйы рауагъта; Йесойы та сын сӕ бар бакодта. 26 Ӕмӕ Йӕ куы акодтой, уӕд ӕрурӕдтой, фӕссахарӕй чи ӕрбацӕйцыд, иу ахӕм кириниаг лӕг Симоны; ӕмӕ йӕ бафтыдтой дзуар Йесойы фӕдыл ӕккойӕ хӕссыныл. 27 Йесойы фӕстӕ цыди дзӕвгар адӕм; се 'хсӕн уыди, чи Йыл дзынӕзта ӕмӕ хъарӕг кодта, бирӕ ахӕм сылгоймӕгтӕ. 28 Йесо сӕм разылд ӕмӕ сын загъта: «Иерусалимы чызджытӕ, Мӕныл ма кӕут, фӕлӕ кӕут уӕхиуыл ӕмӕ уӕ сывӕллӕттыл. 29 Уымӕн ӕмӕ мӕнӕ ӕрцӕуы ахӕм рӕстӕг, ӕмӕ дзурдзысты: „Тӕхудиаг сты ӕнӕзӕнӕгтӕ, чи нӕ ныййардта, уыцы гуыбынтӕ, сывӕллонӕн ӕхсыр чи нӕ дардта, уыцы риутӕ!" 30 Уӕд хӕхтӕм райдайдзысты хатын: „Ӕркӕлут ныл!", ӕмӕ къуыбыртӕм: „Бамбӕхсут нӕ!" 31 Уымӕн ӕмӕ кӕд цъӕхсыф бӕласӕн афтӕ кӕнынц, уӕд уагӕр хуыскъ бӕласыл та цы ӕрцӕудзӕн?» 32 Йемӕ ма Йын марынмӕ кодтой дыууӕ фыдгӕнӕджы дӕр. 33 Ӕмӕ Сӕргӕхц чи хуыйны, уыцы бынатмӕ куы бахӕццӕ сты, уӕд уым дзуарыл байтыгътой Йесойы ӕмӕ фыдгӕнджыты: иуы рахизырдыгӕй, иннӕйы та галиуырдыгӕй. 34 Йесо дзырдта: «Мӕ Фыд, ныббар сын, уымӕн ӕмӕ цы аразынц, уый нӕ зонынц». Йӕ дарӕстыл Ын хӕлттӕ сӕппӕрстой ӕмӕ сӕ се 'хсӕн байуӕрстой. 35 Адӕм лӕууыдысты ӕмӕ кастысты. Худтысты Йыл хицӕуттӕ дӕр: «Иннӕты ирвӕзын кодта; ныр Йӕхи фервӕзын кӕнӕд, кӕд Хуыцауы ӕвзӕрст Чырысти у, уӕд». 36 Хынджылӕг Дзы кодтой ӕфсӕддонтӕ дӕр – бацыдысты-иу Ӕм, Йӕ дзыхмӕ-иу Ын схастой туаг сӕн, 37 Ӕмӕ дзырдтой: «Кӕд иудейаг Паддзах дӕ, уӕд Дӕхи фервӕзын кӕн». 38 Йӕ сӕрмӕ [бердзенагау, ромагау ӕмӕ дзуттагау] фыст уыди: «Ай у иудейаг Паддзах». 39 Тыгъд фыдгӕнджытӕй иу фаудта Йесойы: «Чырысти нӕ дӕ, ӕви? Фервӕзын кӕн Дӕхи дӕр ӕмӕ мах дӕр». 40 Иннӕ та йын уайдзӕф кодта: «Ау, Хуыцауӕй нӕ тӕрсыс, дӕуӕн дӕр ахӕм тӕрхон куы рахастӕуыд? 41 Махӕн раст тӕрхон рахастой – нӕ хъуыддӕгтӕм гӕсгӕ йӕ райстам; уый та ӕвзӕрӕй ницы сарӕзта». 42 Ӕмӕ загъта: «Йесо, Дӕ Паддзахадмӕ куы бацӕуай, уӕд-иу мӕ ӕрымыс!» 43 Йесо йын загъта: «Ӕцӕг дын зӕгъын, тӕккӕ абон Мемӕ уыдзынӕ дзӕнӕты». 44 Уыдис ӕхсӕзӕм сахатмӕ хӕстӕг. Бӕстӕ ӕгасӕй дӕр баталынг, ӕмӕ афтӕ ахаста фарӕстӕм сахаты онг, 45 Уымӕн ӕмӕ хур рухс нал кодта. Кувӕндоны мидӕг ӕмбӕрзӕн аскъуыд йӕ хӕдастӕуыл. 46 Йесо хъӕрӕй ныууынӕргъыдта: «Мӕ Фыд, Дӕ къухтӕм Дын дӕттын Мӕ уд». Ӕмӕ афтӕ куы загъта, уый фӕстӕ Йӕ уд систа. 47 Цы ӕрцыди, уый сӕдӕйыхицау куы федта, уӕд кад кодта Хуыцауӕн ӕмӕ загъта: «Ацы Адӕймаг, ӕнӕмӕнг, рӕстгӕнӕг уыди». 48 Бакӕсынмӕ цы адӕм ӕрбамбырд сты, уыдон хабар куы федтой, уӕд, сӕ риутӕ хойгӕйӕ, здӕхтысты сӕхимӕ. 49 Йесойы зонгӕтӕ та сеппӕт дӕр, стӕй Йӕ фӕдыл Галилейӕ чи рацыд, уыцы сылгоймӕгтӕ дӕр лӕууыдысты дӕрддзӕф ӕмӕ кастысты, цытӕ цӕуы, уымӕ. 50 Уыд иу лӕг, йӕ ном – Иосиф, синедрионы уӕнг, хорз ӕмӕ раст адӕймаг, 51 Иудейаг сахар Аримафейӕ; ӕнхъӕлмӕ каст Хуыцауы Паддзахадмӕ. Уый разы нӕ уыд, синедрион цы уынаффӕ рахаста ӕмӕ цы сарӕзта, уыимӕ. 52 Иосиф бацыди Пилатмӕ Йесойы мард ракурынмӕ. 53 Ӕриста йӕ, батыхта йӕ уӕздан кӕттаджы ӕмӕ йӕ бавӕрдта, къӕдзӕхы цы зӕппадз къахт уыди, уым; ӕвӕрд дзы ничима уыд. 54 Уыди майрӕмбон, сабатмӕ бирӕ нал уыд. 55 Йесойӕн Галилейӕ Йӕ фӕстӕ цы сылгоймӕгтӕ рацыд, уыдон дӕр ацыдысты ӕмӕ федтой зӕппадз, стӕй дзы Йесойы мард куыд бавӕрдтой, уый дӕр. 56 Куы раздӕхтысты, уӕд ӕрцӕттӕ кодтой хӕрздӕфгӕнӕнтӕ. Сабат сын, иудейаг Ӕгъдаумӕ гӕсгӕ, уыди ӕнцойбон.

Лука 24

1 Къуырийӕн йӕ фыццаг бон та сӕумӕйӕ ӕрцыдысты зӕппадзмӕ; семӕ ӕрхастой, цы хӕрздӕфгӕнӕнтӕ ӕрцӕттӕ кодтой, уыдон. 2 Зӕппадзы дур ӕрӕййӕфтой фӕлдӕхтӕй. 3 Бацыдысты мидӕмӕ, фӕлӕ дзы Хицау Йесойы мард не ссардтой, 4 Ӕмӕ фӕджих сты. Ӕваст сӕ разы февзӕрдысты дыууӕ лӕджы ӕрттивгӕ дарӕсы. 5 Сылгоймӕгты тас бацыди, сӕ сӕртӕ ӕруагътой, фӕлӕ сын лӕгтӕ загътой: «Удӕгасы мӕрдтимӕ цы агурут? 6 Ам нӕй, райгас и. Галилейы ма куы уыди, уӕд уын цы дзырдта, уый уӕ зӕрдыл ӕрлӕууӕд: 7 „Адӕймаджы Фырт хъуамӕ лӕвӕрд ӕрцӕуа тӕригъӕдджын адӕмы къухтӕм, байтындздзысты Йӕ дзуарыл ӕмӕ ӕртыккаг бон райгас уыдзӕн"». 8 Уӕд сылгоймӕгтӕн сӕ зӕрдыл ӕрлӕууыдысты Йесойы ныхӕстӕ. 9 Раздӕхтысты зӕппадзӕй ӕмӕ ӕппӕт уыдӕтты тыххӕй радзырдтой иуӕндӕс ахуыргӕнинагӕн, стӕй иннӕтӕн дӕр. 10 Уыцы сылгоймӕгтӕ уыдысты магдалӕйаг Мариа, Иоаннӕ, Иаковы мад Мариа ӕмӕ иннӕтӕ, семӕ ма чи уыдис, уыдон. Хабар радзырдтой апостолтӕн, 11 Фӕлӕ сӕм сылгоймӕгты ныхӕстӕ дзӕгъӕлы дзӕнгӕдайау фӕкастысты, ӕмӕ сыл нӕ баууӕндыдысты. 12 Петр уӕддӕр сыстад ӕмӕ азгъордта зӕппадзмӕ, ӕргуыбыр кодта, бакаст ӕм, федта дзы ӕрмӕстдӕр мӕрддзӕгтӕ ӕмӕ фӕстӕмӕ раздӕхт, цы ӕрцыд, ууыл хинымӕр дисгӕнгӕйӕ. 13 Уыцы бон ахуыргӕнинӕгтӕй дыууӕ фӕцӕйцыдысты, Иерусалимӕй ӕртиссӕдз стадийы дӕрддзӕф цы Эммаусы хъӕу лӕууыд, уырдӕм. 14 Ныхас кодтой, цы ӕрцыд, ӕппӕт уыцы цаутыл. 15 Ӕмӕ ныхас куыд кодтой ӕмӕ кӕрӕдзийӕн сӕ хъуыдытӕ куыд дзырдтой, афтӕ сӕм Йесо Йӕхӕдӕг бахӕстӕг ӕмӕ баиу семӕ. 16 Фӕлӕ сӕ цӕстытӕй рӕстмӕ нал уынӕгау Ӕй нӕ базыдтой. 17 Йесо сӕ бафарста: «Уый цӕуыл дзурут цӕугӕ-цӕуын?» Уыдон ӕнкъардӕй ӕрлӕууыдысты. 18 Сӕ иу, Клеопа, дзуапп радта Йесойӕн: «Иерусалиммӕ ӕрцӕуджытӕй, ӕвӕццӕгӕн, иунӕг Ды нӕ зоныс, ацы бонты уым цы ӕрцыд, уыдӕтты тыххӕй?» 19 Йесо сӕ бафарста: «Цы нӕ зонын?» Уыдон Ын загътой: «Назаретаг Йесойы хабар. Хъуыддагӕй дӕр ӕмӕ ныхасӕй дӕр Уый тыхджын пехуымпар уыди Хуыцауы ӕмӕ ӕппӕт адӕмы раз. 20 Нӕ алчертӕ ӕмӕ Йӕ нӕ хицӕуттӕ радтой мӕлӕты тӕрхон Ын рахӕссынмӕ, ӕмӕ Йӕ дзуарыл байтыгътой. 21 Мах та нӕхицӕн ныфсытӕ ӕвӕрдтам, Израилы Чи фервӕзын кӕндзӕн, Уый у, зӕгъгӕ. Уыимӕ Йӕ байтындзыныл ныр ӕртыккаг бон цӕуы, 22 Ӕмӕ нӕ сылгоймӕгтӕй чидӕртӕ мах дисы бафтыдтой – сӕумӕйӕ уыдысты зӕппадзы цур, 23 Фӕлӕ Йын Йӕ мард не ссардтой. Ӕрцыдысты ӕмӕ радзырдтой, зӕдтӕ нӕм фӕзындысты ӕмӕ нын загътой, Йесо удӕгас у, зӕгъгӕ. 24 Уӕд махӕй чидӕртӕ ацыдысты зӕппадзмӕ ӕмӕ алцыдӕр ссардтой, сылгоймӕгтӕ куыд загътой, афтӕмӕй; Йӕхи та Йын нӕ федтой». 25 Уӕд сын Йесо загъта: «О ӕнӕмбаргӕтӕ! Пехуымпартӕ цы загътой, ӕппӕт уыдӕттыл куыд зынтӕй ӕууӕндут! 26 Чырыстийӕн афтӕ фӕхъизӕмар кӕнын ӕмӕ Йӕ намыс райсын не 'мбӕлд, ӕви?» 27 Ӕмӕ сын, Моисейӕ ӕмӕ ӕппӕт пехуымпартӕй райдайгӕйӕ, бамбарын кодта, ӕппӕт Фыстыты Йӕхи тыххӕй цы загъд ис, уыдӕттӕ иууылдӕр. 28 Цы хъӕумӕ цыдысты, уымӕ куы баввахс сты, уӕд Йесо Йӕхи дарддӕр цӕуӕг скодта. 29 Фӕлӕ Йӕ уыдон урӕдтой, лӕгъстӕ Йын кодтой: «Баззай немӕ, тагъд баизӕр уыдзӕн, бон фӕвӕййы». Уӕд бацыди хъӕумӕ ӕмӕ баззади семӕ. 30 Ӕмӕ Йесо семӕ фынгыл куы ӕрбадт, уӕд райста дзул, арфӕ ракодта, асаста йӕ ӕмӕ сӕм ӕй радта. 31 Уӕд ракастысты сӕ цӕстытӕй, базыдтой Йӕ, фӕлӕ Йӕ цӕстӕй нал уыдтой. 32 Ӕмӕ кӕрӕдзийӕн загътой: «Фӕндагыл немӕ куы ныхас кодта ӕмӕ нын Сыгъдӕг Фыст куы амыдта, уӕд нӕ риуы нӕ зӕрдӕтӕ нӕ сыгъдысты, ӕви?» 33 Уайтӕккӕ сыстадысты ӕмӕ раздӕхтысты Иерусалиммӕ, ӕмӕ уым баййӕфтой иуӕндӕс ахуыргӕнинаджы иннӕтимӕ иумӕ – 34 Уыдон дзырдтой, Хицау бӕлвырд райгас ӕмӕ Йӕхи равдыста Симонмӕ, зӕгъгӕ. 35 Уӕд сын ацы дыууӕ радзырдтой, фӕндагыл цы ӕрцыд, стӕй Йесо дзул куы асаста, уӕд Ӕй куыд базыдтой, уыдӕтты тыххӕй. 36 Уыдӕтты тыххӕй куы дзырдтой, уӕд мӕнӕ Йесо Йӕхӕдӕг лӕууы се 'хсӕн ӕмӕ сын зӕгъы: «Фӕрнджын ут!» 37 Уыдон фӕджих сты ӕмӕ сӕ тас бацыди – афтӕ фенхъӕлдтой, цыма уд уынынц. 38 Фӕлӕ сын Йесо загъта: «Цӕуыл скатай стут ӕмӕ уӕм ахӕм хъуыдытӕ цӕмӕн ӕвзӕры? 39 Фенут Мын Мӕ къухтӕ ӕмӕ Мӕ къӕхтӕ: ай Ӕз Мӕхӕдӕг дӕн. Басгарут Мӕ ӕмӕ сбӕлвырд кӕнут: удӕн фыд ӕмӕ стджытӕ нӕй, Мӕнӕн та ис, куыд уынут, афтӕмӕй». 40 Уый зӕгъыны фӕстӕ сын фенын кодта Йӕ къухтӕ ӕмӕ Йӕ къӕхтӕ. 41 Фырцинӕй сӕ куы нӕма уырныдта ӕмӕ дисы куы бафтыдысты, уӕд сын загъта: «Исты хӕринаг уӕм ис?» 42 Радтой Йын физонӕг кӕсаджы кӕрдих, 43 Райста йӕ ӕмӕ сӕ разы бахордта. 44 Ӕмӕ сын загъта: «Уемӕ ма куы уыдтӕн, уӕд уын Ӕз уый тыххӕй дзырдтон, Моисейы Ӕгъдауы, пехуымпарты чингуыты ӕмӕ псаломты Мӕн тыххӕй цы загъд ис, ӕппӕт уыдӕттӕ хъуамӕ сӕххӕст уой, зӕгъгӕ». 45 Уӕд сын байгом кодта сӕ зонд Сыгъдӕг Фыст ӕмбарынӕн, 46 Ӕмӕ сын загъта: «Сыгъдӕг Фыст афтӕ зӕгъы, Чырысти хъуамӕ фӕхъизӕмар кодтаид ӕмӕ ӕртыккаг бон мӕрдтӕй райгас уыдаид; 47 Ӕмӕ, Иерусалимӕй райдайгӕйӕ, ӕппӕт адӕмтӕм Йӕ номӕй фӕсидтӕуа, цӕмӕй ӕрфӕсмон кӕной ӕмӕ сын ныббарстӕуа сӕ тӕригъӕдтӕ. 48 Уымӕн сымах стут ӕвдисӕнтӕ. 49 Ӕз уын рарвитдзынӕн, Мӕ Фыд зӕрдӕ кӕмӕй бавӕрдта, уый. Ӕмӕ уал баззайут ацы сахары, цалынмӕ уӕларвон тыхӕй схайджын уат, уӕдмӕ». 50 Ӕмӕ сӕ сахарӕй рахуыдта Вифанийы онг, систа Йӕ къухтӕ уӕлӕмӕ ӕмӕ сыл арфӕ бафтыдта. 51 Арфӕтӕ сыл куы ӕфтыдта, уӕд адард уыдонӕй ӕмӕ Йӕ уӕларвмӕ систӕуыд. 52 Уыдон Ӕм бакуывтой ӕмӕ стыр цинимӕ раздӕхтысты Иерусалиммӕ. 53 Уӕдӕй фӕстӕмӕ иудадзыг уыдысты Кувӕндоны ӕмӕ кад кодтой Хуыцауӕн.

Иоанн 1

1 Райдианы уыди Дзырд, ӕмӕ Дзырд уыди Хуыцаумӕ, ӕмӕ Дзырд уыди Хуыцау. 2 Уый райдианы уыди Хуыцаумӕ. 3 Ӕппӕт дӕр Уый фӕрцы сфӕлдыстӕуыд, ӕмӕ цыдӕриддӕр сфӕлдыстӕуыд, уыдонӕй ӕнӕ Уымӕй ницы сфӕлдыстӕуыд. 4 Уый уыди царддӕттӕг, ӕмӕ уыцы цард ӕппӕт адӕмӕн уыди рухс. 5 Рухс талынджы рухс кӕны, ӕмӕ йыл талынг нӕ фӕтых. 6 Уыди Хуыцауӕй ӕрвыст лӕг, йӕ ном Иоанн. 7 Уый ӕрцыд ӕвдисӕнӕн – Рухсы тыххӕй зӕгъынмӕ, цӕмӕй адӕм йӕ фӕрцы иууылдӕр баууӕндой. 8 Уый йӕхӕдӕг рухс нӕ уыд, фӕлӕ ӕрвыст уыди Рухсы тыххӕй зӕгъынмӕ. 9 Уыцы Рухс уыди ӕцӕг Рухс, Уый рухс кӕны, дунемӕ чидӕриддӕр ӕрцӕуы, уыдоны. 10 Уый уыди, Йӕ фӕрцы кӕй сфӕлдыстӕуыд, уыцы дунейы, фӕлӕ Йӕ дуне нӕ базыдта. 11 Ӕрцыд йӕхионтӕм, ӕмӕ Йыл йӕхионтӕ нӕ баууӕндыдысты. 12 Фӕлӕ Йыл чи баууӕндыд, уыдонӕн радта Хуыцауы хъӕбултӕ суӕвыны бар. 13 Уыдон райгуырдысты нӕдӕр туг ӕмӕ стӕгӕй, нӕдӕр нӕлгоймаджы фӕндӕй, фӕлӕ – Хуыцауӕй. 14 Дзырд сси Адӕймаг ӕмӕ ӕрцарди не 'хсӕн, уыди хорзӕхы ӕмӕ ӕцӕгады суадон. Ӕмӕ мах федтам Йӕ намыс – Фыды иунӕг Фырты намыс. 15 Иоанн Фырты тыххӕй лӕууы ӕвдисӕн ӕмӕ хъӕлӕсыдзагӕй зӕгъы: «Ай Уый у, ӕз афтӕ Кӕй тыххӕй загътон: „Мӕ фӕстӕ Чи цыди, Уый фӕци мӕ разӕй, уымӕн ӕмӕ ӕз нӕма уыдтӕн, Уый та уыди"». 16 Ӕмӕ Йӕ ӕгӕрон хъӕздыгдзинадӕй мах райстам хорзӕх хорзӕхы фӕдыл. 17 Уымӕн ӕмӕ Ӕгъдау Моисейы фӕрцы лӕвӕрд ӕрцыд, хорзӕх ӕмӕ ӕцӕгад та Йесо Чырыстийы фӕрцы лӕвӕрд сты. 18 Хуыцауы никуы ничи федта, фӕлӕ Йӕ раргом кодта Йӕ иунӕг Фырт – Фыдимӕ иу ӕмӕ ӕцӕг Хуыцау Чи у, Уый. 19 Иудейтӕ Иерусалимӕй сауджынты ӕмӕ левитты куы арвыстой Иоанны бафӕрсынмӕ: «Ды чи дӕ?», 20 Уӕд ӕй уый нӕ басусӕг кодта ӕмӕ ӕргомӕй загъта, ӕз Чырысти нӕ дӕн, зӕгъгӕ. 21 Уӕд ӕй бафарстой: «Уӕдӕ чи дӕ? Илиа дӕ?» Уый загъта: «Илиа нӕ дӕн». «Пехуымпар дӕ?» Уый дзуапп радта: «Нӕ дӕн». 22 Бафарстой та йӕ: «Уӕдӕ чи дӕ? Цы дзуапп раттӕм нӕ рарвитджытӕн? Дӕхӕдӕг дӕхи тыххӕй цы зӕгъдзынӕ?» 23 Уый сын дзуапп радта Исай-пехуымпары ныхӕстӕй: «Ӕз дӕн ӕдзӕрӕг ран фидиуӕджы хъӕлӕс: ӕмраст скӕнут Хицауӕн Йӕ фӕндаг». 24 Уӕд фарисейтӕ кӕй рарвыстой, 25 Уыдон ӕй бафарстой: «Уӕдӕ кӕд ды нӕдӕр Чырысти дӕ, нӕдӕр Илиа, нӕдӕр пехуымпар, уӕд цӕмӕн аргъауыс?» 26 Иоанн сын дзуапп радта: «Ӕз аргъауын донӕй, фӕлӕ уе 'хсӕн лӕууы, сымах Кӕй нӕ зонут, Уый – 27 Мӕ фӕстӕ Цӕуӕг. Ӕз Уымӕн Йӕ дзабыры бос райхалыны аккаг дӕр нӕ дӕн». 28 Ацы ныхас рауади Вифанийы, Иорданы иннӕ фарс, Иоанн кӕм аргъуыдта, уым. 29 Дыккаг бон Иоанн федта Йесойы ӕрбацӕйцӕугӕ ӕмӕ загъта: «Дунейы тӕригъӕд Чи фӕхӕссы, мӕнӕ Хуыцауы уыцы Уӕрыкк. 30 Ай Уый у, ӕз афтӕ Кӕй тыххӕй загътон: „Мӕ фӕстӕ цы Лӕг цӕуы, Уый фӕци мӕ разӕй, уымӕн ӕмӕ ӕз нӕма уыдтӕн, Уый та уыдис". 31 Ӕз Ӕй нӕ зыдтон. Фӕлӕ донӕй аргъауынмӕ уымӕн ӕрцыдтӕн, цӕмӕй Уый раргом уа Израилӕн». 32 Иоанн ӕвдисӕн лӕууыд: «Ӕз федтон Сыгъдӕг Уды уӕларвӕй бӕлонау Уымӕ ӕрцӕйцӕугӕ ӕмӕ Йемӕ баззайгӕ. 33 Ӕз Ӕй нӕ зыдтон, фӕлӕ мӕ донӕй аргъауынмӕ Чи рарвыста, Уый мын загъта: „Уды Кӕмӕ ӕрцӕйцӕугӕ ӕмӕ Кӕимӕ баззайгӕ фенай, Уый у Сыгъдӕг Удӕй аргъауӕг". 34 Ӕз уыдӕттӕ федтон ӕмӕ ӕвдисӕн лӕууын, Хуыцауы Фырт кӕй у, уый тыххӕй». 35 Дыккаг бон дӕр та Иоанн лӕууыд йӕ ахуыргӕнинӕгтӕй дыууӕимӕ. 36 Ӕмӕ Йесойы фӕцӕйцӕугӕ куы федта, уӕд загъта: «Мӕнӕ Хуыцауы Уӕрыкк». 37 Ахуыргӕнинӕгтӕ уыцы ныхӕстӕ куы фехъуыстой, уӕд сӕ дыууӕ дӕр ацыдысты Йесойы фӕдыл. 38 Йесо фӕстӕмӕ куы ракаст ӕмӕ сӕ Йӕ фӕдыл цӕугӕ куы федта, уӕд сын загъта: «Цы уӕ хъӕуы?» Уыдон Ын загътой: «Равви (ома, Ахуыргӕнӕг), кӕм цӕрыс?» 39 Уый сын загъта: «Рацӕут ӕмӕ йӕ фендзыстут». Уыдон ацыдысты ӕмӕ федтой, Йесо кӕм цӕры, уый. Ӕмӕ уыцы бон фесты Уымӕ. Уыди дӕс сахатмӕ хӕстӕг. 40 Иоаннӕй Йесойы тыххӕй чи фехъуыста ӕмӕ Йӕ фӕдыл чи ацыд, уыцы дыууӕйӕ иу уыдис Андрей, Симон Петры ӕфсымӕр. 41 Андрей ӕвӕстиатӕй бацагуырдта йе 'фсымӕр Симоны ӕмӕ йын загъта: «Мах ссардтам Мессиайы» (ома, Чырыстийы). 42 Уый фӕстӕ йӕ ӕркодта Йесомӕ. Йесо йӕм бакаст ӕмӕ йын загъта: «Иоанны фырт Симон, дӕ ном уыдзӕн Кифӕ» (ома, Петр) 43 Дыккаг бон Йесо скодта Галилеймӕ цӕуыны фӕнд. Ссардта Филиппы ӕмӕ йын загъта: «Цом Мемӕ». 44 Филипп та уыди вифсаидӕйаг, Андрей ӕмӕ Петр кӕцӕй уыдысты, уыцы сахайраг. 45 Филипп бацагуырдта Нафанаилы ӕмӕ йын загъта: «Мах ссардтам, Моисейы Ӕгъдауы Кӕй тыххӕй ис фыст, стӕй пехуымпартӕ Кӕй тыххӕй фыстой, уыцы Назаретаг Йесойы, Иосифы фырты». 46 Фӕлӕ йын Нафанаил загъта: «Назаретӕй дӕр хорзӕй исты рацӕудзӕн?» Филипп ын загъта: «Рацу ӕмӕ фен». 47 Йесо федта Нафанаилы ӕрбацӕйцӕугӕ ӕмӕ загъта: «Мӕнӕ ӕцӕг ӕнӕхин израилаг». 48 Нафанаил Ын загъта: «Ды мӕ цӕмӕй зоныс?» Йесо йын дзуапп радта: «Филипп дӕм куы нӕма фӕдзырдта, уӕд дӕ легъуибӕласы бын федтон». 49 Нафанаил Ын загъта: «Равви, Ды Хуыцауы Фырт дӕ, Израилы Паддзах». 50 Йесо йын дзуапп радта: «Ды ӕууӕндыс, уымӕн ӕмӕ дын загътон: „Ӕз дӕ федтон легъуибӕласы бын". Фендзынӕ уымӕй фылдӕр». 51 Ноджы ма йын загъта: «Ӕцӕг, ӕцӕг зӕгъын сымахӕн: [нырӕй фӕстӕмӕ] уындзыстут арвы дуар гомӕй ӕмӕ Хуыцауы зӕдты уӕларвмӕ ссӕугӕ ӕмӕ Адӕймаджы Фыртмӕ ӕрцӕугӕ».

Иоанн 2

1 Ӕртыккаг бон галилейаг Канӕйы уыди чындзӕхсӕв, ӕмӕ Йесойы Мад уыди уым. 2 Чындзӕхсӕвмӕ хуынд уыдысты Йесо ӕмӕ Йӕ ахуыргӕнинӕгтӕ дӕр. 3 Ӕмӕ сӕн куы фӕци, уӕд Йесойӕн Йӕ Мад загъта: «Сӕн сӕм нӕй». 4 Йесо йын дзуапп радта: «Уый Мӕнӕй цы домыс, Мӕ Мад? Мӕ рӕстӕг нӕма ӕрцыд». 5 Уӕд Йӕ Мад загъта лӕггадгӕнджытӕн: «Цы уын зӕгъа, уый бакӕнут». 6 Иудейаг ӕгъдаумӕ гӕсгӕ уым хи цӕхсынӕн уыди дурӕй конд ӕхсӕз донгарзы; цыдис сӕ фӕйнӕ дыууӕ-ӕртӕ къӕртайы 7 Йесо лӕггадгӕнджытӕн загъта: «Байдзаг кӕнут донгӕрзтӕ донӕй». Ӕмӕ сӕ байдзаг кодтой сӕ былтӕм. 8 Уӕд сын Йесо загъта: «Ныр сӕвгӕнут ӕмӕ ахӕссут фынгӕн уынаффӕгӕнӕгмӕ». Ӕмӕ ахастой. 9 Сӕн цы дон фестад, фынгӕн уынаффӕгӕнӕг уымӕй куы ацахуыста, – сӕн кӕцӕй у, уый та зонгӕ дӕр нӕ кодта, зыдтой йӕ ӕрмӕстдӕр донгӕрзтӕй дон сӕвгӕнӕг лӕггадгӕнджытӕ, – уӕд фӕдзырдта сиахсагмӕ 10 Ӕмӕ йын загъта: «Алчи раздӕр дзӕбӕх сӕн ӕрӕвӕры фынгыл, ӕмӕ сӕ фаг куы баназынц, уӕд та – ӕвзӕрдӕр. Ды та хорз сӕн нырмӕ ныууагътай». 11 Йесо галилейаг Канӕйы цы бакодта, уый уыди Йӕ диссӕгты райдайӕн, уымӕй равдыста Йӕ намыс ӕмӕ Йыл Йӕ ахуыргӕнинӕгтӕ баууӕндыдысты. 12 Уый фӕстӕ Йесо Йӕ Мадимӕ, Йе 'фсымӕртимӕ, Йӕ ахуыргӕнинӕгтимӕ ӕрцыд Капернауммӕ ӕмӕ дзы фесты цалдӕр боны. 13 Ӕрӕввахс иудейаг Куадзӕн, ӕмӕ Йесо ӕрцыд Иерусалиммӕ. 14 Кувӕндоны федта галтӕ, фыстӕ ӕмӕ бӕлӕттӕ уӕйгӕнджыты, ӕхцаивджыты бадгӕ. 15 Уӕд синагӕй скодта ехс, сеппӕты дӕр ратардта Кувӕндонӕй, стӕй фыстӕ ӕмӕ галтӕ дӕр, ӕхцаивджытӕн ныппырх кодта се 'хца, сӕ фынгтӕ сын афӕлдӕхта. 16 Бӕлӕттӕ уӕйгӕнджытӕн та загъта: «Айсут сӕ ардыгӕй ӕмӕ Мӕ Фыды Хӕдзарӕй уӕйгӕнӕн хӕдзар ма кӕнут». 17 Уӕд Йӕ ахуыргӕнинӕгтӕ ӕрымысыдысты, Сыгъдӕг Фыст цы зӕгъы, уый: «Дӕ Хӕдзарыл мӕт Мӕ удхарӕй мары». 18 Уӕд Ын иудейтӕ загътой: «Ахӕм бартӕ Дӕм кӕй ис, ууыл нӕ цавӕр ӕвдисӕйнагӕй баууӕндын кӕндзынӕ?» 19 Йесо сын дзуапп радта: «Фехалут ацы Кувӕндон, ӕмӕ йӕ Ӕз ӕртӕ бонмӕ сараздзынӕн». 20 Уӕд Ын иудейтӕ загътой: «Ацы Кувӕндон ӕхсӕз ӕмӕ дыууиссӕдз азы арӕзтой, Ды та йӕ ӕртӕ бонмӕ сараздзынӕ?» 21 Фӕлӕ Йесо цы Кувӕндоны тыххӕй дзырдта, уый уыди Йӕ буар. 22 Ӕмӕ Йесо мӕрдтӕй куы райгас, уӕд Йӕ ахуыргӕнинӕгтӕ ӕрымысыдысты уыцы ныхӕстӕ, ӕмӕ баууӕндыдысты Сыгъдӕг Фыстыл ӕмӕ Йесойы ныхасыл. 23 Куадзӕны бӕрӕгбоны Йесо Иерусалимы куы уыди, уӕд кӕй ӕвдыста, уыцы диссӕгтӕ федтой бирӕ адӕм ӕмӕ Йыл баууӕндыдысты. 24 Йесо сыл Йӕхӕдӕг та не 'ууӕндыд, уымӕн ӕмӕ зыдта сеппӕты дӕр, 25 Ӕмӕ Йын адӕймаджы тыххӕй исчи загътаид, уый сӕр Ӕй нӕ хъуыд – адӕймаджы зӕрдӕйы цы ис, уый Йӕхӕдӕг хорз зыдта.

Иоанн 3

1 Фарисейты ӕхсӕн уыд иу адӕймаг, йӕ ном Никодим, иудейаг хицӕуттӕй иу. 2 Уый ӕхсӕвы ӕрцыд Йесомӕ ӕмӕ Йын загъта: «Равви, Ды Хуыцауӕй ӕрцӕугӕ Ахуыргӕнӕг кӕй дӕ, уый мах зонӕм. Уымӕн ӕмӕ Ды цы диссӕгтӕ аразыс, уыдон кӕнын никӕй бон бауыдзӕн, Хуыцау йемӕ куы нӕ уа, уӕд». 3 Йесо йын дзуапп радта: «Ӕцӕг, ӕцӕг зӕгъын дӕуӕн: ногӕй чи нӕ райгуыра, уымӕн Хуыцауы Паддзахад фенын йӕ бон нӕ бауыдзӕн». 4 Никодим Ын загъта: «Карджын адӕймаг куыд хъуамӕ райгуыра? Ау, дыккаг хатт мады гуыбынмӕ бацӕуын ӕмӕ райгуырын йӕ бон бауыдзӕн?» 5 Йесо йын дзуапп радта: «Ӕцӕг, ӕцӕг зӕгъын дӕуӕн: дон ӕмӕ Удӕй чи нӕ райгуыра, уымӕн Хуыцауы Паддзахадмӕ бацӕуын йӕ бон нӕ бауыдзӕн. 6 Адӕймагӕй райгуыры адӕймаг, Удӕй та райгуыры уд. 7 Ма дис кӕн, Ӕз дын цы загътон, ууыл: „Ногӕй хъуамӕ райгуырат". 8 Уд дымгӕйау у: дымгӕйы кӕм фӕфӕнды, уым фӕдымы, йӕ уынӕр ын хъусыс, фӕлӕ кӕцӕй ӕрцӕуы ӕмӕ кӕдӕм ацӕуы, уый нӕ зоныс. Афтӕ вӕййы йӕ хабар, Удӕй чидӕриддӕр райгуыры, уымӕн». 9 Никодим Ӕй бафарста: «Уымӕн гӕнӕн куыд ис?» 10 Йесо йын дзуапп радта: «Ды Израилы адӕмы ахуыргӕнӕг куы дӕ, уӕд ӕй нӕ зоныс? 11 Ӕцӕг, ӕцӕг зӕгъын дӕуӕн: Мах цы зонӕм, ууыл дзурӕм, ӕмӕ цы федтам, уый тыххӕй ӕвдисӕн лӕууӕм, сымах та Не 'вдисӕнадыл не 'ууӕндут. 12 Зӕххон цы у, Ӕз уын уый тыххӕй загътон, ӕмӕ уӕ нӕ уырны; уӕларвон цы у, уый тыххӕй уын куы дзурон, уӕд та уӕ куыд бауырндзӕн? 13 Уӕларвмӕ ничима ссыди уырдыгӕй ӕрцӕуӕг Адӕймаджы Фырты йеддӕмӕ. 14 Ӕмӕ Моисей ӕрхуыйӕ калмы ӕдзӕрӕг бӕстӕйы уӕлӕмӕ куыд систа, афтӕ уӕлӕмӕ ист хъуамӕ ӕрцӕуа Адӕймаджы Фырт дӕр, 15 Чидӕриддӕр Ыл ӕууӕнды, уымӕн мыггагмӕйы цард куыд уа, афтӕ. 16 Уымӕн ӕмӕ Хуыцау афтӕ бауарзта дуне, ӕмӕ радта Йӕ Иунӕг Фырты, цӕмӕй Йыл чидӕриддӕр ӕууӕнды, уый ма фесӕфа, фӕлӕ йын уа мыггагмӕйы цард. 17 Уымӕн ӕмӕ Хуыцау Йӕ Фырты дунейӕн тӕрхон рахӕссынмӕ нӕ рарвыста, фӕлӕ Йӕ фӕрцы дуне фервӕзын кӕнынмӕ. 18 Чи Йыл ӕууӕнды, уымӕн тӕрхон нӕй, чи нӕ Йыл ӕууӕнды, уый та ныридӕгӕн тӕрхонгонд у, уымӕн ӕмӕ нӕ баууӕндыд Хуыцауы Иунӕг Фыртыл. 19 Тӕрхон та уый мидӕг ис, ӕмӕ рухс ӕрцыд дунемӕ, фӕлӕ адӕм рухсы бӕсты талынг бауарзтой, уымӕн ӕмӕ сӕ хъуыддӕгтӕ хӕрам уыдысты. 20 Йӕ хъуыддӕгтӕ хӕрам кӕмӕндӕриддӕр сты, уый рухсӕй йе сӕфт уыны ӕмӕ рухсмӕ нӕ цӕуы, цӕмӕй йӕ хъуыддӕгтӕ ма раргом уой. 21 Фӕлӕ ӕцӕгадмӕ гӕсгӕ чи цӕры, уый та цӕуы рухсмӕ – йӕ хъуыддӕгтӕ ӕргом куыд уой, уымӕн ӕмӕ уыдон Хуыцауӕн фӕндон сты». 22 Уый фӕстӕ Йесо Йӕ ахуыргӕнинӕгтимӕ ӕрцыд иудейаг зӕхмӕ. Уым семӕ бафӕстиат иуцасдӕр ӕмӕ аргъуыдта. 23 Дон дзы бирӕ кӕй уыд, уымӕ гӕсгӕ Иоанн дӕр аргъуыдта Эноны, Салиммӕ хӕстӕг. Ӕмӕ йӕм адӕм цыдысты саргъауынмӕ. 24 Уӕд Иоанны ахӕстоны нӕма бакодтой. 25 Иоанны ахуыргӕнинӕгтӕн иу иудейимӕ рауад быцӕу хи ссыгъдӕг кӕныны фӕдыл. 26 Уӕд ӕрцыдысты Иоаннмӕ ӕмӕ йын загътой: «Равви, Иорданы иннӕ фарс демӕ Чи уыд ӕмӕ ды Кӕй тыххӕй дзырдтай, Уый аргъауы ӕмӕ адӕм иууылдӕр Уымӕ цӕуынц». 27 Иоанн сын дзуапп радта: «Адӕймагӕн йӕ бон ницы кӕнын у, уӕларвӕй йын лӕвӕрд куы нӕ уа, уӕд. 28 Ӕз цы загътон, уымӕн уӕхӕдӕг стут ӕвдисӕнтӕ: „Ӕз Чырысти нӕ дӕн, фӕлӕ ӕз Йӕ разӕй дӕн ӕрвыст". 29 Усаг кӕмӕн ис, уый сиахсаг у. Сиахсаджы хӕлар та лӕууы сиахсаджы фарсмӕ, хъусы йын йӕ хъӕлӕс ӕмӕ цин кӕны. Афтӕ нӕй кӕрон мӕ цинӕн. 30 Уымӕн рӕзын ӕмбӕлы, мӕнӕн та – къаддӕрӕй-къаддӕр кӕнын. 31 Уӕларвӕй Ӕрцӕуӕг алкӕмӕй дӕр уӕлдӕр у; зӕххӕй чи у, уый зӕххон у ӕмӕ зӕххонау дзуры. Уӕларвӕй Ӕрцӕуӕг алкӕмӕй дӕр уӕлдӕр у. 32 Уый цы федта ӕмӕ цы фехъуыста, уыдӕтты тыххӕй лӕууы ӕвдисӕн, фӕлӕ Йын Йӕ ныхасыл ничи ӕууӕнды. 33 Йӕ ныхасыл ын чи ӕууӕнды, уый та уымӕй равдисы, Хуыцау Йӕ дзырд кӕй нӕ сайы, уый. 34 Хуыцау Кӕй рарвыста, Уый Хуыцауы ныхӕстӕ кӕны, уымӕн ӕмӕ Хуыцау Йӕ Удӕй бӕрцӕй нӕ дӕтты. 35 Фыд уарзы Фырты ӕмӕ Йын ӕппӕт дӕр радта Йӕ къухмӕ. 36 Фыртыл ӕууӕндӕг схайджын мыггагмӕйы цардӕй, Фыртмӕ чи нӕ хъусы, уый та цард нӕ фендзӕн – Хуыцауы фыдӕх ӕй баййӕфта».

Иоанн 4

1 Йӕ ахуыргӕнинӕгтӕ Иоанны ахуыргӕнинӕгтӕй фылдӕр кӕнынц ӕмӕ Иоаннӕй фылдӕр аргъауы, зӕгъгӕ, уыцы хабар фарисейтӕм кӕй бахӕццӕ, Йесо уый куы базыдта – 2 Уӕвгӕ Йесо Йӕхӕдӕг нӕ аргъуыдта, фӕлӕ Йӕ ахуыргӕнинӕгтӕ, – 3 Уӕд ныууагъта иудейаг бӕстӕ ӕмӕ ногӕй ацыд Галилеймӕ. 4 Йӕ фӕндаг уыди Самарийыл. 5 Ӕмӕ бацыд самариаг сахар Сихармӕ, Иаков йӕ фырт Иосифӕн цы зӕххы хай радта, уымӕ хӕстӕг. 6 Уым уыди Иаковы цъай. Йесо бастади фӕндагыл ӕмӕ ӕрбадт цъайы цур. Уыдис ӕхсӕзӕм сахатмӕ ӕввахс. 7 Дон хӕссынмӕ ӕрцыд иу самариаг сылгоймаг. Йесо йын загъта: «Дон-ма Мын ратт». 8 Йӕ ахуыргӕнинӕгтӕ та уыцы рӕстӕг сахармӕ хӕринаг ӕлхӕнынмӕ ауадысты. 9 Самариаг сылгоймаг Ын загъта: «Ды иудей куы дӕ, уӕд мӕнӕй, самариагӕй, дон куыд курыс?» Афтӕ уымӕн загъта, ӕмӕ иудейтӕ самариӕгтыл не 'рвӕссынц. 10 Йесо йын дзуапп радта: «Ды Хуыцауы хорзӕх куы зонис, стӕй дӕуӕн „Дон-ма Мын ратт" Зӕгъӕджы дӕр, уӕд Дзы дӕхӕдӕг ракурис, ӕмӕ дын Уый раттид царддӕттӕг дон». 11 Сылгоймаг Ын загъта: «Ме 'лдар, цъай арф у, Дӕумӕ та ӕгӕрыстӕмӕй ӕвгӕнӕнгарз дӕр нӕй. Уӕд Дӕм царддӕттӕг дон кӕцӕй ис? 12 Ацы цъай нын нӕ фыдӕл Иаков ныууагъта. Йӕхӕдӕг дӕр дзы нуӕзта, стӕй йӕ сывӕллӕттӕ дӕр ӕмӕ йӕ фос дӕр. Ау, Ды уымӕй уӕлдӕр дӕ?» 13 Йесо йын дзуапп радта: «Ацы донӕй чидӕриддӕр нуазы, уый ногӕй сдойны уыдзӕн. 14 Ӕз ын цы дон раттон, уымӕй чи баназа, уый та мыггагмӕ дӕр нал сдойны уыдзӕн. Фӕлӕ йын Ӕз цы дон раттон, уый йӕ зӕрдӕйы фестдзӕн мыггагмӕйы цард дӕттӕг суадон». 15 Сылгоймаг Ын загъта: «Ме 'лдар, ратт мын уыцы донӕй, цӕмӕй дойны ма кӕнон ӕмӕ дон ӕвгӕнынмӕ ардӕм ма цӕуон». 16 Йесо йын загъта: «Марадз, бадзур дӕ моймӕ ӕмӕ рацу ардӕм». 17 Сылгоймаг Ын дзуапп радта: «Мой мын нӕй». Йесо йын загъта: «Мой дын кӕй нӕй, уымӕй ды раст загътай. 18 Уыди дын фондз мойы, ӕмӕ дын ныртӕккӕ чи ис, уый дӕр дӕ мой нӕу. Уымӕй раст загътай». 19 Сылгоймаг Ын загъта: «Ме 'лдар, ӕз уынын, Ды пехуымпар кӕй дӕ, уый. 20 Нӕ фыдӕлтӕ ацы хохыл куывтой. Сымах та, иудейтӕ, афтӕ зӕгъут, кувын кӕм ӕмбӕлы, уыцы бынат Иерусалимы ис, зӕгъгӕ». 21 Йесо йын загъта: «Баууӕнд Мыл, хорз ус, ӕрцӕуы ахӕм рӕстӕг, ӕмӕ Фыдмӕ нӕдӕр ацы хохыл кувдзыстут, нӕдӕр Иерусалимы. 22 Сымах, самариӕгтӕ, кӕмӕ кувут, уый уӕхӕдӕг дӕр нӕ зонут. Мах та кӕмӕ кувӕм, уый зонӕм, уымӕн ӕмӕ ирвӕзындзинад иудейтӕй рацӕудзӕн. 23 Фӕлӕ ӕрцӕуы ахӕм рӕстӕг, ӕниу, цӕугӕ дӕр ӕркодта, ӕмӕ ӕцӕг кувджытӕ Фыдмӕ кувдзысты Удӕй разӕнгардӕй ӕмӕ ӕцӕгадмӕ гӕсгӕ, уымӕн ӕмӕ Фыдӕн ахӕм кувджытӕ сты фӕндон. 24 Хуыцау уд у, ӕмӕ Йӕм чи кувы, уыдон Ӕм Удӕй разӕнгардӕй ӕмӕ ӕцӕгадмӕ гӕсгӕ хъуамӕ кувой». 25 Сылгоймаг Ын загъта: «Мессиа (ома, Чырысти) кӕй ӕрцӕудзӕн, уый ӕз зонын. Ӕмӕ куы ӕрцӕуа, уӕд нын ӕппӕт дӕр бацамондзӕн». 26 Йесо йын загъта: «Уый Ӕз дӕн, демӕ Ныхасгӕнӕг». 27 Уыцы рӕстӕг ӕрцыдысты Йӕ ахуыргӕнинӕгтӕ, ӕмӕ Йесо сылгоймагимӕ кӕй ныхас кодта, уый сӕ дисы бафтыдта. Фӕлӕ уыдонӕй иу дӕр нӕ загъта: «Цы дӕ хъӕуы?», кӕнӕ «Цӕй фӕдыл ныхас кӕныс йемӕ?» 28 Сылгоймаг ныууагъта йӕ донхӕссӕн, ацыд сахармӕ ӕмӕ дзуры адӕмӕн: 29 «Рацӕут ӕмӕ фенут, ӕз цы ракодтон, ӕппӕт уыдӕттӕ мын Чи загъта, уыцы Адӕймаджы. Уый Чырысти нӕу, цымӕ?» 30 Адӕм рацыдысты сахарӕй ӕмӕ араст сты Йесомӕ. 31 Ныр Ӕм ахуыргӕнинӕгтӕ бахатыдысты: «Равви, бахӕр!» 32 Фӕлӕ сын Уый загъта: «Мӕнмӕ ис, сымах кӕй нӕ зонут, ахӕм хойраг». 33 Уӕд Йӕ ахуыргӕнинӕгтӕ кӕрӕдзийӕн дзырдтой: «Исчи Йын ӕрбахаста хӕринаг?» 34 Йесо сын загъта: «Мӕ хойраг у Мӕ Рарвитӕджы фӕндон ӕххӕст кӕнын ӕмӕ Йӕ хъуыддаг кӕронмӕ саразын. 35 Сымах афтӕ нӕ фӕзӕгъут, мыййаг, цыппар мӕйы ма баззад хуымгӕрдӕнтӕм, зӕгъгӕ? Ӕз та уын зӕгъын: акӕсут уӕ цӕстытӕй ӕмӕ фенут, хуымтӕ ныридӕгӕн кӕрдинаг кӕй сты, уый. 36 Хуымгӕрдӕг райсы йӕ мызд ӕмӕ хор ӕмбырд кӕны мыггагмӕйы цардӕн. Афтӕмӕй тауӕг дӕр ӕмӕ хуымгӕрдӕг дӕр иумӕ цин кӕндзысты. 37 Ам раст уыдзӕн ацы ӕмбисонд: „Иу тауы, иннӕ кӕрды". 38 Ӕз уӕ арвыстон, сымах кӕй нӕ бакуыстат, уый кӕрдынмӕ. Иннӕтӕ куыстой, сымах та сын сӕ фӕллойӕ пайда кӕнут». 39 Цы митӕ фӕкодта, ӕппӕт уыдӕттӕ йын Йесо кӕй загъта, сылгоймаг уый тыххӕй куы радзырдта, уӕд уыцы сахары цӕрӕг самариӕгтӕй Йесойыл бирӕтӕ баууӕндыдысты. 40 Самариӕгтӕ Йӕм куы ӕрцыдысты, уӕд Ын лӕгъстӕ кодтой, куыд сӕм афӕстиат уа, афтӕ. Баззади сӕм дыууӕ боны. 41 Ӕмӕ Йын Йӕхимӕ куы байхъуыстой, уӕд Ыл ноджы фылдӕр адӕм баууӕндыди. 42 Уыцы сылгоймагӕн та дзырдтой: «Ныр дӕ ныхасӕй нал ӕууӕндӕм, фӕлӕ Йӕм нӕхӕдӕг байхъуыстам ӕмӕ зонӕм, Уый ӕцӕгӕй дунейы Ирвӕзынгӕнӕг [Чырысти] кӕй у, уый». 43 Дыууӕ боны фӕстӕ Йесо рацыд уырдыгӕй ӕмӕ араст Галилеймӕ. 44 Йесо Йӕхӕдӕг дзырдта, пехуымпар йӕ фыдыбӕстӕйы ӕгад у, зӕгъгӕ. 45 Галилеймӕ куы ӕрцыд, уӕд Ыл галилейӕгтӕ сӕмбӕлдысты ӕхсызгонӕй, уымӕн ӕмӕ уыдон Иерусалимы уыдысты бӕрӕгбоны ӕмӕ федтой, Йесо уым цы бакодта, ӕппӕт уыдӕттӕ. 46 Йесо ногӕй ӕрцыд, дон сӕн кӕм фестын кодта, уыцы галилейаг Канӕмӕ. Уыцы рӕстӕг паддзахы ӕлдӕрттӕй иуӕн йӕ фырт Капернаумы уыди рынчын. 47 Ӕмӕ Йесо Иудейӕйӕ Галилеймӕ кӕй ӕрцыд, уый куы фехъуыста, уӕд Ӕм ацыд ӕмӕ Йын лӕгъстӕ кодта ӕрцӕуыны ӕмӕ, мӕлӕты къахыл чи лӕууыд, йӕ уыцы фырты сдзӕбӕх кӕныны тыххӕй. 48 Йесо йын дзуапп радта: «Сымах нӕ баууӕнддзыстут, ӕвдисӕйнӕгтӕ ӕмӕ диссӕгтӕ куы нӕ фенат, уӕд». 49 Ӕлдар Ын загъта: «Хицау, ӕрцу, цалынмӕ мӕ фырт нӕ амард, уӕдмӕ». 50 Йесо йын дзуапп радта: «Ацу, дӕ фырт сдзӕбӕх уыдзӕн». Уый баууӕндыд Йесойы ныхасыл ӕмӕ ацыд. 51 Фӕндагыл йӕ цагъартӕ фесты йӕ размӕ ӕмӕ йын загътой: «Дӕ фырт фӕдзӕбӕхдӕр». 52 Уый сӕ бафарста: «Кӕцы сахатыл ын фенцондӕр?» Уыдон ын загътой: «Знон ӕвдӕм сахатыл йӕ тӕвд ӕрхауд». 53 Уӕд фыд базыдта, уый кӕй уыдис, Йесо йын афтӕ куы загъта, дӕ фырт сдзӕбӕх уыдзӕни, зӕгъгӕ, тӕккӕ уыцы афон. Ӕмӕ баууӕндыд йӕхӕдӕг дӕр, ӕмӕ йӕ хӕдзаронтӕ иууылдӕр. 54 Афтӕ Йесо дыккаг хатт, Иудейӕйӕ Галилеймӕ ӕрцӕугӕйӕ, скодта диссаг.

Иоанн 5

1 Уый фӕстӕ уыд иудейаг бӕрӕгбон, ӕмӕ Йесо ӕрцыд Иерусалиммӕ. 2 Иерусалимы, Фысты кулдуары цур уыди, дзуттагау Вифездӕ кӕй хуыдтой, ахӕм найӕн фондз ӕхгӕдсӕр тыргъимӕ. 3 Тыргъты хуыссыд бирӕ рынчынтӕ: куырмытӕ, къуылыхтӕ ӕмӕ цӕнкуылтӕ. [Уыдон ӕнхъӕлмӕ кастысты доны змӕлдмӕ – 4 Хуыцауы зӕд-иу рӕстӕгӕй-рӕстӕгмӕ ӕрцыд найӕнмӕ ӕмӕ-иу дон сызмӕста, ӕмӕ-иу йӕ сызмӕнтыны фӕстӕ фыццаг чи ныххызт, уый-иу сдзӕбӕх цыфӕнды низӕй дӕр.] 5 Ам уыдис, ӕстдӕс ӕмӕ ссӕдз азы рынчын чи уыд, ахӕм лӕг. 6 Йесо йӕ уым хуысгӕйӕ куы федта ӕмӕ рагӕй кӕй у рынчын, уый куы базыдта, уӕд ын загъта: «Фӕнды дӕ, ӕмӕ ӕнӕниз уай?» 7 Рынчын Ын дзуапп радта: «Ме 'лдар, доны змӕсты афон мӕ найӕнмӕ чи ныййиса, ахӕм адӕймаг мын нӕй. Цалынмӕ ӕз ныххизыныл фӕцархайын, уӕдмӕ ӕндӕр исчи мӕ разӕй фӕвӕййы». 8 Йесо йын загъта: «Рабад, сис дӕ хуыссӕн ӕмӕ райдай цӕуын». 9 Уый уайтӕккӕ сдзӕбӕх, систа йӕ хуыссӕн ӕмӕ райдыдта цӕуын. Уыцы хъуыддаг ӕрцыд сабаты. 10 Ӕмӕ чи сдзӕбӕх, уыцы адӕймагӕн иудейтӕ дзырдтой: «Абон сабат у, дӕ хуыссӕн хӕссын дын нӕ фӕччы». 11 Уый сын дзуапп радта: «Чи мӕ сдзӕбӕх кодта, Уый мын загъта: „Сис дӕ хуыссӕн ӕмӕ райдай цӕуын"». 12 Уӕд ӕй бафарстой: «Афтӕ дын Чи загъта: „Сис дӕ хуыссӕн ӕмӕ райдай цӕуын", уыцы Адӕймаг чи у?» 13 Чи сдзӕбӕх, уый та Йӕ нӕ зыдта, уымӕн ӕмӕ Йесо фӕци, уым цы бирӕ адӕм уыди, уыдоны аууон. 14 Фӕстӕдӕр ӕй Йесо ссардта Кувӕндоны ӕмӕ йын загъта: «Ныр ды сдзӕбӕх дӕ. Тӕригъӕд мауал ракӕн, ноджы фыддӕр исты дыл куыд не 'рцӕуа, афтӕ». 15 Уыцы лӕг ацыд ӕмӕ иудейтӕн радзырдта, йе сдзӕбӕхгӕнӕг Йесо у, зӕгъгӕ. 16 Уӕд иудейтӕ зилын райдыдтой Йесойы фӕдыл, сабаты ахӕм хъуыддӕгтӕ кӕй кодта, уый тыххӕй. 17 Йесо та сын загъта: «Мӕ Фыд кӕддӕриддӕр хъуыддаг кӕны, ӕмӕ Ӕз дӕр кӕнын». 18 Уӕд Ӕй иудейтӕ ноджы тынгдӕр агуырдтой амарынмӕ. Уымӕн ӕмӕ Уый канд сабаты ӕгъдау нӕ хӕлдта, фӕлӕ Хуыцауы дӕр хуыдта Йӕ Фыд ӕмӕ уымӕй Йӕхи кодта Хуыцауы ӕмсӕр. 19 Уый фӕдыл сын Йесо загъта: «Ӕцӕг, ӕцӕг зӕгъын сымахӕн: Фырт Йӕхӕдӕг ницы кӕнын фӕразы – Фыды цы гӕнгӕ уыны, ӕрмӕстдӕр уый кӕны. Ӕмӕ Фыд цы кӕны, Фырт дӕр уый аразы. 20 Фыд уарзы Фырты ӕмӕ Йын ӕвдисы, Йӕхӕдӕг цы кӕны, ӕппӕт уыдӕттӕ. Фенын Ын кӕндзӕн ацы хъуыддӕгтӕй ноджы стырдӕртӕ, ӕмӕ сымах дисы бафтдзыстут. 21 Фыд мӕрдты куыд райгас кӕны ӕмӕ сын цард куыд дӕтты, афтӕ Фырт дӕр цард дӕтты, кӕмӕн Ӕй фӕнды, уыдонӕн. 22 Фыд тӕрхон дӕр никӕмӕн кӕны, фӕлӕ ӕппӕт тӕрхон бакодта Фырты бар, 23 Фыды куыд нымайынц, афтӕ сеппӕт дӕр Фырты куыд нымайой. Фырты чи нӕ нымайы, уый Йын Йӕ рарвитӕг Фыды дӕр нӕ нымайы. 24 Ӕцӕг, ӕцӕг зӕгъын сымахӕн: Мӕ ныхасмӕ хъусӕгӕн ӕмӕ Мӕ Рарвитӕгыл ӕууӕндӕгӕн ис мыггагмӕйы цард ӕмӕ тӕрхонгонд нӕ уыдзӕн – ныридӕгӕн мӕлӕтӕй бацыд цардмӕ. 25 Ӕцӕг, ӕцӕг зӕгъын сымахӕн, ӕрцӕудзӕн ахӕм афон, ӕниу, цӕугӕ дӕр ӕркодта, ӕмӕ мӕрдтӕ фехъусдзысты Хуыцауы Фырты хъӕлӕс, ӕмӕ йӕ куы фехъусой, уӕд райгас уыдзысты. 26 Уымӕн ӕмӕ Фыд Йӕхӕдӕг царддӕттӕг куыд у, афтӕ Йӕ Фырты дӕр скодта царддӕттӕг, 27 Ӕмӕ Йын радта тӕрхон кӕныны бар, уымӕн ӕмӕ Уый Адӕймаджы Фырт у. 28 Ууыл дис ма кӕнут. Уымӕн ӕмӕ ӕрцӕуы ахӕм рӕстӕг, ӕмӕ ингӕнты чи ис, уыдон сеппӕт дӕр фехъусдзысты Йӕ хъӕлӕс, 29 Ӕмӕ хӕрзгӕнджытӕ райгас уыдзысты цӕрынмӕ, фыдгӕнджытӕ та – ӕфхӕрд баййафынмӕ. 30 Ӕз Мӕхӕдӕг ницы кӕнын фӕразын. Куыд загъд Мын у, афтӕ тӕрхон кӕнын, ӕмӕ Мӕ тӕрхон раст у, уымӕн ӕмӕ Ӕз тырнын, Мӕхи цы фӕнды, уымӕ нӕ, фӕлӕ Мӕ Рарвитӕджы цы фӕнды, уымӕ. 31 Мӕхи тыххӕй Мӕхӕдӕг куы дзурин, уӕд Мӕ ныхас ӕцӕг нӕ уаид. 32 Фӕлӕ Мын ис ӕндӕр Ӕвдисӕн, ӕмӕ Ӕз зонын: Мӕн тыххӕй цы зӕгъы, уый ӕцӕг у. 33 Сымах арвыстат Иоаннмӕ, ӕмӕ уый загъта ӕцӕгады тыххӕй. 34 Ӕниу, Мӕн адӕймаджы ӕвдисӕнады сӕр нӕ хъӕуы, фӕлӕ йӕ уый тыххӕй зӕгъын, цӕмӕй фервӕзат. 35 Иоанн уыди цырагъ – сыгъди ӕмӕ рухс кодта, сымах та ӕрмӕст иуцасдӕр фӕндыд йӕ рухсмӕ цин кӕнын. 36 Иоанн Мӕн тыххӕй цы загъта, уымӕй та Ме 'вдисӕйнаг тыхджындӕр у. Уымӕн ӕмӕ Мын Мӕ Фыд цы хъуыддӕгтӕ бафӕдзӕхста, Ӕз уыцы хъуыддӕгтӕ аразын, ӕмӕ уыдон ӕвдисӕн сты, Мӕ Фыд Мӕ кӕй рарвыста, уымӕн. 37 Мӕ рарвитӕг Фыд Йӕхӕдӕг загъта Мӕн тыххӕй. Сымах та Йын Йӕ хъӕлӕс дӕр никуы фехъуыстат, ӕмӕ Йын Йӕ цӕсгом дӕр нӕ федтат, 38 Ӕмӕ Йӕ ныхас уӕ зӕрдӕты нӕй, уымӕн ӕмӕ Кӕй рарвыста, Ууыл не 'ууӕндут. 39 Лӕмбынӕг раиртасут Сыгъдӕг Фыст, уымӕн ӕмӕ сымах ӕууӕндут йӕ фӕрцы мыггагмӕйы цард райсыныл, уый та Мӕныл дзурӕг у. 40 Уӕддӕр уӕ нӕ фӕнды Мӕнмӕ ӕрцӕуын ӕмӕ мыггагмӕйы цард райсын. 41 Мӕн адӕмӕй кад нӕ хъӕуы, 42 Фӕлӕ уӕ зонын: сымах Хуыцауы нӕ уарзут. 43 Ӕз Мӕ Фыды номӕй ӕрцыдтӕн, ӕмӕ Мыл не 'ууӕндут, фӕлӕ ӕндӕр исчи куы ӕрцӕуа йӕхи номӕй, уӕд ыл баууӕнддзыстут. 44 Кӕд кӕрӕдзийӕ кадмӕ ӕнхъӕлмӕ кӕсут, иунӕг Хуыцау цы кад дӕтты, уымӕ та нӕ тырнут, уӕд куыд хъуамӕ баууӕндат? 45 Афтӕ ма банхъӕлут, ӕмӕ уӕ Ӕз Мӕ Фыды раз зылын кӕндзынӕн. Ныфсджын кӕмӕй стут, уыцы Моисей у уӕ зылынгӕнӕг. 46 Сымах Моисейыл куы ӕууӕндиккат, уӕд Мӕныл дӕр баууӕндиккат, уымӕн ӕмӕ уый Мӕн тыххӕй фыста. 47 Ӕмӕ кӕд Моисей цы ныффыста, ууыл не 'ууӕндут, уӕд Мӕ ныхӕстыл куыд баууӕнддзыстут?»

Иоанн 6

1 Уый фӕстӕ Йесо ацыд Галилейы, ома, Тивериадӕйы, денджызы иннӕ фарсмӕ. 2 Йӕ фӕдыл ацыд бирӕ адӕм, уымӕн ӕмӕ федтой, рынчынты дзӕбӕх кӕнгӕйӕ кӕй равдыста, уыцы диссӕгтӕ. 3 Йесо схызт хохмӕ ӕмӕ уым бадт Йӕ ахуыргӕнинӕгтимӕ. 4 Ӕрхӕстӕг Куадзӕн, иудейаг бӕрӕгбон. 5 Йесо ракаст, ӕмӕ йӕм бирӕ адӕм кӕй цыди, уый куы федта, уӕд Филиппӕн загъта: «Сӕ бафсадынӕн кӕрдзын кӕм балхӕнӕм?» 6 Афтӕ дзырдта Филиппы бафӕлварыны тыххӕй. Йӕхӕдӕг та ныридӕгӕн зыдта, цы бакӕндзӕн, уый. 7 Филипп Ын дзуапп радта: «Цӕмӕй сӕ фӕйнӕ къӕбӕры фӕуа, уый тыххӕй дыууӕсӕдӕ динары аргъ кӕрдзын дӕр не сфаг уыдзӕн». 8 Йӕ ахуыргӕнинӕгтӕй Йын иу, Симон Петры ӕфсымӕр Андрей, загъта: 9 «Ам иу лӕппумӕ ис хъӕбӕрхоры фондз кӕрдзыны ӕмӕ дыууӕ гыццыл кӕсаджы. Фӕлӕ уый цы фаг у утӕппӕт адӕмӕн?» 10 Йесо загъта: «Ӕрбадын сӕ кӕнут». Уыцы ран уыди бирӕ кӕрдӕг. Ӕмӕ адӕм ӕрбадтысты; нӕлгоймӕгтӕ уыдысты фондз мины бӕрц. 11 Йесо райста кӕрдзынтӕ, арфӕ ракодта ӕмӕ сӕ байуӕрста, бадгӕ чи кодта, уыдоныл. Кӕсаг дӕр сын радта, кӕй цас хъуыди, уыйбӕрц 12 Адӕм куы бафсӕстысты, уӕд Йесо загъта Йӕ ахуыргӕнинӕгтӕн: «Цы уӕлдӕйттӕ баззад, уыдон ӕрӕмбырд кӕнут, куыд ницы дзы фесӕфа, афтӕ». 13 Ӕрӕмбырд сӕ кодтой, ӕмӕ хъӕбӕрхоры фондз кӕрдзынӕй цы баззад, уыдонӕй байдзаг кодтой дыууадӕс чыргъӕды – чи хордта, уыдоны уӕлдӕйттӕ. 14 Йесо цы диссаг скодта, уый адӕм куы федтой, уӕд загътой: «Дунемӕ ӕрцӕуинаг Чи у, ай ӕцӕг уыцы Пехуымпар у». 15 Адӕм ӕрбацӕуынмӕ ӕмӕ Йӕ тыххӕй паддзахӕй сӕвӕрынмӕ кӕй хъавынц, Йесо уый куы базыдта, уӕд та иунӕгӕй ацыд хохмӕ. 16 Куы баизӕр, уӕд Йӕ ахуыргӕнинӕгтӕ ныццыдысты денджызмӕ, 17 Сбадтысты бӕлӕгъы ӕмӕ араст сты денджызы иннӕ фарсмӕ, Капернауммӕ. Баталынг, Йесо зынӕг та нӕма уыд. 18 Дымдта тыхджын дымгӕ ӕмӕ денджыз фӕйлыдта. 19 Фондз ӕмӕ ссӕдз – дӕс ӕмӕ ссӕдз стадийы бӕрц куы ацыдысты, уӕд Йесойы федтой денджызыл къахӕй цӕугӕ, бӕлӕгъмӕ хӕстӕгӕй-хӕстӕгдӕргӕнгӕ, ӕмӕ фӕтарстысты. 20 Фӕлӕ сын Йесо загъта: «Уый Ӕз дӕн, ма тӕрсут». 21 Фӕндыди сӕ Уый бӕлӕгъы сбадын кӕнын, фӕлӕ бӕлӕгъ уайтӕккӕ бахӕццӕ, цы былмӕ цыдысты, уырдӕм. 22 Денджызы иннӕ былыл цы адӕм баззад, уыдонӕн дыккаг бон сӕ зӕрдыл ӕрлӕууыд, знон былыл иунӕг бӕлӕгъ кӕй уыди, уый. Уыдон зыдтой: Йесо ахуыргӕнинӕгтимӕ не сбадти уыцы бӕлӕгъы – иунӕгӕй ацыдысты. 23 Уалынмӕ Тивериадӕйӕ ӕрцӕуӕг ӕндӕр бӕлӕгътӕ хӕстӕг бацыдысты, Хицауы арфӕйы куывды фӕстӕ адӕм кӕрдзын кӕм хордтой, уыцы бынатмӕ. 24 Нӕдӕр Йесо, нӕдӕр Йӕ ахуыргӕнинӕгтӕ ам кӕй не сты, уый адӕм куы федтой, уӕд сбадтысты бӕлӕгъты ӕмӕ Йесойы агурӕг бахӕццӕ сты Капернауммӕ. 25 Ӕмӕ Йӕ денджызы фаллаг фарс куы ссардтой, уӕд Ын загътой: «Равви, кӕд ӕрбацыдтӕ ардӕм?» 26 Йесо сын дзуапп радта: «Ӕцӕг, ӕцӕг зӕгъын сымахӕн: диссӕгтӕ кӕй федтат, уый тыххӕй Мӕ нӕ агурут, фӕлӕ кӕрдзын кӕй бахордтат ӕмӕ кӕй бафсӕстыстут, уый тыххӕй. 27 Фесӕфӕн цы хойрагӕн ис, ууыл ма тыхсут, фӕлӕ тыхсут, фесӕфӕн кӕмӕн нӕй, мыггагмӕйы цард чи дӕтты, уыцы хойрагыл. Уыцы хойраг уын ратдзӕн Адӕймаджы Фырт, уымӕн ӕмӕ Йын ахӕм бар Фыд-Хуыцау радта». 28 Уӕд Ын загътой: «Нӕ хъуыддӕгтӕ Хуыцауӕн фӕндон куыд уой, уый тыххӕй нын цы гӕнгӕ у?» 29 Йесо сын дзуапп радта: «Хуыцау Кӕй рарвыста, Ууыл ӕууӕндын – гъе уый у Хуыцауӕн фӕндон хъуыддаг». 30 Уӕд Ын загътой: «Цавӕр диссаг нын равдисдзынӕ, цӕмӕй йӕ фенӕм ӕмӕ Дыл баууӕндӕм? Дӕ бон цы бакӕнын у? 31 Нӕ фыдӕлтӕ ӕдзӕрӕг бӕстӕйы маннӕ хордтой, фыст куыд у, афтӕ: „Уӕларвӕй сын радта дзул хӕрынӕн"». 32 Йесо сын загъта: «Ӕцӕг, ӕцӕг зӕгъын сымахӕн: уӕларвӕй уын дзул Моисей нӕ радта, фӕлӕ уын уӕларвӕй Мӕ Фыд дӕтты ӕцӕг дзул. 33 Уымӕн ӕмӕ уӕларвӕй чи ӕрцӕуы ӕмӕ дунейӕн цард чи дӕтты, уый у Хуыцауы дзул». 34 Уӕд Ын загътой: «Хицау, дӕтт нын кӕддӕриддӕр уыцы дзул». 35 Йесо сын загъта: «Ӕз дӕн царды дзул. Мӕнмӕ ӕрцӕуӕг нал сыстонг уыдзӕн, ӕмӕ Мӕныл ӕууӕндӕг мыггагмӕ дӕр нал сдойны уыдзӕн. 36 Фӕлӕ уын раздӕр куыд загътон, афтӕ Мӕ кӕд федтат, уӕддӕр не 'ууӕндут. 37 Мӕ Фыд Мын кӕй дӕтты, уый Мӕнмӕ ӕрцӕудзӕн, ӕмӕ Мӕнмӕ ӕрцӕуӕджы нӕ фӕтӕрдзынӕн. 38 Уымӕн ӕмӕ Ӕз уӕларвӕй ӕрцыдтӕн, Мӕхи цы фӕнды, уый нӕ, фӕлӕ Мӕ Рарвитӕджы фӕндон ӕххӕст кӕнынмӕ. 39 Мӕ Рарвитӕгӕн та фӕндон у, цӕмӕй Уый Мӕнӕн кӕй радта, уыдонӕй Ӕз макӕй фесафон, фӕлӕ сеппӕты дӕр райгас кӕнон фӕстаг бон. 40 Уымӕн ӕмӕ Мӕ Фыды фӕнды, Фырты чидӕриддӕр уыны ӕмӕ Йыл чидӕриддӕр ӕууӕнды, уымӕн мыггагмӕйы цард куыд уа, афтӕ. Ӕмӕ йӕ Ӕз фӕстаг бон райгас кӕндзынӕн». 41 Уӕд Ыл иудейтӕ райдыдтой хъуыр-хъуыр кӕнын, «Ӕз уӕларвӕй ӕрцӕуӕг дзул дӕн» кӕй загъта, уый тыххӕй. 42 Уыдон дзырдтой: «Ай Иосифы фырт Йесо нӕу, мыййаг? Йӕ фыд ӕмӕ Йын Йӕ Мады дӕр куы зонӕм, уӕд Уый куыд зӕгъы: „Ӕз уӕларвӕй ӕрцыдтӕн"?» 43 Йесо сын дзуапп радта: «Ма хъуыр-хъуыр кӕнут. 44 Мӕнмӕ ӕрцӕуын никӕй бон у, Мӕ рарвитӕг Фыд ӕй куы нӕ ӕркӕна, уӕд. Ӕмӕ йӕ Ӕз фӕстаг бон райгас кӕндзынӕн. 45 Пехуымпартӕм фыст у: „Ӕмӕ Хуыцау сеппӕты дӕр сахуыр кӕндзӕн". Фыдӕй чи фехъусы ӕмӕ Фыд кӕй сахуыр кӕны, уый ӕрцӕуы Мӕнмӕ. 46 Ӕз афтӕ нӕ зӕгъын, ӕмӕ Фыды исчи федта. Хуыцауӕй Чи у, Фыды ӕрмӕстдӕр Уый федта. 47 Ӕцӕг, ӕцӕг зӕгъын сымахӕн: Мӕныл ӕууӕндӕгӕн ис мыггагмӕйы цард. 48 Ӕз дӕн царды дзул. 49 Уӕ фыдӕлтӕ ӕдзӕрӕг бӕстӕйы маннӕ хордтой, уӕддӕр амардысты. 50 Уӕларвӕй ӕрцӕуӕг дзул та ахӕм у, ӕмӕ дзы чи хӕра, уымӕн мӕлӕт нӕ уыдзӕн. 51 Ӕз дӕн уӕларвӕй ӕрцӕуӕг царддӕттӕг дзул. Уыцы дзул чи хӕра, уый цӕрдзӕни мыггагмӕ. Ӕз цы дзул ратдзынӕн, уый та у, дунейы царды сӕраппонд нывондӕн кӕй ӕрхӕсдзынӕн, Мӕ уыцы Буар». 52 Уӕд иудейтӕ кӕрӕдзиимӕ райдыдтой быцӕу кӕнын: «Ай нын Йӕ Буар куыд ратдзӕн хӕрынмӕ?» 53 Йесо сын загъта: «Ӕцӕг, ӕцӕг зӕгъын сымахӕн: Адӕймаджы Фырты Буар куы нӕ хӕрат ӕмӕ Йын Йӕ Тугӕй куы нӕ нуазат, уӕд уӕм цард нӕ уыдзӕн. 54 Мӕ Буар чи хӕры ӕмӕ Мӕ Туг чи нуазы, уымӕн ис мыггагмӕйы цард, ӕмӕ йӕ Ӕз фӕстаг бон райгас кӕндзынӕн. 55 Уымӕн ӕмӕ Мӕ Буар у ӕцӕг хойраг, Мӕ Туг та – ӕцӕг нозт. 56 Мӕ Буар чи хӕры ӕмӕ Мӕ Туг чи нуазы, уый баиу Мемӕ ӕмӕ Ӕз баиу дӕн йемӕ. 57 Мӕн цардӕгас Фыд куыд рарвыста ӕмӕ Ӕз Фыды лӕвӕрд цардӕй куыд цӕрын, афтӕ Мӕн чи хӕры, уый дӕр цӕрдзӕн Мӕ лӕвӕрд цардӕй. 58 Ахӕм у уӕларвӕй ӕрцӕуӕг дзул. Уӕ фыдӕлтӕ хордтой маннӕ ӕмӕ амардысты; ацы дзул та ахӕм нӕу – чи йӕ хӕра, уый цӕрдзӕни мыггагмӕ». 59 Йесо афтӕ дзырдта, Капернаумы синагогӕйы куы амыдта, уӕд. 60 Йӕ ахуыргӕнинӕгтӕй бирӕтӕ уыцы ныхӕстӕ куы фехъуыстой, уӕд дзырдтой: «Цы ӕнахуыр ныхас кӕны! Уыдӕттӕ хъусын кӕй бон у?» 61 Ахуыргӕнинӕгтӕ ууыл кӕй хъуыр-хъуыр кодтой, Йесо уый ӕнӕ зӕгъгӕйӕ дӕр зыдта ӕмӕ сын загъта: «Уый уӕ къуылымпы кӕны? 62 Адӕймаджы Фырт раздӕр кӕм уыд, уырдӕм Ӕй ссӕугӕ куы фенат, уӕд та? 63 Хуыцауы Уд цард дӕтты, адӕймаг та ӕдых у. Ӕз уын цы ныхӕстӕ дзурын, уыдоны царддӕттӕг Уды хъару ис. 64 Фӕлӕ сымахӕй иуӕй-иутӕ не 'ууӕндынц». Йесо райдианӕй зыдта, Чи Йыл не 'ууӕнды, уыдоны, стӕй Йыл гадзрахатӕй чи рацӕудзӕн, уый дӕр. 65 Йесо дарддӕр загъта: «Гъе, Ӕз уын уый тыххӕй дзырдтон, Мӕнмӕ ӕрцӕуын никӕй бон у, зӕгъгӕ, Мӕ Фыдӕй йын лӕвӕрд куы нӕ уа, уӕд». 66 Уый фӕстӕ Йӕ ныууагътой Йӕ ахуыргӕнинӕгтӕй бирӕтӕ ӕмӕ нал цыдысты Йемӕ. 67 Уымӕ гӕсгӕ Йесо загъта дыууадӕсӕн: «Сымах дӕр фӕнды Мӕ ныууадзын?» 68 Симон Петр Ын дзуапп радта: «Хицау, кӕмӕ фӕцӕуӕм? Дӕумӕ сты мыггагмӕйы цард дӕттӕг ныхӕстӕ. 69 Мах бауырныдта ӕмӕ базыдтам, Ды Хуыцауы Сыгъдӕг кӕй дӕ, уый 70 Йесо сын дзуапп радта: «Уӕ дыууадӕсы дӕр Ӕз нӕ сӕвзӕрстон, ӕви? Фӕлӕ уӕ иу хӕйрӕг у». 71 Йесо афтӕ загъта Симон Искариоты фырт Иудӕйы тыххӕй. Уымӕн ӕмӕ Иудӕ Йӕ дыууадӕс ахуыргӕнинагӕй иу уыдис, фӕлӕ Йыл фӕстӕдӕр рацыд гадзрахатӕй.

Иоанн 7

1 Уый фӕстӕ Йесо зылди Галилейыл, Иудейӕйыл цӕуын та Йӕ нӕ фӕндыд, уымӕн ӕмӕ Йӕ иудейтӕ агуырдтой амарынмӕ. 2 Ӕрхӕстӕг иудейаг бӕрӕгбон – Халагъудты бӕрӕгбон 3 Уӕд Йесойӕн Йе 'фсымӕртӕ загътой: «Араст у ардыгӕй ӕмӕ ацу Иудейӕмӕ; уадз ӕмӕ Дӕ ахуыргӕнинӕгтӕ дӕр феной, Ды цы хъуыддӕгтӕ кӕныс, уый. 4 Зындгонд уӕвын кӕй фӕнды, уый сусӕгӕй ницы аразы. Кӕд Ды ахӕм хъуыддӕгтӕ кӕныс, уӕд Дӕхи равдис дунемӕ». 5 Суанг Ыл Йе 'фсымӕртӕ дӕр не 'ууӕндыдысты. 6 Йесо сын загъта: «Мӕ рӕстӕг нӕма ӕрцыд, сымахӕн та алы афон дӕр бӕззы. 7 Сымахӕй йе сӕфт уынын дунейы бон нӕу, Мӕнӕй та йе сӕфт уыны, уымӕн ӕмӕ Ӕз ӕвдисӕн лӕууын, йӕ хъуыддӕгтӕ хӕрам кӕй сты, уымӕн. 8 Сымах ацӕут ацы бӕрӕгбонмӕ, Ӕз та ацы бӕрӕгбонмӕ нӕ цӕуын, уымӕн ӕмӕ Мӕ рӕстӕг нӕма ралӕууыд». 9 Йесо сын загъта уыцы ныхӕстӕ ӕмӕ баззад Галилейы. 10 Фӕлӕ Йе 'фсымӕртӕ куы ацыдысты, уӕд Уый дӕр ацыд бӕрӕгбонмӕ, ӕрмӕст ӕргомӕй нӕ, фӕлӕ Йӕ куыд ничи базыдтаид, афтӕ. 11 Иудейтӕ та Йӕ агуырдтой бӕрӕгбоны ӕмӕ фарстой: «Кӕм ис уыцы Адӕймаг?» 12 Йесойы тыххӕй адӕм сусӕгӕй кодтой алы ныхас. Иутӕ дзырдтой: «Уый хорз адӕймаг у». Иннӕтӕ та дзырдтой: «Нӕ, Уый адӕмыл сайдӕй цӕуы». 13 Ӕниу, иудейтӕй кӕй тарстысты, уымӕ гӕсгӕ Йесойы тыххӕй ӕргомӕй ничи ницы дзырдта. 14 Бӕрӕгбон йе 'мбисыл куы уыд, уӕд Йесо бацыди Кувӕндонмӕ ӕмӕ амыдта. 15 Иудейтӕ дисы ӕфтыдысты ӕмӕ дзырдтой: «Куы никӕм ахуыр кодта, уӕд Сыгъдӕг Фыст куыд зоны?» 16 Йесо сын дзуапп радта: «Мӕ ахуырад Мӕнӕй нӕу, фӕлӕ Мӕ Рарвитӕгӕй у. 17 Хуыцауы фӕндон ӕххӕст кӕнын кӕй фӕнды, уый базондзӕн, ацы ахуырад Хуыцауӕй у, ӕви Ӕз Мӕхи номӕй дзурын. 18 Йӕхи номӕй дзурӕг йӕхи кадмӕ бӕллы. Йӕ Рарвитӕджы кадмӕ Чи бӕллы, Ууыл ис ӕууӕндӕн – мӕнгдзинад Ӕм нӕй. 19 Моисей уын Ӕгъдау нӕ радта, ӕви? Ӕмӕ уыцы Ӕгъдаумӕ гӕсгӕ сымахӕй ничи цӕры. Цӕй тыххӕй Мӕ хъавут амарынмӕ?» 20 Адӕм Ын уый фӕдыл загътой: «Хӕйрӕджджын дӕ? Чи Дӕ хъавы амарынмӕ?» 21 Йесо сын дзуапп радта: «Ӕз иу хъуыддаг бакодтон, ӕмӕ сымах уеппӕт дӕр дисы бафтыдыстут. 22 Моисей уын радта сунӕты ӕгъдау, ӕниу, уый Моисейӕ нӕ, фӕлӕ уӕ рагфыдӕлтӕй баззад, ӕмӕ сабаты сунӕт кӕнут адӕймагӕн. 23 Кӕд Моисейы Ӕгъдау нӕ фехалыны сӕраппонд адӕймагӕн сабаты скӕнынц сунӕт, уӕд Ӕз сабаты рынчыны къахӕй-къухмӕ кӕй сдзӕбӕх кодтон, уый тыххӕй Мӕм смӕсты стут? 24 Уӕ тӕрхон уӕлӕнгай ма уӕд, фӕлӕ-иу скӕнут ӕнӕхӕрам тӕрхон». 25 Уӕд иерусалимӕгтӕй иуӕй-иутӕ дзырдтой: «Марынмӕ кӕй агурынц, ай Уый нӕу? 26 Мӕнӕ ныхас кӕны ӕргомӕй, ӕмӕ Йын ничи ницы зӕгъы. Кӕд, мыййаг, хицӕуттӕ ӕцӕгдӕр базыдтой, Чырысти кӕй у, уый? 27 Фӕлӕ кӕцон у, уый мах зонӕм. Чырысти та куы ӕрцӕуа, уӕд, кӕцӕй у, уый ничи зондзӕн». 28 Йесо Кувӕндоны куы амыдта, уӕд хъӕлӕсыдзагӕй загъта: «Зонут Мӕ, стӕй кӕцӕй дӕн, уый дӕр зонут. Ӕз Мӕхи номӕй не 'рцыдтӕн, фӕлӕ Мӕ Рарвитӕгыл ис ӕууӕндӕн. Сымах Ӕй нӕ зонут, 29 Ӕз та Йӕ зонын, уымӕн ӕмӕ Ӕз Уымӕй дӕн ӕмӕ Мӕ Уый рарвыста». 30 Уӕд Ӕй хъавыдысты ӕрцахсынмӕ, фӕлӕ Йӕм никӕй къух батасыд, уымӕн ӕмӕ Йӕ рӕстӕг нӕма ӕрцыд. 31 Адӕмӕй та Йыл бирӕтӕ баууӕндыдысты ӕмӕ дзырдтой: «Цымӕ Чырысти куы ӕрцӕуа, уӕд, ацы Адӕймаг цы диссӕгтӕ равдыста, уыдонӕй фылдӕр равдисдзӕн?» 32 Адӕм Йесойы тыххӕй афтӕ кӕй сусу-бусу кӕнынц, уый фехъуыстой фарисейтӕ. Уӕд алчертӕ ӕмӕ фарисейтӕ арвыстой Кувӕндон хъахъхъӕнджыты Йе 'рцахсынмӕ. 33 Йесо загъта: «Бирӕ нал уыдзынӕн уемӕ – Мӕ Рарвитӕгмӕ цӕуын. 34 Агурдзыстут Мӕ ӕмӕ Мӕ не ссардзыстут. Ӕз кӕм уон, уырдӕм ӕрцӕуын уӕ бон нӕ бауыдзӕн». 35 Иудейтӕ сӕ кӕрӕдзийӕн дзырдтой: «Мах Ӕй кӕм не ссарӕм, ахӕм ранмӕ кӕдӕм ацӕудзӕн? Бердзенты ӕхсӕн дзуттӕгтӕ кӕм цӕрынц, уырдӕм цӕуыны ӕмӕ бердзенты ахуыр кӕныны фӕнд Ӕм нӕй, ӕви? 36 Цы ныхӕстӕ загъта, уыдон цы амонынц: „Агурдзыстут Мӕ ӕмӕ Мӕ не ссардзыстут", ӕмӕ „Ӕз кӕм уон, уырдӕм ӕрцӕуын уӕ бон нӕ бауыдзӕн"?» 37 Бӕрӕгбоны фӕстаг ӕмӕ тӕккӕ ахсджиагдӕр бон Йесо сыстад ӕмӕ хъӕлӕсыдзагӕй загъта: «Дойны кӕмӕн у, уый Мӕм ӕрцӕуӕд ӕмӕ баназӕд. 38 Сыгъдӕг Фыст куыд амоны, афтӕ Мӕныл ӕууӕндӕджы зӕрдӕйӕ ныггуылф кӕндзысты царддӕттӕг цӕугӕдӕттӕ». 39 Йесо афтӕ загъта, Ууыл ӕууӕндджытӕ Кӕмӕй хъуамӕ схайджын уыдаиккой, уыцы Сыгъдӕг Уды тыххӕй. Уӕд Сыгъдӕг Уды нӕма рарвыстӕуыд, уымӕн ӕмӕ Йесойы намыс нӕма раргом. 40 Йесо цы загъта, уый адӕм куы фехъуыстой, уӕд дзы иутӕ дзырдтой: «Уый ӕнӕмӕнг пехуымпар у». 41 Иннӕтӕ дзырдтой: «Уый Чырысти у». Аннӕтӕ та дзырдтой: «Ӕмӕ Чырысти Галилейӕ ӕрцӕудзӕн? 42 Чырысти Давиды байзӕддагӕй кӕй уыдзӕн, Давид кӕцӕй уыди, Вифлеемы уыцы хъӕуӕй кӕй ӕрцӕудзӕн, Сыгъдӕг Фысты афтӕ загъд нӕу, ӕви?» 43 Ӕмӕ Йесойы тыххӕй адӕммӕ иу хъуыды нал уыд. 44 Уыдонӕй Йӕ чидӕртӕ хъавыдысты ӕрцахсынмӕ, фӕлӕ Йӕм никӕй къух батасыд. 45 Алчертӕм ӕмӕ фарисейтӕм хъахъхъӕнджытӕ куы ӕрбаздӕхтысты, уӕд сӕ бафарстой: «Цӕуылнӕ Йӕ ӕркодтат?» 46 Хъахъхъӕнджытӕ дзуапп радтой: «Ацы Адӕймаг куыд дзуры, афтӕ никуыма ничи дзырдта». 47 Фарисейтӕ сын загътой: «Ау, сымах дӕр асайдта? 48 Хицӕуттӕй кӕнӕ Йыл фарисейтӕй исчи баууӕндыд? 49 Ацы ӕнӕфенд адӕм та Моисейы Ӕгъдауӕн ницы зонынц, ӕлгъыст сты». 50 Фарисейтӕй иу, кӕддӕр Йесомӕ чи ӕрцыд, уыцы Никодим сын загъта: 51 «Раздӕр уал ӕм куы нӕ байхъуыстӕуа, цы гӕнӕг у, уый куы нӕ базындӕуа, уӕд афтӕмӕй мах Ӕгъдау тӕрхон кӕны адӕймагӕн?» 52 Уыдон ын загътой: «Ды дӕр Галилейӕ дӕ? Раиртас Фыст ӕмӕ фендзынӕ, Галилейӕ пехуымпар кӕй нӕ уыдзӕн, уый». 53 [Ӕмӕ сеппӕт дӕр ацыдысты сӕ хӕдзӕрттӕм.

Иоанн 8

1 Йесо та ацыд Елеоны хохмӕ. 2 Райсомӕй раджы ногӕй ӕрцыд Кувӕндонмӕ, ӕмӕ ӕппӕт адӕм цыдысты Уымӕ. Уый ӕрбадт ӕмӕ сын райдыдта амонын. 3 Уӕд динамонджытӕ ӕмӕ фарисейтӕ ӕрбакодтой, хӕзгулимӕ кӕй баййӕфтӕуыд, уыцы сылгоймаджы, ӕрлӕууын ӕй кодтой адӕмы раз, 4 Ӕмӕ загътой Йесойӕн: «Ахуыргӕнӕг, ацы сылгоймаджы баййӕфтӕуыд хӕзгулимӕ. 5 Моисей нын Ӕгъдауы ахӕм сылгоймӕгты дуртӕй марын бафӕдзӕхста. Ды та цы зӕгъдзынӕ?» 6 Афтӕ Йӕ ракъахыны тыххӕй фарстой, цӕмӕй Йӕм исты ссарой фӕзылын кӕнынӕн. Йесо та ӕргуыбыр кодта ӕмӕ Йе 'нгуылдзӕй фыста зӕххыл. 7 Фӕлӕ Йӕ куы нал ӕмӕ куы нал уагътой, уӕд сӕм скаст ӕмӕ загъта: «Сымахӕй тӕригъӕды ӕфтыд чи нӕу, уый йыл фыццаг ныццӕвӕд дур». 8 Ӕмӕ та ногӕй ӕргуыбыр кодта ӕмӕ фыста зӕххыл. 9 Уыцы ныхӕстӕ куы фехъуыстой, уӕд уыдонӕн се 'фсарм райдыдта тӕрхон кӕнын ӕмӕ, хистӕртӕй райдайгӕйӕ, иу иннӕйы фӕдыл сӕхи айстой. Уым ма баззад ӕрмӕстдӕр Йесо ӕмӕ сылгоймаг Йӕ разы. 10 Йесо скаст ӕмӕ сылгоймагӕн загъта: «Хорз ус, цы фесты уыцы адӕм? Тӕрхон дын ничи рахаста?» 11 Уый дзуапп радта: «Ничи, ме 'лдар!» Йесо йын загъта: «Ӕз дӕр дын тӕрхон нӕ хӕссын. Ацу ӕмӕ нырӕй фӕстӕмӕ тӕригъӕд мауал ракӕн».] 12 Йесо дарддӕр дзырдта адӕмӕн: «Ӕз дунейӕн рухс дӕн. Мӕ фӕдыл чи рацӕуа, уый талынджы нӕ цӕрдзӕн, фӕлӕ йӕм уыдзӕн царды рухс». 13 Уӕд Ын фарисейтӕ загътой: «Дӕхи тыххӕй Дӕхӕдӕг дзурыс, ӕмӕ Дӕ ныхас ӕцӕг нӕу». 14 Йесо сын дзуапп радта: «Кӕд Мӕхи тыххӕй Мӕхӕдӕг дзурын, уӕддӕр Мӕ ныхас ӕцӕг у, уымӕн ӕмӕ кӕцӕй ӕрцыдтӕн ӕмӕ кӕдӕм цӕуын, уый Ӕз зонын. Сымах та нӕ зонут, Ӕз кӕцӕй ӕрцыдтӕн ӕмӕ кӕдӕм цӕуын, уый. 15 Сымах тӕрхон кӕнут адӕймаджы цӕстӕй кӕсгӕйӕ. Ӕз та никӕмӕн тӕрхон кӕнын. 16 Фӕлӕ кӕд Ӕз тӕрхон кӕнын, уӕддӕр Мӕ тӕрхон раст у, уымӕн ӕмӕ Ӕз иунӕг нӕ дӕн – Мӕ рарвитӕг Фыд Мемӕ ис. 17 Ӕмӕ уӕ Ӕгъдауы дӕр фыст ис, дыууӕ адӕймаджы ӕвдисӕнад раст у, зӕгъгӕ. 18 Ӕз дзурын Мӕхи тыххӕй, Мӕн тыххӕй зӕгъы Мӕ рарвитӕг Фыд дӕр». 19 Уӕд Ӕй бафарстой: «Кӕм ис Дӕ Фыд?» Йесо дзуапп радта: «Сымах нӕдӕр Мӕн зонут, нӕдӕр Мӕ Фыды. Мӕн куы зониккат, уӕд Мӕ Фыды дӕр зониккат». 20 Йесо ацы ныхӕстӕ загъта, Кувӕндоны хӕзнавӕрӕны цур куы амыдта, уӕд. Фӕлӕ Йӕ ничи ӕрцахста, уымӕн ӕмӕ Йӕ рӕстӕг нӕма ӕрцыд. 21 Йесо сын ногӕй загъта: «Ӕз цӕуын, агурдзыстут Мӕ, фӕлӕ амӕлдзыстут уӕ тӕригъӕдимӕ. Ӕз кӕдӕм цӕуын, уырдӕм ӕрцӕуын уӕ бон нӕ бауыдзӕн». 22 Уӕд иудейтӕ дзырдтой: «Ау, Йӕхи амардзӕн, афтӕ куы зӕгъы: „Ӕз кӕдӕм цӕуын, уырдӕм ӕрцӕуын уӕ бон нӕ бауыдзӕн"?» 23 Йесо сын загъта: «Сымах дӕллӕгтӕй стут, Ӕз та – уӕллӕгтӕй. Сымах ацы дунейӕ стут, Ӕз та ацы дунейӕ нӕ дӕн. 24 Гъе, Ӕз уын уымӕ гӕсгӕ загътон, сымах амӕлдзыстут уӕ тӕригъӕдтимӕ, зӕгъгӕ. Уымӕн ӕмӕ ӔЗ ДӔН ӕмӕ ууыл куы нӕ баууӕндат, уӕд амӕлдзыстут уӕ тӕригъӕдтимӕ». 25 Уӕд Ӕй бафарстой: «Ды чи дӕ?» Йесо сын загъта: «Ӕз Чи дӕн, уый тыххӕй уын райдианӕй дзурын. 26 Мӕ бон у сымах тыххӕй бирӕ зӕгъын ӕмӕ уын тӕрхон кӕнын. Фӕлӕ Мӕ Рарвитӕгыл ис ӕууӕндӕн, ӕмӕ Ӕз Уымӕй цы фехъуыстон, ӕрмӕст уый дзурын дунейӕн». 27 Йесо сын Йӕ Фыды тыххӕй кӕй дзырдта, уый нӕ бамбӕрстой. 28 Уӕд сын Йесо загъта: «Адӕймаджы Фырты уӕлӕмӕ куы сисат, уӕд базондзыстут: ӔЗ ДӔН, Мӕхи номӕй ницы кӕнын, фӕлӕ зӕгъын, Мӕ Фыд Мын цы бацамыдта, уый. 29 Мӕ Рарвитӕг Мемӕ ис, иунӕгӕй Мӕ нӕ ныууагъта, уымӕн ӕмӕ Йын фӕндон цы у, Ӕз кӕддӕриддӕр уый кӕнын». 30 Йесо ацы ныхӕстӕ куы загъта, уӕд Ыл бирӕтӕ баууӕндыдысты. 31 Уӕд Ыл цы иудейтӕ баууӕндыд, уыдонӕн Йесо загъта: «Мӕ ныхасмӕ гӕсгӕ куы цӕрат, уӕд ӕцӕг Мӕ ахуыргӕнинӕгтӕ уыдзыстут, 32 Ӕмӕ базондзыстут ӕцӕгад, ӕмӕ уӕ ӕцӕгад ссӕрибар кӕндзӕн». 33 Йесойӕн загътой: «Мах Авраамы байзӕддаг стӕм ӕмӕ цагъартӕ никуы никӕмӕн уыдыстӕм. Уӕд Ды куыд зӕгъыс: „Ссӕрибар уыдзыстут"?» 34 Йесо сын дзуапп радта: «Ӕцӕг, ӕцӕг зӕгъын сымахӕн: тӕригъӕды чи ӕфты, уый тӕригъӕды цагъар у. 35 Цагъар йӕ хицауы хӕдзары мыггагмӕ нӕ цӕры, фырт дзы цӕры мыггагмӕ. 36 Уӕдӕ Фырт сымах куы ссӕрибар кӕна, уӕд уыдзыстут ӕцӕг сӕрибар. 37 Ӕз зонын, Авраамы байзӕддаг кӕй стут, уый. Уӕддӕр Мӕ хъавут амарынмӕ, уымӕн ӕмӕ уӕм Мӕ дзырд нӕ хъары. 38 Ӕз Мӕ Фыдмӕ цы федтон, уый дзурын. Сымах дӕр уӕ фыдӕй цы фехъуыстат, уый кӕнут». 39 Дзуапп Ын радтой: «Нӕ фыд Авраам у». Йесо сын загъта: «Сымах Авраамы цот куы уаиккат, уӕд Авраамы хъуыддӕгтӕ кӕниккат. 40 Сымах та Мӕн, Хуыцауӕй ӕцӕгад фехъусӕг ӕмӕ уын ӕй радзурӕг Адӕймаджы, амарынмӕ хъавут. Авраам афтӕ нӕ кодта. 41 Сымах уӕ фыды хъуыддӕгтӕ нӕ уадзут». Уӕд Ын загътой: «Мах дзӕгъӕлзад не стӕм. Иу Фыд нын ис – Хуыцау». 42 Йесо сын загъта: «Хуыцау уӕ Фыд куы уаид, уӕд Мӕ уарзиккат, уымӕн ӕмӕ Ӕз Хуыцауӕй рацӕугӕ дӕн ӕмӕ ардӕм ӕрцыдтӕн. Ӕз Мӕхи номӕй не 'рцыдтӕн, фӕлӕ Мӕ Уый рарвыста. 43 Ӕз цы зӕгъын, уый цӕуылнӕ ӕмбарут? Уымӕн ӕмӕ Мӕ ныхасмӕ хъусын нӕ фӕразут. 44 Уӕ фыд хӕйрӕг у, ӕмӕ уӕ фыды зӕрдӕ цы зӕгъы, уый кӕнын уӕ фӕнды. Уый райдианӕй лӕгмар уыди, ӕцӕгад ӕм нымады дӕр нӕ уыд, уымӕн ӕмӕ йӕм ӕцӕгад нӕй. Уый мӕнг куы фӕзӕгъы, уӕд йӕ кӕнон фӕкӕны, уымӕн ӕмӕ у мӕнгард ӕмӕ мӕнгарддзинады фыд. 45 Ӕз та ӕцӕг кӕй зӕгъын, уый тыххӕй Мыл не 'ууӕндут. 46 Сымахӕй Мын Мӕ цӕстмӕ тӕригъӕд чи бадардзӕн? Фӕлӕ кӕд Ӕз ӕцӕг зӕгъын, уӕд Мыл цӕуылнӕ ӕууӕндут? 47 Хуыцауӕй чи у, уый Хуыцауы ныхӕстӕм хъусы. Сымах та Хуыцауӕй кӕй не стут, уый тыххӕй нӕ хъусут». 48 Иудейтӕ Йын загътой: «Ды самариаг ӕмӕ хӕйрӕджджын кӕй дӕ, уымӕй раст нӕ зӕгъӕм, ӕви?» 49 Йесо дзуапп радта: «Ӕз хӕйрӕджджын нӕ дӕн, фӕлӕ Мӕ Фыды нымайын, сымах та Мӕ ӕгад кӕнут. 50 Фӕлӕ Ӕз Мӕхицӕн намысмӕ нӕ тырнын. Ис Мӕнӕн намысмӕ Тырнӕг – Уый тӕрхонгӕнӕг у. 51 Ӕцӕг, ӕцӕг зӕгъын сымахӕн: Мӕ ныхас чи сӕххӕст кӕна, уый мыггагмӕ дӕр мӕлӕт нӕ фендзӕн». 52 Иудейтӕ Йын загътой: «Ныр мах зонӕм, Ды хӕйрӕджджын кӕй дӕ, уый. Авраам дӕр ӕмӕ пехуымпартӕ дӕр амардысты, Ды та зӕгъыс: „Мӕ ныхас чи сӕххӕст кӕна, уый мыггагмӕ дӕр мӕлӕт нӕ фендзӕн". 53 Ау, нӕ фыдӕл Авраам дӕр ма куы амард, уӕд Ды уымӕй уӕлдӕр дӕ? Ӕмӕ пехуымпартӕ дӕр куы амардысты. Дӕхицӕй цы аразыс?» 54 Йесо дзуапп радта: «Кӕд Мӕхӕдӕг Мӕхицӕн дӕн намысгӕнӕг, уӕд Мӕ намыс ницы у. Сымах уӕ Хуыцау Кӕй хонут, Мӕнӕн Мӕ уыцы Фыд у намысгӕнӕг. 55 Сымах Ӕй нӕ базыдтат, Ӕз та Йӕ зонын. Ӕмӕ Йӕ нӕ зонын, зӕгъгӕ, куы зӕгъон, уӕд сымахау фӕлитой уыдзынӕн. Фӕлӕ Йӕ Ӕз зонын ӕмӕ ӕххӕст кӕнын Йӕ дзырд. 56 Уӕ фыдӕл Авраам цин кодта, Ме 'рцыды бон кӕй фендзӕн, ууыл. Федта йӕ, ӕмӕ йӕ зӕрдӕ барухс». 57 Уӕд Ын иудейтӕ загътой: «Дӕуыл дӕс ӕмӕ дыууиссӕдз азы дӕр куы нӕма цӕуы, уӕд Авраамы федтай?» 58 Йесо сын загъта: «Ӕцӕг, ӕцӕг зӕгъын сымахӕн: Авраамы райгуырды размӕ дӕр ӔЗ ДӔН». 59 Уӕд систой дуртӕ, куыд Ыл сӕ ныццӕвой, афтӕ. Фӕлӕ Йесо фӕаууон ӕмӕ рацыд Кувӕндонӕй

Иоанн 9

1 Йесо фӕцӕйцыд ӕмӕ федта ӕрдзӕй куырм адӕймаджы. 2 Йесойы Йӕ ахуыргӕнинӕгтӕ бафарстой: «Равви, тӕригъӕд чи ракодта? Йӕхи ӕви йӕ ныййарджыты тӕригъӕды аххосӕй у ӕрдзӕй куырм?» 3 Йесо дзуапп радта: «Нӕдӕр йӕхӕдӕг тӕригъӕд ракодта, нӕдӕр йӕ ныййарджытӕ, фӕлӕ куырм у Хуыцауы хъару йыл равдисыны тыххӕй. 4 Цалынмӕ бон у, уӕдмӕ Мӕ Рарвитӕджы хъуыддӕгтӕ хъуамӕ аразон. Ӕрцӕуы ӕхсӕв, ӕмӕ уӕд ничиуал ницы сараздзӕн. 5 Цалынмӕ Ӕз дунейы дӕн, уӕдмӕ Ӕз дунейӕн рухс дӕн». 6 Афтӕ зӕгъыны фӕстӕ ату кодта зӕхмӕ, сызмӕста дзы сыджыт, змӕстӕй байсӕрста куырмы цӕстытӕ 7 Ӕмӕ йын загъта: «Ацу, цӕхс дӕ цӕсгом Силоамы найӕны». («Силоам» тӕлмацгондӕй амоны «Минӕвар».) Уый ацыд, цӕхсадта дзы йӕхи, ракаст йӕ цӕстытӕй ӕмӕ ацыд сӕхимӕ. 8 Йӕ сыхӕгтӕ, стӕй йӕ раздӕр мӕгуыргурӕй чи уыдта, уыдон дзырдтой: «Мӕгуыргурӕй чи бадти, уый нӕу, ӕви?» 9 Иннӕтӕ дзырдтой: «Уый у». Аннӕтӕ та: «Нӕу, фӕлӕ уый хуызӕн у». Йӕхӕдӕг та дзырдта: «Уый ӕз дӕн». 10 Уӕд ӕй бафарстой: «Куыд ракастӕ дӕ цӕстытӕй?» 11 Уый дзуапп радта: «Йесо Чи хуыйны, Уый сызмӕста сыджыт, байсӕрста мын дзы мӕ цӕстытӕ ӕмӕ мын загъта: „Ацу Силоамы найӕнмӕ ӕмӕ дӕхи цӕхс". Ӕз ацыдтӕн, мӕхи цӕхсадтон ӕмӕ мӕ цӕстытӕй ракастӕн». 12 Уӕд ын загътой: «Кӕм ис уыцы Адӕймаг?» Уый сын дзуапп радта: «Нӕ зонын». 13 Уӕд раздӕры куырмы акодтой фарисейтӕм. 14 Йесо сыджыт куы сызмӕста ӕмӕ йын дзы йӕ цӕстытӕ куы байсӕрста, уӕд сабат уыд. 15 Йӕ цӕстытӕй куыд ракаст, уымӕй йӕ фарисейтӕ дӕр бафарстой. Уый сын загъта: «Уыцы Адӕймаг мын сыджыты змӕст ӕрӕвӕрдта мӕ цӕстытыл, ӕз мӕхи цӕхсадтон ӕмӕ райдыдтон уынын». 16 Уӕд фарисейтӕй иуӕй-иутӕ загътой: «Уыцы Адӕймаг Хуыцауӕй нӕу, уымӕн ӕмӕ халы сабаты ӕгъдау». Иннӕтӕ дзырдтой: «Тӕригъӕдджын адӕймаджы бон ахӕм диссӕгтӕ кӕнын куыд у?» Ӕмӕ сӕм иу хъуыды нал уыд. 17 Уӕд та ногӕй загътой куырмӕн: «Ды та уыцы Адӕймаджы тыххӕй цы зӕгъдзынӕ? Дӕ цӕстытӕй дӕ куы ракӕсын кодта». Дзуапп сын радта: «Уый пехуымпар у». 18 Куырм кӕй уыд ӕмӕ йӕ цӕстӕй кӕй ракаст, уый иудейты уӕддӕр нӕ уырныдта. Уымӕ гӕсгӕ йын басидтысты йӕ ныййарджытӕм, 19 Ӕмӕ сӕ бафарстой: «Ӕрдзӕй куырм у, зӕгъгӕ, кӕмӕй зӕгъут, ай уӕ уыцы фырт нӕу? Ныр цӕстӕй куыд ракаст?» 20 Йӕ ныййарджытӕ сын дзуапп радтой: «Ай нӕ фырт кӕй у, ӕмӕ ӕрдзӕй куырм кӕй рахаста, уый зонӕм. 21 Ныр цӕстӕй куыд ракаст ӕмӕ йын йӕ цӕстытӕ чи байгом кодта, уый та нӕ зонӕм. Йӕхи йын бафӕрсут, сывӕллон нал у, йӕхӕдӕг зӕгъӕд йӕхи тыххӕй». 22 Йӕ ныййарджытӕ иудейтӕй кӕй тарстысты, уымӕ гӕсгӕ радтой ахӕм дзуапп. Уымӕн ӕмӕ иудейтӕн сӕ уынаффӕ уыд, Йесойы ӕргомӕй Чырыстийыл чи банымайа, уый синагогӕйӕ ацух кӕнын. 23 Уымӕ гӕсгӕ йӕ ныййарджытӕ загътой: «Сывӕллон нал у, йӕхи йын бафӕрсут». 24 Дыккаг хатт дӕр фӕдзырдтой, раздӕр куырм чи уыд, уыцы адӕймагмӕ ӕмӕ йын загътой: «Раст зӕгъ Хуыцауы раз. Мах зонӕм, уыцы Адӕймаг тӕригъӕдджын кӕй у, уый». 25 Уӕд сын дзуапп радта: «Нӕ зонын, Уый тӕригъӕдджын у ӕви нӕ. Ӕз иу хъуыддаг зонын – уыдтӕн куырм, ныр та кӕсын мӕ цӕстӕй». 26 Ногӕй йӕ бафарстой: «Уыцы Адӕймаг дын цы бакодта? Цы амалӕй дӕ ракӕсын кодта дӕ цӕстытӕй?» 27 Дзуапп сын радта: «Ӕз уын загътон, ӕмӕ сымах нӕ хъуыстат. Уымӕ ма уӕ дыккаг хатт хъусын цӕй тыххӕй фӕнды? Ӕви сымах дӕр Йӕ ахуыргӕнинӕгтӕ суӕвын фӕнды?» 28 Уыдон ӕй райдыдтой ӕлгъитын ӕмӕ йын дзырдтой: «Ды дӕ Йӕ ахуыргӕнинаг, мах та Моисейы ахуыргӕнинӕгтӕ стӕм. 29 Моисеимӕ Хуыцау кӕй ныхас кодта, уый мах зонӕм, Ай та кӕцӕй у, уый нӕ зонӕм». 30 Уыцы адӕймаг сын дзуапп радта: «Диссаг дӕр уый у, ӕмӕ кӕцӕй у, уый нӕ зонут, мӕн та цӕстӕй ракӕсын кодта. 31 Фӕлӕ тӕригъӕдджынтӕм Хуыцау кӕй нӕ хъусы, уый нын зындгонд у. Чи Йӕ нымайы ӕмӕ Йӕ фӕндон чи ӕххӕст кӕны, Хуыцау уымӕ хъусы. 32 Ӕрдзӕй куырмы йӕ цӕстӕй исчи ракӕсын кӕна, уый дуне сфӕлдисынӕй фӕстӕмӕ нӕ фехъуыстӕуыд. 33 Уый Хуыцауӕй куы нӕ уаид, уӕд Ын ницы ӕнтысид». 34 Уыдон ын загътой: «Дӕ райгуырынӕй къахӕй-къухмӕ тӕригъӕдджын куы дӕ, уӕд мах ахуыр кӕныс?» Ӕмӕ йӕ ратардтой. 35 Кӕй йӕ ратардтой, уый Йесо куы фехъуыста, уӕд ӕй ссардта ӕмӕ йын загъта: «Адӕймаджы Фыртыл ӕууӕндыс?» 36 Уый дзуапп радта: «Уый та чи у, хицау? Зӕгъ мын ӕй, ӕмӕ Йыл ӕууӕндон». 37 Йесо йын загъта: «Уынгӕ дӕр Ӕй фӕкодтай, ӕмӕ ныхас дӕр Уый кӕны демӕ». 38 Уӕд уый загъта: «Уырны мӕ, Хицау!» – ӕмӕ Йӕ разы ӕрхауд йӕ зонгуытыл. 39 Йесо загъта: «Ӕз ацы дунемӕ тӕрхон кӕнынмӕ ӕрцыдтӕн, куырмытӕ сӕ цӕстӕй куыд ракӕсой, цӕстджынтӕ та куырм куыд бауой, афтӕ». 40 Уым цы фарисейтӕ уыди, уыдон Ӕй фехъуыстой ӕмӕ Йын загътой: «Ау, мах дӕр куырмытӕ стӕм?» 41 Йесо сын загъта: «Сымах куырмытӕ куы уаиккат, уӕд уӕ тӕригъӕды тыххӕй дзуапп дӕттын нӕ хъӕуид. Фӕлӕ уӕхи цӕстджынтыл кӕй нымайут, уымӕ гӕсгӕ тӕригъӕдӕй сӕрибар не стут.

Иоанн 10

1 Ӕцӕг, ӕцӕг зӕгъын сымахӕн: уӕтӕрмӕ дуарыл чи нӕ бацӕуы, фӕлӕ йӕм ӕндӕр ранӕй чи бабыры, уый давӕг ӕмӕ абырӕг у. 2 Дуарыл бацӕуӕг та фыстӕн сӕ фыййау у. 3 Дуаргӕс ын бакӕны дуар, ӕмӕ йын фыстӕ хъусынц йӕ хъӕлӕс. Уый йӕ фыстӕм дзуры сӕ номӕй, ӕмӕ сӕ ракӕны ӕддӕмӕ. 4 Ӕмӕ йӕ фысты иууылдӕр ӕддӕмӕ куы ракӕны, уӕд фӕцӕуы сӕ разӕй. Фыстӕ та фӕцӕуынц йӕ фӕдыл, уымӕн ӕмӕ йын йӕ хъӕлӕс зонынц. 5 Ӕцӕгӕлоны фӕдыл та нӕ цӕуынц, фӕлӕ дзы лидзынц, уымӕн ӕмӕ ӕцӕгӕлоны хъӕлӕс нӕ зонынц». 6 Йесо сын радзырдта ацы фӕсномыг ныхас. Фӕлӕ сын ӕй цӕй тыххӕй радзырдта, уый нӕ бамбӕрстой. 7 Уӕд сын Йесо ноджыдӕр загъта: «Ӕцӕг, ӕцӕг зӕгъын сымахӕн: Ӕз дуар дӕн фыстӕн. 8 Мӕ размӕ-иу сӕм чи ӕрцыд, уыдон иууылдӕр давджытӕ ӕмӕ абырджытӕ уыдысты; фӕлӕ сӕм фыстӕ нӕ байхъуыстой. 9 Ӕз дӕн дуар. Мӕныл йӕ фӕндаг кӕмӕн уа, уый фервӕздзӕн – бацӕудзӕн, рацӕудзӕн ӕмӕ ссардзӕн хизӕнуат. 10 Давӕг ӕрмӕст адавынмӕ, амарынмӕ ӕмӕ бабын кӕнынмӕ ӕрцӕуы. Ӕз та ӕрцыдтӕн алцӕмӕй дӕр ӕххӕст цард раттынмӕ. 11 Ӕз дӕн хорз фыййау; хорз фыййау йӕ цард ратты фысты сӕраппонд. 12 Ӕххуырст та ахӕм нӕу, уымӕн фыстӕ йӕхи не сты; бирӕгъы ӕрцӕугӕ куы фены, уӕд ныууадзы фысты, лидзынмӕ фӕвӕййы, бирӕгъ аскъӕфы фыстӕй ӕмӕ сӕ ныххӕлиу кӕны. 13 Ӕххуырст алидзы, уымӕн ӕмӕ ӕххуырст у ӕмӕ фыстыл нӕ мӕт кӕны. 14 Ӕз хорз фыййау дӕн, Ӕз зонын Мӕ фысты, Мӕ фыстӕ дӕр Мӕ зонынц. 15 Мӕн Мӕ Фыд куыд зоны, Ӕз дӕр Мӕ Фыды афтӕ зонын, ӕмӕ Мӕ цард дӕттын фысты сӕраппонд. 16 Ацы уӕтӕрӕй чи нӕу, ис Мын ахӕм фыстӕ дӕр, ӕмӕ уыдоны дӕр хъуамӕ ӕрхонон. Уыдон дӕр фехъусдзысты Мӕ хъӕлӕс, ӕмӕ уыдзӕн иу дзуг ӕмӕ иу Фыййау. 17 Мӕ Фыд Мӕ уый тыххӕй уарзы, ӕмӕ Ӕз дӕттын Мӕ цард, цӕмӕй йӕ фӕстӕмӕ райсон. 18 Ничи Мын ӕй исы, фӕлӕ йӕ Ӕз Мӕхӕдӕг дӕттын. Мӕ бар у йӕ раттын дӕр ӕмӕ Мӕ бар у фӕстӕмӕ йӕ райсын дӕр. Афтӕ Мын бафӕдзӕхста Мӕ Фыд». 19 Ацы ныхӕсты тыххӕй дӕр та иудейтӕм иу хъуыды нал уыд. 20 Уыдонӕй бирӕтӕ дзырдтой: «Уый хӕйрӕджджын ӕмӕ сӕрхъӕн у. Цы йӕм хъусут?» 21 Иннӕтӕ дзырдтой: «Уыдон хӕйрӕджджыны ныхӕстӕ не сты. Хӕйрӕгӕн куырмыты цӕстӕй ракӕсын кӕнын йӕ бон у?» 22 Иерусалимы ралӕууыд Кувӕндон Ссыгъдӕг кӕныны бӕрӕгбон Уыди зымӕг. 23 Йесо зылди Кувӕндоныл, Соломоны тыргъыл. 24 Уым Ыл ӕрӕмбырд сты иудейтӕ ӕмӕ Йын дзырдтой: «Бирӕ ма нӕ тухӕнӕй мардзынӕ? Кӕд Чырысти дӕ, уӕд нын ӕй ӕргом зӕгъ». 25 Йесо сын дзуапп радта: «Ӕз уын загътон, ӕмӕ уӕ нӕ уырны. Ӕз Мӕ Фыды номӕй цы хъуыддӕгтӕ кӕнын, уыдон Мӕныл дзурӕг сты. 26 Фӕлӕ не 'ууӕндут, уымӕн ӕмӕ сымах Мӕ фыстӕй не стут [раздӕр уын куыд загътон, афтӕ]. 27 Мӕ фыстӕ хъусынц Мӕ хъӕлӕс, Ӕз сӕ зонын, ӕмӕ уыдон цӕуынц Мӕ фӕдыл. 28 Ӕз сын дӕттын мыггагмӕйы цард – мыггагмӕ дӕр сын мӕлӕт нӕ уыдзӕн, ӕмӕ сӕ Мӕ къухӕй ничи аскъӕфдзӕн. 29 Уыдон Мын Чи радта, Мӕ уыцы Фыдӕй уӕлдӕр нӕй. Ӕмӕ сӕ Мӕ Фыды къухӕй аскъӕфын никӕй бон у. 30 Ӕз ӕмӕ Мӕ Фыд иу стӕм». 31 Иудейтӕ ногӕй фелвӕстой дуртӕ Йӕ амарыны тыххӕй. 32 Йесо сын загъта: «Ӕз уын бирӕ хорз хъуыддӕгтӕ фенын кодтон Мӕ Фыдӕй. Уыдонӕй Мӕ кӕцыйы тыххӕй хъавут дуртӕй амарынмӕ?» 33 Иудейтӕ Йын дзуапп радтой: «Хорз хъуыддӕгты тыххӕй Дӕ нӕ хъавӕм дуртӕй амарынмӕ, фӕлӕ Ды, адӕймаг, Дӕхицӕй Хуыцау кӕй аразыс ӕмӕ уымӕй Хуыцауы кӕй фауыс, уый тыххӕй». 34 Йесо сын загъта: «Уӕ Ӕгъдауы афтӕ фыст нӕй: „Ӕз загътон: сымах хуыцӕуттӕ стут"? 35 Хуыцауы ныхас кӕмӕн лӕвӕрд уыд, кӕд Хуыцау уыдоны хуыцӕуттӕ схуыдта, ӕмӕ Сыгъдӕг Фыстӕн аивӕн нӕй, 36 Уӕд Фыд Кӕй сӕвзӕрста ӕмӕ дунемӕ Кӕй рарвыста, Уымӕн зӕгъут: „Хуыцауы фауыс", „Ӕз Хуыцауы Фырт дӕн" кӕй загътон, уый тыххӕй? 37 Мӕ Фыд цы хъуыддӕгтӕ кӕны, кӕд Ӕз дӕр уыцы хъуыддӕгтӕ нӕ кӕнын, уӕд Мыл ма ӕууӕндут. 38 Фӕлӕ кӕд Ӕз Мӕ Фыды хъуыддӕгтӕ кӕнын ӕмӕ Мыл уӕддӕр не 'ууӕндут, уӕд ӕууӕндут Мӕ хъуыддӕгтыл, Ӕз Мӕ Фыдимӕ иу кӕй дӕн ӕмӕ Мӕ Фыд Мемӕ иу кӕй у, уый куыд базонат ӕмӕ бамбарат, афтӕ». 39 Уӕд та Йӕ ногӕй хъавыдысты ӕрцахсынмӕ, фӕлӕ Уый сӕ къухы нӕ бафтыд. 40 Ӕмӕ та ногӕй ацыд Иорданы иннӕ фарсмӕ, Иоанн раздӕр кӕм аргъуыдта, уыцы бынатмӕ ӕмӕ уым фӕци иуцасдӕр. 41 Ӕрцыдис Ӕм бирӕ адӕм ӕмӕ дзырдтой, зӕгъгӕ, Иоанн диссӕгтӕ нӕ равдыста, фӕлӕ ацы Адӕймаджы тыххӕй цыдӕриддӕр загъта, уый ӕцӕг у. 42 Ӕмӕ Йесойыл уым бирӕтӕ баууӕндыдысты.

Иоанн 11

1 Иу адӕймаг, йӕ ном Лазыр, уыди рынчын. Уый уыди, Мариа йӕ хо Марфӕимӕ кӕм царди, Вифанийы уыцы хъӕуӕй. 2 Мариа та уыди, Хицау Йесойы хӕрздӕфгӕнӕнӕй чи байсӕрста ӕмӕ Йын Йӕ къӕхтӕ йӕ дзыккутӕй чи ныссӕрфта, уыцы сылгоймаг. Ныр йе 'фсымӕр Лазыр уыди рынчын. 3 Хотӕ арвыстой Йесойӕн зӕгъынмӕ: «Хицау, Ды кӕй уарзыс, уый рынчын у». 4 Йесо уый куы фехъуыста, уӕд загъта: «Уыцы низ мӕлӕтмӕ нӕ кӕны, фӕлӕ Хуыцауы кадӕн у, цӕмӕй уый руаджы скадджын уа Хуыцауы Фырт». 5 Йесо уарзта Марфӕйы, йӕ хо Мариайы ӕмӕ Лазыры. 6 Фӕлӕ Лазыр рынчын кӕй у, Йесо уый куы фехъуыста, уӕд кӕм уыдис, уым ма афӕстиат дыууӕ боны. 7 Уый фӕстӕ загъта ахуыргӕнинӕгтӕн: «Ногӕй ацӕуӕм Иудейӕмӕ». 8 Ахуыргӕнинӕгтӕ Йын загътой: «Равви, ӕрӕджы дӕр ма Дӕ иудейтӕ дуртӕй амарынмӕ хъавыдысты, ӕмӕ та ногӕй уырдӕм цӕуыс?» 9 Йесо дзуапп радта: «Боны дыууадӕс сахаты нӕй? Боныгон чи цӕуы, уый нӕ кӕлы, уымӕн ӕмӕ уыны ацы дунейы рухс. 10 Ӕхсӕвыгон чи цӕуы, уый та фӕкӕлы, уымӕн ӕмӕ йӕм рухс нӕй». 11 Уыцы ныхӕстыл ма Йесо бафтыдта: «Нӕ хӕлар Лазыр бафынӕй, фӕлӕ Ӕз цӕуын йӕ райхъал кӕнынмӕ». 12 Йӕ ахуыргӕнинӕгтӕ Йын загътой: «Хицау, кӕд фынӕй баци, уӕд сдзӕбӕх уыдзӕн». 13 Йесо сын Лазыры мӕлӕты тыххӕй дзырдта, уыдон та афтӕ ӕнхъӕл уыдысты, цыма Уый хуымӕтӕг фынӕйы тыххӕй зӕгъы. 14 Уӕд сын Йесо ӕргомӕй загъта: «Лазыр амард. 15 Ӕмӕ Ӕз уым кӕй нӕ уыдтӕн, ууыл сымах тыххӕй цин кӕнын, уымӕн ӕмӕ баууӕнддзыстут. Ныр та йӕм ацӕуӕм». 16 Уӕд фӕсномыгӕй Фаззон чи хуынд, уыцы Фома иннӕ ахуыргӕнинӕгтӕн загъта: «Цом ӕмӕ мах дӕр Йемӕ амӕлӕм». 17 Йесо куы ӕрцыд, уӕд базыдта, Лазыр цыппар боны зӕппадзы кӕй ис, уый. 18 Вифани та Иерусалиммӕ хӕстӕг уыд, фынддӕс стадийы бӕрц. 19 Ӕмӕ иудейтӕй бирӕтӕ ӕрцыдысты Марфӕ ӕмӕ Мариамӕ се 'фсымӕры мӕлӕты фӕдыл сын ныфсытӕ ӕвӕрынмӕ. 20 Йесо кӕй ӕрбацӕуы, уый Марфӕ куы фехъуыста, уӕд ацыд Йӕ размӕ. Мариа та хӕдзары уыд. 21 Марфӕ загъта Йесойӕн: «Хицау, Ды ам куы уыдаис, уӕд ме 'фсымӕр нӕ амардаид. 22 Фӕлӕ ныр дӕр зонын: Ды Хуыцауӕй цы ракурай, уый Дын ратдзӕн». 23 Йесо йын загъта: «Де 'фсымӕр райгас уыдзӕн». 24 Марфӕ Йын загъта: «Фӕстаг бон, мӕрдты райгасы бон, кӕй райгас уыдзӕн, уый зонын». 25 Йесо йын загъта: «Ӕз дӕн мӕрдтӕй ӕгасгӕнӕг ӕмӕ царддӕттӕг. Мӕныл чи ӕууӕнды, уый куы амӕла, уӕддӕр райгас уыдзӕн. 26 Мӕныл ӕууӕндӕг кӕцыфӕнды цардӕгас уд мыггагмӕ дӕр нӕ амӕлдзӕн. Уырны дӕ?» 27 Марфӕ Йын дзуапп радта: «О, Хицау! Дунемӕ Чи хъуамӕ ӕрцӕуа, Ды Хуыцауы уыцы Фырт Чырысти кӕй дӕ, уый мӕ уырны». 28 Уый зӕгъыны фӕстӕ Марфӕ ацыд ӕмӕ сусӕгӕй басидт йӕ хо Мариамӕ: «Ахуыргӕнӕг ам ис ӕмӕ дӕм дзуры». 29 Мариа уый куы фехъуыста, уӕд ӕвӕстиатӕй фестад ӕмӕ ацыд Йесомӕ. 30 Йесо хъӕумӕ нӕма бахӕццӕ, фӕлӕ уыди, Марфӕ Йыл кӕм фембӕлд, уыцы ран. 31 Мариаимӕ хӕдзары чи уыд ӕмӕ йын ныфсытӕ чи ӕвӕрдта, уыцы иудейтӕ йӕ ӕвӕстиатӕй сыстгӕ ӕмӕ рацӕугӕ куы федтой, уӕд араст сты йӕ фӕдыл. Уыдон ӕнхъӕл уыдысты, зӕппадзмӕ кӕуынмӕ ацыди, зӕгъгӕ. 32 Йесо кӕм уыд, Мариа уырдӕм куы ӕрцыд ӕмӕ Йӕ куы федта, уӕд Ын ӕрхауд Йӕ къӕхтӕм ӕмӕ Йын загъта: «Хицау, Ды ам куы уыдаис, уӕд ме 'фсымӕр нӕ амардаид». 33 Мариайы ӕмӕ йемӕ ӕрцӕуӕг иудейты Йесо кӕугӕ куы федта, уӕд Йӕ зӕрдӕ суынгӕг, скатай 34 Ӕмӕ бафарста: «Кӕм ӕй бавӕрдтат?» Уӕд Ын загътой: «Хицау, рацу ӕмӕ фен». 35 Йесойӕн йӕ цӕссыгтӕ ӕркалдысты. 36 Уӕд иудейтӕ дзырдтой: «Кӕс-ма, куыд ӕй уарзта!» 37 Уыдонӕй иуӕй-иутӕ та загътой: «Куырмӕн йӕ цӕстытӕ Чи байгом кодта, Уымӕн Йӕ бон нӕ бауыдаид, цӕмӕй ацы адӕймаг ма амӕла?» 38 Йесойы зӕрдӕ та суынгӕг, афтӕмӕй ӕрцыд зӕппадзмӕ. Уый уыди лӕгӕт, йӕ бацӕуӕныл ын бафӕлдӕхтӕуыд дур. 39 Йесо загъта: «Айсут дур». Марды хо Марфӕ Йын загъта: «Хицау, мард ныридӕгӕн смаг кӕны. Ныр цыппар боны ис зӕппадзы». 40 Йесо йын загъта: «Нӕ дын загътон, куы дӕ уырна, уӕд Хуыцауы намыс фендзынӕ, зӕгъгӕ?» 41 Айстой дур. Йесо скаст уӕларвмӕ ӕмӕ загъта: «Мӕ Фыд, бузныг дӕн Дӕуӕй, кӕй Мӕ хъусыс, уый тыххӕй. 42 Ды Мӕ кӕддӕриддӕр кӕй фехъусдзынӕ, уый Ӕз зыдтон, фӕлӕ ай загътон, ам цы адӕм ис, уыдоны тыххӕй, цӕмӕй баууӕндой, Ды Мӕ кӕй рарвыстай, ууыл». 43 Уыцы ныхӕсты фӕстӕ Йесо хъӕрӕй загъта: «Лазыр, ӕддӕмӕ рацу!» 44 Ӕмӕ мард рацыд, йӕ къухтӕ ӕмӕ йӕ къӕхтӕ – мӕрддзаг хӕцъилтӕй тыхт, йӕ цӕсгом – сӕрӕмбӕрзӕнӕй баст. Йесо сын загъта: «Райхалут ӕй ӕмӕ ацӕуа». 45 Уӕд Мариамӕ чи ӕрцыд ӕмӕ Йесо цы бакодта, уый чи федта, уыцы иудейтӕй Йыл бирӕтӕ баууӕндыдысты. 46 Сӕ иуӕй-иутӕ та ацыдысты фарисейтӕм ӕмӕ сын радзырдтой, Йесо цы бакодта, уый тыххӕй. 47 Уӕд алчертӕ ӕмӕ фарисейтӕ ӕрӕмбырд кодтой синедрион ӕмӕ загътой: «Цы гӕнгӕ нын у? Ацы Адӕймаг бирӕ диссӕгтӕ ӕвдисы. 48 Афтӕ Йӕ куы ныууадзӕм, уӕд Ыл сеппӕт дӕр баууӕнддзысты. Ӕмӕ ӕрцӕудзысты ромӕгтӕ ӕмӕ фесафдзысты нӕ ацы бынат дӕр ӕмӕ нӕ адӕмы дӕр». 49 Уыдонӕй иу, Каиафӕ, уыцы аз алчер уыд. Ӕмӕ сын уый загъта: «Сымах ницы зонут 50 Ӕмӕ не 'мбарут, ӕппӕт адӕмы фесафыны бӕсты адӕмы сӕрвӕлтау иу адӕймаг куы амӕла, уӕд сымахӕн хуыздӕр кӕй у, уый». 51 Уый Каиафӕйӕн уыд йӕхи хъуыды нӕ, фӕлӕ пехуымпар ныхас, уымӕн ӕмӕ уыцы аз алчер уыд, ӕмӕ рагагъоммӕ загъта, Йесо кӕй хъуамӕ амӕла Йӕ адӕмы сӕрвӕлтау, 52 Ӕмӕ ӕрмӕст Йӕ адӕмы сӕрвӕлтау нӕ, фӕлӕ ма ӕрӕмбырд ӕмӕ баиу кӕна, чи ныххӕлиу, Хуыцауы уыцы хъӕбулты дӕр. 53 Уыцы бон скодтой Йесойы амарыны фӕнд. 54 Уымӕ гӕсгӕ-иу Йесо ӕргомӕй иудейты ӕхсӕн нал фӕзынд, фӕлӕ уырдыгӕй ацыд Эфраиммӕ – ӕдзӕрӕг бӕстӕмӕ ӕввахс чи уыди, уыцы сахармӕ; ӕмӕ уым уыди Йӕ ахуыргӕнинӕгтимӕ. 55 Ӕрхӕстӕг иудейаг Куадзӕн, ӕмӕ бӕстӕйы алы рӕттӕй бирӕтӕ Куадзӕны размӕ ӕрцыдысты Иерусалиммӕ сӕхи ссыгъдӕг кӕнынмӕ. 56 Уӕд агуырдтой Йесойы ӕмӕ Кувӕндоны дзырдтой сӕ кӕрӕдзийӕн: «Куыд уӕм кӕсы, Йесо бӕрӕгбонмӕ не 'рцӕудзӕн?» 57 Алчертӕ ӕмӕ фарисейтӕ та радтой бардзырд: Йесо кӕм ис, уый исчи куы базона, уӕд сын фехъусын кӕнӕд ӕмӕ Йӕ ӕрцахсой.

Иоанн 12

1 Куадзӕнӕй ӕхсӕз боны раздӕр Йесо ӕрцыд Вифанимӕ, мӕрдтӕй кӕй райгас кодта, уыцы Лазыр кӕм царди, уырдӕм. 2 Уым Ын ӕрӕвӕрдтой фынг. Марфӕ кодта кӕстӕриуӕг, Лазыр та уыд, Йесоимӕ фынгыл чи бадти, уыдоны ӕхсӕн. 3 Мариа та райста, нард цы зайӕгой хонынц, уымӕй ист сыгъдӕг ӕмӕ зынаргъ хӕрздӕфгӕнӕны джиранка байсӕрста дзы Йесойы къӕхтӕ, ныссӕрфта Йын сӕ йӕ дзыккутӕй, ӕмӕ хӕдзар байдзаг хӕрздӕфӕй. 4 Уӕд Йӕ ахуыргӕнинӕгтӕй иу, фӕстӕдӕр Ыл гадзрахатӕй чи рацыди, уыцы Иудӕ Искариот, загъта: 5 «Цӕуылнӕ уыд ацы хӕрздӕфгӕнӕнӕн ӕртӕсӕдӕ динарыл ауӕйгӕнӕн ӕмӕ ӕхцайӕн мӕгуыртыл байуарӕн?» 6 Уый афтӕ мӕгуыртыл батыхсыны тыххӕй нӕ загъта, фӕлӕ давӕг кӕй уыд, уый тыххӕй: ӕхцайы лагъз уымӕ уыд, ӕмӕ-иу дзы цы нывӕрдтой, уымӕй-иу систа йӕхицӕн. 7 Йесо загъта: «Ныууадз ӕй. Мариа Мын ацы хӕрздӕфгӕнӕн Мӕ ныгӕнӕн бонмӕ бавӕрдта. 8 Мӕгуыртӕ ӕдзух уӕ фарсмӕ сты, Ӕз та ӕдзух уемӕ нӕ уыдзынӕн». 9 Йесо уым кӕй ис, уый базыдтой иудейтӕй бирӕтӕ ӕмӕ ӕрцыдысты ӕрмӕст Уый тыххӕй нӕ, фӕлӕ мӕрдтӕй кӕй райгас кодта, уыцы Лазыры фенынмӕ дӕр. 10 Алчертӕ та скодтой Лазыры дӕр амарыны фӕнд. 11 Уымӕн ӕмӕ-иу иудейтӕй бирӕтӕ ӕрцыдысты Лазыры тыххӕй ӕмӕ-иу баууӕндыдысты Йесойыл. 12 Бӕрӕгбонмӕ цы бирӕ адӕм ӕрӕмбырд, уыдон дыккаг бон фехъуыстой, Йесо ӕрбацӕуы Иерусалиммӕ, зӕгъгӕ, 13 Ӕмӕ райстой палмӕйы къалиутӕ, рацыдысты Йӕ размӕ ӕмӕ хъӕр кодтой: «Осаннӕ! Арфӕгонд уӕд Хуыцауы номӕй Ӕрцӕуӕг – Израилы Паддзах!» 14 Йесо та бавдӕлд ӕмӕ сбадти къӕлӕуыл, Сыгъдӕг Фыст куыд зӕгъы, афтӕ: 15 «Ма тӕрс, Сионы чызг! Мӕнӕ дӕ Паддзах фӕцӕуы къӕлӕуыл бадгӕйӕ». 16 Йӕ ахуыргӕнинӕгтӕ уый фыццаг нӕ бамбӕрстой. Фӕлӕ Йесо куы снамысджын, уӕд сӕ зӕрдыл ӕрлӕууыд: Йесойы тыххӕй Сыгъдӕг Фысты афтӕ загъд уыди ӕмӕ Йын афтӕ бакодтой. 17 Йесо Лазырмӕ зӕппадзмӕ куы бадзырдта ӕмӕ йӕ куы райгас кодта, уӕд Йемӕ цы адӕм уыди, уыдон ныр дзырдтой уыцы цауы тыххӕй. 18 Ӕмӕ адӕм рацыдысты Йӕ размӕ, уымӕн ӕмӕ фехъуыстой, уыцы диссаг Йесо бакодта, зӕгъгӕ. 19 Фарисейтӕ та кӕрӕдзийӕн дзырдтой: «Уынут, куыд ницы уын ӕнтысы! Ӕгас дуне Йӕ фӕдыл цӕуы!» 20 Хуыцаумӕ кувынмӕ бӕрӕгбоны чи ӕрцыд, уыдонӕй иуӕй-иутӕ бердзентӕ уыдысты. 21 Уыдон бацыдысты, галилейаг Вифсаидӕйӕ чи уыди, уыцы Филиппмӕ ӕмӕ дзы куырдтой: «Хорз лӕг, мах Йесойы фенын фӕнды». 22 Филипп ацыд ӕмӕ уый тыххӕй загъта Андрейӕн. Стӕй Филипп ӕмӕ Андрей бацыдысты Йесомӕ ӕмӕ Йын загътой уый тыххӕй. 23 Йесо сын дзуапп радта: «Адӕймаджы Фыртӕн ралӕууыд Йӕ намысы афон. 24 Ӕцӕг, ӕцӕг зӕгъын сымахӕн: мӕнӕуы нӕмыг зӕххы куы нӕ ныххауа ӕмӕ куы нӕ амӕла, уӕд баззайдзӕн иу нӕмыгӕй. Фӕлӕ куы амӕла, уӕд ратдзӕн бирӕ хор. 25 Йӕ уд чи уарзы, уый йӕ фесафдзӕн; ацы дунейы йӕ уд ӕнӕуынон кӕмӕн у, уый та йӕ бахъахъхъӕндзӕн мыггагмӕйы цардӕн. 26 Мӕнӕн чи кусы, уый Мӕ фӕдыл хъуамӕ цӕуа, ӕмӕ Ӕз кӕм дӕн, уым уыдзӕн Мӕ кусӕг дӕр. Мӕнӕн чи кусы, уыцы адӕймагӕн скад кӕндзӕн Мӕ Фыд. 27 Ныр Мӕ уд фӕтыхст. Ӕмӕ Ӕз афтӕ зӕгъон: „Мӕ Фыд! Фервӕзын Мӕ кӕн ацы тухӕнӕй"? Ӕмӕ Ӕз ацы тухӕны тыххӕй куы ӕрцыдтӕн. 28 Мӕ Фыд, скадджын кӕн Дӕ ном!» Уӕд уӕларвӕй ӕрыхъуысти хъӕлӕс: «Скадджын ӕй кодтон ӕмӕ йӕ ноджыдӕр скадджын кӕндзынӕн». 29 Уым цы адӕм лӕууыд, уыдон уый куы фехъуыстой, уӕд иутӕ дзырдтой: «Уый ӕрвнӕрд у». Иннӕтӕ та дзырдтой: «Зӕд ныхас кодта Йемӕ». 30 Уӕд сын Йесо загъта: «Ацы хъӕлӕс Мӕн тыххӕй нӕ уыд, фӕлӕ сымах тыххӕй. 31 Ныр ацы дунейӕн ралӕууыд йӕ тӕрхоны бон, ӕмӕ фӕтардӕуыдзӕн ацы дунейы ӕлдары 32 Ӕмӕ Ӕз зӕххӕй уӕлӕмӕ ист куы ӕрцӕуон, уӕд сеппӕты дӕр ӕркӕндзынӕн Мӕхимӕ». 33 Ацы ныхӕстӕй Йесо фӕсномыгӕй загъта, цавӕр мӕлӕтӕй амӕлдзӕн, уый тыххӕй. 34 Адӕм Ын дзуапп радтой: «Ӕгъдауӕй зонӕм мах, Чырысти мыггагмӕ кӕй цӕрдзӕн, уый. Уӕд Ды куыд зӕгъыс, Адӕймаджы Фырты уӕлӕмӕ хъуамӕ систӕуа, зӕгъгӕ? Чи у Адӕймаджы уыцы Фырт?» 35 Уӕд сын Йесо загъта: «Иуцасдӕр рӕстӕг ма уыдзӕн рухс уемӕ. Цалынмӕ рухс ис, уӕдмӕ цӕут, талынг уӕ куыд нӕ фӕбынӕй кӕна, уымӕн ӕмӕ талынджы цӕуӕг нӕ зоны, кӕдӕм цӕуы, уый. 36 Цалынмӕ рухс уемӕ ис, уӕдмӕ ӕууӕндут рухсыл, цӕмӕй суат рухсы хъӕбултӕ». Уый зӕгъыны фӕстӕ Йесо ацыд ӕмӕ фӕаууон уыдонӕй. 37 Бирӕ диссӕгтӕ ӕвдисгӕ федтой Йесойы, фӕлӕ Йыл уӕддӕр не 'ууӕндыдысты, 38 Исай-пехуымпар цы загъта, уый куыд сӕххӕст уа: «Хицау, махӕй цы фехъуыстой, ууыл чи баууӕндыд, ӕмӕ кӕмӕн раргом Хицауы хъару?» 39 Исай загъта, сӕ бон цӕй тыххӕй баууӕндын нӕ уыд, уый дӕр: 40 «Хуыцау сын бакуырм кодта сӕ цӕстытӕ, сӕхгӕдта сын сӕ зӕрдӕтӕ, цӕмӕй цӕстӕй ма феной, зӕрдӕйӕ ма бамбарой, ма раздӕхой Мӕнмӕ ӕмӕ сӕ Ӕз ма сдзӕбӕх кӕнон, зӕгъы Хуыцау». 41 Ацы ныхӕстӕ Исай загъта, Йесойы намыс кӕй федта ӕмӕ Уый тыххӕй кӕй дзырдта, уымӕ гӕсгӕ. 42 Ӕниу, Йесойыл суанг хицӕуттӕй дӕр бирӕтӕ баууӕндыдысты, фӕлӕ йӕ фарисейты тыххӕй ӕмбӕхстой, синагогӕйӕ сӕ куы ацух кӕной, зӕгъгӕ. 43 Уымӕн ӕмӕ Хуыцау цы намыс дӕтты, уый бӕсты равзӕрстой зӕххон кад. 44 Йесо хъӕлӕсыдзагӕй загъта: «Мӕныл чи ӕууӕнды, уый, Мӕныл ӕууӕндгӕйӕ, Мӕ Рарвитӕгыл ӕууӕнды. 45 Ӕмӕ Мӕн чи уыны, уый Мӕ Рарвитӕджы уыны. 46 Ӕз рухс дӕн, ӕмӕ ӕрцыдтӕн дунемӕ, чидӕриддӕр Мыл ӕууӕнды, уый талынджы куыд нал уа, афтӕ. 47 Мӕ ныхӕстӕ чи фехъуса ӕмӕ сӕ чи не 'ххӕст кӕна, уымӕн Ӕз тӕрхон нӕ кӕнын. Ӕз дунейӕн тӕрхон кӕнынмӕ не 'рцыдтӕн, фӕлӕ йӕ фервӕзын кӕнынмӕ. 48 Мӕныл йӕхи чи тигъ кӕны ӕмӕ Мӕ ныхӕстӕ кӕмӕ нӕ хъарынц, уымӕн ис тӕрхонгӕнӕг: Мӕ ныхас ын тӕрхон кӕндзӕн фӕстаг бон. 49 Уымӕн ӕмӕ Ӕз Мӕхи номӕй нӕ дзырдтон, фӕлӕ цы зӕгъон ӕмӕ куыд зӕгъон, уый Мын Мӕ рарвитӕг Фыд бафӕдзӕхста. 50 Ӕмӕ Ӕз зонын, Йӕ фӕдзӕхст мыггагмӕйы цардмӕ кӕй кӕны, уый. Уӕдӕ Ӕз дзурын, Мӕ Фыд Мын цы загъта, уый».

Иоанн 13

1 Ӕрӕввахс Куадзӕн. Йесо зыдта, кӕй ралӕууыди ацы дунейӕ Фыдмӕ Йӕ ацӕуыны афон. Уый уарзта йӕхионты ацы дунейы, бауарзта сӕ кӕронмӕ. 2 Уыцы рӕстӕг хӕйрӕг ныридӕгӕн Симон Искариоты фырт Иудӕйы зӕрдӕйы нывӕрдта Йесойы ауӕй кӕныны фӕнд. 3 Йӕ Фыд Ын ӕппӕт дӕр Йӕ къухмӕ кӕй радта, Хуыцауӕй кӕй ӕрцыд ӕмӕ ныр Хуыцаумӕ кӕй цӕуы, уый Йесо зыдта; ӕмӕ ӕхсӕвӕры рӕстӕг 4 Сыстад фынгӕй, раласта Йе 'ддаг дарӕс, райста хисӕрфӕн ӕмӕ йӕ ӕрбабаста Йӕ астӕуыл. 5 Уый фӕстӕ дон ныккодта хъуывгъаны ӕмӕ райдыдта Йӕ ахуыргӕнинӕгты къӕхтӕ ӕхсын ӕмӕ сын сӕ Йӕ астӕуыл баст хисӕрфӕнӕй сӕрфын. 6 Йесо Симон Петрмӕ куы бацыд, уӕд Ын уый загъта: «Хицау, мӕ къӕхтӕ мын Ды цӕхсай?» 7 Йесо йын дзуапп радта: «Ӕз цы кӕнын, уый ды ныртӕккӕ не 'мбарыс, фӕлӕ йӕ фӕстӕдӕр бамбардзынӕ». 8 Петр Ын загъта: «Никуы мын цӕхсдзынӕ мӕ къӕхтӕ». Йесо йын дзуапп радта: «Куы нӕ дӕ цӕхсон, уӕд дын Мемӕ иумӕйагӕй ницы ис». 9 Уӕд Ын Симон Петр загъта: «Хицау, цӕхс ӕрмӕст мӕ къӕхтӕ нӕ, фӕлӕ мӕ къухтӕ ӕмӕ мӕ сӕр дӕр». 10 Йесо йын загъта: «Ӕхсадӕн ӕрмӕст йӕ къӕхтӕ цӕхсын хъӕуы, уымӕн ӕмӕ ӕгасӕй дӕр сыгъдӕг у. Сымах дӕр сыгъдӕг стут, ӕрмӕст уеппӕт нӕ». 11 Йесо зыдта Йӕ уӕйгӕнӕджы, ӕмӕ уымӕ гӕсгӕ загъта: «Уеппӕт сыгъдӕг не стут». 12 Сӕ къӕхтӕ сын куы цӕхсадта, йӕ дарӕс куы скодта ӕмӕ ногӕй куы сбадти, уӕд сын загъта: «Ӕз уын цы бакодтон, уый не 'мбарут? 13 Сымах Мӕн Ахуыргӕнӕг ӕмӕ Хицау хонут, ӕмӕ раст зӕгъут, уымӕн ӕмӕ Ӕз Ахуыргӕнӕг ӕмӕ Хицау дӕн. 14 Уӕдӕ уын кӕд Ӕз, Хицау ӕмӕ Ахуыргӕнӕг, уӕ къӕхтӕ цӕхсадтон, уӕд сымах дӕр хъуамӕ ӕхсат уӕ кӕрӕдзийы къӕхтӕ. 15 Уымӕн ӕмӕ уын Ӕз равдыстон, цӕмӕй сымах дӕр кӕнат, Ӕз уын цы бакодтон, уый. 16 Ӕцӕг, ӕцӕг зӕгъын сымахӕн: цагъар йӕ хицауӕй уӕлдӕр нӕу, ӕмӕ минӕвар йӕ рарвитӕгӕй уӕлдӕр нӕу. 17 Кӕд уый зонут ӕмӕ йӕ ӕххӕст кӕнут, уӕд тӕхудиаг уыдзыстут. 18 Уеппӕты тыххӕй нӕ зӕгъын. Кӕй равзӕрстон, Ӕз уыдоны зонын. Фӕлӕ хъуамӕ сӕххӕст уа, Сыгъдӕг Фысты цы загъд ис, уый: „Мемӕ кӕрдзын чи хордта, уый рацыди Мӕ ныхмӕ". 19 Уый нӕма ӕрцыд, Ӕз та уын ныридӕгӕн зӕгъын, куы ӕрцӕуа, уӕд куыд баууӕндат – ӔЗ ДӔН. 20 Ӕцӕг, ӕцӕг зӕгъын сымахӕн: Ӕз кӕй арвитон, ууыл зӕрдиаг чи уа, уый Мӕныл у зӕрдиаг; Мӕныл зӕрдиаг чи у, уый та Мӕ Рарвитӕгыл у зӕрдиаг». 21 Уыцы ныхӕсты фӕстӕ Йесо тынг фӕтыхст ӕмӕ сын загъта: «Ӕцӕг, ӕцӕг зӕгъын сымахӕн, уӕ иу Мыл рацӕудзӕни гадзрахатӕй». 22 Уӕд ахуыргӕнинӕгтӕ фесты кӕрӕдзимӕ ракӕс-бакӕсыл, Йесо кӕй тыххӕй зӕгъы, уый не 'мбаргӕйӕ. 23 Йесо кӕй уарзта, уыцы ахуыргӕнинаг бадти Йесойы фарсмӕ. 24 Симон Петр ӕм ацамыдта, Йесо кӕй тыххӕй загъта, уымӕй Йӕ куыд бафӕрса, афтӕ. 25 Ахуыргӕнинаг йӕхи баввахс кодта Йесомӕ ӕмӕ Йын загъта: «Хицау, уый чи у?» 26 Йесо дзуапп радта: «Къӕбӕр цӕхдоны куы атулон, уӕд ӕй кӕмӕ раттон, уый». Уӕд атылдта къӕбӕр ӕмӕ йӕ радта Иудӕмӕ, Симон Искариоты фыртмӕ. 27 Ӕмӕ дзы уыцы къӕбӕры фӕстӕ бацыд хӕйрӕг. Уӕд Йесо Иудӕйӕн загъта: «Цы кӕнинаг дӕ, уый тагъддӕр кӕн». 28 Цӕй тыххӕй йын афтӕ загъта, уый фынгыл бадджытӕй ничи бамбӕрста. 29 Фӕлӕ Иудӕмӕ ӕхцайы лагъз кӕй уыд, уымӕ гӕсгӕ иуӕй-иутӕ ӕнхъӕлдтой, цыма йын Йесо афтӕ зӕгъы: «Бӕрӕгбонмӕ нӕ цы хъӕуы, уый балхӕн», кӕнӕ та йын мӕгуыртӕн исты дӕттын кӕны. 30 Иудӕ къӕбӕр куы райста, уӕд уайтагъд феддӕдуар. Уыд ӕхсӕв. 31 Иудӕ куы ацыд, уӕд Йесо загъта: «Ныр снамысджын Адӕймаджы Фырт, ӕмӕ Хуыцау дӕр снамысджын Йӕ фӕрцы. 32 Кӕд Хуыцау Йӕ фӕрцы снамысджын, уӕд Ӕй Хуыцау Йӕхӕдӕг дӕр снамысджын кӕндзӕн, ӕмӕ Йӕ снамысджын кӕндзӕн рӕхджы. 33 Мӕ хъӕбултӕ, Ӕз бирӕ нал фӕуыдзынӕн уемӕ. Агурдзыстут Мӕ ӕмӕ, Ӕз иудейтӕн куыд загътон, Ӕз кӕдӕм цӕуын, сымахӕн уырдӕм ӕрцӕуын уӕ бон нӕ бауыдзӕн, зӕгъгӕ, афтӕ ныртӕккӕ зӕгъын сымахӕн дӕр. 34 Дӕттын уын ног фӕдзӕхст: кӕрӕдзи уарзут. Ӕз уӕ куыд бауарзтон, сымах дӕр афтӕ кӕрӕдзи уарзут. 35 Кӕрӕдзи куы уарзат, уӕд уымӕ гӕсгӕ алчидӕр зондзӕн, сымах Мӕ ахуыргӕнинӕгтӕ кӕй стут, уый». 36 Симон Петр Ын загъта: «Хицау, Ды кӕдӕм цӕуыс?» Йесо йын дзуапп радта: «Ӕз кӕдӕм цӕуын, уырдӕм Мӕ фӕдыл цӕуын ныртӕккӕ дӕ бон нӕу, фӕлӕ фӕстӕдӕр рацӕудзынӕ Мӕ фӕдыл». 37 Петр Ын загъта: «Хицау, цӕуылнӕ у мӕ бон ныртӕккӕ Дӕ фӕдыл цӕуын? Ӕз Дӕу сӕраппонд мӕ цард дӕр ратдзынӕн». 38 Йесо йын дзуапп радта: «Дӕ цард Мӕн сӕраппонд ратдзынӕ? Ӕцӕг, ӕцӕг зӕгъын дӕуӕн: уасӕг нӕма ныууасдзӕн, афтӕ Мыл ӕртӕ хатты атигъ кӕндзынӕ дӕхи.

Иоанн 14

1 Ма тыхсут. Ӕууӕндут Хуыцауыл ӕмӕ Мӕныл дӕр ӕууӕндут. 2 Мӕ Фыды хӕдзары цӕрӕн бынӕттӕ бирӕ ис. Афтӕ куы нӕ уаид, уӕд уын нӕ загътаин: „Ӕз цӕуын бынат уын ӕрцӕттӕ кӕнынмӕ". 3 Куы ацӕуон, ӕмӕ уын бынӕттӕ куы ӕрцӕттӕ кӕнон, уӕд та уӕм ӕрцӕудзынӕн ӕмӕ уӕ Мӕхимӕ акӕндзынӕн, цӕмӕй сымах дӕр уат, Ӕз кӕм дӕн, уым. 4 Ӕз кӕдӕм цӕуын, сымах уырдӕм фӕндаг зонут». 5 Фома Йын загъта: «Хицау, кӕдӕм цӕуыс, уый нын зындгонд куы нӕ у, уӕд ӕм фӕндаг куыд хъуамӕ зонӕм?» 6 Йесо йын загъта: «Ӕз дӕн фӕндаг, ӕцӕгад ӕмӕ цард. Мӕ Фыдмӕ ничи ӕрцӕудзӕн, Мӕ фӕрцы куы не 'рцӕуа, уӕд. 7 Сымах Мӕн куы зониккат, уӕд Мӕ Фыды дӕр зониккат. Ӕмӕ Йӕ ныр зонут ӕмӕ Йӕ уынгӕ дӕр фӕкодтат». 8 Филипп Ын загъта: «Хицау, равдис нын Дӕ Фыды, ӕмӕ нын уый фаг уыдзӕн». 9 Йесо йын загъта: «Уыйбӕрц рӕстӕг дӕн уемӕ, ӕмӕ Мӕ нӕ зоныс, Филипп? Мӕн чи федта, уый федта Фыды. Уӕд ды куыд зӕгъыс: „Равдис нын Дӕ Фыды"? 10 Ау, Ӕз Мӕ Фыдимӕ иу кӕй дӕн, ӕмӕ Мӕ Фыд Мемӕ иу кӕй у, уый дӕ нӕ уырны? Ӕз уын цы зӕгъын, уый Мӕхи номӕй нӕ дзурын – Мемӕ иу Чи у, Мӕ уыцы Фыд кӕны Йӕ хъуыддӕгтӕ. 11 Ӕууӕндут Мыл: Ӕз Мӕ Фыдимӕ иу дӕн, Мӕ Фыд та Мемӕ иу у. Кӕннод та ӕууӕндут Мӕ хъуыддӕгтӕм гӕсгӕ. 12 Ӕцӕг, ӕцӕг зӕгъын сымахӕн: Мӕныл чи ӕууӕнды, уый кӕндзӕн Мӕ хъуыддӕгты хуызӕн хъуыддӕгтӕ, ӕмӕ уыдонӕй ноджы стырдӕртӕ сараздзӕн, уымӕн ӕмӕ Ӕз Мӕ Фыдмӕ цӕуын. 13 Ӕмӕ Мӕ ном ссаргӕйӕ цыдӕриддӕр ракурат, уый уын ратдзынӕн, цӕмӕй Фырты фӕрцы Фыд равдиса Йӕ намыс. 14 Мӕ ном ссаргӕйӕ Мӕ цы ракурат, уый уын ратдзынӕн. 15 Кӕд Мӕ уарзут, уӕд ӕххӕст кӕндзыстут Мӕ фӕдзӕхстытӕ. 16 Ӕмӕ Ӕз ракурдзынӕн Мӕ Фыдӕй ӕмӕ уын ратдзӕн, мыггагмӕ уемӕ чи уыдзӕн, уыцы иннӕ Рӕвдауӕджы – 17 Ӕцӕгады Уды. Дунейы бон Йӕ райсын нӕу, уымӕн ӕмӕ Йӕ нӕ уыны ӕмӕ Йӕ нӕ зоны. Сымах та Йӕ зонут, уымӕн ӕмӕ Уый уемӕ ис ӕмӕ уӕ зӕрдӕты цӕрдзӕн. 18 Сидзӕрӕй уӕ нӕ ныууадздзынӕн – ӕрцӕудзынӕн уӕм. 19 Иуцасдӕр ма, ӕмӕ дуне нал фендзӕни Мӕн, сымах та Мӕ фендзыстут, уымӕн ӕмӕ Ӕз цӕрын ӕмӕ сымах дӕр цӕрдзыстут. 20 Уыцы бон базондзыстут, Ӕз Мӕ Фыдимӕ иу кӕй дӕн, сымах Мемӕ иу кӕй стут ӕмӕ Ӕз уемӕ иу кӕй дӕн, уый. 21 Мӕ фӕдзӕхстытӕ кӕй зӕрдӕйы сты ӕмӕ сӕ чи ӕххӕст кӕны, уый Мӕ уарзы. Мӕн чи уарзы, уый та Мӕ Фыд бауарздзӕн, Ӕз дӕр ӕй бауарздзынӕн ӕмӕ йын Мӕхи раргом кӕндзынӕн». 22 Иудӕ Йын (Искариот нӕ) загъта: «Хицау, уый куыд уыдзӕн, ӕмӕ дунейӕн нӕ, фӕлӕ махӕн Дӕхи раргом кӕнай?» 23 Йесо йын дзуапп радта: «Чи Мӕ уарзы, уый сӕххӕст кӕндзӕн Мӕ ныхас, ӕмӕ йӕ Мӕ Фыд бауарздзӕн. Мах ӕм ӕрцӕудзыстӕм ӕмӕ ӕрцӕрдзыстӕм йемӕ. 24 Мӕн чи нӕ уарзы, уый Мӕ ныхӕстӕ не 'ххӕст кӕны. Сымах цы ныхас хъусут, уый та Мӕнӕй нӕ, фӕлӕ Мӕ рарвитӕг Фыдӕй у. 25 Адӕттӕ уын загътон, цалынмӕ ма уемӕ дӕн, уӕдмӕ. 26 Мӕ Фыд Мӕ номыл Кӕй рарвитдзӕн, уыцы Рӕвдауӕг, Сыгъдӕг Уд, сымах сахуыр кӕндзӕн алцӕуыл дӕр, ӕмӕ уын Ӕз цы дзырдтон, уый уын уӕ зӕрдыл ӕрӕфтаудзӕн. 27 Фарн уын уадзын, Мӕ фарн уын дӕттын. Дуне куыд дӕтты, Ӕз уын ӕй афтӕ нӕ дӕттын. Ма тыхсут ӕмӕ ма тӕрсут. 28 Сымах фехъуыстат, Ӕз уын цы загътон, уый: „Ӕз цӕуын, фӕлӕ та уӕм ӕрцӕудзынӕн". Куы Мӕ уарзиккат, уӕд Фыдмӕ кӕй цӕуын, уый тыххӕй сцин кӕниккат, уымӕн ӕмӕ Мӕ Фыд Мӕнӕй уӕлдӕр у. 29 Уый нӕма ӕрцыд, Ӕз та уын ныридӕгӕн зӕгъын, куы ӕрцӕуа, уӕд куыд баууӕндат, афтӕ. 30 Уемӕ Мын бирӕ дзурыны рӕстӕг нал ис, уымӕн ӕмӕ ӕрбаввахс ацы дунейы ӕлдар. Мӕныл йӕ бар нӕ цӕуы, 31 Фӕлӕ Ӕз Фыды кӕй уарзын, ӕмӕ Мын Фыд куыд бафӕдзӕхста, афтӕ кӕй кӕнын, уый дуне хъуамӕ базона. Ныр сыстут ӕмӕ ацӕуӕм ардыгӕй.

