1-2 Илоъ эһдо йахъийо шинаб жо, аьһйддӓкьа бехъхъа йегӓйӓна Каламлил хъуллухъ богьцалӓна йеһйагьийӓ хабалла чӓхал муьхобалъна зукъойо тели аьдамла. 3 Вагьаълъобза, муьгьканлъилаъ вагьалъос нисол-илӀена, гьихъхъалакьӓ къацӀцӀо йахъийа жойлас дул чахал гьоькмо бахъийо диена, гьуьрмат кьоддӓс Теофил, 4 дул малъзи йӧйо шинаб жо гьаькъкъаб гаьгьийакьа дибо йакӀо йоһкъалъгъа. 5 Гьерод Ягьудиялиъ ханлъилаъ гаьгьийа замаллиъ, зукъон гей Абия тухумлис ЗакариялӀо нисоцас гьоһс кашиш. Гьолцос ахъона зукъойо Гьарун авараглила наслолас аьдам. Гьолълъос цӓһна зукъойо Элисабет. 6 Гьоллӧл къонана зувакъона Аллагьлис мӓцова валийа. БетӀергьаллис къацӀцӀо амрона, муъмин-лагъликьа тӀаддаб жона йакӀо нилӀна йовӓгьийо гьолло. 7 Амма гьоллос къова зувакъеэш. Элисабет зукъона къова бӓ ъаъцас аьдам. Гьоллӧл къонана зувакъона мех мекьейӓ сукӀоба. 8 Гьоһс водолалъ Закария, гьидела тухумликьа ирга мокъолъ, Аллагьлил хъуллухъ богьцас зукъойо. 9 Кашишлӓла аьдатликьа гьолцокьа цӀула оһкъойо БетӀергьаллила билӀоъ эһкьена маьгь нийӓ бохӓс готӀ мейал. 10 Вагьли йогьцалаъ, гисдӓ гаьгьийа къацӀцӀола аьдамлӓ какла йовагьийо. 11 Вагьалълъо мехлаъ Закариял эгӓл итӀилло Бичаслис малаик. Малаик эчейо маьгь нийӓ бохӓс готӀ богьцала хирияб мицала кӀетӀакьала рахълиъдӓ. 12 Гьули эгалъ, Закария гьаьгьелъна гьихлъойо ва ийлӀа гьиһчӀейо. 13 Малаикли гьолцохъа нисойо: - Ми гьицӀӓкъа Закария, Аллагьлил дибо гьари-доьъа тухъийо. Дибола ахъхъа, Элисабети, дул оьжо ӧс. Ягья гула ми оьждикьа цӓһна. 14 Дул талигьна рохелна бахъца, тели аьдамла рази бӓхъца гьули ахъийакьа, 15 судлӀо нисода БетӀергьаллидой аьһйдӓ гьули кьоддӓс ахъца. Гьолцо гъинона чӀаъана улӀаъас. Ийола оһхаъзу Илагьияб Ругьлис оцца. 16 Израиллис телидӓс аьдамла гьолцо гьидела БетӀергьан Аллагьлилъдӓ муьвахолча. 17 Иляс авараглислъийо къудратна гьаьлкӀолъина бахъна оһкъос гьули Гьокцогъа аьһйдӓ: ийо-абосна къовасна сидил-гьоһсо йакӀодана йуьһвахолал, Аллагьликьа мутӀиъ ъахъаъцасна муъмиллӓла гьинолкьа мокъолал, Кьоддӓс оһкъолъол халкъ гьаьдур бовал. 18 Закария малаиклихъа нисолло: - Лъинкьад дил вагьли йикъеш? Дона ицлолъна гей, дие ахъона мех мекьейо аьдам гей. 19-20 Малаикли гьолцол жаваб нилӀийо: - До гей Аллагьлидой аьһйдӓ гаьгьийо Жабраил. Гьолцо эһгьна гей дÿхъа икълашанна рохел нисанна. Гьинила замаллиъ йахъцала до нисова йаьжлӓкьа божаъалъ, гьуна же дул йикъе, дибо йаьже йохца, дÿхъа гьоьшшона нисона йахъаъас, до нисойо жо йахъцал. 21 Вагьалълъо мехлаъ халкъ гисдӓ гувабацӀона бечена зукъойо Закария оһкъаллахъа. Суле Аллагьлила билӀоъос гиса говаъаслӀона гьикмат бӓхъна зувакъойо гьоллӧл. 22 Гиса оһкъолъ, Закария халкъилахъа икълашена ахъеэш. Гьоглол биджи йахъийо Аллагьлила билӀоъ гьолцол Аллагьли илгьам гуллолъи. Гьолълъогъа муьгъаттӓ гьоглохъа кӧдӓд ишан богьна икълашейо; Закария йаьже йохна гьихлъойо. 23 Аллагьлила билӀоъ хъуллухъ богьцас водбо йовалъолъ, Закария билӀогъа эһкьейо. 24 Ласона гаьчӀел гьолцос ахъо Элисабет оһх гаьгьийо йахъийо. Лъина боцо мекьецал, гього аьдамлӓъ гисакееш. 