The Old Testament of the Holy Bible
Тхьэм дунаир къызэригъэшІыгъэр
1 УблапІэм Тхьэм уашъомрэ чІыгумрэ къыгъэшІыгъэх. 2 ЧІыгум гъэпсыкІэ иІагъэп ыкІи нэкІыгъэ, шІункІыр чІэ зимыІэм шъхьэщытыгъ; Тхьэм Ыпсэ псымэ акІыІу щыхьарзэщтыгъэ. 3 Тхьэм ыІуагъ: «Нэфынэр къэрэхъу». Нэфынэр къэхъугъ. 4 Нэфынэр зэрэдэгъур Тхьэм ылъэгъугъ; Тхьэм нэфынэр шІункІым къыгуигъэкІыгъ. 5 Нэфынэм «мафэкІэ» Тхьэр еджагъ, шІункІым «чэщкІэ» еджагъ. Пчыхьэ къэхъугъ, пчэдыжь къэхъугъ – апэрэ маф. 6 Тхьэм ыІуагъ: «Псым ыгузэгу, псыр тІоу ыгощэу, ошъо гъэІагъэ щэрэІ». 7 Тхьэм ошъо гъэІагъэ ыгъэпси, псэу ошъо гъэІагъэм ычІэгъ чІэтыр псэу ошъо гъэІагъэм ыкІыІу щыІэм гуищыгъ. Аущтэуи хъугъэ. 8 Тхьэр ошъо гъэІагъэм «уашъокІэ» еджагъ. Пчыхьэ къэхъугъ, пчэдыжь къэхъугъ – ятІонэрэ маф. 9 Тхьэм ыІуагъ: «Уашъом ычІэгъ псэу чІэтыр зэкІэ зы чІыпІэ орэхъуи, гъушъапІэр къэрэлъагъу». Аущтэуи хъугъэ. 10 ГъушъапІэм Тхьэр «чІыгукІэ» еджагъ, псэу зэхэлъэдагъэмэ «хыкІэ» яджагъ. Ар зэрэдэгъур Тхьэм ылъэгъугъ. 11 Тхьэм ыІуагъ: «КъэкІыхэрэр чІыгум къерэгъэкІых: кІэ зиІэ уцхэри чъыг лъэпкъ зэфэшъхьафхэу кІэ зиІэ пхъэшъхьэ-мышъхьэ къызпыкІэхэри». Аущтэуи хъугъэ. 12 ЧІым къэкІыхэрэр къыгъэкІыгъэх: кІэ зиІэ уц лъэпкъ зэфэшъхьафхэри кІэ зиІэу, пхъэшъхьэ-мышъхьэ къызпыкІэрэ чъыг лъэпкъ зэфэшъхьафхэри. Ар зэрэдэгъур Тхьэм ылъэгъугъ. 13 Пчыхьэ къэхъугъ, пчэдыжь къэхъугъ – ящэнэрэ маф. 14 Тхьэм ыІуагъ: «Мафэмрэ чэщымрэ зэфэшъхьаф ашІынхэу, ошъо гъэІагъэм нэфынэхэр къыщэрэхъух, пІалъэхэр къагъэлъэгъонхэу, мафэхэр, илъэсхэр къагъэнэфэнхэу тамыгъэ орэхъух. 15 ЧІыгур къагъэнэфыным пае ошъо гъэІагъэм а нэфынэхэр къыщэрэнэфых». Аущтэуи хъугъэ. 16 Тхьэм нэфынэ инитІу къыгъэшІыгъ: нахь иныр – мафэр зэригъэзекІонэу, нахь цІыкІур – чэщыр зэригъэзекІонэу; жъуагъохэри къыгъэшІыгъэх. 17 Ахэр Тхьэм ошъо гъэІагъэм зыкІытыригъэуцуагъэхэр чІыгур къагъэнэфынэу, 18 мафэмрэ чэщымрэ зэрагъэзекІонхэу ыкІи нэфынэр шІункІым гуащызэ ашІынэу ары. Ар зэрэдэгъур Тхьэм ылъэгъугъ. 19 Пчыхьэ къэхъугъ, пчэдыжь къэхъугъ – яплІэнэрэ маф. 20 Тхьэм ыІуагъ: «Псэ зыпытхэр псым хиз орэхъу. ЧІым ышъхьагъ ошъо гъэІагъэм бзыухэр щэрэбыбых». 21 Тхьэм къыгъэшІыгъэх хым хэс шъэджашъэхэр, нэмыкІ псэушъхьэ лъэпкъ зэфэшъхьафхэу псым бэдэдэ хъухэу щызекІохэри тамэ зиІэ бзыу лъэпкъ зэфэшъхьафхэри. Ар зэрэдэгъур Тхьэм ылъэгъугъ. 22 Тхьэм ынэшІу ахэмэ ащифи, ыІуагъ: «Зыжъугъэбагъу, зыхэжъугъахъу, хыпсыхэм ахизы шъухъу. Бзыухэри чІым щэрэбагъох». 23 Пчыхьэ къэхъугъ, пчэдыжь къэхъугъ – ятфэнэрэ маф. 24 Тхьэм ыІуагъ: «Псэ зыпыт лъэпкъ зэфэшъхьафхэр чІым къерэгъэхъух: былымхэр, цохъорэ-пшырэ псэушъхьэхэр, хьакІэ-къокІэ зэфэшъхьафхэр». Аущтэуи хъугъэ. 25 Тхьэм къыгъэхъугъэх хьакІэ-къуакІэхэр, былым зэфэшъхьафхэр, чІыгум щыцохъорэ-щыпшырэ псэушъхьэ зэмылІэужыгъохэр. Тхьэм ылъэгъугъ ар зэрэдэгъур. 26 Тхьэм ыІуагъ: «КъэдгъэшІын цІыфыр, Тэ титеплъэу, Тэ тяхьщырыр, хыхэм ахэс пцэжъыехэм, ошъогу бзыухэм, былымхэм, зэкІэ чІыгуми чІыгум зэкІэ щыцохъорэ-щыпшырэ псэушъхьэхэми тетыгъо афыриІэнэу». 27 Джаущтэу Ежь итеплъэу цІыфыр Тхьэм ар къыгъэшІыгъ, Ежь итеплъэу къыгъэшІыгъ ар, къыгъэшІыгъ хъулъфыгъи Ащ, бзылъфыгъи къыгъэшІыгъ. 28 Тхьэм ынэшІу ахэмэ ащифи, ариІуагъ: «Зыжъугъэбагъу, зыхэжъугъахъу, чІыгум тиз зышъушІи, ар шъуІэ къижъугъахь, тетыгъо афышъуиІ хым хэс пцэжъыехэм, ошъогу бзыухэм, сыд фэдэрэ псэушъхьэу чІыгум тет пстэуми». 29 Тхьэм ыІуагъ: «Мары къышъостыгъ шъушхынэу кІэ зиІэ уцэу зэкІэ чІыгум тетыр, сыд фэдэрэ чъыги кІэ хэлъэу къызпыкІэрэр. 30 ХьакІэ-къуакІи, бзыуи, чІыгум щыцохъорэ-щыпшырэ сыд фэдэрэ псэушъхьи – псэ зыпытэу чІыгум тет пстэуми – Сэ ашхынэу уц шхъуантІэр ястыгъ». Аущтэуи хъугъэ. 31 Тхьэм зэкІэ къыгъэхъугъэхэр къыплъыхьагъэх – зэкІэри дэгъу дэдагъ. Пчыхьэ къэхъугъ, пчэдыжь къэхъугъ – яхэнэрэ маф.
1 Джаущтэу уашъори, чІыгури, зэкІэ ахэмэ ащыІэ пстэури къэгъэшІыгъэ хъугъэ. 2 Яблэнэрэ мафэм ехъулІэу Тхьэм Іофэу ышІэщтыгъэр ригъэкъуи, яблэнэрэ мафэм Ежь зэкІэ Іофэу ышІагъэмэ ауж гупсэфыгъо уахътэ зыфишІыжьыгъ. 3 Тхьэм ынэшІу щифагъ яблэнэрэ мафэм, мэфэ лъапІэуи ар ышІыгъ, сыда пІомэ а мафэм Ар гупсэфым хэтыгъ: къэгъэшІын-къэгъэхъуным иІоф Ащ ыухыгъ. 4 Джары уашъомрэ чІыгумрэ Зиусхьанэу Тхьэм ахэр къызигъэшІыгъэхэ уахътэм афэгъэхьыгъэ къэбарыр.
Іэдэн чъыгхатэр
5 Зиусхьанэу Тхьэм чІыгумрэ уашъомрэ къызигъэшІыгъэхэ уахътэм шъоф куандэ гори, шъоф уци джыри чІыгум тетыгъэп, сыда пІомэ Зиусхьанэу Тхьэм джыри чІыгум ощх къыгъэкІогъагъэп, чІыгур алэжьынэу цІыфхэри щыІагъэхэп. 6 ЧІы чІэгъым пахъэу къычІэкІырэм чІыгур ыгъэшъокІыщтыгъэ ныІэп. 7 ЕтІанэ Зиусхьанэу Тхьэм цІыфыр чІыгум исапэ хишІыкІыгъ, щыІэныгъэм ижьыкъащэ ыпэбзыймэ аритІупщыхьи, цІыфым псэ ыгъотыгъ. 8 Тыгъэ къокІыпІэмкІэ щыІэ Іэдэн чъыгхатэ Зиусхьанэу Тхьэм щигъэтІысхьи, цІыфэу къыгъэшІыгъэм ар псэупІэ фишІыгъ. 9 Зиусхьанэу Тхьэм чІыгум чъыг зэмылІэужыгъо пстэури къыхигъэкІыгъ, ятеплъэкІэ дахэхэу, апытхэр дэгъухэу; чъыгхэтэ гузэгум щыІэныгъэр къэзытырэ чъыгрэ, шІумрэ емрэ къэозгъашІэрэ чъыгрэ къыдигъэкІагъэх. 10 Іэдэн псыхъор къичъыщтыгъэ, ащ чъыгхатэр ыгъэшъокІыщтыгъэ, етІанэ плІэу зигощыщтыгъэ. 11 Ахэмэ ащыщэу зым ыцІэр Пишэн, ащ дышъэ зэрылъ Хьауилэ чІыгур къеухьэ. 12 А чІыгум идышъэ дэгъу, ащ щыІэх мэ ІэшІу зыпихрэ мыстхъуи, мыжъо лъапІэу оникси. 13 ЯтІонэрэ псыхъом ыцІэр Гъыхъон; ащ хэгъэгоу Куш къеухьэ. 14 Ящэнэрэ псыхъом ыцІэр Тигр, ар Ашур итыгъэкъокІыпІэкІэ мачъэ. ЯплІэнэрэ псыхъор Ефрат. 15 Зиусхьанэу Тхьэм цІыфым Іэдэн чъыгхатэм псэупІэ щыритыгъ ар ылэжьынэу ыкІи къыухъумэнэу. 16 ЦІыфым мыщ фэдэ унашъо фишІи, риІуагъ: «Мы чъыгхатэм дэт сыд фэдэрэ чъыги къыпыкІэрэр пшхын уфит, 17 ау шІумрэ емрэ къэозгъашІэрэ чъыгым къыпыкІэрэр умышхы, сыда пІомэ ар пшхымэ, а мэфэ дэдэм шІокІыпІэнчъэу улІэщт». 18 Зиусхьанэу Тхьэм ыІуагъ: «ЦІыфым изэкъоныр дэи. Сэ ащ ежь епэсыгъэу ІэпыІэгъу къыфэзгъэхъун». 19 Зиусхьанэу Тхьэм чІыгум хишІыкІыгъэх зэкІэ шъоф хьакІэ-къуакІэхэр, ошъогу бзыухэр. Ахэр цІыфым къыфищагъэх ышІэным пае ахэмэ ар зэряджэщтыр. Псэушъхьэ пэпчъ цІыфыр зэреджагъэр ыцІэу къытенагъ. 20 ЗэкІэ былымхэм, ошъогу бзыухэм, шъоф хьакІэ-къуакІэхэм цІыфым цІэ афиусыгъ, ау цІыфым ежь епэсыгъэу ІэпыІэгъу къыфэхъун ахэмэ ахигъотагъэп. 21 Джащыгъум Зиусхьанэу Тхьэм чъые пытэ цІыфым къышъхьарищи, ащ ыцагэмэ зы къахихыгъ, ар зыдэщытыгъэ чІыпІэр пкъышъолкІэ ыгъэкІыжьыгъ. 22 ЦІыфым къыхихыгъэ цагэм Зиусхьанэу Тхьэм бзылъфыгъэр хишІыкІи, цІыфым дэжь ар къыщагъ. 23 ЦІыфым къыІуагъ: «Джы мыр сэ скъупшъхьэ щыщ къупшъхь, спкъышъол щыщ пкъышъол; ащ зэреджэщтхэр „бзылъфыгъ“, сыда пІомэ хъулъфыгъэм хахыгъ». 24 Ащ къыхэкІыкІэ хъулъфыгъэм яти яни ыбгынэнхэшъ, ишъуз гъусэ фэхъущт, ахэри зы хъущтых. 25 ТІури, хъулъфыгъэри бзылъфыгъэри, пцІэнагъэх, ау укІытэщтыгъэхэп.
Тхьэм цІыфхэр Іэдэн чъыгхатэм къызэрэдифыгъэхэр
1 Зиусхьанэу Тхьэм къыгъэшІыгъэ шъоф хьакІэ-къокІэ пстэуми блэр анахь тхьагъэпцІыгъ. Ар бзылъфыгъэм еупчІыгъ: «Мы чъыгхатэм дэт чъыгмэ къапыкІэрэ гори Тхьэм шъушхын шъуфимытэу зэришІыгъэр шъыпкъа?» 2 «Чъыгмэ апыт пхъэшъхьэ-мышъхьэхэр тшхы хъущт, – ыІуагъ бзылъфыгъэм. – 3 Ау Тхьэм ыІуагъ: „Чъыгэу Іэдэн чъыгхэтэ гузэгум итым пытхэр шъумышхы ыкІи шъуанэмыс, сыда пІомэ шъулІэщт“». 4 «Хьау, шъулІэщтэп, – ыІуагъ блэм. – 5 Ау Тхьэм ешІэ ахэр зышъушхырэ мафэм шъунэхэр къэплъэнхэшъ, шъори шІумрэ емрэ зышІэрэ Тхьэм фэдэ шъузэрэхъущтыр». 6 Бзылъфыгъэм ылъэгъугъ чъыгым пытхэр пшхынкІэ зэрэдэгъухэр, уяплъынкІи гохьых, шІэныгъэ бгъотынымкІи цыхьэшІэгъух. Арыти, къыпыкІагъэмэ ащыщ къыпичи, ышхыгъ. ИлІи рити, ащи ышхыгъ. 7 Ахэмэ анэхэр къэплъагъэх, зэрэпцІанэхэр къагурыІуи, шхынцумпэ чъыгым ытхьапэмэ хъураеу абгы къыращэкІын ахашІыкІыгъ. 8 Мафэм ичъыІэтэгъум чъыгхатэм хэтэу Зиусхьанэу Тхьэр къызэрэкІорэр зэхахыгъ. ЛІыми ишъузи Зиусхьанэу Тхьэм къымылъэгъунхэу чъыгмэ захагъэбылъхьагъ. 9 Ау Зиусхьанэу Тхьэр цІыфым къеджагъ: «Тыдэ ущыІа?» 10 Адрэм къыІуагъ: «Уилъэмакъэ чъыгхатэм зыщызэхэсэхым, сызэрэпцІанэм пае сыкъэщыни, зызгъэбылъыгъ». 11 «Хэта о упцІанэу къыозыІуагъэр? – къэупчІагъ Зиусхьанэу Тхьэр. – Ущышхэн уфимытэу зыфэсІогъэ чъыгым пытым щыщ пшхыгъэмэ шІэ?» 12 ЦІыфым джэуап къытыгъ: «Бзылъфыгъэу О къысэптыгъэм а чъыгым къыпичи къыситыгъэти, сэ сшхыгъэ». 13 «Сыда ар аущтэу зыкІэпшІагъэр?» – Зиусхьанэу Тхьэр бзылъфыгъэм еупчІыгъ. Бзылъфыгъэм ыІуагъ: «Блэм сигъэпцІагъэти, сшхыгъэ». 14 Арыти Зиусхьанэу Тхьэм блэм риІуагъ: «О пшІагъэм пае, хьэкІэ-къуакІи былыми атемылъэу, нэлат о птелъ, ныбашъхьэкІэ уцохъощт. КъэбгъэшІэщтми сапэр пшхыщт. 15 Бзылъфыгъэмрэ оррэ зэпыи шъусшІыщт, къышъутекІыщтхэри зэпыищтых: ащ илІэуж о пшъхьэ зэгуиутызэ ышІыщт, о ащ ылъэдакъэ уецэкъэщт». 16 Тхьэм бзылъфыгъэм риІуагъ: «Лъэрымыхь узыхъурэм, гугъоу узыхэтыр згъэбэгъощт, къин плъэгъузэ, сабыйхэр къэплъфыщтых, уилІ ренэу укІэхъопсыщт, уилІ тетыгъо къыпфыриІэщт». 17 Тхьэм лІыми риІуагъ: «Уишъуз уедэІуи, чъыгым пытыр о пшхыгъэ, пшхын узфимытэу сІогъагъэр! Джы ощ пае нэлатыр чІым телъ: къин ухэтэу ащ илэжьыгъэ ущэІэфэ къэпхьыжьыщт. 18 Панэрэ шхъурэ ащ къыпфигъэкІыщтых, шъоф фышъхьэхэр гъомлапхъэ пфэхъущт. 19 ПкІантІэр къыохэу уигъомылэ къэпхьыжьыщт, чІыгум щыщи ухъужьыщт, чІыгоу укъызхэкІыгъэм, сыда пІомэ о усап, икІэрыкІэуи сапэ ухъужьыщт». 20 ЦІыфым – Адам – ишъуз цІэу Хьао фиусыгъ, сыда пІомэ цІыф пстэуми ар ны афэхъугъ. 21 Зиусхьанэу Тхьэм шъомэ щыгъынхэр ахишІыкІхи, Адамрэ ащ ишъузрэ ыфэпагъэх. 22 Зиусхьанэу Тхьэм къыІуагъ: «Мары цІыфым шІумрэ емрэ зэхишІыкІхэу, зэу Тэщ фэдэ хъугъэ; джы щыІэныгъэр къэзытырэ чъыгым пытыр къыпимычыгъагъот, ар ышхымэ, егъашІэм щыІэщт». 23 Джаущтэу Зиусхьанэу Тхьэм Іэдэн чъыгхатэм цІыфыр къыдифыгъ – чІыгоу Тхьэм ар къызхихыгъэр ылэжьынэу. 24 Тхьэм цІыфыр къыдифи, Іэдэн чъыгхатэм итыгъэкъокІыпІэ лъэныкъо дэжь къэрыубрэ зызгъэчэрэгъурэ мэшІо чатэрэ щыІэныгъэм ичъыг екІурэ лъагъор къаухъумэнэу Іуигъэуцуагъэх.
Къаинрэ Хэбэлрэ
1 Адам ишъузэу Хьаом гохьагъ, сабый ащ ышъо хафи, Къаин къылъфыгъ. ЕтІанэ къыІуагъ: «Зиусхьаным къысити, сэ цІыф згъотыгъэ!» 2 ЕтІани ащ Хэбэл, Къаин ыш, къылъфыгъ. Хэбэл мэлахъощтыгъ, Къаин чІыгулэжьыщтыгъ. 3 Уахътэ зытешІэм ыуж, чІыгум къырихыжьыгъэ лэжьыгъэм щыщ Къаин Зиусхьаным тынэу къыфихьыгъ. 4 Хэбэли шъынэ щыпэлъфхэм шэу къакІоцІыкІыгъэр къыфихьыгъ. 5 Хэбэл итын Зиусхьаныр нэшІукІэ къеплъыгъ, ау Къаин итын ыгу рихьыгъэп. Арыти Къаин губжи, ынэгу къызэІигъэхьагъ. 6 «Сыда узкІэгубжырэр? – Зиусхьаныр Къаин къеупчІыгъ, – сыда унэгу къызфызэхэхьагъэр? 7 ШІу ошІэмэ – пшъхьэ Іэты. ШІу умышІэмэ – пчъэІупэм псэкІодыр къыщыошэ. Ар о къыпкІэхъопсы, ау о ащкІэ тетыгъо зигъаІ». 8 Зэгорэм Къаин ышэу Хэбэл риІуагъ: «НекІо, шъофым тигъахь». – Ахэр шъофым зэкІохэм, ащ Къаин Хэбэл щытебани, ыукІыгъ. 9 Арыти Зиусхьаным Къаин къыриІуагъ: «Тыдэ щыІа пшэу Хэбэл?» Къаин къыІуагъ: «СшІэрэп, сыда сэ сшы сырикъэрэгъула?» 10 Зиусхьаным къыІуагъ: «Сыда пшІагъэр? Пшы ылъ ымакъэ чІыгум къычІэджыкІызэ къысэджэ. 11 Джы о нэлат къыптефагъ. Пшы ылъэу о пІэкІэ бгъэчъагъэр ришъунэу зэгозыгъэ чІыгум уиштэжьырэп. 12 Сыд фэдизрэ чІыгур орэлэжьы, ащ нахьыбэрэ ащ о уигъэшхэжьыщтэп. Узыхафыгъэу, шъхьэегъэзыпІэ уимыІэу о чІыгум утетыщт». 13 Къаин Тхьэм риІуагъ: «Пщыныжь къин ар, сэ ар сфэщэчыщтым нахьыб. 14 Джы чІыгум сытеофы, сэ О Уапашъхьэ ситыжьыщтэп. Сызыхафыгъэу, шъхьэегъэзыпІэ симыІэу сыхъущтышъ, хэти апэу сызІукІэрэм сиукІыщт». 15 Зиусхьаным ащ къыриІуагъ: «Ары шъхьае хэтми Къаин зыукІырэм фэдиблэу ыпщыныжьыщт». Арыти Зиусхьаным Къаин тамыгъэ къытырилъхьагъ, къыІукІэрэмэ аукІын амылъэкІынэу. 16 Къаин Зиусхьаным ыпашъхьэ икІыжьи, Нод чІыгум, Іэдэн икъокІыпІэ лъэныкъокІэ, тетІысхьагъ.
Къаин къытекІыгъэхэр Лэмэх нэс
17 Къаин ишъуз гохьагъ, ащ сабый ышъо хафи, Хъанох къылъфыгъ. Къаин а уахътэм къалэ ыгъэпсыщтыгъэ – ащ ежь ыкъо ыцІэ фиусыгъ – Хъанох. 18 Хъанох Іирад къыфэхъугъ, Іирад къыфэхъугъ Мэхъуаел, Мэхъуаел къыфэхъугъ Матущаел, Матущаел къыфэхъугъ Лэмэх. 19 Лэмэх шъузитІу къыщагъ: зым ыцІагъэр Іадэ, ятІонэрэм ыцІагъэр Цылэ. 20 Іадэ Ябэл къылъфыгъ: ар былым Іэхъогъу зиІэ щатырым чІэсхэм ятэпІэшъагъ. 21 Ащ ыш ыцІагъэр Иубэл; ар пщынэ тІаркъомэ, сырынэмэ орэд къязыгъаІорэмэ зэкІэмэ ятэпІашъэщтыгъ. 22 Цылэ Тубал-Къаин къылъфыгъ; ащ джэрзымрэ гъучІымрэ Іэмэ-псымэхэр ахишІыкІыщтыгъэ. Тубэл-Къаин шыпхъоу НаІамэ иІагъ. 23 Лэмэх ишъузмэ ариІуагъ: «Іадэрэ Цылэрэ, шъукъысэдэІу! ШъукъедэІу, Лэмэх ишъузхэр, сэ къышъосІощтым! Хъулъфыгъэм сиуІагъэти – сыукІыгъ! ЛІыр къысэуагъэти – сыукІыгъ! 24 Къаин пае блэ пщынэжьыщтых, Лэмэх пае – тІокІищырэ пшІырэу блэ!»
Щэтрэ Енощрэ
25 Адам ишъуз джыри гохьагъ. Ащ шъэожъые къыфэхъуи, Щэт фиусыгъ. Ащ къикІыщтыгъэр: «Къаин ыукІыгъэ Хэбэл ычІыпІэкІэ Тхьэм шъао къыситыгъ». 26 Щэти шъао къыфэхъугъ, ащ Енощ фиусыгъ. Джащ къыщегъэжьагъэу цІыфхэм Тхьэм «Зиусхьан» фауси, агъэлъапІэзэ елъэІухэу аублагъ.
Адамрэ Хьаомрэ къатекІыгъэхэр
1 Мары Адамрэ ащ къытекІыгъэхэмрэ ятхылъ. Тхьэм цІыфыр къызегъэшІым, Ащ Ежь итеплъэ иІэу къыгъэшІыгъ. 2 Ащ хъулъфыгъэрэ бзылъфыгъэрэ къыгъэшІыгъ, ынэшІуи ахэмэ ащифагъ. Ахэр къызегъэшІхэм, ахэмэ афиусыгъ – «цІыфы». 3 Адам илъэсишъэрэ щэкІырэ къыгъэшІагъэу, ежь фэдэу, ежь итеплъэ иІэу шъао къыфэхъугъ. Адам ащ Щэт цІэу фиусыгъ. 4 Щэт къызэхъум ыуж, Адам илъэс шъий къыгъэшІэжьыгъ; ащ джыри къохэри пхъухэри къыфэхъугъэх. 5 Илъэс шъибгъурэ щэкІырэ къыгъашІи, ар лІагъэ. 6 Щэт илъэсишъэрэ тфырэ къыгъэшІагъэу Енощ къыфэхъугъ. 7 Енощ къызэхъум ыуж, Щэт илъэс шъийрэ блырэ къыгъэшІэжьыгъ, ащ джыри къохэри пхъухэри къыфэхъугъэх. 8 Илъэс шъибгъурэ пшІыкІутІурэ къыгъашІи, Щэт лІагъэ. 9 Енощ илъэс тІокІиплІырэ пшІырэ къыгъэшІагъэу Къэнан къыфэхъугъ. 10 Къэнан къызэхъум ыуж, Енощ илъэс шъийрэ пшІыкІутфырэ къыгъэшІэжьыгъ, ащ джыри къохэри пхъухэри къыфэхъугъэх. 11 Илъэс шъибгъурэ тфырэ къыгъашІи, Енощ лІагъэ. 12 Къэнан илъэс тІокІищырэ пшІырэ къыгъэшІагъэу ащ Махъалалэл къыфэхъугъ. 13 Махъалалэл къызэхъум ыуж, Къэнан илъэс шъийрэ тІокІитІурэ къыгъэшІэжьыгъ; ащ джыри къохэри пхъухэри къыфэхъугъэх. 14 Илъэс шъибгъурэ пшІырэ къыгъашІи, Къэнан лІагъэ. 15 Махъалалэл илъэс тІокІищырэ тфырэ къыгъэшІагъэу Ерэд къыфэхъугъ. 16 Ерэд къызэхъум ыуж, Махъалалэл илъэс шъийрэ щэкІырэ къыгъэшІэжьыгъ; ащ джыри къохэри пхъухэри къыфэхъугъэх. 17 Илъэс шъийрэ тІокІиплІырэ пшІыкІутфырэ къыгъашІи, Махъалалэл лІагъэ. 18 Ерэд илъэсишъэрэ тІокІищырэ тІурэ къыгъэшІагъэу Хъанох къыфэхъугъ. 19 Хъанох къызэхъум ыуж, Ерэд илъэс шъий къыгъэшІэжьыгъ, ащ джыри къохэри пхъухэри къыфэхъугъэх. 20 Илъэс шъибгъурэ тІокІищырэ тІурэ къыгъэшІагъэу Ерэд лІагъэ. 21 Хъанох илъэс тІокІищырэ тфырэ къыгъэшІагъэу Матущэлахъ къыфэхъугъ. 22 Матущэлахъ къызэхъум ыуж, Хъанох илъэс шъищырэ щыІагъ, ар Тхьэм ыпашъхьэ итэу псэугъ, джыри къохэри пхъухэри къыфэхъугъэх. 23 Хъанох илъэс шъищырэ тІокІищырэ тфырэ къыгъэшІагъ. 24 Хъанох Тхьэм ыпашъхьэ итэу псэугъ. ЕтІанэ Хъанох щымыІэжьы хъугъэ, сыда пІомэ Тхьэм ар ыштэжьыгъ. 25 Матущэлахъ илъэсишъэрэ тІокІиплІырэ блырэ къыгъэшІагъэу Лэмэх къыфэхъугъ. 26 Лэмэх къызэхъум ыуж, Матущэлахъ илъэс шъиблырэ тІокІиплІырэ тІурэ къыгъэшІэжьыгъ, ащ джыри къохэри пхъухэри къыфэхъугъэх. 27 Илъэс шъибгъурэ тІокІищырэ бгъурэ къыгъашІи, Матущэлахъ лІагъэ. 28 Лэмэх илъэсишъэрэ тІокІиплІырэ тІурэ къыгъэшІагъэу шъао къыфэхъугъ. 29 НухьэкІэ ар ащ еджи, къыІуагъ: «Зиусхьаным нэлатыр зэрихыгъэ чІыгур тылэжьы зыхъукІэ, тиІофшІэнкІи тІэхэм къинэу алъэгъурэмкІи мы шъаом гупсэфыгъо тигъэгъотыщт». 30 Нухьэ къызэхъум ыуж, Лэмэх илъэс шъитфырэ тІокІиплІырэ пшІыкІутфырэ къыгъэшІэжьыгъ; ащ джыри къохэри пхъухэри къыфэхъугъэх. 31 Илъэс шъиблырэ тІокІищырэ пшІыкІублырэ къыгъашІи, Лэмэх лІагъэ. 32 Нухьэ ыныбжь илъэс шъитф зэхъум, Щэм, Хъам, Ефэт аІоу къыфэхъугъэх.
Иныжъхэр къыздикІыгъэхэр
1 ЦІыфхэр чІыгум нахьыбэ щыхъущтыгъэх, ахэмэ пшъашъэхэр къафэхъущтыгъэх. 2 Тхьэм ыкъомэ цІыфмэ япхъумэ ядэхагъэ алъэгъути, ахэр, шъхьадж ыгу рихьырэр, шъузкІэ аштэщтыгъэх. 3 Джащыгъум Зиусхьаным ыІуагъ: «Сэ Спсэ цІыфым егъашІэми хэтыщтэп. ЦІыфмэ хьадэгъур къапэщылъ, арышъ ахэмэ къагъэшІэщтыр илъэсишъэрэ тІокІырэ орэхъу». 4 А лъэхъаным, нэужырэми фэдэу, чІыгум иныжъхэр тетыгъэх, сыда пІомэ Тхьэм ыкъохэр цІыфмэ апхъумэ адэжь къакІохэти, ахэмэ сабыйхэр къафалъфыщтыгъэ. Ахэр блэкІыгъэ зэманмэ ялІыхъужъхэу щытхъу къызфахьыжьыгъ. 5 ЧІыгум тет цІыфмэ ябзэджагъэ зэрэбэ дэдэр Зиусхьаным ылъэгъугъ: ахэмэ зэкІэ ягупшысэхэр ренэу бзэджагъэ ашІэным фэгъэзагъэх. 6 КІэгъожьыгъ Зиусхьаныр цІыфыр чІыгум къызэрэщигъэшІыгъэмкІэ, ыгукІэ гукъэошхо щыхъугъ. 7 Зиусхьаным къыІуагъ: «ЧІышъхьашъом тезгъэкІодыкІыщтых Сэ зэкІэ къэзгъэшІыгъэ цІыфхэр, ахэмэ акІыгъухэу хьэкІэ-къуакІэхэри, былымхэри, цохъорэ-пшырэ псэушъхьэхэри, ошъогу бзыухэри, сыда пІомэ Сэ ахэр къызэрэзгъэшІыгъэхэмкІэ сыкІэгъожьыгъ». 8 Ау Нухьэ Зиусхьаныр нэшІукІэ еплъыгъ.
Псыкъиушхор
9 Мары Нухьэ икъэбар: Нухьэ зафэу, мыхъун зи зыбгъодэмылъ цІыфэу а лъэхъаным щыІэгъэ цІыфхэм ахэтыгъ; Нухьэ Тхьэм ыпашъхьэ итэу псэущтыгъэ. 10 Нухьэ къуищ иІагъ: Щэм, Хъам, Ефэт. 11 Тхьэм ыпашъхьэкІэ чІыгум тетыр зэкІэ емыкІу хъугъэу щытыгъ; бзэджагъэр ащ тизыгъ. 12 Джы мары Тхьэм ылъэгъугъ: зэкІэ чІыгум тет цІыфхэр гъогу пхэнджым зэрэрыкІохэрэм къыхэкІэу чІыгур емыкІу хъугъэ. 13 Арыти Тхьэм Нухьэ къыриІуагъ: «ЧІыгум щыпсэурэ пстэуми кІэух афэсшІынэу тесыубытагъ: ахэмэ ямыхъо-мышІагъэ чІыгур зэлъиштагъэ. Сэ зэкІэ ахэр згъэкІодыщт, ахэмэ акІыгъоу чІыгури ары. 14 Гофер чъыгым псыпхъонтэр зыфыхэшІыкІ; ащ ыкІоцІ унэ шъхьаф-шъхьафэу зэтеути, ыкІыІукІи ыкІоцІыкІи мыстхъу щыф. 15 Ар мырэущтэу шІы: псыпхъонтэрым икІыхьагъэ Іэнтэгъу шъищ, ишъомбгъуагъэ Іэнтэгъу шъэныкъу, илъэгагъэ Іэнтэгъу щэкІ. 16 Псыпхъонтэрым шъхьэ фэшІ, зы ІэнтэгъукІэ ышъхьагъыкІэ ар дэхьый, ыбгъукІэ пчъэ халъхь; ащ ыкІоцІ апэрэ, ятІонэрэ, ящэнэрэ къатхэр ерэІэх. 17 Сэ, мары, псыкъиушхо чІым къытесщэнышъ, щыІэныгъэм ыпсэ зыхэлъэу ащ тет пстэури згъэкІодыщт. ЗэкІэ чІым щыщыІэр кІодыщт. 18 Ау Сэ Іуагъэ о къыбдэсшІынышъ, о псыпхъонтэрым уихьащт, пкъохэри уишъузи, пкъомэ яшъузхэри уигъусэщтых. 19 Джащ фэдэу зыкІыгъэгъух псэ зыпыт пстэумэ ащыщэу тІурытІу, хъурэ бзырэ, ахэр псэоу о къыбдэнэнхэм пае. 20 Быбырэ лъэпкъ пэпчъ, хьэкІэ-къокІэ лъэпкъхэм, чІыгум сыдрэ щыцохъорэ-щыпшырэмэ ащыщэу тІурытІу, псэоу къэнэнхэм пае, уадэжь къерэхь. 21 Сыд фэдэрэ шхыныгъуи зыдашт, ощ паий, ахэмэ апаий гъэтІылъых». 22 Тхьэм къызэрэриІуагъэм фэдэу, Нухьэ зэкІэ ышІыгъ.
Псыкъиушхор къызэрежьагъэр
1 Зиусхьаным Нухьэ къыриІуагъ: «Ори уиунагъуи псыпхъонтэрым шъуихь. Непэрэ цІыфхэм ащыщэу сапашъхьэ щызафэу Сэ о зызакъор ары слъэгъурэр. 2 ЗэкІэ псэушъхьэ къабзэмэ ащыщэу хъурэ бзырэ, тІурытІоу блы, псэушъхьэ мыкъабзэмэ ащыщэу зы хъурэ зы бзырэ зыдашт. 3 Джарэущтэу ошъогу бзыумэ ащыщэу хъурэ бзырэ, тІурытІоу блы зыкІыгъэгъух, ахэмэ ялъэпкъи чІыгум къытенэнэу. 4 Мэфибл зытешІэкІэ, Сэ чІыгум мэфэ тІокІитІурэ чэщ тІокІитІурэ ощхыр къытезгъэщхэщт, зэкІэ Сэ къэзгъэшІыгъэу щыІэр чІышъхьашъом тезгъэкІодыкІыщт». 5 Зиусхьаным унашъоу къыфишІыгъэр зэкІэ Нухьэ ыгъэцэкІагъ. 6 Псыкъиушхор чІыгум къызэкІом, Нухьэ илъэс шъих ыныбжьыгъ. 7 Псыкъиушхом хэмыфэнхэм пае Нухьи, ащ ыкъохэри, ишъузи, ыкъомэ яшъузхэри псыпхъонтэрым ихьагъэх; 8 былым къабзэхэми, бзыухэми, былым мыкъабзэхэми, чІыгум щыцохъорэ-щыпшырэ псэушъхьэ пстэуми ащыщэу 9 тІурытІоу, хъурэ бзырэ, Нухьэ дэжь псыпхъонтэрым ихьагъэх Тхьэм Нухьэ унашъо къызэрэфишІыгъэм фэдэу. 10 Мэфибл зытешІэм, псыкъиушхор чІыгум къэкІуагъ. 11 Нухьэ ыныбжь илъэс шъихым зетым, ятІонэрэ мазэм, мазэм ияпшІыкІублэнэрэ мафэм, архъонэ-хъоушхом ыІухэр къызэІукІыгъэх, зэІукІыгъэх ошъогум ипчъэхэр – 12 къытещхагъ ощхыр чІыгум мэфэ тІокІитІурэ чэщ тІокІитІурэ. 13 А мэфэ дэдэм псыпхъонтэрым ихьагъэх Нухьи, Нухьэ ыкъохэу Щэми, Хъами, Ефэти, Нухьэ ишъузи, ыкъомэ яшъузхэри акІыгъухэу. 14 Ахэмэ ягъусагъэх зэкІэ хьэкІэ-къокІэ зэфэшъхьафэу, сыд фэдэрэ былымэу, чІылъэм зэкІэ щыцохъорэ-щыпшырэ псэушъхьэу, зэкІэ бзыоу, зэкІэ тамэ зиІэу щыІэр. 15 Ахэр зэкІэ Нухьэ дэжь псыпхъонтэрым ихьагъэх, тІурытІоу, псэ зиІэ сыд фэдэрэ псэушъхьи, 16 лъэпкъэгъу пэпчъ хъурэ бзырэ, Тхьэм Нухьэ унашъо къызэрэфишІыгъэм тетэу. Зиусхьаным ащ ыуж псыпхъонтэрым ипчъэ фишІыжьыгъ. 17 Мэфэ тІокІитІум къыкІоцІ псым икъэкІон зэпыугъэп. Псым къыхахъозэ, псыпхъонтэрыр лъагэу чІыгум тыриІэтыкІыгъ. 18 Ежь псыр къэлъэшызэ, чІыгур чІихьэщтыгъэ. Псыпхъонтэрыр псыкІыІум щесыщтыгъэ. 19 Псым нахь къыхахъозэ, уашъом ычІэгъ анахь къушъхьэ лъагэу чІэтхэр псычІэгъ хъугъэх. 20 Іэнтэгъу пшІыкІутфэу псым ахэмэ акІыІу зыщиІэти, къушъхьэхэр ыгъэбылъыгъэх. 21 Джащыгъум зэкІэ чІыгум щыщыІэгъэ пстэури кІодыгъэ: бзыухэри, былымхэри, хьэкІэ-къуакІэхэри, зэкІэ чІыгум щыцуахъохэри, зэкІэ цІыфхэри. 22 ЩыІэныгъэм ижьыкъащэ зыпэбзый итэу чІышъхьашъом тетыгъэ пстэури ащ хэкІодагъ. 23 Сыд лІэужыгъорэ псэушъхьэу чІышъхьашъом тетыгъэр Зиусхьаным ыгъэкІодыгъ. ЦІыфхэри, хьакІэ-къуакІэхэри, былымхэри, чІыгум щыцохъорэ-щыпшырэ псэушъхьэхэри, ошъогум щыбыбхэри гъэкІодыгъэ хъугъэх. Къэнэгъэ закъор Нухьэрэ ащ псыпхъонтэрым дисыгъэхэмрэ арых. 24 Мэфишъэрэ шъэныкъорэм къыкІоцІ чІыгум псэу тетым къыхэхъуагъ.
закрыть
ЗИУСХЬАН:
( 1 СА 1 : 3 ; нэмыкІ чІыпІэхэми) – Тхьэм изэрэщыт къызэрыпІон плъэкІыщт амалхэм ащыщ. Адыгэ гущыІэу «Зиусхьаным» мэхьанэу иІэм зэфэмыдэ джурт гущыІитІумэ къарыкІрэр къеты. Апэрэр – «Адонай», Тхьэр зэрэлъэрыхьэр, Ар зэрэфэшІыгъэр мэхьанэу иІ. ЯтІонэрэ гущыІэмкІэ Тхьэм ыцІэ къыраІо, ащ къикІырэр «егъашІэм щыІэ зэпытыр». Джуртхэм мы гущыІэр зэрялъэпІэдэдэм къыхэкІэу амакъэ Іоу къаІорэп. Джурт Іэпэрытххэм Тхьэм ыцІэ защыхэтхэгъэ чІыпІэм къызысхэкІэ, ащ пае гущыІэу «Адонай» къаІо. АдыгабзэкІэ ащ къикІырэр «Зиусхьан».
Псыкъиушхор зэпыугъ
1 Тхьэр Нухьи, зэкІэ хьэкІэ-къуакІэу, былымэу ащ псыпхъонтэрым дисыгъэхэми ягупшысагъ. Арыти, Тхьэм чІыгум жьыбгъэр къытырищи, псыхэр зэкІэкІуагъэх. 2 Архъонэ-хъоушхом ыІухэр зэфэкІожьыгъэх, зэфишІыжьыгъэх ошъогум ипчъэхэр, ощхыри щигъэтыжьыгъ. 3 Псыр мэкІэ-макІэзэ чІыгум текІыжьэу ыублагъ. Мэфишъэрэ шъэныкъорэ зытешІэм ыуж, псым кІичэу фежьагъ. 4 Яблэнэрэ мазэм ияпшІыкІублэнэрэ мафэ псыпхъонтэрыр Арарат къушъхьэм къыщыуцугъ. 5 ЯпшІэнэрэ мазэм нэс псым зэпымыоу хэкІыгъ; япшІэнэрэ мазэм иапэрэ мафэ къушъхьэ шыгухэр къэлъэгъуагъэх. 6 Мэфэ тІокІитІу зытешІэм, Нухьэ псыпхъонтэрым фишІыгъэгъэ шъхьаныгъупчъэр къыІуихыгъ, 7 ащ къолэжъыр ритІупщыгъ, псыр ехыжьэу, чІыгур огъушъыжьыфэ къолэжьыр ІубыбыкІыти, къэбыбыжьыщтыгъэ. 8 Ащ ыуж Нухьэ, псыр чІыгум ехыжьыгъэмэ зэригъэшІэнэу, тхьаркъор ритІупщыгъ, 9 ау зытетІысхьан ымыгъотэу, тхьаркъом къыгъэзэжьыгъ, сыда пІомэ джыри псыр чІышъхьашъом зэфэдэкІэ тетыгъ. Нухьэ ыІэ ыщэий, ар къыубыти, псыпхъонтэрым къырихьажьыгъ. 10 Джыри мэфибл зытешІэм, ащ икІэрыкІэу тхьаркъор псыпхъонтэрым къыритІупщыгъ. 11 Пчыхьэ хъугъэу тхьаркъом къыгъэзэжьыгъ – мары зейтун чъыг тхьэпакІэ ыжэ дэлъэу, арыти Нухьэ къыгурыІуагъ псыр чІышъхьашъом зэрехыжьыгъэр. 12 Ащ джыри мэфибл тыригъашІи, тхьаркъор къыритІупщыгъ, ау ащ нахьыбэрэ ащ къыгъэзэжьыгъэп. 13 Нухьэ ыныбжь илъэс шъихырэ зырэм ежьагъэу, апэрэ мазэм иапэрэ мафэ ехъулІэу псыр чІым ехыжьыгъ. Нухьэ псыпхъонтэрым ышъхьэ къызэІуихи зэплъэм, мары псыр чІышъхьашъом ехыжьыгъ. 14 ЯтІонэрэ мазэм иятІокІэнэрэ блырэ мафэ ехъулІэу чІыгур гъушъыжьыгъэ. 15 Тхьэм Нухьэ къыриІуагъ: 16 «КъикІ псыпхъонтэрым, уишъузи, пкъохэри, пкъомэ яшъузхэри уигъусэхэу. 17 Псэ зыпытэу пкІыгъухэр зэкІэ къыздищых, сыдрэ пкъынэ-лынэ зиІэри, бзыухэри, хьакІэ-къуакІэхэри, былымхэри, чІыгум щыцохъорэ-щыпшырэ пстэури – чІыгум тиз орэхъух, лъфэрыехэу орэбагъох». 18 Нухьэ псыпхъонтэрым къикІыгъ, ыкъохэри, ишъузи, ыкъомэ яшъузхэри ащ къыдикІыгъэх. 19 ЗэкІэ хьэкІэ-къуакІэхэри, зэкІэ чІыгум щыцохъорэ-щыпшырэ псэушъхьэхэри, зэкІэ бзыухэри, зэкІэ чІыгум щыпсэухэри ежьхэм ялъэпкъэгъукІэ псыпхъонтэрым къикІыгъэх.
Тхьэм Нухьэ Іуагъэ зэрэдишІыгъэр
20 Нухьэ Зиусхьаным къурмэншІыпІэ фигъэпсыгъ; зэкІэ хьэкІэ-къокІэ, зэкІэ былым къабзэмэ, зэкІэ бзыу къабзэмэ ащыщхэр къахихи, къурмэнгъэст ышІыгъэх. 21 Зиусхьаным мэІэшІур зыІуищэзэ, Ежь зэриІожьыгъ: «ЦІыфым ыпкъ къикІыкІэ ащ нахьыбэрэ чІыгум нэлат есхыжьыщтэп. ЦІыфым игухэлъхэр икІэлэгъум къыщегъэжьагъэу бзэджэшІэным фэгъэзагъэхэми, ащ нахьыбэрэ зэкІэ псэ зыхэлъыр згъэкІодыжьыщтэп. 22 ТапэкІэ, чІыгур щэтыфэ, пхъэнымрэ хыжьынымрэ, чъыІэмрэ жъоркъымрэ, гъэмафэмрэ кІымафэмрэ, мафэмрэ чэщымрэ зэпыущтхэп».
1 Зиусхьаным Нухьэрэ ыкъохэмрэ ынэшІу къащифи, къариІуагъ: «Зыхэжъугъахъу, зыжъугъэбагъу, чІыгум тиз шъухъу. 2 Къышъущэрэщынэх, орэкІэзэзых зэкІэ чІыгум тет хьэкІэ-къуакІэхэри, зэкІэ ошъогу бзыухэри, зэкІэ чІыгум щыцохъорэ-щыпшыхэри, хы пцэжъыехэри; ахэр шъо Іэрылъхьэ къышъуфэсшІыгъэх. 3 ЗэкІэ псэушъхьэхэр гъомлапхъэу къышъосэты, уц шхъуантІэр нахьыпэкІэ къызэрэшъостыгъагъэу. 4 Ау псэр – лъыр – джыри зыхэлъ лыр шъумышхы. 5 Шъо шъупсэу хахыгъэм пае а лъыр зыгъачъэрэр, хьэкІэ-къуакІэми, цІыфми, ыкъош ищыІэныгъэ Іызыхыгъэр шъыпкъэ дэдэмкІэ згъэпщынэщт. 6 ЦІыфым ылъ зыгорэм ыгъачъэмэ, укІакІом ылъ нэмыкІым ерэгъачъ. Сыда пІомэ Тхьэм Ежь итеплъэу цІыфыр къыгъэшІыгъ. 7 Шъо зыхэжъугъахъу, зыжъугъэбагъу, чІым тиз шъухъу!» 8 Тхьэм Нухьэрэ ащ ыкъохэмрэ ариІуагъ: 9 «Мары Сэ шъори, шъо къышъукІэлъыкІощт лІэужхэми, псэ зыпытэу псыпхъонтэрым къикІыжьыгъэ пстэуми: бзыухэм, былымхэм, хьэкІэ-къуакІэхэм, зэкІэ чІыгум тет псэушъхьэхэм Іуагъэ адэсэшІы. 11 Сэ Іуагъэ Сэррэ шъоррэ тазыфагу дэсэлъхьэ: псыкъиушхом тапэкІэ зэкІэ псэ зыпытыр ыгъэкІодыжьыщтэп. Ащ нахьыбэрэ чІыгур псыкъиушхом ыхъункІэжьыщтэп». 12 ЕтІанэ Тхьэм ыІуагъ: «Сэ шъоррэ псэ зыхэлъ пстэоу шъо шъукІыгъухэмрэ зэзэгъыныгъэ къыжъудэсэшІы: Сэррэ чІыгум щыпсэухэрэмрэ тазыфагу Іуагъэу дэлъым инэшанэ хъунэу, Сэ сищабзэ-лэгъупкъопс пщэмэ ахэсэгъэуцо. 14 Сэ чІыгум ошъуапщэхэр къызышъхьарызгъахьэхэкІэ, лэгъупкъопсыр ошъуапщэмэ къащылъэгъощт. 15 Джащыгъум Сэррэ шъоррэ, зэкІэ псэ зыпытхэми тазыфагу дэлъ Іуагъэм Сегупшысэщт, ащ нахьыбэри зэкІэ псэ зыпытыр зыгъэкІодырэ псыкъиушхори щыІэжьыщтэп. 16 Лэгъупкъопсыр пщэмэ ахэтмэ, Сэ ар къэслъэгъунышъ, Сегупшысэщт мыкІодыжьын Іуагъэу Сэррэ чІым тет пстэухэмрэ тазыфагу дэлъым». 17 Тхьэм Нухьэ къыриІуагъ: «Джары Сэррэ чІым щыпсэурэ пстэухэмрэ тазыфагу Іуагъэу дэлъым инэшанэр».
Нухьэрэ ыкъохэмрэ
18 Нухьэ ыкъохэу псыпхъонтэрым къикІыгъэхэр: Щэм, Хъам, Ефэт. Хъам КъэнаІан ятагъ. 19 А нэбгырищыр Нухьэ ыкъуагъэх, чІыгум тет цІыф лъэпкъхэр зэкІэ ахэмэ къатекІыгъэх. 20 Нухьэ чІыгур ылэжьыщтыгъэ, ары апэрэу сэнашъхьэр зыгъэтІысхьагъэр. 21 Санэ ешъуи, Нухьэ утэшъуагъэ хъугъэу ищэтырэ пцІанэу чІэлъыгъ. 22 КъэнаІан ятэу Хъамэ ар зэрэпцІанэр зелъэгъум, къикІыжьи, ылъэгъугъэр ышитІу къафиІотагъ. 23 Щэмырэ Ефэтрэ щыгъынхэр атамэмэ атырадзыхи, кІыбкІэ зэкІакІохэзэ, ятэ дэжь чІахьэхи, ятэ ипцІэнагъэ агъэбылъыгъ. Анэгухэр фагъэзагъэхэпти, ятэ ипцІэнагъэ ахэмэ алъэгъугъэп. 24 Нухьэ зэшъогъэ санэр кІэкІыжьыгъэу къэущыжьыгъ, ыкъо нахьыкІэ къыришІагъэр зешІэм, 25 къыІуагъ: «КъэнаІан нэлатыр терэф. Ар ышыхэм япщылІхэм япщылІыжьэу хъущт». 26 ЕтІани къыІуагъ: «Зиусхьанэу Щэм и Тхьэ щытхъушхор ий! КъэнаІан ежь ыкъошмэ пщылІы афэхъущт. 27 Ефэт ыІэ илъмэ Тхьэм ахерэгъахъу! Щэм ищатырмэ Ефэт ащэрэпсэу! Ежь КъэнаІан Щэмы пщылІы фэхъущт». 28 Псыкъиушхом ыуж Нухьэ джыри илъэс шъищырэ шъэныкъорэ къыгъэшІэжьыгъ. 29 Илъэс шъибгъурэ шъэныкъорэ къыгъашІи, Нухьэ лІагъэ.
Нухьэ къытекІыгъэ лъэпкъхэр
1 Мары Нухьэ ыкъохэу Щэм, Хъам, Ефэт ыкІи ахэмэ къатекІыгъэмэ якъэбар. Псыкъиушхом ыуж ахэмэ сабыйхэр къафэхъугъэх. 2 Ефэт ыкъохэр: Гомэр, Магогъ, Мадай, Яуан, Тубал, Мэщэх, Тирас. 3 Гомэр ыкъохэр: Ащкъэназ, Рыфат, Тогъармэ. 4 Яуан ыкъохэр: Елищэ, Тарщищ, къыт цІыфхэмрэ додан цІыфхэмрэ. 5 Ахэр хыгъэхъунэ, хыІушъо хэгъэгумэ арытІысхьагъэх. Джащ фэдэх ячІыгухэр, ялІакъохэр, ялъэпкъхэр, хэти ежь ыбзэ иІагъ. 6 Хъам ыкъохэр: Куш, Мицраим, Пут, КъэнаІан. 7 Куш ыкъохэр: Сэбэ, Хъауилэ, Саутэ, РаІымэ, Саутэхэ. РаІымэ ыкъохэр: Щэбэрэ Дэданрэ. 8 Куш джащ фэдэу Нымроди къыфэхъугъ – апэрэ лІыхъужъэу чІыгум тетыгъэр. 9 Зиусхьаным иІэмыркІэ ар шэкІо лъэшыгъ, джары зыкІаІори: Нымрод фэдэу, Зиусхьаным иІэмыркІэ ар шэкІо лъэш. 10 Ащ ипачъыхьагъу апэ дэдэ хэтыгъэхэр: Бабилэн, Ерэх, Акъад къалэхэр, ахэр зэкІэ ЩынІар хэгъэгум щыІагъэх. 11 А хэгъэгум ар къикІи, Ашур хэгъэгум кІуагъэ, Нынэуй, Рэхъобот-Іир, Къалахъ къалэхэр ащ щигъэуцугъэх; 12 Нынэуймрэ Къалахъ къэлэшхомрэ азыфагу дэт Рэсэни ащ ыгъэуцугъ. 13 Мицраим къытекІыгъэх: луд, Іанам, лэхау, нафтухъ, 14 патрус цІыфхэр, фылист цІыфхэр къызхэкІыгъэ къаслухъ, къафтор цІыфхэр. 15 КъэнаІан къытекІыгъэх: ащ ищыпэлъф Цыдон, Хьат, 16 цІыф лъэпкъхэу еус, амор, гъыргъащ, 17 хъыу, Іаркъхэр, синхэр, арудхэр, цэмархэр, хъаматхэр. 18 Аруад, цэмар, хъамат цІыфхэр. Нэужым къэнаІан лІакъохэр зэбгырыкІыгъэх. 19 КъэнаІан цІыфхэм ячІыгу гъунапкъэ – Цыдон къыщегъэжьагъэу, ГъэраркІэ гъэзагъэу Іазэ нэс, ащ къыщегъэжьагъэу Сэдом, Іаморэ, Адмэрэ Цэбоимрэ къызэдиубытыхэу ЛэщаІ нэс. 20 Ахэр арых Хъам къытекІыгъэхэр ялІакъохэмкІи, абзэхэмкІи, ячІыгухэмкІи, яцІыф лъэпкъыкІи. 21 Ефэт ышнахьыжъэу Шеми сабыйхэр къыфэхъугъэх. Ар Іэбэр зэкІэ ыкъохэм ятэпІэшъагъ. 22 Щэм ыкъохэр: Іэлам, Ашур, Арпахщад, Луд, Арам. Мыхэр ежьхэм ацІэкІэ зэджэгъэхэ цІыф лъэпкъхэм ятэпІашъэх. 23 Арам ыкъохэр: Іуц, Хъул, Гъэтэр, Мащ. Мыхэр ежьхэм ацІэкІэ зэджэгъэхэ цІыф лъэпкъхэм ятэпІашъэх. 24 Арпахщад Щэлахъ къыфэхъугъ, Щэлахъи Іэбэр къыфэхъугъ. 25 Іэбэр къуитІу къыфэхъугъ, зым ыцІагъэр Пэлэгъ, сыда пІомэ ащ илъэхъан чІыгур зэфагощыгъ, ащ ыш ыцІагъэр Якътан. 26 Якътан къыфэхъугъэх: Алмодад, Щэлеф, Хъацармаот, Ярахъ 27 Хадорам, Узал, Дикълэ, 28 Іобал, Абимаел, Щэбэ, 29 Офыр, Хъауилэ ыкІи Иобаб. Ахэр зэкІэ Якътан ыкъох. Мыхэр ежьхэм ацІэкІэ зэджэгъэхэ цІыф лъэпкъхэм ятэпІашъэх. 30 Ахэр зыщыпсэущтыгъэхэр Мэщэ щегъэжьагъэу Сэфар, къокІыпІэмкІэ щыІэ къушъхьэлъэ хэкум, нэсыщтыгъэх. 31 Ахэр Щэм ыкъох, ежьхэм ялІакъохэмкІэ, абзэхэмкІэ, ячІыгухэмкІэ, яцІыф лъэпкъхэмкІэ. 32 Джары Нухьэ къытекІыгъэмэ ялІакъохэр, зэрэзэтекІыгъэхэмкІэ, цІыф лъэпкъхэу зэрэхъухэрэмкІэ. Псыкъиушхом ыуж ахэмэ къатекІыхи, цІыф лъэпкъхэр чІыгум щызэбгырыкІыгъэх.
Бабилэн плъэпІэ лъагэр
1 А лъэхъаным чІыгум изэфэдэкІэ зы бзэрэ зы гущыІакІэрэ тетыгъэр. 2 КъокІыпІэмкІэ къыщежьэхи, цІыфхэм ЩынІар хэгъэгум чІы зэшъхьэзашъо къыщагъоти, ащ тетІысхьагъэх. 3 Ахэмэ зэраІожьыгъэ: «Чырбыщхэр ятІэм хэтэжъугъэшІыкІи, машІокІэ тэжъугъэгъэжъэжь». Мыжъомэ ачІыпІэкІэ ахэмэ чырбыщхэр яІэ хъугъэ, етІэфым ычІыпІэкІэ – чІыгум къыхэкІырэ мыстхъур. 4 ЕтІанэ ахэмэ аІуагъ: «Къалэ зыфэтэжъугъэуцужьи, плъэпІэ лъагэ тетэу ошъогум нэсэу; лъэужынчъэу чІыгум итэкъухьагъэ тыщымыхъузэ, тищытхъу ядгъэІон». 5 ЕтІанэ цІыфхэм ашІырэ къалэмрэ плъэпІэ лъагэмрэ яплъынэу Зиусхьаныр къехыгъ. 6 Зиусхьаным къыІуагъ: «Мары мыр зы цІыф лъэпкъ, зэкІэми зы бзэ яІэри. Мыр етІани яІофмэ япэубл ныІэп! Сыд Іоф фежьэхэми, афэукІочІыщт! 7 Адэжь техынышъ, ахэмэ абзэ зэхэдгъэкІухьан, зым къыІорэр адрэм гурымыІонэу». 8 Арыти Зиусхьаным ахэр ащ къыщегъэжьагъэу чІыгум зэфэдэкІэ щыритэкъухьагъэх, ащ къыхэкІэу ахэмэ къалэр аухыгъэп. 9 Ащ къыхэкІэу ащ Бабилэн цІэу фашІыгъ, сыда пІомэ Зиусхьаным чІыгум цІыфмэ абзэхэу тетхэр зэкІэ зэхигъэкІухьэгъэх, ащ къыщиубли, чІыгум изэфэдэкІэ щыритэкъухьагъэх.
Щэм къытекІыгъэхэр Ибрам нэс
10 Мары Щэмрэ ащ къытекІыгъэхэмрэ якъэбар: Щэм илъэсишъэ ыныбжьэу, псыкъиушхом ыуж илъэситІу тешІагъэу, Арпахщад къыфэхъугъ. 11 Арпахщад къызэхъум ыуж, Щэм илъэс шъитф къыгъэшІэжьыгъ, къохэри, пхъухэри къыфэхъугъэх. 12 Арпахщад илъэс щэкІырэ тфырэ къыгъэшІагъэу Шэлах къыфэхъугъ. 13 Шэлах къызэхъум ыуж, Арпахщад илъэс шъиплІырэ щырэ къыгъэшІэжьыгъ, джыри къохэри, пхъухэри къыфэхъугъэх. 14 Шэлах илъэс щэкІ къыгъэшІагъэу Іэбэр къыфэхъугъ. 15 Іэбэр къызэхъум ыуж, Шэлах илъэс шъиплІырэ щырэ къыгъэшІэжьыгъ, къохэри, пхъухэри джыри къыфэхъугъэх. 16 Іэбэр илъэс щэкІырэ плІырэ къыгъэшІагъэу Пэлэгъ къыфэхъугъ. 17 Пэлэгъ къызыхъугъэм ыуж, Іэбэр илъэс шъиплІырэ щэкІырэ къыгъэшІэжьыгъ, къохэри, пхъухэри джыри къыфэхъугъэх. 18 Пэлэгъ илъэс щэкІ къыгъэшІагъэу РэІу къыфэхъугъ. 19 РэІу къызыхъугъэм ыуж, Пэлэгъ илъэс шъитІурэ бгъурэ къыгъэшІэжьыгъ, къохэри, пхъухэри джыри къыфэхъугъэх. 20 РэІу илъэс щэкІырэ тІурэ къыгъэшІагъэу Сэрыугъ къыфэхъугъ. 21 Сэрыугъ къызыхъугъэм ыуж, РэІу илъэс шъитІурэ блырэ къыгъэшІэжьыгъ, къохэри, пхъухэри джыри къыфэхъугъэх. 22 Сэрыугъ илъэс щэкІ къыгъэшІагъэу Нахъор къыфэхъугъ. 23 Нахъор къызыхъугъэм ыуж, Сэрыугъ илъэс шъитІу къыгъэшІэжьыгъ, къохэри, пхъухэри джыри къыфэхъугъэх. 24 Нахъор илъэс тІокІырэ бгъурэ къыгъэшІагъэу Тэрахъ къыфэхъугъ. 25 Тэрахъ къызыхъугъэм ыуж, Нахъор илъэсишъэрэ пшІыкІубгъурэ къыгъэшІэжьыгъ, къохэри, пхъухэри джыри къыфэхъугъэх. 26 Тэрахъ илъэс тІокІищырэ пшІырэ къыгъэшІагъэу Ибрами, Нахъори, Харани къыфэхъугъэх. 27 Мары Тэрахърэ ащ къытекІыгъэхэмрэ якъэбар: Тэрахъ Ибрам, Нахъор, Харан къыфэхъугъэх. Харан Лот къыфэхъугъ. Пшъашъэхэу Мылкъэрэ Искъэрэ къыфэхъугъэх. 28 Харан, ятэу Тэрахъ псаоу щыІэу, къызщыхъугъэ чІыгоу Урэ, Къасдый хэгъэгум щыІэм щылІагъ. 29 Ибрамрэ Нахъоррэ шъузхэр къащагъэх: Ибрам ишъуз ыцІагъэр Сарай, Нахъор ишъуз ыцІагъэр Мылкъэ; ащи, ащ ыпхъоу Искъи ятагъэр Харан. 30 Сарай сабый хэкІынэу щытыгъэпти, сабыинчъагъ. 31 Тэрахъ ежь ыкъоу Ибрам, Харан ыкъо Лотэу ежь ипхъорэлъфыр, инысэ Сараеу ежь ыкъо Ибрам ишъузыр зыдырищажьэхи, ахэр игъусэхэу КъэнаІан хэгъэгум кІонхэу, Къасдый хэгъэгум ит Ур къалэм дэкІыгъэх. Хъаран хэгъэгум нэсхи, ащ къыщыуцугъэх; 32 Тэрахъ къыгъэшІагъэр илъэс шъитІурэ тфырэ хъугъэу, Хъаран хэгъэгум щылІагъ.
Тхьэр Ибрам къызэреджагъэр
1 Зиусхьаным Ибрам къыриІуагъ: «О уихэгъэгу икІи, уиІахьылхэри, уятэ иуни къэбгынэхи, Сэ чІыгоу къыозгъэлъэгъурэм кІо. 2 Сэ о лъэпкъышхо къыптезгъэкІыщт, сынэшІу къыпщысфэщт, пцІэ инэу хэсІэтыкІыщт, Тхьэм ынэшІу ащифэныр къызбгъодэкІыщтыр оры. 3 О зынэшІу къыпщыфэхэрэм Сэ СынэшІу ащысфэщт! Нэлат къыозыххэрэм Сэ нэлат ясхыщт! ЧІыгум тет лъэпкъ пстэуми СынэшІу ащысфэщт о уихьатыркІэ». 4 Зиусхьаным къызэрэриІуагъэу Ибрам кІуагъэ; ащ игъусэу Лотэ кІуагъэ. Ибрам Хъаран зекІыжьым, илъэс тІокІищырэ пшІыкІутфырэ ыныбжьыгъ. 5 Ибрам ишъузэу Сарай зыригъэгъусагъ, ышы ыкъоу Лоти, ежьхэм зэкІэ мылъкоу зэрагъэуІугъэри, зэкІэ цІыфэу Хъаран щыряІагъэри КъэнаІан зыдырищэжьагъэх. КъэнаІан чІыгум ихьэхи, 6 Щэхэм къалэ пэблагъэу щыІэ Морэ щыт чъыгаем къэсыгъэх. А лъэхъаным а чІыгум къэнаІан цІыфхэр щыпсэущтыгъэх. 7 Ащ Зиусхьаныр Ибрам къыщыфэлъагъуи, къыриІуагъ: «О птекІыщт цІыфхэм мы чІыгур ястыщт!» Къыфэлъэгъогъэ Зиусхьаным пае Ибрам къурмэншІыпІэ а чІыпІэм щишІыгъ. 8 Ащ икІи, ар къушъхьэлъэ хэкоу Бэтэл ылъэныкъокІэ щыІэм ежьагъ; къохьапІэмкІэ щыІэ Бэтэлрэ къокІыпІэмкІэ щыІэ Іай къалэрэ азыфагу ищэтыр щигъэуцугъ. Зиусхьаным ащ къурмэншІыпІэ щыфигъэуцугъ, Тхьэм Зиусхьан фиуси, ыгъэлъапІэзэ, елъэІоу ригъэжьагъ. 9 ЕтІанэ Ибрам къыблэ лъэныкъом щыІэ шъоф нэкІым кІонэу ежьагъ.
Ибрам Мысырым зэрэщыІагъэр
10 А чІыгум гъаблэ къыщежьагъ, къежьагъэр гъэблэшхоти, Ибрам Мысырым щыхымэу псэупІэ щылъыхъун фаеу хъугъэ. 11 Мысырым ар пэблагъэ зэхъум, ишъузэу Сарай риІуагъ: «Узэрэдахэр сэ сэшІэ. 12 Мысыр хъулъфыгъэмэ узалъэгъукІэ, узэрэсишъузыр къагурыІонышъ, сэ саукІыщт, о псэоу укъагъэнэщт. 13 Сэ о усшэу яІуи, о уихьатыркІэ сэ дэгъоу къыспэгъокІынхэшъ, о сищыІэныгъэ къэбгъэнэжьыщт». 14 Ары зэрэхъугъэри, Ибрам Мысырым къызэсым, Сарай зэрэдэхэ дэдэр мысыр цІыфхэм алъэгъугъ. 15 Фирхьауным ицІыф Іэшъхьэтетхэм ар залъэгъум, фирхьауным ащ идэхагъэ фыщытхъухэу рагъажьи, Сарай фирхьауным иунэ-хапІэ ащагъ. 16 Сарай ихьатыркІэ Ибрам дэгъоу къыпэгъокІыгъэх: ащ иІэ хъугъэх мэл-пчэнхэри, былым пІашъэхэри, щыдхэри, унэІут хъулъфыгъэхэри, бзылъфыгъэхэри, щыдыбзхэри, махъшэхэри. 17 Ау Ибрам ишъузэу Сарай фирхьауным зэриштагъэм пае, фирхьауными ащ зэкІэ иунэ-хапІэ щыпсэурэ цІыфхэми Зиусхьаным уз Іаехэр къафигъэкІуагъэх. 18 Арыти, фирхьауныр Ибрам къеджи, къыриІуагъ: «Сыда о къысэпшІагъэр? Ар уишъузэу зэрэщытыр сыда къызкІысэмыІуагъэр? 19 Сыд пае ар о пшыпхъоу пІуагъа? Сэ ар сшІошъ хъуи, ар шъузкІэ сштагъэ! Уишъуз штэжьи, ІукІыжь!» 20 Фирхьауным унашъо афишІыгъ Ибрами, ишъузи, зэкІэ мылъкоу иІэри кІыгъухэу, къырагъэкІынхэу.
Ибрамрэ Лотрэ зэрэзэбгъодэкІыгъэхэр
1 Ибрам Мысырым икІыжьи, къыблэ лъэныкъом щыІэ шъоф нэкІым ыгъэзэжьыгъ ишъузи имылъкуи зэкІэ кІыгъухэу. Лоти ащ дикІыжьыгъ. 2 Ибрам бай дэд хъугъагъэ – былымкІи, тыжьынкІи, дышъэкІи. 3 Шъоф нэкІым къикІыжьи, ар гъогум техьагъ, Бэтэлрэ Іай къалэмрэ азыфагу щэтырыр зыщигъэуцугъагъэм къэсыфэ къэкІуагъ, 4 къурмэншІыпІэр нахьыпэкІэ зыщигъэуцугъагъэм. Ащ Ибрам ыгъэлъапІэзэ Зиусхьаным щелъэІугъ. 5 Лотэу Ибрам кІыгъугъэми мэл-пчэнхэри, былым пІашъэхэри, унагъуи, унэІутхэри иІагъэх. 6 НэбгыритІумэ чІыгоу яІэр афырикъущтыгъэп: былымэу яІэр зэрэбэм къыхэкІэу зэгъусэхэу зэдыщыІэнхэ амылъэкІыжьы хъугъэ. 7 Ащ къыхэкІэу Ибрам иІахъохэмрэ Лотэ иІахъохэмрэ зэщыхьэщтыгъэх. КъэнаІан цІыфхэри пэрыц цІыфхэри а лъэхъаным а чІыгум щыпсэущтыгъэх. 8 Ибрам Лотэ риІуагъ: «Оррэ сэррэ тазыфагуи, о уиІахъохэми сэ сиІахъохэми азыфагуи зэмызэгъыныгъэ къимыхьанэу тэгъэшІы: тэ тызэкъошба! 9 ЧІыгур зэкІэ о уапашъхьэ илъба? ТызэшІогъэкІ. О сэмэгумкІэ бгъазэмэ, сэ джабгъумкІэ згъэзэщт, о джабгъумкІэ бгъазэмэ, сэ сэмэгумкІэ згъэзэщт». 10 Иордан кІэир зэрэщытэу – ЦэуІар шъыпкъэм нэс – Зиусхьаным ичъыгхатэ фэдэу, Мысыр хэгъэгум фэдэу, псым зэригъэшъокІырэр Лотэ ылъэгъугъ – аущтэу зыщытыгъэр Зиусхьаным Сэдомрэ Іаморэрэ ымыгъэкІодызэ ары. 11 Арыти Лотэ Иордан кІэир къыхихи, къокІыпІэмкІэ ежьагъ. Аущтэу ахэр зэгокІыгъэх: 12 Ибрам КъэнаІан хэгъэгум щыпсэоу, Лотэ – кІэим иІэгъо-блэгъумэ ащыІэ къалэхэм ащыпсэоу ригъэжьагъ, ищэтырхэр Сэдом нэсэу щигъэІагъэх. 13 Сэдом щыпсэухэрэр бзэджагъэх, Зиусхьаным ыпашъхьэ псэкІодыбэхэр щыряІагъэх. 14 Лот зыгокІым ыуж, Зиусхьаным Ибрам къыриІуагъ: «Зыплъыхь! Уздэщыт чІыпІэм щегъэжьагъэу плъэ темырымкІи, къыблэмкІи, къокІыпІэмкІи, къохьапІэмкІи. 15 Мы чІыгоу плъэгъурэр зэрэщытэу ори птекІыщтхэми егъашІэм шъуиІэнэу Сэ къышъостыщт. 16 О лъэпкъэу птекІырэр пшахъом фэдэу згъэбэгъощт: чІыгум телъ сапэр зэрафэмылъытэнэу, о къыптекІыщтхэри афэлъытэщтхэп. 17 ЗыІэти, мы чІыгум икІыхьагъэкІи ишъомбгъуагъэкІи рыкІу, сыда пІомэ Сэ ар о къыосэты». 18 Зы чІыпІэм икІымэ, адрэм кІозэ, Ибрам Хъэурэн къалэм щыІэ Мамрэ чъыгэялъэм къэси, ащ щытІысыгъ. Ащ дэжьым Зиусхьаным къурмэншІыпІэ щыфигъэуцугъ.
Ибрам пыйхэм Лотэ къызэрэІакІихыжьыгъэр
1 ЩынІар ипачъыхьэу Амрафэл, Еласарым ипачъыхьэу Ариох, Елам ипачъыхьэу КъэдарлаІомэр, Гой ипачъыхьэу ТыдыІал 2 заокІэ якІугъэх Сэдом ипачъыхьэу БэраІ, Іаморэ ипачъыхьэу БирщаІ, Адмэ къалэ ипачъыхьэу Щынаб, Цэбоим ипачъыхьэу Щэмэбэр, БэлаІ къалэ – джырэ ЦэуІар – ипачъыхьэ. 3 Ахэмэ Сидим кІэим – джы Хы Щыугъэр зыдэщыІэм дэжь – дзэхэр щаугъоигъагъэх. 4 Илъэс пшІыкІутІурэ ахэр КъэдарлаІомэр ыІэ илъыгъэх, ау япшІыкІущэнэрэ илъэсым зыкъаІэтыгъ. 5 ЯпшІыкІуплІэнэрэ илъэсым КъэдарлаІомэр, икъотэгъу пачъыхьэхэр кІыгъухэу къакІохи, Іаштэрот-Къарнаим щыпсэурэ рэф цІыфхэм, Хъам щыпсэурэ зуз цІыфхэм, Щао-Къыриатаим щыпсэурэ ем цІыфхэм, 6 СэІир къушъхьэм, шъоф нэкІым ит Ел-Паран нэсэу щыпсэурэ хор цІыфхэм атекІуагъэх. 7 Ащ къикІыжьхи, псыкъэкІуапІэу Іэн-Мышпат, джы Къадэщ зыфаІорэм, къэкІуагъэх, Іамалэкъ цІыфхэм яхэгъэгу зэрэпсэоу, Хъацэцэн-Тамар щыпсэурэ амор цІыфхэми атекІуагъэх. 8 ЕтІанэ Сэдом ипачъыхьи, Іаморэ ипачъыхьи, Адмэ ипачъыхьи, Цэбоим ипачъыхьи, БэлаІ къалэ – ЦэуІар ары – ипачъыхьи къыдэкІыхи, Сидим кІэим заор къащыдаублагъ 9 Елам ипачъыхьэу КъэдарлаІомэр, Гой ипачъыхьэу ТыдыІал, ЩынІар ипачъыхьэу Амрафэл, Еласар ипачъыхьэу Ариох. ПачъыхьиплІыр пачъыхьитфымэ апэуцугъ. 10 Сидим кІэим мыстхъу мэшабэ иІагъ. Сэдомрэ Іаморэрэ япачъыхьэхэу кІэзыІэжьыгъэхэм ягъусагъэмэ ащыщыбэхэр ахэмэ арыфагъ; къэнэжьыгъэхэр къушъхьэм хэхьажьыгъэх. 11 Сэдомрэ Іаморэрэ мылъкоу адэлъыр, гъэтІылъыгъэу яІагъэхэр зэкІэ ашти, текІуагъэхэр кІожьыгъэх. 12 Лоти, Ибрам ипхъорэлъфэу Сэдом дэсыгъэр, ащ имылъкуи зыдащагъ. 13 Псэоу къэнэжьыгъэмэ ащыщэу зы нэбгырэ къакІуи, джуртэу Ибрам къэбар ригъэшІагъ. Ибрам амор цІыфхэм ащыщэу Мамрэ зыцІэм ичъыгэялъэ дэжь щыпсэущтыгъэ. А Мамре ыкъошхэу Ещколэрэ Іанэрэрэ Ибрам икъотэгъухэу щытыгъэх. 14 Ыкъош гъэры хъугъэу зызэхехым, Ибрам иунэІутхэу, иунэ къихъухьагъэхэу, нэбгырэ шъищрэ пшІыкІуйрэ ыуІэши, Дан нэсыфэ пыйхэм алъычъагъ. 15 Чэщым Ибрам идзэ ыгощи, ахэмэ ежьыми ицІыфхэми пыйхэр къадзыхьэхи, зэхакъутагъэх, Хъобэ, Дамаск итемыркІэ щыІэм нэс афыгъэх. 16 ЗэкІэ мылъкури ыкъошэу Лоти, ащ имылъкуи, бзылъфыгъэхэри, гъэрхэри къыщэжьыгъэх.
Ибрам Малкъыцэдэкъ къызэрэІукІагъэр
17 КъэдарлаІомэррэ ащ игъусэгъэ пачъыхьэхэмрэ атекІуи, Ибрам къызегъэзэжьым, кІэеу Щао, непэ Пачъыхьэ кІэй зыфаІорэм дэжь, Сэдом ипачъыхьэ ащ къыщыпэгъокІыгъ. 18 Малкъыцэдэкъ, Щалэм ипачъыхьэ, хьалыгъурэ санэрэ ащ къыпигъохыгъ. Тхьэу зэкІэмэ анахь Иным ар икъурмэнышІэу щытыгъ. 19 Ащ ынэшІу къыщифи, къыриІуагъ: «Тхьэу зэкІэмэ анахь Иным Ибрам ынэшІу къыщэф, чІыгуи огуи КъэзыгъэшІыгъэхэм! 20 Щытхъур ий Тхьэу зэкІэмэ анахь Иным, уипыйхэр пІэ къизылъхьагъэхэм!» Ибрам мылъкоу иІэм иІахь пшІанэ Малкъыцэдэкъ ритыгъ. 21 Сэдом ипачъыхьэ Ибрам къыриІуагъ: «СицІыфхэр сэ къысэтыжьхи, о мылъкур къызфэгъан». 22 Ибрам джэуап ритыжьыгъ: «Зиусхьаным, Тхьэу зэкІэмэ анахь Иным, уашъомрэ чІыгумрэ КъэзыгъэшІыгъэм, сІэ фэсэІэтышъ, тхьэлъанэ сэшІы 23 зы Іудани, цокъэ лъэпси о уиІэм щыщэу сымыштэнкІэ. „Ибрам бай сшІыгъэ“ умыІожь нэужым. 24 СицІыфмэ ашхыгъэм текІодагъэм нэмыкІ сэ сыфаеп. Заом къыздежьагъэхэу Іанэри, Эшколи, Мамреий яІахь аІорэкІ».
Тхьэм Ибрахьимэ Іуагъэ зэрэдишІыгъэр
1 А хъугъэ-шІагъэхэм ауж Зиусхьаным Ибрам зыкъыфигъэлъагъуи, ипсалъэ къылъыІэсыгъ: «Умыщын, Ибрам, Сэ – о сыуимэІу. О ІахьышІоу къыпІукІэщтыр ин дэдэщт». 2 Ау Ибрам къыІуагъ: «ЗэкІэри зыІэ илъэу Зиусхьан! Сыда О къысэптыщтым есшІэщтыр, лъфыгъэнчъэу сылІэщтмэ? СикІэн зыІукІэжьыщтыр Дамаск щыщэу мы ЕлыІэзэр ары. 3 Мары, О бын къысэптыгъэпышъ, – къыпигъэхъожьыгъ Ибрам, – сиунэІут ары симылъку къызфэнэжьыщтыр». 4 Зиусхьаным игущыІэ Ибрам къылъыІэсыгъ: «Хьау, уикІэн о ащ ІукІэщтэп: уикІэн зыІукІэщтыр о ппкъынэ-лынэ хэкІыщт!» 5 Зиусхьаным Ибрам щатырым къычІищи, къыриІуагъ: «Уашъом дэплъыий, жъуагъохэр къэлъытэх, къыпфэлъытэщтха ахэр? Джащ фэдиз о птекІыщтхэм япчъагъэ». 6 Зиусхьаным къыриІуагъэр Ибрам ышІошъ хъугъэ, ащ пае Зиусхьаным ащ зэфагъэ иІэу ылъытагъ. 7 Зиусхьаным ащ къыриІуагъ: «Сэры Зиусхьанэу Халде хэгъэгум ит къалэу Урэ укъыдэзыщыжьыгъэр мы чІыгур о уиунаеу къыостыным пае». 8 Ибрам ыІуагъ: «ЗэкІэри зыІэ илъэу Зиусхьан! Мы чІыгур сэсыеу зэрэхъущтыр сыдэущтэу зэзгъэшІэщта?» 9 Зиусхьаным ащ къыриІуагъ: «Илъэсищ зыныбжь танэ Сэ къысфащ, илъэсищ зыныбжь пчэни, илъэсищ зыныбжь тІи, тхьэркъо цІыкІу лъэпкъэу зырэ тхьэркъо ныбжьыкІэрэ». 10 Ахэр зэкІэ ащ къыгъотхи, зэфэдитІоу зэгуиупкІыгъэх, зы Іахьэр адрэм пэІуилъхьагъ, бзыухэр зэгуиупкІыгъэхэп. 11 УкІыгъэу щылъмэ къолэбзыу цунтхъакІохэр къатебыбагъэх, ау Ибрам ахэр Іуифыгъэх. 12 Тыгъэр къуахьэ зэхъум, Ибрам чъые пытэм хилъэсагъ. Щынэгъошхомрэ шІункІымрэ ащ къытеуагъэх. 13 ЕтІанэ Зиусхьаным Ибрам къыриІуагъ: «О бынэу птекІыщтхэр ямычІыгум хымэ зэрэщыхъущтхэр шъыпкъэ дэдэмкІэ зэгъашІэ, ахэр ащ щагъэпщылІыщтых, егъэзыгъэхэу илъэс шъиплІым къыкІоцІ щаІыгъыщтых. 14 Ау Сэ цІыф лъэпкъэу ахэр зыфэпщылІыщтхэм хьыкум тесшІыхьащт; ащ нэужым мылъкушхо яІэу къикІыжьыщтых. 15 Ори гупсэфыгъо бгъотыгъэу уятэ пІашъэхэр зыдэщыІэхэм бгъэзэжьыщт, жъышъхьэ мафэ бгъотыгъэу уагъэтІылъыжьыщт. 16 О птекІыгъэхэу яплІэнэрэ лІэужым ихьащтхэр арых мыщ къэзгъэзэжьыщтхэр, сыда пІомэ амор цІыфхэм яхэбзэнчъагъэ ащ нэс икъугъэу хъущтэп». 17 Тыгъэр къуахьи, шІункІы къызэхъум, мары, Іугъо къызэрыкІырэ табэмрэ мэшІотхъуабзэмрэ зэгоупкІыгъэхэу щылъ псэушъхьэхэм азыфагу дэкІыгъэх. 18 А мафэм Зиусхьаным Ибрам Іуагъэ дишІыгъ: «О бынэу птекІыщтхэм Сэ мы чІыгур ясэты, Мысыр псыхъом къыщегъэжьагъэу адрэ псыхъошхоу Ефрат нэс: 19 къэн, къэныз, къадмон, 20 хьат, периц, рефэ, 21 амор, къэнаІан, гъыргъаш, еус цІыфхэм ячІыгу».
Хэгъаррэ Исмахьилэрэ
1 Ибрам шъузэу иІэгъэ Сарай сабый хэкІыщтыгъэп. Сарай унэІут бзылъфыгъэ, Хэгъар ыцІэу, Мысырым щыщэу иІагъ. 2 Сарай Ибрам риІуагъ: «Зиусхьаным сабый къыситырэп. СиунэІут бзылъфыгъэ гуахь, ащ шъао къысфилъфынкІи хъун». Сарай ыІорэм Ибрам едэІугъ. 3 КъэнаІан хэгъэгум Ибрам илъэсипшІэ зыщэпсэум ыуж, ащ ишъузэу Сарай иунэІут бзылъфыгъэу, Мысырым щыщ Хэгъар шъузгуадзэкІэ ежь илІэу Ибрам ритыгъ. 4 Ибрам Хэгъар гохьагъэти, Хэгъар лъэрмыхьэ хъугъэ. Хэгъар лъэрмыхьэ зэрэхъугъэр къызешІэм, ибысымгуащэ зэримыпэсыжьэу ыублагъ. 5 Арыти Сарай Ибрам риІуагъ: «Сэ гукъаоу сиІэр оры зилажьэр; сиунэІут къыостыгъ угохьанэу, ау сабый ышъо зыхэфэм, сызэримыпэсыжьэу фежьагъ; Зиусхьаным тиІоф къызэхерэф». 6 «Мары, уиунэІут о пІэ илъ, – джэуап къытыгъ Ибрам, – епшІэ пшІоигъор ешІ». Сарай ащ пхъашэу дэзекІонэу фежьагъэти, ар ыдэжь икІыжьи, хэхьажьыгъ. 7 Зиусхьаным имэлэІич шъоф нэкІым, Шур кІорэ гъогум тет псынэкІэчъым дэжь ар щыІукІи, 8 еупчІыгъ: «Сарай иунэІутэу Хэгъар! Тыдэ укъикІэу, тыдэ укІора?» Хэгъар къыІуагъ: «Сибысымгуащэу Сарай ыдэжь сыкъикІижьи, къыкІэстхъужьыгъ». 9 Зиусхьаным имэлэІич къыІуагъ: «Уибысымгуащэ дэжь гъэзэжьи, ащ фэІорышІ. 10 ЯпчъагъэкІэ плъытэн умылъэкІыным нэсыфэ Сэ къыптекІыщтхэр згъэбэгъощтых», – къыпигъэхъуагъ Зиусхьаным имэлэІич. 11 Джыри Зиусхьаным имэлэІич ащ къыриІуагъ: «О улъэрымыхь, шъао къыпфэхъущт, Исмахьил ащ фэус, сыда пІомэ Зиусхьаным къинэу пщэчырэр къызэхихыгъ. 12 О пкъо щыд Іэлым фэдэщт; ежь зэкІэми язаоу, зэкІэ ежьым къезаоу, Ышмэ зэкІэмэ ямызэгъэу щыІэщт ар». 13 Хэгъар Зиусхьанэу ежь къыдэгущыІагъэм цІэ фишІыгъ: «Оры Ел-Рои, Тхьэу сыкъэзылъэгъурэр!» Сыда пІомэ Хэгъар къыІуагъ: «Джыдэдэм сэ сыкъэзылъэгъурэр слъэгъугъэ». 14 Ащ пае а псынэкІэчъым Бэр-Лахъай-Рои раІо. Ар зыдэщыІэр Къадэшрэ Бэрэдрэ азыфагу. 15 Хэгъар Ибрам шъао къыфилъфыгъ; Ибрам ыкъоу Хэгъар къылъфыгъэм Исмахьил фиусыгъ. 16 Хэгъар шъао къызыфелъфым, Ибрам илъэс тІокІиплІырэ хырэ ыныбжьыгъ.
Ибрам Ибрахьим зэрэхъугъэр
1 Ибрам илъэс тІокІиплІырэ пшІыкІубгъурэм итэу Зиусхьаныр ащ къыфэлъагъуи, къыриІуагъ: «Ел-Шадай Сэры, ащ къикІырэр: ЛъэкІ пстэури ЗиІэ Тхьэр. Сапашъхьэ щыпсэу, мыхъун зи къызыхэмыгъаф. 2 Іуагъэ къыбдэсшІынышъ, лІэужыбэ къыостыщт». 3 Ибрам чІыгум бгъэгукІэ зыридзыхыгъ, Тхьэм къыІуагъ: 4 «Сэ джы Іуагъэ къыбдэсэшІы. О цІыф лъэпкъыбэмэ ятэпІашъэ ухъущт. 5 Ащ нахьыбэри Ибрам пцІэжьыщтэп, ау Ибрахьим пцІэщт, сыда пІомэ Сэ лъэпкъыбэмэ ятэу о усшІыщт. 6 О уилІакъо бэдэдэ Сэ сшІыщт: цІыф лъэпкъхэри о къыптезгъэкІыщтых, пачъыхьэхэри къыптекІыщтых! 7 Сэррэ оррэ, о къыптекІыгъэхэу къыпкІэлъыкІощт лІэужхэми, зы лІэужым къикІэу адрэм кІоу, мыкІодыжьын Іуагъэ къыжъудэсшІыщт: ори о къыптекІыщтхэми Сэ шъуи Тхьэу сыщытыщт. 8 Ори о къыптекІыщтхэми зэкІэ КъэнаІан хэгъэгоу хымэу о узыщыпсэурэр егъэшІэрэм шъо шъуиенэу къышъостыщт; ахэми я Тхьэу сыщытыщт». 9 Тхьэм Ибрахьимэ къыриІуагъ: «Ау ори СиІуагъэ гъэцакІэ, джащ фэдэу уауж о къыптекІыщтхэми, зы лІэужым къикІэу адрэм кІоу. 10 Сэ Іуагъэ къыжъудэсшІыгъэшъ, зэкІэ къыптекІыщтхэм ар арэгъэцакІ: зэкІэ хъулъфыгъэу шъуиІэр сунэт шъушІын фае. 11 Сэррэ шъоррэ Іуагъэу тазыфагу илъым итамыгъэу пышъуупкІ шъупкъышъол ыпакІэ. 12 Зы лІэужым къикІэу адрэм кІоу сыдрэ сабыеу, унэІут хъулъфыгъэу унэм къыщыхъугъэри, о къыптемыкІыгъэу, нэмыкІ лъэпкъым тыжьынкІэ щышъущэфыгъэри, сунэт шІыгъэ орэхъу, къызыхъугъэм мэфий тешІагъэу. 13 О уиунэ къихъухьагъэри, о пхэмыкІыгъэу, уитыжьынкІэ пщэфыгъэри сунэт шІыгъэ орэхъух: унэм къихъухьагъэри, пщэфыгъэри ары. Джаущтэу мыкІодыжьын Іуагъэу Сэррэ шъоррэ тазыфагу дэлъым итамыгъэ пкъышъолым телъ хъущт. 14 Сунэт амышІыгъэ хъулъфыгъэу, зиукІытэпІэ ІэпакІэ памыупкІыгъэр зыщыщ лъэпкъым хэкІодыкІыщт, СиІуагъэ зэриукъуагъэм пае».
Сарай Сарэ зэрэхъугъэр
15 Тхьэм Ибрахьимэ джыри къыриІуагъ: «Уишъуз ащ нахьыбэрэ Сарай епІожьыщтэп, ащ ыцІэщтыр Сарэ. 16 Ащ Сэ сынэшІу щысфэнышъ, ащ къыхэкІыгъэу о шъао къыостыщт. Сэ ащ сынэшІу щысфэнышъ, ащ къытекІыщтых цІыф лъэпкъхэр, цІыф лъэпкъмэ япачъыхьэхэри ащ къытекІыщтых». 17 Ибрахьимэ бгъэгукІэ зыридзыхыгъ, ау щхыпцІи, ежь-ежьырэу зэриІожьыгъ: «Илъэсишъэ зыныбжьым сабый къыфэхъунэуи? Илъэс тІокІиплІырэ пшІырэ зыныбжь Сарэ сабый къылъфынэуи?» 18 Ибрахьимэ Тхьэм риІуагъ: «Исмахьилэ псэоу, ащ унэшІу къыщыфэми екъу!» 19 Тхьэм къыІуагъ: «Хьау, уишъузэу Сарэ шъао къыпфилъфыщт, о ащ Исхьакъ цІэу фэуусыщт; мыкІодыжьын зэзэгъыныгъэ Сэ ащи, ащ текІыщтхэми адэсшІыщт. 20 ИсмахьилэкІи о уилъэІу Сэ зэхэсхыгъэ: мары Сэ ащ сынэшІу щысфэщт, быныбэ къытезгъэкІынышъ, инэу-инэу згъэбэгъощт; пщы пшІыкІутІумэ ар ятэщт; Сэ ащ цІыф лъэпкъышхо къытезгъэкІыщт. 21 Ау Іуагъэр зыдэсшІыщтыр – илъэс зытешІэкІэ, мы охътэ дэдэм, Сарэ къыпфилъфыщт Исхьакъ ары». 22 Джаущтэу Ибрахьимэ къыриІуи, Тхьэр ІукІыжьыгъ. 23 ЕтІанэ Ибрахьимэ ыкъоу Исмахьили, зэкІэ иунэ къихъухьагъэхэми, зэкІэ итыжьынкІэ ыщэфыгъэхэми, зэкІэ иунэ хъулъфыгъэу исымэ яукІытапІэмэ апакІэхэр пиупкІыгъэх. Тхьэм къыриІуагъэр зэкІэ ащ ыгъэцэкІагъ. 24 Ибрахьимэ сунэт зашІым, илъэс тІокІиплІырэ пшІыкІубгъурэ ыныбжьыгъ. 25 Исмахьилэ, ащ ыкъо, сунэт зашІым, илъэс пшІыкІущ ыныбжьыгъ. 26 А зы мафэм Ибрахьими ащ ыкъоу Исмахьили сунэт ашІыгъэх. 27 Ащ игъусэхэу зэкІэ хъулъфыгъэу иунэ исыгъэхэр, унэм къихъухьагъэхэри, хымэ лъэпкъымэ тыжьынкІэ къащащэфыгъэ цІыфхэри сунэт ашІыгъэх.
Тхьэр Ибрахьимэ дэжь къызэреблэгъагъэр
1 Зиусхьаныр Мамрэ чъыгэялъэм дэжь Ибрахьимэ къыщыфэлъэгъуагъ – мафэр анахь зыщыжъоркъэу, щэтырым ичІэхьапІэ дэжь ар зыщэсым. 2 Ибрахьимэ ынапІэхэр къыІэтхи зэплъэм, хъулъфыгъищ пэчІынатІэу ылъэгъугъ. Ахэмэ апэгъочъи, чІыгум нэсэу шъхьащэ афишІи, 3 къыІуагъ: «Сизиусхьан, нэшІукІэ укъысэплъымэ, уиІумэт уемыбгъукІу. 4 Псы тІэкІу къышъуфахьынышъ, шъулъакъохэр шъутхьакІыных; мы чъыгым ычІэгъ зыщыжъугъэпсэфын. 5 Сэ шъушхын къэсхьын, кІуачІэ шъушІынышъ, шъуигъогу шъутехьажьын – шъуиІумэт шъукъеолІагъэмэ». Ахэмэ къаІуагъ: «Дэгъу, зэрэпІорэм фэдэу шІы». 6 Ибрахьимэ псынкІэу Сарэ дэжь щэтырым чІэлъади, риІуагъ: «Анахь хьаджыгъэ дэгъум щыщэу шэпхъищ псынкІэу пшэри, хьалыгъу мыкІу-мыпш гъажъэ». 7 Ибрахьимэ Іэхъогъум чъагъэ, шкІэ пщэр дэгъу, ыл шъабэу къахихи, унэІутым ритыгъ псынкІэу къыгъэхьазырынэу. 8 Ибрахьимэ щхыури, щэри, шкІэлыри хьакІэмэ апашъхьэ ригъэуцуагъэх. Ахэр ошхэфэ, ежь чъыг чІэгъым чІэтэу яжагъ. 9 ЕтІанэ ахэр къеупчІыгъэх: «Тыдэ щыІа уишъузэу Сарэ?» Ащ джэуап къытыжьыгъ: «Мары, щэтырым чІэс». 10 Арыти Зиусхьаным къыІуагъ: «КъэкІорэ илъэсым, шІокІ имыІэу, мыщ фэдэ уахътэм уадэжь къэзгъэзэжьыщт, джащыгъум уишъузэу Сарэ шъао къыфэхъущт». Ащ ыкІыбыкІэ щыІэ щэтырым дэжь щытэу Сарэ къэдаІощтыгъэ. 11 Ибрахьими Сари жъы хъугъагъэх, Сарэ бзылъфыгъэ хабзэр къыхэфэжьыщтыгъэп. 12 Сарэ щхыгъэ, ыгукІи зэриІожьыгъ: «Сэ жъы сыхъугъах, сизиусхьани жъы хъугъэ, сэра джыри ащ фэдэ тхъагъо ащ хэзгъотэжьыщтыр?» 13 Зиусхьаным Ибрахьимэ къыриІуагъ: «„Жъы сыхъугъэу, шъыпкъэмкІэ, сабый къысфэхъун ылъэкІына?“ – ыІуи, сыда Сарэ зыкІэщхыгъэр? 14 Зиусхьаным фызэшІомыкІын горэ щыІа? Згъэнэфэгъэ уахътэм, къэкІорэ илъэсым, Сэ уадэжь къэзгъэзэжьыщт, Сари шъэожъые иІэщт». 15 Сарэ къэщынагъэу пцІы къыусыгъ: «Сэ сыщхыгъэп». Ау Ащ къыриІуагъ: «Хьау, о укъэщхыгъ».
Сэдом фэгъэхьыгъэу Ибрахьимэ Тхьэм зэрелъэІугъэр
16 ХьакІэхэр ягъогу лъагъэкІотэнэу къэтэджыжьхи, Сэдом ылъэныкъокІэ кІэим дэплъагъэх. Ибрахьимэ ыгъэкІотэжьынхэу ахэмэ адежьагъ. 17 Зиусхьаным къыІуагъ: «Сэ сигухэлъхэр Ибрахьимэ шІосыушъэфына? 18 ЦІыф лъэпкъ ин, лъэпкъ кІочІэшхор Ибрахьимэ текІыщт шъыпкъ ыкІи ащ ихьатыркІэ чІыгум тет лъэпкъ пстэуми Тхьэм ынэшІу ащифэщт. 19 Ащ пай Сэ ар къазкІыхэсхыгъэри – ежь исабыйхэми, зэкІэ текІыщтхэми зэфагъэрэ шъыпкъагъэрэ алэжьэу, Зиусхьаным игъогу рыкІонхэу унашъо афишІыныр ары. Джащыгъум Сэ, Зиусхьаным, Ибрахьимэ пае къэсІуагъэр зэкІэ згъэцэкІэжьыщт». 20 ЕтІани Зиусхьаным къыІуагъ: «Сэдомрэ Іаморэрэ зыгъэмысэрэ тхьаусыхэ макъэр ины, ахэмэ япсэкІодшІагъи ин дэд. 21 Сехынышъ, ахэр зыгъэмысэрэ тхьаусыхэ макъэу къыслъыІэсырэм фэдэу лажьэ яІэмэ сыкъеплъыщт. Аущтэу щымытми, сэ къэсшІэщт». 22 ЛІыхэр ащ ІукІыжьхи, Сэдом кІуагъэх, ау Ибрахьимэ ыпашъхьэ Тхьэр къинагъ. 23 Ащ къекІуалІи, Ибрахьимэ къыІуагъ: «Адэ джы О зэфагъэ зиІэр бзэджашІэм игъусэу бгъэкІодыщта? 24 Зэфагъэ иІэу мы къалэм нэбгырэ шъэныкъо дэсынкІи мэхъуба? Зэфагъэ зиІэ нэбгырэ шъэныкъомэ яхьатыркІэ фэмыгъэгъоу, мы чІыпІэр бгъэкІодыщта? 25 Ащ фэдэ хъун ылъэкІынэп! Ащ фэдэ О пшІэнэп! Зэфагъэ зиІэр бзэджашІэм дэбгъэкІодынэп, бзэджашІэм къыщышІырэр зэфагъэ зиІэм къехъулІэнэп! Ащ фэдэ хъун ылъэкІынэп! ЗэкІэ чІыгум и ХьыкумышІэ мызафэу зекІонэуи?» 26 Зиусхьаным къыІуагъ: «Къалэу Сэдом зэфагъэ иІэу нэбгырэ шъэныкъо Сэ къыдэзгъуатэмэ, ащыгъум ахэмэ яхьатыркІэ Сэ а къалэр сымыгъэкІодэу къэзгъэнэжьыщт». 27 Ибрахьимэ джыри къыІуагъ: «Мары сэ, сысап ыкІи сыяжь, ау Зиусхьаным сыдэгущыІэнэу гу тесшІыхьагъ: 28 зэфагъэ зиІэр нэбгырэ шъэныкъом нэсынкІэ нэбгыритф щыкІэнкІи мэхъу, адэ а тфэу щыкІэщтым пае О зэрэкъалэу бгъэкІодыщта?» Зиусхьаным къыІуагъ: «ЗгъэкІодыщтэп, нэбгырэ тІокІитІурэ тфырэ ащ къыдэзгъуатэмэ». 29 Ибрахьимэ игущыІэ къыпидзэжьыгъ: «Адэ ащ тІокІитІу къыдэкІымэ?» Тхьэм къыІуагъ: «ТІокІитІумэ яхьатыркІи ар сшІэщтэп». 30 Ибрахьимэ къыІуагъ: «Зиусхьаныр орэмыгубж къэсІощтым пае: ащ нэбгырэ щэкІ дэбгъотэнкІи мэхъуба?» Зиусхьаным къыІуагъ: «Зэфагъэ иІэу нэбгырэ щэкІ дэзгъуатэми, ар згъэкІодыщтэп». 31 Ибрахьимэ къыІуагъ: «Зиусхьаным сеупчІынэу сэ гу тесшІыхьагъ: адэ нэбгырэ тІокІ нахь къыдэмыкІымэ?» Зиусхьаным къыІуагъ: «ТІокІым ихьатыркІи згъэкІодыщтэп». 32 Ибрахьимэ къыІуагъ: «Зиусхьаныр орэмыгубж – джыри зы упчІ: адэ ащ нэбгырипшІ нахь къыдэмыкІымэ?» Зиусхьаным къыІуагъ: «ПшІым ихьатыркІи згъэкІодыщтэп». 33 Зиусхьаным къыІощтыр къызеухым ІукІыжьыгъ, ежь Ибрахьимэ ядэжь къыгъэзэжьыгъ.
Сэдомрэ Іаморэрэ якІодыкІ
1 МэлэІичитІу пчыхьэм ехъулІэу Сэдом къэкІуагъ. Къэлэ къэлапчъэм Лотэ Іусыгъ. ГъогурыкІохэр зелъэгъухэм, ар апэгъокІынэу къэтэджыгъ, чІыгум нэсэу шъхьащэ афишІи, 2 къыІуагъ: «Сизиусхьанхэр! ШъуиІумэт иунэ шъукъеблагъ, чэщыр щишъухын, шъулъакъохэри шъутхьакІынхэшъ, пчэдыжьым шъуигъогу шъутехьажьын». Ау ахэмэ къаІуагъ: «Хьау, тэ урамым чэщыр щитхыщт». 3 Ау лъэшэу ялъэІугъэти, къезэгъыгъэх. Лотэ ахэр иунэ къыщагъэх, ешхэ-ешъо афишІыгъ, хьалыгъу мыкІу-мыпш афигъажъи, ыгъэшхагъэх. 4 Ахэр чъыенхэу гъолъыжьыгъо имыфэхэзэ, къэлэдэсхэм – ныбжьыкІэм къыщегъэжьагъэу анахьыжъым нэс зэкІэ хъулъфыгъэу Сэдом дэсымэ – Лотэ иунэ бгъу пстэумкІи къауцухьагъ. 5 Лотэ къыращи, къыраІуагъ: «Тыдэ щыІэх чэщым щыІэнхэу о къыпфэкІогъэ лІыхэр? Къытфищых ахэр, тэ ахэмэ емыкІу ятхыщт». 6 Лотэ пчъэшъхьаІум къытеуцуагъ, ыкІыбыкІэ пчъэр зэфишІи, 7 къариІуагъ: «Скъошыхэр, сышъолъэІу, бзэджагъэ шъумышІэ. 8 Мары хъулъфыгъэ зымышІагъэ пхъуитІу сиІ; ахэр сэ къышъуфисщынхэшъ, шъузыфаер яшъушІ; ау мы цІыфмэ зи яшъумыІу, къысщыгугъхэу сиунэ къихьагъэмэ зи яшъумышІ!» 9 Ау ахэмэ къаІуагъ: «Моу ІукІ! Хымэ цІыфэу мыщ къэкІуагъэм джы тэщ пае хьыкум ышІынэу ары! Ахэмэ ятшІэщтгъагъэм нахь Іаеу джы о тыкъыбдэзекІощт». Лотэ лъэшэу къыжэхахьэхэзэ, пчъэр хаутынэу къекІолІагъэх. 10 Ау хьакІэмэ Лотэ унэм ращэжьи, пчъэр къырагъэтыжьыгъ. 11 Унэпчъэ ихьапІэм Іут цІыфхэр, ини цІыкІуи, амылъэгъушъунэу къашІыгъэх, ащ къыхэкІэу пчъэ ихьапІэм сыд фэдизрэ лъыхъугъэхэми, ахэмэ ар къагъотын алъэкІыгъэп. 12 ХьакІэмэ Лотэ къыраІуагъ: «Хэта мы къалэм джыри щыуиІэр? Махълъэ, пкъохэр, ппхъухэр е нэмыкІ горэхэр? ЗэкІэ мы къалэм дэщ. 13 Мы къалэр тэ дгъэкІодыщт: мыщ дэсхэр зыгъэмысэрэ тхьаусыхэ макъэу Зиусхьаным лъыІэсыгъэр ины дэдэти, къалэр дгъэкІодынэу Зиусхьаным тыкъигъэкІуагъ». 14 Лотэ къикІи, имахълъэхэу, ыпхъухэр зыщэщтхэм ариІуагъ: «ПсынкІэу мы къалэм шъудэкІ! Зиусхьаным ар джыдэдэм ыгъэкІодыщт». Ау ар мэсэмэркъэоу махълъэмэ къашІошІыгъ. 15 Нэф къэшъ зэхъум, мэлэІичмэ Лотэ агъэгуІэу аублагъ: «ПсынкІэ, уишъузрэ ппхъуитІурэ дэщых! Армырмэ къалэр зыдгъэпщынэжькІэ, ори удэкІодэщт!» 16 Ау ащ кІыхьэ-лыхьэ зырегъэшІыти, мэлэІичмэ, Зиусхьаным Лотэ гукІэгъоу къыфишІырэм ихьатыркІэ, Лоти ащ ишъузи, ыпхъуитІуи аІэхэр къаубытхи, къалэм къыдащыгъэх. 17 Къалэм дэкІыгъахэхэу, ахэмэ ащыщ горэм Лотэ риІуагъ: «Ппсэ къэухъумэжь! УкъызэмыплъэкІ, кІэйми укъыщымыуцу, къушъхьэм екІужь, армырмэ ухэкІодэщт!» 18 Ау Лотэ ахэмэ къариІуагъ: «Хьау, си Зиусхьан! 19 О уиІумэт унэшІу къыщыпфагъ, ин дэд гукІэгъоу къысфэпшІыгъэри: псэоу сыкъэбгъэнэжьыгъ! Ау сэ къушъхьэм сынэсын слъэкІыщтэп – тхьамыкІагъор къыскІэхьанышъ, сыхэкІодэщт. 20 Мары мо къалэр нахь благъ, ащ унэсын плъэкІыщт, ар цІыкІушъ. Ащ сычъэщт, – ар цІыкІу, ащ сынэсынышъ, псэоу сыкъэнэжьыщт». 21 «Дэгъу, – ыІуагъ мэлэІичым, – а уилъэІуи къыпфэсшІэщт: о зыфэпІорэ къалэр згъэкІодыщтэп. 22 Ау зыгъэпсынкІ, ащ о унэмысэу, Сэ сиІоф езгъэжьэн слъэкІыщтэп». Ащ къыхэкІэу ары къалэм ЦэуІар зыкІыфаусыгъэр. 23 Лотэ ЦэуІар къызэсым, тыгъэм чІыгум зыкъытыриІэтыкІыгъагъ. 24 ЕтІанэ Зиусхьаным Сэдомрэ Іаморэрэ, ощхым фэдэу тхъомзашхъорэ машІорэ Зиусхьаным ыдэжь ошъогум къикІэу къатырикІагъ. 25 А къэлитІури, кІэйри, а къалэхэм адэсхэри, чІым къытекІэхэри зэкІэ ыгъэкІодыгъэх. 26 Ау Лотэ ишъуз зэплъэкІыгъэти, щыгъу пкъэоу чъыгъэ. 27 Ибрахьимэ пчэдыжьым жьэу къэтэджи, Зиусхьаным ыпашъхьэ зыщитыгъэ чІыпІэм къэкІуагъ. 28 Сэдомрэ Іаморэрэ ялъэныкъуи кІэйри къызеплъыхьэхэм, ылъэгъугъ: хьакум Іугъор къызэрикІэу, чІыгум Іугъор къытекІы. 29 Джаущтэу кІэим дэт къалэхэр ыгъэкІодхэзэ, Тхьэр Ибрахьимэ егупшысагъ, Лоти зыдэсыгъэ къалэхэр зыгъэкІодыгъэ тхьамыкІагъом къыІэкІихыжьыгъ.
Лотрэ ыпхъухэмрэ
30 Лотэ ЦэуІар къыдэкІыжьи, ыпхъуитІуи игъусэу къушъхьэм щыпсэухэу рагъэжьагъ. ЦэуІар дэсынкІэ ар щынэщтыгъэ. Ыпхъухэр игъусэу ар гъочІэгъым чІэсыгъ. 31 Зэгорэм ыпхъу нахьыжъ нахьыкІэм риІуагъ: «Тятэ жъы мэхъу, тыдэкІи чІыгум зэрэщыхабзэу, тэ къыдгохьан цІыф чІыгум тетыжьэп. 32 Арышъ, тятэ санэ едгъэшъонышъ, ащ тыголъыщт, тятэми зытекІыщтхэр, тилІакъо мыкІодынэу». 33 А чэщым ахэмэ ятэ санэ рагъашъуи, пхъу нахьыжъыр ихьи, ятэ къыголъыгъ, къехъулІагъэр зылІэужыгъор ятэ къышІагъэп – ар къызыгъолъыгъэри зытэджыжьыгъэри. 34 КъыкІэлъыкІорэ мафэм пхъу нахьыжъым нахьыкІэм риІуагъ: «Мары сэ тыгъосчэщ тятэ сыголъыгъ; мы чэщыми санэ едгъэшъонышъ, ори ихьи, ащ къыголъ; тятэми зыхэкІыщтхэр, тилІакъо мыкІодынэу». 35 А чэщыми ятэ санэ рагъэшъуагъ: пхъу нахьыкІэр ихьи, ащ къыголъыгъ, ау къехъулІагъэр зылІэужыгъор ятэ къышІагъэп – ар къызыгъолъыгъэри, зытэджыжьыгъэри. 36 Джаущтэу Лотэ ыпхъуитІуи ятэкІэ лъэрымыхь хъугъэх. 37 Нахьыжъым шъао къыфэхъуи, ащ Моаб фиусыгъ. Ар непэрэ Моаб цІыфхэм ят. 38 Джащ фэдэу нахьыкІэми шъао къыфэхъугъ, ащ цІэ фиусыгъ: Бэн-Іами. Джы къызнэсыгъэми ар непэрэ Іамон цІыфхэм ят.
Ибрахьимэ Абимэлэх дэжь зэрэщыІагъэр
1 Ибрахьимэ а чІыпІэм икІыгъ, къыблэ лъэныкъомкІэ щыІэ шъоф нэкІым кІуи, Кадесрэ Шуррэ азыфагу дэтІысхьагъ; нэужым Гъэрар къэкІуагъэу дэсыгъ. 2 Ишъузэу Сарэ Ибрахьимэ шыпхъукІэ еджэщтыгъэ. Гъэрар ипачъыхьэу Абимэлэх къыгъакІохи, Сарэ ыдэжь аригъэщагъ. 3 Ау чэщым Тхьэр пкІыхьапІэкІэ Абимэлэх къыфакІуи, къыриІуагъ: «Мы бзылъфыгъэр шъузкІэ зэрэпштагъэм пае улІэщт, сыда пІомэ ащ лІы иІ». 4 Абимэлэх бзылъфыгъэм нэсыгъагъэпти, къыІуагъ: «Зиусхьан! Адэ лажьэ зимыІэ цІыфхэр О бгъэкІодыщтха? 5 А цІыфым сэ къысиІуагъи ар ышыпхъоу! Бзылъфыгъэми а дэдэр къысиІуагъ: „Ар сэ сшы“. Сыгу тхьэгъэпцІыгъэ имылъэу, сІэхэри къабзэхэу, сэ аущтэу сызекІуагъ». 6 ПкІыхьапІэкІэ Тхьэм ащ къыриІуагъ: «Сэри сэшІэ угу тхьэгъэпцІыгъэ имылъэу ар о зэрэпшІагъэр, джащ пае сапашъхьэ псэкІод щыозгъэшІагъэп – ащ унэзгъэсыгъэп. 7 Джы лІым ишъуз етыжь, ар тхьэлІыкІу, ощ пае Тхьэм елъэІунышъ, о псэоу укъэнэжьыщт. Ау емытыжьмэ, зэгъашІэ, ори уилІакъуи зэкІэ шъыпкъэ дэдэмкІэ шъулІэщт». 8 Пчэдыжьым жьэу Абимэлэх зэкІэ иІумэтхэр къыугъойхи, а гущыІэхэр къафиІотэжьыгъэх – цІыфхэри лъэшэу щтагъэх. 9 Абимэлэх Ибрахьимэ къаригъащи, егыигъ: «Сыда о къытэпшІагъэр? Сэри сипачъыхьагъуи псэкІодышхо тэмыгъашІэ мыхъунэу, сыд мыхъуна къыосшІагъэр? Аущтэу ашІырэп! ЗэрымызекІохэ хабзэу укъыздэзекІуагъ». 10 Абимэлэх Ибрахьимэ еупчІыгъ: «Сыда аущтэу зыкІэпшІагъэр?» 11 Ибрахьимэ къыІуагъ: «Мы чІыпІэм Тхьэм ищынагъо щыряІэпышъ, сишъуз пае саукІыщт сІуи, сегупшысагъ. 12 ЕтІани сэ ар сшыпхъу шъыпкъ; ар сятэ ыпхъу, ау сянэ ыпхъоу щытэп; сишъузэу хъугъэ. 13 Сятэ иунэ сырищи, къэскІухьэзэ сыпсэунэу Тхьэм сызырещажьэм, сэ ащ есІогъагъ: „ГукІэгъу къысфэшІ, тыдэ тыкІуагъэми, сэ усшыпхъоу яІу“». 14 Абимэлэх мэл-пчэнхэри, былым пІашъэхэри, унэІут хъулъфыгъэхэри бзылъфыгъэхэри Ибрахьимэ къыритыгъэх, Сари къыІэкІигъэхьажьыгъ. 15 Абимэлэх къыриІуагъ: «Мары, сичІыгу уапашъхьэ илъ: узыфаем щыпсэу». 16 Сарэ къыриІуагъ: «Мары, пшы тыжьын ахъщэ мин къесэты. Ащ узхэт цІыфхэм апашъхьэкІэ уигукъао ыпщыныжьыщт, унапи ыукъэбзыжьыщт». 17 ЕтІанэ Ибрахьимэ Тхьэм елъэІугъэти, Тхьэм Абимэлэхи, ащ ишъузи, иунэІут бзылъфыгъэхэри ыгъэхъужьыгъэх, нахьыпэ фэдэу, сабыйхэри къафэхъунхэ алъэкІынэу. 18 Ащ ыпэкІэ Зиусхьаным Абимэлэх иунэ зэкІэ ис бзылъфыгъэхэм сабый амыгъотынэу ышІыгъагъ Ибрахьимэ ишъузэу Сарэ ыпкъ къикІыкІэ.
Исхьакъ икъэхъукІ
1 КъызэриІуагъэу, Зиусхьаныр Сарэ нэшІукІэ къеплъыгъ; къызэригъэгугъагъэр къыгъэшъыпкъэжьыгъ. 2 Сарэ ышъо сабый хафи, Тхьэм къыриІогъэгъэ уахътэм тефэу, Ибрахьимэ ижъыгъом шъао къыфилъфыгъ. 3 Ибрахьимэ ыкъоу къыфэхъугъакІэм, Сарэ шъаоу къыфилъфыгъэм, Исхьакъ фиусыгъ. 4 Тхьэм унашъо къызэрэфишІыгъагъэм тетэу, ар яенэрэ мафэм сунэт ышІыгъ. 5 Исхьакъ къызыфэхъум, Ибрахьимэ илъэсишъэ ыныбжьыгъ. 6 Сарэ къыІуагъ: «Тхьэм къысишІагъэр щхэны: хэт сикъэбар зэхихми, ар щхыщт». 7 ЕтІани къыІуагъ: «Хэт Ибрахьимэ къыриІоныя Сарэ сабый быдз ригъэшъонэу? Ау мары, ащ ижъыгъом сэ шъао къысфэхъугъ». 8 Сабыир ины хъуи, быдзым пагъэзыжьыгъ, Исхьакъ быдзым зыпагъэзыжьыгъэ мафэм Ибрахьимэ ешхэ-ешъошхо ышІыгъ.
Тхьэм Исмахьилэ къызэриухъумагъэр
9 ЕтІанэ Мысырым щыщ Хэгъарэ Ибрахьимэ къыфилъфыгъэ шъэожъыер Исхьакъ дэджэгоу зелъэгъум, 10 Сарэ Ибрахьимэ риІуагъ: «Мы унэІут бзылъфыгъэри ыкъуи унэм ифых, сыда пІомэ унэІут бзылъфыгъэм ыкъо, сэ скъоу Исхьакъ фэдэу, тэ тауж тикІэн ІукІэжьын фитэп». 11 Ыкъо фэгъэхьыгъэу зэхихыгъэ гущыІэхэр Ибрахьимэ ыгу къыхэуагъэх. 12 Ау Тхьэм Ибрахьимэ къыриІуагъ: «КІэлэхъумрэ унэІут бзылъфыгъэмрэ апае угу хэмыгъэкІ. Сарэ къыуиІорэм едэІу, сыда пІомэ Исхьакъ текІыщтхэр арых о уибынкІэ зэджэщтхэр. 13 УнэІут бзылъфыгъэм ыкъуи Сэ цІыф лъэпкъ тезгъэкІыщт, сыда пІомэ ари о пхэкІыгъ». 14 Ибрахьимэ пчэдыжьым гъомлапхъэрэ псы нэтырэ Хэгъарэ ритыхи, ытамэ ахэр тырилъхьэхи, кІэлэхъури игъусэу ытІупщыгъ. Хэгъарэ ежьи, БэрщэбаІ ишъоф нэкІ щыгъощагъ. 15 Нэтым псэу итыр зеухым, кІэлэхъур кондэ чІэгъ горэм чІилъхьагъ. 16 Ежь ІукІи, мычыжьэу, щэбзэщэ тІупщыгъэр зынэсыщтым фэдизэу, тІысыгъэ, сыда пІомэ егупшысэщтыгъэ: «КІэлэхъур зэрэлІэрэр слъэгъун слъэкІыщтэп». КІэлэхъум пэчІынатІэу тІысыгъэу, ар ымакъэ Іэтыгъэу гъыщтыгъэ. 17 Ау Тхьэм кІэлэхъум ымакъэ къызэхихыгъэти, Тхьэм имэлэІич уашъом къиджыкІи, Хэгъарэ къыриІуагъ: «Сыда къыохъулІагъэр, Хэгъар? Умыщын! КІэлэхъоу къэбгъэнагъэм ымакъэ Тхьэм къызэхихыгъ. 18 Къэтэдж, кІэлэхъур къэІэти, гъэрэхьат, зыкъегъэшІэжь! Сэ ащ цІыф лъэпкъышхо тезгъэкІыщт». 19 ЕтІанэ Тхьэм ащ ынэхэр къызэтрихыгъэхэти, псы итэу псынэ Хэгъарэ ылъэгъугъ. Ащ екІуалІи, нэтым псы изы къышІи, кІэлэхъур псы ригъэшъуагъ. 20 Тхьэр кІэлэхъум кІыгъугъ. Ащ хэхъуагъ, шъоф нэкІым щыпсэущтыгъэ, щэбзэгъао хъугъэ. 21 Ар Паран шъоф нэкІым щыпсэущтыгъэ; шъуз фэхъущтыр янэ Мысыр хэгъэгум къыфырищыгъагъ.
Ибрахьимэ Абимэлэх зэзэгъыныгъэ зэрэдишІыгъэр
22 А уахътэм тефэу, Абимэлэх идзэпащэу Пихъол кІыгъоу къакІуи, Ибрахьимэ къыриІуагъ: «О сыд пшІагъэми, Тхьэр сыдигъуи уигъус. 23 Джы Тхьэм ыпашъхьэ тхьэлъанэ къыщысфэшІ, сэри, сэ скъуи, скъо ыкъуи уиягъэ къытэмыгъэкІынэу, сэ гукІэгъу къызэрэпфэсшІыгъэм фэдэу, сэри чІыгоу о узщыхымэми гукІэгъу къытфэпшІынэу». 24 Ибрахьимэ тхьэлъанэ ышІыгъ. 25 ЕтІанэ Абимэлэх ицІыфмэ псынэр зэрэтырахыгъэм пае етхьаусыхылІагъ. 26 Ежь Абимэлэх къыІуагъ: «Ар зышІагъэр сшІэрэп, ори къысэпІуагъэп, непэ къызнэсыгъэм ар зэхэсхыгъэп». 27 Арыти Ибрахьимэ мэл-пчэнхэри, былым пІашъэхэри Абимэлэх ритыхи, Іуагъэ дишІыгъ. 28 Шъынэбзэу блы шъхьафэу ыгъэуцугъэти, 29 Абимэлэх къеупчІыгъ: «Сыда мы шъынэбзиблыр шъхьафы зыкІэпшІыгъэр?» 30 Ибрахьимэ къыІуагъ: «Мы шъынэбзиблыр сэ сшъхьэкІэ къыосэтых, мы псынэр сэ зэрэстІыгъэм ишыхьат хъунхэу сІыхых». 31 Тхьэлъанэ зыщызэдашІыгъагъэм къыщегъэжьагъэу а чІыпІэм БэрщэбаІкІэ еджэх. 32 БэрщэбаІ Іуагъэ Ибрахьимэ щыдишІи, Абимэлэхрэ идзэпащэу Пихъолрэ Фылист хэгъэгум къагъэзэжьыгъ. 33 БэрщэбаІ дэжь тамарискэ чъыг цІыкІу Ибрахьимэ щигъэтІыси, Зиусхьанэу Тхьэу МыкІодыжьыщтым а чІыпІэм щелъэІугъ. 34 Ащ ыуж Ибрахьимэ Фылист хэгъэгум джыри бэрэ щыпсэугъ.
Тхьэм Ибрахьимэ зэриушэтыгъэр
1 А хъугъэ-шІагъэхэм ауж Тхьэм Ибрахьимэ ыушэтыгъ. «Ибрахьим!» – къыриІуагъ ащ Тхьэм. «СыкъэдаІо!» – къыІуагъ Ибрахьимэ. 2 Тхьэм къыІуагъ: «Пкъо зыкІыгъэгъуи, шІу плъэгъурэ пкъо закъоу Исхьакъ, Морый чІыгум кІо, джащ ит къушъхьэмэ ащыщэу Сэ къыозгъэлъэгъущтым пкъо къурмэнгъэст щышІ». 3 Ибрахьимэ пчэдыжьым жьэу къэтэджи, ищыд ыгъэхьазырыгъ, иунэІутхэм ащыщэу нэбгыритІурэ ыкъоу Исхьакърэ зэригъэгъусэхи, къурмэнгъэстым пае машІор зэришІыщт пхъэхэри ыкъутэхи, Тхьэм зыфиІогъэ чІыпІэм ежьагъ. 4 Ящэнэрэ мафэм Ибрахьимэ а чІыпІэр чыжьэкІэ ылъэгъугъ. 5 Арыти Ибрахьимэ иунэІутитІумэ ариІуагъ: «Мыщ шъо шъущытыгу, щыдым шъуфэсакъ. Тэ, сэррэ скъорэ тыкІонышъ, Тхьэм шъхьащэ фэтшІын, етІанэ шъуадэжь къэдгъэзэжьыщт». 6 Пхъэу къурмэнгъэстыр зэришІыщтыр ыкъоу Исхьакъ ыплІэІу рилъхьагъ, шъэжъыемрэ машІомрэ ышти, тІури зэдэкІуагъэх. 7 Исхьакъ Ибрахьимэ риІуагъ: «Тат!» Адрэм къыриІожьыгъ: «Сыд, сикІал?» Ыкъо къыІуагъ: «Мары машІори пхъэхэри, тыдэ щыІа адэ къурмэнгъэст тшІыщт шъынэр?» 8 Ибрахьимэ къыІуагъ: «Тхьэм Ежь къыгъотыщт къурмэнгъэст тшІыщтыр, сишъау». ТІуми зэкІыгъоу апэ рагъэхъугъ. Джаущтэу ахэр зэгъусэу кІощтыгъэх. 9 Тхьэм чІыпІэу Ибрахьимэ къыригъэлъэгъугъэм зынэсхэм, Ибрахьимэ ащ къурмэншІыпІэ щигъэпсыгъ, пхъэхэри тырилъхьагъэх, ыкъоу Исхьакъ зэкІоцІипхи, къурмэншІыпІэм пхъэмэ акІыІу ышІыгъ. 10 Ибрахьимэ ыкъо шІуибзынэу шъэжъыер тырищэягъ. 11 Ау Зиусхьаным имэлэІич уашъом ымакъэ къиІукІэу, къеджагъ: «Ибрахьим! Ибрахьим!» Ибрахьимэ къыІуагъ: «Мары сэ!» 12 Зиусхьаным имэлэІич къыІуагъ: «КІэлэхъум пІэ темыщай, ащ зи емышІ! Джы Сэ сэшІэ о Тхьэм узэрэщыщынэри, сыда пІомэ Сэщ пае о пкъо, пкъо закъо ушъхьасыжьыгъэп!» 13 Ибрахьимэ зэплъэм, ыкІыбыкІэ куандэм тІыр ыбжъакъохэмкІэ хэнагъэу ылъэгъугъ. Ибрахьимэ екІуалІи, тІыр къыубытыгъ, ар ыкъо ычІыпІэкІэ къурмэнгъэст ышІынэу къыхьыгъ. 14 Ибрахьимэ а чІыпІэм «Яхуа-Ирэ» фиусыгъ, ащ къикІырэр: «Зиусхьаным къыгъотыщт». Ащ къыхэкІэу джырэ нэс аІо: «Зиусхьаным икъушъхьэ къыщынэфэщт». 15 Джыри Зиусхьаным имэлэІич уашъом щыІэу Ибрахьимэ къеджи, 16 къыриІуагъ: «ГущыІэ пытэкІэ сэІо, – еІо Зиусхьаным; о пшІагъэм пае – пкъо, пкъо закъо ушъхьасыжьыгъэпышъ, 17 Сэ шъыпкъэ дэдэмкІэ СынэшІу къыпщысфэщт! Сэ о птекІыщт цІыфхэр згъэбэгъощтых, япчъагъэкІэ ошъогу жъуагъомэ афэдизэу, хыІушъо пшахъомэ афэдизэу; о птекІыщтхэм апашъхьэ пыймэ якъэлапчъэхэр щебэджыщтых! 18 ЧІыгум тет цІыф лъэпкъ пстэуми, о уибынхэм яхьатыркІэ СынэшІу ащысфэщт о укъызэрэсэдэІугъэм пае». 19 Ибрахьимэ иунэІутитІумэ адэжь къыгъэзэжьыгъ, зэкІыгъухэу БэрщэбаІ къэкІожьхи, Ибрахьимэ БэрщэбаІ щыпсэугъ.
Ибрахьимэ ышнахьыкІэу Нахъор къытекІыгъэхэр
20 А хъугъэ-шІагъэмэ ауж тІэкІу тешІагъэу Ибрахьимэ макъэ къырагъэІугъ: ышэу Нахъор ишъузэу Мылкъи шъаохэр къылъфыгъэхэу: 21 ищыпэлъфэу Уц, ащ ышэу Буз, Арамэ ятэу Къэмуел, 22 Къэсэд, Хъазэу, Пилдаш, Идлаф, Бэтуел. 23 Бэтуел текІыгъ Рыбкъэ. А нэбгыриир Мылкъэ Ибрахьимэ ышэу Нахъор къыфилъфыгъэх. 24 Ащ ишъуз гуадзэу Рэумэ зыцІэм джащ фэдэу къылъфыгъэх: Тэбахъ, Гъахъам, Тахъащ, МаІах.
Сарэ зэрэлІагъэр
1 Сарэ илъэсишъэрэ тІокІырэ блырэ ыгъэшІагъ. 2 Сарэ Къыриат-АрбаІ щылІагъ, джы ХъэурэнкІэ заджэхэрэм, КъэнаІан хэгъэгум. Ибрахьимэ Сарэ ыгъэягъ, ышъхьагъ итэу пыхьэзэ. 3 ЕтІанэ лІагъэм къыкІэрыкІи, хьат цІыфмэ ариІуагъ: 4 «Мыщ сыщыщэп, сыхэхэс. Сишъузэу лІагъэр згъэтІылъыжьын слъэкІынэу чІыпІэ къысашъущ». 5 Хьат цІыфхэм Ибрахьимэ джэуап къыратыжьыгъ: 6 «КъытэдэІу, тизиусхьан. О упщы лъэрыхь, къэунэ анахь дэгъоу тиІэм уишъуз щычІэлъхьажь; тащыщ пэпчъ лІэкъо къэунэу иІэр ащ пае къыуитын». 7 Ибрахьимэ а чІыгум ицІыф лъэпкъ, хьатхэм, шъхьащэ афишІи, 8 ариІуагъ: «Сихьадэ мыщ щызгъэтІылъыжьынэу шъукъезэгъымэ, ащыгъум шъукъысэдэІу: Цэухъар ыкъоу Ефрэн шъуелъэІу, 9 Махпэлэ гъочІэгъэу ащ игубгъо гъунэ итыр фэшъошэ тыжьын уасэкІэ шъуапашъхьэ къыщысищэнэу хьэдэ чІэлъхьажьыпІэ хъуным пае». 10 Ежь Ефрэн хьат цІыфхэм ахэсыгъэти, Ибрахьимэ джэуап къыритыжьыгъ, ар къэлэ къэлапчъэм дэжь Іутыгъэ хьат цІыфмэ зэкІэмэ зэхахыгъ: 11 «Хьау, сизиусхьан, къысэдэІу: губгъори, ащ ит гъочІэгъыри осэты, сицІыф лъэпкъ ыпашъхьэ ар щыосэты, уихьадэ чІэлъхьажь!» 12 Ибрахьимэ а чІыгум ицІыф лъэпкъ шъхьащэ фишІи, 13 къэзэрэугъоигъэмэ зэкІэмэ зэхахэу Ефрэн риІуагъ: «Ащыгъум ори къыосІощтым къедэІу: сыолъэІу, унэшІу къысщыгъафи, мы губгъом пае тыжьын сІыхыри, сихьадэ сэ ащ щычІэслъхьажьыщт». 14 Ефрэн джэуап къыритыжьызэ къыІуагъ: 15 «КъэдаІу, сизиусхьан! ЧІыгум тыжьын ахъщэ шъиплІ ыуас. ОркІи сэркІи сыд ар, уихьадэ чІэлъхьажь!» 16 Ибрахьимэ Ефрэн къыІуагъэм езэгъи, ишыхьатхэу, уасэу къыфишІыгъэм фэдиз, тыжьын ахъщэ шъиплІ, сатыушІэхэм зэрапщырэмкІэ фипщыгъ. 17 Джаущтэу Ефрэн игубгъоу Махпэлэ дэжь, Мамре пэчІынатІэу щылъыр, губгъори, гъочІэгъэу ащ итыри, а губгъом ит чъыг пстэури, ащ щыІэ иІэгъо-блэгъу пстэури, хьат цІыфхэу къэлэ къэлапчъэм дэжь щытыгъэхэр ишыхьатхэу, Ибрахьимэ къыІэкІэхьагъ. 19 Ащ ыуж Ибрахьимэ ишъузэу Сарэ джы ХъэурэнкІэ заджэхэрэ Мамре пэчІынатІэу, КъэнаІан хэгъэгумкІэ Махпэлэ щыІэ губгъом ит гъочІэгъым щычІилъхьажьыгъ. 20 Ибрахьимэ къыІэкІэхьагъ хьат цІыфмэ къабгъодэкІэу губгъори, ащ ит гъочІэгъыри, иунаеу, ихьадэхэр щычІилъхьажьынхэ ылъэкІынэу.
Исхьакъ къызэрищагъэр
1 Ибрахьимэ жъы хъугъагъэ, ыныбжьыкІэ хэкІотагъэу щытыгъ. СыдрэмкІи Тхьэм ынэшІу Ибрахьимэ къыкІыгъугъ. 2 Ибрахьимэ иунэІут шъхьагъырытэу, иуни ихъызмэтхэри зэкІэ зезыгъакІорэм риІуагъ: «Скопкъ къытеІаби, 3 Зиусхьанэу уашъоми чІыгуми я ТхьэкІэ тхьэлъанэ къысфэшІ, сэ сызхэс къэнаІан цІыфхэм апхъумэ ащыщ скъо шъузэу къызэрэфэмыщэщтымкІэ. 4 Ау сэ сихэгъэгу, сиІахьылхэм адэжь укІонышъ, скъоу Исхьакъ шъуз къыфэпщэщт». 5 УнэІутым къыриІуагъ: «Бзылъфыгъэр фэмыенкІи мэхъу сыригъусэу мы хэгъэгум къэкІонэу; ащыгъум о укъызэрыкІыгъэ хэгъэгум езгъэгъэзэжьын фая о пкъо?» 6 Ибрахьимэ ащ риІуагъ: «Ар пшІэ хъухэщтэп! Скъо ащ емыгъэгъэзэжь! 7 Зиусхьанэу уашъом и Тхьэ, сятэ иунэ сырищи, хымэ хэгъэгум сызыщагъэр, къыздэгущыІагъэр ыкІи, „о птекІыщтхэм мы хэгъэгур ястыщт“ ыІозэ, гущыІэ пытэ къысэзытыгъэр – Ащ Ежь имэлэІич уапэ итэу ыгъэкІонышъ, скъо пае ащ шъуз къипщыщт. 8 Ау бзылъфыгъэр къыбдежьэнэу фэмые зыхъукІэ, тхьэлъанэу къысфэпшІыгъэр птекІыжьы; ау сыд хъугъэкІи, скъо ащ емыгъэгъэзэжь». 9 Арыти унэІутыр изиусхьанэу Ибрахьимэ ыкопкъ теІаби, къыриІуагъэр ыгъэцэкІэнэу тхьэлъанэ фишІыгъ. 10 ЕтІанэ унэІутым изиусхьан имахъшэмэ пшІы къахищи, зэмылІэужыгъо шІухьафтын лъапІэхэу изиусхьан иІэхэр зыдырищажьэхи, гъогум техьагъ – Мэсэпэтамым, Нахъор зыдэсыгъэ къалэм, кІуагъэ. 11 Къалэм пэблагъэу, псынэм дэжь ащ махъшэхэр лъэгуанджэкІэ щыригъэтІысэхыгъэх; пчыхьэу бзылъфыгъэхэр псыхьэ къызщыкІохэрэ охътагъ. 12 Ибрахьимэ иунэІут къыІуагъ: «Зиусхьанэу, ситхьэмэтэ Ибрахьимэ и Тхь! Непэ сиІоф къигъэкІи, ситхьэмэтэ Ибрахьимэ гукІэгъу фэшІ. 13 Мары псынэкІэчъым дэжь сыщыт, къэлэдэсхэм япшъашъэхэр псыхьэ къыздакІохэрэм. 14 „Уикъошын къэукъощи, сэ псы сешъощт“ засІоу, „ешъу, сэ уимахъшэхэри езгъэшъощтых“ къысэзыІожьырэ пшъашъэр – джары О уиІумэтэу Исхьакъ фэбгъэнэфагъэр; джаущтэу сэ къэсшІэщт ситхьаматэ О гукІэгъу къызэрэфэпшІырэр». 15 Ащ къыІорэр къымыухыгъэу, Ибрахьимэ ышэу Нахъоррэ ишъузэу Мылкъэрэ акъо Бэтуел ыпхъоу Рыбкъэ икъошын ытамэ тетэу къыІухьагъ. 16 Пшъашъэр итеплъэкІэ дэхэ дэдагъ, хъулъфыгъэ зымышІэгъэ пшъашъэу щытыгъ. Ар псынэкІэчъым дэжь къехыгъ, икъошын псы ригъахъуи, дэкІоежьынэу ежьэжьыгъ. 17 УнэІутыр пэгъочъи, ащ риІуагъ: «СыолъэІу уикъошын псэу итым щыщ сегъашъоба». 18 Ащ къыІуагъ: «Ешъу, сизиусхьан». Ытамэ къошыныр къыритІупщэхи, ІэкІэ ыІыгъэу псы ригъэшъуагъ. 19 Псы зырегъашъом, къыриІуагъ: «Сэ псы къисхыщт уимахъшэхэм апаий, загъэшъокІыфэ ерэшъох». 20 Ардэдэм икъошын псэу итыр хьэкъуашъом рикІи, псы къырихынэу джыри псынэм чъагъэ, зэкІэ махъшэмэ загъэшъокІыфэ джаущтэу псы къыхьыгъ. 21 УнэІутыр, зи ымыІоу, игъогу Тхьэм шІу тыриІуагъэмэ зэригъашІэ шІоигъоу, ыгъэшІагъоу бзылъфыгъэм лъыплъэщтыгъэ. 22 Махъшэхэр псым зешъуахэхэм, унэІутым дышъэ Іэлъынрэ, дышъэ ахъщэ ныкъо къыщэчэу, дышъэ ІэхъуитІурэ пшъашъэм ыІэхэм апае, дышъэ ахъщипшІ къащэчэу, ритыхи, 23 еупчІыгъ: «КъысаІу, хэта узипшъашъэр? Уятэ иунэ чэщ щитхынэу чІыпІэ иІа?» 24 Ащ джэуап къытыгъ: «Нахъоррэ Мылкъэрэ акъо Бэтуел сырипхъу». 25 ЕтІанэ къыпигъэхъожьыгъ: «Уарзи мэкъуи бэу былыммэ апае тиІ. Чэщыр зыщишъухын чІыпІи тиІ». 26 Ибрахьимэ иунэІут зиуфи, лъэгонджэмышъхьэкІэ щысэу, Зиусхьаным шъхьащэ фишІи, 27 къыІуагъ: «Зиусхьанэу, ситхьэмэтэ Ибрахьимэ и Тхьэ щытхъу фэсэшІы: игукІэгъурэ ишъыпкъагъэрэкІэ ситхьаматэ гум изымынагъэм! Зиусхьаным гъогу занкІэкІэ ситхьаматэ иІахьылхэм яунэ сыкъищагъ!» 28 Пшъашъэр янэ иунэ чъэжьи, къехъулІагъэр ариІотагъ. 29 Рыбкъэ Лабан ыцІэу шы иІагъ, ышыпхъу Іэлъынрэ Іэхъухэмрэ ыІыгъхэу ылъэгъуи, хьакІэм къыриІуагъэхэр зешІэм, псынэм дэжь кІуи, Ибрахьимэ иунэІут екІолІагъ – адрэр имахъшэхэр кІыгъухэу псынэм Іутыгъэти, 31 риІуагъ: «Къеблагъ, Зиусхьаным ынэшІу зыщыфагъэр! Сыд пае мыщ ущыт? Сэ къыпфэзгъэхьазырыгъ уни махъшэхэр зыдэщытыщт чІыпІи». 32 УнэІутыр унэм ихьагъ. Лабан махъшэмэ уанэхэр атырихыгъэх, уарзи Іуси аритыгъ, хьакІэми игъусэхэми алъакъохэр атхьакІынхэу псы къаратыгъ. 33 ЕтІанэ шхын къафахьыгъ, ау Ибрахьимэ иунэІут къыІуагъ: «СиІоф къэсэІофэ сышхэщтэп». «КъаІо», – къыраІожьыгъ. 34 Арыти ащ къыригъэжьагъ: «Сэ Ибрахьимэ сыриунэІут. 35 Зиусхьаным ситхьаматэ лъэшэу ынэшІу къыщифагъ, мылъкушхуи къыритыгъ: мэл-пчэнхэр, былым пІашъэхэр, тыжьынырэ дышъэрэ, унэІут хъулъфыгъэхэри, бзылъфыгъэхэри, махъшэхэри, щыдхэри. 36 Ситхьаматэ ишъузэу Сарэ жъы хъужьыгъэу, ситхьаматэ шъао къыфилъфыгъ; Ибрахьимэ зэкІэ иІэр ащ ритыжьыгъ. 37 Ситхьаматэ тхьэлъанэ сигъэшІыгъ: „Сэ сызхэс къэнаІан цІыфхэм ащыщ скъо шъузэу къыфэмыщ, 38 ау сятэ иунагъо, сиІахьылхэм адэжь кІуи, скъо пай шъуз къыфащ“ ыІуи. 39 Сэ ситхьаматэ сеупчІыгъ: „Бзылъфыгъэр сэ сыригъусэу къэкІонэу фэмыенкІи мэхъуба?“ 40 Ежь къысиІуагъ: „Зиусхьанэу зыпашъхьэ ситым Ежь имэлэІич уапэ итэу къыбдигъэкІонышъ, уигъогу шІум фиузэнкІыщт о сызщыщ лІакъом, сиунагъо щыщэу скъо пае шъуз къэпщэнэу. 41 ТхьэрыІоу къысфэпшІыгъэр зыптекІыжьыщт закъор сятэ иунэ укІоу, ахэмэ пшъашъэ къызыуамыткІэ ары“. 42 Джы непэ псынэкІэчъым сыкъызыІохьэм, къэсІуагъ: „Зиусхьан, ситхьаматэу Ибрахьимэ и Тхь! СыкъызфагъэкІуагъэр къыздэхъугъагъэмэ! 43 Мары сэ псынэм дэжь сыщыт. Псы ыхьынэу пшъашъэ къызыкІокІэ, сэ ащ есІощт: ‘Уикъошын итым щыщ тІэкІу сегъашъу’. 44 ‘Ешъу, уимахъшэхэми псы къафисхыщт’ – къысиІожьымэ, джар Зиусхьаным ситхьаматэ ыкъо шъузэу фигъэнэфагъэр арэу орэхъу“. 45 СыгукІэ зэсІожьырэр къэсымыухызэ, мары, къошыныр ытамэ тетэу Рыбкъэ къыдэкІыгъ, псынэкІэчъым дэжь къехи, псым къыхихыгъ; сэ ащ есІуагъ: „СыолъэІу, сегъашъоба“. 46 Ардэдэм къошыныр ытамэ къыритІупщэхи, къысиІуагъ: „Ешъу, уимахъшэхэри езгъэшъощтых“. Сэри сешъуагъ, махъшэхэри ащ псы ригъэшъуагъэх. 47 Сэ ащ сеупчІыгъ: „Хэта о узыпхъур?“ Ащ джэуап къытыжьыгъ: „Нахъоррэ Мылкъэрэ акъо Бэтуел сырипхъу“. Сэ ащ Іэлъын ыпэ пыслъхьагъ, Іэхъухэри ыІэ ислъхьагъэх. 48 Зысыуфи, шъхьащэ фэсшІэу Зиусхьаныр згъэлъэпІагъэ, Зиусхьанэу, ситхьэмэтэ Ибрахьимэ и Тхьэу, ситхьаматэ ыш ыпхъу ежь ыкъо фэсщэным пае, гъогу занкІэкІэ сэ сыкъэзыщагъэм щытхъур фэсшІыгъ. 49 Сизиусхьан гукІэгъурэ шъыпкъагъэрэ фышъуиІэщтмэ, аущтэу къысашъуІу, армырми къысашъуІу, сэ сшІэщтыри сигъогу зыфэгъэзагъэри сшІэнэу». 50 Лабанрэ Бэтуелрэ джэуап къыратыгъ: «Іофыр Зиусхьаным къыкІэрыкІыгъ; тэрэп „ары“ е „хьау“ къэзыІон зылъэкІыщтыр. 51 Мары Рыбкъэ уапашъхьэ ит; зыдащи кІожь; Зиусхьаным зэриІуагъэм тетэу, уитхьаматэ ыкъо ар шъуз фэрэхъу». 52 Ибрахьимэ иунэІут а гущыІэхэр зызэхехым, чІыгум нэс Зиусхьаным шъхьащэ фишІыгъ. 53 Тыжьын пкъыгъохэри, дышъэ пкъыгъохэри, щыгъынхэри унэІутым къыштэхи, Рыбкъэ ритыгъэх; джащ фэдэу ащ яни ыши тын дэгъухэр афишІыгъэх. 54 Ащ нэужым унэІутыри игъусэхэри шхагъэх, ешъуагъэх, чэщыри щырахыгъ. Пчэдыжьым къызэтэджыжьхэм, Ибрахьимэ иунэІут къыІуагъ: «Сизиусхьан дэжь сышъутІупщыжь». 55 Ау пшъашъэм ышырэ янэрэ къаІуагъ: «МэфипшІ гор нэмыІэми пшъашъэр къытхэрэсыжь!» 56 Ибрахьимэ иунэІут ахэмэ ариІуагъ: «Сешъумыгъэз, Зиусхьаным сигъогу мафэ ышІыгъ; сышъутІупщыжьи, сэ ситхьаматэ дэжь сыкІожьыщт». 57 «Пшъашъэм тыкъеджэнышъ, ащ къыІощтымкІэ теупчІыжьын», – къыраІуагъ ахэмэ. 58 Рыбкъэ къеджэхи, раІуагъ: «Мы цІыфым удежьэщта?» «Сыдежьэщт», – къыІуагъ ащ. 59 ЕтІанэ ашыпхъоу Рыбкъи, ар быдз езгъашъозэ зыпІугъэри, Ибрахьимэ иунэІути, ащ ицІыфхэри къатІупщыжьыгъэх. 60 Ахэмэ анэшІу Рыбкъэ къыщафи, къыраІуагъ: «КъыптекІыщтхэр, тшыпхъу, мины, минипшІ пчъагъэ орэхъух! О къыптекІыгъэмэ Пый къэлапчъэхэр аІэ къихьащтых!» 61 Рыбкъэрэ иунэІут бзылъфыгъэхэмрэ махъшэхэм атетІысхьэхи, Ибрахьимэ иунэІут ыуж ихьагъэх. Рыбкъэ игъусэу ар ядэжь кІожьыщтыгъэ. 62 Исхьакъ Бэр-Лахъай-Рои къикІыжьыгъагъ, ащыгъум ар къыблэ лъэныкъом щыІэ шъоф нэкІым щыпсэущтыгъэ. 63 Мары пчыхьэм, Исхьакъ шъофым ихьагъэу зэплъэм, махъшэхэр къакІохэу ылъэгъугъ. 64 Рыбкъи къаплъи, Исхьакъ къылъэгъугъ, махъшэм къепкІэхи, 65 Ибрахьим иунэІут къеупчІыгъ: «Хэта мы цІыфэу, къытпэгъокІыгъэу къакІорэр?» УнэІутым къыриІожьыгъ: «Ар сэ сизиусхьан». Рыбкъэ техъор къышти, зытырихъуагъ. 66 УнэІутым зэкІэ ышІагъэр Исхьакъ къыфиІотагъ. 67 ЕтІанэ Исхьакъ янэу Сарэ ищэтыр Рыбкъэ чІищагъ; Рыбкъэ ащ ишъуз хъугъэ. Исхьакъ Рыбкъэ шІу ылъэгъугъ, янэ зэрэщымыІэжьым нэшхъэягъэу къыфихьыгъагъэри шъхьащыкІыгъ.
Ибрахьимэ зэрэлІагъэр
1 Ибрахьимэ джыри шъуз къыщагъ, Къэтурэ ыцІэу. 2 Къэтурэ ащ къыфилъфыгъэх ыкъохэу Зимран, Иокъщан, Мэдан, Мыдиан, Ищбакъ, Шыуахъ. 3 Иокъщан къыфэхъугъэх Щэбэрэ Деданрэ. Дедан къытекІыгъэхэр: ашур цІыфхэр, лэтуш цІыфхэр, лэум цІыфхэр. 4 Мыдиан ыкъохэр: Іэфэ, Іэфэр, Хъанох, АбидаІ, ЕлдаІэ. Ахэр зэкІэ Къэтурэ къытекІыгъэх. 5 Ибрахьимэ зэкІэ иІагъэр Исхьакъ ритыжьыгъ. 6 Шъуз гуадзэу Ибрахьимэ иІагъэхэм акъомэ тын хьалэлхэр афишІыхи, ежь псэузэ, Исхьакъ пэчыжьэу, тыгъэкъокІыпІэмкІэ щыІэ чІыгум ыгъэкІуагъэх. 7 ЗэкІэмкІи Ибрахьимэ ыныбжьыгъэр илъэсишъэрэ тІокІищырэ пшІыкІутфырэ. 8 Дунаим Ибрахьимэ жъы дэдэ хъугъэу ехыжьыгъ, жъышъхьэ мафэ иІэу ыпсэ хэкІи, ицІыф лъэпкъ хэхьажьыгъ. 9 Ыкъохэу Исхьакърэ Исмахьилэрэ ар чІалъхьажьыгъ – хьат лъэпкъым щыщ Цохар ыкъо Ефрэн ишъофэу Мамре пэчІынатІэу щылъым ит Махпэлэ гъочІэгъым. 10 Ар Ибрахьимэ хьатхэм къащищэфыгъэ шъофыр ары. Ащ щычІалъхьажьыгъэх Ибрахьимэрэ ащ ишъузэу Сарэрэ. 11 Ибрахьимэ зэлІэм, ащ ыкъо Исхьакъ Тхьэм ынэшІу къыщифагъ. Исхьакъ Бэр-Лахъай-Рои дэжь щыпсэущтыгъ.
Исмахьилэ къытекІыгъэхэр
12 Мары Ибрахьимэ ыкъоу Исмахьилэ къытекІыгъэ цІыфхэр; Исмахьил ары Сарэ иунэІут бзылъфыгъэу Мысырым щыщ Хэгъарэ Ибрахьимэ къыфилъфыгъэр; 13 Мары Исмахьилэ ыкъомэ ацІэхэр, зэкІэлъыкІоу ахэр къызэрэхъугъэхэм елъытыгъэу. Исмахьилэ ищыпэлъфэу Нэбаиот, ащ ыуж Къэдар, Адбэл, Мыбсам, 14 МышмаІ, Думэ, Масэ, 15 Хъадад, Тэмэ, Етур, Нафыщ, Къэдэмэ. 16 Ахэр арых Исмахьилэ ыкъохэр, ахэмэ ацІэхэр, ахэмэ япсэупІэхэми якощыпІэхэми ялъытыгъэу. Ахэр ялъэпкъ пшІыкІутІумэ япщых. 17 ЗэкІэмкІи Исмахьилэ ыныбжь илъэсишъэрэ щэкІырэ блырэ хъугъэу; ыпсэ хэкІи, ицІыф лъэпкъ хэхьажьыгъ. 18 Ащ къытекІыгъэхэр Хъауилэ къыщегъэжьагъэу Ашур укІо зыхъукІэ, Мысырым пэщылъ Шурэм нэс щыпсэущтыгъэх. Зэшыхэр зэмыкІухэу псэущтыгъэх.
Іэсаурэ Якъубэрэ Рыбкъэ къызэрэфэхъугъэхэр
19 Мары Исхьакъ, Ибрахьимэ ыкъо, икъэбар. Ибрахьимэ къыфэхъугъ Исхьакъ. 20 Исхьакъ илъэс тІокІитІу ыныбжьыгъ, ащ Мэсэпэтамым щыщ арам цІыфэу Бэтуел ыпхъу, арам Лабанэ ышыпхъоу Рыбкъэ шъузкІэ зештэм. 21 Исхьакъ ишъуз пае Зиусхьаным елъэІущтыгъэ, сыда пІомэ ащ сабый хэкІыщтыгъэп. Зиусхьанми ар къызэхихи, ишъузэу Рыбкъэ лъэрымыхь хъугъэ. 22 Ыныбэ зэрилъхэзэ, ыкъомэ зэІункІыжьхэу рагъэжьагъ, арыти ащ ыІуагъ: «Аущтэу щытыщтмэ, сыда сэ сищыІэкІэжьыр?» Зиусхьаным зыфигъази, Рыбкъэ еупчІыгъ. 23 Зиусхьаным ащ къыриІуагъ: «ЛъэпкъитІу уныбэ илъ, ЦІыф лъэпкъитІу о пкІоцІ къикІынышъ, загощыщт. Зыр адрэм нахь лъэшыщт, нахьыжъыр нахьыкІэм фэлэжьэщт». 24 Мары уахътэр къэси, зэтІуазэхэр къэхъугъэх. 25 Апэрэр цІэплъэу къэхъугъ, шъом фэдэу, цызакІэу. Ащ фаусыгъ Іэсау. 26 ЕтІанэ ащ ыши къэлъэгъуагъ, Іэсау ылъэдакъэ ІэкІэ ыІыгъэу; ащ Якъуб фаусыгъ. Исхьакъ илъэс тІокІищ ыныбжьыгъ ахэр къызэхъухэм.
Іэсау ищыпэлъфыгъэ зэрищагъэр
27 Сабыйхэр ины хъугъэх; Іэсау шэкІо ІэпэІасэу шъофым ит цІыф хъугъэ; Якъубэ унэрыс цІыф Іасэ хъугъэ. 28 Исхьакъ Іэсау шІу ылъэгъущтыгъ, сыда пІомэ лэучэцІэу Іэсау къыхьыхэрэр ыгу рихьыщтыгъэх, ау Рыбкъэ Якъубэ нахь икІэсагъ. 29 Зэгорэм, Якъубэ стырыпс ыупщэрыхьэзэ, Іэсау мэлэкІалІэм ригъэзыгъэу шъофым къикІыжьыгъ. 30 Якъубэ Іэсау риІуагъ: «Плъыжьыр сшхынэу къысэт, мыдэ мы плъыжьыр. Арымырмэ гъаблэм сегъалІэ!» Джащ къыхэкІэу ащ «ЕдомкІэ» еджагъэх. 31 Ау Якъуб къыІуагъ: «Ащыгъум щыпэлъфыныгъэр къысэт». 32 Іэсау къыІуагъ: «Мары сэ джыдэдэм сылІэщт, сыда щыпэлъфыгъэм къысфишІэщтыр?» 33 Якъуб къыІуагъ: «НахьыпэрапшІэу тхьэлъанэ къысфэшІ». Іэсау ащ тхьэлъанэ фишІыгъ, ищыпэлъфыгъи Якъубэ ритыгъ. 34 Ащ ипэгъокІэу Якъубэ хьалыгъурэ джэнчыпсырэ Іэсау ритыгъэх. Іэсау шхагъэ, ешъуагъ, тэджи, икІыжьыгъ. Щыпэлъфэу ущытыным ифитныгъи зэуи ыгъэгумэкІыгъэп.
Исхьакърэ Абимэлэхрэ
1 Хэгъэгум гъаблэ итыгъ, Ибрахьимэ имафэхэм щыІэгъэ гъаблэр арэп, арыти Исхьакъ Гъэрар хэкум, фылист цІыфхэм япачъыхьэу Абимэлэх дэжь кІуагъэ. 2 Зиусхьаныр Исхьакъ къыфэлъагъуи, къыриІуагъ: «Мысырым умыкІоу, Сэ къыосІощт хэгъэгум щыпсэу. 3 А хэгъэгум хымэу щыпсэу. Сэ о сыпкІыгъущт, сынэшІуи къыпщысфэщт. Ори о птекІыщт цІыфхэми зэкІэ мы хэгъэгур шъостынышъ, о уятэу Ибрахьимэ естыгъэ гущыІэр къэзгъэшъыпкъэжьыщт. 4 Уашъом ит жъуагъомэ япчъагъэ фэдизэу о птекІыщтхэр згъэбэгъощтых; о птекІыщтхэм зэкІэ мы чІыгухэр ястыщтых, о къыптекІыщт цІыфхэм чІыгум тет цІыф лъэпкъ пстэуми о уибынхэм яхьатыркІэ сынэшІу ащысфэщт, 5 Ибрахьимэ СиІуагъэ къедэІуи, фэзгъэпытагъэхэр зэкІэ: унашъохэр, шапхъэхэр, хабзэхэр зэригъэцэкІагъэхэм пае». 6 Исхьакъ Гъэрар хэкум итІысхьагъ. 7 А чІыпІэм щыпсэурэ цІыфхэр ишъуз пае къызеупчІыхэм, ащ ариІуагъ: «Ар сэ сшыпхъу». Рыбкъэ ишъузэу ыІонкІэ щынагъэ, сыда пІомэ Рыбкъэ дэхэ дэдагъэти, ащ пае аукІын къышІошІыгъ. 8 Исхьакъ ащ зисыр бэшІагъэу зэгорэм фылист пачъыхьэу Абимэлэх шъхьаныгъупчъэм зеплъым, Исхьакъ Рыбкъэ едэхашІэу ылъэгъугъ. 9 Абимэлэх Исхьакъ къеджи, риІуагъ: «Ар о уишъуза? Адэ сыд пае о ар пшыпхъоу пІуагъа?» Исхьакъ ащ къыриІожьыгъ: «Ащ ыпкъ къикІэу саукІынкІэ сыщынагъэти ары». 10 Ау Абимэлэх къыІуагъ: «Сыда о къытэпшІагъэр? Тащыщ горэ уишъуз гохьан ылъэкІыщтыгъэ, етІанэ псэкІодышхо тэбгъашІэщтыгъэ». 11 Арыти Абимэлэх ицІыфмэ унашъо афишІыгъ: «Хэтми мы лІыми ащ ишъузи анэсырэм хьадэгъур къыфэрэкІу». 12 Исхьакъ а хэгъэгум итІысхьи, лэжьыгъэ щырипхъэу ригъэжьагъ. А илъэсым хьэу рипхъыгъэм фэдишъэ Іуихыжьыгъ: джаущтэу Зиусхьаным ащ ынэшІу къыщифагъ. 13 Исхьакъ нахь бай хъузэпытыщтыгъэ. Бай дэдэ хъугъэ. 14 Джы ащ иІагъэх мэл-пчэн, былым пІэшъэ Іэхъогъухэр, бэ дэдэ хъоу унэІутхэри, лэжьакІохэри. Джащ пае фылист цІыфхэр Исхьакъ къешъугъухэу аублагъ. 15 Ащ ятэу Ибрахьимэ псэузэ иунэІутхэм атІыгъэгъэ псынэхэр фылист цІыфхэм ятІэкІэ агъэсэигъэх. 16 Ежь Абимэлэх Исхьакъ къыриІуагъ: «ТхэкІыжь. О тэркІэ лъэшыщэ ухъугъ». 17 Арыти Исхьакъ ащ къикощыкІыжьыгъ. Гъэрар кІэим щэтырхэр щигъаІэхи, ащ щытІысыгъ. 18 Исхьакъ ытхъужьыгъэх ятэу Ибрахьимэ зэпсэум атІыгъэгъэ псынэхэу, Ибрахьимэ зэлІэм, фылист цІыфхэм агъэсэигъагъэхэр; ахэмэ цІэу ятэ афишІыгъагъэхэр афиусыжьыщтыгъэх. 19 Исхьакъ иунэІутхэм зэгорэм кІэим щетІэхэзэ, псы къабзэ къызкІэкІырэ псынэкІэчъ къагъотыгъ. 20 Гъэрар иІахъохэр Исхьакъ иІахъохэм «мы псыр тэтый» аІозэ, къянэкъокъугъэх. Арыти псынэм фиусыгъ: Іэсэкъ; сыда пІомэ ежь къенэкъокъущтыгъэх. 21 ЕтІанэ нэмыкІ псынэ атІыгъ; ащкІи зэнэкъокъугъэх; ащ Ситнэ фаусыгъ. 22 А чІыпІэм ІукІи, джыри зы псынэ Исхьакъ ытІыгъ, ащ пае къедэожьыгъэхэп. Ащ Рэхъобот фиусыгъ; сыда пІомэ ащ ыІуагъ: «Джы Зиусхьаным чІыпІэ хъоу-пщау къытитыгъ мы чІыгум тыщыбэгъонэу». 23 Ащ икІи, ар БэрщэбаІ кІуагъэ. 24 Апэрэ чэщым Зиусхьаныр ащ къыфэлъагъуи, къыриІуагъ: «Сэ о уятэ Ибрахьимэ сыри Тхь; умыщын, Сэ сыпкІыгъу. СынэшІу о къыпщысфэщт, птекІыщт цІыфхэр згъэбэгъощтых – сиІумэтэу Ибрахьимэ ихьатыркІэ». 25 Ащ къурмэншІыпІэ щигъэпси, ыгъэлъапІэу Зиусхьаным елъэІугъ. Исхьакъ ащ ищэтырхэр щигъаІэхи, иунэІутхэм псынэ атІыгъ. 26 ЕтІанэ Гъэрар къикІи, Исхьакъ дэжь Абимэлэх къэкІуагъ, упчІэжьэгъоу Ахъузати идзэпащэу Пихъоли игъусэхэу. 27 Исхьакъ ахэмэ ариІуагъ: «Сыда садэжь шъукъызкІэкІуагъэр, сышъулъэгъу мыхъоу, сыкъызыхэшъуфыгъэ пэтызэ?» 28 «Тэ нэрылъэгъу къытфэхъугъ Зиусхьаныр о зэрэпкІыгъур, – джэуап ахэмэ къыратыжьыгъ, – ащ пае тэрырэ оррэ тхьэрыІо зэзэгъ зэдэтшІыщт. 29 Мыхъун къызэрэтэмышІэщтымкІэ тхьэрыІо къэшІ, тэри мыхъун къыотымышІэу, дэгъоу тыкъыбдэзекІуагъ, мамырэу уттІупщыжьыгъ; джы о Зиусхьаным ынэшІу къыпщифагъ». 30 Исхьакъ ахэмэ ешхэ-ешъо афишІыгъ. 31 КъыкІэлъыкІорэ мафэм пчэдыжьым жьэу къэтэджыхи, ахэмэ тхьэрыІо зэдашІыгъ. Исхьакъ ахэр къытІупщыжьхи, мамырэу ыдэжь къикІыжьыгъэх. 32 А мэфэ дэдэм Исхьакъ иунэІутхэу псынэр зытІыщтыгъэмэ псы къызэрагъотыгъэр къыраІуагъ. 33 Исхьакъ ащ ЩыбыІэ фиусыгъ. Ащ къыхэкІэу непэ къызнэсыгъэм а къалэм БэрщэбаІ ыцІ.
Хымэ бзылъфыгъэхэу Іэсау шъуз фэхъугъэхэр
34 Іэсау ыныбжь илъэс тІокІитІу зэхъум, ащ хьат цІыфэу Берый ыпхъу Ехъудит, хьат цІыфэу Елон ыпхъоу Басмат шъузкІэ къыщагъэх. 35 Ахэмэ Исхьакърэ Рыбкъэрэ гукъэуабэ арагъэшІыгъ.
Исхьакъ ынэшІу Якъубэ къызэрэщифагъэр
1 Исхьакъ жъы хъугъэу, зи ымылъэгъужьэу ынэхэм къызащэкІэм, ыкъо нахьыжъэу Іэсау къеджи, риІуагъ: «СикІал!» Адрэм къыриІожьыгъ: «СыкъэдаІо». 2 Исхьакъ къыІуагъ: «Сэ жъы сыхъугъ, згъэшІэнэу къэнагъэр зыфэдизри сшІэрэп. 3 УиІашэ шти – уищабзи щэбзащэхэри – шъофым кІо, лэучэцІ къысфэушэкІу. 4 Къахьи, ІэшІоу къэгъэхьазыр, сэ сыгу рихьырэм фэдэу, сшхынышъ, сылІэным ыпэкІэ сынэшІу къыпщысфэщт». 5 Ахэмэ зэраІуагъэр Рыбкъэ зэхихыгъэти, Іэсау лэучэцІ къыушэкІунэу шъофым зэкІом, 6 Рыбкъэ ыкъоу Якъубэ риІуагъ: «Уятэ пшэу Іэсау риІоу зэхэсхыгъэ 7 лэучэцІ къыфихьынышъ, шхын ІэшІу фигъэхьазырынэу. Уятэ шхэнышъ, лІэным ыпэкІэ Зиусхьаным ыпашъхьэкІэ ащ ынэшІу щифэщт. 8 Джы, сикІал, пшІэн фаем уишъыпкъэу къедэІу, къызэрэуасІоуи шІы. 9 Іэхъогъум кІуи, чэцІ дэгъуитІу къыхэх. Сэ уятэ пае ахэмэ икІэсэ шхын ІэшІур ахэсшІыкІыщт. 10 О ар фэпхьыщт, ышхынышъ, лІэным ыпэкІэ ынэшІу о къыпщифэнэу». 11 Ау Якъубэ янэ къыриІожьыгъ: «Сшэу Іэсау цІыф цызакІ, сэ скІышъо джашъо. 12 Сятэ сыкъиІэбылъэбыхьанкІи мэхъу, зэрэзгъапцІэрэр къызишІэкІэ, ынэшІу къысщифэным ычІыпІэкІэ, нэлат къысихыщт». 13 Ау янэ къыІуагъ: «О уинэлат сэ къыстерэф, сишъау. Ау сэ сІорэм къедэІу, кІуи къысфахь». 14 Якъубэ кІуи, чэцІхэр янэ къыфихьыгъэх, Рыбкъэ Исхьакъ икІэсэ шхын ІэшІур ышІыгъ. 15 ЕтІанэ Рыбкъэ ыкъо нахьыжъэу Іэсау ищыгъын кІэракІэу ежь иунэ илъыр къышти, ыкъо нахьыкІэу Якъубэ щилъагъ. 16 Ащ ыІэхэмрэ ыпшъэ пцІанэрэ чэцІышъохэр къарищэкІыгъ, 17 етІанэ ежь ыгъэхьазырыгъэ шхын ІашІумрэ хьалыгъумрэ Якъубэ ритыгъэх. 18 Ар ятэ дэжь ихьи, риІуагъ: «Тят!» Адрэм къыІуагъ: «СыкъэдаІо. Ухэта, сишъау?» 19 Якъубэ ятэ риІуагъ: «Сэ Іэсау ары, о уищыпэлъф; о къызэрэсэпІуагъэм фэдэу сэ сшІыгъэ; зыкъэІэти, къэтІыс, шхы силэучэцІ, етІанэ о унэшІу къысщыпфэн». 20 Исхьакъ къэупчІагъ: «Сыдэу псынкІэу къэбгъотыгъа, сишъау?» Адрэм джэуап къытыжьыгъ: «Зиусхьанэу уи Тхьэ сапэ къыригъэфагъ». 21 «КъыскІэрыхь, сикІал, – ыІуагъ Исхьакъ, – сыкъыптеІэбэщт, ора скъоу Іэсаур, хьаумэ ормыра?» 22 Якъубэ ятэу Исхьакъ екІолІагъ, адрэм къыІэбылъэбыхьи, къыІуагъ: «Макъэр Якъубэ ымакъ, ау ыІэхэр Іэсау ыІэх». 23 Ащ ыІэхэр Іэсау ыІэмэ афэдэхэу зэрэцызакІэхэм пае ар къышІагъэпти, ащ ынэшІу щифагъ. 24 Ащ къыІуагъ: «Скъоу Іэсаур оры шъыпкъа?» Адрэм джэуап къытыгъ: «Адэ сэры». 25 Исхьакъ къыІуагъ: «Сишъау, уилэучэцІ сшхынэу къысэт, сынэшІу къыпщысфэнэу». Якъубэ къырити, ятэ шхагъэ, санэ къыхьи, ари ришъугъ. 26 ЕтІанэ ащ ятэу Исхьакъ къыІуагъ: «КъысэкІуалІи къысэбэу, сишъау». 27 Якъубэ екІуалІи, ятэ ебэугъ. Исхьакъ ащ ищыгъын мэу къыпихырэр зэхишІагъэти, ынэшІу къыщифи, къыриІуагъ: «Скъо мэу къыпихырэр Зиусхьаным ынэшІу зыщыфагъэу, губгъомэ мэу къарихырэмэ афэд. 28 Тхьэм тынэу о къыуерэтых ошъо осэпсым щыщ, чІым игъэбэжъу щыщ лэжьыгъи сэнэ шІыгъакІи бэдэдэу. 29 Лъэпкъхэр о пфэрэлажьэх, ЦІыф лъэпкъмэ шъхьащэ къыпфарэшІ. О пшыхэм зиусхьан зафэшІ, уянэ ыкъомэ шъхьащэ къыпфарэшІ, Нэлат къыозыхырэм нэлат терэф. ЗынэшІу къыпщызыфэрэм, Тхьэм ынэшІу щерэф!» 30 Исхьакъ ынэшІу Якъубэ щифи, Якъубэ ятэ ыпашъхьэ къызэрикІыжьыгъэм лъыпытэу, Іэсау шакІо къикІыжьыгъ. 31 Ащи шхыныр ІэшІоу ыгъэхьазыри, ятэ къыфихьи, риІуагъ: «ЗыкъэІэти къэтІыс, тят, шхы силэучэцІ, етІанэ унэшІу къысщыпфэнэу». 32 Исхьакъ къэупчІагъ: «Ухэт о?» Адрэм къыІуагъ: «Сэ сыуикъу, уищыпэлъфэу Іэсау ары». 33 Исхьакъ лъэшэу къэщтагъэу къэкІэзэзи, къыІуагъ: «Адэ хэта адрэр, лэучэцІыр къыушэкІуи, сэ къысфэзыхьыгъэр? О укъэкІоным ыпэкІэ ар сшхыгъэ, етІанэ сынэшІу щысфагъ, джары джы нэшІу зыщыфагъэу щытыщтыр». 34 Іэсау ятэ игущыІэхэм ядэІуи, куо мэкъэшхо къыІэти, ятэ риІуагъ: «Тят, сэри унэшІу къысщыф, сэри ары». 35 Исхьакъ къыІуагъ: «Пшы тхьагъэпцІыгъэ ыгу илъэу къакІуи, сынэшІоу о къыпщысфэн фэягъэр ыштагъ». 36 Іэсау къыІуагъ: «Тефэ шъыпкъэу Якъуб ащ фаусыгъэба? Ащ тІо сигъэпцІагъ: сэ сищыпэлъфыгъэ ыштагъ, джы – унэшІу зыщыуигъэфагъ». ЕтІани ятэ еупчІыгъ: «Сэщ пае нэшІущыфэныгъэ къыпфэнагъэба?» 37 Исхьакъ джэуап Іэсау къыритыжьыгъ: «Сэ ар зиусхьанэу уашъхьагъ къизгъэуцуагъ, зэкІэ тиІахьылхэри унэІут фэсшІыгъэх, лэжьыгъэрэ сэнэ шІыгъакІэрэкІэ нахь лъэш сшІыгъэ. Сыд сэ джы о къыпфэсшІэшъущтыр, сикІал?» 38 Іэсау ятэ къеупчІыгъ: «Тят, зызакъуа унэшІу ащыпфэнэу зэрэщытыр? Сэри унэшІу къысщыф, тят!» Іэсау лъэшэу къэгъыгъ. 39 Ятэу Исхьакъ джэуап къытыжьыгъ: «ЧІыгу пщэрымрэ ошъо осэпсымрэ апэчыжьэщтых о уипсэупІэхэр. 40 Уичатэ къыхьырэмкІэ о ущыІэщт, пши уфэлэжьэщт. Ау уахътэр къэсыщт – зыкъызыпІэтыкІэ, ащ ибжь о ппшъэ дэбдзыжьыщт».
Якъубэ Лабан дэжь зэрэчъагъэр
41 Ятэ ынэшІу зэрэщифагъэм пае Іэсау ылъэгъу мыхъоу хъугъэ Якъубэ. Іэсау ыгукІэ ыІуагъ: «Сятэ зыщыдгъэещт мафэхэр къэсынхэшъ, сшэу Якъубэ сыукІыщт». 42 Рыбкъэ раІожьыгъ ыкъо нахьыжъэу Іэсау ыІуагъэр. Арыти, ыкъо нахьыкІэу Якъубэ къыригъаджэхи, риІуагъ: «О пшэу Іэсау уиукІын ыгу хэлъ. 43 Арышъ, къыосІощтым къедэІу, сикІал: Хъаран щыпсэурэ сшэу Лабан дэжь чъэ. 44 Ащ ыдэжь тІэкІурэ къыщыІ, пшы игубж оІэсэжьыфэ, 45 пшы губжэу къыпфыриІэр Іэсэжьэу, ащ о епшІагъэр щэгъупшэжьыфэ. Джащыгъум сэ къыплъызгъэкІонхэшъ, ащ укъисщыжьыщт. Сыд пае а зы мафэм шъуитІуи шъусшІокІодына?» 46 ЕтІанэ Рыбкъэ Исхьакъ риІуагъ: «Хыт бзылъфыгъэхэм апкъ къикІыкІэ щыІэныгъэм сыкІэгушІурэп. Мы чІыгум щыщ бзылъфыгъэхэу, мы хьат бзылъфыгъэхэм афэдэхэм ащыщ Якъубэ шъузкІэ къыщэмэ, ащыгъум сэ сыщыІэнэуи сищыкІэгъэжьэп».
1 Исхьакъ Якъубэ къеджи, ынэшІу къыщифи, унашъо фишІыгъ: «КъэнаІан цІыфхэм апхъумэ ащыщ шъузэу къэмыщ. 2 Мэсэпэтамым кІуи, уянэ ятэу Бэтуел дэжь, уянэ ышэу Лабан ыпхъумэ ащыщ ащ шъузэу къищ. 3 ЛъэкІ пстэури ЗиІэ Тхьэм ынэшІу къыпщеф! Уегъэбагъу ыкІи къыпхерэгъахъу, цІыф лъэпкъыбэхэри о птерэкІых. 4 КъыплъегъэІэс Тхьэм Ибрахьимэ ынэшІоу щифагъэр ори, о къыптекІыщтхэми къалъерэгъэІэс – Тхьэм Ибрахьимэ къыритыгъэ чІыгоу о хымэу узщыпсэурэр уиІахьэшІу хъуным пае!» 5 Арыти Исхьакъ Якъубэ ытІупщыгъ, Мэсэпэтамым, арам цІыфэу Бэтуел ыкъоу Лабан дэжь ар кІуагъэ. Лабан Якъубэрэ Іэсаурэ янэу Рыбкъэ ышыгъ.
Исмахьилэ ыпхъу Іэсау къызэрищагъэр
6 Исхьакъ ынэшІу Якъубэ щифи, Мэсэпэтамым шъуз къырищынэу зэригъэкІуагъэр, ынэшІу щифэзэ, зэрэтыригъэпытыхьагъэр «къэнаІан бзылъфыгъэ къэмыщ» ыІуи, 7 Якъуби ятэрэ янэрэ ядэІуи, Мэсэпэтамым зэрэкІуагъэри Іэсау ылъэгъугъ. 8 Джащыгъум Іэсау къыгурыІуагъ къэнаІан бзылъфыгъэхэр ятэ ыгу зэрэримыхьыхэрэр; 9 арыти Іэсау Исмахьилэ ицІыфхэм адэжь кІуи, джыри зы шъуз къыщагъ – Махъалат, Ибрахьимэ ыкъоу Исмахьилэ ыпхъу, Нэбаиот ышыпхъу.
Якъубэ пкІыхьапІэ Бэтэл зэрэщилъэгъугъэр
10 Якъубэ БэрщэбаІ къыдэкІи, Хъаран ежьагъ. 11 ЧІыпІэ горэм нэси, шІункІ къэхъугъэти, ащ чэщыр щырихынэу къэуцугъ, сыда пІомэ тыгъэр къохьажьыгъагъ. Мыжъо горэ ипІэшъхьагъэу ыгъэтІылъи, чъыенэу гъолъыгъэ. 12 Мары лъэоир чІыгум тетэу, ащ ыцыпэ уашъом нэсэу, Тхьэм имэлэІичхэр ащкІэ дэкІоежьыхэу, къехыхэу пкІыхьапІэкІэ ылъэгъугъ. 13 Мары Зиусхьаныр ащ ышъхьагъ тетэу Якъубэ къыреІо: «Сэры Зиусхьаныр, уятэжъэу Ибрахьими Исхьакъи я Тхьэр. ЧІыгоу узтелъыр Сэ ори птекІыщт бынхэми къышъосэты. 14 О птекІыщт бынхэр чІыгум телъ пшахъом фэдизэу бэ хъущтых, тыгъэ къохьапІэмкІи, тыгъэ къокІыпІэмкІи, темырымкІи, къыблэмкІи ахэр ащыпсэущтых. Оррэ птекІыщтхэмрэ яхьатыркІэ дунаим тет лъэпкъ пстэуми сынэшІу ащысфэщт. 15 Мары Сэ сыпкІыгъу: тыдэ укІуагъэми, усыухъумэщт, мы чІыгуми къэозгъэгъэзэжьыщт. Уизакъоу укъэзгъэнэщтэп къыосІуагъэр сэгъэцэкІэфэ». 16 Якъубэ къэущыжьи, къыІуагъ: «Шъыпкъэ дэдэмкІэ, Зиусхьаныр мы чІыпІэм щыІ; сэ ар сшІэщтыгъэп! 17 Мы чІыпІэр сыдэу щынагъуа! – къыІуагъ ащ лъэшэу къэщтагъэу. – Щэч хэмылъэу мыр Тхьэм иун, уашъом икъэлапчъ!» 18 Якъубэ пчэдыжьым жьэу пІэшъхьагъ ышІыгъэгъэ мыжъор зандэу мыжъосын тамыгъэу ыгъэуцуи, ыкІыІу дагъэ тырикІагъ. 19 А чІыпІэм ащ цІэ фиусыгъ: Бэтэл; ащ ыпэкІэ а къалэм Луз ыцІагъэми. 20 ЕтІанэ Якъубэ тхьэлъанэ ышІыгъ: «Сэ мы гъогоу сызтетым сыкъыщиухъумэу, Тхьэр сигъусэщтмэ, хьалыгъурэ щыгъынрэ къыситэу, 21 мамырныгъэкІэ сятэ иунэ къэзгъэзэжьмэ, Зиусхьаныр си Тхьэу щытыщт; 22 мы мыжъоу мыжъосынэу згъэуцугъэр ТхьэлъэІупІэ хъущт, ыкІи О, Тхьэ, къысэптырэ пстэуми азыпшІанэ О къыостзэ сшІыщт».
Якъуб Рахъэл зэрэІукІагъэр
1 Якъубэ игъогу лъигъэкІуати, тыгъэ къокІыпІэм щыпсэурэ цІыфхэм ячІыгу нэсыгъ. 2 Шъофым псынэ итэу, ащ мэл Іэхъогъуищ Іулъэу ылъэгъугъ. А псынэм псы къырахызэ, былымхэр рагъашъощтыгъэх. Псынашъхьэм мыжъошхо телъыгъ. 3 ЗэкІэ Іэхъогъухэр ащ зыщызэрэугъойхэкІэ, Іахъомэ мыжъор псынашъхьэм къытырагъэукІорэикІыти, мэлхэр псы рагъашъощтыгъэх; етІанэ икІэрыкІэу мыжъор псынашъхьэм тыралъхьажьыщтыгъэ. 4 Якъубэ Іахъомэ яупчІыгъ: «Скъошхэр! Тыдэ шъукъикІыра?» Адрэмэ къаІуагъ: «Тэ Хъаран тыщыщ». 5 Якъубэ яупчІыгъ: «ШъошІа шъо Лабан, Нахъор ыкъо?» Ахэмэ къыраІожьыгъ: «ТэшІэ». 6 Ар джыри яупчІыгъ: «Сыд, ищыІакІэ дэгъуа?» Ахэмэ джэуап къатыжьыгъ: «Дэгъу, марыба Рахъэл, ащ ыпхъу, мэлымэ акІыгъоу къэкІо». 7 «Тыгъэр джыри лъагэ, – ариІуагъ Якъубэ чэмахъомэ, – былымхэр шъуугъоижьынхэу игъоп, мэлхэр псы ежъугъашъохи, хъупІэм шъуфыжьхэба». 8 Ау ахэмэ къыраІуагъ: «ЗэкІэ Іэхъогъухэр къэзэрэугъоижьыфэхэ ар тшІэн тлъэкІыщтэп. Мыжъор джащыгъум къытрагъэукІорэикІынышъ, мэлхэр псы едгъэшъощтых». 9 Ахэр зэрэгъэгущыІэхэфэ, ятэ имэлхэр къыфхэзэ, Рахъэл къыІухьагъ – ар мэлэхъуагъ. 10 Якъубэ янэшэу Лабан ыпхъу Рахъэл мэлхэм ягъусэу зелъэгъум, мыжъор псынашъхьэм къытригъэукІорэикІи, мэлхэр псы ригъэшъуагъэх. 11 Якъубэ Рахъэл ебэуи, ымакъэ Іэтыгъэу къэгъыгъ. 12 Рахъэл ятэ зэриІэхьылыр, ежь Рыбкъэ зэрикъор Якъубэ ащ риІуагъ. Пшъашъэр чъэжьи, ятэ риІотэжьыгъ. 13 Ышыпхъу ыкъо Якъубэ икъэбар зызэхехым, Лабан ащ къыпэгъочъыгъ, ІаплІ къырищэкІи, къебэуи, иунэ рищагъ; Якъубэ ежь икъэбар зэкІэ Лабан къыфиІотагъэти, 14 Лабан ащ къыриІуагъ: «Шъыпкъэ дэдэмкІэ, о скъупшъхьи ущыщ, сыли ущыщ». Якъубэ ащ ыдэжь мазэрэ щыІагъ.
Якъубэ Леарэ Рахъэлрэ къызэрищагъэхэр
15 Уахътэр зытекІым, Лабан Якъубэ къыриІуагъ: «УзэрэсиІэхьылым пае пкІэнчъэу сэщ пае улэжьэна? КъысаІу, сыда лэжьапкІэу остыщтыр?» 16 Лабан пхъуитІу иІагъ: нахьыжъым ыцІагъэр Леа; нахьыкІэм – Рахъэл. 17 Леа ынэхэр дэхагъэх, ау Рахъэл ыпкъыкІи ынапэкІи дэхагъэ. 18 Якъубэ Рахъэл шІу ылъэгъугъэти, Лабан риІуагъ: «Упхъу нахьыкІэу Рахъэл пае илъэсиблырэ сыпфэлэжьэщт». 19 Лабан къыІуагъ: «НэмыкІ горэм естын нахьи, ар о къыостымэ нахьышІу, садэжь щыпсэу». 20 Якъубэ илъэсиблырэ Рахъэл пае лэжьагъэ, ау пшъашъэр шІу дэдэ ылъэгъущтыгъэти, ахэр ежь мэфэ заулэм фэдэу къыщыхъугъэх. 21 Якъубэ риІуагъ Лабан: «Сишъуз къысэт, сыда пІомэ ыдэжь сызщихьащт уахътэр къэсыгъ». 22 Лабан зэкІэ игъунэгъухэр къыригъэблагъэхи, ешхэ-ешъо ышІыгъ. 23 Пчыхьэ зэхъум, ыпхъу Леа Якъубэ дэжь къыщагъ; Якъубэ ащ гохьагъ. 24 Лабан иунэІут бзылъфыгъэу Зилпа, ыпхъу Леа иунэІутынэу ритыгъ. 25 Пчэдыжьым Якъубэ ылъэгъугъэр – мары Леа! Арыти Якъубэ риІуагъ Лабан: «Сыда о къысэпшІагъэр? Рахъэл паеба сэ Іоф о зыкІыпфэсшІагъэр? Сыда сызкІэбгъэпцІагъэр?» 26 Лабан къыІуагъ: «Тэ талъэныкъо нахьыжъым ыпэу нахьыкІэр дагъакІорэп. 27 Мы нысэщэ мэфиблым ащ кІыгъури, етІанэ нахьыкІэри къыоттыщт, о джащ пае илъэсиблырэ джыри сэщ пае улэжьэщт». 28 Якъубэ ащ еуцолІагъ. Тхьэмафэр зытешІэм, Лабан ыпхъу Рахъэл шъузкІэ къыритыгъ. 29 Лабан иунэІут бзылъфыгъэу Билхэ ыпхъу Рахъэл иунэІутынэу ритыгъ. 30 Якъубэ Рахъэл гохьагъ, Леа нахьи Рахъэл бэкІэ нахь лъэшэу шІу ылъэгъущтыгъэ, джыри илъэсиблэ ащ пае Лабан фэлэжьагъ.
Якъубэ ыкъохэр
31 Зиусхьаным Якъубэ Леа шІу зэримылъэгъурэр къызелъэгъум, ащ сабый къыфэхъунэу ышІыгъ, ау Рахъэл сабый хэкІыщтыгъэп. 32 Леа лъэрымыхь хъугъэ, шъао къыфэхъугъ, ащ Рубэн фиусыгъ; сыда пІомэ ащ къыІуагъ: «Зиусхьаным ситхьамыкІагъэ къылъэгъугъ, джы силІ шъыпкъэмкІэ шІу силъэгъущт». 33 Джыри ащ ышъо сабый хафи, шъао къызыфэхъум, къыІуагъ: «Зиусхьаным зэхихыгъэ сэ шІу сызэрамылъэгъурэр, джащ пае джыри зы шъао къыситыгъ». Ащ ЩымІон фиусыгъ. 34 Джыри ащ ышъо сабый хафи, шъао къыфэхъугъ. «Джы силІ сэ къысэпкІылІэщт, – ыІуагъ ащ, – сэ ащ шъэуищ къыфэслъфыгъ». Джащ пае Лэуй фиусыгъ. 35 Джыри зэ ащ ышъо сабый хэфагъ, джыри шъао къыфэхъугъ. «Джы сэ Зиусхьаным щытхъу фэсшІыщт», – ыІуи, джащ пае ыкъо Ехъуд фиусыгъ. Ащ ыуж мылъфэжьэу хъугъэ.
1 Якъубэ сабыйхэр зэрэдимыгъотыхэрэр елъэгъути, Рахъэл ышыпхъу ехъуапсэщтыгъэ. «Сабыйхэр къысэтых, – риІуагъ ащ Якъубэ, – армырмэ сылІэщт». 2 Ау Якъубэ, Рахъэл фэгубжи, риІуагъ: «Сэра Тхьэу о сабый пхэмыкІынэу зышІыгъэр?» 3 «Мары сиунэІут бзылъфыгъэу Билхэ, – ыІуагъ Рахъэл, – ащ ыдэжь ихь: слъэгуанджэхэм сабый атесынэу къысферэлъф. Ащ ихьатырыщтми, сабыйхэр сэри сиІэных». 4 Рахъэл иунэІут бзылъфыгъэу Билхэ ащ ыгъэшъузынэу ритыгъ; Якъубэ ащ ыдэжь ихьагъ. 5 Билхэ ышъо сабый хафи, Якъубэ шъао къыфилъфыгъ. 6 «Тхьэм сиІоф къызэхифыгъ, – къыІуагъ Рахъэл, – силъэІу къызэхихи, шъао къыситыгъ». Джащ пае Дан фиусыгъ. 7 Рахъэл иунэІут бзылъфыгъэу Билхэ джыри лъэрымыхь хъуи, ятІонэрэ шъаор Якъубэ къыфилъфыгъ. 8 «Бэнэныгъэ лъэшкІэ сэ сшыпхъу себэни, сытекІуагъ», – ыІуагъ Рахъэл. Джащ пае ишъао Нафталый фиусыгъ. 9 Леа ежь зэрэмылъфэжьыщтым егупшыси, иунэІут бзылъфыгъэу Зилпа Якъубэ шъуз гуадзэу ритыгъ. 10 Леа иунэІут бзылъфыгъэу Зилпа Якъубэ шъао къыфилъфыгъ. 11 Леа къыІуагъ: «Синасып къыхьыгъ». Джащ пае шъэожъыем Гъад фиусыгъ. 12 Зилпа джыри шъао Якъубэ къыфилъфыгъ. 13 Арыти Леа къыІуагъ: «Гъогу мафэ сытеуцуагъ! Бзылъфыгъэмэ насыпышІу къысаІощт!» Джащ пае Ащэр фиусыгъ. 14 Коц хыныгъом Рубэн шъофым мандрагорхэр къыщигъотхи, янэу Леа къыфихьыгъэх. Рахъэл Леа елъэІугъ: «Пкъо къыхьыгъэ мандрагорхэр къысэтба». 15 Ау Леа ащ къыриІуагъ: «СилІ зэрэстепхыгъэр имыкъоу, джы скъо имандрагорхэр зыІэкІэбгъахьэхэ пшІоигъу, ара?» Рахъэл къыІуагъ: «Пкъо имандрагорхэм апае ащыгъум силІ нычэпэ къыбгорэлъ». 16 Пчыхьэм Якъубэ губгъом къызекІыжьым, Леа ащ пэгъокІи, риІуагъ: «Садэжь къихь. Скъо имандрагорхэмкІэ сэ сшыпхъу ущысщэфыгъ». Арыти а чэщым Якъубэ Леа голъыгъ. 17 Леа илъэІу Тхьэм къызэхихыгъ, ащ ышъо сабый хафи, ятфэнэрэ шъаор Якъубэ къыфилъфыгъ. 18 Джащыгъум Леа къыІуагъ: «СиунэІут бзылъфыгъэ силІ зэрэдэзгощыгъэм пае Тхьэм сиІахьэ къыслъигъэІэсыжьыгъ». Джащ пае Леа ыкъо Исасхъар фиусыгъ. 19 Джыри Леа сабый ышъо хафи, яхэнэрэ шъаор Якъубэ къыфилъфыгъ. 20 Леа къыІуагъ: «Тхьэм тын шІагъо къысфишІыгъ! Джы силІ лъытэныгъэ къысфишІын шъыпкъ, сэ ащ шъэуих къыфэслъфыгъэба!» Леа ыкъо Зэбулун фиусыгъ. 21 ЕтІанэ пшъашъэ къылъфи, ащ Динэ фиусыгъ. 22 Тхьэр Рахъэли егупшысагъ, ащ илъэІу къызэхихи, ышъо сабый хигъэфагъ. 23 Рахъэл лъэрмыхьэ хъуи, шъао къыфэхъуи, къыІуагъ: «Тхьэм емыкІу къысигъэхьыгъэп». 24 Ыкъо Юсыф фиуси, лъэІуагъэ: «Зиусхьаным джыри сэ зы шъао къысерэт!»
Якъубэ Лабан фэлажьэзэ бай зэрэхъугъэр
25 Юсыф къызэхъум ыуж, Якъубэ Лабан риІуагъ: «Тадэжь, сихэгъэгу сыкІожьынэу сытІупщ, 26 сызкІыпфэлэжьэгъэ сишъузхэмрэ сисабыйхэмрэ къысэтхи. Ори ошІэ Іофэу пфэсылэжьыгъэр зыфэдэр». 27 Ау Лабан ащ къыриІуагъ: «НэшІукІэ сэ о укъысэплъыгъэмэ, сыолъэІу, къэуцу, джэнчымкІэ сэ къэсшІагъ оркІэ Зиусхьаным ынэшІу сэри скІыгъу зэрэхъугъэр». 28 ЕтІани къыпигъэхъуагъ: «ЛэжьапкІэу къыптефэрэр ор-орэу къаІуи, сэ къыостыщт». 29 Якъубэ ащ къыриІуагъ: «Сэ о сызэрэпфэлэжьэгъэ шІыкІэр ори ошІэ, сапэтыфэ уибылымхэр зэрэхъугъэхэри ошІэ. 30 Сэ сыкъэмыкІозэ уиІагъэр макІэ, джы бэ хъугъэ! Сыдым сыфежьагъэми, Тхьэм ынэшІу джарэу къыпщифэщтыгъэ! Ау сыдигъуа сэ сиунагъо сызыфэлэжьэщтыр?» 31 Лабан къыІуагъ: «КъаІо, сыда къыостыщтыр?» Якъубэ къыІуагъ: «Зи къысэмыт. Сэ къыуасІорэр къысфапшІэмэ, сэ джыри уимэлхэр пфэзгъэхъущтых ыкІи къэсыухъумэщтых. 32 Непэ зэкІэ уимэл-пчэн Іэхъогъухэр къэскІухьащтых; къахэщых ахэмэ мэлхэу бжьыгъэ зыхэлъхэри, къолэнхэри, шІуцІэхэри, джащ фэдэу бжьыгъи хэлъэу, къолэнэуи пчэнхэм ахэтхэри. Ащ фэдэ былымхэр сэркІэ лэжьапкІэ хъущтых. 33 ЕтІанэ силэжьапкІэ уеплъынэу укъызыкІокІэ, сэ сизэфагъэ уапашъхьэ къыщынэфэщт. Джы щегъэжьагъэу бжьыгъэ хэмылъэу е мыкъолэнэу пчэн е мэлхэм ащыщэу мышІуцІэ сэсыемэ къахэбгъуатэмэ, ар сэ стыгъугъэу мэхъу». 34 «Дэгъу, – ыІуагъ Лабан, – орэхъу о зэрэпІуагъэу». 35 Ау а мафэм Лабан къахищыгъэх ачъэ къолэнхэри, бжьыгъэ зыхэлъхэри, зэкІэ пчэнэу бжьыгъэ зыхэлъхэри, къолэнхэри, фыжь тІэкІу нэмыІэми зыхэлъыгъэхэри, зэкІэ мэл шІуцІэхэри, ахэр агъэхъунхэу ыкъомэ аритыгъэх. 36 Якъубэ мэфищ гъогукІэ пэчыжьэхэу ахэр ІукІыгъэх. Лабан ибылымэу къэнагъэр Якъубэ ыгъэхъущтыгъэ. 37 Къумбыл чъыгым, миндалым, платаным ячы цІынэхэр ащ ыштэхи, пхъашъомэ шъолъырхэр афишІыгъэх, пхъэ фыжьыр къычІигъэщызэ. 38 Шъолъырхэр зыхэщыгъэ чы упсыгъэхэр ащ пчэнхэр псы зыщешъощтыгъэ хьакъуашъомэ арилъхьагъэх, ахэр псы ешъонхэу къызыкІохэкІэ, а уахътэм зэгуахьэщтыгъэхэти, чыхэр алъэгъунхэу. 39 Чы къолэнмэ апашъхьэ пчэнхэр щызэгуахьэщтыгъэхэти, чэцІхэр къолэнхэуи, бжьыгъэ ахэлъэуи къалъфыщтыгъэ. 40 Якъубэ мэлхэр къахищыхэти, ахэр Лабан имэл къолэнхэмрэ шІуцІэхэмрэ афэгъэзагъэхэу зэкІолІэнхэм пае ыгъэуцущтыгъэх. Джы Якъубэ ежь иІэхъогъу шъхьафэу ыІыгъыгъ, Лабан иехэм ахэр ахигъэуцощтыгъэхэп. 41 Былым лъэшхэр зэгуахьэхэ зыщыхъурэм, Якъубэ чыхэр былымхэм алъэгъунэу хьэкъуашъомэ арилъхьэщтыгъэ, чымэ апашъхьэ щызэгохьанхэу. 42 Ау былым хъыбыйхэр зыщызэгуахьэхэрэм, чыхэр арилъхьэщтыгъэхэп. Джаущтэу Лабан былым хъыбыир ие хъущтыгъэ, былым пытэр Якъубэ ІэкІахьэщтыгъэ. 43 Якъубэ бай дэдэ хъугъэ; ащ мэл-пчэн Іэхъогъухэри, унэІут бзылъфыгъэхэри, хъулъфыгъэхэри, махъши, щыди бэ иІэ хъугъэр.
Якъубэ Лабан къызэрэІэкІэкІыжьыгъэр
1 Якъубэ Лабан ыкъомэ ежь пае аІохэрэр зэхихыгъэх: «ЗэкІэ тятэ иІагъэр Якъубэ зыІэкІиубыти, тятэ ыІэ илъыгъэм имылъку ежь хишІыкІыгъ». 2 Якъубэ ежьми нахьыпэрэм фэдэу Лабан къызэрэфыщымытыжьым гу лъитагъ. 3 ЕтІанэ Зиусхьаным Якъубэ къыриІуагъ: «Шъуадэжь, уятэхэм адэжь кІожь; сэри о сыуигъусэщт». 4 Арыти Якъубэ Рахъэлрэ Леарэ алъигъакІохи, ибылым Іэхъогъухэр зыдэщыІэ шъофым къаригъэщагъэх. 5 Ахэмэ ариІуагъ: «Нахьыпэм фэдэу шъуятэ къызэрэсфыщымытыжьыр сэлъэгъу. Ау сятэ и Тхьэ сэ сигъус. 6 Шъори шъошІэ зэкІэ лъэкІэу сиІэмкІэ шъуятэ сызэрэфэлэжьагъэр. 7 Ау шъуятэ сигъапцІэзэ, пшІэ фэдизрэ силэжьапкІэ зэблихъугъэ. Ау Тхьэм ащ сэ бзэджагъэ къысишІэнэу фидагъэп. 8 „Былымэу бжьыгъэ зиІэхэр уилэжьапкІэ хъущтых“ къызысиІокІэ, зэкІэ былымхэр бжьыгъэ яІэу къэхъущтыгъэх. „Къолэнхэр уилэжьапкІэ хъущтых“ зиІокІэ, зэкІэ былымхэр къолэнхэу къалъфыщтыгъэх. 9 Джаущтэу Тхьэм шъуятэ ибылымхэр ыштэхи, сэ ахэр къыситыгъэх. 10 Зэгорэм, былымхэр зыщылъыхъожьыхэрэ уахътэм, сэ пкІыхьапІэкІэ слъэгъугъэ: ачъэу пчэнхэм зязыдзыгъэхэр зэкІэ къолэныгъэх, бжьыгъэхэри яІагъэх. 11 Тхьэм имэлэІич пкІыхьапІэм сыхэтэу къысиІуагъ: „Якъуб!“ Сэ сІуагъэ: „СыкъэдаІо“. 12 Ащ къысиІуагъ: „Моу плъэри, плъэгъущт: ачъэу пчэнмэ зязыдзыхэрэр зэкІэ е къолэных, е бжьыгъэхэр яІэх. Лабан къыуишІэрэр зэкІэ Сэ слъэгъугъэ. 13 Мыжъосыным дагъэ зыщытепкІагъэу, Сэ гущыІэ пытэ къызщысэптыгъэ Бэтэл зыкъыщыозгъэлъэгъугъэ Тхьэр Сэры. Джы тэджи, мы хэгъэгум икІыжьи, укъызыщыхъугъэ хэкум кІожь“». 14 Рахъэлрэ Леарэ джэуап Якъубэ къыратыжьыгъ: «Тятэ тэ тызэригъэхымэрэр нафэба? 15 Тэ тищи, къыткІэкІуагъэр ежь ыгъэфедагъ. 16 Аущтэу зыхъукІэ, зэкІэ мылъкоу Тхьэм тятэ Іихыгъэр тэри тисабыйхэми тэтый. Арышъ зэкІэ Тхьэм къыуиІуагъэр гъэцакІэ». 17 Якъубэ исабыйхэри ишъузхэри махъшэхэм атыригъэтІысхьагъэх; 18 зэкІэ ибылымхэри, зэкІэ ыгъотыгъэ мылъкури, ежь ышъхьэкІэ ибылымэу Мэсэпэтамым щызэригъэгъотыгъэри, ятэу Исхьакъ дэжь, КъэнаІан чІыгум кІожьынэу зыдырищэжьагъ. 19 Лабан имэлхэр ыупхъонхэу кІуагъэти, ятэ иІэгъэ тхьэ нэпцІхэр Рахъэл къытыгъугъэх. 20 Джаущтэу Якъубэ арам цІыфэу Лабан ыгъэпцІагъ: зэрэкощыжьырэмкІэ макъэ ригъэІугъэп. 21 ЗэкІэ иІагъэр зыкІигъэгъуи, ежьэжьыгъ; псыхъоу Ефрат зэпырыкІи, ГъылыІад къушъхьэлъэ хэкум фиузэнкІыгъ.
Лабан Якъубэ зэрэлъежьагъэр
22 Ящэнэрэ мафэм Якъубэ зэрэкІожьыгъэр Лабан раІуагъ. 23 ИІахьылхэр гъусэ ышІыхи, Лабан ащ лъежьагъ, мэфибл тешІагъэу ГъылыІад къушъхьэлъэ хэкум дэжь щыкІэхьагъ. 24 Чэщым пкІыхьапІэкІэ Тхьэр арамэу Лабан къыфакІуи, ащ къыриІуагъ: «Зыфэсакъыжь, Якъубэ зыгорэ епшІэкъон!» 25 Лабан Якъубэ кІэхьагъ; Якъубэ ищэтырэ Іуашъхьэм тыригъэуцуагъ, Лабани иІахьылхэр игъусэхэу ГъылыІад къушъхьэлъэ хэкум къыщыуцугъ. 26 Лабан Якъубэ риІуагъ: «Сыда о пшІэрэр? Сыда, сыбгъапцІи, спхъухэр зыкІепщэжьагъэхэр, ІашэкІэ заом гъэры щашІыгъэхэм фэдэу? 27 Сыда шъэфэу зыфыкІэптхъужьыгъэр, сызыкІэбгъэпцІагъэр, зи къысэмыІоу? Тычэфэу, орэдхэр къатІозэ, шъонтырыпымрэ пхъонтэпщынэмрэ къядгъаІозэ, сэ укъэстІупщыжьыныеба. 28 Аужыпкъэм о сипхъорэлъфхэми спхъухэми сябгъэбэужьыгъэп; акъылынчъэу узекІуагъ. 29 Сыогоон слъэкІыни дэгъоу, ау шъуятэ и Тхьэ тыгъосчэщ къыздэгущыІи, къысиІуагъ: „Зыфэсакъыжь, Якъубэ зыгорэ епшІэкъон!“ 30 КІо, о укІожьыгъэми Іофыгъэп, сыда пІомэ уятэ иунэ узэрифэжьыщтым пфэмыщыІэжьэу удэгуІэщтыгъэ, ау сыда ситхьэ сурэтхэр зыкІэптыгъугъэхэр?» 31 Якъубэ джэуап Лабан ритыжьыгъ: «Сэ сыщынэщтыгъэ, о ппхъухэр степхыжьыных сшІошІыщтыгъэ. 32 Уитхьэ сурэтхэр зэбгъотылІэжьхэрэр псэоу къэнэжьыщтэп. ТиІахьылхэр шыхьат орэхъух: зэкІэ къэлъыхъуи, оуиер штэжь». Ау Якъубэ ышІэщтыгъэп ахэр Рахъэл къызэритыгъугъэхэр. 33 Лабан Якъубэ ищэтыри, Леа ищэтыри, бзылъфыгъэ унэІутитІумэ ящэтыри ачІэхьагъ, ау зи къыгъотыгъэп. Леа ищэтырэ къызычІэкІыжьым, Рахъэл ищэтырэ чІэхьагъ. 34 Рахъэл тхьэ сурэтхэр ыштэхи, мэхъшэ уанэм ычІэгъ чІилъхьагъэх, ежь ахэмэ атетІысхьажьыгъ. Лабан зэкІэ щэтырыр къылъыхъугъ, ау зи къыгъотыгъэп. 35 Ежь Рахъэл ятэ риІуагъ: «Сизиусхьан къысфэрэмыгубж, сыкъыфэтэджын зэрэсымылъэкІырэмкІэ: сэ бзылъфыгъэ хабзэр къысфэкІуагъ». Лабан лъыхъуагъэ, ау тхьэ сурэтхэр къыгъотыгъэхэп. 36 Джы Якъубэ къэгубжи, Лабан ыгъэмысэу ыублагъ: «Сыда сызэрэмысэр, сыд псэкІода сшІагъэр, сауж уимыкІынэу? 37 О зэкІэ сиІапІэмэ уяплъыгъ, сыда уиунэ илъ пкъыгъо пстэумэ ащыщэу къэбгъотыгъэр? ТиІахьылхэм апашъхьэ къилъхь, ахэмэ тиІоф къызэхарэф. 38 Мары, илъэс тІокІырэ уадэжь сыщыІагъ; уимэл-пчэнхэми шъэрэзыжьыгъэ къахэкІыгъэп, уиІэхъогъу щыщ тІыхэр сшхыгъэхэп. 39 ХьэкІэ-къуакІэм зэхицунтхъагъэу къыпфэсхьыжьыгъэп, ар сэ сизэрарыгъ; чэщым атыгъугъэри, мафэм атыгъугъэри сэ сэбгъэпщыныжьыщтыгъэ. 40 Мары сиІоф зытетыгъэр: мафэрэ жъоркъым, чэщырэ чъыІэм къин сагъэщэчыщтыгъэ; сичъые сынэмэ апэчыжьэ зишІыщтыгъэ. 41 Джащ фэдэх илъэс тІокІэу уиунэ щисхыгъэр. УипшъэшъитІумэ апае илъэс пшІыкІуплІырэ сыпфэлэжьагъ, илъэсихырэ – уибылымхэм апае; ау о къыстефэрэ лэжьапкІэр гъогогъуипшІэ зэблэпхъугъэ. 42 Сятэ и Тхьэ, Ибрахьимэ и Тхьэ, Исхьакъ Щынагъо зыфыриІэр скІымыгъугъэмэ, о джыри сэ ІэнэкІэу сыптІупщыжьыщтгъэ. СитхьамыкІагъэрэ Іофэу сІэхэмкІэ сшІагъэмрэ Тхьэм къылъэгъухи, тыгъосчэщ Ар къыскъоуцуагъ». 43 Лабан джэуап Якъубэ къыритыжьыгъ: «Пшъашъэхэр – сэ спхъух; сабыйхэр – сэ сисабыих; былымхэр – сэ сибылымых, зэкІэ о плъэгъурэр сэсый. Спхъухэмрэ ахэмэ къалъфыгъэ сабыйхэмрэ агу хэзгъэкІын слъэкІыщта? 44 Джы оррэ сэррэ тызэгъэзэгъ, тазыфагуи шыхьат дэрэт». 45 Якъубэ мыжъо ин, саугъэтым фэдэу, зандэу ыгъэуцуи, 46 иІахьылхэм ариІуагъ: «Мыжъохэр къэшъуугъоих». Ахэмэ мыжъохэр къаугъоигъэх, Іуашъхьэу зэтыралъхьэхи, а мыжъо Іуашъхьэм дэжь щышхагъэх. 47 Лабан ащ Егъар-Сахъадут фиусыгъ, Якъубэ ащ ГъалыІэд фиусыгъ. 48 Лабан къыІуагъ: «Непэ мы Іуашъхьэр оррэ сэррэ тазыфагукІэ шыхьат». Ащ къыхэкІэуи ащ ГъалыІэд раІо, 49 джащ фэдэуи – Мыцпэ, Лабан зэриІуагъэм пае: «Зиусхьаныр оррэ сэррэ тызэгокІыжьэу, тызэрэмылъэгъужьы зыхъукІи, къытлъэрэплъ. 50 Спхъумэ о дэеу уадэзекІо зыхъукІэ е ахэмэ апэмыкІэу шъузхэр пштэхэмэ, ащыгъум зэгъашІэ, сэррэ оррэ цІыф шыхьат тимыІэми, тазыфагу Тхьэр шыхьатэу дэт». 51 Лабан Якъубэ риІуагъ: «Мары мы Іуашъхьэр, мары мы мыжъосыныри, сэррэ оррэ тазыфагу дэзгъэуцуагъэр. 52 Мы Іуашъхьэм сыкъыблэкІэу бзэджэ Іоф пае сэ уадэжь сыкъызэримыхьащтымкІэ ори мы Іуашъхьэми мы мыжъосыными уакъыблэкІэу бзэджэ Іоф пае садэжь укъызэримыхьащтымкІэ, мы Іуашъхьэри шыхьат, мы саугъэтри шыхьат. 53 Ибрахьимэ и Тхьэ, Нахъор и Тхьэ, ахэмэ ятэ и Тхьэ, хьыкумышІэу тазыфагу дэрэт». Якъубэ ежь ятэ Исхьакъ Щынагъо зыфыриІэмкІэ тхьэрыІо ышІыгъ. 54 Якъубэ Іуашъхьэм къурмэныпхъэр щышІуибзыгъ, иІахьылхэри къыригъэблэгъагъэх шхэнхэу. Зэшхэхэм, ахэмэ Іуашъхьэм чэщыр щырахыгъ. 55 Лабан пчэдыжьым ипхъорэлъфхэми ыпхъухэми къябэужьыгъ, ахэмэ Тхьэм ынэшІу къащифэнэу афелъэІуи, етІанэ ядэжь къежьэжьыгъ.
1 Якъубэ ежь игъогу техьажьыгъ, Тхьэм и МэлэІичхэр ащ къыпэгъокІыгъэх. 2 Ахэр зелъэгъухэм, Якъубэ къыІуагъ: «Мыр Тхьэм иошъогудзэмэ яуцупІ». А чІыпІэм Махъанаим фиусыгъ. 3 Якъубэ мэкъэгъэІухэр ыпэ ригъэшъыхи, Едом хэгъэгум щыІэ хэкоу СэІир, ежь ышэу Іэсау ыдэжь ыгъэкІуагъэх. 4 Ахэмэ унашъо афишІэу ариІуагъ: «Мырэущтэу ешъуІу сизиусхьанэу Іэсау: „Мары уиІумэтэу Якъубэ ыІорэр: ‘Сэ бэрэ хымэ хэгъэгум, Лабан дэжь сыщыпсэугъ. 5 Джы сиІэх цухэри, щыдхэри, мэл-пчэнхэри, унэІут хъулъфыгъэхэри, унэІут бзылъфыгъэхэри; унэшІу къысщыфэным сыщыгугъэу, сикъэбар сизиусхьан раІонэу къэсІопщыгъэх’“». 6 МэкъэгъэІухэм къагъэзэжьи, Якъубэ къыраІуагъ: «Пшэу Іэсау дэжь тыщыІагъ. Ар ежь къыппэгъокІыгъэу къэкІо, нэбгырэ шъиплІи игъус». 7 Якъубэ лъэшэу къащти, къэгумэкІыгъ, кІыгъугъэ цІыфхэри, былымхэри, махъшэхэри купитІоу ыгощыгъэх. 8 «Іэсау зы купым къытебанэу зэхикъутэмэ, – егупшысагъ Якъубэ, – адрэ купым зыкъигъэнэжьын ылъэкІыщт». 9 Якъубэ къыІуагъ: «Сятэ Ибрахьими сятэ Исхьакъи я Тхь, сихэгъэгу, сиІахьылхэм адэжь згъэзэжьынэу О, Зиусхьанэу къысэзыІуагъэр, ЫнаІэ къыстетынэу сызгъэгугъагъэр! 10 Къыстефэрэп сэ зэкІэ шІугъэу, зэкІэ шъыпкъагъэу О уиІумэт къыфэплъэгъугъэр. Сибэщ закъо сІыгъэу мы Иордан псыхъом сызэпырыкІыгъагъ, джы купитІу мылъку яІэу сигъусэ. 11 СыолъэІу, сыщыухъум сэ сшэу Іэсау! Сыда пІомэ ащ сыщэщынэ: ар къэкІонышъ, сэри, ныхэри, зэкІэ кІалэхэри, тиукІынкІэ сэщынэ. 12 Орба къысэзыІуагъэр: „Сэ о шІу къыпфэсшІэщт, ипчъагъэкІэ зэрэбэм къыхэкІэу плъытэн умылъэкІыным нэсэу, хы пшахъом фэдэу, о птекІыщт цІыфхэр згъэбэгъощтых“». 13 А чэщыр Якъубэ а чІыпІэм щырихи, иІагъэм Іэсау пае тынхэр къыхихыгъэх: 14 пчэн шъитІу, ачъэ тІокІ, мэл шъитІу, тІы тІокІ; 15 якъунанхэр акІыгъухэу ащырэ мэхъшэ щэкІ, чэм тІокІитІу, цуипшІ, щыдыбз тІокІ, щыдипшІ. 16 ИунэІутмэ Іэхъогъу пэпчъ шъхьаф-шъхьафэу арити, ариІуагъ: «Сапэ шъуитэу шъукІу, шъуазыфагу чІыгууанэ къижъугъан». 17 Апэрэм унашъо фишІыгъ: «Сэ сшэу Іэсау уІукІэу: „Хэт урий? Тыдэ укІорэ? Хэт иІэхъогъуа уапэ итыр?“ ыІоу, къызыоупчІыкІэ, 18 джэуап ет: „Мыхэр уиІумэтэу Якъубэ ибылымхэу сизиусхьан Іэсау тынэу къыпфишІыгъэхэр арых. Мары ежь Якъуби тауж ит“». 19 А дэдэр ариІуагъ ятІонэрэми, ящэнэрэми, зэкІэ Іэхъогъумэ ауж итыгъэхэми: «Шъори, Іэсау къызышъупэгъокІыкІэ, джащ фэдэу яшъуІу. 20 ЕтІани ешъуІу: „Мары уиІумэтэу Якъуби тауж ит“». Сыда пІомэ ар егупшысэщтыгъэ: «Сапэ изгъэшъыгъэ тынхэмкІэ ащ ынэшІу къызщызгъэфэн. ЕтІанэ, тызэІукІэмэ, дэгъоу къыспэгъокІынкІи мэхъу». 21 Джаущтэу тынхэр апэ ригъэшъыхи, ежь а чэщыр пщыпІэм щырихыгъ.
Якъубэ Тхьэм зэребэныгъэр
22 А чэщ дэдэм Якъубэ къэтэджи, ишъузитІуи, иунэІут бзылъфыгъитІуи, ыкъо пшІыкІузи зыдырищажьэхи, псыикІыпІэмкІэ Ябэкъ зэпырыкІыгъ. 23 Ахэр псыхъом зэпырищыгъэх, зэкІэ иІагъэри зэпырищи, 24 ежь Якъубэ изакъоу къэнагъ. Нэфылъыр къызэкІечыфэ лІы горэ ащ къебэныгъ. 25 КъызэрэтемыкІошъущтыр Ащ къызелъэгъум, ыкопкъ зэрытыпІэ къынэси, къупшъхьэ зэрытыпІэр зэриутыгъ. 26 ЕтІанэ къыриІуагъ: «СыкъэтІупщ, нэф къэшъыгъ». Ау Якъубэ къыІуагъ: «УнэшІу къысщымыфэу устІупщыщтэп». 27 «Сыда о пцІэр?» – адрэр къеупчІыгъ. Мыдрэм къыІуагъ: «Якъуб». 28 Арыти адрэм къыриІуагъ: «Джы къыщегъэжьагъэу о пцІэ Якъубэжьыщтэп, Исраил нахь; сыда пІомэ о Тхьэми цІыфхэми уябэныщтыгъэ, текІоныгъэри къыдэпхыщтыгъэ». 29 Якъуби елъэІугъ: «О пцІэ къысаІоба». Адрэм къыриІожьыгъ: «Сыд о сцІэ хэбгъотэщтыр?» Ащ дэжьым Ащ ынэшІу къыщыщифагъ. 30 «Сэ мыщ Тхьэм ынэгу сыщыкІэплъагъ, псэоуи сыкъэнэжьыгъ» ыІуи, Якъубэ ар зыщыхъугъэ чІыпІэм Пэниел фиусыгъ. 31 Якъубэ Пэнуел зэпичы зэхъум, тыгъэр къыкъокІыгъ. Ар ыкопкъэу узырэм ригъэлъэщаощтыгъэ. 32 Джащ къыхэкІэу джы къызнэсыгъэм исраил цІыфхэм копкъ зэхэтыпІэм фэу телъыр ашхырэп, сыда пІомэ Къебэныгъэр Якъубэ ыкопкъ зэхэтыпІэ фэу телъым нэсыгъагъ.
Якъубэ Іэсау зэрэІукІагъэр
1 Якъубэ зэплъэм, мары Іэсау нэбгырэ шъиплІ игъусэу къакІоу ылъэгъугъ. Леаи, Рахъэли, иунэІут бзылъфыгъитІуми ясабыйхэр Якъубэ янэхэм акІыгъунхэу ышІыгъэх. 2 Ишъуз гуадзэхэмрэ ахэмэ ясабыйхэмрэ апэ ригъэуцуагъэх, ахэмэ ауж Леарэ ащ исабыйхэмрэ ригъэхьагъэх, етІанэ зэкІэмэ ауж Рахъэлрэ Юсыфрэ ригъэуцуагъэх. 3 Ежь зэкІэ ахэмэ апэ иуцуи, ыш екІуалІэзэ, чІыгум нэсэу блэунае шъхьащэ ышІыгъ. 4 Ау Іэсау къыпэгъочъи, ІаплІ къырищэкІызэ, ыпшъэ зыкъыридзи, къебэугъ, тІури гъыгъэ. 5 Іэсау зэплъэм, шъузхэри бынхэри ылъэгъуи, къыІуагъ: «Хэт щыщых мы уигъусэхэр?» Якъубэ джэуап къытыжьыгъ: «Тхьэм игукІэгъукІэ уиІумэт къыритыгъэ бынхэр арых». 6 Шъуз гуадзэхэмрэ ахэмэ ясабыйхэмрэ Іэсау къекІуалІэхи, шъхьащэ къыфашІыгъ. 7 Ащ ыуж Леа исабыйхэр игъусэхэу къекІуалІи, шъхьащэ къыфашІыгъ, етІанэ Рахъэлрэ Юсыфрэ къекІуалІэхи, шъхьащэ къыфашІыгъ. 8 Іэсау къыІуагъ: «Мы сыкъызІукІэгъэ Іэхъогъухэр сыд лІэужыгъоха?» Якъубэ джэуап къытыжьыгъ: «Ар сизиусхьан нэшІукІэ къысэплъыным пае». 9 «Сэ сиІэр икъущт, сшы, – Іэсау ыІуагъ, – оуиер о уерэІ». 10 «Хьау, – ыІуагъ Якъубэ, – нэшІукІэ къысэплъи, мы тыныр сІых! О услъэгъуныр – Тхьэм ынэгу занкІэу сыкІэплъэным ычІыпІ, о дэгъоу укъыспэгъокІыгъ! 11 Сызэрэпфэразэм ишыхьатэу тынэу къыпфэсшІыгъэр штэ, сэ Тхьэм гукІэгъу къысфишІыгъ, сызыфэныкъо щыІэп». Якъубэ елъэІути, Іэсау тыныр ыштэнэу къезэгъыгъ. 12 «Гъогум тытехьан, – къыІуагъ Іэсау, – сэ уапэ ситэу сыкІощт». 13 Ау Якъубэ ащ риІожьыгъ: «Сизиусхьан ешІэ сабыйхэр зэрэхъыбыехэр. Симэл-пчэнхэмрэ былым пІашъэхэмрэ ащых: ахэр мэфэ псаум зыпфыхэкІэ, зэкІэ къозэу хъущтых. 14 О сизиусхьан, тапэ итэу кІо, сэ, уиІумэт, мэкІэ-макІэу, былымыр зэрэкІощтым фэдэу, сабыйхэр зэрэкІощтхэм фэдэу сыкъэкІощт сизиусхьан дэжь, СэІир сыкъэсыфэ». 15 Іэсау къыІуагъ: «ЦІыфэу скІыгъухэм ащыщэу заулэ уигъусэнэу къэзгъэуцун». Якъубэ къыІуагъ: «Сыда ар зэрищыкІагъэр? УнэшІу къысщыфэ къодыеми сэркІэ екъу. Сизиусхьан, укъысфэдэгъущ!» 16 А мэфэ дэдэм Іэсау ежь игъогукІэ СэІир къыгъэзэжьыгъ. 17 Якъубэ СукъоткІэ кІуагъэ, унэ зыфишІыгъ, былымхэм чэлхэр афишІыгъэх. Джащ пае а чІыпІэм Сукъот фиусыгъ. 18 Мэсэпэтамым къикІыжьи, зи мыхъун къемыхъулІэу Якъубэ КъэнаІан хэгъэгум ит Щэхэм къалэм къэкІуагъ. Къалэм дэмыхьэу, ащ пэмычыжьэу къыщыуцугъ. 19 Щэхэм лІым ятэу Хъаморэ ыкъомэ яшъоф щыщэу чІыгу тыжьын ахъщишъэкІэ ыщэфи, ащ ежь ищэтыр щигъэІагъ. 20 Ащ къурмэншІыпІи щигъэуцуи, фиусыгъ: «Тхьэ, Исраил и Тхь».
Якъубэ ыпхъу Динэ емыкІу къызэрэрашІагъэр
1 Динэ, Якъубэ Леа фигъотыгъэ пшъашъэр, а чІыпІэм щыпсэурэ пшъашъэмэ адэжь кІуагъэ. 2 А хэгъэгум ипщэу хъыу лъэпкъым щыщэу Хъамор ыкъоу Щэхэм пшъашъэр къылъэгъуи, ыубытыгъ, голъи, емыкІу рихыгъ. 3 Ащ ыпсэ Якъубэ ыпхъоу Динэ кІэрыпкІагъ, пшъашъэр шІу ылъэгъугъэу, гущыІэ ІэшІукІэ дэгущыІагъ. 4 Щэхэм ятэу Хъамор риІуагъ: «Мы пшъашъэр шъузыкІэ сэгъаштэ». 5 Якъубэ ыпхъу Динэ ынапэ зэрэтырахыгъэр зэхихыгъ. Ау ыкъохэр былымхэм апэтхэу шъофым щыІагъэхэти, ахэр къэкІожьыфэхэ Якъуби зи ыІуагъэп. 6 Щэхэм ятэу Хъамор Якъубэ дэжь къыдэгущыІэнэу къэкІуагъ. 7 Якъубэ ыкъохэр, хъугъэр зызэхахым, шъофым къикІыжьыгъэх, лъэшэу гукъао лІымэ ащыхъугъ, губжым къызэкІигъэнагъэх, сыда пІомэ Якъубэ ыпхъу лые зэрэрахыгъэр – ИсраилкІэ емыкІушху, аущтэу пшІэ хъущтыгъэп. 8 Хъаморэ къыІуагъ: «Сэ скъо, Щэхэм, ыгукІэ шъуипшъашъэ кІэрыпкІагъ; сышъолъэІу, шъузкІэ ар ащ къешъутба. 9 Благъэ шъукъытфэхъун; шъуипшъашъэхэр тэ къытэшъутыхэзэ шъушІын, тэ типшъашъэхэр шъо шъуштэных. 10 Шъукъыддэпсэу, тичІыгу шъуапашъхьэ илъ, шъущыпсэу, шъущылажь, шъуиунаеуи ар зыІэкІэжъугъахь». 11 Ежь Щэхэм пшъашъэм ятэрэ ышхэмрэ ариІуагъ: «НэшІукІэ шъукъысэплъынэу сшІэ къодыемэ, зэкІэ зыфашъуІорэр къышъостыщт. 12 ЗыфашъуІорэм фэдиз нысэ уасэрэ шІухьафтынрэ къэжъугъэнаф, къышъостыщт; пшъашъэр шъузкІэ къысэшъути ары ныІэп сызыфаер». 13 Якъубэ ыкъомэ Щэхэми ащ ятэу Хъамори тхьагъэпцІыгъэ хэлъэу джэуап аратыжьыгъ, сыда пІомэ ащ ежьхэм ашыпхъоу Динэ ынапэ тырихыгъ. 14 «Ар тфэшІэщтэп, – аІуагъ ахэмэ, – цІыфэу сунэт амышІыгъэм шъузкІэ тшыпхъу еттыныр тэркІэ емыкІу хъущт. 15 Шъо шъуилъэІу тэ тыкъызезэгъыщт закъор шъори тэщ фэдэ шъухъоу, зэкІэ шъо хъулъфыгъэу шъуиІэр сунэт шъушІыгъэ зыхъукІэ ары. 16 ЕтІанэ типшъашъэхэр къыжъудэдгъэкІощтых, шъо шъуипшъашъэхэри тэ шъузкІэ тштэщтых, тыжъудэпсэущт, зы цІыф лъэпкъэуи тыхъущт. 17 Ау сунэт зяжъугъэшІынымкІэ шъукъытэмыдэІумэ, тэ тшыпхъу тигъусэу тыІокІыжьы». 18 Хъамори ащ ыкъо Щэхэми а гущыІэхэр агу рихьыгъэх. 19 КІэлэ ныбжьыкІэм ащ лъыпытэу сунэт заригъэшІыгъ – джарэу Якъубэ ыпхъу ащ шІу ылъэгъущтыгъэ. Ятэ иунэ иунагъокІэ Щэхэм ары лъытэныгъэ анахьэу зыфашІыщтыгъэр. 20 Хъаморэрэ ащ ыкъо Щэхэмрэ якъалэ икъэлэпчъэ цІыф зэІукІапІэм къыІухьэхи, къэлэдэсмэ мырэущтэу араІуагъ: 21 «Мы цІыфхэр тэркІэ мамырых, мы чІыгум щэрэтІысхи, шъхьафитэу щэрэлажьэх; мары чІыгур апашъхьэ щыхъоо-пщау. Япшъашъэхэр тэ шъузкІэ къытатхэу, тэ типшъашъэхэри ежьхэм яттыхэу тшІыщт. 22 Мы цІыфхэр къыддэпсэунхэу, зы цІыф лъэпкъэуи тыщытынэу къызезэгъыщтхэ закъор – ежьхэр сунэт зэрашІыгъэхэм фэдэу, тэри зэкІэ тихъулъфыгъэхэр сунэт тшІымэ ары. 23 ЯІэхъогъухэри, ямылъкуи, зэкІэ ябылымхэри тэтые хъущтхэба? Адетэжъугъашти, ахэр къытхэтІысхьащтых». 24 Къэлэдэсхэм Хъаморэрэ ащ ыкъоу Щэхэмрэ адырагъэштагъ; къэлэ хъулъфыгъэхэр зэкІэ сунэт ашІыгъэх. 25 Ящэнэрэ мафэм, ахэр зыщысымэджагъэхэм, Якъубэ ыкъуитІу, Динэ ышыхэу ЩымІонрэ Лэуйрэ, шъхьадж ичатэ къышти, пэрыохъу ямыІэу къалэм дахьэхи, зэкІэ хъулъфыгъэхэр аукІыгъэх. 26 Хъамори ащ ыкъоу Щэхэми чатэкІэ аукІыгъэх; етІанэ Щэхэм иунэ Динэ къыращыжьи, къэкІожьыгъэх. 27 Нэужым Якъубэ ыкъохэр укІыгъэхэм адэжь къэкІожьхи, ашыпхъу ынапэ зыщытырахыгъэ къалэр ахъункІагъ. 28 Ахэмэ мэл-пчэнхэри, былым пІашъэхэри, щыдхэри, сыд лІэужыгъоу къалэм дэлъыгъэри, шъофым рагъотагъэри аштагъ. 29 ЗэкІэ ахэмэ ямылъку зыдаштагъ, зэкІэ ясабыйхэри, яшъузхэри гъэрэу аубытыгъэх, зэкІэ унэмэ арылъхэри зэрапхъуагъэ. 30 Якъубэ ЩымІонрэ Лэуйрэ ариІуагъ: «Мы чІыгум щыпсэухэрэм, къэнаІан цІыфхэми пэрыц цІыфхэми салъэгъу мыхъоу шъушІи, тхьамыкІагъо къысфэшъухьыгъ. Сэ цІыфэу сиІэр макІэ; сэ къыспэуцунхэу къэзэрэугъойхэмэ, сэри зэкІэ тилІакъуи тагъэкІодыщт». 31 Ау ЩымІонрэ Лэуйрэ ятэ къыраІожьыгъ: «Тэ тшыпхъу бзылъфыгъэ хэтакІом фэдэу удэзекІо хъущта?»
Якъубэ Бэтэл дэжь зэрэщыІагъэр
1 Тхьэм Якъубэ къыриІуагъ: «ЗыІэти, Бэтэл кІо, ащ щыпсэу; о пшэу Іэсау зышІобгъэбылъэу узыхэхьажьым, зыкъыозыгъэлъэгъугъэ Тхьэм пае къурмэншІыпІэ ащ щыгъэпс». 2 Якъубэ ежь иунагъуи зэкІэ ицІыфхэми ариІуагъ: «Хымэ тхьэ сурэтэу шъуиунэмэ арытхэр чІэшъудзых, зышъуукъэбзыжь, шъуищыгъынхэри зэблэшъухъух, 3 Бэтэл тыкІощт, ащ сэ къурмэншІыпІэ щызгъэпсыщт – тхьамыкІагъом сызыхэт мафэм сыкъызэхэзыхи, сызытет гъогум щысигъусэгъэ Тхьэм пае». 4 Арыти зэкІэ хымэ тхьэ сурэтэу аІыгъыгъэхэр, тхьакІумпылъхьэу атхьакІумэхэм апылъыгъэхэри Якъубэ къыратыгъэх; Якъубэ ахэр Щэхэм пэмычыжьэу щыт чъыгаем ычІэгъ щычІитІагъэх. 5 ЕтІанэ ахэр ежьагъэх. Тхьэм ищынагъо къэлэ гъунэгъухэм адэсхэр зэлъиубытыгъэхэти, Якъубэ ыкъомэ алъежьагъэхэп. 6 КъэнаІан хэгъэгум ит Лузэ, джы БэтэлкІэ заджэхэрэм, Якъубэ къэкІуагъ – ежьыри зэкІэ игъусэ цІыфхэри. 7 Ащ къурмэншІыпІэ щигъэпси, а чІыпІэм цІэ фишІыгъ: Ел-Бэтэл сыда пІомэ ежь ышы зышІуигъэбылъэу зыкІеІэжьым, мы чІыпІэм Тхьэм зыкъыщыфигъэлъэгъуагъ. 8 Дэборэ, Рыбкъэ быдз езгъэшъуагъэу зыпІугъэр лІагъэ, Бэтэл ыхэкІэ чъыгэе чІэгъым ар щычІалъхьажьыгъ, Якъубэ а чъыгаем Зыщагъаехэрэ чъыгаекІэ еджагъ. 9 Якъубэ Мэсэпэтам къызекІыжьым, Тхьэр ащ джыри къыфэлъагъуи, ынэшІу къыщифагъ. 10 Тхьэм ащ къыриІуагъ: «О пцІэр Якъуб, ау тапэкІэ Якъуб къыуаІожьыщтэп. Джы щегъэжьагъэу о пцІэр – Исраил!» Джаущтэу ащ къыфиусыгъ Исраил. 11 Ащ джыри Тхьэм къыриІуагъ: «ЛъэкІ пстэури ЗиІэ Тхьэр Сэры. Орэбагъу, пхэрэхъу: цІыф лъэпкъ о птекІыщт, цІыф лъэпкъыбэ! Пачъыхьэхэр о къыптекІыщтых! 12 Ибрахьимэрэ Исхьакъырэ ястыгъэ чІыгур, ори къыптекІыщтхэми ястыщт». 13 Тхьэр ащ къызщыдэгущыІэгъэ чІыпІэм ІукІыжьыгъ. 14 Ар къызщыдэгущыІэгъэ чІыпІэм Якъубэ мыжъосын щигъэуцуи, шъон къурмэн щишІи, санэрэ дагъэрэ тырикІагъ. 15 Якъубэ а чІыпІэм Бэтэл фиусыгъ.
Рахъэл Бинямин къыфэхъуи, зэрэлІагъэр
16 Бэтэл дэкІыгъэхэу, Ефрат нэсынхэкІэ джыри чІыгуонэ заулэ къэнагъэу, Рахъэл сабый къыфэхъугъ. Хъошъэным ар ифэгъагъ. 17 Сабый къыфэхъуным икъин зыхэтым, мамыкум ащ къыриІуагъ: «Умыщын, джыри зы шъао уиІ!» 18 Ыпсэ зыщыхэкІыным Рахъэл ыкъо Бэн-Они фиусыгъ. Ау ятэ ащ БиняминкІэ еджагъ. 19 Рахъэл лІагъэ, Ефрат, джы Бэтлэхъэм зыфаІорэм, екІурэ гъогум дэжь щычІалъхьажьыгъ. 20 Ащ икъэунэ Якъубэ мыжъосын тыригъэуцуагъ. Ар непэ нэсыжьэу Рахъэл икъэунэ имыжъосын. 21 Исраили ежьи, Іэдэр плъэпІэ лъагэм ыкІыб ищэтырэ щигъэІагъ.
Якъубэ ыкъохэр
22 А хэгъэгум Исраил къызеты лъэхъаным Рубэн ятэ ишъуз гуадзэу Билхэ зыцІэм голъыгъ. Исраил ар зэхихыгъэ. Якъубэ къо пшІыкІутІу иІагъ. 23 Леа ыкъохэр: Якъубэ иапэрэ сабыеу Рубэн, ащ ыуж ЩымІон, Лэуй, Ехъуд, Иссашхар, Зэбулун. 24 Рахъэл ыкъохэр: Юсыфрэ Биняминрэ. 25 Рахъэл иунэІут бзылъфыгъэ Билхэ ыкъохэр: Данрэ Нафталыйрэ. 26 Леа иунэІут бзылъфыгъэ Зилпа ыкъохэр: Гъадрэ Ащэррэ. Ахэр Якъубэ ыкъохэу Мэсэпэтамым къыщыфэхъугъэхэр арых.
Исхьакъ зэрэлІагъэр
27 Якъубэ ежь ятэ Исхьакъэу, Къыриат-Арбэ, джы Хъэурэн зыфаІорэм пэблэгъэ Мамрэ дэсым дэжь къэкІуагъ. Ащ Ибрахьими Исхьакъи хэхэсэу щыпсэущтыгъэх. 28 Илъэсишъэрэ тІокІиплІырэ Исхьакъ ыгъэшІагъ. 29 Исхьакъ жъы дэдэ хъугъэу ыпсэ хэкІыгъ, дунаим ехыжьи, ицІыф лъэпкъ хэхьажьыгъ, ыкъохэу Іэсаурэ Якъубэрэ ар чІалъхьажьыгъ.
Іэсау къытекІыгъэхэр
1 Мары Іэсау – ар дэдэр Едом – къытекІыгъэхэр. 2 Іэсау къэнаІан цІыфмэ апхъумэ ащыщхэр шъузкІэ ыштагъэх: Адэ, хьат лъэпкъэу Елонэ ыпхъур, хъыу лъэпкъэу ЦыбыІон ыпхъоу Іанэ ыпхъу Охъолибамэ. 3 Басмати ары, Исмахьилэ ыпхъоу Нэбаиот ышыпхъу. 4 Адэ Іэсау къыфилъфыгъ Елифаз; Басмат РэІуел къылъфыгъ. 5 Охъолибамэ къыфэхъугъэх ЕІущ, ЯІылам, Къорахъ. Ахэр арых Іэсау ыкъохэу КъэнаІан хэгъэгум къыщыфэхъугъэхэр. 6 Іэсау ишъузхэри, ыкъохэри, ыпхъухэри, зэкІэ иунэ цІыфэу исхэри, иІэхъогъухэри, зэкІэ ибылымхэри ыугъойхи, КъэнаІан хэгъэгум зэкІэ щигъотыгъэ мылъкури зыкІигъэгъуи, ышэу Якъубэ кІэрыкІи, нэмыкІ хэгъэгу кІуагъэ. 7 Ямылъкухэр бэ дэдэ зэрэхъугъэхэм къыхэкІэу, зэдыщыІэнхэ алъэкІыжьыщтыгъэп; Іэхъогъоу яІэхэр зэрэбэм къыхэкІэу зыщыпсэухэрэ чІыгум ахэр тефэжьыщтыгъэхэп. 8 Джаущтэу Іэсау СэІир къушъхьэлъэ хэкум итІысхьагъ. Іэсау – ар дэдэр ары Едомыр. 9 Къушъхьэлъэ хэкоу СэІир щыпсэурэ едом цІыфхэм ятэ пІашъэу Іэсау мары къытекІыгъэхэр: 10 мары Іэсау ыкъомэ ацІэхэр: Елифаз, Іэсау ишъузэу Адэ ыкъор, РэІуел, Іэсау ишъузэу Басмат ыкъор. 11 Елифаз ыкъохэр: Тэман, Омар, Цэфэу, ГъаІытам, Къэназ. 12 Іэсау ыкъоу Елифаз ТымнаІ ыцІэу шъуз гуадзэ иІагъ, ащ Іамалэкъ къылъфыгъ. Ахэр арых Іэсау ишъузэу Адэ ыкъомэ къатекІыгъэхэр. 13 Марых РэІуел ыкъохэр: Нахъат, Зэрахъ, Щам, Мызэ – ахэр Іэсау ишъузэу Басмат ыкъомэ къатекІыгъэх. 14 Мыхэр арых Іанэ ыпхъоу, ЦыбыІон ипхъорэлъфэу, Іэсау ишъузэу Охъолибамэ ыкъуагъэхэр: ЕІущ, ЯІылам, Корах. 15 Мары Іэсау ыкъомэ къатекІыгъэмэ янахьыжъхэр: Іэсау ищыпэлъфэу Елифазэ ыкъохэр: нахьыжъхэу Тэман, Омар, Цэфэу, Къэназ, 16 нахьыжъхэу Корах, ГъаІытам, Амалек. Мыхэр Елифазэ инахьыжъхэу Едом хэгъэгум щыІагъэхэр арых; мыхэр Адэ ыкъомэ къатекІыгъэх. 17 Мыхэр Іэсау ыкъомэ къатекІыгъэмэ янахьыжъхэр арых: нахьыжъхэу Нахъат, Зэрахъ, Шаммэ, Мызэ. Мыхэр РэІуел инахьыжъхэу Едом хэгъэгум щыІагъэхэр арых; ахэр Іэсау ишъузэу Басмат ыкъомэ къатекІыгъэх. 18 Мыхэр Іэсау ишъузэу Охъолибамэ ыкъох: нахьыжъхэу ЕІущ, ЯІылам, Корах. Ахэр Іанэ ыпхъу Охъолибамэ, Іэсау ишъуз, къылъфыгъэ нахьыжъых. 19 Мыхэр Іэсау, ар Едом, ыкъомэ къатекІыгъэхэр арых, мыхэр арых ахэм янахьыжъхэри.
СэІир къытекІыгъэхэр
20 Мыхэр хор лъэпкъым щыщэу СэІир ыкъохэу, а хэгъэгум щыпсэущтыгъэхэр арых: Лотан, Щэуал, ЦыбыІон, Іанэ, 21 Дищэн, Ецэр, Дищан. Мыхэр арых СэІир ыкъохэу, хор цІыфхэм янахьыжъхэу, Едом хэгъэгум щыпсэущтыгъэхэр. 22 Лотан ыкъощтыгъэхэр: Хъорыйрэ Хэмамрэ; Лотан ышыпхъугъ Тымнэ. 23 Мыхэр Щэуал ыкъох: Іалуан, Манахъат, Іэбал, Щэфэу, Онам. 24 Мыхэр ЦыбыІон ыкъох: Айэрэ Іанэрэ. Ар Іанэу, ежь ятэу ЦыбыІон ищыдхэр ыгъэхъухэзэ, шъоф нэкІым псыфабэхэр къизгъотэгъагъэр ары. 25 Мыхэр арых Іанэ къыфэхъугъэхэр: Дишонрэ Іанэ ыпхъоу Охъолибамэрэ. 26 Мыхэр Дишон ыкъох: Хъэмдан, Ещбан, Итран, Къэран. 27 Мыхэр Эцер ыкъох: Билхан, ЗаІауан, Іакъан. 28 Мыхэр Дишан ыкъох: Уц, Аран. 29 Мыхэр хор цІыфхэм янахьыжъых: нахьыжъхэу Лотан, Щэуал, ЦыбыІон, Іанэ, 30 нахьыжъхэу Дишон, Эцер, Дишан. СэІир хэгъэгум исыгъэхэмкІэ мыхэр арых хор цІыфхэм янахьыжъхэр.
Едом цІыфхэм япачъыхьэхэмрэ ялІакъохэмрэ
31 Мары исраил цІыфхэм, пачъыхьэ яІэ хъуным ыпэкІэ, Едом хэгъэгум ипачъыхьагъэхэр. 32 Едом щыпачъыхьагъ БэІор ыкъоу БэлаІ, ащ икъалэ ыцІэр Динхабэ. 33 БэлаІ зэлІэм, ащ ыуж Боцрэ щыщ Зэрахъ ыкъоу Иобаб пачъыхьэ хъугъэ. 34 Иобаб лІагъэ, ащ ыуж тэманхэм яхэгъэгу щыщэу Хъущам пачъыхьэ хъугъэ. 35 Хущам лІагъэ, ащ ыуж Бэдад ыкъо Хадад пачъыхьэ хъугъэ, Моаб хэгъэгум мыдиан цІыфхэр щызэхэзыкъутагъэр: ащ икъалэ ыцІэр Іауит. 36 Хадад лІагъэ; ащ ыуж Масрэкъэ щыщэу Самлэ пачъыхьэ хъугъэ. 37 Самлэ лІагъэ; ащ ыуж псыІушъом Іут Рэхъобот щыщ Саул пачъыхьэ хъугъэ. 38 Саул лІагъэ, ащ ыуж Іахбэр ыкъо БаІал-Хъанан пачъыхьэ хъугъэ. 39 Іахбэр ыкъоу БаІал-Хъанан лІагъэ, ащ ыуж пачъыхьэ хъугъэ Хадар; ащ икъалэ ыцІэр ПаІу; ащ ишъуз ыцІэр Мэхэтабэл, Мезахаб ыпхъоу Матрэд ыпхъу. 40 Мыхэр арых Іэсау инахьыжъхэр, ахэмэ ялІакъохэр, япсэупІэхэр, ацІэхэр: нахьыжъхэу Тымнэ, Іалуа, Етэт, 41 нахьыжъхэу Охъолибамэ, Елэ, Пинон, 42 нахьыжъхэу Къэназ, Тэман, Мыбцар, 43 нахьыжъхэу Магъдиел, Іирам. Ахэр арых едом нахьыжъхэр, япсэупІэхэмкІэ, чІыгоу аІэ илъыгъэмкІэ. Джары Іэсау, едом цІыфхэм ятэ пІашъэхэр.
Юсыф ипкІыхьапІэхэр
1 Ятэ нахьыпэкІэ хымэу зэрысыгъэ КъэнаІан хэгъэгум Якъубэ итІысхьагъ. 2 Мары Якъубэрэ ащ къытекІыгъэхэмрэ якъэбар. Юсыф илъэс пшІыкІубл ыныбжьыгъ. Ышхэм ягъусэу, Билхэрэ Зилпарэ акъохэм, былымхэр ыгъэхъущтыгъэх, ахэмэ яшІэпхъэджагъэхэр ятэ нигъэсыжьыщтыгъ. 3 Исраил адрэ ыкъохэм анахьэу Юсыф шІу ылъэгъущтыгъэ, сыда пІомэ ар ижъышъхьэм ыгъотыжьыгъагъ, аужыпкъэм ащ гъуапэ зиІэ щыгъын кІыхьэ фаригъэшІыгъагъ. 4 Зэш пстэуми анахьэу ар ятэ шІу зэрилъэгъурэр ахэмэ залъэгъум, ауджэгъуи, гуфэбэныгъэ зыхэлъ гущыІи раІожьын алъэкІыщтыгъэп. 5 Юсыф зэгорэм пкІыхьапІэ ылъэгъуи, ар ышымэ къафиІотагъэти, джыри нахь лъэшэу ахэмэ ар ауджэгъугъ. 6 Ащ ахэмэ ариІуагъ: «ПкІыхьапІэу слъэгъугъэм моу шъукъедэІуба. 7 Бганэхэр губгъом щэтэпхы фэд, мары сэ сибганэ занкІэу къэуцугъ, мары шъо шъуибганэхэр ащ хъураеу къеуцокІыхи, сэ сибганэ шъхьащэ къыфашІыгъ». 8 Ащ ышымэ къыраІуагъ: «О тэ пачъыхьэ укъытфэхъу пшІоигъу, ара? О пІэ тилъы хъунэуи?» – ИпкІыхьапІэхэмрэ игущыІэхэмрэ апае ар джыри нахь лъэшэу алъэгъу мыхъоу хъугъэ. 9 Ежь Юсыф джыри ащ нэмыкІ пкІыхьапІэ ылъэгъуи, ышымэ ар къафиІотагъ: «Мары сэ пкІыхьапІэ слъэгъугъэ, мары тыгъэми, мазэми, жъогъо пшІыкІузми сэ шъхьащэ къысфашІы!» 10 Яти ышыхэми а пкІыхьапІэр къызафеІуатэм, ятэ ащ къегыеу къыриІуагъ: «Сыд пкІыхьапІа плъэгъухэрэр? Сэри, уяни, о пшыхэри чІыгум нэс о шъхьащэ къыпфэтшІынэу уадэжь тыкъэкІонэу ара?» 11 Ышмэ ащ агу къыфыхэкІыщтыгъ; ау ятэ а къэбарыр ыгу риубытагъ.
Юсыф ышыхэм зэращагъэр
12 Зэгорэм Юсыф ышыхэр ятэ имэлхэр Щэхэм дэжь щагъэхъунэу кІуагъэх. 13 Исраил риІуагъ Юсыф: «Пшыхэм Щэхэм дэжь мэлхэр щагъэхъухэба? КІо, ори узгъэкІон ахэмэ адэжь». Юсыф джэуап къытыжьыгъ: «Мары сэ сыхьазыр». 14 Исраил ащ риІуагъ: «КІо, пшыхэр узынчъэхэмэ, былымхэм язытети къеплъ, джэуапи къысфахьыжь». Арыти Хъэурэн кІэир ыбгыни, Юсыф Щэхэм къэкІуагъ. 15 Юсыф гъощагъэу шъофыр къыкІухьэзэ, лІы горэ къыІукІи, къеупчІыгъ: «Сыда узылъыхъурэр?» 16 «Сэ сызлъыхъухэрэр сшыхэр арых, – къыІуагъ Юсыф, – къысаІу, тыда ахэмэ мэл-пчэнхэр зыщагъэхъухэрэр?» 17 Адрэм къыриІожьыгъ: «Ахэр мыщ ІукІыжьыгъэх, сэ зэхэсхыгъэ ахэмэ Дотан кІонхэу зэраІощтыгъэр». Джащыгъум Юсыф ышымэ ауж ихьи, ахэр Дотан къыщигъотыгъэх. 18 Ахэмэ ар чыжьэкІэ къалъэгъугъ; анэсыфэ нэс ар зэраукІыщтыр зэхалъхьэу аублагъ. 19 Ахэмэ зэраІожьыгъэ: «Мары пкІыхьапІэлъэгъур къэкІо. 20 НекІох, тыукІынышъ, псынэ игъукІыгъэ горэм итыдзэжьын, хьэкІэ-къуакІэмэ ашхыгъэу тІощт; теплъын ащ ипкІыхьапІэмэ къарыкІырэм». 21 Ау ар Рубэн зэхихи, Юсыф къыгъэнэжьыгъ. «Ыпсэ хэтэшъумыгъэх», – ыІуагъ ащ. 22 ЕтІани къыІуагъ: «Лъыр шъумыгъачъэ, шъоф нэкІым ит псынэ игъукІыгъэм ишъудз, ау шъуІэ тешъумыщай». Аущтэу ащ зыкІиІуагъэр, ар псэоу къыгъэнэжьынышъ, ятэ ритыжьынэу арыгъэ. 23 Юсыф ышымэ адэжь къызэкІом, ахэмэ ащ гъуапэ зиІэ щыгъын кІыхьэу щыгъыгъэр щатхъыгъ. 24 Ащ нэужым аубыти, псынэм радзагъ; ар нэкІыгъэ, псы итыгъэп. 25 Зэшыхэр шхэнхэу тІысыгъэхэ къодыеу зэплъэхэм, алъэгъугъ: исмахьилэ цІыфхэу сатыушІэ куп ГъылыІад къикІэу къэкІо, ахэмэ ямахъшэхэм мэ ІэшІу къызпихрэ чъыги, Іэзэгъу уци, пцантхъи Мысырым ащэ. 26 Ехъуд ышымэ ариІуагъ: «Тшы тыукІымэ, сыда шІуагъэу хэлъыр? Ар зэрэтыукІыгъэр тыушъэфыжьын фаеу хъущт. 27 Исмахьилэ цІыфхэм ятэжъугъащ, тэ тІэ ащ нэмысыгъэу хъущт. Сыд Іо фаеми, ар тэ тшы, зы пкъышъол, зы лъы тыщыщ». Зэшыхэм ащ дырагъэштагъ. 28 Мидиам щыщ сатыушІэхэр блэкІыхэ зэхъум, Юсыф псынэм къыралъэшъужьи, исмахьилэ цІыфмэ тыжьын ахъщэ тІокІыкІэ аращагъ, адрэхэми Юсыф Мысырым ащагъ. 29 Рубэн къэкІожьи, псынэм зеплъэм – Юсыф исыжьэп. Гукъэошхом хэтэу ащ ищыгъынхэр зэІитхъыгъэх. 30 Ышымэ адэжь къыгъэзэжьи, Рубэн ариІуагъ: «Шъэожъыер щыІэжьэп! Адэ сэры? Тыдэ сэ сыкІощта?» 31 ЕтІанэ зэшымэ Юсыф ищыгъын ашти, ачъэ горэ аукІи, щыгъыныр лъым хагъэуагъ. 32 Щыгъын кІыхьэр ятэ фахьыжьи, раІуагъ: «Мыр тэ къэдгъотыгъ! Еплъба – о пкъо ищыгъына мыр?» 33 Якъубэ еплъи, къэкууагъ: «Мыр скъо ищыгъын! ХьэкІэ-къуакІэмэ ар ашхыгъ! Ары, Юсыф захацунтхъагъ!» 34 Якъубэ ищыгъынхэр зэхицунтхъэхи, дзыопхъэ шэкІ пхъашэм хэшІыкІыгъэ шъыгъо щыгъынхэр зыщилъагъэх, мэфабэрэ ыкъо ыгъэягъ. 35 Ыкъохэри, ыпхъухэри ар агъэрэхьатынэу къэзэрэугъоигъэх; ау Якъубэ рэхьатынэу фэягъэп. «Нэшхъэигъэм сыхэтэу, – ыІуагъ ащ, – скъо дэжь хьадрыхэ сыкІожьыщт». Аущтэу зэпимыгъэоу Юсыф ыгъаещтыгъэ. 36 Мидиам цІыфхэм Юсыф Мысырым ипачъыхьэ-фирхьауным иІэнэтІэзехьэмэ ащыщэу, икъэухъумакІомэ ятхьаматэу Потыфар ращагъ.
Ехъудрэ Тамарэрэ
1 А лъэхъаным Ехъуд ышымэ ахэкІыжьи, Іадулам къалэм щыщэу Хъырэ зыцІэм пэмычыжьэу псэунэу щытІысыгъ. 2 Ащ къэнаІан цІыф горэу ШыуаІ зыцІэм ыпхъу Ехъуд ынаІэ тыридзагъ. Ехъуд ар къыщагъ, ыдэжь ихьагъ. 3 Ар лъэрмыхь хъуи, шъао къыфэхъугъ, Ехъуд ащ Іэр фиусыгъ. 4 Джыри лъэрмыхьэ хъуи, шъао къыфэхъугъ; ащ ШуаІ фиусыгъ Онан. 5 Джыри шъао къыфэхъугъ, ШуаІ ащ фиусыгъ Щэлэ. Шъузым кІалэр къызыфэхъум, Ехъуд Къэзиб щыІагъ. 6 Ехъуд ищыпэлъфэу Іэр пае шъуз къыштагъ: ащ ыцІагъэр Тамар. 7 Ехъуд ищыпэлъфэу Іэр Зиусхьаным ыпашъхьэ щышІугъэпти, Зиусхьаным ар ыгъэлІагъ. 8 Ехъуд Онан риІуагъ: «Пшы ишъуз штэжьыри, ащ ычІыпІэ иуцу, иунагъо зэтегъэуцожь». 9 Бзылъфыгъэм ышъо хидзэщтыр ежь иеу зэрэмыхъущтыр Онан ышІэщтыгъэ; ащ пае ыш ишъуз зыдэгъолъкІэ, ищэпс чІыгум тырикІэщтыгъэ, ыш пае сабый къыгъэхъунэу фэмыеу. 10 Ар зэрэзекІощтыгъэр Зиусхьаным игопагъэп, арыти ари Ащ ыгъэлІагъ. 11 Ащ ыуж Ехъуд инысэу Тамарэ риІуагъ: «Сэ скъоу Шелэ ыныбжь екъуфэ, уятэ иунэ шъузабэу исыгу». Аущтэу зыкІиІуагъэр, егупшысагъэшъ ары: «Ари ышымэ афэдэу мылІэгъагъот». Тамарэ ятэ иунэ кІожьыгъэ. 12 Охътабэ тешІагъ, Ехъуд ишъузэу ШыуаІ ыпхъу лІагъэ. Ехъуд зэрэхьатыжьым, имэлхэр зыупхъухэу, Тымнэ щыІэхэм адэжь иныбджэгъоу Іадулам цІыфэу Хъырэ игъусэу кІуагъэ. 13 Тамарэ ипщ имэлхэр зыщаупхъухэрэм Тымнэ къызэрэкІорэр зызэхехым, 14 шъузэбэ щыгъынхэр зыщиххи, техъор къызэрихъохыгъ, ынэгуи рихъуи, Тымнэ екІурэ гъогум Іут Іэнаим икъэлапчъэ ІутІысхьагъ. Шелэ ыныбжь икъугъэми, ежь ащ шъузкІэ зэрэрамытырэр ылъэгъущтыгъэти ары аущтэу зыкІишІыгъэр. 15 Ехъуд ар къызелъэгъум, ынэгу ихъогъагъэти, бзылъфыгъэ хэтакІокІэ ылъытагъ. 16 Ехъуд ащ екІуалІи, риІуагъ: «НекІо, сыкъыбголъынэу сыфай». Ар ежь инысэу зэрэщытыр ышІэщтыгъэп! Адрэм къыІуагъ: «Сыда о къысэптыщтыр, укъызголъмэ?» 17 Ехъуд къыІуагъ: «Іэхъогъум щыщ чыцІ цІыкІу къыпфязгъэщэщт». Бзылъфыгъэм къыІуагъ: «Ар къысфяогъэщэфэ, шэс къысэптыщта?» 18 Ехъуд еупчІыгъ: «Сыд фэдэ шэса къыостыщтыр?» Бзылъфыгъэм къыриІожьыгъ: «Уимыхъурэу шъодэным пышІагъэмрэ, бэщэу ІэкІэ пІыгъымрэ ары». ЗыфиІуагъэхэр ритыхи, ыдэжь ихьагъ, Тамарэ сабый ышъо хэфагъ. 19 ЕтІанэ къэтэджыжьи, кІожьыгъэ, техъор зытырихыжьи, ишъузэбэ щыгъынхэр зыщилъэжьыгъэх. 20 Ехъуд чыцІ цІыкІур Іадулам цІыфэу иныбджэгъум ригъэщагъ шэсыр бзылъфыгъэм къыІихыжьынэу, ау иныбджэгъу ар ыгъотыгъэп. 21 А чІыпІэм щыпсэухэрэм яупчІыгъ: «Тыдэ щыІа бзылъфыгъэ хэтакІоу, Іэнаим гъогум дэжь щысыгъэр?» Ау ахэмэ къыраІожьыгъ: «Мыщ бзылъфыгъэ хэтакІо щыІагъэп». 22 Ащ Ехъуд дэжь къыгъэзэжьи, риІуагъ: «Сэ ар къэзгъотыгъэп. А чІыпІэм щыпсэухэрэм бзылъфыгъэ хэтакІо ащ щымыІагъэу къысаІуагъ». 23 Ехъуд къыІуагъ: «КІо ащ ыдэжь шэсыр къэрэн, тэ къыддэрэмыхьащхыхэри ары ныІэп. Сэ чыцІ цІыкІур фясэгъащэ; ау о бзылъфыгъэр къэбгъотын плъэкІырэп». 24 Мэзищ фэдиз тешІагъэу Ехъуд къыраІуагъ: «Тамарэ, уинысэ, хэукъуагъ, джы мары ар лъэрымыхь хъугъэ». Ехъуд ариІуагъ: «Дэшъущи, жъугъэсты». 25 Ау Тамарэ зыращажьэм, ащ ипщы дэжь ыгъэкІуагъэх раІонэу: «Сэ лъэрымыхь сызыфэхъугъэр мы пкъыгъохэр зиехэр ары». ЕтІани ащ къыІуагъ: «Моу яплъи, мы мыхъурыр, мы шъодэныр, бэщыр къэошІэжьыха?» – еупчІыгъ ар. 26 Ехъуд къышІэжьыгъэх. «Мыр сэщ нахь заф, – къыІуагъ ащ, – ар Шелэ, скъо, зэресымытыгъэр ары зэкІэ къызэрыкІыгъэр». Ехъуд ащ нахьыбэрэ ащ гохьажьыгъэп. 27 Ихъошъэн къызэсым, Тамарэ тІолъфэныкъохэр ышъо хэлъхэу къычІэкІыгъ. 28 Къыфэхъухэ зэхъум, язырэм ыІэ къыгъэлъэгъуагъ; арыти мамыкум Іудэнэ плъыжь Іэм рипхэкІи, къыІуагъ: «Мыр апэу къэхъугъ». 29 Ау ащ ыІэ зэкІихьажьи, ащ ыш къэхъугъ. «Сыдэущтэу уипэрыохъу ІубгъэзыкІыгъа?» – ыІуагъ ныом. Джащ пае ащ Пэрэц фаусыгъ. 30 ЕтІанэ ащ ыуж ыш къэхъугъ, ыІэ Іудэнэ плъыжьыр къещэкІыгъэу. Ащ цІэу Зэрахъ фаусыгъ.
Юсыфрэ Потыфар игуащэрэ
1 Юсыф Мысырым ащагъ; фирхьауным иІэнэтІэзехьэмэ ащыщэу, икъэухъумакІомэ ятхьаматэу, пачъыхьэ унэм щыпсэурэ мысыр цІыфым Потыфар ар исмахьилэ сатыушІэхэу къэзыщагъэмэ ащищэфыгъ. 2 Зиусхьаныр Юсыф игъусагъэти, ащ иІофхэр дэгъоу кІощтыгъэх. Мысырым щыщэу ежь изиусхьан иунэ ар щыпсэущтыгъэ. 3 Ащ итхьаматэ Зиусхьаныр Юсыф къызэрэкІыгъури, зэкІэ ышІагъэр Зиусхьаным къызэрэдигъэхъугъэри ылъэгъугъ. 4 Юсыф итхьаматэ нэшІукІэ къызэригъэплъыгъ, ежь ышъхьэкІэ иунэІут хъугъэ, етІанэ иунэ Іофхэр зэрихьанхэу ыгъэуцугъ, зэкІэ иІагъэр ащ ыІэ рилъхьагъ. 5 Джащ щегъэжьагъэу Юсыф ихьатыркІэ мысырылІым иІэ пстэуми – унэми, губгъоми, сыд лІэужыгъоу ащыриІагъэми Зиусхьаным ынэшІу къащифэщтыгъэ. 6 ЗэкІэ ащ иІагъэр Юсыф ІэкІилъхьагъ, Юсыф ихьатыркІэ шхэнымрэ ешъонымрэ ехъурэ гумэкІ мысырылІым иІэжьыгъэп. Юсыф ыпкъыкІи ынапэкІи дэхагъэ. 7 Уахътэ тешІагъэу Юсыф изиусхьан ишъуз ынаІэ къытыридзи, къыриІуагъ: «Къызголъ». 8 Ау ар фимыдэу джэуап ритыжьыгъ: «Мары сизиусхьан зыфэгумэкІын гори иунэ щыриІэжьэп, зэкІэ имылъку сІэ къырилъхьагъ. 9 Ежь фэдэу мы унэм Іофхэр щысэгъэзекІох. Ощ нэмыкІэу сэ ащ фит сызфимышІыгъэ щыІэп, сыда пІомэ о ащ уришъуз. Адэ сыдэущтэу ащ фэдэ емыкІушхо сэ сшІэна, Тхьэм ыпашъхьэ псэкІод къыщысхьэу?» 10 Аущтэу ащ мафэ къэс Юсыф къыриІощтыгъэ, ежь ащ голъынэуи кІыгъунэуи ыдэщтыгъэп. 11 Ау зэгорэм иІофхэр ышІэнхэу ар унэм зехьэм, унэІут хъулъфыгъэ гори имысэу къычІэкІыгъ. 12 Бзылъфыгъэм, ащ ищыгъын къетхъуи, къыриІуагъ: «Садэжь къэгъолъ». Ау ищыгъын ащ къыІэкІигъани, Юсыф къыкІитхъуи, унэм къичъыжьыгъ. 13 Ищыгъын къыІэкІигъани, унэм зэричъыжьыгъэр бзылъфыгъэм зелъэгъум, 14 иунэ ис унэІут хъулъфыгъэмэ къяджи, ахэмэ ариІуагъ: «Шъуеплъ: тынапэ тырихынэу, силІ тэ джурт къытфищагъ. ЛІыгъэкІэ къызголъынэу ар садэжь къэкІогъагъ! Сэ сыкъэкууагъ. 15 СыкъэкІыий, куо-хьау къызэрэсІэтыгъэр зызэхехым, ищыгъын къыгъани, кІитхъужьыгъ». 16 Изиусхьан къэкІожьыфэ Юсыф ищыгъын ащ ыдэжь щыІагъ. 17 Ащи а гущыІэ дэдэхэр риІуагъэх: «Джурт унэІутэу къытфэпщагъэр садэжь сынапэ тырихынэу къихьэгъагъ! 18 Сэ куо-хьау къэсІэти, сыкъызэкІыим, ищыгъын садэжь къырини, кІитхъужьыгъ». 19 «УипщылІ джары къысишІэ шІоигъуагъэр», – ыІуи, ишъуз къызыреІом, зиусхьаныр лъэшэу къэгубжыгъ; 20 Юсыф аригъэубыти, пачъыхьэм ихьапсчІэсхэр зычІэсхэм чІаригъэдзагъ. Юсыф джаущтэу хьапсым чІэс хъугъэ. 21 Ау Тхьэр Юсыф игъусагъ, Ежь игукІэгъукІэ хьапсым иІэшъхьэтет ынэшІу къыщифэнэу ышІыгъ. 22 Хьапсым иІэшъхьэтет зэкІэ хьэпсчІэсхэр Юсыф ыІэ къырилъхьагъэх, Іофэу щашІэрэ пстэумкІи ар унэшъошІ хъугъэ. 23 Ащ ыІэ илъым щыщ горэми хьапсым иІэшъхьэтет лъыплъэщтыгъэп; сыда пІомэ Зиусхьаныр Юсыф игъусагъ, сыд ышІагъэми, Зиусхьаным зэкІэ ащ къыдигъэхъущтыгъэ.
Юсыф хьапсым дычІэсхэм япкІыхьапІэхэм къарыкІырэр къызэрагуригъэІуагъэр
1 А хъугъэ-шІагъэмэ ауж тІэкІу тешІагъэу мысыр пачъыхьэм исэнэзехьэрэ ихьалыгъугъажъэрэ язиусхьанэу Мысырым ипачъыхьэ ыпашъхьэ мысагъэ щыряІэ хъугъэ. 2 Фирхьауныр иунэкІэ икъулыкъушІитІумэ лъэшэу афэгубжыгъ: сэнэзехьэ шъхьаІэмрэ хьалыгъугъэжъэ шъхьаІэмрэ. 3 УхъумакІохэм ятхьаматэ иунэ хэт хьапсэу Юсыф зычІэсыгъэм ахэр аригъэщагъэх. 4 УхъумакІомэ ятхьаматэ ахэмэ ынаІэ атетынэу Юсыф афигъэзагъэти, ар ахэмэ афэлажьэщтыгъэ. Хьапсым охътэ заулэрэ чІэсыгъэхэу, 5 зэгорэм мысыр пачъыхьэм исэнэзехьэрэ ихьалыгъугъажъэрэ а зы чэщым пкІыхьапІэхэр алъэгъугъэх, шъхьадж ежь ипкІыхьапІэ мэхьэнэ шъхьаф иІэу. 6 Пчэдыжьыпэм Юсыф ахэмэ адэжь къызэкІом, ахэр зыгорэм зэригъэгумэкІыхэрэр ылъэгъугъ. 7 «Сыда непэ шъузкІэнэшхъэир?» – яупчІыгъ ар фирхьауным иІофышІэхэу изиусхьан иунэ къыдычІэсхэм. 8 Ахэмэ ащ къыраІуагъ: «Тэ пкІыхьапІэхэр тлъэгъугъэх, ау къарыкІырэр къызэхэзыфын щыІэп». Юсыф ахэмэ ариІуагъ: «ПкІыхьапІэхэм язэхэфын Тхьэр арыба зиІофыр. КъысфэшъуІуат сэ ахэр». 9 Сэнэзехьэ шъхьаІэм ипкІыхьапІэ Юсыф къыфиІотагъ: «ПкІыхьапІэ слъэгъугъэ, мары сэнэшъхьэ бжалэр сапашъхьэ ит; 10 а бжалэм къутэмищ гот. Ахэмэ гулъэхэр къызэрадзэу, ахахъоу ригъэжьагъ, къэгъагъэхэр къащылъэгъуагъэх, сэнашъхьэ къапыкІи, игъо хъугъэ. 11 Фирхьауным иІэгубжъи ІэкІэ сІыгъ. Сэнашъхьэр къыпысчи, фирхьауным иІэгубжъэ ар исфызагъ, Іэгубжъэр фирхьауным естыгъ». 12 «Мары ащ къикІырэр, – ыІуагъ Юсыф, – къутэмищыр – ар мэфищ. 13 Мэфищ зытешІэкІэ, фирхьауным лъагэу удиІэтэещт, уичІыпІи уригъэуцожьыщт, ипэум зэрэпшІыщтыгъэм фэдэу, фирхьауным Іэгубжъэр ептызэ пшІыщт. 14 УиІофхэр дэгъу зыхъужьхэкІэ, угу сыкъэгъэкІыжьи, гукІэгъу къысфэшІыба: фирхьауным сигугъу фэшІи, мы унэм сищыжь. 15 Сэ джурт чІыгум егъэзыгъэкІэ сыкъыращыгъи! Хьапсым сычІадзэнэу мыщи мыхъун зи щысшІагъэп». 16 Хьалыгъугъэжъэ шъхьаІэм Юсыф пкІыхьапІэр дэгъукІэ къызэрэзэхифырэр ылъэгъугъэти, къыриІуагъ: «Сэри пкІыхьапІэ слъэгъугъэ, хьалыгъу фыжь арылъэу сшъхьэ мэтэ хъэгъищ тетэу; 17 акІыІурэ матэм фирхьауным пае зэфэшъхьафэу хьалыгъугъажъэм ыгъэжъагъэхэр илъых, ау а матэм шхынэу илъхэм бзыухэр ахэуІох». 18 Юсыф джэуап къытыжьыгъ: «Мары ащ къикІырэр: мэтищыр – ар мэфищ. 19 Мэфищ зытешІэкІэ, фирхьауным ори ударигъэІэтэещт, пшъхьэ паригъэупкІыщт, упкъ пкъэум паригъэлъэнышъ, къолэбзыухэр къыхэуІохэзэ щышхэщтых». 20 Мэфищ зытешІэм, фирхьауныр къызщыхъугъэ мафэм, ащ иунэІутхэм апае ешхэ-ешъошхо ышІыгъ, иунэІутхэм ащыщхэу исэнэзехьэ шъхьаІэрэ ихьалыгъугъэжъэ шъхьаІэрэ лъагэу диІэтэягъэх; 21 сэнэзехьэ шъхьаІэр ичІыпІэ Іуигъэхьажьыгъ, ипэурэм фэдэу Іэгубжъэр къыритызэ ышІынэу. 22 Хьалыгъугъэжъэ шъхьаІэр, Юсыф къызэрэриІуагъэм фэдэу, паригъэлъагъ. 23 Ау сэнэзехьэ шъхьаІэм Юсыф ыгу къэкІыжьыгъэп, ар щыгъупшэжьыгъ.