Иоанн 15

1 Ӕз дӕн ӕцӕг сӕнӕфсиры Тала, Мӕ Фыд та – сӕнӕфсирмӕ Зилӕг. 2 Мӕ къалиутӕй сӕнӕфсир кӕуыл не 'рзайы, уый алыг кӕны. Сӕнӕфсир дзы кӕуыл ӕрзайы, уый та бахсӕды, фылдӕр ыл куыд ӕрзайа, афтӕ. 3 Сымах ныридӕгӕн бахсӕстӕуыд, Ӕз уын кӕй загътон, уыцы ныхасӕй. 4 Ут Мемӕ, ӕмӕ Ӕз дӕр уыдзынӕн уемӕ. Къалиу сӕнӕфсиры талайыл куы нӕ уа, уӕд ыл сӕнӕфсир нӕ зайдзӕн. Афтӕ сымах дӕр пайда не 'рхӕсдзыстут, Мемӕ куы нӕ уат, уӕд. 5 Ӕз дӕн сӕнӕфсиры Тала, сымах та – къалиутӕ; Мемӕ чи ис ӕмӕ Ӕз кӕимӕ дӕн, уый ӕрхӕссы бирӕ пайда. Уымӕн ӕмӕ ӕнӕ Мӕн уӕ бон ницы кӕнын у. 6 Мемӕ чи нӕ уа, уый ӕппӕрст ӕрцӕудзӕн къалиуау ӕмӕ бахус уыдзӕн. Ахӕм къалиутӕ та ӕрӕмбырд кӕнынц, баппарынц сӕ арты ӕмӕ басудзынц. 7 Сымах Мемӕ куы уат, ӕмӕ Мӕ ныхӕстӕ уӕ зӕрдӕйы куы цӕрой, уӕд уӕ цыдӕриддӕр хъӕуа, уый ракурут ӕмӕ йӕ райсдзыстут. 8 Сымах бирӕ пайда куы ӕрхӕссат ӕмӕ Мӕ ахуыргӕнинӕгтӕ куы уат, уӕд уымӕй раргом уыдзӕн Мӕ Фыды намыс. 9 Мӕ Фыд Мӕн куыд бауарзта, Ӕз дӕр уӕ афтӕ бауарзтон. Уӕдӕ ут хайджын Мӕ уарзтӕй. 10 Ӕз Мӕ Фыды фӕдзӕхстытӕ куыд сӕххӕст кодтон ӕмӕ Йӕ уарзтӕй хайджын куыд дӕн, афтӕ сымах дӕр Мӕ фӕдзӕхстытӕ куы ӕххӕст кӕнат, уӕд хайджын уыдзыстут Мӕ уарзтӕй. 11 Адӕттӕ уын загътон, цӕмӕй Мӕ цинӕй уат хайджын, ӕмӕ уӕ цинӕн ма уа кӕрон. 12 Мӕнӕ уын Мӕ фӕдзӕхст: Ӕз уӕ куыд бауарзтон, афтӕ уарзут кӕрӕдзи. 13 Исчи йӕ цард йӕ хӕлӕртты сӕраппонд куы ратта, уӕд уымӕй стырдӕр уарзондзинад нӕй. 14 Сымах та Мӕ хӕлӕрттӕ стут, Ӕз уын цы фӕдзӕхсын, уый куы ӕххӕст кӕнат, уӕд. 15 Ӕз уӕ ныридӕгӕн цагъартӕ нал хонын, уымӕн ӕмӕ йӕ хицау цы кӕны, цагъар уый нӕ зоны. Фӕлӕ уӕ Ӕз Мӕ хӕлӕрттӕ схуыдтон, уымӕн ӕмӕ уын загътон, Мӕ Фыдӕй цыдӕриддӕр фехъуыстон, уый. 16 Сымах Мӕ нӕ сӕвзӕрстат, фӕлӕ уӕ Ӕз сӕвзӕрстон, ӕмӕ уын бахӕс кодтон цӕуын ӕмӕ пайда дӕттын, уӕ уыцы пайда мыггагмӕ куыд уа, афтӕ. Ӕмӕ уӕд Мӕ номӕй цыдӕриддӕр ракурат Фыдӕй, уый уын ратдзӕн. 17 Мӕнӕ уын Ӕз фӕдзӕхсын: уарзут кӕрӕдзи. 18 Дуне уӕ йе сӕфт куы уына, уӕд зонут – сымахӕй раздӕр Мӕнӕй уыдта йе сӕфт. 19 Сымах дунейӕ куы уаиккат, уӕд уӕ дуне йӕхионтау уарзид. Сымах та дунейӕ кӕй не стут, фӕлӕ уӕ Ӕз дунейӕ кӕй сӕвзӕрстон, уый тыххӕй уӕ уыны дуне йе сӕфт. 20 Ӕз уын цы ныхас загътон, уый уӕ зӕрдыл дарут: „Цагъар йӕ хицауӕй уӕлдӕр нӕу". Кӕд Мӕн ӕфхӕрдтой, уӕд сымах дӕр ӕфхӕрдзысты. Кӕд Мӕ ныхасмӕ хъуыстой, уӕд уӕ ныхасмӕ дӕр хъусдзысты. 21 Афтӕ уын кӕндзысты Мӕ номы тыххӕй, уымӕн ӕмӕ Мӕ Рарвитӕджы нӕ зонынц. 22 Ӕз куы не 'рцыдаин ӕмӕ сын куы нӕ дзырдтаин, уӕд тӕригъӕды тыххӕй азымджын нӕ уаиккой. Ныр та сӕ тӕригъӕды тыххӕй сӕхи ницӕмӕй сраст кӕндзысты. 23 Мӕнӕй йе сӕфт чи уыны, уый Мӕ Фыдӕй дӕр йе сӕфт уыны. 24 Ӕз сӕ разы куы нӕ скодтаин, ӕндӕр исчи кӕй нӕ сарӕзтаид, ахӕм хъуыддӕгтӕ, уӕд тӕригъӕды тыххӕй азымджын нӕ уаиккой. Ныр та сӕ федтой, уӕддӕр Мӕнӕй ӕмӕ Мӕ Фыдӕй се сӕфт уынынц. 25 Фӕлӕ афтӕ хъуамӕ сӕххӕст уа, сӕ Ӕгъдауы цы фыст ис, уый: „Дзӕгъӕлы Мӕ уынынц се сӕфт". 26 Ӕз уӕм Мӕ Фыдӕй рарвитдзынӕн Рӕвдауӕджы – ӕцӕгады Уды. Уыцы Уд Мӕ Фыдӕй рацӕуы, ӕмӕ куы ӕрцӕуа, уӕд ӕвдисӕн лӕудзӕн Мӕн тыххӕй. 27 Сымах дӕр Мын уыдзыстут ӕвдисӕнтӕ, уымӕн ӕмӕ фыццаг бонтӕй фӕстӕмӕ Мемӕ стут.

Иоанн 16

1 Адӕттӕ уын уый тыххӕй загътон, цӕмӕй ма фӕкӕлат. 2 Ацух уӕ кӕндзысты синагогӕтӕй. Ӕрцӕуы ахӕм рӕстӕг дӕр, ӕмӕ уӕ чидӕриддӕр мара, уый ӕнхъӕл уыдзӕн, цыма уымӕй Хуыцауӕн кусы. 3 Уыдон уын афтӕ кӕндзысты, нӕдӕр Мӕ Фыды, нӕдӕр Мӕн кӕй нӕ базыдтой, уый тыххӕй. 4 Фӕлӕ уын ай уый тыххӕй загътон, уыцы афон куы ӕрцӕуа, уӕд уӕ зӕрдыл куыд лӕууа, Ӕз уӕ рагацау кӕй фӕдзӕхстон, уый. Раздӕр уын ӕй нӕ дзырдтон, уымӕн ӕмӕ уемӕ уыдтӕн. 5 Ныр та цӕуын Мӕ Рарвитӕгмӕ, ӕмӕ Мӕ сымахӕй ничи фӕрсы: „Кӕдӕм цӕуыс?" 6 Уый уын кӕй загътон, уымӕ гӕсгӕ уӕ зӕрдӕ суынгӕг. 7 Фӕлӕ уын ӕцӕг зӕгъын: Мӕ ацыд сымахӕн хуыздӕр у. Уымӕн ӕмӕ Ӕз куы нӕ ацӕуон, уӕд уӕм Рӕвдауӕг не 'рцӕудзӕн. Куы ацӕуон, уӕд та уӕм Ӕй рарвитдзынӕн. 8 Ӕмӕ куы ӕрцӕуа, уӕд раргом кӕндзӕн дунейы азым – тӕригъӕдмӕ, рӕстадмӕ ӕмӕ тӕрхонмӕ цы цӕстӕй кӕсы, уый. 9 Тӕригъӕд уый мидӕг ис, ӕмӕ Мыл не 'ууӕндынц. 10 Рӕстад уый мидӕг ис, ӕмӕ Ӕз Мӕ Фыдмӕ цӕуын, ӕмӕ Мӕ нал фендзыстут. 11 Тӕрхон уый мидӕг ис, ӕмӕ ацы дунейы ӕлдар ӕрцыд тӕрхонгонд. 12 Сымахӕн ма мӕм бирӕ ис зӕгъинаг, фӕлӕ нырма йӕ бамбарын уӕ бон нӕ бауыдзӕн. 13 Ӕцӕгады Уд куы ӕрцӕуа, уӕд уын раргом кӕндзӕн ӕппӕт ӕцӕгад. Уымӕн ӕмӕ Йӕхи номӕй нӕ дзурдзӕн, фӕлӕ цы фехъуса, уый дзурдзӕн, ӕмӕ уын фехъусын кӕндзӕн, фидӕны цы уыдзӕн, уый. 14 Уый Мын скӕндзӕн намыс, уымӕн ӕмӕ уын фехъусын кӕндзӕн, Мӕнӕй цы фехъуса, уый. 15 Фыдмӕ цыдӕриддӕр ис, уый Мӕн у. Уымӕ гӕсгӕ загътон, Мӕнӕй цы фехъуса, уый уын фехъусын кӕндзӕн, зӕгъгӕ. 16 Рӕхджы Мӕ нал фендзыстут, фӕлӕ та Мӕ рӕхджы ногӕй фендзыстут [уымӕн ӕмӕ Ӕз Мӕ Фыдмӕ цӕуын]». 17 Йӕ ахуыргӕнинӕгтӕй иуӕй-иутӕ дзырдтой кӕрӕдзийӕн: «Уый нын цы зӕгъы: „Рӕхджы Мӕ нал фендзыстут, фӕлӕ та Мӕ рӕхджы ногӕй фендзыстут", ӕмӕ: „Ӕз Мӕ Фыдмӕ цӕуын"?» 18 Уыдон ма ноджыдӕр дзырдтой: «Цавӕр „рӕхджыйы" кой кӕны? Цы нын зӕгъы, уый не 'мбарӕм». 19 Бафӕрсынмӕ Йӕ кӕй хъавынц, Йесойӕн уый зындгонд уыд, ӕмӕ сын загъта: «Ӕз уын афтӕ кӕй загътон: „Рӕхджы Мӕ нал фендзыстут, фӕлӕ та Мӕ рӕхджы ногӕй фендзыстут", кӕрӕдзи уый тыххӕй фӕрсут? 20 Ӕцӕг, ӕцӕг зӕгъын сымахӕн: сымах кӕудзыстут ӕмӕ дзыназдзыстут, дуне та цин кӕндзӕн. Сымах хъыг кӕндзыстут, фӕлӕ уӕ хъыг раивдзӕн цинӕй. 21 Арӕг сылгоймаг хъыг фӕкӕны, уымӕн ӕмӕ йӕ удхары афон ралӕууыд. Фӕлӕ йын сывӕллон куы райгуыры, уӕд дзы фырцинӕй йӕ удхар ферох вӕййы, уымӕн ӕмӕ дунемӕ адӕймаг фӕзынд. 22 Афтӕ ныр сымах дӕр хъыг кӕнут. Фӕлӕ та уӕ Ӕз фендзынӕн, ӕмӕ уӕд уӕ зӕрдӕтӕ байдзаг уыдзысты цинӕй, ӕмӕ уын уӕ цин байсын никӕй бон бауыдзӕн. 23 Уӕд Мӕ ницӕмӕй фӕрсдзыстут. Ӕцӕг, ӕцӕг зӕгъын сымахӕн: Мӕ номӕй цыдӕриддӕр ракурат Фыдӕй, уый уын ратдзӕн. 24 Ныронг Мӕ номӕй ницы куырдтат. Ныр курут ӕмӕ райсдзыстут, ӕмӕ уӕ цинӕн кӕрон нӕ уыдзӕн. 25 Ӕз уын ныронг фӕсномыг ныхӕстӕй дзырдтон. Фӕлӕ ӕрцӕуы афон, ӕмӕ уын Ӕз фӕсномыг ныхӕстӕй нал дзурдзынӕн, фӕлӕ уын ӕргомӕй зӕгъдзынӕн Фыды тыххӕй. 26 Уыцы бон курдзыстут Мӕ номӕй, ӕмӕ уын нӕ зӕгъын, сымах тыххӕй Ӕз Мӕ Фыдмӕ хатдзынӕн, зӕгъгӕ. 27 Уымӕн ӕмӕ уӕ Мӕ Фыд Йӕхӕдӕг уарзы, Мӕн кӕй бауарзтат ӕмӕ Ӕз Хуыцауӕй кӕй ӕрцыдтӕн, ууыл кӕй баууӕндыдыстут, уый тыххӕй. 28 Ӕз Мӕ Фыдӕй рацӕугӕ дӕн ӕмӕ ӕрцыдтӕн дунемӕ. Ныр уадзын дуне ӕмӕ цӕуын Мӕ Фыдмӕ». 29 Йӕ ахуыргӕнинӕгтӕ Йын загътой: «Ныртӕккӕ Ды ӕргомӕй дзурыс, ӕнӕ фӕсномыг ныхасӕй. 30 Ныр уынӕм: Ды ӕппӕт дӕр зоныс. Ды развӕлгъау фӕзоныс, цӕмӕй Дӕ фӕрсдзысты, уый. Ӕмӕ нӕ уымӕй уырны: Ды Хуыцауӕй ӕрцыдтӕ». 31 Йесо сын дзуапп радта: «Ныр баууӕндыдыстут? 32 Мӕнӕ ӕрцӕуы рӕстӕг, ӕниу, цӕугӕ дӕр ӕркодта, ӕмӕ ныххӕлиу уыдзыстут – алчидӕр уӕ ацӕудзӕн сӕхимӕ ӕмӕ Мӕн ныууадздзыстут иунӕгӕй. Фӕлӕ Ӕз иунӕг нӕ дӕн, уымӕн ӕмӕ Мӕ Фыд Мемӕ ис. 33 Уыдӕттӕ уын Ӕз уый тыххӕй загътон, Мемӕ куыд уат ӕмӕ фарнӕй куыд схайджын уат. Дунейы ӕвзардзыстут хъизӕмӕрттӕ, фӕлӕ фидар лӕуут: Ӕз фӕуӕлахиз дӕн дунейыл».

Иоанн 17

1 Уыцы ныхӕсты фӕстӕ Йесо скаст уӕларвмӕ ӕмӕ загъта: «Мӕ Фыд, ӕрхӕццӕ рӕстӕг. Намыс скӕн Дӕ Фыртӕн, ӕмӕ Фырт дӕр снамыс кӕна Дӕуӕн. 2 Уымӕн ӕмӕ алы адӕймаджы дӕр бакодтай Йӕ бар, Уымӕн кӕй радтай, уыдонӕй алкӕмӕн дӕр мыггагмӕйы цард куыд ратта. 3 Мыггагмӕйы цард та уый у, ӕмӕ Дӕу, иунӕг ӕцӕг Хуыцауы, ӕмӕ Де 'рвыст Йесо Чырыстийы куыд зоной. 4 Ды Мын Мӕ бӕрны цы хъуыддаг бакодтай, уый саразынӕй Дӕ Ӕз снамысджын кодтон зӕххыл. 5 Ӕмӕ Мӕ ныр, Мӕ Фыд, Ды дӕр снамысджын кӕн Дӕ разы, дуне сфӕлдисыны агъоммӕ Демӕ куы уыдтӕн, уӕд Мын цы намыс уыди, уымӕй. 6 Ды Мын дунейӕ цы адӕм радтай, уыдонӕн Ӕз раргом кодтон Дӕ ном. Уыдон Дӕу уыдысты, Ды сӕ радтай Мӕнӕн, ӕмӕ уыдон сӕххӕст кодтой Дӕ ныхас. 7 Ныр уыдон бамбӕрстой, Ды Мын цыдӕриддӕр радтай, уый Дӕуӕй лӕвӕрд кӕй у. 8 Уымӕн ӕмӕ Мын Ды цы загътай, уый Ӕз радзырдтон уыдонӕн, баууӕндыдысты йыл ӕмӕ ӕцӕг бамбӕрстой, Ӕз Дӕуӕй кӕй ӕрцыдтӕн, ӕмӕ сӕ бауырныдта, Ды Мӕ кӕй рарвыстай, уый. 9 Ӕз уыдоны тыххӕй кувын. Дунейы тыххӕй нӕ, фӕлӕ Мын Ды кӕй радтай, уыдоны тыххӕй кувын, уымӕн ӕмӕ уыдон Дӕу сты. 10 Мӕнмӕ цыдӕриддӕр ис, уый Дӕу у, Дӕумӕ цыдӕриддӕр ис, уый та Мӕн у. Ӕмӕ Ӕз уыдоны фӕрцы снамысджын дӕн. 11 Ӕз ныр дунейы нал дӕн, фӕлӕ уыдон дунейы сты, Ӕз та Дӕумӕ цӕуын. Мӕ Сыгъдӕг Фыд! Бахъахъхъӕн сӕ, Ды Мын кӕй радтай, Дӕ уыцы номы хъаруйӕ, Мах иу куыд стӕм, афтӕ уыдон дӕр иу куыд уой. 12 Ӕз цалынмӕ семӕ уыдтӕн, уӕдмӕ сӕ хъахъхъӕдтон, Ды Мын кӕй радтай, Дӕ уыцы номы хъаруйӕ. Ӕз сӕ бахъахъхъӕдтон, ӕмӕ дзы ничи фесӕфт, мӕлинаджы йеддӕмӕ, цӕмӕй сӕххӕст уа, Сыгъдӕг Фыст цы зӕгъы, уый. 13 Ныр та Ӕз Дӕумӕ цӕуын, ӕмӕ цалынмӕ дунейы дӕн, уӕдмӕ йӕ уый тыххӕй зӕгъын, Мӕ цинӕй хайджын куыд уой ӕмӕ сӕ цинӕн кӕрон куыд нӕ уа. 14 Ӕз сын ӕрхастон Дӕ ныхас, ӕмӕ сӕ дуне йе сӕфт уыны, уымӕн ӕмӕ Ӕз дунейӕ куыд нӕ дӕн, афтӕ уыдон дӕр дунейӕ не сты. 15 Ды сӕ дунейӕ акӕнай, уый Дӕ нӕ курын, фӕлӕ Дӕ курын, цӕмӕй сӕ бахизай хӕйрӕгӕй. 16 Уыдон дунейӕ не сты, Ӕз дунейӕ куыд нӕ дӕн, афтӕ. 17 Дӕхи сӕ бакӕн ӕцӕгады фӕрцы – Дӕ ныхас ӕцӕгад у. 18 Ды Мӕн дунемӕ куыд рарвыстай, афтӕ сӕ Ӕз дӕр арвыстон дунемӕ. 19 Ӕмӕ уыдоны сӕраппонд Ӕз Мӕхи Дӕуӕн дӕттын нывондӕн, уыдон дӕр ӕцӕгады фӕрцы Дӕу куыд бауой, афтӕ. 20 Ӕрмӕст уыдоны тыххӕй нӕ кувын, фӕлӕ ма сӕ ныхасы фӕрцы Мӕныл чи баууӕнда, уыдоны тыххӕй дӕр. 21 Уадз ӕмӕ сеппӕт дӕр уой иу. Ды, Мӕ Фыд, Мемӕ иу куыд дӕ, Ӕз та Демӕ иу куыд дӕн, афтӕ уыдон дӕр иу уӕнт Немӕ, ӕмӕ дуне баууӕнда, Ды Мӕ кӕй рарвыстай, ууыл. 22 Ды Мын цы намыс радтай, Ӕз уымӕй бахай кодтон уыдонӕн, Мах иу куыд стӕм, афтӕ иу куыд уой. 23 Ӕз уыдонимӕ иу дӕн, Ды та Мемӕ иу дӕ. Уадз ӕмӕ уыдон дӕр уой иумӕ, ӕнӕфӕхицӕн, цӕмӕй дуне базона, Ды Мӕ кӕй рарвыстай ӕмӕ Мӕн куыд бауарзтай, уыдоны дӕр афтӕ кӕй бауарзтай, уый. 24 Мӕ Фыд, Мӕн фӕнды, Ды Мын кӕй радтай, уыдон Мемӕ куыд уой, Ӕз кӕм дӕн, уым, ӕмӕ куыд уыной, дуне сфӕлдисыны размӕ Ды Мӕн кӕй бауарзтай, уый тыххӕй Мын кӕй радтай, Мӕ уыцы намыс. 25 Мӕ раст Фыд! Дуне Дӕ нӕ базыдта, Ӕз та Дӕ зонын, ӕмӕ уыдон дӕр базыдтой, Ды Мӕ кӕй рарвыстай, уый. 26 Ӕмӕ сын Ӕз раргом кодтон Дӕ ном, ӕмӕ сын ӕй дарддӕр дӕр ӕргом кӕндзынӕн, цӕмӕй Мӕ Ды цы уарзтӕй бауарзтай, уыдон дӕр уарзой ахӕм уарзтӕй, ӕмӕ Ӕз уон семӕ».

Иоанн 18

1 Йесо куы бакуывта, уӕд Йӕ ахуыргӕнинӕгтимӕ араст Кедроны тӕрфы иннӕ фарсмӕ, ӕмӕ уым бацыдысты дыргъдонмӕ. 2 Ацы бынат зыдта Йӕ уӕйгӕнӕг Иудӕ дӕр – Йесо ӕмӕ-иу Йӕ ахуыргӕнинӕгтӕ уым арӕх ӕрӕмбырд сты. 3 Иудӕ йемӕ ракодта ӕфсӕддонты, алчертӕ ӕмӕ фарисейтӕ кӕй рарвыстой, Кувӕндоны уыцы хъахъхъӕнджыты, ӕмӕ ӕрцыдысты уырдӕм цырӕгътимӕ, рухсгӕнӕнтӕ ӕмӕ хӕцӕнгӕрзтимӕ. 4 Цыдӕриддӕр Ыл ӕрцӕудзӕн, уый Йесо зыдта, рацыд размӕ ӕмӕ сын загъта: «Кӕй агурут?» 5 Дзуапп Ын радтой: «Назаретаг Йесойы». Йесо сын загъта: «Уый Ӕз дӕн». Лӕууыд семӕ Йӕ уӕйгӕнӕг Иудӕ дӕр. 6 Ӕмӕ сын куы загъта: «Уый Ӕз дӕн», уӕд алӕууыдысты фӕстӕмӕ ӕмӕ адӕргъ сты зӕххыл. 7 Ноджы та сӕ бафарста: «Кӕй агурут?» Уыдон загътой: «Назаретаг Йесойы». 8 Йесо дзуапп радта: «Ӕз уын куы загътон, уый Ӕз дӕн, зӕгъгӕ. Уӕдӕ кӕд Мӕн агурут, уӕд иннӕты ауадзут ӕмӕ цӕуой». 9 Йесо уый загъта, Йӕ ныхас куыд ӕрцӕуа, афтӕ: «Ды Мын кӕй радтай, уыдонӕй Ӕз никӕй фесӕфтон». 10 Симон Петрмӕ уыди кард, фелвӕста йӕ, ныццавта дзы алчеры цагъары ӕмӕ йын йӕ рахиз хъус ахауын кодта. Уыцы цагъарӕн йӕ ном уыди Малх. 11 Фӕлӕ Йесо загъта Петрӕн: «Нывӕр кард кӕрддзӕмы. Ау, Мӕ Фыд Мын цы хъизӕмӕртты кӕхц ӕрцӕттӕ кодта, уый хъуамӕ ма баназон?» 12 Уӕд ӕфсӕддонтӕ сӕ хицауимӕ ӕмӕ иудейтӕй ӕрвыст хъахъхъӕнджытӕ ӕрцахстой Йесойы ӕмӕ Йӕ сбастой. 13 Фыццаг уал Ӕй акодтой Аннамӕ – Каиафӕйы каисмӕ. Каиафӕ та уыцы аз алчер уыд. 14 Уый уыдис, иудейтӕн афтӕ чи бауынаффӕ кодта, адӕмы сӕрвӕлтау иу адӕймаг куы амӕла, уӕд хуыздӕр у, зӕгъгӕ, уыцы Каиафӕ. 15 Симон Петр ӕмӕ ма ноджы иу ахуыргӕнинаг цыдысты Йесойы фӕдыл. Уыцы ахуыргӕнинаг зонгӕ уыд алчеримӕ ӕмӕ Йесоимӕ бацыди алчеры кӕртмӕ. 16 Петр та лӕууыд дуары ӕдде. Алчеримӕ зонгӕ чи уыди, уыцы ахуыргӕнинаг рацыд, загъта дуаргӕс сылгоймагӕн ӕмӕ Петры бакодта мидӕмӕ. 17 Дуаргӕс сылгоймаг бафарста Петры: «Ды дӕр уыцы Адӕймаджы ахуыргӕнинӕгтӕй нӕ дӕ?» Петр загъта: «Нӕ дӕн». 18 Уазал кӕй уыд, уымӕ гӕсгӕ цагъартӕ ӕмӕ хъахъхъӕнджытӕ скодтой арт, лӕууыдысты ӕмӕ сӕхи тавтой. Петр дӕр лӕууыд семӕ ӕмӕ йӕхи тавта. 19 Ныр алчер та бафарста Йесойы Йӕ ахуыргӕнинӕгтӕй ӕмӕ Йӕ ахуырады тыххӕй. 20 Йесо йын дзуапп радта: «Ӕз ӕргомӕй дзырдтон дунейӕн. Ӕз кӕддӕриддӕр адӕмы ахуыр кодтон синагогӕты ӕмӕ Кувӕндоны, иудейтӕ иууылдӕр кӕм ӕмбырд кӕнынц, уым. Сусӕгӕй та ницы дзырдтон. 21 Мӕн цы фӕрсыс? Чи Мӕм хъуыста, уыдоны бафӕрс, Ӕз цы дзырдтон, уымӕй. Уыдон зонынц, Ӕз цы дзырдтон, уый». 22 Йесо афтӕ куы загъта, уӕд Ӕй хъахъхъӕнджытӕй иу – хӕстӕг Ӕм чи лӕууыд, уый – ныдздзӕхст ласта ӕмӕ загъта: «Алчерӕн ахӕм дзуапп дӕттыс?» 23 Йесо йын дзуапп радта: «Кӕд Ӕз ӕвзӕрӕй исты загътон, уӕд ӕй сеппӕтӕн дӕр зӕгъ, ӕвзӕрӕй цы загътон, уый. Кӕд раст загътон, уӕд та Мӕ цӕмӕн цӕвыс?» 24 Анна Йесойы бастӕй арвыста алчер Каиафӕмӕ. 25 Ныр Симон Петр та лӕууыд ӕмӕ йӕхи тавта артмӕ. Загътой йын: «Ды дӕр Йӕ ахуыргӕнинӕгтӕй нӕ дӕ?» Уый Йыл йӕхи атигъ кодта ӕмӕ загъта: «Нӕ дӕн». 26 Алчеры цагъартӕй иу, – Петр кӕй хъус ахауын кодта, уый хӕстӕг, – Петрӕн загъта: «Дыргъдоны Йемӕ дӕу нӕ федтон, ӕви?» 27 Петр та Йыл йӕхи атигъ кодта. Ӕмӕ уыйадыл уасӕг ныууасыд. 28 Каиафӕйӕ Йесойы сӕумӕйӕ акодтой бӕстӕйы хицауы галуанмӕ. Иудейтӕ сӕхӕдӕг нӕ бацыдысты галуанмӕ, цӕмӕй ма счъизи уой ӕмӕ сын Куадзӕн хӕрын ӕмбӕла. 29 Пилат сӕм рацыд ӕмӕ загъта: «Цӕмӕй азымджын кӕнут ацы Адӕймаджы?» 30 Уыдон ын дзуапп радтой: «Уый фыдгӕнӕг куы нӕ уаид, уӕд дын Ӕй дӕ къухтӕм нӕ раттаиккам». 31 Пилат сын загъта: «Акӕнут Ӕй ӕмӕ Йын уӕхи ӕгъдаумӕ гӕсгӕ уӕхӕдӕг рахӕссут тӕрхон». Иудейтӕ йын дзуапп радтой: «Искӕмӕн марыны тӕрхон рахӕссыны бар нӕм нӕй». 32 Уыдон уыцы ныхӕстӕ загътой, цы мӕлӕтӕй амӕлдзӕн, уый тыххӕй Йесо фӕсномыгӕй цы загъта, уый куыд ӕрцӕуа, афтӕ. 33 Уӕд Пилат ногӕй бацыди галуанмӕ, басидт Йесомӕ ӕмӕ Йӕ бафарста: «Ды иудейаг Паддзах дӕ?» 34 Йесо дзуапп радта: «Дӕхи хъуыды зӕгъыс, ӕви дын иннӕтӕ загътой Мӕн тыххӕй?» 35 Пилат загъта: «Ӕмӕ ӕз иудей дӕн? Дӕу Мӕ къухмӕ Дӕ адӕм ӕмӕ алчертӕ радтой. Цы ракодтай?» 36 Йесо дзуапп радта: «Мӕ Паддзахад ацы дунейӕ нӕу. Мӕ Паддзахад ацы дунейӕ куы уаид, уӕд Мӕ фӕсдзӕуинтӕ тох кодтаиккой, Ӕз иудейты къухтӕм куыд нӕ бахауон, ууыл. Фӕлӕ Мӕ Паддзахад ацы дунейӕ нӕу». 37 Пилат Ын загъта: «Уӕдӕ Ды Паддзах дӕ?» Йесо дзуапп радта: «Дӕхӕдӕг ӕй куы зӕгъыс, Ӕз Паддзах кӕй дӕн, уый. Ӕз уымӕн райгуырдтӕн ӕмӕ уымӕн ӕрцыдтӕн дунемӕ, цӕмӕй дзурон ӕцӕгады тыххӕй. Ӕцӕгадӕй чидӕриддӕр у, уый Мӕм хъусы». 38 Пилат Ӕй бафарста: «Цы у ӕцӕгад?» Уый зӕгъыны фӕстӕ Пилат ногӕй рацыд иудейтӕм ӕмӕ сын загъта: «Ӕз Ӕм ницы азым арын. 39 Сымахмӕ ис ӕгъдау, цӕмӕй уын Куадзӕны рауадзон иу ахст адӕймаджы. Фӕнды уӕ, ӕмӕ уын иудейаг Паддзахы рауадзон?» 40 Уӕд уыдон ныхъхъӕр кодтой: «Уый нӕ, фӕлӕ Вараввӕйы!» Вараввӕ та абырӕг уыд.

Иоанн 19

1 Уӕд Пилат Йесойы радта ехсӕй нӕмынмӕ. 2 Ӕфсӕддонтӕ сбыдтой сындзын кадыхуд ӕмӕ Йын ӕй ӕркодтой Йӕ сӕрыл, скодтой Йыл сӕнтсырх пӕлӕз. 3 Бацыдысты-иу Ӕм ӕмӕ Йын дзырдтой: «Ӕгас цӕуӕд иудейаг Паддзах!» Ӕмӕ Йӕ дзӕхстытӕ кодтой. 4 Пилат ногӕй рацыд адӕммӕ ӕмӕ сын загъта: «Ӕз уӕм Ӕй ныртӕккӕ рахондзынӕн, цӕмӕй зонат, кӕй ницы аххос Ӕм арын, уый». 5 Уӕд рацыд Йесо сындзын кадыхуды ӕмӕ сӕнтсырх пӕлӕзы. Пилат сын загъта: «Мӕнӕ уыцы Адӕймаг!» 6 Алчертӕ ӕмӕ хъахъхъӕнджытӕ Йесойы куы федтой, уӕд хъӕр систой: «Байтындз Ӕй, байтындз Ӕй!» Пилат сын загъта: «Акӕнут Ӕй ӕмӕ Йӕ уӕхӕдӕг байтындзут, ӕз Ӕм ницы аххос арын». 7 Иудейтӕ йын дзуапп радтой: «Махӕн ис Ӕгъдау, ӕмӕ уыцы Ӕгъдаумӕ гӕсгӕ Уый хъуамӕ амӕла, уымӕн ӕмӕ Йӕхицӕй Хуыцауы Фырт аразы». 8 Пилат уыцы ныхӕстӕ куы фехъуыста, уӕд ноджы тынгдӕр фӕтарст. 9 Ногӕй та бацыд галуанмӕ ӕмӕ бафарста Йесойы: «Кӕцон дӕ?» Фӕлӕ йын Йесо дзуапп нӕ радта. 10 Пилат Ын загъта: «Мӕнӕн нӕ дӕттыс дзуапп? Дӕ рауадзыны бар дӕр ӕмӕ Дӕ байтындзыны бар дӕр мӕнмӕ кӕй ис, уый нӕ зоныс?» 11 Йесо йын дзуапп радта: «Дӕ бар Мыл ӕппындӕр нӕ цӕуид, уӕларвӕй дын лӕвӕрд куы нӕ уаид, уӕд. Уымӕ гӕсгӕ Мӕн дӕ къухмӕ чи радта, уымӕн йӕ тӕригъӕд дӕ тӕригъӕдӕй уӕззаудӕр у». 12 Уӕдӕй фӕстӕмӕ Пилат архайдта Йӕ рауадзыныл. Иудейтӕ та хъӕр кодтой: «Куы Йӕ рауадзай, уӕд кесӕры лымӕн нӕ дӕ. Йӕхицӕй паддзах чидӕриддӕр аразы, уый кесӕры знаг у». 13 Пилат уый куы фехъуыста, уӕд Йесойы ракодта ӕддӕмӕ ӕмӕ, Лифостротон кӕй хуыдтой, дзуттагау та – Гаввафӕ, уым сбадт тӕрхонгӕнӕджы бынаты. 14 Уыди Куадзӕнмӕ цӕттӕ кӕныны бон, ӕхсӕзӕм сахатмӕ ӕввахс. Пилат загъта иудейтӕн: «Мӕнӕ уӕ Паддзах!» 15 Фӕлӕ уыдон хъӕр систой: «Амар Ӕй! Амар Ӕй! Байтындз Ӕй!» Пилат сын загъта: «Уӕ Паддзахы уын байтындзон?» Алчертӕ дзуапп радтой: «Махӕн кесӕры йеддӕмӕ паддзах нӕй». 16 Ӕппынфӕстаг Пилат сразы семӕ, ӕмӕ Йесойы радта дзуарыл байтындзынмӕ. Ӕмӕ Йӕ акодтой. 17 Йӕ дзуаримӕ Йесо рацыди, Сӕргӕхцы бынат чи хуыйны, дзуттагау та – Голгофӕ, уырдӕм. 18 Уым Ӕй байтыгътой ӕндӕр дыууӕимӕ Йӕ фӕйнӕфарс, астӕуӕй – Йесойы. 19 Пилат фӕйнӕгыл ныффыссын кодта ӕмӕ йӕ дзуарыл ныххуыйын кодта; фыст уыди афтӕ: «Назаретаг Йесо, иудейаг Паддзах». 20 Иудейтӕй йӕ бирӕтӕ кастысты, уымӕн ӕмӕ Йесойы кӕм байтыгътой, уыцы бынат сахармӕ хӕстӕг уыд. Фыст уыди дзуттаг, ромаг ӕмӕ бердзенаг ӕвзӕгтыл. 21 Иудейаг алчертӕ загътой Пилатӕн: «„Иудейаг Паддзах" ма ныффысс. Ныффысс афтӕ: „Ацы лӕг дзырдта: Ӕз иудейаг Паддзах дӕн"». 22 Пилат дзуапп радта: «Цы ныффыстон, уый ныффыстон». 23 Ӕфсӕддонтӕ Йесойы куы байтыгътой, уӕд Ын райстой Йӕ дарӕстӕ ӕмӕ сӕ цыппар хайыл адих кодтой, алы ӕфсӕддонӕн дӕр иу хай. Йӕ хӕдон та хуыд нӕ уыд, фӕлӕ сӕрӕй бынмӕ уафт. 24 Ӕмӕ кӕрӕдзийӕн загътой: «Скъуынгӕ йӕ ма акӕнӕм, фӕлӕ хӕлттӕ сӕппарӕм, кӕддӕра кӕмӕ ӕрхауид». Афтӕ хъуамӕ сӕххӕст уыдаид, Сыгъдӕг Фыст цы зӕгъы, уый: «Се 'хсӕн Мын байуӕрстой Мӕ дарӕс ӕмӕ Мын Мӕ хӕдоныл хӕлттӕ сӕппӕрстой». Ӕмӕ ӕфсӕддонтӕ бакодтой афтӕ. 25 Йесойы дзуары цур лӕууыдысты Йӕ Мад, Йӕ мадыхо, Клеопайы ус Мариа, ӕмӕ магдалӕйаг Мариа. 26 Йесо Йӕ Мады ӕмӕ Йӕ уарзон ахуыргӕнинаджы уым лӕугӕ куы федта, уӕд Йӕ Мадӕн загъта: «Мӕ Мад, мӕнӕ уый Дӕ фырт у». 27 Стӕй загъта ахуыргӕнинагӕн: «Мӕнӕ уый дӕ Мад у!» Ӕмӕ Йӕ уӕд ахуыргӕнинаг акодта йӕхимӕ. 28 Йесо зыдта, ныридӕгӕн ӕппӕт дӕр кӕй сӕххӕст, уый. Ӕмӕ загъта, Сыгъдӕг Фысты цы загъдӕуыд, уый куыд сӕххӕст уа, афтӕ: «Дойны Мын у». 29 Уым уыди туаг сӕнӕй дзаг мигӕнӕн. Ӕфсӕддонтӕ губкӕ стылдтой туаг сӕны, ӕрсагътой йӕ иссопыл ӕмӕ Йын ӕй схастой Йӕ дзыхмӕ. 30 Йесо туаг сӕнӕй куы ацахуыста, уӕд загъта: «Ӕппӕт дӕр сӕххӕст!» Уыйадыл Йӕ сӕр ӕркъул кодта ӕмӕ Йӕ уд радта Йӕ Фыды къухмӕ. 31 Уыди майрӕмбон, ӕмӕ иудейты нӕ фӕндыди, цӕмӕй мӕрдтӕ сабаты дзуарыл уой, уымӕн ӕмӕ уыцы сабат стыр бӕрӕгбон уыди. Уымӕ гӕсгӕ Пилатӕй куырдтой мӕрдтӕн сӕ зӕнгтӕ асӕттын ӕмӕ сӕ дзуарӕй ӕрисын. 32 Уӕд ӕфсӕддонтӕ ӕрцыдысты, ӕмӕ Йесоимӕ тыгъд чи уыд, уыдонӕй фыццаг иуӕн, стӕй иннӕмӕн асастой сӕ зӕнгтӕ. 33 Йесомӕ куы бацыдысты, уӕд Ӕй федтой мардӕй ӕмӕ Йын Йӕ зӕнгтӕ нал асастой. 34 Фӕлӕ Йын ӕфсӕддонтӕй иу арцӕй барӕхуыста Йӕ фарс ӕмӕ дзы уайтагъд ракалд туг ӕмӕ дон. 35 Ӕппӕт уыдӕттӕ чи федта, уый ӕвдисӕн лӕууы, йӕ ӕвдисӕнад ӕцӕг у, ӕмӕ зоны: раст дзуры, сымах дӕр куыд баууӕндат, афтӕ; 36 Уымӕн ӕмӕ ай ӕрцыд, цӕмӕй сӕххӕст уа, Сыгъдӕг Фыст цы зӕгъы, уый: «Йе стӕг нӕ асӕтдзӕн». 37 Ӕмӕ ма ӕндӕр ран дӕр Сыгъдӕг Фысты загъд ис: «Кӕй барӕхуыстой, Уымӕ кӕсдзысты». 38 Уый фӕстӕ аримафейаг Иосиф (уый дӕр Йесойы ахуыргӕнинаг уыди, фӕлӕ йӕ не 'ргом кодта, уымӕн ӕмӕ иудейтӕй тарсти) бахатыди Пилатмӕ, цӕмӕй йын ратта Йесойы мард. Пилат ын бар радта. Иосиф ацыд ӕмӕ Йесойы мард ахаста. 39 Ӕрцыд Никодим дӕр – кӕддӕр ӕхсӕвы Йесомӕ чи ӕрцыд, уый, – ӕмӕ ӕрхаста фондзыссӕдз джиранкайы бӕрц хӕрздӕфгӕнӕнтӕ – смирнӕ ӕмӕ алой хӕццӕйӕ. 40 Уыдон Йесойы мард иудейаг ӕгъдаумӕ гӕсгӕ батыхтой, хӕрздӕфгӕнӕнтӕ кӕуыл бапырх кодтой, уыцы мӕрддзӕгты. 41 Дзуарыл Ӕй кӕм байтыгътой, уым уыди дыргъдон, дыргъдоны та – ӕвӕрд кӕм ничима уыд, ахӕм ног зӕппадз. 42 Иудейаг сабатмӕ бирӕ кӕй нал баззад, ӕмӕ зӕппадз хӕстӕг кӕй уыди, уымӕ гӕсгӕ дзы бавӕрдтой Йесойы.

Иоанн 20

1 Къуырийӕн йӕ фыццаг бон, сӕударӕй, талынг ма уыди, афтӕмӕй, магдалӕйаг Мариа ӕрцыди зӕппадзмӕ ӕмӕ федта, бацӕуӕнӕй дур кӕй айстӕуыд, уый. 2 Уӕд азгъордта ӕмӕ бацыд Симон Петрмӕ, стӕй Йесо кӕй уарзта, уыцы ахуыргӕнинагмӕ ӕмӕ сын загъта: «Хицауы ахастой зӕппадзӕй, ӕмӕ Йӕ кӕм бавӕрдтой, уый нӕ зонӕм». 3 Петр ӕмӕ иннӕ ахуыргӕнинаг уайтӕккӕ араст сты зӕппадзмӕ. 4 Дыууӕ дӕр згъордтой, фӕлӕ иннӕ ахуыргӕнинаг Петрӕй тагъддӕр згъордта ӕмӕ зӕппадзмӕ раздӕр бахӕццӕ. 5 Уый ӕргуыбыр кодта ӕмӕ федта мӕрддзӕгтӕ, фӕлӕ зӕппадзмӕ нӕ бацыд. 6 Йӕ фӕдыл ӕрбахӕццӕ Симон Петр дӕр, бацыд зӕппадзмӕ ӕмӕ дзы федта мӕрддзӕгтӕ. 7 Йесойы сӕр баст кӕмӕй уыди, уыцы хӕцъил та мӕрддзӕгтимӕ нӕ разынди, фӕлӕ тыхтӕй уыди хицӕнӕй. 8 Уӕд раздӕр чи ӕрбахӕццӕ, уыцы ахуыргӕнинаг дӕр мидӕмӕ бахызт. Ӕмӕ йӕхи цӕстӕй куы федта, уӕд ӕй бауырныдта. 9 Уымӕн ӕмӕ уыдон Сыгъдӕг Фыстӕй нӕма зыдтой, Йесо мӕрдтӕй кӕй хъуамӕ райгас уа, уый. 10 Ахуыргӕнинӕгтӕ аздӕхтысты сӕхимӕ, 11 Мариа та лӕууыд зӕппадзы цур ӕмӕ куыдта. Куы куыдта, уӕд ныггуыбыр кодта зӕппадзмӕ, ӕмӕ, 12 Йесойы мард раздӕр кӕм ӕвӕрд уыди, уым федта дыууӕ зӕды урс дарӕсы бадгӕ: иуы – Йӕ нывӕрзӕнмӕ, иннӕйы – Йӕ дӕлфӕдтӕм. 13 Уыдон ӕй бафарстой: «Хорз ус, цӕуыл кӕуыс?» Мариа сын загъта: «Мӕ Хицауы мын ахастой ӕмӕ Йӕ кӕм бавӕрдтой, уый нӕ зонын». 14 Афтӕ куы загъта, уӕд фӕстӕмӕ акаст ӕмӕ федта Йесойы лӕугӕйӕ. Фӕлӕ Йесо кӕй у, уый нӕ базыдта. 15 Йесо йын загъта: «Хорз ус, цӕуыл кӕуыс? Кӕй агурыс?» Мариа ӕнхъӕл уыди, Уый дыргъдонгӕс у ӕмӕ Йын загъта: «Ме 'лдар, кӕд Ӕй ды рахастай, уӕд Ӕй кӕм бавӕрдтай, уый мын зӕгъ ӕмӕ Йӕ ӕз ахӕссон». 16 Йесо йын загъта: «Мариа!» Мариа Йӕм раздӕхт ӕмӕ Йын дзуттагау загъта: «Раввуни!» (ома, Ахуыргӕнӕг). 17 Йесо йын загъта: «Ма Мыл бандзӕв, уымӕн ӕмӕ Ӕз Мӕ Фыдмӕ нӕма ссыдтӕн. Фӕлӕ цу Ме 'фсымӕртӕм ӕмӕ сын зӕгъ: „Цӕуын Мӕ Фыдмӕ ӕмӕ уӕ Фыдмӕ, Мӕ Хуыцаумӕ ӕмӕ уӕ Хуыцаумӕ"». 18 Магдалӕйаг Мариа ацыд ӕмӕ ахуыргӕнинӕгтӕн радзырдта, Хицауы кӕй федта ӕмӕ йын Уый цы загъта, уыдӕтты тыххӕй. 19 Уыцы бон изӕрӕй, къуырийы фыццаг бон, ахуыргӕнинӕгтӕ уыдысты иумӕ. Иудейтӕй кӕй тарстысты, уый тыххӕй сӕхгӕдтой дуӕрттӕ. Уыцы рӕстӕг уатмӕ бацыд Йесо, ӕрлӕууыд сӕ разы ӕмӕ загъта: «Фӕрнджын ут!» 20 Уый зӕгъыны фӕстӕ сӕм равдыста Йӕ къухтӕ, [Йӕ къӕхтӕ] ӕмӕ Йӕ фарс. Ахуыргӕнинӕгтӕ Хицауы куы федтой, уӕд сцин кодтой. 21 Йесо та сын дыккаг хатт загъта: «Фӕрнджын ут! Мӕн Мӕ Фыд куыд рарвыста, афтӕ уӕ Ӕз дӕр ӕрвитын». 22 Уыцы ныхӕсты фӕстӕ сыл бафу кодта ӕмӕ сын загъта: «Схайджын ут Сыгъдӕг Удӕй. 23 Кӕмӕн ныббарат йӕ тӕригъӕдтӕ, уымӕн барст уыдзысты, кӕмӕн сӕ нӕ ныббарат, уымӕн барст нӕ уыдзысты». 24 Йесо куы ӕрцыд, уӕд дыууадӕсӕй иу, Фома, фӕсномыгӕй Фаззон, семӕ нӕ уыд. 25 Иннӕ ахуыргӕнинӕгтӕ йын загътой: «Мах федтам Хицауы». Фӕлӕ сын уый загъта: «Йӕ къухтыл зӕгӕлтӕй хъӕдгӕмттӕ куы нӕ фенон, ме 'нгуылдз уыцы хъӕдгӕмтты куы нӕ бавӕрон, мӕ къух та – Йӕ фарсы хъӕдгомы, уӕд мӕ нӕ бауырндзӕн». 26 Аст боны фӕстӕ та ахуыргӕнинӕгтӕ уыдысты хӕдзары, Фома дӕр уыд семӕ. Дуӕрттӕ уыдысты ӕхгӕд, афтӕмӕй бацыд Йесо, ӕрлӕууыд се 'хсӕн ӕмӕ загъта: «Фӕрнджын ут!» 27 Стӕй загъта Фомайӕн: «Ӕри-ма де 'нгуылдз ардӕм ӕмӕ фен Мӕ къухтӕ. Ӕри дӕ къух ӕмӕ йӕ бавӕр Мӕ фарсы хъӕдгомы, ӕмӕ ӕнӕуырнӕг ма у, фӕлӕ уырнӕг». 28 Фома йын дзуапп радта: «Мӕ Хицау ӕмӕ Мӕ Хуыцау!» 29 Йесо йын загъта: «Ды баууӕндыдтӕ, уымӕн ӕмӕ Мӕ федтай. Тӕхудиаг сты, Мӕн чи нӕ федта, афтӕмӕй чи баууӕндыд, уыдон». 30 Ацы чиныджы загъд кӕй тыххӕй нӕй, бирӕ ахӕм диссӕгтӕ ма равдыста Йесо Йӕ ахуыргӕнинӕгтӕн. 31 Ацы диссӕгты тыххӕй та уымӕ гӕсгӕ ныффыстӕуыд, цӕмӕй баууӕндат, Йесо Чырысти кӕй у, Хуыцауы Фырт, ууыл. Ӕмӕ Йыл куы ӕууӕндат, уӕд Йӕ фӕрцы хайджын уыдзыстут мыггагмӕйы цардӕй.

Иоанн 21

1 Уый фӕстӕ та Йесо Йӕ ахуыргӕнинӕгтӕм фӕзынд ногӕй. Уый уыди Тивериадӕйы денджызы былыл. Хабар уыди афтӕ. 2 Симон Петр, фӕсномыгӕй Фаззон чи хуынд, уыцы Фома, Нафанаил галилейаг Канӕйӕ, Зеведейы фырттӕ ӕмӕ Йесойы иннӕ дыууӕ ахуыргӕнинаджы уыдысты иумӕ. 3 Симон Петр сын загъта: «Ӕз кӕсаг ахсынмӕ цӕуын». Уыдон ын загътой: «Мах дӕр демӕ цӕуӕм». Ацыдысты ӕмӕ сбадтысты бӕлӕгъы, фӕлӕ уыцы ӕхсӕв ницы ӕрцахстой. 4 Боныцъӕхтыл Йесо лӕууыд денджызы былгӕрон. Фӕлӕ Йесо кӕй у, уый ахуыргӕнинӕгтӕ нӕ базыдтой. 5 Йесо сӕ бафарста: «Мӕ хӕлӕрттӕ, исты ӕрцахстат?» Уыдон Ын дзуапп радтой: «Не 'рцахстам». 6 Уый сын загъта: «Хыз баппарут бӕлӕгъӕн йӕ рахиз фарс, ӕмӕ ӕрцахсдзыстут». Уыдон баппӕрстой хыз, ӕмӕ сын бирӕ кӕсӕгтӕ кӕй ӕрцахста, уымӕ гӕсгӕ йӕ сӕ бон раласын нӕ уыд. 7 Йесо кӕй уарзта, уыцы ахуыргӕнинаг загъта Петрӕн: «Ай Хицау у». Симон Петр куы фехъуыста, Хицау у, зӕгъгӕ, уӕд йӕ пӕлӕз ӕрбалвӕста ронӕй (ӕндӕр ыл ницы уыд), ӕмӕ йӕхи нывзылдта денджызмӕ. 8 Иннӕ ахуыргӕнинӕгтӕ та хыз кӕсӕгтимӕ ластой сӕ фӕдыл, афтӕмӕй ӕрбацыдысты бӕлӕгъы; былмӕ сӕ бирӕ нӕ хъуыди – дыууӕсӕдӕ ӕлмӕрины бӕрц. 9 Былмӕ куы рахызтысты, уӕд цӕхӕрыл федтой кӕсаг, йӕ фарсмӕ та – дзул. 10 Йесо сын загъта: «Рахӕссут, цы кӕсӕгтӕ ӕрцахстат, уыдонӕй». 11 Симон Петр схызт бӕлӕгъмӕ ӕмӕ хыз раласта зӕхмӕ. Хыз дзаг уыди стыр кӕсӕгтӕй – ӕдӕппӕт сӕдӕ фӕндзай ӕртӕ кӕсаджы. Ахӕм бирӕ кӕсӕгты уӕзӕй хыз нӕ аскъуыд. 12 Йесо сын загъта: «Рацӕут ӕмӕ аходӕн бахӕрут». Ахуыргӕнинӕгтӕй йӕ ныфс ничи бахаста Йӕ бафӕрсынмӕ, «Чи дӕ», зӕгъгӕ. Уыдон базыдтой, Хицау кӕй у, уый. 13 Йесо бацыд, райста дзул ӕмӕ сын ӕй радта, радта сын кӕсаг дӕр. 14 Афтӕ мӕрдтӕй райгасы фӕстӕ Йесо ӕртыккаг хатт фӕзынд Йӕ ахуыргӕнинӕгтӕм. 15 Аходӕн куы бахордтой, уӕд Йесо бафарста Симон Петры: «Иоанны фырт Симон, уыдон Мӕ цас уарзынц, ды Мӕ уымӕй фылдӕр уарзыс?» Петр Ын дзуапп радта: «О, Хицау! Ды зоныс, ӕз Дӕ кӕй уарзын, уый». Йесо Йын загъта: «Хиз Мӕ уӕрыччыты». 16 Дыккаг хатт дӕр та йӕ бафарста: «Иоанны фырт Симон, уарзыс Мӕ?» Петр Ын дзуапп радта: «О, Хицау! Ды зоныс, ӕз Дӕ кӕй уарзын, уый». Йесо йын загъта: «У фыййау Мӕ фыстӕн». 17 Ӕртыккаг хатт ӕй бафарста: «Иоанны фырт Симон, уарзыс Мӕ?» Ӕртыккаг хатт ӕй «уарзыс Мӕ?» кӕй бафарста, уый тыххӕй Петр фенкъард ӕмӕ Йын дзуапп радта: «Хицау, Ды алцыдӕр зоныс. Ды зоныс, ӕз Дӕ кӕй уарзын, уый». Йесо йын загъта: «Хиз Мӕ фысты. 18 Ӕцӕг, ӕцӕг зӕгъын дӕуӕн: ды ӕрыгон куы уыдтӕ, уӕд-иу дӕ рон дӕ астӕуыл дӕхӕдӕг ӕрбабастай, ӕмӕ дӕ кӕдӕм фӕндыд, уырдӕм-иу ацыдтӕ. Фӕлӕ куы базӕронд уай, уӕд айтындздзынӕ дӕ къухтӕ, ӕрбабӕтдзӕн дӕ ӕндӕр адӕймаг ӕмӕ дӕ акӕндзӕн, кӕдӕм дӕ нӕ фӕнда, уырдӕм». 19 Уыцы ныхӕстӕй Йесо фӕсномыгӕй загъта, Петр Хуыцауы цавӕр мӕлӕтӕй скадджын кӕндзӕн, уый тыххӕй. Уый фӕстӕ йын Йесо загъта: «Мӕ фӕдыл цу». 20 Петр ракаст фӕстӕмӕ ӕмӕ сӕ фӕдыл цӕугӕ федта Йесойы уарзон ахуыргӕнинаджы. Уый уыди, ӕхсӕвӕры рӕстӕг Йесомӕ йӕхи чи баввахс кодта ӕмӕ афтӕ чи загъта: «Хицау, гадзрахатӕй Дыл чи рацӕудзӕн?», уыцы ахуыргӕнинаг. 21 Петр ӕй куы федта, уӕд бафарста Йесойы: «Хицау, уый та цы фӕуыдзӕн?» 22 Йесо йын загъта: «Кӕд Мӕн афтӕ фӕнды, ӕмӕ Ме 'рцыдмӕ удӕгас уа, уӕд дӕу цы хъуыддаг и? Ды цу Мӕ фӕдыл». 23 Ӕмӕ уый айхъуыст ӕфсымӕртыл, уыцы ахуыргӕнинаг нӕ амӕлдзӕн, зӕгъгӕ. Йесо та нӕ амӕлдзӕн нӕ загъта, фӕлӕ: «Кӕд Мӕн афтӕ фӕнды, ӕмӕ Ме 'рцыдмӕ удӕгас уа, уӕд дӕу цы хъуыддаг и?» 24 Ацы ахуыргӕнинаг ӕвдисӕн у ӕппӕт уыдӕттӕн, ӕмӕ сӕ ныффыста. Ӕмӕ мах зонӕм, йӕ ныхас ӕцӕг кӕй у, уый. 25 Йесо ма скодта бирӕ ӕндӕр хъуыддӕгтӕ дӕр. Фӕлӕ сеппӕты тыххӕй лӕмбынӕг ныффысс, зӕгъгӕ, уӕд уыцы чингуытӕ, мӕнмӕ гӕсгӕ, суанг дунейы дӕр нӕ бацӕуиккой.

Апостолты хъуыддӕгтӕ 1

1 Фыццаг чиныг, Феофил, ӕз ныффыстон, Йесо тӕккӕ райдианӕй, уӕлӕрвтӕм Ӕй куы систӕуыд, уӕды онг цы куыста ӕмӕ цӕуыл ахуыр кодта, ӕппӕт уыдӕтты тыххӕй. 2 Кӕй сӕвзӕрста, уыцы апостолтӕн Йӕ ацыды размӕ Сыгъдӕг Уды фӕрцы загъта, цы гӕнгӕ сын у, уый тыххӕй. 3 Йӕ тухӕнты фӕстӕ Йесо бирӕ хӕттыты ӕрцыд апостолтӕм ӕмӕ сын бирӕ ӕвдисӕйнӕгтӕй равдыста, ӕцӕг кӕй райгас, уый. Йӕхи сын уынын кодта дыууиссӕдз боны дӕргъы ӕмӕ сын дзырдта Хуыцауы Паддзахады тыххӕй. 4 Иухатт сӕ ӕрӕмбырд кодта ӕмӕ сын бафӕдзӕхста: «Иерусалимӕй макӕдӕм ацӕут, фӕлӕ ӕнхъӕлмӕ кӕсут, Фыд уын зӕрдӕ цӕмӕй бавӕрдта ӕмӕ уын Ӕз цӕй тыххӕй дзырдтон, уымӕ. 5 Уымӕн ӕмӕ Иоанн аргъуыдта донӕй, сымах та цалдӕр боны фӕстӕ аргъуыд уыдзыстут Сыгъдӕг Удӕй». 6 Апостолтӕ куы ӕрӕмбырд сты, уӕд Ӕй бафарстой: «Хицау, Израилы паддзахад йӕ къӕхтыл ныртӕккӕ слӕууын кӕндзынӕ?» 7 Йесо сын загъта: «Сымахӕн не 'мбӕлы, Мӕ Фыд Йӕ бартӕм гӕсгӕ цы рӕстӕджытӕ ӕмӕ ӕмгъуыдтӕ сӕвӕрдта, уыдон зонын. 8 Фӕлӕ Сыгъдӕг Удӕй куы схайджын уат, уӕд райсдзыстут тых, ӕмӕ Мын ӕвдисӕнтӕ уыдзыстут Иерусалимы, ӕгас Иудейӕйы ӕмӕ Самарийы, ӕмӕ суанг зӕххы кӕронмӕ». 9 Уыцы ныхӕстӕ зӕгъыны фӕстӕ сӕ цӕстыты раз Йесойы систӕуыд, ӕврагъ Ӕй ӕрбатыхта ӕмӕ Йӕ апостолтӕ нал федтой. 10 Йесо уӕлдӕрӕй-уӕлдӕр куы цыд ӕмӕ сӕ цӕстытӕ арвӕй куы нал истой, уӕд ӕваст сӕ разы февзӕрд дыууӕ лӕджы урс-урсид дарӕсы, 11 Ӕмӕ загътой: «Галилейаг лӕгтӕ, цы лӕуут ӕмӕ арвмӕ цы кӕсут? Сымахӕй уӕлӕрвтӕм Кӕй систӕуыд, уыцы Йесо ӕрыздӕхдзӕн, ныртӕккӕ Йӕ уӕлӕрвтӕм ацӕугӕ куыд федтат, афтӕ». 12 Уӕд апостолтӕ раздӕхтысты Иерусалиммӕ, Елеон цы хох хуындӕуы, уымӕй. Уыцы хох Иерусалиммӕ хӕстӕг у – сабаты бонцауы дӕрддзӕфӕн. 13 Куы ӕрцыдысты, уӕд схызтысты уӕллаг уатмӕ ӕмӕ уӕдӕй фӕстӕмӕ уыдысты уым – Петр, Иоанн, Иаков ӕмӕ Андрей, Филипп ӕмӕ Фома, Варфоломей ӕмӕ Матфей, Алфейы фырт Иаков, Симон Зилот ӕмӕ Иаковы ӕфсымӕр Иудӕ. 14 Сеппӕт дӕр иудадзыг куывтой ӕнувыдӕй ӕмӕ ӕмзӕрдӕйӕ; семӕ ма уыдысты сылгоймӕгтӕ, стӕй Йесойы Мад Мариа ӕмӕ Йе 'фсымӕртӕ. 15 Иухатт Петр ӕрлӕууыд ӕфсымӕрты раз 16 (Уыди дзы сӕдӕ дыууын адӕймаджы бӕрц) ӕмӕ загъта: «Ӕфсымӕртӕ, хъуамӕ сӕххӕст уыдаид, Сыгъдӕг Уд развӕлгъау Сыгъдӕг Фысты Давиды дзыхӕй Иудӕйы тыххӕй цы загъта, уый – Иудӕ сси, Йесойы чи ӕрцахста, уыдоны ӕрбакӕнӕг, 17 Кӕд махӕй уыди ӕмӕ йӕм немӕ кусыны хал ӕрхауди, уӕддӕр. 18 Йӕ фыдракӕнды тыххӕй цы мызд райста, уымӕй балхӕдта зӕхх; уым ӕрхауд, йӕ гуыбын аскъуыд ӕмӕ йӕ хуылфыдзаумӕттӕ иууылдӕр ракалдысты. 19 Уый базыдтой Иерусалимы ӕппӕт цӕрджытӕ, ӕмӕ уыцы зӕхх сӕ мадӕлон ӕвзагыл схуындӕуыд Акелдамӕ (ома, Туджы зӕхх). 20 Псаломты чиныджы та фыст у: „Йӕ кӕрт баззайӕд афтидӕй, цӕрӕг дзы ма уӕд", ӕмӕ: „Йӕ бынат ӕрхауӕд ӕндӕрмӕ". 21 Уӕдӕ нӕ сӕвзарын хъӕуы, Хицау Йесо не 'хсӕн куы царди, уӕд – 22 Иоанн куы аргъуыдта, уыцы заманӕй, Йесойы махӕй уӕларвмӕ куы систӕуыд, уӕды онг – иудадзыг немӕ цы лӕгтӕ уыд, уыдонӕй иуы. Уый, махау, хъуамӕ суа ӕвдисӕн Йесойы райгасӕн». 23 Ӕмӕ бахастой фӕндон дыууӕйы тыххӕй: фӕсномыгӕй Варсава кӕнӕ Иуст кӕй хуыдтой, уыцы Иосифы, ӕмӕ Матфийы тыххӕй. 24 Уӕд бакуывтой: «Хицау, Ды алкӕй зӕрдӕ дӕр зоныс. Равдис нын, ацы дыууӕйӕ кӕй сӕвзӕрстай, уый, 25 Цӕмӕй кӕна апостолы куыст, уымӕн ӕмӕ Иудӕ ныууагъта уыцы куыст ӕмӕ ацыд, кӕм хъуамӕ уа, уырдӕм». 26 Сӕппӕрстой хӕлттӕ, схауд Матфийы хал, ӕмӕ иуӕндӕсимӕ сси апостол.

Апостолты хъуыддӕгтӕ 2

1 Хорысӕры бӕрӕгбон куы ралӕууыд, уӕд сеппӕт дӕр уыдысты иумӕ. 2 Ӕмӕ ӕвиппайды, цыма тыхджын дымгӕ сыстад, уыйау арвӕй ӕрцыд уынӕр, ӕмӕ уынӕрӕй байдзаг, кӕм уыдысты, уыцы хӕдзар. 3 Ӕмӕ сӕм фӕзынди арты ӕвзӕгты хуызӕн ӕвзӕгтӕ; уыцы ӕвзӕгтӕ фӕхицӕн сты кӕрӕдзийӕ, ӕмӕ дзы алкӕуыл дӕр ӕрӕнцад иу. 4 Уӕд сеппӕт дӕр схайджын сты Сыгъдӕг Удӕй ӕмӕ райдыдтой дзурын ӕндӕр ӕвзӕгтыл, Уд сӕ куыд арӕзта, афтӕ. 5 Уыцы рӕстӕг Иерусалимы уыдысты, дунейы алы адӕмты ӕхсӕн чи цард, уыцы дингӕнӕг иудейтӕ. 6 Уынӕр куы райхъуыст, уӕд бирӕтӕ ӕрӕмбырд сты ӕмӕ хорзау нал фесты: дзурджыты алчидӕр хъуыста йӕхи ӕвзагыл дзургӕ. 7 Уый сӕ бафтыдта дисы ӕмӕ дзырдтой: «Чи дзуры, уыдон иууылдӕр галилейӕгтӕ не сты, ӕви? 8 Махӕй сӕ алчидӕр йӕ мадӕлон ӕвзагыл дзургӕ куыд хъусы? 9 Мах – парфиӕгтӕ, мидиӕгтӕ ӕмӕ эламӕгтӕ, Месопотамийы, Иудейӕйы ӕмӕ Каппадокийы, Понт ӕмӕ Асийы, 10 Фриги ӕмӕ Памфилийы, Мысыры ӕмӕ, Киринимӕ хӕстӕг чи у, Ливийы уыцы бынӕтты цӕрджытӕ, Ромӕй ӕрцӕуджытӕ, иудейтӕ ӕмӕ Хуыцауыл баууӕндӕг муртаттӕ, 11 Критӕгтӕ ӕмӕ аравиӕгтӕ – неппӕт дӕр сӕ хъусӕм Хуыцауы стыр хъуыддӕгты тыххӕй нӕхи ӕвзӕгтыл дзургӕ». 12 Цытӕ цӕуы, уый не 'мбаргӕйӕ сеппӕт дӕр кӕрӕдзийӕн дисгӕнгӕ дзырдтой: «Ай цы уа?» 13 Иннӕтӕ та сыл худтысты: «Адджын сӕнӕй сӕхимӕ ӕгӕр фӕкастысты». 14 Уӕд Петр слӕууыд иуӕндӕс апостолимӕ ӕмӕ райдыдта адӕмӕн хъӕрӕй дзурын: «Иудейаг лӕгтӕ ӕмӕ Иерусалимы ӕппӕт цӕрджытӕ! Лӕмбынӕг байхъусут мӕ ныхӕстӕм ӕмӕ уын зындгонд уӕд: 15 Сымах куыд ӕнхъӕл стут, хъуыддаг афтӕ нӕу: адон расыг не сты – ныр боны ӕртыккӕгӕм сахат у. 16 Фӕлӕ сӕххӕст, Иоил-пехуымпар рагагъоммӕ цы загъта, уый: 17 „Ӕмӕ рӕстӕджы кӕрон, зӕгъы Хуыцау, Мӕ Удӕй бахай кӕндзынӕн алы адӕймагӕн дӕр. Пехуымпариуӕг кӕндзысты уӕ фырттӕ ӕмӕ уӕ чызджытӕ; уӕ лӕппутӕ уындзысты, цы сын раргом кӕнон, уыдӕттӕ; уӕ зӕрӕдтӕ та уындзысты Мӕнӕй лӕвӕрд фынтӕ. 18 Уыцы бонты Мӕ нӕлгоймаг ӕмӕ сылгоймаг цагъартӕн бахай кӕндзынӕн Мӕ Удӕй, ӕмӕ кӕндзысты пехуымпариуӕг. 19 Равдисдзынӕн диссӕгтӕ уӕлейӕ, арвыл, ӕмӕ ӕвдисӕйнӕгтӕ бынӕй, зӕххыл: туг, арт ӕмӕ фӕздӕджы къуыбылӕйттӕ. 20 Хур баталынг уыдзӕн, ӕмӕ мӕй фестдзӕн туджы хуызӕн, цалынмӕ Хицауы стыр ӕмӕ намысджын бон ралӕууа, уӕдмӕ. 21 Ӕмӕ уыдзӕн афтӕ: Хицауы ном чидӕриддӕр ссара, уый фервӕздзӕн". 22 Израилӕгтӕ, байхъусут ацы ныхӕстӕм: Назаретаг Йесойы уын Хуыцау равдыста стыр хъуыддӕгтӕй, диссӕгтӕй ӕмӕ ӕвдисӕйнӕгтӕй. Ӕппӕт уыдӕттӕ уыцы Лӕджы фӕрцы Хуыцау скодта уе 'хсӕн, уӕхӕдӕг куыд зонут, афтӕ. 23 Хуыцау рагацау куыд бауынаффӕ ӕмӕ снысан кодта, афтӕ Йесо лӕвӕрд ӕрцыд сымахмӕ, ӕмӕ Йӕ муртатты къухтӕй бахуыдтат дзуармӕ ӕмӕ Йӕ амардтат. 24 Фӕлӕ Хуыцау арӕдывта мӕлӕты рӕхыс ӕмӕ Йӕ райгас кодта, уымӕн ӕмӕ адзалы бон Йӕ бауромын нӕ уыд. 25 Давид Йесойы тыххӕй афтӕ зӕгъы: „Хицау кӕддӕриддӕр мӕ цӕстыты раз уыд; мӕ рахиз фарс ис, цӕмӕй ӕз ма фӕцудон. 26 Уымӕ гӕсгӕ райы мӕ зӕрдӕ, ме 'взагыл бадынц цины ныхӕстӕ; суанг мӕ буар дӕр зӕрдӕдаргӕйӕ ӕрӕнцайдзӕн, 27 Уымӕн ӕмӕ мын Ды мӕ уды нӕ ныууадздзынӕ мӕрдтыбӕстӕйы, Дӕ сыгъдӕджы нӕ бамбийын кӕндзынӕ ингӕны. 28 Ды мын бацамыдтай фӕндаг цардмӕ; уыдзынӕн Демӕ, ӕмӕ мын мӕ зӕрдӕ бафсаддзынӕ цинӕй". 29 Ме 'фсымӕртӕ, мӕ ныфс хӕссын сымахӕн нӕ рагфыдӕл Давиды тыххӕй зӕгъынмӕ: уый амард, ӕрцыди ныгӕд ӕмӕ йӕ зӕппадз абон дӕр махмӕ ис. 30 Давид пехуымпар уыд ӕмӕ зыдта: Хуыцау ын расомы кодта, йӕ паддзахад ын йӕ байзӕддӕгтӕй иуӕн кӕй ратдзӕн, уый тыххӕй. 31 Давид уыдта фидӕн, ӕмӕ загъта Чырыстийы райгасы тыххӕй, зӕгъгӕ, Йӕ нӕ ныууагъдӕуыд мӕрдтыбӕстӕйы ӕмӕ Йӕ буар нӕ бамбыд. 32 Уыцы Йесойы Хуыцау райгас кодта, ӕмӕ уымӕн мах неппӕт дӕр стӕм ӕвдисӕнтӕ. 33 Йесойы систӕуыд Хуыцауы рахиз фарсмӕ, ӕмӕ Йӕ Фыдӕй райста, зӕрдӕ Йын Кӕмӕй бавӕрдӕуыд, уыцы Сыгъдӕг Уды, ӕмӕ дзы схайджын кодта адӕмы, сымах ныртӕккӕ куыд уынут ӕмӕ хъусут, афтӕ. 34 Уымӕн ӕмӕ Давид уӕларвмӕ не ссыди, фӕлӕ зӕгъы: „Хуыцау загъта мӕ Хицауӕн: сбад Мӕ рахиз фарс, 35 Цалынмӕ Дын Де знӕгты Дӕ къӕхты бын ӕрӕвӕрон, уӕдмӕ". 36 Уӕдӕ ӕппӕт израилаг адӕм фидарӕй зонӕнт: сымах Кӕй байтыгътат, уыцы Йесойы Хуыцау скодта Хицау ӕмӕ Чырысти». 37 Адӕм уый куы фехъуыстой, уӕд зӕрдӕдзӕф фесты, ӕмӕ фарстой Петры ӕмӕ иннӕ апостолты: «Цы гӕнгӕ нын у, не 'фсымӕртӕ?» 38 Петр сын дзуапп радта: «Ӕрфӕсмон кӕнут, ӕмӕ уӕ алчидӕр Йесо Чырыстийы номыл райсӕд аргъуыд, цӕмӕй уын хатыргонд уой уӕ тӕригъӕдтӕ; ӕмӕ райсдзыстут лӕвар – схайджын уыдзыстут Сыгъдӕг Удӕй. 39 Уымӕн ӕмӕ Хуыцау зӕрдӕ бавӕрдта сымахӕн ӕмӕ уӕ сывӕллӕттӕн, стӕй дард чи у, уыдонӕн – нӕ Хицау Хуыцау кӕй ӕрхондзӕн, ӕппӕт уыцы адӕмӕн». 40 Петр сын дзырдта бирӕ ӕндӕр ныхӕстӕ ӕмӕ сӕм сидти: «Уӕхи бахизут ацы хӕлд фӕлтӕримӕ фесӕфынӕй». 41 Ӕмӕ йын йӕ ныхасыл чи баууӕндыд, уыдоныл саргъуыдӕуыд, ӕмӕ уыцы бон уырнджытыл бафтыд ӕртӕ мин адӕймаджы бӕрц. 42 Уыдон ӕнувыдӕй хӕцыдысты апостолты ахуырадыл, ӕмуд-ӕмвӕндӕй арӕзтой дзулсаст ӕмӕ куывтой. 43 Апостолты фӕрцы-иу сарӕзтӕуыд бирӕ диссӕгтӕ ӕмӕ ӕвдисӕйнӕгтӕ, ӕмӕ алы адӕймаг дӕр тарсти Хуыцауӕй. 44 Уырнджытӕ сеппӕт дӕр уыдысты ӕмуд-ӕмвӕнд, сӕ исбон дӕр иумӕйаг уыд. 45 Уӕй кодтой сӕ мулк ӕмӕ ӕхца уӕрстой ӕппӕтыл дӕр, чи цас хъуаг ӕййӕфта, уымӕ гӕсгӕ. 46 Алы бон дӕр-иу ӕмзӕрдӕйӕ ӕрӕмбырд сты Кувӕндоны; хӕдзари-хӕдзар та арӕзтой дзулсаст ӕмӕ сӕ хойраг хордтой хъӕлдзӕгӕй ӕмӕ сыгъдӕг зӕрдӕйӕ. 47 Кад кодтой Хуыцауӕн ӕмӕ ӕппӕт адӕмӕн уыдысты уарзон; Хицау та сын сӕ нымӕцыл ӕрвылбон ӕфтыдта, кӕй ирвӕзын кодта, уыдоны.

Апостолты хъуыддӕгтӕ 3

1 Кувыны афон, фарӕстӕм сахатыл, Петр ӕмӕ Иоанн фӕцӕйцыдысты Кувӕндонмӕ. 2 Рӕсугъд кӕй хуыдтой, Кувӕндоны уыцы кулдуары раз бадти, мады гуыбынӕй цӕнкуыл чи рахаста, ахӕм лӕг. Алы бон дӕр-иу ӕй ӕрхастой уырдӕм, ныууагътой-иу ӕй уым, ӕмӕ ӕхца куырдта Кувӕндонмӕ цӕуджытӕй. 3 Уый Петр ӕмӕ Иоанны Кувӕндонмӕ бацӕуӕны цур куы федта, уӕд сӕ куырдта ӕхца. 4 Петр ӕмӕ йӕм Иоанн ныккастысты ӕдзынӕг, ӕмӕ йын Петр загъта: «Ӕрбакӕс-ма нӕм». 5 Ӕмӕ сӕ уый дӕр, исты мын кӕд раттикой, зӕгъгӕ, йӕ цӕстытӕ ныссагъта. 6 Фӕлӕ йын Петр загъта: «Ӕвзист ӕмӕ мӕм сызгъӕрин нӕй, фӕлӕ дын дӕттын, цы мӕм ис, уый: Назаретаг Йесо Чырыстийы номыл сыст ӕмӕ райдай цӕуын». 7 Петр ын рахӕцыд йӕ рахиз къухыл ӕмӕ йӕ слӕууын кодта. Уайтӕккӕ сфидар сты йӕ дыууӕ фады ӕмӕ йӕ фадхъултӕ, 8 Фӕгӕпп ласта ӕмӕ райдыдта цӕуын. Семӕ бацыди Кувӕндонмӕ ӕмӕ, Хуыцауы стаугӕйӕ, рацу-бацу кодта гӕппытӕгӕнгӕ. 9 Куыд цыди ӕмӕ Хуыцауӕн куыд кад кодта, уый уыдтой ӕппӕт адӕм, 10 Ӕмӕ йӕ базыдтой – Кувӕндоны Рӕсугъд дуары цур мӕгуыргурӕй чи бадти, уыцы лӕг у. Цы йыл ӕрцыд, уый куы федтой, уӕд джихтӕ кодтой ӕмӕ дисы ӕфтыдысты. 11 Чи сдзӕбӕх, уыцы цӕнкуыл Петр ӕмӕ Иоанны фӕхибар куы нал уагъта, уӕд сӕм ӕппӕт адӕм дисгӕнгӕ ӕрбазгъордтой, Соломоны тыргъ кӕй хуыдтой, уырдӕм. 12 Петр уый куы федта, уӕд загъта адӕмӕн: «Израилӕгтӕ, цы йыл дис кӕнут, ӕмӕ нӕм цы ныккастыстут, цыма йӕ къӕхтыл кӕй цӕуы, уый нӕхи хъаруйӕ кӕнӕ, дингӕнджытӕ кӕй стӕм, уый руаджы бакодтам? 13 Авраамы, Исаакы ӕмӕ Иаковы Хуыцау, нӕ фыдӕлты Хуыцау, снамысджын кодта Йӕ Лӕггадгӕнӕджы – Йесо Чырыстийы. Сымах Ӕй радтат амарынмӕ, ӕмӕ Пилаты Йӕ рауадзын куы бафӕндыд, уӕд Ыл йӕ разы уӕхи атигъ кодтат. 14 Сыгъдӕгыл ӕмӕ Рӕстгӕнӕгыл уӕхи атигъ кодтат, ӕмӕ уӕхицӕн ракуырдтат лӕгмары, 15 Царддӕттӕджы та амардтат. Фӕлӕ Йӕ Хуыцау мӕрдтӕй райгас кодта, ӕмӕ мах уымӕн ӕвдисӕнтӕ стӕм. 16 Ӕмӕ Йесойыл ӕууӕндыны фӕрцы Йӕ ном сфидар кодта, сымах кӕй уынут ӕмӕ зонут, уыцы лӕджы. Йесо цы уырнындзинад дӕтты, уый йӕ уӕ разы бынтондӕр сӕнӕниз кодта. 17 Ӕниу, ме 'фсымӕртӕ, ӕз зонын, сымах дӕр, уӕ хицӕуттау, Йесойӕн афтӕ бакодтат, цы гӕнӕг стут, уый не 'мбаргӕйӕ. 18 Хуыцау Йеппӕт пехуымпарты дзыхӕй Йӕ Чырыстийы тухӕнты тыххӕй рагагъоммӕ куыд загъта, афтӕ Йӕ дзырд сӕххӕст кодта. 19 Уӕдӕ ӕрфӕсмон кӕнут, раздӕхут Хуыцаумӕ, цӕмӕй уын ныббарстӕуа уӕ тӕригъӕдтӕ. 20 Уӕд уын Хицау ратдзӕн рӕвдауыны рӕстӕг ӕмӕ уӕм рарвитдзӕн рагагъоммӕ уын ӕвзӕрст Чырыстийы – Йесойы. 21 Уый хъуамӕ уӕларвы уа, Хуыцау незаманы Йӕ сыгъдӕг пехуымпарты дзыхӕй куыд загъта, уымӕ гӕсгӕ цалынмӕ ӕппӕт дӕр сног кӕныны афон ралӕууа, уӕдмӕ. 22 Моисей загъта нӕ фыдӕлтӕн: „Уӕ Хицау Хуыцау мӕн куыд сӕвӕрдта, афтӕ уын уе 'фсымӕртӕй иуы скӕндзӕни Пехуымпар; ӕмӕ уын Уый цыдӕриддӕр зӕгъа, уымӕ-иу хъусут. 23 Уыцы Пехуымпармӕ чи нӕ байхъуса, уый фӕхъӕудзӕн Хуыцауы адӕмӕй". 24 Самуил ӕмӕ йӕ фӕстӕ иннӕ пехуымпартӕ дӕр иууылдӕр абоны тыххӕй дзырдтой. 25 Сымах стут пехуымпарты байзӕддаг ӕмӕ фидыды бындартӕ. Уыцы фидыд Хуыцау сарӕзта уӕ фыдӕлтимӕ, Авраамӕн мӕнӕ афтӕ куы загъта, уӕд: „Дӕ байзӕддаджы фӕрцы зӕххыл арфӕгонд уыдзысты ӕппӕт адӕмтӕ дӕр". 26 Хуыцау Йӕ Лӕггадгӕнӕджы куы райгас кодта, уӕд Ӕй фыццаг сымахмӕ арвыста Йӕ хорзӕх уын раттынмӕ ӕмӕ уӕ алкӕмӕн дӕр йе 'взӕр хъуыддӕгтӕ ныууадзын кӕнынмӕ».

Апостолты хъуыддӕгтӕ 4

1 Петр ӕмӕ Иоанн адӕмимӕ куы ныхас кодтой, уӕд сӕм ӕрбацыдысты сауджынтӕ, Кувӕндон хъахъхъӕнджыты хицау ӕмӕ саддукейтӕ. 2 Мӕстӕй мардысты апостолтӕм, уымӕн ӕмӕ адӕмы ахуыр кодтой ӕмӕ дзырдтой, Йесо куыд райгас, мӕрдтӕ дӕр афтӕ райгас уыдзысты, зӕгъгӕ. 3 Ӕмӕ сӕ ӕрцахстой ӕмӕ сӕ райсомы онг бакодтой ахӕстоны, уымӕн ӕмӕ баизӕр. 4 Апостолтӕм чи хъуыста, уыдонӕй та бирӕтӕ баууӕндыдысты ӕмӕ ныр уырнджыты нымӕц уыди фондз мины бӕрц. 5 Дыккаг бон Иерусалимы ӕрӕмбырд сты иудейаг хицӕуттӕ, хистӕртӕ, динамонджытӕ, 6 Алчер Анна, Каиафӕ, Иоанн, Александр ӕмӕ алчеры иннӕ къабӕзтӕ. 7 Апостолты ӕрлӕууын кодтой сӕ разы ӕмӕ сӕ фарстой: «Уый цавӕр хъаруйӕ кӕнӕ кӕй номӕй бакодтат?» 8 Уӕд Петр схайджын Сыгъдӕг Удӕй ӕмӕ сын загъта: «Адӕмы хицӕуттӕ ӕмӕ хистӕртӕ! 9 Кӕд нӕ абон рынчын адӕймагӕн хорз ракӕныны ӕмӕ йе сдзӕбӕхы тыххӕй дзуапп домут, 10 Уӕд уеппӕтӕн дӕр ӕмӕ ӕгас Израилы адӕмӕн зындгонд уӕд: сымах Кӕй байтыгътат ӕмӕ Хуыцау мӕрдтӕй Кӕй райгас кодта, уыцы Назаретаг Йесо Чырыстийы номыл лӕууы ацы лӕг уӕ разы ӕнӕнизӕй. 11 „Сымах, аразджытӕ, кӕуыл нӕ барвӕссыдыстут, фӕлӕ сӕрӕвӕрӕн чи сси", Йесо уыцы дур у, ӕмӕ ӕндӕр ирвӕзынгӕнӕг нӕй. 12 Уымӕн ӕмӕ нӕ бон кӕй фӕрцы фервӕзын у, адӕмӕн ӕппӕт дунейы ӕндӕр ахӕм ном рард нӕу». 13 Петр ӕмӕ Иоанны иудейаг хицӕуттӕ ныфсджынӕй куы федтой, стӕй кӕй никуы ахуыр кодтой ӕмӕ хуымӕтӕг лӕгтӕ кӕй сты, уый куы бамбӕрстой, уӕд сеппӕт дӕр дисы бафтыдысты; уалынмӕ базыдтой, Йесоимӕ кӕй уыдысты, уый. 14 Фӕлӕ чи сдзӕбӕх, уыцы адӕймаджы уыдтой апостолтимӕ лӕугӕ, ӕмӕ сӕ ныхмӕ ницы зӕгъын уыд сӕ бон. 15 Радтой сын синедрионӕй ӕддӕмӕ рацӕуыны бардзырд ӕмӕ бавнӕлдтой уынаффӕ кӕнынмӕ: 16 «Цы бакӕнӕм ацы адӕмӕн? Ӕцӕг диссаг кӕй равдыстой, уый Иерусалимы ӕппӕт цӕрджытӕн зындгонд у, ӕмӕ йыл нӕ басӕттын нӕ бон нӕу. 17 Фӕлӕ уый адӕмыл тынгдӕр куыд нӕ айхъуыса, афтӕ сӕм бартхъирӕн кӕнӕм, цӕмӕй Йесойы номыл макӕмӕн дзурой». 18 Фӕдзырдтой сӕм ӕмӕ сын радтой уыцы номыл ӕппындӕр нӕ дзурыны ӕмӕ никӕй ахуыр кӕныны бардзырд. 19 Фӕлӕ сын Петр ӕмӕ Иоанн дзуапп радтой: «Ахъуыды-ма кӕнут, Хуыцауы коммӕ нӕ, фӕлӕ уӕ коммӕ кӕсын Хуыцаумӕ раст фӕкӕсдзӕн? 20 Цы федтам ӕмӕ фехъуыстам, уый тыххӕй нӕ дзурын нӕ бон нӕу». 21 Уыдон та сӕм бартхъирӕн кодтой ӕмӕ сӕ рауагътой. Апостолты бафхӕрыны амал сын нӕ уыди, уымӕн ӕмӕ, цы ӕрцыди, уый тыххӕй адӕм иууылдӕр кад кодтой Хуыцауӕн – 22 Йӕ низӕй ӕнахуыр ӕгъдауӕй цы адӕймаг сдзӕбӕх, ууыл дыууиссӕдз азӕй фылдӕр цыди. 23 Петр ӕмӕ Иоанны куы рауагътой, уӕд уыдон ӕрцыдысты сӕхионтӕм ӕмӕ радзырдтой, алчертӕ ӕмӕ сын адӕмы хистӕртӕ цы загътой, уый. 24 Уырнджытӕ сӕм куы байхъуыстой, уӕд ӕмзӕрдӕйӕ бакуывтой Хуыцаумӕ: «Дунедарӕг – арв, зӕхх, денджыз ӕмӕ сӕ цыдӕриддӕр ис, уыдоны Сфӕлдисӕг! 25 Нӕ фыдӕл Давиды, Дӕ лӕггадгӕнӕджы, дзыхӕй Ды Сыгъдӕг Уды фӕрцы загътай: „Цӕмӕн змӕнтынц муртаттӕ, ӕмӕ адӕмтӕ цӕмӕн кӕнынц, кӕмӕй ницы рауайдзӕн, ахӕм фӕнд? 26 Ӕрлӕууыдысты хӕстӕввонгӕй зӕххон паддзӕхтӕ, ӕмӕ ӕлдӕрттӕ ӕрӕмбырд сты иумӕ Хуыцауы ӕмӕ Йӕ Чырыстийы ныхмӕ". 27 Ӕмӕ ӕцӕгӕй Ирод ӕмӕ Понтий Пилат муртаттимӕ ӕмӕ Израилы адӕмимӕ ӕрӕмбырд сты ацы сахары, Кӕй байсӕрстай, Дӕ уыцы сыгъдӕг Лӕггадгӕнӕг Йесойы ныхмӕ, 28 Цӕмӕй сӕххӕст кӕной, Дӕ хъомысмӕ ӕмӕ Дӕ фӕндмӕ гӕсгӕ рагагъоммӕ цы снысан кодтай, уый. 29 Ӕмӕ сын ныр, Хицау, ӕркӕс се 'ртхъирӕнтӕм ӕмӕ ратт ӕхсар Дӕ цагъартӕн, Дӕ ныхас тынг ныфсджынӕй куыд хъусын кӕной, афтӕ. 30 Дӕ къух радар, цӕмӕй Дӕ сыгъдӕг Лӕггадгӕнӕг Йесойы номӕй дзӕбӕх кӕной рынчынтӕ ӕмӕ ӕвдыстӕуа ӕвдисӕйнӕгтӕ ӕмӕ диссӕгтӕ». 31 Куы бакуывтой, уӕд нынкъуысти, кӕм уыдысты, уыцы бынат, сеппӕт дӕр схайджын сты Сыгъдӕг Удӕй ӕмӕ Хуыцауы ныхас дзырдтой ныфсджынӕй. 32 Цы бирӕ адӕм баууӕндыд, уыдон уыдысты ӕмзӕрдӕ ӕмӕ ӕмуд. Мӕ мулк мӕхи у, зӕгъгӕ, ахӕм хъуыды сӕ никӕмӕ уыдис, алцыдӕр сын уыд иумӕйаг. 33 Апостолтӕ та стыр тыхимӕ ӕвдисӕн лӕууыдысты Хицау Йесойы райгасӕн, ӕмӕ сеппӕт дӕр Хуыцауы стыр хорзӕхӕй уыдысты хайджын. 34 Хъуаг чи ӕййӕфта, уырнджыты ӕхсӕн ахӕм нӕ уыд, уымӕн ӕмӕ зӕхх ӕмӕ хӕдзӕрттӕ кӕмӕн уыд, уыдон сӕ уӕй кодтой, ӕмӕ-иу ӕхца 35 Радтой апостолтӕм; ӕмӕ ӕхцайӕ лӕвӕрдӕуыд алкӕмӕн дӕр йӕ хъуӕгтӕм гӕсгӕ. 36 Зӕгъӕм, апостолтӕ фӕсномыгӕй Варнавӕ (ома, Ныфсдӕттӕг) кӕй схуыдтой, уыцы кипраг левит Иосифӕн уыди зӕххы хай. 37 Ауӕй йӕ кодта, ӕрхаста ӕхца ӕмӕ йӕ радта апостолтӕм.

Апостолты хъуыддӕгтӕ 5

1 Уӕд иу лӕг, йӕ ном – Анани, йӕ ус Сапфирӕимӕ ауӕй кодтой сӕ мулк. 2 Анани ӕхцатӕй иуцасдӕр ныууагъта йӕхицӕн, иннӕты та ӕрхаста ӕмӕ сӕ радта апостолтӕм. Кӕй дзы басусӕг кодта, уый зыдта йӕ ус дӕр. 3 Петр ын загъта: «Анани, хӕйрӕджы дӕ зӕрдӕмӕ цӕмӕн бауагътай – Сыгъдӕг Удӕн мӕнг цӕмӕн загътай ӕмӕ, дӕ зӕххӕй цы ӕхцатӕ райстай, уыдонӕй цӕмӕн басусӕг кодтай? 4 Мыййаг, дӕ мулк дӕхи нӕ уыд, зӕхх ауӕй кӕнынӕй цы райстай, ууыл дӕ бар нӕ цыди? Цӕмӕн дӕм фӕзынд асайыны хъуыды? Ды асайдтай адӕмы нӕ, фӕлӕ Хуыцауы». 5 Уыцы ныхӕстӕ фехъусгӕйӕ, Анани дзыхъмард фӕци ӕмӕ адӕргъ и зӕххыл. Уыцы хабар чи фехъуыста, уыдоны бацыд стыр тас. 6 Бацыдысты лӕппутӕ, ӕрцӕттӕ йӕ кодтой баныгӕнынмӕ, стӕй йӕ рахастой ӕмӕ баныгӕдтой. 7 Ӕртӕ сахаты фӕстӕ ӕрхӕццӕ йӕ ус дӕр, ныр цы ӕрцыди, уый та нӕ зыдта. 8 Петр ӕй бафарста: «Зӕгъ-ма мын, ахӕм аргъыл ауӕй кодтат уӕ зӕхх?» Уый дзуапп радта: «О, ахӕм аргъыл». 9 Петр ын загъта: «Цӕмӕн сфӕнд кодтат Хицауы Уды ракъахын? Дӕ мойы дын чи баныгӕдта, уыдон мӕнӕ ӕрбахизынц дуарыл ӕмӕ дӕу дӕр ахӕсдзысты». 10 Сапфирӕ ӕваст ӕрхауд Петры къӕхты цурмӕ ӕмӕ йӕ уд систа. Лӕппутӕ куы бацыдысты, уӕд ӕй баййӕфтой мардӕй, рахастой йӕ ӕмӕ йӕ баныгӕдтой йӕ мойы фарсмӕ. 11 Ӕмӕ стыр тас бацыд ӕгас аргъуаны, стӕй уыцы хабар чи фехъуыста, уыдоны дӕр. 12 Апостолты фӕрцы адӕмӕн ӕвдыст цыди бирӕ ӕвдисӕйнӕгтӕ ӕмӕ диссӕгтӕ. Ӕппӕт уырнджытӕ-иу ӕмзӕрдӕйӕ ӕрӕмбырд сты Соломоны тыргъы. 13 Семӕ баиумӕ ӕддагӕттӕй йӕ ныфс ничи хаста, фӕлӕ сын адӕм кад кодтой. 14 Ӕмӕ фылдӕрӕй-фылдӕр кодтой Хицауыл ӕууӕндджытӕ – сӕ нымӕцыл ӕфтыд бирӕ нӕлгоймӕгтӕ ӕмӕ сылгоймӕгтӕ. 15 Адӕм сӕ рынчынты хастой уынгтӕм, ӕвӕрдтой сӕ хуыссӕнтыл ӕмӕ сынтытыл, искӕуыл дзы сӕ рӕзты цӕуӕг Петры аууон уӕд та куыд андзӕва, афтӕ. 16 Иерусалиммӕ цыди бирӕ адӕм хӕстӕг сахартӕй дӕр. Уыдон-иу ӕркодтой рынчынты, стӕй ӕнӕзӕгъинӕгтӕ кӕй хъыгдардтой, ахӕмты, ӕмӕ-иу сеппӕт дӕр сдзӕбӕх сты. 17 Алчер ӕмӕ йемӕ чидӕриддӕр уыд, уыдон (ома, саддукейты къорд) хӕлӕджы бын фесты. 18 Ӕрцахстой апостолты ӕмӕ сӕ баппӕрстой сахары ахӕстоны. 19 Фӕлӕ Хицауы зӕд ӕхсӕвы байгом кодта ахӕстоны дуӕрттӕ, ӕддӕмӕ сӕ рахуыдта ӕмӕ загъта: 20 «Ацӕут Кувӕндонмӕ ӕмӕ адӕмӕн дзурут ацы ног царды ӕппӕт дзырдтӕ». 21 Уыдон ӕм байхъуыстой, сӕумӕйӕ бацыдысты Кувӕндонмӕ ӕмӕ ахуыр кодтой адӕмы. Алчер йе 'мбӕлццӕттимӕ куы ӕрбацыдис, уӕд ӕрӕмбырд кодтой синедрион, ома, Израилы адӕмы ӕппӕт хистӕрты, ӕмӕ арвыстой ахӕстонмӕ апостолты ӕрбакӕнынмӕ. 22 Кувӕндон хъахъхъӕнджытӕ ӕрцыдысты ахӕстонмӕ, фӕлӕ апостолты уым не ссардтой. Уӕд раздӕхтысты ӕмӕ загътой: 23 «Ахӕстон баййӕфтам, куыд ӕмбӕлы, афтӕ ӕхгӕдӕй, хъахъхъӕнджытӕ лӕууыдысты дуӕртты цур. Фӕлӕ дуӕрттӕ куы байгом кодтам, уӕд дзы никӕй ссардтам». 24 Кувӕндон хъахъхъӕнджыты хицау ӕмӕ алчертӕ уыцы ныхӕстӕ куы фехъуыстой, уӕд фӕджих сты – цы ӕрцыд, уымӕн ницы ӕмбӕрстой. 25 Фӕлӕ ӕрцыд иучидӕр ӕмӕ сын загъта: «Сымах ахӕстоны кӕй бакодтат, уыцы лӕгтӕ ныртӕккӕ сты Кувӕндоны ӕмӕ амонынц адӕмӕн». 26 Уӕд хъахъхъӕнджыты хицау йӕ дӕлбартимӕ ацыд ӕмӕ сӕ ӕрбакодтой ӕнӕ схуыстытӕй, уымӕн ӕмӕ тарстысты, адӕм сыл апостолты тыххӕй дурадзагъдӕй куы ралӕууой, уымӕй. 27 Ӕрбакодтой апостолты ӕмӕ сӕ ӕрлӕууын кодтой синедрионы раз. Алчер сӕ бафарста: 28 «Мах уын фидарӕй нӕ загътам, ӕви, уыцы Адӕймаджы номыл адӕмы мауал ахуыр кӕнут, зӕгъгӕ? Сымах та Иерусалимы ахӕлиу кодтат уӕ ахуырад, ӕмӕ уыцы Адӕймаджы мӕлӕт махыл сӕвӕринаг стут». 29 Петр ӕмӕ иннӕ апостолтӕ дзуапп радтой: «Адӕмы коммӕ нӕ, фӕлӕ Хуыцауы коммӕ хъуамӕ кӕсӕм. 30 Нӕ фыдӕлты Хуыцау райгас кодта, хъӕдыл Кӕй ӕрцауыгътат ӕмӕ амардтат, уыцы Йесойы. 31 Хуыцау Ӕй сбадын кодта Йӕ рахиз фарс, скодта Йӕ Фӕтӕг ӕмӕ Ирвӕзынгӕнӕг, цӕмӕй Израилӕн рардӕуа фӕсмон ӕмӕ йын ныббарстӕуа йӕ тӕригъӕдтӕ. 32 Ӕппӕт уыдӕттӕн ӕвдисӕнтӕ стӕм мах, стӕй Хуыцау Йӕ коммӕгӕстӕн кӕй радта, уыцы Сыгъдӕг Уд дӕр». 33 Синедрионы чи уыди, уыдон уый куы фехъуыстой, уӕд сӕ маст рафыхт ӕмӕ сӕм уыд апостолты амарыны фӕнд. 34 Фӕлӕ фарисейтӕй иу, Гамалиил, динамонӕг, адӕмы ӕхсӕн дзырддзӕугӕ лӕг, сыстад ӕмӕ радта цыбыр рӕстӕгмӕ апостолты ӕддӕмӕ рарвитыны бардзырд. 35 Стӕй синедрионы уӕнгтӕн загъта: «Израилӕгтӕ, хорз ахъуыды кӕнут, ацы адӕмимӕ уын цы гӕнгӕ у, ууыл. 36 Ӕрӕджы фӕзынд Февдӕ, йӕхицӕй цыдӕр арӕзта, ӕмӕ йемӕ баиу цыппарсӕдӕ адӕймаджы бӕрц. Фӕлӕ йӕ амардӕуыд, ӕмӕ йӕ фӕдыл чи цыди, уыдон иууылдӕр ныххӕлиу сты – ууыл ахицӕн хъуыддаг. 37 Уый фӕстӕ, адӕмы сфысты рӕстӕг, фӕзынди галилейаг Иудӕ ӕмӕ йӕ фӕдыл асайдта дзӕвгар адӕм. Фӕлӕ йӕ амардтой, ӕмӕ йӕм чи хъуыста, уыдон ныххӕлиу сты. 38 Ныр дӕр, зӕгъын уын, ма хъыгдарут ацы адӕмы. Кӕд сӕ хъуыддаг адӕймагӕй аразгӕ у, уӕд дзы ницы рауайдзӕн. 39 Кӕд Хуыцауӕй у, уӕд та уӕ бон нӕ бауыдзӕн сӕ бауромын. Кӕсут уӕхимӕ, цӕмӕй ма суат Хуыцауы ныхмӕ тохгӕнджытӕ». 40 Иууылдӕр бакастысты Гамалиилы коммӕ, фӕдзырдтой апостолтӕм ӕмӕ сӕ фӕнӕмын кодтой. Уый фӕстӕ сын карз бафӕдзӕхстой Йесойы номыл нал дзурын, ӕмӕ сӕ рауагътой. 41 Апостолтӕ рацыдысты синедрионӕй ӕмӕ цин кодтой, Йесойы номы сӕраппонд ахӕм ӕфхӕрды аккаг кӕй разындысты, ууыл. 42 Алы бон дӕр Кувӕндоны ӕмӕ хӕдзари-хӕдзар иудадзыг амыдтой адӕмӕн ӕмӕ хъусын кодтой Йесо Чырыстийы фарны уац.

Апостолты хъуыддӕгтӕ 6

1 Ахуыргӕнинӕгты нымӕцыл куы ӕфтыди, уӕд бердзенаг ӕвзагыл дзурӕг дзуттӕгтӕ райдыдтой хъуыр-хъуыр кӕнын бынӕттон дзуттӕгтыл, ӕрвылбоны ӕххуыс куы фӕдӕттынц, уӕд сын сӕ идӕдз сылгоймӕгты хъулон кӕнынц, зӕгъгӕ. 2 Уӕд дыууадӕс апостолы ӕрӕмбырд кодтой ӕппӕт ахуыргӕнинӕгты ӕмӕ загътой: «Махӕн не 'мбӕлы Хуыцауы ныхас амонын ныууадзын ӕмӕ фынгӕвӕрдтыл тыхсын. 3 Уымӕ гӕсгӕ, ӕфсымӕртӕ, уӕхицӕй сӕвзарут, Сыгъдӕг Удӕй хайджын, дзырддзӕугӕ ӕмӕ зондджын чи у, ахӕм авд лӕджы, ӕмӕ сӕ бафтауӕм уыцы куыстыл. 4 Нӕхӕдӕг та иудадзыг кувдзыстӕм ӕмӕ кусдзыстӕм Хуыцауы ныхас хӕлиу кӕныныл». 5 Уыцы фӕндон фӕцыд сеппӕты зӕрдӕмӕ дӕр ӕмӕ сӕвзӕрстой Стефаны, уырнындзинад ӕмӕ Сыгъдӕг Удӕй хайджын лӕджы, Филиппы, Прохоры, Никаноры, Тимоны, Пармены, стӕй муртаттӕй иудейаг динмӕ ӕрцӕуӕг антиохиаг Николайы. 6 Ӕркодтой сӕ апостолтӕм. Апостолтӕ сын бакуывтой ӕмӕ сыл ӕрӕвӕрдтой сӕ къухтӕ. 7 Парахат кодта Хуыцауы ныхас, Иерусалимы дзӕвгар ӕфтыд ахуыргӕнинӕгты нымӕцыл; сауджынтӕй дӕр бирӕтӕ баууӕндыдысты Чырыстийыл. 8 Стефан та, Хуыцауы хорзӕх ӕмӕ хъаруйӕ хайджынӕй, адӕмы раз кодта стыр диссӕгтӕ ӕмӕ ӕвдисӕйнӕгтӕ. 9 Цавӕрдӕр кириниӕгтӕ ӕмӕ александриӕгтӕ – «Сӕрибар райсджыты» синагогӕ кӕй хуыдтой, уырдӕм цӕуджытӕ, стӕй ма Киликийӕ ӕмӕ Асийӕ чидӕртӕ быцӕуы бацыдысты Стефанимӕ. 10 Фӕлӕ йӕ зонды ныхмӕ, стӕй Кӕй фӕрцы дзырдта, уыцы Сыгъдӕг Уды ныхмӕ фӕлӕууын сӕ бон нӕ уыд. 11 Уӕд кӕйдӕрты сардыдтой афтӕ зӕгъыныл: «Мах фехъуыстам, Моисейы ӕмӕ Хуыцауы куыд фаудта, уый». 12 Афтӕмӕй сызмӕстой адӕмы, хистӕрты ӕмӕ динамонджыты, ӕмӕ балӕбурдтой, ӕрцахстой Стефаны ӕмӕ йӕ акодтой синедрионмӕ. 13 Цы мӕнгӕвдисӕнты ӕрбахуыдтой, уыдон дзырдтой: «Ацы адӕймаг иудадзыг фауы ацы сыгъдӕг бынат ӕмӕ Моисейы Ӕгъдау. 14 Цы дзырдта, уый мах фехъуыстам: ацы Назаретаг Йесо, дам, ныппырх кӕндзӕн ацы бынат ӕмӕ аивдзӕн, Моисейы фӕрцы кӕй райстам, уыцы ӕгъдӕуттӕ». 15 Синедрионы чи бадти, уыдон сеппӕт дӕр сӕ цӕстытӕ ныссагътой Стефаны ӕмӕ федтой, йӕ цӕсгом зӕды цӕсгомау куыд ӕрттывта, уый.

Апостолты хъуыддӕгтӕ 7

1 Уӕд ӕй алчер бафарста: «Цы дӕ зӕгъынц, уый раст у?» 2 Фӕлӕ Стефан загъта: «Ме 'фсымӕртӕ ӕмӕ фыдӕлтӕ! Байхъусут мӕм. Нӕ фыдӕл Авраам Харраны нӕма ӕрцард, афтӕ йӕм Месопотамийы фӕзынди намысы Хуыцау 3 Ӕмӕ йын загъта: „Ныууадз дӕ бӕстӕ ӕмӕ дӕ хӕстӕджыты, ӕмӕ ацу, Ӕз дын кӕй бацамонон, уыцы бӕстӕмӕ". 4 Уӕд Авраам ныууагъта халдейаг зӕхх ӕмӕ ӕрцарди Харраны. Йӕ фыды мӕлӕты фӕстӕ йӕ Хуыцау ӕрцӕрын кодта, ныр сымах кӕм цӕрут, уыцы зӕххыл. 5 Ӕмӕ Хуыцау Авраамӕн иунӕг фады бӕрц дӕр зӕхх нӕ радта. Фӕлӕ зӕрдӕ бавӕрдта уыцы зӕхх ын йӕхицӕн ӕмӕ, йӕ фӕстӕ чи уыдзӕн, уыцы байзӕддӕгтӕн раттынӕй, кӕд Авраамӕн зӕнӕг нӕма уыд, уӕддӕр. 6 Хуыцау ын загъта: „Дӕ байзӕддӕгтӕ цыппарсӕдӕ азы кӕйдӕр зӕххыл уыдзысты ӕцӕгӕлӕттӕ ӕмӕ цагъартӕ, ӕмӕ сӕ ссӕнддзысты". 7 „Фӕлӕ Ӕз бафхӕрыны тӕрхон рахӕсдзынӕн, цагъары ӕфсондзы сӕ чи сифтындза, уыцы адӕмӕн, – загъта Хуыцау, – уый фӕстӕ рацӕудзысты ӕмӕ Мын кувдзысты ацы ран". 8 Хуыцау Авраамимӕ сарӕзта фидыд; уыцы фидыд домдта сунӕт кӕнын. Ӕмӕ Авраамӕй Исаак куы райгуырд, уӕд ын ӕстӕм бон скодта сунӕт; Исаак сунӕт скодта Иаковӕн, Иаков – йӕ дыууадӕс фыртӕн, нӕ рагфыдӕлтӕн. 9 Уыцы рагфыдӕлтӕ сӕ хӕлӕгӕй Иосифы ауӕй кодтой Мысырмӕ. Фӕлӕ Хуыцау йемӕ уыд, 10 Ӕмӕ йын ӕххуыс кодта ӕппӕт зынты. Радта йын зонд, стӕй, Мысыры ӕмӕ йеппӕт галуаны сӕргъы йӕ чи сӕвӕрдта, уыцы мысыраг паддзахы хорзӕх. 11 Уый фӕстӕ ӕппӕт Мысыры ӕмӕ Ханааны зӕххыл скодта стонг рӕстӕг, адӕм хъизӕмары бафтыдысты, нӕ фыдӕлтӕн хойраг нал уыди. 12 Мысыры хор кӕй ис, уый фехъусгӕйӕ, Иаков нӕ фыдӕлты уырдӕм арвыста фыццаг хатт. 13 Дыккаг хатт куы ӕрцыдысты, уӕд Иосиф йӕхи раргом кодта йе 'фсымӕртӕн, ӕмӕ фараон базыдта Иосифы хиуӕтты тыххӕй. 14 Иосиф арвыста хонӕг йӕ фыд Иаковмӕ ӕмӕ ӕппӕт хиуӕттӕм – фынддӕс ӕмӕ ӕртиссӕдз адӕймагмӕ. 15 Иаков ӕрцыди Мысырмӕ, ӕмӕ уым амардысты йӕхӕдӕг дӕр ӕмӕ нӕ фыдӕлтӕ дӕр. 16 Сӕ мӕрдтӕ сын рахастой Сихеммӕ ӕмӕ, Авраам Емморы байзӕддӕгтӕй ӕвзистӕй цы зӕппадз балхӕдта, уым сӕ бавӕрдтой. 17 Хуыцау Авраамӕн, сомы йын ракӕнгӕйӕ, зӕрдӕ цӕмӕй бавӕрдта, уымӕн йе 'рцыд куыд хӕстӕгдӕр кодта, афтӕ Мысыры фылдӕрӕй-фылдӕр ӕфтыд нӕ адӕмы нымӕцыл. 18 Афтӕ уыди, Иосифы тыххӕй чи нӕ зыдта, ахӕм ӕндӕр паддзах бӕстӕйы сӕргъы цалынмӕ ӕрлӕууыд, уӕдмӕ. 19 Уый нӕ адӕмыл цыди хинӕй, ссӕста нын нӕ фыдӕлты, ӕппарын сын кодта сӕ сывӕллӕтты, цӕмӕй удӕгасӕй ма баззайой. 20 Уыцы рӕстӕг райгуырд Моисей; уыди рӕсугъд ӕмӕ Хуыцауӕн фӕндиаг сывӕллон. Фыццаг ӕртӕ мӕйы йӕ хастой йӕ фыды хӕдзары. 21 Куы йӕ аппӕрстой, уӕд ӕй ссардта фараоны чызг, ӕмӕ йӕ схаста йӕхи фыртау. 22 Моисей сахуыр кодта, мысыраг зондджынтӕ цы зыдтой, ӕппӕт уыдӕттӕ, уыди тыхджын ныхасӕй дӕр ӕмӕ хъуыддагӕй дӕр. 23 Дыууиссӕдз азы йыл куы цыди, уӕд ӕм фӕзынд йе 'фсымӕрты, Израилы адӕмы, бабӕрӕг кӕныны фӕнд. 24 Моисей федта, иу мысыраг дзуттаджы куыд ӕфхӕрдта, уый. Уӕд ралӕууыд дзуттаджы фарс, амардта мысыраджы ӕмӕ афтӕмӕй райста дзуттаджы маст. 25 Ӕнхъӕл уыд, Хуыцау сӕ йӕ фӕрцы цагъарадӕй кӕй ирвӕзын кӕны, уый бамбардзысты йе 'фсымӕртӕ, зӕгъгӕ. Фӕлӕ йӕ уыдон нӕ бамбӕрстой. 26 Дыккаг бон дзуттӕгты кӕрӕдзийы нӕмгӕ куы федта, уӕд сӕм бацыд ӕмӕ сӕ фидауын кодта: „Хорз лӕгтӕ, ӕфсымӕртӕ куы стут, кӕрӕдзийы хъыджы цӕмӕн цӕут?" 27 Фӕлӕ хионы ӕфхӕрӕг фесхуыста Моисейы ӕмӕ йын загъта: „Махӕн дӕ хицау ӕмӕ тӕрхонгӕнӕгӕй чи сӕвӕрдта? 28 Знон мысыраджы куыд амардтай, мӕн дӕр афтӕ амарынмӕ хъавыс, ӕви?" 29 Моисей уыцы ныхӕстӕ куы фехъуыста, уӕд алыгъд ӕмӕ ӕрцард ӕцӕгӕлон мадиамаг бӕстӕйы. Ам ын райгуырд дыууӕ фырты. 30 Дыууиссӕдз азы фӕстӕ йӕм Синайы хохмӕ хӕстӕг ӕдзӕрӕг бӕстӕйы, судзгӕ сындзкъутӕры арты ӕвзӕгты, фӕзынди зӕд. 31 Моисей йӕ куы федта, уӕд дисы бафтыд. Ӕмӕ йӕм хуыздӕр ӕй фенынмӕ куы фӕцӕйцыд, уӕд ын Хуыцау загъта: 32 „Ӕз дӕн дӕ фыдӕлты Хуыцау, Авраамы, Исаакы ӕмӕ Иаковы Хуыцау". Моисей фыртӕссӕй скӕсын нӕ уӕндыди. 33 Хуыцау ын загъта: „Ралас дӕ къӕхтӕй дӕ дзабыртӕ, уымӕн ӕмӕ ды кӕм лӕууыс, уый сыгъдӕг зӕхх у. 34 Ӕз федтон, Мӕ адӕмы Мын Мысыры куыд ссӕндынц, уый, фехъуыстон сын сӕ хъӕрзын ӕмӕ ӕрцыдтӕн се ссӕрибар кӕнынмӕ. Уӕдӕ ацу, Ӕз дӕ Мысырмӕ ӕрвитын". 35 „Дӕу хицауӕй ӕмӕ тӕрхонгӕнӕгӕй чи сӕвӕрдта?" – ахӕм ныхӕстимӕ цы Моисейыл сӕхи атигъ кодтой, уый Хуыцау арвыста хицауӕй ӕмӕ сӕрибаргӕнӕгӕй, сындзкъутӕрӕй йӕм цы зӕд раргом, уый фӕрцы. 36 Уыцы Моисей адӕмы ракодта Мысырӕй; Мысыры, Сырх денджызы ӕмӕ ӕдзӕрӕг бӕстӕйы дыууиссӕдз азы дӕргъы арӕзта диссӕгтӕ ӕмӕ ӕвдисӕйнӕгтӕ. 37 Уыцы Моисей загъта Израилы адӕмӕн: „Хуыцау мӕн куыд сӕвӕрдта, афтӕ уын уе 'фсымӕртӕй иуы скӕндзӕни Пехуымпар". 38 Уыцы Моисей уыди ӕдзӕрӕг бӕстӕйы, Израилы адӕм кӕм ӕрӕмбырд сты, уым. Уыди, Синайы хохыл йемӕ цы зӕд дзырдта, уыимӕ ӕмӕ нӕ фыдӕлтимӕ, ӕмӕ райста цардӕгас ныхӕстӕ, цӕмӕй сӕ ӕрхӕсса махмӕ. 39 Фӕлӕ нӕ фыдӕлты нӕ бафӕндыди Моисейы коммӕ кӕсын, сӕхи йыл атигъ кодтой ӕмӕ бӕллыдысты Мысырмӕ аздӕхынмӕ. 40 Ӕмӕ Ааронӕн зӕгътой: „Нӕ разӕй чи цӕуа, ахӕм хуыцӕуттӕ нын сараз, уымӕн ӕмӕ нӕ Мысырӕй чи ракодта, уыцы Моисейыл цы ӕрцыд, уый нӕ зонӕм". 41 Ӕмӕ уӕд сарӕзтой сызгъӕрин род, уыцы гуымирыйӕн ӕрхастой нывонд ӕмӕ, сӕхи къухтӕй кӕй сарӕзтой, уый кадӕн скодтой бӕрӕгбон. 42 Хуыцау сӕ Йе 'ргом аздӕхта ӕмӕ сӕ ныууагъта, цӕмӕй кувой, арвыл цы ис, уыдонӕн, пехуымпартӕм куыд фыст у, афтӕ: „Израилы адӕм, ӕдзӕрӕг бӕстӕйы дыууиссӕдз азы дӕргъы фос Мӕнӕн ӕргӕвстат ӕмӕ нывондтӕ Мӕнӕн хастат, ӕви? 43 Сымах уемӕ хастат хуыцау Молохы цатыр ӕмӕ уӕ хуыцау Рефаны стъалы – кӕмӕн куват, уый тыххӕй кӕй сарӕзтат, уыцы фӕлгонцтӕ. Уымӕ гӕсгӕ уӕ Ӕз ахӕсдзынӕн Вавилонӕй дӕр дарддӕр". 44 Нӕ фыдӕлтӕм ӕдзӕрӕг бӕстӕйы уыди, Хуыцауы намыс кӕм уыд, уыцы Цатыр. Хуыцау уый саразын бафӕдзӕхста Моисейӕн, куыд саразгӕ у, уый дӕр ын равдыста. 45 Нӕ фыдӕлтӕ йӕ райстой ӕмӕ йӕ Нуны фырт Йесоимӕ бахастой, нӕ фыдӕлты цурӕй Хуыцау кӕй фӕсырдта, уыцы адӕмы бӕстӕмӕ. Ӕмӕ уыди уым Давиды заманы онг. 46 Давид ссардта Хуыцауы хорзӕх ӕмӕ Дзы куырдта Иаковы Хуыцауӕн хӕдзар самал кӕныны бар. 47 Хӕдзар та Йын Соломон сарӕзта. 48 Фӕлӕ Дунедарӕг лӕджыкъухӕйконд хӕдзӕртты нӕ цӕры, пехуымпар куыд зӕгъы, афтӕ: 49 „Арв у Мӕ бадӕн, зӕхх – Мӕ къӕхты ӕнцой. Сымах Мын цавӕр хӕдзар сараздзыстут, кӕнӕ цавӕр бынат ӕрӕнцойӕн? – зӕгъы Хицау. – 50 Ӕппӕт уыдӕттӕ Мӕхи къухӕй не сфӕлдыстон, ӕви?" 51 Хивӕнд адӕм! Сымахӕн уӕ буар сунӕт у, уӕ зӕрдӕтӕ ӕмӕ уӕ хъустӕ та сунӕтгонд не сты. Сымах уӕ фыдӕлты хуызӕн стут – кӕддӕриддӕр Сыгъдӕг Уды ныхмӕ лӕуут. 52 Уӕ фыдӕлтӕ пехуымпартӕй кӕцыйы не 'фхӕрдтой? Уыдон амардтой, Рӕстгӕнӕджы ӕрцыды тыххӕй рагагъоммӕ чи загъта, уыцы лӕгты. Сымах та ныр ацы Рӕстгӕнӕгӕн Йӕхиуыл рацыдыстут гадзрахатӕй ӕмӕ Йӕ амардтат. 53 Ӕгъдау райстат зӕдты фӕрцы, ӕмӕ йӕ нӕ сӕххӕст кодтат». 54 Уыдӕттӕ хъусгӕйӕ, синедрионы уӕнгтӕ мӕстӕй тъӕппытӕ хаудтой ӕмӕ йӕм сӕ дӕндӕгты хъыс-хъыс цыдис. 55 Стефан та, Сыгъдӕг Удӕй хайджынӕй, скаст уӕларвмӕ, федта Хуыцауы намыс ӕмӕ Йесойы Хуыцауы рахиз фарс лӕугӕйӕ, 56 Ӕмӕ загъта: «Мӕнӕ уынын арвы дуар гомӕй ӕмӕ Адӕймаджы Фырты Хуыцауы рахиз фарс лӕугӕ». 57 Уӕд уыдон сӕ хъӕлӕсыдзаг ныхъхъӕр кодтой, ӕхгӕдтой сӕ хъустӕ, стӕй йыл ӕмхуызонӕй сӕхи ныццавтой. 58 Ракодтой йӕ фӕссахармӕ ӕмӕ йыл дурадзагъдӕй ралӕууыдысты. Ӕвдисӕнтӕ та сӕ пӕлӕзтӕ ныууагътой, йӕ ном Савл кӕмӕн уыд, уыцы лӕппуимӕ. 59 Стефаныл цавтой дуртӕ, уый та куывта: «Хицау Йесо, айс мын мӕ уд». 60 Стӕй ӕрхауд йӕ зонгуытыл ӕмӕ хъӕрӕй ныууынӕргъыдта: «Хицау, ацы тӕригъӕд сын ныббар». Уыцы ныхӕстимӕ Стефан амард.

Апостолты хъуыддӕгтӕ 8

1 Стефаны кӕй амардтой, уый Савл растыл нымадта. Уыцы бонӕй фӕстӕмӕ тынг ӕфхӕрын райдыдтой Иерусалимы аргъуаны уӕнгты. Ӕмӕ апостолтӕй фӕстӕмӕ сеппӕт дӕр ныххӕлиу сты Иудейӕ ӕмӕ Самарийы алы къуымты. 2 Стефаны та баныгӕдтой Хуыцауыл ӕнувыд лӕгтӕ ӕмӕ йыл тынг фӕкуыдтой. 3 Савл карз тох райдыдта аргъуаны ныхмӕ, цыдис хӕдзари-хӕдзар, ахста уырнӕг нӕлгоймӕгтӕ ӕмӕ сылгоймӕгты ӕмӕ-иу сӕ радта ахӕстонмӕ. 4 Чи ныххӕлиу, уыцы уырнджытӕ уӕдмӕ цыдысты ӕмӕ хъусын кодтой фарны уац. 5 Афтӕ Филипп ӕрцыд самариаг сахармӕ ӕмӕ адӕмӕн дзырдта Чырыстийы тыххӕй. 6 Филипп цы диссӕгтӕ кодта, уыдонмӕ касти бирӕ адӕм ӕмӕ йӕм хъуыстой лӕмбынӕг. 7 Бирӕ хӕйрӕджджынтӕй ӕнӕзӕгъинӕгтӕ рацыдысты хъӕргӕнгӕ, бирӕ уӕнгмӕрдтӕ ӕмӕ цӕнкуылтӕ сӕнӕниз сты. 8 Ӕмӕ сахары цӕрджыты цинӕн кӕрон нал уыд. 9 Сахары царди иу кӕлӕнгӕнӕг адӕймаг, йӕ ном – Симон. Уый рагӕй йӕ кӕлӕнтӕй дисы ӕфтыдта самариӕгты; йӕхицӕй стыр цыдӕр арӕзта. 10 Хъуыстой йӕм стырӕй-чысылмӕ ӕмӕ дзырдтой: «Ацы адӕймагмӕ ис, Стыр кӕй хуындӕуы, Хуыцауы уыцы тых». 11 Хъусгӕ та йӕм уымӕн кодтой, ӕмӕ сӕ бирӕ рӕстӕджы дӕргъы дисы ӕфтыдта йӕ кӕлӕнтӕй. 12 Фӕлӕ сын Филипп Хуыцауы Паддзахады ӕмӕ Йесо Чырыстийы номы тыххӕй уац куы фехъусын кодта, уӕд ыл баууӕндыдысты, ӕмӕ саргъуыдӕуыд нӕлгоймӕгтыл дӕр ӕмӕ сылгоймӕгтыл дӕр. 13 Баууӕндыд Симон йӕхӕдӕг дӕр, райста аргъуыд ӕмӕ иудадзыг уыд Филиппимӕ; дис кодта, цы стыр ӕвдисӕйнӕгтӕ ӕмӕ диссӕгтӕ федта, уыдоныл. 14 Апостолтӕ Иерусалимы куы фехъуыстой, самариӕгтӕ Хуыцауы ныхасыл баууӕндыдысты, зӕгъгӕ, уӕд сӕм арвыстой Петр ӕмӕ Иоанны. 15 Петр ӕмӕ сӕм Иоанн куы ӕрцыдысты, уӕд бакуывтой, цӕмӕй самариӕгтӕ схайджын уой Сыгъдӕг Удӕй. 16 Уымӕн ӕмӕ дзы иу дӕр нӕма схайджын Сыгъдӕг Удӕй – ӕрмӕстдӕр сыл саргъуыдӕуыд Хицау Йесойы номыл. 17 Петр ӕмӕ Иоанн сыл ӕрӕвӕрдтой сӕ къухтӕ ӕмӕ уыдон схайджын сты Сыгъдӕг Удӕй. 18 Апостолты къухты ӕрӕвӕрдӕй адӕм Сыгъдӕг Удӕй кӕй схайджын сты, уый Симон куы федта, уӕд апостолтӕн ӕрбахаста ӕхца, 19 Ӕмӕ загъта: «Раттут мӕнӕн дӕр тых, цӕмӕй-иу ӕз дӕр мӕ къухтӕ кӕуыл ӕрӕвӕрон, уый схайджын уа Сыгъдӕг Удӕй». 20 Петр ын дзуапп радта: «Де 'хца демӕ фесӕфӕд, уымӕн ӕмӕ афтӕ банхъӕлдтай, Хуыцауы хорзӕхӕн ӕхцайӕ балхӕнӕн ис, зӕгъгӕ. 21 Ахӕм куысты бацӕуыны аккаг нӕ дӕ, уымӕн ӕмӕ Хуыцауы раз дӕ зӕрдӕ раст нӕу. 22 Уӕдӕ ӕрфӕсмон кӕн дӕ ацы тӕригъӕдыл, кув Хицаумӕ ӕмӕ дын дӕ зӕрдӕйы фыдвӕнд, чи зоны, ӕмӕ ныххатыр кӕна. 23 Уымӕн ӕмӕ ӕз уынын: ды маргӕй дзаг дӕ, бахаудтӕ тӕригъӕды уацары». 24 Уӕд Симон дзуапп радта: «Бакувут мӕн тыххӕй Хицаумӕ, ӕмӕ цы загътат, ахӕмӕй мыл мацы ӕрцӕуа». 25 Петр ӕмӕ Иоанн уым Йесойы тыххӕй куы фӕдзырдтой ӕмӕ Хицауы ныхас куы фӕцамыдтой, уӕд фӕстӕмӕ ацыдысты Иерусалиммӕ. Сӕ фӕндагыл бирӕ самариаг хъӕуты хъусын кодтой фарны уац. 26 Филиппӕн та Хуыцауы зӕд загъта: «Бавдӕл ӕмӕ ацу хуссармӕ, Иерусалимӕй Газӕмӕ цы фӕндаг цӕуы, уымӕ». (Уыцы фӕндаг ӕдзӕрӕг у.) 27 Ӕмӕ Филипп араст. Уыцы рӕстӕг сӕхимӕ здӕхти кандакийы, ома, эфиопаг ус-паддзахы, евнух стыр хицау – йӕ хӕзнадар. Хуыцаумӕ бакувыны тыххӕй уыд Иерусалимы. 28 Бадти йӕ къареты ӕмӕ касти Исай-пехуымпары чиныджы. 29 Сыгъдӕг Уд Филиппӕн загъта: «Баййаф уыцы къарет ӕмӕ цу йӕ фарсмӕ». 30 Филипп базгъордта къареты цурмӕ ӕмӕ, Исайы чиныджы эфиопаг куыд касти, уый куы фехъуыста, уӕд ӕй бафарста: «Цы кӕсыс, уый ӕмбарыс?» 31 Уый дзуапп радта: «Исчи мын ӕй куы нӕ бацамона, уӕд ӕй куыд хъуамӕ бамбарон?» Ӕмӕ ӕрхатыди Филиппмӕ, цӕмӕй схиза къаретмӕ ӕмӕ сбада йӕ фарсмӕ. 32 Сыгъдӕг Фысты эфиопаг касти мӕнӕ уыцы бынат: «Фысау Ӕй акодтой ӕргӕвдынмӕ, ӕмӕ уӕрыччы куы фелвынынц, уӕд куыд ныссабыр вӕййы, афтӕ Дзы иу сыбыртт дӕр нӕ райхъуыст. 33 Бафхӕрдтой Йӕ, раст тӕрхон Ын нӕ рахастой. Йӕ байзӕддӕгты тыххӕй Йын ничи ницы зоны, уымӕн ӕмӕ Йӕ цард зӕххыл фӕци». 34 Евнух бафарста Филиппы: «Курын дӕ, ӕмӕ мын зӕгъ: пехуымпар афтӕ кӕй тыххӕй зӕгъы? Йӕхи тыххӕй ӕви ӕндӕр искӕй тыххӕй?» 35 Филипп бавнӕлдта амонынмӕ. Райдыдта Сыгъдӕг Фысты уыцы бынатӕй ӕмӕ йын дзырдта фарны уац Йесойы тыххӕй. 36 Сӕ фӕндаг даргӕйӕ, ӕрбахӕццӕ сты донмӕ. Евнух загъта: «Мӕнӕ дон, саргъауынӕн мӕ цы къуылымпы кӕны?» 37 [Филипп ын дзуапп радта: «Кӕд зӕрдиагӕй ӕууӕндыс, уӕд дыл саргъауӕн ис». Евнух загъта: «Ӕууӕндын, Йесо Чырысти Хуыцауы Фырт кӕй у, ууыл».] 38 Евнух радта къарет бауромыны бардзырд. Сӕ дыууӕ дӕр, Филипп ӕмӕ евнух, ныххызтысты донмӕ ӕмӕ йыл Филипп саргъуыдта. 39 Донӕй куы рахызтысты, уӕд Филиппы фелвӕста Хуыцауы Уд, ӕмӕ йӕ евнух нал федта. Зӕрдӕрухсӕй дарддӕр цыд йӕ фӕндагыл. 40 Филипп та февзӕрд Азоты. Ацыд дарддӕр, ӕмӕ йӕ фӕндагыл ӕппӕт сахарты хъусын кодта фарны уац, цалынмӕ Кесаримӕ бахӕццӕ, уӕдмӕ.

Апостолты хъуыддӕгтӕ 9

1 Савлӕн ныр дӕр ӕнӕуынон уыдысты Хицауы ахуыргӕнинӕгтӕ, ӕртхъирӕнтӕ сӕм кодта амарынӕй. Бацыд алчермӕ 2 Ӕмӕ дзы ракуырдта фыстӕджытӕ Дамаскы синагогӕтӕм, цӕмӕй, Йесойы фӕдыл цӕуджытӕй кӕй ссара, уыдоны, лӕгӕй-усӕй, ӕрцахса ӕмӕ сӕ ӕркӕна Иерусалиммӕ. 3 Фӕндагыл ма куы уыд ӕмӕ Дамаскмӕ куы баввахс, уӕд ыл уӕларвӕй ӕваст ӕртыхсти рухс. 4 Савл ӕрхауд зӕххыл ӕмӕ фехъуыста хъӕлӕс: «Савл, Савл, цӕмӕн Мӕ ӕфхӕрыс?» 5 Савл бафарста: «Чи дӕ, Хицау?» Дзуапп ын рардӕуыди: «Ды Кӕй ӕфхӕрыс, уыцы Йесо дӕн. [Зын дын у цыргъ хъилы ныхмӕ бырсын». 6 Савл тӕрсгӕ-ризгӕйӕ бафарста: «Хицау, цы саразын мын фӕдзӕхсыс?» Хицау ын загъта:] Сыст ӕмӕ бацу сахармӕ – уым дын загъд уыдзӕни, цы гӕнгӕ дын у, уый». 7 Савлы ӕмбӕлццӕттӕ лӕууыдысты ӕндзыгӕй; хъӕлӕс хъуыстой, фӕлӕ никӕй уыдтой. 8 Савл сыстад зӕххӕй, йӕ цӕстытӕ байгом сты, фӕлӕ ницы уыдта. Уӕд ын ныххӕцыдысты йӕ къухыл ӕмӕ йӕ ӕркодтой Дамаскмӕ. 9 Ӕртӕ боны цӕстӕй нӕ уыдта, хӕрд ӕмӕ доны хъӕстӕ нӕ фӕци. 10 Дамаскы уыдис иу ахуыргӕнинаг, йӕ ном – Анани. Хицау ӕм фӕзынд ӕмӕ йын загъта: «Анани!» Анани дзуапп радта: «Хъусын Дӕм, Хицау». 11 Хицау ын загъта: «Бавдӕл ӕмӕ ацу, Ӕмраст чи хуыйны, уыцы уынгмӕ, ӕмӕ Иудӕйы хӕдзары бафӕрс иу лӕджы, йӕ ном – Савл, у Тарсы сахарӕй. Ныртӕккӕ кувгӕ кӕны 12 Ӕмӕ йӕ цӕстылуайӕны федта иу лӕджы, йӕ ном – Анани; Анани йӕм бацыд ӕмӕ йыл ӕрӕвӕрдта йӕ къухтӕ, цӕмӕй ракӕса йӕ цӕстытӕй». 13 Анани дзуапп радта: «Хицау, ацы адӕймагӕн йӕхи тыххӕй, стӕй Дӕ сыгъдӕджытӕн Иерусалимы цас фыдмитӕ фӕкодта, уый тыххӕй бирӕтӕй фехъуыстон. 14 Ныр ам ис, ӕмӕ йын алчертӕй рардӕуыд бар, цӕмӕй Дӕ ном чидӕриддӕр ары, уыдоны ӕрцахса». 15 Фӕлӕ йын Хицау загъта: «Ацу, Ӕз ӕй Мӕхицӕн кусӕгӕн сӕвзӕрстон, цӕмӕй Мӕ ном фехъусын кӕна муртаттӕн, паддзӕхтӕн ӕмӕ Израилы адӕмӕн. 16 Ӕз ын равдисдзынӕн, Мӕ номы сӕраппонд цас тухӕнтӕ хъуамӕ бавзара, уый». 17 Анани араст, бацыди хӕдзармӕ, Савлыл ӕрӕвӕрдта йӕ къухтӕ ӕмӕ загъта: «Ме 'фсымӕр Савл, ды фӕндагыл куы уыдтӕ, уӕд дӕм Йӕхи Чи равдыста, уыцы Хицау Йесо рарвыста мӕн, цӕмӕй ракӕсай дӕ цӕстытӕй ӕмӕ схайджын уай Сыгъдӕг Удӕй». 18 Ӕмӕ йын цыма уайтӕккӕ хӕрв систӕуыд йӕ цӕстытӕй, афтӕ ӕваст ракаст цӕстӕй, сыстад ӕмӕ йыл саргъуыдӕуыд. 19 Уый фӕстӕ бахордта ӕмӕ йӕ хъару фӕфидар. Савл иукъорд боны фӕци, Дамаскы чи уыд, уыцы ахуыргӕнинӕгтимӕ. 20 Синагогӕты ӕвӕстиатӕй райдыдта амонын, Йесо Хуыцауы Фырт у, зӕгъгӕ. 21 Чи йӕм хъуыста, уыдон дисы ӕфтыдысты ӕмӕ фарстой: «Ай, Йесойы ном арджыты Иерусалимы чи ӕфхӕрдта, уый нӕу, ӕви? Ардӕм дӕр уыдоны ӕрцахсынмӕ ӕмӕ сӕ алчертӕм акӕнынмӕ не 'рцыд, ӕви?» 22 Савлӕн йӕ ныхас кодта тыхджынӕй-тыхджындӕр, ӕмӕ-иу дамаскаг иудейтӕ фӕуыргъуыйау сты, Йесо Чырысти кӕй у, уый тыххӕй-иу сын куы дзырдта, уӕд. 23 Рацыд дзӕвгар рӕстӕг, ӕмӕ иудейтӕ скодтой Савлы амарыны фӕнд. 24 Фӕлӕ сын Савл базыдта сӕ сусӕгвӕнд. Йӕ амарыны тыххӕй ӕхсӕвӕй-бонӕй хъалагъур хастой сахары кулдуары цур. 25 Фӕлӕ ахуыргӕнинӕгтӕ Савлы ӕхсӕвыгон тӕсчъы ӕруагътой къулыл. 26 Савл ӕрцыд Иерусалиммӕ ӕмӕ архайдта, ахуыргӕнинӕгтимӕ цӕмӕй баиу уа, ууыл. Фӕлӕ дзы сеппӕт дӕр тарстысты – ахуыргӕнинаг кӕй у, уый сӕ нӕ уырныдта. 27 Уӕд ӕй Варнавӕ акодта апостолтӕм, ӕмӕ сын радзырдта, Савл фӕндагыл куыд федта Хицауы, Хицау куыд дзырдта йемӕ, Дамаскы Йесойы номыл ныфсджынӕй адӕмы куыд ахуыр кодта, ӕппӕт уыдӕттӕ. 28 Савл иуцасдӕр уыди семӕ, сӕрибарӕй зылдис Иерусалимыл ӕмӕ ныфсджынӕй адӕмы ахуыр кодта Хицауы номыл. 29 Ныхас ӕмӕ быцӕу кодта бердзенагау дзурӕг дзуттӕгтимӕ дӕр, ӕмӕ сӕм фӕзынд йӕ амарыны фӕнд. 30 Ӕфсымӕртӕ уый куы базыдтой, уӕд ӕй акодтой Кесаримӕ ӕмӕ йӕ уырдыгӕй арвыстой Тарсмӕ. 31 Ӕппӕт Иудейӕйы, Галилейы ӕмӕ Самарийы аргъуантӕ хъыгдард нал ӕййӕфтой, фидар кодтой, уыди сӕ Хуыцауы тас, Сыгъдӕг Уды ӕххуысӕй ӕфтыд уырнджыты нымӕцыл. 32 Петр сахартыл куы зылди, уӕд бабӕрӕг кодта Лиддӕйы сахары цӕрӕг сыгъдӕджыты. 33 Ам фембӕлд иу лӕгыл, йӕ ном – Эней. Уый уыд уӕнгмард – аст азы дӕргъы йӕ хуыссӕнӕй нӕ сыстад. 34 Петр ын загъта: «Эней, Йесо Чырысти дӕ дзӕбӕх кӕны. Рабад ӕмӕ сис дӕ хуыссӕн». Эней уайтӕккӕ рабадт. 35 Лиддӕ ӕмӕ йӕ Сароны цӕрджытӕ сеппӕт дӕр федтой ӕмӕ раздӕхтысты Хицаумӕ. 36 Иоппийы уыдис иу уырнӕг сылгоймаг, йӕ ном – Тавифӕ (ома, Сычъи). Ӕмхиц уыди хорз хъуыддӕгтӕм ӕмӕ ӕххуыс кодта мӕгуыртӕн. 37 Уыцы рӕстӕг Тавифӕ ӕрбарынчын ӕмӕ амард. Цынадтой йӕ ӕмӕ йӕ сӕвӕрдтой уӕллаг уаты. 38 Лиддӕ Иоппимӕ хӕстӕг уыд. Ӕмӕ ахуыргӕнинӕгтӕ куы фехъуыстой, Петр уым ис, зӕгъгӕ, уӕд ӕм арвыстой дыууӕ адӕймаджы зӕгъынмӕ: «Ӕрцу нӕм ӕвӕстиатӕй». 39 Петр рараст семӕ. Куы ӕрхӕццӕ, уӕд ӕй бахуыдтой уӕллаг уатмӕ. Ам ыл ӕрӕмбырд сты ӕппӕт идӕдз устытӕ, куыдтой ӕмӕ йӕм ӕвдыстой, Сычъи семӕ куы царди, уӕд кӕй хуыдта, уыцы хӕдӕттӕ ӕмӕ пӕлӕзтӕ. 40 Петр сеппӕты дӕр рарвыста ӕддӕмӕ, ӕрзоныгыл ӕмӕ бакуывта. Уый фӕстӕ разылди мардмӕ ӕмӕ загъта: «Тавифӕ, рабад». Тавифӕ байгом кодта йӕ цӕстытӕ, федта Петры ӕмӕ рабадт. 41 Петр ӕм бадардта йӕ къух, схӕцыд ыл ӕмӕ Тавифӕ йӕ къӕхтыл слӕууыд. Стӕй Петр фӕдзырдта сыгъдӕджытӕм, идӕдз сылгоймӕгтӕм ӕмӕ сын ӕй удӕгасӕй ӕрлӕууын кодта сӕ разы. 42 Уый айхъуыст ӕгас Иоппийыл ӕмӕ бирӕтӕ баууӕндыдысты Хицауыл. 43 Ӕмӕ ма Петр бирӕ рӕстӕг фӕци Иоппийы, цӕрмгуыстгӕнӕг Симонмӕ.

Апостолты хъуыддӕгтӕ 10

1 Кесарийы уыдис иу лӕг, йӕ ном – Корнилий, Италиаг кӕй хуыдтой, уыцы ӕфсӕддон хайы сӕдӕйыхицау. 2 Йеппӕт хӕдзаронтимӕ нымадта Хуыцауы ӕмӕ Дзы тарсти, мӕгуыр адӕмӕн бирӕ ӕххуыс кодта ӕмӕ иудадзыг куывта Хуыцаумӕ. 3 Иухатт боны фарӕстӕм сахатмӕ хӕстӕг уый бӕлвырд федта Хуыцауы зӕды. Зӕд ӕм бацыд ӕмӕ йын загъта: «Корнилий!» 4 Корнилий зӕды куы федта, уӕд фӕтарст ӕмӕ бафарста: «Цы, Хицау?» Зӕд ын дзуапп радта: «Дӕ куывдтытӕ ӕмӕ мӕгуыртӕн де 'ххуыс Хуыцауӕй нӕ ферох сты. 5 Арвит лӕгтӕ Иоппимӕ ӕмӕ ӕрхон, Петр кӕй хонынц, уыцы Симоны. 6 Уый уазӕгуаты ис, йӕ хӕдзар денджызы былыл кӕмӕн ис, уыцы цӕрмгуыстгӕнӕг Симонмӕ. [Уый дын зӕгъдзӕни, ды ӕмӕ деппӕт хӕдзаронтӕ кӕй фӕрцы фервӕздзысты, ахӕм ныхӕстӕ.]» 7 Йемӕ чи ныхас кодта, уыцы зӕд куы ацыд, уӕд Корнилий фӕдзырдта йӕ фӕсдзӕуинтӕй дыууӕмӕ, стӕй йӕ цумагӕнӕн ӕфсӕддонтӕй иумӕ, Хуыцауыл ӕнувыд лӕгмӕ. 8 Цы ӕрцыд, уый сын радзырдта ӕмӕ сӕ арвыста Иоппимӕ. 9 Дыккаг бон, уыдон ма фӕндагыл куы уыдысты ӕмӕ сӕ сахармӕ бирӕ куы нал хъуыд, уӕд Петр ӕхсӕзӕм сахатмӕ хӕстӕг бакувынмӕ схызти хӕдзары сӕрмӕ. 10 Сыстонг ӕмӕ йӕм хӕрын ӕрцыд. Ӕмӕ цалынмӕ хӕринаг цӕттӕ кодтой, уӕдмӕ йын раргом: 11 Федта арвы дуар гомӕй, ӕмӕ ӕрцӕйцыди цыдӕр, стыр кӕттаджы хуызӕн, йӕ цыппар тигъӕй йӕ ӕрцӕйуагъдӕуыд зӕхмӕ. 12 Уыди дзы алыхуызон цыппӕркъахыг цӕрӕгойтӕ, хилджытӕ ӕмӕ уӕларвон мӕргътӕ. 13 Петрмӕ ӕрыхъуыст хъӕлӕс: «Сыст, Петр, аргӕвд ӕмӕ бахӕр». 14 Фӕлӕ Петр загъта: «Уый нӕ уыдзӕн, Хицау! Ӕлгъаг ӕмӕ чъизи цы у, ӕз ахӕмӕй никуы ницы бахордтон». 15 Уӕд ӕм дыккаг хатт ӕрыхъуыст хъӕлӕс: «Хуыцау цы ссыгъдӕг кодта, уый ӕлгъагыл ма нымай». 16 Афтӕ уыд ӕртӕ хатты, стӕй уайтӕккӕ кӕттаджы систӕуыд уӕларвмӕ. 17 Петр ма, цы федта, уымӕн ницы ӕмбаргӕйӕ, уый цы уыдаид, зӕгъгӕ, дисы куы ӕфтыд, афтӕ Корнилийы ӕрвыст лӕгтӕ ӕрлӕууыдысты кулдуары цур. Адӕмӕй базыдтой, Симоны хӕдзар кӕм ис, уый, 18 Бахъӕр кодтой ӕмӕ бафарстой: «Петр кӕй хонынц, уыцы Симон уазӕгуаты ам ис?» 19 Ныр Петры хъуыдытӕ уыдысты, цы федта, ууыл. Сыгъдӕг Уд ын загъта: «Ӕртӕ лӕджы дӕ агурынц дӕлӕ. 20 Сыст, ӕрхиз ӕмӕ ацу семӕ ӕнӕ мисхал гуырысхойӕ, уымӕн ӕмӕ сӕ Ӕз рарвыстон». 21 Петр ӕрхызти Корнилийы ӕрвыст лӕгтӕм ӕмӕ загъта: «Сымах кӕй агурут, уый ӕз дӕн. Цы хъуыддаджы фӕдыл ӕрцыдыстут?» 22 Уыдон загътой: «Сӕдӕйыхицау Корнилий рӕстгӕнӕг лӕг у, тӕрсы Хуыцауӕй, ӕппӕт иудейаг адӕм ӕй нымайынц. Сыгъдӕг зӕд ын бафӕдзӕхста дӕу йӕ хӕдзармӕ ӕрхонын ӕмӕ дӕм байхъусын». 23 Уӕд сӕ Петр бахуыдта ӕмӕ сӕ суазӕг кодта. Дыккаг бон араст и семӕ; йемӕ ма рацыд иоппиаг ӕфсымӕртӕй цалдӕр. 24 Иннӕ бон ӕрхӕццӕ сты Кесаримӕ. Корнилий ӕрбахуыдта йӕ къабӕзты, хӕстӕг хӕлӕртты, ӕмӕ сӕм ӕнхъӕлмӕ кастысты. 25 Петр мидӕмӕ куы бахызт, уӕд Корнилий рацыд йӕ размӕ ӕмӕ йӕхи ӕрӕппӕрста Петры къӕхтӕм. 26 Петр ыл схӕцыд ӕмӕ загъта: «Сыст, ӕз дӕр ӕрмӕст адӕймаг дӕн». 27 Корнилиимӕ ныхӕстӕ кӕнгӕйӕ, Петр бацыд хӕдзармӕ, баййӕфта дзы бирӕ адӕм 28 Ӕмӕ сын загъта: «Сымах хорз зонут, иудейӕн кӕй нӕй муртатимӕ ӕмбӕлыны кӕнӕ йӕм хӕдзармӕ бацӕуыны бар. Фӕлӕ мын Хуыцау раргом кодта, ӕз иу адӕймаджы дӕр ӕлгъаг ӕмӕ чъизийыл куыд нӕ нымайон, афтӕ. 29 Ӕмӕ мӕм куы фӕдзырдтат, уӕд ӕрцыдтӕн ӕнӕ уӕлдай ныхасӕй. Ныр уӕ фӕрсын: цы хъуыддаджы фӕдыл мӕм арвыстат?» 30 Корнилий загъта: «Ӕртӕ боны размӕ, ацафон, фарӕстӕм сахатыл, ӕз куывтон мӕ хӕдзары. Уӕд мӕ разы февзӕрд иу лӕг ӕрттивгӕ дарӕсы 31 Ӕмӕ загъта: „Корнилий, дӕ куывд дын фехъуыстӕуыд, мӕгуыртӕн де 'ххуыс Хуыцауӕй нӕ ферох. 32 Арвит Иоппимӕ ӕмӕ ӕрхон, Петр кӕй хонынц, уыцы Симоны. Уый уазӕгуаты ис цӕрмгуыстгӕнӕг Симоны хӕдзары, денджызы былыл". 33 Уайтӕккӕ дӕм арвыстон, ӕмӕ кӕй ӕрцыдтӕ, уымӕй хорз бакодтай. Ныр мах иууылдӕр лӕууӕм Хуыцауы раз, цӕмӕй байхъусӕм, Хицау дын цы бафӕдзӕхста, ӕппӕт уыдӕттӕм». 34 Петр райдыдта дзурын: «Ӕцӕг базыдтон, Хуыцау кӕй никӕй хъулон кӕны, уый. 35 Фӕлӕ Дзы чи тӕрсы ӕмӕ рӕстӕй чи цӕры, уый цыфӕнды адӕмыхаттӕй куы уа, уӕддӕр Ын адджын у. 36 Хуыцау Израилаг адӕмӕн рарвыста Йӕ ныхас – Йесо Чырыстийы руаджы адӕмимӕ кӕй фидауы, уыцы фарны уац. Чырысти та ӕппӕт адӕмы Хицау у. 37 Иоанн саргъауынмӕ куы фӕсидтис, уӕд ӕппӕт Иудейӕйы, Галилейӕ райдайгӕйӕ, цы ӕрцыди, уый сымахӕн зындгонд у. 38 Сымах зонут, Хуыцау Назаретаг Йесойы кӕй схайджын кодта Сыгъдӕг Удӕй ӕмӕ хъаруйӕ. Йесо цыди ӕмӕ алы ран дӕр арӕзта хорз хъуыддӕгтӕ, дзӕбӕх кодта хӕйрӕджы дӕлбар адӕмы, уымӕн ӕмӕ Хуыцау Йемӕ уыд. 39 Ӕмӕ мах ӕвдисӕн стӕм, Уый иудейаг бӕстӕйы ӕмӕ Иерусалимы цы бакодта, ӕппӕт уыдӕттӕн. Хъӕдыл Ӕй ӕрцауыгътой ӕмӕ Йӕ амардтой, 40 Фӕлӕ Йӕ Хуыцау райгас кодта ӕртыккаг бон ӕмӕ Йын Йӕхи равдисын кодта адӕммӕ, 41 Ӕрмӕст ӕппӕт адӕммӕ нӕ, фӕлӕ махмӕ – Хуыцау раздӕр кӕй сӕвзӕрста, Йесо мӕрдтӕй куы райгас, уый фӕстӕ Йемӕ чи хордта ӕмӕ нуӕзта, уыцы ӕвдисӕнтӕм. 42 Ӕмӕ Йесо махӕн бафӕдзӕхста адӕммӕ фарны уац фӕхӕссын, Уый удӕгӕстӕн ӕмӕ мӕрдтӕн Хуыцауӕй ӕвӕрд Тӕрхонгӕнӕг кӕй у, уымӕн ӕвдисӕн лӕууын. 43 Йесойӕн ӕвдисӕн сты ӕппӕт пехуымпартӕ, зӕгъгӕ Йыл чидӕриддӕр баууӕнда, уымӕн Йӕ номы хъаруйӕ хатыр уыдзысты тӕригъӕдтӕ». 44 Петр уый куы дзырдта, уӕд ӕм чидӕриддӕр хъуыста, уыдон схайджын сты Сыгъдӕг Удӕй. 45 Петримӕ чи ӕрцыд, уыцы уырнджытӕ сунӕтгӕндтӕ уыдысты; ӕмӕ муртаттӕ дӕр Сыгъдӕг Удӕй кӕй схайджын сты, уый сӕ дисы бафтыдта. 46 Уымӕн ӕмӕ хъуыстой, ӕндӕр ӕвзӕгтыл куыд дзырдтой ӕмӕ Хуыцауӕн куыд кад кодтой, уый. Уӕд Петр загъта: 47 «Уый кӕй бон бауыдзӕн, ӕмӕ махау Сыгъдӕг Удӕй чи схайджын, уыдоныл донӕй саргъауынӕн цӕлхдур сӕвӕра?» 48 Ӕмӕ сын бафӕдзӕхста, цӕмӕй аргъуыд райсой Йесо Чырыстийы номыл. Уый фӕстӕ фысымтӕ ӕрхатыдысты Петрмӕ цалдӕр боны сӕм баззайыны тыххӕй.

Апостолты хъуыддӕгтӕ 11

1 Муртаттӕ дӕр Хуыцауы ныхасыл кӕй баууӕндыдысты, уый фехъуыстой, Иудейӕйы чи уыд, уыцы апостолтӕ ӕмӕ ӕфсымӕртӕ. 2 Ӕмӕ Петр Иерусалиммӕ куы ӕрцыд, уӕд ын сунӕтгонд уырнджытӕ уайдзӕф кодтой: 3 «Ды ӕнӕсунӕт адӕммӕ уыдтӕ ӕмӕ хордтай семӕ». 4 Уӕд сын Петр райдыдта, хъуыддаг куыд рауад, уый тыххӕй бӕстон дзурын: 5 «Ӕз куывтон Иоппийы сахары ӕмӕ мӕ цӕстыл ауад: ӕрцӕйцыди цыдӕр, стыр кӕттаджы хуызӕн, йӕ цыппар тигъӕй йӕ ӕрцӕйуагъдӕуыд уӕларвӕй; ӕмӕ ӕрхӕццӕ мӕнмӕ. 6 Ӕз ӕм ӕдзынӕг ныккастӕн, ӕмӕ дзы федтон цыппӕркъахыг цӕрӕгойтӕ, сырдтӕ, хилджытӕ ӕмӕ уӕларвон мӕргътӕ. 7 Ӕмӕ фехъуыстон хъӕлӕс: „Сыст, Петр, аргӕвд ӕмӕ бахӕр". 8 Фӕлӕ ӕз загътон: „Уый нӕ уыдзӕн, Хицау! Ӕлгъаг ӕмӕ чъизи цы у, ахӕмӕй мӕ дзыхы никуы ницы уыди". 9 Хъӕлӕс мын уӕларвӕй дыккаг хатт дзуапп радта: „Хуыцау цы ссыгъдӕг кодта, уый ӕлгъагыл ма нымай". 10 Афтӕ уыд ӕртӕ хатты, стӕй сӕ иууылдӕр систӕуыд уӕларвмӕ. 11 Ӕмӕ уайтӕккӕ ӕртӕ лӕджы ӕрбалӕууыдысты, ӕз кӕм уыдтӕн, уыцы хӕдзары дуармӕ; уыдон Кесарийӕ мӕнмӕ ӕрвыст уыдысты. 12 Сыгъдӕг Уд мын загъта, цӕмӕй ӕз ӕнӕ гуырысхойӕ ацӕуон семӕ. Мемӕ араст сты ацы ӕхсӕз ӕфсымӕры дӕр, ӕмӕ ӕрцыдыстӕм Корнилийы хӕдзармӕ. 13 Корнилий нын радзырдта, йӕ хӕдзары зӕды куыд федта, уый тыххӕй. Зӕд ын загъта: „Арвит Иоппимӕ ӕмӕ ӕрхон, Петр кӕй хонынц, уыцы Симоны. 14 Уый дын зӕгъдзӕни, ды ӕмӕ деппӕт хӕдзаронтӕ кӕй фӕрцы фервӕздзысты, ахӕм ныхӕстӕ". 15 Ӕз дзурын куы райдыдтон, уӕд уыдон схайджын сты Сыгъдӕг Удӕй, раздӕр Дзы мах куыд схайджын стӕм, афтӕ. 16 Уӕд мӕ зӕрдыл ӕрлӕууыдысты Йесойы ныхӕстӕ: „Иоанн донӕй аргъуыдта, сымах та аргъуыд уыдзыстут Сыгъдӕг Удӕй". 17 Мах Хицау Йесо Чырыстийыл куы баууӕндыдыстӕм, уӕд нын Хуыцау цы радта, кӕд муртаттӕн дӕр ахӕм лӕвар ракодта, уӕд ӕз чи дӕн, ӕмӕ Хуыцауы ныхмӕ ӕрлӕууон?» 18 Куы йӕм байхъуыстой, уӕд ӕрсабыр сты, кад кодтой Хуыцауӕн ӕмӕ дзырдтой: «Уӕдӕ Хуыцау муртаттӕн дӕр радта фӕсмон мыггагмӕ цӕрынӕн». 19 Стефаны мӕлӕты фӕстӕ сӕ ӕфхӕрын куы райдыдтой, уӕд уырнджытӕй чи ныххӕлиу, уыдон бахӕццӕ сты Финикимӕ, Кипрмӕ ӕмӕ Антиохимӕ. Хуыцауы ныхас амыдтой ӕрмӕстдӕр иудейтӕн. 20 Фӕлӕ уыдонӕй иуӕй-иутӕ уыдысты кипрӕгтӕ ӕмӕ кириниӕгтӕ; ӕмӕ Антиохимӕ куы ӕрцыдысты, уӕд муртаттӕн дӕр хъусын кодтой Хицау Йесойы фарны уац. 21 Хуыцау сын лӕвӕрдта тых, бирӕтӕ баууӕндыдысты ӕмӕ ӕрцыдысты Хицаумӕ. 22 Уыцы хабар бахӕццӕ Иерусалимы аргъуанмӕ, ӕмӕ Варнавӕйы арвыстой Антиохимӕ. 23 Куы ӕрцыд ӕмӕ Хуыцауы хорзӕх куы федта, уӕд йӕ зӕрдӕ барухс ӕмӕ сеппӕтӕн дӕр фӕдзӕхста, цӕмӕй Хицауыл уой зӕрдиаг ӕмӕ ӕнувыд. 24 Варнавӕ хорз лӕг уыд, Сыгъдӕг Уд ӕмӕ уырнындзинадӕй хайджын. Ӕмӕ Хицаумӕ ӕрцыд бирӕ адӕм. 25 Уый фӕстӕ Варнавӕ ацыд Тарсмӕ Савлы агурӕг, ссардта йӕ ӕмӕ йӕ ӕрхуыдта Антиохимӕ. 26 Ӕнӕхъӕн аз ӕмбӕлдысты аргъуанимӕ ӕмӕ ахуыр кодтой бирӕ адӕмы. Ахуыргӕнинӕгты фыццаг хатт Антиохийы схуыдтой чырыстӕттӕ. 27 Уыцы рӕстӕг Иерусалимӕй Антиохимӕ ӕрцыдысты пехуымпартӕ. 28 Уыдонӕй иу, йӕ ном – Агав, сыстад ӕмӕ радзырдта, Сыгъдӕг Уд ын цы раргом кодта, уый: ӕппӕт дунейы скӕндзӕн тынг стонг рӕстӕг. Ӕмӕ йӕ пехуымпар ныхас ӕрцыди кесӕр Клавдийы заманы. 29 Уӕд ахуыргӕнинӕгтӕ баныхас кодтой, кӕмӕн куыд йӕ бон у, афтӕ се 'ххуысы хай Иудейӕйы цӕрӕг ӕфсымӕртӕн арвитыны тыххӕй. 30 Ӕмӕ сӕ дзырдӕн разындысты хицау: цы ӕрӕмбырд кодтой, уый Варнавӕимӕ ӕмӕ Савлимӕ арвыстой аргъуаны хистӕртӕм

Апостолты хъуыддӕгтӕ 12

1 Уыцы рӕстӕг паддзах Ирод райдыдта аргъуаны уӕнгтӕй иуӕй-иуты ӕфхӕрын. 2 Кардӕй амарын кодта Иоанны ӕфсымӕр Иаковы. 3 Ацы хъуыддаг иудейтӕн ӕхсызгон кӕй у, уый куы федта, уӕд ӕй бафӕндыд Петры дӕр ӕрцахсын. Уый уыди Донгонд дзулты бӕрӕгбоны рӕстӕг. 4 Ӕрцахсын кодта Петры, баппӕрста йӕ ахӕстонмӕ ӕмӕ йӕ хъахъхъӕнын бафӕдзӕхста, фӕйнӕ цыппар ӕфсӕддоны кӕм уыд, ахӕм цыппар къордӕн. Иродмӕ уыд Куадзӕны фӕстӕ йын адӕмы раз тӕрхон кӕныны фӕнд. 5 Петры дардтой ахӕстоны, аргъуан та уыцы рӕстӕг Петры тыххӕй зӕрдиагӕй куывта Хуыцаумӕ. 6 Ирод ӕй тӕрхонмӕ ракӕнынмӕ куы хъавыди, раст уыцы ӕхсӕв Петр, дыууӕ рӕхысӕй бастӕй, фынӕй кодта дыууӕ ӕфсӕддоны ӕхсӕн; хъахъхъӕнджытӕ лӕууыдысты дуармӕ дӕр ӕмӕ хъахъхъӕдтой ахӕстон. 7 Ӕваст фӕзынди Хуыцауы зӕд ӕмӕ ахӕстоны уат ныррухс. Зӕд басхуыста Петры фарс, райхъал ӕй кодта ӕмӕ загъта: «Сыст рӕвдздӕр». Рӕхыстӕ ӕрхаудтой Петры цӕнгтӕй. 8 Зӕд ын загъта: «Ӕрбабӕтт дӕ рон ӕмӕ скӕн дӕ дзабыртӕ». Петр ӕм байхъуыста. Зӕд та йын загъта: «Скӕн дӕ пӕлӕз ӕмӕ рацу мӕ фӕдыл». 9 Петр рахызт ӕмӕ цыди зӕды фӕдыл, фӕлӕ не 'мбӕрста, зӕд цы аразы, уый ӕцӕгдзинад кӕй у – ӕнхъӕл уыд, ӕмӕ цы уыны, уый цӕстылуайӕн у. 10 Хъахъхъӕнджыты фыццаг ӕмӕ дыккаг къордты рӕзты куы аивгъуыдтой, уӕд бахӕццӕ сты, сахармӕ кӕуылты цыдысты, уыцы ӕфсӕн кулдуармӕ. Дуар сын йӕхӕдӕг байгом, рахызтысты ӕддӕмӕ, ӕмӕ иу уынг куы ауадысты, уӕд зӕд ӕваст ӕрбацыдӕр. 11 Петр йӕхи куы ӕрӕмбӕрста, уӕд загъта: «Ныр ӕз ӕцӕг зонын: Хуыцау рарвыста Йӕ зӕды ӕмӕ мӕ фервӕзын кодта Ироды къухтӕй, иудейаг адӕм цӕмӕ ӕнхъӕлмӕ кастысты, ӕппӕт уыдӕттӕй». 12 Петр уый куы бамбӕрста, уӕд араст, Марк кӕй хуыдтой, уыцы Иоанны мад Мариайы хӕдзармӕ. Ам ӕрӕмбырд бирӕ адӕм ӕмӕ куывтой. 13 Петр кулдуар куы бахоста, уӕд кулдуары цурмӕ рацыди лӕггадгӕнӕг сылгоймаг, йӕ ном – Родӕ. 14 Родӕ Петры йӕ хъӕлӕсӕй базыдта, фӕлӕ фырцинӕй кулдуар нӕ байгом кодта, афтӕмӕй базгъордта ӕмӕ радзырдта, Петр дуармӕ лӕууы, зӕгъгӕ. 15 Уыдон ын загътой: «Уый дӕ зонд куы фӕцыд». Фӕлӕ Родӕ ныллӕууыд, цы загъта, ууыл. Уыдон та дзырдтой: «Уый Петрӕн йӕ зӕд у». 16 Петр та хоста ӕмӕ хоста кулдуар. Кулдуар ын куы байгом кодтой, уӕд ӕй федтой ӕмӕ стыр дисы бафтыдысты. 17 Петр сын йӕ къухӕй бацамыдта, цӕмӕй банцайой, ӕмӕ сын радзырдта, Хицау ӕй ахӕстонӕй куыд ракодта, уый тыххӕй. Стӕй сын загъта: «Ацы хабар фехъусын кӕнут Иаковӕн ӕмӕ иннӕ ӕфсымӕртӕн». Уый фӕстӕ рацыд уырдыгӕй ӕмӕ араст ӕндӕр ранмӕ. 18 Куы ӕрбабон, уӕд ӕфсӕддонтӕ фӕдис систой: Петр цы фӕуыдаид? 19 Ирод фӕцагуырдта Петры, ӕмӕ йӕ куы нӕ ссардта, уӕд ӕрфарста хъахъхъӕнджыты ӕмӕ радта сӕ амарыны бардзырд. Уый фӕстӕ Иудейӕйӕ ацыди Кесаримӕ ӕмӕ дзы афӕстиат. 20 Ирод мӕсты уыди Тир ӕмӕ Сидоны цӕрджытӕм. Уыдон та баныхас кодтой иумӕ ӕмӕ йӕм ӕрцыдысты; балхӕдтой паддзахы галуанӕн уынаффӕгӕнӕг Власты зӕрдӕ, ӕмӕ куырдтой фидыд, уымӕн ӕмӕ сӕ бӕстӕйӕн хойраг паддзахы бӕстӕйӕ истой. 21 Нысангонд бон Ирод паддзахы дарӕсы сбадти къӕлӕтджыны ӕмӕ дзырдта семӕ. 22 Адӕм та хъӕр систой: «Уый адӕймаг нӕ, фӕлӕ хуыцау дзуры!» 23 Ӕмӕ йӕ уайтӕккӕ Хуыцауы зӕд ӕрцавта, ӕцӕг Хуыцауӕн кад скӕныны бӕсты йӕхи хуыцау схонын кӕй бауагъта, уый тыххӕй; къуыдыркӕлмытӕ йӕ бахордтой ӕмӕ йӕ уд систа. 24 Ныридӕгӕн Хуыцауы ныхас хӕлиу кодта парахатӕй. 25 Варнавӕйӕн ӕмӕ Савлӕн фӕдзӕхст цы уыд, уый куы сарӕзтой, уӕд Иерусалимӕй ӕрбаздӕхтысты; семӕ ракодтой, Марк кӕй хуындӕуыд, уыцы Иоанны.