25 ГьоглӀо нисос зукъойо: - Гьуна, вагьлӓ йогьна гей Кьоддӓла БетӀергьалли, вагьалло водлӓъ дïхъа гьаьй йеһхелло аьдамлӓъ эһдо дïкьас рогьона болъонна. 26 Илънасла бицоъ Галилейлила Назарет шагьарбаъ, 27 Давудила наслолала УсуплӀо нисойо сукӀол йоһкъал гьаьдур йӧйо киббадой Аллагьли Жабраил малаик ӭһш. Гьолълъо киббасна цӓһ зукъойо Мариян. 28 Малаикли эһдокна нисос: - Рази йахъ, Аллагьлис баркат михъойо! БетӀергьан Аллагь дÿгъой гей. 29 Нисова жойлакьа гьаиран йахъна гьихлъойо гьоло, вагьло сийо саламди бахъал нуцӀослӀо нисона. 30 ГьицӀӓкъа Мариян, лӀо нисойо малаикли гьолълъохъа, Бичаслис раьгьмат михъойо дул, 31 Гьуна, ми оһх гаьгьийона йахъна дул оьжо ахъца. Иса гула Гьолцокьа цӓһна. 32 Цӓһ йеһкьейо сукӀо ахъца Гьолцоъкьӓ. Кьоддӓлас ОьжолӀо нисас Гьолцохъа. БетӀергьан Аллагьли Гьули Давудила, гьинила абола, тахликьа голца. 33 Гьули ахъца нитоназу Якъубила халкъилал пачалъилаъ, ханлъина гьолцос гьоһсна йолъаъас. 34 Марияни малаиклихъа нисолло: - Ахъо йеһкьеэшла дил нигъад вагьли ахъца? 35 Малаикли жаваб богьна нисос: - Илагьияб Ругь мокъос дÿкьа. Кьоддӓлала гьаьлкӀолъилас гьидоци йахъца дул. Вагьалълъобза гьолцо къовахъа илагьиябна Аллагьлис ОьжоналӀо нисос. 36 Гьуна, дибо аьгарай, къова бӓхъаъцаслӀо нисоцас Элисабетна, же ицлолъӓлъо оһх гаьгьийо йахъийо. Гьолцо къовал илънас боцо гей, 37 Аллагьлихъа йахъаъцас жо гьоьшшона гаьъа. 38 Бета Мариян нисойо: - Гьуна, до БетӀергьаллIс лагъ гей! Ми нисогъа йахъала дил. Бета малаик гьолълъодоис оьчойо. 39 Лади водлӓъас эдеъзи йахъна Мариян йеһкьеш Ягьудиялила мӓьдӓла улкалиъ гаьгьийа шагьарбаъ. 40 Закарияла билӀоъна эһдокна, гьолълъо Элисабетил салам бӧс. 41 Мариянис салам тухъийоназу, Элисабетила оһхаъ гаьгьийо къова лахдас, гьоло Илагьияб Ругьлис йоцца. 42 Бета гьолълъо йукъо тухъинна нисос: - 3 Барка дул, Мариян! КъацӀцӀӓ ийолӓъ эһдо же ми баркат михъойо йахъийо. Баркат гаьгьийо гей дибола оһхаъас къова. 43 Дïгъа Кьоддӓлас ийо дïдой йоһкъойо - нӓсди дил вагьдо баркат! 44 Гьуна, дибо салам дил тухъийоназу, цӀилӀона диела оһхаъас къова лахдӓйо. 45 Гьолълъокьа божийо ми гьардараб гей, судлӀо нисода БетӀергьалли дÿхъа нисойо жо йахъца. 46 Марияни нисойо: - Диела йакӀи БетӀергьан кьоддӓкӀца, 47 ЦӀилӀона гей дие ругьна диела Аллагьли тиса багъоцалакьа, 48 СудлӀо нисода гьаьй йеһхелло гьинила пакъираб лагъликьа. Гьуна, дил баркат михъолъ желагъа муьгъаттӓ къацӀцӀола агьловӓ дил рец бовас, 49 ГьаьлкӀолъи йӧлъ дил Къудратаб БетӀергьалли. Гьогцос цӓһна лагьияб гей. 50 Гьинхъа гьийабачӀецала агьло-агьлолӓкьа раьгьмат гулца. 51 Гьинила кад къуватабла ишла йовагьийо. ЦацакӀзи бовагьийо йакӀо чӀугьарабла аьдамла. 52 Гьогцо залимабла - тахлӓкьас тӀуватӀийо, пакъирабла - кьоддабӓкӀийо. 53 Нувабаковӓл гьолцо кӀетӀо шинаб жо нилӀийо, бечедабла гьоьшшона гаьчӀел меццабакӀийо. 54-55 Гьолцо комак бӧйо Израиллила халкъилал - гьинила лагълӓл; Аллагьлил йакӀкьа гей илла умумаллил - Ирбагьинил, гьолцола къавмалил абадул-абадийалъ раьгьмат бовал нисойо къутӀи. 