Юсыф фирхьауным ипкІыхьапІэхэм къарыкІырэр зэрэгуригъэІуагъэр
1 ИлъэситІу зытешІэм, фирхьауным пкІыхьапІэ ылъэгъугъ: ар Нил псыхъом Іут. 2 Джы мары дэгъухэу, апкъыкІи пщэрхэу, чэмибл Нил псыхъом къыхэкІыгъэхэу, нэпкъ зэхэкІыхьагъэм щэхъух. 3 Мары ахэмэ ауж итхэу, теплъаджэхэу, апкъыкІэ одхэу, нэмыкІ чэмибл Нил псыхъом къыхэкІыхэшъ, адрэ чэмхэм агоуцох. 4 Чэмибл теплъаджэхэу, зыпкъыкІэ одхэм чэм дэхэ зишІугъохэр ашхы. Фирхьауныр къэущыжьыгъ. 5 ИкІэрыкІэу хэчъыежьи, джыри нэмыкІ пкІыхьапІэ ылъэгъугъ: мары зы щэпкъым пщэрхэу, дэгъухэу шъхьибл къыпыкІагъ. 6 Ау мары ахэмэ ауж нэкІхэу, тыгъэжьым ыгъэгъугъэхэу шъхьибл къэкІыгъ. 7 Фышъхьэ одхэм шъхьэ псэоу, шъхьэ ушъагъэхэр ашхыгъэх. Фирхьауныр къэущыжьи, пкІыхьапІэ зэрилъэгъугъэр къыгурыІуагъ. 8 Пчэдыжьым ар гумэкІыгъо хэфагъэу зэкІэ Мысырым ис тхьэгурымагъохэри акъылышІохэри къаригъащэхи, ипкІыхьапІэ ахэмэ къафиІотагъ, ау фирхьауным ар зыми къыфызэхифын ылъэкІыгъэп. 9 Джащыгъум сэнэзехьэ шъхьаІэм фирхьауным риІуагъ: «Джы сыгу къэкІыжьы симысагъэ. 10 Зэгорэм фирхьауныр иунэІутмэ лъэшэу афэгубжи, сэри хьалыгъугъэжъэ шъхьаІэри сигъусэу хьапсым, ухъумакІомэ ятхьаматэ иунэ тычІаригъэшІыхьэгъагъ. 11 А зы чэщым тэ титІуи пкІыхьапІэхэр тлъэгъугъэх, мэхьэнэ шъхьаф иІэу, шъхьадж ежь ипкІыхьапІэ ылъэгъугъ. 12 Ащ щытигъусагъ джурт кІалэ, ухъумакІохэм ятхьаматэ иунэІутыр. Тэ ащ типкІыхьапІэхэр къыфэтІотагъэхэти, ащ шъхьадж пкІыхьапІэу ылъэгъугъэм имэхьанэ къытфызэхифыгъ. 13 Тэ ащ типкІыхьапІэхэр къызэрэзэхифыгъэхэм фэдэуи хъугъэ: сэ сичІыпІэ къэсэбгъэгъэзэжьыгъ, адрэр пябгъэлъагъ». 14 Ащ нэужым фирхьауным Юсыф лъигъэкІуагъэх. ГузэжъогъукІэ ар хьапсым къычІащыжьыгъ, зэкІаупсыхьи, ищыгъынхэр зэблахъухи, фирхьауным дэжь къэкІуагъ. 15 Фирхьауным къыІуагъ: «Сэ пкІыхьапІэ слъэгъугъэ, ау ар къысфызэхэзыфышъун щыІэп. О, зэраІорэмкІэ, пкІыхьапІэр зэрэзэхэпхэу, ащ лъыпытэу къикІырэр къэоІо». 16 «Ар сэ сІэ илъэп, – Юсыф джэуап къытыжьыгъ, – фирхьауным ишІуагъэ екІынэу Тхьэм джэуап къытыщт». 17 Фирхьауным Юсыф къыфиІотагъ: «Сэ пкІыхьапІэ слъэгъугъэ, мары Нил инэпкъ сытет. 18 Джы мары дэгъухэу, апкъыкІэ пщэрхэу, чэмибл Нил псыхъом къыхэкІыгъэхэу, нэпкъ зэхэкІыхьагъэм щэхъух. 19 Джы мары ахэмэ ауж итхэу нэмыкІ чэмибли къыхэкІых, одхэу, теплъэджэ дэдэхэу, зэпкъырыуагъэхэу; ахэмэ афэдэ Мысыр чІыналъэм щыслъэгъугъэп. 20 Чэм зэпкъырыуагъэхэу, чэм одхэм апэрэ чэмибл пщэрхэр ашхыгъ. 21 Пщэрхэр ахэмэ акІоцІ хъугъэх, ау ахэмэ аныбэмэ арыз хъугъэу къахэщыгъэп. Ыпэрэм фэдэу, ахэр теплъэджагъэх. ЕтІанэ сыкъэущыжьыгъ. 22 Ащ ыуж нэмыкІ пкІыхьапІэ слъэгъугъэ: зы щэпкъым арызэу, дэгъухэу шъхьибл къыпыкІагъ. 23 Ахэмэ ауж псыгъохэу, тхьамыкІэхэу, тыгъэжьым ыгъэгъугъэхэу шъхьибл къэкІыгъ. 24 Фышъхьэ одмэ шъхьибл дэгъухэр зи къэмынэу ашхыгъ. Сэ ар тхьэгурымагъохэм къафэсІотагъ, ау зыми къысфызэхифышъугъэп». 25 Юсыф фирхьауным риІуагъ: «Ар пкІыхьапІитІоп, зы нахь. Тхьэм ышІэщтымкІэ фирхьауным макъэ къыригъэІугъ. 26 Чэм дэгъуиблыр – ар илъэсибл; фышъхьэ дэгъуиблыри – ари илъэсибл. Арышъ ар зы пкІыхьапІ. 27 Одхэу ыкІи теплъаджэхэу чэмиблэу апэрэмэ ауж псым къыхэкІыгъэхэр – илъэсибл, джащ фэдэуи одхэу, тыгъэжьым ыгъэгъугъэ шъхьиблыр – ахэри къыкІэлъыкІорэ илъэсибл гъабл. 28 Джары сэ фирхьауным зыкІесІогъагъэр: Тхьэм ышІэщтыр фирхьауным къыригъэлъэгъугъ. 29 Мысыр хэгъэгум изэфэдэкІэ илъэсибл гъэбэжъу къыщежьэщт. 30 Ахэмэ ауж илъэсибл гъаблэ къэхъущт; Мысыр хэгъэгум гъэбэжъоу щыІагъэр ащыгъупшэжьыщт. Гъаблэм чІыгур ыунэкІынышъ, 31 ар къин дэдэу зэрэщытыщтым къыхэкІыкІэ ипэурэ гъэбэжъоу щыІагъэр щымыІагъэм фэдэу хъущт. 32 ПкІыхьапІэр фирхьауным зэкІэлъыкІоу тІо зэрилъэгъугъэм къикІырэр, ар Тхьэм теубытагъэ хэлъэу зэрэрихъухьагъэр, шІэхэуи ар зэригъэцэкІэщтыр ары. 33 Джы фирхьауным губзыгъэу, акъылышІоу лІы къерэгъоти, ар Мысыр хэгъэгум ипащэу ерэгъэуцу. 34 Фирхьауным зэрэхэгъэгоу къулыкъушІэхэр щерэгъэнафэх – илъэсибл гъэбэжъум къыкІоцІ Мысыр хэгъэгум къытекІэщт лэжьыгъэм иятфэнэрэ Іахьэ цІыфмэ къаІахынэу. 35 Лэжьыгъэу а къихьащт илъэс дэгъухэм къэкІыщтыр арэугъой, фирхьауным ынаІэ тетэу ар гъомлапхъэкІэ къалэхэм ащарэгъэтІылъи, къарэухъум. 36 Джащыгъум хэгъэгум илъэсибл гъаблэу къыфэкІощтым пае а гъомлапхъэр гъэтІылъыгъэ хъущт, хэгъэгуми гъаблэр зэпичыщт!»
Юсыф фирхьауным игуадзэу зэрэхъугъэр
37 Фирхьауными ащ иІэнэтІэзехьэхэми Юсыф игущыІэхэр агу рихьыгъэх, 38 ахэмэ ащ ариІуагъ: «Ащ фэдэ цІыф дгъотыщта, мыщ фэдэу, Тхьэм Ыпсэ хэлъэу?» 39 Фирхьауным Юсыф зыфигъэзагъ: «А пстэури о Тхьэм къыпфызэІуихыгъэшъ, ощ фэдэу губзыгъэрэ акъылышІорэ щыІэп. 40 ЗэкІэ сиунэ Іофхэр о зепхьащтых, зэкІэ сицІыфхэм уиунашъохэр агъэцэкІэщтых. Пачъыхьэ тахътэр ары ныІэп ощ нахьи сызэрэнахь иныщтыр». 41 Фирхьауным Юсыф къыриІуагъ: «Сакъы, зэкІэ Мысыр хэгъэгум иІэшъхьэтетэу узгъэуцугъ». 42 Фирхьауным имыхъур Іэлъын къызпихи, Юсыф ыІэ къыпилъхьагъ; лен дэгъу дэдэм хэшІыкІыгъэ щыгъынхэр щилъэхи, ыпшъэ дышъэ пшъэхъу къырилъхьагъ; 43 Заом фытегъэпсыхьэгъэ ку псынкІэу хэгъэгум ятІонэрэ цІыфэу исыр зэрэзэращэрэр къыритыгъ; Юсыф ащ исэу кІо зыхъукІэ, «гъогур ешъут!» аІозэ, куощтыгъэх. Джаущтэу фирхьауным Мысыр хэгъэгум ар Іэшъхьэтет фишІыгъ. 44 Фирхьауным Юсыф риІуагъ: «Мары сэ, фирхьауным, сиунашъо: о уишІэ хэмылъэу, Мысыр хэгъэгум зыми ыІи щигъэсысыщтэп, лъэбэкъуи щидзыщтэп». 45 Фирхьауным Юсыф цІэ фишІыгъ: Цафнат-ПаІынэах; ащ шъузкІэ ритыгъ Асэнат, къалэу Он дэс къурмэнышІэу ПотыпэраІ ыпхъу. Юсыф Мысыр хэгъэгум лъытэныгъэ щыриІэу хъугъэ. 46 Юсыф илъэс щэкІ ыныбжьыгъ Мысырым ипачъыхьэу фирхьауным фэлажьэу зеублэм. Юсыф фирхьауным ыпашъхьэ къикІыжьи, Мысыр хэгъэгур зэкІэ къыкІухьанэу ежьагъ. 47 ЧІыгум илъэсиблым къыкІоцІ гъэбэжъу иІэу, зы лэжьыгъацэ пэпчъ Іэбжыб къытыщтыгъэ. 48 Илъэсиблым къыкІоцІ сыдрэ лэжьыгъэуи Мысыр хэгъэгум щыбэгъуагъэр ащ зэІуигъэкІагъ, лэжьыгъэр къалэхэм ащигъэтІылъыгъ; къалэ пэпчъ ащ къегъэтІылъэкІыгъэ губгъохэм ялэжьыгъэ дилъхьагъ. 49 Юсыф лэжьыгъэ бэдэдэ ыугъоигъ, хыІушъо пшахъом фэдэу, арыти лъытэныри щигъэтыжьыгъ, сыда пІомэ плъытэн плъэкІыжьыщтгъагъэп. 50 А лъэхъаным, гъэблэ илъэсхэр къэмысыхэзэ, Юсыф шъэуитІу къыфэхъугъ: ахэр Он дэс къурмэнышІэу ПотыпэраІ ыпхъу Асэнат къыфилъфыгъэх. 51 Юсыф ищыпэлъф Мынасэ фиуси, къыІуагъ: «Тхьэм сщигъэгъупшагъ зэкІэ ситхьамыкІагъохэри сятэ иуни». 52 Адрэм Ефраим фиуси, къыІуагъ: «Къин зыщысщэчыгъэ хэгъэгум цІыф гъэбэжъу Тхьэм сыщишІыгъ». 53 Гъэбэжъу илъэсиблэу Мысыр хэгъэгум щыІагъэр текІыгъ. 54 Юсыф зэриІогъагъэу, гъэблэ илъэсиблыр къэсыгъ. ЧІынэлъэ пстэуми гъаблэ ащыІагъ, ау Мысыр хэгъэгум тыдэкІи гъомлапхъэ щыІагъ. 55 Ау Мысыр хэгъэгуми тыдэкІи цІыфхэр гъаблэм щигъалІэхэу зырегъажьэм, цІыфхэр лэжьыгъэ къаритынэу фирхьауным елъэІухэу фежьагъэх. Фирхьауным къариІуагъ: «Юсыф дэжь шъукІуи, ащ къышъуиІорэр шъушІэ». 56 Дунаим изэфэдэкІэ гъаблэм зызщеушъомбгъум, Юсыф зэкІэ лэжьыгъэ гъэтІылъыпІэхэр къызэІуихыхи, мысыр цІыфмэ лэжьыгъэр арищэу ыублагъ. Мысыр хэгъэгум гъаблэр нахь ины щыхъущтыгъэ. 57 Хэгъэгу гъунэгъу пстэуми къарыкІыхэти, Юсыф лэжьыгъэ щащэфынэу Мысырым къакІощтыгъэх, сыда пІомэ чІыгум изэфэдэкІэ щыгъэблэшхуагъ.
Юсыф ышнахьыжъхэр Мысырым къызэрэкІуагъэхэр
1 Якъубэ Мысырым лэжьыгъэ зэрэщыІэр зешІэм, ыкъомэ ариІуагъ: «Сыд шъузэплъыжьэу шъузкІыщысыр? 2 Мысырым лэжьыгъэ щыІэу зэхэсхыгъ. ШъукІу ащ, лэжьыгъэ къыщышъущэф, гъаблэм тимыгъалІэу тыщыІэным пае». 3 Юсыф ышипшІ лэжьыгъэ къащэфынэу Мысырым къэкІуагъэх. 4 Ау Бинямин, Юсыф ыш, Якъубэ адигъэкІуагъэп; тхьамыкІагъо горэ къыщымышІыгъагъот ыІуи. 5 Джаущтэу Исраил ыкъохэр, нэмыкІ купмэ ягъусэхэу лэжьыгъэ ащэфынэу кІуагъэх, сыда пІомэ КъэнаІан хэгъэгур зэфэдэкІэ гъаблэм ригъэзыгъагъ. 6 Юсыф а хэгъэгоу къыздэкІуагъэхэм щыІэшъхьэтетыгъ. Ары лэжьыгъэр цІыф пстэуми языщэщтыгъэри. Юсыф ышхэри къекІуалІэхи, анэгу чІыгум нэсэу ащ шъхьащэ къыфашІыгъ. 7 Юсыф ышхэм къяплъи, къышІэжьыгъэх, ау хымэ фэдэу зишІи, пхъашэу къяупчІыгъ: «Шъо тыдэ шъукъикІыгъа?» Ахэмэ джэуап къатыжьыгъ: «КъэнаІан хэгъэгур ары, гъомлапхъэ тщэфынэу ары». 8 Юсыф ышыхэр ышІэжьыгъэх, ау ежь ахэмэ къашІэжьыгъэп ныІа! 9 Юсыф ахэмэ апае пкІыхьапІэу ылъэгъугъагъэхэр ыгу къэкІыжьхи, къариІуагъ: «Шъо шъуплъэкІо-дэІуакІу, тихэгъэгу мэхапІэу иІэхэр зэжъугъэлъэгъунхэу шъукъэкІуагъ». 10 «Хьау, тизиусхьан, – къаІуагъ ахэмэ, – уипщылІхэр гъомлапхъэ ащэфынэу къэкІуагъэх. 11 Тэ зэкІэ зы цІыфым тырикъох; тэ шъыпкъагъэ зыхэлъ цІыфэу тыщыт; уипщылІхэр нибжьи плъэкІо-дэІуакІохэу щытыгъэхэп». 12 «Хьау, – ыІуагъ Юсыф, – мы хэгъэгум мэхапІэу иІэхэр зэжъугъэлъэгъунхэу шъукъэкІуагъ». 13 «Тэ, о уипщылІхэр, – аІуагъ ахэмэ, – зэш пшІыкІутІу тэхъу. Зы цІыфэу, КъэнаІан хэгъэгум щыпсэурэм тырикъох. АнахьыкІэр джы тятэ кІыгъу, тащыщэу зыр щыІэжьэп». 14 Юсыф ахэмэ къариІуагъ: «Адэ сэ къэсІуагъэба: шъо шъуплъэкІо-дэІуакІу. 15 Ау тэ шъутыуплъэкІущт. Фирхьауныр зэрэщыІэмкІэ игъашІэкІэ тхьэ сэІо: шъушынахьыкІэ къэмыкІоу, мыщ шъо шъурагъэкІыжьыщтэп. 16 Шъуащыщ горэ жъугъакІуи, шъушы къерэщ; шъо хьапсым шъучІэсыщтыгу. Джаущтэу сыуплъэкІущт къашъуІорэр шъыпкъэмэ. Аущтэу щымытымэ, шъо шъуплъэкІо-дэІуакІох. Фирхьауныр зэрэщыІэмкІэ тхьэ сэІо». 17 Мэфищырэ къагъэгъунэнхэу Юсыф ахэр хьапс аригъэшІыгъэх. 18 Ящэнэрэ мафэм Юсыф ахэмэ ариІуагъ: «Сэ къызэрэсІоу шъушІымэ, ащыгъум псэоу шъукъэнэщт, сыда пІомэ сэ Тхьэм щынагъо фысиІ. 19 Шъо шъыпкъагъэ зиІэ цІыфэу шъущытмэ, зэшымэ ащыщэу зы мы унэу шъузщаІыгъым къерэн; адрэхэм шъуиунагъохэу гъаблэм ыгъалІэхэрэм апае лэжьыгъэр арэщ. 20 Ау шъуигущыІэхэр къэшъыпкъэжьынхэшъ, псэоу шъукъэнэжьыным пае шъушынахьыкІэ къысфэшъущэн фае». Ахэмэ ащ дырагъэштагъ. 21 «ПсэкІодэу тшыкІэ тшІагъэм пае тызэрэпщынэжьырэр нафэ, – зэраІожьыгъ ахэмэ. – Тэ тлъэгъугъэба ар тхьамыкІагъоу зыхэтыгъэр, ау тыгу егъугъэп къытэлъэІу зэхъум. Джы мары тэри тхьамыкІагъом тыхэфагъ». 22 Рубэн ащ къыхигъэхъуагъ: «Сэ къышъосІогъагъэба: „КІэлэхъумкІэ псэкІод шъумышІэ“, ау шъо шъудэІуагъэп; джы ащ ылъ тагъэпщыныжьы». 23 АІорэр Юсыф къызэрэгурыІорэр ахэмэ ашІэщтыгъэп – ежь Юсыф зэдзэкІакІо иІэу къадэгущыІэщтыгъэ. 24 Юсыф ахэмэ акІэрыкІи, къэгъыгъ. ЕтІанэ къыгъэзэжьи, джыри адэгущыІагъ, ащ ыуж ЩымІон къахищи, ахэмэ алъэгъузэ, ар зэкІоцІапхэнэу унашъо ышІыгъ. 25 Ахэмэ ядзыомэ лэжьыгъэр арызы ашІынэу, шъхьадж итыжьын идзыо фыралъхьажьынышъ, гъогу гъомыли аратынэу Юсыф ариІуагъ. Джаущтэуи афашІагъ. 26 Къаратыгъэ лэжьыгъэр ящыдмэ атыралъхьи, ядэжь ежьэжьыгъэх. 27 Ахэмэ ащыщ горэм, чэщ гъэпсэфыгъом ищыд Іус ритынэу, идзыо къызетІатэм, – мары, дзыо кІоцІым ыкІыІукІэ итыжьын телъ! 28 Арыти ышымэ ариІуагъ: «Ситыжьын къысатыжьыгъ; мары ар, ыкІыІу телъ!» Ахэр агукІэ къэгумэкІыгъэх, щтагъэхэу, зэупчІыжьыхэу фежьагъэх: «Сыд лІэужыгъуа тэ Тхьэм къытишІэрэр?» 29 Ахэр ятэу Якъубэ дэжь, КъэнаІан хэгъэгум къызэкІожьхэм, зэкІэ къяхъулІагъэр ащ къыфаІотагъ: 30 «А хэгъэгум иІэшъхьэтет пхъашэу къыддэгущыІагъ, а хэгъэгумкІэ тэ тыплъэкІо-дэІуакІоуи ылъытагъ. 31 Шъыпкъагъэ зиІэ цІыфхэу тэ тызэрэщытыр, плъэкІо-дэІуакІоу тызэрэщымытыри тэ ащ етІуагъ. 32 Тэ, зэш пшІыкІутІур, зы тым тырикъох, зыр щыІэжьэп, анахьыкІэр тятэ кІыгъоу КъэнаІан хэгъэгум джы щыІ». 33 Джащыгъум а цІыфэу а хэгъэгум изиусхьан къытиІуагъ: «КъэшъуІуагъэр шъыпкъэмэ, мары сэ къызэрэсшІэщтыр: шъушыхэм ащыщэу зыр сэ садэжь къэжъугъэнэщт, адрэхэм лэжьыгъэр шъуиунагъохэу, гъаблэ зиІэхэм афэшъущэнэу шъуигъогу шъутехьажь, 34 шъушынахьыкІэ шъуигъусэу къэжъугъэзэжь. ЕтІанэ сэ сшІошъ хъущт шъо дэІокІо-плъакІоу шъущымытэу, шъыпкъагъэ зиІэ цІыфэу шъузэрэщытыр; шъушэу гъэры сшІыгъэри шъостыжьыщт, мы хэгъэгум шъхьафитэу шъукъыщекІокІын шъуфитэуи сшІыщт». 35 Ядзыохэр заунэкІыжьхэм, шъхьадж идзыо ежь итыжьын зэкІоцІыпхагъэ илъэу къычІэкІыгъ. Ахэмэ ятыжьын зэкІоцІыпхагъэхэр залъэгъухэм, ежьхэми ахэмэ яти агучІэ изыгъ. 36 «Скъохэр сшІожъугъэкІодыгъэх, – ариІуагъ ахэмэ Якъубэ, – Юсыф щыІэжьэп. ЩымІони щыІэжьэп. Джы Бинямини зыдешъущэжьэн шъугу хэлъ, а пстэури сэ сищэчын!» 37 Рубэн ятэ джэуап ритыжьыгъ: «Бинямин сэ къызыпфэсымыщэжькІэ, сэ скъуитІу укІы; ащкІэ цыхьэ къысфэшІи, сэ ар къыпфэсщэжьыщт». 38 «Хьау, – ыІуагъ Якъубэ, – скъо къыжъудэкІощтэп. Ащ ыш лІагъэ, ар изакъоу къысфэнагъ. Шъо шъузытехьащт гъогум ащ тхьамыкІагъо къыщехъулІэмэ, шъо шъуилажьэкІэ сэ, зышъхьац тхъогъэ лІыжъыр, гукъэошхом хьадрыхэм сищэщт».
Бинямин ыкъошхэм ягъусэу Мысырым зэрэщыІагъэхэр
1 А чІыгум гъаблэр щылъэшыщтыгъэ. 2 Мысырым къыращыгъэ лэжьыгъэр заухым, ахэмэ ятэ ариІуагъ: «Джыри шъукІуи, гъомлэпхъэ тІэкІу къытфэшъущэф». 3 Ехъуд джэуап къытыгъ: «А лІым теубытагъэ хэлъэу къытиІуагъ тшы ткІымыгъоу ыпашъхьэ тимыхьажьынэу. 4 Тшы къыддэбгъакІомэ, тыкІонышъ, гъомлапхъэ къыпфэтщэфыщт. 5 Ау къыддэмыгъакІомэ, тыкІощтэп, а цІыфым тшы ткІымыгъоу ыпашъхьэ тимыхьажьынэу къытиІуагъэшъ». 6 Исраил къыІуагъ: «А цІыфым джыри зы шы зэрэшъуиІэр ешъуІуи, сыда мы насыпынчъагъэр къызкІысэшъушІагъэр?» 7 Адрэмэ къаІуагъ: «А цІыфыр тэщ паий тиІахьылхэм апаий къытІуупчІыхьагъ: „Шъуятэ джыри псэуа? Джыри къош шъуиІа?“ – ыІозэ. Тэри а упчІэхэм яджэуап еттыжьыгъ. Сыдым фэтшІэныя тшынахьыкІэ зыдэтщэнэу къытиІощтмэ». 8 Ехъуд Исраилэу ятэм риІуагъ: «КІэлэхъур сэ къыздэтІупщи, джыдэдэм тежьэщт, джащыгъум, тымыкІодэу зэкІэ псэоу тыкъэнэжьыщт – тэри, ори, тисабыйхэми. 9 Ащ ищыІэныгъэ сэ спшъэ исэлъхьажьы, сэ сІэхэмкІэ къыостыжьынэу унашъо къэшІ. Ар сэ къыпфэсщэжьэу, уапашъхьэ къисымыгъэуцожьмэ, сыщэІэфэ оркІэ сэ сымысэщт. 10 КІыхьэ-лыхьэ зетымыгъэшІыгъагъэмэ, джырэ нэс тІогъогогъо тыкІощтгъагъэ». 11 «Арэущтэу щытмэ, – ыІуагъ Исраил, – ащыгъум мыры шъушІэн фаер: мы чІыгум къыщыкІырэ лъэпкъхэм ащыщэу анахь дэгъухэр зыдашъуштэхи, а цІыфым тынэу фэшъухь: Іэзэгъу уци, шъоу тІэкІуи, мэ ІэшІу зыпихрэ чъыги, пцантхъи, чІыдэжъыий, миндаль дэжъыий. 12 Тыжьын ахъщэр фэдитІукІэ нахьыбэу зыдашъушт; шъо шъуидзыомэ яІугъуанэмэ къаралъхьэгъэгъэ тыжьыныри афызэкІэжъугъэкІожьынэу: хэукъогъагъэхэу къычІэкІын. 13 Шъуши зыдешъущажьи, джыри а цІыфым дэжь шъукІу. 14 ЛъэкІ пстэури ЗиІэ Тхьэм а цІыфым ынэшІу къышъущифэнэу ерэшІ – Бинямини адрэ шъуши къытІупщыжьынхэу. Сэ бынынчъэу сыкъэнэнэу щытмэ, бынынчъэу сыщэрэт». 15 А тынхэр зэшмэ зыдаштагъэх, тыжьыныри фэдитІоу зыдаштагъ, Бинямини зыкІагъэгъугъ. ЕтІанэ Мысырым кІохи, Юсыф ыпашъхьэ иуцуагъэх. 16 Бинямин ахэтэу Юсыф зелъэгъум, ежь иунэ Іофхэр зезыхьэрэм риІуагъ: «Мы цІыфхэр сиунэ ищэх, ищыкІэгъэ былым фэдиз шІобзи, къэгъэхьазыр; мыхэр сэ къыздэшхэщтых щэджагъом». 17 Юсыф зэриІуагъэм фэдэу а цІыфыр зекІуагъэ, зэшхэр Юсыф иунэ рищагъэх. 18 Юсыф иунэ зыращэхэм, зэшхэр къэщтагъэхэу зэраІожьыгъ: «Тыжьынэу мыщ ыпэкІэ тидзыомэ къарыкІыгъагъэм пай ащ тызкІащэрэр! Къыттебэнэнышъ, тэ пщылІ тишІыщт, тищыдхэри ыштэщтых». 19 Ахэр Юсыф иунэ Іофхэр зезыхьэрэм екІуалІэхи, унапчъэм Іутхэу дэгущыІагъэх: 20 «Моу къытэдэІу, тизиусхьан! Тэ мыщ ыпэкІи тыкъэкІогъагъ гъомлапхъэ тщэфынэу. 21 ТыкІожьызэ, чэщыр зыщитхыщтым тидзыохэр къызызэІутэххэм, шъхьадж итыжьын идзыо кІоцІ ыкІыІу телъ – ытыгъэм фэдиз къабзэ. Тэ ар джы къышъотэтыжьы. 22 Гъомылэ тщэфыным пае нэмыкІ тыжьыни къэтхьыгъ. Адрэ тыжьынхэр тидзыомэ къарызылъхьэгъагъэр тшІэрэп». 23 «Шъурэхьат, – къариІуагъ ащ, – шъумыщын, шъуи Тхьэ – шъуятэ и Тхьэ – шъуидзыохэм шъэфэу ар шІухьафтынэу къарилъхьэгъэн фае. Шъуитыжьын сэ къысІукІагъ!» ЕтІанэ ахэмэ адэжь ЩымІон къыщагъ. 24 Юсыф иунэ Іофхэр зезыхьэхэрэм зэшхэр Юсыф иунэ рищагъэх, псы къарити, алъакъохэр атхьакІыгъэх, ящыдхэми Іус аратыгъ. 25 Щэджагъом, Юсыф къызщыкІожьырэм тефэу, ахэмэ тынхэр къагъэхьазырыгъэх, сыда пІомэ а унэм щэджэгъуашхэ зэрэщашІыщтыр къариІогъагъ. 26 Юсыф къызэкІожьым, ахэмэ тынхэр ащ ратыгъэх, чІыгум нэсэу шъхьащи фашІыгъ. 27 Ахэмэ япсэуныгъэ къыкІэупчІи, ащ къыІуагъ: «Зигугъу къысфэшъушІыгъэгъэ лІыжъэу шъуятэ иІоф сыдэу щыта? Джыри ар щыІа?» 28 «Тятэу уиІумэт псэу. Джыри щыІ», – джэуап къатыжьыгъ. ЕтІанэ зыфауфи, шъхьащэ фашІыгъ. 29 Юсыф зызеплъыхьэм, ышэу Бинямин, ежь янэ ыкъо, ылъэгъугъ. «Мыра шъушынахьыкІэу зигугъу къысфэшъушІыгъагъэр? – къэупчІагъ ар. – Тхьэм гукІэгъу къыпферэшІ, сишъау». 30 Ышы итеплъэ ыгу къызэхигъэхьагъэу, Юсыф псынкІэу икІи, къызщамылъэгъун чІыпІэ лъыхъоу фежьагъ. Къыгот унэм псынкІэу чІэкІи, ащ щыгъыгъ. 31 ЕтІанэ ынэгу ытхьакІыжьи, къихьажьыгъ, ыгу теІункІэжьи, шхыныр къахьынэу ариІуагъ. 32 Ежьыми шъхьафэу къыфытырагъэуцуагъ, ышыхэми шъхьафэу къафытырагъэуцуагъ, сыда пІомэ мысыр цІыфхэр джуртхэм адэшхэ хъущтэп, ежьхэмкІэ ар емыкІушъ. 33 Зэшхэр Юсыф ыпашъхьэ щытІысыгъэх, нахьыжъыр инахьыжъыгъэ елъытыгъэу; нахьыкІэри инахьыкІагъэ елъытыгъэу; алъэгъурэр ашІогъэшІэгъонэу заплъыхьэщтыгъэ. 34 Ащ шхынхэр иІанэ къытекІэу къафигъэхьыщтыгъэ; Бинямин иІахьэ фэдитфыкІэ анахьыбэу къаритыщтыгъэ. Аущтэу тхъэжьхэу Юсыф дешъуагъэх.
Юсыф ышхэр зэриушэтыгъэхэр
1 Юсыф иунэ Іофхэр зезыхьэрэм унашъо фишІыгъ: «Мыхэмэ ядзыомэ лэжьыгъэр арызы шІы, ащэшъущтым фэдиз, шъхьадж итыжьыни идзыо кІоцІ ыкІыІукІэ телъхьажь. 2 Ау лэжьыгъапкІэу къыхьыгъэ тыжьын ахъщэм кІыгъоу сэ сиІэгубжъэ, ситыжьын Іэгубжъэ, анахьыкІэм идзыо кІоцІ ыкІыІукІэ телъхь». Юсыф къызэрэриІуагъэу адрэм ышІыгъ. 3 Нэф къызэрышъэу, ящыдхэри акІыгъухэу зэшыхэр къатІупщыжьыгъэх. 4 Къалэм джыри ахэр чыжьэу ІукІыгъагъэхэп, Юсыф иунэ Іофхэр зезыхьэрэм зыреІом: «ПсынкІаІоу акІахь ахэмэ, узакІахьэкІэ, яІу: „Сыд пае шІум екІэ шъупэгъокІыгъа? 5 Сыда ситыжьын Іэгубжъэ зыкІэшъутыгъугъэр? А Іэгубжъэр ары сизиусхьан зэрешъорэр, ащкІэ къэхъущт-къэшІэщтхэри къешІэх. Дэеу шъушІагъэ ар!“» 6 Ар ахэмэ акІахьи, а гущыІэхэр ариІуагъэх. 7 Зэшмэ джэуап къатыжьыгъ: «Тизиусхьан, сыд пае ащ фэдэ гущыІэхэр къапІохэрэ? Хьау, уиунэІутхэм ащ фэдэ ашІэн алъэкІыщтыгъэп. 8 Ар хэгъэкІыри, мары тидзыомэ къарыкІыгъэ тыжьынхэр КъэнаІан хэгъэгум къитхыжьхи, къыпфэтхьыжьыгъэх! Адэ сыдэущтэу о уизиусхьан иунэ тыжьын е дышъэ къиттыгъукІына? 9 УипщылІхэм ащыщ горэм тыгъугъэр ебгъотылІэмэ, арэукІ, тэри тизиусхьан тырипщылІэу тыкъэнэщт». 10 «Дэгъу, зэрэшъуІуагъэм тетэу орэхъу, – къыІуагъ адрэм. – Тыгъугъэ зэдгъотылІэрэр ары пщылІы хъущтыр, адрэхэр хыеу хэкІыщтых». 11 Зэшхэм ядзыохэр псынкІэу чІыгум къыратІупщэххи, шъхьадж идзыо къызэІуихыгъ. 12 Юсыф иунэ Іофхэр зезыхьэрэм зэкІэ къылъыхъугъ, анахьыжъым къыщыригъажьи, анахьыкІэмкІэ кІэкІыжьэу – Іэгубжъэр Бинямин идзыо къыригъотагъ. 13 Ягукъао ишыхьатэу, ахэмэ ящыгъынхэр ацунтхъагъэх, шъхьадж ищыд хьылъэхэр тырилъхьажьхи, къалэм къагъэзэжьыгъ. 14 Ехъудрэ ащ ышхэмрэ джыри унэм исыгъэ Юсыф дэжь къакІохи, ащ ыпашъхьэ чІыгум зыщырадзыхыгъ. 15 Юсыф ахэмэ къариІуагъ: «Сыдэущтэу ащ фэдэ шъушІэн шъулъэкІыгъа? Сэщ фэдэ цІыфым ар къызэришІэщтыр шъушІэщтыгъэба?» 16 «Тизиусхьан сыд етІон? – къыІуагъ Ехъуд. – Сыда тІощтыр? СыдкІэ зытыухыижьыщт? Тхьэм уипщылІхэм ямышъыпкъагъэ къычІигъэщыгъ. Джы мары тизиусхьан тэ тырипщылІ, тэри, Іэгубжъэр зыІэкІагъотагъэри». 17 «Хьау, – Юсыф къыІуагъ, – сэ ащ фэдэ сшІэн слъэкІыщтэп! Іэгубжъэр зыІэкІагъотагъэр ары сэ сипщылІыщтыр, шъори рэхьатэу шъуятэ дэжь шъукІожь». 18 Джащыгъум Ехъуд Юсыф екІуалІи, риІуагъ: «Сизиусхьан, сэ, уипщылІ, фит сышІ сизиусхьан гущыІэ есІонэу. Уфэмыгубж уипщылІ, фирхьауным уфэдэми. 19 Сизиусхьан ипщылІхэм къяупчІыгъагъ: „Тырэ шырэ шъуиІа?“ 20 Тизиусхьан, жъы хъугъэу тыри, къо нахьыкІэу ащ ижъышъхьэм къыфэхъугъэри зэрэтиІэр о къыотІогъагъ, ащ ыш лІагъэ, ежь изакъоу янэ къыкІэныгъ. Ар тятэ шІу елъэгъу. 21 О уипщылІхэм къяпІогъагъ: „Зэзгъэлъэгъунэу ар садэжь къашъущэ“. 22 Тизиусхьан тэ къетІожьыгъагъ: „КІэлэхъум ятэ ІэкІыб ышІын ылъэкІыщтэп, ІэкІыб ышІымэ, ятэ лІэщт“. 23 Ау о уипщылІхэм къяпІогъагъ: „ШъушынахьыкІэ мокІэ къыжъудэмыкІомэ, ащ нахьыбэкІэ сапашъхьэ шъукъимыхьажь“. 24 УиІумэтэу, тэ тятэм ыдэжь тызэкІожьым, сизиусхьан игущыІэхэр ащ етІожьыгъэх. 25 Ау тятэ джыри лэжьыгъэ тІэкІу къэтщэнэу къызеІом, 26 тшынахьыкІэ тимыгъусэу тызэрэмыкІощтыр, тшынахьыкІэ тимыгъусэмэ, о унэгу тыкІэплъэн тызэрэфимытыр тэ етІожьыгъ. 27 О уиІумэтэу тэ тятэм къытиІуагъ: „Сишъуз къуитІу къызэрэсфилъфыгъэр шъо шъошІэ. 28 Зыр садэжь икІыгъэти, сэ сІуагъэ: ар хьэкІэ-къуакІэмэ зэпкъыратхъыгъ. Непэ къызнэсыгъэм ар слъэгъужьыгъэп. 29 Джы мыдрэри шъоштэ. Ащи тхьамыкІагъо къехъулІэмэ? Шъо шъуилажьэкІэ, сэ, зышъхьац тхъогъэ лІыжъым, гукъэошхом хьадрыхэ сихьыщт“. 30 Джы сэ, о уиІумэтэу тятэм дэжь, кІэлэхъоу ащ ыпсэ хэтІагъэр тимыгъусэу сыкІожьын слъэкІына? 31 Тятэ, кІэлэхъур зэрэтимыгъусэр зилъэгъукІэ, лІэщт. Тятэу уиІумэт, лІыжъ шъхьац тхъуагъэр, гукъаом Шеол дищэщт. 32 Сэ, уипщылІ, тятэ сшъхьэкІэ гущыІэ естыгъ тшы къыгъэзэжьынэу, ащ къызимыгъэзэжькІэ, сыщэІэфэ сятэ ыпашъхьэ сыщымысэщт. 33 Арышъ сэ, о уипщылІ, кІэлэхъум ычІыпІэкІэ сизиусхьан дэжь пщылІэу сыкъэнэнэу фит сыкъэшІ! Ежь ышымэ адэрэкІожь. 34 КІэлэхъур скІымыгъоу сыдэущтэу сыкІожьыщта? Тятэ тхьамыкІагъоу зыхэфэщтыр сэрэмылъэгъу».
Юсыф ыкъошхэм зыкъызэраригъэшІагъэр
1 Юсыф цІыфхэм апашъхьэ ащ нахьыбэрэ зыщищэІэжьын ымылъэкІэу къэкууагъ: «ЗэкІэ санэІу ишъущых!» Юсыф ышымэ анэмыкІ зи щытыжьыгъэп, ышыхэм зыкъызарегъэшІэжьым. 2 Ар мэкъэ ІэтыгъэкІэ къэгъыгъэти, игъы макъэ мысыр цІыфхэми зэхахыгъэ, фирхьауным иуни къэбарыр нэсыгъ. 3 «Сэры Юсыфыр, – ариІуагъ ащ ышымэ, – джыри псэоу щыІа сятэ?» Ау ащ ышымэ джэуап къыратыжьын амылъэкІэу, къыгъэм фэдэу щытыгъэх. 4 «Адэ шъукъысэкІуалІэба», – Юсыф ышыхэм ариІуагъ. Ышыхэр къекІолІагъэх. «Сэ сы Юсыф, – къыІуагъ ащ, – шъо шъушэу Мысырым щяжъугъэщагъэр ары. 5 Ау мыщ сызэрэщышъущагъэм пае джы къин зэшъумыгъэлъэгъужь, зышъумыукІыжь. Тхьэм сэ мыщ сыкъигъэкІуагъ цІыфхэр къэзгъэнэжьынхэу. 6 Мары чІыгум илъэситІу хъугъэу щыгъабл, джыри илъэситфэ жъонхи лэжьыгъэ Іуахыжьыни алъэкІыщтэп. 7 Тхьэм сэ шъуапэ ситэу мыщ сыкъигъэкІуагъ, шъуилІакъо чІыгум къытыригъэнэнэу, шъуищыІэныгъи Іоф шІэгъошхокІэ къыгъэнэжьынэу. 8 Шъорэп мыщ сыкъэзгъэкІуагъэр, фирхьауным сырятэу, ащ иунэ Іофхэр зэкІэ зесхьанхэуи сытезгъэуцогъэ Тхьэу, зэкІэ Мысыр хэгъэгум сыриІэшъхьэтетэу зышІыгъэр ары нахь. 9 ПсынкІэу сятэ дэжь жъугъэзэжьи, ешъуІу ащ: „Пкъоу Юсыф мырэущтэу еІо: ‘Тхьэм сэ Іэшъхьэтетэу зэкІэ Мысыр хэгъэгум сыфишІыгъ; садэжь къакІо бэ темыгъашІэу. 10 О Гощэн хэкум ущыпсэущт; сэ укъыспэблэгъэщт; ори, о пкъохэри, пкъомэ акъожьхэри, мэл-пчэнхэри, былым пІашъэхэри, зэкІэ уиІэри къыспэблэгъэщт. 11 Ори, уиунагъуи, уибылымхэми фэныкъуагъэ горэ ямыІэнэу сэ уищыІакІэ згъэпсыщт, сыда пІомэ гъаблэр джыри илъэситфэ щыІэщт’“. 12 ШъунитІукІэ шъолъэгъу шъори, сшэу Бинямин ынитІукІи – сэры къыжъудэгущыІэрэр! 13 Мысырым зэкІэ щытхъоу щысиІэр тятэ ешъуІотэжь. ЗэкІэ шъулъэгъугъэр ешъуІотэжьи, псынкІэу тятэ мыщ къашъущэ!» 14 Ышэу Бинямин ыпшъэ зыридзи, ар гъыгъэ, Бинямини ащ ыпшъэ илъэу гъыщтыгъэ. 15 ЗэкІэ ышымэ къябэугъ, ІаплІ къарищэкІызэ, гъыгъэ. ЕтІанэ ащ дэгущыІэнхэу ышыхэм аублагъ. 16 Юсыф ышхэр къызэрэкІуагъэхэм икъэбар фирхьауным иунэ нэсыгъ. Фирхьауными ащ иІумэтхэми ар ягопагъ. 17 Фирхьауным Юсыф къыриІуагъ: «ЯІу пшымэ: шъуищыдхэм атешъулъхьи, КъэнаІан хэгъэгум шъукІожь. 18 Шъуяти шъуибынхэри къыздашъущэхэри, садэжь шъукъакІох; Мысырым анахь дэгъоу илъыр зэкІэ шъостынышъ, тихэгъэгу игъэбэжъукІэ зыжъугъэтхъэжь. 19 Джыри япІонэу къыпфэсэгъэпытэ: Мысыр чІыгум ку псынкІэу итхэр ясабыйхэми яшъузхэми апае арэштэхи, шъуяти къыздарэщ. 20 ШъуиІапІэу къэнэщтым шъугу фэрэмыгъу, сыда пІомэ Мысыр хэгъэгум инахьышІур къышъостыщт». 21 Аущтэуи Исраил ыкъохэм ашІыгъ. Юсыф, фирхьауным иунашъо тетэу, ахэмэ ку псынкІэхэр къаритыгъэх, гъогу гъомыли къаритыгъ, 22 шъхьаджи щыгъыныкІэ ритыгъ. Бинямин тыжьын ахъщэ шъищырэ, зэблихъунэу щыгъын штэгъуитфырэ къыритыгъ. 23 Джащ фэдэу Мысырым ианахьышІухэр атепхагъэхэу щыдипшІырэ, лэжьыгъи, хьалыгъуи, ятэ игъогу гъомылэщтыри атепхагъэхэу щыдыбзэу пшІырэ ятэ фаригъэщагъэх. 24 Ащ ыуж ышыхэр къытІупщыжьхи, ахэр къызежьэжьхэм, Юсыф ышмэ къариІуагъ: «Гъогум шъущызэщымыхь!» 25 Мысырым къикІыжьхи, КъэнаІан хэгъэгум, ежьхэм ятэу Якъубэ дэжь къэкІожьыгъэх. 26 «Юсыф псэоу щыІ, – раІуагъ ятэ, – джы ар Мысыр хэгъэгум зэрэпсэоу иІэшъхьэтет». Ау Якъубэ зэрмыр хъугъэ: къаІорэр ышІошъ хъугъэп. 27 Ау Юсыф къариІогъэгъэ гущыІэ пстэури къызыфаІотэжьым, ежь ащэным пае Юсыф къафигъэкІогъэ ку псынкІэхэри зелъэгъухэм, ыгу зыкъыІэтыжьи, 28 Исраил къыІуагъ: «Дэгъу! Джыри скъо Юсыф псэоу щыІ! СыкІонышъ, ар сымылІэжьызэ зэзгъэлъэгъужьыщт».
Якъубэ Мысырым къызэрэкІуагъэр
1 Исраил зэкІэ иІэр зэкІиугъуаий, къежьагъ. БэрщэбаІ къызэсым, ятэу Исхьакъ и Тхьэ къурмэнхэр фишІыгъэх. 2 Тхьэм Исраил чэщым зыкъыфигъэлъагъуи, къыриІуагъ: «Якъуб! Якъуб!» «СыкъэдаІо», – риІожьыгъ Исраил. 3 Тхьэм къыІуагъ: «Сэры Тхьэр, уятэ и Тхьэр. Мысырым укІонкІэ умыщын, Сэ ащ о цІыф лъэпкъышхо щыптезгъэкІыщт. 4 Сэ Мысырым сыкъыбдэкІощт. Сэр-сэрэуи ащ шъукъисщыжьыщт. Юсыф ежь ыІэкІэ о унапІэхэр ыгъэплІэжьыщтых». 5 Якъубэ БэрщэбаІ къыдэкІыгъ. Исраил ыкъомэ ятэу Якъуби, ясабыйхэри, яшъузхэри, фирхьауным ахэр ращэнхэу къафигъэкІогъэ ку псынкІэхэм арагъэтІысхьэхи, ращэжьагъэх. 6 Ахэмэ ябылымхэр афыщтыгъэх, КъэнаІан хэгъэгум щаугъоигъэ мылъкури зыдащэщтыгъэ. Якъуби ащ къытекІыгъэ пстэури игъусэу Мысырым къэкІуагъэх. 7 Ыкъохэри, ыкъохэм акъожьхэри, ыпхъухэри, ыпхъухэм апхъухэри, зэкІэ илІакъо игъусэу Мысырым къыздищагъ.
Якъубэ ибынхэр
8 Мары Исраил ыкъохэу Мысырым къэкІуагъэхэм ацІэхэр, Якъубэрэ ащ ыкъохэмрэ: Якъубэ ищыпэлъфэу Рубэн. 9 Рубэн ыкъохэр: Хъанох, Палыу, Хъэцрон, Къармый. 10 ЩымІон ыкъохэр: Емуел, Ямин, Іохад, Яхын, Цохар, къэнаІан бзылъфыгъэм ыкъоу Шаул. 11 Лэуй ыкъохэр: Гъэрщэн, Къахат, Мэрарый. 12 Ехъуд ыкъохэр: Іэр, Онан, Шелэ, Пэрэц, Зэрахъ; ау Іэррэ Онанрэ КъэнаІан хэгъэгум щылІагъэх. Пэрэц ыкъощтыгъэх Хэцронрэ Хъамулрэ. 13 Иссашхар ыкъохэр: ТолаІ, Пуа, Иоб, Щымрэн. 14 Зэбулун ыкъохэр: Сэрэд, Елон, Яхълэел. 15 Ахэр Леа ыкъохэу Мэсэпэтам Якъубэ къыщыфилъфыгъэхэмрэ ыпхъоуи Динэрэ арых. ЗэкІэмкІи Леа къытекІыгъэу щэкІырэ щырэ иІагъ. 16 Гъад ыкъохэр: Цыфион, Хъагъый, Шуный, Ецбон, Іэрый, Ародый, Арэлый. 17 Ащэр ыкъохэр: Имнэ, Ишыуа, Ишыуй, БэриІэ, ахэмэ ашыпхъоу Сэрахъ. Бэрие ыкъохэр: Хъэбэр, Малкъыел. 18 Ахэр унэІут бзылъфыгъэу Зилпа, Лабан ежь ыпхъоу Леа ритыгъагъэм къытекІыгъэх. Ащ Якъубэ нэбгырэ пшІыкІух фигъотыгъ. 19 Якъубэ ишъузэу Рахъэл ыкъохэр: Юсыф, Бинямин. 20 Юсыф Мысыр хэгъэгум къыщыфэхъугъэх Мынасэ, Ефраим; Он дэс къурмэнышІэу ПотыпэраІ ыпхъу Асэнат ахэр Юсыф къыфилъфыгъэх. 21 Бинямин ыкъохэр: БэлаІ, Бэхэр, Ащбэл; Гъэрэ, НаІаман, Ехъый, Рощ, Мупим, Хъупим, Ард. 22 Ахэр Рахъэл къытекІыгъэхэу Якъубэ къыфэхъугъэхэр арых, пстэумкІи нэбгырэ пшІыкІуплІ. 23 Дан ыкъо – Хъущым. 24 Нафталый ыкъохэр: Яхцэел, Гъуный, Ецэр, Щылэм. 25 Ахэр Лабан ыпхъоу Рахъэл ритыгъэ унэІут бзылъфыгъэу Билхэ къыфэхъугъэх. Ащ зэкІэмкІи Якъубэ нэбгырибл фигъотыгъ. 26 Якъубэ игъусэу Мысырым къэкІогъэ цІыфхэу, ежь апкъынэ-лынэ хэкІыгъэхэр, Якъубэ ыкъомэ яшъузхэр хэмытхэу, зэкІэмкІи нэбгырэ тІокІищырэ хырэ хъущтыгъэх. 27 Юсыф ыкъохэу Мысырым ежь къыщыфэхъугъэхэр нэбгыритІу. ЗэкІэ Якъубэ иунагъоу Мысырым кІожьыгъэр нэбгырэ тІокІищырэ пшІырэ.
Якъубэ Мысырым щыщэу Гощэн хэкум зэритІысхьагъэр
28 Якъубэ ежь ыпэ Ехъуд ригъэшъи, Гощэн хэкум къащыпэгъокІынэу Юсыф дэжь ыгъэкІуагъ. Гощэн чІыгум къызэкІохэм, 29 Юсыф ику псынкІэ зэкІаригъашІи, Исраил, ежь ятэ ащ щыпэгъокІынэу, Гощэн чІыгум кІуагъэ. Ятэ зелъэгъум, ащ ыпшъэ зыридзи, джаущтэу бэрэ гъыгъэ. 30 Исраил къыІуагъ: «Джы сынитІукІэ псэоу услъэгъужьыгъэшъ, сылІэжьыми хъущт». 31 Юсыф ышхэми зэкІэ ятэ иунагъуи ариІуагъ: «Сэ фирхьауным дэжь сыкІонышъ, ащ есІощт: „КъэнаІан хэгъэгум щыІэгъэ сшыхэри, зэкІэ тятэ иунагъуи садэжь къэкІуагъэх. 32 Ахэр Іахъох, былымхэр ахъу, ямэл-пчэнхэри, ябылым пІашъэхэри, ямылъкуи зэкІэ къыздащагъ“. 33 Шъо, фирхьауныр къышъуаджэу, шъузпылъ ІофымкІэ къышъоупчІымэ, 34 мырэущтэу ешъуІу: „Тэ, о уипщылІхэр, тикІэлэгъум къыщегъэжьагъэу, тятэмэ афэдэу, тыбылымахъу“. Джащыгъум Гощэн хэкум шъукъырагъэнэщт, сыда пІомэ мысыр цІыфхэм мэл-пчэнхэр зыгъэхъухэрэр зэрапэсыхэрэп».
1 Фирхьауным ыдэжь къакІуи, Юсыф ащ риІуагъ: «Сяти, сшыхэри, ямэл-пчэнхэри, ябылым пІашъи, сыд лІэужыгъоу яІэри зэкІэ акІыгъоу, КъэнаІан хэгъэгум къикІыхи, къэкІуагъэх. Джыдэдэм ахэр Гощэн хэкум щыІэх». 2 Юсыф ышымэ ащыщэу нэбгыритф фирхьауным нэІуасэ фишІыгъ. 3 Фирхьауныр Іофэу ашІэрэмкІэ ахэмэ къяупчІыгъ: «Сыд Іоф шъузпылъыр?» Ахэмэ джэуап къатыгъ: «УипщылІхэр мэлахъох, тэри тятэхэри ары». 4 ЕтІани раІуагъ: «Мы чІыгум хэхэсэу тыщыпсэунэу тыкъэкІуагъ. Тэ, уипщылІмэ, тибылымхэм апае хъупІэ щыІэжьэп, сыда пІомэ КъэнаІан хэгъэгум гъэблэшхо ит. Джащ пае тэ, уипщылІхэм, фит тышІ Гощэн хэкум титІысхьанэу». 5 Фирхьауным Юсыф риІуагъ: «Уяти пшыхэри о уадэжь къэкІуагъэх. 6 Мысыр хэгъэгур уапашъхьэ илъ; хэгъэгум ичІыгу анахьышІум уяти пшыхэри игъэтІысхьэх, Гощэн хэкум щэрэпсэух. Ахэмэ цІыф гупкІэхэр ахэтэу ошІэмэ, сибылыммэ алъыплъэнхэу гъэнафэх». 7 ЕтІанэ Юсыф ятэу Якъубэ къыщи, фирхьауным нэІуасэ фишІыгъ. Якъубэ Тхьэм ынэшІу фирхьауным къыщифэнэу фелъэІугъ. 8 Фирхьауныр Якъубэ къеупчІыгъ: «Илъэс тхьапша уныбжьыр?» 9 «Дунаим къызыщыскІухьэрэр илъэсишъэрэ щэкІырэ хъугъэ, – ыІуагъ Якъубэ. – МакІэх, къиныгъэх мафэу къэзгъэшІагъэхэр, сятэжъмэ дунаим илъэс пчъагъэу къызэрэщакІухьагъэм ебгъэпшэнхэ плъэкІыщтэп». 10 Якъубэ Тхьэм ынэшІу фирхьауным къыщифэнэу джыри фиІуи, ащ ыпашъхьэ къикІыжьыгъ. 11 Юсыф яти ышхэми Мысыр хэгъэгум ианахь чІыпІэшІоу, РаІымэсэс хэкум, фирхьауным унашъо къызэрэфишІыгъэм тетэу, псэупІэ щаритыгъ. 12 Юсыф ежь яти, ышхэми, зэкІэ илІакъуи лэжьыгъэр аІэкІигъахьэщтыгъэ, шъхьадж иунагъо сабыеу исым телъытагъэу.
Мысырым гъаблэ къызэрэщыхъугъэр
13 ТыдэкІи хэгъэгум гъомлапхъэ илъыжьыгъэп – джарэу гъаблэр лъэш дэдэ хъугъагъэ, Мысыр хэгъэгури КъэнаІан хэгъэгури гъаблэм къыхэкІэу кІочІаджэ хъугъагъэх. 14 Юсыф Мысыр хэгъэгуми КъэнаІан хэгъэгуми зэкІэ арылъыгъэ ахъщэу, лэжьыгъэу ащэфыщтыгъэм къыкІэкІыгъэр фирхьауным фиугъоигъ. 15 Мысыр хэгъэгуми КъэнаІан хэгъэгуми ахъщэр защаухым, мысыр цІыфхэр Юсыф дэжь къакІохи, къыраІуагъ: «Гъомлапхъэ къытэт! Тиахъщэ зэрэтыухыгъэм пае, укъытэплъызэ тыбгъэлІэнэу ара?» 16 Юсыф ариІуагъ: «Шъуибылымхэр къэшъуфых, шъуибылыммэ ауасэ ипэгъокІэу гъомлапхъэ къышъостыщт, ахъщэр шъуухыгъэмэ». 17 Ахэмэ ябылымхэр къафыгъэх, Юсыф гъомлапхъэ аритыщтыгъэ – шыхэми, мэлхэми, пчэнхэми, цухэми, щыдхэми япэгъокІэу. А илъэсым гъомлапхъэр ябылымхэмкІэ ащ аригъэхъожьыгъ. 18 КъыкІэлъыкІорэ илъэсыми ащ дэжь къакІохи, къыраІуагъ: «ПшІотыушъэфынэп, тизиусхьан, тиахъщи тибылым Іэхъогъухэри уадэжь щыІэ зэрэхъугъэхэр, тпкъырэ тичІыгухэмрэ апэмыкІ къыоттын зи къытфэнэжьыгъэп. 19 Адэ уапашъхьэ тыщыкІодынэу ара, тэри тичІыгухэри? Тэри тичІыгухэри гъомлапхъэкІэ тыщэф; тэри тичІыгухэри фирхьауным пщылІ тыфэхъущт, о къытэт чылапхъэ, тымылІэу псэоу тыкъэнэным, чІыгури нэкІы мыхъуным апае». 20 Джаущтэу Юсыф Мысыр хэгъэгур зэрэщытэу фирхьауным пае къыщэфыгъ. Мысыр цІыфхэр гъаблэм ригъэзыгъагъэхэти, зэкІэми ячІыгу къыращагъ. ЗэкІэ чІыгур фирхьауным ІэкІэхьагъ, 21 мысыр цІыфхэр, хэгъэгум ызыгъунэ къыщегъэжьагъэу адрэ гъунэм нэс, Юсыф фирхьауным пщылІ фишІыгъэх. 22 КъурмэнышІмэ ячІыгу закъу ымыщэфыгъэр, сыда пІомэ фирхьауным ахэмэ Іахьэ гъэнэфагъэ ренэу аритыщтыгъэ, а Іахьэу къаритырэр гъомлапхъэкІэ афикъущтыгъэ; ащ пае ячІыгу ащагъэп. 23 Юсыф цІыфмэ ариІуагъ: «Джы, сэ фирхьауным пае шъори шъуичІыгуи сщэфыгъэшъ, мары чылапхъэ къышъосэты, чІыгум ешъупхъ. 24 Лэжьыгъэу Іушъухыжьырэм иятфэнэрэ Іахьэ фирхьауным къешъут; ІэхьиплІыр шъо къышъуфэнэщт – губгъохэм яшъупхъынэу, гъомлапхъи шъуфэхъунэу, шъори, шъуиунэмэ арысхэми, шъуисабыйхэми апае». 25 Ахэмэ джэуап къатыжьыгъ: «О псэоу тыкъэбгъэнэжьыгъ! Тизиусхьан игукІэгъу тыкІэлъэІу. Джы къыщегъэжьагъэу фирхьауным пщылІы тыфэхъу». 26 Юсыф Мысыр хэгъэгум хабзэу щигъэуцугъэр джы къызнэсыгъэми арэущтэу щыт: ятфэнэрэ Іахьэр фирхьауным раты. КъурмэнышІмэ ячІыгу закъу ары фирхьауным ие мыхъугъэр.
Якъубэ иаужырэ илъэсхэр
27 Мысыр хэгъэгум щыщ Гощэн хэкум исраил цІыфхэр итІысхьагъэх. Ахэмэ ащ чІыгухэр щаІыгъыгъэх, ямылъкукІи яцІыфышъхьэкІи багъощтыгъэх. 28 Якъубэ Мысыр хэгъэгум илъэс пшІыкІублырэ щыпсэугъ, зэкІэмкІи къыгъэшІагъэр илъэсишъэрэ тІокІитІурэ блырэ. 29 Исраил зыщылІэщт уахътэр къызэсым, ыкъоу Юсыф ар къеджи, риІуагъ: «ГукІэгъу къысфыуиІэмэ, о скопкъ къытеІаби, гукІэгъурэ шъыпкъагъэрэ сэркІэ къызэрэпхэфэщтымкІэ тхьэлъанэ къысфэшІ: Мысырым сыщымыгъэтІылъыжь. 30 Тятэжъмэ адэжь зызгъэзэжькІэ, Мысырым сищыжьи, ахэмэ якъэунэ сычІэлъхьажь». Юсыф къыІуагъ: «О къызэрэпІуагъэу сшІыщт». 31 «Тхьэлъанэ къысфэшІ», – ыІуагъ Якъубэ. Юсыф тхьэлъанэ ышІыгъ. ПІэм хэлъыгъэ Якъубэ ышъхьэ къыукъощыгъ.
Якъубэ ынэшІу Юсыф ыкъохэм къызэращифагъэр
1 Уахътэ тешІагъэу, Юсыф раІуагъ: «Уятэ сымадж». Юсыф ыкъуитІоу Мынасэрэ Ефраимрэ Якъубэ дэжь ыщагъэх. 2 Якъубэ макъэ рагъэІугъ: «Пкъоу Юсыф уадэжь къэкІуагъ». Исраил кІуачІэу иІэр къызэкІиугъуаий, пІэгум къитІысхьагъ. 3 Якъубэ Юсыф къыриІуагъ: «ЛъэкІ пстэури ЗиІэ Тхьэр Лузэ дэжь, КъэнаІан хэгъэгум къыщысфэлъагъуи, ынэшІу къысщифи, 4 къысиІуагъ: „Сэ уилІакъо згъэбэгъощт, бэдэди сшІыщт: цІыф лъэпкъыби о птезгъэкІыщт, о птекІыщтхэм ущымыІэжь зыхъукІэ, мы хэгъэгур ястыщт, егъашІэм яунэенэу“. 5 Джы сэ Мысыр хэгъэгум сыкъэмыкІозэ, къыпфэхъугъэ шъэуитІур скъокІэ сэштэ. Ефраимрэ Мынасэрэ джы сэсыещтых, Рубэнрэ ЩымІонрэ сэсыехэу зэрэщытым фэдэу. 6 Сабыеу ахэмэ ауж къыпфэхъущтхэр оуиещтых. Ахэмэ ежь ашымэ ацІэхэмкІэ къяджэхэзэ, мылъкоу къакІэныщтым яІахьэ хэлъыщт. 7 Мэсэпэтамым сыкъикІыжьызэ, нэшхъэигъэшхо къысфихьи, Рахъэл КъэнаІан чІыгум ит Ефрат пэмычыжьэу гъогум тытетэу лІагъэ. Джащ пае сэ ар джы БэтлэхъэмкІэ заджэхэрэ Ефрат кІорэ гъогум дэжь щычІэслъхьажьыгъ». 8 Юсыф ыкъохэм къяплъи, Исраил къэупчІагъ: «Хэта мыхэр?» 9 Юсыф ятэ риІуагъ: «Ахэр Тхьэм мыщ къыщыситыгъэ скъохэр арых». «КъысэщалІэх ахэр, – Якъубэ къыІуагъ, – сэ сынэшІу ащысфэным пае». 10 Якъубэ ынэхэм жъыгъэм къащигъэкІагъэу хъатэу ылъэгъужьыщтыгъэп. Юсыф ахэр ятэ рищалІэхи, Якъубэ къябэугъ, ІаплІ къарищэкІи, 11 Юсыф къыриІуагъ: «Сэ унапэ слъэгъужьынэу сыгугъэжьыщтыгъэп: ау мары, Тхьэм уисабыйхэри сэ сигъэлъэгъугъэх». 12 Юсыф ахэр ятэ ылъэгуанджэмэ къатырихыжьхи, чІыгум нэсэу шъхьащэ фишІыгъ. 13 ЕтІанэ Юсыф Ефраим ежь иджабгъоу, Исраил ар исэмэгубгъоу, Мынасэ ежь исэмэгукІэ, Исраил ар иджабгъукІэ ыгъэуцухи, ятэ пэблагъэу къырищэлІагъэх. 14 Ау Исраил ыІэ джабгъу ыщэий, Ефраим ышъхьэ тырилъхьагъ, ар нахьыкІэу щытыгъ нахь мышІэми, Іэ сэмэгур, ІитІур зэблэдзыгъэу, нахьыжъ Мынасэ ышъхьэ тырилъхьагъ, ар ищыпэлъфэу щытыгъэми. 15 ЕтІанэ ащ Юсыф ынэшІу щифи, къыІуагъ: «Тхьэу, сятэхэу Ибрахьимэрэ Исхьакърэ зыпашъхьэ щыпсэугъэхэр, Тхьэу, егъашІэми непэ нэси сызезыщэрэм, 16 МэлэІичэу, сыдрэ бзэджагъи сыщызыухъумэрэм, – ЫнэшІу ащэрэф Ащ шъэожъыемэ! Ахэмэ сэ силІакъо лъарэгъакІуат, Сятэмэ ялІакъо – Ибрахьимэрэ Исхьакърэ. Ахэр бэдэдэ чІыгум щэрэхъух!» 17 Ятэ ыІэ джабгъу Ефраим ышъхьэ зэрэтырилъхьагъэр Юсыф ыгу къеуагъ, арыти Ефраим ышъхьэ тырихынышъ, Мынасэ ышъхьэ тырилъхьанэу, ятэ ыІэ ыубытыгъ. 18 «Аущтэп, тят, – ыІуагъ Юсыф, – мары щыпэлъфыр, пІэ джабгъу ащ ышъхьэ телъхь». 19 Ау ятэ ащ къемызэгъэу, къыІуагъ: «СэшІэ, сикІал, сэшІэ. Ащи лъэпкъышхо текІыщт, ар ины хъущт. Ау ышнахьыкІэ ащ нахь иныжьи хъущт, ащ текІыщтхэр лъэпкъыбэ хъущтых». 20 Мары а мафэм Исраил ынэшІу ахэмэ зэращифэгъэ гущыІэхэр: «Шъо шъуцІэкІэ исраил цІыфхэр Тхьэм ынэшІукІэ елъэІущтых. Зым ынэшІу адрэм щифэзэ, ахэмэ аІощт: „Ефраимрэ Мынасэрэ Тхьэм ынэшІу къызэращифагъэм фэдэу, ынэшІу къыпщерэф“». Аущтэу Ефраим Мынасэ нахь лъагэу ыгъэуцугъ. 21 ЕтІанэ Исраил Юсыф риІуагъ: «Сэ сихьадэгъу къэсыгъ. Ау Тхьэр шъо шъуигъусэщт, шъуятэмэ яхэгъэгуи шъуигъэгъэзэжьыщт. 22 Сэ къыосэты, пшымэ уатесІэтыкІэу, Щэхэм – Іошъхьэ чапэр, амор цІыфхэм чатэмрэ щабзэмкІэрэ ар къатесхыгъ».
Якъубэ ыкъомэ къафишІыжьыгъэ осыетхэр
1 Якъубэ ыкъохэм къяджи, къариІуагъ: «Шъукъызэрэугъой, тапэкІэ къышъохъулІэщтыр къышъосІонэу. 2 Шъукъызэхахь, шъукъэдаІу, Якъубэ ыкъохэр, – шъуятэу Исраил шъукъедэІу! 3 Рубэн, сищыпэлъф, сипытапІ, хъулъфыгъэ кІуачІэу сиІэм иапэрэ лэжьыгъ, лъытэныгъэшхокІи кІуачІэкІи апэрэ! 4 Псым фэдэу, зыпкъ уимытэу, ащ нахьыбэрэ о апэрэу ущытыжьыщтэп, сыда пІомэ уятэ ипІэ зыхэбгъакІи, – сигъолъыпІэ уушІоигъ. 5 ЩымІонрэ Лэуйрэ зэшых, ячатэхэр – жъалымыгъэм иІашэх! 6 Ахэм рахъухьагъэм сыхэлажьэрэп, ахэмэ якуп сыхахьэрэп. Сыда пІомэ зыгубжыхэкІэ – цІыфхэр аукІых, шъхьаубэтагъэкІи шкІэхъужъхэм ялъынтфэхэр зэпаупкІых. 7 Ягубж жъалым нэлатыр телъ, зэкІокІыгъэм ар фэдэшъ. Ягубж ябги нэлатыр телъ, ар жъалымышъ. Якъубэ ичІыгу ахэр щызэбгырысфыщтых, Исраил ичІыгу ахэр щистэкъухьащтых! 8 Ехъуд, пшыхэм уищытхъу аІотэщт! Уипыймэ апшъэ пІэ телъ, о пшымэ шъхьащэ къыпфашІыщт. 9 Ехъуд, о аслъан ныбжьыкІэм уфэд, – къонтхъ пшІыгъэу къэогъэзэжьы, сишъау, аслъаным фэдэу зытыриуфыхьэзэ, ар якІошъылІэ, аслъаныбзым ар фэд – хэта ар зыгъэгумэкІыщтыр? 10 Тетыгъо бэщыр ІэкІэзыщтэп Ехъуд, пачъыхьэмэ ябэщ ащ илІэужмэ ренэу аІыгъыщт. ТынІахьэр зифэшъуашэр къэкІофэ; цІыф лъэпкъхэри ащ ІорышІэ фэхъущтых. 11 Сэнэшъхьэ бжалэми ащ ищыд рипхылІэщт, санэр зыхэкІырэр – яепхыпІ щыд щырмэ. Ищыгъынхэр ащ санэм щегыкІых, ишъуашэхэр сэнашъхьэм лъэу кІэтым щегыкІых. 12 Ащ ынэхэр санэм нахь плъыжьыщтых, щэм нахь фыжьыщтых ащ ыцэхэр. 13 Зэбулун щыпсэущт хы Іушъом, къухьэ уцупІэ ар хъущт, игъунапкъэхэр Цыдон нэсыщтых. 14 Иссашхар – ар щыд къарыушІоу хьылъэ пхыгъэмэ азыфагу дэлъым фэд; 15 гъэпсэфыпІэр зэрэдэгъур, мы чІыгури зэрэгоІу дэдэр зилъэгъукІэ, ыплІэІу хьылъэм ащ кІигъэуцонышъ, пщылІым фэдэу ащ Іоф ышІэщт. 16 Дан ыгъэІорышІэщт ицІыф лъэпкъ: исраил лъэпкъмэ зэу ащыщэу. 17 Дан гъогум телъыщт блэм фэдэу, блэу лъагъом телъыщт ар щэнаутзехьэу, шым ылъакъо ецакъэшъ – шым тесыр кІыбкІэ къыригъэфэхэу. 18 Цыхьэ пфэсшІэу сыожэ сыкъэбгъэнэжьынэу, Зиусхьан! 19 Куп бзаджэхэр Гъад къытебэнэщтых – ау зэкІифэщтых, алъэдакъэ итэу. 20 Ащэр игъомлапхъэ нэхъоищт; ащ пачъыхьэм шхын ІэшІухэр фищэщтых. 21 Нафталый – блэнэ шъхьафит, ащ щыр дэхэ дэдэхэр зэрехьэх. 22 Юсыф – бэу къызпыкІырэ сэнэшъхьэ бжал, псыкІэчъыпІэм шъхьащыт сэнэшъхьэ бжал, ащ икуамэмэ дэпкъым зыращэкІы. 23 Щэбзэгъаохэр тебанэщтыгъэх ащ губжыгъаехэу, агъэпыеу ащ еощтыгъэх. 24 Ау ищабзэ ащ пкъыеу къэнагъ, ыІэ лъэшхэр уфэ-упцІэу къэнагъэх, – Якъубэ и Тхьэ кІочІэшхо, Мэлахъом ыцІэ, Исраил и Мыжъошхо зандэ ихьатыркІэ; 25 Ар – уятэ и Тхьэу, о къыбдеІэрэр ары. ЛъэкІ пстэури ЗиІэ Тхьэу, ЫшъхьагъыкІэ щыІэ ошъогум, ЫчІэгъ щыІэ чІэнчъэм анэшІукІэ, Быдзрэ кІоцІырэ анэшІукІэ, 26 Уятэ ынэшІоу къыпщифагъэр ижъырэ къушъхьэмэ анэшІоу къыпщыфагъэм нахьышІу. Ижъырэ Іуашъхьэмэ ятын хьалэл нахьышІу. А пстэури Юсыф ышъхьэ къылъэрэІэс – зэшмэ ахахыгъэм ынапцэ. 27 Бинямин – ар тыгъужъ цунтхъакІу: къыубытыгъэр пчэдыжьым ешхы, пчыхьэм ецунтхъэ икъонтхъ». 28 Джары зэкІэ Исраил илІэкъо пшІыкІутІу – джары ахэмэ ятэ ынэшІу зэращифагъэри. ЛІакъо пэпчъ зэрэтефэу ынэшІу щифагъ.
Якъубэ зэрэлІагъэр
29 ЕтІанэ Якъубэ унашъо афишІыгъ: «Сэ шІэхэу сицІыф лъэпкъ сыхэхьажьыщт. Сятэхэм адэжь, ахэр зычІэлъ гъочІэгъэу, хьат лъэпкъым щыщ Ефрэн ишъоф итым сычІэшъулъхьажь, 30 КъэнаІан хэгъэгум дэжь Мамрэ къыпэщылъ Махпэлэ шъофым ит гъочІэгъэу, шъофыр игъусэу Ибрахьимэ ежь иунаеу хьат цІыфэу Ефрэн ежь щычІалъхьажьынэу къыщищэфыгъэм. 31 Ащ дэжьым щычІалъхьажьыгъэх Ибрахьимэрэ ащ ишъузэу Сарэрэ; ащ дэжьым щычІалъхьажьыгъэх Исхьакърэ ащ ишъузэу Рыбкъэрэ; ащ щычІалъхьажьыгъ Леа. 32 А шъофымрэ ащ ит гъочІэгъымрэ хьат цІыфхэм къащащэфыгъэх». 33 Якъубэ ыкъохэм афишІырэ унашъор къыухи, пІэм хэгъолъхьажьыгъ, ыпсэ хэкІи, зыщыщ лъэпкъым хэхьажьыгъ.
Якъубэ зэрагъэтІылъыжьыгъэр
1 Юсыф ятэ зытыриуІуби, ащ ышъхьагъ итэу гъызэ, ынэгу ебэугъ. 2 Юсыф иунэІут ІэзакІомэ ятэ ихьадэ мыкІодыным пае уц щафэнэу унашъо афишІыгъ. 3 Мэфэ тІокІитІурэ, зэрищыкІагъэм тетэу, ІэзакІомэ ащ уцыр щафагъ. Мэфэ тІокІищырэ пшІырэ мысыр цІыфхэм ар агъэягъ. 4 Шъыгъо мафэхэр зыблэкІхэм, Юсыф фирхьауным иунэ Іофзехьэхэм ариІуагъ: «ГукІэгъу къысфыуиІэмэ, сятэ тхьэлъанэ зэрэсигъэшІыгъэр фирхьауным сфешъуІу: 5 „Сэ тятэ тхьэлъанэ сигъэшІыгъ зылІэжьыкІэ, КъэнаІан хэгъэгум къэунэу ежь пае щигъэхьазырыгъэм щычІэслъхьажьынэу къысиІуи. СигъэкІонышъ тятэ чІэслъхьажьыным пае фит сишІынэу сыфай, етІанэ сэ къэзгъэзэжьыщт“». 6 Фирхьауным фит къышІыгъ: «КІуи, уятэ къычІэлъхьажь. Тхьэлъанэу уигъэшІыгъэр гъэцакІэ». 7 Ятэ чІилъхьажьынэу Юсыф кІуагъэ. Ащ дэкІуагъэх фирхьауным зэкІэ инахьыжъ упчІэжьэгъухэри, иунэ ІофышІэ нахьыжъхэри, Мысыр хэгъэгум зэкІэ икъулыкъушІэ Іэшъхьэтетхэри, 8 Юсыф иунагъуи, ышхэри, илІакъуи зэрэпсэоу. Гощэн чІыгум къинагъэхэр ясабыйхэмрэ ябылымрэ ары ныІэп. 9 Ку псынкІэхэри, шыухэри, цІыф бэдэди ащ дежьагъ. 10 Иордан псыхъом ыкІыб, Атад щыІэ хьамэщым зынэсхэм, гъы мэкъэ ин, гухэкІ мэкъэ лъэшкІэ ащ щыгъыгъэх. Юсыф ятэ мэфиблэ ахэмэ агъэягъ. 11 А хэгъэгум ис ханаан цІыфхэм Атад щыІэ хьамэщым зэрэщыгъыгъэхэр залъэгъум, аІуагъ: «Мысыр цІыфхэр сыдэу гухэкІэу гъыхэра!» Джары Иордан псыхъом ыкІыб щыІэ чІыпІэм Абэл-Мицраим зыкІыфаусыгъэр. 12 Джаущтэу Якъубэ ыкъомэ къариІуагъэр агъэцэкІагъ. 13 КъэнаІан хэгъэгум ар къахьыжьи, Мамрэ къыпэщылъ Махпэлэ шъофым ит гъочІэгъым щычІалъхьажьыгъ. А гъочІэгъыр, шъофыри зэрэхэтэу, Ибрахьимэ ежь щычІалъхьажьыным пае иунаеу хьатэу Ефрэн къыщищэфыгъагъ. 14 Ятэ зычІалъхьажьым, Юсыфи, ащ ышхэри, ятэ чІэзылъхьажьынэу адэкІогъагъэхэри Мысырым къэкІожьыгъэх.
Юсыф ыкъошхэр зэригъэгупсэфыгъэхэр
15 Юсыф ышыхэр, ятэ щымыІэжь зэхъум, егупшысагъэх: «Сыдэу хъущта, Юсыф джыри ыгукІэ къытфэбзаджэу, зэкІэ мыхъунэу етшІагъэр тигъэпщыныжьынэу ыгу къэкІымэ?» 16 Арыти ахэмэ Юсыф лІыкІо фагъэкІуагъ риІонэу: «Тятэ лІэным ыпэкІэ къыотІонэу унашъо къышІыгъ. 17 „Моущтэу ешъуІу Юсыф: ‘Пшымэ афэгъэгъуба ямысагъи япсэкІодшІагъи – бзэджагъэу къыуашІагъэр’“. Арышъ джы уятэ и Тхьэ тыриІумэтышъ, тимысагъэ къытфэгъэгъуба». Ар къыраІо зэхъум, Юсыф гъыгъэ. 18 Ышыхэр ыдэжь къакІохи, ыпашъхьэ зыщырадзыхи, къаІуагъ: «Тэ оркІэ тыпщылІ». 19 «Шъумыщын, сэ Тхьэм сыричІыпІа? – къыІуагъ Юсыф. – 20 Шъо шъугу бзэджагъэ къысфилъыгъ, ау Тхьэм ар шІукІэ къызэблихъугъ, джы мы къэхъугъэр щыІэным пае: бэмэ ящыІэныгъэ ІофшІэгъэшхокІэ къыгъэнэжьынэу! 21 Арышъ шъумыщын. Шъори шъуисабыйхэми сынаІэ къышъутетыщт». А гущыІэхэм Юсыф ыкъошхэр агъэрэхьатыгъэх, агухэри агъэушъэбыгъэх.
Юсыф зэрэлІагъэр
22 Джаущтэу Юсыф, зэкІэ илІакъо игъусэу Мысырым итІысхьагъ. ЗэкІэмкІи илъэсишъэрэ пшІырэ Юсыф къыгъэшІагъ. 23 Юсыф Ефраим ящэнэрэ лІэужэу къыкІэлъыкІогъэ бынхэм анэсэу ылъэгъужьыгъэх, джащ фэдэуи Мынасэ ыкъо Махыр текІыгъэхэри Юсыф ыкуашъомэ къащыхъугъэхэти, 24 ежь ие шъыпкъэм фэдэу Юсыф ышымэ ариІуагъ: «Сэ сихьадэгъу къэсыгъ, ау Тхьэр шъыпкъэмкІэ шъуиІэпыІэгъоу шъуадэжь къэкІощт. Мы хэгъэгум шъурищынышъ, Ибрахьимэ, Исхьакъ, Якъубэ аритынэу зэригъэгугъагъэхэ хэгъэгум шъуищэжьыщт». 25 Юсыф Исраил ыкъомэ тхьэ къаригъаІуи, ариІуагъ: «Тхьэр шъыпкъэ дэдэмкІэ ІэпыІэгъукІэ шъуадэжь къэкІощт, джащыгъум сикъупшъхьэхэр мыщ рарэхыжьых». 26 Илъэсишъэрэ пшІырэ ыныбжьэу Юсыф лІагъэ. Ащ уц щафи, ихьадэ Мысырым пхъэмбаим щыдалъхьагъ.
Елимэлэхрэ иунагъорэ тхьамыкІэгъошхоу къяхъулІагъэр
1 ХьыкумэшІхэм израиль цІыф лъэпкъыр зыщагъэІорышІэщтыгъэ мафэхэм ахэм яхэгъэгу гъаблэ къыщыхъугъагъ. Ащ къыхэкІэу Ехъуд хэкум ит Бэтлэхъэм къалэм щыщэу лІы горэ ишъузрэ ыкъуитІурэ игъусэхэу Моаб хэгъэгум щыпсэуныгоу кІогъагъэ. 2 А лІым ыцІагъэр Елимэлэх, ишъузы ыцІагъэр НэІэмый, ыкъуитІу ацІагъэхэр Махълонрэ Къылионрэ; ахэр Ехъуд хэкум ит Бэтлэхъэм къалэм щыпсэурэ ефрат лъэпкъым щыщыгъэх. Моаб хэгъэгум ахэр кІохи, ащ къэнагъэх. 3 Уахътэ тешІагъэу НэІэмый илІэу Елимэлэх лІагъэ, шъузабэмрэ ыкъуитІурэ язакъоу къэнагъэх. 4 Ахэмэ Моаб щыщ пшъашъэхэр къащагъэх – зым Іорпэ ыцІэу, адрэм Рут ыцІэу. Ау илъэсипшІ фэдизрэ ащ щыпсэугъэхэу, 5 НэІэмый ыкъуитІуи, Махълонрэ Къылионрэ, лІагъэх. ЫкъуитІуи илІи имыІэжьхэу а бзылъфыгъэр къэнагъ.
НэІэмыйрэ Рутрэ Бэтлэхъэм къызэрэкІожьыгъэхэр
6 Джащыгъум Моаб хэгъэгур ыбгынэнэу инысэхэр игъусэхэу НэІэмый зиІэтыгъ, сыда пІомэ Зиусхьаныр Ежь ицІыф лъэпкъ нэшІукІэ къеплъи, лэжьыгъэ къазэрэритыгъэр Моаб хэгъэгум ащ щызэхихыгъ. 7 Зыщыпсэущтыгъэ чІыпІэм инысэхэр игъусэхэу ар къикІыжьыгъ. Ехъуд хэкум къагъэзэжьыгъэу, гъогум къырыкІохэзэ, 8 НэІэмый иныситІу ариІуагъ: «Шъуежьи, шъхьаджи янэ иунэ ерэгъэзэжь: дгъэтІылъыгъэхэмрэ сэррэ шІукІэ шъукъызэрэтфыщытыгъэм фэдэу, Зиусхьаныр шІукІэ къышъуфыщэрэт! 9 Шъхьаджи лІы дэкІожьыгъэу, ащ иунэ шъхьэегъэзыпІэ щигъотынэу Зиусхьаным шъуешІ!» Джар НэІэмый ыІуи, ябэугъ. Ау куо макъэм зыкъырагъэІэти, ахэр зэгоутэу гъыгъэх. 10 ЕтІанэ къыраІуагъ: «Хьау, тыуигъусэу узщыщ цІыф лъэпкъыр зыщыпсэурэм тыкъыбдэкІощт». 11 Ау НэІэмый къыІуагъ: «Шъуадэжь шъукІожь, сипшъашъэхэр; сыд пае сэ шъукъыскІыгъуна? Сэ джыри шъэожъыехэр къысхэкІынха, шъо лІы шъуфэхъун алъэкІынэу? 12 Жъугъэзэжь, сипшъашъэхэр, шъукІожь, сэ жъыщэ сыхъугъ лІы сиІэнкІэ. Ау „сэ джыри гугъапІэ сиІ“ сІуагъэми, ар хэгъэкІыри, мы чэщ дэдэм лІым сыкІыгъоу, етІанэ шъаохэр къэслъфыгъагъэхэми, 13 ины охъуфэхэ ахэмэ шъо шъуяжэныя? ШъудэмыкІоу шъущысын шъулъэкІына? Хьау, сипшъашъэхэр, шъощ фэмыдаІоу, сэ сиІоф нахь къин, сыда пІомэ Зиусхьаныр къыспэшІуекІо». 14 Ахэмэ джыри кІый макъэр къаІэти, гъыхэу аублагъ. ЕтІанэ Іорпэ игуащэ ебэуи, къыбгынагъ. Рут игуащэ къыгъэнагъэп, ІаплІи рищэкІыгъ. 15 Ау НэІэмый Рут риІуагъ: «Мары, уинысэгъу зыщыщ цІыф лъэпкъыми итхьэхэми афигъэзэжьыгъ; ори ащ ыуж уитэу кІожь». 16 Ау Рут къыІуагъ: «Семыгъэз усыбгынэнышъ, сыпкІымыгъоу згъэзэжьынэу; о уздакІорэм сэри сыкІощт, о узщыпсэурэм сэри сыщыпсэущт; о уилъэпкъ сэ силъэпкъыщт, о уи Тхьи сэ си Тхьэщт. 17 О узщылІэрэм сэри сыщылІэщт, ащ сыщычІалъхьажьынэуи сыфай. СІуагъэр зысымыгъэцэкІэжьыкІэ, сифэшъуашэр Тхьэм серэгъэгъот, хьадэгъу закъом нэмыкІэу зыгорэм усигъэбгынэмэ». 18 Рут къыкІыгъунэу гухэлъ пытэ зэришІыгъэр зелъэгъум, НэІэмый нахьыбэрэ ащ елъэІужьыгъэп. 19 НэбгыритІури Бэтлэхъэм нэсыфэхэ кІуагъэх. Ахэр Бэтлэхъэм дахьэхи, къызалъэгъухэм, зэрэкъалэу къэбырысырыгъэу, бзылъфыгъэхэм аІощтыгъэ: «Мор НэІэмыя?» 20 «НэІэмыйкІэ шъукъысэмыджэжьэу, Марэ къысашъуІу, сыда пІомэ ЛъэкІ Пстэури ЗиІэм сищыІэныгъэ дыджы ышІыгъ», – ариІуагъ ахэм НэІэмый. 21 «Сэ сІэхэр ушъагъэхэу мыщ сыдэкІыгъ, ау Зиусхьаным ІэнэкІэу къысигъэгъэзэжьыгъ; Зиусхьаныр къыспэшІуекІоу, ЛъэкІ Пстэури ЗиІэм насыпынчъагъэр къысфигъэкІуагъэмэ, сыда НэІэмыйкІэ шъукъызфысэджэщтыр?» 22 Джаущтэу НэІэмый моаб бзылъфыгъэу, инысэу Рут игъусэу Моаб хэгъэгум къикІыжьыгъ. Хьэм ихын зыщыфежьэхэрэм адэжь ахэр Бэтлэхъэм къэкІожьыгъагъэх.
Рут БоІаз игубгъо зэрэщылэжьагъэр
1 НэІэмый илІыгъэ Іэлимэлэх ылъэныкъокІэ БоІаз ыцІэу, икъукІэ лІы баеу, лъэрыхьэу Іахьыл иІагъ. 2 Мэфэ заулэ тешІагъэу моаб бзылъфыгъэу Рут НэІэмый риІуагъ: «Губгъом сыкІонышъ, зынэшІу къысщыфэрэм ыуж ситэу хьэу ахыжьырэм шъхьэу кІэзыгъэхэр къэсыугъоин сэІо». «Адэ кІоба, сипшъашъ», – къыриІожьыгъ ащ НэІэмый. 3 Арыти Рут ежьи, кІуагъэ, хынакІомэ ауж итэу губгъом хьашъхьэхэр къыщиугъоищтыгъэх. А губгъор Елимэлэх унагъом щыщ БоІаз иеу къычІэкІыгъ. 4 Мары, Бэтлэхъэм къикІи, БоІаз хынакІомэ адэжь къакІуи, шІуфэс къарихыгъ: «Тхьэр ІэпыІэгъу къышъуфэрэхъу!» «Зиусхьаным ынэшІу къыпщеф!» – къыраІожьыгъ ахэм. 5 БоІаз иунэІутэу, хынакІохэм ашъхьэщытым еупчІыгъ: «Хэтхэм ащыща мо бзылъфыгъэ ныбжьыкІэр?» 6 Хъулъфыгъэм джэуап къыритыжьыгъ: «Мо бзылъфыгъэ ныбжьыкІэр НэІэмый игъусэу Моаб хэкум къикІыгъэ моаб бзылъфыгъэр ары. 7 Ар къытэлъэІугъ: „ХынакІохэм ауж ситэу, бганэхэм азыфагу къыщысшыпызэ къэсыугъоймэ хъуна?“ ыІуи. Джаущтэу къэкІуагъэу, пчэдыжьым къыщыублагъэу джырэ нэс мыщ щыІ; пщыпІэм зыщигъэпсэфынэу джыры ныІэп зыкІуагъэр». 8 ЕтІанэ БоІаз риІуагъ Рут: «КъэдаІу, сипшъашъ, мыщ уикІэу, нэмыкІ губгъо ущышыпэнэу умыкІу, сиунэІут бзылъфыгъэхэм ауж уитэу угъуае. 9 Хъулъфыгъэмэ хьэр зыщахырэ губгъор уинэплъэгъу ерэт, бзылъфыгъэхэм ауж уитэу къэкІухь. Мары, зи къыуамыІонэу сиунэІутхэм ясІуагъ. Псы уешъо пшІоигъо зыхъукІэ, сиунэІутхэм псыр зэрагъэхъогъэ къошынхэм якІуалІи, ешъу». 10 Арыти Рут чІыгум зыридзыхи, ынатІэ ащ нигъэси, БоІаз еупчІыгъ: «Сэ сыхымэ пэтзэ, сыдэущтэу о нэшІукІэ укъысэплъынэу хъугъа?» 11 БоІаз къыриІожьыгъ: «Уишъхьэгъусэ зэлІэм ыуж, уигуащэ фэпшІагъэр зэкІэ сэ къысфаІотагъ, уяти, уяни, укъызщыхъугъэ хэгъэгури къэубгынэхи, джы нэс узыхэмыхьэгъэ цІыф лъэпкъым удэпсэунэу зэрэхъугъэри. 12 А Іофэу пшІагъэм пае шІу къыпферэшІэжь Зиусхьаным; Зиусхьанэу, Израиль и Тхьэу, о зытэмэ чІэгъ ухъумапІэ щыбгъотынэу зыдэжь укъэкІуагъэм, ІахьышІу икъоу къыплъерэгъэІэс». 13 Рут къыІуагъ: «Сизиусхьан, о тапэкІи укъысфэрэдэгъу! О сыбгъэгупсэфыгъ, дахэуи укъыздэгущыІагъ, уиунэІут бзылъфыгъэхэм ащыщ горэми сыримыуасэми». 14 Щэджэгъуашхэм игъо къызэсым, БоІаз ащ риІуагъ: «МокІэ къакІуи, хьалыгъу шхы, уихьалыгъу такъыр сэнэпсым хэгъаозэ шІы». ХынакІохэм ар аготІысхьагъ. БоІаз ащ лэжьыгъэцэ гъэжъагъэхэр ритыгъ; Рут шхагъэ, зигъэшхэкІыгъ ыкІи къелыжьыгъ. 15 ЕтІанэ Рут шыпэнэу къызэтэджыжьым, БоІаз иунэІутхэм унашъо афишІыгъ: «Бганэхэм азыфагуи къыщерэшып, ыгуи хэшъумыгъэкІ; 16 бганэхэм къакІэрышъудзызэ, къыфэжъугъан, къерэшып ыкІи шъуемыцІацІ». 17 Джаущтэу пчыхьэ нэс Рут шыпагъэ, къышыпыгъэр зеутыжьым, бэ дэдэ хъугъэ. 18 Ар къышти, къалэм кІожьыгъэ, игуащэ ащ къыугъоигъэр ылъэгъугъ. Ежь зызегъэшхэкІым, къыгъэнэгъэгъэ лэжьыгъэцэ гъэжъагъэхэр игуащэ ритыгъ. 19 Игуащэ Рут къеупчІыгъ: «Тыда непэ узщыугъоягъэр, Іоф щыпшІэнэу уздэкІуагъэр? НэшІукІэ къыоплъыгъэм Тхьэм ынэшІу къыщерэф!» Зыщылэжьагъэр Рут игуащэ риІуагъ: «Сэ непэ сылажьэу, зыдэжь сыщыІагъэм ыцІэр БоІаз». 20 НэІэмый инысэ риІуагъ: «Псэухэри лІагъэхэри зыщымыгъупшэгъэ Зиусхьаным ынэшІу БоІаз къыщерэф!» НэІэмый къыпидзэжьыгъ: «А цІыфыр тэ тихэщыжьакІу; тихабзэкІэ ар къытфэгумэкІын фае». 21 Рут къыІуагъ: «Аужыпкъэм ащ къысиІуагъ: „ЗэкІэ хыныр аухыфэ сиунэІутхэм ахэт“». 22 НэІэмый инысэ Рут риІуагъ: «Дэгъу, сипшъашъ, ащ иунэІут бзылъфыгъэхэм Іоф адапшІэмэ нахьышІу, нэмыкІ губгъом угу къыщыхагъэкІынкІи мэхъу». 23 Джаущтэу ар БоІаз иунэІут бзылъфыгъэхэм акІыгъоу, хьэм ихыни коцым ихыни аухыфэ шъхьэхэр къышыпыгъэх, игуащэ дэжьи исыгъ.
Рут лІы фэхъущтыр къызэригъотыгъэр
1 Уахътэ горэ тешІагъэу игуащэу НэІэмый Рут къыриІуагъ: «Сипшъашъ, лІы удэзгъэкІонэу уфаеба, уинасып бгъотынэу? 2 ОшІэба БоІазэу, бзылъфыгъэ унэІутхэу Іоф зыдэпшІагъэхэр зиехэр зэрэтиблагъэр? КъэдаІу, нычэпэ ащ хьамэм хьэр щызэпидзыщт. 3 ЗыгъэпскІи, мэ ІэшІу зыпихырэ дагъэ зыщыф, щыгъын кІэракІэхэр зыщылъэхи, хьамэм кІо, ау шхэу, зыгорэ тырешъухьажьыфэ БоІаз зыкъемыгъэлъэгъу. 4 ЕтІанэ чъыенэу зыгъолъыкІэ, зыдэщылъыр зэгъашІэ; джащыгъум укІонышъ, къызэрэпкъотыщтым ишыхьатэу ылъакъохэм атехъуагъэм ыцыпэ къэпІэтынышъ, угъолъыщт. ПшІэщтыр ежь къыуиІощт». 5 «КъысэпІуагъэр зэкІэри згъэцэкІэщт», – къыриІожьыгъ Рут. 6 Рут хьамэм техьи, игуащэ унашъо къызэрэфишІыгъэу зэкІэри ышІыгъ. 7 БоІаз зигъэшхэкІыгъ, зигъэшъокІыгъ, ыгуи ыгъэчэфыгъ, етІанэ кІуи, лэжьыгъэ самэу щылъым ылъапсэ дэжь чъыенэу гъолъыгъэ. ТІэкІу тешІагъэу Рут макъэ ымыгъэІоу къакІуи, итехъон ылъакъохэм адэжь къыІэти, гъолъыгъэ. 8 Чэщныкъомэ адэжь БоІаз ошІэ-дэмышІэу къэущи, зыкъызызэрегъэзэкІым, ылъэгъурэр хьалэмэт: ылъакъохэм адэжь бзылъфыгъэ щылъ. 9 «Ухэта о?» – еупчІыгъ ащ БоІаз. «Рут, уипщылІыр ары, зиусхьан, – къыІуагъ бзылъфыгъэм, – орышъ тэ тихэщыжьакІор, уищыгъын уипщылІ къытехъу ташъхьагъ узэритыщтым ишыхьатэу». 10 «Зиусхьаным ынэшІу о къыпщерэф, сипшъашъ», – джэуап къыритыгъ БоІаз. «Мы аужырэ уиІофышІу ыпэрэм нахьышІоу пшІагъэ, – байми, тхьамыкІэми, кІэлэ ныбжьыкІэхэм ауж уимыхьэу, НэІэми иунагъо узэрэфэшъыпкъагъэр. 11 Арышъ, сипшъашъ, умыщын! КъызфэпІуагъэр зэкІэри сэ къыпфэсшІэщт; сыда пІомэ сикъалэ дэс пстэуми ашІэ о шІур зыгу илъ бзылъфыгъэ къабзэу узэрэщытыр. 12 Сэ орыкІэ хэщыжьакІоу сызэрэщытыр шъыпкъэ, ау сэщ нахь къыппэблэгъэ хэщыжьакІуи щыІ. 13 Мы чэщыр мыщ щих; неущ а лІым уиштэщтми уимыштэщтми рерэхъухь, уиштэмэ, дэгъу, уерэшт; ау ащ уиштэнэу фэмые зыхъукІэ, сэ усштэщт; Зиусхьаным ыцІэкІэ ТхьэрыІо сэшІы. Джы пчэдыжьыр къэсыфэ чъые». 14 Ащ ылъакъомэ акІэрылъэу Рут пчэдыжьыр къэсыфэ чъыягъэ. БоІаз ыгукІэ зэриІожьыгъ: бзылъфыгъэр хьамэм къызэрэкІогъагъэр арэмышІ; джащ пае зэрэлъэгъухэмэ къэзэрэшІэжьынхэм нэсэу нэфынэ къэмыхъузэ, Рут къэтэджыжьыгъ. 15 БоІаз Рут риІуагъ: «Уишъхьатехъо къэубыти, къэІыгъ». БоІаз шэпхъих хьэм щыщэу къыфипщи, Рут къыІыгъ шъхьатехъом къытыритэкъуагъ, етІанэ ар ытамэ къытырилъхьагъ. Ащ ыуж БоІаз къалэм кІожьыгъэ. 16 Рут игуащэ дэжь къэкІожьыгъ. Арыти адрэр къеупчІыгъ: «Сыдэу ухъугъ, сипшъашъ?» Рут къыІотагъ а цІыфым зэкІэ къыфишІагъэр. 17 ЕтІани къыпигъэхъожьыгъ: «Мы хьэ шэпхъихыр зэкІэ къысити: „Уигуащэ дэжь ІэнэкІэу умыкІожь“ къысиІуагъ». 18 НэІэми къыІуагъ: «ЗыІаж, сипшъашъ, Іофым кІэух фэхъущтыр зэогъэшІэфэ, сыда пІомэ непэ Іофыр ымыухэу, а цІыфыр гупсэфыщтэп».
БоІаз Рут къызэрищагъэр
1 А охътэ дэдэм БоІаз къэлэдэсхэм язэІукІэпІэ къэлапчъэ Іухьагъэу, тІысыгъэу щысызэ, хэщыжьакІоу зыфиІогъагъэр блэкІэу ылъэгъугъ. БоІаз ащ риІуагъ: «Моу къыдахьи, мыкІэ къэтІыс, синыбджэгъу». Адрэр къыдахьи, къэтІысыгъ. 2 ЕтІанэ БоІаз къалэм инахьыжъ-упчІэжьэгъумэ нэбгырипшІ къахищи, ариІуагъ: «МыкІэ шъукъэтІыс». Адрэхэр къэтІысыгъэх. 3 БоІаз хэщыжьакІом риІуагъ: «ТиІахьыл благъэу Елимэлэх игубгъо Моаб хэгъэгум къикІыжьыгъэ НэІэмый ыщэ шІоигъу. 4 А къэбарыр озгъэшІэнышъ, мы тилъэпкъ инахьыжъэу щысхэм апашъхьэ щыпщэфынэу къыуасІо сшІоигъуагъ. Пщэфыжьы пшІоигъомэ, щэфыжь; ау пщэфыжьынэу уфэмыемэ, къысаІу ар сшІэным пае; сыда пІомэ зыщэфыжьынэу фитыныгъэ апэу зиІэр оры, уаужыкІэ сэры». Адрэм джэуап къыритыжьыгъ: «Сэ сэщэфыжьы». 5 Ау ащ БоІаз къыпигъэхъуагъ: «НэІэмый губгъор къызыщыпщэфкІэ, лІагъэм имылъку унагъом къыфэнэжьыным пае, Моаб къикІыгъэ Рути шъузкІэ пштэн фае». 6 Арыти хэщыжьакІом къыІуагъ: «Мылъкоу къыскІэныщтым семыгоожьыным пае, ар сщэфын слъэкІыщтэп; о щэфы ар, сыда пІомэ сэ слъэкІыщтэп». 7 Нахьыпэм Израиль хабзэ илъыгъ: зы Іоф горэ къагъэшъыпкъэжьыным пае, зыгорэ къащэфыжьы е къахъожьы зыхъукІэ, зым ицуакъэ зыщихти, адрэм ритыщтыгъ, джар Іофыр зэраухыгъэмкІэ Израиль шыхьат щыхъущтыгъ. 8 Аущтэу хэщыжьакІом «о щэфы» БоІаз къыриІуи, ицуакъэ къызщихи, ащ къыритыгъ. 9 ЕтІанэ БоІаз нахьыжъхэми зэкІэ Іутыгъэ цІыфхэми ариІуагъ: «Елимэлэхи, ащ ыкъохэу Къылиони, Махълони зэкІэ яехэр НэІэмый зэрэщысщэфыгъэхэм шъо непэ шъуришыхьат. 10 Ащ нэмыкІэу Махълон ишъузыгъэ моаб бзылъфыгъэу Рут сэштэ шъузкІэ. Аущтэу зыхъукІэ, лІагъэм имылъку унагъом къыфэнэжьыщт, ащ илІакъо игъашІэ зэпычыгъэ фэмыхъоу лъэпкъым къыхэнэнэу. Шъо ащ непэ шъуришыхьат». 11 Къэлапчъэм зэкІэ Іут цІыфхэми нахьыжъхэми къаІуагъ: «Ары, тэ тышыхьат. Уишъузэу уиунэ къихьэрэр, израиль лъэпкъыр къызытекІыгъэ Рахъэлрэ Леарэ афэдэу, сабыибэ къыпфэхъунэу Зиусхьаным ерэшІ. Ефрат лІакъом мылъку щыугъой, цІэрыІо ущэрэхъу Бэтлэхъэм. 12 Тэмарэ Ехъуд къыфилъфыгъэ Пэрэцэу укъызтекІыгъэм иунагъо фэдэу, уиунагъо орэхъу – Зиусхьаным мы бзылъфыгъэ ныбжьыкІэм къыхэкІэу бынэу къыуитыщтхэм яхьатыркІэ».
Рут шъао къызэрэфэхъугъэр
13 Джаущтэу Рут БоІаз шъузы фэхъугъ. БоІаз ащ гохьагъ, Зиусхьаным Рут ышъо сабый хэфэнэу ынэшІу къыщифи, шъао къылъфыгъ. 14 Бзылъфыгъэхэм НэІэмый раІуагъ: «Зиусхьаным щытхъур ий, хэщыжьакІо пфэхъужьыщт пхъорэлъф къызэрэуитыгъэм пае. Ащ ыцІэ Израиль щытхъухьэ щэрэхъу! 15 Ащ кІуачІэ уигъэгъотыжьыщт, уижъышъхьэми уиІыгъыжьыщт; сыда пІомэ ар уинысэ къылъфыгъ – шІу узылъэгъоу, къуиблымэ анахьи нахь уасэ зиІэ нысэм». 16 НэІэмый а сабыир ыкуашъо тесыгъ, ренэу лъыплъагъ. 17 Гъунэгъу бзылъфыгъэхэм: «НэІэмый шъао къыфэхъугъ», – аІуи, ащ цІэ фаусыгъ: Іобэд. Даут ятэу Ищай ар нэужым ятэ хъугъэ.
Израиль ипачъыхьэу Даут къызтекІыгъэхэр
18 Джы мары Пэрэц Даут ыпэкІэ къыхэкІыгъэхэр: Пэрэц къыфэхъугъ Хъэцрон; 19 Хъэцрон къыфэхъугъ Рам; Рам къыфэхъугъ Іаминадау; 20 Іаминадау къыфэхъугъ Нахъшон; Нахъшон къыфэхъугъ Салмэн; 21 Салмэн къыфэхъугъ БоІаз; БоІаз къыфэхъугъ Іобэд; 22 Іобэд къыфэхъугъ Ищай; Ищай къыфэхъугъ Даут.
Самуел икъэхъукІэрэ Тхьэм фэлэжьэнэу ар зэраратыгъэмрэ
1 Цыуф лІакъом щыщэу, ефрат лъэпкъым къыхэкІыгъэу, Елкъан ыцІэу зы лІы горэ Ефраим къушъхьэлъэ хэкум итыгъэ къалэу Рэмэтэим-Цэфим дэсыгъ. Ащ ятагъэр Ерэухъам, ятэжъыгъэр Елыхъу, ятэжъым ятагъэр Цыуф ыкъо Тэхъу. 2 Елкъан шъузитІу иІагъ: зым ыцІагъэр Хъаннэ, адрэм – Пынин. Пынин лъфыгъэхэр иІагъэх, ау Хъаннэ сабый хэкІыщтыгъэп. 3 Зиусхьанэу ошъогу дзэхэр зиІэрылъхьэ Тхьэм шъхьащэ фишІынэуи, Ащ ыцІэкІэ къурмэн ышІынэуи а лІыр зыщыщ къалэм икІыти илъэсым зэ къалэу Щылэу кІощтыгъэ. Алый икІэлитІоу Хъофныйрэ Пинхъасрэ къурмэнышІхэу Зиусхьаным Щылэу щыфэлажьэщтыгъэх. 4 Елкъан къурмэн зишІыкІэ ишъхьагъусэу Пынинрэ ащ къылъфыгъэ кІалэхэмрэ пшъашъэхэмрэ Іахьэхэр аритыщтыгъэх. 5 Адрэмэ афэмыдаІоу Хъаннэ шъхьафэу Іахьэ ритыщтыгъ, сыда пІомэ Хъаннэ шІу ылъэгъущтыгъэ, Зиусхьаным сабый къыримытщтыгъэ нахь мышІэми. 6 Зиусхьаным сабый къызэрэримытрэр гукъао щыхъунэу тІуанэу иІэм къызэрэрихъонщтыгъэм Хъаннэ ыгу къыгъэцІыкІущтыгъэ. 7 Илъэс къэс Зиусхьаным иунэ зыкІокІэ, тІуанэм ыгу къыхигъэкІыщтыгъэ, мыдрэр, гукъао зэриІэм нахь хэмылъэу, шхэщтыгъэп. 8 Арти ишъхьагъусэу Елкъан мыщ фэдэу къыриІуагъ: «Хъаннэ! Сыда узкІэгъыри, узкІэмышхэри, угу къэзгъэцІыкІури? ШъэуипшІэу уиІэн ылъэкІыщтыгъэм оркІэ сыанахь лъэпІэнба сэ?» 9 Зы илъэс горэм Щылэу кІохи Зиусхьаным иунэ зыщэшхэхэм, зыщешъохэм Хъаннэ къэтэджыжьыгъ. Лъэш дэдэу ыгу еІэжьыгъэти, пчъэнымрэ гъынымрэ зэдыхэтхэу бзылъфыгъэр Зиусхьаным елъэІузэ, тхьэлъанэ ышІыгъ: «Зиусхьанэу ошъогу дзэхэр зиІэрылъхьэр! СигукІае къыплъэІэсмэ, ащ ипэгъокІэу гукІэгъу къысфэпшІынышъ, сыпщымыгъупшэу, угу сыкъэкІыжьэу, уиІумэт шъао къептмэ, ежь къыгъэшІэщтым фэлэжьэнэу, Зиусхьаным ар естынэу, ышъхьашъо егъашІэми чан нэсымыгъэсыхэнэу тхьэлъанэ сэшІы». А уахътэм къурмэнышІэу Алый пчъэихьапІэм дэжь щытыгъэ тетІысхьапІэм тесэу Зиусхьаным иунэ лъапІэ чІэсыгъ. 12 ЫІупэхэр хъублаблэхэу ар Зиусхьаным бэрэ елъэІуфэ Алый къыІуплъыхьагъ. 13 ЫгукІэ зэриІожьзэ, ышъхьэ фэгущыІэжьрэм фэдэу, ыІупшІэхэр ыгъэхъублаблэхэу Хъаннэ щысыгъэти, ар утэшъуагъэу Алый къышІошІыгъ. 14 Арти Алый ащ риІуагъ: «Сыдигъо нэс уутэшъуагъэу ухэтыщта? Чэфыр зыкІэгъэкІыжь». 15 Ащ иджэуап Хъаннэ къыритыжьыгъ: «Хьау, сизиусхьан, сэ гукІаем сызэлъиштэгъэ бзылъфыгъ, унагъуи сис, узгъэутэшъони зыІузгъэфахэрэп, ау сыгу илъыр зэкІэ Зиусхьаным фэсэІуатэ. 16 УсиІумэт, ау бзылъфыгъэ мыхъатэ фэдэу укъысэмыплъ, сигуузышхорэ сызгъэчэфынчъэмрэ якъэбар джы нэс сІотагъэ». 17 Алый ащ къыриІожьыгъ: «Зыгъэрэхьати шъуадэжь гъэзэжь, узэрелъэІугъэр Израилым и-Тхьэ къыпфишІэщт». 18 Арти къыриІожьыгъ: «УиІумэт уинэшІукІэ еплъ!» Ар къыІуи игъогу техьажьыгъ, шхэуи ар хъужьыгъэ, нахьыпэм фэдэуи чэфынчъэжьыгъэп. 19 Пчэдыжьым Елкъан ибын къэтэджыжьыгъ. Зиусхьаным шхьащэ фашІи ядэжь, Рамэ, къагъэзэжьыгъ. Елкъанрэ Хъаннэрэ зызэкІэгъухэм бзылъфыгъэм илъэІу Зиусхьаным къызэхихыгъ. 20 Уахътэ зытешІэм Хъаннэ ышъо сабый хэфагъ, шъауи къыфэхъугъ. Самуел цІэу ащ фиусыгъ. Хъаннэ ыІощтыгъ: «Зиусхьаным селъэІугъэти, ар къыситыгъ».
Самуел Тхьэм фэлэжьэнэу зэрэратыгъэр
21 Зиусхьаным илъэс къурмэн фашІынышъ, Ащ елъэІунхэм пае Елкъанрэ унагъом исхэмрэ зэгъусэхэу Щылэу кІуагъэх. 22 Хъаннэ ахэм адэмыкІоу илІ риІуагъ: «Сабыир быдзыщэм пызгъэзыжьэу зыкъызиІэткІэ, сэр-сэрэу Зиусхьаным иунэ сщэнышъ, Зиусхьаным ыпашъхьэ итэу фэлэжьэным пае егъэшІэрэу къэзгъэнэщт». 23 Ишъхьагъусэу Елкъан шъузым къыриІуагъ: «Узэрэфаеу зекІо; быдзыщэр екъуфэ егъашъу; Зиусхьаным ыІуагъэр къыбдэрэхъу». Шъузыр къани зегъэшъокІыфэ сабыир быдзыщэм ригъэшъуагъ. 24 КІалэм ибыдзешъон зекъум, илъэсищ зыныбжь шкІэхъужъыр, шъонтым из санэр, хьаджыгъэ дзыожъыер къыздаштэхи янэрэ ыкъорэ Зиусхьаным иунэу Щылэу дэтым кІуагъэх. А лъэхъаным кІалэр джыри сабыигъ. 25 ШкІэхъужъыр шІуабзи, янэ шъэожъыер Алый къыфищагъ. 26 Хъаннэ къыІуагъ: «О сизиусхьан, упсэ Зиусхьаным бэ регъэгъашІ! Уапашъхьэ исэу Зиусхьаным елъэІущтыгъэ бзылъфыгъэр къэошІэжьмэ, сизиусхьан, ар сэры; 27 Мы кІалэр ары Ащ сызфелъэІугъагъэр, сызэрелъэІугъэри Зиусхьаным къысфишІагъ. 28 Ежь къыгъэшІэщтым фэлэжьэнэу Зиусхьаным джы ар сэ есэты, сыда пІомэ ар къыситынэу Зиусхьаным селъэІугъагъ». Ар къызеІом ыуж Зиусхьаным фэлэжьэнэу Хъаннэ кІалэр ащ къыгъэнагъ.
Хъаннэ итхьалъэІу орэд
1 «Джаузэ Зиусхьаным елъэІузэ, Хъаннэ къыІуагъ: Зиусхьаным гушІуагъо дэзгъотыгъ; КІуачІэу схэлъым Тхьэм хигъэхъуагъ; ГущыІэкІэ сипыйхэм сапырикъугъ; Зиусхьаным ишІуагъэкІэ щыІэныгъэм сыкІэгушІу. 2 Зиусхьаным нахь шыихъ щыІэп, Ощ нэмыкІ гори щыІэп, Ти-Тхьэ ебгъэпшэнэу пытапІэ щыІэп. 3 ШъукъызшІошІыжьэу бащэ шъумыІо, ГущыІэ дысхэр къызжэдэшъумыгъэкІых; Зиусхьаныр – зэпстэуми ащыгъозэ Тхьэр ары, ЦІыфмэ ашІэрэр зэкІэ къызэпещэчы. 4 Лъэшмэ ящэбзащэхэр къызэпэкІых, Хъыбэйхэм кІуачІэкІэ зарегъэузэнды; 5 ШхэкІыгъэхэм ягъомылэ къалэжьыжьы, Гъаблэ хэтыгъэхэм аІотэжьы; Сабый къызхэмыкІыщтыгъэр гъогогъуиблэ къэгъэгъагъ, Сабыибэ зиІагъэр чъыг гъугъэу къэнагъ. 6 Зиусхьаным дунаир къыуегъэбгынэ, псэр къыпегъэкІэжьы, Хьадрыхапчъэр къыпфызэІуехы, хьадрыхэ гъогу укъытырещыжьы; 7 Зиусхьаным гъончэнджынчъэу укъегъанэ, былымыр хышхоу къыпфегъакІо, УеушъхьакІу, уакъыхеІэтыкІы. 8 ТхьамыкІэхэр сапэм къыхещыжьых, Ащыгъупшэжьыгъэхэр ежьэ Іуашъхьэм къыхехыжьых, Лъэрыхьэмэ ахегъэуцожьых, ЕгъэшІэрэ щытхъум итетыгъо къареты. ЧІыгум ылъапсэ Зиусхьаным къыщежьагъ, Тызтет дунайри ащ тыригъэуцожьыгъ. 9 Шъыпкъэныгъэ зыхэлъ ицІыфхэм ялъагъохэр къыухъумэщт, Хэбзэнчъэмэ ялъагъо шІункІым ыдырыщт, Къарыу закъор арэп цІыфыр зыгъэлъэшырэр. 10 Енэкъокъурэр зэкІэ Зиусхьаным рихьаджыхьащт; Ошъогум шыблэ мэкъэшхоу къыщыгъогъощт. Дунаир зэрэщытэу Зиусхьаным ыухэсыщт, Ипачъыхьи пытагъэ къыритыщт, и-Тхьэихэхи ыкІуачІэ зыдыригъэІэтэещт». 11 Елкъан ядэжь, Рамэ, ыгъэзэжьыгъ, ишъао Алый къурмэнышІым дэжь, Зиусхьаным фэлэжьэным пае къыгъэнагъ.
Алый ыкъохэм ябзэджэшІагъэхэр
12 Алый ыкъохэр цІыф хъэтагъэхэп; ахэр Зиусхьаным шІолІыкІщтыгъэхэп. 13 КъурмэншІынымкІэ Тхьэм къафигъэуцугъэ хабзэхэу къурмэнышІым цІыфмэ аригъэлэжьынэу щытхэр аукъощтыгъэх. Зыгорэм къурмэн зишІыкІэ лым игъэжъогъум къурмэнышІым иІофтабгэ цацэр ыІэдакъэ чІэгъэнагъэу къэсыти, 14 ар зыщыжъорэ лэгъупым рыхэІабэщтыгъ, цацэм къыпыфэрэр къурмэнышІым фихьыщтыгъ. Щылэу къэкІорэ израил цІыф пстэуми джары зэрадэзекІощтыгъэхэр. 15 КъурмэнышІым иІофтабгэ шэр джыри амыгъэстызэ къэсыти къурмэн зышІырэм риІощтыгъ: «КъурмэнышІым ыгъэжъэнэу лы къысэт, лы жъуагъэр ащ пІихыщтэп, зэрэцІынэзэ къаштэ». 16 «Хабзэм тетэу Тхьэм пае шэр загъэстыхэкІэ о узыфаем фэдиз етІанэ штэ» зыгорэм къызыриІокІэ, мыдрэм риІожьыщтыгъ: «Хьау, джыдэдэм къаштэ, армырмэ, кІуачІэкІэ птесхыщт». 17 А кІалэмэ псэкІодышхо Зиусхьаным ыпашъхьэ щызэрахьэщтыгъ, сыда пІомэ Зиусхьаным ыцІэкІэ ашІырэ къурмэныр зэщагъакъощтыгъ.
КІалэу Самуел Щылэу щыІ
18 КІалэу Самуел къурмэншІыгъом къурмэнышІ чэтэнІабгъур ыбг пыпхагъэу Зиусхьаным фэлажьэщтыгъ. 19 Илъэс къэс атефэрэ къурмэныр ашІынэу янэрэ ятэрэ зэгъусэхэу къакІощтыгъэхэти, щыгъын кІыІутелъ цІыкІур ным къыфидыти, ащ къыфихьыщтыгъ. 20 Алый Елкъанрэ ишъхьагъусэрэ Зиусхьаным ынэшІу къащыфэнэу афелъэІущтыгъ: «Зиусхьаным фэбгъэшъошэгъэ кІалэм ычІыпІэ мы уишъуз къыхэкІыгъэу сабыйхэр Зиусхьаным къыпферэгъэхъух!» ЕтІанэ ахэр ядэжь къэкІожьщтыгъэх. 21 Зиусхьаныр Хъаннэ къыфеплъыгъ, кІэлищрэ пшъэшъитІурэ ышъо хыригъадзи, джыри къыритыгъ. Самуел Зиусхьаным ынаІэ къытетэу зыкъиІэтыщтыгъ. 22 Алый жъы дэдэ хъугъагъэ. ИкІалэхэр зэкІэ израил цІыфхэм зэрадэзекІохэрэм, Тхьэм ицІыфхэр зэкІолІэрэ чэтэнгъэІэгъэ лъапІэм щылэжьэрэ бзылъфыгъэхэм зэращыкІыгъухэрэм якъэбархэр зэхихыщтыгъэти, 23 ахэм ариІуагъ: «Сыд пае аущтэу зыжъугъэпсыра? ЗэкІэ цІыфхэм гущыІэ Іае нэмыкІ къышъуаІуалІэу зэхэсхырэп. 24 Хьау, сикІалэхэр, къэбар дэгъоп къыслъыІэсхэрэр, Зиусхьаным ицІыфхэр къызэІэшъогъахьэх. 25 Зы цІыфым адрэ цІыфым лые зырихкІэ, Тхьэм изэхэфын, ау хэта лІыкІо фэхъущтыр Зиусхьаным емыкІун бзаджэ зышІэрэм?» Ау кІалэхэр ятэ къыІорэм едэІугъэхэп, сыда пІомэ Зиусхьаным хьадэгъур ахэм афигъэнэфэгъэхагъ. 26 КІалэу Самуел ыныбжь нахьи нахь хахъощтыгъэ, Зиусхьаныри цІыфхэри шІукІэ ащ къыпэгъокІыщтыгъэх.
Къэхъущтыр зышІэрэм Алый икІалэхэм къяхъулІэщтыр къызэрариІуагъэр
27 Тхьэм илІыкІо Алый дэжь къакІуи къыриІуагъ: «Зиусхьаным ыІорэр мары: „Фирхьауным Мысыр хэгъэгум шъущигъэпщылІ зэхъум Уятэжъ ятэжъхэм закъыфэзгъэнэфэгъагъэба? 28 О плъэпкъба къурмэнышІэу къысфэлэжьэнэу Израил лъэпкъ пстэумэ къахэсхыгъэр, СикъурмэншІыпІэ шъукъекІолІэным, Гъомэ ІэшІухэр къызпихырэ чъыг мыстхъухэр щыжъугъэстыным, КъурмэнышІ чэтэнІабгъур шъубгмэ апыпхагъэу Сапашъхьэ шъуитыным пае? Израил цІыфхэм сэ сцІэкІэ МашІокІэ агъэстырэ къурмэн пстэумэ ащыщхэр УкъызхэкІыгъэхэм къаІузгъэкІагъэба? 29 Сыд пае шъуІупс къафечъэра Сэщ пае ашІырэ къурмэнхэмрэ гъомылэ тынхэмрэ? Сыда зытехъухьэрэр Сэщ нахь лъэшэу УикІалэхэр бгъэлъэпІэнхэр? Израил цІыфхэм сэ къысфагъэшъошэрэ шІухьафтын Анахь дэгъухэр къызыфыхэпхыжьзэ, уишІугъо ухъуныр?"» 30 Ащ пае Израилым и-Зиусхьанэу Тхьэм Джы ыІорэр мары: «А лъэхъаным унашъо къышъуфэсшІыгъагъ: „О уиуни уятэ иуни егъашІэм Сапашъхьэ шъуимыкІэу шъукъысфэлэжьэнэу"». Ау Зиусхьаным джы къыІорэр мары: «Ар хъужьыхэщтэп, сыда пІомэ Сэ зищытхъу сІотэщтыр Сищытхъу зыІуатэхэрэр ары, Ау мыхъун Іаягъэхэр къыспызыІухьэхэрэр ЦІыфхэм япхъэтэпэмыхьэу хъущтых. 31 Мары лъэхъан къэсыщт Ори укъызхэкІыгъэ уяти шъуилъэкІ сыкъыхэІанэу. Уиунагъо щыщ горэми игъашІэ жъыгъом нэсыщтэп. 32 Израилым итхьамыкІагъо къэплъэгъужьыщт, Зиусхьаным ынэшІу Израилым къызэрэщыфэзи, О уиунагъо ис горэми ИгъашІэ жъыгъом нэсыщтэп. 33 Сиунэ лъапІэ къурмэнышІэу чІэтынэу, Зы нэбгырэ закъу ныІэп къэзгъэнэщтыр, ЫнапІэхэр къэонтэгъунхэм, Ыпсэ хэІэжьыным пае. Ау уиунэ къихъорэ пстэури Гурыт ныбжьым итэу лІэщт. 34 УикІэлитІоу ХъофныйкІи ПинхъаскІи ГъэунэфыпІэ сэ къыпфэсшІыщт: А зы мафэм ахэр зэдэлІэщтых, КъыосІуагъэм ишъыпкъапІэ бгъэунэфыщт. 35 Къысфэшъыпкъэщт къурмэнышІыр сэ къахэсхыщт, Сыгу илъым къытыригъафэу, Сыгу илъыр къышІэу ар зекІощт. Иунагъо щыщхэр егъашІэм къурмэнышІыщтых, Тхьэихэхым ыпашъхьэ ар итэу ЕгъашІэм Ащ фэлэжьэщт. 36 Уиунагъо щыщэу псэоу къэнагъэм пэпчъ А къурмэнышІым ыдэжь къакІозэ шъхьащэ фишІыщт, Тыжьын ахъщэ тІэкІурэ хьалыгъу такъыррэ Къыритынхэу ащ елъэІущт. „КъурмэнышІым ыгъэцэкІэн ылъэкІыщт ІофшІэн горэм сыфэгъаз, Сшхын тІэкІу горэ къырызгъэхъэн слъэкІынэу", – ащ риІощт».
Тхьэм Самуел къызэрахихыгъэр
1 КІэлакІэу Самуел Алый унашъохэр къыфишІзэ, Зиусхьаным фэлажьэщтыгъ. А лъэхъаным Зиусхьаным ипсалъэ цІыфхэм бэрэ зэхаригъэхщтыгъэп, къаригъэхъулІэщтхэри бэрэ къаригъэлъэгъущтыгъэхэп. 2 Алый ынэхэм лъэшэу къащыкІагъэу, хъатэуи ымылъэгъужьэу чэщ горэм игъолъыпІэ хэлъыгъ. 3 ТхьэлъэІупІэм ыпашъхьэ щытыгъэ остыгъэр джыри мыкІосагъэу Зиусхьаным иунэу, Тхьэм иунэшъуипшІ зытетхэгъэ мыжъобгъуитІур зыдэлъ пхъонтэ лъапІэр зычІэтым Самуел илъыгъ. 4 Зиусхьаныр Самуел къеджагъ: «Самуел, Самуел!» Арти мыдрэм къыІуагъ: «Мары сыщыт!» 5 Самуел Алый ыдэжь чъи риІуагъ: «Укъысэджагъэшъ, мары сыкъыпкІэлъырыт». Ау адрэм къыриІожьыгъ: «Сыоджагъэп. КІожьи, гъолъыжь». Ар кІожьи гъолъыжьыгъэ. 6 Ау Зиусхьаныр джыри Самуел къеджагъ. ИкІэрыкІэу Самуел Алый ыдэжь къакІуи, къыриІуагъ: «Мары сыщыт. Укъысэджагъэба». Арти адрэм къыриІуагъ: «Сыоджагъэп, сикІал. Гъэзэжьи гъолъыжь». 7 Зиусхьаным ымакъэ Самуел зэхихыгъэу, Ащ ипсалъэ къыфызэІуихыгъэу щытыгъэп. 8 Ящэнэрэу Зиусхьаныр Самуел къеджагъ. ИкІэрыкІэу ар Алый дэжь кІуи риІуагъ: «Мары сыщыт! Укъысэджагъэба». Ащ дэжьым Алый къыгурыІуагъ Зиусхьаныр кІалэм къызэреджэрэр. 9 Арти Алый Самуел риІуагъ: «КІожьи гъолъыжь. Ар къызыуаджэкІэ, еІу: „КъаІо, Зиусхьан, уиІумэт укъызэхехы"». Самуел кІожьи ичІыпІэ гъолъыжьыгъэ. 10 Арти Зиусхьаныр къакІуи къэуцугъ, ыпэрэмэ афэдэу къеджагъ: «Самуел! Самуел!» Самуел къыІуагъ: «КъаІо, уиІумэт укъызэхехы». 11 Зиусхьаным Самуел къыриІуагъ: «Зы Іофыгъо Израилым щызгъэцэкІэщтышъ, икъэбар зэхэзыхырэм зэригъэшІагъорэм нахь хэмылъэу ытхьакІумэнэІусхэр къыІуигъэощтых. 12 Алый иунагъо есІолІагъэр зэкІэ а мафэм згъэцэкІэжьыщт, дэсыублэнышъ, а Іофыр ыкІэм нэзгъэсыжьыщт. 13 Тхьэм къемыкІунэу икІалэмэ зызэрагъэпсырэм щыгъуазэ пэтзэ, ахэр ыІэжэнхэ зэримылъэкІыгъэм пае егъашІэм зыхэмыкІыжьын бэлахьэ иунагъо къызэрэфезгъэхыщтыр ащ есІогъагъ. 14 Джащ къыхэкІэу иунагъо телъ лажьэр къурмэнхэмкІи нэмыкІ шІухьафтынхэмкІи егъашІэм зэримыпщыныжьышъущтымкІэ гущыІэ пытэ сэшІы». 15 Самуел пчэдыжьым нэс чъыягъэу Зиусхьаным иунапчъэхэр къыІуихыгъэх, ылъэгъугъэм икъэбар Алый фиІотэным тещыныхьэщтыгъ. 16 Ау Алый Самуел къеджи къыриІуагъ: «СикІалэу Самуел!» Адрэм риІожьыгъ: «Мары сыщыт!» 17 Алый къеупчІыгъ: «Сыда къыуаІуагъэр? СшІомыушъэф. КъыуаІуагъэм щыщ зысшІоуушъэфкІэ, уифэшъуашэр Тхьэм уигъэгъотыщт, нахьыбэжьи къыуишІэщт». 18 Самуел зыпари шІуимыушъэфэу зэкІэри къыфиІотэжьыгъ. Арти Алый къыІуагъ: «Ар – Зиусхьан, зэрэшІоигъоу зэкІэ ышІэн ылъэкІыщт».
Самуел тхьэлІыкІоныр пшъэрылъ зэрэфэхъугъэр
19 Самуел хэхъуагъ. Зиусхьани ащ игъусагъ. Ащ къыриІогъэ гущыІэмэ ащыщэу зы закъо гори мыгъэцэкІэжьыгъэу къэнагъэп. 20 ТхьэлІыкІонэу, Зиусхьаным къыбгъодэкІырэ псалъэхэр къышІынхэу Самуел пшъэрылъ къызэрэфехыгъэр зэрэ-Израилэу, Дан къалэм къыщегъэжьагъэу БэрщэбаІ къалэм нэсыжьэу къэбарыр щызэлъашІагъ. 21 Щылэу дэс Самуел Зиусхьаным ипсалъэ къыфыригъэхи, зыкъызырегъашІэм ыуж зэпымыоу ипсалъэкІэ Самуел Щылэу къыщылъыІэсыщтыгъ.
1 Самуел зэрэ-Израилэу псалъэкІэ зыфигъэзагъ. Израил цІыфхэр фылистхэм заокІэ апэгъокІыгъэх, АбэнхъаІэзэр пэблагъэу ахэр агъэуцугъэх, фылистхэр Афэкъ дэжь къыщыуцугъэх.
Тхьэм ипхъонтэ лъапІэ зэратырахыгъэр
2 Фылистхэр израил цІыфхэм къязэонхэу къэуцухи, заор къарашІылІагъ. Фылистхэр израил цІыфхэм къатекІуагъэх, ахэм ащыщэу нэбгырэ миниплІ фэдиз а чІыпІэм къыщаукІыгъ. 3 Псэоу къэнэжьыгъэхэм уцупІэм къызагъэзэжьым, Израилым инахьыжъ упчІэжьэгъухэм къаІуагъ: «Сыда Зиусхьаным фылистхэр къызкІыттыригъэкІуагъэхэр? Зиусхьаным ипхъонтэ лъапІэу Щылэу щыІэр мыщ къызытщэкІэ, Зиусхьаныр тигъусэ хъунышъ, заом тызыкІокІэ, типыйхэм ащ тащиухъумэщт». 4 Арти Щылэу агъакІохи Зиусхьанэу ошъогу дзэхэр зиІэрылъхьэм ипхъонтэ лъапІэу Ар къэрыубхэм атесэу зытешІыхьагъэр къахьыгъ. Алый ыкъуитІоу Хъофныйрэ Пинхъасрэ Тхьэм ипхъонтэ лъапІэ къыдэкІуагъэх. 5 Зиусхьаным ипхъонтэ лъапІэ уцупІэм къызагъэсым израил цІыфхэм куо мэкъэшхоу къаІатыгъэм чІыгур къыгъэгырзыгъ. 6 Фылистхэм а гушІогъо куо мэкъэшхохэр зэхахыгъэти, зэупчІыжьыгъэх: «Сыд фэдэ куо мэкъэшхоха джуртмэ яуцупІэ зыдэщыІэ лъэныкъомкІэ къыщыІухэрэр?» Зиусхьаным ипхъонтэ лъапІэ уцупІэм къызэрэнагъэсыгъэр ахэм къашІагъ. 7 Арти фылистхэм къэщтагъэхэу зэраІожьыгъ: «Ахэм яуцупІэ Тхьэр къэсыгъ. ТхьамыкІэгъошхор къытфэкІуагъ, сыда пІомэ тыгъуаси тыгъоснахьыпи ащ фэдэ хъугъэп. 8 ТхьамыкІэгъошху къытфэкІуагъэр. А Тхьэ кІочІэшхомэ хэт тащызыухъумэщтыр? А Тхьэ дэдэхэр ары мысырхэр шъофнэкІым тхьамыкІагъомэ ащыхэзыдзагъэхэр. 9 Фылистхэр, лІыгъэ къызыхэжъугъаф, зыжъугъэпыт. Ежьхэр гъэры зэрэтшІыгъэхэм фэдэу, джуртмэ гъэры тэ тамышІыжьыным пае, шъуязау. ЛІыгъэ къызхэжъугъаф, ахэм шъуязау». 10 Ащ лъыпытэу фылистхэр къязэуагъэх, израил цІыфхэм ахэр къатекІуагъэх, израил цІыфхэм къыкІаІажьи, чэтэнгъэІагъэмэ ачІэлъэдэжьыгъэх. Хьалэч къырагъэфагъэх, израил лъэсыдзэм щыщэу нэбгырэ мин щэкІ хэкІодагъ. 11 Тхьэм ипхъонтэ лъапІэ фылистхэм зыІэкІагъэхьагъ. Алый ыкъуитІоу Хъофныйрэ Пинхъасрэ къаукІыгъэх.
Алый дунаир зэрихъожьыгъэр
12 Бынямин цІыф горэм зэуапІэр къыбгыни къыкІиІэжьыгъ. А мэфэ дэдэм Щылэу ащ къыгъэзэжьыгъ. Къэбар гухэкІышхо зэриІэм ишыхьатэу ищыгъынхэр зэІытхъыгъагъэх, ышъхьэ ятІэр къыхэтэкъущтыгъ. 13 Ар къызэсым, Алый Тхьэм ипхъонтэ лъапІэ икъэбар ымышІэу зэгоутыщтыгъэти, гъогум пэмычыжьэу къэлапчъэм дэжь щыт тетІысхьапІэм тесэу гъогум рыплъэщтыгъ. Бынямин цІыфыр къэси къэбарыр къызафеІуатэм, къалэм дэс цІыфхэм хьадэгъэшхо къаІатыгъ. 14 Алый гъог макъэхэр зызэхехым къяупчІыгъ: «Сыд фэдэ куо-хьау макъэха къэІухэрэр?» Къэбарыр къафэзыхьыгъэр Алый къекІуалІи къэхъугъэм щигъэгъозагъ. 15 Алый ащ дэжьым илъэс тІокІиплІрэ пшІырэ ыныбжьыгъ, ынэхэр икІосыкІыгъагъэх, зыпари ылъэгъужьыхэщтыгъэп. 16 А цІыфым Алый къыриІуагъ: «Сэ дзэм изэуапІэ къэсыбгынэгъэ къодый, непэ зэуапІэм сшъхьэ къыІусхыжьыгъ». Алый къеупчІыгъ: «Сыда къэхъугъэр, сикІал?» 17 Арти къэбарыхьэм къыриІожьыгъ: «Израил цІыфхэр фылистхэм къафыгъэх. Заом дзэкІолІыбэ хэкІодагъ, хьалэчыр къахагъэхьагъ. О уикІэлитІуи, Хъофныйрэ Пинхъасрэ, хэкІодагъэх, Тхьэм ипхъонтэ лъапІи аштагъ». 18 Тхьэм ипхъонтэ лъапІэ игугъу къызешІым, тетІысхьапІэм къефэхи, Алый кІыбкІэ къызэхэфагъ, жъы дэдэ зэрэхъугъэмрэ зэрэонтэгъугъэмрэ къахэкІэу ытхыкъупшъхьэ зэриути лІагъэ. Ар илъэс 40 -рэ Израилым ихьыкумышІщтыгъ.
Пинхъас ишъхьагъусэ зэрэлІагъэр
19 Алый инысэу, Пинхъас ишъхьагъусэ лъэрмыхьагъ, сабый къыфэхъункІэ макІэ къыфэнэжьыгъагъэр. Тхьэм ипхъонтэ лъапІэ зэратырахыгъэм, ипщырэ ишъхьагъусэрэ зэрэщымыІэжьхэм якъэбар зызэхехым бзылъфыгъэр етІысэхыгъ, хъушъэныр къэси сабый къыфэхъугъ. 20 Ащ лІэныгъэр къызештэм, къыкІэрытыгъэ бзылъфыгъэхэм раІуагъ: «УмыгумэкІ, о шъао къыпфэхъугъ». Ау адрэм зыпари къариІожьыгъэп, хъатэуи къапылъыжьыгъэп. 21 Тхьэм ипхъонтэ лъапІэ затырахым, ипщырэ ишъхьагъусэрэ зэлІэхэм ауж сабыим Ихабод цІэу фиуси ыІуагъ: «Щытхъум Израилыр къыбгынагъ». 22 Ащ къыІуагъ: «Щытхъум Израилыр къыбгынагъ, сыда пІомэ Тхьэм ипхъонтэ лъапІэ атырахыгъ».
Тхьэм ипхъонтэ лъапІэ фылистхэм бэлахь къызэрафихьыгъэр
1 Фылистхэм Тхьэм ипхъонтэ лъапІэ АбэнхъаІэзэр къыращи къалэу Ащдэд къащагъ. 2 Фылистхэм Тхьэм ипхъонтэ лъапІэ тхьэу Дагон ыцІэкІэ агъэуцугъэ унэм рахьи Дагон исынэ кІэрагъэуцуагъ. 3 Ащдэд дэсхэр пчэдыжьым жьэу къызэтэджыжьхэм Зиусхьаным ипхъонтэ лъапІэ ыпашъхьэ Дагон ынэІу егъэзыхыгъэу чІыгум телъ. Арти Дагон къаІатыжьи зыдэщытыгъэ чІыпІэм агъэуцужьыгъ. 4 КъыкІэлъыкІорэ мафэм пчэдыжьым жьэу къызэтэджыжьхэм Зиусхьаным ипхъонтэ лъапІэ ыпашъхьэ Дагон ынэІу егъэзыхыгъэу чІыгум телъ; Дагон ышъхьи ыІитІуи гоупкІыгъэхэу пчъэшъхьаІум телъыгъэх. Дагон ыпкъ закъо къэнагъ. 5 Джащ пае Дагон фэлэжьэрэ къурмэнышІхэри Дагон иунэу Ащдэд дэтым ихьэрэ пстэури а мафэм къыщегъэжьагъэу джы къызнэсыгъэми ащ ипчъэшъхьаІу зэрэнэмысынхэм фэсакъхэзэ темыуцохэу елъэбакъох. 6 Зиусхьаным ынае Ащдэд дэсхэм къащыфагъ, бэ тхьамыкІагъоу ахэм къафыригъэхыгъэр, яфэшъуашэм ипэгъокІэу Ащдэд щыщхэми ащ иІэгъо-блэгъухэм ащыпсэухэрэми апкъышъолхэм къахигъэбэгыкІыгъэх. 7 Ащдэд дэсхэу хъугъэр зылъэгъугъэхэм аІуагъ: «Израилым и-Тхьэ ипхъонтэ лъапІэ тадэжь къанэ хъущтэп, сыда пІомэ тэри титхьэу Дагони Зиусхьаным ынае къытщыфагъ». 8 Фылист иІэшъхьэтетхэм зэкІэми макъэ арагъэІуи, къызэІуагъакІэхи яупчІыгъэх: «Сыда Израилым и-Тхьэ ипхъонтэ лъапІэ етпэсыщтыр?» Арти Гъат дэсхэм къаІуагъ: «Израилым и-Тхьэ ипхъонтэ лъапІэ Гъат къарэщэжь». Израилым и-Тхьэ ипхъонтэ лъапІэ Гъат къарагъэщэжьыгъ. 9 Ар зарагъэщэжьым ыуж Зиусхьаным ынае къалэм къыщыфагъ, дэсхэр гукІодыгъошхо хэфагъэх, ахэм зэкІэми, кІэлэцІыкІумэ къащегъэжьагъэу инмэ анэсыжьэу, апкъышъолхэм къахигъэбэгыкІыгъэх. 10 ЕтІанэ Тхьэм ипхъонтэ лъапІэ Ашкъэлэн арагъэщагъ. Ашкъэлэн зынагъэсым Ашкъэлэн дэсхэм куо-хьау къаІатыгъ: «Тэри тлъэпкъи зэрэщытэу тагъэкІодыным пае Израилым и-Тхьэ ипхъонтэ лъапІэ къытфахьыгъ». 11 Арти макъэ арагъэІуи фылист Іэшъхьэтетхэр зэкІэ къызэфащэсхи араІуагъ: «Израилым и-Тхьэ ипхъонтэ лъапІэ къыздырахыгъэ чІыпІэм арэхьыжь, тэри тлъэпкъи темыкІодылІэнхэм пае». Сыдэу щытми зэрэкъалэу щынэгъошхом зэлъиштагъ, Тхьэми ынае ащ дэсхэм къащыфагъ. 12 Яфэшъуашэм ипэгъокІэу апкъышъолхэм къахигъэбэгыкІыгъэх, гуІэным хэт къэлэдэсхэм ягъог макъэ ошъогум нэс зиІэтщтыгъэ.
Фылистхэм Израилым и-Тхьэ ипхъонтэ лъапІэ ичІыпІэ зэрахьыжьыгъэр
1 Зиусхьаным ипхъонтэ лъапІэ мэзиблэ фылист хэкум щыІагъ. 2 Фылист цІыфхэм якъурмэнышІхэмрэ усэрэжъхэмрэ къызэІуагъакІэхи яупчІыгъэх: «Зиусхьаным ипхъонтэ лъапІэ сыда етпэсыщтыр? Ар ичІыпІэ зэрэнэдгъэсыжьыщт шІыкІэм тыщыжъугъэгъуаз». 3 Адрэхэм къаІуагъ: «Израилым и-Тхьэ ипхъонтэ лъапІэ къыздырахыгъагъэ чІыпІэм яжъугъэхьыжьыщтмэ, зыгорэ ешъумыпэсэу яшъумыгъэхьыжь, псэкІодэу шъушІагъэм пае псэкІодышІыкІэгъожь къурмэн зышъушІыкІэ, шъухъужьынышъ, Тхьэм ынае къызкІышъущыфагъэри къыжъугурыІожьыщт». 4 Арти цІыфхэр къэупчІагъэх: «ПсэкІодышІыкІэгъожь къурмэнэу сыда тшІыщтыр?» Адрэмэ къараІожьыгъ: «Фылист Іэшъхьэтетхэр нэбгырэ пчъагъэу зэрэхъурэм телъытагъэу пкъышъолхэм къахигъэбэгыкІыгъэхэм ятеплъэ зиІэ дышъитфырэ дышъэ цыгъуитфырэ яжъугъэшІ. ШъуиІэшъхьэтетхэми шъори зэкІэми зэфэдэу пщыныжь къышъуфехыгъэшъ ары. 5 Арышъ, шъупкъышъолмэ къахигъэбэгыкІыгъэхэмрэ шъуигубгъохэр зэхэзышхыхьэгъэ цыгъохэмрэ ятеплъэ яІэу шъушІи, Израилым и-Тхьэ рыжъугъэлъапІэу фэжъугъэшъуашэх. Ащ шъуихьазаб нахь псынкІэ къышъуфишІынышъ, шъуитхьэхэми шъуичІыгуи ынэшІу къащыфэнкІи мэхъу. 6 Сыд пае мысыр цІыфхэмрэ фирхьаунхэмрэ афэдэу шъугухэмкІэ зыжъугъэжъалымра? Зиусхьаным ыкІуачІэ зынэсырэр къызарегъашІэм, къамытІупщыжьыщтыгъэхэр шъхьафит къашІыжьхи, ахэм яхэгъэгу къагъэзэжьыгъ. 7 Арышъ, зы кукІэ къэжъугъэпс, бжьыр зыпшъэ нэмысыгъэ чэм щыпэлъфитІу кум кІашъушІ, шкІэу акІэсхэр къакІэшъущхи, ядэжь шъущэжьых. 8 Зиусхьаным ипхъонтэ лъапІэ кум ижъугъэуцуи, шъуихьакъкІэ Зиусхьаным къурмэн фэшъушІыщт дышъэ пкъыгъохэр нэмыкІ пхъуантэ дашъулъхьэхи, ыбгъукІэ къыгожъугъэуцуи, кур шъутІупщи, зыфаем орэкІо. 9 Шъулъыплъ, пхъуантэр къыздыращыгъэ чІыпІэм, Бэтщэмэщ ылъэныкъокІэ кум занкІэу зигъазэкІэ, ащыгъум Тхьэр ары мы тхьамыкІэгъошхор къытфезыгъэхыгъэр. Ащ фэдэу зымыхъукІэ Тхьэм ар къызэрэтфимыхьыгъэр, ошІэ-дэмышІэу къызэрэтэхъулІагъэр къытфэнэфэщт». 10 Фылистмэ джащ фэдэу ашІыгъ: чэм щыпэлъфитІу къаубыти кум кІашІагъэх, шкІэу акІэсыгъэхэр къакъырэм къычІанагъэх. 11 Зиусхьаным ипхъонтэ лъапІи дышъэ цыгъохэмрэ апкъышъолхэм къахигъэбэгыкІыгъэхэм ятеплъэ зиІэхэмрэ зыдалъхьэгъэ пхъуантэри кум рагъэуцуагъэх. 12 Чэмхэм Бэтщэмэщ кІорэ гъогум фаузэнкІыгъ; а гъогум тетхэу кІощтыгъэх, кІохэзэ быущтыгъэх, ау джабгъумкІи сэмэгумкІи дэхыщтыгъэхэп; фылист Іэшъхьэтетхэр ахэм ауж итхэу кІохэзэ, Бэтщэмэщ иІэгъо-блэгъухэм анэсыгъэх. 13 Бэтщэмэщ щыщ цІыфхэм а уахътэм коцыр лъэгум щахыщтыгъ, плъэхи Зиусхьаным ипхъонтэ лъапІэ къызалъэгъум, гушІуагъэх. 14 Кур къакІозэ, Бэтщэмэщ щыщ Ехъошыуа ичІыгу Іахьэ къэси, ащ хэлъ мыжъошхом дэжь къыщыуцугъ. Кур гъэстыныпхъэу зэхакъутагъ, чэмэу ащ кІэшІэгъагъэхэр Зиусхьаным къурмэнгъэст фашІыгъэх. 15 Зиусхьаным ипхъонтэ лъапІи дышъэм хэшІыкІыгъэ пкъыгъохэр зыдэлъыгъэри лэуйхэм къаІатхи джа мыжъошхом тырагъэуцуагъэх. А мафэм Бэтщэмэщ дэсхэм Зиусхьаным ыцІэкІэ къурмэнгъэстхэри нэмыкІ къурмэнхэри ашІыгъэх. 16 Фылист Іэшъхьэтетитфым а зэпстэур алъэгъуи, а мэфэ дэдэм Іэкърэн къагъэзэжьыгъ. 17 Апкъышъолхэм къахигъэбэгыкІыгъэхэм ятеплъэ зиІэ дышъитфыр псэкІодышІыкІэгъожь къурмэнэу фылистхэм Зиусхьаным фашІыжьыгъэх: зыр Ащдэд, зыр Іаззэ, зыр Ашкъэлэн, зыр Гъат, зыр Іэкърэн пае; 18 джащ фэдэу дышъэм хэшІыкІыгъэ цыгъохэри пытапІэхэр зиІэ фылист къалэхэмрэ къэмышІыхьэгъэ къуаджэхэмрэ зыІэ илъыгъэ Іэшъхьэтетитфым ателъытэгъагъ. Бэтщэмэщ дэсхэм Зиусхьаным ипхъонтэ лъапІэ зытырагъэуцогъэгъэ мыжъошхор непэ къызнэсыгъэми Бэтщэмэщ щыщ Ехъошыуа ичІыгу Іахьэ зэрэхэлъ.
Тхьэм ипхъонтэ лъапІэ Къыриат-ЕІэрим зэрагъэкощыжьыгъэр
19 Зиусхьаным ипхъонтэ лъапІэ зэрэдэплъагъэхэм пае Бэтщэмэщ дэсхэм Зиусхьаным ынае къащыфагъэти, нэбгырэ мин 50 -м щыщэу нэбгырэ 70 ыукІыгъ. Зиусхьаным бэлахьышхо къызэрафыригъэхыгъэм пае Бэтщэмэщ дэс цІыфхэм хьадэгъэшхо къаІэтыгъ. 20 Бэтщэмэщ дэс цІыфхэр къэупчІагъэх: «Хэта Зиусхьаным, Тхьэу лъапІэу лъагэм, ыпашъхьэ иуцон зылъэкІыщтыр? Тэ зыхядгъэщыжьмэ, хэт дэжь Ар ядгъэхьыщта?» 21 Арти къэбарыр алъагъэІасынэу Къыриат-ЕІэрим дэсхэм адэжь лІыкІохэр агъэкІуагъэх: «Зиусхьаным ипхъонтэ лъапІэ фылист цІыфхэм къарагъэхьыжьыгъэшъы, шъукъакІуи, ар шъуадэжь шъухьыжь».
1 Къыриат-ЕІэрим дэсхэр къакІохи Зиусхьаным ипхъонтэ лъапІэ къашти, Абинэдау иунэу Іуашъхьэм тетым къахьыгъ, ащ ыкъо ЕлыІазер зырагъэукъэбзи Зиусхьаным ипхъонтэ лъапІэ ынаІэ тыригъэтынэу пшъэрылъ фашІыгъ. 2 Пхъонтэ лъапІэр Къыриат-ЕІэрим къызагъэкощыжьым ыуж охътабэ тешІагъ, илъэс 20 фэдиз горэ блэкІыгъ. Израилым ицІыфхэм Зиусхьаным зыфагъэзэжьыгъ.
Самуел Израилым ихьыкумышІ зэрэхъугъэр
3 ЕтІанэ Самуел израил цІыф пстэумэ ариІуагъ: «Хэмэ тхьэхэри Астарти къэшъубгынэхи, шъугухэмкІэ Зиусхьаным зыфэжъугъаз, а зы закъом шъуфэлажь, джары фылистхэм шъуащызыухъумэщтыр». 4 Арти израил цІыфхэм БэІалрэ Астартрэ щагъэзыехи, Зиусхьан закъом зыфагъэзэжьыгъ. 5 Ащ ыуж Самуел макъэ ыгъэІугъ: «Израил цІыфхэр зэкІэ Мыцпэ къыщызэІужъугъакІэхи, шъощ пае зэкІэми Зиусхьаным селъэІущт». 6 Арти Мыцпэ къыщызэІукІагъэх. КъызэІукІагъэхэм псыр къахьи, апсэ Зиусхьаным зэрэфагъазэрэм ищысэу чІыгум щыракІутыгъ, а мафэми анэкІыгъ. ЕтІанэ аІуагъ: «Зиусхьаным ыпашъхьэ псэкІод щытшІагъ». Іэшъхьэтетэу Самуел Мыцпэ къыщызэІукІэгъэ израил цІыфхэр хьыкум ышІыгъэх. 7 Израил цІыфхэр Мыцпэ къызэрэщызэІукІагъэхэм икъэбар фылистхэм зызэхахым, фылист Іэшъхьэтетхэр Израилым къытебэнэнхэу къежьагъэх. Израил цІыфхэм ар зызэхахым фылистхэм ащыщтагъэх. 8 Арти ахэм Самуел раІуагъ: «Фылистхэм тащиухъумэнэу ти-Зиусхьанэу Тхьэм тэщ пае зэпымыоу тфелъэІу». 9 Самуел быдзыщэм джыри ешъорэ шъынэр Зиусхьаным пае къурмэнгъэст ышІи, Израилым пае Зиусхьаным зелъэІум, Зиусхьаным ар къызэхихыгъ. 10 Самуел къурмэнгъэстыр ышІызэ фылистхэр Израилым къезэонхэу къэсыгъэх. Зиусхьаным а мафэм мэкъэшхохэр къыгъэІузэ, фылистхэр лъэшэу къыгъэщтагъэхэти, шъхьэджэ-псаджэу ахэм Израилыр къабгынагъ. 11 Израил цІыфхэм зэоныр Мыцпэ щырагъажьи фылистхэм язаохэзэ, ахэр къызэкІафэхи, Бэткъар чІыпІэм нэс къафхи, щызэхакъутагъэх. 12 ЕтІанэ Самуел зы мыжъо горэ къышти Мыцпэрэ Ешанрэ азыфагу щигъэтІылъыгъ, «Мы чІыпІэм нэс Зиусхьаныр къыддэІэпыІагъ» ыІозэ, АбэнхъаІэзэркІэ ащ еджагъ. 13 Джащ тетэу фылистхэр агъэІэсагъэх, ащ нахьыбэрэ ахэр Израилым ичІыгу къихьажьыгъэхэп, Самуел щэІэфэ фылистхэр Зиусхьаным иунашъо пэшІуекІошъугъэхэп. 14 Фылистхэм Іэкърэн къыщегъэжьагъэу Гъат нэс щаштэгъэгъэ къалэхэр Израилым къызІэкІигъэхьажьхи, ахэм ягъунапкъэхэри фылистхэм къаІэкІихыжьыгъэх. Ащ ыуж Израилрэ амэрхэмрэ мамырныгъэ зэдыряІагъ.
Самуел Израилым ихьыкумышІ
15 Самуел щэІэфэ Израилым ихьыкумышІщтыгъ. 16 Илъэс зэкІэлъыкІохэм къакІоцІ къалэхэу Бэтэл, Гъылгъал, Мыцпэ ащ къызэпикІухьэхэзэ, а чІыпІэ пстэуми израил цІыфхэм ящыхьыкумышІщтыгъ. 17 ЕтІанэ Рамэ къыгъэзэжьыщтыгъ, сыда пІомэ иунэ ащ дэтыгъ. Мыщи израил цІыфхэм ящыхьыкумышІщтыгъ. А къалэми Зиусхьаным ыцІэкІэ къурмэншІыпІэ ащ щишІыгъ.
Пачъыхьэр къафытырагъэхьаным цІыфхэр зэрэфэягъэхэр
1 Самуел жъы зэхъум икІалэхэр Израилым хьыкум щашІынэу тыригъэхьагъэх. 2 ИкІэлэ нахьыжъ ыцІагъэр Иоел, ятІонэрэ кІалэм ыцІагъэр Абие; ахэр БэрщэбаІ ихьыкумышІщтыгъэх. 3 Ары шъхьае кІалэхэр тым игъогу рыкІощтыгъэхэп, мылъкум зыдырагъэхьыхыгъэу, къуалъхьэхэр къаІахыщтыгъэх, шъыпкъэм тетэу хьыкум ашІщтыгъэп. 4 Арти Израилым инахьыжъ упчІэжьэгъухэр зэкІэ къэзэрэугъойхи Самуел дэжь, Рамэ, къакІохи 5 къыраІуагъ: «Мары жъы ухъугъ, ау уикІалэхэр уигъогу тетхэп; адрэ лъэпкъхэм афэдэу, типэщэнэу пачъыхьэ къытфытегъахь». 6 «Типэщэнэу пачъыхьэ къытфытегъахь» къызэрэраІуагъэр ыгу рихьыгъэпти, Самуел Зиусхьаным елъэІугъ. 7 Зиусхьаным Самуел къыриІуагъ: «ЦІыфмэ къыуаІорэ пстэуми едэІу, сыда пІомэ щагъэзыерэр сэры нахь орэп, сыряпачъыхьэным ахэр фаехэп; 8 Мысырым къызщисщыжьыгъэхэ мафэм къыщегъэжьагъэу непэ къызнэсыгъэми джары ахэр зэрэзекІохэрэр, сэ сыкъабгынэти нэмыкІ тхьэхэм ялъэІущтыгъэх, ори джащ фэдэу къыбдэзекІох. 9 Арышъ, ахэм къаІорэм едэІу, ау пачъыхьэ яІэ зыхъукІэ, яІэшъхьэтет фитныгъэу иІэщтхэр зыфэдэхэри агурыгъаІу». 10 Арти, Самуел пачъыхьэ афытыригъэхьанэу къелъэІурэ цІыфхэм Зиусхьаным игущыІэхэр зэкІэ ариІожьи, 11 къыІуагъ: «Пащэу шъуиІэщт пачъыхьэм ифитныгъэхэр мыщ фэдэщтых: шъуикІалэхэр ыштэнхэшъ, зэоным фытегъэпсыхьэгъэ кухэм алъыплъэнхэу ыгъэнэфэщтых, адрэхэр ишыухэм ахигъэхьащтых, нэмыкІхэри ику зэкІэшІагъэмэ апэ итхэу чъэщтых; 12 зыгорэхэр нэбгырэ мин, нэбгырэ шъэныкъо хъурэ дзэ купхэм яІэшъхьэтетыщтых; адрэхэм игубгъохэр алэжьыщтых, илэжьыгъэхэр Іуахыжьыщтых, Іэшэ-шъуашэхэмрэ зэоным фытегъэпсыхьэгъэ кухэм ящыкІэгъэщтхэмрэ ашІыщтых, 13 шъупхъухэри ащ ыштэщтых мэ ІэшІухэр зыпихырэ щыфэн зэхэлъхэр агъэхьазырынхэм, пщэрыхьанхэм, хьалыгъу агъэжъэным пае; 14 шъуилэжьыгъэшІэпІэ, шъуисэнэшъхьэлэжьыпІэ, зэйтыншІэпІэ анахь дэгъухэри ащ ыштэнхэшъ, иунэІутхэм аритыщтых; 15 лэжьыгъэу хэшъулъхьагъэмрэ сэнашъхьэу шъулэжьырэмрэ азыпшІани пичынышъ, ичырэхэмрэ иунэІутхэмрэ аритыщтых; 16 шъуипщылІ хъулъфыгъэхэри, бзылъфыгъэхэри, шъуичэм нахь лъэпкъышІухэри шъуищыдхэри шъуІихынхэшъ, ежь ышъхьэ иІофхэм апае къызфигъэфедэщтых; 17 шъуимэл-пчэнхэм азыпшІани ыштэщт, шъори ащ шъуриунэІутыщт; 18 етІанэ шъор-шъорэу къыхэшъухыгъэ пачъыхьэм шъукъыгъэтхьаусыхэу Зиусхьаным шъузелъэІукІэ, зыпари къышъуфишІэжьыщтэп». 19 Самуел ариІуагъэм цІыфхэр къедэІунхэу фэягъэхэп: «Хьау, – аІуагъ, – пачъыхьэм тыфай, 20 адрэ лъэпкъхэм тэри тафэдэщт: типачъыхьэ типэщэщт, тапашъхьэ итыщт, заоу ятшІылІэщтхэмкІи пащэу тиІэщт». 21 Самуел цІыфмэ къаІорэ пстэуми едэІуи, зэхихыгъэр Зиусхьаным фиІотэжьыгъ. 22 Зиусхьаным Самуел къыриІуагъ: «Зэрэфаехэу пачъыхьэр афытегъахь». Ащ ыуж Самуел израил цІыфхэм ариІуагъ: «Джы шъхьадж икъалэ орэкІожь».
Тхьэм Саул пачъыхьэнэу къызэрэхихыгъэр
1 Бынямин лъэпкъым щыщэу лІы бэлахьэ горэ Къыщ ыцІэу щыІагъ. Ар бынямин горэм къыхэкІыгъэ Афые икІалэу Бэхъорат къаригъэлъфыгъэ Цырэур ыкъо Абиел икІалэу щытыгъ. 2 Саул ыцІэу ащ кІалэ иІагъ, ныбжьыкІэу, дахэу: Саул фэдэу дахэу Израилым щыщхэм зы нэбгыри ахэтыгъэп, илъэгагъэкІэ зэрэлъэпкъэу ар къахэщыщтыгъэ. 3 Зэгорэм Саул ятэу Къыщ ищыдыбзхэр шІокІодыгъэхэти, Къыщ Саул риІуагъ: «Тэджи, унэІутхэм ащыщ горэ гъусэ шІи, щыдыбзхэм шъукъалъыхъунэу шъукІу». 4 Джащ тетэу ащ Ефраим къушъхьэр зэпичыгъ, чІыпІэу Щалищ къызэпикІухьагъ, ау зылъежьагъэхэр къагъотыгъэхэп. Ащ ыуж чІыпІэу ЩэІалим къызэпакІухьагъэти, ащи къыщагъотыгъэхэп. ЕтІанэ Бынямин хэкур къызэпакІухьагъ шъхьае, мыщи рагъотагъэхэп. 5 Джаузэ Цыуф чІыпІэм зынэсхэм, унэІутэу игъусагъэм Саул риІуагъ: «Тэгъэгъэзэжь, армырмэ тятэ щыдыбзхэри щыгъупшэжьыгъэхэу къытлъыримыгъэжьагъохэт». 6 Арти унэІутым ащ къыриІожьыгъ: «Мы къалэм Тхьэм ицІыф, лъытэныгъэ фашІэу, ыІорэ пстэури тефэу дэс. Ащ ыдэжь тыгъакІуи, зыдэдгъэзэн фэе лъэныкъор къытиІонкІи мэхъуба». 7 Саул иунэІут риІожьыгъ: «ТыкІомэ, а цІыфым сыда фэтхьыщтыр? Тиматэмэ хьалыгъу арылъыжьэп, шІухьафтыни тиІэп, Зиусхьаным ицІыф еттынэу сыда тІэкІэлъыр?» 8 Арти унэІутым Саул риІожьыгъ: «Тыжьын ахъщэм ызыплІанэ сІыгъышъ, Зиусхьаным ицІыф ар естынышъ, лъэныкъоу зыдэдгъэзэщтыр къытиІощт». 9 Джыри Саул иунэІут риІуагъ: «КъапІорэр дэгъу, некІо». Тхьэм ицІыф зыдэс къалэм дэхьагъэх. Іуашъхьэм тет къалэм дэкІуаехэзэ, псыхьэ кІорэ пшъашъэхэр апэ къифагъэхэти, ахэм яупчІыгъэх: «Усэрэжъыр мыщ дэса?» НахьыпэкІэ Тхьэм еупчІынхэ зыхъукІэ Израилым щыщхэм аІощтыгъэ: «Усэрэжъым дэжь некІо»; сыда пІомэ тхьэлІыкІокІэ джы заджэхэрэм пасэм усэрэжъкІэ ягугъу ашІыщтыгъэ. 12 Адрэхэм джэуап къатыжьыгъ: «Дэс, мары ар, шъуапэ итэу макІошъ, шъуелъэкІони шъукІахь, къурмэн зыщашІырэ лъэгапІэм цІыфхэм мэфэкІ къурмэн щашІти, ар непэ къалэм къэкІуагъ; 13 къалэм шъунэсмэ, шъуІукІэщт, щэджэгъуашхэ къыщишІынэу къурмэн зыщашІырэ лъэгапІэм дэмыкІуаезэ шъуфэзыщт. Ар къэмысэу цІыфхэм шхэныр рагъэжьэщтэп, къурмэным пае Тхьэм зелъэІухэкІэ ары къырагъэблэгъагъэхэр зышхэщтхэр. Арышъ, шъукІу, джыри ежьагъэпышъ, шъуІукІэщт». 14 Джащ тетэу ахэр къалэм кІуагъэх. Къэлэгум зынэсхэм лъэгапІэм ежьэгъэ Самуел апэ къифагъ. 15 Саул къэкІонкІэ зы мафэ къэнэжьыгъэу Зиусхьаным Самуел къыриІогъагъ: 16 «Неущ мы уахътэм тефэу Бынямин хэкум щыщэу зы цІыф горэ уадэжь къэзгъэкІощтышъ, сиизраил лъэпкъ ипэщэщтым ышъхьэ дагъэ щыф – ащ силъэпкъ фылистхэм атыригъэкІощт; итхьаусыхэ макъэ къыслъыІэсыгъэшъ, силъэпкъ сыфэгумэкІы». 17 Самуел Саул къызелъэгъум Зиусхьаным ащ къыриІуагъ: «Джары цІыфэу зигугъу къыпфэсшІыгъагъэр; джары силъэпкъ зыгъэІорышІэщтыр». 18 Саул къэлапчъэм зынэсым Самуел екІуалІи еупчІыгъ: «Усэрэжъым иунэ зыдэщытыр къысэпІона?» 19 Самуел Саул къыриІожьыгъ: «Сэры усэрэжъыр, сапэ уитэу къурмэн зыщашІырэ лъэгапІэм дэкІуай, непэ щэджэгъуашхэ къыздэшъушІыщт, неущ пчэдыжьым устІупщыжьыщт, угу илъыр зэкІэ къыосІощт; 20 мэфищкІэ узэкІэІэбэжьмэ пшІокІодыгъэ щыдыбзхэм уафэмыгумэкІ; ахэр къагъотыжьыгъэх. Хэта зыІэ илъыщтыр Израилыр зэрэщытэу зыкІэхъопсырэ пстэури? Ар орэп шъуІуа, уятэ иунагъо зэрэщытэу арэп шъуІуа?» 21 Арти Саул къыриІожьыгъ: «Израилым ис лІэкъо нахь цІыкІухэм ащыщэу быняминба сыкъызхэкІыгъэр? Бынямин лІакъом щыщхэм анахь зыхамылъытэ-рэр арба сэ сыкъызхэкІыгъэр? Сыда ар къызкІысапІорэр?» 22 Самуел Саулрэ ащ иунэІутрэ зэригъэгъусэхи унэшхом зыдырищагъэх, нэбгырэ щэкІ фэдиз хъухэу къыригъэблэгъагъэхэм апшъэкІэ ыщэхи ыгъэтІысыгъэх. 23 Самуел пщэрыхьакІом къеджи риІуагъ: «„ГъэтІылъ" зыфасІуи къыостыгъэгъэ лы Іахьэр къахь». 24 ПщэрыхьакІом блантхъэ зэпытыр къыхьи Саул ыпашъхьэ къырилъхьагъ. Самуел ащ риІуагъ: «Мыр дгъэтІылъыгъагъэшъ, уапашъхьэ илъхьи шхы, цІыфхэр къызщызэІузгъэкІэщтхэ мы уахътэм тефэу ощ пае ар къэдгъэнэгъагъ». Джаущтэу а мафэм Саул Самуел щэджэгъуашхэ дишІыгъ. 25 ЕтІанэ ахэр къурмэн зыщашІырэ лъэгапІэм къехыжьхи къалэм къызэкІожьхэм, Саул унашъхьэм пІэ щыфашІи, чэщым ар ащ щычъыягъ. 26 Нэф къэшъи тыгъэр къызыкъокІым, Самуел унашъхьэм телъыгъэ Саул еджагъ: «Къэтэджи, узгъэкІотэжьыщт». Арти Саул къэтэджыжьи, тІури зэгъусэу щагум къыдэкІыгъэх.
Саул пачъыхьагъум зэрэтехьагъэр
27 Къэлэ гъунэм зыщынэсынхэм Самуел Саул риІуагъ: «Тапэ итэу кІонэу унэІутым еІу». Адрэр апэ иуцуагъ. «О джы къэуцуи Тхьэм къыІуагъэр къыпфэсІотэщт», – риІуагъ.
1 Ащ ыуж Самуел дагъэр зэрыт бжъэр къышти, итыр Саул ышъхьэ тырикІи, ебэуи риІуагъ: «Мары Зиусхьаным икІэн, Ащ илъэпкъ пэщэныгъэ дызепхьанэу Іэшъхьэтетэу уегъэнафэ. 2 Садэжь уикІыжьэу укІожьзэ, Бынямин чІыгум ит псэупІэу Цэлцахъ узынэсыжькІэ, Рахъэл икъашъхьэ дэжь нэбгыритІу уапэ къыщифэщт. Ахэм къэбар уагъэшІэщт: „Узлъежьэгъэ щыдыбзхэр къагъотыжьыгъэх шъхьае, уятэ щыдыбзхэри щыгъупшэжьыгъэхэу, 'СикІалэ сыда икъэбарыр?' ыІозэ, мэгумэкІы". 3 Ащ ыуж уапэкІэ ебгъэхъунышъ, чІыпІэу Табор ит чъыгаем нэс укІощт, ащ дэжь Тхьэм елъэІунхэу Бэтэл кІорэ нэбгырищыр къыщыппэгъокІыщт: зым чыцІищ ыІыгъыщт, адрэм – хьалыгъу хьакушищ, ящэнэрэм санэр зэрыт нэтыр ыхьэу плъэгъущт. 4 УзаІукІэкІэ, ахэм шІуфэс къыуахыщт, етІанэ хьалыгъуитІу къызыуаткІэ къаІыпхыщт. 5 ЕтІанэ Зиусхьаным и-ГъыбІэкІэ заджэхэрэ Іуашъхьэу фылист дзэ купыр къызщыуцугъэм унэсыщт. Къалэм уздахьэкІэ, тхьэлІыкІоныр зипшъэрылъ цІыф купэу, бзэпсхэр зэрыщэгъэ пхъонтэпщынэм, шъонтырыпым, къамылым къяозэ, къурмэн зыщашІырэ лъэгапІэм къехрэм уІукІэщт. Тхьэм кІочІэ лыеу къахилъхьагъэм зэлъиштагъэхэу, Тхьэм къыбгъодэкІырэ псалъэхэр ахэм къашІызэ, Ащ ищытхъу аІуатэ. 6 Джащ дэжьым Зиусхьаным и-Псэ къыпхэхьанышъ, ори ахэм урягъусэу, Тхьэм кІочІэ лыеу къыпхилъхьагъэм узэлъиштагъэу, Тхьэм къыбгъодэкІырэ псалъэхэр къадэпшІызэ, Ащ ищытхъу адэпІотэщт, фэшъхьаф цІыфи ухъущт. 7 Ахэр къызыохъулІахэкІэ, угу къыуиІорэр шІэ, Тхьэу уигъусэм къыбдигъэхъущтышъ. 8 Сэ сынэмысзэ о Гъылгъал кІо, Зиусхьаным пае къурмэнгъэстрэ зэгурыІоныгъэ къурмэнрэ щысшІынхэу сэри сыкъэкІощт. Уадэжь сыкъакІоу пшІэщтыр къыосэІофэкІэ мэфиблэ къысаж». 9 Саул ыгъэзэжьыгъэу Самуел ыдэжь икІыжьзэ, Тхьэм ащ ицІыф гъэпсыкІэ къызэблихъугъ, къыриІуагъэхэри зэкІэ а мэфэ шъыпкъэм къехъулІагъэх. 10 КъакІохэзэ, ахэр къурмэн зыщашІырэ лъэгапІэм къызэсхэм, тхьэлІыкІоныр зипшъэрылъ цІыф купым ІукІагъэх. Тхьэм и-Псэ ащ къылъыІэси, Тхьэм кІочІэ лыеу къыхилъхьагъэм зэлъиштагъэу, Тхьэм къыбгъодэкІырэ псалъэхэр къышІхэу, Ащ ищытхъу адиІуатэу ежьми ригъэжьагъ. 11 НахьыпэкІэ ар зышІэщтыгъэхэу, тхьэлІыкІоныр зипшъэрылъ цІыфмэ ахэтэу, Тхьэм кІочІэ лыеу къыхилъхьагъэм зэлъиштагъэу, Тхьэм къыбгъодэкІырэ псалъэхэр ащ къызэришІрэр зылъэгъухэрэм зым адрэм риІожьщтыгъэ: «Сыда Къыщ ыкъо къыщышІыгъэр? Адэ Саул тхьэлІыкІоныр зипшъэрылъ цІыфхэм джы ащыщ хъугъа?» 12 Ащ дэжьым щытыгъэмэ ащыщ горэм къыІуагъ: «Адрэмэ хэта ятэр?» Джары гущыІэжъым хэлъэу зыкІэхъугъэри: «Адэ Саул тхьэлІыкІоныр зипшъэрылъ цІыфхэм джы ащыщ хъугъа?» 13 ЕтІанэ Тхьэм къыхилъхьэгъэ кІочІэ лыеу зэлъызыштагъэм ар къызебгынэм, Тхьэм къыбгъодэкІырэ псалъэхэр къызэришІрэр, Тхьэм ищытхъоу ыІуатэрэр зэпигъэуи, къурмэн зыщашІырэ лъэгапІэм дэкІоягъ. 14 Ащ ыуж Саул ятэшыр ежьми иунэІути къяупчІыгъ: «Тыда шъуздэкІогъагъэр?» Арти риІожьыгъ: «Щыдыбзхэм талъыхъунэу тыщыІагъ, ахэр къызэтэмыгъотхэм, Самуел дэжь тыІухьэгъагъ». 15 Арти ятэшым Саул къыриІуагъ: «Самуел къышъуиІуагъэр къысфэІотэжь». 16 Саул ятэшым риІуагъ: «Щыдыбзхэр къагъотыжьыгъэхэу ащ къытиІуагъ». Ау зэрэпачъыхьэщтым ехьылІагъэу Самуел къыриІуагъэм икъэбар хигъэгъозагъэп.
Саул пачъыхьэу зэрэтырагъэхьагъэр
17 ЕтІанэ Зиусхьаным игухэлъ щигъэгъозэнхэм пае Самуел цІыфхэр Мыцпэ къащызэІуигъакІэхи, 18 израил цІыфхэм ариІуагъ: «Израилым и-Зиусхьанэу Тхьэм ыІорэр мары: „Израил Мысырым къисщыжьи, мысыр цІыфхэм шъуакъыІэкІэсхыжьыгъ, шъузгъэпщылІщтыгъэ пачъыхьагъу пстэуми ягъэрыпІэ шъукъисщыжьыгъ. 19 Ау шъуи-Тхьэу тхьамыкІэпІэ пстэуми шъукъарызыщыжьэу, шъуигумэкІыгъо шъушъхьащызыхрэр джы щыжъугъэзыий, Зиусхьаным шъо ешъуІуагъ: 'ТиІэшъхьэтетынэу пачъыхьэ къытфытегъахь'. Арышъ, лъэпкъ-лъэпкъэу, лІэкъо-лІакъоу, лъэпкъэгъу-лъэпкъэгъоу Зиусхьаным ыпашъхьэ джы шъуиуцу"». 20 Самуел израил лъэпкъ пстэуми къяджи, бынямин лІакъор къахихыгъ. 21 Арти бынямин лІакъом чэзыур зынэсым, ар зэрэзэтефыгъэ зэкъошхэмкІэ зэхэушъхьафыкІыгъэхэу къекІолІэнхэу ариІуи, матыр лъэпкъэгъур къахихыгъ. ЕтІанэ матыр лъэпкъэгъум щыщ хъулъфыгъэхэр къызыхащхэм, Къыщ ыкъо Саул ыцІэ къыраІуагъ. Ащ лъыхъугъэх, ау къагъотыгъэп. 22 Арти Зиусхьаным еупчІыгъэх: «Саул къэкІуагъэба?» Зиусхьаным къариІожьыгъ: «Мары ар, ІапІэхэм захигъэбылъхьагъ». 23 Лъагъачъэхи ар къащи цІыфхэм къызахэуцом, илъэгагъэкІэ зэрэлъэпкъэу къахэщыгъ. 24 Самуел зэкІэми къариІуагъ: «Зиусхьаным къыхихыгъэр шъолъэгъуа? Зэрэлъэпкъэу ащ фэдэ хэтэп». Ащ дэжьым цІыфхэр зэкІэ къэзэрэгъэкууагъэх: «Пачъыхьэр орэпсэу!» 25 ЕтІанэ Самуел упачъыхьэным унашъоуи фитныгъэуи пылъхэр зыфэдэхэр цІыфхэм къафиІотагъ. КъафиІуати, ахэр зыдитхэгъэ тхылъыр Зиусхьаным ыпашъхьэ рилъхьагъ, ащ ыуж къекІолІагъэхэр шъхьадж пэпчъ иунэ кІожьынэу зэбгыритІупщыжьыгъэх. 26 Саули ядэжь, ГъыбІэ, зегъэзэжьым, Тхьэр зыгу къихьэгъэ лІэхъупхъэхэу къыхихыгъэхэр игъусэхэу кІожьыгъэх. 27 Ары шъхьае зэІышІэкІо цІыфхэм аІощтыгъэ: «Ара тыкъэзыухъумэщтыр?» Джаущтэу пхъэтэпэмыхь ашІыгъ, шІухьафтынхэри фахьыгъэхэп; ау адрэм зыпари ымылъэгъурэм фэдэу зишІщтыгъэ.
Саул Іамон лъэпкъым зэрэтекІуагъэр
1 Іамон лъэпкъым щыщэу Нэхъащ ГъылыІад хэкум ит къалэу Яощ къыдзыхьагъ. Арти Яощ дэс хъулъфыгъэхэм зэкІэми Нэхъащ раІуагъ: «Зэзэгъыныгъэ къыддэшІи тыбготыщт, къулыкъуи пфэтшІэщт». 2 Арти Іамон лъэпкъым щыщэу Нэхъащым ахэм ариІуагъ: «Зэзэгъыныгъэ къыжъудэсшІыщт унашъо пылъэу: шъуащыщ пэпчъ ынэ джабгъу къискІынышъ, зэрэ-Израилэу ынапэ тесхыщт». 3 Арти Яощ дэс нахьыжъ упчІэжьэгъухэм къыраІожьыгъ: «Израил ичІыпІэ пстэуми тилІыкІохэр тІофтэнхэм пае мэфибл къытэт, тыкъыдэзыщыжьын гори зытымыгъоткІэ, тыкъыпфэкІощт». 4 Ащ ыуж лІыкІохэр агъэкІуагъэх Саул зыдэс къалэу ГъыбІэ, къэбарыр цІыфхэм къызафаІуатэм, ахэм куо-хьаушхо къаІатыгъ, гъыныри къыхадзагъ. 5 Ащ тефэу Саул губгъэм щыІагъэти, цухэм ауж итэу къызыдэхьажьым къяупчІыгъ: «Сыда цІыфхэм къяхъулІагъэр, сыда ахэр зыкІэгъыхэрэр?» Арти Яощ къикІыгъэхэм къахьыгъэ къэбарым ар щагъэгъозагъ. 6 КъаІорэр зэхэзыхыгъэ Саул Тхьэм и-Псэ куоу къыхахьи, лъэшэу къызэкІигъанэу къэгубжыгъ. 7 ЕтІанэ цуитІур пкъырыпкъэу зэхиупкІэтагъэх, Саулрэ Самуелрэ ауж имыхьэхэрэм зэкІэми яцухэм джащ фэдэу зэрадэзекІощтхэр лІыкІоу къаІофтагъэхэм ащ лъыпытэу Израилым ичІыпІэ пстэуми къэбарэу аригъэхьыжьыгъ. Арти Зиусхьаным къаришІэн ылъэкІыщтым цІыфхэр зэкІэ ыгъэщынагъэхэти, зэгурыІохи, зыч-зыпчэгъоу заом зэдежьагъэх. 8 КІохэзэ, Бэзэкъ зынэсхэм ахэр Саул къызызэпеплъыхьэхэм, Израилым щыщхэр нэбгырэ мин шъищ, Ехъудэм щыщхэр нэбгырэ мин щэкІ хъухэу къычІэкІыгъ. 9 Арти лІыкІоу къэкІуагъэхэм араІуагъ: «ГъылыІад ит къалэу Яощ дэсхэм макъэ яжъугъэІужь: неущ тыгъэм къыгъэплъэу зыригъажьэкІэ, ІэпыІэгъур къышъулъыІэсыщт». ЛІыкІохэм къагъэзэжьи, Яощ дэсхэр къэбарым зыщагъэгъуазэхэм, адрэхэр лъэшэу гушІуагъэх. 10 Яощ дэсхэм Нэхъащ къэбар фарагъэхьыжьыгъ: неущ тыкъышъупэгъокІыщтышъ, шъузыфаер къыташъушІ. 11 КъыкІэлъыкІорэ мафэм Саул ицІыфхэр купищэу зэхидзи къежьэхи, тыгъэр къызэрэкъокІэу Іамонхэм яуцупІэ къэсыгъэх. Тыгъэнэстыр къэхъуфэ ахэр зэхакъутагъэх. Псэоу къэнагъэхэр пэкІэ-пакІэу зэбгырычъыжьыгъэх. 12 Ащ ыуж цІыфхэм Самуел къыраІуагъ: «Тыдэ щыІэха „Саула ыкІи типачъыхьэщтыр?" зыІуагъэхэр? Ахэр къытІэкІэжъугъахьэхи, апсэ хэтхыщт». 13 Ау Саул ар афидагъэп: «Мы мафэм зыми ыпсэ хэпх хъущтэп, сыда пІомэ Зиусхьаным непэ Израил къыгъэнэжьыгъ». 14 Ащ ыуж Самуел цІыфхэм ариІуагъ: «Гъылгъал тыкІонышъ, пачъыхьэр зэрэтехьэрэр къэдгъэшъыпкъэжьыщт». 15 Арти цІыфхэр зэкІэ зэрэзэхэтхэу Гъылгъал кІохи, Зиусхьаныр ишыхьатэу Саул Гъылгъал ипачъыхьэу тырагъэхьагъ. ЕтІанэ зэгурыІоныгъэ къурмэнхэр Зиусхьаным пае ашІхи, Саули израил цІыфхэри зэкІэ лъэшэу ащ щычэфыгъэх.
Самуел цІыфхэм псалъэ зэрадишІыгъэр
1 Самуел зэрэ Израилэу риІуагъ: «ЗэкІэми къысашъуІорэм сыкъедэІуи, пачъыхьэр къышъуфытезгъэхьагъ, 2 мары, пачъыхьэр джы шъуапашъхьэ ит; сэ жъы сыхъугъ, сшъхьацхэри тхъуагъэх; сикІалэхэри къышъухэтых; сикІэлэгъум къыщегъэжьагъэу непэ къызнэсыгъэм шъуапашъхьэ ситыгъ; 3 мары сыщыт, Зиусхьанри щыгъуазэу, Тхьэм къахихыгъэ пачъыхьэми шъукъызэхихэу, къашъуІо: хэта зицу зыІысхыгъэр, хэта зищыд зыІысхыгъэр, хэта зыгу хэзгъэкІыгъэри сиягъэ зэзгъэкІыгъэри, хэта къуалъхьэ къызІысхи, зилажьэ сыушъэфыгъэри, – ащ фэдэ къышъухэкІмэ, Іысхыгъэр къестыжьыщт». 4 Арти къыраІожьыгъ: «О тыгу хэбгъэкІыгъэп, тишъхьафитныгъи ттепхыгъэп, зыгорэми зыпари Іыпхыгъэп». 5 ЕтІанэ ащ ариІуагъ: «Лажьэ гори симыІэу къызэрэшъуІуагъэмкІэ мы мафэм Зиусхьаныри Тхьэихэхыри шъуишыхьатых». Адрэхэм къыраІожьыгъ: «Ары, тІури тишыхьат». 6 Арти Самуел цІыфхэм ариІуагъ: «Зиусхьаныр Мосэрэ Хьарунэрэ къытезгъэхьагъэхэу, шъуятэхэр мысыр чІыгум къизыщыжьыгъэр ары. 7 Джы шъукъэуцуи, Зиусхьаным тыкъызэхихэу Зиусхьаным шъори шъуятэхэми шІоу къышъуфишІэгъэ пстэури шъугу къэзгъэкІыжьзэ, сышъодэощт. 8 Якъубэ Мысырым зэкІом шъуятэхэр агурэ апсэрэ еІэжьыгъэхэу Зиусхьаным елъэІухэу зырагъажьэм, Зиусхьаным Мосэрэ Хьарунэрэ къафигъакІохи, ахэм шъуятэхэр Мысырым къыращыжьхи, мы чІыпІэм къагъэтІысыгъэх. 9 Ау ахэм я-Зиусхьанэу Тхьэр зыщагъэгъупшагъэти, къязаощтыгъэхэм, Хъэцэр идзэпащэу Сисрэ, фылистхэми, мэуаб пачъыхьэми ахэр Ащ аригъэгъэпщылІыгъэх. 10 Арти, агурэ апсэрэ еІэжьыпагъэхэу, ахэр Зиусхьаным елъэІугъэх: „Тыхэукъуагъ ти-Зиусхьан къызэтэбгынэм, тхьэ нэпцІхэу БэІалхэмрэ Астартхэмрэ тафэІорышІэу зэтэублэм. Джы типыйхэм такъыІэкІэхыжьи, тыпфэлэжьэщт". 11 Арти Зиусхьаным ЕрыубэІали, Баракъи, Ифтахъи, Самуели къыгъэкІуагъэх, пыеу шъукъэзыуцухьэщтыгъэмэ шъуакъыІэкІихижьи, щынэгъончъэу шъущыІагъ. 12 ЕтІанэ Іамон ипачъыхьэу Нэхъащ къышъозэонэу къызэрежьагъэр къызэшъолъэгъум шъукъысэлъэІугъ: „Хьау, пачъыхьэм ыІэмычІэ терэлъ", Зиусхьанэу Тхьэр шъуипачъыхьэу щыт нахь мышІэми. 13 Арышъ, мары пачъыхьэу хэжъудзыгъэр, шъузыфэягъэр: Зиусхьаным пачъыхьэр къышъуфытыригъэхьагъ. 14 Зиусхьаным шъущэрэщын, шъуфэрэлажь, Зиусхьаным ыІорэм шъуерэдэІу, Зиусхьаным иунашъохэм шъуапэрэмыуцужь, шъори шъуипачъыхьэу зыІэ шъуилъри шъуи-Зиусхьанэу Тхьэм ыуж шъуерэт. 15 Зиусхьаным ыІорэм шъуемыдэІоу, Ащ иунашъохэм шъуапэуцужь зыхъукІэ, шъуятэхэм аришІагъэр къышъуишІэщт, ынае къышъущыфэщт. 16 Джы шъукъэуцуи, шъуинэрылъэгъоу Зиусхьаным Іофышхо зэрэзэшІуихыщтым шъукъеплъ: 17 коцым джы иІухыжьыгъоба? Ау Зиусхьаным селъэІунышъ, шыблэри къыгъэгъогъощт, ощхыри къыригъэщхыщт, пачъыхьэ къышъуфытыригъэхьанэу Зиусхьаным шъузелъэІум лъэшэу шъузэрэхэукъуагъэр зыдышъуигъэшІэжьыщт». 18 Арти Самуел Зиусхьаным елъэІуи, Зиусхьаным шыблэри ощхыри а мафэм къытІупщыгъэх, цІыфхэр Зиусхьаными Самуели лъэшэу ащыщынагъэх. 19 Ащ ыуж цІыфхэр зэкІэ Самуел елъэІугъэх: «Зиусхьанэу уи-Тхьэ тфелъэІу уиІумэтхэр ымыгъэлІэнхэу, пачъыхьэ къытфигъэкІонэу тызелъэІум хэукъоныгъэу тиІагъэхэм джыри зы ахэдгъэхъуагъэшъ ары». 20 Арти Самуел цІыфхэм ариІожьыгъ: «А хэукъоныгъэхэр шъушІыгъахэми, шъумыщын, ау Зиусхьаныр зыкІи шъумыбгын, шъугукІэ шъуфэхьалэлэу Зиусхьаным шъуфэлажь. 21 ШІуагъэ зыхэмылъ, шъукъыхэзымыщыжьыщт Іофмэ шъуапымылъ, ахэр зэрэбылым щыІэп. 22 ИІорэ ишІэрэ зэрэзэтетхэм, ыцІэ лъагэ илъэпІагъэ къызэриухъумэрэм ялъытыгъэу Зиусхьаным ыгъэлъэпІэгъэ лъэпкъыр къыбгынэщтэп, сыда пІомэ Зиусхьаным шъурилъэпкъ шІоигъоу шъукъахихыгъ. 23 Сэри джащ фэдэу Зиусхьаным ыпашъхьэ псэкІод щысшІэщтэп. ГъогушІу шъузэрэтетыным шъуфэзгъэсэщт. 24 Ау Зиусхьаным шъущыщын, шъыпкъагъэ фышъуиІэуи шъугукІи шъуфэкъабзэу шъуфэлажь, шъуинэрылъэгъугъэба гъэунэфыпІэшхо къызэрэшъуишІылІагъэр. 25 Армырмэ бзэджагъэхэр зызешъухьэхэкІэ, шъори шъуипачъыхьи шъузэрзэпылъэу шъуритэкъухьащт».
Фылистхэм апэшІуекІорэ заомрэ Саул къурмэныр зэриукъуагъэмрэ
1 Джащ тетэу Саул ятІонэрэ илъэсым пачъыхьагъэ. 2 Саул израил лъэпкъым щыщэу нэбгырэ минищ къахихыгъ: нэбгырэ минитІур игъусэу къалэу Мыхмэсрэ Бэтэл къушъхьэмрэ ащыІагъэх, адрэ миныр Саул ыкъо Ионэтан игъусэу Бынямин хэкум ит къалэу ГъыбІэ щыІагъэх; адрэ цІыфхэр ячэтэнгъэІагъэхэм якІужьынхэу ащ зэбгыритІупщыжьыгъагъэх. 3 Ащ ыуж Ионэтан фылист дзэ купэу ГъыбІэ къыщыуцугъэм тебани зэрэзэхикъутагъэм икъэбар фылистхэм зэхахыгъ. Арти, Саул гъоупщынэм епщэзэ, къэхъугъэм икъэбар зэрэхэгъэгоу щызэхаригъэхыгъ. 4 ЕтІанэ Саул фылист дзэ купыр зэрэзэхикъутагъэм, фылистхэм Израилым агу зэрэщыкІыгъэм икъэбар зэрэ Израилэу зызэхехым, цІыфхэр къэзэрэугъойхи, Саул дэжь Гъылгъал къэкІуагъэх. 5 Арти фылистхэр Израилым къезэонхэм пае зэоным фытегъэпсыхьэгъэ ку мин щэкІ шыкоо нэбгырэ миних ягъусэжьэу, хы Іушъом Іулъ пшахъом ибагъэм фэдиз хъунэу, цІыф бэ дэдэ хъухэу къэзэрэугъойхи къежьагъэх. Бэтаон икъокІыпІэ лъэныкъокІэ дзыгъэу щыІэ Мыхмэс къэсхи къыщыуцугъэх. 6 Джуртхэр лъэныкъо пстэумкІи къаухъурэигъэхэти, ахэр къащтэхи къушъхьэ гъочІэгъхэми, къушъхьэ тІуакІэхэми, мыжъошхохэмрэ къэхэмрэ акъогъуи, псы зэІугъэкІапІэхэми гъэбылъыпІэкІэ якІужьыгъэх; 7 джуртмэ ащыщхэр псыхъоу Иордан зэпырыкІхи, Гъад, ГъылыІад хэгъэгумэ ячІыгумэ анэсыгъэх. Саул Гъылгъал къыдэнэгъагъэ нахь мышІэми, ыуж итэу къэкІогъэ цІыфхэр зэкІэ зэрэщынэщтыгъэхэм къыхэкІэу кІэзэзщтыгъэх. 8 Самуел къыфигъэнэфэгъэ уахътэр къэсыфэ Саул мэфиблэ ащ ежагъ. Ау Самуел Гъылгъал къызэмыкІом, цІыфхэм Саул къабгынэу рагъэжьагъ. 9 Арти Саул ариІуагъ: «Къурмэнгъэстрэ зэгурыІоныгъэ къурмэнрэ сшІыщтхэшъ, ищыкІагъэхэр къысфашъущэх». Ежьым къурмэнгъэст ышІыгъ. 10 Къурмэнгъэстыр ыухыгъэ къодыеу Самуел къэсыгъ. Саул шІуфэс рихынэу ащ пэгъокІыгъ. 11 «Сыд джы пшІагъэр?» – ыІуи Самуел къызеупчІым, Саул риІожьыгъ: «Сигъусэ цІыфхэр зэрэзэбгырычъыжьхэрэр слъэгъугъэ, ау къэбгъэнэфэгъэ мафэхэм яхъулІэу укъызэмыкІом, фылистхэри Мыхмэс къыщызэрэугъоигъэхэти, 12 укъэсыфэ сегупшысыгъ: „Сэ Зиусхьаным ІэпыІэгъу къытитынэу джыри семылъэІузэ, фылистхэр Гъылгъал къэсынхэшъ, къысэзэощтых". Джары къурмэнгъэстхэр зыкІэсшІыгъэхэр». 13 Ау Самуел Саул риІуагъ: «Делагъэу узекІуагъ. Уи-Зиусхьанэу Тхьэм къыуиІорэр бгъэцэкІагъэп. Ащ къыІорэм ублэмыкІыгъагъэмэ, уилІакъо егъашІэм Израилым ипачъыхьэщтыгъ. 14 Ау джы уипачъыхьагъу укъытенэжьыщтэп. Зиусхьаным ыгу рихьэу, Ежь ыІорэм шІомыкІынэу лІы къыгъотыгъ, илъэпкъ ипэщэнэу Зиусхьаным ащ унашъо фишІыгъ, сыда пІомэ Зиусхьаным къыпфишІыгъэ унашъор о бгъэцэкІагъэп». 15 ЕтІанэ Самуел Гъылгъал къыбгыни Бынямин хэкум ит къалэу ГъыбІэ кІуагъэ. Саул игъусэхэр къызелъытэм нэбгырэ шъих Іэпэ-цыпэ хъоу къычІэкІыгъ. 16 Саулрэ ыкъо Ионэтанрэ дзэкІолІэу ягъусэхэри Бынямин ит къалэу ГъыбІэ къыщыуцугъэх. Адрэ фылистхэм къалэу Мыхмэс уцупІэкІэ хахыгъ. 17 Арти фылистхэм яуцупІэ дзэ купищ къыдэкІыгъ апэ къифэрэ чІыгур зэрапхъонэу. Зыр хэкоу ШыуІал ит къалэу Іофрэ лъэныкъомкІэ кІорэ гъогум техьагъ, 18 адрэ купым Бэтхъорэн екІурэ гъогур хихыгъ, ящэнэрэм ЦыоІим лъэгум игъунапкъэкІэ щыІэ шъофнэкІым фигъэзагъ. 19 А лъэхъаным зэрэ Израил хэгъэгоу гъукІэхэр исыгъэхэп, сыда пІомэ джуртхэм чатэхэмрэ пчыпыджынхэмрэ ашІынэу фылистхэм къафадэщтыгъэп. 20 ЯшІуанэхэр, яотычхэр, ягъупчъэхэр алъынхэм пае джуртхэр зэкІэ фылистхэм адэжь кІонхэ фэягъ. 21 Къэуцэкугъэ пхъэІэшацэхэр, шІонажэхэр зэрафалъхэрэм пае фылист гъукІэхэм тыжьын ахъщэу грамми 8 фэдиз аІахыщтыгъэ, Іэмэ-псымэ папцІэхэмрэ отычхэмрэ ягъэлъын уасэу фашІыщтыгъэр тыжьын ахъщэу грамми 4 фэдиз. 22 Арти зэзаохэ зыхъукІэ Саулрэ Ионэтанрэ ягъусэгъэ дзэкІолІхэм зэкІэми чатэхэмрэ пчыпыджынхэмрэ аІыгъщтыгъэхэп, Саулрэ ащ икІалэу Ионэтанрэ ары ныІэп Іашэхэр зиІагъэхэр. 23 ЕтІанэ фылист дзэ купыр Мыхмэс зэпырыкІыпІэм къэсыгъ.
Ионэтан лІыгъэ зэрэзэрихьагъэр
1 Зы мафэ горэм Саул икІалэу Ионэтан иашъоджэнэзехьэ риІуагъ: «МодрабгъукІэ щыІэ фылист дзэ купым дэжь тыгъакІу». Ау а къэбарым ятэ щигъэгъозагъэп. 2 Саул къалэу ГъыбІэ къыпэгъунэгъу чІыпІэу Мигърэун къыщыкІырэ нар чъыгым ычІэгъ чІэсыгъ. Нэбгырэ шъих фэдиз ащ кІыгъугъ. 3 Ахэм ахэтыгъ Зиусхьаным фэлэжьэрэ къурмэнышІэу къурмэнышІ чэтэнІабгъур зыбг пыпхэгъэгъэ Ахъые. Ар Ихабод ышэу Ахъытыу икІэлагъ. Ихабод къызхэкІыгъэр Пинхъас, Пинхъас зыкъуагъэр Щылэу дэсыгъэ къурмэнышІэу Алый ары. Ау Ионэтан зэрежьагъэм цІыфхэр щыгъозагъэхэп. 4 Ионэтан фылист дзэ купым зэрекІолІэнэу фэегъэ лъэныкъуитІумкІи къушъхьэ цэкІэ лъэгэшхохэр къапэІутыгъэхэти, ахэм дэкІыпІэу афэхъущтым Ионэтан егупшысщтыгъэ. Зы къушъхьэ цакІэм зэреджэщтыгъэхэр Боцэц, адрэм – Сэн; 5 зыр Мыхмэс итемыр лъэныкъокІэ гъэзагъэу, адрэр ГъыбІэ икъыблэкІэ нахь дзыгъэу щытыгъ. 6 Ионэтан иашъоджэнэзехьэ риІуагъ: «Сунэт амышІыгъэ фылист дзэ купым тегъэкІу. Тэ тишІуагъэкІэ Зиусхьаным татыригъэкІонкІи мэхъуба. Зиусхьаныр къэзгъэуцушъун щыІэп, нэбгырабэкІи зы нэбгырэкІи укъигъэнэжьын ылъэкІыщт». 7 Ашъоджэнэзехьэм къыриІожьыгъ: «Угу къызэрэуиІорэм тетэу зекІо. Сэ сыуигъусэщт, угу зэрилъым фэдэу сызекІощт». 8 Ионэтан ащ риІожьыгъ: «Фылистхэм якъэрэгъулхэм благъэу тякІолІэнышъ, тыкъалъэгъунэу тыуцущт. 9 Ежьхэр къытэкІолІэфэхэ тымыхъыенэу, тыщытынэу унашъо къызытфашІкІэ, тыкъызэтеуцощт, къушъхьэм тыдэкІоещтэп. 10 Ау тякІолІэнэу унашъо къызытфашІкІэ, къушъхьэм тыдэкІоещт, сыда пІомэ Зиусхьаным ахэм тызэратыригъэкІощтым инэшанэу тэркІэ ар хъущт». 11 ЕтІанэ Ионэтанрэ иашъоджэнэзехьэрэ кІохэзэ, фылист дзэ купым иплъапІэ зефэхэм, фылист къэрэгъулхэм аІуагъ: «Зызщагъэбылъыгъэ къушъхьэ тІуакІэхэм джуртхэр къызэрадэпшыжьхэрэм модэ шъуеплъ». 12 Фылист дзэ купым хэтхэр Ионэтанрэ ащ иашъоджэнэзехьэрэ къякуугъэх: «Моу шъукъыдэкІуай. Зыгорэ къышъодгъэлъэгъущт!» Арти Ионэтан иашъоджэнэзехьэ риІуагъ: «Сауж къихь, Зиусхьаным ахэр джы Израилым ыІэ къырилъхьагъэх». 13 Ионэтан къушъхьэм дэпшыенэу зежьэм, иашъоджэнэзехьи ыуж ихьагъ. Ионэтан фылистхэр риутхи, иашъоджэнэзехьэ ахэр ыукІыжьыгъэх. 14 Ахэм яапэрэ илъыгъо а чІыпІэу гектарым ипшІэниплІ фэдиз хъурэм нэбгырэ тІокІ фэдиз щызэхаукІагъ. 15 Арти губгъэм итыгъэ фылист дзэ пстэури, апэ итхэу къэкІорэ дзэ купхэри, аубытыгъэ чІыгухэр зезыпхъощтыгъэхэри лъэшэу къэщтагъэх, чІыгури зэрэщытэу къэтІыгурыгугъ, зыздагъэзэщтри амышІэжьэу гузэжъогъушхо хэфагъэх.
Фылистхэм зэратекІуагъэхэр
16 Саул иухъумакІохэу Бынямин хэкум ит къалэу ГъыбІэ дэсыгъэхэм фылист дзэкІолІхэр шъхьадж ыпакІэ зэрэхэлъэдэжьхэрэр къалъэгъугъ. 17 Саул игъусэ цІыфхэм ариІуагъ: «ЦІыфхэр къызэпэшъуплъыхьэхи, тэ тиемэ ащыщэу уцупІэм дэкІыгъэр къызэжъугъашІ». Къызаплъыхьэхэм Ионэтанрэ ащ иашъоджэнэзехьэрэ ахэмытыжьхэу къычІэкІыгъ. 18 Арти Саул къурмэнышІэу Ахъые риІуагъ: «Зиусхьаным ипхъонтэ лъапІэ къахь». Сыда пІомэ а уахътэм Зиусхьаным ипхъонтэ лъапІэ израил цІыфхэм зыдаІыгъыгъ. 19 Саул къурмэнышІым джыри зыгорэхэр риІощтыгъэх фылистхэм яуцупІэ гумэкІыгъом нахь зыкъызщеІэтым. Арти Саул къурмэнышІым риІуагъ: «Хъугъэ, икъущт!» 20 ЕтІанэ Саул цІыфхэр къыугъойхи, зэуапІэм зэдыІухьагъэх, фылист дзэкІолІхэр къыкІащтэхи, зэзэожьхэу рагъэжьагъ. 21 Фылистхэм агохьэгъэ джуртхэу, ахэм яуцупІэ щыІагъэхэр Саулрэ Ионэтанрэ ягъусэгъэ джуртхэм къагохьажьыгъэх. 22 Адрэ израил цІыфхэу Ефраим къушъхьэмэ защызгъэбылъгъагъэхэм фылистхэм ашъхьэ зэрэрахьыжьэжьыгъэр зызэхахым, ахэм язаохэрэм къахэхьажьхи фылистхэр афыхэу аублагъ. 23 Зиусхьаным а мафэм Израил атыригъэкІуагъ. Бэтаон нэсэу заор щыкІуагъ.
Саул цІыфхэм афигъэпытагъэр
24 Израил цІыфхэр а мафэм лъэшэу зэхэукІэгъагъэх, сыда пІомэ ипыйхэм яфэшъуашэр аремыгъэгъотыжьыфэ, пчыхьэ охъуфэ зы нэбгыри Іулъхьэ римыгъэхынэу Саул цІыфхэм афигъэпытэгъагъ. Ар зымыгъэцакІэрэм Зиусхьаным нэлат рихыщтэу ыІуи афигъэпытагъэти, цІыфхэм ащыщ горэми гъомлапхъэ зыІуигъэфагъэп. 25 ЕтІанэ цІыфхэр кІохэзэ мэз горэм зынэсхэм, шъоур боу зэрылъ гъэхъунэм ихьагъэх. 26 ДзэкІолІэу кІощтыгъэхэм шакомэ къадэчъырэ шъоур къалъэгъугъ, ау ащыщ горэми ар зыІуигъэфагъэп, сыда пІомэ афагъэпытэгъагъэр аукъонкІэ щынагъэх. 27 Ионэтан ятэ цІыфхэм зэрафигъэпытагъэр зэхихыгъэпти, бэщэу ыІыгъым ыІэпакІэ шъоум хигъауи ыжэ зыфехьым, нахь къызэгурыІожьи, ынэхэр къэлыдыгъэх. 28 Арти дзэкІолІмэ ащыщ горэм мыразэу Ионэтан къыриІуагъ: «„Непэ Іулъхьэ езыгъэхрэр Зиусхьаным ерэгъэунэхъу" ыІуи, уятэ къызэрэтфигъэпытагъэм къыхэкІэу тышхагъэпышъ, цІыфхэр къарыунчъэ хъугъэх». 29 Ионэтан къыриІожьыгъ: «Тятэ хэгъэгур къин хидзагъ. Мы шъоум щыщ тІэкІу зызІосэгъафэм, скІуачІэ къихьажьыгъ. 30 ДзэкІолІхэм непэ пыим къытырахыгъэм щыщ ашхыгъагъэмэ бэкІэ нахьышІугъ, фылистхэми нахьыбахэу ахэкІодыкІыныгъэба?» 31 А мафэм Мыхмэс къыщегъэжьагъэу Аялэун нэсэу фылистхэр ащызэхакъутагъэхэти, дзэкІолІхэр лъэшэу улэугъагъэх. 32 Ахэм фылистхэм мэлхэри, чэмхэри, шкІэхэри къатырахыгъэхэти, мэлакІэм зэригъалІэхэрэм къыхэкІэу былымхэр аукІхи, лъыр джыри къызэрэпычъзэ лыр ашхэу аублагъ. 33 Арти зыгорэм Саул къэбарыр къылъигъэІэсыгъ: «Зиусхьаным къемыкІурэр дзэкІолІхэм зэрашІэрэм еплъ! Лъыр къызэрэпычъэу лыр ашхы». Саул ахэм ариІуагъ: «Шъухэукъуагъэшъ, джы мыжъошхор моу сапашъхьэ къижъугъэукІорай». 34 Ащ ыуж Саул унашъо афишІыгъ: «Шъхьадж ицуи имэли къыщэнышъ, мы чІыпІэм щышІуибзынышъ, етІанэ зэрэщишхыжьын фаем ехьылІагъэу цІыфмэ макъэ яжъугъэІу. Зиусхьаным къемыкІущтыр шъумышІэ, лъыр къыпычъэу лыр шъумышхы». Арти чэщым хэти ицуи имэли къыщи ежь ыІэшъхьитІукІэ шІуибзыгъ. 35 ЕтІанэ Саул Зиусхьаным пае къурмэншІыпІэ ыгъэуцугъ: джары ащ Зиусхьаным ыцІэкІэ апэрэ къурмэншІыпІэу ыгъэуцугъэр. 36 ЕтІанэ Саул дзэкІолІхэм ариІуагъ: «Чэщым фылистхэм талъежъугъажьи, такІэжъугъахь, нэфылъэр къызэкІимычзэ яІэр зэкІэ къатетхынышъ, зы нэбгыри къэмынэу зэхэтыукІэщтых». Адрэмэ къыраІожьыгъ: «ЗэрэпшІоигъоу зэкІэри шІы». Ау къурмэнышІым къариІуагъ: «Ыпэ рапшІэу Тхьэм тежъугъэлъэІу». 37 Арти Саул Тхьэм еупчІыгъ: «Фылистхэм ауж сихьэмэ хъущта? Израил ахэм атебгъэкІощта?» Ау Зиусхьаным а мафэм зи къыриІожьыгъэп. 38 Ащ ыуж Саул дзэпащэхэр зэкІэ къызэІуаригъэгъакІэхи ариІуагъ: «Шъуащыщэу непэ псэкІод зышІагъэр къыхэгъэщыгъэн фае. 39 Израил къэзгъэнэжьырэ Зиусхьаныр зэрэщыІэр сэІо, хэтынкІи фит, сикІалэу Ионэтан орэхъу фаеми, псэкІод зышІагъэм, Іо хэмылъэу, ыпсэ Іусхыщт». Ау цІыфмэ ащыщ горэми зыпари къыІуагъэп. 40 ЕтІанэ Саул израил цІыфхэм ариІуагъ: «Шъо зы бгъумкІэ шъукъэуцу, сэррэ сикІалэу Ионэтанрэ адрэ бгъумкІэ тыкъэуцущт». ЦІыфхэм Саул къыраІожьыгъ: «Нахь пшІотэрэзыр шІэ». 41 ЕтІанэ Саул къыІуагъ: «А Зиусхьанэу Израилым и-Тхь! Зытет шъыпкъэр къэгъэнаф. Лажьэр зытефэрэр сэрмэ е сикІалэу Ионэтанмэ, уримыр къигъэкІ, ау лажьэр уиизраил лъэпкъ тефэмэ, туммимыр къигъэкІ». Мыщ дэжьым Саулрэ Ионэтанрэ лажьэ зэряІэр, ау цІыфхэр зэрэзафэхэр къыгъэнэфагъ. 42 Ащ ыуж Саул «Сэррэ сикІалэу Ионэтанрэ пхъэдзым тишъулъхь» зеІом, пхъэдзым Ионэтан къикІыгъэти. 43 Саул Ионэтан еупчІыгъ: «Сыда пшІагъэр? КъысфэІуат». Арти Ионэтан бэщэу ыІыгъыгъэм ыІэпакІэ шъоум зэрэхигъэуагъэри, ар зэрэзыІуигъэфагъэри къыфиІотагъ. «Ащ пае сыуукІыщтмэ, мары сыхьазырэу сыщыт», – Ионэтан ыІуагъ. 44 Арти Саул къыІуагъ: «СІуагъэр зысымыгъэцэкІэжькІэ сифэшъуашэр Тхьэм сигъэгъотынэу сэ тхьэлъанэ сшІыгъэ. Арышъ, Ионэтан, улІэн фае!» 45 Ау цІыфхэм ащ къыдырагъэштагъэп: «Ионэтан ары непэ текІоныгъэр Израилым къыдезгъэхыгъэр. Ар джы лІэн фая? Ар хъухэнэу щытэп! Зиусхьаныр зэрэщыІэр тэІо. Зы шъхьац налъи ащ ышъхьэ къыхэзынэу щытэп. Тхьэм къызэриІорэм тетэу непэ ар зекІуагъэ». ЦІыфхэм Ионэтан къарагъэтІупщыжьи, псэоу къагъэнагъ. 46 Саул фылистхэм язэожьыгъэп, фылистхэм зыщыпсэухэрэ чІыпІэмэ агъэзэжьыгъ.
Саул заомэ текІоныгъэу къащыдихыгъэхэр
47 Саул Израилым ипачъыхьэ зэхъум ипыйхэу къыкІэлъырысхэм язаощтыгъ. Мэуаб, Іамонхэм, Едом, Цэубэ ипачъыхьэ, фылистхэм зязаом текІоныгъэр къыдихыгъ. Тыдэ зигъэзагъэми, тхьамыкІагъо нэмыкІ къыпыкІщтыгъэп. 48 Идзэ зэтыригъэпсыхьи Іамалэкъхэм язауи атекІуагъ, ахэм яхъункІакІохэм Израил ащиухъумагъ. 49 Саул къуищ иІагъ: Ионэтан, Ишыуй, МэлкъэшыуаІ. Ахэм анэмыкІэу пхъуитІу иІагъ: апэрэр Мэраб, нахьыкІэр Михэл. 50 Саул ишъхьагъусэ ыцІагъэр АхъынэІам, ащ ятагъэр АхъымэІац. Саул дзэпащэу иІагъэр ятэшэу Нэр ыкъо Абинэр. 51 Саул ятэу Къыщрэ Абинэр ятэу Нэррэ Абиел икІэлагъэх. 52 Саул опачъыхьэфэ зэпымыоу фылистхэм язэуагъ. КІэлэ кІочІэшхоу, лІэхъупхъэу ыпэ къифэрэр зэкІэ Саул идзэ хигъахьэщтыгъэх.
Іамалэкъхэм зэрязэуагъэхэр
1 Уахътэ зытешІэм Самуел Саул риІуагъ: «Илъэпкъ, Израил, урипачъыхьэным пае дагъэр къыпщызыфэнэу Зиусхьаным къыгъэкІуагъэр сэры. Арышъ, Зиусхьаным ыдэжь къикІэу къыпфэсхьыгъэ псалъэм джыдэдэм къедэІу. 2 Зиусхьанэу ошъогу дзэхэр зиІэрылъхьэм ыІорэр мары: „Израил къыришІагъэр, Мысырым къикІыжьхэ зэхъум, гъогум тепшъыхьэхи ауж къинэгъэ джуртхэр зэраукІыгъагъэхэр сыгу къэкІыжьыгъэшъ, Іамалэкъ лъэпкъым сыкъыфырехыщт. 3 Арышъ, джы о кІуи Іамалэкъхэм язау, ащыщ гори къэмыгъанэу укІых, хъулъфыгъи, бзылъфыгъи, кІэлэ Іэтахъуи, быдзашъуи, цуи, мэли, махъши, щыди псэоу зыпари къэмыгъанэу зэкІэ зэтеукІэх"». 4 Арти Саул идзэ Тылаим щызэІуигъэкІагъ. Нэбгырэ пчъагъэу зэрэхъурэр къызелъытэм лъэсыдзэр нэбгырэ мин шъитІоу, Ехъудэм къытекІыгъэхэр минипшІ хъухэу къычІэкІыгъ. 5 ЕтІанэ Саул ежьи, Іамалэкъхэм якъалэ нэси, псы игъукІыгъэм ылъэгу щапэтІысыгъ. 6 Ащ ыуж Саул къэнхэм макъэ аригъэІугъ: «ШъуадэсымыгъэкІодыным пае Іамалэкъхэм шъуакъыхэкІыжь, сыда пІомэ израил цІыфхэр Мысырым къикІыжьхэ зэхъум шІукІэ шъуакъыпэгъокІыгъагъ». Арти къэнхэр Іамалэкъхэм къахэкІыжьыгъэх. 7 ЕтІанэ Саул Хъэуил къыщегъэжьагъэу Мысырым игъунапкъэ щыІэ Шыур нэсыжьэу атебани ащыпсэущтыгъэ Іамалэкъхэр зэхикъутагъэх. 8 Іамалэкъхэм япачъыхьэу Агъагъ псэоу къыубыти, лъэпкъыр лъэпсэкІод ышІыгъ. 9 Ау Саулрэ ащ игъусэхэмрэ Агъагъ аукІыгъэп, ащ имэл, ицу анахь дэгъухэр, ишъынэ гъэшхэкІыгъэхэр, нахьышІоу иІэр зэкІэ псэоу къагъэнагъ, агъэкІодынэу фэягъэхэп, ашІомыхъэтагъэхэмрэ былым хьапцэхэмрэ ары ныІэп агъэкІодыгъэр.
Тхьэр Саул пачъыхьэкІэ къызэрэфэмыежьыгъэр
10 Зиусхьаным ыдэжь къикІэу Самуел мыщ фэдэ псалъэ къылъыІэсыгъ: 11 «СыкІэгъожьыгъ Саул пачъыхьэу зэрэтезгъэхьагъэм, сыда пІомэ сыкъыридзэжьырэп». Самуел гухэкІышхом зэлъишти, Саул пае чэщ ренэм зэпымыоу Зиусхьаным елъэІугъ. 12 Самуел пчэдыжьым жьэу къэтэджи Саул зыІуигъэкІэным пае ежьагъ. Арти Саул Ехъуд хэкум ит къалэу Къармэл зэрэкІуагъэри, ежь пае саугъэт ащ зэрэщигъэуцугъэри, етІанэ Гъылгъал зэрэдэхьагъэри Самуел къыраІуагъ. 13 Самуел Саул дэжь къызэсым, Саул ащ къыриІуагъ: «Зиусхьаным ынэшІу къыпщэрэф; Зиусхьаным къыІуагъэр згъэцэкІагъэ». 14 Арти Самуел ащ еупчІыгъ: «Адэ сыд мэл Іой макъа, цу быу макъа стхьакІумэ къыридзэу зэхэсххэрэр?» 15 Саул къыриІожьыгъ: «Ахэр дзэкІолІхэм Іамалэкъхэм къатырахыгъэх. Уи-Зиусхьанэу Тхьэм къурмэн фашІынхэм пае мэл, цу нахь дэгъухэр ахэм къагъанэхи къафыгъэх; адрэхэр зэкІэ тыукІыгъэх». 16 Самуел Саул риІуагъ: «Зэгу, Зиусхьаным нычэпэ къысиІуагъэм къедэІу». Саул къыриІожьыгъ: «КъаІо». 17 Самуел къыІуагъ: «ЗыпшІоцІыкІужьэу узэплъыжьщтыгъэми, израил лъэпкъ пстэумэ уряІэшъхьэтетынэу, Израилым урипачъыхьэнэу Зиусхьаным уакъыхихыгъэба? 18 Зиусхьаным гъогу утыригъахьи къыпфигъэпытагъ: „КІуи, Іамалэкъ псэкІодышІхэр зэкІэ оукІыфэ язау". 19 Сыд пае Зиусхьаным къыуиІуагъэм уемыдэІоу былымхэр къатепхыгъа, Зиусхьаным инэрылъэгъоу бзаджэ пшІагъа?» 20 Саул Самуел къыриІожьыгъ: «Зиусхьаным къыІорэм седэІугъи, Зиусхьаным сыздиІофтагъэм сыкІуи, Іамалэкъхэм япачъыхьэщтыгъэу Агъагъ къэсщагъ, ахэр зэкІэ лъэпсэкІод сшІыгъэх. 21 ДзэкІолІхэр армэ, ахэм къыздафыгъэ былымхэр адрэ тыукІыгъэхэм нахь зишІугъоу ахэтыгъэ мэлхэмрэ цухэмрэ арышъ, уи-Зиусхьанэу Тхьэм ахэр Гъылгъал къурмэн щыфашІыщтых». 22 Арти Самуел къыриІуагъ: «Тара Зиусхьаным нахь игуапэр: къурмэнгъэстхэри нэмыкІ къурмэнхэри фэпшІыныр ара, хьауми ыІорэр бгъэцэкІэныр ара? УдэІоныр къурмэн пшІыным нахьышІу, ыІорэр бгъэцэкІэныр мэлышэм нахьышІу, 23 сыда пІомэ умыдэІоныр шхъухьэ зепхьаныр зэрэпсэкІодым фэд, уапэуцужьынри тхьэ нэпцІхэм уялъэІунри зэфэдэх. Зиусхьаным ыІуагъэр зэрэмыгъэцэкІагъэм пае, Израилым уримыпачъыхьажьынэу Зиусхьаным ущигъэзыягъ». 24 Саул Самуел къыриІожьыгъ: «ПсэкІод сшІыгъэ, Зиусхьаным иунашъорэ о къысэпІуагъэмрэ згъэцэкІагъэхэп, ау цІыфхэм сащыщыни аІорэм дезгъэштагъ. 25 Джы сыолъэІу сипсэкІодшІыгъэ къысфэбгъэгъунэу, Зиусхьаным шъхьакІафэ фэсшІыным пае сыуигъусэу къэбгъэзэжьынэу». 26 Ау Самуел Саул риІожьыгъ: «Сыуигъусэу къэбгъэзэжьыщтэп, Зиусхьаным ыІуагъэр щыбгъэзыягъэшъ, Израилым уримыпачъыхьажьынэу Зиусхьаным ущигъэзыягъ». 27 ЕтІанэ Самуел ІукІыжьынэу фежьагъ. Ау Саул кІэлъыбани, джэнэ ІэпакІэр къыІэкІэфагъэти, щыгъыныр зэІитхъыгъ. 28 Арти Самуел къыриІуагъ: «Джы Зиусхьаным Израилым къыщыуитыгъэгъэ пачъыхьагъур пІэкІитхъыжьыгъ, къыппэблэгъэ ощ нахьышІу цІыф горэм ар ритыгъ; 29 Израилым и-Щытхъузехьэ мышъыпкъэ гори ыІощтэп, ыІорэм пае кІэгъожьыщтэп, сыда пІомэ цІыфэп ар кІэгъожьынэу». 30 Саул къыриІожьыгъ: «ПсэкІод сшІагъэ, ау джы силъэпкъ инахьыжъ упчІэжьэгъухэмрэ Израилымрэ апашъхьэ уасэ къыщысфэшІ, зэдэтэгъэзэжьи уи-Зиусхьанэу Тхьэм шъхьащэ фэсшІын». 31 Арти Самуел Саул ыуж итэу къыгъэзэжьыгъ, Саул Зиусхьаным шъхьащэ фишІыгъ. 32 ЕтІанэ Самуел къыІуагъ: «Іамалэкъхэм япачъыхьэу Агъагъ къысфашъущ». КІэзэззэ, Агъагъ ащ къыкІэрыхьи, къыІуагъ: «Хьадэгъу дыджым сыпэІуфэгъаха?» 33 Ау Самуел риІуагъ: «Уичатэ ныхэм ясабыйхэр зэрашІуигъэкІодыщтыгъэхэм фэдэу, о уяни зыкъо зышІуагъэкІодыгъэ бзылъфыгъэмэ афэдэ орэхъу». Самуел ар къыІуи, Зиусхьаным инэрылъэгъоу Агъагъ Гъылгъал щызэхиупкІэтагъ. 34 ЕтІанэ Самуел Рамэ къыгъэзэжьыгъ, Саул ядэжь, ГъыбІэ, кІожьыгъэ. 35 Джащ къыщегъэжьагъэу Самуел олІэжьыфэ ащ нахьыбэрэ Саул ІукІэжьыгъэп; ау Самуел Саул ыгу фэузыщтыгъ. Израилым ипачъыхьанэу Саул зэрэтыригъэхьагъэм пае Зиусхьаным ыгу егъущтыгъ.
Даут пачъыхьэнэу ышъхьэ дагъэ зэрэщафагъэр
1 Зиусхьаным Самуел къыриІуагъ: «Саул пае джыри бэрэ угумэкІыщта? Сыфэмыежьэу Израилым ипачъыхьагъу ІэнатІэ ащ Іысхыжьыгъ. Дагъэр бжъэм игъахъуи осэІофтэшъ Бэтлэхъэм дэс Ищай дэжь кІо, ащ икІалэмэ ащыщ пачъыхьэ хъунэу Сэ къахэсхыгъ». 2 Арти Самуел ыІуагъ: «Сыдэущтэу сыкІощта? Саул къэбарыр зызэхихкІэ сиукІыщт». Зиусхьаным къыІуагъ: «ШкІэ горэ зыдещажьи, Зиусхьаным къурмэн фэпшІ пшІоигъоу узэрэкІуагъэр яІу. 3 Ищай къурмэным къегъэблагъ. Ащ ыуж о пшІэщтыр Сэ къыозгъэлъэгъунышъ, къахэсхыщтым ышъхьэ дагъэ щыпфэщт». 4 Зиусхьаным къызэрэриІуагъэм тетэу Самуел зекІуагъэ. Ар Бэтлэхъэм къызэсым, къалэм дэс нахьыжъ упчІэжьэгъухэр гумэкІым зэлъиштагъэхэу зыкъыІуагъакІи къеупчІыгъэх: «ГухэлъышІу уиІэу укъэкІуагъа?» 5 Самуел къариІожьыгъ: «Ары, гухэлъышІу сиІэу, Зиусхьаным къурмэн фэсшІынэу сыкъэкІуагъ. Хабзэм тетэу зышъуукъэбзи, къурмэным тызэдекІолІэщт». ЕтІанэ Самуел Ищайрэ икІалэхэмрэ апае Зиусхьаным шІукІэ афелъэІуи, къурмэным къыригъэблэгъагъэх. 6 Ахэр къурмэншІыпІэм къызекІуалІэхэм, Елыаб ыкъо Ищай зелъэгъум Самуел ыгукІэ зэриІожьыгъ: «Мырын фае Зиусхьаным къахихыгъэр». 7 Ау Зиусхьаным Самуел къыриІуагъ: «Елыаб илъэгагъэрэ итеплъэрэ зыдямыгъэхьых. Сэ ар зыпыздзыгъ. Зиусхьаныр зэреплъырэр цІыфыр зэреплъырэм фэдэп. ЦІыфхэр теплъэм дехьыххэмэ, Зиусхьаныр гум еплъэ». 8 Ащ ыуж Ищай Абинэдау къеджи Самуел зырещалІэм, Самуел къыриІуагъ: «Хьау, мыри Зиусхьаным къыхихыгъэп». 9 ЕтІанэ Ищай Щам Самуел зырещалІэм, «Хьау, мыри Зиусхьаным къахихыгъэп» къыриІуагъ. 10 Джаузэ Ищай икІэлибл зырызэу Самуел зырещалІэхэм, «Мыхэм ащыщ зыпари Зиусхьаным къыхихыгъэп» ыІуи, Самуел къыриІуагъ. 11 ЕтІанэ Самуел Ищай еупчІыгъ: «УикІалэхэр зэкІэ мыщ щыІэха?» Ищай къыриІуагъ: «АнахьыкІэ дэдэр къэнагъ, ар мэлахъо щыІ». Арти Самуел ащ риІуагъ: «ЛъыгъакІохи къягъэщэжь, ар мыщ къэмысыжьэу тытІысэу къурмэнылым тыхэІэщтэп». 12 Ищай кІэлэ нахьыкІэм лъигъакІохи къаригъэщэжьыгъ. Ар бжьышІоу, къуапцІэу, ынитІуи дахэу къэгъэтхъыхьагъэу къычІэкІыгъ. Джащ дэжьым Зиусхьаным Самуел къыриІуагъ: «Джарышъ къахэсхыгъэр, тэджи дагъэр ышъхьэ щыф». 13 Самуел дагъэр зэрыт бжъэр къышти, ышхэр зэрэщытхэу ащ ышъхьэ дагъэр щифагъ. Джащ къыщегъэжьагъэуи, ащ ыужи Зиусхьаным и-Псэ Даут къылъыІэс зэпытыгъ. Самуел Рамэ, ядэжь, къыгъэзэжьыгъ.
Даут Саул зэрэфэлэжьагъэр
14 Зиусхьаным и-Псэ Саул къыбгынагъэти, Зиусхьаным фэІорышІэрэ джынапцІэр ыгу къыщышхэщтыгъ. 15 ИІумэтхэм Саул къыраІуагъ: «Тхьэм фэІорышІэрэ джынапцІэр угу къыщэшхэшъ, 16 тизиусхьан ыпашъхьэ ит иІумэтхэм унашъо къытферэшІи, пхъонтэпщынэм дэгъоу къеорэр къыфэдгъэсынышъ, Тхьэм фэІорышІэрэ джынапцІэр угу къыщышхэ зыхъукІэ, ІапэхэмкІэ къыпфеозэ, уигъэрэхьатыжьыщт». 17 Арти Саул иІумэтхэм ариІуагъ: «Пхъонтэпщынэм дэгъоу ео горэ къэжъугъоти къысфашъущ». 18 Мыщ дэжьым иІумэтхэм ащыщ горэм къыІуагъ: «Пхъонтэпщынэм еошъоуи, лІэхъупхъэуи, зэолІ пхъашэуи, жэбзэ дахи Іулъэу, лъэгъупхъэуи, Зиусхьаныр игъусэу Бэтлэхъэм щыщ Ищай зы кІалэ горэ иІэу сэшІэ». 19 Арти Саул мэкъэгъэІухэр Ищай дэжь ыгъакІохи раригъэІуагъ: «Мэлхэр зыгъэхъурэ уикІалэу Даут садэжь къэгъакІу». 20 Арти Ищай хьалыгъу, санэр зэрыз шъонтыр щыдым тырилъхьэхи, зы чыцІ кІигъэгъужьи, икІалэу Даут Саул ыдэжь ыгъэкІуагъ. 21 Даут Саул дэжь къакІуи фэлэжьагъ. Саул Даут лъэшэу ыгу рихьыгъэти, иашъоджэнэзехьэу ыгъэнэфагъ. 22 Арти Саул Ищай дэжь ыгъакІохи раригъэІуагъ: «Даут садэжь къэрэни къулыкъур щерэхь, сыда пІомэ нэшІукІэ сэ ащ сеплъыгъ». 23 Тхьэм фэІорышІэрэ джынапцІэм Саул щыхьагъу къызишІкІэ, Даут пхъонтэпщынэр къыштэти, къыфеощтыгъэ, Саул ыгу къыдищаети, изытет нахьышІу хъущтыгъэ, джынапцІэри ащ шъхьащыкІщтыгъэ.
Даут Голиат зэрэтекІуагъэр
1 Фылистхэм заом зыкъыфагъэхьазыри, ядзэхэр Ехъудэм ит псэупІэу Сэхэу къыщызэІуагъакІэхи, Сэхэурэ Іазэкърэ азыфагу къыдафэу Афэсдамым дэжь пщыпІэ щашІыгъ. 2 Саулрэ израил цІыфхэмрэ загъэхьазыри чъыгэе кІэир уцупІэу къыхахыгъ, фылистхэм апэшІуекІорэ заом зыфагъэхьазырыгъ. 3 Фылистхэр зы бгъумкІэ Іуашъхьэм къытеуцуагъэх, израил цІыфхэри ащ пэчІынэтІэ Іуашъхьэм, кІэир азыфагоу, къыщыуцугъэх. 4 ЕтІанэ Голиат ыцІэу, Гъат щыщ бэнакІоу, метри 3 ехъу зилъэгагъэр фылистхэм къахэкІотыгъ. 5 Джэрз танджыр, пцэжъыепІон теплъэ зиІэу зэхэдэгъэ джэрз ашъоджанэу килограмм 60 фэдиз горэ зионтэгъугъэр ащ щыгъыгъэх; 6 ылъашъхьэмэ къащегъэжьагъэу ылъэгуанджэхэм хьазырэу къанэсэу джэрз тедэхэр яІагъэх, джэрзым хэшІыкІыгъэ пчыпыджын кІэкІыр ыкІыб къыкъощыщтыгъ. 7 ИпчыпыджыныкІ лІы къызэрыкІом ыІапшъэкІэ умыубытышъунэу гъумыгъэ, гъучІ пчыпыджынышъхьэм ионтэгъугъэ килограмми 7 хъущтыгъэ. Голиат имэІузехьэ ыпэ итэу къакІощтыгъ. 8 Голиат къэуцуи израил цІыфхэм ядзэ къекууагъ: «Сыд пае шъукъэзэонэу шъукъэуцугъа? Сэ сыфылистба, шъо Саул шъузэриунэІутыр шъушІэрэба? Зы нэбгырэ къызхэжъугъэкІи къысэжъугъэзау. 9 Джар къысэзэошъоу, сыкъызиукІкІэ, тэ тышъуипщылІыщт. Ау сэ ежь сытекІоу, зысыукІкІэ, шъо шъутипщылІыщт, шъукъытфэлэжьэщт». 10 ЕтІани фылистым къариІуагъ: «Сэ непэ израил дзэхэр хьайнапэ сшІыщтых! ТитІо тызэзэонэу цІыф къызхэжъугъэкІ!» 11 Фылистым къыІуагъэхэр зызэхахым, Саули зэкІэ израил цІыфхэри лъэшэу къыгъащтэхи, щынэгъошхом зыІэкІиубытагъэх.
Даут Саул иуцупІэ зэрэкІуагъэр
12 Даут ятэщтыгъэр ефрат лъэпкъым къыхэкІыгъэ Ищай. Ар Ехъудэм ит къалэу Бэтлэхъэм щыпсэущтыгъ. Ащ кІэлий иІагъ. Саул ипачъыхьэгъум ар лІыжъы хъугъэу анахь алъытэрэ нахьыжъхэм ащыщыгъ. 13 Ищай икІэлэ нахьыжъищ Саул заом дежьагъэх. Анахьыжъыр Елыаб, къыкІэлъыкІорэр – Абинэдау, ящэнэрэр – Щам. 14 Даут зэшхэм анахьыкІагъ. Зэш нахьыжъищыр Саул дежьагъэх. 15 Даут Саул дэжь къикІыжьзэ, чэзыу-чэзыукІэ Бэтлэхъэм дэс ятэ имэлхэр ыгъэхъунхэм пае къакІощтыгъ. 16 Фылистыр къахэкІзэ мэфэ тІокІитІум ипчэдыжьи ипчыхьи къахэкІотти, израил цІыфхэм апашъхьэ къиуцоти, езэонхэу къяджэщтыгъ. 17 Зы мафэ горэм Ищай ыкъо Даут риІуагъ: «Килограмм 15 фэдиз горэ хъунэу лэжьыгъэ гъэгъугъэрэ хьалыгъуипшІрэ зыдаштэхи, дзэр зыдэщытым дэжь кІуи, пшыхэм афэхь. 18 Ахэм ягъэгъусэжьых къое хьалипшІыр, пшыхэр зыхэт дзэм идзэпащэхэм ахэр ятых. Пшымэ япсэуныгъэ изытети, яфэныкъуагъэхэми, яІоф зыфэдэми ишъыпкъапІэ сшІэным пае сыд щыщми зыгорэ къысфыздахь». 19 Саули, ахэри, израилыдзэри зэгъусэхэу чъыгэе кІэим щыІэхэу фылистхэм язэонхэу загъэхьазырщтыгъэ. 20 Даут пчэдыжьым жьэу къэтэджи, имэлхэм нэмыкІ мэлахъо къапигъэуцуи, ыгъэхьазырыгъэр къыздишти Ищай къыриІогъэ чІыпІэм кІуагъэ. Дзэр зыдэщыт чІыпІэм зынэсым, зэрэгъэкуохэзэ етІупщыгъэу зэоным зыфагъэхьазырщтыгъэ. 21 Израил цІыфхэмрэ фылистхэмрэ ясатырэхэр зэпэІууцуагъэх. 22 Даут къыхьыгъэхэр ІапІэхэм апэтыгъэ къэрэгъулым къыфыщинэхи, дзэкІолІхэр зыдэщыт лъэныкъомкІэ ечъэжьагъ. Зынэсым ышхэм япсэуныгъэ изытет кІэупчІагъ. 23 Ар ахэм адэгущыІэзэ, Гъат щыщ фылист бэнакІоу Голиат фылистхэм къахэкІоти, джа къыІощтыгъэхэр джыри къыІохэу зырегъажьэм, Даут къызэхихыгъ. 24 Израил цІыфхэм а лІыр къызэралъэгъоу, лъэшэу къыгъэщынагъэхэти, къыкІатхъужьыгъ. 25 Мыщ дэжьым израил цІыфхэм зэраІожьыщтыгъэ: «Шъолъэгъуа мо лІэу къахэкІотыгъэр? Джар къызкІахэкІотыгъэр Израилым Іэягъэхэр къыриІолІэнхэм пае. Ар зыгорэм ыукІмэ, пачъыхьэм мылъкушхо ащ ритыщт, ипшъашъи ригъэщэщт, ятэ иунагъо хьакъулахьхэр римыгъэтхэу, шъхьафитэу Израилым щигъэпсэущт». 26 Арти Даут къыкІэрыт цІыфхэм яупчІыгъ: «Мы фылистыр зыукІэу, Израилым ынапэ зыукъэбзыжьыщтым сыд шъуІуи фашІэщтыр? Сыда зыщыщыр сунэт амышІыгъэ мо фылистэу Тхьэу щыІэм идзэ шІоигъэхэр къезыІуалІэрэр?» 27 Ар зыукІрэм фашІэщтыр зыфэдэр цІыфхэм Даут къыфаІотагъ. 28 Даут ышнахьыжъэу Елыаб ышнахьыкІэ цІыфхэм зэрадэгущыІэрэр къыззэхехым къэгубжи, Даут къыриІуагъ: «Сыда мыщ укъызкІэкІуагъэр, хэта мэл тІэкІур шъофнэкІым къызфыщыунагъэри? О зыкъызэрэпшІошІыжьрэми угу зэрэшІойми дэгъоу сащыгъуаз, зэрэзэзэощтхэм уеплъынэу укъэкІуагъ». 29 Даут къыриІожьыгъ: «СызэряупчІыгъэм нэмыкІэу мыхъун горэ сшІагъа?» 30 Ар къыІуи, зыдыригъэзэкІи, къакІэрытыгъэ горэм а упчІэ дэдэр зыретым, къызэхэзыхыгъэхэм апэ къыраІогъагъэр къаІожьыгъ. 31 Даут къыІуагъэхэр Саул зыраІожьхэм, адрэм къылъигъакІохи аригъэщагъ. 32 Даут Саул риІуагъ: «Ащ пае хэти орэмыгумэкІ, уиІумэт кІонышъ фылистым езэощт». 33 Арти Саул Даут риІуагъ: «А фылистым о уезэон пфэлъэкІыщтэп, сыда пІомэ джыри укІэлащ, адрэр икІэлэгъум къыщегъэжьагъэу зэолІ». 34 Даут Саул риІожьыгъ: «УиІумэт ятэ имэлхэр ыгъэхъущтыгъэхэти, аслъан е мышъэ горэ къахахьэу Іэхъогъум хэт мэлхэм ащыщ зырихьыжьэкІэ, 35 ащ сылъежьэти сыкІахьэщтыгъэ, сытебанэти, ыжэ дэлъэу ыхьырэр къытесхыжьыщтыгъ. КъызыстебэнэжькІэ ытхыцІашъо зыхэзгъанэти исыутщтыгъэ, стхьалэщтыгъэ; 36 Арышъ, уиІумэт аслъанми мышъэми затекІуагъэкІэ, сунэт амышІыгъэ мо фылистми джар дэдэр есшІэн, сыда пІомэ Тхьэу щыІэм идзэ ынапэ ащ тырехы». 37 ЕтІани Даут къыІуагъ: «Аслъанми мышъэми сащызыухъумэгъэ Зиусхьаным а фылистми сыщиухъумэщт». Арти Саул Даут риІуагъ: «КІо, Зиусхьаныр гъусэ къыпфэхъу». 38 Арти Саул идзэ шъуашэ Даут зыщыригъэлъагъ, джэрз танджыр шъхьащилъагъ, ашъоджанэри зыщыригъэлъагъ. 39 Даут чатэр щыгъынхэм акІыІу къышІыжьи, тезэкІухьагъ, сыда пІомэ ащ фэдэ Іэшэ-шъуашэхэр зыщилъэхэу есэгъагъэп. ЕтІанэ «Мыхэр сщыгъхэу сесагъэпышъ, зызгъэзэшъурэп», – Даут Саул риІуи, зыщырагъэлъагъэхэр зэкІэ къызщихыжьыгъэх. 40 ЕтІанэ ибэщ къыштэжьи, псы игъукІыгъэм ылъэгу мыжъо джэшъуитф къыхихи, имэлэхъо Іалъмэкъ рилъхьагъэх. Мыжъодзыр ыІэдакъэу фылистым езэонэу ежьагъ. 41 Фылистри Даут дэжькІэ къежьагъ, имэІузехьэ ащ ыпэ итыгъ. 42 Фылистыр къаплъи Даут къызелъэгъум, пхъатэ зыпимыхьэу къеплъыгъ, сыда пІомэ ар ныбжьыкІэу, къуапцІэу, бжьышІоу щытыгъ. 43 Фылистым Даут къыриІуагъ: «Бэщыжъ цІыкІухэр уиІэдакъэу укъыспэгъокІынэу сыхьа сэ?» Ащ тетэу фылистыр ежь итхьэмэ ацІэкІэ Даут къебгыгъ. 44 ЕтІанэ фылистым Даут къыриІуагъ: «КъысэкІуалІ уихьадэ ошъогу бзыухэмрэ шъофым ис хьэкІэ-къуакІэхэмрэ ястыжьыщтышъ». 45 Даут фылистым риІожьыгъ: «О чатэр, пчыпыджынышхор, пчыпыджын кІэкІыр уиІэдакъэхэу укъыспэгъокІыгъэмэ, сэ Зиусхьанэу ошъогу дзэхэр зиІэрылъхьэм, Израилым идзэмэ я Тхьэу, Іаягъэхэр къызэпІолІагъэм ыцІэкІэ сыкъыппэгъокІыгъ. 46 Джы Зиусхьаным сІэ укъырилъхьащтышъ, усыукІыщт, пшъхьэ шІосхынышъ, фылистхэм ядзэкІолІхэми яхьадэхэр ошъогу бзыухэмрэ чІым тет хьэкІэ-къуакІэхэмрэ ястыжьынхэшъ, Израилым Тхьэ зэриІэр зэрэдунаеу щызэлъашІэщт. 47 ЕтІанэ мы цІыф жъугъэмэ къашІэщт Зиусхьаным чатэмрэ пчыпыджынымрэкІэ укъызэримыухъумэрэр, сыда пІомэ мыр Зиусхьаным изаошъ, Ащ шъо тІэ шъукъырилъхьащт». 48 Ащ ыуж фылистыр къезэонэу Даут ыдэжькІэ къызежьэм, Даут фылистым ылъэныкъокІэ псынкІэу ечъэжьагъ. 49 Даут иІалъмэкъ иІэбэжьи мыжъор къырихыгъ, мыжъодзым дилъхьи, ыгъэчэрэгъу-ыгъэчэрэгъуи, зы къуапэр къытІупщи, фылистым ынатІэ тыригъэпсыхьи еуагъ. Арти ащ ынатІэ мыжъом пхыриути, ыІу егъэзыхыгъэу чІым къытыригъэфагъ. 50 Джащ тетэу Даут мыжъомрэ мыжъодзымкІэрэ фылистым текІуи ыукІыгъ; ау Даут чатэ ыІыгъыгъэп. 51 Ар дэдэм Даут фылистым ечъалІи, теуцуи, ащ ичатэ чэталъэм къырихи, еуи ышъхьэ шІуиупкІыгъ. ЯбэнакІо къызэраукІыгъэр къызалъэгъум, фылистхэм кІатхъужьыгъ. 52 Арти израил ыкІи ехъудэ дзэкІолІхэм зыкъаІати, зэрэгъэкуохэзэ фылистхэр рафыжьэхи, кІэим икъыдэхьапІэ, Іэкърэн икъэлапчъэмэ анэс, афыжьыгъэх. ЗыкІэхьэгъэхэ фылистхэр Гъатрэ Іэкърэнрэ азыфагу илъ ЩэІараим гъогум тыраукІыхьагъэх. 53 ЕтІанэ израил цІыфхэу фылистхэр езыфыжьагъэхэм къагъэзэжьи, ахэм яуцупІэщтыгъэр зэрапхъуагъэ. 54 Даут ыукІыгъэ фылистым ышъхьэ къыздишти, Ерыусэлэм къыхьыгъ. Ащ иашъоджанэ ежь ичэтэнгъэІагъэ щигъэтІылъыгъ.
Даут Саул къызэрэфащагъэр
55 Даут фылистым езэонэу зэрежьагъэр Саул зелъэгъум, дзэм ипащэу Абинэр еупчІыгъ: «Абинэр, мо кІалэр хэта зыкъор?» Абинэр къыриІожьыгъ: «Упсэ бэ егъашІ, пачъыхь, ар сшІэрэп». 56 Арти пачъыхьэм ыІуагъ: «Ащыгъум къызэгъашІ а кІалэр зыкъор». 57 Даут фылистым текІуагъэу къыгъэзэжьыгъэу къэкІожьзэ, Абинэр ащ екІуалІи Саул дэжь къыщагъ; фылистым ышъхьэ ащ ыІыгъыгъ. 58 Саул ащ къеупчІыгъ: «Хэта узыкъор, кІалэ?» Даут къыриІожьыгъ: «Бэтлэхъэм щыщ уиІумэтэу Ищай сырикІал».
Ионэтанрэ Даутрэ Іуагъэ зэрэзэдашІыгъэр
1 Даутрэ Саулрэ язэдэгущыІэн заухым, Ионэтан ыпсэ Даут ыпсэ хэтІагъэ хъугъэ, ежь ыпсэ фэдэу Ионэтан ар шІу ылъэгъугъ. 2 Саул а мафэм Даут ятэ дэжь кІожьынэу фидагъэп. 3 Ионэтан Даут гъусэ зэрэфэхъурэмкІэ Іуагъэ дишІыгъ, сыда пІомэ ежь ыпсэ фэдэу ар шІу ылъэгъугъ. 4 Арти Ионэтан ищыгъын кІыІутелъ къызщихи Даут ритыгъ, джащ фэдэу иашъоджани, ичати, ищабзи, ибгырыпхи ритыгъэх. 5 Ащ ыуж Саул Даут тыдэ ыгъэкІуагъэми, акъылыгъэ хэлъэу зекІощтыгъэ. Саул ар дзэкІолІхэм Іэшъхьэтет зафешІым, цІыф пстэуми Саул иунэІутхэми агу рихьыгъ. 6 Даут фылист бэнакІом текІуагъэу къагъэзэжьыгъэу къэкІожьхэ зэхъум, бзылъфыгъэхэр орэдхэр къаІохэзэ, къашъохэзэ, пачъыхьэу Саул Израилым икъэлэ пстэумэ къыщапэгъокІыгъэх, ищытхъу аІозэ, гушІогъошхо хэлъэу шъонтырыпхэмрэ нэмыкІ пщынэ Іэмэ-псымэ зэфэшъхьафхэмрэ къяощтыгъэх. 7 Орэдхэр къэзыІозэ къашъощтыгъэ бзылъфыгъэхэр къыхэкуукІыщтыгъэх: «Саул нэбгырэ минхэм атекІуагъэмэ, Даут нэбгырэ минипшІхэм атекІуагъ!» 8 Саул ащ лъэшэу къыгъэгубжыгъ, зэхихыгъэхэр имыгуапэу ыгукІэ зэриІожьыгъ: «Даут минипшІхэр ратхи, сэ минхэр къысапэсыгъэмэ, пачъыхьагъур ары ныІэп джы ар зыщыкІэжьрэр». 9 А мафэм къыщегъэжьагъэу Саул цыхьэ ымышІэу Даут лъыплъэщтыгъ.
Саул Даут ыукІынэу зэрэфэягъэр
10 КъыкІэлъыкІогъэ мафэм Тхьэм фэІорышІэрэ джынапцІэм Саул къыригъэзыгъэти, иунэ исэу зишхыхьажьщтыгъэ. Адрэ мафэхэм зэришІщтыгъэ хабзэу, Даут пхъонтэпщынэм къеощтыгъэ. Саул пчыпыджыныр ыІыгъыгъэти, 11 «Даут дэпкъым хезгъэІулІэн», – ыІуи ыгукІэ зэриІожьи, пчыпыджыныр ыдзыгъ. ГъогогъуитІо зеом Даут зиуфэзэ, ар зытыригъэфагъэп. 12 Арти Саул Даут щыщынэу ригъэжьагъ, сыда пІомэ Зиусхьаныр Даут игъусагъ, ау Зиусхьаным Саул къыбгынэгъагъ. 13 Саул Даут ынэІу ригъэкІи, нэбгырэ мин хъурэ дзэкІолІ купым пащэу фишІыгъэти, Даут дзэкІолІхэр къэзэонхэу ыщэщтыгъэх. 14 Даут сыд фэдэрэ Іоф фежьагъэми, акъылым рыгъуазэщтыгъэ, Зиусхьаныр ренэу ащ игъусагъ. 15 Даут акъылым зэрэрыгъуазэрэр Саули ылъэгъущтыгъэ, джащ къыхэкІэуи щыщынэщтыгъэ. 16 Ау зэрэ Израилэуи Ехъуди Даут шІу ащалъэгъущтыгъэ, сыда пІомэ апэ итэу зэонхэу ыщэщтыгъэх.
Даут Саул ыпхъу къызэрищагъэр
17 Ащ ыуж Саул Даут риІуагъ: «Мары спхъу нахьыжъэу Мэраб, уишъхьагъусэнэу къыостыщт, ау укъысфэшъыпкъэу лІыхъужъэу къулыкъур сфэпхьыщт, Зиусхьаным ыцІэкІэ зао». Ау ежь егупшысыгъ: «Сэ сымыукІэу фылистхэм ар къарэукІ». 18 Ары шъхьае Даут Саул къыриІуагъ: «Сыд гущ сэ, цІыф лъэрыхьэмэ сащымыщэуи, тиунагъокІи Израилым тыщызэлъамышІэуи пачъыхьэм махълъэ сыфэхъун слъэкІына?» 19 Ау Саул ыпхъу Мэраб Даут зыригъэщэнэу щытыгъэ пІалъэр къызэсым Мыхъолат щыщ Іадриел ар дагъэкІуагъ. 20 Саул иадырэпхъоу Михэл Даут шІу къылъэгъугъ. А къэбарыр Саул зырагъэІум, гуапэ щыхъугъ. 21 Саул егупшысыгъ: «Ар ащ зыдэзгъакІокІэ, тІэсхъапІэ фэхъунышъ, фылистхэм аІэкІэкІодэпэн». ЕтІанэ Саул Даут риІуагъ: «Махълъэ укъысфэхъунэу уфаемэ, ятІонэрэу джыри амал уиІ». 22 Ащ ыуж Саул иІумэтхэм унашъо афишІыгъ: «Даут шъэфэу шъудэгущыІи ешъуІу: „Пачъыхьэм ыгу узэрэрихьрэми, ащ иІумэтхэм зэкІэми шІу узэралъэгъугъэми еплъ. Пачъыхьэм махълъэ фэхъу"». 23 Саул иІумэтхэм Даут ар зыраІом, Даут къариІожьыгъ: «Пачъыхьэм уримэхълъэныр псынкІагъокІэ шъогугъа? Сэ сыбаеп, сыцІэрыІоп». 24 Даут ыІуагъэр иІумэтхэм Саул зынагъэсыжьым, 25 Саул ахэм ариІуагъ: «Даут сфешъуІожь пачъыхьэм ипыйхэм яфэшъуашэр ягъэгъотыжьыгъэным пае фылист нэбгыришъэм яукІытапІэхэу къыпыуипкІыгъэхэм анэмыкІ пшъэшъэ уасэу пачъыхьэр зэрэфэмыер». Фылистхэм аІэкІэ Даут зэригъэкІодыщтыр ары Саул зэгупшысщтыгъэр. 26 Саул иІумэтхэм ариІуагъэр Даут зынагъэсым, пачъыхьэм имахълъэ хъун зэрилъэкІыщтыр ащ лъэшэу игуапэ хъугъэ. ПІалъэу агъэнэфагъэр къэмысзэ, 27 Даут ицІыфхэр игъусэхэу кІуи, фылист нэбгырэ шъитІу къыукІыгъ. Ахэм яукІытапІэхэр къапиупкІхи, имахълъэ хъуным тегъэпсыхьагъэу пачъыхьэм къыфихьыгъэх. Арти Саул ыпхъу Михэл ащ дигъэкІуагъ. 28 Джащ тетэу Зиусхьаныр Даут зэригъусэри, ыпхъу Михэл ар шІу зэрилъэгъури инэрылъэгъузэ Саул къырыкІуагъ. 29 Джащ къыхэкІэуи Саул Даут нахьи нахь лъэшэу щыщынэу хъугъэ, ежь опсэуфэ ар ыгъэпыигъ. 30 Фылист дзэпащэхэр зэонэу къежьэхэ къэси, Саул идзэ къулыкъушІэ пстэумэ анахь акъылышІоу Даут ренэу зекІощтыгъэти, ищытхъу дахэ чыжьэу Іугъэ.
Саул Даут къаигъэ зэришІыгъэр
1 Джащ ыуж Саул ыкъо Ионэтани зэкІэ иІумэтхэми Даут агъэлІэнэу ариІощтыгъэ; ау Саул ыкъо Ионэтан Даут шІу дэдэ ылъэгъущтыгъэ. 2 Арти Ионэтан Даут риІуагъ: «Тятэу Саул уигъэкІод шІоигъошъ, неущ зыфэсакъыжь, зы чІыпІэ шъэф горэм зыщыгъэбылъ. 3 ЧІыпІэу шъофым зызщыбгъэбылъыгъэм тятэрэ сэррэ тызэгъусэу тыкІонышъ, сыпфыдэгущыІэщт, ащ ыуж къызэзгъэшІагъэм ущызгъэгъозэщт». 4 ЕтІанэ Ионэтан ятэу Саул Даут игугъу дахэкІэ фишІыгъ: «Пачъыхьэм иІумэтэу Даут ыгу рерэмыгъабгъ, сыда пІомэ угу зэрэфыхэкІын зыпари мыхъун ащ ышІагъэп, ышІэрэ пстэуми уифедэ ахэлъ шъыпкъ. 5 Фылист бэнакІом текІоным пае ыпсэ еблэжьыгъэп, Зиусхьаными зэрэ-Израилэу къыухъумагъ; ор дэдэми уинитІукІэ ар плъэгъугъэти, уигушІогъошхуагъ. Адэ сыда джы лажьи хьакъи зимыІэм ылъ умыгъачъэмэ, Даут умыгъэкІодмэ мыхъунэу узкІыпыхьагъэр?» 6 Арти Саул Ионэтан риІуагъэм едэІуи, тхьэлъанэ ышІыгъ: «Зиусхьаныр зэрэщыІэр сэІо, Даут псэущт». 7 Ащ ыуж Ионэтан Даут къеджи а гущыІэ дэдэхэр риІожьыгъэх. ЕтІанэ Ионэтан Саул дэжь Даут къыщи, ыпэкІэ зэрэщытыгъэу джыри фэлажьэщтыгъэ. 8 ЕтІанэ заор икІэрыкІэу къызежьэм, Даут фылистхэм апэуцужьи, хьалэч зэхишІыхьэхи, кІаригъэІэжьыгъ. 9 ИкІэрыкІэу Тхьэм фэІорышІэрэ джынапцІэр Саул къытебэнагъ. Пчыпыджыныр ыІыгъэу иунэ ар исыгъ. Даут ыІапэхэр пхъонтэпщынэм ригъачъэхэзэ, ащ къыфеощтыгъэ. 10 Саул пчыпыджынымкІэ Даут дэпкъым хыригъэІулІэнэу фэягъ, ау Саул ар къызедзым, Даут Саул кІэлъырылъэти, пчыпыджыныр дэпкъым хисагъ. Арти Даут а чэщым ышъхьэ рихьыжьэжьи, ыпсэ къыухъумагъ. 11 Даут иунэ лъыплъэнхэм, къаубытынышъ, нэф къырамыгъэкІэу аукІыным пае Саул иІофтабгэхэр Даут ядэжь ыгъэкІуагъэх. Даут ишъхьагъусэу Михэл илІ риІуагъ: «Нычэпэ пшъхьэ зыщымыгъэзыекІэ, неущ уаукІыщт». 12 Михэл ар риІуи, Даут шъхьангъупчъэмкІэ унэм ригъэкІи, ар хэхьажьыгъ, псэоуи къэнэжьыгъ. 13 Михэл тхьэ нэпцІым исурэт къышти пІэм хилъхьагъ, пчэнышъор ышъхьэ тырихъуи, ыфэпагъ. 14 Саул иІофтабгэхэр Даут къаубытынэу зегъакІохэм, «Ар сымадж», – ыІуи, Михэл къариІуагъ. 15 Даут къеплъынхэу Саул иІофтабгэхэр джыри ыгъэкІуагъэх. «СыукІыщтышъ, пІэм зэрэхэлъэу ар къысфэшъухь», – ариІуагъ: 16 Арти иІофтабгэхэр зэкІохэм тхьэ нэпцІым исурэтэу пчэнышъор зышъхьэ телъыр пІэм къыхагъотагъ. 17 ЕтІанэ Саул Михэл риІуагъ: «Сыд пае сыбгъэпцІагъа, сипый птІупщыжьи зебгъэгъэбылъыжьыгъа?» Михэл Саул къыриІожьыгъ: «СымытІупщмэ сиукІынэу къызысеІом сигъэщынагъ».
Даут Самуел Рамэ зэрэщыІукІагъэр
18 Даут ышъхьэ Іуихыжьи, Самуел дэжь, Рамэ, кІуи, Саул къыришІагъэр зэкІэ фиІотагъ. ЕтІанэ Самуел игъусэу ежьэхи, Рамэ ичІыпІэу Нэуат кІуагъэх. 19 «Даут Рамэ ичІыпІэу Нэуат кІуагъэ» аІуи, Саул къэбар къыфахьыгъ. 20 Арти Саул Даут къаубытынэу иІофтабгэхэр ыгъэкІуагъэх. Самуел зипэщэ тхьэлІыкІохэу Тхьэм кІочІэ лыеу къахилъхьагъэм зэлъиштагъэхэр, Тхьэм къыбгъодэкІырэ псалъэхэр къэзышІхэрэр, Ащ ищытхъу зыІуатэхэрэр ахэм алъэгъугъ. Ардэдэм Саул иІофтабгэхэми Тхьэм и-Псэ къахахьи, Тхьэм кІочІэ лыеу къахилъхьагъэм зэлъиштэхи, Тхьэм къыбгъодэкІырэ псалъэхэр къашІэу, Ащ ищытхъу аІуатэу хъугъэх. 21 Хъурэм икъэбар Саул зынагъэсыжьым, нэмыкІ иІофтабгэхэр джыри ащ ыгъэкІуагъэх. Ау ахэри Тхьэм кІочІэ лыеу къахилъхьагъэм зэлъиштэхи, Тхьэм къыбгъодэкІырэ псалъэхэр къашІэу, Ащ ищытхъу аІуатэу хъугъэх. ЕтІани Саул иІофтабгэхэр ящэнэрэу зегъакІохэм, ахэри Тхьэм кІочІэ лыеу къахилъхьагъэм зэлъиштэхи, Тхьэм къыбгъодэкІырэ псалъэхэр къашІэу, Ащ ищытхъу аІуатэу хъугъэх. 22 Арти ежь Саул Рамэ кІуагъэ, кІозэ, Сэхыу дэт псынэкІэчъышхом зынэсым кІэупчІагъ: «Самуелрэ Даутрэ тыда зыдэщыІэхэр?» «Рамэ ичІыпІэу Нэуат щыІэх», – аІуи къыраІожьыгъ. 23 Ар Рамэ ичІыпІэу Нэуат зэкІом, Тхьэм и-Псэ къылъыІэси, Рамэ ичІыпІэу Нэуат омыкІофэ зэримыхэбзагъэу, Тхьэм кІочІэ лыеу къыхилъхьагъэм зэлъишти, Тхьэм къыбгъодэкІырэ псалъэхэр къышІэу, Ащ ищытхъу ыІуатэу хъугъэ. 24 Ащ зитІэкІыгъ, Самуел ыпашъхьэ зэритзэ, Тхьэм кІочІэ лыеу къыхилъхьагъэм зэлъишти, Тхьэм къыбгъодэкІырэ псалъэхэр къышІэу, Ащ ищытхъу ыІуатэу хъугъэ. А мафэми къыкІэлъыкІогъэ чэщми мыфэпагъэу ар щылъыгъ. «Адэ Саул тхьэлІыкІоныр зипшъэрылъ цІыфхэм джы ащыщ хъугъа?» джары зытыраІукІыгъэр.
Ионэтан Даут зэригъэныбджэгъугъэр
1 Даут Рамэ ичІыпІэу Нэуат къыбгыни, Ионэтан дэжь къакІуи къеупчІыгъ: «Сыда сшІагъэр, тара сызэрэмысэр, сыда уятэ къызкІысфэмыразэр, сыда спсэ къызкІылъыхъурэр?» 2 Ионэтан къыриІожьыгъ: «Хьау, ар угу къимыгъахь, о улІэщтэп, сыда пІомэ сэ сыщимыгъэгъуазэу тятэ зыпари ышІэрэп. Сыд пая тятэ а Іофыр зыкІысшІуиушъэфын фаер? Ар хъун Іофэу щытэп». 3 Даут тхьэлъанэ ышІызэ къыІуагъ: «УгукІэ укъызэрэсфэщагъэр уятэ дэгъоу ешІэшъ, ежь-ежьырэу зэреІожьы: „Ионэтан ыгу къемыоным пае ымышІэмэ нахьышІу". Ау Зиусхьаныр зэрэщыІэр сэІо, упсэ зэрэщыІэм фэдэу, мы къасІорэр шъыпкъэ: сэррэ хьадэгъумрэ тызэрэзэпэчыжьэр лъэбэкъу закъу ныІэп». 4 «УгукІэ узфаер зэкІэ къыпфэсшІэщт» ыІуи, Ионэтан Даут зыреІом, 5 Даут Ионэтан къыриІожьыгъ: «Неущ мэзакІэр къызэрихьэрэр агъэмэфэкІыщтышъ, пачъыхьэм зы Іанэ сыдыпэсын фае. Ау ащ емылъытыгъэу сытІупщи, зызгъэбылъынышъ, ящэнэрэ мафэм ипчыхьэ нэс зыкъэзгъэлъэгъощтэп. 6 ЗыгорэкІэ уятэ къыскІэупчІэмэ, еІу: „Даут илІакъо зэрэщытэу илъэс къурмэн ешІыти, къалэу Бэтлэхъэм кІо шІоигъоу къысэлъэІугъ". 7 „Дэгъу" къызыуиІожькІэ, уиІумэт иІоф мамырыщт; ау ар къызыгубжкІэ, гухэлъ бзаджэ зэрэрихъухьагъэр оркІэ гъэнэфагъэ. 8 Арышъ, уиІумэт унэшІу къыщыгъаф, Зиусхьаныр тишыхьатэу оррэ сэррэ гъусэ тызэрэзэфэхъугъэмкІэ Іуагъэ зэдэтшІыгъ, ау лажьэ горэ сиІэмэ, о сыукІ нахь, сыд пае уятэ дэжь сыпщэна?» 9 Ионэтан къыриІожьыгъ: «Ар о къыохъулІэхэщтэп. Тятэ бзэджагъэ горэ ыгу риубытагъэу зыгорэкІэ дасшІэмэ, къэбарыр осымыгъашІэ хъуна?» 10 Даут Ионэтан риІуагъ: «Уятэ пхъашэу къыбдэгущыІэжьмэ, хэта къэбарыр сэзгъэшІэщтыр?» 11 «НекІо, хашъом тигъахь», – ыІуи, Ионэтан Даут зыреІом, тІури зэгъусэу хашъом зехьэхэм, 12 Ионэтан Даут риІуагъ: «Израилым и-Зиусхьанэу Тхьэр зэрэщыІэр сэІо! Тятэ сыІуупчІыхьанышъ, неущ мы уахътэм ехъулІэу е неущмыкІэ нэс ыгу илъыр къезгъэІощт. Ар ыгукІэ Даут фэшІоу къэбар зэрэщыІэр къыпфясымгъэхьынэуи, зэхэосымгъэхынэуи? 13 Тятэ ыгу шІу къызэрэпфимылъыр сшІагъэу къэбарыр къызыплъысымыгъэІэскІэ, Ионэтан ифэшъуашэр Зиусхьаным рерэгъэгъот, нахьыбэжьи къырерэшІ. Ар аущтэу зыхъукІэ, устІупщыжьынба, узфаем усымыгъэкІонэуи? Зиусхьаныр тятэ зэригъусагъэм фэдэу ори уигъусэнэу сыпфэлъаІо. 14 Ау сэ джыри сыпсэунэу щытмэ, Зиусхьаным игукІэгъу ори къысфэшІ. 15 Сэ сыщымыІэжьми, Даут ипый пстэури Зиусхьаным чІым тыригъэкІодыкІыгъэхэми, егъашІэми сиунагъо гукІэгъу къыфэшІ». 16 Джащ тетэу Даут иунагъо Іуагъэ зыдешІыхэм, Ионэтан къыІуагъ: «Ори уиунагъуи Іуагъэу зэдэтшІыгъэр зышъумыгъэцакІэкІэ, Зиусхьаным шъуифэшъуашэ зэпстэуми шъуигъэгъотыщт». 17 Даут шІу зэрилъэгъурэмкІэ икІэрыкІэу Ионэтан тхьэлъанэ ышІыгъ, сыда пІомэ ыпсэ фэдэу ар икІэсагъ. 18 ЕтІанэ Ионэтан ащ риІуагъ: «Неущ мэзакІэу къихьэрэм имэфэкІыщтышъ, уищысыпІэ нэкІ зыхъукІэ, къыпкІэупчІэщтых. 19 Арышъ, ящэнэрэ мафэм зызщыбгъэбылъщтыгъэ чІыпІэм псынкІэу къекІужьи, укъамылъэгъунэу мыжъошхо горэм ыкъогъу къотІысхьи зыгъэбылъ. 20 Сэ псагъэ горэм тезгъафэ сшІоигъом фэдэу а лъэныкъомкІэ щэбзищ къэстІупщыщт. 21 „КІуи, щабзэхэр къэгъотыжьых", – сІонышъ, кІэлэцІыкІур сІофтэщт. „Щабзэхэр уакІыбкІэ щылъхэшъ, къэштэжьых" кІэлэцІыкІум зесІокІэ, къыскІэрыхь; ащ къикІрэр уиІофхэр мамырэу ары, Зиусхьаныр зэрэщыІэр сэІо, мыхъун гори къыохъулІэщтэп. 22 „Щабзэхэр уапэкІэ щыІэх" кІэлэцІыкІум зесІокІэ, пшъхьэ щыгъэзый, сыда пІомэ Зиусхьаным уиутІупщыжьыгъэу ащ къекІы. 23 АдыкІэ оррэ сэррэ зэтІуагъэм Зиусхьаныр егъашІэм фэшыхьат». 24 Ащ ыуж Даут хашъом зыщигъэбылъыгъ. МэзакІэу къихьагъэм имэфэкІ къэсыгъэти, пачъыхьэр Іанэм пэтІысхьагъ. 25 Зэрихабзэу пачъыхьэр дэпкъым кІэлъырыт тетІысхьапІэм тесыгъ. Ионэтан ащ пэчІынатІэу щысыгъ. Абинэр Саул кІэрытІысхьагъ; Даут итІысыпІэ нэкІыгъэ. 26 Даут мэфэкІым зыфимгъэхьазырыгъэу, зимыукъэбзыгъэу къышІошІыгъэти, Саул а мафэм зыпари ыІуагъэп. 27 МэзакІэу къихьагъэм имэфэкІ иятІонэрэ мафэ къэсыгъ, ау Даут итІысыпІэ джыри нэкІыгъэ. Арти Саул икІалэу Ионэтан еупчІыгъ: «Сыда Ищай ыкъо тыгъуасэ Іанэм къызызкІыдыпэмысыгъэр, непи къызкІэмылъэгъуагъэр?» 28 Ионэтан Саул риІожьыгъ: «Бэтлэхъэм кІожь шІоигъоу Даут къысэлъэІуи, зысигъэтІупщыгъ. 29 Ащ къысиІуагъ: „ТиунагъокІэ мэфэкІ къурмэн къалэм щэтэшІышъ сытІупщыгоба, сши сыригъэблэгъагъ; нэшІукІэ укъысэплъымэ, сыкІонышъ, сшыхэр къызэзгъэлъэгъущтых"; джары ар пачъыхьэм Іанэм зыкІыдыпэмытІысхьагъэр». 30 Ар зызэхехым, Саул лъэш дэдэу Ионэтан фэгубжи риІуагъ: «Шъуз мыхъатэм къылъфыгъ! Ори укъэзылъфыгъэу уяни шъунапэ тырихэу Ищай ыкъо зэрэбгъэныбджэгъурэр сымышІэу къыпшІошІа? 31 Ищай ыкъо дунаим тетыфэ ори уипачъыхьагъуи ащ шъупэлъэшыжьышъущтэп. Джы ащ лъыгъакІохи къягъащ, сыда пІомэ ихьадэгъу къэсыгъ». 32 ЕтІанэ Ионэтан ятэу Саул зыфигъази еупчІыгъ: «Сыд пае ар аукІын фая? Сыда ащ ышІагъэр?» 33 Арти Ионэтан ыукІ шІоигъоу Саул пчыпыджынымкІэ ащ зеом, Даут ыукІынэу ятэ зэрэрихъухьагъэр Ионэтан къыгурыІуагъ. 34 Ионэтан ыгу Даут фэузыщтыгъэти, яти лъэшэу ыгу хигъэкІыгъагъэти, губжыпагъэу Іанэм къыпэкІыжьи, мэзакІэм имэфэкІэу къихьагъэм иятІонэрэ мафэ Іанэм къекІолІагъэп. 35 КъыкІэлъыкІогъэ мафэм пчэдыжьым зыфиІогъэгъэ уахътэм тефэу Ионэтан хашъом кІуагъэ. КІэлэцІыкІури ащ игъусагъ. 36 КІалэу игъусэм ащ риІуагъ: «СтІупщырэ щабзэхэм чъи къалъыхъу». КІалэр зечъажьэм ащ шъхьарыкІынэу щабзэхэр ежь ытІупщыщтыгъэх. 37 Ионэтан щэбзащэхэр зыдитІупщыгъэ лъэныкъомкІэ кІалэр зечъажьэм Ионэтан ащ кІэлъыджагъ: «Щабзэр уапэкІэ зэрэщылъыр олъэгъуа?» 38 Ионэтан джыри кІалэм кІэлъыджагъ: «Укъэмыуцоу псынкІэу чъэ!» КІалэм Ионэтан ищабзэхэр къыугъоижьхи, изиусхьан къекІолІэжьыгъ. 39 КІалэм къэбар гори ышІэщтыгъэп; Ионэтанрэ Даутрэ ныІэп Іофыр зытетым щыгъозагъэхэр. 40 ЕтІанэ Ионэтан игъусэгъэ кІалэм иІашэ ритыжьи риІуагъ: «Къалэм кІожь, мыхэр зыдэхьыжьых». 41 КІалэр зыІокІыжьым Даут мыжъо къогъум икъыблэ лъэныкъокІэ къыкъокІи ынэІу егъэзыхыгъэу чІым зытыридзи гъогогъуищэ шъхьащэ къышІыгъ; тІури зэбэугъэх, тІури гъыгъэх, ау Даут нахь лъэшэу гъыгъэ. 42 Ионэтан Даут риІуагъ: «Зыгъэрэхьати кІо, „Ори, сэри, силІакъуи, уилІакъуи Зиусхьаныр тазыфагу ерэт" тІуи, Зиусхьаным ыцІэкІэ тІуми тхьэлъанэу тшІыгъэр егъашІэм къэрэнэжь».