Апостолты хъуыддӕгтӕ 13

1 Антиохийы аргъуаны уыди пехуымпартӕ ӕмӕ ахуыргӕнджытӕ: Варнавӕ, Нигер кӕй хуындӕуыд, уыцы Симеон, кириниаг Луций, ӕлдариуӕггӕнӕг Иродимӕ чи хъомыл кодта, уыцы Манаин, ӕмӕ Савл. 2 Уыдон иухатт Хуыцаумӕ куы куывтой ӕмӕ ком куы дардтой, уӕд сын Сыгъдӕг Уд загъта: «Цы хъуыддагӕн сӕ сӕвзӕрстон, уый саразынӕн Мын раттут Варнавӕйы ӕмӕ Савлы». 3 Ком бадарыны ӕмӕ фӕкувыны фӕстӕ Варнавӕйыл ӕмӕ Савлыл ӕрӕвӕрдтой сӕ къухтӕ ӕмӕ сӕ афӕндараст кодтой. 4 Уыдон, Сыгъдӕг Удӕй ӕрвыстытӕ, ӕрцыдысты Селевкийы сахармӕ, уырдыгӕй та науы араст сты Кипрмӕ. 5 Бахӕццӕ сты Саламинмӕ ӕмӕ иудейаг синагогӕты амыдтой Хуыцауы ныхас. Семӕ ма ӕххуысгӕнӕгӕй уыд Иоанн дӕр. 6 Ахызтысты ӕппӕт сакъадахыл ӕмӕ бахӕццӕ сты Пафмӕ. Уым фембӕлдысты цавӕрдӕр иудейаг кӕлӕнгӕнӕг ӕмӕ мӕнгпехуымпарыл, йӕ ном – Вар-Йесо. 7 Вар-Йесо уыди сакъадахы хицау Сергий Павелы, зондджын лӕджы, ӕввахсдӕртӕй иу. Сергий Павел фӕдзырдта Варнавӕ ӕмӕ Савлмӕ, фӕндыд ӕй Хуыцауы ныхасмӕ байхъусын. 8 Фӕлӕ Вар-Йесо (хуыдтой ма йӕ Элима дӕр, ома, кӕлӕнгӕнӕг) уыди сӕ ныхмӕ ӕмӕ архайдта, цӕмӕй сакъадахы хицау уырнындзинадмӕ ма ӕрцӕуа. 9 Фӕлӕ Савл, хуыдтой ма йӕ Павел дӕр, схайджын Сыгъдӕг Удӕй, ӕдзынӕг ныккаст Элимамӕ 10 Ӕмӕ загъта: «О хӕйрӕджы хъӕбул, фӕлитой ӕмӕ налат, рӕстдзинады знаг! Хицауы раст фӕндӕгтӕй адӕмы галиумӕ здахыны куыст искуы ныууадздзынӕ ӕви нӕ? 11 Ныр дӕ Хицауы къух ӕрцӕвдзӕн, бакуырм уыдзынӕ ӕмӕ, цалынмӕ афон ралӕууа, уӕдмӕ хуры рухс нӕ фендзынӕ». Элимайыл ӕваст боны рухс батар, ӕмӕ алырдӕм рафтбафтгӕнгӕйӕ агуырдта, чи йӕ ахона, ахӕмы. 12 Цы ӕрцыд, уый Сергий Павел куы федта, уӕд Хицауы тыххӕй цы базыдта, уый йӕ бафтыдта стыр дисы, ӕмӕ баууӕндыд. 13 Павел ӕмӕ йе 'мбӕлццӕттӕ науы ацыдысты Пафӕй, ӕмӕ бахӕццӕ сты Памфилимӕ, Пергийы сахармӕ. Ам Иоанн фӕхицӕн уыдонӕй ӕмӕ ӕрбаздӕхт Иерусалиммӕ. 14 Уыдон та Пергийӕ араст сты дарддӕр ӕмӕ бахӕццӕ сты писидиаг сахар Антиохимӕ. Сабаты бацыдысты синагогӕмӕ ӕмӕ дзы ӕрбадтысты. 15 Ӕгъдауӕй ӕмӕ пехуымпарты чингуытӕй бакӕсыны фӕстӕ синагогӕйы хицӕуттӕ арвыстой уыдонӕн зӕгъынмӕ: «Ӕфсымӕртӕ, кӕд уӕм адӕмӕн зондамонӕн ныхас ис, уӕд ӕй зӕгъут». 16 Павел сыстад ӕмӕ, къухӕй бацамонгӕйӕ, загъта: «Байхъусут, израилӕгтӕ, стӕй Хуыцауӕй чи тӕрсы, уыдон дӕр! 17 Ацы адӕмы Хуыцау, Израилы Хуыцау, сӕвзӕрста нӕ фыдӕлты. Израилӕгтӕ-ма Мысыры ӕцӕгӕлӕттӕй куы цардысты, уӕд сӕ скодта стыр адӕм, стӕй сӕ уырдыгӕй рахуыдта Йӕ домбай къухӕй. 18 Дыууиссӕдз азы бӕрц сын фӕлӕвӕрдта хойраг ӕдзӕрӕг бӕстӕйы. 19 Ӕмӕ Ханааны бӕстӕйы авд адӕмыхатты куы фӕцагъта, уӕд сын сӕ зӕхх радта израилӕгтӕн. 20 Ӕппӕт уыдӕттӕ ӕрцыдысты иу цыппарсӕдӕ фӕндзай азмӕ. Уый фӕстӕ сын, Самуил-пехуымпары заманы онг, Хуыцау лӕвӕрдта тӕрхонгӕнджытӕ. 21 Фӕстӕдӕр уыдон сӕхицӕн куырдтой паддзах, ӕмӕ сын Хуыцау Вениамины хӕдзарвӕндагӕй радта Кисы фырт Саулы. Уый паддзахиуӕг кодта дыууиссӕдз азы. 22 Стӕй йӕ Хуыцау раппӕрста ӕмӕ сын паддзахӕй сӕвӕрдта Давиды. Хуыцау Йӕхӕдӕг Давиды тыххӕй загъта: „Ӕз ссардтон, Мӕ зӕрдӕмӕ чи цӕуы, Мӕн цыдӕриддӕр фӕнды, уый чи бакӕндзӕн, ахӕм лӕджы – Иессейы фырт Давиды". 23 Хуыцау зӕрдӕ куыд бавӕрдта, афтӕ Давиды байзӕддагӕй Израилӕн радта Ирвӕзынгӕнӕг Йесойы. 24 Йесойы ӕрцыды хӕдразмӕ Иоанн ӕппӕт израилаг адӕммӕ сидтис тӕригъӕдтыл ӕрфӕсмон кӕнынмӕ ӕмӕ аргъуыд райсынмӕ. 25 Иоанн йӕ куыст куы фӕци, уӕд загъта: „Кӕуыл мӕ нымайут? Нӕ, ӕз уый нӕ дӕн. Фӕлӕ мӕнӕ мӕ фӕстӕ ӕрцӕуы, ӕз Кӕй дзабыры бос райхалыны аккаг нӕ дӕн, Уый". 26 Ӕфсымӕртӕ, Авраамы байзӕддӕгтӕ, стӕй сымах, Хуыцауӕй чи тӕрсы, уыдон! Фервӕзыныл дзурӕг ацы уац махӕн ӕрвыст у. 27 Иерусалимы цӕрджытӕ ӕмӕ сӕ хицӕуттӕ Йесойы нӕ базыдтой, ӕмӕ нӕ бамбӕрстой, алы сабат дӕр кӕй фӕкастӕуы, пехуымпарты уыцы ныхӕстӕ. Ӕмӕ сӕ сӕххӕст кодтой мӕлӕты тӕрхон Ын рахӕссынӕй. 28 Амарыны аккаг азым Ӕм не ссардтой, фӕлӕ уӕддӕр Пилатӕй куырдтой Йӕ амарын. 29 Йесойы тыххӕй фыст цы уыд, ӕппӕт уыдӕттӕ куы сӕххӕст кодтой, уӕд Ӕй ӕристой дзуарӕй ӕмӕ Йӕ бавӕрдтой зӕппадзы. 30 Фӕлӕ Йӕ Хуыцау мӕрдтӕй райгас кодта. 31 Бирӕ бонты дӕргъы Йесо Йӕхи ӕвдыста Галилейӕ Иерусалиммӕ Йемӕ ӕрцӕуджытӕн. Ныр уыдон Йесойы тыххӕй ӕвдисӕн лӕууынц нӕ адӕмӕн. 32 Ӕмӕ уын мах ӕрхастам уыцы фарны уац: Хуыцау фыдӕлтӕн ныфс цӕмӕй бавӕрдта, уый радта махӕн, сӕ цотӕн, – Йесойы райгас кодта мӕрдтӕй, 33 Дыккаг псаломы куыд фыст у, афтӕ: „Ды Мӕ Фырт дӕ, Ды Мын абон райгуырдтӕ". 34 Хуыцау Ӕй мӕрдтӕй кӕй райгас кодта, ӕмӕ Йын бамбийӕн кӕй нал уыдзӕн, уый тыххӕй та Хуыцау афтӕ загъта: „Ӕз уыл бафтаудзынӕн, Давидӕн зӕрдӕ цӕмӕй бавӕрдтон ӕмӕ кӕй нӕ аивдӕуыдзӕн, уыцы арфӕтӕ". 35 Уымӕ гӕсгӕ иннӕ ран загъд у: „Дӕ сыгъдӕджы нӕ бамбийын кӕндзынӕ ингӕны". 36 Фӕлӕ Хуыцау цы снысан кодта, Давид йӕ заманы уый куы сарӕзта, уӕд амард, ныгӕд ӕрцыд йӕ фыдӕлтимӕ ӕмӕ бамбыд. 37 Хуыцау Кӕй райгас кодта, Уый та нӕ бамбыд. 38 Уӕдӕ зонут, ӕфсымӕртӕ: Йесойы фӕрцы сымахӕн хъуыстгонд цӕуы уац тӕригъӕдтӕ ныббарыны, 39 Стӕй Моисейы Ӕгъдауы руаджы цӕмӕй не сраст уыдаиккат, ӕппӕт уыдӕттӕ ныххатыр кӕныны тыххӕй. Йесойы руаджы растгонд цӕуы алы уырнӕг дӕр. 40 Уӕдӕ уӕхи хизут, цӕмӕй уыл ма ӕрцӕуа пехуымпары ныхас: 41 „Кӕсут-ма, ӕнӕрвӕссонтӕ! Бадис кӕнут ӕмӕ фӕтары ут, уымӕн ӕмӕ уӕ заманы Ӕз сараздзынӕн ахӕм хъуыддаг, ӕмӕ уын ӕй исчи куы загътаид, уӕд уӕ нӕ бауырныдтаид"». 42 Павел ӕмӕ Варнавӕ синагогӕйӕ куы рацӕйцыдысты, уӕд сӕм хатыдысты, цӕмӕй уыдӕтты тыххӕй дзурой иннӕ сабаты дӕр. 43 Ӕмбырд куы рахӕлиу, уӕд дзӕвгар иудейтӕ, муртаттӕй иудейаг диныл чи ныххӕцыд, уыдонӕй дӕр бирӕтӕ, ацыдысты Павел ӕмӕ Варнавӕйы фӕдыл. Павел ӕмӕ Варнавӕ ныхас кодтой семӕ ӕмӕ сӕм хатыдысты Хуыцауы хорзӕхыл фидар хӕцыны тыххӕй. 44 Иннӕ сабаты ӕгас сахар, искуы иуӕй фӕстӕмӕ, ӕрӕмбырд Хуыцауы ныхас хъусынмӕ. 45 Иудейтӕ та уыйбӕрц адӕм куы федтой, уӕд фырхӕлӕгӕй фӕцӕйтыдтой, дзырдтой Павелы ныхӕсты ныхмӕ ӕмӕ йӕ ӕлгъыстой. 46 Уӕд Павел ӕмӕ Варнавӕ ныфсджынӕй загътой: «Хуыцауы ныхас фыццаг сымахӕн хъуамӕ загъдӕуыдаид. Фӕлӕ йыл кӕй не 'рвӕссут ӕмӕ мыггагмӕйы царды аккагыл уӕхи кӕй нӕ нымайут, уымӕ гӕсгӕ цӕуӕм муртаттӕм. 47 Уымӕн ӕмӕ нын Хицау афтӕ бафӕдзӕхста: „Ӕз Дӕ радтон муртаттӕн рухсӕн, цӕмӕй ӕгас дуне фервӕза Дӕ фӕрцы"». 48 Уыцы ныхӕстӕ муртаттӕн ӕрхастой цин, кад кодтой Хицауы ныхасӕн, ӕмӕ Хуыцау мыггагмӕйы цардӕн кӕй сӕвзӕрста, уыдон иууылдӕр баууӕндыдысты. 49 Афтӕ Хицауы ныхас хӕлиу кодта ӕппӕт бӕстӕйыл. 50 Фӕлӕ иудейтӕ сардыдтой дингӕнӕг уӕздан сылгоймӕгты, стӕй сахары хицӕутты; Павел ӕмӕ Варнавӕйы фӕдыл райдыдтой зилын, ӕмӕ сӕ фӕтардтой уырдыгӕй. 51 Павел ӕмӕ Варнавӕ ацагътой сӕ къӕхты рыг ӕмӕ ацыдысты Иконимӕ. 52 Ахуыргӕнинӕгтӕ та уыдысты зӕрдӕрухс ӕмӕ Сыгъдӕг Удӕй хайджын.

Апостолты хъуыддӕгтӕ 14

1 Павел ӕмӕ Варнавӕ Иконийы дӕр бацыдысты иудейаг синагогӕмӕ, амыдтой афтӕ, ӕмӕ иудейтӕй ӕмӕ бердзентӕй тынг бирӕ баууӕндыд Йесойыл. 2 Хуыцауы ныхасӕн чи нӕ басаст, уыцы иудейтӕ та сызмӕстой муртатты ӕмӕ сӕ сардыдтой ӕфсымӕрты ныхмӕ. 3 Павел ӕмӕ Варнавӕ уым фесты бирӕ рӕстӕг; ныфсджынӕй дзырдтой Хицауы тыххӕй, ӕмӕ Йӕ хорзӕхы тыххӕй раст кӕй дзырдӕуыд, уый апостолты фӕрцы Хицау ӕвдыста ӕвдисӕйнӕгтӕй ӕмӕ диссӕгтӕй. 4 Адӕм сахары фӕдих сты: иутӕ иудейты фарс уыдысты, иннӕтӕ та – апостолты. 5 Муртаттӕ ӕмӕ иудейтӕ сӕ хистӕртимӕ скодтой апостолты бафхӕрыны ӕмӕ сӕ дуртӕй амарыны фӕнд. 6 Павел ӕмӕ Варнавӕ уый куы базыдтой, уӕд ацыдысты ликаониаг сахартӕ Листрӕ ӕмӕ Дервимӕ, стӕй сӕ алфамбылайтӕм. 7 Ам дӕр хъусын кодтой фарны уац. 8 Листрӕйы царди, йӕ къӕхтӕ сахъат кӕмӕн уыдысты, иу ахӕм лӕг; ӕдзух бадти, цӕуынхъом никуы уыд, уымӕн ӕмӕ мады гуыбынӕй афтӕ рахаста. 9 Павел куы дзырдта, уӕд ӕм хъуыста. Павел ӕм ӕдзынӕг ныккаст ӕмӕ федта: уыцы лӕгмӕ ис, кӕй фӕрцы сдзӕбӕх уа, ахӕм уырнындзинад. 10 Уӕд ын Павел хъӕрӕй загъта: «Слӕуу дӕ къӕхтыл». Уый уайтӕккӕ фӕгӕпп ласта ӕмӕ райдыдта цӕуын. 11 Павел цы бакодта, уый адӕм куы федтой, уӕд ликаониагау райдыдтой хъӕр кӕнын: «Адӕймаджы хуызы нӕм хуыцӕуттӕ ӕрцыдысты!» 12 Ӕмӕ Варнавӕйы хуыдтой Зевс, Павелы та – Гермес уымӕн ӕмӕ ныхас фылдӕр уый кодта. 13 Сахары кулдуары размӕ Зевсӕн цы кувӕндон уыд, уый дзуарылӕг та кулдуары цурмӕ ӕрбатардта галтӕ, ӕрхаста дидинӕгбыдтӕ, ӕмӕ йӕ зӕрды уыд адӕмимӕ нывонд ӕрхӕссын. 14 Фӕлӕ апостолтӕ Варнавӕ ӕмӕ Павел уый куы фехъуыстой, уӕд арӕмыгътой сӕ пӕлӕзтӕ, сӕхи баппӕрстой адӕммӕ ӕмӕ хъӕлӕсыдзагӕй дзырдтой: 15 «Адӕм, уый цы ми кӕнут? Мах дӕр сымах хуызӕн адӕймӕгтӕ стӕм. Хъусын уын кӕнӕм фарны уац, цӕмӕй сымах уӕ мӕнгхуыцӕуттӕй раздӕхат цардӕгас Хуыцаумӕ – арв, зӕхх, денджыз ӕмӕ сӕ цыдӕриддӕр ис, уыдоны Сфӕлдисӕгмӕ. 16 Хуыцау рагзаманы адӕмтӕн лӕвӕрдта, сӕхи куыд фӕнды, афтӕ цӕрыны бар. 17 Уӕддӕр Йӕ хорз хъуыддӕгтӕй иудадзыг ӕвдыста Йӕхи: арвӕй уын ӕрвиты къӕвда ӕмӕ йӕ афоныл дӕтты зӕххы бӕркад; хӕссы уӕ хойрагӕй ӕмӕ уын уӕ зӕрдӕтӕ ӕфсады цинӕй». 18 Уыцы ныхӕсты фӕрцы дӕр зынтӕй баурӕдтой адӕмы уыдонӕн нывонд ӕрхӕссынӕй. 19 Уӕд Антиохи ӕмӕ Иконийӕ ӕрцыдысты иудейтӕ ӕмӕ адӕмы сардыдтой апостолты ныхмӕ. Павелыл ралӕууыдысты дурадзагъдӕй, ӕнхъӕл уыдысты амарди, зӕгъгӕ, ӕмӕ йӕ сыфцӕй ласӕгау аластой фӕссахармӕ. 20 Фӕлӕ йыл ахуыргӕнинӕгтӕ куы ӕрӕмбырд сты, уӕд Павел сыстад ӕмӕ баздӕхт сахармӕ. Дыккаг бон Варнавӕимӕ араст Дервимӕ. 21 Уыцы сахармӕ ӕрхастой фарны уац ӕмӕ бирӕты скодтой ахуыргӕнинӕгтӕ. Уый фӕстӕ ӕрбаздӕхтысты Листрӕмӕ, уырдыгӕй та – Иконимӕ ӕмӕ Антиохимӕ. 22 Алы ран дӕр ныфс бауагътой ахуыргӕнинӕгты, фӕдзӕхстой сын, цӕмӕй уырнындзинадыл фидар хӕцой, ӕмӕ сын дзырдтой, Хуыцауы Паддзахадмӕ бацӕуыны сӕраппонд мах бирӕ зынтӕ бавзарын хъӕуы, зӕгъгӕ. 23 Алы аргъуаны дӕр сӕвӕрдтой хистӕртӕ, сӕ къухтӕ сыл ӕрӕвӕргӕйӕ. Ком даргӕйӕ фӕкуывтой ӕмӕ сӕ бафӕдзӕхстой, Кӕуыл баууӕндыдысты, уыцы Хицауыл. 24 Апостолтӕ ахызтысты Писидийыл ӕмӕ ӕрцыдысты Памфилимӕ. 25 Пергийы фӕцамыдтой Хуыцауы ныхас, стӕй ӕрцыдысты Атталимӕ. 26 Уырдыгӕй денджызыл сӕ фӕндаг адардтой Антиохимӕ – ныр цы хъуыддаг ахицӕн кодтой, уый аразынмӕ сӕ Хуыцауы хорзӕхыл бафӕдзӕхсгӕйӕ кӕцӕй рарвыстой, уырдӕм. 27 Куы бахӕццӕ сты, уӕд ӕрӕмбырд кодтой аргъуаны уӕнгты ӕмӕ радзырдтой, Хуыцау сӕ фӕрцы цыдӕриддӕр сарӕзта, муртаттӕн уырнындзинады дуар куыд байгом кодта, уый тыххӕй. 28 Павел ӕмӕ Варнавӕ уым дзӕвгар рӕстӕг арвыстой ахуыргӕнинӕгтимӕ.

Апостолты хъуыддӕгтӕ 15

1 Иудейӕйӕ ӕрцыди чидӕртӕ ӕмӕ ӕфсымӕртӕн райдыдтой амонын: «Моисейы Ӕгъдаумӕ гӕсгӕ сунӕт куы нӕ скӕнат, уӕд нӕ фервӕздзыстут». 2 Павел ӕмӕ Варнавӕ семӕ не сразы сты ӕмӕ сӕм рауад стыр быцӕу. Уӕд бауынаффӕ кодтой, цӕмӕй Павел, Варнавӕ ӕмӕ иннӕ ӕфсымӕртӕй цалдӕр ацы хъуыддаджы фӕдыл ацӕуой апостолтӕм ӕмӕ аргъуаны хистӕртӕм Иерусалиммӕ. 3 Аргъуан сӕ срӕвдз кодта фӕндагмӕ, ӕмӕ ацыдысты Финикийыл ӕмӕ Самарийыл. Сӕ фӕндагыл дзырдтой, муртаттӕ кӕй цӕуынц Хуыцаумӕ, ӕмӕ уымӕй ӕппӕт ӕфсымӕртӕн дӕр хастой стыр цин. 4 Иерусалиммӕ куы ӕрхӕццӕ сты, уӕд сыл ӕхсызгонӕй сӕмбӕлдысты аргъуан, апостолтӕ ӕмӕ хистӕртӕ. Павел ӕмӕ сын Варнавӕ радзырдтой, Хуыцау сӕ фӕрцы цыдӕриддӕр сарӕзта, уыдӕтты тыххӕй. 5 Фӕлӕ сыстадысты Йесойыл баууӕндӕг фарисейтӕй чидӕртӕ, ӕмӕ дзырдтой, зӕгъгӕ, муртаттӕ хъуамӕ кӕной сунӕт ӕмӕ сын хъӕуы бафӕдзӕхсын Моисейы Ӕгъдауыл хӕцын. 6 Апостолтӕ ӕмӕ аргъуаны хистӕртӕ ӕрӕмбырд сты уыцы хъуыддаг равзарынмӕ. 7 Дзӕвгар ыл куы фӕбыцӕу кодтой, уӕд сыстад Петр ӕмӕ загъта: «Ӕфсымӕртӕ, сымах зонут, фыццаг бонтӕй фӕстӕмӕ Хуыцау сымахӕй мӕн сӕвзӕрста, цӕмӕй муртаттӕ мӕ дзыхӕй фехъусой фарны уац ӕмӕ баууӕндой. 8 Ӕмӕ Зӕрдӕзонӕг Хуыцау муртаттыл кӕй ауды, уый равдыста, махӕн Ӕй куыд радта, афтӕ уыдонӕн дӕр Сыгъдӕг Уд раттынӕй. 9 Хуыцау махмӕ дӕр ӕмӕ уыдонмӕ дӕр иу цӕстӕй кӕсы, уымӕн ӕмӕ сын уырнындзинадӕй ссыгъдӕг кодта сӕ зӕрдӕтӕ. 10 Ныр Хуыцауы цӕмӕн къахут? Нӕдӕр нӕ фыдӕлтӕ, нӕдӕр мах кӕй нӕ бафӕрӕзтам хӕссын, уыцы ӕфсондз ахуыргӕнинӕгты бӕрзӕйыл цӕмӕн ӕвӕрут? 11 Мах куы ӕууӕндӕм, мах дӕр ӕмӕ уыдон дӕр кӕй фервӕздзыстӕм ӕрмӕст Хицау Йесойы хорзӕхы руаджы». 12 Уӕд сеппӕт дӕр ныхъхъус сты, ӕмӕ хъуыстой Варнавӕ ӕмӕ Павелмӕ. Уыдон дзырдтой, Хуыцау сӕ фӕрцы муртаттӕм цы ӕвдисӕйнӕгтӕ ӕмӕ диссӕгтӕ сарӕзта, уый тыххӕй. 13 Сӕ ныхас куы фесты, уӕд райдыдта дзурын Иаков: «Ӕфсымӕртӕ, байхъусут мӕм. 14 Симон радзырдта, зӕгъгӕ, Хуыцау фыццаг хатт муртаттӕм ӕркаст, цӕмӕй дзы Йӕхицӕн сӕвзара адӕм. 15 Афтӕ амонынц пехуымпарты ныхӕстӕ дӕр. Фыст у: 16 „Уый фӕстӕ Ӕз раздӕхдзынӕн ӕмӕ сараздзынӕн Давиды хӕлд цатыр, йӕ хӕлддзӕгтӕ йын ӕрӕвӕрдзынӕн сӕ бынӕтты ӕмӕ йӕ сног кӕндзынӕн. 17 Цӕмӕй Хицаумӕ тырной иннӕ адӕм, Мӕ ном чи хӕссы, уыцы адӕмтӕ иууылдӕр. Афтӕ зӕгъы Хицау, 18 Ӕппӕт уыдӕттӕ тӕккӕ райдианӕй Чи ӕргом кӕны, Уый". 19 Уымӕ гӕсгӕ мӕ хъуыды у: муртаттӕй Хуыцаумӕ чи здӕхы, уыдоныл уӕлдай уаргъ ма ӕвӕрӕм. 20 Фӕлӕ сӕм ныффыссӕм, ӕмӕ сӕхи бахизӕнт, мӕнгхуыцӕуттӕн нывондӕн ӕрхӕссынӕй цы фелгъаг, уый хӕрынӕй, хӕтынӕй, хӕдмӕл ӕмӕ туг хӕрынӕй [ӕмӕ сӕ сӕхицӕн цы нӕ фӕнды, уый ма кӕнӕнт иннӕтӕн]. 21 Моисейы Ӕгъдау рагӕй-ӕрӕгмӕ алы сахары дӕр куы амонынц ӕмӕ йӕ синагогӕты алы сабат дӕр куы кӕсынц». 22 Уӕд апостолтӕ ӕмӕ хистӕртӕ ӕппӕт аргъуанимӕ сфӕнд кодтой аргъуанӕй цалдӕр лӕджы сӕвзарын ӕмӕ сӕ Павелимӕ ӕмӕ Варнавӕимӕ Антиохимӕ арвитын. Ӕмӕ сӕвзӕрстой, Варсава дӕр ма кӕй хуыдтой, уыцы Иудӕйы, ӕмӕ Силӕйы – ӕфсымӕрты ӕхсӕн дзырддзӕугӕты. 23 Ныффыстой ӕмӕ сын семӕ арвыстой ахӕм фыстӕг: «Апостолтӕй ӕмӕ аргъуаны хистӕртӕй, уе 'фсымӕртӕй – Антиохийы, Сирийы ӕмӕ Киликийы муртаттӕй Хуыцаумӕ чи ӕрцыд, уыцы ӕфсымӕртӕм. Фӕрнджын ут. 24 Ӕрбайхъуысти нӕм, махӕй чи ацыд, уыдонӕй уӕ чидӕртӕ сӕ ныхӕстӕй фӕкъуыхцы кодтой ӕмӕ уын змӕнтынц уӕ зонд [сымах хъуамӕ кӕнат сунӕт ӕмӕ хӕцат Моисейы Ӕгъдауыл, зӕгъгӕ]. Фӕлӕ сын мах ахӕмӕй ницы бафӕдзӕхстам. 25 Уымӕ гӕсгӕ ӕмзӕрдӕйӕ бауынаффӕ кодтам цалдӕр лӕджы сӕвзарын ӕмӕ уӕм сӕ нӕ уарзон ӕфсымӕртӕ Варнавӕимӕ ӕмӕ Павелимӕ арвитын – 26 Уыцы дыууӕ сӕ цард снывонд кодтой нӕ Хицау Йесо Чырыстийы номы сӕраппонд. 27 Уӕдӕ уӕм ӕрвитӕм Иудӕ ӕмӕ Силӕйы – уыдон уын лӕгӕй-лӕгмӕ ноджыдӕр радзурдзысты, мах уӕм цы ныффыстам, уый. 28 Сыгъдӕг Уд ӕмӕ мах алыг кодтам сымахыл ӕндӕр уаргъ нал ӕвӕрын, мӕнӕ ацы ахсджиагдӕртӕй фӕстӕмӕ: 29 Мӕнгхуыцӕуттӕн хаст нывондтӕ, туг ӕмӕ хӕдмӕл хӕрынӕй, стӕй хӕтынӕй хи бахизын [ӕмӕ уӕ уӕхицӕн цы нӕ фӕнды, уый иннӕтӕн нӕ кӕнын]. Уыдӕттӕй уӕхи куы хизат, уӕд раст бакӕндзыстут. Хӕрзбон». 30 Ӕрвыст ӕфсымӕртӕ ӕрцыдысты Антиохимӕ, ӕрӕмбырд кодтой уырнджыты ӕмӕ сӕм радтой фыстӕг. 31 Уыдон фыстӕг куы бакастысты, уӕд бацин кодтой – ацы хабар сӕ барӕвдыдта. 32 Иудӕ ӕмӕ Силӕ сӕхӕдӕг пехуымпартӕ уыдысты, бирӕ фӕныхас кодтой ӕфсымӕртимӕ, бауагътой сӕ ныфс ӕмӕ сын бафтыдтой сӕ уырнындзинадыл. 33 Уым фесты иуцасдӕр, стӕй сӕ ӕфсымӕртӕ фарнимӕ афӕндараст кодтой сӕ рарвитджытӕм. 34 [Фӕлӕ Силӕйы бафӕндыд уым баззайын.] 35 Павел ӕмӕ Варнавӕ та баззадысты Антиохийы, бирӕ ӕндӕртимӕ амыдтой адӕмӕн ӕмӕ хъусын кодтой Хицауы ныхас. 36 Цасдӕр рӕстӕджы фӕстӕ Павел загъта Варнавӕйӕн: «Ацӕуӕм ӕмӕ, Хицауы ныхас кӕдӕм ӕрхастам, ӕппӕт уыцы сахарты бабӕрӕг кӕнӕм не 'фсымӕрты, сӕ цард сын фенӕм». 37 Варнавӕйы фӕндыд, Марк дӕр ма кӕй хуыдтой, уыцы Иоанны йемӕ акӕнын. 38 Фӕлӕ Павел разы нӕ уыд, Памфилийы сӕ чи ныууагъта ӕмӕ семӕ кусын кӕй нӕ бафӕндыд, уыцы лӕджы акӕныныл. 39 Павелы ӕмӕ Варнавӕйы ӕхсӕн ахӕм быцӕу рауад, ӕмӕ фӕхицӕн сты. Варнавӕ Маркы акодта йемӕ ӕмӕ науыл ацыд Кипрмӕ. 40 Павел та ӕмбӕлццонӕн сӕвзӕрста Силӕйы, ӕфсымӕртӕ йӕ бафӕдзӕхстой Хицауы хорзӕхыл, ӕмӕ араст. 41 Павел цыди Сирийыл ӕмӕ Киликийыл, ӕмӕ йӕ фӕндагыл фидар кодта аргъуантӕ.

Апостолты хъуыддӕгтӕ 16

1 Павел бахӕццӕ Дервимӕ ӕмӕ Листрӕмӕ. Уым царди иу ахуыргӕнинаг, йӕ ном – Тимофей. Йӕ мад уыди Йесойыл баууӕндӕг иудей, йӕ фыд та – бердзенаг. 2 Листрӕйы ӕмӕ Иконийы Тимофейӕ тынг ӕппӕлыдысты ӕфсымӕртӕ. 3 Павелы бафӕндыд Тимофейы йемӕ акӕнын. Уым цы иудейтӕ царди, уыдоны тыххӕй Тимофейӕн скодта сунӕт, уымӕн ӕмӕ сеппӕт дӕр зыдтой, йӕ фыд бердзенаг кӕй уыд, уый. 4 Уыдон цыдысты иу сахарӕй иннӕмӕ ӕмӕ уырнджытӕн сӕххӕст кӕнынмӕ лӕвӕрдтой, апостолтӕ ӕмӕ аргъуаны хистӕртӕ Иерусалимы кӕй рахастой, уыцы уынаффӕтӕ. 5 Ӕмӕ фидар кодта аргъуанты уырнындзинад, ӕрвылбон ӕфтыд уырнджыты нымӕцыл. 6 Ахызтысты Фригийыл ӕмӕ Галатийы бӕстӕйыл, уымӕн ӕмӕ сӕ Сыгъдӕг Уд нӕ бауагъта Хуыцауы ныхас Асийы амонынмӕ. 7 Мисийы арӕнмӕ куы бахӕццӕ сты, уӕд архайдтой Вифинимӕ ацӕуыныл, фӕлӕ сӕ Йесойы Уд нӕ бауагъта уырдӕм. 8 Уӕд ахызтысты Мисийыл ӕмӕ ӕрцыдысты Троадӕмӕ. 9 Ӕмӕ Павел уыцы ӕхсӕв йӕ цӕстылуайӕны федта: йӕ разы ӕрлӕууыд иу македониаг лӕг ӕмӕ йӕм хатыд: «Ӕрцу Македонимӕ ӕмӕ нын баххуыс кӕн». 10 Павелы цӕстылуайӕны хӕдуӕлвӕд нӕхи ӕрцӕттӕ кодтам Македонимӕ цӕуынмӕ – бамбӕрстам, Хуыцау нӕ уырдӕм фарны уац фӕхӕссынмӕ кӕй ӕрхуыдта, уый. 11 Араст стӕм Троадӕйӕ ӕмӕ ӕмраст бацыдыстӕм Самофракимӕ, уырдыгӕй дыккаг бон – Неаполмӕ, 12 Неаполӕй та – ромаг колони Филипптӕм, Македонийы уыцы хайы сӕйраг сахармӕ. Фестӕм дзы цалдӕр боны, 13 Сабаты та ацыдыстӕм фӕссахармӕ, цӕугӕдоны цурмӕ, мах куыд ӕнхъӕл уыдыстӕм, афтӕмӕй кувӕн бынат кӕм уыд, уырдӕм. Ӕрбадтыстӕм ӕмӕ ныхас кодтам, чи ӕрӕмбырд, уыцы сылгоймӕгтимӕ. 14 Ӕмӕ Фиатирӕйы сахарӕй Хуыцауы нымайӕг сылгоймаг, йӕ ном – Лидиа, сӕнтсырх хъуымац уӕйгӕнӕг, хъуыста ныхасмӕ. Хицау ын байгом кодта йӕ зӕрдӕ, Павел цы дзырдта, уыцы ныхӕстӕн. 15 Йӕхиуыл дӕр ӕмӕ йын йӕ хӕдзаронтыл дӕр куы саргъуыдӕуыд, уӕд нӕм ӕрхатыд: «Хицауыл мӕ иузӕрдионыл кӕд банымадтат, уӕд рацӕут мӕ хӕдзармӕ ӕмӕ цӕрут мӕнмӕ». Ӕмӕ нӕ сразы кодта. 16 Иухатт кувӕн бынатмӕ куы фӕцӕйцыдыстӕм, уӕд ныл сӕмбӕлди, дӕсныфӕрсыныл ардауӕг ӕнӕзӕгъинаг кӕй ӕрцахста, ахӕм лӕггадгӕнӕг чызг. Дӕсныфӕрсынӕй йӕ хицӕуттӕн хаста стыр ӕфтиаг. 17 Павелимӕ-иу куы цыдыстӕм, уӕд-иу нӕ фӕдыл бафтыд ӕмӕ хъӕр кодта: «Ацы лӕгтӕ Дунедарӕг Хуыцауы цагъартӕ сты; фервӕзӕн цы амалӕй ис, уыдон уын уый тыххӕй дзурынц». 18 Афтӕ кодта бирӕ бонты дӕргъы. Павел, ӕппынфӕстаг, смӕсты, акаст фӕстӕмӕ ӕмӕ ӕнӕзӕгъинагӕн загъта: «Йесо Чырыстийы номӕй дын дӕттын бардзырд: рацу дзы». Ӕмӕ дзы уайтӕккӕ рацыд. 19 Се 'фтиагыл зӕрдӕ дарӕн кӕй нал ис, уый чызджы хицӕуттӕ куы федтой, уӕд ӕрцахстой Павел ӕмӕ Силӕйы, ӕмӕ сӕ лӕгдыхӕй акодтой сӕйраг фӕзмӕ сахары сӕргълӕуджытӕм. 20 Бакодтой сӕ сахары хицӕуттӕм ӕмӕ загътой: «Ацы лӕгтӕ иудейтӕ сты ӕмӕ змӕнтынц нӕ сахар. 21 Хӕлиу кӕнынц, махӕн, ромӕгтӕн, барвӕссинаг чи нӕу ӕмӕ нын ӕххӕст кӕнын кӕй не 'мбӕлы, ахӕм ӕгъдӕуттӕ». 22 Павелы ӕмӕ Силӕйы ныхмӕ ӕрӕмбырд бирӕ адӕм. Уӕд сахары хицӕуттӕ радтой бардзырд, цӕмӕй дыууӕйӕн дӕр сӕ дарӕс сӕ уӕлӕйӕ ӕррӕмудзой ӕмӕ сӕ лӕдзджытӕй фӕнӕмой. 23 Дзӕбӕх сӕ куы фӕнадтой, уӕд сӕ баппӕрстой ахӕстоны, ӕмӕ хъахъхъӕнӕгӕн бафӕдзӕхстой къӕрцхъусӕй сӕ хъахъхъӕнын. 24 Ахӕм бардзырд куы райста, уӕд сӕ баппӕрста ахӕстоны рӕбинаг хаймӕ ӕмӕ сын сӕ къӕхтыл бакодта хъадамантӕ. 25 Ӕмбисӕхсӕвмӕ хӕстӕг Павел ӕмӕ Силӕ куывтой, зарыдысты Хуыцауы кадӕн, ахӕстытӕ та сӕм хъуыстой. 26 Ӕваст зӕхх афтӕ тыхджын нынкъуысыд, ӕмӕ ахӕстон нызмӕлыд йӕ бындурмӕ. Уайтӕккӕ байгом сты ахӕстоны ӕппӕт дуӕрттӕ, ӕмӕ ахӕстытӕ иууылдӕр сӕ рӕхыстӕй суӕгъд сты. 27 Ахӕстоны хъахъхъӕнӕг куы райхъал ӕмӕ дуӕрттӕ гомӕй куы федта, уӕд фелвӕста йӕ кард ӕмӕ хъавыд йӕхи амарынмӕ; ӕнхъӕл уыд, ӕмӕ ахӕстытӕ алыгъдысты. 28 Фӕлӕ Павел ныхъхъӕр кодта: «Дӕхицӕн знаггад ма ракӕн! Мах неппӕт дӕр ам стӕм!» 29 Уӕд хъахъхъӕнӕг ӕрбахӕссын кодта цырагъ, базгъордта Павелмӕ ӕмӕ Силӕмӕ, ӕмӕ, тӕрсгӕ-ризгӕйӕ, йӕхи ӕрӕппӕрста сӕ къӕхтӕм. 30 Стӕй сӕ рахуыдта ӕддӕмӕ ӕмӕ сӕ бафарста: «Ме 'лдӕрттӕ, фервӕзынӕн мын цы гӕнгӕ у?» 31 Уыдон ын загътой: «Баууӕнд Хицау Йесойыл, ӕмӕ фервӕздзынӕ дӕхӕдӕг дӕр ӕмӕ дӕ хӕдзаронтӕ дӕр». 32 Хъахъхъӕнӕгӕн ӕмӕ йеппӕт хӕдзаронтӕн Павел ӕмӕ Силӕ фӕцамыдтой Хицауы ныхас. 33 Хъахъхъӕнӕг сӕ ӕхсӕвы тӕккӕ уыцы сахатыл ракодта, цӕхсадта сын сӕ хъӕдгӕмттӕ, ӕмӕ ӕвӕстиатӕй аргъуыд райста йӕхӕдӕг дӕр ӕмӕ йеппӕт хӕдзаронтӕ дӕр. 34 Павел ӕмӕ Силӕйы бахуыдта йӕ хӕдзармӕ, фынг сын ӕрӕвӕрдта, ӕмӕ цин кодта йеппӕт хӕдзаронтимӕ, Хуыцауыл кӕй баууӕндыдысты, уый тыххӕй. 35 Куы сбон, уӕд сахары хицӕуттӕ се 'ххуысгӕнджыты арвыстой ахӕстонмӕ зӕгъынмӕ: «Рауадз уыцы лӕгты». 36 Хъахъхъӕнӕг уыцы ныхӕстӕ фӕхӕццӕ кодта Павелмӕ: «Сахары хицӕуттӕ ӕрбарвыстой уӕ рауадзыны бардзырд. Уӕдӕ ныр ацӕут фарнимӕ». 37 Фӕлӕ Павел ӕрвыст лӕгтӕн загъта: «Мах, ромаг граждӕнты, ӕнӕ тӕрхонӕй куы надтой ӕппӕт адӕмы раз, ӕмӕ нӕ ахӕстоны куы баппӕрстой, уӕд нӕ ныр сусӕгӕй уадзынц? Уымӕн уӕвӕн нӕй. Ӕрцӕуӕнт ӕмӕ нӕ сӕхӕдӕг ракӕнӕнт ардыгӕй». 38 Ӕрвыстытӕ уыцы ныхӕстӕ фӕхӕццӕ кодтой сахары хицӕуттӕм. Ромаг граждӕнтӕ кӕй сты, уый куы фехъуыстой, уӕд старстысты, 39 Ӕрцыдысты сӕм ӕмӕ сӕ хатыр ракуырдтой. Рахуыдтой сӕ ахӕстонӕй ӕмӕ сӕм хатыдысты, цӕмӕй ацӕуой сахарӕй. 40 Павел ӕмӕ Силӕ ахӕстонӕй ӕрцыдысты Лидиайы хӕдзармӕ. Уым фембӕлдысты ӕфсымӕртимӕ, ныфс сӕ бауагътой ӕмӕ араст сты дарддӕр.

Апостолты хъуыддӕгтӕ 17

1 Павел ӕмӕ Силӕ ахызтысты Амфиполыл ӕмӕ Аполлонийыл, ӕрцыдысты Фессалоникӕмӕ. Ам уыди иудейаг синагогӕ. 2 Павел ацы хатт дӕр йӕ ахуыр нӕ фехӕлдта, бацыд синагогӕмӕ ӕмӕ ӕртӕ сабаты адӕмимӕ ныхас кодта. Сыгъдӕг Фыстӕй-иу сын ӕрхаста бынӕттӕ, 3 Ӕмбарын сын сӕ кодта ӕмӕ архайдта, цӕмӕй уыцы бынӕтты руаджы баууӕндой, Чырысти кӕй хъуамӕ фӕхъизӕмар кодтаид ӕмӕ райгас уыдаид, ууыл. Дзырдта сын, ӕз уын цы Йесойы тыххӕй хъусын кӕнын, Уый Чырысти у, зӕгъгӕ. 4 Уыдонӕй иуӕй-иутӕ баууӕндыдысты ӕмӕ баиу сты Павел ӕмӕ Силӕимӕ. Уыдонимӕ ма баууӕндыдысты, Хуыцауы чи нымадта, уыцы бердзентӕй тынг бирӕ, стӕй уӕздан сылгоймӕгтӕй дзӕвгар. 5 Уӕд иудейтӕ сӕ фырхӕлӕгӕй сахары уынгтӕй ӕрӕмбырд кодтой бирӕ цъаммар лӕгты ӕмӕ сызмӕстой ӕппӕт сахар. Балӕбурдтой Иасоны хӕдзармӕ ӕмӕ архайдтой Павел ӕмӕ Силӕйы адӕммӕ ракӕныныл. 6 Фӕлӕ сӕ куы нӕ ссардтой, уӕд Иасоны ӕмӕ ӕфсымӕртӕй цалдӕры лӕгдыхӕй акодтой сахары хицӕуттӕм ӕмӕ хъӕр систой: «Сызмӕстой ӕгас дуне, ныр та ардӕм ӕрцыдысты, 7 Ӕмӕ сӕ Иасон суазӕг кодта. Уыдон тох кӕнынц кесӕры уагӕвӕрдты ныхмӕ ӕмӕ паддзахыл нымайынц ӕндӕры – Йесойы». 8 Афтӕмӕй сызнӕт кодтой, чи сӕм хъуыста, уыцы адӕмы ӕмӕ сахары хицӕутты. 9 Хицӕуттӕ Иасонӕй ӕмӕ иннӕтӕй дӕр цъынды райстой ӕхца ӕмӕ сӕ рауагътой. 10 Ӕфсымӕртӕ Павел ӕмӕ Силӕйы ӕхсӕвы ӕвӕстиатӕй арвыстой Веримӕ. Уырдӕм куы бахӕццӕ сты, уӕд бацыдысты иудейаг синагогӕмӕ. 11 Вериӕгтӕ фессалоникӕгтӕй уӕздандӕр разындысты: Хуыцауы ныхасмӕ хъуыстой тынг зӕрдиагӕй; Павел ӕмӕ Силӕ раст амонынц ӕви нӕ, уый базоныны тыххӕй ӕрвылбон иртӕстой Сыгъдӕг Фыст. 12 Уыдонӕй баууӕндыдысты бирӕтӕ, стӕй ма бердзенаг уӕздан сылгоймӕгтӕй ӕмӕ нӕлгоймӕгтӕй дзӕвгар. 13 Павел Хуыцауы ныхас Верийы дӕр кӕй хъусын кӕны, уый фессалоникаг иудейтӕ куы базыдтой, уӕд ӕрцыдысты уырдӕм дӕр, райдыдтой адӕмы ардауын ӕмӕ сӕ знӕт кӕнын. 14 Уӕд ӕфсымӕртӕ Павелы ӕвӕстиатӕй арвыстой денджызмӕ; Силӕ ӕмӕ Тимофей та уым баззадысты. 15 Павелимӕ чи рацыд, уыдон ӕй бахӕццӕ кодтой Афинтӕм, ӕмӕ фӕстӕмӕ раздӕхтысты. Силӕ ӕмӕ Тимофейы тыххӕй сын Павел бафӕдзӕхста, гӕнӕн ӕмӕ амалӕй мӕм ӕвӕстиатӕй рацӕуӕнт, зӕгъгӕ. 16 Павел сӕм ӕнхъӕлмӕ каст Афинты ӕмӕ ӕнцой нӕ зыдта, уымӕн ӕмӕ уыдта, сахар гуымирытӕй йемыдзаг кӕй уыд, уый. 17 Павел синагогӕйы ныхас кодта иудейтимӕ ӕмӕ Хуыцауы нымайӕг бердзентимӕ, стӕй Павелыл ӕрвылбон сахары фӕзы чи ӕмбӕлд, уыдонимӕ. 18 Эпикурион ӕмӕ стоикон философтӕй иуӕй-иутӕ райдыдтой йемӕ быцӕу кӕнын. Сӕ иутӕ дзырдтой: «Цы зӕгъынмӕ хъавы уыцы дзӕгъӕлдзых?» Иннӕтӕ та: «Ӕнхъӕлдӕн, уый ӕцӕгӕлон хуыцӕуттыл ӕууӕндын кӕны». Уымӕн ӕмӕ сын Павел дзырдта фарны уац Йесойы тыххӕй ӕмӕ мӕрдтӕй райгасы тыххӕй. 19 Уыдон Павелы ахуыдтой Ареопагмӕ ӕмӕ йын дзырдтой: «Ды цы ног ахуырад амоныс, уый базонын нӕ бон нӕу? 20 Дӕуӕй цыдӕр ӕнахуыр диссаг хъусӕм, ӕмӕ цы у, уый базонын нӕ фӕнды». 21 Афинӕгтӕ ӕмӕ уым цӕрӕг фӕсарӕйнӕгтӕ сӕ рӕстӕг хуыздӕрӕн ӕрвыстой исты ног хабӕрттӕ дзурыныл кӕнӕ сӕм хъусыныл. 22 Павел сыстад Ареопагы ӕмӕ загъта: «Афинӕгтӕ, ӕз уынын, сымах динмӕ уӕлдай ӕмхиц кӕй стут, уый. 23 Ӕз зылдтӕн сахарыл ӕмӕ уын федтон уӕ кувӕндӕттӕ. Федтон иу нывондхӕссӕн, фыст ыл уыдис афтӕ: „Ӕнӕзонгӕ Хуыцауӕн". Уӕдӕ нӕ Йӕ зонгӕйӕ Кӕмӕ кувут, ӕз уын Уый тыххӕй дзурын. 24 Дуне, стӕй дунейы цы ис, ӕппӕт уыдӕттӕ цы Хуыцау сфӕлдыста, Уый у арв ӕмӕ зӕххы Хицау – лӕджыкъухӕйконд кувӕндӕтты нӕ цӕры. 25 Раст цыма хъуаг истӕмӕй ӕййафы, уыйау Ӕй лӕджы къухты фӕллой нӕ хъӕуы, уымӕн ӕмӕ алкӕмӕн дӕр цард, улӕфт ӕмӕ алцыппӕт Йӕхӕдӕг дӕтты. 26 Иу адӕймагӕй рауагъта ӕппӕт адӕмыхӕттытӕ ӕгас зӕххыл цӕрынӕн, ӕмӕ дзы алкӕмӕн дӕр снысан кодта цӕрыны рӕстӕг ӕмӕ бынат. 27 Цӕмӕй агурой Хуыцауы, кӕд Ӕй банкъариккой ӕмӕ Йӕ ссариккой, кӕд махӕй алкӕмӕ дӕр дард нӕу, уӕддӕр. 28 Йӕ фӕрцы цӕрӕм, змӕлӕм ӕмӕ стӕм, уӕ поэттӕй иуӕй-иутӕ куыд загътой, афтӕ: „Мах Йӕ хъӕбултӕ стӕм". 29 Ӕмӕ кӕд Хуыцауы хъӕбултӕ стӕм, уӕд хъуамӕ зонӕм, Хуыцау кӕй нӕу, адӕймаг йӕ арӕхстдзинады ӕмӕ йӕ зонды фӕрцы сызгъӕрин, ӕвзист ӕмӕ дурӕй цы фӕлгонцтӕ саразы, уыдоны хуызӕн. 30 Уӕдӕ Хуыцау нал кӕсы, куы нӕ Йӕ зыдтой, уыцы рӕстӕджытӕм; фӕлӕ ныртӕккӕ ӕппӕт адӕмӕй алы ран дӕр домы тӕригъӕдтыл фӕсмон. 31 Уымӕн ӕмӕ снысан кодта, Кӕй сӕвзӕрста, уыцы Адӕймаджы фӕрцы дунейӕн ӕнӕхӕрам тӕрхон хӕссыны бон. Афтӕ кӕй уыдзӕн, уый алкӕмӕн дӕр равдыста, мӕрдтӕй Йӕ кӕй райгас кодта, уымӕй». 32 Мӕрдты райгасы тыххӕй куы фехъуыстой, уӕд иутӕ худын райдыдтой, иннӕтӕ та дзырдтой: «Уый тыххӕй дӕм ӕндӕр хатт байхъусдзыстӕм». 33 Уӕд сӕ Павел ныууагъта. 34 Фӕлӕ дзы иуӕй-иутӕ баиу сты Павелимӕ ӕмӕ баууӕндыдысты; уыдонимӕ Ареопагы уӕнг Дионисий, Дамар чи хуынди, уыцы сылгоймаг, ӕмӕ иннӕтӕ.

Апостолты хъуыддӕгтӕ 18

1 Уый фӕстӕ Павел ныууагъта Афинтӕ ӕмӕ араст Коринфмӕ. 2 Уым сӕмбӕлди, йӕ ном Акилӕ кӕмӕн уыд, ахӕм цавӕрдӕр понтаг иудейыл йӕ ус Прискиллӕимӕ. Уыдон ӕрӕджы ӕрцыдысты Италийӕ, уымӕн ӕмӕ кесӕр Клавдий ӕппӕт иудейтӕн радта Ромӕй ацӕуыны бардзырд. Павел ӕрцыд уыдонмӕ, 3 Баззад сӕм ӕмӕ куыста семӕ, уымӕн ӕмӕ сӕм Павелимӕ иу дӕсныйад уыди – цатыртӕ аразын. 4 Алы сабат та ныхас кодта синагогӕйы, йӕхи хъардта иудейты ӕмӕ бердзенты баууӕндын кӕныныл. 5 Силӕ ӕмӕ Тимофей Македонийӕ куы ӕрцыдысты, уӕд Павел йӕхи снывонд кодта Хуыцауы ныхас амонынӕн – иудейты ӕууӕндын кодта, Йесо Чырысти кӕй у, ууыл. 6 Фӕлӕ уыдон йӕ ныхмӕ кӕй уыдысты ӕмӕ йӕ кӕй фаудтой, уый тыххӕй Павел ацагъта йӕ дарӕсы рыг ӕмӕ сын загъта: «Уӕ сӕфты тыххӕй уӕхӕдӕг стут азымджын, ӕз сыгъдӕг дӕн. Нырӕй фӕстӕмӕ муртаттӕм цӕудзынӕн». 7 Павел араст уырдыгӕй, ӕмӕ ӕрцыди, Хуыцауы чи нымадта, иу ахӕм лӕджы хӕдзармӕ, йӕ ном – Иуст; йӕ хӕдзар уыди синагогӕйы фарсмӕ. 8 Синагогӕйы хицау Крисп йеппӕт хӕдзаронтимӕ баууӕндыд Йесойыл. Коринфӕгтӕй Павелмӕ чи байхъуыста, уыдонӕй дӕр бирӕтӕ баууӕндыдысты ӕмӕ аргъуыд райстой. 9 Иухатт ӕхсӕвы Павелмӕ фӕзынд Хицау ӕмӕ йын загъта: «Тӕрсгӕ ма кӕн, фӕлӕ дзур ӕнӕбанцайгӕйӕ. 10 Ӕз демӕ дӕн, ӕмӕ дӕм фыдбылыз саразынмӕ никӕй къух баххӕсдзӕн, уымӕн ӕмӕ Мын ацы сахары бирӕ адӕм ис». 11 Ӕмӕ дзы Павел баззад афӕдз ӕмӕ ӕхсӕз мӕйы, ӕмӕ адӕмы ахуыр кодта Хуыцауы ныхасыл. 12 Фӕлӕ Ахайӕн йӕ хицау Галлион куы уыди, уӕд иудейтӕ ӕмвӕндӕй балӕбурдтой Павелмӕ, ӕмӕ йӕ ӕрбакодтой тӕрхондонмӕ, 13 Зӕгъгӕ, ацы лӕг Хуыцаумӕ кувыныл куыд ахуыр кӕны, уый Ӕгъдаумӕ гӕсгӕ нӕу. 14 Павел йӕ дзых нӕма байгом кодта, афтӕ Галлион иудейтӕн загъта: «Иудейтӕ, исты фыдбылыз кӕнӕ фыдракӕнд куы ӕрцыдаид, уӕд мын ӕфсон уыдаид сымахмӕ байхъусынӕн. 15 Фӕлӕ ныхӕстыл, нӕмттыл ӕмӕ уӕ Ӕгъдауыл кӕй у уӕ быцӕу, уымӕ гӕсгӕ уӕ бар уӕхи. Нӕ мӕ фӕнды, ӕмӕ уын уыдӕтты тӕрхонгӕнӕг ӕз уон». 16 Уыйадыл сӕ фӕтардта тӕрхондонӕй. 17 Уӕд иууылдӕр сӕхи ныццавтой синагогӕйы хицау Сосфеныл ӕмӕ йӕ надтой тӕрхондоны раз. Фӕлӕ йыл Галлион мисхалы бӕрц дӕр нӕ батыхст. 18 Павел Коринфы бафӕстиат дзӕвгар, стӕй хӕрзбон загъта ӕфсымӕртӕн, ӕмӕ Акилӕ ӕмӕ Прискиллӕимӕ науы ацыд Сиримӕ. Хуыцауӕн дзырд кӕй радта, уымӕ гӕсгӕ балцы размӕ Кенхрейы алвыдта йӕ сӕр. 19 Бахӕццӕ сты Эфесмӕ. Уым ныууагъта Акилӕйы ӕмӕ Прискиллӕйы; йӕхӕдӕг та бацыд синагогӕмӕ ӕмӕ ныхас кодта иудейтимӕ. 20 Уыдон ӕм ӕрхатыдысты, цӕмӕй сӕм афӕстиат уа иуцасдӕр, фӕлӕ Павел не сразы. 21 Хӕрзбонӕн сын загъта: «[Цы бӕрӕгбон ӕрцӕуы, уый ӕз ӕнӕмӕнг Иерусалимы хъуамӕ арвитон.] Хуыцауы фӕндӕй та уӕм ӕрыздӕхдзынӕн». Ӕмӕ науы ацыд Эфесӕй. 22 Кесарийы рахызт науӕй ӕмӕ ӕрцыд Иерусалиммӕ. Уым аргъуаны фембӕлд уырнджытимӕ ӕмӕ араст Антиохимӕ. 23 Уым иуцасдӕр куы фӕци, уӕд араст ӕмӕ цыди Галатийы бӕстӕйыл ӕмӕ Фригийыл, йӕ фӕндагыл фидар кодта ӕппӕт ахуыргӕнинӕгты уырнындзинад. 24 Ныр цавӕрдӕр александриаг иудей, йӕ ном – Аполлос, ӕрцыд Эфесмӕ. Аполлос уыди дзырдарӕхст лӕг, хорз зыдта Сыгъдӕг Фыст. 25 Хицауы фӕндаг цы у, уый йын бацамындӕуыд, ӕмӕ Йесойы тыххӕй дзырдта ӕмӕ ахуыр кодта зӕрдиагӕй ӕмӕ раст, кӕд ӕрмӕст Иоанны аргъуыд зыдта, уӕддӕр. 26 Аполлос ныфсджынӕй дзурын райдыдта синагогӕйы. Акилӕ ӕмӕ йӕм Прискиллӕ куы байхъуыстой, уӕд ӕй ахуыдтой сӕхимӕ ӕмӕ йын бӕлвырддӕр бацамыдтой Хуыцауы фӕндаг. 27 Ахаймӕ цӕуыны фӕнд ӕм куы фӕзынд, уӕд ын ӕфсымӕртӕ баххуыс кодтой, стӕй ныффыстой ахуыргӕнинӕгтӕм, цӕмӕй йыл баузӕлой. Уырдӕм куы ӕрцыд, уӕд тынг ахъаз фӕци, Хуыцауы хорзӕхы руаджы чи баууӕндыд, уыдонӕн. 28 Ӕппӕт адӕмы раз-иу йӕ тыхджын ныхасӕй басаста иудейты – Сыгъдӕг Фысты фӕрцы ӕмбарын кодта, Йесо Чырысти кӕй у, уый.

Апостолты хъуыддӕгтӕ 19

1 Аполлос Коринфы куы уыд, уыцы рӕстӕг Павел ахызт хӕхбӕстӕтыл ӕмӕ ӕрцыд Эфесмӕ. Ам фембӕлд цалдӕр ахуыргӕнинагимӕ 2 Ӕмӕ сӕ бафарста: «Куы баууӕндыдыстут, уӕд Сыгъдӕг Удӕй схайджын стут?» Уыдон ын дзуапп радтой: «Сыгъдӕг Уд ис ӕви нӕ, уый тыххӕй мах хъусгӕ дӕр нӕ фӕкодтам». 3 Уӕд сӕ бафарста: «Уӕдӕ уыл цавӕр аргъуыдӕй саргъуыдӕуыд?» Уыдон дзуапп радтой: «Иоанны аргъуыдӕй». 4 Павел загъта: «Иоанн аргъуыдта, тӕригъӕдтыл фӕсмон чи кодта, уыдоныл; дзырдта адӕмӕн, цӕмӕй баууӕндой, йӕ фӕстӕ Чи ӕрцӕуы, Ууыл, ома, Йесойыл». 5 Ахуыргӕнинӕгтӕ уый куы фехъуыстой, уӕд аргъуыд райстой Хицау Йесойы номыл. 6 Павел сыл йӕ къухтӕ куы ӕрӕвӕрдта, уӕд схайджын сты Сыгъдӕг Удӕй, райдыдтой ӕндӕр ӕвзӕгтыл дзурын ӕмӕ пехуымпариуӕг кӕнын. 7 Ӕдӕппӕтӕй уыдысты дыууадӕс лӕджы бӕрц. 8 Павел бацыд синагогӕмӕ; ӕртӕ мӕйы дӕргъы адӕмӕн ныфсджынӕй дзырдта Хуыцауы Паддзахады тыххӕй ӕмӕ сӕ ӕууӕндын кодта. 9 Фӕлӕ дзы иуӕй-иутӕ уыдысты хивӕнд, не 'ууӕндыдысты, ӕмӕ адӕмы раз фаудтой Хицауы фӕндаг. Уӕд сӕ Павел ныууагъта, рахицӕн кодта ахуыргӕнинӕгты ӕмӕ ӕрвылбон амыдта цавӕрдӕр Тиранны скъолайы. 10 Афтӕ ахаста дыууӕ азы, ӕмӕ Асийы ӕппӕт цӕрджытӕ – иудейтӕ дӕр ӕмӕ бердзентӕ дӕр – фехъуыстой Хицауы ныхас. 11 Хуыцау Павелы фӕрцы ӕвдыста ӕнахуыр диссӕгтӕ. 12 Рынчынтыл-иу ӕрӕвӕрдтой Павелы къухмӕрзӕнтӕ ӕмӕ раздарӕнтӕ, ӕмӕ-иу сдзӕбӕх сты сӕ низтӕй, ӕнӕзӕгъинӕгтӕ-иу сӕ рацыдысты. 13 Иудейаг хӕтӕг дӕлимонсурджытӕй иуӕй-иутӕ дӕр бацархайдтой Хицау Йесойы номӕй пайда кӕныныл – хӕйрӕджджынтӕй дӕлимонты куы сырдтой, уӕд дзырдтой: «Бардзырд уын дӕттӕм, Павел Кӕй тыххӕй дзуры, уыцы Йесойы номӕй». 14 Афтӕ кодтой цавӕрдӕр иудейаг алчер Скевайы авд фырты дӕр. 15 Фӕлӕ сын ӕнӕзӕгъинаг загъта: «Йесойы зонын, Павел дӕр мын зындгонд у, сымах та чи стут?» 16 Уӕд ӕнӕзӕгъинаг кӕй мидӕг уыд, уыцы адӕймаг сыл йӕхи ныццавта, ахӕм над сын скодта, ӕмӕ уыцы хӕдзарӕй лидзӕг фесты бӕгънӕгӕй ӕмӕ хъӕдгӕмттимӕ. 17 Уыцы хабар айхъуыст Эфесы ӕппӕт цӕрджытыл – иудейтыл дӕр ӕмӕ бердзентыл дӕр, сеппӕты дӕр тас бацыд, ӕмӕ Хицау Йесойы ном кодта кадджынӕй-кадджындӕр. 18 Чи баууӕндыд, уыдонӕй бирӕтӕ цыдысты ӕмӕ ӕргом кодтой се 'взӕр митӕ. 19 Кӕлӕнгӕнджытӕй бирӕтӕ ӕрхастой иу ранмӕ сӕ чингуытӕ ӕмӕ сӕ басыгътой ӕппӕт адӕмы раз. Чингуыты аргъ куы банымадтой, уӕд рауад дӕс ӕмӕ дыууиссӕдз мин драхмӕйы. 20 Афтӕ Хицауы ныхас кодта парахат ӕмӕ ахадгӕ. 21 Ӕппӕт уыдӕтты фӕстӕ Павелӕн йӕ зӕрдӕ загъта Македонийыл ӕмӕ Ахайыл Иерусалиммӕ ацӕуын. Павел загъта: «Иерусалимы фӕстӕ хъуамӕ бабӕрӕг кӕнон Ром дӕр». 22 Йӕ ӕххуысгӕнджытӕй дыууӕйы, Тимофейы ӕмӕ Эрасты, арвыста Македонимӕ, йӕхӕдӕг та рӕстӕгмӕ баззад Асийы. 23 Уыцы рӕстӕг рауад стыр змӕст Хицауы фӕндаджы ныхмӕ. 24 Иу зӕрингуырд, йӕ ном – Димитри, ӕвзистӕй кодта ус-хуыцау Артемидӕйы кувӕндӕттӕ, ӕмӕ уымӕй ӕрмдӕснытӕн лӕвӕрдта стыр ӕфтиаг райсыны фадат. 25 Димитри ӕрӕмбырд кодта уыдоны, стӕй ӕндӕр ахӕм ӕрмдӕсныты дӕр, ӕмӕ сын загъта: «Хорз адӕм, сымах зонут, нӕ къӕбӕр ацы куыстӕй аразгӕ кӕй у. 26 Сымах та уынут ӕмӕ хъусут, ӕрмӕст Эфесы нӕ, фӕлӕ ӕппӕт Асийы дӕр уыцы Павел кӕй асайдта бирӕ адӕмы – баууӕндын сӕ кодта, лӕджыкъухӕйконд хуыцӕуттӕ хуыцӕуттӕ не сты, зӕгъгӕ. 27 Махӕн дзы уымӕй тӕссаг у, ӕмӕ сӕгад уыдзӕн канд нӕ дӕсныйад нӕ, фӕлӕ ӕппындӕр цӕсты нал ахаддзӕн стыр ус-хуыцау Артемидӕйы кувӕндон дӕр; ӕмӕ йӕ ном нал нӕрдзӕн, ӕппӕт Аси ӕмӕ ӕппӕт дуне кӕмӕн кувынц, уыцы ус-хуыцауӕн». 28 Уыдон уый куы фехъуыстой, уӕд сӕ маст рафыхт ӕмӕ хъӕр систой: «Стыр у Эфесаг Артемидӕ!» 29 Ӕгас сахар ӕддӕг-мидӕг сси. Адӕм ӕрцахстой Павелы македониаг ӕмбӕлццӕттӕ Гай ӕмӕ Аристархы, ӕмӕ ӕмудӕй ныггуылф ластой театрмӕ. 30 Павелы фӕндыд адӕммӕ рацӕуын, фӕлӕ йӕ ахуыргӕнинӕгтӕ нӕ бауагътой. 31 Асиаг хицӕуттӕй иуӕй-иутӕ – йӕ хӕлӕрттӕ – арвыстой Павелмӕ ӕмӕ дзы куырдтой, театрмӕ ма рацу, зӕгъгӕ. 32 Ныр адӕмӕй иутӕ иу хъӕр кодтой, иннӕтӕ та – ӕндӕр. Кӕрӕдзи нал ӕмбӕрстой, сӕ фылдӕр нӕ зыдтой, цӕй фӕдыл ӕрӕмбырд сты, уый. 33 Иудейтӕ Александры рацӕуын кодтой размӕ; адӕмӕй йын чидӕртӕ хъуыддаг бамбарын кодтой. Александр йӕ къухӕй ацамыдта ӕмӕ хъавыди дзыллӕйы раз йӕхиуӕтты сраст кӕнынмӕ. 34 Фӕлӕ иудей кӕй у, уый куы базыдтой, уӕд дыууӕ сахаты бӕрц ӕмхъӕлӕсӕй хъӕр кодтой: «Стыр у Эфесаг Артемидӕ!» 35 Сахары хицӕуттӕй иу ӕрсабыр кодта адӕмы ӕмӕ загъта: «Эфесӕгтӕ, чи нӕ зоны, Эфесы сахар стыр Артемидӕйы кувӕндонӕн ӕмӕ йӕ уӕларвӕй ӕрхаугӕ фӕлгонцӕн кусӕг кӕй у, уый? 36 Ӕмӕ кӕд уый дызӕрдыггаг нӕу, уӕд хъуамӕ уат сабыр ӕмӕ сӕртӕг митӕй уӕхи бахизат. 37 Сымах та ӕрбакодтат, кувӕндон дӕр чи нӕ фӕкъахта ӕмӕ нын нӕ ус-хуыцауы дӕр чи нӕ фаудта, уыцы лӕгты. 38 Кӕд Димитри ӕмӕ иннӕ ӕрмдӕснытӕ искӕуыл хъаст кӕнынц, уӕд ис тӕрхондӕттӕ, ис хицӕуттӕ – уырдӕм хъаст кӕнӕнт кӕрӕдзийыл. 39 Кӕд уын уый фаг нӕу, уӕд, ӕгъдаумӕ гӕсгӕ, фарстайӕн алыггӕнӕн ис адӕмон ӕмбырды. 40 Махӕн тӕссаг у, абон цы змӕст ӕрцыд, уый тыххӕй нӕ куы фӕзылын кӕной, уымӕй. Ацы змӕстӕн ӕфсон нӕй ӕмӕ нӕхи сраст кӕнын нӕ бон нӕ бауыдзӕн». Уыцы ныхӕсты фӕстӕ ауагъта адӕмы.

Апостолты хъуыддӕгтӕ 20

1 Змӕст куы ахицӕн, уӕд Павел ӕрӕмбырд кодта ахуыргӕнинӕгты, ныфс сӕ бауагъта, загъта сын хӕрзбон ӕмӕ араст Македонимӕ. 2 Йӕ фӕндагыл йӕ ныхасӕй ныфс лӕвӕрдта уырнджытӕн. Афтӕмӕй бахӕццӕ Бердзенмӕ. 3 Уым фӕци ӕртӕ мӕйы. Уырдыгӕй Сиримӕ науы ацӕуынмӕ куы хъавыд, уӕд иудейтӕ йӕ ныхмӕ скодтой сусӕгвӕнд, ӕмӕ йӕм ӕрцыд Македонийыл аздӕхыны хъуыды. 4 Павелимӕ [Асимӕ] цыдысты вериаг Сосипатр – Пирры фырт, фессалоникӕгтӕ Аристарх ӕмӕ Секунд, дервиаг Гай ӕмӕ Тимофей, стӕй асиӕгтӕ Тихик ӕмӕ Трофим. 5 Уыдон ацыдысты нӕ разӕй ӕмӕ нӕм ӕнхъӕлмӕ кастысты Троадӕйы. 6 Мах та Донгонд дзулты бӕрӕгбоны фӕстӕ науы ацыдыстӕм Филиппты сахарӕй, фондз боны фӕстӕ семӕ баиу стӕм Троадӕйы, ӕмӕ дзы фестӕм авд боны. 7 Къуырийы фыццаг бон куы ӕрӕмбырд стӕм дзулсастмӕ, уӕд Павел ныхас кодта ахуыргӕнинӕгтимӕ. Дыккаг бон ӕм ацӕуыны фӕнд кӕй уыд, уымӕ гӕсгӕ йӕ ныхас ӕмбисӕхсӕвмӕ дӕр нӕма фӕци. 8 Кӕм ӕрӕмбырд стӕм, уыцы уӕллаг уаты сыгъди бирӕ цырӕгътӕ. 9 Иу лӕппу, йӕ ном – Эвтих, бадти рудзынгыл. Павелы дӕргъвӕтин ныхасы рӕстӕг ыл хуыссӕг фӕтых, аци тарф фынӕй ӕмӕ ахауд ӕртыккаг уӕладзыгӕй. Куы йыл схӕцыдысты, уӕд разынди мард. 10 Павел ӕрхызти дӕлӕмӕ, ныддӕлгом ыл, ныхъхъӕбыс ын кодта ӕмӕ загъта: «Ма тыхсут, йӕ уд йӕ мидӕг ис». 11 Уый фӕстӕ схызт уатмӕ, асаста дзул, бахордта дзы, фӕныхас ма кодта сӕумӕцъӕхтӕм, стӕй ацыд. 12 Ныр лӕппуйы та ӕрбахуыдтой удӕгасӕй, ӕмӕ тынг фӕцин кодтой. 13 Мах ацыдыстӕм разӕй, сбадтыстӕм науы ӕмӕ ацыдыстӕм Ассмӕ, уырдыгӕй Павелы немӕ ракӕнынмӕ. Уымӕн ӕмӕ нын йӕхӕдӕг афтӕ бафӕдзӕхста, йӕ зӕрды фистӕгӕй ацӕуын кӕй уыди, уый тыххӕй. 14 Павел Ассы баиу немӕ, сбадти нӕ науы ӕмӕ ӕрцыдыстӕм Митилинӕмӕ. 15 Уырдыгӕй араст стӕм, ӕмӕ иннӕ бон фӕцӕйцыдыстӕм Хиосы цурты; дыккаг бон бахӕццӕ стӕм Самосмӕ, [фестӕм Трогиллийы] ӕмӕ иннӕ бон ӕрцыдыстӕм Милетмӕ. 16 Уымӕн ӕмӕ Павелы Эфесмӕ бацӕуын нӕ фӕндыди, цӕмӕй Асийы ма бафӕстиат уа. Тагъд кодта, гӕнӕн ӕмӕ амалӕй, Хорысӕры бӕрӕгбонмӕ Иерусалиммӕ куыд ӕрцӕуа. 17 Павел Милетӕй Эфесмӕ арвыста аргъуаны хистӕрты ӕрхонынмӕ. 18 Куы йӕм ӕрцыдысты, уӕд сын загъта: «Сымах зонут, ӕз Асимӕ куы ӕрцыдтӕн, уӕдӕй фӕстӕмӕ уӕм иудадзыг цы уагӕй цардтӕн, уый. 19 Ӕз коммӕгӕсӕй ӕмӕ цӕссыгимӕ куыстон Хицауӕн, иудейты фыдвӕндты аххосӕй тухӕнтӕ ӕвзаргӕйӕ. 20 Сымах зонут, ӕз кӕй ницы басусӕг кодтон, ахъаз уын цы уыди, уымӕй. Ӕппӕт уыдӕттӕ уын амыдтон ӕмӕ ахуыр кодтон адӕмы раз ӕмӕ хӕдзаргай. 21 Иудейтӕм дӕр ӕмӕ муртаттӕм дӕр сидтӕн Хуыцауы раз сӕ тӕригъӕдтыл ӕрфӕсмон кӕнынмӕ ӕмӕ нӕ Хицау Йесойыл ӕууӕндынмӕ. 22 Ныр та мӕ Сыгъдӕг Уд кӕны Иерусалиммӕ, ӕмӕ мыл уым цы ӕрцӕудзӕн, уый нӕ зонын. 23 Ӕрмӕст мын Сыгъдӕг Уд алы сахары дӕр фӕзӕгъы, мӕнмӕ кӕй ӕнхъӕлмӕ кӕсынц ахӕстон ӕмӕ хъизӕмӕрттӕ. 24 Фӕлӕ мӕм мӕ цард ницы кӕсы, ӕрмӕст бӕллын мӕ фӕндагыл кӕронмӕ ацӕуынмӕ, ӕмӕ мын Хицау Йесо цы куыст бафӕдзӕхста, уый бакӕнынмӕ – Хуыцауы хорзӕхы уац адӕммӕ фӕхӕссынмӕ. 25 Ӕмӕ ныр зонын, сымах иууылдӕр, – кӕй ӕхсӕн цардтӕн ӕмӕ Хуыцауы Паддзахады тыххӕй кӕмӕн дзырдтон, – мӕн кӕй нал фендзыстут, уый. 26 Уымӕ гӕсгӕ уын ӕз абон зӕгъын: исчи уӕ куы бабын уа, уӕд мӕн аххос нӕу. 27 Уымӕн ӕмӕ уӕ ӕз ницы басусӕг кодтон – Хуыцауы фӕндон уын фехъусын кодтон ӕххӕстӕй. 28 Уӕдӕ кӕсут уӕхимӕ ӕмӕ ӕппӕт дзугмӕ. Уыцы дзугӕн уӕ Сыгъдӕг Уд фыййӕуттӕй сӕвӕрдта – Хуыцау Йӕ Фырты Тугӕй Йӕхицӕн кӕй балхӕдта, хизут уыцы Аргъуан. 29 Ӕз зонын, мӕ ацыды фӕстӕ уӕм кӕй бацӕудзысты, дзугыл чи нӕ ауӕрддзӕн, ахӕм тугдзых бирӕгътӕ. 30 Уӕхи ӕхсӕн дӕр фӕзындзӕн, рӕстдзинад чи зыгъуыммӕ кӕндзӕн, ахӕм лӕгтӕ, цӕмӕй ахуыргӕнинӕгты асайой сӕ фӕдыл. 31 Уымӕ гӕсгӕ ут къӕрцхъус, уӕ зӕрдыл дарут, ӕртӕ азы дӕргъы, ӕхсӕвӕй-бонӕй, сымахӕй алкӕй дӕр, цӕссыг калгӕйӕ, кӕй ахуыр кодтон, уый. 32 Ныр уӕ фӕдзӕхсын Хуыцауыл ӕмӕ Йӕ хорзӕхыл дзурӕг ныхасыл. Хуыцау уыцы ныхасы фӕрцы сымах скӕндзӕн удвидар ӕмӕ уын ратдзӕн хай ӕппӕт сыгъдӕджытимӕ. 33 Ӕз нӕ бабӕллыдтӕн нӕдӕр искӕй ӕвзистмӕ, нӕдӕр йӕ сызгъӕринмӕ, нӕдӕр йӕ дарӕсмӕ. 34 Уӕхӕдӕг зонут, мӕхи ӕмӕ ме 'мбӕлццӕтты хъуӕгтӕн ӕз куыстон мӕнӕ мӕ ацы къухтӕй. 35 Ӕз уын алцӕмӕй дӕр равдыстон, кӕй хъӕуы афтӕ кусын, лӕмӕгътӕн ӕххуыс кӕнын ӕмӕ Хицау Йесойы ныхӕстӕ зӕрдыл дарын, уымӕн ӕмӕ Йӕхӕдӕг загъта: „Райсынӕй раттын тӕхудиагдӕр хъуыддаг у"». 36 Уыцы ныхӕсты фӕстӕ Павел ӕрзоныгыл ӕмӕ бакуывта сеппӕтимӕ дӕр. 37 Иууылдӕр куыдтой, ныттыхстысты-иу ын йе 'фцӕгыл ӕмӕ йын батӕ кодтой. 38 Афтӕ кӕй загъта, нал мӕ фендзыстут, зӕгъгӕ, уӕлдай хъыг та сын уый уыди. Уый фӕстӕ йӕ афӕндараст кодтой наумӕ.

Апостолты хъуыддӕгтӕ 21

1 Уыдонӕй куы фӕхицӕн стӕм, уӕд ацыдыстӕм науы ӕмӕ ӕмрастӕй бахӕццӕ стӕм Космӕ, дыккаг бон та – Родосмӕ, уырдыгӕй – Патарӕмӕ. 2 Уым ссардтам, Финикимӕ чи цыдис, уыцы нау, сбадтыстӕм дзы ӕмӕ ацыдыстӕм. 3 Баввахс стӕм Кипрмӕ ӕмӕ йӕ фӕуагътам галиуырдыгӕй. Нӕ ных сарӕзтам Сиримӕ, ӕмӕ бацыдыстӕм Тирмӕ. Ам хъуамӕ равдӕлон кодтаиккой нау. 4 Ам ссардтам ахуыргӕнинӕгты ӕмӕ дзы баззадыстӕм авд боны. Уыдон, Сыгъдӕг Удӕй разӕнгардӕй, дзырдтой Павелӕн, цӕмӕй Иерусалиммӕ ма ацӕуа. 5 Фӕлӕ афон куы ралӕууыд, уӕд мах араст стӕм дарддӕр. Ахуыргӕнинӕгтӕ сеппӕт дӕр ӕд устытӕ ӕмӕ ӕд сывӕллӕттӕ рацыдысты немӕ фӕссахармӕ. Денджызы былгӕрон ӕрзоныг стӕм ӕмӕ бакуывтам. 6 Кӕрӕдзийӕн хӕрзбон зӕгъыны фӕстӕ мах сбадтыстӕм науы, уыдон та аздӕхтысты сӕхимӕ. 7 Тирӕй ӕрхӕццӕ стӕм Птолемаидӕмӕ. Уым фембӕлдыстӕм ӕфсымӕртимӕ ӕмӕ сӕм фестӕм иу бон. 8 Дыккаг бон араст стӕм Кесаримӕ. Уым бацыдыстӕм, аргъуан цы авд лӕджы сӕвзӕрста, уыдонӕй иумӕ – фарны уац хъусынгӕнӕг Филиппы хӕдзармӕ, ӕмӕ уымӕ баззадыстӕм. 9 Филиппӕн уыди, пехуымпариуӕг чи кодта, ахӕм цыппар ӕнӕцыд чызджы. 10 Дзӕвгар сӕм куы фестӕм, уӕд Иудейӕйӕ ӕрцыд иу пехуымпар, йӕ ном – Агав. 11 Агав нӕм бацыд, райста Павелы рон, сбаста дзы йӕ къухтӕ, йӕ къӕхтӕ ӕмӕ загъта: «Афтӕ зӕгъы Сыгъдӕг Уд: ацы рон кӕй у, уыцы лӕджы иудейтӕ Иерусалимы мӕнӕ афтӕ сбӕтдзысты ӕмӕ йӕ ратдзысты муртатты къухтӕм». 12 Уый куы фехъуыстам, уӕд уым чи уыди, уыдонимӕ лӕгъстӕ кӕнын райдыдтам Павелӕн, Иерусалиммӕ ма ацу, зӕгъгӕ. 13 Фӕлӕ Павел дзуапп радта: «Уый цытӕ кӕнут? Уӕ кӕуынӕй мын мӕ зӕрдӕ цы марут? Ӕз цӕттӕ дӕн ӕрмӕст ахӕстоны сбадынмӕ нӕ, фӕлӕ Хицау Йесойы номы сӕраппонд Иерусалимы амӕлынмӕ дӕр». 14 Куы нӕ йӕ басастам, уӕд банцадыстӕм ӕмӕ загътам: «Хицауы куыд фӕнды, афтӕ фӕуӕд!» 15 Уый фӕстӕ нӕхи срӕвдз кодтам ӕмӕ араст стӕм Иерусалиммӕ. 16 Немӕ ма рацыдысты кесариаг ахуыргӕнинӕгтӕ цалдӕрӕй. Уыдон нӕ ӕркодтой зӕронддӕр ахуыргӕнинӕгтӕй иумӕ – кипраг Мнасонмӕ, уымӕ ӕрфысым кӕнынмӕ. 17 Иерусалиммӕ куы бахӕццӕ стӕм, уӕд ныл ӕфсымӕртӕ сӕмбӕлдысты ӕхсызгонӕй. 18 Павел дыккаг бон немӕ ацыд Иаковмӕ; ӕрӕмбырд сты аргъуаны ӕппӕт хистӕртӕ дӕр. 19 Павел сын салам радта ӕмӕ бӕлвырд радзырдта, йӕ куысты руаджы Хуыцау муртатты ӕхсӕн цы сарӕзта, уый тыххӕй. 20 Уыдон ӕм байхъуыстой, арфӕ ракодтой Хуыцауӕн ӕмӕ Павелӕн загътой: «Ӕфсымӕр, уыныс, цал мин иудейы баууӕндыд! Ӕмӕ сеппӕт дӕр ӕнувыд сты Моисейы Ӕгъдауыл. 21 Дӕу тыххӕй сын радзырдтой, зӕгъгӕ, муртатты ӕхсӕн ӕппӕт цӕрӕг иудейты ды ахуыр кӕныс Моисейы Ӕгъдау ныууадзыныл, сӕ сывӕллӕттӕн сунӕт нӕ кӕныныл ӕмӕ не 'гъдӕуттӕм гӕсгӕ нӕ цӕрыныл. 22 Ныр цы чындӕуа? Адӕм ӕнӕмӕнг [ӕрӕмбырд уыдзысты, уымӕн ӕмӕ] фехъусдзысты де 'рцыды тыххӕй. 23 Уӕдӕ байхъус нӕ зондмӕ. Не 'хсӕн ис, Хуыцауӕн дзырд чи радта, ахӕм цыппар лӕджы. 24 Акӕн сӕ ӕмӕ дӕхи ссыгъдӕг кӕн семӕ, сӕ хӕрдзтӕ сын райс дӕхимӕ. Уыдон адасдзысты сӕ сӕртӕ, ӕмӕ иууылдӕр фендзысты, дӕу тыххӕй цы фехъуыстой, уый раст кӕй нӕу, ды дӕхӕдӕг дӕр Ӕгъдаумӕ гӕсгӕ кӕй цӕрыс. 25 Муртаттӕй Хицауыл чи баууӕндыд, уыдоны тыххӕй та рахастам уынаффӕ ӕмӕ сӕм ныффыстам, мӕнгхуыцӕуттӕн хаст нывондтӕ, туг ӕмӕ хӕдмӕл хӕрынӕй, стӕй хӕтынӕй сӕхи куыд бахизой». 26 Уӕд Павел ахуыдта уыцы лӕгты ӕмӕ дыккаг бон семӕ ссыгъдӕг кодта йӕхи. Уый фӕстӕ бацыди Кувӕндонмӕ ӕмӕ фехъусын кодта, сыгъдӕг кӕныны бонтӕ кӕд фӕуыдзысты ӕмӕ уыдонӕй алкӕйы тыххӕй дӕр нывондтӕ кӕд ӕрхастӕуыдзӕн, уый тыххӕй. 27 Уыцы авд боны куы фӕуд кодтой, уӕд асиаг иудейтӕ Павелы федтой Кувӕндоны, сардыдтой йыл ӕппӕт адӕмы ӕмӕ йӕ ӕрцахстой. 28 Хъӕр систой: «Израилӕгтӕ, баххуыс кӕнут! Ацы адӕймаг алкӕй дӕр ӕмӕ алы ран дӕр ахуыр кӕны нӕ адӕмы, Ӕгъдауы ӕмӕ ацы бынаты ныхмӕ. Суанг ма муртатты дӕр бахуыдта Кувӕндонмӕ ӕмӕ фӕчъизи кодта ацы сыгъдӕг бынат». 29 Уымӕн ӕмӕ уымӕй размӕ Павелимӕ сахары федтой эфесаг Трофимы, ӕмӕ ӕнхъӕлдтой, Павел ӕй Кувӕндонмӕ бахуыдта, зӕгъгӕ. 30 Ӕппӕт сахар дӕр базмӕлыд, ӕрӕмбырд бирӕ адӕм. Ӕрцахстой Павелы, лӕгдыхӕй йӕ ракодтой Кувӕндонӕй ӕмӕ уайтӕккӕ сӕхгӕдтой дуӕрттӕ. 31 Хъавыдысты йӕ амарынмӕ, фӕлӕ ӕфсӕддон хицаумӕ бахӕццӕ, ӕппӕт Иерусалим кӕй базмӕлыд, уыцы хабар. 32 Уый ӕфсӕддонтимӕ, сӕдӕйыхицӕуттимӕ ӕвӕстиатӕй атындзыдта адӕммӕ. Уыдон ӕфсӕддонты сӕ хицауимӕ куы федтой, уӕд Павелы нал надтой. 33 Ӕфсӕддон хицау бацыди Павелмӕ, ӕрцахста йӕ, радта дыууӕ рӕхысӕй йӕ сбӕттыны бардзырд ӕмӕ бафарста: «Чи у ӕмӕ цы сарӕзта?» 34 Адӕмӕй иутӕ иу хъӕр кодтой, иннӕтӕ та – иннӕ. Ӕфсӕддон хицауӕн змӕсты тыххӕй йӕ бон бӕлвырдӕй базонын кӕй ницы уыди, уымӕ гӕсгӕ радта Павелы фидармӕ акӕныны бардзырд. 35 Павел асинмӕ куы бахӕццӕ, уӕд ӕфсӕддонтӕн фӕци хӕссинаг, уымӕн ӕмӕ йӕм адӕм лӕбурдтой. 36 Йӕ фӕдыл цыди бирӕ адӕм хъӕргӕнгӕ: «Маринаг у!» 37 Фидармӕ бацӕуӕны цур Павел ӕфсӕддон хицауӕн загъта: «Цыдӕр зӕгъыны бар мын дӕттыс?» Уый дзуапп радта: «Ды бердзенагау зоныс? 38 Ӕрӕджы чи сызмӕста ӕмӕ ӕдзӕрӕг бӕстӕмӕ цыппар мин сикарийы чи акодта, ды уыцы мысыраг нӕ дӕ?» 39 Павел дзуапп радта: «Ӕз иудей дӕн, киликиаг зындгонд сахар Тарсы гражданин. Курын дӕ, ратт мын адӕмимӕ ныхас кӕныны бар». 40 Бар ын куы радта, уӕд Павел, асиныл лӕугӕйӕ, адӕмӕн йӕ къухӕй бацамыдта, ӕмӕ куы ӕрсабыр сты, уӕд райдыдта дзурын дзуттагау:

Апостолты хъуыддӕгтӕ 22

1 «Ӕфсымӕртӕ ӕмӕ фыдӕлтӕ, байхъусут, мӕхи сраст кӕныны тыххӕй уын цы зӕгъинаг дӕн, уымӕ». 2 Дзуттагау кӕй дзуры, уый куы фехъуыстой, уӕд бынтон ныхъхъус сты. Павел загъта: 3 «Ӕз дӕн иудей, райгуырдтӕн киликиаг Тарсы. Схъомыл дӕн ацы сахары, Гамалиилы къухы, бӕстон сахуыр кодтон нӕ фыдӕлты Ӕгъдау. Сымах уеппӕт дӕр абон Хуыцауыл куыд ӕнувыд стут, ӕз дӕр Ыл афтӕ ӕнувыд дӕн. 4 Ӕз ӕфхӕрдтон ацы фӕндагыл цӕуджыты, сӕ амарыныл дӕр нӕ ауӕрстон, ахстон нӕлгоймӕгты дӕр ӕмӕ сылгоймӕгты дӕр, ӕмӕ сӕ ӕппӕрстон ахӕстонмӕ. 5 Уымӕн ӕвдисӕн сты алчер ӕмӕ израилаг адӕмы хистӕртӕ иууылдӕр. Ӕз уыдонӕй райстон фыстӕджытӕ не 'фсымӕртӕм, дамаскаг иудейтӕм, ӕмӕ ацыдтӕн, цӕмӕй уым дӕр ӕрцахсон уырнджыты ӕмӕ сӕ бафхӕрынмӕ ӕркӕнон Иерусалиммӕ. 6 Фӕндагыл ма куы уыдтӕн ӕмӕ Дамаскмӕ куы баввахс дӕн, уӕд мыл, ӕмбисбонмӕ хӕстӕг, ӕваст ӕртыхст тӕмӕнкалгӕ рухс уӕларвӕй. 7 Ӕз ӕрхаудтӕн зӕххыл ӕмӕ фехъуыстон хъӕлӕс: „Савл, Савл, цӕмӕн Мӕ ӕфхӕрыс?" 8 Ӕз бафарстон: „Чи дӕ, Хицау?" Уый мын загъта: „Ды Кӕй ӕфхӕрыс, уыцы Назаретаг Йесо дӕн". 9 Ме 'мбӕлццӕттӕ федтой рухс [ӕмӕ сӕ тас бацыди], фӕлӕ мемӕ Дзурӕджы хъӕлӕс нӕ фехъуыстой. 10 Уӕд ӕз бафарстон: „Хицау, цы гӕнгӕ мын у?" Хицау мын загъта: „Сыст ӕмӕ цу Дамаскмӕ – уым дын загъд уыдзӕни, Хуыцау дын цы саразын скарста, ӕппӕт уыдӕтты тыххӕй". 11 Ӕз рухсы тӕмӕнмӕ кӕй бакуырм дӕн, уымӕ гӕсгӕ мын ме 'мбӕлццӕттӕ ныххӕцыдысты мӕ къухыл ӕмӕ мӕ ӕркодтой Дамаскмӕ. 12 Иу лӕг, Анани, – Ӕгъдауыл ӕнувыд, ӕппӕт дамаскаг иудейтӕм нымад, – 13 Ӕрбацыди мӕнмӕ, ӕрлӕууыд мӕ фарсмӕ ӕмӕ загъта: „Ме 'фсымӕр Савл, дӕ цӕстӕй ракӕс". Ӕз уыйадыл ракастӕн мӕ цӕстӕй ӕмӕ йӕ федтон. 14 Анани мын загъта: „Нӕ фыдӕлты Хуыцау дӕ сӕвзӕрста, цӕмӕй Йын базонай Йӕ фӕндон, фенай Рӕстгӕнӕджы ӕмӕ Йын фехъусай Йӕ хъӕлӕс. 15 Ды Йын ӕппӕт адӕмы раз уыдзынӕ ӕвдисӕн ӕмӕ сын дзурдзынӕ, цы федтай ӕмӕ цы фехъуыстай, уый тыххӕй. 16 Уӕдӕ ма цы фӕстиат кӕныс? Сыст, ссар Ын Йӕ ном, аргъуыд райс ӕмӕ цӕхс дӕ тӕригъӕдтӕ". 17 Иерусалиммӕ куы ӕрбаздӕхтӕн ӕмӕ Кувӕндоны куы куывтон, уӕд мын раргом: 18 Федтон Хицауы, ӕмӕ мын загъта: „Рӕвдздӕр ацу Иерусалимӕй, уымӕн ӕмӕ Мӕн тыххӕй ам куы дзурай, уӕд дын дӕ ныхасыл нӕ баууӕнддзысты". 19 Ӕз загътон: „Хицау, уыдон зонынц, ӕз Дӕуыл ӕууӕндджыты кӕй ахстон ӕмӕ сӕ синагогӕты кӕй надтон, уый. 20 Де 'вдисӕн Стефаны куы мардтой, уӕд уый дӕр ӕз растыл нымадтон; лӕууыдтӕн уым ӕмӕ хъахъхъӕдтон йӕ марджыты пӕлӕзтӕ". 21 Хицау мын загъта: „Ацу, уымӕн ӕмӕ дӕ Ӕз дардмӕ, муртаттӕм, арвитдзынӕн"». 22 Хъуыстой йӕм, цалынмӕ ацы ныхӕстӕ нӕ загъта, уӕдмӕ. Уый фӕстӕ систой хъӕр: «Зӕххыл хъуамӕ ма уа! Удӕгасӕй йын ныууадзӕн нӕй!» 23 Адӕм хъӕр кодтой, сӕ пӕлӕзтӕ рӕдывтой ӕмӕ уӕлдӕфмӕ рыг калдтой. 24 Уӕд ӕфсӕддон хицау радта Павелы фидармӕ бакӕныны ӕмӕ ехсӕй нӕмыны бардзырд, цӕмӕй базона, адӕм ӕй хъӕры бын цӕмӕн фӕкодтой, уый. 25 Фӕлӕ йӕ нӕмыны тыххӕй куы сбастой, уӕд Павел йӕ фарсмӕ лӕууӕг сӕдӕйыхицауӕн загъта: «Ау, сымахмӕ ромаг гражданины ехсӕй нӕмыны бар ис, уыимӕ ӕнӕ тӕрхонӕй?» 26 Сӕдӕйыхицау уый куы фехъуыста, уӕд бацыди ӕфсӕддон хицаумӕ ӕмӕ йын загъта: «Уый цы кусыс? Ацы адӕймаг ромаг гражданин у». 27 Уӕд ӕфсӕддон хицау бацыди Павелмӕ ӕмӕ йӕ бафарста: «Зӕгъ-ма мын, ды ромаг гражданин дӕ?» Павел дзуапп радта: «О». 28 Ӕфсӕддон хицау загъта: «Цӕмӕй ромаг гражданин суон, уый тыххӕй ӕз бирӕ ӕхца бафыстон». Павел ын загъта: «Ӕз та мӕ райгуырынӕй фӕстӕмӕ дӕн ромаг гражданин». 29 Ехсӕй нӕмынмӕ йӕ чи хъавыд, уыдон ӕй уайтӕккӕ ныууагътой. Ӕфсӕддон хицау куы базыдта, Павел ромаг гражданин кӕй у, уый, уӕд дзы тас бацыд, рӕхыстӕй йӕ кӕй сбаста, уый тыххӕй. 30 Иудейтӕ йӕ цӕмӕй зылын кӕнынц, уый бӕлвырдӕй базоныны тыххӕй ӕфсӕддон хицау дыккаг бон Павелы суӕгъд кодта йӕ рӕхыстӕй, радта алчерты ӕмӕ ӕппӕт синедрион ӕрӕмбырд кӕныны бардзырд, ӕмӕ сӕм ӕй ракодта.

Апостолты хъуыддӕгтӕ 23

1 Павел афӕлгӕсыд синедрионыл ӕмӕ загъта: «Ме 'фсымӕртӕ, абоны онг цы ацардтӕн, уымӕй Хуыцауы раз мӕ цӕсгом сыгъдӕг у». 2 Уӕд алчер Анани Павелы фарсмӕ лӕуджытӕн бардзырд радта, цӕмӕй йын цӕвой йӕ былтӕ. 3 Павел ын загъта: «Хуыцау дӕ ныццӕвдзӕн, чъырӕйцагъд къул! Мӕнӕн Ӕгъдаумӕ гӕсгӕ тӕрхон кӕныны тыххӕй ам бадыс; ды та дӕттыс мӕ нӕмыны бардзырд, ӕмӕ уымӕй халыс Ӕгъдау». 4 Павелы фарсмӕ чи лӕууыд, уыдон ын загътой: «Хуыцауы алчеры ӕфхӕрыс?» 5 Павел дзуапп радта: «Ӕфсымӕртӕ, алчер кӕй у, уый нӕ зыдтон. Уымӕн ӕмӕ фыст у: „Дӕ адӕмы хицауӕй ӕвзӕр ма зӕгъ"». 6 Сӕ иутӕ саддукейтӕ, иннӕтӕ та фарисейтӕ кӕй сты, Павел уый куы базыдта, уӕд синедрионӕн хъӕлӕсыдзагӕй загъта: «Ме 'фсымӕртӕ, ӕз фарисей дӕн, фарисейы фырт. Ӕмӕ мын тӕрхон кӕнынц, мӕрдты райгасыл мӕ зӕрдӕ кӕй дарын, уый тыххӕй». 7 Павел афтӕ куы загъта, уӕд фарисейтӕ ӕмӕ саддукейтӕ фӕбыцӕу сты, ӕмӕ ӕмбырд фӕдих. 8 (Саддукейтӕ дзурынц, мӕрдтӕ, дам, нӕ райгас уыдзысты; нӕй, дам, зӕдтӕ ӕмӕ удтӕ. Фарисейтӕ та ӕппӕт уыдӕттыл ӕууӕндынц.) 9 Рауади стыр хъӕлӕба. Фарисей чи уыд, уыцы динамонджытӕй сыстади цалдӕр, ӕмӕ загъд самадтой: «Ацы адӕймагмӕ мах ӕвзӕрӕй ницы уынӕм. Кӕд ын уыдӕттӕ уд кӕнӕ зӕд загъта, уӕд та?» 10 Фӕлӕ быцӕу куы стынг, уӕд ӕфсӕддон хицау фӕтарст, Павелы фӕйнӕрдӕм уӕнггай куы фӕхӕссой, уымӕй. Ӕмӕ ӕфсӕддонтӕн бардзырд радта, цӕмӕй ӕрхизой, Павелы адӕмӕй байсой ӕмӕ йӕ фидармӕ акӕной. 11 Уыцы ӕхсӕв Павелмӕ фӕзынди Хицау ӕмӕ йын загъта: «Фидар лӕуу, Павел, уымӕн ӕмӕ Мӕн тыххӕй Иерусалимы куыд дзырдтай, афтӕ хъуамӕ дзурай Ромы дӕр». 12 Куы сбон, уӕд иудейтӕй иуӕй-иутӕ сусӕгӕй баныхас кодтой ӕмӕ ард бахордтой, цалынмӕ Павелы амарой, уӕдмӕ нӕдӕр хӕрыны, нӕдӕр нуазыны тыххӕй. 13 Сусӕгвӕнд чи скодта, уыдон уыдысты дыууиссӕдз адӕймагӕй фылдӕр. 14 Уыдон бацыдысты алчертӕм, адӕмы хистӕртӕм ӕмӕ загътой: «Мах ард бахордтам, цалынмӕ Павелы амарӕм, уӕдмӕ ком бадарыны тыххӕй. 15 Уӕдӕ ныр сымах ӕмӕ синедрион арвитут ӕфсӕддон хицаумӕ Павелы райсом сымахмӕ ӕрхоныны тыххӕй, цыма йын йӕ хъуыддагмӕ бӕлвырддӕр ӕркӕсынмӕ хъавут. Мах та цӕттӕ стӕм, цалынмӕ сымахмӕ не 'рбахӕццӕ уа, уӕдмӕ йӕ амарынмӕ». 16 Уыцы сусӕгвӕнды тыххӕй базыдта Павелы хойы лӕппу. Бацыди фидармӕ ӕмӕ йӕ радзырдта Павелӕн. 17 Павел фӕдзырдта сӕдӕйыхицӕуттӕй иумӕ ӕмӕ йын загъта: «Ацы лӕппуйы ахон ӕфсӕддон хицаумӕ, цыдӕр зӕгъынмӕ йын хъавы». 18 Уый лӕппуйы бакодта ӕфсӕддон хицаумӕ ӕмӕ йын загъта: «Ахст Павел мӕм фӕдзырдта ӕмӕ куырдта, цӕмӕй дӕм ацы лӕппуйы ӕрбахонон; цыдӕр зӕгъинаг дын у». 19 Ӕфсӕддон хицау ныххӕцыд лӕппуйы къухыл, фӕхибар ӕй кодта ӕмӕ йӕ бафарста: «Цы мын зӕгъинаг дӕ?» 20 Лӕппу дзуапп радта: «Иудейтӕ баныхас кодтой дӕумӕ ӕрхатын, цӕмӕй райсом Павелы ӕркӕнай синедрионмӕ, цыма сӕ йӕ хъуыддагмӕ бӕлвырддӕр ӕркӕсын фӕнды. 21 Фӕлӕ ды ма бакӕс сӕ коммӕ, уымӕн ӕмӕ дыууиссӕдз адӕймагӕй фылдӕр йӕ размӕ бадынц. Ард бахордтой, цалынмӕ йӕ амарой, уӕдмӕ нӕ бахӕрын ӕмӕ нӕ баназыныл. Ныридӕгӕн цӕттӕ сты, сӕ каст ма дӕ бардзырдмӕ у». 22 Ӕфсӕддон хицау лӕппуйӕн бафӕдзӕхста: «Мӕнӕн ӕй кӕй загътай, уый макӕмӕн радзур», ӕмӕ йӕ ауагъта. 23 Ӕфсӕддон хицау басидти сӕдӕйыхицӕуттӕй дыууӕмӕ ӕмӕ сын загъта: «Срӕвдз кӕнут дыууӕсӕдӕ ӕфсӕддоны, дӕс ӕмӕ ӕртиссӕдз барӕджы ӕмӕ дыууӕсӕдӕ арцхӕссӕджы. Ӕхсӕвы ӕртӕ сахатыл хъуамӕ араст уой Кесаримӕ. 24 Павелӕн ӕрцӕттӕ кӕнут бӕхтӕ, ӕфсӕддонтӕ йӕ бӕстӕйы хицау Феликсмӕ сӕрӕгасӕй куыд бахӕццӕ кӕной, афтӕ». 25 Ныффыста ахӕм фыстӕг дӕр: 26 «Клавдий Лисийӕ – бӕстӕйы хицаумӕ, кадджын Феликсмӕ. Фӕрнджын у. 27 Ацы адӕймаджы ӕрцахстой иудейтӕ ӕмӕ йӕ хъавыдысты амарынмӕ. Фӕлӕ ӕз ӕрцыдтӕн ӕфсӕддонтимӕ, ӕмӕ ромаг гражданин кӕй у, уый куы базыдтон, уӕд ӕй байстон. 28 Цӕмӕй йӕ азымджын кӕнынц, уый базоныны тыххӕй йӕ ӕркодтон сӕ синедрионмӕ. 29 Ӕмӕ базыдтон: азымджын ӕй кӕнынц, сӕ Ӕгъдаумӕ чи хауы, ахӕм быцӕйуаг фарстыты, фӕлӕ мӕлӕты кӕнӕ ахӕстоны аккаг цы уа, ахӕм азым ӕм нӕ хӕссынц. 30 Йӕ ныхмӕ сусӕгвӕнд кӕй скодтой, уый мын куы загътой, уӕд ӕй ӕвӕстиатӕй арвыстон дӕумӕ. Йӕ зылынгӕнджытӕн дӕр бафӕдзӕхстон сӕ хъаст дӕумӕ бахӕссын». 31 Ӕфсӕддонтӕ цы бардзырд райстой, уымӕ гӕсгӕ Павелы ӕхсӕвы бахӕццӕ кодтой Антипатридӕмӕ. 32 Дыккаг бон Павелимӕ дарддӕр цӕуын бакодтой барджыты бар, сӕхӕдӕг та ӕрбаздӕхтысты фидармӕ. 33 Барджытӕ Кесаримӕ куы ӕрцыдысты, уӕд бӕстӕйы хицаумӕ радтой фыстӕг ӕмӕ йӕм Павелы бакодтой. 34 Бӕстӕйы хицау бакасти фыстӕг ӕмӕ бафарста Павелы, кӕцон у, уымӕй. Киликийӕ кӕй у, уый куы базыдта, уӕд загъта: 35 «Дӕ зылынгӕнджытӕ дӕр куы ӕрцӕуой, уӕд дын ӕркӕсдзынӕн дӕ хъуыддагмӕ». Ӕмӕ радта Ироды галуаны йӕ ахстӕй дарыны бардзырд.

Апостолты хъуыддӕгтӕ 24

1 Фондз боны фӕстӕ алчер Анани ӕрцыд адӕмы хистӕртимӕ, стӕй тӕрхоны дӕсны Тертуллимӕ. Уыдон бӕстӕйы хицаумӕ бахастой сӕ хъаст Павелыл. 2 Павелы куы бакодтой, уӕд ӕй Тертулл райдыдта зылын кӕнын: 3 «Дӕ фӕрцы нӕ бӕстӕ у ӕнцад; царды ӕппӕт къабӕзты алы ран дӕр дӕ арӕхстджын разамындӕй цы ивддзинӕдтӕ цӕуы, уыдон сты ацы адӕмы хорзӕхӕн. Уыдӕтты тыххӕй бузныг стӕм дӕуӕй, кадджын Феликс. 4 Фӕлӕ дӕ цӕмӕй ма фӕлмӕцын кӕнон, уый тыххӕй дӕ курын: дӕ хорзӕхӕй, иучысыл нӕм байхъус. 5 Мах куыд базыдтам, афтӕмӕй ацы лӕг у рын, ӕппӕт дунейы иудейты змӕнтӕг ӕмӕ назаретаг мӕнгдины фӕтӕг. 6 Суанг архайдта Кувӕндон фӕчъизи кӕныныл, ӕмӕ йӕ мах ӕрцахстам. [Нӕ зӕрды уыди нӕхи Ӕгъдаумӕ гӕсгӕ йын тӕрхон кӕнын; 7 Фӕлӕ ӕрцыд ӕфсӕддон хицау Лисий, лӕгдыхӕй нын ӕй байста нӕ къухтӕй, 8 Ӕмӕ йӕ зылын чи кодта, уыдонӕн бафӕдзӕхста дӕумӕ фӕцӕуын.] Ацы лӕджы хъуыддаг дӕхӕдӕг куы равзарай, уӕд ын йӕхицӕй фехъусдзынӕ, мах ӕй цӕмӕй зылын кӕнӕм, ӕппӕт уыдӕттӕ». 9 Иудейтӕ разы уыдысты Тертуллы ныхӕстимӕ, ӕмӕ дзырдтой, ӕппӕт дӕр афтӕ уыди, зӕгъгӕ. 10 Бӕстӕйы хицау ӕм куы ацамыдта, уӕд Павел загъта: «Ӕз зонын, ды ацы адӕмӕн бирӕ азты дӕргъы тӕрхонгӕнӕг кӕй дӕ, уый, ӕмӕ райгондӕй раст кӕндзынӕн мӕхи. 11 Дӕ бон у базонын, ӕз Иерусалиммӕ бакувынмӕ куы ӕрцыдтӕн, ууыл кӕй нӕ рацыди дыууадӕс бонӕй фылдӕр. 12 Нӕдӕр Кувӕндоны, нӕдӕр синагогӕты, нӕдӕр сахары ӕндӕр ран мӕн нӕ фендӕуыд искӕимӕ быцӕугӕнгӕ кӕнӕ адӕмы змӕнтгӕйӕ. 13 Ӕмӕ ныр мӕн цӕмӕй зылын кӕнынц, уый тыххӕй дӕумӕ цы бавдисой, уый сӕм нӕй. 14 Фӕлӕ дӕуӕн сӕттын ууыл, ӕмӕ уыдон мӕнгдин кӕй хонынц, уыцы ахуырадмӕ гӕсгӕ кусын нӕ фыдӕлты Хуыцауӕн; ӕууӕндын, Ӕгъдаумӕ гӕсгӕ цы у ӕмӕ пехуымпартӕм цы фыст ис, ӕппӕт уыдӕттыл. 15 Мӕ зылынгӕнджытӕ сӕхӕдӕг сӕ зӕрдӕ куыд дарынц, афтӕ ӕз дӕр мӕ зӕрдӕ дарын Хуыцауыл: райгас уыдзысты рӕстытӕ дӕр ӕмӕ тӕригъӕдджынтӕ дӕр. 16 Уымӕ гӕсгӕ ӕз архайын Хуыцауы ӕмӕ адӕмы раз кӕддӕриддӕр сыгъдӕг цӕсгомимӕ цӕрыныл. 17 Ӕз Иерусалиммӕ ӕрбаздӕхтӕн бирӕ азты фӕстӕ мӕ адӕмы мӕгуыртӕн баххуыс кӕныны ӕмӕ нывондтӕ ӕрхӕссыны сӕраппонд. 18 Ӕгъдаумӕ гӕсгӕ мӕхи куы ссыгъдӕг кодтон, уӕд мӕ баййӕфтой Кувӕндоны; нӕдӕр дзы бирӕ адӕм уыди, нӕдӕр змӕст. 19 Фӕлӕ дзы уыдысты цавӕрдӕр асиаг иудейтӕ; мӕ ныхмӕ сӕм исты куы уыдаид, уӕд дӕ разы хъуамӕ лӕууиккой ӕмӕ мӕн зылын кӕниккой. 20 Кӕнӕ ам чи ис, уыдон зӕгъӕнт, синедрионы раз куы лӕууыдтӕн, уӕд мӕм цы азым ссардтой, уый. 21 Ӕрмӕст иу фыдракӕнд сарӕзтон – сӕ разы куы лӕууыдтӕн, уӕд хъӕлӕсыдзагӕй загътон: „Абон мын тӕрхон кӕнут, мӕрдты райгасыл мӕ зӕрдӕ кӕй дарын, уый тыххӕй"». 22 Феликс бӕстон зыдта Хицауы фӕндаджы тыххӕй, ӕмӕ хъуыддаг аргъӕвта фӕстӕдӕрмӕ: «Ӕфсӕддон хицау Лисий куы ӕрцӕуа, уӕд уын ӕркӕсдзынӕн уӕ хъуыддагмӕ». 23 Феликс сӕдӕйыхицауӕн радта Павелы хъахъхъӕныны бардзырд, фӕлӕ дам ын хъуамӕ иуцасдӕр фезмӕлӕн дӕр уа, йӕ хӕлӕрттӕ йын куы лӕггад кӕной, уӕд сӕ хъыгдарӕг куыд нӕ уа, афтӕ. 24 Цалдӕр боны фӕстӕ Феликс ӕрцыд йӕ ус Друзиллӕимӕ (уыди дзуттаг). Феликс арвыста Павелы ӕрбакӕнынмӕ, ӕмӕ хъуыста, Павел Йесо Чырыстийыл ӕууӕндыны тыххӕй цы дзырдта, уымӕ. 25 Павел рӕстӕй цӕрыны, хиуыл хӕцыны ӕмӕ фидӕны тӕрхоны тыххӕй куы дзырдта, уӕд Феликсы бацыди тас ӕмӕ загъта: «Ныр ацу, рӕстӕг мын куы фӕуа, уӕд та дӕм фӕдзурдзынӕн». 26 Уыимӕ ма Феликс йӕ зӕрдӕ дардта, Павел ын ратдзӕн ӕхца, зӕгъгӕ. Уымӕ гӕсгӕ-иу арӕх арвыста йе 'рбакӕнынмӕ, ӕмӕ-иу ныхас кодта йемӕ. 27 Фӕлӕ дыууӕ азы фӕстӕ Феликсы раивта Порций Фест. Иудейты зӕрдӕ балхӕныны тыххӕй Феликс Павелы ныууагъта ахӕстоны.

Апостолты хъуыддӕгтӕ 25

1 Фест бӕстӕйы хицауы бынат куы бацахста, уӕд ӕртӕ боны фӕстӕ Кесарийӕ ацыд Иерусалиммӕ. 2 Иерусалимы йӕм Павелыл хъаст кодтой алчертӕ ӕмӕ иудейаг хицӕуттӕ. 3 Хатыдысты йӕм, цӕмӕй сын ахӕм хорзӕх ракӕна, ӕмӕ Павелы арвита Иерусалиммӕ; сӕхӕдӕг та баныхас кодтой фӕндагыл Павелы амарыныл. 4 Фӕлӕ сын Фест дзуапп радта: «Павел Кесарийы ахӕстоны ис, стӕй рӕхджы мӕхӕдӕг дӕр уырдӕм ацӕудзынӕн. 5 Ӕмӕ уӕ кӕй бон у, уыдон рацӕуӕнт мемӕ, ӕмӕ кӕд уыцы лӕг ӕвзӕрӕй исты ракодта, уӕд-иу ӕй базылын кӕнӕнт». 6 Фест сӕм баззад аст-дӕс боны, ӕмӕ ӕрбаздӕхт Кесаримӕ. Дыккаг бон ӕрбадти тӕрхонгӕнӕджы бынаты ӕмӕ радта Павелы ӕрбакӕныны бардзырд. 7 Павел куы ӕрбацыди, уӕд Иерусалимӕй ӕрцӕуӕг иудейтӕ ӕрлӕууыдысты йӕ алыварс, йӕ ныхмӕ йын ӕвӕрдтой бирӕ уӕззау фыдракӕндтӕ, фӕлӕ сӕм ӕвдисӕйнӕгтӕ нӕ уыд. 8 Павел йӕхи раст кӕнынӕн загъта: «Ӕз иу тӕригъӕд дӕр нӕ ракодтон нӕдӕр иудейаг Ӕгъдауы ныхмӕ, нӕдӕр Кувӕндоны ныхмӕ, нӕдӕр кесӕры ныхмӕ». 9 Фесты фӕндыд иудейты зӕрдӕ балхӕнын, ӕмӕ Павелы бафарста: «Фӕнды дӕ Иерусалиммӕ ацӕуын, цӕмӕй дӕ ныхмӕ цы ӕвӕрынц, уыдӕтты тыххӕй дын уым рахӕссон тӕрхон?» 10 Павел загъта: «Ӕз кесӕры тӕрхоны раз лӕууын, ӕмӕ мын ам хъуамӕ тӕрхон кӕной. Ды дӕр хорз зоныс: ӕз иудейты хъыджы ницӕмӕй бацыдтӕн. 11 Кӕд ӕз ахӕмӕй исты ракодтон, ӕмӕ амарыны аккаг дӕн, уӕд цӕттӕ дӕн мӕлӕтмӕ. Фӕлӕ мӕ ныхмӕ цы ӕвӕрынц, кӕд ӕппӕт уыдӕттӕ ӕрымысгӕ сты, уӕд мӕн сӕ къухмӕ раттын никӕй бон у. Ӕз домын кесӕры тӕрхон». 12 Уӕд Фест аныхас кодта йӕ ӕххуысгӕнджытимӕ ӕмӕ дзуапп радта: «Ды ӕрдомдтай кесӕры тӕрхон, ӕмӕ ацӕудзынӕ кесӕрмӕ». 13 Цалдӕр боны фӕстӕ паддзах Агриппа ӕмӕ Вереникӕ Фестӕн ӕгасцуай зӕгъынмӕ ӕрцыдысты Кесаримӕ. 14 Уым фесты дзӕвгар рӕстӕг. Фест паддзахӕн радзырдта Павелы хъуыддаджы тыххӕй ӕмӕ йын загъта: «Ам ис, Феликс ахӕстоны кӕй ныууагъта, ахӕм адӕймаг. 15 Ӕз Иерусалимы куы уыдтӕн, уӕд ыл хъаст кодтой алчертӕ ӕмӕ иудейты хистӕртӕ – куырдтой тӕрхон ын рахӕссын. 16 Ӕз сын дзуапп радтон, зӕгъгӕ, зылынгонд чи цӕуы, уыцы адӕймаг цалынмӕ йӕ зылынгӕнджытимӕ лӕгӕй-лӕгмӕ фембӕла ӕмӕ йын йӕхи раст кӕныны фадат уа, уӕдмӕ ромаг ӕгъдау бафхӕрынмӕ никӕй дӕтты. 17 Уыдон ӕрцыдысты ардӕм, ӕмӕ ӕз ӕвӕстиатӕй дыккаг бон ӕрбадтӕн тӕрхонгӕнӕджы бынаты ӕмӕ радтон уыцы лӕджы ӕрбакӕныны бардзырд. 18 Зылынгӕнджытӕ сыстадысты йӕ ныхмӕ, ӕмӕ ӕз ӕнхъӕл цы фыдракӕндтӕй уыдтӕн, уыдонӕй йӕ иуӕй дӕр нӕ базылын кодтой. 19 Фӕлӕ сын йемӕ уыди цӕйдӕр быцӕутӕ сӕ дины ӕмӕ, Чи амард, уыцы цавӕрдӕр Йесойы тыххӕй – Павел дзырдта, удӕгас у, зӕгъгӕ. 20 Ахӕм фарстатӕ куыд лыггӕнгӕ сты, уый кӕй не 'мбӕрстон, уымӕ гӕсгӕ Павелы бафарстон, нӕ йӕ фӕнды, мыййаг, Иерусалиммӕ ацӕуын ӕмӕ уым тӕрхоны раз ӕрлӕууын? 21 Фӕлӕ Павел ӕрдомдта, цӕмӕй йӕ ныууадзой ахӕстоны, цалынмӕ кесӕр уынаффӕ рахӕсса, уӕдмӕ. Уӕд ӕз радтон, цалынмӕ йӕ кесӕрмӕ арвитон, уӕдмӕ йӕ ахӕстоны дарыны бардзырд». 22 Агриппа загъта Фестӕн: «Фӕнды мӕ уыцы адӕймагмӕ байхъусын». Фест дзуапп радта: «Тӕккӕ райсом ӕм байхъусдзынӕ». 23 Дыккаг бон, хъӕздыг арӕзтӕй ӕмӕ сӕрбӕрзондӕй, ӕрцыдысты Агриппа ӕмӕ Вереникӕ; ӕфсӕддон хицӕуттимӕ ӕмӕ сахары уӕздӕттимӕ бацыдысты ӕмбырды уатмӕ. Фесты бардзырдмӕ гӕсгӕ ӕрбакодтой Павелы. 24 Фест загъта: «Паддзах Агриппа ӕмӕ ам немӕ чи ис, уыцы хорз адӕм! Сымах уынут, Иерусалимы дӕр ӕмӕ ам дӕр иудейтӕ иууылдӕр мӕнмӕ сӕ хъаст кӕуыл хастой ӕмӕ йын удӕгасӕй ныууадзӕн нӕй, зӕгъгӕ, кӕй тыххӕй хъӕр кодтой, уыцы лӕджы. 25 Фӕлӕ куыд федтон, афтӕмӕй йӕ цӕй тыххӕй амардӕуа, ахӕмӕй ницы сарӕзта. Гъе ӕрмӕст йӕхӕдӕг кесӕры тӕрхон кӕй ӕрдомдта, уымӕ гӕсгӕ йӕ сфӕнд кодтон уымӕ арвитын. 26 Кесӕрмӕ ацы лӕджы тыххӕй бӕлвырдӕй цы ныффыссон, ахӕмӕй мӕм ницы ис. Ӕмӕ йӕ уымӕ гӕсгӕ ӕрлӕууын кодтон уӕ разы, уӕлдайдӕр та дӕ разы, паддзах Агриппа, цӕмӕй хъуыддагмӕ ӕркӕсыны фӕстӕ зонон, цы ныффыссын хъӕуы, уый. 27 Уымӕн ӕмӕ, ахст адӕймаг зылынгонд цӕмӕй цӕуы, уый ма бавдис, афтӕмӕй йӕ арвит, уый ӕз ӕнӕсӕрфатыл нымайын».

Апостолты хъуыддӕгтӕ 26

1 Агриппа загъта Павелӕн: «Ис дын дӕхи тыххӕй дзурыны бар». Уӕд Павел йӕ къух размӕ радардта ӕмӕ райдыдта йӕхи раст кӕнын: 2 «Паддзах Агриппа! Мӕхи нымайын амондджыныл, иудейтӕ мӕ цӕмӕйты зылын кӕнынц, ӕппӕт уыдӕттӕй дӕ разы абон мӕхи кӕй раст кӕнын, уымӕй. 3 Уӕлдайдӕр та уымӕн, ӕмӕ ды хорз зоныс иудейты ӕппӕт ӕгъдӕуттӕ ӕмӕ дзырддаг фарстатӕ. Уымӕ гӕсгӕ дӕ курын фӕразонӕй мӕм байхъусын. 4 Ме 'взонджы бонтӕй фӕстӕмӕ куыд цӕрын, уый иудейтӕ иууылдӕр зонынц. Тӕккӕ райдианӕй ӕз цардтӕн мӕ адӕмы ӕхсӕн ӕмӕ Иерусалимы. 5 Рагӕй мӕ зонынц, ӕмӕ сӕ куы бафӕнда, уӕд сӕ бон у ӕвдисӕн ныллӕууын, ӕз кӕй цардтӕн фарисейы цардӕй – нӕ дины тӕккӕ карздӕр къабазы домӕнтӕм гӕсгӕ. 6 Ӕмӕ абон тӕрхоны раз лӕууын, Хуыцау нӕ фыдӕлтӕн зӕрдӕ цӕмӕй бавӕрдта, уымӕй мӕ ныфс кӕй ис, уый тыххӕй. 7 Уыцы зӕрдӕвӕрд кӕй райсдзысты, уымӕй ныфс ис нӕ дыууадӕс мыггаджы, ӕмӕ бонӕй-ӕхсӕвӕй зӕрдиагӕй кусынц Хуыцауӕн. Уыцы зӕрдӕдарӕны тыххӕй, паддзах, мӕн аххосджын кӕнынц иудейтӕ. 8 Хуыцау мӕрдты кӕй ӕгас кӕны, уый, ӕрцӕуӕн кӕмӕн нӕй, ахӕм хабарыл цӕмӕн нымайут? 9 Ӕз дӕр афтӕ ӕнхъӕл уыдтӕн, Назаретаг Йесойы номы ныхмӕ мын мӕ тых, мӕ бонӕй тохгӕнгӕ у. 10 Ӕмӕ уӕвгӕ дӕр афтӕ кодтон Иерусалимы. Алчертӕй бар райстон, афтӕмӕй бирӕ сыгъдӕджыты баппӕрстон ахӕстӕттӕм; мӕлӕты тӕрхон-иу сын куы хастой, уӕд-иу хъӕлӕс кодтон сӕ амарыныл. 11 Бирӕ хӕттыты сӕ ӕфхӕрдтон ӕппӕт синагогӕты, цӕмӕй сӕхи атигъ кӕной Йесойыл. Афтӕ уӕнгӕл мын уыдысты, ӕмӕ сӕ фӕдыл зылдтӕн суанг ӕцӕгӕлон сахарты дӕр. 12 Уый тыххӕй алчертӕй райстон бар, ӕмӕ сын сӕ фӕдзӕхст сӕххӕст кӕнынмӕ араст дӕн Дамаскмӕ. 13 Ӕмбисбон фӕндагыл, паддзах, ӕз федтон, хуры рухсӕй тыхджындӕр чи уыди, мӕн ӕмӕ ме 'мбӕлццӕттыл чи ӕртыхст, ахӕм рухс уӕларвӕй. 14 Неппӕт дӕр ӕрхаудтам зӕххыл, ӕмӕ ӕз фехъуыстон, дзуттагау мын чи дзырдта, ахӕм хъӕлӕс: „Савл, Савл, цӕмӕн Мӕ ӕфхӕрыс? Зын дын у цыргъ хъилы ныхмӕ бырсын". 15 Ӕз бафарстон: „Чи дӕ, Хицау?" Хицау загъта: „Ды Кӕй ӕфхӕрыс, уыцы Йесо дӕн. 16 Сыст ӕмӕ слӕуу дӕ къӕхтыл. Ӕз дӕм уымӕн фӕзындтӕн, цӕмӕй дӕ скӕнон Мӕ кусӕг, ӕмӕ ӕвдисӕн уай, цы федтай ӕмӕ ма дын ноджыдӕр цы раргом кӕндзынӕн, ӕппӕт уыдӕттӕн. 17 Ӕз дӕ бахиздзынӕн дӕхи адӕмӕй, стӕй муртаттӕй – Ӕз дӕ ӕрвитын уыдонмӕ, 18 Цӕмӕй байгом уой сӕ цӕстытӕ ӕмӕ рацӕуой талынгӕй рухсмӕ, хӕйрӕджы къухтӕй Хуыцаумӕ, Мӕныл ӕууӕндыны фӕрцы сын барст ӕрцӕуой сӕ тӕригъӕдтӕ ӕмӕ сыгъдӕджытимӕ райсой сӕ хай". 19 Уымӕ гӕсгӕ, паддзах Агриппа, уӕларвӕй мын цы раргом, уый коммӕ нӕ бакӕсын мӕ бон нӕ баци. 20 Фыццаг амыдтон Дамаскы цӕрджытӕн, уый фӕстӕ Иерусалимы цӕрджытӕн, стӕй ӕппӕт иудейаг бӕстӕйы ӕмӕ муртаттӕн, цӕмӕй ӕрфӕсмон кӕной сӕ тӕригъӕдтыл, раздӕхой Хуыцаумӕ ӕмӕ, кӕй ӕрфӕсмон кодтой, уый ӕвдисой хорз хъуыддӕгтӕй. 21 Уый тыххӕй мӕ иудейтӕ ӕрцахстой Кувӕндоны, ӕмӕ мӕ хъавыдысты амарынмӕ. 22 Фӕлӕ абоны онг, Хуыцауы ӕххуысӕй, ӕнӕфӕцудгӕ лӕууын ӕмӕ дзурын хуымӕтӕг адӕмӕн дӕр ӕмӕ номдзыд адӕмӕн дӕр. Дзургӕ та кӕнын, пехуымпартӕ ӕмӕ Моисей рагагъоммӕ цы загътой, ӕрмӕстдӕр уый. 23 Ома, Чырысти фӕхъизӕмар кӕндзӕн, мӕрдтӕй фыццаг Уый райгас уыдзӕн, ӕрхӕсдзӕн рухс иудейаг адӕмӕн ӕмӕ муртаттӕн». 24 Павел йӕхи афтӕ куы раст кодта, уӕд Фест хъӕрӕй загъта: «Ды сӕрхъӕн дӕ, Павел! Фырахуырӕй дӕ зонд фӕцыд». 25 Павел дзуапп радта: «Нӕ, кадджын Фест, ӕз сӕрхъӕн нӕ дӕн, фӕлӕ зӕгъын, раст зондӕй чи цӕуы, ӕцӕгады уыцы ныхӕстӕ. 26 Ӕппӕт уыдӕтты тыххӕй зоны, ӕз ныфсджынӕй кӕй разы дзурын, уыцы паддзах. Мӕн нӕ уырны, ӕмӕ уыцы хъуыддӕгтӕй исты басусӕг уа паддзахӕй, уымӕн ӕмӕ фӕскъуым не 'рцыдысты. 27 Паддзах Агриппа, пехуымпартыл ӕууӕндыс ӕви нӕ? Кӕй сыл ӕууӕндыс, уый ӕз зонын». 28 Агриппа загъта Павелӕн: «Ӕгӕр тагъд мӕ нӕ чырыстон кӕныс?» 29 Павел загъта: «Хуыцауӕн лӕгъстӕ кӕнын, цӕмӕй тагъд уа ӕви ӕрӕгмӕ уа, ӕрмӕст ды нӕ, фӕлӕ мӕм абон чи хъусы, уыдон сеппӕт дӕр суой мӕ хуызӕттӕ, ӕрмӕст ӕнӕ рӕхыстӕй». 30 Павел афтӕ куы загъта, уӕд паддзах, бӕстӕйы хицау, Вереникӕ, стӕй семӕ чи бадт, уыдон иууылдӕр сыстадысты. 31 Фӕхибар сты ӕмӕ кӕрӕдзийӕн дзырдтой, ацы адӕймаг амарыны кӕнӕ йӕ ахӕстоны дарыны аккагӕй ницы ракодта, зӕгъгӕ. 32 Агриппа загъта Фестӕн: «Кесӕры тӕрхон куы не 'рдомдтаид, уӕд ацы адӕймагӕн уаид суӕгъдгӕнӕн».

Апостолты хъуыддӕгтӕ 27

1 Италимӕ кӕй цӕудзыстӕм, уыцы уынаффӕ куы рахастӕуыд, уӕд Павелы ӕмӕ ма ӕндӕр ахӕстыты радтой кесӕры ӕфсӕддон хайы сӕдӕйыхицау Юлийы къухмӕ. 2 Мах сбадтыстӕм адрамитаг науы, ӕмӕ араст стӕм. Нау йӕ фӕндагыл хъуамӕ баздӕхтаид Асийы наулӕууӕнтӕм. Немӕ уыдис македониаг Аристарх, Фессалоникӕйы сахарӕй. 3 Дыккаг бон бахӕццӕ стӕм Сидонмӕ. Юлий Павелмӕ ракаст хорз цӕстӕй, радта йын йӕ хӕлӕрттӕм ацӕуыны фадат, цӕмӕй йыл баузӕлой. 4 Уырдыгӕй араст стӕм дарддӕр; Кипры чъылдыммӕ бамбӕхстыстӕм дымгӕйӕ, уымӕн ӕмӕ дымдта нӕ ныхмӕ. 5 Килики ӕмӕ Памфилийы рӕзты ахызтыстӕм денджызыл, ӕмӕ бахӕццӕ стӕм ликиаг сахар Миртӕмӕ. 6 Уым сӕдӕйыхицау ссардта, Италимӕ чи цыд, ахӕм александриаг нау, ӕмӕ нӕ сбадын кодта ууыл. 7 Дзӕвгар рӕстӕг цыдыстӕм сындӕг, ӕмӕ тыххӕйты бахӕццӕ стӕм Книдмӕ. Дымгӕ нӕ размӕ цӕуын кӕй нӕ уагъта, уымӕ гӕсгӕ ахызтыстӕм Салмоны рӕзты ӕмӕ, Криты чъылдыммӕ дымгӕйӕ бамбӕхсгӕйӕ, цыдыстӕм дарддӕр. 8 Зынтӕй цыдыстӕм былмӕ ӕввахс, ӕмӕ бацыдыстӕм, Хорз Наулӕууӕнтӕ чи хуыйны, уырдӕм, Ласейы сахармӕ хӕстӕг. 9 Уӕдмӕ рацыд бирӕ рӕстӕг, ком дарыны афон дӕр аивгъуыдта, ӕмӕ науы цӕуын сси тӕссаг. Уымӕ гӕсгӕ Павел дзырдта: 10 «Хорз адӕм, ӕз уынын, фӕндагыл нӕ баййафдзӕн бӕллӕх, ӕмӕ стыр зиан ӕрцӕудзӕн ӕрмӕст уӕзӕгтыл ӕмӕ науыл нӕ, фӕлӕ нӕхиуыл дӕр». 11 Фӕлӕ сӕдӕйыхицау, Павел цы дзырдта, уымӕй наутӕрӕгыл ӕмӕ науы хицауыл фылдӕр ӕууӕндыд. 12 Наулӕууӕн зымӕгиуатӕн кӕй нӕ бӕззыд, уымӕ гӕсгӕ сӕ фылдӕр фӕндон хастой, цӕмӕй нау гӕнӕн ӕмӕ амалӕй бацӕуа критаг наулӕууӕн Финикмӕ, ӕмӕ зымӕг арвитӕм уым. Уыцы наулӕууӕн кӕсы хуссар-ныгуылӕнмӕ ӕмӕ цӕгат-ныгуылӕнмӕ. 13 Хуссайраг уадымс куы радымдта, уӕд ӕнхъӕлдтой ӕмӕ сӕ цы фӕндыди, уый сӕ баййӕфта; систой науӕнгуыр ӕмӕ ацыдысты Криты былгӕрӕтты рӕзты. 14 Фӕлӕ рӕхджы сакъадахырдыгӕй ӕрбадымдта тыхджын уад, «цӕгат-скӕсӕйнаг» чи хуыйны, уый. 15 Уад ӕрцахста науы, ӕмӕ нау йӕ ныхмӕ цӕуын нал фӕрӕзта. Нӕ бон базыдтам, ӕмӕ нӕ дымгӕ хаста, кӕдӕм ӕй фӕндыд, уырдӕм. 16 Мах февзӕрдыстӕм, Кавда кӕй хонынц, уыцы сакъадахы цур. Сакъадах нӕ иуцасдӕр бахызта дымгӕйӕ, ӕмӕ нын тыххӕйты бантыст науы бӕлӕгъ бахъахъхъӕнын. 17 Куы йӕ систой, уӕд бӕндӕнтӕй кӕрӕдзимӕ балвӕстой науы фӕрстӕ. Дымгӕ науы цӕмӕй Сиртмӕ ма ахӕсса ӕмӕ уым тӕнӕджы ма ныссӕдза, уый тыххӕй ӕруагътой наупӕлӕз, ӕмӕ нӕ дымгӕ хаста, кӕдӕм ӕй фӕндыд, уырдӕм. 18 Уад нӕ ӕгъатырӕй кӕй хоста, уымӕ гӕсгӕ дыккаг бон райдыдтой денджызмӕ уӕзӕгтӕ калын. 19 Ӕртыккаг бон та сӕхи къухтӕй науы кусӕнгӕрзтӕ ракалдтой. 20 Бирӕ бонты дӕргъы нӕдӕр хур, нӕдӕр стъалытӕ кӕй нӕ зындысты, уад дӕр кӕй нал ӕнцад, уымӕ гӕсгӕ фервӕзыныл нӕ зӕрдӕ нал дардтам. 21 Адӕм хойраджы хъӕстӕ рагӕй нӕ уыдысты. Павел рацыд сӕ размӕ ӕмӕ загъта: «Хорз адӕм, хъуыди мӕ коммӕ бакӕсын ӕмӕ Криты баззайын. Уӕд ацы бӕллӕх нӕ бавзӕрстаиккам ӕмӕ ныл зиан не 'рцыдаид. 22 Ныр та уӕм сидын, цӕмӕй уӕ ныфс ма асӕтта. Сымахӕй иу адӕймаг дӕр нӕ фесӕфдзӕн; ӕрмӕстдӕр нау фесӕфдзӕн. 23 Ӕз Кӕй дӕн ӕмӕ Кӕмӕн кусын, уыцы Хуыцауы зӕд мӕм фӕзынд дысон 24 Ӕмӕ мын загъта: „Ма тӕрс, Павел! Ды хъуамӕ ӕрлӕууай кесӕры раз, ӕмӕ дын Хуыцау балӕвар кодта, демӕ чи цӕуы, уыдоны иууылдӕр". 25 Уӕдӕ ма тӕрсут, хорз адӕм, ӕз Хуыцауыл ӕууӕндын: куыд мын загъдӕуыд, афтӕ уыдзӕн. 26 Уад нӕ хъуамӕ раппара цавӕрдӕр сакъадахмӕ». 27 Цыппӕрдӕсӕм ӕхсӕв нӕ уылӕнтӕ Адриатикӕйы денджызы куы хастой, уӕд ӕмбисӕхсӕвмӕ хӕстӕг наудзаутӕ банкъардтой, зӕхмӕ кӕй ӕввахс кӕнӕм, уый. 28 Куы сбарстой, уӕд денджыз разынд ссӕдз ивазны ӕрфӕн; стӕй та йӕ чысыл дарддӕр сбарстой, ӕмӕ уыди фынддӕс ивазны ӕрфӕн. 29 Науы къӕдзӕхтӕм куы бахӕсса, уымӕй тӕссаг кӕй уыд, уымӕ гӕсгӕ фӕстӕрдыгӕй ӕруагътой цыппар науӕнгуыры, ӕмӕ куывтой боны ӕрцыды тыххӕй. 30 Наудзаутӕ хъавыдысты науӕй алидзынмӕ, ӕмӕ разырдыгӕй науӕнгуыр ӕрӕппарыны ӕфсонӕй бӕлӕгъ ӕруагътой денджызмӕ. 31 Уӕд Павел сӕдӕйыхицауӕн ӕмӕ ӕфсӕддонтӕн загъта: «Уыдон науыл куы нӕ баззайой, уӕд уын фервӕзӕн нӕй». 32 Уӕд ӕфсӕддонтӕ акъуырдтой бӕлӕгъы бӕттӕнтӕ, ӕмӕ бӕлӕгъ ныххаудта денджызмӕ. 33 Боныцъӕхты размӕ Павел сеппӕтмӕ дӕр хатыд бахӕрыны тыххӕй: «Цыппӕрдӕсӕм бон сымах стут ахӕм зын уавӕрты, ӕмӕ хойраджы хъӕстӕ нӕ фестут. 34 Уымӕ гӕсгӕ уӕм хатын, цӕмӕй бахӕрат – уый ахъаз уыдзӕн уӕ фервӕзынӕн. Иу ӕрду дӕр уӕ никӕй сӕрӕй фӕхъӕудзӕн». 35 Уыцы ныхӕсты фӕстӕ Павел райста дзул, сеппӕты раз арфӕ ракодта Хуыцауӕн, асаста йӕ ӕмӕ райдыдта хӕрын. 36 Уӕд сеппӕт дӕр фӕныфсджын сты ӕмӕ бахордтой. 37 Науыл ӕдӕппӕтӕй уыдыстӕм дыууӕсӕдӕ ӕвдай ӕхсӕз адӕймаджы. 38 Куы бафсӕстысты, уӕд нау фӕрогдӕр кӕныны тыххӕй мӕнӕу ракалдтой денджызмӕ. 39 Куы сбон, уӕд цы зӕхх у, уый нӕ базыдтой, фӕлӕ федтой змисбыл донбакӕлӕн. Бауынаффӕ кодтой гӕнӕн ӕмӕ амалӕй нау уырдӕм батӕрын ӕмӕ йӕ змисы ныссадзын. 40 Акъуырдтой науӕнгуыртӕ ӕмӕ сӕ ныууагътой денджызы, суӕгъд кодтой науыздахӕнтӕ, систой раззаг наупӕлӕз дымгӕмӕ ӕмӕ сӕ ных сарӕзтой былмӕ. 41 Фӕлӕ бахаудтой донбылмӕ, ӕмӕ нау ныссагъди тӕнӕджы. Йӕ фындз аныгъуылд зӕххы ӕмӕ нал змӕлыд, йӕ гуыр та йын уылӕнтӕ дӕрӕн кодтой. 42 Ӕфсӕддонтӕм фӕзынд ахӕстыты амарыны фӕнд, куыд мачи сӕ аленк кӕна ӕмӕ алидза, афтӕ. 43 Фӕлӕ сӕдӕйыхицауы фӕндыди Павелы фервӕзын кӕнын, ӕмӕ сӕ нӕ бауагъта. Бардзырд радта, цӕмӕй ленк кӕнын чи зыдта, уыдон ӕппӕты разӕй ныггӕпп ласой денджызмӕ ӕмӕ былмӕ рахизой; 44 Иннӕтӕ та исты амӕлттӕ кӕной – чи фӕйнӕгыл, чи науы гӕбазыл. Афтӕмӕй неппӕт дӕр раирвӕзтыстӕм зӕхмӕ.

Апостолты хъуыддӕгтӕ 28

1 Зӕхмӕ куы раирвӕзтыстӕм, уӕд базыдтам, сакъадах Мелит кӕй хуыйны, уый. 2 Сакъадахы цӕрджытӕ разындысты тынг адӕмуарзон. Уарыд ӕмӕ уыд уазал; уымӕ гӕсгӕ арт бандзӕрстой ӕмӕ неппӕты дӕр бахуыдтой. 3 Павел ӕрбахаста пыхсытӕ, ӕмӕ сӕ артыл куы ӕвӕрдта, уӕд калм тӕвдмӕ рабырыд пыхсытӕй ӕмӕ йын ацауындзӕг йӕ цонгыл. 4 Сакъадахы цӕрджытӕ йын йӕ цонгыл калмы ауыгъдӕй куы федтой, уӕд кӕрӕдзийӕн дзырдтой: «Ацы адӕймаг, ӕнӕгуырысхойӕ, лӕгмар у. Денджызӕй фервӕзт, фӕлӕ йын рӕстдзинады ус-хуыцау удӕгасӕй баззайыны бар нӕ дӕтты». 5 Фӕлӕ Павел калмы йӕ цонгӕй ӕрцагъта артмӕ, ӕмӕ йын нӕ разиан кодта. 6 Адӕм ӕнхъӕлмӕ кастысты, Павел ныррӕсидзӕн, кӕнӕ дзыхъмард фӕуыдзӕн, зӕгъгӕ. Фӕлӕ бирӕ куы фенхъӕлмӕ кастысты ӕмӕ йын калм кӕй ницы разиан кодта, уый куы федтой, уӕд ӕм ракастысты ӕндӕр цӕстӕй ӕмӕ дзырдтой, уый хуыцау у, зӕгъгӕ. 7 Уырдӕм хӕстӕг уыдысты сакъадахы хицау Публийы хӕдзар ӕмӕ зӕххытӕ. Публий нӕ суазӕг кодта, ӕмӕ нын ӕртӕ боны уыди рӕдау фысым. 8 Публийы фыд сади тӕвдниз ӕмӕ гуыбыннизӕй. Павел ӕм бацыд, бакуывта, ӕрӕвӕрдта йыл йӕ къухтӕ ӕмӕ йӕ сдзӕбӕх кодта. 9 Уыцы цауы фӕстӕ сакъадахы иннӕ рынчынтӕ дӕр цыдысты Павелмӕ ӕмӕ-иу сдзӕбӕх сты. 10 Тынг нӕ сбуц кодтой, ӕмӕ куы цыдыстӕм, уӕд нын немӕ нывӕрдтой, цы нӕ хъуыди, уыдӕттӕ. 11 Ӕртӕ мӕйы фӕстӕ ацыдыстӕм, «Диоскуртӕ» кӕй хуыдтой, уыцы александриаг науы. Уый зымӕгиуат кодта сакъадахыл. 12 Бацыдыстӕм Сиракузтӕм, ӕмӕ дзы баззадыстӕм ӕртӕ боны. 13 Уырдыгӕй ацыдыстӕм, ӕмӕ бахӕццӕ стӕм Ригимӕ. Иннӕ бон радымдта хуссайраг дымгӕ, ӕмӕ дыккаг бон уыдыстӕм Путеолы. 14 Уым ссардтам ӕфсымӕрты ӕмӕ сӕм сӕ курдиатмӕ гӕсгӕ баззадыстӕм авд боны, стӕй араст стӕм Роммӕ. 15 Ромаг ӕфсымӕртӕ фехъуыстой мах тыххӕй ӕмӕ нӕ размӕ рацыдысты Аппийы Фӕз ӕмӕ Ӕртӕ Фысымуаты цурмӕ. Павел сӕ куы федта, уӕд арфӕ ракодта Хуыцауӕн ӕмӕ йӕ зӕрдӕ барухс. 16 Роммӕ куы ӕрцыдыстӕм, уӕд Павелӕн радтой йӕ хъахъхъӕнӕг ӕфсӕддонимӕ хицӕнӕй ӕрцӕрыны бар. 17 Ӕртӕ боны фӕстӕ Павел ӕрхуыдта дзырддзӕугӕ иудейты. Куы ӕрӕмбырд сты, уӕд сын загъта: «Ӕфсымӕртӕ, нӕ адӕмы ныхмӕ ӕмӕ нӕ фыдӕлты ӕгъдӕутты ныхмӕ ӕвзӕрӕй ницы сарӕзтон, фӕлӕ мӕ ӕрцахстой Иерусалимы ӕмӕ мӕ радтой ромӕгты къухтӕм. 18 Уыдон ӕркастысты мӕ хъуыддагмӕ ӕмӕ мӕ хъавыдысты рауадзынмӕ, уымӕн ӕмӕ мӕлӕты тӕрхон рахӕссыны аккаг цы уа, ахӕмӕй ницы ракодтон. 19 Фӕлӕ иудейтӕ ныхмӕ кӕй уыдысты, уымӕ гӕсгӕ ӕрдомдтон кесӕры тӕрхон – ӕндӕр гӕнӕн мын нӕ уыд. Мӕ адӕммӕ исты азым ӕрхӕссыны охыл, мыййаг, нӕ бакодтон афтӕ. 20 Ӕппӕт уыдӕтты тыххӕй ӕрбахуыдтон сымах – фенон уӕ ӕмӕ аныхас кӕнон уемӕ, уымӕн ӕмӕ ацы рӕхысӕй Израилы зӕрдӕдарӕны сӕраппонд баст дӕн». 21 Уыдон ын загътой: «Мах дӕу тыххӕй Иудейӕйӕ фыстӕджытӕ дӕр нӕ райстам, ӕрцӕуӕг ӕфсымӕртӕй дӕр нын дӕу тыххӕй ӕвзӕрӕй ничи ницы фехъусын кодта ӕмӕ загъта. 22 Фӕлӕ мах фӕнды дӕ зондахасты тыххӕй дӕхицӕй фехъусын. Уымӕн ӕмӕ алы ран дӕр уыцы ахуырады ныхмӕ кӕй дзурынц, уый нын зындгонд у». 23 Иудейтӕ баныхас кодтой Павелимӕ, цы бон фембӕлдзысты, уый тыххӕй; ӕмӕ кӕм ӕрбынатон, уырдӕм ӕрцыдысты ноджы фылдӕрӕй. Павел сын райсомӕй изӕрмӕ дзырдта Хуыцауы Паддзахады тыххӕй, Моисейы Ӕгъдауӕй ӕмӕ пехуымпарты чингуытӕй сын хаста ӕвдисӕйнӕгтӕ Йесойы тыххӕй, ӕмӕ афтӕмӕй архайдта сӕ баууӕндын кӕныныл. 24 Иуты баууӕндын кодта йӕ ныхасӕй, иннӕты та нӕ уырныдта. 25 Иу хъуыды сӕм нӕ уыд, ӕмӕ ацыдысты, Павел афтӕ куы загъта, уӕд: «Исай-пехуымпары дзыхӕй Сыгъдӕг Уд хорз загъта уӕ фыдӕлтӕн: 26 „Ацу ацы адӕммӕ ӕмӕ зӕгъ: фехъусдзыстут, ӕмӕ нӕ бамбардзыстут, кӕсдзыстут, ӕмӕ нӕ фендзыстут. 27 Уымӕн ӕмӕ ацы адӕмӕн сӕ зӕрдӕ ныддур, хъусӕй зынтӕй хъусынц, сӕхгӕдтой сӕ цӕстытӕ, цӕмӕй цӕстӕй ма феной, хъусӕй ма фехъусой, зӕрдӕйӕ ма бамбарой, ма раздӕхой Мӕнмӕ ӕмӕ сӕ Ӕз ма сдзӕбӕх кӕнон". 28 Уӕдӕ уын зындгонд уӕд: Хуыцау адӕймаджы кӕй ирвӕзын кӕны, уыцы уац муртаттӕн ӕрвыст у; хъусгӕ дӕр ӕй уыдон фӕкӕндзысты». 29 [Павел афтӕ куы загъта, уӕд иудейтӕ ацыдысты, кӕрӕдзиимӕ тынг быцӕу кӕнгӕйӕ.] 30 Павел дыууӕ азы фӕцард, йӕхӕдӕг цы цӕрӕнуат баххуырста, уым. Чидӕриддӕр ӕм цыдис, уыдоныл-иу сӕмбӕлди зӕрдиагӕй. 31 Ныфсджынӕй ӕмӕ ӕнӕкъуылымпыйӕ дзырдта Хуыцауы Паддзахады ӕмӕ Хицау Йесо Чырыстийы тыххӕй.

Ромӕгтӕм 1

1 Павелӕй, Хуыцау кӕй ӕрхуыдта ӕмӕ Йӕ фарны уац адӕммӕ фӕхӕссын кӕмӕн бафӕдзӕхста, Йесо Чырыстийы уыцы цагъар ӕмӕ апостолӕй. 2 Уыцы фарны уацӕй Хуыцау Йӕ пехуымпарты фӕрцы развӕлгъау зӕрдӕ ӕвӕрдта Сыгъдӕг Фысты. 3 Уый у фарны уац Йӕ Фырты тыххӕй. Туг ӕмӕ стӕгӕй Уый уыди Давиды байзӕддаг, 4 Фӕлӕ Хуыцауы Фырт кӕй у, уый равдыстӕуыд Йӕ хъаруйӕ, сыгъдӕггӕнӕг Уды архайдӕй, мӕрдтӕй райгасӕй; Уый у нӕ Хицау Йесо Чырысти. 5 Йесойы фӕрцы ӕз схайджын дӕн хорзӕхӕй – сдӕн апостол, Йӕ номы сӕраппонд ӕппӕт адӕмты Хуыцауыл ӕууӕндынмӕ ӕмӕ Йӕ коммӕ кӕсынмӕ хонӕг. 6 Сымах дӕр, Йесо Чырыстийыл ӕууӕндынмӕ хуындтытӕ, уыцы адӕмтӕй стут. 7 Ӕз фыссын, Хуыцау кӕй бауарзта ӕмӕ ӕрхуыдта, Ромы уыцы сыгъдӕджытӕн сеппӕтмӕ дӕр. Хорзӕх ӕмӕ уын фарн нӕ Фыд Хуыцауӕй ӕмӕ Хицау Йесо Чырыстийӕ. 8 Фыццаджыдӕр Йесо Чырыстийы фӕрцы арфӕ кӕнын мӕ Хуыцауӕн уеппӕты тыххӕй дӕр, уымӕн ӕмӕ ӕгас дунейӕн уӕ уырнындзинад зындгонд у. 9 Йӕ Фырты фарны уац адӕммӕ зӕрдиагӕй хӕссынӕй цы Хуыцауӕн кусын, Уый мын ӕвдисӕн у: куы фӕкувын, уӕд сымах ӕдзух мӕ зӕрдыл фӕлӕуут, 10 Ӕмӕ иудадзыг курын, кӕд Хуыцауӕн фӕндиаг у, уӕд мын, ӕппынфӕстаг, куыд бантыса сымахмӕ фӕцӕуын. 11 Уӕ фенынмӕ тынг бӕллын, Сыгъдӕг Уд мын цы ралӕвар кодта, уымӕй уын куыд бахай кӕнон ӕмӕ куыд сфидар уат. 12 Ома, кӕрӕдзи сфидар кӕнӕм иумӕйаг уырнындзинадӕй, уӕ уырнындзинадӕй ӕмӕ мӕ уырнындзинадӕй. 13 Мӕн фӕнды, ӕфсымӕртӕ, цӕмӕй сымах зонат, ӕз уӕм бирӕ хӕттыты кӕй хъавыдтӕн ӕрцӕуынмӕ, фӕлӕ къуылымпытӕ ӕвзарын абонмӕ. Ӕз бӕллын, иннӕ адӕмтӕм мын куыд бантыст, афтӕ мын сымахмӕ дӕр иуцасдӕр куыд бантыса. 14 Ӕз бердзентӕй дӕр, талынг адӕмтӕй дӕр, зондджынтӕй дӕр ӕмӕ ӕнӕфендтӕй дӕр хӕс дарын. 15 Уӕдӕ мӕн зӕрдиагӕй фӕнды сымахмӕ дӕр, Ромы цӕрджытӕм, фарны уац хӕссын. 16 Фарны уац кӕй хъусын кӕнын, уый худинагыл нӕ нымайын. Уымӕн ӕмӕ уый алы уырнӕгӕн дӕр, фыццаджыдӕр иудейӕн, стӕй муртатӕн дӕр, у Хуыцауы ирвӕзындӕттӕг тых. 17 Фарны уац куыд ӕргом кӕны, афтӕмӕй Хуыцау адӕймаджы раст кӕны, куы Йыл баууӕнды, ӕрмӕстдӕр уӕд. Сыгъдӕг Фыст дӕр афтӕ зӕгъы: «Рӕстгӕнӕг уырнындзинады фӕрцы цӕрдзӕн». 18 Уӕларвӕй ӕргомгонд цӕуы: Хуыцауы ӕцӕгад фыдӕхӕй ссӕндӕг адӕм сӕ ӕнӕхуыцау миты ӕмӕ хӕрам хъуыддӕгты тыххӕй баййафдзысты Хуыцауы азар. 19 Хуыцауы тыххӕй цы базонӕн ис, уый сын ӕргом у, уымӕн ӕмӕ сын ӕй Хуыцау раргом кодта. 20 Ӕмӕ сӕхи ницӕмӕй сраст кӕндзысты, уымӕн ӕмӕ цӕстӕй фенӕн кӕмӕн нӕй, Хуыцауы уыцы мыггагмӕйы тых ӕмӕ Йӕ ӕрдзыхъӕд дуне сфӕлдисынӕй фӕстӕмӕ бӕлвырд сты, Хуыцау цы сфӕлдыста, уыдӕттыл куы хъуыды кӕнай, уӕд. 21 Хуыцауы бӕргӕ базыдтой, фӕлӕ Хуыцауӕн цы кад ӕмбӕлы, ахӕм кад Ын не скодтой ӕмӕ Дзы бузныг нӕ уыдысты. Сӕ зонд ныззыгъуыммӕ ӕмӕ се 'нӕрхъуыды зӕрдӕтӕ нытталынг сты. 22 Сӕхи зондджынтӕ хонынц, фӕлӕ сӕ зонд фӕцыди, 23 Ӕнӕмӕлгӕ Хуыцаумӕ кувыны бӕсты кувынц, мӕлӕты бар кӕуыл цӕуы, уыцы адӕймагмӕ гӕсгӕ, мӕргътӕм гӕсгӕ, цыппӕркъахыг цӕрӕгойтӕм ӕмӕ хилджытӕм гӕсгӕ конд фӕлгонцтӕм. 24 Уымӕ гӕсгӕ сӕ Хуыцау ныууагъта сӕ зӕрдӕты чъизи мондӕгты ӕвджид, ӕмӕ сӕхӕдӕг ӕлгъаг кӕнынц сӕ буар. 25 Уыдон Хуыцауы ӕцӕгад баивтой мӕнгдзинадӕй, кувынц ӕмӕ кусынц, кӕй сфӕлдыстӕуыд, уыдонӕн, Сфӕлдисӕгӕн та нӕ кувынц – Уый арфӕгонд уӕд мыггагмӕ! Амен. 26 Уый тыххӕй сӕ Хуыцау ныууагъта ӕлгъаг мондӕгты ӕвджид. Сӕ сылгоймӕгтӕ лӕгимӕ цӕрыны ӕрдзон ӕгъдау баивтой, ӕрдзон чи нӕу, ахӕм ӕгъдауӕй. 27 Афтӕ нӕлгоймӕгтӕ дӕр ныууагътой сылгоймӕгтимӕ цӕрыны ӕрдзон ӕгъдау ӕмӕ мондаг кӕнынц кӕрӕдзимӕ. Нӕлгоймӕгтӕ фӕцалх сты ӕлгъаг митыл нӕлгоймӕгтимӕ, ӕмӕ кӕй фехӕлдысты, уымӕй сӕхи ӕртардтой аккаг ӕфхӕрдмӕ. 28 Хуыцауы базонын сӕ кӕй нӕ бафӕндыд, уый тыххӕй сӕ Хуыцау бафтыдта ӕнаккаг митӕ кӕныны зыгъуыммӕ зондыл, 29 Ӕмӕ ӕфтынц алыхуызон тӕригъӕдты, сты фыдзӕрдӕ, кӕрӕф, хӕлӕг, лӕгмартӕ, ӕмхиц хъаугъатӕм, сайынмӕ, хӕраммӕ, хахуырмӕ, 30 Сты маргӕвзаг, Хуыцау сын у ӕнӕуынон, сты налат, сӕрыстыр, хиппӕлой, фыдбылыз саразынмӕ дӕсны, ныййарджытӕн ӕгоммӕгӕс, 31 Ӕнӕмбаргӕтӕ, ӕууӕнкхортӕ, саузӕрдӕ, ӕгъатыр. 32 Кӕд ӕмӕ зонынц, ахӕм митӕ чи кӕны, уыдон Хуыцауы раст тӕрхонмӕ гӕсгӕ мӕлӕты аккаг кӕй сты, уый, уӕддӕр уыцы митӕм канд сӕхӕдӕг не сты ӕмхиц, фӕлӕ ма райгонд сты, ахӕм митыл ӕфтыд чи у, уыдонӕй дӕр.

Ромӕгтӕм 2

1 Уӕдӕ чидӕриддӕр ма у, иннӕмӕн тӕрхон куы кӕнай, уӕд дӕхи дӕр ницӕмӕй сраст кӕндзынӕ. Иннӕмӕн тӕрхон кӕнгӕйӕ, тӕрхон кӕныс дӕхицӕн дӕр. Уымӕн ӕмӕ иннӕмӕн цӕй тыххӕй тӕрхон кӕныс, дӕхӕдӕг дӕр уый гӕнӕг дӕ. 2 Мах та зонӕм: ахӕм митӕ чи кӕны, уыдонӕн Хуыцау стӕрхон кӕндзӕн ӕцӕгадмӕ гӕсгӕ. 3 Ау, афтӕ ӕнхъӕл дӕ, ӕмӕ дӕхӕдӕг цы митӕ кӕныс, ахӕм миты тыххӕй иннӕмӕн тӕрхонгӕнӕг куы уай, уӕд Хуыцауы тӕрхонӕй фервӕздзынӕ? 4 Ӕви Хуыцау хӕрзаудӕг, барон ӕмӕ бирӕбыхсаг кӕй у, уый ницӕмӕ дарыс ӕмӕ, Хуыцау Йӕ хорзӕхмӕ гӕсгӕ дӕу фӕсмонмӕ кӕй хоны, уый не 'мбарыс? 5 Фӕлӕ хивӕнд кӕй дӕ ӕмӕ дӕ ӕрфӕсмон кӕй нӕ фӕнды, уымӕй дӕхӕдӕг карздӕр кӕныс де 'фхӕрд азары бонмӕ – Хуыцау Йӕхи ӕнӕхӕрам тӕрхонгӕнӕгӕй куы раргом кӕна, уӕдмӕ. 6 Хуыцау уӕд алкӕмӕн дӕр ратдзӕн йӕ хъуыддӕгтӕм гӕсгӕ. 7 Иудадзыг хорз хъуыддӕгты лӕудӕй намысмӕ, кадмӕ ӕмӕ ӕнӕмӕлгӕ уӕвынмӕ чи тырны, уыдонӕн ратдзӕн мыггагмӕйы цард. 8 Хиуарзон, ӕцӕгадӕн ӕгоммӕгӕс ӕмӕ тӕригъӕдмӕ ӕмхиц чи у, уыдоныл та Хуыцау ныккалдзӕн Йӕ азар. 9 Хӕрам митӕм ӕмхиц адӕймаджы бакӕндзӕн удхары ӕмӕ хъизӕмары хай: раздӕр иудейы, стӕй та – муртаты. 10 Хорз чи кӕны, уыдонӕй та алкӕмӕн дӕр ратдзӕн намыс, кад ӕмӕ фарн: раздӕр иудейӕн, стӕй та – муртатӕн. 11 Уымӕн ӕмӕ Хуыцау никӕй хъулон кӕны. 12 Иудейаг Ӕгъдау кӕмӕн нӕ уыд, афтӕмӕй тӕригъӕд чи ракодта, уыдон амӕлдзысты, фӕлӕ сын Ӕгъдау тӕрхонгӕнӕг нӕ уыдзӕн. Ӕгъдау кӕмӕн уыд, афтӕмӕй тӕригъӕд чи ракодта, уыдон та тӕрхонгонд уыдзысты Ӕгъдаумӕ гӕсгӕ. 13 Уымӕн ӕмӕ Хуыцау сраст кӕндзӕн, Ӕгъдау чи хъусы, уыдоны нӕ, фӕлӕ Ӕгъдау ӕххӕстгӕнджыты. 14 Муртаттӕн Ӕгъдау нӕй, фӕлӕ сӕ мидхъӕлӕсмӕ гӕсгӕ Ӕгъдауы домӕнтӕ куы феххӕст кӕнынц, уӕд сӕхӕдӕг сӕхицӕн ӕгъдау сты, кӕд сын Ӕгъдау нӕй, уӕддӕр. 15 Ӕмӕ уымӕй ӕвдисынц, Ӕгъдауы домӕнтӕ сӕ зӕрдӕты фыст кӕй сты, уый. Афтӕ кӕй у, ууыл дзурӕг у се 'фсарм, уымӕн ӕмӕ сӕ куы зылын фӕкӕнынц сӕ хъуыдытӕ, куы – раст. 16 Ӕппӕт уыдӕттӕ рабӕрӕг уыдзысты, Йесо Чырыстийы фӕрцы Хуыцау адӕмы сусӕг хъуыдытӕн ӕмӕ хъуыддӕгтӕн тӕрхон куы кӕна, уӕд. Афтӕ зӕгъы, ӕз цы фарны уац хъусын кӕнын, уый. 17 Ныр та дӕумӕ дзурын, дӕхи иудей хонӕг. Ныфс дӕ ис Ӕгъдауӕй; дӕхицӕй ныббуц дӕ, цыма Хуыцау дӕумӕ ӕндӕр цӕстӕй кӕсы; 18 Хуыцауӕн фӕндиаг цы у, уый зоныс; Ӕгъдау дӕ сахуыр кодта, хуыздӕр цы у, уый ӕмбарыныл; 19 Фидарӕй ӕууӕндыс, цыма куырмытӕн фӕндагамонӕг дӕ, талынджы цӕрджытӕн – рухс, 20 Ӕнӕзӕндтӕн – зондамонӕг, сывӕллӕттӕн – ахуыргӕнӕг; ӕппӕт зонынад ӕмӕ ӕцӕгад дын Ӕгъдауы сты. 21 Уӕдӕ, иннӕйы ахуыр кӕнгӕйӕ, дӕхи цӕуылнӕ ахуыр кӕныс? 22 Нӕ давыныл куы ахуыр кӕныс, уӕд дӕхӕдӕг цӕмӕн давыс? Зӕгъыс «ма хӕт» ӕмӕ хӕтыс. Ӕлгъ кӕныс гуымирытыл, ӕмӕ къахыс кувӕндӕттӕ. 23 Ӕгъдауӕй буц дӕ, фӕлӕ Ӕгъдау кӕй халыс, уымӕй ӕгад кӕныс Хуыцауы. 24 Сыгъдӕг Фыст сымах тыххӕй зӕгъы: «Уӕ аххосӕй фауынц муртаттӕ Хуыцауы». 25 Ӕгъдаумӕ гӕсгӕ куы цӕрай, уӕд сунӕт пайда у. Фӕлӕ кӕд Ӕгъдауы сӕрты ахызтӕ, уӕд дӕ сунӕт ницыуал давы. 26 Уӕдӕ сунӕт чи нӕу, уый Ӕгъдауы домӕнтӕ куы ӕххӕст кӕна, уӕд ӕнӕсунӕтӕй дӕр Хуыцауы цӕсты сунӕтгонд нӕ уыдзӕн, ӕви? 27 Уӕдӕ йӕ буарыл сунӕт кӕмӕн нӕй, афтӕмӕй Ӕгъдау чи ӕххӕст кӕны, уый рахӕсдзӕн тӕрхон дӕуӕн, Ӕгъдауы сӕрты ахизӕгӕн, кӕд дын фыст Ӕгъдау ис ӕмӕ сунӕтгонд дӕ, уӕддӕр. 28 Ӕрмӕст ӕддаг бакастӕй иудей чи у, уый ӕцӕг иудей нӕу, стӕй ӕрмӕст буарыл цы сунӕт ис, ӕцӕг сунӕт уый нӕу. 29 Фӕлӕ иудей зӕрдӕйӕ чи у, уый у ӕцӕг иудей; зӕрдӕйы сунӕт – уый у ӕцӕг сунӕт. Уыцы сунӕт фыст ӕгъдаумӕ гӕсгӕ нӕу, фӕлӕ Хуыцауы Удӕй у. Ахӕм адӕймагӕй ӕппӕлынц адӕм нӕ, фӕлӕ Хуыцау.