56 Гьулиъ лъаналъийо боцона багъона, Мариян кьӓь билӀогъа йеһкьейо. 57 Мех мокъолъ, Элисабетил оьжо ахъийо. 58 Аллагьли букъо гургьел богьна гьолълъол оьжо ахъийо тухълъо, гьолълъогъой мадугьаллана аьгарлъина рази бахъийо. 59 БелӀнасла водиъ оьждил суннат бовал мокъовӓ сукӀобӓл йатӀийолӀо абокьацой оьждикьана Закария цӓһ гулал. 60 Амма ийо нисойолӀо оьждикьа Ягья цӓһ гулал нуцӀослӀо нисона. 61 Вагьаллийо цӓһ гаьгьийо сукӀозу гаьъа дибола аьгарлъилаълӀо нисойолӀо гьогло гьолълъохъа. 62 Бета кӧдӓд ишан богьна абохъа нисолло оьждикьа нïйо цӓһд гулал дул йаццалӀо. 63 Гьоһс кьокькьона йакъоллина Закария гьолълъокьа кьодо чахийо: - «Оьждикьа Ягья цӓһ гула». КъацӀцӀӓ аьжаиб бӓхъийо. 64 Йаьже йохийо Закария вагьаллиъисзу Аллагьлил рецна богьна икълашал уьһхолъийолӀо. 65 Гьулиъ сӧһгъой гаьгьийӓ аьдамла йилӀа гьиабачӀейо; вагьло хабар Ягьудияллила къацӀцӀӓ мӓьдӓкьа митемекьейо. 66 Вагьло хабар тухъийӓ пикро бӧс зукъойо: - Нïйо сукӀод ахъал вагьакцо оьждиъкьӓ, - лӀо нисона. Зукъанна Бичаслис гьаьлкӀолъи зукъона гей гьокцоъ. 67 Илагьияб Ругьлисна оцӀна, Ягьяла або Закария, Аллагьлила каламликьа нисос: - 68 Букъо рец БетӀергьаллил, Израиллила Аллагьлил, судлӀо нисода, Гьогцо оһкъона Гьинис халкъ тиса багъойо. 69-70 Гьогцо гьехзу, гьинила илагьиябла авараглӓъкьӓ илол йоһкъолал кьодо йохийо ъосарлъи жейса йоһкъойо Гьинис лагъ Давудила билӀоъкьӓ. 71 Аллагьли нисойо вагьдӓ: илла тушмаллӓкьасна, къацӀцӀӓ иле бӓтӀаъцалӓкьасна хъосар боваллӀо. 72-73 Илла агьлолал кьодо бохийо раьгьмат бованна, вагьлӓзу Гьинис илагьияб бугъаъцас къутӀина илос або Ирбагьинил нилӀийo гьӓна йакӀкьа йоһкъолална. 74 Аллагьли нилӀийа къутӀилакьа зукъойо нисона иле тушмаллӓкьас хъосар бӧслӀо, бета Гьогцол гьийабачӀечӀе ибадатна бӧслӀо. 75 Нитоназу илла оьмролаъ Аллагьлил ибадат бовал Гьогцос мӓцовӓ валийацойна бӓхъна. 76 Мина, Оьжо, Бичаслила авараглъилаъ бикӀзи овас, Ми ӭһш Кьоддӓла гьингъа аьһидӓ Гьинил гьино йеһлъелал, 77 Гьинила халкъилал хъосарлъи - мунагь-гьаькълиъис гьоггӧл мӓцолцаслъи - нисал, 78 Бичаслила гилъилла раьгьмола мехелло бохъ кьоддӓкьа мокъос илол, 79 колӀлӀаъна хеллила гьидоцилаъна бечейӓл бахъалъгъа, илос хаьбӓна рекъеллила гьинолкьа йеһйагьалъгъа. 80 Ягья укълъис зукъойо, аһкъло-лъайликьа оһкъос зукъойо. Израиллила халкъилал ваъзалил аьгъиъцал, гьолцо оьмро бӧйо боьчӀчӀа авлахълиъ.
1 Гьогло водлӓъ Август къайсарила амролакьа дуниялликьа гаьгьийа къацӀцӀӓ аьдамла чӓхал нуцӀос зукъона гей. 2 Вагьли аьдамла чӓхийолъи зукъона гей аьһиддӓш, Квиринийли Шамлиъ наиблъи йогьцала замаллӓъ. 3 МекьейолӀо къацӀцӀӓ гьï-гьидела шагьарбӓъ жувӧл чахиллал. 4 Галилеялис Назарет шагьарбаъаш аьгъиъна Усупна Ягьудияллиъ БетлегьемлӀо нисойо Давудила шагьарбаъ кьодо эһкьейо жу чахиллал, судлӀо нисода гьули Давудила насло-зуриятлисна билӀосна сукӀо зукъойо. 5 Гьолцогъой къацӀо зукъойо гьолцол магьар гулло оһх гаьгьийо ахъо Мариянна. 