Даут хьалыгъу лъапІэр къызэрэратыгъэр
1 Даут къэтэджи ІукІыжьыгъ, Ионэтан къалэм къыгъэзэжьыгъ. 2 Даут къалэу Нэу дэсыгъэ къурмэнышІэу Ахъымэлэх дэжь кІуагъэ. Даут къызелъэгъум Ахъымэлэх къэщтагъэу къеупчІыгъ: «Сыда зыкІыуизакъор, зыгорэ зыкІыуимыгъусэр?» 3 Арти Даут къурмэнышІэу Ахъымэлэх риІуагъ: «Пачъыхьэм Іоф горэм сыфигъази, сызфигъакІори пшъэрылъэу къысфишІыгъэри хэти ышІэ мыхъунэу къысиІуагъ. Джащ пае, етІанэ тыщызэІукІэжьынэу, сигъусэ кІалэхэр чІыпІэ горэм згъэкІуагъэх. 4 Къысэптын плъэкІынэу зыгорэ пІэкІэлъа? Хьалыгъуитф горэ е къэбгъотрэ щыІэмэ къысэт». 5 Арти къурмэнышІым Даут риІожьыгъ: «Хьалыгъу къызэрыкІо къэсштэнэу щыІэп, щыІэр Тхьэм фагъэуцугъэ хьалыгъу лъапІэр арышъ, уицІыфхэр бзылъфыгъэ кІымыгъугъэхэмэ, ашхы хъущт». 6 Даут къурмэнышІым къыриІожьыгъ: «Мэфэ заулэ хъугъэу, гъогу тыкъызтехьагъэм къыщегъэжьагъэу, тихабзэ тетэу кІалэхэр апкъкІэ къабзэх. Тинепэрэ гухэлъ имэхьанэ зэрэиным елъытыгъэу, хабзэмкІэ ахэр къэбзэнхэ фае». 7 ЕтІанэ къурмэнышІым Тхьэм фагъэуцугъэ хьалыгъу лъапІэр ащ къыритыгъ, нэмыкІ щыІагъэп. Хабзэу щыІагъэмкІэ, Тхьэм фагъэуцугъэ хьалыгъу лъапІэм ычІыпІэ Ащ ыпашъхьэ нэмыкІ хьалыгъу фабэ ибгъэуцожьын фэягъэ. 8 Саул иІумэтхэм ащыщэу, Саул иІахъохэм яІэшъхьэтетэу, едом лъэпкъым къыхэкІыгъэ Дэукъ Зиусхьаным пае гухэлъ иІэу а мафэм ащ щыІагъ. 9 Даут Ахъымэлэх еупчІыгъ: «Пчыпыджынми чатэми къысэптынэу зыгорэ уиІэба? Пачъыхьэм иунашъо псынкІэу згъэцэкІэн фэягъэти, чатэми е нэмыкІ Іашэ горэми къыздэсштэнэу игъо сифагъэп». 10 КъурмэнышІым къыриІожьыгъ: «Чъыгэе кІэим узщытекІогъэ фылистэу Голиат ичатэ щыгъынхэм акІоцІыщыхьагъэу мыжъогъозэсыным ыкІыб дэтышъ, уфаемэ, джар штэ нахь, ащ нэмыкІ гори мыщ щыІэп». Даут къыІуагъ: «Ащ фэдэ щыІэпышъ, къаштэ».
Даут Гъат шъхьэегъэзыпІэкІэ зэрэкІуагъэр
11 А мэфэ дэдэм Даут Саул зышІуигъэбылъи Гъат ипачъыхьэу Ахыщ дэжь кІуагъэ. 12 Арти иІумэтхэм Ахыщ къыраІуагъ: «Модрэ хэгъэгум ипачъыхьэу Даутба мыр? „Саул минхэм атекІуагъ, Даут – минипшІхэм" аІомэ, къашъохэзэ, мырба орэд къызфаІуагъэр?» 13 А гущыІэхэр Даут ыгу риубытагъэхэу щытти, Гъат ипачъыхьэу Ахыщ лъэшэу щыщынагъ. 14 А чІыпІэм Даут иІуплъэ зэблихъуи, делашъо къызтыригъауи, зэрмырэу зыкъаригъэлъэгъугъ, пчъэхэр зэхицІалэхэу, Іупсыр ыжакІэ тыригъэтІатІэу ригъэжьагъ. 15 Ахыщ иІумэтхэм ариІуагъ: «Шъулъэгъурэба ащ ышъхьэ зэрэзэІыхьагъэр, сыд пае къысфэшъущагъа? МакІа делэу сэ сиІэр мыр къысфэшъумыщэмэ мыхъунэу, сапашъхьэ делагъэхэр щишІэнхэм пая? Адэ джы мыр сэ къыскІэрысыщта?»
КъурмэнышІхэр зэраукІыгъэхэр
1 Ащ ыуж Даут Гъат къыбгыни Іэдулам гъочІэгъым зыщигъэбылъыгъ. А къэбарыр ышхэмрэ ятэ иунэ исхэмрэ алъыІэсыгъэти, зэрагъэлъэгъунэу ыдэжь къэкІуагъэх. 2 Къинихьагъу зиІэхэр зэкІэ, чІыфэм зэлъиштагъэхэр, зыгу кІодыгъэхэр ащ ыдэжь къакІохи, ахэм яІэшъхьэтет хъугъэ. Нэбгырэ шъиплІ фэдиз зэкІэмкІи гъусэ ащ къыфэхъугъ. 3 ЕтІанэ Даут а чІыпІэр къыбгыни, Мэуаб ит къалэу Мыцпэ кІуи, мэуаб пачъыхьэм елъэІугъ: «Тхьэм къысипэсыгъэр зэсэгъэшІэфэ, сятэрэ сянэрэ уадэжь сфыщыгъаІэхэгоба». 4 Ащ ыуж ахэр мэуаб пачъыхьэм дэжь къыщэхи, Даут пытапІэм зыщегъэбылъыфэ щыІагъэх. 5 ТхьэлІыкІоу Гъад Даут къыриІуагъ: «Мы пытапІэм ащ нахьыбэрэ удэмысыжьэу, ежьи Ехъуд хэгъэгум кІо». Арти Даут ежьи, Хъэрэт мэзым нэсыгъ. 6 Даутрэ игъусэхэмрэ къызэрэсыгъэхэм икъэбар Саул зэхихыгъ. А уахътэм Саул ГъыбІэ щыІагъ, пчыпыджыныр ыІэдакъэу, изэолІхэр къегъэуцокІыгъэхэу чъыгэе чІэгъым ар чІэсыгъ. 7 Арти изэолІэу игъусагъэхэм Саул ариІуагъ: «Бынямин кІэлэжъхэр, шъукъэдаІолъ зэ: лэжьыгъэшІапІэхэри сэнэшъхьэлэжьыпІэхэри Ищай ыкъо къышъуитынхэшъ, дзэкІолІ мин ыкІи шъэ зырызхэр шъуІэ къырилъхьащтха? 8 Джащ пая зэкІэми шъукъыспекІонэу шъузкІызэгохьагъэр? Ищай ыкъорэ сикІалэрэ гъусэ зэрэзэфэхъугъэхэмкІэ Іуагъэ зэрэзэдашІыгъэм икъэбар шъуащыщ горэми сигъэшІагъэп. Джы къызэрэнафэрэмкІэ, шъуащыщ горэми ыгу къысэгъугъэп, сикІалэ сиунэІут къысигъэбэныжьынэу зэрэфежьагъэм икъэбар шъуащыщ горэми сыхигъэгъозагъэп». 9 Едом лъэпкъым щыщэу, Саул иІумэтхэм яІэшъхьэтетмэ ащыщэу Дэукъ къыІуагъ: «Нэу дэс Ахъытыу ыкъо Ахъымэлэх дэжь Даут къызэрыкІогъагъэр сэ слъэгъугъэ. 10 Арти ащ иІоф къырыкІощтымкІэ Зиусхьаным еупчІи, гъомлапхъэхэмрэ фылистэу Голиат ичатэрэ къыритыгъэх». 11 Ащ ыуж пачъыхьэм ыгъакІохи, Ахъытыу ыкъо къурмэнышІэу Ахъымэлэх, ащ иунагъо зэрэщытэу, Нэу дэс къурмэнышІхэр зэкІэ къэкІонхэу унашъо афишІыгъэти, ахэр зэкІэ пачъыхьэм дэжь къэкІуагъэх. 12 Саул къыІуагъ: «Ахъытыу ыкъу, мо къэдаІу». Арти адрэм къыриІожьыгъ: «СыкъэдаІо, сизиусхьан». 13 Саул ащ риІуагъ: «Сыд пае оррэ Ищай ыкъорэ шъукъыспекІоу шъузэрэгъэІушыжьыгъэха, хьалыгъухэмрэ чатэмрэ ептыгъэха, иІоф къырыкІощтымкІэ Тхьэм уеупчІыгъа? Непэ къызэрэнафэрэмкІэ, къысэбэнынэу, сэ къыспэшІуекІоу зыкъиІэтынэу арба?» 14 Ахъымэлэх пачъыхьэм джэуап къыритыжьыгъ: «УиІумэтмэ ащыщэу Даут фэдэу хэта о нахь къыпфэшъыпкъэр? Ар пачъыхьэм имахълъэба, къыпфэсакъырэ цІыфхэм яІэшъхьэтетба, уиуни лъытэныгъэшхо щыфашІыба? 15 Джыра ащ иІоф къырыкІощтымкІэ Тхьэм сызеупчІыгъэр? Хьау, пачъыхьэр, уиІумэти тибынхэри зэкІэ умыгъэмысэх, сыда пІомэ уиІумэт зыпарми щыгъуазэп». 16 Ау пачъыхьэм къыриІуагъ: «Ахъымэлэх, ори уибынхэми зэкІэми хьадэгъур джы къышъуфэкІуагъ». 17 ЕтІанэ пачъыхьэм ухъумакІоу иІагъэхэм унашъо афишІыгъ: «ШъукІуи, Зиусхьаным икъурмэнышІхэр шъуукІых, сыда пІомэ ахэр Даут готых, ар зэрэхэхьажьыгъэр ашІэзэ, къэбар къыслъагъэІасыгъэп». Ау пачъыхьэм иІумэтмэ Зиусхьаным икъурмэнышІхэр аукІынхэу, ахэм аІэ атыращэенэу фэягъэхэп. 18 Арти пачъыхьэм Дэукъ риІуагъ: «КІуи, къурмэнышІхэр укІых». Едом лъэпкъым къыхэкІыгъэ Дэукъ кІуи, къурмэнышІхэм атебэнагъ, чэтэнІабгъур зыбг пыпхэгъэ хъулъфыгъэ тІокІиплІрэ тфырэ а мафэм ыукІыгъ; 19 КъурмэнышІхэм якъалэу Нэу чатэр щигъэхъушІагъ; хъулъфыгъэхэри, бзылъфыгъэхэри, кІэлакІэхэри, сабый быдзашъохэри, цухэри, щыдхэри, мэлхэри чатэкІэ зэтыриукІагъэх. 20 Псэоу къэнэжьыгъэ закъор Ахъытыу ыкъо Ахъымэлэх икІалэу Абыетарти, Даут дэжь ар чъэжьыгъэ. 21 Зиусхьаным икъурмэнышІхэр Саул зэраригъэукІыгъэхэм икъэбар Абыетар Даут риІотэжьыгъ. 22 Арти Даут Абыетар риІуагъ: «Едом лъэпкъым къыхэкІыгъэ Дэукъ а мафэм ащ зыщэсэлъэгъум къэбарыр Саул зэрэнигъэсыжьыщтыр сшІагъэ. Шъуибынхэм апсэ зэрагъэгъугъэр сэ силажь. 23 О садэжь къанэ, умыщын, сэ спсэ къылъыхъущтыр ары ныІэп о упси къылъыхъущтыр; мыщ ущыІэмэ, оркІэ щынагъо щыІэщтэп».
Даут къалэу КъыІил пыйхэм зэращиухъумагъэр
1 Ащ ыуж Даут макъэ къырагъэІугъ: «Фылистхэр КъыІил къытебэнагъэх, хьамэщым телъыр зэкІэ тыращы». 2 Арти Даут Зиусхьаным еупчІыгъ: «СыкІощта, а фылистхэм сатекІощта?» Ащ лъыпытэу Зиусхьаным Даут къыриІожьыгъ: «КІо, фылистхэм уатекІонышъ, КъыІил къэуухъумэщт». 3 Ау Даут игъусагъэхэм къыраІуагъ: «Мыщ, Ехъудэм, тызэрэщыІэу тэщынэмэ, КъыІил тыкІонышъ, фылистмэ ядзэхэм сыдэущтэу тапэуцужьыщта?» 4 Арти Даут джыри Зиусхьаным зеупчІым, Зиусхьаным къыриІожьыгъ: «Тэджи КъыІил кІо, фылистхэр Сэ о пІэ къислъхьащтых». 5 ЕтІанэ Даут ицІыфхэр игъусэхэу ежьи, КъыІил кІуагъэ. фылистхэм язауи ябылымхэр къызатырехым, ахэр зэхихьаджыхьэхи, КъыІил дэсхэр Даут псэоу къыгъэнэжьыгъэх. 6 Ахъымэлэх ыкъо Абыетар Даут дэжь КъыІил къызэкІом, мыжъогъуазэр къыздихьыгъагъ. 7 ЕтІанэ Даут КъыІил къызэрэсыгъэм икъэбар Саул зынагъэсым, Саул ыІуагъ: «Тхьэм ар сІэ къырилъхьагъ, сыда пІомэ къэлапчъэхэмрэ сэххэмрэкІэ зэтегъэпытыхьэгъэ къалэм дахьи, ащ зыдишІыхьажьыгъ». 8 КъыІил зэлъекІунхэшъ, Даутрэ игъусэхэмрэ ащ къыдамыгъэкІхэу даубытэнхэм пае, Саул зэрэхэгъэгоу заом рищэжьагъ. 9 Даут Саул игухэлъ бзаджэ зыфэдэр къызешІэм, къурмэнышІэу Абыетар риІуагъ: «Мыжъогъуазэр къахь». 10 Даут къыІуагъ: «Израилым и-Зиусхьанэу Тхьэр! Сэщ нахь хэмылъэу КъыІил къэкІонышъ, ар зэрипхъонэу Саул гухэлъ зэришІыгъэм икъэбар уиІумэт зэхихыгъ. 11 Сэррэ сигъусэхэмрэ КъыІил дэсхэм Саул тыІэкІалъхьащта? УиІумэт къэбар къызэрэлъыІэсыгъэм фэдэу Саул мыщ къэкІощта? Израилым и-Зиусхьанэу Тхьэр! УиІумэт къэбарым щыгъэгъуаз». Арти Зиусхьаным ащ къыриІуагъ: «КъэкІощт». 12 ЕтІанэ Даут еупчІыгъ: «КъыІил дэсхэм сэррэ сигъусэхэмрэ Саул тыІэкІалъхьащта?» «ШъуІэкІалъхьащт» ыІуи, Зиусхьаным къыриІожьыгъ. 13 Ащ ыуж Даути нэбгырэ шъих фэдиз хъоу игъусагъэхэми КъыІил къабгыни, зызщагъэбылъын лъыхъухэу нэмыкІ чІыпІабэ къызэпакІухьагъ. Даут КъыІил къызэрибгынагъэм икъэбар Саул зылъагъэІэсым, игухэлъ зэблихъужьыгъ.
Даут шъофнэкІэу Зиф зызэрэщигъэбылъыгъэр
14 Даут шъофнэкІым ит пытапІэм, шъофнэкІэу Зиф къэзыуцухьэрэ къушъхьэлъэ хэкум защигъэбылъщтыгъ. Саул мафэ къэс ащ лъыхъущтыгъэ, ау Тхьэм Даут ащ къыІэкІигъэхьагъэп. 15 Ыпсэ ыгъэгъунэу Саул ыуж къызэрихьагъэм Даут щыгъуазэти, Хъорыш пэмычыжьэу шъофнэкІэу Зиф итыгъ. 16 ЕтІанэ Саул ыкъо Ионэтан Даут дэжь, Хъорыш, къакІуи Тхьэр гугъэпІэшхоу зэрэщытымкІэ шІошъхъуныгъэ ригъэшІи, 17 къыриІуагъ: «Умыщын, сыда пІомэ сятэу Саул о къыплъыІэсыщтэп, оры Израилым ипачъыхьащтри, уаужкІэ сэры ятІонэрэщтыр; сятэу Саули ащ щыгъуаз». 18 Ащ ыуж ахэм Зиусхьаныр яшыхьатэу Іуагъэ зэдашІи, Даут Хъорыш къани, Ионэтан ядэжь кІожьыгъэ. 19 ЕтІанэ Зиф щыщхэр Саул дэжь, ГъыбІэ, къакІохи къыраІуагъ: «ШъофнэкІым ит пытапІэу тадэжькІэ щыІэм, Ещымон икъыблэкІэ щыІэ Іуашъхьэу Хъахыл, Даут зыщегъэбылъы. 20 О узщыфаем, пачъыхьэр, кІо, тэ тиІофыр ар пачъыхьэм ыІэ къидгъэхьаныр ары». 21 Саул ахэм ариІуагъ: «Шъугу къызэрэсфэгъурэм пае Зиусхьаным ынэшІу къышъущэф. 22 ШъукІуи джыри зэ жъугъэунэфы, илъэужхэр къыхэжъугъэщых, зылъэгъугъэхэм шъуяупчІ, сыда пІомэ ар тхьагъэпцІэу къэбархэр зэхэсэхы. 23 Зызщигъэбылърэ чІыпІэхэр зэкІэ къызэжъугъашІи, къэбар шъыпкъэр къысфэшъухьыжьи, сыжъудежьэщт. А лъэныкъом ар щыІэу къычІэкІмэ, ехъуд унагъо пэпчъ ащ сыщылъыхъущт». 24 Ащ ыуж ахэр къэтэджыжьхи, Саул нахьи нахь пасэу ахэр Зиф нэсыгъэх. А уахътэм Даутрэ игъусэхэмрэ Ещымон икъыблэ лъэныкъокІэ щыІэ шъофнэкІэу МэІон зыщагъэбылъщтыгъэ. 25 ЕтІанэ Саулрэ игъусэ цІыфхэмрэ лъыхъунхэу ащ ыуж ихьагъэх. Ау Даут макъэ рагъэІугъэти, шъофнэкІэу МэІон къымыбгынэу, ащ ит къушъхьэм дэкІоягъ. Саул ар зызэхехым, Даут шъофнэкІэу МэІон къыщиубытынэу лъежьагъ. 26 Саул къушъхьэм иадырабгъукІэ щыІагъ, Даутрэ игъусэхэмрэ мыдрэ бгъумкІэ зыщагъэбылъщтыгъэ. Саул ІэкІэкІхэмэ ашІоигъоу, Даутрэ игъусэхэмрэ гузэжъогъу хэтхэу, елъэкІонщтыгъэх. Даутрэ игъусэхэмрэ къаубытынхэм пае, Саулрэ кІыгъухэмрэ ахэм абгъукІэ къадаухьэщтыгъэ. 27 Ащ тефэу Саул дэжь мэкъэгъэІу горэ къакІуи къыриІуагъ: «ПсынкІэу къэс нахь, фылистхэр тичІыгу къибэнагъэх». 28 Арти Саул Даут ыуж икІыжьи, фылистхэм апэгъокІыгъ. Джары а чІыпІэм Сэлэ-Гъамэхълэкъоф, ЗыщзэбгъодэкІыжьыгъэхэ къушъхьэр, зыфиІорэр цІэу зыкІыфаусыгъэр.
Даут Саул ищыІэныгъэ къызэригъэнэжьыгъэр
1 ЕтІанэ Даут а чІыпІэр къыбгыни, зэкІолІэгъуаеу щыт къушъхьэлъэ чІыпІэу Іэнгъэдый щыІагъ. 2 Саул фылистхэм язауи къызегъэзэжьым, «Даут зэкІолІэгъуаеу щыт къушъхьэлъэ чІыпІэу Іэнгъэдый щыІ» аІуи, къэбар къынагъэсыгъ. 3 Арти зэрэ-Израилэу ис хъулъфыгъэмэ анахь кІочІэшхоу нэбгырэ минищ зэригъэгъуси, Даутрэ ащ кІыгъухэмрэ къыгъотынхэу Пчэн Іэлхэм якъушъхьэ пцІанэкІэ заджэхэрэм Саул кІуагъэ. 4 КІохэзэ, гъогунапцэм Іутыгъэ чэтым дэжь къызыщэуцухэм, Саул щагу щикІынэу гъочІэгъым чІэхьагъ. Даутрэ игъусэхэмрэ а гъочІэгъым ыпхачІэ зыщагъэбылъщтыгъэ. 5 Арти игъусэхэр Даут къеІушъэшъагъэх: «„Уипый Сэ пІэ къислъхьанышъ, узфаер ащ епшІэщт" къызэрэуиІогъагъэм фэдэу, уиІоф Зиусхьаным къыригъэкІыгъ». Даут къэтэджи, цІыкІу-цІыкІоу Саул ищыгъын кІыІутелъ ыІэпакІэ къыпигъэчъыгъ. 6 Саул ищыгъын ІэпакІэ къызэрэпигъэчъыгъэм Даут ыгу къыгъэлъэпэрэпагъ. 7 Арти игъусэхэм ариІуагъ: «ТилІышъхьэпащэ, Зиусхьаным пачъыхьэнэу къахихыгъэм, сІэ тесщаемэ, Зиусхьаным къысфигъэгъунэп, сыда пІомэ ар Зиусхьаным пачъыхьэнэу къахихыгъ». 8 Даут игущыІэхэмкІэ игъусэхэр ыгъэІасэхи, ахэр Саул тыригъэбэнагъэхэп. Саул къэтэджыжьи, гъочІэгъым къычІэкІыжьи гъогум къытехьажьыгъ. 9 Ащ ыуж Даути къэтэджи, гъочІэгъым къычІэкІи, Саул къыкІэлъыджагъ: «Сизиусхьанэу пачъыхьэр!» Саул къызызэплъэкІым, Даут ынэІу егъэзыхыгъэу чІыгум зытыридзи, шъхьащэ фишІыгъ. 10 Даут Саул риІуагъ: «„Даут гухьагужъ къыфыриІ" къыозыІорэмэ сыда узкІядэІурэр? 11 Мары непэ плъэгъугъэ гъочІэгъым укъызчІэхьэм Зиусхьаным сІэ укъызэрэрилъхьэгъагъэр; усыукІынэуи къысаІогъагъ, ау псэоу укъэзгъэнэжьыгъ. Сэр-сэрэу зэсІожьыгъ: „ТилІышъхьэпащэ сІэ тесщэенэп, сыда пІомэ Зиусхьаным ар пачъыхьэнэу къахихыгъ". 12 Тят! Уищыгъын ІэпакІэу къыпысыупкІыгъэр зэрэсІыгъыр олъэгъуба, ау усыукІыгъэп: сыгу бзэджагъэ зэримылъри мыхъун зэрэсымышІагъэри зэгъашІэ, пшІошъи гъэхъу. О зэрар пфэхъунэу зыпари сшІагъэп, ау о спсэ хэпхынэу гухэлъ зыфэпшІыжьыгъэу сауж уит. 13 Арышъ, сэрми орми зафэр Зиусхьаным зэхифын, къинэу о сэбгъэлъэгъугъэр Зиусхьаным уигъэпщыныжьын; ау сІэ къыптесщэещтэп. 14 Ижъырэ къэбарыжъым зэрэхэлъэу, „Хабзэ зыхэмылъхэр ары хэбзэнчъагъэр къызпыкІрэр". Ау сэ сІэ къыптесщэещтэп. 15 Хэта Израилым ипачъыхьэ зэзэощтыр? Хэта зыуж уитыр? Сэ сауж уитынри хьэ лІагъэм, бжыдзэ закъом ауж уитынри зэфэдэ. 16 Зиусхьаныр хьыкум орэхъу, орми сэрми зафэр Ащ зэхифын. СиІоф Ар хэплъэнышъ, къызэхифыщт, ори сыпщиухъумэщт». 17 Саул фэгъэзагъэу Даут къыІощтыр къызеухым, Саул къыІуагъ: «О умакъа зэхэсхырэр, сикІалэу Даут?» Саул ымакъэ нахь лъэш къэхъуи, къэгъыгъ. 18 ЕтІанэ ащ Даут риІуагъ: «Сэщ нахьи о унахь заф, сыда пІомэ шІукІэ укъыспэгъокІыгъ, сэ къыппэзгъохыгъэр бзэджагъ; 19 Зиусхьаным пІэ сыкъызырелъхьэм, сэщ пае гукІэгъушхоу къызхэбгъэфагъэмкІэ непэ ар о къэуушыхьатыгъ – сыуукІыгъэп. 20 Хэта зипый къызІэкІэхьэгъахэу шІукІэ ар зытІупщыжьщтыгъэр? Непэ о сэ къысфэпшІагъэм ипэгъокІэу Зиусхьаным шІу къыпферэшІэжь. 21 Арышъ, узэрэпачъыхьащтыр джы къызгурыІуагъ, Израилым ипачъыхьагъуи пытэу о къэбгъэгъунэщт. 22 Джы къыспыкІыгъэхэу саужкІэ псэущтхэр зэрэмыгъэкІодыщтхэмкІэ, сятэ иунэ сцІэ зэрэщымыгъэкІосэщтымкІэ Зиусхьаным ыцІэкІэ тхьэлъанэ къысфэшІ». 23 Ащ дэжьым Даут Зиусхьаным ыцІэкІэ тхьэлъанэ Саул фишІыгъ. ЕтІанэ Саул ядэжь ыгъэзэжьыгъ, Даутрэ игъусэхэмрэ зэкІолІэгъуаеу щыт къушъхьэ чІыпІэу Іэнгъэдый агъэзэжьыгъ.
Самуел дунаир зэрихъожьыгъэр
1 Самуел лІагъэ. Израил цІыф пстэури хьадагъэм къекІуалІэхи ар загъэежьым, иунэ зыдэтыгъэ къалэу Рамэ щагъэтІылъыжьыгъ. ЕтІанэ Даут зыдэсыгъэ чІыпІэр къыбгыни, шъофнэкІэу Пэран кІуагъэ.
Даутрэ Абигаилрэ
2 Къалэб лІакъом щыщэу зы лІы бай дэдэ горэ псэупІэу МэІон щыпсэущтыгъ, ыгъэлэжьэрэ чІыгур чІыпІэу Къармэл щыІэу; мэл минищрэ пчэн минрэ ащ иІагъ. А лІым Нэбал ыцІагъэр, ишъуз – Абигаил; а бзылъфыгъэр лъэшэу Іушыгъэ ыкІи дэхагъэ, ау лІыр жъалымэу, гу цІапІэ кІоцІылъэу щытыгъ. Нэбал имэлхэм цыр къатырищыкІынэу Къармэл кІогъагъэ. 4 Нэбал имэлхэм цыр къызэратырищыкІрэр шъофнэкІым щыІэгъэ Даут зэхихыгъэти, 5 ицІыф нэбгырипшІ ыІофыти, ахэм ащ ариІуагъ: «Къармэл шъукІуи, Нэбал дэжь шъуІухь, сэ сцІэкІэ сэлам ешъухи, 6 мырэущтэу ешъуІу: „Ори, уиунагъуи, уие пстэуми мамыр шъогъот; 7 уимэлхэр зэращхэрэм икъэбар зэхэсхыгъ. Мары уимэлахъохэр къытихьылІэщтыгъэхэшъ, ахэм агу зэрэхэтымыгъэкІыгъэри, Къармэл щэІэфэхэ зыпари зэрашІомыкІодыгъэри 8 уицІыфхэм яупчІи къыуаІощт. Арышъ, сицІыфмэ нэшІукІэ укъарегъэплъ, мафэкІэ уадэжь тыкъэкІуагъ; уиІумэтхэми уикІалэу Даути пфызэшІокІрэр къяптыгъэмэ дэгъугъэ"». 9 Ащ ыуж Даут ицІыфхэр Нэбал дэжь кІохи, Даут игущыІэхэр зэкІэ ащ ыцІэкІэ раІохи, къызэтеуцуагъэх. 10 Ау Нэбал Даут ицІыфхэм къариІожьыгъ: «Хэт щыща Даути, хэт щыща Ищай ыкъуи? Зизиусхьанхэм къашІухэхьажьрэ унэІутхэр джы бэ хъугъэ. 11 Сихьалыгъуи, сипси, симэлхэр сфэзыщхэрэм апае згъэхьазырыгъэ лыри къыздикІыгъэр сымышІэрэ цІыфхэм ястынэуи?» 12 Даут ицІыфхэм къагъэзэжьи, ягъогу къытехьажьхи къэкІожьыгъэх. Хъугъэр зэкІэ Даут зыфаІотэжьым, 13 Даут ицІыфхэм ариІуагъ: «Шъуичатэхэр къызгуашъулъхьэх». Арти зэкІэми ячатэхэр къызгуалъхьагъэх, ежь Даути ичатэ къыштагъ. Нэбгырэ шъиплІ фэдизыр Даут ыуж къихьагъ, нэбгырэ шъитІур ІапІэхэм къапэнагъ. 14 Ащ дэжьым чырэмэ ащыщ горэм Нэбал ишъузэу Абигаил къыриІуагъ: «Даут ицІыфхэр шъофнэкІым къыригъэкІхи тизиусхьан дэжь сэлам къырахынэу къыгъэкІогъагъэх, ау мыдрэр губжыгъэу, атекуозэ ахэм адэгущыІэжьыгъ. 15 Ары шъхьае а цІыфхэр лъэшэу къытфэшІугъэх, тыгуи хагъэкІыгъэп, ахэм тырягъусэу шъофым тыкъэтыфэ зыпари тшІокІодыгъагъэп. 16 Тапэгъунэгъоу Іэхъогъухэр щыдгъэхъухэ зэхъум, чэщи мафи ренэу тыкъагъэгъунагъ. 17 Джы хъурэм еплъи, пшІэн фаем егупшыс, армырмэ тизиусхьани иунагъуи зэрэщытэу зыхэмыкІыжьышъущтхэ тхьамыкІагъо хэфэщтых, ежь гу цІапІэ зыкІоцІылъ цІыфышъ, удэгущыІэн плъэкІыщтэп». 18 Арти Абигаил гуІэнкІэ хьалыгъу шъитІу, нэтитІум арыз санэр, гъэжъагъэу мэлитф, хьакукІэ гъэгъугъэу лэжьыгъэ пщыгъитф, сэнэшъхьэгъэгъугъэ блэришъ, шхынцумпэр зыдэлъ хьалыгъу ІашІу шъитІу къыштэхи, щыдхэм атырилъхьагъэх. 19 ЕтІанэ иунэІутхэм ащ ариІуагъ: «Шъо сапэ шъуитэу шъукІу, сэ шъуауж ситыщт». Ишъхьагъусэу Нэбал зыпари ащ риІуагъэп. 20 Ар щыдым тесэу къушъхьэ лъагъом къех пэтзэ, Даутрэ ицІыфхэмрэ зэгъусэхэу къакІохэу ыпэ къифагъэх. 21 Ежь Даут ыгукІэ зэриІожьщтыгъэ: «А цІыфым имылъку зэрэщытэу шъофнэкІым къызэрэщысыухъумагъэри иІэм щыщ зыгори зэрэхэмыкІодыкІыгъэри хьаулый. ШІоу фэсшІагъэр зэхимышІыкІэу, бзаджэкІэ къыспэгъокІыжьыгъ. 22 Даут ипыйхэм яфэшъуашэр Тхьэм аригъэгъотыщт, нахьыбэжьи къаришІэщт, дэпкъым кІэлъырыгъутхьэу Нэбал иунэ исмэ ащыщ горэ пчэдыжь нэс нэф къызизгъэкІыкІэ». 23 Абигаил Даут къызелъэгъум гуІэнкІэ щыдым къехи, ынэІу егъэзыхыгъэу Даут ыпашъхьэ зыщыридзыхи, чІыгум нэсэу шъхьащэ къыфишІыгъ. 24 Ащ ыуж Даут ыпашъхьэ лъэгонджэмышъхьэу къитІысхьи, къыриІуагъ: «Лажьэр зытефэрэр сэры, сизиусхьан. УиІумэт къэгущыІэн ылъэкІынэу фит къэшІи, къыІощтым къедэІу. 25 Сизиусхьан шэнрэ акъылрэ зимыІэ Нэбал пэрэмылъ, сыда пІомэ ыцІэм фэд ащ ышъхьи. Ащ ыцІэр Нэбал, къикІрэр зиакъыл имыкъу. Ау сэ, сыуиІумэт, сизиусхьан ицІыфэу къыгъэкІогъагъэхэр слъэгъугъэхэп. 26 Джы, сизиусхьан, Зиусхьаныри о упси зэрэщыІэхэр сэІо. Арышъ, лъыр уигъэгъэчъэнэп, уигухьагужъи къызтырыуигъэгъэкІонэп, уипыйхэри, сизиусхьан, гужъ къыбдызиІэхэри Нэбал фэдэу джы орэхъух. 27 Сизиусхьан фэлэжьэрэ кІалэхэм аритынэу сизиусхьан иІумэт къыхьыгъэ тынхэр мары. 28 УиІумэт илажьэ къыфэгъэгъу; сизиусхьан иунагъо Зиусхьаным егъашІэм щигъэІэщт, сыда пІомэ сизиусхьан зыфэзаорэр Зиусхьаным иІофышъ, ущэІэфэ уишэнычъагъэ къызтебгъэкІощтэп. 29 Изэрар къыуигъэкІынэу, цІыф горэ уауж къихьэу, упсэ къеІэ шІоигъо зыхъукІэ, сизиусхьан ыпсэ уи-Зиусхьанэу Тхьэм, мылъку лъапІэр къызэраухъумэрэм фэдэу къыухъумэщт, ау уипыйхэм хьашъом далъхьэрэ мыжъор зэрадзырэм фэдэу Ар яощт. 30 ЕтІанэ Зиусхьаным сизиусхьан шІоу къыдэхъунэу фигъэнэфагъэр зэкІэ къыдигъэхъоу, Израилым иІэшъхьэтетэу зытыригъахьэкІэ, 31 игухьагужъ джы къызтыримыгъакІоу, лажьэ зимыІэ цІыфхэр зимыукІхэкІэ, сизиусхьан ыужкІэ кІэгъожьыщтэп, ыгуи къеожьыщтэп. Зиусхьаными сизиусхьан ишІушІэ ыгъэкІодыщтэп, уиІумэти угу къэгъэкІыжь». 32 Арти Даут Абигаил къыриІуагъ: «Израилым и-Зиусхьанэу Тхьэу непэ сапэ укъизгъэфагъэм щытхъур ыдэжь! 33 ШъхьакІоу сагъэшІыгъэм пае лъы згъэчъэнэу сежьагъэу сыкъызэтебгъэуцуагъэшъ, Зиусхьаным ынэшІу уиакъыли ори къащэф. 34 Ау, Израилым и-Зиусхьанэу Тхьэу, сизэрар къыозгъэкІыным сыщызыухъумагъэр, зэрэщыІэр къэсэІо – укъемылъэкІоныгъагъэмэ, сапи зыкъимыгъэфэгъагъэмэ, дэпкъым кІэлъырыгъутхьэу Нэбал иунэ исмэ ащыщ горэ пчэдыжь нэс нэф къизгъэкІыщтгъэп». 35 ЕтІанэ Абигаил къыфищагъэхэр къыІиххи, Даут ащ риІуагъ: «Гупсэфэу шъуадэжь гъэзэжь, къэпІуагъэми сыкъедэІугъ, узфаер къыпфэсшІагъ». 36 Ащ ыуж Абигаил ыгъэзэжьи, Нэбал дэжь зыІохьэм, пачъыхьэм иешхэ-ешъо фэдэу, яунэ щыешхэ-ешъошхощтыгъ, Нэбали ыгукІэ чэфыгъ; ар лъэшэу утэшъогъагъэти, пчэдыжьым нэс зы гущыІи ащ риІуагъэп. 37 Пчэдыжьым Нэбал чэфыр кІэкІыжьи, шъузым къэбарыр зыфеІуатэм, лІым ыгучІэ изи, ыІэпкъ-лъэпкъхэр ыубытыгъэх. 38 Джыри мэфипшІ фэдиз зытешІэм, Зиусхьаныр Нэбал къыфехыгъ, ащ къыхэкІэуи лІагъэ. 39 Нэбал икъэбар зызэхехым Даут ыІуагъ: «ШъхьакІоу къысихыгъэм пае Нэбал ифэшъуашэр езгъэгъоти, иІумэт бзаджэ езымыгъашІэу, Нэбал ыгу илъыгъэ шІоир ащ ышъхьэ къезкъутэхыжьыгъэ Зиусхьаным щытхъур ыдэжь». Ащ ыуж Даут Абигаил дэжь иІумэт лІыкІохэр ыгъакІохи, шъузкІэ зэриштэрэр раригъэІуагъ. 40 Арти Даут илІыкІохэр Абигаил дэжь, Къармэл, кІохи раІуагъ: «Даут шъузэу уфэтщэнэу тыкъыплъигъэкІуагъ». 41 Ар къэтэджи, чІыгум нэс шъхьащэ ышІи къыІуагъ: «Мары уиІумэт, сизиусхьан илІыкІохэм алъакъохэр афитхьакІзэ фэчырэнэу ар хьазыр». 42 Абигаил гузэжъогъукІэ зыкъыгъэхьазыри щыдым къытетІысхьагъ. УнэІут бзылъфыгъитфыр ащ игъусагъ; Даут къылъигъэкІуагъэхэм ауж итэу, Даут дэжь кІуи, шъуз фэхъугъ. 43 Ащ ыуж Даут ИзрыІэл щыщ АхъынэІами къыщи, тІури шъузкІэ ыштагъ. 44 Даут ишъхьагъусэщтыгъэу Саул ыпхъу Михэл Гъалым щыщ Лаиш ыкъо Палтый ятэ ригъэщэгъагъ.
Даут Саул псэоу джыри къызэригъэнэжьыгъэр
1 Зифхэр Саул дэжь, ГъыбІэ, къакІохи къыраІуагъ: «Ещымон ыпашъхьэ ит Іуашъхьэу Хъахыл Даут зыщегъэбылъы». 2 Арти Саул къежьи, израил дзэкІолІ анахь лІыбланэмэ ащыщэу минищ къызэригъэгъуси, Даут лъыхъунэу шъофнэкІэу Зиф кІуагъэ. 3 Саул Ещымон ыпашъхьэ ит Іуашъхьэу Хъахыл, гъогум дэжь, къыщыуцугъ. Даут шъофнэкІым итыгъ. Ыуж къыфынэу Саул ащ къызэрихьагъэр къылъэгъугъэти, 4 Даут ицІыфхэр шъэфэу къэплъэнхэу ыгъакІохи, Саул къызэрэкІогъэ шъыпкъэм икъэбар къыфахьыжьыгъ. 5 Арти Даут Саул къыхихыгъэ уцупІэм зекІуалІэм, Саулрэ ащ идзэпащэу Нэр ыкъо Абинэррэ ягъолъыжьыпІэ къылъэгъугъ. Саул игъусэхэр къегъэтэкъокІыгъэхэу ежь ахэм агузэгу илъыгъ. 6 Ащ дэжьым Даут хъыт лъэпкъым щыщ Ахъымэлэхрэ Иоаб ышэу, Цырыуй ыкъо Абищайрэ закъыфигъази къяупчІыгъ: «Хэта Саул иуцупІэ къыздэкІощтыр?» Абищай къыриІожьыгъ: «Сэ сыкъыбдэкІощт». 7 Чэщым Даутрэ Абищайрэ цІыфхэм ахэхьагъэх; мары Саул, игъусэхэр къегъэтэкъокІыгъэхэу мэчъые, ипчыпыджыни ышъхьэ зыдэгъэзэгъэ лъэныкъомкІэ чІыгум щыхэІугъ; Абинэррэ дзэкІолІхэмрэ ащ къыкІэрылъых. 8 Абищай Даут риІуагъ: «Тхьэм уипый джы пІэ къырилъхьагъ; арышъ, Іизын къысэти, ятІонэрэу сІэ тесымыщэежьынэу, зэ огъукІэ пчыпыджынымкІэ чІыгум хэсІулІэщт». 9 Ау Даут Абищай къыриІожьыгъ: «УмыукІы, армырмэ Зиусхьаным пачъыхьэнэу къахихыгъэм зыІэ тезыщэягъэу хэта псэоу къэнэжьын зылъэкІыщтыр?» 10 ЕтІани Даут къыІуагъ: «Зиусхьаныр зэрэщыІэр сэІо! Зиусхьаныр ащ къыферэх е иаужыпкъэрэ мафэ къыфэрэси орэлІэ, е заом орэкІуи, ащ хэрэкІуад; 11 ау Зиусхьаным пачъыхьэнэу къахихыгъэм сІэ тесщэеныр Зиусхьаным къысфидэнэп; арышъ, ащ ышъхьэ зыдэгъэзэгъэ лъэныкъомкІэ чІыгум щыхэсэгъэ пчыпыджынымрэ псыр зэрыт къошынэу къыкІэрытымрэ къаштэхи, тыІугъэкІыжь». 12 Саул ышъхьэ зыдэгъэзагъэмкІэ щытыгъэхэ пчыпыджынымрэ псыр зэрыт къошынымрэ Даут къыштэхи, нэбгыритІум къагъэзэжьыгъ; зыгорэми зи къылъэгъугъэп, зыгорэми зи къышІагъэп, зи къэущыгъэп. ЗэкІэри чъыещтыгъэ, сыда пІомэ Зиусхьаным къафигъэкІогъэ чъые ІэшІум ахэр хэтыгъэх. 13 ЕтІанэ Даут адрэ бгъумкІэ зэпырыкІыжьи, чыжьэкІэ апэІудзыгъэ къушъхьэтхым къытеуцуагъ; уцупІэмрэ ежь зыдэщыт чІыпІэмрэ бэкІэ зэпэчыжьагъэх. 14 Ащ ыуж Даут цІыфхэмрэ Нэр ыкъо Абинэррэ къяджагъ: «Зэхэоха, Абинэр?» Абинэр ащ риІожьыгъ: «Ухэт о, сыда узкІэкуорэр, пачъыхьэри зыкІэбгъэгумэкІрэр?» 15 Арти Даут Абинэр риІуагъ: «УлІыба о, хэт о пфэдэу Израилым исыр? Сыда уизиусхьан, пачъыхьэм, узкІыфэмысакърэр? Пачъыхьэр, уизиусхьан, ыукІынэу цІыф горэ къызэрыкІогъагъэр ошІа? 16 УизекІуакІэ дэгъоп; Зиусхьаныр зэрэщыІэр сэІо! Зиусхьаным пачъыхьэнэу къахихыгъэм шъузэрэфэмысакъырэм пае шъуаукІыныр къышъутефэ. Еплъэлъ, тыдэ хъугъа пачъыхьэм ышъхьэкІэ щыІэгъэхэ пчыпыджынымрэ псыр зэрытыгъэ къошынымрэ?» 17 Ащ дэжьым Саул Даут ымакъэ къышІэжьыгъэти риІуагъ: «СикІалэу Даут, умакъа зэхэсхырэр?» Даут къыриІожьыгъ: «Сымакъэ адэ, сизиусхьанэу пачъыхьэр». 18 ЕтІани ащ къыІуагъ: «Сыд пае сизиусхьан иІумэт илъэуж зэрифэра? Сыда сшІагъэр? БзэджагъэкІэ сІэ къыптесщэягъа? 19 Сизиусхьанэу пачъыхьэр иІумэт къыІощтым джыри къерэдэІу: Зиусхьаным укъысфигъэгубжыгъэмэ, сикъурмэн Зиусхьаным шІу къысферэшІыжь; цІыфхэр армэ тазыфагу къихьагъэр, Зиусхьаным ынае къащэф, сыда пІомэ, „КІо, тхьэ хамэхэм афэлажь" аІозэ, Зиусхьаным сфыхихыгъэ чІыгум сизыфыгъэхэр ахэр ары. 20 Арышъ, Зиусхьаным инэрылъэгъу, чІыгур слъыкІэ згъэшъокІынэп; сыда пІомэ, щылэчэтыр къушъхьэм къызэрэщырафэкІырэм фэдэу, зы бжыдзэм лъыхъунэу Израилым ипачъыхьэ къежьагъ». 21 Арти Саул къыІуагъ: «Сыхэукъуагъ, къэгъэзэжь, сикІалэу Даут, ащ нахьыбэрэ сизэрар озгъэкІыжьыщтэп, нычэпэ спсэ бгъэлъэпІагъэ: акъылынчъэу сэ сызекІуагъ, бэрэ сыхэукъуагъ». 22 ЕтІанэ Даут джэуап къытыжьыгъ: «Мары пачъыхьэм ипчыпыджын, зы кІалэ горэ къэрэкІуи ар ерэштэжь; 23 Зиусхьаным шъхьадж ифэшъуашэр ригъэгъотын; Зиусхьаным о сІэ укъырилъхьэгъэхагъ, ау Зиусхьаным пачъыхьэнэу къахихыгъэм сІэ тесщэягъэп; 24 непэ о упсэ сэ зэрэзгъэлъэпІагъэм фэдэу сищыІэныгъэ Зиусхьаным ерэгъэлъапІ, сыд фэдэрэ тхьамыкІагъуи ащ сыщерэухъум!» 25 ЕтІанэ Саул Даут риІуагъ: «Зиусхьаным ынэшІу къыпщэф, сишъаоу Даут; Іофыбэ пшІэщт, гъэхъагъэхэри уиІэщт». Ащ ыуж Даут игъогу техьажьыгъ, Саули ичІыпІэ ыгъэзэжьыгъ.
Даут Гъат ипачъыхьэ зэрэфэлэжьагъэр
1 Ащ ыуж Даут ыгукІэ зэриІожьыгъ: «Зэгорэм Саул секІодылІэщт шъыпкъ, арэу зыхъукІэ, сэркІэ нахьышІур фылист чІыгур къэсыбгынэныр ары. Саул етІанэ сауж икІыжьыщт, ащ нахьыбэри Израилым ыкъопэ пстэумэ къащыслъыхъужьыщтэп, сэри ащ сыІэпыкІыжьын». 2 ЕтІанэ Даут зиІэти, игъусэгъэ хъулъфыгъэ шъихыр кІыгъоу Гъат ипачъыхьэу МэІох ыкъо Ахыщ дэжь кІуагъэ. 3 Даути ащ идзэкІолІхэри, хэти иунагъо кІыгъоу, Даут ишъузитІуи – ИзрыІэлым щыщэу АхъынэІамрэ Нэбал игощагъэу, Къармэл щыщэу, шъузабэу къэнэгъэ Абигаилрэ игъусэхэу, Ахыщ дэжь щыІэхэу, Гъат щыпсэущтыгъэх. 4 Даут Гъат зэрэкІожьыгъэм икъэбар Саул къылъыІэсыгъэти, нахьыбэрэ ар ащ лъыхъужьыгъэп. 5 Ащ ыуж Даут Ахыщ риІуагъ: «НэшІукІэ укъысэплъымэ, къэлэ цІыкІумэ ащыщ горэм чІыпІэ къыщысэти, ащ сыщыпсэущт, сыд пае уиІумэт уигъусэу пачъыхьэр зыдэс къалэм къыбдыдэсын фая?» 6 Арти Ахыщ ащ Цыкълагъ къыритыгъ, джащ къыхэкІэуи Цыкълагъ Ехъудэм ипачъыхьэмэ къафэнагъэу джыри аІэ илъ. 7 Даут фылист хэгъэгум зэпстэумкІи зэрисыгъэр илъэсрэ мэзиплІырэ. 8 ЕтІанэ Даут ицІыфхэр игъусэхэу къежьэхэти, къалэу Сур, Мысыр хэгъэгум анэсэу бэшІагъэу ащыпсэущтыгъэ гъышыур, гъызыр, Іамалэкъ лъэпкъхэм атебанэщтыгъэх. 9 Даут а хэгъэгур зэрипхъощтыгъэ, хъулъфыгъи бзылъфыгъи псэоу къыгъанэщтыгъэп, мэлхэр, цухэр, щыдхэр, махъшэхэр, щыгъынхэр къатыриххэти, Ахыщ дэжь къыгъэзэжьщтыгъэ. 10 «Хэта джы шъузтебэнэгъагъэр?» ыІоу Ахыщ Даут зеупчІыкІэ, Даут къыриІожьыщтыгъ: «Зэм – Ехъудэм икъыблэ лъэныкъу, етІанэ – ерахъмыел лъэпкъыр зыщыпсэурэ чІыпІэм икъыблэ лъэныкъу, ящэнэрэм – къэн лъэпкъыр зыщыпсэурэ чІыпІэм икъыблэ лъэныкъу». 11 Гъат къыздимыщэнхэм пае Даут хъулъфыгъи бзылъфыгъи псэоу къыгъанэщтыгъэп. Ар егупшысщтыгъэ: «„Джары Даут зэрызекІуагъэр" аІозэ, ахэм таІотэн алъэкІыщт». Фылист хэгъэгум есыфэ Даут ышІагъэхэр джары. 12 «Ежь къызхэкІыгъэ израил лъэпкъым ар фэлъэгъужьырэпышъ, егъашІэм сэ сичырэщт» зэриІожьзэ, джаущтэу Ахыщ Даут цыхьэ фишІыгъ.
1 ЕтІанэ фылистхэм Израилым зао дашІыным пае дзэхэр къаугъоигъэх, Ахыщ Даут риІуагъ: «Ори уицІыфхэри шъусигъусэхэу заом тызэрэкІощтым ущэсэгъэгъуазэ». 2 Арти Даут Ахыщ риІуагъ: «Хъунба адэ, уиІумэт джы ышІэщтыр къэплъэгъущт». Ахыщ Даут риІуагъ: «Дэгъу, джащ пае сэпсэуфэ ренэу усиухъумэкІонэу осэгъэнафэ».
Саул удыгъэхэр зезыхьэрэм дэжь зэрэкІуагъэр
3 Самуел зэлІэм зэкІэ израил цІыфхэм ар агъэежьи, икъалэу Рамэ щагъэтІылъыжьыгъагъ. Удыгъэхэр зезыхьэхэрэмрэ джэнчыдзхэмрэ Саул хэгъэгум рифыгъагъэх. 4 ЕтІанэ фылистхэр къэзэрэугъойхи къежьагъэх, Шыунэм нэс къакІохи къыщыуцугъэх; Саули израил цІыфхэр зэкІэ къызэІуигъакІэхи къушъхьэу ГъылбэуаІ дэжь къыщыуцугъэх. 5 Саул фылистхэм ядзэ зелъэгъум къэщтагъ, ыгуи лъэшэу къыгъэкІэзэзыгъ. 6 Арти Саул Зиусхьаным еупчІыгъ, ау Зиусхьаным джэуап къыритыжьыгъэп, пкІыхьапІэкІи зыкъыригъэлъэгъугъэп, мыжъо лъапІэу уримыр зырарегъадзэми, джэуапыр къылъигъэІэсыгъэп, тхьэлІыкІохэмкІи къэбарыр къыригъэшІагъэп. 7 ЕтІанэ Саул иунэІутмэ ариІуагъ: «Удыгъэхэр зезыхьэрэ бзылъфыгъэ горэ къысфэжъугъоти, ыдэжь сыкІонышъ сеупчІыщт». ИунэІутмэ джэуап къыратыжьыгъ: «Удыгъэхэр зэрихьэу бзылъфыгъэ горэ Іэндор дэс». 8 Ащ ыуж Саул ищыгъынхэр зыщиххи, нэмыкІхэр зыщилъэхи, нэбгыритІу игъусэу чэщым къежьэхи бзылъфыгъэм дэжь къэкІуагъэх. Саул ащ риІуагъ: «СыолъэІу джэнч къысфэбдзынэу, зыцІэ къесІорэр къысфычІэпщынэу, зигугъу къыпфэсшІырэр къэпщэнэу». 9 Ау бзылъфыгъэм къыриІожьыгъ: «Саул ышІагъэм, удыгъэхэр зезыхьэхэмрэ джэнчыдзхэмрэ хэгъэгум зэрэрифыгъэхэм ущыгъуазэба; сыд пае сытекІодэнэу спсэ хъытыу къыфэбгъэуцура?» 10 Арти Саул тхьэлъанэ ышІи риІуагъ: «Зиусхьаныр зэрэщыІэр сэІо! Мы Іофым пшъэдэкІыжь рыпхьыщтэп». 11 ЕтІанэ бзылъфыгъэр къеупчІыгъ: «Хэта къыпфычІэсщыщтыр?» Адрэм къыриІожьыгъ: «Самуел къысфычІэщ». 12 Бзылъфыгъэм Самуел зелъэгъум лъэшэу къэкууагъ; Саул зыкъыфигъази, къеупчІыгъ: «Сыда сызкІэбгъэпцІагъэр? О у Саул». 13 Арти пачъыхьэм ащ риІуагъ: «Умыщын, сыда плъэгъурэр?» Бзылъфыгъэм Саул къыриІожьыгъ: «Джынэм фэдэу зыгорэ чІы чІэгъым къычІэкІэу сэлъэгъу». 14 «Сыд теплъа ащ иІэр?» – Саул ащ еупчІыгъ. Адрэм къыриІуагъ: «Зы лІыжъ горэ чІы чІэгъым къычІэкІы, джэнэ кІыхьэ щыгъэу». Ар зэрэ-Самуелыр Саул къышІагъэти, ыІу егъэзыхыгъэу чІыгум зытыридзи, шъхьащэ фишІыгъ. 15 Самуел Саул къыриІуагъ: «Сыда сыкъычІэмыкІмэ мыхъунэу сызфэбгъэгумэкІрэр?» Саул риІожьыгъ: «СиІофхэр дэй дэдэх; фылистхэр къысэзаох; Тхьэм сыкъыбгынагъ; тхьэлІыкІохэмкІи пкІыхьапІэкІи Тхьэм джэуап къыситыжьырэп. СшІэщтымкІэ сыоупчІыжьынэу сыкъызкІыоджагъэр джары». 16 Самуел къыриІуагъ: «Зиусхьаным укъыбгыни уипыеу хъугъэмэ, сыд пае сэ укъысэупчІыжьра? 17 Зиусхьаным сэ къысигъаІощтыгъэр ары Зиусхьаным ышІагъэр; Зиусхьаным пачъыхьагъур пІэкІихи, къыппэблэгъэ цІыфым, Даут, ыІэ рилъхьагъ. 18 Зиусхьаным къыуиІуагъэм узэремыдэІугъэм, Іамалэкъхэм зафэгубжым ахэм яфэшъуашэ зэрямыгъэгъотыгъэм пае Зиусхьаным ар джы къыуешІэ. 19 Арышъ, Израили ори Зиусхьаным шъузэгъусэу фылистхэм аІэ шъурилъхьащт: ори уикІалэхэми неущ тызэгъусэщтых, Израилым идзэ Зиусхьаным фылистхэм аІэ рилъхьащт». 20 Самуел къыриІуагъэм лъэшэу къыгъэщынагъэти, Саул ошІэ-дэмышІэу къызэхэфагъ, мэфэ ренэми чэщми фыгукІэ Іуфэгъагъэпти, ар кІочІаджэ хъугъэ. 21 А бзылъфыгъэр Саул къызекІуалІэм лъэшэу зэрэщынагъэр ылъэгъугъэти къыриІуагъ: «Мары уиІумэт, пІорэм къедэІуи, ыпсэ рыджэгужьзэ, унашъоу фэпшІыгъэр ыгъэцэкІагъ; 22 джы сыолъэІу уиІумэт къыуиІощтым къедэІу; хьалыгъу такъыр къыостынышъ шхы, гъогум утехьажьмэ гъэрет уиІэу хъущт». 23 Ау шхэнэу фэягъэпти риІуагъ: «Сышхэщтэп». Арти иунэІутхэри бзылъфыгъэри къелъэІухэ зэхъум, ахэм къыраІорэм едэІуи, къэтэджыжьи пІэм хэтІысхьагъ. 24 Бзылъфыгъэм шкІэкІэ пщэр иІагъэти, гузэжъогъукІэ ар аригъэукІи, хьаджыгъэ къышти тхьацу ыпшагъ, хьалыгъу мыкІу-мыпш ыгъэжъагъ. 25 ЕтІанэ Саулрэ иунэІутхэмрэ къафытыригъэуцуагъ, ахэр шхагъэх, къэтэджыжьхи а чэщ дэдэм къагъэзэжьыгъ.
Даут фылистхэм къызэрэзыхафыгъэр
1 Фылистхэм ядзэхэр зэкІэ Афэкъ къыращалІэхи, израил цІыфхэр ИзрыІэл щыІэ псынэкІэчъым дэжь къыщыуцугъэх. 2 Нэбгырэ шъэрышъэу, мин-минэу зэхэдзыгъэ ядзэхэр ягъусэхэу фылистмэ япщыхэр къакІощтыгъэх. Даутрэ ащ ицІыфхэмрэ Ахыщ ягъусэу ахэм ауж итыгъэхэти, 3 фылистмэ япщыхэм зэраІожьыгъ: «Мыхэр сыд джуртха?» Ахыщ фылистмэ япщыхэм ариІожьыгъ: «Шъущыгъуазэба мыр израил пачъыхьэу Саул зэриІумэтым, зэрэ-Даутым? Илъэсым къехъугъэу ар садэжь щыІэшъ, къызыкІуагъэм къыщегъэжьагъэу непэ къызнэсыгъэм мыхъун гори ащ хэслъэгъуагъэп». 4 Ау фылистмэ япщыхэр къыфэгубжхи къыраІуагъ: «Мы цІыфыр утІупщыжьи чІыпІэу фэбгъэзагъэм орэкІожь, тигъусэу ар заом къэрэмыкІу, заом пыи къыщытфэмыхъужьыным пае. Изиусхьан ыгу къыщэфынба мы лІыхэм ашъхьэ харигъалъхьэу ащкІэ ыгу къыдищаемэ? 5 „Саул минхэм атекІуагъэмэ, Даут зытекІуагъэр минипшІых" зыфиІорэ гущыІэхэр зыхэлъ орэдыр цІыф купышхомэ зыфызэхалъхьэгъэ Даутыр арба ар?» 6 Арти Ахыщ Даут къеджи риІуагъ: «Зиусхьаныр зэрэщыІэр сэІо! Шъыпкъагъэ пхэлъышъ, тызэгъусэу заом тызэдыІухьэу тыкъызэдыІукІыжьщтыгъэмэ сигопэщтгъэ, сыда пІомэ садэжь укъызыкІуагъэм къыщегъэжьагъэу непэ къызынэсыгъэм мыхъун гори пхэслъэгъуагъэп, ау типщымэ агу урихьырэп. 7 Арышъ, джы гъэзэжьи, зыгъэрэхьати кІожь, фылистмэ япщыхэм агухэр къащымыгъахь». 8 Даут Ахыщ риІуагъ: «Сыда сшІагъэри, уинэплъэгъу сыкъызиуцуагъэмрэ непэрэ азыфагу уиІумэт мыхъунэу хэплъэгъуагъэри, сыд пае сизиусхьан ипыйхэм сязэонэу ащ сыкІымыгъущта?» 9 Арти Ахыщ Даут къыриІожьыгъ: «Зиусхьаным имэлэІич фэдэу сыоплъышъ, сэркІэ узэрэшІур пшІошъ гъэхъу; ау фылистмэ япщыхэм аІуагъ: „Ар тигъусэу заом къыддэрэмыкІу". 10 Арышъ, ори уизиусхьанэу Саул ипщылІщтыгъэхэу уигъусэхэми пчэдыжьым жьэу шъукъэтэдж, Пчэдыжьым шъукъыкІэтаджи, нэф къызэрэшъэу шъукІожь». 11 ЕтІанэ Даути ицІыфхэри фылист чІыгум агъэзэжьынэу пчэдыжьым къэтэджыгъэх. Фылистхэр ИзрыІэл кІуагъэх.
Іамалэкъхэм зэратекІуагъэхэр
1 Даутрэ ицІыфхэмрэ Цыкълагъ зэкІохэм ыуж мэфищ тешІагъэу Іамалэкъхэр къыблэ лъэныкъомкІэ хэгъэгум къытебэнагъэх. Къалэу Цыкълагъ аубыти тырагъэстыкІыгъ. 2 Бзылъфыгъэхэри къалэм адрэ дэсыгъэхэри, анахь цІыкІум къыщегъэжьагъэу анахь иным нэсыжьэу, амыукІхэу, гъэрэу зыдыращажьэхи ягъогу техьажьыгъэх. 3 Даутрэ ащ ицІыфхэмрэ а къалэм зыдахьэхэм машІокІэ ар тырагъэстыкІыгъагъ, ахэм яшъузхэр, яшъаохэр, япшъашъэхэр зэгъусэхэу гъэрэу Іуафыгъагъэх. 4 Арти Даути игъусагъэхэми хьадэгъэшхо къаІати, гъын амылъэкІыжьыфэ гъыгъэх. 5 Даут ишъузитІуи гъэрэу аубытыгъагъэх: ИзрыІэл щыщ АхъынэІамрэ Къармэл щыщэу, Нэбал игощагъэу, шъузабэу къэнэгъэ Абигаилрэ. 6 КъащышІыгъэм апсэ хигъэІэжьыгъэхэти, нэбгырэ пэпчъ ыкъохэмрэ ыпхъухэмрэ ыгу афэгъущтыгъэти, мыжъокІэ еохэзэ аукІынэу цІыфхэр зэрэфэягъэм Даут гузэжъогъу хидзагъ. Ау къыщышІыгъэм еуцолІэнымкІэ и-Зиусхьанэу Тхьэм фыриІэ шІошъхъуныгъэм Даут кІуачІэ къызхыригъэгъотэжьыгъ. 7 Ахъымэлэх ыкъо къурмэнышІэу Абыетар мыжъогъуазэр къыхьынэу Даут риІуагъ. Абыетар мыжъогъуазэр Даут къыфихьыгъ. 8 ЕтІанэ «Мы дзэ мацІэм ыуж сихьащта, сылъежьэмэ, сыкІэхьашъущта?» ыІуи, Даут Зиусхьаным еупчІыгъэти, джэуап къыритыжьыгъ: «Ары, ыуж ихь, уакІэхьащт, къатепхыжьыщт». 9 Арти Даутрэ игъусэгъэ дзэкІолІ нэбгырэ шъихымрэ ежьагъэх; псы игъукІыгъэу Бэсэр ылъэгу зынэсхэм, пшъыгъэхэти, къэуцугъэх. 10 ЕтІанэ Даутрэ нэбгырэ шъиплІымрэ апэ рагъэхъугъ. Нэбгырэ шъитІум псы игъукІыгъэу Бэсэр ылъэгу зэпачынэу кІуачІэ яІэжьыгъэпти, а чІыпІэм къыщыуцугъэх. 11 КІохэ пэтзэ зы мысырылІ горэ шъофым апэ къыщифагъэти Даут дэжь къащагъ. Ащ хьалыгъу зыратым, ышхыгъ, псыри тыришъухьажьыгъ; 12 шхынцумпэр зыдэлъ хьалыгъу ІашІуитІурэ сэнэшъхьэгъэгъугъэ блэритІурэ ратхи рагъэшхыгъ. ЕтІанэ зэшхэм, чэщ-мэфищым хьалыгъуи пси Іуфэгъагъэпти, ыкІуачІэ къихьажьыгъ. 13 Даут ащ еупчІыгъ: «Хэтмэ уащыща, тыда узщыщыр?» Адрэм къыриІожьыгъ: «Сэ мысыр лъэпкъым сыщыщ кІал, Іамалэкъ горэм сырипщылІ, мэфищэ сысымэджагъэти сизиусхьан сыкъычІидзыжьыгъ. 14 Къырэт лъэпкъыр зыщыпсэурэ чІыпІэм икъыблэ, Ехъуд хэкуми, Къалэб икъыбли тарыхьэщтыгъэ, Цыкълагъ машІокІэ тедгъэстыкІыгъ». 15 Даут ащ риІуагъ: «А дзэм сепщэлІэщта?» Адрэм къыІуагъ: «СымыукІынэу, сизиусхьан семытыжьынэу Тхьэ къапІомэ, а дзэм уесщэлІэщт». 16 ЕтІанэ ар ащ ыщагъ; мары Іамалэкъхэр, а хэгъэгум щизэрэтэкъухьагъэхэу ешъох, ешхэх, фылистхэм ячІыгурэ Ехъуд хэкумрэ мылъкушхо къызэраращыгъэр агъэмэфэкІы. 17 Даут ахэм атебани, пчыхьэ чэпэзэхэогъум къыщегъэжьагъэу ятІонэрэ мафэм ипчыхьэ нэс язэуагъ, махъшэмэ затезыдзи хэлъэдэжьыгъэ кІэлэ шъиплІым анэмыкІэу, ахэм ащыщ гори псэоу ІэкІэкІыжьыгъэп. 18 Іамалэкъмэ аштэгъагъэхэр зэкІэ Даут къатырихыжьыгъ, ишъузитІуи Даут къатырихыжьыгъ. 19 Арти зи ахэм ашІокІодыгъэп, акъохэми, апхъухэми, Іамалэкъмэ атырахыгъагъэми ащыщ гори ахэмызэу зэкІэри Даут ыІэ къыригъэхьажьыгъ. 20 Былымхэри, пчэн-мэлхэри Даут къатырихыгъэх, ежьхэм ябылымхэм ахэр апэ итхэу, «Мыхэр Даут къатырихыгъэх» аІозэ, къафыщтыгъэх. 21 ЕтІанэ Даут псы игъукІыгъэу Бэсэр ылъэгу къимыкІышъугъэгъэ нэбгырэ шъитІум къякІолІэжьыгъ, ахэр Даут къыпэгъокІыгъэх. А цІыфхэм якІуалІи Даут сэлам арихыгъ. 22 Арти Даут игъусэмэ ахэтыгъэ цІыф бзаджэхэм аІуагъ: «Зэрэтимыгъусагъэхэм пае къатетхыгъэ мылъкур ахэм адэдгощыщтэп; шъхьадж ишъузрэ икІалэхэмрэ ерэштэжьхи, зырарэгъэхь». 23 Ау Даут къыІуагъ: «Сикъошхэр, Зиусхьаным мыр къызытитыгъэм, псэоу тыкъызигъэнэжьыгъэм, къытэзаощтыгъэ дзэр тІэ къызырилъхьагъэм ауж арэущтэу шъумышІы. 24 Хэта ащ фэдэ ІофымкІэ къыжъудезгъэштэщтыр? Заом щыІагъэхэм атефэрэ Іахьэм фэдиз ІапІэхэм къапэдгъэнэгъагъэхэм атефэу зэкІэми зэфэдэу афэдгощын фае». 25 Джащ къыщегъэжьагъэу ыужми джары зэрашІыщтыгъэр; ИзраилкІэ хабзэу ыкІи бзыпхъэу ар джы къызнэсыгъэми агъэуцугъ. 26 ЕтІанэ Даут Цыкълагъ къакІуи, мылъкоу къатырихыгъэм щыщ иныбджэгъу ехъуд анахьыжъ упчІэжьэгъухэм афаригъащи араригъэІуагъ: «Зиусхьаным ипыйхэм къатетхыгъэм щыщ шІухьафтынэу къышъосэты». 27 Зыфаригъэщагъэхэр зыщыпсэущтыгъэхэр Бэтэл, къыблэмкІэ щыІэ Рамот, Ятыр, 28 ІарэІэр, Сифмэт, АштымаІ, 29 Рахэл, ерахъмыелхэм якъалэхэм, къэнхэм якъалэхэм, 30 Хъорым, БорІащан, Іатэх, 31 Хъэурэн, ежь Даутрэ ицІыфхэмрэ зынэсыгъэ чІыпІэ пстэури.
Саулрэ икІалэхэмрэ хьадэгъур къызэрафэкІуагъэр
1 Джащ фэдизым фылистхэр Израилым къезэуагъэх, фылистхэм защаухъумэнэу израилылІмэ къыкІатхъужьыгъэти, къушъхьэу ГъылбэуаІ къыщызэхакъутагъэх. 2 Фылистхэр Саулрэ ыкъохэмрэ къакІэхьагъэх, Саули, икІалэхэу Ионэтани, Абинэдауи, МэлкъэшыуаІи фылистхэм аукІыгъэх. 3 Саул пэшІуекІорэ заор пхъэшагъэ, щэбзащэхэмкІэ охэрэм щабзэхэр къытырагъафэхи, хьылъэу ар къызэхауІыхьагъ. 4 Арти Саул иашъоджэнэзехьэ риІуагъ: «Сунэт амышІыгъэхэр къакІохэу, самыукІэу, къызрэмыджэгуфэхэкІэ, уичатэ къихи сылІ». Ау иашъоджэнэзехьэ лъэшэу щынэщтыгъэти, ащ фэягъэп. Арти Саул ежь ичатэ къырихи, ащ зытыридзэжьыгъ. 5 Саул зэрэлІагъэр иашъоджэнэзехьэ зелъэгъум, ежьми ичатэ зытыридзэжьи зырилІыжьыгъ. 6 Джаущтэу а мафэм Саули, икІэлищи, иашъоджэнэзехьи, зэкІэ ицІыфхэри зэрэзэгъусэхэу хэкІодагъэх. 7 КІэим къыкІэрысыгъэ, Иордан ыкІыбкІэ щыпсэущтыгъэхэ израил цІыфхэм израил дзэкІолІхэм къызэрэкІатхъужьыгъэр, Саулрэ икІалэхэмрэ зэрэщымыІэжьхэр къызалъэгъум, якъалэхэр къабгынэхи, ашъхьэ рахьыжьэжьыгъ. Фылистхэр къакІохи ахэм адэтІысхьагъэх. 8 КъыкІэлъыкІорэ мафэм аукІыгъэхэр ахъункІэнхэу фылистхэр къэкІуагъэхэти, къушъхьэу ГъылбэуаІ щыфэхыгъэ Саули икІэлищи къагъотыжьыгъэх. 9 Арти ащ ышъхьэ шІуаупкІи, иашъоджанэ щахи, ятхьэ нэпцІхэр зычІэт унэхэмрэ цІыфхэмрэ къэбарыр алъыІэсыным пае зэрэфылист чІыгоу мэкъэгъэІухэр къащырагъэкІокІыгъэх. 10 ЕтІанэ ащ иашъоджанэ гъэбэжъугуащэу Астарт итхьалъэІупІэ чІалъхьи, ихьадэ къалэу Бэтщан идэхьапІэ дэжь дэпкъым щыпалъагъ. 11 Ащ ыуж фылистхэм Саул рашІагъэм икъэбар ГъылыІад ит къалэу Яощ дэсхэм зэхахыгъэти, 12 лІыгъэ зыхэлъ цІыфхэр зэкІэ къежьэхи, чэщ ренэм къакІохэзэ, Саулрэ икІалэхэмрэ яхьадэхэр Бэтщан идэпкъ къыпахыжьхи, Яощ къагъэзэжьи, ахэр ащ щагъэстыжьыгъэх. 13 ЕтІанэ яхьадэкъупшъхьэхэр Яощ дэт чъыгаем ычІэгъ щычІатІэжьхи, мэфиблэ анэкІыгъ.
1 Саул зызеукІыжьым ыуж Даут Іамалэкъхэм атекІуи, Цыкълагъ къыгъэзэжьи мэфитІо дэсыгъ. 2 Ящэнэрэ мафэм цІыф горэ Саул идзэ зыщызаощтыгъэ чІыпІэм къикІи къэкІуагъ: ищыгъынхэр зэІытхъыгъагъэх, ышъхьаци ятІэр къыхэтэкъущтыгъэ. Даут дэжь ар къэси, ыпашъхьэ зыщыридзыхи, чІыгум нэс шъхьащэ фишІыгъ. 3 Даут ащ еупчІыгъ: «Тыда укъыздикІырэр?» Адрэм къыриІожьыгъ: «Израилым идзэ зыщызэорэ чІыпІэм сыкъечъыжьы». 4 ЕтІанэ Даут ащ еупчІыгъ: «Сыда къэхъугъэр? КъысфэІуат». Адрэм къыриІожьыгъ: «ЗэуапІэр къабгыни дзэкІолІхэр къечъэжьэжьыгъэх, хэкІодагъэри къауІагъэу лІэжьыгъэри бэдэд, Саули ыкъо Ионэтани щыІэжьхэп». 5 Къэбарыр къыфэзыхьыгъэ кІалэм Даут еупчІыгъ: «Саули ащ ыкъо Ионэтани зэрэщымыІэжьхэр сыдэущтэу пшІэнэу хъугъа?» 6 КІалэм къыриІожьыгъ: «ГъылбэуаІ Іуашъхьэм сыдэкІуае зэхъум, Саул пчыпыджыным зытыригъэкІэгъагъ, зэоным фытегъэпсыхьэгъэ кухэу щэбзаохэр зэрытыгъэхэр ащ кІахьэщтыгъэх. 7 КъызызэплъэкІым сыкъылъэгъугъэти, къысэджагъ. Арти есІуагъ: „Мары сыкъэдаІо". 8 Ар къысэупчІыгъ: „Ухэт о?" ЕсІожьыгъ: „Сэ Іамалэкъмэ сащыщ". 9 ЕтІанэ ащ къысиІуагъ: „Сиакъыл сыщымыозэ, къысэкІуалІи сыукІ, сыда пІомэ спсэ джыри хэтыщт". 10 Арти секІуалІи сыукІыжьыгъэ, сыда пІомэ къызытекІохэм ыуж зэрэщымыІэжьышъущтыр къызгурыІуагъ. Танджэу шъхьащысыгъэмрэ ыІапшъэ илъыгъэ Іэхъумрэ къыпысхыжьхи сизиусхьан къыфэсхьыгъэх». 11 Ащ дэжьым Даут ищыгъынхэр ыцунтхъагъэх, игъусэгъэ цІыфхэми ар дэдэр ашІагъ. 12 Ахэм яхьадэгъэшхуагъ, Саулрэ ащ ыкъо Ионэтанрэ, Зиусхьаным идзэрэ Израил хэгъэгумрэ чатэм зэрэзэхигъэфагъэхэр ягукъэошхоу гъымэ пыхьэхэзэ агъэягъэх, пчыхьэ нэс анэкІыгъ. 13 ЕтІанэ къэбарыр къыфэзыхьыгъэм Даут еупчІыгъ: «Хэтмэ уащыща о?» Адрэм къыриІожьыгъ: «Хэхэс Іамалэкъым сырикІал». 14 Даут ащ риІуагъ: «Зиусхьаным къахихыгъэр уукІыным утемыщыныхьэу сыдэущтэу пІэ тепщэягъа?» 15 Ар къыІуи, Даут идзэкІолІ кІалэ горэм къеджи риІуагъ: «Еуи мор укІы». Ар ащ еуи ыукІыгъ. 16 Даут аукІыгъэм кІэлъиІожьыгъ: «Уихьадэгъу ор-орэу къэблэжьыгъ: Зиусхьаным къахихыгъэр уукІыгъэу къызэоІом уифэшъуашэр ор-орэу къызфэпхьыжьыгъ».
Даут Саулрэ Ионэтанрэ зэригъэягъэхэр
17 Даут Саулрэ ащ ыкъо Ионэтанрэ мыщ фэдэ гъыбзэ къафиІуагъ: 18 Яшар итхылъ зэритхагъэу, ехъуд лъэпкъым «Щабзэм иорэд» ебгъэшІагъ: 19 «А Израил, уищытхъузехьэхэр уилъэгапІэхэм ахэкІодагъэх, О лІыхъужъ гущэхэр зэрэфэхыгъэхэр! 20 Гъат къалэм къэбар щышъумыІуат, Ащкъэлэн иурамхэми макъэ ащышъумыгъэІу, армырмэ фылистмэ япхъухэр гушІоных, сунэт зымышІыгъэмэ япхъухэр тхъэжьыных. 21 ГъылбэуаІ Іуашъхьэхэр! Осэпси ощхи къышъуферэмых, лэжьыгъэ зэрылъ губгъуи шъуакІыІу терэмылъ, лІыхъужъхэм ямэІу къызэхакъутагъэшъ, Саул имэІоу дагъэ зыщафэгъагъэм къытекІуагъэхэшъ. 22 УкІыгъэмэ алъ къытенэу, лІыхъужъхэм апкъышъол пхыригъэкІэу Ионэтан ищэбзащэ дэлъ щабзэр ренэу атыригъафэщтыгъ, Саул ичати фэІазэу ыгъабзэщтыгъ. 23 Саулрэ Ионэтанрэ зэшІугъэх, зэгурыІощтыгъэх, щэІэфэхи ядунай захъожьми зэшІокІодыгъэхэп; бгъашхъомэ анахь псынкІагъэх ахэр, аслъанхэм анахь лъэшыгъэх. 24 О израилыпхъухэр! Жъугъае Саулэу, шэкІ плъыжь дахэкІэ шъузыфапэщтыгъэр, щыгъынхэм къадэшъуштэнэу дышъэ хьап-щыпхэр къышъуфязгъащэщтыгъэр. 25 О лІыхъужъ гущэхэр зэуапІэм зэрэщыфэхыгъэхэри! О уилъэгапІэ гущэхэм къащаукІыгъэу Ионэтан щылъи. 26 Сшэу Ионэтан, ощ пае сэшъыгъо, усилъэпІэ дэдагъ; гуфэбэныгъэу къысфыуиІагъэр сэркІэ бзылъфыгъэм ишІулъэгъу нахьи нахь лъэшыгъ. 27 О лІыхъужъ гущэхэр зэрэфэхыгъэхэри – Іашэ гущэхэри хэкІодагъэхи!»
закрыть
1 . Царств 30 : 17 - 20 : Даут ахэм атебани, пчыхьэ чэпэзэхэогъум къыщегъэжьагъэу ятІонэрэ мафэм ипчыхьэ нэс язэуагъ, махъшэмэ затезыдзи хэлъэдэжьыгъэ кІэлэ шъиплІым анэмыкІэу, ахэм ащыщ гори псэоу ІэкІэкІыжьыгъэп. Іамалэкъмэ аштэгъагъэхэр зэкІэ Даут къатырихыжьыгъ, ишъузитІуи Даут къатырихыжьыгъ. Арти зи ахэм ашІокІодыгъэп, акъохэми, апхъухэми, Іамалэкъмэ атырахыгъагъэми ащыщ гори ахэмызэу зэкІэри Даут ыІэ къыригъэхьажьыгъ. Былымхэри, пчэн-мэлхэри Даут къатырихыгъэх, ежьхэм ябылымхэм ахэр апэ итхэу, «Мыхэр Даут къатырихыгъэх» аІозэ, къафыщтыгъэх.
Даут Ехъудэм ипачъыхьэ зэрэхъугъэр
1 А зэпстэумэ ауж Даут Зиусхьаным еупчІыгъ: «Ехъуд хэкум икъалэмэ ащыщ горэм сыкІомэ хъущта?» Зиусхьаным ащ къыриІожьыгъ: «КІо». Даут къыІуагъ: «Тыда сыздэкІощтыр?» Ащ къыриІожьыгъ: «Хъэурэн». 2 Арти ишъузитІуи, ИзрыІэлым щыщ АхъынэІамрэ чІыпІэу Къармэл щыщ Нэбал игощагъэу, шъузабэу къэнэгъэ Абигаилрэ игъусэхэу Даут ащ кІуагъэ. 3 Игъусэхэри хэт иунагъуи кІыгъоу къакІохи, Хъэурэнрэ ащ къыпэблэгъэ къалэхэмрэ адэтІысхьагъэх. 4 Ехъуд лІыхэр къызэІукІэхи, ехъуд лъэпкъым ипачъыхьанэу Даут дагъэ щафагъ. ГилыІадым ит къалэу Яощ щыщ лІыхэм Саул зэрагъэтІылъыжьыгъэм икъэбар Даут къыфахьыгъ. 5 Арти ГъылыІадым ит къалэу Яощ дэсхэм адэжь лІыкІохэр ыгъакІохи, Даут ахэм араригъэІуагъ: «Шъуизиусхьанщтыгъэу Саул гукІэгъу фэшъушІи зэрэжъугъэтІылъыжьыгъэм пае Зиусхьаным ынэшІу къышъущэф, 6 джы Зиусхьаныр шъоркІэ гукІэгъушІэу, къышъуфэшъыпкъэу, ыпэкІэ къызэрэшъуфыщытыгъэм фэдэу къэрэнэжь, сэри шъуизекІуакІэ ипэгъокІ шІуфашІэ къышъоспэсыжьын; 7 джы зыжъугъэпыт, лІыгъэ къызхэжъугъаф, сыда пІомэ шъуизиусхьанэу Саул щыІэжьэп, сэ ехъуд лъэпкъым сырипачъыхьэнэу дагъэ сшъхьэ къыщафагъ».
Ищбощэт Израилым ипачъыхьэ зэрэхъугъэр
8 Ау Нэр ыкъо, Саул идзэпащэу Абинэр, Саул икІалэу Ищбощэт къызэригъэгъуси, Мэхъэнэим къыщагъ. 9 ЕтІанэ зэрэ-Израилэу ипачъыхьанэу тыригъэхьагъ. ЧІыпІэхэу ГъылыІадыр, Ашыурыр, ИзрыІэлыр, ефраим, бынямин лъэпкъхэр а пачъыхьагъум къыхиубытэщтыгъэх. 10 Саул ыкъо Ищбощэт Израилым ипачъыхьанэу зытехьэм илъэс тІокІитІу ыныбжьыгъэр, пачъыхьагъум зэрэтетыгъэр илъэситІу. Даут игъусагъэр ехъуд лъэпкъыр ары. 11 Ехъуд лъэпкъым ипачъыхьэу Даут зэпстэумкІи Хъэурэн зэрэдэсыгъэр илъэсиблрэ мэзихрэ.
Саулрэ Даутрэ ялІакъохэр зэрэзэшІонагъэхэр
12 Нэр ыкъо Абинэр, Саул ыкъо Ищбощэт идзэкІолІхэр зэгъусэхэу Мэхъэнэим къикІхи ГъыбІон къалэм къэкІуагъэх. 13 Цырыуй икІалэу Иоаб Даут идзэкІолІхэр кІыгъухэу ахэм апэуцужьынхэу къежьэхи, ГъыбІон псыуцупІэм дэжь щызэІукІагъэх. Зы купыр зы нэпкъым къыщыуцугъ, ятІонэрэ купым адрэ нэпкъыр уцупІэкІэ къыхихыгъ. 14 Ащ ыуж Абинэр Иоаб риІуагъ: «КІэлэ заулэ къыхэрэкІи, тапашъхьэ щызэрэзаох». Иоаб къыриІожьыгъ: «КъыхэрэкІых». 15 Арти бгъуитІумкІи дзэкІолІ заулэ къахэкІотыгъ, Саул ыкъо Ищбощэт игъусэмэ быняминэу нэбгырэ пшІыкІутІу, Даут игъусэхэми джащ фэдиз къызхагъэкІыгъ. 16 Ахэр зэжэхэбанэхи, ашъхьэхэр шІозэрэубытыкІхэмэ, чатэхэмкІэ зэхэпыджэжьхэмэ зэрэукІыжьхэзэ, а чІыпІэм щыхэзэрэгъэфагъэх. Ащ пае а чІыпІэм ГъыбІон дэжь щыІэ Хъэлкъат-ХаццуримкІэ, Чатэмэ яшъофкІэ еджагъэх. 17 А мафэм зэо пхъашэ щыІагъ, Даут идзэкІолІхэр Абинэррэ темыр Израилым щыщ дзэкІолІэу ащ игъусагъэхэмрэ атекІуагъэх. 18 Цырыуй ыкъуищи: Иоаби, Абищаи, Іасаели ахэм ахэтыгъэх. Іасаел къушъхьэпчэн Іэлым фэдэу лъэпсынкІэу щытыгъ. 19 Арти Іасаел Абинэр рифыжьи, илъэужхэм занкІэу атетэу, кІэкІэу ыуж ихьагъ. 20 Чъэхэзэ Абинэр къызэплъэкІи къеупчІыгъ: «Ора ар, Іасаел?» Мыдрэм ащ риІожьыгъ: «Сэры». 21 Абинэр ащ къыриІуагъ: «Сэ сауж икІи, дзэкІолІ ныбжьыкІэмэ ащыщ горэм ыуж ихьи, иІэшэ-шъуашэхэр къыпыхых». Ау Іасаел ащ ыуж икІыгъэп. 22 Джыри икІэрыкІэу Абинэр Іасаел къыриІуагъ: «Сауж икІ, сыд пае усэонышъ, ухэзгъэфэн фая? Пшэу Иоаб ыпашъхьэ етІанэ сыдэущтэу сихьажьыщта?» 23 Адрэр ыуж икІынэу фэягъэпти, Абинэр зыкъызэригъэзэкІи пчыпыджынымкІэ ыныбэ къыхэпыджагъ; пчыпыджыныр пхырыкІыпи, ащ дэжьым ар къыщызэхафи, а чІыпІэм ыпсэ щыхэкІыгъ. ЫужкІэ Іасаел зыщыфэхыгъэу, ыпсэ зыщыхэкІыгъэ чІыпІэм блэкІырэ пстэури къыщызэтеуцощтыгъэх. 24 Ау Иоабрэ Абищайрэ Абинэр лъежьагъэх. Ыуж итэу кІохэзэ, ГъыбІон шъофнэкІым екІурэ гъогур Іуашъхьэу Гъыяхъ зыщебгъукІорэм дэжь пэчІынэтІэ Іуашъхьэу Аммэ зынэсхэм, тыгъэр къохьэгъэхагъ. 25 Арти быняминхэр Абинэр купэу къезэрэугъоилІэхи, зэонхэу загъэхьазыри, Іуашъхьэ горэм ышыгу зыщагъэпытагъ. 26 ЕтІанэ Абинэр Иоаб къеджи къыриІуагъ: «Икъущтба чатэкІэ лъэу дгъэчъагъэр? Хьауми заом тхьамыкІагъо къызэрэздихьырэм ущыгъуазэба? Акъошхэм ащ нахьыбэрэ ямызэожьынхэу уицІыфхэм ямыІоу джыри бэ тебгъэшІэщта?» 27 Иоаб ащ къыриІожьыгъ: «Тхьэр зэрэщыІэр сэІо! Ар джы къэмыІогъагъэмэ, цІыфхэм пчэдыжь нэс акъошхэм ялъэуж афыщтыгъэ». 28 Ащ ыуж Иоаб гъоупщынэм къызепщэм, дзэкІолІхэр зэкІэ къызэтеуцуагъэх, ащ нахьыбэри израил цІыфхэм ауж итыжьыгъэхэп; заор щагъэтыжьыгъ. 29 Абинэррэ игъусэгъэ дзэкІолІхэмрэ а чэщым ренэу Иордан кІэим рыкІуагъэх, етІанэ Иордан зэпырыкІхи, пчэдыжьым къыщегъэжьагъэу щэджагъом нэс гъогу тетыгъэхэ нэуж Мэхъэнэим нэсыгъэх. 30 Иоаб Абинэр ыуж икІыжьи къэуцужьыгъ, дзэкІолІхэр зэкІэ къызызэІуегъакІэхэм, Даут идзэкІолІмэ Іасаел нэмыкІэу нэбгырэ пшІыкІубгъу ахэтыжьыгъэп. 31 Даут идзэкІолІхэм быняминхэри Абинэр игъусагъэмэ ащыщхэри нэбгырэ шъищрэ тІокІищрэ хъоу зэхаукІагъэх. 32 ЕтІанэ Іасаел ятэ зыщагъэтІылъыжьыгъэ чІыпІэу Бэтлэхъэм дэтым щагъэтІылъыжьыгъ. Иоабрэ игъусэ дзэкІолІхэмрэ чэщ ренэм кІохи, нэфшъагъом Хъэурэн нэсыгъэх.
1 Саул иунагъорэ ащ готхэмрэ Даут иунагъорэ ащ готхэмрэ зэнэкъокъухэу бэрэ хэтыгъэх. Даут ылъапсэхэр нахь пытэщтыгъэх, Саул иунагъорэ ащ готхэмрэ яІофхэр нахь дэй хъу зэпытыщтыгъэх.
Даут икІалэхэр
2 ЕтІанэ Даут кІалэхэр Хъэурэн къыщыфэхъугъэх. Апэрэ шъаоу Аминон къыфэзылъфыгъэр изрыІэлыпхъоу АхъынэІам ары, 3 ятІонэрэр Къылау, ар зиягъэр, Нэбал игощагъэу Къармэл щыщ Абигаил; ящэнэрэр – Абищэлэм, ащ янагъэр Гъышыурым ипачъыхьэу Тэлмай ыпхъоу МэІах; 4 яплІэнэрэр – Адоный, Хъаджэт икІэлагъ; ятфэнэрэр – Щэфатый, Абитал икІэлагъ; 5 яхэнэрэр – ИтрэІам, къэзылъфыгъэр Даут ишъхьагъусэу Іэгълэ. Ахэр Даут Хъэурэн къыщыфэхъугъэх.
Абинэррэ Даутрэ язэгурыІоныгъ
6 Саул иунагъорэ ащ готхэмрэ, Даут иунагъорэ ащ готхэмрэ азыфагу зэмызэгъыныгъэ елъыфэ Абинэр Саул иунагъорэ ащ готхэмрэ ягъусэу Іэшъхьэтетныгъэ ІэнатІэм щылъыкІотагъ. 7 Айэ ыпхъоу РицпэкІэ заджэхэрэр Саул ишъузгуадзэщтыгъ. Саул ыкъо Ищбощэт Абинэр риІуагъ: «Сятэ ишъузгуадзэщтыгъэм дэжь сыда узкІихьэщтыгъэр?» 8 Ищбощэт къыриІуагъэм лъэшэу къыгъэгубжыгъэу Абинэр ащ риІожьыгъ: «Сыкъумал къыпшІошІа? Ехъудэм сыпэшІуекІоу, уятэу Саул, ащ ышхэмрэ иныбджэгъухэмрэ сагоуцуагъ, ори Даут ыІэ уислъхьагъэп, ау бзылъфыгъэм пае псэкІодэу сшІагъэр къыспэоІэты. 9 Пачъыхьагъур Саул иунагъо къызэрэІэкІихыжьыщтыр, Даут ипачъыхьагъу Дан къыщегъэжьагъэу БэрщэбаІ нэсыжьэу Израилымрэ Ехъудэмрэ зэращигъэуцущтыр Тхьэм къыІуагъ. Зиусхьаным Даут къыдишІыгъэ зэзэгъыныгъэр зысымыгъэцэкІэжькІэ, ифэшъуаши ащ нахьыбэжьи Тхьэм Абинэр рерэгъэгъот!» 11 Арти Ищбощэт Абинэр зыпари риІожьышъугъэп, сыда пІомэ ар ащ щыщынэщтыгъэ. 12 Ащ ыуж Абинэр Даут дэжь лІыкІохэр ыгъакІохи ригъэупчІыгъэх: «Орба мы чІыгур зыІэ илъыщтыр? Іуагъэ зэдэтэгъэшІи, израил лъэпкъыр зэрэщытэу къыбгоуцоным пае гъусэ сыпфэхъущт». 13 Арти къыраригъэІожьыгъ: «Дэгъу, Іуагъэ къыбдэсшІыщт, ау зыгорэкІэ сыолъэІущт – Саул ыпхъоу Михэл къыздэмыщагъэу укъысІукІэнэу укъызыкІокІэ, зыозгъэлъэгъущтэп». 14 Ащ ыуж Саул ыкъо Ищбощэт дэжь Даут лІыкІохэр ыгъакІохи раригъэІуагъ: «Фылист нэбгыришъэм яукІытапІэхэу къапысыупкІыгъэхэр уасэу зыфэстыгъэ сишъузэу Михэл къысэтыжь». 15 Арти Ищбощэт ащ лъигъакІохи, илІ, Лаиш ыкъо Палтый, къытырихыжьыгъ. 16 ЛІыр ауж къихьи, Бахъурим нэс гъызэ къадэкІуагъ; ау Абинэр «Гъэзэжь!» ащ зыреІом, адрэм ыгъэзэжьыгъ. 17 ЕтІанэ Абинэр Израилым инахьыжъ упчІэжьэгъухэм ариІуагъ: «Даут шъуипачъыхьэнэу тапэкІэ шъуфэягъэшъ, 18 шъуигухэлъ джы къыздэжъугъэхъун шъулъэкІыщт. Сыда пІомэ Зиусхьаным Даут къыгъэгугъагъ: „СиІумэтэу Даут ишІуагъэкІэ сиизраил лъэпкъ фылистхэми адрэ ипый пстэуми ащысыухъумэщт"». 19 Ар дэдэр Абинэр быняминхэми ариІуагъ. ЕтІанэ Абинэр зэрэ-Израилэуи бынямин лІакъоми зэрэщытэу яшІоигъоныгъэ зыфэдэр къыфиІотэнэу Даут дэжь Хъэурэн кІуагъэ. 20 Нэбгырэ тІокІ игъусэу Абинэр Даут дэжь Хъэурэн къэкІуагъ, Абинэррэ ащ игъусэхэмрэ ешхэ-ешъо Даут къафишІыгъ. 21 Арти Абинэр Даут риІуагъ: «Сизиусхьанэу пачъыхьэм зэрэизраил лъэпкъэу Іуагъэ къыдишІыным, къыІукІэнхэм, ыгу къызэриІоу зэкІэми япачъыхьэным пае сыкІонышъ къыфесщэлІэщт». Даут Абинэр ытІупщыжьыгъ, адрэми мамырэу ыгъэзэжьыгъ.
Абинэр зэраукІыгъэр
22 Даут идзэкІолІхэу, Иоаб игъусэхэу чІыпІэ зэфэшъхьафмэ къащызэуагъэхэр мылъкушхо къыздащи къэкІожьыгъэх. Ау Абинэр Даут ытІупщыжьыгъагъэти, Даут дэжь, Хъэурэн, ар щыІэжьыгъэп, ащ мамырэу ыгъэзэжьыгъагъ. 23 Иоабрэ дзэу ащ игъусагъэмрэ къызагъэзэжьым, Нэр ыкъо Абинэр пачъыхьэм дэжь къызэрэкІогъагъэри, адрэм ар зэритІупщыжьыгъэри, мамырэу зэригъэзэжьыгъэри къыфаІотагъэх. 24 Арти Иоаб пачъыхьэм дэжь къакІуи къыриІуагъ: «Сыда пшІагъэр? Абинэр уадэжь къэкІогъагъ, сыда ар зыкІэптІупщыжьыгъэр, мамырэу зыкІебгъэгъэзэжьыгъэр? 25 Нэр ыкъо Абинэр зыфэдэр ошІэба: уигъэпцІэнэу, угу зыришІыкІынэу, уидэхьапІи уидэкІыпІи – зэкІэ пшІэрэр пкІэкІишІыкІыным пае ар мыщ къызкІэкІогъагъэр». 26 Ащ ыуж Иоаб Даут дэжь къикІыжьи Абинэр лъыригъэжьагъэх; Бэр-Сирэ чІыпІэм нэсыжьыгъэу, Даут щымыгъуазэу ащ къырагъэгъэзэжьыгъ. 27 Абинэр Хъэурэн къызегъэзэжьым, Іоф шъэф горэм пае дэгущыІэщт фэдэу зыригъэшІзэ, Иоаб ар къэлапчъэхэм акІоцІырищи, укъызщымылъэгъощт къогъу горэм дэжь ыныбэ щыхэпыджагъ. Джаущтэу Иоаб ышэу Іасаел ылъэу ыгъэчъагъэм Абинэр текІодэжьыгъ.
Абинэр ихьадэгъу Даут къызэрэзыхишІагъэр
28 Ащ ыуж Даут къэбарыр зишІагъэр, арти ащ ыІуагъ: «Нэр ыкъо Абинэр ылъэу агъэчъагъэм сэри сипачъыхьагъуи тилажьэ Зиусхьаным ыпашъхьэ егъашІи щыхэлъынэп. 29 Иоабрэ ащ ятэ иунагъорэ зэрэщытэу лажьэр атерэф, Иоаб иунагъо щынуз зиІэхэм, бэгушІоІунэ хъугъэхэм, е бэщыр зикІэгъэкъон сэкъатхэм, е чатэкІэ хагъафэхэрэм, е зышхын зэзымыгъотылІэжьхэрэм егъашІэм ащэрэмыкІ». 30 ГъыбІон дэжь щыкІогъэ заом Іасаел зэрэщиукІыгъагъэм пае ащ ышхэу Иоабрэ Абищайрэ Абинэр зыкІаукІыжьыгъэр. 31 Даут Иоабрэ ащ игъусэ цІыфхэмрэ унашъо афишІыгъ: «Шъуищыгъынхэр зэІышъутхъхи, дзыопхъэ шэкІ пхъашэм хэшІыкІыгъэ шъыгъошъэ джанэхэр зыщышъулъэхи, Абинэр жъугъае». Ар зыдэлъ пхъэмбаим ыуж итэу пачъыхьэу Даут кІощтыгъэ. 32 Абинэр Хъэурэн щагъэтІылъ зэхъум, ащ икъэ дэжь щытэу пачъыхьэм лъэшэу ар ыгъэягъ; зэкІэ цІыфхэми ар агъэягъ. 33 ЕтІанэ пачъыхьэм гъыбзэ ащ фызэхилъхьагъ: «Абинэр фэдэр ара делэгъэ лІакІэр зэпэсыгъэр? 34 О пІэхэр пхыгъагъэхэп, плъакъохэми пшъэхъухэр ателъыгъэп, бзэджашІэхэм цІыфыр зэраукІ хабзэу, жъалымыгъэкІэ узыхагъафэм». Ащ цІыфхэр зэкІэ джыри нахь къыгъэгъыгъэх. 35 ЦІыфхэр Даут дэжь къакІохи гъомлапхъэм хэІанэу къызыраІом джыри мэфагъэ, ау Даут тхьэлъанэ ышІыгъ: «Тыгъэр къомыхьафэ хьалыгъуми е нэмыкІ гори зызІузгъафэкІэ Тхьэм сифэшъуашэри нахьыбэжьи серэгъэгъот». 36 ЦІыфхэм зэкІэми ар зэхахыгъэти, пачъыхьэм адрэ ышІэрэ пстэури зэрягуапэщтыгъэм фэдэу мыдрэри ягопагъ. 37 Нэр ыкъо Абинэр пачъыхьэм зэремыкІодылІагъэр зэкІэ дзэкІолІхэми зэрэ-Израилэуи а мафэм къагурыІуагъ. 38 Пачъыхьэм иІумэтхэм ариІуагъ: «Пэщэшхощтыгъэмрэ зы лІэу щытыгъэмрэ мы мафэм Израилым зэрэщаукІыгъэр шъошІэба? 39 Сыпачъыхьэнэу сшъхьэ дагъэ къыщафагъэми, сэ джыри лъэкІ сиІэгоп, мыдрэ лІыхэр, Цырыуй ыкъохэр, сэщ нахь лъэшых. Бзэджагъэ зышІэрэ цІыф бзаджэм ифэшъуашэ Зиусхьаным рерэгъэгъот!»
Ищбощэт зэраукІыгъэр
1 Абинэр Хъэурэн зэрэщылІагъэм икъэбар Саул ыкъо Ищбощэт зызэхехым, ыгу къышІуефэхыгъ, зэрэ-Израилэуи зытыриубытэщтыр ымышІэу гумэкІым зэлъиштагъ. 2 Саул ыкъо Ищбощэт дзэ куп хэушъхьафыкІыгъэмэ япащэхэу нэбгыритІу иІагъ, зым ыцІагъэр БэІан, адрэм – Рехаб. Ахэм ятагъэр бынямин лІакъом къыхэкІыгъэу, БэІэрот къалэм щыщэу Риммон. БэІэрот Бынямин хэкум къыхиубытэщтыгъэ. 3 БэІэрот щыщхэр Гъытаим екІужьыгъагъэх, хэхэсыцІэр яІэу джы къызнэсыгъэми ахэр ащ щэпсэух. 4 Саул ибын къыхэкІыгъэу джыри зы кІалэ щыІагъ. Ар Саул ыкъо Ионэтан икІалэу лъащэщтыгъэр ары. Ионэтанрэ Саулрэ якъэбар ИзрыІэл къалэм къырахи къызагъэсым ащ ыныбжьыгъэр илъэситф. Ар зыІыгъыщтыгъэ бзылъфыгъэм шъэожъыер къыпхъуати къечъэжьагъ. ГуІэным хэтэу чъэзэ, къыІэпызи тыригъэфэгъагъэти ары кІалэр лъащэ зыкІэхъугъагъэр. Ащ зэреджэщтыгъэхэр Ищбощэт. 5 БэІэрот щыщ Риммон ыкъохэу Рехабрэ БэІанрэ ежьэхи, щэджэгъонэстырым тефэу Ищбощэт иунэ екІолІагъэх; щэджэгъо чъые ышІэу адрэр щылъыгъ. 6 Рехабрэ ышэу БэІанрэ коц къырахыщт фэдэу унэм ихьэхи, ащ ыныбэ хэпыджэхи къыкІатхъужьыгъ. 7 Унэм ихьэгъагъэх, чъыяпІэм ит пІэкІорым ар илъыгъагъэти, ахэр ащ еохи аукІыгъагъ, ышъхьэ къышІуаупкІыгъагъ. Ар къыздашти, чэщ ренэм Араба шъофнэкІым итхэу кІуагъэх. 8 ЕтІанэ Ищбощэт ышъхьэ Даут дэжь Хъэурэн къахьи пачъыхьэм раІуагъ: «Мары Ищбощэт, упсэ ыуж итыгъэ уипыеу Саул ыкъо ышъхьэ; тизиусхьанэу пачъыхьэм пае Саули ащ ибыни яфэшъуашэр Зиусхьаным аригъэгъотыжьыгъ». 9 Ау Даут БэІэрот щыщ Риммон ыкъохэу Рехабрэ ащ ышэу БэІанрэ ариІожьыгъ: «Къиныгъо пстэуми спсэ ащызыухъумэгъэ Зиусхьаныр зэрэщыІэр сэІо! 10 „Мары Саул лІагъэ", – ыІоу къэбар къысфэзыхьыгъэр, мэкъэшІу къысигъэІугъэу зылъытэщтыгъэр сыубыти Цыкълагъ щязгъэукІыгъ. Джары къэбарышІоу къыхьыгъэм пае сэ ащ фэзгъэшъошагъэр. 11 Адэ джы лажьэ зимыІэ цІыфыр иунэ илъэу пІэм хэзыукІыхьэгъэ бзэджэ-наджэхэм аІэкІэ хьакъынчъэу агъэчъэгъэ лъыр ясымыгъэпщыныжьынэуи, чІыгум тесымыгъэкІодыкІынхэуи?» 12 Ащ тетэу Даут идзэкІолІхэм унашъо афишІи, ахэр аригъэукІыгъэх, аІэхэмрэ алъакъохэмрэ паупкІхи, Хъэурэн дэт псыутІэм дэжь щыпалъагъэх. Ищбощэт ышъхьэ Хъэурэн щагъэтІылъыгъэ Абинэр икъэ дычІалъхьажьыгъ.
Даут Израилымрэ Ехъудэмрэ япачъыхьэ зэрэхъугъэр
1 Ащ ыуж Израилым илІэкъо пстэури Даут дэжь Хъэурэн къакІохи къыраІуагъ: «Тэри ори зыл тыщыщ шъыпкъ. 2 Нахьыпэм, Саул зыщыпачъыхьагъэм, израилыдзэхэм урягъуазэу заом Іупщэщтыгъэхэба. Зиусхьаным о къыуиІуагъ: „Мэлахъом Іэхъогъур хъупІэшІум зэрифырэм фэдэу, сиизраил лъэпкъ зезыщэщтыр оры, Израилым ипэщэщтыр оры"». 3 Израилым инахьыжъ упчІэжьэгъухэу пачъыхьэм дэжь Хъэурэн къэкІогъагъэхэм пачъыхьэу Даут Зиусхьаным ыпашъхьэ Іуагъэ ащыдишІыгъ; зэрэ-Израилэу ипачъыхьанэу Даут ышъхьэ дагъэ щафагъ. 4 Даут пачъыхьэ зэхъум ыныбжьыгъэр илъэс щэкІ; зэрэпачъыхьагъэр илъэс тІокІитІу. 5 Хъэурэн дэсэу илъэсиблрэ мэзихрэ Ехъудэм ипачъыхьагъ, Ерыусэлэм дэсэу илъэс щэкІырэ щырэ Израилымрэ Ехъудэмрэ зэрэщытэу япачъыхьагъ.
Даут Ерыусэлэм зэриштагъэр
6 ЕтІанэ пачъыхьэу Даутрэ ащ идзэхэмрэ Ерыусэлэм аштэнэуи а чІыпІэм щыпсэурэ еусхэм язэонхэуи ежьагъэх. Ау адрэхэр «Даут мыщ къыдэхьашъущтэп» аІозэ егупшысщтыгъэхэти, Даут къыраІуагъ: «Мыщ укъыдэхьашъущтэп, нэшъухэри лъащэхэри къыозэожьышъущтых». 7 Ау Цион пытапІэр Даут ыштагъ: ыужкІэ Даут икъалэкІэ ащ еджагъэх. 8 Арти а мафэм Даут ыІуагъ: «Еусхэр шъуукІынхэу шъуфаемэ, къалэр зытет къушъхьэм пхыраутыгъэ псырыкІуапІэмкІэ шъукІуи, Даут зыфэмылъэгъухэу зыфаІорэ нэшъухэмрэ лъащэхэмрэ шъуащытебан». «Нэшъухэмрэ лъащэхэмрэ Зиусхьаным иунэ ихьашъущтхэп» джары зытыраІукІыгъэри. 9 Ащ ыуж Даут пытапІэм дэтІысхьи, Даут икъалэкІэ ащ еджагъ. ЫкІыбкІи, ыкІоцІкІи, тыдэкІи ар зэкІигъэпытыхьагъ. 10 Джащ тетэу Даут иІофхэр нахьышІоу кІохэзэ, нахь лъэши, нахь лъэрыхьи хъущтыгъэ. Зиусхьанэу ошъогу дзэхэр зиІэрылъхьэ Тхьэр ащ игъусагъ. 11 ЕтІанэ Цэур ипачъыхьэу Хъирам лІыкІохэр Даут дэжь къыгъэкІуагъэх, кедр пхъэхэр къыфаригъэщагъэх, пхъашІэхэмрэ унэзэтелъхьэхэмрэ къыгъэкІуагъэхэти, ахэм Даут къэлэсэрай фашІыгъ. 12 Джащ тетэу Израилым ипачъыхьанэу Зиусхьаным зэрэтыригъэхьагъэри, Ежь иизраил лъэпкъ пае ипачъыхьагъу зэрахиІэтыкІыгъэри Даут къыгурыІуагъ.
Даут икІалэхэр
13 Даут Хъэурэн къызыдэкІыжьым ыуж, Ерыусэлэм дэсзэ, шъузхэри шъузгуадзэхэри джыри къыщагъэх. Арти шъаохэмрэ пшъашъэхэмрэ боу джыри ащ къыщыфэхъугъэх. 14 Ерыусэлэм къыщыхъугъэхэм мары ацІэхэр: ЩаммыуаІ, Щэубаб, Нэтан, Сэлмэн, 15 Ипхъар, ЕлышыуаІ, Нэфэгъ, ЯфиаІ, 16 ЕлыщэмаІ, ЕладаІ, Елыфэлэт.
Фылистхэм зэратекІуагъэхэр
17 Израилым ипачъыхьанэу Даут дагъэ зэрэщафагъэр зызэхахым, ар къаубытыным пае фылистхэр лъыхъухэу къезэрэфыжьагъэх. Ар Даут зызэхехым пытапІэм екІугъ. 18 Джы фылистхэр къэсхи РэфаІим кІэим къыщыуцугъэх. 19 Арти Даут Зиусхьаным еупчІыгъ: «Фылистмэ сязаомэ хъущта? Ахэм сатебгъэкІощта?» Зиусхьаным Даут къыриІожьыгъ: «КІо, фылистхэр Сэ, шъыпкъэмкІэ, пІэ къислъхьащтых». 20 ЕтІанэ Даут БэІал-Фэрацим кІуи, ахэр ащ щызэхикъутагъэх. Даут ыІуагъ: «Псы къиугъэм зэкІэ зэрыздихьырэм фэдэу, Зиусхьаным сипыйхэр, слъэгъузэ, сыпырт ригъэфагъэх». Джары а чІыпІэм БэІал-ФэрацимкІэ зыкІеджагъэхэр. 21 Теплъэ зэфэшъхьафхэр зиІэ тхьэ папкІэхэу ашІыгъэхэр фылистмэ къагъэнагъэхэти, ахэр Даутрэ идзэкІолІхэмрэ чІыпІэ горэм Іуащыгъэх. 22 Ащ ыужи фылистхэр къакІохи РэфаІим кІэим къыщыуцугъэх. 23 Арти ышІэщтымкІэ Даут Зиусхьаным зеупчІым, Ащ къыриІожьыгъ: «УапэмыгъокІэу, мэркІо чъыгхэр зыщызэхэт чІыпІэм кІуи, акІыбкІэ къикІи къатебан. 24 ЕтІанэ дзэм икІо макъэ мэркІо чъыгмэ ашъхьагъкІэ къыщыІоу зызэхэпхкІэ ежь, сыда пІомэ фылистыдзэм утекІоным пае Зиусхьаныр уапэ итыщт». 25 Зиусхьаным къыриІуагъэм тетэу Даут зекІуагъэ, ГъэбаІ къыщегъэжьагъэу Гъэзэр нэс фылистхэр щызэхикъутагъэх.
Тхьэм ипхъонтэ лъапІэ Даут Ерыусэлэм къызэрихьыжьыгъэр
1 Ащ ыуж Израилым идзэкІолІ анахь лІыбланэхэр зэкІэ нэбгырэ мин щэкІ хъухэу Даут къызэІуигъэкІагъэх. 2 ЕтІанэ Тхьэм ипхъонтэ лъапІэу, ошъогу дзэхэр зиІэрылъхьэ Зиусхьаным ыцІэкІэ зэджагъэхэу, Ар къэрыубхэм атесэу зытешІыхьагъэр къыдахыжьыным пае Даутрэ идзэкІолІхэмрэ зэкІэ ехъуд къалэу БэІал кІуагъэх. 3 Тхьэм ипхъонтэ лъапІэ Абинэдау иунэу Іуашъхьэм тетым къырахыжьи, ку зэкІэт ашІыгъакІэм къырагъэуцуи къыращэжьэжьыгъ. Абинэдау икІалэхэу Іузэрэ Ахъиурэ ку зэкІэтыр къащэщтыгъэ. 4 Ахъиу Тхьэм ипхъонтэ лъапІэ зэрытыгъэ ку зэкІэтым ыпэ итыгъ. 5 Даути израил лъэпкъ пстэури шъонтырыпхэм, нэмыкІ пщынэ лъэпкъ зэфэшъхьафхэмрэ Іэпэ одыджынхэмрэ Зиусхьаным ыпашъхьэ щяощтыгъэх, орэдхэр къаІощтыгъэх, къашъощтыгъэх. 6 Нэхъон ихьамэщ дэжь къызэсхэм, кум кІэшІэгъэ цухэм Тхьэм ипхъонтэ лъапІэ къагъэукъончыгъэти, ар къемыфэхыным пае Іузэ ыІэ ыщэи ичІыпІэ ригъэуцожьыгъ. 7 Ау емынэгуеу Тхьэм ипхъонтэ лъапІэ зэрэнэсыгъэм пае Зиусхьаныр Іузэ лъэшэу къыфэгубжи, къытыригъафи, Тхьэм ипхъонтэ лъапІэ дэжь ар щылІагъ. 8 Зиусхьаным Іузэ сыпырт зэрэригъэфагъэм пае Даут губжыгъэ. А чІыпІэм джы къызнэсыгъэми «Іузэ сыпырт зыщырагъэфагъэр» аІозэ еджэх. 9 А мафэм Даут Зиусхьаным лъэшэу щыщти, зэриІожьыгъ: «Зиусхьаным ипхъонтэ лъапІэ таущтэу къэсыухъумэхэн?» 10 Арти Зиусхьаным ипхъонтэ лъапІэ ежь ыдэжь, Даут икъалэ, даримыгъахьэу, гъытытмэ ащыщэу Іабэд-Едом иунэ раригъэуцуагъ. 11 Зиусхьаным ипхъонтэ лъапІэ гъытытэу Іабэд-Едом иунэ мэзищэ итыгъэти, Іабэд-Едоми, иунагъуи, имылъкуи зэрэщытэу Зиусхьаным ынэшІу къащыфагъ. 12 «Тхьэм ипхъонтэ лъапІэ пае Іабэд-Едом иунагъуи ащ иІэ пстэуми Зиусхьаным ынэшІу къащыфагъ» аІуи, пачъыхьэм къэбар къыфахьыгъ. Ащ лъыпытэу Даут гушІуагъом хэтэу Тхьэм ипхъонтэ лъапІэ лъыкІуи, Іабэд-Едом иунэ къырихыжьи, Даут икъалэ ар къыхьыжьыгъ. 13 Зиусхьаным ипхъонтэ лъапІэ къэзыхьхэрэм лъэбэкъуих задзым, быгъурэ шкІэкІэ зишІугъорэ къурмэн ащ ышІыгъ. 14 Зиусхьаным ыпашъхьэ итэу Даут пкІэтэ-лъатэзэ чъэщтыгъэ; Даут къурмэнышІ чэтэнІабгъур пэІупхъогъагъ. 15 Джаущтэу Даутрэ израил лъэпкъымрэ къыхэкуукІхэзэ, гъоупщынэмэ къяпщэхэзэ, Зиусхьаным ипхъонтэ лъапІэ къахьыщтыгъэ. 16 Зиусхьаным ипхъонтэ лъапІэ Даут икъалэ къыдахьэ зэхъум, Саул ыпхъоу Михэл шъхьангъупчъэм къиплъи, Зиусхьаным ыпашъхьэ Даут зэрэщыдэпкІаерэмрэ къызэрэщышъорэмрэ къызелъэгъум, ыгукІэ къыкІэнэкІагъ. 17 Зиусхьаным ипхъонтэ лъапІэ къахьи, чэтэнгъэІэгъэ лъапІэм, Даут чІыпІэу щыфигъэнэфэгъагъэм агъэуцуи, Зиусхьаным ыпашъхьэ къурмэнгъэстрэ зэгурыІоныгъэ къурмэнрэ Даут щишІыгъэх. 18 Къурмэнгъэстрэ зэгурыІоныгъэ къурмэнрэ зешІыхэм ыуж Зиусхьанэу ошъогу дзэхэр зиІэрылъхьэм ыцІэкІэ шІоу щыІэ пстэури къыдэхъунэу лъэпкъым фэлъэІуагъ. 19 Ащ ыуж Израилым ицІыф пстэуми, хъулъфыгъэхэми бзылъфыгъэхэми хьалыгъу джэгурыдзэ, финик гъэгъугъэ зэхэгъэчъыхьэгъэ такъыр зырыз ыкІи сэнэшъхьэгъэгъугъэ афаригъэгощыгъ. ЕтІанэ цІыфхэр зэкІэ шъхьадж иунэ екІужьыгъэх. 20 Иунагъо исхэм Тхьэм ынэшІу къащыфэмэ зэрэшІоигъор ариІонэу Даут ядэжь къыгъэзэжьыгъ. Ишъхьагъусэу, пачъыхьэу Саул ыпхъоу Михэл къыпэгъокІи, къыриІуагъ: «УкІытэ зымышІэрэм зызэришІытэжьынэу Израилым ипачъыхьэ иІумэтмэ яунэІут бзылъфыгъэхэм апашъхьэ зыщитІэкІи, делэм фэдэу непэ зыкъызщешІытэжьым, боу къахэщыпагъэм!» 21 Арти Даут Михэл риІуагъ: «Уяти ащ иунагъуи зэрэщытэу къаблэІабыкІи Зиусхьаным илъэпкъэу Израилым илІышъхьэу сызышІыгъэ Зиусхьаным ыпашъхьэ сыкъыщешІагъ. Зиусхьаныр згъэлъапІэу ыпашъхьэ джыри сыщычэфыщт; 22 нахь лъэшыжьэуи зызгъэцІыкІущт, сэр шъыпкъэми сыгу зыфэмыкІожьэу зызгъэпсыщт, а зигугъу къэпшІырэ унэІут бзылъфыгъэхэм сищытхъу нахь аІощт». 23 Саул ыпхъоу Михэл илІэжьыгъо мафэ къэсыфэ сабый къыхэкІыгъэп.
Тхьэм Даут къызэригъэгугъагъэр
1 Пачъыхьэр иунэ гупсэфэу исэу, Іэгъо-благъом щыпсэурэ пыйхэр Зиусхьаным ащ къытыримыгъэбанэхэу зыригъэгъэпсэфзэ, 2 пачъыхьэм тхьэлІыкІоу Нэтан риІуагъ: «Кедрым хэшІыкІыгъэ унэм мары сэ сис, ау Тхьэм ипхъонтэ лъапІэ чэтэнгъэІэгъэ лъапІэм чІэт». 3 Арти Нэтан пачъыхьэм къыриІожьыгъ: «Угу илъыр зэкІэ шІэ, сыда пІомэ Зиусхьаныр уигъусэ». 4 Ау а чэщ дэдэм Зиусхьаным ыдэжь къикІыгъэ псалъэр Нэтан къылъыІэсыгъ: 5 «КІуи сиІумэтэу Даут еІу: „Зиусхьаным ыІорэр мары: Сэ сисынэу ора джы унэ сфэзышІыщтыр? 6 Израил цІыфхэр Мысырым къызисщыжьыгъэхэм щегъэжьагъэу унэ симыІэу къадэскІухьэзэ, непэ къызнэсыгъэми чэтэнгъэІагъэм сычІэтзэ къэсэхьы. 7 Израил цІыфхэм сырягъусэу тыдэ сыщыІагъэми, 'Кедр чъыгым хэшІыкІыгъэу сыд пае унэ сфэшъумыгъэуцура?' сІоу Сиизраил лъэпкъ ипэщэнэу пшъэрылъ зыфэсшІыгъэ лІакъомэ ащыщ горэм есІуагъа? 8 Арышъ сиІумэтэу Даут мыщ фэдэу сфеІу: Зиусхьанэу ошъогу дзэхэр зиІэрылъхьэм ыІорэр мары: Сиизраил лъэпкъ илІышъхьэ ухъуным пае мэл Іэхъогъум Сэрба укъыхэзыщыгъэр? 9 Тыдэ укІуагъэми сыуигъусагъ, уипый пстэуми кІодыкІаер къафэсхьыгъ, дунаим щызэлъашІэрэ цІыфышхомэ афэдэу пцІэ чыжьэу згъэІущт. 10 Сиизраил лъэпкъ чІыпІэ къыфэзгъотыщт, ылъапсэхэр згъэпытэщтых, гупсэфэу чІыпІэ ар исыщт, ащ нахьыбэри гумэкІ хэтыжьыщтэп, бзэджэ-наджэхэм язэрари ащ къырагъэкІыжьыщтэп, ыпэкІэ 11 Сиизраил лъэпкъ хьыкумышІхэр Іэшъхьэтет зыфэсшІыгъэхэм къыщегъэжьагъэу зэрэщытыгъэм фэдэу. Уипый пстэури къыптесымыгъэбанэу зыозгъэгъэпсэфыщт. Уиунагъо итетыгъо ыгъэпытэнэу Зиусхьаным етІани укъегъэгугъэ. 12 КъэбгъэшІэнэу щытыр къэбгъэшІагъэу, уятэхэр зыдэщыІэм зыбгъэзэжькІэ, къыппыкІыгъэу уаужкІэ псэущтыр къэзгъэтэджыжьыщт, ипачъыхьагъу згъэпытэщт. 13 Джары Сэ сцІэ пае унэ зыгъэуцущтыр. Ащ ипачъыхьагъу егъашІэм Сэ щызгъэІэщт. 14 Сэ ащ сырятэщт, ежь Сэ сикІэлэщт, псэкІод зишІэкІэ, цІыфыр зэрагъасэ хабзэу чырэ ІэкІэрэ сыпыухьащт, цІыфхэр къезгъаохэзэ, ифэшъуашэр езгъэгъотыщт; 15 ау ощ пае щызгъэзыий Саул сигукІэгъу зэрэхэсыныгъэм фэдэу ар хэсыныщтэп. 16 Уиунагъуи уипачъыхьагъуи сапашъхьэ егъашІэм итыщтых, уитетыгъуи егъашІэм къызэщыкъощтэп"». 17 Джары Тхьэм Нэтан зэкІэ къыриІуагъэхэу, къыригъэлъэгъугъэхэу Даут риІожьыгъэхэр.
Даут Тхьэм зэрелъэІугъэр
18 ЕтІанэ пачъыхьэу Даут кІуи, Зиусхьаным ыпашъхьэ иуцуи ыІуагъ: «Сыхэт сэ, Зиусхьанэу Тхьэр, сиунагъуи зыщыщыр сыд, ащ фэдизым нэсэу сызлъыпщэным пае! 19 Ар имыкъунэу О плъытагъэ, Зиусхьанэу Тхьэр; уиІумэт иунагъо къырыкІощтым икъэбар къэбгъэІугъ. Аущтэу зэрэхъущтыр сэ, цІыфым, къэсэогъашІэ, Зиусхьанэу Тхьэр! 20 Сыда джыри Даут О къыуиІон ылъэкІыщтыр? Зиусхьанэу Тхьэр, уиІумэт зыфэдэр ошІэ! 21 Къызэрэбгъэгугъагъэм пае угу къызэриІорэм фэдэу а Іофышхор уиІумэт къыфызэІоохы. 22 СыдрэмкІи О, Зиусхьанэу Тхьэр, уапшъэ кІошъун щыІэп, сыда пІомэ Ощ нэмыкІ зэрэщымыІэми, Ощ фэдэ хъунэу Тхьэ зэрэщымыІэми икъэбар тэ сыдыгъуи зэхэтхыщтыгъэ. 23 Уиизраил лъэпкъ, Тхьэр къызфэкІогъэ лъэпкъ закъоу дунаим тетым хэт фэдэн? Ежь ыцІэ къырырашІэжьыным паеба къыгъэнэжьыгъэ лъэпкъыр мысырхэм къызкІахищыжьыгъэр, нэмыкІ лъэпкъхэмрэ тхьэхэмрэ зэбгырыпфхи, къахэпхыгъэ уилъэпкъ лъэкІэуи щынэгъуагъэуи пхэлъхэр нэрылъэгъу къыфэпшІыгъэба? 24 Уиизраил лъэпкъ зыкъоуубыти, Ощ пае егъэшІэрэу зыкъобгъэпытыхьагъ, О, Зиусхьан, Тхьэ ащ уфэхъугъ. 25 Зиусхьанэу Тхьэр, О уиІумэтрэ ащ иунагъорэ яхьылІагъэу къэпІуагъэр егъэшІэрэу джы гъэпытэ, О пІуагъэри гъэцакІэ. 26 „Зиусхьанэу ошъогу дзэхэр зиІэрылъхьэ Тхьэр – Израилыр зыІэ илъ Тхьэр" аІозэ, егъашІэми о пцІэ агъэлъэпІэщт. УиІумэтэу Даут иунагъуи къэплъэгъузэ ылъапсэ пытэщт. 27 Зиусхьанэу ошъогу дзэхэр зиІэрылъхьэу, Израилым и-Тхь, „Уиунагъо итетыгъо згъэпытэщт" пІуи, уиІумэт къызэрепІуагъэм пае сыкъыолъэІунэу гу тесшІыхьагъэу, О уиІумэт джащ фэдэ тхьэлъэІур ыгу щызэригъэзэфагъ. 28 Арышъ, Зиусхьанэу Тхьэр! Оры Тхьэр, о пІорэр шъыпкъэ, Оры ащ фэдэ къэбарышІур уиІумэт къыфыхэзыщыгъэр! 29 ЕгъашІэм уапашъхьэ итынэу уиІумэт иунагъо джы щегъэжьагъэу унэшІу къыщыпфэнэу сыолъэІу, сыда пІомэ Оры, Зиусхьанэу Тхьэр, а къэбарыр къэзгъэІугъэр, О уиІэмыркІэ уиІумэт иунагъо егъашІэм унэшІу щыфэгъэщт».
Даут итекІоныгъэхэр
1 Ащ ыуж Даут фылистмэ атекІуи ахэр ыгъэІэсагъэх, Мэтэдж-Амэ фылистмэ къаІэкІихыжьыгъ. 2 Мэуаб лъэпкъми текІуи, къаубытыгъэ мэуабхэр чІыгум сатырэ-сатырэу тыригъэгъуалъхьэхи, сатырищ пэпчъ тІум ателъхэр аригъэукІыгъэх. Ящэнэрэ сатырэм телъыгъэхэр псэоу къагъэнэнхэу тыриубытагъ. Тын Іахьэхэр къыратынхэу мэуабхэр Даут пщылІы аригъэшІыгъэх. 3 Псыхъоу Пэрат пэІулъ чІыпІэм итетыгъо щигъэуцужь шІоигъоу Цэубэ ипачъыхьэу Рэхъоб ыкъо ХъэдадІэзэр Даут къезэонэу къызежьэм, ащи ар текІуагъ. 4 Арти шыу минрэ шъиблрэ лъэсыдзэм щыщэу нэбгырэ мин тІокІырэ ащ къытырихи, зэоным фытегъэпсыхьэгъэ кухэм акІэшІэгъэгъэ шымэ зэкІэми ялъынтфэхэр Даут зэпаригъэгъэчъыгъэх, ежь къызфигъэнэжьыгъэр куишъэм акІишІэщт шыхэр ары. 5 Шам щыщ арамхэр Цэубэ ипачъыхьэу ХъэдадІэзэр къыдеІэнхэу къежьагъэх, ау Даут арам нэбгырэ мин тІокІырэ тІурэ ыукІыгъ. 6 ЕтІанэ Даут дзэ куп Шам дэс арамхэм якъэрэгъулынхэу ыгъакІуи, тын Іахьэхэр къыратынхэу арамхэр ипщылІ хъугъэх. Тыдэ кІуагъэми Зиусхьаным Даут текІоныгъэр къыдыригъэхщтыгъэ. 7 Ащ ыуж Даут ХъэдадІэзэр ипщылІмэ аІыгъыгъэ дышъэ мэІухэр къаІиххи Ерыусэлэм къыщагъэх. 8 ХъэдадІэзэр икъалэхэу Бэтахърэ Бэротайрэ джэрзыбэ Даут къадищыгъ. 9 Даут ХъэдадІэзэр идзэ зэрэтекІуагъэм икъэбар Хъэмат ипачъыхьэу ТоІый зызэхехым, 10 ТоІый ХъэдадІэзэр езаощтыгъэти, ащ зэрезэуагъэмрэ зэрэтекІуагъэмрэ апае шІуфэс къырихынэу, къызэрэфэразэри къыриІонэу ыкъо Иорам ТоІый Даут дэжь къыгъэкІуагъ. Тыжьыным, дышъэм, гъуаплъэм ахэшІыкІыгъэ шыкъухэр Иорам ыІыгъыгъэх. 11 Пачъыхьэу Даут ахэри зытекІогъэ лъэпкъ пстэумэ къатырихыгъэхэ тыжьынымрэ дышъэмрэ ягъусэхэу Зиусхьаным фигъэшъошагъэх 12 Даут зытекІогъэ арамхэм, мэуабхэм, Іамонхэм, фылистхэм, Іамалэкъхэм, Цэубэ ипачъыхьэу Рэхъоб ыкъо ХъэдадІэзэри ахэр къатырихыгъагъэх. 13 КІэй ЩыугъэкІэ заджэхэрэм арам нэбгырэ мин пшІыкІуир зыщызэхекъутэм Даут ыцІэ чыжьэу Іугъэ. 14 Ащ ыуж дзэ куп Едомым щыкъэрэгъулынэу ригъэуцуагъ; зэрэ-Едомэу щыкъэрэгъулынэу дзэ куп ригъэуцуагъэти, едом цІыфхэр зэкІэ Даут ипщылІ хъугъагъэх. Тыдэ кІуагъэми Зиусхьаным Даут текІоныгъэр къыдыригъэхщтыгъэ.
Даут икъулыкъушІэхэр
15 Джаущтэу Даут зэрэ-Израилэу ипачъыхьагъ, зэрэлъэпкъэу Даут ихьыкумышІщтыгъ, шъыпкъэм тетэу ащ дэзекІощтыгъ. 16 Цырыуй ыкъо Иоаб дзэм иІэшъхьэтетыгъ, Ахъылыуд ыкъо Иощэфат иупчІэжьэгъу шъхьаІэщтыгъ, пачъыхьэм иунашъохэр цІыфмэ алъигъэІэсщтыгъэх. 17 Ахъытыу ыкъо Цэдокъ, Абыетар ыкъо Ахъымэлэх къурмэнышІщтыгъэх, Сэрай тхакІощтыгъэ, хэгъэгум къихъухьэрэ хъугъэ-шІагъэхэр ытхыжьынхэр ипшъэрылъыгъ; 18 ИодаІ ыкъо Бэнай Даут иухъумэкІо шъхьагъырытхэу къэрэт, пэлэт лъэпкъмэ ащыщхэм яІэшъхьэтетыгъ, Даут ыкъохэр къурмэнышІщтыгъэх.
Даутрэ Мэфибощэтрэ
1 Ащ ыуж Даут къыІуагъ: «Ионэтан ихьатыркІэ Саул ибынхэм ащыщ горэм гукІэгъу фэсымышІыгъэу къэнагъа?» 2 ЦыбэкІэ еджэхэу Саул иІумэт горэ щыІагъэти, ащ къеджэхи Даут дэжь къащагъ. Даут ащ еупчІыгъ: «Ора Цыбэр?» Адрэм къыриІожьыгъ: «Сэры, сыуиІумэт». 3 Арти пачъыхьэм ащ риІуагъ: «Саул ибынхэм ащыщ горэ псэуа? Тхьэм ихьатыркІэ гукІэгъу фэсшІыщтыгъэ». Цыбэ пачъыхьэм къыриІожьыгъ: «ЫлъэкъуитІукІэ лъащэу Ионэтан икІалэ псэу». 4 Пачъыхьэр ащ еупчІыгъ: «Тыда ар зыдэщыІэр?» Цыбэ пачъыхьэм къыриІожьыгъ: «Іамиел ыкъо къалэу Лэудэбар дэс Махыр иунэ ис». 5 Арти пачъыхьэу Даут Іамиел ыкъо Лэудэбар дэс Махыр лъигъакІохи къаригъэщагъ. 6 Саул ыкъо Ионэтан икІалэу Мэфибощэт Даут дэжь къакІуи, ыпашъхьэ зыщыридзыхи, чІыгум нэс шъхьащэ къыфишІыгъ. Даут ащ риІуагъ: «Мэфибощэт!» Адрэм къыриІожьыгъ: «Мары, сыуиІумэт». 7 Арти Даут ащ риІуагъ: «Умыщын, уятэу Ионэтан ихьатыркІэ гукІэгъу къыпфэсшІыщт, уятэжъэу Саул ичІыгухэр къыостыжьынхэшъ, сиІанэ упэсэу сигъомылэ пшхыщт». 8 Адрэм шъхьащэ къыфишІи къыриІуагъ: «Сэщ фэдэ хьэ лІагъэм уеплъынэу уиІумэт сыда зыхэтыр?» 9 Арти пачъыхьэр Саул иІумэтэу Цыбэ къеджи, ащ риІуагъ: «Саул иунагъо ыІэ илъыгъэ мылъкур зэкІэ уизиусхьан ыкъом ыкъожьым есэтыжьы, 10 ащ ичІыгухэр ори, уикІалэхэми, уипщылІхэми фэжъулэжьых, уизиусхьан ыкъом ыкъожьым ышхын иІэным пае лэжьыгъэр къэшъухьыжь; узиусхьан ыкъом ыкъожьэу Мэфибощэт сэ сиІанэ ренэу пэсыщт». Цыбэ кІэлэ пшІыкІутфрэ пщылІэу нэбгырэ тІокІырэ иІагъ. 11 Цыбэ пачъыхьэм риІуагъ: «Сизиусхьан иІумэт къыриІорэр зэкІэ уиІумэт ыгъэцэкІэщт». Пачъыхьэм ыкъохэм афэдэу Мэфибощэт ащ иІанэ пэсыгъ. 12 МихэкІэ еджэхэу Мэфибощэт шъэожъые иІагъ. Цыбэ иунагъо исхэр зэкІэ Мэфибощэт иунэІутыгъэх. 13 Джаущтэу Мэфибощэт Ерыусэлэм дэсыгъ, сыда пІомэ пачъыхьэм иунэ ренэу щышхэщтыгъ. Ар ылъэкъуитІукІи лъэщагъэ.
Іамонхэмрэ арамхэмрэ зэратекІуагъэхэр
1 Ащ ыуж охътэ тІэкІу тешІагъэу Іамонмэ япачъыхьэ лІи, ащ ыкъо Хъаныун пачъыхьагъум техьагъ. 2 Арти «Ятэ къысфишІагъэм пае Нэхъащ ыкъо Хъаныун гукІэгъу фэсшІын» ыІуи, Даут Хъаныун ятэ зэрэщымыІэжьым пае фэтхьаусхэнхэу лІыкІохэр ыгъэкІуагъэх. Ау Даут илІыкІохэр Іамон хэгъэгум къызэкІохэм, 3 Іамон лІышъхьэхэм язиусхьанэу Хъаныун раІуагъ: «Уятэ лъытэныгъэу къыфишІырэм пае тхьаусхакІохэр Даут уадэжь къыгъэкІуагъэхэу къыпшІошІа? Къалэм иІоф зытет шъыпкъэр зэрагъэшІэнышъ, етІанэ зэхакъутэным паеп шъуІуа Даут илІыкІохэр уадэжь къызкІигъэкІуагъэхэр?» 4 Арти Хъаныун Даут илІыкІохэр аригъэубытхи, нэбгырэ пэпчъ ыжакІэ икІэлъэныкъо тыраригъэупсыкІи, абгымэ анэсэу ящыгъын ІэпакІэхэр къыпаригъэупкІхи къытІупщыжьыгъэх. 5 А къэбарыр Даут къызылъагъэІэсыжьым, анапэ лъэшэу къытырахыгъэти, ахэм апигъэгъокІхи, пачъыхьэм араригъэІуагъ: «ШъужакІэхэр къэкІыжьыфэхэ Ерихъэу шъукъыдэси, етІанэ шъукъэкІожь». 6 Ащ ыуж Даут зэрэфэмылъэгъухэрэр Іамонхэм нафэ къызафэхъум, къызгуащэнхэшъ, зыдагъэзэонхэм пае, Бэтрэхъобрэ Цэубэрэ ащыщ арамхэм лъэсэу дзэкІолІ нэбгырэ мин тІокІ, МэІах ипачъыхьэ ицІыфхэу нэбгырэ мин, Тэу щыщэу нэбгырэ мин пшІыкІутІу къахащынхэшъ къаугъоинхэу цІыфхэр аІофтагъэх. 7 А къэбарыр Даут зызэхехым израил дзэ хэшыпыкІыгъэ пстэури игъусэу Иоаб заом ыгъэкІуагъ. 8 Іамонхэри къежьэхи ежьмэ якъалэ икъэлапчъэ дэжь къэуцугъэх, Цэубэрэ Рэхъобрэ къарыкІыгъэ арамхэр, Тэурэ МэІахрэ къарыкІыгъэ лІыхэр шъхьафэу шъофым къыщыуцугъэх. 9 Пыидзэхэр ыпэкІи ыужкІи къызэрэпэуцугъэхэр Иоаб къызелъэгъум, Израилым идзэкІолІмэ анахь лІыбланэхэр къахищхи арамхэм апигъэуцугъэх. 10 Адрэ къэнагъэхэр Іамонмэ язэонхэм пае ыгъэуцунхэу ышэу Абищай афигъэзагъ. 11 Иоаб ащ риІуагъ: «Арамхэр сэщ нахь лъэшхэ зыхъукІэ, укъыздеІэщт; Іамонхэр ощ нахь лъэшхэ зыхъукІэ, сыкъэкІонышъ сыкъыбдеІэщт. 12 Зыгъэлъэш, тилъэпкърэ Тхьэм къытитыгъэ къалэхэмрэ апае зытэгъэгъэпыт. Зиусхьаным зэрэшІоигъоу зэкІэ ышІэн ылъэкІыщт». 13 Ащ ыуж Иоаб къыгъэзэжьи, игъусэ дзэкІолІхэм къахэхьажьи арамхэм заор задеублэм, адрэмэ кІатхъужьыгъ. 14 Арамхэм ашъхьэ зэрэІуахыжьыгъэр Іамонхэм къызалъэгъум, Абищай кІэрыхъушъутыжьхи къалэм агъэзэжьыгъ. Арти Иоаб Іамонхэр къыбгынэхи Ерыусэлэм кІуагъэ. 15 Израил цІыфхэр къызэратекІуагъэхэр къызагурэІом, арамхэр къэзэрэугъоижьыгъэх. 16 Арти ХъэдадІэзэр Пэрат псыхъом зэпырыдзыгъэу щыпсэурэ арамхэм алъигъакІохи, ХъэдадІэзэр идзэпащэу Щэубах ягъусэу, ахэр цІыфпсэупІэу Хъэлам къекІолІагъэх. 17 Къэбарыр Даут зынагъэсым, зэкІэ дзэкІолІхэр ащ къыугъойхи, Иордан къызэпырыкІи, Хъэлам кІуагъэ. Арамхэр Даут къыпэуцухи, къезэуагъэх. 18 Арти израил цІыфхэм защаухъумэзэ, арамхэр ечъэжьэжьыгъэх. Арамхэм якухэу зэоным фытегъэпсыхьагъэхэм афэдэу шъиблрэ шыу мин тІокІитІурэ Даут зэхикъути, ядзэпащэу Щэубахи ыуІагъэти, а чІыпІэм ар щылІагъ. 19 Израил цІыфхэр къызэратекІуагъэхэр ХъэдадІэзэр зипэщэгъэ пачъыхьэмэ зэкІэми къызагурэІом, ахэр израил цІыфхэм къяшІухи, Іэрылъхьэ закъыфашІыгъ. Іамонхэм ащ нахьыбэрэ адеІэнхэкІэ арамхэр щынэщтыгъэх.
Имышъузэу БатщэбаІ Даут зэрэкІыгъугъэр
1 Гъатхэм икъихьагъум, пачъыхьэхэр заом зыщыкІорэм, идзэкІолІ пащэхэмрэ зэкІэ израилылІхэмрэ Иоаб игъусэхэу Даут заом зегъакІохэм Іамонхэм атекІохи, Раббэ къалэ къадзыхьагъ; ау ежь Даут Ерыусэлэм къыдэнэгъагъ. 2 Мафэ горэм, пчыхьэм фигъэзагъэу, Даут гъолъыпІэм къытетэджыкІыжьыгъэу, пачъыхьэ унэм ышъхьагъ тетэу тезэкІухьэзэ, унашъхьэм къызеплъыхым, бзылъфыгъэу зызгъэпскІрэр къылъэгъугъ; а бзылъфыгъэр нэр пІэпихэу дэхэ дэдагъ. 3 Арти бзылъфыгъэр зыщыщыр къызэрагъэшІэнэу Даут ыІофытагъэхэти, ЕлыІам ыпхъоу, хъыт лъэпкъым щыщ Урый ишъуз БатщэбаІ арэу къэбар къыфахьыжьыгъ. 4 Ар къыфащэнэу Даут иІумэтхэр лъигъэкІуагъэх; арти ар ащ дэжь къэкІуагъ, ар ащ кІыгъугъ. Бзылъфыгъэ хабзэу къыфэкІогъагъэм ыуж зыгъэкъэбзэжьыгъо мафэхэри блэкІыгъэхагъ. ЕтІанэ ащ ядэжь къыгъэзэжьыгъ. 5 Бзылъфыгъэр лъэрмыхьэ хъугъэти, Даут дэжь ыгъакІохи раригъэІуагъ: «Лъэрмыхьэ сыхъугъ». 6 Арти Даут Иоаб дэжь ыгъакІохи раригъэІуагъ: «Хъыт лъэпкъым щыщ Урый къысфэгъакІу». Иоаб Даут дэжь Урый ыгъэкІуагъ. 7 ЕтІанэ Урый ащ ыдэжь къэкІуагъэти, Иоаб изытети, дзэкІолІхэм язытети, заор зэрэкІорэми Даут акІэупчІагъ. 8 Даут Урый риІуагъ: «Шъуадэжь кІожьи зыгъэпсэф». Урый пачъыхьэм иунэ къикІыжьыгъ, пачъыхьэм ишІухьафтынхэр ащ кІэлъахьыгъэх. 9 Ау Урый изиусхьан иухъумакІохэм ягъусэу пачъыхьэм иунэ ихьапІэ дэжь чэщыр щырихыгъэ нахь ядэжь кІожьыгъэп. 10 Урый ядэжь мыкІожьыгъэу аІуи Даут къэбар къызыфахьым, Даут Урый еупчІыгъ: «Гъогум укъытекІыжьыгъэба, сыд пае шъуадэжь умыкІожьыгъа?» 11 Ащ ипэгъокІэу Урый Даут къыриІожьыгъ: «Тхьэм ипхъонтэ лъапІи, Израили Ехъуди ядзэкІолІхэр чэтэнгъэІагъэхэм ачІэсхэу, сиІэшъхьэтетэу Иоаби, сизиусхьан идзэкІолІхэри шъофым итхэу тадэжь сыкІожьынышъ, сышхэщт, сешъощт, сишъуз сыкІыгъущт арба! О узэрэщыІэр, упсэ зэрэщыІэр сэІо, ау ар сшІэщтэп». 12 Арти Даут Урый риІуагъ: «Непи мыщ къанэ, неущ устІупщыжьыщт». А мафэми къыкІэлъыкІогъэ мафэми Урый Ерыусэлэм къыдэнэгъагъ. 13 ЕтІанэ Даут ар къыригъэблэгъагъэти, Урый ащ дэжь щышхагъ ыкІи щешъуагъ, оутэшъофэ Даут ар ригъэшъуагъ. Ау пчыхьэм Урый изиусхьан ипщылІхэм ягъусэу игъолъыпІэ екІужьи чъыежьыгъэ нахь ядэжь кІожьыгъэп.
Даут Урый зэраригъэукІыгъэр
14 Пчэдыжьым Даут тхылъыпІэ тхьапэм тетхи, ар Урый рити Иоаб фыригъэхьыгъ. 15 А тхылъыпІэм тыритхагъ: «КъыщауІэу, хэкІодэным пае, заом ианахь жъотыпІэ горэм Урый Іужъугъэуцуи, шъо шъукъызэкІэкІожь». 16 Арти къалэр аштэн зэхъум, Иоаб заор анахь зыщыхьылъэн ылъэкІыщтыр ешІэти, Урый ащ ыгъэкІуагъ. 17 Къалэм дзэкІолІхэр къыдэкІхи Иоаб къезэуагъэх, Даут идзэкІолІмэ ащыщхэр ащ дэжьым хэкІодагъэх; джащ фэдэу хъытэу Урыий къыщаукІыгъ. 18 ЕтІанэ заор зэрэкІуагъэм икъэбар зэрэщытэу лъагъэІасынэу Иоаб Даут дэжь ыгъэкІуагъэх. 19 ЫІофытагъэм фигъэпытэзэ мырэущтэу риІуагъ: «Заор зэрэкІуагъэм икъэбар фэпІотэгъахэу, 20 пачъыхьэр зэрэгубжыщтым гу лъыптэу, „Сыд пае шъуязэонэу къалэм ащ фэдизэу благъэу шъуекІолІэгъагъа? Идэпкъхэм къарадзыххэзэ къызэрэшъутырадзэщтхэм шъущыгъозагъэба? 21 ЕрыубэІал ыкъо Абимэлэх хэта зыукІыгъэр? Бзылъфыгъэм мыжъо шъхьал къутафэр дэпкъым къыридзыхи ащ къызтырегъафэм ыужба ар етІанэ Тэбэц зыщылІэжьыгъэр? Сыда ащ фэдизэу благъэу дэпкъым шъузкІекІолІэгъагъэр?" къызыуиІокІэ, о еІожь: „УиІумэтэу хъытэу Урыий джащ фэдэу щыІэжьэп"». 22 Арти Иоаб иІофтабгэ кІуи, зыфигъэкІуагъэр зэкІэ Даут фынигъэсыгъ, заор зэрэкІуагъэм икъэбари зэрэщытэу фиІотагъ. 23 АІофтагъэм Даут риІуагъ: «Іамон дзэкІолІхэр къыттекІощтыгъэх, къытэзэонхэуи шъофым къихьэгъагъэхэти, етфыжьэхи къалэм идэхьэпІэ къэлапчъэ нэс тфыжьыгъэх. 24 Ащ дэжьым дэпкъым тетыгъэ псэгъаохэр уидзэкІолІхэм къызяохэм пачъыхьэм идзэкІолІмэ ащыщ горэхэр хэкІодагъэх; джащ фэдэу уиІумэт хъытэу Урыий хэкІодагъ». 25 Ащ ыуж Даут Іофтабгэм риІуагъ: «Иоаб мыщ фэдэу еІу: „Къэхъугъэм земыгъэгъэгумэкІ, сыда пІомэ модрэр мыдрэр ыІоу чатэм зэхэдз ышІырэп; къалэм пэшІуекІорэ заор гъэлъэши зэхэкъут". Ар еІуи, ыгу къыдэщай». 26 ИлІ зэрэщымыІэжьыр Урый ишъуз зызэхехым хьадагъэ ышІыгъ. 27 Шъыгъон уахътэр ащ зеухым лъигъакІохи Даут ыдэжь ар къаригъэщагъ, ишъуз хъуи, шъао къыфилъфыгъ. Ау Даут аущтэу зэришІыгъэр Зиусхьаным ыгу рихьыгъэп.
ТхьэлІыкІоу Нэтан Даут зэригъэмысагъэр
1 Ащ ыуж Зиусхьаным тхьэлІыкІоу Нэтан Даут дэжь ыІофытагъэти, ар ащ дэжь кІуи риІуагъ: «Зы къалэ горэм нэбгыритІу дэсыгъ: зыр баигъ, адрэр тхьамыкІагъ. 2 Баим былымрэ мэлрэ боу иІагъэх, 3 ау тхьамыкІэм къалъфыгъакІэ шъынэ цІыкІоу къыщэфи ыхъугъэм нэмыкІ зыпари иІагъэп. ЗэрэфэлъэкІэу ащ пылъыщтыгъ, исабыйхэм ахэсэу ар къэхъугъ; ихьалыгъу щыщ Іуфагъэти, ищалъэкІэ псы ешъуагъэти, ыбгъашъо телъэу чъыещтыгъэти, ипшъэшъэжъыем фэдэщтыгъ. 4 Зы мафэ горэм зекІолІ горэ баим дэжь къызыдэхьэм, имыхьамелэ ащ Іуигъэфэным пае имэлхэми ибылымхэми ахэмыІабэу, тхьамыкІэм ишъынэ ыубыти хьакІэм ригъэшхынэу аригъэшІыгъ». 5 Ащ дэжьым Даут а баим лъэшэу фэгубжыгъэу Нэтан риІуагъ: «Тхьэр зэрэщыІэр сэІо! Ар зышІэгъэ цІыфым хьадэгъур ифэшъуаш. 6 ЫшІагъэмрэ гукІэгъу къызэрэхэмыфагъэмрэ апае шъынэр фэдиплІыкІэ нахьыбэу ыпщыныжьын фае». 7 Арти Нэтан Даут риІуагъ: «А лІыр оры. Израилым и-Зиусхьанэу Тхьэм ыІорэр мары: „Израилым урипачъыхьэнэу дагъэ Сэ къыпщысфагъ, уизиусхьанэу Саули Сэ укъыІэкІэсхыжьыгъ, 8 ащ иуни, ащ ишъузхэри Сэ къыостыгъэх, Израилми Ехъудми япачъыхьэу усшІыгъ, ар пшІомакІэмэ, нахьыби къыпфыхэзгъэхъощтгъэ. 9 Сыд пае Зиусхьаным иунашъохэр пхъэтэпэмыхь пшІыхэу, Ащ къылъэгъоу бзэджагъэ пшІагъа? Хъытэу Урый оры зэкІодылІагъэр, ащ игуащэ шъузэу пштагъэ, Іамонхэм ар къябгъэукІыгъ. 10 Сэ пхъэтэпэмыхь сызэрэпшІыгъэм, хъытэу Урый игуащэ бгъэшъузынэу къызэрэпщагъэм апае уиунагъо щыщхэр къаукІыхэзэ егъашІэм къэшъухьыщт". 11 Зиусхьаным ыІорэр мары: „Уиунэгъо кІоцІ щыщ шъыпкъэм бэлахьэр къыпфезгъэхьыщт, плъэгъузэ уишъузхэр къыппэблэгъэ шъыпкъэм естынхэшъ, мэфэ нэфым ахэр ащ езгъэгъэшъузыщтых. 12 Ау гъэбылъыгъэкІэ о пшІагъэр зэрэ-Израилэу къылъэгъоу мэфэ нэфым Сэ сшІэщт"». 13 Ащ дэжьым Даут Нэтан риІуагъ: «Зиусхьаным ыпашъхьэ псэкІод щысшІагъ». Арти Нэтан Даут къыриІожьыгъ: «УипсэкІодышІагъэ Зиусхьаным къыпфигъэгъугъ; о улІэщтэп; 14 ау пшІагъэмкІэ Зиусхьаныр бгъэцІыкІугъэшъ, сабыеу къыпфэхъугъэр лІэжьыщт». 15 ЕтІанэ Нэтан ядэжь кІожьыгъэ. Ащ ыуж Урый ишъуз Даут къыфилъфыгъэ сабыим Зиусхьаным ынае къыщыфи сымэджэ хьылъэ хъугъэ.
БатщэбаІ Даут къыфилъфыгъэ шъаор зэрэлІэжьыгъэр
16 Арти сабыим пае Даут Тхьэм елъэІущтыгъэ, мышхэу, зыришІыхьажьи, джэхашъом телъэу Даут чэщыр рихыгъ. 17 ЕтІанэ ар къагъэтэджыжьынэу иІумэт упчІэжьэгъухэр ыдэжь ихьагъэх, ау ар ащ фэягъэп, адэшхагъэп. 18 Яблэнэрэ мафэм сабыир лІагъэ. Сабыир зэрэлІагъэр Даут раІонкІэ иІумэт упчІэжьэгъухэр щынэщтыгъэх, сыда пІомэ ахэм аІощтыгъэ: «Сабыир джыри псэузэ тызелъэІум етІуагъэм къемыдэІугъэмэ, ар зэрэлІагъэр сыдэущтэу ащ джы етІощта? Зы тхьамыкІагъо горэ зэришІэжьын ылъэкІыщт». 19 ИІумэт упчІэжьэгъухэр зэрэзэІушъэшъэжьхэрэр зелъэгъум сабыир зэрэлІагъэр къыгурыІуагъэти, иІумэтхэм Даут яупчІыгъ: «Сабыир лІагъа?» КъыраІожьыгъ: «ЛІагъэ». 20 Арти Даут къэтэджи зитхьакІыгъ, дагъэ зыщифи, ищыгъынхэри зэблихъухи, Зиусхьаным иунэ кІуи, Тхьэм шъхьащэ фишІыгъ. Ядэжь къыгъэзэжьи агъэшхэнэу зялъэІум, гъомлапхъэ къыфахьи ыпашъхьэ къырагъэуцуагъ. 21 Арти иІумэтхэр ащ еупчІыгъэх: «УизекІуакІэ зыфэгъэхьыгъэр къыдгурыгъаІу: сабыир псэу зэхъум унэкІыгъэ ыкІи угъыгъ, сабыир зэлІэм, укъэтэджыжьи мыхьамелэр зыІубгъэфагъ?» 22 Даут къариІожьыгъ: «Сабыир опсэуфэ зыкІэсынэкІыгъэри сызкІэгъыгъэри „Хэт ышІэра, Зиусхьаным ынэшІу къысщыфэнышъ, сабыир псэоу къэнэжьынкІи мэхъуба?" зыфэпІоным сегупшысщтыгъэти ары. 23 Ау джы ар лІагъэ, сыд пае сынэкІыщта? Ар сэ къэзгъэхъужьын слъэкІыщта? Сэ ащ сыкІэлъыкІожьыщт нахь, ащ сэ къысфигъэзэжьыщтэп».
Сэлмэн къызэрэхъугъэр
24 ЕтІанэ Даут ишъузэу БатщэбаІ еушъыигъ, ащ ыдэжь ихьи кІыгъугъэти, иуахътэ къызэсым, шъао къылъфыгъ, Сэлмэн цІэу ащ фиусыгъ: Зиусхьаным ар шІу къылъэгъугъэти, 25 тхьэлІыкІоу Нэтан къыгъакІуи, Иедидиа цІэу къыфыригъэусыгъ. Ащ имэхьанэр: Зиусхьаным шІу къылъэгъугъэр.
Даут Раббэ зэриштагъэр
26 А уахътэм Иоаб Іамонмэ якъалэу Раббэ езэуагъ, пачъыхьэр зыдэс къалэр ыштагъ. 27 Арти Иоаб раригъэІонэу Даут дэжь ыгъэкІуагъэх: «Раббэ сытебани къалэм ыгъэфедэрэ псырыкІуапІэр сыубытыгъэ. 28 Арышъ адрэ къэнэгъэ дзэкІолІхэр къызэгъэгъусэхи, удэхьанэу къалэм къекІуи, ар штэ; армырмэ, сэ зысштэкІэ, сэ сцІэкІэ ащ еджэнхэу хъущт». 29 Арти Даут дзэр зэрэщытэу зэригъэгъуси Раббэ екІугъ, ащ езауи ыштагъ. 30 Ащ ыуж Даут Іамонмэ япачъыхьэ шъхьащысыгъэ танджыр къыщихи, – дышъэу ащ илъыгъэр килограмм щэкІ фэдиз, мыжъо лъапІи хэсыгъ, – а танджыр Даут зышъхьащигъэтІысхьагъ. Джащ фэдэу мылъку бэдэди къалэм къыдищыгъ. 31 ЦІыфэу ащ дэсыгъэхэр къыдищхи, ащыщхэм Іоф ашІэнэу пхъэххэр, гъучІ къазгъырхэр, отычхэр аритыгъэх, адрэхэр чырбыщ агъэжъэнэу хьакухэм аІуигъэуцуагъэх. Іамон къэлэ пстэуми джары ащ аришІагъэр. А зэпстэумэ ауж Даутрэ зэкІэ идзэхэмрэ Ерыусэлэм къагъэзэжьыгъ.
Аминон Тэмар ынапэ зэрэтырихыгъэр
1 ТІэкІу горэ джыри тешІагъ. Даут ыкъо Абищэлэм шыпхъу дэхэ дэдэ иІагъ Тэмар ыцІэу. Ар Даут ыкъо нэмыкІэу Аминон шІу ылъэгъугъ. 2 Арти зэришІыщтыр ымышІэу, ыгъэнэшхъэеу ышыпхъоу Тэмар лъэш дэдэу зэрегупшысырэм нахь хэмылъэу, Аминон сымаджэ хъугъэ; сыда пІомэ ар пшъэшъагъэти, емыкІу зэрепхыщт шІыкІэр къымыгъотышъоу Аминон къин хэтыгъ. 3 Аминон ныбджэгъу иІагъ; ар Даут ышэу ЩымІэ ыкъоу Ионэдаб зыцІэр арыгъэ. А Ионэдабыр ахэхьэгъэ-ахэкІыгъэу щытыгъэти, 4 ар Аминон къеупчІыгъ: «Сыда, пачъыхьэм ыкъу, мафэ къэс нахь чэфынчъэ узкІэхъурэр, къысаІоба?» Аминон ащ риІожьыгъ: «СятэкІэ сшэу Абищэлэм ышыпхъоу Тэмар шІу слъэгъугъэ». 5 Арти Ионэдаб ащ риІуагъ: «ПІэм хэгъуалъхьи, сымаджэ ухъугъэ фэдэу зышІ; етІанэ узэрэсымаджэр зэхихэу, къыпкІэупчІэнэу уятэ уадэжь къызыкІокІэ еІу: „Сшыпхъоу Тэмар садэжь къэрэкІуи, слъэгъузэ сапашъхьэ шхын щысферэшІи, къарыу сфэхъунэу серэгъэшх, ар слъэгъунэуи, ыІэкІэ сигъэшхэнэуи сыфай"». 6 Ащ ыуж Аминон гъолъи сымаджэ хъугъэ фэдэу зишІыгъ. Ащ къыкІэупчІэнэу пачъыхьэр къызэкІом, Аминон пачъыхьэм риІуагъ: «Сшыпхъоу Тэмар къысфэгъакІоба, слъэгъузэ сапашъхьэ хьалыгъу ІашІу зытІущ горэ щысферэгъажъи, къысІуилъхьэмэ сышхэщт». 7 Арти Даут Тэмар дэжь ыгъакІохи раригъэІуагъ: «Пшэу Аминон иунэ кІуи шхын фэшІ». 8 Ар ышэу Аминон иунэ зэкІом, адрэр щылъыгъ. Хьаджыгъэр къышти тхьацур ыпшагъ, ащ къылъэгъузэ хьалыгъу ІашІухэр ридзэхи ыгъэжъагъэх. 9 ЕтІанэ ахэр табэм щызэпыригъазэхи, ыпашъхьэ ригъэуцуагъэх; ау адрэр шхэнэу фэягъэп. Ащ ыуж «Садэжь итхэр зэкІэ ерэкІых» Аминон къыІуагъэти, цІыфхэр зэкІэ икІыгъэх. 10 Ащ дэжьым Аминон Тэмар риІуагъ: «Унэ гъолъыжьыпІэм гъомлапхъэр хьи, къысІуплъхьэзэ сыбгъэшхэщт». Тэмар ыгъэжъэгъэ хьалыгъу ІашІухэр къыштэхи ышэу Аминон дэжь унэ гъолъыжьыпІэм ыхьыгъ. 11 ЕтІанэ ыхьыгъэр ригъэшхынэу ащ ыпашъхьэ зырегъэуцом, адрэр къатхъуи ыубыти къыриІуагъ: «КъакІуи садэжь къэгъолъ, сшыпхъу». 12 Ау мыдрэм риІожьыгъ: «Хьау, сшы, ащ фэдэ щашІэу Израилым щыхабзэпышъ, сынапэ темых; а хьайуаныгъэр умышІэ. 13 Сэ нэпэнчъэу сыкъанэмэ, тыда сшъхьэ зыдэсхьыжьыщтыр? Ори Израилым ис бзэджашІэмэ уанахь бзэджашІэу уалъытэнба. СыолъэІу пачъыхьэм дэгущыІ, ащ сыкъыуитынба». 14 Ау ащ къыІорэм ар едэІунэу фэягъэпти, кІуачІэкІэ къытекІуи ынапэ тырихыгъ. 15 Ащ ыуж Аминон ар фэмылъэгъужь хъугъэ, шІу зэрилъэгъущтыгъэм нахь лъэшыжьэу, зынахь лъэш къэмыхъужьынэу фэмылъэгъужь хъугъэ. Арти Аминон ащ риІуагъ: «Тэджи ІукІ». 16 Ау ащ къыриІожьыгъ: «Хьау, сипфыныр апэрэ емыкІоу къысэпхыгъэм нахь Іаежьых». Ау адрэр къедэІунэу фэягъэп. 17 ЕтІанэ ежь къыдекІокІщтыгъэ ипщылІ кІалэм къеджи риІуагъ: «Мыдэ мы бзылъфыгъэр ифыжьи ыкІыбкІэ пчъэр щыгъэпытэжь». 18 Іашъхьэ зыпыт джэнэ кІыхьэ Тэмар щыгъыгъ, сыда пІомэ а лъэхъаным пачъыхьэм ыпхъу дэмыкІуагъэхэм джащ фэдэ джанэхэр ары зыщалъэщтыгъэхэр. Ащ дэжьым пщылІым пчъэр ащ ыкІыбкІэ щигъэпытэжьыгъ. 19 Тэмар ышъхьац яжьэр хитакъуи, джэнэ кІыхьэу щыгъыгъэри зэІитхъи, ыІэхэмкІэ ышъхьэ шІуиубытыкІи гъогзэ ежьагъ. 20 Ышэу Абищэлэм ащ къыриІуагъ: «Пшэу Аминонба къыпкІыгъугъэр? – Джы, ужэ зэтелъхь, сшыпхъу; ар – пшы; къыпщышІыгъэм пае гухэкІым земыгъэшх». ЕтІанэ Тэмар цІыфмэ ахэмыхьэу ышэу Абищэлэм дэжь исыгъ. 21 Хъугъэр пачъыхьэу Даут зызэхехым лъэш дэдэу губжыгъэ, 22 Ау Абищэлэм шІукІи бзаджэкІи Аминон дэгущыІагъэп, сыда пІомэ ышыпхъоу Тэмарэ ынапэ зэрэтырихыгъэм пае гухьагужъ фыриІагъ.
Абищэлэм Аминон зэригъэпщынэжьыгъэр
23 Ащ ыуж илъэситІу тешІагъэу Ефраимым пэблэгъэ къалэу БэІал-Хъацэур Абищэлэм имэлхэр щащынхэ зэхъум, пачъыхьэм ыкъохэр зэкІэ Абищэлэм къыригъэблэгъагъэх. 24 Абищэлэм пачъыхьэм дэжь кІуи риІуагъ: «УиІумэт имэлхэр ащыщтхэшъ, ори, уиІумэтхэри, сэри тызэгъусэу тызэдэкІонхэба». 25 Ау пачъыхьэм Абищэлэм къыриІожьыгъ: «Хьау, сикІал, утымыгъэгумэкІыным пае зэкІэми ащ тыкъэкІощтэп». Абищэлэм лъэш дэдэу ащ елъэІугъ; ау адрэр къыфытегъэнагъэп, игухэлъ къыдэхъунэу фэлъаІуи къытІупщыжьыгъ. 26 Арти Абищэлэм ащ риІуагъ: «Ащыгъум сшэу Аминон къыддэрэкІоба». Пачъыхьэм къыриІожьыгъ: «Сыда ар о къызыкІыбдэкІон фаер?» 27 Сыдми Абищэлэм ар къытыригъани Аминонрэ пачъыхьэм зэкІэ ыкъохэмрэ къыдигъэкІуагъэх. 28 ЕтІанэ Абищэлэм игъусэгъэ кІалэмэ унашъо афишІызэ ариІуагъ: «Санэу зэшъуагъэм Аминон чэф къызэрэритыгъэм тетэу, „Аминон шъуеу" къызэрэшъуасІоу, шъуукІы. Шъумыщын, сэры унашъор къышъуфэзышІырэр, лІыгъэрэ теубытагъэрэ къызхэжъугъаф». 29 Арти зэрариІуагъэм тетэу Абищэлэм игъусэгъэ кІалэхэр Аминон дэзекІуагъэх. Ащ дэжьым пачъыхьэм зэкІэ адрэ ыкъохэм зыкъаІатыжьи, шъхьадж ищыд тетІысхьажьи ашъхьэ къыІуахыжьыгъ. 30 Ащыщ гори псэоу къэмынэу, пачъыхьэм ыкъохэр зэкІэ Абищэлэм ыукІыгъэхэу аІуи Даут къэбар къызылъагъэІасым, ахэр гъогум джыри тетыгъэх. 31 Арти пачъыхьэр къэтэджи иджанэ зэІитхъыгъ, чІыгум зытыридзагъ, иІумэтэу къегъэуцокІыгъэхэм зэкІэми яджанэхэр зэІатхъыгъэх. 32 Ау Даут ышэу ЩымІэ ыкъо Ионэдаб ащ риІуагъ: «Пачъыхьэм зэкІэ ыкъохэр аукІыгъэхэу сизиусхьан къышІорэмышІ; Аминон закъу ныІэп щымыІэжьыр, сыда пІомэ Аминон ышыпхъоу Тэмар ынапэ зытырихыгъэм къыщегъэжьагъэу Абищэлэм ар игухэлъыгъ. 33 Арышъ пачъыхьэм ыкъохэр зэкІэ аукІыгъэхэу къызшІуигъэшІызэ сизиусхьан гупшысэм зырерэмыгъэукІ; щымыІэжьыр Аминон закъу ныІэп». 34 Абищэлэм хэлъэдэжьыгъ. Къэрэгъулэу щытыгъэ кІалэр зэплъэм къушъхьэм ебгъукІорэ гъогум цІыфыбэ къырыкІоу къылъэгъугъ. 35 Арти Ионэдаб пачъыхьэм риІуагъ: «Пачъыхьэм ыкъохэр къэкІожьхэшъ ары; уиІумэт зыфиІуагъэм Іофыр тет». 36 Ар ащ къыІогъэ къодыеу, пачъыхьэм ыкъохэр къыдэхьажьхи, гъы мэкъэ куо-хьаушхом зыкъырагъэІэтыгъ. Ежь пачъыхьэри зэкІэ иІумэтхэри лъэш дэдэу гъыщтыгъэх. 37 Арти Абищэлэм хэлъэдэжьи, Гъышыурым ипачъыхьэу Іаммихъуд ыкъо Тэлмай дэжь кІуагъэ. Пачъыхьэу Даут ыкъо мафэм мафэр кІэлъыкІоу ыгъаещтыгъ. 38 Абищэлэм хэлъэдэжьи Гъышыурым зэкІом, ащ илъэсищэ къисыгъ. 39 Аминон зэлІэм ыуж пачъыхьэу Даут нахь къэушъэбыжьыгъэу ыгу Абищэлэм фыхэкІыжьыщтыгъэп.
Абищэлэм Ерыусэлэм къызэригъэзэжьыгъэр
1 ЕтІанэ Даут Абищэлэм зэрэфэзэщырэм Цырыуй ыкъо Иоаб гу лъитагъ. 2 Арти Иоаб къалэу ТэкъоаІ ыгъакІохи, ащ щыщ бзылъфыгъэ Іуш горэ къаригъащи риІуагъ: «Ушъыгъо фэдэу зышІи, шъыгъошъэ джани зыщылъи, дагъэ зыщымыфэу, щымыІэжьыр бэшІагъэу зыгъэерэ бзылъфыгъэм фэдэу зышІи, 3 пачъыхьэм дэжь кІуи, къыосІощтыр еІу». Джащ тетэу пачъыхьэм риІон фаер Иоаб бзылъфыгъэм гуригъэІуагъ. 4 ЕтІанэ ТэкъоаІ щыщ бзылъфыгъэр пачъыхьэм дэжь кІуи, ыпашъхьэ зыщыридзыхи, чІыгум нэс шъхьащэ фишІи риІуагъ: «КъыздэІэпыІ, пачъыхьэр!» 5 Арти пачъыхьэр ащ къеупчІыгъ: «Сыда узгъэгумэкІрэр?» Адрэм къыриІуагъ: «Сэ сышъузаб, сишъхьагъусэ щыІэжьэп. 6 УиІумэт къуитІу иІагъ; шъофым щыІэхэзэ ахэр зэфэгубжхи, зэпызыщыжьынхэ щымыІэу зыр адрэм еуи ыукІыгъ. 7 Джы лІакъор зэрэщытэу уиІумэт къышІонагъэу къыраІо: „Зыш зыукІыжьыгъэр къытэт, уикІэн къызфэбгъэнэн уимыІэжьэу укъэнэщтми, ыш ыпсэ зэригъэгъугъэм пае ежь тыукІыжьыщт". Джащ тетэу аужырэ гугъапІэу сиІэм сыхагъэкІыщт, сишъхьагъусагъэм цІи лъфыгъи дунаим щыримыІэжьэу къэнэщт». 8 Пачъыхьэм бзылъфыгъэм риІуагъ: «Шъуадэжь гъэзэжь, сэ ощ пае унашъо афэсшІыщт». 9 Ащ ипэгъокІэу ТэкъоаІ щыщ бзылъфыгъэм пачъыхьэм риІуагъ: «Лажьэр сэррэ сятэ иунагъорэ къыттерэфэ нахь, сизиусхьанэу пачъыхьэр, пачъыхьэмрэ итетыгъорэ лажьэр атерэмыф». 10 Арти пачъыхьэм къыІуагъ: «Къыппэуцужьын къыкъокІмэ, садэжь къащэ, ащ нахьыбэрэ ар къыбнэсыщтэп». 11 ЕтІанэ ащ къыриІуагъ: «ЛъышІэжьхэр нахьыбэ мыхъунхэм, скъо амыгъэкІодыным пае, Уи-Зиусхьанэу Тхьэр угу къэбгъэкІынэу сыолъэІу, пачъыхьэр». Арти пачъыхьэм къыІуагъ: «Зиусхьаныр зэрэщыІэр сэІо! Пкъо ышъхьац налъи къыхэзэу чІыгум темыфэнкІэ». 12 Бзылъфыгъэм къыІуагъ: «Сизиусхьанэу пачъыхьэм джыри гущыІэ есІонэу уиІумэт Іизын къет». Ащ къыІуагъ: «КъаІо». 13 Бзылъфыгъэм къыІуагъ: «Ащыгъум сыд пае скъо къырашІэнэу зыфаІорэр Тхьэм илъэпкъ епшІэнэу о теуубытагъа? Пачъыхьэм а къыІуагъэмкІэ ежь-ежьырэу зигъэмысэжьыгъ, сыда пІомэ ежь рифыгъэм къыригъэгъэзэжьырэп. 14 Тэ зэпстэуми лІэныгъэр тапэкІэ къэт, къэмыугъоижьышъущт псы икІутыгъэм тыфэд. Ау Тхьэм цІыфым ыпсэ ыгъэкІодырэп, зыхафыгъэм къызэрэригъэзэжьыным иамалхэр Ащ къыхехых. 15 А гущыІэхэр есІонхэм пае сизиусхьанэу пачъыхьэм дэжь сыкъэкІуагъ. Сыда пІомэ сиІахьылхэм сагъэщынэ; уиІумэт егупшысыгъ: „Пачъыхьэм сыдэгущыІэн, иІумэт риІорэм къыдыригъэштэнэп шъуІуа? 16 Пачъыхьэр къысэдэІун, сикІалэрэ сэррэ Тхьэм ицІыфмэ тахэзгъэзынэу зыІорэмэ тащиухъумэн". 17 Арти уиІумэт зэриІожьыгъ: „Сизиусхьанэу пачъыхьэм къыІорэм сигъэрэхьатын, сыда пІомэ сизиусхьанэу пачъыхьэр Тхьэм имэлэІич фэд, дэий дэгъуи къядэІун ылъэкІыщт. Зиусхьанэу Уи-Тхьэ о уигъус"». 18 Пачъыхьэм бзылъфыгъэм къыриІуагъ: «СшІомыушъэфэу сызэрэоупчІыщтыр къысаІу». Арти бзылъфыгъэм къыриІожьыгъ: «КъаІо, сизиусхьанэу пачъыхьэр». 19 Пачъыхьэм къыІуагъ: «Иоаба мы Іофыр зыгу къэкІыгъэр?» Бзылъфыгъэм къыриІожьыгъ: «Упсэ Тхьэм бэ регъэгъашІ, сизиусхьанэу пачъыхьэм къыІуагъэр тэрэз, зытетым тетэу джэуап къыосымытыжьмэ мыхъунэу чІыпІэ сибдзагъ. Тэрэз, уиІумэтэу Иоаб ары унашъо къысфэзышІыгъэр, а къэсІуагъэхэри зэкІэ къэсэзгъэІуагъэр джары. 20 Хъугъэм нэмыкІэу уригъэплъ шІоигъоти, уиІумэтэу Иоаб джаущтэу сигъэшІыгъэ, ау сизиусхьанэу пачъыхьэр Тхьэм имэлэІич фэдэу Іушышъ, дунаим къыщыхъурэр зэкІэ ешІэ». 21 ЕтІанэ пачъыхьэм Иоаб риІуагъ: «Дэгъу, тесыубытагъэшъ, кІуи кІалэу Абищэлэм къегъэгъэзэжь». 22 Иоаб пачъыхьэм ыпашъхьэ зыщыридзыхи, чІыгум нэс шъхьащэ фишІи риІуагъ: «Тхьэм ынэшІу къыпщэф! Сизиусхьанэу пачъыхьэр, уиІумэт нэшІукІэ узэреплърэр джы ешІэ, сыда пІомэ иІумэт зэрэраригъэІуагъэм фэдэу пачъыхьэм ышІыгъ». 23 Джащ тетэу Иоаб ежьи Гъышыурым кІуагъэ. Ащ Абищэлэм Ерыусэлэм къыщэжьыгъ. 24 Пачъыхьэм ыІуагъ: «Иунэ ар орэкІожь, ау санэІу къерэмыхь». Арти Абищэлэм иунэ кІожьыгъэ, ау пачъыхьэм инэплъэгъу зыкъыригъафэщтыгъэп.
Даут Абищэлэм зэрэфигъэгъугъэр
25 Абищэлэм фэдэу лІы лъэгъупхъэ, ащ фэдизэу зыщытхъухи зэрэ-Израилэу исыгъэп. Ылъэдэкъапэмэ къащегъэжьагъэу ышъхьашыгу нэсыжьэу мыхъун гори къыхэмыгъэщынэу зэкІужьэу щытыгъ. 26 Шъхьацышхо телъыгъэти, ащ ионтэгъугъэ ышъхьэ къырищэхщтыгъэ, илъэсым зэ ышъхьэ ыупхъощтыгъэ. Шъхьацэу къехырэм пачъыхьэм ищэчалъэхэмкІэ килограммитІурэ пшІэнищрэ къыщэчщтыгъэ. 27 Абищэлэм шъэуищрэ Тэмар ыцІэу зы пшъашъэрэ къыфэхъугъэх; ыпхъу бзылъфыгъэ дэхагъ. 28 Абищэлэм илъэситІо Ерыусэлэм дэсыгъ, ау пачъыхьэм инэплъэгъу зыкъыригъафэщтыгъэп. 29 Арти Иоаб пачъыхьэм дэжь ыгъэкІоным пае, ар къащэнэу Абищэлэм лъигъэкІуагъэх. Ау адрэр къыфэкІуагъэп. Джыри зэ ащ лъигъэкІуагъэх, ау адрэр етІани къыфэкІуагъэп. 30 Арти ипщылІхэм ариІуагъ: «Шъолъэгъуба Иоаб ичІыгу Іахьэу сичІыгу Іахьэ къыголъыр, хьэр ащ телъ, шъукІуи машІо кІажъудзи тежъугъэстыкІ». Абищэлэм ипщылІхэм а хьасэм машІо кІадзи тырагъэстыкІыгъ. 31 Арти Иоаб Абищэлэм дэжь къакІуи къеупчІыгъ: «Сыд пае уипщылІхэм сихьасэ машІо кІадзи тырагъэстыкІыгъа?» 32 Абищэлэм Иоаб къыриІуагъ: «Садэжь укъэкІонэу уадэжь къэзгъэкІогъагъэх. Пачъыхьэм дэжь узгъэкІонышъ еозгъэІонэу сыфэягъ: „Сыд пае Гъышыурым сыкъикІыжьыгъа? Ащ сыдэсыгъэмэ нахьышІугъ. Джы пачъыхьэм инэплъэгъу сырерэгъахь. Лажьэ сиІэмэ, серэукІ"». 33 Иоаб пачъыхьэм дэжь кІуи, а зэкІэри зыреІожьым, пачъыхьэр Абищэлэм къеджагъ. Ар пачъыхьэм дэжь къакІуи ыпашъхьэ зыщыридзыхыгъ, арти пачъыхьэр Абищэлэм къебэугъ.
Абищэлэм тетыгъор зэриубытыгъэр
1 ЕтІанэ Абищэлэм зэоным фытегъэпсыхьэгъэ кухэр, шыхэр, ишъхьагъырытынхэм пае цІыф Іэжь-лъэжьэу нэбгырэ шъэныкъо зэригъэгъотыгъэх. 2 Абищэлэм пчэдыжьрэ жьэу къэтэджти, къэлэпчъэ дэхьагъум дэжь уцущтыгъэ. Зыгорэм гумэкІыгъо иІэу, зэхыригъэфынэу пачъыхьэм дэжь кІо зыхъукІэ, Абищэлэм ар къызэрищалІэти еупчІыщтыгъ: «Тара къалэу узщыщыр?» «Мыщ фэдэ израил лІакъом уиІумэт щыщ» ыІоу адрэм джэуап къызыритыжькІэ, 3 Абищэлэм ащ риІощтыгъ: «УиІоф шІу ыкІи зафэ, ау пачъыхьэм ыдэжь къыщыодэІун щыІэп». 4 ЕтІани Абищэлэм ыІощтыгъ: «А ей-гущ, мы хэгъэгум сырихьыкумышІыщтгъэмэ! Янэкъокъури нэкъокъогъу зиІэри зэкІэ садэжь къэкІощтыгъэ, шъыпкъэм тетэу зыгъэгумэкІхэрэр афызэхэсфыщтыгъэх». 5 Арти шъхьащэ къыфашІынэу цІыф горэхэр къызекІуалІэхэкІэ, ыІэ афищэйти, ІаплІ арищэкІти, ябэущтыгъэ. 6 Пачъыхьэм хьыкум ригъэшІынэу къэкІорэ израил цІыф пэпчъ, Абищэлэм ар ишІыкІэу, израил цІыфмэ агу зыраригъэхьщтыгъэ. 7 ЕтІанэ, илъэсиплІ зытешІэм, Абищэлэм пачъыхьэм риІуагъ: «Зиусхьаным ыпашъхьэ тхьэлъанэу щысшІыгъэр згъэцэкІэжьынэу Хъэурэн сыкІо сшІоигъу, 8 сыда пІомэ Гъышыурым сыдэсэу, Арам сыщыІэ зэхъум, Ерыусэлэм къысигъэгъэзэжьмэ, Хъэурэн кІонышъ Зиусхьаным шъхьащэ фишІынэу уиІумэт тхьэлъанэ ышІыгъагъ». 9 Ащ пачъыхьэм риІуагъ: «Зыгъэрэхьати кІо». Арти ар Хъэурэн кІуагъэ. 10 Ау етІанэ Абищэлэм, – «Гъоупщынэм ымакъэ зызэхэшъухыкІэ, „Абищэлэм пачъыхьагъум Хъэурэн щытехьагъ" яшъуІу», – ыІуи, дэІокІо-плъакІохэр Израилым илІэкъо пстэумэ шъэфэу ахитІупщыхьагъэх. 11 Ерыусэлэм щыщэу нэбгырэ шъитІу Абищэлэм зыдырищэжьэгъагъ. Ахэр ригъэблэгъагъэхэти, Іофым изытет щымыгъуазэхэу, цыхьэ фашІи дежьагъэх. 12 ЕтІанэ Абищэлэм къурмэныр ышІ зэхъум, Даут иупчІэжьэгъоу Гъылэу щыщ Ахъытэуфэл кІэлъигъакІохи къаригъэщагъ. Іофыгъо шъэфэу зэдырахьыжьагъэм тыраубытэпагъ. ЦІыфхэр Абищэлэм дэжь къыщызэхахьэщтыгъэх.
Даут Ерыусэлэм къызэрибгынагъэр
13 Ащ ыуж мэкъэгъэІур Даут дэжь къакІуи къыриІуагъ: «Израил цІыфхэм агухэр Абищэлэм фагъэзагъэх». 14 Арти Даут иІумэтхэу Ерыусэлэм къыдыдэнагъэхэм ариІуагъ: «Тежъугъажь! Армырмэ Абищэлэм тыкъелыжьыщтэп. ЗыжъугъэпсынкІ, ар шІэхэу къыттеощт, тыІэкІэмыфэзэ, тхьамыкІагъо къытфимыхьызэ, къалэм дэсхэр зэхимыукІэхэзэ тшъхьэ щыдгъэзыен фае». 15 ИІумэтхэм пачъыхьэм къыраІуагъ: «Хъунба адэ, зиусхьанэу пачъыхьэм шІоигъо пстэумкІи тыриІэрылъхь». 16 ЕтІанэ пачъыхьэри иунагъуи зэрэщытэу къежьагъэх. Унэм лъыплъэнхэм пае ишъуз годзипшІ пачъыхьэм къыгъэнагъ. 17 Арти пачъыхьэри цІыфэу ащ игъусагъэхэри къежьэхи, къэлэ гъунэм щыт аужырэ унэм дэжь къызэсхэм, ащ къыщыуцугъэх. 18 ИІумэтхэр зэкІэ ыбгъухэмкІэ ащ къегъэуцокІыгъагъэх, иухъумэкІо шъхьагъырытхэри Гъат къыщегъэжьагъэу игъусэгъэ гъытытхэри – зэкІэ нэбгырэ шъих хъоу, пачъыхьэм ыпэ итэу кІощтыгъэх. 19 Арти пачъыхьэм гъытытэу Иттай риІуагъ: «Сыд пае укъыддакІора? Гъэзэжьи пачъыхьакІэм къыкІэрын. О хымэ хэгъэгум ущыщ, уиунэ укъырафыгъэу мыщ укъэкІуагъ. 20 Тыгъуас нэмыІэу укъызытхэхьагъэр джы утигъусэу укъыддэмыкІомэ мыхъунэу сыдэущтэу уезгъэзына? Сэ къысэхъулІэщтыр сшІэрэп. Ори уилъэпкъэгъоу уигъусэхэми зэдэжъугъэзэжьых, Зиусхьаным игукІэгъурэ ишъыпкъагъэрэ къыпферэгъэнафэх!» 21 Ау Иттай пачъыхьэм къыриІожьыгъ: «Тхьэр зэрэщыІэр сэІо, сизиусхьанэу пачъыхьэр орэпсэу, сизиусхьанэу пачъыхьэр псэущтми е хьадэгъум пэІуфэщтми, уиІумэт тыди щыуигъусэщт». 22 Даут Иттай риІожьыгъ: «Хъун ащыгъум шъунекІу». Арти зибынхэр зигъусэгъэ унагъохэр зэкІэ гъытытэу Иттай къыдежьагъэх. 23 ЦІыфхэр къыблэкІхэ зэхъум хэгъэгум зэрэщытэу нэпсыр рикІыхщтыгъэ. Пачъыхьэр псы игъукІыгъэу Къидрэун ылъэгу зэпырыкІыгъ. ЦІыфхэр зэкІэ гъогум тетхэу шъофнэкІым ылъэныкъокІэ ежьагъэх. 24 КъурмэнышІхэу Абыетаррэ Цэдокърэ къэкІуагъэх. Цэдокъ игъусэгъэ лэуйхэм Тхьэм ипхъонтэ лъапІэ къахьыгъ. Абыетар а чІыпІэм къурмэн щишІыгъ. 25 Арти пачъыхьэм Цэдокъ риІуагъ: «Тхьэм ипхъонтэ лъапІэ къалэм хьыжь. Зиусхьаныр нэшІукІэ къысэплъымэ, къысигъэгъэзэжьынышъ пхъонтэ лъапІэри, ар зыдэщыІэн фэе чІыпІэри къысигъэлъэгъущтых. 26 Ау „Сыпфэразэп" Ащ зиІокІэ, мары сэ сыщыт, сэркІэ зыфэе шъыпкъэр къысерэшІ». 27 Ащ ыуж пачъыхьэм Цэдокъ риІуагъ: «КъыбгурысэгъаІо: ори, Абыетари, къыжъудежьэгъэ шъуикІэлитІуи зэрэшъукІыгъухэу, АхъымэІаци, уикІали, Абыетар ыкъо Ионэтани зыжъугъэрэхьати къалэм жъугъэзэжь. 28 ШъошІа, къэбар шъо къыслъэшъомыгъэІэсыфэ, шъофнэкІым ит псы игъукІыгъэм изэпырыкІыпІэ дэжь сыщышъожэщт». 29 Арти Цэдокърэ Абыетаррэ Тхьэм ипхъонтэ лъапІэ Ерыусэлэм къахьыжьи ащ къыдэнагъэх. 30 Даут Зэйтын Іуашъхьэм ылъэныкъокІэ ежьагъ, ышъхьэ ухъумагъэу, лъапцІэу, гъызэ ар къушъхьэм дэкІуаещтыгъэ, игъусэхэми зэкІэми ашъхьэхэр ухъумагъэхэу гъызэ дэкІуаещтыгъэх. 31 «Абищэлэм гохьагъэхэм Ахъытэуфэл ахэт» аІуи Даут къэбар къылъагъэІасыгъ. Арти Даут ыІуагъ: «А си Зиусхьан, сыолъэІу Ахъытэуфэл ариІощтыр делагъэ фэдэу къащыбгъэхъунэу!» 32 Даут Іуашъхьэм ышыгу дэкІуаий, цІыфхэр Тхьэм зыщелъэІухэрэ чІыпІэм зынэсым, арыкъ лъэпкъым щыщэу Хъущай иджанэ зэготхъыгъэу, ышъхьац ятІэр къыхэтэкъоу Даут къыпэгъокІыгъ. 33 Даут ащ риІуагъ: «УкъыздакІомэ, хьылъэ укъысщыхъущт; 34 ау къалэм бгъэзэжьэу „УсиІумэт, пачъыхьэр, джы нэс уятэ сыриІумэтыгъ, джы о сыуиІумэт" пІоу, Абищэлэм зепІокІэ, Ахъытэуфэл джэнджэшэгъу зэрафэхъущтыр зэщыбгъэкъощт. 35 Цэдокъи, Абыетари, къурмэнышІхэми урягъусэщт, пачъыхьэм иунэ къикІэу зэхэпхырэ къэбар пстэури ахэм анэгъэсыжь. 36 АкъуитІу ахэм ягъусэх: Цэдокъ ыкъо АхъымэІацрэ Абыетар ыкъо Ионэтанрэ; къэбарэу зэхэпхырэр зэкІэ ахэм къяІожьзэ, сэ къыслъыгъэІэс». 37 Арти Даут ицыхьэшІэгъоу Хъущай къалэм къэкІуагъ; Абищэлэм а уахътэм Ерыусэлэм къыдахьэщтыгъэ.
Цыбэ Даут ишІуагъэ къызэрэригъэкІыгъэр
1 Даут Іошъхьэ шыгум тІэкІу къызехым Мэфибощэт иІумэтэу Цыбэ ыпэ къифагъ. Хьылъэхэр ателъхэу щыдитІу ащ игъусагъ. Хьалыгъу шъитІу, сэнэшъхьэгъэгъугъэ блэришъ, гъэмэфэ къушъхьэ-мышъхьэ къыпычыгъэкІишъ, санэр зэрыз нэтыр ахэм ателъыгъ. 2 Арти пачъыхьэр Цыбэ еупчІыгъ: «Хэт пая мыхэр?» Цыбэ къыриІожьыгъ: «Щыдхэр рызекІонхэу пачъыхьэм иунагъо пае, хьалыгъумрэ гъэмэфэ пхъэшъхьэ-мышъхьэхэмрэ дзэкІолІмэ апае, санэр шъофнэкІым кІочІаджэ ихъухьагъэмэ апае». 3 Пачъыхьэр ащ еупчІыгъ: «Уизиусхьанщтыгъэу Саул ыкъорылъф тыдэ щыІа?» Цыбэ пачъыхьэм къыриІожьыгъ: «Ерыусэлэм къыдэнагъ, „Сятэ ипачъыхьагъу израил цІыфхэм джы къысатыжьын" ыІуагъ». 4 Пачъыхьэм Цыбэ риІуагъ: «Мары Мэфибощэт иІэр зэкІэ джы пІэ къесэлъхьажьы». Арти Цыбэ къыриІожьыгъ: «НэшІукІэ къысэплъ, сизиусхьанэу пачъыхьэр, шъхьащэ пфэсэшІы!»
ЩымІый Даут къызэребгыгъэр
5 ЕтІанэ пачъыхьэу Даут Бахъурим къалэм зынэсым, Саул иунагъо щыщ Гъэрэ ыкъоу ЩымІый зыцІэр къаІукІагъ. Ар бгэзэ къакІощтыгъэ. 6 Пачъыхьэм зэкІэ ицІыфхэр, иухъумэкІо дзэкІолІхэр бгъу пстэумкІи къегъэуцокІыгъагъэх нахь мышІэми, Даутрэ ащ иІумэтхэмрэ мыжъокІэ ар къяощтыгъэ. 7 ЩымІый къебги, къекууагъ: «КІожь, кІожь, укІакІоу, цІыф мыхъат. 8 Зипачъыхьагъу уубытыгъэ Саул ибын ылъэу бгъэчъагъэр Зиусхьаным къыптыригъэфэжьыгъ, ащ пае пачъыхьагъур Зиусхьаным Абищэлэм, пкъо, ритыжьыгъ. Джы мары о тхьамыкІагъом ипчъэІупэ унэсыгъ, сыда пІомэ уукІакІу». 9 Цырыуй ыкъо Абищай пачъыхьэм риІуагъ: «Сыда мы хьэ лІагъэр сизиусхьанэу пачъыхьэм къызфебгырэр? СыкІонышъ ышъхьэ пызгъэлъэтыщт». 10 Ау пачъыхьэм ыІуагъ: «Сыда ащ шъуиІофэу хэлъыр, Цырыуй ыкъохэр? Даут къебгынэу Зиусхьаным ащ къытырилъхьагъэмэ, ащ фэдэу зызэришІыгъэм пае хэта еупчІын зылъэкІыщтыр?» 11 ЕтІанэ Даут Абищайрэ зэкІэ иІумэтхэмрэ ариІуагъ: «Сэ къыспыкІыгъэм сиукІыжьынэу фаемэ, быняминым къыхэкІыгъэр нахь лъэшыжьэу фэенба; ыуж шъуикІ ащ, орэбгэ, сыда пІомэ Зиусхьаным ар ащ къытырилъхьагъ. 12 Къинэу сызыхэтыр Зиусхьаным къелъэгъумэ, мыр джы къызэрэсэбгырэм пае Зиусхьаным ынэшІу етІанэ къысщыфэжьынкІи мэхъуба». 13 Даутрэ зэкІэ игъусэхэмрэ ягъогу тетэу кІощтыгъэх, ЩымІый ахэм къаготэу Іошъхьэ цакІэм рекІокІызэ, ябгыщтыгъ, мыжъохэр атыридзэщтыгъэх, сапэр атыритакъощтыгъ. 14 ЕтІанэ пачъыхьэмрэ зэкІэ игъусэхэмрэ Иордан зынэсхэм, пшъыгъэхэти загъэпсэфыгъ.
Ахъытэуфэл джэнджэшэгъу зэрафэхъугъэр
15 А уахътэм Абищэлэмрэ ащ игъусэгъэ израил цІыфхэмрэ Ерыусэлэм къэкІуагъэх, Ахъытэуфэли ахэм ягъусагъ. 16 Даут ицыхьэшІэгъу арыкъэу Хъущай Абищэлэм дэжь къакІуи къыриІуагъ: «Пачъыхьэр орэпсэу, пачъыхьэр орэпсэу!» 17 Арти Абищэлэм Хъущай къыриІуагъ: «Ара уиныбджэгъу узэрэфэшъыпкъэр? Сыд пае уиныбджэгъу уримыгъуса?» 18 Хъущай Абищэлэм риІожьыгъ: «Хьау, сэ сызигъусэри сызигъусэщтри Зиусхьаным къахихыгъэр, мы цІыфхэми зэрэ-Израилэуи къыхахыгъэр ары. 19 НэмыкІэу хэта сызфэлэжьэщтыр? Пачъыхьэм ыкъоба? Уятэ сызэрэфэлэжьагъэм фэдэу ори сыпфэлэжьэщт». 20 ЕтІанэ Абищэлэм Ахъытэуфэл риІуагъ: «ТшІэщтымкІэ джэнджэшэгъу къытфэхъу». 21 Арти Ахъытэуфэл Абищэлэм къыриІожьыгъ: «Унэм лъыплъэнхэу уятэ къыгъэнэгъэ шъуз гуадзэмэ адэжь ихьи, уятэ ыгу къызэрэпщыкІыгъэм икъэбар зэрэ-Израилэу щызэхахынышъ, къыбгоуцуагъэхэм агукІэ ащ нахь тыраригъэубытэщт». 22 ЕтІанэ Абищэлэм пае унашъхьэм чэтэныр щагъаІи, зэрэ-Израилэу щыгъуазэу ятэ ишъуз гуадзэмэ адэжь Абищэлэм ихьагъ. 23 Ахъытэуфэл ыІорэр а лъэхъаным Тхьэм ыІуагъэм палъытэщтыгъэти, ащ иджэнджэшэгъу пстэуми Даути Абищэлэми уасэ фашІыщтыгъ.
Хъущай Абищэлэм зэригъэгъуащэрэр
1 ЕтІанэ Ахъытэуфэл Абищэлэм риІуагъ: «Нэбгырэ мин пшІыкІутІу зэзгъэгъусэнышъ нычэпэ Даут ыуж сихьанэу сэІо. 2 ЫІэ къымыІэтыжьышъунэу пшъыгъэу сызытебанэкІэ, зыщыгугъыни щымыІэу, ышІэжьыщтыри ымышІэу згъэщтэнышъ, игъусэхэр зэкІэ хэлъэдэжьыщтых. Пачъыхьэ закъор сыукІынышъ, 3 цІыф пстэуми къыпфязгъэгъэзэщт. Зы лІы закъо ыпсэ зыбгъэгъукІэ, адрэ цІыфхэр зэкІэ рэхьатыжьыщтых». 4 КъыІуагъэр Абищэлэми Израилым инахьыжъ упчІэжьэгъухэми агу рихьыгъ. 5 ЕтІанэ Абищэлэм ыІуагъ: «Арыкъэу Хъущай шъукъедж, ащи къыІощтым тедэІун». 6 Хъущай Абищэлэм дэжь къызэкІом Абищэлэм ащ риІуагъ: «Ахъытэуфэл тызэригъэгъуазэрэр мары; ащ зэриІорэм фэдэу тызекІощта? Хьау оІомэ, тшІэщтыр къаІо». 7 Арти Хъущай Абищэлэм риІуагъ: «Мызыгъогум Ахъытэуфэл къыІуагъэр дэгъоп». 8 ЕтІанэ Хъущай къыпидзэжьыгъ: «Уяти ащ игъусэхэри зэрэдзэкІолІ лІыбланэхэм ущыгъуазэба, зищырхэр къызтырахыгъэ мышъэбзэу шъофым щагъэгубжыгъэм ахэр фэдэх. Уятэ зэолІ пхъаш, дзэкІолІхэр игъусэхэу чэщым ар къэуцущтэп. 9 Джыдэдэм мэшэ куу горэм е нэмыкІ чІыпІэ горэм ащ зыщегъэбылъы. Арышъ, апэу ащ тебэнагъэмэ ащыщхэр къызиукІхэкІэ, ар зэхэзыхыщтмэ аІощтыр ошІа: „Абищэлэм гоуцуагъэхэм къатекІуагъэх". 10 Джащ дэжьым аслъаныгу зиІэ дзэкІолІхэми агу къашІуефэхыщт. Уяти ащ игъусэ дзэкІолІхэри зэрэлІыбланэхэр зэрэ-Израилэу щашІэба. 11 Джащ пае джэнджэшэгъу сыпфэхъу: Дан къалэм къыщегъэжьагъэу БэрщэбаІ къалэм нэсыжьэу, хы Іушъом Іулъ пшахъор зэрэбэм фэдэу, зэрэ-Израилэу къэугъоий, уряпащэу шъузэхэтэу шъузэонэу шъукІу. 12 Джащыгъум тылъежьэнышъ, тыдэрэ чІыпІэ щыІэнкІи фит, осэпсым зытемыхэрэ чІыпІэ къызэримыгъанэрэм фэдэу, тызатебанэкІэ, ежьри, игъусэхэри, зы нэбгыри къэдгъэнэжьыщтэп. 13 Къалэ горэм зыщигъэбылъмэ, зэрэ-Израилэу гъучІ хьажтІаркъохэр зыпышІэгъэ кІапсэхэр ащ къырихьылІэнышъ, мыжъо зэтелъ закъуи къэтымыгъанэу къалэр чІыгум щиз тшІыщт». 14 Арти Абищэлэми ащ игъусэгъэ израил лІы зэпстэуми аІуагъ: «Арыкъэу Хъущай ыІорэр Ахъытэуфэл ыІорэм нахьышІу». Джащ тетэу Ахъытэуфэл Абищэлэм джэнджэшэгъу зэрэфэхъугъэр нахьышІугъэми, Зиусхьаным теубытагъэ ышІи, мэхьанэнчъэу ар къыгъэнагъ.
Хъущай Даут макъэ зэрэригъэІугъэр
15 Ащ ыуж Хъущай къурмэнышІхэу Цэдокърэ Абыетаррэ заІуигъакІи Ахъытэуфэл Абищэлэмрэ Израилым инахьыжъ упчІэжьэгъухэмрэ ариІуагъэри ежь Хъущай ахэм ариІуагъэри къафиІотэжьыгъ. 16 «Арышъ, ыІуагъ ащ, джы Даут дэжь псынкІэу нэжъугъэсхи макъэ ежъугъэІу: „Ори уигъусэхэми шъукІодынэу шъуфэмыемэ, нычэпэ шъофнэкІым ит псыигъукІыгъэм изэпырыкІыпІэ дэжь укъыщымыуцоу, псынкІаІоу ащ зэпырыкІ"». 17 Ионэтанрэ АхъымэІацрэ псынэкІэчъэу Рэгъэлл дэжь щытхэу къэкІощтым ежэщтыгъэх, сыда пІомэ ахэм къалэм зыкъыщагъэлъагъо хъунэу щытыгъэп. ПщылІ бзылъфыгъэр къакІоти къэбарым ахэр щигъэгъуазэщтыгъэх, етІанэ ахэр Даут дэжь кІожьхэти къэбарыр лъагъэІасыжьщтыгъ. 18 Ау ахэр кІалэ горэм къызелъэгъухэм, Абищэлэм дэжь кІуи риІуагъэти, тІуми а чІыпІэр псынкІэу къабгынагъ. Бахъурим, зищагу псынэр дэтыгъэ цІыф горэм дэжь къакІохи, псынэм ехыгъэх. 19 Арти ащ ишъуз пІэтехъор псынашъхьэм тырипхъуи, зыпари къэмылъэгъонэу лэжьыгъэ зэтегъэпхъыгъэр ащ тыритэкъожьыгъ. 20 ЕтІанэ Абищэлэм иІумэтхэр бзылъфыгъэм иунэ къакІохи, «АхъымэІацрэ Ионэтанрэ тыдэ щыІэха?» аІуи къызеупчІхэм, «Ахэр псыхъом зэпырыкІыгъэх» ыІуи бзылъфыгъэм джэуап аритыжьыгъ. Арти ахэм алъыхъугъэх, ау къамыгъотхэу Ерыусэлэм къагъэзэжьыгъ. 21 Ахэр зыІокІыжьхэм лІыхэр псынэм къикІыжьхи, пачъыхьэу Даут дэжь кІохи, Ахъытэуфэл ариІуагъэр къыфаІотэжьи раІуагъ: «ПсынкІэу псым шъузэпырыкІ». 22 Арти Даутрэ игъусэхэмрэ ежьэхи Иордан зэпырыкІыгъэх; нэфшъагъор къэсыфэ Иордан зэкІэри зэпырыкІыгъагъ. 23 Джэнджэшэгъу зэрафэхъугъэм къызэремыдэІугъэхэр Ахъытэуфэл къызыгурэІом, щыдым уанэр къытырилъхьи, ащ къытетІысхьи ядэжь, икъалэ къыгъэзэжьыгъ. Ибынхэм осыетхэр къафишІыжьи зитхьалэжьыгъ. Арти ятэ икъэунэ ар далъхьажьыгъ. 24 Даут къалэу Мэхъанэим кІуагъэ. Абищэлэмрэ игъусэгъэ израил дзэкІолІхэмрэ къакІохэзэ, псыхъоу Иордан къызэпырыкІыгъэх. 25 Абищэлэм Иоаб ычІыпІэ Іамасэ дзэм ипэщэнэу тыригъэхьагъ. Израил лъэпкъым щыщ Итрэ ары Іамасэ зыкъуагъэр. Нэхъащ ыпхъоу, Иоаб янэу, Цырыуй ышыпхъу Абигал ащ ишъузыгъэр. 26 Абищэлэм игъусэу зэрэ-Израилэу ГъылыІад хэкум къыщыуцугъэх. 27 Даут Мэхъанэим къызэсым, Іамон къалэу Раббэ щыщ Нэхъащ ыкъо Щэубый, Лэудэбар щыщ Іамиел ыкъо Махыр, гъылыІад къалэу Рэугъэлим щыщ Бэрзылай къыпэгъокІыгъэх. 28 Ахэм техъон-кІэлъынхэр, лэджэнхэр, ятІэм хэшІыкІыгъэ хьакъу-шыкъухэр, коцы, хьэ, хьаджыгъэ, лэжьыгъэцэ гъэгъугъэхэр, джэнчы, джэнчыжъый, 29 шъоу, щхыу, мэлхэр, чэмыщэм хэхыгъэ къуае Даутрэ игъусэхэмрэ арагъэшхынхэу къафахьыгъэх. Ахэм аІощтыгъ: «ДзэкІолІхэр мэлакІэ малІэх, пшъыгъэх, шъофнэкІым псыфалІэ щылІагъэх».
Абищэлэм зэрэтекІуагъэхэмрэ зэраукІыгъэмрэ
1 ЕтІанэ Даут игъусэгъэ дзэкІолІхэр къэзэрэугъоигъэхэти, нэбгырэ мин-минэу, шъэрышъэу зэхидзхи, куп пэпчъ шъхьафэу пащэ фишІыгъ. 2 Даут идзэ щэу зэхидзи, дзэкІолІмэ азыщанэ Иоаб пащэ фишІыгъ, адрэм Иоаб ышэу, Цырыуй ыкъо Абищай пащэ фишІыгъ, гъытытэу Иттай ящэнэрэм пащэ фишІыгъ. ЕтІанэ пачъыхьэм лІыхэм ариІуагъ: «Сэри сыкъыжъудэкІощт». 3 Ау лІыхэм къыраІожьыгъ: «УкъэмыкІу, тэ тыкъечъэжьэжьми, ащ фэдизэу къытпылъыщтхэп, тазыныкъо хэкІуадэми, ащи ащ фэдизэу къыпылъыщтхэп. О уизакъоу тэщ фэдэ минипшІым уапеІащт. Арышъ къалэм удэсэу укъыддэІэпыІэмэ тэркІэ нахьышІущт». 4 Пачъыхьэм ариІожьыгъ: «Шъо нахь къежъугъэкІурэр ары сэри сшІэщтыр». Пачъыхьэр къэлапчъэм дэжь уцугъэ, дзэкІолІхэр шъэрышъэу, мин-минэу ащ къыблэкІыгъэх. 5 Арти пачъыхьэм Иоаби, Абищаий, Иттаий унашъо къафишІыгъ: «КІалэу Абищэлэм сэщ пае шъуфэсакъ». Абищэлэм пае пачъыхьэм идзэпащэмэ унашъоу къафишІыгъэр зэкІэ дзэкІолІхэм зэхахыгъ. 6 Даут идзэ Абищэлэм гоуцогъэ израилыдзэм шъофым щыпэгъокІи Ефраим мэзым щызэзэуагъэх. 7 Арти Даут идзэкІолІхэр израилыдзэм текІуагъэх. А мафэм бэ заом цІыфэу хэкІодагъэр – нэбгырэ мин тІокІ аукІыгъ. 8 Зэрэхэгъэгоу заор щыкІуагъ, чатэкІэ хагъэфагъэм нахьыбэжь а мафэм мэзым цІыфэу хэкІодагъэр. 9 Абищэлэм Даут идзэкІолІхэм къапэІууагъ. Щыдым тесэу кІозэ, чъыгэешхом икъутэмэ гъумхэм ачІэкІзэ, ышъхьэкІэ ахэм апыни, ылъакъохэр чІыгум нэмысэу кІэшІагъэу къэнагъ. Щыдэу зытесыгъэр хэлъэдэжьыгъ. 10 Ар дзэкІолІ горэм къылъэгъугъэти, Иоаб дэжь кІуи риІуагъ: «Абищэлэм чъыгаем пынагъэу слъэгъугъэ». 11 Арти Иоаб къэбарыр къыфэзыхьыгъэ дзэкІолІым къыриІуагъ: «Адэ плъэгъугъэмэ, сыд пае уеоу ар хэмыгъэфагъа? Тыжьын ахъщипшІырэ бгырыпхрэ къыостынгъэхэба». 12 Ау адрэм Иоаб къыриІожьыгъ: «Тыжьынэу ахъщэ мин къысэптыщтгъэкІи пачъыхьэм ыкъо сІэ тесщэеныгъэп. КІалэу Абищэлэм ежь пае шъуфэсакъынэу ори, Абищаий, Иттаий пачъыхьэм къызэрэшъуиІуагъэр зэхэтхыгъэба. 13 Мыхъун горэ сшІэгъагъэмэ, сэр-сэрэу бэлахьэм зыхэздзэжьыщтгъэ. Ор шъыпкъэм етІанэ укъыскъоуцожьыщтыгъэп. Ар пачъыхьэм шІоуушъэфын плъэкІынэу щытэп ныІа». 14 «Бащэрэ сыппылъын слъэкІыщтэп», – Иоаб ащ риІожьи, пчыпыджын кІэкІищ къышти Абищэлэм псэоу зыпынэгъэ чъыгаем екІуалІи, Абищэлэм ыгу ахэмкІэ хэпыджагъ. 15 Иоаб иашъоджэнэзехьэ кІэлипшІым Абищэлэм къаухъурэий, чІыгум къытырадзи, аукІыгъ. 16 Ащ ыуж Иоаб гъоупщынэм къыригъапщэхи, Абищэлэм игъусэгъэ израил цІыфмэ алъежьэгъэ дзэкІолІхэм къаригъэгъэзэжьыгъ, сыда пІомэ Иоаб цІыфхэр нахьыбэрэ ыгъэзэонхэу фэежьыгъэп. 17 Абищэлэм ихьадэ мэзым мэшэ куу горэм щырадзэжьи, мыжъо Іошъхьэшхо ышъхьагъ щызэтыратэкъожьыгъ. Абищэлэм игъусэгъэ израил цІыфхэр зэкІэ шъхьадж иунэ екІужьыгъ. 18 Абищэлэм джыри псэузэ Ерыусэлэм пэблэгъэ Пачъыхьэ кІэим мыжъосын щызфигъэуцужьыгъагъ. Ар ыгъэуцу зэхъум цІыфхэм агу къыгъэкІыжьынэу къо зэримыІэр ыІогъагъ. А мыжъосыным ежь ыцІэкІэ еджэгъагъ. Непэ къызнэсыгъэми а мыжъосыным «Абищэлэм имыжъосын» аІозэ, еджэх.
Абищэлэм зэрэщымыІэжьыр Даут зэрэзэхихыгъэр
19 Цэдокъ ыкъо АхъымэІац ыІуагъ: «Пачъыхьэм дэжь сынэрэси, Зиусхьаным ар пыйхэм зэращиухъумагъэм икъэбар лъэсэрэгъэІэса». 20 Ау Иоаб ащ къыриІуагъ: «КъэбарышІу непэ о ащ фэпхьышъущтэп; непэп ащ къэбарыр зыфэпхьыщтыр, нэмыкІ мафэр ары, сыда пІомэ пачъыхьэм ыкъо лІагъэ». 21 ЕтІанэ Иоаб Даут иІумэтэу Африкэ чІыналъэм ис куш лъэпкъым щыщым къеджи риІуагъ: «КІуи плъэгъугъэр пачъыхьэм еІотэжь». Арти кушым Иоаб шъхьащэ къыфишІи ечъэжьагъ. 22 Ау Цэдокъ ыкъо АхъымэІац джыри Иоаб риІуагъ: «Сыдэу щытми, кушым ыуж ситэу сэри сыгъачъэба». Иоаб ащ риІуагъ: «Сыд пае учъэщта, сикІал? ГушІуапкІэ къыуатыщтэпи». 23 «Ау щытми сычъэщт». Арти ащ къыриІожьыгъ: «Чъэ». АхъымэІац чъэкІэ кІэир зэпичи, кушым ыпэ ишъыгъ. 24 А уахътэм Даут къэлэпчъэ зэкІоцІытитІум азыфагу дэсэу щысыгъ. Къэрэгъулыр дэпкъым хэт къэлапчъэм ышъхьэ дэкІуаий къызэплъэм, зыгорэ изакъоу къызэрычъэрэр къылъэгъугъ. 25 Арти къэрэгъулыр къэкууи, пачъыхьэм макъэ къыригъэІугъ. Пачъыхьэм къыІуагъ: «Изакъомэ, къэбарышІу къехьы». Адрэр нахь къэблагъэщтыгъ. 26 Ар дэдэм къэрэгъулым нэмыкІэу къачъэрэр къылъэгъугъэти, къэлэпчъэІутым къекууагъ: «Муары джыри зыгорэ изакъоу къэчъэ». Пачъыхьэм ыІуагъ: «Ащи къэбарышІу къехьы». 27 Къэрэгъулым къыІуагъ: «Апэрэм, къызэрэсшІэжьырэмкІэ, Цэдокъ ыкъо АхъымэІац икІуакІэ ыІыгъ». Арти пачъыхьэм къыІуагъ: «Ар цІыфышІу, къыхьырэри къэбарышІу». 28 АхъымэІац къэси пачъыхьэм къекууагъ: «Сэлам!» ЧІыгум нэс пачъыхьэм шъхьащэ фишІи риІуагъ: «Сизиусхьанэу пачъыхьэм зыкъыпэзыІэтыгъэхэм уатезгъэкІогъэ уи-Зиусхьанэу Тхьэм щытхъур ыдэжь!» 29 Пачъыхьэр къэупчІагъ: «КІалэу Абищэлэм иІофхэр шІуа?» АхъымэІац риІожьыгъ: «Пачъыхьэм иІумэтэу Иоаб уиІумэт уадэжь къыгъэкІон зэхъум гузэжъогъу-гумэкІыгъо горэ щыІагъ, ау ащ къыщыхъугъапэм сыщыгъуазэп». 30 Пачъыхьэм къыІуагъ: «ІукІоти моу уцу». Адрэр ІукІоти уцугъэ. 31 Мары кушыр къэсыгъ. Ащ пачъыхьэм риІуагъ: «Сизиусхьанэу пачъыхьэм пае къэбарышІу! Зиусхьаным О зыкъыппэзыІэтыгъэхэм зэкІэми уатыригъэкІуагъ». 32 Арти пачъыхьэр кушым еупчІыгъ: «КІалэу Абищэлэм иІофхэр дэгъуха?» Адрэм къыриІожьыгъ: «А кІалэм къехъулІагъэр сизиусхьанэу пачъыхьэм ипыйхэмрэ о къыппэшІуекІоу Іоф бзаджэхэм ягупшысэхэрэмрэ къащэрэшІ!» 33 Пачъыхьэм ыгу къызэхахьи, къэлапчъэм ышъхьагъ тет унэм ихьагъ. Ащ кІо зэхъум гъызэ пчъэщтыгъэ: «СикІалэу Абищэлэм! СикІал, сикІалэу Абищэлэм! О пчІыпІэ сылІагъэмэ, зыпэ къэсштэн щыІэныгъэпи, а сикІалэу Абищэлэм, сикІал, сикІал!»
Иоаб Даут зэрегыигъэр
1 Иоаб раІуагъ: «Пачъыхьэм Абищэлэм егъае, ащ пае нэшхъэй». 2 Джаущтэу дзэкІолІхэм а мафэм къыдахыгъэ текІоныгъэр хьадагъэ хъужьыгъэ. Ыкъо пае пачъыхьэр зэрэнэшхъэим икъэбар а мафэм дзэкІолІхэм зэхахыгъ. 3 Арти зэуапІэм зышъхьэ къыІузыхыжьыгъэхэм укІытэхэзэ зызэрагъэбылъырэм фэдэу, дзэкІолІхэр гъэбылъыгъэкІэ къалэм къыдэхьажьщтыгъэх. 4 Пачъыхьэм ыІэхэр ынэІу Іулъхэу, ымакъэ Іоу пыхьэщтыгъэ: «СикІалэу Абищэлэм! Абищэлэм, сикІал, сикІал!» 5 Арти Иоаб пачъыхьэм дэжь къакІуи къыриІуагъ: «О уищыІэныгъи, пкъохэмрэ упхъухэмрэ ящыІэныгъи, уишъузхэмрэ уишъуз гуадзэхэмрэ ящыІэныгъи къэзгъэнэжьыгъэ уиІумэтхэр зэкІэ непэ къыпфэукІытагъэх. 6 Узфэмылъэгъухэрэр ары о шІу плъэгъухэрэр, шІу узылъэгъухэрэр пфэлъэгъухэрэп, сыда пІомэ дзэпащэхэри уиІумэтхэри къызэримыдзэхэрэр непэ къэбгъэнэфагъ. Тэ зэкІэми тылІэу Абищэлэм псэоу къэнэжьыгъагъэмэ, о нахь зэрэуигопэщтгъэр непэ сэ къызгурыІуагъ. 7 Арышъ, къэтэджи уидзэкІолІхэм агу къыдэщай, армырмэ, Тхьэр зэрэщыІэр сэІо, укъызахэмыхьэкІэ, зы нэбгыри нычэпэ къыпфэнэжьыщтэп. О къэбгъэшІагъэм узхэфэгъэ тхьамыкІагъохэм ар анахь дэижьыщт». 8 Арти пачъыхьэр къэтэджи къэлапчъэм дэжь тІысыгъэ. Пачъыхьэр къэлапчъэм дэжь зэрэщысым икъэбар дзэкІолІхэм ахатІупщыхьагъэти, ахэр зэкІэ пачъыхьэм дэжь къыщызэрэугъоигъэх. Ащ дэжьым Абищэлэм Израилым итемыр лъэныкъо щыщ дзэкІолІхэу гоуцогъагъэхэр шъхьадж ипакІэ хэлъэдэжьыгъагъэх.
Даут Ерыусэлэм къызэригъэзэжьыгъэр
9 Израилым итемыр лъэныкъо щыпсэурэ лІэкъо пстэури зэнэкъокъухэзэ тегущыІэщтыгъэх: «Пачъыхьэм типыйхэм тащиухъумагъэми, фылистхэми такъыІэкІихыжьыгъ, ежь Абищэлэм пае тихэгъэгу къыбгыни хэлъэдэжьыгъагъ. 10 Ау пачъыхьэу хэддзыгъэ Абищэлэм заом хэкІодагъэба, пачъыхьэм икъегъэгъэзэжьын сыд пае джы зедгъэукІыхьыра?» Израилым итемыр щыпсэурэ лІэкъо пстэури зытегущыІэрэм икъэбар пачъыхьэм къылъыІэсыгъ. Арти пачъыхьэу Даут къурмэнышІхэу Цэдокърэ Абыетаррэ адэжь ыгъэкІуагъэх: «Ехъудэм инахьыжъ упчІэжьэгъухэм яшъуІу: „Пачъыхьэр тегъэхьажьыгъэным пае шъо зыпари сыда зыкІэшъумыІорэр? 12 Шъо шъусикъош, зыл тыщыщ шъыпкъэх, пачъыхьэр тегъэхьажьыгъэнэу фаехэм сыд пае ауж зыкъижъугъанэра?" 13 Іамасэ сфешъуІу: „Усикъупшъхьэба о, усипкъба? Джы къыщегъэжьагъэу Иоаб ычІыпІэ удзэпэщэнэу узысымыгъэуцукІэ, Тхьэм сифэшъуашэр серэгъэгъот, нахьыбэжьи къысерэшІ!"» 14 Джаущтэу зы нэбгырэм фэдэу ехъудхэм агухэр ащ къыщэфыгъэхэти, ахэм пачъыхьэм дэжь къагъакІохи къырарагъэІуагъ: «Ори уиІумэтхэми зэкІэми къэжъугъэзэжь». 15 Арти пачъыхьэм къыгъэзэжьи псыхъоу Иордан къэкІуагъ. Ехъудхэр пачъыхьэм пэгъокІынхэшъ, Иордан къызэпыращыным пае Гъылгъалым къэкІуагъэх.
Даут ЩымІый гукІэгъу зэрэфишІыгъэр
16 Бахъурим щыщ быняминэу Гъэрэ ыкъо ЩымІый гузажъозэ ехъудхэм ягъусэу пачъыхьэу Даут пэгъокІынэу кІуагъэ. 17 Бынямин нэбгырэ миныр ащ кІыгъугъ. Саул иунагъо иІумэтэу Цыбэ ыкъо пшІыкІутфрэ ипщылІ нэбгырэ тІокІырэ пачъыхьэр Иордан нэмысызэ гузэжъогъукІэ ащ чъагъэх. 18 Ахэр зыфэягъэхэр пачъыхьэм иунагъо псыикІыпІэм къызэпырыкІ зыхъукІэ дэІэпыІэнхэу, етІани ежь зэрэфаем фэдэу яшІуагъэ ащ рагъэкІынэу ары. ЕтІанэ пачъыхьэм иунагъо псыхъоу Иордан къызэрэзэпырыкІыгъэм тетэу, Гъэрэ ыкъо ЩымІый пачъыхьэм ыпашъхьэ зыщыридзыхи, 19 пачъыхьэм риІуагъ: «Сизиусхьанэу пачъыхьэм Ерыусэлэм къызебгынэ мафэм уипщылІ зэрэхэукъогъагъэр угу къэмыгъэкІыжьэу, сизиусхьан, бзэджэшІагъэкІэ ар къысфэмылъэгъоу, хъугъэр, пачъыхьэр, угу темыгъэлъ. 20 Сыда пІомэ зэрэхэукъуагъэр уипщылІ зыдешІэжьы, сизиусхьанэу пачъыхьэм сыпэгъокІыным пае джы мары Израилым итемыр щыпсэурэ лІакъохэм ащыщэу апэ дэдэу сэ сыкъэсыгъ». 21 Арти Цырыуй ыкъо Абищай ащ ипэгъокІэу къыІуагъ: «Тхьэм хихыгъэ пачъыхьэм зэребгыгъэм пае ЩымІый укІыгъэн фаеба?» 22 Ау Даут къыІуагъ: «Сыда ащ зызкІышІожъугъанэрэр, Цырыуй ыкъохэр? Сыжъугъэмысэрэм фэдэу непэ зэшъогъэпсы. Непэ зыгорэ Израилым щытыукІын фая? Зэрэ-Израилэу сызэрипачъыхьэр сэркІэ джыри нафэба?» 23 «О упсэущт», – ЩымІый риІуи, пачъыхьэм тхьэлъанэ ышІыгъ.
Даутрэ Мэфибощэтрэ зэрэзэІукІагъэхэр
24 Саул ипхъорэлъфэу Мэфибощэт пачъыхьэм къыпэгъокІыгъ. Пачъыхьэр зыдэкІыгъэ мафэм къыщегъэжьагъэу текІоныгъэр къыдихи къызщигъэзэжьыгъэ мафэм нэс уахътэу тешІагъэм къыкІоцІ ар ылъакъохэм апылъыгъэп, ыжакІи пыупхъухьагъэп, иджанэхэри ыгыкІыгъэхэп. 25 Ар зыдэс Ерыусэлэм къыдэкІи пачъыхьэм къызыпэгъокІым пачъыхьэр ащ еупчІыгъ: «Сыд пае, Мэфибощэт укъыздемыжьэгъагъа?» 26 Арти адрэм къыриІожьыгъ: «Сизиусхьанэу пачъыхьэр! СиІумэт сигъэпцІагъ, сыда пІомэ сэ, уиІумэт, сызэрэлъащэм къыхэкІэу сІогъагъэ: „Щыдым уанэ теслъхьанышъ, сытетІысхьанышъ пачъыхьэм сыдежьэн". 27 Ау зиусхьанэу пачъыхьэм ыпашъхьэ уиІумэт ащ щиубыгъ. Ау сизиусхьанэу пачъыхьэр Тхьэм имэлэІич пэлъытыгъэшъ, узфэе шъыпкъэр шІэ. 28 АукІ ашІоигъоу сизиусхьанэу пачъыхьэм ыуж зэритыгъэхэм пае сятэ иунагъо зэрэщытэу бгъэкІодыныр ифэшъуаш, ау уиІумэт уиІанэ пэсхэм ахэбгъэтІысхьагъэба, пачъыхьэр джыри згъэгумэкІыным ифитныгъэ сэ сиІа?» 29 Арти пачъыхьэм къыриІожьыгъ: «Икъунба къэпІуагъэр? Сэ зытесыубытагъэр оррэ Цыбэрэ чІыгур зэфэжъугощынэу ары». 30 Ащ ыуж Мэфибощэт пачъыхьэм къыриІожьыгъ: «Сизиусхьанэу пачъыхьэм текІоныгъэр къыдихыгъэу къызигъэзэжьыгъэ уж фаемэ зэкІэри ащ ерэшт».
Даут ынэшІу Бэрзылай зэрэщыфагъэр
31 ГъылыІадэу Бэрзылай пачъыхьэр Иордан зэпырыкІ зыхъукІэ ишъхьагъырытхэм ахэтыным пае Рэугъэлим къикІи къэкІуагъ. 32 Бэрзылай лъэшэу хэкІотэгъагъ, илъэс тІокІиплІ ыныбжьыгъ. Баеу щытти пачъыхьэр Мэхъанэим щэІэфэ гъомлапхъэхэр къыІэкІигъэхьагъэх. 33 Пачъыхьэм Бэрзылай риІуагъ: «Усигъусэу некІо, Ерыусэлэм удэсыфэ сынаІэ къыптезгъэтыщт». 34 Ау Бэрзылай пачъыхьэм къыриІожьыгъ: «Пачъыхьэм сыригъусэу Ерыусэлэм сыкІоным пае згъэшІэнэу ба сэ къысфэнэжьыгъэр? 35 Сэ илъэс тІокІиплІ сыхъугъах; къинымрэ тхъагъомрэ зэхэсымыгъэкІокІэшъун шъуІуа? УиІумэт ышхыщтымрэ ришъущтымрэ яІэшІугъэ зэхифышъун шъуІуа? Хъулъфыгъэхэмрэ бзылъфыгъэхэмрэ яорэд макъэхэр зэхихыным иІоф тета? Сыд пае сизиусхьанэу пачъыхьэм хьылъэ зыфэсшІына? 36 УиІумэт пачъыхьэм игъусэу Иордан ыкІыбкІэ тІэкІу горэм дэкІотэн; сыд пае пачъыхьэм ащ фэдизым нэсэу сигъэлъэпІэн фая? 37 Сикъалэ сызэрэдэсэу сихьадэгъу сыІукІэнэу, сятэрэ сянэрэ якъэмэ адэжь сыщагъэтІылъыжьынэу уиІумэт Іизын къет. Ау мары уиІумэтэу Къымхъам сизиусхьанэу пачъыхьэм игъусэу орэкІо, о зэрэпшІоигъоу ащ къыдэзекІу». 38 Арти пачъыхьэм къыІуагъ: «Къымхъам къыздэрэкІу, о узфаер ащ къыфэсшІэщт, сыд уфаеми ори къыпфэсшІэщт». 39 ЕтІанэ цІыфхэр зэкІэ пачъыхьэри ягъусэу Иордан къызэпырыкІыгъэх. Пачъыхьэр къебэуи, Тхьэм ынэшІу къыщыфэнэу къызыфэлъаІом ыуж Бэрзылай ядэжь къэкІожьыгъ.
Ехъудхэмрэ Израил цІыфхэмрэ зэрэзэнэкъокъугъэхэр
40 ЕтІанэ пачъыхьэр Гъылгъал кІуагъэ, Къымхъами ащ игъусагъ. Ехъудэм щыщ дзэкІолІхэм зэкІэми, Израилым щыщ дзэкІолІмэ азыныкъо пачъыхьэр къагъэкІотэжьыгъ. 41 Ащ ыуж зэкІэ Израилым щыщ дзэкІолІхэр пачъыхьэм дэжь къакІохи раІуагъ: «Сыд пае Ехъудэм щыщ ткъош дзэкІолІхэм утшІуатыгъуи пачъыхьэмрэ Даут иунагъорэ лІэу игъусагъэхэри зэрэзэхэтхэу Иордан къызэпыращыжьхи ядэжь къагъэкІотэжьыгъэха?» 42 Арти ехъудхэм Израилым щыщ дзэкІолІхэм къараІожьыгъ: «Ар зытехъухьэрэр пачъыхьэр тилІакъо щыщышъ, нахь къытпэблагъэшъ ары. Ащ пае шъугубжынэу щыта? Пачъыхьэм ие горэ тшхыгъа е шІухьафтынхэр ащ къытитыгъэха?» 43 Ау Израилым щыщ дзэкІолІхэм ехъудхэм араІуагъ: «ЛІэкъуипшІ тэхъумэ, пачъыхьэу Даут щыщэу тэ къыттефэрэр шъощ нахьи ІахьипшІыкІэ нахьыбэн фае. Ащыгъум сыд пае тынапэ тешъухыра? Типачъыхьэ къызэрегъэгъэзэжьыгъэн фаер тэрба апэу къэзыІуагъэр?» Ау ехъудхэр Израилым щыщ дзэкІолІхэм анахь ябгэу къэгущыІагъэх.
ЩэбаІ зыкъызэриІэтыгъэр
1 Бынямин мыхъатэ горэ Быхърый ыкъоу, ЩэбаІкІэ еджэхэу, Тхьэм шІомылІыкІэу а чІыпІэм щыІагъэти, гъоупщынэм къепщи къыІуагъ: «Даут тызэрэхэт щыІэп, Ищай ыкъуи къызэрэтфыщыт щыІэпышъ, Израилым щыщхэр, зэкІэми тиунэмэ тяжъугъэкІужь!» 2 Арти Израилым итемыр лъэныкъо щыщхэр зэкІэ Даут гокІхи, Быхърый ыкъо ЩэбаІ гоуцуагъэх. Ехъудхэр япачъыхьэ гоуцохи, ащ игъусэхэу Иордан къикІыжьхи Ерыусэлэм кІожьыгъэх. 3 Ащ ыуж Даут Ерыусэлэм дэт иунэ къыгъэзэжьыгъ. ЕтІанэ унэм лъыплъэнхэу къыгъэнэгъэгъэ ишъуз годзипшІ унэ шъхьаф ригъэтІысхьэхи къэрэгъулыр аригъэуцолІагъ. Яфэныкъуагъэхэр аригъэгъотхэу ахэр ащ исыгъэх, ау ежь алъихьэщтыгъэп. ОлІэжьыфэхэ ахэр шъузабэм фэдэу ащ исыгъэх. 4 ЕтІанэ Даут Іамасэ риІуагъ: «МэфищкІэ ехъудхэр къысфызэІугъакІэхи, ори къакІо». 5 Ехъудхэм къяджэнэу Іамасэ ежьагъ, ау пІалъэу фигъэнэфагъэм къемыхъулІэжьэу къэгужъуагъ. 6 Арти Даут Абищай риІуагъ: «Абищэлэм изэрарэу къыгъэкІуагъэм нахьыбэ Быхърый ыкъо ЩэбаІ джы къыхьыщтышъ, ащ къэлэ-пытапІэхэр ымыубытхэзэ, тІэкІэмыкІыжьзэ сидзэкІолІхэр зигъэгъусэхи ыуж ихь». 7 Иоаб идзэкІолІхэри, Даут иухъумэкІо шъхьагъырытхэри, лІыбланэхэри зэкІэ зэгъусэхэу Абищай ыуж итхэу Ерыусэлэм къыдэкІхи Быхърый ыкъо ЩэбаІ лъежьагъэх. 8 ГъыбІоным дэжь мыжъосынышхо горэм зынэсхэм апэкІэ къикІэу Іамасэ къаІукІагъ. Иоаб дзэкІолІ шъуашэкІэ фэпэгъагъэ, къэмалъэм псынкІэу къиупхъотышъоу ыкІи иплъхьажьышъурэ къэмэ кІэкІыр ыкопкъ телъыгъ. КъакІо пэтзэ къэмэ кІэкІыр къэмалъэм къицохъугъ. 9 Мыщ дэжьым Иоаб Іамасэ риІуагъ: «Упсэуба, сикъош?» Іамасэ ебэуным пае Иоаб ащ ыжакІэ Іэ джабгъумкІэ ыубытыгъ. 10 Иоаб ІэкІэлъыгъэ къэмэ кІэкІым Іамасэ зыщиухъумагъэпти, адрэр ащкІэ ыныбэ къыхэпыджи, ыкІоцІ илъыгъэхэр зэкІэ къыригъэугъэх, ащ нахьыбэри хэпыджэжьыгъэп, сыда пІомэ адрэм ыпсэ хэкІыгъэхагъ. ЕтІанэ Иоабрэ ащ ышэу Абищайрэ Быхърый ыкъо ЩэбаІ лъежьагъэх. 11 Иоаб игъусэмэ ащыщ горэ Іамасэ ихьадэ шъхьащытэу ыІощтыгъэ: «Иоаб фэшъыпкъэу Даут готыр Иоаб ыуж ерэхь!» 12 Іамасэ лъым хэлъэу, гъогум телъэу, блэкІхэрэр зэкІэ зэрэшъхьащыуцохэрэр а лІым къызелъэгъум, ащ Іамасэ гъогум къытырилъэшъужьи, шъофым рилъэшъуагъ, щыгъын горэхэр тыридзагъэх. 13 ЕтІанэ ар гъогум зытырелъэшъужьым дзэкІолІхэр зэкІэ Иоаб ыуж итхэу Быхърый ыкъо ЩэбаІ лъежьагъэх. 14 ЩэбаІ Израилым итемыр лъэныкъо щыщ лІэкъо пстэуми заІуигъакІэзэ, къалэу Абэл-Бэт-МэІахэ кІуагъэ. ЕтІанэ быхърый лІакъом щыщхэр зэкІэ къэзэрэугъойхи ащ кІэлъыкІохэзэ къалэм дэхьагъэх. 15 ЕтІанэ Иоаб идзэкІолІхэр Абэл-Бэт-МэІахэ къекІухи къадзыхьагъ, къалэм ыкІыбырэ дэпкъ дэкІоенхэм пае мыжъо-етІэ зэхэлъ Іошъхьэшхо зэтыратакъуи, дэпкъым икъутэн ахэр фежьагъэх. 16 Арти зы бзылъфыгъэ Іуш горэ къалэм идэпкъ ышъхьагъ тетэу къэджагъ: «ШъукъэдаІу, шъукъэдаІу, Иоаб моу къэкІотэнэу ешъуІоба, ащ сыкъыдэгущыІэнэу сыфай». 17 Иоаб къызекІуалІэм бзылъфыгъэм къыІуагъ: «Ора Иоабыр?» «Сэры», – риІожьыгъ. Адрэм къыриІуагъ: «УиІумэт къыуиІощтым къедэІу». Мыдрэм риІожьыгъ: «СыкъэдаІо». 18 Ащ къыІуагъ: «Пасэм аІощтыгъэ: „Зыгорэм кІэупчІэнэу фаер Абэл орэкІуи къыщыкІэрэупчІ". Джары Іофыр зэрэзэхафыщтыгъэр. 19 Мыр Израилым фэшъыпкъэ мамыр къалэмэ ащыщ; ау Израилым ыгъэлъэпІэрэ ным палъытэгъэ а къалэр о зэхэпкъути, бгъэкІоди пшІоигъу. Сыд пае Зиусхьаным ыІэ илъ къалэр бгъэкІодына?» 20 Арти Иоаб риІожьыгъ: «Ашъыу зыгори зэхэскъутэнэуи згъэкІодынэуи сыфаеп! 21 Арэп Іофыр зэрэщытыр. Ау Ефраим Іуашъхьэм щыпсэурэ Быхърый ыкъоу, ЩэбаІкІэ заджэхэрэр пачъыхьэу Даут пэуцужьыгъ. Изакъоу джар къысІэкІэжъугъахьи, къалэм сыкІэрыкІыжьыщт». Бзылъфыгъэм Иоаб къыриІуагъ: «Ащыгъум ащ ышъхьэ дэпкъым къырадзыхыгъэу плъэгъун». 22 ЕтІанэ бзылъфыгъэр цІыфхэм ахахьи игухэлъ зафеІуатэм, Быхърый ыкъо ЩэбаІ ышъхьэ шІуаупкІи Иоаб къыфырадзыхыгъ. Арти ар гъоупщынэм къепщи, къалэр къэзыдзыхьэгъагъэхэр зэкІэ къыІукІыжьхи, ядэжь къагъэзэжьыгъ. Иоаб Ерыусэлэм пачъыхьэм дэжь кІожьыгъэ.
Даут икъулыкъушІэ Іэшъхьэтетхэр
23 Иоаб зэкІэ израилыдзэмэ япэщагъ, ИодаІ ыкъо Бэнай Даут иухъумэкІо шъхьагъырытхэу къэрэт, пэлэт лъэпкъмэ ащыщхэм яІэшъхьэтетыгъ. 24 Адорам егъэзыгъэкІэ Іоф зэрагъашІэщтыгъэ цІыфхэм ятхьамэтагъ; Ахъылыуд ыкъо Иощэфат иупчІэжьэгъу шъхьаІэщтыгъ, пачъыхьэм иунашъохэр цІыфмэ алъигъэІэсщтыгъэх; 25 Шэуа тхэкІуагъэ; Цэдокърэ Абыетаррэ къурмэнышІщтыгъэх, 26 яирэу Іири Даут икъурмэнышІгорэщтыгъ.
ГъыбІонхэм Саул иунагъо агу къызэрэтырагъэпщэхагъэр
1 Даут ипачъыхьагъум зэпыу имыІэу илъэсищэ зэкІэлъыкІоу гъэблагъэ. Даут Зиусхьаным еупчІыгъэти, Зиусхьаным къыриІуагъ: «Саулрэ ащ иунэгъо лъыгъэчъакІорэ лажьэу яІэм, гъыбІонхэр зэраукІыгъэхэм пае ар». 2 ГъыбІонхэр джуртмэ ащыщыгъэхэп, ау амэрхэм зязаохэм ахэм ащыщэу псэоу къэнэжьыгъэмэ къахэкІыгъагъэх. Джуртхэм ахэр щыхьагъу амышІынхэу тхьэлъанэ адашІыгъагъэми, израил цІыфхэмрэ ехъуд цІыфхэмрэ афэгумэкІ фэдэу зыригъэшІзэ, Саул ахэр ыгъэкІодхэ шІоигъуагъ. Арти пачъыхьэр гъыбІонхэм къяджи адэгущыІагъ. 3 Даут гъыбІонхэм яупчІыгъ: «Сыдэущтэу шъугу къыдэсщэежьын слъэкІыщта? Зиусхьаным хихыгъэ лъэпкъ шъуишІуным пае сыда сшІэщтыр?» 4 ГъыбІонхэм ащ къыраІожьыгъ: «Саулрэ ащ иунагъорэ яІоф тыжьынрэ дышъэкІэрэ зэхэпфынэу щытэп, Израилым зыгорэ щядгъэукІынэуи тыфитэп». Арти ащ ариІуагъ: «Сыда адэ шъузыфаер? КъышъуфэсшІэщт». 5 Ахэм пачъыхьэм къыраІуагъ: «Израилым ыкъуапэ горэми тыщымыпсэуным пае Саул тиукІыщтыгъ, джащ фэдэу зэкІэми тигъэкІодынэуи фэягъ. 6 Арышъ, ибынхэм ащыщэу нэбгырибл къытэти, Зиусхьаным инэрылъэгъоу Тхьэм хихыгъэ пачъыхьэу Саул икъалэу ГивыІэ щытыукІынхэшъ, зэрэпылъагъэхэу къэдгъэнэщтых». Пачъыхьэм ариІуагъ: «Къышъостыщтых». 7 Саул ыкъо Ионэтан зэзэгъыныгъэ зэрэдишІыгъагъэм пае, ащ икІалэу Мэфибощэт пачъыхьэм аримытэу псэоу къыгъэнэжьыгъ. 8 Арти Айэ ыпхъоу, Армоныйрэ Мэфибощэтрэ Саул къыфэзылъфыгъэхэ Рицпэ ыкъуитІу, Саул ыпхъоу Мэраб Мыхъолат щыщ Бэрзылай къуитфэу къыфилъфыгъэхэр пачъыхьэм къахихыгъэх. 9 Ахэр гъыбІонхэм къаритхи, Зиусхьаным ыпашъхьэ Іуашъхьэм щыпалъагъэх. Блыри зэдэкІодыгъэх. Хыныгъом иапэрэ мафэхэм, хьэм иІухыжьын фежьагъэхэу ахэр аукІыгъагъэх. 10 Арти Айэ ыпхъоу Рицпэ дзыопхъэ шэкІ пхъашэм фэдэ ежь тетІысхьаным пае къышти, мыжъо горэм ар тыриубгъуи, хыныгъор зыщырагъэжьагъэм къыщыублагъэу ощх къещхынэу къеублэфэ мафэрэ бзыухэр къанимыгъэсхэу, чэщрэ шъофым ит хьакІэ-къуакІэхэр къаримыгъэкІуалІэхэу ахэм яхьадэмэ апэсыгъ. 11 Саул ишъуз гуадзэу, Айэ ыпхъоу Рицпэ ышІагъэм икъэбар Даут къылъагъэІасыгъэти, 12 Даут кІуи Саулрэ Ионэтанрэ яхьадэкъупшъхьэхэр гъылыІад къалэу Яощ дэсхэм къаІихыжьыгъэх. Фылистхэм Саул ГъылбэуаІ щаукІыгъэу, ыкъо Ионэтанрэ ежьыррэ яхьадэхэр Бэтщан чІыпІэм зыщыпалъэжьхэм Яощ дэсхэм ахэр шъэфэу къыпахыжьыгъагъэх. 13 Саули ащ ыкъо Ионэтани яхьадэкъупшъхьэхэр ащ къычІихыжьыгъэх; адрэ палъэгъагъэхэм яхьадэкъупшъхьэхэри къаугъоижьыгъэх. 14 ЕтІанэ Саулрэ ащ ыкъо Ионэтанрэ яхьадэкъупшъхьэхэр Саул ятэу Къыщ икъэу бынямин чІыгум къыхиубытэрэ чІыпІэу ЦэлаІ дэтым чІалъхьажьыгъэх. Пачъыхьэм афишІыгъэ унашъохэр зэкІэ агъэцэкІагъэх. Ащ ыуж цІыфмэ ятхьэлъэІухэр Тхьэм къызэхиххи гукІэгъу къафишІыгъ.
Даут идзэкІолІхэм ягъэхъагъэхэр
15 ЕтІанэ фылистмэ икІэрыкІэу зао къырагъэжьагъэти, Даутрэ идзэкІолІхэмрэ ежьэхи фылистмэ язэуагъэх. Даут пшъыгъагъэ. 16 Иныжъмэ къахэкІыгъэу, зигъоплъэ пчыпыджын килограммищ фэдиз хъущтыгъэу, кІэу къамэ зыгопхэгъэгъэ Ищбый-Бэнэу Даут ыукІынэу фэягъ. 17 Ау Цырыуй ыкъо Абищай фылистым текІуи ыукІыгъ. Арти Даут идзэкІолІхэм тхьэлъанэ ашІыгъ: «Израилыр къызэпэзгъэнэфырэ остыгъэр мыкІосэным пае утигъусэу ащ нахьыбэрэ заом укІожьыщтэп». 18 Ащ ыужи фылистмэ джыри Гоб зыщязаохэм, Хъущым щыщ Сыбхъай иныжъхэм ащыщ горэ ыукІыгъагъ. 19 НэмыкІ зауи Гоб щыкІогъагъэти, Бэтлэхъэм щыщ ЯІэрэ-Орэгъым ыкъо Елхъэнан гъытытмэ ащыщ Голиатэу зипчыпыджыныкІ лІы къызэрыкІом ыІапшъэкІэ умыубытышъунэу гъумыгъэр ыукІыгъагъ. 20 Гъатым джыри зы зао щыкІуагъэти, ыІэхэми ылъакъохэми Іэхъомбэ ыкІи лъэхъомбэ хырых, зэкІэмкІи тІокІырэ плІырэ хъоу пытхэу иныжъхэм ащыщэу зы лІы лъэгэшхо горэ ахэтыгъ. 21 Израил дзэкІолІхэр ащ къыушъхьакІущтыгъэх, ау Даут ыш Щаммэ ыкъо Ионэтан ар ыукІыгъ. 22 А нэбгыриплІыри Гъатым дэс иныжъхэм ащыщыгъэх, плІыри Даутрэ ащ идзэкІолІхэмрэ аукІыгъэх.
Даут ищытхъуфэшІ орэд
1 Зиусхьаным Даут ипыйхэми Саули къызаІакІехыжьым ыуж орэдым хэлъ гущыІэхэр фигъазэхи ащ къыІуагъ: 2 «Зиусхьаныр – симыжъо Іошъхьэ пыт, сипытапІ, сикъэгъэнэжьакІу. 3 Си Тхьэ – сикъушъхьэ зэндэ лъаг, Ар сэ сигугъэпІэшху, симэІу; сыкъэзгъэнэжьырэ кІуачІ, симыжъо дэпкъ занд ыкІи сигъэбылъыпІ; СиухъумакІу, егъэзыпІэхэм О сыкъарэощыжьы! 4 Щытхъушхор зытефэрэ Зиусхьаным селъэІунышъ, сипыйхэми сащиухъумэн. 5 Хьадэгъум иорхэм сыкъауцухьагъэу, кІодыгъом ипсы чъэр сыздихьы пэтыгъ; 6 хьадрыхэ кІапсэхэмкІэ сызэкІоцІыпхагъэу хьадэгъум имашэ сифагъ. 7 ГукІаем идэкъацэ сызыдэфэм, си Зиусхьанэу си Тхьэ зыфэзгъази селъэІугъэти, Сызэрэкууагъэр иунэ лъапІэ къыщызэхихыгъ, спсэ игурым макъэ ытхьакІумэ ридзагъ. 8 ЕтІанэ чІыгур къэтІыгурыгугъ, зызэридзэжьыгъ, ошъогу лъачІэхэри къэкІэзэзхи, къэтІыгурыгугъэх, къызэрафэгубжыгъэр къыгъэнэфагъ. 9 Ыпэгъуанэхэм Іугъор къарыутысыкІыгъ, тезылыкІырэ машІор ыжэ къыдэустхъукІыгъ, мэшІо тэпхэр къыхэтэкъугъэх. 10 Уашъор къызэІуигъэкІоти, Ар ащ къехыгъ, мэзэхэ шІункІыр Ащ ылъэгу чІэтыгъ; 11 Къэрыубмэ къатетІысхьи ебыбэжьагъ, жьыбгъэ фыртынэм ытамэхэм атетэу зыригъэлъэсэжьагъ; 12 ошъуапщэхэм къыздахьырэ псыр зэхигъэзыхьи, ямэзэхэ шІункІ гъэІагъэ къызэригъэуцокІыгъ; 13 итеплъэу зэпэхъопскІыжьырэм мэшІо стафэхэр къызэкІигъанэщтыгъ. 14 Ошъогум мэкъэшхо Зиусхьаным къыщигъэІугъ, ТиІэшъхьэтетышхо ымакъэ къызэхаригъэхыгъ; 15 щабзэхэр къытІупщхи атыригъэфагъэх, ипыйхэм пчыкІэмкІэ кІаригъэтхъужьыгъ. 16 Зиусхьаным ымэкъэ щынагъорэ ижьыкъэщэ гъогъо лъэшрэ хыхэр алъачІэмэ анэсэу зэгуагъэугъэх, дунаим ылъапсэхэр къызэІуахыгъэх. 17 Ащ ыІэ лъэгапІэм къыхищэикІи сиубытыгъ, хыдзэ-псыдзабэхэм сакъыхищыжьыгъ; 18 сипый лъэши сызфэмылъэгъухэу сэщ нахь лъэшщтыгъэхэми сакъыІэкІихыжьыгъ. 19 СитхьамыкІэгъу мафэм ахэм зыкъыспаІэтыгъ, ау Зиусхьаныр сэркІэ тегъэкІапІэщтыгъ. 20 Хъоо-пщаупІэр къыситыжьыгъ, сакъыІэкІихыжьыгъ, сыда пІомэ Ар сэ къысфэшІу. 21 Шъыпкъэм сызэрэтетым пае Зиусхьаным шІу къысфишІагъ, мыхъун зэрэскъомылъым ипэгъокІэу сигъэлъэпІагъ. 22 Сыда пІомэ Зиусхьаным сэ сыбгъодэкІыгъэп, си Тхьэ къемыкІунэу мыхъун сэ сшІагъэп. 23 Ащ иунашъохэр зэкІэ згъэцэкІагъэх, шапхъэу ыгъэуцугъэхэри сыукъуагъэхэп, 24 Ащ ыпашъхьэ лые щысшІагъэп, пхэндж зекІуакІэм зыщысыухъумагъ. 25 Арти шъыпкъэм сызэрэтетыр, ыпашъхьэ сызэрэщыкъабзэр Зиусхьаным къызэхишІыкІыгъ. 26 Къыпфэшъыпкъэхэм уафэшъыпкъэжь, пхэнджыгъэ зыхэмылъым шІур пэогъохы, 27 къабзэм уфэкъабз, тхьагъэпцІыми зэрифэшъуашэу укъыпэгъокІыжьы. 28 Шъырытныгъэ зыхэлъхэр къэогъэнэжьых, пагэхэр уинэплъэгъукІэ пхъэтэпэмыхь ошІыжьых. 29 Оры, оры, Зиусхьан, сиостыгъэ нэфыр; сызхэт шІункІыр Зиусхьаным къысфегъэнэфы. 30 О, О усигъусэу дзэ купым сытекІо; Тхьэр сигъусэу пытэпІэ дэпкъым сыдэкІуае. 31 Ар Тхьэ – Ащ игъогу щыкІэгъэнчъэ шъыпкъ, Ащ игущыІэ зафэм изэфэжь, щыгугъырэ пстэуми мэІу афэхъу. 32 Зиусхьаным нэмыкІ зыпари Тхьэ щыІэп, ти-Тхьэ нэмыкІэу хэт къушъхьэ зэндэ лъагэу щыІэр? 33 Ар – Тхьэу сыкъэзгъэнэжьырэ кІуачІ, гъогу зафэр къысфызэІуехы. 34 Шъыхьэ анэм ылъакъомэ япсынкІагъэрэ ясакъыгъэрэ слъакъомэ къаритыгъэхэшъ, къушъхьэ лъэгапІэхэм санегъэсы; 35 зэуакІэм сыфигъэсагъэшъ, джэрз щабзэр къэсэуфэшъу. 36 Сыкъызэрынэжьыщт мэІур О къысэптыгъэшъ, уиІэпыІэгъу сакъыхеІэтыкІы. 37 Лъагъоу сызтетым зыкъысфырегъэушъомбгъу, слъакъохэри кІэсысыхьэхэрэп. 38 Сипыйхэм ауж силъади, зэхэзгъэтэкъуагъэх, ахэр зэхэсымыукІэфэхэ къэзгъэзэжьыгъэп; 39 ахэм сатекІуагъ, ахэр зэхэсыукІагъэх, зыкъамыІэтыжьышъухэнэу зэхэсщытІагъэх. 40 КІуачІэу сызэрэуузэндыгъэм заом сащытыригъэкІуагъ, зыкъыспэзыІэтыгъэхэр гъэры сэбгъэшІыгъэх; 41 сипыйхэм ашъхьэ О щябгъэгъэзыягъ, сызфэмылъэгъурэр зэкІэ зэхэзгъэфагъ. 42 ІэпыІэгъу щыгугъхэу ахэр къэлъэІуагъэх, ау къэзгъэнэжьыщтхэр щыІагъэп, Зиусхьаным зыфагъэзагъ, ау джэуапэгъу къафэхъугъэп. 43 ЧІыгу сапэм фэдэу ахэр сэ истэкъухьагъэх, гъогум телъ псынжъым фэдэу зэхэсщытІэхи сыутагъэх. 44 ЗыкъыспэзыІэтыгъэ сицІыфхэм сатебгъэкІуагъ, нэмыкІ лъэпкъхэми Іэшъхьэтет О сафэпшІыгъ, зыщыщ сымышІэщтыгъэ лъэпкъхэр джы сэ къысфэпщылІых. 45 Хэмэ цІыфхэр къысэубзэхэу хъугъэ, сикъэбарэу зэхахыгъэм сызыфаер арегъашІэ. 46 Къызэрэсщыщынэхэрэм нахь хэмылъэу хэмэ цІыфхэм ашъо пэзы, ягъэбылъыпІэхэр кІэзэзхэзэ къабгынэх. 47 Зиусхьаныр зэрэщыІэр сэІо, сикъушъхьэ зэндэ лъагэ щытхъур ыдэжь! Тхьэу, сикъэгъэнэжьын икъушъхьэ зэндэ лъагэ, ыцІэ нахь лъагэу зерэІэт! 48 Сэщ пае Тхьэм сипыйхэм яфэшъуашэр аригъэгъотыгъ, лъэпкъхэми сатыригъэкІуагъ, 49 сипыйхэм зэкІэми сатебгъэкІуагъ! Сэ зыкъыспэзыІэтхэрэм апшъэ О сыбгъэуцугъ, цІыф жъалымхэм О сащыуухъумагъ. 50 Джащ пае, Зиусхьаныр, О уищытхъу хэмэ лъэпкъхэм сахэтэу сІотэщт, О щытхъу орэдхэр пфэсІощт. 51 Тхьэм ипачъыхьэ текІоныгъэшхохэр регъэшІых, Ащ тхьэихэхэу Даутрэ ибынхэмрэ егъашІэми гукІэгъу къафыриІэщт!»
Даут иаужырэ гущыІэхэр
1 Ищай ыкъо Даутэу, лъагэу Тхьэм ахиІэтыкІыгъэ лІым, Якъубэ и-Тхьэ пачъыхьэнэу къахихыгъэу, Израилым иорэдыІо жэбзашІоу Даут иаужырэ гущыІэхэр зыфэдэр мары: 2 «Зиусхьаным и-Псэ скІоцІыкІэ къыщэгущыІэ, Ащ игущыІ сыбзэгу телъыр. 3 Израилым и-Тхьэ къысиІуагъ, Израилым и-Къушъхьэ зэндэ лъагэ къысиІуагъ: „ЦІыфхэр зыІэ илъым зэфагъэм тетэу, Тхьэм ищынагъо итэу ипачъыхьагъу зэрехьэмэ, 4 тыгъэр пчэдыжь нэфшъагъом ошъогу къаргъом къызэрэщыкъокІырэм, уцыр ощх ужым зэпэлыдыжьэу зэрэкъашхъорэм ар фэд". 5 Ащ фэдэба Тхьэм ынэшІоу сибын къыщыфэрэр. ЕгъэшІэрэу зэзэгъыныгъэ Ащ сэ къыздишІыгъ, лъэныкъо пстэумкІи пытэу, мыукъожьыхэнэу. Насыпыгъэу сиІэ пстэури къэзыухъумэрэ кІуачІэр, сигухэлъ пстэури Арба къызхэкІрэр? 6 Ау цІыф мыхъатэхэр зызщадзыерэ, ІэкІэ зынэмысышъухэрэ пэнапцІэм фэдэщтых; 7 ау ащ нэсыным пае гъучІыкІэ е пчыпыджын пхъэкІымкІэ зиуІэшын фае; джащ дэжьым машІом ар регъэстыпэ».
Даут идзэкІолІ анахь лІыхъужъхэр
8 Даут илІыхъужъмэ ацІэхэр мары: пачъыхьэм илІыхъужъ хэшыпыкІыгъэ тхьаматэмэ ащыщ тахъкъэмон лъэпкъым къыхэкІыгъэу Иощэб-Бащэбэт; ипчыпыджын нэбгырэ шъиим къапиІэтыгъ, язаозэ зэпстэури хигъэфагъ. 9 Ащ къыкІэлъыкІорэр Даут игъусэгъэ дзэкІолІищым ащыщэу ахъохъ лъэпкъым къыхэкІыгъэ Додэ ыкъожьэу ЕлыІазар. Къэзэонхэу къэуцугъэ фылистхэр аушъхьакІухэ зэхъум, израил дзэкІолІхэр къызызэкІафэхэм, 10 ыІэмычІэ чІэлъ чатэр ыпкъ щыщ охъуфэ фылистмэ ар язэуагъ. Зиусхьаным а мафэм текІоныгъэшхор къафихьыгъ. АукІыгъэмэ апылъхэр къапахыжьынхэм пае цІыфхэр пыим ыуж зыкІихьэгъэгъэхэ закъор. 11 Ащ ыуж итыгъ Хъэрар щыщэу Агъэ ыкъо Щаммэ. Джэнчжъыер зыщашІэгъэ хьасэр зыдэщыІэ Лэхъый чІыпІэм фылистхэр къызыщызэрэугъойхэм израил дзэкІолІэу къэнагъэхэр къечъэжьэжьыгъэх. 12 Ау Щаммэ губгъо гузэгум иуцуи къафызэкІэкІуагъэп, фылистхэми атекІуагъ. Ащ дэжьым Зиусхьаным текІоныгъэшхо къафихьыгъ. 13 Хыныгъо лъэхъаным фылист жъугъэхэр РэфаІим кІэим къызыдэхьэхэм пачъыхьэм илІыхъужъ хэшыпыкІыгъэмэ анахь бэлахьищыр къакІохи Даут дэжь Іэдулам гъочІэгъым чІэхьагъэх. 14 А уахътэм Даут пытапІэм дэсыгъ, фылист дзэ купхэр Бэтлэхъэм дэтыгъэх. 15 Даут гупшысэ ІэшІухэм ахэтэу къыІуагъ: «Бэтлэхъэм икъэлапчъэ дэжь щыт псынэм ипс щыщ хэт къысІуигъэфэн?» 16 Арти лІыхъужъищыр фылистмэ яуцупІэ кІоцІырыкІхи, Бэтлэхъэм икъэлапчъэ дэжь щыт псынэм псы къырахи Даут къыфахьыгъ. Ау ар ащ ешъон ымыдэу, Зиусхьаным ищытхъу пае рикІути 17 къыІуагъ: «А Зиусхьан, ар сшІэным сыщыухъум! Зыпсэ рыджэгужьхэзэ псыхьэ кІогъагъэхэм къахьыгъэм сешъомэ, ахэм алъ сешъуагъэм фэдэба?» Ащ ешъон ыдагъэп. А лІыхъужъищым ашІагъэр джары. 18 Цырыуй ыкъоу, Иоаб ыш Абищай пачъыхьэм илІыхъужъ хэшыпыкІыгъэ тхьаматэмэ ащыщыгъ: ипчыпыджын мокІэ-мыкІэ ахиІузэ нэбгырэ шъищ ыукІыгъ, ищытхъуи нэбгырищ хъурэ а купым ыІуатэщтыгъэ. 19 А лІыхъужъ хэшыпыкІыгъэмэ ар анахь цІэрыІуагъ, ахэм Іэшъхьэтет афэхъугъагъ, ау нэбгырищ хъурэ адрэ купым ар анахь лъэшыгъэп. 20 ИодаІ ыкъо лІыбланэу Бэнай зиІофшІэгъэшхохэмкІэ лъэшэу, Къэбцыел къалэм щыщ мэуабэу Ариел ыкъуитІу атекІуагъ; ар дэдэр осыр къызщесщтыгъэ мафэм кІэим дахьи аслъаныр ащ диукІыхьагъ. 21 Ар дэдэм мысыр лІы лъэгъупхъэ горэ ыукІыгъ. А мысырым пчыпыджын ыІыгъыгъэми, ежь бэщыр ыІэдакъэу ащ пэгъокІи, мысырым пчыпыджыныр къыІэкІитхъи, иІашэкІэ ыукІыжьыгъ. 22 ИодаІ ыкъо Бэнай джары ышІагъэр, адрэ лІыхъужъищым афэдэу ари цІэрыІуагъ. 23 А нэбгырэ щэкІым афэдэу ар цІэрыІо хъугъэ, ау адрэ нэбгырищым анахь лъэшыгъэп. Арти къэзыухъумэрэ цІыфхэм Даут Іэшъхьэтет ар афишІыгъ. 24 А нэбгырэ щэкІым нэмыкІхэри ахэтыгъэх: Иоаб ышэу Іасаел; Бэтлэхъэм щыщ Додэ ыкъо Елхъэнан; 25 Хъэрэуд щыщхэу Щаммэрэ Елыкъэрэ, 26 Бэтпэлэт къалэм щыщэу Хъэлэц, ТэкъоаІ щыщэу Іикъэщ ыкъо Іирэ, 27 Іанатот щыщэу АбиІэзэр, Хъущым щыщ Мэбунай, 28 ахъохъмэ ащыщэу Цалмон, нэтофмэ ащыщэу Махрай, 29 нэтофмэ ащыщхэу БэІан ыкъо Хъэлэдрэ Бынямин хэкум ит ГъыбІэ щыщ Рибай ыкъо Иттайрэ, 30 пирІатонмэ ащыщэу Бэнай, гъэІащмэ ащыщэу Хъыддай, 31 Іарбэтмэ ащыщэу Аби-Іалбон, Бахъурим щыщ Іазмэот, 32 щэІалбонэу Елэхъбэ, Ящэн ыкъохэр, Ионэтан, 33 хъэрарэу Щаммэ ыкъу, хъэрарэу Щэрар ыкъо АхъыІам, 34 МэІахэ щыщ Ахъэсбай ыкъо Елыфэлэт, гъылэунэу Ахъытэуфэл ыкъо ЕлыІам, 35 Къармэл щыщэу Хъэцрай, арыбэу ПэІэрай, 36 Цэубэ щыщ Нэтан ыкъо Игъал, гъадэу Баный, 37 Іамонэу Цэлэкъ, БэІэрот щыщэу Цырыуй ыкъо Иоаб иашъоджэнэзехьэу Нэхъэрай, 38 итырэу Іирэ, итырэу Гъарэб, 39 хъытэу Урый. ЗэкІэри нэбгырэ щэкІырэ блырэ фэдиз хъущтыгъэ.
Лъэпкъыр зэратхыгъэр
1 Зиусхьаныр Израилым джыри лъэшэу къыфэгубжыгъ. Даут ыгу къончагъэ къырилъхьи Израилми Ехъудми арыс цІыфыр зыфэдизыр къылъытэнэу къыриІуагъ. 2 Арти пачъыхьэм идзэ иІэшъхьэтетэу Иоабрэ идзэпащэхэмрэ ариІуагъ: «Даным къыщежъугъажьи БэрщэбаІ нэсэу зэрэизраил лъэпкъэу къызэпэшъукІухь, дзэм хэтын зылъэкІыщт хъулъфыгъэ пчъагъэр зыфэдизыр сшІэным пае ахэр къэшъулъыт». 3 Ау Иоаб пачъыхьэм риІуагъ: «Уи-Зиусхьанэу Тхьэм цІыфэу щыІэмэ афэдиз ахерэгъахъу, ащ фэдишъэ джыри ахерэгъахъу, сизиусхьани ынитІукІэ ар ерэлъэгъу; ау сизиусхьанэу пачъыхьэм сыд фэдэ гухэлъа а Іофым фыриІэр?» 4 Ау пачъыхьэм Иоабрэ идзэпащэхэмрэ ариІуагъэр ыкІыІу къэхъугъ. Арти Иоабрэ пачъыхьэм идзэпащэхэмрэ зэгъусэхэу пачъыхьэм дэжь икІыхи израил лъэпкъыр къалъытэнэу ежьагъэх. 5 Ахэр Иордан зэпырыкІхи, къэлъытэныр ІарэІэр къалэрэ кІэим дэт къалэмрэ къащырагъажьи, ащ ыуж Гъад хэкум, етІанэ ЯІызэр къалэм кІуагъэх. 6 ГъылыІад лъэныкъоми кІуагъэх, хъытмэ яхэку ит къалэу Къадэщи нэсыгъэх; етІанэ Даным кІуагъэх, Даным дэкІхи Цыдон лъэныкъомкІэ агъэзагъ; 7 къыблэмкІэ лъыкІуатэхэзэ, зэтегъэпытыхьэгъэ къалэу Цэури дэхьагъэх, хъэухэмрэ къэнэІанхэмрэ якъэлэ пстэуми анэсыгъэх, Ехъудэм икъыблэкІэ щыІэ БэрщэбаІи нэсыгъэх. 8 Зэрэхэгъэгоу къызэпакІухьи мэзибгъурэ мэфэ тІокІырэ зытешІэм ыуж Ерыусэлэм къагъэзэжьыгъ. 9 ЦІыфхэр зыфэдиз хъурэм икъэбар Иоаб пачъыхьэм зыфеІуатэм, дзэм хэтын зылъэкІыщт хъулъфыгъэ пчъагъэу Израилым, темыр лъэныкъомкІэ, исыр нэбгырэ мин шъиеу, Ехъудэм, къыблэ лъэныкъомкІэ, – мин шъитф хъоу къычІэкІыгъ.
Тхьэм Даут зэригъэпщынагъэр
10 ЦІыф пчъагъэр зыфэдизыр къызелъытэм Даут ыгу къэлъэпэрэпагъ. Арти Даут Зиусхьаным зыфигъэзагъ: «Ащ фэдэу сызекІуи псэкІодышхо згъэхъагъэ. Зиусхьаныр, уиІумэт ипсэкІодшІыгъэ къыфэбгъэгъунэу джы сыолъэІу, сыда пІомэ акъылынчъагъэ къызхэзгъэфагъ». 11 КъыкІэлъыкІорэ мафэм пчэдыжьым Даут къызэтэджыжьым тхьэлІыкІоу, Даут иусэрэжъэу Гъад Зиусхьаным къыриІуагъ: 12 «Даут дэжь кІуи еІу: „Зиусхьаным ыІорэр мары: 'Пщыныжьищ къыптеслъхьащтышъ, ахади о ппэкІэкІынэу ахэм зы къахэх'"». 13 Арти Гъад Даут дэжь къакІуи, къэбарыр къыфихьи, къыриІуагъ: «Тара ащыщэу узыфаер, къахэх: илъэсиблэ уихэгъэгу щыгъэблэныр ара, хьауми уауж ит уипыйхэм ори уицІыфхэми зашІожъугъэбылъзэ мэзищэ къэшъучъыхьаныр ара, хьауми хьадэгъур къызпыкІырэ зэпахырэ бэгуузыр мэфищэ уихэгъэгу къыщекІокІыныр ара? Джы егупшыси СыкъэзгъэкІуагъэм есІожьыщтым теубыт». 14 Арти Даут Гъад риІожьыгъ: «Къинышхо сыхэт; ау щытми, Зиусхьаным ыІэ терэф, сыда пІомэ Ащ игукІэгъу гъунэнчъ; цІыфмэ саІэкІэрэмыфэ закъуи ары ныІэп сызыфаер». 15 Арти Зиусхьаным пчэдыжьым къыщегъэжьагъэу пІалъэу къыгъэнэфагъэм нэс бэгуузыр израил цІыфмэ къафыригъэхыгъ; Даным къыщегъэжьагъэу БэрщэбаІ нэсыжьэу цІыфэу нэбгырэ мин тІокІищрэ пшІырэ лІагъэ. 16 Ерыусэлэм дэс цІыфхэр лъэкъабзэ ригъэфэнэу мэлэІичыр зыфежьэм, Зиусхьаныр тхьамыкІагъоу къафыригъэхыгъэм фыкІэгъожьи, цІыфхэр езгъэтэкъохщтыгъэ мэлэІичым риІуагъ: «Икъущт, джы уцужь». Зиусхьаным имэлэІич ащ дэжьым еус лъэпкъым щыщ Араунэ ихьамэщ дэжь щытыгъ. 17 ЦІыфхэр езгъэтэкъоххэрэ мэлэІичыр къызелъэгъум Даут Зиусхьаным риІуагъ: «Ары сэ сизакъоу псэкІод сшІагъэ, хэбзэнчъэу сызекІуагъ; ау мыдрэ мэлхэм сыда ашІагъэр? Сэррэ сиунагъорэ тифэшъуашэр О тэгъэгъот».
Даут къурмэн зэришІыгъэр
18 А мафэм Гъад Даут дэжь къакІуи къыриІуагъ: «КІуи еусэу Араунэ ихьамэщ Зиусхьаным пае къурмэншІыпІэ щыгъэуцу». 19 Зиусхьаным къыфишІыгъэ унашъом тетэу, Гъад къыриІогъэ чІыпІэм Даут кІуагъэ. 20 Араунэ къызэплъэм пачъыхьэмрэ ащ иІумэтхэмрэ къызэрекІуалІэхэрэр къылъэгъугъэти, Араунэ къапэгъокІи чІыгум нэс пачъыхьэм шъхьащэ къыфишІыгъ. 21 Араунэ къыІуагъ: «Сыда сизиусхьанэу пачъыхьэр иІумэт дэжь къызкІэкІуагъэр?» Даут ащ риІуагъ: «Зиусхьаным къурмэншІыпІэ щыфэзгъэуцуным, цІыфхэр бэгуузым римыгъэтэкъохыжьынхэм апае уихьамэщ пщысщэфынэу ары». 22 Арти Араунэ Даут къыриІожьыгъ: «Сизиусхьанэу пачъыхьэм зыфаер ерэшти къурмэн ерэшІ. Мары къурмэнгъэстым пае цухэри, гъэстыныпхъэ пшІынхэу лэжьыгъэутыныжь пхъэхэри, цухэр зэрэкІашІэхэри. 23 А пачъыхь, а зэкІэ сэ къыосэты». ЕтІани Араунэ пачъыхьэм къыриІуагъ: «Уи-Зиусхьанэу Тхьэм ынэшІу къыпщэрэф!» 24 Ау пачъыхьэм Араунэ риІуагъ: «Хьау, атефэрэ уасэр къыостыщт, къысатыгъэр Си Зиусхьанэу Тхьэм къурмэн фэсшІыщтэп». Джаущтэу Даут хьамэщри цухэри тыжьын ахъщэ шъэныкъокІэ къыщищэфыгъэх. 25 Ащ дэжьым Даут Зиусхьаным пае къурмэншІыпІэр щигъэуцуи къурмэнгъэстрэ мамыр къурмэнрэ щишІыгъэх. Арти Зиусхьаным хэгъэгум гукІэгъу къыфишІыгъ, бэгуузыр израил цІыфхэм къяузыжьыгъэп.
Даут ижъыгъом
1 Пачъыхьэу Даут ыныбжьыкІэ жъыгъом фигъэзэгъагъ. Щыгъынхэр бэу зэтыралъхьэзэ афапэщтыгъэми, ащ зыфэгъэфэбэшъущтыгъэп. 2 Арыти, иІумэтхэм раІуагъ: «Пачъыхьэм къыдекІокІынэу, ащ ынаІэ тыригъэтынэу, ыгупэ кІэлъэу зыгъэфэбэн пшъэшъэ ныбжьыкІэ тизиусхьан пачъыхьэ къыфарэгъот. Джащыгъум тизиусхьан пачъыхьэ фэбэжьыщт». 3 Джащ пае Израилым ичІыпІэ пстэуми пшъэшъэ дахэ ащылъыхъугъэх. Шунэм къалэ щыщ Абищагъ къагъоти, пачъыхьэм къыфащагъ. 4 Пшъашъэр дэхэ дэдагъ, ар пачъыхьэм къыдекІокІыщтыгъэ, зыфаехэр фишІэщтыгъэх, ау пачъыхьэр ащ екІолІагъэп.
Адоный пачъыхьагъур ыубытмэ зэрэшІоигъор
5 А уахътэм Хъаджэт ишъэо Адоный зыкъышІошІыжьэу ыІощтыгъэ: «Сэ пачъыхьэ сыхъущт». Ку псынкІэхэр, шыухэр, ишъхьагъырытхэу, ыпэ итэу кІонхэу псынкІэрыкІо нэбгырэ шъэныкъо зэригъэгъотыгъ. 6 «Сыда ар зытепшІыхьэрэр?» – ыІоу ятэ ар ригъэзыхэщтыгъэп. Ар кІэлэ дэхэ дэдагъ, Абищэлэм ыуж къэхъугъагъ. 7 Ащ Цэруе ыкъо Иоабрэ къурмэнышІэу Ебыетаррэ джэнджэшэгъу къызфишІыгъэхэти, ахэр Адоный готыгъэх. 8 Ау къурмэнышІэу Цадокъи, ЕхъоедаІ ыкъо Бэнайи, тхьэлІыкІоу Натани, ЩымІыйи, РэІыйи, пачъыхьэм илІыхъужъ хэшыпыкІыгъэхэри Адоный готыгъэхэп. 9 Адоный мэл-пчэнхэри, былым пІашъэхэри, шкІэхъужъ гъэшхагъэхэри Блэ мыжъокІэ заджэхэу Рэугъэл псынэкІэчъым дэжь пэблагъэу щытым къурмэн щишІхи, пачъыхьэм ыкъохэри, Ехъудэм щыщ пачъыхьэ къулыкъушІэхэри зэкІэ зэрэзэгъусэхэу къыригъэблэгъагъэх. 10 Ау тхьэлІыкІоу Натани, Бэнаий, лІыхъужъ хэшыпыкІыгъэхэри, ежь ыш Сэлмэни къыригъэблэгъагъэхэп.