Ромӕгтӕм 3

1 Уӕдӕ иудейтӕ иннӕтӕй цӕмӕй хуыздӕр уавӕры сты, кӕнӕ цы пайда дӕтты сунӕт? 2 Стыр пайда алцӕмӕй дӕр. Уӕлдайдӕр та сын Хуыцау Йӕ ныхас сӕ бӕрны кӕй бакодта, уымӕй. 3 Уӕдӕ куыд? Кӕд иуӕй-иутӕ Хуыцауыл иузӕрдион нӕ разындысты, уӕд уый тыххӕй Хуыцау иузӕрдион нал уыдзӕн? 4 Ницы хуызы! Хуыцау Йӕ дзырд нӕ сайы, адӕмӕй та алчидӕр мӕнгард у, Сыгъдӕг Фыст куыд зӕгъы, афтӕ: «Ды раст кӕй дӕ, уый равдисдзысты Дӕ ныхӕстӕ, ӕмӕ тӕрхон куы хӕссай, уӕд фӕуӕлахиз уыдзынӕ». 5 Кӕд не 'взӕр митӕй Хуыцауы рӕстдзинад ӕргом кӕны, уӕд цы зӕгъӕм? Афтӕ зӕгъӕм: «Хуыцау раст нӕ уыдзӕн, Йӕ азар куы ныккала, уӕд»? (Адӕймаг куыд хъуыды кӕны, афтӕ дзурын.) 6 Ницы хуызы! Уӕдӕ Хуыцау дунейӕн ӕндӕр хуызы куыд хъуамӕ стӕрхон кӕна? 7 Кӕд ӕз иузӕрдион кӕй нӕ дӕн, уый Хуыцауы иузӕрдиондзинад тынгдӕр ӕргом кӕны ӕмӕ Хуыцауы намысыл ӕфтауы, уӕд ма мын тӕригъӕдджынау тӕрхон кӕнын цӕмӕн хъӕуы? 8 Уӕдӕ ӕвзӕр митӕ кӕнӕм, мыййаг, цӕмӕй хорз расайой? Цыма ӕз ууыл ахуыр кӕнын, ахӕм даутӕ дӕр мыл мысынц чидӕртӕ. Уыдоны баййафдзӕн, цы тӕрхоны аккаг сты, уый. 9 Уӕдӕ куыд? Мах иннӕтӕй хуыздӕр уавӕры стӕм? Ӕппындӕр нӕ. Мах ныридӕгӕн равдыстам, иудейтӕ дӕр ӕмӕ муртаттӕ дӕр тӕригъӕды дӕлбар кӕй сты, уый. 10 Сыгъдӕг Фыст дӕр афтӕ зӕгъы: «Иунӕг рӕстгӕнӕг дӕр нӕй, 11 Нӕй ӕмбаргӕ адӕймаг, Хуыцауы ничи агуры. 12 Сеппӕт дӕр ныууагътой Хуыцауы, сты ницӕйаг; хорз чи ракӕна, иу ахӕм адӕймаг нӕй. 13 Сӕ хъуыр – гом ингӕн, сайынц се 'взагӕй, сӕ былтыл – калмы марг. 14 Сӕ дзыхтӕй сын ӕлгъыст ӕмӕ масты йеддӕмӕ ницы фехъусдзынӕ. 15 Сты цӕттӕ ӕвӕстиатӕй туг ныккалынмӕ. 16 Кӕмдӕриддӕр сты халӕг, семӕ ӕрхӕссынц фыдбылыз, 17 Фидыдӕй цӕрын нӕ зонынц. 18 Хуыцауӕй нӕ тӕрсынц». 19 Фӕлӕ мах зонӕм: Ӕгъдау цыдӕриддӕр зӕгъы, уый йӕ дӕлбар адӕмӕн зӕгъы. Ӕмӕ хи сраст кӕныны тыххӕй йӕ дзых байгом кӕнын никӕй бон бауыдзӕн – ӕгас дуне Хуыцауы раз дзуапп дӕтдзӕн. 20 Ӕгъдау ӕххӕст кӕнынӕй Хуыцауы раз ничи сраст уыдзӕн. Уымӕн ӕмӕ тӕригъӕд цы у, уый Ӕгъдауы руаджы базонӕм. 21 Фӕлӕ, Ӕгъдаумӕ нӕ кӕсгӕйӕ, ныр байгом, Ӕгъдау ӕмӕ пехуымпартӕ кӕй тыххӕй дзурынц, Хуыцауимӕ бафидауыны уыцы фӕндаг. 22 Ӕппӕт уырнджыты дӕр Хуыцау раст кӕны Йесо Чырыстийыл ӕууӕндыны фӕрцы, хъулон Ын сӕ никӕцы у. 23 Уымӕн ӕмӕ сеппӕт дӕр бафтыдысты тӕригъӕды ӕмӕ Хуыцауы намысӕй ӕнӕхай сты, 24 Фӕлӕ Хуыцау Йӕ хорзӕхмӕ гӕсгӕ сеппӕты дӕр лӕвар раст кӕны Йесо Чырыстийы фӕрцы – Чырысти сын дӕтты сӕрибар. 25 Хуыцау Ӕй снысан кодта фидауынгӕнӕг нывондӕн, цӕмӕй Йӕ Туджы фӕрцы барст ӕрцӕуой, чи Йыл ӕууӕнды, уыдоны тӕригъӕдтӕ. Уымӕй Хуыцау равдыста Йӕ рӕстдзинад – бирӕбыхсаг кӕй у, уымӕ гӕсгӕ адӕмы нӕ бафхӕрдта сӕ раздӕры тӕригъӕдты тыххӕй, 26 Цӕмӕй абон равдиса Йӕ рӕстдзинад: Йӕхӕдӕг раст у ӕмӕ раст кӕны Йесойыл ӕууӕндджыты. 27 Уӕдӕ цӕмӕй раппӕлӕм нӕхицӕй? Ницӕмӕй. Кӕцы ӕгъдау нӕ дӕтты ӕппӕлыны бар? Хъуыддӕгтӕ домӕг ӕгъдау? Нӕ, уырнындзинад домӕг ӕгъдау. 28 Уымӕн ӕмӕ мах афтӕ зӕгъӕм: адӕймаг Ӕгъдау ӕххӕст кӕна ӕви нӕ – уырнындзинады фӕрцы сраст вӕййы. 29 Ау, Хуыцау ӕрмӕст иудейты Хуыцау у, муртатты Хуыцау та нӕу? Кӕй зӕгъын ӕй хъӕуы, муртатты Хуыцау дӕр у. 30 Уымӕн ӕмӕ Хуыцау иу у, ӕмӕ растыл банымайдзӕн ӕппӕт уырнджыты – сунӕтгӕндты дӕр, стӕй сунӕтгонд чи нӕу, уыцы уырнджыты дӕр. 31 Уӕдӕ Ӕгъдау уырнындзинадӕй сафӕм? Ницы хуызы! Сафгӕ нӕ, фӕлӕ йӕ фидар кӕнӕм.

Ромӕгтӕм 4

1 Уӕдӕ цы зӕгъӕм нӕ дзуттаг адӕмы фыдӕл Авраамы тыххӕй? Цы йын бантыст? 2 Кӕд Авраам йӕ хъуыддӕгты фӕрцы сраст, уӕд йӕ бон уыд йӕхицӕй раппӕлын, ӕрмӕст Хуыцауы раз нӕ. 3 Сыгъдӕг Фыст цы зӕгъы? «Авраам баууӕндыди Хуыцауыл, ӕмӕ йӕ уый тыххӕй Хуыцау банымадта рӕстгӕнӕгыл». 4 Фӕллойгӕнӕгӕн йӕ мызд лӕварыл нымад нӕу, фӕлӕ йӕ райсы, кӕй йын ӕмбӕлы, уый тыххӕй. 5 Чи ницы сарӕзта, уый та, тӕригъӕдджынты Чи раст кӕны, Ууыл куы ӕууӕнда, уӕд ӕй йӕ уырнындзинады фӕрцы Хуыцау нымайы рӕстгӕнӕгыл. 6 Йӕ хъуыддӕгтӕм ын нӕ кӕсгӕйӕ, Хуыцау рӕстгӕнӕгыл кӕй банымайы, уыцы адӕймаджы Давид дӕр тӕхудиаг хоны: 7 «Тӕхудиаг сты, сӕ ӕнӕуаг митӕ кӕмӕн ныббарстӕуыд ӕмӕ Хуыцау кӕй тӕригъӕдтӕ нал ӕрымысдзӕн, уыдон. 8 Тӕхудиаг у, Хицау аххосджыныл кӕй нӕ банымайа, уыцы тӕригъӕдджын адӕймаг». 9 Тӕхудиаг кӕй хоны: сунӕтгонды ӕви ӕнӕсунӕтгонды? Мах дзурӕм: Хуыцау Авраамы йӕ уырнындзинады фӕрцы банымадта рӕстгӕнӕгыл. 10 Кӕд ӕй банымадта? Сунӕты фӕстӕ ӕви сунӕты размӕ? Сунӕты фӕстӕ нӕ, фӕлӕ сунӕты размӕ. 11 Йӕ сунӕт ууыл дзурӕг уыди, ӕмӕ йӕ Хуыцау рӕстгӕнӕгыл сунӕты размӕ банымадта, уымӕн ӕмӕ Йыл Авраам ӕууӕндыди. Ӕмӕ сунӕтгонд чи нӕу, ӕппӕт уыцы уырнджытӕн Авраам сси сӕ фыдӕл, цӕмӕй уыдоны дӕр Хуыцау банымайа рӕстгӕнджытыл. 12 Стӕй сунӕтгӕндтӕй дӕр сӕ фыдӕл сси, Авраамы фӕндагыл чи цӕуы ӕмӕ нӕ фыдӕл Авраам йӕ сунӕты размӕ Хуыцауыл куыд ӕууӕндыд, афтӕ Йыл чи ӕууӕнды, ӕрмӕст уыдонӕн. 13 Дуне уыдоны хай кӕй бауыдзӕн, уымӕй Авраамӕн ӕмӕ йӕ байзӕддагӕн зӕрдӕ бавӕрдӕуыд Ӕгъдаумӕ гӕсгӕ нӕ, фӕлӕ Хуыцау Авраамы йӕ уырнындзинадмӕ гӕсгӕ рӕстгӕнӕгыл кӕй банымадта, уый тыххӕй. 14 Дуне кӕд Ӕгъдау ӕххӕстгӕнджыты хай бауыдзӕн, уӕд уырнындзинад дзӕгъӕлы у, Хуыцауы зӕрдӕвӕрд дӕр ницы у. 15 Уымӕн ӕмӕ Ӕгъдау ӕркӕны Хуыцауы фыдӕхмӕ; Ӕгъдау куы нӕ уа, уӕд та йӕ халгӕ дӕр ничи кӕны. 16 Уӕдӕ уыцы зӕрдӕвӕрд уырнындзинадмӕ гӕсгӕ у, цӕмӕй Хуыцауы лӕвар уа ӕмӕ ӕнӕмӕнг аххӕсса Авраамы ӕппӕт байзӕддӕгтыл – Ӕгъдауы дӕлбар чи у, ӕрмӕст уыдоныл нӕ, фӕлӕ Авраамы уырнындзинад кӕмӕ ис, уыдоныл дӕр. Авраам у неппӕты фыдӕл, 17 Сыгъдӕг Фыст куыд зӕгъы, афтӕ: «Ӕз дӕ скодтон бирӕ адӕмты фыдӕл». Бирӕ адӕмты фыдӕл Авраам у Хуыцауы раз – Кӕуыл баууӕндыди, мӕрдты Чи ӕгас кӕны, ӕмӕ цы нӕй, уый цардмӕ Чи ракӕны, уыцы Хуыцауы раз. 18 Кӕд ӕй ныфс нал уыди, уӕддӕр Авраам, зӕрдӕ даргӕйӕ, баууӕндыд ӕмӕ уый тыххӕй сси бирӕ адӕмты фыдӕл, Хуыцау ын куыд загъта, афтӕ: «Тынг бирӕ уыдзысты дӕ байзӕддӕгтӕ». 19 Авраам ӕмбӕрста: цӕуы йыл фондзыссӕдз азы бӕрц, йӕ буар сӕдых, Саррӕ нал ныййардзӕни, фӕлӕ уӕддӕр йӕ уырнындзинад нӕ фӕцудыдта. 20 Хуыцау Йӕ дзырдӕн хицау кӕй разындзӕн, ууыл нӕ фӕгуырысхо, йӕ уырнындзинад дзы бауагъта тых, ӕмӕ Авраам скад кодта Хуыцауӕн, 21 Уымӕн ӕмӕ фидарӕй ӕууӕндыд, Хуыцауӕн Йӕ зӕрдӕвӕрд сӕххӕст кӕнын Йӕ бон кӕй у, ууыл. 22 Уымӕ гӕсгӕ йӕ Хуыцау «банымадта рӕстгӕнӕгыл». 23 Ӕниу, канд Авраамы тыххӕй нӕу фыст, Хуыцау ӕй банымадта рӕстгӕнӕгыл, зӕгъгӕ, 24 Фӕлӕ мах тыххӕй дӕр. Хуыцау рӕстгӕнджытыл банымайдзӕн мах дӕр, уымӕн ӕмӕ ӕууӕндӕм нӕ Хицау Йесойы мӕрдтӕй Райгасгӕнӕгыл. 25 Йесойы нӕ тӕригъӕдты тыххӕй рардӕуыди мӕлӕтмӕ ӕмӕ райгас Хуыцауы раз мах срасты охыл.

Ромӕгтӕм 5

1 Уӕдӕ сраст стӕм уырнындзинады руаджы, ӕмӕ нӕ Хицау Йесо Чырысти мах бафидауын кодта Хуыцауимӕ. 2 Нӕ уырнындзинады фӕрцы нын Чырысти фӕндаг байгом кодта, хайджын кӕмӕй стӕм, уыцы хорзӕхмӕ. Ӕмӕ Хуыцауы намысӕй нӕ хай кӕй райсдзыстӕм, ууыл дарӕм нӕ зӕрдӕ, ӕмӕ нӕ цинӕн нал и кӕрон. 3 Ӕмӕ нӕ цин ӕрмӕст ууыл нӕу, фӕлӕ нӕ тухӕнтыл дӕр, уымӕн ӕмӕ зонӕм, тухӕнтӕ бавзаргӕйӕ кӕй свӕййӕм фӕразон, 4 Фӕразонӕй свӕййӕм фӕлвӕрд, фӕлвӕрд куы свӕййӕм, уӕд уый расайы зӕрдӕдарӕн. 5 Зӕрдӕдарӕн та къӕмдзӕстыггаг нӕу, уымӕн ӕмӕ махӕн лӕ- вӕрд Чи у, уыцы Сыгъдӕг Уды фӕрцы Хуыцау нӕ зӕрдӕтӕ байдзаг кодта Йӕ уарзтӕй. 6 Лӕмӕгъ ма куы уыдыстӕм, уӕд нысангонд ӕмгъуыдыл Чырысти амард тӕригъӕдджынты сӕраппонд. 7 Рӕстгӕнӕджы тыххӕй исчи йӕ цард ратдзӕн, уый дызӕрдыггаг у. Чи зоны, искӕмӕ разына йӕ хӕрзгӕнӕджы сӕраппонд амӕлыны ӕхсар. 8 Фӕлӕ нӕ Хуыцау кӕй уарзы, уый равдыста, тӕригъӕдджынтӕ ма куы уыдыстӕм, уӕд Чырысти мах сӕраппонд кӕй амард, уымӕй. 9 Кӕд абон Йесойы Туджы фӕрцы сраст стӕм, уӕд нӕ цас фылдӕр ныфс ис, Йӕ фӕрцы Хуыцауы фыдӕхӕй кӕй фервӕздзыстӕм, уымӕй! 10 Уымӕн ӕмӕ кӕд раздӕр Хуыцауы знӕгтӕ уыдыстӕм ӕмӕ Йемӕ бафидыдтам Йӕ Фырты мӕлӕты фӕрцы, уӕд нӕ цас фылдӕр ныфс ис, мах, Хуыцауимӕ фидыд адӕм, кӕй фервӕздзыстӕм Йӕ Фырты царды фӕрцы! 11 Уый нӕ, фӕлӕ Хуыцауимӕ кӕй стӕм, ууыл цин кӕнӕм нӕ Хицау Йесо Чырыстийы фӕрцы – Уый нӕ бафидауын кодта Хуыцауимӕ. 12 Иу адӕймаджы аххосӕй дунемӕ ӕрцыд тӕригъӕд, ӕмӕ уыцы тӕригъӕдимӕ – мӕлӕт. Афтӕмӕй мӕлӕт сбарджын ӕппӕт адӕмыл, уымӕн ӕмӕ сеппӕт дӕр тӕригъӕды бафтыдысты. 13 Тӕригъӕд Ӕгъдауы агъоммӕ дӕр дунейы уыди; фӕлӕ ӕгъдау куы нӕ уа, уӕд тӕригъӕд тӕригъӕдыл нымад нӕ цӕуы. 14 Фӕлӕ мӕлӕт Адамы заманӕй Моисейы заманмӕ дӕр ӕлдариуӕг кодта, Адам кӕй ракодта, уыцы тӕригъӕды чи нӕ бафтыд, уыдоныл дӕр. Адам та у, фидӕны Чи хъуамӕ ӕрцыдаид, Уымӕн Йӕ развӕлгонц. 15 Фӕлӕ тӕригъӕд ӕмӕ хорзӕх иу не сты. Кӕд иу адӕймаджы тӕригъӕд бирӕтӕн мӕлӕт ӕрхаста, уӕд уыцы тӕригъӕды зианӕй цас тыхджындӕр сты Хуыцауы хорзӕх ӕмӕ, иу Адӕймаджы, Йесо Чырыстийы, хорзӕхмӕ гӕсгӕ бирӕтӕ кӕй райстой, уыцы лӕвар! 16 Ӕмӕ иу адӕймаджы тӕригъӕд цы расайдта, Хуыцауы хорзӕх уый хуызӕн нӕу. Иу тӕригъӕд ӕркодта карз тӕрхонмӕ, Хуыцауы хорзӕх та бирӕ тӕригъӕдтӕй раст кӕны. 17 Кӕд иу адӕймаджы аххосӕй иу тӕригъӕды тыххӕй мӕлӕт паддзах сси, уӕд иу Адӕймаджы, Йесо Чырыстийы, руаджы та цӕрдзысты ӕмӕ паддзахиуӕг кӕндзысты, Хуыцау йӕ хорзӕх рӕдауӕй кӕмӕн дӕтты ӕмӕ лӕвар кӕй раст кӕны, уыдон. 18 Уӕдӕ иу адӕймаджы тӕригъӕд ӕппӕт адӕмӕн карз тӕрхон куыд расайдта, афтӕ иу Адӕймаджы раст хъуыддаг раст кӕны ӕппӕт адӕмы ӕмӕ сын дӕтты цард. 19 Иу адӕймаджы ӕгоммӕгӕсӕй бирӕтӕ тӕригъӕдджынтӕ куыд систы, афтӕ иу Адӕймаджы коммӕгӕсӕй бирӕтӕ суыдзысты рӕстгӕнджытӕ. 20 Ӕгъдау та ӕрцыди тӕригъӕды бабирӕйӕн, фӕлӕ тӕригъӕд куы бабирӕ, уӕд Хуыцауы хорзӕхӕн ныккӕнӕнтӕ нал уыд, 21 Цӕмӕй, тӕригъӕд куыд паддзахиуӕг кодта ӕмӕ адӕмӕн мӕлӕт куыд хаста, афтӕ паддзахиуӕг кӕна Хуыцауы хорзӕх дӕр, нӕ Хицау Йесо Чырыстийы фӕрцы раст кӕна адӕймаджы ӕмӕ дӕтта мыггагмӕйы цард.

Ромӕгтӕм 6

1 Уӕдӕ цы зӕгъӕм? Цӕмӕй Хуыцауы хорзӕхыл бафта, уый тыххӕй тӕригъӕдджынтӕй хъуамӕ баззайӕм? Ницы хуызы! 2 Мах амардыстӕм тӕригъӕдӕн, уӕд ма тӕригъӕдимӕ куыд хъуамӕ цӕрӕм? 3 Ӕви ныл Йесо Чырыстиимӕ баиуы охыл куы саргъуыдӕуыд, уӕд Йемӕ кӕй амардыстӕм, уый нӕ зонут? 4 Уӕдӕ аргъауыны рӕстӕг мах амардыстӕм ӕмӕ ныгӕд ӕрцыдыстӕм Йемӕ, цӕмӕй Чырысти Йӕ Фыды намысджын хъаруйӕ мӕрдтӕй куыд райгас, афтӕ мах дӕр райгас уӕм ӕмӕ цӕрӕм ног цардӕй. 5 Ӕмӕ кӕд мах Чырыстийау амардыстӕм ӕмӕ афтӕмӕй баиу стӕм Йемӕ, уӕд мӕрдтӕй дӕр райгас уыдзыстӕм, Уый куыд райгас, афтӕ, ӕмӕ баиу уыдзыстӕм Йемӕ. 6 Мах зонӕм, раздӕр цы уыдыстӕм, уыцы адӕймаджы Йемӕ байтыгъдӕуыд нӕ тӕригъӕдджын ӕрдзыхъӕд басӕттынӕн ӕмӕ тӕригъӕды цагъарӕй фервӕзынӕн. 7 Уымӕн ӕмӕ чи амард, уый ссӕрибар тӕригъӕдӕй. 8 Ӕмӕ кӕд иугӕр Чырыстиимӕ амардыстӕм, уӕд ӕууӕндӕм, цӕргӕ дӕр Йемӕ кӕй кӕндзыстӕм, ууыл. 9 Мах зонӕм, мӕрдтӕй райгасы фӕстӕ Чырысти кӕй нал амӕлдзӕн, уый: мӕлӕты бон Ыл нал цӕуы. 10 Уымӕн ӕмӕ куы амард, уӕд амард тӕригъӕдӕн иу хатт ӕмӕ мыггагмӕ. Ныр та удӕгас у, ӕмӕ цӕры Хуыцауӕн. 11 Афтӕ сымах дӕр тӕригъӕдӕн уӕхи нымайут мардыл, Хуыцауӕн та удӕгасыл, Йесо Чырыстиимӕ кӕй стут, уый фӕрцы. 12 Уӕдӕ тӕригъӕд уӕ мӕлӕтон буарӕн паддзах ма уӕд, цӕмӕй буары чъизи мондӕгты коммӕ ма кӕсат. 13 Ӕмӕ уӕ буары уӕнгтӕ ма раттут тӕригъӕдӕн – ӕвзӕр хъуыддӕгтӕ аразыны хотыхӕн, фӕлӕ сымах мӕрдтӕй кӕй райгас стут, уымӕ гӕсгӕ уӕхи бакӕнут Хуыцауы ӕвджид ӕмӕ Йын рӕстады хотыхӕн раттут уӕ уӕнгтӕ. 14 Тӕригъӕд уын ӕлдар ма уӕд, уымӕн ӕмӕ сымах ӕгъдауы дӕлбар не стут, фӕлӕ Хуыцауы хорзӕхы дӕлбар. 15 Уӕдӕ цы кӕнӕм? Ӕгъдауы дӕлбар нӕ, фӕлӕ Хуыцауы хорзӕхы дӕлбар кӕй стӕм, уый тыххӕй хъуамӕ тӕригъӕды бафтӕм? Ницы хуызы! 16 Цагъарау кӕй коммӕ бакастыстут, уымӕн йӕ цагъартӕ кӕй стут, уый нӕ зонут, ӕви? Тӕригъӕдӕн цагъартӕ куы уат, уӕд амӕлдзыстут, Хуыцауӕн коммӕгӕс цагъартӕ куы уат, уӕд уӕ сраст кӕндзӕн. 17 Бузныг Хуыцауӕй, сымах тӕригъӕдӕн уыдыстут цагъартӕ, фӕлӕ ныр зӕрдиагӕй коммӕгӕс стут, уӕ зӕрдӕйы уын цы ахуырад нывӕрдӕуыд, уымӕн. 18 Сымах суӕгъд стут тӕригъӕдӕй ӕмӕ систут рӕстады цагъартӕ. 19 Адӕймаджы хуымӕтӕг ӕвзагӕй пайда кӕнын, уымӕн ӕмӕ сымах лӕмӕгъ стут нырма. Уӕ буары уӕнгтӕ тӕригъӕдӕн кӕддӕр цагъартӕ куыд скодтат, цӕмӕй ӕнӕуаг ӕмӕ чъизи митӕ кӕнат, афтӕ ныр та уӕ буары уӕнгтӕ рӕстадӕн скӕнут цагъартӕ, цӕмӕй цӕрат сыгъдӕг цардӕй. 20 Уымӕн ӕмӕ тӕригъӕды цагъартӕ куы уыдыстут, уӕд сымахыл рӕстады бар нӕ цыд. 21 Ӕмӕ уын уый цы ӕрхаста? Сымах ӕмхиц уыдыстут, ныртӕккӕ ӕфсӕрмы кӕй тыххӕй кӕнут, ӕппынфӕстаг мӕлӕт чи ӕрхӕссы, ахӕм митӕм. 22 Фӕлӕ тӕригъӕдӕй суӕгъд стут ӕмӕ систут Хуыцауы цагъартӕ; ныртӕккӕ уӕ хӕрзиуӕг у сыгъдӕг цард, ӕппынфӕстаг та райсдзыстут мыггагмӕйы цард. 23 Уымӕн ӕмӕ тӕригъӕдӕн йӕ мызд у мӕлӕт, Хуыцауы лӕвар та – мыггагмӕйы цард нӕ Хицау Йесо Чырыстиимӕ удӕнгомӕй.

Ромӕгтӕм 7

1 Ӕфсымӕртӕ, – Ӕгъдау чи зоны, ӕз уыдонмӕ дзурын, – адӕймаг удӕгас куы уа, Ӕгъдауы бар ыл ӕрмӕст уӕд кӕй цӕуы, уый нӕ зонут, ӕви? 2 Зӕгъӕм, моймӕдзыд сылгоймаджы йӕ удӕгас мойыл ӕгъдау бӕтты. Йӕ мой куы амӕла, уӕд та ссӕрибар вӕййы, йӕ мойыл ӕй чи бӕтты, ӕгъдауы уыцы домӕнтӕй. 3 Йӕ мой удӕгас куы уа, афтӕмӕй ӕндӕрӕй куы смой кӕна, уӕд ыл хӕтаджы ном сбады. Йӕ мой куы амӕла, уӕд ӕгъдауӕй сӕрибар у, ӕмӕ ӕндӕрӕй куы смой кӕна, уӕд хӕтагыл нымад нӕу. 4 Сымах дӕр афтӕ, ме 'фсымӕртӕ, Чырыстийы мӕлӕты фӕрцы амардыстут Ӕгъдауӕн, цӕмӕй уат Ӕндӕры – мӕрдтӕй Сыстӕджы адӕм, ӕмӕ кусат Хуыцауӕн. 5 Мах нӕ тӕригъӕдджын ӕрдзыхъӕдӕн коммӕгӕс куы уыдыстӕм, уӕд Ӕгъдау цы чъизи мондӕгтӕ райхъал кодта, уыдон цардысты нӕ мидӕг ӕмӕ куыстой мӕлӕтӕн. 6 Ныр мах амардыстӕм, кӕй уацары уыдыстӕм, ӕппӕт уыдӕттӕн, ӕмӕ афтӕмӕй ссӕрибар стӕм Ӕгъдауӕй, цӕмӕй Хуыцауӕн кусӕм рагон фыстмӕ гӕсгӕ нӕ, фӕлӕ Сыгъдӕг Уд кӕй дӕтты, уыцы ног цардӕй. 7 Уӕдӕ ныр цы зӕгъӕм? Ау, Ӕгъдауӕй цӕуы тӕригъӕд? Ницы хуызы! Фӕлӕ Ӕгъдау куы нӕ уаид, уӕд тӕригъӕд цы у, уый ӕз нӕ зыдтаин. Уымӕн ӕмӕ Ӕгъдау куы нӕ фӕдзӕхстаид «Ма бабӕлл», уӕд нӕ зыдтаин, бабӕллын цы у, уый. 8 Фӕлӕ тӕригъӕдӕн фӕдзӕхсты фӕрцы фӕци фадат, ӕмӕ мӕм райгуырын кодта алы мондӕгтӕ. Тӕригъӕд та ӕнӕ Ӕгъдауӕй мард у. 9 Ӕз кӕддӕр цардтӕн, ӕмӕ мын ӕгъдау нӕ уыди; фӕлӕ фӕдзӕхст куы фӕзынд, уӕд тӕригъӕд ӕрӕгас, 10 Ӕз та амардтӕн. Афтӕмӕй цард чи хъуамӕ раттаид, уыцы фӕдзӕхст мын фӕци мӕлӕты хос. 11 Уымӕн ӕмӕ тӕригъӕдӕн фадат фӕци фӕдзӕхсты фӕрцы, асайдта ӕмӕ амардта мӕн уыцы фӕдзӕхстӕй. 12 Уӕдӕ Ӕгъдау Хуыцауӕй у, фӕдзӕхст дӕр Хуыцауӕй у – раст ӕмӕ фӕрнджын фӕдзӕхст. 13 Уӕдӕ мын уыцы фарн мӕлӕт ӕрхаста? Ницы хуызы! Уый тӕригъӕд сарӕзта – фарны фӕрцы мын ӕрхаста мӕлӕт, ӕмӕ уымӕй равдыста йӕхи. Афтӕмӕй фӕдзӕхсты руаджы сбӕлвырд, тӕригъӕд куыд тӕригъӕдджын у, уый. 14 Мах зонӕм, Ӕгъдау уӕларвон кӕй у, уый; ӕз та тӕригъӕдджын ӕрдзыхъӕды цагъар дӕн, тӕригъӕдӕн уӕйгонд. 15 Цы кӕнын, уый не 'мбарын. Цы мӕ фӕнды, уый нӕ кӕнын, фӕлӕ кӕнын, ме сӕфт цӕмӕй уынын, уыдӕттӕ. 16 Кӕд цы кӕнын, уый кӕнын мӕ нӕ фӕнды, уӕд бӕлвырд у: ӕз разы дӕн, Ӕгъдау фӕрнджын кӕй у, ууыл. 17 Ӕмӕ уыдӕттӕ ныр ӕз нал кӕнын, фӕлӕ сӕ кӕны, мӕ мидӕг цы тӕригъӕд цӕры, уый. 18 Ӕз зонын: мӕ мидӕг, ома, мӕ тӕригъӕдджын ӕрдзыхъӕды, хорзӕй ницы цӕры. Уымӕн ӕмӕ мӕн фӕнды хорз кӕнын, фӕлӕ мӕ бон нӕу. 19 Цы хорз кӕнын мӕ фӕнды, уый бӕсты кӕнын, цы ӕвзӕр кӕнын мӕ нӕ фӕнды, уый. 20 Цы мӕ нӕ фӕнды, кӕд уый кӕнын, уӕд ӕй ӕз нӕ кӕнын, фӕлӕ йӕ кӕны, мӕ мидӕг чи цӕры, уыцы тӕригъӕд. 21 Уӕдӕ мын ахӕм ӕгъдау раргом: хорз кӕнын мӕ куы бафӕнды, уӕд мӕ бон вӕййы ӕрмӕстдӕр ӕвзӕр кӕнын. 22 Уымӕн ӕмӕ мӕ уд цин кӕны Хуыцауы Ӕгъдауыл, 23 Фӕлӕ ӕз уынын: мӕ туджы ис ӕндӕр ӕгъдау. Уыцы ӕгъдау тох кӕны, мӕ зонд цы ӕгъдауы фарс у, уый ныхмӕ; ӕмӕ ӕз свӕййын, мӕ туджы цы тӕригъӕдджын ӕгъдау ис, уымӕн йӕ уацайраг. 24 Ӕвӕдза, цы мӕгуыр адӕймаг дӕн! Чи мӕ фервӕзын кӕндзӕн, мӕлӕт мын цы тӕригъӕдджын ӕрдзыхъӕд хӕссы, уымӕй? 25 Хуыцауы йеддӕмӕ ничи – бузныг Дзы дӕн нӕ Хицау Йесо Чырыстийы руаджы. Уӕдӕ ӕз уыциу адӕймаг дӕн, фӕлӕ мӕ зондӕй кусын Хуыцауы ӕгъдауӕн, тӕригъӕдджын ӕрдзыхъӕдӕй та – тӕригъӕды ӕгъдауӕн.

Ромӕгтӕм 8

1 Уӕдӕ Йесо Чырыстиимӕ чи ис, уыдон тӕрхонгонд никуы уыдзысты. 2 Сыгъдӕг Уды царддӕттӕг ӕгъдау Йесо Чырыстийы руаджы дӕу ссӕрибар кодта тӕригъӕды ӕмӕ мӕлӕты ӕгъдауӕй. 3 Адӕймаджы ӕрдзыхъӕд ӕй кӕй слӕмӕгъ кодта, уый аххосӕй Ӕгъдауӕн цы нӕ бантыст, уый сарӕзта Хуыцау – рарвыста Йӕ Фырты. Фырт райста адӕймаджы тӕригъӕдджын ӕрдзыхъӕды хуызӕн ӕрдзыхъӕд; ӕмӕ Йӕ ӕрхастӕуыд нывондӕн тӕригъӕды тыххӕй. Афтӕмӕй Хуыцау тӕрхон рахаста, адӕймаджы ӕрдзыхъӕды цы тӕригъӕд цӕры, уымӕн, 4 Цӕмӕй Ӕгъдау цы рӕстдзинад домы, уый сӕххӕст уа нӕ царды – мах цӕрӕм тӕригъӕдджын ӕрдзыхъӕдӕн коммӕгӕсӕй нӕ, фӕлӕ Сыгъдӕг Удӕн коммӕгӕсӕй. 5 Тӕригъӕдджын ӕрдзыхъӕдӕн коммӕгӕстӕ тырнынц, сӕ ӕрдзыхъӕды цы фӕнды, уымӕ; Удӕн коммӕгӕстӕ та тырнынц, Уды цы фӕнды, уымӕ. 6 Тӕригъӕдджын ӕрдзыхъӕды цы фӕнды, уымӕ тырнын мӕлӕт у; Уды цы фӕнды, уымӕ тырнын та – цард ӕмӕ фарн. 7 Тӕригъӕдджын ӕрдзыхъӕды цы фӕнды, уымӕ тырнӕг Хуыцауӕн знаг у, уымӕн ӕмӕ Хуыцауы ӕгъдауӕн нӕ сӕтты, стӕй йӕ бон басӕттын дӕр нӕу. 8 Уӕдӕ тӕригъӕдджын ӕрдзыхъӕдӕн коммӕгӕстӕн Хуыцауы зӕрдӕ балхӕнын сӕ бон нӕу. 9 Сымах та уӕ тӕригъӕдджын ӕрдзыхъӕдӕн коммӕгӕс не стут, фӕлӕ – Удӕн, кӕд Хуыцауы Уд уӕ зӕрдӕты цӕры, уӕд. Кӕд искӕмӕ Чырыстийы Уд нӕй, уӕд уый та Чырыстийы нӕу. 10 Фӕлӕ кӕд Чырысти уӕ зӕрдӕты ис, уӕд уын Уд дӕтты цард, Хуыцауимӕ фидыд кӕй стут, уый тыххӕй, кӕд уӕ буар тӕригъӕды аххосӕй мӕлӕтон у, уӕддӕр. 11 Йесойы мӕрдтӕй Райгасгӕнӕджы Уд кӕд уӕ зӕрдӕты цӕры, уӕд Чырыстийы мӕрдтӕй Райгасгӕнӕг райгас кӕндзӕн уӕ мӕлӕтон буӕрттӕ дӕр, уӕ зӕрдӕты Чи цӕры, Йӕ уыцы Уды руаджы. 12 Уӕдӕ, ӕфсымӕртӕ, мах нӕ тӕригъӕдджын ӕрдзыхъӕдӕй хӕс нӕ дарӕм, ӕмӕ йын коммӕгӕсӕй хъуамӕ ма цӕрӕм. 13 Кӕд тӕригъӕдджын ӕрдзыхъӕдӕн коммӕгӕсӕй цӕрут, уӕд амӕлдзыстут; фӕлӕ кӕд Уды хъаруйӕ тӕригъӕдджын хъуыддӕгтӕ марут, уӕд цӕрдзыстут. 14 Уымӕн ӕмӕ Хуыцауы Уды коммӕ чи кӕсы, уыдон иууылдӕр Хуыцауы хъӕбултӕ сты. 15 Цы Удӕй схайджын стут, уый ахӕм нӕу, ӕмӕ цагъартӕ уат ӕмӕ та ногӕй тасы цӕрат. Сымах схайджын стут, Хуыцауы хъӕбултӕ Кӕй руаджы систӕм, ахӕм Удӕй, ӕмӕ Йӕ фӕрцы хъӕлӕсыдзагӕй фӕзӕгъӕм: «Аввӕ, нӕ Фыд!» 16 Уыцы Уд нӕ удимӕ ӕвдисӕн лӕууы, мах Хуыцауы хъӕбултӕ кӕй стӕм, уымӕн. 17 Ӕмӕ кӕд Йӕ хъӕбултӕ стӕм, уӕд Хуыцаумӕ цы хорзӕхтӕ ис, уыдонӕй райсдзыстӕм, исгӕ та сӕ Чырыстиимӕ ракӕндзыстӕм. Ӕмӕ кӕд иугӕр Йемӕ тухӕн ӕвзарӕм, уӕд нын хай уыдзӕн Йӕ намысӕй. 18 Ӕз фидарӕй ӕууӕндын: цы намысӕй схайджын уыдзыстӕм, уымӕн йӕ разы ницы сты абоны тухӕнтӕ. 19 Хуыцау кӕй сфӕлдыста, ӕппӕт уыцы дуне зӕрдиагӕй ӕнхъӕлмӕ кӕсы, уыцы намысимӕ Йӕ хъӕбулты Хуыцау кӕд равдисдзӕн, уымӕ. 20 Уымӕн ӕмӕ Хуыцау кӕй сфӕлдыста, уыцы дуне бафтыд ӕнӕпайда цардыл; барвӕндонӕй йӕ нӕ равзӕрста, фӕлӕ йӕ ахӕм цардыл бафтауын Хуыцауы бафӕндыд. Уӕддӕр бауынаффӕ кодта, 21 Кӕй сфӕлдыста, уыцы дуне кӕй фервӕздзӕн мӕлӕты ӕфсондзӕй ӕмӕ схайджын уыдзӕн, Хуыцау Йӕ хъӕбултӕн цы намыс ратдзӕн, уымӕй. 22 Мах зонӕм: Хуыцау кӕй сфӕлдыста, ӕппӕт уыцы дуне абон дӕр ма хъӕрзы ӕмӕ хъизӕмар кӕны арӕг сылгоймагау. 23 Ӕмӕ ӕрмӕст дуне нӕ, фӕлӕ мах нӕхӕдӕг дӕр хъӕрзӕм хинымӕр. Мах райстам Хуыцауы хорзӕхтӕн сӕ фыццаг – Сыгъдӕг Уд, ӕмӕ ӕнхъӕлмӕ кӕсӕм, Хуыцау нӕ Йӕхицӕн хъӕбултӕ кӕд сараздзӕн ӕмӕ нӕ буар мӕлӕтӕй кӕд фервӕздзӕн, уымӕ. 24 Мах уыцы зӕрдӕдарӕнимӕ фервӕзтыстӕм. Зӕрдӕ цӕуыл дарӕм, уый куы уынӕм, уӕд зӕрдӕдарӕн нал у. Адӕймаг цы уына, ууыл ма йӕ зӕрдӕ куыд хъуамӕ дара? 25 Фӕлӕ цы нӕма федтам, ууыл нӕ зӕрдӕ куы дарӕм, уӕд ӕм ӕнхъӕлмӕ кӕсӕм фӕразонӕй. 26 Ӕмӕ нӕм Сыгъдӕг Уд дӕр ӕрцӕуы ӕххуысмӕ, уымӕн ӕмӕ мах стӕм лӕмӕгъ ӕмӕ нӕ зонӕм, цӕй тыххӕй ӕмӕ куыд кувын хъӕуы, уый. Уӕд Уд мах тыххӕй фӕкуры Хуыцауӕй, ӕвзагыл чи нӕ бады, ахӕм уынӕргъынӕй. 27 Нӕ зӕрдӕтӕ Чи уыны, Уымӕн та зындгонд сты Уды хъуыдытӕ, уымӕн ӕмӕ сыгъдӕджыты тыххӕй фӕкуры, Хуыцауӕн фӕндон куыд у, афтӕ. 28 Ӕмӕ мах зонӕм, Хуыцауы чи уарзы, Йӕ уынаффӕмӕ гӕсгӕ кӕй ӕрхуындӕуыд, уыдонӕн алцыдӕр фӕкӕны сӕ хорзӕхӕн. 29 Уымӕн ӕмӕ Хуыцау рагагъоммӕ кӕй базыдта, уыдонӕн снысан кодта Йӕ Фырты хуызӕн уӕвын, цӕмӕй бирӕ ӕфсымӕрты ӕхсӕн Йӕ Фырт уа фыццаггуырд. 30 Ӕмӕ рагацау кӕй снысан кодта, уыдоны ӕрхуыдта, ӕмӕ кӕй ӕрхуыдта, уыдоны сраст кодта, ӕмӕ кӕй сраст кодта, уыдонӕн радта намыс. 31 Уымӕ ма цы бафтауӕм? Кӕд Хуыцау нӕ фарс у, уӕд нын кӕй бон цы у? 32 Йӕ Фырты Чи нӕ бавгъау кодта, фӕлӕ Йӕ неппӕты сӕрвӕлтау нывондӕн Чи ӕрхаста, Уый нын Йемӕ ӕппӕт дӕр нӕ ратдзӕн, ӕви? 33 Чи фӕзылын кӕндзӕн Хуыцауы ӕвзӕрстыты? Хуыцау сӕ раст кӕны. 34 Чи сын стӕрхон кӕндзӕн? Чи амард, фӕлӕ ма мӕрдтӕй дӕр Чи райгас, уыцы Йесо Чырысти бады Хуыцауы рахиз фарс ӕмӕ куры мах тыххӕй. 35 Чырыстийы уарзтӕй мах ӕнӕхай чи фӕкӕндзӕн? Хъыг ӕви зынтӕ, ӕфхӕрд ӕви стонг, быгъдӕг-бӕгънӕг, тас ӕви цирхъ? Афтӕ зӕгъы Сыгъдӕг Фыст дӕр: 36 «Дӕу кӕй стӕм, уый тыххӕй иудадзыг кӕсӕм мӕлӕты цӕстытӕм, нымайынц нӕ ӕргӕвдинаг фыстыл». 37 Фӕлӕ ӕппӕт уыдӕттыл уӕлахиз кӕнӕм нӕ Бауарзӕджы хъаруйӕ. 38 Уымӕн ӕмӕ ӕз ӕууӕндын: нӕдӕр мӕлӕт, нӕдӕр цард, нӕдӕр зӕдтӕ, нӕдӕр ӕнӕбуар ӕлдӕрттӕ ӕмӕ тыхджынтӕ, нӕдӕр абон, нӕдӕр фидӕн, 39 Нӕдӕр уӕле цы ис, нӕдӕр бынӕй цы ис, кӕй сфӕлдыстӕуыди, нӕдӕр уыдонӕй исчи бафӕраздзӕни, нӕ Хицау Йесо Чырыстийы фӕрцы Хуыцауӕй кӕй райстам, уыцы уарзтӕй мах ӕнӕхай фӕкӕнын.

Ромӕгтӕм 9

1 Чырыстийы раз раст зӕгъын, нӕ сайын; ӕвдисӕн та мын у, Сыгъдӕг Уды дӕлбар чи ис, мӕ уыцы ӕфсарм – 2 Мӕнӕн тынг хъыг у ӕмӕ ӕдзух риссы мӕ зӕрдӕ. 3 Ӕз равзарин, мӕ туг-ме стӕг чи у, мӕ уыцы ӕфсымӕрты сӕраппонд Чырыстийӕ ӕнӕхай куы фӕуаин, стӕй ӕлгъыст куы баййафин, уый дӕр. 4 Уыдон израилӕгтӕ сты; Хуыцау сӕ Йӕхицӕн скодта хъӕбултӕ, равдыста сын Йӕ намыс, семӕ сарӕзта фидыдтӕ, радта сын Ӕгъдау, Хуыцаумӕ кувыны уаг ӕмӕ зӕрдӕвӕрдтӕ. 5 Уыдонӕн ис, Хуыцау кӕй сӕвзӕрста, уыцы рагфыдӕлтӕ; Чырысти туг ӕмӕ стӕгӕй уыдонӕй у – Уый у, ӕппӕтыл дӕр Кӕй бар цӕуы, уыцы Хуыцау. Арфӕгонд уӕд мыггагмӕ! Амен. 6 Зӕгъӕн нӕй, ӕмӕ Хуыцау Йӕ ныхас фӕсайдта. Израилы байзӕддӕгтӕ сеппӕт ӕцӕг израилӕгтӕ не сты. 7 Авраамӕн дӕр йӕ байзӕддӕгтӕ сеппӕт йе 'цӕг хъӕбултӕ не сты. Фӕлӕ Хуыцау загъта: «Исаакӕй чи райгуыра, уыдон уыдзысты нымад дӕ байзӕддӕгтыл». 8 Ома, ӕрдзон ӕгъдауӕй чи райгуырд, Хуыцауы хъӕбултӕ уыдон не сты, фӕлӕ Хуыцауы зӕрдӕвӕрдмӕ гӕсгӕ чи райгуырд, уыдон нымад сты байзӕддӕгтыл. 9 Мӕнӕ уыцы зӕрдӕвӕрд: «Ӕрцӕудзынӕн нысангонд рӕстӕджы, ӕмӕ Саррӕйӕн уыдзӕн лӕппу». 10 Зӕгъӕм ма ноджыдӕр. Ревеккӕйӕн йӕ дыууӕ фырты дӕр иу лӕгӕй уыдысты – нӕ фыдӕл Исаакӕй. 11 Уӕвгӕ дӕр нӕма райгуырдысты, нӕдӕр хорзӕй, нӕдӕр ӕвзӕрӕй ницыма сарӕзтой, афтӕмӕй дзы иуы сӕвзӕрста Хуыцау, цӕмӕй, цы снысан кодта, 12 Уый уа адӕймаджы хъуыддӕгтӕм гӕсгӕ нӕ, фӕлӕ, Хуыцауӕн Йӕхи куыд бафӕнда, афтӕ. Ревеккӕйӕн дӕр уымӕн загъта: «Хистӕр кӕстӕрӕн уыдзӕни цагъар». 13 Сыгъдӕг Фыст уымӕн афтӕ зӕгъы: «Иаковы бауарзтон, Исавыл та Мӕхи атигъ кодтон». 14 Ныр цы зӕгъӕм? Ау, Хуыцау раст нӕ кӕны? Ницы хуызы! 15 Уымӕн ӕмӕ Хуыцау Моисейӕн загъта: «Кӕмӕн Мӕ фӕнды Мӕ хорзӕх раттын, уымӕн ӕй ратдзынӕн. Кӕмӕн Мӕ фӕнды батӕригъӕд кӕнын, уымӕн батӕригъӕд кӕндзынӕн». 16 Уӕдӕ ӕппӕт дӕр аразгӕ у, адӕймаджы куыд фӕнды ӕмӕ хи хъаруйӕ цы кӕны, уымӕй нӕ, фӕлӕ хорзӕхдӕттӕг Хуыцауӕй. 17 Сыгъдӕг Фысты Хуыцау фараонӕн афтӕ зӕгъы: «Паддзахӕй дӕ Ӕз уымӕн сӕвӕрдтон, цӕмӕй дӕ фӕрцы равдисон Мӕ тых, ӕмӕ цӕмӕй Мӕ кой айхъуыса ӕппӕт зӕххыл». 18 Уӕдӕ афтӕ: кӕмӕн Ӕй фӕнды, уымӕн ратты хорзӕх, кӕй Йӕ фӕнды, уый та схивӕнд кӕны. 19 Исчи мын зӕгъдзӕн: «Уӕдӕ ма нӕ цӕй тыххӕй зылын кӕны? Йӕ уынаффӕйы ныхмӕ чи ӕрлӕудзӕн?» 20 Ды та чи дӕ, адӕймаг, ӕмӕ Хуыцауимӕ быцӕу кӕнай? Мигӕнӕн йе скӕнӕгӕн, мыййаг, зӕгъдзӕн: «Афтӕ мӕ цӕмӕн скодтай?» 21 Дурынгӕнӕгӕн ӕлыгыл йӕ бар нӕ цӕуы, ӕви, цӕмӕй иу ӕлыгӕй иу мигӕнӕн райсбавӕрдӕн скӕна, иннӕ та – иударонӕн? 22 Афтӕ Хуыцау дӕр – фӕндыд Ӕй Йӕ азар ӕмӕ Йӕ хъомыс равдисын, уӕддӕр тынг фӕразонӕй быхста, фесафынмӕ цӕттӕ чи уыд ӕмӕ Йӕ азар кӕуыл хъуамӕ ныккалдтаид, уыдонӕн. 23 Быхста сын, Йӕ хорзӕхӕй кӕй хъуамӕ схайджын кодтаид ӕмӕ намыс райсынмӕ цӕттӕ чи уыд, уыдонӕн Йе стыр намыс равдисынӕн. 24 Уыцы адӕм мах стӕм – ӕрхуыдта нӕ канд иудейтӕй нӕ, фӕлӕ муртаттӕй дӕр, 25 Осиа-пехуымпары чиныджы Хуыцау куыд зӕгъы, афтӕ: «Мӕ адӕм чи нӕ уыди, уыдоны схондзынӕн Мӕ адӕм, ӕмӕ кӕй нӕ уарзтон, уый схондзынӕн Мӕ уарзон». 26 «Ӕмӕ сын афтӕ загъд кӕм уыд: „Сымах Мӕ адӕм не стут", уым сӕ схуындӕуыдзӕн цардӕгас Хуыцауы хъӕбултӕ». 27 Исай та Израилы тыххӕй хъӕлӕсыдзагӕй зӕгъы: «Израилы фыртты нымӕц денджызон змисы бӕрц куы уа, уӕддӕр сӕ ӕрмӕст иу гыццыл къорд фервӕздзӕн. 28 Уымӕн ӕмӕ Хуыцау Йӕ тӕрхон зӕххыл рахӕсдзӕни тагъд ӕмӕ цӕхгӕр». 29 Исай-пехуымпар ма ноджыдӕр афтӕ загъта: «Хицау Саваоф нын байзӕддаг куы нӕ ныууагътаид, уӕд мах суыдаиккам Содомау, ахордтаиккам Гоморрӕйы хал». 30 Уӕдӕ ныр цы зӕгъӕм? Хуыцауы цӕсты раст уой, муртаттӕ уымӕ нӕ тырныдтой, фӕлӕ сраст сты – сраст сты уырнындзинады фӕрцы. 31 Израил та агуырдта, Хуыцауы цӕсты йӕ чи сраст кодтаид, ахӕм ӕгъдау, фӕлӕ йӕ не ссардта. 32 Цӕуылнӕ? Уымӕн ӕмӕ йӕ зӕрдӕ дардта уырнындзинадыл нӕ, фӕлӕ хъуыддӕгтыл. Израилы адӕм фӕкалдысты, фӕкӕлӕн цы дурыл ис, ууыл, 33 Сыгъдӕг Фыст куыд зӕгъы, афтӕ: «Мӕнӕ Ӕз Сионы ӕвӕрын, кӕуыл кӕлдзысты ӕмӕ хаудзысты, уыцы дур. Фӕлӕ Йыл чи ӕууӕнды, уый нӕ фӕхудинаг уыдзӕн».

Ромӕгтӕм 10

1 Ӕфсымӕртӕ, зӕрдиагӕй мӕ фӕнды ӕмӕ кувын Хуыцаумӕ, цӕмӕй израилӕгтӕ фервӕзой. 2 Ӕз ӕвдисӕн дӕн: Хуыцауыл ӕнувыд сты, фӕлӕ сӕ ӕнувыддзинад у ӕнӕфенд. 3 Уыдон нӕ зыдтой, Хуыцау адӕймаджы куыд раст кӕны, уый, ӕмӕ архайдтой сӕхи сраст кӕнынӕн сӕхи фӕндаг ссарыныл, ӕмӕ уымӕ гӕсгӕ нӕ басастысты Хуыцауы рӕстадӕн. 4 Чырысти та кӕрон скодта Ӕгъдауӕн, цӕмӕй алы уырнӕг дӕр Хуыцауы раз сраст уа. 5 Ӕгъдаумӕ гӕсгӕ адӕймаг куыд раст кӕны, уый тыххӕй Моисей афтӕ фыссы: «Йӕ домӕнтӕ йын чи сӕххӕст кӕна, уыцы адӕймаг цӕрдзӕн уыдоны фӕрцы». 6 Уырнындзинады фӕрцы адӕймаг куыд раст кӕны, уый тыххӕй Сыгъдӕг Фыст афтӕ зӕгъы: «Дӕхи макуы бафӕрс: „Чи ссӕудзӕн уӕларвмӕ?"» (ома, Чырыстийы зӕхмӕ ӕркӕнынмӕ). 7 «Кӕнӕ: „Чи ныххиздзӕн дӕлдзӕхмӕ?"» (ома, Чырыстийы мӕрдтӕй сыстын кӕнынмӕ). 8 Фӕлӕ Сыгъдӕг Фыст цы зӕгъы? «Хуыцауы ныхас дӕм хӕстӕг у, де 'взагыл ӕмӕ дӕ зӕрдӕйы ис». Уый у, уырнындзинады тыххӕй мах кӕй хъусын кӕнӕм, уыцы ныхас: 9 Йесо Хицау кӕй у, уый тыххӕй ӕргомӕй куы дзурай, ӕмӕ Йӕ Хуыцау мӕрдтӕй кӕй райгас кодта, ууыл зӕрдӕйӕ куы ӕууӕндай, уӕд фервӕздзынӕ. 10 Уымӕн ӕмӕ зӕрдӕйӕ ӕууӕндын адӕймаджы раст кӕны, уырныны тыххӕй ӕргомӕй дзурын та ирвӕзындзинад дӕтты. 11 Сыгъдӕг Фыст дӕр афтӕ зӕгъы: «Чидӕриддӕр Ыл ӕууӕнды, уый нӕ фӕхудинаг уыдзӕн». 12 Ам иудейы ӕмӕ муртаты ӕхсӕн хъауджы нӕй – сеппӕтӕн дӕр иу Хицау ис, ӕмӕ рӕдауӕй дӕтты, Йӕ ном Ын чидӕриддӕр ссара, уыдонӕн. 13 Уымӕн ӕмӕ «Хицауы ном чидӕриддӕр ссара, уый фервӕздзӕн». 14 Фӕлӕ Кӕуыл нӕ баууӕндыдысты, Уый ном куыд ссарой? Кӕй тыххӕй нӕ фехъуыстой, Ууыл куыд баууӕндой? Куыд фехъусой, куы ничи сын хъусын кӕна, уӕд? 15 Ӕмӕ куыд фехъусын кӕной, фехъусын кӕнынмӕ сӕ куы нӕ арвыстӕуа, уӕд? Сыгъдӕг Фыст дӕр афтӕ зӕгъы: «Куыд ӕхцон у фарны уац хӕсджыты ӕрцыд!» 16 Фӕлӕ сеппӕт фарны уацыл нӕ баууӕндыдысты. Уый тыххӕй Исай зӕгъы: «Хицау, махӕй цы фехъуыстой, ууыл чи баууӕндыд?» 17 Уӕдӕ уырнындзинад у фехъусынӕй, хъусгӕ та хъуамӕ фӕкӕнай ныхас Чырыстийы тыххӕй 18 Фӕлӕ фӕрсын: нӕ йӕ фехъуыстой? Кӕй зӕгъын ӕй хъӕуы, фехъуыстой йӕ. Сыгъдӕг Фыст зӕгъы: «Ӕппӕт зӕххыл айхъуыст сӕ хъӕлӕс, ӕмӕ сӕ ныхас анхъӕвзта дунейы иу кӕронӕй иннӕмӕ». 19 Ноджы ма фӕрсын: Израил уый нӕ зыдта? Фыццаг ӕй Моисей куы зӕгъы: «Ӕз сараздзынӕн афтӕ, ӕмӕ хӕлӕг кӕндзыстут, Мӕ адӕм чи нӕу, уыдонмӕ; смӕсты уӕ кӕндзынӕн ӕнӕфенд адӕмы фӕрцы». 20 Исай та ныфсджындӕрӕй зӕгъы: «Чи нӕ Мӕ агуырдта, уыдон Мӕ ссардтой; Ӕз раргом дӕн, Мӕ базонынмӕ чи нӕ бӕллыд, уыдонӕн». 21 Израилы тыххӕй та зӕгъы: «Ӕнӕхъӕн бон, мӕ цӕнгтӕ сӕм даргӕйӕ, сидтӕн ӕгоммӕгӕс ӕмӕ хивӕнд адӕммӕ».

Ромӕгтӕм 11

1 Уӕдӕ уӕ фӕрсын: ау, Хуыцау ныууагъта Йӕ адӕмы? Ницы хуызы! Ӕз мӕхӕдӕг дӕр израилаг дӕн, Авраамы байзӕддаг, Вениамины хӕдзарвӕндагӕй. 2 Хуыцау рагагъоммӕ кӕй базыдта, Йӕ уыцы адӕмы нӕ ныууагъта. Ӕви сымах нӕ зонут, Сыгъдӕг Фыст Илиайы тыххӕй цы зӕгъы, уый? Мӕнӕ цы хъаст хӕссы израилӕгтыл Хуыцаумӕ: 3 «Хицау, Дӕ пехуымпарты амардтой, Дӕ нывондхӕссӕнтӕ ныппырх кодтой; иунӕг ӕз ма баззадтӕн, ӕмӕ мӕн дӕр хъавынц амарынмӕ». 4 Цы дзуапп ын радта Хуыцау? «Ӕз Мӕхицӕн ныууагътон, Ваалы раз сӕ зонгуытыл чи не 'рлӕууыд, ахӕм авд мин адӕймаджы». 5 Афтӕ ныр дӕр ис, Хуыцау Йӕ хорзӕхмӕ гӕсгӕ кӕй сӕвзӕрста, ахӕм адӕмы къорд. 6 Ӕмӕ сӕ Хуыцау кӕд Йӕ хорзӕхмӕ гӕсгӕ сӕвзӕрста, уӕд хъуыддӕгтӕ нымад не сты, науӕд хорзӕх уӕвгӕ дӕр нал уаид хорзӕх. 7 Уӕдӕ цы? Израил цӕмӕ тырныдта, уый нӕ райста. Ӕвзӕрстытӕ йӕ райстой, иннӕтӕн та сӕ зӕрдӕтӕ ныддур сты, 8 Сыгъдӕг Фыст куыд зӕгъы, афтӕ: «Хуыцау сӕ бафтыдта фынӕйыл, радта сын, абон дӕр ма кӕмӕй нӕ уынынц, ахӕм цӕстытӕ, ӕмӕ кӕмӕй нӕ хъусынц, ахӕм хъустӕ». 9 Давид дӕр зӕгъы: «Сӕ минасы фынгтӕ сын разынӕнт ахсӕн хызтӕ ӕмӕ къӕппӕг, уадз ӕмӕ дзы бахауой ӕмӕ райсой сӕ хъуыддӕгтӕм гӕсгӕ. 10 Баталынг уӕд сӕ цӕстырухс, цӕмӕй ма уыной, ӕмӕ сӕ синтӕ ныкъкъӕдз уӕнт мыггагмӕ». 11 Уӕдӕ фӕрсын: ау, израилӕгтӕ афтӕ фӕкалдысты, ӕмӕ мауал сыстой? Ницы хуызы! Фӕлӕ кӕй фӕкалдысты, уый фӕрцы муртаттӕм ӕрцыд ирвӕзындзинад, цӕмӕй сӕм израилӕгтӕ хӕлӕг кӕной. 12 Кӕд израилӕгтӕ сӕ фӕкалдӕй дунейӕн хъӕздыгад ӕрхастой, сӕ фӕсыккӕй та – муртаттӕн хъӕздыгад, уӕд, Хуыцаумӕ ӕнӕхъӕнӕй раздӕхгӕйӕ, уагӕры цас ӕмӕ цас хорзӕх ӕрхӕсдзысты! 13 Сымахӕн, муртаттӕн, зӕгъын: куыд муртатты апостол, афтӕ ӕз буц дӕн, мӕ бӕрны цы куыст ис, уымӕй. 14 Уыцы куысты фӕрцы кӕд мӕ бон бауид, мӕ туг-ме стӕг чи у, уыдоны муртаттӕм хӕлӕгыл бафтауын ӕмӕ дзы иуӕй-иуты фервӕзын кӕнын. 15 Хуыцау сыл Йӕхи кӕй атигъ кодта, кӕд уый дунейӕн Хуыцауимӕ бафидауыны хос фӕци, уӕд сӕм Хуыцау ногӕй Йе 'ргом куы раздаха, уӕд уый цы уыдзӕн? Мӕрдтӕй рабадын нӕ уыдзӕн, ӕви? 16 Кӕд хорысӕрӕй фыццаг дзул Хуыцауы у, уӕд дзултӕ иууылдӕр Хуыцауы сты. Кӕд уидаг Хуыцауы у, уӕд къалиутӕ дӕр Хуыцауы сты. 17 Кӕд къалиутӕй иуӕй-иутӕ асастысты, дӕу та, хъӕддаг зетибӕлас, сӕ бынаты бафтыдӕуыд ӕмӕ сой исыс бӕласы уидагӕй, 18 Уӕд иннӕ къалиутӕм былалгъӕй ма кӕс. Кӕд сӕм былалгъӕй кӕсыс, уӕд та дӕ рох ма уӕд: уидагыл ды нӕ хӕцыс, уидаг хӕцы дӕуыл. 19 Ды зӕгъдзынӕ: «Къалиутӕ уымӕн асастысты, цӕмӕй мӕн сӕ бынаты бафтыдӕуа». 20 Афтӕ у. Уыдон асастысты, уырнындзинад сӕм кӕй нӕ уыди, уый тыххӕй, ды та бӕласыл уырнындзинады фӕрцы дӕ. Ӕмӕ хъал ма у, фӕлӕ тӕрс. 21 Хуыцау ӕрдзон къалиутыл кӕм нӕ бацауӕрста, уым дӕуыл бацауӕрддзӕн? 22 Дӕ зӕрдыл дар: Хуыцау зӕрдӕхӕлар дӕр у, ӕмӕ карз дӕр у. Чи Йӕ ныууагъта, уыдонӕн карз у, дӕуӕн та – зӕрдӕхӕлар, Йӕ хорзӕхыл Ын куы хӕцай, уӕд. Науӕд дӕу дӕр акъуырдзӕн. 23 Дзуттӕгтӕ дӕр хивӕнд куы нӕ уой ӕмӕ куы баууӕндой, уӕд та сӕ бафтыдӕуыдзӕн, уымӕн ӕмӕ Хуыцауӕн Йӕ бон у бӕласыл сӕ ногӕй бафтауын. 24 Ӕрдзӕй хъӕддаг цы зетибӕлас уыди, кӕд дӕу уымӕй акъуырдӕуыд, ӕмӕ, ӕрдзы куыд нӕ вӕййы, афтӕ дӕ бафтыдӕуыд дыргъдоны зетибӕласыл, уӕд уыцы ӕрдзон къалиутӕ та цас хуыздӕр бафтдзысты сӕхи зетибӕласыл! 25 Фӕнды мӕ, ӕфсымӕртӕ, сымахӕн ацы сусӕгдзинад раргом кӕнын, цӕмӕй уӕхицӕй ма ныббуц уат: Израилы иу хай хивӕнд у, цас ӕмбӕлы, муртаттӕй уыйбӕрц Хуыцаумӕ цалынмӕ ӕрцӕуа, уӕдмӕ. 26 Ӕмӕ ӕппӕт Израил фервӕздзӕн, Сыгъдӕг Фыст куыд зӕгъы, афтӕ: «Сионӕй ӕрцӕудзӕн Ирвӕзынгӕнӕг, ӕмӕ Иаковы байзӕддӕгты суӕгъд кӕндзӕн сӕ ӕнӕхуыцау митӕй. 27 Ӕмӕ семӕ сараздзынӕн ацы фидыд, сӕ тӕригъӕдтӕ сын куы скуынӕг кӕнон, уӕд». 28 Фарны уацыл кӕй нӕ ӕууӕндынц, уымӕ гӕсгӕ Хуыцауы знӕгтӕ сты, ӕмӕ уый уӕ пайдайӕн у. Фӕлӕ сӕ Хуыцау кӕй сӕвзӕрста, уымӕ гӕсгӕ сӕ уарзы сӕ рагфыдӕлты тыххӕй. 29 Уымӕн ӕмӕ Хуыцау искӕй куы сӕвзары ӕмӕ йӕ куы схорзӕхджын кӕны, уӕд йӕ уынаффӕ нӕ ивы. 30 Сымах, муртаттӕ, кӕддӕр Хуыцауӕн ӕгоммӕгӕс куыд уыдыстут, ӕмӕ уын ныр дзуттӕгты хивӕнды тыххӕй куыд ныббарстӕуыд, 31 Афтӕ уыдон дӕр: сымахӕн кӕй ныббарстӕуыд, уый тыххӕй абон сты хивӕнд, цӕмӕй ныббарстӕуа сӕхицӕн дӕр. 32 Уымӕн ӕмӕ Хуыцау ӕппӕт адӕмы скодта хивӕндӕн уацайрӕгтӕ, цӕмӕй ныббара сеппӕтӕн дӕр. 33 Куыд ӕвидигӕ сты Хуыцауы хъӕздыгад, зонд ӕмӕ зонындзинад! Кӕй зонд аххӕсдзӕн Йӕ уынаффӕтыл, ӕмӕ Йын чи раиртасдзӕн Йӕ хъуыддӕгтӕ! 34 «Хицауы зонд чи базыдта? Чи Йын уыд уынаффӕгӕнӕг? 35 Кӕнӕ Хуыцауӕн чи цы радта, цӕмӕй йын ӕй фӕстӕмӕ фидын бахъӕуа?» 36 Уымӕн ӕмӕ ӕппӕт дӕр Хуыцау сфӕлдыста, ӕппӕт дӕр цӕры Йӕ фӕрцы ӕмӕ Уымӕн. Кад Ын уӕд мыггагмӕ! Амен.

Ромӕгтӕм 12

1 Хуыцау уӕ кӕй уарзы, уый тыххӕй уӕ курын, ӕфсымӕртӕ: уӕхи Йын ӕрхӕссут удӕгас, сыгъдӕг ӕмӕ фӕндиаг нывондӕн. Уый уыдзӕн, зӕрдӕйӕ чи цӕуы, уӕ уыцы куыст Хуыцауӕн. 2 Ацы дунейы ӕгъдӕуттӕ ма фӕзмут; уадз ӕмӕ ног кӕна уӕ зонд ӕмӕ ива уӕ зӕрдӕ. Ӕмӕ уӕд уӕ бон уыдзӕн Хуыцауы фӕндон зонын – хорз цы у, Хуыцауы зӕрдӕмӕ цы цӕуы ӕмӕ алцӕмӕй дӕр ӕххӕст цы у, уый. 3 Хуыцау мын хорзӕх кӕй радта, уымӕ гӕсгӕ уӕ алкӕмӕн дӕр зӕгъын: цы стут, уӕхицӕй уымӕй фылдӕр ӕнхъӕл ма ут, фӕлӕ уӕ алкӕмӕн дӕр Хуыцау уырнындзинад цас радта, уымӕ гӕсгӕ раст аргъ кӕнут уӕхицӕн. 4 Зӕгъӕм, иу буарӕн бирӕ уӕнгтӕ куыд ис, ӕмӕ сӕ нысаниуӕг ӕмхуызон куыд нӕу, 5 Афтӕ мах дӕр, бирӕ адӕм, Чырыстиимӕ иу буар стӕм, хицӕнтӕй та – иу иннӕмӕн уӕнг. 6 Хуыцауы хорзӕхы фӕрцы нӕм алыхуызон курдиӕттӕ ис. Пехуымпарады курдиат кӕмӕ ис – пехуымпариуӕг кӕнӕд уырнындзинадмӕ гӕсгӕ; 7 Лӕггадгӕнӕджы курдиат кӕмӕ ис – лӕггад кӕнӕд; ахуыргӕнӕг чи у – ахуыр кӕнӕд иннӕты; 8 Ныфсдӕттӕг чи у – ныфс ӕвӕрӕд; исты дӕттыс – дӕтт сыгъдӕг зӕрдӕйӕ; хистӕр чи у – хистӕриуӕг кӕнӕд ӕнувыдӕй; хӕрзгӕнӕг чи у – хорз кӕнӕд зӕрдӕрухсӕй. 9 Уарзут зӕрдиагӕй, фыдӕх уын уӕд ӕнӕуынон, тырнут хорз ракӕнынмӕ. 10 Кӕрӕдзи зӕрдиагӕй уарзут ӕфсымӕртау; иу иннӕйы нымайӕд йӕхицӕй фылдӕр. 11 Кӕддӕриддӕр ут ӕнувыд, цӕхӕр калӕнт уӕ зӕрдӕтӕ, кусут Хуыцауӕн. 12 Уӕ зӕрдӕдарӕн уын уӕд циныхос; уӕ зынты ут фӕразон, кувут ӕнувыдӕй. 13 Цы уӕм ис, уымӕй сыгъдӕджытӕн хай кӕнут сӕ хъуӕгты; ут уазӕгуарзон. 14 Уе 'фхӕрджытӕн хорзӕх курут Хуыцауӕй – ӕлгъитгӕ сӕ ма кӕнут, фӕлӕ сын хорзӕх курут Хуыцауӕй. 15 Цин кӕнут цингӕнджытимӕ ӕмӕ кӕут кӕуджытимӕ. 16 Цӕрут ӕмзӕрдӕйӕ. Хъал ма ут; дунейы цӕсты чи нӕ ахады, уыдонӕй уӕлдӕр уӕхи ма ӕвӕрут. Уӕхи цӕсты зондджынтӕ ма ут. 17 Йӕ фыдӕхӕн макӕмӕн фидут фыдӕхӕй. Ӕппӕт адӕмы цӕсты хорз цы у, архайут уый кӕныныл. 18 Гӕнӕн ӕмӕ уын амал куыд ис, уымӕй алкӕимӕ дӕр цӕрут фидыдӕй. 19 Уӕ маст макӕмӕй исут, мӕ уарзон хӕлӕрттӕ, фӕлӕ йӕ бакӕнут Хуыцауы фыдӕхы ӕвджид. Уымӕн ӕмӕ Сыгъдӕг Фысты Хицау зӕгъы: «Мӕ бар у маст исын, Ӕз ӕй бафхӕрдзынӕн». 20 Уӕдӕ «кӕд де знаг ӕххормаг у, уӕд ӕй бафсад; кӕд ын дойны у, уӕд ын дон ратт. Афтӕ куы кӕнай, уӕд ын йӕ сӕрыл ӕркалдзынӕ цӕхӕр». 21 Фыдӕх дӕ ма басӕттӕд, фӕлӕ фыдӕхыл уӕлахиз кӕн хорзӕхӕй.

Ромӕгтӕм 13

1 Алы адӕймаг дӕр уӕд уӕлдӕр хицӕуттӕн коммӕгӕс, уымӕн ӕмӕ, Хуыцауӕй чи нӕу, ахӕм хицауад нӕй. Цы хицауӕдтӕ ис, уыдон Хуыцауы ӕвӕрд сты. 2 Уымӕ гӕсгӕ хицауады ныхмӕлӕууӕг Хуыцауы уагӕвӕрды ныхмӕ цӕуы. Ахӕмтӕ сӕхӕдӕг сӕхи фӕкӕндзысты тӕрхоны амӕддаг. 3 Хицӕуттӕй тӕссаг у, хорз хъуыддӕгтӕ чи аразы, уыдонӕн нӕ, фӕлӕ ӕвзӕр хъуыддӕгтӕ чи аразы, уыдонӕн. Фӕнды дӕ хицауадӕй нӕ тӕрсын? Араз хорз хъуыддӕгтӕ, ӕмӕ дӕ раппӕлдзӕн. 4 Уымӕн ӕмӕ хицау Хуыцауы кусӕг у ӕмӕ дӕ фарнӕн кусы. Кӕд ӕвзӕр митӕ кӕныс, уӕд дзы тӕрс – цирхъ дзӕгъӕлы нӕ дары, уымӕн ӕмӕ Хуыцауы кусӕг у ӕмӕ ӕфхӕры, ӕвзӕр митӕ чи кӕны, уыдоны. 5 Уӕдӕ коммӕ кӕсын хъӕуы канд ӕфхӕрд баййафыны тасӕй нӕ, фӕлӕ де 'фсарммӕ гӕсгӕ дӕр. 6 Уымӕ гӕсгӕ сымах фидут хъалон дӕр, уымӕн ӕмӕ хицӕуттӕ сӕ хӕстӕ ӕнувыдӕй кӕй ӕххӕст кӕнынц, уымӕй Хуыцауӕн кусынц. 7 Уӕдӕ кӕмӕн цы ӕмбӕлы, уый йын дӕттут: хъалон кӕмӕн ӕмбӕлы, уымӕн – хъалон, фиддон кӕмӕн ӕмбӕлы, уымӕн – фиддон, нымайын кӕй ӕмбӕлы, уый нымайут, кад кӕмӕн ӕмбӕлы, уымӕн кӕнут кад. 8 Кӕрӕдзи уарзынӕй дарддӕр макӕмӕй мацы хӕс дарут. Уымӕн ӕмӕ иннӕйы чи уарзы, уый Ӕгъдау сӕххӕст кодта. 9 «Ма хӕт», «Ма амар», «Ма дав», [«Мӕнгӕвдисӕн ма ныллӕуу»,] «Дӕу цы нӕу, уымӕ ма бабӕлл» – уыцы фӕдзӕхстытӕн дӕр ӕмӕ иннӕ фӕдзӕхстытӕн дӕр сӕ мидис мӕнӕ ацы ныхӕсты ис: «Уарз хионы, дӕхи куыд уарзыс, афтӕ». 10 Уарзондзинад хионы хъыджы нӕ цӕуы. Уӕдӕ чи уарзы, уый Ӕгъдау сӕххӕст кодта. 11 Уыимӕ зонут, махӕн ныридӕгӕн кӕй ралӕууыд нӕ фынӕйӕ райхъалы афон. Уымӕн ӕмӕ куы баууӕндыдыстӕм, уӕдӕй нӕм ныр ӕввахсдӕр у ирвӕзындзинад. 12 Ӕхсӕв фӕивгъуыйы, бон та ӕрбахӕстӕг ис. Уӕдӕ ныууадзӕм талынджы хъуыддӕгтӕ, ӕмӕ нӕхи сифтонг кӕнӕм рухсы хотыхтӕй. 13 Боны рухсмӕ куыд ӕмбӕлы, афтӕ хӕдӕфсармӕй цӕрӕм. Ма бафтӕм фыднозтыл ӕмӕ ӕнӕуаг митыл, хӕтыныл ӕмӕ ӕлгъаг хъуыддӕгтыл, быцӕутыл ӕмӕ хӕлӕгыл. 14 Хицау Йесо Чырысти суӕд уӕ хотых, ӕмӕ уӕ тӕригъӕдджын ӕрдзыхъӕд ма рӕвдаут, цӕмӕй йын йӕ мондӕгтӕ ма ӕфсадат.

Ромӕгтӕм 14

1 Йӕ уырнындзинад лӕмӕгъ кӕмӕн у, ууыл уӕхи ма тигъ кӕнут, ӕмӕ уӕм иу хъуыды кӕй нӕй, уый тыххӕй уын йемӕ быцӕу ма уӕд. 2 Иуӕн йӕ уырнындзинад дӕтты ӕппӕт дӕр хӕрыны бар, лӕмӕгъ та айдагъ халсартӕ хӕры. 3 Чи хӕры, уый ӕнӕрвӕссон ма уӕд, чи нӕ хӕры, ууыл; ӕмӕ чи нӕ хӕры, уый тӕрхон ма кӕнӕд, чи хӕры, уымӕн: Хуыцау дзы Йӕхицӕн хъӕбул загъта. 4 Ды чи дӕ, ӕмӕ кӕйдӕр цагъарӕн тӕрхон кӕнай? Йӕ къӕхтыл лӕууы ӕви ахауд – уый йын йӕ Хицау равзардзӕн. Уӕддӕр слӕудзӕн, уымӕн ӕмӕ Хицауӕн Йӕ бон у уый йӕ къӕхтыл сӕвӕрын. 5 Чидӕр иу бон иннӕ бонӕй ахсджиагдӕрыл нымайы, иннӕмӕн та бонтӕ ӕмхуызон сты. Уадз ӕмӕ алчидӕр иузӕрдионӕй баззайӕд, цӕуыл ӕууӕнды, ууыл. 6 Иу бон иннӕмӕй ахсджиагдӕрыл чи нымайы, уый йӕ Хицауы кадӕн нымайы. [Иу бон иннӕмӕй ахсджиагдӕрыл чи нӕ нымайы, уый йӕ Хицауы кадӕн нӕ нымайы.] Чи хӕры, уый Хицауы кадӕн хӕры, уымӕн ӕмӕ арфӕ кӕны Хуыцауӕн. Чи нӕ хӕры, уый Хицауы кадӕн нӕ хӕры, ӕмӕ арфӕ кӕны Хуыцауӕн. 7 Махӕй йӕхицӕн ничи цӕры ӕмӕ йӕхицӕн ничи мӕлы. 8 Кӕд цӕрӕм, уӕд Хицауӕн цӕрӕм, кӕд мӕлӕм, уӕд Хицауӕн мӕлӕм. Уӕдӕ цӕргӕ ӕви мӕлгӕ кӕнӕм – кӕддӕриддӕр Хицауы стӕм. 9 Уымӕн ӕмӕ Чырысти дӕр уый тыххӕй амард ӕмӕ райгас, цӕмӕй мӕрдтӕн дӕр ӕмӕ удӕгӕстӕн дӕр сӕ Хицау уа. 10 Ды та цӕмӕн тӕрхон кӕныс де 'фсымӕрӕн? Ӕмӕ ды дӕр цӕмӕн дӕлдӕр кӕныс де 'фсымӕры? Неппӕт дӕр Хуыцауы тӕрхоны раз ӕрлӕудзыстӕм. 11 Уымӕн ӕмӕ Сыгъдӕг Фысты загъд у: «Ӕз цардӕгас дӕн, – зӕгъы Хицау, – Мӕ разы ӕрзоныгыл кӕндзӕн алы адӕймаг дӕр, ӕмӕ алы ӕвзаг стаудзӕни Хуыцауы». 12 Уӕдӕ махӕй алчидӕр Хуыцауы раз дзуапп ратдзӕн йӕхи тыххӕй. 13 Уымӕ гӕсгӕ кӕрӕдзийӕн мауал тӕрхон кӕнӕм, фӕлӕ уый бӕсты бацархайут, цӕмӕй уе 'фсымӕр уӕ аххосӕй ма фӕкӕла ӕмӕ тӕригъӕды ма бафта. 14 Хицау Йесоимӕ кӕй дӕн, уымӕ гӕсгӕ ӕз зонын ӕмӕ фидарӕй ӕууӕндын, чъизи хойраг кӕй нӕй, ууыл; исчи чъизийыл цы нымайы, уый ӕрмӕст уымӕн у чъизи. 15 Кӕд цы хойраг хӕрыс, уымӕй де 'фсымӕры хъыджы цӕуыс, уӕд уарзондзинадмӕ гӕсгӕ нӕ цӕрыс. Уӕдӕ Чырысти кӕй тыххӕй амард, уый дӕ хойрагӕй ма саф. 16 Архайут, цӕмӕй сымах хорзыл цы нымайут, уый мачи бафауа. 17 Уымӕн ӕмӕ Хуыцауы Паддзахад хӕрд ӕмӕ нозт нӕу. Рӕстгӕнӕджы цардӕй цӕрын, Сыгъдӕг Уд кӕй дӕтты, уыцы фарн ӕмӕ цин – уый у Хуыцауы Паддзахад. 18 Йӕ ахӕм цардӕй Чырыстийӕн чи кусы, уый ӕлхӕны Хуыцауы зӕрдӕ ӕмӕ дзы адӕм дӕр сты райгонд. 19 Уӕдӕ тырндзыстӕм, фарн цы хӕссы ӕмӕ нын кӕрӕдзийы фидар кӕнынӕн ахъаз цы у, уымӕ. 20 Хуыцауы хъуыддаг хойраджы сӕраппонд ма хал. Алы хойраг дӕр сыгъдӕг у, фӕлӕ ӕвзӕр у, иннӕйы тӕригъӕды чи бафтауа, уыцы хойраг хӕрын. 21 Фӕлтау дзидза ма хӕр, сӕн ма нуаз ӕмӕ, де 'фсымӕр цӕуыл фӕкӕла, [тӕригъӕды йӕ цы бафтауа, кӕнӕ йӕ цы слӕмӕгъ кӕна,] ахӕмӕй мацы кӕн. 22 Цы уырнындзинад дӕм ис, уый Хуыцауы раз ныууадз дӕхицӕн. Растыл цы нымайы, уый тыххӕй йӕхицӕн тӕрхон чи нӕ кӕны, уыцы адӕймаг тӕхудиаг у. 23 Фӕлӕ цы хӕры, ууыл дызӕрдыг чи кӕны, уый тӕрхонгонд у, уымӕн ӕмӕ уырнындзинадмӕ гӕсгӕ нӕ архайы. Уырнындзинадмӕ гӕсгӕ цы нӕ уа, уый та тӕригъӕды бафтын у. 24 Кад Хуыцауӕн! Йӕ бон у сымахӕн хъару раттын; ууыл дзурӕг у, Йесо Чырыстийы тыххӕй ӕз кӕй хъусын кӕнын, уыцы фарны уац. Уым ӕргом кӕны Хуыцауы сусӕг фӕнд – уый ӕнусты дӕргъы ӕмбӕхст уыди, 25 Ныр та раргом. Мыггагмӕ-йы Хуыцауы фӕндонӕй уыцы сусӕгдзинад пехуымпарты фыстыты фӕрцы зындгонд сси ӕппӕт адӕмтӕн, цӕмӕй баууӕндой ӕмӕ Хуыцауӕн суой коммӕгӕс. 26 Йесо Чырыстийы фӕрцы кад уӕд мыггагмӕ иунӕг ӕмӕ уӕлзонд Хуыцауӕн! Амен.

Ромӕгтӕм 15

1 Мах, тыхджынтӕ, хъуамӕ ӕнӕбонтимӕ хӕссӕм уыдонӕн сӕ лӕмӕгъдзинӕдты уаргъ, ӕмӕ нӕхи зӕрдӕ ма ӕлхӕнӕм. 2 Алчидӕр нӕ хъуамӕ ӕлхӕна хионы зӕрдӕ, хорзӕх ын цы хӕссы ӕмӕ йын йӕ уырнындзинад цы фидар кӕны, уымӕй. 3 Уымӕн ӕмӕ Чырысти дӕр Йӕхи зӕрдӕ не 'лхӕдта; уымӕ гӕсгӕ афтӕ зӕгъы Сыгъдӕг Фыст: «Дӕу чи ӕлгъыста, уыдоны ӕлгъыстытӕ ӕрцыдысты Мӕныл». 4 Сыгъдӕг Фыст цыдӕриддӕр зӕгъы, уый ныффыстӕуыд махӕн зонд амонынӕн, цӕмӕй фӕразон уӕвыны, стӕй Сыгъдӕг Фыст цы ныфс дӕтты, уый фӕрцы махӕн уа зӕрдӕдарӕн. 5 Фӕразондзинад ӕмӕ ныфс Чи дӕтты, уыцы Хуыцау уын раттӕд, цӕмӕй сымах, Йесо Чырыстийы фӕзмгӕйӕ, уат ӕмзонд, 6 Ӕмзӕрдӕйӕ ӕмӕ ӕмдзыхӕй стауат нӕ Хицау Йесо Чырыстийы Хуыцауы ӕмӕ Фыды. 7 Чырысти сымахыл куыд зӕрдиаг у, афтӕ зӕрдиаг ут кӕрӕдзийыл Хуыцауы кадӕн. 8 Зӕгъын уын, Хуыцау Йӕ дзырд кӕй нӕ сайы, уый равдисыны тыххӕй Чырысти сунӕтгӕндтӕн сси кусӕг, цӕмӕй сӕххӕст кӕна, Хуыцау уыдоны рагфыдӕлтӕн зӕрдӕ цӕмӕй бавӕрдта, уый, 9 Ӕмӕ муртаттӕ стауой Хуыцауы Йӕ хорзӕхы тыххӕй, Сыгъдӕг Фыст куыд зӕгъы, афтӕ: «Уый тыххӕй стаудзынӕн Дӕу муртатты ӕхсӕн, Дӕуыл уыдзысты мӕ зарджытӕ». 10 Ӕмӕ ма ноджы загъд у: «Цин кӕнут Хуыцауы адӕмимӕ, муртаттӕ». 11 Ӕмӕ ма ноджыдӕр: «Стаут Хицауы, ӕппӕт муртаттӕ, кад Ын кӕнӕнт ӕппӕт адӕмтӕ». 12 Исай дӕр зӕгъы: «Фӕзындзӕн Иессейы Ӕвзар ӕмӕ муртаттыл кӕндзӕн ӕлдариуӕг; муртаттӕ Йыл дардзысты сӕ зӕрдӕ». 13 Зӕрдӕдарӕн Чи дӕтты, уыцы Хуыцау уын уырнындзинады фӕрцы раттӕд цин ӕмӕ фарн, цӕмӕй Сыгъдӕг Уды хъаруйӕ уӕ зӕрдӕдарӕн кӕна фидарӕй-фидардӕр. 14 Дызӕрдыг нӕ кӕнын, ме 'фсымӕртӕ, алы хорз миниуӕг уӕм кӕй ис, алцыдӕр кӕй зонут ӕмӕ уӕ бон кӕрӕдзийӕн зонд амонын кӕй у, ууыл. 15 Фӕлӕ уӕм мӕ ныфс бахастон цыдӕртӕ уын уӕ зӕрдыл ӕрлӕууын кӕныны тыххӕй ныффыссынмӕ. Ӕз уый бакодтон, Хуыцауӕй мын цы хорзӕх лӕвӕрд ис, уымӕ гӕсгӕ – 16 Хуыцау мын бафӕдзӕхста, цӕмӕй муртаттӕн уон Йесо Чырыстийы кусӕг ӕмӕ хӕлиу кӕнон Хуыцауы фарны уац, цӕмӕй муртаттӕ суой, Сыгъдӕг Уд кӕй ссыгъдӕг кодта, ахӕм фӕндиаг нывонд. 17 Уӕдӕ Йесо Чырыстиимӕ кӕй дӕн, уый фӕрцы мӕ бон раппӕлын у, Хуыцауы сӕраппонд цы куыст хӕссын, уымӕй. 18 Цӕмӕй муртаттӕ Хуыцауӕн коммӕгӕс суой, уый тыххӕй Чырысти мӕ фӕрцы цы сарӕзта, уымӕй уӕлдай ницӕй тыххӕй зӕгъынмӕ хӕссын мӕ ныфс. Чырысти уыдӕттӕ бакодта ныхас ӕмӕ хъуыддагӕй, 19 Ӕвдисӕйнӕгтӕй ӕмӕ диссӕгтӕй, Хуыцауы Уды хъаруйӕ. Афтӕмӕй Чырыстийы фарны уац ӕз ахӕлиу кодтон Иерусалимӕй суанг Иллирикмӕ. 20 Ӕз архайдтон, Чырыстийы кӕм нӕ зыдтой, фарны уац уым хъусын кӕныныл, кӕйдӕр конд бындурыл куыд нӕ амайон, 21 Фӕлӕ Сыгъдӕг Фыст куыд зӕгъы, афтӕ: «Кӕмӕн нӕ загъдӕуыд Уый тыххӕй, уыдон фендзысты, ӕмӕ чи нӕ фехъуыста, уыдон бамбардзысты». 22 Афтӕмӕй мын мӕ фадӕттӕм гӕсгӕ бирӕ хӕттыты нӕ бантыст сымахмӕ ӕрцӕуын. 23 Уыцы рӕтты ныр ӕз мӕ куыст ахицӕн кодтон. Бирӕ азты дӕргъы та бӕллыдтӕн сымахмӕ ӕрцӕуынмӕ. 24 Ӕмӕ Испанимӕ куы цӕуон, уӕд мӕ ныфс ис мӕ фӕндагыл сымах фенынӕй, иуцасдӕр уӕ фендӕй бафсӕдынӕй, стӕй мӕ фӕндагмӕ кӕй срӕвдз кӕндзыстут, уымӕй. 25 Ныр та цӕуын Иерусалиммӕ сыгъдӕджытӕн баххуыс кӕнынмӕ. 26 Уымӕн ӕмӕ Македонийы ӕмӕ Ахайы уырнджыты бафӕндыд, Иерусалимы сыгъдӕджытӕй мӕгуыр чи у, уыдонӕн баххуыс кӕнын. 27 Бафӕндыди сӕ, стӕй сӕ хӕсджын дӕр сты. Уымӕн ӕмӕ кӕд иугӕр муртаттӕ иудейтӕн Хуыцауӕй лӕвӕрд хорзӕхӕй схайджын сты, уӕд сын хъуамӕ баххуыс кӕной сӕ зӕххон хъуӕгты. 28 Ӕз уый куы саразон ӕмӕ цы ӕрӕмбырд, уый сӕм мӕхӕдӕг куы фӕхӕццӕ кӕнон, уӕд Испанимӕ мӕ фӕндаг акӕндзынӕн сымахыл. 29 Ӕз зонын, куы уӕм ӕрцӕуон, уӕд уӕм кӕй ӕрхӕсдзынӕн Чырыстийы рӕдау арфӕтӕ. 30 Ӕфсымӕртӕ, нӕ Хицау Йесо Чырыстийы сӕраппонд ӕмӕ, Сыгъдӕг Уд кӕй дӕтты, уыцы уарзты сӕраппонд курын сымахӕй: мӕн тыххӕй мемӕ зӕрдиагӕй кувут Хуыцаумӕ, 31 Цӕмӕй Иудейӕйы фервӕзон ӕнӕуырнджытӕй, ӕмӕ Иерусалимы сыгъдӕджытӕн ме 'ххуыс уа ӕхсызгон, 32 Ӕмӕ Хуыцауы куы бафӕнда, уӕд уӕм ӕрцӕуон цингӕнгӕ, ӕмӕ уӕм мӕ уд ӕрцӕра. 33 Фарндӕттӕг Хуыцау уӕд уеппӕтимӕ дӕр. Амен.

Ромӕгтӕм 16

1 Базонгӕ ут нӕ хо Фивӕимӕ, Кенхрейы аргъуаны диакъонимӕ. 2 Сыгъдӕджытӕн куыд ӕмбӕлы, афтӕ йыл баузӕлут Хицауы кадӕн, ӕмӕ хъуаг цӕмӕй ӕййафа, уымӕй йын баххуыс кӕнут. Йӕхӕдӕг бирӕтӕн баххуыс кодта, уыимӕ мӕнӕн дӕр. 3 Саламтӕ раттут Прискиллӕ ӕмӕ Акилӕйӕн – Йесо Чырыстийы кадӕн ме 'мкусджытӕн. 4 Уыдон мӕ сӕрвӕлтау кастысты мӕлӕты цӕстытӕм. Ӕрмӕст ӕз сӕ нӕ дӕн бузныг, фӕлӕ раздӕры муртатты ӕппӕт аргъуантӕ дӕр. Саламтӕ раттут, сӕ хӕдзары цы аргъуан ӕмбырд кӕны, уымӕн дӕр. 5 Саламтӕ раттут мӕ уарзон Эпенетӕн, Чырыстийыл Асийы фыццаг чи баууӕндыд, уымӕн. 6 Саламтӕ раттут Мариайӕн; уый сымахӕн бирӕ бакуыста. 7 Саламтӕ раттут мӕ хӕстӕджытӕ Андроник ӕмӕ Юнийӕн. Уыдон ахӕстоны уыдысты мемӕ, апостолты ӕхсӕн сты зындгонд, Чырыстийыл баууӕндыдысты мӕнӕй раздӕр. 8 Саламтӕ раттут Амплиатӕн, чырыстон уарзтӕй кӕй уарзын, уымӕн. 9 Саламтӕ раттут Урбанӕн – Чырыстийы кадӕн не 'мкусӕгӕн, ӕмӕ мӕ уарзон хӕлар Стахийӕн. 10 Саламтӕ раттут, Чырыстийыл йӕхи ӕнувыдӕй чи равдыста, уыцы Апеллесӕн. Саламтӕ раттут Аристовулы хӕдзаронтӕн. 11 Саламтӕ раттут мӕ хӕстӕг Иродионӕн. Саламтӕ раттут, Наркиссы хӕдзаронтӕй Хицауимӕ чи ис, уыдонӕн. 12 Саламтӕ раттут Трифенӕйӕн ӕмӕ Трифосӕн, Хицауы зӕрдиаг кусджытӕн. Саламтӕ раттут уарзон хо Персидӕйӕн. Уый бирӕ бакуыста Хицауӕн. 13 Саламтӕ раттут Руфӕн, Хицауы уӕлдай зӕрдиаг кусӕгӕн, стӕй мӕнӕн дӕр мад чи сси, йӕ уыцы мадӕн. 14 Саламтӕ раттут Асинкритӕн, Флегонтӕн, Гермесӕн, Патровӕн, Гермасӕн, стӕй семӕ чи ис, уыцы ӕфсымӕртӕн. 15 Саламтӕ раттут Филолог ӕмӕ Юлиайӕн, Нирей ӕмӕ йӕ хойӕн, Олимпасӕн, стӕй Хуыцауы адӕмӕй семӕ чи ис, уыдонӕй алкӕмӕн дӕр. 16 Кӕрӕдзийӕн салам дӕттут ӕфсымӕрон байӕ. Саламтӕ уын дӕттынц Чырыстийы ӕппӕт аргъуантӕ. 17 Курын уӕ, ӕфсымӕртӕ, уӕхи хизут, цӕуыл сахуыр стут, уыцы ахуырад чи ницӕмӕ дары, афтӕмӕй аргъуантӕ чи дих кӕны ӕмӕ фӕкӕлыны хос чи у, уыдонӕй – ӕмгӕрон сӕм ма цӕут. 18 Ахӕмтӕ нӕ Хицау Чырыстийӕн нӕ кусынц, фӕлӕ сӕ чъизи мондӕгтӕн, рӕсугъд ӕмӕ козбау ныхӕстӕй фӕливынц, ӕнӕхин чи у, уыдоны. 19 Фарны уацӕн коммӕгӕс кӕй стут, уый алкӕмӕн дӕр зындгонд у. Уымӕ гӕсгӕ ӕз цин кӕнын сымах тыххӕй. Фӕнды мӕ, цӕмӕй хорз аразынмӕ уат зондджын, ӕвзӕрмӕ та ма арӕхсат. 20 Ӕмӕ уын уӕд фарндӕттӕг Хуыцау рӕхджы уӕ къӕхты бын ныцъцъист кӕндзӕн хӕйрӕджы. Нӕ Хицау Йесойы хорзӕх уӕд уемӕ. Амен. 21 Саламтӕ уын дӕттынц ме 'мкусӕг Тимофей, мӕ хӕстӕджытӕ Луций, Иасон ӕмӕ Сосипатр. 22 Чырыстон салам уын дӕттын ӕз дӕр, Тертий, Павелы ацы ныхӕстӕ ныффыссӕг. 23 Салам уын дӕтты мӕ фысым, ӕппӕт аргъуан кӕй хӕдзары ӕрӕмбырд вӕййы, уыцы Гай. Саламтӕ уын дӕттынц Эраст, сахары ӕхцафснайӕг, ӕмӕ не 'фсымӕр Кварт. 24 Нӕ Хицау Йесо Чырыстийы хорзӕх уеппӕты дӕр уӕд. Амен.

1 Коринфӕгтӕм 1

1 Павелӕй, Йесо Чырыстийы апостолӕй Хуыцау кӕй сӕвзӕрста, уымӕй, ӕмӕ ӕфсымӕр Сосфенӕй 2 Хуыцауы аргъуанмӕ Коринфы – Хуыцау кӕй ӕрхуыдта ӕмӕ Йесо Чырыстийы руаджы кӕй ссыгъдӕг кодта, уыдонмӕ; стӕй алы ран дӕр нӕ Хицау Йесо Чырыстийы, нӕ иумӕйаг Хицауы, ном чи ары, уыдонмӕ сеппӕтмӕ дӕр. 3 Хорзӕх ӕмӕ уын фарн нӕ Фыд Хуыцауӕй ӕмӕ Хицау Йесо Чырыстийӕ. 4 Ӕз сымах тыххӕй иудадзыг арфӕ кӕнын мӕ Хуыцауӕн, Йесо Чырыстийы руаджы уӕ Йӕ хорзӕхӕй кӕй схайджын кодта, уый фӕдыл. 5 Уымӕн ӕмӕ Йесоимӕ баиуы руаджы сымах схъӕздыг стут алцӕмӕй дӕр: алы ныхасӕй ӕмӕ алы зонынадӕй. 6 Чырыстийы тыххӕй уын цы загъдӕуыд, уый цӕры уӕ зӕрдӕты. 7 Уымӕ гӕсгӕ, нӕ Хицау Йесо Чырыстийы ӕрцыдмӕ ӕнхъӕлмӕгӕсгӕйӕ, иу курдиатӕй дӕр ӕнӕхай не стут. 8 Ӕмӕ уӕ нӕ Хицау Йесо Чырысти сфидар кӕндзӕни кӕронмӕ, цӕмӕй Йӕ ӕрцыды бон уат ӕнӕфау. 9 Йӕ Фыртимӕ, нӕ Хицау Йесо Чырыстиимӕ, сымах цӕрынмӕ Чи ӕрхуыдта, уыцы Хуыцау Йӕ дзырд никуы сайы. 10 Нӕ Хицау Йесо Чырыстийы номӕй уӕ курын, ӕфсымӕртӕ, цӕмӕй уеппӕт дӕр ӕмбарат кӕрӕдзи ӕмӕ дихтӕ ма кӕнат, фӕлӕ уат ӕнгом – ӕмуд ӕмӕ ӕмзонд. 11 Уымӕн ӕмӕ ӕз Хлойӕйы хӕдзаронтӕй фехъуыстон, ме 'фсымӕртӕ, хъаугъатӕ уӕм кӕй ис, уый тыххӕй. 12 Ӕз уый зӕгъынмӕ хъавын, ӕмӕ сымахӕй алчидӕр дзуры: «Ӕз Павелы ахуыргӕнинаг дӕн», «Ӕз Аполлосы ахуыргӕнинаг дӕн», «Ӕз Кифӕйы ахуыргӕнинаг дӕн», «Ӕз Чырыстийы ахуыргӕнинаг дӕн». 13 Ау, Чырысти ныддихтӕ? Ау, Павелы байтыгъдӕуыд уӕ сӕраппонд? Кӕнӕ уыл Павелы номыл саргъуыдӕуыд? 14 Бузныг дӕн Хуыцауӕй, Крисп ӕмӕ Гайы йеддӕмӕ сымахӕй кӕй никӕуыл саргъуыдтон, уый тыххӕй. 15 Афтӕ никӕй бон у зӕгъын, ӕмӕ уыл мӕ номыл саргъуыдӕуыд. 16 Саргъуыдтон ма Стефаны хӕдзаронтыл дӕр. Ӕндӕр ма искӕуыл саргъуыдтон, уый нӕ хъуыды кӕнын. 17 Чырысти мӕ аргъауынмӕ нӕ рарвыста, фӕлӕ фарны уац хъусын кӕнынмӕ, уыимӕ зондджын къӕбӕлдзыг ныхӕстӕй нӕ, цӕмӕй ма фесӕфа Чырыстийы дзуары тых. 18 Сӕфты фӕндагыл цӕуджытӕ дзуары тыххӕй ныхас ӕнӕзондыл нымайынц, махӕн та, фервӕзыны фӕндагыл цӕуджытӕн, Хуыцауы тых у. 19 Афтӕ зӕгъы Сыгъдӕг Фыст дӕр: «Зондджынтӕн фесафдзынӕн се стыр зонд, ӕмбаргӕтӕ нал ӕмбардзысты». 20 Кӕм и зондджын? Кӕм и динамонӕг? Кӕм ис ацы дунейы хъуыдыгӕнӕг? Хуыцау ацы дунейы зонд ӕнӕзонд не скодта, мыййаг? 21 Хуыцау Йӕ зондмӕ гӕсгӕ куыд снысан кодта, афтӕ дуне йӕхи зондӕй Хуыцауы кӕй нӕ базыдта, уымӕ гӕсгӕ Хуыцауы бафӕндыди дзуары тыххӕй «ӕнӕзонд» ныхасы фӕрцы уырнджыты фервӕзын кӕнын. 22 Уымӕн ӕмӕ иудейтӕ диссӕгтӕ домынц, бердзентӕ зонд агурынц, 23 Мах та хъусын кӕнӕм дзуарыл тыгъд Чырыстийы тыххӕй, ӕмӕ нӕ ныхас иудейтӕн цӕлхдур у, муртаттӕ та йӕ ӕнӕзондыл нымайынц. 24 Иудейтӕй ӕмӕ бердзентӕй Хуыцау кӕй ӕрхуыдта, уыдонӕн та Чырысти Хуыцауы тых ӕмӕ Хуыцауы зонд у. 25 Уымӕн ӕмӕ Хуыцауы «ӕнӕзонд» ми адӕмы зондӕй уӕлдӕр у, ӕмӕ Хуыцауы «лӕмӕгъ» ми адӕмы хъаруйӕ домбайдӕр у. 26 Ӕркӕсут-ма, ӕфсымӕртӕ, Хуыцау уӕ куы ӕрхуыдта, уӕд цавӕртӕ уыдыстут: зӕххон барӕнтӕй баргӕйӕ, уе 'хсӕн бирӕ нӕ уыди зондджынтӕ, бирӕ уӕм нӕ уыди тыхджынтӕ, бирӕ уӕм нӕ уыди уӕздӕттӕй. 27 Фӕлӕ Хуыцау сӕвзӕрста, дунейы цӕсты ӕнӕзонд чи у, уыдоны, цӕмӕй фӕхудинаг кӕна зондджынты, ӕмӕ дунейы цӕсты лӕмӕгъ чи у, уыдоны сӕвзӕрста Хуыцау, цӕмӕй фӕхудинаг кӕна тыхджынты. 28 Дунейы цӕсты ницӕйаг, ӕгад ӕмӕ ӕнахадгӕ чи уыди, Хуыцау уыдоны сӕвзӕрста, цӕмӕй ахадгӕты скӕна ӕнахадгӕ, 29 Ӕмӕ иу адӕймаг дӕр Хуыцауы раз йӕхицӕй ма раппӕла. 30 Хуыцау уӕ баиу кодта Йесо Чырыстиимӕ – Уый махӕн фестад Хуыцауӕй лӕвӕрд зонд, ссӕрибар, сраст ӕмӕ нӕ ссыгъдӕг кодта, 31 Цӕмӕй уа, Сыгъдӕг Фыст куыд зӕгъы, афтӕ: «Йӕхицӕй чи ӕппӕлы, уый ӕппӕлӕд Хицауӕй».

1 Коринфӕгтӕм 2

1 Ӕмӕ уӕм ӕз дӕр, ӕфсымӕртӕ, куы ӕрцыдтӕн Хуыцауы сусӕгдзинад фехъусын кӕнынмӕ, уӕд ӕй рӕсугъд ныхӕсты ӕмӕ адӕймаджы зонды руаджы нӕ хъусын кодтон. 2 Уымӕн ӕмӕ мӕ уынаффӕ уыди, цалынмӕ сымахмӕ дӕн, уӕдмӕ Йесо Чырыстийы йеддӕмӕ, уыимӕ дзуарыл тыгъд Йесо Чырыстийы йеддӕмӕ, ницы зонын. 3 Ӕз сымахмӕ уыдтӕн лӕмӕгъӕй, ӕнцой нӕ зыдтон, аккаг куы нӕ разынон, уымӕй тӕрсгӕйӕ, 4 Ӕмӕ фарны уац хъусын кодтон зондджын зӕрдӕлхӕнӕн ныхӕстӕй нӕ, фӕлӕ мӕ ныхас фидаргонд уыди Сыгъдӕг Уды хъаруйӕ, 5 Цӕмӕй уӕ уырнындзинад аразгӕ уа адӕймаджы зондӕй нӕ, фӕлӕ Хуыцауы хъаруйӕ. 6 Зондыл та ахуыр кӕнӕм алцӕмӕй дӕр цӕттӕ уырнджыты, ӕрмӕст ацы дунейы зондыл, стӕй сӕ кӕрон кӕмӕн ӕрцӕуы, а дунейы уыцы ӕлдариуӕггӕнджыты зондыл нӕ, 7 Фӕлӕ мах дзурӕм Хуыцауы сусӕг, ӕмбӕхст уӕлзондыл – махӕн намыс раттыны сӕраппонд дуне сфӕлдисыны агъоммӕ кӕй рахаста, Йӕ уыцы уынаффӕйыл. 8 Уыцы уӕлзонд а дунейы ӕлдариуӕггӕнджытӕй иу дӕр нӕ базыдта. Куы йӕ базыдтаиккой, уӕд намысджын Хицауы дзуарыл нӕ байтыгътаиккой. 9 Сыгъдӕг Фыст дӕр афтӕ зӕгъы: «Цӕст нӕ федта, хъус нӕ фехъуыста ӕмӕ йӕ фӕсонӕрхӕджы дӕр никӕмӕн уыд, чи Йӕ уарзы, уыдонӕн Хуыцау цы ӕрцӕттӕ кодта, уый». 10 Махӕн та йӕ Хуыцау раргом кодта Йӕ Уды руаджы; Уд та ӕххӕссы алцӕмӕ дӕр, суанг Хуыцаумӕ ӕмбӕхст цы ис, уымӕ дӕр. 11 Адӕймагмӕ цы ис, уый адӕмӕй чи зоны, адӕймаджы мидӕг чи цӕры, уыцы уды йеддӕмӕ? Афтӕ Хуыцаумӕ цы ис, уый дӕр Хуыцауы Уды йеддӕмӕ ничи зоны. 12 Мах та схайджын стӕм ацы дунейы удӕй нӕ, фӕлӕ Хуыцауӕй лӕвӕрд Удӕй, цӕмӕй зонӕм, Хуыцау нын цы ралӕвар кодта, уый. 13 Ӕмӕ ууыл мах дзурӕм, адӕймаджы зонд нӕ цы ныхӕстыл сахуыр кодта, уыдонӕй нӕ, фӕлӕ нын Сыгъдӕг Уд цы ныхӕстӕ бацамыдта, уыдонӕй. Удӕй цы у, уый ӕмбарын кӕнӕм Удӕй хайджынтӕн. 14 Хуыцауы Удӕй хайджын цы адӕймаг нӕу, уымӕ та, Хуыцауы Удӕй цы у, уый нӕ хъары – ӕнӕзондыл ӕй нымайы, ӕмӕ йӕ бамбарын нӕ фӕразы, уымӕн ӕмӕ уыдӕттӕн Уды руаджы аргъ кӕнын хъӕуы. 15 Фӕлӕ Хуыцауы Удӕй хайджын чи у, уый аргъ кӕны алцӕмӕн дӕр, уымӕн аргъ кӕнын та никӕй бон у. 16 Уымӕн ӕмӕ «Хицауы зонд афтӕ чи базыдта, ӕмӕ Йын амонӕг уа?» Махмӕ та Чырыстийы зонд ис.

1 Коринфӕгтӕм 3

1 Ӕмӕ, ӕфсымӕртӕ, Хуыцауы Удӕй хайджынтимӕ куыд фӕныхас кӕнынц, мӕ бон уемӕ афтӕ дзурын нӕ уыд. Ӕз уемӕ дзырдтон тӕригъӕдджын мондӕгтӕн коммӕгӕстимӕ дзурӕгау. Уымӕн ӕмӕ уӕ чырыстон уырнындзинадмӕ гӕсгӕ сымах нырма дзидзидайтӕ стут. 2 Ӕз уӕ хастон ӕхсырӕй, хъӕбӕр хӕринаг та уын нӕ лӕвӕрдтон, йӕ бахӕрын уӕ бон кӕй нӕ уыди, уый тыххӕй; ӕмӕ ныртӕккӕ дӕр нӕу уӕ бон йӕ бахӕрын, 3 Уымӕн ӕмӕ нырма дӕр тӕригъӕдджын мондӕгты коммӕ кӕсут. Кӕд стут хӕлӕг ӕмӕ уӕм ис хъаугъатӕ, уӕд уӕ тӕригъӕдджын ӕрдзыхъӕды дӕлбар не стут ӕмӕ, адӕм дунейы куыд цӕрынц, ахӕм цардӕй нӕ цӕрут, мыййаг? 4 Уымӕн ӕмӕ сымахӕй кӕд иу афтӕ зӕгъы: «Ӕз Павелы ахуыргӕнинаг дӕн», иннӕ та: «Ӕз Аполлосы ахуыргӕнинаг дӕн», уӕд ацы дунейы адӕмау не стут, ӕви? 5 Чи у Аполлос? Чи у Павел? Уыдон сты, сымах кӕй фӕрцы баууӕндыдыстут, ӕрмӕстдӕр уыцы кусджытӕ; ӕмӕ сӕ алчидӕр сарӕзта, Хицау ын цы хъуыддаг бафӕдзӕхста, уый. 6 Ӕз байтыдтон, Аполлос дон рауагъта, фӕлӕ хор Хуыцау радта. 7 Уӕдӕ тауӕгӕй дӕр ӕмӕ донуадзӕгӕй дӕр ницы аразгӕ у – ӕппӕт дӕр аразгӕ у хордӕттӕг Хуыцауӕй. 8 Тауӕг ӕмӕ донуадзӕг иу хъуыддаг аразынц, ӕмӕ алчидӕр райсдзӕн йӕ мызд, цас бакуса, уымӕ гӕсгӕ. 9 Мах Хуыцауимӕ иу хъуыддаг аразӕм, сымах та стут Хуыцауы хуым, Хуыцауы хӕдзар. 10 Хуыцау мын цы хорзӕх ракодта, уый фӕрцы зондджын аразӕгау ӕз сӕвӕрдтон бындур, иннӕ та уыцы бындурыл аразы. Фӕлӕ алчидӕр хъуамӕ лӕмбынӕг кӕса, куыд аразы, уымӕ. 11 Бындур ӕвӕрд у ӕмӕ ӕндӕр бындур сӕвӕрын никӕй бон у, уымӕн ӕмӕ ӕвӕрд бындур Йесо Чырысти у. 12 Уыцы бындурыл чи цӕмӕй аразы – сызгъӕринӕй уа, ӕвзистӕй, зынаргъ дуртӕй, хъӕдӕй, хосӕй ӕви хъӕмпӕй – 13 Алкӕмӕн дӕр рабӕрӕг уыдзӕн йӕ хъуыддаг; уымӕн ӕмӕ ралӕудзӕни бон, ӕмӕ алкӕмӕн дӕр йӕ хъуыддаг бафӕлвардзӕн арт ӕмӕ арты сбӕлвырд уыдзӕни, цавӕр ын у, уый. 14 Кӕй арӕзт хъуыддаг нӕ басудза, уый райсдзӕни хӕрзиуӕг. 15 Кӕй хъуыддаг басудза, уый та баййафдзӕни зиан. Ӕниу, йӕхӕдӕг фервӕздзӕни, фӕлӕ артӕй раирвӕзӕгау. 16 Сымах Хуыцауы хӕдзар кӕй стут, ӕмӕ Хуыцауы Уд уӕ зӕрдӕты кӕй цӕры, уый нӕ зонут, ӕви? 17 Хуыцауы хӕдзар чи фӕчъизи кӕна, уый Хуыцау бафхӕрдзӕн, уымӕн ӕмӕ Хуыцауы хӕдзар сыгъдӕг у; ӕмӕ уыцы хӕдзар сымах стут. 18 Йӕхи уӕ мачи сайӕд. Кӕд сымахӕй искӕмӕ афтӕ кӕсы, ӕмӕ ацы дунейы зондджын у, уӕд суӕд «ӕнӕзонд», ӕмӕ уыдзӕни зондджын. 19 Уымӕн ӕмӕ ацы дунейы зонд Хуыцауы цӕсты ӕнӕзонддзинад у, Сыгъдӕг Фыст куыд зӕгъы, афтӕ: «Хуыцау зондджынты ацахсы сӕхи хинӕй». 20 Ӕмӕ ма ноджыдӕр: «Хицау зоны, зондджынты фӕндтӕ дзӕгъӕлы кӕй сты, уый». 21 Уӕдӕ адӕймагӕй мачи ӕппӕлӕд, уымӕн ӕмӕ ӕппӕт дӕр сымах у: 22 Павел уа, кӕнӕ Аполлос уа, кӕнӕ Кифӕ уа, кӕнӕ дуне уа, кӕнӕ цард уа, кӕнӕ мӕлӕт уа, кӕнӕ абон уа, кӕнӕ фидӕн уа – ӕппӕт дӕр сымах у; 23 Сымах та Чырыстийы стут, Чырысти та Хуыцауы у.

1 Коринфӕгтӕм 4

1 Уӕдӕ нӕ сымах хъуамӕ нымайат Чырыстийы кусджытыл, Хуыцау Йӕ сусӕгдзинӕдтӕ кӕуыл баууӕндыди, уыдоныл. 2 Ӕмӕ ахӕм ӕууӕнкӕй чи фӕхайджын, уыдонӕй домдӕуы сӕхи иузӕрдионӕй равдисын. 3 Сымах кӕнӕ иннӕ адӕм мӕнӕн цы аргъ кӕнынц, уый мӕ не 'ндавы. Ӕз мӕхӕдӕг дӕр мӕхицӕн аргъгӕнӕг нӕ дӕн. 4 Кӕд мӕ зӕрдӕ мӕхимӕ ницӕмӕй ӕхсайы, уӕддӕр уымӕй мӕхи нӕ раст кӕнын; тӕрхонгӕнӕг мын Хицау у. 5 Уӕдӕ афонӕй раздӕр тӕрхон ма кӕнут, цалынмӕ Хицау ӕрцӕуа, уӕдмӕ – Уый хурмӕ рахӕсдзӕни талынджы ӕмбӕхст хъуыддӕгтӕ, раргом кӕндзӕни зӕрдӕйы фӕндтӕ, ӕмӕ уӕд Хуыцауӕй алчидӕр райсдзӕн йӕ хӕрзиуӕг. 6 Ӕз цы дзырдтон, ӕфсымӕртӕ, уый уӕ сӕраппонд мӕхи ӕмӕ Аполлосы тыххӕй загътон, цӕмӕй мах бафӕзмат, фыст цы у, уый сӕрты нӕ хизыныл – иу адӕймагӕй сӕрыстыр ма уат, иннӕйыл та дӕлӕмӕ ма хӕцат. 7 Дӕу уӕлдӕр чи ӕвӕры? Цыдӕриддӕр дӕм ис, уый Хуыцауӕй нӕ райстай, ӕви? Ӕмӕ йӕ кӕд Хуыцауӕй райстай, уӕд цы ӕппӕлыс, цыма дӕхи у, афтӕ? 8 Сымахмӕ ныридӕгӕн фагӕй фылдӕр ис ӕппӕт дӕр, ныридӕгӕн схъӕздыг стут, ӕнӕ мах систут паддзӕхтӕ. Бӕргӕ паддзахиуӕг ӕцӕгӕй куы кӕниккат, цӕмӕй мах дӕр уемӕ суӕм паддзӕхтӕ! 9 Уымӕн ӕмӕ мӕнмӕ афтӕ фӕкӕсы, ӕмӕ мах, апостолты, Хуыцау сӕвӕрдта тӕккӕ цауддӕрты бынаты – цыма нын рахастӕуыд, адӕм нӕм куыд кӕсой, афтӕмӕй амарыны тӕрхон. Махыл йӕ цӕст ӕрӕвӕрдта дун-дуне – зӕдтӕ ӕмӕ адӕм. 10 Мах ӕнӕзонд стӕм Чырыстийы сӕраппонд, сымах та зондджын чырыстӕттӕ стут; мах ӕдых стӕм, сымах та – тыхджын; сымах кадджын стут, мах та – ӕгад. 11 Суанг абон дӕр ӕййафӕм стонг ӕмӕ дойны, бӕгънӕг, нӕмынц нӕ, рахау-бахау кӕнӕм, 12 Нӕхи цӕнгтӕй кӕнӕм уӕззау куыст. Ӕлгъитынц нӕ, мах та сын Хуыцауӕй хорзӕх курӕм. Ӕфхӕрынц нӕ, ӕмӕ мах фӕразӕм. 13 Цъыф ныл калынц, мах та сӕ нӕ дзыхыныхасӕй рӕвдауӕм. Мах абонмӕ дунейӕн ӕмӕ алкӕмӕн дӕр стӕм быронау. 14 Ӕз уыдӕттӕ уый тыххӕй нӕ фыссын, ӕмӕ уӕхиуыл ӕрхудат, фӕлӕ уын, уарзон хъӕбултӕн амонӕгау, зонд амонын. 15 Кӕд уын бирӕ чырыстон хъомылгӕнджытӕ ис, уӕддӕр уын фыдӕлтӕ бирӕ нӕй – фарны уац уӕм ӕрхӕссыны фӕрцы Йесо Чырыстийы хъаруйӕ ӕз сдӕн уӕ ныййарӕг. 16 Уымӕ гӕсгӕ уӕ зӕрдиагӕй курын: фӕзмут мӕ [ӕз Чырыстийы куыд фӕзмын, афтӕ]. 17 Уый тыххӕй уӕм арвыстон Тимофейы – Хицауыл иузӕрдион чи у, мӕ уыцы уарзон хъӕбулы. Уӕ зӕрдыл уын ӕрлӕууын кӕндзӕн, Йесо Чырыстийы мӕ цардӕй куыд фӕзмын, уый; мӕ уыцы цард у, алы аргъуаны дӕр цӕуыл ахуыр кӕнын, уымӕ гӕсгӕ. 18 Сымахӕй чидӕртӕ схъал сты – афтӕ сӕм кӕсы, цыма ӕз сымахмӕ нал ӕрцӕудзынӕн. 19 Фӕлӕ кӕд Хицауы бафӕнда, уӕд уӕм рӕхджы ӕрцӕудзынӕн ӕмӕ уыцы хъалтӕн бафӕлвардзынӕн сӕ ныхӕстӕ нӕ, фӕлӕ сӕ хъару, 20 Уымӕн ӕмӕ Хуыцауы Паддзахад ныхӕстӕй нӕ, фӕлӕ хъаруйӕ у. 21 Куыд уӕ фӕнды? Лӕдзӕгимӕ уӕм ӕрцӕуон, ӕви уарзондзинадимӕ ӕмӕ ӕвӕлмасӕй?

1 Коринфӕгтӕм 5

1 Бӕлвырдӕй куыд айхъуыст, афтӕмӕй уӕм фӕзынди хъахбай ми, стӕй ахӕм хъахбай ми, ӕмӕ суанг муртаттӕй дӕр ахӕм хъуыддаг нӕ райхъуыст – чидӕр, дам, цӕры йӕ фыдыусимӕ. 2 Хъалы бӕсты сымахӕн кӕуын ӕмбӕлы, цӕмӕй ахӕм хъуыддаг чи сарӕзта, уый фӕсырдӕуа уе 'хсӕнӕй. 3 Ӕз та уӕм дард дӕн, фӕлӕ удӕй уемӕ дӕн, ӕмӕ цыма ӕцӕгдӕр уемӕ дӕн, афтӕ бауынаффӕ кодтон, ахӕм хъуыддаг бакӕнӕгӕн цы бачындӕуа, уый тыххӕй: 4 Нӕ Хицау Йесойы номыл куы ӕрӕмбырд уат, уӕд мӕ уд дӕр уыдзӕн уемӕ, ӕмӕ уыцы фыдгӕнӕджы нӕ Хицау Йесойы хъаруйӕ 5 Бакӕнӕм хӕйрӕджы бар йӕ буар ын бафхӕрыны тыххӕй, цӕмӕй йӕ уд фервӕза, нӕ Хицау тӕрхон куы кӕна, уыцы бон. 6 Раппӕлинагӕй уӕм ницы ис. Армыдзаг ӕнхъизӕн хыссӕ ӕгасӕй дӕр кӕй сӕнхъизын кӕны, уый нӕ зонут, ӕви? 7 Уӕдӕ уӕхи ссыгъдӕг кӕнут зӕронд ӕнхъизӕнӕй, цӕмӕй фестат ног, ӕнӕнхъизӕн хыссӕ. Сымах ӕцӕгдӕр ахӕмтӕ стут, уымӕн ӕмӕ Чырыстийы, нӕ Куадзӕны Уӕрыччы, нывондӕн ӕрхастӕуыд. 8 Уӕдӕ бӕрӕгбон сыгъдӕгзӕрдӕйӕ бӕрӕг кӕнӕм зӕронд ӕнхъизӕнимӕ нӕ, хӕлды ӕмӕ фыдӕхы ӕнхъизӕнимӕ нӕ, фӕлӕ ӕцӕгады донгонд дзултимӕ. 9 Ӕз уӕм мӕ фыстӕджы фыстон, хӕтаг чи у, уыдонмӕ ӕмгӕрон нӕ цӕуыны тыххӕй. 10 Ӕниу уӕм ацы дунейы хӕлд адӕммӕ, кӕнӕ кӕрӕфтӕм, кӕнӕ стигъджытӕм, кӕнӕ мӕнгхуыцӕуттӕн кувджытӕм ӕмгӕрон нӕ цӕуыны тыххӕй нӕ фыстон, – науӕд сымах ацы дуне ныууадзын хъӕуид, – 11 Фӕлӕ уӕм ӕз фыстон, цӕмӕй ӕмгӕрон ма цӕуат, йӕхи ӕфсымӕр чи хоны, афтӕмӕй хӕтаг кӕнӕ кӕрӕф, кӕнӕ мӕнгхуыцӕуттӕн кувӕг, кӕнӕ цъыфкалӕг, кӕнӕ расыггӕнаг, кӕнӕ стигъӕг чи у, уымӕ. Ахӕмимӕ иу фынгыл дӕр макуы бадут. 12 Ӕнӕуырнджытӕн ӕз цӕмӕн хъуамӕ тӕрхон кӕнон? Уырнджытӕн та сымах хъуамӕ хӕссат тӕрхон – 13 Ӕнӕуырнджытӕн Хуыцау у тӕрхонгӕнӕг. Уӕдӕ «хӕлд адӕймаджы фӕсурут уе 'хсӕнӕй».

1 Коринфӕгтӕм 6

1 Уӕ иу иннӕйыл куы фӕхъаст кӕны, уӕд йӕ ныфс куыд хӕссы йӕ хъаст ӕнӕхуыцӕуттӕм бахӕссынмӕ, сыгъдӕджыты бӕсты йын уыдон куыд тӕрхон кӕной, афтӕ? 2 Дунейӕн сыгъдӕджытӕ кӕй тӕрхон кӕндзысты, уый нӕ зонут, ӕви? Кӕд иугӕр дунейӕн сымах тӕрхон кӕндзыстут, уӕд хуымӕтӕг хъуыддӕгтӕ равзарыны аккаг не стут? 3 Зӕдтӕн мах кӕй тӕрхон кӕндзыстӕм, уый нӕ зонут, ӕви? Уӕд зӕххон царды быцӕутӕ равзарын нӕ бон нӕу? 4 Кӕд ахӕм быцӕутӕ рауайы, уӕд сын тӕрхонгӕнджытӕй цӕмӕн сӕвӕрут, аргъуанмӕ чи ницы бар дары, уыдоны? 5 Уӕхиуыл ӕрхудыны тыххӕй уын зӕгъын: йе 'фсымӕрты быцӕу чи равзара, иунӕг ахӕм зондджын лӕг дӕр уӕм нӕй, ӕви? 6 Сымахмӕ та ӕфсымӕр ӕфсымӕрыл хъаст кӕны, уыимӕ йӕ хъаст ӕнӕуырнджыты размӕ хӕссы. 7 Кӕрӕдзийыл кӕй хъаст кӕнут, ӕрмӕст уый дӕр уӕ стыр ӕгадмӕ ӕртардта. Ӕфхӕрды бынаты баззайын уын хуыздӕр нӕ уаид? Куы уӕ бастыгъдӕуа, уӕд уын хуыздӕр нӕ уаид? 8 Сымах та уӕхӕдӕг ӕфхӕрут ӕмӕ стигъут. Ӕмӕ кӕй? Уе 'фсымӕрты! 9 Ӕви галиутӕ Хуыцауы Паддзахадмӕ кӕй нӕ бацӕудзысты, уый нӕ зонут? Уӕхи ма сайут: нӕдӕр хӕлд адӕм, нӕдӕр мӕнгхуыцӕуттӕн кувджытӕ, нӕдӕр хӕзгултӕ, нӕдӕр нӕлмойтӕ, 10 Нӕдӕр давджытӕ, нӕдӕр кӕрӕфтӕ, нӕдӕр расыггӕнджытӕ, нӕдӕр цъыфкалджытӕ, нӕдӕр стигъджытӕ Хуыцауы Паддзахадмӕ нӕ бацӕудзысты. 11 Сымахӕй дӕр иуӕй-иутӕ ахӕмтӕ уыдысты, фӕлӕ ӕхсад ӕрцыдыстут, ссыгъдӕг ӕмӕ сраст стут нӕ Хицау Йесо Чырыстийы хъаруйӕ ӕмӕ нӕ Хуыцауы Уды руаджы. 12 Ис мын алцыдӕр кӕныны бар, фӕлӕ мын алцы пайда нӕу. Ис мын алцыдӕр кӕныны бар, фӕлӕ хъуамӕ мацӕй цагъар суон. 13 Хойраг гуыбынӕн у, гуыбын та – хойрагӕн, фӕлӕ Хуыцау сӕ дыууӕйы дӕр фесафдзӕни. Буар та хӕтынӕн нӕу, фӕлӕ Хицауӕн, Хицау та буарӕн дӕр хицау у. 14 Хуыцау Йӕ хъаруйӕ райгас кодта Хицауы, райгас кӕндзӕни мах дӕр. 15 Уӕ буӕрттӕ Чырыстийы уӕнгтӕ кӕй сты, уый нӕ зонут, ӕви? Уӕдӕ Чырыстийы буары уӕнгтӕ райсдзынӕн ӕмӕ сӕ хъахбайы уӕнгтӕ фестын кӕндзынӕн? Ницы хуызы! 16 Кӕнӕ хъахбайимӕ чи ӕриу уа, уый йемӕ иу буар кӕй свӕййы, уый нӕ зонут, ӕви? Уымӕн ӕмӕ афтӕ загъдӕуыд: «Дыууӕ уыдзысты иу буар». 17 Хицауимӕ чи баиу вӕййы, уый та Хицауимӕ уды ӕгъдауӕй иу у. 18 Уӕхи хизут хӕтынӕй: адӕймаг цыдӕриддӕр тӕригъӕды бафты, уый буары ӕдде вӕййы, фӕлӕ хӕтаг йӕхи буары тӕригъӕды цӕуы. 19 Хуыцауӕй Кӕй райстат, уӕ буар уыцы Сыгъдӕг Уды хӕдзар кӕй у, уый нӕ зонут, ӕви? Ӕмӕ уӕхиуыл уӕ бар нӕ цӕуы, 20 Уымӕн ӕмӕ уӕ стыр аргъӕй балхӕдӕуыд. Уӕдӕ кад кӕнут Хуыцауӕн уӕ буарӕй.

1 Коринфӕгтӕм 7

1 Сымах мӕм цӕй тыххӕй фыстат, ныр та уый фӕдыл: хорз у, нӕлгоймаг сылгоймаджы ӕмгӕрон куы не 'рцӕуа, уӕд. 2 Фӕлӕ хӕтынӕй хи бахизыны тыххӕй алы нӕлгоймагӕн дӕр уӕд йӕхи ус, ӕмӕ алы сылгоймагӕн дӕр уӕд йӕхи мой. 3 Мой хъуамӕ ӕххӕст кӕна, йӕ усы раз ыл цы хӕс ӕвӕрд ис, уый; афтӕ ус дӕр. 4 Усы буарыл цӕуы йӕхи бар нӕ, фӕлӕ йӕ мойы бар. Афтӕ мойӕн дӕр йӕ буарыл йӕхи бар нӕ цӕуы, фӕлӕ йӕ усы бар. 5 Уӕ дыууӕйы дӕр куы фӕнда, уӕд ӕнӕ кӕрӕдзи ут ӕрмӕстдӕр рӕстӕгмӕ – [ком даргӕйӕ ӕмӕ] кувгӕйӕ, уый фӕстӕ ут иумӕ, цӕмӕй уӕ хӕйрӕг ма мондаг кӕна, уӕхиуыл фӕхӕцын кӕй нӕ фӕразут, уый аххосӕй. 6 Ӕниу ӕй бардзырды хуызы нӕ зӕгъын, фӕлӕ уын ахӕм бар ис. 7 Мӕн та фӕнды, цӕмӕй адӕм иууылдӕр уой мӕ хуызӕн, фӕлӕ алкӕмӕ дӕр йӕхи сӕрмагонд курдиат ис Хуыцауӕй: иумӕ – ахӕм, иннӕмӕ – ӕндӕр. 8 Къай кӕмӕн нӕй, уыдонӕн ӕмӕ идӕдз устытӕн та зӕгъын: мӕнау иунӕгӕй куы баззайой, уӕд сын хуыздӕр у. 9 Фӕлӕ кӕд сӕхиуыл хӕцын нӕ фӕразынц, уӕд курӕнт устытӕ ӕмӕ цӕуӕнт моймӕ. Уымӕн ӕмӕ монцы арты судзынӕй лӕг ӕмӕ усӕй цӕрын хуыздӕр у. 10 Усджын ӕмӕ моймӕдзыд чи у, уыдонӕн та ӕз нӕ, фӕлӕ Хицау фӕдзӕхсы: ус йӕ мойы ма ныууадзӕд; 11 Куы йӕ ныууадза, уӕд та мой мауал скӕнӕд, кӕнӕ йӕ моимӕ бафидауӕд; мой дӕр йӕ усӕй ма ахицӕн уӕд. 12 Иннӕтӕн та Хицау нӕ, фӕлӕ ӕз зӕгъын: кӕд ӕфсымӕртӕй искӕмӕн ис ӕнӕуырнӕг ус, ӕмӕ усы фӕнды йемӕ цӕрын, уӕд ӕй лӕг ма ныууадзӕд. 13 Ӕмӕ устытӕй дӕр ӕнӕуырнӕг лӕг кӕмӕн ис, уымӕн кӕд йӕ мойы йемӕ цӕрын фӕнды, уӕд ӕй ус ма ныууадзӕд. 14 Уымӕн ӕмӕ ӕнӕуырнӕг лӕг йӕ уырнӕг усы фӕрцы сыгъдӕг кӕны, ӕмӕ ӕнӕуырнӕг ус дӕр йӕ уырнӕг мойы фӕрцы сыгъдӕг кӕны. Науӕд уӕ цот сыгъдӕг нӕ уаиккой, ныр та сыгъдӕг сты. 15 Кӕд ӕнӕуырнӕджы ахицӕн фӕнды – ахицӕн уӕд; ахӕм уавӕры ӕфсымӕр кӕнӕ хо сӕрибар сты. Хуыцау уӕ фидыдӕй цӕрынмӕ ӕрхуыдта. 16 Ды кӕцӕй зоныс, ус, ӕмӕ дӕ мойы нӕ фервӕзын кӕндзынӕ? Кӕнӕ ды кӕцӕй зоныс, лӕг, ӕмӕ дӕ усы нӕ фервӕзын кӕндзынӕ? 17 Ӕрмӕст алчидӕр цӕрӕд, Хицау ын куыд снысан кодта, афтӕ, ӕмӕ баззайӕд, Хуыцау ӕй цы уавӕры ӕрхуыдта, уыцы уавӕры. Ӕз уый фӕдзӕхсын ӕппӕт аргъуантӕн дӕр. 18 Сунӕтгондӕй дӕ ӕрхуыдта Хуыцау – ма йӕ сусӕг кӕн; ӕнӕсунӕтӕй дӕ ӕрхуыдта – сунӕт ма скӕн. 19 Сунӕт скӕнын дӕр ницы у, сунӕт не скӕнын дӕр ницы у – ӕрмӕст Хуыцауы фӕдзӕхстытӕм гӕсгӕ цӕрын у ахсджиаг. 20 Алчидӕр баззайӕд, Хуыцау ӕй куы ӕрхуыдта, уӕд цы уыди, уымӕй. 21 Цагъайрагӕй дӕ ӕрхуыдта – ма йыл тыхс; фӕлӕ кӕд дӕ бон сӕрибар райсын у, уӕд дын хуыздӕр уыдзӕни уыцы фадатӕй спайда кӕнын 22 Уымӕн ӕмӕ Хицау кӕй ӕрхуыдта, уыцы цагъары Хицау ссӕрибар кодта; сӕрибарӕй кӕй ӕрхуыдта, уый та Чырыстийы цагъар у. 23 Сымах стыр аргъӕй балхӕдӕуыд – ма сут цагъартӕ адӕймагӕн. 24 Ӕфсымӕртӕ, кӕй цы уавӕры ӕрхуындӕуыд, алчидӕр уыцы уавӕры баззайӕд Хуыцауы раз. 25 Ӕнӕцыд чызджыты ӕмӕ ӕнӕус лӕппуты тыххӕй мын Хицау нӕ бафӕдзӕхста, фӕлӕ Хицау кӕй схорзӕхджын кодта ӕмӕ ӕууӕндӕн кӕуыл ис, ахӕм адӕймагау уын уынаффӕ кӕнын. 26 Мӕ хъуыды ахӕм у: абоны зынтӕм гӕсгӕ адӕймагӕн хуыздӕр у, цы уавӕры ис, уыцы уавӕры баззайын. 27 Дӕ усимӕ къайадӕй баст дӕ? Йӕ фехалыныл ма архай. Усимӕ баст нӕ дӕ? Ус ракурыныл ма архай. 28 Ӕниу, ус куы ракурай, уӕд уымӕй тӕригъӕды не 'фтыс; ӕмӕ чызг мой куы скӕна, уӕд уый дӕр уымӕй тӕригъӕды не 'фты. Фӕлӕ ахӕмтӕ сӕ царды ӕвзардзысты зынтӕ, ӕмӕ уыл мӕ зӕрдӕ риссы. 29 Ӕз уын зӕгъын, ӕфсымӕртӕ: рӕстӕг бирӕ нал баззад, ӕмӕ устытӕ кӕмӕн ис, уыдон нырӕй фӕстӕмӕ хъуамӕ уой, цыма сын устытӕ нӕй, афтӕ. 30 Кӕуджытӕ хъуамӕ ма уой кӕуджытау; цингӕнджытӕ – цингӕнджытау; ӕлхӕнджытӕ хъуамӕ уой, цыма сӕ къухы ницы бафтыд, уыйау. 31 Ацы дунейы хорзӕхтӕй чи пайда кӕны, уыдон хъуамӕ уой афтӕ, цыма дзы нӕ пайда кӕнынц. Уымӕн ӕмӕ мах цы дуне уынӕм, уымӕн йӕ кӕрон ӕрцӕуы. 32 Мӕн та фӕнды, цӕмӕй сымах уат ӕнӕмӕт. Ӕнӕус мӕт кӕны Хицауы хъуыддагыл, Хицауы зӕрдӕ балхӕныныл. 33 Усджын та мӕт кӕны зӕххон хъуыддӕгтыл, йӕ усы зӕрдӕ балхӕныныл. Моймӕдзыд ӕмӕ ӕнӕцыд чызг ӕмхуызон не сты. 34 Ӕнӕмой мӕт кӕны Хицауы хъуыддагыл, [Хицауы зӕрдӕ балхӕныныл,] цӕмӕй буарӕй дӕр ӕмӕ удӕй дӕр уа сыгъдӕг. Моймӕдзыдӕн та йӕ мӕт у зӕххон хъуыддӕгтыл, йӕ мойы зӕрдӕ балхӕныныл. 35 Ӕз уын уӕ бартӕ байсынмӕ нӕ хъавын, фӕлӕ зӕгъын уӕ пайдайӕн, цӕмӕй Хицауӕн кусат нывыл, ӕнувыдӕй, ӕмӕ уӕ мацы къуылымпы кӕна. 36 Кӕд искӕмӕн йӕ чындздзон чызг моймӕдзыд кӕй нӕма у, уый йӕм худинаг кӕсы, уӕд йӕ бар йӕхи – йӕ чызджы раттӕд моймӕ; уымӕй тӕригъӕды нӕ бафтдзӕн. 37 Фӕлӕ йӕ бар йӕхи кӕмӕн у, афтӕмӕй йӕ чызджы ӕнӕцыдӕй ныууадзыны фӕнд фидарӕй чи скодта, ӕмӕ йӕ фӕнд нӕ аивыны тых кӕмӕ ис, уый раст кӕны. 38 Уӕдӕ йӕ чызджы моймӕ чи дӕтты, уый раст кӕны; чи йӕ нӕ дӕтты, уый та ноджы хуыздӕр кӕны. 39 Усӕн цалынмӕ йӕ лӕг удӕгас у, уӕдмӕ йемӕ баст у. Йӕ лӕг куы амӕла, уӕд кӕмӕ ӕрцӕуа, уый йӕхи бар у, ӕрмӕст Хицауыл ӕууӕндӕгӕй хъуамӕ смой кӕна. 40 Фӕлӕ уыцы ус, мӕ уынаффӕмӕ гӕсгӕ, куы нал смой кӕна, уӕд тӕхудиагдӕр уыдзӕн. Мӕнмӕ та афтӕ кӕсы, ӕмӕ ӕз дӕр хайджын дӕн Хуыцауы Удӕй.

1 Коринфӕгтӕм 8

1 Ныр та мӕнгхуыцӕуттӕн хаст нывондты тыххӕй. Мах ӕмбарӕм, неппӕтмӕ дӕр зонынад кӕй ис, уый. Фӕлӕ зонынад адӕймаджы хиуыл ӕрвӕссын кӕны, уарзондзинад та фидаргӕнӕг у. 2 Йӕхицӕн исты зонын ӕнхъӕл чи у, уыцы адӕймаг, куыд ӕмбӕлы, афтӕ ницыма зоны. 3 Фӕлӕ Хуыцауы чи уарзы, уыцы адӕймаджы Хуыцау нымайы хионыл. 4 Уӕдӕ мӕнгхуыцӕуттӕн хаст нывондтӕй хӕрыны тыххӕй мах зонӕм: мӕнгхуыцау дунейы ницы у, иунӕг Хуыцауы йеддӕмӕ ӕндӕр Хуыцау нӕй. 5 Кӕд арвыл кӕнӕ зӕххыл ис, хуыцӕуттӕ кӕй хуындӕуы, ахӕмтӕ, – уымӕн ӕмӕ «хуыцӕуттӕ» ӕмӕ «хицӕуттӕ» бирӕ сты, – 6 Уӕддӕр махӕн ис, ӕппӕт дӕр Чи сфӕлдыста ӕмӕ мах Кӕмӕн цӕрӕм, уыцы иунӕг Фыд-Хуыцау, ӕмӕ ӕппӕт дӕр Кӕй руаджы сфӕлдыстӕуыд, ӕмӕ цардӕй Кӕй фӕрцы схайджын стӕм, уыцы иунӕг Хицау Йесо Чырысти. 7 Фӕлӕ алкӕмӕ фаг зонынад нӕй: иуӕй-иутӕ мӕнгхуыцӕуттыл афтӕ сахуыр сты, ӕмӕ уыдонӕн хаст нывондтӕй куы фӕхӕрынц, уӕд ӕй абон дӕр ма нымайынц мӕнгхуыцӕуттӕн табуйыл. Цы ӕмбӕлы ӕмӕ цы не 'мбӕлы, уый раиртасынхъом кӕй не сты, уымӕ гӕсгӕ сӕ цӕсгом фӕчъизи вӕййы. 8 Хойраг мах Хуыцаумӕ нӕ хӕстӕг кӕны: куы нӕ хӕрӕм, уӕд дӕр нӕ ницы сӕфы; куы хӕрӕм, уӕд дӕр ныл ницы ӕфты. 9 Кӕсут уӕхимӕ, цӕмӕй уӕ уыцы бартӕ лӕмӕгъ уырнджыты ма фӕрӕдийын кӕной. 10 Дӕумӕ ис зонынад, ӕмӕ дӕ исчи муртатты кувӕндоны фынгыл бадгӕ куы фена, уӕд йӕхӕдӕг лӕмӕгъ кӕй у, уымӕ гӕсгӕ йын йе 'фсарм мӕнгхуыцӕуттӕн хаст нывондтӕй хӕрыны бар нӕ ратдзӕн, ӕви? 11 Ӕмӕ дӕ зонынадӕй бабын уыдзӕни лӕмӕгъ – Чырысти кӕй сӕраппонд амард, дӕ уыцы ӕфсымӕр. 12 Афтӕмӕй сымах цӕут уӕ лӕмӕгъ ӕфсымӕрты тӕригъӕды, ардаут сӕ, се 'фсарм сын тӕрхон цӕй тыххӕй кӕны, уыдӕттӕ аразыныл. Ӕмӕ уымӕй цӕут Чырыстийы хъыджы. 13 Уӕдӕ кӕд хойраг тӕригъӕды ӕфтауы ме 'фсымӕры, уӕд мыггагмӕ дӕр дзидзайы хъӕстӕ мӕхи нал фӕкӕндзынӕн, цӕмӕй тӕригъӕды ма бафтауон ме 'фсымӕры.

1 Коринфӕгтӕм 9

1 Ау, ӕз апостол нӕ дӕн? Ау, ӕз сӕрибар нӕ дӕн? Ӕз нӕ Хицау Йесо Чырыстийы нӕ федтон, ӕви? Ӕз Хицауы сӕраппонд цы бакодтон, сымах мӕ уыцы фӕллой не стут, ӕви? 2 Кӕд иннӕтӕн апостол нӕ дӕн, уӕддӕр сымахӕн апостол дӕн. Ӕз Хицауы апостол кӕй дӕн, уымӕн ӕвдисӕйнаг сымах стут. 3 Гъе, уый у мӕ дзуапп, мӕныл даутӕ чи кӕны, уыдонӕн. 4 Ӕви махӕн хӕрыны ӕмӕ нуазыны бар нӕй? 5 Ӕви иннӕ апостолтӕн, Хицауы ӕфсымӕртӕн ӕмӕ Кифӕйӕн, устытӕ куыд ис, афтӕ мӕнӕн нӕй уырнӕг хотӕй цардӕмбал скӕныны бар, цӕмӕй кӕмдӕриддӕр мемӕ уа? 6 Ӕви ӕрмӕст мӕнӕн ӕмӕ Варнавӕйӕн нӕй нӕ кусыны бар? 7 Уый кӕд уыдис, ӕмӕ ӕфсӕддон йӕхӕдӕг йӕхи дара? Сӕнӕфсир ныссадзӕг сӕнӕфсиры гагатӕй ма хӕра? Дзуг чи хизы, уый ӕхсыр ма нуаза? 8 Ӕппӕт уыдӕттӕ ӕз, мыййаг, адӕймаджы зондӕй зӕгъын? Моисейы Ӕгъдау дӕр афтӕ нӕ зӕгъы, ӕви? 9 Уымӕн ӕмӕ дзы фыст ис: «Найгӕнӕг галӕн йӕ дзых бастӕй ма дар». Хуыцауы мӕт, мыййаг, галтыл у? 10 Ӕви уый мах тыххӕй загъд у? Кӕй зӕгъын ӕй хъӕуы, уый мах тыххӕй фыст у; уымӕн ӕмӕ хуымгӕнӕг хъуамӕ хуым кӕна зӕрдӕдаргӕйӕ, ӕмӕ найгӕнӕг най кӕна йӕ хай райсыны ныфсимӕ. 11 Мах уӕ удтӕн байтыдтам тауинаг уӕ зӕрдӕты, ӕмӕ нӕ гуыбынӕн исты куы ӕркӕрдӕм, уӕд уый ӕгӕр уыдзӕни? 12 Иннӕтӕн уӕм ахӕм бар кӕм ис, уым мах уыдонӕй барджындӕр не стӕм, ӕви? Уыцы бартӕй мах уӕвгӕ дӕр нӕ пайда кодтам, фӕлӕ быхсӕм алцӕмӕн дӕр, цӕмӕй Чырыстийы фарны уацӕн мацы цӕлхдур сӕвӕрӕм. 13 Хуыцауы хӕдзары чи лӕггад кӕны, уыдон сӕ хӕлц уырдыгӕй кӕй исынц, ӕмӕ нывондхӕссӕны раз лӕггадгӕнджытӕн нывондтӕй хай кӕй ис, уый нӕ зонут, ӕви? 14 Афтӕ Хицау фарны уац хъусынгӕнджытӕн дӕр бафӕдзӕхста фарны уац хъусын кӕнынӕй цӕрын. 15 Фӕлӕ ӕз уыцы бартӕй не спайда кодтон; мӕ фыстӕг дӕр уӕм уый тыххӕй нӕ фыссын, ӕмӕ сӕ пайда кӕнын райдайон. Уый бӕсты мӕ амӕлӕт хуыздӕр уаид! Раппӕлинагӕй мӕм цы ис, уымӕй мӕ ӕнӕхай ничи фӕкӕндзӕн. 16 Ӕз фарны уац адӕммӕ кӕй хӕссын, уымӕй мӕхицӕй нӕ раппӕлдзынӕн – уый мӕ хӕс у, ӕмӕ додой мӕ сӕр, фарны уац адӕммӕ куы нӕ хӕссон, уӕд! 17 Уыцы куыст барвӕндонӕй куы кӕнин, уӕд мын уаид мызд; фӕлӕ йӕ ӕз барвӕндонӕй нӕ кӕнын – ӕз ӕрмӕст аразын, цы хъуыддаг мын бафӕдзӕхстӕуыд, уый. 18 Уӕдӕ мӕ мызд цы у? Мӕ мызд уый у, ӕмӕ фарны уац хъусын кӕнын лӕвар, ӕмӕ афтӕмӕй фарны уац хъусынгӕнӕджы бартӕй нӕ пайда кӕнын. 19 Ӕз никӕй дӕлбар дӕн, уӕддӕр алкӕмӕн дӕр мӕхицӕй скодтон цагъар, цӕмӕй ӕрхонон фылдӕр адӕм. 20 Иудейты ӕрхоныны сӕраппонд иудейтӕн ӕз сдӕн иудейау; Моисейы Ӕгъдауы дӕлбар уӕвджыты ӕрхоныны сӕраппонд ӕз уыдонӕн сдӕн Ӕгъдауы дӕлбар адӕймагау, кӕд Ӕгъдауы дӕлбар нӕ дӕн, уӕддӕр. 21 Ӕгъдау кӕмӕн нӕй, уыдонӕн сдӕн, Ӕгъдау кӕмӕн нӕй, ахӕмау, – афтӕмӕй та Хуыцауы раз ӕнӕ ӕгъдау нӕ дӕн, фӕлӕ дӕн Чырыстийы ӕгъдауы дӕлбар, – цӕмӕй ӕрхонон, Ӕгъдау кӕмӕн нӕй, уыдоны. 22 Лӕмӕгъты ӕрхоныны сӕраппонд лӕмӕгътӕн сдӕн лӕмӕгъау. Ӕппӕтӕн дӕр ӕз сдӕн алцы, цӕмӕй цыфӕндыйӕ дӕр фервӕзын кӕнон иуӕй-иуты. 23 Ӕз ӕппӕт уыдӕттӕ фарны уацы сӕраппонд кӕнын, йӕ хорзӕхӕй мӕ хай куыд райсон, афтӕ. 24 Згъорӕн фӕзы сеппӕт дӕр фезгъорынц, фӕлӕ хӕрзиуӕг иу адӕймагмӕ кӕй ӕрхауы, уый нӕ зонут, ӕви? Уӕдӕ згъоргӕут, ӕмӕ райсат хӕрзиуӕг. 25 Ерысты архайджытӕ хиуылхӕцгӕ сты алцӕмӕй дӕр. Уыдонӕн сӕ нысан у, рӕстӕг кӕй бахӕрдзӕн, ахӕм хӕрзиуӕг райсын; махӕн та нӕ нысан у мыггагмӕйы хӕрзиуӕг райсын. 26 Уымӕ гӕсгӕ ӕз не згъорын, бӕлвырд нысан кӕмӕн нӕй, уыйау; уӕлдӕф тымбылкъухӕй цӕвӕгау нӕу мӕ цӕф. 27 Хъизӕмарӕй марын мӕ буар, аразын дзы цагъар, цӕмӕй ма разынон, иннӕтӕм фарны уац чи ӕрхаста, афтӕмӕй фӕлварӕнтӕ раттын кӕй бон нӕ баци, ахӕм.

1 Коринфӕгтӕм 10

1 Мӕн фӕнды, ӕфсымӕртӕ, цӕмӕй сымах зонат, нӕ фыдӕлтӕ иууылдӕр ӕврагъы дӕлбазыр кӕй уыдысты, ӕмӕ сеппӕт дӕр Сырх денджызыл кӕй ахызтысты, уый. 2 Уыдонӕн сеппӕтыл дӕр Моисеимӕ саргъуыдӕуыд ӕврагъ ӕмӕ денджызы. 3 Сеппӕт дӕр хордтой уыциу уӕларвон хойраг. 4 Сеппӕт дӕр нуӕзтой уыциу уӕларвон донӕй – семӕ чи уыдис, уыцы уӕларвон къӕдзӕхӕй ракӕлгӕ донӕй; уыцы къӕдзӕх та уыди Чырысти. 5 Фӕлӕ Хуыцау сӕ фылдӕрӕй райгонд нӕ уыд, ӕмӕ фӕцагъды сты ӕдзӕрӕг бӕстӕйы. 6 Уыдӕттӕ та махӕн зондыхос сты – фыдӕхмӕ ӕмхиц ма уӕм, уыдон ӕм куыд ӕмхиц уыдысты, афтӕ. 7 Ма ут мӕнгхуыцӕуттӕн кувджытӕ, уыдонӕй сын бирӕтӕ куыд куывтой, афтӕ; Сыгъдӕг Фыст уыдоны тыххӕй зӕгъы: «Адӕм ӕрбадтысты хӕрд ӕмӕ нозтыл, стӕй сыстадысты ӕмӕ сын бацайдагъ хъазт». 8 Ма хӕтӕм, уыдонӕй бирӕтӕ хӕтыныл куыд бафтыдысты, афтӕ; уый тыххӕй дзы иу бонмӕ фӕмард ӕртӕ ӕмӕ ссӕдз мины. 9 Ма къахӕм Чырыстийы, уыдонӕй Йӕ бирӕтӕ куыд къахтой, афтӕ; уый тыххӕй фӕцагъды сты кӕлмыты хӕстӕй. 10 Ма хъуыр-хъуыр кӕнут, уыдонӕй бирӕтӕ куыд хъуыр-хъуыр кодтой, афтӕ; уый тыххӕй сӕ фӕцагъта удхӕссӕг зӕд. 11 Сӕ хабӕрттӕ махӕн зондыхос сты; ӕмӕ сӕ ныффыстӕуыди, цӕмӕй мах, рӕстӕджы кӕроны цӕрджытӕ, ахуыр кӕнӕм уыдоныл. 12 Уӕдӕ кӕд исчи афтӕ ӕнхъӕл у, фидар лӕууы, зӕгъгӕ, уӕд кӕсӕд йӕхимӕ, цӕмӕй ма ахауа. 13 Сымах бахаудтат, адӕймаг кӕм бахауы, ахӕм фӕлварӕны. Фӕлӕ Хуыцау иузӕрдион у, ӕмӕ уыл не 'руадздзӕн, тых уӕм кӕй фаг нӕ разына, ахӕм фӕлварӕн, фӕлӕ уын уӕ фӕлварӕны баххуыс кӕндзӕн, куыд ын бафӕразат, афтӕ. 14 Уӕдӕ, мӕ уарзон хӕлӕрттӕ, уӕхи хизут мӕнгхуыцӕуттӕм кувынӕй. 15 Ӕз зӕгъын, ӕмбаргӕтӕн куыд фӕзагъдӕуы, афтӕ. Ӕмӕ цы зӕгъын, ууыл уӕхӕдӕг ахъуыды кӕнут. 16 Цы арфӕйы кӕхцы тыххӕй арфӕ кӕнӕм, уый мах Чырыстийы Тугимӕ нӕ иу кӕны, ӕви? Ӕмӕ цы дзул асӕттӕм, уый мах Чырыстийы Буаримӕ нӕ иу кӕны, ӕви? 17 Дзул иу кӕй у, уымӕ гӕсгӕ мах, бирӕ адӕм, иу буар стӕм, уымӕн ӕмӕ иу дзулӕй райсы алчидӕр йӕ хай. 18 Акӕсут-ма, туг-стӕгӕй израилаг чи у, уыдонмӕ – нывондӕй куы фӕхӕрынц, уӕд нывондхӕссӕны раз лӕггадгӕнджытӕ нӕ вӕййынц, ӕви? 19 Ӕз цы зӕгъын уымӕй? Мӕнгхуыцау исты у, кӕнӕ мӕнгхуыцауӕн цы нывонд ӕрхӕссынц, уый исты у, зӕгъгӕ? 20 Нӕ! Фӕлӕ муртаттӕ цы нывондтӕ ӕрхӕссынц, уыдоны Хуыцауӕн нӕ хӕссынц, фӕлӕ дӕлимонтӕн. Мӕн та нӕ фӕнды, ӕмӕ дӕлимонтимӕ баст уат. 21 Хицауы кӕхцӕй дӕр нуазын ӕмӕ дӕлимонты кӕхцӕй дӕр нуазын уын не 'мбӕлы. Хицауы фынгыл дӕр бадын ӕмӕ дӕлимонты фынгыл дӕр бадын уын не 'мбӕлы. 22 Ау, мах Хицауы мӕсты кӕндзыстӕм? Мах Уымӕй, мыййаг, тыхджындӕр стӕм? 23 Ис алцыдӕр кӕныны бар, фӕлӕ алцы пайда нӕу. Ис алцыдӕр кӕныны бар, фӕлӕ алцы фидаргӕнӕг нӕу. 24 Йӕхи пайдайыл мачи тыхсӕд, фӕлӕ алчидӕр тыхсӕд иннӕйы пайдайыл. 25 Уӕййаг цыдӕриддӕр ис, уый хӕрут ӕнӕ равзар-бавзарӕй, ӕнӕзӕрдӕхсайгӕйӕ. 26 Уымӕн ӕмӕ «зӕхх, стӕй зӕххыл цыдӕриддӕр ис, уый Хицауы у». 27 Ӕнӕуырнджытӕй уӕ исчи куы фӕхона, ӕмӕ уӕ ацӕуын куы бафӕнда, уӕд уын цы ӕрӕвӕрой, уый бахӕрут ӕнӕ равзар-бавзарӕй, ӕнӕзӕрдӕхсайгӕйӕ. 28 Фӕлӕ уын исчи куы зӕгъа: «Уый мӕнгхуыцауӕн хаст нывонд у», уӕд дзы ма бахӕрут уыцы адӕймаджы тыххӕй ӕмӕ ӕфсармы сӕраппонд. 29 Ӕз сымах ӕфсармы тыххӕй нӕ зӕгъын, фӕлӕ уыцы адӕймаджы ӕфсармы тыххӕй. Мӕ сӕрибарӕн мын кӕйдӕр ӕфсарм цӕмӕ гӕсгӕ хъуамӕ уа тӕрхонгӕнӕг? 30 Кӕд бузныгӕй хӕрын, уӕд бузныг цӕмӕй дӕн, уый тыххӕй мын цӕмӕн хъуамӕ бауайдзӕф кӕна исчи? 31 Уӕдӕ хӕргӕ кӕнат ӕви нуазгӕ, ӕви ӕндӕр исты хъуыддаг аразат, ӕппӕт дӕр кӕнут Хуыцауы кадӕн. 32 Цӕлхдур ма ут нӕдӕр иудейтӕн, нӕдӕр бердзентӕн, нӕдӕр Хуыцауы аргъуанӕн, 33 Ӕз дӕр алы хъуыддаджы алкӕйы зӕрдӕ куыд ӕлхӕнын, афтӕ. Мӕхи пайдамӕ нӕ бӕллын, фӕлӕ бирӕты пайдамӕ, цӕмӕй фервӕзой.

1 Коринфӕгтӕм 11

1 Фӕзмут мӕ, ӕз Чырыстийы куыд фӕзмын, афтӕ. 2 Ӕппӕлын уӕ, ӕфсымӕртӕ, мӕнмӕ цы федтат, ӕппӕт уыдӕттӕ уӕ зӕрдыл кӕй лӕууынц ӕмӕ уӕм цы ахуырад ӕрхастон, ууыл ӕнӕхъӕнӕй дӕр фидар кӕй хӕцут, уый тыххӕй. 3 Ноджы ма мӕ фӕнды, цӕмӕй сымах зонат: алы нӕлгоймагӕн дӕр йӕ хицау Чырысти у, сылгоймаджы хицау нӕлгоймаг у, Чырыстийы хицау та Хуыцау у. 4 Кувгӕйӕ кӕнӕ пехуымпариуӕг кӕнгӕйӕ бӕгъӕмсар цы нӕлгоймаг нӕ уа, уый йӕхи ӕмӕ йӕ Хицауы ӕгад кӕны. 5 Бӕгъӕмсарӕй цы сылгоймаг кувы кӕнӕ пехуымпариуӕг кӕны, уый дӕр йӕхи ӕмӕ йӕ хицауы ӕгад кӕны – ахӕм сылгоймаг сӕрдастӕй уӕлдай нӕу. 6 Кӕд сылгоймаг сӕрбӕттӕн нӕ дары, уӕд йӕ сӕр алвынӕд; фӕлӕ сылгоймагмӕ кӕд йӕ сӕр алвынын кӕнӕ адасын худинаг кӕсы, уӕд сӕрбӕттӕн дарӕд. 7 Нӕлгоймаг бӕгъӕмсар хъуамӕ уа, уымӕн ӕмӕ йӕ Хуыцау Йӕхимӕ гӕсгӕ сфӕлдыста ӕмӕ йӕ намыс Уымӕй у; сылгоймаджы намыс та нӕлгоймагӕй у. 8 Уымӕн ӕмӕ нӕлгоймаг сылгоймагӕй нӕ рацыд, фӕлӕ сылгоймаг рацыд нӕлгоймагӕй; 9 Нӕлгоймаджы не сфӕлдыстӕуыди сылгоймагӕн, фӕлӕ сылгоймаджы сфӕлдыстӕуыди нӕлгоймагӕн. 10 Ӕмӕ сылгоймаг дӕлбар кӕй у, уый равдисынӕн зӕдты сӕраппонд хъуамӕ дара сӕрбӕттӕн. 11 Ӕниу, Хицауы раз сылгоймагӕн нӕлгоймаг куыд ахсджиаг у, афтӕ ахсджиаг у сылгоймаг дӕр нӕлгоймагӕн. 12 Уымӕн ӕмӕ кӕд сылгоймаг нӕлгоймагӕй рацыд, уӕддӕр нӕлгоймаг сылгоймагӕй райгуыры. О, фӕлӕ ӕппӕт дӕр Хуыцауӕй у. 13 Ахъуыды-ма кӕнут уӕхӕдӕг, сылгоймагӕн бӕгъӕмсарӕй Хуыцаумӕ кувын фидауы? 14 Ӕрдз уӕ йӕхӕдӕг ахуыр кӕны: нӕлгоймагӕн сӕрыхъуынтӕ уадзын ӕгад у; 15 Сылгоймаг та сӕрыхъуынтӕ куы уадза, уӕд ын уый кад у, уымӕн ӕмӕ йын сӕрыхъуынтӕ ӕрдзон ӕмбӕрзӕнау лӕвӕрд сты. 16 Фӕлӕ кӕд уыдӕтты тыххӕй искӕй быцӕу кӕнын фӕнды, уӕд мах дӕр ӕмӕ Хуыцауы аргъуантӕ дӕр ахӕм ӕгъдауыл хӕст не стӕм. 17 Ныр та уын цы зӕгъдзынӕн, уымӕй уӕ ӕппӕлгӕ нӕ кӕнын, уымӕн ӕмӕ уе 'мбырдтӕ пайдайы бӕсты зиан ӕрхӕссынц. 18 Фыццаджыдӕр, ӕз хъусын, зӕгъгӕ, аргъуанмӕ куы ӕрцӕут, уӕд фӕкъордтӕ вӕййут, ӕмӕ афтӕ кӕй у, уый мӕ иуырдыгӕй уырнгӕ дӕр кӕны. 19 Ӕцӕг уӕм алыхуызон зондахаст дӕр хъуамӕ уа, уе 'хсӕн фӕлтӕрд чи у, уыдон куыд сбӕлвырд уой, афтӕ. 20 Сымах иумӕ куы ӕрӕмбырд вӕййут, уӕд уын дзы Хицауы ӕхсӕвӕр нӕ рауайы – 21 Алчидӕр батагъд кӕны йӕ ӕхсӕвӕр бахӕрыныл, ӕмӕ иу ӕххормагӕй баззайы, иннӕ та расыг свӕййы. 22 Хӕрынӕн ӕмӕ уын нуазынӕн хӕдзӕрттӕ нӕй, мыййаг? Ӕви Хуыцауы аргъуан ницӕмӕ дарут ӕмӕ мӕгуыртыл дӕлӕмӕ хӕцут? Цы уын зӕгъон? Уый тыххӕй уӕ раппӕлон? Нӕ уӕ раппӕлдзынӕн. 23 Уымӕн ӕмӕ ӕз Хицауӕй цы базыдтон, сымахӕн дӕр уый бацамыдтон: гадзрахатӕй Йыл куы рацыдӕуыд, уыцы ӕхсӕв Хицау Йесо райста дзул, 24 Арфӕ ракодта, асаста йӕ ӕмӕ загъта: «[Айсут ӕмӕ хӕрут –] ай Мӕ Буар у, ӕмӕ саст цӕуы уӕ сӕраппонд. Афтӕ кӕнут Мӕ ӕрымысынӕн». 25 Ӕхсӕвӕры фӕстӕ райста сӕны кӕхц дӕр ӕмӕ загъта: «Ацы кӕхц у, Мӕ Тугӕй фидаргонд чи цӕуы, уыцы ног фидыд. Кӕдфӕнды дӕр дзы ма нуазат – уый кӕнут Мӕ ӕрымысынӕн». 26 Уӕдӕ ацы дзул куы фӕхӕрут ӕмӕ ацы сӕн куы фӕнуазут, уӕд уымӕй хъусын кӕнут Хицауы мӕлӕты тыххӕй, цалынмӕ ӕрцӕуа, уӕдмӕ. 27 Аккаг аргъ сын чи нӕ кӕны, афтӕмӕй ацы дзул чи хӕра ӕмӕ ацы сӕн чи нуаза, уый бацӕудзӕни Хицауы Буары ӕмӕ Туджы тӕригъӕды. 28 Уӕдӕ алы адӕймаг дӕр ныккӕсӕд йӕ зӕрдӕмӕ, ӕмӕ уый фӕстӕ хӕрӕд ацы дзулӕй ӕмӕ нуазӕд ацы сӕнӕй. 29 Хицауы Буарӕн аргъ чи нӕ кӕны, афтӕмӕй чи хӕры ӕмӕ нуазы, уымӕн уыцы дзул ӕмӕ сӕн уыдзысты тӕрхонӕн. 30 Уымӕ гӕсгӕ сымахӕй бирӕтӕ сты лӕмӕгъ ӕмӕ рынчын; чи амарди, уыдон дӕр дзӕвгар сты. 31 Уымӕн ӕмӕ нӕхӕдӕг нӕхицӕн тӕрхон куы кӕниккам, уӕд тӕрхонгонд нӕ уаиккам. 32 Хицау нын куы фӕтӕрхон кӕны, уӕд та баййафӕм ӕфхӕрд, цӕмӕй дунеимӕ тӕрхонгонд ма уӕм. 33 Уымӕ гӕсгӕ, ме 'фсымӕртӕ, ӕхсӕвӕрмӕ куы ӕрӕмбырд вӕййут, уӕд-иу банхъӕлмӕ кӕсут кӕрӕдзимӕ. 34 Кӕд исчи ӕххормаг у, уӕд бахӕрӕд йӕ хӕдзары, цӕмӕй уӕ уыцы ӕмбырд ма ӕркӕна тӕрхонмӕ. Иннӕ хъуыддӕгтӕ банывыл кӕндзынӕн, куы уӕм ӕрцӕуон, уӕд.