6 Гьулиъ гьоддӧл мокъолъ, гьоглӀол къова ахъал мех мокъойо. 7 Марияни ӧйо аьһиддӓш къова, оьжо. Бета къïлӓъна оьлӀна голло гьолълъо гьули синакӀбаъ, жувӧл бецал билӀоъ маьче михъаъалъ. 8 ГьоглӀо мицаъ зувакъона гей авлахълиъ нише гьидеш боцӀи богъоцас векӓ. 9 Гьоглодой Бичаслис малаик оһкъойо, БетӀергьаллила Нурли гангъизи бӧйо гьоллӧл, гьолълъохъа векӓна йилӀа гьийабачӀейо. 10 Малаикли нисос векӓхъа: - 3 ГьийабацӀӓкъа, до мизол бакъойо къацӀцӀола аьламлил бахъцас букъо рохел. 11 Жейса Давудила шагьарбаъ ахъна гей Аллагьли аьдамла тиса бӓгъал ӭһйо Кьоддӓс Масигь. 12 Гьуна, миже вагьалълъокьа боьважаллъийо аьламат: мизол иһхъос синакӀбаъ оьлӀна голло къова. 13 Гелокьасзу малаиклигъой къацӀо оһкъос гьаһсаъла агьлолас йукъо гьаз. Аллагьлил тасбигьна йогьна гьолло нисос: - 14 Гьаһсаъла Аллагьлил рецна, ЛӀийо дуниялликьа Аллагьли цӀоб гуллӓл - рекъелна! 15 Малаикла гьаһсаъ мекьена муьгъаттӓ, векӓ сидхъа гьоһсо нисос: - БетӀергьалли илол тухъал битӀилло вагьдо хабарна, гьулиъ йахъийо жона йикъелал Бетлегьемлиъ иле мекьал. 16 Вагьаллиъисзу кьапӀун мекьейӓ гьоллол, мийахъос Мариянна, Усупна, синакӀбаъ укилло къована. 17 Къова эгӓйоназу векӓ нисос, къова ахъийас хабар гьидел малаикли илгьам бӧйолӀо. 18 Гьодлохъа энекзи бахъийӓ къацӀцӀӓ аьдамла аьжаиб бӓхъна гьихбалъос векӓ нисойо жойлакьа. 19 Нисова жойлаш маънана богьна, Марияни шоваълечӀе йакӀкьа йовахийo гьолло шибаблис йаьжбо. 20 Малаикли нисогъа гьидел тухъанна бегӓнна битӀилло хабар битӀун михъолъ, Аллагьлил рецна тасбигьна богьна векӓ кьӓь боьвачош. 21 БелӀен водиъис къовал суннат бӧслаъ, гьолцокьа Иса цӓһ гулца. Вагьли цӓһ зукъойо малаикли Мариян оһх гаьгьийо йахъал аьһйдӓ гулалӀо нисойо цӓһ. 22 Мусала къанонликьа гьоггӧл мӓцолцас водбо йоһвакъолъ, гьолло оьжо Иерусалимлиъ акъос БетӀергьаллил назро огьна нилӀал. 23 (Аллагьлила амролакьа ийола сиһйаъас гисакийо шибаб абоддӓс насло БетӀергьаллил назролъилаъ икъелца зукъона.) 24 Вагьалълъо динияб къанонликьа къурбаллил мухал нуцӀос зукъона гей къона ванаъас илба, йаги илбалис къона лӀапан. 25 Гьуна вагьалълъо мехлаъ, Иерусалимлиъ зукъона гей СимеонлӀо нисойо сукӀо. Гьули зукъона динияб муъмин ва Израиллис халкъ БетӀергьалли тапшур боваллакьа йакӀо гаьгьийо сукӀо. Гьолцогъой зукъона Илагьияб Ругьна. 26 Гьолцол Илагьияб Ругьли тухъал йитӀилло жу Бичаслис Масигь эгайчӀе угъаъцаслъи. 27 ВагьаглӀо водиъ гьули Илагьияб Ругьли оһкъолло Аллагьлила билӀоъ. Ийо-абона акъос итӀино Иса гьулиъ, Гьолцол бовал нуцӀойо динияб аьдат бовал. 28 Симеони окчиш Гьули кӧъ, бета Аллагьлил рецна богьна нисос: - 29 Йӓ Рабби дие БетӀергьан, до Дибо лагъ, мокъола дил къадар до угъал, Ми нисова йаьжкьа рекъенна богьна. 30-31 Ми къацӀцӀола халкъилал йикъалъгъа гьаьдур йӧйо хъосарлъи йегӓйо диела гьаьйдӓл, 32 мажуслӓл канлъи-лъай, дибола Израил халкъилал рецна къадрона. 33 Оьждикьас Симеони вагьлӓ нисолъ, йио-або гьайран-гьикмат бӓхъийо. 