Сэлмэн пачъыхьагъум зэрэтехьагъэр
11 ЕтІанэ Натан Сэлмэн янэ БатщэбаІ риІуагъ: «Хъаджэт ыкъо Адоный пачъыхьэ зэрэхъугъэр зэхэпхыгъэба, тизиусхьанэу Даут ащ щымыгъуазэуи? 12 Джы къыосІощтыр ары: ори уишъэо Сэлмэни шъушъхьэхэр хэшъухыжьых. 13 Моу джыдэдэм кІуи, пачъыхьэу Даут дэжь ихьи еІу: „Сизиусхьанэу пачъыхьэр, ‘Уишъэо Сэлмэн саужкІэ пачъыхьэ хъущт, ситахътэ ар тетІысхьащт’ пІуи, уиІумэт тхьэлъанэ фэпшІыгъагъэба? Сыда адэ Адоный пачъыхьагъур зыкІиубытыгъэр?“ 14 О пачъыхьэм джыри удэгущыІэ пэтзэ уауж ситэу сыкъихьанышъ, епІорэр къэсыушыхьатыжьыщт». 15 Арыти, БатщэбаІ пачъыхьэр зыщычъыерэ унэм кІуагъэ. Пачъыхьэр жъы дэдэ хъугъагъэти, Шунэм щыщ Абищагъ ащ къыдекІокІыщтыгъэ. 16 БатщэбаІ пачъыхьэм шъхьащэ ин фишІыгъ. Пачъыхьэр къеупчІыгъ: «Сыд узфаер?» 17 Ащ риІуагъ: «Сизиусхьан пачъыхьэр! „Уишъэо Сэлмэн саужкІэ пачъыхьагъум тетыщт, ситахътэ ар тетІысхьащт“ пІуи, уи Зиусхьанэу Тхьэм ыцІэкІэ уиІумэт тхьэлъанэ фэпшІыгъагъ. 18 Джы мары Адоный пачъыхьагъур ыубытыгъ, ау, сизиусхьан пачъыхьэр, хъурэм о ущыгъуазэп. 19 Ащ цухэри, шкІэхъужъ гъэшхагъэхэри, мэл-пчэнхэри боу къурмэн ышІыгъэх, пачъыхьэм адрэ ыкъохэри, къурмэнышІэу Ебыетари, дзэм иІэшъхьэтет Иоаби ригъэблэгъагъэх. Ау уиІумэт Сэлмэн ригъэблэгъагъэп. 20 Ау о, сизиусхьан пачъыхьэр, зэрэ Израилэу къыоплъы, сизиусхьан пачъыхьэ ыуж тахътэм тетІысхьащтым ыцІэ епІонэу къыожэ. 21 Армырмэ сизиусхьан пачъыхьэ ятэ пІашъэхэр зыдэщыІэм зигъэзэжькІэ, сэри сишъэо Сэлмэни тагъэмысэщт». 22 Ар пачъыхьэм дэгущыІэзэ, тхьэлІыкІоу Натан къихьагъ. 23 Арыти, пачъыхьэм раІуагъ: «Мары тхьэлІыкІоу Натан». Ар пачъыхьэм дэжь ихьи, ынэІу джэхашъом нигъэсэу пачъыхьэм шъхьащэ фишІыгъ. 24 Натан къыІуагъ: «Сизиусхьан пачъыхь! „Адоный саужкІэ пачъыхьагъум тетыщт, ситахътэ ар тетІысхьащт“ о пІуагъа? 25 Сыда пІомэ ар непэ кІуи цухэри, шкІэхъужъ гъэшхагъэхэри, мэл-пчэнхэри боу къурмэн ышІыгъэх, пачъыхьэм ыкъохэри зэкІэ, дзэпащэхэри, къурмэнышІэу Ебыетари къыригъэблэгъагъэхэу, ахэр ащ ыдэжь щешхэх, щешъох, „Пачъыхьэу Адоный гъэшІэ кІыхьэ орэхъу!“ аІо. 26 Ау сыуиІумэт сэри, къурмэнышІэу Цадокъи, ЕхъоедаІ ыкъо Бэнайи, уиІумэт Сэлмэни тыригъэблэгъагъэп. 27 Сизиусхьан пачъыхьэм зэрэшІоигъоу а зэпстэури мыхъугъэнэуи? Сизиусхьан пачъыхьэм ыуж тахътэм тетІысхьащтым икъэбар тэ, уиІумэтхэм, зыкІытэмыгъэшІагъэр сыда?» 28 Ащ дэжьым пачъыхьэу Даут джэуап къыритыжьыгъ: «Моу БатщэбаІ шъукъысфедж». Арыти, адрэр къихьи пачъыхьэм ыпашъхьэ къиуцуагъ. 29 Пачъыхьэм тхьэлъанэ ышІызэ къыІуагъ: «Къиныгъо пстэуми спсэ ащызыухъумэгъэ Зиусхьаныр зэрэщыІэр сэІо! 30 Израилым и Зиусхьанэу Тхьэм ыцІэкІэ тхьэлъанэ сшІи, уишъэо Сэлмэн саужкІэ пачъыхьагъум тетынэу, сэ счІыпІэ тахътэм ар тетІысхьанэу къызэрэосІогъагъэм фэдэу непэ джаущтэу сшІыщт». 31 Арыти, БатщэбаІ ынэІу джэхашъом нигъэсэу пачъыхьэм шъхьащэ фишІи, риІуагъ: «Сизиусхьан пачъыхьэу Даут егъашІэм орэпсэу!» 32 Ащ ыуж пачъыхьэу Даут къыІуагъ: «КъурмэнышІэу Цадокъи, тхьэлІыкІоу Натани, ЕхъоедаІ ыкъо Бэнайи шъукъысфядж». Ахэр пачъыхьэм дэжь къихьагъэх. 33 Пачъыхьэм ахэм ариІуагъ: «СиухъумэкІо шъхьагъырытхэр зижъугъэгъусэхи, сишъэо Сэлмэн сикъыдыр тежъугъэтІысхьи Гъыхъон псынэкІэчъым шъущэ. 34 КъурмэнышІэу Цадокъ тхьэлІыкІоу Натан игъусэу Израилым ипачъыхьанэу дагъэр ащ щыщарэф. Бжъэмыем шъукъепщи, „Пачъыхьэу Сэлмэн орэпсэу!“ – шъуІуи, макъэ яжъугъэІу. 35 ЕтІанэ ар мыщ къэжъугъэкІотэжь. Ар къэкІожьынышъ ситахътэ тетІысхьащт. Сэ счІыпІэ пачъыхьагъум ар тетыщт, Израилми Ехъудэми ялІышъхьэ пэщэнэу осыет ащ къыфэсшІыжьыгъ». 36 Арыти, ЕхъоедаІ ыкъо Бэнай пачъыхьэм риІожьыгъ: «Амин, сизиусхьан пачъыхьэм и Зиусхьанэу Тхьэм шІоигъо ар орэхъу! 37 Зиусхьанэу Тхьэр сизиусхьан пачъыхьэм зэригъусагъэм фэдэу Сэлмэни Ар ерэгъус, сизиусхьан пачъыхьэу Даут итахътэ зэрахиІэтыкІыгъэм нахь лъэшыжьэу ащ итахътэ ахерэІэтыкІ!» 38 Джаущтэу къурмэнышІэу Цадокъи, тхьэлІыкІоу Натани, ЕхъоедаІ ыкъо Бэнайи, пачъыхьэм иухъумэкІо шъхьагъырытхэу къэрэтый, пэлэтый лъэпкъмэ ащыщхэри Сэлмэн дэжь кІохи, пачъыхьэу Даут икъыдыр ар тырагъэтІысхьи, Гъыхъон псынэкІэчъым ащагъ. 39 КъурмэнышІэу Цадокъ дагъэр зэрыт бжъэр чэтэнгъэІэгъэ лъапІэм къычІихи Сэлмэн пачъыхьанэу ышъхьэ дагъэ щафагъ. Ащ лъыпытэу бжъэмыем къызепщэхэм, «Пачъыхьэу Сэлмэн орэпсэу!» – аІуи, цІыфхэр зэкІэ къэзэрэгъэкууагъэх. 40 ЦІыф пстэуми Сэлмэн къагъэкІотэжьыгъ, ахэм къамылхэм къарагъаІощтыгъ, ягушІогъошхуагъ, якуо мэкъэшхохэм чІыгур агъэтІыгурыгущтыгъэ. 41 Арыти, Адоныйрэ ащ ригъэблэгъагъэхэмрэ шхэныр зэрэзэпагъэоу жъот макъэхэр къызэхахыгъэх. Иоаб бжъэмые макъэр къызызэхехым къыІуагъ: «Сыда къалэр къэзгъэбырсырыгъэр?» 42 Ащ къыІощтыгъэр джыри къымыухыгъэу, къурмэнышІэу Ебыетар ыкъо Ионэтан къыІухьагъ. Арыти, Адоный къыІуагъ: «КъакІо, уцІыф заф о, къэпхьырэр къэбарышІу». 43 Ионэтан ащ ипэгъокІэу Адоный риІуагъ: «ЗытетымкІэ, тизиусхьан пачъыхьэу Даут Сэлмэн пачъыхьанэу тыригъэхьагъ. 44 Пачъыхьэм къурмэнышІэу Цадокъи, тхьэлІыкІоу Натани, ЕхъоедаІ ыкъо Бэнайи, пачъыхьэм иухъумэкІо шъхьагъырытхэу къэрэтыйхэмрэ пэлэтыйхэмрэ ащыщхэри ащ къыдигъэкІуагъэхэти, Сэлмэн пачъыхьэм икъыдыр тырагъэтІысхьагъ. 45 ЕтІанэ къурмэнышІэу Цадокърэ тхьэлІыкІоу Натанрэ пачъыхьанэу ащ ышъхьэ дагъэ Гъыхъон щыщафагъ. ЯгушІогъошхоу ащ къикІыжьыгъэхэшъ ары къалэр къызкІэпчІыгъэр. Жъот макъэу зэхэшъухырэр джары къызхэкІырэр. 46 Сэлмэни пачъыхьэм итахътэ тетІысхьэгъах. 47 Пачъыхьэм иІумэтхэри тизиусхьан пачъыхьэу Даут дэжь къакІохи, „Уи Тхьэ Сэлмэн ищытхъу о уищытхъу нахь лъэшыжьэу ерэгъэІу, итахъти о уитахътэ нахь лъэшыжьэу ахерэІэтыкІ!“ аІуи, къыфэгушІуагъэх. Арыти, пачъыхьэм ипІэ зэрэхэлъэу ащ ипэгъокІэу шъхьащэ къышІыгъ. 48 ЕтІани ащ къыІуагъ: „Израилым и Зиусхьанэу Тхьэм, сэ къысхэкІыгъэу ситахътэ непэ тетІысхьагъэр сэзгъэлъэгъурэм щытхъур ыдэжь!“» 49 Ащ дэжьым Адоный ригъэблэгъагъэхэр зэкІэ къащтэхи къэтэджыжьхи, шъхьадж игъогу техьажьыгъ. 50 Адоный Сэлмэн щыщынэу кІуи къурмэншІыпІэм ыкъуапэу къыпыщхэрэм захигъэнагъ. 51 Къэбарыр Сэлмэн къынагъэси къыраІуагъ: «Адоный пачъыхьэу Сэлмэн щэщынэшъ, къурмэншІыпІэм ыкъуапэу къыпыщхэрэм захигъэнагъэу, „Пачъыхьэу Сэлмэн иІумэт чатэкІэ ымыукІынэу джыдэдэм тхьэлъанэ къысферэшІ“ еІо». 52 Арыти, Сэлмэн ыІуагъ: «ЦІыф зафэу зыкъигъэлъагъомэ, зы шъхьац налъи ащ ышъхьэ къыхэзынэп, ау хъор-шэрыгъэ къызызхигъафэкІэ, кІодыщт». 53 Джащ тетэу пачъыхьэу Сэлмэн ащ лъигъакІохи къурмэншІыпІэм къыкІэраригъэщыжьыгъ. Ар къакІуи пачъыхьэу Сэлмэн шъхьащэ къызфешІым, Сэлмэн ащ риІуагъ: «Уиунэ кІожь».
Даут Сэлмэн зэреушъыигъэр
1 Даут илІэжьыгъо къызэсым, ыкъо Сэлмэн осыетхэр къыфишІыжьыгъэх: 2 «Мары сэ дунаим сехыжьыщтышъ, пытагъэрэ лІыгъэрэ зыхэгъэлъ, 3 Уи Зиусхьанэу Тхьэм Іуагъэу къыддишІыгъэр къэгъэгъун, Мосэ ихабзэ зэритхагъэм фэдэу, Ащ илъагъохэм атет, Ащ ишапхъэхэм, Ащ иунашъохэм, Ащ ыгъэнэфагъэхэм, Ащ ыухэсыгъэхэм уатемыкІ. Джащыгъум сыд пшІагъэми, тыдэ зыбгъэзагъэми, сыдырэмкІи уиІоф кІэкІыщт. 4 Зиусхьаным сыкъызэригъэгугъагъэр ыгъэцэкІэным пае, „Пкъохэр зытет гъогумэ афэсакъхэу, агурэ апсэрэ шъыпкъагъэ ахэлъэу сапашъхьэ итхэмэ, о къыпхэкІыгъэхэр ренэу Израилым итахътэ тесыщтых“ ыІуи, къысиІуагъ. 5 Джыри: Цэруе ыкъо Иоаб къысишІагъэм, израилыдзэм ипэщитІоу Нэр ыкъо Абинэррэ Етэр ыкъо Іамасэрэ зэрадэзекІуагъэм, ахэр зэриукІыгъэхэми, зао щымыІэу лъыр ыгъачъи, лъэу ыгъэчъагъэмкІэ зызэриуцІэпІыжьыгъэми уащыгъуазэшъ, 6 ижъышъхьэм рэхьатэу зэрэмылІэжьыным тегъэпсыхьагъэу, уиІушыгъэ къызэрихьэу, ащ дэзекІу. 7 ГъылыІадэу Барзылай ыкъохэм гукІэгъу афэшІ, уиІэнэ пакІэ пысэу шхэщтхэм ахэгъафэх, сыда пІомэ пшы Абищэлэм зыщысыухъумэу сызежьэжьым ахэр къызгоуцогъагъэх. 8 ЕтІанэ уиІумэтмэ ахэт Бахъурим щыщ быняминэу Гъэрэ ыкъо ЩымІый, Махъанаим сыкІо зэхъум ар бгэкІаеу къысэбгыгъагъ. Ау Иордан дэжь къыщыспэгъокІыгъагъ. Арыти, „КъамэкІэ усыукІыщтэп“ сІуи, Зиусхьаным ыцІэкІэ тхьэлъанэ ащ дэсшІыгъагъ. 9 О ар умыгъэпщынэжьэу къэмыгъан. Сыда пІомэ о уцІыф Іушышъ, ижъышъхьэм лъыр къыпычъэу зэрэлІэжьыным тегъэпсыхьагъэу епшІэн плъэкІыщтым ущыгъуаз».
Даут зэрэлІагъэр
10 ЕтІанэ Даут ятэ пІашъэхэр зыдэщыІэм ыгъэзэжьыгъэти, Даут икъалэу Цион ар щагъэтІылъыжьыгъ. 11 Даут Израилым зэрипачъыхьагъэр илъэс тІокІитІу: Хъэурэн зэрэщыпачъыхьагъэр илъэсибл, Ерусэлэм илъэс щэкІрэ щырэ щыпачъыхьагъ. 12 Арыти, Сэлмэн пачъыхьэу техьагъ. Хэбзэ пытэ хэлъэу пачъыхьагъур ащ зэрихьагъ.
Адоный зэрэлІагъэр
13 Хъаджэт ыкъо Адоный Сэлмэн янэ БатщэбаІ дэжь къэкІуагъ. Адрэр ащ къеупчІыгъ: «УшІуфакІуа?» Мыдрэм джэуап ритыжьыгъ: «СышІуфакІу». 14 Ащ къыІуагъ: «СыкъыбдэгущыІэ сшІоигъу». Адрэм къыриІожьыгъ: «КъаІо». 15 Ащ къыІуагъ: «ОшІэба пачъыхьагъур зэрэсиягъэри, зэрэ Израилэуи пачъыхьэ сыхъунэу къызэрэсэплъыщтыгъэри. Ау пачъыхьагъур сІэкІэкІыгъ, сшы ар ІэкІэхьагъ, сыда пІомэ Зиусхьаным джаущтэу унашъо ышІыгъэхагъ. 16 Джы зыгорэкІэ сыолъэІущтышъ, уиджэуап сыкъемыгъэгъэукІытэжь». Адрэм къыриІожьыгъ: «КъаІо». 17 Ащ къыІуагъ: «Пачъыхьэу Сэлмэн усфыдэгущыІэнэу сыолъэІу, сыда пІомэ ащ укъыгъэукІытэжьыщтэп. Шунэм къалэ щыщ Абищагъ шъузэу къыситынэу сфеІоба». 18 БатщэбаІ къыриІожьыгъ: «Дэгъу, пачъыхьэм сыпфыдэгущыІэн». 19 БатщэбаІ Адоный пае дэгущыІэнэу пачъыхьэу Сэлмэн дэжь кІуагъэ. Пачъыхьэр ащ къыфэтэджыгъ, шъхьащэ къыфишІи, итахътэ тетІысхьажьыгъ. Пачъыхьэм яни пае тахътэ къаригъэхьи ащ иджабгъукІэ ар тІысыгъэ. 20 ЕтІанэ ащ къыІуагъ: «ЛъэІу цІыкІу горэ къыпфысиІэшъ, сыкъэмыгъэукІытэжьба». Пачъыхьэм ащ къыриІуагъ: «КъэлъаІу, тян, укъэзгъэукІытэжьыщтэп». 21 Мыдрэм риІуагъ: «Шунэм щыщ Абищагъ пшы Адоный шъузэу етба». 22 Ащ ипэгъокІэу пачъыхьэу Сэлмэн янэ къыриІожьыгъ: «Сыда Адоный пае Шунэм щыщ Абищагъ укъызкІыкІэлъэІурэр? Пачъыхьагъуми къыфыкІэлъэІуба. Ар сшынахьыжъба, къурмэнышІэу Ебыетари Цэруе ыкъо Иоаби игъусэхэба». 23 Арыти, пачъыхьэу Сэлмэн Зиусхьаным ыцІэкІэ тхьэлъанэ ышІи ыІуагъ: «Ыпсэ гъэгъугъэным пае Адоный ар ымыІуагъэ зыхъукІэ, сифэшъуашэр Тхьэм серэгъэгъот, нахьыбэжьи къысерэшІ! 24 Сэ пытапІэ къысфэхъугъэ, сятэ Даут итахътэ сытезгъэтІысхьэгъэ, Ежь къызэриІуагъэу, тиунагъо ипачъыхьагъу сыІузгъэуцогъэ Зиусхьаныр зэрэщыІэр сэІо, Адоный ихьадэгъу непэ, джыдэдэм къэсыгъэкІэ». 25 Джащ тетэу пачъыхьэу Сэлмэн ЕхъоедаІ ыкъо Бэнай ыгъакІуи, ар ащ еуи ыукІыгъ.
Ебыетар зэрэпщынагъэмрэ Иоаб зэрэлІагъэмрэ
26 ЕтІанэ пачъыхьэм къурмэнышІэу Ебыетар риІуагъ: «Іанатот щыІэ уихапІэ кІожь, хьадэгъур уифэшъуаш. Ау джыдэдэм усыукІыщтэп, сыда пІомэ сятэ Даут уригъусэу Зиусхьанэу Тхьэм ипхъонтэ лъапІэ къыдепхьакІыгъ, тятэ ыщэчыгъэр зэкІэ ори дэпщэчыгъ». 27 Джаущтэу Сэлмэн Ебыетар Зиусхьаным икъурмэнышІын къыІуигъэкІыгъ, джащ тетэу Зиусхьаным Алый иунэ ехьылІагъэу Шылэу къащыриІогъагъэр нэрылъэгъу хъужьыгъэ. 28 Иоаб а къэбарыр зызэхехым, Абищэлэм гомыуцоу, Адоный гоуцогъагъэти, Зиусхьаным ичэтэнгъэІэгъэ лъапІэ чъэжьи къурмэншІыпІэм ыкъуапэу къыпыщхэрэм захигъэнагъ. 29 Иоаб Зиусхьаным ичэтэнгъэІэгъэ лъапІэ зэрэчъэжьыгъэми, къурмэншІыпІэм ар зэрэкІэрытми икъэбар Сэлмэн къыфахьыгъ. Арыти, Сэлмэн «КІуи ар укІы» риІуи ЕхъоедаІ ыкъо Бэнай ыІофтагъ. 30 Бэнай Зиусхьаным ичэтэнгъэІэгъэ лъапІэ къакІуи ащ риІуагъ: «Пачъыхьэм иунашъо мары: „КъычІэкІ!“» Адрэм къыриІожьыгъ: «Хьау, мыщ сыщэрэлІ». Арыти, Бэнай пачъыхьэм ар риІожьыгъ: «Иоаб риІуагъэр мары, къысиІожьыгъэри мары». 31 Пачъыхьэм ащ къыриІуагъ: «Ащ къыуиІуагъэр фашІ, укІи гъэтІылъыжь. Иоаб хьакъынчъэу ыгъэчъэгъэ лъыр сэри, сятэ иунагъуи атехыжь. 32 Сятэ Даут ишІэ хэмылъэу ежь нахь зафэхэу, ежь нахьышІугъэхэ лІитІур зэриукІыгъэхэм, израилыдзэм ипащэу Нэр ыкъо Абинэррэ ехъудыдзэм ипащэу Итрэ ыкъо Іамасрэ къамэкІэ зэриукІыгъэхэм пае Зиусхьаным ащ ифэшъуашэр рерэгъэгъот. 33 Ахэм алъэу ыгъэчъагъэр ежьми къытекІыщтхэми къатерэфэжь, Даути, ащ къытекІыгъэхэми, иунагъуи, итахъти Зиусхьаным егъэшІэрэ мамырыр къарет!» 34 ЕхъоедаІ ыкъо Бэнай кІуи, Иоаб ыукІыгъ, ихапІэу шъофнэкІым щыІэм ар щагъэтІылъыжьыгъ. 35 ЕтІанэ пачъыхьэу Сэлмэн ЕхъоедаІ ыкъо Бэнай адрэм ычІыпІэ дзэхэм япащэу тыригъэхьагъ, Ебыетар ычІыпІэ пачъыхьэм къурмэнышІэу Цадокъ тыригъэхьагъ.
ЩымІый зэрэлІагъэр
36 ЕтІанэ пачъыхьэр ЩымІый къеджи ащ риІуагъ: «Унэ Ерусэлэм щышІи щыпсэу, ащ удэкІэу зыми умыкІу. 37 Мыщ удэкІэу, псы игъукІыгъэу Къыдрэн ылъэгу зыщызэпыпчырэ мэфэ шъыпкъэм улІэщтышъ зэгъашІэ. Уихьадэгъу ор-орэу къызфэпхьыжьыщт». 38 Арыти, ЩымІый пачъыхьэм риІожьыгъ: «Дэгъу, сизиусхьан пачъыхьэм унашъо къызэрэфишІыгъэу, уиІумэт зекІощт». ЩымІый бэрэ Ерусэлэм щыпсэугъ. 39 Ау илъэсищ зытешІэм ыуж ЩымІый ипщылІитІу горэ Гъат ипачъыхьэу МаІах ыкъо Ахыщ зекІужьхэм, ЩымІый къыраІуагъ: «Мары уипщылІхэр Гъат щыІэх». 40 Арыти, ЩымІый ищыд уанэр тырилъхьи ипщылІхэм къалъыхъунэу Ахыщ дэжь Гъат кІуагъэ. ЕтІанэ ЩымІый къыгъэзэжьыгъ, ипщылІхэри Гъат къыздырищыжьыгъэх. 41 ЩымІый Ерусэлэм дэкІи Гъат зэрэкІогъагъэри къызэригъэзэжьыгъэри Сэлмэн раІуагъ. 42 Арыти, пачъыхьэм ЩымІый лъигъэкІуагъэх, къаригъащи риІуагъ: «Зиусхьаным ыцІэкІэ тхьэлъанэ озгъэшІи, „Мыщ удэкІэу, чІыпІэ горэм узщыкІорэ мэфэ шъыпкъэм улІэщтышъ, зэгъашІэ“ сІуи, къыосІогъагъэба? Ори „Дэгъу, къысэпІуагъэр згъэцэкІэщт“ къысэпІожьгъагъэба? 43 Сыд пае адэ Зиусхьаным ыпашъхьэ тхьэлъанэу щыпшІыгъэри унашъоу къыпфэсшІыгъэри умыгъэцэкІэжьыгъэха?» 44 Джыри пачъыхьэм ЩымІый риІуагъ: «Сятэ Даут зэрарэу ебгъэкІыгъэр зыфэдэр ор шъыпкъэми ошІэ, угуи ар къыуеІо. Зиусхьаным уигухьагужъ къыптыригъэфэжьыщт! 45 Ау пачъыхьэу Сэлмэн Тхьэм ынэшІу къыщэрэф, тятэ Даут итахътэ Зиусхьаным ыпашъхьэ егъашІэм ерэт!» 46 ЕтІанэ пачъыхьэм ЕхъоедаІ ыкъо Бэнай унашъо зыфешІым, адрэр кІуи ЩымІый еуи ыукІыгъ. Сэлмэни пачъыхьагъур джыри нахь зыІэкІигъэпытыхьагъ.
Сэлмэн итхьэлъэІу
1 ЕтІанэ Сэлмэн Мысырым ипачъыхьэ фирхьауным езэгъи ыпхъу къыщагъ. Ежь пае унэ емышІыфэ, Зиусхьаным и Унэ емыгъэпсыфэ, Ерусэлэм дэпкъхэр къыремышІэкІыфэхэ шъузыр Даут икъалэу Цион зыддищагъ. 2 Ащ нэс Зиусхьаным ыцІэкІэ Унэ агъэпсыгъэу щытыгъэпти, цІыфхэм къурмэнхэр зыщашІырэ лъэгапІэхэм къурмэнхэр джыри ащашІыщтыгъэх. 3 Ятэ Даут иунашъохэм атетэу псэузэ, Сэлмэн Зиусхьаныр шІу ылъэгъугъ, ау ащи къурмэнхэр зыщашІырэ лъэгапІэхэм къурмэнхэр ащишІыщтыгъэх, гъомэ ІашІухэр къызпиххэри ахэм ащигъэстщтыгъэх. 4 Пачъыхьэр къурмэн щишІынэу ГъыбІоным кІуагъэ, сыда пІомэ къурмэнхэр зыщашІырэ лъэгэпІэ шъхьаІэр ащ щыІагъ. Сэлмэн къурмэнгъэст мин а къурмэншІыпІэм щишІыгъ. 5 Сэлмэн ГъыбІоным щыІэу Зиусхьаныр чэщым пкІыхьапІэкІэ къыфэкІуагъ. Тхьэм къыриІуагъ: «КъыпфэсшІэнэу узыфаем къыкІэлъэІу». 6 Арыти, Сэлмэн риІожьыгъ: «УиІумэтэу, сятэ Даут шъыпкъагъэ хэлъэу, зэрэщытын фаем тетэу, къыпфэгупцІанэу уапашъхьэ зэритыгъэм пае гукІэгъушхо къыфэпшІыгъ. А гукІэгъушхор О къыдэблэжьи, джы зэрэщытым фэдэу, итахътэ тесынэу шъауи къептыгъ. 7 Джы, си Зиусхьанэу Тхьэр, сятэ пачъыхьэу Даут ычІыпІэ УиІумэт тебгъэхьагъ. Ау сэ сыкІэлащ, къызщебгъэжьэщтыри зыщыуухыжьыщтыри сшІэрэп. 8 УиІумэти зипчъагъэ къэмылъытэшъунэу, нэплъэгъукІэ къэмыплъыхьашъунэу бэ хъурэ уилъэпкъэу О къыхэпхыгъэм хэт. 9 Плъэпкъ иІоф зэхифыным, шІумрэ емрэ къыгурыІоным пае УиІумэт зэхэшІыкІыныгъэ къыхалъхьэба. Армырмэ плъэпкъэу цІыфыбэ хъурэм иІоф хэта зэхэзыфыщтыр?» 10 Сэлмэн ащ фэдэу къызэрелъэІугъэр Тхьэм игуапэ хъугъэ. 11 Арыти, Тхьэм ащ къыриІуагъ: «Ащ укъызэрэкІэлъэІугъэм, гъэшІэ кІыхьэ ухъуным укъызэрэкІэмылъэІугъэм, мылъкушхом укъызэрэкІэмылъэІугъэм, уипыйхэм апсэ згъэгъуным укъызэрэкІэмылъэІугъэм, ау сизэфагъэ зэхэпфынэу губзыгъагъэм укъызэрэкІэлъэІугъэм пае, 12 мары къызэрэпІуагъэм фэдэу сшІыщт: мары акъылышІуи зэхэшІыкІи къыпхэсэлъхьэх. Ощ фэдэ джы нэс щыІагъэп, уаужкІи ощ фэдэ къэхъущтэп. 13 УкъызкІэмылъэІугъэри къыпфэсшІэщт. Мылъкушхуи щытхъушхуи Сэ къыосэтых ущэІэфэ ощ фэдэ пачъыхьэхэм ахэмытынэу. 14 Сишапхъэхэр, Сиунашъохэр къэуухъумэхэу, уятэ Даут фэдэу Сигъогу утетыщтмэ, гъэшІэ кІыхьэ Сэ усшІыщт». 15 Сэлмэн къэущыжьыгъ, ау ылъэгъугъэр пкІыхьапІэу къычІэкІыгъ. ЕтІанэ ар Ерусэлэм кІуи, Зиусхьаным ипхъонтэ лъапІэ ыпашъхьэ иуцуи, къурмэнгъэст ышІыгъ, мамыр къурмэнхэри ышІхи, иІумэт пстэуми ешхэ-ешъошхо афишІыгъ.
Сэлмэн иІушыгъ
16 Мафэ горэм бзылъфыгъэ хэтэкІуитІу горэ пачъыхьэм дэжь къакІохи, ыпашъхьэ къиуцуагъэх. 17 Зы бзылъфыгъэм къыІуагъ: «А сизиусхьан! Сэри мы бзылъфыгъэри зы унэ тызэдис. А унэм тызэдисзэ, сабый къысфэхъугъ. 18 Сызылъфагъэр мэфищ хъугъэу, мы бзылъфыгъэри лъфагъэ. Тызэгъусагъ, тэщ нэмыкІ гори унэм къыддисыгъэп. Тизэкъуагъ. 19 Мы бзылъфыгъэм исабый чэщым лІагъэ, сыда пІомэ зыхэчъыем ыпІытІыжьыгъ. 20 Арыти, чэщныкъом къэтэджи, сэ, уиІумэт, сычъыезэ, сишъао Іуихи, ыбгъэ кІигъэгъолъхьагъ. Ишъэо лІагъэ сэ сыбгъэ къыкІигъэгъолъхьагъ. 21 Пчэдыжьым сишъао быдз езгъэшъонэу сыкъэтэджыгъ, ау сызІоплъэм, ар лІагъэу къычІэкІыгъ. Нэфылъэр къызэкІичыгъэу гуфаплъэу сызеплъым, ар сэ къэслъфыгъэ сабыир армырэу къычІэкІыгъ». 22 Адрэ бзылъфыгъэм ыІуагъ: «Хьау, сэ сишъао псэу, о уишъау лІагъэр». Мыдрэм ыІощтыгъ: «Хьау, о уишъау лІагъэр, сэ сыер псэу». Джаущтэу пачъыхьэм ыпашъхьэ итэу ахэр зэнэкъокъущтыгъэх. 23 Арыти, пачъыхьэм къыІуагъ: «Сэ сишъау псэур, о уишъао лІагъэ», – мыщ еІо. Модрэм еІо: «Хьау, о уишъау лІагъэр, сэ сиер псэу». 24 Мыщ дэжьым пачъыхьэм къыІуагъ: «Моу чатэр къысэшъут». Арыти, пачъыхьэм чатэр къыфахьыгъ. 25 Пачъыхьэм къыІуагъ: «Шъэожъыеу псэур зэфэдитІоу зэгошъуупкІи ызыныкъо зым ешъут, адрэ ныкъор адрэм ешъут». 26 Арыти, зишъао псэугъэ бзылъфыгъэм, ны зэхашІэу иІэм ыкІоцІ илъыр зэкІэ къызэпыригъэзагъэм фэдэу къэхъуи, гуІэным хэтэу пачъыхьэм риІуагъ: «А сизиусхьан! Мы сабыир зэрэпсэоу ащ ешъут, шъумыукІы». Адрэ бзылъфыгъэм къыІуагъ: «Ори сэри тыхэрэкІ, зэгошъуупкІ». 27 Арыти, пачъыхьэм къыІуагъ: «Мы бзылъфыгъэм сабыир ешъутыжь, шъуукІ хъунэу щытэп, джары ащ янэр». 28 Пачъыхьэм хьыкумыр зэришІыгъэм икъэбар зэрэ Израилэу щызэхахыгъэти, лъытэныгъэшхо къыфаригъэшІыгъ, сыда пІомэ хьыкумшІыным тегъэпсыхьагъэу Тхьэм Іушыгъэ къызэрэхилъхьагъэр янэрылъэгъу хъугъэ.
Сэлмэн икъулыкъушІэ Іэшъхьэтетхэр
1 Джащ тетэу пачъыхьэу Сэлмэн зэрэ Израилэу пачъыхьагъур щиІыгъыгъ. 2 КъулыкъушІэ Іэшъхьэтетэу ащ иІагъэхэр мыхэр ары: Цадокъ ыкъо Іазарый – къурмэнышІыщтыгъ; 3 Щыщэ ыкъохэу Елыхъорэфрэ Ахъыйрэ – тхакІощтыгъэх, хэгъэгум къихъухьэрэ хъугъэ-шІагъэхэр атхыжьынхэр япшъэрылъыгъ; Ахъылуд ыкъо Ехъощафат – пачъыхьэм иІофшІэкІэ-псэукІэ ытхыщтыгъ; 4 ЕхъоедаІ ыкъо Бэнай – дзэхэм япэщагъ; Цадокърэ Ебыетаррэ – къурмэнышІыщтыгъэх; 5 Натан ыкъо Іазарый – чІыпІэ гъэІорышІапІэмэ яІэшъхьэтетхэм япэщагъ, къурмэнышІэу Натан ыкъо Забыд – пачъыхьэм ицыхьэшІэгъущтыгъ; 6 Ахъыщар – пачъыхьэм иунэ-хапІэ лъыплъэщтыгъ, Іабыдэ ыкъо Адонирам – егъэзыгъэкІэ Іоф зэрагъашІэщтыгъэ цІыфхэм ятхьамэтагъ. 7 Зэрэ Израилэу ит чІыпІэ гъэІорышІапІэхэм яІэшъхьэтетхэу Сэлмэн нэбгырэ пшІыкІутІу иІагъ. Пачъыхьэмрэ ащ иунагъорэ апае гъомлапхъэхэр ахэм къырагъэуалІэщтыгъэх. Нэбгырэ пэпчъ илъэсым щыщэу зы мазэм телъытагъэу гъомлапхъэхэр къыригъэолІэнхэр ипшъэрылъыгъ. 8 Ахэм ацІэхэр мары: Хъур ыкъо – Ефраим къушъхьалъэр ыІэ илъыгъ; 9 Дэкъэр ыкъо – Макъац, ЩаІалбим, Бэтщэмэщ, Елэн, Бэтхъэнан ыІэ илъыгъэх; 10 Хъэсэд ыкъо – Арубот ыІэ илъыгъ, ар дэдэм Сэукъои Хъэфэр чІыгури зэрэщытэу фэгъэзэгъагъэх; 11 Абинэдау ыкъо – Дор къушъхьэхэр ыІэ илъыгъэх; Сэлмэн ыпхъу Тафат ащ ишъузыгъ; 12 Ахъылуд ыкъо БэІанэ – къалэхэу ТаІынахърэ Мэгъыдэрэ, ИзрыІэлым ыхэкІэ щыІэу Цэртан пэблагъэу къалэу Бэтщан зэрэщытэу, Бэтщан къыщегъэжьагъэу къалэу Абэл-Махъолэ нэсыжьэу, къалэу ИокъмэІами шІокІыжьэу ыІэ илъыгъэх; 13 Гъэбэр ыкъо – ГъылыІадым ит къалэу Рамот, Мэнасэ ыкъо Яир икъуаджэхэу ГъылыІадым итхэри; Бащан къушъхьэ-шъоф чІыпІэм ит хэкоу Аргобрэ дэпкъхэмкІэ къэшІыхьагъэхэ, гъоплъэ сэххэмкІэ егъэтыгъэ къэлэшхо тІокІищымрэ ыІэ илъыгъэх; 14 Іыдэу ыкъо Ахъынадаб – Махъанаим ыІэ илъыгъ; 15 АхъымаІац – Нафталый хэкур ыІэ илъыгъ; Сэлмэн ыпхъу Басмат шъузэу ащ ыщэгъагъ; 16 Хъущай ыкъо БэІан – Ащэр хэкумрэ къалэу БэІалэтрэ ыІэ илъыгъэх; 17 Парыуахъ ыкъо Ехъощафат – Исасхъар хэкур ыІэ илъыгъ; 18 Елэ ыкъо Щымэй – Бинямин хэкур ыІэ илъыгъ; 19 Урый ыкъо Гъэбэр – амор лъэпкъым ипачъыхьэу Сихъонрэ Бащан хэкум ипачъыхьэу Іогърэ тетыгъор зыщаІыгъыщтыгъэ ГъылыІад чІыпІэр ыІэ илъыгъ. Ежь закъор ары мыщ щычІыпІэІашъхьэтетыгъэр. 20 Ехъудэри Израилри хы Іушъом Іулъ пшахъом фэдэу бэ хъухэу, ашхыщтри рашъущтри яхъойхэу, тхъэжьэу щыІагъэх.
Сэлмэн зэрэдэтхъагъэхэр
21 Псыхъоу Евфрат къыщегъэжьагъэу фылист лъэпкъым ичІыгурэ Мысырым игъунапкъэхэмрэ анэсыжьэу арыт пачъыхьагъухэр зэкІэ Сэлмэн ыІэ илъыгъэх. Сэлмэн опсэуфэ ахэм зэкІэми тынІахьэхэр къыратыщтыгъэх, къыфэкъулыкъушІэщтыгъэх. 22 Сэлмэн гъомлапхъэу коц хьаджыгъэ тоннищрэ, нэмыкІ лэжьыгъэ хьаджыгъэ тоннихрэ, 23 былым гъэшхагъэу шъхьипшІым, хъупІэм къыращыгъэ былымышъхьэ тІокІым, мэл-пчэнхэм анэмыкІэу, шъыхьэхэр, мэзачъэхэр, шъофпчэнхэр, щагубзыу гъэпщэрыгъэхэр етІани мафэ къэс ищыкІэгъагъэх. 24 Псыхъоу Евфрат икъохьапІэ лъэныкъокІэ, Тифсахъ къыщегъэжьагъэу Іаззэ нэс илъ чІыгухэмрэ адэжькІэ щыІэ пачъыхьагъухэмрэ зэкІэ Сэлмэн ыІэ илъыгъэх. Игъунэгъу хэгъэгухэм зэкІэми мамырэу ар адэпсэущтыгъ. 25 Джаущтэу Ехъудэмрэ Израилымрэ щынагъо ямыІэу, Сэлмэн опсэуфэ, Дан къыщегъэжьагъэу БэрщэбаІ нэсыжьэу арысхэм – хэти исэнашъхьэрэ имаркІорэ ылэжьзэ шхэжьыщтыгъэ. 26 Сэлмэн ку псынкІэхэм акІашІэрэ шы мин тІокІитІум апае шэщхэмрэ шыуш мин пшІыкІутІурэ иІагъэх. 27 Зэрэ Израилэу ит чІыпІэ гъэІорышІапІэхэм яІэшъхьэтетхэм Сэлмэнрэ ащ иІанэпэсхэмрэ ящыкІэгъэщт гъомлапхъэхэр зэкІэ, щыкІагъэ афэмыхъоу шъхьадж фагъэнэфэгъэ мазэм къыригъэуалІэщтыгъэх. 28 Шыхэмрэ къыдырхэмрэ арагъэшхыщт хьэри уарзэри шъхьадж ичэзыум пачъыхьэр чІыпІэу зыдэщыІэрэм къырищалІэщтыгъэх. 29 Тхьэм Сэлмэн акъылышІуи, зэхэшІыкІышхуи, шІэныгъэшхуи гъуни нэзи имыІэу къыритыгъэх. 30 Сэлмэн иакъылышІукІэ КъокІыпІэм къыщалъфыгъэ цІыф пстэуми, мысырхэми яІушыгъэ ашъхьапырифыжьыщтыгъэ. 31 Ар цІыф пстэуми анахь акъылышІуагъ, езрахъ цІыф лъэпкъым щыщэу Етани, Махъол ыкъохэм – Хъэмэн, Къалкол, ДардэІ анахь акъылышІуагъ, гъунэгъу лъэпкъ пстэуми ащ ищытхъу аІуатэщтыгъэ. 32 Джащ тетэу гъэсэпэтхыдэ минищрэ орэд минрэ тфырэ ащ зэхилъхьагъэх. 33 Ливан хэгъэгум къыщыкІырэ кедрэ чъыгым къыщегъэжьагъэу дэпкъым къыхэкІыкІырэ иссопым нэсыжьэу ар къатегущыІагъ, псэушъхьэхэми, бзыухэми, хьацІ-уцІхэми, пцэжъыехэми къатегущыІагъ. 34 Арыти, Сэлмэн зэрэІушым икъэбар зэхэзыхыгъэ лъэпкъ пстэуми, чІыпІэ зэфэшъхьафмэ арыс пачъыхьэ пстэумэ ялІыкІохэр ащ иІушыгъэ едэІунхэу къакІощтыгъэх.
Сэлмэн Тхьэм и Унэ ишІын зызэрэфигъэхьазырыгъэр
1 Цэур къалэм ипачъыхьэу Хъирам Даут опсэуфэ иныбджэгъущтыгъ. Сэлмэн ятэ ычІыпІэкІэ пачъыхьанэу дагъэ зэрэщафагъэм икъэбар зызэхехым, лІыкІохэр Сэлмэн дэжь ащ къыгъэкІуагъэх. 2 Ежь Сэлмэни Хъирам дэжь раІонэу ыгъэкІуагъэх: 3 «Сятэ Даут игъунэгъу лъэпкъхэм зэрязаощтыгъэм къыхэкІэу, Зиусхьаным ахэр лъэгукІэтын къыфемышІыфэ Зиусхьанэу Тхьэм ыцІэ епхыгъэу Унэ зэримышІышъугъэм ори ущыгъуаз. 4 Ау мары си Зиусхьанэу Тхьэм тыдэкІи гупсэфыгъо къыщыситыгъэшъ, пыйи пэрыохъуи джы сиІэжьэп. 5 Арышъ, „О пкъоу пчІыпІэ уитахътэ тезгъэтІысхьащтым Сэ сцІэ епхыгъэу Унэ ышІыщт“ ыІуи, Зиусхьаным сятэ Даут къызэрэриІуагъэм тетэу, си Зиусхьанэу Тхьэм ыцІэ епхыгъэу Унэ сшІыщтышъ, 6 Ливаным къыщыкІырэ кедрэ чъыгхэр къысфыраупкІынхэу унашъо афэшІ. Згъэлажьэхэрэр о бгъэлажьэхэрэм ягъусэщтых, о къэбгъэуцурэ уасэм фэдиз бгъэлажьэхэрэм апае къыостыщт. Сыда пІомэ Цыдон къалэ щыщхэм чъыгхэр зэрэраупкІышъурэм фэдэу изыупкІышъун цІыф тэ зэрэтимыІэр ори ошІэ». 7 Сэлмэн къыраригъэІуагъэр зызэхехым Хъирам гушІуи ыІуагъ: «Мы лъэпкъышхор ыгъэІорышІэнэу Даут шъэо Іуш къезытыгъэ Зиусхьаным щытхъур ыдэжь!» 8 Ащ лъыпытэу Хъирам Сэлмэн дэжь ыІофтэхи раригъэІуагъ: «Садэжь къызфэбгъэкІогъэхэ Іофым зыщызгъэгъозагъ. Кедрэ ыкІи кипарис чъыгхэм яхьылІагъэу узфаер къыпфэсшІэщт. 9 Згъэлажьэхэрэм ахэр Ливаным къыращынхэшъ, хы Іушъом къынагъэсыщтых. Зэгопхагъэхэу хымкІэ къязгъэщэнхэшъ, о къэбгъэнэфэгъэ чІыпІэм къынязгъэгъэсынхэшъ, джащ дэжьым къыщызэтырязгъэлъхьащтых. Ащ ыуж о зыІэкІэбгъэхьажьыщтых. Ау ори сишІоигъоныгъэ сфэгъэцакІ, сипщыпІэ дэсхэм апае лэжьыгъэ къысфягъащ». 10 Джаущтэу Хъирам Сэлмэн зэрэфаем фэдэу кедрэ чъыгхэмрэ кипарисхэмрэ къыритыщтыгъэх. 11 Ежь Сэлмэн Хъирам ипщыпІэ щыпсэухэрэм ашхынэу коц тонн минищ фэдизрэ зэйтын дэгъэ къабзэу литрэ мин пшІыкІутІурэ шъитІурэ фэдизрэ ритыщтыгъэх. Илъэс къэс джащ фэдиз ащ Хъирам ритыщтыгъэ. 12 Зиусхьаным къызэригъэгугъагъэм тетэу Сэлмэн акъылышІу къыхилъхьагъ. Хъирамрэ Сэлмэнрэ зэшІугъэх, ахэм зэзэгъыныгъэ зэдашІыгъ. 13 Арыти, Сэлмэн зэрэ Израилэу лэжьэнхьакъ ащытырилъхьагъ. Лэжьэнхьакъыр зыпшъэ дэкІыщтыгъэр нэбгырэ мин щэкІ. 14 Нэбгырэ минипшІ зырызэу чэзыукІэ зы мазэрэ къэтынхэу ахэр Ливаным ащ ыгъакІощтыгъэх. Зы мазэрэ Ливаным къэтхэти, етІанэ мэзитІурэ яунэ исыщтыгъэх. Адонирам ахэм яІэшъхьэтетыщтыгъ. 15 Ахэм анэмыкІэу нэбгырэ мин тІокІищрэ минипшІрэ хьылъэзехьэу, мыжъор къыгозыутрэ нэбгырэ мин тІокІиплІырэ Сэлмэн къушъхьэлъэ хэкум щыфэлажьэщтыгъэх. 16 Ащ дакІоу Іоф зышІэрэ цІыфхэм алъыплъэнхэу Сэлмэн Іэшъхьэтетэу нэбгырэ минищрэ шъищрэ тыригъэхьэгъагъ. 17 Унэ лъапсэм халъхьанхэм пае мыжъошхохэр, мыжъо пытэ лъэпкъ дэгъухэр, ауІучІыгъэ мыжъохэр къагъэхьазырынхэу пачъыхьэм унашъо афишІыгъ. 18 Арыти, Сэлмэн ипсэолъэшІхэми, Хъирам ипсэолъэшІхэми, Гъыбыл къалэм щыщхэми мыжъохэр ауІучІыщтыгъэх, Тхьэм и Унэ халъхьанхэм пае ахэри пхъэхэри къагъэхьазырыщтыгъэх.
Тхьэм и Унэ зэрагъэпсыгъэр
1 Израил цІыфхэр мысыр чІыгум къызикІыжьыгъэхэм ыуж илъэс шъиплІрэ тІокІиплІырэ тешІагъэу, Сэлмэн Израилым зэрипачъыхьэри илъэсиплІым хэхьагъэу, илъэсым иятІонэрэ мазэу Зиф зыфаІорэм тефэу Тхьэм и Унэ игъэпсын ар фежьагъ. 2 Сэлмэн Тхьэм и Унэу ыгъэпсыгъэм икІыхьагъэ метрэ щэкІ, ишъомбгъуагъэ метрипшІ, илъэгагъэ метрэ пшІыкІутф фэдиз хъущтыгъэх. 3 Тхьэм и Унэ ишъомбгъуагъэ диштэу, икІыхьагъэ метрипшІ хъунэу, ишъомбгъуагъэ метритф фэдизэу чІэхьапІэ фишІыгъ. 4 Хъагъэм фэдэу зэпыутыгъэхэу, акІоцІкІэ щышъуамбгъохэу, кІыбымкІэ нахь щыбгъузэхэу, алъапсэхэр инэу къеупсэхыгъэхэу шъхьангъупчъапІэхэр хихыгъэх. 5 Джащ фэдэу Тхьэм и Уни кІоцІ унэ лъапІэри къызэдиубытхэу Тхьэм и Унэ пышІыхьэ фишІыгъ. ЕтІанэ пышІыхьэр унэ шъхьаф-шъхьафэу зэтыриутыжьыгъ. 6 Щэ зэтет пышІыхьэм ычІэгърэ тетыпІэм ишъомбгъуагъэщтыгъэр метритІурэ ныкъорэ фэдиз, ащ ышъхьагъ тетым ишъомбгъуагъэ зыфэдизыгъэр метрищ Іэпэ-цып, шъхьагъ шъыпкъэм ишъомбгъуагъэщтыгъэр метрищрэ ныкъорэ фэдиз. ПышІыхьэр Тхьэм и Унэ идэпкъхэм къанэмысыным тегъэпсыхьагъэу зишъомбгъуагъэ чІыпІэ-чІыпІэу зэтеутыгъэ дэпкъыр Тхьэм и Унэ хъурэябзэу къыдекІокІэу къешІэкІыгъагъ. 7 Тхьэм и Унэ агъэпс зэхъум ауІучІыгъэ мыжъо хьазырхэр халъхьагъэх. Тхьэм и Унэ игъэпсыгъом отэ, пхъэшІэ ощ е нэмыкІ гъучІ Іэмэ-псымэ горэхэм ятео мэкъэ анахь цІыкІуи щызэхэпхыщтыгъэп. 8 ЯтІонэрэ тетыпІэм унэсыным пае Тхьэм и Унэ икъыблэ лъэныкъо хэлъыгъэ ихьапІэмкІэ укъихьан фэягъэ. ДэкІоепІэ щыхьэхэмкІэ ятІонэрэ тетыпІэм нэсхэти, етІанэ ащ текІхэти шъхьагъ шъыпкъэм дэкІуаещтыгъэх. 9 Джаущтэу Тхьэм и Унэ ишІын ащ ыухыгъ, кедрэ пхъэмбгъухэр зытеІулІэжьыгъэ кедрэ бгыкъухэр ащ икІашъо тыраригъэдзагъэх. 10 ЕтІани метрищ фэдиз зилъэгэгъэ пышІыхьэхэр Тхьэм и Унэ къыдакІухьэу паригъэшІыхьагъэх. Кедрэ пкъэухэмкІэ ахэр Тхьэм и Унэ къегъэпытылІэгъагъэх. 11 Арыти, Зиусхьаным Сэлмэн зыкъыфигъази къыриІуагъ: 12 «Мары Тхьэм и Унэ ошІы. Сишапхъэхэм уатемыкІэу, Сигъэнэфагъэхэм уаблэмыкІэу, Сиунашъохэр зэкІэ бгъэцакІэхэзэ пшІыщтмэ, уятэ Даут къесІуагъэр оркІэ Сэ згъэцэкІэжьыщт. 13 Израил цІыфхэм сахэтыщт, сиизраил лъэпкъи збгынэщтэп». 14 Джащ тетэу Сэлмэн Тхьэм и Унэ игъэуцун ыухыгъ.
Тхьэм и Унэ ыкІоцІ зэрашІыгъэр
15 Тхьэм и Унэ ыкІоцІкІэ дэпкъым кедрэ пхъэмбгъухэр къыраригъэІулІэкІыгъэх. Тхьэм и Унэ иджэхашъуи икІашъуи зэдакІоу пхъэхэр атыраригъэІулІагъэх, джэхашъом кипарис пхъэмбгъухэр раригъэдзагъэх. 16 Тхьэм и Унэ ыпхачІэ щыІэу, метрипшІ фэдизкІэ ащ къыкІэрыгъэкІотыгъэу дэпкъ аригъэгъэуцуи, джэхашъом къыщегъэжьагъэу кІашъом нэс кедрэ пхъэмбгъухэр тыраригъэІулІэхи, лъапІэмэ яанахь лъэпІэжьым пае кІоцІ унэ лъапІэр джащ щаригъэшІыгъ. 17 Тхьэм и Унэ щыщэу адрэ къэнагъэм икІыхьагъэ метрэ тІокІ фэдизыгъ. 18 Тхьэм и Унэ ыкІоцІ къыраІулІэкІыгъэ кедрэм къалъыркъэбхэмрэ къызэІуихынэу ригъэжьэгъэ къэгъэгъэ Іэрамхэмрэ ятеплъэ фэдэ зиІэ сурэтхэр щыпхырыупкІыгъагъэх. Мыжъохэр къэмылъагъоу зэкІэми кедрэр атеІулІэгъагъ. 19 Зиусхьаным иунашъохэр зыдэлъ Пхъонтэ лъапІэр чІигъэуцоным пае а кІоцІ унэ лъапІэр Тхьэм и Унэ ащ харигъэшІыхьагъ. 20 КІоцІ унэ лъапІэм икІыхьагъэ метрипшІ фэдизыгъ, ишъомбгъуагъи илъэгагъи метрипшІ зырыз фэдизыгъ. Ащ ыкІоцІ дышъэ къабзэ къыригъэтІылъэкІыгъ. КІоцІ унэ лъапІэм уимыхьэзэ, ащ ыпашъхьэ дэжь щытыгъэ къурмэншІыпІэм кедрэ пхъэмбгъухэр къыриІулІэкІыгъэх. 21 Сэлмэн Тхьэм и Унэ ыкІоцІи дышъэ къабзэ къыригъэтІылъэкІыгъ. Дышъэ пшъэхъухэр кІоцІ унэ лъапІэм ыпашъхьэ рищэхи, ащи дышъэ къыригъэтІылъэкІыгъ. 22 Тхьэм и Унэ зэрэщыт къабзэу, кІоцІ унэ лъапІэм итыгъэ къурмэншІыпІэми дышъэ къаригъэтІылъэкІыгъ. 23 Метритф фэдиз зилъэгэгъэ къэрыубитІоу зэйтын чъыгым хэшІыкІыгъэхэр кІоцІ унэ лъапІэм ригъэуцуагъэх. 24 Къэрыубым изытамэ метритІурэ ныкъорэ фэдизыгъ, адрэ тамэми ишъомбгъуагъэ метритІурэ ныкъорэ фэдизыгъ. Зы тэмэ цыпэм къыщегъэжьагъэу адрэ тэмэ цыпэм нэс илъыгъэр метритф фэдизыгъ. 25 Адрэ къэрыубми иинагъэ метритф фэдизыгъ. КъэрыубитІури яшапхъэхэмкІи ятеплъэкІи зэфэдэкъэбзагъэх. 26 Зы къэрыубым илъэгагъэ метритф фэдизыгъ, адрэ къэрыубри джащ фэдизыгъ. 27 Къэрыубхэр Тхьэм и Унэ ыкІоцІ ыгузэгу ащ ригъэуцуагъэх. Къэрыубмэ атамэхэр зэкІэхыгъагъэх. Зы къэрыубым ытамэ зы дэпкъым нэсыщтыгъэ, адрэ къэрыубым ытамэ нэмыкІ дэпкъым нэсыщтыгъэ. Адрэ ятэмитІу Тхьэм и Унэ ыкІоцІ ыгузэгу щызэнэсыщтыгъэх. 28 Къэрыубхэри дышъэкІэ ащ къыгъэтІылъыхьагъэх. 29 Ащ дакІоу Тхьэм и Унэ ыкІоцІ дэпкъхэм зэрэщытэу къэрыубхэм, пальмэ чъыгхэм, къызэІуихынэу ригъэжьэгъэ къэгъэгъэ Іарамхэм ятеплъэ фэдэ зиІэ сурэтхэр ащыпхыриупкІыгъэх. 30 Джащ фэдэу Тхьэм и Унэ хэт кІоцІ унэ лъапІэм иджэхашъуи Тхьэм и Унэ адрэ иджэхашъуи дышъэ атырилъхьагъ. 31 Зэйтын чъыгым хэшІыкІыгъэу тфэ зэтет пчъэблыпкъхэр зиІэ пчъэбгъуитІузэІухыр кІоцІ унэ лъапІэм урихьанэу хилъхьагъ. 32 Зэйтын чъыгым хэшІыкІыгъэ пчъэбгъуитІузэІухым зэрэщытэу ыбгъумэ къэрыубхэм, пальмэхэм, къызэІуихынэу ригъэжьэгъэ къэгъэгъэ Іэрамхэм ятеплъэ фэдэ зиІэ сурэтхэр ащыпхыриупкІхи, дышъэкІэ къыгъэтІылъыхьажьыгъэх, къэрыубхэми пальмэхэми дышъэр атырилъхьагъ. 33 Зэйтын чъыгым хэшІыкІыгъэу плІэ зэтет пчъэблыпкъхэр Тхьэм и Унэ чІэхьапІэу фишІыгъэх. 34 ЛъэныкъуитІукІи зэІукІыщтыгъэ пчъэзэкІоцІытыр кипарис чъыгым хишІыкІыгъ. Зы пчъэм ылъэныкъуитІу ыпэкІи ыужкІи зэІукІыщтыгъэ, адрэ пчъэми ылъэныкъуитІу ыпэкІи ыужкІи зэІукІыщтыгъэ. 35 Къэрыубхэр, пальмэхэр, къызэІуихынэу ригъэжьэгъэ къэгъэгъэ Іэрамхэм ятеплъэ фэдэ зиІэ сурэтхэр ахэм ащыпхыриупкІхи, дышъэр къаригъэтІылъэкІыжьыгъ. 36 Ащ къыщымыуцоу ауІучІыгъэ мыжъо хьазырхэр сатырищэу зэтырилъхьи, кедрэ бгыкъухэр зы сатырэу ахэм къатырилъхьажьи, кІоцІ щагур дэпкъкІэ къышІыхьагъ. 37 ЯплІэнэрэ илъэсым, Зиф мазэм тефэу, Зиусхьаным и Унэ лъапсэ ащ фишІыгъ. 38 ЯпшІыкІузэнэрэ илъэсым, Булэ мазэм, ар яенэрэ маз, ищыкІагъэр зэкІэ ешІылІагъэу Тхьэм и Унэ игъэпсын ащ ыухыгъ. Ащ ишІын илъэсиблэ пылъыгъ.
Сэлмэн икъэлэсэрай
1 Сэлмэн ежь пае ышІыщтыгъэ къэлэсэраим игъэпсын илъэс пшІыкІущэ пылъи, ар зэрэщытэу ыухыгъ. 2 Джащ фэдэу Ливан Мэз Ун зыфаІори ышІыгъ. Ащ икІыхьагъэ метрэ шъэныкъо, ишъомбгъуагъэ метрэ токІрэ тфырэ, илъэгагъэ метрэ пшІыкІутф фэдизыгъ. СатыриплІ хъоу кедрэ кІэсэнхэр унэм кІигъэуцуагъэх. Кедрэ бгыкъухэр а кІэсэнхэм атыриІулІэжьыгъэх. 3 Кедрэ кІэсэн тІокІитІурэ тфырэу пшІыкІутф-пшІыкІутфэу сатырэу чІэсагъэмэ апэпчъ кедрэ бгыкъу пшІыкІутф зырыз атыриІулІэжьи, шъхьагъырэ унэу зикІашъо бгыкъу пшІыкІутф зырызэу шъолъырищэу зэтеутыгъэр ащ тыригъэуцожьыгъ. 4 НэфынэкъипсапІэхэр сатырищэу зэтетыгъэх. НэфынэкъипсапІэм нэфынэкъипсапІэ къыпэІутыгъ. 5 ПчъэхэгъэуцуапІэхэри пчъэблыпкъхэри плІэу зэтетыгъэх. 6 Метрэ тІокІырэ тфырэ фэдиз икІыхьагъэу, метрэ пшІыкІутф хъун ишъомбгъуагъэу КІэсэнхэр ЗыкІэт Унэшху зыфаІоу шъхьэ зытелъыр ащ ышІыгъ. Шъхьэ фэхъурэяшъо зиІэ унэшхоу КІэсэнхэр зыкІэтыр зыфаІорэр ащ къыпишІыхьажьыгъ. 7 Тэхътэ ЩытыпІэ Унэшхор зыфаІоу, хьыкум зыщишІыщтыгъэу, Хьыкум ШІыпІэ УнэшхокІэ заджэщтыгъэхэри ышІыгъ. Ащ иджэхашъорэ идэпкъхэмрэ кедрэ пхъэмбгъухэр атыраригъэІулІагъэх. 8 Ежь зыщыпсэущтыгъэ унэм ищагоу кІэсэнхэр зыкІэт Хьыкум ШІыпІэ Унэшхом ыкІыбкІэ щыІагъэри джащ фэдэу ыгъэпсыгъ. Мысыр пачъыхьэм ыпхъоу Сэлмэн къыщагъэм ежь ием фэдэ унэ фаригъэшІыгъ. 9 Ар джэхашъом къыщегъэжьагъэу унашъхьэм нэсыжьэу, ыкІыби къыхиубытэу, щагушхом нэсыжьэу шапхъэмэ атетэу нэІумкІи кІыбымкІи ауІучІыхи, пхъэххэмкІэ зэпахыжьыгъэ мыжъо лъэпкъ пытэ дэгъухэмкІэ, мыжъошхохэмкІэ къэгъэпкІыхьэгъагъ. 10 Зым икІыхьагъэ метритф хъунэу, адрэм икІыхьагъэ метриплІ фэдизэу мыжъо лъэпкъ пытэ дэгъухэм, мыжъошхохэм унэ лъапсэр ахэшІыкІыгъагъ. 11 Шапхъэмэ атетэу ауІучІыгъэ мыжъо лъэпкъ пытэ дэгъухэр ащ ыкІыІу тырилъхьэхи, кедрэ бгыкъухэр ахэм атырилъхьажьыгъэх. 12 Щагушхор, Зиусхьаным и Унэ ыкІоцІырэ ищагуи Тхьэм и Унэ иапэрэ ихьапІэу кІэсэнхэр зыкІэтри шапхъэмэ атетэу ауІучІыгъэ мыжъохэр сатырищэу зэтелъхэу, кедрэ бгыкъухэр зыкІыІу зы сатырэу телъыжьхэмкІэ джащ фэдэу хъурэябзэу къэшІыхьэгъагъэх.
Хъирам иІэпэІэсэныгъ
13 ЕтІанэ Сэлмэн Цэур щыщ Хъирам лъигъэкІуагъэх. 14 Израил лъэпкъым къыхиубытэрэ нэфтэлый лъэпкъым щыщ шъузабэ горэм ар икІалэщтыгъ. Ятэ Цэур щыщыгъ, джэрзым Іоф зэрэдэпшІэщтым ар фэІазэу щытыгъэти, фэІэпэІасэу пкъыгъо зэфэшъхьафхэр ащ хишІыкІыщтыгъэх. Ар пачъыхьэу Сэлмэн дэжь къэкІуагъэу Іоф зэфэшъхьафхэр фишІэщтыгъ.
Джэрз кІэсэнитІур зэришІыгъэр
15 Метрибгъу зырыз фэдиз зилъэгэгъэ кІэсэнитІоу джэрз гъэткІугъэм ащ хишІыкІыгъэхэм метрэ хырых фэдиз зикІыхьэгъэ джэрз шъэгъэ блэрхэр зэфэдэу хъурэябзэу къадекІокІыщтыгъэх. 16 КІэсэн шъхьагъхэр хъурэябзэу къызэдаубытэу къатыригъэуцожьынхэм пае, метритІурэ ныкъорэ фэдиз зырыз ялъэгагъэу танджхэр джэрзым хигъэткІукІыгъэх. 17 КІэсэн шъхьагъхэм атыригъэуцогъэ танджхэм къарихъухыжьынэу джэрз шъэгъэ блэрхэмрэ хъытыу фэдэу зэхэблэгъэ джэрз пшъэхъухэмрэ блырыблэу ыгъэхьазырыгъэх. 18 Джаущтэу кІэсэнхэр ыгъэпсхи, ахэм ашъхьагъхэм атыригъэуцогъэ танджхэм къарихъухыжьыгъэ хъытыухэм ачІэгъ къыдекІокІэу фэхъурэяшъоу къытепшырэ сатыритІоу нар теплъэ зиІэхэр язырызэу ышІыгъ. 19 МетритІу хъунэу яинагъэу аІууц къэгъагъэхэм ятеплъэ зиІэ танджхэр ышІыхи Тхьэм и Унэ иапэрэ ихьапІэу кІэсэнхэр зыкІэтым кІагъэуцогъэ пкъэухэм ашъхьагъ тыригъэуцожьыгъэх. 20 Фэхъурэяшъоу къытепшырэ тхыпхъэхэу кІэсэнитІуми ашъхьагъ тетыгъэ танджхэм алъэпсэ шъыпкъэмэ къадекІокІыхэрэр хъытыум пэблэгъагъэх. СатыритІу хъоу нар шъитІу хъурэябзэу ахэм къаришІэкІыгъ. 21 ЕтІанэ кІэсэнхэр кІэтэу Тхьэм и Унэ иапэрэ ихьапІэ ышІыгъ. Зы кІэсэныр къыблэмкІэ ыгъэуцуи, ЯхынкІэ еджагъ. Адрэ кІэсэныр темырымкІэ ыгъэуцуи, БоІазкІэ еджагъ. 22 КІэсэнхэм ашъхьагъ аІууц къэгъагъэм итеплъэ фэдэ яІэу ышІыгъ. Джащ тетэу кІэсэнхэм ягъэуцун ыухыгъ.
Джэрзым хэшІыкІыгъэ лэгъуп-псыубытыпІэр
23 ЕтІанэ лэгъуп-псыубытыпІэр джэрзым хишІыкІыгъ. Ащ ынэз зы бгъум къыщегъэжьагъэу адрэ бгъум нэс метритф фэдиз хъущтыгъэ. Ар зэпэхъурэебзагъ, илъэгагъэ метритІурэ ныкъорэ фэдизыгъ, ащ ынэз ихъурэягъэ метрэ пшІыкІутф фэдиз илъыгъ. 24 Джэрз лэгъуп-псыубытыпІэ ІупшІэ чІэгъым хъурэябзэу къыдекІокІэу метрэныкъо фэдиз пэпчъ къалъыркъэб теплъэ зиІэ шІыгъэхэр пшІырыпшІэу пышІэгъагъэх. СатыритІу хъоу зэготхэу ахэр лэгъуп-псыубытыпІэм хъурэябзэу къыдекІокІыщтыгъэх. Къалъыркъэбхэри лэгъуп-псыубытыпІэри зэдакІоу джэрзым зэдыхэгъэткІукІыгъагъэх. 25 Лэгъуп-псыубытыпІэр цу пшІыкІутІум атетыгъ: цуищыр ашъхьэкІэ темырымкІэ, адрищыр къохьапІэмкІэ, щыр къыблэмкІэ, адрищыр къокІыпІэмкІэ гъэзэгъагъэх. Лэгъуп-псыубытыпІэр ахэм атетыжьыгъ, акІэнтІыІухэр лъачІэмкІэ гъэзэгъагъэх. 26 Лэгъуп-псыубытыпІэм ынэзхэр Іабгъу фэдиз хъунэу Іужъугъэх, ыІупшІэхэр Іэгубжъэ ІупшІэм фэдэу гъэпсыгъэхэу, аІууц къэгъэгъэ къызэІукІыгъакІэм итеплъэ зыдаІыгъыгъ. Лэгъуп-псыубытыпІэм псэу литрэ мин тІокІитІу фэдиз ифэщтыгъэ.
Щэрэхъхэм атет тхьакІыпІэ-тегъэуцуапІэхэр
27 Джащ фэдэу ащ щэрэхъхэм атет тхьакІыпІэ-тегъэуцуапІэхэр пшІы хъоу джэрзым хишІыкІыгъэх. Щэрэхъхэм атет тхьакІыпІэ-тегъэуцуапІэ пэпчъ метритІу фэдиз икІыхьэгъагъ, ишъомбгъуагъэщтыгъэр метритІу фэдиз, метрэрэ ныкъорэ хъунэу илъэгэгъагъ. 28 Щэрэхъхэм атет тхьакІыпІэ-тегъэуцуапІэхэр мыщ фэдэу зэхэгъэуцогъагъэх: абгъухэр кІоцІымкІэ щыІэ зэгъэпытылІапІэхэмкІэ зэкІэгъэпытыхьэгъагъэх. 29 КІоцІымкІэ щыІэ зэгъэпытылІапІэхэмкІэ зэкІэгъэпытыхьэгъэ бгъухэми зэгъэпытылІапІэхэми аслъанхэр, цухэр, къэрыубхэр атешІыхьэгъагъэх. Аслъанхэмрэ цухэмрэ ашъхьагъи ачІэгъи Іэрам зэхэблагъэхэр атешІыхьэгъагъэх. 30 ТхьакІыпІэ-тегъэуцуапІэ пэпчъ икулъэмыджхэр джэрзэу джэрз щэрэхъиплІымэ атетыгъ. Лэгъуп-псыубытыпІэр къэмыукъончыным пае тхьакІыпІэ-тегъэуцуапІэм икъопиплІэу тэмэпкъышъхьэм фэдэу къыпыщыщтыгъэхэм атегъэуцогъагъ. Ахэри Іэрам зэхэблагъэ пэпчъи зэдакІоу джэрзым зэдыхэгъэткІукІыгъагъэх. 31 ТхьакІыпІэ-тегъэуцуапІэм ынэз сантиметрэ шъэныкъокІэ къытеІатыкІыгъагъ. ИтеплъэкІэ кІэсэн лъапсэмэ афэдэу хъурэягъ, ишъомбгъуагъэ сантиметрэ тІокІищрэ пшІыкІутфырэ фэдизыгъ. Ынэз дэхэфэшІ горэхэр къешІэкІыгъагъэх. Ар зыдэтым ыбгъухэр плІэмыягъэх нахь, хъурэягъэхэп. 32 ТхьакІыпІэ-тегъэуцуапІэр щэрэхъиплІмэ атетыгъ. Щэрэхъхэм якулъэмыджхэр тхьакІыпІэ-тегъэуцуапІэм дыхэтыгъэх. Щэрэхъ пэпчъ илъэгагъэ сантиметрэ тІокІищрэ пшІыкІутфырэ фэдизыгъ. 33 Щэрэхъмэ язэхэлъыкІэ ку псынкІэмэ акІэт щэрэхъмэ афэдагъ. Ахэм якулъэмыджхэри, якущэрэхъ лъэгухэри, якутакъэхэри, якуцэхэри – зэкІэри зэдакІоу джэрзым зэдыхэгъэткІукІыгъагъэх. 34 ТхьакІыпІэ-тегъэуцуапІэ пэпчъ ыкъопиплІ тэмэпкъышъхьэм фэдэу къыпыщыщтыгъэх. Ахэр тхьакІыпІэ-тегъэуцуапІэмэ адыхэгъэткІукІыгъагъэх. 35 Щэрэхъхэр зыкІэт тхьакІыпІэ-тегъэуцуапІэм ынэзхэр сантиметрэ тІокІырэ тфырэ фэдиз горэкІэ тегъэуцуапІэм къышъхьащыщтыгъэх. Ащ ыкъуапэхэм яубытыпІэхэри ыбгъухэри зэдакІоу шІыгъагъэх. 36 Щэрэхъхэр зыкІэт тхьакІыпІэ-тегъэуцуапІэмэ яубытыпІэмэ анэзхэм къэрыубхэр, аслъанхэр, пальмэ чъыгхэр зытебгъэуцон плъэкІыщт чІыпІэмэ атыришІыхьэхи, Іэрам блэрхэм ясурэтхэр ахэм къаригъэкІокІыжьыгъэх. 37 Джаущтэу щэрэхъхэм атет тхьакІыпІэ-тегъэуцопІипшІыр ащ ышІыгъ. ЯшІыкІэкІи, яшапхъэкІи, ятеплъэкІи зэфэдэхэу ахэр джэрзым хигъэткІукІыгъэх. 38 Джэрз лэгъупипшІи ащ ышІыгъ. Лэгъуп пэпчъ литрэ шъий ифэщтыгъэ. Лэгъуп пэпчъ илъэгагъэ метритІу фэдизыгъ, лэгъуп пэпчъ щэрэхъхэр зыкІэт тхьакІыпІэ-тегъэуцопІипшІым яз тетыгъ. 39 ЕтІанэ щэрэхъхэр зыкІэт тхьакІыпІэ-тегъэуцопІитфыр Тхьэм и Унэ икъыблэ лъэныкъокІэ гъэзагъэу, адритфыр Тхьэм и Унэ итемыр лъэныкъокІэ щыІэу зэбгыригъэуцукІыгъэх. Джэрзым хэшІыкІыгъэ лэгъуп-псыубытыпІэр Тхьэм и Унэ икъыблэ-къокІыпІэ лъэныкъокІэ ыгъэуцугъ.
Тхьэм и Унэ зэрагъэдэхагъэр
40 ЕтІанэ Хъирам лэгъупхэр, хьакужъонтхъухэр, лэджэнхэр ышІыгъэх. Джаущтэу Хъирам пачъыхьэу Сэлмэн дэжь щыІэу Зиусхьаным и Унэ щишІэщтыгъэ Іофыр зэкІэ ыухыгъ. 41 Ащ ышІыгъэх: кІэсэнитІури, фэхъурэяшъоу щыт танджхэу ахэм ашъхьарысхэри, танджитІуми къяхъухыжьыгъэщт хъытыуитІури; 42 нар шъиплІыри хъытыуитІум апишІэжьыгъэх; хъытыу пэпчъ нарэу пышІэгъагъэр сатыритІу; кІэсэнхэм ашъхьарыс танджхэм къарихъухыжьынхэу ахэр ащ ышІыгъэх; 43 щэрэхъхэр зыкІэт тхьакІыпІэ-тегъэуцопІипшІыри, щэрэхъхэр зыкІэт лэгъупипшІыри, 44 лэгъуп-псыубытыпІэри, ащ ычІэгъ чІэт цу пшІыкІутІури, 45 лэгъупцІыкІухэри, хьакужъонтхъухэри, лэджэнхэри ащ ышІыгъэх. Зиусхьаным и Унэ пае Хъирам Сэлмэн фишІыгъэ пкъыгъо пстэури джэрз зэпэлыдыжьым хэшІыкІыгъагъэх. 46 Пачъыхьэм ар ыгъэткІути Иордан пэмычыжьэу, Сукъотрэ Цэртанрэ азыфагу илъ чІыпІэм чІыгу итІыкІыгъэм щыраригъэкІэжьыщтыгъэ. 47 ЕтІанэ а пкъыгъохэр бэ дэдэ зэрэхъущтыгъэхэм къахэкІэу джэрзэу агъэкІуагъэр зыфэдизыр Сэлмэн аригъэгъэнэфагъэп. 48 Ащ дакІоу Сэлмэн Зиусхьаным и Унэ чІэтыщтыхэр аригъэшІыгъэх. АригъэшІыгъэхэр мыщ фэдэх: дышъэ къурмэншІыпІэр, гъомылэ тынхэр зытыралъхьащт дышъэ Іанэр; 49 Тхьэм и Унэ хэт кІоцІ унэ лъапІэм икъыблэ лъэныкъокІэ тфырытфэу щытынхэу дышъэ къабзэм остыгъэхэр хишІыкІыгъэх; къэгъагъэхэри, остыгъэхэри, Іадэхэри дышъэм хэшІыкІыгъагъэх; 50 лэджэн цІыкІухэр, остыгъэм ишъэгъэ стафэхэр къызэрэпахырэ Іадэхэр, нэмыкІ лэджэнхэр, Іэгубжъэхэр, жъапхъэхэр дышъэ къабзэм хэшІыкІыгъагъэх. ЛъапІэмэ анахь лъэпІэжьэу Тхьэм и Унэ ыкІоцІ итыжьым хэлъ пчъэмрэ Тхьэм и Унэ иапэрэ ихьапІэ хэлъ пчъэмрэ яхьалъкъхэр дышъэм хэшІыкІыгъагъэх. 51 Джаущтэу Зиусхьаным и Унэ игъэпсын пылъыгъэ ІофшІэн пстэури Сэлмэн зэшІуихыгъ. Арыти, Сэлмэн ятэ Даут тыжьынэу, дышъэу, пкъыгъохэу Зиусхьаным фигъэшъошэгъагъэхэр къыхьхи, Зиусхьаным и Унэ хэт пкъыгъолъэпІэ-гъэтІылІыпІэм чІэлъынхэу аритыпагъэх.
Тхьэм ипхъонтэ лъапІэ Тхьэм и Унэ къызэрахьыжьыгъэр
1 Сэлмэн Зиусхьаным ипхъонтэ лъапІэ Даут икъалэу Цион къыдахыжьынышъ къахьыжьыным пае Израилым инахьыжъ упчІэжьэгъухэм, зэкІэ лІакъомэ яІэшъхьэтетхэм, израил цІыфхэм къатекІыгъэхэм япащэхэм пачъыхьэу Сэлмэн дэжь, Ерусэлэм, къэкІонхэу къяджагъ. 2 Арыти, илъэсым ияблэнэрэ етан мазэм тефэу израилхэр зэкІэ пачъыхьэу Сэлмэн дэжь агъэмэфэкІынэу къекІолІагъэх. 3 Израилым инахьыжъ упчІэжьэгъу пстэури къакІохи, къурмэнышІхэм пхъонтэ лъапІэр къаІатыгъ. 4 Зиусхьаным ипхъонтэ лъапІи, чэтэнгъэІэгъэ лъапІэри, ащ чІэлъыгъэ пкъыгъо лъапІэхэри рахьыжьагъэх. КъурмэнышІхэмрэ лэуйхэмрэ ахэр ахьыщтыгъэх. 5 Пачъыхьэу Сэлмэнрэ зэрэ Израилэу ицІыф хэхыгъэхэу ащ щызэрэугъоигъэхэмрэ пхъонтэ лъапІэм ыпэ итхэу, мэл-пчэнхэмрэ былымхэмрэ ябагъэ зыфэдизыр къэлъытэгъуаеу къурмэн ашІхэзэ, кІощтыгъэх. 6 КъурмэнышІхэм Зиусхьаным ипхъонтэ лъапІэ къахьи, лъапІэмэ яанахь лъэпІэжьыр зэрытыщт кІоцІ унэм рахьи, къэрыубмэ атэмэ чІэгъмэ ачІагъэуцуагъ. 7 Къэрыубмэ атамэхэр пхъонтэ лъапІэр зыдэщыт чІыпІэм ышъхьагъ щызэкІэхыгъэхэу, пхъонтэ лъапІэмрэ ар зэрэзэрахьэрэ пхъэ убытыпІэхэмрэ ашъхьагъ щыгъэІэгъагъэх. 8 ЧІыпІэ лъапІэу кІоцІ унэ лъапІэм ыпашъхьэ итымкІэ узыплъэкІэ, пхъонтэ лъапІэр зэрэзэрахьэрэ пхъэ убытыпІэхэм аІэпакІэхэр щыплъэгъущтыгъэх, ау укъыІукІотмэ, плъэгъущтыгъэхэп. Джы къызнэсыгъэми джащ фэдэу ахэр зэрэщытых. 9 Израил цІыфхэр Мысыр хэгъэгум къикІыжьыгъэхэу, Зиусхьаным ахэм зэзэгъыныгъэ къызадешІым, Мосэ Хъорэб къушъхьэм щыІэзэ пхъонтэ лъапІэм дилъхьэгъэгъэ мыжъобгъуитІум анэмыкІ зыпари ащ дэлъыгъэп. 10 КъурмэнышІхэр чІыпІэ лъапІэм къызекІыжьхэм, ошъуапщэр Зиусхьаным и Унэ из хъугъэ. 11 Ащ ошъуапщэр из зэрэхъугъэм къыхэкІэу къурмэнышІхэр щытынхэ алъэкІыщтыгъэп. Джащ нэсэу Тхьэм Зиусхьаным и Унэ зэлъикІугъ. 12 Мыщ дэжьым Сэлмэн къыІуагъ: «Зыщымылъэгъушъущт чІыпІэм зэрэщыІэр ежь Зиусхьаным къыІуагъ. 13 УипсэупІэнэу Ощ пае мары Унэ лъапІэр сэ згъэпсыгъэ, егъашІэм ущыщыІэнэу ар О уичІыпІ».
Сэлмэн цІыфхэм зэрадэгущыІагъэр
14 Зэрэ Израилэу ицІыф хэхыгъэхэу щытхэм Сэлмэн закъфыригъэзэкІи Тхьэм ынэшІу къащыфэнэу къафэлъэІуагъ. 15 Ащ къыІуагъ: «Израилым и Зиусхьанэу Тхьэм, сятэ Даут къыриІуагъэр непэ зыгъэцэкІэжьыгъэм, щытхъур ыдэжь! Ащ ыІогъагъ: 16 „Сиизраил лъэпкъ Мысырым къызщисщыжьыгъэ мафэм къыщегъэжьагъэу Сэ сцІэ пае Унэ щагъэпсынэу Израилым илІакъохэр зыщыпсэурэ къалэмэ ащыщ гори къыхэсхыгъэп, Сиизраил лъэпкъ илІышъхьэ хъуным пае Даут къахэсхыгъ“. 17 Сятэ Даут Израилым и Зиусхьанэу Тхьэм ыцІэ епхыгъэу унэ ыгъэпсынэу гухэлъ иІагъ. 18 Ау Зиусхьаным сятэ Даут къыриІуагъ: „Джары сцІэ епхыгъэу унэ пшІынэу угу зэрилъыр дэгъу. 19 Ау сцІэ епхыгъэу унэ зыгъэуцущтыр къыпхэкІыгъэ шъаор нахь орэп, джары сцІэ епхыгъэу унэ зышІыщтыр“. 20 Зиусхьаным ыІуагъэр ыгъэцэкІэжьыгъ. Сятэ Даут ычІыпІэ сэ сиуцуагъ, Израилым итахъти сытетІысхьагъ, Зиусхьаным зэриІуагъэм фэдэу, Израилым и Зиусхьанэу Тхьэм ыцІэ епхыгъэу унэ сшІыгъэ. 21 Зиусхьаным тятэхэр Мысыр хэгъэгум къызырещыжьхэм ахэм къадишІыгъэгъэ зэзэгъыныгъэр зыдэлъ пхъонтэ лъапІэм пайи чІыпІэ ащ щызгъэхьазырыгъ».
Тхьэм и Унэ икъызэІухыгъом Сэлмэн тхьэлъэІоу щишІыгъэр
22 Ащ дэжьым Сэлмэн израил лъэпкъым изэІукІэ ыпэ итэу къурмэншІыпІэм ыпашъхьэ дэжь уцугъэ, ыІэхэр уашъом фэгъэзагъэу къыдиІэтыехи, 23 къыІуагъ: «Зиусхьанэу Израилым и Тхьэр! Ощ фэдэу Тхьэ ташъхьагъкІэ уашъоми ычІэгъкІэ чІыгуми атетэп. УиІумэтхэм адэпшІыгъэ зэзэгъыныгъэм уфэшъыпкъэу, зыгукІэ къыпфэщагъэхэу уапашъхьэ ит УиІумэтхэм гукІэгъу къафэошІы. 24 УиІумэтэу сятэ Даут къепІогъагъэр бгъэцэкІэжьыгъэ; О къэпІогъагъэр непэ бгъэцэкІэжьыгъэ. 25 Израилым и Зиусхьанэу Тхьэр, „Пкъохэр зытет гъогухэм афэсакъхэу, ощ фэдэу сапашъхьэ итхэмэ, о къыпхэкІыгъэхэр ренэу Израилым итахътэ тесыщтых“ пІуи, УиІумэтэу сятэ Даут къепІогъагъэр джы къэгъэшъыпкъэжь. 26 Израилым и Тхьэр, УиІумэтэу сятэ Даут къепІогъагъэр шъыпкъэ орэхъужь! 27 Шъыпкъэ дэдэу, Тхьэр ара чІыгум щыпсэущтыр? Уашъоми уашъохэм яуашъуи О уарыфэрэп, сэ сшІыгъэ унэм ащыгъум уифэхэнэп ныІа. 28 Ау щытми, си Зиусхьанэу Тхьэр, УиІумэт итхьэлъэІурэ къызкІэлъэІурэмрэ унаІэ къатедз, УиІумэт иджэмакъэрэ тхьэлъэІоу непэ ышІырэмрэ къызэхэхых. 29 Уинэплъэгъу мафи чэщи мы Унэми, О пцІэ зэпхыгъэнэу зыфэпІогъэ мы чІыпІэми къафэрэгъэзагъ. УиІумэт а чІыпІэм щытэу тхьэлъэІоу ышІыщтыр къызэхэорэх. 30 О УздэщыІэ мы чІыпІэм дэжь щытхэу УиІумэти Уиизраил лъэпкъи тхьэлъэІу зыщашІыкІэ, ятхьэлъэІу къызэхэх, О уздэщыІэ чІыпІэм, ошъогум къыщызэхэхи япсэкІодхэр къафэгъэгъу. 31 Зыгорэм игупсэ зэрар фэхъоу псэкІод ышІагъэу, адрэр къедаоу тхьэлъанэ ригъэшІынэу, тхьэлъанэ зэдашІынэу мы Унэм чІэт къурмэншІыпІэм къызекІуалІэхэкІэ, 32 ошъогум къыщызэхэхи, УиІумэтхэм хьыкумышІ къафэхъу, мысэм ышІагъэр ышъхьэ къигъэфэжьи гъэмысэ, зафэм изэфагъэ елъытыгъэу зэрэзафэр къэгъэнаф. 33 Уиизраил лъэпкъ уапашъхьэ псэкІод зэрэщишІагъэм пае пыир къызытекІокІэ, уадэжь къагъэзэжьэу мы Унэм къызыщыолъэІухэкІэ, агу еІэжьыгъэхэу къызыщыолъэІухэкІэ, 34 ошъогум къыщызэхэххи, Уиизраил лъэпкъ ипсэкІодшІагъэ къыфэгъэгъуи, ятэмэ къяптыгъэгъэ чІыгур ахэм къятыжь. 35 Уапашъхьэ псэкІод щашІагъэу, ащ пае ахэм огъу къафэбгъэкІуагъэу мы чІыпІэм зыкъыфагъазэу ахэр къызыолъэІухэкІэ, уадэжь къызагъэзэжькІэ, О зэребгъэуцолІагъэхэм къыхэкІэу псэкІодэу ашІагъэм зыфыкІэгъожьхэкІэ, 36 ошъогум къыщызэхэххи, УиІумэт Уиизраил лъэпкъ ипсэкІодшІагъэ къыфэгъэгъу, зэрыкІон фэе гъогу зафэр къыфэгъэнафи, плъэпкъ кІэнэу къептыгъэ уичІыгу ощх къыщыфегъэщх. 37 ЧІыгум щыгъаблэу, хьадэгъур къызпыкІырэ зэпахрэ бэгуузыр къекІокІэу, жьыбгъэ стырыр къепщэу, лэжьыгъэр зыгъэкІодрэ узыр, мацІэр, хьамлыухэр къежьагъэхэу е зыщыпсэухэрэ къалэм ичІыгумэ пыир къатебанэу, тхьамыкІагъо горэ къафыкъокІэу, уз горэм ригъэзыгъэхэу, 38 агу еІэжьыгъэхэу, тхьамыкІагъом зэлъиубытыгъэхэу, мы Унэм аІэхэр къызыщыпфащэйхэкІэ, зы нэбгырэ горэм е Уиизраил лъэпкъ зэрэщытэу лъэІу къызыпфашІыкІэ, ахэр къызыолъэІухэкІэ, 39 уздэщыІэ чІыпІэу ошъогум О къыщызэхэххи, япсэкІодхэр къафэгъэгъу. Хэти зэрыкІогъэ гъогум, ыгу иплъагъорэм елъытыгъэу, ифэшъуашэр егъэгъот, сыда пІомэ цІыф пстэуми агу илъым О зыр ары щыгъуазэр. 40 Ахэр зэхьылІагъэр тыпщыщынэмэ, тятэмэ къяптыгъэ чІыгум ренэу тызэрэщыпсэущтыр ары. 41 Уиизраил лъэпкъ щымыщ хамэр О уикъэбар зэхихыгъэу, ащ пае лъэныкъо чыжьэм къикІэу къызыкІокІэ, – 42 сыда пІомэ О уикъэбарышхуи, уилъэкІи, уизэшІокІи ахэми зэхахыщт, – ари къэкІонышъ, мы Унэм щылъэІощт. 43 УздэщыІэ чІыпІэу ошъогум О къыщызэхэхи, хамэр къызэрэуаджэрэр зэкІэ къыфашІ, чІыгум тет лъэпкъ пстэуми уашІэным, Уиизраил лъэпкъ къызэрэпщыщынэрэм фэдэу къыпщыщынэнхэм, къыщыолъэІунхэу мы Унэр О зэрэпфэсшІыгъэм икъэбар зэхахыным пае. 44 О зэрыбгъэкІорэ гъогум тетэу, Уилъэпкъ пыим пэшІуекІоу заом зежьэкІэ, О къыхэпхыгъэ къалэмкІэ, О пцІэ епхыгъэу сшІыгъэ унэм зыкъыфагъазэу Зиусхьаным елъэІухэ зыхъукІэ, 45 ахэм ятхьэлъэІуи къызкІэлъэІухэри ошъогум О къыщызэхэххи, зэфагъэкІэ къапэгъокІ. 46 Уапашъхьэ псэкІод щашІэу, – псэкІод зымышІырэ цІыф щыІэпышъ, – ахэм О уакъыфэгубжэу, пыйхэм аІэкІаплъхьэхэу, гъэры зышІыгъэхэ пыим ичІыгу чыжьэ е благъэ ахэр защэхэкІэ, 47 етІанэ гъэрэу зыдэщыІэхэ чІыпІэм зыкъыщашІэжьэу, „псэкІод тшІыгъэ, хэбзэнчъэу тызекІуагъ, лажьэ ттелъ“ аІозэ, гъэры зыщашІыгъэхэ чІыгум зэрисхэзэ, зыкъыпфагъазэу къызыолъэІухэкІэ, 48 гъэры зышІыгъэхэ пыйхэм ячІыгу зэрисхэзэ, агукІи апсэкІи О зыкъыпфагъазэу, ятэмэ къяптыгъэ ячІыгу, О къыхэпхыгъэ къалэм, О пцІэ епхыгъэу сшІыгъэ унэм закъыфагъазэу О къызыолъэІухэкІэ, 49 ятхьэлъэІуи къызфэлъаІохэри ошъогум, О уздэщыІэ чІыпІэм, къыщызэхэххи, зэфагъэкІэ къапэгъокІ, 50 Уилъэпкъ уапашъхьэ щишІыгъэ псэкІодри уапашъхьэ зэрэщыхэукъуагъэри къыфэгъэгъух, гъэры зышІыгъэхэм гукІэгъу къафыряІаным пае ахэм агухэр къягъэгъух. 51 Сыда пІомэ ахэр Мысырым къипщыжьыгъэхэр, гъучІ хьакухэм ямэшІостыр къыхэпщыжьыгъэхэр ары. 52 УиІумэт итхьэлъэІурэ Уиизраил лъэпкъ итхьэлъэІурэ уинэплъэгъу къафэрэгъэзагъ, ахэр О къыуаджэхэ зыхъукІэ сыдыгъуи зэхэпхынхэм пае. 53 Сыда пІомэ тятэхэр Мысырым къызеощыжьхэм, Зиусхьанэу Тхьэр, УиІумэт Мосэ къызэрепІуагъэм фэдэу, пІэ илъынэу дунаим тет лъэпкъ пстэуми О ар къахэпхыгъ!»
Сэлмэн Тхьэм ынэшІу къыщыфэнэу лъэпкъым зэрэфэлъэІуагъэр
54 Сэлмэн итхьэлъэІуи, Зиусхьаным фыриІэ лъэІури къызеуххэм, ыІэхэр уашъомкІэ гъэзагъэхэу, дэІэтэягъэхэу Зиусхьаным икъурмэншІыпІэ ыпашъхьэ лъэгонджэмышъхьэкІэ щысыгъэти, къэтэджыжьыгъ. 55 Ащ дэжьым щытэу ымакъэ лъэшэу Іоу, Тхьэм ынэшІу къащыфэнэу, израил цІыфэу къызэІукІагъэхэм къафэлъаІуи къыІуагъ: 56 «Зиусхьаным зэриІуагъэм фэдэу, Иизраил лъэпкъ гупсэфыгъо къезытыгъэм щытхъур ыдэжь! ИІумэт Мосэ къыриІогъэ гущыІэшІухэм ащыщ гори мыгъэцэкІэжьыгъэу къэнагъэп. 57 Тятэмэ зэрягъусагъэм фэдэу, ти Зиусхьанэу Тхьэр тэри терэгъус, тыкъерэмыбгын, тыкъызэремынэкІ! 58 Ащ игъогумэ татетыным, тятэмэ осыет къафишІыгъэ унашъохэр, Ащ ишапхъэхэр, Ащ игъэнэфагъэхэр дгъэцэкІэнхэм пае, тыгухэмкІэ тызферэщэх! 59 Зиусхьаным ыпашъхьэ сызэрэщелъэІугъэ гущыІэхэр ти Зиусхьанэу Тхьэм мафи чэщи лъэрэІэсых, Зиусхьанэу Тхьэр ИІумэти Иизраил лъэпкъи зэфагъэкІэ мафи чэщи къапэрэгъокІ, 60 Зиусхьаныр зэрэ Тхьэр, Ащ нэмыкІ зэрэщымыІэр дунаим тет лъэпкъ пстэуми ашІэным пае. 61 Джы фэдэу ти Зиусхьанэу Тхьэм ишапхъэхэм татетыным, Ащ иунашъохэр дгъэцэкІэнхэм пае, шъугукІэ зэрэщытэу Ащ шъуфэрэгъэзагъ!»
Сэлмэн къурмэнхэр зэришІыгъэр
62 Ащ дэжьым пачъыхьэми израил цІыфэу зэкІэ ащ игъусэхэми Зиусхьаным пае къурмэн ашІыгъ. 63 Арыти, Сэлмэн Зиусхьаным пае былымышъхьэ мин тІокІырэ минитІурэ мэл-пчэнхэу минишъэрэ мин тІокІырэ мамыр къурмэн ышІыгъэх. Джаущтэу пачъыхьэмрэ израил цІыфхэмрэ Зиусхьаным и Унэ къызэІуахыгъ. 64 А мэфэ дэдэм пачъыхьэм къурмэнгъэст, гъомылэ тын ышІхи, мамыр къурмэнмэ къатекІыгъэ шэр ыгъэсти, Зиусхьаным и Унэ ыпашъхьэ ит щагум ипчэгу ыукъэбзыгъ. Къурмэнгъэстэу, гъомылэ тынэу ышІыгъэхэмрэ мамыр къурмэныпхъэхэм къатекІыгъэ шэмрэ Зиусхьаным ыпашъхьэ щытыгъэ джэрз къурмэншІыпІэм ифэшъунхэу щытыгъэп. 65 Сэлмэн а уахътэм мэфэкІышхо ышІыгъ, Хъэмат къалэ идэхьагъу къыщегъэжьагъэу игъукІырэ псыхъоу Мысырым игъунапкъэкІэ щыІэм нэсыжьэу къарыкІыгъэ израил цІыфхэр зэкІэ зэІукІэшхом, ти Зиусхьанэу Тхьэм дэжь, къекІолІэгъагъэх. Мэфиблэ, джыри мэфиблэ, зэкІэмкІи мэфэ пшІыкІуплІэ ахэм агъэмэфэкІыгъ. 66 Яенэрэ мафэм Сэлмэн цІыфхэр ытІупщыжьыгъэх. Зиусхьаным ИІумэт Даутрэ Иизраил лъэпкърэ шІоу къафишІагъэм пае гушІуагъом зэлъиштагъэхэу, чэфыр агу изэу ахэр, Тхьэм ынэшІу къыщыфэнэу пачъыхьэм фэлъаІохи, ядэжь кІожьыгъэх.
Тхьэр Сэлмэн къызэрэфэкІуагъэр
1 Сэлмэн Зиусхьаным и Уни, пачъыхьэ унэми, джащ фэдэу ышІынэу зыфэегъэ пстэуми ягъэпсын зеухым, 2 Зиусхьаныр ГъыбІон къызэрэщыфэкІогъагъэм фэдэу ятІонэрэу Сэлмэн къыфэкІуагъ. 3 Зиусхьаным ащ къыриІуагъ: «УитхьэлъэІуи укъызэрэсэлъэІугъэхэри Сэ зэхэсхыгъэх. ЕгъашІэм Сэ сцІэ чІэтынэу о пшІыгъэ Унэр згъэкъэбзагъэ; синэплъэгъуи сыгуи егъашІэм ащ теплъэхъукІыщтхэп. 4 Уятэ Даут фэдэу, шъыпкъэм утетэу, ар къызэрэсфэлэжьагъэм фэдэу, угукІи упсэкІи сапашъхьэ уитмэ, осыетэу къыпфэсшІыгъэхэр зэкІэ бгъэцакІэхэу, Сишапхъэхэмрэ Сигъэнэфагъэхэмрэ къэуухъумэхэзэ пшІыщтмэ, 5 „О къыпхэкІыгъэхэр ренэу Израилым итахътэ тесыщтых“ сІуи, уятэ Даут къызэресІуагъэм фэдэу, уипачъыхьагъу егъэшІэрэу Израилым щызгъэуцущт. 6 Ау шъори шъуикІалэхэми шъузгокІхэу, осыетэу, унашъоу къышъуфэсшІыгъэхэр шъумыгъэцакІэхэу, нэмыкІ тхьэхэм зафэжъугъазэу, ахэм шъхьащэ афэшъушІ зыхъукІэ, 7 Израилыр чІыгоу къестыгъэм тезгъэкІодыкІыщт, Сэ сичІыпІэнэу сыукъэбзыгъэ Унэр пхъатэ зыпэсымыхьыжьэу, къэбаркІэ къызэфаІотэжьэу Израилыр лъэпкъ пстэуми якІэнэкІалъэу къэзгъэнэщт. 8 Мы Унэр къутэфэ Іуашъхьэу къэнэжьыщт. Ащ блэкІырэм пэпчъ ыгучІэ зэризыгъэм нахь хэмылъэу кІэшъуикІызэ ыІощт: „Сыд пае Зиусхьаныр мы хэгъэгуми мы Унэми мыщ фэдэу адэзекІуагъа?“ 9 Ащ дэжьым аІощт: „Ахэм ятэхэр мысыр хэгъэгум къизыщыжьыгъэхэ я Зиусхьанэу Тхьэр къабгыни, нэмыкІ тхьэхэр аштэхи, ахэм шъхьащэ зэрафашІыщтыгъэхэмрэ зэрафэлажьэщтыгъэхэмрэ апае Зиусхьаным джа тхьамыкІэгъо пстэури къафыригъэхыгъ“».
Сэлмэнрэ Хъирамрэ зэрэзэзэгъыгъэхэр
10 Сэлмэн унитІур, Зиусхьаным и Унэрэ пачъыхьэм иунэрэ, илъэс тІокІырэ ышІхэзэ ыухыгъэх. 11 Джащ фэдизым Цэурым ипачъыхьэу Хъирам Сэлмэн зэрэшІоигъоу кедрэ ыкІи кипарис чъыгхэр, дышъэр къыфаригъащэщтыгъэхэти, пачъыхьэу Сэлмэн Хъирам Гъалыл хэкум итэу къэлэ тІокІ ритыгъ. 12 Арыти, Хъирам Цэур къыдэкІи Сэлмэн къыритыгъэ къалэхэм яплъынэу къызэкІом, ахэр ащ ыгу рихьыгъэхэп. 13 Ащ къыриІуагъ: «Сыд фэдэ къалэха адэ, сикъош, къысэптыгъэхэр?» Къабул чІыгукІэ ахэм ар яджагъ, непэ къызнэсыгъэми джары ахэм зэряджэхэрэр. 14 Хъирам пачъыхьэм дышъэ килограмм минищрэ шъихрэ къыфаригъэщэгъагъ.
Сэлмэн илъэхъан Израилым зыкъызэриІэтыгъэр
15 Сэлмэн Зиусхьаным и Унэ, ежь пае унэ, Милло зыфаІорэ етІэ зэтетэкъуагъэхэу къэлэ дэпкъым ылъапсэхэр зэрагъэпытэщтыгъэхэр, Ерусэлэм дэпкъыр, Гъэзэр, Мэгъыдэ, Гъэзэр къалэхэр ыгъэпсынхэм пае егъэзыгъэкІэ Іоф ашІэнэу цІыфхэм атырилъхьагъ. 16 Мысырым ипачъыхьэ фирхьауныр Гъэзэр екІуи ар тыригъэстыкІыгъагъ. КъэнаІан лъэпкъым щыщхэу къалэм дэсыгъэхэр зэхиукІэхи, ыпхъоу Сэлмэн ишъуз шІухьафтынэу ар ритыгъагъ. 17 Арыти, Сэлмэн Гъэзэррэ ыхэкІэ щыІэ Бэтхъорэнрэ ыгъэпсыгъэх, 18 БаІалати Татмори пшэхъолъэ шъофнэкІым щигъэпсыгъэх. 19 Джащ фэдэу Сэлмэн илэжьыгъэ-гъомлэпхъэ гъэтІылъыпІэхэр зыдэтыщт къалэхэр зэкІэ, ку псынкІэхэр зыдэщыІэщт къалэхэр, шыудзэхэм апае къалэхэр, Ерусэлэми Ливанми, ыІэ илъыгъэ чІыпІэ пстэуми, ащишІынэу зыфэягъэр зэкІэ Сэлмэн ышІыгъ. 20 Израил цІыфхэм ащымыщ цІыф лъэпкъхэу аморхэм, хьатхэм, пэрыцхэм, хъэухэм, еусхэм, 21 ахэм къахэкІыгъэхэу, израил цІыфмэ амыгъэкІодыгъэхэу псэоу къэнагъэхэм Сэлмэн егъэзыгъэкІэ Іоф ашІэнэу атырилъхьагъ. 22 Сэлмэн израил цІыфхэм егъэзыгъэкІэ Іоф аригъашІэщтыгъэп, ау ахэр ежь идзэкІолІыщтыгъэх, иІумэтыщтыгъэх, къыпэблэгъэ лІэкъо-лъэшыщтыгъэх, идзэпащэщтыгъэх, ку псынкІэу, шыоу ежь иІэхэм афэгъэзэгъагъэх. 23 Джахэр ары Сэлмэн аригъэшІэрэ Іофхэр зэрагъэцакІэхэрэм лъыплъэщтыгъэ Іэшъхьэтетхэр: япчъагъэкІэ нэбгырэ шъитфрэ шъэныкъорэ хъухэу ахэм Іоф зышІэрэ цІыфхэр агъэІорышІэщтыгъэх. 24 Фирхьауным ыпхъу Даут икъалэ къыдэкІыжьи, Сэлмэн ащ фаригъэшІыгъэ унэм кІожьыгъэ. ЕтІанэ Сэлмэн Милло ыгъэпсыгъ. 25 Сэлмэн Зиусхьаным пае ышІыгъэ къурмэншІыпІэм Зиусхьаным ыпашъхьэ илъэсым щэ къурмэнгъэстхэмрэ мамыр къурмэнхэмрэ щишІыщтыгъэх, гъомэ ІэшІухэр къызпиххэрэр щигъэстыщтыгъэх. Ащ дакІоу иунэ игъэпсыни ыухыгъ. 26 Джащ фэдэу пачъыхьэу Сэлмэн Едом хэкум ит Елат къалэм пэмычыжьэу, хы Плъыжьым Іут Іэцыон-Гъэбэр къалэм хыдзэм пае къухьэхэр щишІыгъэх. 27 Арыти, Хъирам къухьэгъэІорышІэным фэІэзэ ицІыфхэу хым щыгъуазэхэр Сэлмэн ицІыфхэм гъусэ афишІхи ыгъэкІуагъэх. 28 Ахэр Офыр чІыпІэм кІохи, дышъэу килограмм мин пшІыкІутІурэ шъихрэ къыращи пачъыхьэу Сэлмэн къыфащагъ.
ЩэбаІ хэгъэгум ипачъыхьэгуащ
1 ЩэбаІ хэгъэгум ипачъыхьэгуащэ Зиусхьаным ишІуагъэкІэ Сэлмэн ищытхъоу аІуатэрэр зызэхехым, ащ дэжь ІуупчІыхьанэу къэкІуагъ. 2 Шъхьагъырытхэр бэу игъусэхэу Ерусэлэм ар къэкІуагъ; махъшэхэр мэ ІашІухэр къызпихрэ щыфэхэмкІэ, дышъэ бэ дэдэкІэ, мыжъо лъапІэхэмкІэ ушъэгъагъэх. Ар Сэлмэн дэжь къакІуи зыфэе пстэумкІи къыдэгущыІагъ. 3 Арыти, Сэлмэн ащ къызэреупчІыгъэ пстэуми япэкъокІ риІожьыгъ, пэгъокІ джэуап къызфимыгъотыжьышъуни пачъыхьэм къыриІуагъэхэм зи къахэфагъэп. 4 ЩэбаІ хэгъэгум ипачъыхьэгуащэ Сэлмэн иІушыгъи, унэу ащ ышІыгъэри, 5 иІанэ къытехьэрэ гъомлапхъэхэри, иІэшъхьэтетхэр Іанэм зэрэпэтІысхьэхэрэм пылъ хабзэхэри, игъомлэпхъэзехьэхэм язекІокІэ-шІыкІэхэри, ахэр зэрэфэпагъэхэри, исэнэзехьэхэри, Зиусхьаным и Унэ къурмэнгъэстхэр зэрэщишІхэри зелъэгъухэм, ащ нахьыбэрэ зыфэІэжэжьышъугъэп. 6 Арыти, пачъыхьэм къыриІуагъ: «О пшІэрэ Іофхэмрэ уиІушыгъэрэ яхьылІагъэу сихэгъэгу къэбарэу щызэхэсхыгъэхэр шъыпкъэ. 7 Ау сыкъэмыкІоу, сынитІукІэ сэмылъэгъуфэ сшІошъ хъугъэп. Шъхьае, зытет шъыпкъэм ызыныкъуи къысаІуагъэп, сыда пІомэ сэ зэхэсхыгъэм нахьыб Іушыгъэу пхэлъри мылъкоу уиІэри. 8 УицІыфхэу, мы уиІумэтхэу ренэу уапашъхьэ итхэу уиІушыгъэ зэхэзыххэрэр насыпышІох! 9 КъыпфэшІу уи Зиусхьанэу Тхьэу Израилым итахътэ утезгъэтІысхьагъэм щытхъур ыдэжь! Зиусхьаным Израилым егъэшІэрэ шІулъэгъу къызэрэфишІыгъэм къыхэкІэу ухьыкумышІынэу, шъыпкъэр зепхьанэу пачъыхьэу утыригъэхьагъ». 10 Ащ дэжьым пачъыхьэм дышъэу килограмм минищрэ шъихрэ, мэ ІашІухэр къызпиххэрэр бэ дэдэу, мыжъо лъапІэхэр ащ къыритыгъэх. ЩэбаІ хэгъэгум ипачъыхьэгуащэ мэ ІашІухэр къызпихрэ щыфэхэу къыритыгъэмэ афэдэ бэ дэдэу ащ къыфащэу джыри зыкІи къыхэкІыгъэп. 11 Джащ фэдэу Хъирам ихыдзэ къухьэу дышъэр Офыр къыфизыщыщтыгъэми чъыгплъыжь лъэпкъым фэдэуи мыжъо лъапІэхэуи бэ дэдэ Офыр къыфырищыгъ. 12 Пачъыхьэм а чъыгплъыжь лъэпкъым Зиусхьаным и Унэрэ пачъыхьэ унэмрэ апае ІэубытыпІэхэр, орэдыІохэм апае бзэпсхэр зэрыщэгъэ пхъонтэпщынэ зэфэшъхьафхэр харигъэшІыкІыгъэх. Ащ фэдизым нэсэу чъыгплъыжь лъэпкъыр зыкІи къащагъэп, джы нэси алъэгъугъагъэп. 13 Арыти, пачъыхьэу Сэлмэн ЩэбаІ хэгъэгум ипачъыхьэгуащэ зыфэягъэри къызкІэлъэІугъэхэри зэкІэ ритхи, шІухьафтынхэри фишІыгъэх. ЕтІанэ ежьми игъусэгъэ иІумэтхэми къыздикІыгъэгъэхэ хэгъэгум агъэзэжьыгъ.
Пачъыхьэу Сэлмэн ибайныгъэхэр
14 Сэлмэн пае илъэс къэс къащэрэ дышъэм ионтэгъугъэщтыгъэр килограмм мин пшІыкІубгъурэ шъибгъурэ тІокІиплІырэ. 15 Ар сатыу ашІыхэрэр къезыхьакІхэрэми, сатыушІхэми, Іарабыем ипачъыхьэ пстэуми, хэкухэм яІэшъхьэтетхэми къаІаххэрэм анэмыкІыгъ. 16 Арыти, пачъыхьэу Сэлмэн дышъэм мэІушхо шъитІу харигъэуІучІыкІыгъэх. МэІу пэпчъ дышъэу текІодагъэр килограммиблым къехъу. 17 Джащ фэдэу нахь мэІу цІыкІухэри шъищ хъухэу дышъэм харигъэуІучІыкІыгъэх. МэІу пэпчъ дышъэу текІодагъэр килограммитфым тІэкІу къехъу. Пачъыхьэм ахэр Ливан Мэз Ун зыфаІорэм чІигъэуцуагъэх. 18 Пачъыхьэм пыл къупшъхьэм тэхътэ ин харигъэшІыкІи, дышъэ къабзэкІэ ар къараригъэтІылъэкІыжьыгъ. 19 Тахътэм лъэоених екІуалІэщтыгъэ. Тахътэм ыкІыб ышъхьагъ хъурэягъ, тетІысхьапІэу хэтым ыбгъуитІукІи ІэтелъхьапІэхэр иІагъэх. ІэтелъхьапІэхэм ІэкІэ шІыгъэу аслъаныхъухэр къаготыгъэх. 20 ДэкІоепІихым абгъуитІукІэ ІэрышІ аслъаныхъу пшІыкІутІу зырыз щытыгъ. Ащ фэдэ зы пачъыхьагъу горэми щашІыгъэу щытыгъэп. 21 Пачъыхьэу Сэлмэн шъуалъэу иІэ пстэури дышъэм хэшІыкІыгъагъэх. Ливан Мэз Ун зыфаІорэм чІэтыгъэ шъуалъэхэри зэкІэ дышъэ шъыпкъэм хэшІыкІыгъагъэх. Тыжьыным хэшІыкІыгъэ зи щыІагъэп, сыда пІомэ Сэлмэн иуахътэ тыжьыным уасэ иІагъэп. 22 Тарщыщ къыщашІыгъэ хыдзэ къухьэхэу пачъыхьэм иІагъэхэр Хъирам икъухьэхэм ягъусагъэх. Арыти, Тарщыщ къыщашІыгъэ хыдзэ къухьэхэр илъэсищ тешІэ къэс зэ къакІохэти, дышъэр, тыжьыныр, пыл къупшъхьэр, мамунэхэр, джэнэтбзыухэр къащэщтыгъэх. 23 Джаущтэу пачъыхьэу Сэлмэн мылъкоу иІэмкІи иІушыгъэкІи дунаим тет пачъыхьэ пстэуми ашъхьадифыщтыгъэ. 24 Арыти, зэрэдунаеу Тхьэм Сэлмэн къыхилъхьэгъэ Іушыгъэм едэІухэмэ ашІоигъоу, ар зэрагъэлъэгъунэу фэягъэх. 25 Ахэм тыжьын шъуалъэхэри, дышъэ шъуалъэхэри, щыгъынхэри, Іашэхэри, мэ ІашІухэр къызпихрэ пкъыгъохэри, шыхэри, къыдырхэри илъэс къэс шІухьафтынэу къыратыщтыгъэх. 26 Сэлмэн ку псынкІэхэмрэ шыухэмрэ зэригъэгъотыгъэх. Ку псынкІэ минрэ шъиплІрэ шыу мин пшІыкІутІурэ иІагъэх. Ахэр ку псынкІэхэр зыдэт къалэхэмрэ пачъыхьэм дэжь, Ерусэлэмрэ, адигъэуцуагъэх. 27 Пачъыхьэм тыжьыным ыуасэ мыжъо къызэрыкІохэм афэдэу ышІыгъ, кедрэхэр ихъоигъэхэти, къушъхьэлъэ чІыпІэхэм къащыкІырэ шхынцумпэ чъыгхэм яосэгъухэу ышІыгъ. 28 Шыхэр Сэлмэн Мысырымрэ Къуорэ къыфыращыщтыгъэх; пачъыхьэм исатыушІхэм ахэр ахъщэкІэ Къуо къыщащэфыщтыгъэх. 29 Ку псынкІэ пэпчъ тыжьын килограммиблрэ пшІэнитІукІэрэ, зы шыр тыжьын килограммрэ пшІэнийкІэрэ Мысырым къыфыращыщтыгъэх. Джащ фэдэу пачъыхьэм исатыушІхэм ахэр зэкІэ хьатхэмрэ Арамымрэ япачъыхьэхэм афащэщтыгъэх.
Сэлмэн Тхьэм зэрэгокІыгъэр
1 Пачъыхьэу Сэлмэн фирхьауным ыпхъу нэмыкІэу, хэмэ хэгъэгумэ ащыщхэу, моабмэ, Іамонхэм, едомхэм, цыдонмэ, хьатхэм къахэкІыгъэхэу бзылъфыгъэхэр бэу шІу ылъэгъугъэхэти, ахэр шъузэу къыщагъэх. 2 Зиусхьаным «Ахэм шъуалъимыхь, ежьхэри къышъулъерэмыхьэх, шъугухэр ятхьэмэ афащэщтыхэшъ» ыІуи, израил цІыфхэм зигугъу къафишІыгъагъэхэр ары ахэр лъэпкъэу къызхэкІыгъагъэхэр. Джахэр ары Сэлмэн шІулъэгъу зыфишІыгъэхэр. 3 Пачъыхьэпхъухэу шъуз шъибл иІагъ, ишъуз гуадзэхэр шъищ хъущтыгъэх. Джаущтэу ишъузхэм ащ ыгу зэщафыгъ. 4 Арыти, Сэлмэн ижъышъхьэм ыгукІэ шъузэу иІэхэм нэмыкІ тхьэхэм апащагъ, ятэ Даут фэдэу и Зиусхьанэу Тхьэм ыгукІэ ар фэшъыпкъэ дэдагъэп. 5 Джащ тетэу Сэлмэн цыдонмэ ятхьэнэпцІ Астартэрэ Іамонхэм ятхьэнэпцІ бзэджэ-наджэу Мылъкомрэ афэлажьэу ыублагъ. 6 Зиусхьаным къемыкІущтыр Сэлмэн ышІэщтыгъ, ятэ Даут фэдэу Зиусхьаным ар фэшъыпкъэ дэдагъэп. 7 ЕтІанэ Сэлмэн моабмэ ятхьэнэпцІ бзэджэ-наджэу Къэмэщрэ Іамонхэм ятхьэнэпцІ бзэджэ-наджэу Молэхрэ апае Ерусэлэм къыпэблагъэу къурмэн зыщашІырэ лъэгапІэхэр щигъэуцугъэх. 8 Хэмэ хэгъэгумэ ащыщ бзылъфыгъэу ишъузхэм, зитхьэхэм апашъхьэ гъомэ ІашІухэр щызгъэущтыгъэхэм, къурмэнхэр афэзышІыщтыгъэхэм зэкІэми джаущтэу афишІыгъ. 9 Арыти, Израилым и Зиусхьанэу Тхьэр Сэлмэн ыгукІэ зэрэгокІыгъэм пае къыфэгубжыгъ. Зиусхьаным тІо ащ зыкъыригъэлъэгъугъагъэми, 10 нэмыкІ тхьэхэм зафимыгъэзэнэу къыфигъэпытэгъагъэми, ащ пае къэмынэу Зиусхьаным къыфигъэпытагъэм ар едэІугъэп. 11 Арыти, Зиусхьаным Сэлмэн къыриІуагъ: «Ащ фэдэу зэрыпшІырэм, сиІуагъэ узэрэфэмышъыпкъагъэм, сишапхъэхэр къызэрэмыухъумагъэхэм пае, уипачъыхьагъу пІэкІэсхыпэнышъ, уиІумэт ар естыщт. 12 Ау о опсэуфэ уятэ Даут ихьатыркІэ ар сшІэщтэп, пкъо ар зыІэкІэсхыщтыр. 13 Пачъыхьагъур зэрэщытэу ащ ІэкІэсхыщтэп, пкъо зы лІакъо къестыщт, СиІумэт Даутрэ, Сэ къахэсхыгъэ Ерусэлэмрэ яхьатыркІэ».
Сэлмэн ипыйхэр
14 Зиусхьаным Сэлмэн пый къыфкъуигъэкІыгъ, ар едомэу, Едом пачъыхьэ лІакъом щыщэу Адад ары. 15 Даут Едомым щыІэзэ, дзэпащэу Иоаб аукІыгъэхэр ыгъэтІылъыжьынхэу къакІуи, Едомым ис хъулъфыгъэхэр зэкІэ ыукІыгъагъэх. 16 Едомым ис хъулъфыгъэхэр зэкІэ аукІыфэхэ Иоаби израил цІыфхэри мэзихэ ащ къисыгъагъэх. 17 Ау Адад ятэ къулыкъу фэзышІыщтыгъэ едом нэбгырэ заулэ игъусэу Мысырым екІужьыгъагъэх. Адад ащ дэжьым джыри сабыигъ. 18 Мыдиан хэкур къабгыни ахэр Паран чІыпІэм къэкІуагъэх, Параным щыщэу нэбгырэ заулэ гъусэ къызфашІи, Мысырым ипачъыхьэ фирхьауным дэжь къэкІуагъэх. Фирхьауным ащ уни, ышхыни, чІыгуи къыритыгъэх. 19 Фирхьауныр Адад лъэшэу къызэрэфэшІугъэм къыхэкІэу игощэ Тахъпынэс ышыпхъу шъузкІэ ащ къыритыгъагъ. 20 Арыти, Тахъпынэс ышыпхъу шъаоу Гъэнубат Адад къыфилъфыгъ. Тахъпынэс ар фирхьауным иунэ щипІущтыгъэ. Гъэнубат фирхьауным ыкъохэм ягъусэу фирхьауным иунэ исыгъ. 21 ЕтІанэ Даут ятэ пІашъэхэр зыдэщыІэм зэригъэзэжьыгъэми, дзэпащэу Иоаб зэрэщымыІэжьми якъэбар Адад зызэхехым, фирхьауным риІуагъ: «СытІупщыжьба, сичІыгу згъэзэжьынэу сыфай». 22 Ау фирхьауным ащ къыриІуагъ: «Сыда садэжь ущыІэу зыгорэм уфэныкъуа, сыд пае уичІыгу бгъэзэжь пшІоигъуа?» Адрэм къириІожьыгъ: «Хьау, сытІупщыжьба». 23 Джащ фэдэу Зиусхьаным Сэлмэн джыри зы пый къыфкъуигъэкІыгъ. Ар ЕлыедаІ ыкъо Рэзэн, изиусхьанэу, Цэубэ ипачъыхьэу ХъададІэзэр къышІухэхьажьыгъагъэр ары. 24 Даут ХъададІэзэр зытекІом ыуж ащ цІыфхэр къызэриугъоилІэхи, ежь бзэджэшІэ купым пащэ фэхъугъ. ЕтІанэ ахэр Дамаск кІохи дэтІысхьагъэх, Дамаск дэсхэу Іэшъхьэтетныгъэр щаІыгъыгъ. 25 Арыти, Сэлмэн щэІэфэ ар Израилым ипыигъ, Адад бзэджагъэу къаришІагъэм нэмыкІэу ащ изэрар Израилым ренэу къыригъэкІыгъ. Ащ Израилым гухьагужъ къыфыриІагъ. Ар Арамым ипачъыхьэуи хъугъагъэ.
Тхьэм ЯрабІам къызэригъэгугъагъэр
26 Нэуат ыкъо, ефрат лІакъом къыхэкІыгъэу, Цэрэд къалэм щыщэу, Сэлмэн иІумэт ЯрабІам – ащ янэ шъузабэ ыцІэр ЦэруІэ – пачъыхьэм зыкъыпиІэтыгъ. 27 Ащ пачъыхьэм зыкъыпиІэтынэу зытехъухьагъэр мары: Сэлмэн Милло ыгъэпсыщтыгъэ, джащ фэдэу ятэ Даут икъалэ къекІокІырэ дэпкъыр нахь зэкІигъэпытыхьэщтыгъэ. 28 ЯрабІам лІэхъупхъэу щытыгъ. Сэлмэн кІалэр зэрэчаным гу лъитагъэти, Юсыф къытекІыгъэхэу егъэзыгъэкІэ Іоф зэрагъашІэхэрэм алъыплъэнэу тыригъэхьагъ. 29 А уахътэм ЯрабІам Ерусэлэм къыдэкІыгъэу Щылэу щыщ Ахъый тхьэлІыкІор гъогум ыпэ къыщифагъ. Ащ щыгъыныкІэ щыгъыгъ. Ежь нэбгыритІум нэмыкІ шъофым итыгъэп. 30 Арыти, Ахъый щыгъыгъэ щыгъыныкІэр ыубыти такъыр пшІыкІутІоу зэбгыритхъыгъ. 31 Ащ ЯрабІам къыриІуагъ: «ТакъырипшІыр о штэ, сыда пІомэ Израилым и Зиусхьанэу Тхьэм къыІорэр мары: „Пачъыхьагъур Сэлмэн къыІэсэхыжьы, лІэкъуипшІыр о къыосэты. 32 СиІумэт Даутрэ израил лІэкъо пстэумэ къахэсхыгъэ къалэу Ерусэлэмрэ яхьатыркІэ зы лІакъор ащ къыфэзгъэнэщт. 33 Ар зытехъухьащтыр израил цІыфхэр Сэ згокІыгъэхэу, цыдонхэм ятхьэнэпцІэу Астартэ, моабхэм ятхьэнэпцІэу Къэмэщ, Іамонхэм ятхьэнэпцІэу Мылъком ахэм шъхьащэ зэрафашІырэм, ятэ Даут фэдэу, къысэкІущтыр ашІэу, къафэзгъэпытэгъэ Сишапхъэхэмрэ Сигъэнэфагъэхэмрэ агъэцакІэхэзэ, Сигъогухэм зэратемытыгъэхэм пае. 34 Ау зэрэпачъыхьагъоу ащ къыІэкІэсхыжьрэп, къахэсхыгъэ Даут, СиІумэт, фэзгъэпытагъэхэмрэ Сиунашъохэмрэ зыгъэцакІэщтыгъэм ихьатыркІэ ежь щэІэфэ тетыгъор езгъэІыгъыщт. 35 Ау ыкъо пачъыхьагъур къыІэкІэсхыжьынышъ, ащ щыщ лІэкъуипшІыр о къыостыщт. 36 СцІэ епхыгъэнэу къыхэсхыгъэ къалэу Ерусэлэм СиІумэт Даут ижъуагъо инэф щымыкІосэным пае, ыкъо зы лІакъо естыщт. 37 О укъахэсэхышъ, узфэе пстэури бгъэІорышІэщт, Израилым урипачъыхьащт. 38 СиІумэт Даут зэришІыщтыгъэм фэдэу, къыпфэзгъэпытэщтыр зэкІэ бгъэцакІэу, Силъагъохэм уатетэу къысэкІущтыр пшІэмэ, Сихабзэхэм уарыгъуазэу Сиунашъохэмрэ Сихабзэхэмрэ бгъэцакІэхэмэ, усигъусэщт, Даут зэрэфэсшІыгъэм фэдэу, уиунагъо итетыгъо згъэпытэщт, Израилри пІэ къислъхьащт. 39 МыегъашІэми, Даут илІакъо джаущтэу къэсыуфэщт“». 40 Сэлмэн ЯрабІам ыукІ шІоигъуагъ, ау ЯрабІам зиІэти Мысырым, мысыр пачъыхьэу Щыщакъ дэжь чъэжьи, Сэлмэн олІэфэ Мысырым къисыгъ.
Сэлмэн зэрэлІагъэр
41 Сэлмэн нэмыкІэу къехъулІагъэхэри, ащ ышІагъэхэри, иІушыгъи Сэлмэн ышІагъэхэм яхьылІэгъэ тхылъым дэтхэба. 42 Сэлмэн зэрэ Израилэу ипачъыхьэу Ерусэлэм илъэс тІокІитІо дэсыгъ. 43 ЕтІанэ Сэлмэн ятэ пІашъэхэр зыдэщыІэм ыгъэзэжьыгъэти, ятэ Даут икъалэ щагъэтІылъыжьыгъ, ыкъо РэхъабІам ащ ычІыпІэ пачъыхьагъум техьагъ.
Израилыр пачъыхьагъуитІоу гощыгъэ зэрэхъугъэр
1 РэхъабІам Щэхэм кІуагъэ, сыда пІомэ Израилым итемыр лъэныкъо щыпсэурэ цІыфхэр зэкІэ ар пачъыхьагъум тырагъэхьаным пае Щэхэм къекІолІэгъагъэх. 2 Нэуат ыкъо ЯрабІам, пачъыхьэу Сэлмэн зышІуигъэбылъэу, Мысырым екІужьыгъэу исыгъэти, ар зэхихыгъэ. Арыти, ЯрабІам Мысырым къикІыжьынэу зигъэхьазырыжьыгъ. 3 Ащ лъагъакІохи къарагъэщагъ. Джащ дэжьым ЯрабІамрэ израил цІыфэу зэкІэ къызэІукІагъэхэмрэ къакІохи РэхъабІам къыраІуагъ: 4 «Уятэ бжьы хьылъэ къыттырилъхьагъ. Іоф къинэу тызхэтымрэ уятэ къыттырилъхьэгъэ бжьы хьылъэмрэ о нахь къытфэгъэпсынкІэхи, тыпфэлэжьэщт». 5 Ащ ахэм ариІуагъ: «ШъукІожьи мэфищ зытешІэкІэ джыри садэжь шъукъакІу». Арыти, цІыфхэр кІожьыгъэх. 6 Ятэ Сэлмэн псэоу зыщэІэм ащ инахьыжъ упчІэжьэгъущтыгъэхэр пачъыхьэу РэхъабІам джэнджэшэгъу къызфишІхи яупчІыжьыгъ: «Сыда а цІыфхэм ясІожьмэ хъунэу къысэшъуІощтыр?» 7 Ахэм ащ къыраІуагъ: «А цІыфхэм джы уафэІорышІэу, зыфаехэр афапшІэу, зафэбгъэцІыкІоу, дахэкІэ уадэгущыІэмэ, о ущэІэфэ ахэр уиІэрылъхьащтых». 8 Ау нахьыжъ упчІэжьэгъущтыгъэхэм къыраІуагъэр пхъатэ пимыхьэу, къыримыдзэу ежь игъусэ кІэлакІэхэм яупчІыжьыгъ. 9 Ахэм ариІуагъ: «Сятэ атырилъхьэгъэ бжьы хьылъэр афэзгъэпсынкІэнэу къысэзыІогъэ цІыфхэм ясІожьынэу сыда къысэшъуІощтыр?» 10 Арыти, ежь игъусэ кІэлакІэхэм ащ къыраІуагъ: «Уятэ атырилъхьэгъэ бжьы хьылъэр афэбгъэпсынкІэнэу къыозыІогъэ цІыфхэм мыр яІожь: „Сэ сІэхъомбэжъые сятэ ыбг нахь гъум. 11 Арышъ, сятэ бжьыр къышъутырилъхьи къин шъуигъэлъэгъугъэмэ, сэ шъуибжь нахь хьылъэ къышъуфэсшІыщт. Сятэ къамыщкІэ шъуаригъэукІщтыгъэмэ, сэ гъучІ папцІэ зыІэпакІэ хэлъ къамыщкІэ шъуязгъэубышъыщт“». 12 Арыти, РэхъабІам «Ящэнэрэ мафэм садэжь шъукъакІу» ыуІи, унашъо къызэрафишІыгъэм тетэу, ЯрабІами цІыф пстэури пачъыхьэм дэжь ящэнэрэ мафэм къэкІуагъэх. 13 Пачъыхьэр пхъашэу цІыфхэм къадэгущыІагъ. Нахьыжъ упчІэжьэгъухэм ахэм ариІожьынэу къыраІуагъэри къыридзагъэп. 14 КІэлакІэхэм къызэрыраІуагъэм тетэу, ащ ахэм ариІуагъ: «Сятэ бжьыр къышъутырилъхьи къин шъуигъэлъэгъугъэмэ, сэ шъуибжь нахь хьылъэ къышъуфэсшІыщт. Сятэ къамыщкІэ шъуаригъэукІыщтыгъэмэ, сэ гъучІ папцІэ зыІэпакІэ хэлъ къамыщкІэ шъуязгъэубышъыщт». 15 Джащ тетэу пачъыхьэр цІыфхэм ядэІугъэп. Сыда пІомэ Щылэу щыщ Ахъый къыриІуагъэу, Нэуат ыкъо ЯрабІам къырыригъэІожьыгъэр хъужьыным пае, Зиусхьаным ишІэ хэлъэу хъурэр зэхъокІыгъэхагъ. 16 Пачъыхьэр къызэрямыдэІугъэр темыр лъэныкъом къикІыгъэ израил цІыфхэм янэрылъэгъу хъугъэти, ахэм пачъыхьэм раІуагъ: «Сыда Даут тызэрэхэтыр? Ищай ыкъо тызэрэфыщыт щыІэп. Израилыр, хэти иунэ ерэкІужь! Джы, Даут, уипачъыхьагъу изакъоу къыпфэрэн!» Джащ тетэу Израилым итемыр лъэныкъо щыпсэухэрэр хэти иунэ екІужьыгъ. 17 Ау Ехъудэм икъалэхэм адэс израил цІыфхэр ары ныІэп РэхъабІам зипачъыхьэ хъугъэр. 18 ЕтІанэ РэхъабІам егъэзыгъэкІэ Іоф зэрагъэшІэрэ цІыфхэм ятхьаматэу Адорам ыІофытагъ, ау израил цІыф пстэуми мыжъозэхао къашІи ар хэкІодагъ. Пачъыхьэу РэхъабІам Ерусэлэм екІужьыным пае ку псынкІэм гузэжъогъоу зыридзагъ. 19 Джаущтэу Израилым итемыр лъэныкъо щыпсэухэрэм Даут иунагъо зыкъызэрэпэІатыгъэу джы къызнэсыгъэми къахьы.
ЯрабІам Израилым итемыр лъэныкъо ипачъыхь
20 ЯрабІам къызэригъэзэжьыгъэр темыр лъэныкъом щыпсэурэ израил цІыф пстэуми зызэхахым, ащ лъагъакІуи зэІукІэм къарагъащи темыр лъэныкъом щыпсэурэ израил цІыф пстэуми япачъыхьанэу тырагъэхьагъ. Даут иунагъо ехъуд лІакъом нэмыкІ гомытэу къэнагъ. 21 Израилым езэонышъ, пачъыхьагъур Сэлмэн ыкъо РэхъабІам къыІэкІигъэхьажьыным пае, ежь Ерусэлэм къызэсым, зэрэехъуд лІакъорэ бынямин лІакъомрэ ащыщхэу дзэкІолІ хэшыпыкІыгъэу нэбгырэ минишъэрэ мин тІокІиплІырэ къахищыгъэх. 22 Ау Тхьэм дэжь къикІыгъэ псалъэр Тхьэм илІыкІоу ЩымаІ къылъигъэІэси къыриІуагъ: 23 «Ехъудэм ипачъыхьэу, Сэлмэн ыкъо РыхъэбэІэм, зэрэ Ехъуди, Бинямини, нэмыкІ цІыфхэми яІу: 24 „Зиусхьаным ыІорэр мары: ‘ШъумыкІу, шъукъош израил цІыфхэм заор адэшъумыубл. Шъхьадж иунэ ерэкІужь, сыда пІомэ Сэры ар къызпкъырыкІыгъэр’“». Арыти, Зиусхьаным ыІорэм едэІухи, Зиусхьаным къызэрариІуагъэм тетэу агъэзэжьыгъ.
ЯрабІам идышъэ шкІэхэр
25 ЕтІанэ ЯрабІам Щэхэм къалэр Ефраим къушъхьэлъэ хэкум щызэкІигъэпытыхьи, ащ дэтІысхьажьыгъ. Ащ къыдэкІи Пэнуэл къалэр ыгъэпсыгъ. 26 ЯрабІам ыгукІэ зэриІожьщтыгъ: «Пачъыхьагъум Даут иунагъо къыфигъэзэжьынкІи хъун. 27 Мы сызипачъыхьэхэр Зиусхьаным и Унэ къурмэнхэр щашІынхэм пае Ерусэлэм кІохэ зыхъукІэ, язиусхьан ехъуд пачъыхьэу РэхъабІам агухэмкІэ зыфагъэзэжьыщт, сэ саукІынышъ, ахэр ехъуд пачъыхьэу РэхъабІам гоуцожьыщтых». 28 Арыти, пачъыхьэр яупчІыжьи шкІитІу дышъэм харигъэшІыкІи ариІуагъ: «Ерусэлэм бащэрэ шъукІуагъ. Мары шъуитхьэхэр, Израилыр, мысыр чІыгум укъизыщыжьыгъэхэр». 29 Зыр Бэтэл, адрэр Даным ащигъэуцугъэх. 30 Джащ къыхэкІэу псэкІод ашІагъ, сыда пІомэ цІыфхэр тІумэ яз дэжь, Даными нэс кІохэу, рагъэжьагъ. 31 ЯрабІам къурмэнхэр зыщашІырэ лъэгапІэм тхьэлъэІупІэунэ тыригъэуцуагъ, Лэуй ыкъомэ ащымыщхэу, цІыфмэ къахихыгъэхэр къурмэнышІэу кІэригъэуцуагъэх. 32 Ехъудэм зэрэщашІыщтыгъэм фэдэу, яенэрэ мазэм ияпшІыкІутфэнэрэ мафэ агъэмэфэкІынэу ЯрабІам ыгъэнэфагъ. Ежь къурмэнхэр къурмэншІыпІэм щишІыщтыгъэх. ШкІитІоу ыгъэуцугъэхэм пае къурмэнхэр Бэтэл щишІыгъ. ЛъэгапІэу ыгъэуцугъэхэм афэгъэзэгъэнхэу къурмэнышІхэр Бэтэл щигъэнэфагъэх. 33 Яенэрэ мазэм ияпшІыкІутфэнэрэ мафэу нэрышэ-гурышэкІэ ежь ыгъэнэфагъэм тефэу Бэтэл щигъэуцугъэ къурмэншІыпІэм кІуагъэ. Израил цІыфхэм зыщагъэмэфэкІыщтыр ыгъэнафи, гъомэ ІашІухэр къызпиххэрэр щигъэстынхэм пае, къурмэншІыпІэм екІолІагъ.
Тхьэм илІыкІо ЯрабІам зэригъэмысагъэр
1 ЯрабІам гъомэ ІашІухэр къызпиххэрэр щигъэстынхэм пае къурмэншІыпІэм зыщыкІэрытыгъэ уахътэм тефэу Тхьэм илІыкІо, Зиусхьаным унашъо къыфишІыгъэти, Ехъудэм къикІи Бэтэл къэкІуагъ. 2 Арыти, къурмэншІыпІэр ымыдэу Зиусхьаным унашъоу къыфишІыгъэр ащ къыІуагъ: «О, къурмэншІыпІэр, о, къурмэншІыпІэр! Зиусхьаным ыІорэр мары: „Даут иунагъо Иощыехъу ыцІэу шъао къихъухьащт. Ащ къурмэнышІхэу гъомэ ІашІухэр къызпиххэрэр къурмэн зыщашІырэ лъэгапІэхэм ащызгъэстхэрэр къурмэн уашъхьагъ щишІыщтых, цІыф къупшъхьэхэри уакІыІу щигъэстыщтых“». 3 ГъэунэфыпІэр зыфэдэщтри а мафэм къыгъэнафи къариІуагъ: «Зиусхьаным ар зэриІуагъэм ишыхьатыщтыр мары: мыдэ мы къурмэншІыпІэр зэбгырызыщт, ащ телъ яжьэри зэбгырыутысыкІыжьыщт». 4 Тхьэм илІыкІо Бэтэл дэт къурмэншІыпІэр ымыдэу къыІуагъэр пачъыхьэм зызэхехым ЯрабІам ыІэ къурмэншІыпІэм къытырихи, адрэм фигъази къыІуагъ: «Шъуубыт ар». ЫІэ къызеІэтым, ащ ыдэжькІэ ыгъэзагъэти, ар голІыкІи, римыдзыхыжьышъоу къэнагъ. 5 Зиусхьаным унашъо къызэрэфишІыгъэм тетэу, Тхьэм илІыкІо къариІогъэгъэ гъэнэфапІэм тефэжьэу къурмэншІыпІэр зэбгырызыгъ, къурмэншІыпІэм телъыгъэ яжьэри зэбгырыутысыкІыжьыгъ. 6 Арыти, пачъыхьэм Тхьэм илІыкІо риІуагъ: «Уи Зиусхьанэу Тхьэм гукІэгъу къысфегъэшІи, сІэ къездзыхыжьышъунэу сфелъэІу». Ар дэдэм Тхьэм илІыкІо Зиусхьаным елъэІуи, пачъыхьэм ыІэ ыпэкІэ зэрэщытыгъэм фэдэу ыгъэІорышІэу хъужьыгъэ. 7 ЕтІанэ пачъыхьэм Тхьэм илІыкІо риІуагъ: «Усигъусэу унэм къыздихьи гъомылэм хаІ, шІухьафтыни къыостын». 8 Ау Тхьэм илІыкІо пачъыхьэм риІуагъ: «Уиунэ ыкІэлъэныкъо къысэптыщткІи ащ сыбдихьанэп, мы чІыпІэм хьалыгъуи щысшхынэп, пси сыщешъонэп. 9 Сыда пІомэ Зиусхьаным мыщ фэдэу къысиІуагъ: „Ащ хьалыгъу щымышх, пси ущемышъу, гъогоу узэрыкІуагъэми укъырымыкІожь“». 10 Арыти, ар нэмыкІ гъогу рыкІуагъ, Бэтэл къызэкІом къызэрыкІогъэгъэ гъогумкІэ къыгъэзэжьыгъэп. 11 ТхьэлІыкІо лІыжъ горэ Бэтэл дэсыгъ. Ащ ыкъомэ ащыщ горэ ыдэжь къэкІожьи, Тхьэм илІыкІо непэ Бэтэл щишІагъэр къыфиІотэжьыгъ. Ащ пачъыхьэм риІуагъэхэри адрэ ыкъохэм ятэ къыфаІотэжьыгъ. 12 «Тара ар зэрыкІогъэ гъогур?» – ыІуи тыр ахэм зяупчІым, Тхьэм илІыкІоу Ехъудэм къикІыгъагъэр зэрыкІожьыгъэ гъогур ыкъохэм къырагъэлъэгъугъ. 13 «Уанэр щыдым къысфытешъулъхь», – ыкъохэм ащ зареІом, уанэр щыдым къыфытыралъхьагъэти, ар ащ тетІысхьагъ. 14 Тхьэм илІыкІо лъежьи адрэр чъыг чІэгъым чІэсэу рихьылІагъ. Арыти, риІуагъ: «Ора Тхьэм илІыкІоу Ехъудэм къикІыгъэр?» Адрэм «Сэры» къыриІожьыгъ. 15 Арыти, мыдрэм риІуагъ: «Тадэжь некІоба, гъомлапхъэм ухэІан». 16 Адрэм къыриІожьыгъ: «Сэ къэзгъэзэжьынышъ шъуадэжь сыкъэкІон слъэкІыщтэп. А чІыпІэм гъомлапхъи уадэжь щызІузгъэфэщтэп, пси сыщешъощтэп, 17 сыда пІомэ Зиусхьаным къысиІуагъ: „А чІыпІэм ущымышх, пси ущемышъу, гъогоу узэрыкІогъагъэми къэбгъэзэжьмэ укъырымыкІожь“». 18 Арыти, мыдрэм ащ риІуагъ: «Ощ фэдэу сэри сытхьэлІыкІу. Зиусхьаным унашъоу къыпфишІыгъэр мэлэІычым къысиІожьыгъ: „Ащ къегъэгъэзэжьи уадэжь къыздащ, хьалыгъуи егъэшх, псыкІи зерэгъэшъокІ“». Ащ ар ыгъэпцІагъ. 19 Джаущтэу ащ къыдигъэзэжьи иунэ хьалыгъу щишхыгъ, пси щешъуагъ. 20 Ахэр Іанэм джыри пэсхэзэ тхьэлІыкІоу къезгъэгъэзагъэм Зиусхьаныр къыдэгущыІагъ. 21 Тхьэм илІыкІоу Ехъудэм къикІыгъэм фэгъэхьыгъэу къыриІуагъ: «Зиусхьаным ыІорэр мары: „Зиусхьаным къыпфишІыгъэ унашъом уемыдэІоу, уи Зиусхьанэу Тхьэм къыпфигъэпытагъэр умыгъэцакІэу, 22 къэбгъэзэжьи, ‘Хьалыгъуи щымышх, пси ущемышъу’ Ащ зыфиІогъэ чІыпІэм хьалыгъу зэрэщыпшхыгъэми псы узэрэщешъуагъэми апае уихьадэ уятэхэр зычІэлъ къэунэм чІалъхьажьыщтэп“». 23 Тхьэм илІыкІо хьалыгъу ышхи псыкІи зызегъэшъокІым, тхьэлІыкІом ищыд къызэригъэгъэзагъэм уанэр фытырилъхьагъ. 24 Джащ тетэу адрэр гъогум техьажьыгъ. Арыти, аслъаныр ыпэ къифи ащ ылІыгъ. Ихьадэ гъогу гузэгум тедзэжьыгъэу телъыгъ, щыдри шъхьащытыгъ, аслъаныр хьадэм дэжь щытыгъ. 25 КъыблэкІырэ цІыфмэ гъогум телъ хьадэри хьадэм дэжь щыт аслъанри алъэгъугъэхэти, тхьэлІыкІо лІыжъыр зыдэсыгъэ къалэм кІохи щаІотагъ. 26 Ащ гъогум къыщезгъэзэгъэгъэ тхьэлІыкІом аІорэр зызэхехым ыІуагъ: «Ар Тхьэм илІыкІоу Зиусхьаным къыфишІыгъэ унашъом емыдэІугъэр ары. Зиусхьаным къызэрэриІогъагъэм фэдэу, Зиусхьаным ар аслъаным пэкІигъафи, адрэм ар зэхицунтхъи ыгъэлІагъ». 27 ЕтІанэ ыкъохэм ащ ариІуагъ: «Уанэр щыдым къысфытешъулъхь». Уанэр къыфытыралъхьагъ. 28 Ар ежьи гъогум тедзэгъэ хьадэр къыгъотыжьыгъ. Аслъанымрэ щыдымрэ хьадэм кІэрытыгъэх, аслъаным ар ышхыгъэп, щыдри зэхилІыхьагъэп. 29 ТхьэлІыкІом Тхьэм илІыкІо ихьадэ къыІати, щыдым къытырилъхьи, къыгъэзэжьи къыщэжьыгъ. А тхьэлІыкІом Тхьэм илІыкІо ихьадэ ыгъэеным, ыгъэтІылъыжьыным пае икъалэ къыгъэзэжьыгъ. 30 Арыти, хьадэр ежьхэм якъэунэ дилъхьи, «Е-о-ой-гущ, сикъош!» – ыІозэ, ыгъэежьыгъ. 31 Ар зегъэтІылъыжьыхэм ыкъохэм ащ ариІуагъ: «СызылІэкІэ, Тхьэм илІыкІо зыдэслъхьэжьыгъэ къэунэм сэри сычІэшъулъхьажь, сэ сикъупшъхьэхэри ащ икъупшъхьэхэм акІэрышъулъхьажьых. 32 Зиусхьаным Бэтэл дэт къурмэншІыпІэр, Щамэрэн хэкум ит къалэхэм къурмэн зыщашІырэ ялъэгапІэхэм атет тхьэлъэІупІэунэхэр ымыдэхэу ышІыгъэ унашъор гъэцэкІэжьыгъэ хъущт». 33 Ащ ыуж ЯрабІам зытетыгъэ гъогу пхэнджым къытемыкІэу, лъэпкъ пстэумэ ащыщ къурмэнышІхэр къурмэн зыщашІырэ лъэгапІэхэм аІуигъахьэщтыгъэх. Хэтми фаер къурмэн зыщашІырэ лъэгапІэм икъурмэнышІ хъунэу ыукъэбзти, тыригъахьэщтыгъэ. 34 ЯрабІам иунагъо ащ псэкІодым хищэщтыгъэ, унэхъунымрэ дунаим текІодыкІыжьпэнымрэ афищэщтыгъэх.
ЯрабІам ыкъо зэрэлІагъэр
1 А уахътэм ЯрабІам ыкъо Абие сымаджэ хъугъэ. 2 Арыти, ЯрабІам ишъуз риІуагъ: «Тэджи, ЯрабІам узэришъузыр къамышІэнэу, уищыгъын зэблэхъуи, Щылэу кІо. Мы цІыфлъэпкъым сызэрипачъыхьащтыр къысэзыІогъэгъэ тхьэлІыкІоу Ахъый ащ дэс. 3 ХьалыгъуипшІ, хьалыу тІэкІу горэ, шъоу къошын аІоу зыдаштэхи ыдэжь кІуи кІалэм къырыкІощтыр къыуиІощт». 4 ЯрабІам ишъуз джаущтэу ышІыгъ: Щылэу кІуи Ахъый иунэ ихьагъ. Ахъый жъы зэрэхъугъэм къыхэкІэу ынэхэм алъэгъужьыщтыгъэп. 5 Зиусхьаным Ахъый къыриІуагъ: «ЯрабІам ыкъо сымаджэшъ, ащ пае къыоупчІынэу ишъуз уадэжь къэкІо. Мыры, мыры Іуи, еІу». Арыти, бзылъфыгъэм нэмыкІ цІыф фэдэу зишІи ащ ыдэжь къэкІуагъ. 6 Ар унэм къихьи, ылъэмакъэхэр Ахъый къызызэхехым риІуагъ: «КъакІо, ЯрабІам ишъуз, сыд пае нэмыкІ цІыф фэдэу зыпшІыгъа? Сэ пшъэрылъ хьылъэ къыпфысиІ. 7 КІожьи ЯрабІам еІу: „Израилым и Зиусхьанэу Тхьэм ыІорэр мары: ‘ЦІыф къызэрыкІомэ уакъыхэсщи лъэрыхьэ усшІыгъ, Израилым урипачъыхьанэу дагъэ Сэ къыпщысфагъ. 8 Даут иунагъо пачъыхьагъур къыІэкІэсхыжьи о къыостыгъ. Ау о Сиунашъохэр зыгъэцакІэщтыгъэу, ыгукІэ зэрэщыт къабзэу къысфэщэгъагъэу, къысэкІущтым нэмыкІ зымышІэгъэ СиІумэт Даут уфэдэп. 9 О уапэкІэ щыІэгъэ пстэуми анахь дэеу узекІуагъ, сыбгъэгубжынэу укІуи нэмыкІ тхьэхэмрэ тхьэпапкІэхэмрэ бгъэуцугъэх, сыщыбгъэзыягъ. 10 Джащ пае ЯрабІам иунагъо тхьамыкІагъо къыфэсхьын. ЯрабІам иунагъо хъулъфыгъэ гори къисымыгъанэу зэкІэ Израилым щызгъэкІодын, адрэ къэнагъэхэр шъхьафитныгъэ ямыІэу, абгынэжьыгъэхэу Израилым щысшІыных, хэкІыр зэрэрапхъэнкІыкІэу, ЯрабІам иунагъо зэрэщытэу лъэкъабзэ изгъэфэн. 11 Хэтми ЯрабІам иунагъо щыщэу къалэм щылІэрэр хьэмэ ашхыжьыщт, губгъэм илІыхьэрэр ошъогу бзыумэ зэхаулыІухьажьыщт’“. Зиусхьаным джаущтэу къыІуагъэшъ ары. 12 Джы шъуадэжь кІожь. Къалэм узэрэдэхьажьыгъэм тетэу уишъао лІэщт. 13 Израил цІыфхэм зэкІэми ар агъэежьынышъ агъэтІылъыжьыщт. А зы закъор ары ЯрабІам иунагъо щыщэу къэунэм далъхьажьыщтыр, сыда пІомэ ЯрабІам иунагъо щыщэу Израилым и Зиусхьанэу Тхьэр нэшІукІэ къызэплъыгъэр джары. 14 Зиусхьаным Израилым пачъыхьакІэ щызфишІыщт, джары ЯрабІам иунагъо непэ зыгъэкІодыщтри: джыдэдэми. 15 Зиусхьаныр Израилым итемыр къыфырехыщт, псым хэт къамылым фэдэу ар ыгъэкІэзэзынышъ, тхьэнэпцІэу Астартэ пкъэухэр зэрэфагъэуцугъэхэм, Зиусхьаныр зэрагъэгубжыгъэм пае ятэмэ къаритыгъэ чІыпІэшІум израил цІыфхэр риукъэбзыкІынхэшъ, Евфрат псыхъо кІыбым щыритэкъухьащтых. 16 ЯрабІам псэкІодэу ышІагъэхэм, ахэмкІэ Израилым псэкІод зэрэригъэшІагъэм апае Ащ Израилыр къыбгынэщт». 17 ЯрабІам ишъуз ежьэжьи Тырцэ кІожьыгъэ. Унэ пчъэшъхьаІум елъэбэкъожьыгъэ къодыеу шъаор лІагъэ. 18 Зиусхьаным ИІумэт тхьэлІыкІоу Ахъый къызэрэриІогъагъэм фэдэу, зэрэ Израилэу ар ыгъэтІылъыжьи ыгъэежьыгъ.
ЯрабІам ихьадэгъу
19 ЯрабІам адрэ иІофхэри, ар зэрязэуагъэри, ипачъыхьагъу зэрэзэрихьагъэри израил пачъыхьэмэ яхьылІэгъэ Іэпэрытххэм арытхагъэхэба. 20 ЯрабІам пачъыхьагъум илъэс тІокІырэ тІурэ тетыгъэу лІи, ятэ пІашъэхэр зыдэщыІэхэм ыгъэзэжьыгъэти, ыкъо Нэдэб ащ ычІыпІэ пачъыхьагъум техьагъ.
Ехъуд пачъыхьэу РэхъабІам
21 Сэлмэн ыкъо РэхъабІам Ехъудэм пачъыхьагъум щытетыгъ. РэхъабІам пачъыхьагъум зытехьэм илъэс тІокІитІурэ зырэ ыныбжьыгъэр. Ерусэлэм дэсэу илъэс пшІыкІублэ ар пачъыхьагъ. Ежь ыцІэ епхыгъэнэу Зиусхьаным израил лъэпкъ пстэумэ а къалэр къахихыгъ. РэхъабІам янэ ыцІагъэр НаІамэ, Іамоныпхъугъ. 22 Зиусхьаным къемыкІущтыр Ехъудэм ышІэщтыгъэ, ятэмэ ашІэгъэ псэкІодмэ анахь лъэшыжьэу псэкІодхэр зэрашІэщтыгъэм Ар нахьыбэ дэдэу зэщафщтыгъ. 23 Ахэм къурмэнхэр зыщашІырэ лъэгапІэхэр, пкъэухэр, мыжъосынхэр Іошъхьэ лъагэ пэпчърэ чъыг жьау пэпчърэ ащагъэуцугъэх. 24 ЦІэпІагъэхэр зышІэрэ хъулъфыгъэхэмрэ бзылъфыгъэхэмрэ а хэкум исыгъэх. Ахэм Зиусхьаным израил цІыфмэ ахифыжьыгъэ лъэпкъхэм ашІэщтыгъэ гущыкІыгъо емыкІушхохэр ашІэщтыгъэ. 25 РэхъабІам зыпачъыхьэр илъэситфым зынэсым Мысырым ипачъыхьэу Щыщакъ Ерусэлэм къезэонэу къытебани, 26 Зиусхьаным и Унэрэ пачъыхьэм иунэрэ арылъыгъэ пкъыгъо лъапІэхэр зэкІэ ыштагъ. Сэлмэн аригъэшІыгъэ дышъэ мэІухэри зэкІэ ыштагъ. 27 Пачъыхьэу РэхъабІам ахэм ачІыпІэ джэрз мэІухэр аригъэшІхи, ахэр пачъыхьэм иунэихьапІэ Іутыгъэ ухъумакІохэм яІэшъхьэтетхэм аритыгъэх. 28 Пачъыхьэр Зиусхьаным и Унэ чІахьэ къэс иухъумакІохэм ахэр къахьыщтыгъэх, етІанэ ухъумакІохэр зэрысырэ унэм икІэрыкІэу ахьыжьыщтыгъэх. 29 Ащ нэмыкІэу РэхъабІам къырыкІуагъэмрэ ышІагъэхэмрэ ехъуд пачъыхьэхэм яхьылІэгъэ Іэпэрытххэм арытхагъэхэба. 30 РэхъабІамрэ ЯрабІамрэ ренэу зэзаощтыгъэх. 31 ЕтІанэ РэхъабІам ятэ пІашъэхэр зыдэщыІэхэм ыгъэзэжьыгъэти, ахэм афэдэу Даут икъалэ щагъэтІылъыжьыгъ. Ащ янэ ыцІагъэр Іамоныпхъоу НаІамэ. Ащ ыуж ыкъо Абием ежь ычІыпІэ пачъыхьанэу техьагъ.
Ехъуд пачъыхьэу Абием
1 Нэуат ыкъо ЯрабІам зыпачъыхьэр илъэс пшІыкІуим хэхьагъэу Абием Ехъудэм ипачъыхьэ хъугъэ. 2 Илъэсищэ ар Ерусэлэм щыпачъыхьагъ. Ащ янэу Абищэлэм ыпхъу ыцІагъэр МаІах. 3 Ежь ыпэкІэ ятэ ышІэгъэ псэкІод пстэуми ар ахэтыгъ. Ятэшхо Даут Зиусхьанэу Тхьэм зэрэфэшъыпкъагъэм фэдэу ыгукІэ шъыпкъагъэ фыриІагъэп. 4 Ау щыт нахь мышІэми, Зиусхьанэу Тхьэм Даут ихьатыркІэ, ежь ыуж ыкъо пачъыхьагъум тыригъахьи, ижъуагъо инэф Ерусэлэм щигъэкІосагъэп, ащкІэ Ерусэлэм ыгъэлъэшыгъ. 5 Сыда пІомэ Даут, хьатэу Урый ришІагъэм нэмыкІэу, Зиусхьаным къекІущтыр зэкІэ ышІэщтыгъэ, ежь щэІэфэ Ащ къыфигъэнэфагъэхэм адэхыгъэп. 6 РэхъабІамрэ ЯрабІамрэ щэІэфэхэ зэзэуагъэх. 7 АдыкІэ Абием къырыкІуагъэхэр ехъуд пачъыхьэхэм яхьылІэгъэ Іэпэрытххэм арытхагъэхэба. Абиемрэ ЯрабІамрэ зэзаощтыгъэх. 8 Абием ятэ пІашъэхэр зыдэщыІэм ыгъэзэжьи, Даут икъалэ щагъэтІылъыжьыгъ. Арыти, ыкъоу Асэ ащ ычІыпІэ пачъыхьагъум техьагъ.
Ехъуд пачъыхьэу Асэ
9 Израилым ипачъыхьэу ЯрабІам зыпачъыхьэр илъэс тІокІым хэхьагъэу Асэ Ехъудэм ипачъыхьэу хъугъэ. 10 Ар илъэс тІокІитІурэ зырэ Ерусэлэм щыпачъыхьагъ. Ащ янэщтыгъэр Абищэлэм ыпхъу МаІах ары. 11 Ятэшхо Даут фэдэу Асэ Зиусхьаным къекІущтыр ышІэщтыгъэ. 12 Арыти, цІэпІагъэхэр зышІэрэ хъулъфыгъэхэмрэ бзылъфыгъэхэмрэ хэгъэгум рифхи, тхьэнэпцІмэ ямыжъосынхэу ятэжъмэ агъэуцугъэхэр ыгъэкІодыжьыгъэх. 13 ТхьэнэпцІ Астартэ имыжъосын зэригъэуцугъэм пае янэ МаІах пачъыхьэгощацІэм хигъэкІи, а мыжъосыныр зэхикъутэжьи, псыигъукІыгъэ зэпырыкІыпІэу Къыдрэн дэжь щигъэстыжьыгъ. 14 Ау къурмэнхэр зыщашІырэ лъэгапІэхэр зэхакъутэгъагъэхэп. Ау щыт нахь мышІэми, Асэ опсэуфэ ыгукІэ Зиусхьаным фэшъыпкъагъ. 15 Джаущтэу ащ ятэ Зиусхьаным фигъэшъошэгъэ тын лъапІэхэри, ежь фигъэшъошэгъэ пкъыгъо лъапІэхэу дышъэмрэ тыжьынымрэ ахэшІыкІыгъэхэри, шыкъухэри Зиусхьаным и Унэ чІилъхьагъэх. 16 Асэрэ Израилым ипачъыхьэу БаІыщэрэ щэІэфэхэ зэзаохэзэ къахьыгъ. 17 Израилым ипачъыхьэу БаІыщэ Ехъудэм пэшІуекІоу къежьи, Ехъудэм ипачъыхьэу Асэ ыдэжькІэ къикІхэрэр къыблимыгъэкІынхэми, ащ дэжь ымыгъэкІонхэми апае Рамэ ыгъэпсынэу фежьагъ. 18 Арыти, Асэ Зиусхьаным и Унэ игъэтІылъыпІэхэмрэ пачъыхьэ унэм игъэтІылъыпІэхэмрэ къарынэжьыгъэ тыжьынымрэ дышъэмрэ зэкІэ къариххи иІумэтхэм аритыгъ. ЕтІанэ Хъэзион ыкъо Тауримэн къыхэкІыгъэу, Арамым ипачъыхьэу, Дамаск дэсыгъэ Бэнхадад дэжь ыгъакІохи раригъэІуагъ: 19 «Тятэрэ уятэрэ зэзэгъыныгъэ зэрэзэдыряІагъэм фэдэу, оррэ сэррэ зэзэгъыныгъэ зэдытерэІ. Мары тыжьынрэ дышъэрэ тынэу къыпфясэгъэхьхэшъ, Израилым ипачъыхьэу БаІыщэ дэпшІыгъэ зэзэгъыныгъэр скІэрыкІыжьынэу зэщыгъакъу». 20 Бэнхадад пачъыхьэу Асэ къедэІуи, идзэІэшъхьэтетхэр израил къалэхэм язэонхэу ыгъакІохи, Іиони, Дани, Абэл-Бэт-МаІахи, Къынэрэти зэрэщытэу, зэрэ Нафталый хэкоу ыштагъэх. 21 А къэбарыр зызэхехым, БаІыщэ Рамэ изэтегъэпсыхьан ыуж икІыжьи, Тырцэ къыгъэзэжьыгъ. 22 Пачъыхьэу Асэ зы къэмынэу ехъудхэм зэкІэми унашъо афишІи псэуалъэм пае БаІыщэ ыгъэфедэщтыгъэ мыжъохэмрэ пчъэхэмрэ Рамэ къыдаригъэхыжьыгъэх. Пачъыхьэу Асэ ахэм Бинямин хэкум ылъэныкъокІэ щыІэ ГъыбІэ къалэмрэ Мыцпэ къалэмрэ ахишІыкІыжьыгъэх. 23 Асэ нэмыкІэу ыгъэхъагъэхэри, лІыгъэу зэрихьагъэхэри, зэкІэ ышІагъэхэри, къалэу ыгъэпсыгъэхэри ехъуд пачъыхьэхэм яхьылІэгъэ Іэпэрытххэм арытхагъэхэба. Ащ ижъышъхьэм ылъакъохэр узыщтыгъэх. 24 Асэ ятэ пІашъэхэр зыдэщыІэм ыгъэзэжьыгъэти, ятэшхо Даут икъалэу ятэжъхэр зыдэлъхэм щагъэтІылъыжьыгъ. Джащ тетэу ащ ыкъо Ехъощафат ежь ычІыпІэ пачъыхьагъум техьагъ.
Израил пачъыхьэу Надаб
25 Ехъудэм ипачъыхьэу Асэ зыпачъыхьэр ятІонэрэ илъэсым хэхьагъэу ЯрабІам ыкъо Надаб Израилым ипачъыхьэу техьи илъэситІо Израилым ипачъыхьагъ. 26 Зиусхьаным къемыкІущтыр ащ ышІэщтыгъэ, ятэ игъогу тетыгъ, ащ ипсэкІодшІагъэхэу Израилым псэкІод зэрэригъэшІагъэхэм афэдэхэри ышІагъ. 27 Арыти, Исасхъар лІакъом щыщэу, Ахъый ыкъо БаІыщэ ащ зыкъыпиІэтыгъ. Надабрэ зэкІэ израил цІыфхэмрэ фылистмэ якъалэу Гъыбытон къадзыхьагъэу зыщаІыгъым, БаІыщэ ар Гъыбытон дэжь щиукІыгъ. 28 Ехъудэм ипачъыхьэу Асэ зытетыр ящэнэрэ илъэсым хэхьагъэу БаІыщэ ар ыукІи, ежь ащ ычІыпІэ техьагъ. 29 Ар пачъыхьагъум зытехьэм, Зиусхьаным ИІумэтэу Щылэу щыщ Ахъый къызэрэригъэІогъагъэу, ЯрабІам иунагъо щыщэу зы нэбгырэ закъуи къэмынэу, зэрэщытэу зэкІэ ыгъэкІодыгъ. 30 ЯрабІам ышІыгъэ псэкІодшІагъэхэм, ащкІэ Израилым псэкІод зэрэригъэшІагъэм, Израилым и Зиусхьанэу Тхьэр ыгъэгубжэу ынапэ зэрэтырихыгъэм джар къыфихьыгъ. 31 Надаб нэмыкІэу ыгъэхъагъэхэри зэкІэ ышІагъэхэри израил пачъыхьэхэм яхьылІэгъэ Іэпэрытххэм арытхагъэхэба. 32 Асэрэ Израилым ипачъыхьэу БаІыщэрэ опсэуфэхэ зэзэоным хэтыгъэх.
Израил пачъыхьэу БаІыщэ
33 Ехъудэм ипачъыхьэу Асэ пачъыхьагъум зытехьагъэр ящэнэрэ илъэсым хэхьагъэу Ахъый ыкъо БаІыщэ израил цІыф пстэуми япачъыхьанэу Тырцэ щытехьи илъэс тІокІырэ плІырэ пачъыхьагъ. 34 Зиусхьаным къемыкІущтыр ащ ышІэщтыгъэ, ЯрабІам игъогу тетэу, Израилым псэкІод ащ зэрэригъэшІагъэм фэдэу, псэкІодхэр ышІагъэх.
1 Зиусхьаным ыдэжь къикІыгъэу БаІыщэ ехьылІагъэу Хъананый ыкъо Ехъыо псалъэ къылъыІэсыгъ: 2 «ТхьамыкІэмэ уакъыхэсщи сиизраил лъэпкъ пащэ узэрэфэсшІыгъэм, ЯрабІам игъогу узэрэтехьагъэм, сиизраил лъэпкъ сигъэгубжынэу псэкІодхэр зэребгъэшІагъэм пае 3 мары, БаІыщэ, иунагъуи уилъфыгъэхэм яунагъохэри згъэкІодыщтых, Нэуат ыкъо ЯрабІам иунагъо есшІагъэр ори къыосшІэщт. 4 БаІыщэ иунагъо щыщэу къалэм щылІэрэр хьэмэ ашхыжьыщт, губгъэм илІыхьэрэр ошъогу бзыумэ зэхаулыІухьажьыщт». 5 БаІыщэ нэмыкІэу къырыкІуагъэхэри, ышІагъэхэри, зэкІэ ыгъэхъагъэхэри Израилым ипачъыхьэхэм яхьылІэгъэ Іэпэрытххэм арытхагъэхэба. 6 БаІыщэ ятэ пІашъэхэр зыдэщыІэм ыгъэзэжьыгъэти, Тырцэ щагъэтІылъыжьыгъ. Арыти, ыкъо Елэ ащ ычІыпІэ пачъыхьагъум техьагъ. 7 Джащ тетэу Зиусхьаным ыдэжь къикІыгъэу Хъананый ыкъо тхьэлІыкІоу Ехъыо псалъэ къызэрэлъыІэсыгъагъэу, БаІыщэрэ ащ иунагъорэ Зиусхьаным къемыкІущтыр зэрашІагъэм, ЯрабІам иунагъо зэрэкІырыплъыгъэхэм пае Зиусхьаныр агъэгубжыгъ.
Израил пачъыхьэу Елэ
8 Ехъудэм ипачъыхьэу Асэ пачъыхьагъум зытетыр илъэс тІокІырэ хырэм хэхьагъэу БаІыщэ ыкъо Елэ пачъыхьагъум Тырцэ щытехьи илъэситІо пачъыхьагъэ. 9 Арыти, ку псынкІэхэм азыныкъо яІэшъхьэтетэу Зымрый ащ зыкъыпиІэтыгъ. Тырцэ щыІэу, ащ дэт икъэлэсэрай лъыплъэрэ Арцэ дэжь щыешъогъаеу 10 Зымрый къакІуи чатэмкІэ ащ еуи ыукІыгъ. Ехъудэм ипачъыхьэу Асэ зытетыр ятІокІэнэрэ блырэ илъэсым хэхьэгъагъ ар ащ ычІыпІэ пачъыхьагъум зытехьэм. 11 Ар пачъыхьагъум техьи тахътэм зытетІысхьэм, дэпкъым егъутхьылІэу БаІыщэ иунагъо исмэ ащыщ горэ къымыгъанэу иІахьылхэри иныбджэгъухэри зэкІэ ыукІыгъэх. 12 Джаущтэу Зиусхьаным ыдэжь къикІыгъэу Хъананый ыкъо Ехъыо псалъэ къызэрэлъыІэсыгъагъэу, Зымрый БаІыщэ иунагъо зэрэщытэу ыгъэкІодыгъ. 13 БаІыщэрэ ащ ыкъо Елэрэ псэкІодхэр ашІэзэ, Израилым псэкІодхэр зэрэрагъэшІагъэм, Израилым и Зиусхьанэу Тхьэр агъэгубжэу, тхьэнэпцІхэм ямыжъосынхэр зэрагъэуцугъэхэм апае Зиусхьаным джар къаришІагъ. 14 Елэ иІофшІагъэхэмрэ нэмыкІэу ышІагъэхэмрэ Израилым ипачъыхьэхэм яхьылІэгъэ Іэпэрытххэм арытхагъэхэба.
Израил пачъыхьэу Зымрый
15 Ехъудэм ипачъыхьэу Асэ зыпачъыхьэр ятІокІэнэрэ блырэ илъэсым хэхьагъэу, Зымрый пачъыхьэу Тырцэ щытехьи мэфиблэ тетыгъ. Израилыдзэр а уахътэм фылистмэ якъалэу Гъыбытон къекІугъэу кІэрытыгъ. 16 Арыти, израилыдзэу къэкІуагъэу щытыгъэм Зымрый шъэфэу пачъыхьэм зыкъызэрэпиІэтыгъэмрэ ар зэриукІыгъэмрэ зызэхехым, израил цІыф пстэуми дзэІэшъхьэтетэу Іомрый Израилым ипачъыхьанэу а мэфэ шъыпкъэм дзэуцупІэм щытырагъэхьагъ. 17 Іомрыйрэ зэкІэ израил цІыфхэмрэ зэгъусэхэу Гъыбытон къыкІэрыкІыжьхи, къызэкІэкІожьхи Тырцэ къадзыхьагъ. 18 Зымрый къалэр зэраштагъэр зелъэгъум, къэлэсэраим хэт унэ-пытапІэм ихьи, ыкІыбкІэ пачъыхьэ унэм машІо щыкІидзэжьи хэстыхьажьыгъ. 19 ЯрабІам Израилым псэкІод зэрэригъэшІагъэм фэдэу, ащ игъогу тетэу, ащ ышІэгъэ псэкІодхэр ышІэзэ, Зиусхьаным къемыкІущтыр зэришІагъэм пае ар хэкІодагъ. 20 Зымрый нэмыкІэу ышІагъэхэри шъэфэу зыкъызэриІэтыгъагъэри израил пачъыхьэхэм яхьылІэгъэ Іэпэрытххэм арытхагъэхэба.
Израил пачъыхьэу Іомрый
21 Джащ тетэу израил цІыфхэр тІо гощыгъэ хъугъэ: ызыныкъо Гъынат ыкъо Тыбный пачъыхьэу тырагъэхьанэу гоуцуагъ, адрэхэр Іомрый гохьагъэх. 22 Арыти, Іомрый готхэр Гъынат ыкъо Тыбный гоуцуагъэхэм атекІохи, Тыбный лІи, Іомрый пачъыхьагъум техьагъ. 23 Ехъудэм ипачъыхьэу Асэ зытетыр ящэкІэнэрэ зырэ илъэсым хэхьагъэу Іомрый Израилым ипачъыхьанэу техьи илъэс пшІыкІутІо тетыгъ. Тырцэ илъэсихэ щыпачъыхьагъ. 24 ЕтІанэ Іомрый тыжьын килограмм тІокІищ фэдизкІэ Щамэрэн къушъхьэр Щэмэр къыщищэфыгъ. Къушъхьэр зэкІигъэпытыхьи, къалэу ышІыгъэм къушъхьэр зиягъэ Щэмэр ыцІэкІэ ЩамэрэнкІэ еджагъ. 25 Зиусхьаным къемыкІущтыр Іомрый ышІэщтыгъэ, ежь ыпэкІэ тетыгъэмэ анахь Іаеу зекІощтыгъэ. 26 Нэуат ыкъо ЯрабІам игъогу сыдырэмкІи ар тетыгъ, Израилым псэкІод ащ зэрэригъэшІагъэм фэдэу, итхьэнэпцІхэмкІэ Израилым и Зиусхьанэу Тхьэр ыгъэгубжыгъ. 27 Іомрый нэмыкІэу ышІагъэхэри лІыгъэу ащ зэрихьагъэри израил пачъыхьэхэм яхьылІэгъэ Іэпэрытххэм арытхагъэхэба. 28 Іомрый ятэ пІашъэхэр зыдэщыІэм ыгъэзэжьи Щамэрэн зыщагъэтІылъыжьым, ыкъо Ахъаб ащ ычІыпІэ пачъыхьагъум техьагъ.
Израил пачъыхьэу Ахъаб
29 Ехъудэм ипачъыхьэу Асэ зытетыр ящэкІэнэрэ ирэ илъэсым хэхьагъэу Іомрый ыкъо Ахъаб пачъыхьагъум техьагъ. Іомрый ыкъо Ахъаб Щамэрэн дэсэу илъэс тІокІырэ тІурэ Израилым ипачъыхьагъ. 30 Іомрый ыкъо Ахъаб ежь ыпэкІэ тетыгъэ пстэуми анахь дэижьэу Зиусхьаным къемыкІущтыр ышІэщтыгъэ. 31 Нэуат ыкъо ЯрабІам ипсэкІодшІагъэхэр римыгъэкъухэу, Цыдоным ипачъыхьэу ЕтбаІал ыпхъу Изэбэл шъузэу къыщи, БаІал фэлажьэу, шъхьащэ фишІэу ригъэжьагъ. 32 Арыти, БаІал пае Щамэрэн щигъэпсыгъэ тхьэлъэІупІэунэм къурмэншІыпІэ щыфыхишІыхьагъ. 33 Джащ фэдэу Ахъаб Астартэ пае пкъэухэр ыгъэуцухи, ежь ыпэкІэ тетыгъэ израил пачъыхьэ пстэуми анахь лъэшыжьэу Израилым и Зиусхьанэу Тхьэр ыгъэгубжыгъ. 34 Ащ илъэхъан Бэтэл щыщ Хъыел Ерыхъоу къалэр ыгъэпсыгъ. Зиусхьаным дэжь къикІыгъэу Ныун ыкъо Ехъошуа псалъэ къызэрэлъыІэсыгъагъэу, Хъыел къэлэ лъапсэр зегъэуцум, ищыпэ шъаоу Абирам лІагъэ, къэлапчъэхэр зыхегъэуцожьхэм, ишъэо анахьыкІэу Сэгъуб чІинагъ.
ТхьэлІыкІоу Иласрэ огъумрэ
1 ГъылыІад хэкумкІэ Тыщбэ щыщ Илас Ахъаб риІуагъ: «Израилым и Тхьэу зыпашъхьэ ситыр зэрэщыІэр сэІо! Сэ сымыІоу мы илъэсхэм осэпси къемыхынкІэ, ощхи къемыщхынкІэ». 2 Зиусхьаным ипсалъэ ащ къылъыІэсыгъ: 3 «Мыщ дэкІи къокІыпІэмкІэ кІуи Иордан икъокІыпІэ лъэныкъокІэ игъукІырэ псыхъоу Къэрит дэжь зыщыгъэбылъ. 4 А игъукІырэ псыхъом псы ущешъощт, къолэжъхэм ащ дэжь ущагъэшхэнэу унашъо афэсшІыгъ». 5 Арыти, Зиусхьаным ипсалъэ къызэрэлъыІэсыгъэу ащ ышІыгъ: Иордан икъокІыпІэ лъэныкъокІэ щыІэ игъукІырэ псыхъоу Къэрит кІуи, ащ къэнагъ. 6 Къолэжъхэм пчэдыжьми пчыхьэми лырэ хьалыгъурэ къыфахьщтыгъэ, игъукІырэ псыхъом псы щешъощтыгъэ. 7 Ау тІэкІу горэ зытешІэм, ощх къещхыщтыгъэпти, игъукІырэ псыхъом псы дэмытыжьэу хъугъэ.
Иласрэ Царэфат щыщ шъузабэмрэ
8 Зиусхьаным ипсалъэ ащ къылъыІэсыгъ: 9 «Цыдоным пэгъунэгъу къалэу Царэфат кІуи ащ дэс. Уигъэшхэнэу зы шъузабэ горэм есІуагъ». 10 Арыти, ар Царэфат кІуагъэ. Къалэм икъэлапчъэ зынэсым шъузабэ горэ пхъэ къыугъоеу ылъэгъугъ. Ащ къеджи риІуагъ: «Псы тІэкІу горэ сешъонэу къошынкІэ къысфахьба». 11 ЗыфелъэІугъэр къыхьынэу ар зежьэм, мыдрэр кІэлъыджи риІуагъ: «Сэщ пае хьалыгъу такъыр гори о пІэкІэ къысфахьба». 12 Адрэм къыриІожьыгъ: «Уи Зиусхьанэу Тхьэр зэрэщыІэр сэІо! Гъэжъагъэу зыпари сиІэп, пхъэчайжъыем илъэу хьаджыгъэ Іабжыбрэ къошыным итэу тхъу тІэкІурэ ныІэп сиІэр. Пхъэ тІэкІу горэ тадэжь схьынышъ, сэррэ скъо паерэ джар згъэхьазырын, тшхынышъ, етІанэ тылІэщт». 13 Илас ащ риІуагъ: «Умыщын, кІожьи зэрэпІуагъэу шІы. Ау ыпэрапшІэу сэщ пае хьалыгъу джэгурыдзэ сфыхэхи къысфахь, етІанэ оррэ уикІалэ паерэ зыгорэ шІы. 14 Сыда пІомэ Израилым и Зиусхьанэу Тхьэм ыІорэр мары: „Зиусхьаным чІыгум ощх къызщытыригъэщхэщт мафэм нэс пхъэчайжъыем илъ хьаджыгъэм хэкІыщтэп, къошыным ит дагъэми къыщыкІэщтэп“». 15 Шъузабэр кІожьи, Илас къызэрэриІуагъэм фэдэу ышІыгъ. Джаущтэу ежьри зэрахэтэу иунагъо зэрэщытэу мэфэ заулэ ашхын агъотыгъ. 16 Зиусхьаным ипсалъэ Илас къызэрэлъигъэІэсыгъэм фэдэу, пхъэчайжъыем илъ хьаджыгъэм хэкІыщтыгъэп, къошыным ит дагъэми къыщыкІэщтыгъэп.
Илас шъузабэм икІалэ къызэригъэпсэужьыгъэр
17 ЕтІанэ а унэр зие бысымгуащэм ыкъо сымаджэ хъугъэ. Узышхо иІагъэти ар лІагъэ. 18 Арыти, бзылъфыгъэм Илас къыриІуагъ: «Сыда уиІофэу къысхэлъыр, Тхьэм ицІыф? СипсэкІодшІагъэхэр сыгу къэбгъэкІыжьынхэшъ, сикІалэ бгъэлІэным пае садэжь укъэкІуагъ». 19 Арыти, мыдрэм риІожьыгъ: «Къаштэ моу уикІалэ». Ар ащ ыбгъэгу къыкІихыжьи, ышъхьагъ тет унэу ежь зэрысыгъэм ыхьи ипІэ хилъхьагъ. 20 Зиусхьаным зыфигъази къыІуагъ: «Си Зиусхьанэу Тхьэр! Зыдэжь сис шъузабэм ыкъо бгъэлІагъэу къин хэбдзагъи адэ». 21 Гъогогъуищэ кІалэм тегъуалъхьэзэ, Зиусхьаным зыфигъази къыІуагъ: «Си Зиусхьанэу Тхьэр! Мы кІалэм ыпсэ къыхэрэхьажь!» 22 Зиусхьаным Илас ымакъэ къызэхихыгъ. КІалэм ыпсэ къыгъэзэжьи, къыхэхьажьи, ар къэпсэужьыгъ. 23 Ащ ыуж Илас кІалэр ышъхьагъ тет унэм къырищыжьи, янэ къыфищэжьи риІуагъ: «Еплъ, уикІалэ псэу». 24 Арыти, а бзылъфыгъэм Илас къыриІуагъ: «Тхьэм узэрилІыкІори Зиусхьаным дэжь къикІрэ псалъэр къызэрэплъыІэсри джы къэсшІагъ».
Иласрэ тхьэнэпцІэу БаІал илІыкІохэмрэ
1 Охътабэ тешІагъэу ящэнэрэ илъэсым Зиусхьаным ипсалъэ Илас къылъыІэсыгъ: «КІуи Ахъаб зегъэлъэгъу. Сэ чІыгум ощх къытезгъэщхэщт». 2 Арыти, Илас Ахъаб зыригъэлъэгъунэу кІуагъэ. Щамэрэн щыгъэблэшхуагъ. 3 Ахъаб къэлэсэраим лъыплъэрэ Іэшъхьэтетэу Іобадыехъу къеджагъ. Іобадыехъу Тхьэм ищынагъо лъэшэу итыгъ. 4 Изэбэл зиусхьанлІыкІохэр зыщигъэкІодыгъэхэ уахътэм, Іобадыехъу ахэм ащыщэу тхьэлІыкІохэу нэбгыришъэ зэриубытылІэжьыгъэу, нэбгырэ шъэныкъо-шъэныкъоу гъочІэгъхэм защаригъэгъэбылъыгъэу хьалыгъурэ псырэ афихьщтыгъэ. 5 Ахъаб Іобадыехъу риІуагъ: «Ежьи хэкум ит псыкъэкІопІэ пстэури, игъукІырэ псы пстэури къызэпэкІухьи, тишхэмрэ тикъыдырхэмрэ щыдгъэхъунхэу, тибылымхэр тшІомыкІодынхэм пае уц къэдгъотышъущтмэ къызэгъашІ». 6 Арыти, къызэпакІухьаным пае чІыгур зэфагощи, Ахъаб гъогу шъхьаф рыкІуагъ, Іобадыехъуи гъогу шъхьаф рыкІуагъ. 7 Іобадыехъу гъогум рыкІозэ, Илас ыпэ къифагъ. Ар ащ къышІэжьыгъэти, ынэІу егъэзыхыгъэу чІыгум зытыридзи еупчІыгъ: «Ора ар, сизиусхьанэу Илас?» 8 Адрэм къыриІожьыгъ: «Сэры, уизиусхьан дэжь кІуи еІу: „Илас мыщ щыІ“». 9 Арыти, мыдрэм риІожьыгъ: «Сыда силажьэр, Ахъаб сиукІынэу уиІумэт ащ ыІэ зыкІиплъхьарэр? 10 Уи Зиусхьанэу Тхьэр зэрэщыІэр сэІо! Сизиусхьан укъигъотыным пае цІыфлъэпкъэуи пачъыхьагъоуи къаримыгъэлъыхъугъэ зыпари къыгъэнагъэп. О укъамыгъотыгъэу заІокІэ, зыдэщыІэгъэхэ пачъыхьагъуми цІыфлъэпкъми укъызэрамыгъотышъурэмкІэ тхьэлъанэ аригъэшІыщтыгъэ. 11 Джы о къысэоІо: „КІуи уизиусхьан еІу: ‘Илас мыщ щыІ’“. 12 СызэрэпкІэрыкІыжьэу уздэхъугъэри сымышІэу Зиусхьаным Ыпсэ уІуилъэсыкІыжьыщт. Арышъ, къэбар фэсхьынэу Ахъаб дэжь сыкІоу, етІанэ ащ о узимыгъотыжькІэ, сиукІыщт, уиІумэт икІэлэгъум къыщегъэжьагъэу Тхьэм ищынагъо ит нахь мышІэми. 13 Изэбэл зиусхьанлІыкІохэр зыщигъэкІодыгъэхэ уахътэм, сэ сшІагъэр, ахэм ащыщэу нэбгыришъэ зиусхьанлІыкІохэу зэрэзэсыубытылІэжьыгъэхэри, нэбгырэ шъэныкъо-шъэныкъоу гъочІэгъхэм зызэрэщязгъэбылъыгъэри, хьалыгъурэ псыкІэрэ зэрэзгъэшхагъэхэри сизиусхьан къыраІуагъэба? 14 Джы о къысэоІо: „КІуи уизиусхьан еІу: Илас мыщ щыІ. Ащ сиукІыщти“». 15 Арыти, Илас къыІуагъ: «Зыпашъхьэ сит Зиусхьанэу ошъогу дзэхэр зиІэрылъхьэ Тхьэр зэрэщыІэр сэІо! Непэ ащ зезгъэлъэгъущт». 16 ЕтІанэ Іобадыехъу Ахъаб пэгъокІи риІуагъэти, Ахъаб Илас дэжькІэ ежьагъ. 17 Ахъаб Илас къызелъэгъум, ащ риІуагъ: «Орба зэрэ Израилэу тхьамыкІагъор къыфэзыхьырэр?» 18 Илас къыриІожьыгъ: «Сэрэп, оррэ уиунагъорэ Зиусхьаным иунашъохэр щыжъугъэзыягъэхэу, тхьэнэпцІэу БаІали адрэхэми шъхьащэ зэрафэшъушІырэм пае Израилым тхьамыкІагъор къыфэзыхьырэр оры. 19 Арышъ, гъакІохи зэрэ Израилэуи, БаІал фэлэжьэрэ лІыкІо нэбгырэ шъиплІрэ шъэныкъори, Астартэ фэлэжьэрэ лІыкІо нэбгырэ шъиплІэу Изэбэл иІэнакІэ пэсхэри Къармэл къушъхьэм дэжь къыщысфягъэугъоих». 20 Арыти, Ахъаб зэрэ Израилэу ащиІофытэхи, БаІалрэ Астартэрэ афэлэжьэрэ лІыкІохэр зэкІэ Къармэл къушъхьэм дэжь къыщаригъэугъоигъэх. 21 Илас цІыфхэм ахахьи ариІуагъ: «Джыри бэрэ шъуеджэнджэшыщта? Зиусхьаныр армэ Тхьэр, джащ зыфэжъугъаз, ау БаІалмэ, ащ зыфэжъугъаз». Ау цІыфхэм зи къаІуагъэп. 22 Илас цІыфмэ ариІуагъ: «Сэзыр ары зиусхьанлІыкІоу къэнагъэр, БаІал фэлэжьэрэ лІыкІохэр нэбгырэ шъиплІрэ шъэныкъорэ мэхъух. 23 НыбгъэшъуитІу къытэшъути, зы ныбгъэшъур ахэм арэшти, зэхарэупкІати, пхъэмэ атырарэлъхь, ау машІо кІарэмышІыхь. Адрэ ныбгъэшъур сэ згъэхьазырынышъ, пхъэмэ атеслъхьащт, ау машІо кІэсшІыхьащтэп. 24 Шъори шъуитхьэ ыцІэкІэ шъуедж, сэри си Зиусхьан ыцІэкІэ седжэщт. Тхьэу машІокІэ джэуап къэзытрэр ары Тхьэр». Арыти, зэкІэ цІыфхэм къаІуагъ: «КъапІорэр дэгъу». 25 Илас БаІал фэлэжьэрэ лІыкІохэм ариІуагъ: «Шъо шъунахьыбэшъ, ныбгъэшъуитІум яз шъухади жъугъэхьазыри, шъуитхьэ ыцІэкІэ шъуедж, ау машІом пэшъумылъхь». 26 Арыти, аратыгъэ ныбгъэшъур аубыти агъэхьазырыгъ. «БаІал, джэуап къэтыжь!» аІоу куохэзэ, пчэдыжьым къыщегъэжьагъэу щэджагъом нэс елъэІугъэх. Ау макъи-лъакъи къэІугъэп. Ахэр къурмэншІыпІэу агъэуцугъэм ыпашъхьэ щыпкІэтэ-лъатэщтыгъэх. 27 Щэджагъом Илас ахэм акІэнакІэу ариІуагъ: «Мэкъэ лъэш дэдэкІэ шъукуо нахь, ар тхьэшъ, зыгорэкІэ гупшысэм хилъэсэгъэнкІи е щагум икІыгъэнкІи, е гъогу тетынкІи, е мэчъыемэ къэгъэущыжьыгъэн фэенкІи хъун!» 28 Арыти, адрэхэм лъэшэу куохэу рагъэжьагъ, зэряхабзэу лъыпсыр къячъэхэу къамэхэмрэ пчыпыджынхэмкІэрэ зыхэпыджэжьщтыгъэх. 29 Щэджагъоми дэхыгъ, ау ахэр пчыхьэ къурмэншІыгъом нэс зеутэкІыжьыным хэтыгъэхэми, макъи-лъакъи щыІагъэп, джэуап гори зэхахыгъэп. 30 ЕтІанэ Илас цІыфхэм зэкІэми ариІуагъ: «ШъукъысэкІуалІ». ЦІыфхэр зэкІэ ащ къекІолІагъэх. Зиусхьаным икъурмэншІыпІэу зэтырадзыгъагъэр ыгъэуцужьыгъ. 31 Илас мыжъо пшІыкІутІу къыштагъ. Зиусхьаным «О пцІэщтыр Израил» къызэриІогъэгъэ Якъубэ ыкъомэ къатекІыгъэ лІэкъо пшІыкІутІум япчъагъэ ахэр фэдизыгъ. 32 Зиусхьаным ыцІэкІэ а мыжъохэм къурмэншІыпІэ ахишІыкІыгъ. ЕтІанэ лэжьыгъэ килограмм пшІыкІутІу фэдиз дэфэнэу къурмэншІыпІэр хъурэябзэу дитІыкІыгъ. 33 Ащ ыуж ащ пхъэхэр тырилъхьажьхи, ныбгъэшъур зэІихи, пхъэхэм атырилъхьажьыгъ. ЕтІанэ къыІуагъ: «Псы щэлъиплІ арызыбзэу къэшъухьи къурмэнгъэстымрэ пхъэмрэ къатешъукІ». 34 ЕтІани къариІуагъ: «Джыри джаущтэу шъушІы». Ахэм джыри джаущтэу ашІыгъ. ЕтІани къыІуагъ: «Джадэдэр ящэнэрэу шъушІы». Ящэнэрэуи зашІым, 35 псыр къурмэншІыпІэм къечъэхи, дэтІыкІыгъэм диз хъугъэ. 36 Пчыхьэ къурмэншІыгъом тхьэлІыкІоу Илас къакІэрыхьи къыІуагъ: «Зиусхьанэу, Ибрахьимэ, Исхьакъ, Израил я Тхьэр! О зы закъом Израилым узэри Тхьэри, сэ сызэрэ УиІумэтри, О къызэрэпІуагъэм фэдэу зэкІэри зэрэсшІыгъэри непэ арэшІ! 37 Джэуап къысэтыжь, Зиусхьан, джэуап къысэтыжь! О, Зиусхьан, узэрэ Тхьэри агухэр зэрэзэпырыбгъэзагъэхэри арэшІ!» 38 Ащ дэжьым Зиусхьаным имашІо къехи, къурмэнгъэстри, пхъэхэри, мыжъохэри, ятІэри, дэтІыкІыгъэм псэу дэтри ыдырыгъэх. 39 Ар залъэгъум цІыфхэм зэкІэми анэІухэр егъэзыхыгъэу пстэуми чІыгум зытырадзи къаІуагъ: «Зиусхьаныр ары Тхьэр, Зиусхьаныр ары Тхьэр!» 40 Илас ахэм ариІуагъ: «Зы нэбгырэ закъуи зимыгъэбылъыжьыным пае, БаІал итхьэлІыкІохэр шъуубытых». Арыти, ахэр къаубытхи Илас игъукІырэ псыхъоу Къышон ылъэгу дэжькІэ ыщэхи, ащ щиукІыгъэх.
Огъум икІэух
41 Илас Ахъаб риІуагъ: «КІуи шхэ, ешъу, сыда пІомэ ощхышхом ымакъэ къэІу». 42 Арыти, Ахъаб шхэнэуи ешъонэуи кІуагъэ. Илас Къармэл ышыгу зыдэкІуаем ышъхьэ чІыгум риуфэхи, ынэІу ылъэгуанджэмэ азыфагу дилъхьагъ. 43 ИІумэт шъэожъыем риІуагъ: «КІуи хым ылъэныкъокІэ къаплъэ». Адрэр кІуи къызэплъэм, – «Зыпари щыІэп» ыІуи, къыриІожьыгъ. Мыдрэм риІуагъ: «Блы екъуфэ кІуи къэкІожь». 44 Яблэнэрэм кІуи къызегъэзэжьым къыриІуагъ: «Мары цІыф Іэгум щиз хъунэу ошъуапщэ горэ хым къышъхьащэкІы». Мыдрэм риІуагъ: «КІуи Ахъаб еІу: „Ощхым ухимыубытэным пае, уику псынкІэ зэкІэшІэжьи кІожь“». 45 Ащ нэс жьыбгъэм ошъуапщэхэр къытыригъэзыхьэхи, уашъор къэушІункІи, ощхышхо къещхэу ыублагъ. Ахъаб ику псынкІэ итІысхьажьи ИзрыІэл кІэим кІуагъэ. 46 Зиусхьаным ыкІуачІэ Илас къыхэхьагъ. Илас ищыгъынхэр ыбг пишІэхи, Ахъаб ыпэ итэу ИзрыІэл кІэим нэс чъагъэ.
1 Илас зэкІэ ышІагъэри БаІал илІыкІохэр зэкІэ ичатэкІэ ащ зэриукІыгъэхэри Ахъаб Изэбэл риІуагъ. 2 Арыти, Изэбэл илІыкІо Илас дэжь рыригъэІонэу ыІофытагъ: «Тхьэмэ сифэшъуашэри нахьыбэжьи сарэгъэгъот сІуагъэр зысымыгъэцэкІэжькІэ, ахэм ащыщ нэбгырэ пэпчъ ыпсэ узэрэрыджэгугъэм фэдэу упсэ неущ мыщ фэдэ уахътэм ехъулІэу сыкъызырымыджэгужькІэ». 3 Джащ къыхэкІэу щынагъэти, ышъхьэ къыухъумэжьыным пае Ехъудэм ит БэрщэбаІ къалэм кІуи иІумэт шъэожъыер ащ къыдинагъ. 4 Ежь ежьи шъофнэкІым итэу кІозэ, зы мэфэ гъогу зызэпечым, кондэ чІэгъым чІэтІысхьи лІэныгъэр къыфэкІоным кІэлъэІузэ, ыІуагъ: «Икъунба, Зиусхьан, спсэ штэжь, тятэхэм сафэд, сызэрэнахьышІу щыІэп, афэдэ сэрэхъу». 5 Гъолъи кондэ чІэгъым щычъыягъ. Ащ дэжь мэлэІичыр къынэси къыриІуагъ: «Къэтэджи шхэ». 6 Илас ынэхэр къыззэтрехым хьалыгъу джэгурыдзэрэ псы къошынрэ ышъхьэ дэжькІэ щытыгъэх. Арыти, шхи пси ешъуи икІэрыкІэу чъыежьыгъэ. 7 Зиусхьаным имэлэІич къыгъэзэжьыгъ, къынэси къыриІуагъ: «Къэтэджи шхэ, сыда пІомэ гъогу кІыхьэ уапэ илъ». 8 Ар къэтэджыгъ, шхагъэ, псыкІэ зигъэшъокІыгъ, а гъомылэмкІэ ыкІуачІэ къыригъэхьажьыгъэу чэщ-зымэфэ тІокІитІо Тхьэм икъушъхьэу Хъорэб нэс кІуагъэ. 9 Ащ зынэсым гъочІэгъ горэм чІахьи чэщыр щырихыгъ. Зиусхьаным ипсалъэ ащ къыщылъыІэсыгъ. Зиусхьаным ащ къыриІуагъ: «Сыд мыщ щыпшІэрэр, Илас?» 10 Ащ къыІуагъ: «Зиусхьанэу ошъогу дзэхэр зиІэрылъхьэ Тхьэм пае сыгужъыягъ, сыда пІомэ израил цІыфхэм уиІуагъэ аукъуагъ, уикъурмэншІыпІэхэр зэхакъутагъэх, уитхьэлІыкІохэр чатэкІэ аукІыгъэх. Сэ сизакъоу сыкъэнагъ, спсэ хахынэу къыслъэхъух». 11 Зиусхьаным къыриІуагъ: «КъычІэкІи Зиусхьаным ыпашъхьэ къушъхьэм щытеуцу». Ащ дэжьым Зиусхьаныр къыблэкІызэ, Зиусхьаным ыпашъхьэ къушъхьэр къыщызэгуиутэу, къушъхьэцакІэхэр къызэхигъэтакъохэу жьыбгъэр лъэш дэдэу къепщагъ. Ау Зиусхьаныр жьыбгъэм хэтыгъэп. Жьыбгъэм ыуж чІыгур къэсысыгъ, ау Зиусхьаныр чІыгусысым хэтыгъэп. 12 ЧІыгусысым ыуж машІом зыкъыштагъ, ау Зиусхьаныр машІом хэтыгъэп. МэшІо ужым жьы шъабэр нахь Іэсэжьыгъэ. 13 Илас ар зызэхехым ищыгъынкІыІутелъ ынэІу къырихъуи, гъочІэгъым къычІэкІи, ащ ичІэхьапІэ дэжь уцугъэ. Арыти, макъэ горэ ащ къылъыІэси къыриІуагъ: «Сыд мыщ щыпшІэрэр, Илас?» 14 Мыдрэм риІожьыгъ: «Зиусхьанэу ошъогу дзэхэр зиІэрылъхьэ Тхьэм пае сыгужъыягъ, сыда пІомэ израил цІыфхэм уиІуагъэ аукъуагъ, уикъурмэншІыпІэхэр зэхакъутагъэх, уитхьэлІыкІохэр чатэкІэ аукІыгъэх. Сэ сизакъоу сыкъэнагъ, спсэ хахынэу къыслъэхъух». 15 Зиусхьаным ащ къыриІуагъ: «ШъофнэкІыр зэпычи, гъэзэжьи Дамаскым кІо. Ащ узынэскІэ, Арамым ипачъыхьанэу Хъазаел ышъхьэ дагъэ щыф. 16 Джаущтэу Нымщый ыкъо Ехъыо Израилым ипачъыхьанэу ышъхьэ дагъэ щыф. Абэл-Мэхъолэ щыщ Щафат ыкъо ЕлыщаІ о пчІыпІэ ихьанэу тхьэлІыкІонэу ышъхьэ дагъэ щыф. 17 Хъазаел икъамэ зыщызыухъумагъэр Ехъыо екІодылІэщт, Іыиуй икъамэ зыщызыухъумагъэр ЕлыщаІ ыукІыщт. 18 БаІал ыпашъхьэ лъэгонджэмышъхьэкІэ щемытІысэхыгъэхэу, ащ емыбэугъэхэу израил цІыфхэм ащыщэу нэбгырэ минибл зэкІэмкІи Сэ къэзгъэнагъ».
ЕлыщаІ къызэрэхахыгъэр
19 Арыти, ащ а чІыпІэр къыбгыни, ежьи Щафат ыкъо ЕлыщаІ жъоу хэтэу къыгъотыгъ. Цу тІурытІоу пшІыкІутІу ащ игъусагъ, ежь япшІыкІутІонэрэ цуитІум ауж итыгъ. Илас ащ блэкІзэ, ищыгъынкІыІутелъ шъхьащидзагъ. 20 Адрэм цухэр къыбгынэхи Илас ыуж къилъади къыриІуагъ: «Семыжьэзэ сятэрэ сянэрэ сыкъябэужьынышъ, уауж сыкъихьанэу Іизын къысэтба». Мыдрэм риІожьыгъ: «КІожьба адэ, къыпфэсшІагъэр зыщымыгъэгъупш». 21 Ар кІэрыкІоти, цуитІу ыукІи, цухэр зыкІэшІэгъэгъэ пхъэІашэр машІо ышІи, лыр ыгъажъуи, цІыфмэ арити, ахэм ар ашхыгъ. Ежь Илас ыуж ихьи иІумэтэу лэжьэнэу ригъэжьагъ.
Арамым зэрезэуагъэхэр
1 Арамым ипачъыхьэу Бэнхадад идзэ зэрэщытэу къыугъойи, пачъыхьэ щэкІрэ тІурэр, шыхэр, ку псынкІэхэр игъусэхэу кІуи Щамэрэн къыдзыхьагъ, ащ езэуагъ. 2 ИлІыкІохэр Израилым ипачъыхьэу Ахъаб дэжь къалэм ыгъакІохи раригъэІуагъ: «Бэнхадад ыІорэр мары: „Уитыжьыни уидышъи сэ сыех, уишъуз анахь дахэхэри пкъо нахьышІухэри сэ сыех“». 4 Арыти, Израилым ипачъыхьэ къыраригъэІожьыгъ: «О зэрэпІоу орэхъу, зиусхьан пачъыхьэр: сэри сиІэ пстэури о уиех». 5 ЛІыкІохэр джыри къакІохи къыраІуагъ: «Бэнхадад ыІорэр мары: „Уитыжьыни, уидышъи, уишъузхэри, пкъохэри къысэтых“ зэрэсІорэр къыуаІонэу уадэжь къэсэгъакІох. 6 Сыд хъугъэми уиуни, уиІумэтмэ яунэхэри къызэпаплъыхьанхэу, уинэплъэгъу къедэхэшІэрэ пстэури къызІакІагъэхьанышъ къахьынэу неущ мыщ фэдэ уахътэм ехъулІэу сиІумэтхэр уадэжь къэзгъэкІощтых». 7 Арыти, Израилым ипачъыхьэ хэкум ис нахьыжъ упчІэжьэгъу пстэуми къяджи ариІуагъ: «Шъуеплъ ащ бзэджагъэ горэ зэришІэным егупшысы. Сишъузхэми, скъохэми, ситыжьыни, сидышъи къызалъегъакІом зыфаер фэсшІагъ». 8 Нахьыжъ упчІэжьэгъу пстэуми зэкІэ цІыфхэми ащ къыраІуагъ: «УемыдэІу ыкІи уемызэгъ». 9 Арыти, Бэнхадад ащ илІыкІохэм ариІуагъ: «„УиІумэт дэжь апэ къызфэбгъэкІогъагъэхэр зэкІэ къыпфишІэнэу хьазыр, ау мыдрэр къыпфэсшІэн слъэкІыщтэп“ шъуІуи, сизиусхьан пачъыхьэм ешъуІожь». ЛІыкІохэм агъэзэжьи джэуапыр ащ фахьыжьыгъ. 10 Бэнхадад ащ къыраригъэІонэу ыдэжь джыри къыгъэкІуагъэх: «Тхьэмэ сифэшъуашэри нахьыбэжьи сарагъэгъот сІуагъэр зысымыгъэцэкІэжькІэ, сэри сауж итэу къакІохэрэми Іагум из хъун сапэ зыдэтхьыжьынэу Щамэрэн къыхэмынэжьэу зызэхэсымыхьаджыхьэкІэ». 11 Израилым ипачъыхьэ раІожьынэу ариІуагъ: «Заор умыухыгъэу текІоныгъэр умыгъэмэфэкІ». 12 Ар зызэхехым чэтэнгъэІагъэм чІэсэу ипачъыхьэхэм ягъусэу ешъощтыгъэ Бэнхадад иІумэтхэм ариІуагъ: «Шъузэонэу зыжъугъэхьазыр!» Ахэр къалэм екІугъэх. 13 ТхьэлІыкІо горэ Израилым ипачъыхьэу Ахъаб къекІуалІи къыриІуагъ: «Зиусхьаным ыІорэр мары: „Мы дзэшхор олъэгъуба? Сэ сызэрэ Зиусхьаныр пшІэным пае непэ ар о пІэ къислъхьащтышъ еплъ“». 14 Ахъаб ащ еупчІыгъ: «ХэткІэ?» Адрэм къыриІожьыгъ: «Хэкухэм яІэшъхьэтет пащэмэ яшъхьагъырыт дзэкІолІ ныбжьыкІэхэмкІэ». Ар еупчІыгъ: «Хэта заор къезгъэжьэщтыр?» Адрэм къыриІожьыгъ: «Оры». 15 Ахъаб хэкумэ яІэшъхьэтет пащэмэ яшъхьагъырыт дзэкІолІ ныбжьыкІэхэр къылъытагъэхэти, нэбгырэ шъитІурэ щэкІрэ тІурэ хъухэу къычІэкІыгъ. Ахэм аужкІэ зэон зылъэкІыщтыхэмрэ израил хъулъфыгъэхэмрэ зэкІэ къызелъытэхэм, нэбгырэ минибл хъухэу къычІэкІыгъ. 16 Ахэр зэуапІэм щэджагъом кІуагъэх. Ежь Бэнхадад къыготыгъэ пачъыхьэ щэкІрэ тІурэм ягъусэу чэтэнгъэІагъэм чІэсэу ешъокІаеу ешъуагъ. 17 Заом апэ дэзыублагъэхэр хэкухэм яІэшъхьэтет пащэмэ яшъхьагъырыт дзэкІолІ ныбжьыкІэхэр ары. Бэнхадад зеІофтэхэм цІыфхэр Щамэрэн къызэрэдэкІыгъэхэм икъэбар къыфахьыжьыгъ. 18 Арыти, ащ ариІуагъ: «Тямызао ашІоигъоу къэлъэІонхэу къакІохэми, псэоу къэшъуубытых, зэонэу къакІохэми, джащ фэдэу псэоу къэшъуубытых». 19 Хэкухэм яІэшъхьэтет пащэмэ яшъхьагъырыт дзэкІолІ ныбжьыкІэхэр апэ къалэм дэкІхи заом ежьагъэх, дзэр ахэм ауж итыгъ. 20 Нэбгырэ пэпчъ пыим езауи хигъэфагъ. Арамхэм къыкІатхъужьыгъэти, израил цІыфхэр ахэм ауж къилъэдагъэх. Арамым ипачъыхьэу Бэнхадад шым тесэу шыухэр игъусэхэу ышъхьэ Іуихыжьыгъ. 21 Израилым ипачъыхьэ къакІуи пыим ишхэри ику псынкІэхэри къызІэкІигъахьэхи, арамхэр хьапэ-сапэ ригъэфагъэх. 22 ТхьэлІыкІор Израилым ипачъыхьэ къекІуалІи къыриІуагъ: «КІуи зыгъэпыт, пшІэщтыр зэгъашІэ, сыда пІомэ Арамым ипачъыхьэ гъатхэм джыри къыозэощт».
Арамхэр ятІонэрэу къызэратебэнагъэхэр
23 Арамым ипачъыхьэ иІумэтхэм къыраІуагъ: «Ахэм ятхьэхэр къушъхьэмэ ятхьэхэти, къыттекІуагъэх. Ау ахэм шъофым тыщязаомэ, татекІон шъыпкъ. 24 Арышъ, пшІэщтыр мары: пачъыхьэ пэпчъ тегъэкІи дзэ купхэм япащэхэр ахэм ачІыпІэ тегъахьэх. 25 ЦІыфэу пшІокІодыгъэм фэдиз хэтэу дзэ зэхащ, шэу, ку псынкІэу уиІагъэм фэдиз зэгъэгъоти, ахэм шъофым тыщязэощт, джащыгъум татекІон шъыпкъ». Арыти, ахэм ядэІуи, къызэрэраІуагъэм фэдэу ышІыгъ. 26 КъэкІорэ гъатхэм Бэнхадад арамхэр къыугъойхи Израилым къезэонэу Афэкъ къекІолІагъ. 27 Израил цІыфхэри къызэхаугъуаехи, гъомлапхъэ къыздашти ахэм къапежьагъэх. Израил цІыфхэр пчэн Іэхъогъу мыинитІум афэдэу отэрэу загощи, ахэм апашъхьэ къиуцуагъэх. Арамхэм чІыгур зэлъаубытыгъ. 28 Тхьэм илІыкІо къакІуи Израилым ипачъыхьэ къыриІуагъ: «Зиусхьаным ыІорэр мары: „Зиусхьаныр къушъхьэмэ ятхьэ нахь кІэйхэм ятхьэп“ арамхэм зэраІорэм пае, „Сэ сызэрэ Зиусхьаныр шъушІэнэу, а дзэшхор пІэ къислъхьащт“». 29 Джаущтэу яуцупІэхэр зэпыщытхэу ахэм мэфиблэ рахыгъ. Яблэнэрэ мафэм заом даубли, израил цІыфхэм зы мафэкІэ арамхэм ялъэсыдзэ щыщэу нэбгырэ минишъэ зэхаукІагъ. 30 Адрэ къэнэжьыгъэмэ кІатхъужьи Афэкъ къалэ екІужьыгъэх. Къэнэжьыгъэ нэбгырэ мин тІокІырэ миниблрэм къэлэ дэпкъыр къатефи, ащ чІэкІодагъэх. 31 Бэнхадад къалэм дэхьажьыгъэу зы кІоцІ унэм къичъмэ адрэм илъадэу хэтыгъ. Ащ иІумэтхэм къыраІуагъ: «Израил хэгъэгум ипачъыхьэхэм гукІэгъу ахэлъэу зэхэтхыгъ. Арышъ, дзыопхъэ шэкІ пхъашэм хэшІыкІыгъэ шъыгъошъэ джанэхэр зыщытлъэнхэшъ, кІапсэхэр тшъхьэмэ атетлъхьанхэшъ Израилым ипачъыхьэ дэжь тыкІонэу изын къытэти, упсэоу укъигъэнэжьынкІи мэхъуба». 32 Арыти, дзыопхъэ шэкІ пхъашэм хэшІыкІыгъэ шъыгъошъэ джанэхэр зыщалъэхи, кІапсэхэр ашъхьэмэ атыралъхьэхи ахэр Израилым ипачъыхьэ дэжь кІохи раІуагъ: «УиІумэт Бэнхадад „СымыукІ“ еІо». Адрэр къяупчІыгъ: «Ар псэуа? Ар сэ скъош». 33 КІуагъэхэм зэхахыгъэр шІу хъун зэрилъэкІыщтым инэшанэу алъыти, ащ ыжэ къыдэзыгъэр гуІэнкІэ къапхъуати, къаІуагъ: «Ары. Бэнхадад о пкъош». Ащ къариІуагъ: «ШъукІожьи ар къысфашъущ». Бэнхадад ащ дэжь къэкІуагъ. Арыти, адрэм ар ику псынкІэ зыдыригъэтІысхьагъ. 34 Бэнхадад ащ къыриІуагъ: «Сятэ уятэ тырихыгъэ къалэхэр къыостыжьыщтых. Сятэ сатыушІыпІэхэр ежь пае Щамэрэн зэрэщигъэуцугъагъэхэм фэдэу, ори ахэр Дамаскым щыбгъэуцунхэ уфит». Ахъаб риІожьыгъ: «Зэзэгъыныгъэ зызэдэтшІыхэкІэ устІупщыжьыщт». Арыти, зэзэгъыныгъэ дишІи ар ытІупщыжьыгъ.
ТхьэлІыкІом Ахъаб зэригъэмысагъэр
35 Зиусхьаным тхьэлІыкІо зэкупэгъум щыщ горэм унашъо къыфишІыгъэти, игъусэ риІуагъ: «Сыубышъ». Ау адрэм ар ыубышъын ыдагъэп. 36 Арыти, адрэм къыриІожьыгъ: «Зиусхьаным ыІорэм узэремыдэІурэм пае, ускІэрыкІыжьыгъэу укІожьзэ, аслъаным уилІыщт». Ар ащ кІэрыкІыжьи кІожьзэ, аслъаныр къыІукІи ащ ылІыгъ. 37 ЕтІанэ тхьэлІыкІом нэмыкІ цІыф горэ къыгъоти риІуагъ: «Сыубышъ». А цІыфым тыркъохэр къытырещэфэхэ ар ыубышъыгъ. 38 ТхьэлІыкІор ежьи кІозэ пачъыхьэм гъогум щыІукІагъэти, ынэхэм анэмыкІ къыхэмыщэу ынэгу ихъуагъэу ащ ыпашъхьэ иуцуагъ. 39 Пачъыхьэр къыблэкІызэ ар ащ екууи риІуагъ: «УиІумэт зэуапІэм кІогъагъэти, зыгорэ къахэкІи цІыф горэ къысищалІи къыІуагъ: „Мы цІыфым лъыплъ, ар къызаукІыкІэ, ащ ыпсэ пае о упсэ птыжьыщт е тыжьынэу килограмм щэкІ фэдиз къысэптыжьыщт“. 40 Арыти, уиІумэт Іоф горэхэм ауж етыфэ цІыфыр ІукІодыкІыгъ». Израилым ипачъыхьэ къыриІожьыгъ: «Джары о пфэухэсыгъагъэр, ор-орэу къыхэпхыгъ». 41 Адрэм ынэгу ихъуагъэр гузэжъогъукІэ къызырехым, тхьэлІыкІомэ зэращыщыр къышІэжьыгъ. 42 Ащ пачъыхьэм риІуагъ: «Зиусхьаным ыІорэр мары: „АукІынэу зытеслъхьэгъэ цІыфыр зэрэптІупщыжьыгъэм пае, ащ ыпсэ ычІыпІэ упсэ згъэгъущт, ащ илъэпкъ ычІыпІэ о плъэпкъ згъэкІодыщт“». 43 Израилым ипачъыхьэ ыгу къэбырсырыгъэу, гухэкІ иІэу ядэжь ежьэжьи Щамэрэн нэсыгъ.
Набэт исэнэшъхьэшІапІ
1 Джыри уахътэ зытешІэм къэхъугъэр мары: изрыІэлэу Набэт сэнэшъхьэшІапІэ ИзрыІэлым, щамэрэн пачъыхьэу Ахъаб икъэлэсэрай пэблагъэу щыриІагъ. 2 Ахъаб Набэт риІуагъ: «УисэнэшъхьэшІапІэ сиунэ къыпэгъунэгъушъ, къысэти сэ ар хэтэрыкІлэжьыпІэ сшІыжьыщт. Ащ ычІыпІэ нахьышІужьыхэу сэнэшъхьэшІапІэ сэ къыостыщт е, оркІэ нахьышІумэ, ыуасэм фэдиз тыжьын къыостыщт». 3 Ау Набэт Ахъаб къыриІожьыгъ: «Сятэмэ якІэн къыостыныр Зиусхьаным ерэмыд!» 4 Арыти, Ахъаб «Тятэмэ якІэн къыостыщтэп» изрыІэлэу Набэт къызэрэриІуагъэм ыгу къыгъэбырсырыгъэуи гухэкІ иІэуи ядэжь къэкІожьыгъ. ИпІэ хэгъуалъхьи ышъхьэ ригъэзэкІыгъ, зи зыІуимыгъафэу щылъыгъ. 5 Ишъуз Изэбэл ащ ыдэжь къихьи къеупчІыгъ: «Зи умышхыжьэу сыда угу уезгъэІэжьыгъэр?» 6 Мыдрэм риІожьыгъ: «ИзрыІэлэу Набэт „УисэнэшъхьэшІапІэ тыжьынкІэ къысащ е, оркІэ нахьышІумэ, нэмыкІ сэнэшъхьэшІапІэ ащ ычІыпІэ къыостыщт“ зесэІом, „СисэнэшъхьэшІапІэ къыостыщтэп“ ыІуи джэуап къыситыжьыгъ». 7 Арыти, ишъуз Изэбэл ащ къыриІуагъ: «Израилым урипачъыхьэшъ, уитетыгъо джы къызфэбгъэфедэнба? Къэтэджи шхэ, угуи гъэчэфыжь. ИзрыІэлэу Набэт исэнэшъхьэшІапІэ сэ пІэ къизгъэхьащт». 8 Джащ тетэу Ахъаб ыцІэкІэ тхылъыпІэ тхьапэхэр ытххи, имыхъуркІэ ахэр зэтыригъэпкІэжьыгъэх. А тхылъыпІэ тхьапэхэр Набэт зыдэс къалэм инахьыжъ упчІэжьэгъухэм, ицІыф лъэрыхьэхэм афаригъэхьыгъэх. 9 Ащ мыщ фэдэу ытхыгъ: «НэкІыгъэн фаеу макъэ яжъугъэІуи, шъукъызызэрэугъойхэкІэ, Набэт зэІукІэм ыпшъэкІэ жъугъэтІыс. 10 Нэбгырэ мыхъэтитІу ащ ыпашъхьэ ижъугъэтІысхьи, „Тхьэмрэ пачъыхьэмрэ Іаягъэхэр япІолІагъ“ аІозэ шыхьатэу къэрэуцух. ЕтІанэ ар ахэшъущи, олІэфэ мыжъохэмкІэ шъуеу». 11 Арыти, къалэм щыщ лІыхэм, нахьыжъ упчІэжьэгъоу, цІыф лъэрыхьэхэу ащ дэсхэм, Изэбэл къафаригъэхьыгъэ тхылъыпІэм къызэращыфигъэпытагъэм фэдэу ашІыгъ. 12 НэкІыгъэн фаеу макъэ агъэІуи, къызызэрэугъойхэм, Набэт зэІукІэм ыпшъэкІэ агъэтІысыгъ. 13 Нэбгырэ мыхъэтитІу къахэкІи ащ ыпашъхьэ итІысхьагъэх. «Набэт Тхьэмрэ пачъыхьэмрэ Іаягъэхэр ариІолІагъэх» аІозэ, а мыхъатэхэр цІыфмэ апашъхьэ шыхьатэу щытеуцуагъэх. Ар къалэм дащи, олІэфэ мыжъохэмкІэ еохэзэ зэхаукІагъ. 14 ЕтІанэ Изэбэл дэжь раІонэу агъэкІуагъ: «Набэт мыжъохэмкІэ зэхаукІагъ, ар лІагъэ». 15 Изэбэл Набэт мыжъохэмкІэ зэхаукІи зэрэлІагъэр зызэхехым, Ахъаб риІуагъ: «КІуи изрыІэлэу Набэт исэнэшъхьэшІапІэу тыжьынкІэ къыуитынэу зыфэмыягъэр штэжь, сыда пІомэ Набэт щыІэжьэп, лІагъэ». 16 Ахъаб Набэт зэрэлІагъэр зызэхехым, изрыІэлэу Набэт исэнэшъхьэшІапІэ ыубытынэу кІуагъэ. 17 Зиусхьаным ипсалъэ Тыщбэ щыщ Илас къылъыІэсыгъ: 18 «КІуи Израилым ипачъыхьэу Ахъаб, Щамэрэн щыІэм зыІугъакІ. Мары ар Набэт исэнэшъхьэшІапІэ хэт, ар ыубытыным пае кІуагъэ. 19 Мыщ фэдэу ащ еІу: „Зиусхьаным ыІорэр мары: ‘О уукІыгъ, джы икІэн пштагъэ ара?’“ Мыщ фэдэу джыри ащ еІу: „Зиусхьаным ыІорэр мары: ‘Набэт ылъ хьэмэ зыщабзэигъэ чІыпІэм о плъи хьэхэм щабзэижьыщт’“». 20 Арыти, Ахъаб Илас риІуагъ: «Сыкъэбгъотыгъ, сипый». Адрэм къыриІожьыгъ: «Укъэзгъотыгъ, сыда пІомэ Зиусхьаным къемыкІущтхэр пшІэнэу упсэ япщагъ. 21 Арышъ, джащ пае тхьамыкІагъо къыпфэсхьын, лъэкъабзэ уисшІыхьан, Ахъаб иунагъо хъулъфыгъэ гори къисымыгъанэу зэкІэ згъэкІодын, шъхьафитныгъэ имыІэу, абгынэжьыгъэу къэзгъэнэн. 22 Нэуат ыкъо ЯрабІам иунагъорэ Ахъый ыкъо БаІыщэ иунагъорэ ясшІагъэр ори къыосшІэщт сыбгъэгубжэу сынапэ зэрэтепхыгъэм, Израилым псэкІод зэребгъэшІагъэм пае». 23 Джащ фэдэу Изэбэл ехьылІагъэуи Зиусхьаным къыІуагъ: «Изэбэл ИзрыІэл къалэм ыкІыб хьэхэм щашхыжьыщт. 24 Ахъаб иунагъо щыщэу къалэм щылІэрэр хьэмэ ашхыжьыщт, губгъэм илІыхьэрэр ошъогу бзыумэ зэхаулыІухьажьыщт». 25 Зиусхьаным къемыкІущтыр ышІэу Ахъаб ыпсэ зэрищагъэм фэдэу зыми джыри ышІагъэп. Ишъузэу Изэбэл ар ыгъэплъэхъущтыгъ. 26 Зиусхьаным израил цІыфхэм акІэлъырифыгъэ аморхэм зэряхэбзагъэу тхьэнэпцІхэм загохьэм емыкІушхо ышІагъ. 27 Ахъаб а зэкІэм къызядэІум ищыгъынхэр зэІитхъи, дзыопхъэ шэкІ пхъашэм хэшІыкІыгъэ джанэр ыкІышъо нэсынэу зыщилъагъ. ЫнэкІыщтыгъ, дзыопхъэ шэкІ пхъашэм хэшІыкІыгъэ джанэр зэрэщыгъэу гъолъыжьыщтыгъ, чэфынчъэуи хэтыгъ. 28 Зиусхьаным ипсалъэ Тыщбэ щыщ Илас къылъыІэсыгъ: 29 «Ежь Ахъаб къызэреуцолІагъэр олъэгъуа? КъызэреуцолІагъэм пае щэІэфэ тхьамыкІагъо хэзгъэфэщтэп, ау ыкъо иунагъо щэІэфэ тхьамыкІагъохэр къыфэзгъэкІощтых».
ТхьэлІыкІоу Мыхаехъурэ Ахъабрэ
1 Арамымрэ Израилымрэ зао зэдамышІэу илъэсищэ щыІагъэх. 2 Ящэнэрэ илъэсым зыхэхьэм Ехъудэм ипачъыхьэу Ехъощафат Израилым итемыр лъэныкъо ипачъыхьэ дэжь кІуагъэ. 3 Израилым ипачъыхьэ иІумэтхэм ариІуагъ: «ГъылыІадым ит къалэу Рамот тэтыеба? Арамым ипачъыхьэ ар къыІэкІэтхыжьыным пае зи тшІэрэп». 4 Арыти, ащ Ехъощафат риІуагъ: «ГъылыІадым ит къалэу Рамот пэшІуекІоу заом укъыздэкІощта?» Ехъощафат Израилым ипачъыхьэ къыриІожьыгъ: «О узэрэхъоу сэри сыхъущт, сицІыфхэри уицІыфмэ афэрэдэх, сишхэри уишхэм афэрэдэх». 5 ЕтІани Ехъощафат Израилым ипачъыхьэ къыриІуагъ: «Зиусхьаным къыупсэлъыщтыр апэ зэтэгъэгъашІэ». 6 Арыти, Израилым ипачъыхьэ тхьэлІыкІоу нэбгырэ шъиплІ фэдиз къызэІуигъакІи ариІуагъ: «ГъылыІадым ит Рамот пэшІуекІорэ заом сыкІощта хьауми сымыкІощта?» Ахэм къыраІожьыгъ: «КІо, Зиусхьаным ар пачъыхьэм ыІэ къырилъхьащт». 7 Ау Ехъощафат къэупчІагъ: «НэмыкІ зиусхьанлІыкІо горэ мыщ щыІэба ар едгъэупчІыжьыным пае?» 8 Израилым ипачъыхьэ Ехъощафат риІуагъ: «Зиусхьаным еупчІын ылъэкІынэу зы нэбгырэ горэ джыри щыІ. Ар Имлэ ыкъо Мыхаехъу ары. Ау сэ ар сфэлъэгъурэп Тхьэм къыбгъодэкІыгъэ псалъэу къышІырэм дэи нэмыкІ шІу къысэмыхъулІэнэу къырегъэкІышъ». Ехъощафат къыІуагъ: «Аущтэу умыІо, пачъыхь». 9 Арыти, Израилым ипачъыхьэ тхьамэтэ пащэмэ ащыщ горэм къеджи риІуагъ: «ПсынкІаІоу Имлэ ыкъо Мыхаехъу лъыкІу». 10 Израилым ипачъыхьэрэ Ехъудэм ипачъыхьэрэ пачъыхьэ шъуашэхэр ащыгъхэу, шъхьадж итахътэ тесэу Щамэрэн икъэлапчъэ пэчІынатІэу пчэгушхом исыгъэх. ТхьэлІыкІохэр зэкІэ ахэм апашъхьэ исхэу Тхьэм ыкІочІэ лые зэлъиштагъэхэм фэдэу зыраутэкІыжьщтыгъэ. 11 КъэнаІан ыкъо Цыдкъый бжъакъохэр гъучІым хишІыкІхи къыІуагъ: «Зиусхьаным ыІорэр мары: „Арамхэр огъэкІодыпэфэ мыхэмкІэ зэхэплІыхьащтых“». 12 ТхьэлІыкІо пстэуми, Тхьэм къариІуагъэ фэдэу, ар дэдэр къаІощтыгъэ: «ГъылыІадым ит Рамот кІо, къыбдэхъущт, Зиусхьаным ар пачъыхьэм ыІэ къырилъхьащт».
Мыхаехъу къызэратекІощтыхэр къызэрариІуагъэр
13 Мыхаехъу къеджэнэу лъагъэкІуагъэм ащ риІуагъ: «ОшІэмэ, тхьэлІыкІохэм зэдырагъаштэу къызэраІорэмкІэ, пачъыхьэм шІу къыдэхъущт. О къэпІощтри ахэм ащыщ пэпчъ къыІорэм терэф, ори шІу къаІо». 14 Ау Мыхаехъу къыриІожьыгъ: «Зиусхьаныр зэрэщыІэр сэІо! Зиусхьаным къысиІорэр ары сэ къэсІощтыр». 15 Ар пачъыхьэм дэжь къызэкІом, пачъыхьэм ащ риІуагъ: «Мыхаехъу! ГъылыІадым ит Рамот пэшІуекІорэ заом сыкІощта хьауми сымыкІощта?» Адрэм ащ къыриІожьыгъ: «КІо, уатекІощт. Зиусхьаным ар пачъыхьэм ыІэ къырилъхьащт». 16 Пачъыхьэм ащ риІуагъ: «Шъыпкъэ нэмыкІ зыпари къысэмыІонэу Зиусхьаным ыцІэкІэ тхьапшрэ тхьэлъанэ озгъэшІын фая?» 17 Арыти, адрэм къыІуагъ: «Мэлахъор зыпэмыт мэлхэр къушъхьэхэм зэращызэбгырыкІхэрэм фэдэу, зэрэ Израилэу итэкъухьагъэу слъэгъугъэти Зиусхьаным къыІуагъ: „Іэшъхьэтет пащэ ахэм яІэп, хэти мамырэу ядэжь къерэгъэзэжь“». 18 Израилым ипачъыхьэ Ехъощафат риІуагъ: «Ащ дэи нэмыкІ дэгъу горэ къэхъунэу Тхьэм ыцІэкІэ сэщ пае къызэримыІощтыр къыосІогъагъэба?» 19 Арыти, Мыхаехъу къыриІожьыгъ: «Зиусхьаным ипсалъэ зыфэдэм къедэІу. Зиусхьаныр итахътэ тесэу, иошъогу кІуачІэхэр зэкІэ къегъэуцокІыгъэхэу, иджабгъукІи исэмэгукІи щытхэу слъэгъугъэ. 20 Зиусхьаным къыІуагъ: „Хэта Ахъаб ГъылыІадым ит Рамот кІонышъ, ащ къыщыхагъэфэным пае тезгъэгушІухьащтыр?“ Зым зы къыІуагъ, адрэм нэмыкІ къыІуагъ. 21 Зы псэ горэ къахэкІоти Зиусхьаным ыпашъхьэ иуцуи риІуагъ: „Сэ тезгъэгушІухьащт“. Зиусхьаныр ащ еупчІыгъ: „Сыдэущтэу?“ 22 Адрэм къыІуагъ: „СыкІонышъ, пцІыр къязгъэІорэ псэу зысшІынышъ, зэкІэ тхьэлІыкІомэ къязгъэІощт“. Зиусхьаным къыІуагъ: „О тебгъэгушІухьанышъ, джар бгъэцэкІэщт. КІуи джащ тетэу шІы“. 23 Арышъ, Зиусхьаным пцІыр къязгъэІорэ псэр мы уитхьэлІыкІомэ зэкІэми къажэдигъэхьагъ. Ау Зиусхьаным ощ пае къыІуагъэр дэи». 24 КъынэІанэ ыкъо Цыдкъый Мыхаехъу къекІуалІи, ынэІупашъо къыкІыригъэхи къыІуагъ: «Зиусхьаным Ыпсэ сэ скІэрыкІыгъэу о укъегъэгущыІа адэ джы?» 25 Арыти, Мыхаехъу къыриІуагъ: «Зыбгъэбылъыным пае зы кІоцІ унэм укъичъмэ адрэм уилъадэу къэпчъыхьэу узщыхъущт мафэм ар нафэ о къыпфэхъущт». 26 Израилым ипачъыхьэ къыІуагъ: «Мыхаехъу шъуубыти къалэм иІэшъхьэтетэу Амонрэ пачъыхьэм ыкъо Иоащрэ афашъущи 27 мыщ фэдэу яшъуІу: „Пачъыхьэм ыІорэр мары: ‘Мыр хьапсым чІэшъудзи, сырэхьатыжьыгъэу къэсэгъэзэжьыфэ, хьалыгъу тІэкІурэ псы тІэкІурэ нахь ешъумытэу жъугъашхэ’“». 28 Арыти, Мыхаехъу къыІуагъ: «Рэхьатэу къэбгъэзэжьыщтмэ, ащыгъум Зиусхьаныр арэп къэсэзгъэІуагъэр». Джыри къыІуагъ: «ШъукъэдаІу, зэкІэ цІыфхэр!»
Ахъаб ихьадэгъу
29 Израилым ипачъыхьэрэ Ехъудэм ипачъыхьэу Ехъощафатрэ ГъылыІадым ит Рамот екІугъэх. 30 Израилым ипачъыхьэ Ехъощафат риІуагъ: «Сэ сыкъамышІэжьынэу щыгъынхэр зэблэсхъунхэшъ заом сыІухьащт, о уипачъыхьэ щыгъынхэр зыщылъэх». Израилым ипачъыхьэ къамышІэжьынэу ищыгъынхэр зэблихъухи заом Іухьагъ. 31 Арамым ипачъыхьэ ку псынкІэмэ яІэшъхьэтет нэбгырэ щэкІрэ тІурэу иІэхэм ариІуагъ: «ЦІыкІу, ины шъуІоу, нэмыкІхэм шъуапымылъэу Израилым ипачъыхьэ закъо шъуезау». 32 Ку псынкІэмэ яІэшъхьэтетмэ Ехъощафат къызалъэгъум, «Израилым ипачъыхьэн фае» аІуи, къезэонхэу къыфагъэзагъ. Арыти, Ехъощафат къякууагъ. 33 Ку псынкІэмэ яІэшъхьэтетмэ ар Израилым зэримыпачъыхьэр къызашІэм агъэзэжьыгъ. 34 Зы лІы горэм щэбзащэр ымышІахэу къыкъудыйи щабзэр зетІупщым, Израилым ипачъыхьэ тыригъафи, иашъоджэнэ ыгупэкІэ ашъоджэнэ пІон зэпыдзапІэм дэжь щыпхыриути ыуІагъ. Арыти, пачъыхьэм ишыкуао риІуагъ: «Гъэзэжьи дзэм сыхэщыжь, сыкъауІагъ». 35 Ау а мафэм заор нахьи нахь къызэкІэблагъэти, пачъыхьэр ику псынкІэ рагъэуцуи, ар ащ итэу арэмхэм апыщытыгъ. Джаущтэу пчыхьэм ар лІагъэ, лъыр иуІагъэ къичъызэ, ку псынкІэм илъадэщтыгъ. 36 Арыти, тыгъэр зыкъохьахэм дзэуцупІэм зэрэщытэу макъэ щагъэІугъ: «Шъхьадж икъалэ орэкІожь, шъхьадж ичІыгу ерэгъэзэжь!» 37 Пачъыхьэр лІи Щамэрэн къащэжьыгъ, пачъыхьэр Щамэрэн щагъэтІылъыжьыгъ. 38 Ку псынкІэр Щамэрэн псыутІэм щатхьакІыжьыгъ, Зиусхьаным къызэраригъэІогъагъэм фэдэу, хьэхэм ащ ылъ абзэигъ, бзылъфыгъэ мыхъатэхэми ар атхьакІыжьыгъ. 39 Ахъаб иІофшІагъэхэри, нэмыкІэу зэкІэ ышІагъэхэри, пыл къупшъхьэм унэр зэрэхишІыкІыгъэри, къалэу ыгъэпсыгъэхэри зэкІэ израил пачъыхьэхэм яхьылІэгъэ Іэпэрытххэм арытхагъэхэба. 40 Ахъаб ятэ пІашъэхэр зыдэщыІэм зегъэзэжьым, ыкъо Ахъазыехъу ащ ычІыпІэ пачъыхьагъум техьагъ.
Ехъуд пачъыхьэу Ехъощафат
41 Израилым ипачъыхьэу Ахъаб пачъыхьэгъум зытетыр яплІэнэрэ илъэсым хэхьагъэу Асэ ыкъо Ехъощафат Ехъудэм ипачъыхьэу техьагъ. 42 Ехъощафат пачъыхьагъум зытехьэм ыныбжьыгъэр илъэс щэкІрэ тфырэ, илъэс тІокІырэ тфырэ Ерусэлэм щыпачъыхьагъ. Ащ янагъэр Щылхъый ыпхъу Іазубэ ары. 43 Зиусхьаным къекІущтыр ышІэзэ, ятэ Асэ игъогу зэпстэумкІи ар тетыгъ, ащ текІыгъэп. 44 Ау къурмэнхэр зыщашІырэ лъэгапІэхэр зэхаригъэкъутагъэхэп, цІыфмэ ахэм къурмэнхэр ащашІыщтыгъэх, гъомэ ІашІухэр къызыпиххэри ащагъэстщтыгъэх. 45 Ехъощафат Израилым ипачъыхьэ мамыр зэзэгъыныгъэ дишІыгъ. 46 Ехъощафат нэмыкІэу ышІагъэхэри, лІыгъэу зэрихьагъэхэри, зэрэзэуагъэри ехъуд пачъыхьэхэм яхьылІэгъэ Іэпэрытххэм арытхагъэхэба. 47 Ащ ятэ Асэ илъэхъан цІэпІагъэхэр зышІэрэ хъулъфыгъэу ыкІи бзылъфыгъэу къэнэжьыгъэхэри чІыгум тыригъэкІодыкІыпагъэх. 48 А уахътэм Едомым пачъыхьэ иІагъэп, щыІагъэр пачъыхьэу агъэнэфагъэр ары. 49 Ехъощафат хымкІэ кІозэ дышъэр Офыр къырищыным пае тарщыщ къухьэмэ афэдэхэр ышІыгъэх. Ау ахэр ащ нэсыгъэхэп, сыда пІомэ Іэцыон-Гъэбэр дэжь щыкъутагъэх. 50 Ахъаб ыкъо Ахъазыехъу Ехъощафат риІуагъ: «СиІумэтхэр уиІумэтмэ ягъусэхэу къухьэхэмкІэ орэкІох». Ау Ехъощафат ащ къезэгъыгъэп. 51 Ехъощафат ятэ пІашъэхэр зыдэщыІэм зегъэзэжьым, ятэ Даут икъалэу ятэ пІашъэхэр зыдэлъхэм щагъэтІылъыжьыгъ. Ыкъо Ехъорам ащ ычІыпІэ пачъыхьагъум техьагъ.
Израил пачъыхьэу Ахъазыехъу
52 Ехъудэм ипачъыхьэу Ехъощафат зыпачъыхьэр япшІыкІублэнэрэ илъэсым хэхьагъэу Ахъаб ыкъо Ахъазыехъу Израилым ипачъыхьэу техьи, илъэситІо Израилым ипачъыхьагъ. 53 Зиусхьаным къемыкІущтыр ышІэщтыгъэ, ятэрэ янэрэ ягъогу, Израилыр псэкІодым хэзыщэгъэ Нэуат ыкъо ЯрабІам игъогу ар атетыгъ. Ар БаІал фэлажьэщтыгъэти, шъхьащэ фишІыщтыгъэти, ятэ ышІэгъэ пстэумэ къахэкІэу Зиусхьаныр лъэш дэдэу ыгъэгубжыгъ.
ТхьэлІыкІоу Иласрэ пачъыхьэу Ахъэзыехъурэ
1 Пачъыхьэу Ахъаб зэлІэм ыуж Моабым Израилым зыкъыпиІэтыгъ. 2 Мафэ горэм, Ахъазый Щамэрэн дэт ышъхьагъырэ иунэ къыпэІут хъагъэм шъхьапырызи, сымаджэ хъугъэ. Арыти, лІыкІохэр ыІофытэхи, ариІуагъ: «ШъукІуи, фылистхэм ятхьэнэпцІэу Іэкърэн къалэм дэт БаІал-Зэбуб дэжь, сыхъужьыщтмэ шъукъеупчІ». 3 Ау Зиусхьаным имэлэІич къалэу Тыщбы щыщ Илас къыриІуагъ: «КІуи, Щамэрэн дэс пачъыхьэм илІыкІохэм апэгъокІи, яІу: „Сыда Израилым Тхьэ иІэба, фылистхэм ятхьэнэпцІэу Іэкърэн къалэм дэт БаІал-Зэбуб дэжь шъукъеупчІынэу шъузкІакІорэр?“ 4 Арышъ шъуипачъыхьэ пае Зиусхьаным ыІорэр мары: „ПІэу узхэгъолъхьагъэм укъыхэмыкІыжьэу, шъыпкъэ дэдэмкІэ, улІэщт“». Арыти, Илас кІуагъэ. 5 Ахъазый ыІофытагъэхэм къагъэзэжьыгъ. Ар ахэм яупчІыгъ: «Сыда адэ къызкІэжъугъэзэжьыгъэр?» 6 Адрэхэм къыраІожьыгъ: «ЦІыф горэ тапэкІэ къикІи къытиІуагъ: „ШъукІуи, пачъыхьэу шъузыІофтагъэм дэжь жъугъэзэжьи, ешъуІу: ‘Зиусхьаным ыІорэр мары: – Сыда Израилым Тхьэ иІэба, фылистхэм ятхьэнэпцІэу Іэкърэн къалэм дэт БаІал-Зэбуб дэжь шъукъеупчІынэу шъузкІакІорэр? Джащ пае пІэу узхэгъолъхьагъэм укъыхэмыкІыжьэу, шъыпкъэ дэдэмкІэ, улІэщт’“». 7 Пачъыхьэр къэупчІагъ: «ШъуапэкІэ къикІи а гущыІэхэр къышъозыІогъэ цІыфым итеплъэ сыд фэдагъа?» 8 Ахэм ащ раІожьыгъ: «А цІыфым хъурышъо пырацэм хэшІыкІыгъэ джанэ щыгъ, шъо бгырыпхыр ыбг илъ». Пачъыхьэм къыІуагъ: «Ар Тыщбы щыщ Илас ары». 9 Арыти, дзэкІолІ шъэныкъом ипащэ идзэкІолІ шъэныкъо игъусэу ащ дэжь ыгъэкІуагъэх. Илас къушъхьэм ышыгу тесыгъэти, ар ащ дэжь дэкІуайи риІуагъ: «Тхьэм ицІыф! Укъехынэу пачъыхьэм къыуеІо». 10 Ау Илас дзэкІолІ шъэныкъомэ ипащэ къыриІожьыгъ: «Сэ Тхьэм сырицІыфышъ, машІор уашъом къерэхи, ори уидзэкІолІ шъэныкъуи шъуерэст». Арыти, машІор уашъом къехи, пащэри ащ идзэкІолІ шъэныкъуи ыстыгъэх. 11 Пачъыхьэм джыри дзэкІолІ шъэныкъом инэмыкІ пащэ идзэкІолІ шъэныкъо игъусэу ащ дэжь ыгъэкІуагъэх. Ащ Илас риІуагъ: «Тхьэм ицІыф! Пачъыхьэм ыІорэр мары: псынкІэу укъехынэу унашъо къыпфешІы». 12 Ау Илас ащ къыриІожьыгъ: «Сэ Тхьэм сырицІыфышъ, машІор уашъом къерэхи, ори уидзэкІолІ шъэныкъуи шъуерэст». Тхьэм имашІо уашъом къехи, пащэри ащ идзэкІолІ шъэныкъуи ыстыгъэх. 13 Джыри ящэнэрэ дзэкІолІ шъэныкъом ипащэ идзэкІолІ шъэныкъо игъусэу ыгъэкІуагъэх. Ящэнэрэ дзэкІолІ шъэныкъом ипащэ кІуи, ащ ыдэжь дэкІуайи, Илас ыпашъхьэ лъэгонджэмышъхьэу зыщыридзыхи, елъэІупэзэ, риІуагъ: «Тхьэм ицІыф! Сэри мыдрэ уиІумэт нэбгырэ шъэныкъоу щытми тпсэхэм ялъэпІагъэ уапашъхьэ щэрэмыкІод. 14 Мары машІор уашъом къехи мыщ ыпэрэ дзэкІолІ шъэныкъомэ япэщитІу ядзэкІолІ шъэныкъохэр зэрягъусэхэу ыстыгъэхэшъ, спсэ илъэпІагъэ уапашъхьэ щэрэмыкІод!» 15 Зиусхьаным имэлэІич Илас къыриІуагъ: «Ащ дакІу, ущымыщын». Арыти, къежьи, ащ игъусэу пачъыхьэм дэжь кІуи, 16 риІуагъ: «Зиусхьаным ыІорэр мары: „Сыда Израилым Тхьэ иІэба, фылистхэм ятхьэнэпцІэу Іэкърэн къалэм дэт БаІал-Зэбуб дэжь шъукъеупчІынэу шъузкІакІорэр? Джащ пае пІэу узхэгъолъхьагъэм укъыхэмыкІыжьэу, шъыпкъэ дэдэмкІэ, улІэщт“». 17 Арыти, Зиусхьаным Илас къызэрэригъэІуагъэм тетэу, Ахъэзыехъу лІагъэ. Ащ къо иІагъэпти, Ехъудэм ипачъыхьэу, Ехъощафат ыкъо Иорам зыпачъыхьэр ятІонэрэ илъэсым хэхьагъэу, ежь ычІыпІэ ыш Ехъорам пачъыхьагъум техьагъ. 18 Ахъазыехъу нэмыкІэу ышІагъэхэр Израилым ипачъыхьэхэм яхьылІэгъэ Іэпэрытххэм арытхагъэхэба.
Тхьэм Илас уашъом зэрэдищэежьыгъэр
1 Илас жьыбгъэшхоу къилъырэм дыхэтэу, Зиусхьаным Ежь дэжь зыщыригъэгъэзэжьын фэе уахътэр къэсыгъэу, Иласрэ ЕлыщаІрэ Гъылгъал къыдэкІыгъэхэу кІощтыгъэх. 2 Илас ЕлыщаІ риІуагъ: «О мыщ къыщыуцуба, сыда пІомэ сэ Зиусхьаным Бэтэл сегъакІо». Ау ЕлыщаІ къыриІожьыгъ: «Зиусхьаныр зэрэщыІэри о узэрэщыІэри сэІо укъэсымыбгынэнкІэ». Джаущтэу ахэр Бэтэл кІуагъэх. 3 Арыти, тхьэлІыкІо зэкупэгъоу Бэтэл дэсыгъэхэр ЕлыщаІ къыпэгъокІыхи къыраІуагъ: «Тхьэмэтэнчъэу непэ укъызэрэнэщтыр, Зиусхьаным ар непэ уашъом зэрэдищэежьыщтыр ошІа?» Ащ ариІожьыгъ: «Ар сэри сэшІэ, щыжъугъэт». 4 Илас ащ риІуагъ: «ЕлыщаІ, о мыщ къыщыуцуба, сыда пІомэ сэ Зиусхьаным Ерыхъоу сегъакІо». Адрэм къыриІожьыгъ: «Зиусхьаныр зэрэщыІэри о узэрэщыІэри сэІо укъэсымыбгынэнкІэ!» Джаущтэу ахэр Ерыхъоу къэсыгъэх. 5 Арыти, тхьэлІыкІо зэкупэгъоу Ерыхъоу дэсыгъэхэр ЕлыщаІ къекІуалІэхи къыраІуагъ: «Тхьэмэтэнчъэу непэ укъызэрэнэщтыр, Зиусхьаным ар непэ уашъом зэрэдищэежьыщтыр ошІа?» Ащ ариІожьыгъ: «Ар сэри сэшІэ, щыжъугъэт». 6 ЕтІани Илас ащ риІуагъ: «ЕлыщаІ, о мыщ къанэ, сыда пІомэ сэ Зиусхьаным Иордан сегъакІо». Адрэм къыриІожьыгъ: «Зиусхьаныр зэрэщыІэри о узэрэщыІэри сэІо укъэсымыбгынэнкІэ!» Джаущтэу зэгъусэхэу ягъогу техьажьыгъэх. 7 Бэтэл дэсыгъэ тхьэлІыкІо зэкупэгъур нэбгырэ шъэныкъо хъухэу ауж итхэу къакІощтыгъэх. Ахэр къапэзанкІэу чыжьэкІэ къызэуцухэм, мыдритІур Иордан псыхъоІум Іутыгъ. 8 Ащ дэжьым Илас ищыгъын кІыІутелъ къышти зэкІоцІищыхьагъ, ащкІэ псым зыхэом, ар бгъуитІумкІэ зэгокІи, тІури игъушъыкІыгъэ псы лъачІэу къэлъэгъуагъэмкІэ зэпырыкІыгъэх. 9 Псым зызэпырэкІхэм Илас ЕлыщаІ риІуагъ: «СыпкІэрамыщыжьызэ узыфаер къаІо». Арыти, ЕлыщаІ къыриІожьыгъ: «КІуачІэу пхэлъым фэдэу ІахьитІу къысфэгъанэба». 10 Адрэм къыІуагъ: «УкъызкІэлъэІурэр шІэгъуае. СызэрэпкІэращыжьырэр къызыплъэгъукІэ, узыфаер къыбдэхъущт, зымылъэгъукІэ, къыбдэхъущтэп». 11 Ахэр зэдэгущыІэхэу гъогум рыкІохэзэ, ку псынкІэмрэ шыхэмрэ мэшІогъэшІыгъэу, ошІэ-дэмышІэу, къэсыхи, нэбгыритІури зэпэшъхьаф хъугъэх. Илас жьыбгъэшхоу къилъыгъэм дыхэтэу уашъом дэкІоежьыгъ. 12 ЕлыщаІ ащ еплъзэ къэкууагъ: «А тят! А тят! Израилым ику псынкІэрэ ащ ишыудзэрэ!» Ащ нахьыбэрэ ар ащ ылъэгъужьыгъэп. ЕлыщаІ ищыгъынхэр ыубытхи зэфэдитІоу зэгуитхъыгъэх. 13 ЕтІанэ Илас къыпызыгъэ щыгъын кІыІутелъыр къыштэжьи, къыгъэзэжьи, Иордан инэпкъ къыІухьагъ. 14 Илас къыпызыгъэ щыгъын кІыІутелъыр къышти, псым рыхауи, къыІуагъ: «Тыдэ щыІа Илас и Зиусхьанэу Тхьэр, джа дэдэр ары?» Ар къыІуи псым зыхэом, ар бгъуитІумкІэ зэгокІи, ЕлыщаІ ащ икІыгъ. 15 Ерыхъоу щыщ тхьэлІыкІо зэкупэгъум чыжьэкІэ ар къалъэгъугъэти, аІуагъ: «Илас кІуачІэу хэлъыгъэр ЕлыщаІ къыхэхьагъ». Ахэр ащ къыпэгъокІыхи, чІыгум нэс шъхьащэ къыфашІи, 16 къыраІуагъ: «Мары уиІумэтхэм зишІугъоу нэбгырэ шъэныкъо тэхъу. ОрэкІохи, уитхьаматэ къылъэрэхъухэба. ЗыгорэкІэ Зиусхьаным ы Псэ ар ышти, къушъхьэмэ къащыридзыхыгъэн е кІэймэ ащыщ горэм дидзэгъэнкІи мэхъуба». Ау ащ къыІуагъ: «ШъумыгъакІох». 17 Ау агъэукІытэфэ ахэр бэрэ зелъэІухэм, ащ ариІуагъ: «ЖъугъакІохэба адэ». Арыти, нэбгырэ шъэныкъо агъакІуи, мэфищэ къылъыхъугъэх, ау ар къагъотыгъэп. 18 ЕлыщаІ Ерыхъоу джыри щыІэзэ, ахэм ащ дэжь къызагъэзэжьым, ариІуагъ: «ШъумыкІу сІуи къышъосІогъагъэба?»
ТхьэлІыкІоу ЕлыщаІ иапэрэ шІэгъошІагъэхэр
19 ЕлыщаІ Ерыхъоу къалэм дэсхэм къыраІуагъ: «Тизиусхьан зэрилъэгъоу, мы къалэм итІысыпІэ дэгъу, ау ипс дэгъоп, ичІыпІи гъэбэжъулъэп». 20 Ащ ыІуагъ: «КІэу лэгъуп къысэшъути, ащ щыгъу къишъутакъу». Арыти, къыратыгъ. 21 Ащ дэжьым псышъхьэм кІуи, щыгъур хитакъуи ыІуагъ: «Зиусхьаным ыІорэр мары: „Мы псым ыпсэ къыпызгъэкІэжьыгъ, ащ нахьыбэрэ ыгъэлІэжьыщтхэп, гъэбэжъунчъагъэри щыІэжьыщтэп“». 22 Джаущтэу ЕлыщаІ зэрэтыриІуагъэм тетэу, псыр джы къызнэсыгъэми дэгъу. 23 Ащ ыуж Ерыхъоу къыдэкІыжьи Бэтэл къалэ ежьагъ. Гъогум тетэу кІозэ, шъэожъые куп ащ къыдэкІи, къыкІэнакІэхэзэ къыраІуагъ: «КІо, шъхьэ къуй, кІо, шъхьэ къуй!» 24 Ар къызэплъэкІыгъ, къяплъи, Зиусхьаным ыцІэкІэ къябгыгъ. Арыти, мышъэбзитІу мэзым къыхэкІхи шъэожъые нэбгырэ тІокІитІурэ тІурэ зэпкъыратхъыгъ. 25 ЕтІанэ ар Къармэл къушъхьэм дэкІоягъ, ащ къехыжьи Щамэрэн ыгъэзэжьыгъ.
Израилымрэ Ехъудэмрэ Моабым зэрезэуагъэхэр
1 Ехъудэм ипачъыхьэу Ехъощафат зыпачъыхьэр илъэс пшІыкІуим хэхьагъэу Ахъаб ыкъо Ехъорам Израилым ипачъыхьэу Щамэрэн щытехьи, илъэс пшІыкІутІо пачъыхьагъ. 2 Ятэрэ янэрэ зэрашІыщтыгъэм фэмыдэ дэдагъэми, Зиусхьаным къемыкІущтыр ащ ышІэщтыгъэ. Ятэ БаІал пае аригъэуцугъэгъэ пкъэур къыхитхъыжьыгъ. 3 Ау щытми Израилым псэкІод езгъэшІагъэу, Нэуат ыкъо ЯрабІам ипсэкІодшІагъэмэ афэдэхэри ышІэщтыгъ, ахэм къахэкІыщтыгъэп. 4 Моабым ипачъыхьэу МэщаІ мэлхъуным пылъыщтыгъ. Арыти, шъынэ минишъэрэ тІы минишъэм къатыращыкІыгъэ цымрэ Израилым ипачъыхьэ тынэу илъэс къэс фаригъэщэнхэ фэягъэ. 5 Ау, Ахъаб зэлІэм, Моабым ипачъыхьэ Израилым ипачъыхьэ зыкъыпиІэтыгъ. 6 Арыти, пачъыхьэу Ехъорам а уахътэм Щамэрэн къалэм къыдэкІи, израилыдзэр зэрэхэгъэгоу къыщыхаригъэщи, къызэІуаригъэгъакІи, ащ ипчъагъэ зыфэдизыр къылъытагъ. 7 А уахътэм Ехъудэм ипачъыхьэу Ехъощафат дэжь ыгъакІохи раригъэІуагъ: «Моабым ипачъыхьэ зыкъыспиІэтыгъ. Усигъусэу Моабым тезэонэу тызэдэбгъэкІощта?» Адрэм къыраригъэІожьыгъ: «СыкъэкІощт, тызэфэдэщт, о узэрэхъоу сэри сэрэхъу, уицІыфхэр зэрэхъухэу сицІыфхэри орэхъух, уишхэр зэрэхъухэу сишхэри орэхъух». 8 Арыти, Ехъощафат къэупчІагъ: «Тара гъогоу тызэрыкІощтыр?» Ехъорам ыІопщыжьыгъ: «Едом шъофнэкІымкІэ тыкІощт». 9 Ащ ыуж Израилым ипачъыхьэ Ехъудэм ипачъыхьэрэ Едомым ипачъыхьэрэ игъусэхэу ежьагъ. Мэфиблэ къакІухьэзэ гъогу зытетхэ уж, дзэмрэ ауж итэу къэкІорэ былымхэмрэ ешъонхэу псы фэныкъохэу хъугъэ. 10 Арыти, Израилым ипачъыхьэ ыІуагъ: «АІ-анасын! Зиусхьаным Моабым ыІэ тыригъэхьаным пае пачъыхьищми тызэІуигъэкІэгъэн фае». 11 Ехъощафат къыІуагъ: «ЗиусхьанлІыкІо горэ мыщ щыІэба, ар Ащ едгъэупчІыжьыным пае?» Израилым ипачъыхьэ иІумэтмэ ащыщ горэм ащ ипэгъокІэу къыІуагъ: «Илас иІофтабгэщтыгъэу Щафат ыкъо ЕлыщаІ мы чІыпІэм щэпсэу». 12 Ехъощафат къыІуагъ: «Зиусхьаным ипсалъэ ащ къылъэІэсы». Арыти, Израилым ипачъыхьи, Ехъощафати, Едомым ипачъыхьи ащ дэжь кІуагъэх. 13 ЕлыщаІ Израилым ипачъыхьэ риІуагъ: «Сыда о сиІофэу пхэлъыр? Уятэрэ уянэрэ ятхьэлІыкІохэм адэжь кІо». Израилым ипачъыхьэ ащ риІуагъ: «Хьау, Зиусхьаным Моабым Іэрылъхьэ тыфишІыным пае пачъыхьищми тызэІуигъэкІагъэу гуцаф тэшІышъ ары». 14 ЕлыщаІ къыІуагъ: «Ошъогу дзэхэр зиІэрылъхьэ Зиусхьан Тхьэу сызфэлажьэрэр зэрэщыІэр сэІо! Ехъудэм ипачъыхьэу Ехъощафат сышІомылІыкІыщтыгъэмэ, о сыкъыоплъыщтыгъахэп ыкІи услъэгъущтыгъахэп. 15 Ау джы пхъонтэпщынаом шъукъысфедж». Пхъонтэпщынаор къео зэхъум Зиусхьаным ыкІуачІэ ЕлыщаІ къыхэхьагъэти, 16 ащ къыІуагъ: «Зиусхьаным ыІорэр мары: „ПсыигъукІыгъэ лъэгур чІыпІэ-чІыпІэу зэпышъутІыкІ“. 17 Сыда пІомэ Зиусхьаным ыІорэр мары: „Жьыбгъэ къепщэуи, ощх къещхэуи шъумылъэгъуми, мы лъэгум псыр из къэсшІынышъ, шъори, зэкІэ былымхэми ащ шъуешъощт“. 18 Ау Зиусхьаным сыдэущтэу а зэпстэури къыщыхъун, Ащ Моабыр шъуІэ къырилъхьанышъ, 19 къэлэ зэкІэгъэпытыхьагъэхэр зэкІэ, къэлэ шъхьаІэхэр зэкІэ зэхэшъукъутэщтых, анахь чъыг дэгъухэри ишъуупкІыщтых, псы къэкІуапІэхэр зэкІэ зэпыжъугъэІыкІыщтых, анахь лэжьыгъэшІэпІэ дэгъухэр мыжъокІэ жъугъэсэищтых». 20 КъыкІэлъыкІорэ пчэдыжьым, гъомылэ тын зыщашІырэ уахътэм тефэу, ошІэ-дэмышІэу Едомым ылъэныкъокІэ къикІэу псыр къачъи, а чІыпІэм изыбзэ хъугъэ. 21 Пачъыхьэхэр къязэонхэу къызэрэкІохэрэр моабхэм зызэхахым, ныбжьыкІэмэ къащегъэжьагъэу лІыжъхэм анэсыжьэу зэон зылъэкІыщтхэр зэкІэ къаугъойи ягъунапкъэ къыІуагъэуцуагъэх. 22 Пчэдыжьым ахэр жьэу къэтэджыгъэх. Тыгъэр къыкъокІи, инэф псы шъхьашъом къытыридзи къызегъэлыдым, моабхэм ар лъым фэдэу плъыжьэу къалъэгъугъ. 23 Арыти, ахэм аІуагъ: «Ар лъы. Пачъыхьэхэр зэзэожьхи, зэрэукІыжьыгъэх. Джы, Моабыр, ахэм къыщанагъэр къэтхьынэу некІо!» 24 Джащ тетэу ахэр израилыдзэм иуцупІэ къекІугъэх. Ау Израил дзэкІолІхэм зыкъаІати, моабхэм къязаохэу заублэм, ахэм кІатхъужьыгъ. Адрэхэр моабхэм нахь къажэхахьэщтыгъэх, къязаощтыгъэх. 25 Джаущтэу къалэхэри зэхакъутагъэх, нэбгырэ пэпчъ нахь лэжьыгъэшІэпІэ дэгъу пэпчъ мыжъохэр ритакъохи агъэсэигъэх, псы чъэпІэ пстэури зэпагъэІыкІыгъэх, анахь чъыг дэгъухэри зэкІэ раупкІыгъэх. Къыр-Хъарэсэт икъэлэ дэпкъ закъохэу мыжъом хэшІыкІыгъэхэр ары ныІэп къэнэжьыгъагъэхэр. Арыти, мыжъодзхэм ар къадзыхьи, еохэзэ зэхакъутагъ. 26 Моабым ипачъыхьэ заом къызэрэщытекІохэрэр къызелъэгъум, Едомым ипачъыхьэ зыдэщыт лъэныкъомкІэ кІоцІыритхъу шІоигъоу, чэтэгъэбзэным тегъэпсыхьагъэхэу дзэкІолІ нэбгырэ шъибл игъусэу къежьагъ, ау зи къадэхъугъэп. 27 Ащ ыуж ежь ычІыпІэ пачъыхьагъум техьанэу щытыгъэ ищыпэ шъао ыубыти, къэлэ дэпкъым ышъхьагъ къурмэнгъэст щишІыгъ. Алъэгъугъэм израил цІыфхэр зэшІэгъуаджэ ышІыгъэхэти, израилыдзэр къызэкІэкІожьи ичІыгу къыгъэзэжьыгъ.
ЕлыщаІ шъузабэм зэрэдэІэпыІагъэр
1 ТхьэлІыкІо зэкупэгъум щыщыгъэ горэм ишъузабэ гъогзэ ЕлыщаІ къыриІуагъ: «УиІумэт сишъхьагъусэ лІагъэ. УиІумэт Зиусхьаным зэрэшІолІыкІыщтыгъэм ущыгъуаз. Джы ахъщэ чІыфэ къызІихыгъагъэр сикІэлитІу пщылІ ышІынхэм пае дищынхэу къэкІуагъ». 2 ЕлыщаІ ащ риІуагъ: «Сыда къыпфэсшІэнэу узыфаер? Уиунэ ит щыІэмэ къысаІу». Адрэм къыриІожьыгъ: «Дагъэр зэрыт къошыным нэмыкІ уиІумэт иунэ зыпари итэп». 3 Мыдрэм риІуагъ: «Хахьи къошынхэр къыхэдзых, зэкІэ уигъунэгъухэм къошын нэкІхэр къаІыхых. НахьыбаІоу къэхьых. 4 ЕтІанэ о шъуадэжь кІожьи, ори уикІалэхэми унэм шъуихьажьи, пчъэр о къегъэт. Джа къошынэу къэпхьыгъэхэм зэкІэми дагъэр арыгъахъу. Зэрыз хъурэр ІугъэуцукІзэ шІы». 5 Арыти, бзылъфыгъэр ядэжь къэкІожьи, ежьри ишъаохэри зехьажьхэм, унапчъэр ригъэтыгъ. КІалэхэм къошынхэр къыратхэзэ, ежь дагъэр ахэм аригъахъощтыгъэ. 6 Къошынхэм арыз зешІым ыкъо риІуагъ: «Къаштэ джыри къошын». Адрэм къыриІожьыгъ: «Ащ нахьыбэ къошын щыІэжьэп». Джащ тетэу дагъэри зэпыужьыгъ. 7 Ащ ыуж бзылъфыгъэр Тхьэм илІыкІо дэжь къакІуи хъугъэр къызыфеІотэжьым, мыдрэм риІуагъ: «КІожьи дагъэр ящи уичІыфэхэр тыжьых. Адрэ къэнэжьрэм ори уикІалэхэми шъурыщыІ».
Шунэм щыщ бзылъфыгъэмрэ икІалэрэ
8 Зы мафэ горэм ЕлыщаІ Шунэм къалэм къэкІуагъэу бзылъфыгъэ лъэрыхьэ горэм, игъомлапхъэ хэІанэу къелъэІупэзэ, ядэжь ригъэблэгъагъ. Мыщ къакІо къэси игъомлапхъэ хэІанэу ащ дэжь ихьэ зэпытщтыгъэ. 9 Арыти, бзылъфыгъэм илІ риІуагъ: «Мары мы хъулъфыгъэу тадэжь ренэу блэкІ зэпытрэр Тхьэм зэрицІыф лъапІэр сэшІэ. 10 Арышъ, унашъхьэм унэ шъхьаф щыфыхэдгъэуцонышъ, пІи, Іани, тІысыпІи, остыгъи фидгъэуцонхэшъ, тадэжь къакІо къэс ащ ерэс». 11 Зы мафэ горэм ар ахэм адэжь къакІуи, унэм ихьи щыгъолъыгъ. 12 Арыти, иІумэт Гъэхъазый риІуагъ: «Шунэм щыщ а бзылъфыгъэм къысфедж». Ар къызеджэм, адрэр къакІуи, Гъэхъазый ыпашъхьэ къиуцуагъ. 13 Бзылъфыгъэм еупчІынэу ЕлыщаІ Гъэхъазый риІуагъ: «УкъызэрэтфэгумэкІырэм пае сыда къыпфэтшІэщтыр? Пачъыхьэм е дзэпащэм ощ пае тадэгущыІэнэу уфаеба?» Бзылъфыгъэм къыриІожьыгъ: «Хьау, сэ сызыфаер силъэпкъ дэсэгъоты». 14 ЕлыщаІ къыІуагъ: «Сыда адэ фэтшІэщтыр?» Гъэхъазый къыриІуагъ: «Марба кІалэ иІэп ныІа, илІ лІыжъы». 15 Арыти, ЕлыщаІ къыІуагъ: «Къедж ащ». Ар ащ къызеджэм, адрэр къакІуи, пчъэм дэжь къэуцугъ. 16 ЕлыщаІ ащ риІуагъ: «Илъэс зытешІэкІэ, мыщ фэдэ уахътэм шъаор пІэлджэнашъхьэ тесыщт». Адрэм къыриІожьыгъ: «Ащ фэдэ хъунэуи, сизиусхьан, Тхьэм ицІыф, уиІумэт умыгъапцІэ». 17 Джащ тетэу, ЕлыщаІ къызэрэриІогъагъэм фэдэу, бзылъфыгъэр лъэрмыхьэ хъуи, адрэ илъэсым, джа уахътэм шъао къыфэхъугъ. 18 КІалэм хахъуи, мафэ горэм ятэ дэжь, мэщыр зыупкІэхэрэм адэжь, кІуагъэ. 19 Ащ щыІэзэ, ятэ риІуагъ: «Сшъхьэ! Сшъхьэ мэузы!» Арыти, адрэм иунэІут риІуагъ: «Янэ фэхьыжь мыр». 20 УнэІутым кІалэр къышти янэ фихьыжьыгъ. Шъаор щэджагъо нэс ным ыкуашъо теси лІагъэ. 21 Арыти, ным ар ышти, Тхьэм ицІыф зэрыс унэм дихьыйи ащ ипІэ хилъхьагъ. Унапчъэр къыфишІыжьи къикІыжьыгъ. 22 ЕтІанэ илІ къеджи риІуагъ: «УнэІутхэм ащыщ горэрэ щыдыбз горэрэ къысэтыхи Тхьэм ицІыф дэжь сыкІонышъ къэзгъэзэжьыщт». 23 Адрэм къыІуагъ: «Сыд пае ащ дэжь укІощта? Непэ мэзакІэм икъихьагъоп, шэмбэтэп ныІа?» Ау шъузым къыриІожьыгъ: «ЗэкІэри дэгъу хъущт». 24 Бзылъфыгъэм пае щыдыбзым уанэр зытыралъхьэм, иунэІут риІуагъ: «ПсынкІаІоу егъажьи, сэ къэсэмыІофэ къэмыгъэужъэжъ». 25 Джащ тетэу ежьи Тхьэм ицІыф дэжь Къармэл къушъхьэм кІуагъэ. Тхьэм ицІыф ар чыжьэкІэ къызелъэгъум, иІумэт Гъэхъазый риІуагъ: «Мор Шунэм щыщ бзылъфыгъэр ары. 26 ПсынкІэу пэгъокІи, еупчІ: „Упсэуба? УилІи псэуба? УикІали псэуба?“» Арыти, бзылъфыгъэм къыриІожьыгъ: «Хъущт». 27 Ау Тхьэм ицІыф дэжь къушъхьэм дэкІуайи, ащ екІуалІи, ылъакъохэр шІуиубытыкІыгъэх. Ар Іуищыжь шІоигъоу Гъэхъазый къызыІохьэм, Тхьэм ицІыф къыІуагъ: «Ыуж икІ, ащ гухэкІышхо иІ. Зиусхьаным хъугъэр сигъэшІагъэп, зыпари къысиІуагъэп». 28 Бзылъфыгъэм къыІуагъ: «КІалэ къыситынэу сизиусхьан селъэІугъагъа? „СымыгъапцІ“ сІуи къыосІогъагъэба?» 29 Арыти, ЕлыщаІ Гъэхъазый риІуагъ: «Гъогум утехьаным зыфэгъэхьазыри, сибэщ зыдашти ежь. Зыгорэ уапэ къифэмэ, сэлам емых, зыгорэм сэлам къызыуихкІэ, джэуап емытыжь. Нэси сибэщ сабыим ынэІу телъхь». 30 Сабыим янэ ЕлыщаІ риІуагъ: «Зиусхьаныр зэрэщыІэри о узэрэщыІэри сэІо! СыпкІэрымыкІыжьынкІэ». Арыти, ар бзылъфыгъэм дежьагъ. 31 Гъэхъазый ахэм апэ итэу нэси, бэщыр сабыим ынэІу тырилъхьагъ. Ау адрэм макъи-лъакъи къыгъэІугъэп. Арыти, ЕлыщаІ къыпэгъокІи, сабыир къызэрэмыущыжьрэр къыриІуагъ. 32 ЕлыщаІ унэм ихьагъ. Мары сабый лІагъэр ежь ипІэ хэлъ. 33 Арыти, унэм зэрехьэу пчъэр къыригъэти, Зиусхьаным елъэІугъ. 34 ЕтІанэ зиІэти сабыим шъхьащыгъолъхьагъ, ежь ыІупэхэр адрэм ыІупэмэ, ежь ынэхэр ащ ынэхэм, ыІагушъохэр ащ ыІагушъохэм анигъэсыгъэх. Сабыим зэрэщытэу шъхьащыгъуалъхьи, ащ ыпкъ къэфэбэжьыгъ. 35 Ащ ыуж къэтэджыжьи унэ кІоцІым иджэхашъо щытезэкІухьагъ. Джыри зиІэти сабыим зэрэщытэу шъхьащыгъолъхьагъ. Сабыир гъогогъуиблэ къэпси ынэхэр къызэкІихыгъэх. 36 ЕлыщаІ Гъэхъазый къеджи риІуагъ: «А Шунэм щыщ бзылъфыгъэм къедж». Арыти, адрэр ащ къеджагъ. Бзылъфыгъэр ЕлыщаІ дэжь къызэкІом ащ риІуагъ: «Уишъао штэжь». 37 Ар ащ къекІуалІи, ыпашъхьэ зыкъыщыридзыхи, джэхашъом нэсэу шъхьащэ къыфишІыгъ. ЕтІанэ ишъао ыштэжьи икІыжьыгъ.