1 Коринфӕгтӕм 12

1 Мӕн фӕнды, ме 'фсымӕртӕ, цӕмӕй сымах зонат, Сыгъдӕг Уд кӕй дӕтты, уыцы курдиӕтты тыххӕй. 2 Сымах зонут: муртаттӕ ма куы уыдыстут, уӕд уӕ цыма иставӕр тых сайдта, афтӕ куывтат ӕгомыг гуымирытӕн. 3 Уымӕ гӕсгӕ уын зӕгъын: Хуыцауы Уд кӕмӕ ис, уый Йесойы нӕ ралгъитдзӕн, ӕмӕ Йесойы Хицау ничи схондзӕн, Сыгъдӕг Уд ӕм куы нӕ уа, уӕд. 4 Курдиӕттӕ алыхуызон сты, дӕтгӕ та сӕ уыциу Уд кӕны. 5 Хуыцауӕн алы хуызы балӕггадгӕнӕн ис, разӕнгардгӕнӕг та уыциу Хицау у. 6 Куыстытӕ алыхуызон сты, фӕлӕ неппӕты фӕрцы ӕппӕт дӕр уыциу Хуыцау аразы. 7 Алкӕй фӕрцы дӕр Сыгъдӕг Уд Йӕхи ӕвдисы иумӕйаг пайдайӕн. 8 Уды руаджы иуӕн лӕвӕрд цӕуы уӕлзонд ныхасы курдиат, иннӕмӕн та уыциу Уды руаджы – зонынады ныхасы курдиат; 9 Аннӕмӕн уыциу Уды руаджы – уырнындзинад; иннӕмӕн уыциу Уды руаджы – низтӕ дзӕбӕх кӕныны курдиат; 10 Иуӕн – диссӕгтӕ аразыны, иннӕмӕн – пехуымпарады, иннӕмӕн – уд Хуыцауӕй у ӕви нӕ, уый зоныны, иннӕмӕн – алыхуызон ӕвзӕгтыл дзурыны, иннӕмӕн – ӕвзӕгтӕ ӕмбарын кӕныны курдиат. 11 Фӕлӕ ӕппӕт уыдӕттӕ кӕны уыциу Уд. Ӕмӕ алкӕмӕн дӕр дӕтты, куыд Ӕй фӕнды, афтӕ. 12 Буар иу у, йӕ уӕнгтӕ та – бирӕ. Фӕлӕ кӕд бирӕ сты, уӕддӕр сеппӕт дӕр иу буар сты. Афтӕ у Чырысти дӕр. 13 Уымӕн ӕмӕ неппӕтыл дӕр – иудейтӕ ӕмӕ бердзентыл, цагъартӕ ӕмӕ сӕрибар адӕмыл – иу Удӕй саргъуыдӕуыд, ӕмӕ иу буар систӕм, неппӕтӕн дӕр уыциу Уд рардӕуыди. 14 Буар та иу уӕнгӕй нӕу, фӕлӕ бирӕ уӕнгтӕй. 15 Къах куы зӕгъид: «Къух кӕй нӕ дӕн, уымӕ гӕсгӕ буары хай нӕ дӕн», уӕд уый тыххӕй буары хай нал уаид? 16 Ӕмӕ хъус куы зӕгъид: «Цӕст кӕй нӕ дӕн, уымӕ гӕсгӕ буары хай нӕ дӕн», уӕд уый тыххӕй буары хай нал уаид? 17 Кӕд ӕнӕхъӕн буар цӕст у, уӕд хъусгӕ та куыд кӕнид? Кӕд буар ӕнӕхъӕнӕй хъус у, уӕд ӕмбудгӕ та куыд кӕнид? 18 Хуыцау та буары алы уӕнгӕн дӕр скодта бынат, куыд Ӕй фӕндыд, афтӕ. 19 Уӕнгтӕ иууылдӕр иу уӕнг куы уаиккой, уӕд буар уӕвгӕ уаид? 20 Ныр та уӕнгтӕ бирӕ сты, буар та иу у. 21 Цӕст къухӕн нӕ зӕгъдзӕни: «Ницӕмӕн мӕ хъӕуыс». Сӕр къӕхтӕн нӕ зӕгъдзӕни: «Ницӕмӕн мӕ хъӕут». 22 Уый нӕ, фӕлӕ нӕм лӕмӕгъдӕр цы уӕнгтӕ кӕсынц, уыдон ӕнӕмӕнг хъӕуынц. 23 Иннӕтӕй нӕм къаддӕр чи кӕсы, нӕ буары уыцы уӕнгтыл фылдӕр мӕт кӕнӕм. 24 Аив чи нӕу, нӕ уыцы уӕнгтӕ хуыздӕр ӕмбӕрзӕм; аив уӕнгты та ӕмбӕрзын нӕ хъӕуы. Хуыцау буар афтӕ скодта, цӕмӕй фылдӕр мӕт кӕнӕм, фаг нымад чи нӕу, уыцы уӕнгтыл, 25 Буары уӕнгтӕ ма ныххицӕнтӕ уой, фӕлӕ кӕрӕдзийыл мӕт кӕной ӕмхуызон. 26 Уымӕ гӕсгӕ буары иу уӕнг куы фӕриссы, уӕд иннӕтӕ дӕр фӕриссынц йемӕ. Иу уӕнг куы снамысджын уа, уӕд иннӕ уӕнгтӕ дӕр цин кӕнынц йемӕ. 27 Сымах Чырыстийы буар стут, хицӕнтӕй та – Йӕ буары уӕнгтӕ. 28 Ӕмӕ Хуыцау уыдонӕй иуты аргъуаны сӕвӕрдта фыццаджыдӕр апостолтӕй, дыккаджы – пехуымпартӕй, уый фӕстӕ – ахуыргӕнджытӕй; дарддӕр иутӕн радта диссӕгтӕ ӕвдисыны тых, низтӕй дзӕбӕх кӕныны, ӕххуыс кӕныны, разамынд дӕттыны, алыхуызон ӕвзӕгтыл дзурыны курдиат. 29 Сеппӕт дӕр апостолтӕ сты? Сеппӕт дӕр пехуымпартӕ сты? Сеппӕт дӕр ахуыргӕнджытӕ сты? Сеппӕтмӕ дӕр ис диссӕгтӕ ӕвдисыны тых? 30 Сеппӕтмӕ дӕр ис низтӕй дзӕбӕх кӕныны курдиат? Сеппӕты бон у алыхуызон ӕвзӕгтыл дзурын? Сеппӕт дӕр ӕвзӕгтӕ ӕмбарын кӕнынц? 31 Тырнут ахсджиагдӕр курдиӕттӕм. Ӕмӕ уын ӕз ныртӕккӕ бацамондзынӕн тӕккӕ ахъаззагдӕр фӕндаг.

1 Коринфӕгтӕм 13

1 Ӕз адӕймаджы ӕмӕ зӕдты ӕвзӕгтыл куы дзурон, фӕлӕ мӕм уарзт куы нӕ уа, уӕд ӕз дӕн зыланггӕнаг мырмыраг кӕнӕ зылангзӕл ӕрхуытӕбӕгъ. 2 Кӕд мӕм ис пехуымпар ныхас, зонын ӕппӕт сусӕгдзинӕдтӕ, ис мӕм алы зонынад, стӕй хӕхты ӕндӕр ран ӕрӕвӕрын кӕй бон у, ахӕм уырнындзинад, уарзт та мӕм нӕй, – уӕд ӕз ницы дӕн. 3 Ӕз меппӕт мулк дӕр куы байуарон, мӕ буар басудзынмӕ куы раттон, уарзт та мӕм куы нӕ уа, – уӕд мын уыдӕттӕй ницы пайда ис. 4 Уарзт у бирӕбыхсаг, зӕрдӕхӕлар, уарзт хӕлӕг нӕ кӕны, уарзт нӕу хиппӕлой, нӕу сӕрыстыр, 5 Нӕу ӕнӕуаг, нӕ бӕллы хи пайдамӕ, нӕу мӕстыгӕр, фыдӕх йӕ зӕрдӕмӕ нӕ хӕссы, 6 Ӕвзӕрдзинадыл нӕ райы, фӕлӕ цин кӕны рӕстадыл; 7 Хатыр кӕны ӕппӕт дӕр, алцӕуылдӕр ӕууӕнды, алцӕуылдӕр йӕ зӕрдӕ дары, фӕразы алцӕмӕн дӕр. 8 Уарзтӕн кӕрон никуы уыдзӕни, пехуымпарад та банцайдзӕн, алыхуызон ӕвзӕгты курдиат нал уыдзӕни, зонынадӕн ӕрцӕудзӕни кӕрон. 9 Уымӕн ӕмӕ нӕ зонынад ӕххӕст нӕу, ӕмӕ нӕ пехуымпарад ӕххӕст нӕу. 10 Алцӕмӕй дӕр ӕххӕсты дуг куы ралӕууа, уӕд ӕххӕст цы нӕу, уый нал уыдзӕн. 11 Ӕз саби куы уыдтӕн, уӕд сабиау дзырдтон, сабийы хъуыдытӕ мӕм уыди, алцӕмӕ дӕр кастӕн сабийы цӕстӕй. Лӕджы кары куы бацыдтӕн, уӕд та ныууагътон, сабийӕ мӕм цы уыди, уыдӕттӕ. 12 Абон мах уынӕм, рӕстмӕ кӕм ницы зыны, ахӕм кӕсӕнмӕ кӕсӕгау, уӕд та фендзыстӕм комкоммӕ. Ныртӕккӕ мӕ зонынад ӕххӕст нӕу, уӕд та базондзынӕн ӕххӕстӕй, мӕн Хуыцау ӕххӕстӕй куыд базыдта, афтӕ. 13 Ныр та сты ӕртӕйӕ: уырнындзинад, зӕрдӕдарӕн, уарзт. Фӕлӕ уыдонӕй тӕккӕ ахъаззагдӕр уарзт у.

1 Коринфӕгтӕм 14

1 Тырнут уарзӕгойӕ цӕрынмӕ, ӕнувыдӕй архайут, Уд кӕй дӕтты, уыцы курдиӕттӕ райсыныл, уӕлдайдӕр та пехуымпариуӕг кӕныныл. 2 Ӕндӕр ӕвзагыл чи дзуры, уый адӕмӕн нӕ, фӕлӕ Хуыцауӕн дзуры. Ничи йӕ ӕмбары – Уды руаджы сусӕгдзинӕдтӕ дзуры. 3 Пехуымпариуӕггӕнӕг та адӕмӕн дзуры, цӕмӕй сӕ сфидар, сразӕнгард кӕна ӕмӕ барӕвдауа. 4 Ӕндӕр ӕвзагыл чи дзуры, уый ӕрмӕст йӕхи фидар кӕны, пехуымпариуӕггӕнӕг та аргъуан фидар кӕны. 5 Мӕ зӕрдӕ уеппӕтӕн дӕр зӕгъы ӕндӕр ӕвзӕгтыл дзурын, уӕлдайдӕр та пехуымпариуӕг кӕнын. Ӕвзӕгтыл дзурӕг аргъуан сфидар кӕныны сӕраппонд йӕ ныхас куы нӕ ӕмбарын кӕна, уӕд пехуымпариуӕггӕнӕг ӕвзӕгтыл дзурӕгӕй уӕлдӕр у. 6 Ныр уӕм ӕз куы ӕрцӕуон, ӕфсымӕртӕ, ӕмӕ ӕндӕр ӕвзӕгтыл куы дзурон, уӕд уын цы пайда фӕуыдзынӕн, Хуыцауӕй мын цы раргом, ахӕмӕй исты, кӕнӕ зонынад, кӕнӕ пехуымпарад, кӕнӕ ахуырад куы не 'рхӕссон, уӕд? 7 Зӕлтӕ кӕмӕй рацӕуынц, ахӕм ӕнӕуд дзаумӕттӕн, зӕгъӕм, уадындзӕн кӕнӕ фӕндырӕн, сӕ зӕлтӕ бӕлвырд куы нӕ уой, уӕд куыд базындӕуа, уадындзыл кӕнӕ фӕндырыл цы цӕгъдынц, уый? 8 Ӕмӕ хӕстон сыкъауадындзӕй бӕлвырд зӕлтӕ куы нӕ хъуыса, уӕд хӕстмӕ йӕхи чи ӕрцӕттӕ кӕндзӕн? 9 Бамбарӕн кӕмӕн нӕй, ахӕм ныхӕстӕ сымах дӕр ӕндӕр ӕвзӕгтыл куы дзурат, уӕд куыд базындӕуа, цы дзурут, уый? Уымӕн ӕмӕ уӕ ныхас уыдзӕн дымгӕмӕ дзурӕгау. 10 Дунейы бирӕ ӕвзӕгтӕ ис, ӕмӕ дзы ӕнӕхъуыды иу дӕр нӕй. 11 Фӕлӕ ӕз ӕвзаг куы нӕ зонон, уӕд ныхасгӕнӕгӕн ӕндӕрбӕстаг дӕн, ӕмӕ ныхасгӕнӕг дӕр мӕнӕн ӕндӕрбӕстаг у. 12 Афтӕ уӕд сымахмӕ дӕр. Уд кӕй дӕтты, кӕд уыцы курдиӕттӕм бӕллут, уӕд архайут, цӕмӕй уӕм бирӕ уа, аргъуан сфидар кӕнынӕн ахъаз чи у, ахӕм курдиӕттӕ. 13 Уӕдӕ ӕндӕр ӕвзӕгтыл чи дзуры, уый кувӕд, цы дзуры, уый ӕмбарын кӕныны курдиат райсыны тыххӕй. 14 Уымӕн ӕмӕ ӕз ӕнӕзонгӕ ӕвзагыл куы кувон, уӕд мӕ уд кувдзӕн, мӕ зондӕн та дзы пайда нӕ уыдзӕн. 15 Уӕдӕ цы бакӕнон? Кувдзынӕн удӕй, кувдзынӕн зондӕй дӕр, зардзынӕн удӕй, зардзынӕн зондӕй дӕр. 16 Уымӕн ӕмӕ ды Хуыцауӕн удӕй куы арфӕ кӕнай, уӕд ӕвзӕгтӕ ӕмбарынхъом цы адӕймаг нӕу, уый дӕ арфӕйӕн «амен» куыд зӕгъдзӕн, цы дзурыс, уый куы не 'мбара, уӕд? 17 Ды хорз арфӕ кӕныс, фӕлӕ дзы иннӕйы уырнындзинад нӕ фидар кӕны. 18 Бузныг дӕн мӕ Хуыцауӕй: ӕндӕр ӕвзӕгтыл ӕз уеппӕтӕй дӕр фылдӕр дзурын. 19 Фӕлӕ мӕ аргъуаны фӕнды ӕндӕр ӕвзагыл мингай дзырдтӕ зӕгъыны бӕсты фондз ныхасы мӕ зондӕй зӕгъын, цӕмӕй сахуыр кӕнон иннӕты дӕр. 20 Ӕфсымӕртӕ, зондӕй сывӕллӕттӕ ма ут. Фыдбылыз саразынмӕ ут сабитӕ, зондӕй та – хъомылтӕ. 21 Ӕгъдауы фыст у: «Ацы адӕмӕн дзурдзынӕн ӕндӕр ӕвзӕгтыл ӕмӕ ӕндӕрбӕстӕгты дзыхӕй, фӕлӕ Мӕм уӕд дӕр нӕ байхъусдзысты», – зӕгъы Хицау. 22 Уӕдӕ ӕндӕр ӕвзӕгтӕ Хуыцау ӕвдисӕйнагӕн радта уырнджытӕн нӕ, фӕлӕ ӕнӕуырнджытӕн; пехуымпарад та ӕнӕуырнджытӕн нӕ, фӕлӕ уырнджытӕн радта. 23 Уӕдӕ ӕгас аргъуан куы ӕрӕмбырд уа, ӕмӕ иууылдӕр ӕндӕр ӕвзӕгтыл куы дзурой, ӕмӕ ӕвзӕгтӕ ӕмбарынхъом чи нӕу, уыдон, кӕнӕ ӕнӕуырнджытӕ куы бацӕуой, уӕд уӕ ӕрратӕ нӕ фӕхондзысты, ӕви? 24 Фӕлӕ иууылдӕр пехуымпариуӕг куы кӕной, ӕмӕ сӕм ӕнӕуырнӕг кӕнӕ ӕвзӕгтӕ бамбарынхъом чи нӕу, ахӕм куы бацӕуа, уӕд цы ныхӕстӕ фехъуса, уыдон ын йӕ цӕстмӕ бадардзысты йӕ тӕригъӕдтӕ, йӕхиуыл ӕрхуддзӕн, 25 Раргом уыдзысты йӕ зӕрдӕйы сусӕггӕгтӕ. Уӕд ӕрхаудзӕни дӕлгоммӕ, бакувдзӕни Хуыцаумӕ ӕмӕ зӕгъдзӕни: «Хуыцау, ӕцӕгдӕр, уемӕ ис». 26 Уӕдӕ цы зӕгъон, ӕфсымӕртӕ? Сымах куы ӕрӕмбырд вӕййут, уӕд уӕ алкӕмӕ дӕр вӕййы кӕнӕ зарӕг, кӕнӕ зондамонӕн ныхас, кӕнӕ ӕндӕр ӕвзаг, кӕнӕ уыцы ӕвзаг бамбарын кӕныны курдиат, кӕнӕ искӕмӕн Хуыцауӕй исты раргом вӕййы. Ӕппӕт уыдӕттӕ хъуамӕ фидар кӕной аргъуан. 27 Кӕд исчи ӕндӕр ӕвзагыл дзуры, уӕд дзурӕнт дыууӕйӕ, тӕккӕ фылдӕр ӕртӕйӕ, уымӕй дӕр радгай, иу та йӕ ӕмбарын кӕнӕд. 28 Кӕд ӕмбарынгӕнӕг нӕй, уӕд аргъуаны ма дзурӕд, фӕлӕ дзурӕд йӕхицӕн ӕмӕ Хуыцауӕн. 29 Пехуымпартӕ дӕр дзурӕнт дыууӕйӕ кӕнӕ ӕртӕйӕ, иннӕтӕ та сын сӕ ныхас ӕвзарӕнт. 30 Фӕлӕ чи бады ӕмӕ хъусы, уыдонӕй искӕмӕн Хуыцауӕй исты куы раргом уа, уӕд дзургӕ чи кӕны, уый банцайӕд – 31 Уеппӕты бон дӕр у радгай пехуымпариуӕг кӕнын, цӕмӕй иууылдӕр ахуыр кӕной ӕмӕ сӕ бауагъдӕуа ныфс. 32 Пехуымпары разӕнгардгонд уд пехуымпарӕн коммӕгӕс у. 33 Уымӕн ӕмӕ Хуыцау ӕнӕсӕрфаты Хуыцау нӕу, фӕлӕ фарндӕттӕг Хуыцау у. Уыцы фарнӕй хайджын сты сыгъдӕджыты ӕппӕт аргъуантӕ. 34 Сылгоймӕгтӕ аргъуаны ма дзурӕнт, уымӕн ӕмӕ сын дзурын не 'мбӕлы, фӕлӕ сӕ бынат зонӕнт – афтӕ зӕгъы Ӕгъдау дӕр. 35 Кӕд сӕ исты базонын фӕнды, уӕд хӕдзары бафӕрсӕнт сӕ лӕгты, уымӕн ӕмӕ сылгоймагӕн аргъуаны ныхас кӕнын аив нӕу. 36 Хуыцауы ныхас, мыййаг, сымахӕй рацыди, кӕнӕ ӕрмӕст сымахмӕ бахъардта? 37 Кӕд исчи йӕхи нымайы пехуымпарыл кӕнӕ Сыгъдӕг Удӕй лӕвӕрд курдиаты хицауыл, уӕд бамбарӕд: ӕз уӕм цы фыссын, уый Хицау бафӕдзӕхста. 38 Уыдӕттӕ чи ницӕмӕ дары, уымӕн йӕхи дӕр ницӕмӕ дардӕуы. 39 Уӕдӕ, ӕфсымӕртӕ, тырнут пехуымпариуӕг кӕнынмӕ, ӕмӕ ӕндӕр ӕвзӕгтыл дзурыны бар дӕр дӕттут. 40 Ӕппӕт дӕр уӕд нывыл ӕмӕ ӕгъдауыл.

1 Коринфӕгтӕм 15

1 Ноджы ма уын иу хатт уӕ зӕрдыл лӕууын кӕнын, ӕфсымӕртӕ, ӕз уӕм цы фарны уац ӕрхастон, уый; сымах ӕй райстат уӕ зӕрдӕмӕ, сси уын царды бындур. 2 Ирвӕзгӕ дӕр уыцы фарны уацы руаджы кӕнут, ӕз уын цы фехъусын кодтон, кӕд ууыл фидар хӕцут, уӕд; науӕд дзӕгъӕлы баууӕндыдыстут. 3 Уымӕн ӕмӕ уӕм ӕз ӕрхастон, мӕхӕдӕг цы райстон, уыцы тӕккӕ сӕйрагдӕр: Сыгъдӕг Фысты куыд загъдӕуы, афтӕ Чырысти амарди нӕ тӕригъӕдты тыххӕй; 4 Уыди ныгӕд ӕмӕ ӕртыккаг бон райгас, Фысты куыд загъдӕуы, афтӕ. 5 Ӕмӕ Йӕхи равдыста Кифӕмӕ, уый фӕстӕ та ӕппӕт дыууадӕс апостолмӕ дӕр. 6 Стӕй уыциу рӕстӕг Йӕхи равдыста фондзсӕдӕ ӕфсымӕрӕй фылдӕрмӕ. Уыдонӕн сӕ фылдӕр абон дӕр сты удӕгас, иуӕй-иутӕ та дзы амардысты. 7 Уый фӕстӕ Йӕхи равдыста Иаковмӕ, фӕстӕдӕр – ӕппӕт апостолтӕм. 8 Сеппӕты фӕстӕ, ӕфтыддагмӕ фӕзынӕгау, фӕзынди мӕнмӕ дӕр. 9 Уымӕн ӕмӕ ӕз апостолтӕн сӕ тӕккӕ къаддӕр дӕн, ӕмӕ апостолы ном хӕссыны аккаг дӕр нӕ дӕн, Хуыцауы аргъуан кӕй ӕфхӕрдтон, уый тыххӕй. 10 Фӕлӕ ӕз цы дӕн, уый Хуыцауы хорзӕхӕй дӕн. Ӕмӕ Йӕ хорзӕхӕй хайджын дзӕгъӕлы нӕ фӕдӕн: ӕз сеппӕтӕй дӕр фылдӕр бакуыстон – ӕниу, ӕз нӕ, фӕлӕ мемӕ чи ис, Хуыцауы уыцы хорзӕх. 11 Уӕдӕ мах – ӕз дӕр ӕмӕ иннӕ апостолтӕ дӕр – уыцы фарны уац хъусын кӕнӕм ӕмӕ йыл сымах баууӕндыдыстут. 12 Чырысти мӕрдтӕй кӕй райгас, кӕд фарны уац ууыл дзуры, уӕд сымахӕй иуӕй-иутӕ куыд зӕгъынц, мӕрдтӕн райгасы амал нӕй, зӕгъгӕ? 13 Кӕд мӕрдтӕн райгасы амал нӕй, уӕд Чырысти дӕр нӕ райгас. 14 Ӕмӕ кӕд Чырысти нӕ райгас, уӕд цы уац хъусын кӕнӕм, уый дӕр дзӕгъӕлы у, ӕмӕ уӕ уырнындзинад дӕр дзӕгъӕлы у. 15 Ӕмӕ кӕд мӕрдтӕн райгасы амал нӕй, уӕд мах дӕр Хуыцауӕн разыниккам мӕнгӕвдисӕнтӕ, уымӕн ӕмӕ Хуыцауы тыххӕй дзуриккам, зӕгъгӕ, Уый райгас кодта, Кӕй нӕ райгас кодта, уыцы Чырыстийы. 16 Уымӕн ӕмӕ кӕд мӕрдтӕн райгасы амал нӕй, уӕд Чырысти дӕр нӕ райгас. 17 Ӕмӕ Чырысти кӕд нӕ райгас, уӕд уӕ уырнындзинадӕй пайда нӕй ӕмӕ нырма уӕ тӕригъӕдтӕй не ссӕрибар стут. 18 Уӕд Чырыстийыл ӕууӕндгӕйӕ чи амард, уыдон дӕр бабын сты. 19 Ӕмӕ кӕд Чырыстийыл ӕрмӕстдӕр ацы царды дарӕм нӕ зӕрдӕ, уӕд ӕппӕт адӕмы ӕхсӕн махӕй ӕнамонддӕр нӕй. 20 Фӕлӕ Чырысти мӕрдтӕй райгас – чи амарди, уыдонӕй фыццаг Уый райгас. 21 Уымӕн ӕмӕ мӕлӕт адӕймаджы руаджы куыд у, афтӕ Адӕймаджы руаджы у мӕрдтӕй райгас дӕр. 22 Адамимӕ иууылдӕр куыд мӕлынц, афтӕ иууылдӕр райгас уыдзысты Чырыстиимӕ, 23 Алчидӕр йӕ рӕстӕджы: фыццаг Чырысти, Чырысти куы ӕрцӕуа, уӕд та – йӕхионтӕ. 24 Уый фӕстӕ ӕрцӕудзӕн кӕрон. Чырысти ӕппӕт ӕнӕбуар ӕлдӕртты, барджынты ӕмӕ тыхджынты куы басӕтта, уӕд Паддзахад ратдзӕни Фыдмӕ – Хуыцаумӕ. 25 Уымӕн ӕмӕ Чырысти хъуамӕ паддзахиуӕг кӕна, цалынмӕ Йын Хуыцау ӕппӕт знӕгты Йӕ къӕхты бын ӕрӕвӕра, уӕдмӕ. 26 Бабын уыдзӕн фӕстаг знаг – мӕлӕт. 27 Уымӕн ӕмӕ Чырыстийӕн Хуыцау «ӕппӕт дӕр ӕрӕвӕрдта Йӕ къӕхты бын». Кӕд загъд у «ӕппӕт дӕр Ын ӕрӕвӕрдта Йӕ къӕхты бын», уӕддӕр бӕлвырд у – ам ныхас нӕ цӕуы ӕппӕт дӕр Чырыстийы къӕхты бын ӕрӕвӕрӕг Хуыцауӕн Йӕхиуыл. 28 Хуыцау Ын ӕппӕт дӕр Йӕ дӕлбар куы бакӕна, уӕд Фырт Йӕхӕдӕг дӕр бацӕудзӕн, ӕппӕт дӕр Ын Йӕ дӕлбар Чи бакодта, Уый дӕлбар, ӕмӕ Хуыцау алцӕмӕн дӕр ӕмӕ алкӕмӕн дӕр уыдзӕн иунӕг Хицау. 29 Науӕд мӕрдты сӕраппонд цӕй охыл райсынц аргъуыд? Кӕд мӕрдтӕн райгасы амал нӕй, уӕд цӕмӕн райсынц аргъуыд мӕрдты сӕраппонд? 30 Ӕмӕ мах дӕр ӕрвылсахат цӕй тыххӕй вӕййӕм тӕссаг уавӕрты? 31 Ӕфсымӕртӕ, ӕз алы бон дӕр мӕлгӕ кӕнын: нӕ Хицау Йесо Чырыстийы руаджы сымахӕн цы сарӕзтон, ӕз уымӕй буц дӕн ӕмӕ мын уый дӕтты афтӕ зӕгъыны бар. 32 Ӕз Эфесы хъӕддаг сырдтимӕ куы тох кодтон, уӕд мӕ нысан кӕд зӕххон уыди, уӕд мын уымӕй цы пайда ис? Кӕд мӕрдтӕ ӕгас нӕ кӕнынц, уӕд «байдайӕм хӕрын ӕмӕ нуазын, уӕддӕр райсом амӕлдзыстӕм!» 33 Ма фӕсайды ут: «Ӕвзӕр ӕмбӕлттӕ хорз миниуджытӕ сафӕг сты». 34 Куыд ӕмбӕлы, афтӕ уӕхи ӕрӕмбарут ӕмӕ тӕригъӕды мауал ӕфтут. Уӕ худинаджы тыххӕй уын ӕй зӕгъдзынӕн: сымахмӕ ис, Хуыцауы чи нӕ зоны, ахӕмтӕ. 35 Исчи бафӕрсдзӕн: «Куыд райгас уыдзысты мӕрдтӕ? Ӕмӕ цавӕр буары ӕрцӕудзысты?» 36 Ӕнӕзонд, ды цы тауыс, уый нӕ райгас уыдзӕни, куы нӕ амӕла, уӕд. 37 Ӕмӕ ды куы фӕтауыс, уӕд фидӕны буар нӕ тауыс, фӕлӕ бӕгънӕг нӕмыг, мӕнӕуы нӕмыг уа, ӕви ӕндӕр истӕй нӕмыг. 38 Фӕлӕ йын Хуыцау дӕтты, цавӕр Ӕй фӕнды, ахӕм буар, ӕмӕ афтӕ алы нӕмыгӕн дӕр – йӕхи буар. 39 Буӕрттӕ та ӕмхуызон не сты. Адӕмӕн – иу буар ис, цыппӕркъахыгтӕн – ӕндӕр буар, мӕргътӕн – ӕндӕр, кӕсӕгтӕн – ӕндӕр. 40 Ис ӕрвон буӕрттӕ ӕмӕ зӕххон буӕрттӕ: ӕрвонтӕн иу намыс ис, зӕххонтӕн – ӕндӕр, 41 Ӕндӕр намыс ис хурӕн, ӕндӕр намыс – мӕйӕн, ӕндӕр намыс – стъалытӕн. Сӕ намысмӕ гӕсгӕ иу стъалы иннӕйы хуызӕн нӕу. 42 Афтӕ уыдзӕн, мӕрдтӕ куы райгас уой, уӕд дӕр: байтыдӕуы бамбийынӕн, райгас вӕййы ӕнӕмӕлгӕйӕ; 43 Байтыдӕуы ницӕйагӕй, райгас вӕййы намысджынӕй; байтыдӕуы лӕмӕгъӕй, райгас вӕййы тыхджынӕй; 44 Байтыдӕуы ӕрдзон буар, райгас вӕййы уӕларвон буар. Ис ӕрдзон буар, ис уӕларвон буар. 45 Сыгъдӕг Фыст дӕр афтӕ зӕгъы: «Фыццаг адӕймаг – Адам сси удӕгас», фӕстаг Адам та сси царддӕттӕг уд. 46 Раздӕр уӕларвон нӕ вӕййы, фӕлӕ ӕрдзон, уый фӕстӕ та – уӕларвон. 47 Фыццаг адӕймаг у зӕххон, сыджытӕй конд, дыккаг Адӕймаг та – уӕларвон. 48 Сыджытӕй конд фыццаг адӕймаг цавӕр у, ахӕмтӕ сты зӕххонтӕ дӕр, ӕмӕ Уӕларвон цавӕр у, ахӕмтӕ сты уӕларвонтӕ дӕр. 49 Ӕмӕ мах сыджытӕй конд адӕймаджы хуызӕн куыд уыдыстӕм, афтӕ уыдзыстӕм Уӕларвоны хуызӕн дӕр. 50 Зӕгъын уын, ӕфсымӕртӕ: фыд ӕмӕ тугӕн Уӕларвон Паддзахадмӕ бацӕуын сӕ бон нӕу, ӕмӕ мӕлӕт тых цӕуыл у, уый ӕнӕмӕлгӕ нӕ уыдзӕн. 51 Зӕгъын уын сусӕгдзинад: мах неппӕт дӕр нӕ амӕлдзыстӕм, фӕлӕ неппӕт дӕр фендӕрхуызон уыдзыстӕм 52 Уайтӕккӕ, цӕстыфӕныкъуылдмӕ, куыддӕр фӕстаг сыкъауадындз ныууаса, афтӕ. Куы ныууаса, уӕд мӕрдтӕ райгас уыдзысты, мӕлӕт сын нал уыдзӕн, мах та фендӕрхуызон уыдзыстӕм. 53 Уымӕн ӕмӕ чи ӕмбийы, нӕ уыцы буар хъуамӕ суа ӕнӕмбийгӕ, ӕмӕ мӕлӕт тых цӕуыл у, уый хъуамӕ суа ӕнӕмӕлгӕ. 54 Ацы ӕмбийгӕ буар ӕнӕмбийгӕ куы суа ӕмӕ мӕлӕт тых цӕуыл у, уый ӕнӕмӕлгӕ куы суа, уӕд сӕххӕст уыдзӕни, Сыгъдӕг Фысты цы загъд ис, уый: «Мӕлӕт аирвӕзт уӕлахизы хъуыры». 55 «Мӕлӕт! Кӕм ис дӕ уӕлахиз? Мӕлӕт! Кӕм ис дӕ маргджын фат?» 56 Тӕригъӕд – уый у мӕлӕты маргджын фат; тӕригъӕд та хъару Ӕгъдауӕй райсы. 57 Бузныг Хуыцауӕй – Уый нын нӕ Хицау Йесо Чырыстийы руаджы дӕтты уӕлахиз! 58 Уӕдӕ, мӕ уарзон ӕфсымӕртӕ, ут фидар, ӕнӕфӕцудгӕ, иудадзыг ӕмӕ зӕрдиагӕй кусут Хицауӕн; уӕ фӕллойы тыххӕй Хицауӕй ӕнӕ хӕрзиуӕгӕй кӕй нӕ баззайдзыстут, уый зонут.

1 Коринфӕгтӕм 16

1 Ныр та сыгъдӕджытӕн ӕххуысы тыххӕй. Сымах хъуамӕ бакӕнат, ӕз Галатийы аргъуантӕн куыд бафӕдзӕхстон, афтӕ. 2 Къуырийы фыццаг бон сымахӕй алчидӕр рахицӕн кӕнӕд, йӕ мулк куыд амоны, уыйбӕрц ӕмӕ йын уӕд цӕттӕ, ӕз уӕм куы ӕрцӕуон, уӕд уӕ уыцы ӕххуыс ӕмбырдгӕнинаг куыд нал уа, афтӕ. 3 Ӕз уӕм куы ӕрцӕуон, уӕд сымах аккагыл кӕй банымайат, уыдоны арвитдзынӕн фыстӕджытимӕ, цӕмӕй Иерусалиммӕ фӕхӕццӕ кӕной уӕ лӕвар. 4 Кӕд мӕн дӕр ацӕуын бахъӕуа, уӕд ацӕудзысты мемӕ. 5 Ӕз уӕм ӕрцӕудзынӕн, Македонийыл куы ахизон, уӕд. Уымӕн ӕмӕ мӕ фӕндаг Македонийыл уыдзӕн. 6 Ӕз уӕм, чи зоны, афӕстиат уон, чи зоны, зымӕг дӕр сымахмӕ арвитон, ӕмӕ мӕ сымах срӕвдз кӕндзыстут, кӕдӕм цӕуон, уырдӕм. 7 Нӕ мӕ фӕнды ныртӕккӕ сымахмӕ ӕхстуадӕй бацӕуын, фӕлӕ кӕд Хицауы бафӕнда, уӕд мӕ зӕрдӕ дарын иуцасдӕр уӕм баззайыныл. 8 Эфесы та уыдзынӕн Хорысӕры бӕрӕгбонмӕ – 9 Уымӕн ӕмӕ кӕд мӕ ныхмӕлӕуджытӕ бирӕ сты, уӕддӕр мын ис парахатӕй ӕмӕ ӕнтыстджынӕй кусыны фадат. 10 Кӕд уӕм Тимофей ӕрцӕуа, уӕд бацархайут, сымахмӕ йын ӕдас цӕмӕй уа, ууыл. Уымӕн ӕмӕ уый дӕр, мӕнау, Хицауӕн кусы. 11 Ӕмӕ йыл ӕнӕрвӕссон мачи уӕд. Ифтонгӕй йӕ афӕндараст кӕнут фарнимӕ, цӕмӕй ӕрцӕуа мӕнмӕ – иннӕ ӕфсымӕртимӕ йӕм ӕнхъӕлмӕ кӕсын. 12 Ныр та не 'фсымӕр Аполлосы тыххӕй. Ӕз ӕм тынг ӕрхатыдтӕн сымахмӕ ӕфсымӕртимӕ ацӕуыны тыххӕй. Фӕлӕ йӕ ныртӕккӕ ницы хуызы бафӕндыд; фадат ын куы фӕуа, уӕд уӕм ацӕудзӕн. 13 Къӕрцхъус ут, уӕд уӕм фидар уырнындзинад, ут ӕхсарджын ӕмӕ хъӕддых. 14 Уӕ алы хъуыддаджы дӕр ӕвдисут уарзондзинад. 15 Ахайы фыццагдӕр Стефан ӕмӕ йӕ хӕдзаронтӕ кӕй баууӕндыдысты ӕмӕ сыгъдӕджытӕн лӕггад кӕнынӕн сӕхи кӕй снывонд кодтой, уый уын зындгонд у. Курын уӕ, ӕфсымӕртӕ, 16 Сӕ коммӕ кӕсут ахӕмтӕн, стӕй ацы хъуыддаджы семӕ чидӕриддӕр фӕллой кӕны, уыдонӕн дӕр. 17 Сымах мемӕ кӕй не стут, уый мын баххӕст кодтой Стефан, Фортунат ӕмӕ Ахаик. Райын се 'рцыдыл. 18 Уыдон мӕнӕн дӕр ӕмӕ сымахӕн дӕр ӕрхастой удӕнцой. Ахӕмтӕ уӕм уӕнт нымады. 19 Салам уын дӕттынц Асийы аргъуантӕ; зӕрдиаг чырыстон салам уын дӕттынц Акилӕ ӕмӕ Прискиллӕ, стӕй сӕ хӕдзары цы аргъуан ӕмбырд кӕны, уый дӕр. 20 Салам уын дӕттынц ӕппӕт ӕфсымӕртӕ. Кӕрӕдзийӕн салам дӕттут ӕфсымӕрон байӕ. 21 Ӕз, Павел, ацы салам фыссын мӕхи къухӕй. 22 Хицауы [Йесо Чырыстийы] чи нӕ уарзы, уый ӕлгъыст фӕуӕд. Марана та! 23 Нӕ Хицау Йесойы хорзӕх уӕ уӕд. 24 Ӕз уарзын уеппӕты дӕр – Йесо Чырыстиимӕ иудзинад кӕмӕн ис, уыдоны.

2 Коринфӕгтӕм 1

1 Павелӕй, Хуыцауы фӕндӕй Йесо Чырыстийы апостолӕй, ӕмӕ не 'фсымӕр Тимофейӕ – Хуыцауы аргъуанмӕ Коринфы, стӕй ӕгас Ахайы ӕппӕт сыгъдӕджытӕм. 2 Хорзӕх ӕмӕ уын фарн нӕ Фыд Хуыцауӕй ӕмӕ Хицау Йесо Чырыстийӕ. 3 Арфӕгонд уӕд нӕ Хицау Йесо Чырыстийы Хуыцау ӕмӕ Фыд, фӕлмӕнзӕрдӕ Фыд ӕмӕ ныфсдӕттӕг Хуыцау. 4 Уымӕй стӕм ныфсджын неппӕт зынты, цӕмӕй цавӕрфӕнды зынтӕ чи ӕвзары, уыдонӕн та мах ӕвӕрӕм ныфс, Хуыцау нӕхицӕн зӕрдӕ цӕмӕй ӕвӕры, уыдӕттӕй. 5 Уымӕн ӕмӕ мах Чырыстийы хъизӕмӕрттӕй цас фылдӕр хайджын разынӕм, уыйас нын Чырысти дӕр дӕтты фылдӕр ныфс. 6 Кӕд мах хъизӕмар кӕнӕм, уӕд нӕ хъизӕмар у ныфс уӕ бауадзыны ӕмӕ уӕ фервӕзыны сӕраппонд. Кӕд мах бауагъдӕуы ныфс, уӕд сымахӕн ныфс раттыны сӕраппонд. Уыцы ныфсы руаджы сымах фӕразонӕй фӕбыхсут, мах кӕй ӕвзарӕм, ахӕм хъизӕмӕрттӕн. 7 Нӕ зӕрдӕ уыл фидарӕй дарӕм. Уымӕн ӕмӕ зонӕм: кӕд хайджын стут нӕ хъизӕмӕрттӕй, уӕд хайджын стут, мах ныфс цӕмӕй ис, уымӕй дӕр. 8 Фӕнды нӕ, ӕфсымӕртӕ, цӕмӕй сымах зонат, мах Асийы цы зынтӕ бавзӕрстам, уый тыххӕй. Мах ахӕм стыр хъизӕмары хай фестӕм, ӕмӕ удӕгасӕй баззайыны ӕнхъӕл нал уыдыстӕм. 9 Нӕхи ӕнкъардтам афтӕ, цыма нын мӕлӕты тӕрхон рахастӕуыд. Уыцы фыдӕвзарӕны хай баистӕм уымӕн, цӕмӕй нӕ зӕрдӕ дарӕм нӕхиуыл нӕ, фӕлӕ мӕрдты ӕгасгӕнӕг Хуыцауыл. 10 Мах кастыстӕм мӕлӕты цӕстытӕм, ӕмӕ нӕ Хуыцау бахызта. Уый фервӕзын кӕндзӕн мах, ӕмӕ Йыл нӕ зӕрдӕ дарӕм: фервӕзын нӕ кӕндзӕни ноджыдӕр, 11 Сымах дӕр мах тыххӕй куы куват, уӕд. Ӕмӕ бирӕтӕ бузныг зӕгъдзысты Хуыцауӕн, бирӕты куывдмӕ гӕсгӕ ныл хӕрзаудӕн кӕй кӕны, уый тыххӕй. 12 Уымӕн ӕмӕ нӕхицӕй мӕнӕ уымӕй ӕппӕлӕм: дунейы, уӕлдайдӕр та сымахмӕ, мах фӕцардыстӕм хӕдӕфсармӕй, Хуыцауӕн фӕндон куыд уа, афтӕ ӕнӕхинӕй; адӕймаджы зондмӕ гӕсгӕ нӕ, фӕлӕ Хуыцауы хорзӕхмӕ гӕсгӕ. Уымӕн не 'фсарм – ӕвдисӕн. 13 Цы бакӕсат ӕмӕ бамбарат, уымӕй уӕлдай уӕм ницы фыссӕм, ӕмӕ мӕ зӕрдӕ дарын, мах кӕй бамбардзыстут кӕронмӕ, 14 Иуцасдӕр нӕ ныридӕгӕн дӕр куыд бамбӕрстат, афтӕ: нӕ Хицау Йесойы ӕрцӕуыны бон сымах буц уыдзыстут махӕй, мах та – сымахӕй. 15 Ӕз ууыл фидарӕй кӕй ӕууӕндын, уымӕ гӕсгӕ мӕ фӕндыди сымахмӕ раздӕр ӕрцӕуын, цӕмӕй уыл дыууӕ хатты сӕмбӕла хорзӕх. 16 Мӕ зӕрды уыди Македонимӕ цӕугӕйӕ сымахмӕ фездӕхын, стӕй уӕм Македонийӕ ногӕй ӕрцӕуын, цӕмӕй мӕ сымах Иудейӕмӕ срӕвдз кӕнат. 17 Ахӕм фӕнд мӕм кӕй уыди, уый мӕ рӕузондӕй у? Ӕви мӕм цы фӕндтӕ вӕййы, уыдон адӕймаджы зондӕй ӕвзӕрынц, ӕмӕ уыциу рӕстӕг «о» ӕмӕ «нӕ» фӕзӕгъын, мыййаг? 18 Хуыцау Йӕ дзырд нӕ сайы ӕмӕ ӕвдисӕн у, мах уын цы фӕзӕгъӕм, уый уыциу рӕстӕг «о» ӕмӕ «нӕ» кӕй нӕу. 19 Ӕз, Силуан ӕмӕ Тимофей сымахӕн Кӕй тыххӕй дзырдтам, Хуыцауы уыцы Фырт Йесо Чырысти уыциу рӕстӕг «о» ӕмӕ «нӕ» нӕ уыди, фӕлӕ ӕрмӕст «о» у. 20 Уымӕн ӕмӕ Хуыцау зӕрдӕ цӕмӕй ӕвӕры, уыдон иууылдӕр Чырыстийы фӕрцы сты «о» – сӕххӕст вӕййынц. Уымӕ гӕсгӕ, Хуыцауӕн кад куы фӕкӕнӕм, уӕд Чырыстийы руаджы фӕзӕгъӕм «амен». 21 Чырыстиимӕ иугондӕй махӕн сымахимӕ хъару Чи дӕтты, уыцы Хуыцау нӕ рахицӕн кодта Йӕхицӕн. 22 Ӕмӕ Йӕ адӕм кӕй стӕм, зӕрдӕ нын цӕмӕй бавӕрдта, уыдӕттӕ кӕй райсдзыстӕм, уый равдисынӕн уал нын Хуыцау нӕ зӕрдӕты ӕрцӕрын кодта Йӕ Уды. 23 Хуыцау уыны мӕ зӕрдӕ ӕмӕ мын у ӕвдисӕн: ӕз Коринфмӕ ныронг не 'рцыдтӕн, кӕй уыл ауӕрдын, ӕрмӕстдӕр уый тыххӕй. 24 Хъуыддаг уый мидӕг нӕй, ӕмӕ мах уӕ уырнындзинадӕн ӕлдариуӕг кӕнӕм. Мах уе 'мкусджытӕ стӕм уӕ цины сӕраппонд, уымӕн ӕмӕ фидар у уӕ уырнындзинад.

2 Коринфӕгтӕм 2

1 Уымӕ гӕсгӕ хуыздӕрыл банымадтон сымахмӕ не 'рцӕуын, ногӕй та уын зӕрдӕхъыджы хос куыд нӕ разынон, афтӕ. 2 Хъыджы уӕ куы бафтауон, уӕддӕр мын мӕ зӕрдӕ чи барухс кӕндзӕн, хъыджы кӕй бафтыдтон, уыдоны йеддӕмӕ? 3 Фысгӕ дӕр уӕм уый тыххӕй ныккодтон, ӕмӕ уӕм куы ӕрцӕуон, уӕд мӕ маст ма бауадзой, мӕ зӕрдӕ кӕмӕй хъуамӕ барухс уа, уыдон. Уырны мӕ: мӕ цин уеппӕты цин у. 4 Ӕз уӕм мӕстджынӕй ӕмӕ зӕрдӕрыстӕй, бирӕ цӕссыг калгӕйӕ, масты уӕ бафтауыны тыххӕй нӕ ныффыстон, фӕлӕ цӕмӕй сымах базонат, ӕз уӕ куыд бирӕ уарзын, уый. 5 Ӕмӕ кӕд исчи искӕйы маст бауагъта, уӕд уымӕй мӕн не смӕстджын кодта, фӕлӕ – ныхас ӕгӕр карз куыд нӕ рауайа, афтӕ – иуцасдӕр уеппӕты дӕр. 6 Уыцы адӕймагӕн ӕгъгъӕд фӕуӕд, уӕ фылдӕрӕй цы ӕфхӕрд баййӕфта, уый. 7 Ныр та уын хуыздӕр у уымӕн ныббарын ӕмӕ йӕ барӕвдауын, цӕмӕй йӕ хъыг ма фегӕр уа. 8 Уымӕ гӕсгӕ уӕ курын уӕ уарзт ӕм хъуыддагӕй равдисын. 9 Фысгӕ дӕр уӕм, алы хъуыддаджы дӕр коммӕгӕс стут ӕви нӕ, уый бафӕлварыны тыххӕй ныккодтон. 10 Кӕмӕн хатыр кӕнут, уымӕн ӕз дӕр хатыр кӕнын. Ӕз цы ныббарстон (кӕд уӕвгӕ исты ныббарстон), уӕд ӕй Чырыстийы раз уӕ сӕраппонд ныббарстон, 11 Цӕмӕй нын хӕйрӕг зиан ма ӕрхӕсса – йӕ фыдвӕндтӕ нын зындгонд сты. 12 Троадӕмӕ Чырыстийы тыххӕй фарны уац хъусын кӕнынмӕ куы ӕрцыдтӕн, уӕд мын уыцы куыстӕн кӕд Хицауӕй дуар гом уыди, 13 Уӕддӕр мӕ уд ӕнцой нӕ зыдта, уымӕн ӕмӕ ме 'фсымӕр Тит уым нӕ разынди. Уымӕ гӕсгӕ сын хӕрзбон загътон ӕмӕ ацыдтӕн Македонимӕ. 14 Бузныг Хуыцауӕй – Уый мах, уӕлахиздзаутау, кӕддӕриддӕр хоны Чырыстийы фӕдыл. Чырыстийы уац, ӕхсызгон хӕрздӕфау, Хуыцау мах руаджы хӕлиу кӕны алы ран дӕр. 15 Уымӕн ӕмӕ махӕй цӕуы Чырыстийы уацы хӕрздӕф, ӕмӕ уый Хуыцауы кадӕн у. Уыцы хӕрздӕф ӕнхъӕвзы фервӕзыны фӕндагыл цӕуджытыл дӕр ӕмӕ сӕфты фӕндагыл цӕуджытыл дӕр. 16 Иутӕн уый у мӕлӕты тӕф мӕлынӕн, иннӕтӕн та – царды хӕрздӕф цӕрынӕн. Адӕмӕй исчи разындзӕн, мыййаг, ахӕм куысты аккаг? 17 Бирӕтӕ, цӕстфӕлдахӕг уӕйгӕнджытау, зыгъуыммӕ кӕнынц Хуыцауы ныхас. Мах уыдонӕй не стӕм – Хуыцауы номӕй ӕмӕ Хуыцауы раз дзурӕм сыгъдӕг зӕрдӕйӕ, Чырыстиимӕ ӕмудӕй.

2 Коринфӕгтӕм 3

1 Ау, ногӕй та уын нӕхи амонӕм? Кӕйдӕрты ӕппӕлӕн фыстӕджыты сӕр куыд хъӕуы, афтӕ, мыййаг, махмӕ дӕр сымахӕн равдисынӕн ахӕм фыстӕджытӕ хъуамӕ уа, кӕнӕ уын сӕ уӕхицӕй хъуамӕ райсӕм? 2 Сымах уӕхӕдӕг стут, нӕ зӕрдӕты кӕй ныффыстӕуыд, ӕппӕт адӕм кӕй зонынц ӕмӕ кӕсынц, нӕ уыцы фыстӕг. 3 Нӕ фӕллойы руаджы Чырыстийы фыстӕг кӕй стут, уый уыны алчидӕр. Уыцы фыстӕг милдонӕй фыст нӕу – цардӕгас Хуыцауы Уд ӕй ныффыста; къӕйдуртыл фыст нӕу, фӕлӕ зӕрдӕйы къултыл. 4 Уый ӕнӕмӕнг афтӕ кӕй у, ууыл Хуыцауы раз фидарӕй ӕууӕндӕм Чырыстийы руаджы. 5 Уый тыххӕй нӕ, ӕмӕ нӕхӕдӕг истӕмӕн бӕззӕм. Мах афтӕ нӕ нымайӕм, ӕмӕ нӕм нӕхи цавӕрдӕр курдиат ис. Нӕ! Цы нӕм ис, уый Хуыцауӕй лӕвӕрд у. 6 Хуыцау махӕн радта Йӕ ног фидыды кусджыты арӕхстдзинад. Уыцы ног фидыдмӕ гӕсгӕ Хуыцау ныр фыст ӕгъдау нал дӕтты, фӕлӕ хай кӕны Йӕ Удӕй. Уымӕн ӕмӕ фыст ӕгъдау маргӕ кӕны, Уд та цард дӕтты. 7 Йӕ бындур къӕйдуртыл фыст дамгъӕтӕ кӕмӕн уыдысты, кӕд уыцы мӕлӕтхӕссӕг куыст афтӕ намысджын уыд, ӕмӕ рӕстӕгмӕ тӕмӕнтӕ чи калдта, Моисейы уыцы цӕсгоммӕ кӕсын Израилы адӕм нӕ фӕрӕзтой, 8 Уӕд Уды фӕрцы кусын та бирӕ намысджындӕр нӕу, ӕви? 9 Тӕрхон баййафынмӕ цы куыст тардта, кӕд уый намысджын уыди, уӕд цас намысджындӕр у, адӕймаджы цы куыст раст кӕны, уый! 10 Кӕддӕр намысджын цы уыди, уый ныр намысджын нал у, уымӕн ӕмӕ фӕци ноджы намысджындӕры аууон. 11 Кӕрон кӕмӕн хъуамӕ ӕрцыдаид, кӕд уый намысджын уыд, уӕд кӕрон кӕмӕн не 'рцӕудзӕн, уый та цас ӕмӕ цас намысджындӕр у! 12 Махӕн ис ахӕм зӕрдӕдарӕн ӕмӕ архайӕм иттӕг ныфсджынӕй, 13 Ӕмӕ нӕ фӕзмӕм Моисейы – уый ӕмбӕрзта йӕ цӕсгом, рӕстӕгмӕ цы у, уымӕн йӕ кӕрон Израилы адӕм куыд нӕ уыной, афтӕ. 14 Нырма дӕр сӕ зонд куырм у. Рагон Фӕдзӕхст куы фӕкӕсынц, уӕд ыл уыцы ӕмбӕрзӕн тыгъд у, уымӕн ӕмӕ йӕ Чырысти хъуамӕ сиса. 15 Абон дӕр ма, Моисейы Ӕгъдау кӕсгӕйӕ, ӕмбӕрзӕн тыгъд у сӕ зӕрдӕтыл. 16 Фӕлӕ Хицаумӕ куы ӕрцӕуынц, уӕд уыцы ӕмбӕрзӕн айстӕуы. 17 Хицау уд у, ӕмӕ Хицауы Уд кӕм ис, сӕрибар дӕр уым ис. 18 Мах неппӕт дӕр гом цӕсгомимӕ кӕсӕм Хицауы намысмӕ, уыцы намыс зыны махыл ӕмӕ кӕнӕм Хицауы хуызӕн – уый Хицау аразы Йӕ Уды руаджы.

2 Коринфӕгтӕм 4

1 Ахӕм куыст нын Хуыцауы хорзӕхы фӕрцы лӕвӕрд у, ӕмӕ нӕ ныфс нӕ сӕтты. 2 Махӕн иумӕйагӕй ницы ис, худинаджы тыххӕй кӕй фембӕхсынц, ахӕм митимӕ, нӕ архайӕм хинӕй ӕмӕ Хуыцауы ныхас нӕ зыгъуыммӕ кӕнӕм. Мах ӕргомӕй хъусын кӕнӕм ӕцӕгад, ӕмӕ нын Хуыцауы раз аргъгӕнӕг уӕд алы адӕймаг дӕр. 3 Мах кӕй хъусын кӕнӕм, уыцы фарны уац кӕд искӕмӕн нӕу ӕргом, уӕд ӕргом нӕу сӕфтыкъахыл лӕуджытӕн. 4 А дунейы хуыцау уыцы ӕнӕуырнджыты бакуырм кодта, ӕмӕ нӕ уынынц Чырыстийы, Хуыцауы Халдихы, намысыл дзурӕг фарны уацы тӕмӕнкалгӕ рухс. 5 Мах нӕхи тыххӕй нӕ хъусын кӕнӕм, фӕлӕ Йесо Чырысти Хицау кӕй у, уый тыххӕй; мах та Йесойы сӕраппонд уӕ цагъартӕ стӕм. 6 Уымӕн ӕмӕ афтӕ Чи загъта: «Талынгӕй сӕрттивӕд рухс», уыцы Хуыцау нӕ зӕрдӕты ссыгъта рухс, ӕмӕ мах базыдтам Хуыцауы намыс – уый ӕнхъӕвзы Йесо Чырыстийӕ. 7 Фӕлӕ уыцы хӕзна мах хӕссӕм ӕлыгӕй конд мигӕнӕнты – нӕ буӕртты, цӕмӕй бӕлвырд уа: ахӕм ӕгӕрон тых нӕхицӕй нӕу, Хуыцау ӕй дӕтты. 8 Мах ссӕндынц алырдыгӕй, фӕлӕ нӕ басӕттын нӕ фӕразынц; цы гӕнгӕ нын у, уый нал фӕзонӕм, фӕлӕ нӕ ныфс нӕ асӕтты; 9 Ӕфхӕрынц нӕ, фӕлӕ нӕ Хуыцау нӕ ныууагъта; ӕрыссӕндынц нӕ, фӕлӕ нӕ мӕлӕм. 10 Мах нӕ буары кӕддӕриддӕр хӕссӕм Йесойы мӕлӕт, цӕмӕй нӕ буары разына Йесойы цард дӕр. 11 Уымӕн ӕмӕ мах, удӕгӕстӕ, Йесойы сӕраппонд иудадзыг кӕсӕм мӕлӕты цӕстытӕм, цӕмӕй нӕ мӕлинаг буары разына Йесойы цард дӕр. 12 Мӕлӕт нӕ цух нӕ уадзы, цӕмӕй сымах цӕрат. 13 Сыгъдӕг Фыст афтӕ цы уырнындзинады тыххӕй зӕгъы: «Ӕз ӕууӕндыдтӕн, ӕмӕ уымӕ гӕсгӕ дзырдтон», нӕ удмӕ дӕр уыцы уырнындзинад ис, ӕмӕ уымӕ гӕсгӕ мах дӕр ӕууӕндӕм ӕмӕ дзурӕм. 14 Мах зонӕм: Хицау Йесойы Райгасгӕнӕг Йесоимӕ райгас кӕндзӕни мах дӕр, ӕмӕ нӕ уемӕ ӕрлӕууын кӕндзӕн Йӕ разы. 15 Ӕппӕт уыдӕттӕ сты уӕ сӕраппонд, цӕмӕй Хуыцауы хорзӕх анхъӕвза бирӕ адӕмыл ӕмӕ расайа бирӕ арфӕтӕ Хуыцауы кадӕн. 16 Уымӕ гӕсгӕ нӕ ныфс нӕ сӕтты. Кӕд нӕ буар хӕррӕгъмӕ цӕуы, уӕд нӕ уд та бонӕй-бонмӕ ногдӕр кӕны. 17 Нӕ уӕлӕнгай хъизӕмӕрттӕ цыбыр рӕстӕгмӕ сты – уыдон махӕн ӕрхӕсдзысты, ӕмбал кӕмӕн нӕй, ахӕм стыр мыггагмӕйы намыс. 18 Уымӕн ӕмӕ мах кӕсӕм, цӕстӕй цы уынӕм, уымӕ нӕ, фӕлӕ цӕстӕй цы нӕ уынӕм, уымӕ. Цӕстӕй цы уынӕм, уый рӕстӕгмӕ у, цӕстӕй цы нӕ уынӕм, уый та у мыггагмӕ.

2 Коринфӕгтӕм 5

1 Мах зонӕм: нӕ зӕххон хӕдзар, ацы халагъуд, куы ныккӕла, уӕд нын уӕлӕрвты ис цӕрӕндон – адӕймаг нӕ, фӕлӕ Хуыцау кӕй сарӕзта, уыцы мыггагмӕйы хӕдзар. 2 Ныр та уал хъӕрзӕм – бӕллӕм нӕ уӕларвон буары ӕрцӕрынмӕ. 3 Уӕдӕ нӕ зӕххон буар куы раласӕм, уӕд дӕр бӕгънӕг нӕ уыдзыстӕм. 4 Мах цалынмӕ ацы халагъуды цӕрӕм, уӕдмӕ хъӕрзӕм уаргъы бын. Уый тыххӕй нӕ хъӕрзӕм, ӕмӕ мах нӕ зӕххон буарӕй рахизын фӕнды; мах бӕллӕм уӕларвон буары ӕрцӕрынмӕ, цард мӕлинаджы куыд аныхъуыра, афтӕ. 5 Хуыцау нӕ фӕлдисгӕ дӕр уый тыххӕй скодта; ӕмӕ афтӕ кӕй уыдзӕн, уый равдисынӕн уал нӕ схайджын кодта Йӕ Удӕй. 6 Уымӕ гӕсгӕ мах кӕддӕриддӕр стӕм ныфсджын ӕмӕ зонӕм: цалынмӕ нӕ буары цӕрӕм, уӕдмӕ Хицауӕй дард стӕм. 7 Мах цӕрӕм, цӕстӕй цы уынӕм, уымӕй нӕ, фӕлӕ уырнындзинадӕй. 8 Стӕм ныфсджын, ӕмӕ хуыздӕрыл нымайӕм буарӕй рахизын ӕмӕ Хицаумӕ ӕрцӕрын. 9 Уӕдӕ буары уӕм ӕви нӕ, нӕхи хъарӕм Хицауы зӕрдӕ балхӕныныл. 10 Уымӕн ӕмӕ неппӕты дӕр Чырыстийы тӕрхоны раз ӕрлӕууын бахъӕудзӕни, цӕмӕй алчидӕр райса, йӕ буары ма куы уыди, уӕд хорзӕй кӕнӕ ӕвзӕрӕй цы сарӕзта, уымӕ гӕсгӕ. 11 Мах зонӕм Хицауы тас ӕмӕ ӕууӕндын кӕнӕм адӕмы. Хуыцау уыны нӕ зӕрдӕ; ӕнхъӕл дӕн, сымах дӕр мах тыххӕй зонут ӕппӕт дӕр. 12 Ногӕй та уын нӕхи нӕ амонӕм, фӕлӕ уын дӕттӕм, махӕй буц куыд уат, ахӕм фадат. Уӕд уӕ бон ныхкъуырд раттын уыдзӕни, зӕрдӕйы нӕ, фӕлӕ ӕдде цы ис, уымӕй хъал чи у, уыдонӕн. 13 Кӕд сонт стӕм, уӕд – Хуыцауы сӕраппонд; нӕ зонд кӕд нӕхимӕ ис, уӕд – сымах сӕраппонд. 14 Кӕд иу амарди ӕппӕт адӕмы сӕрвӕлтау, уӕд иууылдӕр амардысты – мах уый куы бамбӕрстам, Чырыстийы уарзт уӕдӕй фӕстӕмӕ ауды махыл. 15 Чырысти амард ӕппӕт адӕмы сӕрвӕлтау, цӕмӕй удӕгӕстӕ сӕхицӕн ма цӕрой, фӕлӕ цӕрой, уыдоны сӕрвӕлтау Чи амард ӕмӕ райгас, Уымӕн. 16 Уымӕ гӕсгӕ нырӕй фӕстӕмӕ адӕймаджы цӕстӕй никӕмӕуал кӕсӕм. Кӕддӕр ахӕм цӕстӕй кастыстӕм Чырыстимӕ, ныр та Йӕм нал кӕсӕм. 17 Уӕдӕ Чырыстиимӕ чи ис, уый ног адӕймаг у – йӕ зӕронд цардӕн ӕрцыд кӕрон, райдыдта йӕ ног цард. 18 Ӕппӕт уыдӕттӕ сты, Чырыстийы фӕрцы нӕ Йемӕ Чи бафидауын кодта ӕмӕ нын адӕмы Йемӕ бафидауын кӕныны куыст Чи бафӕдзӕхста, уыцы Хуыцауӕй. 19 Мах хъусын кӕнӕм: Хуыцау дунеимӕ Чырыстийы фӕрцы бафидыдта – адӕмӕн ныббарста сӕ тӕригъӕдтӕ. Ӕмӕ фидыды ныхас нӕ бӕрны бакодта. 20 Уӕдӕ Чырыстийы минӕвӕрттӕ стӕм мах, ӕмӕ цыма Хуыцау Йӕхӕдӕг зӕгъы нӕ дзыхӕй, уыйау Чырыстийы номӕй курӕм сымахӕй: бафидаут Хуыцауимӕ. 21 Тӕригъӕдтӕ Кӕмӕ нӕ уыди, Уый мах сӕраппонд Хуыцау бафхӕрдта тӕригъӕдджыны бафхӕрӕгау, цӕмӕй Йӕ фӕрцы сраст уӕм Хуыцауы раз.

2 Коринфӕгтӕм 6

1 Мах, Хуыцауы ӕмкусджытӕ, курӕм сымахӕй: Хуыцау уӕ цы хорзӕхӕй схайджын кодта, уый уын дзӕгъӕлы ма фӕуӕд. 2 Уымӕн ӕмӕ Хуыцау зӕгъы: «Хӕрзаудӕны афон дӕ фехъуыстон, фервӕзыны бон дын баххуыс кодтон». Ныртӕккӕ у хӕрзаудӕны афон, ныртӕккӕ у фервӕзыны бон. 3 Мах къуылымпыйы хос никӕмӕн стӕм, цӕмӕй нын нӕ куыст мачи бафауа. 4 Фӕлӕ алы хъуыддаджы дӕр нӕхи ӕвдисӕм Хуыцауы кусджытӕй – тынг фӕразонӕй нӕ зынты, нӕ хъуӕгты, тыхст уавӕрты, 5 Над ӕййафгӕйӕ, ахӕстӕтты, нӕ ныхмӕ сыстыны рӕстӕг, уӕззау куысты, ӕгъуыссӕгӕй, ӕххормагӕй. 6 Нӕхи ӕвдисӕм нӕ сыгъдӕг цардӕй, зонынадӕй, бирӕбыхсон ӕмӕ зӕрдӕхӕлар кӕй стӕм, уымӕй, Сыгъдӕг Удӕй хайджынӕй, ӕнӕцӕстмӕ уарзтӕй, 7 Ӕцӕгады ныхасӕй, Хуыцауы хъаруйӕ. Рӕстдзинад нӕ хотых у, дарӕм ӕй рахиз къухы дӕр ӕмӕ галиуы дӕр. 8 Мах вӕййӕм нымад ӕмӕ ӕгад, фӕдзурынц нӕ ӕвзӕр ӕмӕ хорз. Нымайынц нӕ фӕлитойтыл, мах та стӕм раст; 9 Зындгонд не стӕм, фӕлӕ нӕ зонынц; нымайынц нӕ мардыл, фӕлӕ удӕгас стӕм; ӕфхӕрынц нӕ, фӕлӕ нӕ мӕлӕм; 10 Ӕфтауынц нӕ зӕрдӕхъыджы, мах та иудадзыг цин кӕнӕм; мах стӕм гӕвзыкк, фӕлӕ схъӕздыг кӕнӕм бирӕты; ницы нӕм ис, фӕлӕ нӕм ӕппӕт дӕр ис. 11 Коринфӕгтӕ, мах уын ӕргомӕй дзурӕм, гом уын сты нӕ зӕрдӕтӕ. 12 Бынат уын ис нӕ зӕрдӕты, махӕн та уӕ зӕрдӕты фаг бынат нӕй. 13 Мӕ хъӕбултӕн зӕгъӕгау уын зӕгъын: сымах дӕр нын ӕй бафидут уымӕй – бынат нын раттут уӕ зӕрдӕты. 14 Ӕнӕуырнджытимӕ иу ӕфсондзы уӕхи ма сифтындзут. Рӕстдзинад ӕмӕ тӕригъӕдӕн, рухс ӕмӕ талынгӕн иумӕйагӕй исты ис, мыййаг? 15 Чырыстийӕн велиаримӕ бафидауӕн ис, мыййаг? Кӕнӕ уырнӕджы цы бӕтты ӕнӕуырнӕгимӕ? 16 Хуыцауы хӕдзарӕн мӕнгхуыцӕуттимӕ иумӕйагӕй цы ис? Мах та цардӕгас Хуыцауы хӕдзар стӕм, Хуыцау Йӕхӕдӕг куыд загъта, афтӕ: «Сӕ зӕрдӕты ӕрбынат кӕндзынӕн ӕмӕ цӕрдзынӕн семӕ; ӕмӕ уыдзынӕн сӕ Хуыцау, уыдон та уыдзысты Мӕ адӕм. 17 Уымӕ гӕсгӕ рацӕут се 'хсӕнӕй ӕмӕ сӕ рахицӕн ут, зӕгъы Хицау, чъизи цы у, уымӕй уӕхи хизут, ӕмӕ уӕ Ӕз ӕркӕндзынӕн Мӕхимӕ. 18 Ӕмӕ уын уыдзынӕн Фыд, сымах та Мын уыдзыстут фырттӕ ӕмӕ чызджытӕ, зӕгъы Дунедарӕг Хуыцау».

2 Коринфӕгтӕм 7

1 Мӕ уарзон хӕлӕрттӕ, кӕд ӕмӕ нын Хуыцау уыдӕттӕй зӕрдӕ бавӕрдта, уӕд бавдӕлӕм ӕмӕ, буар ӕмӕ уд цӕмӕй фӕчъизи вӕййынц, уымӕй, Хуыцауӕй тӕрсгӕйӕ, ссыгъдӕг кӕнӕм нӕхи, алцӕмӕй дӕр Йӕ адӕм куыд суӕм, афтӕ. 2 Уӕ зӕрдӕты нын бынат раттут. Мах никӕй хъыджы бацыдыстӕм, никӕмӕн ракодтам знаггад, никӕмӕй ницы райстам. 3 Уӕ базылын кӕныны тыххӕй нӕ зӕгъын афтӕ. Амӕйразмӕ дӕр уын куы загътон: уыйбӕрц уӕ уарзӕм, ӕмӕ цӕттӕ стӕм уемӕ амӕлынмӕ дӕр ӕмӕ цӕрынмӕ дӕр. 4 Ӕз уыл тынг ӕууӕндын, тынг буц уӕ дӕн. Не стыр зынты дӕр ӕз дӕн ныфсджын ӕмӕ кӕрон нӕй мӕ цинӕн. 5 Уымӕн ӕмӕ мах Македонимӕ куы ӕрцыдыстӕм, уӕд ӕппындӕр ӕнцой нӕ зыдтам, уынгӕг рӕстӕг ныл скодта: нӕ алыварс – тох, нӕ зӕрдӕты – тас. 6 Фӕлӕ Хуыцау, зӕрдӕсӕстыты рӕвдауӕг, мах барӕвдыдта Титы ӕрцыдӕй, 7 Ӕмӕ ӕрмӕст йе 'рцыдӕй нӕ, фӕлӕ сымахӕй йӕ зӕрдӕ кӕй барухс, уымӕй дӕр. Уый нын радзырдта, мӕ фендмӕ кӕй бӕллут, уӕ хъыг куыд стыр у ӕмӕ разӕнгардӕй мӕ фарс кӕй стут, уый тыххӕй. Ӕмӕ уӕд ноджы бафтыди мӕ циныл. 8 Кӕд уӕ мӕ фыстӕгӕй зӕрдӕхъыджы бафтыдтон – фӕсмойнаг мын нӕу. Ӕз федтон: кӕд цыбыр рӕстӕгмӕ, уӕддӕр уын мӕ фыстӕг ӕрхаста зӕрдӕхъыг, ӕмӕ йыл хъынцъыймаг фӕдӕн. 9 Ныр та райын – зӕрдӕхъыджы кӕй бафтыдыстут, ууыл нӕ, фӕлӕ уӕ уыцы хъыг фӕсмон кӕй расайдта, ууыл. Уӕдӕ уын ницы зиан ӕрхастам, уымӕн ӕмӕ уӕ хъыг Хуыцауӕн фӕндон у. 10 Хуыцауӕн фӕндон хъыг расайы, фервӕзынмӕ чи ӕркӕны, ахӕм фӕсмон; ӕмӕ уый хъынцъыймаг нӕу. Дуне цы хъыг дӕтты, уый та мӕлӕт расайы. 11 Кӕсут-ма: Хуыцауӕн фӕндон хъыг уӕ куыд тынг ӕнувыд скодта, куыд зӕрдиагӕй уӕ бафӕндыд уӕ ном бахъахъхъӕнын, куыд тынг смӕсты стут, куыд егъау у уӕ тас, куыд иузӕрдион ныл разындыстут, куыд тынг разӕнгард стут азымджыны бафхӕрынмӕ! Сымах алцӕмӕй дӕр равдыстат, уыцы хъуыддаджы сыгъдӕг кӕй стут, уый. 12 Уӕдӕ уӕм ӕз иугӕр ныффыстон, уӕд ӕфхӕрӕджы сӕраппонд дӕр ӕмӕ ӕфхӕрд баййафӕджы сӕраппонд дӕр нӕ, фӕлӕ уын цӕмӕй Хуыцауы раз раргом уа, куыд ӕнувыд ныл стут, уый. 13 Ӕмӕ нӕ уымӕй барӕвдыдтат. Мах кӕй барӕвдыдтат, уымӕй фылдӕр та Титы циныл райӕм – сымах ын уеппӕт дӕр фестут удӕнцойы хос. 14 Уӕдӕ Титӕн цӕмӕйдӕрты сымахӕй кӕй раппӕлыдтӕн, уымӕй къӕмдзӕстыгӕй нӕ баззадтӕн. Мах уын цы дзырдтам, уый раст куыд у, афтӕ Титӕн цӕмӕйты раппӕлыдыстӕм, уыдон дӕр раст разындысты. 15 Иууылдӕр коммӕгӕс кӕй разындыстут, ӕмбӕлгӕ кад ын куы нӕ скӕнат, уымӕй тӕрсгӕйӕ йын кӕй фӕлӕууыдыстут фысым, уыдӕттӕ куы ӕрымысы, уӕд йӕ зӕрдӕйӕн свӕййут ноджы адджындӕр. 16 Ӕз цин кӕнын, алы хъуыддаджы дӕр мӕ сымахӕй ныфс кӕй ис, ууыл.

2 Коринфӕгтӕм 8

1 Хъусын уын кӕнӕм, ӕфсымӕртӕ, Македонийы аргъуантӕн Хуыцау цы хорзӕх радта, уый тыххӕй. 2 Уыдон фӕлвӕрд ӕрцыдысты стыр зынты, фӕлӕ уӕддӕр сӕ цинӕн кӕрон нӕй; сты тынг гӕвзыкк, фӕлӕ равдыстой, рӕдаудзинадӕй ӕгӕрон хъӕздыг кӕй сты, уый. 3 Сӕ къух цас амыдта, уыйбӕрц, стӕй ноджы фылдӕр барвӕндонӕй куыд лӕвӕрдтой, уымӕн ӕз ӕвдисӕн дӕн. 4 Уыдон нӕ тынг куырдтой, цӕмӕй сӕ хай бахӕссой сыгъдӕджытӕн балӕггад кӕныны арфӕйаг хъуыддагмӕ. 5 Мах ӕнхъӕл куыд нӕ уыдыстӕм, уымӕй ноджы фылдӕр бакодтой. Фыццаджыдӕр сӕхи радтой Хицауӕн ӕмӕ, Хуыцауы фӕндӕй, махӕн дӕр. 6 Уымӕ гӕсгӕ мах куырдтам Титӕй, уыцы арфӕйаг хъуыддаг куыд райдыдта, афтӕ йӕ сымахмӕ дӕр кӕронмӕ куыд ахӕццӕ кӕна. 7 Сымах алцӕмӕй дӕр хъӕздыг стут – ис уӕм уырнындзинад, зонынад, арӕхсут дзурынмӕ, иудадзыг стут ӕнувыд, уарзут нӕ. Уӕдӕ ацы арфӕйаг хъуыддаджы дӕр уӕхи равдисут рӕдауӕй. 8 Ӕз афтӕ бардзырд дӕттыны хуызы нӕ зӕгъын, фӕлӕ иннӕтӕ ӕнувыд кӕй сты, уымӕй фӕлварын уӕ уарзт – зӕрдиаг у ӕви нӕ. 9 Уымӕн ӕмӕ сымах зонут нӕ Хицау Йесо Чырыстийы хорзӕх. Йесо хъӕздыг уыди, фӕлӕ уӕ сӕраппонд Йӕхи сгӕвзыкк кодта, Йӕ гӕвзыккӕй сымах куыд схъӕздыг уат, афтӕ. 10 Зӕгъын уын мӕ хъуыды: ацы хъуыддаг уӕ пайдайӕн у, уымӕн ӕмӕ йӕ суанг фарон фыццаг сымах райдыдтат, стӕй йӕ саразыны фӕнд дӕр фыццаг уӕхицӕй рацыд. 11 Уӕдӕ уыцы хъуыддаг ныр кӕронмӕ ахӕццӕ кӕнут. Йӕ райдайын уӕ куыд зӕрдиагӕй фӕндыд, афтӕ йӕ кӕронмӕ дӕр ахӕццӕ кӕнут уӕ фадӕттӕм гӕсгӕ. 12 Нӕ къух цас амоны, уыйбӕрц зӕрдиагӕй куы дӕттӕм, уӕд уый Хуыцауӕн фӕндон у; цы нӕм нӕй, уый Хуыцау нӕ домы. 13 Ныхас ууыл нӕ цӕуы, ӕмӕ иннӕтӕн ӕнцондӕр фӕуа, сымахӕн та – зындӕр, фӕлӕ алкӕмӕ дӕр ӕмбӕрц куыд уа. 14 Ныртӕккӕ ӕййафынц хъуаг, ӕмӕ уӕм уӕлдай цы ис, уымӕй сӕм фӕкӕсут. Иннӕ хатт та уӕм уӕ хъуӕгты уыдон фӕкӕсдзысты, уӕлдай сӕм цы уа, уымӕй, уӕ алкӕмӕ дӕр ӕмбӕрц куыд уа, афтӕ. 15 Сыгъдӕг Фыст дӕр афтӕ зӕгъы: «Бирӕ чи ӕрӕмбырд кодта, уымӕ уӕлдай нӕ уыди, чысыл чи ӕрӕмбырд кодта, уый та хъуаг не 'ййӕфта». 16 Бузныг Хуыцауӕй, мах уыл куыд ӕнувыд стӕм, афтӕ Титӕн дӕр сымахыл ӕнувыды зӕрдӕ кӕй радта, уый тыххӕй. 17 Уый уӕм ныридӕгӕн фӕцӕуы, мах ӕм кӕй ӕрхатыдыстӕм, ӕрмӕст уый тыххӕй нӕ, фӕлӕ йӕ фырӕнувыдӕй йӕхи бафӕндыд. 18 Йемӕ ма йын ӕрвитӕм, фарны уац адӕммӕ зӕрдиагӕй кӕй хӕссы, уый тыххӕй ӕппӕт аргъуантӕ дӕр кӕмӕй ӕппӕлынц, уыцы ӕфсымӕры. 19 Уымӕй уӕлдай ма йӕ аргъуантӕ равзӕрстой не 'мбӕлццонӕй дӕр, мах кӕй аразӕм, уыцы арфӕйаг хъуыддаджы. Уыцы куыст мах кӕнӕм Хицауы кадӕн ӕмӕ йыл ӕнувыдӕй кӕй архайӕм, уый равдисынӕн. 20 Уый тыххӕй сӕ ӕрвитӕм, ӕмӕ нын не 'вджид кӕй бакодтой, уыцы ӕххуыс егъау у, ӕмӕ нӕхи хизӕм, цӕмӕй нӕ мачи базылын кӕна. 21 Мах тырнӕм, цӕмӕй ӕппӕт дӕр нывыл уа ӕрмӕст Хицауы цӕсты нӕ, фӕлӕ адӕмы цӕсты дӕр. 22 Семӕ ма сын ӕрвитӕм, бирӕ хъуыддӕгты йӕхи ӕнувыдӕй чи равдыста, нӕ уыцы ӕфсымӕры. Ныр та ноджы ӕнувыддӕр у, уымӕн ӕмӕ йӕ зӕрдӕ тынг дары сымахыл. 23 Тит у ме 'мбал ӕмӕ ме 'мкусӕг, сымахмӕ цы куыст кӕнӕм, уым. Иннӕ ӕфсымӕртӕ та сты аргъуанты минӕвӕрттӕ, Чырыстийы кадӕн кусджытӕ. 24 Уӕдӕ йӕ аргъуантӕ куыд феной, афтӕ сын хъуыддагӕй равдисут уӕ уарзт, стӕй сымахӕй дзӕгъӕлы кӕй нӕ ныббуц стӕм, уый.

2 Коринфӕгтӕм 9

1 Ӕниу, сыгъдӕджытӕн ӕххуысы тыххӕй сымахмӕ мӕн фыссын дӕр нӕ хъӕуы. 2 Уымӕн ӕмӕ уӕ зӕрдиагӕй баххуыс кӕнын кӕй фӕнды, уый мӕнӕн зындгонд у ӕмӕ мӕхицӕй ӕппӕлын македониӕгтӕн, Ахайы уырнджытӕ суанг ивгъуыд азӕй ӕххуысмӕ цӕттӕ сты, зӕгъгӕ. Ӕмӕ сымах ӕнувыд кӕй стут, уый бирӕты сразӕнгард кодта. 3 Ӕфсымӕрты та ӕз уый тыххӕй ӕрвитын, цӕмӕй уӕ кӕй раппӕлыдтӕн, уый дзӕгъӕлы ма фӕуа – ӕз сымахӕй куыд дзырдтон, афтӕ цӕттӕ уат. 4 Мемӕ македониӕгтӕ куы ӕрцӕуой, уӕд уӕ ӕдзӕттӕйӕ ма ӕрӕййафой; тынг ныфсджын уӕ кӕй уыдыстӕм, – ам уӕ кой кӕнын уӕвгӕ дӕр нал хъӕуы, – уый махӕн худинаг куыд нӕ расайа. 5 Уымӕ гӕсгӕ ӕз бакӕнинагыл банымадтон ӕфсымӕртӕм ӕрхатын, цӕмӕй уӕм ацӕуой нӕ разӕй ӕмӕ рагацау ӕрцӕттӕ кӕной, раздӕр ныфс кӕмӕй бавӕрдтат, уӕ уыцы зӕрдиаг ӕххуыс. Ӕмӕ уӕд уыдзӕн ӕнӕбары раттынау нӕ, фӕлӕ ӕцӕг зӕрдиаг ӕххуыс. 6 Уӕ зӕрдыл дарут: чъынды тауӕгӕн йӕ хор дӕр мӕгуырау уыдзӕни, рӕдауӕй чи тауы, уымӕн та йӕ хор тугыл аскъуыйдзӕн. 7 Йӕ цӕст цас уарзы, алчидӕр уыйбӕрц хъуамӕ ратта ӕнӕбустӕйӕ ӕмӕ барвӕндонӕй, уымӕн ӕмӕ зӕрдӕрухсӕй чи дӕтты, Хуыцау уыцы адӕймаджы уарзы. 8 Хуыцауӕн та Йӕ бон у сымах алы хорзӕхӕй дӕр схъӕздыг кӕнын; уӕд уӕм ӕдзух алцыдӕр уыдзӕни, цас уӕ хъӕуы, уыйбӕрц, ӕмӕ ма уӕлдайджынтӕй фаг уыдзӕн алы хорз хъуыддагӕн дӕр. 9 Сыгъдӕг Фыст дӕр афтӕ зӕгъы: «Рӕдауӕй радта, байуӕрста мӕгуыртӕн; йӕ рӕстад цӕрдзӕн мыггагмӕ». 10 Тауӕгӕн мыггаг Чи дӕтты, хӕрынӕн та – хойраг, Уый уын ратдзӕн мыггаг, ӕрзайын ӕмӕ сбирӕ кӕндзӕн уӕ рӕстады тыллӕг. 11 Алцӕмӕй дӕр афтӕ схъӕздыг уыдзыстут, ӕмӕ уӕ бон уыдзӕни кӕддӕриддӕр рӕдауӕй баххуыс кӕнын. Уӕд бирӕтӕ арфӕ кӕндзысты Хуыцауӕн, нӕ къухӕй кӕй айсой, уӕ уыцы ӕххуысы тыххӕй. 12 Уымӕн ӕмӕ сыгъдӕджытӕн сӕ хъуӕгты баххуыс кӕнынӕй уӕлдай уӕ уыцы лӕггад расайдзӕн бирӕ арфӕтӕ Хуыцауӕн. 13 Уӕ лӕггадӕй уӕхи куы равдисат, уӕд сыгъдӕджытӕ стаудзысты Хуыцауы, уымӕн ӕмӕ сымах коммӕгӕс стут, уӕ зӕрдӕмӕ кӕй айстат, Чырыстийы уыцы фарны уацӕн, ӕмӕ рӕдауӕй ӕххуыс кӕнут уыдонӕн дӕр ӕмӕ алкӕмӕн дӕр. 14 Куы-иу кувой, уӕд сӕ зӕрдӕтӕ тырндзысты сымахмӕ, уымӕн ӕмӕ уӕ Хуыцау схайджын кодта Йӕ ӕгӕрон хорзӕхӕй. 15 Бузныг Хуыцауӕй, ныхӕстӕй зӕгъӕн кӕмӕн нӕй, Йӕ уыцы хорзӕхы тыххӕй!

2 Коринфӕгтӕм 10

1 Лӕгӕй-лӕгмӕ уемӕ «тӕппуд» чи у, уӕ фӕсаууонмӕ та – хъӕбатыр, ӕз уыцы Павел дӕн. Чырысти куыд ӕвӕлмас ӕмӕ уарзӕгой уыд, афтӕ ӕвӕлмас ӕмӕ уарзӕгойӕ 2 Уӕ курын, куы уӕм ӕрцӕуон, уӕд мӕ куыд нӕ бахъӕуа мӕхи хъӕбатыр ӕмӕ ныфсхастӕй равдисын. Фидарӕй ӕууӕндын: мӕхи ахӕмӕй равдисын мӕ бон у, мӕнӕй ӕнхъӕл чи у, ацы дунейы адӕм куыд цӕрынц, афтӕ цӕры, зӕгъгӕ, уыдоны ныхмӕ. 3 Уымӕн ӕмӕ кӕд адӕймаджы буары цӕрӕм, уӕддӕр адӕймаджы фӕрӕзтӕй нӕ тох кӕнӕм. 4 Мах цы хотыхтӕй хӕцӕм, уыдон адӕймаджы конд не сты – мах хӕцӕм, Хуыцауы тых кӕй мидӕг ис, фидӕрттӕ ныддӕрӕн кӕнын кӕй бон у, уыцы хотыхтӕй. Уыдонӕй дӕрӕн кӕнӕм рӕдыд хъуыдытӕ – 5 Хуыцауы базоныны фӕндагыл цы систӕ самадӕуыд, уыдоны. Уымӕй исӕм уацары алы хъуыды ӕмӕ йӕ кӕнӕм Чырыстийӕн коммӕгӕс. 6 Ӕмӕ ӕххӕст коммӕгӕс куы суат, уӕд цӕттӕ уыдзыстӕм цавӕрфӕнды хивӕнд дӕр бафхӕрынмӕ. 7 Ӕддаг бакастӕй цы зыны, уымӕ кӕсут? Чырыстийы кӕй у, ууыл фидарӕй чи ӕууӕнды, уый ноджыдӕр ахъуыды кӕнӕд, мах дӕр, уыйау, Чырыстийы кӕй стӕм, ууыл. 8 Уӕ аргъуан фехалынӕн нӕ, фӕлӕ йӕ саразынӕн Хицау махӕн цы бартӕ радта, уыдонӕй ӕгӕр куы раппӕлон, уӕд дӕр нӕ фӕхудинаг уыдзынӕн. 9 Афтӕ ӕнхъӕл ма ут, ӕмӕ уӕ тӕрсын кӕнын мӕ фыстӕджытӕй. 10 Уымӕн ӕмӕ чидӕртӕ зӕгъынц: «Йӕ фыстӕджыты домаг ӕмӕ тыхджын у, лӕгӕй-лӕгмӕ та – лӕмӕгъ, йӕ ныхас нӕ ахады». 11 Афтӕ чи зӕгъы, уый зонӕд: нӕ фыстӕджыты фӕсаууонмӕ цавӕртӕ стӕм, хъуыддагӕй дӕр ахӕмтӕй равдисдзыстӕм нӕхи, куы уӕм ӕрцӕуӕм, уӕд. 12 Уымӕн ӕмӕ йӕхицӕй чи ӕппӕлы, уыдонимӕ нӕхи ӕрӕмных кӕнынмӕ, кӕнӕ уыдоныл нӕхи абарынмӕ нӕ ныфс нӕ хӕссӕм. Уыдон сӕхицӕн аргъ кӕнынц сӕхи барӕнтӕм гӕсгӕ, ӕмӕ сӕхи барынц сӕхиуыл – уый ӕнӕзонд ми у. 13 Мах та нӕхицӕй куы ӕппӕлӕм, уӕд нын нысангонд цы арӕнтӕ ис, уыдоны сӕрты нӕ ахиздзыстӕм, фӕлӕ баззайдзыстӕм, Хуыцау нын бакусынӕн цы хуымы хай бабар кодта, уым; сымах дӕр уыцы хуымы стут. 14 Мах уыцы арӕнты сӕрты ахизыныл нӕхи нӕ хъарӕм. Куы нӕ уӕм ӕрцыдаиккам, уӕд афтӕ уыдаид. Фӕлӕ сымахмӕ дӕр бахӕццӕ стӕм Чырыстийы фарны уацимӕ. 15 Нӕхицӕй куы феппӕлӕм, уӕд нӕ арӕнты сӕрты нӕ ахизӕм, кӕйдӕр фӕллӕйттӕ нӕхи нӕ бакӕнӕм. Ӕппындӕр нӕ! Мах нӕ зӕрдӕ дарӕм: уӕ уырнындзинад рӕздзӕн, ӕмӕ сымахмӕ бакусдзыстӕм ноджы фылдӕр, махӕн нысангонд арӕнты сӕрты нӕ ахизгӕйӕ. 16 Ӕмӕ уӕд нӕ бон бауыдзӕн канд сымахмӕ нӕ, фӕлӕ ӕндӕр рӕтты дӕр фарны уац хъусын кӕнын. Мах нӕхицӕй нӕ раппӕлдзыстӕм, кӕйдӕр хуымы цӕттӕ хор мах фӕллой у, зӕгъгӕ. 17 «Йӕхицӕй чи ӕппӕлы, уый ӕппӕлӕд Хицауӕй». 18 Аккагыл нымад у, йӕхицӕй чи ӕппӕлы, уый нӕ, фӕлӕ Хицау кӕмӕй ӕппӕлы, уый.

2 Коринфӕгтӕм 11

1 О, куы мын бабыхсиккат, иуцасдӕр ӕнӕзонд куы уон, уӕд! Цӕй ӕмӕ мын бабыхсут. 2 Ӕз уыл ӕнувыд дӕн; Хуыцауы куыд нӕ фӕнды, афтӕ мӕн дӕр нӕ фӕнды, ӕмӕ ма уыл ӕндӕр искӕй бар дӕр цӕуа. Ӕз сымах иу Лӕгӕн – Чырыстийӕн – ӕрцӕттӕ кодтон ӕмкъайӕн, цӕмӕй уӕ ӕнӕкъӕм чызгӕй ӕрлӕууын кӕнон Йӕ разы. 3 Фӕлӕ уын ӕз тӕрсын, калм Евӕйыл хинӕй куыд рацыд, афтӕ сымахӕн дӕр уӕ зонд куы сзыгъуыммӕ уа, ӕмӕ Чырыстийы куы нал уарзат сыгъдӕг ӕмӕ иузӕрдион уарзтӕй. 4 Уымӕн ӕмӕ уӕм исчи куы ӕрцӕуы, уӕд ын фӕдӕттут, мах уын кӕй тыххӕй нӕ дзырдтам, ахӕм ӕндӕр Йесойы тыххӕй дзурыны бар; ӕнӕзивӕгӕй райсут, раздӕр кӕй нӕ райстат, ахӕм уд, ӕмӕ фӕхъусут, раздӕр кӕй нӕ фехъуыстат, ахӕм фарны уацмӕ. 5 Мӕнмӕ та афтӕ кӕсы, ӕмӕ ӕз уыцы «уӕлдӕр апостолтӕй» ницӕмӕй цауддӕр дӕн. 6 Рӕсугъд дзурынмӕ нӕ арӕхсын, зонгӕ та кӕнын – уый уын мах равдыстам алцӕмӕй дӕр. 7 Цӕмӕй сымах сбӕрзонд уат, уый тыххӕй мӕхи кӕй ӕрныллӕг кодтон, ӕмӕ уын Хуыцауы фарны уац лӕвар кӕй амыдтон, уымӕй ӕз тӕригъӕды, мыййаг, бафтыдтӕн? 8 Зӕгъӕн ис, ӕз стыгътон иннӕ аргъуантӕ – сымахӕн балӕггад кӕныны тыххӕй ӕхца уыдонӕй истон. Сымахмӕ куы уыдтӕн, уӕд хъуаг кӕд ӕййӕфтон, уӕддӕр никӕй батыхсын кодтон. 9 Хъуаг цӕмӕй ӕййӕфтон, уымӕй мын баххуыс кодтой Македонийӕ ӕрцӕуӕг ӕфсымӕртӕ. Ӕз уӕ никуы батыхсын кодтон ӕмӕ нырӕй фӕстӕмӕ дӕр нӕ батыхсын кӕндзынӕн. 10 Афтӕ кӕй у, уымӕй мын ӕппӕт Ахайы дӕр мӕхицӕй ӕппӕлыны бар ничи байсдзӕн – ӕз уый зӕгъын, Чырыстийы ӕцӕгадӕй хайджын кӕй дӕн, уымӕ гӕсгӕ. 11 Цӕмӕн афтӕ дарын мӕхи? Кӕй уӕ нӕ уарзын, уый тыххӕй? Хуыцау ӕвдисӕн: ӕз уӕ бирӕ уарзын. Фӕлӕ мӕхи куыд дардтон, афтӕ дардзынӕн нырӕй фӕстӕмӕ дӕр, 12 Цӕмӕй ӕфсон агурджытӕн ӕфсон ма уа сӕхицӕй раппӕлынӕн, цыма не 'мсӕр сты, уыйау. 13 Уымӕн ӕмӕ ахӕмтӕ сты мӕнгапостолтӕ, фӕлитой кусджытӕ, сӕхи ӕвдисынц афтӕ, цыма Чырыстийы апостолтӕ сты. 14 Уым диссагӕй ницы ис: хӕйрӕг дӕр йӕхи равдисы рухсы зӕдӕй. 15 Ӕмӕ йӕ кусджытӕ дӕр рӕстады кусджытӕй сӕхи куы февдисынц, уӕд уый ӕнӕрцӕугӕ хабар нӕу. Фӕлӕ сӕ кӕрон уыдзӕни сӕ хъуыддӕгтӕм гӕсгӕ. 16 Зӕгъын ма уын: ӕнӕзондыл мӕ мачи нымайӕд. Фӕлӕ мӕ кӕд ӕнӕзондыл нымайут, уӕддӕр мыл барвӕссут ахӕмӕй дӕр, цӕмӕй уын иуцасдӕр раппӕлон мӕхицӕй. 17 Ӕз ныртӕккӕ цы зӕгъдзынӕн, уый Хицауӕн фӕндон нӕу – райдайдзынӕн мӕхицӕй ӕппӕлын ӕнӕзондау. 18 Сӕ зӕххон хъуыддӕгтӕй бирӕтӕ сӕхицӕй куыд ӕппӕлынц, афтӕ ӕз дӕр ӕппӕлдзынӕн мӕхицӕй. 19 Уымӕн ӕмӕ сымах, зондджынтӕ, ӕнӕзӕндтыл зӕрдиагӕй ӕууӕндут. 20 Сымах ӕууӕндут, цагъартӕ уӕ чи кӕны, уӕ мулк уын чи хӕры, йӕ дӕлбар уӕ чи кӕны, сымахӕй уӕлдӕр йӕхи чи ӕвӕры, уӕ цӕсгом уын чи цӕвы, уыдоныл. 21 Ӕфсӕрмы кӕнын йӕ зӕгъынӕй дӕр: уыдӕттӕ бакӕнынӕн нӕм фаг хъару нӕ разынди. Кӕд исчи истӕмӕй раппӕлынмӕ йӕ ныфс хӕссы, уӕд ӕз дӕр – ме 'нӕзондӕй йӕ зӕгъын – мӕ ныфс хӕссын. 22 Уыдон дзуттӕгтӕ сты? Ӕз дӕр. Израилӕгтӕ сты? Ӕз дӕр. Авраамы цот сты? Ӕз дӕр. 23 Чырыстийы кусджытӕ сты? Мӕ зонд цыма фӕцыд, ӕз уыйау зӕгъын: ӕз уыдонӕй уӕлдӕр дӕн. Ӕз дзӕвгар фылдӕр бафыдӕбон кодтон, дзӕвгар фылдӕр уыдтӕн ахӕстӕтты, надтой мӕ ӕнӕвгъаудӕрӕй, бирӕ хӕттыты кастӕн мӕлӕты цӕстытӕм. 24 Иудейты къухӕй фондз хатты бавзӕрстон фӕйнӕ нудӕс ӕмӕ ссӕдз цӕфы; 25 Ӕртӕ хатты мӕ фӕнадтой лӕдзджытӕй; иу хатт мӕ дуртӕй мардтой; ӕртӕ хатты наусӕфты бахаудтӕн; ӕхсӕв ӕмӕ бон денджызы, доны уӕлӕ, арвыстон; 26 Арӕх цыдтӕн балцыты; тӕссаг мын уыди цӕугӕдӕттыл; тӕссаг мын уыди абырджытӕй; тӕссаг мын уыди хи адӕмӕй; тӕссаг мын уыди муртаттӕй; тӕссаг мын уыди сахары; тӕссаг мын уыди ӕдзӕрӕг быдыры; тӕссаг мын уыди денджызы; тӕссаг мын уыди мӕнгӕфсымӕртӕй; 27 Мӕ куыст уыди уӕззау; арӕх хуыссӕгӕй не 'фсӕстӕн; ӕййӕфтон стонг ӕмӕ дойны; арӕх мӕ гуыбын дӕр не 'фсӕстон; фӕрӕзтон уазал ӕмӕ бӕгънӕгӕн. 28 Уыдӕттӕй уӕлдай мыл ӕвӕрд ис ӕппӕт аргъуантыл сагъӕсты ӕрвылбоны уаргъ дӕр. 29 Чи слӕмӕгъ, ӕмӕ ӕз йемӕ ма слӕмӕгъ уон? Чи фӕкалд, ӕмӕ мӕ зӕрдӕ ма судза? 30 Кӕд мӕн мӕхицӕй раппӕлын хъӕуы, уӕд мӕ бон раппӕлын у, лӕмӕгъ кӕй дӕн, уымӕй. 31 Ӕз мӕнг кӕй нӕ зӕгъын, уый зоны Хицау Йесойы Хуыцау ӕмӕ Фыд – арфӕгонд уӕд мыггагмӕ! 32 Паддзах Аретайы ӕлдар мӕн ӕрцахсыны тыххӕй Дамаскы сахары рацӕуӕнтӕ хъахъхъӕдта. Фӕлӕ мӕ рудзынгӕй тӕсчъы ӕруагътой сисыл, ӕмӕ йӕ къухмӕ нӕ бахаудтӕн.

2 Коринфӕгтӕм 12

1 Кӕд ницы пайда у, уӕддӕр хъуамӕ раппӕлон мӕхицӕй. Райдайдзынӕн дзурын, Хицау мын цы фенын ӕмӕ раргом кодта, уыдӕтты тыххӕй. 2 Ӕз зонын иу чырыстон адӕймаджы. Цыппӕрдӕс азы размӕ йӕ, – нӕ зонын, йӕ буары уыд ӕви нӕ, Хуыцау ӕй зоны, – систӕуыд ӕртыккаг уӕларвмӕ. 3 Йӕ буары уыд ӕви нӕ, уый нӕ зонын, Хуыцау ӕй зоны, фӕлӕ зонын, уыцы адӕймаджы 4 Систӕуыди дзӕнӕтмӕ ӕмӕ фехъуыста, ӕвзагыл чи нӕ бады ӕмӕ адӕймаг кӕй хъуамӕ басусӕг кӕна, ахӕм ныхӕстӕ. 5 Ахӕм адӕймагӕй раппӕлдзынӕн, мӕхицӕй та нӕ раппӕлдзынӕн. Мӕхицӕй куы ӕппӕлон, уӕд ӕрмӕстдӕр мӕ лӕмӕгъдзинадӕй. 6 Ӕниу мӕ мӕхицӕй раппӕлын куы бафӕнда, уӕд ӕнӕзонд нӕ уыдзынӕн – раст цы у, уый зӕгъдзынӕн. Фӕлӕ мӕхиуыл хӕцын, цӕмӕй мӕм цы уыны, кӕнӕ мӕнӕй цы хъусы, уымӕй мын хуыздӕр ӕнхъӕл мачи уа. 7 Ӕмӕ мын Хуыцау цы раргом кодта, ӕппӕт уыдӕттӕй мӕхиуыл куыд нӕ фервӕссон, уый тыххӕй мӕ буары фӕцавдӕуыд фат – хӕйрӕджы зӕд; уый мӕ мары тухӕнӕй, цӕмӕй мӕхиуыл ма фервӕссон. 8 Уымӕй фервӕзыны тыххӕй ӕртӕ хатты лӕгъстӕ кодтон Хицауӕн, 9 Фӕлӕ мын загъта: «Ӕгъгъӕд дын у Мӕ хорзӕх, уымӕн ӕмӕ Мӕ тых йӕ тыхы бацӕуы, адӕймаг лӕмӕгъ куы вӕййы, уӕд». Уымӕ гӕсгӕ ӕз зӕрдиагдӕрӕй ӕппӕлдзынӕн, ӕдых кӕй дӕн, уымӕй, иудадзыг Чырыстийы хъаруйӕ хайджын куыд уон, афтӕ. 10 Уымӕ гӕсгӕ Чырыстийы сӕраппонд ӕз райгонд дӕн мӕ лӕмӕгъдзинадӕй, ме 'фхӕрдӕй, мӕ хъуӕгтӕй, мӕ фӕдыл кӕй зилынц, уымӕй, мӕ тыхст уавӕртӕй. Уымӕн ӕмӕ тыхджын вӕййын лӕмӕгъӕй. 11 Ӕз сдӕн ӕнӕзондау – уымӕ мӕ уӕхӕдӕг ӕртардтат. Уӕвгӕ та мӕ сымах хъуамӕ ӕппӕликкат. Кӕд ӕз ницы дӕн, уӕддӕр «уӕлдӕр апостолтӕй» ницӕмӕй цауддӕр дӕн. 12 Апостол кӕй дӕн, уый уын равдыстон мӕ фӕразонӕй, ӕвдисӕйнӕгтӕй, диссӕгтӕй ӕмӕ стыр хъуыддӕгтӕй. 13 Иннӕ аргъуантӕй уӕлдай уӕ хъыджы цӕмӕй бацыдтӕн? Кӕй уӕ нӕ батыхсын кодтон, уымӕй? Ныббарут мын мӕ ацы азым! 14 Ныр цӕттӕ дӕн ӕртыккаг хатт сымахмӕ цӕуынмӕ, ӕмӕ уӕ нӕ батыхсын кӕндзынӕн. Мӕн уӕ мулк нӕ хъӕуы – уӕхӕдӕг мӕ хъӕут. Хъуамӕ ныййарджытӕн бынтӕ сӕ хъӕбултӕ ма кӕной, фӕлӕ хъӕбултӕн – сӕ ныййарджытӕ. 15 Цыдӕриддӕр мӕм ис, уый дӕр ӕмӕ суанг мӕхи дӕр цингӕнгӕ ратдзынӕн уӕ удты сӕраппонд. Ӕз уӕ бирӕ куы уарзын, уӕд мӕ сымах къаддӕр цӕмӕн уарзут? 16 Зӕгъӕм, ӕз уӕ мӕхӕдӕг нӕ батыхсын кодтон. Фӕлӕ кӕд, мыййаг, хин адӕймаг дӕн, сайдӕй уыл рацыдтӕн ӕмӕ уӕ афтӕмӕй мӕхи бакодтон? 17 Кӕнӕ уӕм кӕй арвыстон, кӕд уӕ, мыййаг, уыдонӕй кӕйдӕр фӕрцы исты райстон? 18 Ӕз ӕрхатыдтӕн Титмӕ сымахмӕ ацӕуыны тыххӕй, ӕмӕ ма йын ӕфсымӕртӕй иуы арвыстон йемӕ. Тит уӕ исты райста? Мах Титимӕ ӕмзӕрдӕ нӕ уыдыстӕм, иу фӕндагыл нӕ цыдыстӕм, мыййаг? 19 Цыма алцӕмӕй дӕр уӕ разы нӕхи раст кӕнӕм, афтӕ уӕм кӕсы? Мах цы дзурӕм, уый, Чырыстиимӕ иугондӕй, Хуыцауы раз дзурӕм. Мӕ уарзон хӕлӕрттӕ, ӕппӕт уыдӕттӕ мах кӕнӕм уе сфидар кӕныны тыххӕй. 20 Ӕз тӕрсын: куы уӕм ӕрцӕуон, уӕд нын куы сбӕлвырд уа, нӕдӕр ӕз, нӕдӕр сымах кӕй не стӕм, кӕрӕдзийы нӕ цавӕрӕй фенын фӕндыд, ахӕмтӕ; куы уӕм ӕрӕййафон хъаугъатӕ, хӕлӕг, маст, хи уӕлдӕр ӕвӕрын, хахуыртӕ, фыдгой, сӕрыстырдзинад ӕмӕ змӕст; 21 Мӕ Хуыцау та мӕ ногӕй куы ӕрныллӕг кӕна сымахмӕ, ӕмӕ куы кӕуон, раздӕр тӕригъӕд чи ракодта, сӕ чъизи хъуыддӕгтыл, хъахбай ӕмӕ ӕлгъаг митыл фӕсмон чи нӕ фӕкодта, бирӕ ахӕмтыл.

2 Коринфӕгтӕм 13

1 Ныр уӕм ӕртыккаг хатт цӕуын. «Дыууӕ кӕнӕ ӕртӕ ӕвдисӕны цы ныхасӕн уа, уый банымадӕуы растыл». 2 Ӕз уӕм дыккаг хатт куы уыдтӕн, уӕд рагацау загътон, тӕригъӕды чи бафтыд, уыдонӕн дӕр ӕмӕ иннӕтӕн сеппӕтӕн дӕр; ныр та фӕсаууонмӕ ногӕй зӕгъын: куы ӕрцӕуон, уӕд хатыр никӕмӕн уыдзӕн. 3 Уымӕн ӕмӕ сымах агурут ӕвдисӕйнаг, мӕ дзыхӕй Чырысти дзуры ӕви нӕ. Чырысти уын ӕдых нӕу, фӕлӕ Йӕ хъару равдисы уе 'хсӕн. 4 Кӕд Ӕй ӕдыхӕй байтыгъдӕуыд, уӕддӕр цӕры Хуыцауы хъаруйӕ. Чырысти куыд ӕдых уыди, мах дӕр афтӕ ӕдых стӕм, фӕлӕ Хуыцауы хъаруйӕ Йемӕ цӕрдзыстӕм сымахӕн. 5 Уӕхи бафӕлварут, уырнындзинад уӕм ис ӕви нӕ; уӕ зӕрдӕтӕм ныккӕсут. Ӕви Йесо Чырысти уӕ зӕрдӕты кӕй ис, уый нӕ зонут? Кӕд ӕй нӕ зонут, уӕд, цавӕр хъуамӕ уат, ахӕмтӕ не стут. 6 Уыцы ныфс мӕ ис, ӕмӕ сымах базондзыстут, мах цавӕр хъуамӕ уӕм, ахӕм кӕй стӕм, уый. 7 Ӕмӕ кувӕм Хуыцаумӕ, цӕмӕй ӕвзӕрӕй мацы саразат. Нӕ куывд уый охыл нӕу, ӕмӕ цавӕр хъуамӕ уӕм, нӕхи ахӕмӕй равдисӕм – фӕнды нӕ, цӕмӕй сымах аразат хорз хъуыддӕгтӕ, мах цавӕр хъуамӕ уӕм, ахӕмӕй куы нӕ зынӕм, уӕд дӕр. 8 Уымӕн ӕмӕ ӕцӕгады ныхмӕ ӕнӕбон стӕм, ӕцӕгады сӕраппонд та – тыхджын. 9 Мах лӕмӕгъ куы вӕййӕм, сымах та – тыхджын, уӕд цины бафтӕм. Сымах ӕнаипп цӕмӕй уат, кувгӕ дӕр уый сӕраппонд кӕнӕм. 10 Ӕппӕт уыдӕттӕ уӕм фӕсаууонмӕ уый тыххӕй фыссын, ӕмӕ сымахмӕ куы уон, уӕд мӕ ма бахъӕуа мӕхи карзӕй равдисыны сӕр, халынӕн нӕ, фӕлӕ мын аразынӕн Хицау цы бартӕ радта, уыдонмӕ гӕсгӕ. 11 Ӕппынфӕстаг, ӕфсымӕртӕ, цин кӕнут, тырнут ӕнаипп уӕвынмӕ, кӕрӕдзийӕн ныфс ӕвӕрут, ут ӕмзонд, цӕрут фидыдӕй, ӕмӕ гъеуӕд уарзт ӕмӕ фарн дӕттӕг Хуыцау уыдзӕн уемӕ. 12 Кӕрӕдзийӕн салам дӕттут ӕфсымӕрон байӕ. Салам уын дӕттынц сыгъдӕджытӕ иууылдӕр. 13 Нӕ Хицау Йесо Чырыстийы хорзӕхӕй, Хуыцауы уарзтӕй ӕмӕ Сыгъдӕг Удимӕ иудзинадӕй уеппӕт дӕр ут хайджын.

Галатӕгтӕм 1

1 Павелӕй, адӕмы уынаффӕмӕ гӕсгӕ нӕ, адӕймаджы фӕрцы дӕр нӕ, фӕлӕ Йесо Чырыстийы фӕндӕй ӕмӕ Чырыстийы мӕрдтӕй райгасгӕнӕг Фыд-Хуыцауы фӕндӕй апостолӕй кӕй сӕвӕрдӕуыд, уымӕй, 2 Стӕй мемӕ чи ис, ӕппӕт уыцы ӕфсымӕртӕй Галатийы аргъуантӕм. 3 Хорзӕх ӕмӕ уын фарн нӕ Фыд Хуыцауӕй ӕмӕ Хицау Йесо Чырыстийӕ. 4 Чырысти нӕ тӕригъӕдты тыххӕй Йӕхи ӕрхаста нывондӕн, цӕмӕй нӕ фервӕзын кӕна ацы мӕнгард дунейӕ – афтӕ бафӕндыди нӕ Фыд Хуыцауы. 5 Кад Ын уӕд мыггагӕй-мыггагмӕ! Амен. 6 Дисы мӕ ӕфтауы, Чырыстийы хорзӕхы фӕрцы уӕ Йӕхимӕ Ӕрхонӕгӕй ӕндӕр фарны уацмӕ уе 'ргом куыд тагъд здахын райдыдтат, уый. 7 Уый ӕндӕр фарны уац нӕу, ӕрмӕст ис, уӕ зонд уын чи змӕнты ӕмӕ Чырыстийы фарны уац сзыгъуыммӕ кӕнын кӕй фӕнды, ахӕмтӕ. 8 Фӕлӕ уын суанг мах, кӕнӕ зӕд уӕларвӕй куы хъусын кӕна, мах уын кӕй нӕ хъусын кодтам, ахӕм фарны уац, уӕд ӕлгъыст фӕуӕд йӕ хъусынгӕнӕг. 9 Раздӕр цы дзырдтам, уый зӕгъын ныр дӕр: махӕй цы фарны уац фехъуыстат, уымӕй фӕстӕмӕ уын ӕндӕр фарны уац чи хъусын кӕны, уый ӕлгъыст фӕуӕд. 10 Ӕз абон адӕмы хорзӕхмӕ тырнын ӕви Хуыцауы? Мыййаг, адӕмы зӕрдӕ балхӕныныл архайын? Абон дӕр ма ӕз адӕмы зӕрдӕ балхӕныныл куы архаин, уӕд Чырыстийы цагъар нӕ уаин. 11 Зонут ӕй, ме 'фсымӕртӕ: ӕз цы фарны уац фехъусын кодтон, уый адӕймагӕй нӕ рацыд. 12 Ӕз ӕй адӕймагӕй нӕ фехъуыстон, адӕймаг мын ӕй нӕ бацамыдта, фӕлӕ мын ӕй Йесо Чырысти раргом кодта. 13 Ӕз иудейаг диныл хӕст куы уыдтӕн, уӕд цы уагӕй цардтӕн, Хуыцауы Аргъуан ӕгъатырӕй куыд ӕфхӕрдтон ӕмӕ йӕ фесафыныл куыд архайдтон, уый тыххӕй сымах фехъуыстат. 14 Иудейаг диныл мӕхи хъарынӕй ӕз мӕ бирӕ дзуттаг ӕмгӕрттӕн фӕдӕн сӕ разӕй, ӕгӕр ӕнувыдӕй ӕххӕст кодтон мӕ фыдӕлты ӕгъдӕуттӕ. 15 Фӕлӕ ма мады гуыбыны куы уыдтӕн, уӕд мӕ Чи сӕвзӕрста, стӕй мӕ Йӕ хорзӕхмӕ гӕсгӕ Чи ӕрхуыдта, уыцы Хуыцауы куы бафӕндыд 16 Мӕнӕн Йӕ Фырты раргом кӕнын, Йӕ фарны уац муртаттӕм цӕмӕй хӕссон, уӕд адӕмӕй никӕимӕ уынаффӕ кодтон. 17 Мӕ размӕ апостол чи сси, уыдонмӕ нӕ ацыдтӕн Иерусалиммӕ, фӕлӕ ацыдтӕн Аравимӕ, уырдыгӕй та ӕрбаздӕхтӕн Дамаскмӕ. 18 Стӕй, ӕртӕ азы фӕстӕ, ацыдтӕн Иерусалиммӕ, цӕмӕй базонгӕ уон Кифӕимӕ; ӕмӕ йӕм фӕдӕн фынддӕс боны. 19 Иннӕ апостолтӕй, Хицауы ӕфсымӕр Иаковы йеддӕмӕ, ӕз никӕй федтон. 20 Цы уӕм фыссын, зӕгъын уын Хуыцауы раз, уымӕй та сайгӕ нӕ кӕнын. 21 Уый фӕстӕ ацыдтӕн Сири ӕмӕ Киликимӕ. 22 Иудейӕйы чи ис, Чырыстийы уыцы аргъуанты уырнджытӕн лӕгӕй-лӕгмӕ зонгӕ нӕ уыдтӕн. 23 Ӕрмӕст фехъуыстой, зӕгъгӕ, кӕддӕр сӕ чи ӕфхӕрдта, уый ныр, раздӕр йӕ фесафыныл кӕмӕн архайдта, уыцы уырнындзинады тыххӕй хъусын кӕны фарны уац. 24 Ӕмӕ мӕн тыххӕй кад кодтой Хуыцауӕн.

Галатӕгтӕм 2

1 Фӕстӕдӕр, цыппӕрдӕс азы фӕстӕ, Варнавӕимӕ ногӕй ацыдтӕн Иерусалиммӕ, Титы дӕр акодтон немӕ. 2 Уырдӕм ацӕуын мын Хуыцауӕй раргом; ӕмӕ уым радзырдтон, муртаттӕн цы фарны уац хъусын кӕнын, уый тыххӕй, хицӕнӕй та ма – дзырддзӕугӕтӕн дӕр, цӕмӕй ма рауайа афтӕ, ӕмӕ ӕз дзӕгъӕлы фӕкуыстон кӕнӕ дзӕгъӕлы кусын. 3 Ме 'мбӕлццон Тит бердзенаг уыди, фӕлӕ уымӕй дӕр сунӕт скӕнын нӕ домдтой, 4 Кӕд нӕм мӕнгӕфсымӕртӕ куыддӕрты ӕрбаирвӕзтысты, уӕддӕр. Уыдон нӕм сӕхи ӕрбайстой, Чырыстиимӕ иу кӕй стӕм, уый руаджы нын цы сӕрибар ис, уымӕ сусӕгӕй цӕст дарынмӕ ӕмӕ махӕй цагъартӕ скӕнынмӕ. 5 Фӕлӕ сын мах нӕ басастыстӕм ӕмӕ иу сахаты бӕрц дӕр нӕ бахаудтам сӕ дӕлбар, цӕмӕй уӕм фарны уацы ӕцӕгад баззайа сыгъдӕгӕй. 6 Дзырддзӕугӕтыл нымад чи уыди – кӕдфӕнды-цыфӕнды сгуыхт ма уой, мӕнӕн уӕлдай нӕу, Хуыцау никӕй хъулон кӕны – уыдон мӕ фарны уацыл ницы бафтыдтой. 7 Уый нӕ, фӕлӕ федтой, мӕнӕн баргонд кӕй у ӕнӕсунӕтгӕндтӕн фарны уац хъусын кӕнын, сунӕтгӕндтӕн хъусын кӕнын Петрӕн куыд баргонд у, афтӕ. 8 Уымӕн ӕмӕ сунӕтгӕндтӕн Петры апостолӕй Чи сӕвӕрдта, мӕн дӕр муртаттӕн апостолӕй Уый сӕвӕрдта. 9 Ӕмӕ мын Хуыцау цы хорзӕх радта, уый куы базыдтой, уӕд Иаков, Кифӕ ӕмӕ Иоанн – аргъуаны цӕджындзтыл кӕй нымайынц, уыдон – немӕ ӕмгуысты нысанӕн мӕнӕн ӕмӕ Варнавӕйӕн райстой нӕ къухтӕ, цӕмӕй мах ацӕуӕм муртаттӕм, уыдон та – сунӕтгӕндтӕм. 10 Ӕрмӕст куырдтой, цӕмӕй ма рох кӕнӕм мӕгуырты, ӕмӕ ӕз бацархайдтон афтӕ бакӕныныл. 11 Фӕлӕ Кифӕ Антиохимӕ куы ӕрцыд, уӕд ӕз комкоммӕ радзырдтон йӕ ныхмӕ, уымӕн ӕмӕ раст нӕ бакодта. 12 Иаковы ӕрвыст лӕгты ӕрцыды агъоммӕ Кифӕ муртаттимӕ бадтис иу фынгыл. Фӕлӕ уыдон куы ӕрцыдысты, уӕд, сунӕтгӕндтӕй кӕй тарсти, уымӕ гӕсгӕ байдыдта муртаттӕй йӕхи иуварс ласын. 13 Йемӕ цӕстмӕмитӕ кодтой иннӕ иудейтӕ дӕр, суанг ма сӕ Варнавӕ дӕр бафӕзмыдта. 14 Фӕлӕ уыдон фарны уацы ӕцӕгадмӕ гӕсгӕ сӕхи кӕй нӕ дарынц, уый куы федтон, уӕд сеппӕты раз Кифӕйӕн загътон: «Кӕд ды, иудей, иудейау нӕ, фӕлӕ муртатау цӕрыс, уӕд муртатты иудейаг цардӕй цӕрыныл цӕмӕн ӕфтауыс?» 15 Мах муртаттӕй рацӕуӕг тӕригъӕдджынтӕ не стӕм – туг-стӕгӕй стӕм иудейтӕ. 16 Фӕлӕ мах зонӕм, Ӕгъдау ӕххӕст кӕнынӕй Хуыцауы раз ничи сраст уыдзӕни, фӕлӕ ӕрмӕст Йесо Чырыстийыл ӕууӕндынӕй. Уымӕ гӕсгӕ мах баууӕндыдыстӕм Йесо Чырыстийыл, цӕмӕй сраст уӕм Ӕгъдау ӕххӕст кӕныны фӕрцы нӕ, фӕлӕ Чырыстийыл ӕууӕндынӕй. Ӕгъдау ӕххӕст кӕныны фӕрцы Хуыцауы раз ничи сраст уыдзӕни. 17 Кӕд Чырыстийы фӕрцы тырнӕм нӕхи сраст кӕнынмӕ, ӕмӕ уӕддӕр тӕригъӕдджынтӕ стӕм, уӕд уый, мыййаг, афтӕ амоны, ӕмӕ Чырысти тӕригъӕдӕн кусӕг у? Ницы хуызы! 18 Уымӕн ӕмӕ цы фехӕлдтон, уый кӕд ногӕй аразын, уӕд мӕхи ӕгъдаухалӕджы бынаты ӕвӕрын. 19 Ӕгъдауы фӕрцы ӕз амардтӕн Ӕгъдауӕн, цӕмӕй цӕрон Хуыцауӕн. Ӕз тыгъд ӕрцыдтӕн Чырыстиимӕ. 20 Ӕмӕ ныр ӕз нал цӕрын, фӕлӕ мӕ зӕрдӕйы цӕры Чырысти. Ӕмӕ нырма кӕд мӕ буары цӕрын, уӕд цӕрын ӕрмӕстдӕр, Чи мӕ бауарзта ӕмӕ мӕн тыххӕй Йӕхи нывондӕн Чи ӕрхаста, Хуыцауы уыцы Фыртыл ӕууӕндынӕй. 21 Ӕз мӕхи нӕ тигъ кӕнын Хуыцауы хорзӕхыл. Уымӕн ӕмӕ адӕймаджы кӕд Ӕгъдау раст кӕны, уӕд Чырысти дзӕгъӕлы амард.

Галатӕгтӕм 3

1 О ӕнӕзонд галатӕгтӕ! Цыма Йесо Чырыстийы сымахмӕ байтыгъдӕуыд, афтӕ уын ӕй куы равдыстӕуыди, уӕд уӕ чи фӕцӕсты кодта [ӕмӕ ӕцӕгады коммӕ ма кӕсат]? 2 Сымахӕй мӕ ӕрмӕстдӕр мӕнӕ уый базонын фӕнды: Ӕгъдау ӕххӕст кӕныны руаджы схайджын стут Сыгъдӕг Удӕй, ӕви фарны уац фехъусыны ӕмӕ йыл баууӕндыны фӕрцы? 3 Ахӕм ӕнӕзонд стут? Сыгъдӕг Уды разамындӕй цы райдыдтат, уый ныр уӕхи хъарутӕй фӕуынмӕ хъавут? 4 Цытӕ бавзӕрстат, уый дзӕгъӕлы фӕци? Ау, дзӕгъӕлы фӕци! 5 Ӕгъдау кӕй ӕххӕст кӕнут, Хуыцау уын Сыгъдӕг Уд уый руаджы дӕтты ӕмӕ уе 'хсӕн диссӕгтӕ уый фӕрцы кӕны, ӕви фарны уац фехъусыны ӕмӕ йыл баууӕндыны фӕрцы? 6 Афтӕ «Авраам баууӕндыди Хуыцауыл, ӕмӕ йӕ уый тыххӕй Хуыцау банымадта рӕстгӕнӕгыл». 7 Уӕдӕ зонут: уырнджытӕ сты Авраамы байзӕддӕгтӕ. 8 Сыгъдӕг Фысты рагацау загъдӕуыди, Хуыцау муртатты кӕй сраст кӕндзӕн уырнындзинады фӕрцы; ӕмӕ Хуыцау Авраамӕн развӕлгъау фехъусын кодта фарны уац: «Дӕ фӕрцы арфӕгонд уыдзысты ӕппӕт адӕмтӕ». 9 Уӕдӕ уырнджытӕ уырнӕг Авраамимӕ сты арфӕгонд. 10 Ӕгъдау ӕххӕст кӕнынӕй ныфс кӕй ис, уыдон та сеппӕт дӕр ӕлгъыст сты. Уымӕн ӕмӕ фыст у: «Ӕгъдауы чиныджы цыдӕриддӕр фыст ис, уыдӕттӕ иудадзыг чи не 'ххӕст кӕны, уый ӕлгъыст у». 11 Ӕгъдауы фӕрцы та Хуыцауы раз кӕй ничи сраст уыдзӕн, уый бӕлвырд у, уымӕн ӕмӕ «рӕстгӕнӕг уырнындзинады фӕрцы цӕрдзӕни». 12 Ӕгъдау та уырнындзинадимӕ баст нӕу, фӕлӕ «йӕ чи сӕххӕст кӕна, уый цӕрдзӕн йӕ фӕрцы». 13 Чырысти мах фервӕзын кодта, Ӕгъдаумӕ гӕсгӕ цы ӕлгъыст баййӕфтам, уымӕй – нӕ сӕрвӕлтау уыцы ӕлгъыст ӕруагъта Йӕхиуыл, Сыгъдӕг Фыст куыд зӕгъы, афтӕ: «Хъӕдыл кӕйдӕриддӕр ӕрцауыгъдӕуыд, уый ӕлгъыст у». 14 Уый уымӕн афтӕ у, цӕмӕй Хуыцау Авраамыл цы арфӕ бафтыдта, уый Йесо Чырыстийы фӕрцы анхъӕвза муртаттыл, ӕмӕ мах уырнындзинады руаджы схайджын уӕм, ныфс Кӕмӕй бавӕрдӕуыд, уыцы Удӕй. 15 Ӕфсымӕртӕ, цӕвиттон ӕрхӕсдзынӕн адӕймаджы цардӕй: адӕймаджы ныстуан фидаргонд куы ӕрцӕуы, уӕд ӕй ничи аивы ӕмӕ йӕм ничи бафтауы. 16 Хуыцау та зӕрдӕ бавӕрдта Авраамӕн ӕмӕ йӕ байзӕддагӕн. Фыст нӕу «байзӕддӕгтӕн дӕр», ома, бирӕ адӕмӕн, фӕлӕ фыст у иуы тыххӕй: «ӕмӕ дӕ байзӕддагӕн». Уыцы байзӕддаг Чырысти у. 17 Ӕз мӕнӕ уый зӕгъын: Хуыцау цы фидыд сарӕзта, уымӕн йӕ бынат нӕ бацахста, цыппарсӕдӕ ӕртын азы фӕстӕ цы Ӕгъдау фӕзынд, уый; ӕмӕ Хуыцауы зӕрдӕвӕрд баззад йӕ тыхы. 18 Уымӕн ӕмӕ зӕрдӕ цы хорзӕхтӕй ӕвӕрдӕуы, кӕд уыдоны Ӕгъдау дӕтты, уӕд уый зӕрдӕвӕрдмӕ гӕсгӕ нал у. Фӕлӕ Йӕ уыцы хорзӕхтӕ Хуыцау Авраамӕн зӕрдӕвӕрдмӕ гӕсгӕ радта. 19 Уӕдӕ Ӕгъдау цӕй тыххӕй у? Хуыцау ӕй фӕстӕдӕр уӕлӕмхасӕнӕн радта адӕмы фыдракӕндты тыххӕй, зӕрдӕ Кӕмӕн бавӕрдӕуыд, уыцы Байзӕддаг цалынмӕ ӕрцӕуа, уӕдмӕ. Ӕгъдау ӕвӕрд ӕрцыди зӕдты ӕххуысӕй ӕмӕ ӕхсӕнылӕджы фӕрцы. 20 Фӕлӕ ӕхсӕнылӕг ӕппынкъаддӕр дыууӕ ныхасгӕнӕгӕн вӕййы, Хуыцау та иу у. 21 Уӕдӕ Ӕгъдау Хуыцауы зӕрдӕвӕрды ныхмӕ у? Ницы хуызы! Уымӕн ӕмӕ мыггагмӕйы цард чи дӕтты, ахӕм ӕгъдау куы ӕрцыдаид лӕвӕрд, уӕд адӕймаджы ӕцӕгдӕр уый раст кодтаид. 22 Фӕлӕ Сыгъдӕг Фыст расидт, ӕппӕт дуне дӕр тӕригъӕдмӕ ахст кӕй у, уый тыххӕй, цӕмӕй, Хуыцау зӕрдӕ цы раттынӕй бавӕрдта, уый Йесо Чырыстийыл ӕууӕндыны фӕрцы лӕвӕрд ӕрцӕуа уырнджытӕн. 23 Уырнындзинады ӕрцыдмӕ та ахст уыдыстӕм, ӕмӕ нӕ Ӕгъдау хъахъхъӕдта, ӕрцӕуинаг цы уырнындзинад уыди, цалынмӕ уый раргом, уӕдмӕ. 24 Уӕдӕ Ӕгъдау махӕн уыди, Чырыстимӕ нӕ чи хъуамӕ ӕркодтаид, уыцы сабигӕс, цӕмӕй сраст уӕм уырнындзинады фӕрцы. 25 Уырнындзинад куы ӕрцыди, уӕдӕй фӕстӕмӕ уыцы сабигӕсы дӕлбар нал стӕм. 26 Уырнындзинады руаджы, Йесо Чырыстиимӕ иугондӕй, уеппӕт дӕр Хуыцауы хъӕбултӕ стут. 27 Уымӕн ӕмӕ сымах – Чырыстиимӕ баиуы охыл кӕуыл саргъуыдӕуыд, уыдон – баиу стут Чырыстиимӕ. 28 Ныр нал ис нӕдӕр иудей, нӕдӕр бердзенаг, нӕдӕр цагъар, нӕдӕр сӕрибар, нӕдӕр нӕлгоймаг, нӕдӕр сылгоймаг, уымӕн ӕмӕ уеппӕт дӕр Йесо Чырыстиимӕ ӕнӕфӕхицӕнгӕнгӕ иу стут. 29 Кӕд сымах Чырыстийы стут, уӕд Авраамы байзӕддӕгтӕ стут, ӕмӕ райсдзыстут, Хуыцау зӕрдӕ кӕмӕй бавӕрдта, Йӕ уыцы хорзӕхтӕ.

Галатӕгтӕм 4

1 Ноджы ма уын зӕгъын: бындар цалынмӕ саби уа, уӕдмӕ цагъарӕй ницӕмӕй хицӕн кӕны, кӕд ӕппӕты хицау у, уӕддӕр. 2 Фыд кӕй снысан кодта, уыцы афонмӕ уый у йӕ хъомылгӕнджыты ӕмӕ хӕдзармӕ цӕстдарджыты дӕлбар. 3 Афтӕ мах дӕр: цалынмӕ сабитӕ уыдыстӕм, уӕдмӕ ацы дунейы ӕгъдӕутты цагъартӕ уыдыстӕм. 4 Фӕлӕ афон куы ралӕууыд, уӕд Хуыцау рарвыста, сылгоймагӕй Чи райгуырд ӕмӕ Ӕгъдауы дӕлбар Чи уыд, Йӕ уыцы Фырты, 5 Ӕгъдауы дӕлбар чи у, уыдоны суӕгъд кӕнынмӕ, цӕмӕй нӕ Хуыцау Йӕхицӕн сараза хъӕбултӕ. 6 Хуыцауы хъӕбултӕ кӕй стут, уымӕ гӕсгӕ Хуыцау нӕ зӕрдӕты ӕрцӕрын кодта Йӕ Фырты Уды, ӕмӕ Уый хъӕлӕсыдзагӕй фӕзӕгъы: «Аввӕ, нӕ Фыд!» 7 Уымӕ гӕсгӕ ды цагъар нал дӕ, фӕлӕ хъӕбул; ӕмӕ кӕд хъӕбул дӕ, уӕд дын Хуыцау ратдзӕн, Йӕ хъӕбултӕн Ӕм цы хорзӕхтӕ ис, уыдонӕй. 8 Раздӕр та, Хуыцауы куы нӕма зыдтат, уӕд уыдыстут, ӕцӕгӕй Хуыцау чи нӕу, уыцы хуыцӕутты цагъартӕ. 9 Ныр та, Хуыцауы куы базыдтат, растдӕр зӕгъгӕйӕ та, Хуыцау уӕ куы базыдта, уӕд ногӕй цӕмӕн здӕхут дунейы уыцы ӕдых ӕмӕ ницӕйаг ӕгъдӕуттӕм? Цӕмӕн уӕ фӕнды, ӕмӕ уыдонӕн ногӕй цагъартӕ уат? 10 Сымах бӕрӕг кӕнут сӕрмагонд бонтӕ, мӕйтӕ, рӕстӕджытӕ ӕмӕ азтӕ. 11 Сымахмӕ мӕ фӕллой дзӕгъӕлы куы фӕуа, уымӕй уын тӕрсын. 12 Лӕгъстӕ уын кӕнын, ӕфсымӕртӕ, бафӕзмут мӕн, уымӕн ӕмӕ ӕз дӕр сымах хуызӕн адӕймаг дӕн. Сымах мӕ хъыджы ницӕмӕй бацыдыстут. 13 Куыд зонут, афтӕмӕй уын фыццаг хатт фарны уац куы хъусын кодтон, уӕд рынчын уыдтӕн. 14 Ӕмӕ мӕ рынчын кӕд сымахӕн фӕлварӕн уыди, уӕддӕр мӕ ницыйыл нӕ банымадтат, ӕнӕрвӕссон мыл нӕ уыдыстут, фӕлӕ мыл баузӕлыдыстут, цыма уын Хуыцауы зӕд кӕнӕ Йесо Чырысти уыдтӕн, афтӕ. 15 Уӕ цин цы фӕци? Мӕхӕдӕг ӕвдисӕн дӕн, гӕнӕн уын куы уыдаид, уӕд рафтыдтаиккат уӕ цӕстытӕ ӕмӕ сӕ раттаиккат мӕнӕн. 16 Ау, рӕстдзинад уын кӕй дзырдтон, уый тыххӕй уын знаг сдӕн? 17 Иннӕтӕ уыл ӕнувыд сты, ӕрмӕст зӕрдиагӕй нӕ – архайынц уӕ фӕхицӕн кӕныныл, цӕмӕй сымах уыдоныл уат ӕнувыд. 18 Ӕнувыдӕй хи ӕвдисын хорз у, нысан хорз куы уа, уӕд, ӕмӕ кӕддӕриддӕр ахӕмӕй баззайын, фӕлӕ ӕз уемӕ куы вӕййын, ӕрмӕст уыцы рӕстӕг нӕ. 19 Мӕ хъӕбултӕ, арӕг усау ногӕй хъизӕмӕрттӕ сымах тыххӕй ӕвзарын, цалынмӕ Чырыстийы ӕрдзыхъӕдӕй не схайджын уат, уӕдмӕ. 20 Куыд мӕ фӕнды ныртӕккӕ сымахмӕ фестын ӕмӕ уемӕ ӕндӕр хъӕлӕсы уагӕй ныхас кӕнын, уымӕн ӕмӕ уын цы бакӕнон, уый нал зонын. 21 Зӕгъут-ма мын, Ӕгъдауы дӕлбар уӕвын кӕй фӕнды, уыдон – Ӕгъдау цы зӕгъы, уый нӕ хъусут? 22 Фыст у: «Авраамӕн уыди дыууӕ фырты – сӕ иу райгуырди цагъар сылгоймагӕй, иннӕ та – сӕрибар сылгоймагӕй». 23 Фӕлӕ цагъар сылгоймагӕй чи райгуырди, уый ӕрдзон ӕгъдауӕй райгуырди, сӕрибар сылгоймагӕй чи райгуырди, уый та – Хуыцауы зӕрдӕвӕрдмӕ гӕсгӕ. 24 Ам фӕсномыг хъуыды ис. Уыцы сылгоймӕгтӕ дыууӕ фидыды амонынц: сӕ иу ӕрцыди Синайы хохӕй, ӕмӕ дзы гуыры цагъартӕ – уый у Агар. 25 Агар амоны Синайы хох Аравийы – фӕсномыгӕй уый у абоны Иерусалим, уымӕн ӕмӕ йӕ хъӕбултимӕ цагъарады ис. 26 Уӕларвон Иерусалим та сӕрибар у – неппӕты мад. 27 Уымӕн ӕмӕ Сыгъдӕг Фыст зӕгъы: «Сцин кӕн, чи нӕ ары, уыцы ӕнӕзӕнӕг сылгоймаг. Ныхъхъӕр кӕн фырцинӕй, арыны хъизӕмӕрттӕ чи нӕ бавзӕрста, уыцы сылгоймаг. Уымӕн ӕмӕ мойджынӕй уагъдӕн дзӕвгар фылдӕр хъӕбултӕ ис». 28 Ӕфсымӕртӕ, Исаакау сымах Хуыцауы зӕрдӕвӕрды хъӕбултӕ стут. 29 Фӕлӕ ӕрдзон ӕгъдауӕй райгуырӕг уды ӕгъдауӕй райгуырӕджы уӕд куыд ӕфхӕрдта, афтӕ у ныр дӕр. 30 Цы зӕгъы Сыгъдӕг Фыст? «Фӕсур цагъар сылгоймаджы ӕмӕ йӕ лӕппуйы, уымӕн ӕмӕ цагъар сылгоймаджы лӕппуйӕн фыды бынтӕй хай нӕ уыдзӕн – сӕрибар сылгоймаджы лӕппуйы бауыдзысты». 31 Уӕдӕ, ӕфсымӕртӕ, мах стӕм цагъар сылгоймаджы нӕ, фӕлӕ сӕрибар сылгоймаджы хъӕбултӕ.

Галатӕгтӕм 5

1 Чырысти нӕ уый тыххӕй ссӕрибар кодта, ӕмӕ сӕрибар уӕм. Уӕдӕ фидар лӕуут, ӕмӕ та ногӕй цагъарады ӕфсондзы бынмӕ ма бахаут. 2 Ӕз, Павел, зӕгъын сымахӕн: кӕд сунӕт кӕнут, уӕд уын Чырыстийӕ ницы пайда уыдзӕни. 3 Сунӕт чидӕриддӕр кӕны, уыдонӕн ма ноджы иу хатт зӕгъын: Ӕгъдау уын ӕнӕхъӕнӕй ӕххӕстгӕнинаг у. 4 Сымахӕй Ӕгъдауы фӕрцы йӕхи чи раст кӕны, уыдон баззадысты ӕнӕ Чырыстийӕ, ӕнӕхай фесты Хуыцауы хорзӕхӕй. 5 Мах та разӕнгард кӕны Сыгъдӕг Уд, ӕмӕ уырнындзинады фӕрцы нӕ зӕрдӕ дарӕм ӕмӕ ӕнхъӕлмӕ кӕсӕм, Хуыцау мах кӕй сраст кӕндзӕн, уымӕ. 6 Уымӕн ӕмӕ мах Йесо Чырыстиимӕ куы уӕм, уӕд сунӕт скӕнай, ма скӕнай – уӕлдай нӕу; ахсджиаг у, йӕ тых уарзты мидӕг кӕмӕн ис, ӕрмӕст ахӕм уырнындзинад. 7 Хорз куы цыдыстут, уӕд уӕ чи бахъыгдардта, ӕмӕ ӕцӕгады коммӕ мауал кӕсат? 8 Ахӕм зондыл уӕ уе 'рхонӕг Хуыцау нӕ сардыдта. 9 Чысыл ӕнхъизӕн хыссӕ ӕгасӕй дӕр сӕнхъизын кӕны. 10 Сымахмӕ дӕр ӕндӕр зонд кӕй нӕ уыдзӕн, ууыл ӕз Хицауы фӕрцы фидарӕй дарын мӕ зӕрдӕ. Уӕ зонд уын чи змӕнты, чидӕриддӕр уӕд, баййафдзӕн ӕфхӕрд. 11 Кӕд ма ӕз ныртӕккӕ дӕр, ӕфсымӕртӕ, сунӕты фарс дӕн, уӕд мӕ цӕй тыххӕй ӕфхӕрынц? Уӕд дзуары тыххӕй цы фӕдзурын, уый цӕлхдур нӕ уаид. 12 О, уӕ зонд уын чи змӕнты, уыдон сӕхи куы бардузиккой! 13 Сӕрибармӕ хуынд стут, ӕфсымӕртӕ; ӕрмӕст уӕ сӕрибар ма асайӕд уӕ тӕригъӕдджын ӕрдзыхъӕды мондӕгтӕ ӕфсадынмӕ, фӕлӕ, кӕрӕдзи уарзгӕйӕ, уӕ иу иннӕмӕн лӕггад кӕнӕд. 14 Уымӕн ӕмӕ Ӕгъдауы ӕппӕт мидис иу ныхасы ис: «Уарз хионы, дӕхи куыд уарзыс, афтӕ». 15 Фӕлӕ кӕд кӕрӕдзи ӕхсынут ӕмӕ хӕрут, уӕд уӕхи хизут кӕрӕдзи фӕцӕгъдынӕй. 16 Зӕгъын уын, цӕрут Удӕн коммӕгӕсӕй, ӕмӕ уӕд уӕ тӕригъӕдджын ӕрдзыхъӕды мондӕгты фӕдыл нӕ цӕудзыстут. 17 Уымӕн ӕмӕ Уды цы фӕнды, уый тӕригъӕдджын ӕрдзыхъӕды нӕ фӕнды, тӕригъӕдджын ӕрдзыхъӕды цы фӕнды, уый та Уды нӕ фӕнды. Уыдон кӕрӕдзи ныхмӕ сты, ӕмӕ уӕ цы фӕнды, уый нӕ кӕнут. 18 Фӕлӕ кӕд сымах Уды коммӕ кӕсут, уӕд Ӕгъдауы дӕлбар не стут. 19 Тӕригъӕдджын ӕрдзыхъӕды хъуыддӕгтӕ зындгонд сты: хӕтын, чъизи ӕмӕ ӕлгъаг митӕ, 20 Мӕнгхуыцӕуттӕн кувын, кӕлӕнтӕ, фыдӕх, хъаугъатӕ, мӕсты кӕнын, хи уӕлдӕр ӕвӕрын, кӕрӕдзи не 'мбарын, къордтыл дихтӕ кӕнын, 21 Хӕлӕгцӕст, марын, фыднозт, ӕнӕуаг митӕ ӕмӕ афтӕ дарддӕр. Дзырдтон уын ӕмӕ уын ныр дӕр зӕгъын: ахӕм митӕ чи кӕны, уыдон Хуыцауы Паддзахадмӕ нӕ бацӕудзысты. 22 Уд та дӕтты уарзт, цин, фарн, фӕразондзинад, адӕймаджы кӕны зӕрдӕхӕлар, рӕдау, иузӕрдион, 23 Ӕвӕлмас, хиуылхӕцгӕ. Ахӕмтӕм Ӕгъдау бар нӕ дары. 24 Чырыстийы чи у, уыдон сӕ тӕригъӕдджын ӕрдзыхъӕд байтыгътой йӕ чъизи бӕллицтимӕ ӕмӕ мондӕгтимӕ. 25 Кӕд Уд махӕн царддӕттӕг у, уӕд Уымӕн коммӕгӕсӕй хъуамӕ цӕрӕм. 26 Ма уӕм цытуарз, кӕрӕдзи ма мӕсты кӕнӕм, кӕрӕдзимӕ ма хӕлӕг кӕнӕм.

Галатӕгтӕм 6

1 Ӕфсымӕртӕ, исчи тӕригъӕды куы бафта, уӕд ӕй сымах, Сыгъдӕг Удӕн коммӕгӕстӕ, ӕвӕлмасӕй раздахут раст фӕндагмӕ; уыимӕ кӕсут уӕхимӕ, цӕмӕй уын тӕригъӕд уӕхи дӕр ма сцыбӕл кӕна. 2 Иу иннӕйы царды уаргъӕй бахай кӕнӕд йӕхицӕн, ӕмӕ афтӕмӕй сӕххӕст кӕндзыстут Чырыстийы ӕгъдау. 3 Ницы уӕвгӕйӕ йӕхицӕн цыдӕр ӕнхъӕл чи у, уый йӕхи сайы. 4 Алчидӕр кӕсӕд йӕхи хъуыддӕгтӕм ӕмӕ сӕ кӕйдӕр хъуыддӕгтимӕ ма барӕд. Уӕд йӕхи хъуыддӕгтӕ цавӕр сты, ӕрмӕст уымӕй раппӕлдзӕн йӕхицӕй. 5 Уымӕн ӕмӕ алчидӕр йӕхи уаргъ ахӕсдзӕн. 6 Хуыцауы ныхас кӕмӕн амындӕуы, уый йӕ алы исбонӕй дӕр хай кӕнӕд ахуыргӕнӕгӕн. 7 Уӕхиуыл сайд ма ӕруадзут: Хуыцау хынджылӕггаг нӕу. Адӕймаг цы байтауа, уый ӕркӕрддзӕн. 8 Йӕ тӕригъӕдджын ӕрдзыхъӕд ӕфсадынӕн чи тауы, уый ӕркӕрддзӕни мӕлӕт; Уд ӕфсадынӕн чи тауы, уый та ӕркӕрддзӕни мыггагмӕйы цард. 9 Уӕдӕ ӕвӕллайгӕйӕ аразӕм хорз хъуыддӕгтӕ, уымӕн ӕмӕ кӕд нӕ хъару нӕ асӕтта, уӕд йӕ заманы ӕркӕрддзыстӕм, цы байтауӕм, уый. 10 Ӕмӕ цалынмӕ рӕстӕг ис, уӕдмӕ цӕй ӕмӕ алкӕмӕн дӕр цӕуӕм хорзы, уӕлдайдӕр та, уырнындзинад мах иу бинонтӕ кӕимӕ скодта, уыдонӕн. 11 Уынут, мӕхи къухӕй уӕм цы стыр дамгъӕтӕй ныффыстон! 12 Ӕддаг бакастӕй цы зыны, уыдӕтты фӕрцы йӕхи равдисыныл чи архайы, уыдон уӕ сунӕтыл уымӕн ардауынц, цӕмӕй Чырыстийы дзуары тыххӕй ӕфхӕрд ма баййафой. 13 Уымӕн ӕмӕ сунӕт чи кӕны, уыдон суанг сӕхӕдӕг дӕр не 'ххӕст кӕнынц Ӕгъдау, фӕлӕ архайынц, сымах сунӕт куыд скӕнат, ӕмӕ уымӕй сӕхицӕй куыд раппӕлой, ууыл. 14 Мӕн та мӕхицӕй раппӕлынӕй Хуыцау бахизӕд – раппӕлдзынӕн, нӕ Хицау Йесо Чырыстийы дзуары тыххӕй кӕй хъусын кӕнын, ӕрмӕст уымӕй. Уыцы дзуары фӕрцы мӕнӕн байтыгъдӕуыд дуне, мӕн та – дунейӕн. 15 Уымӕн ӕмӕ сунӕт скӕнай, ма скӕнай – уӕлдай нӕу; ахсджиаг у ногӕй райгуырын. 16 Ацы ӕгъдаумӕ гӕсгӕ чи цӕры, уыдон ӕмӕ Хуыцауы Израил хайджын уӕнт хорзӕх ӕмӕ фарнӕй. 17 Нырӕй фӕстӕмӕ мыл уаргъ мачиуал ӕвӕрӕд, уымӕн ӕмӕ мӕ буарыл Йесойы хъӕдгӕмттӕ хӕссын. 18 Нӕ Хицау Йесо Чырыстийы хорзӕх уӕ уӕд, ӕфсымӕртӕ. Амен.

Эфесӕгтӕм 1

1 Павелӕй, Хуыцауы фӕндӕй Йесо Чырыстийы апостолӕй – Йесо Чырыстиимӕ иу ӕмӕ Йыл иузӕрдион чи у, Эфесы уыцы сыгъдӕджытӕм. 2 Хорзӕх ӕмӕ уын фарн нӕ Фыд Хуыцауӕй ӕмӕ Хицау Йесо Чырыстийӕ. 3 Арфӕгонд уӕд нӕ Хицау Йесо Чырыстийы Хуыцау ӕмӕ Фыд, уды ӕгъдауӕй ныл Чырыстийы фӕрцы уӕлӕрвты алы хуызы арфӕ бафтауӕг. 4 Уый Чырыстийы руаджы мах сӕвзӕрста дуне сфӕлдисыны размӕ, Йӕ разы сыгъдӕг ӕмӕ ӕнаипп куыд уӕм. 5 Хуыцау нӕ кӕй уарзы, уый тыххӕй Йӕ фӕндонмӕ гӕсгӕ рагацау снысан кодта Йесо Чырыстийы фӕрцы махӕй Йӕхицӕн хъӕбултӕ саразын, 6 Цӕмӕй раппӕлдӕуа Йе стыр хорзӕхӕй – уымӕй нын бахай кодта Йӕ уарзон Фырты руаджы. 7 Чырысти не ссӕрибары аргъ бафыста Йӕ Тугӕй, ӕмӕ нын хатыр сты нӕ тӕригъӕдтӕ. Афтӕ равдыста Хуыцау Йӕ ӕгӕрон хорзӕх, 8 Ӕмӕ дзы махӕн радта рӕдауӕй, цӕмӕй уӕм уӕлзонд ӕмӕ ӕмбарӕм Йӕ уынаффӕтӕ. 9 Хуыцаумӕ рагагъоммӕ уыди, Чырыстийы руаджы кӕй хъуамӕ сӕххӕст кодтаид, ахӕм нысан. Ӕмӕ ныр махӕн раргом кодта Йӕ уыцы сусӕг фӕнд – 10 Афон куы ралӕууа, уӕд уӕларвон ӕмӕ зӕххон цы у, ӕппӕт уыдон, Чырысти сӕ сӕргъы, афтӕмӕй баиу кӕнын. 11 Ӕппӕт дӕр Йӕхи фӕндонмӕ гӕсгӕ Чи кӕны, уыцы Хуыцау рагацау куыд снысан кодта, афтӕ Чырыстийы фӕрцы мах сӕвзӕрста Йӕхицӕн адӕмӕн, 12 Цӕмӕй мах ӕппӕлӕм Йӕ намысӕй, уымӕн ӕмӕ Чырысти зӕрдӕдарӕн фыццаг махӕн сси. 13 Ӕмӕ сымах дӕр куы фехъуыстат ӕцӕгады ныхас, фарны уац уӕ фервӕзыны тыххӕй, ӕмӕ Чырыстийыл куы баууӕндыдыстут, уӕд баиу стут Йемӕ. Хуыцауы адӕм кӕй стут, уый равдисынӕн Хуыцау сымах схайджын кодта, зӕрдӕ Кӕмӕй бавӕрдта, уыцы Сыгъдӕг Удӕй. 14 Сыгъдӕг Уд у, Хуыцаумӕ нын ӕфснайдӕй цы хорзӕхтӕ лӕууы, уыдон кӕй райсдзыстӕм, уый ӕвдисӕн. Райсдзыстӕм сӕ, Хуыцау Йӕ адӕмы куы ссӕрибар кӕна, уӕд. Ӕмӕ афтӕмӕй Йӕ кадыл ноджыдӕр бафтдзӕн. 15 Уымӕ гӕсгӕ ӕз дӕр, Хицау Йесойыл кӕй баууӕндыдыстут ӕмӕ ӕппӕт сыгъдӕджыты кӕй уарзут, уый куы фехъуыстон, 16 Уӕдӕй фӕстӕмӕ сымах тыххӕй иудадзыг арфӕ кӕнын Хуыцауӕн ӕмӕ кувын, 17 Цӕмӕй нӕ Хицау Йесо Чырыстийы Хуыцау, намысджын Фыд, сымах схайджын кӕна Йӕ Удӕй. Уыцы Уд уын ратдзӕн уӕлзонд ӕмӕ уын раргом кӕндзӕн Хуыцауы. 18 Ӕз кувын, цӕмӕй байгом уой уӕ зӕрдӕйы цӕстытӕ ӕмӕ базонат, Хуыцау кӕй ӕрхуыдта, уыдонӕн зӕрдӕ цӕмӕй бавӕрдта, уый. Сымах бамбарат, куыд намысджын сты, Йӕ сыгъдӕджытӕн хай кӕмӕй уыдзӕн, Йӕ уыцы хорзӕхтӕ, 19 Куыд ӕгӕрон ӕмӕ егъау у, махыл, уырнджытыл, кӕмӕй хӕцы, Йӕ уыцы домбай тых. 20 Уыцы тых Хуыцау равдыста Чырыстийыл – мӕрдтӕй Йӕ райгас кодта ӕмӕ Йӕ уӕлӕрвты сбадын кодта Йӕ рахиз фарс, 21 Ӕппӕт уӕларвон ӕлдӕрттӕй ӕмӕ барджынтӕй, тыхджынтӕй ӕмӕ хицӕуттӕй уӕлдӕр; ӕмӕ Йын радта ӕрмӕст абоны нӕ, фӕлӕ фидӕны дунейы ӕппӕт нӕмттӕй дӕр уӕлдӕр ном. 22 Хуыцау ӕппӕт дӕр фӕкодта Чырыстийы къӕхты бын, сӕвӕрдта Йӕ тӕккӕ уӕлдӕр бынаты – Аргъуаны сӕргъы. 23 Аргъуан у Йӕ Буар, ӕмӕ уыцы Буары ӕххӕстӕй цӕры, ӕппӕт дӕр алцӕмӕй Чи ӕххӕст кӕны, Уый.

Эфесӕгтӕм 2

1 Уӕ ӕнӕуаг миты ӕмӕ тӕригъӕдты аххосӕй сымах раздӕр мард уыдыстут. 2 Уыцы тӕригъӕдты ӕфтыдӕй цардыстут ацы дунейы уагыл, уӕлдӕфы ӕлдариуӕг чи кӕны, Хуыцауы ныхмӕлӕуджыты фӕрцы ныртӕккӕ чи архайы, уыцы удӕн коммӕгӕсӕй. 3 Мах дӕр кӕддӕр цардыстӕм уыдонау, ӕфсӕстам нӕ тӕригъӕдджын ӕрдзыхъӕды мондӕгтӕ, нӕ чъизи хъуыдытӕн ӕмӕ бӕллицтӕн уыдыстӕм коммӕгӕс. Иннӕтау нӕ ӕрдзыхъӕдмӕ гӕсгӕ уыдыстӕм, Хуыцауы фыдӕх кӕй хъуамӕ баййӕфтаид, ахӕмтӕ. 4 Фӕлӕ фӕлмӕнзӕрдӕ Хуыцау мах афтӕ бирӕ бауарзта, 5 Ӕмӕ мах, нӕ тӕригъӕдты аххосӕй мард адӕмы, райгас кодта Чырыстиимӕ – сымах фервӕзтыстут Хуыцауы хорзӕхы фӕрцы. 6 Хуыцау нӕ райгас кодта Йесо Чырыстиимӕ ӕмӕ нӕ уӕлӕрвты сбадын кодта Йемӕ, 7 Цӕмӕй фидӕны ӕнусты равдиса, куыд ӕгӕрон сты Йӕ хорзӕх ӕмӕ, Йесо Чырыстийы руаджы махмӕ кӕй равдыста, Йӕ уыцы уарзт. 8 Хуыцауы хорзӕх сымах фервӕзын кодта уӕ уырнындзинады фӕрцы. Уӕхӕдӕг ницӕмӕй фесгуыхтыстут – уый уын Хуыцауы лӕвар у; 9 Уӕ хъуыддӕгтӕм гӕсгӕ нӕ фервӕзтыстут, ӕмӕ йӕхицӕй мачи раппӕлӕд. 10 Мах Хуыцауы сконд стӕм, Йесо Чырыстийы фӕрцы нӕ сфӕлдыстӕуыди, Хуыцау нын рагацау кӕй снысан кодта, уыцы хорз хъуыддӕгтӕ аразынмӕ. 11 Раздӕр чи уыдыстут, уый уӕ зӕрдыл дарут. Туг ӕмӕ стӕгӕй кӕддӕр муртаттӕ уыдыстут. Сымах ӕнӕсунӕт хуыдтой, сунӕтгонд кӕй хуындӕуы, уыдон (афтӕмӕй та сӕ сунӕт ӕрмӕстдӕр у, адӕймаг буарӕн цы саразы, уый). 12 Уӕды заман уыдыстут ӕнӕ Чырысти, израилаг адӕмӕн ӕцӕгӕлӕттӕ, Хуыцауы бадзырдтӕ ӕмӕ зӕрдӕвӕрдӕй – ӕнӕхай, уӕ зӕрдӕ ницӕуыл дардтат, ацы дунейы цардыстут ӕнӕ Хуыцауӕй. 13 Сымах кӕддӕр дард уыдыстут, ныр та баиу стут Йесо Чырыстиимӕ, ӕмӕ уӕ Йӕ Туг ӕрбахӕстӕг кодта. 14 Чырысти у нӕ фидауынгӕнӕг. Дзуттӕгтӕй ӕмӕ муртаттӕй скодта иу адӕм – фехӕлдта, се 'хсӕн цы сис уыди, уый, 15 Ӕмӕ фыдӕх фесӕфта Йӕ мӕлӕтӕй. Чырысти аивта Ӕгъдау йеппӕт фӕдзӕхстытӕ ӕмӕ уагӕвӕрдтимӕ, цӕмӕй бафидауын кӕна дыууӕты дӕр ӕмӕ сӕ, Йемӕ иугондӕй, сараза ног адӕймаг, 16 Иу буары иугондӕй сӕ дзуары фӕрцы бафидауын кӕна Хуыцауимӕ, дзуарыл фыдӕх фесафгӕйӕ. 17 Ӕмӕ куы ӕрцыд, уӕд ӕрхаста фидыды фарны уац сымахӕн – Хуыцауӕй дард адӕмӕн, стӕй Йӕм хӕстӕг чи уыди, уыдонӕн дӕр. 18 Уымӕн ӕмӕ нӕ дыууӕтӕн дӕр, иу Удӕй хайджынтӕн, Фыдмӕ фӕндаг байгом Чырыстийы фӕрцы. 19 Уӕдӕ сымах ӕцӕгӕлӕттӕ ӕмӕ ӕрцӕуӕггӕгтӕ нал стут, фӕлӕ сыгъдӕджыты ӕмбӕстӕгтӕ ӕмӕ Хуыцауы хӕдзаронтӕ. 20 Сымах амад ӕрцыдыстут апостолты ӕмӕ пехуымпарты бындурыл, сӕрӕвӕрӕн дур та Йесо Чырысти Йӕхӕдӕг у, 21 Ӕппӕт бӕстыхайыл Уый хӕцы, ӕмӕ бӕстыхай рӕзы, Хицауы сыгъдӕг кувӕндон куыд суа, афтӕ. 22 Чырыстиимӕ иугондӕй, сымахӕй дӕр Сыгъдӕг Уды хъаруйӕ амадӕуы цӕрӕн хӕдзар Хуыцауӕн.

Эфесӕгтӕм 3

1 Уымӕ гӕсгӕ ӕз, Павел, Йесо Чырыстийӕн кӕй кусын, уый тыххӕй дӕн ахӕстоны сымах, муртатты, сӕраппонд. 2 Сымах куыд фехъуыстат, афтӕмӕй Хуыцау Йӕ хорзӕхмӕ гӕсгӕ мӕ бӕрны бакодта уӕ сӕраппонд кусын. 3 Хуыцау Йӕ сусӕгдзинад раргом кодта мӕнӕн, ӕз уӕм уӕлдӕр цыбырӕй куыд ныффыстон, афтӕ. 4 Ӕмӕ йӕ куы бакӕсат, уӕд уӕ бон бауыдзӕн, ӕз Чырыстийы сусӕгдзинад куыд ӕмбарын, уый базонын. 5 Уыцы сусӕгдзинад адӕмы раздӕры фӕлтӕртӕн ӕргом нӕ уыд, ныр та Сыгъдӕг Уды руаджы раргом Чырыстийы сыгъдӕг апостолтӕн ӕмӕ пехуымпартӕн: 6 Фарны уацы фӕрцы муртаттӕ дӕр, Йесо Чырыстиимӕ иугондӕй, иудейтимӕ уыдзысты иу буар ӕмӕ уыдонимӕ хай райсдзысты, Хуыцау зӕрдӕ цӕмӕй бавӕрдта, уымӕй. 7 Хуыцау Йӕ хъаруйы руаджы мӕнӕн кӕй ралӕвар кодта, Йӕ уыцы хорзӕхмӕ гӕсгӕ ӕз сдӕн лӕггадгӕнӕг – фарны уац хъусынгӕнӕг. 8 Мӕнӕн, сыгъдӕджытӕй тӕккӕ къаддӕрӕн, рардӕуыд ацы хорзӕх – фарны уац Чырыстийы ӕгӕрон намысы тыххӕй муртаттӕм ӕрхӕссын, 9 Хуыцауы сусӕг фӕнд алкӕмӕн дӕр раргом кӕнын. [Йесо Чырыстийы фӕрцы] ӕппӕт дӕр цы Хуыцау сфӕлдыста, Уый рӕстӕджы райдианӕй басусӕг кодта Йӕ уыцы фӕнд, 10 Цӕмӕй уӕларвон ӕлдӕрттӕ ӕмӕ барджынтӕ Аргъуаны руаджы абон базоной, алы хуызы йӕхи чи ӕвдисы, Хуыцауы уыцы уӕлзонд. 11 Хуыцау афтӕ бакодта, дуне сфӕлдисыны агъоммӕ цы снысан кодта, уымӕ гӕсгӕ. Ӕмӕ Йӕ уыцы фӕндон сӕххӕст кодта нӕ Хицау Йесо Чырыстийы руаджы. 12 Чырыстиимӕ кӕй баиу стӕм ӕмӕ Йыл кӕй ӕууӕндӕм, уый фӕрцы нӕ бон у зӕрдӕ даргӕйӕ ӕмӕ ныфсджынӕй Хуыцауы раз ӕрлӕууын. 13 Уымӕ гӕсгӕ уӕ курын: уӕ сӕраппонд кӕй ӕвзарын, мӕ уыцы тухӕнтӕ уын уӕ ныфс ма асӕттӕнт – уыдоны фӕрцы схайджын уыдзыстут намысӕй. 14 Уый тыххӕй ӕз лӕууын мӕ зонгуытыл [нӕ Хицау Йесо Чырыстийы] Фыды раз – 15 Арв ӕмӕ зӕххыл алы мыггагӕн дӕр ном Дӕттӕджы раз – 16 Йӕ намысджын хӕзнадонӕй уын тых куыд ратта, Йӕ Уды руаджы уын уӕ уд куыд сфидар кӕна, 17 Уӕ уырнындзинады фӕрцы Чырысти уӕ зӕрдӕты куыд ӕрцӕра. 18 Уарзондзинад уӕд уӕ царды бындур. Ӕз кувын, цӕмӕй ӕппӕт сыгъдӕджытимӕ уӕ бон базонын уа, куыд уӕрӕх, парахат, ӕгӕрон ӕмӕ ӕнӕбын у Чырыстийы уарзт – 19 Зонд кӕуыл не 'ххӕссы, уыцы уарзт; ӕмӕ ӕххӕстӕй хайджын уат Хуыцауы ӕрдзыхъӕдӕй. 20 Хуыцауӕн Йӕ бон у, цы курӕм кӕнӕ нӕ фӕсонӕрхӕджы дӕр цы нӕй, уымӕй дзӕвгар фылдӕр саразын. Ахӕм домбай у, нӕ фӕрцы йӕхи чи ӕвдисы, Йӕ уыцы тых. 21 Йесо Чырыстийы руаджы Хуыцауӕн кад уӕд Аргъуаны – фӕлтӕрӕй-фӕлтӕрмӕ ӕмӕ мыггагӕй-мыггагмӕ! Амен.