34 Гьоллол доьъана богьна Симеони нисос Мариянхъа, оьждила ийохъа: - Гьуна, вагьацо оьждиъкьӓ телидӓс Израил халкъилас аьдамла бейакца, телидӓс кьоддабӓкца, вагьди къова ахъца Аллагьлис аьламатцой, амма тели аьдамла гьолцол данде бечеш, 35 - дибона йакӀо балъайиахъа лъукъзи йахъца, - телилас йакӀиъ гаьгьийӓ пикрована загьир йӓхъалъгъа. 36 Зукъойо гьулиъ гьиниъ караматлъи гаьгьийо Гьаннат - Pенуэлис кид, Ашерила кьибиллиъис, йилӀа ицлолъийо аьдам. Гьинила бетӀергьаллигъой ахъо йеһкьена муьгъаттӓ алӀна лӀи йагъос. 37 БелӀнайигна оьһкъона лӀи йеһкьецал къоролай нитоназу Аллагьлила билӀоъос йолъаъас зукъона гей нишена-хискьана БетӀергьаллил какна-кӀална йогьна, тӀаъат-ибадатликьа йечена. 38 Вагьалълъо мехлаъ гьолълъо Аллагьлил рец-бакъ богьна мёш зукъойо Исас хабар, Иерусалим тапшур боваллакьа йакӀо гаьгьийа къацӀола аьдамлӓл. 39 Бета гьоллӧл, БетӀергьаллила къанонликьа бовал нуцӀойо аьдатна богьна, мекьена мокъос Галилеялиъ, гьидела шагьар Назаретлиъ. 40 ИтӀино укълъис зукъойо, къуватабна аькъилабна ахъца зукъойо, Аллагьлис баркат зукъойо Гьолцоъ. 41 Шибаб лӀиъ Гьолцос ийо-або мекьӓгьийо Иерусалимлиъ ПасхалӀо нисоцала ид-водил. 42 Гьолцол ацӀона къона лӀи йеһкьелъ, аьдатликьа ид-водил гьоллӧл мекьейо кьодо Иерусалимлиъ. 43 Бета ид-водо йолъона муьгъаттӓ гьоллӧл кьӓь мекьейо, гьихлъос гьоллос насло Иса Иерусалимлиъ; гьули гьихлъӧлъи икъаъас ийолна аболна. 44 ГицӀийолӀо гьодлол Гьули гӧслӀона бадлогъой. ЙалӀокъёш йагъойо гьино йолъона муьгъаттӓ, муьхобалъийолӀо гьоллӧл гьули иһзал аьгарлъилаъна бега-бийакъейӓъна. 45 Гьулина иһхъечӀе, кьӓь кӀаьймуьхона мекьейолӀо гьоллӧл Иерусалимлиъ гьолцогъойна миздабана. 46 Лъанасла водиъ Гьули иһхъона гей Аллагьлила билӀоъ муалимлӓъ алӀо къёна эчена, гьоглохъа энекзи ахъна гьоглол суалла нийаццас. 47 КъацӀцӀӓ энекзи баъхийа гьайран-гьикмат бовагьца зукъона гьолцола аһкълолана жаваблӓна. 48 Гьули эгалъ, ийо-або гьикмат бӓхъийо; гьолцола ийо оьждихъа нисос: - Йӓ дие оьжо, сийод ми илол йӧйо. Гьуна, дибо абона дона йукъа пашманлъилаъ ми иһзийо. 49 Гьолцо гьоллохъа нисос: - Суд миже до иһзал нуцӀос? Мизол икъаъасди зукъойо до диела Абола билӀоъ ахъал нуцӀоцаслъи? 50 Амма ийо-абол биджи йахъеэш гьолцо нисӧ йаьжлӓш маъна. 51 Бета Гьули аьгъиъна эһкьейо гьоллогъой лӀийо Назаретлиъ. Гьули ийо-або нисогъа уьһхо-аьһхейо. Ийона гьогцос йаьжбо шоваълечӀе йакӀкьа йовахийо. 52 Иса укълъийо, аьдамлӓла аһкъло-пикролаъ оһкъойо, Аллагьлинна аьдамлӓнна Гьули йилӀа атӀийо.
1 Тиберий къайсарлъилаъ ахънас ацӀона лъинас лӀи зукъойо; Ягьудиялиъ наиблъилаъ Понтий Пилат зукъойо; Галилеялиъ ханлъилаъ Гьерод зукъойо; гьолцос ис Филипп зукъойо Итурейлилана Трахонитлилана вилаятлис хан; Лисаний Абиленаллиъ ханлъилаъ зукъойо; 2 Гьаннана Кайафана бишшун букъӓ кашишлалъилаъ гаьгьийа мехлаъ, Закарияла оьждил - Ягьял боьчӀчӀа авлахълиъ Аллагьлис йаьже тухъийо. 3 Гьолцо Иордан эһхедой гьица гаьгьийа мицӓъ кӀаьйлӀона лъïд мӓцоллолъи тӀибитӀизи йӧйо, мизос мунагьла тавба богьда чурзи йӓхъцалӀо нисойо. 