ЕлыщаІ ишІэгъошІитІу
38 Ащ ыуж ЕлыщаІ Гъылгъал къыгъэзэжьыгъ. А чІыпІэм щыгъэблагъ. ТхьэлІыкІо зэкупэгъоу ыпашъхьэ исыгъэхэм адыщысыгъэ ежь иІумэт риІуагъ: «Лэгъупышхор тегъэуцуи тхьэлІыкІо зэкупэгъум пае хьантхъупс гъэпІонкІы». 39 Ахэм ащыщ горэ уц горэхэр къыугъоинхэу губгъэм зехьэм, сэнэ бжанлэм фэдэу къэкІэу зыгорэ къыгъотыгъэти, иджэнэ ІэкІапэ из ащ къыпичи, къыхьыгъ. Ар ыупкІати, хьантхъупсыр зыщыпІонкІырэ лэгъупым, зыфэдэр амышІэу, хитэкъуагъ. 40 ЕтІанэ шхэнхэу къафырагъэхъуагъ. Ау хьантхъупсым зэрэхэхъумпІагъэхэм тетэу куо-хьаушхо къаІатыгъ: «А Тхьэм ицІыф! УзгъэлІэщтыр лэгъупым ит!» Джаущтэу ашхын алъэкІыгъэп. 41 Арыти, ЕлыщаІ къыІуагъ: «Моу хьаджыгъэ къашъуштэ». Ар лэгъупым итым хитакъуи ыІуагъ: «Джы къафигъахъуи орэшхэх». Джаущтэу лэгъупым итыр пшхышъунэу хъужьыгъэ. 42 Ащ ыуж БаІал-Щалищэ къалэм щыщ лІы горэ къакІуи, Тхьэм ицІыф апэрэ лэжьыгъэу Іуихыжьыгъэм щыщэу, хьэ хьаджыгъэм хэшІыкІыгъэу хьалыжъые тІокІырэ шъуампІэр зытелъ лэжьыгъацэхэмрэ дзыокІэ къыфихьыгъэх. Арыти, ЕлыщаІ ыІуагъ: «ЦІыфхэм яти ягъэшх». 43 ИІумэт къеупчІыгъ: «Нэбгыришъэм афикъунэу тара ястыщтыр?» Мыдрэм риІожьыгъ: «Ят цІыфхэм, арэшх, сыда пІомэ Зиусхьаным ыІорэр мары: „Афикъунышъ, къялыжьыщт“». 44 Арыти, ахэм заретым, загъэшхэкІыгъ, Зиусхьаным зэриІуагъэуи къялыжьыгъ.
ЕлыщаІ НаІаман зэригъэхъужьыгъэр
1 Арамым ипачъыхьэ идзэ Іэшъхьэтетэу НаІаман лІэхъупхъэу, изиусхьан пачъыхьэ ащ лъытэныгъэ къыфишІэу щытыгъ, сыда пІомэ ащ ишІуагъэкІэ Зиусхьаным арамхэр атыригъэкІуагъэх. А лІыр дзэкІолІ бэлахьэщтыгъ, ау шъоджэуз иІэу хъугъагъэ. 2 Зэгорэм арамхэр къатебанэхи зызэкІэкІожьхэм, Израил хэгъэгум щыщэу пшъэшъэжъые горэ гъэрэу аубыти зыдыращыгъагъэти, ар НаІаман ишъуз къыдекІокІыщтыгъ. 3 Зымафэ горэм ащ изиусхьангуащэ риІуагъ: «А ей-гущ, Щамэрэн дэс тхьэлІыкІом дэжь мы сизиусхьан кІогъагъэмэ, ишъоджэуз ыгъэхъужьыныгъи!» 4 Арыти, НаІаман кІуи, Израил хэгъэгум щыщ пшъэшъэжъыем ыІорэр изиусхьан къыфиІотагъ. 5 Арамым ипачъыхьэ ащ къыриІуагъ: «Хъун, кІо. Сэ Израилым ипачъыхьэ пае тхьапэ тхыгъэ къыостынышъ фэозгъэхьыщт». Тыжьынэу килограмм 340 -рэ фэдиз, дышъэ килограмм 90 -рэ фэдиз, щыгъын штэгъуипшІ зыдиштэхи ар кІуагъэ. 6 Тхьапэ тхыгъэр Израилым ипачъыхьэ къыфихьыгъ. Ащ итхэгъагъ: «Мы тхьапэм игъусэу мары сиІумэт НаІаман къыпфэсэгъакІо шъоджэузэу иІэр бгъэхъужьыным пае». 7 Израилым ипачъыхьэ тхьапэм зеджэм, ищыгъынхэр зэІитхъыхи, къыІуагъ: «Сытхьа сэ згъэлІэнхэуи къэзгъэхъужьынхэуи? Сыд пае шъоджэузыр лІым фэзгъэхъужьынэу садэжь къыгъэкІуагъа? Джары шъуеплъ, къысэпыиным пае ушъхьагъу ар лъэхъу». 8 Тхьэм ицІыфэу ЕлыщаІ Израилым ипачъыхьэ ищыгъынхэр зэрэзэхицунтхъагъэр зызэхехым, раригъэІонэу пачъыхьэм дэжь ыІофытагъэх: «Сыд пае уищыгъынхэр зэхэпцунтхъагъа? ТхьэлІыкІо Израилым зэрисыр ышІэным пае садэжь ар къэрэкІу». 9 Ащ нэс НаІаман ишыхэмрэ ику псынкІэрэ игъусэхэу къэси ЕлыщаІ иунэ пчъэІупэ дэжь къэуцугъ. 10 Арыти, ЕлыщаІ иІофтабгэ ащ пигъэгъокІи рыригъэІуагъ: «КІуи Иордан псыхъо, гъогогъуиблэ зычІэгъауи лыкІэ къыптекІэжьынышъ, къабзэ ухъужьыщт». 11 НаІаман губжыгъэу къыІукІыжьи ыІуагъ: «Адэ сэ къызэрэсшІошІыгъэр ар къикІынышъ, къэуцунышъ, и Зиусхьанэу Тхьэм ыцІэ къыІонышъ, ыІэ узырэ чІыпІэм къытырилъхьанышъ, сишъоджэуз ыгъэхъужьынэу ары. 12 Дамаск псыхъохэу Абанэрэ Парпаррэ Израилым ипсыхъо пстэумэ анахьышІухэба? Сыда ахэм защызгъэпскІэу узыр симыІэжьынэу зызгъэкъэбзэжьын слъэкІыщтыгъэба?» Джащ тетэу къыгъэзэжьи, губжыгъэу къыІукІыжьыгъ. 13 Ащ дэжьым иІумэтхэр къекІуалІэхи къыраІуагъ: «Тят, оркІэ къин горэ зыхэлъ тхьэлІыкІом къыуиІогъагъэмэ пшІэщтыгъэба? „ЗыгъэпскІи къабзэ ухъужьыщт“ къызыуиІуагъэкІэ, сыд пае умышІэщта?» 14 Арыти, ар кІуи, Тхьэм ицІыфэу ЕлыщаІ къызэрэриІуагъэм тетэу, гъогогъуиблэ Иордан зычІигъэуагъ. Сабыим фэдэу лыкІэ къытекІэжьи, зиукъэбзыжьыгъ. 15 Ащ лъыпытэу НаІаман игъусэхэр зэрэкІыгъухэу къыгъэзэжьи, Тхьэм ицІыфэу ЕлыщаІ ыпашъхьэ къиуцуи къыІуагъ: «Мары Израилым и Тхьэ фэдэ зэрэдунаеу зэрэтемытыр къэсшІагъ. Арышъ, уиІумэт шІухьафтын Іых». 16 Адрэм къыІуагъ: «Зиусхьанэу зыпашъхьэ ситыр зэрэщыІэр сэІо пІысымыхынкІэ!» НаІаман бэрэ къаигъэ къышІыгъ шъхьае, мыдрэр фезэгъыгъэп. 17 Арыти, НаІаман къыІуагъ: «Ар мыхъущтмэ, уиІумэт Зиусхьаным нэмыкІ тапэкІэ тхьэ горэхэми къурмэнгъэстхэмрэ къурмэнхэмрэ афишІыщтхэпышъ, къыдыритІум ахьын алъэкІыщтым фэдиз чІыгу къырарэт. 18 Ау Зиусхьаным къыфигъэгъунэу уиІумэт къызкІэлъэІурэр мары: сизиусхьан пачъыхьэ итхьэ фагъэуцугъэ тхьэлъэІупІэунэм шъхьащэ щишІынэу Римон кІуагъэу сІэ зыкъызтыригъакІэкІэ, Римон фагъэуцугъэ тхьэлъэІупІэунэм сшъхьэ зыщесыуфэхкІэ, Зиусхьаным уиІумэт ащ пае къыферэгъэгъу». 19 Арыти, ЕлыщаІ къыриІожьыгъ: «Зыгъэрэхьати кІожь». Адрэр къыІукІыжьи, тІэкІу горэм кІуагъэ. 20 Ащ дэжьым ЕлыщаІ иІумэт Гъэхъазый ыІуагъ: «Мары, а арамэу НаІаман къыхьыгъэм щыщ зи къыІимыхэу сизиусхьан ар ытІупщыжьыгъ. Зиусхьаныр зэрэщыІэр сэІо! Ащ сыкІэлъычъэнышъ зыгорэ къыІысхын». 21 Ар дэдэм Гъэхъазый НаІаман ыуж илъэдагъ. Арыти, НаІаман къыкІэлъычъэрэр къылъэгъуи, ику псынкІэ къикІи, къыпэгъокІи къеупчІыгъ: «ЗэкІэри дэгъуба?» 22 Мыдрэм риІожьыгъ: «ЗэкІэри дэгъу. Сизиусхьан сыкъыІофтагъ къыосІонэу: „Ефраим къушъхьэлъэ хэкум къикІхи тхьэлІыкІо зэкупэгъум щыщхэу кІэлитІу садэжь къэкІуагъэхэшъ, тыжьын килограмм 34 -рэ фэдизрэ щыгъын штэгъуитІурэ къят“». 23 Арыти, НаІаман ыІуагъ: «ФэдитІукІэ нахьыбэу штэба». Ар ыштэнэу къелъэІуи, тыжьынри щыгъын штэгъуитІури дзыуитІум къарилъхьэхи, ежь иІумэт нэбгыритІум къаритхи, Гъэхъазый ыпэ итхэу рахьыжьагъэх. 24 ЕтІанэ Іуашъхьэм къызэсым, ахэм аІыгъыгъэр къаІихыжьи иунэ щигъэбылъыгъ. Ащ ыуж цІыфхэр ытІупщыжьхи, ахэм агъэзэжьыгъ. 25 Ар къэкІожьи изиусхьан дэжь зехьэм, ЕлыщаІ къеупчІыгъ: «Тыда укъыздикІыжьыгъэр, Гъэхъазый?» Адрэм къыриІожьыгъ: «УиІумэт зыми кІогъагъэп». 26 Мыдрэм ащ риІуагъ: «А цІыфыр ику псынкІэ къызекІым сыгукІэ сыуигъусагъэба сэ? Тыжьынрэ, щыгъынхэмрэ, зэйтын чъыгхэмрэ, сэнэшъхьэ шІапІэхэмрэ, мэл-пчэнхэмрэ, былым пІашъэхэмрэ, унэІут хъулъфыгъэхэмрэ, унэІут бзылъфыгъэхэмрэ къаІыпхынхэм игъуа? 27 НаІаман ишъоджэуз оррэ къыпкІэхъощтхэмрэ джащ пае егъашІэм къышъуферэгъэзэжь». Джащ дэжьым ар шъоджэузым осым фэдэу фыжьыбзэу зэлъикІугъэу ащ дэжь къикІыжьыгъ.
ЕлыщаІ обзэгъушъхьэр псым къызэрэхихыжьыгъэр
1 Мафэ горэм тхьэлІыкІо зэкупэгъум хэтхэм ЕлыщаІ раІуагъ: «О утипащэу тыздэщыІэ тиеджэпІэ-псэупІэ тэркІэ зэжъущ. 2 Иордан тыжъугъакІуи, пкъэу зырыз къэтхьынышъ, тыщыпсэунэу унэ псы гъунэм щытшІыщт». Арыти, ащ къадыригъэштагъ. 3 Ащ дэжьым ащыщ горэм къыІуагъ: «Лъэш дэдэу сыолъэІу тэ, уиІумэтхэм, утигъусэу къыддакІоба». «Хъунба адэ», – къыриІожьыгъ. 4 Джаущтэу ар адэкІуагъ. Ахэр Иордан къэсыхи чъыгхэр къыраупкІынхэу фежьагъэх. 5 Ащыщ горэм чъыгыр риупкІ пэтзэ иобзэгъушъхьэ къышІози псым хэфагъ. Арыти, къэкууи къыІуагъ: «Ай, сизиусхьан, ар хьафэу къаІысхыгъагъи!» 6 ЕлыщаІ ащ еупчІыгъ: «Тыда ар зыщыхэфагъэр?» Адрэм чІыпІэр къызырегъэлъэгъум, ЕлыщаІ пхъэ такъыр горэ чъыгым къыпиупкІи а чІыпІэм зыхедзэм, обзэгъушъхьэр къычІэужьынэу ышІыгъ. 7 Ащ риІуагъ: «Мыр штэжь». Адрэм обзэгъушъхьэр къыхихыжьыгъ.
ЕлыщаІ арамхэр къызэрэзэтыригъэуцуагъэхэр
8 Арамым ипачъыхьэ джыри зэ израил цІыфхэм зао къаришІылІагъ. ИдзэкъулыкъушІ Іэшъхьэтетхэм адэгущыІэзэ, ащ ыІощтыгъэ: «Мыщ фэдэ чІыпІэр тидзэ иуцупІэу тэгъэнафэ». 9 Арыти, Тхьэм ицІыфэу ЕлыщаІ Израилым ипачъыхьэ дэжь ыгъакІохи раригъэІуагъ: «Арамхэм а чІыпІэм зыщагъэпытагъэшъ, благъэу уемыкІуалІ». 10 Джаущтэу Израилым ипачъыхьэ ЕлыщаІ зыфиІогъэгъэ чІыпІэм къыщыхъухэрэр къызэрагъэшІэнэу ыгъакІохэзэ, пчъагъэрэ зыкъиухъумэжьыгъ. 11 Арамым ипачъыхьэ хъурэм къыгъэгумэкІыгъэу идзэкъулыкъушІ Іэшъхьэтетхэм къяджи ариІуагъ: «Тащыщэу Израилым ипачъыхьэ бзэгу фэзыхьрэр джыдэдэм къашъуІо». 12 Арыти, ащ идзэкъулыкъушІ Іэшъхьэтетхэм ащыщ горэм къыІуагъ: «Ащ фэдэ гори къытхэтэп, сизиусхьан пачъыхьэр, ау Израилым итхьэлІыкІоу ЕлыщаІ уичъыепІэ унэ щыпІохэрэри Израилым ипачъыхьэ реІожьых». 13 Пачъыхьэм къыІуагъ: «ШъукІуи ар зыдэщыІэр къызэжъугъашІи, лъызгъэкІонхэшъ къязгъэубытыщт». Ащ къэбар къыфахьи къыраІуагъ: «Мары Дотан къалэм ар щыІ». 14 Арыти, дзэ купышхо ягъусэу шыхэмрэ ку псынкІэхэмрэ ащ ыгъэкІуагъэх. Ахэр чэщэу къакІохи къалэр къадзыхьагъ. 15 Пчэдыжьым Тхьэм ицІыф иІумэт къэтэджи къызекІым, мары – дзэри, шыхэри, ку псынкІэхэри къалэм къызэрегъэуцокІыгъэхэр къылъэгъугъ. Арыти, ащ ЕлыщаІ риІуагъ: «Ео-ой, сизиухьан! Сыд джы тшІэжьыхэн?» 16 Адрэм къыриІожьыгъ: «Укъэмыщт, сыда пІомэ тэ тигъусэхэр ахэм ягъусэхэм анахьыб». 17 Ащ дэжьым ЕлыщаІ Тхьэм елъэІузэ къыІуагъ: «Зиусхьан! Мыр тэрэзэу гъаплъэба». Ар дэдэм Зиусхьаным ЕлыщаІ иІумэт зегъаплъэм, мары шыхэмрэ ку псынкІэхэу мэшІотхъуабзэр къызпиххэмрэ ЕлыщаІ къызэлъаухъурэигъэу къушъхьэр зэрэщытэу зэлъабгъагъ. 18 ЕтІанэ арамхэр ащ дэжь къызежьэхэм ЕлыщаІ Зиусхьаным елъэІуи ыІуагъ: «Амылъэгъушъунэу ахэр шІых». Ащ ЕлыщаІ зэрелъэІугъэу, ахэм амылъэгъушъунэу ышІыгъ. 19 Арыти, ЕлыщаІ ахэм ариІуагъ: «А гъогур арэп мыр, а къалэри арэп мыр. Сауж шъукъихьи шъузлъыхъурэ цІыфым дэжь сэ шъусщэщт». Джаущтэу ахэр Щамэрэн къыщагъэх. 20 Щамэрэн къызэсхэм, ЕлыщаІ къыІуагъ: «Зиусхьаныр! Мыхэм алъэгъунэу анэхэр къэгъэплъэжьых». Арыти, Зиусхьаным ахэр къызегъэплъэжьхэм, мары Щамэрэн ипчэгу зэритхэр къалъэгъугъ. 21 Арыти, Израилым ипачъыхьэ ахэр къызелъэгъухэм, ЕлыщаІ еупчІыгъ: «Мыхэр зэхэсэрэукІэха, зэхэсэрэукІэха, тят?» 22 Адрэм къыриІожьыгъ: «УмыукІых. Заом гъэры щашІхэрэр аукІхэрэп ныІа? Егъашхэхи егъашъохи, етІанэ япачъыхьэ дэжь тІупщыжьых». 23 Арыти, ешхэ-ешъо афаригъэшІи, ахэр агъэшхахэхи, зырагъэшъуахэхэм атІупщыжьхи, япачъыхьэ дэжь агъэзэжьыгъ. Ащ ыуж арамхэр Израилым ичІыгу къытемыбанэхэу охътэ шІукІае тешІагъ. 24 ТІэкІу зытешІэм Арамым ипачъыхьэу Бэнхадад дзэу иІэр зэрэщытэу къыугъойи, къакІуи Щамэрэн къыдзыхьагъ. 25 Ахэм ар къызадзыхьэм Щамэрэн щыгъэблэшхуагъэти, щыдышъхьэр тыжьын зы килограммрэ грамм 200 -рэ фэдизкІэ, тхьаркъо цуе грамм 250 -рэ фэдизыр тыжьын грамм 75 -рэ фэдизкІэ ащэщтыгъэх. 26 Мафэ горэм Израилым ипачъыхьэ къэлэ дэпкъым ышъхьагъ тетэу кІозэ, бзылъфыгъэ горэм гъогызэ къыриІуагъ: «КъыздэІэпыІ, сизиусхьан пачъыхьэр». 27 Арыти, мыдрэм риІуагъ: «Зиусхьаныр къыбдэмыІэпыІэмэ, сыдэущтэу сэ сыбдэІэпыІащта? Лэжьыгъи сани сиІэпи». 28 Пачъыхьэр ащ пыдзагъэу еупчІыгъ: «Сыда узфаер?» Адрэм къыриІожьыгъ: «Модэ мо бзылъфыгъэм къысиІощтыгъ: „УикІалэ непэ тэгъэшхи, сэ сишъао неущ тшхыщт“. 29 Арыти, сишъао дгъажъуи тшхыгъэ. КъыкІэлъыкІорэ мафэм ащ есІуагъ: „Джы о уикІалэ къашти тэгъэшхы“. Ау ащ икІалэ ыгъэбылъыгъ». 30 Пачъыхьэр бзылъфыгъэм къыІуагъэм едэІуи, ищыгъынхэр зэІитхъыгъэх. Къэлэ дэпкъым ышъхьагъ тетэу ащ къыщикІухьэзэ, мары дзыопхъэ шэкІ пхъашэм хэшІыкІыгъэ джанэр ыкІышъо нэсэу зэрэщыгъыр цІыфхэм алъэгъугъ. 31 Ащ дэжьым пачъыхьэм къыІуагъ: «Щафат ыкъо ЕлыщаІ непэ ышъхьэ зышІосымыхкІэ, Тхьэм сифэшъуашэр серэгъэгъот, нахьыбэжьи къысерэшІ». 32 Пачъыхьэм иІумэт горэ ЕлыщаІ лъигъэкІуагъ. Ежь ЕлыщаІ иунэ исыгъ, нахьыжъ упчІэжьэгъухэри ащ ыдэжь исыгъэх. КъагъэкІуагъэр джыри къэмысзэ, нахьыжъ упчІэжьэгъухэм ащ ариІуагъ: «А укІакІом ыкъо сшъхьэ шІуаригъэхынэу къызэригъакІорэр шъошІа? Шъусакъ, къагъэкІуагъэр къызыскІэ, пчъэр пытэу ежъугъэти къишъумыгъахь. Мары изиусхьан пачъыхьэри ащ ыуж кІэкІэу ит!» 33 Ар ахэм адэгущыІэфэ, пачъыхьэм къыгъэкІуагъэр къэси къыІуагъ: «Сыда Зиусхьаным джыри сызэрэщыгугъыжьын слъэкІыщтыр, ащ фэдиз тхьамыкІагъор къытфихьыгъэмэ?»
1 Мыщ дэжьым ЕлыщаІ къыІуагъ: «Зиусхьаным къыІорэм шъукъедэІу. Зиусхьаным ыІорэр мары: „Неущ мыщ фэдэ уахътэм анахь хьаджыгъэ дэгъум фэдэ дзыомрэ хьэ дзыуитІумрэ тыжьын чапыч зырызкІэ Щамэрэн ибэдзэр щащэщтых“». 2 Арыти, пачъыхьэм дзэ къулыкъушІ Іэшъхьэтетышхоу цыхьэ зыфишІыщтыгъэм ЕлыщаІ риІуагъ: «Тхьэм лэжьыгъэр уашъом къыригъэтэкъохыгъэми, ащ фэдэу хъун ылъэкІынэуи?» Арыти, мыдрэм риІожьыгъ: «Ар о унитІукІэ плъэгъущт, ау ар къыпІуфэщтэп».
Арамым идзэхэм зэрэкІатхъужьыгъэр
3 А уахътэм шъоджэуз зиІэ нэбгыриплІ горэ къалэм идэхьэпІэ къэлапчъэхэм адэжь щысхэу зэраІожьыщтыгъэ: «Сыд пае хьадэгъум тежэу мыщ дэжьым тыщысыщта? 4 Къалэм тыдэхьанэу тІомэ, къалэм щыгъаблэшъ, ащ тыдэлІыхьан, мыщ дэжьым тыщысми джащ фэдэу тылІэн. Ащ нахьышІу арамхэм ядзэуцупІэ тыжъугъакІуи. ТамыукІэу, псэоу тыкъагъанэмэ, тыщыІэн, таукІмэ таукІыгъ». 5 Арыти, шІункІ къызэхъум, арамхэм ядзэуцупІэ кІонхэу ежьагъэх. Арамхэм ядзэуцупІэ игъунэгъоу екІолІагъэх, мары зы цІыф гори ащ щыІэп. 6 Зиусхьаным ку псынкІэхэм къапыІукІырэ макъэхэмрэ шы щыщ макъэхэмрэ, дзэшхоу къакІорэм къыпыІукІырэ макъэри зэрахэтэу арамхэм ядзэуцупІэ къыщызэхахынхэу ышІыгъагъ. Арыти, ахэм зэраІожьыгъагъ: «Израилым ипачъыхьэ хъыт ыкІи мысыр пачъыхьэхэр ахъщэ аритызэ, къытигъэзэонхэу къызгуищэгъэнхэ фае». 7 Ахэм псынкІэу зыкъаІатыжьи шІункІ къызэрэхъоу кІатхъужьыгъагъ: ягъэІагъэхэри, яшхэри, ящыдхэри, яуцупІи зэрэщытэу къабгынэхи, зыкъагъэнэжьыным пае ашъхьэхэр Іуахыжьыгъагъэх. 8 А цІыфхэу шъоджэуз зиІэхэр дзэуцупІэм ыгъунэ къекІуалІэхи гъэІагъэ горэм чІэхьагъэх. Ащ щышхагъэх, щешъуагъэх, тыжьыни, дышъи, щыгъыни къычІаххи къыздаштагъэх, къагъэзэжьи ахэр агъэбылъыгъэх. Джыри нэмыкІ гъэІагъэ горэм чІахьэхи, ащи къычІахыгъэх, къагъэзэжьи агъэбылъыгъэх. 9 ЕтІанэ ахэм зэраІожьыгъ: «ТшІэрэр тэрэзэп. Мы мафэр къэбар гушІуагъом имафэшъ, зыдгъэлъажъоу, нэф къэшъыфэ тежэмэ, тагъэмысэжьыщт. Джыдэдэм тыжъугъакІуи пачъыхьэми ащ ицІыфхэми къэбарыр ятэжъугъэгъашІ». 10 Арыти, ахэм къагъэзэжьи къэлэ дэхьапІэм хэлъ къэлапчъэр къэзгъэгъунэщтыгъэхэр къэбарым щагъэгъозагъэх: «Арамхэм ядзэуцупІэ тыкІогъагъ, мары зы цІыф гори ащ щыІэп, цІыф горэми ымакъэ щызэхэпхырэп. Шы-щыд епхыгъэхэр ары ныІэп щытхэр, ягъэІагъэхэри зэрэщытых». 11 Арыти, ахэр къэлэ дэхьапІэм хэлъ къэлапчъэр къэзгъэгъунэщтыгъэхэм къяджэхи пачъыхьэми ащ ицІыфхэми афаІопщыгъ. 12 Пачъыхьэр чэщым къэтэджи, идзэкъулыкъушІ Іэшъхьэтетхэм къяджи ариІуагъ: «Арамхэм къыташІэрэр къышъосІон. Гъаблэм тызэригъалІэрэр ахэм ашІэти, хашъом зыщагъэбылъынэу ядзэуцупІэ къабгынагъ. „Ахэр къалэм къызыдэкІхэкІэ, зэрэпсэухэу тыубытынхэшъ, къалэм тыдэхьащт“ – джары ахэр зэгупшысхэрэр». 13 Арыти, къыдекІокІхэрэ дзэкъулыкъушІ Іэшъхьэтетмэ ащыщ горэм къыІуагъ: «Къалэм къыдэнэгъэ адрэ шыхэм ащыщэу шитфымэ атесхэу зыгорэхэр тэжъугъэгъакІох. НэмыкІ амал щыІэп, ахэр къаукІыхэмэ, адрэ израил цІыфэу лІагъэхэмэ афэдэ хъущтых. Арышъ, тэжъугъэгъакІохи, хъурэм тежъугъэплъ». 14 Арыти, ку псынкІитІум шы тІурытІу акІашІагъэх. «ШъукІуи шъукъаплъ», – ыІуи, пачъыхьэм арамхэм ядзэ ыуж ригъэхьагъэх. 15 Ежьэхи ащ ыуж итхэу Иордан нэс кІуагъэх. Мары арамхэр гузэжъогъум хэтхэу зечъэжьэжьхэм къычІадзыгъэ щыгъынхэмрэ пкъыгъохэмрэ гъогум тетэкъуагъэу, тизыбзэу телъых. Джаущтэу агъэкІуагъэхэм къагъэзэжьи къэбарыр пачъыхьэм къыфахьыгъ. 16 ЕтІанэ цІыфхэр къежьэхи арамхэм ядзэуцупІэ зэрапхъуагъ. Зиусхьаным къызэриІуагъэу, анахь хьаджыгъэ дэгъу зы дзыомрэ хьэ дзыуитІумрэ тыжьын ахъщэ зырыз ауасэу джащ дэжьым хъугъэ. 17 Арыти, пачъыхьэм идзэ къулыкъушІ Іэшъхьэтетышхоу ицыхьэшІэгъугъэр къэлапчъэм Іуигъэуцогъагъ. ЦІыфхэм ар къэлапчъэм щыІуапІытІыхьи, пачъыхьэр ЕлыщаІ ыдэжь къызэкІом, ащ къызэрэриІогъагъэу, ар лІагъэ. 18 ЕлыщаІ пачъыхьэм ащ дэжьым къыриІогъагъ: «Неущ мыщ фэдэ уахътэм анахь хьаджыгъэ дэгъу зы дзыомрэ хьэ дзыуитІумрэ тыжьын ахъщэ зырызкІэ Щамэрэн ибэдзэр щащэщтых». 19 А дзэкъулыкъушІ Іэшъхьэтетышхом ЕлыщаІ къыриІогъагъ: «Тхьэм лэжьыгъэр уашъом къыригъэтэкъохыгъэми, ащ фэдэу хъун ылъэкІынэуи?» Мыдрэм риІожьыгъагъ: «Ар о унитІукІэ плъэгъущт, ау ащ щыщ о къыпІуфэщтэп». 20 Джа дэдэр ащ къехъулІагъ. ЦІыфхэм ар къэлапчъэм щыІуапІытІыхьи, етІанэ лІэжьыгъэ.
Шунэм щыщ бзылъфыгъэм ичІыгу къызэрэратыжьыгъэр
1 Мафэ горэм ЕлыщаІ зикІалэ къыгъэхъужьыгъэгъэ бзылъфыгъэм риІогъагъ: «Ори уиунагъуи шъуежьи, шъузщыпсэун шъулъэкІыщт нэмыкІ хэгъэгу горэм шъукІу, сыда пІомэ Зиусхьаным къыригъэжьэнышъ илъэсиблэ мы хэгъэгум щыгъэблэщт». 2 Арыти, ЕлыщаІ къариІуагъэм едэІухи, бзылъфыгъэмрэ иунагъорэ заІати, фылист хэгъэгум кІохи илъэсиблэ ащ къисыгъэх. 3 Илъэсибл зытешІэм а бзылъфыгъэр фылист хэгъэгум къикІыжьи къэкІожьыгъ. Иунэрэ ихапІэрэ къыратыжьынхэм пае елъэІунэу, пачъыхьэм дэжь ар кІуагъэ. 4 Пачъыхьэр ащ дэжьым Тхьэм ицІыфэу ЕлыщаІ иІумэт Гъэхъазый дэгущыІэщтыгъэти, ащ риІуагъ: «ЕлыщаІ ишІэгъошІагъэхэр зэкІэ къысфэІуатэхэба». 5 ЛІагъэр ащ къызэригъэхъужьыгъагъэм икъэбар адрэм къызщыфиІотэрэ дэдэм тефэу зишъао къыгъэхъужьыгъэгъэ бзылъфыгъэр иунэрэ ичІыгу Іахьэрэ пае пачъыхьэм къелъэІугъ. Гъэхъазый ащ дэжьым къыІуагъ: «Сизиусхьан пачъыхьэр, а бзылъфыгъэ дэдэри ЕлыщаІ къыгъэхъужьыгъэгъэ а шъаори арых мыхэр». 6 Арыти, пачъыхьэр бзылъфыгъэм къеупчІыгъэти, мыдрэми хъугъэр фиІотэжьыгъ. Пачъыхьэм тхьамэтэ пащэмэ ащыщ горэ гъусэ къыфишІи, ащ риІуагъ: «Мыщ имылъку зэрэщытэу, хэгъэгур къызибгынэгъэ мафэм къыщегъэжьагъэу джы нэс, ичІыгу Іахьэ федэу къытын ылъэкІыщтыгъэ пстэури етыжьых».
ТхьэлІыкІоу ЕлыщаІрэ Хъазаелрэ
7 ЕтІанэ ЕлыщаІ Арам хэгъэгум икъэлэ шъхьаІэу Дамаск кІуагъэ. А уахътэм Арамым ипачъыхьэу Бэнхадад исымэджэгъугъэти, ащ къэбарыр къыфахьи къыраІуагъ: «Тхьэм ицІыф мыщ къэкІуагъ». 8 Арыти, пачъыхьэм иІумэт къулыкъушІ Іэшъхьэтетэу Хъазаел риІуагъ: «ШІухьафтыныр пІыгъэу Тхьэм илІыкІо пэгъокІи, мы узыр хъужьыщтмэ къысфызэригъэшІэнэу Зиусхьаным ар сфегъэупчІ». 9 Дамаск нахьышІоу щащэхэрэмкІэ ушъэгъэ махъшэ тІокІитІур игъусэу Хъазаел ащ пэгъокІыгъ. Ащ екІуалІи риІуагъ: «УикІэлэ Бэнхадад, арам пачъыхьэм, уадэжь сыкъиІофтагъ сыоупчІынэу: „Мы сиуз хъужьыщта?“» 10 Арыти, ЕлыщаІ къыриІожьыгъ: «Гъэзэжьи ащ еІу: „Шъыпкъэ дэдэмкІэ ухъужьыщт“, ау ар зэрэлІэщтыр Зиусхьаным, шъыпкъэ дэдэмкІэ, къысигъэшІагъ». 11 ЕтІанэ ЕлыщаІ инэплъэгъу ащ къыфигъази, тедыягъэм фэдэу гуфаплъэу бэрэ къеплъыгъэти, ар къыгъэукІытагъ. Тхьэм ицІыф ар дэдэм къэгъыгъ. 12 Арыти, Хъазаел къеупчІыгъ: «Сыд пае сизиусхьан гъыра?» Адрэм къыриІожьыгъ: «Израил цІыфхэм тхьамыкІагъоу къафэпхьыщтыр зыфэдэр, ахэм япытапІэхэр зэрэбгъэстыщтхэр, ядзэкІолІ хэшыпыкІыгъэхэр чатэкІэ зэрэуукІыщтхэр, ясабый быдзашъохэм ашъхьэхэр зэрэзэгоуутыщтхэр, ябзылъфыгъэ лъэрмыхьэхэр зэрэзэгоуупкІыщтхэр сэшІэшъ ары». 13 Арыти, Хъазаел къыІуагъ: «УиІумэт хьэ лІагъэ ащ фэдиз Іофышхо ышІэнэуи?» ЕлыщаІ ащ риІожьыгъ: «Арамым ипачъыхьэ ухъунэу Зиусхьаным къысигъэлъэгъугъ». 14 ЕтІанэ ар ЕлыщаІ къыкІэрыкІыжьи изиусхьан дэжь къыгъэзэжьыгъ. Адрэр ащ къеупчІыгъ: «Сыда ЕлыщаІ къыуиІуагъэр?» Мыдрэм риІожьыгъ: «Шъыпкъэ дэдэу, ухъужьынэу къысиІуагъ». 15 КъыкІэлъыкІогъэ мафэм Хъазаел чыхІаныр къышти, ыгъэуцІыни, ар пачъыхьэм ынэІу рифызылІи ыгъэлІагъ. Джащ тетэу Хъазаел ащ ычІыпІэ пачъыхьагъум техьагъ.
Ехъуд пачъыхьэу Иорам
16 Израилым ипачъыхьэу Ахъаб ыкъо Ехъорам зыпачъыхьэр ятфэнэрэ илъэсым хэхьагъэу Ехъудэм ипачъыхьэу Ехъощафат ыкъо Иорам Ехъудэм ипачъыхьэу техьагъ. 17 Ар пачъыхьагъум зытехьэм ыныбжьыгъэр илъэс щэкІрэ тІурэ, илъэсие Ерусэлэм щыпачъыхьагъ. 18 Ахъаб ыпхъумэ ащыщ горэ ишъузыгъэти, ар израил пачъыхьэхэм ягъогухэм атетыгъ, Ахъаб иунагъо зэрэщашІыщтыгъэм фэдэу, Зиусхьаным къемыкІущтыр ышІэщтыгъэ. 19 Ау Зиусхьаным иІумэт Даут ихьатыркІэ Ехъудэр ыгъэкІодынэу фэягъэп, сыда пІомэ ащ ижъуагъо инэф мыкІосэным пае ыкъохэмкІэ ипачъыхьагъу егъашІэм щигъэІэнэу къыгъэгугъэгъагъ. 20 Иорам пачъыхьэзэ, Ехъудэм итетыгъо пэуцужьхэу Едомым ицІыфхэм зыкъыпаІэти, ащ хэкІыхи, ежьхэм япачъыхьэ тырагъэхьагъ. 21 Арыти, Иорам ку псынкІэхэр игъусэхэу ЦаІир къалэ кІуагъэхэу едомхэм ахэр къадзыхьагъэх. Пачъыхьэмрэ ку псынкІэхэм яІэшъхьэтетхэу игъусэхэмрэ чэщым зыкъаІати, пыидзэм езаохэзэ, ащ къыкІоцІыратхъуи къежьэжьыгъэх. ИдзэкІолІхэри, шъхьадж ипакІэ хэлъэдэжьи, ядэжь къагъэзэжьыгъ. 22 Джаущтэу Едомыр Ехъудэм зэрэгокІыгъэу джы къызнэсыгъэми ар шъхьафит. А охътэ дэдэм Лыбнэ къали ащ гокІыжьыгъ. 23 Иорам нэмыкІэу ышІагъэхэмрэ къехъулІагъэхэмрэ ехъуд пачъыхьэхэм яхьылІэгъэ Іэпэрытххэм арытхагъэхэба. 24 Иорам ятэ пІашъэхэр зыдэщыІэхэм ыгъэзэжьыгъэти, ятэ Даут икъалэу ятэ пІашъэхэр зыдэлъхэм щагъэтІылъыжьыгъ. Ыкъо Ахъазыехъу ащ ычІыпІэ пачъыхьагъум техьагъ.
Ехъуд пачъыхьэу Ахъазый
25 Израилым ипачъыхьэу, Ахъаб ыкъо Ехъорам зыпачъыхьэр илъэс пшІыкІутІум хэхьагъэу Ехъудэм ипачъыхьэу, Иорам ыкъо Ахъазый пачъыхьагъум техьагъ. 26 Ахъазый пачъыхьагъум зытехьэм ыныбжьыгъэр илъэс тІокІырэ тІурэ. Ар зы илъэсрэ Ерусэлэм щыпачъыхьагъ. Израилым ипачъыхьэу Іомрый ипхъорэлъфэу ащ янагъэм ыцІагъэр Іаталый. 27 Пачъыхьэу Ахъаб иунагъо игъогу ар тетыгъ, Ахъаб иунагъо ишъузкІэ иІахьылыгъэти, ащ фэдэу, Зиусхьаным къемыкІущтыр ышІэщтыгъэ. 28 Ахъазый пачъыхьэмрэ Ахъаб ыкъо Ехъорам пачъыхьэмрэ зэгъусэхэу Арамым ипачъыхьэу Хъазаел езэонхэу ГъылыІадым ит Рамот къалэм екІугъэхэти, арамхэм Ехъорам къауІагъ. 29 Ехъорам пачъыхьэр Арамым ипачъыхьэу Хъазаел езаозэ, арамхэм Рамот къыщауІэгъагъэти, къызэригъэІэзэнхэу ИзрыІэл къыгъэзэжьыгъ. Ахъаб ыкъо Ехъорам сымэджагъэти, ащ дэжь Иорам ыкъо Ахъазый сымэджаплъэ къэкІуагъ.
Ехъыо Израилым ипачъыхьанэу къызэрэхахыгъэр
1 А уахътэм ЕлыщаІ тхьэлІыкІо зэкупэгъум ащыщ горэм къеджи риІуагъ: «Гъогум узэрэтехьанэу зыгъэхьазыри, мы къошынжъыеу зэйтын дагъэр зэрытыр зыдашти ГъылыІадым ит Рамот къалэм кІо. 2 Ащ узыкІокІэ, Нымщый ыкъо Ехъощафат икІалэу Ехъыо къыщызэгъэгъоти, зыІугъакІ. ДзэІэшъхьэтет купэу зыхэтым къыхэщи чъыяпІэм ищ. 3 Зэйтын дагъэр зэрыт къошынжъыер къашти, ышъхьэ текІи еІу: „Зиусхьаным ыІорэр мары: ‘Израилым урипачъыхьанэу пшъхьэ дагъэ къыщэсэфэ’“. ЕтІанэ псынкІэу къечъэжьэжь». 4 Арыти, тхьэлІыкІо ныбжьыкІэр ГъылыІадым ит Рамот къалэм кІуагъэ. 5 Ар ащ къызэсым, мары дзэІэшъхьэтетхэр зэхэгущыІэжьхэу щысых. Ащ къыІуагъ: «О, тхьамэтэ пащ, сыкъыпфаІофтагъ». Арыти, Ехъыо къеупчІыгъ: «Тащыщэу хэт дэжьа?» Мыдрэм риІожьыгъ: «Уадэжь, тхьамэтэ пащ». 6 Арыти, адрэр къэтэджи, унэм ихьагъэх. ТхьэлІыкІо ныбжьыкІэм зэйтын дагъэр ащ ышъхьэ тырикІи риІуагъ: «Израилым и Зиусхьанэу Тхьэм ыІорэр мары: „Зиусхьаным илъэпкъ, Израилым, урипачъыхьанэу укъыхэсэхы. 7 СиІумэт тхьэлІыкІохэуи, сиІумэт пстэоуи Изэбэл аригъэукІыгъэхэм алъ сшІэжьыным пае, уизиусхьан Ахъаб иунагъо бгъэкІодыщт. 8 Сыда пІомэ Ахъаб иунагъо зэрэщытэу кІодыщт. Ахъаб иунагъо хъулъфыгъэ гори къисымыгъанэу зэкІэ Израилым щызгъэкІодыщтых, шъхьафитныгъэ зимыІэхэри, абгынэжьыгъэу къэнагъэхэри зэрахэтхэу. 9 Джаущтэу Ахъаб иунагъо Нэуат ыкъо ЯрабІамрэ Ахъый ыкъо БаІыщэрэ яунагъомэ ясшІагъэр есшІэщт. 10 Изэбэл ИзрыІэл къалэм ыкІыб хьэхэм щашхыжьыщт, зыгорэми ар ыгъэтІылъыжьыщтэп“». ТхьэлІыкІо ныбжьыкІэм псынкІэу пчъэр къыІуихи къичъыжьыгъ. 11 ЕтІанэ Ехъыо изиусхьан пачъыхьэ идзэІэшъхьэтетхэу зигъусагъэхэм адэжь къызегъэзэжьым, ахэр ащ къеупчІыгъэх: «ЗэкІэри дэгъуа? Сыда а зэрмырыр уадэжь къызкІэкІогъагъэр?» Мыдрэм ариІожьыгъ: «Ар зыфэдэ цІыфри зыфиІори шъошІэба». 12 Адрэхэм къыраІожьыгъ: «Ар шъыпкъэп, къытаІу». Арыти, тхьэлІыкІом къыриІуагъэхэр афиІотэжьхи, «Зиусхьаным ыІорэр мары: „Израилым урипачъыхьанэу пшъхьэ дагъэ къыщэсэфэ“» ащ къызэрэрэриІуагъэр ариІуагъ. 13 Ащ дэжьым ахэр, гуІэхэзэ, шъхьадж ищыгъын къышти, атеуцонэу дэкІояпІэм фытыралъхьэхи, бжъэмыем къепщэхи, къэзэрэгъэкууагъэх: «Ехъыо пачъыхьэу техьагъ!»
Израилым ипачъыхьэу Иорам зэраукІыгъэр
14 ЕтІанэ Нымщый ыкъо Ехъощафат икІалэу Ехъыо Израилым ипачъыхьэу Ехъорам зыкъыпиІэтыгъагъ. Ежь Ехъорам израил дзэкІолІхэр игъусэхэу ГъылыІадым ит Рамот къалэм щыІэу Арамым ипачъыхьэу Хъазаел идзэ пэІууцогъагъ. 15 Пачъыхьэу Ехъорам Арамым ипачъыхьэу Хъазаел езаозэ къауІэгъагъэти, къызэригъэІэзэнхэу ИзрыІэл къалэм къыгъэзэжьыгъагъ. ЕтІанэ Ехъыо игъусэхэм ариІуагъ: «Сэ шъукъызготмэ, ИзрыІэл дэсхэм макъэ аригъэІуным пае зыгори Рамот къалэм дэрэмыкІ». 16 Ащ ыуж Ехъыо ику псынкІэ итІысхьи Ехъорам иуІагъэхэр зыщигъэхъужьыщтыгъэ ИзрыІэл кІуагъэ. Ехъудэм ипачъыхьэу Ахъазый Ехъорам дэжь кІэупчІакІо къэкІуагъэу щыІагъ. 17 ИзрыІэл къызэрэшІыхьэгъэ дэпкъым ышъхьагъ тетыгъэ къэрэгъулым Ехъыо идзэу къакІощтыгъэр къылъэгъугъэти ыІуагъ: «ЦІыф куп горэ къакІоу сэлъэгъу». Арыти, Ехъорам къыІуагъ: «Шыу горэ Іофыти, ахэм апэгъэгъокІи, мамыр ІофкІэ къэкІохэмэ къягъэупчІ». 18 Шыур ежьи, ахэм апэгъокІи ариІуагъ: «Пачъыхьэм ыІорэр мары: „Мамыр Іофа шъукъызфакІорэр?“» Арыти, Ехъыо къыриІожьыгъ: «Сыд о уиІофэу ащ хэлъыр? Сауж къихьи некІо». Къэрэгъулым хъурэм икъэбар пачъыхьэм ригъашІэу къыІуагъ: «Ар ахэм акІэрыхьагъ, ау къыгъэзэжьырэп». 19 Джыри нэмыкІ шыу аІофтагъэти, ари апэгъокІи ариІуагъ: «Пачъыхьэм ыІорэр мары: „Мамыр Іофа шъукъызфакІорэр?“» Ехъыо ащи къыриІуагъ: «Сыд о уиІофэу ащ хэлъыр? Сауж къихьи некІо». 20 Джыри къэрэгъулым хъурэм икъэбар пачъыхьэм ригъашІэу къыІуагъ: «Ар ахэм акІэрыхьагъ, ау къыгъэзэжьырэп. Иехьыжьэгъэ къэкІуакІэкІэ ар Нымщый икъорылъф Ехъыо фэд». 21 Арыти, Ехъорам къыІуагъ: «КъызэкІашъушІ!» Ащ ику псынкІэ къызэкІашІи, Израилым ипачъыхьэу Ехъорами, Ехъудэм ипачъыхьэу Ахъазыйи, шъхьадж ику псынкІэ арытІысхьэхи, Ехъыо пэгъокІыгъэх. Ахэр изрыІэлэу Набэт ичІыгу Іахьэ щызэІукІагъэх. 22 Арыти, Ехъорам Ехъыо къызешІэжьым еупчІыгъ: «Мамыр Іофа укъызфакІорэр, Ехъыо?» Адрэм ащ къыриІожьыгъ: «Уянэ Изэбэл тхьэнэпцІыбэхэм шъхьащэ афишІэу, удыгъэхэр бэу зэрихьэхэу сыдэущтэу Іофыр мамырын ылъэкІыщта?» 23 Ар дэдэм Ехъорам ику псынкІэ къыригъэгъази, къачъэзэ, Ахъазый къекууагъ: «ТагъэпцІагъ, Ахъазый!» 24 Ащ дэжьым Ехъыо щэбзащэр ищабзэ къыдилъхьи, лъэшэу къыкъудыйи, Ехъорам ытэмэкъупшъхьитІу азыфагу къытыригъафи, щэбзащэр ащ ыгу къыпхырифыгъ. Ехъорам ику псынкІэ ифэжьыгъ. 25 Арыти, Ехъыо идзэІэшъхьэтетмэ ащыщ Бидкъар риІуагъ: «Модэ мор къашти изрыІэлэу Набэт ичІыгу Іахьэ щычІэдзыжь. Сыда пІомэ титІо тызэгъусэу ащ ятэ Ахъаб ыуж титэу тыкІозэ, Зиусхьаным ащ къехъулІэнэу къыІогъагъэр угу къэгъэкІыжь: 26 „Шъыпкъэ дэдэмкІэ, Набэт ылъи ащ ыкъомэ алъи тыгъуасэ слъэгъугъэ, – Зиусхьаным ыІорэр джары, – ахэм алъ мы чІыпІэм щысшІэжьыщт“. Арышъ, Зиусхьаным къызэриІуагъэм фэдэу, ар а чІыгу Іахьэм щычІэдзыжь».
Ехъудэм ипачъыхьэу Ахъазый зэраукІыгъэр
27 Ехъудэм ипачъыхьэу Ахъазый ар зелъэгъум Бэт-Хагъэн къалэм ылъэныкъокІэ ечъэжьэжьыгъ. Ехъыо ащ ыуж илъади унашъо афишІыгъ: «Мыри шъуукІы!» Арыти, ар ику псынкІэ итэу, ИблэІам къалэу Гур Іуашъхьэм пэгъунэгъум екІурэ гъогум тетэу чъэжьзэ, еохи ауІагъ. Ар Мэгъыдэ къалэ гуІэнкІэ екІужьи, ащ щылІагъ. 28 ИІумэтхэм ар Ерусэлэм ащэжьи, Даут икъалэ дэт икъэунэу ятэшхохэр зычІэлъхэм щагъэтІылъыжьыгъ. 29 Ахъаб ыкъо Ехъорам зыпачъыхьэр илъэс пшІыкІузым хэхьагъэу Ахъазый Ехъудэм ипачъыхьэу техьэгъагъ.
Изэбэл зэраукІыгъэр
30 ЕтІанэ Ехъыо ИзрыІэл къалэ къэкІуагъ. Пачъыхьэу Ехъорам янэ Изэбэл а къэбарыр къызыфагъэсым, ынэхэр кІигъэлыкІхи, ышъхьац ыгъэдахи шъхьангъупчъэм къиплъэу Іууцуагъ. 31 Ехъыо къэлапчъэм къызыдэхьэм ар ащ къеупчІыгъ: «Зизиусхьан зыукІыжьыгъэ Зымрый, уиІофхэр дэгъуха?» 32 Арыти, мыдрэр шъхьангъупчъэм дэплъыйи, мэкъэ ІэтыгъэкІэ къэупчІагъ: «Хэт къызготыр, хэт?» Тхьамэтэ пащэмэ ащыщ нэбгырэ зытІущ къиплъыгъ. 33 «Къижъудз ар шъхьангъупчъэм», – ыІуи унашъо къафишІыгъ. Арыти, ар къырадзыхыгъ. Джаущтэу ащ ылъ дэпкъми шыхэми атыриутхагъ. Ехъыо ику псынкІэ кІэшІэгъэ шыхэр ащ ихьадэ телъадэхи зэхащытІыхьагъ. 34 Ащ ыуж Ехъыо къэлэсэраим дахьи щешхагъ, щешъуагъ. ЕтІанэ ариІуагъ: «А бзылъфыгъэу Зиусхьаныр зэбгыгъэм шъуфэсакъ, ар къэжъугъотыжьи жъугъэтІылъыжь. Сыда пІомэ ар пачъыхьэпхъущтыгъ». 35 Арыти, ар агъэтІылъыжьынэу кІуагъэх шъхьае, ышъхьэкъупшъхьэрэ, ыІэ-лъакъохэмрэ анэмыкІ къагъотыжьыгъэп. 36 Ахэм къагъэзэжьи къэбарыр къызыфахьыжьым, ащ къыІуагъ: «Зиусхьаным Тыщбы щыщ иІумэт Илас джары къыригъэІогъагъэр: „Изэбэл ихьадэ хьахэм ИзрыІэл чІыгум щашхыжьыщт. 37 Изэбэл ихьадэ чІыгум хэлъ ебзым фэдэу ИзрыІэл чІыгум хэшъухьажьыщт. Джащ тетэу ‘Мыр Изэбэл’ ыІоу ар зыгорэми ыгу къэкІыжьыхэщтэп“».
Ахъаб къытекІыгъэхэр зэраукІыгъэхэр
1 Ахъаб къытекІыгъэхэу нэбгырэ тІокІищрэ пшІырэ Щамэрэн щыІагъэх. Арыти, Ехъыо ытхи ИзрыІэлым ихэку Іэшъхьэтетхэм, ащ инахьыжъ упчІэжьэгъухэм, Ахъаб икІалэхэм япІун-лэжьын фэгъэзэгъагъэхэм афаригъэхьыгъ. Мыщ фэдэу ахэм афитхыгъ: 2 «Шъуизиусхьан ыкъохэр шъо къышъуфэгъэзагъэхэшъ, ку псынкІэхэри, шыхэри, зэкІэгъэпытыхьэгъэ къалэри, Іашэхэри шъуІэ илъыхэшъ, мы тхьапэ тхыгъэр къызэрэсэу, 3 шъуизиусхьан ыкъомэ шъуахаплъи, анахьышІоу, нахь зифэшъуашэр къахэшъухи, пачъыхьагъум тежъугъахьи, шъуизиусхьан иунагъо пае шъукъэзау». 4 Ахэр лъэш дэдэу къащтэхи аІуагъ: «Мары пачъыхьитІур ащ текІошъугъэп, тэ сыдэущтэу тыпэлъэшын тлъэкІына?» 5 Арыти, пачъыхьэм иунэ-хапІэ лъыплъэрэм, къалэм иІэшъхьэтет, нахьыжъ упчІэжьэгъухэм, кІалэмэ япІун-лэжьын фэгъэзагъэхэм Ехъыо дэжь рырагъэІонэу агъэкІуагъ: «Тэ тыуиІумэтышъ, о къапІорэр тшІэщт, зыгори пачъыхьэу тедгъэхьащтэп, оркІэ нахьышІур шІэ». 6 Ехъыо ащ ипэгъокІэу ятІонэрэу къафаригъэхьыгъэ тхьапэ тхыгъэм мыщ фэдэу къыритхагъ: «Сэ шъукъызготэу, сІорэри шъушІэщтмэ, шъуизиусхьан къытекІыгъэхэм ашъхьэхэр къыздашъуштэхи неущ мыщ фэдэ уахътэм ехъулІэу ИзрыІэл шъукъакІу». Пачъыхьэм къытекІыгъэхэр зэрэхъущтыгъэхэр нэбгырэ тІокІищрэ пшІырэ. Къалэм нахь щыцІэрыІохэр ары ахэр зыгъасэщтыгъэхэр. 7 Тхьапэ тхыгъэр ахэм къызэраІэкІахьэу пачъыхьэм къытекІыгъэхэр зэрэнэбгырэ тІокІищрэ пшІырэу аукІхи, ашъхьэхэр матэмэ аралъхьэхи Ехъыо дэжь ИзрыІэл къалэм фарагъэхьыгъэх. 8 Ехъыо афиІофтэгъагъэр къакІуи пачъыхьэм къытекІыгъэхэм ашъхьэхэр къызэрахьыгъэхэр къыриІуагъ. Арыти, ащ къыІуагъ: «Пчэдыжьым нэс щылъынхэу къэлэпчъэ дэхьапІэм дэжь сэмитІоу ахэр щызэтешъулъхьэх». 9 Пчэдыжьым Ехъыо къикІи, къэуцуи зэкІэ цІыфхэм къариІуагъ: «Шъо лажьэ шъуиІэп. Сэ мары сизиусхьан зыкъыпэсІати ар сыукІыгъэ. Адэ хэта мыдрэхэр зэкІэ зыукІыгъэр? 10 Ахъаб иунагъо ехьылІагъэу Зиусхьаным къыІуагъэм щыщ мыгъэцэкІагъэу зи къызэрэмынэщтыр зэжъугъашІэ. ИІумэт Илас къызэрэригъэІогъагъэм фэдэу, Зиусхьаным ышІыжьыгъ». 11 Джащ тетэу Ехъыо Ахъаб иунагъо щыщхэу ИзрыІэл къыдэнэгъагъэхэри, иІумэт Іэшъхьэтетышхохэри, къыготыгъэ иныбджэгъу благъэхэри, икъурмэнышІхэри зы нэбгырэ закъуи псэоу къымыгъанэу зэкІэ ыукІыгъ.
Пачъыхьэу Ахъазыехъу иІахьылхэр зэраукІыгъэхэр
12 ЕтІанэ ащ зызэтыригъэпсыхьи, ежьи Щамэрэн кІуагъэ. Мэлахъохэм язэІукІапІэу Бэт-Іэкъэд зыфаІорэм дэжь къыщыуцугъэу, 13 Ехъыо Ехъудэм ипачъыхьэу Ахъазый ышхэр ыпэ къифагъэхэти, яупчІыгъ: «Шъухэт шъо?» Адрэхэм къыраІожьыгъ: «Тэ Ахъазый тыриш, пачъыхьэм иунагъорэ пачъыхьэнанэу ИзэбэлкІэ тшыхэмрэ япсэуныгъэ изытет къызэдгъэшІэнэу тэкІо». 14 Арыти, мыдрэм унашъо ышІыгъ: «Зэрэпсэоу мыхэр шъуубытых». Ар дэдэм ахэр зэрэпсэухэу къаубытхи, нэбгырэ тІокІитІурэ тІурэ хъухэу, зы нэбгырэ закъуи псэоу къамыгъанэу Бэт-Іэкъэд пэгъунэгъу псынэм дэжь щаукІыгъэх.
Ахъаб иІахьылэу къэнагъэхэр зэраукІыгъэхэр
15 ЕтІанэ Ехъыо ащ дэжь къыІукІыжьи къежьэжьыгъэу, Рехаб ыкъо Ехъонадаб ыпэкІэ къикІэу къакІозэ ІукІагъ. Ащ сэлам рихи риІуагъ: «Сэ сыгукІэ сызэрэпфыщытым фэдэу ори угукІэ укъысфыщыта?» Ехъонадаб къыриІожьыгъ: «Ары». «Ащыгъум, – Ехъыо ыІуагъ, – пІэ къаштэ». Ащ лъыпытэу ыІэ фищэйи, къыдиІэтайи ику псынкІэ къыригъэтІысхьагъ. 16 Ащ риІуагъ: «Къыздежьи Зиусхьаным щытхъу пстэури зэриеным сишъыпкъэу сызэрэфэбанэрэр плъэгъущт». Джаущтэу ар ку псынкІэм рагъэтІысхьагъ. 17 Ехъыо Щамэрэн къызэкІом, Зиусхьаным Илас къызэрэригъэІогъагъэм фэдэу, Ахъаб зыгорэущтэу къыхэшІыхьагъэхэу псэоу къэнагъэхэр зэкІэ зэхиукІагъэх.
ТхьэнэпцІэу БаІал фэлажьэхэрэр зэраукІыгъэхэр
18 Ащ ыуж Ехъыо цІыфхэр зэкІэ къызэІуигъакІэхи ариІуагъ: «Ахъаб БаІал икъоу фэлэжьагъэп. Ехъыо ащ нахьышІуІоу фэлэжьэщт. 19 Арышъ, БаІал къурмэнышхо фэсшІыщтышъ, ащ фэлэжьэрэ лІыкІо пстэури, шъхьащэ фэзышІхэри, икъурмэнышІхэри зэкІэ зы нэбгыри къэмынэу садэжь къыщызэІужъугъакІэх. КъэмыкІорэр псэоу къэнэжьыщтэп». БаІал шъхьащэ фэзышІыщтыгъэхэр ыгъэкІодынхэм пае Ехъыо а тхьагъэпцІыгъэр зэрихьагъ. 20 Арыти, Ехъыо ыІуагъ: «БаІал ыцІэкІэ мэфэкІ зэІукІэ шІыгъэн фаеу макъэ яжъугъэІу». ЗэІукІэ зэрэщыІэщтым икъэбар арагъэшІагъ. 21 Ехъыо зэрэ Израилэу щиІофытэхи БаІал шъхьащэ фэзышІхэрэр зэкІэ зы нэбгыри къэмынэу, къызэІукІагъэх. Ахэр БаІал пае агъэпсыгъэ тхьэлъэІупІэунэм зехьэхэм, хэуцуапІэ имыІэжьэу цІыфыр ащ изыбзэ хъугъэ. 22 Арыти, Ехъыо БаІал пае фэІо-фашІэхэр зыгъэцакІэхэрэм зыщалъэрэ щыгъынхэр зыІыгъырэм риІуагъ: «БаІал фэлэжьэрэ пстэуми щыгъынхэр къафэхьых». Адрэм ахэм щыгъынхэр къафихьыгъэх. 23 ЕтІанэ Ехъыо Рехаб ыкъо Ехъонадаб игъусэу БаІал пае агъэпсыгъэ тхьэлъэІупІэунэм ихьи, БаІал фэлажьэхэрэм ариІуагъ: «Зиусхьаным фэлажьэрэмэ ащыщ горэ къышъухэтмэ зышъуплъыхьи зэжъугъашІэ, сыда пІомэ БаІал фэлажьэхэрэм анэмыкІ мыщ щыІэнэу щытэп». 24 Ащ лъыпытэу ахэр къурмэнхэмрэ къурмэнгъэстхэмрэ яшІын фежьагъэх. Ежь Ехъыо БаІал пае агъэпсыгъэ тхьэлъэІупІэунэм ыкІыб нэбгырэ тІокІиплІ къыригъэуцокІи ариІуагъ: «ШъуІэ къислъхьэрэмэ ащыщ псэоу къэзгъанэрэм ыпсэ ащ ыпсэ пае ытыжьыщт». 25 Къурмэнгъэстыныр заухым Ехъыо идзэкІолІ лъэсрыкІохэмрэ идзэІэшъхьэтетхэмрэ ариІуагъ: «Шъуихьи зы нэбгырэ закъуи мыкІожьынэу зэхэшъуукІыхьэх». Арыти, ахэр чатэхэмкІэ зэхалІыхьэхи, дзэкІолІ лъэсрыкІохэмрэ дзэІэшъхьэтетхэмрэ БаІал пае агъэпсыгъэ тхьэлъэІупІэунэм къычІадзыжьыгъэх, агъэзэжьи ащ хэт унэ лъапІэм ихьажьыгъэх. 26 Ар дэдэм БаІал пае агъэпсыгъэ тхьэлъэІупІэунэм итыгъэ пкъэухэр къычІаххи агъэстыгъэх. 27 Джаущтэу БаІал имыжъосынхэр зэхагъэтэкъуагъэх, БаІал пае агъэпсыгъэ тхьэлъэІупІэунэр зэхакъути, ар хэкІитэкъупІэ зэрашІыжьыгъэу джыри щыт. 28 Джаущтэу Ехъыо БаІал тхьэнэпцІым шъхьащэ фэшІыгъэныр Израил хэгъэгум ригъэкІодыкІыпагъ. 29 Ау Ехъыо Нэуат ыкъо ЯрабІамэу Израилыр псэкІодым хэзыщагъэм ипсэкІодшІагъэхэр, ащ дышъэм харигъэшІыкІыгъэ шкІэхэу Бэтэлрэ Данрэ ащигъэуцугъэхэр ІэкІыб ышІыгъэхэп. 30 Зиусхьаным Ехъыо къыриІуагъ: «Сэ сшІоигъор шъыпкъагъэ пхэлъэу уигуапэу зэрэпшІагъэм, Сэ сызыфаер Ахъаб иунагъо зэрепшІагъэм пае пкъохэр яплІэнэрэ лІэужым нэс Израилым ипачъыхьащтых». 31 Ау Ехъыо Израилым и Зиусхьанэу Тхьэм ихабзэхэм ыгукІэ афэшъыпкъагъэп. Израилыр псэкІодым хэзыщэгъэ ЯрабІам ипсэкІодшІагъэхэр ІэкІыб ышІыгъэхэп.
Ехъыо зэрэлІагъэр
32 А уахътэм Израилым ыубытырэ чІыгум Зиусхьаныр къыхэІабэзэ, нахь макІэ ышІэу ригъэжьагъ. Арамым ипачъыхьэу Хъазаел Израилым къезаозэ, тыдэкІи ащ къыщытекІощтыгъ. 33 Иордан псыхъом икъокІыпІэкІэ къыщегъэжьагъэу, къыблэ лъэныкъомкІэ щыІэ псыхъоу Арнон тет ІароІэр къалэм нэс ащ ыштэгъагъ. Ащ къыхиубытэщтыгъэх гъад, рубэн лъэпкъхэмрэ мэнасэ лъэпкъым щыщэу къокІыпІэ лъэныкъом щыпсэущтыгъэмрэ зэрысыгъэхэ ГъылыІад, Бащан хэкухэр. 34 Ехъыо нэмыкІэу ышІагъэхэмрэ лІыгъэу ащ зэрихьагъэхэмрэ израил пачъыхьэхэм яхьылІэгъэ Іэпэрытххэм арытхагъэхэба. 35 Ехъыо ятэ пІашъэхэр зыдэщыІэхэм зегъэзэжьым, Щамэрэн щагъэтІылъыжьыгъ. Ыкъо Ехъоахъаз ащ ычІыпІэ пачъыхьагъум техьагъ. 36 Ехъыо Щамэрэн дэсэу Израилым зэрипачъыхьагъэр илъэс тІокІырэ ирэ.
Пачъыхьэм янэу Іаталый пачъыхьагъум зэрэтырадзыгъэр
1 Ахъазыехъу янэ Іаталый икІалэ къызэраукІыгъэр зешІэм, пачъыхьэм ибын зэрэщытэу аригъэукІынэу фежьагъ. 2 Ау пачъыхьэу Иорам ыпхъоу, Ахъазый ышыпхъу ЕхъощэбаІ Ахъазый ыкъо Ехъоащ къышти, пачъыхьэм адрэ ыкъохэу аукІынэу щытыгъэхэм гъэбылъыгъэкІэ къахихи, ари быдз езгъэшъорэ бзылъфыгъэри чъыепІэ унэ горэм ыщагъэх. Джаущтэу Іаталый ар шІуигъэбылъыгъэти, ар аукІыгъэп. 3 ЕхъощэбаІ Ехъоащ Зиусхьаным и Унэ илъэсихэ щегъэбылъыфэ, Іаталый пачъыхьагъум тетыгъ. 4 Яблэнэрэ илъэсым зынэсым ЕхъоедаІ къурмэнышІым алъигъакІохи, ухъумэкІо шъхьагъырытхэмрэ дзэкІолІ лъэсрыкІохэмрэ ядзэІэшъхьэтетхэм къяджи, ежь дэжь, Зиусхьаным и Унэ къыщэхи, зэзэгъыныгъэ адишІыгъ. Зиусхьаным и Унэ тхьэлъанэ щаригъэшІи, пачъыхьэм ыкъо аригъэлъэгъугъ. 5 Ащ дэжьым ахэм унашъо афишІи ариІуагъ: «Мары джы шъушІэщтыр: шэмбэтрэ къулыкъу зышІырэ шъуизыщанэ пачъыхьэм иунэ къыгъэгъунэщт; 6 ятІонэрэ зыщанэм Сур къэлапчъэр къыгъэгъунэщт; ящэнэрэ зыщанэр ухъумэкІо шъхьагъырытхэм акІыб дэтэу къэлапчъэм Іутыщт. Джаущтэу унэр къэжъугъэгъун. 7 Шъуащыщ купитІоу шэмбэтрэ къулыкъу зымышІыхэрэм пачъыхьэм фэсакъхэзэ, Зиусхьаным и Унэ къагъэгъунэщт. 8 Хэти иІашэ ыІыгъэу пачъыхьэр бгъу пстэумкІи къэшъууцухьи, благъэу къышъокІолІэнэу фежьэрэ пстэури шъуукІы. Пачъыхьэр тыдэ кІуагъэми шъуригъус». 9 Арыти, дзэІэшъхьэтетхэм къурмэнышІэу ЕхъоедаІ къафишІыгъэ унашъохэр зэкІэ агъэцакІэхи, яцІыфхэу шэмбэтрэ къулыкъу зышІыхэрэмрэ зымышІыхэрэмрэ къызэрагъэгъусэхи, къурмэнышІэу ЕхъоедаІ дэжь къэкІуагъэх. 10 КъурмэнышІым ухъумэкІо шъхьагъырытхэм ядзэІэшъхьэтетхэм пачъыхьэу Даут ипчхэу, имэІухэу Зиусхьаным и Унэ чІэлъхэр къаритыгъэх. 11 Арыти, дзэкІолІ лъэсрыкІохэр, пачъыхьэр бгъу пстэумкІи ухъумагъэ хъуным пае, шъхьадж иІашэ зэриІыгъэу, унэм икъыблэ лъэныкъо къыщегъэжьагъэу итемыр лъэныкъо нэсэу, къурмэншІыпІэри унэри хъурэябзэу къауцухьагъ. 12 ЕхъоедаІ ащ лъыпытэу пачъыхьэм ыкъо къырищи пачъыхьэ танджыр шъхьащигъэуцуи, упачъыхьэным Тхьэм и Унашъохэу пылъхэр зэрытхэгъэ тхылъыр ритыгъ. Джащ тетэу ар пачъыхьагъум тырагъахьи ышъхьэ дагъэ щафагъ. Щытыгъэхэр, «Пачъыхьэр орэпсэу!» аІомэ, Іэгу фытеохэзэ, зэрэгъэкуощтыгъэх. 13 Іаталый цІыфхэмрэ дзэкІолІ лъэсрыкІохэмрэ амакъэ зызэхехым ахэм адэжь, Зиусхьаным и Унэ, кІуагъэ. 14 Мары пачъыхьэр хабзэм тетэу кІэсэным кІэрыт. ДзэІэшъхьэтетхэмрэ сырынапщэхэмрэ ащ къызэрегъэуцокІыгъэхэри, зэкІэ цІыфхэм зэрягушІогъошхори, сырынэхэм къызэряпщэхэри ылъэгъугъэх. Іаталый ищыгъынхэр зэІитхъыхи къэкууагъ: «ДгокІыгъэх! ДгокІыгъэх!» 15 КъурмэнышІэу ЕхъоедаІ Іаталый Зиусхьаным и Унэ зэрэщычІамыукІыхьаным егупшыси, ухъумэкІо шъхьагъырытхэм ядзэІэшъхьэтетхэм унашъо афишІи ариІуагъ: «Модэ мор ухъумэкІо шъхьагъырытхэм ахэшъущи, къэзыухъумэнэу фежьэрэ пстэури чатэкІэ шъуукІы». 16 Арыти, ар къаубыти, агъэкІуатэзэ, шыхэмкІэ пачъыхьэм ищагу къызэрэдэхьажьхэрэ лъэныкъомкІэ агъакІуи, ащ дэжь щаукІыгъ.
ЕхъоедаІ Ехъуд пачъыхьагъур гъогушІу зэрэтырищагъэр
17 Зиусхьаным фэІорышІэнхэм пае, ЕхъоедаІ пачъыхьэмрэ цІыфхэмрэ Зиусхьаным Іуагъэ даригъэшІыгъ. Ащ нэмыкІэуи пачъыхьэмрэ цІыфхэмрэ Іуагъэ ащ зэдаригъэшІыгъ. 18 Ащ ыуж цІыфхэр зэкІэ БаІал иунэ езэрэгъэкІухи, ащ чІэт къурмэншІыпІэхэри, ежь исурэтэу чІэтыгъэхэри зэхагъэтэкъуагъэх. БаІал икъулыкъушІэу Матан къурмэншІыпІэ пашъхьэм щаукІыгъ. ЕхъоедаІ къурмэнышІым Зиусхьаным и Унэ лъыплъэнхэу цІыфхэр ыгъэнэфагъэх. 19 ЕтІанэ ЕхъоедаІ дзэІэшъхьэтетхэр, ухъумэкІо шъхьагъырытхэр, дзэкІолІ лъэсрыкІохэр, цІыфхэр зэкІэ игъусэхэу пачъыхьэр Зиусхьаным и Унэ къычІащыжьи, ухъумэкІо шъхьагъырытхэм къагъэгъунэщтыгъэ Сур къэлапчъэм къыблащи, пачъыхьэ унэм къащэжьыгъ. Ар ащ пачъыхьэ тахътэм щытетІысхьагъ. 20 ЦІыфхэм зэкІэми ягушІогъошхуагъ, Іаталый пачъыхьэ унэм чатэкІэ зыщаукІым ыуж къалэри Іэсэжьыгъагъ. 21 Ехъоащ пачъыхьагъум зытехьэм илъэсибл ыныбжьыгъэр.
Ехъуд пачъыхьэу Ехъоащ
1 Ехъыо зыпачъыхьэр яблэнэрэ илъэсым хэхьагъэу Ехъоащ пачъыхьагъум техьи, илъэс тІокІитІо Ерусэлэм щыпачъыхьагъ. Ащ янэ ыцІагъэр Цыбый, БэрщэбаІ къалэм щыщыгъ. 2 Ехъоащ щэІэфэ Зиусхьаным къекІущтыр ренэу ышІэщтыгъ, сыда пІомэ къурмэнышІэу ЕхъоедаІ иупчІэжьэгъущтыгъ. 3 Ау щытми къурмэнхэр зыщашІырэ лъэгапІэхэр зэтыраригъэхыжьыгъагъэхэп, цІыфмэ ахэм къурмэнхэр джыри ащашІыхэзэ, мэ ІашІухэр къызыпиххэри ащагъэстщтыгъэх. 4 Арыти, Ехъоащ къурмэнышІхэм ариІуагъ: «Зиусхьаным и Унэ чІэтыщт пкъыгъо лъапІэхэр зэращэфыщт тыжьын ахъщэу цІыфхэм къахэкІырэр, нэбгырэ пэпчъ къытырэ хьакъулахь тыжьыныр, къахьырэ ахъщэр, аущтэу шъхьадж ыгу пыкІырэ ахъщэр Зиусхьаным и Унэ къыщышъуугъоих. 5 КъурмэнышІхэм зишІуагъэ къязгъэкІхэрэм ахъщэ къаІарэхи, Тхьэм и Унэ, хэкъутыкІыгъэхэр иІэхэу алъэгъухэмэ, арэгъэцэкІэжьых». 6 Ау Ехъоащ зыпачъыхьэр ятІокІэнэрэ щырэ илъэсым хэхьафэ къурмэнышІхэм Тхьэм и Унэ хэкъутыкІыгъэу иІэхэр агъэцэкІэжьыгъэхэп. 7 Арыти, пачъыхьэу Ехъоащ къурмэнышІэу ЕхъоедаІи нэмыкІ къурмэнышІхэри къаригъащэхи ариІуагъ: «Сыда Тхьэм и Унэ хэкъутыкІыгъэу иІэхэр зыкІяшъумыгъэгъэцэкІэжьхэрэр? Джы къыщегъэжьагъэу къурмэнышІхэм зишІуагъэ къязгъэкІхэрэм ахъщэр шъощ пае къаІышъумыхыжьэу, ар Тхьэм и Унэ зыгъэцэкІэжьыщтхэм лэжьапкІэ афэшъушІ». 8 Арыти, зишІуагъэ къязгъэкІхэрэм ежьхэм апае ахъщэ къаІамыхыжьынэу пачъыхьэу Ехъоащ къызэрариІуагъэм къурмэнышІхэр къезэгъыгъэх, Тхьэм и Унэ игъэцэкІэжьын цІыфхэм къин тырамылъэгъон фаеу игъоу алъэгъугъ. 9 ЕхъоедаІ пхъуантэ горэм ышъхьэ гъуанэ фишІи, къурмэншІыпІэм иджабгъу лъэныкъокІэ, ар Зиусхьаным и Унэ ичІэхьапІэ дэжь ыгъэуцугъ. ПчъэшъхьаІум дэжь щыт къэрэгъул къурмэнышІхэм Зиусхьаным и Унэ къырахьылІэрэ ахъщэр зэкІэ ащ ралъхьэщтыгъэ. 10 ЕтІанэ, пхъуантэм ахъщэр дизыбзэ зыхъукІэ, пачъыхьэм итхакІорэ къурмэнышІ шъхьаІэмрэ къакІохэти, Зиусхьаным и Унэ къырахьылІэгъэ ахъщэр алъытэжьти, дзыо цІыкІухэм аралъхьэти ашъхьаІухэр папхыкІыжьщтыгъэх. 11 Джащ тетэу ахъщэр алъытэти, Зиусхьаным и Унэ зыгъэцэкІэжьхэрэм яІэшъхьэтетхэм аратыщтыгъэ, адрэхэм ар Зиусхьаным и Унэ Іоф щызышІэрэ пхъашІэхэм, псэолъэшІхэм, 12 унэ дэпкъхэр къэзыІэтхэрэм, мыжъохэр къыгозыутхэрэм аратыжьщтыгъэ, чъыг ихыкІыгъэхэмрэ мыжъо къыгоутыгъэхэмрэ къэщэфыгъэнхэм, Зиусхьаным и Унэ хэкъутыкІыгъэхэм ягъэцэкІэжьынрэ ащ иІыгъынрэ атырагъэкІуадэщтыгъэ. 13 Ау щытми тыжьын лэджэн цІыкІухэр, остыгъэм ишъэгъэ стафэхэр къызэрэпахырэ Іадэхэр, нэмыкІ лэджэнхэр, къурмэншІыпІэм тыраутхэрэ лъыр зэрагъэхъорэ Іэгубжъэхэр, сырынэхэр, нэмыкІ дышъэ-тыжьын пкъыгъохэр Зиусхьаным и Унэ къырахьылІэгъэ ахъщэмкІэ ашІыгъэхэп. 14 А ахъщэр Іоф зышІэхэрэм аратыщтыгъэ, Зиусхьаным и Уни рырагъэцэкІэжьщтыгъэ. 15 Іоф зышІэхэрэм ахъщэр аратынэу пшъэрылъ зыфашІхэрэм шъыпкъагъэ зэрахэлъым къыхэкІэу ар зэрагъэзекІорэ шІыкІэм кІэупчІэжьщтыгъэхэп. 16 ПсэкІодышІкІэгъожь къурмэнымрэ псэкІод къурмэнымрэ къаращэфынхэм пае къатырэ ахъщэр Зиусхьаным и Унэ игъэцэкІэжьын хамыгъахьэу, ар къурмэнышІхэм къафэнэжьщтыгъэ. 17 А уахътэм арам пачъыхьэу Хъазаел зао ышІынэу къежьи, Гъат къалэм къекІуи, ар ыштагъ. Ерусэлэм ыштэнэуи Хъазаел гухэлъ ышІыгъ. 18 Ау Ехъудэм ипачъыхьэу Ехъоащ Ехъудэм ипачъыхьэгъэхэ ятэ пІашъэхэу Ехъощафати, Иорами, Ахъазыйи, ежьми Тхьэм и Унэ фашІыгъэ тын лъапІэхэр, Зиусхьаным и Унэ игъэтІылъыпІэхэмрэ пачъыхьэм иунэрэ къаригъотэгъэ дышъэр зэкІэ Арамым ипачъыхьэу Хъазаел фаригъэщагъэх. Арыти, адрэр идзэ игъусэу Ерусэлэм кІэрыкІыжьыгъ. 19 Ехъоащ иІофшІагъэхэмрэ нэмыкІэу ышІагъэхэмрэ ехъуд пачъыхьэхэм яхьылІэгъэ Іэпэрытххэм арытхагъэхэба. 20 Ехъоащ иІумэтхэм зыкъыпаІэти, шъэфэу зэзэгъыхи, ар Милло зыфаІорэ етІэ зэтетэкъуагъэхэу къэлэ дэпкъым ылъапсэхэр зэрэгъэпытагъэхэм ашъхьагъ тет унэу Силэ чІыпІэм ылъэныкъокІэ щыІэм щаукІыгъ. 21 Ар зыукІыгъэхэр ежь иІумэтхэу ЩымІат ыкъо Иозабадрэ Шэумэр ыкъо Ехъозабадрэ. Ар лІи Даут икъалэу ятэ пІашъэхэр зыдэлъхэм щагъэтІылъыжьыгъ. Ащ ычІыпІэ ыкъо Амацый пачъыхьагъум техьагъ.
Израил пачъыхьэу Ехъоахъаз
1 Ехъудэм ипачъыхьэу Ахъазый ыкъо Ехъоащ зыпачъыхьэр ятІокІэнэрэ щырэ илъэсым хэхьагъэу Ехъыо ыкъо Ехъоахъаз Израилым ипачъыхьэу Щамэрэн щытехьи илъэс пшІыкІублэ пачъыхьагъэ. 2 Ащ Зиусхьаным къемыкІущтыр ышІэщтыгъэ, Нэуат ыкъо ЯрабІамэу Израилыр псэкІодым хэзыщагъэм ышІэгъэ псэкІодмэ ахэтыгъ, ахэм къащигъакІэщтыгъэп. 3 Арыти, Зиусхьаныр Израилым къыфэгубжи, ар Арамым ипачъыхьэу Хъазаелрэ Хъазаел ыкъо Бэнхададрэ егъэшІэрэу аІэ рилъхьагъ. 4 Ащ ыуж Ехъоахъаз Зиусхьаным лъэшэу елъэІугъэти, Зиусхьаным ар къызэхихыгъ, сыда пІомэ израил цІыфхэр къин зэрэхэтхэри, арам пачъыхьэр ахэм къызэражэхахьэри Ащ инэрылъэгъугъ. 5 Зиусхьаным къэгъэнэжьакІор Израилым къыфигъэкІуагъэти, ахэр арамхэм къаІапыкІыжьыгъэх. Джаущтэу израил цІыфхэр ыпэкІэ зэрэщыІагъэхэм фэдэу мамырэу псэунхэу рагъэжьэжьыгъ. 6 Ау ащ емылъытыгъэу ахэр ЯрабІам иунагъоу Израилыр псэкІодым хэзыщагъэм ышІэгъэ псэкІодмэ ахэкІыщтыгъэхэп, ахэм зэрахэтыгъэх, Астартэ пае агъэуцугъэ пкъэухэр Щамэрэн джыри зэритыгъэх. 7 Арамым ипачъыхьэ Ехъоахъаз идзэ къызэхикъути, къызэрэзэхихьаджыхьагъэм къыхэкІэу, ащ щыщэу зэкІэмкІи къыфэнэжьыгъагъэр шыу шъэныкъу, ку псынкІэу пшІы, нэбгырэ минипшІ хъурэ лъэсыдзэр. 8 Ехъоахъаз иІофшІагъэхэмрэ нэмыкІэу ышІагъэхэмрэ израил пачъыхьэхэм яхьылІэгъэ Іэпэрытххэм арытхагъэхэба. 9 Джаущтэу Ехъоахъаз ятэ пІашъэхэр зыдэщыІэхэм зегъэзэжьым, Щамэрэн ар щагъэтІылъыжьыгъ. Ыкъо Иоащ ащ ычІыпІэ пачъыхьагъум техьагъ.
Израил пачъыхьэу Иоащ
10 Ехъудэм ипачъыхьэу Ехъоащ зыпачъыхьэр ящэкІэнэрэ блырэ илъэсым хэхьагъэу Ехъоахъаз ыкъо Иоащ пачъыхьэу Щамэрэн щытехьи илъэс пшІыкІухэ пачъыхьагъэ. 11 Ащи Зиусхьаным къемыкІущтыр ышІэщтыгъэ, Нэуат ыкъо ЯрабІамэу Израилыр псэкІодым хэзыщагъэм ышІэгъэ псэкІод пстэуми ахэтыгъэ нахь, ахэм ахэкІыщтыгъэп, къахэнагъ. 12 Иоащ иІофшІагъэхэри, нэмыкІэу ышІагъэхэри, гу пытэу иІэмкІэ Ехъудэм ипачъыхьэу Амацый зэрэтекІуагъэри израил пачъыхьэхэм яхьылІэгъэ Іэпэрытххэм арытхагъэхэба. 13 Джаущтэу Иоащ ятэ пІашъэхэр зыдэщыІэхэм зегъэзэжьым, ыкъо ЯрабІам ащ итахътэ тетІысхьагъ. Ежь Иоащ израил пачъыхьэхэр зыщагъэтІылъыжьыгъэхэ Щамэрэн щагъэтІылъыжьыгъ.
ЕлыщаІ зэрэлІагъэр
14 Израилым ипачъыхьэу Иоащ джыри мылІэзэ, ЕлыщаІ мыхъужьынэу сымаджэ хъуи, етІанэ узым илІыкІыгъ. Иоащ ащ дэжь къакІуи, «А тят! А тят! Израилым ику псынкІэрэ ащ ишыудзэрэ!» ыІозэ, ащ тегъагъ. 15 ЕлыщаІ ащ риІуагъ: «Щабзэмрэ щэбзащэхэмрэ къаштэх». Арыти, адрэм щабзэмрэ щэбзащэхэмрэ ыштагъэх. 16 Ащ дэжьым израил пачъыхьэм ащ риІуагъ: «ПІэ щабзэм телъхь». Адрэм къызэрэриІуагъэм фэдэу зешІым, ежь ЕлыщаІ ыІэхэр пачъыхьэм ыІэмэ атырилъхьагъ. 17 Джыри ащ риІуагъ: «КъокІыпІэ лъэныкъомкІэ гъэзэгъэ шъхьангъупчъэр Іухи, щабзэр штэ». Адрэм джаущтэу ышІыгъ. ЕтІани ЕлыщаІ ащ риІуагъ: «О». Арыти адрэр зэом, ащ къыриІуагъ: «Зиусхьаным а щэбзащэм къарыІэкІехыжьых, Арамым ащкІэ текІо, арамхэм зыкъамыІатыжьышъунэу Афэкъ уащытекІощт». 18 Джыри ЕлыщаІ ащ риІуагъ: «Щэбзащэхэр штэх». Адрэм къыштагъэх. Арыти израил пачъыхьэм риІуагъ: «ЧІыгум фэгъази о». Ар гъогогъуищэ чІыгум еуи къэуцужьыгъ. 19 Арыти, ЕлыщаІ ащ фэгубжи риІуагъ: «Гъогогъуитфэ е хэ уеон фэягъэ, джащыгъум арамхэм уатекІопэщтыгъэ, ау арамхэм джы узэратекІощтыр гъогогъуищ ныІэп». 20 Ащ ыуж ЕлыщаІ лІи агъэтІылъыжьыгъ. Илъэс къихьагъу къэс моаб бзэджэшІэ купхэр хэгъэгум пчъагъэрэ къибанэщтыгъэх. 21 Зэгорэм лІагъэ горэ агъэтІылъыжь пэтзэ, бзэджэшІэ куп къызэракІорэр алъэгъугъэти, хьадэр ЕлыщаІ икъэунэ чІадзэжьыгъ. Хьадэр ефэхи ЕлыщаІ икъупшъхьэхэм затефэм, ащ ыпсэ къыпыкІэжьи къэтэджыжьыгъ.
Израилымрэ Арамымрэ зэрэзэзэуагъэхэр
22 Арамым ипачъыхьэу Хъазаел Ехъоахъаз опачъыхьэфэ израил цІыфхэр ренэу щыхьагъу къышІыщтыгъэх. 23 Ау Зиусхьаным ахэм гукІэгъу къафишІи къыухъумагъэх, Ибрахьимэ, Исхьакъ, Якъубэ къадишІыгъэ зэзэгъыныгъэм илъэпІагъэ пае ахэр ыгъэкІодынхэу фэягъэп, джы къызнэсыгъэми ыпашъхьэ римыгъэкІыхэу, къыгъэнагъэхэу щыІэх. 24 ЕтІанэ Арамым ипачъыхьэу Хъазаел лІи, ыкъо Бэнхадад ащ ычІыпІэ пачъыхьагъум техьагъ. 25 Ехъоахъаз ыкъо Иоащ Хъазаел ыкъо Бэнхадад Ехъоахъаз заокІэ тырихыгъэгъэ къалэхэр къызІэкІигъэхьажьыгъэх. Гъогогъуищэ Иоащ ар зэхикъути, израил къалэхэр къызІэкІигъэхьажьыгъэх.
Ехъудэмрэ Израилымрэ япачъыхьэхэр зэрэзэпыщытыгъэхэр
1 Израилым ипачъыхьэу, Ехъоахъаз ыкъо Иоащ зыпачъыхьэр ятІонэрэ илъэсым хэхьагъэу Ехъудэм ипачъыхьэу, Ехъоащ ыкъо Амацый пачъыхьагъум техьагъ. 2 Ар пачъыхьагъум зытехьэм ыныбжьыгъэр илъэс тІокІырэ тфырэ, илъэс тІокІрэ бгъурэ Ерусэлэм щыпачъыхьагъ. Ащ янэ ыцІагъэр ЕхъоІадан, Ерусэлэм щыщыгъ. 3 Амацый Зиусхьаным къекІущтыр ышІэщтыгъ, ау ятэшхо Даут фэмыдэ дэдэу, ятэ Ехъоащ зэрэзекІуагъэм фэдэу зигъэпсыщтыгъ. 4 Ау къурмэнхэр зыщашІырэ лъэгапІэхэр зэхакъутэгъагъэхэпти, цІыфмэ ахэм къурмэнхэр ащашІщтыгъэх, гъомэ ІашІухэр къызпиххэри ащагъэстщтыгъэх. 5 Амацый пачъыхьагъур зызІэкІегъэпытыхьахэм ятэ пачъыхьэщтыгъэр зыукІыгъэ иІумэтхэр аригъэукІыжьыгъэх. 6 Ау иІумэт укІакІохэм ялъфыгъэхэр ыгъэкІодыгъэхэп, сыда пІомэ Зиусхьаным иунашъоу Мосэ ихэбзэ тхылъ зэритхагъэм фэдэу ышІыгъ: «Ялъфыгъэхэм апае ны-тыхэр укІыкІэ агъэпщынэжьынхэу, ялъфыгъэхэри ны-тымэ апае укІыкІэ агъэпщынэжьынхэу щытэп. Ау хэти бзэджэшІагъэу иІэм пае укІыкІэ пшъэдэкІыжь егъэхьыжьыгъэн фае». 7 ЕтІанэ ар КІэй ЩыугъэкІэ заджэхэрэм едом нэбгырэ минипшІым ащытекІонхэм кІэщакІо фэхъугъ, СэлаІ къалэр заокІэ ышти, Иокътэел цІэр фиусыжьыгъ, а цІэмкІэ джы къызнэсыгъэми ащ еджэх. 8 А уахътэм Амацый израил пачъыхьэу Иоащ ыкъо Ехъоахъаз ыкъо Ехъыо дэжь лІыкІохэр ыгъакІохи, кІуачІэкІэ зэрэзэнэкъокъунхэ фаер раригъэІуагъ. 9 Арыти, Израилым ипачъыхьэу Иоащ Ехъудэм ипачъыхьэу Амацый дэжь къыраригъэІонэу къыгъэкІуагъэх: «Зэгорэм Ливан къушъхьэхэм къащыкІырэ пэрэжъыем джа Ливан къушъхьэ дэдэм къащыкІырэ кедрэм дэжь раригъэІонэу ыІофытагъэх: „Упхъу скъо шъузэу къет“. Ау Ливан къушъхьэмэ ащыпсэурэ псэушъхьэ Іэлыр къышъхьарыхьи, а пэрэжъыер зэхицІыцІагъ. 10 Едомхэм шъыпкъэ дэдэмкІэ уатекІуагъэшъ, пагэ ухъугъ. Къыбдэхъугъэм разэ рыхъуи, рэхьатэу уихэгъэгу ис. Сыд пае тхьамыкІагъо хэпхынэу, ори пІэ илъ ехъуд лъэпкъми шъузэрэзэгъусэу хьадэгъур хэшъухынэу зыбгъэпсыра?» 11 Ау Амацый ащ едэІугъэпти, Израилым ипачъыхьэу Иоащ къежьи, ежьыррэ Ехъудэм ипачъыхьэу Амацыйрэ Ехъудэм ит Бэтщэмэщ къалэм дэжь зэзэонхэу щызэІукІагъэх. 12 Израилыдзэр ехъудыдзэм къытекІуи, ахэр шъхьадж иунэ екІужьыгъэх. 13 Израилым ипачъыхьэу Иоащ Ехъудэм ипачъыхьэу, Ахъазый ыкъо Ехъоащ ыкъожь Амацый Бэтщэмэщ щиубыти, Ерусэлэм къекІугъ. Ерусэлэм къешІэкІыгъэ дэпкъ пытапІэр ащ хэт Ефраим къэлапчъэм къыщегъэжьагъэу Къопэ къэлапчъэм нэс, икІыхьагъэкІэ метрэ шъитІу фэдиз хъунэу, зэхикъутагъ. 14 Арыти, ащ Зиусхьаным и Унэ къырагъотэгъэ дышъэри, тыжьынри, пкъыгъо лъапІэхэри, пачъыхьэм иунэ къырагъотэгъэ мылъкури зэкІэ зыдиштэхи, шэсэу ыубытыгъэхэри зыдырищажьэхи Щамэрэн ыгъэзэжьыгъ. 15 Иоащ иІофшІагъэхэри, лІыгъэу зэрихьагъэхэри, Ехъудэм ипачъыхьэу Амацый ар зэрезэуагъэри израил пачъыхьэхэм яхьылІэгъэ Іэпэрытххэм арытхагъэхэба. 16 Джащ тетэу Иоащ ятэ пІашъэхэр зыдэщыІэхэм зегъэзэжьым, израил пачъыхьэхэм афэдэу Щамэрэн щагъэтІылъыжьыгъ. Арыти, ыкъо ЯрабІам ащ ычІыпІэ пачъыхьагъум техьагъ.
Ехъудэм ипачъыхьэу Амацый зэрэлІагъэр
17 Ехъудэм ипачъыхьэу, Ехъоащ ыкъо Амацый Израилым ипачъыхьэу, Ехъоахъаз ыкъо Иоащ зэлІэм ыуж, илъэс пшІыкІутфэ псэугъэ. 18 Амацый иІофшІагъэхэр ехъуд пачъыхьэхэм яхьылІэгъэ Іэпэрытххэм арытхагъэхэба. 19 Ащ къыпэшІуекІохэу цІыф горэхэм Ерусэлэм зыкъыщыпаІэтыгъэти, Лахыщ къалэ гъэбылъыпІэкІэ екІужьыгъ. Ау ыуж афызэ Лахыщ лъагъакІохи, ащ щаукІыгъ. 20 Ихьадэ шыкІэ къахьыжьи, Даут икъалэу ятэ пІашъэхэр зыдалъхьажьыгъэхэ Ерусэлэм ар щагъэтІылъыжьыгъ. 21 Арыти, зэрэехъуд лъэпкъэу илъэс пшІыкІух зыныбжьыгъэ Іузый ятэ Амацый ычІыпІэ пачъыхьагъум тыригъэхьагъ. 22 Ятэ ятэ пІашъэхэр зыдэщыІэм зегъэзэжьым ыуж ары ащ Елат къалэр зэкІигъэпытыхьажьи, ар Ехъудэм ыІэ къызыригъэхьажьыгъэр.
Израил пачъыхьэу ЯрабІам
23 Ехъудэм ипачъыхьэу, Ехъоащ ыкъо Амацый зыпачъыхьэр япшІыкІутфэнэрэ илъэсым хэхьагъэу Израилым ипачъыхьэу, Иоащ ыкъо ЯрабІам Щамэрэн пачъыхьагъум щытехьи, илъэс тІокІитІурэ зырэ пачъыхьагъэ. 24 Зиусхьаным къемыкІущтыр ащ ышІэщтыгъ: Нэуат ыкъо ЯрабІамэу Израилыр псэкІодым хэзыщагъэм ышІэгъэ псэкІод пстэуми ахэтыгъ. 25 Ащ Хъамат къалэм идэхьагъу къыщегъэжьагъэу хы ЛІагъэм нэсэу Израилым гъунапкъэу иІагъэхэр ыгъэуцужьыгъэх. Израилым и Зиусхьанэу Тхьэм иІумэтэу, Амытай ыкъо Юнысэу Гъат-Хахъэфэр къалэм щыщ тхьэлІыкІом къызэрэригъэІогъагъэм фэдэу ар хъужьыгъэ. 26 Сыда пІомэ Израилым къинышхо зэрэтелъыр Зиусхьаным къылъэгъущтыгъэ, хъулъфыгъэ гори къыримыгъанэу зэкІэ Израилым щигъэкІодыгъэх, шъхьафитныгъэ зимыІэхэри, абгынэжьыгъэу къэнагъэхэри зэрахэтхэу. 27 Ау Зиусхьаным израил лъэпкъыр дунаим тыримыгъэкІодыкІэу, Иоащ ыкъо ЯрабІам ишІушІагъэкІэ ар къыгъэнэжьыгъ. 28 ЯрабІам иІофшІагъэхэри, лІыгъэу зэрихьагъэхэри, ар зэрязэуагъэри, Ехъудэм ыІэ илъыгъэ къалэхэу Дамаскрэ Хъаматрэ Израилым ыІэ къызэрэригъэхьэжьыгъагъэхэри израил пачъыхьэхэм яхьылІэгъэ Іэпэрытххэм арытхагъэхэба. 29 Джаущтэу ЯрабІам нэмыкІ израил пачъыхьэхэм афэдэу ятэ пІашъэхэр зыдэщыІэм ыгъэзэжьыгъ. Арыти, ыкъо Зэхарый ащ ычІыпІэ пачъыхьагъум техьагъ.
Ехъуд пачъыхьэу Іузый
1 Израилым ипачъыхьэу ЯрабІам зыпачъыхьэр ятІокІэнэрэ блырэ илъэсым хэхьагъэу Ехъудэм ипачъыхьэу, Амацый ыкъо Іузый пачъыхьагъум техьагъ. 2 Ар пачъыхьагъум зытехьэм илъэс пшІыкІух ыныбжьыгъэр, илъэс шъэныкъорэ тІурэ Ерусэлэм щыпачъыхьагъ. Ащ янэ ыцІагъэр Ехъолыехъу, Ерусэлэм щыщыгъ. 3 Ятэ Амацый фэдэкъабзэу Зиусхьаным къекІущтыр ащ ышІэщтыгъ. 4 Ау къурмэнхэр зыщашІырэ лъэгапІэхэр зэхакъутэгъагъэхэпти, цІыфмэ ахэм къурмэнхэр джыри ащашІыщтыгъэх, гъомэ ІашІухэр къызпиххэри ащагъэстщтыгъэх. 5 Арыти, Зиусхьаныр пачъыхьэм къыфехи, олІэжьыфэ шъоджэузыр иІэнэу ышІи, унэ шъхьаф исэу щыІагъ. Пачъыхьэм ыкъо Иотам апшъэрэ Іэшъхьэтетныгъэр иІэу хэгъэгум пэщэныгъэ дызэрихьэщтыгъ. 6 Іузый зэкІэ иІофшІагъэхэри ышІагъэхэри ехъуд пачъыхьэхэм яхьылІэгъэ Іэпэрытххэм арытхагъэхэба. 7 Джащ тетэу Іузый ятэ пІашъэхэр зыдэщыІэхэм зегъэзэжьым, ятэ Даут икъалэу ятэ пІашъэхэр зыдэлъхэм щагъэтІылъыжьыгъ. Арыти, ыкъо Иотам ащ ычІыпІэ пачъыхьагъум техьагъ.
Израил пачъыхьэу Зэхарый
8 Ехъудэм ипачъыхьэу Іузый зыпачъыхьэр ящэкІэнэрэ ирэ илъэсым хэхьагъэу Израилым ипачъыхьэу ЯрабІам ыкъо Зэхарый пачъыхьагъум техьи, мэзихэ пачъыхьагъэ. 9 Арыти, ятэхэм зэрашІыщтыгъэу, ащ Зиусхьаным къемыкІущтыр ышІэщтыгъэ, Нэуат ыкъо ЯрабІамэу Израилыр псэкІодым хэзыщагъэм ипсэкІодшІагъэмэ афэдэхэри ышІэщтыгъ, ахэм къахэкІыщтыгъэп. 10 Яощ ыкъо Щалум ащ зыкъыпиІэти, цІыфхэм апашъхьэ щиукІи, ащ ычІыпІэ пачъыхьагъум техьагъ. 11 Зэхарый зэкІэ иІофшІагъэхэр израил пачъыхьэхэм яхьылІэгъэ Іэпэрытххэм джарба зэрарытхагъэри. 12 Джаущтэу Зиусхьаным «Пкъохэр яплІэнэрэ лІэужым нэс Израилым ипачъыхьащтых» ыІуи, Ехъыо къызэрэриІогъагъэм фэдэу хъужьыгъэ.
Израил пачъыхьэу Щалум
13 Яощ ыкъо Щалум Ехъудэм ипачъыхьэу Іузый зыпачъыхьэр ящэкІэнэрэ бгъурэ илъэсым хэхьагъэу пачъыхьагъум техьи, зы мазэрэ Израилым Щамэрэн щырипачъыхьагъ. 14 Ащ дэжьым Гъадый ыкъо Мынахъэм Тырцэ лъэныкъом къикІи, Щамэрэн къекІуи, Яощ ыкъо Щалум къезауи, ар Щамэрэн щиукІи, ащ ычІыпІэ пачъыхьагъум техьагъ. 15 Щалум зэкІэ иІофшІагъэхэри, пачъыхьэм зыкъызэрэпиІэтыгъагъэри израил пачъыхьэхэм яхьылІэгъэ Іэпэрытххэм джарба зэрарытхагъэри. 16 ЕтІанэ Мынахъэм Тифсахъ къалэм къекІуи зэрипхъуагъ. Ащ икъэлапчъэ къыфыІуахэу зэрэдамыгъэхьагъэм пае, дэсыгъэхэри, иІэгъо-благъохэм ащыпсэущтыгъэхэри зэкІэ зэдигъакІохэу, Тырцэ лъэныкъом къикІ зэхъум, зэхигъэтэкъуагъэх. Бзылъфыгъэ лъэрмыхьэу ащ дэсыгъэ пстэури зэпиупкІыгъэх.
Израил пачъыхьэу Мынахъэм
17 Ехъудэм ипачъыхьэу Іузый зыпачъыхьэр ящэкІэнэрэ бгъурэ илъэсым хэхьагъэу Гъадый ыкъо Мынахъэм Израилым ипачъыхьэнэу техьи илъэсипшІэ Щамэрэн щыпачъыхьагъ. 18 Ежь щэІэфэ Зиусхьаным къемыкІущтыр ащ ышІэщтыгъ: Нэуат ыкъо ЯрабІамэу Израилыр псэкІодым хэзыщагъэм ышІэгъэ псэкІодмэ къащигъакІэщтыгъэп. 19 А уахътэм Ашурым ипачъыхьэу Пул зэонэу хэгъэгум къихьагъэти, ар къыготынымрэ пачъыхьагъур зыІэкІигъэпытыхьанымрэ пае, тыжьынэу килограмм мин щэкІрэ тфырэ фэдиз Мынахъэм ащ ритыгъ. 20 Мынахъэм ашур пачъыхьэм а тыжьыныр ритыным пае зэкІэ израил байхэм нэбгырэ телъытэу грамм шъих зырыз фэдиз къаугъоинэу атырилъхьагъ. Арыти, ашур пачъыхьэр зэкІэкІожьи, хэгъэгум икІыжьыгъ. 21 Мынахъэм зэкІэ иІофшІагъэхэри ышІагъэхэри израил пачъыхьэхэм яхьылІэгъэ Іэпэрытххэм арытхагъэхэба. 22 Джащ тетэу Мынахъэм ятэ пІашъэхэр зыдэщыІэхэм ыгъэзэжьыгъ. Арыти, ыкъо Пэкъахъый ащ ычІыпІэ пачъыхьагъум техьагъ.
Израил пачъыхьэу Пэкъахъый
23 Ехъудэм ипачъыхьэу Іузый зыпачъыхьэр яшъэныкъорэ илъэсым хэхьагъэу Мынахъэм ыкъо Пэкъахъый Израилым ипачъыхьэнэу Щамэрэн щытехьи, илъэситІо пачъыхьагъэ. 24 Ащ Зиусхьаным къемыкІущтыр ышІэщтыгъэ: Нэуат ыкъо ЯрабІамэу Израилыр псэкІодым хэзыщагъэм ышІэгъэ псэкІодмэ къащигъакІэщтыгъэп. 25 Арыти, идзэ Іэшъхьэтет пащэмэ ащыщэу, Рэмалыехъу ыкъо Пэкъахъ гъылыІад лъэпкъым щыщ нэбгырэ шъэныкъо игъусэу ащ зыкъыпиІэти, Щамэрэн дэт пачъыхьэ унэм хэт унэ-пытапІэм раукІыхьагъ. Ежь ащ ычІыпІэ пачъыхьагъум техьагъ. 26 Пэкъахъый зэкІэ иІофшІагъэхэри ышІагъэхэри израил пачъыхьэхэм яхьылІэгъэ Іэпэрытххэм джарба зэрарытхагъэр.
Израил пачъыхьэу Пэкъахъ
27 Ехъудэм ипачъыхьэу Іузый зыпачъыхьэр яшъэныкъорэ тІурэ илъэсым хэхьагъэу Рэмалыехъу ыкъо Пэкъахъ Израилым ипачъыхьэнэу Щамэрэн щытехьи, илъэс тІокІырэ пачъыхьагъэ. 28 Ащ Зиусхьаным къемыкІущтыр ышІэщтыгъэ: Нэуат ыкъо ЯрабІамэу Израилыр псэкІодым хэзыщагъэм ышІэгъэ псэкІодмэ къащигъакІэщтыгъэп. 29 Израилым ипачъыхьэу Пэкъахъ итетыгъом Ашурым ипачъыхьэу Тыгълат-Пылэсэр къежьи, Іион, Абэл-Бэт-МаІах, Яноахъ, Къэдэщ, Хъацэр къалэхэмрэ, ГъылыІад, Гъалыл, Нафталый хэкухэмрэ ыштэхи, цІыфхэр рищхи Ашурым ыгъэкощыгъэх. 30 Арыти, Елэ ыкъо ХъощэІ Рэмалыехъу ыкъо Пэкъахъ зыкъыпиІэти, еуи ар ыукІыгъ. Іузый ыкъо Иотам зыпачъыхьэр ятІокІэнэрэ илъэсым хэхьагъэу ежь Пэкъахъ ычІыпІэ пачъыхьагъум техьагъ. 31 Пэкъахъ зэкІэ иІофшІагъэхэри нэмыкІэу ышІагъэхэри Израилым ипачъыхьэхэм яхьылІэгъэ Іэпэрытххэм джарба зэрарытхагъэр.
Ехъуд пачъыхьэу Иотам
32 Израилым ипачъыхьэу, Рэмалыехъу ыкъо Пэкъахъ зыпачъыхьэр ятІонэрэ илъэсым хэхьагъэу Ехъудэм ипачъыхьэу Іузый ыкъо Иотам пачъыхьагъум техьагъ. 33 Ар пачъыхьагъум зытехьэм илъэс тІокІырэ тфырэ ыныбжьыгъэр, илъэс пшІыкІухэ Ерусэлэм щыпачъыхьагъ. Ащ янэ Цадокъ ыпхъугъ, ыцІагъэр Еруща. 34 Зиусхьаным къекІущтыр ышІэщтыгъэ, ятэ Іузый фэдэу сыдырэмкІи зекІуагъэ. 35 Ау къурмэнхэр зыщашІырэ лъэгапІэхэр зэхакъутэгъагъэхэпти, цІыфмэ ахэм къурмэнхэр ащашІыщтыгъэх, гъомэ ІашІухэр къызпиххэри ащагъэстщтыгъэх. Иотам Шъхьагъ къэлапчъэхэр Зиусхьаным и Унэ хигъэуцогъагъэх. 36 Иотам зэкІэ иІофшІагъэхэри, зэкІэ ышІагъэхэри Ехъудэм ипачъыхьэхэм яхьылІэгъэ Іэпэрытххэм джарба зэрарытхагъэри. 37 А уахътэм Зиусхьаным Арамым ипачъыхьэу Рэцынрэ Рэмалыехъу ыкъо Пэкъахърэ Ехъудэм зыкъыпаригъэІэтэу ригъэжьагъ. 38 Иотам ятэ пІашъэхэр зыдэщыІэхэм зегъэзэжьым, ятэ пІашъэхэм афэдэу, ятэ Даут икъалэ щагъэтІылъыжьыгъ. Ыкъо Ахъаз ащ ычІыпІэ пачъыхьагъум техьагъ.
Ехъуд пачъыхьэу Ахъаз
1 Рэмалыехъу ыкъо Пэкъахъ Израилым зэрипачъыхьэр япшІыкІублэнэрэ илъэсым хэхьагъэу, Ехъудэм ипачъыхьэу Иотам ыкъо Ахъаз пачъыхьагъум техьагъ. 2 Ахъаз пачъыхьагъум зытехьэм ыныбжьыгъэр илъэс тІокІ, илъэс пшІыкІухэ ар Ерусэлэм щыпачъыхьагъ. Ау ятэшхо Даут фэдэу, и Зиусхьанэу Тхьэм къекІущтыр ышІэщтыгъэп. 3 Израил пачъыхьэхэм ягъогухэм атетыгъ. Ащ шІокІэу ыкъо машІокІэ къурмэн ышІыгъ, Зиусхьаным израил цІыфмэ ахифыжьыгъэ лъэпкъхэм ашІэщтыгъэ гущыкІыгъо емыкІушхохэм акІырыплъыщтыгъ. 4 Къурмэнхэр зыщашІырэ лъэгапІэхэми, Іуашъхьэхэми чъыг жьау пэпчъ ычІэгъи къурмэнхэр ащишІыщтыгъэх, гъомэ ІашІухэр къызпиххэрэр ащигъэстщтыгъэх. 5 ЕтІанэ Арамым ипачъыхьэу Рэцынрэ Израилым ипачъыхьэу Рэмалыехъу ыкъо Пэкъахърэ Ерусэлэм заокІэ аштэнэу къекІухи къадзыхьагъ, Ахъаз ащ даубытагъ, ау текІошъугъэхэп. 6 А уахътэм едом пачъыхьэм Елат къалэр Арамым ыІэ къыригъэхьажьи, ащ дэсыгъэ ехъудхэр дифхи, едомхэр къакІохи ащ дэхьагъэхэу, джы къызнэсыгъэми щэпсэух. 7 Ахъаз Ашурым ипачъыхьэу Тыгълат-Пылэсэр дэжь лІыкІохэр ыІофытэхи раригъэІуагъ: «Сэ о сыуиІумэт, сыуиІэрылъхь, о зэрэпІоу сыхъунэу сыкъеуцуалІэшъ, къакІуи зыкъыспэзыІэтыгъэхэ Арамым ипачъыхьэрэ Израилым ипачъыхьэрэ сакъыІэкІэхыжь». 8 Ахъаз Зиусхьаным и Унэ къырагъотэгъэ дышъэри, тыжьынри, пачъыхьэм иунэ къарагъотэгъэ мылъкури зэкІэ ышти, ашур пачъыхьэм ратынэу фаригъэщагъэх. 9 Арыти, ашур пачъыхьэр ащ къезэгъи, Дамаск къалэм екІуи, ар ышти, цІыфэу дэсыгъэхэр Къыр къалэм ыгъэкощхи, Рэцын ыукІыгъ. 10 Пачъыхьэу Ахъаз Ашурым ипачъыхьэу Тыгълат-Пылэсэр пэгъокІынэу Дамаск кІуагъэти, ащ дэт къурмэншІыпІэр ылъэгъугъ. Пачъыхьэу Ахъаз ащ тешІыкІыгъэ сурэтымрэ техыгъэ шапхъэхэмрэ Урый къурмэнышІым фаригъэхьыгъэх. 11 Арыти, Урый къурмэнышІым пачъыхьэу Ахъаз Дамаск къыраригъэхыгъэ а шапхъэхэм атехыгъэу, пачъыхьэу Ахъаз Дамаск къимыкІыжьзэ къурмэншІыпІэр ышІыгъ. 12 Пачъыхьэр Дамаск къызекІыжьым къурмэншІыпІэр ылъэгъугъ. Пачъыхьэр кІуи, къурмэншІыпІэм дэкІоягъ. 13 Икъурмэнгъэсти игъомылэ тыни ащ щишІыгъэх, ишъон къурмэни зэгурыІоныгъэ къурмэным ылъи зэрэщытэу къурмэншІыпІэм тырикІагъэх. 14 Джэрз къурмэншІыпІэу Зиусхьаным ыпашъхьэ итыгъэр, къурмэншІыпІакІэмрэ Зиусхьаным и Унэрэ азыфагу дэтыгъэр, Тхьэм и Унэ чІэхьапІэ къыІуигъэкІоти, темыр лъэныкъомкІэ гъэзагъэу ыгъэуцугъ. 15 Пачъыхьэу Ахъаз Урый къурмэнышІым унашъо фишІэу риІуагъ: «Пчэдыжь къурмэнгъэстымрэ пчыхьэ гъомылэ тынымрэ, пачъыхьэм икъурмэнгъэстрэ ащ игъомылэ тынрэ, цІыфхэм зэкІэми якъурмэнгъэстрэ ахэм ягъомылэ тынрэ яшъон къурмэни зэрягъусэу къурмэншІыпІэ шъхьаІэм щыгъэстых. Къурмэнгъэст ашІырэ, нэмыкІ къурмэн ашІырэ былымышъхьэ пэпчъ ылъ зэрэщытэу къурмэншІыпІэм текІ. Адрэ джэрз къурмэншІыпІэм етшІэщтыр сэ къэсІощт». 16 Арыти, Урый къурмэнышІым пачъыхьэу Ахъаз унашъо къызэрэфишІыгъэм фэдэу ышІыгъ. 17 Пачъыхьэу Ахъаз щэрэхъхэр зыкІэт тхьакІыпІэ-тегъэуцуапІэхэм абгъухэу кІоцІымкІэ щыІэ зэгъэпытылІапІэхэмкІэ зэкІэгъэпытыхьагъэхэр къахикІыкІхи, ахэм атетыгъэ джэрз лэгъупхэр къатырихыгъэх. Лэгъуп-псыубытыпІэр, джэрзым хэшІыкІыгъэ цоу ащ ычІэгъ чІэтыгъэхэм къатырихи, мыжъо джэхашъом тыригъэуцуагъ. 18 Шэмбэт мафэхэм Тхьэм и Унэ рычІэхьанхэу ащ къыпишІыхьагъэри, ежь пачъыхьэр Зиусхьаным и Унэ кІо зыхъукІэ зычІэтэу къызэрыкІорэ гъэІагъэри ашур пачъыхьэм игуапэ хъуным пае зэфаригъэшІыжьыгъэх. 19 Ахъаз зэкІэ иІофшІагъэхэр ехъуд пачъыхьэхэм яхьылІэгъэ Іэпэрытххэм арытхагъэхэба. 20 Джаущтэу Ахъаз ятэ пІашъэхэр зыдэщыІэхэм зегъэзэжьым, ятэ пІашъэхэм афэдэу, ятэ Даут икъалэ щагъэтІылъыжьыгъ. Арыти, ыкъо Хъызкъый ащ ычІыпІэ пачъыхьагъум техьагъ.
Израилым ипачъыхьэу ХъощэІ
1 Ехъудэм ипачъыхьэу Ахъаз зыпачъыхьэр япшІыкІутІонэрэ илъэсым хэхьагъэу Елэ ыкъо ХъощэІ Израилым ипачъыхьанэу Щамэрэн щытехьи, илъэсибгъо пачъыхьагъэ. 2 Ежь ыпэкІэ тетыгъэ израил пачъыхьэмэ афэмыдэми, Зиусхьаным къемыкІущтыр ышІэщтыгъ. 3 Ашурым ипачъыхьэу Щалмынэсэр ащ зыкъыпиІэти, ХъощэІ ащ ыІэ илъэу хъугъэ, тын Іахьэхэри ритыщтыгъэх. 4 Ау Ашурым ипачъыхьэ ХъощэІ зэрэгокІыгъэм гу лъитагъ, сыда пІомэ ащ илІыкІо Іофтабгэхэр Мысырым ипачъыхьэу Сэу дэжь ыгъакІощтыгъэх, Ашурым ипачъыхьэ илъэс къэс ритын фэегъэ тын Іахьэхэр фаригъащэщтыгъэхэп. Арыти, Ашурым ипачъыхьэ ар аригъэубыти, хьапсым чІаригъэдзагъ.
Темыр пачъыхьагъоу Щамэрэн зэраштагъэр
5 ЕтІанэ Ашурым ипачъыхьэ идзэ игъусэу, зэрэхэгъэгоу зэлъиубытэу къибани, Щамэрэн къалэм къекІуи, ар къэдзыхьагъэу илъэсищэ ыІыгъыгъ. 6 ХъощэІ зыпачъыхьэр ябгъонэрэ илъэсым хэхьагъэу ашур пачъыхьэм Щамэрэн ышти, израил цІыфхэр ыгъэкощхи Ашурым раригъэщыгъэх. Хъалахъ къалэ, Гозан хэкум ит Хъабэр псыхъом ылъэныкъокІэ, мадай къалэхэм ахэр аригъэгъэкощыгъэх. 7 Щамэрэн къалэр аштагъ, сыда пІомэ израил цІыфхэм я Зиусхьанэу Тхьэу, ахэр Мысыр хэгъэгум къизыщыжьыгъэу, Мысырым ипачъыхьэ фирхьауным къыІэкІэзыхыжьыгъэм къемыкІущтыр ашІэщтыгъэ, нэмыкІ тхьэхэм шъхьащэ афашІыщтыгъ, 8 Зиусхьаным израил цІыфхэм ахифыжьыгъэ лъэпкъхэм яхабзэхэми, израил пачъыхьэхэм ягъэпсыкІэхэми атетхэу зекІохэу, ахэм афэдэ зашІэу аублагъ. 9 Джаущтэу израил цІыфхэм я Зиусхьанэу Тхьэм къемыкІущтхэр шъэфэу ашІэу аублагъ. Къэлэ цІыкІухэм къащегъэжьагъэу дэпкъхэмкІэ гъэпытэгъэ къэлэшхомэ анэсыжьэу къурмэн зыщашІырэ лъэгапІэхэр якъэлэ пстэуми адагъэуцуагъэх. 10 Ахэм Астартэ пае пкъэухэмрэ мыжъосынхэмрэ Іошъхьэ лъагэ пэпчърэ чъыг жьау чІэгъ пэпчърэ ащагъэуцугъэх. 11 Зиусхьаным ахэм ахифыжьыгъэ цІыф лъэпкъхэм зэряхэбзагъэу, къурмэн зыщашІырэ лъэгапІэхэм гъомэ ІашІухэр къызпиххэрэр ащагъэущтыгъэх, Зиусхьаныр агъэгубжэу Ащ къемыкІущтхэр ашІэщтыгъэх. 12 Зиусхьаным «Ахэр шъумышІэх» къызфариІогъэ тхьэ нэпцІхэм шъхьащэ афашІыщтыгъэ. 13 Ау Зиусхьаным итхьэлІыкІо пстэухэмкІи, усэрэжъ пэпчъкІи Израилымрэ Ехъудэмрэ къариІогъагъэба: «Шъуигъогу пхэнджхэм шъуакъытекІи, шъуятэхэм къахэслъхьэгъэ хабзэу Си Іумэт тхьэлІыкІохэмкІэ къэзгъэкІуагъэр Си унашъохэмрэ Си шапхъэхэмрэ атетэу жъугъэцакІэ». 14 Ау ахэр дэІуагъэхэп, я Зиусхьанэу Тхьэр зышІошъ мыхъущтыгъэ ятэхэм афэдэу, якъаигъагъэ хагъэхъуагъ. 15 Зиусхьаным ишапхъэхэр, ятэхэм Ащ къадишІыгъэ иІуагъэ, Ащ зыфигъэсакъщтыгъэхэр щагъэзыягъэх. Тхьэ нэпцІхэм шъхьащэ афашІыщтыгъэти, осэнчъэу хъугъэх. Ягъунэгъу цІыф лъэпкъхэм афэдэу мызекІонхэу Зиусхьаным унашъо къызфафишІыгъагъэхэм акІырыплъыгъэх. 16 Джаущтэу я Зиусхьанэу Тхьэм и Унашъохэр зэкІэ щагъэзыехи, тхьэпапкІэхэу шкІитІу дышъэм хагъэткІукІыгъ, Астартэ пае пкъэухэр агъэуцугъэх, тыгъэ-жъогъо-мазэхэм, БаІал шъхьащэ афашІыщтыгъэ. 17 Акъохэмрэ апхъухэмрэ машІокІэ къурмэн ашІыщтыгъэх, шхъухьэшІэнымрэ джэнчыдзынымрэ апылъыгъэх, Зиусхьаным къемыкІущтыр зэрашІэнымрэ Ар зэрагъэгубжынымрэ ыуж итыгъэх. 18 Арыти, Зиусхьаныр израил цІыфхэм лъэшэу къафэгубжи, ахэр ынэІу ригъэкІыгъэх. Ехъуд лъэпкъым нэмыкІ зыпари къэнагъэп. 19 Ехъудэми и Зиусхьанэу Тхьэм иунашъохэр ыгъэцакІэщтыгъэхэп, израил цІыфхэм къаштэгъэ хабзэхэм атетэу псэущтыгъэ. 20 Арыти, Зиусхьаныр Израилым илІэуж пстэуми къафэгубжи, ахэр ригъэуцолІагъэх, хъункІэкІо-цунтхъакІохэм яІэрылъхьэ ышІыхэзэ, аужыпкъэм ынэІу ригъэкІыпагъэх. 21 Израилым Даут икІэн Ехъудэм зыгуиушъхьафыкІыпи, Нэуат ыкъо ЯрабІам пачъыхьэу тыригъэхьагъ. ЯрабІам Израилыр Зиусхьаным кІэрищи, псэкІодышхом хищагъ. 22 Джаущтэу израил цІыфхэр ЯрабІам ышІэрэ псэкІод пстэумэ ахэтыгъэх, ахэм къакІырагъэчыщтыгъэп. 23 Аужыпкъэм Зиусхьаным иІумэт тхьэлІыкІо пстэухэм къызэраригъэІогъагъэм тетэу Израилыр ынэІу ригъэкІыгъ. Джаущтэу Израилыр ичІыгу рагъэкІи, Ашурым зэрагъэкощыгъэу джы къызнэсыгъэми ащ щыІ.
НэмыкІ лъэпкъхэм ащыщхэр Щамэрэн къызэрэрагъэтІысхьагъэхэр
24 Ашур пачъыхьэм Бабилэн, Кутэ, Іао, Хъамат, Сэфаруаим къалэмэ адэсхэр къыгъэкощхи, ахэр израил цІыфхэм ачІыпІэ Щамэрэн къалэхэм адигъэтІысхьагъэх. Ахэм Щамэрэн хэкур зэлъаубыти, ащ ит къалэхэм ащыпсэухэу рагъэжьагъ. 25 Ахэр а чІыпІэм къызагъэкощыгъэхэм къыщегъэжьагъэу Зиусхьаным шъхьащэ фашІыщтыгъэпти, Зиусхьаным аслъанхэр къаригъэкІухэти, ахэм ащыщхэр алІыщтыгъэх. 26 Арыти, Ашурым ипачъыхьэ къэбар фахьи раІуагъ: «ЦІыфэу бгъэкощхи щамэрэн къалэхэм адэбгъэтІысхьагъэхэм а хэгъэгум и Тхьэ ихабзэхэр ашІэхэрэпышъ, Тхьэм джащ пае аслъанхэр къатырегъэбанэх, а хэгъэгум и Тхьэ ихабзэхэр ахэм зэрамышІэхэрэм пае мары алІых». 27 Джащ пае Ашурым ипачъыхьэ унашъо ышІи ыІуагъ: «Ащ къижъугъэкощыкІыгъэ къурмэнышІхэм ащыщэу зы нэбгырэ орэкІуи щэрэпсэу, а хэгъэгум и Тхьэ ихабзэхэм ахэр аферэгъасэх». 28 Арыти, Щамэрэн къырагъэкощыкІыгъэхэм ащыщэу зы къурмэнышІ горэ кІуи, Бэтэл дэсэу ахэр Зиусхьаным шъхьащэ зэрэфэпшІыщтым фигъасэщтыгъэх. 29 Ау щытми цІыф лъэпкъ пэпчъ джыри ежь итхьэ нэпцІхэр ышІыхэти, Щамэрэн щыпсэущтыгъэхэм якъурмэншІыпІэ лъэгапІэхэм атырагъэуцогъэгъэ тхьэлъэІупІэунэмэ ащигъэуцущтыгъэх. Лъэпкъ пэпчъ зыщыпсэурэ къалэм ахэр ащагъэуцугъэх. 30 Бабилэн щыщхэм Сукъот-Бэнот агъэуцугъ, Кут щыщхэм – Нэргъал, Хъамат щыщхэм – Ащымэ, 31 Іао щыщхэм Ныбхъазрэ Тартакърэ агъэуцугъэх, Сэфаруаим щыщхэм якІалэхэр ятхьэнэпцІхэу Адрамэлэхрэ Іанамэлэхрэ апае машІокІэ къурмэн ашІыщтыгъэх. 32 Ащ дакІоуи Зиусхьаными шъхьащэ фашІыщтыгъэ, ежьмэ ащыщ цІыф зэфэшъхьафхэр зыхадзыхи, къурмэншІыпІэ лъэгапІэмэ къурмэнхэр ащашІынхэу Іуагъэхьагъэхэу, ахэр къурмэнхэр зыщашІырэ лъэгапІэхэм атырагъэуцогъэгъэ тхьэлъэІупІэунэмэ аІутыгъэх. 33 Ахэм Зиусхьаным шъхьащэ фашІыщтыгъэ, къызхагъэкощыкІыгъэ лъэпкъхэм ахэлъыгъэ хабзэм тетэу, джаущтэуи ежьхэм ятхьэнэпцІхэми афэлажьэщтыгъэх. 34 Джы къызнэсыгъэми ахэр пасэм ахэлъыгъэ хабзэхэм атетэу мэпсэух: Зиусхьаным щыщынэхэрэп, Зиусхьаным Израил цІэр къызфиусыгъэ Якъубэ ыкъохэм къафигъэпытэгъэ шапхъэхэр, гъэнэфагъэхэр, хабзэхэр, унашъохэр агъэцакІэхэрэп. 35 Зиусхьаным ахэм Іуагъэ къадишІи, унашъо къафишІи, къариІуагъ: «НэмыкІ тхьэхэр шъумыгъэлъапІэх, ахэм шъхьащэ афэшъумышІ, шъуафэмылажь, къурмэнхэри афэшъумышІ. 36 Ау зыІэ къышъуфэзыщэйи, зикІочІэшхокІэ мысыр хэгъэгум шъукъизыщыжьыгъэ Зиусхьаныр, Джар жъугъэлъапІэ, Джащ шъхьащэ фэшъушІ, Джащ къурмэнхэр фэшъушІых. 37 Ащ шъо къышъуфитхыгъэ шапхъэхэр, гъэнэфагъэхэр, хабзэр, унашъохэр зэрэжъугъэцэкІэнхэм сыдыгъуи шъупылъ, нэмыкІ тхьэхэр шъумыгъэлъапІэх. 38 Сэ Іуагъэу къыжъудэсшІыгъэр зыщышъумыгъэгъупш, нэмыкІ тхьэхэр шъумыгъэлъапІэх. 39 Ау шъуи Зиусхьанэу Тхьэ закъор жъугъэлъапІэ, джащыгъум Ащ шъуипый пстэуми шъуакъыІэкІихыжьыщт». 40 Ау ахэр дэІуагъэхэп, пасэм ахэлъыгъэ хабзэхэм атетэу зекІощтыгъэх. 41 Ау щытми а лъэпкъхэм Зиусхьаныр агъэлъапІэщтыгъэми, тхьэнэпцІхэм ямыжъосынхэм афэлажьэщтыгъэх. Ахэм ялъфыгъэхэри, ялъфыгъэхэм къалъфыжьыгъэхэри ятэхэр зэрэзекІощтыгъэхэм фэдэу джы къызнэсыгъэми щытых.
Ехъуд пачъыхьэу Хъызкъый
1 Израилым ипачъыхьэу Елэ ыкъо ХъощэІ зыпачъыхьэр ящэнэрэ илъэсым хэхьагъэу Ехъудэм ипачъыхьэу Ахъаз ыкъо Хъызкъый пачъыхьагъум техьагъ. 2 Ар пачъыхьагъум зытехьэм ыныбжьыгъэр илъэс тІокІырэ тфырэ, илъэс тІокІрэ бгъурэ Ерусэлэм щыпачъыхьагъ. Ащ янэ Зэхарый ыпхъугъ, ыцІагъэр Абый. 3 Ятэшхо Даут фэдэу ащ Зиусхьаным къекІущтыр зэкІэ ышІэщтыгъэ. 4 Ащ къурмэнхэр зыщашІырэ лъэгапІэхэр, пкъэухэр, Астартэ имыжъосынхэр зэхаригъэкъутэжьыгъэх. Мосэ ышІыгъэгъэ джэрз блэри зэхицІыцІэжьыгъ, сыда пІомэ а уахътэм нэс израил цІыфхэр НэхъущтэнкІэ ащ еджэхэзэ, гъомэ ІашІухэр къызпиххэрэр ыпашъхьэ щагъэстыщтыгъэх. 5 Израилым и Зиусхьанэу Тхьэм ар пытэу щыгугъыщтыгъ. Ащ фэдэ ехъуд пачъыхьэхэм ахэтыгъэп, ыужкІи ыпэкІи фэдэ къахэкІыгъэп. 6 Ар Зиусхьаным епкІылІагъэу, Ащ къыкІэрыкІыщтыгъэп, Зиусхьаным Мосэ осыетэу къыфишІыгъэ унашъохэр ыгъэцакІэщтыгъэх. 7 Джаущтэу Зиусхьаныр ащ игъусагъ, сыдрэ Іоф рихьыжьагъэми зэкІэри къыдэхъущтыгъэ. Ащ ашур пачъыхьэм итетыгъо зыкъыпиІэти, фэмыпщылІыжьэу хъугъэ. 8 Ар фылистхэм язауи, Іазэ къалэм нэсэу, ащ иІэгъо-чІыгъо щыпсэущтыгъэхэми, къэлэ цІыкІухэми дэпкъхэмкІэ гъэпытэгъэ къэлэшхохэм адэсыгъэхэм зэкІэми атекІуагъ. 9 Хъызкъый зыпачъыхьэр яплІэнэрэ илъэсым хэхьагъэу, израил пачъыхьэу Елэ ыкъо ХъощэІ зыпачъыхьэр яблэнэрэ илъэсым хэхьагъэу, Ашурым ипачъыхьэу Щалмынэсэр Щамэрэн къекІуи, къыдзыхьагъ. 10 Илъэсищ зытешІэм, Хъызкъый зыпачъыхьэр яхэнэрэ илъэсым хэхьагъэу, Израилым ипачъыхьэу ХъощэІ пачъыхьагъум зытетыр ябгъонэрэ илъэсым хэхьагъэу, Щамэрэн ащ ыштагъ. 11 Арыти, ашур пачъыхьэм израил цІыфхэр ыгъэкощхи, Ашурым раригъэщыгъэх, Хъалахъ къалэ, Гозан хэкум ит Хъабэр псыхъом ылъэныкъокІэ, мадай къалэхэм ахэр араригъэкощыгъэх. 12 Я Зиусхьанэу Тхьэм зэремыдэІугъэхэм, Ащ иІуагъэ зэраукъуагъэм, Зиусхьаным иІумэт Мосэ унашъоу къафишІыгъэхэм зэрямыдэІугъэхэмрэ зэрамыгъэцэкІагъэхэмрэ пае ахэм джар къащышІыгъ.
Ашурхэм Ерусэлэм зэраштагъэр
13 Хъызкъый зыпачъыхьэр япшІыкІузэнэрэ илъэсым хэхьагъэу Ашурым ипачъыхьэу Санхъэриб Ехъудэм икъэлэ зэкІэгъэпытыхьагъэхэм къякІуи, ахэр ыштагъэх. 14 Ехъудэм ипачъыхьэу Хъызкъый ашур пачъыхьэм дэжь, Лахыщ къалэм, ыгъакІохи раригъэІуагъ: «Сызэрэмысэм сеуцолІэжьы, скІэрыкІыжьба. Къыстеплъхьэрэр спщыныщт». Арыти, ашур пачъыхьэм Ехъудэм ипачъыхьэу Хъызкъый къыритын фаеу тыжьын килограмм минибгъу фэдизрэ, дышъэ килограмм шъибгъу фэдизрэ къытырилъхьагъ. 15 Арыти, Хъызкъый Зиусхьаным и Унэ къырагъотэгъэ тыжьын пстэури, пачъыхьэм иунэ къырахыгъэ мылъкури аритыгъэх. 16 Ащ дэжьым Хъызкъый Зиусхьаным иунапчъэмэ атеІулІэгъэ дышъэмрэ пчъэблыпкъхэм ащ атыраригъэІулІэгъэ дышъэмрэ къатыритхъыжьхи, ашур пачъыхьэм ритыгъэх. 17 Ашур пачъыхьэм идзэІэшъхьэтет пащэ, ихэгъэгу Іэшъхьэтетышхо, икъулыкъушІ шъхьаІэ дзэшхор ягъусэу Лахыщ къалэм къыдигъэкІхи зэонхэу Хъызкъый пачъыхьэм дэжь Ерусэлэм къыгъэкІуагъэх. Ахэр къежьэхи Ерусэлэм къекІолІагъэх, ыпшъэкІэ щыІэ псыубытыпІэм къыхэкІырэ псычъапІэу щыгъынхэр зыщагыкІхэрэ чІыпІэм дэжь къэуцугъэх. 18 Ахэр пачъыхьэм къеджагъэхэти, пачъыхьэм иунэ-хапІэ лъыплъэщтыгъэу Хъылкъый ыкъо Елыекъым, Щэбнэ тхакІор, пачъыхьэм иІофшІэкІэ-псэукІэ зытхыщтыгъэу Асаф ыкъо Иоахъ ахэм адэжь кІуагъэх. 19 Арыти, пачъыхьэм икъулыкъушІ шъхьаІэ къариІуагъ: «Хъызкъый ешъуІожь: „Пачъыхьэшхоу, Ашурым ипачъыхьэ, мары къызэреупчІырэр: ‘Сыда гугъапІэу уиІэр? 20 О къапІорэмкІэ заом текІоныгъэ щыпшІышъущта? Сэ узгокІыжьыгъэмэ, хэта адэ джы о узщыгугъырэр? 21 Мары бэщ зэпыкІыгъэу, ащ зытезгъакІэрэм ыІэ къыкІоцІырыхьанышъ, къыхэонэу щыт Мысырыр ІэпыІэгъу къызфэпшІынэу о огугъэ. Мысырым ипачъыхьэ фирхьауныр щыгугъыхэрэмкІэ зыфэдэр джары’. 22 ‘Ти Зиусхьанэу Тхьэм тыщэгугъы’ къысашъуІомэ, ар къурмэнхэр зыщашІыщтыгъэхэу зилъэгапІэхэмрэ зикъурмэншІыпІэхэмрэ Хъызкъый зэхикъутэжьхи, ‘Ерусэлэм дэт мы къурмэншІыпІэ закъор ары ныІэп шъхьащэ зыфэшъушІыщтыр’ ыІуи, Ехъудэмрэ Ерусэлэмрэ къызфариІуагъэр арба? 23 Арышъ, сизиусхьан ашур пачъыхьэр къыппехьэ: шы минитІу къыостыщт, ахэм атесыщт цІыфхэр къэбгъотышъущтхэмэ. 24 Сизиусхьан иІумэт Іэшъхьэтет анахь къызэрыкІом сыдэущтэу о утекІошъуна? Ку псынкІэхэмрэ шыхэмрэ зэриІэхэм пае Мысырым ущэгугъы арба? 25 Зиусхьаным ишІоигъоныгъэ хэмылъэу мы чІыпІэр хэкужъ сшІынэу сыкъэкІуагъэп ныІа? Зиусхьаным сэ къысиІуагъ: ‘А чІыпІэм кІуи хэкужъ шІы’“». 26 Арыти, Хъылкъый ыкъо Елыекъым, Щэбнэ, Асаф ыкъо Иоахъ хэгъэгу Іэшъхьэтетым раІуагъ: «УиІумэтхэм арамыбзэр къыдгурэІошъ, къэлэ дэпкъым тет цІыфхэр къэдаІохэшъ, джуртыбзэкІэ укъыддэмыгущыІ». 27 Ау ашур пачъыхьэм икъулыкъушІ шъхьаІэ ахэм къариІуагъ: «Сизиусхьан мы къэсІуагъэр о уизиусхьанрэ оррэ нэмыкІ ясымыІонэу сыкъыгъэкІуагъа? Хьау, джа дэпкъым тет цІыфхэуи, шъори шъузэрахэтэу, зибзэджэ-наджэхэр зышхыжьыщтхэу изышъужьыщтхэми ясэІо». 28 Джащ дэжьым къулыкъушІ шъхьаІэр къэтэджи, ымакъэ лъэшэу Іэтыгъэу, джуртыбзэкІэ къыІуагъ: «Пачъыхьэшхом, Ашурым ипачъыхьэ, ыІорэм шъукъедэІу! 29 Пачъыхьэм ыІорэр мары: „Хъызкъый шъуерэмыгъэдел, сыда пІомэ ащ шъусщиухъумэн ылъэкІыщтэп. 30 ‘Зиусхьаным тыкъиухъумэщт, мы къалэр Ашурым ипачъыхьэ ІэкІигъэхьащтэп’ ыІозэ, Хъызкъый Зиусхьаным шъущерэмыгъэгугъ. 31 Хъызкъый шъуемыдэІу. Сыда пІомэ Ашурым ипачъыхьэ ыІорэр мары: ‘Зыкъысэшъутэу, шъукъызгоуцомэ, хэти исэнашъхьэрэ имаркІорэ ылэжьхэмэ ышхыжьхэу, ипсыешъуапІэ къыхихырэ псым ешъожьэу щыІэщт. 32 ЕтІанэ сыкъэкІонышъ, шъо шъуичІыгу фэдэу, лэжьыгъэмрэ санэмрэ зэрызхэу, хьалыгъумрэ сэнэшъхьэшІапІэхэмрэ зыщыхъойхэу, зэйтын чъыгхэр къызщыкІыхэу, шъоур зыдэщыІэ чІыгум шъусщэжьынышъ, шъущыпсэущт, шъущылІэщтэп’. ‘Зиусхьаным тыкъиухъумэщт’ зыІозэ, шъузгъэпцІэрэ Хъызкъый шъуемыдэІуба. 33 Лъэпкъхэм ятхьэхэм а лъэпкъмэ ячІыгухэр ашур пачъыхьэм рамыгъэштэн алъэкІыгъа? 34 Тыдэ щыІэха Хъамат, Арпад къалэхэм ятхьэхэр? Тыдэ щыІэха Сэфаруаим, ХэнаІ, Іиуа къалэхэм ятхьэхэр? Ахэм Щамэрэн самыгъэштэн алъэкІыгъа? 35 Хэта а хэкухэм ятхьэ пстэумэ ащыщэу зичІыгу сэ сщызыухъумагъэр? Зиусхьаным Ерусэлэм сэ джы симыгъэштэнэуи?“» 36 Ау цІыфхэм зи аІощтыгъэп, зи ащ рамыІожьынэу пачъыхьэм унашъо къафишІыгъэти, иджэуапэу зы гущыІи аІощтыгъэп. 37 Джаущтэу пачъыхьэм иунэ-хапІэ лъыплъэщтыгъэу Хъылкъый ыкъо Елыекъым, Щэбнэ тхакІор, пачъыхьэм иІофшІэкІэ-псэукІэ зытхыщтыгъэу Асаф ыкъо Иоахъ ящыгъынхэр зэІытхъыгъэхэу Хъызкъый дэжь къагъэзэжьи, ашур пачъыхьэм икъулыкъушІ шъхьаІэ къариІуагъэр къыфаІотэжьыгъ.
Хъызкъый тхьэлІыкІоу ЕщаІыехъу упчІэжьэгъу зэришІыгъэр
1 Хъызкъый пачъыхьэм иІумэтхэм якъэбар зызэхехым, ищыгъынхэр зэІитхъи, дзыопхъэ шэкІ пхъашэм хэшІыкІыгъэ джанэр ыкІышъо нэсынэу зыщилъи, Зиусхьаным и Унэ кІуагъэ. 2 Хъызкъый пачъыхьэм иунэ-хапІэ лъыплъэрэ Елыекъым, Щэбнэ тхакІор, къурмэнышІ шъхьаІэхэр, дзыопхъэ шэкІ пхъашэм хэшІыкІыгъэ джанэхэр акІышъомэ анэсынэу ащыгъхэу, Амэц ыкъо ЕщаІыехъу тхьэлІыкІом дэжь ыгъэкІуагъэх. 3 Ахэм ащ раІуагъ: «Хъызкъый ыІорэр мары: „Непэрэ мафэр гукъаом, пщыныжьым, хьайнэпагъэм ямаф. Зикъэхъугъо сабыир къылъфыжьынэу кІуачІэ зимыІэжь бзылъфыгъэм тыфэд тэ. 4 Ти Зиусхьанэу Тхьэу узфэлажьэрэм къызэхихыгъэмэ, Тхьэу щыІэм емыкІухэр риІолІэнхэу изиусхьан ашур пачъыхьэм къыгъэкІогъэ дзэ пэщэ Іэшъхьэтетым зэкІэ къыІогъэ гущыІэхэу ти Зиусхьанэу Тхьэу узфэлажьэрэм къызэхихыгъэхэм апае ифэшъуашэр рерэгъэгъот. Псэоу къэнэжьыгъэхэм апае Тхьэм елъэІуба“». 5 Арыти, Хъызкъый пачъыхьэм иІумэтхэр ЕщаІыехъу дэжь къакІохи пачъыхьэм ыІорэр зыраІом, 6 ЕщаІыехъу ахэм къариІожьыгъ: «Шъуизиусхьан мыщ фэдэу ешъуІожь: „Зиусхьаным ыІорэр мары: ‘Ашур пачъыхьэм иІумэтхэм къысаІолІэгъэ емыкІоу зэхэпхыгъэхэм зыкъямыгъэгъащт. 7 Мары къэбар къылъызгъэІэсынышъ, ихэгъэгу ымыгъэзэжьмэ мыхъунэу чІыпІэ изгъэфэщт. Сэ ар чатэкІэ ащ щязгъэукІыщт’“».
Ашурхэм къязэонхэу аІуи къызэрагъэщынагъэхэр
8 Ашур дзэм идзэпэщэ Іэшъхьэтет Лахыщ къалэм зегъэзэжьым, ашур пачъыхьэр ащ дэкІыгъэу Либнэ къалэ зэрэтебэнагъэр ышІагъ. Джащ пае пачъыхьэм дэгущыІэнэу а къалэм ар кІуагъэ. 9 Куш хэгъэгум ипачъыхьэу Тырхъакъ ашур пачъыхьэм къезэонэу къызэрежьагъэм икъэбар зэхихыгъэти, Хъызкъый дэжь лІыкІохэр джыри ащ ыгъэкІуагъэх. 10 Ащ раригъэІуагъ: «Ехъудэм ипачъыхьэу Хъызкъый мыщ фэдэу ешъуІу: „‘Ерусэлэм ашур пачъыхьэм ІэкІагъэхьащтэп’ пІозэ, узщыгугъырэ уи Тхьэ уерэмыгъапцІ. 11 Сэри, нэмыкІхэуи ашур хэгъэгум тетыгъор щызыІыгъыгъэхэми хэгъэгу пстэури зэрагъэкІодыгъэм ущыгъуазэба, – ора псэоу къэнэжьыщтыр? 12 Сятэмэ зэрапхъогъэ лъэпкъхэр, Гозан, Хъаран, Рэцэф къалэхэр, Тэласар чІыгум ит Іэдэн къалэм щыщхэр ятхьэхэм къагъэнэжьыгъэх шІуа? 13 Тыдэ щыІа Хъамат къалэм ипачъыхьэ, Арпад къалэм ипачъыхьэ? Тыдэ щыІэха Сэфаруаим, ХэнаІ, Іиуа къалэхэм япачъыхьэхэр?“» 14 Хъызкъый лІыкІохэм къахьыгъэ тхьапэ тхыгъэр къаІихи еджагъ. Ащ лъыпытэу Зиусхьаным и Унэ кІуи, ар Зиусхьаным ыпашъхьэ къыщызэкІоцІихыгъ. 15 Хъызкъый Зиусхьаным ыпашъхьэ щытэу елъэІузэ, къыІуагъ: «А Зиусхьанэу, Израилым и Тхьэу Къэрыубмэ атесыр! О зыр ары чІыгум тет пачъыхьагъу пстэуми я Тхьэр, уашъори чІыгури О къэбгъэшІыгъэх. 16 Зиусхьаныр, мыдэ къэдаІуи къызэхэх, уинэплъэгъу мыкІэ къэгъази къаплъэ. Зиусхьан, О ренэу щыІэ Тхьэм, емыкІухэр къыуаІолІэнхэу Санхъэриб къыгъэкІуагъэхэм аІохэрэр къызэхэх! 17 А Зиусхьан, шъыпкъэ дэдэмкІэ, ашур пачъыхьэхэм цІыф лъэпкъхэри, ахэр зэрыс хэгъэгухэри зэрапхъуагъэх. 18 ЯтхьэпэпкІэ пкъыгъохэри ахэм машІом падзагъэх, сыда пІомэ шъыпкъэ дэдэмкІэ ахэр тхьэхэп, цІыфмэ пхъэмрэ мыжъомрэ ахашІыкІыгъэх ныІэпти, агъэкІодыгъэх. 19 Арышъ, ти Зиусхьанэу Тхьэр, сыолъэІу: ащ тыкъыІэкІэхыжьи, а Зиусхьан, о узэрэ Тхьэ закъор чІыгум тет пачъыхьагъу пстэуми зэлъашІэщт».
ЕщаІыехъу Ашурым ипачъыхьэ икІодыкІэ хъущтыр къызэриІуагъэр
20 Амэц ыкъо ЕщаІыехъу Хъызкъый дэжь раІонэу ыгъэкІуагъэх: «Израилым и Зиусхьанэу Тхьэм ыІорэр мары: „Ашурым ипачъыхьэу Санхъэриб пэшІуекІу, Сэ укъызэрэсэлъэІугъэр къызэхэсхыгъ“. 21 Ащ ехьылІагъэу Зиусхьаным къыІорэр мары: „Цион ыпхъоу пшъэшъапІэм итым укъыридзахэрэп, къыпкІэнакІэ; Ерусэлэм ыпхъу ышъхьэ уакІыбкІэ щегъэсысы. 22 Хэт о узэгыигъэри, емыкІухэр зэпІолІагъэхэри? Хэт умакъэ къызпэпІэтыгъэри, унапІэхэр лъагэу зыфыдэпщэягъэхэри? Израилым ианахь ЛъапІэр ары!“ 23 УиІумэт уилІыкІохэмкІэ Зиусхьаным уегыйзэ, пІуагъэ: „Cику псынкІэхэу бэ дэдэ хъухэрэмкІэ къушъхьэ шыгухэм санэсыгъ. Ливаным фэдэ чІыпІэ Іудзыгъэми сынэси, ащ ит кедрэ анахь лъагэхэмрэ кипарис анахь лъапІэхэмрэ къисыупкІыгъэх. ЧІыпІэ анахь Іудзыгъэхэми санэси, ямэзцунэхэми сапхырыкІыгъ, 24 чІыгум сэ сетІэзэ, псынэхэр стІыгъэх, хэмэ псыр къарысхызэ, сэ сешъуагъ, Нил псыхъо къосхэр слъэгухэмкІэ изгъэгъушъыкІыгъэх“. 25 Ау зэхэпхыгъэба: бэшІагъэу Сэ ар зэрэсшІагъэр, ижъым ижъыжьым аущтэу хъунэу зэрисхъухьэгъагъэр, о зэкІэгъэпытыхьэгъэ къалэхэм зыпари къызэрадэмынэрэмкІэ, къутэфэ Іуашъхьэ зэрэпшІыхэрэмкІэ ар зэрэбгъэцэкІэжьырэр? 26 Ахэм ащыпсэурэ цІыфхэр кІочІаджэ хъугъэхэу, щынэным къыхэкІэу мэкІэзэзых, шъхьакІом ешхых. Губгъэм ит уцым, уц къыхэкІыгъакІэм, унашъхьэмэ къатекІэрэ уцэу, шъхьэлъэгъу имыфэу кІодыжьыгъэм фэдэх ахэр. 27 УзэрэтІысри, узэрэтэджри, унэм узэрикІри, укъызэрихьажьри – зэкІэ Сэ сэшІэ. БзэджагъэкІэ укъызэрэспэуцужьри сэшІэ. 28 БзэджагъэкІэ укъызэрэспэуцужьрэм, уипэгагъэ якъэбарэу къызнэсыгъэм пае, сихъурджанэ упэгъуанэмэ арысщынышъ, сижэдэлъхэр ужэ къыдэслъхьанхэшъ, джа укъызэрыкІогъэ гъогу дэдэм утетэу озгъэгъэзэжьынышъ, узгъэкІожьыщт». 29 ЕтІанэ ЕщаІыехъу Хъызкъый пачъыхьэм фиІопщыжьыгъ: «Джы оркІэ щыІэщт гъэунэфыпІэхэр зыфэдэхэр мары: лэжьыгъацэу чІыгум хафи къэкІыгъэм къытырэр мы илъэсым шъушхыщт, адрэ илъэсым – ежь чІыгум къытекІагъэр ары, ящэнэрэ илъэсым лэжьыгъэр шъупхъыщт, Іушъухыжьыщт, сэнэшъхьэшІапІэхэр жъулэжьынхэшъ, къапыкІэрэр шъушхыщт. 30 Ехъудэм псэоу къинэжьыгъэхэм алъапсэхэр пытэжьынхэшъ, ашъхьапэмэ гъэбэжъу къатыщт. 31 Ерусэлэмрэ Цион къушъхьэмрэ ащыбэгъожьыщтых псэоу къэнэжьыщтхэр. Зиусхьаныр лъэш дэдэу зыфаер джары. 32 Арышъ, Зиусхьаным Ашурым ипачъыхьэ ехьылІагъэу къыІорэр мары: „Мы къалэм ар къыдэхьащтэп, щабзи ащ дидзэщтэп, мэІухэр ыІыгъэу ыштэнэу къекІолІэщтэп, ащ дэхьаным пае къыдзыхьащтэп. 33 Джа гъогоу къызэрыкІуагъэм тетэу ащ ыгъэзэжьыщт, мы къалэми къыдэхьащтэп, Сэ, Зиусхьаным, сэІо. 34 Сэ сихьатыркІэ, сиІумэт Даут ихьатыркІэ, мы къалэр къэзгъэнэжьыным пае къэсыухъумэщт“». 35 А чэщым Зиусхьаным и МэлэІич къежьи, ашур дзэуцупІэм кІуи, нэбгырэ минишъэрэ мин тІокІиплІырэ минитфырэ щызэхиукІагъ. Пчэдыжьым цІыфхэр къызэтэджыжьхэм, мары хьадэхэр тыдэкІи щылъхэу алъэгъу. 36 ЕтІанэ Ашурым ипачъыхьэу Санхъэриб зэкІэкІожьи, ашур пачъыхьагъум икъэлэ шъхьаІэу Нинэо ыгъэзэжьи, ащ дэтІысхьажьыгъ. 37 Мафэ горэм ежь итхьэу Нысрэх иунэ щелъэІузэ, ыкъомэ ащыщхэу Адрамэлэхрэ Сарэцэррэ ар чатэкІэ аукІи, ежьхэр Арарат хэгъэгум екІужьыгъэх. Ыкъомэ ащыщ Есархъадон ащ ычІыпІэ пачъыхьагъум техьагъ.
Хъызкъый пачъыхьэр зэрэхъужьыгъэр
1 А уахътэм Хъызкъый илІыкІынэу уз къыштагъ. ТхьэлІыкІоу Амэц ыкъо ЕщаІыехъу ащ дэжь къакІуи къыриІуагъ: «Зиусхьаным ыІорэр мары: „Умыхъужьэу улІэщтышъ, уибынхэм осыет къафэшІыжь“». 2 Арыти, Хъызкъый ынэІу дэпкъым фигъази Зиусхьаным елъэІузэ къыІуагъ: 3 «А Зиусхьан! Сызафэу уапашъхьэ сызэритыгъэр, сыгукІэ сызэрэпфэшъыпкъагъэр, къыокІущтыр зэрэсшІагъэр угу къэбгъэкІыжьынэу сыолъэІу». Ащ лъыпытэу Хъызкъый лъэшэу къэгъыгъ. 4 ЕщаІыехъу пачъыхьэр зыщыпсэурэ унэм ищагу джыри дэмыкІыжьыгъэу, Зиусхьаным ипсалъэ къылъыІэсыгъ. 5 «Гъэзэжьи силъэпкъ ипщ Хъызкъый еІу: „Уятэшхо Даут и Тхьэу Зиусхьаным ыІорэр мары: ‘УитхьэлъэІу Сэ къызнэсыгъ, унэпсхэри слъэгъугъэх. Мары Сэ узгъэхъужьынышъ, ящэнэрэ мафэм Зиусхьаным и Унэ укІощт. 6 УигъашІэ илъэс пшІыкІутф къыпфыхэзгъэхъощт, ори мы къалэми ашур пачъыхьэм шъущысыухъумэщт, Сэ сихьатыркІэ, сиІумэт Даут ихьатыркІэ, мы къалэри къэзгъэнэжьыщт’“». 7 ЕщаІыехъу къыІуагъ: «Шхынцумпэ гъэгъугъэ такъыр къашъуштэ». Арыти, ар къашти, къытекІэгъэ бэгу етагъэм тыралъхьи ар нахьышІу хъужьыгъэ. 8 Арыти, Хъызкъый ЕщаІыехъу еупчІыгъ: «Зиусхьаным сызэригъэхъужьыпэщтымрэ ящэнэрэ мафэм Зиусхьаным и Унэ сызэрэкІощтымрэ сыд фэдэ шыхьат нэшана яІэщтыр?» 9 ЕщаІыехъу ащ къыриІожьыгъ: «Зиусхьаным ыІуагъэр зэригъэцэкІэжьыщтым ишыхьат нэшанэ зыфэдэр мары: мары ныбжьыкъур шэпхъипшІыкІэ нахь кІыхьэ хъугъэ. Уфая ар шэпхъипшІыкІэ икІэрыкІэу нахь кІако хъужьынэу?» 10 Хъызкъый къыІуагъ: «Ныбжьыкъур шэпхъипшІыкІэ ыпэкІэ лъыкІотэныр къинэп, ау ныбжьыкъур шэпхъипшІыкІэ къызэкІэрэкІожь». 11 Арыти, тхьэлІыкІоу ЕщаІыехъу Зиусхьаным лъэшэу елъэІуи, Ащ Ахъаз исыхьат илъэоянэхэм къатыридзэрэ ныбжьыкъоу ыпэкІэ лъыкІуатэщтыгъэр шэпхъипшІыкІэ къызэкІигъэкІожьыгъ.
Бабилэн лІыкІохэр Хъызкъый дэжь къызэрэкІуагъэхэр
12 А уахътэм бабилэн пачъыхьэу, Баладан ыкъо Мэродах-Баладан Хъызкъый зэрэсымаджэр зэхихыгъэти, илІыкІохэм тхылъыпІэ тхыгъэрэ шІухьафтынхэмрэ къыфаригъэхьыгъэх. 13 Хъызкъый къыфагъэкІуагъэхэм къаІуагъэм игуапэу едэІуи, имылъку гъэтІылъыпІэхэр, итыжьынрэ идышъэрэ, мэ ІашІухэр къызпихрэ щыфэхэр, дэгъэ лъапІэхэр, иІэшэ гъэтІылъыпІэ, иунэ илъ мылъкур зэкІэ аригъэлъэгъугъэх. Хъызкъый иунэ итэу, ихапІэ дэтэу аримыгъэлъэгъугъэ зи къэнагъэп. 14 Ащ ыуж тхьэлІыкІоу ЕщаІыехъу пачъыхьэу Хъызкъый дэжь къакІуи къыриІуагъ: «Тыда мы цІыфхэр къыздыпфикІыгъагъэхэри, сыда ахэм къыуаІуагъэри?» Хъызкъый ащ риІожьыгъ: «Бабилэн хэгъэгу чыжьэм ахэр къикІыгъэх». 15 ЕщаІыехъу къыІуагъ: «Сыда ахэм уиунэ щалъэгъугъэр?» Хъызкъый риІожьыгъ: «Сиунэ ит пстэури ахэм алъэгъугъ, симылъку гъэтІылъыпІэхэм арылъэу ясымыгъэлъэгъоу зы пкъыгъо закъуи къэнагъэп». 16 Ащ дэжьым ЕщаІыехъу Хъызкъый риІуагъ: «Зиусхьаным ыІорэм къедэІу: 17 „Мары уахътэ къэсынышъ, уиунэ илъри, уятэмэ джы нэс аугъоигъэри зэкІэ аштэнышъ, Бабилэн ащэщт. Зи къэнэщтэп“, джары Зиусхьаным ыІорэр. 18 О къыпхэкІыщт кІалэмэ ащыщхэр ращынхэшъ, бабилэн пачъыхьэм иунэ-хапІэ анаІэ тырагъэтэу Іоф фашІэщт». 19 Хъызкъый ЕщаІыехъу къыриІожьыгъ: «Зиусхьаным о къыуигъэІуагъэр дэгъу». Сыда пІомэ «Сэ сыщэІэфэ мамыррэ щыІэкІэшІурэ щэрэІэх!» ыІуи, ежь егупшысыжьыгъ. 20 Хъызкъый зэкІэ иІофшІагъэхэмрэ, лІыгъэу ащ зэрихьагъэхэмрэ, ыпшъэкІэ щыІэ псыубытыпІэм къыхищыгъэ псычъапІэр къалэм къызэрэдищагъэмрэ ехъуд пачъыхьэхэм яхьылІэгъэ Іэпэрытххэм арытхагъэхэба. 21 Джащ тетэу Хъызкъый ятэ пІашъэхэр зыдэщыІэм ыгъэзэжьыгъэти, ащ ыкъо Мэнасэ ежь ычІыпІэ пачъыхьагъум техьагъ.
Ехъуд пачъыхьэу Мэнасэ
1 Мэнасэ пачъыхьагъум зытехьэм ыныбжьыгъэр илъэс пшІыкІутІу. Илъэс шъэныкъорэ тфырэ Ерусэлэм ар щыпачъыхьагъ. Янэ ыцІагъэр Хъэфцибахъ. 2 Зиусхьаным израил цІыфмэ ахифыжьыгъэ лъэпкъхэм ашІэщтыгъэ гущыкІыгъо емыкІушхохэм акІырыплъзэ, Мэнасэ Зиусхьаным къемыкІущтыр ышІэщтыгъэ. 3 КъурмэншІыпІэ лъэгапІэхэу ятэ Хъызкъый зэхикъутагъэхэр икІэрыкІэу ащ зэтыригъэуцожьыгъэх, тхьэнэпцІэу БаІал пае къурмэншІыпІэхэр ыгъэуцугъэх, израил пачъыхьэу Ахъаб фэдэу, Астартэ пае пкъэухэр ыгъэуцугъэх; ошъогу кІочІэпцІэ пстэуми шъхьащэ афишІыщтыгъэ, афэлажьэщтыгъэ. 4 Зиусхьаным и Унэу, Ежь ыцІэ епхыгъэнэу къахихыгъэ къалэу, Зиусхьаным зыфиІогъэ Ерусэлэм дэтым тхьэнэпцІхэм апае къурмэншІыпІэхэр чІигъэуцуагъэх. 5 Щагушхомрэ Зиусхьаным и Унэ ыкІоцІ щагурэ ошъогу кІочІэпцІэ пстэумэ апае къурмэншІыпІэхэр адигъэуцуагъэх. 6 Ыкъо машІокІэ къурмэн ышІыгъ, нэпхыгъэ кІуачІэхэр зыхэлъхэм, къэхъущтхэр къязыІохэрэм апылъыгъ, джынапцІэмэ апыщагъэхэр, удыгъэхэр зезыхьэхэрэр уцогъу ышІыгъэх. Джащ фэдэу Зиусхьаныр ыгъэгубжэу, Ащ къемыкІущтхэр бэу ышІагъэх. 7 Астартэ пае ышІыгъэ пкъэур Зиусхьаным и Унэ чІигъэуцуагъ. Зиусхьаным Ежь и Унэ ехьылІагъэу Даутрэ ащ ыкъо Сэлмэнрэ къариІуагъ: «Мы Унэми израил лІакъомэ ячІыпІэ пстэуми къахэсхыгъэ Ерусэлэми Сэ сцІэ егъашІэм япхыгъэщт. 8 Израил цІыфхэр ятэхэм къястыгъэ чІыгум зыщызгъэгупсэфыщтхэр ахэм унашъоу къафэсшІыгъэхэмрэ Си Іумэт Мосэ осыет къыфэсшІыгъэ хабзэмрэ зэрагъэцэкІэнхэм пылъхэмэ ары ныІэп». 9 Ау ехъуд цІыфхэр дэІуагъэхэп. Мэнасэ ахэм псэкІодышхохэр зэраригъэшІыщтыгъэм къыхэкІэу, Зиусхьаным израил цІыфхэм акІэрифыгъэ лъэпкъхэм анахь Іэежьэу, емыкІушхохэр ашІэщтыгъ. 10 Арыти, Зиусхьаным иІумэт тхьэлІыкІохэм къараригъэІуагъ: 11 «Ехъуд пачъыхьэу Мэнасэ ежь ыпэкІэ амэрхэм ашІэщтыгъэ емыкІушхохэм анахь Іаежъхэр ышІэзэ, итхьэнэпцІхэмкІэ Ехъудэр псэкІодшІэным хищагъ. 12 Арышъ, Израилым и Зиусхьанэу Тхьэм джащ пае еІо: „Мары зэхэзыхрэм ытхьакІумэнэІус Іуригъэутэу Ерусэлэми Ехъудэми тхьамыкІэгъошхо къафезгъэхыщт. 13 Щамэрэнрэ Ахъаб илІакъорэ ясшІагъэр Ерусэлэми есшІэщт, Ерусэлэм цІыфхэр дэсыукъэбзыкІынхэшъ, зэрышхэгъэхэ лагъэр алъэкІыжьмэ, ылъачІэ дэгъэзыягъэу зэрагъэуцужьырэм фэдэу, нэкІэу къэзгъэнэщт. 14 Силъэпкъ щыщэу къэнагъэр щызгъэзыещт, ипыйхэм аІэ ар ислъхьащт, иджэгъогъу пстэуми ар ахъункІэщт, зэбгырахыщт. 15 Ятэхэр Мысырым къызикІыжьыгъэхэ мафэм къыщегъэжьагъэу непэрэ мафэм нэс сагъэгубжэу, къысэмыкІущтхэр зэрашІэщтыгъэм пае Сэ ахэр къясшІэщт“». 16 Джыри Мэнасэ лажьи хьакъи зимыІэ цІыфхэм алъ бэу Ерусэлэм щигъэчъагъ, а псэкІод пстэумэ ашІокІыжьэу, Зиусхьаным къемыкІущтхэр ригъашІэхэзэ, Ехъудэр псэкІодышІыным хищагъ. 17 Мэнасэ зэкІэ иІофшІагъэхэри псэкІодэу ышІыгъэхэри Ехъудэм ипачъыхьэхэм яхьылІэгъэ Іэпэрытххэм арытхагъэхэба. 18 Джаущтэу Мэнасэ лІи ятэ пІашъэхэр зыдэщыІэм зегъэзэжьым, Іузэ ичъыгхатэу ежь иунэ къыпэблагъэм щагъэтІылъыжьыгъ. Арыти, ыкъо Амэн ащ ычІыпІэ пачъыхьагъум техьагъ.
Ехъуд пачъыхьэу Амэн
19 Амэн пачъыхьагъум зытехьэм илъэс тІокІырэ тІурэ ыныбжьыгъэр, илъэситІо Ерусэлэм щыпачъыхьагъ. Ащ янэ ыцІагъэр Мэшулэмэт. Ар Иотбэ къалэ щыщ Хъаруц ыпхъугъ. 20 Ащи, ятэ Мэнасэ зэрихэбзагъэу, Зиусхьаным къемыкІущтыр ышІэщтыгъэ. 21 Ятэ зытетыгъэ гъогум темыкІэу тетыгъ, ятэ зыфэлажьэщтыгъэ тхьэнэпцІхэм шъхьащэ афишІыщтыгъ. 22 Ятэшхомэ я Зиусхьанэу Тхьэм ыкІыб фэгъэзагъэу, Зиусхьаным игъогу тетыгъэп. 23 Амэн иІумэтхэм зыкъыпаІэти, пачъыхьэр иунэ раукІыхьагъ. 24 Ау ехъуд цІыфхэм Амэн зыкъыпэзыІэтыгъэхэр зэкІэ аукІхи, ыкъо Иощыехъу ащ ычІыпІэ пачъыхьанэу тырагъэхьагъ. 25 Амэн зэкІэ иІофшІагъэхэр Ехъудэм ипачъыхьэхэм яхьылІэгъэ Іэпэрытххэм арытхагъэхэба. 26 Ар Іузэ ичъыгхатэ дэт икъэунэ щагъэтІылъыжьи, ыкъо Иощыехъу ежь ычІыпІэ пачъыхьанэу техьагъ.
Иощыехъу пачъыхьагъум зэрэтехьагъэр
1 Иощыехъу пачъыхьагъум зытехьэм илъэсий ыныбжьыгъэр, илъэс щэкІрэ зырэ Ерусэлэм щыпачъыхьагъ. Ащ янэ ыцІагъэр Едыдэ, Боцкъат къалэм щыщ Іадай ыпхъугъ. 2 Ащ Зиусхьаным къекІущтыр ышІэщтыгъэ, ятэшхо Даут игъогу зэкІэмкІи зэрэтетыным ишъыпкъэу пылъыгъ.
Хэбзэ тхылъыр къызэрагъотыжьыгъэр
3 Иощыехъу зыпачъыхьэр япшІыкІуенэрэ илъэсым хэхьагъэу пачъыхьэм тхакІоу Мэшулам ыкъо Ацалый ыкъожь Щафан Зиусхьаным и Унэ ыІофыти риІуагъ: 4 «Хъылкъый къурмэнышІ шъхьаІэм дэжь кІуи, цІыфхэм Зиусхьаным и Унэ къырахьылІагъэу, Зиусхьаным и Унэ чІэхьапІэ къэзыухъумэрэ къурмэнышІхэм къаугъоигъэ тыжьын ахъщэр къегъэлъытэжь. 5 Ар Зиусхьаным и Унэ зыгъэцэкІэжьхэрэм яІэшъхьэтетхэм арарэти, адрэхэм ар Зиусхьаным и Унэ хэкъутыкІыгъэхэр зыгъэцэкІэжьхэрэм, 6 пхъашІэхэм, унэзэтелъхьэхэм, адрэ псэолъэшІхэм, унэр зэрагъэцэкІэжьыщт пхъэхэмрэ мыжъо къыгоутыгъэхэмрэ къыращэфынхэм пае араратыжь. 7 Ау шъыпкъагъэ зэрахэлъым къыхэкІэу ар зэрагъэзекІорэ шІыкІэм шъукІэмыупчІэжь». 8 КъурмэнышІ шъхьаІэу Хъылкъый Щафан тхакІом риІуагъ: «Зиусхьаным и Унэ хэбзэ тхылъыр къычІэзгъотагъ». Хъылкъые ар Щафан ритыгъ, адрэр ащ еджагъ. 9 Щафан тхакІор пачъыхьэм дэжь къакІуи къыриІуагъ: «УиІумэтхэм унэм къырагъотэгъэ тыжьын ахъщэр Зиусхьаным и Унэ зыгъэцэкІэжьхэрэм яІэшъхьэтетхэм аратыгъ». 10 ЕтІанэ Щафан тхакІом пачъыхьэм риІуагъ: «Хъылкъые къурмэнышІым тхылъ къыситыгъ». Арыти Щафан ащ итым къыфеджагъ. 11 Пачъыхьэм хэбзэ тхылъым итхагъэр зызэхехым, ар ыгу къеуи, ищыгъынхэр зэІитхъыгъэх. 12 Арыти, пачъыхьэм Хъылкъый къурмэнышІи, Щафан ыкъо Ахъыкъами, Михай ыкъо Іахбэри, Щафан тхакІоми, пачъыхьэм икъулыкъушІэу Іасайи унашъо афишІи ариІуагъ: 13 «ШъукІуи сэщ пайи, лъэпкъми, зэрэ Ехъудэ хэгъэгоуи апае мы къагъотыгъэ тхылъым итхагъэм ехьылІагъэу Зиусхьаным шъукъеупчІ. Зиусхьаныр машІоу къызэкІигъанэу къытфэгубжыгъ, сыда пІомэ тятэхэр мы тхылъым тэщ пае итхагъэхэр зэрагъэцэкІэн фаем едэІугъэхэп». 14 Арыти, Хъылкъый къурмэнышІыр, Ахъыкъам, Іахбэр, Щафан, Іасай аІоу Хъулдэ бзылъфыгъэ тхьэлІыкІом дэжь кІуагъэх. Ар щыгъынхэм афэгъэзагъэу, Хъархъас ыкъо Тикъуа ыкъожь Щалум ишъхьагъусагъ, Ерусэлэм къалэм иадырабгъукІэ щыпсэущтыгъ. Ащ дэжь кІохи дэгущыІагъэх. 15 Ащ ахэм къариІуагъ: «Израилым и Зиусхьанэу Тхьэм ыІорэр мары: „Садэжь шъукъэзгъэкІогъэ цІыфым сфешъуІожь: 16 Зиусхьаным ыІорэр мары: ‘Ехъудэ пачъыхьэр зэджэгъэ тхылъым зэритхагъэм тетэу, мы чІыпІэми ащ щыпсэухэрэми сынае къащысфэщт. 17 Сэ сыкъабгынагъэу, нэмыкІ тхьэхэм апашъхьэ мэ ІэшІухэр къызпиххэрэр зэрэщагъэстхэрэм, адрэ ашІэрэ пстэуми апае сагъэгубжэу машІоу сыкъызэкІэнагъ, сыкъызэкІэмыкІыжьынэу мы чІыпІэм лъэшэу сыкъыфэгубжыгъ’. 18 Ау Зиусхьаным шъуеупчІынэу шъукъэзгъэкІогъэ ехъуд пачъыхьэм ешъуІожь: ‘Израилым и Зиусхьанэу Тхьэм джа зэхэпхыгъэм къариІуалІэрэр мары: 19 Mы чІыпІэмрэ ащ щыпсэухэрэмрэ яхьылІагъэу къэсІуагъэр, ахэр адрэхэм къалъэгъоу хэкужъ зэрэсшІыщтхэр зызэхэохым, угукІэ шъабэ ухъугъэшъ, Зиусхьаным зыфэбгъэцІыкІугъэшъ, уищыгъынхэр зэІыптхъыгъэхэшъ, сапашъхьэ ущыгъыгъэшъ, Сэри укъызэхэсхыгъ’. Зиусхьаным джары ыІорэр. 20 Джащ пае мары уятэхэр зыщагъэтІылъыжьыгъэхэ чІыпІэр озгъэгъотыжьыщт, игъо къэсыфэ ущызгъэІэнышъ, уикъэунэ уезгъэкІужьыщт, мы чІыпІэм къыфезгъэхыщт тхьамыкІагъохэр плъэгъущтхэп“». Арыти, джэуапыр пачъыхьэм къынагъэсыжьыгъ.
Иощыехъу пачъыхьэм тхьэнэпцІхэр зэрэщигъэзыягъэхэр
1 Иощыехъу пачъыхьэм ыгъакІохи, Ехъудэмрэ Ерусэлэмрэ янахьыжъ упчІэжьэгъухэр зэкІэ ащ дэжь къыщызэІуагъэкІагъэх. 2 Пачъыхьэр Зиусхьаным и Унэ кІуагъэ, зэкІэ ехъуд цІыфхэри, зэкІэ Ерусэлэм щыщхэри, къурмэнышІхэри, тхьэлІыкІохэри, анахь къызэрыкІохэм къащегъэжьагъэу анахь лъэрыхьэхэм анэсыжьэу зэкІэ цІыфхэр ащ игъусагъэх. Ар Зиусхьаным и Унэ къычІагъотэгъэ хэбзэ тхылъым итхагъэхэм зэкІэми зэхахэу къеджагъ. 3 Пачъыхьэр кІэсэнхэр зыкІэт чІыпІэ хэІатыкІыгъэм теуцуи, Зиусхьаным игъогу тетынхэу, Ащ иунашъохэр, Ащ иухэсыгъэхэр, Ащ ишапхъэхэр, хэбзэ тхылъым итхагъэхэр агурэ апсэкІэрэ агъэцэкІэнхэу Зиусхьаным ыпашъхьэ Іуагъэ щызэдаригъэшІыгъ. КъызэІукІагъэхэр зэкІэ ащ къезэгъыгъэх. 4 Пачъыхьэм Хъылкъый къурмэнышІ шъхьаІэм, къурмэнышІ шъхьаІэм игуадзэхэм, Зиусхьаным и Унэ чІэхьапІэ къэзыухъумэрэ къурмэнышІхэм унашъо афишІи, БаІал, Астартэ, ошъогу кІочІапцІэхэм апае агъэфедэщтыгъэхэ пкъыгъо зэфэшъхьафхэр Зиусхьаным и Унэ къычІаригъэхыгъэх. ЕтІанэ ахэр Ерусэлэм ыкІыбкІэ Къыдрэн кІэим щигъэстыгъэх, ястафэхэр Бэтэл ахьыжьынхэу унашъо афишІыгъ. 5 Ехъуд къалэхэмрэ Ерусэлэм иІэгъо-благъохэмрэ къурмэнхэр зыщашІырэ лъэгапІэхэм мэ ІашІу къызпиххэрэр ащагъэстынхэм пае тхьэнэпцІхэм ялэжьакІохэу ехъуд пачъыхьэхэм тырагъэуцогъагъэхэр тыригъэкІыгъэх. Ахэм БаІали, тыгъэми, мазэми, жъогъобынхэми, ошъогу кІочІапцІэхэми апае мэ ІашІухэр къызпиххэрэр агъэстыщтыгъэх. 6 Ащ тхьэнэпцІэу Астартэ ипкъэу Зиусхьаным и Унэ къычІаригъэхыжьи, Ерусэлэм ыкІыбкІэ аригъэхьи, Къыдрэн псы игъукІыгъэ зэпырыкІыпІэм дэжь щаригъэгъэстыгъ. Ащ истафэхэр сапэу зэхаригъэубыкІэжьхи, етІанэ цІыф къызэрыкІохэр зыдалъхьажьырэ къэхалъэм даригъэтэкъожьыгъ. 7 Зиусхьаным и Унэ цІэпІагъэхэр щызышІэщтыгъэ хъулъфыгъэхэмрэ бзылъфыгъэхэмрэ зэрысыщтыгъэхэ унэхэр зэхаригъэкъутагъэх. Астартэ пае техъонхэр бзылъфыгъэхэм ахэм ащашІыщтыгъэх. 8 ТхьэнэпцІмэ ялэжьакІохэр зэкІэ ехъуд къалэхэм адаригъэщыхи, ГъэбаІ къыщегъэжьагъэу БэрщэбаІ нэсэу ит лъэгапІэхэу тхьэнэпцІхэм ялэжьакІохэм мэ ІашІухэр зыщагъэущтыгъэхэр ащылъэІожьынхэ амылъэкІынэу зэхикъутагъэх. Джащ фэдэу ащ зэхикъутагъ Ехъошуа къэлэ Іэшъхьэтетым икъэлапчъэу къалэм зэрэдахьэхэрэм исэмэгубгъукІэ щыІэ лъэгапІэри. 9 Ау лъэгапІэхэм якъурмэнышІхэр Зиусхьаным икъурмэншІыпІэу Ерусэлэм дэтым къекІуалІэщтыгъэхэп, нэмыкІ къурмэнышІхэм ягъусэхэу хьалыгъу мыкІумыпшыр зэдашхыщтыгъ. 10 Зыгорэми ыкъо е ыпхъу Молэх тхьэнэпцІым къурмэнэу фимыгъэстыным пае, Тофэт тхьэнэпцІым ипкъэоу Хъынэм ыкъохэм якІэй дэтым емылъэІужьышъунхэу ащ ышІыгъ. 11 Джащ фэдэу, ехъуд пачъыхьэхэм тыгъэм пае Зиусхьаным и Унэ ичІэхьапІэ дэжь, тхьамэтэ пащэмэ ащыщэу Нэтан-Мэлэх ихапІэ пэблагъэу агъэуцущтыгъэ шыхэр, Іуаригъэщыжьыгъэх, ку псынкІэхэу тыгъэм пае агъэуцущтыгъэхэр машІокІэ ыгъэстыгъэх. 12 Пачъыхьэм ехъуд пачъыхьэхэм Ахъаз иунашъхьэ тырашІыхьэгъэ къурмэншІыпІэхэри, Мэнасэ Зиусхьаным и Унэ ищагуитІу адигъэуцогъэгъэ къурмэншІыпІэхэри къыридзыххи зэхигъэтэкъуагъэх. Ахэм якъутафэхэр псы игъукІыгъэ зэпырыкІыпІэу Къыдрэн щыритэкъужьыгъэх. 13 Израил ипачъыхьэу Сэлмэн цыдонмэ, моабхэм, Іамонхэм ятхьэнэпцІ бзэджэ-наджэхэу Астартэ, Къэмэщ, Мылкъом апае лъэгапІэхэу Ерусэлэм икъокІыпІэкІэ, Зэйтын къушъхьэм икъыблэкІэ щигъэуцугъэхэр Иощыехъу пачъыхьэм уащымылъэІожьышъунэу ышІыгъэх. 14 ТхьэнэпцІхэмрэ Астартэрэ афагъэуцугъэ пкъэухэр зэхикъутэхи, ахэр зыдэщытыгъэ чІыпІэхэм цІыф къупшъхьэхэр атыритэкъожьыгъэх. 15 Джащ тетэу, Нэуат ыкъо ЯрабІамэу Израилыр псэкІодым хэзыщагъэм, Бэтэл щигъэуцугъэ лъэгапІэр, джа къурмэншІыпІэри лъэгапІэри зэщидзыхи, сапэ ышІэу зэхигъэтэкъуагъэх. Астартэ пае агъэуцугъэ пкъэухэри ыгъэстыгъэх. 16 Иощыехъу зэплъэм Іуашъхьэм тетыгъэ къэунэхэр къылъэгъугъэхэти, ыгъакІохи къупшъхьэхэр къаригъэхьхи, ахэр къурмэншІыпІэм ыкІыІу щигъэстхи, Зиусхьаным Тхьэм илІыкІо мыр зэрэхъущтыр къызэрэригъэІогъагъэм тетэу, къурмэншІыпІэр умыгъэфедэжьышъунэу ышІыгъ. 17 Иощыехъу къэупчІагъ: «Сыд саугъэта мы слъэгъурэр?» Къэлэдэсхэм ащ къыраІожьыгъ: «Ар Тхьэм илІыкІоу Ехъудэм къикІи Бэтэл щагъэуцугъэ къурмэншІыпІэм ыкІыІу о щыпшІэрэр зэрэхъущтыр къэзыІогъагъэм икъэун». 18 Арыти, ащ къыІуагъ: «Ащ шъунэмыс, ащ икъупшъхьэхэм хэти анэрэмыс». Арыти, ащ икъупшъхьэхэри Щамэрэн къикІыгъэгъэ тхьэлІыкІом икъупшъхьэхэри къагъэнагъэх. 19 Джащ тетэу Иощыехъу Зиусхьаныр агъэгубжэу израил пачъыхьэмэ Щамэрэн ит къалэхэм якъурмэншІыпІэ лъэгапІэхэм атырагъэуцогъэ тхьэлъэІупІэунэхэри зэхикъутагъэх. Бэтэл зэрэщишІыгъэм фэдэу ахэми джар аришІагъ. 20 КъурмэншІыпІэ лъэгапІэхэм ятхьэнэпцІ лэжьакІохэу ащ щыІагъэхэр зэкІэ къурмэншІыпІэхэм ащиукІхи, цІыф къупшъхьэхэр ахэм акІыІу щигъэстыжьыгъэх. ЕтІанэ Ерусэлэм къыгъэзэжьыгъ.
Пэсахъ мэфэкІым къызэрэфагъэзэжьыгъэр
21 Пачъыхьэм зэкІэ цІыфхэм унашъо афишІи, ариІуагъ: «Мы хэбзэ тхылъым зэритым тетэу, шъуи Тхьэ пае пэсахъ мэфэкІыр шъушІы». 22 ХьыкумышІхэм Израил пэщэныгъэ зыщыдызэрахьэщтыгъэ лъэхъаным къыщегъэжьагъэу израил пачъыхьэхэмрэ ехъуд пачъыхьэхэмрэ ялъэхъан къынэсэу мыщ фэдэ пэсахъ мэфэкІ ашІыщтыгъэп. 23 Ау пачъыхьэу Иощыехъу зыпачъыхьэр япшІыкІуенэрэ илъэсым хэхьагъэу джа пэсахъым игъэмэфэкІын Зиусхьаным пае Ерусэлэм щырагъэжьэжьыгъ.
Иощыехъу иаужырэ зэхъокІыныгъэхэр
24 Хъылкъый къурмэнышІым Зиусхьаным и Унэ къыригъотэгъэ хэбзэ тхылъым итхагъэхэр гъэцэкІэжьыгъэнхэм пае, Иощыехъу удыгъэхэр зезыхьэхэрэр, джэнчыдзхэр, джынэхэр къычІэзыщхэрэр, тхьэ нэпцІхэр, зэкІэ бзэджэ-наджэхэр Ехъудэмрэ Ерусэлэмрэ ащигъэкІодыпагъэх. 25 Ыгурэ ыпсэрэ кІуачІэу ахэлъ пстэумкІэ зэкІэ Мосэ ихабзэхэм аблэмыкІэу, Зиусхьаным зыфигъэзэгъапэу ыпэкІэ пачъыхьэ щыІагъэп, ыужкІи ащ фэдэ къэхъужьыгъэп. 26 Ау пачъыхьэу Мэнасэ Зиусхьаныр щигъэзыйи, Ар ыгъэгубжэу, Ащ къемыкІущтыр зэришІэщтыгъэм пае Зиусхьаныр Ехъудэм лъэшэу къызэрэфэгубжыгъэу къызэкІэкІыжьыгъагъэп. 27 Зиусхьаным къыІуагъ: «Израилыр зэрэкІэрыздзыгъэм фэдэу, Ехъудэри зыкІэрыздзыщт, „Сэ сичІыпІэщт“ сІуи, Сэ къахэсхыгъэ мы Ерусэлэм къалэри, Сэ сцІэ епхыгъэнэу зыфэсІогъэ мы Унэри пхъатэ зыпэсымыхьыжьхэу, щызгъэзыещтых».
Иощыехъу ипачъыхьан зэриухыгъэр
28 Иощыехъу зэкІэ иІофшІагъэхэмрэ нэмыкІэу ышІагъэхэмрэ Ехъудэм ипачъыхьэхэм яхьылІэгъэ Іэпэрытххэм арытхагъэхэба. 29 Иощыехъу ипачъыхьагъум мысыр пачъыхьэ фирхьаунэу Нэхъоу ашур пачъыхьэм пэшІуекІоу Ефрат псыхъом ылъэныкъокІэ ежьагъ. Иощыехъу пачъыхьэр ащ езэонэу зыпэгъокІым, адрэм ар къызэлъегъум, къеуи Мэгъыдэ къыщиукІыгъ. 30 Арыти, иІумэтхэм ащ ихьадэ ку псынкІэм илъэу Мэгъыдэ къыращыжьи, Ерусэлэм къащэжьыгъ. Икъэунэ ар далъхьажьыгъ. Ащ дэжьым ехъудхэм Иощыехъу ыкъо Ехъоахъаз ышъхьэ дагъэ щарагъафи, ятэ ычІыпІэ пачъыхьанэу тырагъэхьагъ.
Ехъуд пачъыхьэу Ехъоахъаз
31 Ехъоахъаз пачъыхьагъум зытехьэм ыныбжьыгъэр илъэс тІокІырэ щырэ. Мэзищэ ар Ерусэлэм щыпачъыхьагъ. Ащ янэ ыцІагъэр Хъамутал. Ар Лыбнэ къалэ щыщ Ирмые ыпхъугъ. 32 Ятэшхохэм зэряхэбзагъэу Зиусхьаным къемыкІущт пстэури ащ ышІэщтыгъ. 33 Ар Нэхъоу фирхьауным Хъамат хэкум ит Рыблэ къалэ щиубыти, Ерусэлэм щымыпачъыхьажьыным пае гъэры ышІыгъ. Хэкум тыжьынэуи дышъэуи килограмм минищ зырыз фэдиз тынІахьэу тырилъхьагъ. 34 Джаущтэу Нэхъоу фирхьауным Иощыехъу ыкъо Елыекъым ятэ Иощыехъу ычІыпІэ пачъыхьанэу тыригъахьи, ыцІэ ЕхъоекъымкІэ зэблихъужьыгъ. Ехъоахъаз ыубыти, Мысырым ыщи, ар ащ щылІэжьыгъ.
Ехъуд пачъыхьэу Ехъоекъым
35 Ехъоекъым тыжьыни дышъи фирхьауным ритыщтыгъэх. Нэхъоу фирхьауным иунашъо тетэу, ащ ритынхэм пае хэкухэм ащыпсэурэ нэбгырэ пэпчъ, шъхьадж иамал елъытыгъэу, тыжьынымрэ дышъэмрэ къатынхэу хьакъулахь атырилъхьагъ. 36 Ехъоекъым пачъыхьагъум зытехьэм ыныбжьыгъэр илъэс тІокІырэ тфырэ, илъэс пшІыкІузэ Ерусэлэм щыпачъыхьагъ. Ащ янэ ыцІагъэр Зэбудэ. Ар Румэ щыщ Пэдай ыпхъугъ. 37 Ятэшхохэм зэряхэбзагъэу, Зиусхьаным къемыкІущт пстэури ащ ышІэщтыгъ.
1 Ехъоекъым ипачъыхьагъум бабилэн пачъыхьэу Нэбухаднэцар Ехъоекъым къезауи, илъэсищэ ар ыІэмычІэ илъыгъ. ЕтІанэ Ехъоекъым ащ зыкъыпиІэти шъхьафит хъужьыгъэ. 2 Зиусхьаным къасдый, арам, моаб, Іамон дзэ купхэу зэхахьэхэрэр ащ къытыригъэбанэщтыгъэх. Зиусхьаным иІумэт тхьэлІыкІохэм къызэраригъэІогъагъэм тетэу, Ехъудэр ыгъэкІодынэу ахэр къытыригъэбанэщтыгъэх. 3 Шъыпкъэ дэдэмкІэ, Зиусхьаным иунашъо тетэу, ехъудхэр ынэІу ригъэкІынхэм пае, Мэнасэ ипсэкІодшІагъэхэм, ащ ышІэгъэ пстэумэ апае Ехъудэм ар къыщышІыгъ. 4 Лъы хыер, Ерусэлэм зэлъыригъэкІоу, зэригъэчъагъэри Зиусхьаным ащ къыфигъэгъунэу фэягъэп. 5 Ехъоекъым зэкІэ иІофшІагъэхэмрэ нэмыкІэу ышІагъэхэмрэ ехъуд пачъыхьэхэм яхьылІэгъэ Іэпэрытххэм арытхагъэхэба. 6 Ехъоекъым лІи ятэ пІашъэхэр зыдэщыІэм зегъэзэжьым, ыкъо Ехъоехин ащ ычІыпІэ пачъыхьагъум техьагъ. 7 Мысыр пачъыхьэм ыІэ илъыгъэ чІыгухэр, игъукІырэ мысыр псыхъом къыщегъэжьагъэу Ефрат псыхъом нэсэу, зэкІэ бабилэн пачъыхьэм зэриштагъэхэм къыхэкІэу, мысыр пачъыхьэр зао ышІынэу ащ нахьыбэ къежьэжьыгъэп.
Ехъуд пачъыхьэу Ехъоехин
8 Ехъоехин пачъыхьэу зытехьэм илъэс пшІыкІуй ыныбжьыгъэр, мэзищэ Ерусэлэм щыпачъыхьагъ. Ащ янэ ыцІагъэр Нэхъущтэ. Ерусэлэм щыщ Елнатан ыпхъугъ. 9 Ятэ зэрихэбзагъэу, Зиусхьаным къемыкІущт пстэури ащ ышІэщтыгъ. 10 А уахътэм бабилэн пачъыхьэу Нэбухаднэцар идзэпэщэ Іэшъхьэтетхэр Ерусэлэм къезэрэгъэкІухи, къалэр къадзыхьагъ. 11 Бабилэн пачъыхьэу Нэбухаднэцар идзэпэщэ Іэшъхьэтетхэм къалэр аштэнэу фежьагъэхэу, ежьыр ащ къэкІуагъ. 12 Арыти, ехъуд пачъыхьэу Ехъоехини, яни, иІумэт Іэшъхьэтетхэри, ипщхэри, иунэ-хапІэ зынаІэ тезгъэтхэри зэригъусэхэу бабилэн пачъыхьэм зыратыгъ. Бабилэн пачъыхьэр зыпачъыхьэр яенэрэ илъэсым хэхьагъэу Ехъоекъым ащ ыубытыгъ. 13 Бабилэн пачъыхьэм Зиусхьаным и Унэ, пачъыхьэ унэм арылъыгъэ мылъкур зэкІэ арищыгъ. Зиусхьаным къызэриІогъагъэм фэдэу, израил пачъыхьэу Сэлмэн ышІыгъэ дышъэ пкъыгъохэр Зиусхьаным и Унэ ащ щызэхиупІышкІуагъэх. 14 Ерусэлэм дэсхэр зэкІэ, пщыхэр зэкІэ, дзэпэщэ Іэшъхьэтетхэр зэкІэ нэбгырэ минипшІ хъухэу ыгъэкощыгъэх, пхъэшІэ ІэпэІасэхэри, гъукІэхэри зэкІэ, хэкум щыщ цІыф анахь тхьамыкІэхэм анэмыкІ зи къымыгъанэу рищыгъэх. 15 Ехъоехин Бабилэн къалэм ыгъэкощыгъ, пачъыхьэм яни, ишъузхэри, ащ иунэ-хапІэ зынаІэ тезгъэтхэри, хэкум ицІыф лъэрыхьэхэри Ерусэлэм даригъэщхи Бабилэн аригъэгъэкощыгъэх. 16 Бабилэн пачъыхьэм дзэкІолІ нэбгырэ миниблыр, пхъашІэхэмрэ гъукІэхэмрэ нэбгырэ мин хъухэу, зэоным фэгъэсэгъэ дзэкІолІ хэшыпыкІыгъэхэр зэкІэ псэупІэкІэ Бабилэн аригъэгъэкощыгъэх. 17 Бабилэн пачъыхьэм Ехъоехин ятэш Матаный ащ ычІыпІэ пачъыхьэу тыригъахьи, Цыдкъый цІэу фаригъэусыжьыгъ.
Ехъуд пачъыхьэу Цыдкъый
18 Цыдкъый пачъыхьэу зытехьэм илъэс тІокІырэ зырэ ыныбжьыгъ, илъэс пшІыкІузэ Ерусэлэм щыпачъыхьагъ. Ащ янэ ыцІагъэр Хъамутал. Ар Лыбнэ къалэ щыщ Ирмые ыпхъугъ. 19 Ащи Ехъоекъым фэдэ къабзэу Зиусхьаным къемыкІущтыр ышІэщтыгъэ. 20 Зиусхьаныр Ерусэлэми Ехъудми лъэш дэдэу къафэгубжыгъэти, ащ нахьыбэрэ ымыдэжьхэу, ынэІу ригъэкІыпагъэх. ЕтІанэ Цыдкъый бабилэн пачъыхьэм зыкъыпиІэтыгъ.
Ерусэлэм зэрэзэхакъутагъэр
1 Цыдкъый зыпачъыхьэр ябгъонэрэ илъэсым хэхьагъэу, илъэсым ияпшІэнэрэ мазэ ияпшІэнэрэ мафэ бабилэн пачъыхьэу Нэбухаднэцар идзэ зэрэщытэу игъусэу Ерусэлэм къекІуи ар къадзыхьагъ, къэлэ дэпкъым рыдэкІоенхэу псэуалъэ горэ ашІыгъ. 2 Цыдкъый зыпачъыхьэр япшІыкІузэнэрэ илъэсым хэхьафэ къалэр джаущтэу къызэрыдзыхьэгъагъ. 3 ЯплІэнэрэ мазэм иябгъонэрэ мафэ гъаблэр къалэм нахь щылъэшыгъ, цІыфхэм ашхын яІагъэп. 4 Къэлэ дэпкъым къыпхыраутыгъ. Цыдкъый идзэкІолІхэр чэщым пачъыхьэ хэтэщагум рекІокІырэ къэлэ дэпкъхэм азыфагу дэтхэу, къэлапчъэм пэблэгъэ лъагъом тетхэу чъагъэх. А уахътэм къасдыйхэр къалэм къегъэуцокІыгъэхэу щытыгъэхэти, пачъыхьэмрэ идзэкІолІхэмрэ Ерыхъоу кІэим екІужьыгъэх. 5 Ау къасдыйхэм ядзэ пачъыхьэм лъежьи Ерыхъоу кІэим щыкІэхьагъ. Ащ идзэ зэрэщытэу шъхьадж ыпакІэ хэлъэдэжьыгъ. 6 Джаущтэу пачъыхьэр къаубыти, бабилэн пачъыхьэм дэжь Рыблэ ащи ащ иІоф щаІуагъ. 7 Цыдкъый ыкъохэр ыпашъхьэ щаукІхи, ежь Цыдкъый ынэхэр ракІыхи, ыІэхэм джэрз Іэхъу-лъэхъухэр атыралъхьи Бабилэн ащагъ.
Тхьэм и Унэ зэрэзэхакъутагъэр
8 Илъэсым иятфэнэрэ мазэ, мазэм ияблэнэрэ мафэ, бабилэн пачъыхьэу Нэбухаднэцар зыпачъыхьэр япшІыкІубгъонэрэ илъэсым хэхьагъэу, бабилэн пачъыхьэм иухъумэкІо шъхьагъырытмэ яІэшъхьэтетэу, ащ иІумэт Нэбузарадан Ерусэлэм къэкІуагъ. 9 Зиусхьаным и Уни, пачъыхьэм иуни, Ерусэлэм дэт унэхэри зэкІэ, цІыф лъэрыхьэхэм яунэхэри машІо акІидзи ащ ыгъэстыгъэх. 10 Къасдый дзэу пачъыхьэм иухъумэкІо шъхьагъырытхэм яІэшъхьэтет игъусагъэхэм Ерусэлэм къекІокІырэ дэпкъри зэхакъутагъ. 11 Пачъыхьэм иухъумэкІо шъхьагъырытмэ яІэшъхьэтетэу Нэбузарадан къалэм дамыщыгъэу къэнэгъэгъэ цІыфхэри, бабилэн пачъыхьэм ыпэкІэ гохьэгъагъэхэри, нэмыкІ цІыф къызэрыкІохэри къалэм даригъэщыгъэх. 12 Пачъыхьэм иухъумэкІо шъхьагъырытмэ яІэшъхьэтет зынэмысэу къыгъэнагъэр сэнэшъхьэшІапІэхэмрэ чІыгумрэ адэлэжьэнхэм пае къэлэдэс анахь тхьамыкІэхэм ащыщэу тІэкІу гор ныІэп. 13 Къасдыйхэм джэрз гъэткІугъэм хэшІыкІыгъэ кІэсэнхэу Зиусхьаным и Унэ иапэрэ ихьапІэ чІэтхэри, щэрэхъхэм атет тхьакІыпІэ-тегъэуцуапІэхэри, джэрзым хэшІыкІыгъэ лэгъуп-псыубытыпІэу Зиусхьаным и Унэ чІэтыгъэри зэхацІыцІэхи, а джэрзыр Бабилэн ащагъ. 14 Джащ фэдэу ащагъэх лэгъупхэри, хьакужъонтхъухэри, остыгъэм ишъэгъэ стафэхэр къызэрэпахырэ Іадэхэри, Іэгубжъэхэри, джэрзым хэшІыкІыгъэ шыкъоу Тхьэм ыпашъхьэ итхэ зыхъукІэ агъэфедэщтыгъэхэри, 15 жъапхъэхэри, лэджэнхэри ащагъэх, дышъэмрэ тыжьынымрэ ахэшІыкІыгъэхэри пачъыхьэм иухъумэкІо шъхьагъырытмэ яІэшъхьэтет ыштагъэх. 16 КІэсэнитІоу, лэгъуп-псыубытыпІэхэу, щэрэхъхэм атет тхьакІыпІэ-тегъэуцуапІэхэу Сэлмэн Зиусхьаным и Унэ пае джэрзым харигъэшІыкІыгъэхэм яонтэгъуагъэ зыфэдизыр ащэчыгъэу щытыгъэп. 17 Зы кІэсэным метрий фэдиз илъэгэгъагъ, метрэрэ ныкъорэ фэдиз илъэгагъэу джэрзым хэгъэткІукІыгъэу тандж ащ шъхьащыгъэуцожьыгъагъ. Джэрз шъэгъэ блэрымрэ фэхъурэяшъоу къытепшырэ сатыритІоу нар теплъэ зиІэхэмрэ танджым хъурэябзэу къыдекІокІыщтыгъэх. Джэрз шъэгъэ блэрыр къыздекІокІырэ адрэ кІэсэнри джащ фэдагъ.
Ехъуд цІыфхэр Бабилэн зэрэращыгъэхэр
18 Бабилэн пачъыхьэм иухъумэкІо шъхьагъырытмэ яІэшъхьэтет къурмэнышІ шъхьаІэу Сэрай, къурмэнышІ шъхьаІэм игуадзэу Цэфаный, Зиусхьаным и Унэ чІэхьапІэ къэзыухъумэрэ къурмэнышІ нэбгырищри ыубытыгъэх. 19 ДзэкІолІхэм яІэшъхьэтет пащэщтыгъэхэм ащыщ горэ, пачъыхьэм ицыхьэшІэгъу-упчІэжьэгъу нэбгыритфэу къалэм дэсыгъэхэр, дзэм иІэшъхьэтет итхакІоу дзэм кІощтхэр зытхыщтыгъэр, нахь цІыф лъэрыхьэхэу къалэм дэсыгъэхэм ащыщхэу нэбгырэ тІокІищ ащ къалэм даригъэщыгъэх. 20 Пачъыхьэм иухъумэкІо шъхьагъырытмэ яІэшъхьэтетэу Нэбузарадан ахэр ыубытхи бабилэн пачъыхьэм дэжь Рыблэ ыщагъэх. 21 Бабилэн пачъыхьэм ахэр аригъэутынхи, Хъамат хэкум ит Рыблэ къалэ щаригъэукІыжьыгъэх. Джаущтэу ехъуд цІыфхэр ячІыгу ращыгъэх.
Ехъудэм иІэшъхьэтет пащэу Гъэдалый
22 Бабилэн пачъыхьэу Нэбухаднэцар Ехъуд хэкум къыригъэнэжьыгъэ цІыфхэм Щафан ыкъо Ахъыкъам ыкъо Гъэдалый Іэшъхьэтет пащэу афишІыгъ. 23 Дзэм иІэшъхьэтет пащэхэми, ахэм ягъусэ дзэкІолІхэми бабилэн пачъыхьэм Гъэдалый Іэшъхьэтет пащэу зэрэтыригъэхьагъэр зызэхахым, Гъэдалый дэжь Мыцпэ къэкІуагъэх: Нэтаный ыкъо Исмахьил, Къарыехъ ыкъо Иохъанан, нэтофэ лъэпкъым щыщ Танхъумэт ыкъо Сэрай, зятэ МэІахэ щыщ Язаныехъу, ядзэкІолІхэр. 24 Гъэдалый ахэми, зиІэшъхьэтет ядзэкІолІхэми тхьэлъанэ афишІи ариІуагъ: «Къасдый Іэшъхьэтетхэм шъуащымыщынэу мы чІыпІэм унэхэр щышъушІхи, бабилэн пачъыхьэм шъуфэІорышІи шъуиІофхэр дэгъу хъущт». 25 Ау яблэнэрэ мазэм тефэу пачъыхьэ лІакъом щыщ ЕлыщамаІ ыкъо Нэтаный ыкъожь Исмахьилэ нэбгырипшІ игъусэу къакІуи, Гъэдалыйи ащ игъусэу Мыцпэ дэсыгъэхэми къатебани ыукІыгъэх. 26 ЕтІанэ цІыфхэм, анахь къызэрыкІохэм къащегъэжьагъэу анахь лъэрыхьэхэм анэсыжьэу, дзэкІолІ Іэшъхьэтетхэри зэрахэтхэу, къасдыйхэм ащэщынэхэти, заІати зэкІэ Мысырым икІыжьыгъэх.
Ехъоехин хьапсым къызэрэчІагъэкІыжьыгъэр
27 Ехъуд пачъыхьэу Ехъоехин зыращыгъэр ящэкІэнэрэ блырэ илъэсым хэхьагъэу, илъэсым ияпшІыкІутІонэрэ мазэ иятІокІэнэрэ блырэ мафэ бабилэн пачъыхьэу Еуил-Мэродах пачъыхьанэу зытехьэгъэ илъэсым, ехъуд пачъыхьэу Ехъоехин нэшІукІэ къеплъи, хьапсым къычІаригъэщыжьыгъ. 28 Ар ащ нэгушІоу къыпэгъокІыгъ, нэмыкІ хэгъэгумэ япачъыхьэхэу Бабилэн щыІагъэхэм анахьыбэу лъытэныгъэ къыфишІыгъ. 29 Пачъыхьэм Ехъоехин хьапсэчІэс щыгъынэу щыгъыгъэхэр зыщыригъэхыжьхи, щэІэфэ ышхыщтым ар щигъэкІагъэп. 30 Джаущтэу пачъыхьэм иунашъокІэ, ищыкІагъэр зэкІэ мафэ къэс рагъэгъотзэ, олІэжьыфэ ар щыІагъ.
Персие пачъыхьэмрэ ащ игуащэрэ ешхэ-ешъохэр зэрашІыгъэр
1 Мары Ахъашурэщ зыщыпсэущтыгъэ мафэхэм къэхъугъэр. Ахъашурэщ Индием щегъэжьагъэу Кущ нэсэу хэкуишъэрэ тІокІырэ блырэмэ пачъыхьагъур ащиІыгъыгъ. 2 А мафэхэм пачъыхьэм итахътэ Персием ит пытапІэу Шушан щыІагъ. 3 Тетыгъор зиІыгъым иящэнэрэ илъэс зэкІэ пщыхэм, ихэкумэ тетыгъор ащызыІыгъхэм, Персием, Мадайм ядзэхэм япащэхэм, ІэнатІэкІэ ахэІэтыкІыгъэхэм, къулыкъушІэхэм ащ ешхэ-ешъошхо афишІыгъ. 4 Ипачъыхьагъу мылъкушхоу илъымрэ ежь ипачъыхьэ щытхъушхорэ мэфишъэрэ тІокІиплІырэм къыкІоцІ аригъэлъэгъугъ. 5 А мафэхэр зытекІыхэм, зэкІэ ицІыфхэу Шушан пытапІэм дэсхэм, цІыф къызэрыкІохэми хэІэтыкІыгъэхэми апае, мэфибл ешхэ-ешъо ипачъыхьэ щагушхо чъыг хатэу дэлъым ащыфишІыгъ. 6 Щагур бзыуцыфым хэшІыкІыгъэ пэІухъо шхъуантІэхэмрэ фыжьыхэмрэкІэ гъэкІэрэкІагъэу щытыгъ. А пэІухъохэр кІэпсэжъые плъыжь-чІапцІэхэмкІэ ыкІи фыжьхэмкІэ мыжъоф пкъэухэм апылъ тыжьын хъурджанэхэм апылъэгъагъэх. Дышъэмрэ тыжьынымрэ ахэшІыкІыгъэ тегъолъхьапІэхэр щагум щагъэуцугъэх. А щагум мыжъо шІуцІэхэр, плъыжьхэр, фыжьхэр, налмэс-налкъутэр зыхэгъэпкІэгъэхэ джэхашъо иІагъ. 7 Дышъэ Іэгубжъэ зэфэшъхьафхэм пачъыхьэм иунашъокІэ санэр шъхьамысхэу къафырагъахъощтыгъ. 8 Хэтрэ хьакІи зэрэфаеу ешъон фитыгъ; зыми ригъэзыщтыгъэхэп, сыда пІомэ пачъыхьэм ихэгъырэймэ унашъо афишІыгъагъ шъхьадж зэрэфаем тетэу дэзекІонхэу. 9 А мэфэ дэдэхэм пачъыхьэ гуащэу Уаштый пачъыхьэу Ахъашурэщ иунэ бзылъфыгъэхэм апае ешхэ-ешъошхо щишІыгъ.
Пачъыхьэ гуащэу Уашти пачъыхьэу Ахъашурэщ зэремыдэІугъэр
10 Яблэнэрэ мафэм, пачъыхьэм ыгу санэм къызегъэчэфым, ащ ариІуагъ Мехьумэн, Бизтэ, Хъарбон, Быхътэ, Абахътэ, Зэтар, Къэркас – евнух нэбгыриблэу пачъыхьэу Ахъашурэщ ежь ышъхьэкІэ фэлажьэщтыгъэхэм – 11 пачъыхьэ гуащэу Уаштый пачъыхьэ паІори щыгъэу ыпашъхьэ къыращэнэу. Ар дэхэ дэдэу щытыгъэти, ащ идэхагъэ цІыфхэми ІэнатІэкІэ хэІэтыкІыгъэхэми аригъэлъэгъу шІоигъуагъ. 12 Пачъыхьэм иевнуххэм афишІыгъэ унашъом пачъыхьэ гуащэу Уаштый едэІунэу фэягъэп. Арыти пачъыхьэр лъэшэу губжыгъэ, машІом фэдэу къызэкІэнагъ. 13 ЕтІанэ пачъыхьэм иупчІэжьэгъухэм зафигъэзагъ – хабзэхэмрэ фитыныгъэхэмрэ зышІэхэрэм яупчІыжьэу ихэбзагъэти. 14 А лъэхъаным ащ нахь къыпэблагъэу щытыгъэхэр: Къарщэн, Щэтар, Адматэ, Тарщыщ, Мэрэс, Марсэн, Мэмухъан – Персиемрэ Мадаимрэ япщыхэу пачъыхьэм ыпашъхьэ занкІэу ихьанхэ алъэкІынэу ыкІи пачъыхьагъум апэрэхэу исыгъэхэр арых. 15 «Хабзэм тетэу сыдэущтэу удэзекІон фая пачъыхьэ гуащэу Уаштый, пачъыхьэм иевнуххэм ащ фаригъэшІыгъэ унашъор зэримыгъэцэкІагъэм пае?» – ар яупчІыгъ. 16 Пачъыхьэмрэ пщыхэмрэ апашъхьэ Мэмухъан къыщиІуагъ: «Пачъыхьэ гуащэу Уаштый пачъыхьэ закъор арэп зыпашъхьэ щымысэр, ІэнатІэкІэ хэІэтыкІыгъэхэми пачъыхьэу Ахъашурэщ ихэку пстэуми ащыпсэурэ цІыфхэми апашъхьэ щымыс нахь; 17 сыда пІомэ пачъыхьэ гуащэм ышІагъэм икъэбар лІы зиІэ бзылъфыгъэ пстэуми алъыІэсыщт. Хъулъфыгъэмэ аІощт: „Пачъыхьэу Ахъашурэщ игуащэ къыфащэнэу унашъо ышІыгъ, ау ар къафэкІуагъэп“. Ар яушъхьагъоу бзылъфыгъэмэ ялІыхэр пхъэтэпэмыхь ашІын алъэкІыщт. 18 Непэ шъыпкъэми Персиеми Мадаими япщы гуащэхэм, пачъыхьэ гуащэм изекІуакІэ зызэхахкІэ, джа дэдэр пачъыхьэм ипщы пстэуми араІоу хъущт; зэщыхьани, гухэкІи къыхэкІыщт. 19 Пачъыхьэм игъоу елъытэмэ, пачъыхьэ унашъо ащ къыдерэгъэкІ, ар Мадаими Персиеми яхабзэмэ ахэтхагъэ орэхъу зэбламыхъужьынэу – Уаштый пачъыхьэм ащ нахьыбэрэ ыпашъхьэ къихьан фимытэу, пачъыхьэ гуащэм фашІырэ фитныгъэхэр ащ нахь бзылъфыгъэ дэгъу горэм пачъыхьэм ферэгъаз. 20 Пачъыхьэм иунашъо ащ ипачъыхьагъу ины тыдэкІи зыщызэхахыкІэ, зэкІэ бзылъфыгъэхэр ялІыхэм ядэІущтых, анахь хэІэтыкІыгъэм щегъэжьагъэу анахь къызэрыкІом нэсыжьэу». 21 А гущыІэр пачъыхьэми пщыхэми агу рихьыгъ; арыти пачъыхьэр Мэмухъан игущыІэ тетэу зекІуагъэ. 22 Хэку пэпчъ тхакІэу илъымкІэ ыкІи лъэпкъэу ис пэпчъ ыбзэкІэ тхыгъэу – лІы пэпчъ иунэ щызиусхьанынэу раІозэ, пачъыхьэм ихэку пстэуми тхылъхэр арагъэхьыгъэх.
Пачъыхьэр шъузыкІэ лъэхъу
1 Уахътэ тешІагъэу пачъыхьэу Ахъашурэщ игубж зэІэсэжьым, ар Уаштии, ащ ышІагъэми, ащ фэгъэхьыгъэу ежь унашъоу ышІыгъэми ягупшысагъ. 2 Джащыгъум пачъыхьэм ежь ышъхьэкІэ фэлэжьэрэ упчІэжьэгъумэ аІуагъ: «Пачъыхьэм пае пшъэшъэ ныбжьыкІэ дахэмэ алъэрэхъух. 3 Пачъыхьэм ипачъыхьагъу ит хэку пстэуми лІыкІохэр ащерэгъэнафэх: пшъэшъэ ныбжьыкІэхэр зэкІэ, ятеплъэкІэ дахэхэу, пачъыхьэ пытапІэу Шушан къалэм дэтым хэт бзылъфыгъэ унэм къыщаугъоинхэу. Бзылъфыгъэмэ алъыплъэрэ евнухэу Хэгъае ахэмэ ынаІэ атерэт, загъэдэхэным пае мэІэшІу зыпихырэ щыфэнхэри арерэтых. 4 Пшъашъэу пачъыхьэм ыгу рихьырэр Уашти ычІыпІэкІэ пачъыхьэ гуащэ орэхъу». А гущыІэхэр пачъыхьэм игъоу ылъэгъугъ, джаущтэуи ащ ышІыгъ. 5 Джурт горэ щыІагъ Мардохъай ыцІэу, ар пытапІэу Шушан дэтым дэсыгъ, бинямин лъэпкъым щыщыгъ. Ащ ятэ Яир, ятэжъ ЩымІый, ятэжъ ятэ Къыщ ацІагъ. 6 Бабилэн пачъыхьэу Нэбухаднэцар джурт пачъыхьэу Ехъоный гъэрмэ акІыгъоу Ерусэлэм къызырещым, Мардохъай къызтекІыгъэхэр а гъэрхэм ахэтыгъэх. 7 Мардохъай ятэшым ыпхъоу Эстэр – джуртыбзэкІэ Хьадас – ыпІужьыгъагъ, сыда пІомэ ащ яни яти иІэжьыгъэп. А пшъашъэр ыпкъыкІэ дахэу, ынэгукІэ гохьыгъ. Янэрэ ятэрэ щымыІэжьхэ зэхъум, Мардохъай ар ыпхъу фэдэу ядэжь къыщэжьыгъагъ. 8 Пачъыхьэм унашъоу къыдигъэкІыгъэр агъэІуи, пшъэшъабэ Хэгъай алъыплъэнэу пачъыхьэ пытапІэу Шушан дэтым щаугъоигъ. Джащыгъум Эстэри, бзылъфыгъэ унэм лъыплъэрэ Хэгъай ынаІэ тетынэу, пачъыхьэ унэм ащэгъагъ. 9 А пшъашъэр ащ ыгу рихьыгъ, нэшІукІи еплъыгъ, псынкІэу мэІэшІу зыпихырэ щыфэнхэри шхын шъхьафэу фыхахыгъэхэри ратыгъэх. ЕтІанэ Хэгъай пачъыхьэм иунэшхо щылажьэрэмэ пшъэшъибл къахихи, Эстэр иІофтэбгэнхэу фигъэнафэхи, Эстэри ащ фигъэзэгъэ пшъашъэхэри бзылъфыгъэ унэм ианахь псэупІэ дэгъум аригъэщагъэх. 10 Эстэр цІыф лъэпкъэу зыщыщыри, къызхэкІыгъэ лІакъори ариІуагъэп, сыда пІомэ Мардохъай унашъо къыфишІыгъагъ аримыІонэу. 11 Мафэ къэс Мардохъай бзылъфыгъэ унэм ищагу дэжь къыщикІухьэщтыгъэ Эстэр ипсауныгъи иІоф зытетри зэригъэшІэнэу. 12 Пшъашъэхэм, бзылъфыгъэмэ афагъэуцугъэ хабзэм тетэу, мэзэ пшІыкІутІум къыкІоцІ загъэдэхэн фэягъ: апэрэ мэзихым миррэ зыфаІорэ мэІэшІу зыпихырэ дагъэр, адрэ мэзихым мэІэшІу зыпихырэ нэмыкІ уцхэр ащафэн фэягъ. 13 Бзылъфыгъэ унэм икІыгъэу пшъашъэр пачъыхьэм дэжь чІахьэ зыхъукІэ, ищыкІэгъэнэу сыд къыкІэлъэІугъэми, ратыщтыгъ. 14 Унэм пчыхьэм ар ихьэти, пчэдыжьым ятІонэрэ бзылъфыгъэ унэу, пачъыхьэм иевнухэу ЩаІашгъэз ыІэ илъым кІожьыщтыгъэ. Ащ нахьэу пачъыхьэм дэжь чІэхьажьыщтыгъэп, пачъыхьэр къыфаеу, ыцІэ къыраІоу къемыджэхэмэ.
Эстэр пачъыхьэ гуащэ зэрэхъугъэр
15 Аущтэу Эстэр – ыпхъу фэдэу зыштэгъэ Мардохъай ятэшэу Абихъаил ыпхъу – пачъыхьэм ыдэжь кІонэу ичэзыу къэсыгъ. Пачъыхьэм иевнухэу бзылъфыгъэмэ алъыплъэрэ Хэгъай зыфиІуагъэм нэмыкІ ар кІэлъэІугъэп. Эстэр зэкІэ зылъэгъугъэмэ агу зырыригъэхьыгъ. 16 Пачъыхьэу Ахъашурэщ итетыгъом ияблэнэрэ илъэс ияпшІэнэрэ маз ары – Тэбэт мазэр – ащ иунэшхо Эстэр зыращагъэр. 17 Пачъыхьэм зэкІэ ишъузмэ анахьэу Эстэр шІу ылъэгъугъ, зэкІэ пшъашъэмэ анахьэу ыгукІэ фэшІоу, нэшІукІэ еплъэуи хъугъэ. Пачъыхьэ паІор ащ Эстэр шъхьащилъхьи, Уашти ычІыпІэкІэ пачъыхьэ гуащэ ышІыгъ. 18 Пачъыхьэм зэкІэ ІэнатІэкІэ ахэІэтыкІыгъэхэм, къулыкъушІэхэм ешхэ-ешъошхо афишІыгъ. Зэрэпачъыхьэгъоу цІыфхэм щагъэмэфэкІынэу игъоу афилъэгъугъ, пачъыхьэм епэсыгъэ шІухьафтынхэри афишІыгъэх.
Мардохъай пачъыхьэм ыпсэ къызэригъэнэжьыгъэр
19 ЯтІонэрэуи пшъашъэхэр заугъойхэм, Мардохъай Іоф гъэнэфагъэ фэгъэзагъэу пачъыхьэ къэлапчъэм дэжь щысыгъ. 20 Эстэр, Мардохъай унашъоу фишІыгъагъэм тетэу, лІакъоу къызхэкІыгъэри, цІыф лъэпкъэу зыщыщри ариІогъагъэп. Мардохъай ыІуагъэр Эстэр джыри ыгъэцакІэщтыгъ, ипІурэу ащ иунэ зесым зэришІыщтыгъэм фэдэкъабзэу. 21 Мардохъай пачъыхьэ къэлапчъэм зыщыІусыщтыгъэ мафэхэм пачъыхьэм иевнуххэу Быхътанрэ Тэрэщрэ гухьэ-гужъ фыряІэу Ахъашурэщ аукІынэу рахъухьэщтыгъэ. 22 Ар зешІэм, Мардохъай пачъыхьэ гуащэу Эстэр риІуагъ, ежь Эстэр Мардохъай ыцІэкІэ пачъыхьэм къэбарыр риІожьыгъ. 23 Іофыр зэхафи, шъыпкъэу къызычІэкІым, нэбгыритІур пылъапІэм палъагъ. А лъэхъаным ихъугъэ-шІагъэхэр зыдатхэрэ тхылъым пачъыхьэм иунашъокІэ Мардохъай ишІушІэ Іоф датхагъ.
Джуртхэр ыгъэкІодынхэу Хамэн зэрэрихъухьагъэр
1 А хъугъэ-шІагъэхэм ауж агъагъ лъэпкъым щыщэу Хъэмэдат ыкъоу Хамэн пачъыхьэу Ахъашурэщ ыгъэини, ыІэтыгъ, ар зэкІэ пщэу иІэмэ анахь лъагэуи ыгъэуцугъ. 2 Пачъыхьэ къэлапчъэм дэжь пачъыхьэм къулыкъу щыфэзышІэхэрэр зэкІэ Хамэн лъытэныгъэ фашІэу, ыпашъхьэ лъэгонджэмышъхьэкІэ щытІысыщтыгъэх, сыда пІомэ пачъыхьэм ащ фэдэ унашъо ышІыгъагъ. Ау Мардохъай ащ лъытэныгъи фишІыщтыгъэп, зыфиуфэщтыгъэп ыкІи. 3 Пачъыхьэ къэлапчъэм дэжь пачъыхьэм къулыкъу щыфэзышІэрэмэ Мардохъай раІощтыгъэ: «Пачъыхьэм иунашъо сыда зыфэмыгъэцакІэрэр?» 4 Джаущтэу мафэ къэс раІощтыгъэми, ежь ядэІурэпти, Хамэн къэбарыр нагъэсыгъ – Мардохъай изекІуакІэ фигъэгъущтмэ зэригъэшІэнэу, сыда пІомэ зэрэджуртыр ахэмэ ариІогъагъ. 5 ШъыпкъэмкІи, Мардохъай ежь лъытэныгъэ къыфимышІэу, ыпашъхьэ лъэгонджэмышъхьэкІэ зэрэщымытІысырэм гу зылъетэм, Хамэн губжым зэлъиштагъ. 6 Ау Мардохъай зыщыщ цІыф лъэпкъыр къызыраІом, ар изакъоу ыукІыныр Хамэн шІомакІэ хъугъэ, Мардохъай илъэпкъэгъухэу, зэкІэ Ахъашурэщ ипачъыхьагъу тыдэкІи щыпсэущтыгъэ джуртхэр ыгъэкІодынхэу рихъухьагъ. 7 Апэрэ мазэм, Нысан зыцІэ мазэм, пачъыхьэу Ахъашурэщ итетыгъом ияпшІыкІутІонэрэ илъэс, Хамэн ыпашъхьэ пур – къикІырэр пхъэдз – радзагъ: мазэри мафэри агъэунэфыным пае. Пхъэдзыр зытефагъэр япшІыкІутІонэрэ мазэу Адар зыфаІорэр ары. 8 Арыти Хамэн пачъыхьэу Ахъашурэщ риІуагъ: «Пачъыхьэгъум ихэку пстэуми ащыпсэурэ цІыф лъэпкъмэ зы лъэпкъ гъэнэфагъэ горэ ахэт; ахэм яхабзэхэмкІэ нэмыкІ лъэпкъмэ захаушъхьафыкІы; пачъыхьэм хабзэу къыдигъэкІыгъэхэр агъэцакІэхэрэп. Арышъ ахэр пачъыхьагъум аущтэу щыпсэунхэр пачъыхьэмкІэ зэрар хъущт. 9 Пачъыхьэм игъоу елъытэмэ, ахэр аукІынхэу унашъо къыдерэгъэкІ. Тыжьын ахъщэ минипшІ пачъыхьэм иІофхэр зыІэ илъхэм афэсщэчынышъ, ар пачъыхьэм имылъку гъэтІылъыпІэ ралъхьанэу ястыщт». 10 Джащыгъум пачъыхьэм имыхъур Іэлъын ыІэхъуамбэ къыпихи, джуртмэ япыеу агъагъ лъэпкъым щыщэу, Хъэмэдат ыкъо Хамэн ритыгъ. 11 Пачъыхьэм Хамэн риІуагъ: «А тыжьыныр о къызфэгъани, цІыф лъэпкъым узыфаер ешІ». 12 Апэрэ мазэм ияпшІыкІущэнэрэ мафэ пачъыхьэм итхакІохэм къяджагъэх. Ахэмэ Хамэн унашъо зэришІыгъэм тетэу сатрапхэм, хэку пэпчъ Іэшъхьэтетэу иІэм, лъэпкъ пэпчъ пщэу иІэм, хэку пэпчъ тхакІэу илъымкІэ, лъэпкъ пэпчъ бзэу зэрыгущыІэрэмкІэ афатхыгъ. Пачъыхьэу Ахъашурэщ ыцІэкІэ зэкІэ тхыгъэу, пачъыхьэ мыхъур ІэлъынымкІэ къэгъэшъыпкъэжьыгъэуи щытыгъ. 13 Пачъыхьэм ихэку пстэуми унашъор мэкъэгъэІухэм анагъэсыгъ. ЯпшІыкІутІонэрэ мазэм изы мэфэ закъо къыкІоцІ – Адар мазэм ияпшІыкІущэнэрэ мафэ – зэкІэ джуртхэр, цІыкІуи, ини, сабыий, бзылъфыгъи ахэтхэу аукІынхэу, агъэкІодынхэу, лъэпсэкІод ашІынхэу, ямылъкуи зэрапхъонэу а унашъом итыгъ. 14 Унашъом тетхыкІыгъэхэр хэбзэ кІуачІэ яІэу къыдагъэкІын фэягъ. А унашъор хэку пэпчъ щагъэІун, лъэпкъ пстэуми янэрылъэгъоу нэІуасэ фашІынхэ фэягъ зэкІэри а мафэм фэхьазырынхэм пае. 15 МэкъэгъэІухэр пачъыхьэм зэриІуагъэу псынкІэу гъогум техьэхи, пачъыхьэ пытапІэр зыдэт къалэу Шушан а унашъор щагъэІугъ. Пачъыхьэри Хамэни ешъохэу щысыгъэх, ау Шушан къалэр гумэкІышхом зэлъиштэгъагъ.
Мардохъай джуртмэ ІэпыІэгъу афэхъунэу Эстэр зэрелъэІугъэр
1 Мардохъай, хъугъэр зэкІэ зешІэм, ищыгъынхэр зэІитхъыгъэх. Дзыуапхъэм хэшІыкІыгъэ щыгъынхэр зыщилъэхи, яжьэр ышъхьэ къыритэкъохыгъ, къэлэ гупчэм ихьи, гугъэузэу мэкъэшхокІэ тхьаусыхэу фежьагъ. 2 Джаущтэу пачъыхьэ къэлапчъэм нэсыгъ, ау дэхьагъэп, сыда пІомэ дзыуапхъэм хэшІыкІыгъэ щыгъынхэр пщыгъхэу пачъыхьэ къэлапчъэм удэхьан уфитыгъэп. 3 Джащ фэдэу пачъыхьэм иунашъо зыщагъэІугъэ хэку пстэуми нэшхъэигъэшхом джуртхэр ащызэлъиштэщтыгъэх, ащанэкІыщтыгъ, ащытхьаусхэщтыгъэх. Ащыщыбэхэр дзыуапхъэм хэшІыкІыгъэ щыгъынхэр ащыгъэу яжьэм хэгъуалъхьэщтыгъэх. 4 Эстэр иунэІут бзылъфыгъэхэмрэ иевнуххэмрэ ыдэжь къакІохи, Мардохъай ышІагъэр къыфаІотагъэти, пачъыхьэ гуащэр лъэшэу къэгумэкІыгъ. Мардохъай дзыуапхъэм хэшІыкІыгъэ щыгъынхэр зыщихынхэшъ, нэмыкІ щыгъынхэр зыщилъэнхэу фаригъэхьыгъэх, ау адрэм аІихыгъэхэп. 5 ЕтІанэ пачъыхьэм иевнухэу Хъэтах, Эстэр унэІутэу фагъэнэфагъэр, Эстэр къаригъащи, Мардохъай дэжь ыгъэкІуагъ къэхъугъэр, ащ фэдэу зыкІэзекІорэри къызэригъэшІэнэу. 6 Хьатах Мардохъай дэжь, къэлэ утыгоу пачъыхьэ къэлапчъэмэ адэжь щыІэм кІуагъэ. 7 Мардохъай зэкІэ ащ къыриІотагъ: ежь къехъулІагъэхэри, джуртхэр зэраукІыщтхэм пае тыжьын пчъэгъэ гъэнэфагъэ пачъыхьэм имылъку гъэтІылъыгъэ хилъхьанэу Хамэн зэригъэгугъагъэхэри. 8 Джуртхэр агъэкІодынхэм пае къалэу Шушан къыщыдагъэкІыгъэ унашъом тетхыкІыгъэр Мардохъай Хъэтах ритыгъ, Эстэр ригъэлъэгъунышъ, зэкІэ Іофмэ язытет щигъэгъозэнэу. ЕтІани фигъэпытагъ пачъыхьэм дэжь кІонышъ, ежь илъэпкъэгъухэм гукІэгъу къафишІыным пае елъэІунэу. 9 Хъатах кІуи, Мардохъай игущыІэхэр Эстэр риІотэжьыгъэх. 10 Эстэр Хъэтах дэгущыІи, ыІофтагъ Мардохъай риІожьынэу: 11 «ЗэкІэ пачъыхьэм икъулыкъушІэхэми, пачъыхьэм ихэку щыпсэурэ цІыф лъэпкъхэми ашІэ: хэтми, орэхъулъфыгъ, орэбзылъфыгъ, къемыджагъэхэу пачъыхьэм ищагу кІоцІ дахьэрэм – хабзэм фигъэнэфагъэр зы: ар аукІын фае. Пачъыхьэм идышъэ бэщ зыфищэйрэр ары ныІэп псаоу къэнэжьыщтыр. Сэры пІомэ, мары мэфэ щэкІ хъугъэ пачъыхьэм дэжь сыкІонэу къызысэмыджагъэр». 12 Эстэр игущыІэхэр Мардохъай зыраІотэжьыхэм, ащ джэуап аритыжьыгъ: «Пачъыхьэм иунэшхо узэрэчІэсым пае джурт пстэуми ащыщэу о зым псаоу укъэнэжьынэу умыгугъ. 14 Мыщ фэдэ уахътэм о зи умыІомэ, ащыгъум шъхьафитныгъэмрэ кІодыпІэм икІыжьыгъэным иамалрэ нэмыкІ чІыпІэкІэ джуртхэм къафэкІощт, ау ори уятэ иунагъуи шъукІодыщт. ЕтІани, хэт ышІэра, мыщ фэдэ уахътэм паенкІи мэхъуба пачъыхьэ гуащэу узкІэхъугъэр?» 15 Мардохъай раІожьынэу Эстэр къыІуагъ: 16 «Ежьи, Шушан джуртэу дэсыр зэкІэ къэугъой, сэщ пае нэкІыр шъуІыгъ, мэфищым къыкІоцІ шъумышх ыкІи шъуемышъу, чэщыми мафэми. Сэри сиунэІут бзылъфыгъэхэр сигъусэхэу джащ фэдэу нэкІыр сІыгъыщт. Ащ ыуж, агъэуцугъэ хабзэм ымыдэми, пачъыхьэм дэжь сыкІощт, сыкІодынэу щытмэ – сэрэкІод». 17 Мардохъай ежьи, Эстэр унашъоу къышІыгъэм тетэу ышІыгъ.
Эстэр апэрэ ешхэ-ешъошхоу ышІыгъэр
1 Ящэнэрэ мафэм Эстэр пачъыхьэ гуащэм ишъуашэхэр зыщилъагъэх. ЕтІанэ пачъыхьэ унэшхом ищагу кІоцІ дэуцуагъ, пачъыхьэ тахътэр зыдэщыІэ унэшхом пэчІынатІэу. Ащ дэжьым унэ ихьэгъум пэзанкІэу пачъыхьэ тахътэм тесэу пачъыхьэр иунэшхо исыгъ. 2 Щагум дэтэу пачъыхьэ гуащэу Эстэр зелъэгъум, ар ащ нэшІукІэ еплъыгъ. Пачъыхьэм дышъэ бэщэу ыІыгъыр Эстэр фищэигъ, пачъыхьэ гуащэр ащ екІуалІи, дышъэ бэщ цыпэм теІэбагъ. 3 Пачъыхьэм Эстэр риІуагъ: «Сыда узгъэгумэкІырэр, пачъыхьэ гуащэу Эстэр? Сыд фэдэ лъэІуа уиІэр? Пачъыхьагъум ызыныкъу пІуагъэми, къыуатыщт». 4 Эстэр къыІуагъ: «Пачъыхьэм игъоу елъытэмэ, Хамэн игъусэу ар ешхэ-ешъоу сэ фэзгъэхьазырыгъэм непэ ерэблагъ». 5 Пачъыхьэм къыІуагъ: «Эстэр шІоигъор фэтшІэнэу псынкІэу Хамэн къашъущэ». Хамэн игъусэу пачъыхьэр Эстэр ыгъэхьазырыгъэ ешхэ-ешъом кІуагъэ. 6 Санэм ешъохэзэ, пачъыхьэр Эстэр еупчІыгъ: «Сыда узфаер? КъаІо, къыпфэсшІэщт. Сыд лъэІуа уиІэр? Пачъыхьагъум ызыныкъо укъыкІэлъэІугъэми, къыпфэсшІэщт». 7 Эстэр джэуап къытыгъ: «Мары сшІоигъоу сыкъызкІэлъэІурэр: 8 Пачъыхьэр нэшІукІэ къысэплъымэ, пачъыхьэм сызыфаеу сыкъызкІэлъэІурэр къысфишІэнэу игъоу елъытэмэ, ащыгъум пачъыхьэр Хамэн игъусэу афэзгъэхьазырыгъэ ешхэ-ешъом джыри неущ орэкІох. Джащыгъум сэ пачъыхьэм иупчІэ джэуап къестыщт».
Мардохъай ыукІынэу Хамэн гухэлъ зэриІагъэр
9 А мафэм Хамэн чэфэу, нэгушІоу къыдэкІыгъ. Ау Хамэн пачъыхьэ къэлапчъэмэ адэжь Мардохъай щилъэгъуи, ар къыфэмытэджэу, ыпашъхьэ зызщемыгъэсысыми, Хамэн лъэшэу фэгубжыгъ. 10 Ау Хамэн ыгу теІункІэжьи, ядэжь кІожьыгъ. ЕтІанэ иныбджэгъухэмрэ ишъузэу Зэрэшрэ къащэнхэу алъигъэкІуагъэх. 11 Ахэмэ Хамэн зыщытхъужьызэ, къафиІотагъ мылъкушхо зэриІэр, ыкъохэр бэ зэрэхъухэрэр, ар пачъыхьэм зэригъэлъэпІагъэм, пщыхэми пачъыхьэм икъулыкъушІэхэми лъагэу зэратыриІэтыкІыгъэм икъэбар. 12 Хамэн ащ къыхигъэхъуагъ: «Ежь пачъыхьэ гуащэу Эстэри къыгъэхьазырыгъэ ешхэ-ешъом пачъыхьэмрэ сэррэ нэмыкІ ригъэблэгъагъэп; джаущтэу неущи сэ пачъыхьэм сыригъусэу ащ сыригъэблэгъагъ. 13 Ау Мардохъай джуртыр пачъыхьэ къэлапчъэм дэжь щысэу сэлъэгъуфэ, а пстэуми сэркІэ пкІэ яІэп». 14 Ишъузэу Зэрэши зэкІэ ежь иныбджэгъухэми ащ раІуагъ: «Іэнтэгъу шъэныкъо илъэгагъэу пылъапІэ къарэгъэхьазыри, Мардохъай ащ палъэнэу пачъыхьэм пчэдыжьым елъэІу; етІанэ пачъыхьэм уригъусэу ешхэ-ешъом чэфэу кІо». Ар Хамэн ыгу рихьыгъ, пылъапІэри аригъэгъэхьазырыгъ.
Пачъыхьэм Мардохъай лъытэныгъэ зэрэфишІыгъэр
1 А чэщым пачъыхьэм чъыен ылъэкІыгъэп, арыти ащ унашъо ышІыгъ ипачъыхьагъу лъэхъан фэгъэхьыгъэ хъугъэ-шІагъэхэр зыдатхэрэ тхылъыр къыфахьынэу; пачъыхьэм ащ къыфеджагъэх. 2 Ащ итхагъэу къырагъотагъ пачъыхьэм фэлажьэрэ къэрэгъулитІоу, ащ ипчъэшъхьаІу къэзгъэгъунэщтыгъэхэ Быхътанрэ Тэрэщрэ пачъыхьэу Ахъашурэщ аукІынэу зэрэрахъухьэгъагъэр Мардохъай зэраригъэшІэгъагъэр. 3 Пачъыхьэм къыІуагъ: «Сыд фэдэ лъытэныгъа, сыд фэдэ ІахьышІуа Мардохъай фагъэшъошагъэр?» Пачъыхьэм иунэІутхэм джэуап къатыгъ: «Зи ащ фашІагъэ щыІэп». 4 «ІофышІэ горэ дэта щагум?» – къэупчІагъ пачъыхьэр. Хамэн ащыгъум пачъыхьэм иунэшхо кІыб щыІэ щагум дэтыгъ; Мардохъай фагъэхьазырыгъэ пылъапІэм паригъалъэ зэрэшІоигъор пачъыхьэм риІонэу ар къэкІогъагъ. 5 Пачъыхьэм иунэІутхэм къаІуагъ: «Хамэн къэкІуагъэу щагум дэт». Пачъыхьэм къыІуагъ: «Къерэхь». 6 Хамэн къызехьэм, пачъыхьэр ащ еупчІыгъ: «Сэ лъытэныгъэ зыфэсшІы сшІоигъо цІыфым сыд фасшІэмэ хъуна?» Хамэн ыгукІэ зэриІожьыгъ: сэщ пэмыкІэу, хэта пачъыхьэм лъытэныгъэ зыфишІы шІоигъощтыр? 7 Хамэн пачъыхьэм риІуагъ: «Пачъыхьэм лъытэныгъэ зыфишІы шІоигъо цІыфым 8 пачъыхьэм щыгъырэ шъуашэр къыфарэхь, пачъыхьэр зытесырэ шымэ ащыщ къыфарэщ, пачъыхьэ паІом яхьыщырэу пачъыхьэм ишыхэр зэрагъэдахэрэм фэдэ шым ышъхьэ тырарэлъхь. 9 Шъуашэмрэ шымрэ пачъыхьэм иапэрэ пщымэ ащыщ горэм рарэти, а цІыфэу пачъыхьэм лъытэныгъэ зыфишІы шІоигъом ахэр ащ щерэлъ, шым тесэу къэлэ утыгум къырерэщ. Мэкъэ лъэшыкІэ ащ ыпашъхьэ къыщерэІу: „Пачъыхьэм лъытэныгъэ зыфишІы шІоигъо цІыфым джаущтэу дэзекІох!“» 10 Арыти пачъыхьэм Хамэн фигъэпытагъ: «Джыдэдэм шъуашэри шыри штэхи, джа къызэрэпІуагъэм фэдэу, пачъыхьэ къэлапчъэм дэжь щыс Мардохъай джуртым дэзекІу. КъэпІуагъэм щыщ гори хэмыгъэз». 11 Хамэн шъуашэри шыри ыштэхи, Мардохъай ыфэпагъ, ар шым тесэу къэлэ пчэгум къырищи, мэкъэ лъэшыкІэ ащ ыпашъхьэ къыщиІуагъ: «Пачъыхьэм лъытэныгъэ зыфишІы шІоигъо цІыфым джаущтэу дэзекІох!» 12 Ащ ыуж Мардохъай пачъыхьэ къэлапчъэм дэжь къыгъэзэжьыгъ. Ежь Хамэн, гукъэошхоу ышІыгъэм къыхэкІэу ышъхьэ шъхьарыхъоныр къехъухыгъэу, гуІэзэ, ядэжь кІожьыгъэ. 13 Ишъузэу Зэрэши зэкІэ ежь иныбджэгъухэми къехъулІэгъэ пстэури Хамэн къафиІотэжьыгъ. Арыти ащ иныбджэгъу акъылышІохэми ишъузи къыраІуагъ: «Мардохъаеу зыпкъ къикІыкІэ улъэпэонэу ебгъэжьагъэр джуртмэ ащыщышъ, ащ о упэшІуекІон плъэкІыщтэп, ежь, щэч хэмылъэу, о къыптекІощт нахь». 14 Ахэр ащ дэгущыІэхэзэ, пачъыхьэм иевнуххэр къэсхи, Эстэр къыгъэхьазырыгъэ ешхэ-ешъом гуІэным хэтхэу Хамэн зыдащагъ.
Хамэн къырыкІуагъэр
1 Пачъыхьэр Хамэн игъусэу пачъыхьэ гуащэу Эстэр дэжь ешхэ-ешъом кІуагъэ. 2 А ятІонэрэ мафэм, санэм ешъозэ, пачъыхьэр Эстэр еупчІыгъ: «Пачъыхьэ гуащэу Эстэр, сыда узыфаер? КъаІо, къыпфэсшІэщт. Сыд лъэІуа уиІэр? Пачъыхьагъум ызыныкъо укъыкІэлъэІугъэми, къыпфэсшІэщт». 3 Пачъыхьэ гуащэу Эстэр джэуап къытыжьыгъ: «О, пачъыхьэр, нэшІукІэ укъысэплъэу, игъоу олъытэмэ, сшІоигъор – псаоу сыкъэбгъэнэнэу ары. ЛъэІоу къыпфысиІэр лъэпкъэу сызыщыщыр умыгъэкІодынэу ары. 4 Сыда пІомэ тэ ахъщэкІэ тащагъ, сэри силъэпкъэгъухэри лъэпсэкІоды ташІынэу, таукІынэу, тагъэкІодынэу. ПщылІы ташІынэу тащэгъагъэмэ, зи сІоныеп, сыда пІомэ ащ фэдэм пае пачъыхьэр бгъэгумэкІыныр тэрэзынэп». 5 Пачъыхьэу Ахъашурэщ пачъыхьэ гуащэу Эстэр еупчІыгъ: «Хэта ар, тыдэ щыІа, мыщынэу ащ фэдэ зыгу къэкІыгъэр?» 6 Эстэр къыІуагъ: «Пыйри джэгъогъури мы лІы бзаджэу Хамэн ары!» Джащыгъум пачъыхьэмрэ пачъыхьэ гуащэмрэ апашъхьэ Хамэн зэрэщынэрэм къыхэкІэу къыщыкІэзэзыгъ. 7 Губжым хэтэу пачъыхьэр ешхэ-ешъом къыхэтаджи, пачъыхьэ чъыгхатэм дэхьагъ. Хамэн, ыпсэ къыгъэнэжьыным пае, Эстэр елъэІунэу къэнагъ, сыда пІомэ ащ пачъыхьэм ыгъэкІодынэу зэрэрихъухьагъэр къыгурыІуагъ. 8 Пачъыхьэ чъыгхатэм пачъыхьэр къыдэкІыжьи, зыщешъощтыгъэхэ унэм къызегъэзэжьым, Эстэр игъолъыпІэ Хамэн зытыридзагъэу ылъэгъугъ. Арыти пачъыхьэр къэкууагъ: «Аужыпкъэм сиунэ кІоцІ сэ сапашъхьэ пачъыхьэ гуащэм лые щырихы шІоигъу!» Пачъыхьэм ыжэ а гущыІэр къызэрэдэкІэу, агъэмысэхэрэм зэрарашІэ хабзэу, Хамэн ынэгу рахъуагъ. 9 Пачъыхьэм иевнухмэ ащыщэу Хъарбонэ къыІуагъ: «Марыба пылъапІэри, Іэнтэгъу шъэныкъо илъэгагъэу Хамэн иунэ дэжь щыт. Пачъыхьэр къэзгъэнэжьыгъэ Мардохъай пае ар Хамэн ыгъэхьазырыгъагъ». Пачъыхьэм къыІуагъ: «Ар джащ пышъулъ». 10 Мардохъай пае ыгъэхьазырыгъэ пылъапІэм Хамэн палъагъ. Ащ нэуж ныІэп пачъыхьэм игубж зыІэсэжьыгъэр.
Джуртмэ яІоф нахьышІум фэузэнкІыгъэ зэрэхъугъэр
1 А мафэм пачъыхьэу Ахъашурэщ джуртмэ япыеу Хамэн иуни зэкІэ имылъкуи пачъыхьэ гуащэу Эстэр ритыгъ. Пачъыхьэр Мардохъай къеджагъ, сыда пІомэ ар ежь Эстэр къызэрэфыщытыр ариІогъагъ. 2 Пачъыхьэм имыхъурэу Хамэн къыІихыжьыгъагъэр ыІапэ къыпихи, Мардохъай ритыгъ. Хамэн иуни зэкІэ имылъкуи алъыплъэнэу Эстэр Мардохъай ыгъэнэфагъ. 3 Эстэр джыри зэ пачъыхьэм дэгущыІагъ, ащ ыпашъхьэ зыщыридзыхи, гъызэ елъэІугъ агъагъ лъэпкъым щыщэу Хамэн бзэджагъэу джуртмэ аришІэнэу рихъухьагъэр ашъхьарищынэу. 4 Пачъыхьэм дышъэ бэщыр Эстэр фищэигъ. Эстэр къэтэджыгъ, пачъыхьэм ыпашъхьэ къиуцуи, 5 къыІуагъ: «Пачъыхьэм игъоу ылъытэу, нэшІукІэ къысэплъэу, мы Іофыри шІозафэу, ыгу сырехьэу щытымэ, ащыгъум унашъо къыдерэгъэкІ Хамэн ытхыгъэ тхылъхэр къызэкІагъэкІожьынхэу. Пачъыхьэм ихэку пстэуми ащыпсэурэ джуртхэр ыгъэкІодынхэу, агъагъ лъэпкъым щыщ Хьамэдат ыкъоу Хамэн ытхыгъэхэр арых зигугъу къэсшІырэр. 6 Армырмэ тхьамыкІагъоу силъэпкъ зыхэфэщтым сыдэущтэу сеплъын слъэкІына, лІакъоу сыкъызхэкІыгъэр зэрэкІодыщтыри сыдэущтэу сфэщэчына?» 7 ЕтІанэ пачъыхьэу Ахъашурэщ пачъыхьэ гуащэу Эстэри Мардохъай джуртыми ариІуагъ: «Мары, Хамэн иуни зэкІэ имылъкуи сэ Эстэр естыгъ, джуртмэ ыІэ зэратырищэягъэм пае ежьыри пылъапІэм пязгъэлъагъ. 8 Шъо джы джуртмэ афэгъэхьыгъэу тэрэзэу шъулъытэрэр пачъыхьэм ыцІэкІэ шъутхы, пачъыхьэ мыхъурри кІэшъудзэжь, сыда пІомэ пачъыхьэм ыцІэкІэ атхыгъэу, ащ имыхъур зыкІадзэжьыгъэр зэблэпхъун плъэкІыщтэп». 9 А мэфэ дэдэм, ящэнэрэ мазэу, Сиуан мазэм иятІокІэнэрэ щырэ мафэ пачъыхьэм итхакІохэм къяджагъэх. Мардохъай зэкІэ къыІуагъэм тет шъыпкъэу хэкуишъэрэ тІокІырэ блырэ хъурэмэ унашъо къафыдагъэкІыгъ: джуртхэм, сатрапхэм, хэку пэпчъ Іэшъхьэтетэу иІэм, лъэпкъ пэпчъ пщэу иІэм, Индием щегъэжьагъэу Кущ нэсыжьэу. Хэку пэпчъ тхакІэу илъымкІэ, лъэпкъ пэпчъ ежь ыбзэкІэ, джуртхэми ежьхэм ятхакІэкІи абзэкІи ахэм атхыгъ. 10 Пачъыхьэу Ахъашурэщ ыцІэкІэ Мардохъай аригъэтхи, пачъыхьэ мыхъурыри акІидзэжьыгъ, пачъыхьэм пае къыхахыгъэ шы лъэпкъ псынкІэхэм атес мэкъэгъэІухэм аІэкІилъхьи, тхылъхэр афаригъэщагъэх. 11 Мары пачъыхьэм а иунашъо итыгъэр: сыдрэ къали дэс джуртхэр зэрэугъоинхэшъ, ящыІэныгъэ къаухъумэжьын фитых. Лъэпкъхэу, хэкухэу джуртхэм ябзылъфыгъэхэри ясабыйхэри зэрахэтэу атебанэхэрэм ядзэхэр ахэм агъэкІодынхэ, аукІынхэ, лъэпсэкІод ашІынхэ, ямылъкуи зэрапхъон фитых. 12 А пстэури тыдэкІи гъэцэкІагъэ зыщыхъун фэягъэр пачъыхьэу Ахъашурэщ зэкІэ ихэкухэм а зы мафэм, япшІыкІутІонэрэ мазэу Адар зыфаІорэм ияпшІыкІущэнэрэ маф ары. 13 А унашъом тетхыкІыгъэхэр хэбзэ кІуачІэ яІэу хэку пэпчъ къыщыдагъэкІын фэягъ. А унашъор лъэпкъ пстэуми арагъэІунэу щытыгъ. А мафэм ехъулІэу ежьхэм алъ ашІэжьынэу джуртхэр хьазырынхэ фэягъ. 14 Пачъыхьэм ишы чъэрмэ атесхэу мэкъэгъэІухэр, пачъыхьэм иунашъо фэІорышІэхэу, псынкІэу езэрэгъэфыжьагъэх. Пачъыхьэ пытапІэу Шушан дэтыми ежь къалэми унашъор щагъэІугъ. 15 Пачъыхьэ шъуашэр, ышъокІэ шхъонтІэ-шІуцІашъоу ыкІи фыжьэу, дышъэ пэІошхор, шэкІ фыжьымрэ шэкІ плъыжь-чІапцІэмрэ ахэшІыкІыгъэ абэр щыгъхэу Мардохъай пачъыхьэм ыдэжь къикІыжьыгъ. Къалэу Шушан къэчэфыжьи, къэгушІожьыгъ. 16 А уахътэм джуртхэм дунаир къафэнэфыгъ, гушІуагъуи яІагъ, лъытэныгъи къафашІыгъ. 17 Хэку пэпчъи, къалэ пэпчъи, сыдрэ чІыпІи, пачъыхьэм иунашъорэ ыухэбзыгъэмрэ зынэсыхэрэм, джуртхэр щычэфыщтыгъэх, гушІуагъо яІагъ, ешхэ-ешъом хэтхэу ямэфэкІыгъ. Хэгъэгум ицІыф лъэпкъыхэм ащыщыбэхэм джурт зашІыгъ, сыда пІомэ джуртхэм ащыщынэхэ хъугъагъэх.
Джуртхэр япыйхэм зэратекІуагъэхэр
1 ЯпшІыкІутІонэрэ мазэу, Адар мазэм ияпшІыкІущэнэрэ мафэ пачъыхьэм иунашъорэ ыухэбзыгъэмрэ агъэцэкІэнэу игъо къэсыгъ. А мафэр ары джуртхэм тетыгъо афыряІэнэу япыйхэр зыгугъэщтыгъэхэр. Ау Іофыр шъхьафэу къычІэкІыгъ – ежь пыйхэр джуртхэм аІэ илъ хъугъэх. 2 Пачъыхьэу Ахъашурэщ ихэку пстэуми арыт къалэхэм джуртхэр ащызэрэугъоигъэх – бзэджагъэ зыгу къафилъыгъэхэм язэонхэу; ахэмэ ащыщ гори джуртхэм къапэуцужьын ылъэкІынэу щытыгъэп, сыда пІомэ зэкІэ цІыф лъэпкъыхэр джуртхэм ащыщынэхэ хъугъагъэ. 3 Хэку пэпчъ Іэшъхьэтетэу иІэр, сатрапхэр, хэку пэпчъ пщэу иІэр, пачъыхьэм икъулыкъушІэхэри джуртхэм къадеІэщтыгъэх, сыда пІомэ ахэм Мардохъай щынэгъошхо фашІыгъагъ. 4 Пачъыхьэм иунэ Мардохъай щылъэшыгъ, икъэбар хэку пстэуми къащекІокІыщтыгъ, ежьыми нахь лъагэу зиІэты зэпытыщтыгъ. 5 Джуртхэм япыйхэр чатэкІэ яохэзэ аукІыщтыгъэх, лъэпсэкІод ашІыхэзэ, зэрэфаехэу яджэгъогъухэм адэзекІощтыгъэх. 6 Пачъыхьэ пытапІэу Шушан дэтыми джуртхэм нэбгырэ шъитф фэдиз щаукІыгъ ыкІи щагъэкІодыгъ. 7 Ахэмэ джуртхэм япый Хьамэдат ыкъоу Хамэн ыкъуипшІ ахэтыгъ, ахэр: Парщандат, Далфон, Аспат, Порат, Адалый, Арыдат, Пармашт, Арысай, Арыдай, Уайзэт. Ау хъункІэн Іоф джуртхэм зэрахьагъэп. 11 А мэфэ дэдэм пачъыхьэ пытапІэу Шушан дэтым щаукІыгъэм ипчъагъэ пачъыхьэм раІожьыгъ. 12 Пачъыхьэм пачъыхьэ гуащэу Эстэр риІуагъ: «Пачъыхьэ пытапІэу Шушан дэтым джуртхэм нэбгырэ шъитф фэдизырэ Хамэн ыкъуипшІырэ апсэ щыхахыгъ. Адэ нэмыкІ хэкоу пачъыхьэм ыІэ илъхэм сыда ахэм ащашІагъэр? Джыри зыгорэм уфая? КъыпфэсшІэн. Сыд лъэІуа джыри уиІэр? Ари къыпфэсшІэн». 13 Эстэр къыІуагъ: «Пачъыхьэм игъоу елъытэмэ, Шушан дэс джуртхэм фитыныгъэ арарэт хабзэм теткІэ непэ ашІагъэм фэдэ неущи ашІэнэу. Хамэн ыкъуипшІымэ яхьадэхэр пылъапІэм парэлъэх». 14 Пачъыхьэм джаущтэу ашІынэу афигъэпыти, Шушан унашъо къыщыдигъэкІыгъ. Хамэн ыкъуипшІымэ яхьадэхэр пылъапІэм палъагъэх. 15 Шушан дэс джуртхэр джащ фэдэу Адар мазэм ияпшІыкІуплІэнэрэ мафи зэрэугъойхи, Шушан нэбгырэ шъищ фэдизмэ апсэ щыхахыгъ, ау ахъункІагъэхэп. 16 НэмыкІ джуртхэу пачъыхьэм ихэкухэм арысыгъэхэри апсэ къаухъумэжьынэу зэрэугъоигъагъэх, япыйхэмкІэ гупсэф агъотынэу, яджэгъогъухэм ащыщэу нэбгырэ мин тІокІищырэ пшІыкІутфырэ фэдизмэ апсэ хахыгъ, ау хъункІэ ашІагъэп. 17 Ар зыхъугъэр Адар мазэм ияпшІыкІущэнэрэ маф ары. А мэзэ дэдэм ияпшІыкІуплІэнэрэ мафэ ахэм загъэпсэфи, ешхэ-ешъомрэ чэфыгъомрэ ямафэу ар ашІыгъ. 18 Ау Шушан дэсыгъэ джуртхэр а мазэм ияпшІыкІущэнэрэ мафи, ияпшІыкІуплІанэрэми зэонхэу зэрэугъоигъагъэх. ЯпшІыкІутфэнэрэ мафэм загъэпсэфыгъ, ар ешхэ-ешъомрэ чэфыгъомрэ ямафэу ашІыгъ. 19 Джащ пае джуртхэу, къоджэ, къэлэ цІыкІухэм адэсхэм Адар мазэм ияпшІыкІуплІэнэрэ мафэ ешхэ-ешъомрэ чэфыгъомрэ ахэтхэу, шхын ІахьышІухэр зэфагъэхьыжьызэ, мэфэкІ мафэу агъэмэфэкІы.
Мардохъай Пурим мэфэкІыр зэригъэнэфагъэр
20 Мардохъай а хъугъэ-шІагъэхэр зэкІэ ытхыхи, пачъыхьэу Ахъашурэщ ихэкухэм зэкІэ джуртэу арысхэм, чыжьэхэми благъэхэми, тхылъхэр афигъэхьыгъэх. 21 АщкІэ афиухэсыгъ илъэс къэс Адар мазэм ияпшІыкІуплІэнэрэ, ияпшІыкІутфэнэрэ мафэхэр агъэмэфэкІынэу. 22 Мы мафэхэр арых джуртхэм япыйхэмкІэ гупсэф зыщагъотыгъэр. Мы мазэр ары янэшхъэигъо – гушІуагъо, ятхьамыкІагъо – мэфэкІ зыщыхъугъэхэр. Ащ пае апшъэ рилъхьагъ ешхэ-ешъомрэ чэфыгъомрэ яІэхэу а мафэхэр агъэмэфэкІынэу, шхын ІахьышІухэр зэфагъэхьыжьынэу, тхьамыкІэхэм шІухьафтын аратызэ ашІынэу. 23 Аущтэу а мафэхэр, Мардохъай зэрафитхыгъэм тетэу агъэмэфэкІынэу зэраублагъэм фэдэу, джуртхэм илъэс къэс лъагъэкІуатэщтыгъ. 24 Сыда пІомэ агъагъ лъэпкъым щыщэу Хьамэдат ыкъо Хамэн, джурт пстэуми япыим, джуртхэр ыгъэкІодынхэу рихъухьи, ахэр зыщигъэкІодыщт мафэр ыгъэунэфынэу пур – къикІырэр пхъэдз – ридзэгъагъ. 25 Ау Эстэр пачъыхьэм дэжь зэкІом, пачъыхьэм тхылъ аригъэтхыгъ гухэлъ бзаджэу Хамэн джуртхэм яхьылІагъэу ышІыгъагъэр ежь къытефэжьынэу, ежьыри ыкъохэри пылъапІэм палъэнхэу унашъуи къыдигъэкІыгъ. 26 Джары а мафэхэм Пурим зыкІафаусыгъэр, гущыІэу «пур» зыфиІорэм къытекІэу. ЗэкІэ мы тхылъым ит гущыІэ пстэуми адиштэу, ежьхэми алъэгъугъэу, къяхъулІагъэмэ адиштэу, 27 джуртхэм зэдаштагъэ, ежьхэми атекІыщтхэми апшъэ ралъхьажьыгъ, ядин зыштэхэри зэрахэтэу, Мардохъай иунашъо тетэу, охътэ гъэнэфагъэм илъэс къэс дэх имыІэу а мэфитІур агъэмэфэкІынэу. 28 А мафэхэр ащымыгъупшэу хагъэунэфыкІызэ ашІынэу, лІэужэу къакІэлъыкІохэрэми, лІакъо пэпчъ, хэку пэпчъ, къалэ пэпчъ агъэмэфэкІын фае. Пурим мафэхэр джуртхэм аІэкІэмызэу, атекІыщтхэми а мафэхэм ягъэмэфэкІын щамыгъэтыжьынэу унашъо зэдаштагъ. 29 ЕтІанэ пачъыхьэ гуащэу Эстэр, Абихъаил ыпхъу, Мардохъай джуртыр игъусэу тхылъ ытхыгъ, ыпэкІэ Пурим мэфэкІым фэгъэхьыгъэ тхылъэу Мардохъай ытхыгъагъэр къыгъэшъыпкъэжьынэу. 30 Ахъашурэщ ипачъыхьагъу ит хэкуишъэрэ тІокІырэ блырэмэ арыс джурт пстэуми мамырныгъэрэ зыпкъ итыныгъэрэ яІэмэ зэрашІоигъом ехьылІэгъэ гущыІэхэр зэрыт тхылъхэр афагъэхьыгъ. 31 ЕтІани а тхылъхэм арытыгъ Пурим мафэхэр джуртхэмрэ ахэм ялІэужхэмрэ охътэ гъэнэфагъэм агъэмэфэкІынэу. А унашъом нэмыкІ мэфэкІхэмрэ нэкІымрэ тхьаусхэнымрэ ямэфэкІхэмрэ Пурим мэфэкІхэр ахагъэхъонэу къыдилъытэщтыгъэ. А унашъор Мардохъайрэ пачъыхьэ гуащэу Эстэррэ къыдагъэкІыгъагъ. 32 Эстэр мы иунашъо Пуримым фэгъэхьыгъэ хабзэхэр къыгъэшъыпкъэжьыгъэх ыкІи ахэр тхылъым ратхагъэх.
Мардохъай лъытэныгъэшхо зэрэфашІыгъэр
1 Ащ ыуж пачъыхьэу Ахъашурэщ ипачъыхьагъу хы Іушъом нэсэу щыпсэурэ цІыфмэ хьакъулахь атырилъхьагъ. 2 Ащ зэкІэ Іофышхо гъэшІэгъонэу ышІагъэхэмрэ Мардохъай зэригъэлъэпІагъэм икъэбархэмрэ Персиемрэ Мадаимрэ япачъыхьэхэм ялъэхъан хъугъэ-шІагъэхэр зыдатхэщтыгъэ тхылъым датхагъэх. 3 Мардохъай джуртыр пачъыхьэу Ахъашурэщ ыужкІэ хэгъэгум иятІонэрэ цІыфэу щытыгъ. Ащ джуртхэм лъытэныгъэшхо фашІыщтыгъ, илъэпкъэгъухэм лъэшэу шІу алъэгъущтыгъ. Мардохъай ишІуагъэ илъэпкъ ригъэкІыщтыгъ, игущыІэкІи шІу афишІэщтыгъ.
Юныс Тхьэм зэремыдэІугъэр
1 Зиусхьаным игущыІэ Юныс, Амытай ыкъо, къыфехыгъ: 2 – Ежьи, Нинэуй къэлэшхом кІо, гъэмысэхи, Тхьэм игущыІэ ягъэІу, сыда пІомэ ахэмэ ябзэджэшІагъэхэр къыслъыІэсыгъэх. 3 Юныс зигъэхьазырыгъ Зиусхьаным пэчыжьэ зишІынэу, Нинэуй мыкІоу, ащ илъэныкъо шъхьафыкІэ щыІэ Тарщыщ ежьагъ. Яфо къалэм къэси, Тарщыщ кІорэ къухьэ къыгъотыгъ, гъогупкІэр арити, Зиусхьаным пэчыжьэ зишІыным пае, Тарщыщ адэкІонэу къухьэм итІысхьагъ. 4 Ау Зиусхьаным хым жьыбгъэ лъэш къыщиІэтыгъ, хым хыоешхо къыщыхъуи, къухьэр къызэхэкъутэу фежьагъ. 5 КъошъофылІхэр къэщынагъэх, шъхьаджи итхьэ елъэІущтыгъэ, къухьэр нахь псынкІэ ашІыным пае хым хьылъэхэр хадзэхэу аублагъ; ежь Юныс къухьэ кІоцІым ехи, гъолъи, пытэу хэчъыегъагъ. 6 Къухьэм ипащэ ащ ыдэжь къакІуи, къыриІуагъ: – Сыда узфэчъыерэр? Къэтэдж, уи Тхьэ елъэІу; хэт ышІэра, Тхьэр къытфэгумэкІынкІи мэхъу, тимыгъэкІодынэу. 7 ЕтІанэ къухьэм исхэм зэраІожьыгъ: – НекІо, пхъэдз итэжъугъадз мы тхьамыкІагъор зыпкъ къикІырэр зэдгъэшІэнэу. – Пхъэдзыр зырадзэм, Юныс тефагъ. 8 Джащыгъум ащ раІуагъ: – КъытаІу, хэта мы тхьамыкІагъор къызыпкъырыкІырэр? Сыд Іофа узпылъыр, тыдэ укъикІыра? Тыдэ щыІа уихэгъэгу, сыд цІыф лъэпкъа узщыщри? 9 Ащ къариІуагъ: – Сэ сыджурт, хымрэ чІыгумрэ къэзгъэшІыгъэхэу, ошъогумэ я Тхьэу Зиусхьаныр сэгъэлъапІэ. 10 ЦІыфхэр лъэшэу къащтэхи, ащ раІуагъ: – Сыда о зэхэпшІыхьагъэр? – Ахэмэ ашІэщтыгъэ Зиусхьаным зышІуигъэбылъынэу ар зэрэхэхьажьыгъэр, сыда пІомэ ежь ар къариІогъагъ. 11 Хыоешхор нахь лъэш хъущтыгъэти, ащ раІуагъ: – Сыда къыотшІэн фаер хыр Іэсэжьыным пае? 12 Джащыгъум ащ ариІожьыгъ: – Сэ сышъушти, псым сыхэшъудз, етІанэ хыоешхор уцужьыщт, сыда пІомэ мы хыоешхом сэ силажьэкІэ шъузэрэхэфагъэр сэ къызгурыІуагъ. 13 Аущтми лІыхэм, нэпкъым екІолІэнхэу, псынкІэу къухьэр афэу фежьагъэх, ау ар къадэхъущтыгъэп, сыда пІомэ хыоешхор нахь лъэш хъущтыгъэ. 14 Арыти ахэр куохэзэ, Зиусхьаным елъэІугъэх: – ТыолъэІу, Зиусхьан, мы лІым ыпсэ пае тэрэмыкІод, тимылажьэмкІэ тымыгъэмыс, сыда пІомэ О пшІоигъор, Зиусхьан, пшІагъэ! 15 Юныс аубыти, ахэмэ хым хадзагъ; зэрэхадзэу хым игубж Іэсэжьыгъэ. 16 А лІыхэм Зиусхьаным щынэгъошхо фыряІэ хъугъэ. Зиусхьаным къурмэни тхьэрыІохэри фашІыгъэх.
Юныс Тхьэм зэрелъэІугъэр
1 Зиусхьаным пцэжъыешхом унашъо фишІыгъ Юныс ыдырынэу; Юныс а пцэжъыешхом ыкІоцІ чэщ-мэфищэ исыгъ. 2 Пцэжъыем ыкІоцІ зэрисэу Юныс Зиусхьанэу и Тхьэ мэкъэшхокІэ зыфигъэзагъ: 3 – Гузэжъогъум сыхэтэу сэ Зиусхьаным инэу селъэІугъ: Ащ джэуап къыситыгъ. Хьадрыхэ икуупІэ сэ сыкъикуукІыгъ: О сымакъэ къызэхэпхыгъ. 4 О хым анахь икуупІэм сыхэбдзагъ, псыорышхомэ сыкъауцухьагъ, О зэкІэ Уипсхэр, зэкІэ Уиорхэр сэ сашъхьагъ икІыщтыгъэх. 5 Джащыгъум сэ сІуагъэ: – О Уинэплъэгъу сэ сыкІэрычыгъ, ау О Уиунэшхо лъапІэ сэ джыри слъэгъужьыщт. 6 Спшъэтыкъ къэсэу псыхэм сызэлъаубытыгъ, куупІэм сыхэтыгъ, хы уцыр сшъхьэ къещэкІыгъэ хъугъагъэ. 7 Къушъхьэхэм алъачІэ нэсэу сэ сехыгъагъ – хэгъэгоу зикъэлапчъэхэр пчъэдадзэхэмкІэ егъэшІэрэу зэфашІыжьыгъэм; ау О, Зиусхьанэу си Тхь, спсэ хьадрыхэ къипщыжьыщт. 8 Спсэ фэмылъэкІыжь зэхъум, сэ Зиусхьаныр сыгу къэкІыжьыгъ, силъэІуи О Уадэжь, Уиунэшхо лъапІэ, къэсыгъ. 9 ПкІэ зимыІэ тхьэ нэпцІхэр зыгъэлъапІэхэрэм шъыпкъагъэу О къыпфыряІэн фаер щагъэзыягъ. 10 Ау сэ щытхъу макъэкІэ О къурмэн пфэсшІыщт; узэрэзгъэгугъагъэр згъэцэкІэжьыщт. Зиусхьаныр ары тыкъэзгъэнэжьыщтыр! 11 Арыти Зиусхьаным пцэжъыешхом унашъо фишІи, ащ Юныс чІыгум къытыритІупщыхьажьыгъ.
Юныс Зиусхьаным зэредэІугъэр
1 Зиусхьаным игущыІэ ятІонэрэу Юныс къыфехыгъ: 2 – Ежьи, Нинэуй къэлэшхом кІо, Сэ къэбарэу къыуасІорэр ащ щыІуат. 3 Юныс ежьи, Зиусхьаным къыриІуагъэм тетэу Нинэуй кІуагъэ; а Нинэуир къэлэшхо дэдагъ, мэфищыкІэ зэпыпчынэу щытыгъ. 4 Юныс Нинэуй зэпичэу ыублагъ, зы мэфэ гъогу зекІу нэужым цІыфхэм ариІуагъ: – Мэфэ тІокІитІу зытешІэкІэ, Нинэуй зэхэкъутэщт! 5 Нинэуйм дэсхэм Тхьэм игущыІэ ашІошъ хъугъэ: нэкІыр аубытыгъ, ини цІыкІуи дзыуапхъэм хэшІыкІыгъэ шъыгъо щыгъынхэр зыщалъагъ. 6 А къэбарыр Нинэуй ипачъыхьэ къызылъэІэсым, ар итахътэ къытекІи, ипачъыхьэ шъуашэ зыщихыгъ, дзыуапхъэм хэшІыкІыгъэ шъыгъо щыгъынхэр зыщилъэхи, яжьэм хэтІысхьагъ. 7 Ащ Нинэуй дэс цІыфхэм ариІуагъ: – Мыр пачъыхьэми ицІыф лъэрыхьхэми яунашъу: зы цІыфи, зы былыми – чэмхэми мэлхэми – зыпари ашхы хъущтэп, хъупІэми орэмыкІох, пси ерэмышъох. 8 Дзыуапхъэм хэшІыкІыгъэ щыгъынхэр цІыфхэм зыщарэлъ, былымхэми атырарэхъу, лъэшэу Тхьэм ерэлъэІух, шъхьаджи игъогу бзаджэ ерэбгыни, мыхъункІэ цІыфхэм адэзекІоныр херэнэжь. 9 Хэт ышІэра, Тхьэр кІэгъожьынышъ, игубжышхо тшъхьарищынкІи мэхъу, тэри тымыкІодэу тыкъэнэжьын. 10 Ахэмэ ягъогу бзаджэ зэрабгынагъэр Тхьэм зелъэгъум, тхьамыкІагъоу аришІэнэу зыфиІогъагъэм фыкІэгъожьи, аришІагъэп.
Юныс игубжырэ Тхьэм игукІэгъурэ
1 Юныс ар лъэшэу ыгу хэкІи, губжыгъэ. 2 Арыти Зиусхьаным елъэІуи, ащ къыІуагъ: – Е, Зиусхьан! Сихэгъэгу сызесыми мыщ фэдэу зэрэхъущтыр сыгукІэ сшІэщтыгъэ. Джары сэ Тарщыщ сызфечъэжьэгъагъэри, сыда пІомэ сэ сшІэщтыгъэ: О, шІур афэзышІэу, гукІэгъу зыхэлъэу, шІэхэу мыгубжэу, мыкІодыжьын шІулъэгъушхо зиІэ Тхьэу ущыт, цІыфхэр бгъэпщынэным уфыкІэгъожьыными уфэхьазыр. 3 Джы, Зиусхьан, спсэ хэх, сыда пІомэ сыщыІэным нахьи, сылІэныр нахь къэсэштэ. 4 Зиусхьаным къыІуагъ: – Тэрэза узэрэгубжырэр? 5 Юныс къалэм дэкІи, тыгъэ къокІыпІэ лъэныкъомкІэ тІысыгъэ, чэл зыфишІыжьи, ащ ижьау чІэтІысхьагъ – къалэм къыщышІыщтыр ылъэгъунэу. 6 Джащыгъум Зиусхьанэу Тхьэм къэкІырэ лъэпкъ къыгъэкІыгъ. Юныс ышъхьэ жьаоу къытыридзэрэм ар ыгъэрэхьатынэу Тхьэр фэягъ. А къэкІыгъэм Юныс лъэшэу щыгушІукІыгъ. 7 ЯтІонэрэ мафэм, нэф къызэрэшъэу, хьамлыум къэкІыгъэм хишхыкІынэу Тхьэм ыгъэпсыгъэти, ар гъугъэ. 8 ЕтІанэ тыгъэр къызыкъокІым, Тхьэм тыгъэжь стырыр къыригъапщи, Юныс ышъхьэ тыгъэм ристыкІэу ыублагъ, кІочІаджэ хъуи, хьадэгъум кІэлъэІузэ, ащ къыІуагъ: – СыщыІэным нахьи, сылІэныр нахь къэсэштэ. 9 Арыти Тхьэм Юныс къыриІуагъ: – КъэкІыгъэм пае угубжыныр тэрэза? Адрэм къыІуагъ: – Боу тэрэз. СыщыІэным сыфэмыежьэу сыгубжыгъ. 10 Джащыгъум Зиусхьаным къыІуагъ: – Къин зытемылъэгъуагъэу, къэмыгъэкІыгъэу, а зы чэщым къэкІи, а зы чэщым кІодыжьыгъэм угу фэгъу. 11 – Адэ сыдэущтэу сыгу фэмыгъуна Нинэуй къэлэшхоу нэбгырэ минишъэрэ тІокІырэм къехъу, Іэ джабгъумрэ Іэ сэмэгумрэ зэхагъэкІуакІэу зыдэсым, былымыби зыдэтым.