Эфесӕгтӕм 4

1 Уӕдӕ ӕз, Хицауы сӕраппонд ахст, курын сымахӕй, цӕмӕй уӕ цард уа, Хуыцау уӕ цӕмӕ ӕрхуыдта, уый аккаг. 2 Иудадзыг ут сӕрныллӕг, ӕвӕлмас, фӕразон, иу иннӕйы уарзӕд, йӕ хъуагдзинӕдтӕм ын нӕ кӕсгӕйӕ. 3 Уӕхи хъарут, Хуыцауы Уд уын цы иудзинад дӕтты, уый бахъахъхъӕныныл; ут фидыд ӕмӕ кӕрӕдзиимӕ ӕнӕфӕхицӕнгӕнгӕ баст. 4 Сымах иумӕ иу буар стут, хайджын стут иу Удӕй, ис уын иумӕйаг зӕрдӕдарӕн – Хуыцау уын ӕй радта, куы уӕ ӕрхуыдта, уӕд. 5 Ис уын иу Хицау, иу уырнындзинад, иу аргъуыд, 6 Иу Хуыцау – неппӕты Фыд. Ӕппӕтыл дӕр цӕуы Йӕ бар, Йӕхи ӕвдисы алкӕй фӕрцы дӕр ӕмӕ цӕры алкӕй зӕрдӕйы дӕр. 7 Махӕй алкӕмӕн дӕр хорзӕх лӕвӕрд у, Чырыстийы кӕмӕн цас бафӕндыд, уыйас. 8 Сыгъдӕг Фыст уымӕ гӕсгӕ зӕгъы: «Ссыд уӕлӕмӕ, райста уацары, адӕмӕн радта хорзӕх». 9 «Ссыд уӕлӕмӕ» та уӕд цы амоны, кӕд раздӕр дӕлдзӕхмӕ кӕй ныццыд, уый нӕ амоны, уӕд? 10 Чи ныццыд, ӕппӕт уӕлӕрвтӕй уӕлдӕр дӕр Уый ссыди, цӕмӕй паддзахиуӕг кӕна дун-дунейӕн. 11 Уый иуты сӕвӕрдта апостолтӕй, иннӕты – пехуымпартӕй, аннӕты – фарны уац хъусынгӕнджытӕй, кӕй та – фыййӕуттӕ ӕмӕ ахуыргӕнджытӕй, 12 Цӕмӕй цӕттӕ кӕной сыгъдӕджыты, кусой Хуыцауӕн, ӕмӕ рӕза Чырыстийы Буар, 13 Цалынмӕ неппӕт дӕр ӕрцӕуӕм уымӕ, ӕмӕ уӕм ӕмуд нӕ уырнындзинады, базонӕм Хуыцауы Фырты, алцӕмӕй дӕр Чырыстийау ӕххӕст куыд уӕм, афтӕ. 14 Ӕмӕ мауал уӕм, алы ахуырӕдтӕ уылӕнтау кӕмӕй хъазынц ӕмӕ дымгӕйау кӕй хӕссынц, ахӕм сабитӕ; сайын ма бакомӕм афӕливынмӕ дӕсны хинӕйдзӕгтӕн. 15 Фӕлӕ зӕрдиаг уӕм ӕцӕгад ӕмӕ уарзтыл, алцӕмӕй дӕр суӕм Чырыстийы хуызӕн ӕмӕ баиу уӕм Йемӕ – буары Сӕримӕ. 16 Буарӕн ӕппӕт дӕр Уый дӕтты – буар кӕрӕдзийыл ӕнгом хӕцы йеппӕт нуӕртты фӕрцы, йӕ алы уӕнг дӕр кӕны йӕхи куыст, ӕмӕ афтӕмӕй буар ӕгасӕй дӕр рӕзы, арӕзт цӕуы уарзондзинады фӕрцы. 17 Уымӕ гӕсгӕ уын зӕгъын ӕмӕ уын Хицауы номӕй фӕдзӕхсын, цӕмӕй мауал цӕрат, муртаттӕ сӕ рӕузонды аххосӕй куыд цӕрынц, афтӕ. 18 Уыдонӕн сӕ зонд аныгъуылд талынджы, ӕнӕфенд ӕмӕ дурзӕрдӕ кӕй сты, уый аххосӕй ӕнӕхай фесты, Хуыцау цы цард дӕтты, уымӕй. 19 Ныййих сты сӕ зӕрдӕтӕ, уымӕ гӕсгӕ бафтыдысты ӕлгъаг хъуыддӕгты, ӕмӕ сын чъизи митӕй ӕфсис нал и. 20 Сымах та Чырыстийы афтӕ нӕ базыдтат, ӕмӕ ахӕм цардӕй цӕрат. 21 Уымӕн ӕмӕ сымах фехъуыстат Йесойы тыххӕй, цы ӕцӕгад Ӕм ис, ууыл сахуыр стут, 22 Цӕмӕй мауал цӕрат, уӕ чъизи мондӕгтӕ уӕ куы сайдтой ӕмӕ уӕ раууатмӕ куы тардтой, раздӕры уыцы цардӕй, 23 Сног уат уд ӕмӕ зондӕй, 24 Ӕмӕ суат, Хуыцауы хуызӕн кӕй сфӕлдыстӕуыд, ӕцӕгадмӕ гӕсгӕ рӕстӕй ӕмӕ сыгъдӕгӕй чи цӕры, ахӕм ног адӕймӕгтӕ. 25 Уӕдӕ мауал дзурут мӕнгтӕ – алчидӕр хионӕн дзурӕд, ӕцӕг цы у, уый, уымӕн ӕмӕ мах иу буары уӕнгтӕ стӕм. 26 Куы смӕсты вӕййут, уӕд-иу тӕригъӕды ма бафтут: дӕ мастӕй фервӕз, цалынмӕ хур нӕ аныгуылд, уӕдмӕ, 27 Ӕмӕ хӕйрӕджы ӕмгӕрон ма уадзут. 28 Чи давта, уый мауал давӕд, фӕлтау кусӕд, кӕнӕд пайдайаг хъуыддӕгтӕ йӕхи къухтӕй, ӕмӕ йӕм уа, хъуаг чи ӕййафы, уымӕ фӕкӕсыны фаг дӕр. 29 Ӕнӕуаг ныхас ӕппындӕр ма схауӕд уӕ дзыхӕй, фӕлӕ адӕймагӕн йӕ хъуаджы чи феххуыс уыдзӕн ӕмӕ йӕ чи сфидар кӕндзӕн, ӕрмӕстдӕр ахӕм хорз ныхӕстӕ, чи сӕ фехъуса, уыдонӕн хорзӕхӕн куыд уой, афтӕ. 30 Хуыцау уӕ кӕй ссӕрибар кӕндзӕн, уый равдисынӕн уал уын бахай кодта Йӕ Сыгъдӕг Удӕй, ӕмӕ уыцы Уды хъыджы ма цӕут. 31 Бынтондӕр ныууадзут мӕсты ӕмӕ знӕт, хъӕр-хъӕлӕба, фыдгой, алы ӕндӕр фыдӕх. 32 Цӕрут хӕларӕй, кӕрӕдзийы зын уӕм хъарӕд, Хуыцау уын Чырыстийы фӕрцы куыд ныббарста, афтӕ хатыр кӕнут кӕрӕдзийӕн.

Эфесӕгтӕм 5

1 Уӕдӕ, уарзон хъӕбултау, фӕзмут Хуыцауы, 2 Ӕмӕ цӕрут кӕрӕдзи уарзгӕйӕ, Чырысти мах куыд бауарзта ӕмӕ нӕ сӕраппонд Хуыцауӕн ӕхсызгон хӕрздӕф нывондӕн Йӕхи куыд ӕрхаста, афтӕ. 3 Хӕтынӕн, цавӕрфӕнды чъизи мийӕн ӕмӕ кӕрӕфӕн сымахмӕ хъуамӕ сӕ кой дӕр ма уа, сыгъдӕджытӕн куыд ӕмбӕлы, афтӕ. 4 Стӕй уыл фыддзых, дзӕгъӕлдзырд ӕмӕ ӕнӕуаг хъазӕн ныхӕстӕ дӕр нӕ фидауынц, уый бӕсты арфӕ кӕнут Хуыцауӕн. 5 Зындгонд уын хъуамӕ уа: нӕдӕр хӕтагӕн, нӕдӕр чъизи адӕймагӕн, нӕдӕр кӕрӕфӕн, – уымӕн ӕмӕ кӕрӕф мӕнгхуыцауӕн кувӕг у, – Чырыстийы ӕмӕ Хуыцауы Паддзахады хай нӕ уыдзӕн. 6 Дзӕгъӕлдзырдӕй уӕ мачи асайӕд. Ӕппӕт уыдӕтты тыххӕй Хуыцау Йӕ азар ныккалдзӕн, басӕттын чи нӕ комы, уыдоныл. 7 Уӕдӕ уын уыдонимӕ иумӕйагӕй мацы уӕд. 8 Сымах кӕддӕр талынджы уыдыстут, ныр та рухсы стут Хицауимӕ. Уӕдӕ цӕрут рухсы хъӕбулты цардӕй, 9 Уымӕн ӕмӕ рухс кӕм ис, уым сты алы хорздзинад, рӕстад ӕмӕ ӕцӕгад. 10 Архайут, Хуыцауӕн фӕндон цы у, уый базоныныл, 11 Ӕмӕ уын талынджы хъӕбулты ӕнӕпайда хъуыддӕгтимӕ иумӕйагӕй мацы уӕд, фӕлӕ сын сӕ хурмӕ хӕссут. 12 Уымӕн ӕмӕ уыдон сусӕгӕй цы кӕнынц, уыдӕттӕн суанг сӕ кой дӕр худинаг у. 13 Рухсмӕ цыдӕриддӕр рахастӕуы, уый раргом вӕййы, ӕмӕ цы раргом уа, уый та рухс фесты. 14 Уый тыххӕй у загъд: «Райхъал у, фынӕй, рабад мӕрдтӕй, ӕмӕ дӕ Чырысти ныррухс кӕндзӕн». 15 Уӕдӕ кӕсут уӕ цардмӕ; уӕхи дарут ӕнӕзӕндтау нӕ, фӕлӕ зондджынтау. 16 Пайда кӕнут алы фадатӕй дӕр, уымӕн ӕмӕ рӕстӕг ӕвзӕр у. 17 Ӕнӕмбаргӕ ма ут, фӕлӕ базонут, Хицауӕн фӕндон цы у, уый. 18 Фыднозт ма кӕнут сӕн, уымӕн ӕмӕ уый расайы хӕлд митӕ. Фӕлтау хайджын кӕнут Сыгъдӕг Удӕй. 19 Куы ӕрӕмбырд вӕййут, уӕд зарут псаломтӕ, гимнтӕ ӕмӕ удварны зарджытӕ; зӕрдиагӕй заргӕйӕ стаут Хицауы. 20 Иудадзыг ӕмӕ алцӕй тыххӕй дӕр нӕ Хицау Йесо Чырыстийы номӕй бузныг ут Фыд-Хуыцауӕй. 21 Чырыстийы тас уӕм кӕй ис, уымӕ гӕсгӕ кӕрӕдзийӕн ут коммӕгӕс. 22 Сылгоймӕгтӕ, цыма Хицауы коммӕ кӕсут, афтӕ уӕ лӕгтӕн ут коммӕгӕс. 23 Уымӕн ӕмӕ нӕлгоймаг сылгоймаджы хицау у, Чырысти Аргъуаны хицау куыд у, афтӕ. Чырысти у Йӕ буары, Аргъуаны, Ирвӕзынгӕнӕг дӕр. 24 Фӕлӕ Аргъуан Чырыстийӕн куыд коммӕгӕс у, афтӕ сылгоймӕгтӕ дӕр кӕддӕриддӕр хъуамӕ кӕсой сӕ лӕгты коммӕ. 25 Лӕгтӕ, уарзут уӕ устыты, Чырысти Аргъуан куыд бауарзта, афтӕ – йӕ сӕраппонд Йӕхи ӕрхаста нывондӕн, 26 Цӕмӕй йӕ цӕхса дон ӕмӕ ныхасӕй, ӕмӕ йӕ афтӕмӕй снывонд кӕна Хуыцауӕн, 27 Ӕрлӕууын ӕй кӕна Йӕ разы намысджын Аргъуанӕй, ӕнӕ сау стъӕлфӕй, ӕнӕ къӕмӕй, ӕнӕ ӕндӕр исты аиппӕй, сыгъдӕг ӕмӕ ӕнӕфау куыд уа, афтӕ. 28 Лӕгтӕ сӕхи буар куыд уарзынц, афтӕ хъуамӕ уарзой сӕ устыты. Йӕ усы чи уарзы, уый йӕхи уарзы. 29 Йӕ буар ӕнӕуынон никуы никӕмӕн уыди, фӕлӕ йӕ алчидӕр ӕфсады ӕмӕ йыл мӕт кӕны. Афтӕ Чырыстийӕн дӕр Йӕ мӕт Аргъуаныл у, 30 Уымӕн ӕмӕ мах Йӕ Буары уӕнгтӕ стӕм. 31 «Уымӕ гӕсгӕ адӕймаг ныууадздзӕн йӕ фыд ӕмӕ йӕ мады, баиу уыдзӕн йӕ усимӕ, ӕмӕ дыууӕ уыдзысты иу буар». 32 Уыцы ныхӕсты стыр сусӕгдзинад ӕвӕрд ис, ӕмӕ ӕз зӕгъын: уый хауы Чырысти ӕмӕ Аргъуанмӕ. 33 Уыимӕ хауы сымахмӕ дӕр: алчидӕр йӕхи куыд уарзы, афтӕ уарзӕд йӕ усы, ус та стъӕлфӕд йӕ лӕгӕй.

Эфесӕгтӕм 6

1 Сывӕллӕттӕ, ут уӕ ныййарджытӕн коммӕгӕс, уымӕн ӕмӕ афтӕ раст у. 2 «Нымай дӕ фыд ӕмӕ дӕ мады» – ахӕм у фыццаг фӕдзӕхст зӕрдӕвӕрдимӕ: 3 «Уӕд уыдзынӕ фӕрнджын ӕмӕ дзӕвгар фӕцӕрдзынӕ зӕххыл». 4 Сымах дӕр, ныййарджытӕ, ма мӕсты кӕнут уӕ сывӕллӕтты, фӕлӕ сӕ хъомыл ӕмӕ ахуыр кӕнут Хицауы фӕдзӕхстытӕм гӕсгӕ. 5 Цагъартӕ, цыма Чырыстийы коммӕ кӕсут, афтӕ зӕрдиагӕй коммӕгӕс ут уӕ зӕххон хицӕуттӕн, тӕрсут сӕ хъыджы бацӕуынӕй. 6 Сӕ зӕрдӕ сын балхӕнынӕн цӕстмӕкуыст ма кӕнут, фӕлӕ сын кусут, Хуыцауы фӕндон ӕнувыдӕй чи ӕххӕст кӕны, Чырыстийы уыцы цагъартау. 7 Кусут сын зӕрдӕрайгӕйӕ, адӕмӕн кусӕгау нӕ, фӕлӕ Хицауӕн цыма лӕггад кӕнут, афтӕ. 8 Уӕ зӕрдыл дарут: алчидӕр, цагъар уа ӕви сӕрибар, Хицауӕй райсдзӕни хорзӕх йӕ алы хорз хъуыддаджы тыххӕй дӕр. 9 Сымах дӕр, хицӕуттӕ, уӕ цагъартӕм кӕсут ахӕм цӕстӕй, ныууадзут уе 'ртхъирӕнтӕ. Хъулон Чи никӕй кӕны, сымахӕн дӕр ӕмӕ уыдонӕн дӕр уӕлӕрвты ахӕм Хицау кӕй ис, уый уӕ рох ма уӕд. 10 Ӕппынфӕстаг, ме 'фсымӕртӕ, удвидар кӕнут, Хицауимӕ кӕй стут, уымӕй, ӕмӕ Йӕ домбай хъаруйӕ. 11 Уӕхи сифтонг кӕнут Хуыцауы хотыхтӕй, уӕ бон хӕйрӕджы мӕнгард миты ныхмӕ лӕууын куыд уа, афтӕ. 12 Уымӕн ӕмӕ нӕ тох адӕймаджы ныхмӕ нӕу, фӕлӕ ӕнӕбуар ӕлдӕртты ӕмӕ барджынты ныхмӕ, ацы талынг дунейы хицӕутты ныхмӕ, уӕлдӕфы чи ис, уыцы фыдӕххӕссӕг удты ныхмӕ. 13 Уый тыххӕй уӕхи сифтонг кӕнут Хуыцауы хотыхтӕй, цӕмӕй фыдбылызы бон куы ралӕууа, уӕд уӕм разына ныхмӕ ӕрлӕууыны хъару, фӕуӕлахиз уат ӕппӕтыл дӕр, ӕмӕ ма фӕцудат. 14 Уӕдӕ фидар лӕуут, уӕ астӕутӕ ӕрбалвасут ӕцӕгадӕй, уӕ уӕлӕ скӕнут рӕстады згъӕрхӕдон. 15 Фидыды уац хъусын кӕнынмӕ цӕттӕдзинад уӕд уӕ къахыдарӕс. 16 Кӕддӕриддӕр уӕм уӕд, хӕйрӕджы ӕппӕт судзгӕ фӕттӕ кӕмӕй ахуыссын кӕндзыстут, уый – уырнынады уарт. 17 Ирвӕзындзинад уӕд уе згъӕрхуд, ӕмӕ райсут Уды лӕвӕрд цирхъ – Хуыцауы ныхас. 18 Кӕддӕриддӕр кувут ӕмӕ курут Хуыцауы Удӕй разӕнгардӕй. Уый тыххӕй ут къӕрцхъус ӕмӕ ӕвӕллайгӕйӕ кувут ӕппӕт сыгъдӕджыты тыххӕй. 19 Кувут мӕн тыххӕй дӕр, цӕмӕй мӕ дзурын куы бахъӕуа, уӕд мын Хуыцау ратта ӕвзаг, ӕмӕ ӕз ныфсджынӕй раргом кӕнон фарны уацы сусӕгдзинад. 20 Рӕхыстӕй бастӕй дӕр ӕз уыцы фарны уацы минӕвар дӕн. Кувут, цӕмӕй йӕ фехъусын кӕнон ныфсджынӕй, куыд мын ӕмбӕлы, афтӕ. 21 Цӕмӕй сымахӕн дӕр мӕ уавӕртӕ ӕмӕ мӕ хъуыддӕгтӕ зындгонд уой, уый тыххӕй уын ӕппӕт дӕр радзурдзӕн Тихик, нӕ уарзон ӕфсымӕр ӕмӕ Хицауӕн иузӕрдион кусӕг. 22 Ӕз ӕй сымахмӕ ӕрвитын, цӕмӕй базонат мах тыххӕй ӕмӕ уӕ бауадза ныфс. 23 Ӕфсымӕртӕн фарн ӕмӕ уарзт уырнындзинадимӕ Фыд-Хуыцауӕй ӕмӕ Хицау Йесо Чырыстийӕ. 24 Нӕ Хицау Йесо Чырыстийы чи уарзы, уыдон сеппӕт дӕр хайджын уӕнт Хуыцауы хорзӕх ӕмӕ ӕнӕмӕлгӕ цардӕй.

Филиппӕгтӕм 1

1 Павелӕй ӕмӕ Тимофейӕ, Йесо Чырыстийы цагъартӕй, – Йесо Чырыстиимӕ иу чи у, Филиппты уыцы сыгъдӕджытӕм, аргъуаны хистӕртӕм ӕмӕ диакъонтӕм. 2 Хорзӕх ӕмӕ уын фарн нӕ Фыд Хуыцауӕй ӕмӕ Хицау Йесо Чырыстийӕ. 3 Куы уӕ ӕрымысын, уӕд кӕддӕриддӕр сымах тыххӕй бузныг вӕййын мӕ Хуыцауӕй. 4 Кӕдфӕнды ма кувон уеппӕты тыххӕй дӕр – кӕддӕриддӕр фӕкувын цингӕнгӕ, 5 Фарны уац хъусын кӕныны куысты фыццаг бонӕй суанг абонмӕ кӕй ӕххуыс кӕнут, уый тыххӕй. 6 Сымахмӕ ахӕм хорз хъуыддаг Чи райдыдта, Уый йӕ Йесо Чырыстийы ӕрцыдмӕ кӕй ахӕццӕ кӕндзӕн кӕронмӕ, ууыл ӕууӕндын фидарӕй. 7 Ӕмӕ уеппӕтмӕ дӕр мӕнӕн ахӕм цӕстӕй кӕсын ӕмбӕлы, уымӕн ӕмӕ сымах мӕ зӕрдӕйы стут. Ахӕстоны куы дӕн, фарны уацы сӕрыл куы хӕцын, раст кӕй у, уымӕн ӕвдисӕн куы лӕууын, уӕд уеппӕт дӕр мемӕ стут уыцы арфӕйаг хъуыддаджы. 8 Ӕз уеппӕты дӕр Йесо Чырыстийы уарзтӕй кӕй уарзын, уымӕн Хуыцау – ӕвдисӕн. 9 Ӕз кувын, цӕмӕй уӕ уарзондзинад кӕна фылдӕрӕй-фылдӕр, ӕфта уӕ зонынадыл, уа уӕм арф ӕмбарынад, 10 Ӕмӕ уӕ бон уа, хуыздӕр цы у, уый равзарын. Уӕд Чырыстийы ӕрцыды бон уыдзыстут сыгъдӕг ӕмӕ ӕнӕфау, 11 Йесо Чырыстийы фӕрцы алцӕмӕй дӕр разындзыстут рӕстгӕнджытӕ Хуыцауы кад ӕмӕ намысӕн. 12 Фӕнды мӕ, ме 'фсымӕртӕ, цӕмӕй сымах зонат, ӕз цы уавӕры бахаудтӕн, уый кӕй фӕахъаз фарны уац парахатдӕрӕй хъусын кӕнынӕн; 13 Ӕмӕ ӕз Чырыстийы сӕраппонд ахӕстоны кӕй дӕн, уый базыдтой галуаны ӕппӕт хъахъхъӕнджытӕ, стӕй иннӕтӕ дӕр. 14 Ӕмӕ ӕз ахст кӕй дӕн, уый ӕфсымӕртӕн сӕ фылдӕры сразӕнгард кодта Хицауыл зӕрдӕ тынгдӕр дарынмӕ, ӕмӕ ноджы ныфсхастдӕрӕй, уӕндондӕрӕй хъусын кӕнынц Хуыцауы ныхас. 15 Раст зӕгъын хъӕуы, иуӕй-иутӕ сӕ хӕлӕгӕй ӕмӕ сӕхи кады сӕраппонд дзурынц Чырыстийы тыххӕй, иннӕтӕ та – сыгъдӕг зӕрдӕйӕ. 16 Иутӕн сӕ зӕрдӕ сыгъдӕг нӕу – хи уӕлдӕр сӕвӕрыны сӕраппонд дзурынц Чырыстийы тыххӕй; бӕлгӕ та кӕнынц, мӕ рӕхыстӕ куыд фӕуӕззаудӕр уой, уымӕ. 17 Иннӕтӕн та уарзондзинад дӕтты ӕвзаг. Уыдон зонынц: фарны уацы сӕрылхӕцӕгӕй мӕн Хуыцау сӕвӕрдта. 18 Ӕмӕ цы? Чырыстийы тыххӕй куыдфӕнды ма дзурӕд, – былалгъӕй кӕнӕ зӕрдиагӕй, – уӕддӕр райын. Ӕмӕ райдзынӕн, 19 Уымӕн ӕмӕ зонын: уӕ куывды руаджы ӕмӕ Йесо Чырыстийы Уды ӕххуысӕй уый мӕнӕн фӕахъаз уыдзӕн фервӕзынӕн. 20 Ӕнхъӕлмӕ кӕсын ӕмӕ мӕ зӕрдӕ дарын, ӕз кӕй ницӕмӕй фегад уыдзынӕн, фӕлӕ раздӕрау ныр дӕр кӕй разындзынӕн ныфсджын, ӕмӕ мӕ фӕрцы снамысджын уыдзӕн Чырысти – кӕнӕ мӕ цардӕй, кӕнӕ мӕ мӕлӕтӕй. 21 Уымӕн ӕмӕ мӕ цард Чырысти у, мӕлӕт – ме 'фтиаг. 22 Мӕ буары цӕргӕйӕ куы баззайон, уӕд уый та мӕ хъуыддагӕн пайда у; ӕмӕ цы равзарон, уый нӕ зонын. 23 Сӕ иу дӕр мӕ сайы йӕхимӕ ӕмӕ иннӕ дӕр: фӕнды мӕ ацы дунейӕ ацӕуын ӕмӕ Чырыстиимӕ цӕрын – уый дзӕвгар хуыздӕр у. 24 Уӕ сӕраппонд та хуыздӕр у мӕ буары баззайын. 25 Ӕмӕ ӕз ӕнӕгуырысхойӕ ӕууӕндын, кӕй баззайдзынӕн цӕргӕйӕ ӕмӕ кӕй уыдзынӕн уеппӕтимӕ дӕр, цӕмӕй рӕза уӕ уырнындзинад ӕмӕ цин кӕнат. 26 Ӕмӕ та уӕм куы ӕрцӕуон, уӕд уын мӕ фӕрцы фылдӕр фадат уыдзӕн, Йесо Чырыстийы руаджы уын цы бантыст, уымӕй раппӕлынӕн. 27 Ӕрмӕст уӕ цард уӕд Чырыстийы фарны уацмӕ гӕсгӕ. Ӕмӕ уӕм куы ӕрцӕуон, уӕд фендзынӕн, кӕнӕ фӕсаууонмӕ фехъусдзынӕн, сымах кӕй стут ӕмуд, ӕмзӕрдӕйӕ кӕй тох кӕнут, фарны уац йӕ бындур кӕмӕн у, уыцы уырнындзинадыл, 28 Ӕмӕ уӕ ныхмӕлӕуджытӕй ӕппындӕр кӕй нӕ тӕрсут. Хуыцау сын уе 'хсары руаджы равдисдзӕн: уыдон фесӕфдзысты, сымах та фервӕздзыстут. 29 Уымӕн ӕмӕ сымахӕн хорзӕхӕн лӕвӕрд у Чырыстийыл ӕрмӕст ӕууӕндын нӕ, фӕлӕ Йӕ сӕраппонд хъизӕмар кӕнын дӕр. 30 Сымах архайут, ӕз кӕм архайдтон, уыцы тохы. Куыд тох кодтон, уый сымах федтат, ныр та хъусут, абон дӕр мӕ тох кӕй нӕма фӕци, уый.

Филиппӕгтӕм 2

1 Уӕдӕ Чырыстиимӕ кӕй стут, кӕд уын уый ныфс дӕтты, кӕд уарзондзинад рӕвдауы сымах, кӕд уын Сыгъдӕг Удимӕ иудзинад ис, кӕд зӕрдӕхӕлар ӕмӕ тӕригъӕдгӕнаг стут, 2 Уӕд ноджыдӕр бафтаут мӕ циныл: уарзут кӕрӕдзи ӕмхуызон, ут ӕмхъуыды, ӕмуд ӕмӕ ӕмзонд. 3 Иннӕтӕй хи уӕлдӕр ӕвӕрыны кӕнӕ кадмӕ бӕллыны сӕраппонд мацы аразут, фӕлӕ ут сӕрныллӕг – иу иннӕйы нымайӕд йӕхицӕй уӕлдӕрыл. 4 Алкӕмӕн дӕр йӕ мӕт уӕд канд йӕхиуыл нӕ, фӕлӕ иннӕйыл дӕр. 5 Сымах алцӕмӕ дӕр хъуамӕ кӕсат Йесо Чырыстийы цӕстӕй: 6 Йӕ ӕрдзыхъӕдмӕ гӕсгӕ Хуыцауы ӕмсӕр кӕд уыди, уӕддӕр нӕ ныххӕцыд, Хуыцауы ӕмсӕр кӕй у, ууыл. 7 Фӕлӕ Йӕхӕдӕг Йӕхи сгӕвзыкк кодта – схайджын цагъары ӕрдзыхъӕдӕй, сси адӕймаджы халдих, ӕмӕ бакастӕй дӕр уыд адӕймаджы хуызӕн. 8 Уый ӕрныллӕг кодта Йӕхи – афтӕ коммӕгӕс уыди, ӕмӕ амард, уыимӕ мӕлгӕ та дзуарыл акодта. 9 Ӕмӕ Йӕ Хуыцау афтӕ сбӕрзонд кодта, ӕмӕ Йын радта ӕппӕт нӕмттӕй дӕр уӕлдӕр ном, 10 Цӕмӕй Йесойы номы раз сӕ зонгуытыл ӕрлӕууой, уӕларвы, зӕххыл ӕмӕ дӕлдзӕх чи ис, уыдон иууылдӕр, 11 Ӕмӕ алчидӕр ӕргомӕй зӕгъа: Йесо Чырысти Хицау у. Уый уыдзӕни Фыд-Хуыцауы кадӕн. 12 Мӕ уарзон хӕлӕрттӕ, сымах иудадзыг коммӕгӕс уыдыстут – ӕз уемӕ куы уыдтӕн, уӕд дӕр, уӕлдайдӕр та ныртӕккӕ, ӕз уемӕ куы нӕ дӕн, уӕд. Уӕдӕ тӕрсгӕ-ризгӕйӕ уӕхи хъарут уӕ фервӕзыныл, 13 Уымӕн ӕмӕ Хуыцау Йӕхӕдӕг кусы уӕ зӕрдӕты – фӕндон Ын чи у, уӕ уыцы бӕллицтӕ ӕмӕ хъуыддӕгтӕ Уымӕй рацӕуынц. 14 Ӕппӕт дӕр кӕнут ӕнӕ хъуыр-хъуырӕй ӕмӕ ӕнӕ гуырысхойӕ, 15 Цӕмӕй уат Хуыцауы ӕнаипп, сыгъдӕг ӕмӕ ӕнӕфау хъӕбултӕ ацы ӕнӕуаг ӕмӕ хӕлд адӕмы ӕхсӕн. Арвыл цы стъалытӕ ферттивы, сымах ахӕм стъалытау стут се 'хсӕн, 16 Парахат кӕнут царддӕттӕг ныхас. Ӕмӕ Чырысти куы ӕрцӕуа, уӕд мӕ бон раппӕлын уыдзӕни, мӕхи дзӕгъӕлы кӕй нӕ хъардтон ӕмӕ дзӕгъӕлы кӕй нӕ куыстон, уымӕй. 17 Фӕлӕ мӕ, мыййаг, суанг нывондӕн куы ӕрхастӕуа, ӕмӕ нывонды тугау мӕ туг уӕ уырнындзинады нывондыл куы акӕла, уӕддӕр ӕз цин кӕнын, стӕй цин кӕ- нын уеппӕтимӕ дӕр. 18 Афтӕ цин кӕнут сымах дӕр, стӕй цин кӕнут мӕнимӕ иумӕ дӕр! 19 Хицау Чырыстийы фӕрцы мӕ зӕрдӕ дарын сымахмӕ рӕхджы Тимофейы арвитыныл, цӕмӕй ӕз дӕр базонон уӕ уавӕрты тыххӕй ӕмӕ барухс уа мӕ зӕрдӕ. 20 Мӕнӕн ӕндӕр ахӕм адӕймаг нӕй, Тимофейау сымахыл афтӕ зӕрдиагӕй чи бамӕт кӕна. 21 Иннӕтӕ иууылдӕр мӕт кӕнынц, Йесо Чырыстийӕн фӕндон цы у, ууыл нӕ, фӕлӕ сӕхи пайдайыл. 22 Тимофей фӕлвӕрд кӕй у, уый та зонут, уымӕн ӕмӕ фырт йӕ фыды фарсмӕ куыд балӕууа, афтӕ мемӕ фарны уац хъусын кӕныныл куыста ӕнувыдӕй. 23 Дарддӕр цы бауыдзынӕн, уый куыддӕр базонон, афтӕ мӕ ныфс ис ӕвӕстиатӕй йӕ сымахмӕ арвитыныл. 24 Хицауы фӕрцы фидарӕй ӕууӕндын, рӕхджы уӕм мӕхӕдӕг дӕр кӕй ӕрцӕудзынӕн, ууыл. 25 Ӕз ӕнӕмӕнг бакӕнинагыл нымайын, мӕ хъуӕгты мын ӕххуысмӕ кӕй ӕрбарвыстат, мӕ уыцы ӕфсымӕр, ӕмкусӕг ӕмӕ ӕмтохгӕнӕг Эпафродиты сымахмӕ арвитын. 26 Уымӕн ӕмӕ тынг бӕллы уеппӕты дӕр фенынмӕ, ӕмӕ стыр мӕты бафтыд, йӕ фӕрынчыны хабар уӕм кӕй байхъуыст, уый тыххӕй. 27 Уыди рынчын ӕмӕ фӕцӕймард, фӕлӕ йын Хуыцау батӕригъӕд кодта, ӕмӕ ӕрмӕст уымӕн нӕ, фӕлӕ мӕнӕн дӕр, мӕ хъыгыл куыд нал бафта, афтӕ. 28 Уымӕ гӕсгӕ уӕм ӕй ӕрвитын ӕвӕстиатӕй, цӕмӕй уын йӕ фенд ӕрхӕсса цин, мӕнӕн та мӕ хъыг фӕкъаддӕр уа. 29 Уӕдӕ Хицауӕн фӕндон куыд уа, афтӕ йыл сӕмбӕлут ӕхсызгонӕй. Аргъ кӕнут ахӕмтӕн. 30 Чырыстийы хъуыддаджы сӕраппонд Эпафродит мӕлӕтмӕ хӕстӕг уыд, йӕ цард ӕвгъау нӕ кодта, цӕмӕй мын уӕ бӕсты баххуыс кӕна, уӕ бон мын цы раттын нӕ уыд, уымӕй.

Филиппӕгтӕм 3

1 Ӕппынфӕстаг, ме 'фсымӕртӕ, цин кӕнут, Хицауимӕ кӕй стут, ууыл. Раздӕр уын цы дзырдтон, уый уӕм ногӕй фыссын мӕнӕн зын нӕу, сымах та фыдбылызӕй бахиздзӕн. 2 Уӕхи хизут куыйтӕй, уӕхи хизут зианхӕссӕг кусджытӕй, уӕхи хизут, буарӕй хынджылӕггаг чи аразы, уыдонӕй. 3 Мах стӕм ӕцӕг сунӕтгонд – кусӕм Хуыцауӕн, Йӕ Уд нӕ куыд аразы, афтӕ. Нӕ зӕрдӕ зӕххоныл нӕ дарӕм, фӕлӕ ӕппӕлӕм, Йесо Чырыстиимӕ кӕй стӕм, уымӕй. 4 Ӕниу, мӕ бон у, ӕмӕ зӕххоныл дӕр дарон мӕ зӕрдӕ. Кӕд искӕмӕ афтӕ кӕсы, ӕмӕ зӕххоныл зӕрдӕ дарын йӕ бон у, уӕд мӕ бон та ноджы тынгдӕр у. 5 Сунӕтгонд ӕрцыдтӕн мӕ царды ӕстӕм бон, дӕн израилаг адӕмӕй, Вениамины хӕдзарвӕндагӕй, дзуттӕгтӕй райгуырӕг дзуттаг, Ӕгъдау куыд ӕххӕст кодтон, уымӕ гӕсгӕ – фарисей, 6 Диныл фырӕнувыдӕй – Аргъуан ӕфхӕрӕг, Ӕгъдаумӕ гӕсгӕ – ӕнӕфау рӕстгӕнӕг. 7 Фӕлӕ мӕм раздӕр ӕфтиаг цы касти, уый Чырыстийы тыххӕй банымадтон ницӕуыл. 8 Уый нӕ, фӕлӕ тӕккӕ зынаргъдӕр цы у, уый сӕраппонд – Йесо Чырыстийы базоныны сӕраппонд – ӕз ӕппӕт дӕр нымайын ницӕуыл. Чырыстийы тыххӕй ӕнӕхай фӕдӕн алцӕмӕй дӕр, ӕппӕт дӕр нымайын быроныл, цӕмӕй мӕ иунӕг хӕзна уа Чырысти, 9 Ӕмӕ баиу уон Йемӕ. Ӕгъдауы руаджы адӕймаг цы рӕстадӕй схайджын вӕййы, ӕз уымӕ нал тырнын. Ӕз тырнын, Чырыстийыл ӕууӕндыны руаджы Хуыцау уырнджытӕн кӕй дӕтты, уыцы рӕстадмӕ. 10 Мӕ нысан у Чырыстийы ӕмӕ мӕрдтӕй Йӕ райгасгӕнӕг тых базонын, Йӕ хъизӕмӕрттӕ бавзарын, Уый куыд амарди, афтӕ амӕлын, 11 Цӕмӕй исты хуызы мӕрдтӕй райгас уон. 12 Ӕз афтӕ нӕ зӕгъын, ӕмӕ ныридӕгӕн бахӕццӕ дӕн мӕ нысанмӕ, кӕнӕ ӕнаипп сдӕн; фӕлӕ згъорын размӕ, гӕнӕн ӕмӕ амалӕй хӕрзиуӕг мӕхи бакӕнынмӕ – Йесо Чырысти мӕ уый тыххӕй скодта йӕхион. 13 Ӕфсымӕртӕ, ӕз афтӕ ӕнхъӕл нӕ дӕн, ӕмӕ мӕ хӕрзиуӕг ныридӕгӕн райстон. Ӕрмӕст, фӕстӕмӕ нӕ кӕсгӕйӕ, ныййарц дӕн размӕ – 14 Згъорын нысанмӕ, Хуыцау Йесо Чырыстийы фӕрцы мӕн кӕй тыххӕй ӕрхуыдта, уыцы уӕларвон хӕрзиуӕг райсынмӕ. 15 Уӕдӕ махӕй алцӕмӕй дӕр ӕххӕст чи у, уымӕ ахӕм хъуыды хъуамӕ уа. Кӕд истӕй фӕдыл ӕндӕр хъуыдыйыл хӕст стут, уӕд уын уый дӕр Хуыцау раргом кӕндзӕн. 16 Уӕвгӕ, куыдфӕнды ма уӕд, дарддӕр дӕр цӕрӕм, цы нын бантыст, уымӕ гӕсгӕ. 17 Ӕфсымӕртӕ, фӕзмут мӕн. Нӕхи уын цавӕрӕй равдыстам, ахӕм уагыл чи цӕры, уыдон сымахӕн уӕд фӕзминаг. 18 Уымӕн ӕмӕ бирӕтӕ, – ӕз уын уыдоны тыххӕй арӕх дзырдтон, ныр та уын кӕугӕйӕ дзурын, – цӕрынц Чырыстийы дзуары знӕгтау. 19 Уыдонӕн сӕ кӕрон – бынсӕфт, сӕ хуыцау – сӕ гуыбын, худинаг сӕм цы хъуамӕ кӕсид, уымӕй сты сӕрыстыр. Сӕ мӕт у зӕххон цардыл. 20 Мах та уӕларвон бӕстӕгтӕ стӕм, уырдыгӕй ӕнхъӕлмӕ кӕсӕм Ирвӕзынгӕнӕгмӕ дӕр – Хицау Йесо Чырыстимӕ. 21 Ӕппӕт басӕттын дӕр Йӕ бон кӕмӕй у, Йӕ уыцы хъаруйӕ Уый аивдзӕн нӕ лӕмӕгъ буар, скӕндзӕн ӕй Йӕ намысджын Буары халдих.

Филиппӕгтӕм 4

1 Уӕдӕ зӕрдӕйӕ кӕй уындмӕ бӕллын, мӕ цин ӕмӕ мӕ хӕрзиуӕг чи у, мӕ уыцы уарзон ӕфсымӕртӕ, фидар лӕуут, Хицауыл ӕууӕндгӕйӕ. 2 Хатын Эводимӕ, хатын Синтихимӕ: сымах Хицауимӕ стут, ӕмӕ ӕмбарут кӕрӕдзи. 3 Дӕуӕй дӕр, мӕ иузӕрдион ӕмкусӕг, ӕххуыс курын уыцы сылгоймӕгтӕн. Сӕ нӕмттӕ царды чиныджы фыст кӕмӕн сты, уыцы Климент ӕмӕ мӕ иннӕ ӕмкусджыты ӕмрӕнхъ уыдон мӕнимӕ иумӕ тох кодтой фарны уац адӕммӕ хӕссыны сӕраппонд. 4 Иудадзыг цин кӕнут, Чырыстиимӕ кӕй стут, ууыл; ӕмӕ ма уын ноджыдӕр зӕгъын – цин кӕнут. 5 Ӕвӕлмас кӕй стут, уый зындгонд уӕд ӕппӕт адӕмӕн дӕр. Хицауӕн Йе 'рцыд хӕстӕг у. 6 Мацӕуыл мӕт кӕнут, фӕлӕ алы хатт дӕр кувут Хуыцаумӕ, курут Дзы, бузныгӕй Йын ӕргом кӕнут уӕ хъуӕгтӕ, 7 Ӕмӕ зонд кӕуыл не 'ххӕссы, Хуыцауы уыцы фарн бахъахъхъӕндзӕн уӕ зӕрдӕтӕ ӕмӕ уӕ зонд Йесо Чырыстиимӕ иугондӕй. 8 Ӕппынфӕстаг, ме 'фсымӕртӕ, цыдӕриддӕр у ӕцӕг, уӕздан, раст, сыгъдӕг, уарзинаг, ӕхцон – цыдӕриддӕр нывыл ӕмӕ раппӕлинаг у, бӕллут уымӕ. 9 Цӕуыл уӕ сахуыр кодтон, цы уын радтон, цы уын загътон, цавӕрӕй мӕ федтат, фӕзмут ӕппӕт уыдӕттӕ, ӕмӕ фарндӕттӕг Хуыцау уыдзӕн уемӕ. 10 Бузныг дӕн Хицауӕй ӕмӕ мӕ цинӕн кӕрон нал ис, дзӕвгар рӕстӕджы фӕстӕ та мыл тыхсын кӕй райдыдтат, уый тыххӕй. Уӕвгӕ мыл кӕддӕриддӕр тыхстыстут, фӕлӕ уын фадат нӕ уыд. 11 Хъуаг ӕййафын, зӕгъгӕ, уый тыххӕй уын нӕ зӕгъын – ӕз сахуыр дӕн, цы мӕм вӕййы, уый фагыл нымайыныл. 12 Цӕрын зонын гӕвзыккӕй дӕр ӕмӕ фӕрныгӕй дӕр; сахуыр дӕн кӕддӕриддӕр ӕмӕ кӕмдӕриддӕр ӕфсӕстӕй ӕмӕ стонгӕй, парахатӕй ӕмӕ хъуагӕй цӕрыныл. 13 Мӕ бон ӕппӕт дӕр у мӕнӕн тых дӕттӕг Чырыстиимӕ. 14 Ӕниу мӕм мӕ зынты ӕххуысмӕ кӕй ӕрцыдыстут, уымӕй хорз бакодтат. 15 Уӕхӕдӕг ӕй зонут, филиппӕгтӕ, фарны уац хъусын кӕнынмӕ куы бавнӕлдтон, уӕд Македонийӕ мӕ рацӕуыны фӕстӕ мын мӕ лӕггады тыххӕй иу аргъуан дӕр нӕ баххуыс кодта – ӕрмӕстдӕр мӕ сымах барӕвдыдтат. 16 Сымах мын Фессалоникӕмӕ дӕр мӕ хъуаджы заман иу ӕмӕ дыууӕ хатты не 'рбарвыстат уе 'ххуысы хай. 17 Ӕз уый хуынтӕ уӕ агурыны тыххӕй нӕ дзурын. Мӕн фӕнды, цӕмӕй уӕ хорз хъуыддӕгты номхыгъды фылдӕр кӕна ӕфтиаг. 18 Ӕз райстон, ӕмӕ мӕм ис, цас мӕ хъӕуы, уымӕй фылдӕр. Цы мын рарвыстат, уый райстон Эпафродитӕй, ӕмӕ мӕм фаг ис. Уӕ хуын у хӕрздӕф нывондау, Хуыцауӕн фӕндиаг ӕмӕ ӕхсызгон. 19 Йе стыр хъӕздыгадӕй Хуыцау баххӕст кӕндзӕн уӕ алы хъуаг дӕр Йесо Чырыстийы фӕрцы. 20 Нӕ Фыд Хуыцауӕн кад уӕд мыггагӕй-мыггагмӕ! Амен. 21 Саламтӕ раттут ӕппӕт сыгъдӕджытӕн – Йесо Чырыстиимӕ чи ис, уыдонӕн. Саламтӕ уын дӕттынц, мемӕ чи ис, уыцы ӕфсымӕртӕ. 22 Саламтӕ уын дӕттынц ӕппӕт сыгъдӕджытӕ, уӕлдайдӕр та кесӕры хӕдзаронтӕ. 23 Нӕ Хицау Йесо Чырыстийы хорзӕх уӕ уӕд.

Колоссӕгтӕм 1

1 Павелӕй, Хуыцауы фӕндӕй Йесо Чырыстийы апостолӕй, ӕмӕ не 'фсымӕр Тимофейӕ – 2 Чырыстиимӕ иу чи у, Колоссты уыцы сыгъдӕг ӕмӕ иузӕрдион ӕфсымӕртӕм. 3 Хорзӕх ӕмӕ уын фарн нӕ Фыд Хуыцауӕй [ӕмӕ Хицау Йесо Чырыстийӕ]. Мах иудадзыг кувӕм сымах тыххӕй ӕмӕ арфӕ кӕнӕм Хуыцауӕн – нӕ Хицау Йесо Чырыстийы Фыдӕн, 4 Уымӕн ӕмӕ мах фехъуыстам: сымах ӕууӕндут Йесо Чырыстийыл ӕмӕ уарзут ӕппӕт сыгъдӕджыты. 5 Уӕ уырнындзинад ӕмӕ уарзтӕн сӕ бындур у, уӕлӕрвты уын ӕфснайдӕй цы хорзӕхтӕ лӕууы, уыдоныл уӕ зӕрдӕ кӕй дарут, уый. Уыцы зӕрдӕдарӕны тыххӕй сымах фехъуыстат ӕцӕгады ныхасы – фарны уацы. 6 Уыцы фарны уац ӕрхӕццӕ сымахмӕ, ӕмӕ ӕппӕт дунейы куыд ӕнтыстджын у ӕмӕ парахат кӕны, афтӕ йын ӕнтысы сымахмӕ дӕр, Хуыцауы хорзӕх ӕцӕг цавӕр у, ахӕмӕй йӕ куы фехъуыстат ӕмӕ базыдтат, уӕдӕй фӕстӕмӕ. 7 Фарны уац сымах базыдтат нӕ уарзон ӕмкусӕг Эпафрасӕй – уый уӕ сӕраппонд ӕнувыдӕй кусы Чырыстийӕн. 8 Эпафрас нын радзырдта, Хуыцауы Уд уӕм цы уарзт райхъал кодта, уый тыххӕй. 9 Уый цы бон фехъуыстам, уӕдӕй фӕстӕмӕ мах дӕр иудадзыг кувӕм сымах тыххӕй ӕмӕ курӕм, цӕмӕй уын Хуыцау Йӕ Уды фӕрцы ратта ӕппӕт зонд ӕмӕ ӕмбарынад, ӕмӕ Йын ӕххӕстӕй базонат Йӕ фӕндон. 10 Уӕд уӕ цард Хицауӕн уыдзӕн фӕндиаг, ӕппӕт алцӕмӕй дӕр Ын ӕлхӕндзыстут Йӕ зӕрдӕ, уӕ алы хорз хъуыддаг дӕр хӕсдзӕн пайда, Хуыцауы зондзыстут фылдӕрӕй-фылдӕр. 11 Йе стыр хъомыс ӕфтауӕд уӕ тыхыл, скӕнӕд уӕ фидар ӕмӕ фӕразон, 12 Ӕмӕ цингӕнгӕ арфӕ кӕнат, рухсмӕ уӕ Чи ӕрхуыдта, сыгъдӕджытӕн ӕфснайдӕй цы хорзӕхтӕ лӕууы, уыдонӕй уӕ хай райсыны аккаг Чи скодта, уыцы Фыдӕн. 13 Уый мах фервӕзын кодта талынджы уацарӕй ӕмӕ нӕ бакодта Йӕ уарзон Фырты Паддзахадмӕ – 14 Фырт не ссӕрибары аргъ бафыста Йӕ Тугӕй, ӕмӕ нын хатыр сты нӕ тӕригъӕдтӕ. 15 Уый райгуырд ӕппӕт сфӕлдисыны размӕ, Уый у, цӕстӕй Кӕй нӕ уынӕм, уыцы Хуыцауы Халдих. 16 Уымӕн ӕмӕ арвыл ӕмӕ зӕххыл цыдӕриддӕр ис, цӕстӕй цы уынӕм ӕмӕ цы нӕ уынӕм, ӕппӕт уыдӕттӕ Уый фӕрцы сфӕлдыстӕуыд: уӕларвон уӕлдӕр бынӕттӕ, хицӕуттӕ, ӕлдӕрттӕ, барджынтӕ – ӕппӕт дӕр Йӕ фӕрцы ӕмӕ Уымӕн сфӕлдыстӕуыд. 17 Ӕппӕт сфӕлдысты размӕ дӕр Уый ис, ӕмӕ ӕппӕтыл дӕр Уый хӕцы. 18 Уый у Йӕ буары, Аргъуаны, Сӕр. Уый у сӕрӕвӕрӕн, мӕрдтӕй фыццаг Уый райгас, цӕмӕй ӕппӕт дӕр уа Йӕ дӕлбар. 19 Уымӕн ӕмӕ Хуыцауы бафӕндыд, цӕмӕй Йеппӕт миниуджытӕ уой Чырыстимӕ, 20 Ӕмӕ Чырыстийы фӕрцы ӕппӕт дӕр бафидауын кӕна Йемӕ. Чырысти дзуарыл цы Туг ныккалдта, уымӕй Хуыцау бафидауын кодта уӕларвонты ӕмӕ зӕххонты. 21 Кӕддӕр сымах дӕр Хуыцауӕн уыдыстут ӕцӕгӕлӕттӕ ӕмӕ Йе знӕгтӕ, ӕмӕ уый ӕвдыстат уе 'взӕр хъуыддӕгтӕй. 22 Ныр та уӕ бафидауын кодта Йемӕ, Чырысти адӕймаджы буары кӕй амард, уый фӕрцы, цӕмӕй Хуыцауы раз уат сыгъдӕг, ӕнаипп ӕмӕ ӕнӕфау. 23 Ныр уӕ уырнындзинад иудадзыг хъуамӕ уа фидар ӕмӕ ӕнӕфӕцудгӕ, сымах цы фарны уац фехъуыстат, уый уын цы зӕрдӕдарӕн дӕтты, ууыл ма фӕгуырысхо уат. Уыцы фарны уац хъуыстгонд ӕрцыди дунейы ӕппӕт адӕмӕн, ӕмӕ ӕз, Павел, сдӕн йӕ кусӕг. 24 Ныртӕккӕ амондджын дӕн, уӕ сӕраппонд кӕй ӕвзарын, уыцы хъизӕмӕрттӕй. Мӕ буары хъизӕмӕрттӕй ӕз архайын Чырыстийы тухӕнтӕ баххӕст кӕныныл Йӕ Буары, Аргъуаны, сӕраппонд. 25 Ӕз сдӕн Йӕ уыцы Аргъуаны кусӕг, цӕмӕй саразон, уӕ пайдайӕн мын Хуыцау цы бафӕдзӕхста, уый – Хуыцауы ныхас ӕххӕстӕй фехъусын кӕнын. 26 Ӕз хъуамӕ адӕммӕ фӕхӕссон, рагзаманӕй ӕппӕт фӕлтӕртӕ кӕй нӕ зыдтой, ныр та Хуыцау сыгъдӕджытӕн кӕй раргом кодта, Йӕ уыцы сусӕгдзинад. 27 Хуыцауы бафӕндыд, уыцы сусӕгдзинады ӕппӕт адӕмтӕн цы намысы хӕзна ис, уый Йӕ сыгъдӕджытӕн равдисын. Уыцы сусӕгдзинад у, Чырысти уӕ зӕрдӕты кӕй цӕры ӕмӕ Йӕ фӕрцы Хуыцауы намысӕй хай райсыныл уӕ зӕрдӕ кӕй дарут, уый. 28 Мах хъусын кӕнӕм Чырыстийы тыххӕй; ӕппӕт зонынадӕй дӕр пайда кӕнгӕйӕ, зонд амонӕм ӕмӕ ахуыр кӕнӕм алы адӕймаджы дӕр, цӕмӕй алы адӕймаджы дӕр Хуыцауы раз ӕрлӕууын кӕнӕм, Чырыстиимӕ кӕй ис, уый руаджы ӕнаиппӕй. 29 Ӕз уый сӕраппонд кусын ӕмӕ мӕхи хъарын, Чырысти мын кӕмӕй хай кӕны, Йӕ уыцы домбай хъаруйӕ.

Колоссӕгтӕм 2

1 Фӕнды мӕ, цӕмӕй зонат, уӕ сӕраппонд, стӕй лаодикиӕгты ӕмӕ мӕ лӕгӕй-лӕгмӕ чи нӕ зоны, уыдоны сӕраппонд дӕр куыд бирӕ кусын, уый. 2 Ӕз тырнын, цӕмӕй уат ныфсджын, уарзондзинад уӕ бӕтта кӕрӕдзийыл, хъӕздыг уат, ӕцӕгадыл ӕнӕгуырысхойӕ кӕй ӕууӕндут ӕмӕ йӕ ӕххӕстӕй кӕй ӕмбарут, уымӕй. Ӕмӕ уӕд зондзыстут Хуыцауы сусӕгдзинад – Чырыстийы. 3 Зонды ӕмӕ зонынады ӕппӕт арфӕвӕрд хӕзнатӕ Чырыстимӕ сты. 4 Ӕз уын уыдӕтты тыххӕй уымӕн зӕгъын, цӕмӕй уӕ мачи асайа къӕбӕлдзыг ныхӕстӕй. 5 Уымӕн ӕмӕ мӕхӕдӕг уемӕ нӕ дӕн, фӕлӕ мӕ уд уемӕ ис, ӕмӕ цин кӕнын, уӕ цард нывыл кӕй у ӕмӕ Чырыстийыл фидарӕй кӕй ӕууӕндут, ууыл. 6 Уӕдӕ Хицау Йесо Чырыстийыл зӕрдиагӕй куыд баууӕндыдыстут, афтӕ ут Йемӕ ӕмӕ Йын уӕ цард уӕд фӕндон. 7 Куыд уын бацамындӕуыд, афтӕ Йӕ скӕнут уӕ царды бындур, рӕзӕд уӕ уырнындзинад, ӕмӕ кӕддӕриддӕр ут бузныг. 8 Уӕхи хъахъхъӕнут, цӕмӕй уӕ мачи асайа ӕнӕпайда ӕмӕ гӕдыбыд ахуырӕдтӕй. Уыдонӕн сӕ бындур Чырысти нӕу, фӕлӕ дунейы ӕгъдӕуттӕ ӕмӕ адӕмы таурӕгътӕ. 9 Адӕймаджы буар Йӕ уӕлӕ Чи скодта, уыцы Чырыстимӕ сты Хуыцауы ӕппӕт миниуджытӕ. 10 Чырыстиимӕ иугондӕй сымах ӕххӕст стут ӕппӕтӕй дӕр. Уый лӕууы ӕппӕт уӕларвон ӕлдӕртты ӕмӕ барджынты сӕргъы. 11 Сымах баиу стут Чырыстиимӕ, ӕмӕ ӕрцыдыстут сунӕтгонд. Уыцы сунӕт уын скодта адӕймаг нӕ, фӕлӕ Чырысти, ӕмӕ афтӕмӕй фервӕзтыстут тӕригъӕдджын ӕрдзыхъӕдӕй – 12 Аргъуыды рӕстӕг Чырыстиимӕ ӕрцыдыстут ныгӕд ӕмӕ, Йесойы мӕрдтӕй райгасгӕнӕг Хуыцауы тыхыл ӕууӕндгӕйӕ, райгас стут Йемӕ. 13 Сымах уӕ тӕригъӕдты ӕмӕ уӕ ӕнӕсунӕт ӕрдзыхъӕды аххосӕй уыдыстут мард, фӕлӕ уӕ Хуыцау райгас кодта Чырыстиимӕ. Хуыцау нын ныббарста неппӕт тӕригъӕдтӕ дӕр, 14 Аивта, Ӕгъдаумӕ гӕсгӕ нӕ ныхмӕ чи уыди, нӕ хӕсты уыцы номхыгъд, скодта йын кӕрон – байтыгъта йӕ дзуарыл. 15 Ӕнӕбуар ӕлдӕрттӕн ӕмӕ барджынтӕн байста сӕ хотыхтӕ, фӕуӕлахиз сыл дзуарӕй ӕмӕ дунейӕн равдыста, уыдоны ӕгадмӕ кӕй ӕртардта, уый. 16 Уӕдӕ уын мачи тӕрхон кӕнӕд, цы хӕрут ӕмӕ цы нуазут, стӕй иставӕр бӕрӕгбон, мӕйноджы бӕрӕгбон кӕнӕ сабат кӕй нӕ бӕрӕг кӕнут, уый тыххӕй. 17 Уыдӕттӕ сты, фидӕны цы хъуамӕ ӕрцыдаид, уымӕн йӕ аууон. Цы ӕрцыд, уый та Чырысти у. 18 Се 'нӕхъуаджы сӕрныллӕгӕй ӕмӕ зӕдтӕн кувынӕй зӕрдӕрухс чи у, уыдонӕй уӕ исчи уӕ хӕрзиуӕгӕй ӕнӕхай ма фӕкӕнӕд. Уыдонӕн сӕ дины бындур мӕнг цӕстылуайӕнтӕ сты. Ахӕмтӕ дзӕгъӕлы сӕрыстыр сты сӕ зӕххон зондӕй. 19 Уыдон Чырыстийыл, буары Сӕрыл, хӕст не сты. Буарӕн ӕппӕт дӕр дӕтты Чырысти – буар кӕрӕдзийыл ӕнгом хӕцы нуӕрттӕ ӕмӕ уӕнгбӕттӕнты фӕрцы, ӕмӕ рӕзы Хуыцауӕн фӕндиагӕй. 20 Кӕд сымах Чырыстиимӕ амардыстут ӕмӕ а дунейы ӕгъдӕуттӕй ссӕрибар стут, уӕд ма, цыма дунейы цӕрут, уыйау цӕмӕн кӕсут уыдоны коммӕ: 21 «Дӕ къухмӕ йӕ ма райс!», «Ма дзы бахӕр!», «Ма йыл бандзӕв!»? 22 Уыцы ӕгъдӕуттӕ цӕуыл дзурынц, ӕппӕт уыдӕттӕ нал фӕбӕззынц се спайда кӕныны фӕстӕ. Уыдон иууылдӕр сты адӕмы ӕрхъуыдыгонд фӕдзӕхстытӕ ӕмӕ ахуырӕдтӕ. 23 Ахӕм уагӕвӕрдтӕ ӕрхъуыдыгонд динимӕ, ӕгӕр сӕрныллӕгимӕ ӕмӕ буар ӕнӕхъуаджы домынимӕ ӕддаг бакастӕй зондджын зынынц, ӕцӕгӕй та тӕригъӕдджын ӕрдзыхъӕдыл сӕ бон нӕ цӕуы.

Колоссӕгтӕм 3

1 Уӕдӕ кӕд сымах Чырыстиимӕ райгас стут, уӕд тырнут уӕлӕрвтӕм, Чырысти Хуыцауы рахиз фарс кӕм бады, уырдӕм. 2 Уӕ хъуыдытӕ уӕнт зӕххон цардыл нӕ, фӕлӕ уӕларвон цардыл, 3 Уымӕн ӕмӕ сымах амардыстут, ӕмӕ уӕ цард Чырыстиимӕ Хуыцаумӕ ис ӕмӕ ӕргом нӕма у. 4 Уӕ цард, Чырысти, куы раргом уа, уӕд Йемӕ раргом уыдзӕн уӕ намыс дӕр. 5 Уӕдӕ амарут уӕ зӕххон уӕнгтӕ: хӕтын, чъизи митӕ, ӕлгъаг мондӕгтӕ, кӕрӕф, уымӕн ӕмӕ кӕрӕф мӕнгхуыцаумӕ кувын у. 6 Уыдӕтты тыххӕй Хуыцау Йӕ фыдӕх ныккалдзӕн Йӕ ныхмӕлӕуджытыл. 7 Се 'хсӕн ма куы цардыстут, уӕд сымах дӕр ахӕм ӕвзӕр митӕ кодтат. 8 Ныр ныууадзут ӕппӕт уыдӕттӕ: мӕсты, фыдӕх, фыдгой, ӕнӕуаг ныхӕстӕ. 9 Кӕрӕдзийӕн мӕнгтӕ ма дзурут, уымӕн ӕмӕ сымах фервӕзтыстут, раздӕр цы уыдыстут, уыцы адӕймагӕй йӕ хъуыддӕгтимӕ, 10 Ӕмӕ систут ног адӕймӕгтӕ. Хуыцау уӕ кӕны ногӕй-ногдӕр, цӕмӕй Йӕ базонат ӕмӕ суат уе Сфӕлдисӕджы хуызӕн. 11 Ныр бердзенаг уай, иудей уай, сунӕтгонд уай, ӕнӕсунӕтгонд уай, талынг адӕмтӕй уай, скиф уай, цагъар уай, сӕрибар уай – уӕлдай нал у. Ӕппӕтдӕр у Чырысти, алкӕй зӕрдӕйы дӕр Уый цӕры. 12 Сымах Хуыцау сӕвзӕрста, стут Йӕ сыгъдӕг ӕмӕ уарзон адӕм. Уӕдӕ ут тӕригъӕдгӕнаг, зӕрдӕхӕлар, сӕрныллӕг, ӕвӕлмас ӕмӕ фӕразон. 13 Быхсут кӕрӕдзийӕн. Иу уӕ иннӕмӕй хъӕстаг куы уа, уӕд-иу ын ныббарӕд. Чырысти уын куыд ныббарста, афтӕ ут барон. 14 Уыдӕттӕм бафтаут уарзондзинад – уый у ӕппӕт дӕр кӕрӕдзийыл бӕттӕг ӕмӕ алцӕмӕй дӕр ӕххӕстгӕнӕг. 15 Чырыстийы фарн разамынд дӕттӕд уӕ зӕрдӕтӕн, уымӕн ӕмӕ уыцы фарны сӕраппонд ӕрхуындӕуыд сымах ӕмӕ систут иу буар. Ӕмӕ уый тыххӕй ут бузныг. 16 Чырыстийы ныхас парахатӕй цӕрӕд уӕ зӕрдӕты. Ӕмӕ уын цы бирӕ зонд дӕтты, уый фӕрцы зонд амонут ӕмӕ ахуыр кӕнут уӕ кӕрӕдзийы. Хорзӕхӕй хайджынӕй, Хуыцауӕн зӕрдиагӕй зарут псаломтӕ, гимнтӕ ӕмӕ удварны зарджытӕ. 17 Ныхасӕй кӕнӕ хъуыддагӕй цыдӕриддӕр аразут, уый уын уӕд Хицау Йесойы номыл, ӕмӕ Йӕ фӕрцы арфӕ кӕнут Фыд-Хуыцауӕн. 18 Устытӕ, чырыстонӕн куыд ӕмбӕлы, афтӕ уӕ лӕгтӕн ут коммӕгӕс. 19 Лӕгтӕ, уарзут уӕ устыты, ӕмӕ сӕм тызмӕг ма ут. 20 Сывӕллӕттӕ, алы хъуыддаджы дӕр ут уӕ ныййарджытӕн коммӕгӕс, уымӕн ӕмӕ уый Хицауӕн фӕндон у. 21 Ныййарджытӕ, ма мӕсты кӕнут уӕ сывӕллӕтты, цӕмӕй зӕрдӕсаст ма фӕуой. 22 Цагъартӕ, алы хъуыддаджы дӕр ут уӕ зӕххон хицӕуттӕн коммӕгӕс. Зӕрдӕ балхӕнынӕн сын цӕстмӕкуыст ма кӕнут, фӕлӕ сын кусут зӕрдиагӕй ӕмӕ Хицауӕй тӕрсгӕйӕ. 23 Цыдӕриддӕр кӕнут, уый кӕнут ӕнувыдӕй, адӕмӕн кусӕгау нӕ, фӕлӕ Хицауӕн цыма лӕггад кӕнут, афтӕ. 24 Уӕ зӕрдыл дарут: уӕ фӕллойы тыххӕй уын Хицау ратдзӕн хӕрзиуӕг. Уымӕн ӕмӕ Хицау Чырыстийӕн кусут. 25 Хӕрам хъуыддӕгтӕ чи аразы, уымӕн сӕ бафыстӕуыдзӕн хӕрамӕй – Хуыцау никӕй хъулон кӕны.

Колоссӕгтӕм 4

1 Хицӕуттӕ, уӕ цагъартимӕ ут рӕстзӕрдӕ, кӕсут сӕм хорз цӕстӕй. Сымахӕн дӕр уӕларвы Хицау кӕй ис, уый уӕ рох ма уӕд. 2 Кувут ӕнувыдӕй, зӕрдиагӕй ӕмӕ Хуыцауӕй бузныгӕй. 3 Кувут мах тыххӕй дӕр, цӕмӕй нын Хуыцау ратта фадат, ӕз ахӕстоны кӕй сӕраппонд дӕн, Чырыстийы уыцы сусӕгдзинадыл дзурынӕн. 4 Кувут, цӕмӕй уыцы сусӕгдзинад ӕз раргом кӕнон, куыд мын ӕмбӕлы, афтӕ. 5 Ӕнӕуырнджытимӕ уӕхи дарут зондджынӕй, алы фадатӕй дӕр пайда кӕнгӕйӕ. 6 Уӕ ныхас кӕддӕриддӕр уӕд зӕрдӕмӕдзӕугӕ ӕмӕ нывыл, ӕмӕ зонут, кӕмӕн цы дзуапп дӕттын хъӕуы, уый. 7 Мӕн тыххӕй уын ӕппӕт дӕр радзурдзӕн нӕ уарзон ӕфсымӕр Тихик, Хицауӕн мемӕ чи кусы, мӕ уыцы иузӕрдион ӕххуысгӕнӕг. 8 Ӕз уӕм ӕй уымӕн ӕрвитын, цӕмӕй уын радзура нӕ уавӕрты тыххӕй ӕмӕ уын барӕвдауа уӕ зӕрдӕтӕ. 9 Ӕрвитын уӕм ӕй, сымахӕрдыгон чи у, нӕ уыцы иузӕрдион ӕмӕ уарзон ӕфсымӕр Онисимимӕ. Уыдон уын радзурдзысты амы ӕппӕт хабӕрттӕ. 10 Салам уын дӕттынц, мемӕ ахст чи у, уыцы Аристарх, Марк – Варнавӕйы хӕстӕг (куы уӕм ӕрцӕуа, уӕд ыл баузӕлут, зӕгъгӕ, уын кӕй тыххӕй бафӕдзӕхстӕуыд, уый), 11 Ӕмӕ Иуст кӕй хонынц, уыцы Йесо. Сунӕтгӕндтӕй ӕрмӕст уыдон кусынц мемӕ Хуыцауы Паддзахадӕн; стыр ныфс мын сты. 12 Салам уын дӕтты уӕхи Эпафрас, Йесо Чырыстийы цагъар. Уый иудадзыг сымах тыххӕй кувы ӕнувыдӕй, цӕмӕй уат ӕнӕфӕцудгӕ, ӕнӕгуырысхойӕ ӕууӕндат Хуыцауыл ӕмӕ Йын уат алцӕмӕй дӕр коммӕгӕс. 13 Ӕз ӕвдисӕн дӕн, уӕ сӕраппонд, стӕй Лаодикийы ӕмӕ Иераполы чи ис, уыдоны сӕраппонд Эпафрас куыд бирӕ кусы, уымӕн. 14 Салам уын дӕттынц нӕ уарзон дохтыр Лука ӕмӕ Димас. 15 Салам раттут лаодикиаг ӕфсымӕртӕн, стӕй Нимфасӕн ӕмӕ, йӕ хӕдзары цы аргъуан ӕмбырд кӕны, уымӕн. 16 Ацы фыстӕг уӕ аргъуаны куы бакӕсат, уӕд бакӕнут афтӕ, цӕмӕй йӕ бакӕсой Лаодикийы аргъуаны дӕр; Лаодикийӕ цы фыстӕг райсат, уый та сымах бакӕсут. 17 Зӕгъут Архиппӕн: «Хицау дын дӕ бӕрны цы куыст бакодта, ууыл у ӕнувыд – кӕронмӕ йӕ ахӕццӕ кӕн». 18 Ӕз, Павел, мӕ салам ныффыстон мӕхи къухӕй. Ӕз рӕхыстӕй баст кӕй дӕн, уый уӕ рох ма уӕд. Хуыцауы хорзӕх уӕ уӕд.

1 Фессалоникӕгтӕм 1

1 Павелӕй, Силуанӕй ӕмӕ Тимофейӕ – Фыд-Хуыцауы ӕмӕ Хицау Йесо Чырыстийы аргъуанмӕ Фессалоникӕйы. Хорзӕх ӕмӕ уын фарн нӕ Фыд Хуыцауӕй ӕмӕ Хицау Йесо Чырыстийӕ. 2 Мах уеппӕты тыххӕй дӕр кӕддӕриддӕр арфӕ кӕнӕм Хуыцауӕн, ӕмӕ куы фӕкувӕм, уӕд нӕ рох нӕ вӕййут. 3 Нӕ Фыд Хуыцауы раз мах иудадзыг нӕ зӕрдыл дарӕм, уырнындзинад кӕмӕ разӕнгард кӕны, уӕ уыцы хъуыддӕгтӕ, уарзт кӕмӕ аразы, уӕ уыцы фӕллой, нӕ Хицау Йесо Чырыстийы ныфсӕй фӕразон кӕй стут, уый. 4 Хуыцау сымах кӕй сӕвзӕрста ӕмӕ уӕ кӕй уарзы, уый махӕн зындгонд у, не 'фсымӕртӕ. 5 Уымӕн ӕмӕ уын нӕ фарны уац мах хъусын кодтам ӕрмӕст ныхасӕй нӕ, фӕлӕ Сыгъдӕг Уды хъаруйӕ ӕмӕ зӕрдӕмӕхъаргӕ бирӕ ӕвдисӕйнӕгтимӕ. Уӕхӕдӕг зонут, сымахмӕ куы уыдыстӕм, уӕд уӕ сӕраппонд нӕхи куыд дардтам, уый. 6 Ӕмӕ сымах фӕзмын райдыдтат мах ӕмӕ Хицауы. Фарны уацыл баууӕндыдыстут бирӕ зынтӕ ӕвзаргӕйӕ, фӕлӕ уын Сыгъдӕг Уд кӕй радта, уыцы цинимӕ. 7 Ӕмӕ афтӕмӕй фӕзминаг систут Македонийы ӕмӕ Ахайы ӕппӕт уырнджытӕн. 8 Хицауы фарны уац сымахӕй анхъӕвзта канд Македонийыл ӕмӕ Ахайыл нӕ, фӕлӕ Хуыцауыл куыд тынг ӕууӕндут, уыцы хабар бахӕццӕ алы ранмӕ дӕр, ӕмӕ ныр мах уый тыххӕй дзурын ницӕмӕнуал хъӕуы. 9 Сӕхӕдӕг дзурынц, куыд ныл сӕмбӕлдыстут, мӕнгхуыцӕуттӕй Хуыцаумӕ куыд раздӕхтыстут, ууыл – сымах систут цардӕгас ӕмӕ ӕцӕг Хуыцауӕн цагъартӕ, 10 Ӕмӕ ӕнхъӕлмӕ кӕсут уӕлӕрвтӕй Йӕ Фырт Йесойы ӕрцыдмӕ. Уый Хуыцау райгас кодта мӕрдтӕй, ӕмӕ мах ирвӕзын кӕны ӕрцӕуинаг фыдӕхӕй.

1 Фессалоникӕгтӕм 2

1 Сымах уӕхӕдӕг зонут, ӕфсымӕртӕ, не 'рцыд уӕм дзӕгъӕлы кӕй нӕ фӕци, уый. 2 Куыд зонут, афтӕмӕй нӕ амӕй размӕ Филиппты бафхӕрдтой ӕмӕ дзы хъизӕмӕрттӕ бавзӕрстам, фӕлӕ нӕ Хуыцауы фӕрцы нӕ ныфс бахастам сымахӕн Йӕ фарны уац хъусын кӕнынмӕ, кӕд нӕ ныхмӕ тынг карзӕй лӕууыдысты, уӕддӕр. 3 Мах адӕмы цӕуыл ахуыр кӕнӕм, уымӕн йӕ бындур уый нӕу, ӕмӕ дзӕгъӕл фестӕм, йе нӕ бӕллицтӕ чъизи сты, йе искӕй асайыныл архайӕм. 4 Хуыцау мах бафӕлвӕрдта ӕмӕ нын бабар кодта фарны уац, ӕмӕ нӕ ныхас дӕр ахӕм у – архайӕм адӕмы зӕрдӕ балхӕныныл нӕ, фӕлӕ нӕ зӕрдӕтӕ зонӕг Хуыцауы зӕрдӕ балхӕныныл. 5 Сымах куыд зонут, афтӕмӕй козбау ныхас махӕй никуы рацыд; хи пайдамӕ бӕллыны зӕрдӕ нӕм нӕ уыди – Хуыцау ӕвдисӕн. 6 Адӕм нын кад кӕной – сымах уат ӕви ӕндӕр исчи – уымӕ дӕр нӕ бӕллӕм. 7 Мах Чырыстийы апостолтӕ стӕм, ӕмӕ нӕ бон уыди нӕхи бӕрзонд сӕвӕрын, фӕлӕ уе 'хсӕн уыдыстӕм ӕвӕлмас, дзидзидарӕг мад йӕ хъӕбултыл куыд узӕла, уыйау. 8 Мах уыл афтӕ ӕнувыд стӕм, афтӕ уӕ бауарзтам, ӕмӕ нӕ бафӕндыди сымахӕн ӕрмӕст Хуыцауы фарны уац фехъусын кӕнын нӕ, фӕлӕ уын нӕ уд дӕр раттын. 9 Сымах, ӕфсымӕртӕ, уӕ зӕрдыл хорз дарут нӕ уӕззау куыст. Цӕмӕй уӕ тыхстыхос макӕмӕн уӕм, уый тыххӕй мах куыстам ӕхсӕвӕй-бонӕй, ӕмӕ уын афтӕмӕй хъусын кодтам Хуыцауы фарны уац. 10 Ӕвдисӕнтӕ уӕхӕдӕг ӕмӕ Хуыцау: сымахмӕ, уырнджытӕм, цардыстӕм сыгъдӕгӕй, рӕстзӕрдӕйӕ ӕмӕ ӕнӕфауӕй. 11 Сымах зонут: мах уӕ алкӕй дӕр хъомыл кодтам, фыд йӕ хъӕбулты куыд хъомыл кӕны, афтӕ – 12 Лӕвӕрдтам уын ныфс, рӕвдыдтам ӕмӕ уӕ ахуыр кодтам, цӕмӕй уӕ цард уа, Йӕ Паддзахадмӕ ӕмӕ уӕ Йӕ намысмӕ Чи хоны, уыцы Хуыцауӕн фӕндон. 13 Ӕмӕ уый тыххӕй мах иудадзыг арфӕ кӕнӕм Хуыцауӕн, уымӕн ӕмӕ махӕй цы Хуыцауы ныхас фехъуыстат, уый банымадтат адӕймагӕй рацӕугӕ ныхасыл нӕ, фӕлӕ ӕцӕгдӕр куыд у, афтӕ – Хуыцауы ныхасыл, ӕмӕ сымах, уырнджытӕ, уӕ цард аразут уыцы ныхасмӕ гӕсгӕ. 14 Ӕфсымӕртӕ, сымах дӕр систут, Йесо Чырыстийӕн Иудейӕйы чи ис, Хуыцауы уыцы аргъуантау – ӕфхӕрд уӕхи адӕмӕй баййӕфтат, уыдон дӕр иудейтӕй ӕфхӕрд куыд баййӕфтой, афтӕ. 15 Хицау Йесойы ӕмӕ пехуымпарты дӕр иудейтӕ амардтой, мах дӕр фӕсырдтой; Хуыцау дӕр сӕ ныхмӕ у, ӕмӕ ӕппӕт адӕмӕн дӕр знӕгтӕ сты. 16 Мах муртаттӕн хъусын кӕнӕм фарны уац сӕ фервӕзыны сӕраппонд, ӕмӕ нын иудейтӕ ӕвӕрынц цӕлхдуртӕ. Афтӕмӕй ӕдзух ӕфтауынц тӕригъӕд тӕригъӕдыл – афтӕ сын сбирӕ сты, ӕмӕ сӕ ӕппынфӕстаг баййӕфта Хуыцауы азар. 17 Мах, ӕфсымӕртӕ, цыбыр ӕмгъуыдмӕ фӕхицӕн стӕм сымахӕй, ӕмӕ нӕ кӕд цӕстӕй нӕ уынут, уӕддӕр зӕрдӕйӕ уемӕ стӕм. Зӕрдиагӕй архайдтам уӕ феныныл. 18 Ӕз, Павел, иу ӕмӕ дыууӕ хатты нӕ хъавыдтӕн сымахмӕ ӕрцӕуынмӕ, фӕлӕ нын хӕйрӕг ӕвӕрдта цӕлхдуртӕ. 19 Сымах стут нӕ ныфс, нӕ цин, стӕй нӕ Хицау Йесо куы ӕрцӕуа, уӕд Ын нӕхицӕй цӕмӕй ӕппӕлдзыстӕм, нӕ уыцы хӕрзиуӕг. 20 О, нӕ намыс ӕмӕ нӕ цин сымах стут.

1 Фессалоникӕгтӕм 3

1 Ӕнхъӕлмӕ кӕсын нӕ бон кӕй нал уыди, уымӕ гӕсгӕ бауынаффӕ кодтам, цӕмӕй нӕхӕдӕг баззайӕм Афинты, 2 Чырыстийы тыххӕй фарны уац хъусын кӕныны хъуыддаджы Хуыцауӕн немӕ чи кусы, нӕ уыцы ӕфсымӕр Тимофейы та арвыстам уӕ барӕвдауынмӕ ӕмӕ уӕ уырнындзинад сфидар кӕнынмӕ, 3 Цӕмӕй уыцы зынты сымахӕй мачи фӕцуда. Зынтӕ бавзарын нын нысангонд кӕй у, уый уӕхӕдӕг хорз зонут – 4 Куы уӕм уыдыстӕм, уӕд дӕр уын рагацау дзырдтам, кӕй нӕ ӕфхӕрдзысты, уый тыххӕй; ӕмӕ афтӕ кӕй рауад, уый ныр уӕхӕдӕг уынут. 5 Уымӕ гӕсгӕ мӕнӕн дӕр ӕнхъӕлмӕ кӕсын мӕ бон нал уыд, ӕмӕ арвыстон уӕ уырнындзинады тыххӕй базонынмӕ, цӕмӕй хӕйрӕг сымах ма смондаг кӕна тӕригъӕдмӕ ӕмӕ нӕ куыст дзӕгъӕлы ма фӕуа. 6 Ныр Тимофей ӕрцыд сымахӕй ӕмӕ нӕм ӕрхаста хорз хабар уӕ уырнындзинад ӕмӕ уӕ уарзты тыххӕй; загъта нын, ӕдзух уӕ зӕрдыл кӕй лӕууӕм, ӕмӕ мах сымах фендмӕ куыд бӕллӕм, сымах дӕр мах фендмӕ афтӕ кӕй бӕллут. 7 Ӕмӕ кӕд зынты ӕфтӕм ӕмӕ нӕ ӕфхӕрынц, уӕддӕр, ӕфсымӕртӕ, уӕ уырнындзинад мах бауагъта ныфс. 8 Кӕд сымах фидарӕй ӕууӕндут Хицауыл, уӕд мах удӕгас стӕм. 9 Сымах тыххӕй, стӕй нын нӕ Хуыцауы раз цы стыр цин ӕрхастат, уый тыххӕй Хуыцауӕн аккаг арфӕ кӕм ссарӕм? 10 Ӕхсӕвӕй-бонӕй кувӕм ӕвӕллайгӕйӕ, цӕмӕй уӕ фенӕм лӕгӕй-лӕгмӕ ӕмӕ баххӕст кӕнӕм, уӕ уырнындзинад цы хъуаг у, уый. 11 Уӕдӕ нын нӕ Фыд Хуыцау Йӕхӕдӕг ӕмӕ нӕ Хицау Йесо нӕ фӕндаг саразӕнт сымахмӕ. 12 Хицау уын раттӕд, мах уӕ цы уарзтӕй уарзӕм, ахӕм уарзондзинад, уӕ кӕрӕдзи ӕмӕ иннӕты дӕр зӕрдиагӕй куыд уарзат, афтӕ, 13 Цӕмӕй уын Хицау сфидар ӕмӕ ссыгъдӕг кӕна уӕ зӕрдӕтӕ, ӕмӕ нӕ Фыд Хуыцауы раз уат ӕнаипп, нӕ Хицау Йесо Йеппӕт сыгъдӕджытимӕ куы ӕрцӕуа, уӕд. Амен.

1 Фессалоникӕгтӕм 4

1 Ныр та уӕм, ӕфсымӕртӕ, хатӕм ӕмӕ уын лӕгъстӕ кӕнӕм Йесо Чырыстийы номӕй: куыд цӕрын хъӕуы ӕмӕ Хуыцауы зӕрдӕ куыд ӕлхӕнын хъӕуы, ууыл уӕ мах куыд сахуыр кодтам, кӕд цӕргӕ дӕр афтӕ кӕнут, уӕддӕр ут ноджы ӕнувыддӕр. 2 Сымах хорз зонут, Хицау Йесойы номӕй уын цы бафӕдзӕхстам, уыдӕттӕ. 3 Хуыцауӕн фӕндон у уӕ сыгъдӕг цард: уӕхи бахизут хӕтынӕй. 4 Алчидӕр уӕ сахуыр уӕд йӕ буар Хуыцауы фӕндиаг ӕнӕкъӕмӕй дарыныл, 5 Ӕмӕ Хуыцауы чи нӕ зоны, уыцы муртаттау чъизи мондӕгты коммӕ ма кӕсут. 6 Хуыцауы фӕнды, цӕмӕй сымахӕй уыцы хъуыддаджы йе 'фсымӕры тӕригъӕды мачи бацӕуа ӕмӕ йӕ ма асайа йӕхи пайдайӕн. Уымӕн ӕмӕ уын мах раздӕр куыд дзырдтам ӕмӕ уын куыд фӕдзӕхстам, афтӕ ӕппӕт уыдӕтты тыххӕй мастисӕг Хицау у. 7 Уымӕн ӕмӕ Хуыцау мах сӕвзӕрста чъизи цардӕй цӕрынмӕ нӕ, фӕлӕ сыгъдӕг цардӕй цӕрынмӕ. 8 Уӕдӕ хивӕнд чи у, уый адӕймаджы коммӕ нӕ, фӕлӕ уӕ Йӕ Сыгъдӕг Удӕй Чи схайджын кодта, уыцы Хуыцауы коммӕ нӕ кӕсы. 9 Ӕфсымӕрты уарзыны тыххӕй уӕм фыссын уӕвгӕ дӕр нӕ хъӕуы, уымӕн ӕмӕ кӕрӕдзийы уарзын сымахӕн Хуыцауӕй лӕвӕрд у. 10 Ӕмӕ ныр сымах ахӕм цӕстӕй кӕсут ӕгас Македонийы ӕппӕт ӕфсымӕртӕм. Курӕм уӕ, ӕфсымӕртӕ: ут ноджы ӕнувыддӕр, 11 Зӕрдиагӕй тырнут сабыр цардӕй цӕрынмӕ; алчидӕр аразӕд йӕ хъуыддаг ӕмӕ кусӕд йӕхи къухтӕй, мах уын куыд фӕдзӕхстам, афтӕ. 12 Уӕд ӕнӕуырнджыты раз уӕ цард уыдзӕн нывыл, ӕмӕ хъуаг ницӕмӕй ӕййафдзыстут. Чырыстийы дыккаг ӕрцыд 13 Мӕн фӕнды, ӕфсымӕртӕ, цӕмӕй сымах зонат, чи амарди, уыдоны тыххӕй, ӕмӕ зӕрдӕдарӕн кӕмӕн нӕй, уыдонау хъынцъымы ма ӕфтат. 14 Мах ӕууӕндӕм, Йесо кӕй амард ӕмӕ райгас, ууыл. Ӕмӕ кӕд афтӕ у, уӕд Йесойыл ӕууӕндгӕйӕ чи амарди, уыдоны дӕр Хуыцау Чырыстиимӕ ӕркӕндзӕн Йӕхимӕ. 15 Мах уын ныртӕккӕ цы зӕгъӕм, уый Хицауы ныхас у: Хицауы ӕрцыдмӕ махӕй удӕгасӕй чи баззайа, уыдон мӕрдты разӕй нӕ фӕуыдзысты. 16 Уымӕн ӕмӕ уӕларвон бардзырд ӕмӕ архангелы хъӕлӕс куыддӕр райхъуысой, Хуыцауы сыкъауадындз куыддӕр ныууаса, афтӕ Хицау Йӕхӕдӕг ӕрцӕудзӕн уӕларвӕй, ӕмӕ райгас уыдзысты, Чырыстийыл ӕууӕндгӕйӕ чи амард, уыдон. 17 Уый фӕстӕ мах, удӕгасӕй баззайджытӕ, уыдонимӕ ист ӕрцӕудзыстӕм ӕврӕгътыл, уӕлдӕфы фембӕлдзыстӕм Хицауимӕ, ӕмӕ уӕдӕй фӕстӕмӕ ӕдзух дӕр уыдзыстӕм Йемӕ. 18 Уыцы дзырдтӕй рӕвдаут уӕ кӕрӕдзийы.

1 Фессалоникӕгтӕм 5

1 Сымахмӕ, ӕфсымӕртӕ, афонтӕ ӕмӕ ӕмгъуыдты тыххӕй фыссын ницӕмӕн хъӕуы. 2 Хуыснӕг ӕхсӕвы ӕнӕнхъӕлӕджы куыд ӕрцӕуы, Хицауы ӕрцыд дӕр афтӕ кӕй уыдзӕн, уый уӕхӕдӕг дӕр бӕлвырдӕй зонут. 3 Уымӕн ӕмӕ адӕм куы дзурой: «сабырад ӕмӕ ӕдасдзинад», уӕд ӕнхъӕлцау сылгоймагӕн арынафон йӕ тухӕнтӕ куыд ралӕууынц, афтӕ ӕваст ӕрцӕудзӕн сӕ адзал – аирвӕзыны амал сын нӕ уыдзӕн. 4 Сымах та, ӕфсымӕртӕ, талынджы нӕ цӕрут, ӕмӕ уӕ уыцы бон хуыснӕгау ӕдзӕллагӕй ӕрӕййафа. 5 Уымӕн ӕмӕ уеппӕт дӕр рухсы хъӕбултӕ ӕмӕ боны хъӕбултӕ стут. Мах ӕхсӕвы хъӕбултӕ дӕр не стӕм ӕмӕ талынджы хъӕбултӕ дӕр. 6 Уӕдӕ иннӕтау фынӕй ма кӕнӕм, фӕлӕ уӕм цӕттӕ ӕмӕ къӕрцхъус. 7 Уымӕн ӕмӕ фынӕйгӕнджытӕ ӕхсӕв фӕфынӕй кӕнынц, ӕмӕ расыггӕнджытӕ ӕхсӕвы барасыг вӕййынц. 8 Мах та боны хъӕбултӕ стӕм, ӕмӕ уӕм къӕрцхъус. Уырнындзинад ӕмӕ уарзт не згъӕрхӕдон уӕнт, ныфс нӕ кӕй ис фервӕзынӕй, уый та – не згъӕрхуд. 9 Уымӕн ӕмӕ Хуыцау мах сӕвзӕрста Йӕ фыдӕх ныл бафтауынмӕ нӕ, фӕлӕ нӕ Хицау Йесо Чырыстийы фӕрцы фервӕзынмӕ. 10 Йесо амарди мах тыххӕй, цӕмӕй мах, удӕгас уӕм ӕви мард, цӕрӕм Йемӕ. 11 Уымӕ гӕсгӕ рӕвдаут кӕрӕдзийы, иу иннӕмӕн уӕд фидаргӕнӕг – ӕнӕуи дӕр куыд кӕнут, афтӕ. 12 Курӕм уӕ, ӕфсымӕртӕ: нымайут, чи уӕм фӕллой кӕны ӕмӕ уын зонд чи амоны, уӕ аргъуаны уыцы хистӕрты. 13 Уарзут сӕ ӕмӕ сын уӕлдай аргъ кӕнут сӕ куысты тыххӕй. Кӕрӕдзиимӕ цӕрут фидыдӕй. 14 Ноджы ма уын лӕгъстӕ кӕнӕм, ӕфсымӕртӕ: магусатӕн амонут зонд, ныфс уадзут ӕнӕныфсты, ӕххуыс кӕнут лӕмӕгътӕн, быхсут алкӕмӕн дӕр. 15 Кӕсут уӕхимӕ, цӕмӕй фыдӕхӕн мачи фида фыдӕхӕй, фӕлӕ иудадзыг тырнут кӕрӕдзийӕн ӕмӕ алкӕмӕн дӕр хорз саразынмӕ. 16 Цин кӕнут кӕддӕриддӕр. 17 Кувут иудадзыг. 18 Алцӕй тыххӕй дӕр бузныг ут Хуыцауӕй. Сымахмӕ, Йесо Чырыстийыл ӕууӕндджытӕм, Хуыцау уыдӕттӕм ӕнхъӕлмӕ кӕсы. 19 Сыгъдӕг Уды ма къуылымпы кӕнут. 20 Пехуымпарадмӕ уазал цӕстӕй ма кӕсут. 21 Раиртасут алцыдӕр ӕмӕ хӕцут, хуыздӕр цы у, ууыл. 22 Уӕхи хизут алы ӕвзӕр хъуыддагӕй дӕр. 23 Уӕдӕ уӕ фарндӕттӕг Хуыцау Йӕхӕдӕг ссыгъдӕг кӕнӕд бынтондӕр – уӕ уд, уӕ зӕрдӕ ӕмӕ уӕ буар – ӕппӕт дӕр нӕ Хицау Йесо Чырыстийы ӕрцыды бон ӕнаипп куыд разына, афтӕ. 24 Уӕ Хонӕг иузӕрдион у, ӕмӕ Уый сараздзӕн ӕппӕт уыдӕттӕ. 25 Ӕфсымӕртӕ, кувут мах тыххӕй. 26 Ӕппӕт ӕфсымӕртӕн дӕр салам дӕттут ӕфсымӕрон байӕ. 27 Хицауы номӕй уын фӕдзӕхсын ацы фыстӕг ӕппӕт ӕфсымӕртӕн дӕр бакӕсын. 28 Нӕ Хицау Йесо Чырыстийы хорзӕх уӕ уӕд.

2 Фессалоникӕгтӕм 1

1 Павелӕй, Силуанӕй ӕмӕ Тимофейӕ – нӕ Фыд Хуыцауы ӕмӕ Хицау Йесо Чырыстийы аргъуанмӕ Фессалоникӕйы. 2 Хорзӕх ӕмӕ уын фарн нӕ Фыд Хуыцауӕй ӕмӕ Хицау Йесо Чырыстийӕ. 3 Сымах тыххӕй, ӕфсымӕртӕ, мах хъуамӕ иудадзыг арфӕ кӕнӕм Хуыцауӕн, ӕмӕ уый раст уыдзӕн, уымӕн ӕмӕ рӕзы уӕ уырнындзинад ӕмӕ уеппӕт дӕр фылдӕрӕй-фылдӕр уарзут уӕ кӕрӕдзийы. 4 Сымах цы ӕфхӕрд ӕмӕ зынтӕ ӕвзарут, уыдонӕн фӕразон кӕй стут ӕмӕ уӕм фидар уырнындзинад кӕй ис, уыдӕттӕ махӕн сты Хуыцауы ӕппӕт аргъуанты нӕхицӕй ӕппӕлыны бындур. 5 Уӕ уавӕр ӕвдисӕн у, Хуыцауы ӕнӕхӕрам тӕрхон кӕй ралӕудзӕн, уымӕн – сымах нымад ӕрцӕудзыстут, кӕй сӕраппонд хъизӕмар кӕнут, Хуыцауы уыцы Паддзахадӕн аккагыл. 6 Хуыцау ӕнӕхӕрам у: сымах чи ӕфхӕры, уыдонӕн ӕй бафыстӕуыдзӕн ӕфхӕрдӕй, 7 Сымахӕн та, ӕфхӕрдтытӕн, – удӕнцойӕ немӕ, Хицау Йесо уӕларвӕй Йӕ хъомысджын зӕдтимӕ куы ӕрцӕуа, уӕд. 8 Ӕмӕ пиллон арты Йӕ маст райсдзӕни, Хуыцауы чи нӕ зоны ӕмӕ нӕ Хицау Йесойы фарны уацы коммӕ чи нӕ кӕсы, уыдонӕй. 9 Уыдонӕн рахастӕуыдзӕн мыггагмӕ амӕлыны тӕрхон, ӕнӕхай фӕуыдзысты Хицауӕй ӕмӕ Йе стыр намысӕй, 10 Куы ӕрцӕуа, уӕд. Уыцы бон Ӕй скадджын кӕндзысты Йӕ сыгъдӕджытӕ, Чи Йыл баууӕндыд, уыдон сеппӕт дӕр фендзысты Йӕ намыс, уыдонимӕ сымах дӕр, уымӕн ӕмӕ баууӕндыдыстут нӕ ныхасыл. 11 Ӕмӕ мах иудадзыг кувӕм сымах тыххӕй, цӕмӕй уӕ нӕ Хуыцау скӕна, цы цардмӕ уӕ ӕрхуыдта, уый аккаг, сӕххӕст уын кӕна уӕ хорз бӕллицтӕ, ӕмӕ Йӕ хъаруйӕ кӕронмӕ ахӕццӕ кӕна, уӕ уырнындзинадӕй разӕнгард кӕмӕ стут, ӕппӕт уыцы хъуыддӕгтӕ. 12 Цӕмӕй сымах скадджын кӕнат нӕ Хицау Йесойы ном, ӕмӕ нӕ Хуыцау ӕмӕ Хицау Йесо Чырыстийы хорзӕхмӕ гӕсгӕ уӕхӕдӕг дӕр скадджын уат Йӕ кадӕй.

2 Фессалоникӕгтӕм 2

1 Ӕфсымӕртӕ, нӕ Хицау Йесо Чырыстийы дыккаг ӕрцыдыл ӕмӕ Йемӕ нӕ иумӕйаг фембӕлдыл дзургӕйӕ та зӕрдиагӕй курын сымахӕй, 2 Цӕмӕй ӕваст ма фӕцудат зондӕй ӕмӕ уӕ тасы ма бафтауой нӕдӕр мӕнгпехуымпарад, нӕдӕр ныхӕстӕ, нӕдӕр фыстӕг, цыма уыдон махӕй рацыдысты, ныридӕгӕн Хицауы ӕрцыды бон ралӕууыд, зӕгъгӕ. 3 Мачи уӕ макуыд асайӕд. Уымӕн ӕмӕ уыцы бон нӕ ралӕудзӕни, цалынмӕ уырнындзинад ныууагъдӕуа ӕмӕ Хуыцауы ныхмӕлӕууӕг, мӕлинаг, раргом уа, уӕдмӕ. 4 Уый йӕхи сӕвӕрдзӕни, хуыцау кӕй хуындӕуы ӕмӕ табу кӕмӕн кӕнынц, уыдонӕй уӕлдӕр ӕмӕ сеппӕтӕн дӕр уыдзӕни знаг; рабаддзӕни Хуыцауы кувӕндоны ӕмӕ йӕхи расиддзӕн Хуыцауӕй. 5 Ӕз ма сымахмӕ куы уыдтӕн, уӕд уын уый тыххӕй кӕй дзырдтон, уый уӕ зӕрдыл нал лӕууы, ӕви? 6 Ӕмӕ уын ныр зындгонд у, цы йӕ уромы, уый. Фӕлӕ йӕ рӕстӕг куы ралӕууа, уӕд йӕхи раргом кӕндзӕн. 7 Уымӕн ӕмӕ фыдӕхы сусӕг тыхтӕ скуыстой ныридӕгӕн, фӕлӕ цы хъуамӕ уа, уый нӕма уыдзӕни, Хуыцауы ныхмӕлӕууӕджы ныртӕккӕ чи уромы, уый цалынмӕ ист ӕрцӕуа, уӕдмӕ. 8 Уӕд ныхмӕлӕууӕг раргом уыдзӕн, ӕмӕ йӕ Хицау Йесо амардзӕн Йӕ комытӕфӕй, бынсӕфт ӕй фӕкӕндзӕн Йӕ намысджын ӕрцыдӕй. 9 Ныхмӕлӕууӕг куы ӕрцӕуа, уӕд хӕйрӕджы ӕппӕт хъаруйӕ равдисдзӕн мӕнг ӕвдисӕйнӕгтӕ ӕмӕ мӕнг диссӕгтӕ. 10 Алы фӕливӕн митӕй сайдзӕн сӕфтыкъахыл лӕуджыты – уыдон сӕфынц, уымӕн ӕмӕ нӕ бауарзтой, сӕ фервӕзыны тых кӕмӕ ис, уыцы ӕцӕгад. 11 Уый тыххӕй сӕ Хуыцау ныууагъта фӕлывды ӕвджид, мӕнг цы у, ууыл куыд баууӕндой. 12 Ӕмӕ ӕцӕгадыл чи нӕ баууӕндыди, фӕлӕ тӕригъӕд чи бауарзта, уыдон сеппӕт дӕр уыдзысты тӕрхонгонд. 13 Мах та сымах тыххӕй, Хицау кӕй бауарзта, нӕ уыцы ӕфсымӕртӕ, хъуамӕ иудадзыг арфӕ кӕнӕм Хуыцауӕн – Уый дуне сфӕлдисыны размӕ сымах сӕвзӕрста, цӕмӕй фервӕзат, Йӕ Уд уӕ кӕй ссыгъдӕг кодта ӕмӕ ӕцӕгадыл кӕй баууӕндыдыстут, уый фӕрцы. 14 Уымӕ гӕсгӕ уӕ ӕрхуыдта Хуыцау, махӕй цы фарны уац фехъуыстат, уый руаджы – нӕ Хицау Йесо Чырыстийы намысӕй хай райсынмӕ. 15 Уӕдӕ, ӕфсымӕртӕ, ут ӕнӕфӕцудгӕ ӕмӕ фидар хӕцут, мах уӕм ныхасӕй кӕнӕ фыстӕй кӕй ӕрхастам, уыцы ӕцӕгадыл. 16 Нӕ Хицау Йесо Чырысти Йӕхӕдӕг, ӕмӕ мах Чи бауарзта, Йӕ хорзӕхмӕ гӕсгӕ нын ӕнӕихсигӕ ныфс ӕмӕ ӕнӕгуырысхо зӕрдӕдарӕн Чи радта, нӕ уыцы Фыд-Хуыцау 17 Барӕвдауӕд сымах зӕрдӕтӕ ӕмӕ уӕ сфидар кӕнӕд, цӕмӕй кӕддӕриддӕр аразат ӕмӕ дзурат, хорз цы у, уый.

2 Фессалоникӕгтӕм 3

1 Ӕппынфӕстаг, кувут мах тыххӕй, ӕфсымӕртӕ, цӕмӕй Хицауы фарны уац ӕнхъӕвза дарддӕр ӕмӕ йын кад кӕной, сымах ын куыд кад кӕнут, афтӕ. 2 Кувут, цӕмӕй мах фервӕзӕм ӕвзӕр ӕмӕ фыдадӕмӕй; уымӕн ӕмӕ уырнындзинад алкӕмӕ нӕй. 3 Фӕлӕ Хицау иузӕрдион у, Уый уӕ сфидар кӕндзӕн ӕмӕ уӕ бахиздзӕни хӕйрӕгӕй. 4 Мах уын цы фӕдзӕхсӕм, уый кӕй аразут ӕмӕ йӕ кӕй араздзыстут, ууыл мах, Хицауы фӕрцы, фидарӕй ӕууӕндӕм. 5 Хицау уын уӕ зӕрдӕтӕ саразӕд Хуыцауы уарзтмӕ ӕмӕ Чырыстийау фӕразонмӕ. 6 Нӕ Хицау Йесо Чырыстийы номӕй уын фӕдзӕхсын, ӕфсымӕртӕ, мах сӕм цы ӕцӕгад ӕрхастам, уымӕ гӕсгӕ чи нӕ цӕры ӕмӕ магуса чи у, ахӕм ӕфсымӕртимӕ уын иумӕйагӕй мацы уӕд. 7 Мах уын цӕмӕй фӕзминаг стӕм, уый уӕхӕдӕг зонут – магусатау уӕм нӕ цардыстӕм. 8 Хойраг лӕвар никӕмӕ хордтам, фӕлӕ ӕхсӕвӕй-бонӕй кодтам уӕззау куыст, цӕмӕй уӕ макӕмӕн уӕм тыхстыхос. 9 Ахӕм бар нын нӕ уыди, зӕгъгӕ, уый тыххӕй нӕ, фӕлӕ цӕмӕй нӕхи равдисӕм, бафӕзмыны аккаг уын куыд уӕм, ахӕмтӕй. 10 Сымахмӕ куы уыдыстӕм, уӕд уын афтӕ фӕдзӕхстам: «Кусын кӕй нӕ фӕнды, уый хӕргӕ дӕр ма кӕнӕд». 11 Фӕлӕ мах куыд хъусӕм, афтӕмӕй сымахӕй иуӕй-иутӕ сты магусатӕ, ницы аразынц, фӕлӕ сӕхи тъыссынц кӕйдӕр хъуыддӕгты. 12 Ахӕмтӕн Хицау Йесо Чырыстийы номӕй фӕдзӕхсӕм ӕмӕ курӕм, цӕмӕй ныггуыбыр кӕной ӕмӕ кусой, цӕрой сӕхи къухты фӕллойӕ. 13 Сымах та, ӕфсымӕртӕ, ӕвӕллайгӕйӕ аразут хорз хъуыддӕгтӕ. 14 Нӕ фыстӕджы цы амындтӕ ис, уыдонмӕ чи нӕ байхъуса, ахӕмы хъуамӕ зонат ӕмӕ уын йемӕ иумӕйагӕй мацы уа, йӕхиуыл куыд ӕрхуда, афтӕ. 15 Ӕрмӕст ӕй уе знагыл ма нымайут, фӕлӕ уе 'фсымӕрыл, ӕмӕ йын амонут зонд. 16 Фарндӕттӕг Хицау уын раттӕд фарн кӕддӕриддӕр ӕмӕ алы хъуыддаджы дӕр. Хицау уӕд уеппӕтимӕ дӕр! 17 Ӕз, Павел, саламтӕ ныффыстон мӕхи къухӕй – уый у нысан мӕ алы фыстӕгыл дӕр. Мӕнӕ афтӕ фӕфыссын: 18 «Нӕ Хицау Йесо Чырыстийы хорзӕх уеппӕты дӕр уӕд».

1 Тимофеймӕ 1

1 Павелӕй, Йесо Чырыстийы апостолӕй – уыцы куысты мӕ сӕвӕрдтой нӕ Ирвӕзынгӕнӕг Хуыцау ӕмӕ нӕ зӕрдӕдарӕн Йесо Чырысти. 2 Ӕз фыссын Тимофеймӕ, уырнындзинады руаджы мын ӕцӕг хъӕбул чи сси, уымӕ. Хорзӕх, арфӕ ӕмӕ дын фарн Фыд-Хуыцауӕй ӕмӕ нӕ Хицау Йесо Чырыстийӕ. 3 Ӕз Македонимӕ куы цыдтӕн, уӕд дӕм ӕрхатыдтӕн, Эфесы куыд баззайай ӕмӕ дзы иуӕй-иутӕн куыд бафӕдзӕхсай, цӕмӕй мауал амоной ӕндӕр ахуырӕдтӕ, 4 Ӕмӕ ныууадзой аргъӕуттӕ ӕмӕ рагфыдӕлты хӕдзарвӕндӕгты тыххӕй ранымай-банымайтӕ. Ӕппӕт уыдӕттӕн фӕуӕн нӕй, расайынц ӕнӕпайда быцӕутӕ, ӕмӕ ахъаз не сты Хуыцауы хъуыддагӕн – уырнындзинады руаджы адӕмы ирвӕзын кӕнынӕн. 5 Уыцы фӕдзӕхстӕн йӕ нысан у, сыгъдӕг зӕрдӕ, сыгъдӕг цӕсгом ӕмӕ зӕрдиаг уырнынад кӕй бындур сты, ахӕм уарзондзинад. 6 Иуӕй-иутӕ фӕиппӕрд сты уыцы фӕндагӕй ӕмӕ схӕцыдысты ӕнӕпайда дзӕнгӕдайыл. 7 Динамонджытӕ суой, уый сӕ фӕнды, фӕлӕ цы дзурынц, уый дӕр не 'мбарынц, стӕй цӕуыл баууӕндын кӕныныл архайынц, уый дӕр. 8 Мах та зонӕм: Моисейы Ӕгъдау хорз у, йӕхӕдӕг куыд домы, афтӕ дзы куы пайда кӕнай, уӕд. 9 Ома, Ӕгъдау лӕвӕрд у рӕстгӕнӕгӕн нӕ, фӕлӕ йӕ чи не 'ххӕст кӕны, уыдонӕн, ӕмӕ хивӕндтӕн, ӕнӕхуыцӕуттӕн, тӕригъӕдджынтӕн, сыгъдӕг цы у, уый ницӕмӕдарджытӕн ӕмӕ фауджытӕн, фыд ӕмӕ мады ӕфхӕрджытӕн, лӕгмартӕн, 10 Хӕлд адӕмӕн, нӕлмойтӕн, лӕгдавджытӕн, мӕнгардтӕн, мӕнгӕвдисӕнтӕн, стӕй ма, раст ахуырады ныхмӕ цы у, уыдӕттыл чи хӕцы, уыдонӕн. 11 Уыцы ахуырад цӕуы тӕхудиаг Хуыцауы намысыл дзурӕг фарны уацӕй – мӕнӕн кӕй бафӕдзӕхстӕуыд, уымӕй. 12 Ӕз арфӕ кӕнын, мӕнӕн тых Чи радта, нӕ уыцы Хицау Йесо Чырыстийӕн, иузӕрдионыл мӕ кӕй банымадта, Йӕ кусӕг мӕ кӕй скодта, уый тыххӕй. 13 Ӕз Ӕй раздӕр фаудтон, зылдтӕн Йӕ фӕдыл ӕмӕ Йӕ ӕфхӕрдтон, фӕлӕ мын ныббарстӕуыд, уымӕн ӕмӕ цы кодтон, уый не 'мбӕрстон – уыдтӕн ӕнӕуырнӕг. 14 Нӕ Хицау мын рӕдауӕй бахай кодта Йӕ хорзӕхӕй ӕмӕ, Йесо Чырыстиимӕ иу кӕй стӕм, уый руаджы нӕхи чи свӕййы, уыцы уырнындзинад ӕмӕ уарзтӕй. 15 Ацы ныхас ӕцӕг у ӕмӕ йыл ис ӕнӕгуырысхойӕ баууӕндӕн: Йесо Чырысти дунемӕ ӕрцыди тӕригъӕдджынты фервӕзын кӕнынмӕ, ӕмӕ уыдонӕн ӕз сӕ фыццаг дӕн. 16 Ӕмӕ мын хатыргонд дӕр уый тыххӕй ӕрцыд, цӕмӕй Йесо Чырысти фыццаг мӕныл равдиса, куыд бирӕбыхсаг у, уый, ӕмӕ мӕ хабар зондыхос уа, чи Йыл баууӕнда ӕмӕ мыггагмӕйы цард чи райса, уыдонӕн. 17 Мыггагмӕйы Паддзахӕн – цӕстӕй кӕй нӕ уынӕм, уыцы ӕнӕмӕлгӕ иунӕг Хуыцауӕн – кад ӕмӕ намыс уӕд мыггагӕй-мыггагмӕ! Амен. 18 Уыдӕттӕ дын, мӕ хъӕбул Тимофей, ӕз фӕдзӕхсын, дӕу тыххӕй цы пехуымпар ныхӕстӕ уыди, уыдонмӕ гӕсгӕ. Ӕмӕ уыцы пехуымпар ныхӕстӕй разӕнгардӕй тох кӕн ӕнувыд хӕстонау. 19 Уӕд дӕм уырнындзинад ӕмӕ у хӕдӕфсарм. Иуӕй-иутӕ нӕ бакастысты се 'фсармы коммӕ ӕмӕ уый аххосӕй адзӕгъӕл сты уырнындзинадӕй. 20 Уыдонӕй сты Именей ӕмӕ Александр. Ӕз сӕ бакодтон хӕйрӕджы бар, Хуыцауы нӕ фауыныл куыд сахуыр уой, афтӕ.

1 Тимофеймӕ 2

1 Фыццаджыдӕр курын, цӕмӕй куват, курат, лӕгъстӕ ӕмӕ арфӕ кӕнат Хуыцауӕн ӕппӕт адӕмы, 2 Паддзӕхты ӕмӕ ӕппӕт хицӕутты тыххӕй, ӕнцад-ӕнцойӕ ӕмӕ ӕнӕмастӕй, Хуыцауыл ӕнувыдӕй, кад ӕмӕ радимӕ куыд цӕрӕм, афтӕ. 3 Афтӕ кувын хорз ӕмӕ фӕндон у нӕ Ирвӕзынгӕнӕг Хуыцауӕн – 4 Фӕнды Йӕ, цӕмӕй адӕм иууылдӕр фервӕзой ӕмӕ базоной ӕцӕгад. 5 Уымӕн ӕмӕ Хуыцау иу у, Хуыцау ӕмӕ адӕмы ӕхсӕн дӕр иу Ӕхсӕнылӕг ис – Адӕймаг Йесо Чырысти. 6 Ӕппӕт адӕмы ссӕрибары тыххӕй Уый Йӕхи ӕрхаста нывондӕн – уымӕй Хуыцауы фӕндон равдыстӕуыд Йӕхи нысангонд ӕмгъуыдыл. 7 [Чырыстийы раз] раст зӕгъын, нӕ сайын: мӕн сӕвӕрдӕуыд уыцы хабар хъусынгӕнӕгӕй ӕмӕ апостолӕй, муртаттӕн уырнындзинады ӕмӕ ӕцӕгады ахуыргӕнӕгӕй. 8 Мӕн фӕнды, цӕмӕй алы ран дӕр нӕлгоймӕгтӕ сӕ сыгъдӕг къухтӕ дарой Хуыцаумӕ ӕмӕ Йӕм кувой, сӕ зӕрдӕты фыдӕх ӕмӕ гуырысхо куыд нӕ уа, афтӕмӕй. 9 Мӕн ма уыимӕ фӕнды, цӕмӕй сылгоймӕгтӕ дарой ӕмбӕлгӕ дарӕс, уой хӕдӕфсарм ӕмӕ хӕрзӕгъдау. Сӕ фидауц уӕд дзыккуты аив быд, кӕнӕ сызгъӕрин фӕлындӕнтӕ, кӕнӕ налхъуыт, кӕнӕ зынаргъ дарӕс нӕ, 10 Фӕлӕ хорз хъуыддӕгтӕ – афтӕ ӕмбӕлы, йӕхи Хуыцауыл ӕууӕндӕг чи хоны, уыцы сылгоймӕгтӕн. 11 Сылгоймаг ахуыр кӕнӕд ӕдзӕмӕй, иудадзыг коммӕгӕсӕй; 12 Нӕлгоймагӕн зонд амоныны ӕмӕ йыл ӕлдариуӕг кӕныны бар та йын нӕ дӕттын – уӕд ӕдзӕм. 13 Уымӕн ӕмӕ раздӕр Адамы сфӕлдыстӕуыд, уый фӕстӕ та – Евӕйы. 14 Сайд дӕр Адамыл не 'рцыд – сылгоймагыл ӕрцыд сайд, ӕмӕ фӕтӕригъӕдджын. 15 Уӕвгӕ зӕнӕг уадзыны фӕрцы фервӕздзӕн, уырнындзинад ӕмӕ уарзтӕй хайджын, Хуыцауы цӕсты сыгъдӕг ӕмӕ хӕдӕфсарм куы уа, уӕд.

1 Тимофеймӕ 3

1 Ацы ныхас ӕцӕг у: аргъуаны хистӕр уӕвын кӕй фӕнды, уый хорз хъуыддагмӕ бӕллы. 2 Аргъуаны хистӕр хъуамӕ уа ӕнӕфау, иу усы мой, уӕззау зонды хицау, хӕдӕфсарм, хӕрзуаг, уазӕгуарзон, хорз зондамонӕг, 3 Ма уа расыггӕнаг, хылмондаг, загъдгӕнаг, ӕхцауарзаг, фӕлӕ уа ӕвӕлмас, 4 Аккаг уынаффӕгӕнӕг йӕ хӕдзарӕн, аргъ ын кӕной йӕ цот ӕмӕ уой коммӕгӕс. 5 Уымӕн ӕмӕ хи хӕдзарӕн уынаффӕ кӕнынмӕ чи нӕ арӕхсы, уый Хуыцауы аргъуаныл куыд мӕт кӕндзӕн? 6 Аргъуаны хистӕр, ӕрӕджы чи баууӕндыд, уыдонӕй ма уӕд, цӕмӕй йӕхиуыл ма фервӕсса ӕмӕ, хӕйрӕгӕн цы тӕрхон рахастӕуыд, ахӕм тӕрхон ын ма рахастӕуа. 7 Хъуамӕ йӕ нымайой ӕнӕуырнджытӕ дӕр, цӕмӕй дзы ӕвзӕрӕй мацы райхъуыса ӕмӕ хӕйрӕджы хызы ма бахауа. 8 Диакъонтӕ дӕр хъуамӕ уой аккаг лӕгтӕ, ма уой дывзагон, нозтуарзаг ӕмӕ кӕрӕф. 9 Хъуамӕ фидар хӕцой уырнынады арфӕвӕрд мидисыл ӕмӕ сӕ цӕсгом уа сыгъдӕг. 10 Ахӕмты фыццаг хъӕуы бафӕлварын, ӕмӕ ӕнӕфау куы разыной, уӕд-иу диакъоны лӕггад кӕнӕнт. 11 Афтӕ сӕ устытӕ дӕр хъуамӕ уой аккаг, ма уой хахуыргӕнджытӕ, уой уӕззау зонды хицау ӕмӕ ӕууӕнкджын алы хъуыддаджы дӕр. 12 Диакъон хъуамӕ уа иу усы мой, хорз арӕхса йӕ цотӕн ӕмӕ йӕ хӕдзарӕн уынаффӕ кӕнынмӕ. 13 Хорз чи бакусы, уыцы диакъонтӕ схизынц сӕ куысты уӕлдӕр къӕпхӕнмӕ, ӕмӕ Йесо Чырыстийыл кӕй ӕууӕндынц, уый фӕрцы Хуыцауы раз свӕййынц тынг ныфсджын. 14 Ацы фыстӕг дӕм фыссын, рӕхджы дӕм кӕй ӕрцӕудзынӕн, ууыл зӕрдӕ даргӕйӕ. 15 Фӕлӕ куы афӕстиат уон, уӕд зон, Хуыцауы хӕдзары хи куыд дарын хъӕуы, уый. Уыцы хӕдзар цардӕгас Хуыцауы Аргъуан у – ӕцӕгадӕн йӕ цӕджындз ӕмӕ йе 'нӕфӕцудгӕ бындур. 16 Гуырысхойаг нӕу – нӕ уырнынады сусӕгдзинад егъау у: Хуыцау фӕзынд адӕймаджы буары, Чи у, уый равдыста Сыгъдӕг Уд, зӕдтӕ Йӕ федтой, Йӕ ном Ын фехъуыстой адӕмтӕ, баууӕндыдысты Йыл дунейы, уӕлӕрвтӕм Ӕй систӕуыд намысджынӕй.

1 Тимофеймӕ 4

1 Хуыцауы Уд бӕлвырд зӕгъы: рӕстӕджы кӕрон бирӕтӕ ныууадздзысты уырнындзинад, баууӕнддзысты фӕлитой удтыл ӕмӕ дӕлимонты ахуырӕдтыл. 2 Ахӕм ахуырӕдтӕ хӕлиу кӕнынц, йе 'фсарм чи бахордта, уыцы мӕнгард цӕстмӕхъустӕ. 3 Уыдон нӕ уадзынц ус курын, нӕ дӕттынц бӕлвырд хойрӕгтӕ хӕрыны бар; афтӕмӕй та сӕ Хуыцау уымӕн сфӕлдыста, цӕмӕй сӕ бузныгӕй хӕрой, чи Йыл баууӕндыд ӕмӕ ӕцӕгад чи базыдта, уыдон. 4 Хуыцау цыдӕриддӕр сфӕлдыста, уый у хорз ӕмӕ аппаринаг нӕу, бузныгӕй йӕ куы хӕрай, уӕд, 5 Уымӕн ӕмӕ ссыгъдӕг вӕййы Хуыцауы ныхасӕй ӕмӕ кувынӕй. 6 Уыдӕттӕ амон ӕфсымӕртӕн, ӕмӕ уыдзынӕ, уырнындзинады ныхӕстӕй, стӕй цы арфӕйаг ахуырадыл ныххӕцыдтӕ, уый ныхӕстӕй йӕхи чи хӕссы, Йесо Чырыстийы уыцы хорз кусӕг. 7 Ӕлгъаг ӕмӕ ӕнӕзонд аргъӕутты ӕмгӕрон та ма цу, фӕлӕ фӕлвар Хуыцауӕн фӕндиагӕй цӕрыныл. 8 Уымӕн ӕмӕ буар фӕлварын уадиссаг пайда нӕ дӕтты, Хуыцауӕн фӕндиагӕй цӕрын та алцӕмӕй дӕр пайда у – зӕрдӕ ӕвӕры абоны цардӕй дӕр ӕмӕ фидӕны цардӕй дӕр. 9 Ацы ныхас ӕцӕг у ӕмӕ йыл ис ӕнӕгуырысхойӕ баууӕндӕн. 10 Уыцы царды сӕраппонд у нӕ фӕллой ӕмӕ нӕ тох, уымӕн ӕмӕ нӕ зӕрдӕ цардӕгас Хуыцауыл дарӕм; Хуыцау та ӕппӕт адӕмӕн, уӕлдайдӕр уырнджытӕн, Ирвӕзынгӕнӕг у. 11 Амон афтӕ ӕмӕ ууыл ахуыр кӕн иннӕты. 12 Ӕвзонг кӕй дӕ, уый тыххӕй дыл ӕнӕрвӕссон мачи уӕд. Уырнджытӕн у фӕзминаг дӕ ныхасӕй, дӕ цардӕй, дӕ уарзтӕй, дӕ уырнындзинадӕй, ӕнӕкъӕм кӕй дӕ, уымӕй. 13 Ме 'рцыдмӕ кӕс Сыгъдӕг Фыст, амон ӕмӕ ахуыр кӕн иннӕты дӕр. 14 Аргъуаны хистӕртӕ дыл сӕ къухтӕ куы ӕрӕвӕрдтой, уӕд дын пехуымпар ныхасмӕ гӕсгӕ Хуыцау цы курдиат радта, уымӕ уазал цӕстӕй ма кӕс. 15 Де 'ргом аздах ӕппӕт уыдӕттӕм, дӕхи сын снывонд кӕн, цӕмӕй алчидӕр уына де 'нтыст. 16 Кӕс лӕмбынӕг дӕ цардыуагмӕ ӕмӕ цӕуыл ахуыр кӕныс, уымӕ; афтӕ кӕн иудадзыг. Уӕд дӕхи дӕр фервӕзын кӕндзынӕ ӕмӕ дӕм чи хъусы, уыдоны дӕр.

1 Тимофеймӕ 5

1 Зӕронд лӕгмӕ тызмӕгӕй ма дзур, фӕлӕ йын амон, цыма дӕ фыдӕн; ӕрыгӕттӕн амон, цыма де 'фсымӕртӕн; 2 Зӕронд устытӕн – цыма дӕ мадӕн; ӕрыгӕттӕн – цыма дӕ хотӕн, дӕ зӕрдӕ сыгъдӕг куыд уа, афтӕмӕй. 3 Ӕххуыс кӕн, иунӕгӕй чи баззад, уыцы идӕдз сылгоймӕгтӕн. 4 Фӕлӕ кӕд идӕдзӕн ис сывӕллӕттӕ кӕнӕ цоты цот, уӕд уыдон фыццаг сахуыр уӕнт хи хӕдзары сӕ уырнындзинад хъуыддагӕй ӕвдисыныл ӕмӕ ныййарджытӕн сӕ хорз хорзӕй фидыныл – уый Хуыцауӕн фӕндон у. 5 Иунӕгӕй чи баззади, уыцы идӕдз ус йӕ зӕрдӕ дары ӕрмӕст Хуыцауыл, ӕхсӕвӕй-бонӕй кувы ӕмӕ куры. 6 Ирхӕфсӕнтӕ уарзаг идӕдз ус та цӕрдудӕй мард у. 7 Амон сын ӕппӕт уыдӕттӕ, цӕмӕй сӕ цард уа ӕнӕфау. 8 Хионтыл, уӕлдайдӕр та йӕ бинонтыл чи нӕ тыхсы, уый ныууагъта уырнындзинад ӕмӕ ӕнӕуырнӕгӕй фыддӕр у. 9 Идӕдзты номхыгъдмӕ бахӕссӕн ис, ӕппынкъаддӕр ӕртиссӕдз азы кӕуыл цӕуы ӕмӕ иу мой кӕмӕн уыд, ахӕм сылгоймӕгты. 10 Алчидӕр сӕ хъуамӕ зындгонд уа йӕ хорз хъуыддӕгтӕй: схъомыл кодта сывӕллӕттӕ, бӕлццӕттӕн уыд фысым, сыгъдӕджытӕн ӕхсадта сӕ къӕхтӕ, ӕххуыс кодта иннӕтӕн сӕ зынты – алы хорз хъуыддагмӕ дӕр ӕмхиц. 11 Ӕрыгон идӕдз сылгоймӕгты та номхыгъдмӕ ма хӕсс, уымӕн ӕмӕ сӕ монцтӕ Чырыстийӕ уӕлдӕр куы сӕвӕрынц, уӕд сӕ бафӕнды моймӕ фӕцӕуын. 12 Афтӕмӕй свӕййынц азымджын, уымӕн ӕмӕ фӕсайынц, раздӕр кӕй радтой, сӕ уыцы дзырд. 13 Уыимӕ ма фӕцалх вӕййынц ӕвдӕлон цардыл ӕмӕ хӕдзари-хӕдзар зилыныл; свӕййынц канд ӕвдӕлон нӕ, фӕлӕ дзӕгъӕлдзых, сӕхи тъыссынц кӕйдӕр хъуыддӕгты, фӕдзурынц, цы не 'мбӕлы, уыдӕттӕ. 14 Уымӕ гӕсгӕ мӕн фӕнды, цӕмӕй ӕрыгон идӕдз устытӕ цӕуой моймӕ, арой сывӕллӕттӕ, уынаффӕ кӕной сӕ хӕдзӕрттӕн ӕмӕ ныхмӕлӕууӕгӕн мацы фадат дӕттой фауынӕн. 15 Уымӕн ӕмӕ иуӕй-иутӕ ныридӕгӕн адзӕгъӕл сты хӕйрӕджы фӕдыл. 16 Кӕд уырнӕг сылгоймагӕн ис хӕстӕг идӕдз устытӕ, уӕд сӕ хӕссӕд йӕхӕдӕг ӕмӕ аргъуаны ма тыхсын кӕнӕд, цӕмӕй аргъуан ӕххуыс кӕна иунӕгӕй баззайӕг идӕдз устытӕн. 17 Нывыл разамынд цы аргъуаны хистӕртӕ дӕттынц, уыдонӕн фылдӕр аргъ кӕнын хъӕуы, Хуыцауы ныхас амоныныл ӕмӕ ахуыр кӕныныл чи кусы, уӕлдайдӕр уыдонӕн. 18 Уымӕн ӕмӕ Сыгъдӕг Фыст зӕгъы: «Найгӕнӕг галӕн йӕ дзых бастӕй ма дар», ӕмӕ: «Алы фӕллойгӕнӕг дӕр хъуамӕ райса йӕ мызд». 19 Аргъуаны хистӕрыл цы хъаст ӕрбацӕуа, уымӕ ма байхъус, дыууӕ кӕнӕ ӕртӕ ӕвдисӕны куы нӕ уа, уӕд. 20 Тӕригъӕды ӕфтыд чи у, уыдонӕн уайдзӕф кӕн ӕппӕт аргъуаны раз, цӕмӕй тӕрсой иннӕтӕ дӕр. 21 Хуыцауы, Йесо Чырыстийы ӕмӕ ӕвзӕрст зӕдты раз дӕуӕн фидарӕй фӕдзӕхсын уыцы амындтӕ ӕххӕст кӕнын; уыимӕ макӕй хъулон кӕн, алкӕмӕ дӕр кӕс иухуызон цӕстӕй. 22 Искӕуыл къух ӕрӕвӕрынмӕ ма батагъд кӕн, цӕмӕй ма схайджын уай кӕйдӕр тӕригъӕдӕй; дӕхи бахиз счъизийӕ. 23 Нырӕй фӕстӕмӕ нуаз ӕрмӕст дон нӕ, фӕлӕ иучысыл сӕн дӕр, дӕ ахсӕн кӕй риссы ӕмӕ арӕх рынчын кӕй вӕййыс, уый тыххӕй. 24 Иуӕй-иутӕн сӕ тӕригъӕдтӕ тӕрхоны агъоммӕ дӕр бӕлвырд сты, иннӕтӕн та фӕстӕдӕр раргом вӕййынц. 25 Афтӕ бӕлвырд сты хорз хъуыддӕгтӕ дӕр, фӕлӕ кӕд бӕлвырд не сты, уӕд дӕр нӕ басусӕг уыдзысты.

1 Тимофеймӕ 6

1 Цагъарады ӕфсондзы бын чи ис, уыцы цагъартӕ хъуамӕ алы ӕгъдауӕй дӕр нымайой сӕ хицӕутты, Хуыцауы номмӕ ӕмӕ нӕ ахуырадмӕ фау ӕрхӕссӕн куыд нӕ уа, афтӕ. 2 Уырнӕг хицӕуттӕ кӕмӕн ис, уыдон сӕм ницӕмӕ дарыны цӕстӕй ма кӕсӕнт, се 'фсымӕртӕ кӕй сты, уый тыххӕй. Уый нӕ, фӕлӕ сын хъуамӕ кусой ноджы ӕнувыддӕрӕй, уымӕн ӕмӕ кӕмӕн лӕггад кӕнынц, уыдон уырнджытӕ ӕмӕ уарзон ӕфсымӕртӕ сты. Ууыл ахуыр кӕн уырнджыты, араз сӕ ахӕм зондыл. 3 Ӕндӕр ахуырад чи амоны, нӕ Хицау Йесо Чырыстийы раст ныхӕстыл ӕмӕ ӕцӕг уырнындзинадӕй рацӕугӕ ахуырадыл чи нӕ хӕцы, 4 Уый у сӕрыстыр, ницы зоны, сӕйы ӕнӕхъуаджы дзӕнгӕда ӕмӕ быцӕуныхӕсты низӕй. Ахӕм быцӕутӕ расайынц хӕлӕг, хъаугъатӕ, фыдгой, гуырысхойы ӕфтауӕг хъуыдытӕ, 5 Ӕнӕбанцайгӕ хъӕлӕбатӕ. Ӕмхиц сӕм чи у, уыдонӕн сӕ зонд ныззыгъуыммӕ, ныууагътой ӕцӕгад, сты ахӕм хъуыдыйыл хӕст, цыма уырнындзинад ӕфтиаг райсынӕн у. [Ахӕмтӕм ӕмгӕрон ма цу.] 6 Уырнындзинад та хъӕздыг кӕны, цы йӕм ис, уый фагыл чи нымайы, уыцы адӕймаджы. 7 Уымӕн ӕмӕ мах дунемӕ ницы ӕрхастам, ӕмӕ дзы нӕ бон ницы ахӕссын бауыдзӕн. 8 Фӕлӕ нын хойраг ӕмӕ дарӕс куы уа, уӕд уый фагыл хъуамӕ нымайӕм. 9 Бирӕ мулкмӕ чи бӕллы, уыдон та бахауынц къӕппӕджы, фӕлварӕнты, ӕмӕ фӕвӕййынц, бӕллӕх ӕмӕ бынсӕфтмӕ чи ӕркӕны, бирӕ ахӕм ӕнӕзонд ӕмӕ фыдбылызы мондӕгты амӕддаг. 10 Уымӕн ӕмӕ ӕппӕт фыдбылызтӕн сӕ уидаг ӕхцайы бӕллиц у. Ӕхцамӕ бӕлгӕйӕ, иуӕй-иутӕ фӕхауӕггаг сты уырнындзинады фӕндагӕй ӕмӕ сӕхи бафтыдтой бирӕ хъизӕмӕртты. 11 Ды та, Хуыцауы адӕймаг, дӕхи бахиз ӕппӕт уыдӕттӕй. Тырн рӕстадмӕ, Хуыцауӕн фӕндиаг цардмӕ, уырнынадмӕ, уарзтмӕ, фӕразон ӕмӕ ӕвӕлмас уӕвынмӕ. 12 Ӕнувыдӕй тох кӕн уырнындзинадыл, фидар хӕц мыггагмӕйы цардыл. Уыцы цардмӕ дӕ ӕрхуындӕуыд, ӕмӕ йӕ сӕраппонд дӕ уырнындзинады тыххӕй ӕргомӕй загътай бирӕ ӕвдисӕнты раз. 13 Алкӕмӕн дӕр цард Чи дӕтты, уыцы Хуыцауы раз, стӕй Понтий Пилатӕн ӕцӕгады тыххӕй ӕргомӕй Чи загъта, уыцы Йесо Чырыстийы раз дын фӕдзӕхсын: 14 Ӕппӕт амындтӕ ӕнувыдӕй ӕмӕ ӕнӕфауӕй ӕххӕст кӕн суанг нӕ Хицау Йесо Чырыстийы ӕрцыдмӕ. 15 Уыцы ӕрцыд уыдзӕн йӕ рӕстӕджы, тӕхудиаг ӕмӕ иунӕг Дунедарӕджы, паддзӕхты Паддзахы ӕмӕ хицӕутты Хицауы фӕндонмӕ гӕсгӕ. 16 Уый у, бацӕуӕн кӕдӕм нӕй, ахӕм рухсы Чи цӕры, адӕмӕй Кӕй ничи федта ӕмӕ фенӕн Кӕмӕн нӕй, уыцы Хуыцау. Ӕнӕмӕлгӕ цард ӕрмӕст Уымӕ ис. Намыс ӕмӕ Йын паддзахад уӕд мыггагмӕ! Амен. 17 Ацы царды бонджын чи у, уыдонӕн бацамон, цӕмӕй сӕхиуыл ма фервӕссой ӕмӕ ныфсджын уой, зӕрдӕ дарӕн цы мулкыл нӕй, уымӕй нӕ, фӕлӕ нын зӕрдӕйы дзӕбӕхӕн ӕппӕт дӕр парахатӕй Чи дӕтты, уыцы [цардӕгас] Хуыцауӕй. 18 Уыдон аразӕнт хорз хъуыддӕгтӕ, ӕмӕ уыцы хорз хъуыддӕгтӕ уӕнт сӕ хъӕздыгдзинад; уадз ӕмӕ уой рӕдау ӕмӕ зӕрдӕхӕлар; 19 Ӕмбырд кӕной, фидӕнӕн ӕнӕфӕцудгӕ бындур чи у, уыцы хӕзна, цӕмӕй райсой ӕцӕг цард. 20 О Тимофей, цы дын баргонд ӕрцыди, уый бахъахъхъӕн. «Зонынад» кӕй хонынц, ӕцӕгӕй та зонынадимӕ иумӕйагӕй кӕмӕн ницы ис, уый фӕдыл ӕлгъаг дзӕгъӕлы ныхӕсты ӕмӕ ӕнӕзонд быцӕуты ӕмгӕрон ма цу. 21 Иуӕй-иутӕ дзурынц, цыма сӕм ис уыцы «зонынад», афтӕмӕй та уырнындзинады фӕндагӕй адзӕгъӕл сты. Хуыцауы хорзӕх уӕ уӕд.

2 Тимофеймӕ 1

1 Павелӕй – Хуыцауы фӕндӕй Йесо Чырыстийы апостол чи у, уымӕй. Ӕз ӕрвыст дӕн, Хуыцау зӕрдӕ цы цардӕй бавӕрдта, уый тыххӕй фехъусын кӕнынмӕ – уыцы цард лӕвӕрд цӕуы Йесо Чырыстиимӕ баиуы руаджы. 2 Ӕз фыссын мӕ уарзон хъӕбул Тимофеймӕ. Хорзӕх, арфӕ ӕмӕ дын фарн Фыд-Хуыцауӕй ӕмӕ нӕ Хицау Йесо Чырыстийӕ. 3 Мӕ рагфыдӕлтау сыгъдӕг цӕсгомимӕ Кӕмӕн кусын, уыцы Хуыцауӕй ӕз бузныг дӕн, ӕхсӕвӕй-бонӕй куы фӕкувын, уӕд ӕдзух дӕу кӕй ӕрымысын, уый тыххӕй. 4 Дӕ цӕссыгтӕ куы ӕрымысын, уӕд фӕбӕллын дӕ фенынмӕ, цӕмӕй мӕ зӕрдӕ байдзаг уа цинӕй. 5 Мӕ зӕрдыл ӕрбалӕууы, раздӕр дӕ мадымад Лоидӕмӕ ӕмӕ дӕ мад Эвникӕмӕ чи уыди, дӕ уыцы зӕрдиаг уырнындзинад. Дӕумӕ дӕр ахӕм уырнындзинад кӕй ис, ууыл фидарӕй ӕууӕндын. 6 Уымӕ гӕсгӕ дын дӕ зӕрдыл лӕууын кӕнын: мӕ къухтӕ дыл ӕрӕвӕрыны руаджы Хуыцау дӕуӕн кӕй радта, уыцы курдиаты арт ахуыссын ма бауадз. 7 Уымӕн ӕмӕ нын Хуыцау цы Удӕй бахай кодта, уый нын тӕппуды хос нӕу, фӕлӕ нын дӕтты тых, уарзт ӕмӕ раст зонд. 8 Уӕдӕ нӕ Хицауы [Йесо Чырыстийы] тыххӕй ӕргомӕй кӕй дзурыс, уый худинагыл ма нымай, стӕй ӕз Йӕ сӕраппонд ахӕстоны кӕй дӕн, уый дӕр. Фӕлӕ Хуыцауы хъаруйӕ ныфсджынӕй мӕнимӕ тухӕн кӕн фарны уацы сӕраппонд. 9 Хуыцау мах фервӕзын кодта ӕмӕ нӕ ӕрхуыдта сыгъдӕг цардмӕ – нӕ хъуыддӕгтӕм гӕсгӕ нӕ, фӕлӕ Йӕ фӕнд ӕмӕ Йӕ хорзӕхмӕ гӕсгӕ. Йӕ хорзӕх нын Йесо Чырыстийы руаджы суанг дуне сфӕлдисыны агъоммӕ рардӕуыд, 10 Ӕргом та абон раци – нӕ Ирвӕзынгӕнӕг Йесо Чырысти куы ӕрцыд, уӕд; Уый фӕтых мӕлӕтыл ӕмӕ фарны уацы руаджы ӕрхаста ӕнӕмӕлгӕ цард. 11 Ӕмӕ мӕн [муртаттӕн] сӕвӕрдӕуыд уыцы фарны уацы фидиуӕгӕй, апостол ӕмӕ ахуыргӕнӕгӕй. 12 Ӕмӕ ацы тухӕнтӕ дӕр уый тыххӕй ӕвзарын, фӕлӕ сӕ худинагыл нӕ нымайын. Уымӕн ӕмӕ Кӕуыл баууӕндыдтӕн, уый зонын, ӕмӕ фидарӕй ӕууӕндын: мӕ бӕрны цы бакодта, уый бахъахъхъӕнын Йӕ бон у Йе 'рцыды бонмӕ. 13 Мӕнӕй цы раст ныхӕстӕ фехъуыстай, уыдон дын уӕнт зондыхос; дӕ цард араз, Йесо Чырыстиимӕ баиуы руаджы цы уырнындзинад ӕмӕ уарзтӕй схайджын стӕм, уыдонмӕ гӕсгӕ. 14 Нӕ зӕрдӕты цӕрӕг Сыгъдӕг Уды фӕрцы бахъахъхъӕн, дӕ бӕрны дын цы хӕзна бачындӕуыд, уый. 15 Ды зоныс: асиӕгтӕ иууылдӕр, уыдонимӕ Фигел ӕмӕ Ермоген дӕр, ныууагътой мӕн. 16 Хицау Йӕ арфӕ бафтауӕд Онисифоры хӕдзарыл. Бирӕ хӕттыты мӕ барӕвдыдта, мӕ рӕхыстӕ дӕр ӕй нӕ урӕдтой – къӕмдзӕстыгы хос ын нӕ уыдысты. 17 Уый нӕ, фӕлӕ Роммӕ куы ӕрцыд, уӕд мӕ агуырдта зӕрдиагӕй ӕмӕ мӕ ссардта. 18 Хицау ын баххуыс кӕнӕд, цӕмӕй йын тӕрхоны бон Хицау уа хатыргӕнӕг. Эфесы дӕр мын цас балӕггад кодта, уый ды хуыздӕр зоныс.

2 Тимофеймӕ 2

1 Уӕдӕ, мӕ хъӕбул, дӕхи фидар кӕн, Йесо Чырыстийы руаджы кӕмӕй схайджын стӕм, уыцы хорзӕхӕй. 2 Ӕмӕ бирӕ ӕвдисӕнты раз мӕнӕй цы фехъуыстай, уый ды та бабар кӕн, зӕрдӕ дарӕн кӕуыл ис, иннӕты дӕр сахуыр кӕнынмӕ чи сарӕхсдзӕн, ахӕмтӕн. 3 Йесо Чырыстийы иузӕрдион хӕстонӕн куыд ӕмбӕлы, афтӕ тухӕн кӕн мемӕ. 4 Йӕхи никӕцы хӕстон лӕг сбӕтдзӕн царды ӕрвылбоны сагъӕстӕй – уый ӕрмӕстдӕр тырны ӕфсӕддон хицауы зӕрдӕ балхӕнынмӕ. 5 Ерысты архайӕг хӕрзиуӕг нӕ райсдзӕн, ерысты уаг куы хала, уӕд. 6 Цы хор ӕрзад, уымӕй йӕ хай фыццаг хъуамӕ райса, чи йыл фыдӕбон кодта, уыцы зӕхкусӕг. 7 Ахъуыды кӕн, ӕз дын цы зӕгъын, ууыл. Хицау дын раттӕд ӕппӕт дӕр ӕмбарыны зонд. 8 Дӕ зӕрдыл дар Йесо Чырыстийы. Уый у Давиды байзӕддаг, мӕрдтӕй рабадӕг – ууыл дзурӕг у, ӕз цы фарны уац хъусын кӕнын, уый. 9 Уыцы фарны уацы сӕраппонд хъизӕмар кӕнын ӕз, фыдгӕнӕгау мӕ суанг рӕхыстӕй дӕр сбастой. Фӕлӕ Хуыцауы ныхасӕн рӕхыстӕй сбӕттӕн нӕй. 10 Уымӕ гӕсгӕ ӕз алцӕмӕн дӕр фӕразын ӕвзӕрстыты сӕраппонд, цӕмӕй уыдон дӕр фервӕзой Йесо Чырыстийы руаджы ӕмӕ схайджын уой мыггагмӕйы намысӕй. 11 Ацы ныхас ӕцӕг у: «Кӕд Йемӕ амардыстӕм, уӕд цӕргӕ дӕр Йемӕ кӕндзыстӕм. 12 Кӕд тухӕнтӕн фӕразӕм, уӕд Йемӕ паддзахиуӕг дӕр кӕндзыстӕм. Нӕхи Йыл куы атигъ кӕнӕм, уӕд ныл Уый дӕр Йӕхи атигъ кӕндзӕн. 13 Мах Ыл гадзрахатӕй куы рацӕуӕм, уӕддӕр Уый иузӕрдион у, уымӕн ӕмӕ Йӕ ӕрдзыхъӕд аивын Йӕ бон нӕу». 14 Ӕппӕт уыдӕттӕ зӕрдыл лӕууын кӕн ӕмӕ Хуыцауы раз фидарӕй фӕдзӕхс, цӕмӕй ӕнӕпайда быцӕуныхас ма кӕной – уыцы быцӕутӕ ӕрмӕст зиан ӕрхӕссынц, чи сӕм хъусы, уыдонӕн. 15 Бацархай, цӕмӕй Хуыцауы раз разынай, йӕ куысты тыххӕй къӕмдзӕстыг чи нӕу, ӕцӕгады ныхас раст чи амоны, ахӕм фӕлтӕрд кусӕг. 16 Ӕлгъаг дзӕгъӕлы ныхӕстӕм ӕмгӕрон ма цу. Ӕмхиц сӕм чи у, уыдон дардӕй-дарддӕр кӕнынц Хуыцауӕй. 17 Рак буарыл куыд ахӕлиу вӕййы, афтӕ анхъӕвздзӕн сӕ ахуырад. Уыдонӕй сты Именей ӕмӕ Филит. 18 Уыдон фӕиппӕрд сты ӕцӕгадӕй, дзурынц, мӕрдтӕ ныридӕгӕн райгас сты, зӕгъгӕ, ӕмӕ афтӕмӕй халынц иуӕй-иуты уырнындзинад. 19 Фӕлӕ Хуыцауы ӕвӕрд фидар бындур уӕддӕр ӕнӕфӕцудгӕ у, ӕмӕ йыл ис мыхуыр мӕнӕ ацы ныхӕстӕй: «Хицау зоны Йӕ адӕмы», стӕй: «Хицауы ном чидӕриддӕр ары, уый тӕригъӕды мауал ӕфтӕд». 20 Стыр хӕдзары та ис ӕрмӕст сызгъӕрин ӕмӕ ӕвзист мигӕнӕнтӕ нӕ, фӕлӕ хъӕд ӕмӕ ӕлыгӕй конд мигӕнӕнтӕ дӕр. Сӕ иутӕ кадджын мигӕнӕнтӕ сты, иннӕтӕ та – хуымӕтӕг. 21 Уӕдӕ тӕригъӕдӕй йӕхи чи ссыгъдӕг кӕна, уый уыдзӕн кадджын нывонд мигӕнӕн – пайда дзы кӕны Хӕдзары Хицау, бӕззы алы хорз хъуыддагӕн дӕр. 22 Лӕппуйы монцтӕй хиз дӕхи. Сыгъдӕгзӕрдӕйӕ Хицаумӕ чи кувы, уыдонимӕ тырн рӕстӕй цӕрынмӕ, уырнындзинадмӕ, уарзт ӕмӕ фидыдмӕ. 23 Ӕдзӕлгъӕд ӕмӕ ӕнӕфенд быцӕуты ӕмгӕрон ма цу; уыдон хъаугъатӕ кӕй расайынц, уый дын зындгонд у. 24 Хицауы цагъарӕн та хъаугъа кӕнын не 'мбӕлы, фӕлӕ алкӕимӕ дӕр хъуамӕ уа зӕрдӕхӕлар, уа хорз зондамонӕг, фыдӕх йӕ зӕрдӕмӕ ма хӕсса, 25 Ныхмӕлӕуджыты ахуыр кӕна ӕвӕлмасӕй. Гӕнӕн ис, ӕмӕ сын Хуыцау баххуыс кӕна, ӕрцӕуа сӕм фӕсмон ӕмӕ базоной ӕцӕгад, 26 Ӕрӕмбарой сӕхи ӕмӕ раирвӕзой, йӕхицӕн сӕ цагъартӕ скӕнынӕн цы хӕйрӕг ӕрцахста, уый къӕппӕгӕй.

2 Тимофеймӕ 3

1 Зындгонд дын уӕд: рӕстӕджы кӕрон уыдзӕн уӕззау заман. 2 Уымӕн ӕмӕ адӕм уыдзысты хиуарзон, ӕхцауарз, хиппӕлой, сӕрыстыр, маргӕвзаг, ныййарджытӕн ӕгоммӕгӕс, ӕбузныг, ӕнӕхуыцау, саузӕрдӕ, 3 Нӕбарон, хахуыргӕнӕг, ӕгъатыр; хиуыл хӕцын нӕ зондзысты, хорзӕй цы ис, уый сын уыдзӕн ӕнӕуынон, 4 Уыдзысты гадзрахат, сӕнтдзӕф, хъал, Хуыцауы уарзыны бӕсты фылдӕр уарздзысты ирхӕфсӕнтӕ. 5 Сӕхи ӕвдисдзысты афтӕ, цыма Хуыцауы нымайынц, Йӕ хъаруйыл та Йын сӕхи атигъ кӕндзысты. Ахӕмтӕм ӕмгӕрон ма цу. 6 Уыдоны хуызӕттӕ ӕрбаирвӕзынц хӕдзӕрттӕм, ӕмӕ сӕ уацары бахауынц, тӕригъӕдты чи аныгъуылди, сӕ алы мондӕгты коммӕ чи кӕсы, ахӕм ӕнӕзонд сылгоймӕгтӕ – 7 Иудадзыг ахуыр чи кӕны, фӕлӕ ӕцӕгад базонын кӕй бон нӕу, ахӕмтӕ. 8 Ианний ӕмӕ Иамврий Моисейы ныхмӕ куыд лӕууыдысты, афтӕ уыцы адӕймӕгтӕ дӕр сты ӕцӕгады ныхмӕ, сӕ зонд ныззыгъуыммӕ, ӕцӕг уырнындзинадимӕ сын иумӕйагӕй ницы ис. 9 Фӕлӕ сын бирӕ нӕ бантысдзӕн. Алкӕмӕн дӕр раргом уыдзӕн, уыдон ӕнӕзонд кӕй сты, уый – уыцы дыууӕйы хабар куыд уыди, афтӕ. 10 Ды та дӕ цард сарӕзтай мӕ ахуырадмӕ гӕсгӕ; бафӕзмыдтай мӕ цардыуаг, мӕ бӕллицтӕ, мӕ уырнынад, мӕ уарзт, куыд фӕразон ӕмӕ хъӕддых дӕн, уый. 11 Ды мӕнимӕ бавзӕрстай, Антиохийы, Икони ӕмӕ Листрӕйы мӕ сӕр кӕй баййӕфта, уыцы ӕфхӕрд ӕмӕ хъизӕмӕрттӕ. Цы фыдӕфхӕрд нӕ баййӕфтон! Ӕмӕ мӕ ӕппӕт уыдӕттӕй фервӕзын кодта Хицау. 12 Ӕниу, Хуыцауӕн фӕндиагӕй цӕрын ӕмӕ Йесо Чырыстиимӕ иумӕ уӕвын кӕй фӕнды, уыдон сеппӕт дӕр ӕййафдзысты ӕфхӕрд. 13 Фыдзӕрдӕтӕ ӕмӕ фӕлитойтӕ та кӕндзысты ӕвзӕрӕй-ӕвзӕрдӕр, сӕхӕдӕг фӕсайды уыдзысты ӕмӕ иннӕты дӕр сайдзысты. 14 Ды та цӕуыл сахуыр дӕ ӕмӕ фидарӕй цӕуыл баууӕндыдтӕ, уый хӕццӕ кӕн дарддӕр. Чи дӕ сахуыр кодта, уыдоны хорз зоныс; 15 Уыимӕ сабибонтӕй фӕстӕмӕ ды зоныс Сыгъдӕг Фыст – уымӕ ис дӕуӕн зонд раттыны тых, цӕмӕй Йесо Чырыстийыл ӕууӕндыны руаджы фервӕзай. 16 Ӕппӕт Сыгъдӕг Фыст Хуыцауӕй разӕнгардгондӕй ныффыстӕуыд, ӕмӕ ахъаз у ахуырӕн, багӕды кӕнынӕн, раст фӕндагмӕ раздахынӕн, Хуыцауӕн фӕндиагӕй цӕрыныл хъомыл кӕнынӕн, 17 Хуыцауы адӕймаг алы хуызы ифтонг ӕмӕ алы хорз хъуыддагмӕ дӕр цӕттӕ куыд уа, афтӕ.

2 Тимофеймӕ 4

1 Хуыцауы раз, стӕй Йӕ паддзахы бартимӕ Чи ӕрцӕудзӕн ӕмӕ удӕгӕстӕн ӕмӕ мӕрдтӕн тӕрхон Чи кӕндзӕн, нӕ уыцы Хицау Йесо Чырыстийы раз дын фидарӕй фӕдзӕхсын: 2 Хъусын кӕн Хуыцауы ныхас, амон ӕй, фадат дын куы уа, уӕд дӕр ӕмӕ дын куы нӕ уа, уӕд дӕр. Цӕстмӕ дар, уайдзӕф кӕн, рӕвдау – амон фӕразонӕй. 3 Уымӕн ӕмӕ ӕрцӕудзӕн ахӕм рӕстӕг, ӕмӕ адӕм раст ахуырадыл сӕхи атигъ кӕндзысты, сӕ монцтӕм гӕсгӕ сӕхицӕн ӕвзардзысты, сӕ хъустӕн ӕхсызгон кӕй ныхас уа, ахӕм бирӕ ахуыргӕнджытӕ; 4 Ӕцӕгадмӕ нал хъусдзысты ӕмӕ баууӕнддзысты аргъӕуттыл. 5 Фӕлӕ дӕумӕ кӕддӕриддӕр уӕд уӕззау зонд, зынтӕн у фӕразон, адӕммӕ хӕсс фарны уац, кӕронмӕ бакӕн дӕ куыст. 6 Мӕн та рӕхджы ӕрхастӕуыдзӕн нывондӕн, ӕмӕ ацы дунейӕ мӕ ацӕуыны афон ралӕууыд. 7 Тох кодтон хъӕбатырӕй, мӕ фӕндагыл ацыдтӕн кӕронмӕ, мӕ уырнындзинад бахъахъхъӕдтон. 8 Ныридӕгӕн мын цӕттӕ у рӕстгӕнӕджы хӕрзиуӕг, ӕмӕ мын ӕй уыцы бон ратдзӕн Хицау, ӕнӕхӕрам Тӕрхонгӕнӕг. Ӕмӕ ӕрмӕст мӕнӕн нӕ, фӕлӕ йын Йе 'рцыдмӕ чидӕриддӕр зӕрдиагӕй ӕнхъӕлмӕ каст, уыдонӕн дӕр. 9 Бацархай рӕхджы мӕм ӕрцӕуыныл. 10 Уымӕн ӕмӕ Димас ацы дуне фылдӕр бауарзта, ныууагъта мӕ ӕмӕ ацыди Фессалоникӕмӕ, Крискент та ацыд Галатимӕ, Тит – Далматимӕ. Иунӕг Лука ма ис мемӕ. 11 Маркы ракӕн демӕ, уымӕн ӕмӕ мӕ уый Хуыцауы куысты хъӕугӕ кӕны. 12 Тихикы арвыстон Эфесмӕ. 13 Куы цӕуай, уӕд рахӕсс, Карпмӕ Троадӕйы кӕй ныууагътон, уыцы пӕлӕз, стӕй чингуытӕ, уӕлдайдӕр сӕракыл фыст чингуытӕ. 14 Бирӕ фыдбылызтӕ мын сарӕзта ӕрхуыгуырд Александр. Хицау ын бафиддзӕн йӕ хъуыддӕгтӕм гӕсгӕ. 15 Ды дӕр дзы дӕхи бахиз, уымӕн ӕмӕ тынг лӕууыди, цы дзырдтам, уый ныхмӕ. 16 Фыццаг хатт мӕхи сраст кӕныны сӕраппонд куы дзырдтон, уӕд мемӕ ничи уыди, уымӕн ӕмӕ мӕ иууылдӕр ныууагътой. Хуыцау сын ӕй ныббарӕд! 17 Фӕлӕ мӕм Хицау ӕрцыд ӕмӕ мӕ сфидар кодта, цӕмӕй фарны уац мӕ руаджы хъуыстгонд ӕрцӕуа ӕххӕстӕй ӕмӕ йӕ муртаттӕ сеппӕт дӕр фехъусой. Афтӕмӕй ӕз раирвӕзтӕн домбайы дзыхӕй. 18 Хицау мӕ бахиздзӕн алы ӕвзӕр хъуыддагӕй ӕмӕ мӕ фервӕзын кӕндзӕн Йӕ Уӕларвон Паддзахадӕн. Кад Ын уӕд мыггагӕй-мыггагмӕ! Амен. 19 Саламтӕ ратт Прискиллӕ ӕмӕ Акилӕйӕн, стӕй Онисифоры хӕдзаронтӕн. 20 Эраст баззади Коринфы, Трофимы рынчынӕй ныууагътон Милеты. 21 Бацархай зымӕджы агъоммӕ ӕрцӕуыныл. Саламтӕ дын дӕттынц Эввул, Пуд, Лин ӕмӕ Клавдиа, стӕй ӕфсымӕртӕ иууылдӕр. 22 Хицау [Йесо Чырысти] уӕд демӕ. Хуыцауы хорзӕх уӕ уӕд.

Титмӕ 1

1 Павелӕй, Хуыцауы цагъарӕй ӕмӕ Йесо Чырыстийы апостолӕй. Ӕз ӕрвыст дӕн, цӕмӕй Хуыцауы ӕвзӕрстыты ӕрхонон уырнындзинадмӕ, ӕцӕгад базонынмӕ, Хуыцауы нымайынмӕ 2 Ӕмӕ мыггагмӕйы цардыл зӕрдӕ дарынмӕ. Ахӕм цардӕй суанг дуне сфӕлдисыны размӕ ныфс бавӕрдта, Йӕ дзырд Чи нӕ сайы, уыцы Хуыцау, 3 Фӕлӕ Йӕ зӕрдӕвӕрд фарны уацы руаджы раргом кодта Йӕхи нысангонд ӕмгъуыды. Нӕ Ирвӕзынгӕнӕг Хуыцауы фӕдзӕхстмӕ гӕсгӕ мӕнӕн баргонд у уыцы фарны уац адӕммӕ хӕссын. 4 Ӕз фыссын Титмӕ, нӕ иумӕйаг уырнындзинады фӕрцы мын ӕцӕг хъӕбул чи сси, уымӕ. Фарн ӕмӕ дын хорзӕх Фыд-Хуыцауӕй ӕмӕ нӕ Ирвӕзынгӕнӕг Йесо Чырыстийӕ. 5 Криты дӕ уый тыххӕй ныууагътон, цӕмӕй куыст ахӕццӕ кӕнай кӕронмӕ, ӕмӕ алы сахары аргъуанӕн дӕр сӕвӕрай, ӕз дын куыд бафӕдзӕхстон, ахӕм хистӕртӕ: 6 Алчидӕр сӕ хъуамӕ уа ӕнӕфау, иу усы мой, йӕ сывӕллӕттӕ уой уырнджытӕ, хӕлд ӕмӕ ӕгоммӕгӕсы дау сӕм ӕрхӕссӕн куыд нӕ уа. 7 Хуыцауы хӕдзарӕн уынаффӕгӕнӕгӕн куыд ӕмбӕлы, афтӕ аргъуаны хистӕр хъуамӕ уа ӕнӕфау, ма уа къӕйных, мӕстыгӕр, расыггӕнаг, хылмондаг ӕмӕ кӕрӕф. 8 Уый хъуамӕ уа уазӕгуарз, хӕрзгӕнӕг, хӕдзонд-хӕдӕфсарм, раст адӕймаг, Хуыцауыл ӕнувыд, хиуылхӕцгӕ, 9 Цы ӕцӕгады ныхасыл сахуыр, ууыл иузӕрдион. Уӕд йӕ бон уыдзӕн раст ахуырадӕй ныфс бауадзын, ныхмӕлӕуджыты – багӕды кӕнын. 10 Уымӕн ӕмӕ ис, ӕнӕпайда ныхас чи кӕны ӕмӕ адӕмы чи фӕливы, бирӕ ахӕм хивӕндтӕ, уӕлдайдӕр сунӕтгӕндтӕй. 11 Ахӕмтӕн хъӕуы сӕ дзых сӕхгӕнын. Уыдон сӕ мӕнгахуырӕдтӕй ӕнӕхъӕн бинонты саразынц зылын фӕндагыл, ӕмӕ сӕ уыцы ӕгадгӕнӕг куыст арӕзт у сӕ дзыппытӕ ныннӕмынмӕ. 12 Критӕгтӕн сӕхицӕй иу, сӕхи «пехуымпар», афтӕ загъта: «Критӕгтӕ рагӕй-ӕрӕгмӕ дӕр сты фӕлитойтӕ, саузӕрдӕ сырдтӕ, зивӕггӕнаг фыдгуыбынтӕ». 13 Уыцы ӕвдисӕйнаг раст у. Уымӕ гӕсгӕ сӕ гӕды кӕн ӕгъатырӕй, цӕмӕй хӕцой раст уырнындзинадыл, 14 Ӕмӕ ма хъусой иудейаг аргъӕуттӕм ӕмӕ ӕцӕгад ныууадзӕг адӕмы амындтӕм. 15 Сыгъдӕджытӕн ӕппӕт дӕр сыгъдӕг у; тӕригъӕдӕй чъизитӕн ӕмӕ ӕнӕуырнджытӕн та ӕппӕт дӕр чъизи у, уымӕн ӕмӕ сӕ зонд ӕмӕ сӕ цӕсгом счъизи. 16 Уыдон дзурынц, цыма Хуыцауы зонынц, афтӕмӕй Йыл сӕ митӕй тигъ кӕнынц сӕхи; сты цъаммар, хивӕнд ӕмӕ сӕ бон нӕу иунӕг хорз хъуыддаг дӕр саразын.

Титмӕ 2

1 Ды та амон, раст ахуырад куыд домы, афтӕ. 2 Зӕронд лӕгты ахуыр кӕн, цӕмӕй уой уӕззау зонды хицау, уӕздан, хӕдӕфсарм, раст уырнындзинадыл хӕст, уарзӕгой, фӕразон. 3 Зӕронд сылгоймӕгтӕн дӕр амон, сыгъдӕджытӕн куыд ӕмбӕлы, афтӕ цӕрын. Хъуамӕ ма уой хахуыргӕнджытӕ, карз нозтмӕ ӕмхиц, хорз цы у, ууыл ахуыр кӕной иннӕты, 4 Ӕрыгон сылгоймӕгтӕн амоной зонд, цӕмӕй уарзой сӕ лӕгты ӕмӕ сӕ хъӕбулты, 5 Уой хӕдӕфсарм, ӕнӕкъӕм, мӕт кӕной сӕ бинонтыл, уой зӕрдӕхӕлар, сӕ лӕгтӕн коммӕгӕс. Уӕд Хуыцауы ныхас рафауынӕн ӕфсон нӕ уыдзӕн. 6 Афтӕ лӕппуты дӕр ахуыр кӕн хиуыл хӕцыныл. 7 Алы хъуыддаджы дӕр дӕхи ӕвдис фӕзминагӕй. Аккаг хуызы амон ӕцӕгад – мацы дзы аппар ӕмӕ йӕм мацы бафтау. 8 Дӕ ныхас уӕд раст, йӕ ныхмӕ сдзурын куыд ничи фӕраза, ныхмӕлӕууӕгӕн махӕй ӕвзӕр зӕгъын йӕ бон куыд нӕ бауа ӕмӕ куыд фӕхудинаг уа. 9 Цагъартӕн фӕдзӕхс, цӕмӕй кӕсой сӕ хицӕутты коммӕ, алы хъуыддаджы дӕр сын ӕлхӕной сӕ зӕрдӕ, фӕстӕмӕ сӕм ма дзурой, 10 Сӕ мулкӕй сын ма давой, кӕддӕриддӕр сыл уой иузӕрдион. Уадз ӕмӕ сеппӕт цардӕй кадджын кӕной нӕ Ирвӕзынгӕнӕг Хуыцауы ахуырад. 11 Ӕппӕт адӕмы фервӕзынӕн раргом Хуыцауы хорзӕх, 12 Ӕмӕ мах ахуыр кӕны ӕнӕхуыцау цард ӕмӕ зӕххон мондӕгтӕ ныууадзыныл, ӕмӕ ацы дунейы хӕдӕфсармӕй, рӕстӕй ӕмӕ Хуыцауӕн фӕндиагӕй цӕрыныл. 13 Уыцы хорзӕхы руаджы мах зӕрдӕдаргӕйӕ ӕнхъӕлмӕ кӕсӕм, не стыр Хуыцау ӕмӕ Ирвӕзынгӕнӕг Йесо Чырыстийы намыс кӕд раргом уыдзӕн, уыцы тӕхудиаджы бонмӕ. 14 Чырысти нӕ сӕраппонд Йӕхи ӕрхаста нывондӕн, цӕмӕй нӕ фервӕзын кӕна алы тӕригъӕдӕй дӕр ӕмӕ Йӕхицӕн ссыгъдӕг кӕна, хорз хъуыддӕгтӕм чи тырндзӕн, ахӕм адӕм. 15 Ӕппӕт уыдӕттыл ахуыр кӕн уырнджыты, ныфс сӕ уадз ӕмӕ сын сӕ цӕстмӕ дар барджынӕй, алчидӕр дын аргъ куыд кӕна, афтӕ.

Титмӕ 3

1 Сӕ зӕрдыл сын лӕууын кӕн, цӕмӕй коммӕ кӕсой хицӕуттӕ ӕмӕ ӕлдариуӕггӕнджытӕн, алы хорз хъуыддагмӕ дӕр уой цӕттӕ, 2 Макӕй фыдгой кӕной, ма уой загъдгӕнаг, фӕлӕ алкӕимӕ дӕр уой ӕвӕлмас ӕмӕ сӕрныллӕг. 3 Мах нӕхӕдӕг дӕр кӕддӕр уыдыстӕм ӕнӕмбаргӕ, хивӕнд, дзӕгъӕл адӕм, чъизи мондӕгты ӕмӕ алы ирхӕфсӕнты цагъартӕ, уыдыстӕм фыдзӕрдӕ, хӕлӕг, цъаммар, кӕрӕдзийӕ уыдтам не сӕфт. 4 Фӕлӕ нӕ Ирвӕзынгӕнӕг Хуыцау хӕрзаудӕнгӕнӕг ӕмӕ адӕмуарзон кӕй у, уый куы раргом, 5 Уӕд нӕ фервӕзын кодта, хорз хъуыддӕгтӕ нӕм цыма уыди, уый фӕрцы нӕ, фӕлӕ Йӕ хорзӕхмӕ гӕсгӕ – ӕхсад ӕрцыдыстӕм ног цард дӕттӕг донӕй ӕмӕ Сыгъдӕг Уды фӕрцы систӕм ног адӕм. 6 Уыцы Удӕй нын нӕ Ирвӕзынгӕнӕг Йесо Чырыстийы руаджы Хуыцау радта рӕдауӕй, 7 Цӕмӕй Йӕ хорзӕхы фӕрцы сраст уӕм ӕмӕ нӕ зӕрдӕ дарӕм Хуыцауӕй мыггагмӕйы цард райсыныл. 8 Ацы ныхас ӕцӕг у. Мӕн уый фӕнды, ӕмӕ адӕмы ӕнувыдӕй ахуыр кӕнай ӕппӕт уыдӕттыл, цӕмӕй Хуыцауыл чи баууӕндыд, уыдон сӕхи зӕрдиагӕй хъарой хорз хъуыддӕгтӕ аразыныл. Уый хорз у ӕмӕ адӕмӕн уыдзӕни пайда. 9 Рагфыдӕлты хӕдзарвӕндӕгты тыххӕй ӕнӕсӕрфат ранымай-банымайӕ, Моисейы Ӕгъдауы фӕдыл быцӕутӕй ӕмӕ загъдӕй та дӕхи хиз – дзӕгъӕлы ӕмӕ ӕнӕпайда сты. 10 Мӕнгахуырадыл чи лӕууы, уымӕн иу ӕмӕ дыууӕ хатты куы бамбарын кӕнай, уӕд дын йемӕ иумӕйагӕй мацыуал уӕд. 11 Ӕмӕ зон, ахӕм адӕймаг кӕй фехӕлд ӕмӕ тӕригъӕды кӕй бафтыд, ӕмӕ уымӕй йӕхӕдӕг йӕхицӕн тӕрхон кӕй рахаста, уый. 12 Артемайы кӕнӕ дӕм Тихикы куы арвитон, уӕд бацархай Никополмӕ мӕм ӕрцӕуыныл. Уымӕн ӕмӕ зымӕг уым арвитын ис мӕ зӕрды. 13 Тӕрхоны хъуыддӕгты дӕсны Зинайы ӕмӕ Аполлосы зӕрдиагӕй срӕвдз кӕн фӕндагмӕ, хъуаг куыд ницӕмӕй баййафой, афтӕ. 14 Уадз ӕмӕ мах уырнджытӕ дӕр сахуыр уой, ӕххуысы сӕр кӕм хъӕуы, уым ӕнувыдӕй хорз хъуыддӕгтӕ аразыныл, науӕд сӕ уырнындзинад уыдзӕн ӕнӕпайда. 15 Саламтӕ дын дӕттынц, мемӕ чи ис, уыдон иууылдӕр. Саламтӕ ратт, мах чи уарзы, уыцы уырнджытӕн. Хуыцауы хорзӕх уеппӕты дӕр уӕд.