4 Вагьаддийа йаьжбо чӓхна гей Ишая авараглила ТӀекликьа: «Гьоһс гьокӀ тухъца боьчӀчӀа авлаиълиъ: Гьуги оһкъолъол гьино къачӀази йова, Кьоддӓлал гьино йаһкъойцӀойо йова, 5 Шибаб куво-аьракъ йолъала, шибаб мӓь-бизова йеһйалъала, ЧӀикӀ-чӀекӀдийо жо йаһкъойцӀала, хир-оькӀилӓ маьче мелъала, 6 Шибаб ругь-чӀаголъилал Аллагьлис хъосарлъи йегӓла». 7 Гьолцодой мӓцолал мокъова халкъилала аьламлихъа Ягья нисӓгьийо: - Гьай миже, цӀодола бекелалис насло! Лъод миже тӀамзи бӧйо кьодо мокъоцала Аллагьлила симолдоис боьвачал? 8 Миже бӧва тавбалас пихъ йегала. Иле Ирбагьинила наслолас къовӓ гейлӀо нисона бикълабашӓкъа. Гьуна До мизохъа нисос, Аллагьлил йадда вагьаддӧл кьалӓна Ирбагьинила къовӓл Гьогцохъа йуьһвахонна йӓхъца. 9 Хоьхила хемухадой оһг гуллолъи мизол йикъе. КӀетӀо пихъ кьодо йахъаъцас хоьхо буьчӀна цӀоъ гулцаслъи йикъе. 10 Гьиде сийод йовал нуцӀослӀо нисос зукъойо аьдамлӓ. 11 Ягья жаваб ницца зукъойо: - Къона мухун гаьгьийа гьоһсцоис гаьччал нилӀа, кен гаьгьийана вагьаллӓ йова. 12 Мунагьла чурзи йовагьиллал мокъовӓ гьаькъ бокӀолал бечеллӓ аьдамлӓна нисолло гьолцохъа: - Йӓ Муалим, иле сийод йовал нуцӀос? 13 Гьоллол жаваб нилӀийо Ягья: - Мизол бегаллагъа кьоддӓс багъӓкъа гьаькъ. 14 Вагьаллӓзу рагъухъаллӓна мокъона нисолло: - Илена сийод йовал нуцӀос? Гьоллохъана нисойо: - Гьоһссидиъасна гьичӀегонна окко йагъӓкъа, гьоһссидикьана гаьччо аьйиб гулӓкъа, мизол ниццала харжликьа рази бахъна бече. 15 Масигь оһкъаллахъа гувабацӀона бечейаъ, халкъилал пикро бахъца зукъойо Ягья Масигь зогъаллӀона. 16 Ягья къацӀцӀолал жаваб нилӀийо: - До мизос мунагьла лъïд йӓһцолца, амма оһкъос дïгъана йилӀа къудратаб СукӀо. До гей гьолцола гьалалъцолӓс кьохъӓ йӓһкал мустагьикъаб гаьччо сукӀо. Гьогцо мизос мунагьла йӓһцолас Илагьиябли ругьлидна цӀойидна. 17 Гьогцола каъ аьһко гей, нахоъос хъбо мацонна гьинила баькьиъ гулца, нахо гьоһсна йедаъцала цӀоъна гунна Гьолцо йекӀелца. 18 Рохеллис Хабар нисона вагьаллӓзу тели баддӧнна насигьатла Ягья аьдамлӓл йовагьийо. 19 Гьерод ханли гьинила истӀис ахъо Гьеродиада йоһкъойолъина, бади гьокцос чороклъина Ягья мотӀолиъ йакьеллъо, 20 Гьероди Ягья тӀусагъийаъ голло, ханли йовагьийа бадло кешлъилӓкьа кьодо вагьли кешлъина телилъийо. 21 КъацӀцӀо гаьлъда-гаьгьийо аьламна мокъона лъïд мунагьла йӓһцолцалаъ, Исана лъïъна эһдокна доьъа бӧслаъ, гьаһса йеһйагьейо. 22 Илбалила суратбакьа Илагьияб Ругь мокъойо гьолцодой. Бета гьаһсаъкьӓ гьокӀ тухъийо: - Ми гей дил аццас дие Оьжо. Дÿкьа До рази гей! 23 Иса Аллагьлил хъуллухъ бовал уьһхолъийаъ, гьолцос зукъойо лъанайиглъийо лӀи. Гьолцола умумаллис вагьаддийо кьибил гейлӀо нисос зукъойо: гьолцос або Усуп, гьолцосна або Эли, бета 24 Маттат, Леви, Малки, Яннай, Усуп, 25 Матитя, Амос, Нагьум, Гьесли, Наггай, 26 Магьат, Маттати, Шимъи, Йосех, Йода, 27 Йогьанан, Реса, Зеруббабел, Шеалтиэл, Нер, 28 Малки, Адди, Къасам, Алмодам, Эр, 29 Ешуа, Элиэзер, Йорим, Маттат, Леви, 30 Шимъон, Ягьуда, Усуп, Йонан, Элякъим, 31 Мелеа, Менна, Маттата, Натан, Давуд, 32 Йишай, Йобед, Боаз, Шалмон, Нагьшон, 33 Аминадаб, Админ, Арам, Гьецрон, Перец, Ягьуда, 34 Якъуб, Исгьакъ, Ирбагьин, Терагь, Нагьор, 35 Серуг, Реу, Пелег, Эбер, Шелагь, 36 Къейнан, Арпакшад, Шем, Нуьгь, Ламек, 37 Метушелагь, Гьенок, Яред, Магьалалеэл, Къейнан, 38 Энош, Шит, Адам, Аллагь.