The New Testament of our Lord and Saviour Jesus Christ
Исус лъэпкъэу къызхэкӀыгъэр
1 Мыр Исус Христосэу Даутэ ыкъор ыкӀи Ибрахьимэ ыкъор лъэпкъэу къызхэкӀыгъэм итхылъ. 2 Ибрахьимэ Исхьакъ къыфэхъугъ; Исхьакъ Якъубэ къыфэхъугъ; ащ Иудэрэ ышхэмрэ къыфэхъугъэх; 3 Иудэ Фаресрэ Зарэрэ къыфэхъугъэх; и тӀумэ янэ Фамар ыцӀагъ; Фарес Есром къыфэхъугъ; ащ Арам къыфэхъугъ; 4 ащ Аминадав къыфэхъугъ; ащ Наасон къыфэхъугъ; ащ Салмон къыфэхъугъ; 5 ащ Вооз къыфэхъугъ; Вооз янэ Рахав ыцӀагъ; Вооз Овид къыфэхъугъ; Овид янэ Руф ыцӀагъ; Овид Иессе къыфэхъугъ; 6 ащ пачъыхьэ Даутэ къыфэхъугъ. Пачъыхьэу Даутэ Сэлмэн къыфэхъугъ; Сэлмэн янэ, Урие зыцӀэм ишъузэу щытыгъагъ. 7 Сэлмэн Ровоам къыфэхъугъ; ащ Авие къыфэхъугъ; ащ Асэ къыфэхъугъ; 8 ащ Иосафат къыфэхъугъ; ащ Иорам къыфэхъугъ; ащ Озие къыфэхъугъ; 9 ащ Иоафам къыфэхъугъ; ащ Ахаз къыфэхъугъ; ащ Езекие къыфэхъугъ; 10 ащ Манассие къыфэхъугъ; ащ Амон къыфэхъугъ; ащ Иосие къыфэхъугъ; 11 ащ Иоаким къыфэхъугъ. Израил цӀыфхэр Вавилон къэлэшхом лӀыгъэкӀэ защэхэ лъэхъанэм ыдэжь Иоаким Иехониерэ ышхэмрэ къыфэхъугъэх. 12 Израил цӀыфхэр Вавилоным защэхэ ужым, Иехонием Салафиил къыфэхъугъ; ащ Зоровавел къыфэхъугъ; 13 ащ Авиуд къыфэхъугъ; ащ Елиаким къыфэхъугъ; ащ Азор къыфэхъугъ; 14 ащ Садок къыфэхъугъ; ащ Ахим къыфэхъутъ; ащ Елиуд къыфэхъугъ; 15 ащ Елеазар къыфэхъугъ; ащ Матфан къыфэхъугъ; ащ Якъубэ къыфэхъугъ; 16 ащ Юсыф къыфэхъугъ. Ар ХристоскӀэ заджэхэрэ Исус къызфэхъугъэ Мерэм илӀэу щытыгъ. 17 Арэущтэу Ибрахьимэрэ пачъыхьэ Даутэрэ азыфару лӀы уж пшӀыкӀуплӀ дэлъыгъ; пачъыхьэ Даутэрэ Израил цӀыфхэр Вавилоным защэхэ лъэхъанэмрэ азыфару лӀыуж пшӀыкӀупчӀ дэлъыгъ, Израил цӀыфхэр Вавилон защэхэ лъэхъанэмрэ Христос къызыхъугъэ лъэхъанэмрэ азыфагу лӀыуж пшӀыкӀуплӀи дэлъыгъ.
Исус къызэрэхъугъэр
18 Исус Христос икъэхъукӀэ зэрэхъутъэр мары: Юсыф Исус янэу Мерэм къыщэнэу ыгъэнэфэгъагъ, ау зэрэщэнхэм ыпэкӀэ, Тхьэм Ыпсэ ЛъапӀэ илъэкӀыныгъэкӀэ Мерэм сабый къызэрэфэхъущтыр нафэу къэхъугъ. 19 Юсыфэу Мерэм илӀ шъыпкъагъэ зиӀэ лӀэу щытыгъэти, цӀыфмэ апашъхьэ Мерэм ынапэ щытырихынэу фэмыеу, шъэфэу ытӀупщыжьынэу тыриубытагъ. 20 Ау Юсыф а Ӏофым егупшысэзэ, Зиусхьаным имэлэӀичпкӀыхьапӀэкӀэ къыфэкӀуагъ. Даутэ ыкъо Юсыф! къыӀуагъ ащ. Мерэмыр шъузэу къэпщэнэу умыщын, сыда пӀомэ ащ сабыеу къыфэхъущтыр къызхэкӀырэр Тхьэм Ыпсэ ЛъапӀэ ары. 21 Мерэм къо къыфэхъущт, о ащ цӀэу фэуусыщтри Исус, сыда пӀомэ ащ ылъэпкъ ипсэкӀодхэм ялъэкӀыныгъэ къыӀэкӀихыжьынышъ, мыкӀодхэу къыгъэнэжьыщтых. 22 А зэпстэури зыфэхъугъэр Зиусхьаным мы гущыӀэхэу пегъымбарым ыгу къырилъхьэхи къыригъэӀуагъэхэр къэшъыпкъэжьынхэр ары: 23 Мары, пшъашъэр лъэрмыхьэ хъунышъ, къо къыфэхъущт. Ащ цӀэу фаусыщтыр Еммануил. Ащ къикӀырэр: Тхьэр тигъусэ. 24 Юсыф къызэущыжьым, Зиусхьаным имэлэӀич къызэрэриӀуагъэм тетэу зекӀуагъэ, Мерэми шъузэу ыщагъ. 25 Ау ар ишъуз фэхъуным ыпэкӀэ Мерэм апэрэ къор къыфэхъугъ. Юсыф ащ цӀэу фиусыгъэри Исус.
Тхьэгурымагъохэр тыгъэ къыкъокӀыпӀэмкӀэ къызэрикӀыгъэхэр
1 Ирод пачъыхьэ имафэхэм Иудей хэкум щыщ Вифлеем къалэм Исус къызэхъу ужым, тхьэгурымагъохэр тыгъэ къыкъокӀыпӀэмкӀэ къикӀыхи, къалэу Ерусалим къэкӀуагъэх. 2 Тыдэ щыӀа джуртхэм япачъыхьэу къэхъугъэр? къаӀуагъ. Сыда пӀомэ ащ ижъуагъо тыгъэ къыкъокӀыпӀэмкӀэ тэ щытлъэгъугъэти, ар дгъэлъэпӀэнэу тыкъэкӀуагъ. 3 Ирод пачъыхьэм ар зызэхехым къэгумэкӀыгъ, Ерусалим зэкӀэ дэс цӀыфхэри ащ дэгумэкӀыгъэх. 4 Арыти, Ирод цӀыфхэм зэкӀэ ядин пэщэшхохэри, я Тэурат егъэджэкӀо пащэ пстэури ыугъоихи яупчӀыгъ: Тыда Христос къызщыхъун фаер? 5 Иудей хэкум щыщ Вифлеем ары, къыраГуагъ ахэмэ, сыда пӀомэ пегъымбарым мырэущтэу къытхыгъ: 6 «O, Иудей хэкум щыщ Вифлеем. Иудэ лъэпкъым ипащэхэм анахьи зыкӀи уанахь цӀыкӀоп; сыда пӀомэ зы пащэ о къыпхэкӀыщт. А пащэм мэлахъом мэлхэр зэрищэхэрэм фэдэу, слъэпкъ Израил ыщэщт». 7 Арэущтэу къызыраӀом, Ирод тхьэгурымагъохэм шъэфэу къяджи, жъуагъор къызыкъокӀыгъэ охътэ дэдэр зэригъэшӀагъэ. 8 Ахэр Вифлеем ыгъакӀохэзэ ариӀуагъ: ШъукӀохи, сабыим икъэбар дэгъоу къызэжъугъашӀ. Ар къызыжъугъоткӀэ, макъэ къысэжъугъэӀу, сэри ар згъэлъэпӀэнэу сыкӀощт. 9 Тхьэгурымагъохэр пачъыхьэм къариӀуагъэм едэӀухи ежьагъэх. Тыгъэ къокӀыпӀэмкӀэ щалъэгъугъэ жъуагъори ахэмэ апэ итэу кӀозэ, сабыир зыдэщыӀэ чӀыпӀэм зынэсым, къышъхьэщыуцуагъ. 10 Жъуагъор залъэгъум, лъэш дэдэу гушӀуагъэх. 11 Унэм зехьэхэм, сабыири ащ янэу Мерэми исхэу алъэгъугъэх. Залъэгъухэм, сабыим ыпашъхьэ лъэгонджэмышъхьэкӀэ зыщырадзыхи, агъэлъэпӀагъ. Япхъуантэхэр зэтырахыхи, тынхэу дышъи, ладэни, смирни сабыим ратыгъэх. 12 Ирод дэжь амыгъэзэжьынэу пкӀыхьапӀэкӀэ Тхьэм къагуригъэӀуагъэти, нэмыкӀрэ гъогукӀэ яхэгъэгу кӀожьыгъэх.
Юсыфрэ Мерэмрэ сабыир ягъусэу Мысырым зэрэкӀатхъужьыгъэр
13 Тхьэгурымагъохэр зекӀыжьхэм, Зиусхьаным имэлэӀич пкӀыхьапӀэкӀэ Юсыф къыфэкӀуагъ. Къэтэджи, къыӀуагъ, сабыимрэ ащ янэрэ зыдащэхи, Мысырым кӀэтхъужь. Макъи къыосэгъэӀуфэ, ащ щыӀ, сыда пӀомэ Ирод сабыир ыукӀынэу лъыхъущт. 14 Арэущтэу Юсыф тэджи, сабыимрэ ащ янэрэ чэщым зыдищэхи, Мысырым кӀуагъэ. 15 Ирод олӀэфэкӀэ ар ащ дэжьым щыпсэугъ. Арэущтэу зыфэхъугъэр Зиусхьаным мы гущыӀэхэу пегъымбарым къыригъэӀуагъэхэр къэшъыпкъэжьынхэр ары: «Мысырым къикӀыжьынэу Скъо сыкъеджагъ». Ирод идзэлӀхэм сабыйхэр зэраригъэукӀыгъэхэр 16 Тхьэгурымагъохэм къызэрагъэпцӀагъэр Ирод зелъэгъум, лъэшэу къэгубжыгъ. Тхьэгурымагъохэм къырагъэшӀэгъэ уахътэм тетэу, Вифлееми ащ зэкӀэ иӀэгъо благъоми щыщ къэхъугъэкӀэ сабыйхэр илъэситӀу зыныбжьым нэс аукӀынхэу идзэлӀхэр ыгъэкӀуагъэх. 17 Джащыгъум мы гущыӀэхэу пегъымбар Иеремие къыӀуагъэхэр къэшъыпкъэжьыгъэх: 18 «Куохьао макъэ Рамэ къуаджэм къыщыӀугъ, гъымэкъэшхорэ тхьаусыхэ мэкъэшхорэ ахэтэу. Рахил зигъэсамбырыжьынэу фэмыеу, исабыйхэр егъэежьых, сыда пӀомэ ахэр щыӀэжьыхэпышъ ары».
Юсыфрэ Мерэмрэ сабыир ягъусэу Мысырым къызэрикӀыжьыгъэхэр
19 Ирод зэлӀэ ужым, Зиусхьаным имэлэӀич пкӀыхьапӀэкӀэ Юсыф Мысырым къыщыфакӀуи, 20 къыӀуагъ: Къэтэджи, сабыимрэ ащ янэрэ зыдащэхи, Израил хэгъэгум кӀожь, сыда пӀомэ сабыим ыпсэ зыгъэгъунхэу ыуж итыгъэхэр лӀагъэхэшъ ары. 21 Арэущтэу Юсыф тэджи, сабыимрэ ащ янэрэ зыдищэхи, Израил хэгъэгум кӀожьыгъэ. 22 Ау Ирод ичӀыпӀэкӀэ ащ ыкъо Архелай Иудей хэкум ипачъыхьэ хъугъэу Юсыф къэбар зызэхехым, ащ кӀонкӀэ щынагъэ. ПкӀыхьапӀэкӀэ Тхьэм къызыгурегъэӀо ужым, Галилей хэкум кӀуи, 23 НазареткӀэ заджэхэрэ къалэм дэтӀысхьагъ. Арэущтэу зыфэхъугъэр мы гущыӀэхэу пегъымбархэм Исус ехьылӀагъэу къаӀуагъэхэр къэшъыпкъэжьынхэр ары: «Назарет щыщкӀэ еджэщтых».
УмэхъэкӀо Иуан Тхьэм игущыӀэхэр зэригъэӀущтыгъэхэр
1 А мафэхэм умэхъэкӀо Иуан къэлъагъуи, Иудей хэкум ишъоф нэкӀ цӀыфхэм Тхьэм игущыӀэхэр щаригъэӀухэзэ, 2 мырэущтэу къыӀощтыгъ: ШъуипсэкӀодхэм шъуафыкӀэгъожь, сыда пӀомэ Тхьэу уашъом щыӀэм и Тетыгъошхо къэблэгъагъэшъ ары. 3 Иуан ары пегъымбар Исайас мырэущтэу зыфиӀуагъэр: «Шъоф нэкӀым зы джэ макъэ горэ къыщэӀу: Зиусхьаным игъогу фэжъугъэпси, игъогу лъагъохэр зэшъхьэзашъоу фэшъушӀых». 4 Иуан мэхъшэцым хэшӀыкӀыгъэу щыгъын щыгъыгъ, ыбги шъо бгырыпх илъыгъ. Гъомлапхъэу иӀагъэр мацӀэхэмрэ шъоф шъоумрэ арыгъэ. 5 Джащыгъум Ерусалим дэс цӀыфхэри, Иудей хэкум зэкӀэ ис цӀыфхэри, Иордан псыхъом иӀэгъоблагъом зэкӀэ ис цӀыфхэри Иуан ыдэжь кӀощтыгъэх. 6 ПсэкӀодэу ашӀагъэхэр Тхьэм ыпашъхьэ ралъхьахэти, Иордан псыхъом Иуан зыщырагъэумэхъыщтыгъ. 7 Зырагъэумэхъынэу фарисейхэмрэ саддукейхэмрэ ащыщхэу бэу ыдэжь къакӀохэу Иуан зелъэгъум, ахэмэ ариӀуагъ: Шъо, блэщылъфхэр! Тхьэм игубжэу къэкӀощтым шъуӀэкӀэкӀынэу хэт шъушъхьэ къизылъхьагъэр? 8 ШъуипсэкӀодхэм шъуафыкӀэгъожьыным фэшъошэ ӀофышӀухэр жъугъэцакӀэх. 9 «Ибрахьимэ тэ тятэ ары», шъугукӀэ шъуӀонэу шъуфитэу шъумыгугъ, сыда пӀомэ сэ шъосэӀо, Тхьэм мы мыжъохэм Ибрахьимэ пае бынхэр къахигъэхъукӀын ылъэкӀыщт. 10 Ощыр чъыг лъапсэхэм атыраубытэгъах. Арэущтэу сыдрэ чъыгэу шӀугъэ къызпымыкӀэрэр раупкӀынышъ, машӀом падзэщт. 11 ШъуипсэкӀодхэм шъузэрафыкӀэгъожьыгъэр къэжъугъэлъэгъонэу сэ псымкӀэ шъусэумэхъы, ау саужкӀэ къэкӀощтым сэщ нахьи нахь лъэкӀыныгъэшхо иӀ. Ащ ицуакъэхэр фэсхьынхэуи сифэшъуащэп. Ащ Тхьэм Ыпсэ ЛъапӀэрэ машӀомрэкӀэ шъо шъуиумэхъыщт. 12 Ащ ихьанцэ ыӀэ кӀэлъ, ихьамэщи ыукъэбзыжьынышъ, икоци конхэм аритэкъожьыщт, ау уарзэр мыкӀосэжьын машӀокӀэ ыгъэстыщт.
Иуан Исус зэриумэхъыгъэр
13 Джащыгъум Исус Галилей хэкум къикӀи, Иордан псыхъом къэкӀуагъ Иуан зыригъэумэхъынэу. 14 Ау Иуан ымыдэу, Исус мырэущтэу риӀуагъ: О сэ сыуумэхъын фае. Сэ о усыумэхъынэу укъысфэкӀуа? 15 Джы арэущтэу орэхъу, ыӀуи, Исус Иуан пэгъокӀ ритыжьыгъ, сыда пӀомэ джаущтэу ары шъыпкъэгъэ пстэури зэрэдгъэцэкӀэн фаер. Исус аущтэу къызыреӀом, Иуан къезэгъи ыумэхъыгъ. 16 Исус Иуан зызэрэригъэумэхъэу, псым къыхэкӀыжьыгъ. Псым къызыхэкӀыжьым, уашъор зэӀукӀи, Тхьэм ыпсэ ЛъапӀэ тхьаркъом фэдэу ежьым къызэрэфехырэр ылъэгъугъ. 17 ЕтӀанэ уашъом зы макъэ къиӀукӀыгъ: Мары сэ шӀу слъэгъурэ Скъо кӀасэу сыгу зэӀурэр.
Шэйтаныр Исус псэкӀод ригъэшӀэнэу ыуж зэритыгъэр
1 Джащыгъум Тхьэм Ыпсэ ЛъапӀэ Исус шъоф нэкӀым ыщагъ. Тхьэм Ыпсэ ЛъапӀэ Исус ащ дэжьым зыфищагъэр шэйтаныр Исус псэкӀод ригъэшӀэнэу ыуж итыныр ары. 2 Исус мэфэ тӀокӀитӀурэ чэщ тӀокӀитӀурэкӀэ зенэкӀы ужым, къэмэлэкӀагъ. 3 Шэйтанэу цӀыфхэм псэкӀод языгъэшӀэнэу ыуж итыр Исус къыбгъодахьи къыриӀуагъ: О Тхьэм ури Къомэ, мы мыжъохэр хьалыгъу хъунхэу унашъо шӀы. 4 Тхьэм игущыӀэ тхыгъэхэм арыт, къыӀожьыгъ Исус, «Хьалыгъу закъор арэп цӀыфыр зэрэпсэущтыр, сыдрэ гущыӀэу Тхьэм ыжэ къыдэкӀырэр ары нахь». 5 Ащ нэужым шэйтаным Исус къэлэ лъапӀэм зыдищи, Тхьэм иунэшхо нахь лъэгапӀэу иӀэм тыригъэуцуи, 6 къыриӀуагъ: О Тхьэм ури Къомэ, мыщ дэжьым зыщедзых; сыда пӀомэ Тхьэм игущыӀэ тхыгъэхэм арыт: «Тхьэм имэлэӀичхэм о къыохьылӀагъэу унашъо къафишӀыщт, о плъакъокӀи мыжъом уемыутэкӀыным пае, аӀэхэмкӀэ уаӀэтыщт». 7 Мырэущтэуи Тхьэм игущыӀэ тхыгъэхэм арыт, риӀожьыгъ Исус, «Зиусхьанэу уи Тхьэ умыушэты». 8 ЕтӀани шэйтаным Исус Ӏошъхьэ лъэгэ дэдэ горэм дищаий, дунаем тет пачъыхьагъо пстэури, ахэмэ щытхъушхоу яӀэри къыригъэлъэгъуи, 9 къыриӀуагъ: ЧӀыгум зебдзыхызэ сэ сыбгъэлъапӀэмэ, ахэр зэкӀэ къыостыщтых. 10 Сауж икӀ, шэйтан! риӀожьыгъ Исус. Сыда пӀомэ Тхьэм игущыӀэ тхыгъэхэм арыт: «Зиусхьанэу уи Тхьэ бгъэлъапӀэзэ, ежьым изакъоу уфэлэжьэн фае». 11 Исус ар зыреӀом, шэйтаныр ащ ыуж икӀыжьыгъ, мэлэӀичхэри къыфехыхи, Исус фэӀофтабгэхэу аублагъ.
Исус иӀоф Галилей хэкум зэрэщиублагъэр
12 Иуан хьапсым чӀадзагъэу Исус къэбар зызэхехым, Галилей хэкум кӀожьыгъэ. 13 Назарет къалэм дэкӀыжьи, хэкухэу Завулонрэ Неффалимрэ зыцӀэхэм ащыщэу псыӀушъом Ӏут Капернаум къалэм кӀуи, ащ дэтӀысхьагъ. 14 Исус арэущтэу зыфишӀагъэр пегъымбар Исайас мы гущыӀэхэу къыӀуагъэхэр къэшъыпкъэжьынхэр ары: 15 «Завулон хэкур, Неффалим хэкур, псы Ӏушъом Ӏут хэкур, Иордан псыхъом иадрабгъу щыӀэ хэкур, хымэ лъэпкъхэм яхэкоу Галилей!» (Ахэмэ атегущыӀэу пегъымбарым мырэущтэу къыӀуагъ:) 16 «ЦӀыфхэу шӀункӀыгъэм хэтхэм нэфынэшхо алъэгъугъ; лӀэныгъэм ищынагъо хэку шӀункӀым ис цӀыфхэми нэфынэ къатридзагъ». 17 А лъэхъанэм къыщегъэжьагъэу Исус Тхьэм игущыӀэхэр цӀыфхэм аригъэӀухэу къыублагъ: ШъуипсэкӀодхэм шъуафыкӀэгъожь, сыда пӀомэ Тхьэу уашъом щыӀэм и Тетыгъошхо къэблэгъагъэшъ ары.
Исус пцэжъыяшэ нэбгыриплӀ игъогу рыкӀонхэу къызэряджагъэр
18 Исус Галилей псыхъураем иӀушъо рекӀокӀызэ, зэкъошитӀу ылъэгъугъ. Ахэр Симонэу ПетрэкӀэ заджэхэрэмрэ ащ ыш Индрысрэ арыгъэ. Ахэмэ хъытыур псыхъураем хадзэщтыгъэ, сыда пӀомэ пцэжъыяшэхэу щытыгъэхэти ары. 19 Исус ахэмэ ариӀуагъ: Сауж шъукъырыкӀу. Пцэжъые къэшъуубытыным пае, ыуж шъузэритыгъэм фэдэу, цӀыфхэр сэ сигъогу къытежъугъэхьанхэм пае ауж шъузэрихьащтыр шъозгъэшӀэщт. 20 Ахэмэ а гущыӀэхэр зэрэзэхахэу, яхъытыухэр къабгынэхи, Исус ыуж ихьагъэх. 21 Исус нахь чыжьэу кӀозэ, ахэмэ анэмыкӀэу зэкъошитӀоу Зеведей ыкъохэу Якъубэрэ Иуанрэ ылъэгъугъэх. Ахэм ятэ Зеведей ягъусэу, къуашъом исхэу яхъытыухэр агъэхьазырыщтыгъэх. Исус ахэми яджагъ. 22 Ахэмэ зэряджэу, къуашъори яти къабгынэхи, Исус ыуж ихьагъэх.
Исус Галилей хэкум цӀыф купышхом Тхьэм игущыӀэхэр зэрэщаригъашӀэщтыгъэхэр ыкӀи зэрэщигъэхъужьыщтыгъэхэр
23 Исус зэкӀэ Галилей хэкур къыкӀухьэзэ, синэгогухэм цӀыфхэм Тхьэм игущыӀэхэр щаригъашӀэщтыгъэх, Тхьэм и Тетыгъошхо ехьылӀэгъэ къэбарышӀури аригъэӀущтыгъ, цӀыфхэм ащыщэуи хэтрэ сымаджи гъойщаий ыгъэхъужьыщтыгъ. 24 Арышъ, Исус икъэбар Сирие хэкум тыдэкӀи щыӀугъ. Сымэджэ зэфэшъхьафи уз зэфэшъхьафи зиӀэ пстэури Исус къыфащэщтыгъэх; джынапцӀэ зыхэсхэри, къытефэхэрэри, зыӀэпкълъэпкъ узым зэкӀиубытагъэхэри ыгъэхъужьыщтыгъэх. 25 Галилей хэкуми, КъэлипшӀ зыцӀэ хэкуми, Ерусалими, Иудей хэкуми, Иордан псыхъом иадрабгъуи щыщхэр купышхохэу Исус ыуж ихьащтыгъэх.
Исус Ӏуашъхьэм тетэу Тхьэм игущыӀэхэр зэригъэӀугъэхэр
1 Исус цӀыф купышхохэр зелъэгъухэм, Ӏуашъхьэм дэкӀуаий, тӀысыгъэ. ЗэтӀысым, игъогу рыкӀохэрэр ежьым къыбгъодахьэхи, 2 Исус ахэмэ Тхьэм игущыӀэхэр аригъашӀэхэу ыублагъ:
Сыхьатмафэ ежьагъэхэр
3 Гурэ псэрэкӀэ тхьамыкӀэхэу щытхэр сыхьатмафэ ежьагъэх, сыда пӀомэ ахэр Тхьэу уашъом щыӀэм и Тетыгъошхо ыӀэчӀэгъ чӀэтых. 4 Гукъао зиӀэхэр сыхьатмафэ ежьагъэх, сыда пӀомэ ахэмэ ягукъао Тхьэм ашъхьэщихыщт. 5 Зыгу пэгагъэ имылъхэр сыхьатмафэ ежьагъэх, сыда пӀомэ ахэмэ ӀэхьышӀоу къалъысыщтыр чӀылъэр ары. 6 Шъыпкъагъэм фэзэщхэу, фалӀэхэрэр сыхьатмафэ ежьагъэх, сыда пӀомэ ахэмэ афырикъун шъыпкъагъэ агъотыжьыщт. 7 ГукӀэгъу зыгу илъхэр сыхьатмафэ ежьагъэх, сыда пӀомэ ахэмэ гукӀэгъу агъотыжьыщт. 8 Зыгу къабзэхэр сыхьатмафэ ежьагъэх, сыда пӀомэ ахэмэ Тхьэр алъэгъущт. 9 ЗэшӀуныгъэ цӀыфмэ ахэзылъхьэхэрэр сыхьатмафэ ежьагъэх, сыда пӀомэ ахэмэ Тхьэм ибынхэкӀэ яджэщтых. 10 Шъыпкъагъэм пае цӀыфхэу къин зэрагъэщэчхэрэр сыхьатмафэ ежьагъэх, сыда пӀомэ ахэр Тхьэу уашъом щыӀэм и Тетыгъошхо ыӀэчӀэгъ чӀэтых. 11 Сэ сигъогу шъузэрэрыкӀорэм пае, цӀыфхэр къышъохъонхэмэ, къин шъуагъэщэчмэ, къышъуфэмышъуашэу Ӏэегъэ пстэури къышъуаӀуалӀэмэ, сыхьатмафэ шъуежьагъ. 12 Шъутхъэжь, инэуи шъугушӀу, сыда пӀомэ Тхьэм уашъом ӀэхьышӀоу къыщышъуфигъэшъошэщтыр инышъ ары. Арэущтэу шъо шъуапэкӀи пегъымбархэм къин арагъэщэчыщтыгъ.
Щыгъумрэ нэфынэмрэ
13 ЧӀылъэм ищыгъур шъоры. Ау щыгъум ищыугъэ хэкӀымэ, сыдэущтэу ащ ищыугъэ хэплъхьажьыщта? ЗыкӀи ишӀуагъэ къэкӀожьыщтэп. Ар ратэкъужьынышъ, цӀыфмэ аулъэгущт. 14 Дунаем инэфынэр шъоры. Ӏуашъхьэм тет къалэр гъэбылъыгъэу хъушъурэп. 15 Зыми остыгъэ хигъанэу, ар щэлъэ чӀэгъым чӀигъэуцорэп, итетыпӀэ лъагэ тырегъэуцо нахь. ЕтӀанэ унэм ис пстэуми ащ инэфынэ анэсы. 16 Арышъ, цӀыфмэ апашъхьэ шъуинэфынэ щэрэнэф, шъуишӀушӀагъэхэр алъэгъунхэшъ, Шъуятэ лъапӀэу уашъом щыӀэм щытхъу фашӀыным пае.
Тэурат хабзэм ехьылӀагъ
17 Муса и Тэурат хабзэ итхэмрэ пегъымбархэм атхыгъэ тхылъхэм арытхэмрэ згъэкӀодынхэу сыкъэкӀуагъэу шъумыгугъ. Ахэр згъэкӀодынхэу арэп сыкъызфэкӀуагъэр, изгъэкъунхэу ары нахь. 18 Шъыпкъэр шъосэӀо, уашъомрэ чӀылъэмрэ щэӀэхэфэ, Мусэ и Тэурат хабзэ итхэу хьарыфхэм анахь цӀыкӀуи зы уцупӀи хэкӀодыкӀыщтэп, ащ ит пстэури къэшъыпкъэжьыфэ. 19 ЦӀыфэу мы унашъохэм анахь цӀыкӀухэм ащыщэу зыгорэм емыдэӀоу, адрэ цӀыфхэри а унашъом емыдэӀунхэу языгъашӀэрэм Тхьэу уашъом щыӀэм и Тетыгъошхо ыӀэчӀэгъ чӀэт цӀыфхэм анахь цӀыкӀу дэдэкӀэ еджэщтых. Ау мы унашъохэр зыгъэцакӀэу, цӀыфмэ ахэр языгъашӀэрэр Тхьэу уашъом щыӀэм и Тетыгъошхо ыӀэчӀэгъ чӀэт цӀыф инхэм ащыщкӀэ еджэщтых. 20 Шъыпкъэр шъосэӀо, шъуишъыпкъагъэ Тэурат егъэджэкӀо пащэхэмрэ фарисейхэмрэ яшъыпкъагъэ нахьи нахь ин мыхъумэ, Тхьэу уашъом щыӀэм и Тетыгъошхо ыӀэчӀэгъ шъучӀэхьащтэп.
Губжыным ехьылӀагъ
21 Пэсэрэ цӀыфхэм зэрараӀуагъэр шъо зэхэшъухыгъ: «ЦӀыф умыукӀ. ЦӀыф зыукӀырэр хьыкумышӀэм ыпашъхьэ ращэщт». 22 Ау сэ шъосэӀо, хэтми ежь ышы фэгубжырэр хьыкумышӀэм ыпашъхьэ ращэщт. Ежь ышы «О ушъхьэнэкӀ!» езыӀорэр Тхьэмэтэ Хэсэшхом ыпашъхьэ ращэщт. Ау ышы «О удел!» езыӀорэр джэхьнэмы машӀом кӀоныр фэшъуашэу мысэ хъущт. 23 Арышъ, Тхьэм ептынэу тыныр къурмэн шӀыпӀэм зыпхьыкӀэ, о пшы гукъанэ горэ къыпфыриӀэу угу къэкӀыжьмэ, 24 уитын къурмэн шӀыпӀэм ыпашъхьэ къыщыгъани, ыпэрапшӀэу кӀуи, пшы ешӀужь. ЕтӀанэ къакӀуи, уитын тыжь. 25 О уидэогъу псынкӀэу ешӀужь, уригъусэу гъогум утетыфэ. Армырмэ хьыкумышӀэм ыпашъхьэ урищэщт. ХьыкумышӀэми иӀофшӀакӀо уӀэкӀилъхьащт, хьапсыми учӀадзэщт. 26 Шъыпкъэр осэӀо, аужырэ чапычыр отыжьыфэ, хьапсым укъычӀэкӀыжьыщтэп.
Зинэ шӀэным ехьылӀагъ
27 ЗэраӀуагъэр зэхэшъухыгъ: «Зинэ умышӀэ». 28 Ау сэ шъосэӀо, хэти зы бзылъфыгъэ горэм енэцӀэу еплъымэ, ыгукӀэ зинэ ышӀэгъах. 29 Арышъ, о унэ джабгъу псэкӀод пшӀэнэу удихьыхмэ, къитхъыжьи чӀэдз. О ппкъы зэкӀэ джэхьнэмым хадзэным нахьи, о пӀэпкълъэпкъхэм ащыщэу зы пшӀокӀодыныр оркӀэ нахьышӀу. 30 О пӀэ джабгъуи псэкӀод пшӀэнэу удихьыхмэ, пыупкӀыжьи чӀэдз. О ппкъы зэкӀэ джэхьнэмым кӀоным нахьи, пӀэпкълъэпкъхэм ащыщэу зы пшӀокӀодыныр оркӀэ нахьышӀу.
Шъхьэгъусэ тӀупщыжьыным ехьылӀагъ
31 Пасэм мыри аӀуагъ: «Зишъуз зытӀупщыжьырэм къызэритӀупщыжьырэ тхылъ рерэт». 32 Ау сэ шъосэӀо, ишъуз зинэ ымышӀагъэу, хэтми зытӀупщыжьырэм шъузым зинэ ригъэшӀагъэу мэхъу, (етӀанэ шъузыр джыри дэкӀожьмэ). Ащ фэдэу хэтми лӀы горэм къытӀупщыжьыгъэ шъуз къэзыщэжьырэм зинэ ышӀагъэу мэхъу.
ТхьарыӀоным ехьылӀагъ
З3 Джыри пэсэрэ цӀыфхэм зэрараӀуагъэр шъо зэхэшъухыгъ: «ЗыкӀи пцӀыкӀэ тхьарыӀо умышӀы, ау Зиусхьаным фэпшӀыгъэ тхьарыӀохэр бгъэшъыпкъэжьынхэ фае». 34 Ау сэ шъосэӀо, шъо тхьарыӀо зыкӀи шъушӀы хъущтэп, уашъомкӀи тхьарыӀо шъумышӀы, сыда пӀомэ уашъор Тхьэм итӀысыпӀэ лъапӀэу щытышъ ары. 35 ЧӀылъэмкӀи тхьарыӀо шъумышӀы, сыда пӀомэ ар Тхьэм ылъакъохэр зытет лъэгукӀэтын лъапӀэу щытышъ ары. ЕрусалимкӀи тхьарыӀо шъумышӀы, сыда пӀомэ ар пачъыхьэшхом икъалэшъ ары. 36 О пшъхьэкӀи тхьарыӀо умышӀы, сыда пӀомэ, зы шъхьац налъэ нэмыӀэми, шӀуцӀи фыжьи пшӀын плъэкӀыщтэп. 37 Ау шъуигущыӀэ «Ары» шъуӀоу щытмэ, ар жъугъэцакӀэ, шъуигущыӀи «Хьау, арэп» шъуӀоу щытмэ, ари жъугъэцакӀэ. Ащ блэкӀырэр шэйтаным иӀоф щыщ.
ЦӀыф бзаджэм шъупэмыуцужь
38 Мыри зэраӀуагъэр зэхэшъухыгъ: «О унэ къеӀэрэм ынэ еӀэжь, о пцэ къеорэм ыцэ еожь», 39 ау сэ шъосэӀо, цӀыф бзаджэм шъупэмыуцужь. Ау хэти о унэкӀушъо джабгъу къеорэм адрэ нэкӀушъори фэгъаз. 40 Зыгорэ уиджанэ пӀихынэу къыодэонэу фаемэ, уищыгъын кӀыӀутелъи къыфэгъан. 41 Лъэубэкъу мин дэпкӀунэу уезгъэзырэм лъэубэкъу минитӀу дэкӀу. 42 О зыгорэкӀэ къыолъэӀурэм ет, чӀыфэ пӀызыхынэу фаеми уакӀыб фэмыгъаз. Шъуипыйхэр шӀу шъулъэгъух 43 ЗэраӀуагъэр зэхэшъухыгъ: «Уигъунэгъу шӀу лъэгъу, уипый уджэгъу». 44 Ау сэ шъосэӀо, шъуипыйхэр шӀу шъулъэгъух, цӀыфхэу къин шъозыгъэщычыхэрэм Тхьэм шӀукӀэ шъуафелъэӀу, 45 Шъуятэ лъапӀэу уашъом щыӀэм ибынхэу шъухъуным пае. Ащ итыгъэ цӀыф бзаджэхэми цӀыфышӀухэми къафыкъуегъэкӀы, шъыпкъагъэ зиӀэхэми зимыӀэхэми ощх къафырегъэщхы. 46 ШӀу шъузылъэгъухэрэм язакъоу шӀу шъулъэгъухэмэ, сыд фэдэ ӀэхьышӀуа шъузщыгугъырэр? Хьакъулахь ахъщэр хэзыххэрэм а дэдэр арыба ашӀэрэр? 47 ПӀъо шъушыхэм анэмыкӀ зыми ыӀапэ шъумыубытмэ, илыягъэу сыда шӀугъэу шъушӀэрэр? Хымэ лъэпкъхэми а дэдэр ашӀэба? 48 Арышъ, Шъуятэ лъапӀэу уашъом щыӀэм ишъыпкъагъэ щыкӀагъэ зи имыӀэу, ежьыр икъугъэу зэрэщытым фэдэу, шъори зишъыпкъагъэ щыкӀагъэ зи имыӀэу, цӀыф икъугъэхэу шъущытын фае.
Сэдакъэм ехьылӀагъ
1 Шъо шӀушӀагъэр зышъушӀэкӀэ, цӀыфхэм тагъэшӀэгъощт шъуӀоу, ахэмэ алъэгъоу зэрэшъумышӀэнхэм шъуфэсакъ. Армырмэ шъуЯтэ лъапӀэу уашъом щыӀэм ӀэхьышӀу къышъуфигъэшъошэщтэп. 2 Арышъ, сэдакъэ зыптыкӀэ, цӀыфхэм къэбар ямыгъашӀ, синэгогухэм ачӀэсхэу, урамхэми атетхэу нэпитӀу зиӀэ цӀыфхэм адрэ цӀыфхэм къэбар зэрарагъашӀэрэм фэдэу, ежьхэм зыщагъэтхъужьынхэм пае. Шъыпкъэр шъосэӀо, арэущтэу зышӀэхэрэм яӀахьэ агъотыгъах. 3 Ау о сэдакъэ зыптыкӀэ, о пӀэ джабгъу Ӏофэу ышӀырэр пӀэ сэмэгу ымышӀэу орэхъу, 4 сэдакъэу о птыгъэр шъэфэу къэнэным пае. Ащыгъум Уятэ лъапӀэу цӀыфхэм шъэфэу ашӀэрэр зылъэгъурэм уиӀэхьэшӀу къыуитыщт.
Тхьэм елъэӀугъэным ехьылӀагъ
5 Тхьэм шъуелъэӀу хъумэ, нэпитӀу зиӀэ цӀыфхэм зэрашӀырэм фэдэу шъумышӀы. ЦӀыфхэм зарагъэлъэгъуным пае, Тхьэм елъэӀухэзэ, синэгогухэми урам къуапэхэми къащыуцунхэр якӀас. Шъыпкъэр шъосэӀо, ахэмэ яӀахьэ агъотыгъах. 6 Ау о Тхьэм уелъэӀу зыхъукӀэ, уиунэ кӀоцӀы ихьажьи, пчъэр къыфэшӀи, Уятэ лъапӀэу цӀыфхэм амылъэгъурэм елъэӀу. Ащыгъум Уятэ лъапӀэу цӀыфхэм шъэфэу ашӀэрэр зылъэгъурэм уиӀэхьышӀу къыуитыщт. 7 Тхьэм шъузелъэӀукӀэ, бащэ шъумыӀо, хымэ лъэпкъхэм зэрашӀырэм фэдэу; сыда пӀомэ ахэмэ гущыӀабэ къаӀомэ, ятхьэлъэӀухэмэ Тхьэр къядэӀунэу мэгугъэх. 8 Арышъ, ахэмэ зэрашӀырэм фэдэу шъумышӀы; сыда пӀомэ шъо шъуелъэӀуным ыпэкӀэ шъуищыкӀагъэр шъуЯтэ лъапӀэм ешӀэшъ ары. 9 Мырэущтэу Тхьэм шъуелъэӀу: «О Тятэ лъапӀэу уашъом щыӀэр! ПцӀэ цӀыфхэм агъэлъапӀэу орэхъу. 10 Уи Тетыгъошхо къэрэкӀу. Узыфаер уашъом зэрэщыхъурэм фэдэу, чӀылъэми щэрэхъу. 11 Хьалыгъоу тищыкӀагъэр непэ къытэт. 12 Мыхъунэу тшӀагъэхэр къытфэгъэгъух, тэ мыхъун къытэзышӀагъэхэм зэрафэдгъэгъурэм фэдэу. 13 Шэйтаным псэкӀод тигъэшӀэнэу фит умышӀы, ащи тыщыухъум. МыкӀодыжьын тетыгъошхори, лъэкӀыныгъэшхори, щытхъушхори оуиех. Амин». 14 ЦӀыфмэ мыхъунэу ашӀагъэхэр зафэжъугъэгъухэкӀэ, Шъуятэ лъапӀэу уашъом щыӀэм шъори мыхъунэу шъушӀагъэхэр къышъуфигъэгъущтых, къыпигъэхъожьыгъ Исус. 15 Ау цӀыфмэ мыхъунэу ашӀагъэхэр шъо зафэшъумыгъэгъухэкӀэ, Шъуятэ лъапӀи шъо мыхъунэу шъушӀагъэхэр къышъуфигъэгъущтхэп.
НэкӀыным ехьылӀагъ
16 Ащ фэдэу шъунэкӀы зыхъукӀэ, нэпитӀу зиӀэ цӀыфхэм афэдэу зышъумыгъэнэшхъэй; сыда пӀомэ зэрэнэкӀхэрэр цӀыфмэ арагъэлъэгъуным пае, ахэмэ анахэ зэхагъахьэ. Шъыпкъэр шъосэӀо, ахэмэ яӀахьэ агъотыгъах. 17 ,18 Ду 0 унэкӀы зыхъукӀэ, цӀыфхэм ащ гу лъамытэу, Уятэ лъапӀэу цӀыфхэм амылъэгъурэм изакъоу зэрэунэкӀырэм гу лъитэным пае, дэгъэ лъапӀэ пшъхьэ щыф, унэгуи тхьакӀы. Ащыгъум Уятэ лъапӀэу цӀыфхэм шъэфэу ашӀэрэр зылъэгъурэм уиӀэхьышӀу къыуитыщт.
Уашъом мылъкушхо щышъуугъой
19 ЧӀылъэм мылъкушхо щышъумыугъой, сыда пӀомэ хъунэмрэ улъыинымрэ чӀылъэм щыӀэр щагъэкӀоды, тыгъуакӀохэми чӀылъэм щыӀэхэр атӀэкӀых ыкӀи атыгъух. 20 Ау уашъом мылъкушхо щышъуугъой. Хъунэми улъыиными ащ дэжьым щагъэкӀодырэп, тыгъуакӀохэми щатӀэкӀырэп ыкӀи щатыгъурэп. 21 Сыда пӀомэ о уимылъкушхо зыдэщыӀэм угуи щыӀэщт.
Пкъым иостыгъэ
22 Пкъым иостыгъэр нэр ары. Арышъ, о унэ псаумэ, о ппкъи зэкӀэ нэфынэщт. 23 Ау о унэ дэимэ, о ппкъи зэкӀэ шӀункӀыщт. Арышъ, о пхэлъ нэфынэр шӀункӀымэ, а шӀункӀыгъэр сыдэу шӀункӀыгъэшху!
Тхьэмрэ ахъщэмрэ
24 Зы цӀыфыр тхьэмэтитӀум афэлэжьэн ылъэкӀыщтэп, е зыр ыуджэгъунышъ, адрэр шӀу ылъэгъущт, е зым шъыпкъэу фыщытынышъ, адрэр зэрипэсыщтэп. Шъо Тхьэми ахъщэми шъуафэлэжьэн шъулъэкӀыщтэп.
ГумэкӀыным ехьылӀагъ
25 Арышъ, шъосэӀо, «Сыда тнгхыщтыр, сыда тешъощтыр?» шъуӀоу, шъуищыӀэныгъэ пае шъумыгумэкӀ. «Сыда тщыгъыщтыр?» шъуӀоу, шъупкъы паий шъумыгумэкӀ. Гъомылэм нахьи щыӀэныгъэр нахь лъапӀэба, щыгъыным нахьи пкъыр нахь лъапӀэба? 26 Ошъогум щыбыбырэ бзыухэм шъуяплъ. Ахэмэ чылапхъи апхъырэп, лэжьыгъи къахыжьырэп, конхэм аратэкъожьырэп, ау щытми Шъуятэ лъапӀэу уашъом щыӀэм ахэр егъашхэх. Шъо ахэмэ анахьи бэкӀэ шъуанахь лъапӀэба? 27 ГумэкӀынымкӀэ хэта шъо шъуащыщэу зищыӀэныгъэ зы сыхьат закъокӀэ зезыгъэукӀыхьан зылъэкӀыщтыр? 28 Щыгъыным пае сыда шъузкӀэгумэкӀырэр? Губгъо къэгъагъэхэм якъэкӀыкӀэ шъуеплъ. Ахэр лажьэхэрэп, ци аджырэп, 29 ау сэ шъосэӀо, ежь пачъыхьэ Сэлмэн сыд фэдизэу дахэу кӀэракӀэщтыгъэми, ахэмэ ащыщэу зыгорэм фэдэу фэпагъэу щытыгъэп. 30 А уцэу губгъом непэ итэу, неущ хьакум радзэжьыщтыр Тхьэм арэущтэу зигъэкӀэракӀэкӀэ, ащ нахьи шъо бэкӀэ нахь шъуигъэкӀэрэкӀэнба, шъо шӀршъхъуныгъэ зимакӀэхэр? 31 Арышъ, «Сыда тшхыщтыр?» е «Сыда тешъощтыр?» е «Сыда тщыгъыщтыр?» шъуӀоу шъумыгумэкӀ. 32 Сыда пӀомэ ащ фэдэ Ӏоф пстэури ары дунаем тет лъэпкъхэр зылъыхъухэрэр. А зэпстэури шъо зэрэшъуищыкӀагъэр Шъуятэ лъапӀэу уашъом щыӀэм ешӀэ. 33 Ау ыпэрапшӀэу Тхьэм и Тетыгъошхо иӀофхэмрэ Тхьэм ишъыпкъагъэрэ ауж шъуит, етӀанэ а Ӏоф пстэури къышъуӀэкӀэхьащтых. 34 Арышъ, неущырэ мафэм шъуфэмыгумэкӀ. Неущырэ мафэр ежь ышъхьэ фэгумэкӀыжьыщт, сыда пӀомэ зыфэгумэкӀыжьын икъун Ӏоф сыдрэ мафи иӀэшъ ары.
Зыми хьыкум тешъумышӀыхь
1 Зыми хьыкум тешъумышӀыхь, Тхьэм хьыкум къышъутыримышӀыхьаным пае. 2 Сыда пӀомэ шъо цӀыфхэм хьыкум зэратешъушӀыхьарэм фэдэу, Тхьэм шъори хьыкум къышъутыришӀыхьащт, шъо шапхъэу зэрышъушырэм фэдэ шапхъэкӀи Тхьэм шъо къышъуфишыжьыщт. 3 0 унэ пкъэоу кӀэлъым гу лъымытэу, пхъэцалэу о пшы ынэ кӀэлъыр сыд пае плъэгъура? 4 Пкъэур о унэ кӀэлъ пэтызэ, сыдэущтэу пшы епӀон плъэкӀыра: «Пхъэцалэу о унэ кӀэлъыр къычӀэсэгъэх» пӀоу? 5 О нэпитӀу зиӀэр, ыпэрапшӀэу пкъэоу о унэ кӀэлъыр къыкӀэхыжьи, етӀанэ пхъэцалэу пшы ынэ кӀэлъыр къызэрэкӀэпхыжьыщтыр нафэу плъэгъущт. 6 Ӏофхэу шъо шъугухэмкӀэ лъапӀэу щытхэр хьэхэмэ яшъумыт. Налмэсналкъутэхэр къохэмэ апашъхьэ щишъумыпхъыхь. Армырмэ ахэмэ ахэр аулъэгунхэшъ, зыкъызэрагъэзэкӀынышъ, шъори шъузэхацунтхъэжьыщт.
Тхьэм шъуелъэӀу, шъулъыхъу, къэлапчъэм шъутеу
7 ШъуелъэӀуи, Тхьэм къышъуитыщт; шъулъыхъуи, къэжъугъотыщт; къэлапчъэми шъутеуи, Тхьэм къышъуфыӀуихыщт; 8 сыда пӀомэ хэтми Тхьэм елъэӀурэр зыкӀэлъэӀурэр иӀэ хъущт, лъыхъурэми зылъыхъурэр къыгъотыщт; къэлапчъэм теорэми Тхьэм къыфыӀуихыщт. 9 Е цӀыф къышъухэта, зыкъо хьалыгъу пае къелъэӀумэ, мыжъо езытыщтыр? 10 Е пцэжъые пае къелъэӀумэ, блэ езытыщтыр? 11 Арэущтэу шъо шъубзаджэ пэтми, шъуибынхэм шӀу яшъутын шъулъэкӀымэ, ащ нахьи нахьыбэу Шъуятэ лъапӀэу уашъом щыӀэм ежьым елъэӀухэрэм ӀофышӀухэр къаритыщтхэба? 12 Арэущтэу цӀыфхэр къыжъудэзекӀонхэу шъо шъузэрэфаем фэдэу, шъори ахэмэ сыдигъуи шъуадэзекӀу. Джары Тэурат хабзэм итхэми пегъымбархэм атхыгъэхэми къарыкӀырэр.
Къэлэпчъэ зэжъур
13 Къэлэпчъэ зэжъумкӀэ шъудахь; сыда пӀомэ кӀодыпӀэм икъэлапчъэ шъуамбгъо, ащ кӀорэ гъогури гъогушхошъ ары. А гъогум рыкӀохэрэри бэ мэхъух. 14 Ау щыӀэныгъэм икъэлапчъэ зэжъу, ащ кӀорэ гъогури бгъузэ. Ар къэзыгъотхэрэри макӀэх.
Чъыгыр зыфэдэр къыпыкӀэрэмкӀэ къэпшӀэщт
15 Пегъымбар нэпцӀхэм шъуафэсакъ. Ахэмэ мэлышъо щыгъын ащыгъэу, ау агухэмкӀэ тыгъужъ цунтхъакӀохэм афэдэхэу шъуадэжь къэкӀох. 16 Чъыгыр зыфэдэр къыпыкӀэрэмкӀэ зэрэпшӀэрэм фэдэу, а цӀыфхэм Ӏофхэу агъэцакӀэхэрэмкӀэ ахэр зыфэдэхэр къэшъушӀэщтых. Пырэжъые куандэм сэнашъхьэ къыпача, е шхъум ынджыр къыпача? 17 Ащ фэдэу сыдрэ чъыгышӀум шӀу къыпэкӀэ, ау чъыг дэим дэй къыпэкӀэ. 18 ЧъыгышӀум дэй къыпыкӀэн ылъэкӀыщтэп, чъыг дэими шӀу къыпыкӀэн ылъэкӀыщтэп. 19 Сыдрэ чъыгэу шӀу къызыпымыкӀэрэр раупкӀынышъ, машӀом падзэщт. 20 Арышъ, а цӀыфхэм Ӏофхэу агъэцакӀэхэрэмкӀэ ахэр зыфэдэхэр къэшъушӀэщтых.
ЕгъашӀэми шъо шъусшӀэщтыгъэп
21 Хэтрэ цӀыфэу «Зиусхьан! Зиусхьан!» сызыгъэлъапӀэу къысэзыӀорэр арэп Тхьэу уашъом щыӀэм и Тетыгъошхо ыӀэчӀэгъ чӀэхьащтыр, Сятэ лъапӀэу уашъом щыӀэр зыфаер зыгъэцакӀэрэр ары нахь. 22 А мафэм цӀыфыбэмэ мырэущтэу къысаӀощт: «Зиусхьан! Зиусхьан! Тхьэм ежь игущыӀэхэр тэ тыгухэм къарилъхьэхэу, ахэр о пцӀэкӀэ къатӀощтыгъэхэба, джынапцӀэхэри о пцӀэкӀэ цӀыфмэ ахэтфыщтыгъэхэба, Ӏодышхо гъэшӀэгъон Ӏаджыхэри о пцӀэкӀэ тшӀэщтыгъэхэба?» 23 Ау сэ ахэмэ занкӀэу ясӀощт: «ЕгъашӀэми шъо шъусшӀэщтыгъэп. СанэӀу шъуикӀ, шъо бзэджашӀэхэр».
Унэ зышӀырэ лӀы Ӏушымрэ унэ зышӀырэ лӀы акъылынчъэмрэ
24 Арышъ, хэти сэ сигущыӀэхэр зэхэзыхэу, ахэри зыгъэцакӀэрэр зыфэдэр лӀы Ӏушэу зиунэ мыжъо пытэм тезышӀыхьагъэр ары. 25 Ощхыр къещхыгъ, псыхэри къиугъэх, жьыбгъэхэри къепщэхэзэ, а унэм тезэрэхьагъэх, ау а унэр къызэхэуагъэп, сыда пӀомэ мыжъом тырашӀыхьагъэти ары. 26 Ау хэти сигущыӀэхэр зэхэзыхэу, ахэри зымыгъэцакӀэрэр зыфэдэр лӀы акъылынчъэу, зиунэ пшахъом тезышӀыхьагъэр ары. 27 Ощхыр къещхыгъ, псыхэри къиугъэх, жьыбгъэхэри къепщэхэзэ а унэм тезэрэхьагъэх. А унэр къызэхэуагъ, къызызэхаоми, Ӏае дэдэу къызэхэуагъ. 28 Исус мы гущыӀэхэр къызеӀохэм ыуж, цӀыф купышхохэм Ӏофхэр зэраригъашӀэщтыгъэ шӀыкӀэр агъэшӀэгъуагъ, 29 сыда пӀомэ Тэурат егъэджэкӀо пащэхэмрэ фарисейхэмрэ афэмыдэу, тетыгъошхо иӀэу, цӀыфхэм Ӏофхэр аригъашӀэщтыгъэхэти ары.
Исус шъоджэ уз Ӏае зиӀэ лӀы горэ зэригъэхъужьыгъэр
1 Исус Ӏуашъхьэм къызехыжьым, цӀыф купышхуабэхэр ыуж итхэу кӀощтыгъэх. 2 Ащ дэжьым шъоджэ уз Ӏае зиӀэ лӀы горэ Исус къыбгъодахьи, лъэгонджэмышъхьэкӀэ ыпашъхьэ къитӀысхьи къыӀуагъ: О тхьаматэ, уфаемэ сыбгъэхъужьын плъэкӀыщт. 3 Исус ыӀэ ыщэий, теӀаби къыӀуагъ: Ары, сыфай, псаоу къэхъужь! Ардэдэм шъоджэ узыр а лӀым хэкӀыжьи, къабзэу хъужьыгъэ. 4 Ащ дэжьым Исус а лӀым риӀуагъ: Фэсакъ, мыр зыми емыӀотэжь, ау дин пащэм ыдэжь кӀуи зегъэлъэгъу. ЕтӀанэ пегъымбар Мусэ иунашъо тетэу къурмэн шӀы. Ар узэрэхъужьыгъэмкӀэ цӀыфхэм апашъхьэ шыхьат щыхъущт.
Исус дзэ пащэм иунэӀут зэригъэхъужьыгъэр
5 ЕтӀанэ Исус Капернаум къалэм дэхьагъ. Зыдахьэм, дзэ пащэ горэ къыбгъодахьи къелъэӀугъ: 6 0 тхьаматэ, сиунэӀут ыӀэпкълъэпкъ узым зэкӀиубытагъэу, гугъушхо ыхьэу, унэм илъ. 7 Сэ сыкъэкӀонышъ, ар згъэхъужьыщт, Исус ащ риӀуагъ. 8 0 тхьаматэ, о сиунэ укъихьанэу сифэшъуашэп, къыӀожьыгъ дзэ пащэм, ау зы гущыӀэ закъо къаГуи, унашъо шӀи, сиунэӀут хъужьыщт. 9 Сыда пӀомэ сэри лӀы горэм иунашъо ыӀэчӀэгъ сычӀэт, сэ сиунашъоми ыӀэчӀэгъ дзэлӀхэр чӀэтых. Зыгорэм «КӀо» есӀомэ, кӀощт. Адрэми «КъакӀо» есӀомэ, къэкӀощт. СиунэӀути «Мыр шӀэ» есӀомэ, ышӀэщт. 10 Исус ар зызэхехым, ыгъэшӀагъуи, игъусэхэм ариӀуагъ: Шъыпкъэр шъосэӀо, мыщ фэдэ шӀошъхъуныгъэ зиӀэ цӀыф закъо Израил хэгъэгум изгъотагъэп. 11 Ау сэ шъосэӀо, тыгъэ къыкъокӀыпӀэмкӀи тыгъэ къохьапӀэмкӀи цӀыфыбэхэр къикӀынхэшъ, Ибрахьимэ, Исхьакъ, Якъубэ яъусэхэу Тхьэу уашъом щыӀэм и Тетыгъошхо иешхэ ешъошхо чӀыпӀэхэр щаубытыщтых. 12 Ау мы пачъыхьагъом ицӀыфхэр шӀункӀыгъэм икуупӀэ хадзэщтых. Ащ дэжьым куохьауныгъэрэ цэ зэрэгъэшхыныгъэрэ щыхъущтых. 13 ЕтӀанэ Исус дзэ пащэм риӀуагъ: КӀо, о пшӀошъ зэрэхъугъэм фэдэу къыбдэхъущт. А сыхьат дэдэм пащэм иунэӀут хъужьыгъэ.
Исус цӀыфыбэхэр зэригъэхъужьыгъэхэр
14 ЕтӀанэ Исус Петрэ иунэ ихьи, Петрэ ишӀугуащэ плъырстыркӀэ сымаджэу, пӀэм хэлъэу ылъэгъутъ. 15 Исус ащ ыӀапэ нэсыгъ, плъырстырыри хэкӀыжьыгъ. ШӀугуащэр къэтэджыжьи, Исус къыхьакӀэу ыублагъ. 16 Пчыхьашъхьэр къызэсым, джынапцӀэ зыхэс цӀыфыбэхэр Исус ыдэжь къащагъэх. Исус джынапцӀэхэр зы гущыӀэкӀэ цӀыфмэ ахифыхи, сымэджэ пстэури ыгъэхъужьыгъэх. 17 Арэущтэу зыфэхъугъэр пегъымбар Исайас мы гущыӀэхэу къыӀуагъэхэр къэшъыпкъэжьынхэр ары: «Тэ тигъойщаехэр ттырихи, тиузхэр ежьым зытырилъхьажьыгъэх».
Исус игъогу рыкӀоным къин щэчыныгъэу хэлъыр
18 ЦӀыф купышхуабэхэу къеуцокӀыгъэхэр Исус зелъэгъухэм, игъогу рыкӀохэрэм ариӀуагъ: НекӀо псыхъураем иадрабгъу тызэпырыжъугъэкӀ. 19 Джащыгъум зы Тэурат егъэджэкӀо пащэ горэ Исус къыбгъодахьи къыриӀуагъ: Дин гъэсакӀу, тыдэ укӀоми, уауж сыкъырыкӀощт. 20 Баджэхэм исынхэу бы яӀ, ошъогу бзыухэми набгъо яӀ, ау ЦӀыф Лъэпкъым Ыкъо ышъхьэ зэрихьылӀэжьын чӀы пӀэ иӀэп, риӀожьыгъ Иисус. 21 ЕтӀанэ игъогу рыкӀохэрэм ащыщэу нэмыкӀ зыгорэм Исус къыриӀуагъ: Тхьаматэ, ыпэрапшӀэу сыкӀонышъ, сятэ чӀэслъхьажьынэу фит сыкъэшӀ. 22 ЛӀагъэхэу щытхэм ежьхэм ялӀагъэхэм яхьадэхэр чӀарэлъхьажьых, ау о сауж къырыкӀу, риӀожьыгъ Исус.
Исус жьыбгъэ щынэгъошхор зэригъэуцугъэр
23 Исус зы къуашъо горэм зетӀысхьэм, игъогу рыкӀохэрэри ыуж итхэу къуашъом итӀысхьагъэх. 24 ОшӀэдэмышӀэу жьыбгъэ щынэгъошхо псыхъураем къыщыхъуи, псыорхэр къуашъом къиохэу хъугъэ. Ау Исус чъыещтыгъэ. 25 Джащыгъум ахэр Исус къыбгъодахьэхи, къагъэущи аӀуагъ: Зиусхьан, тымыкӀодэу тыкъэгъэнэжь, тэкӀоды. 26 Сыда шъузкӀэщынэрэр, шӀошъхъуныгъэр зимакӀэхэр? ариӀуагъ Исус ахэмэ. ЕтӀанэ къэтэджи, жьыбгъэшхоми псыми ягыий, кӀымсым дэдэу къэхъугъ. 27 Хэта мыр жьыбгъэшхори псыри зыгъэдаӀорэр? аӀуагъ цӀыфхэмэ агъэшӀагъоу.
Исус джынапцӀэ зыхэс нэбгыритӀу зэригъэхъужьыгъэхэр
28 ЕтӀанэ псыхъураем иадрабгъу ит хэкоу Гергесэ зыцӀэ къалэм епхыгъэм Исус зынэсым, джынапцӀэ зыхэс нэбгыритӀу къэунэхэм къачӀэкӀыхи, къыпэгъокӀыгъэх. А гъогум зы цӀыфи бламыгъэкӀэу, лӀы ябгэхэу щытыгъэх. 29 Тхьэм Ыкъу, сыда о уиӀофэу къытхэлъыр? Игъо къэмысэу къин тэбгъэщэчынэу укъэкӀуагъа? аӀозэ къэкууагъэх. 30 Ау ахэмэ апэчыжьэу къо Ӏэхъогъушхо щыхъущтыгъ. 31 Джащыгъум джынапцӀэхэр Исус къелъэӀугъэх: Мы лӀыхэм тызахэпфыкӀэ, мо къо Ӏэхъогъум тыгъакӀуи, къохэмэ апкъыхэм тахэгъахь. 32 ШъукӀу! ариӀуагъ Исус ахэмэ. Арэущтэу зеӀом, джынапцӀэхэр лӀыхэм ахэкӀыжьхи, къохэм апкъыхэм ахэхьагъэх. Къохэм апкъыхэм захахьэхэм, Ӏэхъогъур зэкӀэ Ӏошъхьэ нэпкъым къечъэхи, псыхъураем хэлъадэхи, псым хэлӀыхьагъэх. 33 Ау къуахъохэр хэхьажьхи, къалэм кӀохи, хъугъэшӀэгъэ пстэури, джынапцӀэ зыхэс лӀитӀум къащышӀыгъэри щаӀотагъ. 34 Къэбарыр заӀуатэм, къалэм дэс цӀыф пстэури Исус пэгъокӀынхэу дэкӀыгъэх. Исус залъэгъум, яхэку ыбгынэнэу къелъэӀугъэх.
Исус лӀы горэу зыӀэпкълъэпкъ узым зэкӀиубытагъэр зэригъэхъужьыгъэр
1 ЕтӀанэ Исус къуашъо горэм итӀысхьи, псыхъураем къызэпырыкӀыжьи, икъалэ къэкӀожьыгъ. 2 Джащыгъум лӀы лӀы горэу зыӀэпкълъэпкъ узым зэкӀиубытагъэр пӀуаблэм телъэу Исус ыдэжь къахьыгъ. Исус ахэмэ яшӀошъхъуныгъэ зелъэгъум, лӀэу зыӀэпкълъэпкъ узым зэкӀиубытагъэм риӀуагъ: Угу умыгъэкӀоды, сикӀал! УипсэкӀодхэр къыпфэгъугъэх. 3 Исус ар къызеӀом, Тэурат егъэджэкӀо пащэхэм ащыщэу заулэмэ агукӀэ аӀуагъ: Мы лӀым Тхьэр егъэпцӀы. 4 Исус ахэмэ агухэм арылъыр ешӀэти къыӀуагъ: Шъугухэм мыщ фэдэ гукъэкӀ бзаджэхэр сыда зыкӀарылъыр? 5 Тара нахь псынкӀагъор, «УипсэкӀодхэр къыпфэгъугъэх», пӀоныр ара, хьауми «Къэтэджи, къэкӀухь», пӀоныр ара? 6 Ау къэшъушӀэным пае, ЦӀыф Лъэпкъым Ыкъо псэкӀодхэр ыгъэгъунхэу дунаем тетыгъо зэрэщыриӀэр, джащыгъум Исус лӀэу зыӀэпкълъэпкъ узым зэкӀиубытагъэм риӀуагъ: Къэтэджи, уипӀуаблэ къашти, шъуадэжь кӀожь. 7 А лӀыр къэтэджи, ядэжь кӀожьыгъэ.8 ЦӀыф купышхохэм ар залъэгъум, агъэшӀэгъуагъ. Тхьэу цӀыфхэм ащ фэдэ тетыгъо къязытыгъэми щытхъу фашӀыгъ.
Исус игъогу рыкӀонэу Маттэ къызэреджагъэр
9 Исус нахь чыжьэу кӀозэ, хьакъулахь ахъщэр зыщыхахырэ унэм Ӏусэу, Маттэ зыцӀэ зы лӀы горэ ылъэгъугъ. Сауж къырыкӀу, риӀуагъ Исус. Маттэ къэтэджи, Исус ыуж ихьагъ. 10 ЕтӀанэ Исус Маттэ иунэ щышхэщтыгъ. Хьакъулахь ахъщэр хэзыххэрэмрэ псэкӀод зышӀэхэрэмрэ бэ хъухэу къэкӀуагъэхэу, Исусрэ игъогу рыкӀохэрэмрэ адашхэщтыгъэх. 11 Фарисейхэм ар залъэгъум, Исус игъогу рыкӀохэрэм араГуагъ: Шъо шъуидин гъэсакӀо хьакъулахь ахъщэр хэзыххэрэмрэ псэкӀод зышӀэхэрэмрэ сыда зыкӀадашхэрэр ыкӀи зыкӀадешъорэр? 12 Ау Исус ар зызэхехым, къыӀуагъ: Псаухэр арэп Ӏазэ зищыкӀагъэхэр, сымаджэхэр ары нахь. 13 ШъукӀуи, мы гущыӀэхэу Тхьэм къыӀуагъэхэм къарыкӀырэр къызэжъугъашӀ: «КъурмэншӀыныр арэп сызыфаер, гукӀэгъур ары нахь». Сыда пӀомэ шъыпкъагъэ зиӀэ цӀыфхэм сяджэнэу арэп сыкъызфэкӀуагъэр, псэкӀод зышӀэхэрэр япсэкӀодхэм афыкӀэгъожьынхэм пае, сяджэнэу ары нахь.
Джурт тхьаматэхэр нэкӀыным ехьылӀагъэу Исус къызэреупчӀыгъэхэр
14 Джащыгъум Иуан игъогу рыкӀохэрэр Исус ыдэжь къакӀохи къыраӀуагъ: Тэррэ фарисейхэмрэ бэрэ тэнэкӀы. О уигъогу рыкӀохэрэм сыда зыкӀамынэкӀырэр? 15 ~Шъаор ягъусэфэкӀэ, шъаом игъусэхэр шъыгъон алъэкӀына? ариӀожьыгъ Исус ахэмэ. Ау шъаор затырахыщт мафэхэр къэкӀощтых. А мафэхэр къызыкӀохэкӀэ, анэкӀыщт. 16 ШэкӀыкӀэм щыщ идэжьын щыгъыныжъым зыми тыридэрэп, сыда пӀомэ шэкӀыкӀэм щыщ идэжьыным щыгъыныжъыр зэӀитхъынышъ, гъуанэр нахь ин ышӀыщт. 17 Джащ фэдэу, сэнэпс шӀыгъакӀэр шъонтыжъхэм арагъахъорэп. Арэущтэу ашӀымэ, шъонтхэр къызэготхъынхэшъ, сэнэпсыр къичъыжьыщт, шъонтхэри кӀодыщтых. Сэнэпс шӀыгъакӀэр шъонтыкӀэх зэрарагъахъорэр. Ащыгъум тӀури мыкӀодхэу къэнэжьыщтых.
Исус тхьаматэ горэм ыпхъоу лӀагъэр къызэригъэтэджыжьыгъэр; Исус ищыгъын кӀапэ къынэсыгъэ бзылъфыгъэр зэригъэхъужьыгъэр
18 Исус цӀыфхэм а гущыӀэхэр ариӀохэзэ, тхьаматэ горэ къыбгъодахьи, лъэгонджэмышъхьэкӀэ Исус ыпашъхьэ къитӀысхьи къыӀуагъ: Сэ спхъу джы дэдэм лӀагъэ, ау о къакӀори, пӀэ телъхьи къэхъужьыщт. 19 Джащыгъум Исус къэтэджи, игъогу рыкӀохэрэр игъусэхэу а тхьаматэм ыдэжь кӀуагъэ. 20 Зы бзылъфыгъэ горэ, илъэс пшӀыкӀутӀу хъугъэу, лъыбэ къыкӀэкӀэу гуӀэщтыгъэ. Ар Исус ыкӀыбкӀэ къекӀуалӀи, ищыгъын кӀапэ къынэсыгъ; 21 сыда пӀомэ ыгукӀэ мыщ фэдэу ыӀуагъэти ары: «Исус ищыгъыным сынэс нэмыӀэми сыхъужьыщт». 22 Исус зыкъызэригъэзэкӀи, бзылъфыгъэр къызелъэгъум, къыӀуагъ: Угу умыгъэкӀоды, сипшъашъ. УишӀошъхъуныгъэ уигьэхъужьыгъ. А сыхьат дэдэм къыщегъэжьагъэу а бзылъфыгъэр хъужьыгъэ. 23 ЕтӀанэ Исус тхьаматэм иунэ ихьи, къамыл сырынэхэм япщэрэ цӀыфхэри, цӀыф купышхори бырсырхэу, хьадагъэ ашӀэу зелъэгъум, 24 къыӀуагъ: ШъуикӀых, пшъэшъэжъыер лӀагъэп, мэчъые нахь. Исус ар къызеӀом, къыдэхьащхыгъэх. 25 Исус цӀыф купышхор зырегъэкӀы ужым, пшъэшъэжъыем ыдэжь ихьи, ыӀэ ыубытыгъ. Зеубытым, пшъэшъэжъыер къэтэджыгъ. 26 А къэхъугъэм икъэбар а хэкум зэкӀэ ис цӀыфхэм зэлъашӀэ хъугъэ.
Исус лӀы нэшъуитӀу зэригъэхъужьыгъэр
27 Исус а чӀыпӀэм къызекӀыжьым, лӀы нэшъуитӀу ыуж къихьагъэу къылъыджэщтыгъ: Даутэ Ыкъу, гукӀэгъу къытфэшӀ! 28 ЕтӀанэ Исус унэм зехьэм, а лӀы нэшъуитӀур къыбгъодэхьагъ. Исус ахэмэ ариӀуагъ: Ар сэ сшӀэн зэрэслъэкӀыщтымкӀэ шӀошъхъуныгъэ шъуиӀа? ШӀошъхъуныгъэ тиӀ, о тхьаматэ, къыраӀожьыгъ ахэмэ. 29 ЕтӀанэ Исус ахэмэ анэхэм анэси къыӀуагъ: Шъо шъушӀошъ зэрэхъугъэм фэдэу, къыжъудэрэхъу. 30 Исус арэущтэу къызеӀом, ахэмэ анэхэр къэплъэжьыгъэх. Шъуфэсакъ, мыр зыми ешъумыӀу, ыӀуагъ Исус ахэмэ унэшъо пытэ афишӀэу. 31 Ау ахэр унэм къызекӀыжьхэм, а къэбарыр хэкум зэкӀэ изы ашӀыгъ.
Исус бзакоу, джынапцӀэ зыхэс лӀы горэ зэригъэхъужьыгъэр
32 Исусрэ игъогу рыкӀохэрэмрэ унэм икӀыжьхэ зэхъум, бзакоу, джынапцӀэ зыхэс лӀы горэ цӀыфхэм Исус ыдэжь къащагъ. 33 Исус джынапцӀэр а лӀым хифи, лӀэу бзакоу щытыгъэр къэгущыӀагъ. Ар залъэгъум, цӀыф купышхом ыгъэшӀагъуи ыӀуагъ: Мыщ фэдэ Ӏоф Израил хэгъэгум тэ ныбжьи щытлъэгъугъэп. 34 Ау фарисейхэм аӀуагъ: ДжынапцӀэхэм япащэ илъэкӀыныгъэ ары мы лӀым джынапцӀэхэр цӀыфмэ зэрахифырэр.
Исус цӀыф купышхом ыгу зэрэфэгъугъэр
35 Исус къэлэ пстэури, къоджэ пстэури къыкӀухьащтыгъэх. Синэгогухэм цӀыфхэм Тхьэм игущыӀэхэр щаригъашӀэщтыгъэх, Тхьэм и Тетыгъошхо ехьылӀэгъэ къэбарышӀури аригъэӀущтыгъ, хэтрэ сымаджи гъойщаий ыгъэхъужьыщтыгъ. 36 Мэлахъо зимыӀэ мэл Ӏэхъогъум фэдэу улэугъэхэу, заухъумэжьын амылъэкӀэу цӀыф купышхохэр зелъэгъухэм, Исус ыгу афэгъугъ. 37 ЕтӀанэ игъогу рыкӀохэрэмэ ариӀуагъ: Лэжьыгъэр бэ, ау лэжьакӀохэр макӀэх. 38 Арышъ, лэжьыгъэр къахыжьыным пае, лэжьакӀохэр къыгъэкӀонхэу лэжьыгъэр зием шъуелъэӀу.
Апостол пшӀыкӀутӀур
1 Исус игъогу рыкӀорэ нэбгырэ пшӀыкӀутӀумэ къяджи, ахэмэ джынэпцӀэ Ӏаехэр цӀыфмэ ахафынхэу тетыгъо аритыгъ, хэтрэ сымаджи гъойщаий агъэхъужьынэуи лъэкӀыныгъэ аритыгъ. 2 А апостол пшӀыкӀутӀумэ ацӀэхэр мары: Апэу Симонэу ПетрэкӀэ заджэхэрэр; ащ ышэу Индрыс; Зеведей ыкъуитӀоу Якъубэрэ Иуанрэ; 3 Филипп, Варфоломей, Фомэ, Маттэу хьакъулахь ахъщэр хэзыхыщтыгъэр, Алфей ыкъо Якъуб, Фаддей; 4 Симонэу зихэгъэгу ыгу етыгъэу фэлажьэщтыгъэр, Иудэ Искариот; а Иудэр ары нэужым Исус тетыгъо зиӀэхэм аӀэкӀэзыгъэхьанэу щытыгъэр.
Исус апостол нэбгырэ пшӀыкӀутӀур Тхьэм фэлэжьэнхэу зэрэдигъэкӀыгъэхэр
5 А апостол пшӀыкӀутӀур Исус зыдегъэкӀхэм, мы унашъор афишӀыгъ: Хымэ лъэпкъхэм адэжь шъумыкӀу, Самарие хэкум щыщ къалэ горэми шъудэмыхь. 6 Ащ нахьи Израил ицӀыфэу мэл кӀодыгъэхэм афэдэхэм адэжь шъукӀу. 7 ШъукӀуи, «Тхьэу уашъом щыӀэм и Тетыгъошхо къэблэгъагъ», шъуӀуи, къэбар яжъугъэӀу. 8 Сымаджэхэр жъугъэхъужьых, лӀагъэхэри къэжъугъэтэджыжьых, шъоджэ уз Ӏаер зиӀэхэри псаохэу, къабзэхэу жъугъэхъужьых, джынапцӀэхэри цӀыфхэм ахэшъуфых. Уасэ хэмылъэу къышъуӀэкӀэхьагъ, шъори уасэ хэмылъэу яшъутыжь. 9 Шъуибгырыпхыхэм арылъэу дышъи, тыжьыни, гъоплъэ ахъщи зыдэшъумышт. 10 Гъогум шъузытехьэкӀэ, Ӏалъмэкъи, джэнитӀуи, цуакъи, бэщи зыдэшъумыштэх. Сыда 11 Ӏомэ лэжьакӀом ишхын ифэшъуашэшъ ары. 11 Къалэми, къуаджэми, тыдэ шъудахьэми, къышъуфэшъуашэ цӀыф горэм шъукӀэупчӀ. А чӀыпӀэм шъукъе кӀыжьыфэ нэс, а цӀыфым иунэ шъуис. 12 Унэм шъузихьэкӀэ, «Тхьэм шъо мы унэм исхэм гупсэфыныгъэ къышъуерэт», шъуӀуи, шӀуфэс яшъух. 13 Унэм исхэр а шӀуфэс гущыӀэм фэшъуашэхэмэ, Тхьэм гупсэфыныгъэ ахэмэ къаритыщт, ау фэмышъуашэхэу къычӀэкӀымэ, гупсэфыныгъэр шъуадэжьы къерэгъэзэжь. 14 Ау зы унэ горэм исхэм, е зы къалэ горэм дэсхэм ащыщэу зыми шъуримыгъэблагъэмэ, е шъуигущыӀэхэм ямыдэӀумэ, а унэм шъукъызикӀыжькӀэ, е а къалэм шъукъызыдэкӀыжькӀэ, шъулъакъохэм акӀэрылъ сапэр акӀэрыжъугъэтэкъужь. 15 Шъыпкъэр шъосэӀо, ахърэт мафэм а къалэм къинэу ыщэчыщтым нахьи, къалэхэу Содомрэ Гоморрэрэ къинэу ащэчыщтыр нахь мэкӀэщт.
Сэ снгъогу шъузэрэрыкӀорэм пае, цӀыфхэм кънн шъуагъэщэчыщт
16 Мары, мэлхэм шъуафэдэу тыгъужъхэм шъуахэсэгъахьэ. Арышъ, блэхэм афэдэу Ӏушэу шъущыт, гъэпцӀэныгъэ зыхэмылъ тхьаркъохэм афэдэуи шъущыт. 17 ЦӀыфмэ шъуафэсакъ, сыда пӀомэ тхьамэтэ хасэхэм апашъхьэ шъуращэщт, ясинэгогухэми къамыщкӀэ къащышъоощтых. 18 Сэ сигъогу шъузэрэрыкӀорэм пае, Ӏэшъхьэтетхэмрэ пачъыхьэхэмрэ апашъхьэ шъуращэщт. ШъузыращэкӀэ, ахэми хымэ лъэпкъхэми апашъхьэ къэбарышӀум шыхьат шъуфэхъунэу игъо шъуфифэщт. 19 ХьыкумышӀэм ыпашъхьэ шъузыращэкӀэ, «Сыда тӀощтыр?» е «Сыдэущтэу тӀощта», шъуӀоу шъумыгумэкӀ; сыда пӀомэ шъуӀон фаер Тхьэм Ыпсэ ЛъапӀэм ащ дэжьым шъугухэм къарилъхьащт. 20 КъэгущыӀэщтыр шъорэп, Шъуятэ лъапӀэ ЬӀпсэ ЛъапӀэу шъугухэм арылъыр ары нахь. 21 Шым ежь ышы, тым ежь ибын тетыгъо зиӀэхэм аригъэукӀыным пае, аӀэкӀигъэхьащт. Бынхэри ятэянэхэм апэуцущтых, тетыгъо зиӀэхэми арагъэукӀыщтых. 22 Шъо сэ сцӀэ зэрэжъугъэлъапӀэрэм пае, цӀыф пстэуми шъуауджэгъущт. Ау кӀэухым нэсыфэ теубытэныгъэ зиӀэр мыкӀодэу Тхьэм къыгъэнэжьыщт. 23 Зы къалэм къин щышъуагъэщэчмэ, нэмыкӀрэ къалэ горэм кӀэшъуӀэжь. Сыда пӀомэ, шъыпкъэр шъосэӀо, Израил хэгъэгум икъалэхэр къэшъукӀухьанхэу игъо шъуимыфэзэ, ЦӀыф Лъэпкъым Ыкъо къэкӀожьыщт. 24 ЕджакӀор езыгъаджэрэм нахьи нахь инэп, Ӏофтабгэри итхьаматэ нахьи нахь инэп. 25 ЕджакӀор езыгъаджэрэм фэдэ хъумэ, ащ ар фырикъущт, унэӀутри итхьаматэ фэдэ хъумэ, ащи ар фырикъущт. Унэр зием ВелзевулкӀэ зеджэхэкӀэ, унагъом исхэми ащ нахьи нахь Ӏае афаӀонба?
Шъузщыщынэн фаэр
26 Арышъ, ахэмэ шъуащымыщын, сыда пӀомэ къэмылъэгъожьынэу чӀэухъумагъэу зи щыӀэп, цӀыфхэм къамы шӀэнэуи гъэбылъыгъэу зи щыӀэп. 27 Мэзахэм щышъуа сӀорэр мэфэ нэфынэм къыщышъуӀотэжь. ШъутхьакӀумэхэм къяӀушъашъэхэу къышъуаӀорэм икъэбар унашъхьэхэм шъуатетэу цӀыфхэм яжъугъэӀу. 28 Псэр зыукӀын зымылъэкӀэу, пкъыр зыукӀыхэрэм шъуащымыщын. Ащ нахьи, псэри пкъыри джэхьнэмым щызыгъэкӀодышъущтым шъущыщын. 29 Бзыу цӀыкӀуитӀур зы чапычкӀэ ащэрэба? Ау щытми, Шъуятэ лъапӀэ фэмыеу, ахэмэ ащыщэу зи чӀыгум къытефэщтэп. 30 Ау шъо шъушъхьэ тет шъхьац налъэ пстэури лъытагъэ. 31 Арышъ, шъумыщын. Шъо бзыубэхэм анахьи шъуанахь лъапӀ.
Христос игъогу рыкӀохэрэм узэращыщыр цӀыфхэм ябгъэшӀэныр
32 Зыгорэм цӀыфмэ апашъхьэ сэ сигъогу рыкӀохэрэм зэращыщыр щиӀомэ, ар сигъогу рыкӀохэрэм зэращыщыр Сятэу уашъом щыӀэм ыпашъхьэ сэри щысӀощт. 33 Ау хэтми сэ сигъогу рыкӀохэрэм ащымыщэу цӀыфмэ апашъхьэ щызыӀорэр, ар сигъогу рыкӀохэрэм зэращымыщыр Сятэу уашъом щыӀэм ыпашъхьэ сэри щысӀощт.
Зэзэгъыныгъэр чӀылъэм къыфэсхьынэу арэп сыкъызфэкӀуагъэр, сэшхор къыфэсхьынэу ары нахь
34 Зэзэгъыныгъэр чӀылъэм къыфэсхьыным пае, сэ сыкъэкӀуагъэу шъумыгугъ. Зэзэгъыныгъэр къэсхьынэу арэп сыкъызфэкӀуагъэр, сэшхор къэсхьынэу ары нахь; 35 сыда пӀомэ сэ сыкъызфэкӀуагъэр къор ятэ, пхъури янэ, нысэри игуащэ пэзгъэуцужьынэу ары. 36 ЦӀыфым ипыйхэри ежь иунагъо исхэр ары. 37 Хэтми сэ шӀу сызэрилъэгъурэм нахьи, зятэ е зянэ нахьышӀоу зылъэгъурэр сфэшъуашэу щытэп. Ащ фэдэуи хэтми сэ шӀу сызэрилъэгъурэм нахьи, е зыкъо е зыпхъу нахьышӀоу зылъэгъурэр сфэшъуашэу щытэп. 38 Хэтми зикъащ къэзыштэу, сэ сауж къырымыкӀорэр сфэшъуашэу щытэп. 39 Хэтми зыпсэ мыкӀодэу, къызэригъэнэжьыщтым ыуж итым ыпсэ шӀокӀодыщт, ау хэтми сэщ пае зыпсэ зышӀокӀодрэм ыпсэ мыкӀодэу къыгъэнэжьыщт.
ӀэхьышӀу бгъотыныр
40 ПӀъо шъуезыгъэблагъэрэм сэри сыригъэблэгъагъэу мэхъу, сэ сезыгъэблагъэрэми сэ сыкъэзыгъэкӀуагъэри ригъэблэгъагъэу мэхъу. 41 Хэти зы пегъымбар горэ зэрэпегъэмбарым пае езыгъэблагъэрэм пегъымбарым иӀэхьышӀу къыгъотыжьыщт, хэти шъыпкъагъэ зиӀэ цӀыфыр ащ ишъыпкъагъэ пае езыгъэблагъэрэми шъыпкъагъэ зиӀэ цӀыфым иӀэхьышӀу къыгъотыжьыщт. 42 Хэти мы цӀыф цӀыкӀухэм ащыщэу зыгорэ сэ сигъогу зэрэрыкӀорэм пае, зы псы чъыӀэ шъоныбжъэ нэмыӀэми езыгъашъорэм, шъыпкъэр шъосэӀо, ащ ифэшъошэ ӀэхьышӀу шӀокӀодыщтэп.
1 Исус игъогу рыкӀорэ нэбгырэ пшӀыкӀутӀум унашъохэр зафешӀыхэ ужым, а чӀыпӀэм икӀи, джуртмэ якъалэхэм цӀыфхэм Тхьэм игущыӀэхэр щаригъэшӀэнхэу ыкӀи щаригъэӀунхэу кӀуагъэ.
УмэхъэкӀо Иуан лӀыкӀохэр Исус ыдэжь зэригъэкӀуагъэхэр
2 Иуан хьапсым чӀэсэу Христос Ӏофэу ышӀагъэхэм якъэбар зызэхехым, игъогу рыкӀохэрэм ащыщэу нэбгыритӀу ыгъакӀуи, 3 ригъэупчӀыгъ: Ора къэкӀон фаер, хьауми нэмыкӀ горэм тыпэплъэн фая? 4 Жъугъэзэжьи, ариӀожьыгъ Исус ахэмэ, Ӏофэу зэхэшъухыхэрэмрэ шъулъэгъухэрэмрэ Иуан ешъуӀотэжьых: 5 Нэшъухэр къэплъэжьых, лъащэхэр тэрэзэу мэзекӀожьых, шъоджэ уз Ӏае зиӀэхэр псаохэу, къабзэхэу мэхъужьых, дэгухэм зэхахыжьы, лӀагъэхэр къэтэджыжьых, тхьамыкӀэхэми къэбарышӀур зэхахы. 6 Сэщ пае зыгу мыхъун къизымыгъахьэрэр сыхьатмафэ ежьагъ. 7 Иуан игъогу рыкӀохэрэр зежьэжьхэм, Исус цӀыф купышхохэм Иуан ехьылӀагъэу ариӀоу ыублагъ: Шъоф нэкӀым шъузыдэкӀым, сыда шъулъэгъунэу шъузыфэягъэр? Жьыбгъэм ыгъэсысырэ къамыл шъулъэгъунэу арыгъа? 8 Армырмэ, сыда шъулъэгъунэу шъузыфэягъэр ащ дэжьым шъузыдэкӀым? Щыгъын дахэхэр зыщыгъ зы лӀы горэ арыгъа? Щыгъын дахэхэр зыщыгъхэр зэрысхэр пачъыхьэхэм яунэшхохэр ары. 9 Адэ, сыда шъулъэгъунэу шъузыфэягъэр ащ дэжьым шъузыдэкӀым? Пегъымбара? Сэ шъосэӀо, ар пегъымбар къодыеп, ар пегъэмбарым нахьи нахь ин. 10 Ар лӀыкӀоу Тхьэм игущыӀэ тхыгъэхэм зикъэбар мырэущтэу арытыр ары: «Мары уапэрапшӀэу силӀыкӀо къэсэгъакӀо, ащ уигъогу пфигъэпсыщт». 11 Шъыпкъэр шъосэӀо, бзылъфыгъэхэм къакӀэхъуагъэхэм ащыщэу умэхъэкӀо Иуан нахьи нахь ин щыӀэп. Арэу щытми, Тхьэу уашъом щыӀэм и Тетыгъошхо ыӀэчӀэгъ чӀэт цӀыфхэм ащыщэу анахь цӀыкӀури Иуан нахьи нахь ин. 12 УмэхъэкӀо Иуан имафэхэм къащегъэжьагъэу джы нэсы, цӀыфхэм Тхьэу уашъом щыӀэм и Тетыгъошхо ыӀэчӀэгъ чӀэт цӀыфхэм къин арагъэщэчыгъ, бзэджашӀэхэми а тетыгъошхор лӀыгъэкӀэ аубытынэу ыуж итых; 13 сыда пӀомэ умэхъэкӀо Иуан имафэхэм нэсыфэ, пегъымбархэр зэкӀэ пегъымбар Мусэ и Тэурат хабзэ итхэмкӀи а тетыгъошхор къызэрэкӀощтым къытегущыӀагъэх. 14 Ар шъуштэнэу шъуфаемэ, умэхъэкӀо Иуаныр къэкӀонэу щытыгъэ пегъымбар Иляс ары. 15 РыдэӀонэу тхьакӀумэ зиӀэм зэхерэх! 16 Джырэ цӀыфхэр сыда зыфэзгъэдэщтыр? Урамым тес кӀалэхэу мырэущтэу зыӀохэу, яныбджэгъумэ яджэхэрэм афэдэх: 17 «Къамылым тышъуфепщагъэ пэтми, шъо шъукъэшъуагъэп; тэ гъыбзэ орэд къышъуфэтӀуагъэ пэтми, шъо шъугъыгъэп». 18 Сыда пӀомэ Иуан къэкӀуагъ. Ар мэнэкӀы, сэнэпси ешъорэп. «Ащ джынапцӀэ хэс», аӀо. 19 ЦӀыф Лъэпкъым Ыкъо къэкӀуагъ. Ар машхэ ыкӀи ешъо, «Шхэн ешъоныр зикӀасэу, хьакъулахь ахъщэр хэзыххэрэмрэ псэкӀод зышӀэхэрэмрэ яныбджэгъу», аӀо. Ау Тхьэм изэхэшӀыкӀыяыгъэшхо къыхэкӀыгъэ хъугъэшӀагъэхэм азэхэшӀыкӀыныгъэшхор къагъэшъыпкъэжьы.
Сыхьатмыгъо уежьагъ, Хоразин къалэ! Сыхьатмыгъо уежьагъ, Вифсайдэ къалэ!
20 Джащыгъум Исус къалэхэу ежь иӀофышхо гъэшӀэгъонхэм анахьыбэхэр зыщишӀагъэхэм ягыеу ыублагъ, ахэр япсэкӀодшӀагъэхэм зэрафыкӀэмыгъожьыгъэхэм пае. 21 Сыхьатмыгъо уежьагъ, Хоразин къалэ! Сыхьатмыгъо уежьагъ, Вифсайдэ къалэ! Сыда пӀомэ шъуадэжь сэ щысшӀэгъэ Ӏофышхо гъэшӀэгъонхэр къалэхэу Тиррэ Сидонрэ ащысшӀагъэхэу щытыгъэмэ, бэшӀагъэу шъыгъоныгъэ щыгъын ащыгъэу.. анэкӀухэр яжьэкӀэ цӀэлагъэхэу япсэкӀодшӀагъэхэм афыкӀэгъожьыщтыгъэх. 22 Ау сэ шъосэӀо, ахърэт мафэм шъо къинэу шъущэчыщтым нахьи, Тиррэ Сидонрэ къинэу ащэчыщтыр нахь мэкӀэщт. 23 О Капернаум къалэ, уашъом удэкӀоена? Джэхьнэмым икуупӀэ нэсыфэ укӀоцӀырызыщт нахь, сыда пӀомэ уадэжь щысшӀэгъэ Ӏофышхо гъэшӀэгъонхэр Содом къалэм щысшӀагъэхэу щытыгъэмэ, ар джы нэсыфэ щытэу къэнэщтыгъ. 24 Ау сэ шъосэӀо, ахърэт мафэм къинэу о пщэчыщтым нахьи, Содом къинэу ыщэчыщтыр нахь мэкӀэщт.
Садэжь шъукъакӀуи, гупсэфыныгъэ шъостыщт
25 Ащ дэжьым Исус игущыӀэ лъигъэкӀуатэу ыӀуагъ: Сят, уашъоми чӀылъэми я Зиусхьан мы Ӏофхэр цӀыф Ӏушхэмрэ цӀыф губзыгъэхэмрэ ашӀоушъэфыгъэу, сабыйхэм зэрябгъэшӀагъэмкӀэ щытхъур пфэсэшӀы. 26 Ары, Сят, о ар арэущтэу пшӀоигъуагъ. 27 Сятэ щыӀэ пстэури къысӀэкӀилъхьагъ. Къо лъапӀэр зыфэдэр Ты лъапӀэм нэмыкӀ зыми ышӀэрэп. Ты лъапӀэр зыфэдэри Къо лъапӀэмрэ Къо лъапӀэм ар зэригъэшӀэнхэу фэе цӀыфхэмрэ анэмыкӀ зыми ышӀэрэп. 28 ЗэкӀэ улэугъэхэу, хьылъэ онтэгъу зытелъхэр, садэжь шъукъакӀуи, гупсэфыныгъэ шъостыщт. 29 Сэ сибжьы зытешъулъхьи, сэ къасӀорэр зэжъугъашӀэ, сыда пӀомэ сэ сыгу шъабэ, пэгагъи зи илъэп. ЕтӀанэ шъугухэмкӀэ гупсэфыныгъэ жъугъотыщт; 30 сыда пӀомэ сэ сибжьы щэчыгъошӀоу, сихьылъи псынкӀэу щытышъ ары.
Исус игъогу рыкӀохэрэм шэмбэт мафэм коцышъхьэхэр къызэрэпачыгъэхэр
1 А лъэхъанэм Исус зы шэмбэт мафэ горэм коц хьасэхэм ахэтэу кӀощтыгъ. Игъогу рыкӀохэрэр мэлакӀэ лӀагъэхэти, коцышъхьэхэр къыпачыхэзэ ашхыхэу аублагъ. 2 Фарисейхэм ар залъэгъум, Исус къыраӀуагъ: Еплъ, шэмбэт мафэм хабзэкӀэ пшӀэ мыхъущтыр уигъогу рыкӀохэрэм ашӀэ. 3 Даутэрэ игъусэхэмрэ мэлакӀэ лӀэхэ зэхъум, ащ ышӀагъэм шъуеджагъэба? ариӀожьыгъ Исус. 4 Ар Тхьэм иунэ ихьи, цӀыфхэм Тхьэм ыпашъхьэ агъэтӀылъыгъэ хьалыгъур ежьыми игъусэхэми ашхыгъ. А хьалыгъур дин пащэхэм анэмыкӀ хабзэкӀэ зыгорэм ышхы мыхъунэу щытыгъ, ау Даути игъусэхэми ашхыгъ. 5 Е дин пащэхэр Тхьэм иунэшхо чӀэтхэу, шэмбэт мафэм лажьэхэу, а мафэр амыгъэлъапӀэ пэтми, лажьэ ямыӀэу къызэрэнэрэр Мусэ и Тэурат хабзэ зэритхагъэм шъуеджагъэба? 6 Ау сэ шъосэӀо, Тхьэм иунэшхо нахьи нахь инэу зыгорэ къышъухэт. 7 «КъурмэншӀыныр арэп сызыфаер, гукӀэгъур ары нахь», ыӀуи, Тхьэм къыӀогъэ гущыӀэхэм къарыкӀырэр шъушӀэщтгъэмэ, лажьэ зимыӀэхэрэр жъугъэмысэщтгъэхэп;8 сыда пӀомэ ЦӀыф Лъэпкъым Ыкъо шэмбэт мафэм итхьамат.
Исус зыӀэ лъэныкъор пыгъукӀыгъэу щыт лӀы горэ зэригъэхъужьыгъэр
9 ЕтӀанэ Исус а чӀыпӀэм икӀи, ахэмэ ясинэгогу чӀэхьагъ. 10 ЗыӀэ лъэныкъор пыгъукӀыгъэу щыт лӀы горэ ащ дэжьым чӀэтыгъ. Арэущтэу зэхъум, Исус зэрагъэмысэн Ӏоф горэ къагъотыным пае, мырэущтэу къеупчӀыгъэх: Шэмбэт мафэм сымаджэр бгъэхъужьыныр хабзэкӀэ хъущта, мыхъущта? 11 Хэта шъуащыщэу мэлы закъоу иӀэр шэмбэт мафэм машэм зифэкӀэ, къыубытыжьэу, къизымыхыжьыщтыр? ариӀуагъ Исус ахэмэ. 12 ЦӀыфыр мэлым нахьи бэкӀэ нахь лъапӀэба? Арышъ, шэмбэт мафэм шӀу пшӀэныр хабзэкӀэ хъущт. 13 ЕтӀанэ Исус а лӀым риӀуагъ: О пӀэ къэщэй. ЛӀым ыӀэ къыщэий, адрэ Ӏэм фэдэу хъужьыгъэ. 14 Джащыгъум фарисейхэр синэгогум чӀэкӀыжьхи, Исус агъэкӀодынэу гухэлъ ашӀызэ, зэрагъэкӀодыщт шӀыкӀэмкӀэ зэупчӀыжьыгъэх.
Тхьэм ежьым фэлэжьэнэу къыхихыгъэр
Ау Исус ахэмэ ягухэлъ къызешӀэм, а чӀыпӀэм икӀыжьыгъ. 15 ЦӀыфыбэхэр ыуж итхэу кӀуагъэх, ахэмэ ахэт сымаджэхэри зэкӀэ ыгъэхъужьыгъэх. 16 Ау Исус ежьыр хэт щыщми ахэмэ цӀыфмэ къарамыгъэшӀэнэу унашъо пытэ афишӀыгъ. 17 Арэущтэу зыфэхъугъэр пегъымбар Исайас итхылъ итхэу, Тхьэм мы гущыӀэхэу Христосым ехьылӀагъэу къыӀуагъэхэр къэшъыпкъэжьынхэр ары: 18 «Мыры къысфэлэжьэнэу къыхэсхыгъэр. Ар сэ шӀу слъэгъоу, сикӀасэу сыгу зэӀурэр ары. Сэ спсэ ащ ыгу ислъхьанышъ, ащ шъыпкъагъэр хымэ лъэпкъхэм аригъэӀущт. 19 Ащ бырсыр макъэ къиӀэтыщтэп ыкӀи куощтэп. Ащ ымакъэ урамхэми зыми щызэхихыщтэп. 20 Къамыл ныкъо зэпыкӀ зэпикӀыжьыщтэп, макӀэу блэрэ шъагъэри ыгъэкӀосэщтэп, шъыпкъагъэр тыригъэкӀоным нэсыфэ. 21 Лъэпкъхэр зыщыгугъыхэу зыпаплъэхэрэр ежьыр ары».
Исусрэ джынапцӀэхэм япащэу Велзевулырэ
22 Ащ дэжьым нэшъоу ыкӀи бзакоу джынапцӀэ зыхэс лӀы горэ цӀыфхэм Исус ыдэжь къащагъ. Къызащэм, Исус лӀы бзакор гущыӀэшъоу ыкӀи ылъэгъушъоу ыгъэхъужьыгъ. 23 ЦӀыф купышхохэм зэкӀэ лъэшэу агъэшӀагъоу аӀуагъ: Мыр Даутэ Ыкъоу Христос арын фаеба? 24 Ау фарисеймэ ар зызэхахым, мырэущтэу аӀуагъ: Велзевулэу джынапцӀэмэ япащэ илъэкӀыныгъэ ары джынапцӀэхэр цӀыфхэм зэрахифырэр. 25 Ахэмэ ягухэлъхэр Исус ышӀэхэзэ ариӀуагъ: Сыд фэдэрэ пачъыхьагъор лъэныкъуитӀоу зигощымэ, зэхэтэкъощт. Ащ фэдэуи сыд фэдэрэ къали, сыд фэдэрэ уни лъэныкъуитӀоу гощыгъэ хъумэ, щыӀэжьын ылъэкӀыжьыщтэп. 26 Шэйтаными зы цӀыф горэм шэйтаныр хифымэ, ащыгъум ежь ышъхьэкӀэ лъэныкъуитӀоу зэрэгъэхъугъэу мэхъу. Сыдэущтэу етӀанэ ащ итетыгъо щыӀэжьын ылъэкӀына? 27 Адэ, Велзевул илъэкӀыныгъэкӀэ сэ джынапцӀэхэр цӀыфхэм ахэсэфыхэмэ, шъо шъуицӀыфхэм джынапцӀэхэр цӀыфхэм зэрахафырэр хэт илъэкӀыныгъэу хъура? Арышъ, ахэр шъо шъуихьыкумышӀэхэу хъущтых. 28 Ау сэ джынапцӀэхэр цӀыфхэм зэрахэсфырэр Тхьэм Ыпсэ ЛъапӀэ арышъ, Тхьэм и Тетыгъошхо къызэрэшъухэхьагъэр ары ащ къикӀырэр. 29 Ащ фэдэу, кӀуачӀэ зиӀэ лӀы горэм иунэ ихьэу, ащ ихьапщыпхэр къытыгъун хэта зылъэкӀыщтыр, ыпэрапшӀэу а лӀэу кӀуачӀэ зиӀэр зэкӀоцӀимыпхэмэ? Ау а лӀыр зэкӀоцӀипхэмэ, иунэ къыхъункӀэн ылъэкӀыщт. 30 Сэ симыгъусэр къыспэуцу, къыздэзымыугъуоирэми ретэкъухьэ. 31 Арышъ, сэ шъосэӀо, цӀыфхэм сыдрэ псэкӀодэу ашӀагъэри, сыд фэдэу Тхьэр агъапцӀыгъэми афэгъушъущтых, ау хэти Тхьэм Ыпсэ ЛъапӀэ зыгъэпцӀырэм къыфэгъущтэп. 32 Хэти ЦӀыф Лъэпкъым Ыкъо гущыӀэ Ӏае фэзыӀорэм фэгъущт, ау Тхьэм Ыпсэ ЛъапӀэ гущыӀэ Ӏае фэзыӀорэм мы дунаеми адрэ дунаеми къыщыфэгъущтэп.
Чъыгыр зыфэдэр къыпыкӀэрэмкӀэ къэпшӀэщт
З3 Чъыгыр шӀумэ, къыпыкӀэрэри шӀу; чъыгыр дэймэ, къыпыкӀэрэри дэи; сыда пӀомэ чъыгыр зыфэдэр къыпыкӀэрэмкӀэ къэпшӀэщт. 34 Шъо, блэщылъфыхэр, шъо шъуибзэджагъэкӀэ сыдэущтэу шӀу къэшъуӀон шъулъэкӀына? Сыда пӀомэ жэм къыдэкӀырэр гум илъыр ары. 35 ЦӀыфышӀум ыгу илъ шӀугъэм шӀугъэ къыхехы, цӀыф бзаджэми ыгу илъ бзэджагъэм бзэджагъэ къыхехы. 36 Сэ шъосэӀо, цӀыфхэм сыдрэ гущыӀэу, пкӀэ зимыӀэу къаӀорэм ипэгъокӀ ахърэт мафэм Тхьэм ратыжьын фаеу хъущт; 37 сыда пӀомэ уигущыӀэхэм яхьылӀагъэу Тхьэм уигъэхыещт, уигущыӀэхэм яхьылӀагъэуи уигъэмысэщт.
Зы нэшэнэ гъэшӀэгъонышхо горэ уашъом къафыригъэхынэу фарисейхэр Исус къызэрелъэӀугъэхэр
38 Ащ дэжьым Тэурат егъэджэкӀо пащэхэмрэ фарисейхэмрэ ащыщхэм Исус къыраӀуагъ: Дин гъэсакӀу, зы нэшэнэ гъэшӀэгъонышхо горэ тэбгъэлъэгъунэу тыфай. 39 Джырэ цӀыф бзаджэхэу Тхьэр зымышӀэхэрэр нэшэнэ гъэшӀэгъонышхо фаех, ариӀожьыгъ Исус ахэмэ, ау пегъымбар Юныс инэшанэ нэмыкӀ Тхьэм ахэмэ къаритыщтэп; 40 сыда пӀомэ Юныс пцэшхо джадэм ыныбэ мэфищырэ чэщищырэ зэрилъыгъэм фэдэу, ЦӀыф Лъэпкъым Ыкъо мэфищырэ чэщищырэ чӀылъэм икуупӀэ чӀэлъыщт. 41 Ниневие къалэм дэсыгъэ цӀыфхэр ахърэт мафэм къэтэджыжьынхэшъ, джырэ цӀыфхэм къядэощтых ыкӀи къагъэмысэщтых, сыда пӀомэ ахэмэ Тхьэм игущыӀэхэр Юныс аригъэӀухэу зызэхаххэм, япсэкӀодшӀагъэхэм афыкӀэгъожьыгъэх, ыкӀи мары, пегъымбар Юныс нахьи нахь инэу зыгорэ къышъухэт. 42 Джащ фэдэу къыблэ хэгъэгум щыщэу бзылъфыгъэ пачъыхьэр ахърэт мафэм къэтэджыжьынышъ, джырэ цӀыфхэм къядэощт ыкӀи къыгъэмысэщтых, сыда пӀомэ а бзылъфыгъэ пачъыхьэр пачъыхьэ Сэлмэн изэхэшӀыкӀыныгъэ едэӀунэу чӀылъэм икъуапэ къикӀи къэкӀуагъ, ыкӀи мары, пачъыхьэ Сэлмэн нахьи нахь инэу зыгорэ къышъухэт.
ДжынэпцӀэ Ӏаем къызэригъэзэжьырэр
43 Зы джынэпцӀэ Ӏае горэ цӀыф горэм зыхэкӀыкӀэ, псы зэрымыт шъоф нэкӀым макӀошъ, зыгъэпсэфыпӀэ горэм лъыхъоу къекӀухьэ, ау ыгъотырэп. 44 Зыгъэпсэ фыпӀэ ымыгъотэу, «Сызыхэсыгъэ цӀыфэу сэ сиунэу щытыгъэм ыдэжь згъэзэжьыщт», еӀо. Ащ ыдэжь къегъэзэжьышъ, унэр нэкӀэу, пхъэнкӀыгъэу, зэлъыӀухыгъэу къегъотыжьы. 45 Джащыгъум макӀо, джынэпцӀибл ежьым нахьи нахь бзаджэхэу къызыдещэхэшъ, унэм ехьэхэшъ, етӀысхьэх. Аужыпкъэм а лӀым иӀоф ыпэрэм нахьи нахь дэи мэхъу. Джары джырэ цӀыфхэм къяхъулӀэщтыр.
Исус янэрэ ышхэмрэ
46 Исус а гущыӀэхэр цӀыф купышхохэм ариӀохэзэ, ежь янэрэ ышхэмрэ къэкӀуагъэхэу, къыдэгущыӀэхэмэ ашӀоигъоу щагум дэтыгъэх. 47 Зыгорэм Исус къыриӀуагъ: КъэдаӀолъ, о уянэрэ пшыхэмрэ къэкӀуагъэхэу, къыбдэгущыӀэхэмэ ашӀоигъоу щагум дэтых. 48 Хэта сянэри, хэта сшыхэри? риӀожьыгъ Исус а къезыӀуагъэм. 49 ЕтӀанэ игъогу рыкӀохэрэм Ӏапэ афишӀи къыӀуагъ: Мыхэр ары сэ сянэри сшыхэри; 50 сыда пӀомэ хэти сэ Сятэу уашъом щыӀэр зыфаер зыгъэцакӀэрэр ары сэ сшыри, сшыпхъури, сянэри.
Чылапхъэр зыпхъырэм ехьылӀэгъэ гъэсэныгъэ тхыдэр
1 А мэфэ дэдэм Исус унэм къикӀи, псыхъурэе Ӏушъом ӀутӀысхьагъ. 2 ЦӀыф купышхохэу ежь ыдэжь къыщызэрэугъоигъэхэр зэрэбагъэм пае, ежьыр зы къуашъо горэм итӀысхьагъ. ЦӀыфхэр зэкӀэ псыхъураем Ӏутыгъ. 3 ЕтӀанэ Исус гъэсэныгъэ тхыдэхэмкӀэ цӀыфхэм Ӏофыбэхэр ариӀуагъэх: ШъукъэдаГу. Зы лӀы горэ чылапхъэ ыпхъынэу дэкӀыгъ. 4 Чылапхъэр ыпхъызэ, ащ щыщ тӀэкӀу гъогум тетэкъуагъ. Бзыухэр къэбыбыхи, ар ашыпыгъ. 5 Ау зы тӀэкӀуи ятӀэ макӀэ зыхэлъ чӀыгу мыжъуалъэм тетэкъуагъ. ЧӀыгур куугъэпти, шӀэх дэдэу къыхэкӀыгъ, 6 ау тыгъэр къызыдэкӀуаем пыгъукӀыгъ, лъапсэ куу зэрямыӀагъэм паий, гъугъэх. 7 НэмыкӀ тӀэкӀуи панэхэм ахэтэкъуагъ. Панэхэр къэкӀыхи, чылапхъэу къыхэкӀыгъэхэр атхьалагъэх. 8 Ау етӀани зы тӀэкӀу чӀыгу дэгъум хэтэкъуагъ, шъхьэхэри къапыкӀагъэх. Зы шъхьэ налъэм коцишъэ къикӀагъ, адрэм тӀокӀищ, адрэми щэкӀ къикӀагъ. 9 ЕтӀанэ Исус къыпигъэхъожьыгъ: РыдэӀонэу тхьакӀумэ зиӀэм зэхерэх.
Исус цӀыфхэм Ӏофхэр аригъашӀэхэзэ, гъэсэныгъэ тхыдэхэр къызыкӀафиӀотэщтыгъэхэр
10 Ащ нэужым игъогу рыкӀохэрэр Исус къыбгъодахьэхи къеупчӀыгъэх: ЦӀыфхэм уадэгущыӀэзэ, гъэсэныгъэ тхыдэхэр сыда зыкӀафэпӀуатэрэр? 11 Тхьэу уашъом щыӀэм и Тетыгъошхо ишъэфхэр шъушӀэнхэу Тхьэм фитыныгъэ къышъуитыгъ, ау ахэмэ къаритыгъэп, ариӀожьыгъ Исус ахэмэ. 12 Тхьэм зиӀэм нахьыбэ къыритыщт, къелыжьынэуи бэ иӀэщт, ау Тхьэм зимыӀэм иӀэ тӀэкӀури Ӏихыжьыщт. 13 Сэ цӀыфхэм садэгущыӀэзэ, гъэсэныгъэ тхыдэхэр зыкӀафэсӀуатэрэр мары: Ахэр еплъыхэ пэтми, алъэгъурэп, даӀохэ пэтми, зэхахырэп ыкӀи къагурыӀорэп. 14 Ӏофэу ахэмэ къяхъулӀэрэмкӀэ Тхьэм ежь игущыӀэхэу пегъымбар Исайас ыгу къырилъхьэхи, къыригъэӀуагъэхэр къэшъыпкъэжьыгъэх: «Шъо егъашӀэм зэхэшъухы зэпытыщт, ау къыжъугурыӀощтэп; шъо егъашӀэм шъулъэгъу зэпытыщт, ау гу лъы шъутэщтэп. 15 Сыда пӀомэ мы цӀыф лъэпкъым щыщхэм агухэм гулъытэ ямыӀэ хъугъэ. Ахэмэ атхьакӀумэхэмкӀэ жъажъэу зэхахы, анэхэри аупӀыцӀагъэх. Арэущтэу щымытыгъэмэ, анэхэмкӀэ алъэгъу щтыгъ, атхьакӀумэхэмкӀи зэхахыщтыгъ, агухэмкӀи къагурыӀощтыгъ, садэжьи къагъэзэжьыгъэмэ, сэ ахэр згъэхъужьыщтгъэх». 16 Ау шъо шъунэхэри шъутхьакӀумэхэри сыхьатмафэ ежьагъэх, ахэмэ ыкӀи алъэгъу ыкӀи зэхахы. 17 Шъыпкъэр шъосэӀо, пегъымбар Ӏаджи шъыпкъагъэ зиӀэ цӀыф Ӏаджи шъо шъулъэгъурэр алъэгъумэ ашӀоигъуагъ, ау алъэгъугъэп, шъо зэхэшъухырэри зэхахынэу ашӀоигъуагъ, ау зэхахыгъэп.
Чылапхъэр зыпхъырэм ехьылӀэгъэ гъэсэныгъэ тхыдэм къикӀырэр Исус игъогу рыкӀохэрэм къызэрагуригъэӀуагъэр
18 Ащыгъум чылапхъэр зыпхъырэм ехьылӀэгъэ гъэсэныгъэ тхыдэм къикӀырэм шъукъедэӀу: 19 Тхьэм и Тетыгъошхо икъэбар зыгорэм зэхихэу, ау ар къызыгурымыӀокӀэ, Шэйтаныр къэкӀошъ, чылэпхъэшӀоу а цӀыфым ыгу илъ хъугъэр рехыжьы. Мыр чылапхъэу гъогум тепхъагъэм фэд. 20 Адрэ цӀыфыри мыжъуабэ зэрылъ чӀыгум тепхъэгъэ чылапхъэм фэд. А цӀыфыр ары Тхьэм игущыӀэхэр зэрэзэхиххэу, а гущыӀэхэр гушӀуагъокӀэ зыштэрэр. 21 Ау ащ ыгукӀэ лъапсэ зэримыӀэм пае, шӀошъхъуныгъэм игъогу бэрэ тетыжьрэп. Тхьэм игущыӀэхэм апаекӀэ, е гузэжъогъу зэрэхафэу, е цӀыфхэм ащ къин зэрэрагъэщэчэу, шӀошъхъуныгъэм игъогу текӀыжьы. 22 ЕтӀани зы цӀыф панэхэм ахэпхъэгъэ чылапхъэм фэд. Ащ Тхьэм игущыӀэхэр зэхехых, ау мы дунаем игугъухэмрэ баиныгъэм игъэпцӀэныгъэрэ Тхьэм игущыӀэхэу ыгу илъхэр атхьалэхэшъ, ащ зи шӀугъэ къыпыкӀырэп. 23 ЕтӀани нэмыкӀ зы цӀыф чӀыгу дэгъум хэпхъэгъэ чылапхъэм фэд. Ар ары Тхьэм игущыӀэхэр зэхэзыхэу, зэхэзышӀыкӀырэр. Ащ шӀугъэ къыпэкӀы, е фэдишъэ, е фэдэ тӀокӀищ, е фэдэ щэкӀ.
Уц шӀоеу коцым ыгузэгу пый горэм щипхъыгъэм ехьылӀэгъэ гъэсэныгъэ тхыдэр
24 Исус нэмыкӀ гъэсэныгъэ тхыди ахэмэ къафиӀотагъ: Тхьэу уашъом щыӀэм и Тетыгъошхо зыфэдэр лӀэу чылэпхъэшӀу зихьасэ хэзыпхъагъэр ары. 25 Ау цӀыфхэр чъыехэзэ, ипый къакӀуи, уц шӀой коцым ыгузэгу хипхъи ӀукӀыжьыгъ. 26 А чылапхъэр къэкӀэу, къыпыкӀэнэу зыфежьэм, ащ игъусэу уц шӀоири къыхэкӀыгъ. 27 Хьасэр зием ыдэжь илэжьакӀохэр кӀохи раГуагъ: «Тхьаматэ, чылэпхъэшӀу уихьасэ хэупхъагъэба? Адэ, мы уц шӀоир тыдэ къикӀыгъа?» 28 «Ар пый горэм ышӀагъ», къариӀожьыгъ тхьаматэм. «Тэ тыкӀонышъ, ар къыхэтчынэу уфая?» аГуи, лэжьакӀохэр тхьаматэм еупчӀыгъэх. 29 Ау ежьым къыӀуагъ: «Хьау, ар хъущтэп, сыда пӀомэ уц шӀоим игъусэу коцыри къыхэшъучынкӀэ мэхъу. 30 ТӀури зэгъусэу хыныгъом нэсыфэ къызэдэрэкӀ. Къахыжьын зыхъукӀэ, хынакӀомэ сэ ясӀощт: Уц шӀойхэр ыпэрапшӀэу къыхэшъухи шъупхых, машӀокӀэ жъугъэстынхэм пае; етӀанэ коцыр къэшъухи, сиконхэм арышъутакъу».
Горчицацэмрэ тэджэпсымрэ яхьылӀэгъэ гъэсэныгъэ тхыдэхэр
31 Ащ нэмыкӀэуи зы гъэсэныгъэ тхыдэ Исус ахэмэ къафиӀотагъ: Тхьэу уашъом щыӀэм и Тетыгъошхо зыфэдэр горчицацэр ары. А цэр зы лӀы горэм ихьасэ щишӀагъ. 32 Цэ пстэуми анахь цӀыкӀу пэтми, ар къызыкӀырэ ужым, зы илъэс зыныбжь къэкӀыгъэ пстэуми анахь инэу щыт. Ошъогу бзыухэри къэбыбыхэзэ, ащ икъутамэхэм атесынхэу чъыгы мэхъу. 33 ЕтӀанэ Исус нэмыкӀ гъэсэныгъэ тхыди къафиӀотагъ: Тхьэу уашъом щыӀэм и Тетыгъошхо зыфэдэр тэджэпсыри ары. Зы бзылъфыгъэ горэм тэджэпсыр къышти, хьаджыгъэ ӀанлъищымкӀэ зэхипшыхьагъ, зэрэщытэу къэтэджыфэ. 34 А зэпстэури Исус гъэсэныгъэ тхыдэхэмкӀэ цӀыф купышхохэмэ къафиӀотагъ. Гъэсэныгъэ тхыдэ хэмытэу адэгущыӀэщтыгъэп. 35 Исус цӀыфхэм адэгущыӀэзэ, гъэсэныгъэ тхыдэхэр зыфафиӀотагъэр пегъымбарым мы гущыӀэхэу къыӀуагъэхэр къэшъыпкъэжьынхэр ары: «Гъэсэныгъэ тхыдэхэр къэсӀуатэхэу сыжэ къызэ тесхынышъ, дунаер къызыхъугъэм щегъэжьагъэу аушъэфыщтыгъэ Ӏофхэр къэсӀощтых».
Уц шӀоеу коцым ыгузэгу пыим щипхъыгъэм ехьылӀэгъэ гъэсэныгъэ тхыдэм къикӀырэр Исус игъогу рыкӀохэрэм къызэрагуригъэӀуагъэр
36 Ащ нэуж Исус цӀыф купышхохэм къахэкӀи, унэу зэрысыгъэм ихьагъ. Игъогу рыкӀохэрэр къыбгъодахьэхи къыраГуагъ: Хьасэм къыхэкӀэгъэ уц шӀоим ехьылӀэгъэ гъэсэныгъэ тхыдэм къикӀырэр къыдгурыгъаӀу. 37 ЧылэпхъэшӀур зыпхъырэр ЦӀыф Лъэпкъым Ыкъу ары, къыӀожьыгъ Исус. 38 Хьасэм къикӀырэр дунаер ары. ЧылэпхъэшӀуми къикӀырэр Тхьэм и Тетыгъошхо ыӀэчӀэгъ чӀэт цӀыфхэр ары. Уц шӀоими къикӀырэр шэйтаным ицӀыфхэр ары. 39 ЕтӀанэ пыеу а уцыр коц гузэгум хэзыпхъагъэм къикӀырэр шэйтаныр ары. Хыныгъоми къикӀырэр мы дунаем икӀэух ары, хынакӀохэми къарыкӀырэр мэлэӀичхэр ары. 40 Уц шӀоир къыхачэу, машӀомкӀэ зэрагъэстырэм фэдэу ары зэрэхъущтыр мы дунаем икӀэух дэжь: 41 ЦӀыф Лъэпкъым Ыкъо имэлэӀичхэр ыгъэкӀонхэшъ, уц шӀоир лэжьыгъэм зэрэхачырэм фэдэу, цӀыфхэм псэкӀод языгъашӀэрэ цӀыфхэри, нэмыкӀ цӀыфхэу бзэджагъэ зышӀэхэрэри Тхьэм и Тетыгъошхо ыӀэчӀэгъ чӀаукъэбзыкӀыщтых. 42 МэлэӀичхэм а цӀыфхэр аугъоинхэшъ, мэшӀошхом ихьаку радзэщтых. Ащ дэжьым куохьауныгъэрэ цэ зэрэгъэшхыныгъэрэ щыхъущтых. 43 Джащыгъум шъыпкъагъэ зиӀэ цӀыфхэр тыгъэ нэбзыйхэм афэдэу, Ты лъапӀэм и Тетыгъошхо ыӀэчӀэгъ чӀэтхэу къыщынэфыщтых. РыдэӀонэу тхьакӀумэ зиӀэм зэхерэх.
Гъэсэныгъэ тхыдищ
44 Ащ нэмыкӀэуи Тхьэу уашъом щыӀэм и Тетыгъошхо зыфэдэр мылъкушхоу хьасэм щыгъэбылъыгъэу щытыгъэр ары. А мылъкушхор зы цӀыф горэм къызегъотым, ыгъэбылъыжьи, гушӀозэ кӀуи, иӀэр зэкӀэ ыщэжьи, а хьасэр къыщэфыгъ. 45 ЕтӀанэ Тхьэу уашъом щыӀэм и Тетыгъошхо зыфэдэр налмэсналкъутэ дэгъухэм алъыхъурэ сатыушӀэр ары. 46 Налмэсналкъутэ лъапӀэ зегъотым, кӀуи иӀэр зэкӀэ ыщэжьи, ар къыщэфыгъ. 47 Джыри Тхьэу уашъом щыӀэм и Тетыгъошхо зыфэдэр хъытыоу хым хадзагъэу, пцэжъые зэмылӀэужыгъуабэ къэзыубытыгъэр ары. 48 Ащ изы зэхъум, пцэжъыяшэхэм ар хыӀушъом къытыралъэшъожьыгъ. ЕтӀанэ ахэр тӀысхи, пцэжъые дэгъухэр щалъэхэм аралъхьэхи, пцэжъые дэйхэри чӀадзыжьыгъэх. 49 Джащ фэдэу ары зэрэхъущтыр мы дунаем икӀэух дэжь. МэлэӀичхэр къехынхэшъ, шъыпкъагъэ зиӀэ цӀыфхэм цӀыф бзаджэхэр къахащынхэшъ, 50 мэшӀошхом ихьаку радзэщтых. Ащ дэжьым куохьауныгъэрэ цэ зэрэгъэшхыныгъэрэ щыхъущтых.
МылъкукӀэмрэ мылъкужъымрэ
51 Ащ нэуж Исус игъогу рыкӀохэрэмэ яупчӀыгъ: А пстэури шъо шӀоу къыжъугурыӀуагъа? ШӀоу къыдгурыӀуагъэх, Зиусхьан, аГуи, ахэмэ пэгъокӀ къатыжьыгъ. 52 Ащ къыхэкӀыкӀэ хэтрэ Тэурат егъэджэкӀо пащэу Тхьэу уашъом щыӀэм и Тетыгъошхо ыӀэчӀэгъ чӀахьэрэр унэ зие горэм фэд, ариӀуагъ Исус ахэмэ. Ащ мылкъу гъэтӀылъыпӀэу иӀэм мылъкукӀи мылъкужъи къычӀехы.
Назарет дэс цӀыфхэм Исус зэрамыштагъэр
53 А гъэсэныгъэ тхыдэхэр якъыӀотэн Исус къызеухым, а чӀыпӀэм икӀыжьыгъ. 54 Янэ икъалэ къэкӀожьи, ясинэгогу цӀыфхэм Тхьэм игущыӀэхэр щаригъашӀэхэу ыублагъ. ЦӀыфхэм зэраригъашӀэщтыгъэ шӀыкӀэр агъэшӀагъоу къаӀуагъ: Мы лӀым мыщ фэдиз зэхэшӀыкӀыныгъэшхо тыдэ къырихыгъа? Мы лъэкӀыныгъэ зыхэлъ Ӏофышхохэр тыдэ къикӀыгъэха? 55 ПхъашӀэм ыкъор арыба мыр? Мыщ янэба МерэмкӀэ заджэхэрэр? Якъуб, Иосый, Симон, Иудэ мы лӀым ышхэба? 56 Ышыпхъухэри зэкӀэ тэ къытхэсхэба? Арэущтэу зыщыткӀэ, мы лӀым мы Ӏоф пстэури тыдэ къырихыгъа? 57 Арэущтэу Исус пае агу мыхъун къырагъэхьагъ. Пегъымбарым лъытэныгъэ фэзымышӀыхэрэр ежь янэ икъалэ дэсхэмрэ ежь иунагъо щыщхэмрэ арых ныӀэп,ариӀуагъ Исус ахэмэ. 58 Ахэмэ шӀошъхъуныгъэ зэрямыӀэм пае, Исус Ӏофышхо гъэшӀэгъоныбэхэр ащ щищӀагъэхэп.
УмэхъэкӀо Иуан ышъхьэ зэрэпаупкӀыгъэр
1 А мафэхэм пщэу Ирод Исус икъэбар зэхихыгъэти, 2 Ӏофтабгэхэмэ ариӀуагъ: Ар умэхъэкӀо Иуан арын фае. Ар лӀагъэхэм къахэтэджыкӀыжьыгъ, джари ащ фэдэ лъэкӀыныгъэ зыхэлъ Ӏофышхохэр ыӀэ къызкӀикӀыхэрэр. 34 Ирод ар зыкӀиӀуагъэр мары: Ежьым ышэу Филипп зыцӀэр псаоу пэтми, Ирод а Филипп ишъузэу Иродиадэ зыцӀэр къыщэжьыгъ. Ащ къызэрищэжьыгъэм пае, Иуан Ирод риӀощтыгъ: «О пшы ишъуз къэпщэжьыныр хабзэкӀэ хъущтэп». Ащ нэужым Иродиадэ ихьатыркӀэ Ирод идзэлӀхэм Иуан аригъэубыти, Ӏэхъулъэхъу тыраригъалъхьи, хьапсым чӀаригъэдзагъ. 5 Ирод Иуан ыукӀынэу фэягъ, ау цӀыфхэм ащыщынэщтыгъ, сыда пӀомэ ахэмэ Иуан пегъымбаркӀэ алъытэщтыгъэти ары. 6 Ау Ирод къызыхъугъэ мафэр загъэлъапӀэм, Иродиадэ ыпхъу утыгум къиуцуи, къафашъуи, пщы Ирод ыгу еӀугъ. 7 Ыгу еӀугъэти, пшъашъэм тхьарыӀо фишӀи ыӀуагъ: Сыд щыщми узыфаер остын. 8 Янэ ыгъэӀушыгъэти, пшъашъэм къыӀуагъ: УмэхъэкӀо Иуан ышъхьэ лэгъэшхо горэм илъэу къысэт. 9,10 Пачъыхьэм ар зызэхехым, ыгу лъэшэу къеуагъ, арышъхьакӀэ хьакӀэхэм апашъхьэ пшъашъэм тхьарыӀоу фишӀыгъэм пае зыфаер ратынэу унашъо ышӀи, Иуан ышъхьэ хьапсым къыщыпиупкӀынэу зы дзэлӀ горэ ыгъэкӀуагъ. 11 Иуан ышъхьэ лэгъэшхом илъэу къахьи, пшъашъэм ратыгъ, пшъашъэми янэ фихьыгъ. 12 ЕтӀанэ Иуан игъогу рыкӀохэрэр къакӀохи, Иуан ихьадэ хьапсым чӀахыжьи, чӀалъхьажьыгъ. ЗычӀалъхьажьы ужым, кӀохи къэбарыр Исус фахьыгъ.
Исус нэбгырэ минитф зэригъэшхагъэр
13 Исус а къэбарыр зызэхехым, цӀыфхэм ахэкӀи, къуашъомкӀэ чӀыпӀэ Ӏудзыгъэ горэм изакъоу кӀуагъэ. Ау цӀыф купышхохэм ар зызэхахым, къалэхэм къадэкӀыхи, . лъэсэу Исус лъыкӀуагъэх. 14 Исус къуашъом къикӀи, цӀыф купышхор зелъэгъум, ыгу афэгъуи, сымаджэхэу ахэтхэр ыгъэхъужьыгъэх. 15 Пчыхьэ зэхъум, игъогу рыкӀохэрэр Исус къыбгъодахьэхи къаГуагъ: Мы чӀыпӀэр нэкӀы, мафэри хэкӀотэгъах. Къуаджэхэм кӀонхэшъ, гъомлапхъэ къызфащэфыжьыным пае, цӀыф купышхохэр тӀупщыжьых. 16 3ыми кӀонхэу ящыкӀагъэп. Шъо ахэр жъугъашхэх,ариӀуагъ Исус ахэмэ. 17 Тэ хьалыгъуитфрэ пцэжъыитӀурэ нахь зи тиӀэп, къыраӀожьыгъ адрэхэм. 18 Мо сэ ахэр къысфэшъухьых, къыӀожьыгъ Исус. 19 ЕтӀанэ Исус цӀыф купышхохэр уцым хэтӀысхьанхэу ариӀуагъ. Хьалыгъуитфымрэ пцэжъыитӀумрэ къыштэхи, уашъом дэплъыий, Тхьэм щытхъу фишӀыгъ. ЕтӀанэ хьалыгъухэр зэгуичыхи, игъогу рыкӀохэрэм аритыгъэх; ахэми цӀыф купышхохэм афагощыгъэх. 20 ЦӀыф пстэури шхагъэх ыкӀи загъэшхэкӀыгъ. Ащ нэужым хьалыгъу такъырхэу къялыжьыгъэхэр мэтэ пшӀыкӀутӀу арызэу аугъоижьыгъэх. 21 Шхагъэхэр зэкӀэ, бзылъфыгъэхэмрэ сабыйхэмрэ хэмытхэу, нэбгырэ мйнитф фэдиз хъущтыгъэх.
Исус псы кӀыӀум тетэу зэрэкӀуагъэр
22 ЕтӀанэ Исус цӀыф купышхохэр ытӀупщыжьыхэфэ, игъогу рыкӀохэрэр ежьым ыпэрапшӀэу псыхъураем иадрабгъу зэпырыкӀынхэу къуашъом ригъэтӀысхьагъэх. 23 ЦӀыф купыпгхохэр зетӀупщыжьыхэ ужым, изакъоу Тхьэм елъэӀунэу Ӏуашъхьэм дэкӀоягъ. Пчыхьашъхьэр къызэсым, ащ дэжьым изакъоу къытенагъ. 24 Ау къуашъор псыхъураем ыгузэгу нэсыгъагъ, жьыбгъэри къыпеоти, хыорхэм къуашъор къин хадзагъ. 25 АтэкъэӀогъум дэжь къуашъом исхэм алъэныкъокӀэ псы кӀыӀум тетэу Исус къэкӀуагъ. 26 Исус псы кӀыӀум тетэу къакӀоу игъогу рыкӀохэрэмэ залъэгъум, хьадэ джадэу аӀуи, лъэшэу щтагъэхэу къэкууагъэх. 27 Ау къызэкуохэм, Исус къариӀуагъ: Шъугу шъумыгъэкӀоды, сэры ар, шъумыщын. 28 Зиусхьан, орымэ ар, псы кӀыӀум сытетэу, уадэжь сыкъэкӀонэу къысаГу, риӀуагъ Петрэ Исус. 29 КъакӀо, къыӀуагъ Исус. Петр къуашъом икӀи, псы кӀыӀум тетэу Исус ыдэжь кӀоу ыублагъ. 30 Ау жьыбгъэшхоу къепщэрэм гу зылъетэм, къэщтагъ. Псым чӀэбэу зеублэм, къэкууагъ: Зиусхьан, сымытхьалэу сыкъэгъэнэжь. 31 Петрэ ар къызэриӀоу, Исус ыӀэ ыщэий, къыубыти къыриӀуагъ: О шӀошъхъуныгъэ зимакӀэр, сыда узкӀехъырэхъышагъэр? 32 ЕтӀанэ а нэбгыритӀур къуашъом адитӀысхьажьхи, жьыбгъэр уцужьыгъэ. 33 Зэуцужьым, къуашъом исхэр лъэгонджэмышъхьэкӀэ Исус ыпашъхьэ къитӀысхьэхи раӀуагъ: Шъыпкъэу о Тхьэм ури Къоу ущыт.
Исус Геннисарет хэкум сымаджэхэр зэрэщигъэхъужьыгъэхэр
34 Псыхъураем зызэпырэкӀыхэм, Геннисарет хэкум нэсыгъэх. 35 А чӀыпӀэм ис цӀыфхэмэ Исус къызашӀэжьым, а хэкум зэрэщытэу макъэ щагъэӀуи, сымаджэхэр зэкӀэ Исус къыфахьыгъэх. 36 Зи мыхъуми, Исус ищыгъын кӀапэ нигъэсынхэу къелъэӀугъэх, ищыгъын кӀапэми нэсыгъэ пстэури хъужьыгъэх.
Тыжъхэм къакӀэныжьыгъэ хабзэхэр
1 Джащыгъум Ерусалим къикӀыгъэ фарисейхэмрэ Тэурат егъэджэкӀо пащэхэмрэ Исус ыдэжь къакӀохи къеупчӀыгъэх: 2 0 уигъогу рыкӀохэрэр тятэжъхэм къытфагъэнэгъэ хабзэхэм сыда зыкӀатекӀыхэрэр? Сыда пӀомэ ахэмэ аӀэхэр амытхьакӀыхэу машхэх! 3 Шъо шъуятэжъхэми яхабзэхэм шъуатетыным пае, Тхьэм иунашъо сыда шъузыкӀытекӀырэр? ариӀожьыгъ Исус. 4 Сыда пӀомэ Тхьэм ыӀуагъ: «Уятэрэ уянэрэ лъытэныгъэ афэшӀ», ыкӀи «Хэти щэрэт зятэ е зянэ ӀэягъэкӀэ тегущыӀэрэр шъуукӀын фае». 56 Ау шъо шъоӀо: «Зы цӀыф горэм ежьым ятэ е янэ мырэущтэу риӀомэ: Сэ тынэу шъо шъостын слъэкӀыщтгъэр джы Тхьэм пае тын сшӀыщт, ыӀоу, ащыгъум ятэянэхэм лъытэныгъэ афимышӀыми хъущт». Арэущтэу шъушӀэзэ, шъуятэжъхэм къышъуфагъэнэгъэ хабзэхэмкӀэ Тхьэм игущыӀэхэр зы лъэныкъокӀэ ешъогъэзых. 7 Шъо, нэпитӀу зиӀэхэр! Пасэм пегъымбар Исайас шъыпкъэр къышъуиӀолӀагъ мырэущтэу зеӀом: 8 «Мы цӀыфхэм аӀупэхэмкӀэ сагъэлъапӀэ, ау агухэмкӀэ спэчыжьэх. 9 Ахэмэ цӀыфхэм Ӏофхэр арагъашӀэхэзэ, цӀыфхэм яхабзэ Тхьэм иунашъо зэрэфагъадэрэм пае, сызэрагъэлъапӀэрэр хьаулый». 10 Ащ нэужым Исус цӀыф купышхомэ къяджи ариӀуагъ: ШъукъэдаӀу ыкӀи зыгурыжъугъаӀу. 11 ЦӀыфыр мыкъабзэу зышӀырэр ыжэ дахьэрэр арэп, ыжэ къыдэкӀырэр ары нахь. 12 Джащыгъум игъогу рыкӀохэрэр Исус къыбгъодахьэхи къеупчӀыгъэх: Фарисейхэм а къэпӀуагъэхэр зызэхахым, агу мыхъун къызэрэрагъэхьагъэр ошӀа? 13 Сыдрэ къэкӀыгъэу Сятэу уашъом щыӀэм чӀым химыгъэтӀысхьагъэр къыхэтхъыжьыгъэу хъущт, ариӀожьыгъ Исус. 14 Ахэмэ ауж шъуикӀ. Мы фарисейхэр цӀыф нэшъухэм япэрыт нэшъух. Зы нэшъум адрэ нэшъур зэрищэн хъумэ, тӀури машэм ифэщтых. 15 Арэущтэу зеӀом, Петр Исус къыриӀожьыгъ: А гъэсэныгъэ тхыдэу къэпӀотагъэм къикӀырэр къыдгурыгъаӀу. 16 Джыри зи къыжъугурымыӀоу ара? къыӀожьыгъ Исус 17 Жэм дахьэрэ пстэури ныбэм зэрихьэу, пкъым къызэрэхэкӀыжьырэр къыжъугурыӀорэба? 18 Ау жэм къыдэкӀыхэрэр гу кӀоцӀым къекӀых. Ахэр ары цӀыфыр мыкъабзэу зышӀыхэрэр; 19 сыда пӀомэ гум къикӀыхэрэр мыхэр ары: гупшысэ бзаджэхэр, цӀыф укӀыныр, зинэ шӀэныр, тыгъоныр, цӀыфхэм пцӀы ателъхьаныр, ӀэягъэкӀэ цӀыфхэм атегущыӀэныр. 20 Ахэр ары цӀыфыр мыкъабзэу зышӀыхэрэр. Ау Ӏэ мытхьакӀыгъэхэмкӀэ шхэным цӀыфыр мыкъабзэу ышӀырэп.
Ханаан хэкум щыщ бзылъфыгъэм шӀошъхъуныгъэу иӀагъэр
21 ЕтӀанэ Исус а чӀыпӀэм икӀи, къалэхэу Тиррэ Сидонрэ яӀэгъоблагъо кӀуагъэ. 22 Джащыгъум а лъэныкъом къикӀыгъэу, Ханаан хэкум щыщэу зы бзылъфыгъэ горэ Исус ыдэжь къакӀуи къэкууагъ: Тхьаматэу Даутэ Ыкъу, гукӀэгъу къысфэшӀ. Зы джынапцӀэ горэм сэ спхъу Ӏаеу ригъэзыгъэу щыт. 23 Ау Исус а бзылъфыгъэм зы гущыӀи риӀуагъэп, зы пэгъокӀи ритыжьыгъэп. Игъогу рыкӀохэрэр Исус къыбгъодахьэхи къаӀуагъ: Мыр куозэ, тауж итышъ, ӀугъэкӀ. 24 Израил цӀыфхэу мэл кӀодыгъэхэм афэдэхэр ары ныӀэп сыкъызфэкӀуагъэхэр, къыӀожьыгъ Исус. 25 Ау бзылъфыгъэр Исус къыбгъодахьи, лъэгонджэмышъхьэкӀэ ыпашъхьэ къитӀысхьи къыӀуагъ: О тхьаматэ, къыздэӀэпыӀ! 26 Хьалыгъур сабыйхэм аӀыпхэу хьэхэм ябгъэшхыныр тэрэзэп, пэгъокӀ ытыжьыгъ Исус. 27 Шъыпкъэ, тхьаматэ, къыӀожьыгъ бзылъфыгъэм, ау хьэхэми ятхьаматэхэм яӀанэ къетэкъохырэ шкъойхэр ашхых. 28 О бзылъфыгъ, шӀошъхъуныгъэу уиӀэр ины, ри Ӏуггъ Исус. О зэрэпшӀоигъом тетэу къыбдэрэхъу. А сыхьатым къыщегъэжьагъэу а бзылъфыгъэм ыпхъу хъужьыгъэ.
Исус цӀыфыбэхэр зэригъэхъужьыгъэхэр
29 Ащ нэужым Исус а чӀыпӀэм икӀи, Галилей псыхъураем рекӀокӀыгъ. Ӏуашъхьэм дэкӀуаий, ащ дэжьым тетӀысхьагъ. 30 ЦӀыф купышхуабэхэм цӀыф лъащэри, Ӏащэри, нэшъури, дэгури, нэмыкӀрэ уз зиӀэхэри къыздащэхи, Исус ыдэжь къакӀохи, сымаджэхэр ащ ылъакъохэм адэжь щагъэтӀылъыгъэх. ЗагъэтӀылъхэм, Исус ахэр ыгъэхъужьыгъэх. 31 Бзакохэр гущыӀэхэу, Ӏащэхэр псаохэу, лъащэхэр тэрэзэу зекӀожьхэу, нэшъухэр къэплъэжьыгъэхэу цӀыфхэм залъэгъум, агъэшӀэгъуи, Израил и Тхьэ щытхъу фашӀыгъ.
Исус нэбгырэ миннплӀ зэрнгъэшхагъэхэр
32 Исус игъогу рыкӀохэрэм къяджи къыӀуагъ: Мы цӀыфхэм сыгу ягъу, сыда пӀомэ мэфищ хъугъэу сигъусэх, ашхыни яӀэп. МэлакӀэ лӀэхэу стӀупщыжьынхэкӀэ сыфаеп. Гъогум щызэхэфэнхэкӀи мэхъу. З3 Мыщ фэдиз цӀыф купышхом афырикъун хьалыгъу шъоф нэкӀым тыдэ къитхын тлъэкӀына? аӀуи, игъогу рыкӀохэрэм Исус къыраӀуагъ. 34 Хьалыгъу тхьапша шъуиӀэр? ариӀуагъ Исус ахэмэ. Хьалыгъуиблырэ пцэжъые тӀэкӀурэ тиӀ, къаӀожьыгъ ахэмэ. 35 Джащыгъум Исус цӀыф купышхор чӀыгум етӀысэхынхэу унашъо афишӀыгъ. 36 Хьалыгъуиблымрэ пцэжъыехэмрэ къыштэхи, Тхьэм щытхъу фишӀыгъ. ЕтӀанэ хьалыгъухэр зэгуичыхи, игъогу рыкӀохэрэм аритыгъэх. Ахэми цӀыфхэм афагощыгъэх. 37 ЦӀыф пстэури шхагъэх ыкӀи загъэшхэкӀыгъ. Ащ нэужым хьалыгъу такъырхэу къялыжьыгъэхэр мэтибл арызэу аугъоижьыгъэх. 38 Шхагъэхэр, бзылъфыгъэхэмрэ сабыйхэмрэ хэмытхэу, нэбгырэ миниплӀ фэдиз хъущтыгъэх. 39 ЕтӀанэ Исус цӀыф купышхор ытӀупщыжьи, къуашъом итӀысхьи, Магадан хэкум кӀуагъэ.
Зы нэшэнэ гъэшӀэгъонышхо горэ уашъом къафыригъэхынэу фарисейхэр Исус къызэрелъэӀугъэхэр
1 Фарисейхэмрэ саддукейхэмрэ Исус ыдэжь къакӀохи, ежьыр агъэунэфыным пае, зы нэшэнэ гъэшӀэгъонышхо горэ уашъом къафыригъэхынэу къелъэӀугъэх. 2 Ау Исус ахэмэ ариӀожьыгъ: Пчыхьашъхьэм мырэущтэу шъоӀо: «Уашъор шэплъышъ, мафэр ошӀу хъущт». 3 Пчэдыжьыми мырэущтэу шъоӀо: «Уашъом ошъуапщэр тиз ыкӀи шэплъышъ, непэ оешхо хъущт». Уашъом итеплъэ къикӀырэр къыжъугурэӀо, ау мы лъэхъанэм инэшанэхэм къарыкӀырэр къыжъугурыӀон шъулъэкӀырэп. 4 Джырэ цӀыф бзаджэхэу Тхьэр зымышӀэхэрэр нэшэнэ гъэшӀэгъонышхо фаех, ау пегъымбар Юныс инэшанэ нэмыкӀ Тхьэм ахэмэ къаритыщтэп. Ар къызеӀом, Исус ахэмэ ахэкӀи ӀукӀыжьыгъ.
Фарисеихэмрэ саддукейхэмрэ ятэджэпс
5 ЕтӀанэ псыхъураем иадрабгъу зызэпырэкӀыжьхэм, игъогу рыкӀохэрэм хьалыгъу къыздахьынэу ащыгъупшэгъагъ. 6 Исус ахэмэ арйӀуагъ: Шъуфэсакъ. Фарисейхэмрэ саддукейхэмрэ ятэджэпсы зыщышъуухъум. 7 Хьалыгъу тиӀэпышъ ары ащ зыкӀиӀорэр, зэраӀозэ, игъогу рыкӀохэрэр а Ӏофым тегущыӀагъэх. 8 Исус ахэмэ аӀуагъэм гу лъити къыӀуагъ: ШӀошъхъуныгъэ зимакӀэхэр, хьалыгъу зэрэшъуимыӀэм сыд пае шъутегущыӀэра? 9 Джыри зи къыжъугурымыӀоу ара? Шъугу къэкӀыжьырэба, хьалыгъуитфыр цӀыф минитфым зафызэгосэчым, хьалыгъу шкъойхэр арызэу сыд фэдиз матэхэу шъуугъоижьыгъэхэр? 10 Хьалыгъуиблыри цӀыф миниплӀым зафызэгосэчым, хьалыгъу такъыр матэхэу сыд фэдиза арызэу шъуугъоижьыгъэхэр? 11 «Фарисейхэмрэ саддукейхэмрэ ятэджэпс зыщышъуухъум», сӀуи зэсэӀом, хьалыгъур арэп сэ зыфэсӀогъагъэр, ар сыдэущтэу къыжъугурымыӀора? 12 Исус зыфиӀогъагъэр хьалыгъу тэджэпсыр арыгъэп, ау Фарисейхэмрэ саддукейхэмрэ цӀыфхэм Ӏофхэу арагъашӀэхэу щытыгъэхэр ары нахь. Ащ зыщаухъумэн зэрэфаер Исус игъогу рыкӀохэрэм джы къагурыӀуагъ.
«Оры Христосэу Тхьэм Ыкъор» ыӀуи, Петр Исус зэрэриӀуагъэр
13 ЕтӀанэ Кайсарфилипие къалэм иӀэгъоблагъо Исус къызэкӀом, игъогу рыкӀохэрэм яупчӀыгъ: Сэ ЦӀыф Лъэпкъым ЬӀкъо хэт сыщыщэу цӀыфхэм аӀора? 14 Зы купым о уумэхъэкӀо Иуанэу аӀо, къаӀожьыгъ ахэмэ. НэмыкӀхэми о упегъымбар Илясэу аӀо. ЕтӀанэ адрэхэми о упегъымбар Иеремиеу е пегъымбархэмэ уащыщ горэу аӀо. 15 Адэ шъори, сэ хэт сыщыщэу шъуӀора? яупчӀыгъ Исус ахэмэ. 16 Оры Христосэу щыӀэныгъэр къыздикӀырэ Тхьэм Ыкъор, къыӀожьыгъ Симон Петр. 17 Сыхьатмафэ уежьагъ, о Юныс ыкъо Симон, ыӀуи, Исус ащ риӀожьыгъ. Сыда пӀомэ мыр зэхэозыгъэшӀыкӀыгъэр цӀыфыр арэп, Сятэу уашъом щыӀэр ары нахь. 18 Сэ осэӀо, о у Петрэ, мыжъом уфэд, сэ сичылыс о къыптесшӀыхьащт, лӀэныгъэм ыкӀуачӀэхэри а чылысым текӀонхэ алъэкӀыщтэп. 19 Тхьэу уашъом щыӀэм и Тетыгъошхо иӀункӀыбзэхэр остыщтых; чӀылъэм сыд щыщми о фит умышӀырэр уашъоми фиты щыхъущтэп; чӀылъэм сыд щыщми о фит пшӀырэри уашъоми фиты щыхъущт. 20 ЕтӀанэ ежьыр зэрэ Христосыр зыми рамыӀотэжьынэу Исус игъогу рыкӀохэрэм унашъо пытэ афишӀыгъ.
Исус ежьыр зэраукӀыщтри, лӀагъэхэм къызэрахэтэджыкӀыжьыщтри къызэриӀуагъэр
21 А лъэхъанэм къыщегъэжьагъэу Исус игъогу рыкӀохэрэм къагуригъаӀоу ыублагъ: Сэ Ерусалим сыкӀон фаеу щыт. Нахьыжъхэми, дин пэщэшхохэми, Тэурат егъэджэкӀо пащэхэми къиныбэ сагъэщэчын ыкӀи саукӀын фаеу щыт, ящэнэрэ мафэми лӀагъэхэм сыкъахэтэджыкӀыжьын фаеу щыт. 22 Арэущтэу зеӀом, Петрэ Исус зы лъэныкъокӀэ Ӏуищи, фимыдэу фежьагъ: Зиусхьан, Тхьэм ар ерэмыд. Ар зыкӀи къыохъулӀэ хъущтэп. 23 Исус Петрэ зыкъыфигъази риӀуагъ: Сауж икӀ, шэйтан. Сэ сигъогукӀэ пэрыохъу укъысфэхъу, сыда пӀомэ, о уигупшысакӀэ Тхьэм игупшысакӀэу щытэп, цӀыфым игупшысакӀэу щыт нахь. 24 Джащыгъум Исус игъогу рыкӀохэрэм ариӀуагъ: Зыгорэ сэ сауж къырыкӀонэу фаемэ, ежьыр зыфэе Ӏофхэр къерэгъанэхи, лӀэныгъэм икъащ къерэшти, сауж къырэрэкӀу; 25 сыда пӀомэ хэти зыпсэ мыкӀодэу къэзыгъэнэжьынэу фаем ыпсэ шӀокӀодыщт, ау хэти сэщ пае зыпсэ зышӀокӀодрэм ыпсэ мыкӀодэу къыгъэнэжьыщт. 26 Дунаер зэкӀэ зы цӀыфым ие хъоу, ежьыр кӀодмэ, а цӀыфым ишӀуагъэу къэкӀощтыр сыда? Хьауми цӀыфым ыпсэ пае уасэу сыда ытышъущтыр? 27 Сыда пӀомэ ЦӀыф Лъэпкъым Ыкъо имэлэӀичхэр игъусэхэу ежь Ятэ ищытхъушхо фэдэ щытхъушхо иӀэу къэкӀожьыщт. Ащыгъум хэти ышӀагъэм фэшъуашэу ригъэгъотыжьыщт. 28 Шъыпкъэр шъосэӀо, ЦӀыф Лъэпкъым Ыкъо и Тетыгъошхо иӀэу къакӀоу алъэгъуфэ, мыщ дэжьым щыт цӀыфхэм ащыщхэу заулэм лӀэныгъэр алъэгъущтэп.
Исус итеплъэ зэрэзэрихъокӀыгъэр
1 Мэфих зытешӀэ ужым, Исус Петри, Якъуби, ащ ышы Иуани зидищэхи, Ӏошъхьэ лъагэм язакъоу дищэягъэх. 2 Джащыгъум ахэмэ апашъхьэ Исус итеплъэ щызэрихъокӀыгъ. Ынэгу тыгъэм фэдэу къэлыдыгъ, ищыгъынхэри осым фэдэу фыжьыбзэу хъугъэх. 3 Зэплъэхэм, пегъымбархэу Мусэрэ Илясрэ Исус къыдэгущыӀэхэу ащ игъогу рыкӀорэ нэбгырищым къафэлъэгъуагъэх. 4 Зиусхьан, мыщ дэжьым тызэрэщыӀэр дэгъу, ыӀуи, Петр Исус къыриӀуагъ. Уфаемэ, чэлищ мыщ дэжьым щызгъэӀэн, ощ пае зы, Мусэ паий зы, Иляс паий зы. 5 Петр гущыӀэзэ, ошӀэдэмышӀэу ошъопщэ нэфынэ къакӀуи, ахэмэ къашъхьэщыхьагъ. Ошъуапщэм зы макъэ горэ къыхэӀукӀыгъ: Мары сэ шӀу слъэгъурэ Скъо кӀасэу сыгу зэӀурэр. Ащ ыӀорэм шъуедэӀу. 6 Ар зызэхахым, Исус игъогу рыкӀохэрэр лъэшэу щтагъэхэу чӀыгум бгъэгукӀэ зырадзэхыгъ. 7 Ау Исус ахэмэ абгъодахьи, ӀапэкӀэ анэси къыӀуагъ: Шъумыщын, шъукъэтэдж. 8 Къыздэплъыехэм, Исус нэмыкӀ зи алъэгъужьыгъэп. 9 Ахэр Ӏуашъхьэм къехыжьхэзэ, Исус ахэмэ унашъо афишӀыгъ: ЦӀыф Лъэпкъым Ыкъо лӀагъэхэм къахэтэджыкӀыжьыфэ, шъулъэгъугъэр зыми ешъумыӀотэжь. 10 Игъогу рыкӀорэ нэбгырищыр Исус къеупчӀыгъэх: Адэ, Тэурат егъэджэкӀо пащэхэм, «ЫпэрапшӀэу пегъымбар Иляс къэкӀон фае», сыда зыкӀаӀорэр? 11 Шъыпкъэ, Иляс къэкӀонышъ, Ӏоф пстэури тэрэзэу зэтыригъэуцожьын фае, ариӀожьыгъ Исус. 12 Ау сэ шъосэӀо, Иляс къэкӀогъах, ари къашӀэжьыгъэп, ау Ӏоф бзэджагъэу ащ рашӀэнхэу зыфэягъэхэр рашӀагъэх. Ащ фэдэу ахэмэ ЦӀыф Лъэпкъым Ыкъуи къин рагъэщэчыщт. 13 Джащыгъум Исус зыфиӀогъагъэр умэхъэкӀо Иуан арэу Исус игъогу рыкӀохэрэм къагурыӀуагъ.
Исус джынапцӀэ зыхэс кӀалэ горэ зэригъэхъужьыгъэр
14 Ащ нэужым Исусрэ игъусищымрэ цӀыф купышхом адэжь къызагъэзэжьым, зы лӀы горэ Исус къыбгъодахьи, ыпашъхьэ лъэгонджэмышъхьэкӀэ къитӀысхьи, 15 къыӀуагъ: Тхьаматэ, скъо гукӀэгъу къыфэшӀ, сыда пӀомэ мэзакӀэр къызихьэкӀэ, лъэшэу къин ещэчы. Бэрэ машӀом е псым хэфэ. 16 О уигъогу рыкӀохэрэм адэжь сщагъэ, арышъхьакӀэ, ахэмэ агъэхъужьын алъэкӀыгъэп. 17 Еоой, шӀошъхъуныгъэ зимыӀэхэу, джырэ цӀыф къуанчэхэр, къыӀожьыгъ Исус. Сыд фэдизрэ сышъухэтын фая? Сыд фэдизрэ шъусщыӀэн фая? А кӀалэр къысфашъущ. 18 Къызыфащэм, Исус джынапцӀэм егыигъ, джынапцӀэри кӀалэм хэкӀыжьыгъ. А сыхьатым щегъэжьагъэу кӀалэр хъужьыгъэ. 19 ЕтӀанэ Исусрэ игъогу рыкӀохэрэмрэ язакъоу къызэнэжьхэм, ахэр Исус къыбгъодахьэхи къеупчӀыгъэх: Сыд пае а джынапцӀэр тэ хэтфын тымылъэкӀыгъа? 20 Шъо шъуишӀошъхъуныгъэ зэрэмакӀэр арышъ ары,ариӀожьыгъ Исус. Шъыпкъэр шъосэӀо, горчицацэм фэдизэу шӀошъхъуныгъэ шъуиӀэмэ, мы Ӏуашъхьэм, «ӀукӀи модэ кӀо!» зешъуӀокӀэ, ар ӀукӀынышъ кӀощт. Ащыгъум шъо къыжъудэмыхъун Ӏоф зи къэнэжьыщтэп. 21 Мыщ фэлэ ДЖынапцӀэр тхьэлъэӀумрэ нэкӀынымрэ афэшъхьафкӀэ цӀыфым хэпфышъущтэп, къыпигъэхъожьыгъ Исус.
Исус ежьыр зэраукӀыщтри, лӀагъэхэм къызэрахэтэджыкӀыжьыщтри ятӀонэрэу къызэриӀуагъэр
22 Исусрэ игъогу рыкӀохэрэмрэ Галилей хэкум зыщызэрэугъоижьхэм, Исус ариӀуагъ: ЦӀыф Лъэпкъым Ыкъо цӀыфхэм аӀэкӀэхьанышъ, 23 ахэмэ ежьыр аукӀыщт, ящэнэрэ мафэми лӀагъэхэм къахэтэджыкӀыжьыщт. Исус ар зареӀом, агу лъэшэу къеуагъ.
Исусрэ Петрэрэ Тхьэм иунэшхо пае хьакъулахь ахъщэр зэратыгъэр
24 Капернаум къалэм къызэкӀохэм, Тхьэм иунэшхо пае хьакъулахь ахъщэу дидрахм зыцӀэр хэзыхыхэрэр Петрэ ыдэжь къакӀохи къаГуагъ: Тхьэм и унэшхо пае хьакъулахь ахъщэу дидрахмэр шъуидин гъэсакӀом ета? 25 Ары, еты, къыӀожьыгъ Петрэ. ЕтӀанэ Петрэ унэм зехьэм, ар къэмыгущыӀэу Исус ащ дэгущыӀагъ: О сыдэу ухаплъэра, Симон? Дунаем тет пачъыхьэмэ хьакъулахьэу хьапщыпхэм атыралъхьэрэмрэ хьакъула хьэу цӀыфмэ атыралъхьарэмрэ хэта къызыӀахырэр? Ежьхэмэ акъохэр ара, хьауми нэмыкӀ цӀыфхэр ара? 26 НэмыкӀ цӀыфхэр ары, къыӀожьыгъ Петр. Джащыгъум ежьхэм акъохэм хьакъулахь атыралъхьарэп, арыба? ыӀуи, Исус ащ риӀожьыгъ. 27 Ау мы цӀыфхэм агу къетымыгъэоным пае, псыхъураем кӀуи, уипцэкъэнтф хадзи, апэрэ пцэжъыеу къыхэбдзырэр къашти, ыжэ зэтехи, тыжьын ахъщэ дэбгъотэщт. Ар шти, хьакъулахьэу сэщ паий ощ паий ят.
Тхьэм и Тетыгъошхо ыӀэчӀэгъ чӀэт цӀыфхэм ащыщэу хэта анахь ин дэдэр?
1 А мафэхэм игъогу рыкӀохэрэр Исус къыбгъодахьэхи къеупчӀыгъэх: Тхьэу уашъом щыӀэм и Тетыгъошхо ыӀэчӀэгъ чӀэт цӀыфхэм ащыщэу хэта анахь ин дэдэр? 2 Исус сабый горэм къеджи, азыфагу дигъэуцуи, ЗкъыӀуагъ: Шъыпкъэр шъосэӀо, шъугухэм арылъыр зэшъухъокӀэу, сабыйхэм шъуафэдэу шъумыхъумэ, Тхьэу уашъом щыӀэм и Тетыгъошхо ыӀэчӀэгъ шъучӀэхьащтэп. 4 Арышъ, мы сабыим фэдэу хэти зышъхьэ зыгъэцӀыкӀужьырэр ары Тхьэу уашъом щыӀэм и Тетыгъошхо ыӀэчӀэгъ чӀэт цӀыфхэм анахь ин дэдэр. 5 Хэти мыщ фэдэ сабыир сэ сцӀэкӀэ къезыгъэблагъэрэм сэ сыригъэблэгъагъэу мэхъу.
ЦӀыфхэм псэкӀод ашӀэнэу дэзыхьыхырэ Ӏофхэр
6 Ау мы цӀыкӀухэм ащыщэу сэркӀэ шӀошъхъуныгъэ зиӀэм псэкӀод ышӀэнэу хэти дэзыхьыхрэм ыпшъэтыкъ мыжъо шъхьал кӀэрашӀэу, хы куупӀэм хадзэу рагъэтхьэлагъэмэ, ежьымкӀэ нахьышӀущтыгъ. 7 ЦӀыфхэм псэ кӀод ашӀэнэу дэзыхьыхырэ Ӏофхэм апаекӀэ дунаер сыхьатмыгъо ежьагъ. Шъыпкъэ, ащ фэдэ Ӏофхэр къэхъунхэ фае, ау цӀыфэу къызыпкъырыкӀырэр сыхьатмыгъо ежьагъ. 8 Е о пӀэ орэхъу, е о плъакъо орэхъу псэкӀод пшӀэнэу удихьыхмэ, пыупкӀыжьи чӀэдз. ӀитӀури е лъэкъуитӀури уиӀэхэу мыухыжьын машӀом упадзэным нахьи, уӀащэу е улъащэу мыкӀодыжьын щыӀэныгъэ бгъотыныр оркӀэ нахьышӀу. 9 Ащ фэдэуи, о унэ псэкӀод пшӀэнэу удихьыхмэ, къитхъыжьи, чӀэдз. УнитӀу псаоу джэхьнэмым имашӀо упадзэным нахьи, зы нэ нахь уимыӀэми, мыкӀодыжьын щыӀэныгъэ бгъотыныр оркӀэ нахьышӀу. 10 Шъуфэсакъ, мы цӀыкӀухэм ащыщэу зыгори зэшъумыпэсэу шъущымыт; сыда пӀомэ сэ шъосэӀо, мы цӀыкӀухэмэ ямэлэӀичхэу уашъом щыӀэхэм Сятэу уашъом щыӀэм ынэгу щалъэгъу зэпыт. 11 Сыда пӀомэ ЦӀыф Лъэпкъым ЬӀкъо къызыфэкӀуагъэр цӀыф кӀодыгъэм лъыхъунышъ, мыкӀодэу къыгъэнэжьыныр ары.
Мэлэу кӀодыгъэм ехьылӀэгъэ гъэсэпэ тхыдэр
12 Шъо сыдэущтэу шъухаплъэра? Зы цӀыф горэм мэлишъэ иӀэу тӀон. Ахэмэ ащыщэу зыр гъуащэмэ, адрэ тӀокӀиплӀырэ пшӀыкӀубгъурэр Ӏуашъхьэмэ къатыринэнхэшъ, кӀонышъ, мэлэу гъощагъэм лъыхъущтба? 13 Шъыпкъэр шъосэӀо, а мэлыр къызигъотыжькӀэ, мэл тӀокӀиплӀырэ пшӀыкӀубгъурэу ныбжьи мыгъощагъэхэм анахьи, а мэлым нэхь щыгушӀукӀыщт. 14 Ащ фэдэу Шъуятэ лъапӀэу уашъом щыӀэр мы цӀыкӀухэм ащыщэу зыгори кӀодынэу фаеп.
Шэу псэкӀод зышӀэрэр
15 О пшы оркӀэ псэкӀод ышӀэмэ, ыдэжь кӀуи, ар зэрэпсэкӀодыр шъуизакъо зыхъукӀэ гурыгъаГу. КъызыодэӀукӀэ, ащыгъум о пшы къыпфэнэщт. 16 Ау къызыомыдэӀукӀэ, зы нэбгырэ е нэбгыритӀу пшы ыдэжь зыдащ. Ащыгъум «шыхьатитӀумэ е шыхьатищымэ къаӀорэмкӀэ сыдрэ гущыӀи гъэшъыпкъагъэу хъущт». 17 Ахэмэ ядэӀунэу ымыдэмэ, чылыс зэӀукӀэм щыщхэм апашъхьэ Ӏофыр илъхь. Чылыс зэӀукӀэми едэӀунэу ымыдэмэ, хымэ лъэпкъхэм ащыщэу зыгорэм фэдэу, е хьакъулахь ахъщэр хэзыхырэм фэдэу оркӀэ орэхъу. 18 Шъыпкъэр шъосэӀо, чӀылъэм сыд щыщми шъо фит шъумышӀырэр уашъоми фиты щыхъущтэп; чӀылъэм сыд щыщми шъо фит шъушӀырэри уашъоми фиты щыхъущт. 19 Джыри шъосэӀо, чӀылъэм шъуащыщэу нэбгыритӀу шъузэгурыӀоу, сыд щыщкӀи шъуелъэӀумэ, Сятэу уашъом щыӀэм ар къышъуфишӀэщт. 20 Сыда пӀомэ сэ сцӀэкӀэ нэбгыритӀу е нэбгырищ зызэрэугъоихэкӀэ, сэри ахэмэ сахэт.
ГукӀэгъу зыхэмылъ унэӀутым ехьылӀэгъэ гъэсэныгъэ тхыдэр
21 Джащыгъум Петр Исус къыбгъодахьи къеупчӀыгъ: Зиусхьан, сэ сшы сэркӀэ псэкӀод ышӀэмэ, тхьапшырэ фэзгъэгъун фая? Гъогогъуиблым нэса? 22 Сэ осэӀо, гъогогъуибл къодыеп, гъогогъуиблыр тӀокӀищырэ пшӀырэкӀэ штагъэу нахь, риӀожьыгъ Исус. 23 Арышъ, Тхьэу уашъом щыӀэм и Тетыгъошхо зыфэдэр пачъыхьэу зиунэӀутмэ ателъ чӀыфэр зылъытэнэу фэягъэр ары. 24 Ылъытэнэу зыфежьэм, талант минипшӀ чӀыфэ зытелъэу зыгорэ къыфащагъ. 25 Ау къыритыжьынэу амал иӀэпти, ари, ащ ишъузи, ибынхэри, иӀэр зэкӀэ ащэхэзэ, чӀыфэр ригъэпщыныжьынэу пачъыхьэм унашъо ышӀыгъ. 26 Джащыгъум а унэӀутым лъэгонджэмышъхьэкӀэ пачъыхьэм ыпашъхьэ зыщыридзыхи риӀуагъ: «Семыгъэз. ЗэкӀэ остыжьыщт». 27 Пачъыхьэм ыгу унэӀутым егъуи, чӀыфэр фигъэгъуи ытӀупщыжьыгъ. 28 А унэӀутыр зыӀокӀыжьым, адрэ унэӀутмэ ащыщэу динаришъэ чӀыфэ зытелъым ӀукӀи, «Сэ сичӀыфэу птелъыр къысэтыжь», ыӀуи ытхьалэу ыублагъ. 29 Джащыгъум адрэ унэӀутым ащ ыпашъхьэ зыщыридзыхи, елъэӀузэ къыӀуагъ: «Семыгъэз, остыжьыщт». 30 Ау мыдрэм ымыдэу, кӀуи, хьапсым чӀаригъэдзагъ, чӀыфэр къыретыжьыфэ. 31 Адрэ унэӀутхэу ар зылъэгъугъэмэ лъэшэу агу къеуагъэти, тхьаматэм ыдэжь кӀохи, къэхъугъэр зэкӀэ раӀотэжьыгъ. 32 Тхьаматэм а унэӀутыр къаригъащи риӀуагъ: «УнэӀут бзадж, укъысэлъэӀугъэти, сичӀыфэу птелъыгъэр зэкӀэ пфэзгъэгъугъ. 33 Сэ о гукӀэгъу къызэрэпфэсшӀыгъэм фэдэу, ори адрэ унэӀутым гукӀэгъу фэпшӀын фэягъэба?» 34 Тхьаматэр лъэшэу къэгубжыгъэ, ичӀыфэу телъыри зэкӀэ къыретыжьыфэ, аӀыгъынэу а унэӀутыр хьапс ухъумакӀохэмэ аритыгъ. 35 (ЕтӀанэ Исус къыпигъэхъожьыгъ:) Шъуащыщэу хэти ыгукӀэ ышы фэзымыгъэгъурэм сэ Сятэу уашъом щыӀэр ащ фэдэу къыдэзекӀощт.
Шъхьэгъусэ тӀупщыжьыным ехьылӀагъ
1 Исус а гущыӀэхэр къызеӀохэм ыуж, Галилей хэкум икӀи, Иудей хэкоу Иордан псыхъом иадрабгъу щыӀэм кӀуагъэ. 2 ЦӀыф купышхохэри ыуж итхэу кӀуагъэх, ахэмэ ясымаджэхэри а чӀыпӀэм щигъэхъужьыгъэх. 3 Джащыгъум фарисей заулэ Исус къыбгъодахьэхи, хагъэукъоным пае къеупчӀыгъэх: Сыд фэдэ шхьаусыгъом къыхэкӀыкӀэ лӀым ишъуз ытӀупщыжьыныр хабзэкӀэ хъущта? 4 Тхьэу щыӀэр зэкӀэ къэзыгъэхъугъэм ублапӀэм дэжь цӀыфхэр «хъулъфыгъэрэ бзылъфыгъэрэ къыгъэхъугъэх», ыӀоу, Тхьэм игущыӀэ тхыгъэхэм арытхэм шъуяджагъэба? пэгъокӀ ытыжьыгъ Исус. 5 «Ащ къыхэкӀыкӀэ лӀыр ятэянэхэм ахэкӀынышъ, ишъуз гъусэ фэхъунышъ, итӀур зыпкъы хъущтых», ыӀоу, Тхьэм зэриӀуагъэм шъуеджагъэба? 6 Арэущтэу ахэр зыпкъых нахь, пкъитӀоу хъужьхэрэп. Арышъ, а тӀоу Тхьэм гъусэ зэфишӀыгъэхэр цӀыфым зэгуигъэкӀыжьы хъущтэп. 7 Адэ, «Зы лӀы горэм зэритӀупщыжьырэ тхылъ ишъуз ритымэ, шъузыр ытӀупщыжьы хъущт», ыӀуи, пегъдмбар Мусэ сыд пае унашъо къышӀыгъа, къыраГуагъ фарисейхэм Исус. 8 Шъуигуркъагъэ пае шъуишъузхэр шъутӀупщыжьынхэу пегъымбар Мусэ фит шъуишӀыгъ, ариӀожьыгъ Исус. Ау ублапӀэм дэжь арэущтэу щытыгъэп. 9 Ау сэ шъосэӀо, ишъуз зинэ ымышӀагъэу хэтми зытӀупщыжьэу, нэмыкӀ бзылъфыгъэ къэзыщэжьырэм зинэ ышӀагъэу мэхъу. Ащ фэдэу хэтми лӀы горэм ытӀупщыжьыгъэ шъуз къэзыщэжьырэм зинэ ышӀагъэу мэхъу. 10 ЛӀымрэ шъузымрэ зэрэзэфыщытыр арэу щытмэ, ащыгъум къэмыщэныр нахьышӀу, аӀуи, игъогу рыкӀохэрэмэ Исус къыраӀуагъ. 11 Сэ къэсӀуагъэр хэти ыштэн ылъэкӀыщтэп, ариӀожьыгъ Исус. Ар зыштэн зылъэкӀхэрэр Тхьэм лъэкӀыныгъэ къызэритыгъэхэр ары ныӀэп; 12 сыда пӀомэ цӀыфхэм ащыщхэу зы куп янэмэ къызэралъфэу къащэни дэкӀони амылъэкӀынэу къэхъухэшъ, къащэни дэкӀони алъэкӀырэп. НэмыкӀхэми къащэн амылъэкӀынэу цӀыфхэм ашӀыгъэх. ЕтӀанэ нэмыкӀхэми Тхьэу уашъом щыӀэм и Тетыгъошхо ыӀэчӀэгъ чӀэтынхэм пае, ежьхэм къащэни дэкӀони адэрэп. Ар зыштэн зылъэкӀырэм ерэштэ.
Исусрэ сабыйхэмрэ
13 Джащыгъум цӀыфхэм сабыйхэр Исус къыфащагъэх, Тхьэм ынэшӀу къащифэным пае, Исус ыӀэхэр атырилъхьанхэуи Тхьэм афелъэӀунэуи. Ау Исус игъогу рыкӀохэрэм афадагъэп. 14 Ау Исус къыӀуагъ: Сабыйхэр мо садэжь къэрэкӀох, зи яшъумыӀоу, сыда пӀомэ ащ фэдэхэр Тхьэу уашъом щыӀэм и Тетыгъошхо ыӀэчӀэгъ чӀэтых. 15 ЕтӀанэ Исус ыӀэхэр ахэмэ атрилъхьагъэх. Ащ нэужым а чӀыпӀэм икӀыжьыгъ.
КӀэлэ баир
16 Зы лӀы горэ Исус къыбгъодахьи къыӀуагъ: Дин гъэсакӀу, мыкӀодыжьын щыӀэныгъэ згъотыным пае, сыд дэгъоу сшӀэщтыр? 17 ДэгъумкӀэ сыд пае укъысэупчӀыра? риӀожьыгъ Исус а лӀым. Тхьэм нэмыкӀ дэгъу зи щыӀэп. МыкӀодыжьын щыӀэныгъэ бгъотынэу уфаемэ, Тхьэм иунашъохэр гъэцакӀэх. 18 Сыд унашъоха? къыриӀожьыгъ адрэм Исус. «ЦӀыф умыукӀы, зинэ умышӀэ, умытыгъу, нэмыкӀ цӀыфхэм пцӀы атемылъхь, 19 уятэрэ уянэрэ лъытэныгъэ афэшӀ, о пшъхьэ шӀу зэрэплъэгъурэм фэдэу, уигъунэгъури шӀу лъэгъу», къыӀожьыгъ Исус. 20 СикӀэлэгъу къыщегъэжьагъэу ахэр зэкӀэ сэгъэцакӀэх, къыриӀожьыгъ кӀалэм Исус. Сыда джыри сищыкӀагъэр? 21 Зишъыпкъагъэ щыкӀагъэ зи зимыӀэ цӀыф икъугъэу ухъунэу уфаемэ, кӀуи, уимылъку щэжьи, ахъщэр тхьамыкӀэхэм ят, риӀожьыгъ Исус. Джащыгъум мылъкушхо уашъом щыуиӀэ хъущт. ЕтӀанэ къакӀуи, сауж къырыкӀу. 22 КӀалэм ар зызэхехым, ыгу къеоу ӀукӀыжьыгъ, сыда пӀомэ мылъкушхо иӀагъэти ары. 23 Шъыпкъэр шъосэӀо, Тхьэу уашъом щыӀэм и Тетыгъошхо ыӀэчӀэгъ чӀэхьаныр баимкӀэ къин, ариӀуагъ Исус игъогу рыкӀохэрэм. 24 Джыри шъосэӀо, баир Тхьэм и Тетыгъошхо ыӀэчӀэгъ чӀэхьаным нахьи, махъшэр мэстанэм икӀыныр нахь ӀэшӀэх. 25 Исус къыӀуагъэр игъогу рыкӀохэрэм зызэхахым, ар лъэшэу агъэшӀагъоу къеупчӀыгъэх: Арэущтэу щытмэ, ежьым зимыгъэкӀодэу, хэта зыкъэзыгъэнэжьын зылъэкӀыщтыр? 26 Исус ахэмэ яплъи ариӀуагъ: ЦӀыфхэм ежьхэм замыгъэкӀодэу, зыкъагъэнэжьын алъэкӀырэп, ау Тхьэм ымылъэкӀын Ӏоф зи щыӀэп. 27 Мо къэдаӀолъ, тэ тиӀэгъэ пстэури къэдгъани, о уауж тыкъырыкӀуагъ, къыриӀуагъ Петр Исус. Сыда ащыгъум ӀэхьышӀоу тэ къэдгъотыщтыр? 28 Шъыпкъэр шъосэӀо, ариӀуагъ Исус, адрэ дунаем ЦӀыф Лъэпкъым Ыкъо щытхъушхо иӀэу итӀысыпӀэ лъапӀэ зытетӀысхьэкӀэ, шъо сауж къырыкӀуагъэхэр тӀысыпӀэ лъапӀэ пшӀыкӀутӀум шъуатетӀысхьанышъ, мысэхэмрэ хыехэмрэ зэхэжъудзыхэзэ, Израил иунэгъо лъэпкъ пшӀыкӀутӀумэ хьыкум атешъушӀыхьащт. 29 Хэт щыщми е зиунэхэр, е зышхэр, е зышыпхъухэр, е зятэ, е зянэ, е зибынхэр, е чӀыгухэр сэщ пае къэзыгъэнагъэм фэдишъэу къыгъотыщт, мыкӀодыжьын щыӀэныгъи ӀэхьышӀоу къылъысыщт. 30 Ау апэ итхэм ащыщхэу бэхэр ауж къинэщтых, ауж итхэри апэу хъущтых.
СэнэшъхьашӀэхэм яхьылӀэгъэ гъэсэпэ тхыдэр
1 Тхьэу уашъом щыӀэм и Тетыгъошхо зыфэдэр мары. Зы сэнэшъхьэ хатэ зие горэм пчэдыжьым жьэу лэжьакӀохэр исэнэшъхьэ хатэм щигъэлэжьэнхэм пае алъыхъунэу дэкӀыгъ. 2 ЛэжьакӀохэр къызегъотхэм, адэгущыӀи, мафэм динар зырыз аритынэу зэгурыӀохи, Ӏоф ашӀэнэу исэнэшъхьэ хатэ ыгъэкӀуагъэх. 3 Пчэдыжьым сыхьатыр бгъум дэжь сэнэшъхьэ хатэр зиер дэкӀи, ахэмэ анэмыкӀхэу Ӏоф зимыӀэ лӀыхэр бэдзэрым дэжь Ӏутхэу ылъэгъугъэх. 43 елъэгъухэм мырэущтэу ариӀуагъ: «Шъори сисэнэшъхьэ хатэ шъукӀу, къышъутефэрэр шъостын». Арэущтэу зареӀом, ахэри кӀуагъэх. 5 Щэджагъом дэжьи, сыхьатыр щым дэжьи, сэнэшъхьэ хатэр зиер джыри дэкӀи, ыпэрэм фэдэу ышӀагъ. 6 ЫкӀэм ыкӀэжьым сыхьатыр тфым дэжь дэкӀи, нэмыкӀхэри щытхэу зегъотхэм, ариӀуагъ: «Мэфэ реным зи шъумышӀэу, мыщ дэжьым сыда шъузыкӀыщытыр?» 7 Адрэмэ къыраӀожьыгъ: «Ӏоф тэзыгъэшӀэн дгъотыгъэп». Арэущтэу къызаӀом, сэнэшъхьэ хатэр зием ариӀожьыгъ: «Шъори шъукӀуи, сисэнэшъхьэ хатэ шъущылажь. Къышъутефэрэр къышъостын». 8 Пчыхьашъхьэр къызэсым, сэнэшъхьэ хатэр зием лэжьакӀохэмэ япащэ риӀуагъ: «ЛэжьакӀохэм къяджи, ауж къэкӀуагъэхэмкӀэ къэубли, апэрэхэм анэсэу мэфапкӀэр ят». 9 Сыхьатыр тфым Ӏофыр зыублагъэхэр къызэкӀохэм, лэжьакӀомэ япащэ динар зырыз аритыгъ. 10 ЕтӀанэ Ӏофыр апэу зыублагъэхэр къызэкӀохэм, нахьыбэ аритынэу гугъагъэх, ау ахэми динар зырыз аритыгъ. 11 Ахъщэр заштэм, сэнэшъхьэ хатэр зием фэтхьаусыхагъэх. 12 «Тэ мэфэ реным фэбэ Ӏаем тыхэтэу, къин тщэчызэ Ӏоф тшӀагъэ пэтми, мы лӀыхэу ауж къэкӀуагъэхэу, зы сыхьат нахь Ӏоф зымышӀагъэмэ тафэбгъэдагъ», къаӀуагъ. 13 Ау сэнэшъхьэ хатэр зием ахэмэ ащыщэу зыгорэм риӀуагъ: «Синыбджэгъу. Мыхъун зи къыуасшӀэрэп. Зы динарба тызэрэзэгурыӀуагъэр? 14 УимэфапкӀэ шти, кӀожь. Мы лӀэу ауж къэкӀуагъэми о остыгъэм фэдиз естынэу сыфай. 15 Сэ сызыфаер сиахъщэ есшӀэн сыфитба? Хьауми о ошъугъуа, сэ сыгу шӀугъэ зэрилъым пае?» 16 (ЕтӀанэ Исус къыпигъэхъожьыгъ:) Арэущтэу ауж итхэр апэу хъущтых, апэ итхэри ауж къинэщтых; сыда пӀомэ, къеблэгъагъэхэр бэ, ау къыхэхыгъэу щытхэр макӀэх.
Исус ежьыр зэраукӀыщтри, лӀагъэхэм къызэрахэтэджыкӀыжьыщтри ящэнэрэу къызэриӀуагъэр
17 ЕтӀанэ Исус Ерусалим дэкӀуаеу, гъогум зытетым, игъогу рыкӀорэ нэбгырэ пшӀыкӀутӀур зы лъэныкъокӀэ язакъоу Ӏуищыхи ариӀуагъ: 18 Мары тэ джы Ерусалим тыдэкӀуае. Ащ дэжьым ЦӀыф Лъэпкъым Ыкъо дин пэщэшхохэмрэ Тэурат егъэджэкӀо пащэхэмрэ аӀэкӀэхьащт. Ахэмэ ежьым укӀ къытыралъхьащт, 19 къыкӀэнэкӀэнхэуи, къамыщкӀэ къеонхэуи, къащым раӀулӀынэуи хымэ лъэпкъхэм аӀэкӀалъхьащт; ящэнэрэ мафэми ежьыр лӀагъэхэм къахэтэджыкӀыжьыщт.
Зеведей ыкъохэм янэ Исус Ӏофэу зыкӀелъэӀугъэр
20 Джащыгъум Зеведей ыкъохэм янэ, ыкъохэри игъусэхэу, Исус къыбгъодахьи, лъэгонджэмышъхьэкӀэ ыпашъхьэ къитӀысхьи, зыгорэкӀэ къелъэӀунэу фэягъ. 21 Сыда узыфаер? риӀуагъ Исус бзылъфыгъэм. О уитетыгъошхо къызысыкӀэ, мы скъуитӀу зыр уиджабгъукӀэ, адрэри уисэмэгубгъукӀэ къэтӀысынхэу фит шӀы, къыриӀожьыгъ бзылъфыгъэм. 22 Шъо шъузыкӀэлъэӀурэр шъушӀэрэп, къыӀожьыгъ Исус. Сэ сызэшъощт къиныгъэм ишъуалъэ итым шъо шъуешъон шъулъэкӀыщта, хьауми цӀыфхэм Ӏаеу сызэраумэхъыщт шӀыкӀэм фэдэу, зяжъугъэумэхъын шъулъэкӀыщта? ТлъэкӀыщт, къыраӀожьыгъ ахэмэ. 23 Сэ сызэшъощт къиныгъэм ишъуалъэ итым шъори шъуешъощт, ариӀуагъ Исус. ЦӀыфхэм сэ Ӏаеу сызэраумэхъыщт шӀыкӀэм фэдэу, шъори шъуаумэхъыщт. Ау сэ сиджабгъукӀэ ыкӀи сисэмэгубгъукӀэ шъукъэтӀысынэу фит шъусшӀын слъэкӀыщтэп. А тӀысыпӀэхэр цӀыфхэу Сятэ зыфигъэхьазырыгъэхэм яй. 24 Адрэ нэбгырипшӀэу Исус игъогу рыкӀохэрэм ар зызэхахым, зэшитӀумэ афэгубжыгъэх. 25 Ау Исус игъогу рыкӀохэрэм къяджагъ. Шъо шъошӀэ, ариӀуагъ Исус, мы дунаем тет пщыхэр цӀыфхэм апшъэ зэрэдэсхэрэр, тхьаматэхэм цӀыфхэм тетыгъо зэрафыряӀэри шъошӀэ. 26 Ау шъо шъуазыфагу арэп зэрэщытын фаер. Шъуащыщэу ин хъунэу фаер Ӏофтабгэу къышъуфэхъун фае. 27 Шъуащыщэу апэ итынэу фаери гацылӀ къышъуфэхъун фае. 28 Ащ фэдэу ЦӀыф Лъэпкъым Ыкъо цӀыфхэм яшӀуагъэ ежьым зэригъэкӀыжьыныр арэп къызфэкӀуагъэр, ежьым ишӀуагъэ цӀыфхэм аригъэкӀыныр, цӀыфыбэхэми апае ыпсэ шъхьэщэфыжьэу ытыныр ары нахь.
Исус лӀы нэшъуитӀур зэригъэхъужьыгъэхэр
29 Ащ нэуж Исусрэ игъогу рыкӀохэрэмрэ Ерихон къалэм къызыдэкӀыжьхэм, цӀыф купышхо ыуж итэу кӀощтыгъ. 30 А чӀыпӀэм лӀы нэшъуитӀу гъогу напцэм Ӏусыгъэх. Ахэмэ Исус зэрэблэкӀырэр зызэхахым, мэкъэшхокӀэ къаджэхэу къаублагъ: Тхьаматэу Даутэ Ыкъу, гукӀэгъу къытфэшӀ! 31 Ау цӀыф купышхом хэтхэм амыдэу, «Щыжъугъэт!» аӀуи араӀуагъ, ауми лӀы нэшъуитӀур джыри нахь мэкъэшхокӀэ къэджагъэх: Тхьаматэу Даутэ Ыкъу, гукӀэгъу къытфэшӀ! 32 Исус къызэтеуцуи, къяджи ариӀуагъ: Сыда шъуфэсшӀэнэу шъузыфаер? 33 Тхьаматэ, тынэхэр къэгъэплъэжьых, къыраӀожьыгъ ахэмэ. 34 Исус ыгу ахэмэ акӀэгъуи, анэхэм атеӀэбагъ. Ардэдэми ахэмэ анэхэр къэплъэжьыгъэх, Исуси ыуж ихьагъэх.
Щытхъушхо иӀэу, Исус Ерусалим зэрэдэхьагъэр
1 Исусрэ игъогу рыкӀохэрэмрэ Ерусалим игъунэгъу хъугъэх. Елеон зыцӀэ Ӏуашъхьэм Ӏус Виффагие къуаджэм къызынэсхэм, Исус игъогу рыкӀохэрэм ащыщхэу нэбгыритӀу апэ ыгъэкӀуагъэх, 2 мырэущтэу ариӀозэ: ШъуапэкӀэ ит къуаджэм шъудахь. Шъузэрэдахьэу щыдыбз горэ, ищыд къунан игъусэу, епхыгъэу шъуапэ къифэщт. Ахэр къыкӀэрышъутӀэтыкӀхи, къысфашъущэх. 3 Зыгорэм зыгорэ къышъуиӀомэ, «Тхьаматэр мыхэм афай», ешъуӀуи, занкӀэу къэшъущэнхэу фит шъуишӀыщт. 4 Арэущтэу зыфэхъугъэр пегъымбарым мы гущыӀэхэу къыӀуагъэхэр къэшъыпкъэжьынхэр ары: 5 «Къалэу Сион пхъум фэдэм ешъуӀу: Еплъ, гушъэбагъэ иӀэу ыкӀи щыдым тесэу, уипачъыхьэ къыпфэкӀо; ар зытесыр щыдыбзым икъунан ары». 6 Игъогу рыкӀохэрэр кӀохи, Исус зэрариӀуагъэм тетэу ашӀыгъ. 7 Щыдыбзымрэ щыд къунанымрэ къащэхи, ящыгъынхэр атыралъхьагъэх, щыгъынхэми акӀыӀу Исус тетӀысхьагъ. 8 ЦӀыф купышхомэ ящыгъынхэр гъогум тыраубгъощтыгъэх, нэмыкӀхэми къутамэхэр чъыгымэ къапаупкӀыхэти, гъогум тыралъхьэщтыгъэх. 9 ЦӀыф купышхохэу Исус ыпэ итхэу кӀощтыгъэхэми, ыуж итхэу кӀощтыгъэхэми мэкъэшхокӀэ аӀощтыгъ: Хьусаннэ, Даутэ Ыкъо ыдэжь! Зиусхьаным ыцӀэкӀэ къакӀорэм щытхъушхор ий! Хьусаннэ! Анахь Иным щытхъушхор ий! 10 ЕтӀанэ Исус Ерусалим зыдахьэм, зэрэкъалэу къэбырысыри, цӀыфмэ къаӀощтыгъ: Мыр хэта? 11 Ар Исус ары, Галилей хэкум щыщ Назарет къалэм къикӀыгъэ пегъымбарыр, къаӀощтыгъэ цӀыф купышхохэм.
Исус щэнщэфакӀохэр Тхьэм иунэшхо къызэрэчӀифыгъэхэр
12 Ащ нэужым Исус Тхьэм иунэшхо чӀахьи, щэнщэфакӀохэу ащ чӀэтхэр зэкӀэ къычӀифыхэу ыублагъ; ахъщэ зыхъожьхэрэм яӀанэхэмрэ тхьаркъо зыщэхэрэм япхъэнтӀэкӀухэмрэ зэпыригъэзагъэх. 13 Исус ахэмэ ариӀуагъ: Тхьэм къызэриӀорэр игущыӀэ тхыгъэхэм арыт, «Сэ сиунэ тхьэлъэӀупӀэу щытыщт», ау шъо «хъункӀэкӀо гъэбылъыпӀэм» фэдэу шъошӀы. 14 Исус Тхьэм иунэшхо чӀэтэу, нэшъухэмрэ лъащэхэмрэ ыдэжь къакӀохи, ежьым ащ дэжьым ахэр щигъэхъужьыгъэх. 15 Ау дин пэщэшхохэмрэ Тэурат егъэджэкӀо пащэхэмрэ Исус ышӀэгъэ Ӏоф гъэшӀэгъонхэр залъэгъухэм, сабыйхэр Тхьэм иунэшхо чӀэтхэу, «Хьусаннэ Даутэ Ыкъо ыдэжь!» аӀоу, къэзэрэджагъэхэри зызэхахым, амыдэу, 16 Исус къыраӀуагъ: Ахэмэ къаӀохэрэр зэхэоха? Зэхэсэхы, ариӀожьыгъ Исус, ау ныбжьи шъуеджагъэба Даутэ мыщ фэдэу Тхьэм зэрэриӀуагъэм: «Сабыйхэмрэ сабый быдзашъохэмрэ аӀупӀэхэмкӀэ щытхъу къызфябгъэшӀыгъ». 17 ЕтӀанэ Исус ахэмэ ахэкӀи, къалэм дэкӀи, Вифание къуаджэм кӀуи, ащ чэщыр щырихыгъ.
Исус ынджыр чъыгым зэребгыгъэр
18 Нэф къызэшъым, Ерусалим къэкӀожьызэ, Исус къэмэлэкӀагъ. 19 Гъогум Ӏутэу ынджыр чъыг зелъэгъум, ащ къыӀухьагъ, ау тхьапэ нэмыкӀ зи пымытэу зелъэгъум, мырэущтэу чъыгым риӀуагъ: ЕгъашӀэми о зи къыппымыкӀэжьынэу орэхъу! Ар къызэриӀоу ынджыр чъыгыр гъугъэ. 20 Ар залъэгъум, игъогу рыкӀохэрэм агъэшӀагъоу аӀуагъ: Сыдэущтэу ынджыр чъыгыр ащ фэдэу псынкӀэу гъугъа? 21 Шъыпкъэр шъосэӀо, ариӀуагъ Исус ахэмэ, шъугу щэч къишъумыгъахьэу, шӀошъхъуныгъэ шъуиӀэмэ, ынджыр чъыгым къехъулӀагъэм имызакъоу шъушӀэн шъулъэкӀыщт, мы Ӏуашъхьэми, «ЗыкъэӀэти, хым зыхадз», зешъуӀокӀэ, арэущтэу хъущт. 22 ШӀошъхъуныгъэ шъуиӀэмэ, сыд щыщкӀи шъуелъэӀумэ, Тхьэм ар къышъуфишӀэщт.
Джурт тхьаматэхэр Исус итетыгъо къезытыгъэмкӀэ къызэреупчӀыгъэхэр
23 ЕтӀанэ Исус Тхьэм иунэшхо чӀахьи, цӀыфхэм Тхьэм игущыӀэхэр аригъашӀэхэу ыублагъ. Ахэмэ аригъашӀэхэ зэхъум, дин пэщэшхохэмрэ цӀыфхэм янахьыжъхэмрэ къыбгъодахьэхи къаӀуагъ: Мы Ӏофхэр пшӀэнхэу фитыныгъэр тыда къыздипхыгъэр? Ахэр пшӀэнхэу тетыгъор хэта о къыозытыгъэр? 24 Сэри шъо зы Ӏоф горэкӀэ сышъоупчӀыщт, ариӀожьыгъ Исус. ПэгъокӀ къысэшъутыжьмэ, сэри шъосӀон мы Ӏофхэр сшӀэнхэу фитыныгъэр къыздисхыгъэр. 25 Иуан цӀыфхэр ыумэхъынхэу хэт къэзыгъэкӀуагъэр? ЦӀыфхэр ара, хьауми Тхьэр ара? «Тхьэр ары Иуан къэзыгъэкӀуагъэр», тӀомэ, ежьым къытиӀожьыщт: «Адэ, сыд пае Иуан къыӀуагъэхэр шъушӀошъ мыхъугъа?» аӀозэ, ахэр зэупчӀыжьыгъэх. 26 Ау «ЦӀыфхэр ары Иуан къэзыгъэкӀуагъэхэр», тӀомэ, цӀыфхэм тащыщынэн фае, сыда пӀомэ цӀыф пстэуми Иуан пегъымбарэу зэрэщытыгъэр алъытэшъ ары. 27 Арыти, ТшӀэрэп, аӀуи, Исус къыраӀожьыгъ. Ащыгъум сэри шъосӀощтэп мы Ӏофхэр сшӀэнхэу фитыныгъэр къыздисхыгъэр, ыӀуи, Исус ахэмэ ариӀожьыгъ.
яхьылӀэгъэ гъэсэныгъэ тхыдэр
28 ЕтӀанэ Исус къыӀуагъ: Сыдэущтэу шъо шъухаплъэра? ЛӀы горэм къуитӀу иӀагъ. А лӀыр апэрэм бгъодахьи риӀуагъ: «СикӀал, кӀуи, непэ сисэнэшъхьэ хатэ щылажь». 29 Ау ащ пэгъокӀ къыритыжьыгъ: «Сыфаеп», арышъхьакӀэ ащ нэужым кӀэгъожьи кӀуагъэ. 30 ЕтӀанэ тыр адрэ кӀалэми бгъодахьи, а дэдэр риӀуагъ. Ащ къыӀожьыгъ: «СыкӀощт, тхьаматэ», ау кӀуагъэп. 31 Хэта тӀумэ язэу ятэ шӀоигъор зыгъэцэкӀагъэр? Апэрэр ары, къыраӀожьыгъ ахэмэ. Шъыпкъэр шъосэӀо, ариӀуагъ Исус, хьакъулахь ахъщэр хэзыххэрэмрэ бзылъфыгъэ хэтакӀохэмрэ шъо шъуапэу Тхьэм и Тетыгъошхо ыӀэчӀэгъ чӀэхьащтых. 32 Сыда пӀомэ Иуан шъыпкъагъэм игъогу шъутыригъэхьанэу къэкӀуагъ, ау шъо Иуан цыхьэ фэшъушӀыгъэп, арышъхьакӀэ хьакъулахь ахъщэр хэзыххэрэмрэ бзылъфыгъэ хэтакӀохэмрэ Иуан ыӀуагъэр ашӀошъ хъугъэ. Шъо ахэмэ ашӀошъ зэрэхъугъэр шъулъэгъугъэ пэтми, шъукӀэгъожьыгъэп, Иуани цыхьэ фэшъушӀыгъэп.
СэнэшъхьэшӀэ бзаджэхэм яхьылӀэгъэ гъэсэныгъэ тхыдэр
33 НэмыкӀ гъэсэныгъэ тхыдэми шъукъедэӀу. Унэ зие горэм сэнэшъхьэ хатэ ыгъэтӀысхьагъ. Мыжъо чэукӀэ къышӀыхьи, сэнэшъхьэ фызалъэ хишӀыхьи, унэ плъэпӀэ лъаги дишӀыхьагъ. ЕтӀанэ сэнэшъхьэшӀэ горэхэм хатэр аӀэ кӀилъхьи, хымэ хэгъэгу горэм кӀуагъэ. 34 ЕтӀанэ сэнэшъхьэ пычыжьыгъор къызэсым, исэнэшъхьэ Ӏахьэ къаӀахынэу сэнэшъхьашӀэхэм адэжь унэӀутхэр ыгъэкӀуагъэх. 35 Ау сэнэшъхьашӀэхэм унэӀутхэр къаубытхи, зыми къеуагъэх, адрэр къаукӀыгъ, ящэнэрэми мыжъохэмкӀэ еохэзэ, къаукӀыгъ. 36 Сэнэшъхьэ хатэр зием джыри зэ унэӀутхэр ыгъэкӀуагъэх, апэу ыгъэкӀуагъэхэм анахьи нахьыбэжьэу. СэнэшъхьашӀэхэм ахэми а дэдэр къарашӀагъ. 37 ЫкӀэм ыкӀэжьым сэнэшъхьэ хатэр зием, «Сэ скъо лъытэныгъэ къыфашӀын», ыӀуи, ыкъо ахэмэ адэжь ыгъэкӀуагъ. 38 Ау сэнэшъхьашӀэхэм сэнэшъхьэ хатэр зием ыкъо залъэгъум, зэраӀожьыгъ: «Мыры сэнэшъхьэ хатэр къызыфэнэжьыщтыр. Ар тэжъутъэукӀи, сэнэшъхьэ хатэр тэ къытфэнэжьыщт». 39 Арэущтэу ари къаубыти, сэнэшъхьэ хатэм къыдадзыжьи къаукӀыгъ. 40 Арышъ, сэнэшъхьэ хатэр зиер къызыкӀожькӀэ, а сэнэшъхьашӀэмэ сыд аришӀэщтыр? къыпигъэхъожьыгъ Исус. 41 Зэхэзыхыгъэхэм Исус мырэущтэу къыраӀуагъ: Сэнэшъхьэ хатэр зием а бзэджашӀэхэр Ӏаеу ыгъэкӀодынхэшъ, нэмыкӀ сэнэшъхьашӀэхэу сэнэшъхьэ пычыжьыгъор къызыскӀэ, исэнэшъхьэ Ӏахьэ къезытыжьыщтхэм хатэр аӀэкӀилъхьащт.
Унэ зышӀыхэрэм зэрамыпэсэу чӀадзыжьыгъэ мыжъор
42 ЕтӀанэ Исус ариӀуагъ: Тхьэм игущыӀэ тхыгъэхэм мырэущтэу зэрарытым шъуеджагъэба: «Унэ зышӀыхэрэм зэрамыпэсэу чӀадзыжьыгъэ мыжъор мыжъо лъэпсэ дэдэу унэм фэхъугъ. Мыр Зиусхьаным иӀэшӀагъэ Ӏоф, ари тэ гъэшӀэгъонэу къытфэлъагъо»? 43 Арышъ, шъосэӀо, къыпигъэхъожьыгъ Исус. Тхьэм и Тетыгъошхо ыӀэчӀэгъ шъучӀэхьаным ифиты ныгъэ шъо шъутырихынышъ, и Тетыгъошхо фэшъуашэу шӀугъэ зыгъэцакӀэрэ нэмыкӀ лъэпкъ горэм ритыщт. 44 Мы мыжъом тефэрэр зэпкъыриутыщт, ау зытефэрэр мыжъом ыщытӀэщт. 45 Мы гъэсэпэ тхыдэхэр дин пэщэшхохэмрэ фарисейхэмрэ зызэхаххэм, ахэмэ яхьылӀагъэу Исус ахэр къызэриӀуатэхэрэр къагурыӀуагъэти, 46 ежьыр къаубытынэу пылъыгъэх, ау цӀыф купышхохэм ащыщынэщтыгъэх, сыда пӀомэ ахэмэ Исус пегъымбаркӀэ алъытэщтыгъэти ары.
Нысэщэ джэгушхом ехьылӀэгъэ гъэсэныгъэ тхыдэр
1 Джыри зэ Исус гъэсэныгъэ тхыдэхэмкӀэ цӀыфхэм ариӀуагъ: 2 Тхьэу уашъом щыӀэм и Тетыгъошхо зыфэдэр мары. Зы пачъыхьэ горэм ыкъо къыригъащи, нысэщэ джэгушхо фишӀыгъ. 3 Къыригъэблэгъэнхэу зэриӀогъэгъэ цӀыфхэм пачъыхьэм иунэӀутхэр алъигъэкӀуагъэх, ау къэкӀонхэу фэягъэхэп. 4 ЕтӀанэ пачъыхьэм ахэмэ анэмыкӀ унэӀутхэр ыгъакӀохи, мырэущтэу ариӀуагъ: «Къезгъэблэгъэнхэу зэсӀогъагъэхэм яшъуӀу: Ӏанэр хьазыр, сицухэри сибылымхэу джэгушхом фэзгъэшхагъэхэри шӀуязгъэбзыгъэх, зэкӀэри хьазыр; джэгушхом шъукъеблагъ». 5 Ау унэӀутхэм къаӀуагъэм а цӀыфхэр ымыгъапэхэу зэбгырыфыгъэх, зыр ихьасэ кӀуагъэ, адрэри иӀоф ыуж ихьажьыгъ. 6 Адрэхэм пачъыхьэм иунэӀутхэр аубытхи, лые арахызэ, къаукӀыгъэх. 7 Пачъыхьэм ар зызэхехым, къэгубжи, идзэ ыгъакӀуи, а цӀыф укӀакӀохэр аригъэгъэкӀодхи, якъали машӀокӀэ аригъэгъэстыгъ. 8 ЕтӀанэ пачъыхьэм иунэӀутхэм ариӀуагъ: «Джэгушхор ашӀынэу хьазыр, ау къезгъэблэгъэнхэу зэсӀогъэгъэ цӀыфхэр къэкӀонхэу яфэшъуашэп. 9 Арышъ, гъогу зэхэкӀыпӀэхэм шъукӀуи, хэт щыщ жъугъотми, джэгушхом къежъугъэблагъ». 10 А унэӀутхэр гъогухэм атехьэхи, агъотыгъэхэр зэкӀэ, цӀыф дэгъуи цӀыф бзаджи, къырагъэблэгъагъ; арэущтэу джэгу зыщашӀырэ унэм изы хъугъэ. 11 Ау етӀанэ пачъыхьэм хьакӀэхэр зэригъэлъэгъунхэу къызехьэм, нысащэм фэшъошэ щыгъын щымыгъэу лӀы горэ ылъэгъугъ. 12 Зелъэгъум, а лӀым еупчӀыгъ: «Синыбджэгъу, мырэущтэу уфэпагъэу сыдэущтэу укъихьагъа?» Ау адрэм зиушъэфыгъ. 13 Джащыгъум пачъыхьэм иунэӀутмэ ариӀуагъ: «Ӏэхъулъэхъу а лӀым тешъулъхьи, шӀункӀыгъэм икуупӀэ хашъудз. Ащ дэжьым куохьауныгъэрэ цэ зэрэгъэшхыныгъэрэ щыхъущтых». 14 Сыда пӀомэ къеблэгъагъэхэр бэ, ау къыхэхыгъэу щытхэр макӀэх, къыпигъэхъожьыгъ Исус.
Хьакъулахь ахъщэм ехьылӀагъ
15 Джащыгъум фарисейхэр кӀохи, Исус игущыӀэ горэм зэрэтыраубытэн шӀыкӀэмкӀэ зэупчӀыжьыгъэх. 16 Арэущтэу фарисейхэм ежьхэм ягъогу рыкӀохэрэр Исус ыдэжь агъэкӀуагъэх, пщэу Ирод ыуж рыкӀохэрэр ягъусэхэу. Ахэмэ къаӀуагъ: Дин гъэсакӀу, шъыпкъагъэ зиӀэ лӀэу узэрэщытри, шъыпкъагъэм тетэу Тхьэм игъогу цӀыфхэм зэрябгъашӀэрэри тэшӀэ. ЦӀыфхэм аӀорэми уигъапэрэп, сыда пӀомэ цӀыфмэ ятеплъэ уемыплъэу, цӀыф пстэури уизэфэдэхэу щытых. 17 Арышъ, къытаӀу, сыд фэдэу ухаплъэра? Кайсарым хьакъулахь ахъщэр етты хъущта, мыхъущта? 18 Ау Исус ахэмэ ябзэджагъэ гу лъитагъэти къыӀуагъ: Сыд пае сыхэжъугъэукъонэу шъупылъа, шъо нэпитӀу зиӀэхэр? 19 Мо хьакъулахь ахъщэр сэжъугъэлъэгъу. Арэущтэу динар ахъщэ Исус къыфахьыгъ. 20 Хэта зисурэт мыщ итыри, хэта зыцӀэ мыщ тетхагъэри? ариӀуагъ Исус. 21 Кайсарыр ары, къаӀуагъ ахэмэ. Ащыгъум Кайсарым иер Кайсарым ешъутыжь, Тхьэм иери Тхьэм ешъутыжь, ариӀуагъ Исус. 22 Ар зызэхахым ахэмэ агъэшӀэгъозэ, Исус къагъани ӀукӀыжьыгъэх.
Саддукейхэр лӀагъэхэм якъэтэджыжьын ехьылӀагъэу Исус къызэреупчӀыгъэхэр
23 А мэфэ дэдэм саддукейхэу лӀагъэхэр къызэрэтэджыжьыщтхэр зышӀошъ мыхъухэрэм ащыщхэу заулэ Исус къыбгъодахьэхи къеупчӀыгъэх: 24 Дин гъэсакӀу, пегъымбар Мусэ ыӀуагъ: «Зы лӀы горэм бын имыӀэу лӀэмэ, а лӀым унагъор фишӀыным пае, ышы шъузабэр къыщэжьын фае». 25 Тэ зэкъошибл къытхэтыгъ. Ахэмэ ащыщэу апэрэм шъуз къыщагъэу дунаем ехыжьыгъ. Бын иӀагъэпти, шъузыр ышы къыфигъэнагъ. 26 Ащ фэдэуи ятӀонэрэми, ящэнэрэми, яблэнэрэм нэс ар къяхъулӀагъ. 27 3эпстэуми ауж дэдэу шъузыри дунаем ехыжьыгъ. 28 Джы лӀагъэхэр къызытэджыжьхэкӀэ, мы зэкъошиблымэ ащыщэу хэта зишъузыщтыр ар? ЗэкӀэми шъузэу яӀагъэба? 29 Шъухэукъо, ариӀожьыгъ Исус ахэмэ. ШъузкӀыхэукъорэр Тхьэм игущыӀэ тхыгъэхэмрэ Тхьэм илъэкӀыныгъэшхомрэ зэрэшъумышӀэхэрэр ары. 30 ЛӀагъэхэр къызытэджыжьхэкӀэ, шъуз къащэжьыщтэп, лӀыми дэкӀожьыщтхэп, уашъом щыӀэ мэлэӀичхэм афэдэхэу щытыщтых нахь. 31 Ау шъыпкъэу лӀагъэхэр къэтэджыжьыщтха, шъуӀоу шъукъэупчӀымэ, мы гущыӀэхэу Тхьэм ыӀуагъэхэм шъуяджагъэба: 32 «Сэры Ибрахьими, Исхьакъи, Якъуби я Тхьэр»? Ащ къикӀырэр Тхьэр псэухэмрэ лӀагъэхэу зыфаӀохэрэмрэ я Тхьэу зэрэщытыр ары. 33 ЦӀыф купышхохэм ар зызэхахым, Исус Ӏофхэу аригъашӀэхэрэр агъэшӀэгъуагъэх.
Тхьэм иунашъохэм ащыщэу анахь ин дэдэр
34 Исус саддукеймэ ажэхэр аригъэубытыгъэхэу фарисеймэ зызэхахым, зэрэугъоигъэх. 35 Ахэмэ ащыщэу зы Тэурат егъэджэкӀо пащэ горэ Исус ыгъэунэфыным пае къеупчӀыгъ: 36 Дин гъэсакӀу, Тхьэм иунашъохэм ащыщэу анахь ин дэдэр тары? 37 «ЗэкӀэ о угурэ упсэрэкӀи, зэкӀэ уизэхэшӀыкӀыныгъэкӀи о Зиусхьанэу уи Тхьэ шӀу лъэгъу», риӀожьыгъ Исус. 38 Анахь ин дэдэу, апэрэ унашъор джары. 39 ЯтӀонэрэ унашъори ащ фэд: «О пшъхьэ шӀу зэрэплъэгъурэм фэдэу, уигъунэгъуи шӀу лъэгъу». 40 Мы унэшъуитӀум пегъымбар Мусэ и Тэурат хабзэ итхэмрэ зэкӀэ адрэ пегъымбархэм аӀуагъэхэмрэ зэкӀэ къырагъэубытых.
Христос хэта зыкъор?
41 Фарисейхэр къызызэрэугъоихэм, Исус ахэм яупчӀыгъ: 42 Христос сыда ешъуӀуалӀэрэр? Хэты ыкъу ар? Даутэ ыкъу ар, къыраӀожьыгъ фарисеймэ. 43 Арэущтэу щытмэ, Тхьэм Ыпсэ ЛъапӀэ Даутэ ыгу къырилъхьи, Христос ехьылӀагъэу «Си Зиусхьан» ыӀозэ, къызэрэригъэӀуагъэр сыдэущтэу хъугъа? ариӀожьыгъ Исус. Даутэ ыӀуагъэба: 44 «Тхьэу Зиусхьаным сэ си Зиусхьан къыриӀуагъ: О уипыйхэр плъэкъо чӀэгъ къычӀэсэгъэуцохэфэ, сэ сиджабгъукӀэ къызготӀысхь»? 45 Ежь Даутэ Христос «си ЗиусхьанкӀэ» еджэ, къыпигъэхъожьыгъ Исус. Арэу зыхъукӀэ, сыдэущтэу Христос Даутэ ыкъоу хъура? 46 3 ыми Исус зы гущыӀэ къыриӀожьын ылъэкӀыгъэп. А мафэм къыщегъэжагъэу ащ нэмыкӀыкӀэ Исус къеупчӀыжьынэу хэти тегушхуагъэп.
Исус Тэурат егъэджэкӀо пащэхэмрэ фарисейхэмрэ ямысагъэ къызэригъэлъэгъуагъэр
1 Джащыгъум Исус цӀыф купышхохэмрэ игъогу рыкӀохэрэмрэ ариӀуагъ: 2 Тэурат егъэджэкӀо пащэхэмрэ фарисейхэмрэ пегъымбар Мусэ итӀысыпӀэ лъапӀэ тетӀысхьагъэх. 3 Арышъ, зэкӀэ шъушӀэн фаеу ыкӀи жъугъэцэкӀэн фаеу ахэмэ къышъуаӀорэр жъугъэцакӀэ, арышъхьакӀэ ашӀэрэр шъумышӀэ, сыда пӀомэ ахэмэ аӀо нахь, агъэцакӀэрэп. 4 Хьылъэу зехьэгъуаехэр зэкӀоцӀапхэзэ, цӀыфхэм атамэхэм атыралъхьэ, ау ежьхэр цӀыфхэм адэӀэпыӀэнхэу зы Ӏэхъуамби агъэхъыерэп. 5 Ахэмэ яшӀушӀэгъэ пстэури цӀыфхэм арагъэлъэгъуным пае ашӀэ. Ахэмэ янэмаз къэмлэнэжьыехэр агъэшъуамбгъох, яшъошэ кӀыхьэхэм якӀапэхэри агъэкӀыхьэх. 6 Ешхэешъошхохэм адэжьи синэгогухэм цӀыфхэр защызэӀукӀэхэкӀи, тхьэмэтэ тӀысыпӀэхэр аубытынхэри шӀу алъэгъу. 7 ЗэӀукӀэхэми ежьхэм аӀэхэм цӀыфхэр ащарагъэбэунхэри, «дин гъэсакӀокӀэ» зэрагъэджэнхэри якӀас. 8 Ау шъо «дин гъэсакӀокӀэ» зэшъумыгъаджэх, сыда пӀомэ дин гъэсакӀоу шъуиӀэ закъор Христос ары, шъо зэкӀэри шъузэкъошых. 9 ШъуятэкӀэ зыми чӀылъэм шъущемыдж, сыда пӀомэ шъо шъуятэу шъуиӀэ закъор уашъом щыӀэ Шъуятэ лъапӀэр ары. 10 Ащ фэдэуи «ушъыякӀокӀэ» зэшъумыгъаджэх, сыда пӀомэ ушъыякӀоу шъуиӀэ закъор Христос ары. 11 Шъо шъуащыщэу анахь ин дэдэр Ӏофтабгэу къышъуфэхъун фае. 12 Сыда пӀомэ хэти ежь ышъхьэ зыгъэиныжьырэр Тхьэм ыгъэцӀыкӀущт, хэти ежь ышъхьэ зыгъэцӀыкӀужьырэри Тхьэм ыгъэиныщт. 13 Сыхьатмыгъо шъуежьагъ, Тэурат егъэджэкӀо пащэхэри, фарисейхэри, шъо нэпитӀу зиӀэхэр! Тхьэу уашъом щыӀэм и Тетыгъошхо икъэлапчъэ цӀыфмэ апашъхьэ щэшъогъэпытэ. Шъо а тетыгъошхом ыӀэчӀэгъ шъучӀахьэрэп, чӀэхьанхэу фаехэри чӀэхьанхэу фит шъушӀыхэрэп. 14 Сыхьатмыгъо шъуежьагъ, Тэурат егъэджэкӀо пащэхэри, фарисейхэри, шъо нэпитӀу зиӀэхэр! Шъузабэхэм яунэхэр къатешъохых, цӀыфмэ зыкъяжъугъэгъэшӀэгъоным паий, тхьэлъэӀухэр шъогъэкӀыхьэх. Ащ пае Тхьэм инэу шъуигъэпщыныжьыщт. 15 Сыхьатмыгъо шъуежьагъ, Тэурат егъэджэкӀо пащэхэри, фарисейхэри, шъо нэпитӀу зиӀэхэр! Шъо чӀыгуМи хыми къащышъокӀухьэ, зы цӀыф закъо шъуидин къижъугъэхьаным пае. Ар къызэжъудэхъукӀэ, шъощ нахьи фэдитӀукӀэ нахь Ӏаеу, джэхьнэм бынэу ар шъогъэхъу. 16 Сыхьатмыгъо шъуежьагъ, шъо пэщэ нэшъухэу мырэущтэу зыӀохэрэр: «Тхьэм иунэшхо ыцӀэкӀэ зыгорэм тхьэ ыӀомэ, ащ зи къикӀырэп, ау Тхьэм иунэшхо идышъэ ыцӀэкӀэ зыгорэм тхьэ ыӀомэ, тхьарыӀуагъэу мэхъу». 17 Шъо акъыл зимыӀэхэу цӀыф нэшъухэр! Тара нахь лъапӀэр: дышъэр ара, хьауми Тхьэм иунэшхоу дышъэр лъапӀэу зышӀырэр ара? 18 Мырэущтэуи шъоӀо: «Къурмэн шӀыпӀэм ыцӀэкӀэ зыгорэм тхьэ ыӀомэ, ащ зи къикӀырэп, ау къурмэныпхъэу къурмэншӀыпӀэм телъым ыцӀэкӀэ зыгорэм тхьэ ыӀомэ, тхьарыӀуагъэу мэхъу». 19 Шъо цӀыф нэшъухэр! Тара нахь лъапӀэр, къурмэныпхъэр ара, хьауми къурмэншӀыпӀэу къурмэныпхъэр лъапӀэу зышӀырэр ара? 20 Арышъ, къурмэншӀыпӀэм ыцӀэкӀэ тхьэ зыӀорэм къурмэншӀыпӀэм ыцӀэкӀи, ащ телъ пстэумэ ацӀэкӀи тхьэ ыӀуагъэу мэхъу. 21 Джащ фэд Тхьэм иунэшхо ыцӀэкӀэ тхьэ зыӀорэми Тхьэм иунэшхо ыцӀэкӀи, ащ чӀэсым ыцӀэкӀи тхьэ ыӀуагъэу мэхъу. 22 Уашъом ыцӀэкӀэ тхьэ зыӀорэми Тхьэм итӀысыпӀэ лъапӀэ ыцӀэкӀи, ащ тесым ыцӀэкӀи тхьэ ыӀуагъэу мэхъу. 23 Сыхьатмыгъо шъуежьагъ, Тэурат егъэджэкӀо пащэхэри, фарисейхэри, шъо нэпитӀу зиӀэхэр! Хатэм къыдэкӀагъэхэм анахь пыутэхэм ащыщэу зы пшӀанэр Тхьэм пае шъоты, ау Тэурат хабзэм итхэу, нахь Ӏофхэу жъугъэцэкӀэн фаехэу, зэфагъэр, гукӀэгъуныгъэр, Тхьэм фэшъыпкъэныгъэр къэшъогъанэх. Ахэр ары жъугъэцэкӀэн фаехэр, адрэ Ӏофхэри къэшъумыгъанэхэу. 24 Шъо пэщэ нэшъухэр! Шъузашъорэм аргъоир хэшъухызэ, махъшэу хэлъыр шъодыры. 25 Сыхьатмыгъо шъуежьагъ, Тэурат егъэджэкӀо пащэхэри, фарисейхэри, шъо нэпитӀу зиӀэхэр! Шъо шъуишъуалъэхэмрэ шъуилагъэхэмрэ акӀыбхэр шъогъэкъабзэх, ау акӀоцӀхэм нэйпсыягъэрэ зымыщыӀэныгъэрэ нахь зи арылъхэп. 26 О фарисей нэшъур! ЫпэрапшӀэу шъуалъэмрэ лагъэмрэ акӀоцӀ гъэкъабзэ, джащыгъум акӀыбхэри къабзэу хъущтых. 27 Сыхьатмыгъо шъуежьагъ, Тэурат егъэджэкӀо пащэхэри, фарисейхэри, шъо нэпитӀу зиӀэхэр. Шъо фыжьэу зыкӀыӀу гъэлагъэ къэунэхэм шъуафэд. Ахэр дахэу къэлъа гъох, арышъхьакӀэ акӀоцӀыкӀэ хьэдэкъупшъхьэрэ сыдрэ зы шӀоигъэрэ ачӀизых. 28 Ащ фэдэу шъори шъуитеплъэкӀэ шъыпкъагъэр зиӀэ цӀыфхэм шъуафэдэу цӀыфхэм шъукъа фэлъагъо, ау шъукӀоцӀыкӀэ нэпитӀугъэрэ бзэджагъэрэ шъу кӀоцӀизых. 29 Сыхьатмыгъо шъуежьагъ, Тэурат егъэджэкӀо пащэхэри, фарисейхэри, шъо нэпитӀу зиӀэхэр! Пегъымбархэм апае къэунэхэр шъогъэуцух, шъыпкъагъэ зиӀэ цӀыфхэм якъэнэтӀэхэсхэри шъогъэкӀэракӀэх. 30 Ау щытми, «Тятэжъхэм ямафэхэм тэ тыщыӀагъэмэ, ахэмэ пегъымбармэ алъ загъачъэм, гъусэ тафэхъущтгъэп», шъоӀо. 31 Джаущтэу шъоӀозэ, пегъымбархэр зыукӀыгъэмэ акъохэу шъузэрэщытыр шъоршъорэу къэшъоушыхьатыжьы. 32 Дэгъуба ащыгъум, шъуятэжъхэм къаублэгъэ Ӏофыр ижъугъэкъужь. 33 Шъо блэхэр! Шъо блэщылъфэхэр! Джэхьнэмым шъукӀонэу Тхьэм къышъутырилъхьащтым сыдэущтэу шъуӀэкӀэкӀын? 34 Ащ пае мары пегъымбархэри, зэхэшӀыкӀыныгъэ зиӀэ цӀыфхэри, дин гъэсакӀохэри сэ къышъуфэсэгъакӀох. Ахэмэ ащыщэу зы купыр къащым ешъуӀулӀынышъ, шъуукӀыщтых; адрэ купми шъуисинэгогухэм къамыщкӀэ шъущяощт, зы къалэм дэшъуфыхэзэ адрэ къалэм шъуфыщтых. 35 Арэущтэу дунаем щагъэчъэгъэ лъы хыер зэкӀэ шъо къышъутефэщт, шъыпкъагъэ зиӀэу пегъымбар Авел ылъ щегъэжьагъэу пегъымбар Зэкъариеу Варахый ыкъо ылъ къыхиубытэу. Пегъымбар Зэкъариер ары Тхьэм иунэшхорэ къурмэн шӀыпӀэмрэ азыфагу щышъуукӀыгъагъэр. 36 Шъыпкъэр шъосэӀо, мы мыхъомышӀэ Ӏоф пстэуми ямысагъэ джырэ цӀыфхэм къатефэщт.
Ей Ерусалим!
37 Ей Ерусалим, Ерусалим! УицӀыфхэм пегъымбархэр аукӀых, Тхьэм илӀыкӀохэми мыжъохэмкӀэ яохэзэ аукӀых. Бзыум ищырхэр ытамэмэ ачӀэгъ зэрэщычӀиугъуаехэрэм фэдэу, сыд фэдизрэ уибынхэр зэсыугъоилӀэнхэу сэ сыфэягъ, ау шъо шъуфэягъэп. 38 Мо зэ шъуеплъ, Тхьэр шъуикъалэ нэшӀукӀэ къеплъыжьыщтэп. 39 Сэ шъосэӀо, «Зиусхьаным ыцӀэкӀэ къэкӀорэм щытхъушхор ий!» зыщышъуӀощт мафэм нэсыфэ, сышъулъэгъужьыщтэп.
Исус Тхьэм иунэшхо зэрэзэхакъутэщтыр къызэриӀуагъэр
1 Исус Тхьэм иунэшхо къычӀэкӀыжьи, ӀукӀыжьы зэхъум, Тхьэм иунэшхо хэт унэхэр Исус рагъэлъэгъунэу игъогу рыкӀохэрэр къыбгъодэхьагъэх. 2 Мы пстэури шъолъэгъуа? ариӀуагъ Исус ахэмэ. Шъыпкъэр шъосэӀо, мыжъуитӀу къызэтемынэжьэу, пстэури къызэхэтэкъощтых.
Къиныбэ щэчыныгъэм иублапӀ
3 Ащ ыужым Исус Елеон зыцӀэ Ӏуашъхьэм тесэу, игъогу рыкӀохэрэм язакъоу къыбгъодахьэхи къеупчӀыгъэх: КъытаӀу, о зыфэпӀогъэ Ӏофхэр сыдигъо къэхъущтых, о дунаем укъызэрэкӀожьыщтымрэ дунаем икӀэух къызэрэкӀощтымрэ янэшанэхэри сыд фэдэха? 4 Зыми шъукъызэримыгъэпцӀэщтым шъуфэсакъ,ариӀожьыгъ Исус. 5 Сыда пӀомэ сэ сцӀэкӀэ зэджэжьхэу, «Сэры Христос», аӀоу, цӀыфхэу къэкӀощтхэр бэу хъущтых, цӀыфыбэхэри агъэпцӀэщтых. 6 Благъэми чыжьэми зэо къэбар зэхэшъухыщт, ау шъо шъущынэнэу ищыкӀагъэп. А Ӏофхэр къэхъунхэ фае, ау дунаем икӀэух къэсыгъэу щытыгоп. 7 Зы лъэпкъыр адрэ лъэпкъым, зы пачъыхьагъори адрэ пачъыхьагъом езэонэу къэтэджыщт. Гъаблэхэри къэхъущтых, чӀыпӀэчӀыпӀэхэмкӀи чӀыгур инэу щысысыщт. 8 А Ӏофхэр зэкӀэ къиныбэ щэчыныгъэм иублапӀэ ныӀэп. 9 ЦӀыфхэм шъо къин шъуагъэщэчыным пае, тетыгъо зиӀэхэм шъуаӀэкӀагъэхьанышъ, шъуарагъэукӀыщт, сэ сцӀэ зэрэжъугъэлъапӀэрэм паий, лъэпкъ пстэуми шъуауджэгъущт. 10 Джащыгъум цӀыфыбэ шӀошъхъуныгъэм игъогу текӀыщтых; зым адрэр тетыгъо зиӀэхэм аригъэубытыщт, зым адрэри ыуджэгъущт. 11 Пегъымбар нэпцӀыбэхэр къэлъэгъощтых, цӀыфыбэхэри къагъэпцӀэщтых. 12 Бзэджагъэм къызэрэхэхъощтым къыхэкӀэу, цӀыфыбэмэ яшӀулъэгъуныгъэ чъыӀэу хъущт. 13 Ау кӀэухым нэсыфэ теубытэныгъэ зиӀэр мыкӀодэу Тхьэм къыгъэнэжьыщт. 14 Ау сэ къысфэлажьэрэ цӀыфхэм Тхьэм и Тетыгъошхо ехьылӀэгъэ къэбарышӀур чӀылъэм тыдэкӀи щагъэӀун фаеу щыт, цӀыф лъэпкъ пстэуми апашъхьэ шыхьатхэу щыхъунхэм пае. Ащ нэужым дунаем икӀэух къэсыщт.
Гузэжъогъушхор
15 Арышъ, «Зэхэзыкъутэрэ ГущыкӀыгъоу» пегъымбар Данил зытегущыӀагъэр чӀыпӀэ лъапӀэм щытэу зышъулъэгъукӀэ, (еджэрэм къыгурэрэӀу), 16 ащыгъум Иудей хэкум ис цӀыфхэр Ӏуашъхьэхэм ярэкӀолӀэжьых. 17 Унашъхьэм тетыри къызехыкӀэ, зыгорэ зыдихьынэу унэм ерэмыхьажь. 18 Губгъом итыми ищыгъын кӀыӀутелъ зыдихьынэу къерэмыгъэзэжь. 19 А мафэхэм бзылъфыгъэ лъэрмыхьэхэмрэ сабый быдзашъо зиӀэхэмрэ сыхьатмыгъо ежьэщтых. 20 Шъузхэхьажьыщт мафэр кӀымафэм е шэмбэт мафэм темыфэнэу Тхьэм шъуелъэӀу; 21 сыда пӀомэ гузэжъогъушхо а мафэхэм хъущт. Ащ фэдэ гузэжъогъушхо дунаер къызыхъугъэм щегъэжьагъэу джырэ нэсыфэ щыӀагъэп ыкӀи щыӀэжьыщтэп. 22 А мафэхэр нахь макӀэ мыхъугъэхэмэ, зы цӀыфи мыкӀодэу къэнэжьыщтгъэп. Ау ежьым къыхихыгъэ цӀыфхэм яхьатыркӀэ Тхьэм а мафэхэр нахь макӀэ ышӀыщтых. 23 А мафэхэм «Мары Христос мыщ дэжьым щыӀ», ыӀоу, е «Христос модэ щыӀ», ыӀоу зыгорэм къышъуиӀомэ, шъушӀошъ шъумыгъэхъу; 24 сыда пӀомэ Христос нэпцӀхэмрэ пегъымбар нэпцӀхэмрэ къэлъэгъощтых. Ахэмэ нэшэнэ гъэшӀэгъонышхохэри, Ӏофышхо гъэшӀэгъонхэри къагъэлъэгъощтых, алъэкӀымэ, Тхьэм къыхихыгъэ цӀыфхэри агъэпцӀэнхэм пае. 25 Джары а Ӏофхэр къэхъунхэм ыпэ якъэбар шъосӀуагъэ. 26 Арышъ, «Мары, Христос шъоф нэкӀым щыӀ», къызышъуаӀокӀэ, ащ дэжьым шъумыкӀу. «Мары, Христос ыкӀоцӀырэ унэм щыӀ», аӀоми, шъушӀошъ шъумыгъэхъу; 27 сыда пӀомэ, тыгъэ къыкъокӀыпӀэм къыщытэджырэ пчыкӀэм тыгъэ къохьапӀэм нэсы дунаер зэригъэнэ фырэм фэдэу, мафэу ЦӀыф Лъэпкъым Ыкъо къызыкӀожьыщтри хъущт. 28 ШъушӀэрэба, хьэйуан псэхалӀэр зыдэщыӀэм бгъэжъхэри зэрэщызэрэугъоищтхэр.
ЦӀыф Лъэпкъым Ыкъо дунаем къызэрэкӀожьыщтыр
29 А гузэжъогъушхо мафэмэ ауж ошӀэдэмышӀэу тыгъэр ушӀункӀыжьыщт, мазэри къэнэфыжьыщтэп. Жъуагъохэри уашъом къефэхыщтых, уашъом щыӀэ кӀуачӀэхэри хъыещтых. 30 Джащыгъум ЦӀыф Лъэпкъым Ыкъо инэшанэ уашъом къыщылъэгъощт, дунаем тет лъэпкъ пстэури гъыхэу абгъэгу еожьыщтых. ЦӀыф Лъэпкъым Ыкъо ошъуапщэхэм ахэтэу, лъэкӀыныгъэшхорэ щытхъушхорэ иӀэхэу, къакӀоу алъэгъущт. 31 ЕтӀанэ бжъэмыешхом ымакъэ чан къэӀунышъ, ЦӀыф Лъэпкъым Ыкъо имэлэӀичхэр ыгъэкӀощтых, дунай лъэныкъуиплӀым, зы ошъо чапэм къыщегъэжьагъэу адрэ ошъо чапэм нэс, ицӀыфхэу къыхихыгъэхэр къахищыхэзэ, ежьым къыфаугъоижьынхэу.
Ынджыр чъыгым шъыпкъагъэу къыдгуригъаӀорэр
32 Ынджыр чъыгым къехъулӀэрэмкӀэ Ӏоф горэ зэжъугъашӀэ: Икъутамэхэм псы къахахьэу, итхьапэхэр къыпыкӀэхэ зыхъукӀэ, гъэмафэр къызэрэблагъэр шъошӀэ. 33 Ащ фэдэу шъори мы Ӏофхэр зэкӀэ зышъулъэгъухэкӀэ, ЦӀыф Лъэпкъым Ыкъо гъунэгъоу, къэлапчъэм дэжь зэрэщытыр шъушӀэ. 34 Шъыпкъэр шъосэӀо, мы Ӏофхэр зэкӀэ къэхъунхэм ыпэкӀэ, мы лъэпкъыр кӀодыщтэп. 35 Уашъомрэ чӀылъэмрэ кӀодыжьыщтых, ау сэ сигущыӀэхэр кӀодыжьыщтхэп.
А мафэри а сыхьатри къызысыщтыр зыми ышӀэрэп
36 Ау а мафэри а сыхьатри къызысыщтыр зыми ышӀэрэп. Уашъохэм ащыӀэ мэлэӀичхэм ашӀэрэп, Тхьэм Ыкъоми ышӀэрэп. Ты лъапӀэм изакъоу ары ныӀэп зышӀэрэр. 37 Пегъыбар Нухьэ имафэхэм адэжь Ӏофхэр зэрэщытыгъэхэм фэдэу, ЦӀыф Лъэпкъым Ыкъо дунаем къызыкӀожьыщтым ыдэжь Ӏофхэр щытыщтых. 38 Сыда пӀомэ псы къиугъэшхор къэмыкӀуагъэу, а мафэхэм цӀыфхэр шхэщтыгъэх ыкӀи ешъощтыгъэх, къащэщтыгъэх ыкӀи дакӀощтыгъэх, Нухьэ къухьэм зитӀысхьэгъэ мафэм нэсыфэкӀэ. 39 Къэхъущтыр амышӀэу псы къиугъэшхор къакӀуи, ахэр зэкӀэ ыхьыгъэх ыкӀи ытхьалагъэх. Ащ фэдэу ЦӀыф Лъэпкъым Ыкъо дунаем къызыкӀожьыщтым ыдэжь Ӏофхэр щытыщтых. 40 Ащ дэжьым нэбгыритӀу губгъом итыщтых, язырэр мэлэӀичхэм уашъом дахьыещт, адрэр къагъэнэщт. 41 БзылъфыгъитӀу зы шъхьалым щыхьаджэщт, язырэр мэлэӀичхэм уашъом дахьыещт, адрэр къагъэнэщт. 42 Арышъ, шъумычъыеу шъусакъ, сыда пӀомэ Зиусхьаныр дунаем къызыкӀожьыщт. мафэр шъушӀэрэпышъ ары. 43 Ау мыр зэжъугъашӀэ: унэр зием тыгъуакӀор къызыкӀощт сыхьатыр ышӀэщтыгъэмэ, чъыещтгъэп, иуни къыригъахьэу илъыр рыригъэтыгъукӀыщтгъэп. 44 Арышъ, шъори шъухьазырын фае, сыда пӀомэ ЦӀыф Лъэпкъым Ыкъо къэкӀожьынэу шъузымыгугъэрэ сыхьат горэм дунаем къэкӀожьыщт.
Узщыгугъышъун унэӀут е узщымыгугъышъун унэӀут
45 Хэта адэ зэхэшӀыкӀыныгъэ зиӀэу, зыщыгугъышъунэу унэӀутэу тхьаматэм адрэ унэӀутхэу иӀэхэм пащэу афишӀыгъэр, игъом ашхын аритынэу? 46 А унэӀутыр сыхьатмафэ ежьагъ, итхьаматэ къэкӀожьыгъэу, арэущтэу ышӀэу къызигъотыжькӀэ. 47 Шъыпкъэр шъосэӀо, тхьаматэм имылъку зэкӀэ а унэӀутым ыӀэ рилъхьащт. 48 Ау а унэӀутым бзэджагъэ зэрихьэзэ, «Ситхьаматэ шӀэхэу къэкӀожьыщтэп», ыгукӀэ ыӀоу, 49 адрэ унэӀутхэм яоу ыкӀи ешъуакӀомэ адашхэу ыкӀи адешъоу зиублэкӀэ, 50 а унэӀутыр зымыгугъэрэ мафэ горэм ыкӀи зыщимышӀэрэ сыхьат горэм итхьаматэ къэкӀожьыщт. 51 А унэӀутыр укӀыкӀаеу ыукӀыщт, нэпитӀу зиӀэхэм къиныгъэ зыщадищэчыщт чӀыпӀэми ыгъэкӀощт. Ащ дэжьым куохьауныгъэрэ цэ зэрэгъэшхыныгъэрэ щыхъущтых.
ПшъэшъипшӀымэ яхьылӀэгъэ гъэсэныгъэ тхыдэр
1 А мафэм Тхьэу уашъом щыӀэм и Тетыгъошхо зыфэдэу щытыщтыр мары. ПшъэшъипшӀмэ яостыгъэхэр аштэхи, шъаом пэгъокӀынхэу дэкӀыгъэх. 2 Ахэмэ ащыщэу тфым акъыл ямыӀэу щытыгъэх, тфыр Ӏушхэу щытыгъэх. 3 Акъыл зимыӀэ пшъашъэхэм яостыгъэхэр заштэхэм, дагъэ зыдаштагъэп. 4 Пшъэшъэ Ӏушхэм яостыгъэмэ ягъусэу, дагъэ зэрыт дагъалъэхэри зыдаштагъэх. 5 Шъаор къызэгужъом, пшъэшъэ пстэури шъхьаукъэхи хэчъыягъэх. 6 Ау чэщныкъом дэжь зы макъэ горэ къэӀугъ: «Мары шъаор къакӀо! ШъукъыпэгъокӀ!» 7 Джащыгъум а пшъашъэхэр зэкӀэ къэтэджыхи, яостыгъэхэр агъэхьазырыгъэх. 8 Акъыл зимыӀэ пшъашъэхэр пшъэшъэ Ӏушхэм ялъэӀугъэх: «Шъуидагъэ щыщ къытэшъут, сыда пӀомэ, тиостыгъэхэр мэкӀуасэх». 9 Ау пшъэшъэ Ӏушхэм къаӀожьыгъ: «Шъори тэри ар тфырикъухэнэп. Дагъэ зыщэрэмэ адэжь шъукӀоу къызфэшъущэфымэ нахьышӀу». 10 Къащэфынэу ахэр зэкӀохэм, шъаор къэкӀуагъ, хьазырэу щытыгъэ пшъэшъитфыри игъусэхэу джэгу зьпцашӀырэ унэм ихьэхи, къэлапчъэри къыфашӀыжьыгъ. 11 Ащ нэуж адрэ пшъашъэхэри къэкӀожьхи, мырэущтэу аӀуагъ: «Титхьаматэу титхьаматэ! Къэлапчъэр къытфэӀух!» 12 Ау ащ къыӀожьыгъ: «Шъыпкъэр шъосэӀо, шъо хэтми шъузщьпцыр сшӀэрэп». 13 Арышъ, шъумычъыеу шъусакъ, къыпигъэхъожьыгъ Исус, сыда пӀомэ ЦӀыф Лъэпкъым Ыкъо дунаем къызыкӀожьыщт мафэри сыхьатри шъушӀэрэпышъ ары.
Талант зыцӀэ ахъщэхэм яхьылӀэгъэ гъэсэныгъэ тхыдэр
14 Джыри Тхьэу уашъом щыӀэм и Тетыгъошхо къызэрэкӀощтьф зыфэдэр мары. Зы лӀы горэ хымэ хэгъэгу горэм кӀонэу зэхъум, иунэӀутмэ къяджи, имылъку аӀэкӀилъхьагъ. 15 Зым талантитф ритыгъ, нэмыкӀми талантитӀу ритыгъ, етӀанэ нэмыкӀми зы талант ритыгъ. Хэти лъэкӀыныгъэу иӀэм фэшъуашэу рити, гъогум техьагъ. 16 Талантитф зэритыгъэр занкӀэу кӀуи, ахэр ыгъэлажьэхи, джыри талантитф къыхьыжьыгъ. 17 Джащ фэдэу талантитӀу зэритыгъэми джыри талантитӀу къыхьыжьыгъ. 18 Ау тхьаматэм зы талант зэритыгъэр кӀуи, ар чӀыгум чӀитӀи, итхьаматэ иахъщэ ыгъэбылъыгъ. 19 Бэ тешӀагъэу а унэӀутмэ ятхьаматэ къэкӀожьыгъ, иунэӀутхэм ахъщэр зэрагъэлэжьагъэмкӀи яупчӀынэу ыублагъ. 20 Талантитф зэритыгъагъэр тхьаматэм бгъодахьи, адрэ талантитфэу къыхьыгъэхэр къыфихьыхи къыӀуагъ: «Тхьаматэ, талантитф къысӀэкӀэплъхьагъ. Мары, ахэмкӀэ джыри талантитф къэсхьыжьыгъ». 21 Тхьаматэм ащ риӀуагъ: «Дэгъоу пшӀагъэ. О сыпщыгугъышъунэу уунэӀут дэгъу! Ӏоф макӀэхэмкӀэ сызщыгугъышъунэу лӀэу узэрэщытыгъэм пае, Ӏофыбэхэр къыпӀэкӀэслъхьащтых. КъакӀуи, уитхьаматэ игушӀуагъо къыхахь!» 22 Джаущтэу талантитӀу зэритыгъагъэри тхьаматэм бгъодахьи къыӀуагъ: «Тхьаматэ, талантитӀу къысӀэкӀэплъхьагъ. Мары, ахэмкӀэ джыри талантитӀу къэсхьыжьыгъ». 23 Тхьаматэм ащ риӀуагъ: «Дэгъоу пшӀагъэ. О сыпщыгугъышъунэу уунэӀут дэгъу! Ӏоф макӀэхэмкӀэ сызщыгугъышъунэу лӀэу узэрэщытыгъэм пае, Ӏофыбэхэр къыпӀэкӀэслъхьащтых. КъакӀуи, уитхьаматэ игушӀуагъо къыхахь!» 24 ЕтӀанэ зы талант зэритыгъагъэри тхьаматэм бгъодахьи къыӀуагъ: «Тхьаматэ, о узэрэлӀы пхъашэр сшӀэщтыгъэ, чылапхъэ зыхэмыпхъагъэм лэжьыгъэр къыщыохыжьы, зыхэмысагъэми къыщыоугъоижьы. 25 Сыщынэти сыкӀуи, уиталант чӀыгум чӀэзгъэбылъхьагъ. Мары, оуиер осэтыжьы». 26 Тхьаматэм ащ риӀуагъ: «О уунэӀут бзадж ыкӀи уунэӀут фэмыф! О пшӀэщтыгъэ сэ чылапхъэр зыхэсымыпхъагъэм лэжьыгъэ къызэрэщысхыжьырэри, зыхэсымысагъэм къызэрэщысыугъоижьырэри. 27 Арэущтэу зыхъукӀэ, сэ сиахъщэ банкым ептын фэягъэба? Ащыгъум къызысэгъэзэжьым, сиахъщэ хэхъуагъэу къычӀэсхыжьыщтыгъ». 28 «Мы лӀым италант Ӏышъухи, талантипшӀ зиӀэм ешъут. 29 Сыда пӀомэ Тхьэм хэт щыщми зиӀэм нахьыбэ къыритыщт, къелыжьынэуи бэ иӀэщт. Ау Тхьэм зимыӀэм иӀэ тӀэкӀури Ӏихыжьыщт. 30 Ау мы унэӀутэу пкӀэ зимыӀэр шӀункӀыгъэм икуупӀэ хэшъудз. Ащ дэжьым куохьауныгъэрэ цэ зэрэгъэшхыныгъэрэ щыхъущтых». Ар къызеӀо ужым, Исус мэкъэшхокӀэ къыӀуагъ: РыдэӀонэу тхьакӀумэ зиӀэм зэхерэх.
ЦӀыф Лъэпкъым Ыкъо цӀыф лъэпкъхэм хьыкум зэратыришӀыхьащтыр
31 ЦӀыф Лъэпкъым Ыкъо щытхушхо иӀэу, имэлэӀич пстэури игъусэхэу дунаем къызыкӀожькӀэ, итӀысыпӀэ лъапӀэу щытхъушхо зиӀэм тетӀысхьащт. 32 Лъэпкъ пстэури ежьым ыпашъхьэ къыщызэрэугъоищтых, мэлахъом мэлхэмрэ пчэнхэмрэ зэрэзэхидзыхэрэм фэдэуи, цӀыфхэр зэхидзыщтых. 33 Мэлхэр иджабгъукӀэ пчэнхэр исэмэгубгъукӀэ ыгъэуцущтых. 34 Джащыгъум Пачъыхьэм иджабгъумкӀэ щытхэм ариӀощт: «Сэ Сятэ лъапӀэ ынэшӀу зыщифагъэхэр, шъукъакӀуи, Тхьэм дунаер къызигъэхъугъэм къыщегъэжьагъэу къышъуфигъэхьазырыгъэ тетыгъор шъуиӀэхьышӀоу шъуубыты. 35 Сыда пӀомэ мэлакӀэ сызэлӀэм, сыжъугъэшхагъ; псыфалӀэ сызэлӀэми, псы сежъугъэшъуагъ; хымэу сызыщэтыми, сыкъежъугъэблэгъагъ, 36 зыщыслъэн зысемыӀэми, сышъуфэпагъ; сызэсымаджэми шъукъыслъыплъагъ; хьапсым сызычӀэсыми, садэжь шъукъэкӀуагъ». 37 Джащыгъум шъыпкъагъэ зиӀэ цӀыфхэм къыраӀожьыщт: «Зиусхьан, сыдигъо мэлакӀэ улӀэу утлъэгъуи узыдгъэшхагъэр, е псыфалӀэ улӀэу псы узедгъэшъуагъэр? 38 Сыдигъуа хымэу утлъэгъуи узедгъэблэгъагъэр, е зыщыплъэн уимыӀэу узытфэпагъэр? 39 Усымаджэу е хьапсым учӀэсэу сыдигъуа утлъэгъуи, уадэжь тыкъызыкӀуагъэр?» 40 Пачъыхьэм ахэмэ пэгъокӀ аритыщт: «ПӀъыпкъэр шъосэӀо. Сэ сшы анахь цӀыкӀу дэдэхэм ащыщэу зыгорэм фэшъушӀагъэр сэ къысфэшъушӀагъэу мэхъу». 41 ЕтӀанэ Пачъыхьэм исэмэгубгъукӀэ щытхэм ариӀощт: «Садэжь шъуӀукӀ, шъо Тхьэм ынае зыщифагъэхэр. Шэйтанымрэ ащ имэлэӀичхэмрэ Тхьэм афигъэхьазырыгъэ мыкӀосэжьын машӀом шъукӀу. 42 Сыда пӀомэ мэлакӀэ сызэлӀэм, сыжъугъэшхагъэп; псыфалӀэ сызэлӀэми, псы сежъугъэшъуагъэп; 43 хымэу сызыщэтыми, сыкъежъугъэблэгъагъэп, зыщыслъэн зысемыӀэми, сышъуфэпагъэп; сызэсымаджэми, хьапсым сызычӀэсми, шъукъыслъыплъагъэп». 44 Джащыгъум ахэми Пачъыхьэм къыраӀожьыщт: «Зиусхьан, мэлакӀэ улӀэу, е псыфалӀэ улӀэу, е ухымэу, е зыщыплъэн уимыӀэу, е усымаджэу, е хьапсым учӀэсэу сыдигъо утлъэгъуи, тишӀуагъэ отымыгъэкӀэу сыдигъуа укъызыдгъэнагъэр?» 45 Джащыгъум Пачъыхьэм пэгъокӀ аритыщт: «Шъыпкъэр шъосэӀо, мы цӀыкӀу дэдэмэ ащыщэу зыгорэм фэшъумышӀагъэр сэ къысфэшъумышӀагъэу мэхъу». 46 Арэущтэу ахэмэ мыухыжьын къин ащэчынэу ӀукӀыжьыщтых, ау шъыпкъагъэ зиӀэ цӀыфхэм мыкӀодыжьын щыӀэныгъэ къалъысынэу ӀукӀыжьыщтых.
Тхьэмэтэ Хэсэшхом щыщ тхьаматэхэм Исус тхьагъэпцӀыгъэкӀэ аукӀынэу гухэлъ зэрашӀыгъэр
1 Исус а гущыӀэ пстэури къызеӀохэ ужым, игъогу рыкӀохэрэм ариӀуагъ: 2 Пасхъэ зыцӀэ мэфэкӀ мэфэшхор къэсыным мэфитӀу зэриӀэр шъо шъошӀэ. ЦӀыф Лъэпкъым Ыкъуи къащым раӀулӀынэу тетыгъо зиӀэхэм аӀэкӀэхьащт. 3 Джащыгъум дин пэщэшхохэри, Тэурат егъэджэкӀо па щэхэри, цӀыфмэ янахьыжъхэри дин пэщэшхоу Кайафэ зыцӀэм иунэшхо къыщызэӀукӀагъэх. 4 Ахэмэ Исус тхьагъэпцӀыгъэкӀэ аубытынышъ, аукӀынэу гухэлъ ашӀыгъ. 5 Ау цӀыфхэм бырсырышхо амышӀыным пае, мэфэкӀ мэфэшхом тефэу орэмыхъу, аГуагъ ахэмэ.
Зы бзылъфыгъэ горэм Вифание къуаджэм дагъэу осэшхо
зиӀэр Исус зэрэщифагъэр 6 ЕтӀанэ Исус Вифание къуаджэм щыӀэу, Симонэу шъоджэ уз Ӏае зиӀагъэм иунэ щыӀагъ. 7 Исус ащ дэжьым зыщэӀэм, зы бзылъфыгъэ горэ унэм къихьагъ. А бзылъфыгъэм алавастэр зыцӀэ мыжъом хэшӀыкӀыгъэу зы апч ыӀыгъыгъ. А апчым осэшхо зиӀэ дагъэу мэ ӀэшӀу зыпихырэр итыгъ. Исус Ӏанэм пэсэу, бзылъфыгъэр къыбгъодахьи, Исусым ышъхьэ дагъэр тырикӀагъ. 8 Исус игъогу рыкӀохэрэм ар залъэгъум, агу римыхьэу мырэущтэу аГуагъ: Сыд пае мы дагъэу осэшхо зиӀэр хьаулыеу ыгъэкӀодыгъа? 9 Ар осэшӀукӀэ ащагъэмэ, тхьамыкӀэхэм ахъщэр афагощын алъэкӀыщтыгъ. 10 Ау Исус ащ гу лъити ариӀуагъ: Сыд пае бзылъфыгъэр жъугъэукӀытэра? Сыда пӀомэ ащ шӀугъэ горэ къысфишӀагъ. 11 ТхьамыкӀэхэр къышъухэт зэпытых, ау сэ сышъухэт зэпытыщтэп. 12 А бзылъфыгъэм мы дагъэр сэ спкъы къызытырекӀэм, сызэрэчӀалъхьажьыным сыфиухьазырыгъ. 13 Шъыпкъэр шъосэӀо, сэ къысфэлажьэрэ цӀыфхэм чӀылъэм зэкӀэ къэбарышӀур тыдэ щагъэӀуми, мы бзылъфыгъэм ышӀагъэр къаӀотэжьыщт, цӀыфхэм а бзылъфыгъэр шӀукӀэ агу къагъэкӀыжьыным пае.
Иудэ зыцӀэм Исус дин пэщэшхохэм аӀэкӀигъэхьанэу зэрадиштагъэр
14 Джащыгъум Исус игъогу рыкӀорэ нэбгырэ пшӀыкӀутӀумэ ащыщэу, Иудэ ИскариоткӀэ заджэхэрэр дин пэщэшхохэмэ адэжь кӀуи, 15 къыӀуагъ: Исус къышъуӀэкӀэзгъахьэмэ, сыда къысфэшъушӀэщтыр? Ахэмэ тыжьын ахъщэ щэкӀ къыратынэу къагъэгугъагъ. 16 Ащ щегъэжьагъэу Исус ахэмэ аӀэкӀигъэхьаным пае, Ӏэрыфэгъу уахътэ Иудэ паплъэу ыублагъ.
Исус Пасхъэ пчьгхьэшъхьашхэр игъогу рыкӀохэрэм зэрадишӀыгъэр
17 Хьалыгъу Мыгъэтэдж зыщашхырэ мэфэкӀ мэфэшхо мафэхэм яапэрэ мафэм дэжь игъогу рыкӀохэрэр Исус къыбгъодахьэхи къеупчӀыгъэх: Пасхъэ пчыхьэшъхьашхэр щыпшӀынэу тыдэ щыдгъэхьазырынэу уфая? 18 Къалэм шъудахь, къыӀожьыгъ Исус. ЛӀы гъэнэфагъэ горэм дэжь шъукӀуи, ешъуӀу: «Дин гъэсакӀом еӀо: Сэ сигъо къэблэгъагъ. Сэррэ сигъогу рыкӀохэрэмрэ Пэсхъэ пчыхьэшъхьашхэр уиунэ щытшӀыщт». 19 Исус зэрариӀуагъэм тетэу, игъогу рыкӀохэрэм ашӀи, Пасхъэ пчыхьэшъхьашхэр агъэхьазырыгъ. 20 Пчыхьашъхьэр къызэсым, Исус игъогу рыкӀорэ нэбгырэ пшӀыкӀутӀур игъусэхэу Ӏанэм пэтӀысхьагъ. 21 Ахэр шхэхэ зэхъум, Исус къыӀуагъ: Шъыпкъэр шъосэӀо, шъуащыщ горэм тетыгъо зиӀэхэм саӀэкӀигъэхьащт. 22 Ахэмэ лъэшэу агу къеуагъ. Зыр зым ыуж итэу къыраӀонэу фежьагъэх: Зиусхьан, сэрэп ар, арыба? 23 Мы апсым сигъусэу зыӀэкӀэ хьалыгъу къыхэзыгъаорэр ары тетыгъо зиӀэхэм саӀэкӀэзыгъэхьащтыр,пэгъокӀ ытыжьыгъ Исус. 24 Шъыпкъэ, ЦӀыф Лъэпкъым Ыкъо дунаем ехыжьыщт, ежьым ехьылӀагъэу Тхьэм игущыӀэ тхыгъэхэм зэрарытым фэдэу. Ау ЦӀыф Лъэпкъым Ыкъо тетыгъо зиӀэхэм аӀэкӀэзыгъахьэрэр сыхьатмыгъо ежьагъ. А цӀыфыр къэмыхъугъэмэ, ежьымкӀэ нахьышӀущтыгъ. 25 Иудэу Исус тетыгъо зиӀэхэм аӀэкӀэзыгъэхьанэу щытыгъэм къыӀуагъ: Равви, сэрэп ар, арыба? Оры, къызэрэпӀорэм фэдэу, Исус ащ риӀуагъ.
Зиусхьаным ипчыхьэшъхьашх
26 Ахэр шхэхэ зэхъум, Исус хьалыгъур къыштагъ, Тхьэм щытхъу фишӀи, зэгуичи, игъогу рыкӀохэрэм арити къыӀуагъ: Ма, шъушхы, мы хьалыгъур сэ спкъы ары. 27 ЕтӀани зы шъуалъэ къышти, Тхьэм щытхъу фишӀи, арити къыӀуагъ: Шъо зэкӀэри мыщ итым щыщ шъуешъу. 28 Мы сэнэпсыр сэ слъэу Тхьэм ежьымрэ ицӀыфхэмрэ азыфагу дилъхьэгъэ зэзэгъыныгъэр зыгъэшъыпкъэжьырэр ары. ЦӀыфыбэхэм яшӀуагъэ къэкӀонэу, лъэу сэ къыскӀэкӀыщтыр ары, япсэкӀодхэр афэгъунхэм пае. 29 Сэ шъосэӀо, джы щегъэжьагъэу Сятэ и Тетыгъошхо къызыкӀощтым нэсыфэ, сэнэшъхьэ къутамэм ипс сешъожьыщтэп. А мафэм кӀэу сэ сыкъыжъудешъожьыщт. 30 ЕтӀанэ Исусрэ игъогу рыкӀохэрэмрэ тхьэщытхъу орэд къызаӀо ужым, унэм икӀыхи, Елеон Ӏуашъхьэм кӀуагъэх.
«Сэ сыкъэмышӀэу къэпӀощт», Исус Петрэ зэрэриӀуагъэр
31 Ащ дэжьым Исус игъогу рыкӀохэрэм ариӀуагъ: Нычэпэ шъо пстэуми сизакъоу утыгум сыкъишъунэщт, сыда пӀомэ Тхьэм къызэриӀорэр игущыӀэ тхыгъэхэм арыт: «Сэ мэлахъор сыукӀыщт, мэлы Ӏэхъогъури зэбгырыкӀыжьыщт». 32 Ау лӀагъэхэм сыкъызахэтэджыкӀыжьыкӀэ, шъуапэ рапшӀэу Галилей хэкум сыкӀощт. 33 Пстэуми утыгум укъыранэми, сэ ныбжьи укъисынэщтэп, къыриӀуагъ Петрэ Исус. 34 Шъьшкъэр осэӀо, риӀожьыгъ Исус Петрэ, мы нычэпэ дэдэм атакъэр Ӏоным ыпэкӀэ, сэ сыкъэмышӀэу гъогогъуищэ къэпӀощт. 35 Сэ о сыбдэлӀэн фаеу щытми, усымышӀэу сӀощтэп, къыриӀожьыгъ Петрэ Исус. Ащ фэдэ къабзэу Исус игъогу рыкӀорэ адрэ лӀы пстэуми къаӀуагъ.
Исус Гефсимание хатэм Тхьэм зэрэщелъэӀугъэр
36 Ащ нэуж Гефсимание зыцӀэ чӀыпӀэ горэм Исус игъогу рыкӀохэрэр игъусэхэу кӀуагъэ. Мо шъуетӀысэх, сэ модэ сыкӀоу, Тхьэм селъэӀуфэ,ыӀуи, Исус ахэмэ ариӀуагъ. 37 ЕтӀанэ Петрэрэ Зеведей ыкъуитӀурэ зыдищэхи, ыгу къеоу, гумэкӀэу ыублагъ. 38 Джащыгъум ахэмэ ариӀуагъ: СылӀэрэм фэдэу инэу сыгу хэкӀы. Шъумычъыеу шъусакъэу мо садэжь шъущыӀ. 39 ЕтӀанэ зы тӀэкӀу ӀукӀоти, чӀыгум бгъэгукӀэ зыридзыхи, Тхьэм елъэӀузэ къыӀуагъ: Сэ Сят, амал иӀэмэ, мы къин щэчыныгъэм ишъуалъэ сэ сӀых. Ау сэ сызыфаер мыхъоу, о узыфаер орэхъу. 40 Ащ ыужым Исус игъогу рыкӀорэ нэбгырищымэ адэжь къыгъэзэжьи, чъыехэу къыгъотыжьыгъэх. Арэущтэу зы сыхьат закъокӀэ шъусигъусэу шъумычъыеу, шъусакъын шъулъэкӀыгъэп, ара? ыӀуи, Исус Петрэ риӀуагъ. 41 Шъумычъыеу шъусакъ, псэкӀодшӀэным шъудимыхьыхынэуи Тхьэм шъуелъэӀу. Гур фай, ау пкъым ылъэкӀырэп. 42 ЕтӀанэ Исус ятӀонэрэу ӀукӀыжьи, Тхьэм елъэӀузэ къыӀуагъ: Сэ Сят, мы къин щэчыныгъэм ишъуалъэ сӀыпхынэу мыхъунэу щытмэ, о узыфаер орэхъу. 43 Джыри зэ Исус къызегъэзэжьым, а нэбгырищыр чъыехэу къыгъотыжьыгъэх, сыда пӀомэ анапӀэхэр онтэгъоу хъугъэхэти ары. 44 Джыри зэ ахэр къыгъанэхи, ӀукӀи, а гущыӀэ дэдэхэмкӀэ ящэнэрэу Тхьэм елъэӀугъ. 45 ЕтӀанэ Исус игъогу рыкӀохэрэм адэжь къыгъэзэжьи ариӀуагъ: Зыжъугъэпсэфызэ джыри шъочъыя? Мары, сыхьатыр къэблэгъагъ. ЦӀыф Лъэпкъым Ыкъо псэкӀод зышӀэрэ цӀыфхэм аӀэкӀэхьащт. 46 Шъукъэтэдж! НекӀо, мары ахэмэ саӀэкӀэзыгъэхьащтыр къэблэгъагъ!
Исус зэраубытыгъэр
47 Исус джыри гущыӀэзэ, игъогу рыкӀорэ нэбгырэ пшӀыкӀутӀумэ ащыщэу Иудэу Исус тетыгъо зиӀэхэм аӀэкӀэзыгъэхьанэу щытыгъэр къэкӀуагъ. Сэшхохэмрэ умэхэмрэ аӀыгъхэу, цӀыф купышхо игъусагъ. Дин пэщэшхохэмрэ цӀыфмэ янахьыжъхэмрэ ары ахэр къэзыгъэкӀогъагъэхэр. 48 Сэ сызэбэущтыр ары зыфасӀорэр. Ар шъуубыт,ыӀуи, Иудэм Исус зэраӀэкӀигъэхьащт шӀыкӀэр игъусэхэм ариӀогъагъ. 49 Иудэ зэрэнэсэу Исус екӀуалӀи, Опсэу, Равви! ыӀуи, Исус ебэугъ. 50 Ныбджэгъу, сыда укъызкӀэкӀуагъэр? ыӀуи, Исус ащ риӀуагъ. Джащыгъум адрэхэр Исус къекӀуалӀэхи аубытыгъ. 51 ОшӀэдэмышӀэу Исус игъусэхэм ащыщэу зыгорэм исэшхо къырихи, дин пэщэшхом иунэӀут еуи, ытхьакӀумэ лъэныкъо гуиупкӀыгъ. 52 Джащыгъум Исус ащ риӀуагъ: О уисэшхо сапӀэм илъхьажь, сыда пӀомэ сэшхом еӀэрэ пстэури сэшхом екӀодылӀэжьыщтых. 53 Хьаури Сятэ семылъэӀушъункӀэ огугъа? СелъэӀумэ, ащ джы дэдэм мэлэӀич дзэ пшӀыкӀутӀум ехъоу къысфигъэкӀощт. 54 Ау етӀанэ сыдэущтэу Тхьэм игущыӀэ тхыгъэхэм арытхэр къэшъыпкъэжьыщтха? Тхьэм игущыӀэ тхыгъэхэм арытба, мырэущтэу зэрэхъун фаер? 55 А сыхьатым Исус а цӀыф купышхом риӀуагъ: ХъункӀакӀо горэ шъуубытыщтым фэдэу, сэшхохэмрэ умэхэмрэ шъуӀыгъхэу шъукъыспэгъокӀыгъа? Мафэ къэси Тхьэм иунэшхо цӀыфхэм Тхьэм игущыӀэхэр щязгъашӀэхэзэ сычӀэсыгъ, арышъхьакӀэ сышъуубытыгъэп. 56 Ау мыр зэкӀэ зыфэхъугъэр пегъымбармэ атхыгъэхэр къэшъыпкъэжьынхэр ары. Джащыгъум Исус игъогу рыкӀорэ пстэуми ежьыр утыгум къырани хэхьажьыгъэх.
Исус Тхьэмэтэ Хэсэшхом ыпашъхьэ зэрэращагъэр
57 Исус заубыты ужым, дин пэщэшхоу Кайафэ зыцӀэм ыдэжь ащагъ. Ащ дэжьым Тэурат егъэджэкӀо пащэхэмрэ нахьыжъхэмрэ къыщызэӀукӀагъэх. 58 Петри чыжьэкӀэ Исус ыуж итэу, дин пэщэшхом ищагу нэсыфэ къыкӀэлъыкӀуагъ. КӀэухэу Исус фэхъущтыр ылъэгъуным пае, Петрэ щагум дахьи, ухъумакӀохэм ахэтӀысхьагъ. 59 Дин пэщэшхохэри, нахьыжъхэри, Тхьэмэтэ Хэсэшхом щыщхэу адрэ тхьэмэтэ пстэури Исус укӀ тыралъхьаным пае, шыхьатныгъэ нэпцӀ лъыхъущтыгъэх. 60 Шыхьат нэпцӀыбэхэр къэтэджыхи, Ӏаджи Исус тыралъхьагъэ пэтми, зыфаер къагъотыгъэп. Ау ыкӀэм ыкӀэжьым шыхьат нэпцӀитӀу къэтэджыхи, 61 мырэущтэу къаӀуагъ: Мы лӀым ыӀощтыгъэ: «Тхьэм иунэшхо зэхэскъутэнышъ, мэфищкӀэ зэтезгъэуцожьын слъэкӀыщт». 62 ЕтӀанэ дин пэщэшхор къэтэджыгъ. Сыд мы лӀыхэм о къыптралъхьарэр? Сыда зи къызкӀэмыӀорэр? къыриӀуагъ ащ Исус. 63 Ау Исус зи къыӀуагъэп. ЩыӀэныгъэр къыздикӀырэ Тхьэм ыцӀэкӀэ сыолъэӀу, къытаӀу, ора Христосэу Тхьэм Ыкъо? къыриӀуагъ дин пэщэшхом Исус. 64 Ары, къызэрэпӀорэм фэдэу, риӀуагъ Исус. Ау сэ шъосэӀо, джы щегъэжьагъэу лъэкӀыныгъэшхор зиӀэ Тхьэм иджабгъукӀэ госэу, ошъуапщэхэми ахэтэу, ЦӀыф Лъэпкъым Ыкъо къакӀоу шъулъэгъущт. 65 Джащыгъум дин пэщэшхом ищыгъынхэр къызэгуитхъыгъэх. Тхьэр ыгъэпцӀыгъ, къыӀуагъ ащ. Сыда нэмыкӀ шыхьат зэрэтищыкӀэгъэжьыр? Джары, Тхьэр зэригъэпцӀыгъэр шъо зэхэшъухыгъ. 66 Сыдэущтэу шъухаплъэра? УкӀ ифэшъуаш, пэгъокӀ къатыжьыгъ ахэмэ. 67 Джащыгъум Исус ынэгу кӀэужъунтхи, бжымкӀэ еуагъэх. НэмыкӀхэри ынэпашъо еохэзэ, 68 раӀуагъ: Христос, упегъымбармэ, хэтми къыоуагъэм ыцӀэ къаӀо!
Петрэ Исус ымышӀэу къызэриӀуагъэр
69 Джащыгъум Петрэ щагум дэсыгъ. Зы унэӀут пшъашъэ горэ къекӀуалӀи къыӀуагъ: Ори а Исусэу Галилей щыщым уригъусагъ. 70 Хьау, зыфапӀорэр сшӀэрэп, къыщиӀуагъ Петрэ зэкӀэмэ апашъхьэ. 71 ЕтӀанэ Петрэ щагум идэкӀыпӀэ Ӏухьэу фежьагъ. Джащыгъум нэмыкӀ унэӀут пшъашъэ горэм ар къылъэгъуи, ащ дэжьым щытхэм ариӀуагъ: Мы лӀыри Назарет щыщ Исус игъусагъ. 72 Джыри зэ Петрэ, А лӀыр сшӀэрэп, ыӀуи, тхьэ ыӀуагъ. 73 Зы тӀэкӀу тешӀагъэу, ащ дэжьым щытхэм Петрэ къыбгъодахьэхи къыраӀуагъ: Шъыпкъэу ори ахэмэ уащыщ, сыда пӀомэ уигущыӀакӀэ ар нафэ къешӀы. 74 Тхьэр сэгъэпцӀы, къасӀорэр мышъыпкъэмэ, а лӀыр сшӀэрэп, ыӀуи, Петрэ тхьарыӀо ышӀэу ыублагъ. Ардэдэм атакъэр къэӀуагъ. 75 Джащыгъум Исус къыриӀогъэгъэ гущыӀэхэр Петрэ ыгу къэкӀыжьыгъэх: Атакъэр Ӏоным ыпэкӀэ, сэ сыкъэмышӀэу гъогогъуищэ къэпӀощт. Ар ыгу къызэкӀыжьым, Петрэ щагум дэкӀи, лъэшэу гъыгъэ. 27
Исус Ӏэшъхьэтетэу Пилат ыпашъхьэ зэрэращагъэр
1 Нэф къызэшъым, дин пэщэшхо пстэумрэ цӀыфмэ янахьыжъхэмрэ зэдеусэхи, Исус укӀ тыралъхьанэу аухэсыгъ. 2 Исус Ӏэхъу тыралъхьи, Ӏуащи, Ӏэшъхьэтетэу Понтый Пилат ӀэкӀалъхьагъ.
Иудэ зэрэлӀагъэр
3 Иудэу Исус ахэмэ аӀэкӀэзыгъэхьагъэм Исус укӀ зэрэтыралъхьагъэр зелъэгъум, кӀэгъожьи, ратыгъэ тыжьын ахъщэ щэкӀыр дин пэщэшхохэмрэ нахьыжъхэмрэ афихьыжьхи, 4 ариӀуагъ: Лъы хыер къызэрэшъуӀэкӀэзгъэхьагъэмкӀэ псэкӀод сшӀагъэ. Ащ тэ тиӀоф хэлъэп, о уиӀоф нахь, къыраӀуагъ ахэмэ. 5 Джащыгъум Иудэ а тыжьын ахъщэхэр Тхьэм иунэшхо кӀоцӀым щыритэкъухи, чӀэкӀыжьыгъ. ЕтӀанэ кӀуи, зйтхьалэжьыгъ. 6 Дин пэщэшхохэм тыжьын ахъщэхэр аштэжьхи къаӀуагъ: Мыхэр Тхьэм пае ахъщэр зыдэлъ пхъуантэм хабзэкӀэ даплъхьэ хъущтэп, сыда пӀомэ ар лъыуасэшъ ары. 7 Ащыгъум зэупчӀыжьхи, хымэхэр чӀалъхьажьынхэу къошынышӀэм ихьасэ а ахъщэмкӀэ къащэфынэу аухэсыгъ. 8 Арэущтэу непэ нэсы а хьасэм «Лъыуасэ ХьасэкӀэ» еджэх. 9 Джащыгъум пегъымбар Иеремие мы гущыӀэхэу къыӀуагъэхэр къэшъыпкъэжьыгъэх: «Шъхьэуасэу Израил цӀыфхэм ежьым пае агъэнэфэгъэ тыжьын ахъщэ щэкӀыр ашти, 10 ахэмкӀэ къошынышӀэм ихьасэ къащэфыгъ, Зиусхьаным унашъо къызэрэсфишӀыгъэм тетэу».
Ӏэшъхьэтет Пилат Исус зэреупчӀыгъэр
11 Джащыгъум Исус Ӏэшъхьэтетэу Пилат ыпашъхьэ иуцуагъ. О джуртмэ уряпачъыхьа? ыӀуи, Ӏэшъхьэтетыр Исус къеупчӀыгъ. Ары, къызэрэпӀорэм фэдэу, къыӀожьыгъ Исус. 12 Ау дин пэщэшхохэмрэ нахьыжъхэмрэ Исус загъэмысэм, Исус зи къыӀуагъэп. 13 Джащыгъум Пилат Исус къыриӀуагъ: Къыптыралъхьарэр зыфэдизыр зэхэпхырэба? 14 Ау Исус зы гущыӀи къыӀожьыгъэп. Зи къызэримыӀожьыгъэм пае, Ӏэшъхьэтет Пилат лъэшэу ыгъэшӀэгъуагъ.