Филимонмӕ 1

1 Павелӕй, Йесо Чырыстийы сӕраппонд ахӕстӕй, ӕмӕ ӕфсымӕр Тимофейӕ – нӕ уарзон ӕмкусӕг Филимонмӕ, 2 Нӕ [уарзон] хо Апфиамӕ, не 'мтохгӕнӕг Архиппмӕ, ӕмӕ дӕ хӕдзары цы аргъуан ӕмбырд кӕны, уымӕ. 3 Хорзӕх ӕмӕ уын фарн нӕ Фыд Хуыцауӕй ӕмӕ Хицау Йесо Чырыстийӕ. 4 Ӕз ӕдзух бузныг фӕзӕгъын мӕ Хуыцауӕн, мӕ куывды дӕу тыххӕй дӕр куы фӕкувын, уӕд. 5 Уымӕн ӕмӕ ӕз хъусын, Хицау Йесойыл куыд тынг ӕууӕндыс, ӕппӕт сыгъдӕджыты цы уарзтӕй уарзыс, уый тыххӕй. 6 Ӕз кувын, немӕ дын иумӕйаг цы уырнындзинад у, цӕмӕй уый ахъаз уа, Чырыстийы сӕраппонд хорзӕй саразын нӕ бон цы у, уый базонынӕн. 7 Дӕ уарзт нын ӕрхаста стыр цин ӕмӕ нӕ ныфс бауагъта, уымӕн ӕмӕ ды, ме 'фсымӕр, барӕвдыдтай сыгъдӕджыты зӕрдӕтӕ. 8 Уымӕ гӕсгӕ, дӕуӕн цы саразын ӕмбӕлы, кӕд мӕм Чырыстийӕ уыцы бардзырд раттыны бар ис, 9 Уӕддӕр дӕ уарзондзинады сӕраппонд хуыздӕрыл нымайын дӕумӕ ӕрхатын. Ӕз, зӕронд Павел, ныр та ма Йесо Чырыстийы сӕраппонд ахст лӕг дӕр, 10 Хатын дӕумӕ, ахӕстоны куы уыдтӕн, уӕд мӕ хъӕбул чи сси, уыцы Онисимы тыххӕй. 11 Кӕддӕр дын уый пайда нӕ уыди, ныр та дӕуӕн дӕр ӕмӕ мӕнӕн дӕр пайда у. Ӕмӕ дӕм ӕй ӕрвитын фӕстӕмӕ, 12 Цыма дын мӕ зӕрдӕ дӕттын, афтӕ. 13 Хъавыдтӕн ӕй мемӕ ныууадзынмӕ, фарны уацы сӕраппонд цалынмӕ ахӕстоны дӕн, уӕдмӕ мын дӕ бӕсты ӕххуыс куыд кодтаид. 14 Фӕлӕ мӕ де 'вастӕй ницы бакӕнын бафӕндыди, цӕмӕй дӕ уыцы хорз хъуыддаг ӕнӕбары ма рауайа, фӕлӕ барвӕндонӕй. 15 Дӕуӕй цыбыр ӕмгъуыдмӕ, чи зоны, уый тыххӕй фӕхицӕн, цӕмӕй йыл сӕмбӕлай ӕхсызгонӕй ӕмӕ мыггагмӕ уа демӕ, 16 Ӕмӕ дын цагъар мауал уа, фӕлӕ цагъарӕй уӕлдӕр – уарзон ӕфсымӕр. Ӕз ӕй бирӕ уарзын, ды та йӕ ноджы фылдӕр бауарздзынӕ, канд адӕймагау нӕ, фӕлӕ Хицауимӕ кӕй ис, уый тыххӕй дӕр. 17 Уӕдӕ кӕд мемӕ ӕмзӕрдӕ дӕ, уӕд ыл баузӕл, мӕныл куыд баузӕлис, афтӕ. 18 Кӕд истӕмӕй дӕ хъыджы бацыди, кӕнӕ дӕ исты дары, уӕд ӕй нымай мӕ хӕсыл. 19 Ӕз, Павел, фыссын мӕхи къухӕй: бафиддзынӕн дын ӕй. Ды мӕнӕй цы дарыс – уый дӕхӕдӕг дӕ, ӕмӕ дын уыцы хӕсы кой нӕ кӕнын. 20 Уӕдӕ, ме 'фсымӕр, мӕн фӕнды, Хицауимӕ кӕй стӕм, уымӕ гӕсгӕ дӕуӕй пайда райсын; Чырыстийы сӕраппонд барӕвдау мӕ зӕрдӕ. 21 Ӕз дӕм ныффыстон, кӕй мӕм байхъусдзынӕ, ууыл фидарӕй ӕууӕндгӕйӕ. Цӕй тыххӕй дын загътон, уымӕй фылдӕр кӕй сараздзынӕ, уый зонын. 22 Уыимӕ ма мын ӕрцӕттӕ кӕн уат дӕр. Уымӕн ӕмӕ мӕ зӕрдӕ дарын, Хуыцау дзуапп кӕй ратдзӕн уӕ куывдӕн ӕмӕ мӕ кӕй балӕвар кӕндзӕн сымахӕн. 23 Саламтӕ дын дӕттынц, Йесо Чырыстийы сӕраппонд мемӕ ахӕстоны чи ис, уыцы Эпафрас, 24 Стӕй ме 'мкусджытӕ Марк, Аристарх, Димас ӕмӕ Лука. 25 Нӕ Хицау Йесо Чырыстийы хорзӕх уемӕ уӕд.

Дзуттӕгтӕм 1

1 Хуыцау бирӕ хӕттыты ӕмӕ алы хуызты рагӕй-ӕрӕгмӕ нӕ фыдӕлтимӕ ныхас кодта пехуымпарты дзыхӕй. 2 Абон та, рӕстӕджы кӕрон, немӕ дзырдта, дун-дуне Кӕй фӕрцы сфӕлдыста ӕмӕ ӕппӕтӕн дӕр бындарӕй Кӕй сӕвӕрдта, Йӕ уыцы Фырты дзыхӕй. 3 Фырт у Хуыцауы намысы тӕмӕнкалгӕ рухс; Фыды ӕмӕ Фырты ӕрдзыхъӕд иу у. Фырт ӕппӕтыл дӕр хӕцы Йӕ тыхджын ныхасӕй; мах ссыгъдӕг кодта тӕригъӕдтӕй ӕмӕ уӕлӕрвты сбадти Дунедарӕджы рахиз фарс. 4 Хуыцау Ын цы ном радта, уый зӕдты нӕмттӕй цас кадджындӕр у, уыйбӕрц Фырт фӕуӕлдӕр уыдонӕй. 5 Уымӕн ӕмӕ Хуыцау зӕдтӕй кӕд кӕмӕн загъта: «Ды Мӕ Фырт дӕ, Ды Мын абон райгуырдтӕ»? Ӕмӕ ноджыдӕр: «Ӕз Йӕ Фыд уыдзынӕн, Уый та Мӕ Фырт уыдзӕн»? 6 Йӕ иунӕг Фырты дунемӕ хонгӕйӕ та Хуыцау загъта: «Табу Йын кӕнӕнт Хуыцауы ӕппӕт зӕдтӕ». 7 Зӕдты тыххӕй Сыгъдӕг Фысты загъд у: «Дӕ зӕдты фестын кӕныс дымгӕтӕ, Дӕ цумагӕнӕнты – пиллон арт». 8 Фырты тыххӕй та афтӕ загъд у: «Ды, Хуыцау, паддзахиуӕг кӕндзынӕ мыггагмӕ, Ды раст ӕлдариуӕг кӕныс Дӕ Паддзахады. 9 Ды бауарзтай рӕстдзинад ӕмӕ Дын ӕнӕуынон у тӕригъӕд. Уымӕ гӕсгӕ Дӕу, Хуыцау, Дӕ Хуыцау де 'мбӕлттӕй уӕлдӕр сӕвӕрдта; байсӕрста Дӕ циндӕттӕг зетийӕ». 10 Ноджыдӕр загъд у: «Раздӕр Ды, Хицау, бындур ӕрӕвӕрдтай зӕххӕн, ӕмӕ арв дӕр Ды сфӕлдыстай. 11 Уыдонӕн ӕрцӕудзӕни кӕрон, Ды та дӕ ӕмӕ уыдзынӕ мыггагмӕ. Ӕппӕт дӕр ныххӕррӕгъ уыдзӕни дарӕсау, 12 Ды сӕ стухдзынӕ пӕлӕзау, ӕмӕ сӕ раивдӕуыдзӕн дарӕсау. Ды та цы дӕ, уымӕй баззайдзынӕ, ӕмӕ Дӕ царды бонтӕ нӕ фӕуыдзысты». 13 Хуыцау зӕдтӕй кӕд кӕмӕн загъта: «Сбад Мӕ рахиз фарс, цалынмӕ Дын Де знӕгты Дӕ къӕхты бын ӕрӕвӕрон, уӕдмӕ»? 14 Зӕдтӕ сеппӕт дӕр цумагӕнӕн удтӕ не сты, мыййаг? Ӕмӕ сӕ Хуыцау ӕрвиты, чи хъуамӕ фервӕза, уыдоны сӕраппонд балӕггад кӕнынмӕ.

Дзуттӕгтӕм 2

1 Уӕдӕ цы фехъуыстам, уымӕ хъуамӕ здахӕм уӕлдай ӕргом, цӕмӕй ма фӕдзӕгъӕл уӕм. 2 Зӕдты фӕрцы загъд цы ныхас ӕрцыд, уымӕн ӕнӕххӕстгӕнгӕ куы нӕ уыд, ӕмӕ-иу Ӕгъдау фехалыны ӕмӕ коммӕ нӕ бакӕсыны тыххӕй адӕймаг алкӕддӕр аккаг ӕфхӕрд куы баййӕфта, 3 Уӕд мах куыд баззайдзыстӕм ӕнӕфхӕрдӕй, уыцы стыр ирвӕзындзинадыл ӕнувыд куы нӕ уӕм, уӕд? Ацы ирвӕзындзинады тыххӕй фыццаг дзырдта Хицау, ӕмӕ йыл мах фидарӕй баууӕндын кодтой, Уымӕй йӕ чи фехъуыста, уыдон. 4 Уыцы уац ӕцӕг кӕй у, уый Хуыцау Йӕхӕдӕг равдыста ӕвдисӕйнӕгтӕй, диссӕгтӕй, алыхуызон домбай хъуыддӕгтӕй, Сыгъдӕг Уд цы курдиӕттӕ дӕтты, уыдонӕй Йӕхи фӕндонмӕ гӕсгӕ бахай кӕнынӕй. 5 Цы фидӕны дун-дунейы кой кӕнӕм, уый Хуыцау зӕдты дӕлбар нӕ бакодта. 6 Афтӕ кӕй у, уый тыххӕй чидӕр Сыгъдӕг Фысты загъта: «Цы у адӕймаг, ӕмӕ йыл Ды тыхсай? Кӕнӕ цы у адӕймаджы фырт, ӕмӕ йыл Ды мӕт кӕнай? 7 Цыбыр ӕмгъуыдмӕ йӕ сӕвӕрдтай зӕдтӕй дӕлдӕр, радтай йын кад ӕмӕ намыс. [Цы сфӕлдыстай, уый йын бакодтай йӕ бар.] 8 Ӕппӕт дӕр ын ӕрӕвӕрдтай йӕ къӕхты бын». Хуыцау ын ӕппӕт дӕр йӕ дӕлбар куы бакодта, уӕд ын йӕ дӕлбар цы нӕ бакодта, ахӕмӕй ницыуал ныууагъта. Ныртӕккӕ та нӕма уынӕм, ӕппӕт дӕр йӕ дӕлбар кӕй у, уый. 9 Фӕлӕ мах уынӕм, цыбыр ӕмгъуыдмӕ зӕдтӕй дӕлдӕр Кӕй сӕвӕрдӕуыд, уыцы Йесо Йӕ мӕлӕты руаджы кӕй схайджын кад ӕмӕ намысӕй. Уымӕн ӕмӕ хорзӕхджын Хуыцауы бафӕндыд, Йесо алкӕй сӕраппонд дӕр мӕлӕт куыд бавзара. 10 Ӕппӕт дӕр Кӕмӕн у ӕмӕ ӕппӕт дӕр Кӕй фӕрцы фӕзынд, уыцы Хуыцауы бафӕндыд Йӕ бирӕ хъӕбулты намысмӕ ӕрхонын. Ӕмӕ уый тыххӕй хъизӕмӕртты фӕрцы Йесойы уыдонӕн скодта алцӕмӕй дӕр ӕххӕст Ирвӕзынгӕнӕг. 11 Уымӕн ӕмӕ Сыгъдӕггӕнӕг дӕр, стӕй чи ссыгъдӕг, уыдон иууылдӕр иунӕг Хуыцауӕй сты. Уымӕ гӕсгӕ сӕ Йе 'фсымӕртӕ хонын Чырысти ӕфсӕрмыйагыл нӕ нымайы ӕмӕ зӕгъы: 12 «Дӕ ном фехъусын кӕндзынӕн Ме 'фсымӕртӕн, се 'мбырды ӕппӕлдзынӕн Дӕуӕй». 13 Ӕмӕ ноджыдӕр: «Ӕз Ыл дардзынӕн Мӕ зӕрдӕ». Ӕмӕ ноджыдӕр: «Мӕнӕ Ӕз Мӕхӕдӕг ӕмӕ Мын Хуыцау кӕй радта, Мӕ уыцы хъӕбултӕ». 14 Уӕдӕ хъӕбултӕ туг ӕмӕ стӕгӕй кӕй сты, уымӕ гӕсгӕ Чырысти дӕр сси уыдоны халдих, цӕмӕй Йӕ мӕлӕты фӕрцы мӕлӕты ӕлдары – хӕйрӕджы – ӕнӕхай фӕкӕна йӕ хъаруйӕ, 15 Ӕмӕ ссӕрибар кӕна, сӕ цӕргӕбонты мӕлӕты тасӕй цагъар чи уыд, уыдоны. 16 Кӕй зӕгъын ӕй хъӕуы, Уый райста зӕдты ӕрдзыхъӕд нӕ, фӕлӕ Авраамы байзӕддаджы ӕрдзыхъӕд. 17 Йесо алцӕмӕй дӕр хъуамӕ уыдаид Йе 'фсымӕрты хуызӕн, цӕмӕй Хуыцауы раз суа уарзӕгой ӕмӕ иузӕрдион Алчер ӕмӕ ӕрхӕсса Хуыцауимӕ фидауынгӕнӕг нывонд адӕмы тӕригъӕдты тыххӕй. 18 Ӕмӕ Йӕхӕдӕг фӕлварӕнтӕ кӕй бавзӕрста, уымӕ гӕсгӕ Йӕ бон у, фӕлварӕнты чи бахауы, уыдонӕн баххуыс кӕнын.

Дзуттӕгтӕм 3

1 Уӕдӕ, мӕ сыгъдӕг ӕфсымӕртӕ, уӕларвмӕ хуындтытӕ, уӕ зӕрдӕ саразут Хуыцауы Минӕвармӕ – ӕргомӕй кӕуыл хӕцӕм, нӕ уыцы уырнындзинады Алчер Йесомӕ. 2 Моисей Хуыцауы ӕппӕт хӕдзары куыд иузӕрдион уыд, афтӕ Йесо дӕр иузӕрдион у, Алчерӕй Йӕ Чи сӕвӕрдта, Ууыл. 3 Фӕлӕ хӕдзар саразӕг хӕдзарӕй куыд кадджындӕр у, афтӕ Йесо дӕр Моисейӕ стырдӕр намысы аккаг у. 4 Уымӕн ӕмӕ алы хӕдзарӕн дӕр ис аразӕг, фӕлӕ ӕппӕт дӕр Хуыцау сарӕзта. 5 Моисей иузӕрдион уыди Хуыцауы ӕппӕт хӕдзары, фӕлӕ лӕггадгӕнӕгау, цӕмӕй ӕвдисӕн уа, фидӕны цы загъд уыдзӕн, уымӕн. 6 Чырысти та Фыртау ӕнувыд у. Ӕвӕрд ӕрцыд Хуыцауы ӕппӕт хӕдзары сӕргъы, уыцы хӕдзар та мах стӕм, ныфсджын куы уӕм ӕмӕ цы зӕрдӕдарӕнӕй ӕппӕлӕм, ууыл ӕнувыд куы разынӕм, уӕд. 7 Сыгъдӕг Уд афтӕ зӕгъы: «Абон Хуыцауы хъӕлӕс куы фехъусат, 8 Уӕд уӕ зӕрдӕтӕ ма ныддур кӕнут, уӕ фыдӕлтӕ ӕдзӕрӕг бӕстӕйы Йӕ ныхмӕ куы сыстадысты ӕмӕ Йӕ куы фӕлвӕрдтой, уӕдау. 9 Фӕлвӕрдтой Мӕ уым, къахтой Мӕ, ӕмӕ дыууиссӕдз азы дӕргъы уыдтой Мӕ хъуыддӕгтӕ. 10 Уымӕ гӕсгӕ Ӕз смӕсты дӕн уыцы фӕлтӕрмӕ ӕмӕ загътон: сӕ зӕрдӕтӕ ӕдзух адзӕгъӕл вӕййынц, нӕ базыдтой Мӕ фӕндӕгтӕ. 11 Ӕмӕ Ӕз мӕстӕлгъӕдӕй расомы кодтон: уыдон Мӕ фӕлладуадзӕнмӕ никуы бацӕудзысты». 12 Уӕдӕ кӕсут уӕхимӕ, ӕфсымӕртӕ, ахӕм ӕвзӕр ӕмӕ хивӕнд зӕрдӕ уӕ макӕмӕн разынӕд, ӕмӕ Цардӕгас Хуыцауы ныууадза. 13 Фӕлӕ ма цалынмӕ «абон» дзурӕн ис, уӕдмӕ ӕрвылбон ныфс дӕттут кӕрӕдзийӕн, цӕмӕй тӕригъӕд макӕй асайа сымахӕй ӕмӕ йӕ зӕрдӕ макӕмӕн ныддур уа. 14 Уымӕн ӕмӕ мах Чырыстиимӕ ӕмхайджынтӕ стӕм, райдианы нӕм цы уырнындзинад уыди, ууыл кӕронмӕ фидарӕй куы хӕцӕм, уӕд. 15 Сыгъдӕг Фыст дӕр афтӕ зӕгъы: «Абон Хуыцауы хъӕлӕс куы фехъусат, уӕд уӕ зӕрдӕтӕ ма ныддур кӕнут, уӕ фыдӕлтӕ Йӕ ныхмӕ куы сыстадысты, уӕдау». 16 Уымӕн ӕмӕ Моисей Мысырӕй кӕй ракодта, уыдон Хуыцауы хъӕлӕс куы фехъуыстой, уӕд Йӕ ныхмӕ сыстадысты, ӕрмӕст сеппӕт нӕ. 17 Дыууиссӕдз азы дӕргъы Хуыцауы маст кӕмӕ фыхти? Тӕригъӕды чи бафтыд ӕмӕ се стджытӕ ӕдзӕрӕг бӕстӕйы кӕмӕн баззадысты, уыдонмӕ Йын нӕ фыхти, ӕви? 18 Ӕгоммӕгӕстӕй дарддӕр кӕмӕн расомы кодта Хуыцау, Мӕ фӕлладуадзӕнмӕ никуы бацӕудзысты, зӕгъгӕ? 19 Уӕдӕ мах уынӕм: хивӕнд кӕй уыдысты, уый тыххӕй сын нӕ бантыст бацӕуын.

Дзуттӕгтӕм 4

1 Уӕдӕ Хуыцауы фӕлладуадзӕнмӕ бацӕуыны тыххӕй зӕрдӕвӕрд цалынмӕ йӕ тыхы ис, уӕдмӕ тӕрсӕм, цӕмӕй сымахӕй уыцы фӕлладуадзӕнӕй ӕнӕхай мачи фӕуа. 2 Уымӕн ӕмӕ фарны уац уыдон куыд фехъуыстой, мах дӕр ӕй афтӕ фехъуыстам. Фӕлӕ цы ныхас фехъуыстой, уый сын пайда не 'рхаста, уымӕн ӕмӕ йыл нӕ баууӕндыдысты. 3 Мах та йыл баууӕндыдыстӕм ӕмӕ цӕуӕм Хуыцауы фӕлладуадзӕнмӕ, Уый куыд загъта, афтӕ: «Ӕз мӕстӕлгъӕдӕй расомы кодтон: уыдон Мӕ фӕлладуадзӕнмӕ никуы бацӕудзысты». Хуыцау та Йӕ хъуыддӕгтӕ арӕзт фӕци, дуне куы сфӕлдыста, уӕд. 4 Уымӕн ӕмӕ ӕвдӕм боны тыххӕй кӕмдӕр афтӕ загъд у: «Ӕмӕ ӕвдӕм бон Хуыцау ӕрӕнцад Йеппӕт хъуыддӕгтӕй». 5 Уыимӕ ма ноджыдӕр загъд у: «Уыдон Мӕ фӕлладуадзӕнмӕ никуы бацӕудзысты». 6 Уӕдӕ ма йӕм чидӕртӕ хъуамӕ бацӕуой. Раздӕр фарны уац чи фехъуыста, уыдон сӕ хивӕнды аххосӕй кӕй нӕ бацыдысты, 7 Уымӕ гӕсгӕ ма Хуыцау ноджыдӕр дӕтты бӕлвырд афон – «абон». Уый тыххӕй бирӕ рӕстӕджы фӕстӕ загъта Давиды дзыхӕй, уӕлдӕр куыд загъд у, афтӕ: «Абон Хуыцауы хъӕлӕс куы фехъусат, уӕд уӕ зӕрдӕтӕ ма ныддур кӕнут». 8 Нуны фырт Йесо сын ӕнцой куы ӕрхастаид, уӕд уый фӕстӕ Хуыцау ӕндӕр боны тыххӕй нал загътаид. 9 Уӕдӕ Хуыцауы адӕмӕн нырма ӕрцӕудзӕни фӕлладуадзӕн сабат. 10 Хуыцауы фӕлладуадзӕнмӕ чи бацыд, уый йӕхӕдӕг дӕр ӕрӕнцад йӕ хъуыддӕгтӕй, Хуыцау Йӕ хъуыддӕгтӕй куыд ӕрӕнцад, афтӕ. 11 Уӕдӕ бацархайӕм уыцы фӕлладуадзӕнмӕ бацӕуыныл, цӕмӕй мачи бафӕзма хивӕндты ӕмӕ сӕ хал ма ахӕра. 12 Уымӕн ӕмӕ Хуыцауы ныхас у цӕрдуд ӕмӕ хъомысджын, цавӕрфӕнды дыком цирхъӕй цыргъдӕр: уый ахъары афтӕ, ӕмӕ кӕрӕдзийӕ фӕхицӕн кӕны зӕрдӕ ӕмӕ уд, ӕрхӕджытӕ ӕмӕ стджыты магъз, тӕрхон кӕны сусӕг фӕндтӕ ӕмӕ хъуыдытӕн. 13 Ӕмӕ Хуыцау кӕй сфӕлдыста, уыдонӕй Дзы сусӕг ничи у. Ӕппӕт дӕр Ын ӕргом у – дзуапп Уымӕн ратдзыстӕм. 14 Уӕдӕ махӕн ис, уӕлӕрвтыл Чи ахызти, уыцы стыр Алчер Йесо, Хуыцауы Фырт, ӕмӕ фидар ныххӕцӕм, ӕргомӕй цӕуыл ӕууӕндӕм, ууыл. 15 Нӕ Алчер ахӕм нӕу, нӕ лӕмӕгъдзинӕдтӕ нын Чи нӕ бамбара, уымӕн ӕмӕ Уый дӕр, махау, бавзӕрста ӕппӕт фӕлварӕнтӕ, фӕлӕ тӕригъӕд нӕ ракодта. 16 Уымӕ гӕсгӕ ныфсджынӕй балӕууӕм, хорзӕх кӕцӕй цӕуы, Хуыцауы уыцы бадӕны раз, цӕмӕй нын уа хатыр ӕмӕ бахъуаджы рӕстӕг ӕххуысӕн райсӕм хорзӕх.

Дзуттӕгтӕм 5

1 Уымӕн ӕмӕ алы алчеры дӕр адӕмӕй сӕвзӕрстӕуы, адӕмы сӕраппонд ӕй сӕвӕрдӕуы Хуыцауӕн кусӕгӕй, тӕригъӕдты тыххӕй хуынтӕ ӕмӕ нывондтӕ куыд хӕсса. 2 Йӕ бон у, чи фӕдзӕгъӕл, уыцы ӕнӕфендтыл ӕрвӕссын, уымӕн ӕмӕ йӕхӕдӕг дӕр лӕмӕгъ у. 3 Уымӕ гӕсгӕ адӕмы тӕригъӕдты ӕмрӕнхъ йӕхи тӕригъӕдты тыххӕй дӕр хъуамӕ хӕсса нывондтӕ. 4 Ӕмӕ ахӕм стыр бынаты йӕхи ничи сӕвӕрдзӕн – Хуыцау ӕй хъуамӕ сӕвзара, Аароны куыд сӕвзӕрста, афтӕ. 5 Чырысти дӕр Алчеры намыс Йӕхӕдӕг нӕ радта Йӕхицӕн, фӕлӕ Йын афтӕ Чи загъта: «Ды Мӕ Фырт дӕ, Ды Мын абон райгуырдтӕ», Уый Йын ӕй радта, 6 Ӕндӕр ран дӕр ма куыд загъд у, афтӕ: «Ды Мелхиседекы хуызӕн Алчер дӕ мыггагмӕ». 7 Уый ма зӕххыл куы уыди, уӕд, дзыназгӕйӕ ӕмӕ цӕссыг калгӕйӕ, куывта ӕмӕ куырдта, мӕлӕтӕй Йӕ фервӕзын кӕнын Кӕй бон уыди, уыцы Хуыцауӕй, ӕмӕ Йӕ Уый фехъуыста, кӕй Йӕ нымадта, уый тыххӕй. 8 Кӕд Хуыцауы Фырт уыди, уӕддӕр тухӕнты фӕрцы сси коммӕгӕс, 9 Сӕххӕст алцӕмӕй дӕр, ӕмӕ Йеппӕт коммӕгӕстӕн фестад мыггагмӕйы ирвӕзындзинады гуырӕн. 10 Ӕмӕ Йӕ Хуыцау расидти Мелхиседекы хуызӕн Алчерӕй. 11 Уый тыххӕй ма нын бирӕ дзурын ӕмбӕлы, фӕлӕ нын зын у сымахӕн ӕй бамбарын кӕнын, уымӕн ӕмӕ хъусынхъом нал стут. 12 Цас рӕстӕг рацыд, уымӕ гӕсгӕ ныр ахуыргӕнджытӕ хъуамӕ уаиккат, сымахӕн та хъӕуы, цӕмӕй уын исчи ногӕй амона Хуыцауы ныхасы абетӕ; хъӕбӕр хойраг нӕ, фӕлӕ та уӕ ногӕй ӕхсыр хъӕуы. 13 Йӕ хойраг ӕхсыр кӕмӕн у, уый раст цы у, уымӕн ницы ӕмбары, уымӕн ӕмӕ нырма дзидзидай у. 14 Чи бахъомыл, йӕ фӕлтӕрддзинады фӕрцы хорз ӕмӕ фыдӕх хицӕн кӕнынмӕ чи арӕхсы, хъӕбӕр хойраг уыдонӕн у.

Дзуттӕгтӕм 6

1 Уӕдӕ ныууадзӕм Чырыстийы ахуырады абетӕ ӕмӕ не 'ргом аздахӕм, хъомылӕн цы ӕмбӕлы, уымӕ. Ма бавналӕм ногӕй бындур ӕвӕрынмӕ – мауал ахуыр кӕнӕм мӕлӕтхӕссӕг хъуыддӕгтыл ӕрфӕсмон кӕныныл ӕмӕ Хуыцауыл ӕууӕндыныл, 2 Алыхуызон аргъуыдтыл, къухтӕ ӕрӕвӕрыныл, мӕрдты райгасыл ӕмӕ мыггагмӕйы тӕрхон рахӕссыныл. 3 Нӕ фӕлӕ Хуыцау фадат куы ратта, уӕд нӕ къухы бафтдзӕни дарддӕр ацӕуын. 4 Уымӕн ӕмӕ иу хатт рухс кӕй зӕрдӕйы ссыгъдӕуыд, уӕларвон хорзӕхы ад чи базыдта ӕмӕ Сыгъдӕг Удӕй чи схайджын, 5 Хуыцауы ныхас куыд арфӕйаг у, уый чи базыдта, фидӕны дунейы цы тых ӕвдыст ӕрцӕудзӕн, уый чи банкъардта, 6 Ӕмӕ уый фӕстӕ уырнындзинад чи ныууагъта, уыдонӕн дыккаг хатт фӕсмонмӕ ӕркӕнӕн нал ис, уымӕн ӕмӕ Хуыцауы Фырты ногӕй сӕ зӕрдӕты байтындзынц дзуарыл ӕмӕ Йӕ ӕгад кӕнынц. 7 Бирӕ къӕвдатӕй ӕфсӕст ӕмӕ йӕм чи зилы, уыдонӕн цардыхосы зайӕгхал дӕттӕг зӕхх арфӕгонд вӕййы Хуыцауӕй; 8 Сындз ӕмӕ пыхсы бын чи фӕвӕййы, уыцы зӕхх та ницӕмӕн бӕззы ӕмӕ у ӕлгъыстӕввонг, ӕппынфӕстаг арты амӕддаг бауыдзӕн. 9 Ӕниу, кӕд дзургӕ афтӕ кӕнӕм, мӕ уарзон хӕлӕрттӕ, уӕддӕр ӕууӕндӕм, сымах хуыздӕр уавӕры кӕй стут ӕмӕ ирвӕзындзинады фӕндагыл кӕй цӕут, ууыл. 10 Уымӕн ӕмӕ Хуыцау раст у, ӕмӕ Дзы нӕ ферох уыдзӕн, сыгъдӕджытӕн цы лӕггад бакодтат ӕмӕ кӕнут, уымӕй Йӕ кадӕн цы фӕллой ӕмӕ уарзондзинад равдыстат, уый. 11 Мах бӕллӕм, цӕмӕй уӕ алчидӕр кӕронмӕ баззайа ахӕм ӕнувыдӕй ӕмӕ ӕххӕстӕй райса, йӕ зӕрдӕ цӕуыл дары, уый. 12 Ма сут зивӕггӕнаг, фӕлӕ фӕзмут, Хуыцау зӕрдӕ цӕмӕй бавӕры, уый уырнындзинады ӕмӕ фӕразоны фӕрцы чи райсы, уыдоны. 13 Хуыцау Авраамӕн зӕрдӕ куы ӕвӕрдта, уӕд ын Йӕхицӕй сомы кодта, уымӕн ӕмӕ Йӕхицӕй уӕлдӕр кӕмӕй расомы кодтаид, ахӕм нӕ уыди. 14 Хуыцау загъта: «Ӕцӕгӕй дӕ Мӕ арфӕты бын фӕкӕндзынӕн ӕмӕ дын ратдзынӕн тынг бирӕ цот». 15 Ӕмӕ фӕразонӕй бирӕ фенхъӕлмӕ кӕсыны фӕстӕ Авраам райста, Хуыцау ын зӕрдӕ цӕмӕй бавӕрдта, уый. 16 Адӕм сомы кӕнынц сӕхицӕй уӕлдӕрӕй, ӕмӕ сӕ ныхас раст кӕй у, уымӕн ӕвдисӕн вӕййы сӕ уыцы сомы, ӕмӕ уӕд алы быцӕуӕн дӕр ӕрцӕуы кӕрон. 17 Афтӕ Хуыцау дӕр Йӕ зӕрдӕвӕрд сфидар кодта сомыйӕ; зӕрдӕ сын цӕмӕй бавӕрдта, уый чи хъуамӕ райстаид, уыдонӕн Йӕ сомыйӕ бӕлвырд равдыста, Йӕ фӕндон кӕй никуы аивдзӕн, уый. 18 Хуыцауы зӕрдӕвӕрд ӕмӕ сомыйӕн ивӕн нӕй, ӕмӕ дзы Хуыцауы бон мӕнг зӕгъын нӕу. Йӕ уыцы дыууӕ хъуыддаджы махӕн дӕттынц стыр ныфс, ӕмӕ мах, Хуыцауы дӕлбазыр ӕмбӕхсӕн ссарджытӕ, фидар хӕцӕм, зӕрдӕ нын цӕмӕй бавӕрдта, ууыл. 19 Уыцы зӕрдӕдарӕн махӕн у науӕнгуырау ӕдас ӕмӕ фидар, ӕмӕ кӕны фӕсӕмбӕрзӕнмӕ – Иууылсыгъдӕг Бынатмӕ, 20 Мелхиседекы хуызӕн Алчер мыггагмӕ Чи сси, уыцы Йесо нӕ сӕраппонд фӕндагамонӕгӕй кӕдӕм бацыди, уырдӕм.

Дзуттӕгтӕм 7

1 Мелхиседек уыди Салимы паддзах, Дунедарӕг Хуыцауы алчер. Паддзӕхты ныддӕрӕн кӕныны фӕстӕ Авраам куы ӕрбацӕйздӕхт, уӕд Мелхиседек рацыд йӕ размӕ ӕмӕ йыл Хуыцауы арфӕ бафтыдта. 2 Авраам уымӕн алцӕмӕй дӕр рахицӕн кодта дӕсӕймаг хай. Йӕ ном «Мелхиседек» амоны «Рӕстады паддзах»; уый у Салимы паддзах, ома, «Фарны паддзах». 3 Мелхиседекӕн нӕй фыд, мад, фыдӕлтӕ, йӕ цардӕн нӕй райдайӕн ӕмӕ кӕрон. Хуыцауы Фырты хуызӕн уӕвгӕйӕ, уый у алчер мыггагмӕ. 4 Уынут, нӕ рагфыдӕл Авраам паддзӕхтӕй цы байста, уыдонӕн сӕ хуыздӕр дӕсӕймаг хай кӕмӕн радта, уый куыд цытджын у! 5 Сауджынтӕ чи свӕййы, Левийы уыцы байзӕддагӕн Ӕгъдаумӕ гӕсгӕ ис адӕмӕй, ома, се 'фсымӕртӕй, дӕсӕймаг хай ӕмбырд кӕныны бар, кӕд се 'фсымӕртӕ дӕр Авраамы байзӕддаг сты, уӕддӕр. 6 Мелхиседек та Левийы хӕдзарвӕндагӕй нӕ уыди, фӕлӕ райста дӕсӕймаг хай Авраамӕй – Хуыцау зӕрдӕ кӕмӕн бавӕрдта, уымӕй – ӕмӕ йыл арфӕ бафтыдта. 7 Хуыцауы арфӕ кӕуыл бафтыдӕуы, уымӕй арфӕгӕнӕг уӕлдӕр кӕй у, уый та гуырысхойаг никӕмӕн у. 8 Уыимӕ дӕсӕймаг хай чи исы, Левийы уыцы байзӕддӕгтӕ ӕнӕ мӕлгӕ не сты, Мелхиседекы тыххӕй та Сыгъдӕг Фыст зӕгъы, удӕгас у, зӕгъгӕ. 9 Ис афтӕ зӕгъӕн дӕр: Авраам дӕсӕймаг хай Мелхиседекӕн куы радта, уӕд ма йын ӕй радта, дӕсӕймаг хай Израилы кӕй байзӕддӕгтӕ исынц, уыцы Левий дӕр. 10 Уымӕн ӕмӕ Мелхиседек Авраамы размӕ куы рацыд, уӕд Левий кӕд гуырд нӕма уыд, уӕддӕр ныридӕгӕн йӕ фыдӕлы туджы уыд. 11 Сауджынты – Левийы байзӕддӕгты лӕггад уыд адӕмӕн лӕвӕрд Ӕгъдауы бындур. Алцыдӕр уыдоны фӕрцы куы сӕнаипп уыдаид, уӕд ма цӕмӕн хъуыди, Аароны хуызӕн нӕ, фӕлӕ Мелхиседекы хуызӕн у, зӕгъгӕ, Кӕй тыххӕй загъд у, ахӕм ӕндӕр Алчер? 12 Сауджынты лӕггад ӕндӕрӕй куы баивдӕуа, уӕд Ӕгъдау дӕр хъуамӕ ӕнӕмӕнг баивдӕуа. 13 Ӕппӕт уыдӕттӕ Кӕй тыххӕй загъд сты, Уый, нӕ Хицау, ӕндӕр хӕдзарвӕндагӕй у – уыцы хӕдзарвӕндагӕй нывондхӕссӕны цур ничи лӕггад кодта. 14 Нӕ Хицау хурау Иудӕйы хӕдзарвӕндагӕй кӕй скасти, уый бӕлвырд у. Уыцы хӕдзарвӕндагӕй сауджынтӕ кӕй уыдзӕни, Моисей уый тыххӕй ницы загъта. 15 Фӕлӕ ивддзинад ноджы фӕбӕлвырддӕр, Мелхиседекы хуызӕн ӕндӕр Алчер куы ӕрцыд, уӕд. 16 Ӕмӕ Уый Алчер сси, бӕлвырд хӕдзарвӕндагӕй рацӕуын чи домдта, уыцы Ӕгъдаумӕ гӕсгӕ нӕ, фӕлӕ ӕнӕфӕугӕ царды хъомысӕй. 17 Уый тыххӕй зӕгъы Сыгъдӕг Фыст: «Ды Мелхиседекы хуызӕн Алчер дӕ мыггагмӕ». 18 Раздӕры фӕдзӕхст та аивдӕуы, ӕдых ӕмӕ ӕнӕпайда кӕй свӕййы, уымӕ гӕсгӕ. 19 Уымӕн ӕмӕ Ӕгъдау алцӕмӕй дӕр ӕнаипп ницы скодта. Ныр та лӕвӕрд ӕрцыди, Хуыцаумӕ кӕй фӕрцы хӕстӕгдӕр кӕнӕм, ахӕм хуыздӕр зӕрдӕдарӕн. 20 Уыцы фидыд сомыйӕ фидаргонд ӕрцыд. 21 Иннӕтӕ ӕнӕ сомыйӕ систы алчертӕ, Уый та – Хуыцауы сомыимӕ: «Расомы кодта Хуыцау ӕмӕ Йӕ уынаффӕ нӕ аивдзӕн: Ды [Мелхиседекы хуызӕн] Алчер дӕ мыггагмӕ». 22 Афтӕмӕй Йесо сси хуыздӕр фидыдӕн йӕ цӕджындз. 23 Стӕй иннӕ алчертӕ бирӕ уыдысты, уымӕн ӕмӕ дзы мӕлӕт никӕмӕн лӕвӕрдта мыггагмӕ алчерӕй баззайыны фадат. 24 Йесо та мыггагмӕ кӕй цӕры, уымӕ гӕсгӕ мыггагмӕ у Алчер. 25 Ӕмӕ Йӕ фӕрцы Хуыцаумӕ чи ӕрцӕуы, уыдоны бынтон фервӕзын кӕнын Йӕ бон у, уымӕн ӕмӕ мыггагмӕ ӕгас у, цӕмӕй Хуыцауӕй кура уыдоны тыххӕй. 26 Растдӕр нын ахӕм Алчер хъуамӕ уыдаид: сыгъдӕг, фыдбылызмӕ ӕнӕмхиц, ӕнаипп, тӕригъӕдджынтӕй хицӕн ӕмӕ уӕлӕрвтӕй уӕлдӕр ссӕуӕг. 27 Уый иннӕ алчерты хуызӕн нӕу; ӕрвылбон Ӕй фыццаг Йӕхи тӕригъӕдты, уый фӕстӕ та адӕмы тӕригъӕдты тыххӕй нывондтӕ хӕссыны сӕр нӕ хъӕуы. Йесо уый бакодта иу хатт ӕмӕ мыггагмӕ, Йӕхи нывондӕн куы ӕрхаста, уӕд. 28 Уымӕн ӕмӕ Ӕгъдау алчертӕй ӕвӕры лӕмӕгъ адӕймӕгты; Ӕгъдау раттыны фӕстӕ Хуыцау цы сомы ракодта, уымӕ гӕсгӕ та Алчерӕй сӕвӕрдӕуыд, мыггагмӕ алцӕмӕй дӕр Чи сӕххӕст, уыцы Фырты.

Дзуттӕгтӕм 8

1 Нӕ ныхасы сӕр та мӕнӕ уый у: махӕн ис, уӕлӕрвты Дунедарӕджы рахиз фарс Чи сбадт, ахӕм Алчер. 2 Уый лӕггад кӕны ӕцӕг кувӕндоны – адӕймаг нӕ, фӕлӕ Хуыцау кӕй сарӕзта, уыцы Сыгъдӕг Цатыры. 3 Алы алчеры дӕр сӕвӕрдӕуы хуынтӕ ӕмӕ нывондтӕ ӕрхӕссынӕн. Уымӕ гӕсгӕ хъуыди, цӕмӕй Уымӕ дӕр уыдаид, нывондӕн цы ӕрхастаид, уый. 4 Уый зӕххыл куы уаид, уӕд Алчер дӕр нӕ уыдаид. Уымӕн ӕмӕ Ӕгъдаумӕ гӕсгӕ нывондтӕ чи хӕссы, ам, зӕххыл, ахӕм алчертӕ ис. 5 Уыдон лӕггад кӕнынц, уӕларвы цы ис, уымӕн ӕрмӕстдӕр йӕ фӕлгонц ӕмӕ йӕ аууон чи у, уыцы кувӕндоны – Моисей Сыгъдӕг Цатыр аразынмӕ куы бавнӕлдта, уӕд ын Хуыцау куыд загъта, афтӕ: «Хъусыс, ӕппӕт дӕр сараз, хохыл дын куыд равдыстӕуыд, уымӕ гӕсгӕ». 6 Фӕлӕ Йесо цы Алчеры куыст райста, уый уыдоны куыстӕй уӕлдӕр у, уымӕн ӕмӕ Йесо хуыздӕр фидыды Ӕхсӕнылӕг у ӕмӕ уыцы фидыд хуыздӕр зӕрдӕвӕрдыл ӕнцой кӕны. 7 Уымӕн ӕмӕ фыццаг фидыд куы ницы хъуаг уыдаид, уӕд дыккаджы сӕр нӕ бахъуыдаид. 8 Фӕлӕ сын Хуыцау уайдзӕф кӕны: «Мӕнӕ ралӕудзӕн рӕстӕг, зӕгъы Хуыцау, ӕмӕ Израилы байзӕддагимӕ ӕмӕ Иудӕйы байзӕддагимӕ Ӕз сараздзынӕн ног фидыд. 9 Уый нӕ уыдзӕн, мысыраг зӕххӕй ракӕныны тыххӕй сын сӕ фыдӕлты къухыл куы рахӕцыдтӕн, уӕд уыдонимӕ цы фидыд сарӕзтон, ахӕм. Уымӕн ӕмӕ уыдон Мӕ уыцы фидыдмӕ гӕсгӕ нӕ цардысты, ӕмӕ сӕ Ӕз ныууагътон, зӕгъы Хуыцау. 10 Мӕнӕ, зӕгъы Хуыцау, уыцы бонты фӕстӕ Израилы байзӕддагимӕ кӕй сараздзынӕн, уыцы фидыд: сӕ зонды сын нывӕрдзынӕн ӕмӕ сӕ зӕрдӕтыл ныффысдзынӕн Ме 'гъдӕуттӕ, ӕмӕ уыдзынӕн сӕ Хуыцау, уыдон та уыдзысты Мӕ адӕм. 11 Уӕд алчи йе 'мбӕстаджы ӕмӕ йе 'фсымӕры нӕ ахуыр кӕндзӕн ӕмӕ йын нӕ дзурдзӕн: „Базон Хуыцауы", уымӕн ӕмӕ иууылдӕр, стырӕй-чысылӕй, зондзысты Мӕн. 12 Уымӕн ӕмӕ сын Ӕз ныббардзынӕн сӕ галиу митӕ, сӕ тӕригъӕдтӕ сын нал ӕрымысдзынӕн». 13 Уыцы фидыд ног схонгӕйӕ, Хуыцау фенын кодта, фыццаг фидыд кӕй базӕронд, уый. Цы ныххӕррӕгъ ӕмӕ базӕронд уа, уымӕн та йе сӕфт ӕрӕввахс вӕййы.

Дзуттӕгтӕм 9

1 Фыццаг фидыдӕн уыди йӕхи домӕнтӕ, Хуыцауӕн куыд кусын хъӕуы, уый тыххӕй, стӕй зӕххон кувӕндон – Сыгъдӕг Цатыр. 2 Цатыры фыццаг уат хуынди «Сыгъдӕг бынат». Сарӕзтӕйӕуыд афтӕ, ӕмӕ дзы уыди цырагъдарӕн, фынг ӕмӕ нывонд дзултӕ. 3 Дыккаг ӕмбӕрзӕны фӕстӕ та уыди, «Иууылсыгъдӕг» чи хуыйны, уыцы уат. 4 Уыди дзы сызгъӕрин будсудзӕн ӕмӕ фидыды Чырын, йеппӕт фӕрстыл дӕр – сызгъӕрин цъар. Йӕ мидӕг уыдысты сызгъӕрин къус маннӕимӕ, Аароны билцъӕфтыд лӕдзӕг ӕмӕ, фӕдзӕхстытӕ цы къӕйтыл фыст уыдысты, уыдон. 5 Чырыны сӕрмӕ та – херувимтӕ, Хуыцауы намыс уым кӕй ис, уый ӕвдисынӕн; сӕ дӕлбазыр уыди тӕригъӕдтӕ ныббарыны бынат. Ӕппӕт уыдӕтты тыххӕй ныр бӕлвырд дзурын нӕ хъӕуы. 6 Ӕппӕт дӕр сарӕзтӕуыд афтӕ, ӕмӕ фыццаг уатмӕ Хуыцауӕн лӕггад кӕнынмӕ кӕддӕриддӕр цыдысты сауджынтӕ; 7 Дыккаг уатмӕ та – ӕрмӕстдӕр алчер афӕдз иу хатт тугимӕ, ӕмӕ-иу ӕй нывондӕн ӕрхаста йӕхи тӕригъӕдты, стӕй адӕм нӕзонгӕйӕ цы тӕригъӕдтӕ ракодтой, уыдоны тыххӕй. 8 Уымӕй Сыгъдӕг Уд ӕвдисы, зӕгъгӕ, цалынмӕ раздӕры Цатыр ис, уӕдмӕ Иууылсыгъдӕгмӕ бацӕуӕн нӕй. 9 Сыгъдӕг Цатыр фӕсномыгӕй абонмӕ амоны: Хуыцауӕн цы хуынтӕ ӕмӕ нывондтӕ хӕссынц, уыдон ницы ахъаз сты се 'рхӕсджыты ӕфсармы тӕрхонӕй фервӕзын кӕнынӕн. 10 Уыцы нывондтӕ хӕрды, нозты ӕмӕ буар ссыгъдӕджы ӕгъдӕуттимӕ ӕрмӕстдӕр сты, буармӕ чи хауы, ахӕм домӕнтӕ; уыдон ӕххӕстгӕнинаг уыдысты хуыздӕр уагӕвӕрды ӕрцыдмӕ. 11 Ныр та ӕрцыд Чырысти – ӕцӕг хорзӕхтӕ нын Чи ӕрхаста, уыцы Алчер, ӕмӕ бацыд ӕндӕр Цатырмӕ. Уыцы Цатыр у ахсджиагдӕр ӕмӕ алцӕмӕй дӕр ӕххӕст; лӕджыкъухӕйконд нӕу, ома, нӕу ацы дунейӕ. 12 Сӕгъты ӕмӕ родты тугимӕ нӕ, фӕлӕ Йӕхи Тугимӕ иу хатт ӕмӕ мыггагмӕ Чырысти бацыд Иууылсыгъдӕгмӕ, ӕмӕ нӕ мыггагмӕ фервӕзын кодта тӕригъӕды азымӕй. 13 Чи фӕчъизи, уыдон кӕд сӕгъты ӕмӕ галты туг, стӕй нывонд дыгӕрдыджы ӕртхутӕг бапырх кӕнынӕй ссыгъдӕг вӕййынц Ӕгъдаумӕ гӕсгӕ, 14 Уӕд цас ӕмӕ цас тыхджындӕр у, мыггагмӕйы Уды фӕрцы Хуыцауӕн Йӕхи ӕнаипп нывондӕн Чи ӕрхаста, уыцы Чырыстийы Туг! Уыцы Туг мах фервӕзын кӕндзӕн ӕфсармы тӕрхонӕй – ныууадздзыстӕм мӕлӕтхӕссӕг хъуыддӕгтӕ ӕмӕ кусдзыстӕм цардӕгас Хуыцауӕн. 15 Уымӕ гӕсгӕ Чырысти у ног фидыды Ӕхсӕнылӕг, цӕмӕй мыггагмӕйы хорзӕхтӕ райсынмӕ хуындтытӕ фыццаг фидыды заман цы тӕригъӕдтӕ ракодтой, уыдон сын уой хатыргонд Йӕ мӕлӕты фӕрцы, ӕмӕ райсой, Хуыцау сын зӕрдӕ цӕмӕй бавӕрдта, уый. 16 Ӕмӕ кӕд ныстуан ис, уӕд хъуамӕ бӕлвырд уа, йӕ ныффыссӕг кӕй амард, уый. 17 Уымӕн ӕмӕ ныстуан йӕ тыхы бацӕуы, йӕ ныффыссӕг куы амӕлы, уӕд; цалынмӕ йӕ ныффыссӕг удӕгас у, уӕдмӕ йын тых нӕй. 18 Уымӕ гӕсгӕ фыццаг фидыд дӕр йӕ тыхы ӕнӕ тугӕй нӕ бацыд. 19 Уымӕн ӕмӕ Ӕгъдауы фӕдзӕхстытӕ иууылдӕр Моисей ӕппӕт адӕмӕн куы фехъусын кодта, уӕд райста родты ӕмӕ сӕгъты туг донимӕ, стӕй сырх къуымбил, иссоп, ӕмӕ дзы бапырх кодта Ӕгъдауы чиныгыл ӕмӕ адӕмӕн сеппӕтыл дӕр. 20 Моисей загъта: «Уый у, Хуыцау уын кӕй коммӕ кӕсын бафӕдзӕхста, уыцы фидыды туг». 21 Уыцы тугӕй бапырх кодта Сыгъдӕг Цатыр дӕр, стӕй дзы Хуыцауӕн лӕггад кӕнынӕн чи уыдис, ӕппӕт уыцы дзаумӕттӕ дӕр. 22 Ӕгъдаумӕ гӕсгӕ, зӕгъӕн ис ӕмӕ ӕппӕт дӕр сыгъдӕггонд цӕуы тугӕй, ӕмӕ туг куы нӕ акӕла, уӕд хатыр нӕй. 23 Уӕдӕ уӕларвы цы ис, уыдоны фӕлгонцтӕ хъуамӕ сыгъдӕггонд цӕуой уыцы нывондтӕй, уӕларвоны та хуыздӕр нывондтӕ хъӕуы. 24 Чырысти бацыд, ӕцӕг Иууылсыгъдӕджы фӕлгонц чи у, лӕджыкъухӕйконд ахӕм Иууылсыгъдӕгмӕ нӕ, фӕлӕ комкоммӕ уӕларвмӕ, цӕмӕй мах тыххӕй ӕрлӕууа Хуыцауы раз. 25 Алчер ӕрвылаз нывонды тугимӕ Иууылсыгъдӕгмӕ куыд цыдис, Йесо афтӕ нӕ бацыди Йӕхи бирӕ хӕттыты нывондӕн хӕссынмӕ. 26 Афтӕ куы уаид, уӕд Ӕй дуне сфӕлдисынӕй фӕстӕмӕ бирӕ хӕттыты бахъуыдаид хъизӕмар кӕнын. Ныр та Уый ӕрцыд иу хатт, рӕстӕджы кӕронмӕ, тӕригъӕд фесафыны сӕраппонд Йӕхи нывондӕн ӕрхӕссынмӕ. 27 Адӕймагӕн иу хатт амӕлын, стӕй та тӕрхоны раз ӕрлӕууын куыд ӕмбӕлы, 28 Афтӕ Чырысти дӕр бирӕты тӕригъӕдтӕ Йӕхимӕ райсыны сӕраппонд иу хатт Йӕхи ӕрхаста нывондӕн; дыккаг хатт та ӕрцӕудзӕн тӕригъӕдӕй ссыгъдӕг кӕнынмӕ нӕ, фӕлӕ Йӕм ӕнхъӕлмӕ чи кӕсы, уыдоны фервӕзын кӕнынмӕ.

Дзуттӕгтӕм 10

1 Фидӕны цы хорзӕхтӕ хъуамӕ ӕрцыдаид, Ӕгъдау уыдонӕн сӕхи не 'вдисы, фӕлӕ у ӕрмӕст сӕ аууон. Уымӕ гӕсгӕ афӕдзӕй-афӕдзмӕ иудадзыг ӕмхуызон нывондтӕ чи хӕссы, Ӕгъдау уыдоны ӕнаипп никӕд скӕндзӕн. 2 Науӕд нывондтӕ нал хӕссиккой, уымӕн ӕмӕ иу хатт ӕмӕ мыггагмӕ ссыгъдӕг уаиккой тӕригъӕдӕй ӕмӕ сын се 'фсарм тӕрхонгӕнӕг нал уаид. 3 Фӕлӕ уыцы нывондтӕ афӕдзӕй-афӕдзмӕ зӕрдыл ӕрӕфтауынц тӕригъӕдтӕ, 4 Уымӕн ӕмӕ галтӕ ӕмӕ сӕгъты тугӕй тӕригъӕдтӕн фесафӕн нӕй. 5 Чырысти дунемӕ куы ӕрцыд, уӕд уый тыххӕй загъта Хуыцауӕн: «Ды нывондтӕ ӕмӕ хуынтӕ нӕ бакуымдтай, фӕлӕ Мын ӕрцӕттӕ кодтай буар. 6 Иууылсудзинаг нывондтӕ ӕмӕ тӕригъӕды тыххӕй нывондтӕ Дӕуӕн фӕндон нӕ уыдысты. 7 Уӕд Ӕз загътон: Мӕн тыххӕй Сыгъдӕг Чиныджы фыст куыд у, афтӕ мӕнӕ ӕрцыдтӕн, Хуыцау, Дӕ фӕндон сӕххӕст кӕнынмӕ». 8 Кӕд уыцы нывондтӕ Ӕгъдаумӕ гӕсгӕ ӕрхастӕуы, уӕддӕр Чырысти фыццаг загъта: «Нывондтӕ, хуынтӕ, иууылсудзинаг нывондтӕ ӕмӕ тӕригъӕды тыххӕй нывондтӕ Ды нӕ бакуымдтай, фӕндон Дын нӕ уыдысты». 9 Уый фӕстӕ ма Йӕ ныхасмӕ бафтыдта: «Мӕнӕ ӕрцыдтӕн Дӕ фӕндон сӕххӕст кӕнынмӕ». Уый аивта фыццаг, цӕмӕй йӕ тыхы бацӕуа дыккаг. 10 Хуыцауы уыцы фӕндонмӕ гӕсгӕ Йесо Чырысти Йӕ буар иу хатт ӕмӕ мыггагмӕ ӕрхаста нывондӕн, ӕмӕ афтӕмӕй мах ссыгъдӕг кодта ӕмӕ баистӕм Хуыцауы. 11 Алы сауджын дӕр ӕрвылбон лӕггад кӕны Хуыцауы раз ӕмӕ бирӕ хӕттыты ӕрхӕссы, тӕригъӕдтӕ кӕмӕй никуы ис фесафӕн, ахӕм уыциу нывондтӕ. 12 Йесо та тӕригъӕдты тыххӕй ӕрхаста иу нывонд, Хуыцауы рахиз фарс сбадти мыггагмӕ, 13 Ӕмӕ уӕдӕй фӕстӕмӕ ӕнхъӕлмӕ кӕсы, Йе знӕгты Йын цалынмӕ Йӕ къӕхты бын ӕрӕвӕрдӕуа, уӕдмӕ. 14 Уымӕн ӕмӕ кӕй ссыгъдӕг кодта, уыдоны иу нывондӕй мыггагмӕ алцӕмӕй дӕр скодта ӕнаипп. 15 Уый тыххӕй нын ӕвдисӕн лӕууы Сыгъдӕг Уд дӕр. Хуыцау куы загъта: 16 «Мӕнӕ, зӕгъы Хуыцау, уыцы бонты фӕстӕ семӕ кӕй сараздзынӕн, уыцы фидыд: сӕ зӕрдӕты сын нывӕрдзынӕн ӕмӕ сӕ зонды ныффысдзынӕн Ме 'гъдӕуттӕ», 17 Уӕд ма уый фӕстӕ ноджыдӕр загъта: «Сӕ тӕригъӕдтӕ ӕмӕ сын сӕ ӕнӕуаг митӕ нал ӕрымысдзынӕн». 18 Тӕригъӕдтӕ барст куы уой, уӕд уыдоны тыххӕй нывонд хӕссын нал хъӕуы. 19 Уӕдӕ нӕ, ӕфсымӕртӕ, ныфс ис, Йесойы Туджы фӕрцы ног ӕмӕ царддӕттӕг фӕндагыл Иууылсыгъдӕгмӕ кӕй бацӕудзыстӕм, уымӕй. 20 Уыцы фӕндаг нын ӕмбӕрзӕны, ома, Йӕ буары фӕрцы, Уый айгӕрста ӕмӕ йыл фыццаг Йӕхӕдӕг ацыд. 21 Ӕмӕ нын афтӕмӕй Хуыцауы хӕдзары сӕргъы ис стыр Алчер. 22 Уӕдӕ ӕрцӕуӕм Хуыцаумӕ зӕрдиагӕй, фидар уырнындзинадимӕ – Йесойы туг нын ссыгъдӕг кодта нӕ зӕрдӕтӕ ӕмӕ ссӕрибар стӕм ӕфсармы тӕрхонӕй, нӕ буар нын цӕхсадӕуыд сыгъдӕг донӕй. 23 Фидар ныххӕцӕм, ӕргомӕй кӕй тыххӕй дзурӕм, уыцы зӕрдӕдарӕныл, уымӕн ӕмӕ зӕрдӕ Чи бавӕрдта, Уый Йӕ дзырд нӕ сайы. 24 Иу иннӕйыл уӕд ӕнувыд, кӕрӕдзи разӕнгард кӕнӕм уарзынмӕ ӕмӕ хорз хъуыддӕгтӕм. 25 Иуӕй-иутӕ куыд сахуыр сты, уыйау мах ма уадзӕм не 'мбырд, фӕлӕ ныфс дӕттӕм кӕрӕдзийӕн, уыцы бон куыд хӕстӕгдӕр кӕны, уый цас бӕлвырддӕр уынӕм, афтӕ ноджы ӕнувыддӕрӕй. 26 Кӕд ӕцӕгад базыдтам ӕмӕ уӕддӕр зонгӕ-зонын тӕригъӕды бафтӕм, уӕд тӕригъӕдты тыххӕй ӕндӕр нывонд нал уыдзӕн, 27 Ӕмӕ нын ӕрмӕстдӕр баззад тӕрхонмӕ, стӕй Хуыцауы ныхмӕлӕуджытӕ мыггагмӕ цы ӕвирхъау арты амӕддаг фӕуыдзысты, уымӕ тӕрсгӕ-ризгӕйӕ ӕнхъӕлмӕ кӕсын. 28 Моисейы Ӕгъдау чи не 'ххӕст кодта, ахӕм адӕймаг дыууӕ кӕнӕ ӕртӕ ӕвдисӕны ныхасӕй кӕд ӕгъатырӕй мӕлӕтмӕ лӕвӕрд цыди, 29 Уӕд, куыд ӕнхъӕл стут, цас карздӕр ӕфхӕрды аккаг уыдзӕни, Хуыцауы Фырты чи ссӕнды ӕмӕ, сыгъдӕггонд кӕмӕй ӕрцыди, фидыды уыцы Туг чи ницӕмӕ дары ӕмӕ хорзӕх дӕттӕджы Уды чи фауы, уый? 30 Мах зонӕм Хуыцауы, афтӕ Зӕгъӕджы: «Ӕз сӕ Мӕ маст райсдзынӕн, бафхӕрдзынӕн сӕ». Ӕмӕ ноджыдӕр: «Хицау тӕрхон кӕндзӕн Йӕ адӕмӕн». 31 Тӕссаг у цардӕгас Хуыцауы къухтӕм бахауын! 32 Ӕрымысут, Хуыцау уӕ зӕрдӕтӕм рухс куы бауагъта ӕмӕ уый фӕстӕ тохы бирӕ зынтӕн куы бафӕрӕзтат, уӕ раздӕры уыцы бонтӕ. 33 Куы уыл ӕгас адӕмы раз цъыфкалӕн кодтой ӕмӕ уӕ ӕфхӕрдтой, куы та уыдыстут, ахӕм уавӕры ма чи уыд, уыдоны фарсмӕ. 34 Уымӕн ӕмӕ тухӕн кодтат ахӕстытимӕ дӕр, ӕмӕ уын уӕ мулк куы хастой, уӕд цин кодтат, хуыздӕр ӕмӕ уын ӕнӕфӕугӕ мулк кӕй ис, уый зонгӕйӕ. 35 Уӕдӕ ма ныууадзут уӕ зӕрдӕдарӕн, ӕмӕ уый тыххӕй райсдзыстут стыр хӕрзиуӕг. 36 Бафӕразын уӕ хъӕуы, цӕмӕй кӕронмӕ сӕххӕст кӕнат Хуыцауы фӕндон ӕмӕ райсат, зӕрдӕ уын цӕмӕй бавӕрдӕуыд, уый. 37 Уымӕн ӕмӕ «бирӕ нал хъӕуы, хӕрзгыццыл рӕстӕг ма, ӕмӕ ӕрцӕуинаг Чи у, Уый ӕрцӕудзӕн, нӕ бафӕстиат уыдзӕн. 38 Мӕ рӕстгӕнӕг уырнындзинады фӕрцы цӕрдзӕни, фӕстӕмӕ куы ахӕца, уӕд та дзы райгонд нӕ уыдзынӕн». 39 Мах та, фӕстӕмӕ чи ахӕцы ӕмӕ мӕлӕтмӕ чи цӕуы, уыдонӕй не стӕм, фӕлӕ фидар хӕцӕм нӕ уырнындзинадыл, цӕмӕй фервӕзын кӕнӕм нӕ удтӕ.

Дзуттӕгтӕм 11

1 Уырнындзинад та у, нӕ зӕрдӕ цӕуыл дарӕм, ууыл фидарӕй ӕууӕндынгӕнӕг, ӕмӕ цӕстӕй цы нӕ уынӕм, уый ӕргомгӕнӕг. 2 Незаманты чи царди, уыцы адӕмӕй сӕ уырнындзинады фӕрцы раппӕлыди Хуыцау. 3 Уырнындзинады фӕрцы мах базонӕм: Хуыцау дун-дуне сфӕлдыста Йӕ ныхасӕй – цӕстӕй цы нӕ уынӕм, уымӕй рацыд, цӕстӕй цы уынӕм, уый. 4 Уырнындзинады фӕрцы ӕрхаста Авел Хуыцауӕн Каины нывондӕй хуыздӕр нывонд. Йӕ уырнындзинады фӕрцы йын Хуыцау райста йӕ нывонд, ӕмӕ уымӕй равдыста, Авел рӕстгӕнӕг кӕй у, уый. Ӕмӕ кӕд Авел амарди, уӕддӕр йӕ уырнындзинады фӕрцы абон дӕр ма дзуры. 5 Енохмӕ уырнындзинад кӕй уыдис, уымӕ гӕсгӕ йӕ ахуыдта Хуыцау ӕмӕ мӕлӕт нӕ федта: «Зӕххыл нал уыди – Хуыцау ӕй акодта». Уымӕн ӕмӕ йын йӕ акӕныны размӕ Хуыцау загъта, Йӕ зӕрдӕ Йын кӕй балхӕдта, уый тыххӕй. 6 Ӕнӕ уырнындзинадӕй та Хуыцауы зӕрдӕйӕн балхӕнӕн нӕй. Хуыцаумӕ ӕрцӕуӕг хъуамӕ ӕууӕнда, Хуыцау кӕй ис ӕмӕ Йӕ чи агуры, уыдонӕн хорзӕх кӕй дӕтты, ууыл. 7 Цӕстӕй фенӕн цӕмӕн нӕма уыд, уый йын Хуыцау куы раргом кодта, уӕд Ной, йӕ уырнындзинады фӕрцы Хуыцаумӕ байхъусгӕйӕ, сарӕзта, йӕхӕдӕг ӕмӕ йӕ бинонтӕ кӕм фервӕзтысты, уыцы нау; йӕ уырнындзинадӕй стӕрхон кодта дунейӕн, ӕмӕ йӕ Хуыцау йӕ уырнындзинады фӕрцы банымадта рӕстгӕнӕгыл. 8 Уырнындзинад ӕм кӕй уыдис, уый фӕрцы Авраам байхъуыста Хуыцаумӕ, кӕй хъуамӕ райстаид, уыцы бӕстӕмӕ ацӕуыны тыххӕй. Ӕмӕ ацыди, кӕдӕм араст, уый нӕ зонгӕйӕ. 9 Уырнындзинад ӕм кӕй уыдис, уый фӕрцы Авраам ӕцӕгӕлонау ӕрцард, зӕрдӕ йын кӕмӕй бавӕрдӕуыд, уыцы зӕххыл. Царди цатырты; афтӕ цардысты Исаак ӕмӕ Иаков дӕр – уыциу зӕрдӕвӕрд Хуыцау уыдонӕн дӕр радта. 10 Уымӕн ӕмӕ Авраам ӕнхъӕлмӕ каст, фидар бындур кӕмӕн ис, Хуыцау йӕ нывгӕнӕг ӕмӕ аразӕг кӕмӕн у, уыцы сахармӕ. 11 Саррӕ уыди ӕнӕзӕнӕг, стӕй сывӕллон ныййарыны кары дӕр нал уыди, уӕддӕр ӕм уырнындзинад кӕй уыдис, уый фӕрцы йӕ бон баци ӕмӕ басывӕрджын. Уымӕн ӕмӕ зыдта: зӕрдӕ Чи бавӕрдта, Уый Йӕ дзырд нӕ сайы. 12 Ӕмӕ уымӕ гӕсгӕ иу лӕгӕй, уымӕй дӕр кӕй буар ныххӕррӕгъ, ахӕмӕй, рацыд, арвыл стъалытӕ куыд бирӕ ис ӕмӕ денджызы былыл змис куыд ӕнӕнымӕц у, афтӕ бирӕ адӕм. 13 Ацы адӕймӕгтӕ иууылдӕр амардысты уырнджытӕй, зӕрдӕ сын цӕмӕй бавӕрдӕуыд, уый нӕ райсгӕйӕ; ӕрмӕст ӕй федтой дардмӕ, цин кодтой ӕмӕ дзырдтой, зӕххыл ӕцӕгӕлӕттӕ ӕмӕ рӕстӕгмӕ цӕрджытӕ стӕм, зӕгъгӕ. 14 Афтӕ чи зӕгъы, уыдон сӕ уыцы ныхӕстӕй ӕвдисынц, сӕхи фыдыбӕстӕмӕ кӕй тырнынц, уый. 15 Ӕмӕ цы бӕстӕйӕ рацыдысты, сӕ хъуыдытӕ ууыл куы уыдаиккой, уӕд сын уыдаид аздӕхыны фадат. 16 Фӕлӕ уыдон тырныдтой хуыздӕрмӕ, ома, уӕларвон бӕстӕмӕ. Уымӕ гӕсгӕ Хуыцау дӕр къӕмдзӕстыг нӕу, Йӕхи уыдоны Хуыцау кӕй хоны, уымӕй – сахар уыдонӕн ӕрцӕттӕ кодта. 17 Хуыцау Авраамы куы фӕлвӕрдта, уӕд Авраам, уырнындзинад ӕм кӕй уыдис, уый фӕрцы нывондӕн ӕрхаста Исаакы. Кӕд ын зӕрдӕ бавӕрдӕуыд, уӕддӕр цӕттӕ уыд йӕ иунӕг фырты нывондӕн ӕрхӕссынмӕ. 18 Исаакы тыххӕй та йын афтӕ загъд уыди: «Исаакӕй чи райгуыра, уыдон нымад уыдзысты дӕ байзӕддӕгтыл». 19 Авраам ӕууӕндыди, Хуыцауӕн Йӕ бон кӕй у мӕрдтӕй дӕр райгас кӕнын. Уымӕ гӕсгӕ Хуыцау Авраамӕн фӕстӕмӕ радта йӕ фырты, ӕмӕ уый фӕсномыгӕй амыдта фидӕнмӕ. 20 Уырнындзинад ӕм кӕй уыдис, уый фӕрцы Исаак Хуыцауы арфӕ бафтыдта Иаковы ӕмӕ Исавы фидӕныл. 21 Иаков куы марди, уӕд ӕм уырнындзинад кӕй уыдис, уый фӕрцы Хуыцауы арфӕ бафтыдта Иосифы алы фыртыл дӕр, ӕрӕнцой кодта йӕ лӕдзӕгыл ӕмӕ бакуывта Хуыцаумӕ. 22 Иосиф куы марди, уӕд ӕм уырнындзинад кӕй уыдис, уый фӕрцы загъта, Израилы адӕм Мысырӕй кӕй рацӕудзысты, уый тыххӕй, ӕмӕ сын бафӕдзӕхста уырдыгӕй йе стджытӕ рахӕссын. 23 Моисей куы райгуырди, уӕд йӕ ныййарджытӕм уырнындзинад кӕй уыдис, уый фӕрцы йӕ ӕртӕ мӕйы ӕмбӕхстой. Уымӕн ӕмӕ сывӕллон тынг рӕсугъд кӕй у, уый федтой ӕмӕ паддзахы бардзырдӕй дӕр нал фӕтарстысты. 24 Моисей йӕ лӕджы кары куы бацыди, уӕд йӕ уырнындзинады фӕрцы не сразы фараоны чызджы фырты ном хӕссыныл, 25 Ӕмӕ, тӕригъӕдӕй рӕстӕгмӕ йӕ мондӕгтӕ уадзыны бӕсты, хуыздӕрыл банымадта Хуыцауы адӕмимӕ тухӕнтӕ ӕвзарын. 26 Мысыраг хӕзнаты бӕсты йӕхицӕн зынаргъдӕр хӕзнайыл банымадта Чырыстийау ӕгад ӕййафын, уымӕн ӕмӕ хӕрзиуӕг райсынмӕ ӕнхъӕлмӕ каст. 27 Паддзах дзы йӕ маст кӕй райсдзӕн, уымӕй нӕ фӕтӕрсгӕйӕ, Моисей йӕ уырнындзинады фӕрцы ныууагъта Мысыр. Цӕстӕй фенӕн Кӕмӕн нӕй, уыцы Хуыцауы цыма цӕстӕй уыдта, афтӕ фидар лӕууыд. 28 Уырнындзинад ӕм кӕй уыдис, уый фӕрцы скодта Куадзӕн ӕмӕ уӕлкъӕсӕртӕ сахуырста тугӕй, цӕмӕй хистӕр хъӕбулты марӕг ма бавнала израилӕгты хъӕбултӕм. 29 Сурзӕххыл цӕуӕгау израилӕгтӕ сӕ уырнындзинады фӕрцы ахызтысты Сырх денджызыл, ӕмӕ мысырӕгтӕ дӕр ахизын куы бафӕлвӕрдтой, уӕд фӕдӕлдон сты. 30 Авд боны дӕргъы Иерихоны алыварс израилӕгтӕ цалдӕр хатты куы ӕрзылдысты, уӕд сӕ уырнындзинады фӕрцы ӕркалдысты йӕ къултӕ. 31 Уырнындзинад ӕм кӕй уыдис, уый фӕрцы хӕтагсыл Раав суазӕг кодта сгарджыты, ӕмӕ нӕ бабын ӕнӕсӕттонтимӕ. 32 Цы ма уын зӕгъон? Рӕстӕг мын нӕй Гедеоны, Варакы, Самсоны, Иеффайы, Давиды, Самуилы ӕмӕ иннӕ пехуымпарты тыххӕй радзурынӕн. 33 Уыдонмӕ уырнындзинад кӕй уыдис, уый фӕрцы уӕлахиз кодтой паддзахӕдтыл, сӕ хъуыддӕгтӕ уыдысты раст, Хуыцау-иу сын зӕрдӕ цӕмӕй бавӕрдта, уый-иу райстой, домбӕйтты-иу ӕрсабыр кодтой, 34 Арт сыл нӕ тых кодта, аирвӕзтысты-иу карды комӕй, уыдысты лӕмӕгъ ӕмӕ стыхджын сты, хӕсты уыдысты хъаруджын, лидзӕг-иу фӕкодтой ӕцӕгӕлӕтты ӕфсад. 35 Сылгоймӕгтӕ-иу сӕ мӕрдты удӕгасӕй райстой. Иннӕты-иу амардӕуыд хъизӕмары мӕлӕтӕй – уыдон-иу сӕрибар райсын нӕ бакуымдтой, цӕмӕй райгас уой хуыздӕр цардӕн. 36 Аннӕтӕй та кодтой хынджылӕг ӕмӕ сӕ надтой ехсӕй, бастой сӕ рӕхыстӕй ӕмӕ сӕ ӕппӕрстой ахӕстӕтты. 37 Мардтой сӕ дуртӕй, лыгтӕ сӕ кодтой хырхӕй, [ракъахыны сӕраппонд сын ластой сӕ уд,] мардтой сӕ кардӕй, рахау-бахау кодтой фысдзӕрмтты ӕмӕ сӕгъдзӕрмтты, уыдысты мӕгуыр, цардӕй ӕфхӕрд ӕмӕ ссӕст. 38 Ӕппӕт дуне кӕй аккаг нӕ уыд, уыдон рахау-бахау кодтой ӕдзӕрӕг рӕтты ӕмӕ хӕхты, лӕгӕтты ӕмӕ цъассыты. 39 Сӕ уырнындзинады тыххӕй сын сеппӕтӕй дӕр раппӕлыд Хуыцау, фӕлӕ сын зӕрдӕ цӕмӕй бавӕрдта, уый нӕ райстой. 40 Уымӕн ӕмӕ Хуыцаумӕ мах тыххӕй ноджы хуыздӕр фӕнд уыди, цӕмӕй уыдон ӕрмӕстдӕр махимӕ суой алцӕмӕй дӕр ӕнаипп.

Дзуттӕгтӕм 12

1 Уӕдӕ йӕ уырнындзинад чи равдыста, ахӕм ӕвдисӕнтӕ нӕ алыварс уыйас бирӕ кӕм сты, уым мах дӕр ныууадзӕм, фӕстӕмӕ ныл цы хӕцы, ӕппӕт уыдӕттӕ, стӕй нӕ ӕнцонӕй чи ӕрцахсы, уыцы тӕригъӕд ӕмӕ, нӕ размӕ цы фӕндаг ис, ууыл тындзӕм фӕразонӕй, 2 Уырнындзинад Чи дӕтты ӕмӕ йӕ алцӕмӕй дӕр ӕххӕст Чи кӕны, уыцы Йесомӕ кӕсгӕйӕ: цы цины аккаг уыд, уый бӕсты фӕразонӕй фӕхъизӕмар кодта, ӕгад ницӕмӕ ӕрдаргӕйӕ, амард дзуарыл, ӕмӕ ныр бады Хуыцауы рахиз фарс. 3 Ахъуыды кӕнут тӕригъӕдджынтӕй ахӕм ӕфхӕрд Бавзарӕгыл, цӕмӕй ма сӕдых ӕмӕ ма слӕмӕгъ уат удӕй. 4 Тӕригъӕды ныхмӕ сымах нырма мӕлӕтдзаг тох нӕма кодтат, 5 Ӕмӕ уын, хъӕбултау, уӕ зӕрдӕ фӕфидар кӕнынӕн цы загъд уыди, уый уӕ ферох: «Мӕ хъӕбул, Хуыцауы ӕфхӕрдмӕ ницӕмӕ йӕ дарыны цӕстӕй ма кӕс, ӕмӕ дын куы бауайдзӕф кӕны, уӕд дӕ ныфс ма сӕттӕд. 6 Уымӕн ӕмӕ Хуыцау кӕй уарзы, уыцы адӕймаджы бафхӕры; нӕмгӕ та кӕны, Йӕхицӕн фырт кӕй скӕны, уыдонӕй алкӕй дӕр». 7 Уӕ хъомыл кӕныны сӕраппонд быхсут ӕфхӕрдӕн – уымӕй Хуыцау ӕвдисы, хъӕбулты цӕстӕй уӕм кӕй кӕсы, уый. Ахӕм фырт ис, мыййаг, фыд кӕй нӕ бафхӕры? 8 Ӕппӕт хъӕбулты куыд бафхӕрдӕуы, кӕд ахӕм ӕфхӕрд не 'ййафут, уӕд сымах ӕцӕг хъӕбултӕ нӕ, фӕлӕ дзӕгъӕлзад сывӕллӕттӕ стут. 9 Нӕ зӕххон ныййарджытӕ нӕ ӕфхӕрдтой, ӕмӕ сӕ мах куы нымадтам, уӕд мыггагмӕйы царды сӕраппонд куыннӕ хъуамӕ кӕсӕм нӕ Уӕларвон Фыды коммӕ! 10 Ныййарджытӕ нӕ цыбыр рӕстӕджы дӕргъы ӕфхӕрдтой, куыд сӕм хуыздӕр касти, афтӕ; Хуыцау та нӕ нӕхи пайдайӕн бафхӕры, цӕмӕй уӕм Йӕ сыгъдӕгдзинадӕй хайджын. 11 Алы ӕфхӕрд дӕр нын фыццаг ӕхсызгон нӕ вӕййы – хъыг нӕм фӕкӕсы. Фӕлӕ нӕ фӕстӕдӕр уыцы ӕфхӕрд куы сахуыр кӕны, уӕд нӕ цард свӕййы фӕрнджын ӕмӕ раст. 12 Уӕдӕ сфидар кӕнут уӕ мӕрдхуыст цӕнгтӕ ӕмӕ, чи слӕмӕгъ, уӕ уыцы уӕрджытӕ, 13 Ӕмӕ цӕут раст фӕндагыл уӕ къӕхтӕй, цӕмӕй къуылых къах тынгдӕр ма фӕкъӕдз уа, фӕлӕ сдзӕбӕх уа. 14 Архайут алкӕимӕ дӕр фидыдӕй цӕрыныл; тырнут уӕхи сыгъдӕгӕй дарынмӕ, уымӕн ӕмӕ ӕнӕ уымӕй Хицауы ничи фендзӕн. 15 Кӕсут уӕхимӕ, цӕмӕй уӕ Хуыцауы хорзӕхӕй ӕнӕхай мачи фӕуа, цӕмӕй уе 'хсӕн маргджын зайӕгойау мачи сырӕза ӕмӕ ма фӕхъӕстӕ кӕна бирӕты, 16 Цӕмӕй уӕм ма уа хӕтаг, кӕнӕ ӕнӕхуыцау, Исавау хистӕр фырты бартӕ иу хъӕрмхуыппы къусыл чи баивта. 17 Сымах куыд зонут, афтӕмӕй Исавы фӕстӕдӕр ӕрхъуыд йӕ фыды арфӕ, фӕлӕ дзы ӕнӕхай фӕци, уымӕн ӕмӕ, кӕд кӕугӕйӕ куырдта, уӕддӕр фыды фӕнд аивын йӕ бон нал уыд. 18 Уырзӕй басгарӕн кӕмӕн ис ӕмӕ арт кӕуыл судзы, сымах ахӕм хохмӕ не 'рцыдыстут, не 'рцыдыстут талынгмӕ, саудалынг ӕмӕ уадмӕ, 19 Сыкъауадындзы уастмӕ ӕмӕ Хуыцауы хъӕлӕсмӕ. Адӕм ӕй куы фехъуыстой, уӕд куырдтой, цӕмӕй сын мацыуал дзура. 20 Уымӕн ӕмӕ адӕмы бон нӕ уыд, цы сын фӕдзӕхстӕуыди, уымӕ хъусын: «Хохыл суанг сырд куы бандзӕва, уӕд уый дӕр мард ӕрцӕуӕд дуртӕй». 21 Ӕмӕ цы федтой, уый сӕ ахӕм тас бауагъта, ӕмӕ Моисей загъта: «Ризӕг мыл бахӕцыд фыртӕссӕй». 22 Сымах та ӕрцыдыстут Сионы хохмӕ ӕмӕ цардӕгас Хуыцауы сахармӕ – уӕларвон Иерусалиммӕ, ӕнӕнымӕц зӕдты цины ӕмбырдмӕ, 23 Уӕлӕрвты кӕй нӕмттӕ фыст сты, уыцы фыццаггуырд хъӕбулты Аргъуанмӕ, алкӕмӕн дӕр Тӕрхонгӕнӕг Хуыцаумӕ, алцӕмӕй дӕр ӕнаипп чи сси, уыцы рӕстгӕнджыты удтӕм, 24 Ног фидыды Ӕхсӕнылӕг Йесомӕ ӕмӕ, мах чи ссыгъдӕг кодта, Йӕ уыцы Тугмӕ – Авелы тугӕй уыцы Туг хуыздӕрыл дзуры. 25 Кӕсут, дзургӕ Чи кӕны, Уымӕ ӕнӕбайхъусгӕ ма фӕут. Зӕххыл Чи дзырдта, Уымӕ цы адӕм нӕ байхъуыстой, кӕд уыдон ӕнӕфхӕрдӕй нӕ аирвӕзтысты, уӕд махӕн та ӕнӕфхӕрдӕй баззайӕн уӕвгӕ дӕр нӕй, уӕлӕрвтӕй Чи дзуры, Уымӕй не 'ргом куы аздахӕм, уӕд. 26 Уӕды заманы Йӕ хъӕлӕсӕй нынкъуыста зӕхх, ӕмӕ та ныр дӕр дзырд радта: «Ноджы ма иу хатт нынкъусдзынӕн канд зӕхх нӕ, фӕлӕ арв дӕр». 27 Ныхӕстӕ «ноджы ма иу хатт» ӕвдисынц, цы сфӕлдыстӕуыд, уый кӕй нынкъуысдзӕн ӕмӕ йӕ кӕй аивдӕуыдзӕн, цӕмӕй мыггагмӕ баззайа, ӕнӕфӕцудгӕ цы у, уый. 28 Уӕдӕ, ӕнӕфӕцудгӕ Паддзахадмӕ цӕугӕйӕ, хъуамӕ уӕм бузныг, ӕмӕ Йын ӕхцон куыд уа, афтӕ хъуамӕ кусӕм Хуыцауӕн, аргъ Ын кӕнгӕйӕ ӕмӕ Дзы тӕрсгӕйӕ. 29 Уымӕн ӕмӕ нӕ Хуыцау у ӕппӕт ныхъуырӕг арт.

Дзуттӕгтӕм 13

1 Ӕфсымӕртау иудадзыг уарзут кӕрӕдзи. 2 Уазӕгуарзон кӕй хъуамӕ уат, уый уӕ рох ма уӕд. Уазӕгуарзон кӕй уыдысты, уымӕ гӕсгӕ иуӕй-иутӕ, кӕй уазӕг кӕнынц, уый нӕ зонгӕйӕ, суазӕг кодтой зӕдты. 3 Ма рох кӕнут ахӕстыты, цыма уӕхӕдӕг дӕр семӕ ахӕстоны стут, уыйау. Уӕ зӕрдыл дарут, тухӕнтӕ чи ӕвзары, уыдоны – гӕнӕн ис, ӕмӕ уӕхи дӕр бахъӕуа тухӕнтӕ ӕвзарын. 4 Алчидӕр къайадӕн кӕнӕд аргъ ӕмӕ уӕ хуыссӕн уӕд сыгъдӕг. Хӕлд адӕмӕн ӕмӕ хӕзгултӕн Хуыцау тӕрхон кӕндзӕн. 5 Ӕхцауарз ма ут, фӕлӕ уӕм цы ис, уый фагыл нымайут. Уымӕн ӕмӕ Хуыцау Йӕхӕдӕг загъта: «Нӕ дӕ ныууадздзынӕн ӕмӕ дӕ нӕ аппардзынӕн». 6 Уымӕ гӕсгӕ ныфсджынӕй зӕгъӕм: «Хицау мын у ӕххуысгӕнӕг, ӕмӕ нӕ фӕтӕрсдзынӕн: цы мын бакӕндзӕн адӕймаг?» 7 Ма рох кӕнут, Хуыцауы ныхас уын чи амыдта, уӕ уыцы хистӕрты; куыд фӕцардысты ӕмӕ сӕ цард цӕуыл ахицӕн, уый дарут уӕ зӕрдыл ӕмӕ сын фӕзмут сӕ уырнындзинад. 8 Йесо Чырысти знон цавӕр уыд, абон дӕр ахӕм у, ӕмӕ мыггагмӕ дӕр ахӕм уыдзӕн. 9 Алыхуызон ӕмӕ ӕцӕгӕлон ахуырӕдтӕ уӕ сӕ фӕдыл ма асайӕнт. Зӕрдӕтӕ фидар кӕнын хорз у, цы хӕрын фӕччы ӕмӕ нӕ фӕччы, уыцы уагӕвӕрдтӕй нӕ, фӕлӕ Хуыцауы хорзӕхӕй. Чи сӕ ӕххӕст кӕны, уыдонӕн дӕр ницы пайда ӕрхастой. 10 Махӕн ис, Сыгъдӕг Цатыры лӕггадгӕнджытӕн хӕрыны бар кӕцӕй нӕй, ахӕм нывондхӕссӕн. 11 Тӕригъӕдтӕй ссыгъдӕг кӕныны тыххӕй алчер Иууылсыгъдӕгмӕ цы фосы туг бахӕссы, уыдоны басыгъдӕуы адӕмы цӕрӕнуаты ӕдде. 12 Афтӕ Йесо дӕр, адӕмы Йӕ Тугӕй ссыгъдӕг кӕныны сӕраппонд, амарди фӕссахар. 13 Уӕдӕ Йӕм фӕцӕуӕм фӕссахармӕ, ӕмӕ Йӕ ӕгад мах ӕгад дӕр суӕд. 14 Уымӕн ӕмӕ нын ам, ӕдзух кӕм уыдзыстӕм, ахӕм сахар нӕй, фӕлӕ тырнӕм фидӕны сахармӕ. 15 Цӕй уӕдӕ Йесойы фӕрцы иудадзыг ӕппӕлӕм Хуыцауӕй – уадз ӕмӕ Йын уый уа нӕ нывонд, ӕмӕ афтӕмӕй кадджын кӕнӕм Йӕ ном. 16 Рохуаты ма ныууадзут хорзы цӕуын дӕр, цы уӕм ис, уымӕй иннӕтӕн хай кӕнын – ахӕм нывондтӕ Хуыцауӕн ӕхцон сты. 17 Уӕ хистӕртӕ сымах удтыл тыхсынц – сымах тыххӕй сӕ дзуапп дӕттын бахъӕудзӕн, ӕмӕ сӕм хъусут, кӕсут сӕ коммӕ, цӕмӕй кусой ӕнкъардӕй нӕ, фӕлӕ цингӕнгӕ. Ӕнкъардӕй куы кусой, уӕд уый уӕ пайдайӕн нӕу. 18 Кувут мах тыххӕй. Нӕ цӕсгом сыгъдӕг кӕй у, уый нын дызӕрдыггаг нӕу, уымӕн ӕмӕ архайӕм алцӕмӕй дӕр рӕстӕй цӕрыныл. 19 Кувын уӕ уӕлдайдӕр уый тыххӕй курын, цӕмӕй уӕм ӕрыздӕхон тагъддӕр. 20 Мыггагмӕйы фидыд фидаргонд цы Тугӕй ӕрцыд, уый фӕрцы фысты стыр Фыййау Чи сси, нӕ уыцы Хицау Йесойы мӕрдтӕй райгасгӕнӕг фӕрнджын Хуыцау 21 Сымах схайджын кӕнӕд алы хорзӕхӕй дӕр, Йӕ фӕндон куыд ӕххӕст кӕнат, афтӕ. Уадз ӕмӕ нын Хуыцау Йесо Чырыстийы фӕрцы нӕ зӕрдӕйы сфӕлдисӕд, фӕндон Ын цы у, уый. Чырыстийӕн кад уӕд мыггагӕй-мыггагмӕ! Амен. 22 Курын уӕ, ӕфсымӕртӕ, байхъусут ацы ныфсдӕттӕг ныхӕстӕм. Ӕз уӕм бирӕ дӕр куы нӕ ныффыстон. 23 Хъусын уын кӕнын, не 'фсымӕр Тимофей кӕй суӕгъд, уый тыххӕй. Ӕмӕ кӕд рӕхджы ӕрцӕуа, уӕд уӕ бабӕрӕг кӕндзыстӕм иумӕ. 24 Саламтӕ раттут уеппӕт хистӕртӕн ӕмӕ ӕппӕт сыгъдӕджытӕн. Саламтӕ уын дӕттынц италиаг уырнджытӕ. 25 Хуыцауы хорзӕх уеппӕты дӕр уӕд.

Иаков 1

1 Иаковӕй, Хуыцауы ӕмӕ Хицау Йесо Чырыстийы цагъарӕй, – ӕцӕгӕлон адӕмты ӕхсӕн цы дыууадӕс мыггаджы ныххӕлиу, уыдонмӕ. Фӕрнджын ут. 2 Алы фӕлварӕнты куы бахаут, ме 'фсымӕртӕ, уӕд ӕй уӕхицӕн нымайут стыр амондыл, 3 Уымӕн ӕмӕ уӕ уырнындзинад фӕлварӕнты куы бахауы, уӕд фӕразон кӕй свӕййут, уый сымахӕн зындгонд у. 4 Фӕразондзинад та сымах хъуамӕ ӕркӕна, алцӕмӕй дӕр бынтон нывыл куыд уат, ӕппындӕр уӕм аипп куыд нӕ уа, уымӕ. 5 Фӕлӕ уӕ кӕд искӕмӕн йӕ зонд фаг не 'ххӕссы, уӕд алкӕмӕн дӕр рӕдауӕй ӕмӕ ӕнӕ уайдзӕфӕй дӕттӕг Хуыцауӕй ракурӕд, – ӕмӕ йын ратдзӕн. 6 Ӕрмӕст курӕд, кӕй райсдзӕн, ууыл ӕууӕндгӕйӕ ӕмӕ бынтон ӕнӕдызӕрдыгӕй. Уымӕн ӕмӕ дызӕрдыггӕнӕг у, дымгӕ кӕй сисы ӕмӕ кӕмӕй фӕхъазы, уыцы денджызон уылӕнау. 7 Ахӕм адӕймаг Хицауӕй исты райсыныл йӕ зӕрдӕ ма дарӕд – 8 Йӕ зонд дыууӕрдӕм хӕцы, ӕмӕ цыдӕриддӕр ма араза, фаг ныфс ӕм нӕ разыны. 9 Гӕвзыкк ӕфсымӕр ӕппӕлӕд, хъӕздыг кӕй у, уымӕй. 10 Хъӕздыг та ӕппӕлӕд йӕ гӕвзыккӕй, уымӕн ӕмӕ ӕрбацыдӕр уыдзӕни быдираг дидинӕгау. 11 Скӕсы хур, йӕ тӕвдӕй бахус вӕййы ӕмӕ ӕрызгъӕлы дидинӕг, йӕ рӕсугъддзинад ӕрбайсӕфы. Афтӕ хъӕздыг дӕр: йӕ хъуыддӕгтӕ аразгӕ-аразын фӕтары уыдзӕн. 12 Тӕхудиаг у фӕлварӕнӕн фӕразон адӕймаг, уымӕн ӕмӕ фӕлвӕрд куы уа, уӕд райсдзӕни, чи Йӕ уарзы, уыдонӕн Хуыцау зӕрдӕ цӕмӕй бавӕрдта, уыцы хӕрзиуӕг – мыггагмӕйы цард. 13 Фӕлварӕнты чи бахауа, уый ма дзурӕд: «Хуыцау мӕ къахы». Хуыцауӕн фыдӕхӕй ракъахӕн нӕй, стӕй Йӕхӕдӕг дӕр никӕй къахы. 14 Фӕлӕ алкӕй дӕр ракъахы йӕхи монц, сцыбӕл ӕй кӕны ӕмӕ бахауы йӕ къӕппӕджы. 15 Монц ауадзы йӕ уидӕгтӕ, ӕмӕ дзы рацӕуы тӕригъӕд, тӕригъӕд та расайы мӕлӕт. 16 Ма фӕдзӕгъӕл ут, мӕ уарзон ӕфсымӕртӕ. 17 Хорзӕй цыдӕриддӕр ис, уый дӕр ӕмӕ алы хорзӕх дӕр ӕрцӕуынц уӕлӕрвтӕй, иудадзыг иухуызон Чи у ӕмӕ аууоны фӕд Кӕуыл нӕ зыны, Уымӕй – рухсы Фыдӕй. 18 Йӕ фӕндонмӕ гӕсгӕ нын радта ног цард – ӕцӕгады ныхасы руаджы нӕ скодта Йӕ хъӕбултӕ. Кӕй сфӕлдыста, уыдонӕй мах хорысӕрау рахицӕн кодта Йӕхицӕн. 19 Зонут, мӕ уарзон ӕфсымӕртӕ: алы адӕймаг дӕр рӕвдз уӕд байхъусынмӕ, рагацау баууилӕд йӕ ныхас, сонт мӕстыгӕр ма уӕд. 20 Уымӕн ӕмӕ мӕсты адӕймаджы бон нӕу, Хуыцауӕн фӕндон цы у, уый саразын. 21 Уымӕ гӕсгӕ ныууадзут алы чъизи ми, алы фыдӕх; ӕвӕлмасӕй кӕсут Хуыцауы ныхасы коммӕ. Уыцы ныхас байтыдӕуыд уӕ зӕрдӕты ӕмӕ йӕ бон у уӕ фервӕзын кӕнын. 22 Ӕххӕст ӕй кӕнут ӕмӕ ма ут, ӕрмӕст ӕм байхъусынӕй дарддӕр чи ницы аразы ӕмӕ уымӕй йӕхӕдӕг йӕхи чи сайы, ахӕмтӕ. 23 Уымӕн ӕмӕ ныхас чи хъусы, фӕлӕ йӕ чи не 'ххӕст кӕны, уый у, кӕсӕны йӕхимӕ чи кӕсы, уыцы адӕймаджы хуызӕн: 24 Федта йӕхи, иуварс ацыд ӕмӕ дзы уайтӕккӕ ферох, цы хуызӕн у, уый. 25 Фӕлӕ ахӕм нӕу, сӕрибардӕттӕг ӕнаипп ӕгъдау чи иртасы ӕмӕ йыл чи хӕцы, уыцы адӕймаг. Цы хъусы, уый дзы нӕ ферох вӕййы, фӕлӕ йӕ ӕххӕст кӕны. Ахӕм адӕймаг тӕхудиаг уыдзӕн йӕ алы хъуыддаджы дӕр. 26 Кӕд исчи йӕхи уырнӕгыл нымайы, йе 'взагыл та йӕ бар нӕ цӕуы, уӕд йӕхӕдӕг йӕхи сайы ӕмӕ йӕ уырнындзинад тутт у. 27 Сидзӕрты, идӕдзты сӕ зынты барӕвдауын, а дунейы чъизитӕй хи бахизын – уый у Фыд-Хуыцауы раз сыгъдӕг ӕмӕ ӕнӕфау уырнындзинад.

Иаков 2

1 Ме 'фсымӕртӕ, сымах нӕ намысджын Хицау Йесо Чырыстийыл ӕууӕндджытӕ стут ӕмӕ макӕй хъулон кӕнут. 2 Зӕгъӕм, уе 'мбырдмӕ бацыд адӕймаг сызгъӕрин къухдарӕнимӕ, зынаргъ дарӕсы. Бацыд мӕгуыр дӕр бызгъуыр дарӕсы. 3 Зынаргъ дарӕс кӕуыл ис, сымах уымӕ куы бакӕсат ӕмӕ йын куы зӕгъат: «Сбад ацы хорз бынаты», мӕгуырӕн та куы зӕгъат: «Ды уым слӕуу», кӕнӕ: «Ӕрбад ам, мӕ къӕхты раз», 4 Уӕд, мыййаг, иуы иннӕмӕй нӕ уӕлдӕр кӕнут ӕмӕ галиу зондыл лӕуд тӕрхонгӕнджытӕ не свӕййут? 5 Байхъусут, мӕ уарзон ӕфсымӕртӕ. Дунейы цӕсты гӕвзыкк чи у, уыдоны Хуыцау, мыййаг, нӕ сӕвзӕрста уырнындзинадӕй сӕ схъӕздыг кӕнынмӕ ӕмӕ сӕ Йӕ Паддзахадмӕ бахонынмӕ? Уыцы Паддзахадӕй Хуыцау зӕрдӕ бавӕрдта, чи Йӕ уарзы, уыдонӕн. 6 Сымах та мӕгуыры ницӕмӕ ӕрдардтат. Бонджынтӕ уӕ не ссӕндынц ӕмӕ уӕ тӕрхоны раз ӕнӕбары уыдон, мыййаг, не 'рлӕууын кӕнынц? 7 Сымахӕн цы кадджын ном рардӕуыд, ууыл цъыф, мыййаг, уыдон нӕ калынц? 8 Сыгъдӕг Фысты куыд загъд ис: «Уарз хионы, дӕхи куыд уарзыс, афтӕ», зӕгъгӕ, кӕд сымах Паддзахы уыцы ӕгъдаумӕ гӕсгӕ цӕрут, уӕд раст кӕнут. 9 Фӕлӕ кӕд искӕй хъулон кӕнут, уӕд тӕригъӕды ӕфтаут уӕхи ӕмӕ ӕгъдаумӕ гӕсгӕ стут ӕгъдаухалджытӕ. 10 Уымӕн ӕмӕ ӕппӕт ӕгъдау чи ӕххӕст кӕны, уый йын йӕ домӕнтӕй искӕцыйы куы фӕкъуыхцы уа, уӕд, ӕнӕхъӕн ӕгъдау фехалӕгау, азымджын у. 11 «Ма хӕт» Чи загъта, «Ма амар» дӕр Уый загъта. Кӕд хӕтгӕ нӕ кӕныс, фӕлӕ искӕй марыс, уӕд ӕгъдаухалӕг дӕ. 12 Уӕ ныхас ӕмӕ уӕ хъуыддӕгтӕ нывыл хъуамӕ уой, уымӕн ӕмӕ уын сӕрибардӕттӕг ӕгъдау тӕрхон кӕндзӕн. 13 Тӕригъӕдгӕнаг чи нӕу, уымӕн тӕрхон тӕригъӕд нӕ зоны; тӕригъӕдгӕнагӕн тӕрхонӕй тас нӕу. 14 Ме 'фсымӕртӕ, кӕд исчи зӕгъы, уырнындзинад мӕм ис, зӕгъгӕ, йӕ хъуыддӕгтӕ та уырнындзинадмӕ гӕсгӕ не сты, уӕд ын уый цы пайда у? Ахӕм уырнындзинад ӕй фервӕзын кӕндзӕн? 15 Зӕгъӕм, де 'фсымӕр кӕнӕ дӕ хо сты бӕгънӕг ӕмӕ сӕм бонваг хойраг дӕр нӕй, 16 Ӕмӕ сын сымахӕй исчи куы зӕгъид: «Ацӕут фарнимӕ, уӕхи батавут ӕмӕ бахӕрут», фӕлӕ хъуаг цӕмӕй ӕййафынц, уый та сын куы нӕ раттид, уӕд уымӕй цы пайда ис? 17 Афтӕ уырнындзинад дӕр – хъуыддӕгтӕй ӕвдыст куы нӕ уа, уӕд мард у. 18 Фӕлӕ исчи зӕгъдзӕн: «Дӕумӕ уырнындзинад ис, мӕнмӕ та – хъуыддӕгтӕ». Фенын мын кӕн дӕ уырнындзинад ӕнӕ хъуыддӕгтӕй, ӕз та дын мӕ уырнындзинад мӕ хъуыддӕгтӕй равдисдзынӕн. 19 Дӕу уырны, Хуыцау иунӕг Хуыцау кӕй у, уый. Хорз кӕныс. Уый дӕлимонты дӕр уырны ӕмӕ ӕмризӕджы ризынц. 20 Фӕлӕ уырнындзинад ӕнӕ хъуыддӕгтӕй мард кӕй у, уый базонын дӕ фӕнды, ӕнӕзонд адӕймаг? 21 Нӕ фыдӕл Авраам йӕ фырт Исаакы нывондхӕссӕныл куы ӕрӕвӕрдта, уӕд Хуыцау Авраамы йӕ хъуыддӕгты фӕрцы не сраст кодта, ӕви? 22 Куыд уыныс, афтӕмӕй йӕ уырнындзинад ӕмӕ йӕ хъуыддӕгтӕ фӕрсӕй-фӕрстӕм цыдысты, хъуыддӕгты фӕрцы йӕ уырнындзинад сси ӕнаипп. 23 Афтӕ сӕххӕст, Сыгъдӕг Фыст цы зӕгъы, уый: «Авраам баууӕндыди Хуыцауыл, ӕмӕ йӕ уый тыххӕй Хуыцау банымадта рӕстгӕнӕгыл». Ӕмӕ Авраамы схуындӕуыд Хуыцауы хӕлар. 24 Куыд уынут, афтӕмӕй Хуыцау адӕймаджы сраст кӕны ӕрмӕст уырнындзинады фӕрцы нӕ, фӕлӕ хъуыддӕгты фӕрцы дӕр. 25 Афтӕ хӕтагсыл Раав дӕр сгарджыты куы суазӕг кодта ӕмӕ сӕ ӕдас фӕндагыл куы арвыста, уӕд ӕй Хуыцау йӕ хъуыддӕгты фӕрцы не сраст кодта, ӕви? 26 Уӕдӕ буар ӕнӕ удӕй мард куыд у, афтӕ уырнындзинад дӕр ӕнӕ хъуыддӕгтӕй мард у.

Иаков 3

1 Ме 'фсымӕртӕ, сымахӕй бирӕтӕ сӕхицӕй ахуыргӕнджытӕ скӕнынмӕ ма тырнӕнт. Махӕй, ахуыргӕнджытӕй, карздӕрӕй кӕй ӕрдомдӕуыдзӕн, уый сымахӕн зындгонд у. 2 Уымӕн ӕмӕ мах неппӕт дӕр арӕх фӕтӕригъӕдджын вӕййӕм. Ныхасӕй тӕригъӕд чи нӕ ракӕны, уый у алцӕмӕй дӕр ӕххӕст адӕймаг ӕмӕ йӕ бон у йеппӕт буары рохтыл хӕцын дӕр. 3 Цӕмӕй бӕхтӕ нӕ коммӕ кӕсой, уый тыххӕй сын идоны къӕбӕлтӕ сӕ дзыхы куы бакӕнӕм, уӕд нӕ бар фӕцӕуы сеппӕт буарыл дӕр. 4 Кӕс-ма, наутӕ дӕр кӕд тынг егъау сты ӕмӕ сӕ кӕд цыфӕнды тыхджын дымгӕтӕ тӕрынц, уӕддӕр сӕ гыццыл здахӕн саразы, наутӕрӕджы кӕдӕм фӕфӕнды, уыцырдӕм. 5 Афтӕ ӕвзаг дӕр хӕрзгыццыл уӕнг у, фӕлӕ йын тынг бирӕ ӕнтысы. Кӕс-ма, хӕрзгыццыл зынгӕй цы стыр арт сирвӕзы! 6 Ӕвзаг дӕр у зынг, фыдбылызы дуне. Ӕвзаг нӕ буары иннӕ уӕнгты ӕхсӕн ахӕм у, ӕмӕ ӕлгъаг кӕны ӕгас буар дӕр, арт бафтауы неппӕт цардыл, йӕхӕдӕг та зындоны артӕй судзы. 7 Адӕймагӕн йӕ бон у алы сырдты ӕмӕ мӕргъты, хилджыты ӕмӕ денджызон цӕрӕгойты йӕ дӕлбар бакӕнын, ӕмӕ сӕ йӕ дӕлбар дӕр бакодта. 8 Ӕвзаджы та йӕ дӕлбар бакӕнын адӕмӕй никӕмӕн ӕнтысы. Уый у, бауромӕн кӕмӕн нӕй, ахӕм фыдбылыз, мӕлӕтхӕссӕг маргӕй ӕмыдзаг. 9 Ӕвзагӕй арфӕ кӕнӕм нӕ Хицауӕн – Фыдӕн, ӕмӕ дзы ӕлгъитӕм, Хуыцауы ӕнгӕс кӕй сфӕлдыстӕуыд, уыцы адӕмы дӕр. 10 Иу дзыхӕй рацӕуы арфӕ ӕмӕ ӕлгъыст. Ме 'фсымӕртӕ, уый хъуамӕ афтӕ ма уа. 11 Уыциу суадонӕй гуырынц, мыййаг, адджын дон дӕр ӕмӕ маст дон дӕр? 12 Ме 'фсымӕртӕ, легъуибӕласыл, мыййаг, зетибӕласы гагатӕ ӕрзайдзӕни, сӕнӕфсирыл та – легъуийы дыргътӕ? Афтӕ цӕхджын суадонӕй дӕр адджын дон нӕ гуыры. 13 Сымахӕй зондджын ӕмӕ ӕмбаргӕ исчи у? Кӕд ӕцӕг ахӕм у, уӕд ӕй равдисӕд йӕ нывыл цардӕй, зондӕй гуырӕг ӕвӕлмасдзинадӕй. 14 Фӕлӕ кӕд уӕ зӕрдӕ хӕлӕг ӕмӕ хи уарзынӕй ӕмыдзаг у, уӕд ма ӕппӕлут уӕхицӕй ӕмӕ ӕцӕгад ма ӕмбӕхсут уӕ гӕды ныхӕсты аууон. 15 Уый нӕу уӕларвӕй ӕрцӕугӕ зонд, фӕлӕ у зӕххон, тӕригъӕдджын ӕрдзыхъӕдӕй рацӕугӕ, хӕйрӕджы лӕвӕрд. 16 Уымӕн ӕмӕ хӕлӕг ӕмӕ хи уарзын кӕм уа, уым уыдзӕни змӕст ӕмӕ алы ӕвзӕр митӕ. 17 Уӕларвӕй ӕрцӕугӕ зонд та фыццаджыдӕр у сыгъдӕг, стӕй у фидауынгӕнӕг, ӕвӕлмас, уарзӕгой, нӕу хивӕнд, йӕ хъуыддӕгтӕ сты хорз, никӕй хъулон кӕны, цӕстмӕмитӕ йӕм нӕй. 18 Фидыд чи тауы, уыцы фидауынгӕнджытӕ бафснайынц рӕстады тыллӕг.

Иаков 4

1 Сымахмӕ фыдӕх ӕмӕ хъаугъатӕ кӕцӕй ис? Уӕ мидӕг кӕрӕдзиимӕ цы монцтӕ тох кӕнынц, уыдон сӕ нӕ расайынц, ӕви? 2 Бӕллут цӕмӕдӕр – ӕмӕ уын нӕй; марут ӕмӕ хӕлӕг кӕнут, фӕлӕ уӕддӕр уӕ бон йӕ райсын нӕу. Кӕрӕдзимӕ хӕссут фыдӕх ӕмӕ хъаугъа кӕнут; цы уӕ хъӕуы, уый нӕ райсут, уымӕн ӕмӕ нӕ курут. 3 Куы фӕкурут, уӕд нӕ райсут, уымӕн ӕмӕ хорзӕхӕн нӕ курут, фӕлӕ уӕ монцтӕ бафсадынӕн. 4 Хуыцауы ныууадзӕг адӕм! Дунеимӕ хӕларӕй цӕрын Хуыцауӕн знаггад кӕнын кӕй у, уый нӕ зонут, ӕви? Уӕдӕ дунеимӕ хӕларӕй цӕрын чи равзара, уый Хуыцауӕн свӕййы знаг. 5 Ӕви сымах афтӕ ӕнхъӕлут, ӕмӕ Сыгъдӕг Фыст дзӕгъӕлы зӕгъы: «Хуыцау нӕ зӕрдӕты Кӕй ӕрцӕрын кодта, уыцы Уд нӕ афтӕ бирӕ уарзы, ӕмӕ Йӕ фӕнды, ӕрмӕст Уый дӕлбар куыд уӕм»? 6 Уый хыгъд нын Хуыцау ноджы фылдӕр хорзӕх дӕтты. Уымӕ гӕсгӕ зӕгъы Сыгъдӕг Фыст: «Хуыцау сӕрыстыртӕн сӕ ныхмӕ у, сӕрныллӕджытӕн та хорзӕх дӕтты». 7 Уӕдӕ Хуыцауӕн басӕттут, слӕуут хӕйрӕджы ныхмӕ ӕмӕ уӕ алидздзӕн. 8 Ӕрбахӕстӕг ут Хуыцаумӕ, ӕмӕ уӕм ӕрбахӕстӕг уыдзӕн. Ссыгъдӕг кӕнут уӕ къухтӕ, тӕригъӕдджынтӕ; ӕрӕхсут уӕ зӕрдӕтӕ, дызӕрдыгтӕ. 9 Хъыг кӕнут, кӕут ӕмӕ дзыназут. Уӕ худын раивут кӕуынӕй, уӕ цин – хъыгӕй. 10 Хицауы раз ӕрныллӕг кӕнут уӕхи ӕмӕ уӕ сбӕрзонд кӕндзӕн. 11 Кӕрӕдзийыл цъыф ма калут, ӕфсымӕртӕ. Йе 'фсымӕрыл цъыф чи калы кӕнӕ йе 'фсымӕрӕн чи тӕрхон кӕны, уый цъыф калы ӕгъдауыл ӕмӕ йын тӕрхон хӕссы. Кӕд ӕгъдауӕн тӕрхон хӕссыс, уӕд ӕгъдау ӕххӕстгӕнӕг нӕ дӕ, фӕлӕ тӕрхонгӕнӕг. 12 Ӕгъдауӕвӕрӕг ӕмӕ Тӕрхонгӕнӕг иу у, Йӕ бон у фервӕзын кӕнын дӕр ӕмӕ фесафын дӕр. Ды та чи дӕ, ӕмӕ хионӕн тӕрхон кӕнай? 13 Ныр та байхъусут сымах, афтӕ зӕгъджытӕ: «Абон кӕнӕ райсом ацӕудзыстӕм ахӕм ӕмӕ ахӕм сахармӕ, фӕцӕрдзыстӕм дзы афӕдз, кӕндзыстӕм сӕудӕджер ӕмӕ райсдзыстӕм ӕфтиаг». 14 Афтӕмӕй та райсом цы ӕрцӕудзӕн, уый уӕвгӕ дӕр нӕ зонут. Уӕ цард цы у? Сымах стут донытӕфау, исдуг чи фӕзыны ӕмӕ стӕй чи ӕрбайсӕфы. 15 «Хицауы куы бафӕнда, уӕд мах уыдзыстӕм удӕгас ӕмӕ сараздзыстӕм уый дӕр ӕмӕ уый дӕр», – афтӕ дзурыны бӕсты 16 Сымах фырхъалӕй уӕхицӕй ӕппӕлут. Алы ахӕм хиппӕлой ми дӕр фыдбылыз у. 17 Уӕдӕ хорз кӕнын кӕй хъӕуы, уый чи ӕмбары ӕмӕ йӕ чи нӕ кӕны, уымӕн уый тӕригъӕд у.

Иаков 5

1 Байхъусут сымах, бонджынтӕ. Кӕут ӕмӕ дзыназут, цы бӕллӕхтӕ уӕ ӕрӕййафынц, уыдоны тыххӕй. 2 Уӕ мулк бамбыди, уӕ дарӕс уын бахордта рӕмпӕг. 3 Уӕ сызгъӕрин ӕмӕ ӕвзист сызгӕ сты, се згӕ уӕ ныхмӕ ӕвдисӕн уыдзӕн ӕмӕ уын артау бахӕрдзӕн уӕ буар. Рӕстӕджы кӕрон ӕрӕмбырд кодтат уӕ хӕзнатӕ! 4 Уӕ хуымтӕ уын чи ныккарста, уыцы кусджыты мызд уӕхи бакодтат, ӕмӕ уыдон ӕрдиаг кӕнынц хъӕлӕсыдзагӕй. Хор бафснайджыты ӕрдиаг сыхъуысти Хицау Саваофмӕ. 5 Сымах хъалӕй цардыстут зӕххыл, уӕ удыдзӕбӕхӕн; уӕхи снард кодтат, къӕсӕрмӕ чи ӕрбахӕццӕ, уӕ ӕргӕвдыны уыцы бонмӕ. 6 Сымах тӕрхон рахастат рӕстгӕнджытӕн ӕмӕ сӕ амардтат; уыдон уын ныхкъуырд нӕ лӕвӕрдтой. 7 Уӕдӕ, ӕфсымӕртӕ, Хицауы ӕрцыдмӕ ӕнхъӕлмӕ кӕсут фӕразонӕй. Мӕнӕ зӕхкусӕг фӕразонӕй ӕнхъӕлмӕ кӕсы зӕххы зынаргъ бӕркадмӕ, цалынмӕ фӕззыгон ӕмӕ уалдзыгон уарынтӕ ӕрцӕуой, уӕдмӕ. 8 Фӕразонӕй ӕнхъӕлмӕ кӕсут сымах дӕр, фидар фӕлӕуут, уымӕн ӕмӕ Хицауы ӕрцыдмӕ бирӕ нал баззади. 9 Кӕрӕдзийӕ хъӕстаг ма ут, ӕфсымӕртӕ, ӕмӕ тӕрхонгонд ма уат. Тӕрхонгӕнӕг ныридӕгӕн къӕсӕрыл лӕууы. 10 Ме 'фсымӕртӕ, Хицауы номӕй чи дзырдта, уыцы пехуымпартӕ хъизӕмӕрттӕн куыд фӕразон уыдысты, афтӕ фӕразон ут сымах дӕр. 11 Мах тӕхудиагыл нымайӕм, хъизӕмӕрттӕн чи бафӕрӕзта, уыдоны. Сымах фехъуыстат, Иов фӕразон кӕй разынд ӕмӕ йӕ Хицау ӕппынфӕстаг кӕй схорзӕхджын кодта, уый тыххӕй, ӕмӕ зонут, Хицау уарзӕгой ӕмӕ тӕригъӕдгӕнаг кӕй у, уый. 12 Уӕлдайдӕр, ме 'фсымӕртӕ, ма сомы кӕнут нӕдӕр арвӕй, нӕдӕр зӕххӕй, нӕдӕр ӕндӕр истӕмӕй. Фӕлӕ уӕ «о» хъуамӕ уа «о», уӕ «нӕ» та – «нӕ», ӕмӕ тӕрхонгонд ма уат. 13 Хъизӕмар уӕ исчи ӕвзары? Кувӕд. Хъӕлдзӕг уӕ исчи у? Зарӕд Хуыцауӕн. 14 Рынчын уӕ исчи у? Фӕдзурӕд аргъуаны хистӕртӕм. Уыдон ӕй Хицауы номыл байсӕрддзысты зетийӕ ӕмӕ йын скувдзысты. 15 Уырнындзинады мидӕг йӕ тых кӕмӕн ис, уыцы куывдӕй сдзӕбӕх уыдзӕн рынчын, ӕмӕ йӕ Хицау рабадын кӕндзӕн. Ӕмӕ кӕд тӕригъӕдты бафтыди рынчын, уӕд ын сӕ ныббарстӕуыдзӕн. 16 Уӕдӕ уӕ тӕригъӕдтӕ ӕргом кӕнут кӕрӕдзийӕн, кувут кӕрӕдзийы тыххӕй, ӕмӕ сӕнӕниз уат. Рӕстгӕнӕджы зӕрдиаг куывды бон бирӕ у. 17 Илиа мах хуызӕн адӕймаг уыди. Фӕлӕ уарын цӕмӕй ма уа, уый тыххӕй зӕрдиагӕй ракуырдта Хуыцауӕй, ӕмӕ ӕртӕ азы ӕмӕ ӕхсӕз мӕйы зӕхмӕ иу ӕртах дӕр не 'рхауд. 18 Стӕй ногӕй куы бакуывта, уӕд арвӕй ӕрцыд уарын ӕмӕ зӕхх радта хор. 19 Ме 'фсымӕртӕ, исчи уӕ ӕцӕгадӕй куы адзӕгъӕл уа ӕмӕ йӕ иннӕ куы раздаха, 20 Уӕд зонӕд: чи адзӕгъӕл, ахӕм тӕригъӕдджыны раздахӕг ын мӕлӕтӕй фервӕзын кӕндзӕн йӕ уд, ӕмӕ барст ӕрцӕудзысты бирӕ тӕригъӕдтӕ.

1 Петр 1

1 Петрӕй, Йесо Чырыстийы апостолӕй, – Понты, Галатийы, Каппадокийы, Асийы ӕмӕ Вифинийы чи ныххӕлиу, ӕцӕгӕлонау дзы чи цӕры, Хуыцауы уыцы ӕвзӕрстытӕм. 2 Кӕй уӕ сӕвзардзӕн, уый Фыд-Хуыцау зыдта рагацау, ӕмӕ Йӕ Уд ссыгъдӕг кодта сымах, цӕмӕй Йесо Чырыстийӕн уат коммӕгӕс ӕмӕ уӕ цӕхсадӕуа Йӕ Тугӕй. Хуыцау уын ноджы фылдӕр бахай кӕнӕд Йӕ хорзӕх ӕмӕ Йӕ фарнӕй. 3 Арфӕгонд уӕд нӕ Хицау Йесо Чырыстийы Хуыцау ӕмӕ Фыд. Йесо Чырыстийы мӕрдтӕй кӕй райгас кодта, уымӕй нын Йе стыр хорзӕхмӕ гӕсгӕ радта ног цард ӕмӕ ӕнӕфӕцудгӕ зӕрдӕдарӕн – 4 Фесӕфӕн кӕмӕн нӕй, рӕстӕджы бар кӕуыл нӕ цӕуы, ахӕм хорзӕхтӕ уӕлӕрвты ӕфснайдӕй лӕууынц сымахӕн. 5 Уырнынад уӕм кӕй ис, уымӕ гӕсгӕ Хуыцау сымах Йӕ хъаруйӕ хъахъхъӕны, цалынмӕ уӕ фервӕзын кӕна, уӕдмӕ. Уыцы ирвӕзындзинад цӕттӕ у, ӕмӕ йӕ Хуыцау раргом кӕндзӕни рӕстӕджы кӕроны. 6 Ӕмӕ цин кӕнут уыдӕтты тыххӕй, ныртӕккӕ уӕ алыхуызон фӕлварӕнты исдуг хъыг бавзарын куы бахъӕуы, уӕд дӕр. 7 Сызгъӕрин бафӕразы артӕн, фӕлӕ уӕддӕр фесӕфы; сызгъӕринӕй зынаргъдӕр чи у, уӕ уыцы фӕлтӕрд уырнындзинад раппӕлыны, намыс ӕмӕ кады аккаг уыдзӕн, Йесо Чырысти куы ӕрцӕуа, уӕд. 8 Сымах цӕстӕй нӕ федтат Чырыстийы, фӕлӕ Йӕ уарзут, ӕмӕ Йӕ кӕд ныртӕккӕ нӕ уынут, уӕддӕр Ыл ӕууӕндут ӕмӕ уӕ цин у, зӕгъӕн кӕмӕн нӕй, ахӕм. 9 Уымӕн ӕмӕ уӕ къухы ӕфты, уырнындзинад сымах цӕмӕ хъуамӕ ӕркӕна, уый – уӕ удты фервӕзын кӕнын. 10 Уыцы ирвӕзындзинад иртӕстой пехуымпартӕ ӕмӕ рагагъоммӕ загътой, сымахӕн нысангонд цы хорзӕх уыди, уый тыххӕй. 11 Уыдон архайдтой, хайджын Кӕмӕй уыдысты, Чырыстийы уыцы Уд сын рагагъоммӕ Чырыстийы тухӕнты ӕмӕ Йӕ фӕстӕдӕры намысы тыххӕй куы дзырдта, уӕд сын цы афонмӕ ӕмӕ ӕууӕлтӕм амыдта, уый базоныныл. 12 Хуыцау сын раргом кодта, цы раиртӕстой, уый сӕхи хорзӕхӕн нӕ, фӕлӕ уӕ хорзӕхӕн кӕй уыди. Цы раиртӕстой, уый тыххӕй ныр сымахӕн загътой, фарны уац уын уӕларвӕй ӕрвыст Сыгъдӕг Удӕй разӕнгардӕй чи фехъусын кодта, уыдон. Уыцы сусӕгдзинад базонынмӕ бӕллынц зӕдтӕ дӕр. 13 Уымӕ гӕсгӕ уӕ зонд уӕд архайынмӕ цӕттӕ ӕмӕ цырд лӕуут; уӕ зӕрдӕ фидарӕй дарут, Йесо Чырысти куы ӕрцӕуа, уӕд цы хорзӕх райсдзыстут, ууыл. 14 Ут коммӕгӕс хъӕбултау – Хуыцауы куы нӕма зыдтат, уӕд уӕм цы мондӕгтӕ уыди, уыдоны фӕдыл ма цӕут, 15 Фӕлӕ уӕ Ӕрхонӕг куыд сыгъдӕг у, афтӕ уӕхӕдӕг дӕр алы хъуыддаджы ут сыгъдӕг. 16 Сыгъдӕг Фыст дӕр афтӕ зӕгъы: «Ут сыгъдӕг, уымӕн ӕмӕ Ӕз сыгъдӕг дӕн». 17 Чи никӕй хъулон кӕны, алкӕмӕн дӕр йӕ хъуыддӕгтӕм гӕсгӕ Чи хӕссы тӕрхон, кӕд Уый уӕ Фыд хонут, уӕд ӕцӕгӕлон бӕстӕйы уӕ цард ӕрвитут афтӕ, ӕмӕ уӕм Хуыцауы тас куыд уа. 18 Уымӕн ӕмӕ сымах зонут: уӕ фыдӕлтӕй уын цы ницӕйаг цард баззад, уымӕй уӕ балхӕдӕуыди, рӕстӕг кӕй бахӕрдзӕн, ахӕм ӕвзист кӕнӕ сызгъӕринӕй нӕ, 19 Фӕлӕ ӕнаипп ӕмӕ сыгъдӕг Уӕрыччы – Чырыстийы зынаргъ Тугӕй. 20 Уый сӕвзӕрстӕуыд дуне сфӕлдисыны размӕ, ӕмӕ сымах сӕраппонд раргом рӕстӕджы кӕрон. 21 Йӕ фӕрцы сымах баууӕндыдыстут Хуыцауыл. Уый Йӕ райгас кодта мӕрдтӕй ӕмӕ Йын радта намыс, Хуыцауыл куыд ӕууӕндат ӕмӕ Йыл уӕ зӕрдӕ куыд дарат. 22 Ӕцӕгадӕн коммӕ бакӕсыны руаджы сымах уӕ зӕрдӕтӕ ссыгъдӕг кодтат ӕнӕцӕстмӕуарзтӕй ӕфсымӕрты уарзынӕн. Уӕдӕ кӕрӕдзи бауарзут зӕрдиагӕй. 23 Уымӕн ӕмӕ сымах ногӕй райгуырдыстут, мӕлӕты бар кӕуыл цӕуы, уыцы адӕймаджы мыггагӕй нӕ, фӕлӕ Хуыцауы цардӕгас ӕмӕ ӕнусон ныхасы руаджы. 24 Сыгъдӕг Фыст зӕгъы: «Алы адӕймаг дӕр у кӕрдӕгау, йӕ намыс – быдираг дидинӕгау: кӕрдӕг бахус ӕмӕ дидинӕг ӕрызгъӕлди; 25 Хицауы ныхас та мыггагмӕ цӕры». Уыцы ныхас у, сымах цы фарны уац фехъуыстат, уый.

1 Петр 2

1 Уӕдӕ ныууадзут алы хӕрам, хин, цӕстмӕми, хӕлӕг ӕмӕ фыдгой. 2 Ноггуырд сабитау кӕддӕриддӕр уӕ зӕрдӕ агурӕд удӕн царддӕттӕг сыгъдӕг ӕхсыр – рӕзты хос уын куыд уа уӕ фервӕзынӕн, афтӕ. 3 Уымӕн ӕмӕ сымах базыдтат Хицауы хорзӕхы ад. 4 Адӕм Кӕуыл нӕ барвӕссыдысты, фӕлӕ Хуыцау Кӕй сӕвзӕрста ӕмӕ Йын зынаргъ Чи у, ӕрцӕут уыцы Чырыстимӕ – удӕгас дурмӕ. 5 Ӕмӕ сымах дӕр, удӕгас дуртау, уӕхи раттут Хуыцауӕн уӕхицӕй лӕггады хӕдзар самайынӕн, уыдзыстут дзы сыгъдӕг кусджытӕ ӕмӕ Йын Йесо Чырыстийы фӕрцы хӕсдзыстут фӕндиаг нывондтӕ – лӕггад Ын кӕндзыстут Сыгъдӕг Удӕй разӕнгардӕй. 6 Уымӕн ӕмӕ Сыгъдӕг Фысты загъд ис: «Мӕнӕ Ӕз Сионы ӕвӕрын сӕрӕвӕрӕн – ӕвзӕрст зынаргъ дур, ӕмӕ Йыл чи ӕууӕнды, уый нӕ фӕхудинаг уыдзӕн». 7 Уӕдӕ Уый сымахӕн, уырнджытӕн, хӕзна у, ӕнӕуырнджытӕн та у, «аразджытӕ цы дурыл нӕ барвӕссыдысты, фӕлӕ сӕрӕвӕрӕн чи сси», «кӕуыл фӕкӕлынц ӕмӕ ахауынц, уыцы дур». 8 Хуыцауы ныхасӕн коммӕгӕс кӕй не сты, уый тыххӕй Йыл фӕкӕлынц. Афтӕ сын снысан кодта Хуыцау. 9 Сымах та стут «ӕвзӕрст мыггаг, лӕггадгӕнджытӕ Паддзахӕн, Хуыцау Йӕхи кӕй бакодта, уыцы сыгъдӕг адӕм», талынгӕй уӕ Йӕ диссаджы рухсмӕ Ӕрхонӕджы алӕмӕты хъуыддӕгты тыххӕй куыд хъусын кӕнат. 10 Кӕддӕр Хуыцауы адӕм нӕ уыдыстут, ныр та Йӕ адӕм стут. Кӕддӕр Ын Йӕ хорзӕх нӕ зыдтат, ныр та дзы хайджын стут. 11 Мӕ уарзон хӕлӕрттӕ, курын сымахӕй, ӕцӕгӕлон бӕстӕйы рӕстӕгмӕ цӕрджытӕй: уӕ тӕригъӕдджын ӕрдзыхъӕды мондӕгты коммӕ ма кӕсут – уыдон уӕ уды ныхмӕ тох кӕнынц. 12 Муртатты ӕхсӕн уӕ цард уӕд фӕзминаг. Фыдгӕнджытӕ цыма стут, уыйау уыл кӕд уыдон цъыф калынц, уӕддӕр уындзысты уӕ хорз хъуыддӕгтӕ ӕмӕ скад кӕндзысты Хуыцауӕн, куы ӕрцӕуа, уӕд. 13 Хицауы сӕраппонд коммӕгӕс ут, кӕй бар уыл цӕуы, уыдонӕй алкӕмӕн дӕр: паддзахӕн – уӕлдӕр хицауиуӕггӕнӕгӕн, 14 Фыдгӕнджыты бафхӕрыны ӕмӕ хӕрзгӕнджыты барӕвдауыны тыххӕй паддзах кӕй сӕвӕры, уыцы хицӕуттӕн. 15 Уымӕн ӕмӕ Хуыцауы афтӕ фӕнды, цӕмӕй уӕ хорз хъуыддӕгтӕй кӕрон сӕвӕрат ӕнӕзонд адӕмы ӕнӕфенд ныхӕстӕн. 16 Цӕрут сӕрибар адӕмау – Хуыцауы цагъартау. Фӕлӕ уӕ сӕрибар ӕвзӕр митӕ ма расайӕд. 17 Аргъ кӕнут алкӕмӕн дӕр, уарзут ӕфсымӕрты, тӕрсут Хуыцауӕй, нымайут паддзахы. 18 Цагъартӕ, нымайут уӕ хицӕутты ӕмӕ сын ут коммӕгӕс, стӕй зӕрдӕхӕлар ӕмӕ ӕвӕлмас чи у, ӕрмӕст уыдонӕн нӕ, фӕлӕ тызмӕгтӕн дӕр. 19 Уымӕн ӕмӕ исчи ӕназымӕй ӕфхӕрд ӕмӕ хъизӕмӕрттӕ куы ӕвзара, ӕмӕ Хуыцауимӕ йӕ зӕрдӕ кӕй ис, уый сӕраппонд куы быхса, уӕд уый Хуыцауӕн фӕндон у. 20 Уе 'взӕр хъуыддӕгты тыххӕй ӕфхӕрд куы ӕййафат ӕмӕ куы быхсат, уӕд дзы раппӕлинагӕй цы ис? Фӕлӕ кӕд хорз хъуыддӕгтӕ аразут, афтӕмӕй хъизӕмар ӕвзарут ӕмӕ стут фӕразон, уӕд уый Хуыцауӕн фӕндон у – 21 Хуыцау уӕ уый тыххӕй сӕвзӕрста. Уымӕн ӕмӕ Чырысти дӕр хъизӕмар бавзӕрста сымах сӕраппонд, ӕмӕ уын у фӕзминаг, цӕмӕй цӕуат Йӕ фӕдыл. 22 Чырысти тӕригъӕды никуы бафтыд, ӕмӕ Йӕ дзыхӕй мӕнгныхас никуы рацыди. 23 Дзырдтой Йын ӕвзӕртӕ, фӕлӕ ӕвзӕр ныхасӕй дзуапп нӕ лӕвӕрдта, хъизӕмарӕй Йӕ мардтой, фӕлӕ сӕ никӕмӕ ӕртхъирӕн кодта – ӕппӕт дӕр бакодта Ӕнӕхӕрам Тӕрхонгӕнӕджы ӕвджид. 24 Уый нын нӕ тӕригъӕдтӕ Йӕ буаримӕ систа дзуармӕ, цӕмӕй амӕлӕм тӕригъӕдӕн ӕмӕ цӕрӕм рӕстдзинадӕн. Сымах Йӕ хъӕдгӕмттӕй сдзӕбӕх стут. 25 Уымӕн ӕмӕ сымах уыдыстут дзӕгъӕл фыстау, фӕлӕ ныр раздӕхтыстут уӕ удты Фыййаумӕ ӕмӕ Цӕстдарӕгмӕ.

1 Петр 3

1 Афтӕ сымах дӕр, устытӕ, кӕсут уӕ лӕгты коммӕ, Хуыцауы ныхасӕн дзы чи нӕ сӕтты, цӕмӕй уыдонӕн зӕгъын дӕр ма бахъӕуа, фӕлӕ сӕ Хуыцаумӕ ӕрхона сӕ устыты цард, 2 Уымӕн ӕмӕ фендзысты, сымах кӕй цӕрут сыгъдӕгӕй ӕмӕ уӕм кӕй ис Хуыцауы тас. 3 Ӕддаг бакастӕй чи зыны, дзыккуты уыцы аив быд, сызгъӕрин фӕлындӕнтӕ кӕнӕ аив дарӕс ма уӕнт уӕ фидауц, 4 Фӕлӕ уӕ зӕрдӕйы уаг, Хуыцауы цӕсты тынг зынаргъ чи у, уыцы ӕвӕлмас ӕмӕ сабыр удыхъӕды ӕнӕмӕлгӕ рӕсугъддзинад. 5 Хуыцауыл йӕ зӕрдӕ чи дардта, уыцы сыгъдӕг устытӕ дӕр рагзаманы фидауцджын уыдысты, сӕ лӕгты коммӕ кӕй кастысты, уымӕй. 6 Афтӕ Саррӕ уыд Авраамӕн коммӕгӕс, ӕмӕ йӕ хуыдта йе 'лдар. Кӕд сымах хорз хъуыддӕгтӕ аразут ӕмӕ уыл фӕстӕмӕ ницавӕр тас хӕцы, уӕд Саррӕйы хъӕбултӕ стут. 7 Сымах дӕр, лӕгтӕ, цӕрут уӕ устытимӕ, уыдон лӕмӕгъдӕр кӕй сты, уый ӕмбаргӕйӕ. Аргъ сын кӕнут, уымӕн ӕмӕ уыдон дӕр уемӕ райсдзысты Хуыцауы хорзӕх – мыггагмӕйы цард. Афтӕмӕй уӕ куывд нӕ фӕкъуылымпы уыдзӕн. 8 Уӕдӕ уеппӕт дӕр ут ӕмзонд, иннӕйы мӕт ӕмӕ цинӕй хайджын, ӕфсымӕруарз, зӕрдӕхӕлар, сӕрныллӕг. 9 Фыдӕхӕн ма фидут фыдӕхӕй, ӕфхӕрӕн ныхасӕн – ӕфхӕрӕн ныхасӕй. Уый нӕ, фӕлӕ Хуыцауӕй курут хорзӕх ӕфхӕрджытӕн – Хуыцау сымах уый тыххӕй ӕрхуыдта. Ӕмӕ уыл уӕд ӕрцӕудзӕн Йӕ хорзӕх. 10 Уымӕн ӕмӕ «тӕхудиаг цардӕй цӕрын ӕмӕ хорз рӕстӕг фенын кӕй фӕнды, уый ма уӕд маргӕвзаг ӕмӕ йӕ дзыхӕй ма рацӕуӕд мӕнгныхас, 11 Ныууадзӕд фыдӕх ӕмӕ аразӕд хорз хъуыддӕгтӕ, зӕрдиагӕй тырнӕд фидыдмӕ. 12 Хицау Йӕ цӕст дары рӕстгӕнджытӕм ӕмӕ сын хъусы сӕ куывдмӕ; фыдгӕнджытӕн та Хицау сӕ ныхмӕ у». 13 Ӕмӕ хорз хъуыддӕгтӕм куы тырнат, уӕд уын фыдбылыз чи хъуамӕ сараза? 14 Фӕлӕ кӕд Хуыцауӕн фӕндон хъуыддӕгты тыххӕй тухӕн ӕвзарут, уӕд тӕхудиаг стут; уе 'фхӕрджытӕ уӕ цӕмӕй тӕрсын кӕнынц, уымӕй та ма тӕрсут ӕмӕ ма тыхсут. 15 Зӕрдӕбынӕй кад кӕнут Чырыстийӕн – уӕ Хицауӕн. Уӕ зӕрдӕдарӕны бындурӕй уӕ чи фӕрса, уымӕн кӕддӕриддӕр цӕттӕ ут ӕвӕлмасӕй ӕмӕ Хуыцауӕй тӕрсгӕйӕ дзуапп раттынмӕ. 16 Уӕ цӕсгомыл къӕм абадын ма бауадзут, ӕмӕ фӕхудинаг уой, уӕ дзӕбӕх чырыстон цардыл цъыф чи калы, уыдон. 17 Уымӕн ӕмӕ Хуыцауы фӕндӕй иугӕр хъизӕмар бавзаргӕ куы уа, уӕд ӕй ӕвзӕр хъуыддӕгты бӕсты фӕлтау хорз хъуыддӕгты тыххӕй бавзар. 18 Уымӕн ӕмӕ Чырысти дӕр мах Хуыцаумӕ ӕрхоныны охыл уыциу хъизӕмар бавзӕрста – Йӕхӕдӕг ӕназым уыди, афтӕмӕй азымджынты сӕраппонд амарди уыдоны тӕригъӕдты тыххӕй. Йӕ буар Ын амардтой, фӕлӕ уды ӕгъдауӕй райгас, 19 Ӕмӕ афтӕмӕй ацыд ӕмӕ хъусын кодта уац ахст удтӕн – 20 Кӕддӕр Хуыцауӕн чи нӕ басаст, уыдонӕн. Хуыцау сын быхста ӕмӕ ӕнхъӕлмӕ касти, цалынмӕ Ной нау арӕзта, уӕдмӕ. Уыцы науы ӕрмӕст цалдӕрӕй – аст адӕймаджы – фервӕзтысты доны фӕрцы. 21 Уыцы дон фӕсномыгӕй амыдта донаргъуыдмӕ; донаргъуыд та у буары чъизи ӕрӕхсын нӕ, фӕлӕ Хуыцауӕн сыгъдӕг цӕсгомимӕ цӕрыны тыххӕй зӕрдӕ бавӕрын Донаргъуыд абон сымах ирвӕзын кӕны Йесо Чырыстийы райгасы фӕрцы – 22 Уый ацыд уӕларвмӕ, бады Хуыцауы рахиз фарс, Йӕ дӕлбар сты зӕдтӕ, уӕларвон барджынтӕ ӕмӕ тыхджынтӕ.

1 Петр 4

1 Чырысти буарӕй хъизӕмӕрттӕ кӕй бавзӕрста, уымӕ гӕсгӕ сымах дӕр Йӕ цӕстӕй кӕсут хъизӕмӕрттӕм ӕмӕ уымӕй ифтонг кӕнут уӕхи, уымӕн ӕмӕ буарӕй тухӕнгӕнӕг тӕригъӕды нал ӕфты – 2 Буары цӕрынӕн ма йын цы рӕстӕг баззади, уый ӕрвиты адӕймаджы тӕригъӕдджын мондӕгтӕ ӕфсадгӕйӕ нӕ, фӕлӕ Хуыцауӕн фӕндиагӕй. 3 Ӕгъгъӕд уын фӕуӕд, ивгъуыд заман муртатты ӕгъдӕуттӕм гӕсгӕ цас фӕцардыстут, уый – уыдыстут хӕлд адӕм, чъизи монцты, фыднозты ӕмӕ ӕнӕуаг миты уацайрӕгтӕ, куывтат ӕлгъаг мӕнгхуыцӕуттӕн. 4 Ныр муртаттимӕ иумӕ уыдонӕн сӕ хӕлд хъуыддӕгты цъымарайы кӕй нал ныгъуылут, уый сӕ ӕфтауы дисы ӕмӕ уыл цъыф калынц. 5 Уыдон дзуапп ратдзысты, удӕгӕстӕн ӕмӕ мӕрдтӕн тӕрхон рахӕссынмӕ цӕттӕ Чи у, Уымӕн. 6 Уымӕ гӕсгӕ фарны уац мӕрдтӕ дӕр уый тыххӕй фехъуыстой, ӕмӕ адӕмӕн тӕрхон куыд рахастӕуы, кӕд уыдоны буарӕн тӕрхон афтӕ рахастӕуыд, уӕддӕр уды ӕгъдауӕй цӕрой Хуыцауимӕ. 7 Рӕхджы алцӕмӕн дӕр уыдзӕни кӕрон. Уӕдӕ ут хӕдзонд, кӕддӕриддӕр цӕттӕ ӕмӕ кувут. 8 Фыццаджыдӕр кӕрӕдзи уарзут зӕрдиагӕй, уымӕн ӕмӕ уарзондзинады фӕрцы бирӕ тӕригъӕдтӕ ныббарстӕуы. 9 Кӕрӕдзийы-иу суазӕг кӕнут зӕрдиагӕй, ӕнӕ хъуыр-хъуырӕй. 10 Сымахӕй алкӕмӕн дӕр рардӕуыд йӕхи курдиат, ӕмӕ уӕ алчидӕр Хуыцауы лӕвӕрд уыцы алыхуызон хорзӕхтӕй раст пайда кӕнӕд кӕрӕдзийӕн лӕггады охыл. 11 Чи амоны, уый амонӕд Хуыцауы ныхас; чи лӕггад кӕны, уый лӕггад кӕнӕд, Хуыцау ын цы хъару дӕтты, уымӕй – уӕ алы хъуыддагӕй дӕр Йесо Чырыстийы фӕрцы Хуыцау куыд скадджын уа, афтӕ. Кад ӕмӕ Йын паддзахад уӕд мыггагӕй-мыггагмӕ! Амен. 12 Мӕ уарзон хӕлӕрттӕ, уӕ бафӕлварыны тыххӕй фыдӕвзарӕнты кӕй ӕфтут, уый уӕм диссаг ма кӕсӕд, цыма уыл цыдӕр ӕнахуыр хъуыддаг ӕрцыди, уыйау, 13 Фӕлӕ цин кӕнут, Чырыстийы тухӕнтӕй хайджын кӕй стут, ууыл, ӕмӕ хъӕлдзӕг ӕмӕ зӕрдӕрухс уыдзыстут, Йӕ намыс куы раргом уа, уӕд. 14 Кӕд уыл Чырыстийы номы тыххӕй цъыф калынц, уӕд тӕхудиаг стут, уымӕн ӕмӕ Хуыцауы намысджын Уд уӕ зӕрдӕты ис. [Уыдон Ӕй фауынц, сымах та Йӕ кадджын кӕнут.] 15 Ӕрмӕст марыны, кӕнӕ давыны, кӕнӕ ӕндӕр фыдракӕнды, кӕнӕ искӕй хъуыддӕгты хи нытъыссыны тыххӕй уӕ ӕфхӕрд макӕмӕ ӕрхауӕд. 16 Фӕлӕ чырыстон кӕй у, кӕд уый тыххӕй исчи тухӕны ӕфты, уӕд ӕм худинаг ма кӕсӕд, фӕлӕ стауӕд Хуыцауы, цы ном хӕссы, уый тыххӕй. 17 Уымӕн ӕмӕ ралӕууыд тӕрхонӕн Хуыцауы хӕдзарӕй райдайыны рӕстӕг. Ӕмӕ кӕд тӕрхон махӕй райдайдзӕн, уӕд Хуыцауы фарны уацӕн чи нӕ сӕтты, уыдонӕн та цӕуыл ахицӕн уыдзӕн? 18 «Кӕд рӕстгӕнӕг зынтӕй ирвӕзы, уӕд ӕнӕхуыцау тӕригъӕдджын цы фӕуыдзӕн?» 19 Уӕдӕ Хуыцауы фӕндонмӕ гӕсгӕ чи ӕвзары тухӕн, уыдон сӕхи бафӕдзӕхсӕнт иузӕрдион Сфӕлдисӕгыл ӕмӕ дарддӕр дӕр аразӕнт хорз хъуыддӕгтӕ.

1 Петр 5

1 Фыссын уӕ аргъуаны хистӕртӕм. Ӕз дӕр дӕн аргъуаны хистӕр, Чырыстийы тухӕнтӕн ӕвдисӕн, ӕмӕ, цы намыс хъуамӕ раргом уа, уымӕй чи схайджын уыдзӕн, уыдонӕй иу. Курын уӕ: 2 Сымахыл кӕй бафӕдзӕхстӕуыд, Хуыцауы уыцы дзуг ӕнӕбары, ӕфтиаджы тыххӕй ма хизут, фӕлӕ зӕрдиагӕй, ӕнувыдӕй – Хуыцауӕн фӕндонӕй. 3 Уӕ бӕрны чи ис, уыдонӕн ӕлдӕрттӕ ма ут, фӕлӕ дзугӕн ут фӕзминаг. 4 Ӕмӕ Хистӕр Фыййау куы ӕрцӕуа, уӕд райсдзыстут ӕнӕмӕлгӕ намысы хӕрзиуӕг. 5 Сымах дӕр, кӕстӕртӕ, кӕсут хистӕрты коммӕ. Уырнджытӕ, уеппӕт дӕр кӕрӕдзийы раз ут сӕрныллӕг, уымӕн ӕмӕ «Хуыцау сӕрыстыртӕн сӕ ныхмӕ у, сӕрныллӕджытӕн та хорзӕх дӕтты». 6 Уӕдӕ уӕхи ӕрныллӕг кӕнут хъомысджын Хуыцауы раз ӕмӕ, афон куы ралӕууа, уӕд уӕ сбӕрзонд кӕндзӕн. 7 Уеппӕт сагъӕстӕ бакӕнут Йӕ бар, уымӕн ӕмӕ Йӕ мӕт сымахыл у. 8 Ут къӕрцхъус ӕмӕ цырд лӕуут, уымӕн ӕмӕ уӕ фыдгул хӕйрӕг цӕуы богътӕгӕнӕг домбайау ӕмӕ агуры, кӕй аныхъуыра, ахӕмты. 9 Фидар уырнындзинадимӕ ӕрлӕуут йӕ ныхмӕ – уе 'фсымӕртӕ дӕр ӕппӕт дунейы ахӕм тухӕнтӕ кӕй ӕвзарынц, уый сымах зонут. 10 Исдуг ӕвзардзыстут тухӕнтӕ, фӕлӕ алы хорзӕх дӕр Кӕмӕ ис, уыцы Хуыцау уӕ сӕвзӕрста Чырыстиимӕ иугондӕй Йӕ мыггагмӕйы намысӕй хай райсынмӕ, ӕмӕ уын Йӕхӕдӕг ратдзӕн ног тыхтӕ, скӕндзӕн уӕ удвидар ӕмӕ ӕнӕфӕцудгӕ хъаруджын. 11 Паддзахиуӕг кӕнӕд мыггагмӕ! Амен. 12 Ацы цыбыр фыстӕг уӕм ныффыстон, иузӕрдионыл кӕй нымайын, уыцы ӕфсымӕр Силуаны ӕххуысӕй. Фӕнды мӕ сымах фӕныфсджын кӕнын, цы хорзӕхы фӕдыл фыссын, уый Хуыцауы ӕцӕг хорзӕх кӕй у, уымӕн ӕвдисӕн ныллӕууын. Фидар хӕцут уыцы хорзӕхыл. 13 Саламтӕ уын дӕттынц, сымахау Хуыцау кӕй сӕвзӕрста, Вавилоны уыцы аргъуан, стӕй мӕ хъӕбул Марк. 14 Кӕрӕдзийӕн салам дӕттут ӕфсымӕрон уарзты байӕ. Фарн уеппӕтӕн дӕр – Чырыстиимӕ чи ис, уыдонӕн.

2 Петр 1

1 Симон Петрӕй, Йесо Чырыстийы цагъар ӕмӕ апостолӕй, – нӕ Хуыцау ӕмӕ Ирвӕзынгӕнӕг Йесо Чырыстийы рӕстады руаджы нӕ зынаргъ уырнындзинадӕй чи схайджын, уыдонмӕ. 2 Хуыцауы ӕмӕ нӕ Хицау Йесойы зоныны руаджы уӕм фылдӕр кӕнӕнт хорзӕх ӕмӕ фарн. 3 Хуыцауӕн фӕндиагӕй цӕрынӕн нӕ цыдӕриддӕр хъӕуы, уый нын радта Хуыцау, уымӕн ӕмӕ базыдтам Йӕ намыс ӕмӕ нӕ Йӕ хорзӕхмӕ Ӕрхонӕджы. 4 Афтӕмӕй мах райстам, аргъ кӕмӕн нӕй, ахӕм стыр зӕрдӕвӕрдтӕ, уыдоны фӕрцы Хуыцауы ӕрдзыхъӕдӕй куыд схайджын уат, ӕмӕ фервӕзат тӕригъӕдджын мондӕгты аххосӕй дуне хурхгӕнӕг мӕлӕтӕй. 5 Уымӕ гӕсгӕ зӕрдиагӕй архайут уӕ уырнындзинадмӕ хорз хъуыддӕгтӕ бафтауыныл, уӕ хорз хъуыддӕгтӕм та – зонынад, 6 Зонынджынӕй уӕлдай ут хиуылхӕцон, хиуылхӕцонӕй уӕлдай – фӕразон, фӕразонӕй уӕлдай ӕнувыд ут Хуыцауыл, 7 Хуыцауыл ӕнувыдӕй уӕлдай узӕлут ӕфсымӕртыл, ӕфсымӕртыл узӕлынӕй уӕлдай уарзут алкӕй дӕр. 8 Кӕд сымах уыцы миниуджытӕй хайджын стут ӕмӕ уӕм фылдӕр кӕнынц, уӕд уыдоны фӕрцы уыдзыстут ӕнтыстджын ӕмӕ базондзыстут нӕ Хицау Йесо Чырыстийы. 9 Уыцы миниуджытӕ кӕмӕ не сты, уый та у куырм ӕмӕ ницы уыны, йӕ раздӕры тӕригъӕдтӕй кӕй ссыгъдӕг, уый дзы ферох. 10 Уымӕ гӕсгӕ, ӕфсымӕртӕ, зӕрдиагдӕрӕй архайут, Хуыцау уӕ кӕй сӕвзӕрста ӕмӕ ӕрхуыдта, ууыл фидарӕй хӕцыныл. Афтӕмӕй никуы фӕкӕлдзыстут. 11 Уымӕн ӕмӕ уын афтӕмӕй уыдзӕн нӕ Хицау ӕмӕ Ирвӕзынгӕнӕг Йесо Чырыстийы мыггагмӕйы Паддзахадмӕ ӕнӕкъуылымпыйӕ бацӕуыны фадат. 12 Уымӕ гӕсгӕ сымахӕн уыдӕтты тыххӕй дзурдзынӕн ӕдзух, кӕд сӕ зонут ӕмӕ уӕм цы ӕцӕгад фӕхӕццӕ, ууыл фидар хӕцут, уӕддӕр. 13 Уӕдӕ растыл нымайын, цалынмӕ ма мӕ ацы буары цӕрын, уӕдмӕ уын уыдӕттӕ ногӕй уӕ зӕрдыл ӕрлӕууын кӕнын. 14 Уымӕн ӕмӕ мын нӕ Хицау Йесо Чырысти раргом кодта ӕмӕ зонын, рӕхджы мӕ ацы буар кӕй хъуамӕ ныууадзон, уый. 15 Уӕдӕ архайдзынӕн, ацы дунейӕ куы ацӕуон, уӕд мӕ ныхӕстӕ кӕддӕриддӕр уӕ зӕрдыл куыд лӕууой. 16 Мах уын нӕ Хицау Йесо Чырыстийы тыхы ӕмӕ ӕрцыды тыххӕй куы дзырдтам, уӕд кӕйдӕр къӕбӕлдзыг фӕливӕн аргъӕуттӕ нӕ фӕзмыдтам – нӕхи цӕстӕй Йын федтам Йе стыр намыс. 17 Тӕккӕ уӕлдӕр Намысджынӕй Йӕм куы ӕрыхъуыст: «Ай, Кӕуыл аудын, Мӕ уыцы уарзон Фырт у», уӕд райста Фыд-Хуыцауӕй кад ӕмӕ намыс. 18 Уыцы уӕларвон хъӕлӕс мах фехъуыстам нӕхӕдӕг, сыгъдӕг хохыл Йемӕ куы уыдыстӕм, уӕд. 19 Пехуымпар ныхас раст кӕй у, уый нын афтӕмӕй раргом ноджы тынгдӕр. Ӕмӕ цалынмӕ бон кӕнын райдайа ӕмӕ Бонвӕрнон уӕ зӕрдӕты ссудза, уӕдмӕ уыцы пехуымпар ныхасмӕ, талынджы рухстауӕг цырагъмӕ здахӕгау, уе 'ргом кӕй здахут, уымӕй раст кӕнут. 20 Фыццаджыдӕр зонут уый, ӕмӕ Сыгъдӕг Фысты пехуымпар ныхӕстӕй иуӕн дӕр адӕймаджы хъаруйӕ райхалӕн нӕй, 21 Уымӕн ӕмӕ пехуымпар ныхас адӕймаджы фӕндонмӕ гӕсгӕ никуы уыд, фӕлӕ адӕм, Сыгъдӕг Удӕй разӕнгардгондӕй, дзырдтой, Хуыцауӕй цы уыдис, уый.

2 Петр 2

1 Израилаг адӕмы ӕхсӕн мӕнгпехуымпартӕ куыд уыдис, афтӕ сымахӕн дӕр уыдзӕн мӕнгахуыргӕнджытӕ; уыдон ӕрхӕсдзысты семӕ мӕлӕтмӕ тӕрӕг мӕнгахуырӕдтӕ, сӕхи атигъ кӕндзысты сӕрибар сын ӕрхӕссӕг Хицауыл, ӕмӕ афтӕмӕй сӕхи ӕвиппайды бакӕндзысты мӕлӕты амӕддаг. 2 Бирӕтӕ сын бафӕзмдзысты сӕ чъизи митӕ; уыдоны аххосӕй ӕгад уыдзӕни раст фӕндаг. 3 Кӕрӕф кӕй сты, уымӕ гӕсгӕ сӕ мӕнгард ныхӕсты руаджы тона кӕндзысты сымахӕй. Тӕрхон сын раджы рахастӕуыд, ӕмӕ сӕм сӕ мӕлӕт къӕрцхъусӕй лӕууы. 4 Кӕд тӕригъӕды чи бафтыд, Хуыцау уыцы зӕдтыл нӕ бацауӕрста, ныппӕрста сӕ зындонмӕ ӕмӕ сӕ тӕрхоны бонмӕ талынджы дары рӕхыстӕй бастӕй; 5 Кӕд рагон дунейыл нӕ бацауӕрста, бахызта ӕрмӕстдӕр рӕстдзинады фидиуӕг Нойы йӕ бинонтимӕ – аст адӕймаджы, ӕнӕхуыцӕутты дуне та доны хъаймӕтӕй фесӕфта; 6 Кӕд Содом ӕмӕ Гоморрӕйы сахарты фестын кодта ӕртхутӕг, ӕмӕ сын уымӕй рахаста сӕ сыскъуыныны тӕрхон, фидӕны ӕнӕхуыцӕуттӕн уый зондыхос куыд уа, афтӕ; 7 Хӕлд адӕмы ӕлгъаг цардӕй чи сфӕлмӕцыд, уыцы рӕстгӕнӕг Лоты та фервӕзын кодта – 8 Уымӕн ӕмӕ уыцы рӕстгӕнӕг царди се 'хсӕн, ӕмӕ алы бон дӕр йӕ зӕрдӕ рысти, се 'нӕуаг хъуыддӕгтӕ сын кӕй уыдта ӕмӕ хъуыста, уымӕй, – 9 Уӕд Хицау зоны, рӕстгӕнджытӕ фӕлварӕнтӕй куыд фервӕзынгӕнгӕ сты, ӕнӕхуыцӕуттӕ та сӕ бафхӕрыны тыххӕй тӕрхоны бонмӕ куыд ныууадзгӕ сты, уый – 10 Чъизи мондӕгты фӕдыл чи цӕуы, Хуыцауы бартӕ чи ницӕмӕ дары, налат, хивӕнд чи у ӕмӕ намысджынты фауынӕй чи нӕ тӕрсы, уӕлдайдӕр уыдон. 11 Афтӕмӕй зӕдтӕ уыдонӕй домбайдӕр сты хъомыс ӕмӕ тыхӕй, фӕлӕ Хицауы раз намысджынтӕн нӕ фӕзӕгъынц фауӕн ныхас. 12 Уыдон та фауынц, цы не 'мбарынц, уый. Ӕрцахсынӕн ӕмӕ ӕргӕвдынӕн чи райгуырд, ахӕм ӕнӕзонд цӕрӕгойтӕй уӕлдай не сты, кӕсынц се 'рдзыхъӕды коммӕ, ӕмӕ кӕй фехӕлдысты, уый сӕ ӕркӕндзӕни сӕфтмӕ. 13 Уыдонӕн сӕ хӕрам хъуыддӕгтӕ бафыстӕуыдзӕн хӕрамӕй. Ӕхсызгон сын сты се 'рвылбоны хиирхӕфсӕнтӕ; ӕлгъаг ӕмӕ ӕгадгӕнджытӕ, райгонд вӕййынц сӕ фӕливӕн митӕй, уемӕ куы фӕцӕл кӕнынц, уӕд. 14 Сӕ цӕстытӕ агурынц хӕтаг сылгоймӕгты, тӕригъӕдӕй ӕфсис нӕ зонынц; сӕ къӕппӕджы бахауынц, йӕ уырнынад кӕмӕн не сфидар, ахӕмтӕ. Сӕ зӕрдӕтӕ систы кӕрӕф, уыдон ӕлгъыст сты, 15 Ныууагътой раст фӕндаг, фӕдзӕгъӕл сты ӕмӕ ацыдысты Восоры фырт Валаамы фӕндагыл – уый бабӕллыд йӕ тӕригъӕды тыххӕй мызд райсынмӕ, 16 Фӕлӕ йын йӕ цӕстмӕ бадардӕуыди, зылын кӕй у, уый: ӕгомыг хӕрӕг сдзырдта адӕймаджы ӕвзагӕй ӕмӕ пехуымпары бахызта сӕрхъӕн мийӕ. 17 Ахӕмтӕ сты хуыскъ суадӕттӕ, уад кӕй ахӕссы, ахӕм мигътӕ. Уыдонмӕ ӕнхъӕлмӕ кӕсы саудалынг. 18 Уыдон кӕнынц хиппӕлой ӕмӕ ницӕйаг ныхӕстӕ, чъизи мондӕгты къӕппӕгӕй ахсынц, зылын фӕндагыл цӕуджытӕй нырма ныр чи фӕхицӕн, ахӕмты. 19 Зӕрдӕ сын ӕвӕрынц сӕрибарӕй, афтӕмӕй сӕхӕдӕг та мӕлӕты цагъартӕ сты, уымӕн ӕмӕ чи кӕмӕн басасти, уый уымӕн цагъар у. 20 Кӕд нӕ Хицау ӕмӕ Ирвӕзынгӕнӕг Йесо Чырыстийы базоныны фӕрцы фервӕзтысты дунейы чъизитӕй, фӕлӕ та дзы ногӕй суйтӕ кӕнынц ӕмӕ сӕ амӕддаг баисты, уӕд сӕ фӕстаг уавӕр фыццагӕй фыддӕр уыдзӕн. 21 Уыдон базыдтой раст фӕндаг, фӕлӕ ныууагътой, цы сыгъдӕг фӕдзӕхст сын лӕвӕрд ӕрцыд, уый. Уыцы раст фӕндаг куы нӕ базыдтаиккой, уӕд сын хуыздӕр уыдаид. 22 Фӕлӕ уыдоныл ӕрцыди раст ӕмбисонд: «Куыдз раздӕхы йӕ омдзӕгмӕ», «ӕхсад хуы ацӕуы цъыфы йӕхи сӕвдулынмӕ».

2 Петр 3

1 Ӕз сымахмӕ цы фыстӕг фыссын, уый дыккаг у, мӕ уарзон хӕлӕрттӕ. Дыууӕ фыстӕджы дӕр уын уӕ зӕрдыл цы лӕууын кӕнын, уымӕй архайын уӕ сыгъдӕг хъуыдытӕ райхъал кӕныныл. 2 Рох уӕ ма уӕнт, сыгъдӕг пехуымпартӕ рагагъоммӕ кӕй загътой, уыцы ныхӕстӕ, стӕй уын уӕ апостолты дзыхӕй Хицау ӕмӕ Ирвӕзынгӕнӕг кӕй фехъусын кодта, Йӕ уыцы фӕдзӕхст. 3 Фыццаджыдӕр зонут, рӕстӕджы кӕрон кӕй фӕзындзысты, сӕ чъизи монцты дӕлбар чи уыдзӕн, ахӕм фауджытӕ. Уыдон уыл худдзысты: 4 «Кӕм ис, зӕрдӕ кӕмӕй бавӕрдта, Йӕ уыцы дыккаг ӕрцыд? Уымӕн ӕмӕ нӕ фыдӕлтӕ дӕр амардысты, фӕлӕ дуне сфӕлдисынӕй нырмӕ ӕппӕт дӕр баззад, цы уыд, уымӕй». 5 Афтӕ чи хъуыды кӕны, уыдон нӕ зонынц: Хуыцауы ныхасӕй рагзаманы арв ӕмӕ зӕхх скондӕуыд донӕй ӕмӕ доны фӕрцы. 6 Уымӕ гӕсгӕ уӕдыккон дуне фӕдӕлдон ӕмӕ бабын. 7 Ныртӕккӕйы арв ӕмӕ зӕхх та уыцы ныхасӕй ауӕрст сты басудзынмӕ – тӕрхоны бон бабын уыдзысты уыдон дӕр ӕмӕ ӕппӕт ӕнӕхуыцӕуттӕ дӕр. 8 Мӕ уарзон хӕлӕрттӕ, иу хъуыддаг сымахӕн хъуамӕ сусӕг ма уа: Хицауӕн иу бон мин азы хуызӕн у, мин азы та – иу боны хуызӕн. 9 Иуӕй-иутӕм куыд кӕсы, афтӕ Хицау фӕстиат нӕ кӕны Йӕ зӕрдӕвӕрд сӕххӕст кӕныныл, фӕлӕ уын бирӕ быхсы – фӕнды Йӕ, иу адӕймаг дӕр куыд нӕ фесӕфа, фӕлӕ иууылдӕр куыд ӕрфӕсмон кӕной. 10 Хуыснӕг куыд ӕрцӕуы, афтӕ уыдзӕн Хицауы ӕрцыд дӕр. Арв гӕрӕхтӕгӕнгӕ цыдӕр ӕрбауыдзӕн, арвыл цыдӕриддӕр ис, уыдон цӕхӕр фестдзысты ӕмӕ ныппырх уыдзысты, зӕхх йӕхӕдӕг дӕр ӕмӕ йыл цы хъуыддӕгтӕ ис, уыдон иууылдӕр басудздзысты. 11 Кӕд ӕппӕт уыдӕттӕ афтӕ ныппырх уыдзысты, уӕд сымах та цавӕр хъуамӕ уат? Сымах уӕ сыгъдӕг царды хъуамӕ ӕнувыд уат Хуыцауыл, 12 Ӕнхъӕлмӕ кӕсат ӕмӕ бӕллат Хуыцауы боны ӕрцыдмӕ. Уыцы бон арвыл сирвӕздзӕн арт ӕмӕ ныппырх уыдзӕн, цыдӕриддӕр ыл ис, уыдон фестдзысты цӕхӕр ӕмӕ батайдзысты. 13 Фӕлӕ махӕн Хуыцау зӕрдӕ бавӕрдта ӕмӕ ӕнхъӕлмӕ кӕсӕм, рӕстад кӕм ӕрцӕрдзӕн, уыцы ног арв ӕмӕ ног зӕхмӕ. 14 Уӕдӕ, мӕ уарзон хӕлӕрттӕ, ӕппӕт уыдӕттӕм ӕнхъӕлмӕ кӕсгӕйӕ, бацархайут, Йӕ разы сыгъдӕгӕй, ӕнаиппӕй ӕмӕ Йемӕ фидыдӕй ӕрлӕууыныл. 15 Ӕмӕ нӕ Хицау бирӕ кӕй быхсы, уый нымайут фервӕзыны фадатыл; Хуыцауӕй йын лӕвӕрд зондӕй сымахмӕ уый тыххӕй фыста нӕ уарзон ӕфсымӕр Павел дӕр. 16 Афтӕ Павел фыссы йеппӕт фыстӕджыты, уыдӕттыл куы фӕдзуры, уӕд. Йӕ фыстыты ис зынӕмбарӕн бынӕттӕ, ӕмӕ сӕ ӕнӕфенд ӕмӕ, йӕ уырнынад кӕмӕн не сфидар, уыдон зыгъуыммӕ кӕнынц иннӕ Фыстытау, ӕмӕ уымӕй сӕхи кӕнынц мӕлӕты амӕддаг. 17 Уӕдӕ, мӕ уарзон хӕлӕрттӕ, уыдӕтты тыххӕй сымах зонут ныридӕгӕн ӕмӕ уӕхи хъахъхъӕнут, хӕлд адӕмы рӕдыд фӕндагыл куыд нӕ ацӕуат ӕмӕ, фидар цӕуыл лӕуут, уымӕй куыд нӕ фӕиппӕрд уат, афтӕ. 18 Рӕзут нӕ Хицау ӕмӕ Ирвӕзынгӕнӕг Йесо Чырыстийы хорзӕхӕй хайджынӕй, тырнут ноджы Йӕ хуыздӕр базонынмӕ. Кад Ын уӕд абон дӕр ӕмӕ мыггагмӕ дӕр! Амен.