1 Илагьияб Ругьлид оцӀийо Иса Иорданлиъис кӀаьй уьһхона гӧйо, бета Ругьли Гьули оһкъолло боьчӀчӀа авлахълиъ. 2 Вагьлиъ йагъойо Иса оьһкъонаийг водо. Илбисли гьолцос гьаьлна бикъелло. Вагьлосинаб замаллиъ сикӀаъ лукӀма мейэш. Оьһкъонаийг водо еһкьелъ, Гьули нукойо. 3 Вагьалълъо мехлаъ илбисли нисос Гьолцохъа: - Ми Аллагьлис Оьжо зогъда, вагьалӀо кьалхъа ниса баьбалал уьһхолӀо. 4 Иса гьоглӀол жаваб нилӀийо: - ТӀекликьа чахна гей: «Сид баьбалакьа боваъас нсалли гьинис оьмро». 5 Бета илбисли мӓькьана оһкъонна, сид лагьзатлиъ дуниялликьа гаьгьийӓ къацӀцӀӓ пачалихъла йегабалло Гьолцол. 6 Бета гьоклӀо нисос: - Вагьадло къацӀцӀола пачалихълӓс ихтиярна рецна до Дул нилӀал, судлӀо нисода гьолълъос ихтияр дïхъа нилӀна гей, до дил атӀтӀийал вагьло ницца. 7 Ми дил сужда богьда, вагьли къацӀцӀо дибо йахъца. 8 Иса жаваб нилӀийо: - ТӀекликьа чахна гей: «Сид Аллагьлиллӓъ сужда бовӓкъа, БетӀергьаллиллӓъ ибадат бовӓкъа». 9 Бета илбисли Гьули Иерусалимлиъ эжена Аллагьлила билӀола кьохъкьана гонна, Гьолцохъа нисос: - Ми Аллагьлис Оьжо зогъда, вагьалӀоъла лӀийо огицӀ! 10 ТӀекликьа чахна гаьъад: «Аллагьли малаиклӓкьа амро бовас ми цӀуми овалӀо сона». 11 Бета: «Малаиклӓ каъ охна эзас кьалил дибо хаьба мехелечӀе». 12 Иса жаваб бӧйо: - «Ми БетӀергьан, дибола Аллагьлил гьаьлбики йовӓкъа» - лӀо нисона чахна ТӀекликьа. 13 Гьолцол къацӀцӀо гьаьлбики йогьна лъикъолъ, илбис гьоһс санаъатаб мех мокъоцал боъийо Гьолцодойс. 14 Иса оһкъойо Галилеялиъ Илагьияб Ругьна Гьиниъ бахъна. Гьолцос цӓһ нӓназу сӧһгъой гаьгьийӓ мицӓъ йеһкьейо. 15 Синагоглӓъ эһкьена Гьолцо ваъза-насигьатла йовагьийо, къацӀцӀола Гьолцол рецбакъ бӧс зукъойо. 16 Бета Иса тарбийа-лъай нилӀийа Назарет шагьарбаъ эһкьейо, гьинила аьдатликьа шамат водиъ синагоглиъна эһдокийо. Гьоллол ТӀек хъовал минбарликьа кьодокийо. 17 Ишая авараглис ТӀек нилӀийо Гьолцохъа. Вагьаддийо калима гаьгьийо мицаъ ТӀекна йеһгьена, ъӧйо Гьолцо: 18-19 «Дïъ БетӀергьаллис Ругь гей, гьолцо дил ихтияр нилӀийо Рохеллис Хабар мискиллӓхъа мейал, асирлъилаъ гаьгьийӓ тиса бӓгъоналӀо, боцдийӓл канлъи йоһкъоналӀо, азаб-акъубалиъ гаьгьийӓ гиса мегьналӀо. Аллагьлила раьгьматлис мех мокъоналӀо нисал эһгьна гей До». 20 Бета Гьули ТӀекна йиһхъона, хъулухъчийахъана нилӀна, къё эчейо. Синагоглиъ гаьгьийӓ къацӀцӀолас гьаьй йеһхейо Гьолцокьа. 21 Иса гьоллохъа нисал уьһхотохъийо: - Жейса миже вагьалӀо калималихъа энекзи бахъцалаъ, чахийо жо тӀубази йахъийо. 22 Гьолцола каламли гьоллол букъо асар бӧйо. Исала сикӀаъкьӓ гугьцала вагьалълъо баркатаб каламли къацӀцӀӓ аьжаиб бовагьийо. Бета гьолло нисойо: - Усупиc оьжод гей Гьули? 