Исус укӀ зэрэтыралъхьагъэр
15 Пасхъэ зыцӀэ мэфэкӀ мэфэшхор къэсымэ, цӀыфхэр зыкӀэлъэӀурэ хьапсчӀэс горэ шъхьафитэу къафитӀупщыжьыныр Ӏэшъхьэтет Пилат ихабзэу щытыгъ. 16 А мафэхэм Вараввэ ыцӀэу, зы хьапсчӀэс цӀэрыӀо горэ ахэмэ яӀагъ. 17 Арыти, ахэр къызызэӀукӀэхэм, Пилат яупчӀыгъ: Хэта шъхьафитэу къышъуфэстӀупщыжьынэу шъузфаер? Варавва, хьаури ХристоскӀэ заджэхэрэ Исус ара? 18 Пилат арэущтэу зыкӀяупчӀыгъэр шъугъоным къыхэкӀэу ахэмэ Исус къызэрэӀэкӀалъхьагъэр ешӀэти ары. 19 Пилат унэшъошӀ тӀысыпӀэм тесызэ, ишъуз лӀыкӀохэр къыфигъакӀохи къыраригъэӀуагъ: Мы лӀэу шъыпкъагъэ зиӀэм мыхъун горэ епшӀэкъон, сыда пӀомэ нычэпэ пкӀыхьапӀэ Ӏае слъэгъуи, мы лӀым пае къин сщэчыгъэ. 20 Ау Пилат Вараввэ шъхьафитэу къырагъэтӀупщыжьынэуи, Исус рагъэгъэкӀодынэуи дин пэщэшхохэмрэ нахьыжъхэмрэ цӀыф купышхохэм араӀуагъ. 21 ТӀумэ язэу хэта шъхьафитэу къышъуфэстӀупщыжьынэу шъузыфаер? ыӀуи, Ӏэшъхьэтетэу Пилат джыри зэ цӀыфмэ ариӀуагъ. Вараввэ ары, къаӀуагъ ахэмэ. 22 Адэ, ХристоскӀэ заджэхэрэ Исус сыд есшӀэщт?ариӀуагъ Пилат. Къащым теГулӀ! къаӀуагъ зэкӀэ ахэмэ. 23 Сыда ащ бзэджагъэу ышӀагъэр? къыӀуагъ Пилат. Ау ахэр нахь инэу къэзэрэгъэкууагъэх: Къащым теГулӀ! 24 Пилат зи хишӀыхьан ымылъэкӀэу, цӀыфхэр нахь къызэрэбырсырыхэрэр зелъэгъум, псы къышти, цӀыфхэм апашъхьэ ыӀэхэр щитхьакӀыжьхи къыӀуагъ: Мы лӀэу шъыпкъагъэ зиӀэм ылъ сэ къыстефэрэп. Ар шъо шъупшъэ илъ! 25 Ащ ылъ тэри тибынхэми къыттерэф! къаГуагъ зэкӀэ цӀыфхэм. 26 Джащыгъум Пилат Вараввэ шъхьафитэу афитӀупщыжьыгъ. ЕтӀанэ дзэлӀхэр Исус къамыщкӀэ ригъаохи, къащым тыраӀулӀэнэу аӀэкӀилъхьагъ.
ДзэлӀхэр Исус зэрэкӀэнэкӀагъэхэр
27 Джащыгъум Ӏэшъхьэтет Пилат идзэлӀхэм Исус преторием зыцӀэ унэшхом ыкӀоцӀ чӀащагъ, адрэ къэнэгъэ дзэлӀ купышхори Исус бгъу пстэумкӀэ къыкӀэлъырытхэу щызэхаугъоягъэх. 28 ЕтӀанэ дзэлӀхэм Исус ищыгъынхэр къыщахыхи, плъыжь чӀапцӀэу зы шъошэ кӀыхьэ щалъагъ. 29 Панэм хэшӀыкӀыгъэ пачъыхьэ танджэ фабли, ышъхьэ тыралъхьи, ыӀэ джабгъуи бэщ цӀыкӀу ӀэкӀалъхьагъ. Ащ нэужым лъэгонджэмышъхьэкӀэ ыпашъхьэ къитӀысхьэхи, кӀэнакӀэхэзэ «Опсэу, джуртмэ япачъыхь!» къыраГуагъ. 30 ЕтӀанэ теужъунтхагъэх, бэщкӀэ ышъхьэ еощтыгъэх. 31 Ахэр Исус зыкӀэнакӀэхэ ужым, шъошэ кӀыхьэр щахыжьи, ежь ищыгъынхэр щалъэжьыгъэх. ЕтӀанэ къащым тыраӀулӀэнэу преторием ращыжьыгъ.
Исус къащым зэрэтыраӀулӀагъэр
32 Къалэм къыдэкӀыхэзэ, Симон ыцӀэу, Кириние къалэм щыщэу зы лӀы горэм ӀукӀагъэх. ЗыӀокӀэхэм, Исус икъащ ыхьынэу Симон рагъэзыгъ. 33 Исус къызащэм, Голгофэ зыфаӀорэ чӀыпӀэм нэсыгъэх (Голгофэ къикӀырэр «ПӀъхьэпкъ ЧӀыпӀэр» ары). 34 Ащ дэжьым зынэсхэм, сэнэпсрэ зэзыпс дыджырэ зэхэшӀыхьагъэу зэфагощыгъэх. 35 36 ЕтӀанэ ащ дэжьым тӀысхи, Исус аухъумэщтыгъэх. 37 Исус къащым зыкӀытыраГулӀагъэр зы пхъэмбгъу горэм тетхагъэу, ежь ышъхьагъкӀэ къащым тыраӀулӀагъэу щытыгъ: «Мыр джуртхэм я Пачъьгхьэу Исус ары». 38 А чӀыпӀэм хъункӀэкӀуитӀу, зыр иджабгъукӀэ адрэр исэмэгубгъукӀэ, Исус игъусэхэу къащхэм атыраӀулӀагъэх. 39 КъыблэкӀырэ цӀыфхэм Исус къехъоныхэзэ ашъхьэхэр агъэсысхэу, 40 мырэущтэу аӀуагъ: О Тхьэм иунэшхо зэхэзыкъутэу, мэфищкӀэ зэтезыгъэуцожьыщтыр, умыкӀодэу зыкъэгъэнэжь! О Тхьэм ури Къомэ, къащым къехыжь! 41 Ащ фэдэу дин пэщэшхохэми, Тэурат егъэджэкӀо пащэхэми, нахьыжъхэми Исус кӀэнакӀэхэу къаӀуагъ: 42 НэмыкӀ цӀыфхэр мыкӀодхэу къыгъэнэжьыгъэх, ау ежь зыкъигъэнэжьышъурэп. Ежьыр Израил ипачъыхьэу щытмэ, къащым къерэхыжьи, ежьымкӀэ шӀошъхъуныгъэ тиӀэ хъущт. 43 Ежьыр Тхьэм щэгугъы. Тхьэр ежьым къыфаеу щытмэ, мыкӀодэу къерэгъэнэжь. Сыда пӀомэ «Сэ Тхьэм сыри Къу», ыӀощтыгъэ. 44 Ащ фэдэу Исус игъусэхэу къащхэм араӀулӀыгъэ хъункӀакӀохэри ежьым къехъоныщтыгъэх.
Исус зэрэлӀагъэр
45 Щэджагъом щегъэжьагъэу а хэгъэгум тыдэкӀи шӀункӀ къыщыхъугъ, сыхьатыр щым нэсы. 46 Сыхьатыр щым дэжь Исус мэкъэшхокӀэ джагъэ: Или, Или! Лама савахфани? (Ащ къикӀырэр: О Ситхь, о Ситхь! Сыд пае утыгум сизакъоу сыкъиунагъа?) 47 А чӀыпӀэм щытхэмэ ащыщхэм ар зызэхахым, аӀуагъ: Пегъымбар Иляс еджэ. 48 Ащ лъыпытэу ахэмэ ащыщэу зыгорэ Ӏулъади, кӀышъо зэраӀотырэр къыштагъ. Сэнэпс шӀоӀугъэр хиз ышӀи, бэщ горэм пилъхьи, Исус кӀигъэшъунэу фищэигъ. 49 Зэ, пегъымбар Иляс къакӀоу, мыкӀодэу къыгъэнэжьмэ, тежъугъэплъ, къаӀуагъ адрэхэм. 50 Ау Исус джыри зэ мэкъэшхокӀэ джи, ыпсэ ытыгъ. 51 Джащыгъум Тхьэм иунэшхо ипэӀухъо ыпшъхьэкӀэ къыщегъэжьагъэу ыхэ нэсыфэ тӀоу къызэготхъыгъ. ЧӀыгури къэсысыгъ, мыжъохэри зэгоутыгъэх. 52 Къэунэхэри зэӀукӀыхи, Тхьэм ицӀыф лъапӀэхэу лӀагъэхэу щытхэм ащыщхэу бэ къэтэджыжьыгъэх. 53 Ахэр къэунэхэм къачӀэкӀыжьыгъэх, Исус лӀагъэмэ къызахэтэджыкӀыжьы ужыми, къэлэ лъапӀэу Ерусалим дахьэхи, бэмэ зыкъарагъэлъэгъугъ. 54 Дзэ пащэми ащ игъусэхэу Исус зыухъумэщтыгъэхэми чӀыгур къызэрэсысырэри зэкӀэ хъугъэшӀагъэри залъэгъум, лъэшэу щтагъэхэу аГуагъ: Шъыпкъэ дэдэу мыр Тхьэм Ыкъоу щытыгъ. 55 ЧыжьэкӀэ къаплъэхэу, бзылъфыгъэ Ӏаджи ащ дэжьым щытыгъэх. Ахэр Исус ӀэпыӀэгъу фэхъухэзэ, игъусэхэу Галилей къикӀыгъагъэх. 56 Мыхэр ахэмэ ахэтыгъэх: Маг далэ къуаджэм щыщ Мерэми, Зеведей ыкъохэм яни, нэмыкӀ Мерэми. Ар Якъубэрэ Иосыйрэ янэу щытыгъ.
Исус ихьадэ къэунэм зэрэчӀалъхьажьыгъэр
57 Пчыхьашъхьэр къызэсым, Юсыф ыцӀэу Аримафей къуаджэм щыщэу, зы лӀы бай горэ къэкӀуагъ. Ари Исус игъогу рыкӀохэрэм ащыщыгъ. 58 Ар Пилат ыдэжь кӀуи, Исус ихьадэ кӀэлъэӀугъ. Джащыгъум хьадэр Юсыф ратыжьынэу Пилат унашъо ышӀыгъ. 59 Юсыф хьадэр къышти, чэфын къабзэ рищэкӀи, 60 Ӏошъхьэ цакӀэу аригъэкъутагъэм ежьым пае кӀэу къыхаригъэшӀыкӀыгъэ къэунэм чӀилъхьажьыгъ. ЕтӀанэ Юсыф къэунэ чӀэхьапӀэм мыжъошхо ӀуигъэукӀораий ӀукӀыжьыгъ. 61 Магдалэ къуаджэм щыщ Мерэмрэ адрэ Мерэмрэ ащ дэжьым щыӀагъэх, къэунэм пэӀусхэу.
Къэунэм иухъумакӀохэр
62 ЯтӀонэрэ мафэу бэрэскэшхом къыкӀэлъыкӀорэ мафэм дин пэщэшхохэмрэ фарисейхэмрэ зэрэугъоихи, Ӏэшъхьэтет Пилат ыдэжь кӀуагъэх. 63 Тхьаматэ, а пцӀыусым псау пэтэу, «Мэфищ нэужым лӀагъэхэм сыкъахэтэджыкӀыжьыщт», ыӀуи, зэриӀогъагъэр тыгу къэкӀыжьыгъ, къаӀуагъ ахэмэ. 64 Арышъ, ухъумакӀохэр ящэнэрэ мафэм нэсыфэ къэунэм фэсакъыхэзэ, аухъумэнэу унашъо шӀы. Армырмэ игъогу рыкӀохэрэр къэкӀонхэшъ, ихьадэ атыгъунышъ, цӀыфмэ араӀощт: «ЛӀагъэхэм къахэтэджыкӀыжьыгъ». А аужырэ пцӀыр апэрэ пцӀым нахьи нахь дэеу хъущт. 65 УхъумакӀохэр шъосэтых, шъукӀуи, шъо зэрэшъулъэкӀэу къэунэр къэшъуухъум, ариӀуагъ Пилат. 66 Ахэр кӀохи, къэунэм ухъумакӀохэр Ӏуагъэуцуагъэх, мыжъоми мыхъур тырадзагъ.
Исус лӀагъэхэм къызэрахэтэджыкӀыжьыгъэр
1 Шэмбэтыр блэкӀыгъэу, тхьамафэм иапэрэ мафэм нэф къызэшъым, Магдалэ къуаджэм щыщ Мерэмрэ адрэ Мерэмрэ къэунэм еплъынхэу кӀуагъэх. 2 ОшӀэдэмышӀэу чӀыгур лъэшэу къэсысыгъ, сыда пӀомэ Зиусхьаным имэлэӀич уашъом къехи, къэунэм Ӏухьи, мыжъошхор ӀуигъэукӀорэикӀыжьи, мыжъошхом тетӀысхьагъ. 3 Ащ итеплъэ пчыкӀэм фэдэу щытыгъ, ищыгъынхэри осым фэдэу фыжьыбзэу щытыгъэх. 4 УхъумакӀохэр ащ зэрэщыщынэхэрэм пае кӀэзэзыщтыгъэх, хьадашъуи яӀэ хъугъэ. 5 Шъумыщын, ариӀуагъ мэлэӀичым бзылъфыгъэмэ. Исусэу къащым раӀулӀыгъэм шъузэрэлъыхъурэр сэ сэшӀэ. 6 Ар мыщ дэжьым щыӀэжьэп. ЗэриӀуагъэм тетэу, ар лӀагъэхэм къахэтэджыкӀыжьыгъ. ШъукъакӀуи, шъуеплъ, мары Зиусхьаныр зыдэщылъыгъэ чӀыпӀэр.7 Джы шъо псынкӀэу шъукӀуи, игъогу рыкӀохэрэм яшъуӀу: «Исус лӀагъэхэм къахэтэджыкӀыжьыгъ. Шъо шъуапэ рапшӀэу ар Галилей кӀощт. Ащ дэжьым ар щышъулъэгъужьыщт». Джары, къэбарыр сэ шъосӀуагъэ. 8 Арэущтэу бзылъфыгъэхэр къэунэм ӀукӀыжьхи, агу изыгъэу гушӀогъошхуи яӀэу, макъэ арагъэӀунэу Исус игъогу рыкӀохэрэм адэжь чъэхэу фежьагъэх. 9 Игъогу рыкӀохэрэм макъэ арагъэӀунэу а бзылъфыгъэхэр кӀохэзэ, ошӀэдэмышӀэу Исус къаӀукӀи къариӀуагъ: Шъопсэу. Мыдрэхэр Исус ечъалӀэхи, ыпашъхьэ лъэгонджэмышъхьэкӀэ итӀысхьэхи, ылъакъохэр аубытыгъэх. 10 Джащыгъум Исус ариӀуагъ: Шъумыщын. ШъукӀохи, сшыхэр Галилей кӀонхэу макъэ яжъугъэӀу. Ащ сэри сыщалъэгъущт.
Дин пэщэшхохэмэ ухъумакӀохэр къуалъхьэкӀэ зэращэфыгъэхэр
11 Бзылъфыгъэхэр кӀохэ зэхъум, ухъумакӀохэм ащыщхэр къалэу Ерусалим дахьэхи, дин пэщэшхохэм адэжь кӀохи, зэкӀэ хъугъэр араӀотагъ. 12 Дин пэщэшхохэр, нахьыжъхэр ягъусэхэу, зэрэугъоихи, зэупчӀыжьыгъэх. Ахъщабэ ухъумакӀохэмэ арати, 13 араӀуагъ: «Чэщым тэ тызыхэчъыем, Исус игъогу рыкӀохэрэр къакӀохи, ихьадэ атыгъугъ», шъуӀон фае. 14 А къэбарыр Ӏэшъхьэтетым зызэхихыкӀэ, дгъэсамбырынышъ, шъори зи къышъуимыӀонэу тшӀыщт. 15 Арэущтэу ухъумакӀохэм ахъщэр ашти, араӀуагъэм тетэу зекӀуагъэх. Непэ къэсыфэ а къэбарыр джуртмэ зэрахьэу ахэлъ.
Исус игъогу рыкӀохэрэм Ӏофэу ашӀэнэу апшъэ рилъхьагъэр
16 Ащ нэужым Исус игъогу рыкӀорэ нэбгырэ пшӀыкӀузыр Галилей кӀохи, ежь зыфиӀогъэгъэ Ӏуашъхьэм дэкӀоягъэх. 17 ЕтӀанэ Исус залъэгъум, лъэгонджэмышъхьэкӀэ ыпашъхьэ итӀысхьагъэх; ау зышӀошъ мыхъурэ заулэ ахэмэ ахэтыгъэх. 18 Исус игъогу рыкӀохэрэм къабгъодахьи ариӀуагъ: Уашъоми чӀылъэми тетыгъошхор зэкӀэ щысиӀэу сӀэ илъ. 19 Арышъ, шъукӀохи лъэпкъ пстэури сигъогу къытежъугъахьэх. Ты лъапӀэми, Ыкъуи, Тхьэм Ыпсэ ЛъапӀи ацӀэкӀэ шъуумэхъыхи, 20 унашъохэу шъосӀуагъэхэр зэкӀэ агъэцэкӀэнхэу яшъуӀу. ШъыпкъэмкӀэ, дунаем икӀэух нэсы сэ ренэу сышъуигъусэщт. Амин.
УмэхъэкӀо Иуан Тхьэм игущыӀэхэр зэригъэӀущтыгъэхэр
1 Тхьэм Ыкъоу Исус Христос ехьылӀэгъэ къэбарышӀур мырэущтэу къеублэ. 2 Тхьэм мыщ фэдэу къызэриӀорэр пегъымбархэм ятхылъхэм арыт: «Мары уапэ рапшӀэу сэ силӀыкӀо къэсэгъакӀо; ащ уигъогу къыпфигъэпсыщт. 3 Ащ иджэ макъэ ары мыщ фэдэу ыӀозэ, шъоф нэкӀым къыщыӀурэр: Зиусхьаным игъогу фэжъугъэпси, игъогу лъагъохэр зэшъхьэзашъоу фэшъушӀых». 4 Тхьэм къызэриӀуагъэм тетэу, умэхъэкӀо Иуан шъоф нэкӀым къыщылъагъуи, цӀыфхэм Тхьэм игущыӀэхэр аригъэӀухэзэ, мырэущтэу къыӀощтыгъ: ӀПъуипсэкӀодхэм шъуафыкӀэгъожьи, зысэжъугъэумэхъ, Тхьэм ахэр къышъуфигъэгъунхэм пае. 5 Иудей хэкум зэкӀэ ис цӀыфхэри, Ерусалим дэс цӀыф пстэури Иуан ыдэжь кӀощтыгъэх. ПсэкӀодхэу ашӀагъэхэр Тхьэм ыпашъхьэ ралъхьэхэти, Иордан псыхъом Иуан зыщырагъэумэхъыщтыгъ. 6 Иуан махъшэцым хэшӀыкӀыгъэу щыгъын щыгъыгъ, ыбги шъобгырыпх илъыгъ, мацӀи шъоф шъоуи ышхыщтыгъ. 7 Тхьэм игущыӀэхэр цӀыфхэм аригъэӀухэзэ къыӀощтыгъ: Сэщ нахьи нахь лъэкӀыныгъэшхо иӀэу зыгорэ саужкӀэ къэкӀощт. Зезгъэзыхэу ащ ицокъэлъэпсхэр фэстӀэтэнхэуи сифэшъуашэп. 8 Сэ псымкӀэ шъусыумэхъыгъ, ау ащ Тхьэм Ыпсэ ЛъапӀэкӀэ шъуиумэхъыщт.
Иуан Исус зэриумэхъыгъэр
9 А мафэхэм Галилей хэкум щыщ Назарет къалэм Исус къыдэкӀи, Иордан псыхъом Иуан зыщыригъэумэхъыгъ. 10 Исус псым къыхэкӀыжьы пэтэу, уашъор зэгочи, Тхьэм Ыпсэ ЛъапӀэ тхьаркъом фэдэу ежьым къызэрэфехырэр ылъэгъугъ. 11 Уашъоми зы макъэ къиӀукӀыгъ: Сэ шӀу слъэгъурэ Скъо кӀасэу сыгу зэӀурэр оры.
Шэйтаныр Исус псэкӀод ригъэшӀэнэу ыуж зэритыгъэр
12 Ащ лъыпытэу Тхьэм Ыпсэ ЛъапӀэ Исус шъоф нэкӀым ыщагъ. 13 Шэйтаныр Исус псэкӀод ригъэшӀэнэу ыуж итэу, Исус мэфэ тӀокӀитӀурэ шъоф нэкӀым итыгъ. ХьакӀэкъуакӀэхэм ахэтыгъ. МэлэӀичхэри фэӀофтабгэщтыгъэх.
Исус иӀоф Галилей хэкум зэрэщиублагъэр
14 УмэхъэкӀо Иуан хьапсым зычӀадзэ ужым, Исус Галилей хэкум кӀуи, Тхьэм и Тетыгъошхо ехьылӀэгъэ къэбарышӀур щигъэӀоу ыублагъ. 15 Мафэр къэсыгъ, Тхьэм и Тетыгъошхуи къэблэгъагъ. ШъуипсэкӀодхэм шъуафыкӀэгъожьи, къэбарышӀур шъушӀошъ жъугъэхъу, ыӀощтыгъ.
Исус пцэжъыяшэ нэбгыриплӀ игъогу рыкӀонхэу къызэряджагъэр
16 Исус Галилей псыхъураем иӀушъо рекӀокӀызэ, Симонрэ ащ ышэу Индрысрэ хъытыур псым хадзэу ылъэгъугъэх, сыда пӀомэ пцэжъыяшэхэу щытыгъэхэти ары. 17 Исус ахэмэ ариӀуагъ: Сауж шъукъырыкӀу. Пцэжъые къэшъуубытыным пае, ыуж шъузэритыгъэм фэдэу, цӀыфхэр сэ сигъогу къы тежъугъэхьанхэм пае, ауж шъузэрихьащтыр шъозгъэшӀэщт. 18 Ахэмэ а гущыӀэхэр зэрэзэхахэу, хъытыухэр къабгынэхи, Исус ыуж ихьагъэх. 19 Исус ащ тӀэкӀу ӀукӀотыгъэу, Зеведей ыкъохэу Якъубэрэ Иуанрэ къуашъом исхэу, яхъытыухэр агъэхьазырхэу ылъэгъугъэх. 20 Ащ лъыпытэу Исус ахэми яджагъ. Ятэу Зеведеирэ илэжьакӀохэмрэ къуашъом исхэу къабгынэхи Исус ыуж ихьагъэх.
Исус лӀы горэм джынэпцӀэ Ӏае зэрэхифыгъэр
21 ЕтӀанэ Капернаум къалэм дэхьагъэх. Шэмбэт мафэр къызэсым, Исус синэгогум чӀахьи, цӀыфхэм Тхьэм игущыӀэхэр аригъашӀэхэу ыублагъ. 22 ЦӀыфхэм Исус Ӏофхэр зэраригъашӀэщтыгъэ шӀыкӀэр агъэшӀэгъуагъ, сыда пӀомэ Тэурат егъэджэкӀо пащэхэм афэмыдэу, тетыгъошхо иӀэу, Тхьэм игъогу цӀыфхэм аригъашӀэщтыгъэти ары. 23 ОшӀэдэмышӀэу джынэпцӀэ Ӏае зыхэс лӀы горэ синэгогум къыщылъагъуи къахэкууагъ: 24 Сыд уиӀофэу къытхэлъыр, Назарет щыщ Исус? ТыбгъэкӀодынэу укъэкӀуагъа? О хэтми узщыщыр сэшӀэ: Тхьэм ыдэжь къикӀыгъэ ЛъапӀэр оры. 25 Щыгъэт, мы лӀым къыхэкӀыжь! къыӀуагъ Исус джынапцӀэм егыеу. 26 ДжынэпцӀэ Ӏаем лӀыр къыгъэкӀэзэзи, мэкъэшхокӀэ къэкууи лӀым хэкӀыжьыгъ. 27 ЦӀыфхэм ар залъэгъум, пстэуми лъэшэу агъэшӀагъуи зэраӀожьыгъ: Сыда мыр? ӀофыкӀэхэр цӀыфхэм арегъашӀэх. Тетыгъошхуи иӀэу, джынэпцӀэ Ӏаехэми унашъо афишӀызэ, егъэдаӀох. 28 Арэущтэу Галилей хэкум зэкӀэ Исус икъэбар псынкӀэу тыдэкӀи щыӀугъ.
Исус цӀыфыбэхэр зэригъэхъужьыгъэхэр
29 ЕтӀанэ ахэр синэгогум къызэрэчӀэкӀыжьхэу, Якъубэрэ Иуанрэ ягъусэхэу, Симонрэ Индрысрэ яунэ кӀуагъэх. 30 Симон ишӀугуащэ плъырстыркӀэ сымаджэу пӀэм хэлъыгъ. Ар зэрэсымаджэр занкӀэу Исус къыраӀуагъ. 31 Исус ащ ыдэжь кӀуи, ыӀэ ыубыти, къыгъэтӀысыгъ. ШӀугуащэм плъырстырыр хэкӀыжьи, къэтэджыжьи, ахэр къыхьакӀэхэу ыублагъ. 32 Пчыхьашъхьэм тыгъэр зыкъохьажьы ужым, сымаджэхэмрэ джынапцӀэ зыхэсхэмрэ зэкӀэ Исус къыфащагъэх. 33 Къалэм дэс пстэури пчъэӀупэм къыщызэӀукӀагъэх. 34 Ащ дэжьым Исус уз зэмылӀэужыгъуабэ зиӀэ сымаджэ Ӏаджи ыгъэхъужьыгъэх, джынэпцӀабэхэри цӀыфхэм ахифыгъэх, ау джынапцӀэхэр къэгущыӀэнхэу фит ышӀыгъэхэп, сыда пӀомэ ахэмэ ар зэрэХристосыр ашӀэщтыгъэти арыгъэ.
Исус Галилей хэкур къыкӀухьэзэ, Тхьэм игущыӀэхэр цӀыфхэм зэраригъэӀущтыгъэхэр
35 Пчэдыжьым жьы дэдэу Исус къэтэджи, къалэм дэкӀи, чӀыпӀэ Ӏудзыгъэ горэм кӀуи, Тхьэм щелъэӀугъ. 6 Симонрэ игъусэхэмрэ Исус лъыхъунхэу дэкӀыгъэх. 37 Къызагъотыжьым раӀуагъ: ЗэкӀэ цӀыфхэр къыплъэхъух. 38 Гъунэгъу къуаджэхэми къалэхэми тыжъугъакӀу, ахэми Тхьэм игущыӀэхэр цӀыфхэм щязгъэӀунхэм пае, къариӀожьыгъ Исус, сыда пӀомэ джары сэ сыкъызфэкӀуагъэр. 39 Арэущтэу Галилей хэкур зэкӀэ къыкӀухьэзэ, ясинэгогухэм цӀыфхэм Тхьэм игущыӀэхэр щаригъэӀущтыгъэх, джынапцӀэхэри цӀыфхэм ахифыщтыгъэх.
Исус шъоджэ уз Ӏае зиӀэ лӀы горэ зэригъэхъужьыгъэр
40 Шъоджэ уз Ӏае зиӀэ лӀы горэ Исус ыдэжь къакӀуи, лъэгонджэмышъхьэкӀэ къэтӀыси къелъэӀугъ: Уфаемэ, сыбгъэхъужьын плъэкӀыщт. 41 Исус ыгу егъугъ, ыӀэ ыщэий, теӀаби ыӀуагъ: Ары, сыфай, псаоу хъужь! 42 Ардэдэм шъоджэ узыр а лӀым хэкӀыжьи, къабзэу хъужьыгъэ. 43 Ащ лъыпытэу Исус ар ытӀупщыжьэу, фигъэпытэу риӀуагъ: 44 Фэсакъ, мыр зыми емыӀотэжь, ау дин пащэм ыдэжь кӀуи зегъэлъэгъу. Узэрэхъужьыгъэм пае, пегъымбар Мусэ иунашъо тетэу къурмэн шӀы. Ар узэрэхъужьыгъэмкӀэ цӀыфхэм апашъхьэ шыхьат щыхъущт. 45 Ау а лӀыр ӀукӀыжьи, къехъулӀэгъэ пстэури ыӀуатэзэ къэбарыр цӀыфхэм ариӀоу ыублагъ. Арыти, цӀыфхэм къалъэгъоу Исус зы къалэ горэми дэхьан ымылъэкӀыжьы хъугъэ, ау чӀыпӀэ Ӏудзыгъэхэм ащыӀагъ. Ау щытми, тыдэкӀи къикӀыхэу цӀыфхэр ыдэжь къэкӀощтыгъэх.
Исус лӀы горэу зыӀэпкълъэпкъ узым зэкӀиубытагъэр зэригъэхъужьыгъэр
1 Мафэ заулэ тешӀагъэу Исус Капернаум къалэм къызегъэзэжьым, иунэ къызэрэкӀожьыгъэр цӀыфмэ зэхахыгъ. 2 Зызэхахым, цӀыфхэу къэзэрэугъоигъэхэр зэрэбагъэм пае, унэпчъэӀупэми хэуцуапӀэ имыӀэжьэу хъугъэ, Исуси Тхьэм игущыӀэхэр аригъэӀухэу ыублагъ. 3 Джащыгъум цӀыф куп къэкӀуагъ; ахэмэ ащыщэу нэбгыриплӀым лӀы горэу зыӀэпкълъэпкъ узым зэкӀиубытагъэр къыздахьыгъ. 4 ЦӀыфхэр зэрэбагъэм къыхэкӀыкӀэ, сымаджэр Исус рахьылӀэн алъэкӀыгъэп. ЗамылъэкӀым, унашъхьэм дахьыий, Исус зыдэщыӀэм дэжь унашъхьэм щыщ тырахи, сымаджэр пӀуаблэм телъэу ратӀупщэхыгъ. 5 Исус ахэмэ яшӀошъхъуныгъэ зелъэгъум, лӀэу зыӀэпкълъэпкъ узым зэкӀиубытагъэм риӀуагъ: СикӀал, уипсэкӀодхэр къыпфэгъугъэх. 6 Тэурат егъэджэкӀо пащэхэу ащ щысыгъэхэм ащыщхэм агухэмкӀэ аГуагъ: 7 Сыд пае мы лӀыр мырэущтэу гущыӀэра? Ащ Тхьэр егъэпцӀыба? Тхьэм нэмыкӀэу, хэта псэкӀодхэр зыгъэгъун зылъэкӀырэр? 8 Ардэдэм Исус ыгукӀэ ахэмэ агухэм арылъыр ешӀэти ариӀуагъ: Сыд пае ащ фэдэ Ӏофхэр шъо шъугухэмкӀэ шъуӀора? 9 Тара нахь псынкӀагъор, лӀэу зыӀэпкълъэпкъ узым зэкӀиубытагъэу щытым «УипсэкӀодхэр къыпфэгъугъэх», епӀоныр ара, хьауми «Тэджи, уипӀуаблэ къашти къэкӀухь», епӀоныр ара? 10 Ау къэшъушӀэным пае, ЦӀыф Лъэпкъым Ыкъо псэкӀодхэр ыгъэгъунхэу дунаим тетыгъо зэрэщыриӀэр, джащыгъум Исус лӀэу зыӀэпкълъэпкъ узым зэкӀиубытагъэу щытым риӀуагъ: 11 Сэ осэӀо, къэтэджи, уипӀуаблэ къашти, шъуадэжь кӀожь! 12 Ар дэдэм лӀыр къэтэджи, ипӀуаблэ къышти, цӀыф пстэуми алъэгъоу унэм икӀыжьыгъ. Ар пстэуми инэу агъэшӀагъозэ, Тхьэм щытхъу фашӀэу аӀуагъ: Мыщ фэдэ Ӏоф тэ ныбжьи тлъэгъугъэп.
Исус игъогу рыкӀонэу Левый къызэреджагъэр
13 Исус джыри Галилей псыхъурэе Ӏушъом Ӏухьажьыгъ. ЦӀыф купышхо ыдэжь къэкӀуагъэ, Исуси Тхьэм игущыӀэхэр аригъашӀэхэу ыублагъ. 14 ЕтӀанэ нахь чыжьэу кӀозэ, хьакъулахь ахъщэр зыщыхахырэ унэм Ӏусэу, Алфей ыкъо Левый ылъэгъугъ. Сауж къырыкӀу, риӀуагъ Исус. Левый къэтэджи, Исус ыуж ихьагъ. 15 ЕтӀанэ Исус Левый иунэ щышхэщтыгъ. Хьакъулахь ахъщэр хэзыххэрэмрэ псэкӀод зышӀэхэрэмрэ бэ хъухэу, Исусрэ игъогу рыкӀохэрэмрэ адашхэщтыгъэх; сыда пӀомэ Исус ыуж итэу къэкӀуагъэхэр бэ мэхъухэти ары. 16 Тэурат егъэджэкӀо пащэхэу фарисейхэм ащыщхэм Исус хьакъулахь ахъщэр хэзыххэрэмрэ псэкӀод зышӀэхэрэмрэ адашхэу залъэгъум, Исус игъогу рыкӀохэрэм араӀуагъ: Хьакъулахь ахъщэр хэзыххэрэмрэ псэкӀод зышӀэхэрэмрэ сыда ар зыкӀадашхэрэр ыкӀи зыкӀадешъорэр? 17 Исус ар зызэхехым, ариӀуагъ: Псаухэр арэп Ӏазэ зищыкӀагъэхэр, сымаджэхэр ары нахь. ПӀъыпкъагъэ зиӀэ цӀыфхэм сяджэнэу арэп сыкъызфэкӀуагъэр, псэкӀод зышӀэхэрэр япсэкӀодхэм афыкӀэгъожьынхэм пае, сяджэнэу ары нахь.
Джурт тхьаматэхэр нэкӀыным ехьылӀагъэу Исус къызэреупчӀыгъэхэр
18 УмэхъэкӀо Иуан игъогу рыкӀохэрэмрэ фарисейхэмрэ анэкӀыщтыгъ. ЦӀыф заулэ къакӀохи, Исус къыраӀуагъ: Иуан игъогу рыкӀохэрэмрэ фарисейхэмэ ягъогу рыкӀохэрэмрэ анэкӀы. О уигъогу рыкӀохэрэм сыд зыкӀамынэкӀырэр? 19 ӀПъаор ягъусэфэкӀэ, шъаом игъусэхэр нэкӀын алъэкӀына? Хьау, шъаор ягъусэфэкӀэ, нэкӀынхэ алъэкӀыщтэп,ариӀожьыгъ Исус ахэмэ. 20 Ау шъаор затырахыщт мафэхэр къэкӀощтых. А мафэр къызыкӀокӀэ, нэкӀыщтых. 21 ШэкӀыкӀэм щыщ идэжьын щыгъыныжъым зыми тыридэрэп. Арэущтэу ышӀымэ, шэкӀыкӀэм щыщ идэжьыным щыгъыныжъыр зэӀитхъынышъ, гъуанэр нахь ин ышӀыщт. 22 Джащ фэдэу, зыми сэнэпс шӀыгъакӀэр шъонтыжъхэм аригъахъорэп. Арэущтэу ышӀымэ, сэнэпсым шъонтхэр къызэгуитхъынхэшъ, сэнэпсыри къичъыщт, шъонтхэри кӀодыщтых. Ау сэнэпс шӀыгъакӀэр шъонтыкӀэхэм арагъэхъон фае.
Исус игъогу рыкӀохэрэм шэмбэт мафэм коцышъхьэхэр къызэрэпачыгъэхэр
23 Шэмбэт мафэ горэм Исус коц хьасэхэм ахэтэу кӀощтыгъ. Игъогу рыкӀохэрэр кӀохэзэ, коцышъхьэхэр къыпачыхэу аублагъ. 24 Фарисейхэм Исус къыраӀуагъ: Еплъ, ахэмэ шэмбэт мафэм хабзэкӀэ пшӀэ мыхъущтыр сыд пае ашӀэра? 25 Даутэрэ игъусэхэмрэ къин хэтхэу, мэлакӀэ лӀэхэ зэхъум, ащ ышӀагъэм зыкӀи шъуеджагъэба? ариӀожьыгъ Исус. 26 Авиафар зыцӀэ дин пэщэшхом имафэхэм Даутэ Тхьэм иунэ ихьи, цӀыфхэм Тхьэм ыпашъхьэ агъэтӀылъыгъэ хьалыгъур ышхыгъ. А хьалыгъур дин пащэхэм анэмыкӀ хабзэкӀэ зыгорэм ышхы мыхъунэу щытыгъ, ау Даутэ ышхыгъ игъусэхэми аригъэшхыгъ. 27 ЕтӀанэ Исус ариӀуагъ: Тхьэм шэмбэт мафэр цӀыфым пае къыгъэхъугъэ нахь, цӀыфыр шэмбэт мафэм пае къыгъэхъугъэп. 28 Арышъ, ЦӀыф Лъэпкъым Ыкъо шэмбэт мафэм итхьамат.
Исус зыӀэ лъэныкъо пыгъукӀыгъэу щыт лӀы горэ зэригъэхъужьыгъэр
1 Джыри зэ Исус синэгогум чӀэхьажьыгъ. ЗыӀэ лъэныкъо пыгъукӀыгъэу щыт лӀы горэ ащ дэжьым чӀэтыгъ. 2 Шэмбэт мафэм тефэу Исус а лӀыр ыгъэхъужьыщтмэ, фарисейхэр еплъакӀощтыгъэх, зэрагъэмысэн Ӏоф горэ къагъотыным пае. 3 Исус лӀэу зыӀэ лъэныкъо пыгъукӀыгъэм риӀуагъ: Къэтэджи, мо утыгум къихь. 4 ЕтӀанэ ахэмэ ариӀуагъ: Шэмбэт мафэм шӀугъэ пшӀэныр ара, хьауми бзэджагъэ пшӀэныр ара хабзэкӀэ хъущтыр, псэ мыкӀодэу къэбгъэнэжьыныр ара, хьауми бгъэкӀодыныр ара? Ау ахэмэ заушъэфыгъ. 5 Ахэмэ ягуркъагъэ Исус ыгу къеуи, губжыгъэу ахаплъи, лӀым риӀуагъ: О пӀэ къэщэй. ЛӀым ыӀэ къыщэий, адрэ Ӏэм фэдэу хъужьыгъ. 6 Джащыгъум фарисейхэр синэгогум чӀэкӀыжьхи, ежьхэмрэ пачъыхьэ Ирод ыуж рыкӀохэрэмрэ Исус агъэкӀодынэу гухэлъ ашӀызэ, зэрагъэкӀодыщт шӀыкӀэмкӀэ зэупчӀыжьыщтыгъэх.
Щыф купышхор Исус зэрэкӀэлъыкӀуагъэр
7 Исус игъогу рыкӀохэрэр игъусэхэу а чӀыпӀэм икӀыжьи, Галилей псыхъураем кӀуагъэ. Галилей хэкум щыщ цӀыфыбэхэр Исус ыуж ихьагъэх. 8 Исус ышӀэгъэ Ӏоф пстэури зэхахыгъэти, Иудей хэкуми, Ерусалими, Идумей хэкуми, Иордан псыхъом иадрабгъу щыӀэ хэкуми, къалэхэу Тиррэ Сидонрэ алъэныкъоми цӀыфыбэхэр къарыкӀыхи, Исус ыдэжь къэкӀуагъэх. 9 Ащ дэжьым цӀыф купышхор тезэрэмыгъэбэнэнхэм пае, Исус игъогу рыкӀохэрэм зы къуашъо ежьым хьазырэу фыщагъэтынэу ариӀуагъ. 10 Сыда пӀомэ Исус цӀыфыбэхэр ыгъэхъужьхэу щытыгъэти, уз зиӀэ пстэури нэсынхэу зытырадзэщтыгъ. 11 ДжынэпцӀэ Ӏаехэми Исус залъэгъукӀэ ыпашъхьэ зырадзыхти куощтыгъэх: «О Тхьэм ури Къу». 12 Ау Исус ежьыр хэт щыщми цӀыфхэм къарамыгъэшӀэнэу джынапцӀэхэм ишъыпкъэу афигъэпытэщтыгъ.
Исус игъогу рыкӀорэ нэбгырэ пшӀыкӀутӀур зэригъэнэфагъэхэр
13 Исус Ӏуашъхьэм дэкӀуаий, ежь зыфаехэм къяджи, ахэр ыдэжь къэкӀуагъэх. 14 Нэбгырэ пшӀыкӀутӀу игъусэнхэуи, Тхьэм игущыӀэхэр цӀыфхэм арагъэӀунхэм пае, ыгъэкӀонхэуи ыгъэнэфагъэх. 15 Ащ нэмыкӀэу, сымаджэхэр агъэхъужьынхэуи, джынапцӀэхэр цӀыфхэм ахафынхэуи тетыгъо аритып?. 16 Исус нэбгырэ пшӀыкӀутӀоу ыгъэнэфагъэхэр мыхэр арых: Симонэу Исус ятӀонэрэ цӀэу Петрэ зыфиусыгъэр; 17 3еведей ыкъуитӀоу Якъубэрэ Иуанрэ (ахэмэ ятӀонэрэ цӀэу Воанергес фиусыгъэх; Воанергес къикӀырэр «Шыблэм ыкъохэр» ары); 18 ЕтӀанэ Индрыс, Филипп, Варфоломей, Маттэ, Фомэ, Алфей ыкъо Якъубэ, Фаддей, Симонэу зихэгъэгу ыгу етыгъэу фэлажьэщтыгъэр, 19 Иудэ Искариот. А Иудэ ары нэужым Исус тетыгъо зиӀэхэм аӀэкӀэзыгъэхьанэу щытыгъэр.
Исусрэ джынапцӀэхэм япащэу Велзевулрэ
20 ЕтӀанэ Исус унэм кӀожьыгъэ. Ежьыррэ игъогу рыкӀохэрэмрэ шхэгъу амыгъотэу, джыри зэ цӀыф купышхо къэзэрэугъоигъ. 21 Исус иунэкъощхэм ежьым къызэригъэзэжьыгъэр зызэхахым, «Ащ зишӀэжьырэп», аӀоти, къащэжьынэу лъыкӀуагъэх. 22 Тэурат егъэджэкӀо пащэхэу Ерусалим къикӀыгъэхэу къэкӀуагъэхэм Исус ехьылӀагъэу аӀощтыгъ: Велзевул ащ хэс, Велзевулэу джынапцӀэхэм япащэ илъэкӀыныгъэ ары джынапцӀэхэр цӀыфхэм зэрахифырэр. 23 Арыти, Исус ахэмэ къяджи, гъэсэныгъэ тхыдэхэмкӀэ ариӀуагъ: Шэйтаным сыдэущтэу шэйтаныр цӀыф горэм хифын ылъэкӀына? 24 Зы пачъыхьагъом лъэныкъуитӀоу зигощымэ, щыӀэжьын ылъэкӀыщтэп. 25 Ащ фэдэу зы унэри лъэныкъуитӀоу гощыгъэ хъумэ, щыӀэжьын ылъэкӀыщтэп. 26 Шэйтанри къэтэджэу, ежь ышъхьэ пэуцужьэу, лъэныкъуитӀоу зэрэгъэхъумэ, ар щыӀэжьын ылъэкӀыщтэп, икӀодыжьыгъо къэсыгъэ нахь. 27 Зыми кӀуачӀэ зиӀэ лӀы горэм иунэ ихьэу, ихьапщыпхэр къырихын ылъэкӀыщтэп ыпэ рапшӀэу а лӀэу кӀуачӀэ зиӀэр зэкӀоцӀимыпхэмэ. Ау а лӀыр зэкӀоцӀипхэмэ, иунэ къытӀэкӀын ылъэкӀыщт. 28 Шъыпкъэр шъосэӀо, цӀыфхэм япсэкӀод пстэури сыд фэдизэу Тхьэр агъэпцӀми, къафэгъушъущтых. 29 Ау хэти Тхьэм Ыпсэ ЛъапӀэ зыгъэпцӀырэм егъашӀэми къыфэгъущтэп, мыкӀодыжьын псэкӀодкӀэ мысэ хъугъэ нахь. 30 Исус ар зыкӀиӀуагъэр, «ДжынэпцӀэ Ӏае хэс», аӀоу, ахэмэ ежьым ехьылӀагъэу аӀуагъэти ары.
Исус янэрэ ышхэмрэ
31 Джащыгъум Исус янэрэ ышхэмрэ къэкӀуагъэх. Щагум дэтхэу, Исус къеджэнэу зыгорэ агъэкӀуагъ. 32 ЦӀыф купышхоу Исус къетӀысэкӀыгъэхэм къыраӀуагъ: О уяни, пшыхэри, пшыпхъухэри щагум дэтхэу къыпкӀэупчӀэх. З3 Хэта сяни сшыхэри? ариӀожьыгъ Исус ахэмэ. 34 ЕтӀанэ къетӀысэкӀыгъэхэм ахаплъи къыӀуагъ: Мыхэр ары сэ сянэри сшыхэри. 35 Хэти Тхьэр зыфаер зыгъэцакӀэрэр ары сэ сшыри, сшыпхъури, сянэри.
Чылапхъэр зыпхъырэм ехьылӀэгъэ гъэсэныгъэ тхыдэр
1 Исус джыри зэ псыхъурае Ӏушъом цӀыфхэм Тхьэм игущыӀэхэр щаригъашӀэхэу ыублагъ. ЦӀыфхэу Исус ыдэжь къыщызэрэугъоигъэхэр зэрэбагъэм пае, ежьыр псым тет къуашъо горэм дэкӀуаий, итӀысхьагъ. ЗэкӀэ цӀыф купышхор псым игъунэгъоу Ӏушъом Ӏутыгъ. 2 Гъэсэныгъэ тхыдэхэмкӀэ цӀыфхэм Ӏофыбэр аригъэшӀагъ. ЦӀыфхэм аригъашӀэзэ, мыщ фэдэу ариӀуагъ: 3 ШъукъэдаГу. ЛӀы горэм чылапхъэ ыпхъынэу дэкӀыгъ. 4 Чылапхъэр ыпхъызэ, ащ щыщ тӀэкӀу гъогум тетэкъуагъ. Бзыухэр къэбыбыхи, ар ашыпыгъ. 5 Зы тӀэкӀуи ятӀэ макӀэ зыхэлъ чӀыгу мыжъуалъэм тетэкъуагъ. ЧӀыгур куугъэпти, шӀэх дэдэу къыхэкӀыгъ, 6 ау тыгъэр къызыдэкӀуаем пыгъукӀыгъ, лъэпсэ куу зэрямыӀагъэм паий, гъугъэх. 7 НэмыкӀ тӀэкӀуи панэхэм ахэтэкъуагъ. Панэхэр къэкӀыхи, чылапхъэу къыхэкӀыгъэхэр атхьалэхи, зи къапагъэкӀагъэп. 8 ЕтӀани зы тӀэкӀу чӀыгу дэгъум хэтэкъуагъ. Ахэр къэкӀыхи, къыдэкӀуаехи, шъхьэхэр къапыкӀагъэх. Зы шъхьэ налъэм коцыцэ щэкӀ къыпыкӀагъ, адрэм тӀокӀищ, адрэми коцыцишъэ къыпыкӀагъ. 9 ЕтӀанэ Исус къыпигъэхъожьыгъ: РыдэӀонэу тхьакӀумэ зиӀэм зэхерэх
Исус цӀыфхэм Ӏофхэр аригъашӀэхэзэ, гъэсэныгъэ тхыдэхэр къызыкӀафиӀотэщтыгъэхэр
10 ЦӀыфхэр зэбгырыкӀыжьхи, Исус изакъоу къызэнэжьым, игъогу рыкӀорэ нэбгырэ пшӀыкӀутӀумрэ игъусэхэмрэ гъэсэныгъэ тхыдэхэм яхьылӀагъэу къеупчӀыгъэх. 11 Тхьэм и Тетыгъошхо ишъэфхэр шъушӀэнхэу Тхьэм фитыныгъэ къышъуитыгъ, ариӀуагъ Исус, ау нэмыкӀ цӀыфхэм гъэсэныгъэ тхыдэхэмкӀэ Ӏоф пстэури алъэӀэсы. 12 Арэущтэу «ахэр анэхэмкӀэ еплъыхэ пэтми, зи алъэгъущтэп, атхьакӀумэхэмкӀэ даӀохэ пэтми, зи къагурыӀощтэп. Армырмэ Тхьэм ыдэжь къагъэзэжьыщтыгъ, ащи япсэкӀодхэр афигъэгъущтгъэх».
Чылапхъэр зыпхъырэм ехьылӀэгъэ гъэсэныгъэ тхыдэм къикӀырэр Исус игъогу рыкӀохэрэм къызэрагуригъэӀуагъэр
13 Ащ ыужым Исус ахэмэ ариӀуагъ: Мы гъэсэныгъэ тхыдэр къыжъугурымыӀоу, адрэ гъэсэныгъэ тхыдэ пстэури сыдэущтэу къыжъугурыӀощта? 14 Зыпхъырэм Тхьэм игущыӀэхэр епхъых. 15 ЦӀыфхэм ащыщэу зы купыр чылапхъэу гъогум тепхъагъэм фэд. Тхьэм игущыӀэхэр зэрэзэхаххэу, шэйтаныр къэкӀошъ, гущыӀэхэу агухэм арылъ хъугъэхэр рехыжьых. 16 Адрэ цӀыф купыр чӀыгу мыжъуалъэм тепхъэгъэ чылапхъэм фэд. Тхьэм игущыӀэхэр зэрэзэхаххэу, а гущыӀэхэр гушӀуагъокӀэ аштэх. 17 Ау ахэмэ агухэмкӀэ лъапсэ зэрямыӀэм пае, шӀошъхъуныгъэм игъогу бэрэ тетыжьхэрэп. Тхьэм игущыӀэхэм апаекӀэ, е гузэжъогъу зэрэхафэхэу, е цӀыфхэм ахэмэ къин зэрарагъэщэчэу, шӀошъхъуныгъэм игъогу текӀыжьых. 18 ЕтӀанэ зы цӀыф купыр панэхэм ахэпхъэгъэ чылапхъэм фэд. Ахэмэ Тхьэм игущыӀэхэр зэхахых, 19 ау мы дунаем игугъухэри, баиныгъэм игъэпцӀэныгъэри, нэмыкӀ Ӏоф мыхъомышӀэхэм акӀэхъопсэныри агухэм ехьэхэшъ, Тхьэм игущыӀэхэу агухэм арылъхэр атхьалэхэшъ, а цӀыфхэми шӀугъэ къапыкӀырэп. 20 ЕтӀани нэмыкӀ цӀыф куп чӀыгу дэгъум хэпхъэгъэ чылапхъэм фэд. Ахэмэ Тхьэм игущыӀэхэр зэхахыхэшъ, а гущыӀэхэр аштэх, ахэми шӀугъэ къапэкӀы, е фэдэ щэкӀ, е фэдэ тӀокӀищ, е фэдишъэ.
Щэлъэ чӀэгъым чӀэт остыгъэр
21 Ащ ыужым Исус ариӀуагъ: Зыгорэм остыгъэр къыхьэу, щэлъэ чӀэгъым е пӀэкӀор чӀэгъым ар чӀегъэуцуа? Остыгъэм итетыпӀэ лъагэ тырегъэуцо нахь. 22 Сыда пӀомэ сыд щыщми гъэбылъыгъэр къэлъэгъожьыщт, сыд щыщми чӀэухъумагъэри къэнэфэжьыщт. 23 РыдэӀонэу тхьакӀумэ зиӀэм зэхерэх. 24 Исус етӀанэ ариӀуагъ: Зэхэшъухырэм тэрэзэу гу лъышъут. Шъо шапхъэу зэрэшъушырэм фэдэ шапхъэкӀэ Тхьэм шъо къышъуфишыжьыщт, нахьыбэуи къышъуфыхигъэхъощт. Тхьэм 25 зиӀэм нахьыбэ къыритыщт, ау Тхьэм зимыӀэм иӀэ тӀэкӀури Ӏихыжьыщт. Чылапхъэу къэкӀырэм ехьылӀэгъэ гъэсэныгъэ тхыдэр 26 Исус мыри къыӀуагъ: Тхьэм и Тетыгъошхо зыфэдэр мары. ЛӀы горэм чылапхъэр чӀыгум хепхъэ. 27 Чэщым мэчъые, мафэми къэущы, чылапхъэр къэкӀы, къыдэкӀуае, ау ар зэрэхъурэр ащ ышӀэрэп. 28 ЧӀыгум ежьежьырэу къыхэкӀы, ыпэ рапшӀэу пкъыр къыхэкӀы, етӀанэ ар мэшъхьалъэ, етӀанэ мэтӀыргъо. 29 Шъхьэналъэхэр зытӀыргъохэкӀэ, хыныгъор къэсыгъэшъ, ахыжьы.
Горчицацэм ехьылӀэгъэ гъэсэныгъэ тхыдэр
30 Тхьэм и Тетыгъошхо сыдым фэдгъэдэн? къыӀуагъ Исус. Хьауми сыд гъэсэныгъэ тхыдэкӀэ ар зыфэдэр къэтӀон? 31 Ар зыфэдэр горчицацэр ары. ЧӀыгум хэфэфэ, дунаим тет цэ пстэуми анахь цӀыкӀу. 32 Ау чӀыгум зыхафэкӀэ, къэкӀышъ, зы илъэс зыныбжь къэкӀыгъэ пстэуми анахьи нахь инэу мэхъу. Ижьауи къолэбзыухэр чӀэсынхэ алъэкӀынэу къутэмэ инхэри къыгокӀэх. 33 Ащ фэдэ гъэсэныгъэ тхыдабэхэмкӀэ цӀыфхэм зэхашӀыкӀын зэралъэкӀыщтым тетэу, Исус Тхьэм игущыӀэхэр ариӀощтыгъэх. 34 Гъэсэныгъэ тхыдэ хэмытэу цӀыфхэм адэгущыӀэщтыгъэп. Ау игъогу рыкӀохэрэр язакъоу къызэнэжьхэкӀэ, пстэури зэхаригъэшӀыкӀыщтыгъ.
Исус жьыбгъэ щынэгъошхор зэригъэуцугъэр
35 А мэфэ дэдэм пчъыхьэр къызэсым, Исус игъогу рыкӀохэрэм ариӀуагъ: НекӀо, псыхъураем иадрабгъу тызэпырыжъугъэкӀ. 36 Игъогу рыкӀохэрэр цӀыф купышхом къыхэкӀыхи, Исус къуашъоу зэрысым къыдитӀысхьэхи ежьагъэх. НэмыкӀ къуашъохэри игъусагъэх. 37 Жьыбгъэ щынэгъошхо къэхъуи, къуашъом псыорхэр къиохэу, псыр изы хъоу фежьагъ. 38 Исус ышъхьэ шъхьантэм телъэу, къошъо кӀоцӀым ыкӀэкӀэ щычъыещтыгъ. Ахэмэ къагъэущи раӀуагъ: Дин гъэсакӀу, тызэрэкӀодырэм уигъэгумэкӀырэба? 39 Исус къэтэджи, жьыбгъэшхом егыий, псым риӀуагъ: Самбыр! Щыгъэт! Жьыбгъэр уцужьи, кӀымсым дэдэу къэхъугъ. 40 ЕтӀанэ игъогу рыкӀохэрэм ариӀуагъ: Сыд пае ащ фэдизэу шъущтэрэ? ШӀошъхъуныгъэ джыри шъуимыӀэу ара? 41 Хэт мыр, жьыбгъэшхори псыри зыгъэдаӀорэр?зэраӀожьыгъ ахэмэ щтагъэхэу.
Исус джынапцӀэ зыхэс лӀы горэ зэригъэхъужьыгъэр
1 Галилей псыхъураем иадрабгъу ит хэкоу Гадарэ зыцӀэ къалэм епхыгъэм нэсыгъэх. 2 Исус къуашъом къызэрикӀэу, джынэпцӀэ Ӏае зыхэс лӀы горэ къэунэхэм алъэныкъокӀэ къикӀи къыпэгъокӀыгъ. 3 А лӀыр къэунэхэм ахэсыгъ. ГъучӀ Ӏэхъурэ лъэхэъурэкӀэ зыми ыпхын ылъэкӀыщтыгъэп. 4 Сыда пӀомэ гъучӀ Ӏэхъулъэхъу бэрэ тыралъхьэщтыгъ, ау Ӏэхъур ээпичыщтыгъ, лъэхъури зэпиутыщтыгъ. Арэущтэу зыми а лӀыр ыгъэуцун ылъэкӀыщтыгъэп. 5 Чэщи мафи къэунэхэмрэ Ӏуашъхьэхэмрэ ахэт зэпытыщтыгъ, куомэкӀыизэ мыжъохэмкӀэ зэожьыщтыгъ. 6 ЧыжьэкӀэ а лӀым Исус зелъэгъум, къачъи лъэгъонджэмышъхьэкӀэ ыпашъхьэ къитӀысхьагъ. 7 МэкъэшхокӀэ къэкуозэ къыӀуагъ: Исус, Тхьэу анахь Иным Ыкъу, сыда уиӀофэу къысхэлъыр? Тхьэм ыцӀэкӀэ сыолъэӀу, къин сэмыгъэлъэгъу! 8 А лӀым арэущтэу зыкӀиӀуагъэр, Исус джынапцӀэм, «О джынэпцӀэ Ӏае, мы лӀым хэкӀыжь!» риӀуагъэти ары. 9 Сыда о пцӀэр? еупчӀыгъ Исус а лӀым. Сэ сцӀэр дзэ, пэгъокӀ къытыжьыгъ ащ, сыда пӀомэ бэ тэхъушъ ары. 10 ЕтӀанэ Исус ахэр а хэкум римыфынхэу лъэшэу къелъэӀугъэх. 11 А чӀыпӀэ дэдэм зы къо Ӏэхъогъушхо Ӏошъхьэ нэпкъым щыхъущтыгъ. 12 Джащыгъум джынэпцӀэ Ӏаехэр Исус къелъэӀугъэх: Къохэм адэжь тыгъакӀуи, ахэмэ апкъыхэм тахэгъахь. 13 Исус ахэр фит ышӀыгъэх. ДжынэпцӀэ Ӏаехэр лӀым хэкӀыжьхи, къохэм апкъыхэм ахэхьагъэх. Къо Ӏэхъогъур Ӏошъхьэ нэпкъым къечъэхи, псыхъураем хэлъадэхи, псым ытхьалагъэх. Ахэр минитӀу фэдиз хъущтыгъэх. 14 Къуахъохэр хэхьажьхи, къалэмрэ къуаджэхэмрэ хъугъэшӀагъэр щаӀотэжьыгъ, цӀыфхэри хъугъэр зэрагъэлъэгъунэу къэкӀуагъэх. 15 Ахэр Исус ыдэжь къызэкӀохэм, джынэпцӀабэхэр къызхэкӀыжьыгъэ лӀыр фэпагъэу, иакъыл къыгъотыжьыгъэу, ащ дэжьым щысэу алъэгъугъ. Ар залъэгъум, къэщтагъэх. 16 Джащыгъум къэхъугъэр зылъэгъугъэ цӀыфхэм джынапцӀэхэр зыхэсыгъэ лӀымрэ къохэмрэ къяхъулӀагъэр цӀыфхэм араӀотэжьыгъ. 17 ЦӀыфхэм ар зызэхахым, Исус яхэку ыбгынэнэу къелъэӀугъэх. 18 Исус къуашъом итӀысхьажьы зэхъум, джынапцӀэхэр къызхэкӀыжьыгъэ лӀыр ащ къелъэӀугъ: Гъусэ сызыфэшӀ. 19 О уибынхэм адэжь уиунэ кӀожьи, Зиусхьаным къыпфишӀэгъэ шӀугъэшхомрэ гукӀэгъу къызэрэпфишӀыгъэмрэ яӀотэжь, риӀуагъ Исус ар фимыдэу. 20 Арэущтэу ар кӀуи, Исус къыфишӀагъэр КъэлипшӀ зыцӀэ хэкум щиӀуатэу ыублагъ, цӀыфхэми зэкӀэ агъэшӀэгъуагъ.
Исус Иаир зыцӀэм ыпхъоу лӀагъэр къызэригъэтэджыжьыгъэр; Исус ищыгъын къынэсыгъэ бзылъфыгъэр зэригъэхъужьыгъэр
21 Исус къуашъомкӀэ Галилей псыхъураем иадрабгъу зызэпырэкӀыжьым, цӀыф купышхо ежьым ыдэжь къыщызэрэугъоигъ. Исус псы Ӏушъом Ӏутэу, 22 Иаир зыцӀэ синэгогу пащэ горэ къэкӀуагъ. Ащ Исус зелъэгъум, ылъакъохэм адэжь зыкъыщыридзыхи, 23 лъэшэу къелъэӀугъ: Сэ спхъу цӀыкӀу малӀэ пэт. Хъужьынышъ, псаоу къэнэжьыным пае, къакӀуи, пӀэхэр телъхьэх. 24 Джащыгъум Исус а лӀым игъусэу кӀуагъэ. ЦӀыф купышхо Исус тезэрэгъэбанэхэу игъусэхэу кӀощтыгъэх. 25 А цӀыфхэм зы бзылъфыгъэ горэ ахэтыгъ. Илъэс пшӀыкӀутӀу хъугъэу, бэрэ ащ лъы къыкӀэкӀэу гуӀэщтыгъ. 26 Ӏэзэ Ӏаджи еплъыгъагъэх, къиныби рагъэщэчыгъагъ. Бзылъфыгъэм иӀэ пстэури ахэмэ атыригъэкӀодэгъагъ, ау нахь Ӏае хъущтыгъэ нахь, ишӀуагъэ къэкӀуагъэп. 27 Ащ Исус икъэбар зэхихыгъэти, цӀыф купышхом хэтэу Исус ыкӀыбкӀэ къакӀуи, ищыгъын къынэсыгъ; 28 сыда пӀомэ а бзылъфыгъэм мыщ фэдэу ыгукӀэ ыӀуагъэти ары: «Исус ищыгъынхэм санэс нэмыӀэми, сыхъужьыщт». 29 Ардэдэм лъыкӀэкӀыныр уцужьыгъэ, зэрэхъужьыгъэри ыпкъыкӀэ зэхишӀагъ. 30 Исус ыгукӀэ кӀуачӀэ зэрэхэкӀыгъэм занкӀэу гу лъитагъ. ЦӀыф купышхом хэтэу зыкъызэригъэзэкӀи ариӀуагъ: Хэта сищыгъынхэм къанэсыгъэр? 31 ЦӀыф купышхор къыптезэрэгъэбанэхэу плъэгъузэ, етӀани, «Хэта къызнэсыгъэр?» оӀуа? къыраӀуагъ игъогу рыкӀохэрэм. 32 Ау Исус ар зышӀагъэр ылъэгъуным пае, зиплъыхьэщтыгъ. 33 Джащыгъум бзылъфыгъэм къехъулӀагъэр ешӀэти, щтагъэу, кӀэзэзэу къыӀухьи, Исус ыпашъхьэ зыкъыщыридзыхи, шъыпкъэр зэкӀэ къыриӀуагъ. 34 Сипшъашъ, риӀуагъ Исус, уишӀошъхъуныгъэ уигъэхъужьыгъ. Гъогу маф, гупсэфыныгъэ уиӀэу опсэу. Узынчъэу ухъужьыгъ. 35 Исус гущыӀэзэ, лӀы заулэ синэгогу пащэм иунэ къикӀыгъэхэу, къакӀохи, Иаир къыраГуагъ: Ппхъу дунаем ехыжьыгъ. Дин гъэсакӀом сыд пае джыри къин ебгъэлъэгъужьыра? 36 Ау Исус ахэмэ къаГуагъэр зэрэзэхихэу, синэгогу пащэм риӀуагъ: Умыщын, шӀошъхъуныгъэ зигъаӀэ къодый. 37 ЕтӀанэ ГТетри, Якъуби, ащ ышы Иуани нэмыкӀ зи зыдимыщэу, Исус гъогум техьажьыгъ. 38 Синэгогу пащэм иунэ къызэкӀохэм, Исус цӀыфхэр бырсьфхэу, хьадагъэ ашӀэу, пыхьэхэу ылъэгъугъэх. 39 Исус унэм къызехьэм, ариӀуагъ: Сыд пае бырсыр къэшъуӀэтэу, хьадагъэ шъушӀьфа? Пшъэшъэжъыер лӀагъэп, мэчъые нахь. 40 Исус ар къызеӀом, къыдэхьащхыгъэх. Ау Исус зэпстэури унэм къыригъэкӀыхи, пшъэшъэжъыем ятэянэмрэ игъусищрэ зыдищэхи, пшъэшъэжъыер зэрылъ унэм ихьагъ. 41 ЕтӀанэ пшъэшъэжъыем ыӀэ къыубыти риӀуагъ: Талифэ кум! (Ащ къикӀырэр, Сипшъэшъэжъый, сэ осэӀо, къэтэдж!) 42 Пшъэшъэжъыер ардэдэм къэтэджыжьи, унэ кӀоцӀыр къыкӀухьагъ. Ар илъэс пшӀыкӀутӀум итыгъ. Ар залъэгъум, лъэшэу агъэшӀэгъуагъ. 43 Ау Исус хъугъэр зыми рамыӀотэжьынэу унэшъо пытэ афишӀыгъ. ЕтӀанэ пшъэшъэжъыер агъэшхэнэу ариӀуагъ.
Назарет дэс цӀыфхэм Исус зэрамыштагъэр
1 Исус, игъогу рыкӀохэрэр игъусэхэу, а чӀыпӀэм икӀыжьи, янэ икъалэ кӀожьыгъэ. 2 ӀПэмбэт мафэр къызэсым, синэгогум цӀыфхэм Тхьэм игущыӀэхэр щаригъашӀэхэу ыублагъ. Ежьым едэӀугъэ цӀыфыбэхэм агъэшӀагъоу къаӀуагъ: Мы лӀым къыӀохэрэр тыдэ къырихыгъэха? Сыдэу зэхэшӀыкӀыныгъэшхо Тхьэм ащ къьфитыгъа! Сыдэу Ӏо фышхо гъэшӀэгъонха ащ ыӀэ къикӀыхэрэр! 3 Мерэм ыкъоу пхъашӀэр арыба мыр, Якъубэ, Иосый, Иудэ, Симон ашыр? Ышыпхъухэри тэ къытхэсхэба? Арэущтэу Исус пае агу мыхъун къырагъэхьагъ. 4 Пегъымбарым лъытэныгъэ фэзымышӀыхэрэр ежь янэ икъалэ дэсхэр, ежь иблагъэхэр, ежь иунагъо щыщхэр ары ныӀэп, ариӀуагъ Исус ахэмэ. 5 Исус сымэджэ заулэм ыӀэхэр атырилъхьэхэу зэригъэхъужьыгъэхэм нэмыкӀ а чӀыпӀэм Ӏофышхо гъэшӀэгъон зи щишӀагъэп. 6 Ахэмэ яшӀошъмыхъуныгъи ыгъэшӀэгъуагъ.
Исус игъогу рыкӀорэ нэбгырэ пшӀыкӀутӀур Тхьэм фэлэжьэнхэу зэрэдигъэкӀыгъэхэр
ЕтӀанэ цӀыфхэм Тхьэм игущыӀэхэр аригъашӀэхэзэ, игъунэгъу къуаджэхэр къыкӀухьащтыгъэх. 7 Джащыгъум Исус игъогу рыкӀорэ нэбгырэ пшӀыкӀутӀумэ къяджи, тӀурытӀоу дигъэкӀыхэу ыублагъ. ДжынэпцӀэ Ӏаехэр цӀыфхэм ахафынхэу тетыгъо аритыгъ. 8 Мы унашъор афишӀыгъ: Гъогум шъузытехьэкӀэ, зы бэщ нэмыкӀ зи зыдэшъумышт. Хьалыгъуи, Ӏалъмэкъи, бгырыпхым илъ ахъщи зыдэшъумыштэх. 9 Ау цокъэ къызэрыкӀохэр зыщышъулъэх. ДжэнитӀуи зыщышъумылъ. 10 ХьакӀэу зы унэ горэм шъуихьэмэ, а чӀыпӀэм шъукъыдэкӀыжьыфэ нэс, а унэм шъуис, къыпигъэхъожьыгъ Исус. 11 Зы чӀыпӀэ горэм шъущырамыгъэблагъэмэ е къыщышъомыдэӀухэмэ, а чӀыпӀэм шъукъызикӀыжькӀэ, мыхъунэу ашӀагъэмкӀэ ахэмэ апашъхьэ шыхьат щыхъуным пае, шъуицуакъэхэм акӀэрылъ сапэр акӀэрыжъугъэтэкъужь. Шъыпкъэр шъосэӀо, ахърэт мафэм а къалэм къинэу ыщэчыщтым нахьи, Содомрэ Гоморрэрэ къинэу ащэчыщтыр нахь мэкӀэщт. 12 Арэущтэу а нэбгырэ пшӀыкӀутӀур гъогум техьэхи, «ШъуипсэкӀодхэм шъуафыкӀэгъожь», цӀыфхэм араӀозэ, агъэӀоу аублагъ. 13 ДжынэпцӀабэхэр цӀыфмэ ахафыщтыгъэх, сымаджэ Ӏаджи дагъэ щафэзэ агъэхъужьыщтыгъэх.
УмэхъэкӀо Иуан ышъхьэ зэрэпаупкӀыгъэр
14 Исус цӀэрыӀоу хъугъэти, икъэбар пачъыхьэу Ирод зэхихыгъ. Зызэхехым, мырэущтэу ыӀуагъ: Мыр умэхъэкӀоу Иуан ары. Ар лӀагъэхэм къахэтэджыкӀыжьыгъ, джары ащ фэдэ лъэкӀыныгъэ зыхэлъ Ӏофышхохэр ыӀэ къызкӀикӀыхэрэр. 15 Ар пегъымбар Иляс ары, аӀощтыгъ нэмыкӀ цӀыфхэм. Ар пегъымбар гор, пэсэрэ пегъымбархэм афэдэу,аӀощтыгъ етӀани нэмыкӀхэми. 16 Ау Ирод ахэмэ ягущыӀэхэр зызэхеххэм, ыӀуагъ: Иуанэу зышъхьэ пязгъэупкӀыгъэр лӀагъэхэм къахэтэ джыкӀыжьыгъ. 17 Ирод ар зыкӀиӀуагъэр мыры: Ежьым ышэу Филипп зыцӀэр псаоу пэтми, Ирод а Филипп ишъузэу Иродиадэ зыцӀэр къыщэжьыгъ. 18 Ащ къызэрищэжьыгъэм пае, Иуан Ирод риӀощтыгъ: «О пшы ишъуз къэпщэжьыныр хабзэкӀэ хъущтэп». 19 Ащ пае Иродиадэ Иуан гужъ фыриӀэу хъугъэ. Иродиадэ ихьатыркӀэ Ирод идзэлӀхэм Иуан аригъэубыти, хьапсым чӀаригъэдзагъ. Иродиадэ Иуан аригъэукӀынэу фэягъ, ау ар къыдэхъугъэп. 20 Сыда пӀомэ Иуан шъыпкъагъэ зиӀэ цӀыф лъапӀэу зэрэщытыр Ирод ышӀэщтыгъэти, щыщынэщтыгъ ыкӀи ыухъумэщтыгъ. Иуан къыӀохэрэм зядэӀукӀэ, инэу гумэкӀыщтыгъ, ау щытми игуапэу едэӀущтыгъ. 21 Зы мафэ горэм Иродиадэ Ӏофэу зылъыхъущтыгъэр къыфифагъ. Ирод къызыхъугъэ мафэр ыгъэлъэпӀэнэу икъулыкъушӀэхэм, идзэ ипэщэшхохэм, Галилей хэкум итхьаматэхэм ешхэешъошхо афишӀи къыригъэблэгъагъэх. 22 Джащыгъум Иродиадэ ыпхъу унэм къихьи къафэшъуагъ. Иродрэ ихьакӀэхэмрэ агу рихьыгъ. УзыфаемкӀи къысэлъэӀуи, укъызэрысэлъэӀурэр къыпфэсшӀэщт, риӀуагъ пачъыхьэм пшъашъэм. 23 ТхьарыӀуи фишӀыгъ: Сыд щыщми узыфаер остын, сипачъыхьагъу ыныкъо нэс. 24 Пшъашъэр унэм икӀыжьи, янэ еупчӀыжьыгъ: СыдкӀэ селъэӀущта? УмэхъэкӀо Иуан ышъхьэкӀэ елъэӀу, къыриӀожьыгъ янэ. 25 Пшъашъэр псынкӀэу унэм къилъэдэжьи, пачъыхьэм къыриӀуагъ: Джыдэдэм умэхъэкӀо Иуан ышъхьэ зы лэгъэнгхо горэм илъэу къысэт. 26 Пачъыхьэм ар зызэхехым, ыгу лъэшэу къеуагъ, арышъхьакӀэ хьакӀэхэм апашъхьэ пшъашъэм тхьарыӀоу фишӀыгъэм пае игущыӀэ епцӀыжьынэу фэягъэп. 27 Арыти, ардэдэм зы дзэлӀ горэ Иуан ышъхьэ къыхьынэу унашъо фишӀи ыгъэкӀуагъ. 28 Ар кӀуи, Иуан ышъхьэ хьапсым щыпиупкӀи, лэгъэшхом илъэу къыхьи, пшъашъэм къыритыгъ. Пшъашъэм янэ ритыжьыгъ. 29 Иуан игъогу рыкӀохэрэм хъугъэшӀагъэр зызэхахым, къакӀохи, Иуан ихьадэ хьапсым чӀахыжьи, къэунэм чӀалъхьажьыгъ.
Исус нэбгырэ минитф зэригъэшхагъэр
30 Апостолхэр Исус ыдэжь къыщызэрэугъоихи, Ӏофэу ашӀэгъэ пстэумрэ цӀыфхэм аригъэшӀэгъэ Ӏоф пстэумрэ раӀотэжьыгъэх. 31 КъэкӀонакӀохэр зэрэбагъэм пае, Исусрэ игъогу рыкӀохэрэмрэ шхэгъуи фифэжььпцтыгъэхэпти, Исус ахэмэ ариӀуагъ: ЧӀыпӀэ Ӏудзыгъэ горэм тизакъоу тыкӀонышъ, зыжъугъэпсэфьпцт. 32 Арыти, къуашъом исхэу Ӏудзыгъэ чӀыпӀэ горэм язакъоу кӀуагъэх. 33 ЦӀыфхэм ахэр къуашъом исхэу, ӀукӀыхэу алъэгъугъ, бэми къашӀэжьыгъэх. ЦӀыфхэр къэлэ пстэуми лъэсэу къадэчъыхи, Исусрэ игъогу рыкӀохэрэмрэ къуашъомкӀэ зыдэкӀощтыгъэ чӀыпӀэм нэмысхэ рапшӀэу ахэр нэсхи, къэзэрэутъоигъэх. 34 Исус къуашъом къикӀи, цӀыф купышхор зелъэгъум, а цӀыфхэр мэлахъо зимыӀэ мэл Ӏэхъогъум фэдэхэу щыты гъэхэти, ыгу ягъуи, Ӏофыбэхэр аригъашӀэхэу ыублагъ. 35 Мафэр зыхэкӀуатэм, игъогу рыкӀохэрэр Исус къыбгъодахьэхи къаӀуагъ: Мы чӀыпӀэр нэкӀы, мафэри хэкӀотэгъах. 36 Чылэкъоджэ гъунэгъухэм кӀонхэшъ, гъомлапхъэ къызфащэфыжьыным пае, цӀыфхэр тӀупщыжьых; сыда пӀомэ, ашхын зи яӀэп. 37 Шъо ахэр жъугъашхэх, ариӀуагъ Исус ахэмэ. ТыкӀонышъ, динар шъитӀум ауасэ хьалыгъу къэтщэфына, мы цӀыфхэм ядгъэшхынэу? къыраӀожьыгъ адрэхэм. 38 Хьалыгъу тхьапша шъуиӀэр? ариӀуагъ Исус. ШъукӀуи къызэжъугъашӀ. КъызэрагъашӀи къаГуагъ: Хьалыгъуитфырэ пцэжъыитӀурэ тиӀ. 39 ЕтӀанэ Исус цӀыф пстэури купкупэу уц шхъуантӀэм хагъэтӀысхьанхэу игъогу рыкӀохэрэм унашъо афишӀыгъ. 40 ЕтӀанэ цӀыфхэр шъэрышъэу, шъэныкъошъэныкъоу купкупэу тӀысыгъэх. 41 ЕтӀанэ Исус хьалыгъуитфымрэ пцэжъыитӀумрэ къыштэхи, уашъом дэплъыий, Тхьэм щытхъу фишӀыгъ. ЕтӀанэ хьалыгъухэр зэгуичыхи, цӀыфмэ апашъхьэ ралъхьанхэу игъогу рыкӀохэрэм аритыгъэх. ПцэжъыитӀури ахэмэ зэкӀэми афигощыгъ. 42 ЦӀыф пстэури шхагъэх ыкӀи загъэшхэкӀыгъ. 43 Ащ нэужым къялыжьыгъэ хьалыгъу такъырхэмрэ пцэжъыехэмрэ мэтэ пшӀыкӀутӀу арызэу аугъоижьыгъэх. 44 Шхагъэхэр лӀы минитф хъущтыгъэх.
Исус псы кӀыӀум тетэу зэрэкӀуагъэр
45 Исус цӀыф купышхор етӀупщыжьыфэ, игъогу рыкӀохэрэр ежьым ыпэ рапшӀэу псыхъураем иадрабгъу ит Вифсайдэ къалэм зэпырыкӀынхэу къуашъом ригъэтӀысхьагъэх. 46 Исус цӀыфхэр зетӀупщыжьыхэ ужым, Тхьэм елъэӀунэу Ӏуашъхьэм дэкӀоягъ. 47 Пчыхьэр къызэсым, къуашъор псыхъурэе гузэгум нэсыгъагъ, Исуси изакъоу чӀыгум къытенагъ. 48 Къуашъом исхэм жьыбгъэр къапеоти, ахэмэ ерагъэу къошъо бэщхэмкӀэ афэу Исус ылъэгъугъэх. АтэкъэӀогъум дэжь къуашъом исхэм алъэныкъокӀэ псы кӀыӀум тетэу, Исус къэкӀуагъ. Ахэмэ аблэкӀы пэтыгъ. 49 Исус псы кӀыӀум тетэу къакӀоу залъэгъум, хьадэджадэу ашӀошӀи, къэкууагъэх, 50 сыда пӀомэ зэпстэуми ар алъэгъуи, лъэшэу щтагъэхэти ары. Ардэдэм Исус къадэгущыӀагъ: ПӀъугу шъумыгъэкӀоды, сэры ар, шъумыщын. 51 ЕтӀанэ ахэмэ къуашъом адитӀысхьи, жьыбгъэр уцужьыгъэ. Лъэш дэдэу агъэшӀэгъуагъ, 52 сыда пӀомэ Ӏофышхо гъэшӀэгъонэу Исус хьалыгъухэмкӀэ ышӀэгъагъэр къагурымыӀоу, гуркъэхэу щытыгъэхэти ары.
Исус Геннисарет хэкум сымаджэхэр зэрэщигъэхъужьыгъэхэр
53 Псыхъураем зызэпырэкӀыхэм, Геннисарет хэкум нэсхи, гъурзыр щырадзыхыгъ. 54 Къуашъом къызэрикӀыхэу, цӀыфхэм Исус къашӀэжьыгъ. 55 ЦӀыфхэм а хэкур зэкӀэ къачъыхьэу, сымаджэхэр пӀуаблэхэм акӀоцӀылъхэу Исус зыдэщыӀэу зыфаӀорэ чӀыпӀэм къахьэу къаублагъ. 56 Къуаджэми, къалэми, чылэми Исус тыдэ кӀуагъэми сымаджэхэр а чӀыпӀэхэм ягузэгупӀэхэм ащагъэтӀылъти, зи мыхъуми ищыгъын кӀапэм нигъэсынхэу къелъэӀущтыгъэх, Исус ищыгъын кӀапэми нэсыгъэ пстэури хъужьыщтыгъэх.
Тыжъхэм къакӀэныжьыгъэ хабзэхэр
1 Фарисейхэри Ерусалим къикӀыгъэ Тэурат егъэджэкӀо пащэхэм ащыщхэри Исус ыдэжь къыщызэрэугъоигъэх. 2 Ахэмэ Исус игъогу рыкӀохэрэм ащыщхэр Ӏэ мыкъабзэхэмкӀэ, ащ къикӀырэр аӀэхэр амытхьакӀыхэу, шхэхэу алъэгъугъ. 3 Сыда пӀомэ фарисейхэмрэ адрэ джурт пстэумрэ ятэжъхэм къакӀэныжьыгъэ хабзэхэм атетхэу, аӀэхэр амытхьакӀыгъэхэу шхэхэрэп. 4 Бэдзэрым къикӀыжьхэмэ, замыгъэкъэбзэжьыгъэу шхэхэрэп. А хабзэхэм анэмыкӀэу, ятэжъхэм къакӀэныжьыгъэ хэбзабэхэр зэрахьэ, гущыӀэм пае, шъуалъэхэми, къумгъанхэми, лэгъупхэми ятхьакӀынхэр. 5 Арыти, фарисейхэмрэ Тэурат егъэджэкӀо пащэхэмрэ Исус къеупчӀыгъэх: О уигъогу рыкӀохэрэр тятэжъхэм къытфагъэнэгъэ хабзэхэм атемытхэу, Ӏэ шӀоихэмкӀэ сыд пае шхэхэра? 6 Пегъымбар Исайас шъо нэпитӀу зиӀэхэм шъыпкъэр къышъуиӀолӀагъ, ариӀожьыгъ Исус. Мыщ фэдэу итхылъ ит: «Мы цӀыфхэм аӀупэхэмкӀэ сагъэлъапӀэ, ау агухэмкӀэ спэчыжьэх. 7 Ахэм цӀыфхэм Ӏофхэр арагъашӀэхэзэ, цӀыфхэм яхабзэ Тхьэм иунашъо зэрэфагъадэрэм пае, сэ сызэрагъэлъапӀэрэр хьаулый». 8 Тхьэм иунашъо къэжъугъэнагъэу, цӀыфхэм къакӀэныжьыгъэ хабзэхэм шъуатет. 9 Шъуятэжъхэм къакӀэныжьыгъэ хабзэхэр жъугъэцэкӀэнхэм пае, Тхьэм иунашъо зы лъэныкъокӀэ ешъогъэзы, къыпигъэхъожьыгъ Исус. ШСыда пӀомэ пегъымбар Мусэ ыӀуагъ: «Уятэрэ уянэрэ лъытэныгъэ афэшӀ», ыкӀи «Хэти щэрэт зятэ е зянэ ӀэягъэкӀэ тегущыӀэрэр шъуукӀын фае». и>12 Ау шъо шъоӀо: «Зы цӀыф горэм ежьым ятэ е янэ мырэущтэу риӀомэ: Сэ тынэу шъо шъостын слъэкӀыщтгъэр джы корбан сшӀыщт, ыӀоу, (ащ къикӀырэр Тхьэм пае тын сшӀыщт), ащыгъум а цӀыфым ятэ е янэ зи фимышӀэнэу фит». 13 Арэущтэу шъушӀызэ, шъуятэжъхэм яхабзэхэу шъо шъукъохэм къафэжъугъанэхэрэмкӀэ Тхьэм игущыӀэхэр зы лъэныкъокӀэ ешъогъэзых. Ащ фэдэ Ӏаджи шъошӀэ. 14 Исус цӀыф купышхом джыри зэ къяджи ариӀуагъ: Шъо пстэури шъукъысэдэӀу, къасӀорэри зыгурыжъу гъаӀу. 15 ЦӀыфыр мыкъабзэу зышӀын зылъэкӀырэр шхы нэу ышхырэр арэп, ыгу къикӀыхэрэр ары нахь. 16 Рыдэ Ӏонэу тхьакӀумэ зиӀэм зэхерэх. 17 Исус цӀыф купышхом хэкӀыжьи, унэм зехьажьым, игъогу рыкӀохэрэр а гъэсэныгъэ къэбарым ехьылӀагъэу къеупчӀыгъэх. 18 Шъори зи къыжъугурымыӀоу ара? ариӀожьыгъ Исус. ЦӀыфым шхынэу ышхырэм ежьыр мыкъабзэу ышӀын зэримылъэкӀырэр къыжъугурыӀорэба? 19 Сыда пӀомэ цӀыфым шхынэу ышхырэр ыгу ихьэрэп, ыныбэ ехьэ нахь, етӀани пкъым хэкӀыжьы. (А гущыӀэхэмкӀэ Исус шхын пстэури хьалэлэу ыӀуагъ.) 20 ЦӀыфым ыгу къикӀырэр ары мыкъабзэу зышӀырэр,къыпигъэхъожьыгъ Исус. 21 Сыда пӀомэ цӀыфым ыкӀоцӀырэ ыгурэ ары мыхэр къызэрыкӀыхэрэр: гупшысэ бзаджэхэр, зинэ шӀэныр, тыгъоныр, цӀыф укӀыныр, 22 нэйпсыеныр, бзэджагъэр, тхьагъэпцӀыгъэр, мыхъомышӀэ псэукӀэр, шъугъоныр, цӀыфхэм ӀэягъэкӀэ атегущыӀэныр, пэгагъэр, делагъэр. 23 А бзэджэгъэ пстэури гу кӀоцӀым къекӀыхэшъ, цӀыфыр мыкъабзэу ашӀы.
Сирофиникие хэкум щыщ бзылъфыгъэм шӀошъхъуныгъэу иӀагъэр
24 ЕтӀанэ Исус а чӀыпӀэм икӀи, къалэхэу Тиррэ Сидонрэ яӀэгъоблагъо кӀуагъэ. Зы унэ горэм зехьэм, ащ дэжьым ежьыр зэрэщыӀэр зыми ышӀэнэу фэягъэп, ау ар гъэбэлъыгъэу хъугъэп. 25 Зы бзылъфыгъэу джынапцӀэ зыхэс пхъу зиӀэм Исус къызэрэкӀуагъэр зэрэзэхихэу къакӀуи, ылъакъохэм адэжь зыщыридзыхыгъ. 26 А бзылъфыгъэр Сирофиникие хэкум щыщыгъ, ыбзи урымыбзагъ. Ыпхъу джынапцӀэр хифынэу Исус къелъэӀугъ. 27 Ыпэ рапшӀэу сабыйхэм загъэгъэшхэкӀ, риӀуагъ Исус а бзылъфыгъэм, сыда пӀомэ сабыйхэм хьалыгъур аӀыпхэу, хьэхэм ябгъэшхыныр тэрэзэп. 28 Шъыпкъэ, тхьаматэ, къыриӀожьыгъ бзылъфыгъэм, ау сабыйхэм къаӀэпытэкъурэ хьалыгъу шкъойхэр Ӏэнэ чӀэгъым чӀэс хьэхэми ашхых. 29 А гущыӀэр къызэрэпӀуагъэм пае, джынапцӀэр о ппхъу хэкӀыжьыгъ, риӀуагъ Исус. О уиунэ кӀожь. 30 Бзылъфыгъэр унэм къызэкӀожьым, джынапцӀэр хэкӀыжьыгъэу, ыпхъу пӀэм хэлъэу къыгъотыжьыгъ.
Исус дэгоу ыкӀи гущыӀэгъуаеу щыт лӀы горэ зэригъэхъужьыгъэр
31 Ащ ыужым Исус къалэхэу Тиррэ Сидонрэ яӀэгъоблагъо къикӀыжьи, КъэлипшӀ зыцӀэ хэкум кӀоцӀырыкӀи, Галилей псыхъураем къэкӀожьыгъ. 32 Джащыгъум дэгоу ыкӀи гущыӀэгъуаеу щыт лӀы горэ цӀыфхэм Исус къыфащи, ыӀэ тырилъхьанэу къелъэӀугъэх. 33 Исус а лӀыр цӀыфхэм зы лъэныкъокӀэ ахищи, язакъоу къызэнэжьхэм, ыӀэхъуамбэхэр лӀым ытхьакӀумэхэм ариӀухи, ужъунтхи, лӀым ыбзэгу теӀэбагъ. 34 ЕтӀанэ уашъом дэплъыий, куоу хэщэтыкӀи, а лӀым риӀуагъ: «Еффатэ!» (Еффатэм къикӀырэр, «ПтхьакӀумэхэм зыкъызэӀуахыжьыщт!») 35 Ардэдэм лӀым ытхьакӀумэхэм зэхахэу хъужьыгъэх, ыбзэгуи къытӀупщыжьи, къабзэу къэгущыӀэу ыублагъ. 36 Исус цӀыфхэм ар зыми рамыӀотэжьынэу унашъо афишӀыгъ. Ау сыд фэдизэу унашъо афишӀыгъэми, а Ӏофыр нахьыбэу агъэӀущтыгъ. 37 ЦӀыфхэм хъугъэшӀагъэр ин дэдэу агъэшӀагъозэ аӀощтыгъ: ЗэкӀэри дэгъоу ышӀагъ. Дэгухэм зэхахэу егъэхъужьых, бзакохэри къегъэгущыӀэх.
Исус нэбгырэ миниплӀ зэригъэшхагъэр
1 А мафэхэм джыри зэ цӀыф купышхо къэзэрэугъоигъ. Ахэмэ ашхын зи яӀагъэпти, Исус игъогу рыкӀохэрэм къяджи ариӀуагъ: 2 ЦӀыф купышхом сыгу ягъу, сыда пӀомэ мэфищ хъугъэу сигъус, ышхыни иӀэп. 3 МэлакӀэ лӀэхэу цӀыфхэр стӀупщыжьхэмэ, гъогум щызэхэфэщтых, сыда пӀомэ чыжьэу къикӀыгъэхэр ахэмэ ахэтых. 4 Мы шъоф нэкӀым ахэмэ афырикъун хьалыгъу зыгорэм тыдэ къихын ылъэкӀына? аГуи, игъогу рыкӀохэрэм Исус къыраӀожьыгъ. 5 Хьалыгъу тхьапша шъуиӀэр? яупчӀыгъ Исус ахэмэ. Хьалыгъуибл тиӀ, къаӀожьыгъ ахэмэ. 6 Джащыгъум Исус цӀыф купышхор чӀыгум етӀысэхын хэу унашъо ышӀыгъ. Хьалыгъуиблыр къыштэхи, Тхьэм щытхъу фишӀыгъ. ЕтӀанэ хьалыгъухэр зэгуичыхи, цӀыф купышхом ыпашъхьэ ралъхьанхэу игъогу рыкӀохэрэм аритыгъэх. Ахэми арэущтэу ашӀыгъ. 7 Пцэжъые цӀыкӀу заули яӀагъ. Ахэмэ апаий Исус Тхьэм щытхъу фишӀи, ахэри цӀыфмэ апашъхьэ ралъхьанхэу игъогу рыкӀохэрэм ариӀуагъ. 8 ЦӀыфхэр шхагъэх ыкӀи загъэшхэкӀыгъ. Ащ нэужым хьалыгъу такъырхэу къялыжьыгъэхэр мэтибл ар ызэу аугъоижьыгъэх. 9 Шхагъэхэр нэбгырэ миниплӀы фэдиз хъущтыгъэх. ЕтӀанэ Исус цӀыфхэр ытӀупщыжьыгъэх. 10 ЦГыфхэр зетӀупщыжьыхэ ужым, игъогу рыкӀохэрэр игъусэхэу къуашъом итӀысхьи, къуаджэу Далмануфэ иӀэгъоблагъо кӀуагъэ.
Зы нэшэнэ гъэшӀэгъонышхо горэ уашъом къафыригъэхынэу фарисейхэр Исус къызэрелъэӀугъэхэр
11 Фарисейхэр Исус ыдэжь къакӀохи, гущыӀэкӀэ къеныкъокъухэу къаублагъ. Ежьыр агъэунэфыным пае, зы нэ шэнэ гъэшӀэгъонышхо горэ уашъом къафыригъэхынэу фэягъэх. 12 Исус ыгукӀэ куоу хэщэтыкӀи къыӀуагъ: Джырэ цӀыфхэр нэшэнэ гъэшӀэгъонышхо сыд пае кӀэупчӀэхэра? Шъыпкъэр шъосэӀо, Тхьэм джырэ цӀыфхэм нэшэнэ гъэшӀэгъонышхо зи къаритыщтэп. 13 ЕтӀанэ Исус ахэр къыгъанэхи, къуашъом итӀысхьи, псыхъураем иадрабгъу зэпырыкӀыжьыгъ.
Фарисейхэм ятэджэпсырэ пачъыхьэ Ирод итэджэпсырэ
14 Исус игъогу рыкӀохэрэм икъун хьалыгъу къыздахьынэу ащыгъупшэгъагъ. Къуашъом илъэу, зы хьалыгъу закъо нэмыкӀ зи къыздахьыгъэп. 15 Исус ахэмэ афигъэпытэу ариӀуагъ: Шъуфэсакъ, фарисейхэм ятэджэпсырэ пачъыхьэ Ирод итэджэпсырэ защышъуухъум. 16 Хьалыгъу тиӀэпышъ ары ащ зыкӀиӀорэр, зэраӀоу, игъогу рыкӀохэрэр а Ӏофым тегущыӀагъэх. 17 Исус ахэмэ аӀорэм гу лъити ариӀуагъ: Хьалыгъу зэрэшъуимыӀэм сыд пае шъутегущыӀэрэ? Джыри зи зэхэшъумышӀыкӀэу ыкӀи къыжъугурымыӀоу ара? Ащ фэдизэу шъугуркъэу шъущыта? 18 Нэ шъуиӀэ пэтми, шъумылъэгъоу ара? ТхьакӀумэ шъуиӀэ пэтми, зэхэшъумыхэу ара? 19 Шъуту къэкӀыжьырэба, хьалыгъуитфыр цӀыф минитфым зафызэгосэчым, хьалыгъу такъыр матэхэу сыд фэдиза арызэу шъуугъоижьыгъэхэр? Мэтэ пшӀыкӀутӀу, къыраӀожьыгъ ахэмэ. 20 Хьалыгъуиблыри цӀыф миниплӀым зафызэгосэчым, хьалыгъу такъыр матэхэу сыд фэдиза арызэу шъуугъоижьыгъэхэр? Мэтибл, къыраӀожьыгъ ахэмэ. 21 Джыри зи къыжъугурымыӀоу ара? ариӀуагъ Исус ахэмэ.
Исус Вифсайдэ къуаджэм щыщэу лӀы нэшъу горэ зэригъэхъужьыгъэр
22 ЕтӀанэ Исусрэ игъогу рыкӀохэрэмрэ Вифсайдэ къуаджэм къэкӀуагъэх. ЦӀыфхэм лӀы нэшъу горэ Исус къыфащи, теӀэбэнэу елъэӀугъэх. 23 Исус нэшъум ыӀэ ыубыти, къуаджэм дищыгъ. ЕтӀанэ нэшъум ынэхэм акӀэужъунтхи, ыӀэхэр нэшъум тырилъхьэхи еупчӀыгъ: Зыгорэ олъэгъуа? 24 Нэшъум ышъхьэ къыӀэти къыӀуагъ: ЦӀыфхэм къакӀухьэу сэлъэгъух. Ахэр чъыгхэм афэдэх. 25 ЕтӀанэ Исус ыӀэхэр джыри зэ нэшъум ынитӀумэ атырилъхьажьыгъэх. Ащ дэжьым лӀым тэрэзэу ылъэгъоу хъугъэ. Ар хъужьи, пстэури нафэу ылъэгъоу хъужьыгъэ. 26 Ащ нэужым Исус а лӀым риӀуагъ: Къуаджэм удэмыхь, зыми зи емыӀу. ЕтӀанэ ядэжь ыгъэкӀожьыгъ.
«Оры Христосыр», ыӀуи, Петрэ Исус зэрэриӀуагъэр
27 Исусрэ игъогу рыкӀохэрэмрэ Кайсарфилипие къалэм иӀэгъоблагъо икъуаджэхэм алъэныкъомкӀэ кӀуагъэх. КӀохэзэ, Исус игъогу рыкӀохэрэм яупчӀыгъ: ЦӀыфхэм сэ хэт сыщыщэу аӀора? 28 Зы купым о уумэхъэкӀо Иуанэу аӀо, къыраӀожьыгъ ахэмэ. НэмыкӀхэми о упегъымбар Илясэу аӀо. ЕтӀанэ адрэхэми о пегъымбархэмэ уащыщ горэу аӀо. 29 Адэ шъори, сэ хэт сьпцыщэу шъуӀора? яупчӀыгъ Исус ахэмэ. Оры Христосыр, ыӀуи, Петрэ Исус къыриӀожьыгъ. 30 Ащ дэжьым Исус ар зыми рамыӀотэжьынэу ахэмэ афигъэпытагъ.
Исус ежьыр зэраукӀыщтри, лӀагъэхэм къызэрахэтэджыкӀыжьыщтри къызэриӀуагъэр
31 Джащыгъум Исус игъогу рыкӀохэрэм мырэущтэу аригъашӀэу ыублагъ: ЦӀыф Лъэпкъым Ыкъо къиныбэ ыщэчын фаеу щыт. Нахьыжъхэми, дин пэщэшхохэми, Тэурат егъэджэкӀо пащэхэми ежьыр зэрамыпэсын ыкӀи аукӀын фаеу щыт, мэфищ нэужми лӀагъэхэм къахэтэджыкӀыжьын фаеу щыт. 32 Исус мы Ӏофхэр шъхьаихыгъэу къыӀуагъэх. Джащыгъум Петрэ Исус зы лъэныкъокӀэ Ӏуищи, фимыдэу ыублагъ, 33 Ау Исус зыкъызэригъэзэкӀи, игъогу рыкӀохэрэм яплъи, Петрэ егыигъ: Сауж икӀ, шэйтан! О уигупшысакӀэ Тхьэм игупшысакӀэу щытэп, цӀыфым игупшысакӀэу щыт нахь. 34 ЕтӀанэ Исус цӀыф купышхомрэ игъогу рыкӀохэрэмрэ къяджи ариӀуагъ: Зыгорэ сэ сауж къырыкӀонэу фаемэ, ежьыр зыфэе Ӏофхэр къерэгъанэхи, лӀэныгъэм икъащ къерэшти, сауж къырэрэкӀу; 35 сыда пӀомэ хэти зыпсэ мыкӀодэу къэзыгъэнэжьынэу фаем ыпсэ шӀокӀодыщт, ау хэти сэщ паерэ къэбарышӀум паерэ зыпсэ зышӀокӀодрэм ыпсэ мыкӀодэу къыгъэнэжьыщт. 36 Дунаер зэкӀэ зы цӀыфым ие хъоу, ежьыр кӀодмэ, ишӀуагъэу къэкӀощтыр сыда? 37 ЦӀы фым ыпсэ пае уасэу сыд ытышъущтыр? 38 Джырэ цӀыфхэу Тхьэр зымышӀэхэу, псэкӀод зышӀэхэрэм ащыщэу хэти сэррэ сэ сигущыӀэхэмрэ къыттеукӀытыхьэрэм, сэ ЦӀыф Лъэпкъым Ыкъуи а цӀыфым сытеукӀытыхьажьыщт, мэлэӀич лъапӀэхэр сигъусэхэу сэ Сятэ ищытхъушхо фэдэ щытхъушхо сиӀэу сыкъызыкӀожькӀэ,
1 Шъыпкъэр шъосэӀо, ариӀуагъ Исус ахэмэ, Тхьэм и Тетыгъошхо лъэкӀыныгъэшхокӀэ къэкӀуагъэу алъэгъуфэ, мыщ дэжьым щыт цӀыфхэм ащыщхэу заулэм лӀэныгъэр алъэгъущтэп.
Исус итеплъэ зэрэзэрихъокӀыгъэр
2 Мэфих зытешӀэ ужым, Исус Петри, Якъуби, Иуани зыдищэхи, зы Ӏошъхьэ лъагэ горэм язакъоу дищэягъэх. Джащыгъум ахэмэ апашъхьэ Исус итеплъэ щызэрихъокӀыгъ, 3 Дунаим тет гыкӀакӀо горэм щыгъынхэр фыжьэу зэригыкӀышъущтхэм нахьи, Исус ищыгъынхэр нахь фыжьыбзэу, къэлыдэу хъугъэх. 4 Ащ дэжьым пегъымбархэу Илясрэ Мусэрэ ахэм къафэлъэгъуагъэх, ахэри Исус къыдэгущыӀэхэу щытыгъэх. 5 Равви, мыщ дэжьым тызэрэщыӀэр дэгъу, ыӀуи, Петрэ Исус къыриӀуагъ. Чэлищ щыдгъэӀэн, ощ пае зы, Мусэ паий зы, Иляс паий зы. 6 Петрэ ыӀон ышӀагъэп; сыда пӀомэ ахэр щтагъэхэти ары. 7 Джащыгъум зы ошъуапщэ къакӀуи къашъхьэщыхьагъ. Ошъуапщэм зы макъэ горэ къыхэӀукӀыгъ: Мары сэ шӀу слъэгъурэ Скъо кӀасэр. Ащ ыӀорэм шъуедэӀу. 8 ОшӀэдэмышӀэу, зызэплъэкӀыжьхэм, ахэмэ ягъусэу Исус нэмыкӀ зи алъэгъужьыгъэп. 9 Ахэр Ӏуашъхьэм къехыжьхэзэ, ежьырэу ЦӀыф Лъэпкъым Ыкъо лӀагъэхэм къахэтэджыкӀыжьыфэ, алъэгъугъэр зыми рамыӀотэжьынэу Исус унашъо афишӀыгъ. 10 А гущыӀэхэр агу раубытагъэх, «ЛӀагъэхэм къахэтэджыкӀыжьынэу Исус зыфиӀуагъэм къыригъэкӀыгъэр сыда?» аӀозэ зэупчӀыжьыгъэх. 11 Ахэр Исус къеупчӀыгъэх: Тэурат егъэджэкӀо пащэхэм ыпэ рапшӀэу пегъымбар Иляс къэкӀон фаеу аӀоу, сыда зыкӀаӀорэр? 12 Шъыпкъэ, ыпэ рапшӀэу Иляс къэкӀонышъ, Ӏоф пстэури тэрэзэу зэтыригъэуцожьын фае, ариӀожьыгъ Исус, ау Тхьэм игущыӀэ тхыгъэхэм зэрарытым фэдэу, ЦӀыф Лъэпкъым Ыкъо къиныбэ ыщэчын фаеу щыт, цӀыфхэми зэрамыпэсын фаеу щыт. 13 Ау сэ шъосэӀо, Иляс къэкӀогъах, Ӏоф бзэджагъэу ежьым рашӀэнхэу зыфэягъэхэри рашӀагъэх, ежьым ехьылӀагъэу Тхьэм игущыӀэ тхыгъэхэм зэрарытым фэдэу.
Исус джынапцӀэ зыхэс кӀалэ горэ зэригъэхъужьыгъэр
14 Исусрэ игъусищрэ адрэ нэбгырэхэу игъогу рыкӀохэрэм адэжь къызагъэзэжьым, цӀыф купышхом ахэр къауцухьагъэхэу, Тэурат егъэджэкӀо пэщэ куп ахэмэ къянэкъокъухэу алъэгъугъэх. 15 Исус къызалъэгъум, цӀыф купышхом зэкӀэ агъэшӀагъуи, къыбгъодэлъадэхи, шӀуфэс къырахыгъ. 16 Сыдым ехьылӀагъэу ахэмэ шъуянэкъокъура?яупчӀыгъ Исус игъогу рыкӀохэрэм. 17 ЦӀыф купышхом хэтэу зыгорэм къыриӀуагъ: Дин гъэсакӀу, джынапцӀэу сэ сикӀалэ бзако зышӀырэр хэсти, къыпфэсщагъ. 18 ДжынапцӀэр кӀалэм къыхахьэ къэс, чӀыгум къытыредзэ. ЫӀупс къыӀутӀэтӀэу, ыцэхэр зэригъэшхыхэу зэтекъэ. О уигъогу рыкӀохэрэм джынапцӀэр хафынэу сялъэӀугъ, арышъхьакӀэ ахэмэ ар хафын алъэкӀыгъэп. 19 Еоой, шъо джырэ цӀыфхэу шӀошъхъуныгъэ зимыӀэхэр, ариӀожьыгъ Исус. Сыд фэдизрэ сышъухэтын фая? Сыд фэдизрэ шъусщыӀэн фая? А кӀалэр къысфашъущ. 20 Ахэмэ кӀалэр Исус къыфащагъ. Ау джынапцӀэм Исус зэрилъэгъоу, кӀалэр къыгъэкӀэзэзыгъ. КӀалэр чӀыгум къытефи, Ӏупсыр къыӀутӀэтӀэу укӀорэигъэ. 21 Сыд фэдиз хъугъэу мыщ фэдэу щыта? еупчӀыгъ Исус кӀалэм ятэ. ИцӀыкӀугъэ къыщегъэжьагъэу арэущтэу щыт, къыӀожьыгъ ятэ. 22 ДжынапцӀэм ар ыгъэкӀодыным пае, машӀоми псыми бэрэ ахидзэщтыгъ. Зыгорэ пшӀэн плъэкӀымэ, гукӀэгъу къытфэшӀи къыддэӀэпыӀ. 23 «Зыгорэ пшӀэн плъэкӀымэ», оӀо, риӀуагъ Исус а лӀым. ШӀошъхъуныгъэ зиӀэм сыдрэ Ӏофи ышӀэн елъэкӀы. 24 Ардэдэм кӀалэм ятэ къэкууагъ: Сэ сшӀошъ мэхъу, сишӀошъмыхъуныгъэ сытекӀонэу къыздэӀэпыӀ, тхьаматэ. 25 Исус цӀыф купышхо къэзэрэугъоигъэу зелъэгъум, джынэпцӀэ Ӏаем егыий риӀуагъ: О, цӀыфхэр бзакоу ыкӀи дэгоу зышӀырэ джынапцӀ, унашъо къыпфэсэшӀы, мы кӀалэм хэкӀыжьи, ныбжьи укъыхэмыхьажь. 26 ДжынэпцӀэ Ӏаер къыхэкуукӀи, кӀалэр лъэшэу къыгъэкӀэзэзи хэкӀыжьыгъ. КӀалэр хьадэм фэдэу хъугъэ. Арыти, а цӀыфхэм ащыщыбэхэм, «Ар лӀагъэ» аӀуагъ. 27 Ау Исус кӀалэм ыӀэ къыубыти, ылъакъохэм атыригъэуцуагъ, кӀалэри къэтэджыжьыгъ. 28 Ащ ыужым Исус унэ горэм зехьэм, игъогу рыкӀохэрэм язакъоу къызынэжьхэм, къеупчӀыгъэх: Сыд пае а джынапцӀэр тэ хэтфын тымылъэкӀыгъа? 29 Мыщ фэдэ лъэпкъыр тхьэлъэӀунымрэ нэкӀынымрэ афэшъхьафкӀэ цӀыфым хэпфышъущтэп, ариӀожьыгъ Исус.
Исус ежьыр зэраукӀыщтри, лӀагъэхэм къызэрахэтэджыкӀыжьыщтри ятӀонэрэу къызэриӀуагъэр
30 Исусрэ игъогу рыкӀохэрэмрэ а чӀыпӀэм икӀыхи, Галилей хэкум кӀоцӀырыкӀыгъэх. Ахэр зыдэщыӀэхэр Исус зыми къышӀэнэу фэягъэп, 31 сыда пӀомэ игъогу рыкӀохэрэм Ӏофхэр аригъашӀэщтыгъэхэти ары. Ахэмэ мырэущтэу ариӀуагъ: ЦӀыф Лъэпкъым Ыкъо цӀыфхэм аӀэкӀэхьанышъ, ахэмэ ежьыр аукӀыщт, ау заукӀы ужым, мэфищ тешӀагъэу лӀагъэхэм къахэтэджыкӀыжьыщт. 32 Ау игъогу рыкӀохэрэм а гущыӀэхэм къарыкӀырэр къагурыӀуагъэп, ежьым къеупчӀынхэуи щынэщтыгъэх.
Хэта анахь ин дэдэр?
33 Капернаум къалэм къэкӀожьыгъэх. Унэм зехьэхэм, Исус игъогу рыкӀохэрэм яупчӀыгъ: Гъогум шъузытетым, сыда шъузытегущыӀагъэр? 34 Ау ахэмэ заушъэфыгъ, сыда пӀомэ ахэр гъогум зытетхэм, «Тэ тщыщэу хэт анахь ин дэдэр», аӀоти зэнэкъокъущтыгъэх. 35 Исус тӀыси, игъогу рыкӀорэ нэбгырэ пшӀыкӀутӀум къяджи ариӀуагъ: Зыгорэ апэ итынэу фаемэ, ар ауж дэдэу хъун фае, пстэуми Ӏофтабгэуи афэхъун фае. 36 Зы сабый горэм ыӀэ къыубыти, агузэгу ригъэуцуи, ӀаплӀ рищэкӀи ариӀуагъ: 37 Хэти мыщ фэдэ сабыир сэ сцӀэкӀэ къезыгъэблагъэрэм сэ сыригъэблэгъагъэу мэхъу; хэти сэ сезыгъэблагъэрэми сэ сизакъоу арэп ригъэблагъэрэр, сэ сыкъэзыгъэкӀуагъэри ары.
Къытпэмыуцурэр тигъус
38 Дин гъэсакӀу, лӀы горэм о пцӀэкӀэ джынапцӀэхэр цӀыфхэм ахифхэу тлъэгъугъэ, ыӀуи, Иуан Ису къы риӀуагъ. Ар тэ зэрэтщымыщым пае зэтетӀэжьэнэу тыпылъыгъ. 39 ЗэтешъумыӀажь ар, къыӀуагъ Исус, сыда пӀомэ сэ сцӀэкӀэ Ӏофышхо гъэшӀэгъон зышӀэрэр ащ лъыпытэу ӀэягъэкӀэ къыстегущыӀэн ылъэкӀыщтэп. 40 Сыда пӀомэ тэ къытпэмыуцурэр тигъусэшъ ары. 41 Шъыпкъэр шъосэӀо, Христос игъогу шъузэрэрыкӀорэм пае, зы псы шъуалъэ шъуезыгъашъорэм ифэшъошэ ӀэхьышӀу шӀокӀодыщтэп.
Щыфхэм псэкӀод ашӀэнэу дэзыхьыхырэ Ӏофхэр
42 Мы цӀыкӀухэм ащыщэу сэркӀэ шӀошъхъуныгъэ зиӀэм псэкӀод ышӀэнэу хэти дэзыхьыхрэм ыпшъэтыкъ мыжъо шъхьал кӀэрашӀэу, хым хадзагъэмэ, ежьымкӀэ нахьышӀущтыгъ. 43, 44 О пӀэ псэкӀод пшӀэнэу удихьыхмэ, пыупкӀыжь. УӀитӀу псаоу джэхьнэмэу цӀыфылыр зышхыщтэу, хьамлыухэр зыщымылӀэжьыщтэу, зимашӀуи мыкӀосэжьыщтым укӀоным нахьи, уӀащэу мыкӀодыжьын щыӀэныгъэ бгъотыныр оркӀэ нахьышӀу. 45, 46 О плъакъуи псэкӀод пшӀэнэу удихьыхмэ, пыупкӀыжь. ПлъэкъуитӀу псаоу джэхьнэмэу цӀыфылыр зышхыщтэу, хьамлыухэр зыщымылӀэжьыщтэу, зимашӀуи мыкӀосэжьыщтым упадзэным нахьи, улъащэу мыкӀодыжьын щыӀэныгъэ бгъотыныр оркӀэ нахьышӀу. 4748 Ащ фэдэуи, о унэ псэкӀод пшӀэнэу удихьыхмэ, къитхъыжь. УнитӀу псаоу джэхьнэмэу цӀыфылыр зышхыщтэу, хьамлыухэр зыщымылӀэжьыщтэу, зимашӀуи мыкӀосэжьыщтым упадзэным нахьи, зы нэ нахь уимыӀэми, Тхьэм и Тетыгъошхо ыӀэчӀэгъ учӀэхьаныр оркӀэ нахьышӀу. 49 Тхьэм хэтрэ цӀыфи машӀокӀэ ыщыущт, сыдрэ къурмэныпхъэри щыгъукӀэ ащыущт. 50 Щыгъур дэгъу. Ау щыгъум ищыугъэ хэкӀымэ, сыдэущтэу ищыугъэ хэшъулъхьажьыщт? Щыугъэ зыхэжъугъэлъ, шъузэгурыӀоуи шъузэдэпсэу.
Шъхъэгьусэ тӀупщыжьыным ехьылӀагъ
1 Исус а лъэныкъом икӀыжьи, Иудей хэкоу Иордан псыхъом иадрабгъу щыӀэм кӀуагъэ. Джыри зэ цӀыф купышхохэр ыдэжь къыщызэрэугъоигъэх, зэрихабзэуи Исус ахэмэ Тхьэм игущыӀэхэр аригъашӀэхэу ыублагъ. 2 Джащыгъум фарисей заулэ Исус къыбгъодахьэхи, ежьыр хагъэукъоным пае, къеупчӀыгъэх: ЛӀым ишъуз ытӀупщыжьыныр хабзэкӀэ хъущта? 3 Пегъымбар Мусэ унашъоу сыда къышъуфишӀыгъэр?ариӀожьыгъ Исус ахэмэ. 4 ЛӀы горэм ишъуз зэритӀупщыжьырэ тхылъ ытхымэ, шъузыр ытӀупщыжьынэу пегъымбар Мусэ фит ышӀыгъ, къаӀожьыгъ ахэмэ. 5 Шъуигуркъагъэ пае пегъымбар Мусэ а унашъор къышъуфитхыгъ, ариӀожьыгъ Исус ахэмэ. 6 Ау ублапӀэм дэжь Тхьэм щыӀэр зэкӀэ къызегъэхъум, цӀыфхэр «хъулъфыгъэрэ бзылъфыгъэрэ къыгъэхъугъэх». 7 «Ащ къыхэкӀыкӀэ лӀыр ятэянэхэм ахэкӀьшышъ, ишъуз гъусэ фэхъунышъ, 8 итӀур зыпкъы хъущтых». Арэущтэу ахэр зыпкъых нахь, пкъитӀоу хъужьхэрэп. 9 Арышъ, а тӀоу Тхьэм гъусэ зэфишӀыгъэхэр цӀыфым зэгуигъэкӀыжьы хъущтэп. 10 ЕтӀанэ унэм исхэу, игъогу рыкӀохэрэр а ӀофымкӀэ Исус къеупчӀыгъэх. 11 Исус ариӀуагъ: Хэтми зишъуз зытӀупщыжьэу, нэмыкӀ бзылъфыгъэ къэзыщэжьырэм апэрэ шъузымкӀэ зинэ ышӀагъэу мэхъу. 12 Шъузыри илӀ гокӀыжьэу нэмыкӀ лӀы горэм дэкӀожьмэ, ащи зинэ ышӀагъэу мэхъу.
Исусрэ сабыйхэмрэ
13 ЕтӀанэ цӀыфхэм сабыйхэр Исус къыфащагъэх, Тхьэм ынэшӀу ахэмэ къащифэным пае, Исус ахэмэ атеӀэбэнэу. Ау Исус игъогу рыкӀохэрэм афадагъэп. 14 Исус ащ гу зылъетэм, ыгу ябгъэу ариӀуагъ: Сабыйхэр садэжь къэрэкӀох, зи яшъумыӀоу, сыда пӀомэ ащ фэдэхэр Тхьэм и Тетыгъошхо ыӀэчӀэгъ чӀэтых. 15 Шъыпкъэр шъосэӀо, сабыим Тхьэм и Тетыгъошхо зэридэрэм фэдэу, хэтми Тхьэм и Тетыгъошхо зымыдэрэр а Тетыгъошхом ыӀэчӀэгъ чӀэхьащтэп. 16 ЕтӀанэ Исус сабыйхэм ӀаплӀ арищэкӀи, ыӀэхэр атырилъхьэхи, Тхьэм ынэшӀу къащифэнэу афелъэӀугъ.
ЛӀы баир
17 Исус гъогум зытехьажьым, зы лӀы горэ ыдэжь къачъи, лъэгонджэмышъхьэкӀэ ыпашъхьэ къитӀысхьи къеупчӀыгъ: Дин гъэсэкӀо дэгъу, мыкӀодыжьын щыӀэныгъэ ӀэхьышӀоу къыслъысыным пае, сыда сшӀэщтыр? 18 Сыда дэгъукӀэ укъызкӀысаджэрэр? риӀожьыгъ Исус а лӀым. Тхьэм нэмыкӀэу зи дэгъу щыӀэп. 19 Тхьэм иунашъохэр ошӀэх: «ЦӀыф умыукӀ, зинэ умышӀэ, умытыгъу, нэмыкӀ цӀыфхэм гщӀы атемылъхь, цӀыфхэм яӀэр гъэпцӀэныгъэкӀэ къатемых, уятэрэ уянэрэ лъытэныгъэ афэшӀ». 20 Дин гъэсакӀу, къыриӀожьыгъ а лӀым Исус, сикӀэлэгъу къыщегъэжьагъэу ахэр зэкӀэ сэгъэцакӀэх. 21 Джащыгъум Исус а лӀым еплъи, ыгу еӀуи риӀожьыгъ: Зы уищыкӀагъ. КӀуи, уиӀэ пстэури щэжьи, ахъщэр тхьамыкӀэхэм ят. Джащыгъум уашъом мылъкушхо щыуиӀэ хъущт. ЕтӀанэ къащыр къашти, къакӀуи, сауж къырыкӀу. 22 Ар Исус къызеӀом, лӀым ынэгу къызэӀахьи, ыгу къеоу ӀукӀыжьыгъ, сыда пӀомэ мылъкушхо иӀагъэти ары. 23 Исус зиплъыхьи, игъогу рыкӀохэрэм ариӀуагъ: Мылъку зиӀэхэмкӀэ Тхьэм и Тетыгъошхо ыӀэчӀэгъ чӀэхьанхэу сыдэу къин! 24 Исус игъогу рыкӀохэрэм а гущыӀэхэр зызэхаххэм, лъэшэу агъэшӀэгъуагъ. Ау Исус джыри зэ ариӀуагъ: Синыбджэгъухэр, мылъкум щыгугъыхэрэмкӀэ Тхьэм и Тетыгъошхо ыӀэчӀэгъ чӀэхьанхэр сыдэу къин! 25 Баир Тхьэм и Тетыгъошхо ыӀэчӀэгъ чӀэхьаным нахьи, махъшэр мэстанэм икӀыныр нахь ӀэшӀэх. 26 Исус игъогу рыкӀохэрэм ар нахьыбэу агъэшӀагъуи зэраӀожьыгъ: Арэущтэу щытмэ, ежьым зимыгъэкӀодэу, хэт зыкъэзыгъэнэжьын зылъэкӀыщтыр? 27 Исус ахэмэ яплъи къыӀуагъ: ЦӀыфхэм ежьхэм замыгъэкӀодэу зыкъагъэнэжьын алъэкӀырэп, ау Тхьэм елъэкӀы; сыда пӀомэ Тхьэм ымылъэкӀын Ӏоф зи щыӀэп. 28 Мо къэдаӀолъ, тэ тиӀэгъэ пстэури къэдгъани, о уауж тыкъырыкӀуагъ, ыӀуи, Петрэ Исус риӀоу ыублагъ. 29, 30 Шъыпкъэр шъосэӀо, къыӀуагъ Исус, хэт щыщми е зиунэ, е зышхэр, е зышыпхъухэр, е зянэ, е зятэ, е зишъуз, е зибынхэр, е зичӀыгухэр сэщ паерэ къэбарышӀум паерэ къэзыгъэнагъэу, джы мы дунаем унэхэр, шыхэр, шыпхъухэр, ныхэр, бынхэр, чӀыгухэрэ фэдишъэу щызымыгъотыжьыщт цӀыф зи щыӀэп, а цӀыфыми къиныбэ рагъэщэчыщт. Адрэ дунаеми мыкӀодыжьын щыӀэныгъэ щыриӀэ хъущт. 31 Ау апэ итхэм ащыщхэу бэхэр ауж къинэщтых, ауж итхэри апэу хъущтых.
Исус ежьыр зэраукӀыщтри, лӀагъэхэм къызэрахэтэджыкӀыжьыщтри ящэнэрэу къызэриӀуагъэр
32 Ерусалим дэкӀуаехэу гъогум зытетхэм, игъогу рыкӀохэрэм апэ итэу Исус кӀуагъэ. Ахэмэ агъэшӀагъоу, щынагъо агухэм арылъэу, ыуж итхэу кӀощтыгъэх. Исус джыри зэ игъогу рыкӀорэ нэбгырэ пшӀыкӀутӀур зы лъэ ныкъокӀэ Ӏуищыхи, ежьым къехъулӀэщтыр ариӀоу ыублагъ. З3 Мары, тэ джы ЕрусалимкӀэ тыдэкӀуае, ыӀуагъ. Ащ дэжьым ЦӀыф Лъэпкъым Ыкъо дин пэщэшхохэмрэ Тэурат егъэджэкӀо пащэхэмрэ аӀэкӀэхьащт. Ахэмэ ежьым укӀ къытыралъхьащт, хымэ лъэпкъхэми аӀэкӀалъхьащт. мАхэр къыкӀэнэкӀэщтых, къытеужъунтхэщтых, къамыщкӀэ къеощтых ыкӀи аукӀыщт. Мэфищ нэужми ежьыр лӀагъэхэм къахэтэджыкӀыжьыщт.
Якъубэрэ Иуанрэ Ӏофэу Исус зыкӀелъэӀугъэхэр
35 3еведей ыкъохэу, Якъубэрэ Иуанрэ Исус къыбгъодахьэхи къыраӀуагъ: Дин гъэсакӀу, тэ тыкъызэрэолъэӀущтыр къытфэпшӀэнэу тыфай. 36 Сыда къышъуфэсшӀэнэу шъузыфаер? ариӀуагъ Исус. 37 О уищытхъушхо къызыскӀэ, зыр уиджабгъукӀэ адрэр уисэмэгубгъукӀэ тыкъэтӀысынэу фит тыкъэшӀ, къыраӀожьыгъ ахэмэ. 38 Шъо шъузыкӀэлъэӀурэр шъушӀэрэп, ариӀуагъ Исус. Сэ сызэшъощт къиныгъэм ишъуалъэ итым шъо шъуешъон шъулъэкӀыщта, хьауми цӀыфхэм Ӏаеу сызэраумэхъыщт шӀыкӀэм фэдэу, зяжъугъэумэхъын шъулъэкӀыщта? 39 ТлъэкӀыщт, къыраӀожьыгъ ахэмэ. Сэ сызэшъощт къиныгъэм ишъуалъэ итым шъори шъуешъощт, ариӀуагъ Исус. ЦӀыфхэм сэ Ӏаеу сызэраумэхъыщт шӀыкӀэм фэдэу, шъори шъуаумэхъыщт. 40 Ау сэ сиджабгъукӀэ е сисэмэгубгъукӀэ шъукъэтӀысынэу фит шъусшӀын слъэкӀыщтэп. А тӀысыпӀэхэр цӀыфхэу Тхьэм зыфигъэхьазырыгъэхэм яй. 41 Адрэ нэбгырипшӀэу Исус игъогу рыкӀохэрэм ар зызэхахым, Якъубрээ Иуанрэ афэгубжыгъэх. 42 Ащ дэжьым Исус игъогу рыкӀохэрэм къяджагъ. Шъо шъошӀэ, ариӀуагъ Исус, мы дунаем пщы кӀэ щызаджэхэрэр цӀыфхэм апшъэ зэрэдэсхэрэри, ятхьаматэхэм цӀыфхэм тетыгъо зэряфыряӀэри шъошӀэ. 43 Шъо шъуазыфагу арэп зэрэщытын фаер. Шъуащыщэу ин хъунэу фаер Ӏофтабгэу къышъуфэхъун фае. 44 Шъуащыщэу апэ итынэу фаери пстэуми пщылӀ афэхъун фае. 45 Сыда пӀомэ ЦӀыф Лъэпкъым Ыкъо цӀыфхэм яшӀуагъэ ежьым зэригъэкӀыжьыныр арэп къызфэкӀуагъэр, ежьым ишӀуагъэ цӀыфхэм аригъэкӀыныр, цӀыфыбэхэми апае ыпсэ шъхьэщэфыжьэу ытыныр ары нахь.
Исус Вартимей зыцӀэ нэшъур зэригъэхъужьыгъэр
46 Исусрэ игъогу рыкӀохэрэмрэ Ерихон къалэм къэкӀуагъэх. ЦӀыф купышхо ягъусэу ахэр къалэм зыдэкӀыжьхэм, Тимей ыкъоу Вартимей зыцӀэу, зы лъэӀокӀо нэшъу горэ гъогу напцэм Ӏусыгъ. 47 Назарет щыщ Исус зэрэблэкӀырэр зызэхехым, мэкъэшхокӀэ къэджагъ: Даутэ Ыкъо Исус, гукӀэгъу къысфэшӀ! 48 ЦӀыфыбэхэм амыдэу «Щыгъэт!» раГуагъ, Ау ар джыри нахь мэкъэшхокӀэ къэджагъ: Даутэ Ыкъу, гукӀэгъу къысфэшӀ! 49 Исус къызэтеуцуи къыӀуагъ: Мо шъукъедж. Умыщын, къэтэдж, ежьыр къыоджэ, аГуи, нэшъум къеджагъэх. 50 Нэшъум ищыгъын кӀыӀутелъ зытыридзыжьи, къызщылъэти Исус ыдэжь къэкӀуагъ. 51 Сыда къыпфэсшӀэнэу узыфаер? риӀуагъ Исус а лӀым. Равви, сынэхэр къэгъэплъэжьых, къыриӀуагъ нэшъум. 52 КӀожь, риӀуагъ Исус. О уишӀошъхъуныгъэ уигъэхъужьыгъ. Ардэдэм нэшъум ынэхэр къэплъэжьыгъэх, Исуси ыуж итэу гъогум техьагъ.
Щытхъушхо иӀэу, Исус Ерусалим зэрэдэхьагъэр
1 Исусрэ игъогу рыкӀохэрэмрэ Ерусалим игъунэгъу хъугъэх. Елеон Ӏуашъхьэм Ӏус къуаджэхэу Виффагиерэ Вифаниерэ къызынэсхэм, Исус игъогу рыкӀохэрэм ащыщхэу нэбгыритӀу апэ ыгъэкӀуагъэх, 2 мырэущтэу ариӀозэ: ШъуапэкӀэ ит къуаджэм шъудахь. Шъузэрэдахьэу, щыд къунанэу зы цӀыф горэ ныбжьи зытемытӀысхьагъэр епхыгъэу шъуапэ къифэщт. Ар къыкӀэрышъутӀэтыкӀи, мо къашъущэ. 3 «Сыда шъушӀэрэр?» ыӀоу, зыгорэ къышъоупчӀымэ, «Зиусхьаныр ащ фай», ешъуӀуи, занкӀэу къэшъущэнэу фит шъуишӀыщт. 4 Ахэр кӀохи, урамым тетэу къэлапчъэ горэм епхыгъэу, щыд къунан горэ къагъоти, къыкӀэратӀэтыкӀыгъ. 5 А чӀыпӀэм щытхэм ащыщхэм къараӀуагъ: Сыд пае а щыд къунаныр къыкӀэрышъутӀэтыкӀыра? 6 Исус зэриӀуагъэм фэдэу пэгъокӀ аратыжьи, адрэхэм щыд къунаныр ащэнэу фит къашӀыгъэх. 7 Щыд къунаныр Исус ыдэжь къащи, ящыгъынхэр тыралъхьагъэх. ЕтӀанэ Исус щыд къунаным тетӀысхьагъ. 8 ЦӀыфыбэхэм ящыгъынхэр гъогум тыраубгъощтыгъэх, нэмыкӀхэми чъыг къутамэхэр хатэхэм къащыпаупкӀыхэти, гъогум тыралъхьэщтыгъэх. 9 ЦӀыфхэу Исус ыпэ итхэу кӀощтыгъэхэми, ыуж итхэу кӀощтыгъэхэми мэкъэшхокӀэ аӀощтыгъ: Хьусаннэ! Зиусхьаным ыцӀэкӀэ къакӀорэм щытхъушхор ий! 10 Тятэшхоу Даутэ и Тетыгъоу къэкӀощтым щытхъупгхор ий! Хьусаннэ! Анахь Иным щытхъушхор ий! 11 Исус Ерусалим дахьи, Тхьэм иунэшхо чӀэхьагъ. Зэпстэури къызеплъыхьэм ыуж, мафэр хэкӀотагъэти, къалэм дэкӀи, игъогу рыкӀорэ нэбгырэ пшӀыкӀутӀур игъусэхэу Вифание къуаджэм кӀуагъэ.
Исус ынджыр чъыгым зэребгыгъэр
12 ЯтӀонэрэ мафэм Вифанием зыдэкӀыжьхэм, Исус къэмэлэкӀагъ, 13 Тхьапэхэр зыпыт ынджьф чъыг чыжьэкӀэ зелъэгъум, зыгорэ пытмэ еплъынэу кӀуагъэ. Чъыгым зынэсым, тхьапэ нэмыкӀ зи пымытэу къычӀэкӀыгъ, сыда пӀомэ ынджьфым игъо щытыгъэпти ары. 14 Арэущтэу зэхъум, Исус чъыгым риӀуагъ: Непэ щегъэжьагъэу о къыппыкӀэу егъашӀэми зыми зи ерэмышх. Игъогу рыкӀохэрэм Исус къыӀуагъэр зэхахыгъ.
Исус щэнщэфакӀохэр Тхьэм иунэшхо къызэрэчӀифыгъэхэр
15 ЕтӀанэ Ерусалим нэсыгъэх. Исус Тхьэм иунэшхо чӀахьи, щэнщэфакӀохэу ащ чӀэтхэр къычӀифыхэу ыублагъ. Ахъщэ зыхъожьхэрэм яӀанэхэмрэ, тхьаркъо зыщэхэрэм япхъэнтӀэкӀухэмрэ зэпьфигъэзагъэх. 16 Тхьэм иунэшхо кӀоцӀыкӀэ зыми зи щызэпырихынэу ыдагъэп. 17 ЦӀыфхэм шъыпкъэр аригъашӀэзэ, мыщ фэдэу ариӀуагъ: Тхьэм къызэриӀорэр игущыӀэ тхыгъэхэм арытба: «Сэ сиунэ лъэпкъ пстэуми тхьэлъэӀупӀэу афэхъущт?» Ау шъо «хъункӀэкӀо гъэбылъыпӀэм» фэдэу шъушӀыгъэ. 18 Дин пэщэшхохэмрэ Тэурат егъэджэкӀо пащэхэмрэ Исус къыӀуагъэхэр зызэхаххэм, ежьыр зэрагъэкӀодыщт шӀыкӀэм лъыхъухэу аублагъ; сыда пӀомэ Исус Ӏофхэу аригъашӀэщтыгъэхэр цӀыф купышхом ыгъэшӀагъохэти, дин пэщэшхохэмрэ Тэурат егъэджэкӀо пащэхэмрэ Исус щыщынэщтыгъэх. 19 ЕтӀанэ пчыхьэр къызэсым, Исусрэ игъогу рыкӀохэрэмрэ къалэм дэкӀыжьыгъэх,
Ынджыр чъыгэу гъугъэр
20 Пчэдыжьым ынджыр чъыгым къызыблэкӀыжьхэм, ылъапсэ нэсэу ар зэрэгъугъэр алъэгъугъ. 21 Петрэ ащ дэжьым Исус ыӀогъагъэр ыгу къэкӀыжьи къыриӀуагъ: Равви, еплъ, ынджыр чъыгэу узэбгыгъэр гъугъэ! 22 ТхьэмкӀэ шӀошъхъуныгъэ шъугухэм арыжъугъэлъ, ариӀожьыгъ Исус ахэмэ. 23 Шъыпкъэр шъосэӀо, зыгорэм ыгу щэч къыримыгъахьэу, къыӀорэр хъункӀэ шӀошъхъуныгъэ иӀэу, мы Ӏуашъхьэм, «ЗыкъэӀэти хым зыхадз», зиӀокӀэ, ар къыдэхъущт. 24 Арышъ, шъосэӀо, сыд щыщкӀи Тхьэм шъуелъэӀумэ, Тхьэм ар къызэрэшъуфишӀэщтымкӀэ шӀошъхъуныгъэ шъугухэм арыжъугъэлъи, къышъуфишӀэщт. 25 Тхьэм шъузелъэӀукӀи, гукъанэ зыгорэм фышъуиӀэмэ фэжъугъэгъу, Шъуятэ лъапӀэу уашъом щыӀэм шъо мыхъунхэу шъушӀагъэхэр къышъуфигъэгъунхэм пае. 26 Ау шъо ащ фэшъумыгъэгъумэ, Шъуятэ лъапӀэу уашъом щыӀэм шъо мыхъунхэу шъушӀагъэхэри къышъуфигъэгъутцтхэп.
Джурт тхьаматэхэр Исус итетыгъо къезытыгъэмкӀэ къызэреупчӀыгъэхэр
27 Джыри зэ Исусрэ игъогу рыкӀохэрэмрэ Ерусалим къэкӀожьыгъэх. Исус Тхьэм иунэшхо къыкӀухьэзэ, дин пэщэшхохэмри, Тэурат егъэджэкӀо пащэхэри, нахьыжъхэри къыбгъодахьэхи, 28 къыраӀуагъ: Мы Ӏофхэр пшӀэнхэу фитыныгъэр тыда къыздипхыгъэр, е ахэр пшӀэнхэу тетыгъор хэта о къыозытыгъэр? 29 Сэри шъо зы Ӏоф горэкӀэ сышъоупчӀыщт, ариӀуагъ Исус. ПэгъокӀ къысэшъутыжьмэ, сэри шъосӀон мы Ӏофхэр сшӀэнхэу фитыныгъэр къыздисхыгъэр. 30 Иуан цӀыфхэр ыумэхъынхэу хэта къэзыгъэкӀуагъэр? ЦӀыфхэр ара, хьауми Тхьэр ара? ПэгъокӀ къысэшъут. 31 «Тхьэр ары Иуан къэзыгъэкӀуагъэр», тӀомэ, ежьым къытиӀожьышт: «Адэ, сыд пае Иуан къыӀуагъэхэр шъушӀошъ мыхъугъэха?» аӀозэ, ахэр зэупчӀыжьыгъэх. 32 «ЦӀыфхэр ары Иуан къэзыгъэкӀуагъэхэр», етӀожьы на? ау ахэр цӀыфхэм ащыщынэщтыгъэх; сыда пӀомэ цӀыф пстэуми Иуан шъыпкъэу пегъымбарэу зэрэщытыгъэр алъытэщтыгъэти ары. 33 Арыти, ТшӀэрэп, аӀуи, Исус къыраӀожьыгъ. Ащыгъум сэри шъосӀощтэп мы Ӏофхэр сшӀэнхэу фитыныгъэр къыздисхыгъэр, ариӀожьыгъ Исус ахэмэ.
СэнэшъхьэшӀэ бзаджэхэм яхьылӀэгъэ гъэсэныгъэ тхыдэр
1 Исус гъэсэныгъэ тхыдэхэмкӀэ цӀыфхэм адэгущыӀэу ыублагъ: ЛӀы горэм сэнэшъхьэ хатэ ыгъэтӀысхьагъ. Мыжъо чэукӀэ къышӀыхьи, сэнэшъхьэ фызалъэ ышӀи, унэ плъэпӀэ лъаги дишӀыхьагъ. ЕтӀанэ сэнэшъхьашӀэ горэхэм хатэр аӀэкӀилъхьи, Хымэ хэгъэгу горэм кӀуагъэ. 2 Сэнэшъхьэ пычыжьыгъор къызэсым, исэнэшъхьэ Ӏахьэ къаӀихынэу унэӀут горэ сэнэшъхьашӀэхэм адэжь ыгъэкӀуагъ. 3 Ау ахэмэ унэӀутыр къаубыти, къеохи, ӀэнэкӀэу къатӀупщыжьыгъ. 4 ЕтӀанэ сэнэшъхьэ хатэр зием нэмыкӀ унэӀут горэ сэнэшъхьашӀэхэм адэжь ыгъэкӀуагъ. Ащи ышъхьэ къеохи, лые къырахыгъ. 5 ЕтӀанэ нэмыкӀ унэӀут горэ ыгъэкӀуагъ; ар къаукӀыгъ; нэмыкӀ унэӀутыбэхэри ыгъэкӀуагъэх; зы купым къеуагъэх, адрэ купыри къаукӀыгъ. 6 ШӀу ылъэгъурэ ыкъо закъо къыфэнагъ. «Скъо лъытэныгъэ къыфашӀын», ыӀуи, ауж дэдэу ар сэнэшъхьашӀэхэм адэжь ыгъэкӀуагъ. 7 Ау сэнэшъхьашӀэхэм зэраӀожьыгъ: «Мыры сэнэшъхьэ хатэр къызыфэнэжьыщтыр. Ар тэжъугъэукӀи, сэнэшъхьэ хатэр тэ къытфэнэжьыщт». 8 Арэущтэу сэнэшъхьэ хатэр зием ыкъо къаубыти, къаукӀи, сэнэшъхьэ хатэм къыдадзыжьыгъ. 9 Сэнэшъхьэ хатэр зием сыда ышӀэщтыр? къыпигъэхъожьыгъ Исус. Ар къэкӀонышъ, сэнэшъхьашӀэхэр ыгъэ кӀодынхэшъ, сэнэшъхьэ хатэр нэмыкӀхэм аӀэкӀилъхьащт. 10 Мы гущыӀэхэу Тхьэм игущыӀэ тхыгъэхэм арытхэм шъуяджагъэба: «Унэ зышӀыхэрэм зэрамыпэсэу чӀадзыжьыгъэ мыжъор мыжъо лъэпсэ дэдэу унэм фэхъугъ. 11 Мыр Зиусхьаным иӀэшӀагъэ Ӏоф, ари тэ гъэшӀэгъонэу къытфэлъагъо»? 12 Тэурат егъэджэкӀо пащэхэмрэ дин пэщэшхохэмрэ мы гъэсэныгъэ тхыдэр ежьхэм яхьылӀагъэу Исус къызэриӀотагъэр къагурыӀуагъэти, Исус къаубытынэу пылъыгъэх, ау цӀыф купышхом щыщынэщтыгъэхэти, ыуж икӀыжьхи ӀукӀыжьыгъэх.
Хьакъулахь ахъщэм ехьылӀагъ
13 Ащ нэужым Тэурат егъэджэкӀо пащэхэмрэ дин пащэхэмрэ гущыӀэ горэм тыраубытэным пае, фарисейхэм ащыщхэри пачъыхьэ Ирод ыуж рыкӀохэрэм ащыщхэри Исус ыдэжь агъэкӀуагъэх. 14 Ахэр Исус ыдэжь къакӀохи къыраӀуагъ: Дин гъэсакӀу, шъыпкъагъэ зиӀэ лӀэу узэрэщытри, цӀыфхэм аӀорэм узэримыгъапэрэри тэшӀэ, сыда пӀомэ цӀыфхэм ятеплъэ уемыплъэу, цӀыф пстэури уизэфэдэхэу щытых, шъыпкъагъэми тетэу, Тхьэм игъогу цӀыфхэм яогъашӀэ. Кайсарым хьакъулахь ахъщэр етты хъущта, мыхъущта? Еттына, еттымытына? 15 Ау Исус ахэмэ янэпитӀугъэ гу лъитагъэти ариӀуагъ: Сыд пае сыхэжъугъэукъонэу шъупылъа? Зы динар ахъщэ къысфэшъухьи сэжъугъэлъэгъу. 16 Зы динар къыфахьыгъ. Хэта зисурэт мыщ итыри, хэта зыцӀэр мыщ тетхагъэри?ариӀуагъ Исус. Кайсарыр ары, къаӀуагъ ахэмэ. 17 Ащыгъум Кайсарым иер Кайсарым ешъутыжь, Тхьэм иери Тхьэм ешъутыжь, ариӀуагъ Исус. Ахэмэ ежьыр бэу агъэшӀэгъуагъ.
Саддукейхэр лӀагъэхэм якъэтэджыжьын ехьылӀагъэу Исус къызэреупчӀыгъэхэр
18 Саддукейхэу лӀагъэхэр къызэрэтэджыжьыщтхэр зышӀошъ мыхъухэрэм ащыщхэу заулэ Исус ыдэжь къакӀохи къеупчӀыгъэх: 19 Дин гъэсакӀу, пегъымбар Мусэ мырэущтэу къытфитхыгъ: «ЛӀы горэм ышы лӀэу, бын имыӀэу шъуз къыкӀэнмэ, ышы унагъо фишӀыным пае, а лӀым шъузабэр къыщэжьын фае». 20 Зэкъошибл щыӀагъ. Ахэм ащыщэу апэрэм шъуз къыщагъ, ау бын къыкӀэмынэу дунаем ехыжьыгъ. 21 ЯтӀонэрэми а шъузыр къыщэжьыгъ. Ащи бын къыкӀэмынэу дунаем ехыжьыгъ, ящэнэрэри ащ фэдагъ. 22 Блыми а шъузыр къащэжьыгъ, ау бын къакӀэныгъэп. Зэпстэуми ауж дэдэу шъузыри дунаем ехыжьыгъ. 23 ЛӀагъэхэр къызытэджыжьхэкӀэ, хэта зишъузыщтыр ар? Сыда пӀомэ блыми шъузэу яӀагъэшъ ары, 24 Тхьэм игущыӀэ тхыгъэхэмрэ Тхьэм илъэкӀыныгъэшхомрэ зэрэшъумышӀэхэрэр арыба шъузкӀыхэукъорэр?ариӀожьыгъ Исус ахэмэ. 25 Сыда пӀомэ лӀагъэхэр къызытэджыжьхэкӀэ, шъуз къащэжьыщтэп, лӀыми дэкӀожьыщтхэп, уашъом щыӀэ мэлэӀичхэм афэдэхэу щытыщтых нахь. 26 Ау лӀагъэхэр къызэрэтэджыжьыщтхэр пегъымбар Мусэ итхылъ зэритым шъуеджагъэба? Пэнэ куандэм икъэбар зэрыт чӀыпӀэм ыдэжь ит Тхьэр пегъымбар Мусэ къыдэгущыӀэу мырэущтэу къызэриӀуагъэр: «Сэры Ибра хьими, Исхьакъи, Якъуби я Тхьэр». 27 Ащ къикӀырэр Тхьэр псаухэмрэ лӀагъэхэу зыфаӀохэрэмрэ я Тхьэу зэрэщытыр ары. Шъо инэу шъухэукъо.
Тхьэм иунашъохэм ащыщэу анахь ин дэдэр
28 Тэурат егъэджэкӀо пащэхэм ащыщэу зыгорэм Исусрэ саддукейхэмрэ зэнэкъокъухэу зэхихыгъ, Исус дэгъоу пэгъокӀ къызэраритыгъэри ешӀэти, къыбгъодахьи къеупчӀыгъ: Тхьэм иунашъо пстэуми ащыщэу анахь ин дэдэр тара? 29 Анахь ин дэдэр мыры: «ШъукъэдаӀу, Израил цӀыфхэр, Зиусхьанэу ти Тхьэ ары зизакъоу Зиусхьаныр; 30 зэкӀэ о угурэ упсэрэкӀи, зэкӀэ уизэхэшӀыкӀыныгъэкӀи, зэкӀэ пкӀуачӀэкӀи Зиусхьанэу уи Тхьэ шӀу лъэгъу». 31 ЯтӀонэрэ унашъор мыры: «О пшъхьэ шӀу зэрэплъэгъурэм фэдэу, уигъунэгъуи шӀу лъэгъу». Мы унэшъуитӀум анахьи унашъо нахь ин щыӀэп, къыӀожьыгъ Исус. 32 Дэгъоу, дин гъэсакӀу, ыӀуи, Тэурат егъэджэкӀо пащэм Исус къыриӀожьыгъ, Тхьэр зэрэзакъор, ащ нэмыкӀэу Тхьэ зэрэщымыӀэри шъыпкъэу къэпӀуагъ. 33 ЗэкӀэ о угурэ упсэрэкӀи, зэкӀэ уизэхэшӀыкӀыныгъэкӀи, зэкӀэ пкӀуачӀэкӀи ар шӀу плъэгъуныр, о пшъхьи шӀу зэрэплъэгъурэм фэдэу, уигъунэгъуи шӀу плъэгъуныр, Тхьэм пае агъэстырэ къурмэныпхъэ пстэумрэ тын пстэумрэ анахьи бэкӀэ нахь лъапӀ. 34 Исус Тэурат егъэджэкӀо пащэм губзыгъэу пэгъокӀ къызэритыгъэр зелъэгъум, риӀуагъ: О Тхьэм и Тетыгъошхо ыӀэчӀэгъ учӀэхьанэу упэчыжьэп. Ащ къыщегъэжьагъэу ащ нэмыкӀыкӀэ Исус къеупчӀыжьынэу хэти тегушхуагъэп.
Христос хэта зыкъор?
35 Исус Тхьэм иунэшхо чӀэтэу, цӀыфхэм Тхьэм игущыӀэхэр аригъашӀэхэзэ къыӀуагъ: Тэурат егъэджэкӀо пащэхэм Христос Даутэ ыкъоу сыдэущтэу аӀонэу хъугъа? 36 Сыда пӀомэ Тхьэм Ыпсэ ЛъапӀэ ежь Даутэ ыгу къырилъхьи, мырэущтэу къыригъэӀуагъэба: «Тхьэу Зиусхьаным сэ си Зиусхьан къыриӀуагъ: О уипыихэр плъэкъо чӀэгъ къычӀэсэгъэуцохэфэ, сэ сиджабгъукӀэ къызготӀысхь»? 37 Ежь Даутэ Христос «си ЗиусхьанкӀэ» еджэ, къыпигъэхъожьыгъ Исус. Арэу зыхъукӀэ, сыдэущтэу Христос Даутэ ыкъоу хъура? ЦӀыф купышхор игуапэу Исус едэӀущтыгъ.
Исус Тэурат егъэджэкӀо пащэхэм ямысагъэ къызэригъэлъэгъуагъэр
38 Исус цӀыфхэм Тхьэм игущыӀэхэр аригъашӀэхэзэ къыӀуагъ: Тэурат егъэджэкӀо пащэхэм шъуафэсакъ. Ахэмэ шъошэ кӀыхьэхэр ащыгъхэу къакӀухьаныр якӀас. ЗэӀукӀэхэми ежьхэм аГэхэм цӀыфхэр щарагъэбэунхэри, 39 синэгогухэм цӀыфхэр зыщызэӀукӀэхэкӀи, ешхэешъошхохэм адэжьи тхьэмэтэ тӀысыпӀэхэр аубытынхэри якӀас. 40 Шъузабэхэм яунэхэри къатырахых. ЦӀыфхэм зыкъарагъэгъэшӀэгъоным пае, тхьэлъэӀухэр агъэкӀыхьэх. Тхьэм ахэмэ яфэшъуашэ инэу аригъэпщыныжьыщт.
Шъузабэм ахъщэу Тхьэм пае ытыгъэр
41 ЦӀыфхэм Тхьэм тын фашӀэу, ахъщэхэр зыдалъхьэрэ пхъуантэхэм апашъхьэ Исус тӀысыгъэу, ахъщэхэр зэрэдалъ хьахэрэм еплъыщтыгъ. ЦӀыф баибэхэм ахъщэ бэу далъхьагъ. 42 Зы шъузэбэ тхьамыкӀэ горэ къакӀуи, гъоплъэ ахъщитӀу пхъуантэм дилъхьагъ. Ар зы чапыч фэдиз мэхъу. 43 Джащыгъум Исус игъогу рыкӀохэрэм къяджи ариӀуагъ: Шъыпкъэр шъосэӀо, мы шъузэбэ тхьамыкӀэм изакъоу адрэ дэзылъхьэгъэ цӀыф пстэуми анахьи нахьыбэ дилъхьагъ; 44 сыда пӀомэ ахэмэ ахъщэу къялыжьыгъэм щыщ далъхьагъэти ары, ау а шъузабэм зэкӀэ дилъхьагъ зэрэпсэунэу макӀэ тӀэкӀоу иӀэр зэкӀэ ары.
Исус Тхьэм иунэшхо зэрэзэхакъутэщтыр къызэриӀуагъэр
1 Исус Тхьэм иунэшхо къычӀэкӀыжьызэ, игъогу рыкӀохэрэм ащыщэу зыгорэм къыриӀуагъ: Еплъ, дин гъэсакӀу! Мыхэр сыдэу мыжъо джадэха! Мыхэр сыдэу унэ гъэшӀэгъонха! 2 Мы унэшхохэр олъэгъуха? ыӀуи, Исус ащ риӀожьыгъ. МыжъуитӀу къызэтемынэжьэу пстэури къызэхэтэкъощтых.
Къиныбэ щэчыныгъэм иублапӀ
3 Ащ ыужым Исус Тхьэм иунэшхо фэзанкӀэу Елеон Ӏуашъхьэм тесэу, Петри, Якъуби, Иуани, Индрыси язакъоу къызэнэжьхэм, къеупчӀыгъэх: 4 КъытаӀу, о зыфэпӀогъэ Ӏофхэр сыдигъо къэхъущтых, ахэр зэкӀэ къызэрэхъущтхэм янэшанэри сыда? 5 Зыми шъукъызэримыгъэпцӀэщтым шъуфэсакъ, ыӀуи, Исус ахэмэ ариӀоу ыублагъ. 6 Сэ сцӀэкӀэ зэджэжьхэу, «Сэры Христос», аӀоу, цӀыфхэу къэкӀощтхэр бэу хъущтых, цӀыфыбэхэри агъэпцӀэщтых. 7 Ау благъэми чыжьэми зэо къэбар зызэхэшъухыкӀэ, шъумыщын. А Ӏофхэр къэхъунхэ фае, ау дунаем икӀэух къэсыгъэу щытыгоп. 8 Зы лъэпкъыр адрэ лъэпкъым, зы пачъыхьагъори адрэ пачъыхьагъом езэонэу къэтэджыщт. ЧӀыпӀэчӀыпӀэхэмкӀи чӀыгур инэу щысысыщт, гъаблэхэри къэхъущтых. А Ӏофхэр къиныбэ щэчыныгъэм иублапӀ. 9 Ау шъо шъузыфэсакъыжь. Тхьамэтэ хасэхэм апашъхьэ шъуращэщт, синэгогухэми къамыщкӀэ къащышъоощтых. Сэ сигъогу шъузэрэрыкӀорэм пае, Ӏэшъхьэтетхэмрэ пачъыхьэхэмрэ апашъхьэ къэбарышӀум шыхьат шъуфэхъунэу шъукъиуцощт. 10 Ау ыпэ рапшӀэу сэ къысфэлажьэрэ цӀыфхэм къэбарышӀур лъэпкъ пстэуми арагъэӀун фаеу щыт. 11 ХьыкумышӀэм ыпашъхьэ шъуращэнэу шъузаубыткӀэ, «Сыда тӀощтыр?» шъуӀоу, ыпэ рапшӀэу шъумыгумэкӀ. А сыхьат дэдэм гущыӀэхэу Тхьэм Ыпсэ ЛъапӀэ шъугухэм къарилъхьэхэрэр къашъуӀох; сыда пӀомэ шъорэп къэгущыӀэщтыр, Тхьэм Ыпсэ ЛъапӀ ары нахь. 12 Шым ежь ышы, тым ежь ибын тетыгъо зиӀэхэм аригъэукӀыным пае, аӀэкӀигъэхьащт. Бынхэри ятэянэхэм апэуцущтых, тетыгъо зиӀэхэми арагъэукӀыщтых. 13 Шъо сэ сцӀэ зэрэжъугъэлъапӀэрэм пае, цӀыф пстэуми шъуауджэгъущт. Ау кӀэухым нэсыфэ теубытэныгъэ зиӀэр мыкӀодэу Тхьэм къыгъэнэжьыщт.
Гузэжъогъушхор
14 Ау «Зэхэзыкъутэрэ ГущыкӀыгъоу» пегъымбар Данил зытегущыӀагъэр зыдэщымытын фэе чӀыпӀэм щытэу зышъулъэгъукӀэ, (еджэрэм къыгурэрэӀу), ащыгъум Иудей хэкум ис цӀыфхэр Ӏуашъхьэхэм ярэкӀолӀэжьых. 15 Унашъхьэм тетыри къызехыкӀэ, зыгорэ зыдихьынэу унэм ерэмыхьажь. 16 Губгъом итыми ищыгъын кӀыӀутелъ зы дихьынэу къерэмыгъэзэжь. 17 А мафэхэм бзылъфыгъэ лъэрмыхьэхэмрэ сабый быдзашъо зиӀэхэмрэ сыхьатмыгъо ежьэщтых. 18 Мы Ӏофхэр кӀымафэм темыфэнхэу Тхьэм шъуелъэӀу; 19 сыда пӀомэ а мафэхэм гузэжъогъушхо дунаем щыхъущт. Ащ фэдэ гузэжъогъушхо Тхьэм дунаер къызигъэхъугъэм щегъэжьагъэу джырэ нэсыфэ щыӀагъэп ыкӀи щыӀэжьыщтэп. 20 Зиусхьаным а мафэхэр нахь макӀэ ымышӀыгъэхэмэ, зы цӀыфи мыкӀодэу къэнэжьыщтгъэп. Ау ежьым къыхихыгъэ цӀыфхэм яхьатыркӀэ Зиусхьаным а мафэхэр нахь макӀэ ышӀыгъэх. 21 А мафэхэм «Мары, Христос мыщ дэжьым щыӀ», ыӀоу, е «Христос модэ щыӀ», ыӀоу зыгорэм къышъуиӀомэ, шъушӀошъ шъумыгъэхъу. 22 Христос нэпцӀхэмрэ пегъымбар нэпцӀхэмрэ къэлъэгъощтых. Ахэмэ нэшэнэ гъэшӀэгъонышхохэри Ӏофышхо гъэшӀэгъонхэри къагъэлъэгъощтых, алъэкӀымэ, Тхьэм къыхихыгъэ цӀыфхэр агъэпцӀэнхэм пае. 23 Ау шъо шъузыфэсакъыжь, а Ӏоф пстэури къэхъунхэм ыпэкӀэ ахэмэ якъэбар къышъосӀуагъ.
ЦӀыф Лъэпкъым Ыкъо дунаем къызэрэкӀожьыщтыр
24 Ау а мафэхэм гузэжъогъушхом ыуж тыгъэр ушӀункӀыжьыщт, мазэри къэнэфыжьыщтэп. 25 Жъуагъохэри уашъом къефэхыщтых, уашъом щыӀэ кӀуачӀэхэри хъыещтых. 26 Джащыгъум ЦӀыф Лъэпкъым Ыкъо ошъуапщэхэм ахэтэу, лъэкӀыныгъэшхорэ щытхъушхорэ иӀэхэу, къакӀоу цӀыфхэм алъэгъущт. 27 Джащыгъум ЦӀыф Лъэпкъым Ыкъо мэлэӀичхэр ыгъэкӀощтых, дунай лъэныкъуиплӀым зы ошъо чапэм къыщегъэжьагъэу адрэ ошъо чапэм нэс, ежь ицӀыфхэу къыхихыгъэхэр къыхищыхэзэ, ежьым къыфаугъоижьынхэу.
Ынджыр чъыгым шъыпкъагъэу къыдгуригъаӀорэр
28 Ынджыр чъыгым къехъулӀэрэмкӀэ Ӏоф горэ зэжъугъашӀэ: икъутамэхэм псы къахахьэу, ытхьапэхэр къыпыкӀэхэ зыхъукӀэ, гъэмафэр къызэрэблагъэр шъошӀэ. 29 Ащ фэдэу шъори, мы Ӏофхэр къэхъухэу зышъулъэгъукӀэ, ЦӀыф Лъэпкъым Ыкъо гъунэгъоу, къэлапчъэм дэжь зэрэщытыр шъушӀэ. 30 Шъыпкъэр шъосэӀо, мы Ӏофхэр зэкӀэ къэхъунхэм ыпэкӀэ, мы лъэпкъыр кӀодыщтэп. 31 Уашъомрэ чӀылъэмрэ кӀодыжьыщтых, ау сэ сигущыӀэхэр кӀодыжьыщтхэп.
А мафэри а сыхьатри къызысыщтыр зыми ышӀэрэп
32 Ау а мафэр е а сыхьатыр къызысыщтыр зыми ышӀэрэп. Уашъом щыӀэ мэлэӀичхэми ашӀэрэп, Тхьэм Ыкъуи ышӀэрэп. Ты лъапӀэ изакъоу ары ныӀэп ар зышӀэрэр. 33 Шъузыфэсакъыжь! Шъумычъыеу шъусакъ, Тхьэми шъуелъэӀу; сыда пӀомэ а сыхьатыр къызыкӀощтыр шъушӀэрэпышъ ары! 34 Ар зыфэдэр мары: лӀы горэм чыжьэу къыкӀухьанэу иунэ екӀы. Хэти ежь иӀоф ышӀэнэу иунэӀутхэм иунэ аӀэкӀелъхьэ, къэлапчъэм Ӏут ухъумакӀори мычъыеу сакъынэу унашъо фешӀы. 35 Арышъ, шъори шъумычъыеу шъусакъ; сыда пӀомэ, пчыхьэшъхьапэр арыми, чэщныкъор арыми, атэкъэӀогъур арыми, пчэдыжь нэфшъагъор арыми, унэр зиер къызыкӀожьыщтыр шъушӀэрэпышъ ары! 36 Ар шъумышӀахэу къызыкӀожькӀэ, шъучъыеу шъупэмыплъэу зыкъешъумыгъэгъот. 37 Шъо къышъуасӀорэр зэпстэуми ясэӀо: шъумычъыеу шъусакъ!
Тхьэмэтэ Хэсэшхом щыщ тхьаматэхэм Исус тхьагъэпцӀыгъэкӀэ аукӀынэу гухэлъ зэрашӀыгъэр
1 Пасхъэ зыцӀэ мэфэкӀ мэфэшхомрэ Хьалыгъу Мыгъэтэдж зыщашхырэ мэфэкӀ мэфэшхо мафэхэмрэ къэсын хэкӀэ мэфитӀу къэнэжьыгъ. Дин пэщэшхохэмрэ Тэурат егъэджэкӀо пащэхэмрэ Исус аукӀыным пае, тхьагъэпцӀыгъэкӀэ зэраубытыщт шӀыкӀэм лъыхъущтыгъэх. 2 Сыда пӀомэ ахэмэ аӀуагъ: ЦӀыфхэм бырсырышхо амышӀыным пае, мэфэкӀ мэфэшхом тефэу орэмьгхъу.
Зы бзылъфыгъэ горэм Вифание къуаджэм дагъэу осэшхо зиӀэр Исус зэрэщифагъэр
3 ЕтӀанэ Исус Вифание къуаджэм щыӀэу, Симонэу шъоджэ уз Ӏае зиӀагъэм иунэ Ӏанэм пэсэу щышхэщтыгъ. Шхэзэ, бзылъфыгъэ горэ унэм къихьагъ. А бзылъфыгъэм алавастэр зыцӀэ мыжъом хэшӀыкӀыгъэу, апч ыӀыгъыгъ. Нард зыцӀэ къэкӀыгъэм идагъэ къабзэу ыкӀи осэшхо зиӀэу, мэ ӀэшӀу зыпихырэр а апчым итыгъ. Бзылъфыгъэм апчыр ыкъути, Исус ышъхьэ дагъэр тырикӀагъ. 4 Ар залъэгъум, зы куп губжи, мыщ фэдэу зэриӀожьыгъ: Мы дагъэу осэшхо зиӀэр хьаулыеу сыд пае ыгъэкӀодыгъа? 5 А дагъэр ащагъэмэ, динар шъищ нахьи нахьыбэ къьгхьыщтыгъ, тхьамыкӀэхэми афагощын алъэкӀыщтыгъ. Арэущтэу аӀозэ, бзылъфыгъэм щыхьагъэх. 6 Ыуж шъуикӀ, къыӀуагъ Исус. Сыд пае бзылъфыгъэр жъугъэукӀытэра? Ащ шӀугъэ къысфишӀагъ. 7 ТхьамыкӀэхэр къышъухэт зэпытых, сыдигъо шъуфаеми шӀугъэ афэшъушӀэн шъулъэкӀыщт, ау сэ сышъухэт зэпытыщтэп. 8 Мы бзылъфыгъэм ылъэкӀыгъэр ышӀагъ. Ащ сэ спкъы дагъэ щифи, сызэрэчӀалъхьажьыным сыфиухьазырыгъ. 9 Шъыпкъэр шъосэӀо, сэ къысфэлажьэрэ цӀыфхэм чӀылъэм зэкӀэ къэбарышӀур тыдэ щагъэӀуми, мы бзылъфыгъэм ышӀагъэр къаӀотэжьыщт, цӀыфхэм шӀукӀэ а бзылъфыгъэр агу къагъэкӀьгжьыным пае.
Иудэ зыцӀэм Исус дин пэщэшхохэм аӀэкӀигъэхьанэу зэрадиштагъэр
10 Исус игъогу рыкӀорэ нэбгырэ пшӀыкӀутӀум ащыщэу Иудэ Искариот зыцӀэр дин пэщэшхохэм адэжь кӀуагъэ, Исус аӀэкӀигъэхьаным пае. 11 Ахэмэ ар зызэхахым, гушӀуагъэх, ахъщи Иудэ къыратынэу къагъэгугъагъ. Арэущтэу Иудэ Исус ахэмэ аӀэкӀигъэхьаным пае, Ӏэрыфэгъу уахътэ паплъэу ыублагъ.
Исус Пасхъэ пчьгхьэшъхьашхэр игъогу рыкӀохэрэм зэрадшпӀыгъэр
12 Хьалыгъу Мыгъэтэдж зыщашхырэ мэфэкӀ мэфэшхо мафэхэм ащыщэу апэрэ мафэу Пасхъэ шъынэр зыщышӀуабзыщтыгъэм дэжь игъогу рыкӀохэрэм Исус къыраӀуагъ: Пасхъэ пчыхьэшъхьашхэр щыпшӀынэу тыдэ тыкӀонышъ, щыдгъэхьазырынэу уфая? 13 Арэущтэу Исус игъогу. рыкӀохэрэм ащыщэу нэбгыритӀу къалэм ыгъэкӀуагъэх, мырэущтэу ариӀуагъэу: Къалэм шъудахьи, зы лӀы горэм псы къошын ыхьэу, ащ дэжьым къыщышъуӀукӀэщт. А лӀым ыуж шъуитэу шъукӀу. 14 А лӀыр зэрыхьэрэ унэр зием ешъуӀу: «Дин гъэсакӀом еӀо: Сэррэ сигъогу рыкӀохэрэмрэ Пасхъэ пчыхьэшъхьашхэр зыщытшӀыщт хьакӀэщыр тыдэ щыӀа?» 15 Джащыгъум гъэкӀэрэкӀагъэу, тегъэпсыхьагъэу хьэкӀэщышхо лъагэ горэ шъуигъэлъэгъущт. Ащ дэжьым зэкӀэри къыщытфэжъутъэхьазыр. 16 Исус игъогу рыкӀохэрэр дэкӀыхи, къалэм дэхьагъэх. Исус зэрариӀуагъэм тетэу пстэури къагъоти, Пасхъэ пчыхьэшъхьашхэр агъэхьазырыгъ. 17 Пчыхьашъхьэр къызэсым, Исус игъогу рыкӀорэ нэбгырэ пшӀыкӀутӀур игъусэхэу къэкӀуагъ. 18 Ахэр Ӏанэм пэсхэу шхэхэ зэхъум, Исус къыӀуагъ: Шъыпкъэр шъосэӀо, шъо сэ къыздашхэхэрэм шъуащыщ горэм тетыгъо зиӀэхэм саӀэкӀигъэхьащт. 19 Ахэмэ агу къеуагъ. Зым зыр ыуж итэу къыраӀонэу фежьагъэх: Ар сэрэп, арыба? 20 Шъо пшӀыкӀутӀум шъуащыщэу мы апсым сигъусэу хьалыгъу къыхэзыгъаорэр ары тетыгъо зиӀэхэм саӀэкӀэзыгъэхьащтыр, ариӀуагъ Исус. 21 Шъыпкъэ, ЦӀыф Лъэпкъым Ыкъо дунаем ехыжьыщт, ежьым ехьылӀагъэу Тхьэм игущыӀэ тхыгъэхэм зэрарытым фэдэу. Ау ЦӀыф Лъэпкъым Ыкъо тетыгъо зиӀэхэм аӀэкӀэзыгъахьэрэр сыхьатмыгъо ежьагъ! А цӀыфыр къэмыхъугъэмэ, ежьымкӀэ нахьышӀущтыгъ.
Зиусхьаным ипчыхьэшъхьашх
22 Ахэр шхэхэ зэхъум, Исус хьалыгъур къыштагъ, Тхьэм щытхъу фишӀи, зэгуичи, ахэм арити къыӀуагъ: Ма, шъушхы, мы хьалыгъур сэ спкъы ары. 23 ЕтӀанэ зы шъуалъэ къышти, Тхьэм щытхъу фишӀи аритыгъ. Ахэр зэкӀэ ащ итым щыщ ешъуагъэх. 24 Мы сэнэпсыр сэ слъэу Тхьэм ежьымрэ ицӀыфхэмрэ азыфагу дилъхьэгъэ зэзэгъыныгъэр къэзыгъэшъыпкъэжьырэр ары, ариӀуагъ Исус. ЦӀыфыбэхэм яшӀуагъэ къакӀонэу, лъэу сэ къыскӀэкӀыщтыр ары. 25 Шъыпкъэр шъосэӀо, Тхьэм и Тетыгъошхо къызыкӀощтым нэсыфэ, сэнэшъхьэ къутамэм ипс сешъожьыщтэп. А мафэм кӀэу сешъожьыщт. 26 ЕтӀанэ Исусрэ игъогу рыкӀохэрэмрэ тхьэщытхъу орэд къызаӀо ужым, унэм икӀыхи, Елеон Ӏуашъхьэм кӀуагъэх.
«Сэ сыкъэмышӀэу къэпӀощт», Исус Петрэ зэрэриӀуагъэр
27 Шъо пстэуми сизакъоу утыгум сыкъишъунэщт, ариӀуагъ Исус игъогу рыкӀохэрэм, сыда пӀомэ Тхьэм къызэриӀорэр игущыӀэ тхыгъэхэм арыт: «Сэ мэлахъор сыукӀыщт, мэлхэри зэбгырыкӀыжьыщтых». 28 Ау лӀагъэхэм сыкъызахэтэджыкӀыжьыкӀэ, шъуапэ рапшӀэу Галилей хэкум сыкӀощт. 29 Пстэуми утыгум укъыранэми, сэ укъисынэщтэп,къыриӀуагъ Петрэ Исус. 30 Шъьшкъэр осэӀо, риӀожьыгъ Исус Петрэ, мы нычэпэ дэдэм атакъэр тӀо Ӏоным ыпэкӀэ, гъогогъуищэ сэ сыкъэмышӀэу къэпӀощт. 31 Сэ сыбдэлӀэн фаеу щытми, усымышӀэу сӀощтэп,теубытагъэу къыӀуагъ Петрэ. Ащ фэдэ къабзэу Исус игъогу рыкӀорэ адрэ лӀы пстэуми къаӀуагъ.
Исус Гефсимание хатэм Тхьэм зэрэщелъэӀугъэр
32 Ащ нэужым Гефсимание зыцӀэу чӀыпӀэ горэм нэсыгъэх. Мо шъуетӀысэх, сэ Тхьэм селъэӀуфэ, ыӀуи, Исус игъогу рыкӀохэрэм ариӀуагъ. 33 Исус етӀанэ Петри, Якъуби, Иуани зыдищэхи, ыгу къеоу, гумэкӀэу ыублагъ. 34 СылӀэрэм фэдэу инэу сыгу хэкӀы, ариӀуагъ. Шъумычъыеу шъусакъэу мо шъущыӀ. 35 ЕтӀанэ зы тӀэкӀу ӀукӀоти, чӀыгум зыридзыхи, амал иӀэмэ, къин щэчыныгъэм исыхьат блигъэкӀынэу Тхьэм елъэӀугъ. З6 Аввэу сэ Сят, о умылъэкӀын Ӏоф зи щыӀэп, ыӀуагъ. Мы къин щэчыныгъэм ишъуалъэ сэ сӀых. Ау сэ сызыфаер мыхъоу, о узыфаер орэхъу. 37 Ащ ыужым Исус игъогу рыкӀорэ нэбгырищымэ адэжь къыгъэзэжьи, чъыехэу къыгъотыжьыгъэх. Симон очъыя? ыӀуи, Исус Петрэ риӀуагъ. Зы сыхьат закъокӀэ умычъыеу усакъын плъэкӀыгъэп, ара? 38 Шъумычъыеу шъусакъ, псэкӀодшӀэным шъудимыхьыхынэуи Тхьэм шъуелъэӀу. Гур фай, ау пкъым ылъэкӀырэп. 39 Исус етӀанэ ӀукӀыжьи, а гущыӀэ дэдэхэмкӀэ Тхьэм елъэӀугъ. 40 Джыри зэ къызегъэзэжьым, а нэбгырищыр чъыехэу къыгъотыжьыгъэх, сыда пӀомэ анапӀэхэр онтэгъоу хъугъэхэти ары. Ахэмэ Исус къыраӀожьыщтыр ашӀагъэп. 41 Исус ящэнэрэу къызегъэзэжьым, ахэмэ ариӀуагъ: Зыжъугъэпсэфызэ джыри шъочъыя? Икъун! Сыхьатыр къэсыгъ. Мары, ЦӀыф Лъэпкъым Ыкъо псэкӀод зышӀэрэ цӀыфхэм аӀэкӀэхьащт. 42 Шъукъэтэдж! НекӀо, мары ахэмэ саӀэкӀэзыгъэхьащтыр къэблэгъагъ.
Исус зэраубытыгъэр
43 Ардэдэм Исус джыри гущыӀэзэ, игъогу рыкӀорэ нэбгырэ пшӀыкӀутӀум ащыщэу Иудэу Исус тетыгъо зиӀэхэм аӀэкӀэзыгъэхьанэу щытыгъэр къэкӀуагъ. Сэшхохэмрэ умэхэмрэ аӀыгъхэу, цӀыф купышхо игъусагъ. Дин пэщэшхохэри, Тэурат егъэджэкӀо пащэхэри, нахьыжъхэри ары ахэр къэзыгъэкӀогъагъэхэр. 44 Сэ сызэбэущтыр ары зыфасӀорэр, ыӀуи, Иудэ Исус зэраӀэкӀигъэхьащт шӀыкӀэр игъусэхэм ариӀогъагъ. Ар шъуубыти, шъуфэсакъызэ Ӏушъущ. 45 Иудэ зэрэнэсэу Исус екӀуалӀи, Равви! ыӀуи, Исус ебэугъ. 46 Арэущтэу Исус аубытыгъ. 47 Ащ дэжьым щытхэм ащыщэу зым исэшхо къырихи, дин пэщэшхом иунэӀут еуи, ытхьакӀумэ лъэныкъо гуиупкӀыгъ. 48 ХъункӀакӀо горэ шъуубытыщтым фэдэу, сэшхохэмрэ умэхэмрэ шъуӀыгъхэу шъукъыспэгъокӀыгъа? ариӀуагъ Исус ахэмэ. 49 Мафэ къэси Тхьэм иунэшхо цӀыфхэм Тхьэм игущыӀэхэр щязгъашӀэхэу сышъухэтыгъ, арышъхьакӀэ сышъуубытыгъэп. Ау мыр зыфэхъугъэр Тхьэм игущыӀэ тхыгъэхэм арытхэр къэшъыпкъэжьынхэр ары. 50 Джащыгъум Исус игъогу рыкӀорэ пстэуми ежьыр утыгум къырани хэхьажьыгъэх.
КӀалэу хэхьажьыгъэр
51 Зы кӀалэ горэ чэсэй фыжь ыпкъ ещэкӀыгъэу, Исус игъусэхэм ахэтыгъ. А кӀалэр къаубытэу аублагъ, 52 ары шъхьакӀэ кӀалэм чэсэй фыжьыр ахэмэ къаӀэкӀини, пцӀанэу аӀэкӀэкӀи хэхьажьыгъ.
Исус Тхьэмэтэ Хэсэшхом ыпашъхьэ зэрэращагъэр
53 Исус дин пэщэпгхом ыдэжь ащагъ, адрэ дин пэщэшхохэри, нахьыжъхэри, Тэурат егъэджэкӀо пащэхэри зэкӀэ ащ дэжьым къыщызэӀукӀагъэх. 54 Петри чыжьэкӀэ Исус ыуж итэу, дин пэщэшхом ищагу нэсыфэ къыкӀэлъыкӀогъагъ. Ащ дэжьым машӀом зыщыригъэоу, ухъумакӀохэм ахэсыгъ. 55 Дин пэщэшхохэмрэ Тхьэмэтэ Хэсэшхом щыщхэу адрэ тхьаматэ пстэумрэ Исус укӀ тыралъхьаным пае, шыхьат лъыхъущтыгъэх, ау зи къагъотыгъэп. 56 Шыхьат нэпцӀыбэхэм Исус пцӀы Ӏаджи тыралъхьагъ, арышъхьакӀэ къаӀуагъэхэр зэтефагъэхэп. 57 Арэущтэу зэхъум, шыхьат нэпцӀ куп къэтэджи, мыр Исус тырилъхьагъ: 58 Мы лӀым мыщ фэдэу къыӀоу зэхэтхыгъэ: «Тхьэм иунэшхоу цӀыфхэм аӀэкӀэ ашӀыгъэр сэ зэхэскъутэнышъ, цӀыфхэм аӀэкӀэ амышӀыгъэу нэмыкӀ унэшхо мэфищкӀэ зэтезгъэуцожььпцт». 59 Ау а шыхьатхэми Исус тыралъхьагъэхэр зэтефагъэхэп. 60 ЕтӀанэ дин пэщэшхор къэтэджи, утыгум къиуцуагъ. Сыд мы лӀыхэм о къыптралъхьэрэр? еупчӀыгъ ар Исус. Сыда зи къызкӀэмыӀорэр? 61 Исус зиушъэфэу, зи къыӀуагъэп. Ора Христосэу щытхъушхор зиӀэ Тхьэм Ыкъо? джыри зэ дин пэщэшхор еупчӀыгъ. 62 Сэры, къыӀуагъ Исус, лъэкӀыныгъэшхор зиӀэ Тхьэм иджабгъукӀи госэу, ошъуапщэми ахэтэу, ЦӀыф Лъэпкъым Ыкъо къакӀоу шъулъэгъущт. 63 Джащыгъум дин пэщэшхом ищыгъынхэр къызэгуитхъыгъэх. Сыда нэмыкӀ шыхьат зэрэтищыкӀэгъэжьыр? къыӀуагъ ащ. МТхьэр зэригъэпцӀыгъэр шъо зэхэшъухыгъ. Сыдэущтэу шъухаплъэра? Ахэмэ зэкӀэмэ Исус укӀ ифэшъуашэу къаГуагъ. 65 Зы купыр Исус теужъунтхэхэу аублагъ. ЫнэкӀуи рахъуи, бжымкӀэ еуагъэх. Упегъымбармэ, хэтми къыоуагъэм ыцӀэ къаӀо! раӀуагъ. УхъумакӀохэри Исус енэпэшъоуагъэх.
Петрэ Исус ымышӀэу къызэриӀуагъэр
66 Петрэ ыхэкӀэ щагум зыдэтым, дин пэщэшхом иунэӀут пшъашъэхэм ащыщ къэкӀуагъ. 67 Петрэ машӀом зыщыригъэоу зелъэгъум, еплъи риӀуагъ: Ори а Исусэу Назарет щыщым уригъусагъ. 68 Хьау, о зыфапӀорэр сэ сшӀэрэп ыкӀи зэхэсшӀыкӀырэп, ыӀуагъ Петр. ЕтӀанэ щагум дэкӀи, идэхьапӀэ дэхьагъ. Атакъэр къэӀуагъ. 69 УнэӀут пшъашъэм Петрэ ащ дэжьым щытэу зелъэгъум, а чӀыпӀэм щытхэм джыри зэ ариӀожьэу ыублагъ: Мыр ахэмэ ащыщ. 70 Хьау, сэ ахэмэ сащыщэп, джыри зэ ыӀуагъ Петрэ. Зы тӀэкӀу тешӀагъэу ащ дэжьым щытхэм джыри зэ Петрэ къыраӀожьыгъ: ӀПъыпкъэу ори ахэмэ уащыщ; сыда пӀомэ Галилей хэкум ущыщба? ЯгущыӀакӀэкӀэ укъэгущыӀэ. 71 Тхьэр сэгъэпцӀы къасӀорэр мышъыпкъэмэ, а лӀэу зыфашъуӀорэр сшӀэрэп, ыӀуи, Петрэ тхьарыӀо ышӀэу ыублагъ. 72 Ардэдэм ятӀонэрэу атакъэр къэӀуагъ. Джащыгъум Исус къыриӀогъэгъэ гущыӀэхэр Петрэ ыгу къэкӀыжьыгъэх: Атакъэр тӀо Ӏоным ыпэкӀэ, гъогогъуищэ сэ сыкъэмышӀэу къэпӀощт. Ар ыгу къызэкӀыжьым, Петрэ къэгъыгъ.
Исус Ӏэшъхьэтетэу Пилат ыпашъхьэ зэрэращагъэр
1 Нэф къызэрышъэу, нахьыжъхэри, Тэурат егъэджэкӀо пащэхэри, адрэ тхьаматэхэу Тхьэмэтэ Хэсэшхом щыщхэри ягъусэхэу, дин пэщэшхохэмэ хасэ ашӀыгъ. Исус Ӏэхъу тыралъхьи, Ӏуащи, Ӏэшъхьэтетэу Пилат ӀэкӀалъхьагъ. 2 0 джуртхэм уряпачъыхьа? ыӀуи, Пилат Исус къеупчӀыгъ. Ары, къызэрэпӀорэм фэдэу, риӀожьыгъ Исус. 3 Дин пэщэшхохэм ӀэджыкӀи Исус агъэмысэщтыгъ. 4 Пилат джыри зэ Исус къеупчӀыгъ: Сыда зи къызкӀэмыӀорэр? Къыптыралъхьэрэр зыфэдизыр плъэгъурэба? 5 Ау Исус зи къыӀожьыгъэп. Зи къызэримыӀожьыгъэм пае, Пилат ыгъэшӀэгъуагъ.
Исус укӀ зэрэтыралъхьагъэр
6 Пасхъэ мэфэкӀ мэфэшхо къэсымэ, цӀыфхэр зыкӀэлъэӀурэ хьапсчӀэс горэ шъхьафитэу къафитӀупщыжьыныр Пилат ихабзэу щытыгъ. 7 А мафэхэм нэбгырэ заулэу цӀыфхэр къэзыгъэбырсыгъэхэу, лӀы горэ зыукӀыгъэхэр хьапсым чӀэсыгъэх. Вараввэ зыцӀэу зы лӀы горэ ахэмэ ахэтыгъ. 8 ЦӀыфхэр купышхоу Пилат ыдэжь къакӀохи, ихабзэ фэдэу къафишӀэнэу къелъэӀугъэх. 9 Джуртхэм япачъыхьэ шъхьафитэу къышъуфэстӀупщыжьынэу шъуфая? ариӀожьыгъ Пилат. 10 Пилат аущтэу зыкӀяупчӀыгъэр шъугъоным къыхэкӀэу, дин пащэхэм Исус къызэрэӀэкӀалъхьагъэр къыгурыӀуагъэти ары. 11 Ау Пилат Вараввэ шъхьафитэу къырагъэтӀупщыжьыным пае, дин пэщэшхохэм цӀыф купышхор зэкӀагъэплъыхьагъэх. 12 Адэ, джуртхэм япачъыхьэу зыфашъуӀорэм сыда есшӀэщтыр? джыри зэ ариӀуагъ Пилат. 13 Къащым теӀулӀ! къэкууагъэх ахэр. 14 Сыд ащ бзэджагъэу ышӀагъэр? ариӀуагъ Пилат. Ау ахэр нахь инэу къэзэрэгъэкууагъэх: Къащым теГулӀ! 15 Джащыгъум Пилат цӀыф купышхор ыгъэрэзэнхэу фэягъэти, Вараввэ шъхьафитэу къафитӀушцыжьыгъ. ЕтӀанэ дзэлӀхэр Исус къамыщкӀэ ригъаохи, къащым тыраӀулӀэнэу аӀэкӀилъхьагъ.
ДзэлӀхэр Исус зэрэкӀэнэкӀагъэхэр
16 ДзэлӀхэм преторие зыцӀэ унэшхом Исус чӀащи, адрэ къэнагъэ дзэлӀ купышхор ащ щызэхаугъоягъэх. 17 ЕтӀанэ плъыжь чӀапцӀэу зы шъошэ кӀьгхьэ Исус щалъи, панэ хэшӀыкӀыгъэу пачъыхьэ тандж фабли, ышъхьэ тыралъхьагъ. 18 Шъхьащэ фашӀэу аублагъ: «Опсэу, о джуртхэм япачъыхь!» аӀозэ. 19 ЕтӀанэ бэщкӀэ ышъхьэ еощтыгъэх, теужъунтхэщтыгъэх ыкӀи агъэлъапӀэрэм фэдэу лъэгонджэмышъхьэкӀэ ыпашъхьэ къитӀысхьэштыгъэх. 20 Ахэр Исус зыкӀэнакӀэхэ ужым, шъошэ кӀыхьэ плъыжь чӀапцӀэр щахыжьи, ежь ищыгъынхэр щалъэжььггъэх. ЕтӀанэ къащым тыраӀулӀэнэу преторием ращыжьыгъ.
Исус къащым зэрэтыраӀулӀагъэр
21 Кириние къалэм щыщэу, Симон зьщӀэу зы лӀы горэ щыӀагъ. Ар Александррэ Руфрэ ятэу щытыгъ. Ар губгъом къикӀызэ блэкӀ пэтэу, Исус икъащ ыхьынэу рагъэзыгъ. 22 Голгофэ зыфаӀорэ чӀыпӀэм Исус ащагъ, (Голгофэ къикӀырэр «Шъхьэпкъ ЧӀыпӀэр» ары). 23 Ащ дэжьым зынэс хэм, мур зыцӀэ мыстхъу горэ зыхэлъ сэнэпс Исус фащэигъ, арышъхьакӀэ аӀихыгъэп. 24 ЕтӀанэ Исус къащым тыраӀулӀагъ. Пхъэдз ашӀызэ, ищыгъынхэм ащыщэу хэти иӀахьэу къылъысыщтыр зэфагощыгъ. 25 Исус къащым зытыраӀулӀэм, пчэдыжьым сыхьатыр бгъум нэсыгъагъ. 26 Исус къащым зыкӀыраӀулӀыгъэр зы пхъэмбгъу горэм мырэущтэу тетхагъэу щытыгъ: «Джуртхэм я Пачъыхь». 27 А чӀыпӀэм хъункӀэкӀуитӀу, зыр иджабгъукӀэ адрэр исэмэгубгъукӀэ, Исус игъусэхэу къащхэм атыраӀулӀагъэх. 28 Арэущтэу мы гущыӀэхэу Тхьэм игущыӀэ тхыгъэхэм арытхэр къэшъыпкъэжьыгъэх: «Хабзэм текӀыгъэхэм ащыщэу ежьыр алъытагъ». 29 КъыблэкӀырэ цӀыфхэр Исус къехъонхэзэ, ашъхьэхэр агъэсысхэу, мырэущтэу аӀуагъ: О Тхьэм иунэшхо зэхэзыкъутэу, мэфищкӀэ зэтезыгъэуцожьыщтыр, 30 умыкӀодэу зыкъэгъэнэжьи, къащым къехыжь! 31 Ащ фэдэу дин пэщэшхохэмрэ Тэурат егъэджэкӀо пащэхэмрэ Исус кӀэнакӀэхэу зэраӀожьыгъ: НэмыкӀ цӀыфхэр мыкӀодэу къыгъэнэжьыгъэх, ау ежь зыкъигъэнэжьышъурэп. 32 Христосэу Израил ипачъыхьэ джы къащым къерэхыжь. Ар тлъэгъумэ, шӀошъхъуныгъэ тиӀэ хъущт. Исус игъусэхэу къащхэм атыраӀулӀагъэхэри ежь къехъоныщтыгъэх.
Исус зэрэлӀагъэр
33 Щэджагъом щегъэжьагъэу сыхьатыр щым нэс, а хэгъэгум тыдэкӀи шӀункӀ къыщыхъугъ. 34 Сыхьатыр щым дэжь Исус мэкъэшхокӀэ джагъэ: Элой, Элой! Лама савахфани? (Ащ къикӀырэр, «О Ситхь, о Ситхь! Сыд пае утыгум сизакъоу сыкъиунагъ?») 35 А чӀыпӀэм щытхэм ащыщхэм ар зызэхахым, аГуагъ: ШъукъэдаӀу, ар пегъымбар Иляс еджэ. 36 Зыгорэ Ӏулъади, кӀышъо зэраӀотырэм сэнэпс шӀоӀугъэр хиз ышӀи, бэщ горэм пилъхьи, Исус кӀигъэшъунэу фищэигъ. ЕтӀанэ ыӀуагъ: Зэ, пегъымбар Иляс къакӀоу къащым къыпихыжьмэ, тежъугъэплъ. 37 Ау Исус мэкъэшхокӀэ джи, ыпсэ ытыгъ. 38 Джащыгъум Тхьэм иунэшхо ипэӀухъо ыпшъэкӀэ къыщегъэжьагъэу ыхэ нэсыфэ тӀоу къызэготхъыгъ. 39 ДзэлӀхэм япащэу Исус къыфэзанкӀэу щытым Исус мырэущтэу лӀэу зелъэгъум, къыӀуагъ: Шъыпкъэ дэдэу мы лӀыр Тхьэм Ыкъоу щытыгъ. 40 ЧыжьэкӀэ къаплъэхэу бзылъфыгъэхэри ащ дэжьым щытыгъэх. Мыхэр ахэмэ ахэтыгъэх: Магдалэ къуаджэм щыщ Мерэми, Саломий, нэмыкӀ Мерэми. А Мерэм Якъубэ нахьыкӀэу зыфаӀорэмрэ ышы Иосыирэ янэу щытыгъ. 41 Исус Галилей хэкум зыщэӀэм, ахэр игъусэщтыгъэх ыкӀи ӀэпыӀэгъу фэхъущтыгъэх. Ахэмэ анэмыкӀхэуи бзылъфыгъэ Ӏаджи Исус игъусэхэу Ерусалим къэкӀуагъэхэу а чӀыпӀэм щытыгъэх.
Исус ихьадэ къэунэм зэрэчӀалъхьажьыгъэр
42 Бэрэскэшхо мэфагъ, шэмбэт мафэм ыпэрэ мафэр ары. Пчыхьэшъхьапэ хъугъэти, 43 Аримафей къуаджэм щыщ Юсыфыр къэкӀуагъ. А Юсыф Тхьэмэтэ Хэсэшхом щыщэу, лъытэныгъэ зифэшъошэ тхьаматэу щытыгъ. Тхьэм и Тетыгъошхо къэсыным паплъэу щытыгъ. Ащ зигъэгушхуи, Пилат ыдэжь кӀуи, Исус ихьадэ кӀэлъэӀугъ. 44 Исус зэрэлӀагъэр Пилат ыгъэшӀэгъуагъ. ДзэлӀхэм япащэ къаригъащи еупчӀыгъ: Исус бэшӀагъа зылӀагъэр? 45 Дзэ пащэм Исус зэрэлӀагъэр Пилат къызыреӀом, Юсыф Исус ихьадэ ыхьыжьынэу фит ышӀыгъ. 46 Юсыф чэфын къыщэфи, хьадэр къащым къыпихыжьи, чэфыныр рищэкӀи, Ӏошъхьэ цакӀэу акъутагъэм къыхашӀыкӀыгъэ къэунэм чӀилъхьажьыгъ. ЕтӀанэ къэунэ чӀэхьапӀэм зы мыжъошхо ӀуигъэукӀорэягъ. 47 Магдалэ къуаджэм щыщ Мерэмрэ Иосый янэ Мерэмрэ Юсыф хьадэр зычӀилъхьажьыгъэр алъэгъугъ.
Исус лӀагъэхэм къызэрахэтэджыкӀыжьыгъэр
1 Шэмбэтыр зыблэкӀым, Магдалэ къуаджэм щыщ Мерэми, Саломий, Якъубэ янэ Мерэми къэунэм кӀохэу, Исус ихьадэ дагъэ щафэным пае, мэ ӀэшӀу зыпихырэ щыфэн дагъэхэр ащэфыгъэх. 2 Тхьамафэм иапэрэ мафэм жьы дэдэу, тыгъэр къыкъокӀыгъэ къодыеу, къэунэм кӀонхэу гъогум техьагъэх. 3 Къэунэ чӀэхьапӀэм мыжъошхоу Ӏулъыр хэт тфыӀуигъэукӀорэикӀына? зэраӀожьыгъ ахэмэ. 4 Зэплъэхэм, мыжъошхор, ар мыжъошхо ин дэдагъ, ӀугъэукӀорэикӀыгъэу алъэгъугъ. 5 Къэунэм зычӀахьэхэм, щыгъын фыжьы кӀыхьэкӀэ фэпагъэу, зы кӀалэ горэ джабгъу лъэныкъомкӀэ щысэу алъэгъуи, агучӀэ изыгъ. 6 ШъумыгумэкӀ, къариӀуагъ ащ ахэмэ. Назарет щыщ Исусэу къащым раГулӀыгъэм шъузэрэлъыхъурэр сэшӀэ. Ар мыщ дэжьым щыӀэжьэп. Ар лӀагъэхэм къахэтэджыкӀыжьыгъ! Мары чӀыпӀэу зычӀалъхьажьыгъэр. 7 Ау шъо шъукӀуи, Петрэрэ адрэ лӀыхэу Исус игъогу рыкӀохэрэмрэ яшъуӀу: «Шъо шъуапэ рапшӀэу ар Галилей кӀощт. КъызэрэшъуиӀуагъэм тетэу ащ дэжьым щышъулъэгъужьыщт». 8 Джащыгъум агучӀэ изыгъэти, бзылъфыгъэхэр кӀэзэзхэу къэунэм къычӀэкӀыжьхи, хэхьажьыгъэх. Зыми зи раӀуагъэп, сыда пӀомэ джащ фэдизэу щынагъэхэти ары.
Исус Магдалэ къуаджэм щыщ Мерэм зыкъызэрэригъэлъэгъугъэр
9 Тхьамафэм иапэрэ мафэм жьэу Исус лӀагъэхэм къызахэтэджыкӀыжьым, ыпэ рапшӀэу Магдалэ къуаджэм щыщ Мерэм зыкъыригъэлъэгъугъ. А Мерэм ары Исус джынэпцӀибл зыхифыгъагъэр. 10 Мерэм цӀыфхэу Исус игъусэгъагъэхэу, джы шъыгъохэу гъыщтыгъэхэм адэжь кӀуи, хъугъэшӀагъэр ариӀуагъ. 11 Исус зэрэпсаурэри Мерэм ар зэрилъэгъугъэри зызэхахым, ашӀошъ хъугъэп.
Исус игъогу рыкӀохэрэм ащыщхэу нэбгыритӀу зыкъызэраригъэлъэгъугъэр
12 ЕтӀанэ игъогу рыкӀохэрэм ащыщхэу нэбгыритӀу губгъомкӀэ кӀохэзэ, нэмыкӀ теплъэ иӀэу, Исус зыкъаригъэлъэгъугъ. 13 Ахэми агъэзэжьи, адрэ цӀыфхэу Исус игъогу рыкӀохэрэм къэбарыр араӀотэжьыгъ, ау ахэмэ ашӀошъ хъугъэп.
Исус игъогу рыкӀохэрэм Ӏофэу ашӀэнэу апшъэ рилъхьагъэр
14 Ащ ыужым игъогу рыкӀорэ нэбгырэ пшӀыкӀузыр шхэхэзэ, Исус зыкъаригъэлъэгъугъ. Ахэмэ яшӀошъмыхъуныгъэмрэ ягуркъагъэрэ апаий, ежьыр лӀагъэхэм къахэтэджыкӀыжьыгъэу зылъэгъугъэхэм къаӀотагъэр ашӀошъ зэрэмыхъугъэм паий ягыигъ. 15 Дунаер зэкӀэ къэшъукӀухьи, ариӀуагъ Исус ахэмэ, цӀыф пстэуми къэбарышӀур яжъугъэӀу. 16 Хэти зышӀошъ хъоу, зыгорэм зезыгъэумэхъырэр мыкӀодэу Тхьэм къыгъэнэжььпцт, ау хэти зышӀошъ мыхъурэр Тхьэм ыгъэ мысэщт. 17 Мы нэшанэхэр шӀошъхъуныгъэ зиӀэ цӀыфхэм ягъусэщтых: Сэ сцӀэкӀэ цӀыфхэм джынапцӀэхэр ахафыщтых; амышӀэрэ бзэхэмкӀэ гущыӀэщтых; 18 аӀэхэмкӀи блэхэр къаштэщгых; лӀэныгъэ къызхэкӀын шъоным ешъохэми, зи къаришӀэщтэп; ахэмэ аӀэхэр зытыралъхьэрэ сымаджэхэр хъужьыщтых.
Исус уашъом зэрэдэкӀоежьыгъэр
19 Зиусхьан Исус игъогу рыкӀохэрэм къызадэгущыӀэм ыуж, Тхьэм ар уашъом дищэежьыгъ, Тхьэм иджабгъукӀи щысынэу готӀысхьагъ. 20 Исус игъогу рыкӀохэрэр ежьагъэхэу, Тхьэм игущыӀэхэр тыдэкӀи щагъэӀущтыгъэх. Зиусхьаныр адэлажьэу, нэшэнэ гъэшӀэгъонышхохэу ежь игущыӀэхэм гъусэу афишӀэу щытыгъэхэмкӀэ а гущыӀэхэр ыгъэшъыпкъэжьыщтыгъэх. Амин.
Мы тхылъыр зыкӀэстхыгъэр
1 ХъугъэшӀагъэхэу тапашъхьэ щыхъугъэхэм якъэбархэр цӀыфыбэмэ атхыжьынхэу пылъыгъэх. 2 Ахэмэ атхыгъэхэр цӀыфхэу а Ӏофхэр ублапӀэм щегъэжьагъэу нэкӀэ зылъэгъугъэхэрэмрэ Тхьэм игущыӀэхэм афэлажьэхэрэмрэ къызэрэтаӀотэжьыгъэхэм атетэу ары. 3 Арэущтэу сэри мы хъутъэшӀэгъэ Ӏоф пстэуми яублапӀэ щегъэжьагъэу сыфэсакъыпэу зысэгъэунэфы ужым, о, лъытэныгъэ зифэшъошэ Феофил, зэкӀэлъыкӀоу пфэстхынхэу тесыубытагъ, 4 о къыуагъэшӀэгъэ Ӏофхэм яшъыпкъагъэ пшӀэным пае.
МэлэӀич Гавриил умэхъэкӀо Иуан къызэрэхъущтыр къызэриӀуагъэр
5 Иудей хэкум ипачъыхьэ Ирод имафэхэм Зэкъарие зыцӀэу зы дин пащэ горэ щыӀагъ. Ар АвиекӀэ заджэхэрэ дин пэщэ купым хэтыгъ. Ишъхьэгъусэ Елизаветэ Хьарун къытехъукӀыгъэ цӀыфхэм ащыщыгъ. 6 ТӀуми Тхьэу ЗиусхьанымкӀэ шъыпкъагъэ яӀэу, иунашъохэмрэ ихабзэхэмрэ атетхэу, зэрагъэмысэн Ӏоф зи амышӀэу псэущтыгъэх. 7 Бын яӀагъэп, сыда пӀомэ Елизаветэ бын къыхэкӀэу щытыгъэп, тӀури ныбжькӀэ хэкӀотагъэхэу щытыгъэх. 8 Зэкъарие зыхэт дин пэщэ купыр Тхьэм иунэшхо щылэжьэнэу игъо къызынэсым, Зэкъарие дин пащэу Тхьэм ыпашъхьэ Ӏоф щишӀэщтыгъ. 9 Дин пащэхэм яхабзэ тетэу пхъэдз зашӀым, Зиусхьаным иунэшхо кӀоцӀ чӀэхьанышъ, мэ ӀэшӀу зыпихырэ уцыр Тхьэм пае ыгъэстынэу Зэкъарие къытефагъ. 10 Уцыр зыщагъэстын фэе сыхьатыр къызэсым, Зэкъарие уцыр ыгъэстыфэкӀэ, зэкӀэ цӀыфхэр Тхьэм иунэшхо щагу Тхьэм щелъэӀущтыгъэх. 11 Джащыгъум уц гъэстыпӀэм иджабгъукӀэ щытэу, Зиусхьаным имэлэӀич горэ Зэкъарие къыщыфэлъэгъуагъ. 12 Зэкъарие ар зелъэгъум, къащти щынэгъэшхохэфагъ. 13 Джащыгъум мэлэӀичыр къыдэгущыӀагъ: Укъэмыщт, Зэкъарие. УилъэӀу Тхьэм къызэхихыгъ. Уишъхьэгъусэ Елизаветэ къо къыфэхъущт, ащи Иуан цӀэу о фэуусыщт. 14 Ар гушӀогъошхорэ тхъэгъошхорэ къыпфэхъущт, ар къызэрэхъугъэм пае, цӀыфыбэхэри гушӀощтых. 15 ЗиусхьанымкӀэ лӀышхоу щытыщт, сэнэпсымрэ узыгъэутэшъон шъонымрэ яшъощтэп, янэ ышъо зыхидзагъэм щегъэжьагъэуи Тхьэм Ыпсэ ЛъапӀэ инэу ыгу илъыщт. 16 Израил цӀыфыбэхэри Зиусхьанэу я Тхьэ игъогу къытыригъэхьажьыщтых. 17 Тхьэм Ыпсэ ЛъапӀэ пегъэмбарэу Илясым ыгу зэрилъыгъэм фэдэу, ащ ыгу илъэу, Иляс кӀуачӀэ зэриӀагъэм фэдэуи кӀуачӀэ иӀэу, Зиусхьаныр къэкӀоным ыпэкӀэ, ар къэкӀощт. Тыхэмрэ къохэмрэ агухэр шӀу зэфишӀыжьыщтых, Тхьэм емыдэӀухэрэри шъыпкъагъэ зиӀэ цӀыфхэм ягъогу тыригъэхьащтых. Арэущтэу Зиусхьаным фэшъошэ лъэпкъ хъунэу ащ Израил лъэпкъыр ыгъэхьазырыщт. 18 Ар зэрэшъыпкъэр сыдэущтэу сшӀэщта? ыӀуи, Зэкъарие мэлэӀичым риӀуагъ. Сэ лӀыжъы сыхъугъ, сишъхьэгъуси ныбжькӀэ хэкӀотагъ. 19 Тхьэм ыпашъхьэ ит мэлэӀичэу Гавриил сэры,къыриӀожьыгъ мэлэӀичым. Мы къэбарышӀур осӀоным пае, сыкъыбдэгущыӀэнэу Тхьэм сыкъигъэкӀуагъ. 20 Джары, сэ къыосӀуагъэр пшӀошъ хъугъэпышъ, а зыфэсӀогъэ Ӏофхэр охъухэфэ, умыгущыӀэшъоу, бзакоу ущытыщт. Игъо къызысыкӀэ, ахэр къэхъунхэ фае. 21 Ащ нэсыфэ Зэкъарие Тхьэм иунэшхо къызэрэчӀэмыкӀыжьыгъэр цӀыфхэм агъэшӀагъоу ащ ежэщтыгъэх. 22 ЕтӀанэ Зэкъарие Тхьэм иунэшхо къызычӀэкӀыжьым, цӀыфхэм къадэгущыӀэн ылъэкӀыгъэп. Джащыгъум Тхьэм иунэшхо зыгорэ къызэрэщыфэлъэгъуагъэр зэхашӀыкӀыгъ. Зэкъарие зыфаер ыӀэхэмкӀэ къагуригъаӀоу, бзакоу къэнагъ. 23 Тхьэм иунэшхо Ӏофэу щишӀэщтыгъэхэм ямафэхэр зытекӀыхэм, Зэкъарие иунэ ыгъэзэжьыгъ. 24 Бащэ темышӀэу ишъхьэгъусэ Елизаветэ ышъо сабый хидзагъ, мэзитфыкӀи цӀыфмэ къахэхьагъэп. 25 «Зиусхьаным мыр сэ къысфишӀагъ», ыӀуагъ ащ. «Мы мафэхэм ынэшӀу къысщифэу, цӀыфхэмэ апашъхьэ симыгъуагъэ щыстырихыгъ».
МэлэӀичэу Гавриил Исус къызэрэхъущтыр Мерэм къызэрэриӀуагъэр
26 Елизаветэ мэзихкӀэ лъэрмыхьэу, Тхьэм имэлэӀич Гавриил Галилей хэкум щыщэу, Назарет зыцӀэ къалэ горэм къыгъэкӀуагъ. 27 Ар къызфигъэкӀуагъэр Мерэм зыцӀэ пшъашъэ горэ ары. Юсыф зыцӀэ лӀэу пачъыхьэ Даутэ къытехъукӀыгъэ цӀыфхэм ащыщым а Мерэм къыщэнэу ыгъэнэфагъэу щытыгъ. 28 Мерэм зыдэщыӀэм мэлэӀичыр къакӀуи къыӀуагъ: ГушӀо, о Тхьэм ынэшӀу зыщифагъэр, Зиусхьаныр уигъусэ! 29 МэлэӀичым къыӀуагъэм Мерэм лъэшэу къыгъэгузэжъуагъ, а шӀуфэс гущыӀэу къыриӀуагъэм къикӀырэми егупшысагъ. 30 Укъэмыщт, Мерэм, ыӀуи, мэлэӀичым ащ къыриӀуагъ, Тхьэм ынэшӀу къыпщифагъ. 31 O пшъо сабый хидзэнышъ, къо къыпфэхъущт. Ащ Исус цӀэу о фэуусышт. 32 Ар цӀыфышхоу хъущт, анахь Иным ЫкъокӀи еджэщтых. Ятэшхо пачъыхьэ Даутэ итӀысыпӀэ лъапӀэ Зиусхьанэу Тхьэм ащ къыритыщт, 33 мыкӀодыжьын тетыгъуи Якъубэ ылъэпкъ фыриӀэщт. Итетыгъошхуи егъэшӀэм кӀэух иӀэщтэп. 34 Ар сыдэуштэу хъуна? еупчӀыгъ Мерэм мэлэӀичым. Сэ пшъэшъэ дэмыкӀуагъэу сыщыт. 35 Тхьэм Ыпсэ ЛъапӀэ къыпфехыщт, анахь Иным ыкӀуачӀи уигъусэщт, къыриӀожьыгъ мэлэӀичым. Арышъ, кӀэлэ лъапӀэу къэхъущтым Тхьэм ЫкъокӀэ еджэщтых. 36 Мары, уиблагъэ Елизаветэу бын къызхэмыкӀынэу зыфаӀощтыгъэм ижъышъхьэм ышъо хидзагъэу, джы яхэнэрэ мазэм ит; 37 сыда пӀомэ Тхьэм ымылъэкӀын Ӏоф зи щыӀэп. 38 Мары, сэ Зиусхьаным сырипщылӀ, къыӀуагъ Мерэм. О зэрэпӀуагъэм тетэу къыздэрэхъу. ЕтӀанэ мэлэӀичым Мерэм къыгъани, ӀукӀыжьыгъ.
Мерэм Елизаветэ ыдэжь зэрэкӀуагъэр
39 А мафэхэм Мерэм зигъэхьазыри, Ӏошъхьэ хэкум щыщэу Иудэ зыцӀэ унэгъо лъэпкъыр зыдэс къуаджэ горэм псынкӀэу кӀуагъэ. 40 А къуаджэм зынэсым, Мерэм Зэкъарие иунэ ихьи, Елизаветэ шӀуфэс рихыгъ. 41 Елизаветэ Мерэм ишӀуфэс гущыӀэ зызэхехым, сабыеу ыныбэ илъым зыкъигъэхъыягъ. Джащыгъум Тхьэм Ыпсэ ЛъапӀэ Елизаветэ ыгу инэу илъ хъуи, 42 Елизаветэ мэкъэшхокӀэ къыӀуагъ: Бзылъфыгъэ пстэумэ анахьи Тхьэм ынэшӀу о нахь къыпщифагъ, о пкъы къыхэкӀыщт сабыими Тхьэм ынэшӀу къыщифагъ. 43 Сэ сыхэт, си Зиусхьан янэ садэжь къэкӀонэу? 44 О уишӀуфэс гущыӀэ сэ стхьакӀумэ зынэсым, сыныбэ илъ сабыим гушӀуагъокӀэ зыкъигъэхъыягъ. 45 Зиусхьаным къыриӀуагъэр къехъулӀэнкӀэ зышӀошъ хъугъэр сыхьатмафэ ежьагъ!
Мерэм Знусхьаным щытхъушхо зэрэфишӀыгъэр
46 ЕтӀанэ Мерэм къыӀуагъ: Сэ спсэкӀэ Зиусхьаным ииныгъэ щытхъушхор фэсэшӀы, 47 сымыкӀодэу сыкъэзыгъэнэжьырэ Тхьэм инэу сы щэгушӀукӀы, 48 сыда пӀомэ Зиусхьаныр ипщылӀ тхьамыкӀэ нэшӀукӀэ къеплъыгъ. Мары, джы щегъэжьагъэу лъэхъан пстэуми яцӀыфхэм сэ сыхьатмафэ сежьагъэу аӀощт, 49 сыда пӀомэ ЛъэкӀыныгъэшхо ЗиӀэм Ӏоф гъэшӀэгъонхэр къысфишӀагъэх. Ежьым ыцӀэр ары лъапӀэр. 50 Тхьэм ежь ищынагъо зыгу илъ цӀыфхэм гукӀэгъу афешӀы, ятэ щегъэжьагъэу ыкъо хиубытэу. 51 Ӏоф гъэшӀэгъонхэр ыӀэкӀэ ыгъэхъагъэх, пэгагъэ зыгу илъхэр зэбгырифыгъэх. 52 Тетыгъо зиехэм ятӀысыпӀэхэм къаридзыхыгъэх, пэгагъэ зыгу имылъхэр къыӀэтыгъэх. 53 ЩыкӀагъэ зиӀэхэм тынышӀухэр аритыгъэх, ау байхэр ӀэнэкӀэу къыгъэнагъэх. 54,55 ИпщылӀэу Израил лъэпкъым кӀэлъэплъэ. Тятэшхохэр къызэригъэгугъагъэхэм атетэу, Ибрахьимрэ ащ къытехъукӀыгъэ цӀыфхэмрэ гукӀэгъу афишӀынэу ыгу илъ зэпыт. 56 Елизаветэ дэжь Мерэм мэзищкӀэ щыӀагъ, етӀанэ ядэжь ыгъэзэжьыгъ.
УмэхъэкӀо Иуан къызэрэхъугъэр
57 Елизаветэ илъфэгъу мафэ къэси, къо къыфэхъугъ. 58 Елизаветэ игъунэгъухэмрэ иблагъэхэмрэ Зиусхьаным гукӀэгъушхо ащ къызэрэфишӀыгъэр зызэхахым, Елизаветэ фэгушӀуагъэх. 59 Яенэрэ мафэм сабыир сунэт ашӀынэу зэрэугъоихэ зэхъум, цӀэу ятэ Зэкъарие ыцӀэ фаусынэу аублагъ. 60 Ау сабыим янэ афидагъэп. Хьау, ащ Иуан ыцӀэщт, ыӀуагъ. 61 О уиблагъэхэм зи ахэтэп ащ фэдэ цӀэ зиӀэр,къыраӀожьыгъ ахэмэ. 62 Ащ нэуж сабыим ятэ ӀэкӀэ зэхырагъэшӀыкӀызэ, цӀэу фиусынэу зыфаемкӀэ еупчӀыгъэх. 63 Ащ пхъэмбгъу парчэ горэ къахьынэу агуригъэӀуагъ. Ар къызахьым, ащ тыритхагъ: Ащ ыцӀэщтыр Иуан. Ахэмэ зэкӀэми ар агъэшӀэгъуагъ. 64 Ардэдэм ыбзэрэыбзэгурэ къытӀупщыжьхи, Тхьэм щытхъу фишӀэу къэгущыӀэжьыгъ. 65 Гъунэгъухэу къегъэтӀысыкӀыгъэхэр зэкӀэ щынэгъошхом хэфагъэх, Иудей Ӏошъхьэ хэкум тыдэкӀи а Ӏофхэри зэкӀэ зэлъашӀэ хъугъэх. 66 А Ӏофхэр зэхэзыхыгъэ пстэуми ахэр агухэм ралъхьэхэу аӀощтыгъ: Мы сабыир сыд фэдэу хъущта? Сыда пӀомэ Зиусхьаным ынэшӀу ащ щифагъ.
Зэкъарие ыгу Тхьэм къырилъхьэгъэ гущыӀэхэр къызэриӀуагъэхэр
67 Тхьэм Ыпсэ ЛъапӀэ сабыим ятэу Зэкъарие ыгу инэу илъ хъуи, мы гущыӀэхэр къыригъэӀуагъэх: 68 Зиусхьанэу Израил и Тхьэ щытхъушхор ий, сыда пӀомэ ылъэпкъэу Израил нэшӀукӀэ къеплъи, шъхьафитныгъэ къыритыгъ. 69 Тхьэм ежьым фэлажьэрэ пачъыхьэ Даутэ къытехъукӀыгъэ цӀыфхэм ащыщэу лъэкӀыныгъэшхо зиӀэу, тымыкӀодэу тыкъэзыгъэнэжьыщтыр къытфигъэ кӀуагъ, 70 пасэм щегъэжьагъэу ипегъымбар лъапӀэхэм агухэм къарилъхьи, къызэраригъэӀуагъэм фэдэу. 71 Ащ типыйхэм тащиухъумэу, тымыкӀодэу тыкъигъэнэжьыщт, тызыуджэгъухэрэми тыкъаӀэкӀихыжьыщт. 72 Арэущтэу Тхьэм тятэжъышхохэм гукӀэгъушхо къафешӀы, зэзэгъыныгъэ лъапӀэу ежьымрэ тятэжъышхоу Ибрахьимэрэ азыфагу гущыӀэ пытэкӀэ дилъхьагъэри егъэцакӀэ. 73 А гущыӀэ пытэр мырыгъэ: 74 Тэ типыйхэм тыкъаӀэкӀихыжьыщт, щынагъуи тыгухэм арымылъэу, ежьым тыфэлэ жьэнэу тигъэлъэкӀыщт, 75 ежьым ыпашъхьэ тигъашӀэкӀэ гукъэбзагъэрэ шъыпкъагъэрэ тиӀэхэзэ. 76 ЕтӀанэ Зэкъарие къыпигъэхъожьыгъ: О сикӀал, анахь Иным урипегъымбарэу аӀощт, сыда пӀомэ Зиусхьаным игъогу бгъэпсынэу ежьым ыпэ укӀощт. 77 О Зиусхьаным ылъэпкъ ебгъэшӀэщт, япсэкӀодхэр зэрафигъэгъухэрэмкӀэ ахэр мыкӀодхэу, Тхьэм къызэригъэнэжьхэрэр. 78 Ти Тхьэ гукӀэгъуныгъэу иӀэр ины. Ежьыр къыкъокӀырэ тыгъэм фэдэу уашъом къикӀэу къытфэкӀощт, 79 лӀэныгъэм ищынагъо хэтхэмрэ шӀункӀыгъэм хэтхэмрэ атепсэным паий, мамырныгъэ гъогум тытыригъэхьаным паий. 80 Сабыим хахъуи, ыгуи ыпси хэхъуагъ. Израил цӀыфмэ апашъхьэ къызщихьащт мафэм нэс шъоф нэкӀым щыӀагъ.
Исус къызэрэхъугъэр
1 А мафэхэм Рим къэралыгъошхом зэкӀэ ис цӀыф пстэури алъытэнхэу ыкӀи ацӀэхэр атхынхэу Кайсар Аугуст зыцӀэм унашъо къыдигъэкӀыгъ. 2 Мыр апэ дэдэу цӀыфхэр зыщалъытагъэхэр ары. Ар къызыхъугъэр Сирие хэкум иӀэшъхьэтетэу Квириный зыцӀэм илъэхъан ары. 3 Арыти, хэтрэ цӀыфи ежь ыцӀэ аригъэтхыным пае, ятэянэхэр зыщыщ къалэм кӀуагъэ. 4 Арэущтэу Юсыф пачъыхьэ Даутэ къытехъукӀыгъэ цӀыфхэм зэращыщым пае, Галилей хэкум щыщэу Назарет зыцӀэ къалэм дэкӀи, Иудей хэкум щыщэу Даутэ икъалэу Вифлеем зыцӀэм дэкӀоягъ. 5 Юсыф Мерэмэу къыщэнэу ыгъэнэфагъэм игъусэу ежь ыцӀэ аригъэтхыным пае, Вифлеем дэкӀоягъ. Мерэм ышъо сабый хидзагъ, 6 ыкӀи ащ дэжьым щыӀэхэу, илъфэгъу мафэ къэсыгъ. 7 Джащыгъум Мерэм ыкъоу щыпэбыныр къыфэхъуи, хъэдэным кӀоцӀищыхьагъ. ХьакӀэщым ахэмэ апае чӀыпӀэ нэкӀ иӀэжьэпти, былымхэр зычӀэт цощым ит Ӏус шхынлъэ горэм дилъхьагъ.
МэлэӀичыр мэлэхъохэм къазэрэфэлъэгъуагъэр
8 А Ӏэгъоблагъом мэлэхъо заулэ ямэлхэм апэсхэу чэщым губгъом итыгъэх. 9 Тхьэм имэлэӀич горэ ахэмэ къафэлъэгъуагъ. Зиусхьаным инэфынэ гъэшӀэгъонышхо мэлахъохэр къызеуцухьэм, ахэр лъэшэу къэщтагъэх. 10 Ау мэлэӀичым къариӀуагъ: ПГъукъэмыщт, ау шъукъэдаӀу! ЗэкӀэ шъулъэпкъ пае къэбар гушӀогъошхо къышъосӀощт: 11 ШъумыкӀодэу Шъукъэзыгъэнэжьыщтыр Даутэ икъалэ непэ къыщыхъугъ, Зиусхьанэу Христос ары. 12 Мыр шъоркӀэ нэшанэ хъущт: Зы сабый горэ хъэдэным кӀоцӀыщыхьагъэу, Ӏус шхынлъэм дэлъэу къэжъугъотыщт. 13 ЕтӀанэ ошӀэдэмышӀэу мэлэӀичым ыдэжь уашъом щыщэу мэлэӀич купышхо къыщылъэгъуагъ. Тхьэм щытхъушхо фашӀэу мырэущтэу къаӀуагъ: 14 Щытхъушхор уашъомкӀэ Тхьэм ий, чӀылъэмкӀэ цӀыфхэу Тхьэр разэ зыфэхъухэрэм гупсэфыныгъэр яй! 15 МэлэӀичхэр ӀукӀыжьхи, уашъом зыдэкӀоежьхэм, мэлахъохэм зэраӀожьыгъ: Зиусхьаным зикъэбар къытфигъэӀугъэ хъугъэшӀагъэр тлъэгъунэу Вифлеем тыжъугъакӀу. 16 Арыти, Вифлеем псынкӀэу кӀохи, Мерэми Юсыфи Ӏус шхынлъэм дэлъ сабыйри къагъотыгъэх. 17 Ахэмэ ахэр залъэгъухэм, мэлэӀичым сабыим ехьылӀагъэу къариӀуагъэхэр аӀотэжьыгъэх. 18 Мэлахъохэм къаӀуагъэхэр зэхэзыхыгъэ цӀыф пстэуми агъэшӀэгъуагъэх. 19 Ау Мерэм мы Ӏофхэр зэкӀэ ыгу риубытэхи ягупшысагъ. 20 Мэлахъохэм зэхахыгъэ пстэумрэ алъэгъугъэ пстэумрэ апае Тхьэр агъэлъапӀэзэ, щытхъу фашӀызэ, агъэзэжьыгъ. А Ӏофхэр зэрэхъугъэхэр мэлэӀичым ахэмэ къызэрариӀуагъэм тетэу ары.
Юсыфрэ Мерэмрэ сабыеу Исус Зиусхьаным ыпашъхьэ зэрэрахьагъэр
21 Мэфий тешӀагъэу сабыир сунэт ашӀын фаеу зэхъум, Мерэм ышъо хидзэным ыпэкӀэ, мэлэӀичым ащ къызэрэриӀогъагъэм тетэу Исус фаусыгъ. 22 Пегъымбар Мусэ и Тэурат хабзэ иунашъо тетэу Юсыфрэ Мерэмрэ зызыщагъэкъэбзэжьын фэе мафэхэр зыблэкӀхэм, сабыир Зиусхьаным ыпашъхьэ рахьаным пае, Ерусалим зыдахьыгъ, 23 мы унашъоу Зиусхьаным ихабзэ итым тетэу: «Хэтрэ хъулъфыгъэ щыпэбыныр Зиусхьаным иеу щытын фае». 24 Ащ нэмыкӀэуи Ерусалим зыфэкӀуагъэхэр Зиусхьаным ихабзэ иунашъо тетэу, ежьхэр къабзэу хъунхэм пае, «губгъо тхьаркъо цӀыкӀуитӀу е тхьаркъо щыр цӀыкӀуитӀу» къурмэныпхъэу ахьыныр ары. 25 А мафэхэм Симеон зыцӀэу зы лӀы горэ Ерусалим дэсыгъ. Ар шъыпкъагъэ зиӀэу, Тхьэм ищынагъо зыгу илъ лӀэу щытыгъ. Израил игукъао Тхьэм тырихыжьыным ежэу щытыгъ. Тхьэм Ыпсэ ЛъапӀи ыгу илъыгъ. 26 Тхьэм Ыпсэ ЛъапӀэ Симеон зэхэригъэшӀыкӀыгъ, Зиусхьаным ыдэжь къикӀынэу щытыгъэ Христос ылъэгъуным ыпэкӀэ, лӀэныгъэр зэримылъэгъущтыр. 27 Арэущтэу зыхъукӀэ, Тхьэм Ыпсэ ЛъапӀэ Симеон Тхьэм иунэшхо чӀигъэхьагъ. Тэурат хабзэм иунашъо тетэу, сабыир Тхьэм ыпашъхьэ рахьаным пае янэрэ ятэрэ сабыеу Исус Тхьэм иунэшхо къызычӀахьэм, 28 Симеон сабыир ӀаплӀкӀэ къышти, мы гущыӀэхэр ыӀохэзэ, Тхьэм щытхъу фишӀыгъ: 29 Зиусхьан, сызэрэбгъэгугъагъэм тетэу, сэ о пфэлажьэрэр гупсэфыныгъэ сыгу илъэу джы дунаем серэхыжь; 30, 31 сыда пӀомэ цӀыф лъэпкъ пстэуми апашъхьэ о щыбгъэхьазырыгъэу, цӀыфхэр мыкӀодхэу къэзыгъэнэжьыщтыр сэ сынэхэмкӀэ слъэгъугъэ. 32 Ар нэфынэу хымэ лъэпкъхэм шъыпкъагъэр языгъэшӀэщтыр ары, о плъэпкъ Израил щытхъушхо иӀэ зыгъэхъущтри ары. 33 Юсыфрэ сабыим янэрэ Симеон сабыим ехьылӀагъэу къыӀогъэ гущыӀэхэр агъэшӀэгъуагъэх. 34 ЕтӀанэ ахэмэ ынэшӀу къащифэнэу Симеон Тхьэм афелъэӀуи, сабыим янэ Мерэм риӀуагъ: Израил щыщ цӀыфыбэхэр мы сабыим текӀодэнхэм паий, цӀыфыбэхэри мыкӀодхэу къыгъэнэжьынхэм паий, нэшанэу цӀыфхэр къызпэуцущтыр хъуным паий, Тхьэм ар къыгъэкӀуагъ. 35 Арэущтэу цӀыфыбэмэ агухэм арылъхэр нафэ къэхъущтых. Сэшхом фэдэу гукъэошхом о угуи къыуӀэщт. 36 Асир зыцӀэ унагъом щыщэу, Фануил ыпхъоу Аннэ ыцӀэу зы пегъымбар бзылъфыгъэ горэ щыӀагъ. ЫныбжькӀэ лъэшэу хэкӀотагъэу щытыгъ. ЗыдэкӀо ужым илъэсиблэ илӀ игъусагъ. 37 ЕтӀанэ лӀыр лӀи, бзылъфыгъэр ыныбжь тӀокӀиплӀырэ плӀырэ охъуфэ шъузабэу щытыгъ. Чэщи мафи Тхьэм иунэшхо къычӀэмыкӀэу, нэкӀэу, Тхьэм елъэӀоу, чэщи мафи Тхьэм фэлажьэу щытыгъ. 38 А ныор а сыхьат дэдэм Мерэмрэ Юсыфрэ абгъодахьи, Тхьэм щытхъу фишӀи, Тхьэм Ерусалим шъхьафитныгъэ къызэрэритыщтым паплъэхэу щытыгъэ цӀыфхэм сабыим игугъу къафишӀы зэпытыщтыгъ. 39 Мерэмрэ Юсыфрэ Зиусхьаным ихабзэ иунашъо тетэу, зэкӀэри загъэцакӀэ ужым, Галилей хэкум щыщ якъалэу Назарет агъэзэжьыгъ. 40 Сабыим хахъуи, ыгуи ыпсэми ахэхъуагъ, зэхэшӀыкӀыныгъэ иӀэ хъугъэ, Тхьэм ынэшӀуи ащ къыщифэу щытыгъ.
КӀалэу Исус Тхьэм иунэшхо зэрэкӀуагъэр
41 Илъэс къэс Исус янэятэхэр Пасхъэ зыцӀэ мэфэкӀ мэфэшхом дэжь Ерусалим кӀощтыгъэх. 42 КӀалэр илъэс пшӀыкӀутӀу зэхъум, хабзэм тетэу мэфэкӀ мэфэшхом пае Ерусалим кӀуагъэх. 43 МэфэкӀ мэфэшхо мафэхэр зыблэкӀхэм, янэятэхэм якъалэ къагъэзэжьы зэхъум, ахэмэ амышӀэу кӀалэу Исус Ерусалим къыдэнагъ. 44 Адрэ ягъусэхэм ахэтэу гугъэхэу, янэятэхэр зы мафэ гъогум тетыгъэх. ЕтӀанэ яблагъэхэмрэ яныбджэгъухэмрэ адэжь кӀалэм щылъыхъухэу аублагъ. 45 Къызамыгъотыжьым, лъыхъухэзэ, Ерусалим къагъэзэжьыгъ. 46 Мэфищ ужым Тхьэм иунэшхо чӀэсэу, дин гъэсакӀохэмэ ахэсэу, ахэмэ къаӀорэм едэӀоу ыкӀи яупчӀэу къагъотыжьыгъ. 47 КӀалэм ыӀорэм къедэӀущтыгъэ пстэуми игубзыгъагъэрэ ипэгъокӀхэмрэ агъэшӀагъощтыгъэх. 48 Янэятэхэм кӀалэр залъэгъум, агъэшӀэгъуагъ. А кӀал, сыда къытэпшӀагъэр? къыриӀуагъ янэ. Уяти сэри гумэкӀыгъом тыхэтэу тыкъыплъэхъу. 49 Сыд пае шъукъыслъыхъура? ариӀожьыгъ ежьым. Сэ Сятэ иунэшхо сычӀэсын зэрэфаер шъушӀэрэба? 50 Ау кӀалэм гущыӀэхэу къариӀуагъэхэр къагурыӀуагъэхэп. 51 ЕтӀанэ янэятэхэм ягъусэу Исус Назарет ехыжьыгъ, афэӀорышӀэуи щытыгъ. Янэ мы Ӏофхэр зэкӀэ ыгу риубытагъэх. 52 Исус хахъозэ, изэхэшӀыкӀыныгъи хахъозэ, Тхьэми цӀыфхэми агу къеӀугъ.
УмэхъэкӀо Иуан Тхьэм игущыӀэхэр зэригъэӀущтыгъэхэр
1 Кайсар Тиверый итетыгъо ипшӀыкӀутфэнэрэ илъэсыр арыгъэ; Понтый Пилат зыцӀэр Иудей хэкум иӀэшъхьэтетэу щытыгъ; Ироди Галилей хэкум ипщэу щытыгъ; ышы Филипп Итурей хэкумрэ Трахонит хэкумрэ япщэу щытыгъ. Лисание зыцӀэр Авилиней хэкум ипщэу щытыгъ. 2 Аннэрэ Кайафэрэ дин пэщэшхохэу щытыгъэх. А мафэхэр ары Зэкъарие ыкъо Иуанэу шъоф нэкӀым щыпсэущтыгъэм Тхьэм игущыӀэхэр къызыфехыгъэхэр. 3 Иуан Иордан псыхъом иӀэгъоблагъо зэкӀэ къыкӀухьэу, цӀыфхэм Тхьэм игущыӀэхэр аригъэӀухэзэ, мырэущтэу къыӀощтыгъ: ШъуипсэкӀодхэм шъуафыкӀэгъожьи, зысэжъугъэумэхъ, Тхьэм ахэр къышъуфигъэгъунхэм пае. 4 Мы Ӏофхэр зэкӀэ хъугъэх, пегъымбар Исайас игущыӀэхэр зэрыт тхылъым зэритым фэдэу, «Шъоф нэкӀым зы джэ макъэ горэ къыщэӀу: Зиусхьаным игъогу фэжъугъэпси, игъогу лъагъохэр зэшъхьэзэшъоу фэшъушӀых. 5 Сыдрэ къуладжи сэищт, сыдрэ Ӏуашъхьи бги къефэхыщт. Гъогу ӀонтӀагъэхэр занкӀэу хъущтых. Зэшъхьэзашъоу щымыт гъогухэр зэшъхьэзашъоу хъущтых. 6 ЦӀыфхэр мыкӀодхэу Тхьэм къызэригъэнэжьхэрэр цӀыф пстэуми алъэгъущт». 7 ЦӀыф купышхохэм зырагъэумэхъынэу Иуан ыдэжь къыдэкӀыгъэх. Ежьым ахэмэ ариӀуагъ: Шъо блэщылъфхэр! Тхьэм игубжэу къэкӀощтым шъуӀэкӀэкӀынэу хэта шъушъхьэ къизылъхьагъэр? 8 ШъуипсэкӀодхэм шъуафыкӀэгъожьыным фэшъошэ ӀофышӀухэр жъугъэцакӀэх. «Ибрахьим тэ тят ары», шъугукӀэ шъуӀон шъуфитэу шъумыгугъ, сыда пӀомэ сэ шъосэӀо, Тхьэм мы мыжъохэм Ибрахьимэ пае бынхэр къахигъэхъукӀынхэ ылъэкӀыщт. 9 Ощыр чъыг лъапсэхэм атыраубытэгъах. Арэущтэу сыдрэ чъыгэу шӀугъэ къызпымыкӀэрэр раупкӀынышъ, машӀом падзэщт. 10 ЦӀыф купышхохэр Иуан къеупчӀыгъэх: Сыда адэ тэ тшӀэщтыр? 11 Хэти джэнитӀу зиӀэм джанэ зимыӀэм зыр рерэт, ариӀожьыгъ ахэмэ. Шхын зиӀэми шхын зимыӀэм рерэт. 12 Хьакъулахь ахъщэр хэзыххэрэми зырагъэумэхъыным пае, Иуан ыдэжь къакӀохи къеупчӀыгъэх: Дин гъэсакӀу, тэ сыда тшӀэщтыр? 13 ЦӀыфхэм къаӀышъухын фаем нахьыбэ къаӀышъумых, ариӀожьыгъ ахэмэ. 14 Адэ, тэ сыда тшӀэщтыр? аӀуи, дзэлӀхэри Иуан къеупчӀыгъэх. Зыми егъэзыныгъэкӀэ иахъщэ къытешъумых, зыми пцӀыкӀэ шъуемыдау. Ахъщэ лэжьапкӀэу къышъуатырэм шъуезэгъ, ариӀожьыгъ ахэмэ. 15 Мы Иуан Христосэу зыфаӀорэр ары шъуӀуа?аӀоу, гугъапӀэ яӀэу цӀыфхэр зэкӀэ агухэмкӀэ зэупчӀыжьыщтыгъэх. 16 Сэ псымкӀэ шъусэумэхъы, ау сэщ нахьи нахь лъэкӀыныгъэшхо иӀэу зыгорэ къэкӀощт, ариӀуагъ Иуан ахэмэ зэкӀэ. Ащ ицокъэлъэпсхэр фэстӀэтэнхэуи сифэшъуашэп. Ащ Тхьэм Ыпсэ ЛъапӀэрэ машӀомрэкӀэ шъо шъуиумэхъыщт. 17 Ащ ихьанцэ ыӀэ кӀэлъ, ихьамэщи ыукъэбзыжьынышъ, икоци иконхэм аритэкъожьыщт, ау уарзэр мыкӀосэжьын машӀомкӀэ ыгъэстыщт. 18 Арэущтэу Иуан цӀыфмэ нэмыкӀ Ӏофыбэхэр аригъашӀэхэзэ, къэбарышӀур аригъэӀущтыгъ. 19 Пщы Ирод, ежь ышы псаоу пэтми, а шым ишъузэу Иродиадэ зыцӀэр къызэрищэжьыгъэм паий, ащ нэмыкӀ бзэджагъэу ышӀэгъэ пстэуми апаий, Иуан пщы Ирод егыигъ. 20 Джащыгъум Ирод бзэджагъэу ышӀэгъэ пстэуми ахигъахъуи, идзэлӀхэм Иуан хьапсым чӀаригъэдзагъ.
Иуан Исус зэриумэхъыгъэр
Иуан цӀыф пстэури ыумэхъыхэ зэхъум, Исуси ыумэхъыгъ. Исус Тхьэм зелъэӀум, уашъор зэӀукӀи, 22 тхьаркъом ыпкъ фэдэу пкъы иӀэу, Тхьэм Ыпсэ ЛъапӀэ Исус къыфехыгъ. Уашъом зы макъэ горэ къиӀукӀыгъ: Оры сэ шӀу слъэгъурэ Скъо кӀасэр. Сэ сыгу о къыоӀугъ.
Исус лъэпкъэу къызхэкӀыгъэр
23 Исус иӀоф зеублэм, илъэс щэкӀ ыныбжьыгъ. ЦӀыфмэ къызэрашӀошӀыгъэм фэдэу, ар Юсыф ыкъуагъ. Ар Илый ыкъуагъ. 24 Ар Матфат ыкъуагъ. Ар Левый ыкъуагъ. Ар Мелхый ыкъуагъ. Ар Ианнай ыкъуагъ. Ар Юсыф ыкъуагъ. 25 Ар Маттафый ыкъуагъ. Ар Амос ыкъуагъ. Ар Наум ыкъуагъ. Ар Еслим ыкъуагъ. Ар Наггей ыкъуагъ. 26 Ар Мааф ыкъуагъ. Ар Маттафый ыкъуагъ. Ар Семей ыкъуагъ. Ар Юсыф ыкъуагъ. Ар Иудэ ыкъуагъ. 27 Ар Иоаннан ыкъуагъ. Ар Рисай ыкъуагъ. Ар Зоровавел ыкъуагъ. Ар Салафиил ыкъуагъ. Ар Нирый ыкъуагъ. 28 Ар Мелхый ыкъуагъ. Ар Аддый ыкъуагъ. Ар Косам ыкъуагъ. Ар Елмодам ыкъуагъ. Ар Ир ыкъуагъ. 29 Ар Иосие ыкъуагъ. Ар Елиезер ыкъуагъ. Ар Иорим ыкъуагъ. Ар Матфат ыкъуагъ. Ар Левый ыкъуагъ. 30 Ар Симеон ыкъуагъ. Ар Иудэ ыкъуагъ. Ар Юсыф ыкъуагъ. Ар Ионан ыкъуагъ. Ар Елиаким ыкъуагъ. 31 Ар Мелеай ыкъуагъ. Ар Майнан ыкъуагъ. Ар Маттафай ыкъуагъ. Ар Нафан ыкъуагъ. Ар Даутэ ыкъуагъ. 32 Ар Иессе ыкъуагъ. Ар Овид ыкъуагъ. Ар Вооз ыкъуагъ. Ар Сэлмон ыкъуагъ. Ар Наасон ыкъуагъ. 33 Ар Аминадав ыкъуагъ. Ар Арам ыкъуагъ. Ар Есром ыкъуагъ. Ар Фарес ыкъуагъ. Ар Иудэ ыкъуагъ. 34 Ар Якъубэ ыкъуагъ. Ар Исхьакъ ыкъуагъ. Ар Ибрахьимэ ыкъуагъ. Ар Фаррэ ыкъуагъ. Ар Нахор ыкъуагъ. 35 Ар Серух ыкъуагъ. Ар Рагав ыкъуагъ. Ар Фалек ыкъуагъ. Ар Евер ыкъуагъ. Ар Салэ ыкъуагъ. 36 Ар Кайнан ыкъуагъ. Ар Арфаксад ыкъуагъ. Ар Сим ыкъуагъ. Ар Нухьэ ыкъуагъ. Ар Ламех ыкъуагъ. 37 Ар Мафусал ыкъуагъ. Ар Енох ыкъуагъ. Ар Иаред ыкъуагъ. Ар Малелеил ыкъуагъ. Ар Кайнан ыкъуагъ. 38 Ар Енос ыкъуагъ. Ар Сиф ыкъуагъ. Ар Адэм ыкъуагъ. Ар Тхьэм ий.
Шэйтаныр Исус псэкӀод ригъэшӀэнэу ыуж зэритыгъэр
1 Тхьэм Ыпсэ ЛъапӀэ инэу ыгу илъэу, Исус Иордан псыхъом къыӀукӀыжьыгъ. 2 Тхьэм Ыпсэ ЛъапӀэ ежьыр шъоф нэкӀым ыщагъ. А чӀыпӀэм шэйтаныр ежьым псэкӀод ригъэшӀэнэу мэфэ тӀокӀитӀурэ ыуж итыгъ. А мафэхэм Исус зи ышхыгъэп, ахэри зытешӀэхэ ужым къэмэлэкӀагъ. 3 Джащыгъум шэйтаным Исус къыриӀуагъ: О Тхьэм ури Къомэ, мы мыжъор хьалыгъу хъунэу унашъо фэшӀ. 4 Тхьэм игущыӀэ тхыгъэхэм арыт, риӀожьыгъ Исус, «Хьалыгъу закъор арэп цӀыфыр зэрэпсэущтыр, сыдрэ гущыӀэу Тхьэм ыдэжь къикӀырэр ары нахь». 5 ЕтӀанэ шэйтаным Исус чӀыпӀэ лъагэ горэм дищаий, зы нэплъэгъукӀэ дунаим тет пачъыхьагъо пстэури къыригъэлъэгъугъэх. 6 Ащ Исус къыриӀуагъ: Мы пачъыхьагъохэм ятетыгъо пстэумрэ щытхъушхоу яӀэмрэ о остыщтых, сыда пӀомэ сӀэ илъых ыкӀи сэ сызфаем естынэу сыфит. 7 Лъэгонджэмышъхьэу укъэтӀысэу, сэ сыбгъэлъапӀэмэ, ахэр зэкӀэри оуие хъущтых. 8 Тхьэм игущыӀэ тхыгъэхэм арыт, риӀожьыгъ Исус, «Зиусхьанэу уи Тхьэ бгъэлъапӀэзэ, ежьым изакъоу уфэлэжьэн фае». 9 Ащ ыужым шэйтаным Исус Ерусалим ыщи, Тхьэм иунэшхо нахь лъэгапӀэу иӀэм тыригъэуцуи къыриӀуагъ: О Тхьэм ури Къомэ, мыщ дэжьым зыщедзых; 10,11 сыда пӀомэ Тхьэм игущыӀэ тхыгъэхэм арыт: «Тхьэм имэлэӀичхэм укъаухъумэнэу унашъо къафишӀыщт, о плъакъокӀи мыжъом уемыутэкӀыным пае, аӀэхэмкӀэ уаӀэтыщт». 12 Тхьэм игущыӀэ тхыгъэхэм арыт, риӀожьыгъ Исус, «Зиусхьанэу уи Тхьэ умыушэты». 13 ЕтӀанэ шэйтаным Исус псэкӀод зэригъэшӀэн Ӏэмал пстэури зеухым, игъо къыфифэмэ къыгъэзэжьынэу ӀукӀыжьыгъ.
Исус иӀоф Галилей хэкум зэрэщиублагъэр
14 ЕтӀанэ Тхьэм Ыпсэ ЛъапӀэ илъэкӀыныгъэкӀэ Исус Галилей хэкум ыгъэзэжьыгъ. Исус икъэбар а хэкум зэкӀэ щыӀугъ. 15 ЦӀыф пстэуми щытхъу къыфашӀэу, Исус ахэмэ ясинэгогухэм Тхьэм игущыӀэхэр щаригъашӀэщтыгъэх.
Назарет дэс цӀыфхэм Исус зэрамыштагъэр
16 Исус зыщапӀугъэ Назарет къалэм къэкӀуагъ. Зэрихабзэу шэмбэт мафэм синэгогум чӀэхьагъ. ЗычӀахьэм, Тхьэм игущыӀэ тхыгъэхэм ащыщхэм афяджэнэу апашъхьэ къиуцуагъ. 17 Пегъымбар Исайас итхылъ къыратыгъ. Тхылъыр къызэӀуихи, мырэущтэу зэрытхэгъэ чӀыпӀэр къыгъотыгъ: 18 «Зиусхьаным Ыпсэ ЛъапӀэ сыгу илъ хъугъэ; сыда пӀомэ Тхьэм дэгъэ лъапӀэр къысщифагъ. КъызкӀысщифагъэр тхьамыкӀэхэм къэбарышӀур язгъэӀуныр ары. Зыгу кӀодыгъэхэр згъэхъужьынхэуи, хьапсчӀэсхэр шъхьафит зэрэхъужьыщтхэр язгъэӀунэуи, нэшъухэр къэзгъэплъэжьынхэуи, къин зыщэчыхэрэр шъхьафит сшӀыжьынхэуи Тхьэм сыкъигъэкӀуагъ. 19 Зиусхьаным ынэшӀу цӀыфхэм къазыщифэщт илъэсыр къызэрэсыгъэм икъэбар язгъэӀунэуи сыкъигъэкӀу агъ». 20 Исус етӀанэ тхылъыр зэгуилъхьэжьи, синэгогу ӀофышӀэм ритыжьи тӀысыгъэ. Синэгогум чӀэс цӀыф пстэуми анэхэр тырагъэкъагъэхэу ежьым еплъыщтыгъэх. 21 Исус ахэмэ ариӀоу ыублагъ: Зэхэшъухы пэтзэ, мы гущыӀэхэу Тхьэм игущыӀэ тхыгъэхэм арытхэр непэ къэшъыпкъэжьыгъэх. 22 ЦӀыфхэм агу инэу Исус еӀугъ, игущыӀэ дахэхэри агъэшӀэгъуагъэх. Ахэмэ къаГуагъ: Юсыф ыкъу арыба мыр? 23 Щэч хэмылъэу, мы гущыӀэжъыр къысэшъуӀощт: «Ӏазэ, зыгъэхъужь!» ариӀуагъ Исус. Капернаум къалэм Ӏофэу щыпшӀагъэхэу зэхэтхыгъэхэр мы къалэу уянэ икъалэ щышӀэх. 24 Исус етӀани къыпигъэхъожьыгъ: Шъыпкъэр шъосэӀо, хэтрэ пегъымбар янэ икъалэ щадэрэп. 25 Ау шъыпкъэр шъосэӀо, пегъымбар Иляс имафэхэм илъэсищырэ мэзихырэ уашъом щыӀэ Тхьэм ощхыр къемыщхэу зыпеупкӀым, хэкум тыдэкӀи гъэблэшхуи зыщэхъум, Израил хэгъэгум шъузэбэ Ӏаджи исыгъэх. 26 Ау щытми, ахэмэ ащыщ горэм ыдэжь Тхьэм Иляс ыгъэкӀуагъэп, Сидон къалэм иӀэгъоблагъо щыщ Сарептэ къуаджэм дэс шъузабэ горэм ыдэжь ыгъэкӀуагъэ нахь. 27 Ащ фэдэуи, пегъымбар Елисей имафэхэм шъоджэ уз Ӏаер зиӀэ цӀыфыбэхэр Израил исыгъэх, ау Елисей ахэмэ ащыщэу зи ыгъэхъужьыгъэп. Сирие хэкум щыщэу Неман зыцӀэр ыгъэхъужьыгъэ нахь. 28 Ар зызэхахым, синэгогум чӀэс цӀыф пстэури лъэшэу къэгубжыгъэх. 29 Къызщылъэтхи, Исус къалэм дафи, къалэр зытет бгышъхьэм радзыхынэу ащагъ. 30 Ау Исус ахэмэ азыфагу дэдэм кӀоцӀырыкӀи ӀукӀыжьыгъ.
Исус лӀы горэм джынэпцӀэ Ӏае зэрэхифыгъэр
31 ЕтӀанэ Исус Галилей хэкум щыщ Капернаум къалэм къехи, шэмбэт мафэм цӀыфхэм Тхьэм игущыГэхэр ари гъашӀэхэу ыублагъ. 32 ЦӀыфхэм Исус Ӏофхэр зэраригъашӀэщтыгъэ шӀыкӀэр лъэшэу агъэшӀэгъуагъ, сыда пӀомэ тетыгъошхо иӀэу, ахэмэ адэгущыӀэщтыгъэти ары. 33 Синэгогум джынэпцӀэ Ӏае зыхэс лӀы горэ щыӀагъ. Ар мэкъэшхокӀэ къахэкууагъ: 34 Еоой! Сыд уиӀофэу къытхэлъыр, Назарет щыщ Исус? ТыбгъэкӀодынэу укъэкӀуагъа? О хэтми узщыщыр сэшӀэ: Тхьэм ыдэжь къикӀыгъэ ЛъапӀэр оры! 35 Щыгъэт, мы лӀым хэкӀыжь! къыӀуагъ Исус джынапцӀэм егыеу. ДжынапцӀэм зэкӀэмэ апашъхьэ лӀыр къыриути, зи римышӀэу хэкӀыжьыгъ. 36 ЗэкӀэми лъэшэу агъэшӀагъоу зэраӀожьыщтыгъ: Мыр сыда? Тетыгъошхорэ лъэкӀыныгъэшхорэ иӀэу, джынэпцӀэ Ӏаехэм унашъо афишӀызэ, цӀыфхэм ахефых. 37 Джаущтэу Исус икъэбар Ӏэгъоблэгъо хэкум тыдэкӀи щыӀугъ.
Исус цӀыфыбэхэр зэригъэхъужьыгъэхэр
38 Исус синэгогум къычӀэкӀыжьи, Симон иунэ ихьагъ. Симон ишӀугуащэ плъырстырым инэу ригъэзыгъэу пӀэм хэлъыгъ. Исус ар ыгъэхъужьынэу елъэӀугъэх. 39 Исус сымаджэм шъхьэщыуцуи, плъырстырым егыий, хигъэкӀыжьыгъ. Бзылъфыгъэр занкӀэу къэтэджыжьи, ахэр къыхьакӀэхэу ыублагъ. 40 Тыгъэр къохьажьы зэхъум, уз зэфэшъхьаф зиӀэ сымаджэхэр зэкӀэри Исус къыфащэхэу цӀыф пстэуми аублагъ. Ахэмэ ащыщ пэпчъ ыӀэ тырилъхьазэ, ыгъэхъужьыщтыгъэх. 41 ДжынапцӀэхэр цӀыфыбэхэм къахэкӀыжьыщтыгъэх ыкӀи къэкуощтыгъэх: Оры Христосэу Тхьэм Ыкъо! Ар зэрэХристосыр ахэмэ ашӀэщтыгъэти, Исус ягыйти, къэгущыӀэнхэу фит ышӀыщтыгъэхэп.
Исус Галилей хэкур къыкӀухьэзэ, Тхьэм игущыӀэхэр цӀыфхэм зэраригъэӀущтыгъэхэр
42 Нэф къызэшъым, Исус къалэм дэкӀи, чӀыпӀэ Ӏудзыгъэ горэм кӀуагъэ. Ау цӀыф купышхохэр ежьым лъыхъухи къызагъотыжьым, адэжь къагъэнэнэу пылъыгъэх. 43 НэмыкӀ къалэхэми Тхьэм и Тетыгъошхо ехьылӀэгъэ къэбарышӀур цӀыфмэ щязгъэӀун фае. Джары Тхьэм сыкъызфигъэкӀуагъэр, ариӀуагъ Исус. 44 Арэущтэу Галилей хэкум ит синэгогухэм Тхьэм игущыӀэхэр цӀыфмэ щаригъэӀущтыгъэх.
Исус апэрэ нэбгырищыр игъогу рыкӀонхэу къызэряджагъэр
1 Мафэ горэм Исус Геннисарет зыцӀэ псыхъураем Ӏутэу, Тхьэм игущыӀэхэм ядэӀунхэм пае, цӀыф купышхохэр къэзэрэугъоихи тезэрэгъэбэнагъэх. 2 А чӀыпӀэм псы Ӏушъом къошъуитӀу Ӏутэу Исус ылъэгъугъ. Пцэжъыяшэхэр ахэмэ къарыкӀыгъэхэу, яхъытыухэр агъэкъэбзэщтыгъэх. 3 А къуашъохэм язэу Симон ием Исус ихьи, тӀэкӀу ӀукӀотынэу Симон риӀуи тӀысыгъэ. ЕтӀанэ къуашъом исэу, цӀыф купышхохэм Тхьэм игущыӀэхэр аригъашӀэхэу ыублагъ. 4 ЦӀыфхэм зарегъашӀэхэ ужым, Исус Симон риӀуагъ: КуупӀэм хахьи, пцэжъые къэшъуубытыным пае, шъуихъытыухэр хажъудзэх. 5 Тхьаматэ, чэщы реным бэрэ тыулэугъ, ау зи къэтыубытыгъэп, къыӀожьыгъ Симон. Ау о зэрэпӀорэм тетэу, джыри зэ хъытыухэр сэ хэздзэжьыщтых. 6 Хъытыухэр зыхадзэхэм, пцэжъыябэхэр къаубытыгъэти, яхъытыухэр зэготхъыхэу аублагъ. 7 Ягъусэхэу адрэ къуашъом исхэр къэкӀонхэшъ, къадэӀэпыӀэнхэу Ӏэ афашӀыгъ. Ахэр къакӀохи, чӀэбынкӀэ щынагъоу къошъуитӀумэ пцэжъые арызэу ашӀыгъ. 8 Симон Петрэ ар зелъэгъум, Исус ылъакъохэм адэжь зыщыридзыхи ыӀуагъ: Сэ збгъодэкӀ, Зиусхьан! Сэ сыпсэкӀодышӀэ цӀыф. 9 Ар зыкӀиӀуагъэр пцэжъыехэу къаубытыгъэхэр зэрэбагъэм пае, ежьыми адрэ игъусэхэми агучӀэ изыгъагъэти ары. 10 Ащ фэдэу Зеведей ыкъуитӀоу Якъуби Иуани Симон дэлажьэщтыгъэхэми агучӀэ изыгъагъ. Умыщын, риӀуагъ Исус Симон. Пцэжъые къэуубытыным пае, ыуж узэритыгъэм фэдэу, джы къыщегъэжьагъэу цӀыфхэр сэ сигъогу къытебгъэхьащтых. 11 ЕтӀанэ ахэмэ якъуашъохэр псым къыхалъэшъужьхи, зэпстэури къагъани, Исус ыуж ихьагъэх.
Исус шъоджэ уз Ӏае зиӀэ лӀы горэ зэригъэхъужьыгъэр
12 Исус къалэ горэм щыӀэу, лӀы горэ шъоджэ уз Ӏаер ыпкъ хизэу къэкӀуагъ. Ащ Исус зэрилъэгъугъэм тетэу, чӀыгум бгъэгукӀэ зыщыридзыхи елъэӀугъ: Тхьаматэ, уфаемэ сыбгъэхъужьын плъэкӀыщт. 13 Исус ыӀэ ыщэий, теӀаби къыӀуагъ: Сыфай, псаоу хъужь! Ардэдэм шъоджэ узыр а лӀым хэкӀыжьыгъ. 14 Исус ащ фигъэпытэу риӀуагъ: Мыр зыми емыӀотэжь, ау дин пащэм ыдэжь кӀуи, зегъэлъэгъу. Узэрэхъужьыгъэм пае, пегъымбар Мусэ иунашъо тетэу къурмэн шӀы. Ар узэрэхъужьыгъэмкӀэ цӀыфхэм апашъхьэ шыхьат щыхъущт. 15 Ау Исус икъэбар ыпэм нахьи нахьыбэу цӀыфмэ ахэхьагъэу хъугъэ. Арэущтэу цӀыф купышхохэр Исус къыӀохэрэм къядэӀунхэу, яузхэри рагъэгъэхъужьынхэу ыдэжь къакӀохэу хъугъэ. 16 Ау Исус цӀыфмэ ахэкӀызэ, Ӏудзыгъэ чӀыпӀэхэм Тхьэм щелъэӀуным пае, кӀонэу ихабзэу щытыгъ.
Исус лӀы горэу зыӀэпкълъэпкъ узым зэкӀиубытагъэр зэригъэхъужьыгъэр
17 Зы мафэ горэм Исус цӀыфхэм Тхьэм игущыӀэхэр аригъашӀэщтыгъэх. Галилей хэкум щыщ къоджэ пстэуми, Иудей хэкум щыщ къоджэ пстэуми, Ерусалими къарыкӀыгъэхэу, фарисейхэри Тэурат егъэджэкӀо пащэхэри Исус къедэӀущтыгъэ цӀыфхэм ахэсыгъэх. Сымаджэхэр ыгъэхъужьынхэу Зиусхьаным ыкӀуачӀэ Исус хэлъыгъ. 18 Джащыгъум лӀы горэу зыӀэпкълъэпкъ узым зэкӀиубытагъэр пӀуаблэм телъэу нэбгырэ заулэмэ къахьызэ, Исус ыпашъхьэ ралъхьаным пае, унэм рахьанэу пылъыгъэх. 19 Ау цӀыфхэр зэрэбагъэм къыхэкӀыкӀэ сымаджэр унэм рахьан алъэкӀыгъэп. Арэущтэу зэхъум, унашъхьэм дэкӀуаехи, унашъхьэм щыщ тырахи, сымаджэр пӀуаблэм телъэу, цӀыф пстэуми къалъэгъоу Исус ыпашъхьэ къыратӀупщэхыгъ. 20 Ахэмэ яшӀошъхъуныгъэ зелъэгъум, Исус а лӀым риӀуагъ: УипсэкӀодхэр къыпфэгъугъэх. 21 Ар зеӀом, Тэурат егъэджэкӀо пащэхэмрэ фарисейхэмрэ агухэмкӀэ аӀоу аублагъ: Хэта мыр? Тхьэр егъэпцӀыба? Тхьэм нэмыкӀэу, хэта псэкӀодхэр зыгъэгъун зылъэкӀырэр? 22 Ау Исус ахэмэ агухэм арылъыр ешӀэти ариӀуагъ: Сыд пае ащ фэдэ Ӏофхэр шъо шъутукӀэ шъуӀора? 23 Тара нахь псынкӀагъор, «УипсэкӀодхэр къыпфэгъугъэх», пӀоныр ара, хьауми «Къэтэджи къэкӀухь», пӀоныр ара? 24 Ау къэшъушӀэным пае, ЦӀыф Лъэпкъым Ыкъо псэкӀодхэр ыгъэгъунхэу дунаем тетыгъо зэрэщыриӀэр,джащыгъум Исус лӀэу зыӀэпкълъэпкъ узым зэкӀиубытагъэу щытым риӀуагъ: Сэ осэӀо, къэтэджи, уипӀуаблэ къашти, шъуадэжь кӀожь! 25 Ардэдэм а лӀыр ахэмэ апашъхьэ къыщытэджи, пӀуаблэу зытелъыгъэр зыдиштэжьи, Тхьэм щытхъу фишӀызэ, ядэжь кӀожьыгъэ. 26 ЗэкӀэми агучӀэ изыгъэу Тхьэм щытхъу фашӀыщтыгъ. Щынагъэхэу къаӀощтыгъ: Сыда гъэшӀэгъонышху тэ непэ тлъэгъугъэр!
Исус игъогу рыкӀонэу Левый къызэреджагъэр
27 Ащ нэуж Исус къызыдэкӀым, хьакъулахь ахъщэ зыщыхахырэ унэм Ӏусэу, хьакъулахь ахъщэр хэзыхырэ лӀы горэу Левый зыцӀэр ылъэгъугъ. Сауж къырыкӀу, риӀуагъ Исус. 28 Левый къэтэджи, зэкӀэри къыгъани, Исус ыуж ихьагъ. 29 ЕтӀанэ Левый иунэ ешхэешъошхо Исус щыфишӀыгъ. Хьакъулахь ахъщэр хэзыххэрэмрэ нэмыкӀ хьакӀэхэмрэ бэ хъухэу Ӏанэм пэсыгъэх. 30 Арэущтэу залъэгъум, фарисейхэмрэ Тэурат егъэджэкӀо пащэхэмрэ ар агу римыхьэу, Исус игъогу рыкӀохэрэм араӀуагъ: Хьакъулахь ахъщэр хэзыххэрэмрэ псэкӀод зышӀэхэрэмрэ сыда шъузкӀадашхэрэр ыкӀи шъузкӀадешъорэр? 31 Псаухэр арэп Ӏазэ зищыкӀагъэхэр, сымаджэхэр ары нахь, ариӀожьыгъ Исус. 32 Шъыпкъагъэ зиӀэ цӀыфхэм сяджэнэу арэп сыкъызфэкӀуагъэр, псэкӀод зышӀэхэрэр япсэкӀодхэм афыкӀэгъожьынхэм пае, сяджэнэу ары нахь.
Джурт тхьаматэхэр нэкӀыным ехьылӀагъэу Исус къызэреупчӀыгъэхэр
33 Фарисейхэмрэ Тэурат егъэджэкӀо пащэхэмрэ Исус къыраӀуагъ: Иуан игъогу рыкӀохэрэм бэрэ анэкӀы ыкӀи Тхьэм елъэӀух, фарисейхэмэ ягъогу рыкӀохэрэри ары, ау о уигъогу рыкӀохэрэр машхэх ыкӀи ешъох. 34 Шъаор ягъусэфэкӀэ, шъаом игъусэхэр жъугъэнэкӀынха? ариӀожьыгъ Исус ахэмэ. 35 Ау шъаор затырахыщт мафэхэр къэкӀощтых. А мафэхэр къызыкӀохэкӀэ, анэкӀыщт. 36 Джащыгъум зы гъэсэныгъэ къэбар ариӀуагъ: Зыми идэжьын щыгъыныкӀэм къыпитхъэу, щыгъыныжъым тыридэрэп. Арэущтэу ышӀымэ, щыгъыныкӀэр зэӀитхъыжьынышъ, щыгъыныкӀэм щыщэу идэжьыныр щыгъыныжъым екӀущтэп. 37 Джащ фэдэу зыми сэнэпс шӀыгъакӀэр шъонтыжъхэм аригъахъорэп. Арэущтэу ышӀымэ, сэнэпс шӀыгъакӀэм шъонтхэр къызэгуитхъынхэшъ, сэнэпсри къичъыжьыщт, шъонтхэри кӀодыщтых. 38 Ау сэнэпс шӀыгъакӀэр шъонтыкӀэхэм арагъахъон фае. Ащыгъум тӀури мыкӀодхэу къэнэжьыщтых. 39 Сэнэпсыжъ ешъуагъэм сэнэпс шӀыгъакӀэм ыгу еӀущтэп; сыда пӀомэ сэнэпсыжъыр нахь дэгъоу еӀошъ ары.
Исус игъогу рыкӀохэрэм шэмбэт мафэм коцышъхьэхэр къызэрэпачыгъэхэр
1 Шэмбэт мафэ горэм Исус коц хьасэхэм ахэтэу кӀозэ, игъогу рыкӀохэрэм коцышъхьэхэр къыпачыхэзэ, ӀэгукӀэ аӀотыхэзэ ашхыщтыгъэх. 2 Фарисей заулэмэ аӀуагъ: Шэмбэт мафэм хабзэкӀэ пшӀэ мыхъущтыр сыд пае шъушӀэра? 3 Даутэрэ игъусэхэмрэ мэлакӀэ лӀэхэ зэхъум, ащ ышӀагъэм шъуеджагъэба? ариӀожьыгъ Исус ахэмэ. 4 Ар Тхьэм иунэ ихьи, цӀыфхэм Тхьэм ыпашъхьэ агъэтӀылъыгъэ хьалыгъур ышти ышхыгъ, игъусэхэми аригъэшхыгъ. А хьалыгъур дин пащэхэм анэмыкӀ хабзэкӀэ зыгорэм ышхы мыхъунэу щытыгъ. 5 ЕтӀанэ Исус ариӀуагъ: ЦӀыф Лъэпкъым Ыкъо шэмбэт мафэм итхьамат.
Исус зыӀэ лъэныкъо пыгъукӀыгъэу щыт лӀы горэ зэригъэхъужьыгъэр
6 НэмыкӀ шэмбэт мафэ горэм Исус синэгогум чӀахьи, цӀыфхэм Тхьэм игущыӀэхэр аригъашӀэщтыгъэх. ЗыӀэ джабгъу пыгъукӀыгъэу щыт лӀы горэ ащ дэжьым чӀэтыгъ. 7 Шэмбэт мафэм тефэу Исус а лӀыр ыгъэхъужьыщтмэ, Тэурат егъэджэкӀо пащэхэмрэ фарисейхэмрэ Исус еплъакӀощтыгъэх, зэрагъэмысэн Ӏоф горэ къагъотыным пае. 8 Ау Исус ахэмэ агухэм арылъыр ышӀагъ, лӀэу зыӀэ лъэныкъо пыгъукӀыгъэми риӀуагъ: Къэтэджи, мо утыгум къихь. ЛӀыр къэтэджи, утыгум къихьагъ. 9 ЕтӀанэ Исус ахэмэ ариӀуагъ: Сэ сышъоупчӀы. Шэмбэт мафэм шӀугъэ пшӀэныр ара, хьауми бзэджагъэ пшӀэныр ара хабзэкӀэ хъущтыр, псэ мыкӀодэу къэбгъэнэжьыныр ара, хьауми бгъэкӀодыныр ара? 10 ЕтӀанэ ахэмэ зэкӀэмэ ахаплъи, а лӀым риӀуагъ: О пӀэ къэщэй. ЛӀым ыӀэ къыщэий, адрэ Ӏэм фэдэу хъужьыгъ. 11 Ау ахэр губжыным къызэкӀигъаплъэхи, Исус рашӀэщтымкӀэ зэупчӀыжьыщтыгъэх.
Исус апостол нэбгырэ пшӀыкӀутӀур къызэрэхихыгъэхэр
12 А мафэхэм Тхьэм елъэӀуным пае, Исус Ӏуашъхьэм дэкӀоягъ. Тхьэм елъэӀузэ, чэщыр зэкӀэ ащ щигъэкӀуагъ. 13 Нэф къызэрэшъэу, игъогу рыкӀохэрэм къяджи, ахэмэ ащыщэу нэбгырэ пшӀыкӀутӀу къахихи, апостолхэкӀэ яджагъ. А апостолхэр мыхэр арыгъэх: 14 Симонэу ятӀонэрэ цӀэу Петрэ зыфиусыгъэр; ащ ышэу Индрыс; етӀанэ Якъубэ, Иуан, Филипп, Варфоломей, 15 Маттэ, Фомэ, Алфей ыкъо Якъубэ, Симонэу зихэгъэгу ыгу етыгъэу фэлажьэрэмкӀэ заджэхэрэр, 16 Якъубэ ыкъо Иудэ, Иудэ Искариот. А Иудэ Искариот ары нэужым тетыгъо зиӀэхэм Исус аӀэкӀэзыгъэхьанэу щытыгъэр.
Исус цӀыф купышхом Тхьэм игущыӀэхэр зэраригъашӀэщтыгъэхэри зэригъэхъужьыщтыгъэхэри
17 Ахэмэ ягъусэу Исус къехыжьи, чӀыпӀэ зэшъхьэзэшъу горэм къыщыуцугъ. Игъогу рыкӀохэрэм ащыщхэу зы купышхо а чӀыпӀэм щытыгъ. Ахэмэ анэмыкӀэуи цӀыф купышхо Иудей хэкум зэкӀэ, Ерусалими, къалэхэу Тиррэ Сидонрэ яхыӀушъохэми къарыкӀыхи, ащ дэжьым къыщызэрэугъоигъэх. 18 Ахэр зэкӀэ Исус гущыӀэхэу къыӀохэрэм ядэӀунхэуи яузхэр рагъэгъэхъужьынхэуи къэкӀогъагъэх. ДжынэпцӀэ Ӏаехэмэ къин зэрагъэщэчырэ цӀыф хэри Исус ыгъэхъужьыщтыгъэх. 19 Сымэджэ пстэури ыгъэхъужьынхэу кӀуачӀэ ыпкъ къыхэкӀэу зэрэщытыгъэм пае, цӀыфхэр зэкӀэ зэрэнэсынхэм ыуж итыгъэх.
Сыхьатмафэ ежьагъэхэри сыхьатмыгъо ежьагъэхэри
20 Исус игъогу рыкӀохэрэм яплъи къыӀуагъ: Сыхьатмафэ шъуежьагъ, шъо тхьамыкӀэхэр, сыда пӀомэ Тхьэм и Тетыгъошхо ыӀэчӀэгъ шъучӀэт. 21 Сыхьатмафэ шъуежьагъ, шъо джы мэлакӀэ лӀэхэрэр, сыда пӀомэ шъо зыжъугъэшхэкӀыжьыщт. Сыхьатмафэ шъуежьагъ, шъо джы гъыхэрэр, сыда пӀомэ шъугушӀожьыщт. 22 Сыхьатмафэ шъуежьагъ, ЦӀыф Лъэпкъым Ыкъо игъогу шъузэрэрыкӀорэм пае, цӀыфхэмэ шъуауджэгъумэ, шъузыхадзымэ, къышъохъонхэмэ, шъуцӀи Ӏае ашӀымэ. 23 А мафэм шъугушӀу, шъузэрэгушӀорэм пае, шъудэ пкӀай, сыда пӀомэ Тхьэм уашъом ӀэхьышӀоу къыщышъуфигъэшъошэщтыр ины. А цӀыфхэмэ ятэжъхэм пегъэмбармэ арэущтэу арашӀэщтыгъ. 24 Ау сыхьатмыгъо шъуежьагъ, шъо байхэр, сыда пӀомэ шъугу зыгъэтхъэн Ӏофхэр жъугъотыгъахэх. 25 Сыхьатмыгъо шъуежьагъ, джы зызыгъэшхэкӀыгъэхэр, сыда пӀомэ мэлакӀэ шъулӀэжьыщт. Сыхьатмыгъо шъуежьагъ, джы гушӀохэрэр, сыда пӀомэ шъугъыщт ыкӀи шъупыхьажьыщт. 26 Сыхьатмыгъо шъуежьагъ, зэкӀэ цӀыфхэр къышъущытхъухэмэ, сыда пӀомэ а цӀыфхэм ятэжъхэм арэущтэу пегъэмбар нэпцӀхэм арашӀэщтыгъ.
Шъуипыйхэр шӀу шъулъэгъух
27 Ау шъо къысэдэӀухэрэм шъосэӀо. Шъуипыйхэр шӀу шъулъэгъух, шъузыуджэгъухэрэми шӀу афашъушӀ. 28 Къышъобгыхэрэми Тхьэм ынэшӀу къащифэнэу шъуафелъэӀу, ӀаекӀэ къыжъудэзекӀохэрэми шӀукӀэ Тхьэм шъуафелъэӀу. 29 О унэкӀушъо лъэныкъо къеорэм адрэ нэкӀушъори фэгъаз. О уищыгъын кӀыӀутелъ птезыхырэм джанэри къыфэгъан. 30 Хэтми зыгорэкӀэ къыолъэӀурэм ет, уихьапщыпхэр птезыхырэми къыуитыжьынэу емыӀу. 31 ЦӀыфхэр шъо къыжъудэзекӀонхэу шъузэрэфаем фэдэу, шъори ахэмэ шъуадэзекӀу. 32 ШӀу шъузылъэгъухэрэм язакъоу шӀу шъулъэгъухэмэ, шъоркӀэ сыд фэдэ щытхъуа ащ хэлъыр? ПсэкӀод зышӀэхэрэм ежьхэр шӀу къэзылъэгъухэрэр шӀу алъэгъужьхэба? 33 ШӀугъэ къышъуфэзышӀэрэ цӀыфхэм шӀу афашъушӀэжьмэ, шъоркӀэ сыд фэдэ щытхъуа ащ хэлъыр? ПсэкӀод зышӀэхэрэм арыба ашӀырэр? 34 КъышъуатыжьынкӀэ шъузыщыгугъыхэрэм чӀыфэ яшъутымэ, шъоркӀэ сыд фэдэ щытхъуа ащ хэлъыр? ПсэкӀод зышӀэхэрэм адрэ псэкӀод зышӀэхэрэм чӀыфэ араты, аратыгъэм фэдиз къаӀахыжьынэу щыгугъыхэу. 35 Ау шъуипыйхэр шӀу шъулъэгъух, шӀу афашъушӀ, къышъуатыжьынкӀэ шъущымыгугъэу чӀыфи яшъут. Арэущтэу зышъушӀыкӀэ, Тхьэм ӀэхьышӀоу къэшъуфигъэшъошэщтыр ины хъущт, анахь Иным ибынхэуи шъущытышт; сыда пӀомэ цӀыфхэу шӀу зыфаӀорэр къызыгурымыӀохэрэмкӀи цӀыф бзаджэхэмкӀи Тхьэр шӀу. 36 Шъуятэ лъапӀэ гукӀэгъу зэриӀэм фэдэу, шъори гукӀэгъу зижъугъаӀ.
Зыми хьыкум тешъумышӀьгхь
37 3ыми хьыкум тешъумышӀыхь, Тхьэми хьыкум къышъутыришӀыхьащтэп. Зы цӀыфи шъумыгъэмыси, Тхьэми шъуигъэмысэщтэп. ЦӀыфхэм афэжъугъэгъу, Тхьэми шъуигъэмысэщтэп. ЦӀыфхэм афэжъугъэгъу, Тхьэми къышъуфигъэгъущт. 38 ЦӀыфхэм яшъути, Тхьэм шъо къышъуитыщт. Шъуишапхъэ гъэсысыгъэу, иубагъэу, изэу къелыжьыгъэу Тхьэм къышъуфишӀэжьыщт; сыда пӀомэ шъо шапхъэу зэрэшъушырэм фэдэ шапхъэкӀэ Тхьэм шъо къышъуфишыжьыщт. 39 ЕтӀанэ Исус зы гущыӀэжъ горэ ариӀуагъ: Зы нэшъум адрэ нэшъур зэрищэн ылъэкӀына? ТӀури машэм ифэнхэба? 40 ЕджакӀор езыгъаджэрэм нахьи нахь инэп, ау хэти зэкӀэ зэригъэшӀагъэ зыхъукӀэ, езыгъаджэрэм фэдэу мэхъу. 41 О унэ пкъэоу кӀэлъым гу лъымытэу, пхъэцалэу о пшы ынэ кӀэлъыр сыд пае плъэгъура? 42 О унэ пкъэоу кӀэлъыр умылъэгъоу, сыдэущтэу пшы епӀон плъэкӀыра, «Пхъэцалэу о унэ кӀэлъыр къычӀэсэгъэх, сшы?» О нэпитӀу зиӀэр, ыпэ рапшӀэу пкъэоу о унэ кӀэлъыр къыкӀэхыжьи, етӀанэ пхъэцалэу о пшы ынэ кӀэлъыр къызэрэкӀэпхыжьыщтыр нафэу плъэгъущт.