1 Иоанн 1

1 Райдианӕй цы уыди, мах цы фехъуыстам, нӕхи цӕстӕй цы федтам, цӕмӕ кастыстӕм ӕмӕ нӕ уырзтӕ цы сгӕрстой, Царды уыцы Дзырды тыххӕй хъусын кӕнӕм сымахӕн. 2 Уымӕн ӕмӕ нӕм цард раргом кодта йӕхи, федтам ӕй ӕмӕ йын стӕм ӕвдисӕн. Ӕмӕ уын хъусын кӕнӕм, Фыдмӕ чи уыд ӕмӕ махӕн йӕхи чи раргом кодта, уыцы мыггагмӕйы царды тыххӕй. 3 Мах цы федтам ӕмӕ фехъуыстам, уый уын хъусын кӕнӕм, сымахӕн немӕ иудзинад куыд уа, афтӕ. Махӕн та иудзинад Фыдимӕ ӕмӕ Йӕ Фырт Йесо Чырыстиимӕ ис. 4 Ацы ныхӕстӕ мах фыссӕм, цӕмӕй нӕ цинӕн кӕрон ма уа. 5 Ӕмӕ уын мӕнӕ мах хъусын кӕнӕм, Уымӕй цы уац фехъуыстам, уый: Хуыцау у рухс ӕмӕ Йӕм мисхалы бӕрц дӕр талынг нӕй. 6 Кӕд иугӕр мах дзурӕм, Йемӕ нын иудзинад ис, зӕгъгӕ, уӕвгӕ та талынджы цӕрӕм, уӕд сайгӕ кӕнӕм ӕмӕ нӕ цард ӕцӕгадмӕ гӕсгӕ нӕу. 7 Хуыцау Йӕхӕдӕг рухсы куыд ис, кӕд мах дӕр афтӕ рухсы цӕрӕм, уӕд нын кӕрӕдзиимӕ ис иудзинад ӕмӕ нӕ Йӕ Фырт Йесойы Туг сыгъдӕг кӕны алы тӕригъӕдӕй дӕр. 8 Кӕд мах афтӕ дзурӕм, тӕригъӕд нӕм нӕй, зӕгъгӕ, уӕд нӕхи сайӕм ӕмӕ ӕцӕгад нӕ зӕрдӕты нӕ цӕры. 9 Мах нӕ тӕригъӕдтыл ӕргомӕй куы ӕрфӕсмон кӕнӕм, уӕд нын Уый, иузӕрдион ӕмӕ раст кӕй у, уымӕ гӕсгӕ ныббардзӕн нӕ тӕригъӕдтӕ ӕмӕ нӕ ссыгъдӕг кӕндзӕн алы галиу хъуыддагӕй дӕр. 10 Кӕд афтӕ дзурӕм, тӕригъӕды не 'фтӕм, зӕгъгӕ, уӕд Ӕй мах ӕвдисӕм сайӕгойӕ ӕмӕ Йӕ ныхас нӕ зӕрдӕты нӕ цӕры.

1 Иоанн 2

1 Мӕ хъӕбултӕ, ацы ныхӕстӕ уӕм ӕз фыссын, тӕригъӕды цӕмӕй ма ӕфтат, уый тыххӕй. Фӕлӕ уӕ исчи тӕригъӕд куы ракӕна, уӕд нын Фыды раз ис Сӕрылхӕцӕг, Рӕстгӕнӕг Йесо Чырысти. 2 Уый у Хуыцауимӕ фидауынгӕнӕг нывонд нӕ тӕригъӕдты тыххӕй, ӕмӕ ӕрмӕст мах тӕригъӕдты тыххӕй нӕ, фӕлӕ ӕппӕт дунейы тӕригъӕдты тыххӕй дӕр. 3 Йӕ фӕдзӕхстытӕ Йын куы феххӕст кӕнӕм, уӕд нын раргом вӕййы, кӕй Йӕ базыдтам, уый. 4 Афтӕ чи зӕгъы: «Ӕз Ӕй базыдтон», фӕлӕ Йын Йӕ фӕдзӕхстытӕ та не 'ххӕст кӕны, уый у фӕлитой ӕмӕ ӕцӕгад йӕ зӕрдӕйы нӕ цӕры. 5 Фӕлӕ Йын Йӕ дзырд чи ӕххӕст кӕны, уымӕн йӕ зӕрдӕйы ӕцӕг ӕрцарди Хуыцауы уарзт. Уымӕй нын раргом вӕййы, мах Йемӕ кӕй баиу стӕм, уый. 6 «Ӕз баиу дӕн Йемӕ» чи зӕгъы, уый хъуамӕ цӕра, Йесо куыд цардис, афтӕ. 7 Мӕ уарзон хӕлӕрттӕ, ӕз уӕм цавӕрдӕр ног фӕдзӕхсты тыххӕй нӕ фыссын. Ӕз уӕм цы фӕдзӕхсты тыххӕй фыссын, уый рагон у – сымах ӕй зонут тӕккӕ райдианӕй. Ацы рагон фӕдзӕхст у, сымах кӕй фехъуыстат, уыцы ныхас. 8 Ӕниу уӕм цы фыссын, уый ног фӕдзӕхст дӕр у – йӕ ӕцӕгад ӕвдыст ӕрцыд Чырыстийы цардӕй дӕр ӕмӕ уӕ цардӕй дӕр, уымӕн ӕмӕ талынг фӕивгъуыйы ӕмӕ ӕцӕг рухс ныридӕгӕн рухс кӕны. 9 Афтӕ чи зӕгъы, рухсы цӕрын, зӕгъгӕ, афтӕмӕй йе 'фсымӕрӕй та йе сӕфт чи уыны, уый нырма талынджы цӕры. 10 Йе 'фсымӕры чи уарзы, уый рухсы цӕры, ӕмӕ тӕригъӕдмӕ цы аразы, ахӕмӕй йӕм ницы ис. 11 Йе 'фсымӕрӕй йе сӕфт чи уыны, уый та талынджы ис, йӕ фӕндаг талынг у ӕмӕ, кӕдӕм цӕуы, уый нӕ зоны, уымӕн ӕмӕ йӕ талынг бакуырм кодта. 12 Фыссын уӕм, мӕ хъӕбултӕ, уымӕн ӕмӕ уын хатыр сты уӕ тӕригъӕдтӕ Йесойы руаджы. 13 Фыссын уӕм, фыдӕлтӕ, уымӕн ӕмӕ сымах базыдтат, райдианӕй Чи ис, Уый. Фыссын уӕм, ӕрыгон лӕппутӕ, уымӕн ӕмӕ сымах басастат хӕйрӕджы. Ныффыстон уӕм, мӕ сывӕллӕттӕ, уымӕн ӕмӕ сымах базыдтат Фыды. 14 Ныффыстон уӕм, фыдӕлтӕ, уымӕн ӕмӕ сымах базыдтат, райдианӕй Чи ис, Уый. Ныффыстон уӕм, ӕрыгон лӕппутӕ, уымӕн ӕмӕ сымах тыхджын стут, Хуыцауы ныхас цӕры уӕ зӕрдӕты, ӕмӕ басастат хӕйрӕджы. 15 Ма уарзут дуне, стӕй дунейы цы ис, уый дӕр. Дуне чи уарзы, уый Фыды нӕ уарзы. 16 Уымӕн ӕмӕ дунейы цыдӕриддӕр ис – тӕригъӕдджын ӕрдзыхъӕды монцтӕ, цӕсты монцтӕ ӕмӕ хъал царды цӕстӕй кӕсын – уыдон Фыдӕй не сты, фӕлӕ сты ацы дунейӕ. 17 Дуне ӕмӕ йӕ монцтӕ аивгъуыйынц, Хуыцауы фӕндон ӕххӕстгӕнӕг та мыггагмӕ цӕрдзӕни. 18 Мӕ сывӕллӕттӕ, рӕстӕджы кӕрон у. Сымах куыд фехъуыстат, афтӕмӕй ӕрцӕудзӕн Чырыстийы ныхмӕлӕууӕг. Ӕмӕ ныр дӕр Чырыстийӕн фӕзынд бирӕ ныхмӕлӕуджытӕ, ӕмӕ афтӕмӕй мах зонӕм, кӕрон кӕй ӕрхӕццӕ, уый. 19 Уыдон мах ӕхсӕнӕй рацыдысты, фӕлӕ махӕй нӕ уыдысты. Махӕй куы уыдаиккой, уӕд немӕ уаиккой. Фӕлӕ уыдон ацыдысты ӕмӕ уымӕй раргом, сеппӕт дӕр махӕй кӕй нӕ уыдысты, уый. 20 Сымах та Сыгъдӕг схайджын кодта Йӕ Удӕй, ӕмӕ уеппӕт дӕр зонут ӕцӕгад. 21 Ӕцӕгад цыма нӕ зонут, уый тыххӕй уӕм, мыййаг, нӕ ныффыстон, фӕлӕ йӕ кӕй зонут, стӕй кӕцыфӕнды мӕнгдзинад ӕцӕгадӕй кӕй нӕ рацӕуы, уый дӕр уын зындгонд кӕй у, уый тыххӕй. 22 Йесо, дам, Чырысти нӕу чи зӕгъы, уый кӕд нӕу сайӕгой, уӕд ма сайӕгой та чи у? Уыцы сайӕгой Чырыстийы ныхмӕлӕууӕг у. Уый йӕхи тигъ кӕны Фыдыл дӕр ӕмӕ Фыртыл дӕр. 23 Фыртыл чидӕриддӕр йӕхи тигъ кӕны, уымӕн хай нӕй Фыдӕй дӕр, фӕлӕ Фыртыл ӕргомӕй чи ӕууӕнды, уымӕн хай ис Фыдӕй дӕр. 24 Райдианӕй цы фехъуыстат, уый цӕрӕд уӕ зӕрдӕты. Райдианӕй цы фехъуыстат, уый уӕ зӕрдӕты куы цӕра, уӕд сымахӕн дӕр уыдзӕн иудзинад Фыртимӕ дӕр ӕмӕ Фыдимӕ дӕр. 25 Ӕмӕ нын Йӕхӕдӕг зӕрдӕ бавӕрдта мӕнӕ уымӕй – мыггагмӕйы цардӕй. 26 Ацы ныхӕстӕ уӕм ӕз ныффыстон, уӕ асайыныл чи архайы, уыдоны тыххӕй. 27 Ӕниу, сымах Уый схайджын кодта Йӕ Удӕй. Уыцы Уд цӕры уӕ зӕрдӕты, ӕмӕ, исчи уӕ ахуыр кӕна, уый хъуаг не стут. Уыцы Уд уын амоны алцыдӕр, ахуыр уӕ кӕны, мӕнг цы у, ууыл нӕ, фӕлӕ ӕцӕгадыл. Уӕдӕ уын Чырыстиимӕ уӕд иудзинад, Уд уӕ куыд сахуыр кодта, афтӕ. 28 Уӕдӕ, мӕ хъӕбултӕ, уӕд уын иудзинад Чырыстиимӕ, куы ӕрцӕуа, уӕд ныфсджын куыд уӕм ӕмӕ Йӕ разы къӕмдзӕстыг куыд нӕ разынӕм, афтӕ. 29 Хуыцау раст Хуыцау кӕй у, кӕд иугӕр уый зонут, уӕд алы рӕстгӕнӕг дӕр Уымӕй кӕй райгуырд, уый дӕр хъуамӕ зонат.

1 Иоанн 3

1 Кӕсут-ма, Фыд нӕ куыд бирӕ уарзы, Йӕ хъӕбулты ном куыд хӕссӕм, афтӕ. Ӕмӕ ӕцӕгдӕр Йӕ хъӕбултӕ стӕм. Дуне Хуыцауы кӕй нӕ базыдта, мах дӕр уый тыххӕй нӕ зоны. 2 Мӕ уарзон хӕлӕрттӕ, мах ныр Хуыцауы хъӕбултӕ стӕм. Фидӕны цавӕртӕ уыдзыстӕм, уый та нӕма раргом. Фӕлӕ зонӕм: куы раргом уа, уӕд уыдзыстӕм Уый хуызӕн, уымӕн ӕмӕ Йӕ фендзыстӕм, цавӕр у, ахӕмӕй. 3 Ӕмӕ Йыл уыцы хъуыддаджы йӕ зӕрдӕ чидӕриддӕр дары, уый сыгъдӕг кӕны йӕхи, уымӕн ӕмӕ Уый сыгъдӕг у. 4 Тӕригъӕды ӕфтыд чидӕриддӕр у, уый халы Хуыцауы ӕгъдау дӕр. Уымӕн ӕмӕ тӕригъӕд ракӕнынӕй хӕлд цӕуы Хуыцауы ӕгъдау. 5 Йесо тӕригъӕдтӕ ахӕссыны тыххӕй кӕй фӕзынд, уый сымах зонут. Йӕхӕдӕг та тӕригъӕдджын ницӕмӕй у. 6 Чидӕриддӕр Йемӕ баиу, уый тӕригъӕды не 'фты. Тӕригъӕд чидӕриддӕр ракӕны, уый Йӕ нӕ федта ӕмӕ Йӕ нӕ базыдта. 7 Мӕ хъӕбултӕ, мачи уӕ асайӕд. Рӕстӕй чи цӕры, уый рӕстгӕнӕг у, Чырысти рӕстгӕнӕг куыд у, афтӕ. 8 Тӕригъӕды чи ӕфты, уый хӕйрӕгӕй у, уымӕн ӕмӕ райдианӕй хӕйрӕг у тӕригъӕды ӕфтыд. Ӕмӕ Хуыцауы Фырт дӕр уый тыххӕй фӕзынди, цӕмӕй хӕйрӕджы хъуыддӕгтӕ фехала. 9 Хуыцауӕй чидӕриддӕр райгуырд, уый тӕригъӕды нал ӕфты, уымӕн ӕмӕ схайджын Хуыцауы цардӕй. Ӕмӕ тӕригъӕды ӕфтын йӕ бон нал у, уымӕн ӕмӕ Хуыцауӕй райгуырд. 10 Хуыцауы хъӕбултӕй ӕмӕ хӕйрӕджы хъӕбултӕй чи кӕцы у, уый афтӕмӕй базындӕуы: рӕстӕй чидӕриддӕр нӕ цӕры ӕмӕ йе 'фсымӕры чидӕриддӕр нӕ уарзы, уый Хуыцауӕй нӕу. 11 Райдианӕй мӕнӕ уыцы уац фехъуыстат: мах хъуамӕ уарзӕм кӕрӕдзи. 12 Каины хуызӕн ма ут. Уый хӕйрӕгӕй уыд ӕмӕ амардта йе 'фсымӕры. Ӕмӕ йӕ цӕмӕн амардта? Уымӕн ӕмӕ йӕхи хъуыддӕгтӕ хӕрам уыдысты, йе 'фсымӕры хъуыддӕгтӕ та – раст. 13 Ӕфсымӕртӕ, дуне уӕ йе сӕфт кӕй уыны, уый уӕм диссаг ма кӕсӕд. 14 Не 'фсымӕрты кӕй уарзӕм, уымӕ гӕсгӕ мах зонӕм, мӕлӕтӕй цардмӕ кӕй рахызтыстӕм, уый. Йе 'фсымӕры чи нӕ уарзы, уый мӕлӕты къухы ис. 15 Йе 'фсымӕрӕй йе сӕфт чидӕриддӕр уыны, уый лӕгмар у. Сымах та зонут: лӕгмартӕй иуӕн дӕр мыггагмӕйы цард нӕй. 16 Уарзондзинад цы у, уый мах базыдтам, Йесо нӕ сӕраппонд Йӕ цард кӕй радта, уымӕй. Ӕмӕ мах дӕр хъуамӕ не 'фсымӕрты сӕраппонд дӕттӕм нӕ цард. 17 Зӕххон цардӕн алцыдӕр фаг кӕмӕ ис, уый йе 'фсымӕры хъуӕгтӕ куы уына, фӕлӕ йӕхи нӕуынӕг куы скӕна, уӕд йӕ зӕрдӕйы Хуыцауы уарзондзинад куыд цӕрдзӕн? 18 Мӕ хъӕбултӕ, уӕдӕ кӕрӕдзи уарзӕм дзыхы ныхӕстӕй нӕ, фӕлӕ нӕ уарзт зӕрдиаг кӕй у, уый равдисӕм хъуыддагӕй. 19 Уымӕй базондзыстӕм, мах ӕцӕгады хъӕбултӕ кӕй стӕм, уый. Ӕмӕ Хуыцауы раз ӕнцой ссардзыстӕм нӕ зӕрдӕйӕн, 20 Истӕй тыххӕй нын тӕрхон куы кӕна, уӕд дӕр; уымӕн ӕмӕ Хуыцау нӕ зӕрдӕйӕ стырдӕр у ӕмӕ зоны ӕппӕт дӕр. 21 Мӕ уарзон хӕлӕрттӕ, кӕд нын нӕ зӕрдӕ нӕ тӕрхон кӕны, уӕд ныфсджын стӕм Хуыцауы раз. 22 Ӕмӕ цыдӕриддӕр фӕкурӕм, уый Дзы райсӕм, уымӕн ӕмӕ цӕрӕм Йӕ фӕдзӕхстытӕм гӕсгӕ ӕмӕ Йын нӕ хъуыддӕгтӕ сты фӕндон. 23 Йӕ фӕдзӕхст та ахӕм у: мах хъуамӕ ӕууӕндӕм Йӕ Фырт Йесо Чырыстийыл ӕмӕ уарзӕм кӕрӕдзи, куыд нын бафӕдзӕхста, афтӕ. 24 Йӕ фӕдзӕхстытӕм гӕсгӕ чи цӕры, уый Хуыцауимӕ ис, ӕмӕ Хуыцау йемӕ ис. Хуыцау немӕ кӕй ис, уый нын ӕргом кӕны, Йӕхӕдӕг нын Кӕй радта, уыцы Сыгъдӕг Уд.

1 Иоанн 4

1 Мӕ уарзон хӕлӕрттӕ, алы адӕймагыл ма ӕууӕндут, фӕлӕ йӕ фӕлварут, цы удӕй хайджын у, уый йын Хуыцауӕй лӕвӕрд у ӕви нӕ, уымӕн ӕмӕ бирӕ мӕнгпехуымпартӕ фӕзынди дунейы. 2 Хуыцауы Уд кӕмӕ ис, уый афтӕмӕй базондзыстут: Йесо Чырысти адӕймаджы буары ӕрцыд, зӕгъгӕ, ӕргомӕй чидӕриддӕр зӕгъы, уый Хуыцауы Удӕй у хайджын. 3 Фӕлӕ афтӕ чидӕриддӕр зӕгъы, Йесо адӕймаджы буары не 'рцыд, зӕгъгӕ, уымӕ та Хуыцауы Уд нӕй – Чырыстийы ныхмӕлӕууӕджы уд ӕм ис. Сымах фехъуыстат, Чырыстийы ныхмӕлӕууӕджы уд кӕй ӕрцӕудзӕн, уый тыххӕй. Ӕмӕ уыцы уд ныридӕгӕн дунейы ис. 4 Мӕ хъӕбултӕ, сымах Хуыцауӕй стут ӕмӕ басастат уыцы мӕнгпехуымпарты, уымӕн ӕмӕ уӕ зӕрдӕты Чи ис, Уый уӕлдӕр у, дунейы чи ис, уымӕй. 5 Уыдон дунейӕ сты, ӕмӕ дзургӕ дӕр дунейы ӕвзагыл кӕнынц, ӕмӕ сӕм дуне хъусы. 6 Мах та Хуыцауӕй стӕм, ӕмӕ Хуыцауы чи зоны, уый нӕм хъусы. Хуыцауӕй чи нӕу, уый та нӕм нӕ хъусы. Уымӕй базонӕм ӕцӕгады Уды ӕмӕ фӕливӕг уды. 7 Мӕ уарзон хӕлӕрттӕ, уӕдӕ уарзӕм кӕрӕдзи, уымӕн ӕмӕ уарзондзинад Хуыцауӕй у. Чидӕриддӕр уарзы, уый Хуыцауӕй райгуырд ӕмӕ зоны Хуыцауы. 8 Чи нӕ уарзы, уый нӕ базыдта Хуыцауы, уымӕн ӕмӕ Хуыцау уарзондзинад у. 9 Хуыцау мах кӕй уарзы, уый нын уымӕй раргом, ӕмӕ Йӕ иунӕг Фырты рарвыста дунемӕ, махӕн Йӕ фӕрцы цард куыд уа, афтӕ. 10 Уарзондзинад уый мидӕг нӕй, ӕмӕ мах бауарзтам Хуыцауы. Хуыцау нӕ Йӕхӕдӕг бауарзта ӕмӕ Йӕ Фырты нӕ тӕригъӕдты тыххӕй рарвыста фидауынгӕнӕг нывондӕн. 11 Мӕ уарзон хӕлӕрттӕ, кӕд Хуыцау мах афтӕ бауарзта, уӕд мах дӕр хъуамӕ уарзӕм кӕрӕдзи. 12 Хуыцауы никуы ничи федта, фӕлӕ кӕрӕдзи куы уарзӕм, уӕд Хуыцау ис немӕ ӕмӕ Йӕ уарзт та ӕххӕстӕй цӕры нӕ зӕрдӕты. 13 Мах Хуыцауимӕ кӕй баиу стӕм, ӕмӕ Уый та немӕ кӕй баиу, уый мах зонӕм, Йӕ Удӕй нын кӕй бахай кодта, уымӕй. 14 Мах федтам ӕмӕ ӕвдисӕн стӕм, Фыд Йӕ Фырты дунейӕн Ирвӕзынгӕнӕгӕй кӕй рарвыста, уымӕн. 15 Йесо Хуыцауы Фырт кӕй у, ууыл ӕргомӕй чи ӕууӕнды, уый баиу Хуыцауимӕ ӕмӕ Хуыцау баиу йемӕ. 16 Хуыцау мах кӕй уарзы, уый базыдтам ӕмӕ баууӕндыдыстӕм уыцы уарзтыл. Хуыцау у уарзондзинад, ӕмӕ чи уарзы, уый баиу Хуыцауимӕ ӕмӕ Хуыцау баиу йемӕ. 17 Уарзондзинад нӕ зӕрдӕты цӕры афтӕ ӕххӕстӕй, ӕмӕ ныфсджын уыдзыстӕм тӕрхоны бон, уымӕн ӕмӕ ацы дунейы цӕрӕм, Чырысти куыд царди, афтӕ. 18 Уарзондзинадӕн тасимӕ иумӕйагӕй ницы ис, ӕцӕг уарзондзинад кӕм уа, уым тасӕн бынат нӕй. Уымӕн ӕмӕ тӕрсгӕ чи кӕны, уый ныридӕгӕн ӕфхӕрд ӕййафы. Чи тӕрсы, уымӕн йӕ уарзт алцӕмӕй ӕххӕст нӕу. 19 Мах уарзӕм, уымӕн ӕмӕ нӕ Хуыцау Йӕхӕдӕг раздӕр бауарзта. 20 Афтӕ чи зӕгъы: «Ӕз Хуыцауы уарзын», афтӕмӕй та йе 'фсымӕрӕй йе сӕфт чи уыны, уый у фӕлитой. Уымӕн ӕмӕ цӕстӕй кӕй уыны, йӕ уыцы ӕфсымӕры чи нӕ уарзы, уымӕн йӕ бон нӕу, цӕстӕй Кӕй нӕ уыны, уыцы Хуыцауы уарзын. 21 Ӕмӕ нын Уый бафӕдзӕхста, Хуыцауы чи уарзы, уый йе 'фсымӕры дӕр куыд уарза, афтӕ.

1 Иоанн 5

1 Йесо Чырысти кӕй у, ууыл чидӕриддӕр ӕууӕнды, уый Хуыцауӕй райгуырд, ӕмӕ Фыды чидӕриддӕр уарзы, уый Йын уарзы Йӕ хъӕбулты дӕр. 2 Хуыцауы куы уарзӕм ӕмӕ Йӕ фӕдзӕхстытӕ куы ӕххӕст кӕнӕм, уӕд уымӕй зонӕм, Йӕ хъӕбулты Йын кӕй уарзӕм, уый. 3 Хуыцауы кӕй уарзӕм, уый мах ӕвдисӕм Йӕ фӕдзӕхстытӕ ӕххӕст кӕнынӕй. Йӕ фӕдзӕхстытӕ та ӕнцон ӕххӕстгӕнӕн сты. 4 Уымӕн ӕмӕ Хуыцауӕй чидӕриддӕр райгуырд, уый уӕлахиз кӕны дунейыл. Дуне саст цӕмӕй ӕрцыд, уый нӕ уырнындзинад у. 5 Йесо Хуыцауы Фырт кӕй у, ууыл ӕууӕндӕг куы нӕ фӕуӕлахиз уа дунейыл, уӕд ыл уӕвгӕ та чи фӕуӕлахиз уыдзӕн? 6 Уый у, дон ӕмӕ тугимӕ Чи ӕрцыд, уыцы Йесо Чырысти. Ӕрцыд ӕрмӕст донимӕ нӕ, фӕлӕ дон ӕмӕ тугимӕ. Ӕмӕ Сыгъдӕг Уд ӕвдисӕн лӕууы Уый тыххӕй, уымӕн ӕмӕ Уд ӕцӕгад у. 7 Ис ӕртӕ ӕвдисӕны [уӕларвы: Фыд, Дзырд ӕмӕ Сыгъдӕг Уд; ӕмӕ се 'ртӕ дӕр иу сты. 8 Ӕртӕ ӕвдисӕны та зӕххыл ис]: Уд, дон ӕмӕ туг. Ӕмӕ се 'ртӕйӕн дӕр сӕ ныхас иу у. 9 Кӕд мах адӕймаджы ныхасыл ӕууӕндӕм, уӕд Хуыцауы ныхас та уӕлдӕр у, уымӕн ӕмӕ уыцы ныхас Хуыцау Йӕхӕдӕг загъта Йӕ Фырты тыххӕй. 10 Хуыцауы Фыртыл чи ӕууӕнды, уымӕн Хуыцауы уыцы ныхас йӕ зӕрдӕйы ис. Хуыцауыл чи не 'ууӕнды, уый Йӕ ӕвдисы сайӕгойӕ, уымӕн ӕмӕ не 'ууӕнды, Хуыцау Йӕ Фырты тыххӕй кӕй загъта, уыцы ныхасыл. 11 Уыцы ныхас ууыл у, ӕмӕ нын Хуыцау ралӕвар кодта мыггагмӕйы цард ӕмӕ уыцы цард Йӕ Фырты руаджы лӕвӕрд цӕуы. 12 Хуыцауы Фыртӕй хай кӕмӕн ис, уымӕн ис мыггагмӕйы цард. Хуыцауы Фыртӕй хай кӕмӕн нӕй, уымӕн та нӕй мыггагмӕйы цард. 13 Ацы ныхӕстӕ ныффыстон сымахмӕ, Хуыцауы Фыртыл ӕууӕндджытӕм, мыггагмӕйы цард уын кӕй ис, уый куыд зонат, афтӕ. 14 Мах афтӕ ныфсджын стӕм Хуыцауы раз, ӕмӕ Йын фӕндон цы у, уый Дзы куы фӕкурӕм, уӕд нӕ фехъусы. 15 Хуыцауӕй цыдӕриддӕр куы фӕкурӕм, уӕд нӕм кӕй хъусы, кӕд уый зонӕм, уӕд ма уыимӕ зонӕм, цы Дзы ракуырдтам, уый ныридӕгӕн нӕхи кӕй баци, уый дӕр. 16 Кӕд исчи йе 'фсымӕры уыны, мӕлӕтмӕ чи нӕ кӕны, ахӕм тӕригъӕды ӕфтыдӕй, уӕд кувӕд, ӕмӕ йын Хуыцау ратдзӕн цард. Ныхас цӕуы, мӕлӕтмӕ чи нӕ кӕны, ахӕм тӕригъӕды ӕфтыд чи у, уыдоныл. Фӕлӕ ис, мӕлӕтмӕ чи кӕны, ахӕм тӕригъӕд, ӕмӕ ӕз нӕ зӕгъын ахӕмы тыххӕй кувын. 17 Алы галиу хъуыддаг дӕр тӕригъӕды бафтын у, фӕлӕ ис, мӕлӕтмӕ чи нӕ кӕны, ахӕм тӕригъӕд дӕр. 18 Мах зонӕм: Хуыцауӕй чидӕриддӕр райгуырд, уый тӕригъӕды не 'фты, фӕлӕ йӕ хъахъхъӕны Хуыцауӕй Райгуырӕг, ӕмӕ йӕм хӕйрӕг не 'ххӕссы 19 Зонӕм ӕй: мах Хуыцауы хъӕбултӕ стӕм, дуне ӕнӕхъӕнӕй та хӕйрӕджы уацары ис. 20 Мах зонӕм уый дӕр, ӕмӕ Хуыцауы Фырт ӕрцыд ӕмӕ нын радта зонд, ӕцӕг Чи у, Уый куыд базонӕм, афтӕ. Мах баиу стӕм, ӕцӕг Чи у, Уыимӕ ӕмӕ Йӕ Фырт Йесо Чырыстиимӕ – Уый у ӕцӕг Хуыцау ӕмӕ мыггагмӕйы цард. 21 Мӕ хъӕбултӕ, уӕхи хизут мӕнгхуыцӕуттӕй.

2 Иоанн 1

1 Хистӕрӕй – ӕвзӕрст ӕхсинмӕ ӕмӕ йӕ сывӕллӕттӕм, ӕрмӕст ӕз нӕ, фӕлӕ ӕцӕгад базонджытӕ сеппӕт дӕр зӕрдиагӕй кӕй уарзынц, уыдонмӕ. 2 Нӕ уарзтӕн йӕ бындур у, нӕ зӕрдӕты чи ис ӕмӕ мыггагмӕ немӕ чи уыдзӕн, уыцы ӕцӕгад. 3 Фыд-Хуыцауы ӕмӕ Йӕ Фырт Йесо Чырыстийы хорзӕх, арфӕ ӕмӕ фарн уыдзысты немӕ – ӕцӕгадӕй ӕмӕ уарзтӕй хайджынтимӕ. 4 Фыд нын куыд бафӕдзӕхста, афтӕ дӕ сывӕллӕттӕй иуӕй-иутӕ ӕцӕгадмӕ гӕсгӕ кӕй цӕрынц, уый куы базыдтон, уӕд тынг бацин кодтон. 5 Ӕмӕ ныр, ӕхсин, дӕуӕй курын – дӕумӕ ног фӕдзӕхст нӕ фыссын, фӕлӕ нӕм райдианӕй чи ис, уыцы фӕдзӕхст: уарзӕм кӕрӕдзи. 6 Уарзын та афтӕ амоны, ӕмӕ мах хъуамӕ цӕрӕм Хуыцауы фӕдзӕхстытӕм гӕсгӕ. Райдианӕй кӕй фехъуыстат, уыцы фӕдзӕхст ахӕм у: цӕрут уарзондзинадмӕ гӕсгӕ. 7 Уымӕн ӕмӕ дунейы фӕзынди, Йесо Чырысти адӕймаджы буары не 'рцыд, зӕгъгӕ, чи дзуры, бирӕ ахӕм фӕливджытӕ: ахӕм адӕймаг у фӕливӕг ӕмӕ Чырыстийы ныхмӕлӕууӕг. 8 Кӕсут уӕхимӕ, цӕуыл фӕкуыстам, уый куыд нӕ фесафат, фӕлӕ уӕ мызд ӕххӕстӕй куыд райсат, афтӕ. 9 Чырыстийы ахуырадмӕ гӕсгӕ чидӕриддӕр нӕ цӕры ӕмӕ ӕндӕр фӕндагыл цӕуы, уымӕн хай нӕй Хуыцауӕй; уыцы ахуырадмӕ гӕсгӕ чи цӕры, уымӕн та хай ис Фыдӕй дӕр ӕмӕ Фыртӕй дӕр. 10 Чи уӕм ӕрцӕуы ӕмӕ уӕм уыцы ахуырад йемӕ чи не 'рхӕссы, уый уӕ хӕдзармӕ ма уадзут ӕмӕ йын «ӕгасцуай» ма дзурут. 11 Уымӕн ӕмӕ йын «ӕгасцуай» чи зӕгъа, уый йын йӕ хӕрам хъуыддӕгты свӕййы цӕдисӕмбал. 12 Бирӕ цӕйдӕрты тыххӕй уӕм ныффыссин, фӕлӕ мӕ милдонӕй гӕххӕттыл фыссын нӕ фӕнды. Мӕ зӕрдӕ дарын сымахмӕ ӕрцӕуыныл ӕмӕ лӕгӕй-лӕгмӕ фӕныхас кӕныныл, нӕ цинӕн кӕрон куыд нӕ уа, афтӕ. 13 Салам дын дӕттынц, Хуыцау кӕй сӕвзӕрста, дӕ уыцы хойы сывӕллӕттӕ.

3 Иоанн 1

1 Хистӕрӕй – мӕ уарзон Гаймӕ, ӕцӕгӕй кӕй уарзын, уымӕ. 2 Мӕ уарзон хӕлар, ӕз кувын, цӕмӕй уай ӕнӕниз ӕмӕ дын алы хъуыддаджы дӕр ӕнтыса, дӕ удӕн куыд ӕнтысы, афтӕ. 3 Ӕфсымӕртӕ куы ӕрцыдысты ӕмӕ, ды ӕцӕгадыл ӕнувыд кӕй дӕ ӕмӕ ӕцӕгадмӕ гӕсгӕ кӕй цӕрыс, уый тыххӕй куы радзырдтой, уӕд ӕз тынг бацин кодтон. 4 Мӕ сывӕллӕттӕ ӕцӕгадмӕ гӕсгӕ кӕй цӕрынц, уый фехъусынӕй стырдӕр цин мӕнӕн нӕй. 5 Мӕ уарзон хӕлар, ӕфсымӕртыл, стӕй дзы кӕй нӕ зоныс, суанг уыдоныл дӕр кӕй узӕлыс, уымӕй дӕр иузӕрдион дӕ. 6 Уыдон аргъуанӕн радзырдтой дӕ уарзты тыххӕй. Хуыцауӕн фӕндон куыд у, афтӕ сӕ фӕндагмӕ куы срӕвдз кӕнай, уӕд уымӕй хорз бакӕндзынӕ. 7 Уыдон балцы ацыдысты Чырыстийы сӕраппонд, муртаттӕй та ӕххуыс нӕ исынц. 8 Ӕмӕ ахӕмтӕн мах хъуамӕ ӕххуыс кӕнӕм, ӕцӕгадӕн ӕмкусджытӕ куыд уӕм, афтӕ. 9 Ӕз ныффыстон аргъуанмӕ, фӕлӕ сӕм хицауиуӕг кӕнын чи уарзы, уыцы Диотреф нӕ ницӕмӕ дары. 10 Ӕмӕ ӕз куы ӕрцӕуон, уӕд радзурдзынӕн йӕ хъуыддӕгты тыххӕй. Цъыф ныл калы, ӕмӕ йӕм уый дӕр фаг нӕ кӕсы, фӕлӕ ма ӕфсымӕрты йӕхӕдӕг дӕр нӕ уазӕг кӕны, ӕмӕ сӕ суазӕг кӕнын кӕй фӕнды, уыдонӕн дӕр ӕвӕры цӕлхдуртӕ ӕмӕ сӕ тӕры аргъуанӕй. 11 Мӕ уарзон хӕлар, ӕвзӕр цы у, уый ма фӕзм, фӕлӕ фӕзм, хорз цы у, уый. Хӕрзгӕнӕг Хуыцауӕй у; хӕрам хъуыддӕгтӕ чи кӕны, уый та Хуыцауы нӕ федта. 12 Димитрийы тыххӕй хорз дзурынц сеппӕт дӕр, ӕмӕ дзы афтӕ зӕгъы ӕцӕгад йӕхӕдӕг дӕр. Мах дӕр стӕм ӕвдисӕнтӕ, ӕмӕ нӕ дзырд ӕцӕг кӕй у, уый хорз зоныс. 13 Бирӕ цӕйдӕрты тыххӕй дӕм ныффыссин, фӕлӕ мӕ милдонӕй фыссын нӕ фӕнды – 14 Мӕ зӕрдӕ дарын дӕу рӕхджы феныныл ӕмӕ уӕд лӕгӕй-лӕгмӕ фӕныхас кӕндзыстӕм. 15 Фӕрнджын у. Салам дын дӕттынц хӕлӕрттӕ. Хӕлӕрттӕн салам ратт номӕй-номмӕ.

Иудӕ 1

1 Йесо Чырыстийы цагъар Иудӕйӕ, Иаковы ӕфсымӕрӕй, – Фыд-Хуыцау кӕй бауарзта ӕмӕ Йесо Чырысти кӕй хъахъхъӕны, уыцы ӕвзӕрстытӕм. 2 Хуыцау уын ноджы фылдӕр бахай кӕнӕд Йӕ хорзӕхӕй, Йӕ фарн ӕмӕ уарзтӕй. 3 Мӕ уарзон хӕлӕрттӕ, кӕд мӕ зӕрдиагӕй фӕндыди сымахмӕ нӕ иумӕйаг ирвӕзындзинады тыххӕй ныффыссын, уӕддӕр ӕнӕмӕнг бакӕнинагыл банымадтон сымахмӕ ныффыссын, сыгъдӕджытӕн иу хатт ӕмӕ мыггагмӕ лӕвӕрд цы уырнындзинад ӕрцыди, мӕ фыстӕг уӕ ууыл тохмӕ куыд сразӕнгард кӕна, афтӕ. 4 Уымӕн ӕмӕ уӕм ӕрбаирвӕзтысты ӕнӕхуыцау чидӕртӕ. Уыдон нӕ Хуыцауы хорзӕхӕй сӕхицӕн сарӕзтой ӕлгъаг миты фӕрӕз, сӕхи тигъ кӕнынц нӕ иунӕг Дунедарӕг ӕмӕ Хицау Йесо Чырыстийыл. Рагӕй-нырмӕ у фыст, уыдон аккаг ӕфхӕрд кӕй баййафдзысты, уый тыххӕй. 5 Кӕд сымахӕн зындгонд у, уӕддӕр мӕ фӕнды уӕ зӕрдыл уын ӕй ӕрлӕууын кӕнын: Хицау Йӕ адӕмы мысыраг зӕххӕй куы раирвӕзын кодта, уӕд уый фӕстӕ фесӕфта, чи Йыл нӕ баууӕндыд, уыдоны. 6 Ӕмӕ йӕ намыс чи нӕ бахъахъхъӕдта ӕмӕ йӕ цӕрӕн бынат чи ныууагъта, уыцы зӕдты стыр тӕрхоны бонмӕ дары талынджы, мыггагмӕйы рӕхыстӕй бастӕй. 7 Уыдонау Содом ӕмӕ Гоморрӕ, стӕй сӕ алфамбылайы сахартӕ хӕтыдысты ӕмӕ фехӕлдысты, ӕмӕ уый тыххӕй мыггагмӕйы арты ӕфхӕрд кӕй ӕййафынц, уый алкӕмӕн дӕр у зондыхос. 8 Ахӕмтӕ сты уыцы сӕнттӕцӕгъдджытӕ дӕр – уыдон ӕлгъаг кӕнынц буар, Хуыцауы бартӕ ницӕмӕ дарынц ӕмӕ фауынц намысджынты. 9 Архангел Михаил та Моисейы буары тыххӕй хӕйрӕгимӕ куы фӕбыцӕу, уӕд тӕрхоны бар йӕхимӕ нӕ райста, нӕ дзы рацыд фауӕн ныхас, ӕрмӕст ын загъта: «Хуыцау дын Йӕхӕдӕг схос кӕнӕд». 10 Адон та фауынц, цы нӕ зонынц, уый. Сӕ ӕрдзыхъӕдмӕ гӕсгӕ ӕнӕзонд цӕрӕгойтау цы зонынц, уымӕй сӕхи сафынц. 11 Сар сӕ сӕр! Уыдон цӕуынц Каины фӕндагыл, сӕ зӕрдӕтӕ сарӕзтой мулкмӕ ӕмӕ Валаамау фӕсайды сты, змӕнтынц Корейау ӕмӕ сӕфынц. 12 Ахӕмтӕ ӕлгъаг сты уӕ уарзты ӕхсӕвӕрты – ӕнӕфсармӕй цӕл кӕнынц уемӕ. Сӕ мӕт ӕрмӕстдӕр у сӕхиуыл, амардысты дыууӕ хатты; уыдон сты, дымгӕ кӕй хӕссы, ахӕм ӕнӕкъӕвда мигътӕ, бындзарӕй кӕй срӕдывдӕуыд, ахӕм ӕнӕдыргъ фӕззыгон бӕлӕстӕ, 13 Уыдон сты денджызы знӕт уылӕнтау, абухы сӕ худинаджы фынк, уыдон сты, мыггагмӕйы саудалынг кӕмӕ ӕнхъӕлмӕ кӕсы, уыцы дзӕгъӕл стъалытау. 14 Уыдоны тыххӕй пехуымпариуӕг кодта Адамы байзӕддаджы ӕвдӕм фӕлтӕрӕй Енох дӕр: «Мӕнӕ фӕцӕуы Хицау Йӕ ӕнӕнымӕц сыгъдӕг зӕдтимӕ 15 Алкӕмӕн дӕр тӕрхон рахӕссынмӕ. Уый багӕды кӕндзӕн ӕппӕт ӕнӕхуыцау тӕригъӕдджынты сеппӕт ӕнӕхуыцау миты ӕмӕ, Йӕ ныхмӕ кӕй дзырдтой, ӕппӕт уыцы къӕйных ныхӕсты тыххӕй». 16 Уыдон сты хъуырхъуыргӕнджытӕ, райгонд ницӕмӕй сты, цӕрынц сӕ монцтӕм гӕсгӕ, кӕнынц хиппӕлой ныхӕстӕ, козбау митӕ сӕхи пайдайы сӕраппонд. 17 Фӕлӕ сымахӕй, мӕ уарзон хӕлӕрттӕ, рох ма уӕд, нӕ Хицау Йесо Чырыстийы апостолтӕ рагагъоммӕ цы загътой, уый. 18 Уыдон уын дзырдтой, зӕгъгӕ, рӕстӕджы кӕрон фӕзындзысты, сӕ ӕнӕхуыцау монцты дӕлбар чи уыдзӕн, ахӕм фауджытӕ. 19 Уыдон ныххицӕнтӕ кӕнынц уырнджыты, кӕсынц сӕ тӕригъӕдджын ӕрдзыхъӕды коммӕ, нӕй сӕм Сыгъдӕг Уд. 20 Сымах та, мӕ уарзон хӕлӕрттӕ, рӕзут уӕ сыгъдӕг уырнындзинады бындурыл, кувут Сыгъдӕг Удӕй разӕнгардӕй, 21 Фидар хӕцут Хуыцауы уарзтыл, ӕнхъӕлмӕ кӕсут нӕ Хицау Йесо Чырыстийы хорзӕхмӕ, мыггагмӕйы цардӕй куыд схайджын уат, афтӕ. 22 Иутӕм, дызӕрдыггӕнджытӕм, ут зӕрдӕхӕлар, 23 Иннӕты ратонут арты дзыхӕй ӕмӕ фервӕзой, аннӕтӕм ут зӕрдӕхӕлар, фӕлӕ уӕхи хизут, сӕ тӕригъӕдджын митӕй цы дарӕс фелгъаг, суанг уымӕй дӕр куыд нӕ фӕчъизи уат, афтӕ. 24 Фӕкӕлынӕй уӕ бахизын ӕмӕ уӕ Йӕ намысмӕ ӕнаиппӕй ӕмӕ райгӕйӕ бакӕнын Кӕй бон у, 25 Уыцы иунӕг Хуыцауӕн, нӕ Ирвӕзынгӕнӕгӕн, нӕ Хицау Йесо Чырыстийы фӕрцы уӕд кад ӕмӕ намыс, паддзахад ӕмӕ ӕлдариуӕг – рӕстӕджы райдианӕй нырмӕ, абон ӕмӕ мыггагмӕ! Амен.

Ӕргомад 1

1 Ам цы фыст ис, уый Хуыцау бафӕдзӕхста Йесо Чырыстийӕн, рӕхджы цы уыдзӕн, уый Йын Йӕ цагъартӕн куыд раргом кӕна, афтӕ. Ӕппӕт уыдӕттӕ Йесо равдыста Йӕ цагъар Иоаннӕн, кӕй йӕм арвыста, Йӕ уыцы зӕды фӕрцы. 2 Ӕмӕ Иоанн фехъусын кодта, цы федта, ӕппӕт уыдӕттӕ; афтӕмӕй ӕвдисӕн ныллӕууыд Хуыцауы ныхасӕн ӕмӕ радзырдта Йесо Чырыстийы тыххӕй. 3 Ацы пехуымпар ныхӕстӕ чи кӕсы ӕмӕ сӕм чи хъусы, цы фыст дзы ис, уыдӕттӕ кӕмӕ хъарынц, уыдон тӕхудиаг сты, уымӕн ӕмӕ рӕстӕг ӕрӕввахс. 4 Иоаннӕй Асийы авд аргъуанмӕ: хорзӕх ӕмӕ уын фарн, Чи ис, Чи уыд ӕмӕ Чи ӕрцӕудзӕн, Уымӕй ӕмӕ, Йӕ бадӕны раз чи ис, уыцы авд удӕй, 5 Ӕмӕ иузӕрдион Ӕвдисӕн Йесо Чырыстийӕ – мӕрдтӕй фыццаг Чи райгас ӕмӕ зӕххон паддзӕхты Паддзах Чи у, Уымӕй. Уый мах уарзы ӕмӕ нӕ Йӕ Туджы руаджы ссӕрибар кодта нӕ тӕригъӕдтӕй, 6 Скодта нӕ паддзӕхтӕ, Йӕ Хуыцауӕн ӕмӕ Фыдӕн лӕггадгӕнджытӕ. Кад ӕмӕ Йын Паддзахад уӕд мыггагӕй-мыггагмӕ! Амен. 7 Мӕнӕ Уый ӕрцӕуы ӕврӕгътимӕ, ӕмӕ Йӕ алчидӕр фендзӕн, чи Йӕ барӕхуыста, уыдон дӕр. Ӕмӕ Йӕ разы ныдздзыназдзысты ӕппӕт зӕххон адӕмтӕ. Бӕгуыдӕр, афтӕ уыдзӕн! Амен. 8 «Ӕз дӕн Алфӕ ӕмӕ Омегӕ [айдиан ӕмӕ кӕрон]», – зӕгъы Хицау Хуыцау, Чи ис, Чи уыд ӕмӕ Чи ӕрцӕудзӕн, уыцы Дунедарӕг. 9 Йесойы тыххӕй уемӕ фӕразонӕй тухӕнтӕ чи ӕвзары, сымахимӕ Йӕ Паддзахады хай чи райсдзӕн, ӕз уӕ уыцы ӕфсымӕр Иоанн дӕн. Хуыцауы ныхас кӕй амыдтон ӕмӕ Йесойӕн ӕвдисӕн кӕй лӕууыдтӕн, уый тыххӕй ӕз хаст уыдтӕн, Патмос чи хуыйны, уыцы сакъадахмӕ. 10 Хуыцаубоны ӕз уыдтӕн Сыгъдӕг Удӕй разӕнгард ӕмӕ мӕ чъылдыммӕ фехъуыстон сыкъауадындзы зӕлыны хуызӕн домбай хъӕлӕс: «[Ӕз дӕн Алфӕ ӕмӕ Омегӕ, Фыццаг ӕмӕ Фӕстаг.] 11 Цы уыныс, уый чиныджы ныффысс ӕмӕ йӕ арвит Асийы авд аргъуанмӕ: Эфесмӕ, Смирнӕмӕ, Пергаммӕ, Фиатирӕмӕ, Сардисмӕ, Филаделфи ӕмӕ Лаодикимӕ». 12 Ӕз акастӕн фӕстӕмӕ, чи мӕм дзырдта, уый феныны тыххӕй. Ӕмӕ куы акастӕн, уӕд федтон авд сызгъӕрин цырагъдарӕны, 13 Ӕмӕ цырагъдарӕнты ӕхсӕн – адӕймаджы фырты Халдихы, Йӕ уӕлӕ даргъ дарӕс, Йӕ риуыл баст уыди сызгъӕрин рон. 14 Йӕ сӕрыхъуынтӕ уыдысты миты хуызӕн урс-урсид къуымбилау, Йӕ цӕстытӕ – пиллон артау. 15 Йӕ къӕхтӕ ӕрттывтой, пецы чи сзынг, ахӕм ӕрхуыйау, Йӕ хъӕлӕс та нӕрыд стыр ӕхсӕрдзӕнау. 16 Йӕ рахиз къухы – авд стъалыйы, Йӕ дзыхӕй ӕддӕмӕ зынди цыргъ дыком цирхъ, Йӕ цӕсгом уыди ӕмбисбоны тӕмӕнкалгӕ хуры хуызӕн. 17 Ӕмӕ Йӕ ӕз куы федтон, уӕд мардау ӕрхаудтӕн Йӕ къӕхты цурмӕ. Уӕд мыл Уый ӕрӕвӕрдта Йӕ рахиз къух ӕмӕ мын загъта: «Ма тӕрс. Ӕз дӕн Фыццаг ӕмӕ Фӕстаг, 18 Дӕн удӕгас. Ӕз уыдтӕн мард, ныр цӕрдзынӕн мыггагӕй-мыггагмӕ. Мӕнмӕ сты мӕрдтыбӕстӕйы ӕмӕ мӕлӕты дӕгъӕлтӕ. 19 Уӕдӕ ныффысс, цы федтай, цытӕ цӕуы ӕмӕ фӕстӕдӕр цытӕ ӕрцӕудзӕн, уый тыххӕй. 20 Мӕ рахиз къухы кӕй уыныс, уыцы авд стъалыйы, стӕй авд сызгъӕрин цырагъдарӕны сусӕгдзинад ахӕм у: авд стъалыйы сты авд аргъуанӕн сӕ зӕдтӕ, авд цырагъдарӕны та сты авд аргъуаны.

Ӕргомад 2

1 Эфесы аргъуаны зӕдмӕ ныффысс: „Йӕ рахиз къухы авд стъалыйы Чи дары, авд сызгъӕрин цырагъдарӕны ӕхсӕн Чи цӕуы, Уый афтӕ зӕгъы: 2 Ӕз зонын дӕ хъуыддӕгтӕ, дӕ фӕллой, фӕразон кӕй дӕ, фыдадӕмӕн кӕй нӕ быхсыс, йӕхи апостол чи хоны, уӕвгӕ та апостол чи нӕу, уыдоны кӕй бафӕлвӕрдтай ӕмӕ мӕнгард кӕй сты, уый кӕй базыдтай, уыдӕттӕ. 3 Ды фӕразон дӕ, бирӕ бавзӕрстай Мӕ номы сӕраппонд, ӕмӕ нӕ бафӕлладтӕ. 4 Фӕлӕ дӕ азымджыныл нымайын, дӕ фыццаг уарзт дӕм кӕй нал ис, уымӕй. 5 Уӕдӕ цы бӕрзонд ранӕй ӕрхаудтӕ, уый ӕрымыс, ӕрфӕсмон кӕн ӕмӕ араз дӕ раздӕры хъуыддӕгтӕ. Афтӕ куы нӕ уа, куы не 'рфӕсмон кӕнай, уӕд дӕм ӕрцӕудзынӕн ӕмӕ дын дӕ цырагъдарӕн йӕ бынатӕй айсдзынӕн. 6 Ӕниу дӕм хорзӕй уый ис, ӕмӕ николаитты хъуыддӕгтӕ Мӕнӕн куыд ӕнӕуынон сты, афтӕ ӕнӕуынон сты дӕуӕн дӕр. 7 Хъустӕ кӕуыл ис, уый хъусӕд, Уд аргъуантӕн цы зӕгъы, уымӕ. Уӕлахиздзауӕн ратдзынӕн, Хуыцауы дзӕнӕты цы царды бӕлас ис, уый дыргъӕй бахӕрыны бар". 8 Смирнӕйы аргъуаны зӕдмӕ дӕр ныффысс: „Фыццаг ӕмӕ Фӕстаг, мард Чи уыд ӕмӕ ныр удӕгас Чи у, Уый афтӕ зӕгъы: 9 Ӕз зонын [дӕ хъуыддӕгтӕ,] дӕ хъизӕмӕрттӕ ӕмӕ дӕ мӕгуырдзинад, фӕлӕ уӕддӕр хъӕздыг дӕ; зонын, йӕхи иудей чи хоны, уӕвгӕ та иудей нӕ, фӕлӕ хӕйрӕджы синагогӕ чи у, уыдон дыл цъыф кӕй калынц, уый. 10 Цы хъизӕмӕрттӕ бавзарын дӕ бахъӕудзӕн, уыдонӕй ма тӕрс. Уӕ бафӕлварыны тыххӕй хӕйрӕг сымахӕй кӕйдӕрты баппардзӕн ахӕстоны, ӕмӕ уӕ хъизӕмар ахӕсдзӕн дӕс боны. Мӕлын дӕ куы бахъӕуа, уӕддӕр баззай иузӕрдионӕй ӕмӕ дын ратдзынӕн хӕрзиуӕг – мыггагмӕйы цард. 11 Хъустӕ кӕуыл ис, уый хъусӕд, Уд аргъуантӕн цы зӕгъы, уымӕ. Уӕлахиздзауӕн дыккаг мӕлӕтӕй тас нӕу". 12 Пергамы аргъуаны зӕдмӕ дӕр ныффысс: „Цыргъ дыком цирхъ Кӕмӕ ис, Уый афтӕ зӕгъы: 13 Ӕз зонын: ды цӕрыс, хӕйрӕг паддзахиуӕг кӕцӕй кӕны, уым. Уӕддӕр Мӕныл ӕнувыд дӕ, хӕйрӕг кӕм цӕры, уӕ уыцы сахары Мӕ иузӕрдион ӕвдисӕн Антипайы куы амардтой, суанг Мыл уыцы рӕстӕг дӕхи нӕ атигъ кодтай. 14 Фӕлӕ дӕ уӕддӕр иуцасдӕр азымджыныл нымайын, уымӕн ӕмӕ уӕм ис, Валаамы ахуырадыл хӕст чи у, ахӕмтӕ; Валаам та сахуыр кодта Валакы, ӕмӕ уый Израилы адӕмы сардыдта мӕнгхуыцӕуттӕн хаст нывондтӕ хӕрыныл ӕмӕ хӕтыныл. 15 Афтӕ дӕумӕ дӕр ис николаитты ахуырадыл хӕст адӕймӕгтӕ. 16 Ӕрфӕсмон кӕн, науӕд дӕм рӕхджы ӕрцӕудзынӕн ӕмӕ семӕ тох самайдзынӕн Мӕ дзыхы цирхъӕй. 17 Хъустӕ кӕуыл ис, уый хъусӕд, Уд аргъуантӕн цы зӕгъы, уымӕ. Уӕлахиздзауӕн бахӕрын кӕндзынӕн ӕмбӕхст маннӕйӕ ӕмӕ йын ратдзынӕн урс дур. Дурыл фыст уыдзӕн, йӕ райсӕгӕй фӕстӕмӕ кӕй ничи зоны, ахӕм ног ном". 18 Фиатирӕйы аргъуаны зӕдмӕ дӕр ныффысс: „Пиллон артау Кӕй цӕстытӕ сты, зынг ӕрхуыйау Кӕй къӕхтӕ ӕрттивынц, Хуыцауы уыцы Фырт афтӕ зӕгъы: 19 Ӕз зонын дӕ хъуыддӕгтӕ, дӕ уарзт, дӕ уырнындзинад, дӕ куыст ӕмӕ фӕразон кӕй дӕ, стӕй, дӕ фӕстаг хъуыддӕгтӕ фыццӕгтӕй фылдӕр кӕй сты, уый. 20 Фӕлӕ дӕ уӕддӕр азымджыныл нымайын: йӕхи пехуымпар чи хоны, уыцы сылгоймаг Иезавелӕн дӕттыс йӕ ахуырадӕй Мӕ цагъарты фӕливыны фадат – ардауы сӕ хӕтыныл ӕмӕ мӕнгхуыцӕуттӕн хаст нывондтӕй хӕрыныл. 21 Ӕз ын радтон рӕстӕг ӕрфӕсмон кӕнынӕн, фӕлӕ хъахбай кӕй у, ууыл ӕй ӕрфӕсмон нӕ фӕнды. 22 Мӕнӕ йыл Ӕз ӕфтауын низ; йемӕ чи хӕты, уыдон та сӕ митыл куы нӕ ӕрфӕсмон кӕной, уӕд сӕ ӕппарын стыр бӕллӕхы. 23 Йӕ сывӕллӕтты дӕр ын амардзынӕн; уӕд ӕппӕт аргъуантӕ дӕр базондзысты, Ӕз кӕй уынын зӕрдӕтӕ ӕмӕ зонд, ӕмӕ уӕ алкӕмӕн дӕр кӕй ратдзынӕн йӕ хъуыддӕгтӕм гӕсгӕ. 24 Сымахӕн та – уыцы ахуырадыл Фиатирӕйы хӕст чи нӕу, хӕйрӕджы сусӕгдзинӕдтӕ кӕй хонынц, уый чи нӕ зоны, уыдонӕн – зӕгъын: ӕндӕр уаргъ уыл нӕ сӕвӕрдзынӕн, 25 Ӕрмӕст Ме 'рцыдмӕ фидар хӕцут, цы уӕм ис, ууыл. 26 Чи фӕуӕлахиз уа ӕмӕ Мын кӕронмӕ коммӕгӕс чи разына, уымӕн Ӕз ратдзынӕн адӕмтыл ӕлдариуӕг кӕныны бар, 27 Ӕз ӕлдариуӕг кӕныны бар Мӕ Фыдӕй куыд райстон, афтӕ; здахдзӕн сӕ ӕфсӕн лӕдзӕгӕй, уыдон базгъӕлӕнтӕ уыдзысты ӕлыгӕй конд мигӕнӕнтау, 28 Ӕмӕ йын ратдзынӕн Бонвӕрнон. 29 Хъустӕ кӕуыл ис, уый хъусӕд, Уд аргъуантӕн цы зӕгъы, уымӕ".

Ӕргомад 3

1 Сардисы аргъуаны зӕдмӕ дӕр ныффысс: „Хуыцауы авд уды ӕмӕ авд стъалыйы Кӕмӕ сты, Уый афтӕ зӕгъы: зонын дын дӕ хъуыддӕгтӕ; ды хӕссыс удӕгасы ном, фӕлӕ мард дӕ. 2 Райхъал у ӕмӕ фидар кӕн, сӕфты къахыл дӕм цы лӕууы, уый. Уымӕн ӕмӕ зонын, дӕ хъуыддӕгтӕ Мӕ Хуыцауы цӕсты ӕнаипп кӕй не сты, уый. 3 Уӕдӕ дӕ цӕуыл сахуыр кодтой ӕмӕ цы фехъуыстай, уый ӕрымыс, цӕр уымӕ гӕсгӕ ӕмӕ ӕрфӕсмон кӕн. Куы нӕ райхъал уай, уӕд дӕм Ӕз ӕрцӕудзынӕн хуыснӕгау, ӕмӕ кӕд ӕрцӕудзынӕн, уый нӕ базондзынӕ. 4 Уӕвгӕ дын Сардисы ис, йӕ дарӕс чи нӕ фӕчъизи кодта, ахӕм цалдӕр адӕймаджы. Уыдон урс-урсид дарӕсы цӕудзысты Мемӕ, уымӕн ӕмӕ сты уый аккаг. 5 Уӕлахиздзау уыдонау скӕндзӕн урс-урсид дарӕс, ӕмӕ йын йӕ ном царды чиныджы нӕ ахахх кӕндзынӕн. Мӕ Фыды ӕмӕ Йӕ зӕдты раз ӕй Ӕз банымайдзынӕн мӕхионыл. 6 Хъустӕ кӕуыл ис, уый хъусӕд, Уд аргъуантӕн цы зӕгъы, уымӕ". 7 Ӕмӕ Филаделфийы аргъуаны зӕдмӕ дӕр ныффысс: „Давиды дӕгъӕл Кӕмӕ ис, куыд мачи сӕхгӕна, афтӕ Чи гом кӕны ӕмӕ куыд мачи байгом кӕна, афтӕ Чи ӕхгӕны, уыцы Сыгъдӕг ӕмӕ Ӕцӕг зӕгъы: 8 Зонын дын дӕ хъуыддӕгтӕ. Мӕнӕ дын Ӕз байгом кодтон дуар ӕмӕ йӕ сӕхгӕнын никӕй бон бауыдзӕн. Дӕумӕ бирӕ тых нӕй, уӕддӕр хъуыстай Мӕ ныхасмӕ ӕмӕ Мыл дӕхи нӕ атигъ кодтай. 9 Хӕйрӕджы синагогӕйы чи ис, йӕхи иудей чи хоны, уӕвгӕ та иудей нӕ, фӕлӕ фӕливӕг чи у, уыдонӕн Ӕз бакӕндзынӕн афтӕ: ӕрцӕудзысты ӕмӕ ӕрхаудзысты дӕ къӕхтӕм ӕмӕ базондзысты, Ӕз дӕ кӕй бауарзтон, уый. 10 Ды Мӕ фӕдзӕхстмӕ гӕсгӕ фӕразон кӕй разындтӕ, уый тыххӕй дӕ Ӕз бахиздзынӕн, зӕххон цӕрджыты бафӕлварынӕн ӕппӕт дунейы цы фыдӕвзарӕны рӕстӕг уыдзӕн, уымӕй. 11 Ӕз рӕхджы ӕрцӕудзынӕн. Цы дӕм ис, ууыл хӕц, цӕмӕй дын дӕ хӕрзиуӕг мачи байса. 12 Уӕлахиздзауы скӕндзынӕн Мӕ Хуыцауы Кувӕндоны цӕджындз, ӕмӕ дзы никуал рацӕудзӕн. Ныффысдзынӕн ыл Мӕ Хуыцауы ном, уӕларвӕй, Мӕ Хуыцауӕй, чи ӕрцӕудзӕн, Мӕ Хуыцауы уыцы ног Иерусалимы сахары ном ӕмӕ Мӕ ног ном. 13 Хъустӕ кӕуыл ис, уый хъусӕд, Уд аргъуантӕн цы зӕгъы, уымӕ". 14 Лаодикийы аргъуаны зӕдмӕ дӕр ныффысс: „Афтӕ зӕгъы Амен, иузӕрдион ӕмӕ ӕцӕг ӕвдисӕн, Хуыцауы сфӕлдысты сӕрӕвӕрӕн: 15 Зонын дын дӕ хъуыддӕгтӕ. Ды нӕдӕр уазал дӕ, нӕдӕр тӕвд. О, фӕлтау уазал кӕнӕ тӕвд куы уаис! 16 Тӕвд дӕр ӕмӕ уазал дӕр нӕ, фӕлӕ хъӕрмуст кӕй дӕ, уый тыххӕй дӕ сӕппардзынӕн Мӕ дзыхӕй. 17 Ды зӕгъыс: ӕз хъӕздыг дӕн, бирӕ мӕм ис ӕмӕ ницы хъуаг ӕййафын. Фӕлӕ нӕ зоныс, ды мӕгуыр, кӕуинаг, гӕвзыкк, куырм ӕмӕ бӕгънӕг кӕй дӕ, уый. 18 Уынаффӕ дын кӕнын: арты чи ссыгъдӕг, Мӕнӕй ахӕм сызгъӕрин балхӕн ӕмӕ схъӕздыг уай; стӕй балхӕн урс дарӕс, скӕн ӕй дӕ уӕлӕ ӕмӕ дӕ бӕгънӕг буары худинӕгтӕ мауал зыной. Цӕмӕй уынай, уый тыххӕй дӕр Мӕнӕй балхӕн хос ӕмӕ дзы байсӕрд дӕ цӕстытӕ. 19 Ӕз кӕй уарзын, уыдоны багӕды кӕнын ӕмӕ бафхӕрын. Уӕдӕ у ӕнувыд ӕмӕ ӕрфӕсмон кӕн. 20 Мӕнӕ лӕууын дуармӕ ӕмӕ хойын. Мӕ хъӕлӕс чи фехъуса ӕмӕ дуар чи байгом кӕна, уымӕ бацӕудзынӕн ӕмӕ цӕл кӕндзынӕн йемӕ, уый та – Мемӕ. 21 Уӕлахиздзауы Мемӕ сбадын кӕндзынӕн Мӕ бадӕны, Ӕз куыд фӕуӕлахиз дӕн ӕмӕ Мӕ Фыдимӕ Йӕ бадӕны куыд сбадтӕн, афтӕ. 22 Хъустӕ кӕуыл ис, уый хъусӕд, Уд аргъуантӕн цы зӕгъы, уымӕ"».

Ӕргомад 4

1 Уый фӕстӕ ӕз федтон арвы дуар гомӕй. Ӕмӕ раздӕр кӕй фехъуыстон, сыкъауадындзы зӕлынау мемӕ цы хъӕлӕс ныхас кодта, уый мын загъта: «Ссу ардӕм, ӕмӕ дын фенын кӕнон, фидӕны цы уыдзӕн, уый». 2 Ӕз уайтӕккӕ фӕдӕн Сыгъдӕг Удӕй разӕнгард. Уӕларвы уыди паддзахы бадӕн, паддзахы бадӕны та федтон Бадӕджы. 3 Бадӕг тӕмӕнтӕ калдта зынаргъ дуртӕ иаспис ӕмӕ сардисау. Паддзахы бадӕны алыварс изумрудау ӕрттывта арвырон. 4 Паддзахы бадӕны алыварс – цыппар ӕмӕ ссӕдз паддзахы бадӕны. Уыцы паддзахы бадӕнты бадтысты цыппар ӕмӕ ссӕдз хистӕры. Уыди сыл урс-урсид дарӕс, сӕ сӕртыл та – сызгъӕрин кадыхудтӕ. 5 Паддзахы бадӕнӕй-иу рацыд ӕрвӕрттывдтытӕ, хъуысти дзы ӕрвнӕрды гыбар-гыбур, паддзахы бадӕны раз сыгъдис авд артӕвзаг цырагъы – уыдон сты Хуыцауы авд уды. 6 Паддзахы бадӕны раз уыдис цыдӕр, авджын денджызы хуызӕн, дзӕнхъайау ирд. Паддзахы бадӕн кӕм уыди, уыцы бынаты хӕдастӕу ӕмӕ йӕ алыварс уыди цыппар уӕларвон удгоймаджы бирӕ цӕстытимӕ разӕй дӕр ӕмӕ чъылдымырдыгӕй дӕр. 7 Фыццаг уӕларвон удгоймаг уыди домбайы хуызӕн, дыккаг удгоймаг – галы хуызӕн, ӕртыккаг удгоймагӕн йӕ цӕсгом уыдис адӕймаджы цӕсгомау, цыппӕрӕм удгоймаг уыди тӕхгӕ цӕргӕсы хуызӕн. 8 Цыппар уӕларвон удгоймагӕй алкӕмӕн дӕр уыди фӕйнӕ ӕхсӕз базыры; алырдыгӕй дӕр ӕмӕ сӕ базырты бын дӕр уыди бирӕ цӕстытӕ. Ӕхсӕвӕй-бонӕй ӕнӕбанцайгӕйӕ дзурынц: «Чи уыд, Чи ис ӕмӕ Чи ӕрцӕудзӕн, уыцы Дунедарӕг Хицау Хуыцау сыгъдӕг у, сыгъдӕг у, сыгъдӕг у». 9 Паддзахы бадӕны Бадӕгӕн, мыггагӕй-мыггагмӕ Цардӕгасӕн, уыцы уӕларвон удгоймӕгтӕ намысы, кады ӕмӕ арфӕйы ныхӕстӕ куы фӕдзурынц, 10 Уӕд цыппар ӕмӕ ссӕдз хистӕры адӕлгом вӕййынц паддзахы бадӕны Бадӕджы раз, сӕ кадыхудтӕ ӕрӕвӕрынц паддзахы бадӕны раз ӕмӕ бакувынц мыггагӕй-мыггагмӕ Цардӕгасмӕ: 11 «Ды намысы ӕмӕ кады аккаг дӕ, нӕ тыхджын Хицау ӕмӕ нӕ Хуыцау, уымӕн ӕмӕ ӕппӕт дӕр Ды сфӕлдыстай, ӕппӕт дӕр сфӕлдыстӕуыд ӕмӕ ӕппӕт дӕр цӕры Дӕ фӕндонмӕ гӕсгӕ».

Ӕргомад 5

1 Уӕд паддзахы бадӕны Бадӕджы рахиз къухы ӕз федтон дыууӕрдыгӕй дӕр фыст чиныг-тыхтон; ӕхгӕд уыдис авд мыхуырӕй. 2 Ӕз федтон тыхджын зӕды. Уый хъӕрӕй бафарста: «Чи у ацы чиныджы мыхуыртӕ асӕттыны ӕмӕ йӕ байгом кӕныны аккаг?» 3 Ӕмӕ нӕдӕр уӕларвы, нӕдӕр зӕххыл, нӕдӕр зӕххы бын никӕй бон уыди чиныг байгом кӕнын ӕмӕ дзы цы фыст ис, уый фенын. 4 Ӕмӕ ӕз бирӕ фӕкуыдтон, уыцы чиныг байгом кӕныны ӕмӕ дзы цы фыст ис, уый феныны аккаг кӕй ничи разынд, ууыл. 5 Уӕд мын цыппар ӕмӕ ссӕдз хистӕрӕй иу загъта: «Ма ку, мӕнӕ фӕуӕлахиз Домбай Иудӕйы хӕдзарвӕндагӕй, Давиды Ӕвзар. Уый асӕтдзӕн авд мыхуыры ӕмӕ байгом кӕндзӕн чиныг». 6 Ӕз федтон: Хуыцау кӕм бады, уыцы бынаты хӕдастӕу лӕууыд Уӕрыкк, Йӕ алыварс та – цыппар уӕларвон удгоймаджы ӕмӕ цыппар ӕмӕ ссӕдз хистӕры; ӕдде бакӕсгӕйӕ Уӕрыкк уыди, цыма Йӕ нывондӕн ӕрхастӕуыд, афтӕ. Уыдис Ын авд сыкъайы ӕмӕ авд цӕсты – ӕппӕт зӕхмӕ кӕй рарвыстӕуыд, Хуыцауы уыцы авд уды. 7 Уӕрыкк ӕрбацыд ӕмӕ паддзахы бадӕны Бадӕджы рахиз къухӕй райста чиныг. 8 Чиныг куы райста, уӕд цыппар уӕларвон удгоймаджы ӕмӕ цыппар ӕмӕ ссӕдз хистӕры адӕлгом сты Уӕрыччы раз. Алкӕмӕ дӕр дзы уыди фӕндыр, стӕй будӕй дзаг сызгъӕрин будсудзӕнтӕ – сыгъдӕджыты куывдтытӕ. 9 Уыдон зарыдысты ног зарӕг: «Ды чиныг райсыны ӕмӕ йын йӕ мыхуыртӕ асӕттыны аккаг дӕ, уымӕн ӕмӕ Дӕу ӕрхастӕуыд нывондӕн, ӕмӕ Дӕ Тугӕй Хуыцауӕн балхӕдтай адӕм алы мыггаджы ӕмӕ ӕвзаджы, алы адӕмы ӕмӕ адӕмыхатты ӕхсӕнӕй, 10 Скодтай сӕ паддзӕхтӕ, нӕ Хуыцауӕн лӕггадгӕнджытӕ, ӕмӕ паддзахиуӕг кӕндзысты зӕххыл». 11 Ӕз акастӕн ӕмӕ фехъуыстон, паддзахы бадӕны, цыппар уӕларвон удгоймаджы ӕмӕ цыппар ӕмӕ ссӕдз хистӕры алыварс цы бирӕ зӕдтӕ уыди, уыдоны хъӕлӕс. Уыдон уыдысты ӕрдзӕ-ӕрдзӕтӕ, ӕнӕнымӕц, 12 Ӕмӕ дзырдтой хъӕрӕй: «Нывондӕн Кӕй ӕрхастӕуыд, уыцы Уӕрыкк у кады, намысы ӕмӕ арфӕйы аккаг; Уый у тыхджын ӕмӕ хъӕздыг, зондджын ӕмӕ хъомысджын!» 13 Ӕз фехъуыстон, Хуыцау кӕй сфӕлдыста, уыдон сеппӕт дӕр уӕларвы, зӕххыл, зӕххы бын, денджызы – дун-дунейы чидӕриддӕр ис, уыдон цы дзырдтой, уый: «Паддзахы бадӕны Бадӕгӕн ӕмӕ Уӕрыккӕн – арфӕ, кад, намыс ӕмӕ ӕппӕт бартӕ мыггагӕй-мыггагмӕ!» 14 Цыппар уӕларвон удгоймаджы загътой: «Амен». Цыппар ӕмӕ ссӕдз хистӕры дӕр адӕлгом сты ӕмӕ бакуывтой, мыггагмӕ Цардӕгас Чи у, Уымӕн.

Ӕргомад 6

1 Ӕз федтон: Уӕрыкк авд мыхуырӕй асаста фыццаг, ӕмӕ фехъуыстон цыппар уӕларвон удгоймагӕй иуы хъӕлӕс, цыма арв ныннӕрыд: «Рацу [ӕмӕ кӕс]». 2 Ӕз федтон урс бӕх; йӕ барӕгмӕ уыд ӕрдын, лӕвӕрд ын ӕрцыд кадыхуд, ӕмӕ рацыд уӕлахиздзауӕй, куыд фӕуӕлахиз уа, афтӕ. 3 Уӕрыкк дыккаг мыхуыр куы асаста, уӕд фехъуыстон, дыккаг уӕларвон удгоймаг цы загъта, уый: «Рацу [ӕмӕ кӕс]». 4 Ӕмӕ рацыд ӕндӕр, ӕртхуыз бӕх; йӕ барӕгӕн лӕвӕрд ӕрцыд зӕххӕй сабырад айсыны бар, цӕмӕй марой кӕрӕдзи; ӕмӕ йӕм радтой стыр цирхъ. 5 Уӕрыкк ӕртыккаг мыхуыр куы асаста, уӕд фехъуыстон, ӕртыккаг уӕларвон удгоймаг цы загъта, уый: «Рацу [ӕмӕ кӕс]». Ӕз федтон сау бӕх; йӕ барӕджы къухы уыди барӕн. 6 Цыппар уӕларвон удгоймаджы кӕм уыдысты, уырдыгӕй мӕм райхъуыст адӕймаджы хъӕлӕсау: «Мӕнӕуы къус динарыл, хъӕбӕрхоры ӕртӕ къусы динарыл, зети ӕмӕ сӕнӕн та знаггад ма ракӕн». 7 Уӕрыкк цыппӕрӕм мыхуыр куы асаста, уӕд фехъуыстон цыппӕрӕм уӕларвон удгоймаджы хъӕлӕс: «Рацу [ӕмӕ кӕс]». 8 Ӕз федтон фӕлурс бӕх; йӕ барӕджы ном – мӕлӕт. Мӕрдтыбӕстӕ цыдис йӕ фӕдыл, ӕмӕ сын лӕвӕрд уыди зӕххы цыппӕрӕм хайыл цирхъы ӕмӕ стонджы, рыны ӕмӕ зӕххон сырдты фӕрцы марыны бар. 9 Уӕрыкк фӕндзӕм мыхуыр куы асаста, уӕд нывондхӕссӕны бын федтон, Хуыцауы ныхасы тыххӕй ӕмӕ се 'вдисӕнады тыххӕй кӕй амардӕуыд, уыдоны удтӕ. 10 Уыдон хъӕлӕсыдзагӕй дзырдтой: «Сыгъдӕг ӕмӕ ӕцӕг Дунедарӕг, кӕдмӕ у Дӕ каст, зӕххон цӕрджытӕн тӕрхон цӕуылнӕ рахӕссыс ӕмӕ сӕ нӕ туг цӕуылнӕ райсыс?» 11 Уӕд сӕ алкӕмӕн дӕр лӕвӕрд ӕрцыд урс-урсид дарӕс ӕмӕ сын загъдӕуыд, цӕмӕй банхъӕлмӕ кӕсой иуцасдӕр, зӕххыл ма уыдонау кӕй хъуамӕ амардӕуа, сӕ уыцы ӕмкусджытӕ ӕмӕ ӕфсымӕртӕ цалынмӕ нымӕц баххӕст кӕной, уӕдмӕ. 12 Уӕрыкк ӕхсӕзӕм мыхуыр куы асаста, уӕд федтон: зӕхх тынг нынкъуыст, хур ныттар сау хъисынау ӕмӕ мӕй ӕнӕхъӕнӕй ныссырх тугау. 13 Стъалытӕ арвӕй ӕрхаудтой зӕхмӕ, тыхджын дымгӕ легъуийы куы ныууигъы, уӕд йӕ цъӕх дыргътӕ куыд ӕрызгъӕлынц, афтӕ. 14 Арв тыхтонау ӕрбампылд ӕмӕ цыдӕр ӕрбаци. Алы хох ӕмӕ сакъадах дӕр йӕ бынатӕй фенкъуысыд. 15 Зӕххон паддзӕхтӕ ӕмӕ стыр хицӕуттӕ, ӕфсӕддон разамонджытӕ ӕмӕ хъӕздгуытӕ, тыхджынтӕ, алы цагъар ӕмӕ алы сӕрибар дӕр бамбӕхстысты лӕгӕтты ӕмӕ хӕхты – къӕдзӕхты ӕхсӕн. 16 Ӕмӕ дзурынц хӕхтӕн ӕмӕ къӕдзӕхтӕн: «Рафӕлдӕхут ныл ӕмӕ нӕ уӕ быны бамбӕхсут паддзахы бадӕны Бадӕгӕй ӕмӕ Уӕрыччы фыдӕхӕй. 17 Ралӕууыд Сӕ фыдӕхы стыр бон ӕмӕ йын чи бафӕраздзӕн?»

Ӕргомад 7

1 Ӕппӕт уыдӕтты фӕстӕ ӕз федтон цыппар зӕды. Уыдон лӕууыдысты зӕххы цыппар кӕроны, ӕмӕ хӕцыдысты зӕххон цыппар дымгӕйыл, нӕдӕр зӕххыл, нӕдӕр денджызыл, нӕдӕр бӕлӕстыл куыд нӕ дымой, афтӕ. 2 Ӕз федтон ӕндӕр зӕды дӕр. Уый ссӕйцыд скӕсӕнӕй ӕмӕ йӕм уыди цардӕгас Хуыцауы мыхуыр. Зӕд ныхъхъӕр кодта, зӕххӕн ӕмӕ денджызӕн знаггад ракӕныны бар лӕвӕрд кӕмӕ ӕрцыд, уыцы цыппар зӕдмӕ: 3 «Цалынмӕ нӕ Хуыцауы цагъарты тӕрныхтыл мыхуыр сӕвӕрӕм, уӕдмӕ знаггад ма ракӕнут нӕдӕр зӕххӕн, нӕдӕр денджызӕн, нӕдӕр бӕлӕстӕн». 4 Ӕз фехъуыстон, мыхуыр ӕвӕрд кӕуыл ӕрцыд, уыдоны нымӕц: израилаг адӕмы ӕппӕт хӕдзарвӕндӕгтӕй мыхуыр ӕвӕрд ӕрцыди сӕдӕ цыппор цыппар миныл. 5 Иудӕйы хӕдзарвӕндагӕй мыхуыр ӕвӕрд ӕрцыд дыууадӕс миныл; Рувимы хӕдзарвӕндагӕй – дыууадӕс миныл; Гады хӕдзарвӕндагӕй – дыууадӕс миныл; 6 Асиры хӕдзарвӕндагӕй – дыууадӕс миныл; Неффалимы хӕдзарвӕндагӕй – дыууадӕс миныл; Манассийы хӕдзарвӕндагӕй – дыууадӕс миныл; 7 Симеоны хӕдзарвӕндагӕй – дыууадӕс миныл; Левийы хӕдзарвӕндагӕй – дыууадӕс миныл; Иссахары хӕдзарвӕндагӕй – дыууадӕс миныл; 8 Завулоны хӕдзарвӕндагӕй – дыууадӕс миныл; Иосифы хӕдзарвӕндагӕй – дыууадӕс миныл; Вениамины хӕдзарвӕндагӕй – дыууадӕс миныл. 9 Уый фӕстӕ ӕз федтон, нымайын дӕр кӕй ничи бафӕрӕзтаид, уыйбӕрц дзыллӕ алы адӕмыхӕттытӕй, алы мыггагӕй, алы адӕмтӕй ӕмӕ ӕвзӕгтӕй – сӕ къухы палмӕйы къалиутимӕ урс-урсид дарӕсы лӕууыдысты паддзахы бадӕны ӕмӕ Уӕрыччы раз. 10 Уыдон хъӕлӕсыдзагӕй дзырдтой: «Паддзахы бадӕны Чи бады, нӕ уыцы Хуыцау ӕмӕ Уӕрыкк сты ирвӕзынгӕнӕг!» 11 Зӕдтӕ иууылдӕр лӕууыдысты паддзахы бадӕны, цыппар ӕмӕ ссӕдз хистӕры ӕмӕ цыппар уӕларвон удгоймаджы алыварс, стӕй адӕлгом сты паддзахы бадӕны раз ӕмӕ бакуывтой Хуыцаумӕ: 12 «Амен! Табу, намыс ӕмӕ кад мыггагӕй-мыггагмӕ нӕ зондджын, арфӕгонд, тыхджын ӕмӕ хъомысджын Хуыцауӕн! Амен!» 13 Цыппар ӕмӕ ссӕдз хистӕрӕй мӕ иу бафарста: «Уӕртӕ урс-урсид дарӕс кӕуыл ис, уыдон чи сты ӕмӕ кӕцӕй ӕрцыдысты?» 14 Ӕз ын загътон: «Ды йӕ дӕхӕдӕг зоныс, ме 'лдар». Уӕд мын загъта: «Стыр бӕллӕхӕй чи ӕрцыд, уыдон сты; сӕ дарӕстӕ ныхсадтой ӕмӕ сӕ ныуурс кодтой Уӕрыччы Тугӕй. 15 Уый тыххӕй лӕууынц Хуыцауы бадӕны раз ӕмӕ Йын ӕхсӕвӕй-бонӕй лӕггад кӕнынц Йӕ Кувӕндоны; ӕмӕ паддзахы бадӕны Бадӕг уыдоны бакӕндзӕн Йӕ дӕлбазыр. 16 Уыдон нал кӕндзысты нӕдӕр стонг, нӕдӕр дойны. Хур дӕр сӕ нал судздзӕн ӕмӕ сӕ ӕнтӕф дӕр нал хъыгдардзӕн. 17 Уымӕн ӕмӕ Хуыцау кӕм бады, уыцы бынаты хӕдастӕу цы Уӕрыкк ис, Уый сӕ кӕндзӕн хизынмӕ ӕмӕ царддӕттӕг суадӕттӕм, ӕмӕ сын Хуыцау сӕ цӕстытӕй асӕрфдзӕн сӕ цӕссыг».

Ӕргомад 8

1 Уӕрыкк ӕвдӕм мыхуыр куы асаста, уӕд сахаты ӕрдӕджы бӕрц уӕларвы иу сыбыртт дӕр нал хъуыст. 2 Ӕмӕ ӕз федтон Хуыцауы раз лӕууӕг авд зӕды; уыдонмӕ лӕвӕрд ӕрцыд авд сыкъауадындзы. 3 Ӕрбацыд ӕндӕр зӕд сызгъӕрин будсудзӕнимӕ ӕмӕ ӕрлӕууыд нывондхӕссӕны раз. Лӕвӕрд ӕм ӕрцыд бирӕ буд, цӕмӕй йӕ ӕппӕт сыгъдӕджыты куывдимӕ ӕрӕвӕра, паддзахы бадӕны раз цы сызгъӕрин нывондхӕссӕн уыди, ууыл. 4 Буды фӕздӕг сыгъдӕджыты куывдимӕ зӕды къухӕй фӕцыд хӕрдмӕ, Хуыцаумӕ. 5 Зӕд райста будсудзӕн, байдзаг ӕй кодта нывондхӕссӕны цӕхӕрӕй ӕмӕ йӕ фехста зӕхмӕ. Райхъуыст ӕрвнӕрды гыбар-гыбур, арв нырттывта ӕмӕ зӕхх нынкъуыст. 6 Уӕд авд сыкъауадындзы кӕмӕ уыди, уыцы авд зӕды сӕхи ӕрцӕттӕ кодтой сыкъауадындзтӕй уасынмӕ. 7 Фыццаг зӕд ныууасыд сыкъауадындзӕй, ӕмӕ зӕххыл ныууарыд их ӕмӕ арт тугӕмхӕццӕйӕ. Басыгъд зӕххы ӕртыццаг хай, басыгъд бӕлӕсты ӕртыццаг хай, басыгъд цъӕх кӕрдӕг ӕгасӕй дӕр. 8 Дыккаг зӕд ныууасыд сыкъауадындзӕй, ӕмӕ стыр хохы хуызӕн цыдӕр, пиллон арт уадзгӕйӕ, ныххаудта денджызы ӕмӕ денджызы ӕртыццаг хай фестад туг. 9 Денджызы удӕгасӕй цы уыд, уыдонӕн амард се 'ртыццаг хай, бабын науты ӕртыццаг хай. 10 Ӕртыккаг зӕд ныууасыд сыкъауадындзӕй, ӕмӕ арвӕй судзгӕ цырагъау рахауди стыр стъалы, ӕмӕ ныххаудта цӕугӕдӕтты ӕртыццаг хайы ӕмӕ суадӕтты. 11 Уыцы стъалыйы ном у Скъӕлдзой. Дӕтты ӕртыццаг хай скъӕлдзойау смаст, ӕмӕ уыцы маст донӕй фӕцагъды бирӕ адӕм. 12 Цыппӕрӕм зӕд ныууасыд сыкъауадындзӕй, ӕмӕ хуры ӕртыццаг хай, мӕйы ӕртыццаг хай, стъалыты ӕртыццаг хай фӕсахъат. Сӕ рухс афтӕ бамынӕг, ӕмӕ боны ӕмӕ ӕхсӕвы ӕртыццаг хай дӕр уыди талынг. 13 Ӕз федтон иу цӕргӕсы уӕлиӕутты тӕхгӕ, ӕмӕ фехъуыстон, хъӕрӕй цы дзырдта, уый: «Сыкъауадындзтӕй ма цы ӕртӕ зӕды уасдзысты, уыдоны уастӕй бӕллӕх, бӕллӕх, бӕллӕх ӕрцӕудзӕн зӕххон цӕрджытыл!»

Ӕргомад 9

1 Фӕндзӕм зӕд ныууасыд сыкъауадындзӕй, ӕмӕ федтон, арвӕй зӕхмӕ цы стъалы ӕрхауд, уый; уымӕ лӕвӕрд ӕрцыд дӕгъӕл дӕлдзӕхӕй. 2 Стъалы байгом кодта дӕлдзӕхы дуар ӕмӕ, егъау пецӕй рацӕуӕгау, уырдыгӕй ракалд фӕздӕг; дӕлдзӕхы фӕздӕгӕй ныттар сты хур ӕмӕ уӕлдӕф. 3 Фӕздӕгӕй зӕхмӕ рацыдысты мӕтыхтӕ, ӕмӕ сын лӕвӕрд ӕрцыд зӕххон скорпионты тых. 4 Уыдонӕн бафӕдзӕхстӕуыд знаггад нӕ кӕнын нӕдӕр зӕххон кӕрдӕгӕн, нӕдӕр зайӕгхалӕн, нӕдӕр бӕлӕстӕн, фӕлӕ йӕ тӕрныхыл Хуыцауы мыхуыр ӕвӕрд кӕмӕн нӕй, ӕрмӕст уыцы адӕмӕн. 5 Мӕтыхтӕн фӕдзӕхст уыд адӕмы марын нӕ, фӕлӕ сӕ фондз мӕйы дӕргъы удхары бафтауын. Ӕмӕ адӕм удхар кӕндзысты, скорпион йӕ фат куы фӕсадзы, уӕд адӕймаг куыд фӕудхар кӕны, афтӕ. 6 Уыцы бонты адӕм сӕхӕдӕг агурдзысты мӕлӕт, фӕлӕ йӕ не ссардзысты. Бӕлдзысты мӕлӕтмӕ, фӕлӕ йӕ нӕ фендзысты. 7 Мӕтыхтӕ уыдысты хӕстмӕ ифтонг бӕхты хуызӕн. Сӕ сӕртыл – сызгъӕрин кадыхудты хуызӕттӕ, сӕ цӕсгӕмттӕ – адӕймаджы цӕсгомы хуызӕн, 8 Сӕ сӕрыхъуынтӕ – сылгоймаджы сӕрыхъуынты хуызӕн, сӕ дӕндӕгтӕ – домбайы дӕндӕгтау. 9 Сӕ гуырыл уыди згъӕрӕфтыды хуызӕн, сӕ базырты уынӕр та уыди, бирӕ бӕхтӕ хӕстмӕ куы фезгъорынц, уӕд сӕ уӕрдӕттӕ куыд фӕгыбар-гыбур кӕнынц, уыйау. 10 Мӕтыхты къӕдзилтӕ уыдысты скорпионты къӕдзилтау фӕттимӕ; ӕмӕ сӕм уыд адӕмӕн фондз мӕйы знаггад кӕныны тых. 11 Сӕ паддзах уыди дӕлдзӕхы зӕд. Дзуттагау йӕ ном у Аваддон, бердзенагау та – Аполлион 12 Ахицӕн иу бӕллӕх, ӕмӕ ма йӕ фӕстӕ ноджыдӕр ӕрбацӕуы дыууӕ бӕллӕхы. 13 Ӕхсӕзӕм зӕд ныууасыд сыкъауадындзӕй, ӕмӕ Хуыцауы раз цы сызгъӕрин нывондхӕссӕн уыди, уый цыппар сыкъайӕ мӕм райхъуыст хъӕлӕс. 14 Сыкъауадындз цы ӕхсӕзӕм зӕдмӕ уыди, уымӕн уыцы хъӕлӕс загъта: «Суӕгъд кӕн, Евфраты стыр цӕугӕдоны цур баст чи у, уыцы цыппар зӕды». 15 Бӕлвырд сахат ӕмӕ бонмӕ, мӕй ӕмӕ азмӕ цӕттӕ цы цыппар зӕды уыди, уыдон уӕгъдгонд ӕрцыдысты адӕмы ӕртыццаг хай амарынмӕ. 16 Ӕз фехъуыстон бӕхджын ӕфсады нымӕц – уый уыди дыууӕсӕдӕ милуаны. 17 Мӕнӕн равдыстӕуыд бӕхты сӕ барджытимӕ, ӕмӕ сӕ федтон ахӕмӕй: барджытыл уыди зынгхуыз, сапфирау тарцъӕх ӕмӕ сондонау бур згъӕрӕфтыд; бӕхты сӕртӕ уыдысты домбӕйтты сӕрты хуызӕн, сӕ комӕй калди арт, фӕздӕг ӕмӕ сондон. 18 Ӕмӕ сӕ комӕй цы ӕртӕ рыны калди, уыдонӕй – арт, фӕздӕг ӕмӕ сондонӕй – амард адӕмы ӕртыццаг хай. 19 Уымӕн ӕмӕ бӕхтӕн сӕ тых уыди сӕ комы ӕмӕ сӕ къӕдзилты. Сӕ къӕдзилтӕ та уыдысты кӕлмыты хуызӕн сӕртимӕ, ӕмӕ уыдонӕй хӕцыдысты адӕмыл. 20 Ацы рынтӕй чи нӕ амард, уыцы адӕммӕ та фӕсмон не 'рцыд ӕмӕ нӕ ныууагътой дӕлимонтӕм ӕмӕ, сӕхӕдӕг къухӕй кӕй скодтой, нӕдӕр уынгӕ, нӕдӕр хъусгӕ, нӕдӕр цӕугӕ чи нӕ кӕны, сӕ уыцы сызгъӕрин, ӕвзист, ӕрхуы, дурын ӕмӕ хъӕдын гуымирытӕм кувын. 21 Фӕсмон нӕ фӕкодтой, лӕгмар, кӕлӕнгӕнджытӕ, хӕтаг, давӕг кӕй уыдысты, ууыл.

Ӕргомад 10

1 Ӕмӕ ӕз федтон ӕндӕр тыхджын зӕды уӕларвӕй ӕрцӕйцӕугӕ. Йӕ дарӕс уыдис ӕврагъӕй, йӕ сӕрмӕ – арвырон, йӕ цӕсгом – хуры хуызӕн, йӕ къӕхтӕ – судзгӕ цӕджындзтау. 2 Йӕ къухы уыди гыццыл чиныг гомӕй. Уыцы зӕд йӕ рахиз къах ӕрӕвӕрдта денджызыл, галиу къах та – зӕххыл, 3 Ӕмӕ ныхъхъӕр кодта, домбай куыд фембухы, афтӕ. Куы ныхъхъӕр кодта, уӕд дзуапп радтой авд ӕрвнӕрды. 4 Авд ӕрвнӕрды дзуапп куы радтой, уӕд хъуамӕ бавнӕлдтаин фыссынмӕ. Фӕлӕ мӕм уӕларвӕй ӕрыхъуысти хъӕлӕс: «Авд ӕрвнӕрды цы загътой, уый басусӕг кӕн, ма йӕ ныффысс». 5 Денджызыл ӕмӕ зӕххыл лӕугӕ кӕй федтон, уыцы зӕд йӕ рахиз къух сдардта уӕларвмӕ 6 Ӕмӕ расомы кодта, мыггагӕй-мыггагмӕ Цардӕгас Чи у, Уымӕй – арв ӕмӕ арвыл цы ис, зӕхх ӕмӕ зӕххыл цы ис, денджыз ӕмӕ денджызы цы ис, ӕппӕт уыдӕттӕ Сфӕлдисӕгӕй: «Ӕрцӕуинаг цы у, уый нӕ бафӕстиат уыдзӕн. 7 Ӕвдӕм зӕдӕн сыкъауадындзӕй уасыны рӕстӕг куы ралӕууа, уӕд сӕххӕст уыдзӕн Хуыцауы сусӕг фӕндон – Йӕ цагъар пехуымпартӕн зӕрдӕ куыд бавӕрдта, афтӕ». 8 Уӕларвӕй мӕм цы хъӕлӕс ӕрыхъуыст, уый мын ноджыдӕр загъта: «Марадз, денджыз ӕмӕ зӕххыл цы зӕд лӕууы, уый къухӕй райс гом чиныг». 9 Ӕз ацыдтӕн зӕдмӕ ӕмӕ йын загътон: «Ӕри мын чиныг». Уый мын загъта: «Айс ӕй ӕмӕ йӕ бахӕр. Дӕ хуылф дын смаст кӕндзӕн, дӕ дзыхы та мыдау адджын уыдзӕн». 10 Ӕз зӕды къухӕй райстон чиныг ӕмӕ йӕ бахордтон. Ӕмӕ мӕ дзыхы мыдау уыд адджын; куы йӕ бахордтон, уӕд та дзы мӕ хуылф смаст. 11 Ӕмӕ мын загъдӕуыд: «Ды бирӕ адӕмты, адӕмыхӕттыты, ӕвзӕгты ӕмӕ паддзӕхты тыххӕй ногӕй пехуымпар ныхас хъуамӕ зӕгъай».

Ӕргомад 11

1 Радтой мӕм хъилы хуызӕн барӕн лӕдзӕг ӕмӕ мын загъдӕуыд: «Марадз, сбар Хуыцауы Кувӕндон ӕмӕ нывондхӕссӕн, ӕмӕ банымай, чи дзы кувы, уыдоны нымӕц. 2 Йе 'ддаг кӕрт та ныууадз, ма йӕ сбар, уымӕн ӕмӕ муртаттӕн лӕвӕрд у: уыдон сыгъдӕг сахар ссӕнддзысты дыууӕ ӕмӕ дыууиссӕдз мӕйы. 3 Арвитдзынӕн Мӕ дыууӕ ӕвдисӕны, ӕмӕ уыдон хъисын дарӕсы пехуымпариуӕг кӕндзысты мин дыууӕсӕдӕ ӕхсай боны». 4 Уыдон сты, ӕппӕт зӕххы Хицауы раз чи лӕууы, уыцы дыууӕ зетибӕласы ӕмӕ дыууӕ цырагъдарӕны. 5 Искӕй уыдонӕн фыдбылыз ракӕнын куы бафӕнда, уӕд сӕ комӕй рацӕудзӕн арт ӕмӕ сын се знӕгты аныхъуырдзӕн. Афтӕ амӕлдзӕн, уыдонӕн фыдбылыз ракӕнын кӕй бафӕнда, уый. 6 Уыдонмӕ ис арвы дуар сӕхгӕныны бар, цӕмӕй сӕ пехуымпар ныхасы рӕстӕг уарын ма уа. Иугӕр сӕ куы бафӕнда, уӕд сӕм ис дӕттӕ туг фестын кӕныны ӕмӕ зӕххыл алы рын бафтауыны тых. 7 Се 'вдисӕнад куы фӕуой, уӕд семӕ стох кӕндзӕн дӕлдзӕхӕй рацӕуӕг сырд, фӕтых сыл уыдзӕн ӕмӕ сӕ амардзӕн. 8 Сӕ мӕрдтӕ баззайдзысты, сӕ Хицауы сын кӕм байтыгътой, фӕсномыгӕй Содом ӕмӕ Мысыр чи хуыйны, уыцы стыр сахары уынджы. 9 Сӕ мӕрдтӕм сын ӕртӕ боны ӕмӕ ӕрдӕг кӕсдзысты адӕмтӕй, мыггӕгтӕй, ӕвзӕгтӕй, адӕмыхӕттытӕй бирӕтӕ, ӕмӕ сын сӕ мӕрдтӕ зӕппадзы бавӕрын нӕ бауадздзысты. 10 Зӕххыл цӕрджытӕн уый уыдзӕн цины бӕрӕгбон, кӕрӕдзийӕн ӕрвитдзысты лӕвӕрттӕ, уымӕн ӕмӕ уыцы дыууӕ пехуымпары удхарӕй мардтой зӕххыл цӕрджыты. 11 Фӕлӕ сӕ ӕртӕ боны ӕмӕ ӕрдӕджы фӕстӕ Хуыцау бауагъта цард, ӕмӕ слӕууыдысты сӕ къӕхтыл. Чи сӕ федта, уыдон баисты стыр тасы амӕддаг. 12 Сӕ дыууӕ дӕр фехъуыстой, уӕларвӕй сын хъӕрӕй цы загъдӕуыд, уый: «Ссӕут ардӕм». Уыдон ӕврагъы фӕцыдысты уӕларвмӕ, ӕмӕ уый федтой се знӕгтӕ. 13 Ӕмӕ уайтӕккӕ зӕхх тынг нынкъуысти, сахары дӕсӕймаг хай ныппырх. Зӕххӕнкъуысты фӕмард авд мин адӕймаджы. Иннӕты бацыд тас ӕмӕ кад кодтой Уӕларвон Хуыцауӕн. 14 Дыккаг бӕллӕх ахицӕн. Рӕхджы ӕрбахӕццӕ уыдзӕн ӕртыккаг бӕллӕх. 15 Ӕвдӕм зӕд ныууасыд сыкъауадындзӕй, ӕмӕ уӕларвы азӕлыдысты ахӕм ныхӕстӕ: «Дуне ныр сси нӕ Хицауы ӕмӕ Йӕ Чырыстийы Паддзахад, ӕмӕ Уый паддзахиуӕг кӕндзӕн мыггагӕй-мыггагмӕ». 16 Хуыцауы раз сӕ паддзахы бадӕнты чи бады, уыцы цыппар ӕмӕ ссӕдз хистӕры адӕлгом сты ӕмӕ бакуывтой Хуыцаумӕ: 17 «Ды Дӕхимӕ ӕппӕт бартӕ дӕр кӕй райстай ӕмӕ Паддзах кӕй сдӕ, уый тыххӕй арфӕ кӕнӕм Дӕуӕн, Чи ис ӕмӕ Чи уыди, уыцы Дунедарӕг Хицау Хуыцау. 18 Муртатты маст рафыхт, ӕмӕ ралӕууыд Дӕ азар, мӕрдтӕн тӕрхон хӕссыны, Дӕ цагъар пехуымпартӕн, сыгъдӕджытӕн, Дӕуӕй тӕрсджытӕн – хуымӕтӕгтӕн ӕмӕ номдзыдтӕн – мызд раттыны, бӕстӕ сафджыты фесафыны рӕстӕг». 19 Ӕмӕ уӕларвы байгом Хуыцауы Кувӕндон, ӕмӕ дзы разынд Йӕ фидыды Чырын. Арв нырттывта ӕмӕ райхъуыст ӕрвнӕрды гыбар-гыбур, зӕхх нынкъуыст ӕмӕ ныууарыди стыр их.

Ӕргомад 12

1 Ӕмӕ арвыл фӕзынди стыр ӕвдисӕйнаг: йӕ дарӕс хурӕй кӕмӕн уыд, ахӕм сылгоймаг. Йӕ къӕхты бын – мӕй, йӕ сӕрыл – кадыхуд дыууадӕс стъалыйӕ. 2 Уый уыди сывӕрджын, ӕмӕ хъӕр кодта фыррыстӕй, уымӕн ӕмӕ ралӕууыдысты йӕ арыны хъизӕмӕрттӕ. 3 Арвыл фӕзынд ӕндӕр ӕвдисӕйнаг дӕр: ӕртхуыз стыр залиаг калм авд сӕримӕ ӕмӕ дӕс сыкъаимӕ, йӕ сӕртыл авд кадыхудимӕ. 4 Уый йӕ къӕдзилӕй расӕрфта стъалыты ӕртыццаг хай арвӕй ӕмӕ сӕ ӕркалдта зӕхмӕ. Залиаг калм лӕууыд арӕг сылгоймаджы раз, куы ныййара, уӕд ын йӕ сывӕллоны куыд бахӕра, афтӕ. 5 Сылгоймаг ныййардта, ӕппӕт адӕмты ӕфсӕн лӕдзӕгӕй чи здахдзӕн, ахӕм лӕппу. Ӕмӕ сывӕллон ист ӕрцыд Хуыцаумӕ, Хуыцауы бадӕн кӕм ис, уырдӕм. 6 Сылгоймаг та алыгъд ӕдзӕрӕг бӕстӕмӕ, Хуыцау ын бынат кӕм ӕрцӕттӕ кодта, уырдӕм, уым ын мин дыууӕсӕдӕ ӕхсай боны куыд лӕггад кӕной, афтӕ. 7 Ӕмӕ уӕларвы уыди хӕст – Михаил ӕмӕ йӕ зӕдтӕ хӕцыдысты залиаг калмимӕ, залиаг калм ӕмӕ йӕ зӕдтӕ дӕр хӕцыдысты, 8 Фӕлӕ баззадысты састы бынаты, ӕмӕ сын уӕларвы бынат нал уыд. 9 Ӕмӕ стыр залиаг калм, хӕйрӕг ӕмӕ сайтан кӕй хонынц, ӕппӕт дунейы чи сайы, уыцы рагон калм, ӕппӕрст ӕрцыд йӕ бынатӕй. Йемӕ йын зӕхмӕ раппӕрстӕуыд йӕ зӕдты дӕр. 10 Ӕз фехъуыстон, уӕларвы хъӕрӕй цы загъдӕуыд, уый: «Ныр ралӕууыд, нӕ Хуыцау кӕд ирвӕзын кӕны, уыцы рӕстӕг, Йӕ тыхы ӕмӕ паддзахиуӕгады, Йӕ Чырыстийы ӕлдариуӕгады рӕстӕг, уымӕн ӕмӕ раппӕрстӕуыд не 'фсымӕртыл цъыфкалӕджы, ӕхсӕвӕй-бонӕй сыл нӕ Хуыцауы раз цъыф чи калдта, уый. 11 Уыдон ыл фӕуӕлахиз сты Уӕрыччы тугӕй, се 'вдисӕнады дзырдӕй, кастысты мӕлӕты цӕстытӕм, фӕлӕ сӕ цард ӕвгъау нӕ кодтой. 12 Уӕдӕ райут, уӕлӕрвтӕ ӕмӕ уӕлӕрвты цӕрджытӕ! Додой сӕ сӕр зӕххӕн ӕмӕ денджызӕн, уымӕн ӕмӕ уӕм ӕрцыд хӕйрӕг мӕстӕлгъӕдӕй, рӕстӕг ын бирӕ кӕй нал баззад, уый зонгӕйӕ!» 13 Зӕхмӕ йӕ кӕй раппӕрстӕуыд, залиаг калм уый куы бамбӕрста, уӕд зилын райдыдта, лӕппу кӕмӕн райгуырд, уыцы сылгоймаджы фӕдыл. 14 Уӕд сылгоймагӕн лӕвӕрд ӕрцыд стыр цӕргӕсы дыууӕ базыры, ӕдзӕрӕг бӕстӕйы йын цы бынат уыди, уырдӕм калмӕй бамбӕхсыны тыххӕй атӕхынӕн, ӕмӕ йын уым лӕггад кӕной рӕстӕджы, рӕстӕджыты ӕмӕ рӕстӕджы ӕмбисы дӕргъы 15 Сылгоймаджы фӕдыл калм йӕ комӕй рауагъта цӕугӕдон, куыд ӕй аласа, афтӕ. 16 Фӕлӕ зӕхх баххуыс кодта сылгоймагӕн – байтыгъта йӕ ком ӕмӕ аныхъуырдта, залиаг калм йӕ дзыхӕй цы цӕугӕдон рауагъта, уый. 17 Залиаг калм смӕсты сылгоймагмӕ ӕмӕ ацыди, Хуыцауы фӕдзӕхстытӕм гӕсгӕ чи цӕры ӕмӕ Йесойӕн ӕвдисӕн чи лӕууы, сылгоймаджы уыцы иннӕ цотимӕ схӕцынмӕ.

Ӕргомад 13

1 Залиаг калм ӕрлӕууыд денджызы былгӕрон змисыл, ӕмӕ федтон сырды денджызӕй рацӕйцӕугӕ; уыдис ын дӕс сыкъайы ӕмӕ авд сӕры, йӕ сыкъатыл – дӕс кадыхуды, йӕ сӕртыл та – Хуыцауы фауӕн нӕмттӕ. 2 Ӕз кӕй федтон, уыцы сырд уыди фыранчы хуызӕн, йӕ дзӕмбытӕ – арсы дзӕмбытау, йӕ дзых – домбайы дзыхау. Залиаг калм ын радта йӕ тых, йӕ паддзахы бынат ӕмӕ стыр бартӕ. 3 Йӕ сӕртӕй иу мӕлӕтдзаг цӕфы хуызӕнӕй зынди, фӕлӕ уыцы мӕлӕтдзаг цӕф байгас. Ӕппӕт зӕххон адӕмтӕ дис кодтой сырдыл, ацыдысты йӕ фӕдыл ӕмӕ бакуывтой залиаг калмӕн, сырдӕн бартӕ кӕй радта, уый тыххӕй. 4 Бакуывтой сырдӕн дӕр ӕмӕ дзырдтой: «Ацы сырдӕн ӕмбал нӕй, кӕй бон бауыдзӕн йемӕ тохы бацӕуын!» 5 Сырдӕн лӕвӕрд ӕрцыд ӕвзаг схъӕл ныхӕстӕ кӕнынӕн ӕмӕ Хуыцауы фауынӕн, лӕвӕрд ын ӕрцыди дыууӕ ӕмӕ дыууиссӕдз мӕйы дӕргъы ӕлдариуӕгады бар. 6 Сырд байгом кодта йӕ дзых Хуыцауы бафауынмӕ, фаудта Йын Йӕ ном, Йӕ цӕрӕн бынат ӕмӕ уӕларвон цӕрджыты. 7 Лӕвӕрд ын уыди сыгъдӕджытимӕ схӕцыны ӕмӕ уыдоны басӕттыны тых. Ноджы ма йын лӕвӕрд ӕрцыд алы мыггаг ӕмӕ адӕмыл, алы ӕвзаг ӕмӕ адӕмыхаттыл ӕлдариуӕг кӕныны бар. 8 Ӕмӕ йӕм кувдзысты, дуне сфӕлдисыны размӕ нывондӕн нысангонд Чи уыди, уыцы Уӕрыкмӕ царды чиныджы сӕ нӕмттӕ фыст кӕмӕн не сты, уыцы зӕххон цӕрджытӕ иууылдӕр. 9 Хъустӕ кӕуыл ис, уый хъусӕд. 10 Уацары цӕугӕ кӕмӕн у, уый ацӕудзӕн уацары. Цирхъӕй амӕлгӕ кӕмӕн у, уый амӕлдзӕн цирхъӕй. Уый афтӕ амоны: сыгъдӕджытӕ фӕразон ӕмӕ иузӕрдион хъуамӕ уой. 11 Ӕз федтон ӕндӕр сырды зӕххӕй рацӕйцӕугӕ. Уыдис ын уӕрыччы сыкъаты хуызӕн дыууӕ сыкъайы ӕмӕ дзырдта залиаг калмау. 12 Фыццаг сырды раз уый архайы, фыццаг сырдмӕ цы бартӕ ис, ахӕм бартӕй, ӕмӕ ӕппӕт зӕххон цӕрджыты кувын кӕны, йӕ мӕлӕтдзаг цӕф кӕмӕн байгас, уыцы сырдмӕ. 13 Ӕвдисы ахӕм диссӕгтӕ, ӕмӕ адӕмы цӕсты раз арвӕй зӕхмӕ ӕруадзы арт. 14 Фыццаг сырды раз ын цы диссӕгтӕ ӕвдисыны бар лӕвӕрд ӕрцыд, уыдонӕй фӕливы зӕххон цӕрджыты, дзуры сын, цӕмӕй цирхъӕй цӕф чи уыд ӕмӕ ныр удӕгас чи у, уыцы сырды кадӕн саразой йӕ сурӕт. 15 Ӕмӕ йын лӕвӕрд уыди фыццаг сырды сурӕты цард бауадзыны тых, сырды сурӕт дзыхӕй куыд сдзура ӕмӕ йӕм чи нӕ кувы, уыдоны иууылдӕр куыд марын кӕна, афтӕ. 16 Дыккаг сырд домдзӕн, цӕмӕй алкӕмӕн дӕр – хуымӕтӕг адӕм ӕмӕ номдзыдтӕн, хъӕздгуытӕ ӕмӕ мӕгуыртӕн, сӕрибартӕ ӕмӕ цагъартӕн – йӕ рахиз къухыл кӕнӕ тӕрныхыл ӕвӕрд ӕрцӕуа нысан. 17 Уыцы нысан у сырды ном кӕнӕ сырды ном ӕвдисӕг нымӕц. Уый кӕуыл уа, уыдоны йеддӕмӕ нӕдӕр ӕлхӕныны, нӕдӕр уӕй кӕныны бар никӕмӕн уыдзӕн. 18 Ам уӕлзонд хъӕуы. Зонд кӕмӕ ис, уый раиртасӕд сырды нымӕц, уымӕн ӕмӕ уый ӕвдисы адӕймаджы ном. Уыцы нымӕц у ӕхсӕзсӕдӕ ӕхсай ӕхсӕз.

Ӕргомад 14

1 Ӕз федтон: мӕнӕ Сионы хохыл лӕууы Уӕрыкк; Йемӕ сты, Йӕ ном ӕмӕ Йӕ Фыды ном кӕй тӕрныхтыл фыст ис, уыцы сӕдӕ цыппор цыппар мины. 2 Уӕларвӕй мӕм ӕрыхъуысти, стыр ӕхсӕрдзӕны уынӕрау ӕмӕ тыхджын ӕрвнӕрды гыбар-гыбурау чи уыди, ахӕм хъӕлӕс. Ӕз цы хъӕлӕс фехъуыстон, уый уыди, фӕндырдзӕгъдджытӕ цыма сӕ фӕндыртыл цагътой, ахӕм. 3 Уыдон паддзахы бадӕны раз, цыппар уӕларвон удгоймаджы ӕмӕ цыппар ӕмӕ ссӕдз хистӕры раз зарынц ног зарӕг. Зӕххон адӕмы ӕхсӕнӕй цы сӕдӕ цыппор цыппар мины балхӕдӕуыд, уыдоны йеддӕмӕ уыцы зарӕг сахуыр кӕнын никӕй бон уыд. 4 Уыдон сӕхи нӕ фӕчъизи кодтой сылгоймӕгтӕй, уымӕн ӕмӕ сылгоймаджы хъӕстӕ нӕ фесты. Уӕрыкк кӕдӕм цӕуы, уыдон дӕр уырдӕм цӕуынц Йӕ фӕдыл. Уыдоны балхӕдӕуыд адӕмы ӕхсӕнӕй, ӕмӕ сӕ Хуыцауӕн ӕмӕ Уӕрыккӕн снывондчындӕуыд хорысӕрау. 5 Сӕ дзыхӕй мӕнгныхас нӕ рацыд, сты ӕнӕфау. 6 Уый фӕстӕ ӕз федтон ӕндӕр зӕды уӕлиӕутты тӕхгӕ. Уыдис ӕм мыггагмӕйы фарны уац зӕххон цӕрджытӕн – алы адӕмыхатт ӕмӕ мыггагӕн, алы ӕвзаг ӕмӕ адӕмӕн ӕй хъусын кӕныны тыххӕй. 7 Зӕд хъӕрӕй дзырдта: «Тӕрсут Хуыцауӕй ӕмӕ Йын кад скӕнут, уымӕн ӕмӕ ралӕууыд Йӕ тӕрхоны рӕстӕг. Бакувут арв ӕмӕ зӕхх, денджыз ӕмӕ суадӕттӕ Сфӕлдисӕгмӕ». 8 Фыццаг зӕды фӕстӕ фӕзынд ӕндӕр зӕд ӕмӕ дзырдта: «Бабын, бабын стыр Вавилон; йӕ хъахбайдзинады тыххӕй йӕ баййӕфта Хуыцауы фыдӕх, ӕмӕ уыцы фыдӕхы сӕнӕй бадардта ӕппӕт адӕмтӕн». 9 Дыууӕ зӕды фӕстӕ фӕзынд ӕртыккаг зӕд дӕр ӕмӕ хъӕрӕй дзырдта: «Сырдмӕ ӕмӕ сырды сурӕтмӕ чи кувы ӕмӕ йӕ тӕрныхыл кӕнӕ йӕ къухыл нысан чи сӕвӕрдта, 10 Уый Хуыцауы азары кӕхцӕй нуаздзӕн, ӕндӕр истӕимӕ хӕццӕ чи нӕу, Йӕ уыцы фыдӕхы сӕнӕй, сыгъдӕг зӕдты ӕмӕ Уӕрыччы раз хъизӕмар кӕндзӕн сондонӕй арты. 11 Сырдмӕ ӕмӕ сырды сурӕтмӕ чи кувы ӕмӕ йын йӕ номы нысан чи сӕвӕрдта, уыдоны хъизӕмарӕй марӕг арты фӕздӕг цӕудзӕн мыггагӕй-мыггагмӕ, ӕхсӕвӕй-бонӕй ӕнцой нӕ зондзысты». 12 Уый афтӕ амоны: Хуыцауы фӕдзӕхстытӕм гӕсгӕ чи цӕры ӕмӕ Йесойыл иузӕрдион чи у, уыцы сыгъдӕджытӕ фӕразон хъуамӕ уой. 13 Уӕларвӕй мӕм ӕрыхъуыст хъӕлӕс ӕмӕ мын загъта: «Ныффысс: нырӕй фӕстӕмӕ Хицауыл ӕууӕндгӕйӕ чи мӕлы, уыдон тӕхудиаг сты». «О, уыдон ӕрӕнцайдзысты сӕ фыдӕбӕттӕй, – зӕгъы Уд, – уымӕн ӕмӕ сӕ хъуыддӕгтӕ цӕуынц сӕ фӕдыл». 14 Ӕз федтон урс ӕврагъ ӕмӕ ӕврагъыл адӕймаджы фырты Халдихы бадгӕ, Йӕ сӕрыл – сызгъӕрин кадыхуд, Йӕ къухы – цыргъ ӕхсырф. 15 Ӕндӕр зӕд рацыд Кувӕндонӕй ӕмӕ ӕврагъыл Бадӕгӕн хъӕрӕй загъта: «Рауадз Де 'хсырф ӕмӕ ӕркӕрд хуым, уымӕн ӕмӕ ралӕууыд хуымгӕрдӕн – зӕххыл хуымтӕ сцӕттӕ сты». 16 Уӕд ӕврагъыл Бадӕг Йе 'хсырф рауагъта зӕххыл ӕмӕ ныккарста зӕхх. 17 Уӕларвон Кувӕндонӕй рацыд ӕндӕр зӕд; уымӕ дӕр уыди цыргъ ӕхсырф. 18 Нывондхӕссӕны цурӕй рацыд, артыл кӕй бар цӕуы, уыцы зӕд ӕмӕ цыргъ ӕхсырф цы зӕдмӕ уыди, уымӕн хъӕрӕй загъта: «Рауадз дӕ цыргъ ӕхсырф ӕмӕ зӕххыл бафснай сӕнӕфсир, уымӕн ӕмӕ йӕ гагатӕ срӕгъӕд сты». 19 Зӕд йе 'хсырф рауагъта зӕххыл, ралыг кодта сӕнӕфсиры пуцӕлттӕ ӕмӕ сӕ ныппӕрста Хуыцауы фыдӕхы стыр сӕндуцӕны. 20 Ӕмӕ сӕнӕфсир лӕмӕрст ӕрцыд фӕссахар сӕндуцӕны; ракалди сӕндуцӕнӕй туг ӕмӕ схӕццӕ суанг бӕхы рохтӕм ӕмӕ анхъӕвзта мин ӕхсӕзсӕдӕ стадийы

Ӕргомад 15

1 Ӕз арвыл федтон ӕндӕр ӕмбисонды стыр ӕвдисӕйнаг – авд зӕды; уыди сӕм, Хуыцауы фыдӕх кӕуыл ахицӕн, уыцы фӕстаг авд рыны. 2 Ӕмӕ ӕз федтон артимӕ хӕццӕ авджын денджызау цыдӕр. Сырдыл, йӕ сурӕтыл, йӕ номы нымӕцыл чи фӕтых, уыцы адӕм Хуыцауы фӕндыртимӕ лӕууынц авджын денджызыл 3 Ӕмӕ зарынц Хуыцауы цагъар Моисейы зарӕг ӕмӕ Уӕрыччы зарӕг: «Стыр ӕмӕ диссаг сты Дӕ хъуыддӕгтӕ, Дунедарӕг Хицау Хуыцау! Раст ӕмӕ ӕцӕг сты Дӕ фӕндӕгтӕ, адӕмты Паддзах! 4 Чи нӕ фӕтӕрсдзӕн Дӕуӕй, Хицау, чи не скӕндзӕн кад Дӕ номӕн? Уымӕн ӕмӕ сыгъдӕг ӕрмӕстдӕр Ды дӕ. Ӕрцӕудзысты ӕппӕт адӕмтӕ ӕмӕ Дӕм кувдзысты, уымӕн ӕмӕ раргом сты Дӕ раст тӕрхӕттӕ». 5 Уый фӕстӕ ӕз федтон: уӕларвы байгом Кувӕндон – Сыгъдӕг Цатыр. 6 Уӕздан кӕттагӕй сыгъдӕг ӕмӕ ӕрттиваг дарӕсы, сӕ риутыл сызгъӕрин рӕттимӕ, Кувӕндонӕй рацыдысты авд зӕды авд рынимӕ. 7 Цыппар уӕларвон удгоймагӕй иу ацы авд зӕдмӕ радта, мыггагӕй-мыггагмӕ цардӕгас Чи у, уыцы Хуыцауы фыдӕхӕй ӕмыдзаг авд сызгъӕрин кӕхцы. 8 Кувӕндон байдзаг Хуыцауы намысы ӕмӕ хъаруйы фӕздӕгӕй, ӕмӕ Кувӕндонмӕ бацӕуын никӕй бон уыдис, авд зӕдмӕ чи уыди, цалынмӕ уыцы авд рыны ахицӕн уой, уӕдмӕ.

Ӕргомад 16

1 Кувӕндонӕй мӕм райхъуыст, авд зӕдӕн хъӕрӕй цы загъдӕуыд, уый: «Марадз, Хуыцауы фыдӕхы авд кӕхцы акалут зӕхмӕ!» 2 Ацыд фыццаг зӕд ӕмӕ йӕ кӕхц ракалдта зӕхмӕ, ӕмӕ сырды нысан кӕуыл уыд ӕмӕ йын йӕ сурӕтмӕ чи куывта, уыцы адӕмыл фӕзынд ӕвирхъау риссаг хӕфдзӕстытӕ. 3 Дыккаг зӕд йӕ кӕхц ракалдта денджызмӕ. Денджыз сси мард адӕймаджы туджы хуызӕн, ӕмӕ дзы удӕгасӕй ницыуал баззад. 4 Ӕртыккаг зӕд йӕ кӕхц ракалдта цӕугӕдӕттыл ӕмӕ суадӕттыл, ӕмӕ фестадысты туг. 5 Ӕмӕ ӕз фехъуыстон, дӕттыл кӕй бар цӕуы, уыцы зӕды хъӕлӕс: «Раст дӕ Ды, Чи ис ӕмӕ Чи уыди, уыцы сыгъдӕг Хуыцау, уымӕн ӕмӕ Ды ахӕм тӕрхон рахастай. 6 Уыдон сыгъдӕджыты ӕмӕ пехуымпарты туг кӕй ныккалдтой, уый тыххӕй сын Ды бадардтай туг. Уый аккаг сты». 7 Нывондхӕссӕнӕй мӕм райхъуыст: «О, Дунедарӕг Хицау Хуыцау, раст ӕмӕ ӕнӕхӕрам сты Дӕ тӕрхӕттӕ». 8 Цыппӕрӕм зӕд йӕ кӕхц ракалдта хурыл ӕмӕ хурӕн лӕвӕрд ӕрцыд адӕмы йӕ тӕвдӕй судзыны бар. 9 Ӕмӕ адӕмы сыгъта тыхджын ӕнтӕф. Уыдон ӕлгъыстой, ацы рынтыл Кӕй бар цыди, уыцы Хуыцауы; фӕлӕ сӕм фӕсмон не 'рцыд ӕмӕ Йын кад не скодтой. 10 Фӕндзӕм зӕд йӕ кӕхц ракалдта сырды бадӕныл, ӕмӕ йӕ паддзахад баталынг. Адӕм фырхъизӕмарӕй ӕхсыдтой се 'взӕгтӕ, 11 Сӕ хъизӕмары ӕмӕ сӕ хӕфдзӕстыты тыххӕй ӕлгъыстой Уӕларвон Хуыцауы, фӕлӕ сӕ хъуыддӕгтыл фӕсмон нӕ фӕкодтой. 12 Ӕхсӕзӕм зӕд йӕ кӕхц ракалдта Евфраты стыр цӕугӕдонмӕ ӕмӕ дзы дон нал баззад, паддзӕхтӕн скӕсӕнӕй фӕндаг куыд байгом уа, афтӕ. 13 Ӕмӕ залиаг калмы дзыхӕй, сырды дзыхӕй ӕмӕ мӕнгпехуымпары дзыхӕй рацӕугӕ федтон, галхӕфсыты хуызӕн чи уыд, ахӕм ӕртӕ ӕнӕзӕгъинаджы – 14 Диссӕгтӕ чи ӕвдисы, уыцы дӕлимонты. Уыдон рацыдысты ӕппӕт дунейы паддзӕхтӕм, Дунедарӕг Хуыцауы стыр бонмӕ сӕ тохмӕ ӕрӕмбырд кӕнынмӕ. 15 «Мӕнӕ фӕцӕуын хуыснӕгау. Тӕхудиаг у, фынӕй чи нӕу, бӕгънӕгӕй куыд нӕ цӕуа ӕмӕ йын йӕ худинаг куыд мачи фена, йӕ дарӕс афтӕ сыгъдӕгӕй чи дары, уыцы адӕймаг». 16 Ӕмӕ сӕ ӕрӕмбырд кодтой, дзуттагау Армагеддон цы бынат хуыйны, уырдӕм. 17 Ӕвдӕм зӕд йӕ кӕхц ракалдта уӕлдӕфмӕ, ӕмӕ Кувӕндонӕй, паддзахы бадӕнӕй, райхъуыст хъӕрӕй дзурӕг хъӕлӕс: «Сӕххӕст!» 18 Арв нырттывта, райхъуыст ӕрвнӕрды гыбар-гыбур ӕмӕ зӕхх тынг нынкъуыст, адӕймаг зӕххыл куы фӕзынд, уӕдӕй фӕстӕмӕ куыд нӕма уыд, афтӕ тынг нынкъуысти зӕхх. 19 Стыр сахар фӕци ӕртӕ дихы, адӕмты сахартӕ бабын сты. Хуыцауӕй нӕ ферох стыр Вавилон ӕмӕ йын бадардта Йе стыр фыдӕхы сӕны кӕхцӕй. 20 Цыдӕр ӕрбаисты сакъадӕхтӕ, хӕхтӕ дӕр фӕтары сты. 21 Адӕмыл арвӕй ныууарыди таланты ӕмуӕз их; ӕмӕ адӕм Хуыцауы ӕлгъыстой ихрыны тыххӕй, уымӕн ӕмӕ сӕ уыцы рын тынг хъизӕмарӕй мардта.

Ӕргомад 17

1 Ӕмӕ авд кӕхцы кӕмӕ уыд, уыцы авд зӕдӕй иу ӕрбацыд ӕмӕ мын загъта: «Рацу, ӕз дын фенын кӕнон, бирӕ дӕттыл чи бады, уыцы стыр хъахбаймӕ цы ӕфхӕрд ӕнхъӕлмӕ кӕсы, уый. 2 Хӕтыдысты йемӕ зӕххон паддзӕхтӕ, зӕххон цӕрджытӕ расыг кодтой йӕ хъахбайдзинады сӕнӕй». 3 Ӕз уыдтӕн Удӕй разӕнгард ӕмӕ зӕд мӕн акодта ӕдзӕрӕг ранмӕ ӕмӕ федтон, сырх сырдыл чи бадти, уыцы сылгоймаджы. Сырдыл фыст уыдысты Хуыцауы фауӕн бирӕ нӕмттӕ, уыдис ын авд сӕры ӕмӕ дӕс сыкъайы. 4 Сылгоймагыл уыди сырх ӕмӕ сӕнтсырх дарӕс, фӕлыст уыди сызгъӕринӕй ӕмӕ налхъуыт-налмасӕй; йӕ къухы – йӕ хъахбайдзинады ӕлгъаг ӕмӕ чъизи хъуыддӕгтӕй ӕмыдзаг сызгъӕрин кӕхц. 5 Йӕ тӕрныхыл фыст уыди, сусӕг ахадындзинад кӕмӕн ис, ахӕм ном: «Стыр Вавилон, хъахбайты ӕмӕ зӕххон ӕлгъаг миты мад». 6 Ӕз федтон: сылгоймаг расыг уыди сыгъдӕджыты – Йесойы ӕвдисӕнты тугӕй. Куы йӕ федтон, уӕд стыр дисы бафтыдтӕн. 7 Зӕд мын загъта: «Цӕуыл дис кӕныс? Ӕз дын зӕгъдзынӕн ацы сылгоймаджы ӕмӕ кӕуыл бады, авд сӕры ӕмӕ дӕс сыкъайы кӕмӕн ис, уыцы сырды сусӕгдзинад. 8 Ды кӕй федтай, уыцы сырд уыди ӕмӕ нал ис; уый рацӕудзӕн дӕлдзӕхӕй ӕмӕ ссардзӕн йӕ мӕлӕт; ӕмӕ дунейы райдианӕй зӕххыл цӕрджытӕй царды чиныджы кӕй нӕмттӕ не сты фыст, уыдон дисы бафтдзысты, чи уыди, чи нал ис ӕмӕ чи фӕзындзӕн, уыцы сырдмӕ кӕсгӕйӕ. 9 Ам уӕлзонд хъӕуы. Авд сӕры сты, сылгоймаг кӕуыл бады, уыцы авд хохы, 10 Ӕмӕ авд паддзахы. Уыдонӕй фондз амарди, иу дзы ис ныртӕккӕ, иннӕ та нӕма ӕрцыд, ӕмӕ куы ӕрцӕуа, уӕд бирӕ нӕ ахӕсдзӕн. 11 Раздӕр чи уыди ӕмӕ ныр чи нал ис, уыцы сырд у ӕстӕм паддзах – авд паддзахӕй иу, ӕмӕ ссардзӕн йӕ мӕлӕт. 12 Ды цы дӕс сыкъайы федтай, уыдон сты дӕс паддзахы. Сӕ паддзахӕдтӕ нӕма райстой, фӕлӕ сахаты ӕмгъуыдмӕ сырдимӕ райсдзысты паддзахы бартӕ. 13 Уыдон ӕмзонд сты, ӕмӕ сӕ тых, сӕ бартӕ ратдзысты сырдмӕ. 14 Уыдон тох кӕндзысты Уӕрыккимӕ, ӕмӕ сӕ Уӕрыкк басӕтдзӕн, уымӕн ӕмӕ Уый у хицӕутты Хицау ӕмӕ паддзӕхты Паддзах, ӕмӕ Йемӕ уыдзысты хуындтытӕ, ӕвзӕрстытӕ ӕмӕ Йӕ иузӕрдионтӕ». 15 Зӕд мын загъта: «Ды федтай, хъахбай кӕуыл бады, уыцы дӕттӕ – уыдон сты адӕмтӕ ӕмӕ дзыллӕтӕ, адӕмыхӕттытӕ ӕмӕ ӕвзӕгтӕ. 16 Ды цы сырды ӕмӕ цы дӕс сыкъайы федтай, уыдон хъахбайӕ фендзысты се сӕфт ӕмӕ йӕ бацарӕфтыд кӕндзысты, ныууадздзысты йӕ бӕгънӕгӕй, бахӕрдзысты йын йӕ фыд, ӕмӕ йӕ басудздзысты арты. 17 Уымӕн ӕмӕ сын Хуыцау сӕ зӕрдӕты нывӕрдта Йӕ фӕнд сӕххӕст кӕнын – хъуамӕ уой ӕмзонд ӕмӕ, цалынмӕ Хуыцауы ныхас сӕххӕст уа, уӕдмӕ сӕ паддзахы бартӕ раттой сырдмӕ. 18 Ды цы сылгоймаджы федтай, уый та у, зӕххон паддзӕхтыл ӕлдариуӕг чи кӕны, уыцы стыр сахар».

Ӕргомад 18

1 Уый фӕстӕ ӕз федтон, стыр бартӕ кӕмӕ уыдис, ахӕм ӕндӕр зӕды уӕларвӕй ӕрцӕйцӕугӕ. Зӕхх ныррухс йӕ намысӕй. 2 Уый хъӕрӕй загъта: «Бабын, бабын стыр Вавилон, сси дӕлимонтӕн цӕрӕнуат ӕмӕ алы ӕнӕзӕгъинагӕн фысымуат, алы чъизи ӕмӕ ӕлгъаг маргъӕн фысымуат. Уымӕн ӕмӕ йӕ хъахбайдзинады тыххӕй баййӕфта Хуыцауы фыдӕх, ӕмӕ уыцы фыдӕхы сӕнӕй бадардта ӕппӕт адӕмтӕн. 3 Зӕххон паддзӕхтӕ хӕтыдысты йемӕ, зӕххон сӕудӕджертӕ схъӕздыг сты йе стыр исбонӕй». 4 Уӕларвӕй мӕм ӕрыхъуыст ӕндӕр хъӕлӕс: «Рацӕут уырдыгӕй, Мӕ адӕм, йӕ тӕригъӕдтӕй хайджын куыд нӕ уат ӕмӕ йемӕ ӕфхӕрд куыд нӕ баййафат, афтӕ. 5 Уымӕн ӕмӕ йӕ тӕригъӕдтӕ схӕццӕ сты уӕларвмӕ, Хуыцауӕй нӕ ферох сты йе 'взӕр митӕ. 6 Йӕхӕдӕг куыд ӕфхӕрдта, афтӕ йӕ бафхӕрут. Цытӕ кодта, уыдӕтты тыххӕй йын бафидут дывӕрӕй. Сӕн цы кӕхцы цӕттӕ кодта, уым ын ӕрцӕттӕ кӕнут дыууӕ хатты карздӕр сӕн. 7 Цас хъал уыд ӕмӕ цас парахатӕй царди, уыйас ын бавзарын кӕнут хъизӕмар ӕмӕ хъыгтӕ. Уымӕн ӕмӕ хинымӕр зӕгъы: „Ӕз ус-паддзахау бадын, идӕдз нӕ дӕн ӕмӕ хъыгтӕ нӕ бавзардзынӕн!" 8 Уый тыххӕй йыл иунӕг бонмӕ ӕрцӕудзысты рынтӕ, мӕлӕт, хъыгтӕ, стонг рӕстӕг; ӕмӕ басудздзӕн арты, уымӕн ӕмӕ йын тӕрхон Чи хӕссы, уыцы Хицау Хуыцау тыхджын у». 9 Йемӕ чи хӕтыд ӕмӕ йемӕ бухъцард чи кодта, уыцы зӕххон паддзӕхтӕ йын йӕ арты фӕздӕг куы феной, уӕд ыл скӕудзысты ӕмӕ ныдздзыназдзысты, 10 Йӕ хъизӕмӕртты тасӕй лӕудзысты дӕрддзӕф ӕмӕ дзурдзысты: «Додоййаг фӕдӕ, додоййаг, стыр сахар, Вавилоны тыхджын сахар! Уымӕн ӕмӕ дын цы тӕрхон рахастӕуыд, уый дӕ баййӕфта иунӕг сахатмӕ». 11 Кӕуынц ӕмӕ йыл дзыназынц зӕххон сӕудӕджертӕ дӕр, уымӕн ӕмӕ сын ничиуал ӕлхӕны сӕ уӕййӕгтӕ: 12 Сызгъӕрин ӕмӕ ӕвзист дзаумӕттӕ, налхъуыт-налмас, уӕздан кӕттаг, сырх, сӕнтсырх ӕмӕ зӕлдаг хъуымӕцтӕ, алыхуызон хӕрздӕф хъӕдӕрмӕг ӕмӕ пылыстӕгӕй, зынаргъ хъӕдӕй, ӕрхуыйӕ, ӕфсӕйнаг ӕмӕ мраморӕй алыхуызон дзаумӕттӕ, 13 Корицӕ, судзагхал, буд ӕмӕ хӕрздӕфгӕнӕнтӕ, сӕн ӕмӕ зети, ссад ӕмӕ мӕнӕу, стуртӕ ӕмӕ фыстӕ, бӕхтӕ ӕмӕ уӕрдӕттӕ, цагъартӕ – адӕймаджы буӕрттӕ ӕмӕ удтӕ. 14 Дӕ зӕрдӕйӕн адджын цы уыд, уый фӕлыгъди дӕуӕй, ӕнӕхай фӕдӕ деппӕт мулк ӕмӕ бӕллиццагӕй, ӕмӕ сӕ нал ссардзынӕ. 15 Ӕппӕт уыдӕттӕй чи сӕудӕджер кодта, йӕ фӕрцы чи схъӕздыг, уыдон дзы йӕ хъизӕмӕртты тасӕй лӕудзысты дӕрддзӕф, кӕудзысты ӕмӕ дзыназдзысты: 16 «Додоййаг фӕдӕ, додоййаг, уӕздан кӕттагӕй, сырх ӕмӕ сӕнтсырх хъуымӕцтӕй дарӕс кӕуыл ис, сызгъӕринӕй ӕмӕ налхъуыт-налмасӕй фӕлыст чи у, уыцы стыр сахар! 17 Уымӕн ӕмӕ ахӕм мулк фесӕфт иунӕг сахатмӕ!» Науты ӕппӕт хистӕртӕ ӕмӕ бӕлццӕттӕ иууылдӕр, наудзаутӕ, денджызыл цӕуӕг ӕппӕт сӕудӕджертӕ лӕууынц дӕрддзӕф, 18 Уынынц ын йӕ арты фӕздӕг ӕмӕ хъӕр кӕнынц: «Ацы стыр сахарӕн ӕмбал нӕй!» 19 Сӕ сӕртыл зӕрынц рыг, хъӕр кӕнынц, кӕуынц ӕмӕ дзыназынц: «Додоййаг фӕдӕ, додоййаг, денджызы наутӕ кӕмӕ ис, уыдон иууылдӕр кӕй исбонӕй схъӕздыг сты, уыцы стыр сахар! Уымӕн ӕмӕ ды иунӕг сахатмӕ царӕфтыд фӕдӕ». 20 Цин кӕнут уый тыххӕй, уӕларв, сыгъдӕджытӕ, апостолтӕ ӕмӕ пехуымпартӕ, уымӕн ӕмӕ уын уый цы тӕрхон рахаста, ахӕм тӕрхон ын рахаста Хуыцау. 21 Иу тыхджын зӕд райста стыр куыройыфыдыйас дур, нывзылдта йӕ денджызмӕ ӕмӕ загъта: «Афтӕ тагъд дӕлӕмӕ ныххаудзӕн Вавилоны стыр сахар ӕмӕ нал уыдзӕн. 22 Ды нал фехъусдзынӕ фӕндыртыл цӕгъдджыты ӕмӕ зарӕггӕнджыты, уадындзтыл ӕмӕ сыкъауадындзтыл цӕгъдджыты; нал дӕм уыдзӕн иу ӕрмгуысты ӕрмдӕсны дӕр, нал дӕ хъуысдзӕн куыройыфыды уынӕр; 23 Нал ссудздзысты дӕ рухсгӕнӕнтӕ, нал дӕ хъуысдзӕн сиахсаджы ӕмӕ усаджы хъӕлӕс. Дӕ сӕудӕджертӕ бӕсты гуыппырсартӕ уыдысты, дӕ кӕлӕнтӕй асайдтай ӕппӕт адӕмты. 24 Ацы сахары ныккалдӕуыд пехуымпарты ӕмӕ сыгъдӕджыты, стӕй зӕххыл кӕй амардӕуыд, уыдонӕн сеппӕты туг дӕр».

Ӕргомад 19

1 Уый фӕстӕ ӕз уӕларвы фехъуыстон, бирӕ адӕм цыма хъӕрӕй дзырдтой, ахӕм хъӕлӕс: «Аллилуйа! Нӕ Хуыцау ирвӕзынгӕнӕг у; Уый намысджын ӕмӕ тыхджын у; 2 Уымӕн ӕмӕ Йӕ тӕрхӕттӕ раст ӕмӕ ӕнӕхӕрам сты! Уый бафхӕрдта, йӕ хъахбайдзинадӕй зӕхх чи фехӕлдта, уыцы стыр хъахбайы ӕмӕ дзы райста Йӕ цагъарты туг». 3 Дыккаг хатт загъдӕуыд: «Аллилуйа! Йӕ фӕздӕг кӕлдзӕн мыггагӕй-мыггагмӕ». 4 Уӕд цыппар ӕмӕ ссӕдз хистӕры ӕмӕ цыппар уӕларвон удгоймаджы адӕлгом сты ӕмӕ бакуывтой Йӕ бадӕны бадӕг Хуыцаумӕ: «Амен! Аллилуйа!» 5 Уӕд паддзахы бадӕнӕй райхъуысти хъӕлӕс: «Ӕппӕлут нӕ Хуыцауӕй, Йӕ цагъартӕ иууылдӕр ӕмӕ Дзы чи тӕрсы, уыдон – номдзыдтӕ ӕмӕ хуымӕтӕгтӕ». 6 Ӕз фехъуыстон, бирӕ адӕм цыма хъӕрӕй дзырдтой, стыр ӕхсӕрдзӕны уынӕрау ӕмӕ тыхджын ӕрвнӕрды гыбар-гыбурау чи уыди, ахӕм хъӕлӕс: «Аллилуйа! Дунедарӕг Хицау Хуыцау сси паддзах! 7 Уӕдӕ цин кӕнӕм, хъӕлдзӕг уӕм ӕмӕ Йын скӕнӕм кад. Уымӕн ӕмӕ ӕрцыд Уӕрыччы чындзӕхсӕвы рӕстӕг, ӕмӕ Йӕ Усаг йӕхи ӕрцӕттӕ кодта. 8 Радтой йын сыгъдӕг ӕмӕ ӕрттиваг кӕттагӕй дарӕс скӕныны бар». Уыцы кӕттаг та у сыгъдӕджыты рӕстад. 9 Зӕд мын загъта: «Ныффысс: тӕхудиаг сты Уӕрыччы чындзӕхсӕвмӕ хуындтытӕ». Ноджы мын загъта: «Уыдон ӕцӕгӕй Хуыцауы ныхӕстӕ сты». 10 Ӕз бакувынмӕ адӕлгом дӕн зӕды къӕхты раз. Фӕлӕ мын уый загъта: «Афтӕ ма бакӕн; ӕз дӕуӕн, стӕй Йесойӕн ӕвдисӕн чи у, дӕ уыцы ӕфсымӕртӕн ӕмкусӕг дӕн. Хуыцаумӕ бакув, уымӕн ӕмӕ Йесойӕн ӕвдисӕн чи у, уыдонмӕ пехуымпарады уд ис». 11 Ӕз федтон арвы дуар гомӕй ӕмӕ Барӕджы урс бӕхыл. Барӕджы хонынц Иузӕрдион ӕмӕ Ӕцӕг, уымӕн ӕмӕ ӕнӕхӕрам сты Йӕ тӕрхон ӕмӕ Йӕ тох. 12 Барӕджы цӕстытӕ сты пиллон артау, Йӕ сӕрыл – бирӕ кадыхудтӕ. Фыст Ыл ис, ӕрмӕстдӕр Йӕхӕдӕг кӕй зоны, ахӕм ном. 13 Ис Ыл тугӕйдзаг пӕлӕз; Йӕ ном: Хуыцауы Дзырд. 14 Уӕларвон ӕфсад сыгъдӕг ӕмӕ уӕздан кӕттагӕй урс-урсид дарӕсы урс бӕхтыл цыди Йӕ фӕстӕ. 15 Йӕ дзыхӕй зыны цыргъ цирхъ адӕмты цӕгъдынӕн. Уый сӕ здахдзӕн ӕфсӕн лӕдзӕгӕй; сӕндуцӕны къӕхтӕй дуцы Дунедарӕг Хуыцауы стыр фыдӕхы сӕн. 16 Йӕ пӕлӕзыл, Йӕ синыл фыст у Йӕ ном: «Паддзӕхты Паддзах ӕмӕ хицӕутты Хицау». 17 Ӕз федтон, хурыл чи лӕууыд, уыцы зӕды. Уӕлиӕутты цы мӕргътӕ тӕхы, уыдонмӕ сеппӕтмӕ дӕр зӕд ныхъхъӕр кодта: «Ратӕхут, ӕрӕмбырд ут Хуыцауы стыр куывдмӕ, 18 Ӕмӕ бахӕрут паддзӕхты мӕрдтӕ, ӕфсӕддон разамонджыты мӕрдтӕ, тыхджынты мӕрдтӕ, бӕхты ӕмӕ барджыты мӕрдтӕ, ӕппӕт сӕрибар ӕмӕ цагъар, хуымӕтӕг ӕмӕ номдзыд адӕмы мӕрдтӕ». 19 Ӕз федтон сырды ӕмӕ зӕххон паддзӕхты се 'фсӕдтимӕ. Уыдон ӕрӕмбырд сты Барӕгимӕ ӕмӕ Йе 'фсадимӕ хӕст самайынмӕ. 20 Ӕмӕ ӕрцахстӕуыд сырды, стӕй сырды нысан йӕ уӕлӕ чи сӕвӕрдта ӕмӕ йын йӕ сурӕтмӕ чи куывта, уыдоны асайыны тыххӕй сырды раз диссӕгтӕ чи ӕвдыста, уыцы мӕнгпехуымпары. Сӕ дыууӕйы дӕр удӕгасӕй ныппӕрстӕуыд судзгӕ сондоны цадмӕ. 21 Иннӕтӕ та цагъды фесты, Барӕджы дзыхӕй цы цирхъ зынди, уымӕй, ӕмӕ мӕргътӕ иууылдӕр бафсӕстысты сӕ фыдӕй.

Ӕргомад 20

1 Ӕз федтон зӕды уӕларвӕй ӕрцӕйцӕугӕ. Йӕ къухы уыди дӕлдзӕхы дӕгъӕл ӕмӕ стыр рӕхыс. 2 Уый ӕрцахста, хӕйрӕг ӕмӕ сайтан чи у, уыцы рагон залиаг калмы, сбаста йӕ мин азы ӕмгъуыдмӕ 3 Ӕмӕ йӕ ныппӕрста дӕлдзӕхмӕ, сӕхгӕдта йыл дуар ӕмӕ дуарыл сӕвӕрдта мыхуыр, цалынмӕ мин азы рацӕуа, уӕдмӕ адӕмты куыд мауал фӕлива, афтӕ. Уый фӕстӕ хъуамӕ уӕгъдгонд ӕрцӕуа цыбыр ӕмгъуыдмӕ. 4 Ӕз федтон паддзахы бадӕнтӕ; бадтысты сыл, тӕрхон кӕныны бар лӕвӕрд кӕмӕн ӕрцыд, уыдон. Ӕз федтон, Йесойӕн ӕвдисӕны ӕмӕ Хуыцауы ныхас амоныны тыххӕй кӕй сӕртӕ акъуырдтой, уыдоны удтӕ; уыдон нӕ бакуывтой сырдмӕ ӕмӕ йӕ сурӕтмӕ, сӕ тӕрныхтыл ӕмӕ сӕ къухтыл сырды нысан нӕ сӕвӕрдтой. Уыдон райгас сты ӕмӕ Чырыстиимӕ паддзахиуӕг кодтой мин азы. 5 Иннӕ мӕрдтӕ та нӕ райгас сты, цалынмӕ мин азы рацӕуа, уӕдмӕ. Ай у фыццаг райгас. 6 Тӕхудиаг сты, мӕрдты фыццаг райгасы чи райгас уа – уыдон Хуыцауы адӕм сты; дыккаг мӕлӕты бон сыл нӕ цӕуы, фӕлӕ уыдзысты Хуыцауӕн ӕмӕ Чырыстийӕн лӕггадгӕнджытӕ, ӕмӕ Йемӕ паддзахиуӕг кӕндзысты мин азы. 7 Уыцы мин азы куы фӕуой, уӕд хӕйрӕг уӕгъдгонд ӕрцӕудзӕн дӕлдзӕхон ахӕстонӕй ӕмӕ рацӕудзӕн, зӕххыл алы ран чи цӕры, уыцы адӕмты – Гог ӕмӕ Магогы – асайынмӕ ӕмӕ сӕ хӕстмӕ ӕрӕмбырд кӕнынмӕ; уыдзысты денджызы змисау бирӕ. 8 Уыдон рацыдысты ӕппӕт зӕххыл ӕмӕ ӕртыхстысты сыгъдӕджыты цӕрӕн бынатыл – уарзон сахарыл. 9 Фӕлӕ Хуыцау уӕларвӕй рауагъта арт ӕмӕ сӕ басыгъта; 10 Сӕ асайӕг хӕйрӕджы та ныппӕрстӕуыд, сырд ӕмӕ мӕнгпехуымпар кӕм сты, уыцы судзгӕ сондоны цадмӕ, ӕмӕ уым ӕхсӕвӕй-бонӕй хъизӕмар кӕндзысты мыггагӕй-мыггагмӕ. 11 Ӕз федтон паддзахы стыр урс бадӕн ӕмӕ уыцы бадӕны Бадӕджы. Фӕлыгъдысты Дзы арв ӕмӕ зӕхх, ӕмӕ цыдӕр ӕрбаисты. 12 Чи амард, уыдоны – хуымӕтӕгты ӕмӕ номдзыдты – федтон паддзахы бадӕны раз лӕугӕ. Чингуытӕ уыдысты гом, гом уыд ӕндӕр чиныг дӕр – царды чиныг. Мӕрдтӕн тӕрхонгонд ӕрцыд, чингуыты кӕмӕн цы хъуыддӕгтӕ фыст уыди, уыдонмӕ гӕсгӕ. 13 Уӕд денджыз радта, чи дзы уыди, уыцы мӕрдты, мӕлӕт ӕмӕ мӕрдтыбӕстӕ дӕр радтой, чи сӕм уыди, уыцы мӕрдты. Ӕмӕ алкӕмӕн дӕр тӕрхонгонд ӕрцыд йӕ хъуыддӕгтӕм гӕсгӕ. 14 Мӕлӕт ӕмӕ мӕрдтыбӕстӕ ӕппӕрст ӕрцыдысты судзгӕ цадмӕ. Уый у дыккаг мӕлӕт – судзгӕ цад. 15 Ӕмӕ царды чиныджы фыст кӕй ном нӕ уыди, уый ныппӕрстӕуыд судзгӕ цадмӕ.

Ӕргомад 21

1 Ӕз федтон ног арв ӕмӕ ног зӕхх. Раздӕры арв ӕмӕ раздӕры зӕхх аивгъуыдтой, нал уыди денджыз дӕр. 2 Ӕз федтон сыгъдӕг сахар – ног Иерусалим уӕларвӕй, Хуыцауӕй, ӕрцӕйцӕугӕ, чындзау фӕлыстӕй, йӕ мойагӕн рӕсугъд арӕзтӕй. 3 Паддзахы бадӕнӕй мӕм райхъуыст домбай хъӕлӕс: «Ныр Хуыцауы цӕрӕн бынат адӕмы ӕхсӕн ис, ӕмӕ Хуыцау Йӕхӕдӕг цӕрдзӕн семӕ, уыдон уыдзысты Йӕ адӕм, ӕмӕ Уый уыдзӕни сӕ Хуыцау. 4 Ӕмӕ сын Хуыцау сӕ цӕстытӕй ныссӕрфдзӕн сӕ цӕссыг; нал уыдзӕн нӕдӕр мӕлӕт, нӕдӕр хъыгтӕ, нӕдӕр хъарӕг, нӕдӕр рыст, уымӕн ӕмӕ раздӕр цы уыди, уый аивгъуыдта». 5 Паддзахы бадӕны Бадӕг загъта: «Мӕнӕ ӕппӕт дӕр фӕлдисын ногӕй». Ӕмӕ мын загъта: «Ныффысс, уымӕн ӕмӕ ацы дзырдтӕ ӕцӕг сты ӕмӕ сыл ис ӕууӕндӕн». 6 Ноджы мын загъта: «Сӕххӕст! Ӕз дӕн Алфӕ ӕмӕ Омегӕ, райдиан ӕмӕ кӕрон. Дойны кӕмӕн у, уымӕн лӕвар ратдзынӕн царддӕттӕг суадонӕй. 7 Уӕлахиздзау райсдзӕн ӕппӕт уыдӕттӕ, Ӕз ын уыдзынӕн Хуыцау, уый та Мын уыдзӕни хъӕбул. 8 Тӕппудтӕн ӕмӕ ӕнӕуырнджытӕн, ӕлгъӕгтӕн ӕмӕ лӕгмартӕн, хӕлд адӕмӕн ӕмӕ кӕлӕнгӕнджытӕн, мӕнгхуыцӕуттӕн кувджытӕн ӕмӕ ӕппӕт фӕлитойтӕн та сӕ бынат у судзгӕ сондоны цады. Уый у дыккаг мӕлӕт». 9 Фӕстаг рынтӕй дзаг авд кӕхцы цы авд зӕдмӕ уыди, уыдонӕй иу ӕрцыд мӕнмӕ ӕмӕ мын загъта: «Рацу, ӕз дын равдисон Уӕрыччы Усаджы». 10 Ӕз уыдтӕн Удӕй разӕнгард ӕмӕ мӕ зӕд фӕхаста стыр ӕмӕ бӕрзонд хохмӕ, ӕмӕ мын фенын кодта Иерусалимы сыгъдӕг сахар уӕларвӕй, Хуыцауӕй, ӕрцӕйцӕугӕ. 11 Уый тӕмӕнтӕ калдта Хуыцауы намысӕй. Йӕ рухсгӕнӕн уыди тӕккӕ зынаргъдӕр дурау, дзӕнхъайы ӕнгӕс иасписау. 12 Сахары къул уыди стыр ӕмӕ бӕрзонд, уыди дзы дыууадӕс дуары, дуӕрттыл лӕууыдысты дыууадӕс зӕды. Дуӕрттыл фыст уыдысты израилаг адӕмы дыууадӕс мыггаджы нӕмттӕ. 13 Скӕсӕнырдыгӕй – ӕртӕ дуары, цӕгатырдыгӕй – ӕртӕ дуары, хуссарырдыгӕй – ӕртӕ дуары, ныгуылӕнырдыгӕй – ӕртӕ дуары. 14 Сахары къулӕн ис дыууадӕс бындуры, уыдоныл фыст сты Уӕрыччы дыууадӕс апостолы нӕмттӕ. 15 Сахарӕн йӕхи, йӕ къул ӕмӕ йӕ дуӕрттӕ барынӕн мемӕ ныхасгӕнӕгмӕ уыди сызгъӕрин лӕдзӕг. 16 Сахар у цыппӕрдигъон, йӕ дӕргъ ӕмӕ йӕ уӕрх сты ӕмхуызон. Зӕд сахар сбарста лӕдзӕгӕй ӕмӕ рауад дыууадӕс мин стадийы Йӕ дӕргъ, йӕ уӕрх ӕмӕ йӕ бӕрзӕнд сты ӕмхуызон. 17 Сбарста йын йӕ къул дӕр ӕмӕ рауад сӕдӕ цыппор цыппар ӕлмӕрины – адӕймаджы нымадӕй баргӕйӕ; зӕдмӕ дӕр ахӕм барӕн уыди. 18 Сахары къул уыд иасписӕй, сахар йӕхӕдӕг та – ирд авджы хуызӕн сыгъдӕг сызгъӕринӕй. 19 Сахары къулы бындуртӕ фӕлыст уыдысты алыхуызон зынаргъ дуртӕй. Фыццаг бындур – иаспис, дыккаг – сапфир, ӕртыккаг – халкидон, цыппӕрӕм – изумруд, 20 Фӕндзӕм – сардоникс, ӕхсӕзӕм – сердолик, ӕвдӕм – хризолит, ӕстӕм – берилл, фарӕстӕм – топаз, дӕсӕм – хризопрас, иуӕндӕсӕм – сапфир, дыууадӕсӕм – аметист. 21 Дыууадӕс дуары – дыууадӕс налхъуыты: алы дуар дӕр – ӕнӕхъӕн налхъуытӕй. Сахары уынг уыдис ирд авджы хуызӕн сыгъдӕг сызгъӕринӕй. 22 Кувӕндон та дзы нӕ федтон, уымӕн ӕмӕ Дунедарӕг Хицау Хуыцау ӕмӕ Уӕрыкк сты йӕ кувӕндон. 23 Рухсы тыххӕй сахары нӕ хъӕуы нӕдӕр хур, нӕдӕр мӕй. Уымӕн ӕмӕ йӕ ныррухс кодта Хуыцауы намыс, Уӕрыкк та у йӕ рухсгӕнӕн. 24 Адӕмтӕ цӕрдзысты сахары рухсмӕ, зӕххон паддзӕхтӕ йӕм ӕрхӕсдзысты сӕ намыс. 25 Йӕ дуӕрттӕ бон ӕхгӕд нӕ уыдзысты, ӕхсӕв та дзы уӕвгӕ нӕ уыдзӕн. 26 Ӕрхӕсдзысты йӕм адӕмты кад ӕмӕ намыс. 27 Чъизи цы уа, ахӕмӕй йӕм ницы бацӕудзӕн, ӕлгъаг ӕмӕ гӕды митӕ чи кӕны, уыдонӕй дӕр ӕм фӕндаг никӕмӕн уыдзӕн, фӕлӕ йӕм бацӕудзысты, Уӕрыкмӕ царды чиныджы фыст чи у, ӕрмӕстдӕр уыдон.

Ӕргомад 22

1 Зӕд мын фенын кодта, Хуыцауы ӕмӕ Уӕрыччы бадӕнӕй дзӕнхъайау цы ӕрттивгӕ царддӕттӕг цӕугӕдон калди, уый. 2 Уый калди сахары уынджы хӕдастӕуты, йӕ иу фарс дӕр ӕмӕ йӕ иннӕ фарс дӕр рӕзыд, афӕдз дыууадӕс хатты, ӕрвылмӕй, дыргъ чи дӕтты, уыцы царды бӕлас. Бӕласы сыфтӕртӕ адӕмтӕн уыдысты ӕвдадзыхос. 3 Сахары ӕлгъыстагӕй ницыуал уыдзӕн. Уым уыдзӕн Хуыцауы ӕмӕ Уӕрыччы бадӕн, ӕмӕ Йын лӕггад кӕндзысты Йӕ цагъартӕ. 4 Фендзысты Йын Йӕ цӕсгом, ӕмӕ Йӕ ном фыст уыдзӕн сӕ тӕрныхтыл. 5 Уым ӕхсӕв нӕ уыдзӕн, нӕ дзы хъӕудзӕн нӕдӕр рухсгӕнӕн, нӕдӕр хуры рухс, уымӕн ӕмӕ сын рухс кӕндзӕн Хицау Хуыцау; ӕмӕ паддзахиуӕг кӕндзысты мыггагӕй-мыггагмӕ. 6 Зӕд мын загъта: «Ацы дзырдтӕ ӕцӕг сты ӕмӕ сыл ис ӕууӕндӕн. Ӕмӕ пехуымпарты Йӕ Удӕй разӕнгардгӕнӕг Хицау Хуыцау Йӕ зӕды рарвыста, рӕхджы цы уыдзӕн, уый Йӕ цагъартӕн равдисынмӕ». 7 «Рӕхджы ӕрцӕудзынӕн». Ацы чиныджы пехуымпар ныхӕстӕ кӕмӕ хъарынц, уый тӕхудиаг у. 8 Ӕз, Иоанн, федтон ӕмӕ фехъуыстон ӕппӕт уыдӕттӕ. Куы сӕ фехъуыстон ӕмӕ сӕ куы федтон, уӕд бакувынмӕ адӕлгом дӕн, уыдӕттӕ мын чи ӕвдыста, уыцы зӕды къӕхты раз. 9 Фӕлӕ мын уый загъта: «Афтӕ ма бакӕн; ӕз дӕуӕн, де 'фсымӕр пехуымпартӕн, стӕй ацы чиныджы ныхӕстӕ кӕмӕ хъарынц, уыдонӕн се 'мкусӕг дӕн. Хуыцаумӕ бакув». 10 Ноджы мын загъта: «Ма басусӕг кӕн ацы чиныджы пехуымпар ныхӕстӕ. Уымӕн ӕмӕ рӕстӕг ӕрӕввахс. 11 Ӕвзӕргӕнӕг дарддӕр кӕнӕд ӕвзӕр митӕ. Чъизи адӕймаг дарддӕр чъизи кӕнӕд йӕхи. Рӕстгӕнӕг дарддӕр кӕнӕд раст хъуыддӕгтӕ ӕмӕ сыгъдӕг дарддӕр цӕрӕд сыгъдӕгӕй». 12 «Рӕхджы ӕрцӕудзынӕн, ӕмӕ мызд Мемӕ ис – алкӕмӕн дӕр ратдзынӕн йӕ хъуыддӕгтӕм гӕсгӕ. 13 Ӕз дӕн Алфӕ ӕмӕ Омегӕ, райдиан ӕмӕ кӕрон, фыццаг ӕмӕ фӕстаг». 14 Йӕ дарӕс чи ӕхсы, уыдон тӕхудиаг сты – уыдзӕн сын царды бӕласы дыргъӕй бахӕрыны ӕмӕ сахармӕ дуарыл бацӕуыны бар. 15 Куыйтӕ ӕмӕ кӕлӕнгӕнджытӕ, хӕлд адӕм ӕмӕ лӕгмартӕ, мӕнгхуыцӕуттӕн кувджытӕ, стӕй гӕды митыл хӕст чи у ӕмӕ сӕ чи уарзы, уыдон та баззайдзысты ӕдде. 16 «Ӕз, Йесо, Мӕ зӕды арвыстон ӕппӕт уыдӕтты тыххӕй сымахӕн аргъуанты зӕгъынмӕ. Ӕз дӕн Давиды Ӕвзар ӕмӕ Байзӕддаг, тӕмӕнкалгӕ Бонвӕрнон». 17 Уд ӕмӕ Усаг зӕгъынц: «Ӕрцу!» Чи хъусы, уый дӕр зӕгъӕд: «Ӕрцу!» Дойны кӕмӕн у, уый ӕрцӕуӕд, ӕмӕ кӕй фӕнды, уый царды дон айсӕд лӕвар. 18 Ацы чиныджы пехуымпар ныхӕстӕ чидӕриддӕр хъусы, уыдонӕн ӕз зӕгъын: исты ма сӕм чи бафтауа, ууыл Хуыцау бафтаудзӕн, ацы чиныджы кӕй тыххӕй фыст ис, уыцы рынтӕ. 19 Ӕмӕ ацы чиныджы пехуымпар ныхӕстӕй чи аппара, уый Хуыцау ӕнӕхай фӕкӕндзӕн ацы чиныджы фыст кӕй тыххӕй ис, уыцы царды бӕласӕй ӕмӕ сыгъдӕг сахарӕй. 20 Ӕппӕт уыдӕттӕн ӕвдисӕн Чи у, Уый зӕгъы: «О, рӕхджы ӕрцӕудзынӕн!» Амен. Ӕрцу, Хицау Йесо! 21 Нӕ Хицау Йесойы хорзӕх уӕд алкӕимӕ дӕр.