23 Иса нисойо гьоллохъа: - Гьай-гьай миже Лïхъа кицина бакъона нисас: «Ми дохтур зогъда, гьакъкъа Мизу сагъ ахълӀо. Илол Капернаумлиъ йахъийо шинаб жо тухъийо, же вагьалӀо Дибола абола ракьликьана йова!» - лӀона нисас миже Дïхъа. 24 Амма Гьогцо гьоглохъа нисойо: - Гьаькъкъаб жо гей, гьоһсна авараг гьинила абола ракьликьа бикӀзи оваъас. 25 Гьаькъкъаб жо нисос До мизохъа: Иляс авараглила замаллиъ лъана лӀина илъна боцо бахъийо мицакьа водо гуйчӀе къацӀцӀо дуниялликьа йукъо ракъи йоһкъона. 26 Израиллиъна тели къоролла зувакъодана, Сидонлидой гьиһца гаьгьийа Царепатила сид къоролайдоййаъ эһйэш Аллагьли Иляс. 27 Элиша авараглила замаллиъ Израиллиъна барас унтилаъ кӀовабакӀова тели аьдамла бӓхъдана, Шамлиъис гьоһс НаъманлӀо нисоцас сукӀовӓъ аһцолеэш гьолълъо унтилаъас. 28 Вагьли тухъийоназу, синагоглиъ гаьгьийӓ аьдамла гьалаг бӓхъийо. 29 Баьгъбаъна гьолло Гьули шагьарбаъаш гисана эжена бачилӀ тӀотӀаллӀо нисона, гьидес шагьар бӧйо бизола раьъалликьа акъос зукъойо. 30 Амма Иса халкъилаъас алӀос оьчона оъийо. 31 Бета Галилеялила КапернаумлӀо нисоцала шагьарбаъна эһкьена, гьоллол шамат водлӓъ Аллагьлис калам биджи бовал уьһхолъийо. 32 Гьолцола ваъзалӓкьа аьдамла аьжаиб бӓхъна зувакъойо. Гьолцо нисоцас жо нисос зукъойо Гьиниъ гьаьлкӀолъи гаьгьийаъцой. 33 Синагоглиъ зукъона гей зинналлӓ охийо гьоһс сукӀо. 34 - ЭццакӀав Сийод дул илоъкьӓ йатӀна, Назаретлиъис Иса! - лӀо нисона йукъо илӀелӓл уьһхолъийо гьули сукӀо. - Иле пасад бовалди оһкъона Ми! Дил икъеш Ми Аллагьлис Илагьияб СукӀо ахъцаслъи! 35 Иса гьокӀ йоъиллийо гьолълъос: - ГьокӀ йоъла, болъо Ми гьолцола магъоъос! Синагоглиъ алӀлӀода гьули сукӀона къё икьена, гьоьшшона зарал бойчӀе гьолцола магъоъос зиннал гисакийо. 36 КъацӀцӀӓ гьайран бахъийо. Гьоллӧл сидхъа гьоһсо бикълабашал муьхобалъийо: - Сийо йаьжед гьули, гьинила къуватлидна къудратлидна амро богьцас зинналлӓл; гьолълъогъа муьгъаттӓ гьоллӧлна инсаллила магъоъос гисабакцас, - лӀо нисона. 37 Нӓназу сӧһгъой гаьгьийӓ мицӓъ митемекьейо Исас хабар. 38 Бета аьгъиъна, синагоглиъисна гисакна, Иса СимонлӀо нисоцала сукӀодой билӀогъа эһкьеш. Симонис йукъо ийо йаьчӀ-йиххала унтилаъ йилӀа кӀокӀона йиһхъос. Гьоло йахълалӀо нисона гьарзи йӧс Гьолцохъа. 39 КӀокӀовадой гьиһцана эһкьена, йаьжена нисона, гьолълъоъос унти болъолца. Вагьаллиъисзу йаьгъиъна, гьоллол кеноһх гулал йуьһхолъча гьоло. 40 Бохъ тӀикейа анталаъ тели кӀовакӀовӓ аьдамлана бӓкъона мокъойо Гьолцодой. Исана шибаблил кӧ йеһхенна гьоллӧл бӓхъилло. 41 Лади аьдамлӓъаш зинналла йовацӀийо. - Ми Аллагьлис Оьжо гей! - лӀо нисона илӀелабас зувакъойо гьоллӧл йоьвачошлаъ. Амма жу Масигь гаьгьийолъи зинналлӓл икъелъ, Иса гьоллос гьокӀа йоваъиллис зукъойо. 42 Бета хиса водо хишейоназу гисакна Гьули боьчӀчӀа авлахълиъ эһкьейо. Халкъила Гьули иһзийо. Иһхъона муьгъаттӓ, гьидедойс нӓна эһкьӓкъалӀо нисона гьардизи бӓхъийо. 43 Амма Иса гьоллохъа нисойо: - Аллагьлис Парчагьлъи йоһкъоцалас Рохеллис Хабар нисал До бадло шагьарбӓъна эһкьал нуцӀос, вагьалълъол ӭһйо гей До. 44 Вагьлӓ Ягьудиялила синагоглӓъ эһкьена, Гьолцо ваъза-насигьатла йовагьийо.