Чъыгыр зыфэдэр къыпыкӀэрэмкӀэ къэпшӀэщт
43 ЧъыгышӀум дэй къыпыкӀэрэп, чъыг дэими шӀу къыпыкӀэрэп. 44 Сыдрэ чъыги зыфэдэр къыпыкӀэрэмкӀэ къэпшӀэщт. Пырэжъые куандэм ынджыр къыпачырэп, шхъуми сэнашъхьэ къыпачырэп. 45 ЦӀыфышӀум ыгу илъ шӀугъэм шӀугъэ къыхехы, цӀыф бзаджэми ыгу илъ бзэджагъэм бзэджагъэ къыхехы; сыда пӀомэ жэм къыдэкӀырэр гум илъыр ары.
Унэ зышӀырэ лӀы Ӏушымрэ унэ зышӀырэ лӀы акъылынчъэмрэ
46 Сыд пае «Зиусхьан! Зиусхьан!» шъуӀоу къысашъуӀора, сэ сӀорэр шъумыгъэцакӀэу? 47 Хэти садэжь къакӀоу, сигущыӀэхэр зэхэзыхэу, ахэри зыгъэцакӀэрэр зыфэдэр шъозгъэшӀэщт. 48 Ар зыфэдэр унэ зышӀырэ лӀэу чӀыгур куоу къэзытӀэу, унэ лъапсэр мыжъо пытэм тезышӀыхьагъэр ары. Псышхор къызеум, псым иорхэр а унэм еуагъэх, ау а унэр пытэу зэрашӀыгъэм пае, агъэхъыен алъэкӀыгъэп. 49 Ау сигущыӀэхэр зэхэзыхэу, ахэри зымыгъэцакӀэрэр зыфэдэр лӀэу зиунэ лъэпсэ пытэ имыӀэу, чӀыгушъхьэм тезышӀыхьагъэр ары. Псым иорхэр а унэм къызэреохэу, къызэхэуагъ. А унэр къызызэхаоми, Ӏае дэдэу къызэхэуагъ.
Исус дзэ пащэм иунэӀут зэригъэхъужьыгъэр
1 Исус а гущыӀэхэм зэкӀэ цӀыфхэр зарегъэдэӀухэ ужым, Капернаум къалэм дэхьагъ. 2 Дзэ пащэ горэм шӀу ылъэгъурэ унэӀут горэ иӀагъ. А унэӀутыр лӀэным нэсыгъэу сымаджэу щылъыгъ. 3 Дзэ пащэм Исус икъэбар зызэхехым, Исус къэкӀонышъ, иунэӀут ыгъэхъужьынэу джуртхэм янахьыжъхэм ащыщхэу заулэ лъэӀуакӀоу ыдэжь ыгъэкӀуагъэх. 4 Ахэр Исус ыдэжь къызэкӀохэм, лъэшэу елъэӀухэзэ раГуагъ: О ар ащ фэпшӀэнэу ифэшъуаш, 5 сыда пӀомэ тэ тлъэпкъ шӀу елъэгъу, тисинэгогуи тфаригъэшӀыгъ. 6 Исус адишти адэкӀуагъ. Дзэ пащэм иунэ пэблагъэхэ зэхъум, дзэ пащэм иныбджэгъухэр Исус къыпигъэгъокӀыхи къыраригъэӀуагъ: Тхьаматэ, зымыгъэулэу, о сэ сиунэ укъихьанэу сифэшъуашэп. 7 Ар сифэмышъуашэу зэрэщытым пае, уадэжь сэ сшъхьэкӀэ сыкъэкӀонэуи зыфэзгъэшъошагъэп. Ау зы гущыӀэ закъо къаӀуи, унашъо шӀи, сиунэӀут хъужьыщт. 8 Сэри лӀы горэм иунашъо ыӀэчӀэгъ сычӀэт, сэ сиунашъуи ыӀэчӀэгъ дзэлӀхэр чӀэтых. Зыгорэм «КӀо» есӀомэ, кӀощт. Адрэми «КъакӀо» есӀомэ, къэкӀощт. СиунэӀути «Мыр шӀэ» есӀомэ, ышӀэщт. 9 Исус ар зызэхехым, а лӀыр ыгъэшӀэгъуагъ, ыуж ит цӀыф купышхоми зыфигъази ариӀуагъ: Сэ шъосэӀо, мыщ фэдэ шӀошъхъуныгъэ зиӀэ цӀыф горэ Израил хэгъэгуми изгъотагъэп. 10 ЕтӀанэ лӀыкӀохэм унэм агъэзэжьыгъ. Къызагъэзэжьым, унэӀутыр хъужьыгъэу къагъотыжьыгъ.
Наин къалэм щыщ шъузабэм икӀалэу лӀагъэр Исус къызэригъэтэджыжьыгъэр
11 Охътэ тӀэкӀу тешӀагъэу Исус Наин зыцӀэ къалэм кӀуагъэ. Игъогу рыкӀохэрэри цӀыф купышхори игъусэхэу «Ӏощтыгъэх. 12 Исус къэлапчъэм игъунэгъу зэхъум, хьадэ горэ къыдахыщтыгъ. Ар шъузабэ горэм ыкъо закъоу щытыгъ. ЦӀыф купышхуи къалэм щыщэу шъузабэм игъусагъ. 13 Зиусхьаным шъузабэр зелъэгъум, ыгу егъуи мырэущтэу риӀуагъ: Умыгъ, тян. 14 ЕтӀанэ пхъэмбаим бгъодахьи, ащ теГэбагъ. Хьадэр зыхьыхэрэр къызэтеуцуагъэх. ЕтӀанэ Исус къыӀуагъ: А кӀал, къэтэдж, осэӀо! 15 Ар зеӀом, кӀалэу лӀагъэр къэтэджыжьи, къэгущыӀэу фежьагъ. Исуси ащ янэ ар ритыжьыгъ. 16 Ахэмэ зэкӀэми щынэгъошхо агу къихьагъ, Тхьэми щытхъу фашӀэу аӀуагъ: Пегъымбарышхо къытхэкӀыгъ. Тхьэр нэшӀукӀэ ылъэпкъ къеплъыгъ. 17 Исус ышӀагъэм икъэбар зэкӀэ Иудей хэкуми зэкӀэ Ӏэгъоблагъоми ащыӀугъ.
УмэхъакӀо Иуан лӀыкӀохэр Исус ыдэжь зэригъэкӀуагъэхэр
18 Мы Ӏофхэр зэкӀэ Иуан игъогу рыкӀохэрэм ежьым раӀотэжьыгъэх. 19 Ахэмэ ащыщхэу нэбгыритӀу Иуан къяджи, Зиусхьаным дэжь ыгъэкӀуагъэх мырэущтэу еупчӀынхэу: Ора къэкӀон фаер, хьауми нэмыкӀ горэм тыпэплъэн фая? 20 А нэбгыритӀур Исус ыдэжь къызэкӀохэм, къаГуагъ: УмэхъэкӀо Иуан тыкъыоупчӀынэу уадэжь тыкъигъэкӀуагъ: «Ора къэкӀон фаер, хьауми нэмыкӀ горэм тыпэплъэн фая?» 21 А мафэхэм сымаджэ Ӏаджи, уз Ӏае зиӀэ Ӏаджи, джынапцӀэ зыхэс цӀыф Ӏаджи Исус ыгъэхъужьыгъэх. Нэшъу Ӏаджи къыгъэплъэжьыгъэх. 22 Исус ахэмэ ариӀожьыгъ: Жъугъэзэжьи, Ӏофэу шъулъэгъугъэхэмрэ зэхэшъухыгъэхэмрэ Иуан ешъуӀотэжьых: Нэшъухэр къэплъэжьых, лъащэхэр тэрэзэу мэзекӀожьых, шъоджэ уз Ӏаер зиӀэхэр псаухэу, къабзэхэу мэхъужьых, дэгухэми зэхахыжьы, лӀагъэхэр къэтэджыжьых, тхьамыкӀэхэми къэбарышӀур зэхахы. 23 Сэщ пае зыгу мыхъун къизымыгъахьэрэр сыхьатмафэ ежьагъ. 24 Иуан илӀыкӀохэр зыӀокӀыжьхэм, Исус цӀыф купышхохэм Иуан ехьылӀагъэу ариӀоу ыублагъ: Шъоф нэкӀым шъузыдэкӀым, сыда шъулъэгъунэу шъузыфэягъэр? Жьыбгъэм ыгъэсысырэ къамыл шъулъэгъунэу арыгъа? 25 Армырмэ, сыда шъулъэгъунэу шъузыфэягъэр ащ дэжьым шъузыдэкӀым? Дахэу фэпагъэу зы лӀы гора? Дэхэ дэдэу фэпагъэхэу, псэукӀэшӀу зиӀэхэр зэрысхэр пачъыхьэхэм яунэшхохэр ары. 26 Адэ, сыда шъулъэгъунэу шъузыфэягъэр ащ дэжьым шъузыдэкӀым? Пегъымбара? Сэ шъосэӀо, ар пегъымбар къодыеп, ар пегъымбарым нахьи нахь ин. 27 Ар лӀыкӀоу зикъэбар Тхьэм игущыӀэ тхыгъэхэм мырэущтэу арытыр ары: «Мары, уапэ рапшӀэу силӀыкӀо къэсэгъакӀо, ащ о уигъогу пфигъэпсыщт». 28 Сэ шъосэӀо, бзылъфыгъэхэм къакӀэхъуагъэхэм ащыщэу, умэхъэкӀо Иуан нахьи нахь ин щыӀэп. Ау щытми, Тхьэм и Тетыгъошхо ыӀэчӀэгъ чӀэт цӀыфхэм ащыщэу анахь цӀыкӀури Иуан нахьи нахь ин. 29 Исус гущыӀэхэу къыӀуагъэхэм ядэӀущтыгъэ цӀыф пстэуми, хьакъулахь ахъщэр хэзыххэрэри ахэмэ ахэтхэу, Тхьэм игущыӀэхэр зафэу алъытагъэх. Ахэр арыгъэх Иуан зезыгъэумэхъыгъэхэр. 30 Ау фарисейхэмрэ Тэурат егъэджэкӀо пащэхэмрэ ашӀэн .фаеу Тхьэр зыфаер адагъэп. Ахэр арыгъэх Иуан зезымыгъэумэхъыгъэхэр. 31 Джырэ цӀыфхэр сыда зыфэзгъэдэщтыр? къыӀуагъ Исус. Сыд ахэр зыфэдэхэр? 32 Урамым тес кӀалэхэу мырэущтэу зыӀохэу, зэджэжьхэрэм афэдэх: «Къамылым тышъуфепщагъэ пэтми, шъо шъу къэшъуагъэп; тэ гъыбзэ къышъуфэтӀуагъэ пэтми, шъо шъугъыгъэп». З3 Сыда пӀомэ умэхъэкӀо Иуан къэкӀуагъ. Ащ хьалыгъу ымышхэу щыт, сэнэпси емышъоу щыт. «Ащ джынапцӀэ хэс», шъоӀо. 34 ЦӀыф Лъэпкъым Ыкъо къэкӀуагъ. Ар машхэ ыкӀи ешъо. «Шхэнешъоныр зикӀасэу, хьакъулахь ахъщэр хэзыххэрэмрэ псэкӀод зышӀэхэрэмрэ яныбджэгъу», шъоӀо. 35 АрышъхьакӀэ Тхьэм изэхэшӀыкӀыныгъэшхо зыдэгъэ пстэуми а зэхэшӀыкӀыныгъэшхор къагъэшъыпкъэжьы.
Исус псэкӀодышӀэ бзылъфыгъэ хэтакӀо горэм ипсэкӀодхэр зэрэфигъэгъугъэхэр
36 Фарисейхэм ащыщэу зыгорэм Исус ыгъэшхэнэу ригъэблэгъагъ. Исус фарисеим иунэ ихьи, Ӏанэм пэтӀысхьагъ. 37 Къалэм щыщэу зы псэкӀодышӀэ бзылъфыгъэ хэтакӀо горэм Исус фарисеим иунэ щышхэнэу зэреблэгъагъэр къышӀагъ. Алавастэр зыцӀэ мыжъом хэшӀыкӀыгъэу, зы апч горэу осэшхо зиӀэ дагъэ зэрытыр къыздихьи къэкӀуагъ. 38 Исус ыкӀыбкӀэ къыбгъодахьи, лъэшэу зэрэгъыгъэм пае, ынэпсыхэмкӀэ Исус ылъакъохэр ыгъэуцӀынхэу къыублагъ. ЕтӀанэ Исус ылъакъохэр ышъхьацыкӀэ ылъэкӀыжьыгъэх, ылъакъохэм ябэугъ, осэшхо зиӀэ дагъэм щыщи ащифагъ. 39 Фарисеу Исус къезыгъэблэгъагъэм ар зелъэгъум, ыгукӀэ ыӀуагъ: Мыр пегъымбарэу щытыгъэмэ, мы бзылъфыгъэу къынэсырэр зыфэдэр, псэкӀодышӀэ бзылъфыгъэ хэтакӀоу зэрэщытыр ышӀэщтыгъ. 40 Симон, сэ зыгорэ осӀощт, риӀуагъ Исус а лӀым. КъаӀо, дин гъэсакӀу, къыӀожьыгъ Симон. 41 ЧӀыфэ зытырэ лӀы горэм ичӀыфэ нэбгыритӀум ателъыгъ, зым динар шъитф, адрэм шъэныкъо, ыӀуагъ Исус. 42 А чӀыфэхэр къапщыныжьын замылъэкӀым, тӀуми афигъэгъугъ. МитӀум язэу хэта чӀыфэ зытырэ лӀыр 43 СызэрэгугъэрэмкӀэ нахьыбэ зыфигъэгъугъэр ары,къыӀожьыгъ Симон. КъэпшӀагъ, риӀожьыгъ Исус. 44 ЕтӀанэ Исус бзылъфыгъэм зыфигъази, Симон риӀуагъ: Мы бзылъфыгъэр олъэгъуа? Сэ о уиунэ сыкъызехьэм, слъакъохэр стхьакӀынхэу псы къысэптыгъэп, ау мы бзылъфыгъэм ынэпсыхэмкӀэ слъакъохэр къыгъэуцӀынхи, ышъхьацымкӀэ ылъэкӀыжьыгъэх. 45 О укъысэбэугъэп, ау унэм сыкъызэрихьэу, мы бзылъфыгъэр слъакъомэ къябэуныр зэпигъэугъэп. 46 Сэ сшъхьэ дагъэ къыщыпфагъэп, ау ащ сэ слъакъохэм осэшхо зиӀэ дагъэр къащифагъ. 47 Арышъ, осэӀо, шӀулъэгъуныгъэшхо ащ ыгу илъыгъэти, ащ ипсэкӀодыбэхэр фэгъугъэх. Ау макӀэ зыфэгъугъэм ыгу шӀулъэгъуныгъэ макӀэ илъ. 48 ЕтӀанэ Исус бзылъфыгъэм риӀуагъ: УипсэкӀодхэр пфэгъугъэх. 49 Джащыгъум адрэ хьакӀэхэм агухэмкӀэ аӀоу аублагъ: Мы лӀэу псэкӀодхэри зыгъэгъурэр хэта? 50 Ау Исус бзылъфыгъэм риӀуагъ: УишӀошъхъуныгъэ умыкӀодэу укъигъэнэжьыгъ. Гъогу маф. Гупсэфыныгъэ уиӀэу опсэу.
Бзылъфыгъэхэу Исус игъусагъэхэр
1 Ащ ыужым Тхьэм и Тетыгъошхо ехьылӀэгъэ къэбарышӀур ыгъэӀузэ, Исус къалэхэмрэ къуаджэхэмрэ къыкӀу хьащтыгъэх. Игъогу рыкӀорэ нэбгырэ пшӀыкӀутӀур игъусагъэх. 2 ДжынапцӀэхэр зыхифыгъэхэу, зиузхэр ыгъэхъужьыгъэхэу бзылъфыгъэ заули игъусагъэх: Магдалэ къуаджэм щыщ Мерэмэу Исус джынэпцӀибл зыхифыгъагъэр, 3 етӀанэ пщэу Ирод иунэзехьэу Хузэ зыцӀэм ишъхьэгъусэ Иуаннэ, етӀанэ Сусанни, ащ нэмыкӀыбэхэри. А бзылъфыгъэхэм ямылъкукӀэ Исусрэ игъогу рыкӀохэрэмрэ ӀэпыӀэгъу афэхъущтыгъэх.
Чылапхъэ зыпхъырэм ехьылӀэгъэ гъэсэныгъэ тхыдэр
4 Ащ нэужым цӀыф купышхо къэзэрэугъоигъэу, тэдрэ къуаджэм къикӀыгъэ цӀыфхэри Исус ыдэжь къызэкӀохэм, мы гъэсэныгъэ тхыдэр афиӀотагъ: 5 Зы лӀы горэ чылапхъэ ыпхъынэу дэкӀыгъ. Чылапхъэр ыпхъызэ, ащ щыщ тӀэкӀу гъогум тетэкъуагъ. ЦӀыфхэм ар лъэгукӀэ аубагъ, ошъогу бзыухэми ашыпыгъ. 6 ТӀэкӀуи чӀыгу мыжъуалъэм тетэкъуагъ. Ахэр къызыхэкӀыхэм, псы агъотыгъэпти, гъужьыгъэх. 7 НэмыкӀ тӀэкӀуи панэхэм ахэтэкъуагъ. Панэхэр ахэмэ ягъусэхэу къэкӀыхи, чылапхъэу къыхэкӀыгъэхэр атхьалагъэх. 8 ЕтӀани зы тӀэкӀуи чӀыгу дэгъум хэтэкъуагъ. Ахэр къэкӀыхи, шъхьэхэр къапыкӀэхи, зы шъхьэ налъэм коцишъэ къикӀагъ. Ар Исус къызеӀо нэужым, мэкъэшхокӀэ къыӀуагъ: РыдэӀонэу тхьакӀумэ зиӀэм зэхерэх.
Исус цӀыфхэм Ӏофхэр аригъашӀэхэзэ, гъэсэныгъэ тхыдэхэр къызыкӀафиӀотэщтыгъэхэр
9 Игъогу рыкӀохэрэр Исус къеупчӀыгъэх: Мы гъэсэныгъэ тхыдэм сыда къикӀырэр? 10 Тхьэм и Тетыгъошхо ишъэфхэр шъушӀэнхэу Тхьэм фитыныгъэ къышъуитыгъ, къыӀуагъ Исус, ау нэмыкӀ цӀыфхэм гъэсэныгъэ тхыдэхэмкӀэ садэгущыӀэ. Арэущтэу «ахэр еплъыхэ пэтми, алъэгъущтэп, даӀохэ пэтми, къагурыӀощтэп».
Чылапхъэр зыпхъырэм ехьылӀэгъэ гъэсэныгъэ тхыдэм къикӀырэр Исус игъогу рыкӀохэрэм къызэрагуригъэӀуагъэр
11 Гъэсэныгъэ тхыдэм къикӀырэр мыры: Чылапхъэр Тхьэм игущыӀэу ары. 12 ЦӀыфхэм ащыщэу зы купыр чылапхъэу гъогум тетэкъуагъэм фэд. Мыхэр ары Тхьэм игущыӀэхэр зэхэзыххэрэр, ау етӀанэ шэйтаныр къэкӀошъ, шӀошъхъуныгъэ аримыгъэгъотызэ, а гущыӀэхэр агухэм арехыжьых, Тхьэм а цӀыфхэр къымыгъэнэжьынхэм пае. 13 Адрэ цӀыф купыр чӀыгу мыжъуалъэм тетэкъогъэ чылапхъэм фэд. Мыхэр ары Тхьэм игущыӀэхэр зэрэзэхаххэу, а гущыӀэхэр гушӀуагъокӀэ зыштэхэрэр, ау ахэмэ лъапсэ яӀэп. ШӀошъхъуныгъэм игъогу бэрэ тетыжьхэрэп. ЯшӀошъхъуныгъэ ишъыпкъагъэ гъэунэфыгъэу зыхъукӀэ, шӀошъхъуныгъэм игъогу текӀыжьых. 14 ЕтӀанэ зы цӀыф купыр панэхэм ахэтэкъогъэ чылапхъэм фэд. Мыхэр ары Тхьэм игущыӀэхэр зэхэзыххэрэр, ау мы дунаим игугъухэмкӀи, баиныгъэмкӀиэ, щыӀэныгъэм итхъагъохэмкӀи мэкӀэмакӀэу зырагъэтхьалэ, ахэми шӀугъэ къапыкӀырэп. 15 ЕтӀани нэмыкӀ цӀыф куп чӀыгу дэгъум хэтэкъогъэ чылапхъэм фэд. Мыхэр ары шӀугъэрэ шъыпкъагъэрэ зыгу илъхэу, Тхьэм игущыӀэхэр зэхэзыххэу зыубытхэрэр. Теубытэныгъэ яӀэу, шӀугъэ къапэкӀы. Исус ар къызеӀо ужым, мэкъэшхокӀэ къыӀуагъ: РыдэӀонэу тхьакӀумэ зиӀэм зэхерэх.
Щэлъэ чӀэгъым чӀэт остыгъэр
16 Зыми остыгъэ хигъанэу, щэлъэ чӀэгъым е пӀэкӀор чӀэгъым чӀигъэуцорэп, ау унэм къихьахэрэм инэфынэ алъэгъуным пае, итетыпӀэ лъагэ тырегъэуцо. 17 Сыда пӀомэ къэмылъэгъожьынэу гъэбылъыгъэу зи щыӀэп, цӀыфхэм къамышӀэнэуи къэмылъэгъожьынэуи чӀэухъумагъэу зи щыӀэп. 18 Арышъ, шъузэрэдэӀощтым шъуфэсакъ. Тхьэм хэт щыщми зйӀэм нахьыбэ къыритыщт, ау Тхьэм зи зимыӀэм иӀэу шӀошӀырэри Ӏихыжьыщт.
Исус янэрэ ышхэмрэ
19 Исус янэрэ ышхэмрэ ежьым ыдэжь къэкӀуагъэх, арышъхьакӀэ цӀыфхэр багъэхэти, екӀолӀэнхэ алъэкӀыгъэп. 20 Джащыгъум Исус къэбар фахьыгъ: О уянэрэ пшыхэмрэ уалъэгъумэ ашӀоигъоу щагум дэтых. 21 Тхьэм игущыӀэхэр зэхэзыххэу зыгъэцакӀэхэрэр ары сэ сянэри сшыхэри, ариӀожьыгъ Исус ахэмэ.
Исус жьыбгъэ щынэгъошхор зэригъэуцугъэр
22 Мафэ горэм игъогу рыкӀохэрэр игъусэхэу къуашъо горэм Исус итӀысхьи ариӀуагъ: НекӀо, псыхъураем иадрабгъу тызэпырыжъугъэкӀ. Арэущтэу ежьагъэх. 23 Къуашъом исхэу кӀохэзэ, Исус хэчъыягъ. Псыхъураем жьыбгъэшхо къыщепщи, къуашъом псыр изы къэхъоу фежьи, щынэгъошхо хэфагъэх. 24 Джащыгъум Исус къыбгъодахьэхи, къагъэущи аӀуагъ: Зиусхьан, Зиусхьан, тэкӀоды! Исус къэтэджи, жьыбгъэшхоми псыорхэми ягыий, зэтыригъэуцуагъэх, кӀымсыми къэхъугъ. 25 ЕтӀанэ ахэмэ ариӀуагъ: ШъуишӀошъхъуныгъэ тыдэ щыӀа? Хэта мыр? Жьыбгъэшхоми псыми унашъо афишӀызэ егъэдаӀох, щтагъэхэу, агъэшӀагъоу зэупчӀыжьыгъэх ахэр.
Исус джынэпцӀабэхэр зыхэс лӀы горэ зэригъэхъужьыгъэр
26 Галилей хэкум къыпэӀулъ хэкоу Гадарэ зыцӀэ къалэм епхыгъэм къуашъомкӀэ нэсыгъэх. 27 Исус къуашъом икӀи, псы Ӏушъом зытехьэм, къалэм щыщэу джынапцӀэхэр зыхэс лӀы горэ къачъэзэ къыпэгъокӀыгъ. А лӀым бэшӀагъэу щыгъын щыгъыжьыгъэп, унэ горэми исыжьыгъэп, ау къэунэхэм ахэсыгъ. 28 Ащ Исус зелъэгъум, ыпашъхьэ чӀыгум зыкъыщыридзыхи, мэкъэшхокӀэ къэкуозэ, къыӀуагъ: Исус, Тхьэу анахь Иным Ыкъу, сыда уиӀофэу къысхэлъыр? СыолъэӀу, къин сэмыгъэлъэгъу. 29 Ар зыкӀиӀуагъэр джынэпцӀэ Ӏаер лӀым хэкӀыжьынэу Исус унашъо фишӀыгъэти ары. ДжынапцӀэхэр а лӀым бэрэ хахьэщтыгъэх. ЦӀыфхэм гъучӀ Ӏэхъулъэхъу ащ тыралъхьэти, аухъумэу аӀыгъыщтыгъ. Ау Ӏэхъулъэхъухэр зэпиутхэти, джынапцӀэм а лӀыр шъоф нэкӀым ригъэзыхьэщтыгъ. 30 Сыда о пцӀэр? еупчӀыгъ Исус а лӀым. Сэ сцӀэр дзэ, къыӀожьыгъ ащ. Ар зыкӀиӀуагъэр джынэпцӀабэхэр хэхьагъэхэу шытыгъэти ары. 31 ДжынапцӀэхэр чӀылъэм икуупӀэу чӀэ зимыӀэм кӀонхэу унашъо афимышӀынэу Исус къелъэӀугъэх. 32 А чӀыпӀэ дэдэм къо Ӏэхъогъушхо Ӏошъхьэ нэпкъым щыхъущтыгъ. А къохэм апкъыхэм ахэхьанхэу фит къышӀынхэу джынапцӀэхэр Исус къелъэӀугъэх. Исус ахэр фит ышӀыгъэх. 33 Ардэдэм джынапцӀэхэр лӀым хэкӀыжьхи, къохэм апкъыхэм ахэхьагъэх. Къо Ӏэхъогъур Ӏошъхьэ нэпкъым къечъэхи, псыхъураем хэлъадэхи, псым ытхьалагъэх. 34 Къуахъохэм хъугъэшӀагъэр залъэгъум, хэхьажьхи, къалэмрэ къуаджэхэмрэ хъугъэшӀагъэр ащаӀотагъ. 35 ЦӀыфхэр хъугъэшӀагъэр зэрагъэлъэгъунэу дэкӀыгъэх. Ахэр Исус ыдэжь къызэкӀохэм, джынапцӀэхэр къызхэкӀыгъэ лӀыр фэпагъэу, иакъыл къыгъотыжьыгъэу Исус ыдэжь щысэу алъэгъугъ. Ар залъэгъум, лъэшэу къэщтагъэх. 36 Хъугъэр зылъэгъугъэ цӀыфхэм джынапцӀэхэр зыхэсыгъэ лӀыр Исус зэригъэхъужьыгъэр джы араӀотэжьыгъ. 37 Джащыгъум яхэку ыбгынэнэу Гадарэ цӀыф пстэури Исус къелъэӀугъэх, сыда пӀомэ ахэр щынэгъошхо хэфагъэхэти ары. Арэущтэу ӀукӀыжьыным пае, Исус къуашъом итӀысхьагъ. 38 Исус къуашъом итӀысхьэ пэтызэ, джынапцӀэхэр къызхэкӀыгъэ лӀыр Исус къелъэӀугъ: Гъусэу къызыфэшӀ. 39 О уиунэ кӀожьи, Тхьэм къыпфишӀэгъэ шӀугъэшхор уицӀыфхэм яӀотэжь! риӀуагъ Исус а лӀым. ЕтӀанэ ытӀупщыжьыгъ. ЛӀыр кӀожьи, Исус къыфишӀэгъэ шӀугъэшхор къалэм щиӀотэжьыгъ.
Исус Иаир зыцӀэм ыпхъоу лӀагъэр къызэригъэтэджыжьыгъэр; Исус ищыгьын кӀапэ къынэсыгъэ бзылъфыгъэр зэригъэхъужьыгъэр
40 ЕтӀанэ Исус къызегъэзэжьым, цӀыф купышхор къыпэгъокӀыгъ, сыда пӀомэ зэкӀэри ащ паплъэщтыгъэхэти ары. 41 Иаир зыцӀэ синэгогу пащэ горэ къакӀуи, Исус ылъакъохэм адэжь зыкъыщыридзыхи къелъэӀугъ: Садэжь къакӀо. 42 Сыда пӀомэ илъэс пшӀыкӀутӀу фэдиз ыныбжьэу зы пхъу закъо иӀагъ. Ар лӀэным нэсыгъэу сымаджэу щылъыгъ. Арэущтэу Исус Иаир ыдэжь кӀо зэхъум, цӀыф купышхор тезэрэгъэбэнагъ. 43 Ахэмэ зы бзылъфыгъэ горэ ахэтыгъ. Илъэс пшӀыкӀутӀу хъугъэу, ащ бэрэ лъы къыкӀэкӀэу гуӀэщтыгъэ. Ащ иӀэр зэкӀэ Ӏазэхэм атыригъэкӀодэгъагъ, ау зыми ыгъэхъужьын ылъэкӀыщтыгъэп. 44 А бзылъфыгъэр Исус ыкӀыбкӀэ къекӀуалӀи, ищыгъын кӀапэ къынэсыгъ. Ащ зэрэнэсэу илъыкӀэкӀын уцужьыгъэ. 45 Хэта къызнэсыгъэр? къыӀуагъ Исус. Зэпстэуми загъэхые зэхъум, Петр къыӀуагъ: Тхьаматэ, цӀыфхэм укъауцухьызэ, къыптебанэхэу зэрэщытхэр плъэгъурэба? 46 Зыгорэ къызнэсыгъ, къыӀуагъ Исус. Сыда пӀомэ кӀуачӀэ зэрэсхэкӀыгъэр зэхэсшӀагъэшъ ары. 47 Ау бзылъфыгъэм ышӀагъэр къызэрашӀэщтыр зелъэгъум, кӀэзэзэу къыӀухьи, Исус ыпашъхьэ зыкъыщыри дзыхи, цӀыф пстэуми апашъхьэ къызкӀынэсыгъэри, занкӀэу зэрэхъужьыгъэри къыӀуагъ: 48 Сипшъашъ, уишӀошъхъуныгъэ уигъэхъужьыгъ,риӀуагъ Исус. Гъогу маф. Гупсэфыныгъэ уиӀэу опсэу. 49 Исус гущыӀэзэ, синэгогу пащэм иунэ зыгорэ къикӀыгъэу, къакӀуи къыӀуагъ: О ппхъу дунаем ехыжьыгъ. Дин гъэсакӀом къин джыри емыгъэ лъэгъужь. 50 Ау Исус ар зызэхехым, Иаир риӀуагъ: О умыщын. ШӀошъхъуныгъэ зигъаӀэ къодый. Ппхъу къэхъужьыщт. 51 Исус Иаир иунэ зынэсым, Петрэ, Иуан, Якъубэ, пшъэшъэжъыем ятэянэ анэмыкӀ унэм зыдыригъэхьагъэп. 52 ЦӀыф пстэуми хьадагъэ ашӀызэ, абгъэгухэм яожьыщтыгъэх. Ау Исус ыӀуагъ: Хьадагъэ шъумышӀы. Ар лӀагъэп, мэчъые нахь. 53 Ау ахэмэ ар зэрэлӀагъэр ашӀэти, Исус къыдэхьащхыгъэх. 54 Ау Исус пшъэшъэжъыем ыӀэ къыубыти, мэкъэшхокӀэ къыӀуагъ: Сипшъэшъэжъый, къэтэдж! 55 Пшъэшъэжъыем ыпсэ къыпыхьажьи, ардэдэм къэтэджыжьыгъ. Ар агъэшхэнэу Исус ариӀуагъ. 56 Пшъэшъэжъыем ятэянэхэм лъэшэу агъэшӀэгъуагъ, ау Исус хъугъэшӀагъэр зыми рамыӀотэжьынэу афигъэпытагъ.
Исус игъогу рыкӀорэ нэбгырэ пшӀыкӀутӀур Тхьэм фэлэжьэнхэу зэрэдигъэкӀыгъэхэр
1 Исус игъогу рыкӀорэ нэбгырэ пшӀыкӀутӀур зэӀуигъакӀэхи, цӀыфмэ джынапцӀэхэр ахафынхэуи, яузхэр агъэхъужьынхэуи лъэкӀыныгъэрэ тетыгъорэ аритыгъ. 2 Тхьэм и Тетыгъошхо ехьылӀэгъэ къэбарышӀур агъэӀунэуи, сымаджэхэр агъэхъужьынхэуи дигъэкӀыгъэх. 3 Мырэущтэу ариӀуагъ: Гъогум шъузытехьэкӀэ, зи зыдэшъумышт, бэщи, Ӏалъмэкъи, хьалыгъуи, ахъщи зыдэшъумышт. ДжэнитӀуи зыщышъумылъ. 4 ХьакӀэу зы унэ горэм шъуихьэмэ, а чӀыпӀэм шъукъикӀыжьыфэ нэс, а унэм шъуис. 5 ЦӀыфхэм шъурамыгъэблагъэмэ, якъалэ шъукъызыдэкӀыжькӀэ, мыхъунэу ашӀагъэмкӀэ ахэмэ апашъхьэ шыхьат щыхъуным пае, шъулъакъохэм акӀэрылъ сапэр акӀэрыжъугъэтэкъужь. 6 Арэущтэу Исус игъогу рыкӀохэрэр ежьэхи, къуаджэмэ адэхьэадэкӀыхэу къэбарышӀур щагъэӀущтыгъ, тыдэкӀи сымаджэхэри щагъэхъужьыщтыгъэх.
Пщы Ирод зэрэгумэкӀыгъэр
7 Пщы Ирод Исус ышӀэгъэ пстэуми якъэбар зэхихыгъэти, гумэкӀи, зыфихьын ышӀэщтыгъэп, сыда пӀомэ цӀыф куп ыӀощтыгъ: Пегъымбар Иуан лӀагъэхэм къахэтэджыкӀыжьыгъ. 8 Пегъымбар Иляс къэлъэгъуагъ, аӀощтыгъ етӀанэ нэмыкӀхэми. Пэсэрэ пегъымбархэм ащыщэу горэ къэтэджыжьыгъ,аӀощтыгъ адрэхэми. 9 Ау Ирод къыӀуагъ: Иуан ышъхьэ дзэлӀхэм пязгъэупкӀыгъ. Адэ, мыщ фэдэ къэбархэр зэраӀуалӀэрэ лӀыр хэта? Арэущтэу къыӀозэ, Исус зэригъэлъэгъунэу ыуж итыгъ.
Исус нэбгырэ минитф зэригъэшхагъэр
10 Апостолхэм Исус ыдэжь къызагъэзэжьым, Ӏофхэу ашӀагъэхэр раӀотэжьыгъэх. ЕтӀанэ Исус цӀыфхэм ахэкӀи, апостолхэр зыдищэхэзэ, язакъоу ВифсайдэкӀэ заджэхэрэ къалэм кӀуагъэх. 11 Ау цӀыф купышхохэм ар къызашӀэм, Исус лъыкӀуагъэх. Исус ахэмэ дахэкӀэ къапэгъокӀыгъ, Тхьэм и Тетыгъошхо ехьылӀагъэуи адэгущыӀагъ, зэӀэзэн фаеу зищыкӀагъэхэри ыгъэхъужьыгъэх. 12 Мафэр хэкӀуатэу ыублагъ. Игъогу рыкӀорэ нэбгырэ пшӀыкӀутӀур Исус къыбгъодахьэхи къыраӀуагъ: КъоджэчӀылэ гъунэгъухэм кӀонхэшъ, гъолъыпӀэрэ гъомлапхъэрэ къагъотынхэм пае, цӀыф купышхор тӀупщыжь; сыда пӀомэ мы чӀыпӀэр Ӏудзыгъэшъ ары. 13 Шъо ахэр жъугъашхэх, ариӀуагъ Исус ахэмэ. Тэ хьалыгъуитфьфэ пцэжъыитӀурэ нахь тиӀэп, къаГуагъ ахэмэ, хьауми мы цӀыф пстэуми ашхын къафэтщэфынэу тыкӀона? 14 Ахэр лӀы минитф фэдиз хъущтыгъэх. ЕтӀанэ Исус игъогу рыкӀохэрэм ариӀуагъ: ЦӀыфхэр шъэныкъошъэныкъоу, купкупэу ежъугъэтӀысэхых. 15 Игъогу рыкӀохэрэм арэущтэу ашӀызэ, цӀыф пстэури рагъэтӀысэхыгъэх. 16 ЕтӀанэ Исус хьалыгъуитфымрэ пцэжъыитӀумрэ къыштэхи, уашъом дэплъыий, ахэмэ апае Тхьэм щытхъу фишӀыгъ. ЕтӀанэ хьалыгъухэр зэгуичыхи, цӀыфмэ апашъхьэ ралъхьанхэу игъогу рыкӀохэрэм аритыгъэх. 17 ЦӀыф пстэури шхагъэх ыкӀи загъэшхэкӀыгъ. Ащ нэужым хьалыгъу такъырхэу къялыжьыгъэхэр мэтэ пшӀыкӀутӀу арызэу аугъоижьыгъэх.
«Оры Тхьэм и Христос», ыӀуи, Петр Исус зэрэриӀуагъэр
18 Зы мафэ горэм чӀыпӀэ Ӏудзыгъэ горэм щыӀэу, игъогу рыкӀохэрэр игъусэхэу Исус Тхьэм зелъэӀу ужым, ахэмэ яупчӀыгъ: ЦӀыф купышхохэм сэ хэт сыщыщэу аӀора? 19 Зы купым о уумэхъэкӀо Иуанэу аӀо, къаӀожьыгъ ахэмэ. НэмыкӀхэми о упегъымбар Илясэу аӀо. ЕтӀанэ адрэхэми пэсэрэ пегъымбархэм ащыщэу зыгорэ къэтэджыжьыгъэу аӀо. 20 Адэ шъори, сэ хэт сыщыщэу шъуӀора? ариӀуагъ Исус. Оры Тхьэм и Христос, къыӀожьыгъ Петрэ.
Исус ежьыр зэраукӀыщтри, лӀагъэхэм къызэрахэтэджыкӀыжьыщтри къызэриӀуагъэр
21 Джащыгъум Исус ежьыр зэрэХристосыр зыми рамыӀотэжьынэу афигъэпытагъ. 22 ЦӀыф Лъэпкъым Ыкъо къиныбэ ыщэчын фаеу щыт,ыӀуагъ. Нахьыжъхэми, дин пэщэшхохэми, Тэурат егъэджэкӀо пащэхэми ежьыр зэрамыпэсын ыкӀи аукӀын фаеу щыт, ящэнэрэ мафэми лӀагъэхэм къахэтэджыкӀыжьын фаеу щыт. 23 Зыгорэ сэ сауж къырыкӀонэу фаемэ, ежьыр зыфэе Ӏофхэр къерэгъанэхи, лӀэныгъэм икъащ мафэ къэс къерэшти, сауж къырэрэкӀу, ариӀуагъ Исус ахэмэ зэкӀэмэ. 24 Сыда пӀомэ хэти зыпсэ мыкӀодэу къэзыгъэнэжьынэу фаем ыпсэ шӀокӀодыщт, ау хэти сэщ пае зыпсэ зышӀокӀодрэм ыпсэ мыкӀодэу къыгъэнэжьыщт. 25 Дунаер зэкӀэ зы цӀыфым ие хъоу, ежьыр кӀодмэ, е ыпсэ зэрар фэхъужьмэ, ишӀуагъэу къэкӀощтыр сыда? 26 Хэти сэррэ сэ сигущыӀэхэмрэ къыттеукӀытыхьарэм сэ, ЦӀыф Лъэпкъым Ыкъуи, а цӀыфым сытеукӀытыхьажьыщт, Ты лъапӀэмрэ мэлэӀич лъапӀэхэмрэ ящытхъушхо фэдэ щытхъушхо сиӀэу сыкъызыкӀожькӀэ. 27 Шъыпкъэр шъосэӀо, Тхьэм и Тетыгъошхо алъэгъуфэ, мыщ дэжьым щыт цӀыфхэм ащыщхэу заулэм лӀэныгъэр алъэгъущтэп.
Исус итеплъэ зэрэзэрихъокӀыгъэр
28 Исус а гущыӀэхэр къызеӀохэ ужым мэфий тешӀагъэу, Петри, Иуани, Якъуби зыдищэхи, Тхьэм елъэӀунэу Ӏуашъхьэм дэкӀоягъ. 29 Тхьэм елъэӀузэ, ынапэ итеплъэ зэрихъокӀыгъ, ищыгъынхэри фыжьыбзэу, къэлыдэу хъугъэх. 30 Зэплъэхэм, нэбгыритӀу Исус къыдэгущыӀэу щытэу алъэ гъугъ. Ахэр пегъымбар Мусэрэ Илясрэ арыгъэх. 31 Нэфынэ гъэшӀэгъонышхом къыхэлыдыкӀыхэу къэлъэгъуагъэх, Исус Ерусалим дунаем зэрэщехыжьын фаеми тегущыӀагъэх. 32 Петрэрэ игъусэхэмрэ хэчъыягъэх, ау къызэущыжьхэм, Исус нэфынэ гъэшӀэгъонышхом хэтэу, къыхэлыдыкӀэу адрэ нэбгыритӀур къыбгъодэтхэу алъэгъугъэх. 33 А нэбгыритӀур ӀукӀыжьхэ зэхъум, Петрэ Исус риӀуагъ: Тхьаматэ, мыщ дэжьым тызэрэщыӀэр дэгъу. Чэлищ щыдгъэӀэн, ощ пае зы, Мусэ паий зы, Иляс паий зы. Петрэ ыӀорэр ымышӀэу ащ фэдэу къыӀуагъ. 34 Петр гущыӀэзэ, ошъуапщэ къакӀуи, ахэмэ къашъхьэщыхьагъ. Ошъуапщэр къызашъхьэщэхьэм, Исус игъогу рыкӀохэрэр къэщтагъэх. 35 Ошъуапщэм зы макъэ горэ къыхэӀукӀыгъ: Мары сэ шӀу слъэгъурэ Скъо кӀасэр. Ащ ыӀорэм шъуедэӀу. 36 А макъэр къызэӀу ужым, Исус изакъоу къэнагъ. Ау игъогу рыкӀохэрэм алъэгъугъэр а мафэхэм зыми рамыӀуатэу аушъэфыгъ.
Исус джынапцӀэ зыхэс кӀалэ горэ зэригъэхъужьыгъэр
37 ЯтӀонэрэ мафэм ахэр Ӏуашъхьэм къызехыжьхэм, цӀыф купышхо Исус къыпэгъокӀыгъ. 38 ОшӀэдэмышӀэу а цӀыф купышхом зы лӀы горэ къыхэкуукӀыгъ: Дин гъэсакӀу, сэ скъо усфеплъынэу сыолъэӀу, а къо закъор ары сиӀэр. 39 ДжынапцӀэ горэм кӀалэр зэкӀеубытэшъ, ошӀэдэмышӀэу егъэкуо. КӀалэм ыжэ Ӏупс къыӀутӀэтӀэу, джынапцӀэм ар къегъэкӀэзэзышъ, къинышхо римыгъахьэу хэкӀыжьырэп. 40 О уигъогу рыкӀохэрэм джынапцӀэр хафынэу сялъэӀугъ, арышъхьакӀэ ахэмэ ар хафын алъэкӀыгъэп. 41 Еоой, шӀошъхъуныгъэ зимыӀэхэу, джырэ цӀыф къуанчэхэр, къыӀожьыгъ Исус. Сыд фэдизрэ сышъухэтын ыкӀи шъусщыӀэн фая? О пкъо мо къащэ. 42 Ау кӀалэр къакӀозэ, джынэпцӀэ Ӏаем ар чӀыгум ты ридзи ыгъэкӀэзэзыгъ. Исус джынэпцӀэ Ӏаем егыий, кӀалэр ыгъэхъужьыгъ, яти ритыжьыгъ. 43 ЦӀыф пстэуми Тхьэм илъэкӀыныгъэшхо лъэшэу агъэшӀэгъуагъ.
Исус ежьыр цӀыфхэм зэраӀэкӀэхьащтыр ятӀонэрэу къызэриӀуагъэр
ЦӀыф пстэуми Исус Ӏофхэу ышӀагъэ пстэури агъэшӀагъохэ зэхъум, игъогу рыкӀохэрэм ариӀуагъ: 44 Мы гущыӀэхэр шъутхьакӀумэхэм арыжъугъахь. ЦӀыф Лъэпкъым Ыкъо цӀыфхэм аӀэкӀэхьащт. 45 Ау а гущыӀэхэм къарыкӀырэр къагурыӀуагъэп. А гущыӀэхэр къагурыӀон амылъэкӀынэу ахэмкӀэ гъэбылъыгъэу щытыгъэх, а гущыӀэхэм яхьылӀагъэуи Исус къеупчӀынхэу щынэщтыгъэх.
Хэта анахь ин дэдэр?
46 Исус игъогу рыкӀохэрэм, «Тэ тщыщэу хэта анахь иныр?» аӀоу, зэнэкъокъуныгъэ къахэхьагъ. 47 Исус ахэмэ агухэм арылъыр ышӀэзэ, зы сабый горэ къышти, ыбгъукӀэ ыгъэуцуи ариӀуагъ: 48 Хэти мы сабыир сэ сцӀэкӀэ къезыгъэблагъэрэм сэ сыригъэблэгъагъэу мэхъу, хэти сэ сезыгъэблагъэрэми сэ сыкъэзыгъэкӀуагъэри ригъэблэгъагъэу мэхъу, сыда пӀомэ шъуащыщэу анахь цӀыкӀур ары анахь ин дэдэр.
Къышъупэмыуцурэр шъуигъус
49 Тхьаматэ, о пцӀэкӀэ лӀы горэм джынапцӀэхэр цӀыфхэм ахифхэу тлъэгъугъэ, къыӀуагъ Иуан. Ар тэ зэрэтщымыщым пае, зэтетӀэжьэнэу тыпылъыгъ. 50 ЗэтешъумыӀажь ар, къыриӀожьыгъ Исус, сыда пӀомэ шъо къышъупэмыуцурэр шъуигъусэшъ ары.
Самарие хэкум щыщ къуаджэ горэм дэсхэм Исус рагъэблэгъэнэу зэрамыдагъэр
51 Тхьэм Исус уашъом зыдищэежьыщт мафэр къызэблагъэм, Исус Ерусалим кӀонэу тыриубытагъ. 52 ЛӀыкӀохэр ыпэ рапшӀэу ыгъэкӀуагъэх. Ахэр кӀохи, Самарие хэкум щыщэу зы къуаджэ горэм зыщыхьакӀэн чӀыпӀэ къыфагъэхьазырынэу дэхьагъэх. 53 Ау Исус Ерусалим зэрэкӀорэм пае, а къуаджэм дэс цӀыфхэм рагъэблэгъэнэу адагъэп. 54 Ар залъэгъум, Исус игъогу рыкӀохэрэм ащыщхэу Якъубэрэ Иуанрэ къаӀуагъ: Зиусхьан, уашъом машӀо къехэу мы цӀыфхэр ыгъэстынхэу тӀона? 55 Ау Исус ахэмэ зафигъази, афимыдэу ариӀуагъ: Хьау, ар хъущтэп; 56 сыда пӀомэ ЦӀыф Лъэпкъым Ыкъо къызфэкӀуагъэр цӀыфхэр ыгъэкӀодынхэу арэп, мыкӀодхэу къыгъэнэжьынхэу ары нахь. ЕтӀанэ нэмыкӀ къуаджэ горэм кӀуагъэх.
Исус игъогу рыкӀоным къин щэчыныгъэу хэлъыр
57 Гъогум рыкӀохэзэ, зыгорэм Исус къыриӀуагъ: Тыдэ укӀоми, уауж сыкъырыкӀощт. 58 Баджэхэм исынхэу бы яӀ, ошъогу бзыухэми набгъо яӀ, ау ЦӀыф Лъэпкъым Ыкъо ышъхьэ зэрихьылӀэжьын чӀыпӀэ иӀэп, риӀожьыгъ Исус. 59 Сауж къырыкӀу, риӀуагъ Исус нэмыкӀ горэм. Тхьаматэ, къыӀожьыгъ адрэм, ыпэ рапшӀэу сыкӀо нышъ, сятэ чӀэслъхьажьынэу фит сыкъэшӀ. 60 ЛӀагъэхэу щытхэм ежьхэм ялӀагъэхэм яхьадэхэр чӀарэлъхьажьых, риӀожьыгъ Исус. Ау о кӀуи, Тхьэм и Тетыгъошхо ехьылӀэгъэ къэбарышӀур гъэӀу. 61 Сэ уауж сыкъырыкӀощт, тхьаматэ, къыӀуагъ нэмыкӀ горэми. Ау ыпэ рапшӀэу сэ сибынхэм аӀапэ сыубытыжьынэу фит сыкъэшӀ. 62 ПхъэӀэшэкӀыр зыубытыгъэу къызэплъэкӀыжьырэр Тхьэм и Тетыгъошхо фэлэжьэнэу ифэшъуашэп, ыӀуи, Исус ащ риӀожьыгъ.
Исус игъогу рыкӀорэ нэбгырэ тӀокӀищырэ пшӀырэ Тхьэм фэлэжьэнхэу зэрэдигъэкӀыгъэхэр
1 Ащ нэужым Зиусхьаным нэбгырэ тӀокӀищырэ пшӀырэ къыгъэлъагъохи, тэдрэ къалэуи тэдрэ чӀыпӀэуи ежьыр зыдэкӀон фаем тӀурытӀоу ыпэрапшӀэу ыгъэкӀуагъэх. 2 Мырэущтэу ариӀуагъ: Лэжьыгъэр бэ, ау лэжьакӀохэр макӀэх. Арышъ, лэжьыгъэр зием шъуелъэӀу, лэжьыгъэр къахыжьыным пае, лэжьакӀохэр къыгъэкӀонхэу. 3 ШъукӀу! Мо шъукъэдаӀу, шъынэхэм шъуафэдэу тыгъужъхэм шъуахэсэгъахьэ. 4 Ахъщалъи, Ӏалъмэкъи, цуакъи зыдэшъумыштэх. Гъогум зыми шӀуфэс щешъумых. 5 ХьакӀэу зы унэ горэм шъузихьэкӀэ, ыпэ рапшӀэу, «Тхьэм шъо мы унэм исхэм гупсэфыныгъэ къышъуерэт», шъуӀуи, шӀуфэс яшъух. 6 А гупсэфыныгъэр зифэшъошэ цӀыф а унэм исмэ, Тхьэм гупсэфыныгъэр ащ къыритыщт. Имысмэ, гупсэфыныгъэр шъо къышъуфэкӀожьыщт. 7 А унэм шъукъини, къышъуатырэри шъушхы ыкӀи шъуешъу, сыда пӀомэ лэжьакӀом илэжьапкӀэ ыгъотынэу ифэшъуашэшъ ары. Бысымыр зэшъухъокӀэу, зы унэм шъукъикӀэу, нэмыкӀ цӀыфым иунэ шъуимыхь. 8 Зы къалэ горэм шъудахьэу шъузырагъэблагъэкӀэ, ащ дэжьым къышъуатырэр шъушхы. 9 Сымаджэхэр ащ дэжьым щыжъугъэхъужьых, мырэущтэуи яшъуӀу: «Тхьэм и Тетыгъошхо къышъупэблэгъагъ». 10 Ау зы къалэ горэм шъудахьэу, ащ дэжьым шъущырамыгъэблагъэмэ, иурамхэм шъуатехьи, мырэущтэу шъуӀо: 11 «Шъуикъалэ исапэу тэ тлъакъохэм акӀэрылъыр къышъутетэтэкъожьы; ау щытми зэжъугъашӀэ, Тхьэм и Тетыгъошхо къызэрэблэ гъагъэр». 12 Сэ шъосэӀо, ахърэт мафэм а къалэм къинэу ыщэчыщтым нахьи, Содом къалэм къинэу ыщэчыщтыр нахь мэкӀэщт.
Сыхьатмыгъо уежьагъ, Хоразин къалэ! Сыхьатмыгъо уежьагъ, Вифсайдэ къалэ!
13 Сыхьатмыгъо уежьагъ, Хоразин къалэ! Сыхьатмыгъо уежьагъ, Вифсайдэ къалэ! Сыда пӀомэ шъуадэжь сэ щысшӀэгъэ Ӏофышхо гъэшӀэгъонхэр къалэхэу Тиррэ Сидонрэ ащысшӀагъэхэу щытыгъэмэ, бэшӀагъэу шъыгъоныгъэ щыгъын ащыгъхэу, анэгухэр яжьэкӀэ цӀэлагъэхэу япсэкӀодшӀагъэхэм афыкӀэгъожьыщтгъэх. 14 Ау ахърэт мафэм шъо къинэу шъущэчыщтым нахьи, Тиррэ Сидонрэ къинэу ащэчыщтыр нахь мэкӀэщт. 15 О Капернаум къалэ, уашъом удэкӀоена? Джэхьнэмым икуупӀэ нэсыфэ упхырызыщт нахь. 16 Шъо къышъодэӀурэр, сэри къысэдэӀу. Шъо шъузымыдэрэм сэри сидэрэп, сэ сызымыдэрэми сэ сыкъэзыгъэкӀуагъэри ыдэрэп.
Исус игъогу рыкӀорэ нэбгырэ тӀокӀищырэ пшӀырэм къызэрагъэзэжьыгъэр
17 Исус игъогу рыкӀорэ нэбгырэ тӀокӀищырэ пшӀырэмэ гушӀуагъокӀэ къагъэзэжьи аӀуагъ. Зиусхьан, о пцӀэ къызытӀокӀэ, джынапцӀэхэри тэ тӀэмычӀэ илъ мэхъух. 18 Шъыпкъэ, пчыкӀэм фэдэу шэйтаныр уашъом къефэхэу сэ слъэгъугъэ, ариӀуагъ Исус. 19 Блэхэми скор пионхэми шъуатеуцонэуи, пыим ыкӀуачӀэ зэкӀэ шъутекӀонэуи тетыгъо шъостыгъ; зыми иягъэ къышъокӀыщтэп. 20 Ау джынапцӀэхэр шъуӀэмычӀэ зэрилъхэм пае, шъумыгушӀу, шъуцӀэхэр уашъом итхылъ зэритхэм пае, шъугушӀо нахь.
Исус зэрэгушӀуагъэр
21 А сыхьатым Тхьэм Ыпсэ ЛъапӀэ инэу къыгъэгушӀоу Исус къыӀуагъ: Сят, уашъоми чӀылъэми я Зиусхьан, мы Ӏофхэр цӀыф Ӏушхэмрэ цӀыф губзыгъэхэмрэ ашӀоушъэфыгъэу, сабыйхэм зэрябгъэшӀагъэмкӀэ щытхъу пфэсэшӀы. Ары, Сят, о ар арэущтэу пшӀоигъуагъ. 22 ЕтӀанэ Исус игъогу рыкӀохэрэм зафигъази къыӀуагъ: Сятэ щыӀэ пстэури къысӀэкӀилъхьагъ. Къо лъапӀэр зыфэдэр Ты лъапӀэм нэмыкӀ зыми ышӀэрэп. Ты лъапӀэр зыфэдэри Къо лъапӀэмрэ Къо лъапӀэм зэригъэшӀэнхэу фэе цӀыфхэмрэ анэмыкӀ зыми ышӀэрэп. 23 Исусрэ игъогу рыкӀохэрэмрэ язакъоу къызэнэжьхэм, Исус ахэмэ зафигъази ариӀуагъ: Шъо шъунэхэм алъэгъурэр зылъэгъурэ нэхэр сыхьатмафэ ежьагъэх! 24 Сыда пӀомэ сэ шъосэӀо, пегъымбар Ӏаджи пачъыхьэ Ӏаджи шъо шъулъэгъурэр алъэгъунэу ашӀоигъуагъ, ау алъэгъугъэп, шъо зэхэшъухырэри зэхахынэу ашӀоигъуагъ, ау зэхахыгъэп.
Самарие хэкум щыщэу гукӀэгъу зыхэлъ цӀыфыр
25 Зы Тэурат егъэджэкӀо пащэ горэ къэтэджи, Исус ыгъэунэфыным пае, къыӀуагъ: Дин гъэсакӀу, мыкӀодыжьын щыӀэныгъэ ӀэхьышӀоу къыслъысыным пае, сыда сшӀэщтыр? 26 Тэурат хабзэм сыда итыр? риӀожьыгъ Исус. Сыдэущтэу укъеджэра? 27 «ЗэкӀэ о угурэ упсэрэкӀи, зэкӀэ пкӀуачӀэкӀи, зэкӀэ уизэхэшӀыкӀыныгъэкӀи Зиусхьанэу уи Тхьэ тпӀу лъэгъу, о пшъхьи шӀу зэрэплъэгъурэм фэдэу, уигъунэгъури шӀу лъэгъу», къыӀожьыгъ адрэм. 28 ПӀъыпкъэр къэпӀуагъ, риӀуагъ Исус а лӀым. А къэпӀуагъэр гъэцакӀи, мыкӀодыжьын щыӀэныгъэ бгъотыщт. 29 Ау Тэурат егъэджэкӀо пащэм зигъэхыенэу фэягъэти, Исус риӀуагъ: Хэта адэ сэ сигъунэгъу? 30 Зы лӀы горэ Ерусалим дэкӀи, Ерихон къалэм ехызэ, хъункӀакӀомэ аӀэкӀэфагъ, къыӀожьыгъ Исус. ХъункӀакӀомэ ар ахъункӀыгъ, ищыгъынхэри щахыгъ, Ӏаеу еохи, ыпсэ пыт къодыеу къагъани, хэхьажьыгъэх. 31 А сыхьат дэдэм зы дин пащэ горэ а гъогумкӀэ ехынэу хъугъэ. А лӀыр зелъэгъум, гъогум иадрабгъумкӀэ блэкӀыгъ. 32 Ащ фэдэу Левый зыцӀэ унэгъо лъэпкъым щыщэу зы дин пащэ горэ а чӀыпӀэм нэси, а лӀыр зелъэгъум, гъогум иадрабгъумкӀэ блэкӀыгъ. 33 Ау Самарие хэкум щыщэу зы лӀы горэ а гъогум рыкӀозэ, а лӀым ыдэжь къэсыгъ. Ар зелъэгъум, ыгу егъуи, 34 бгъодэхьагъ, иуӀагъэхэм дагъэрэ сэнэпсырэкӀэ яӀази ыпхыгъэх. ЕтӀани а лӀыр къыӀэти, ежьыр зытесыгъэ щыдым тырилъхьи, хьакӀэщ горэм рихьи, лъыплъагъ. 35 ЯтӀонэрэ мафэм динаритӀу ыджыбэ къырихи, хьакӀэщыр зием рити, къыӀуагъ: «О мы лӀым лъыплъи, сыд фэдиз нахьыбэу тебгъэкӀуадэми, къызызгъэзэжькӀэ, остыжьыщт». 36 Джы, о зэрэпшӀошӀьфэмкӀэ мы нэбгырищым ащыщэу хъункӀакӀохэм аӀэкӀэфэгъэ лӀым игъунэгъу фэдэу хэта нахьышӀоу дэзекӀуагъэр? къыпигъэхъожьыгъ Исус. 37 ЛӀэу гукӀэгъу фэзышӀыгъэр ары, къыӀуагъ Тэурат егъэджэкӀо пащэм. Ори кӀуи, ащ фэдэу шӀэ, риӀуагъ Исус.
Мерэмрэ Марфэрэ
38 ЕтӀанэ Исусрэ игъогу рыкӀохэрэмрэ ягъогу рыкӀохэзэ, зы къуаджэ горэм зыдахьэхэм, Марфэ зыцӀэу бзылъфыгъэ горэм иунэ Исус ригъэблэгъагъ. 39 А бзылъфыгъэм Мерэм ыцӀэу зы шыпхъу иӀагъ. А шыпхъур Зиусхьаным игущыӀэхэм ядэӀоу, ылъакъохэм адэжь щысыгъ. 40 Ау ыгъэхьэкӀэнхэм иӀофхэр Марфэ шӀобаӀо хъугъэх. Арыти, ар Исус къыбгъодахьи къыриӀуагъ: Зиусхьан, Ӏофхэр зэкӀэ сэ сизакъоу сшӀэнхэу сшыпхъу сыкъызэригъанэрэр пшӀоемыкӀуба? Ар къыздэӀэпыӀэнэу еГу! 41 Ей Марфэу си Марф, риӀожьыгъ Зиусхьаным, о Ӏоф бащэмэ зябгъэгъэгумэкӀэу зыогъалӀэ. 42 Ау зы ныӀэп уищыкӀагъэр. Мерэм Ӏэхьэ нахьышӀур къыхихыгъ, а ӀэхьышӀури ащ Ӏахыжьыщтэп.
Тхьэм елъэӀугъэным ехьылӀагъ
1 Зы чӀыпӀэ горэм Исус Тхьэм щелъэӀущтыгъ. Тхьэм зелъэӀу ужым, игъогу рыкӀохэрэм ащыщэу зыгорэм ежьым къыриӀуагъ: Зиусхьан, умэхъэкӀо Иуан игъогу рыкӀохэрэм Тхьэм узэрелъэӀун фэе шӀыкӀэр зэраригъэшӀагъэм фэдэу, ори тэ тэгъашӀэ. 2 Тхьэм шъуелъэӀу зыхъукӀэ, мырэущтэу шъуӀо, ариӀуагъ Исус. «О Тятэ лъапӀэу уашъом щыӀэр! ПцӀэ цӀыфхэм агъэлъапӀэу орэхъу. Уи Тетыгъошхо къэрэкӀу. Узыфаер уашъом зэрэщыхъурэм фэдэу, чӀылъэми щэрэхъу. 3 Хьалыгъоу тищыкӀагъэр мафэ къэси къытэт. 4 Тэ типсэкӀодхэр къытфэгъэгъух, сыда пӀомэ тэри хэти мыхъун къытэзышӀэрэм фэтэгъэгъу. Шэйтаным псэкӀод тигъэшӀэнэу фит умышӀы, ащи тыщыухъум». 5 Шъо шъуащыщэу зыгорэм ныбджэгъу иӀэу тӀон,ариӀуагъ Исус. Чэщныкъом а ныбджэгъум иунэ макӀошъ, реӀо: «Синыбджэгъу, чӀыфэу хьалыгъуищ къысэт, 6 сыда пӀомэ синыбджэгъу горэ гъогурыкӀоу къысфэкӀуагъ. Езгъэшхын зи сиӀэп». 7 Арэущтэу зеӀом, унэм ис ныбджэгъум адрэм къыреӀожьы: «Сымыгъэулэу. Къэлапчъэр гъэпытагъэ, сисабыйхэри сигъусэхэу пӀэм хэлъых. Сыкъэтэджэу зыгорэ остын слъэкӀыщтэп». 8 Сэ шъосэӀо, къыпигъэхъожьыгъ Исус, зэриныбджэгъум пае, къэтэджэу хьалыгъур къыримытыщтми, ыуж зэримыкӀыжьырэм пае къэтэджынышъ, зыфаер зэкӀэ къыритыщт. 9 Арышъ, шъосэӀо, шъуелъэӀуи Тхьэм къышъуитыщт; шъулъыхъуи къэжъугъотыщт; къэлапчъэми шъутеуи, Тхьэм къышъуфыӀуихыщт; 10 сыда пӀомэ хэтми лъаӀорэм зыкӀэлъэӀурэр иӀэ хъущт, лъыхъурэми зылъыхъурэр къыгъотыщт; къэлапчъэм теорэми Тхьэм къыфыӀуихыщт. 11 Ты къышъухэта, зыкъо хьалыгъу пае къелъэӀумэ, мыжъо езытыщтыр, е пцэжъые пае къелъэӀумэ, блэ езытыщтыр, 12 е кӀэнкӀэ пае къелъэӀумэ, скорпион езытыщтыр? 13 Арэущтэу шъо шъубзаджэ пэтми, шъуибынхэм шӀу зэряшъутыщтыр шъошӀэ. Ащ нахьи нахьыбэу Ты лъапӀэу уашъом щыӀэм ежьым елъэӀухэрэм ежь ЬӀпсэ ЛъапӀэ къаритыщтба?
Исусрэ джынапцӀэхэм япащэу Велзевулрэ
14 Исус лӀы бзако горэм джынапцӀэу ащ ыбзэ зыубытырэр хифыгъ. ДжынапцӀэр зыхэкӀыжьым, бзакоу щытыгъэ лӀыр къэгущыӀагъ. ЦӀыф купышхохэм агъэшӀэгъуагъ. 15 Ау ащыщхэу заулэмэ къаГуагъ: Велзевулэу джынапцӀэхэм япащэ илъэкӀыныгъэ ары джынапцӀэхэр цӀыфхэм зэрахифырэр. 16 НэмыкӀхэми Исус агъэунэфыным пае, зы нэшэнэ гъэшӀэгъонышхо горэ уашъом къафыригъэхынэу фэягъэх. 17 Ау ахэмэ ягухэлъхэр Исус ышӀэхэзэ ариӀуагъ: Сыдрэ зы пачъыхьагъуи лъэныкъуитӀоу зигощымэ, зэхэтэкъощт, унэ гори лъэныкъуитӀоу гощыгъэ хъумэ, къызэхэощт. 18 Шэйтанри лъэныкъуитӀоу зэрэгъэхъумэ, итетыгъо сыдэущтэу щыӀэжьын ылъэкӀына? Ар зыкӀасӀорэр Велзевул илъэкӀыныгъэкӀэ сэ джынапцӀэхэр цӀыфхэм ахэсэфыхэу шъоӀошъ ары. 19 Адэ, Велзевул илъэкӀыныгъэкӀэ сэ джынапцӀэхэр цӀыфхэм ахэсэфыхэмэ, шъо шъуицӀыфхэм джынапцӀэхэр зэрахафырэр хэт илъэкӀыныгъэу хъура? Арышъ, ахэр шъо шъуихьыкумышӀэхэу хъущтых. 20 Ау сэ джынапцӀэхэр цӀыфхэм зэрахэсфырэр Тхьэм ыӀэхъуамбэшъ, Тхьэм и Тетыгъошхо къызэрэшъухэхьагъэр ары ащ къикӀырэр. 21 КӀуачӀэ зиӀэ лӀы горэм ӀашэкӀэ дэгъоу тегъэпсыхьагъэу, иунэ къыухъумэ зыхъукӀэ, имылъкукӀэ щынагъо щыӀэп. 22 Ау ащ нахьи нахь кӀочӀэшхо зиӀэ лӀы горэ ащ къытебанэу къызытекӀокӀэ, Ӏашэу зыщыгугъыхэрэр къытырихынхэшъ, ахэр зэкӀэ ыгощыжьыщтых. 23 Сэ симыгъусэр къыспэуцу, сэ къыздэзымыугъоирэми ретэкъухьэ.
ДжынэпцӀэ Ӏаем къызэригъэзэжьырэр
24 Зы джынэпцӀэ Ӏае горэ цӀыф горэм зыхэкӀыкӀэ, псы зэрымыт шъоф нэкӀым макӀошъ, зыгъэпсэфыпӀэ горэм лъыхъоу къекӀухьэ. ЗыгъэпсэфыпӀэ ымыгъотэу, «Сызыхэсыгъэ лӀэу сэ сиунэу щытыгъэм ыдэжь згъэзэжьыщт», еӀо. 25 Ащ ыдэжь къегъэзэжьышъ, унэр пхъэнкӀыгъэу, зэлъыӀухыгъэу къегъотыжьы. 26 Джащыгъум макӀо, джынэпцӀибл ежьым нахьи нахь бзаджэхэу къыздещэхэшъ, унэм ехьэхэшъ етӀысхьэх. ЫкӀэм ыкӀэжьым а лӀым иӀоф ыпэм нахьи нахь дэи мэхъу. 27 А гущыӀэхэр Исус къыӀохэзэ, цӀыф купышхом хэтэу зы бзылъфыгъэ горэм ымакъэ Ӏэтыгъэу къыриӀуагъ: Ныбэу узэрылъыгъэри, бгъэу узкӀэшъугъэри сыхьатмафэ ежьагъэх. 28 Шъыпкъэ, къыӀуагъ Исус, ау Тхьэм игущыӀэхэр зэхэзыхэу, ахэри зыгъэцакӀэрэр ащ нахьи нахь сыхьатмафэ ежьагъэх.
ЦӀыф Лъэпкъым Ыкъо цӀыфхэм нэшанэ зэрафэхъурэр
29 ЦӀыфхэр нахь купышхохэу Исус ыдэжь къыщызэрэугъоихэ зэхъум, ащ къыӀуагъ: Джырэ цӀыфхэр бзаджэх. Ахэр нэшэнэ гъэшӀэгъонышхо фаех, ау пегъымбар Юныс инэшанэ нэмыкӀ Тхьэм ахэмэ къаритыщтэп, 30 сыда пӀомэ Юныс Ниневие къалэм дэсыгъэ цӀыфхэм нэшанэ зэрафэхъугъэм фэдэу, ЦӀыф Лъэпкъым Ыкъо джырэ цӀыфхэм нэшанэ афэхъущт. 31 Ау сэ шъосэӀо, къыблэ хэгъэгум щыщэу бзылъфыгъэ пачъыхьэр ахърэт мафэм къэтэджынышъ, джырэ цӀыфхэм къядэощт ыкӀи къыгъэмысэщтых, сыда пӀомэ а бзылъфыгъэ пачъыхьэр пачъыхьэ Сэлмэн изэхэшӀыкӀыныгъэ едэӀунэу чӀылъэм ыкъуапэ къикӀи къэкӀуагъ, ыкӀи мары пачъыхьэ Сэлмэн нахьи нахь инэу зыгорэ къышъухэт. 32 Ниневие къалэм дэсыгъэ цӀыфхэр ахърэт мафэм къэтэджынхэшъ, джырэ цӀыфхэм къядэощтых ыкӀи къагъэмысэщтых, сыда пӀомэ ахэмэ Тхьэм игущыӀэхэр Юныс аригъэӀухэу зызэхаххэм, япсэкӀодшӀагъэхэм афыкӀэгъожьыгъэх, ыкӀи мары Юныс нахьи нахь инэу зыгорэ къышъухэт.
Пкъым иостыгъ
33 Зыми остыгъэ' хигъанэу, гъэбылъыгъэ къогъу горэм ар къуигъэуцорэп е щэлъэ чӀэгъым чӀигъэуцорэп, унэм къихьэхэрэм инэфынэ алъэгъуным пае, итетыпӀэ лъагэ тырегъэуцо нахь. 34 Пкъым иостыгъэ нэр ары. Арышъ, о унэ псаумэ, зэкӀэ ппкъы нэфынэщт. Ау о унэ дэимэ, зэкӀэ о ппкъы шӀункӀыщт. 35 Арышъ, о пхэлъ нэфынэр шӀункӀыгъэ мыхъуным фэсакъ. 36 Арэущтэу зэкӀэ о ппкъы шӀункӀыгъэ хэмылъэу нэфынэ хизмэ, зэкӀэ о ппкъы нэфынэу хъущт, остыгъэ нэфынэм укъызэригъэнэфырэм фэдэу.
Исус Тэурат егъэджэкӀо пащэхэмрэ фарисейхэмрэ ямысагъэ къызэригъэлъэгъуагъэр
37 Исус а гущыӀэхэр къызеӀохэ ужым, фарисей горэм ежьыр ыгъэшхэнэу иунэ ригъэблэгъагъ. Исус ащ иунэ ихьи, Ӏанэм пэтӀысхьагъ. 38 Шхэным ыпэкӀэ Исус ыӀэхэр зэримытхьакӀыгъэхэр фарисеим зелъэгъум, ыгъэшӀэгъуагъ. 39 Шъо фарисейхэм шъуишъуалъэхэмрэ шъуилагъэхэмрэ акӀыбхэр шъогъэкъабзэх, риӀуагъ Зиусхьаным, ау нэйпсыягъэрэ бзэджагъэрэ нахь зи шъукӀоцӀылъэп. 40 Шъо акъыл зимыӀэхэр! Тхьэу кӀыбыр къэзыгъэхъугъэм кӀоцӀыри къыгъэхъугъэба? 41 Ау шъо шъуишъуалъэхэмрэ шъуилагъэхэмрэ акӀоцӀ илъыр тхьамыкӀэхэм яшъогъэшхышъ, шъоркӀэ зэкӀэ къабзэу хъущт. 42 Ау сыхьатмыгъо шъуежьагъ, шъо фарисейхэр! Хатэм къыдэкӀагъэхэм анахь пыутыхэм ащыщэу зы пшӀанэр Тхьэм пае шъоты, ау зэфагъэмрэ Тхьэр шӀу зэрэшъулъэгъурэмрэ къэшъогъанэх. Ахэр ары жъугъэцэкӀэн фаехэр, адрэ Ӏофхэри къэшъумыгъанэхэу. 43 Сыхьатмыгъо шъуежьагъ, шъо фарисейхэр! Синэгогухэм тхьамэтэ тӀысыпӀэхэр ащышъуубытынхэри, зэӀукӀэхэм цӀыфхэр шъуӀэхэм щяжъугъэбэунхэри шӀу шъолъэгъу. 44 Сыхьатмыгъо шъуежьагъ, шъо Тэурат егъэджэкӀо пащэхэри, Фарисейхэри, шъо нэпитӀу зиӀэхэр, сыда пӀомэ хэкӀодэжьыгъэ къэхэмэ шъо шъуафэд. ЦӀыфхэм гу лъамытэу, ахэмэ акӀыӀу рэкӀох. 45 Тэурат егъэджэкӀо пащэхэм ащыщэу зыгорэм Исус къыриӀуагъ: Дин гъэсакӀу, арэущтэу пӀомэ, тэри укъытэхъоны. 46 Шъо Тэурат егъэджэкӀо пащэхэри, сыхьатмыгъо шъуежьагъ, къыӀожьыгъ Исус, сыда пӀомэ хьылъэ зехьэгъуаехэр цӀыфхэм атешъолъхьэх, ау ахэмэ шъуадэӀэпыӀэнэу зы Ӏэхъуамби жъугъэхъыерэп. 47 Сыхьатмыгъо шъуежьагъ! Пегъымбархэу шъо шъуятэжъхэм аукӀыгъагъэхэм апае къэунэхэр шъогъэуцухэшъ, 48 шъуятэжъхэм ашӀэгъагъэхэм шъори зэрадежъугъаштэрэр къэшъоушыхьаты; сыда пӀомэ шъуятэжъхэр арыба пегъымбархэр зыукӀыгъагъэхэр, шъорыба къэунэхэр афэзыгъэуцухэрэр? 49 Ащ пае Тхьэм изэхэшӀыкӀыныгъэшхокӀэ къыӀуагъ: «Пегъымбархэри апостолхэри ахэмэ афэзгъэкӀощтых. Ахэмэ ащыщэу зы купыр къаукӀыщт, зы купыми къин рагъэщэчыщт». 50 , 51 Арышъ шъосэӀо, пегъымбар Авел ылъ щегъэжьагъэу пегъымбар Зэкъарие ылъ къыхиубытэу, зэкӀэ пегъымбархэм ялъыуасэ джырэ цӀыфхэм Тхьэм аригъэпщыныжьыщт. Пегъымбар Зэкъарие ары къурмэн шӀыпӀэмрэ Тхьэм иунэшхорэ азыфагу щагъэкӀодыгъагъэр. Шъыпкъэр шъосэӀо, ахэмэ зэкӀэ ялъыуасэ джырэ цӀыфхэм Тхьэм аригъэпщыныжьыщт. 52 Сыхьатмыгъо шъуежьагъ, Тэурат егъэджэкӀо пащэхэр, сыда пӀомэ шӀэныгъэм иӀункӀыбзэ шъо шъуштагъэ. Ау шӀэныгъэм иунэ шъо шъуихьагъэп, ихьанхэу фэягъэхэри ихьанхэу фит шъушӀыгъэхэп. 53, 54 Дщ дэжьым Исус зыӀокӀыжьым, Тэурат егъэджэкӀо пащэхэмрэ фарисейхэмрэ ежьыр хагъэукъоным фаехэу, Ӏоф горэм хаубытэным ешакӀохэу, ӀофыбэхэмкӀэ еупчӀыхэзэ рагъэзэу аублагъ.
НэпитӀугъэм шъуфэсакъ
1 Джащыгъум цӀыфхэм хэуцуапӀэ амыгъотыжьэу, купышхо мин пчъагъэкӀэ къызызэӀокӀэхэм, Исус апэу игъогу рыкӀохэрэм ариӀоу къыублагъ: Фарисейхэм ятэджэпсэу янэпитӀугъэ шъуфэсакъ. 2 Къэмылъэгъожьынэу чӀэухъумагъэу зи щыӀэп, цӀыфхэм къамышӀэнэуи гъэбылъыгъэу зи щыӀэп. 3 Ащ къыхэкӀыкӀэ, мэзахэм щышъуӀуагъэр мэфэ нэфынэм цӀыфхэм зэхахыжьыщт, унэ кӀоцӀым шъущыӀушъашъэу тхьакӀумэм ишъуӀуагъэри унашъхьэхэм атетхэу къыщаӀотэжьыщт.
Шъузщыщынэн фаер
4 Ау сэ шъосэӀо, синыбджэгъухэр, пкъыр зыукӀхэу ащ нэужым ащ ехъу зи зышӀэн зымылъэкӀхэрэм шъуащымыщын. 5 Ау шъо шъузщыщынэн фаер сэ шъозгъэлъэгъущт: ЗиукӀырэ ужым, джэхьнэмым хэзыдзэжьынэу тетыгъо зиӀэр ары шъузщыщынэн фаер. Ары, шъосэӀо, ащ шъущыщын. 6 Бзыу цӀыкӀуитфыр чапычитӀукӀэ ащэрэба? Ау щытми, ахэмэ ащыщэу зи щымыгъупшэжьэу Тхьэм ыгу илъ. 7 Ау шъо шъушъхьэ тет шъхьац налъэ пстэури лъытагъэ. Шъумыщын, бзыубэхэм анахьи шъо шъуанахь лъапӀ.
Христос игъогу рыкӀохэрэм узэращыщыр цӀыфхэм ябгъэшӀэныр
8 Сэ шъосэӀо, сэ ЦӀыф Лъэпкъым Ыкъо сигъогу рыкӀохэрэм зэращыщыр цӀыфхэм апашъхьэ хэтми къыщызыӀорэр, сэри ар сигъогу рыкӀохэрэм зэращыщыр Тхьэм имэлэӀичхэм апашъхьэ къыщысӀощт. 9 Ау хэтми сэ сигъогу рыкӀохэрэм ащымыщэу цӀыфхэм апашъхьэ щызыӀорэр, сэри ар сигъогу рыкӀохэрэм зэращымыщыр Тхьэм имэлэӀичхэм апашъхьэ щысӀощт. 10 Хэтми ЦӀыф Лъэпкъым Ыкъо гущыӀэ Ӏае фэзыӀорэм фэгъущт, ау Тхьэм Ыпсэ ЛъапӀэ зыгъэпцӀырэм фэгъущтэп. 11 Синэгогухэм шъузаратыкӀэ, хэку пащэхэмрэ тетыгъор зиӀэхэмрэ апашъхьэ шъузыращэкӀэ, «Сыдэущтэу зыдгъэхыен?» шъуӀоу, ыкӀи «Сыда тӀощтыр?» шъуӀоу шъумыгумэкГ, 12 сыда пӀомэ къэшъуӀон фаер а сыхьатым Тхьэм Ыпсэ ЛъапӀэ шъуигъэшӀэшт.
ЛӀы баеу акъыл зимыӀэм ехьылӀэгъэ гъэсэныгъэ тхыдэр
13 ЦӀыф купышхом хэтэу лӀы горэ Исус къелъэӀугъ: Дин гъэсакӀу, тэ тятэ къыкӀэныжьыгъэ мылъкур сэ сшы къыздегъэгощ. 14 Шъузэрэгощыщт шӀыкӀэр къышъосӀонэу хэта сызыгъэуцугъэр? риӀожьыгъ Исус. 15 ЕтӀанэ цӀыфмэ ариӀуагъ: Шъуфэсакъ! Сыд фэдэ нэйпсыягъэ къызыхэшъумыгъаф, сыда пӀомэ цӀыфым сыд фэдиз мылъку иӀэми,ар ищыӀэныгъэ епхыгъэпышъ ары. 16 ЕтӀанэ Исус зы гъэсэныгъэ тхыдэ афиӀотагъ: ЛӀы бай горэм ичӀыгу лэжьыгъабэ къыхэкӀыгъ. 17 Арэущтэу зэхъум, ышъхьэ фиӀожьэу къыублагъ: «Сыда сшӀэщтыр? Сэ силэжьыгъэхэр зэрыслъхьан зи сиӀэп». 18 ЕтӀанэ къыӀуагъ: «Мырэущтэу сшӀэщт. Сикъакъырхэр скъутэнхэшъ, нахь инхэу сшӀыжьынхэшъ, сигъажъорэ симылъкурэ зэкӀэ ахэмэ арыслъхьащт. 19 ЕтӀанэ сэ зэсӀожьыщт: Илъэсыбэ пфырикъун Ӏаджи уиӀ. Зыгъэпсэф, шхэ, ешъу, зыгъатхъ!» 20 Ау Тхьэм къыриӀуагъ: «О акъыл зимыӀэ цӀыф! Мы чэщ дэдэм о ппсэ хэсхыжьыщт. Мы бгъэтӀылъыгъэхэр хэт къызыфэнэжьыщтыр?» 21 Ежь ышъхьэ пае мылъушхо зыугъоеу, ау Тхьэм ыдэжькӀэ мылъушхо зимыӀэм джары къехъулӀэщтыр.
ГумэкӀыным ехьылӀагъ
22 Арышъ шъосэӀо, ариӀуагъ Исус игъогу рыкӀохэрэм, «Сыда тшхыщтыр?» шъуӀоу, шъуищыӀэныгъэ пае шъумыгумэкӀ. «Сыда тщыгъыщтыр?» шъуӀоу, шъупкъы паий шъумыгумэкӀ. 23 ЩыӀэныгъэр гъомылэм нахьи нахь лъапӀ, пкъыри щыгъыным нахьи нахь лъапӀ. 24 Къуалэхэм шъуяплъ: Ахэмэ чылапхъи апхъырэп, лэжьыгъи къахыжьырэп. Конхэри къакъырхэри яӀэхэп, ау щытми Тхьэм къареты. Шъо бзыухэм анахьи бэкӀэ шъуанахь лъапӀ! 25 ГумэкӀынымкӀэ хэта шъо шъуащыщэу зы Ӏэнтэгъу фэдиз нэмыӀэми икӀыхьагъэ хэзыгъэхъон зылъэкӀыщтыр? 26 Ащ фэдэу мэкӀэ тӀэкӀур зышъумылъэкӀыкӀэ, адрэ къэнагъэ пстэуми апае сыда шъузкӀэгумэкӀырэр? 27 Къэгъагъэхэм якъэкӀыкӀэ шъуеплъ. Ахэр лажьэхэрэп, ци аджырэп, ау сэ шъосэӀо, ежь пачъыхьэу Сэлмэн сыд фэдизэу дахэу кӀэракӀэщтыгъэми, ахэмэ ащыщэу зыгорэми фэдэу гъэкӀэрэкӀагъэу щытыгъэп. 28 А уцэу губгъом непэ итэу неущ хьакум радзэжьыщтыр Тхьэм арэущтэу зигъэкӀэракӀэкӀэ, ащ нахьи бэкӀэ нахьыбэу шъо шъуигъэкӀэрэкӀэщт, шъо шӀошъхъуныгъэ зимакӀэхэр! 29 Шъо шъушхыщтымрэ шъузэшъощтымрэ ауж шъуимыт ыкӀи шъуафэмыгумэкӀ. 30 Сыда пӀомэ ащ фэдэ Ӏоф пстэури ары дунаем тет лъэпкъхэр зылъыхъухэрэр. Ахэр зэрэшъуищыкӀагъэр Шъуятэ лъапӀэ ешӀэ. 31 Ау ыпэ рапшӀэу Тхьэм и Тетыгъошхо иӀофхэм ауж шъуит, етӀанэ адрэ къэнэгъэ Ӏофхэри къышъуӀэкӀэхьащтых. 32 Шъумыщын, шъо куп тӀэкӀур, сыда пӀомэ Шъуятэ лъапӀэ и Тетыгъошхо къызыскӀэ, тетыгъо къышъуитынэу игуап. 33 Шъуихьапщыпхэр шъущэхи, ахъщэр тхьамыкӀэхэм яшъут. Жъы мыхъужьын ахъщалъэхэр зыфэшъушӀых, нахь макӀэ мыхъужьын мылъкушхо уашъом щызэжъугъэгъот. Ащ дэжьым тыгъуакӀо горэ а мылъкушхом щекӀолӀэшъущтэп, хъунэхэми ашхыщтэп. 34 Сыда пӀомэ шъуимылъкушхо зыдэщыӀэм шъугухэри щыӀэщтых.
Шъумычъыеу шъусакъ!
35 Шъо шъуицыякӀэхэр дэупкӀагъэхэу, шъуиостыгъэхэри хэгъэнагъэхэу хьазырэу шъущыт. 36 ЦӀыфхэу зитхьаматэ нысащэм къикӀыжьыным паплъэхэу, къэлапчъэм къызэрэтеоу фыӀузыхынэу хьазырэу щытхэм афэдэу шъущыт. 37 Тхьаматэр къызыкӀожьыкӀэ, унэӀутхэу мычъыехэу ыкӀи сакъыхэу къыгъотыжьхэрэр сыхьатмафэ ежьагъэх, Шъыпкъэр шъосэӀо, ицыякӀэ диупкӀэнышъ, Ӏанэм пигъэтӀысхьащтых, ежьыри къэкӀонышъ, ашъхьэщытыщт. 38 Чэщныкъом дэжь е нэфшъэгъо атэкъэӀогъум дэжь тхьаматэр къэкӀожьыгъэу, а унэӀутхэр мычъыехэу ыкӀи сакъыхэу къызигъотыжьхэкӀэ, ахэр сыхьатмафэ ежьагъэх. 39 Ау мыр зэжъугъашӀэ: Унэр зием тыгъуакӀор къызыкӀощт сыхьатыр ышӀэщтыгъэмэ, чъыещтгъэп, иуни къыригъахьэу илъыр рыригъэтыгъукӀыщтгъэп. 40 Шъори шъухьазырын фае, сыда пӀомэ ЦӀыф Лъэпкъым Ыкъо къэкӀожьынэу шъузымыгугъэрэ сыхьат горэм дунаем къэкӀожьыщтышъ ары. 41 Зиусхьан, къыӀуагъ Петрэ, мы гъэсэныгъэ тхы дэр тэщ пае къэпӀуагъа, хьауми цӀыф пстэуми апае къэпӀуагъа? 42 Хэта адэ, зэхэшӀыкӀыныгъэ зиӀэу, зыщыгугъышъунэу унэзехьэу тхьаматэм унэӀутхэу иӀэхэм пащэ афишӀыщтыр игъом яшхын аритынэу? къыӀуагъ Зиусхьаным. 43 А унэӀутыр сыхьатмафэ ежьагъ, итхьаматэ къэкӀожьыгъэу, арэущтэу ышӀэу къызигъотыжькӀэ. 44 Шъыпкъэр шъосэӀо, тхьаматэм имылъку зэкӀэ а унэӀутым ыӀэ рилъхьащт. 45 Ау а унэӀутым «Сэ ситхьаматэ шӀэхэу къэкӀожьыщтэп», ыгукӀэ ыӀоу, адрэ унэӀутхэм, бзылъфыгъи хъулъфыгъи, яоу ыкӀи ешхэу, ешъоу, уташъоу зиублэкӀэ, 46 а унэӀутыр зымыгугъэрэ мафэ горэм ыкӀи зыщимышӀэрэ сыхьат горэм итхьаматэ къэкӀожьыщт. А унэӀутыр укӀыкӀаеу ыукӀыщт, шӀошъхъуныгъэ зимыӀэхэм къиныгъэ зыщадищэчын чӀыпӀэми ыгъэкӀощт. 47 Ау итхьаматэ зыфаер ышӀэщтыгъэ пэтми, унэӀутэу зызымыгъэхьазырыгъэм, е тхьаматэр зыфаер зымыгъэцэкӀагъэм утыныбэ къытефэщт. 48 Ау итхьаматэ зыфаер зымышӀэу, утын зифэшъуашэ зышӀагъэм нахь утын макӀэ къытефэщт. Тхьэм бэ зэритыгъэм бэ ытыжьынкӀи къыщыгугъыщт, бэ зыӀэ рилъхьагъэми нахьыбэкӀи къыщыгугъыщт.
Зы унэм зэдисхэр зэрэзэмызэгъыщтхэр
49 ЧӀылъэм машӀо есыдзыным пае, сэ сыкъэкӀуагъ. А машӀор зэхэнагъэемэ, сыдэу сыгопэщтыгъ! 50 ЦӀыфхэм Ӏаеу сэ саумэхъын фаеу щыт, ар охъуфэ инэуи сэгумэкӀы! 51 Зэзэгъыныгъэ чӀылъэм къыфэсхьыным пае, сыкъэкӀуагъэу шъогугъа? Хьау, сэ шъосэӀо, зэмызэгъыныгъэ къэсхьынэу ары нахь, 52 сыда пӀомэ джы щегъэжьагъэу, зы унэм ис нэбгыритфыр лъэныкъуитӀоу зэрэгъэхъущт: щыр тӀум пэуцущт, тӀури щым пэуцущт. 53 ЛъэныкъуитӀоу зэрэгъэхъунхэшъ, тыр къом пэуцущт, къори тым пэуцущт, ныр пхъум пэуцущт, пхъури ным пэуцущт, гуащэри нысэм пэуцущт, нысэри гуащэм пэуцущт.
Мы лъэхъанэм инэшанэхэм къарыкӀырэр зыгурыжъугъаӀу
54 Тыгъэ къохьапӀэмкӀэ ошъуапщэ къытехьэу шъулъэгъумэ, «Ощх къещхыщт», занкӀэу шъоӀо, арэущтэуи мэхъу, ариӀуагъ Исус цӀыф купышхом. 55 Къыблэ лъэныкъом къикӀырэ жьыбгъэри къепщэ хъумэ, «Фабэ дэдэу хъущт», шъоӀо, арэущтэуи мэхъу. 56 Шъо нэпитӀу зиӀэхэр! ЧӀылъэмрэ уашъомрэ ятеплъэ къикӀырэр къыжъугурэӀо, мы лъэхъанэм инэшанэхэм къарыкӀырэр сыд пае къыжъугурымыӀора?
О уидэогъу узэрешӀужьыным ыуж ит
57 Сыд пае шъо шъушӀэн фаер шъоршъорэу зэхэшъумышӀыкӀыра? 58 ГущыӀэм пае, о уидэогъу уригъусэу хьыкумышӀэм ыдэжь узыкӀокӀэ, гъогум шъурыкӀозэ, узэрешӀужьыным ыуж ит. Армырмэ уидэогъу хьыкумышӀэм ыпашъхьэ уригъэуцощт, ащи хьапс ухъумакӀом уӀэкӀилъхьащт, хьапс ухъумакӀоми хьапсым учӀидзэщт. 59 Сэ осэӀо, аужырэ чапычыр отыжьыфэ, хьапсым укъычӀэкӀыжьыщтэп.
О уипсэкӀодшӀагъэхэм афыкӀэгъожь е орорэу зыбгъэкӀодыжьыгъэу мэхъу
1 А мафэхэм цӀыф куп Исус ыдэжь къакӀохи, Галилей цӀыфхэу Ӏэшъхьэтет Пилат ицӀыфхэм аригъэукӀыгъагъэхэм якъэбар къыфахьыгъ. А Галилей цӀыфхэм алъырэ якъурмэныпхъэ ылъымрэ зэхэлъадэхэу, Пилат ицӀыф хэм ахэр аригъэукӀыгъагъэх. 2 Исус ыдэжь къэкӀуагъэхэм ариӀожьыгъ: Мы Галилей цӀыфхэр арэущтэу зэрэкӀодыгъэхэм пае, Джалилым щыщхэу адрэ цӀыф пстэумэ анахьи нахь псэкӀодышӀэхэу шъогугъа? 3 Хьау, арэущтэу щытэп, сэ шъосэӀо! Ау шъуипсэкӀодшӀагъэхэм шъуафыкӀэмыгъожьмэ, шъори зэкӀэ ащ фэдэ къабзэу шъукӀодыщт. 4 Хьаури Силоам зыцӀэ чӀыпӀэм ит унэ плъэпӀэ лъагэр нэбгырэ пшӀыкӀуеу къызытеуи, чӀиукӀыхьагъэхэр адрэ цӀыфхэу Ерусалим дэс пстэуми анахьи нахь мысагъэхэкӀэ шъогугъа? 5 Хьау, арэущтэу щытэп, сэ шъосэӀо! Ау шъуипсэкӀодшӀагъэхэм шъуафыкӀэмыгъожьмэ, шъори зэкӀэ ащ фэдэ къабзэу шъукӀодыщт.
Ынджыр чъыг гъугъэм ехьылӀэгъэ гъэсэныгъэ тхыдэр
6 ЕтӀанэ Исус мы гъэсэныгъэ тхыдэр къафиӀотагъ: ЛӀы горэм исэнэшъхьэ хатэ ынджыр чъыг хэтэу иӀагъ. Зыгорэ къыпыкӀагъэмэ еплъынэу зэкӀом, зи къыпыкӀагъэу ыгъотыгъэп. 7 Джащыгъум сэнэшъхьашӀэм риӀуагъ: «Мары илъэсищ хъугъэу мы чъыгым зыгорэ къыпыкӀэмэ сеплъынэу сыкъэкӀо, ау зи пытэу згъотырэп. Арышъ иупкӀыжь, сыд пае чӀыгум ыкӀуачӀэ хьаулыеу хихыра?» 8 СэнэшъхьашӀэм къыриӀожьыгъ: «Тхьаматэ, мы илъэсым щигъэтыгу. Чъыгыр ихъурэягъэкӀэ къэстӀыхьанышъ, ебз тӀэкӀуи чӀэстэкъон. 9 КъэкӀорэгъэм къыпыкӀэнкӀи мэхъу. Джащыгъуми къызыпымыкӀэкӀэ, иупкӀын плъэкӀын».
Исус бзылъфыгъэ горэу зиузэнкӀыжьын зымылъэкӀэу, зытхыцӀэ уфагъэу щытыр шэмбэт мафэм зэригъэхъужьыгъэр
10 Шэмбэт мафэм синэгогу горэм Исус цӀыфхэм Тхьэм игущыӀэхэр щаригъашӀэщтыгъэх. 11 Бзылъфыгъэ горэ илъэс пшӀыкӀуй хъугъэу, зыгъэсымаджэрэ джынапцӀэ хэсэу ащ дэжьым щыӀагъ. ЗиузэнкӀыжьын ымылъэкӀэу, ытхыцӀэ уфагъэу щытыгъ. 12 Исус ар зелъэгъум, еджи риӀуагъ: Нын, джы щегъэжьагъэу ухъужьыгъэу, шъхьафитэу ухъугъ. 13 ЕтӀанэ ыӀэхэр а бзылъфыгъэм зытырелъхьэм, ардэдэм ащ зиузэнкӀыжьи хъужьыгъэ, Тхьэми щытхъу фишӀыгъ. 14 Ау Исус шэмбэт мафэм сымаджэр зэригъэхъужьыгъэм пае, синэгогу пащэр губжи, цӀыфмэ ариӀуагъ: ЦӀыфыр лэжьэн фаеу мэфих щыӀ. А мафэхэм зыжъугъэхъужьынэу шъукъакӀо нахь, шэмбэт мафэм шъукъэмыкӀу. 15 Шъо нэпитӀу зиӀэхэр! риӀожьыгъ Зиусхьаным а пащэм. Шъуащыщэу зыгорэ щыӀа, зицу е зищыд шэмбэт мафэми къыкӀэзытӀэтыкӀэу, цощым къычӀэзыщэу псы езымыгъашъорэ? 16 Арэу зыхъукӀэ, мы бзылъфыгъэу Ибрахьимэ къытехъукӀыгъэ цӀыфхэм ащыщэу, илъэс пшӀыкӀуй хъугъэу шэйтаным ыпхыгъэр шэмбэт мафэм шъхьафит сшӀэу згъэхъужьын фэягъэба? 17 Исус ар къызеӀом, къыпэгущыӀэжьырэ цӀыф пстэури укӀытэжьыгъэх, къэнэгъэ цӀыфхэри Исус Ӏофышхо гъэшӀэгъонхэу ышӀагъэ пстэуми апае гушӀощтыгъэх.
Горчицэцэмрэ тэджэпсымрэ яхьылӀэгъэ гъэсэныгъэ тхыдэхэр
18 Тхьэм и Тетыгъошхо зыфэдэр сыда? къыӀуагъ Исус. Ар сыдым фэзгъэдэна? 19 Ар зыфэдэр горчицацэр ары. Ар лӀы горэм къышти, ихатэ щишӀагъ. Ар къэкӀи, чъыгы хъугъэ, ошъогу бзыухэри икъутамэхэм атесхэу хъугъэ. 20 Тхьэм и Тетыгъошхо сыдым фэзгъэдэна? джыри зэ къыӀуагъ Исус. 21 Ар зыфэдэр тэджэпсыр ары. Зы бзылъфыгъэ горэм ар къышти, ӀэнлъищымкӀэ хьаджыгъэ зэхипшыхьагъ, зэпстэури къэтэджыфэ.
Къэлэпчъэ зэжъур
22 Исус къалэхэмрэ къуаджэхэмрэ къыкӀухьэхэзэ, цӀыфхэм Тхьэм игущыӀэхэр аригъашӀэхэзэ, игъогу Ерусалим фигъэзагъ. 23 Зыгорэ ежьым къеупчӀыгъ: Тхьаматэ, мыкӀодхэу, Тхьэм къыгъэнэжьыщт цӀыфхэр макӀэха? 24 Къэлэпчъэ зэжъумкӀэ шъузэрэдэхьащтым зэрэшъулъэкӀэу ыуж.шъуит, ариӀожьыгъ Исус, сыда пӀомэ сэ шъосэӀо, цӀыфыбэхэр дэхьанхэу ыуж итыщтых, ау алъэкӀыщтэп. 25 Унэ бысымыр къэтэджынышъ, къэлапчъэр зыщыфишӀыжьыщт сыхьатыр къэсышт. ЕтӀанэ, «Тхьаматэ, къэлапчъэр къытфыӀух», шъуӀоу, кӀыбым шъудэтэу, къэлапчъэм шъукъытеонкӀи мэхъу. Джащыгъум ащ къышъуиӀожьыщт: «Шъо хэтми шъузщыщыр сшӀэрэп». 26 ЕтӀанэ шъуӀоу шъуублэщт: «Тыуигъусэу тышхэщтыгъ ыкӀи тешъощтыгъ, тикъалэ иурамхэми Тхьэм игущыӀэхэр ащытэбгъашӀэщтыгъэх». 27 Ау ащ къышъуиӀощт: «Шъо хэтми шъузщыщыр сшӀэрэп, санэӀу шъуикӀ, зэкӀэ шъо бзэджашӀэхэр!» 28 Ибрахьими, Исхьакъи, Якъуби, адрэ пегъымбар пстэури Тхьэм и Тетыгъошхо ыӀэчӀэгъ чӀэхьагъэхэу, ау шъо а Тетыгъошхом ыӀэчӀэгъ шъукъычӀафыгъэу зышъулъэгъукӀэ, куохьауныгъэрэ цэ зэрэгъэшхыныгъэрэ къэхъущтых. 29 ЦӀыфхэр тыгъэ къыкъокӀыпӀэмкӀи, тыгъэ къохьапӀэмкӀи, темырымкӀи, къыблэмкӀи къикӀынхэшъ, Тхьэм и Тетыгъошхо иешхэешъошхо чӀыпӀэхэр щаубытыщтых. 30 Джащыгъум ауж итхэм ащыщхэр апэу хъущтых, апэ итхэм ащыщхэри ауж къинэщтых.
Ей Ерусалим!
31 А сыхьат дэдэм фарисей куп къакӀуи, Исус къыриӀуагъ: Мыщ дэжьым ӀукӀ. Армырмэ пщэу Ирод ицӀыфхэм уаригъэукӀыщт. 32 ШъукӀуи, ариӀожьыгъ Исус, а Оаджэм ешъуӀу: «Сэ непи неущи джынапцӀэхэр цӀыфхэм ахэсфыщтых, сымаджэхэри згъэхъужьыщтых, ящэнэрэ мафэми сиӀоф сыухыщт». 33 Ау щытми, непи, неущи, неущмыщкӀи сигъогу сырыкӀон фаеу щыт, сыда пӀомэ пегъымбарыр Ерусалим нэмыкӀ чӀыпӀэ щылӀэ хъущтэп. 34 Ей Ерусалим, Ерусалим! УицӀыфхэм пегъымбархэр аукӀых, Тхьэм илӀыкӀохэми мыжъокӀэ яохэзэ аукӀых. Бзыум ищырхэр ытамэмэ ачӀэгъ зэрэщычӀиугъуаехэрэм фэдэу, сыд фэдизрэ уибынхэр сэ зэсыугъоилӀэнхэу сыфэягъ, ау шъо шъуфэягъэп. 35 Мо зэ шъуеплъ, Тхьэр шъуикъалэ нэшӀукӀэ къеплъыжьыщтэп. Сэ шъосэӀо, «Зиусхьаным ыцӀэкӀэ къакӀорэм щытхъушхор ий!» зыщышъуӀощт мафэм нэсыфэ, сышъулъэгъужьыщтэп.
Исус зэкӀэбэгагъэу щыт лӀы горэ шэмбэт мафэм зэригъэхъужьыгъэр
1 Шэмбэт мафэ горэм фарисейхэм ятхьаматэхэм ащыщэу зыгорэм иунэ щышхэнэу Исус зырегъэблагъэм, цӀыфхэр Исус еплъакӀощтыгъэх. 2 ЗеплъакӀохэм, зэкӀэбэгагъэу щыт лӀы горэ Исус ыпашъхьэ къиуцуагъэу алъэгъугъ. 3 Исус Тэурат егъэджэкӀо пащэхэмрэ фарисейхэмрэ ариӀуагъ: ӀНэмбэт мафэм сымаджэр бгъэхъужьыныр хабзэкӀэ хъущта, мыхъущта? 4 Ау ахэмэ заушъэфыгъ. Зызаушъэфым, Исус сымаджэм теӀаби, ыгъэхъужьыгъ. ЕтӀанэ ытӀупщыжьыгъ. 5 ЕтӀанэ Исус ахэмэ яупчӀыгъ: Шъуащыщэу зыгорэм ищыд е ицу шэмбэт мафэм псынэм ифэмэ, а сыхьатым къырихыжьынба? 6 Ахэмэ пэгъокӀ къыратышъугъэп.
ХьакӀэхэмрэ бысымымрэ зэрагъэшӀэн фае Ӏофхэр
7 ХьакӀэхэм тхьэмэтэ тӀысыпӀэхэр аубытхэу Исус гу зылъетэм, мы гъэсэныгъэ тхыдэр къафиӀотагъ: 8 Зыгорэм ешхэешъошхо горэм уригъэблагъэмэ, тхьэмэтэ тӀысыпӀэм умытӀыс, сыда пӀомэ ощ нахьи нахь тхьаматэ горэ къыригъэблэгъагъэхэм ахэтынкӀи мэхъу. 9 Джащыгъум бысымэу ори ари шъукъезыгъэблэгъагъэр къыббгъодэхьанышъ, къыуиӀощт: «Мы лӀым о уитӀысыпӀэ ет». Арэу зыхъурэм, о уукӀытэжьыгъэу, аужырэ тӀысыпӀэр уубытын фаеу хъущт. 10 Ау узырагъэблагъэкӀэ, аужырэ тӀысыпӀэм тӀыс. Джащыгъум бысымыр о къыббгъодэхьанышъ, къыуиӀощт: «ТӀэкӀу дэкӀотай, синыбджэгъу». Ар адрэ хьэкӀэ пстэуми апашъхьэ оркӀэ нахь щытхъу мэхъу; 11 сыда пӀомэ хэти зышъхьэ зыгъэиныжьырэр Тхьэм ыгъэцӀыкӀущт, ежь ышъхьэ зыгъэцӀыкӀужьырэри Тхьэм ыгъэиныщт. 12 ЕтӀанэ Исус ибысым риӀуагъ: Щэджэгъуашхэ е пчыхьэшъхьашхэ о зыпшӀыкӀэ, уиныбджэгъухэр, е пшыхэр, е уиблагъэхэр, е уигъунэгъу байхэр къемыгъэблагъэх. Ахэр къебгъэблагъэхэмэ, афэпшӀагъэр къыпфашӀэжьынэу урагъэблэгъэжьэнкӀи мэхъу. 13 Ау ешхэешъошхо зыпшӀыкӀэ, тхьамыкӀэхэр, сэкъатхэр, лъащэхэр, нэшъухэр къегъэблагъэх. 14 АфэпшӀагъэр ахэмэ къыпфашӀэжьын зэрамылъэкӀырэм пае, сыхьатмафэ уежьагъ. Шъыпкъагъэ зиӀэ цӀыфхэр къызытэджыжьхэкӀэ, афэпшӀагъэр Тхьэм къыпфишӀэжьыщт.
Ешхэешъошхом ехьылӀэгъэ гъэсэныгъэ тхыдэр
15 Исус игъусэхэу Ӏанэм пэсхэм ащыщэу зыгорэм мыр зызэхехым, къыӀуагъ: Тхьэм и Тетыгъошхо къызыскӀэ, адрэ хьакӀэхэм ягъусэу Ӏанэм пэсыщтыр сыхьатмафэ ежьагъ. 16 Зы лӀы горэм ешхэешъошхо ышӀыгъ, риӀуагъ Исус а лӀым, цӀыфыбэхэри къыригъэблэгъэнхэу ариӀуагъ. 17 Ешхэешъошхор зыщаублэщт сыхьатыр къызэсым, зы унэӀут горэ къыригъэблэгъэнхэу зэриӀогъэгъэ цӀыфхэм адэжь мырэущтэу ариӀонэу ыгъэкӀуагъ: «Джы шъукъеблагъ, пстэури хьазыр». 18 Ау къафагъэгъунхэм пае, зэпстэури зэфэдэу лъаӀохэу аублагъ. Апэрэм риӀуагъ: «Сэ зы хьасэ къэсщэфыгъ, ар сыкӀоу зэсымыгъэлъэгъумэ хъущтэп. Къысфэгъэгъу». 19 Адрэм къыӀуагъ: «ЦуипшӀ къэсщэфыгъэшъ, язэрэщыт згъэунэфынэу сэкӀо пэт. Къысфэгъэгъу». 20 Ящэнэрэми къыӀуагъ: «Сэ шъуз къэсщагъэшъ, сыкъэкӀон слъэкӀыщтэп». 21 Джащыгъум унэӀутым къыгъэзэжьи, хъугъэшӀагъэр итхьаматэ къыриӀожьыгъ. КъызыреӀожьым, бысымыр къэгубжи, унэӀутым риӀуагъ: «ПсынкӀэу къалэм иурамышхохэмрэ иурам цӀыкӀухэмрэ атехьи, тхьамыкӀэхэр, сэкъатхэр, нэшъухэр, лъащэхэр мо къащэх». 22 УнэӀутым къызегъэзэжьым, къыӀуагъ: «Тхьаматэ, уиунашъо згъэцэкӀагъэ, ау джыри тӀысыпӀэ нэкӀхэр щыӀэх». 23 Джащыгъум тхьаматэм унэӀутым риӀуагъ: «Гъогухэмрэ гъогу лъагъохэмрэ атехьи, сиунэ из хъуным пае, уапэ къифэрэ цӀыфхэр къэкӀонхэу шӀы. 24 Сэ шъосэӀо, а цӀыфхэу сэ къезгъэблэгъэнхэу зэсӀогъагъэхэм ащыщэу зи сиӀанэ къыхэӀэнэп». Сыда пӀомэ кьеблэгъагъэхэр бэ, ау къыхэхыгъэу щытхэр макӀэх, къыпигъэхъожьыгъ Исус.
Исус игъогу рыкӀоным къын щэчыныгъэу хэлъыр
25 ЦӀыф купышхохэр Исус игъусэхэу кӀощтыгъэх. Исус зафигъази, ахэмэ ариӀуагъ: 26 Хэт щыщми садэжь къакӀоу, зянэ, зятэ, зишъуз, зибынхэр, зышхэр, зышыпхъухэр шӀу зэрилъэгъухэрэм нахьи, зыпси шӀу зэрилъэгъурэм нахьи, сэ нахьышӀу сызымылъэгъурэр сигъогу рыкӀохэрэм ащыщ хъун ылъэкӀыщтэп. 27 Хэти зикъащ зезыхьэу, сэ сауж къырымыкӀорэм сэ сигъогу рыкӀохэрэм ащыщ хъун ылъэкӀыщтэп. 28 Шъуащыщэу зыгорэм унэ плъэпӀэ лъагэ ышӀынэу фае хъумэ, ыпэрапшӀэу тӀысэу, тефэщтым еплъэу, а унэр зэрэригъэкъун ахъщэ иӀэмэ, зэупчӀыжьын фаеба? 29 Арэущтэу ымышӀэмэ, лъапсэр ыгъэуцугъэу, ащ унэр ыухын зимылъэкӀыкӀэ, ар къэзылъэгъурэ цӀыф пстэури къыдэхьащхыхэу, 30 мырэущтэу аӀощт: «Мы лӀым унэр ышӀэу ригъэжьагъ, ау фэухыгъэп». З1 _дщ фэдэуи, зы пачъыхьэ горэм нэмыкӀ пачъыхьэ горэм зао ришӀылӀэнэу ыгу хэлъмэ, ыпэ рапшӀэу тӀысынышъ, дзэлӀ мин тӀокӀ зиӀэ пыеу къыфакӀорэм ежьым идзэлӀ минипшӀыкӀэ пэуцушъущтмэ, егупшысын фаеба? 32 Пэуцун ымылъэкӀмэ, пыир чыжьэу щытэу, лӀыкӀохэр фигъэкӀонхэшъ, зэшӀужьынхэу ригъэлъэӀущтых. 33 Ащ фэдэу шъуащыщэу хэти иӀэ пстэури къэзымыгъанэрэр сэ сигъогу рыкӀохэрэм ащыщ хъун ылъэкӀыщтэп.
Щыугьэ зыхэмылъ щыгъур
34 Щыгъур дэгъу. Ау щыгъум ищыугъэ хэкӀымэ, сыдэущтэу ищыугъэ ащ хэплъэхьажьыщт? 35 Хьасэмрэ ебзымрэкӀэ нахьышӀу хъущтэп, чӀадзыжьы нахь. РыдэӀонэу тхьакӀумэ зиӀэм зэхерэх.
Мэлэу кӀодыгьэм ехьылӀэгъэ гъэсэныгьэ тхыдэр
1 Хьакъулахь ахъщэр хэзыххэрэмрэ псэкӀод зышӀэхэрэмрэ зэкӀэ Исус едэӀунхэу къекӀолӀагъэх. 2 Ау фарисейхэмрэ Тэурат егъэджэкӀо пащэхэмрэ агу емыӀоу аӀуагъ: Мы лӀым псэкӀод зышӀэрэ цӀыфхэр гъусэ зыфешӀых ыкӀи адэшхэ. 3 Арэущтэу къызаӀом, Исус мы гъэсэныгъэ тхыдэр ахэмэ афиӀотагъ: 4 Шъуащыщэу зыгорэм мэлишъэ иӀэу тӀон. Ахэмэ ащыщэу зыр шӀокӀодмэ, адрэ тӀокӀиплӀырэ пшӀыкӀу бгъурэр губгъом къыринэнхэшъ, кӀодыгъэр къегъотыжьыфэ лъыхъонба? 5 Ар къызигъотыжькӀэ, гушӀоу къеӀэтышъ, ытамэ къытырелъхьэ. 6 Унэм къызыкӀожькӀэ, иныбджэгъухэмрэ игъунэгъухэмрэ къяджэшъ, ареӀо: «ШъукъыздэгушӀу, сэ симэлэу сшӀокӀодыгъэр къэзгъотыжьыгъ». 7 Сэ шъосэӀо, ащ фэдэу шъыпкъагъэ зиӀэ нэбгырэ тӀокӀиплӀырэ пшӀыкӀубгъурэу псэкӀод фыкӀэгъожьыныр зимыщыкӀагъэхэм апае, гушӀуагъоу уашъом щыхъурэм нахьи, псэкӀод зышӀэрэ цӀыф закъоу зипсэкӀодхэм афыкӀэгъожьырэм пае, уашъом нахь гушӀогъошхо щыхъущт.
Тыжьын ахъщэу кӀодыгъэм ехьылӀэгъэ гъэсэныгъэ тхыдэр
8 Ащ фэдэуи бзылъфыгъэ горэм тыжьын ахъщипшӀ иӀэу тӀон. Ахэмэ ащыщэу зыр шӀокӀодмэ, остыгъэ хигъанэу, ахъщэр къегъотыжьыфэ, фэсакъыпэу лъыхъузэ, унэр зэкӀэ къыпхъэнкӀынба? 9 Ар къызигъотыжькӀэ, иныбджэгъухэмрэ игъунэгъухэмрэ къяджэшъ, ареӀо: «ШъукъыздэгушӀу, ахъщэу сшӀокӀодыгъэр къэзгъотыжьыгъ». 10 Сэ шъосэӀо, ащ фэдэ къабзэу псэкӀод зышӀэрэ цӀыфэу кӀэгъожьырэм Тхьэм имэлэӀичхэр фэгушӀощтых.
КӀодыгъэ кӀалэм ехьылӀэгъэ гъэсэныгьэ тхыдэр
11 Зы лӀы горэм къуитӀу иӀагъ, къыӀуагъ Исус. 12 Къо нахьыкӀэм ятэ риӀуагъ: «Сят, мылъкум щыщэу къыстефэщт Ӏахьэр къысэт». Арыти, тым мылъкур ахэмэ афигощыгъ. 13 Мэфэ заулэ зытешӀэм, къо нахьыкӀэм иӀэр зэкӀэ зэкӀиугъуаий, хымэ хэгъэгу горэм кӀуагъэ. А хэгъэгум мыхъомышӀэ псэукӀэкӀэ имылъку щигъэкӀодыгъ. 14 ЗэкӀэри зегъэкӀодым, гъэблэшхо а хэгъэгум къыщыхъуи, щыкӀэгъэшхо иӀэ хъугъэ. 15 Арэущтэу зэхъум, а хэгъэгум щыпсэурэ лӀы горэм ыдэжь кӀуи, Ӏоф къыӀихыгъ. А лӀым икъохэр губгъом щигъэхъунхэу ыгъэкӀуагъ. 16 Къохэм яӀус щыщ ыныбэ из ышӀынэу ехъуапсэщтыгъ, ау а Ӏусым щыщ хэти ащ къыритыгъэп. 17 КӀалэм итхьамыкӀагъо зыздешӀэжьым, ышъхьэ фиӀожьыгъ: «Сэ сятэ илэжьакӀохэр сыд фэдиз хъухэми, шхын афырикъуни къялыжьыни яӀ, ау сэ мэлакӀэм сиукӀэу мыщ дэжьым сыщыӀ! 18 Сятэ ыдэжь сыкӀожьынышъ, есӀощт: Сят, уашъомкӀи оркӀи псэкӀод сшӀагъэ. 19 О сэ скъо къысэпӀонэу сифэшъуашэп. О уилэжьакӀохэм ащыщэу зым фэдэу сэри сышт». 20 ЕтӀанэ тэджи, ятэ ыдэжь кӀожьынэу ежьагъ. Ыкъо чыжьэкӀэ къэкӀожьэу ятэ къызелъэгъум, ыгу егъуи, пэгъочъи, ӀаплӀ рищэкӀи, ебэоу ыублагъ. 21 Ыкъо ятэ риӀуагъ: «Сят, уашъомкӀи оркӀи псэкӀод сшӀагъэ. О сэ скъо къысэпӀонэу сифэшъуашэп». 22 Ау ятэ иунэӀутхэм ариӀуагъ: «Щыгъынхэм анахь дэгъур псынкӀэу къыфэшъухьи щышъулъ. Зы Ӏэлъыни Ӏэрышъулъхь, цуакъэхэри щышъулъэх. 23 Тэнэ гъэшхагъэр къашъущи, шӀошъубз. Тыжъугъашх ыкӀи тыжъугъэгушӀу. 24 Мы сэ скъо лӀагъэу щытыгъ, ау къэхъужьыгъ, кӀодыгъэу щытыгъ, ау къэдгъотыжьыгъ». Арэущтэу ешхэешъошхо ашӀэу аублагъ. 25 Ау тым ыкъо нахьыжъ губгъом итыгъ. КъэкӀожьэу унэм игъунэгъу къызэхъум, орэд макъэрэ Ӏэгу тео макъэрэ зэхихыгъ. 26 УнэӀутхэм ащыщэу зыгорэм еджи, «Сыда къэхъугъэр?» ыӀуи еупчӀыгъ. 27 УнэӀутым къыриӀуагъ: «ПшынахьыкӀэ къэкӀожьыгъ. Уятэ ар псаоу зэригъотыжьыгъэм пае, тэнэ гъэшхагъэр шӀуаригъэбзыгъ». 28 Къо нахьыжъым ар зызэхехым, къэгубжи, унэм ихьажьынэу фэягъэп. Ау ятэ унэм къикӀи, ихьажьынэу къелъэӀоу ыублагъ. 29 Къо нахьыжъым ятэ пэгъокӀ ритыгъ: «КъэдаӀу! Сэ мыщ фэдиз илъэс хъугъэу сыпфэлажьэ, о уиунашъохэми зыкӀи сатекӀыгъэп. Сэ синыбджэгъухэми ешхэешъошхо афэсшӀыным пае, зы чэцӀи къысэптыгъэп. 30 Ау джы о пкъо зыфапӀоу уимылъку бзылъфыгъэ хэтакӀохэм атезыгъэкӀодагъэр къэкӀожьыгъэшъ, тэнэ гъэшхагъэр фышӀуябгъэбзыгъ!» 31 Ау тым къыриӀуагъ: «Скъо, о сыдигъуи садэжь ущыӀ, сиӀэ пстэури оуий. 32 Ау тэ тыгушӀон ыкӀи тытхъэжьын фаеба, мы пшынахьыкӀэ лӀагъэу щытыгъ, ау къэхъужьыгъ, кӀодыгъэу щытыгъ, ау къэдгъотыжьыгъ»?
ЛӀы баим иунэзехьэ тхьагъэпцӀым ехьылӀэгъэ гъэсэныгъэ тхыдэр
1 ЛӀы бай горэм унэзехьэ горэ иӀагъ, ариӀуагъ Исус игъогу рыкӀохэрэм. «Мы лӀым уимылъку пшӀуегъэкӀоды», аӀуи, цӀыфхэм лӀы баим раӀуагъ. 2 Арэущтэу лӀы баир иунэзехьэ къеджи риӀуагъ: «0 къыохьылӀагъэу сыд мы зэхэсхырэр? Симылъку зэрэзепхьэгъэ шӀыкӀэр сэгъэлъэгъу. Джы нэуж симылъку о зепхьэ хъущтэп». 3 Унэзехьэм ышъхьэ фиӀожьыгъ: «Сыда сэ сшӀэщтыр? Ситхьаматэ сиӀоф сӀехыжьы. ЧӀыгур стӀынэу кӀуачӀэ икъун сиӀэп, сылъэӀонэуи сэукӀытэ. 4 СиӀоф сӀихыжьмэ, сшӀэщтыр джы сэшӀэ, цӀыфхэм яунэхэм сырагъэблэгъэным пае». 5 Арэущтэу унэзехьэр цӀыфхэу итхьаматэ ичӀыфэ зытелъхэм зырызэу къяджи, ахэмэ ащыщэу апэрэм риӀуагъ: «Ситхьаматэ ичӀыфэу сыд фэдиза птелъыр?» 6 ЧӀыфэр зытелъ лӀым къыӀуагъ: «Дэгъэ къошынишъэ стелъ». Адрэм риӀожьыгъ: «Мары уичӀыфэ тхылъ къэштэжьи, тӀыси, псынкӀэу шъэныкъо итх». 7 ЕтӀанэ унэзехьэм нэмыкӀ зыгорэми риӀуагъ: «О чӀыфэу сыд фэдиза птелъыр?» Ащ къыӀуагъ: «Коц дзыуишъэ стелъ». Адрэм риӀожьыгъ: «УичӀыфэ тхылъ къэштэжьи, тӀокӀиплӀ итх». 8 Арэущтэу зэхъум, тхьаматэр иунэзехьэ тхьагъэпцӀым щытхъужьыгъ, ӀушыгъэкӀэ зэрэзекӀуагъэм пае, сыда пӀомэ, мы дунаем ицӀыфхэр ежьхэр зэрэзэдэзекӀохэрэмкӀэ нэфынэ шъыпкъэм щызекӀорэ цӀыфхэм анахьи нахь Ӏушых. 9 Ау сэ шъосэӀо, дунэе мылъкумкӀэ ныбджэгъухэр зэжъугъэгъотых, а мылъкур зышъуухыкӀэ, мыкӀодыжьын псэупӀэм шъурагъэблэгъэным пае. 10 Ӏоф макӀэхэмкӀэ узщыгугъышъунэу щыт цӀыфым ӀофыбэхэмкӀи ущыгугъышъущт, Ӏоф макӀэхэмкӀи узщыгугъышъунэу щымыт цӀыфым ӀофыбэхэмкӀи ущыгугъышъущтэп. 11 Арэущтэу зыхъукӀэ, дунэе мылъкур зешъухьанэу зыщыгугъышъунхэ цӀыфхэу шъущымыты гъэмэ, ащыгъум мылъку шъыпкъэр хэт шъо шъуӀэ къизылъхьащтыр? 12 НэмыкӀхэм ямылъкукӀэ зыщыгугъышъунхэ цӀыфхэу шъущымытыгъэмэ, шъо шъуимылъку зешъухьанэу хэта къышъозытыщтыр? 13 Зы унэӀутыр тхьэмэтитӀум афэлэжьэн ылъэкӀыщтэп; сыда пӀомэ, е зыр ыуджэгъунышъ, адрэр шӀу ылъэгъущт, е зым шъыпкъэу фыщытынышъ, адрэр зэрипэсыщтэп. Шъо Тхьэми ахъщэми шъуафэлэжьэн шъулъэкӀыщтэп.
Тэурат хабзэмрэ Тхьэм и Тетыгъошхорэ
14 Ахъщэр шӀу дэдэу зылъэгъурэ фарисейхэм ар зэкӀэ зызэхахым, Исус дэхьащхыгъэх. 15 Ау Исус ахэмэ ариӀуагъ: Шъорыба, шъыпкъагъэ зиӀэ цӀыфхэм зафэзыгъадэхэу, цӀыфмэ апашъхьэ зафэу зыщызыгъэлъагъохэрэр, ау Тхьэм шъо шъугухэм арылъыр ешӀэ; сыДа пӀомэ цӀыфмэ агъэлъапӀэрэ Ӏофхэр Тхьэм ыдэжькӀэ лъэшэу пыутых. 16 Пегъымбар Мусэ и Тэурат хабзэ итхэмрэ пегъымбархэм атхыгъэхэм арытхэмрэ Тхьэм фэлажьэрэ цӀыфхэм агъэӀугъэх, умэхъэкӀо Иуан имафэхэм анэсыфэ. Ащ къыщегъэжьагъэу Тхьэм и Тетыгъошхо ехьылӀэгъэ къэбарышӀур агъэӀу, хэти а Тетыгъошхом ыӀэчӀэгъ чӀэхьаным гузэжъогъукӀи ыуж ит. 17 Ау пегъымбар Мусэ и Тэурат хабзэ ит хьарыфхэм анахь цӀыкӀур хэкӀодыкӀыным нахьи, уашъори чӀылъэри нахь кӀодыжьыщтых.
Шъхьэгъусэ тӀупщыжьыным ехьылӀагъ
18 Хэтми зишъуз зытӀупщыжьэу, нэмыкӀ бзылъфыгъэ къэзыщэжьырэм зинэ ышӀагъэу мэхъу. Ащ фэдэу хэтми лӀы горэм ытӀупщыжьыгъэ шъуз къэзыщэжьырэм зинэ ышӀагъэу мэхъу.
ЛӀы баимрэ Лазарырэ
19 ЛӀы бай горэ щыӀагъ. Ар щыгъынхэм анахь лъапӀэхэмкӀэ фэпагъэу, мафэ къэси ешхэешъошхо ышӀыщтыгъ. 20 ЛӀы баим икъэлапчъэ дэжь зы лӀы тхьамыкӀэ горэ, Лазар ыцӀэу, ыкӀышъо бэгухэр тетхэу щылъыгъ. 21 А лӀы тхьамыкӀэм лӀы баем иӀанэ къетэкъохыгъэхэмкӀэ имэлэкӀалӀэ ыгъэуцунэу шӀоигъуагъ. Хьэхэри къекӀуалӀэхэти, ибэгухэр абзэихьащтыгъэх. 22 ЛӀы тхьамыкӀэр дунаем ехыжьыгъ, мэлэӀичхэми ар Ибрахьимэ ыдэжь ахьыгъ. ЛӀы баири дунаем ехыжьи, чӀалъхьажьыгъ. 23 А лӀы баир гугъушхо хэтэу, лӀагъэхэм ячӀыпӀэ щыӀэу къыдэплъыий, Лазари бгъодэсэу, Ибрахьимэ ылъэгъугъ. 24 Ар зелъэгъум джагъэ: «Тятэ Ибрахьимэ, гукӀэгъу къысфэшӀи, Лазар къысфэгъакӀуи, ащ ыӀэхъомбапэ псым херэгъауи, сыбзэгу ерэгъэучъыӀ, сыда пӀомэ мы машӀом сыхэтэу къинышхо сэлъэгъу». 25 Ау Ибрахьимэ къыӀуагъ: «СикӀал, угу къэгъэкӀыжь, дунаем узытетым, уиӀэхьышӀу щыбгъотэу зэрэщытыгъэр, ау Лазар ащ фэдэу къин ыхьэу зэрэщытыгъэр. Ау джы ащ ыгу зыгъэрэзэн Ӏофхэр егъотыжьых, о къинышхом ухэт. 26 Ащ нэмыкӀэуи шъоррэ тэррэ тазыфагу тӀуакӀэ дэлъ, мыщ дэжьым къикӀыхэу шъуадэжь кӀонхэу фаехэр мыкӀошъунхэм пае. Ащ фэдэу шъуадэжь къикӀэу тадэжь зи къэкӀошъурэп». 27 Арэущтэу зеӀом, лӀы баим къыӀуагъ: «Ащыгъум тят, сыолъэӀу, сятэ иунэ Лазар гъакӀо, 28 сыда пӀомэ сэ шитф сиӀ. Мы къинышхо щэчыпӀэм ахэри къэмыкӀонхэм пае, фэсакъынхэу агурерэгъаӀу». 29 Ау Ибрахьимэ къыриӀожьыгъ: «Пегъымбар Мусэ ытхыгъэмрэ адрэ пегъымбархэм атхыгъэхэмрэ яӀэх, ахэмэ ярэдэӀух». 30 Ау лӀы баим къыӀуагъ: «Хьау, тятэ Ибрахьимэ, ау лӀагъэхэм къахэтэджыкӀыжьыгъэу зыгорэм ыгъэзэжьмэ, ахэмэ япсэкӀодхэм афыкӀэгъожьыщтых». 31 Ибрахьимэ къыриӀожьыгъ: «Пегъымбар Мусэмрэ адрэ пегъымбархэмрэ ямыдэӀухэмэ, зыгорэ лӀагъэхэм къахэтэджыкӀыжьыщтми, ашӀошъ хъущтэп».
Щыфхэм псэкӀод ашӀэнэу дэзыхьыхырэ Ӏофхэм, псэкӀод гъэгъуным, шӀошъхъуныгьэм, ӀорышӀэным яхьылӀагъ
1 ЦӀыфхэм псэкӀод ашӀэнэу дэзыхьыхырэ Ӏофхэр къэхъунхэ фае, ау а Ӏофхэр къызпкъырыкӀырэ цӀыфыр сыхьатмыгъо ежьагъ, ариӀуагъ Исус игъогу рыкӀохэрэм. 2 А цӀыфым мы цӀыкӀухэм ащыщэу зыгорэм псэкӀод ышӀэнэу дихьыхыным нахьи, мыжъо шъхьал ежьым ыпшъэтыкъ кӀэрашӀэу хым хадзагъэмэ, ежьымкӀэ нахьышӀущтыгъ. 3 Арышъ, шъузфэсакъыжь. О пшы псэкӀод ышӀэмэ, ар зэрэпсэкӀодыр еӀожь, ыкӀи ар кӀэгъожьмэ, фэгъэгъу. 4 Зы мафэм ыкӀоцӀы гъогогъуиблэ оркӀэ псэкӀод ышӀэмэ, къыгъэзэжьэу, «СыкӀэгъожьыгъ», ыӀомэ, фэгъэгъужь. 5 ШӀошъхъуныгъэу тиӀэм къытфыхэгъахъу! аӀуи, апостолхэм Зиусхьаным къыраӀуагъ. 6 Горчицацэм фэдизэу шӀошъхъуныгъэ шъуиӀэу, мы ынджыр чъыгым, «Зыкъыхэтхъыжьи, хым зыщыхэшӀэжь», ешъуӀомэ, къышъодэӀущт, къыӀуагъ Зиусхьаным. 7 Шъуащыщэу зыгорэм унэӀутэу иӀэр жъоу е мэлхэр ыгъэхъухэу тӀон. А унэӀутыр губгъом къызикӀыжькӀэ, «ПсынкӀэу къакӀуи, Ӏанэм къыпытӀысхь», риӀона? 8 Ар хэгъэкӀыри, риӀощтыр мыры: «Пчыхьэшъхьашхэ къысфэгъэхьазыри, уицыякӀэ дэупкӀи, сэшхэфэ, сешъофэ, къысшъхьащыт. Ащ нэужым о ушхэни уешъони уфит». 9 УнэӀутым унашъоу фэпшӀыгъэр зэригъэцэкӀагъэм пае, щытхъу фэпшӀыщта? Сыгугъэрэп. 10 Ащ фэдэу шъори унашъоу Тхьэм къышъуфишӀыгъэр зыжъугъэцэкӀэрэ ужым, мырэущтэу шъуӀон фае: «Тэ тыунэӀут ныӀэп. Тэ тшӀагъэр тшӀэн фаеу щытыр ары ныӀэп».
Исус шъоджэ уз Ӏаер зиӀэ лӀы нэбгыришлӀ зэригъэхъужьыгъэхэр
11 Исус Ерусалим кӀозэ, Самарие хэкумрэ Галилей хэкумрэ азыфагу кӀоцӀырыкӀыщтыгъ. 12 Къуаджэ горэм дахьэ пэтызэ, шъоджэ уз Ӏаер зиӀэ лӀы нэбгырипшӀ къыӀукӀагъэх. Чыжьэу къэуцухи, 13 мэкъэшхокӀэ къэджагъэх: Исус, тхьаматэ, гукӀэгъу къытфэшӀ! 14 Ахэр зелъэгъухэм, Исус къыӀуагъ: ШъукӀуи, дин пащэхэм зяжъугъэлъэгъу. Ахэр гъогум рыкӀохэзэ, къабзэу хъужьыгъэх. 15 Ахэмэ ащыщэу зым зэрэхъужьыгъэр зелъэгъум, мэкъэшхокӀэ Тхьэм щытхъу фишӀэу къыгъэзэжьыгъ. 16 Исус ылъакъохэм адэжь бгъэгукӀэ зыкъыщыридзыхи, щытхъу фишӀыгъ. А лӀыр Самарие хэкум щыщыгъ. 17 НэбгырипшӀыр къабзэу хъужьыгъэхэба? къыӀуагъ Исус. Адрэ нэбгырибгъур тыдэ къэнагъэха? 18 Мы лӀы хымэ закъом нэмыкӀ къыгъэзэжьэу, Тхьэм щытхъу фишӀынэу зи къахэкӀыгъэп, ара? 19 ЕтӀанэ Исус а лӀым риӀуагъ: Тэджи кӀожь, уишӀошъхъуныгъэ уигъэхъужьыгъ.
Тхьэм и Тетыгъошхо къызэрэкӀощтыр
20 Тхьэм и Тетыгъошхо сыдигъо къэкӀощта? аӀуи, фарисейхэр Исус къызеупчӀыхэм, ащ ариӀожьыгъ: Тхьэм и Тетыгъошхо нэрылъэгъоу къэкӀощтэп, 21 цӀыфхэми, «Мары, ар мыщ дэжьым щыӀ», е «Муары, модэ щыӀ», аӀощтэп. Сыда пӀомэ Тхьэм и Тетыгъошхо шъо къышъухэт. 22 ЕтӀанэ Исус игъогу рыкӀохэрэм ариӀуагъ: ЦӀыф Лъэпкъым ЬӀкъо имафэхэм ащыщэу зы мэфэ закъо нэмыӀэми шъулъэгъу зышъушӀоигъо мафэхэр къэкӀбщтых, ау ар шъулъэгъущтэп. 23 «Мары, ЦӀыф Лъэ пкъым Ыкъо мыщ дэжьым щыӀ», е «Муары, модэ щыӀ», къышъуаӀощт, ау ащ дэжьым шъумыкӀу, а цӀыфхэми шъуакӀэлъымычъ; 24 сыда пӀомэ зы ошъокъуапэм къыщегъэжьагъэу адрэ ошъокъуапэм нэс пчыкӀэм дунаер зэригъэнэфырэм фэдэу, ежьыр къызыкӀожьыщт мафэм ыдэжь ЦӀыф Лъэпкъым Ыкъо къэлъэгъожьыщт. 25 Ау ыпэ рапшӀэу къиныбэ ыщэчын фаеу щыт, джырэ цӀыфхэми ежьыр зэрамыпэсын фаеу щыт. 26 Пегъымбар Нухьэ имафэхэм адэжь Ӏофхэр зэрэщытыгъэхэм фэдэу, ЦӀыф Лъэпкъым Ыкъо дунаем къызыкӀожьыным ыпэрэ мафэхэм адэжь Ӏофхэр щытыщтых. 27 ЦӀыфхэр шхэщтыгъэх ыкӀи ешъощтыгъэх, къащэщтыгъ ыкӀи дакӀощтыгъэх, Нухьэ къухьэм зитӀысхьэгъэ мафэм нэсыфэкӀэ. ЕтӀанэ псы къиугъэшхор къакӀуи, ахэр зэкӀэ ыгъэкӀодыгъэх. 28 Пегъэмбар Лут имафэхэм адэжь Ӏофхэри ащ фэдэу щытыгъэх: ЦӀыфхэр шхэщтыгъэх ыкӀи ешъощтыгъэх, щэщтыгъэх ыкӀи щафэщтыгъэх, чӀыгуми хапхъэщтыгъэх, унэхэри ашӀыщтыгъэх. 29 Ау Лут Содом къалэм зыдэкӀыгъэ мафэм машӀорэ тхъомзашхъорэ уашъом къыщещхыхи, ахэр зэкӀэ ыгъэкӀодыгъэх. 30 ЦӀыф Лъэпкъым Ыкъо къызылъэгъожьыщт мафэм ыдэжьи Ӏофхэр ащ фэдэ къабзэу щытыщтых. 31 А мафэм унашъхьэм тетыр ихьапщыпхэу унэм илъхэр зыдихьынхэу унэм ерэмыхьажь. Губгъом итыми унэм къерэмыгъэзэжь. 32 Лут ишъуз къехъулӀагъэр шъугу къэжъугъэкӀыжь. 33 Хэтми зыпсэ мыкӀодэу къызэригъэнэжьыщтым ыуж итым ыпсэ шӀокӀодыщт, ау хэти зыпсэ зышӀокӀодырэм ыпсэ мыкӀодэу къыгъэнэжьыщт. 34 Сэ шъосэӀо, а чэщым нэбгыритӀу зы пӀэм хэлъыщтых. Язырэр мэлэӀичхэм уашъом дахьыещт, адрэри къагъэнэщт. 35 БзылъфыгъитӀу зэдэхьаджэщтых, язырэр мэлэӀичхэм уашъом дахьыещт, адрэри къагъэнэщт. 36 НэбгыритӀури губгъом итыщтых, язырэр мэлэӀичхэм уашъом дахьыещт, адрэри къагъэнэщт. 37 Тыда ар зыщыхъущтыр, Зиусхьан? къыраӀуагъ Исус. Хьайуан псэхалӀэр зыдэщыӀэм бгъэжъхэри щызэрэугъоищтых, ариӀожьыгъ Исус.
Шъузабэмрэ шъыпкъагъэ зимыӀэ хьыкумышӀэмрэ яхьылӀэгъэ гьэсэныгъэ тхыдэр
1 ЕтӀанэ игъогу рыкӀохэрэм агу амыгъэкӀодэу, Тхьэм елъэӀухэ зэпытыным пае, Исус зы гъэсэныгъэ тхыдэ къафиӀотагъ. 2 Мыщ фэдэу къыӀуагъ: Тхьэми щымыщынэу, цӀыфхэми ащымыукӀытэу, хьыкумышӀэ горэ къалэ горэм дэсыгъ. 3 А къэлэ дэдэм зы шъузабэ гори дэсыгъ. «Сидэогъу сифэшъуашэр къысегъэт», ыӀозэ, хьыкумышӀэм ыдэжь къэкӀо зэпытыщтыгъ. 4 Бэрэ хьыкумышӀэм шъузабэр зыкӀэлъэӀурэр фидагъэп. ЕтӀанэ ежь зэриӀожьыгъ: «Тхьэм сыщымыщынэми, цӀыфхэм сащымыукӀытэми, 5 сэ сшъхьэ ымыгъэуз зэпытыным пае, мы шъузабэм ифэшъуашэ езгъэгъотын. Армырмэ къысфэчъэ зэпытызэ зысигъэгъэпсэфыщтэп». 6 ЕтӀанэ Зиусхьаным ыӀуагъ: Шъыпкъагъэ зимыӀэ хьыкумышӀэм ыӀорэр зэхэшъоха? 7 Тхьэм ежь къыхихыгъэ цӀыфхэу чэщи мафи лъэшэу къелъэӀухэрэм яфэшъуашэ аригъэгъотынба? Яфэшъуашэ аригъэгъотыным бэрэ ригъэжэщтха? 8 Сэ шъосэӀо, ахэмэ яфэшъуашэ псынкӀэу аригъэгъотыщт. Ау ЦӀыф Лъэпкъым Ыкъо мы дунаем къызыкӀожькӀэ, шӀошъхъуныгъэ зиӀэхэр щигъотыщтха?
Фарисеимрэ хьакъулахь ахъщэр хэзыхырэ лӀымрэ яхьылӀэгъэ гъэсэныгъэ тхыдэр
9 Ащ нэмыкӀэуи ежьхэм шъыпкъагъэ яӀэу зыщыгугъыжьхэу, нэмыкӀхэр зэзымыпэсырэ цӀыф заулэм Исус мы гъэсэныгъэ тхыдэр къафиӀотагъ: 10 НэбгыритӀу Тхьэм елъэӀунхэу Тхьэм иунэшхо кӀуагъэх. Зыр фарисейхэм ащыщыгъ, адрэр хьакъулахь ахъщэр хэзыххэрэм ащыщыгъ. 11 Фарисеир ащ дэжьым щытэу, ыгукӀэ мырэущтэу Тхьэм елъэӀущтыгъ: «Адрэ цӀыфхэу хъункӀакӀохэми, бзэджашӀэхэми, зинэ зышӀэхэрэми, модэ щыт хьакъулахь ахъщэр хэзыхырэми сэ сызэрафэмыдэм пае, щытхъу пфэсэшӀы, Ситхь. 12 Сэ тхьамафэ къэс мэфитӀо сэнэкӀы, федэу згъотырэм ипшӀанэ Тхьэм пае сэты». 13 Ау хьакъулахь ахъщэр хэзыхырэр чыжьэу къэуцугъэу, ынэхэмкӀэ уашъом дэплъыенэу фэмыеу, ыбгъэгу еозэ Тхьэм елъэӀущтыгъ: «Ситхь, сэ, псэкӀод зышӀэрэ цӀыфым, гукӀэгъу къысфэшӀ». 14 Сэ шъосэӀо, адрэ лӀым фэмыдэу мы лӀым ТхьэмкӀэ шъыпкъагъэ иӀэу Ӏдэжь кӀожьыгъэ. Сыда пӀомэ хэти зышъхьэ зыгъэиныжьырэр Тхьэм ыгъэцӀыкӀущт, ежь ышъхьэ зыгъэцӀыкӀужьырэри Тхьэм ыгъэиныщт.
Исусэ сабыйхэмрэ
15 ЕтӀанэ цӀыфхэм сабыйхэр Исус къыфащагъэх, Тхьэм ынэшӀу къащифэным пае, Исус ахэмэ атеӀэбэнэу. Ау игъогу рыкӀохэрэм ар залъэгъум, афадагъэп. 16 Ау Исус сабыйхэм къяджи къыӀуагъ: Сабыйхэр садэжь къэрэкӀох? зи яшъумыӀоу, сыда пӀомэ ащ фэдэхэр Тхьэм и Тетыгъошхо ыӀэчӀэгъ чӀэтых. 17 Шъыпкъэр шъосэӀо, сабыим Тхьэм и Тетыгъошхо зэридэрэм фэдэу, хэтми Тхьэм и Тетыгъошхо зымыдэрэр а Тетыгъошхом ыӀэчӀэгъ чӀэхьащтэп.
Тхьэмэтэ баир
18 Зы тхьаматэ горэ Исус къеупчӀыгъ: Дин гъэсэкӀо дэгъу, мыкӀодыжьын щыӀэныгъэ Ӏэхьы шӀу къыслъысыным пае, сыда сшӀэн фаер? 19 Сыда дэгъукӀэ укъызкӀысаджэрэр? риӀожьыгъ Исус а лӀым. Тхьэм нэмыкӀэу зи дэгъу щыӀэп. 20 Тхьэм иунашъохэр ошӀэх: «Зинэ умышӀэ, цӀыф умыукӀ, умытыгъу, нэмыкӀ цӀыфхэм пцӀы атемылъхь, уятэрэ уянэрэ лъытэныгъэ афэшӀ». 21 СикӀэлэгъу къыщегъэжьагъэу ахэр зэкӀэ сэгъэцакӀэх, риӀожьыгъ адрэм. 22 Ар Исус зызэхехым, риӀуагъ: Джыри зы уищыкӀагъ. УиӀэр зэкӀэ щэжьи, ахъщэр тхьамыкӀэхэм ят. Джащыгъум уашъом мылъкушхо щыуиӀэ хъущт. ЕтӀанэ сауж къырыкӀу. 23 Адрэм ар зызэхехым, ыгу лъэшэу къеуагъ, сыда пӀомэ мылъкушхо иӀагъэти ары. 24 Ау Исус ащ ыгу къызэреорэр зелъэгъум, къыӀуагъ: Мылъку зиӀэхэмкӀэ Тхьэм и Тетыгъошхо ыӀэчӀэгъ чӀэхьанхэу сыдэу къин! 25 Баир Тхьэм и Тетыгъошхо ыӀэчӀэгъ чӀэхьаным нахьи, махъшэр мэстанэм икӀыныр нахь ӀэшӀэх. 26 Ар зэхэзыхыгъэ цӀыфхэм къаӀуагъ: Арэущтэу щытмэ, ежьым зимыгъэкӀодэу, хэта зыкъэзыгъэнэжьын зылъэкӀыщтыр? 27 ЦӀыфмэ ашӀэн амылъэкӀырэр Тхьэм ышӀэн елъэкӀы, къыӀуагъ Исус. 28 Мо къэдаӀолъ! къыӀуагъ Петрэ. Тэ тиӀэгъэ пстэури къэдгъани, о уауж тыкъырыкӀуагъ. 29 Шъыпкъэр шъосэӀо, ариӀожьыгъ Исус, хэт щыщми е зиунэ, е зятэянэхэр, е зышхэр, е зышыпхъухэр, е зишъуз, е зибынхэр Тхьэм и Тетыгъошхо пае къэзыгъэнагъэу, 30 иӀагъэм нахьи бэкӀэ нахьыбэ мы дунаем щызымыгъотыжьыщт цӀыф зи щыӀэп, адрэ дунаеми мыкӀодыжьын щыӀэныгъэ щыриӀэ хъущт.
Исус ежьыр зэраукӀыщтри, лӀагъэхэм къызэрахэтэджыкӀыжьыщтри ящэнэрэу къызэриӀуагъэр
31 Исус игъогу рыкӀорэ нэбгырэ пшӀыкӀутӀур зы лъэныкъокӀэ Ӏуищыхи ариӀуагъ: Мары, тэ джы Ерусалим тыдэкӀуае. ЦӀыф Лъэпкъым Ыкъо ехьылӀагъэу пегъымбархэм атхыгъэ пстэури къехъулӀэхэзэ, къэшъыпкъэжьыщтых. 32 Ащ къикӀырэр ежьыр хымэ лъэпкъхэм аӀэкӀэхьащт. Ахэри къыкӀэнэкӀэщтых, къехъоныщтых ыкӀи къытеужъунтхэщтых. 33 ЕтӀанэ къамыщкӀэ къеощтых ыкӀи аукӀыщт, ящэнэрэ мафэми ежьыр лӀагъэхэм къахэтэджыкӀыжьыщт. 34 Ау игъогу рыкӀохэрэм а гущыӀэхэу ариӀуагъэхэм ащыщэу зи къагурыӀуагъэп. А гущыӀэхэм къарыкӀырэр ахэмкӀэ шъэфэу щытыгъэх, Исус ахэмэ къаригъэкӀыгъэри къагурыӀуагъэп.
Исус зы лъэӀокӀо нэшъу горэ зэригъэхъужьыгьэр
35 Исус Ерихон къалэм кӀозэ игъунэгъоу зэхъум, нэшъу горэ лъэӀуакӀоу гъогу напцэм Ӏусыгъ. 36 ЦӀыф купышхо блэкӀэу зызэхехым, ар къэупчӀагъ: Сыда мыр? 37 Назарет щыщ Исус мыщ дэжьым блэкӀы, къыраӀуагъ цӀыфхэм. 38 Ар къызаӀом, нэшъур мэкъэшхокӀэ къэджагъ: Даутэ Ыкъо Исус, гукӀэгъу къысфэшӀ! 39 Апэ ит цӀыфхэм амыдэу, «Щыгъэт!» аӀуи къыраӀуагъ. Ау ар джыри нахь мэкъэшхокӀи къэджагъ: Даутэ ЬӀкъу, гукӀэгъу къысфэшӀ! 40 Исус къызэтеуцуи, ежьым ыдэжь а лӀыр къаригъэщагъ. Нэшъур игъунэгъоу къызэкӀом, еупчӀыгъ: 41 Сыда къыпфэсшӀэнэу узыфаер? Тхьаматэ, сынэхэр къэгъэплъэжьых, къыӀожьыгъ нэшъум. 42 Унэхэр къэплъэжьыщтых, къыриӀуагъ Исус. УишӀошъхъуныгъэ уигъэхъужьыгъ. 43 Ардэдэм нэшъум ынэхэр къэплъэжьыгъэх, Тхьэми щытхъу фишӀызэ, Исус ыуж ихьагъ, ЦӀыф пстэуми ар залъэгъум, ахэми Тхьэм щытхъу фашӀыгъ.
Исусрэ Закхейрэ
1 Ащ нэужым Исус Ерихон къалэм дэхьагъэу ащ кӀоцӀырыкӀыщтыгъ. 2 3акхей зыцӀэу зы лӀы горэ ащ дэсыгъ. Ар хьакъулахь ахъщэр хэзыххэрэм япащэхэм ащыщыгъ, цӀыф баеуи щытыгъ. 3 Исус хэтми зыщыщыр зэригъэлъэгъумэ шӀоигъуагъ, арышъхьакӀэ ежьыр лӀы мылъагэу щытыти, цӀыф купышхом хэтэу зи ылъэгъун ылъэкӀыщтыгъэп. 4 Арыти, цӀыфхэм апэ ишъи, ынджыр чъыг горэм дэпшыягъ, Исус ылъэгъуным пае, сыда пӀомэ Исус а гъогумкӀэ блэкӀын фэягъ. 5 Исус а чӀыпӀэм зынэсым, дэплъыий, Закхей риӀуагъ: Закхей, псынкӀэу къех, непэ уадэжь себлэгъэн фае. 6 Закхей псынкӀэу къехыжьи, игуапэу иунэ Исус ригъэблэгъагъ. 7 ЦӀыф пстэуми ар залъэгъум, агу емыӀоу аӀуагъ: ПсэкӀод зышӀэрэм ыдэжь хьакӀэу ихьагъ. 8 Закхей къэтэджи, Зиусхьан Исус къыриӀуагъ: Мо къэдаӀолъ, Зиусхьан! Симылъку ызыныкъо тхьамыкӀэхэм ястыщт. Зы Ӏоф горэмкӀэ цӀыф горэ згъэпцӀагъэмэ, фэдиплӀ ар фэспщыныжьыщт. 9 ЦӀыфхэр мыкӀодхэу къэзыгъэнэжьырэр непэ мы унагъом ыдэжь къэкӀуагъ, риӀуагъ Исус Закхей, сыда пӀомэ мы лӀыри Ибрахьимэ къытехъукӀыгъэ цӀыфхэм ащыщ. 10 Сыда пӀомэ ЦӀыф Лъэпкъым Ыкъо къызфэкӀуагъэр цӀыфхэу кӀодыгъэхэм алъыхъунышъ, мыкӀодхэу къыгъэнэжьынхэр ары.
Минэ зыцӀэ ахъщэхэм яхьылӀэгъэ гъэсэныгъэ тхыдэр
11 ЦӀыфхэр Исус гущыӀэхэу къыӀохэрэм ядэӀухэ зэхъум, мы гъэсэныгъэ тхыдэр къыпигъэхъуагъ; сыда пӀомэ Исус Ерусалим игъунэгъоу щытыгъ, Тхьэм и Тетыгъошхо ардэдэм къэлъэгъонэуи цӀыфхэр гугъэщтыгъэх. 12 Арэущтэу зэхъум, Исус къыӀуагъ: Зы пщы горэ зы хэгъэгу чыжьэ горэм кӀонэу щытыгъ, ежь ихэгъэгу пае пачъыхьэ заригъэшӀынышъ, етӀанэ къыгъэзэжьыным пае. 13 ДэкӀыным ыпэкӀэ, иунэӀутхэм ащыщхэу нэбгырипшӀ къяджи, минэ зыцӀэ ахъщэ зырыз арити ариӀуагъ: «Къэсэгъэзэжьыфэ, мы ахъщэмкӀэ къэшъущэф ыкӀи шъущэ». 14 Ау мы пщым ихэгъэгу щыщ цӀыфхэм ежьыр ауджэгъущтыгъэти, «Мы лӀыр пачъыхьэ къытфэхъунэу тыфаеп», аӀоу арагъэӀонэу лӀыкӀохэр пщым ыужкӀэ а хэгъэгум агъэкӀуагъэх. 15 Ащж пае къэмынэу а пщыр пачъыхьэу агъэнэфагъ. ЕтӀанэ пщым къызегъэзэжьым, унэӀутхэу ахъщэхэр зэритыгъагъэхэм къяджагъ. Ахэмэ ащыщэу хэти ищэнщэфэн ӀофкӀэ ыгъэхъагъэхэр зэригъашӀэмэ шӀоигъуагъ. 16 Апэрэ унэӀутыр къакӀуи къыӀуагъ: «Тхьаматэ, къысэптыгъэ минэ ахъщэмкӀэ фэдипшӀ къэзгъэхъагъ». 17 Тхьаматэм ащ риӀуагъ: «Дэгъоу пшӀагъэ, сиунэӀут дэгъу! Ӏоф макӀэхэмкӀэ сызщыгугъышъунэу лӀэу узэрэщытыгъэм пае, къэлипшӀ къыпӀэкӀэслъхьащт». 18 ЯтӀонэрэ унэӀутыр къакӀуи къыӀуагъ: «Тхьаматэ, къысэптыгъэ минэ ахъщэмкӀэ фэдитф къэзгъэхъагъ». 19 Тхьаматэм ащ риӀуагъ: «Къэлитф о къыпӀэкӀэслъхьащт». 20 Ящэнэрэ унэӀутри къакӀуи къыӀуагъ: «Тхьаматэ, мары о уиминэ ахъщэ. Хъэдэн горэм кӀоцӀысщыхьи, щыззгъэлъыгъ. 21 ЛӀы пхъашэу узэрэщытым пае, сыкъыпщыщынагъ. УмыгъэтӀылъыгъэр къэоштэжьы, чӀыгум о хэмыпхъагъэри къэохыжьы». 22 Итхьаматэ ащ риӀуагъ: «О уигущыӀэхэмкӀэ узгъэмысэщт, о унэӀут бзадж! О пшӀэщтыгъ сэ лӀы пхъашэу сы зэрэщытри, сымыгъэтӀылъыгъэр къызэрэсштэжьырэри, чӀыгум хэсымыпхъагъэр къызэрэсхыжьырэри. 23 Сиахъщэ банкым сыда о зыкӀимылъхьагъэр? Ащыгъум къызысэгъэзэжьым, сиахъщэ хэхъуагъэу къычӀэсхыжьыщтыгъ». 24 ЕтӀанэ тхьаматэм къыбгъодэтхэм ариӀуагъ: «Мы лӀым минэ ахъщэр Ӏышъухи, минэ ахъщипшӀ зиӀэм ешъут». 25 Ахэмэ раӀуагъ: «Тхьаматэ, минэ ахъщипшӀ ащ иӀахэба?» 26 Тхьаматэм къыӀожьыгъ: «Сэ шъосэӀо, Тхьэм хэт щыщми зиӀэм нахьыбэ къыритыщт, ау Тхьэм зи зимыӀэм иӀэ тӀэкӀури Ӏихыжьыщт. 27 Ау джы сэ сипыйхэу пачъыхьэ сафэхъунэу фэмыягъэхэр къашъущэхи, сапашъхьэ щышъуукӀых».
Щытхъушхо иӀэу, Исус Ерусалим зэрэдэхьагъэр
28 Исус а гущыӀэхэр къызеӀохэм ыуж, Ерусалим дэкӀоенэу игъогу техьажьыгъ. 29 Елеон зыцӀэ Ӏуашъхьэм Ӏус къуаджэхэу Виффагиерэ Вифаниерэ зыцӀэхэм Исус ягъунэгъу зэхъум, игъогу рыкӀохэрэм ащыщхэу нэбгыритӀу ыпэкӀэ ыгъэкӀуагъэх, 30 мырэущтэу ариӀозэ: ШъуапэкӀэ ит къуаджэм шъудахь. Шъузэрэдахьэу щыд къунанэу зы цӀыф ныбжьи зытемытӀысхьагъэр епхыгъэу шъуапэ къифэщт. Ар къыкӀэрышъутӀэтыкӀи, мо къашъущэ. 31 «Сыд ар къызыкӀыкӀэрышъутӀэтыкӀырэр?» ыӀоу, зыгорэ къышъоупчӀымэ, мырэущтэу ешъуӀу: «Зиусхьаныр ащ фай». 32 А лӀыкӀуитӀур кӀохи, Исус зэрариӀуагъэм тетэу зэкӀэ къагъотыгъ. 33 Щыд къунаныр къызыкӀэратӀэтыкӀым, ар зиехэм къараӀуагъ: Сыда щыд къунаныр зыкӀыкӀэрышъутӀэтыкӀырэр? 34 Зиусхьаныр ащ фай, къаӀуагъ ахэмэ. 35 ЕтӀанэ щыд къунаныр Исус дэжь къащи, ящыгъынхэр тыралъхьахи, Исус тырагъэтӀысхьагъ. 36 Исус щыд къунаным тесэу кӀо зэхъум, цӀыфхэм ящыгъынхэр гъогум фытыраубгъощтыгъэх. 37 Ерусалим игъунэгъоу гъогур Елеон Ӏуашъхьэм къызщехырэ чӀыпӀэм Исус зынэсым, Ӏофышхо гъэшӀэгъонхэу алъэгъугъэ пстэуми апае гушӀохэу, мэкъэшхокӀэ Тхьэм щытхъу фашӀэу, игъогу рыкӀорэ куп пстэуми аӀоу аублагъ: 38 Зиусхьаным ыцӀэкӀэ къакӀорэ пачъыхьэм щытхъушхор ий! Мамырныгъэ уашъом щыӀ! Анахь Иным щытхъушхор ий! 39 ЦӀыф купышхом хэтэу фарисей заулэмэ Исус къыраӀуагъ: Дин гъэсакӀу, уигъогу рыкӀохэрэм щагъэтынэу яӀу! 40 Сэ шъосэӀо, къыӀожьыгъ Исус, ахэмэ щагъэтмэ, мыжъохэр къэкуощтых. 41 Исус Ерусалим нахь игъунэгъу къэси, къалэр зелъэгъум, ащ фэгъызэ къыӀуагъ: 42 О мамырныгъэ къыпфэзыхьыщт Ӏофхэр непэ пшӀагъоет, ау джы о унэхэм ахэр ашӀогъэбылъыгъэу щытых; 43 сыда пӀомэ, уипыйхэм пытапӀэхэмкӀэ укъызыщауцухьащт мафэхэр къыпфэкӀощтых. Ахэмэ о укъаухъурэищт, тэдрэ лъэныкъокӀи къыптезэрэгъэбэнэщтых. 44 Уипыйхэм ори уибынхэу къыбдыдэсхэри шъуагъэкӀодыщт, мыжъуитӀу зэтелъэуи къагъэнэщтэп, умыкӀодэу Тхьэм укъызигъэнэжьын уахътэр къызэрэпфифагъэр къызэрэбгурымыӀуагъэм пае.
Исус щэнщэфакӀохэр Тхьэм иунэшхо къызэрэчӀифыгьэхэр
45 ЕтӀанэ Исус Тхьэм иунэшхо чӀахьи, щэнщэфакӀохэр къычӀифхэу ьгублагъ. 46 Ахэмэ ариӀуагъ: Тхьэм къызэриӀорэр игущыӀэ тхыгъэхэм арыт: «Сэ сиунэ тхьэлъэӀупӀэу щытыщт». Ау шъо «хъункӀэкӀо гъэбылъыпӀэм» фэдэу шъушӀыгъэ. 47 Мафэ къэси Тхьэм иунэшхо чӀэтэу, Исус цӀыфхэм Тхьэм игущыӀэхэр аригъашӀэщтыгъэх. АрышъхьакӀэ дин пэщэшхохэм, Тэурат егъэджэкӀо пащэхэм, адрэ тхьаматэхэу цӀыфмэ яӀэхэм Исус зэрагъэкӀодыщт шӀыкӀэм лъыхъухэу аублагъ, 48 ау цӀыф пстэуми ягуапэу Исус едэӀущтыгъэхэти, мыхъунэу рашӀэнэу зи агъотыгъэп.
Джурт тхьаматэхэр Исус итетыгъо къезытыгъэмкӀэ къызэреупчӀыгъэхэр
1 Мафэ горэм Тхьэм иунэшхо чӀэтэу, Исус цӀыфхэм Тхьэм игущыӀэхэр аригъашӀэхэзэ, къэбарышӀур аригъэӀущтыгъэ. Джащыгъум дин пэщэшхохэмрэ Тэурат егъэджэкӀо пащэхэмрэ нахьыжъхэр ягъусэхэу къыбгъодахьэхи къеупчӀыгъэх: 2 КъытаӀу, мы Ӏофхэр пшӀэнхэу фитыныгъэр тыда къыздипхыгъэр, е ахэр пшӀэнхэу тетыгъор хэта о къыозытыгъэр? 3 Сэри шъо зы Ӏоф горэкӀэ сышъоупчӀыщт, ариӀожьыгъ Исус. ПэгъокӀ къысэшъут. 4 Иуан цӀыфхэр ыумэхъынхэу хэта къэзыгъэкӀуагъэр, цӀыфхэр ара, хьауми Тхьэр ара? 5 «Тхьэр ары Иуан къэзыгъэкӀуагъэр», тӀомэ, «Адэ, сыд пае Иуан къыӀуагъэхэр шъушӀошъ мыхъугъэха?» къыӀожьыщт, аӀозэ, ахэр зэупчӀыжьыгъэх. 6 Ау «ЦӀыфхэр ары къэзыгъэкӀуагъэхэр», тӀомэ, цӀыф пстэури мыжъохэмкӀэ къытаохэзэ, таукӀыщт, сыда пӀомэ Иуан пегъымбарэу зэрэщытыгъэр ашӀошъ мэхъу. 7 Арыти, Иуан къэзыгъэкӀуагъэр тшӀэрэп, къаГуагъ. 8 Ащыгъум сэри шъосӀощтэп, мы Ӏофхэр сшӀэнхэу фитыныгъэр къыздисхыгъэр, ариӀожьыгъ Исус.
СэнэшъхьэшӀэ бзаджэхэм яхьылӀэгъэ гьэсэныгъэ тхыдэр
9 ЕтӀанэ Исус цӀыфхэм мы гъэсэныгъэ тхыдэр афиӀуатэу ыублагъ: ЛӀы горэм сэнэшъхьэ хатэ ыгъэтӀысхьи, сэнэшъхьашӀэ горэхэм аӀэкӀилъхьагъ. Ащ нэужым хымэ хэгъэгу горэм бэрэ къэтынэу кӀуагъэ. 10 Сэнэшъхьэ пычыжьыгъор къызэсым, исэнэшъхьэ Ӏахьэ къыратыжьынэу сэнэшъхьашӀэхэм адэжь зы унэӀут горэ ыгъэкӀуагъ. Ау сэнэшъхьашӀэхэр унэӀутым къеохи, ӀэнэкӀэу къатӀупщыжьыгъ. 11 Хатэр зием етӀани зы унэӀут горэ ыгъэкӀуагъ, ау ащи къеохи, лые къырахи, ӀэнэкӀэу къатӀупщыжьыгъ. 12 ЕтӀани ящэнэрэ унэӀут горэ ыгъэкӀуагъ. Ари къауӀи, къыдафыжьыгъ. 13 Джащыгъум сэнэшъхьэ хатэр зием къыӀуагъ: «Сыда сшӀэщтыр? Сэ шӀу слъэгъурэ скъо кӀасэр згъэкӀон. Ащ лъытэныгъэ къыфашӀынкӀи мэхъу». 14 Ау сэнэшъхьашӀэхэм хатэр зием ыкъо залъэгъум, зэупчӀыжьхи зэраӀожьыгъ: «Мыры сэнэшъхьэ хатэр къызыфэнэжьыщтыр. Ар тэжъугъэукӀи, сэнэшъхьэ хатэр тэ къытфэнэжьыщт». 15 Арэущтэу сэнэшъхьэ хатэм къыдадзыжьи къаукӀыгъ. Сэнэшъхьэ хатэр зием сыда ахэмэ аришӀэщтыр? къыпигъэхъожьыгъ Исус. 16 Ар къэкӀонышъ, сэнэшъхьашӀэхэр ыгъэкӀодынхэшъ, сэнэшъхьэ хатэр нэмыкӀхэм аӀэкӀилъхьащт. Тхьэм ерэмыд! къаӀуагъ цӀыфхэм ар зызэхахым. 17 Ау Исус ахэмэ яплъи къыӀуагъ: Ащыгъум мы гущыӀэхэу Тхьэм игущыӀэ тхыгъэхэм арытхэм сыда къарыкӀырэр: «Унэ зышӀыхэрэм зэрамыпэсэу чӀадзыжьыгъэ мыжъор мыжъо лъэпсэ дэдэу унэм фэхъугъ»? 18 А мыжъом тефэрэр къызэпкъыриутыщт, ау зытефэрэр мыжъом ыщытӀэщт. 19 Тэурат егъэджэкӀо пащэхэмрэ дин пэщэшхохэмрэ Исус мы гъэсэныгъэ тхыдэр ежьхэм яхьылӀагъэу къызэриӀотагъэр къагурыӀуагъэти, а сыхьат дэдэм Исус къаубытынэу пылъыгъэх, ау цӀыфхэм ащыщынэщтыгъэх.
Хьакъулахь ахъщэм ехьылӀагъ
20 Арыти, Тэурат егъэджэкӀо пащэхэмрэ дин пэщэшхохэмрэ Исус еплъакӀощтыгъэх, къуалъхьэкӀи ащэфыгъэхэу, шъыпкъагъэ зиӀэ цӀыфхэм афэдэу тхьагъэпцӀыгъэкӀэ зызышӀырэ цӀыф куп фагъэкӀуагъэх. Исус хэкум игацэу тетыгъор зиӀэм ыӀэ ӀэкӀагъэхьаным пае, зы гущыӀэ горэм тыраубытэнэу гугъэщтыгъэх. 21 Ахэр Исус къеупчӀыгъэх: Дин гъэсакӀу, о шъыпкъагъэр къызэрэпӀорэри, цӀыфхэм шъыпкъагъэр зэрябгъашӀэрэри тэшӀэ. ЦӀыфхэм ятеплъэ уемыплъэу, цӀыф пстэури уизэфэдэхэу щытых, шъыпкъагъэм тетэуи Тхьэм игъогу цӀыфхэм яогъашӀэ. 22 Кайсарым хьакъулахь ахъщэр етты хъущта, мыхъущта? 23 Ау Исус ахэмэ ятхьагъэпцӀыгъэ гу лъитагъэти ариӀуагъ: Сыд пае сыхэжъугъэукъонэу шъупылъа? 24 Зы динар ахъщэ сэжъугъэлъэгъу. Хэта зисурэт мыщ итыри, хэта зыцӀэ мыщ тетхагъэри? Кайсарыр ары, къаӀуагъ ахэмэ. 25 Ащыгъум Кайсарым иер Кайсарым ешъутыжь, Тхьэм иери Тхьэм ешъутыжь, ариӀуагъ Исус. 26 Арэущтэу цӀыфхэм апашъхьэ гущыӀэ горэм щытыраубытэнэу алъэкӀыгъэп, пэгъокӀэу Исус аритыгъэри агъэшӀагъозэ заушъэфыгъ.
Саддукейхэр лӀагъэхэм якъэтэджыжьын ехьылӀагъэу Исус къызэреупчӀыгъэхэр
27 Саддукейхэу лӀагъэхэр къызэрэтэджыжьыщтхэр зышӀошъ мыхъухэрэм ащыщхэу заулэ Исус къыбгъодахьэхи къеупчӀыгъэх: 28 Дин гъэсакӀу, пегъымбар Мусэ мырэущтэу къытфитхыгъ: «ЛӀы горэм ышы лӀэу, бын имыӀэу шъуз къыкӀэнмэ, ышы унагъо фишӀыным пае, а лӀым шъузабэр къыщэжьын фае». 29 Джы зэкъошибл щыӀагъ. Ахэмэ ащыщэу апэрэм шъуз къыщагъ, ау бын къыкӀэмынэу дунаем ехыжьыгъ. 30 ЯтӀонэрэми а шъузыр къыщэжьыгъ. Ащи бын къыкӀэмынэу дунаем ехыжьыгъ. 31 Ящэнэрэми а шъузыр къыщэжьыгъ. Ащ фэдэуи яблэнэрэм нэс бын къакӀэмынэу зэкӀэри дунаем ехыжьыгъэх. 32 Зэпстэуми ауж дэдэу шъузыри дунаем ехыжьыгъ. 33 Джы лӀагъэхэр къызытэджыжьхэкӀэ, хэта зишъузыщтыр ар? Сыда пӀомэ блыми шъузэу яӀагъэшъ ары. 34 Джырэ цӀыфхэм къащэх ыкӀи дэкӀох, ариӀожьыгъ Исус ахэмэ. 35 Ау лӀагъэхэм къахэтэджыкӀыжьынхэшъ, адрэ дунаем щыпсэунхэу зифэшъуашэхэм шъуз къащэжьыщтэп, лӀыми дэкӀожьыщтхэп. 36 Ахэр мэлэӀичхэм афэдэх, лӀэн алъэкӀыжьыщтэп ыкӀи лӀагъэхэм къахэтэджыкӀыжьыгъэхэшъ, Тхьэм ибынхэу щытых. 37 Ау лӀагъэхэр къызэрэтэджыжьыщтхэр пегъымбар Мусэми нафэу къыгъэлъэгъуагъ. Сыда пӀомэ пэнэ куандэм икъэбар Тэурат хабзэм зэрыт чӀыпӀэм ыдэжь ит пегъымбар Мусэ Тхьэу Зиусхьаным «Ибрахьими, Исхьакъи, Якъуби я ТхьэкӀэ» зэреджэрэр. 38 Ащ къикӀырэр Тхьэр псэухэмрэ лӀагъэхэу зыфаӀохэрэмрэ я Тхьэу зэрэщытыр ары; сыда пӀомэ ежьым ыдэжькӀэ пстэури псэух. 39 Исус ар къызеӀом, Тэурат егъэджэкӀо пащэхэм ащыщхэу заулэмэ къаӀуагъ: Дин гъэсакӀу, дэгъоу къэпӀуагъ. 40 ЕтӀанэ ащ нэмыкӀыкӀэ Исус къеупчӀыжьынэу хэти тегушхуагъэп.
Христос хэта зыкъор?
41 Ащ дэжьым Исус ахэмэ ариӀуагъ: Христос Даутэ ыкъоу сыдэущтэу аӀонэу хъугъа? 42, 43 Сыда пӀомэ ежь Даутэ мыщ фэдэу къызэриӀуагъэр Сэбурым итба: «Тхьэу Зиусхьаным сэ си Зиусхьан къыриӀуагъ: О уипыйхэр лъэгукӀэтын пфэсшӀыхэфэ, сэ сиджабгъукӀэ къызготӀысхь»? 44 Ежь Даутэ Христос «Си ЗиусхьанкӀэ» еджэ,къыпигъэхъожьыгъ Исус. Арэу зыхъукӀэ, сыдэущтэу Христос Даутэ Ыкъоу хъура?
Исус Тэурат егъэджэкӀо пащэхэм ямысагъэ къызэригъэлъэгъуагъэр
45 ЦӀыф пстэури Исус къедэӀухэ зэхъум, игъогу рыкӀохэрэм ариӀуагъ: 46 Тэурат егъэджэкӀо пащэхэм шъуафэсакъ. Ахэмэ шъошэ кӀыхьэхэр ащыгъхэу къакӀухьаныр якӀас. ЗэӀукӀэхэми ежьхэм аӀэхэм цӀыфхэр ащырагъэбэунхэр шӀу алъэгъу. Синэгогухэм цӀыфхэр защызэӀукӀэхэкӀи, ешхэешъошхохэм адэжьи тхьэмэтэ тӀысыпӀэхэр аубытынхэри шӀу алъэгъу. 47 Шъузабэхэм яунэхэри къатырахых. ЦӀыфхэм зыкъарагъэгъэшӀэгъоным пае, ятхьэлъэӀухэр агъэкӀыхьэх. Тхьэм ахэмэ яфэшъуашэ инэу аригъэпщыныжьыщт.
Шъузабэм ахъщэу Тхьэм пае ытыгъэр
1 Исус Тхьэм иунэшхо чӀэтэу зэплъэм, цӀыф байхэм Тхьэм тын фашГэу, ахъщэхэр пхъуантэхэм адалъхьэхэу ылъэгъугъ. 2 Яплъы зэхъум, шъузэбэ тхьамыкӀэ горэм гъоплъэ ахъщитӀу пхъуантэм дилъхьэу ылъэгъугъ. 3 Шъыпкъэр шъосэӀо, къыӀуагъ, мы шъузэбэ тхьамыкӀэм адрэ пстэуми анахьи нахьыбэ дилъхьагъ; 4 сыда пӀомэ ахэмэ ахъщэу къялыжьыгъэм щыщ далъхьагъэти ары, ау а шъузабэм зэрыпсэунэу мэкӀэ тӀэкӀоу иӀэр зэкӀэ дилъхьагъ.
Тхьэм иунэшхо зэрэзэхакъутэщтыр Исус къызэриӀуагъэр
5 Тхьэм иунэшхо мыжъо дахэхэмкӀи тынхэу цӀыфхэм Тхьэм фашӀыгъэхэмкӀи дахэу гъэкӀэрэкӀагъэу зэрэщытым зыгорэхэр зытегущыӀэхэм, Исус къыӀуагъ: 6 Мыщ дэжьым щышъулъэгъурэр мыжъуитӀу къызэтемынэжьэу, пстэури къызызэхэтэкъощт мафэхэр къэсыщтых. 7 Дин гъэсакӀу, о зыфэпӀогъэ Ӏофхэр сыдигъо къэхъущтха, ахэр къызэрэхъущтхэм янэшанэхэри сыдха? къеупчӀыгъэх ахэр.
Нэшанэхэмрэ къиныбэ щэчыныгъэмрэ
8 ЦӀыфхэм шъукъызэрамыгъэпцӀэщтым шъуфэсакъ,къыӀожьыгъ Исус. Сыда пӀомэ сэ сцӀэкӀэ зэджэжьхэу, «Сэры Христос», аӀоу ыкӀи «Мафэр къэблэгъагъ», аӀоу цӀыфхэу къэкӀощтхэр бэу хъущтых. Ахэмэ ауж шъуимыхь. 9 Заохэм якъэбархэмрэ цӀыфхэм пачъыхьагъухэм ягъэпсыкӀэ акъутэжьынэу къызэрэтаджэхэрэм якъэбархэмрэ зызэхэшъухыкӀэ, шъукъэмыщт. А Ӏофхэр къэхъунхэ фае, ау дунаем икӀэух занкӀэу къэсыщтэп. 10 Зы лъэпкъыр адрэ лъэпкъым, зы пачъыхьагъури адрэ пачъыхьагъум езэонэу къэтэджыщт, етӀанэ ариӀуагъ Исус. 11 ЧӀыпӀэчӀыпӀэхэмкӀи чӀыгур ин дэдэу щысысыщт, зэпахырэ узхэри гъаблэхэри къэхъущтых. УашъомкӀи щынэгъошхо нэшанэхэр къикӀыщтых. 12 Ау мы Ӏоф пстэури къэхъунхэм ыпэкӀэ, сэ сцӀэ зэрэжъугъэлъапӀэрэм пае, цӀыфхэм шъуаубытыщт, къини шъуагъэщэчыщт. Синэгогухэм шъуаратыщт, хьапсхэми шъуачӀадзэщт, пачъыхьэхэмрэ Ӏэшъхьэтетхэмрэ апашъхьи шъуращэщт. 13 Джащыгъум ахэмэ апашъхьэ къэбарышӀум шыхьат шъуфэхъущт. 14 Ау мыр шъугухэм арыжъугъэлъ: Зыжъугъэхыеу яшъуӀощтыр ыпэ рапшӀэу жъугъэхьазырыным шъупымылъ; 15 сыда пӀомэ къышъонэкъокъухэрэр къышъупэмыуцужьышъунхэу ыкӀи къышъупэмыгущыӀэжьышъунхэу гущыӀэхэри зэхэшӀыкӀыныгъэри къышъостыщтых. 16 Шъуянэшъуятэхэми, шъушыхэми, шъуиблагъэхэми, шъуиныбджэгъухэми тетыгъо зиӀэхэм шъуаӀэкӀагъэхьащт, шъуащыщэу зы купи аукӀыщт. 17 Шъо сэ сцӀэ зэрэжъугъэлъапӀэрэм пае, цӀыф пстэуми шъуауджэгъущт. 18 Ау зы шъхьац налъи шъо шъушъхьэхэм ахэкӀодыкӀыщтэп. 19 Теубытэныгъэ шъуиӀэмэ, шъупсэхэр мыкӀодхэу къэжъугъэнэжьыщтых.
Ерусалим зэракъутэщтыр Исус къызэриӀуагъэр
20 Ерусалим дзэхэм къауцухьагъэу зышъулъэгъукӀэ, икъутэжьыгъо къызэрэблэгъагъэр шъушӀэщт. 21 Ащыгъум Иудей хэкум ис цӀыфхэр Ӏуашъхьэхэм ярэкӀолӀэжьых, къалэм дэсхэри дэрэкӀыжьых, губгъом итхэри къалэм дэрэмыхьажьых. 22 Сыда пӀомэ Тхьэм игущыӀэ тхыгъэхэм арыт пстэури къэшъыпкъэжьынхэм пае, цӀыфхэм ашӀагъэхэр Тхьэм зыщаригъэпщыныжьын мафэхэр мырых. 23 А мафэхэм бзылъфыгъэ лъэрмыхьэхэмрэ быдзэшъо сабый зиӀэхэмрэ сыхьатмыгъо ежьэщтых. Мы хэгъэгум ицӀыфхэр къинышхо хэфэщтых, Тхьэри мы лъэпкъым лъэшэу къыфэгубжыщт. 24 Ахэмэ ащыщхэр сэшхокӀэ аукӀыщтых, адрэхэри гъэрэу къаубытыгъэхэу лъэпкъ пстэуми адэжь ащэщтых. Хымэ лъэпкъхэм ялъэхъан ыухыфэ, ахэмэЕрусалим лъэгукӀэ аутэщт.
Щыф Лъэпкъым Ыкъо дунаем къызэрэкӀожьыщтыр
25 Нэшэнэ гъэшӀэгъонышхохэр тыгъэм, мазэм ыкӀи жъуагъохэм къащылъэгъощтых. ЧӀылъэм тет цӀыф лъэпкъхэм ашӀэщтыр амышӀэу агу кӀодыщт. Хыри лъэшэу къыдэуаеу ибырсыр мэкъэшхо къэӀущт. 26 Дунаем къыщыхъущтхэм паплъэхэу, цӀыфхэр щынагъом хэтхэу мэхыщтых, сыда пӀомэ уашъом щыӀэ кӀуачӀэхэр хъыещтыхэшъ ары. 27 Джащыгъум ЦӀыф Лъэпкъым Ыкъо ошъуапщэм хэтэу, лъэкӀыныгъэшхорэ щытхъушхорэ иГэхэу къакӀоу цӀыфхэм алъэгъущт. 28 А Ӏофхэр къэхъухэу заублэкӀэ, шъукъэтэджи, шъушъхьэхэр къэшъуӀэтых, сыда пӀомэ Тхьэм къиным шъузщыхихыжьыщт мафэр къэблэгъагъэшъ ары.
Ынджыр чъыгым шъыпкъагъэу къыдгуригъаӀорэр
29 ЕтӀанэ Исус зы гъэсэныгъэ къэбар горэ ариӀуагъ: Ынджыр чъыгымрэ адрэ чъыг пстэумрэ шъуяплъ. 30 Чъыгхэр къэтӀэмхэу зыфежьэхэкӀэ, гъэмафэр къызэрэблагъэр зыми къышъуимыӀоу шъошӀэба? 31 Ащ фэдэу шъори мы Ӏофхэр къэхъухэу зышъулъэгъухэкӀэ, Тхьэм и Тетыгъошхо благъэ къызэрэхъутъэр шъушӀэ. 32 Шъыпкъэр шъосэӀо, мы Ӏофхэр зэкӀэ къэхъунхэм ыпэ, мы лъэпкъыр кӀодыщтэп. 33 Уашъомрэ чӀылъэмрэ кӀодыжьыщтых, ау сэ сигущыӀэхэр кӀодыжьыщтхэп.
Сыдигъуи шъусакъ!
34 ЕшхэешъонымкӀи, утэшъонымкӀи, мы дунаим игугъухэмкӀи шъушъхьэхэр зэӀышъумыгъэхьанхэу шъузыфэсакъыжь. Армырмэ шъумышӀахэу а мафэр къышъутеошт. 35 Сыда пӀомэ а мафэр чӀылъэшъхьашъом тет цӀыф пстэуми хъытыум фэдэу къафэкӀощт. 36 Сыдигъуи шъусакъ, къэхъущт пстэуми шъуахэкӀыным паий, кӀуачӀэ жъугъотынышъ, ЦӀыф Лъэпкъым Ыкъо ыпашъхьэ шъузэрихьащтымкӀэ Тхьэм шъуелъэӀу зэпыт. 37 Мафэ къэс Исус Тхьэм иунэшхо чӀэтэу, цӀыфхэм Тхьэм игущыӀэхэр аригъашӀэщтыгъэх, ау чэщ къэхъу къэс, къалэм дэкӀыти, Елеон зыцӀэ Ӏуашъхьэм чэщыр щырихыщтыгъ. 38 Жьэу пчэдыжь къэс Исус едэӀунхэу цӀыф пстэури Тхьэм иунэшхо къэкӀощтыгъэх.
Тхьэмэтэ Хэсэшхом щыщ тхьаматэхэм Исус тхьагъэнпДыгъэкӀэ аукӀынэу гухэлъ зэрашӀыгъэр
Хьалыгъу Мыгъэтэдж зыщашхырэ мэфэшхо мафэхэу ПасхъэкӀэ заджэхэрэр къэблэгъагъэх. 2 Дин пэщэшхохэмрэ Тэурат егъэджэкӀо пащэхэмрэ Исус цӀыфхэм амышӀэу зэрагъэкӀодыщт шӀыкӀэм лъьгхъущтыгъэх, сыда пӀомэ ахэр цӀыфхэм ащыщынэщтыгъэхэти ары. З Джащыгъум Исус игъогу рыкӀорэ нэбгырэ пшӀыкӀутӀумэ ащыщэу ИскариоткӀэ заджэхэрэ Иудэ ыгу шэйтаныр ихьагъ. 4 ЕтӀанэ Иудэ дин пэщэшхохэмрэ Тхьэм иунэшхо иухъумакӀохэм япащэхэмрэ адэжь кӀуи, Исус зэраӀэкӀигъэхьащт шӀыкӀэмкӀэ адэгущыӀагъ. 5 Ахэр гушӀуагъэх, ахъщи ратынэу къагъэгугьагъ. 6 Арэущтэу Иудэ адишти, цӀыф купышхохэм амышӀэу Исус аӀэкӀигъэхьаным пае, Ӏэрыфэгъу уахътэ паплъэу ыублагъ.
Исус игъогу рыкӀохэрэм Пасхъэ пчыхьэшъхьашхэр зэрагьэхьазырыгъэр
7 Хьалыгъу Мыгъэтэдж зыщашхырэ мэфэкӀ мэфэшхо мафэхэм ащыщэу Пасхъэ шъынэр зыщышӀуаубзын фэе мафэр къэсыгъ. 8 Арэущтэу зэхъум, Исус Петрэрэ Иуанрэ ыгъэкӀуагъэх, мырэущтэу ариӀуагъэу: ШъукӀуи, Пасхъэ пчыхьэшъхьашхэр тшӀыным пае жъугъэхьазыр. 9 Тыдэ щыдгъэхьазырынэу уфая? къыраӀожьыгъ ахэмэ. 10 ШъукъэдаӀу! ариӀуагъ Исус. Къалэм шъузэрэдахьэу, зы лӀы горэм псы къошын ыхьэу къышъуӀукӀэщт. А лӀым ыуж шъуитэу унэу зэрыхьэрэм шъори шъуихьи, 11 унэр зием ешъуӀу: «Дин гъэсакӀом къыуеӀо: Сэррэ сигъогу рыкӀохэрэмрэ Пасхъэ пчыхьэшъхьашхэр зыщытшӀыщт хьакӀэщыр тыдэ щыӀа?» 12 Джащыгъум гъэкӀэрэкӀагъэу зы хьэкӀэщышхо лъагэ горэ шъуигъэлъэгъущт. Ащ дэжьым зэкӀэри щыжъугъэхьазыр. 13 Алэр етӀанэ кӀохи, Исус къызэрариӀуагъэм тетэу къагъоти, Пасхъэ пчыхьэшъхьашхэр агъэхьазырыгъ.
Зиусхьаным ипчыхьэшъхьашхэ
14 Сыхьатыр къызэсым, апостол нэбгырэ шпӀыкӀутӀур игъусэхэу Исус Ӏанэм пэтӀысхьагъ. 15 Къин сщэчыным ыпэкӀэ, мы Пасхъэ пчыхьэшъхьапгхэр къыжъудэсшӀымэ лъэшэу сшӀоигъуагъ, ариӀуагъ ахэмэ. 16 Сыда пӀомэ сэ шъосэӀо, Тхьэм и Тетыгъошхо къэсыгъэу, Пасхъэ мэфэкӀ мэфэшхом къикӀырэр шъыпкъэ къыщэхъуфэ, Пасхъэ пчыхьэшъхьашхэр сэ сшӀыжьыщтэп. 17 ЕтӀанэ Исус зы шъуалъэ къышти, Тхьэм щытхъу фишӀи къыӀуагъ: Мыр къашъушти, мыщ итым щыщ шъукъыздешъу; 18 сыда пӀомэ сэ шъосэӀо, Тхьэм и Тетыгъошхо къэсыфэ, сэнэшъхьэ къутамэм ипс сешъожьыщтэп. 19 ЕтӀанэ Исус хьалыгъур къыштагъ, Тхьэм щытхъу фишӀи, зэгуичи, ахэмэ арити къыӀуагъ: Мы хьалыгъур сэ спкъэу шъо сишӀуагъэ шъокӀынэу стыщтыр ары. ПӀъугу сыкъэжъугъэкӀыжьыным пае, шъушхы. 20 Ащ фэдэу пчыхьэшъхьашхэ ужым шъуалъэр къышти къыӀуагъ: Мы шъуалъэм сэнэпсэу итым къикӀырэр зэзэгъыныгъакӀэу Тхьэм ежьыррэ шъоррэ шъуазыфагу дилъхьарэр ары. А зэзэгъыныгъакӀэр къэзыгъэшъыпкъэжьырэр лъэу шъо сишӀуагъэ шъокӀынэу сэ къыскӀэкӀыщтыр ары. 21 Ау тетыгъо зиӀэхэм сэ саӀэкӀэзыгъэхьащтыр сигъусэу мы Ӏанэм пэс. 22 ЦӀыф Лъэпкъым Ыкъо Тхьэм зэриухыгъэм тетэу, дунаем ехыжьыщт. Ау тетыгъо зиӀэхэм ар аӀэкӀэзыгъахьэрэр сыхьатмыгъо ежьагъ. 23 Исус ар зеӀом, игъогу рыкӀохэрэр зэупчӀыжьхэу аублагъ: Тэ тщыщэу хэта ар зышӀэнэу зыгу хэлъыр?
Исус игъогу рыкӀохэрэм ащыщэу анахь инэу алъытэн фаемкӀэ зэрэзэнэкъокъугъэхэр
24 Исус игъогу рыкӀохэрэм ащыщэу анахь инэу алъытэн фаемкӀэ зэнэкъокъухэу аублагъ. 25 Дунаем тет пачъыхьэхэр цӀыфхэм апшъэ дэсых,ариӀуагъ Исус. Тетыгъор зиӀэхэми шӀу зышӀэхэрэмкӀэ цӀыфхэр зэрагъаджэх. 26 ӀНъо шъуазыфагу арэп зэрэщытын фаер. Ар мыхъоу, шъуазыфагу анахь иныр цӀыкӀум фэдэу орэхъу, тхьаматэри шъхьагърытым фэдэу орэхъу. 27 Хьауми хэта анахь иныр, Ӏанэм пэсыр ара, шъхьагърытыр ара? Ӏанэм пэсыр арыба? Ау шъхьагърытым фэдэу сэ сышъухэт. 28 Сэ къин сщэчэу сызыщэтым, сигъусагъэхэр шъоры. 29 Сэ тетыгъо сиӀэнэу Сятэ къызэрэситыгъэм фэдэу, шъори тетыгъо шъуиӀэнэу шъосэты. 30 Сэ си Тетыгъошхо къызыскӀэ, сиӀанэ шъупэсэу шъушхэщт ыкӀи шъуешъощт, Израил иунэгъо лъэпкъ пшӀыкӀутӀум хьыкум атешъушӀыхьанэу пачъыхьэ тӀысыпӀэхэм шъуатетӀысхьащт.
«Сэ сыкъэмышӀэу къэпӀощт», Исус Петрэ зэрэриӀуагъэр
31 Симон, Симон, къэдаӀу. МэкъумэщышӀэм коцымрэ уарзэмрэ зэрэзэхидзыхэрэм фэдэу, шъуигъэунэфыным пае, шэйтаным Тхьэм фитыныгъэ къыӀихыгъ. 32 Ау шӀошъхъуныгъэм игъогу утемыкӀынэу Тхьэм сыпфелъэӀугъ. О садэжь къызыбгъэзэжькӀэ, пшыхэм агухэр гъэпытэх. 33 Зиусхьан, сэ о сыуигъусэу хьапсым сыкӀощтми, лӀэныгъэм сыӀукӀэщтми, сыфэхьазыр, къыриӀуагъ Симон Петрэ Исус. 34 Петрэ, сэ осэӀо, къыӀожьыгъ Исус, непэ атакъэр Ӏоным ыпэкӀэ, сэ сыкъэмышӀэу гъогогъуищэ къэпӀощт.
Ахъщалъэр, Ӏалъмэкъыр, сэшхор
35 Ахъщалъи Ӏалъмэкъи шъумыӀыгъхэу, цуакъэхэри шъущымыгъхэу шъузыдэсэгъэкӀым, щыкӀагъэ горэ шъуиӀагъа? ариӀуагъ Исус. Хьау, щыкӀагъэ зи тиӀагъэп, къаӀожьыгъ ахэмэ. 36 Ау джы, ахъщалъи, Ӏалъмэкъи зиӀэм зыдерэшт,ариӀуагъ Исус. Сэшхо зимыӀэми ищыгъын кӀыӀутелъ ерэщи, сэшхо къерэщэф. 37 Сэ шъосэӀо, мы гущыӀэхэу Тхьэм игущыӀэ тхыгъэхэм арытхэр сэ къысэхъулӀэхэзэ, къэшъыпкъэжьынхэ фае: «Хабзэм текӀыгьэхэм ащыщэу ежьыр алъытагъ». Сыда пӀомэ сэ къысэхьылӀагъэу Тхьэм игущыӀэ тхыгъэхэм арытхэр къэхъу пэтхэшъ ары. 38 3иусхьан, мары сэшхуитӀу тиӀ, къаӀуагъ ахэмэ. Ар икъущт, ариӀожьыгъ Исус.
Исус Елеон зыцӀэ Ӏуашъхьэм Тхьэм зэрэщелъэӀугъэр
39 Исус Ерусалим дэкӀи, ихабзэ тетэу Елеон Ӏуашъхьэм дэкӀоягъ. Игъогу рыкӀохэрэри игъусагъэх. 40 ЗыдэкӀощт чӀыпӀэм зынэсым, ариӀуагъ: ПсэкӀодшӀэным шъудимыхьыхынэу Тхьэм шъуелъэӀу. 41 ЕтӀанэ Исус зы мыжъо дзыгъом фэдизэу ахэмэ ахэкӀи ӀукӀыгъ. ЛъэгонджэмышъхьэкӀэ тӀыси, Тхьэм елъэӀугъ: 42 Сэ Сят, уфаемэ мы къин щэчыныгъэм ишъуалъэ сэ сӀых. Ау сэ сызыфаер мыхъоу, о узыфаер орэхъу. 43 Джащыгъум зы мэлэӀич горэ уашъом къехи, кӀуачӀэ ригъэгъотыжьынэу къыфэлъэгъуагъ. 44 Исус гумэкӀыгъэшхом хэтэу, нахь лъэшэу Тхьэм елъэӀугъ. ИпкӀэнтӀэпсхэри лъы ткӀопсхэм афэдэу чӀыгум теткӀощтыгъэх. 45 Тхьэм зелъэӀум ыуж Исус къызэтэджыжьым, игъогу рыкӀохэрэм адэжь зэкӀом, гумэкӀыгъэшхо зэряӀэм пае, хэчъыягъэхэу къыгъотыжьыгъэх. 46 Сыд пае шъучъыера? ариӀуагъ Исус ахэмэ. Шъукъэтэджи, псэкӀодшӀэным шъудимыхьыхынэу Тхьэм шъуелъэӀу.
Исус зэраубытыгъэр
47 Исус гущыӀэзэ, игъогу рыкӀорэ нэбгырэ пшӀыкӀутӀум ащыщэу Иудэ зыцӀэр апэ итэу цӀыф купышхо къэкӀуагъ. Иудэ Исус ебэунэу къыбгъодэхьагъ. 48 Иудэ, ЦӀыф Лъэпкъым Ыкъо укъызэребэурэмкӀэ тетыгъо зиӀэхэм аӀэкӀэогъахьа? риӀуагъ Исус. 49 Исус игъусэхэм къэхъущтым гу зылъатэм, къаГуагъ: Зиусхьан, сэшхохэмкӀэ тахэона? 50 Исус игъусэхэм ащыщэу зыр дин пэщэшхом иунэӀутым еуи, иджабгъу тхьакӀумэ гуиупкӀыгъ. 51 Икъун! Ыуж икӀ! къыӀуагъ Исус. ЕтӀанэ унэӀутым ытхьакӀумэ теӀаби ыгъэхъужьыгъ. 52 Ащ нэужым Исус ежьыр зыубытынэу къэкӀогъэ дин пэщэшхохэми, Тхьэм иунэшхо иухъумакӀохэм япащэхэми, нахьыжъхэми ариӀуагъ: ХъункӀакӀо горэ шъуубытыщтым фэдэу, сэшхохэмрэ умэхэмрэ шъуӀыгъхэу шъукъэкӀуагъа? 53 Мафэ къэси Тхьэм иунэшхо сышъухэтыгъ, арышъхьакӀэ сышъуубытыгъэп. Ау джы игъо шъуфифагъ, мы сыхьатми шӀункӀыгъэ бзаджэм тетыгъор ие хъугъэ.
Петрэ Исус ымышӀэу къызэриӀуагъэр
54 Арэущтэу ахэмэ Исус аубыти, Ӏуащи, дин пэщэшхом иунэ ращагъ. Петрэ чыжьэкӀэ ауж итэу алъыкӀуагъ. 55 Щагу гузэгум машӀор рашӀыхьи къызетӀысэкӀыхэм, Петри ахэтӀысхьагъ. 56 Зы унэӀут пшъашъэ горэм Петрэ машӀом пэсэу ылъэгъуи, къызеплъыпэм, къыӀуагъ: Мыри Исус игъусагъ. 57 Хьау, къыӀуагъ Петрэ, ар сшӀэрэп, пшъашъ. 58 Зы тӀэкӀу тешӀагъэу нэмыкӀ горэми Петрэ къылъэгъуи къыӀуагъ: Ори ахэмэ уащыщ. Хьау, лӀы, сэ ахэмэ сащыщэп, къыӀожьыгъ Петрэ. 59 Зы сыхьат фэдиз тешӀагъэу, етӀани зыгорэм теубытагъэу къыӀуагъ: Щэч хэмылъэу мы лӀыри ащ игъусагъ, сыда пӀомэ ар Галйлей щыщ. 60 Хьау, лӀы, а зыфапӀорэр сшӀэрэп, къыӀожьыгъ Петрэ. КъэгущыӀэзэ, ардэдэм атакъэр къэӀуагъ. 61 Зиусхьаным зыкъызэригъэзэкӀи, Петрэ еплъыгъ. Джащыгъум Зиусхьаным къыриӀогъэгъэ гущыӀэхэр Петрэ ыгу къэкӀыжьыгъэх: Непэ атакъэр Ӏоным ыпэкӀэ, сэ сыкъэмышӀэу гъогогъуищэ къэпӀощт. 62 Ар ыгу къызэкӀыжьым, Петрэ щагум дэкӀи, лъэшэу гъыгъэ.
УхъумакӀохэр Исус зэрэкӀэнэкӀагъэхэр
63 Исус зыухъумэщтыгъэхэр ежьым кӀэнакӀэщтыгъэх ыкӀи еощтыгъэх. 64 Исус ынэхэр щапхэхи еупчӀыгъэх: Упегъымбармэ, хэтми къыоуагъэм ыцӀэ къаӀо! 65 Къехъонхэзэ, нэмыкӀ Ӏаджи къыраӀуагъ.
Исус Тхьэмэтэ Хэсэшхом ыпашъхьэ зэрэращагъэр
66 Нэф къызэшъым, цӀыфмэ анахьыжъхэри, дин пэщэшхохэри, Тэурат егъэджэкӀо пащэхэри къызэӀукӀэхи, Тхьэмэтэ Хэсэшхом ыпашъхьэ Исус ращагъ. 67 Христосыр орымэ, къытаӀу, къыраӀуагъ. Сэ къышъуасӀомэ, шъушӀошъ хъущтэп, ариӀожьыгъ Исус. 68 Сэри сышъоупчӀымэ, пэгъокӀ къысэшъутыщтэп ыкӀи сышъутӀупщыжьыщтэп. 69 Ау джы щегъэжьагъэу ЦӀыф Лъэпкъым Ыкъо лъэкӀыныгъэшхо зиӀэ Тхьэм иджабгъукӀэ госыщт. 70 Ащыгъум о Тхьэм ури Къоу ара? къаГуагъ ахэмэ зэкӀэмэ. Ары, шъо зэрэшъуӀорэм фэдэу арэу сыщыт, ариӀожьыгъ Исус. 71 Сыда нэмыкӀ шыхьат зэрэтищыкӀэгъэжьыр? къаӀуагъ ахэмэ. Ежь ижэдэкӀэу зэхэтхыгъэба?
Исус Ӏэшъхьэтетэу Пилат ыпашъхьэ зэрэращагъэр
1 ЕтӀанэ хасэм хэт пстэури къэтэджыжьхи, Исус Ӏэшъхьэтетэу Пилат ыдэжь ащагъ. 2 Исус агъэмысэу къа ублагъ, мырэущтэу аӀоу: Мы лӀым тэ тлъэпкъ къыгъэбырсырэу, Кайсарым хьакъулахь ахъщэр раримыгъэтэу, ежьыр Христос пачъыхьэу зыфиӀожьэу тыубытыгъэ. 3 O джуртхэм уряпачъыхьа? ыӀуи, Пилат Исус къеупчӀыгъ. Ары, къызэрэпӀорэм фэдэу, риӀожьыгъ Исус. 4 Джащыгъум Пилат дин пэщэшхохэмрэ цӀыф купышхохэмрэ ариӀуагъ: Мы лӀыр зи зэрызгъэмысэн езгъотылӀэрэп. 5 Галилей хэкум къыщегъэжьагъэу мыщ дэжьым нэсыфэ, Иудей хэкум зэкӀэ тыдэ укӀоми, мы лӀым цӀыфхэм Ӏофхэу аригъашӀэхэрэмкӀэ къегъэбырсырых, аӀуи, ахэр ыуж имыкӀыжьхэу къаӀуагъ.
Исус пщэу Ирод ыпашъхьэ зэрэращагъэр
6 Пилат Галилей гущыӀэр зызэхехым, къэупчӀагъ: Мы лӀыр Галилей щыща? 7 Хэкоу Ирод зипщым Исус зэрэщыщыр Пилат къызешӀэм, Ирод ыдэжь Исус аригъэщагъ, сыда пӀомэ а мафэхэм атефэу Ирод Ерусалим къэкӀуагъэу щытти ары. 8 Ирод Исус зелъэгъум, лъэшэу гушӀуагъэ, сыда пӀомэ Исус игугъу зэхихыгъэти, бэ шӀагъэу зэригъэлъэгъумэ шӀоигъуагъэти ары. Исус зы нэшэнэ гъэшӀэгъонышхо горэ къыригъэлъэгъунэу гугъэщтыгъэ. 9 Ар Исус бэкӀэ еупчӀыгъ, ау Исус зи риӀуагъэп. 10 Дин пэщэшхохэу ыкӀи Тэурат егъэджэкӀо пащэхэу ащ дэжьым щытхэм Исус лъэшэу агъэмысэщтыгъ. 11 Иродрэ идзэлӀхэмрэ агъэпыутэу Исус дэзекӀуагъэх ыкӀи кӀэнакӀэщтыгъэх. ЕтӀани Ирод идзэлӀхэм Исус шъошэ фыжькӀэ пачъыхьэм фэдэу аригъэфапи, Пилат ыдэжь аригъэщэжьыгъ. 12 А мафэм Иродрэ Пилатрэ ныбджэгъу зэфэхъугъэх. Ащ ыпэкӀэ зэпыйщтыгъэх.
Исус укӀ зэрэтыралъхьагъэр
13 Ӏэшъхьэтетэу Пилат дин пэщэшхохэри, адрэ тхьаматэхэу Тхьэмэтэ Хэсэшхом щыщхэри, цӀыфхэри къызэӀуигъакӀэхи, 14 ариӀуагъ: Мы лӀым цӀыфхэр къыгъэбырсырхэу шъуӀуи къысфэшъущагъ. Джы шъо шъуапашъхьэ ащ сыщеупчӀыгъ, ау зэрыжъугъэмысэрэмкӀэ лажьэ иӀэу езгъотылӀагъэп. 15 Пщы Ироди мысэу ылъытагъэп, сыда пӀомэ къытфаригъэщэжьыгъ. ЗэрэшъулъэгъурэмкӀэ, укӀ зифэшъошэ Ӏоф мы лӀым зи ышӀагъэп. 16 Арышъ, къамыщкӀэ езгъэонхэшъ, стӀупщыжьыщт. 17 Пасхъэ мэфэкӀ мэфэшхом пае хьапсчӀэсхэм ащыщэу зы нэбгырэ Пилат цӀыфхэм шъхьафитэу къафитӀупщыжьын фаеу щытыгъ. 18 ЦӀыфхэр зэкӀэ къэзэрэгъэкуухэу аублагъ: Мыр Ӏущ, Вараввэ шъхьафитэу къытфэтӀугацыжь. 19 А Вараввэу зыцӀэм къэлэдэсхэр къызэригъэбырсырыгъэхэм паий, цӀыф горэ зэриукӀыгъэм паий хьапсым чӀадзагъэу щытыгъ. 20 Пщэу Пилат Исус шъхьафитэу ытӀупщыжьмэ шӀоигъуагъэти, цӀыфхэм джыри зэ зафигъази адэгущыӀагъ. 21 Ау ахэр куо зэпытыгъэх: Къащым теӀулӀ! Къащым теӀулӀ! 22 Сыда мы лӀым бзэджагъэу ышӀагъэр? УкӀ зифэшъошэ Ӏоф зи ышӀагъэу езгъотылӀагъэп. Арышъ, къамыщкӀэ езгъэонхэшъ, стӀупщыжьыщт, ящэнэрэу ариӀуагъ пщы Пилат ахэмэ. 23 Къащым теГулӀ! аӀозэ, мэкъэшхокӀэ цӀыфхэм зэпамыгъэоу аӀощтыгъ. Якуо макъэкӀэ зыфаери къадэхъугъ. 24 Арэущтэу цӀыфхэр зыфэягъэр Пилат къафишӀэнэу тыриубытагъ. 25 ЦӀыфхэр къызэригъэбырсырыгъэхэмрэ цӀыф горэ зэриукӀыгъэмрэ апае, хьапсым чӀадзэгъэгъэ Вараввэу цӀыфхэр зыкӀэлъэӀугъэр шъхьафитэу къафитӀупщыжьыгъ. Ау Исус зыфаер рашӀэн фитхэу ахэмэ аӀэкӀилъхьагъ.
Исус къащым зэрэтыраӀулӀагъэр
26 Исус къащым тыраӀулӀэнэу преторием зыращым, Симон ыцГэу, Кириние къалэм щыщэу зы лӀы горэ губгъом къикӀыжьызэ ӀукӀагъэх. Ар къаубыти, къащыр ытамэхэм атыралъхьи, Исус ыуж итэу кӀозэ, къащыр ыхьынэу рагъэзыгъ. 27 ЦӀыф купыпгхо Исус лъыкӀощтыгъ. Зыбгъэгухэм яожьхэу, Исус зыгъэерэ бзылъфыгъэхэри ахэтыгъэх. 28 Исус ахэмэ зафигъази ариӀуагъ: Ерусалим ибзылъфыгъэхэр, сэщ пае шъумыгъ, шъо шъушъхьэ паий, шъуибынхэм апаий шъугъ нахь; 29 сыда пӀомэ «Бзылъфыгъэхэу бын къызхэмыкӀыгъэхэри, джы ри мылъфагъэхэри, быдз езымыгъэшъуагъэхэри сыхьатмафэ ежьагъэх», зыщаӀощт мафэхэр къэсыщтых. 30 Ащыгъум къушъхьэхэм, «Шъукъыттеф!» Ӏуашъхьэхэми, «Тыкъэшъуухъум!» араӀоу хъущт. 31 Сыда пӀомэ чъыгыр тӀэмыгъэ зыхъукӀэ, цӀыфхэм мыщ фэдэ Ӏофхэр зашӀэхэкӀэ, чъыгыр гъужьыгъэ зыхъукӀэ, ащ нахьи нахь бзэджагъэхэр ашӀэщтба? 32 БзэджэшӀитӀу Исус игъусэхэу къащхэм атыраӀулӀэнэу дащыгъэх. 33 «Шъхьэпкъ» зыфаӀорэ чӀыпӀэм зынэсхэм, ащ дэжьым Исус къащым щытыраӀулӀагъ. БзэджэшӀитӀур, зыр иджабгъукӀэ адрэр исэмэгубгъукӀэ, Исус игъусэхэу къащхэм атыраӀулӀагъэх. 34 Сэ Сятэ, къафэгъэгъу! къыӀуагъ Исус. Мы цӀыфхэм ашӀэрэр къагурыӀорэп. ДзэлӀхэми пхъэдз ашӀызэ, Исус ищыгъынхэр зэфагощыгъэх. 35 ЦӀыфхэу ащ дэжьым щытхэр хъурэм еплъыщтыгъэх. Тхьэмэтэ Хэсэшхом щыщ тхьаматэхэри Исус кӀэнакӀэхэу къаӀуагъ: НэмыкӀ цӀыфхэр мыкӀодхэу къыгъэнэжьыгъэх. Тхьэм къыхихыгъэ Христос ежьыр арымэ, мыкӀодэу зыкъерэгъэнэжь. 36 ДзэлӀхэри Исус кӀэнакӀэхэу къыбгъодахьэхи, сэнэпс шӀоӀугъэ къыфащэизэ, 37 къыраӀуагъ: О джуртхэм уряпачъыхьэмэ, умыкӀодэу зыкъэгъэнэжь. 38 Зы пхъэмбгъу горэм урымыбзэкӀи, латинабзэкӀи, джуртыбзэкӀи тетхагъэу, Исус ышъхьагъкӀэ къащым тыраӀулӀагъэу щытыгъ: «Джуртхэм я Пачъыхьэр мыры». 39 БзэджашӀэхэу ащ дэжьым тыраӀулӀагъэхэм ащыщэу зыр Исус къехъони къыӀуагъ: Орыба Христосыр? Ори тэри тымыкӀодэу тыкъэгъэнэжь! 40 Ау адрэр ащ егыеу къыӀуагъ: Тхьэм ущыщынэрэба? Хьыкумэу мы лӀым тырашӀыхьагъэр ори къыптрашӀыхьагъэба? 41 ЗэфагъэкӀэ тэ тагъэпщыныжьы, сыда пӀомэ бзэджагъэу тшӀагъэхэм яфэшъуашэ тагъэгъотыжьы. Ау мы лӀым мыхъун зи ышӀагъэп. 42 ЕтӀанэ къыӀуагъ: Исус, уи Тетыгъошхо къызыскӀэ, угу сыкъэгъэкӀыжь. 43 Шъыпкъэр осэӀо, непэ джэнэтым ущысигъусэщт,ыӀуи, Исус ащ риӀожьыгъ.
Исус зэрэлӀагъэр
44 Щэджагъо хъугъагъэ, а хэгъэгуми тыдэкӀи шӀункӀ къыщыхъугъ, сыхьатыр щым нэс, 45 сыда пӀомэ тыгъэр ушӀункӀыгъэти ары. Тхьэм иунэшхо ипэӀухъо тӀоу къызэготхъыгъ. 46 Сят, спсэ о къыпӀэкӀэсэлъхьэ, мэкъэшхокӀэ къыӀуагъ Исус. А гущыӀэхэр къызеӀохэ ужым, ыпсэ ытыгъ. 47 ДзэлӀхэм япащэ хъугъэр зелъэгъум, Тхьэм щытхъу фишӀи къыӀуагъ: Шъыпкъэ дэдэу мы лӀыр шъыпкъагъэ зиӀэ лӀэу щытыгъ. 48 А зэкӀэри зырагъэлъэгъунэу къызэрэугъоигъэ цӀыф купышхо пстэуми хъугъэр залъэгъум ыуж, абгъэгухэм яожьхэзэ, яунэхэм кӀожьыгъэх. 49 Исус иныбджэгъу пстэури, бзылъфыгъэхэу ежьым игъусэхэу Галилей къикӀыгъа гъэхэри ахэмэ ахэтхэу, чыжьэкӀэ уцугъэхэу мы хъугъэшӀагъэхэм яплъыщтыгъэх.
Исус ихьадэ къэуиэм зэрэчГалъхьажьыгъэр
50 Юсыф зыцӀэу лӀы горэ Тхьэмэтэ Хэсэшхом итхьаматэхэм ащыщыгъ. Ар шъыпкъагъэ зиӀэ лӀы дэгъоу щытыгъ. 51 Тхьэмэтэ Хэсэшхом итхьаматэхэм ашӀэнэу аухэсыгъагъэр адиштэгъагъэп. А Юсыф Иудей хэкум щыщ Аримафей зыцӀэ къуаджэм щыщыгъ. Тхьэм и Тетыгъошхо къэсыным паплъэу щытыгъ. 52 Ар пщэу Пилат ыдэжь кӀуи, Исус ихьадэ кӀэлъэӀутъ. 53 ЕтӀанэ хьадэр къащым къыпихыжьи, чэфын рищэкӀи, Ӏошъхьэ цакӀэу акъутагъэм къыхашӀыкӀыгъэ къэунэу ыпэкӀэ цӀыф зи зычӀамылъхьажьыгъэм чӀилъхьажьыгъ. 54 А мафэр бэрэскэшхо мафэу щытыгъ, шэмбэт мафэри къэблэгъагъ. 55 Бзылъфыгъэхэу Исус игъусэхэу Галилей къикӀыгъагъэхэр Юсыф игъусэхэу кӀохи, къэунэри Юсыф хьадэр къэунэм зэрэчӀилъхьажьырэри алъэгъугъ. 56 ЕтӀанэ унэм къызагъэзэжьым, мэӀэшӀу зыпихырэ щыфэн дагъэхэмрэ осэшхо зиӀэ дагъэхэмрэ агъэхьазырыгъэх. Хабзэм тетэу етӀанэ шэмбэт мафэм загъэпсэфыгъ.
Исус лӀагъэхэм къызэрахэтэджыкӀыжьыгъэр
1 Тхьамафэм иапэрэ мафэм нэф къызэшъым, бзылъфыгъэхэм осэшхо зиӀэхэу, мэӀэшӀу зыпихырэ щыфэн дагъэхэу агъэхьазырыгъэхэр зыдахьэхи, къэунэм кӀуагъэх, нэмыкӀ зыгорэхэри ягъусэхэу. 2 Зынэсхэм, мыжъошхор къэунэм ичӀэхьапӀэ ӀугъэукӀорэикӀыгъэу къагъотыгъ. 3 Ау къэунэм зычӀахьэхэм, Зиусхьанэу Исус ихьадэ чӀагъотыжьыгъэп. 4 Ар зыфахьын амышӀэу щытхэзэ, зэплъэхэм, щыгъын фыжьыбзэкӀэ фэпагъэхэу лӀитӀу амышӀахэу апашъхьэ къиуцуагъэх. 5 Бзылъфыгъэхэр къэщтагъэхэу ашъхъэхэр чӀыгум зырагъэзыххэм, а лӀитӀумэ къараӀуагъ: ЛӀагъэхэм адэжь псаум сыд пае шъущылъыхъура? 6 Ар мыщ дэжьым щыӀэжьэп, лӀагъэхэм къахэтэджыкӀыжьыгъ. Ар Галилей хэкум щыӀэзэ, мырэущтэу къызэрэшъуиӀогъагъэр шъугу къэжъугъэкӀыжь: 7 «ЦӀыф Лъэпкъым Ыкъо псэкӀод зышӀэрэ цӀыфхэм аӀэкӀэхьэн фаеу щыт, къащыми раӀулӀынышъ, ящэнэрэ мафэм лӀагъэхэм къахэтэджыкӀыжьын фаеу щыт». 8 Ар къызаӀом, Исус игущыӀэхэр агу къэкӀыжьыгъэх. 9 Бзылъфыгъэхэр къэунэм къычӀэкӀыжьхи, Исус игъогу рыкӀорэ нэбгырэ пшӀыкӀузымрэ адрэ ягъусэгъэ пстэумрэ а зэкӀэри араӀотэжьыгъ. 10 Апостолхэм ар языӀотагъэхэр мы бзылъфыгъэхэр арыгъэх: Магдалэ къуаджэм щыщ Мерэми, Иуанни, Якъубэ янэ Мерэми, адрэ бзылъфыгъэхэу ахэмэ ягъусагъэхэри. 11 Ау бзылъфыгъэхэм къаӀуагъэхэм зи къарымыкӀэу апостолхэм къащыхъутъ, ашӀошъи хъугъэп. 12 Ау Петрэ тэджи, къэунэм чъагъэ. Зыриуфэхи, къэунэм зычӀэплъэм, чэфынхэм анэмыкӀ зи ылъэгъугъэп. Хъутъэр ыгъэшӀагъоу иунэ ыгъэзэжьыгъ.
Еммаус къуаджэм кӀорэ гъогур
13 А мэфэ дэдэм Исус игъогу рыкӀохэрэм ащыщхэу нэбгыритӀу километрэ пшӀыкӀузкӀэ Ерусалим пэчыжьэу щыт Еммаус зыцӀэ къуаджэм кӀощтыгъэх. 14 КӀохэзэ, хъугъэшӀагъэ пстэуми рыгущыӀэщтыгъэх. 15 ЗэдэгущыӀэхэу зэупчӀыжьхэу кӀохэзэ, ежь Исус абгъодахьи, ягъусэу кӀуагъэ. 16 Ау ахэмэ анэхэм къащипхъуи, зэрэИсусыр ашӀэжьыгъэп. 17 Гъогум шъутетэу сыда шъузэрыгущыӀэхэрэр, сыд паий шъунэшхъэйра? ариӀуагъ Исус. 18 Мы мафэхэм Ерусалим къыщыхъугъэ Ӏофхэр ащ дэсхэм ащыщэу зымышӀэрэ закъор орыщтын, ыӀуи, ахэмэ ащыщэу Клеопэ зыцӀэм Исус къыриӀожьыгъ. 19 Сыд Ӏофха? яупчӀыгъ Исус. Назарет щыщ Исус къехъулӀагъэр ары, къыраӀуагъ ахэмэ. Ар Тхьэмрэ цӀыф пстэумрэ адэжькӀэ игущыӀэхэмкӀи Ӏофхэу ышӀагъэхэмкӀи лъэкӀыныгъэшхо зиӀэ пегъымбарэу щытыгъ. 20 Дин пэщэшхохэмрэ Тхьэмэтэ Хэсэшхом итхьаматэхэмрэ Пилат укӀ тырырагъэлъхьаным пае, Пилат ар ӀэкӀагъахьи, къащым тырырагъэӀулӀагъ. 21 Израил лъэпкъым шъхьафитныгъэ къезытыщтыр ежьыр арэу тэ тыщыгугъыщтыгъ. 22 Ащ нэмыкӀэу, а зэпстэури зыхъугъэр непэ мэфищ мэхъу, тибзылъфыгъэхэм ащыщхэу зыгорэхэми къэбар гъэшӀэгъон къытфаӀотагъ. Ахэр пчэдыжьым жьэу къэунэм кӀуагъэх, 23 ау Исус ихьадэ къагъотыжьыгъэп. Къызагъэзэжьым, мэлэӀичитӀу къафэлъагъуи, Исус псаоу ахэмэ къараӀуагъэу къаӀотэжьыгъ. 24 Тэ тщыщ зыгорэхэр етӀанэ къэунэм кӀохи, бзылъфыгъэхэм зэраГуагъэм тетэу пстэури къагъотыгъ, ау Исус ышъхьэкӀэ алъэгъугъэп. 25 Сыдэу къыжъугурыӀогъуае, пегъымбархэм аӀогъэ пстэури шъушӀошъ хъунэу сыдэу къин къышъуфэхъурэ!ариӀуагъ Исус ахэмэ. 26 Христос ищытхъушхо иӀэ хъуным нэсыфэ, мы къиныгъэхэр ыщэчынхэ фэягъэба? 27 ЕтӀанэ Исус пегъымбар Мусэмрэ адрэ пегъымбар пстэумрэ къащегъэжьагъэу Тхьэм игущыӀэ тхыгъэ пстэуми ежьым ехьылӀагъэу арытхэр зэхаригъэшӀыкӀыгъэх. 28 Къуаджэу зыдэкӀощтыгъэхэм игъунэгъу зэхъухэм, Исус къэмыуцоу блэкӀырэм фэдагъ. 29 Ау ахэмэ ар амыгъакӀоу къагъэуцуи къыраӀуагъ: Мафэр хэкӀотагъ, пчыхьашъхьи мэхъу пэт. Арышъ, тигъусэу къанэ. Ар къызаӀом, Исус адишти, адэжь къэнагъ. 30 ЕтӀанэ Исус ахэмэ ягъусэу шхэлэу Ӏанэм зыпэтӀысхьэм, хьалыгъур къыштагъ, Тхьэм щытхъу фишӀи, зэгуичи аритыгъ. 31 Джащыгъум анэхэр къэплъэжьхи, зэрэИсусыр къашӀэжьыгъ. КъызашӀэжьым, Исус кӀодыжьи, анэхэмкӀэ алъэгъужьыгъэп. 32 Гъогум тызытетым, Исус къыддэгущыӀэу Тхьэм игу щыӀэ тхыгъэхэм арытхэр къыдгуригъаӀо зэхъум, игущыӀэхэмкӀэ тызэригъэгушӀуагъэм пае, тыгухэр машӀом фэдэу къызэкӀигъанэщтыгъэба? зэраӀожьыгъ ахэмэ. 33 Ардэдэм ахэр къэтэджыжьхи, Ерусалим агъэзэжьыгъ. Апостол пшӀыкӀузымрэ адрэ ягъусэхэмрэ зэрэугъоигъэхэу къагъотыгъэх. 34 Зиусхьаныр шъыпкъэ дэдэу лӀагъэхэм къахэтэджыкӀыжьыгъ, Симони зыкъыригъэлъэгъугъ, аӀуагъ апостолхэм. 35 Ежьхэми гъогум къыщахъулӀагъэри, Исус хьалыгъур зызэгуечым, къызэрашӀэжьыгъэри къаӀотэжьыгъ.
Исус игъогу рыкӀохэрэм зыкъызэраригъэлъэгъугъэр
36 Ахэмэ мы Ӏофхэр къаӀуатэхэзэ, ежь Исус азыфагу къиуцуи къариӀуагъ: Гупсэфыныгъэ шъуиӀэу шъопсэу. 37 Ахэр къызэрэщтагъэхэм пае, агучӀэ изыгъэу, хьадэ джадэ алъэгъоу къашӀошӀыгъ. 38 Сыд пае шъугумэкӀыра? къариӀуагъ Исус. Сыд пае шъугу щэч къихьэра? 39 Сэ сӀэхэмрэ слъакъохэмрэ шъукъяплъ. Сэр дэдэр ары. ШъукъыстеӀаби, шъуеплъ, сыда пӀомэ хьадэ джадэм шъори, лыри, къупшъхьэри иӀэхэп, сэ сиӀэу зэрэшъулъэгъурэм фэдэу. 40 Мы гущыӀэхэр къызеӀохэм, ыӀэхэмрэ ылъакъохэмрэ аригъэлъэгъугъэх. 41 ГушӀуагъом къыхэкӀэу ашӀошъ мыхъоу агъэшӀагъо зэхъум, къариӀуагъ: Мыщ дэжьым шхын горэ шъуиӀа? 42 Пцэжъые гъэжъэгъэ ныкъо ратыгъ. 43 Ар къаӀихи, апашъхьэ щишхыгъ. 44 Сызышъухэтым къышъуасӀощтыгъэр мыры: пегъымбар Мусэ и Тэурат хабзи, адрэ пегъымбархэм ятхылъхэми, Сэбурыми сэ къысэхьылӀагъэу арыт пстэури къысэхъулӀэхэзэ, къэшъыпкъэжьынхэ фаех, къариӀуагъ Исус ахэмэ. 45 ЕтӀанэ Тхьэм игущыӀэ тхыгъэхэм арытхэр зэхаригъэшӀыкӀыхэзэ, 46 къариӀуагъ: Тхьэм игущыӀэ тхыгъэхэм арыт: Христос къин ыщэчын фаеу щыт, етӀани лӀэнышъ, ящэнэрэ мафэм лӀагъэ хэм къахэтэджыкӀыжьын фаеу щыт. 47 Ерусалим щегъэжьагъэу дунаем тет лъэпкъ пстэури къыхиубытэу, сэ къысфэлажьэрэ цӀыфхэм сэ Христос сцӀэкӀэ мы къэбарыр агъэӀущт: ШъуипсэкӀодхэм шъуафыкӀэгъожьи, Тхьэм ахэр къышъуфигъэгъущтых. 48 Шъо а Ӏоф пстэуми шъуряшыхьат. 49 ШъукъэдаӀу, сэ Сятэ шъукъызэригъэгугъагъэр къышъуфезгъэхыщт. Ау уашъом къикӀэу кӀуачӀэ къышъуфехыфэ, къалэу Ерусалим шъукъыдан.
Исус уашъом зэрэдэкӀоежьыгъэр
50 ЕтӀанэ Исус ахэр Ерусалим дищыхи, Вифание къуаджэм игъунэгъоу ыщэхи, ыӀэхэр къыӀэтхи, Тхьэм ынэшӀу къащифэнэу афелъэӀугъ. 51 Тхьэм афелъэӀузэ ахэкӀи, Тхьэм ар уашъом дищэяжьыгъ. 52 Арэущтэу зэхъум, ежьым щытхъу фашӀэу, лъэгонджэмышъхьэкӀэ тӀысыгъэх. ЕтӀанэ гушӀогъошхом хэтхэу Ерусалим агъэзэжьыгъ. 53 Тхьэм щытхъу фашӀэу, Тхьэм иунэшхо щыӀэ зэпытыщтыгъэх. Амин.
ГущыӀэр цӀыфэу зэрэхъугъэр
1 УблапӀэм ыдэжь ГущыӀэр щыӀагъ. Ар Тхьэм ыдэжь щыӀагъ, а ГущыӀэри Тхьэу арыгъэ. 2 УблапӀэм щегъэжьагъэу а ГущыӀэр Тхьэм ыдэжь щыӀагъ. 3 Тхьэм а ГущыӀэм зэкӀэри къыригъэгъэхъугъ. Тхьэм къыгъэхъугъэ пстэумэ ащыщэу а ГущыӀэм къыримыгъэгъэхъугъэ зи щыӀэп. 4 МыкӀодыжьын щыӀэныгъэ а ГущыӀэм хэлъыгъ, а щыӀэныгъэри цӀыфхэм нэфынэ афэхъугъ. 5 Нэфынэр шӀункӀыгъэм щэнэфы, шГункӀыгъэри нэфынэм текӀуагъэп. 6 Тхьэм къыгъэкӀуагъэу, зы лӀы горэ дунаем къытехьагъ. Ащ ыцӀагъэр Иуан. 7 ЦӀыф пстэуми а нэфынэмкӀэ шӀошъхъуныгьэ яӀэ хъуным пае, Иуан нэфынэм шыхьат фэхъунэу шыхьатэу къэкӀуагъ. 8 Ежьыр арэп нэфынагъэр, ау нэфынэм шыхьат фэхъунэу Тхьэм ар къыгъэкӀуагъ. 9 Нэфынэ шъыпкъэу цӀыф пстэури къэзыгъэнэфырэр дунаем къытехьанэу щытыгъ. 10 А ГущыӀэр дунаем къытехьагъ. Тхьэм а ГущыӀэм дунаер зэкӀэ къыригъэгъэхъугъ, ау щытми дунаем ицӀыфхэм ар къашӀэжьыгъэп. 11 Ежь ихэгъэгу къэкӀуагъ, ау ицӀыфхэм ежьыр аштагъэп. 12 Ау ежьыр зэкӀэ зыштэгъэ цӀыфхэу ежьымкӀэ шӀошъхъуныгъэ зиӀэхэр Тхьэм ибын хъунхэу фитыныгъэ аритыгъ. 13 Ахэр Тхьэм ибын зэрэхъугъэ шӀыкӀэр быныр къызэрыхъурэ шӀыкӀэм фэдэп. Ащ къикӀырэр ахэр Тхьэм ибын зэрэхъугъэхэр зы хъулъфыгъэ зы бзылъфыгъэм зэрехъуапсэрэм фэдэп, е зы лӀы горэ бын зэрэфаем фэдэп, ау Тхьэм бын фэхъуныр къызхэкӀыгъэр Тхьэр ары. 14 А ГущыӀэр цӀыфэу хъугъэ ыкӀи къытхэтыгъ. Ежьым ищытхъушхуи тлъэгъугъэ. А щытхъушхор Ты лъапӀэм Ыкъо закъо ищытхъушху ары. НэшӀу щыфэныгъэрэ шъыпкъагъэрэ ежьым ыгу илъыгъэх. 15 Иуан ежьым шыхьат фэхъугъ. МэкъэшхокӀэ мырэущтэу ыӀуагъ: Мары зыфэсӀуагъэр, «Сэ саужкӀэ къэкӀощтыр сэщ нахьи нахь ин, сыда пӀомэ сэ сыкъэхъуным ыпэкӀэ, ар щыӀагъ». 16 Ежьым ишӀугъэшхо щыщэу зы нэшӀу щыфэныгъэр адрэ нэшӀу щыфэныгъэм къыкӀэлъыкӀоу къыднигъэсыгъ. 17 Сыда пӀомэ Тэурат хабзэр Тхьэм иунашъокӀэ къытфэзыгъэнагъэр пегъымбар Мусэ ары, ау нэшӀу щыфэныгъэмрэ шъыпкъагъэмрэ къызпкъырыкӀыгъэр Исус Христос ары. 18 Тхьэр егъашӀэми нэкӀэ зыми ылъэгъугъэп. Къо закъоу Ты лъапӀэм ыдэжь щыӀэм Тхьэр зыфэдэр къытфигъэнэфагъ.
УмэхъэкӀо Иуан ишыхьатныгь
19 Иуан Исус шыхьат зэрэфэхъугъэр мыры; Ерусалим щыщ джуртхэм дин пащэхэри левитхэри Иуан еупчӀынхэу ыдэжь агъэкӀуагъэх. Ухэта, о? аӀуи къызеупчӀыхэм, 20 Иуан шъыпкъэр ымыушъэфэу, нафэу къыӀуагъ: Сэрэп Христосыр. 21 Адэ, ухэта о? къеупчӀыжьыгъэх ахэр. Пегъымбар Иляс ора? Хьау, ыӀуагъ Иуан. Пегъымбарыр ора? къеупчӀыжьыгъэх. Хьау, ыӀуагъ. 22 Ухэта о, адэ? къыраӀуагъ. ТыкъэзыгъэкӀуагъэмэ пэгъокӀ яттыжьынэу къытаӀу. Сыда о зэпӀолӀэжьырэр? 23 Пегъымбар Исайас мырэущтэу зыфиӀогъэ макъэр сэры: «Зиусхьаным игъогу занкӀэу шъушӀы, ыӀозэ, шъоф нэкӀым зы джэ макъэ горэ къыщэӀу», къыӀуагъ Иуан. 24 А лӀыкӀохэр фарисейхэмэ ащыщыгъэх. Ахэр Иуан къеупчӀыгъэх: 25 Христос орымырмэ, Иляс орымырмэ, пегъым барыри орымырмэ, сыд пае ащыгъум цӀыфхэр уумэхъыхэра? 26 Сэ псымкӀэ цӀыфхэр сэумэхъых, ариӀуагъ Иуан. Ау шъумышӀэрэ горэ къышъухэт. 27 Ежьыр ары саужкӀэ къэкӀощтыр. Ежьыр сэщ нахьи нахь ин. Ащ ицокъэлъэпсхэр фэстӀэтэнхэуи сифэшъуашэп. 28 Ар зэкӀэ зыщыхъугъэр Вифание къуаджэр ары, Иордан псыхъом иадрабгъоу Иуан цӀыфхэр зыщиумэхъыщтыгъэхэр.
Тхьэм икъурмэныпхъэ шъынэр
29 ЯтӀонэрэ мафэм Иуан Исус къакӀоу зелъэгъум, къыӀуагъ: Мары Тхьэм икъурмэныпхъэ шъынэу дунаем ицӀыфхэм япсэкӀодхэр атезыхыжьырэр. 30 Мары зыфэсӀуагъэр: «ЛӀэу саужкӀэ къэкӀощтыр сэщ нахьи нахь ин, сыда пӀомэ сэ сыкъэхъуным ыпэкӀэ ар щыӀагъ». 31 Ар сэ сшӀэщтыгъэп, ау сэ цӀыфхэр псымкӀэ сыумэхъынхэу сыкъызкӀэкӀуагъэр ар хэтми зыщыщыр Израил цӀыфмэ язгъэшӀэныр ары. 32 ЕтӀанэ Иуан Исус шыхьат фэхъузэ къыӀуагъ: Тхьэм Ыпсэ ЛъапӀэр тхьаркъом фэдэу уашъом къехи, Исус къыфехи, къызэрэшъхьащытыр слъэгъугъ. 33 Ежьыр сэ сшӀэщтыгъэп, ау цӀыфхэр псымкӀэ сыумэхъынхэу сыкъэзыгъэкӀуагъэм къысиӀуагъ: «Тхьэм Ыпсэ ЛъапӀэ къызфехэу, къызшъхьащыт цӀыфыр ары Тхьэм Ыпсэ ЛъапӀэкӀэ цӀыфхэр зыумэхъыщтыр». 34 Арэущтэу зэрэхъугъэр сэ слъэгъугъэ, ежьыр Тхьэм зэриКъори къэсэушыхьаты.
Апэрэ лӀыхэу Исус игъогу техьагъэхэр
35 ЯтӀонэрэ мафэм Иуан игъогу рыкӀорэ нэбгыритӀу игъусэхэу а чӀыпӀэм щыӀагъ. 36 Ащ дэжьым Иуан Исус зелъэгъум, къыӀуагъ: Мары Тхьэм икъурмэныпхъэ шъынэр. 37 Иуан игъргу рыкӀорэ нэбгыритӀум ащ ар къыӀоу зызэхахым, Исус ыуж ихьагъэх. 38 Исус зыкъызэригъэзэкӀи, ахэр ежьым ыуж къихьагъэхэу зелъэгъум, ариӀуагъ: Сыда шъузыфаер? Равви, тыдэ ущыпсэура? къыраӀожьыгъ ахэмэ. (Раввим къикӀырэр «Дин ГъэсакӀор» ары.) 39 ШъукъакӀуи, шъулъэгъущт, ариӀуагъ Исус. Арэущтэу ахэр къакӀохи, Исус зыщыпсэурэр алъэгъугъ, а мафэми Исус ыдэжь къэнагъэх. Сыхьатыр плӀым дэжьыгъ. 40 Иуан Исус ехьылӀагъэу ыӀуагъэхэр зэхэзыхыгъэхэу, Исус ыуж ихьэгъэ нэбгыритӀумэ язырэр Симон Петрэ ышы Индрыс арыгъэ. 41 Индрыс ыпэ рапшӀэу ыш Симон къыгъоти риӀуагъ: Мессихьыр къэдгъотыгъ. (Мессихьым къикӀырэр «Христос» ары.) 42 ЕтӀанэ Индрыс Исус ыдэжь Симон къыщагъ. Исус Симон зелъэгъум, къыриӀуагъ: О у Симонэу Иуанэ урикъу. КифэкӀэ къыоджэщтых (Кифэм къикӀырэр «Мыжъор» ары). Исус игъогу рыкӀонхэу Филиппрэ Нафанаилрэ зэряджагъэр 43 ЯтӀонэрэ мафэм Исус Джалил хэкум кӀонэу тыриубытагъ. ЕтӀанэ Исус Филипп ӀукӀи риӀуагъ: Сауж къырыкӀу. 44 А Филипп Индрысрэ Петрэрэ зыщыщ Вифсайдэ къалэм щыщыгъ. 45 Филипп кӀуи, Нафанаил къыгъоти риӀуагъ: Тэурат хабзэм итэу, пегъымбар Муси, адрэ пегъымбархэми зигугъу къашӀыгъэр къэдгъотыгъ. Ар Юсыф ыкъоу Назарет къалэм щыщ Исус ары. 46 Назарет шӀугъэ зыхэлъ горэ къыдэкӀына? къыриӀожьыгъ Нафанаил. КъакӀуи еплъ, риӀожьыгъ Филипп. 47 Исус Нафанаил къакӀоу зелъэгъум, ащ ехьылӀагъэу ыӀуагъ: Мыр Израил лӀы шъыпкъэу тхьагъэпцӀыгъэ зи зыхэмылъыр ары. 48 Тыдэ сыщыпшӀэра? ыӀуи, Нафанаил Исус къыриӀуагъ. Филипп къыоджэным ыпэкӀэ, ынджыр чъыгым ычӀэгъ учӀэтэу услъэгъугъ, риӀожьыгъ Исус. 49 Равви, о Тхьэм ури Къу, Израил урипачъыхь, къыриӀожьыгъ Нафанаил. 50 Ынджыр чъыгым ычӀэгъ учӀэтэу услъэгъугъ, къызэрэосӀуагъэм пае, пшӀошъ хъугъэ, риӀуагъ Исус. Ащ нахьи нахь гъэшӀэгъонхэр плъэгъущтых. 51 ЕтӀанэ Исус Нафанаил риӀуагъ: Шъыпкъэ дэдэр шъосэӀо, уашъор зэӀухыгъэу, ЦӀыф Лъэпкъым Ыкъо ышъхьагъкӀэ мэлэӀичхэр дэкӀуаехэуи къехыхэуи шъулъэгъущт.
Канэ къуаджэм нысащэу щыӀагъэр
1 Ящэнэрэ мафэм Галилей хэкум щыщэу Канэ къуаджэм нысащэ щыӀагъ. Исус янэ а нысащэм щыӀагъ. 2 Исуси игъогу рыкӀохэрэри а нысащэм рагъэблэгъагъэхэу щытыгъэх. 3 Сэнэпсыр заухым, янэ Исус риӀуагъ: Сэнэпс яӀэжьэп. 4 0 бзылъфыгъ, сыда сэ сиӀофэу ащ хэлъыр? Сэ сигъо къэсыгъэгоп, къыриӀожьыгъ Исус янэ. 5 Исус сыд къышъуиӀоми, жъугъэцакӀэ, ариӀуагъ Исус янэ унэӀутхэм. 6 А чӀыпӀэм мыжъом хэшӀыкӀыгъэ къошыних Ӏутыгъэх, джуртхэм ядин хабзэ тетэу загъэкъэбзэжьыным пае. Къошын пэпчъ литрэ тӀокӀиплӀшъэрэ тӀокӀырэ фэдиз ифэщтыгъ. 7 Къошынхэм псы арызэу арыжъугъахъу, ариӀуагъ Исус унэӀутхэм. Арэущтэу ахэмэ къошынхэм арызыбзэу рагъэхъуагъ. 8 Исус етӀанэ ариӀуагъ: Къошынхэм тӀэкӀутӀэкӀу къахэшъухи, хьатыякӀом фэшъухь. Арэущтэуи ашӀыгъ. 9 ХьатыякӀор псэу сэнэпс хъугъэм еӀубыгъ. Сэнэпсыр къыздикӀыгъэр ышӀагъэп, ау унэӀутхэу а псыр къошынхэм къахэзыхыгъэхэм ашӀэщтыгъ. Арэущтэу хьатыякӀор шъаом къеджи, 10 риӀуагъ: ЬӀпэ рапшӀэу сэнэпс дэгъур Ӏанэм къытырагъэуцо. ХьакӀэхэр бэу зешъохэ ужым, сэнэпс нахь пыутыр Ӏанэм къытырагъэуцожьы, ау о сэнэпс дэгъур джы нэс щыбгъэтыгъ. 11 Исус инэшэнэ гъэшӀэгъонышхохэм ащыщхэм апэрэр мыр арыгъэ. А нэшэнэ гъэшӀэгъонышхор Галилей хэкум щыщэу Канэ къуаджэм щигъэлъэгъуагъ. Арэущтэу ищы тхъушхо къыгъэнэфагъ, игъогу рыкӀохэрэм ежьымкӀэ шӀошъхъуныгъэу яӀэри нахь пытэ хъугъэ. 12 Ащ нэуж яни, ышхэри, игъогу рыкӀохэрэри игъусэхэу Исус Капернаум къалэм къехыгъ. Ащ дэжьым мэфэ заулэрэ щыӀагъэх.
Исус щэнщэфакӀохэр Тхьэм иунэшхо къызэрэчӀифыгъэхэр
13 Джуртхэм ямэфэкӀ мэфэшхоу Пасхъэ зыцӀэр къэблэгъагъ, Исуси Ерусалим дэкӀоягъ. 14 Тхьэм иунэшхо чӀэхьагъ. ЗычӀахьэм, цухэр, мэлхэр, тхьаркъохэр зыщэхэрэри Ӏанэхэм апэсхэу ахъщэр зыхъожьхэрэри ащ дэжьым чӀилъэгъуагъэх. 15 Джащыгъум къамыщ кӀапсэм къыхишӀыкӀи, яозэ, Тхьэм иунэшхо чӀэт пстэури, цухэри мэлхэри ягъусэхэу, къычӀифыгъэх. Ахъщэ зыхъожьхэрэми яӀанэхэр зэпыригъэзагъэх, яахъщэхэри ритэкъухьагъэх. 16 Мыхэр Ӏушъухых, Сятэ иунэ бэдзэр шъумышӀы, ариӀуагъ Исус тхьаркъохэр зыщэхэрэм. 17 Арэущтэу зэхъум, «О уиунэ сызэрэфэгумэкӀырэм сигъэлӀэщт», зыфиӀорэ гущыӀэхэу Тхьэм игущыӀэ тхыгъэхэм зэрарытхэр Исус игъогу рыкӀохэрэмэ агу къэкӀыжьыгъ. 18 Джащыгъум джуртхэм Исус къыраӀожьыгъ: Мыр пшӀэнэу фитыныгъэ зэрэуиӀэмкӀэ сыд фэдэ нэшэнэ гъэшӀэгъонышхо тэбгъэлъэгъуна? 19 Мы тхьэунэр зэхэшъукъути, сэ мэфищкӀэ зэтезгъэуцожьыщт, пэгъокӀ аритыжьыгъ Исус ахэмэ. 20 Мы тхьэунэр илъэс тӀокӀитӀурэ хырэкӀэ зэтырагъэуцуагъ, къаӀуагъ джуртхэм. О мэфищкӀэ зэтебгъэуцожьышъущта? 21 Ау Исус тхьэунэу зыфиӀуагъэр ежьым ыпкъ арыгъэ. 22 Исус лӀагъэхэм къызахэтэджыкӀыжьым ыуж, игъогу рыкӀохэрэм а гущыӀэхэу къыӀогъагъэхэр агу къэкӀыжьхи, Тхьэм игущыӀэ тхыгъэхэмкӀи Исус гущыӀэхэу къыӀуагъэхэмкӀи шӀошъхъуныгъэ яӀэ хъугъэ.
Щыф пстэуми агухэм арылъыр Исус ешӀэ
23 Пасхъэ мэфэкӀ мэфэшхом Ерусалим Исус щыӀэзэ, нэшэнэ гъэшӀэгъонышхохэу къыгъэлъэгъуагъэхэр алъэгъугъэхэти, цӀыфыбэмэ ежьымкӀэ шӀошъхъуныгъэ яӀэ хъутъэ. 24 Ау Исус цӀыфхэм цыхьэ афишӀыгъэп, сыда пӀомэ ахэр зэкӀэ ышӀэщтыгъэхэти ары. 25 Зыгорэ цӀыфхэм яхьылӀагъэу шыхьат къыфэхъунэу Исус ищыкӀагъэп, сыда пӀомэ, цӀыфхэм агухэм арылъыр ышӀэщтыгъэти ары.
ИкӀэрыкӀэу шъукъалъфыжьын фае
1 Никодим ыцӀэу, фарисейхэм ащыщэу зы лӀы горэ щыӀагъ. Ар джурт тхьаматэхэм ащыщыгъ. 2 Ар Исус ыдэжь чэщым къакӀуи къыриӀуагъ: Равви, о Тхьэм ыдэжь къикӀыгъэ дин гъэсакӀоу узэрэщытыр тэшӀэ; сыда пӀомэ Тхьэр уигъусэу щымытмэ, нэшэнэ гъэшӀэгъонышхохэу о къэбгъэлъагъохэрэр зыми къыгъэлъэгъон ылъэкӀыщтэп. 3 Шъыпкъэ дэдэр осэӀо, зы цӀыф горэ икӀэрыкӀэу къамылъфыжьмэ, Тхьэм и Тетыгъошхо ылъэгъун ылъэкӀыщтэп, риӀожьыгъ Исус. 4 ЦӀыфыр жъы хъумэ, сыдэущтэу къалъфыжьынэу хъущта? къыриӀожьыгъ Никодим. Ежь янэ ыныбэ ихьажьынышъ, икӀэрыкӀэу къалъфыжьыщта? 5 Шъыпкъэ дэдэр осэӀо, пэгъокӀ ытыжьыгъ Исус, псымрэ Тхьэм ЬӀпсэ ЛъапӀэрэ къахэкӀэу цӀыфыр икӀэрыкӀэу къамылъфыжьмэ, Тхьэм и Тетыгъошхо ыӀэчӀэгъ чӀэхьан ылъэкӀыщтэп. 6 ЦӀыфым къыфэхъурэр цӀыфы, ау цӀыфэу Тхьэм Ыпсэ ЛъапӀэ къыхэкӀырэр Тхьэм Ыпсэ ЛъапӀэ зыгу илъ цӀыфыр ары. 7 «ИкӀэрыкӀэу шъукъалъфыжьын фае», сӀуи къызэрэосӀуагъэр умыгъэшӀагъо. 8 Жьыбгъэр ежьыр зыфаемкӀэ щепщэ. Ымакъэ зэхэохы, арышъхьакӀэ къыздикӀырэри зыдакӀорэри пшӀэрэп. Джары хэтрэ цӀыфэу Тхьэм Ыпсэ ЛъапӀэ къыхэкӀыгъэм иӀоф зытетыр. 9 Ар сыдэущтэу хъура? къеупчӀыгъ Никодим Исус. 10 О Израил дин гъэсакӀохэм уащыщ, ар умышӀэу ара? пэгъокӀ ритыжьыгъ Исус. 11 Шъыпкъэ дэдэр осэӀо, тэ тшӀэрэр ары тызэрыгущыӀэрэр, тлъэгъугъэри ары шыхьат тызфэхъурэр, ау щытми, тэ тишыхьатныгъэ шъо жъудэрэп. 12 Мы дунаем иӀофхэм ягугъу къышъуфэсшӀыгъ, ау шъо шъушӀошъ хъугъэп. Уашъом иӀофхэм ягугъу къышъуфэсшӀымэ, сыдэущтэу шъушӀошъ хъуна? 13 ЦӀыф зи уашъом дэкӀоягъэп, ау ЦӀыф Лъэпкъым Ыкъоу зиунэ уашъом щыӀэр уашъом къехыгъ. 14 Пегъымбар Мусэ шъоф нэкӀым блэр зэрэщиӀэтыгъагъэм фэдэу, ЦӀыф Лъэпкъым Ыкъуи цӀыфхэм къаӀэтын фае, 15 ежьымкӀэ шӀошъхъуныгъэ зиӀэ пстэуми мыкӀодыжьын щыӀэныгъэ яӀэ хъуным пае. 16 Сыда пӀомэ Тхьэм дунаем ицӀыфхэр ащ фэдизэу шӀу зэрилъэгъугъэхэм къыхэкӀэу, ежь Ыкъо закъор ытыгъ, хэти Тхьэм ЫкъокӀэ шӀошъхъуныгъэ зиӀэр мыкӀодэу къэнэжьыным ыкӀи мыкӀодыжьын щыӀэныгъэ иӀэ хъуным пае. 17 Тхьэм дунаем ицӀыфхэр ыгъэмысэнхэр арэп ежь Ыкъо дунаем къызфигъэкӀуагъэр, ау Ыкъо дунаем ицӀыфхэр мыкӀодхэу къыригъэгъэнэжьынхэр ары нахь. 18 Тхьэм ежь ЫкъокӀэ хэти шӀошъхъуныгъэ зиӀэр ыгъэмысэщтэп, ау хэти шӀошъхъуныгъэ зимыӀэр Тхьэм ыгъэмысэгъах, Ыкъо закъомкӀэ шӀошъхъуныгъэ иӀэ зэрэмыхъугъэм пае. 19 Тхьэм цӀыфхэр зыкӀигъэмысэхэрэр мыры: Нэфынэр дунаем къытехьагъ, ау цӀыфхэм нэфынэм нахьи шӀункӀыгъэр нахьышӀу алъэгъугъ, сыда пӀомэ Ӏофхэу ашӀагъэхэр бзэджагъэхэшъ ары. 20 Хэти бзэджагъэр зыгъэцакӀэрэм нэфынэр еуджэгъу, Ӏофхэу ышӀагъэхэри нафэ къэмыхъунхэм пае, нэфынэм екӀуалӀэрэп. 21 Ау хэтми шъыпкъагъэр зыгъэцакӀэрэр нэфынэм екӀуалӀэ, Ӏофхэу ышӀагъэхэр Тхьэр ыгу зэрилъым пае, зэригъэцэкӀагъэхэр нафэ къэхъуным пае.
УмэхъэкӀо Иуан Исус зэрэтегущыӀагъэр
22 Ащ нэужым Исусрэ игъогу рыкӀохэрэмрэ Иудей хэкум кӀуагъэх. Ахэмэ ягъусэу Исус а чӀыпӀэм къани, цӀыфхэр щиумэхъыщтыгъэх. 23 Къуаджэу Салим зыцӀэм пэгъунэгъу Енон зыцӀэ чӀыпӀэу псы зыщыбагъэм Иуани цӀыфхэр щиумэхъыщтыгъэх. Ахэр Иуан ыдэжь къакӀохэти, зырагъэумэхъыщтыгъ. 24 А лъэхъанэм Иуан хьапсым чӀадзагъэу щытыгъэгоп. 25 Иуан игъогу рыкӀохэрэм ащыщхэмрэ зы джурт горэмрэ диным тетэу зызэрэбгъэкъэбзэжьыщт ӀофымкӀэ зэнэкъокъухэу фежьагъэх. 26 Игъогу рыкӀохэрэр Иуан ыдэжь къакӀохи къыраӀуагъ: Равви, еплъ Иордан псыхъом иадрабгъу о узигъусагъэ лӀэу шыхьат узыфэхъугъэм цӀыфхэр еумэхъых, цӀыфхэри зэкӀэ ащ ыдэжь къэкӀох. 27 Тхьэм римыгъэлъэкӀымэ, зыми зи ышӀэн ылъэкӀыщтэп, къыӀожьыгъ Иуан. 28 «Христосыр сэрэп, ау Христос ыпэ Тхьэм сыкъигъэкӀуагъ», сӀуи зэрэсӀуагъэмкӀэ шъо шъусишыхьат. 29 Нысэр зиер шъаор ары. Ау шъаом игъусэу ащ дэжьым щытэу, шъаом ымакъэ зэхэзыхырэр щэгушӀукӀы. А гушӀуагъоу икъугъэр сэ сигушӀуагъоуи хъутъэ. 30 Ежьыр нахь ин хъун фае, сэри нахь цӀыкӀоу сыхъун фае.
Уашъом къехырэр
31 ЫпшъэкӀэ къехырэр зэкӀэмэ апшъэ щыӀ. Ау чӀылъэм щыщыр чӀылъэм ий, чӀылъэм щыщхэр зэрэгущыӀэхэрэм фэдэу мэгущыӀэ. Уашъом къехырэр зэкӀэмэ апшъэ щыӀ. 32 Ащ Ӏофхэу ылъэгъугъэхэмрэ зэхихыгъэхэмрэ къеушыхьатыжьых, ау ащ ишыхьатныгъэ зыми ыдэрэп. 33 Ау ащ ишыхьатныгъэ зыдагъэм Тхьэр зэрэшъыпкъэр ыдагъэу мэхъу. 34 Сыда пӀомэ Тхьэм къыгъэкӀуагъэм тхьэм игущыӀэхэр ары къыӀохэрэр. А цӀыфым ыгу Тхьэм ежь Ыпсэ ЛъапӀэ гъунэ имыӀэу къырелъхьэ. 35 Ты лъапӀэм ежь Ыкъо шӀу елъэгъу, зэпстэури ыӀэ къырилъхьагъ. 36 Тхьэм ЫкъокӀэ шӀошъхъуныгъэ зиӀэм мыкӀодыжьын щыӀэныгъэ иӀэ хъугъэ, ау Ыкъо емыдэӀурэм мыкӀодыжьын щыӀэныгъэ ылъэгъущтэп, Тхьэм игубж телъыщт нахь.
Исус Самарие бзылъфыгъэм зэрэдэгущыӀагъэр
1 Иуан игъогу рыкӀохэрэм анахьи Исус игъогу рыкӀохэрэр нахьыбэ хъухэу, Исус ахэр зэриумэхъыщтыгъэхэм икъэбар фарисейхэм зэранэсыгъэр Исус къышӀагъ. 2 (Ау ахэр зыумэхъыщтыгъэхэр Исус игъогу рыкӀохэрэр арыгъэ, ежь Исус арыгъэп.) 3 А къэбарыр Исус зызэхехым, Иудей хэкум икӀи, Галилей хэкум кӀожьыгъэ. 4 Арэущтэу Самарие хэкум кӀоцӀырыкӀын фаеу хъугъэ. 5 Исус кӀозэ, Самарие хэкум щыщ къалэу Сихар зыцӀэм нэсыгъ; а къалэр Якъубэ ыкъо Юсыф ритыгъэгъэ чӀыгу Ӏахьэм пэгъунэгъугъ. 6 А чӀыпӀэм Якъубэ ипсынэ щытыгъ. Исус гъогууанэм ыгъэпшъыгъэти, псынэм ыдэжь тӀысыгъэ. Сыхьатыр пшӀыкӀутӀум дэжьыгъ. 7 Исус псынэм дэжь щысэу Самарие бзылъфыгъэ горэ псыхьэ къэкӀуагъ. Псы тӀэкӀу сегъашъу, ыӀуи, Исус а бзылъфыгъэм риӀуагъ. 8 Джащыгъум Исус игъогу рыкӀохэрэм гъомылэ къащэфынэу къалэм кӀогъагъэх. 9 0 джуртэу ущыт, сэ Самарие бзылъфыгъэу сыщыт,къыриӀуагъ Самарие бзылъфыгъэм Исус. Сыдэущтэу псы уезгъэшъонэу укъысэлъэӀушъура? (Арэущтэу зыкӀиӀуагъэр джуртхэмрэ Самарие цӀыфхэмрэ зэхахьэу щытыгъэхэпти ары.) 10 Тхьэм итын зыфэдэри, «Псы тӀэкӀу сегъашъу», о къыозыӀорэр хэт зыщыщыри пшӀэщтыгъэмэ, о ащ уелъэӀущтыгъ, ащи о щыӀэныгъэ къыозытыщт псым уригъашъощтыгъ, пэгъокӀ ритыжьыгъ Исус. 11 Тхьаматэ, къыриӀожьыгъ бзылъфыгъэм, псынэр куу, о псы къызэрипхыни уиӀэп. Ащыгъум а псэу щыӀэныгъэ къысэзытыщтыр тыда къыздипхыщтыр? 12 Тятэжъышхоу Якъубэ ары мы псынэр къытфэзыгъэнагъэр. Ежьыри ыкъохэри мы псым ешъощтыгъэх, ибылымхэри ригъашъощтыгъэх. Ащ нахьи унахь ина о? 13 Мы псым хэт ешъоми, псыфалӀэ лӀэжьыщт, пэгъокӀ ритыжьыгъ Исус. 14 Ау сэ псэу естырэм ешъорэр ныбжьи псыфалӀэ лӀэжьыщтэп. Сэ псэу естырэр цӀыфым ыгу илъэу, псы къызэрычъ зэпытырэ псынэ фэхъужьыщт; а псыми мыкӀодыжьын щыӀэныгъэ иӀэ ыгъэхъущт. 15 Тхьаматэ, къыриӀуагъ бзылъфыгъэм, псыфалӀи сымылӀэжьынэу, псыхьи сыкъэмыкӀожьынэу а псым щыщ къысэт. 16 КӀуи, уилӀ къеджи, къэкӀожь, риӀуагъ Исус. 17 Сэ лӀы сиӀэп, къыриӀожьыгъ бзылъфыгъэм. Тэрэз, риӀуагъ Исус бзылъфыгъэм. ЛӀы зэрэуимыӀэр шъыпкъэу къэпӀуагъ. 18 ЛӀитф уиӀагъ, джы уиӀэри о уилӀэу щытэп. А къэпӀуагъэр шъыпкъэ. 19 Тхьаматэ, узэрэпегъымбар горэр къэсшӀагъ, къыриӀожьыгъ бзылъфыгъэм. 20 Тэ тятэжъхэр мы Ӏуашъхьэм Тхьэм щелъэӀущтыгъэх, ау шъо джуртхэм шъоӀо, Ерусалим арэу Тхьэм узыщелъэӀун фаер. 21 О бзылъфыгъ, риӀуагъ Исус, пшӀошъ гъэхъу, мы Ӏуашъхьэми Ерусалими Ты лъапӀэм шъузыщемылъэӀун мафэ къэкӀощт. 22 Шъо Самарие цӀыфхэм Тхьэу шъузэлъэӀурэр шъушӀэрэп, ау тэ Тхьэу тызэлъэӀурэр тэшӀэ, сыда пӀомэ мы дунаем ицӀыфхэр мыкӀодхэу къэзыгъэнэжьырэр джуртхэм ащыщ. 23 Исус етӀанэ ыӀуагъ: Ты лъапӀэм шъыпкъэу елъэӀухэрэр агу етыгъэу, шъыпкъагъэкӀэ зыщелъэӀурэ мафэр къэсыщт ыкӀи къэсыгъ. Ащ фэдэу елъэӀухэрэр ары Ты лъапӀэм икӀасэхэр. 24 Тхьэр псэ, ащ елъэӀухэрэри Тхьэм Ыпсэ ЛъапӀэ илъэкӀыныгъэкӀи шъыпкъагъэкӀи елъэӀунхэ фае. 25 Мессихьэу ХристоскӀэ заджэхэрэр къызэрэкӀощтыр сэшӀэ, къыриӀожьыгъ бзылъфыгъэм. Ар къызыкӀокӀэ, Ӏоф пстэури къыдгуригъэӀощт. 26 А зыфапӀорэр сэры, джы къыбдэгущыӀэрэр ары,риӀуагъ Исус. 27 Джащыгъум Исус игъогу рыкӀохэрэр къэкӀожьыгъэх. Исус бзылъфыгъэ горэм дэгущыӀэу залъэгъум агъэшӀэгъуагъ, арышъхьакӀэ «Сыда узыфаер», е «Сыда ащ узкӀыдэгущыӀэрэр?» ыӀоу, ахэмэ ащыщэу зыми къыӀуагъэп. 28 ЕтӀанэ бзылъфыгъэм ипсы къошын къыгъани, къалэм кӀожьи, цӀыфхэм ариӀуагъ: 29 ШъукъакӀу, модэ лӀы горэм сэ сшӀэгъэ пстэури къысиӀожьыгъ. Христосыр ары шъуӀуа? 30 Ахэр къалэм къыдэкӀыхи, Исус ыдэжь къэкӀуагъэх. 31 Ахэр джыри къэмысыхэзэ, игъогу рыкӀохэрэр Исус къелъэӀугъэх: Равви, шхэ. 32 Ау Исус ариӀуагъ: Шъо шъумышӀэрэ шхын сиӀ. 33 Ащ къыхэкӀэу игъогу рыкӀохэрэм, Зыгорэм шхын къыфихьыгъ шъуӀуа? аӀуи, зыр адрэм еупчӀыжьыгъ. 34 Сэ сишхын сыкъэзыгъэкӀуагъэр зыфаер згъэцэкӀэнри, ащ иӀоф сыухынри ары, ариӀуагъ Исус ахэмэ. 35 Джыри мэзиплӀкӀэ хыныгъор къэсыщт, арыба шъуӀорэр? Ау сэ шъосэӀо, шъунапӀэхэр къэшъуӀэтхи, губгъо хьасэхэм шъуяплъ! Лэжьыгъэхэр ягъо къэхъуи, яхыныгъо къэсыгъ. 36 Джы лэжьыгъэр къэзыхыжьырэм ифэшъошэ Ӏахьэ егъотыжьы, джы мыкӀодыжьын щыӀэныгъэм пае лэжьыгъэр къехыжьы. Арэущтэу чылапхъэр зыпхъырэри лэжьыгъэр къэзыхыжьырэри зэдэгушӀощтых. 37 Арэущтэу, «Зым чылапхъэр епхъы, адрэм лэжьыгъэр къехыжьы», зыфаӀорэ гущыӀэр шъыпкъэ хъугъэ. 38 Шъо шъуздэмыулэугъэ лэжьыгъэр къэшъухыжьынэу шъузгъэкӀуагъ. А лэжьыгъэм нэмыкӀхэр дэулэугъэх, шъо ахэмэ яӀофи шъухэхьагъ. 39 А къалэм дэсхэу Самарие цӀыфыбэми ИсускӀэ шӀошъхъуныгъэ яӀэ хъугъэ, а бзылъфыгъэр Исус шыхьат фэхъоу, «Сэ сшӀэгъэ пстэури къысиӀуагъ», зэриӀуагъэм пае. 40 Арэущтэу Самарие цӀыфхэр Исус ыдэжь къызэкӀохэм, адэжь тӀэкӀурэ щыӀэнэу Исус къелъэӀугъэх. КъызелъэӀухэм, Исус ахэмэ адэжь мэфитӀукӀэ къэнагъ. 41 Исус игущыӀэхэр зызэхаххэм, ежьымкӀэ шӀошъхъуныгъэ зиӀэ хъугъэхэр нахьи нахьыбэ хъугъэх. 42 Джы о къэпӀуагъэхэм язакъоу арэп шӀошъхъуныгъэ тиӀэ зыгъэхъугъэхэр, раӀуагъ ахэмэ бзылъфыгъэм. Ау тэ ттхьакӀумэхэмкӀэ ежьым къыӀохэрэр зэхэтхыгъ, дунаем ицӀыфхэр мыкӀодхэу къэзыгъэнэжьырэри шъыпкъэмкӀэ ежьыр арэу зэрэщытыр къэтшӀагъ.
Исус пачъыхьэм фэлажьэрэ Ӏэшъхьэтетым ыкъо зэригъэхъужьыгъэр
43 А мэфитӀум ыуж Исус а чӀыпӀэм икӀи, Галилей хэкум кӀуагъэ; 44 сыда пӀомэ пегъымбарым янэ икъалэ дэсхэм лъытэныгъэ зэрэфамышӀырэр ежь Исус къыушыхьатыгъагъ. 45 ЕтӀанэ Галилей хэкум Исус къызэкӀом, ащ ис цӀыфхэм къырагъэблэгъагъ, сыда пӀомэ мэфэкӀ мэфэшхом ахэр Ерусалим щыӀагъэхэти, а мафэхэм Исус ащ дэжьым щишӀэгъэ пстэури алъэгъугъагъэх. 46 Джарэущтэу Галилей хэкум щыщэу Канэ зыцӀэ къуаджэм Исус джыри къэкӀожьыгъ. А къуаджэр ары псыр сэнэпс зыщишӀыгъагъэр. Пачъыхьэм фэлажьэрэ Ӏэшъхьэтет горэ Капернаум къалэм дэсыгъ. Ащ ыкъо сымаджэу щылъыгъ. 47 Исус Иудеим къикӀи, Галилей къызэрэкӀуагъэр а Ӏэшъхьэтетым зызэхехым, Исус ыдэжь къэкӀуагъ. КъыздакӀуи, сэ скъо сымаджэу лӀэныгъэм нэсыгъэр сфэгъэхъужь, ыӀуи къелъэӀугъ. 48 Нэшэнэ гъэшӀэгъонышхохэмрэ Ӏофышхо гъЭшӀэгъонхэмрэ шъумылъэгъухэмэ, шӀошъхъуныгъэ шъуиӀэ хъущтэп, риӀуагъ Исус. 49 Тхьаматэ, сэ скъо мылӀэ рапшӀэу къакӀуи, ыдэжь ех,ыӀуи, пачъыхьэм фэлажьэрэ Ӏэшъхьэтетым Исус къыриӀожьыгъ. 50 КӀожь, пкъо псэущт, риӀуагъ Исус. Исус риӀогъэ гущыӀэхэр а лӀым ышӀошъ хъуи кӀожьыгъэ. 51 Ӏэшъхьэтетыр гъогум тетэу зэкӀожьым, иунэӀутхэр къыпэгъокӀыхи къыраӀуагъ: Пкъо псау. 52 Сыхьатыр тхьапшым ыдэжь хъужьынэу къызиублагъэр? ыӀуи яупчӀыгъ. Тыгъуасэ щэджэгъоужым сыхьатыр зым дэжь плъырстырыр хэкӀыжьыгъ, къыраӀожьыгъ ахэмэ. 53 Ар къызаӀом, кӀалэм ятэ къышӀагъ плъырстырыр ыкъо зыхэкӀыжьыгъэр, «Пкъо псэущт», Исус къызщыриӀогъэгъэ сыхьат дэдэр ары. Джащыгъум ежьыми зэрэунагъоуи шӀошъхъуныгъэ яӀэ хъугъэ. 54 Исус Иудеим къикӀи, Галилей къызэкӀом, джары ятӀонэрэ нэшэнэ гъэшӀэгъонышхоу къыгъэлъэгъуагъэр.
Псыхъурэе зыгъэпскӀыпӀэм дэжь Исус лӀы горэ зэрэщигъэхъужьыгъэр
1 Ащ нэужым джурт мэфэкӀ мэфэшхо щыӀагъ, Исуси Ерусалим къэкӀуагъ. 2 Ерусалим Мэл Къэлапчъэ зыцӀэм ыдэжь псыхъурэе зыгъэпскӀыпӀэ горэ, джуртыбзэкӀэ Вифездэ ыцӀэу, дэт. Шъхьэ зытелъ пкъэу къэлэпчъитф а зыгъэпскӀыпӀэм иӀ. 3 А чӀыпӀэм сымаджэ Ӏаджи чӀэлъыгъэх, нэшъуи, лъащи, зыӀэпкълъэпкъ узым зэкӀиубытагъи. Ахэр псым зыкъигъэхъыеным ежэщтыгъэх; 4 сыда пӀомэ Зиусхьаным имэлэӀич загъорэ а зыгъэпскӀыпӀэм хахьэти, псыр къыгъэхъыещтыгъ. Псыр къызыхъыекӀэ, апэу ащ хэхьагъэр сыд уз иӀэми хъужьыщтыгъ. 5 Илъэс щэкӀырэ ирэ сымаджэу щытыгъэ лӀы горэ а сымаджэхэм ахэлъыгъ. 6 Исус ар щылъэу зелъэгъум, бэшӀагъэу сымэджагъэу ешӀэти, еупчӀыгъ: Ухъужьынэу уфая? 7 Тхьаматэ, къыриӀожьыгъ сымаджэм, псыр зыхъыекӀэ, зыгъэпскӀыпӀэм сыхэзыгъэхьан гъусэ сиӀэп. Сэ сыкӀо къэс, сапэ нэмыкӀ горэ псым хахьэ. 8 Къэтэдж, уипӀуаблэ къашти къэкӀухь, риӀуагъ Исус. 9 Исус ар къызэреӀоу, а лӀыр хъужьыгъэ. ИпӀуаблэ къыштэжьи къыкӀухьагъ. Ар къызыхъугъэр шэмбэт мэфагъ. 10 Арыти, джуртмэ а лӀэу хъужьыгъэм раӀуагъ: Непэ шэмбэт маф, хабзэкӀэ уипӀуаблэ пштэжьыныр хъущтэп. 11 Сэ сызыгъэхъужьыгъэм «УипӀуаблэ къашти къэкӀухь», ыӀуи къысиӀуагъ, къариӀожьыгъ а лӀым ахэмэ. 12 «УипӀуаблэ къашти къэкӀухь», къыозыӀуагъэр хэт щыщ? аӀуи еупчӀыгъэх. 13 Ау лӀэу хъужьыгъэм зыгъэхъужьыгъэр зыщыщыр ышӀэщтыгъэп; сыда пӀомэ а чӀыпӀэм цӀыф купышхо щыӀагъэти, Исус ӀукӀыжьыгъагъ. 14 Ащ нэужым Исус а лӀым Тхьэм иунэшхо щыӀукӀи риӀуагъ: Джы дэгъоу ухъужьыгъ. Нахь Ӏае къыомыхъулӀэным пае, псэкӀод умышӀэжь. 15 А лӀыр ӀукӀыжьи, джуртмэ адэжь кӀуи, зыгъэхъужьыгъэр зэрэИсусыр ариӀотэжьыгъ. 16 Шэмбэт мафэм ащ фэдэ Ӏофхэр зэришӀэхэрэм пае, джуртхэм Исус къин къырагъэщэчэу аублагъ, аукӀынэуи ыуж къихьагъэх. 17 Джы къызынэсыгъэм сэ Сятэ Ӏоф ешӀэ, сэри Ӏоф сэшӀэ, ариӀуагъ Исус ахэмэ. 18 Ащ пае джуртхэм Исус аукӀынэу нахьи нахь лъэшэу ыуж итыгъэх. ЬӀуж зыкӀитыгъэхэр шэмбэт мафэм яхабзэкӀэ мыхъущтыр Исус зэришӀагъэм имызакъоу, Тхьэм зыфигъадэу, Тхьэр ежь Ятэу зэриӀуагъэри ары.
Къо лъапӀэм тетыгъоу иӀэр
19 Шъыпкъэ дэдэр шъосэӀо, ариӀуагъ Исус ахэмэ, ежьежьырэу Къо лъапӀэм зи ыгъэцэкӀэн ылъэкӀыщтэп; Ты лъапӀэм ыгъэцакӀэу ылъэгъурэм нэмыкӀ зи ыгъэцэкӀэн ылъэкӀыщтэп. Ты лъапӀэм сыд ыгъэцакӀэми, Ыкъуи ар егъэцакӀэ. 20 Сыда пӀомэ Ты лъапӀэм ежь Ыкъо шӀу елъэгъу. Ежьым ыгъэцакӀэрэ пстэури Ыкъо къырегъэлъэгъу, жъугъэшӀэгъоным паий, мы Ӏофхэм анахьи нахь Ӏофышхохэр Ыкъо ригъэлъэгъущтых. 21 Арэущтэу лӀагъэхэр Ты лъапӀэм къыгъэтэджыжьхэзэ къызэригъэпсэужьхэрэм фэдэу, Ыкъуи ежь зыфэе цӀыфхэр къегъэпсэужьых. 22 Ты лъапӀэм зыми хьыкум тыришӀыхьарэп, ау хьыкум шӀын Ӏоф пстэури Ыкъо къыфигъэзагъ, 23 цӀыф пстэуми Ты лъапӀэм лъытэныгъэ зэрэфашӀырэм фэдэу, Ыкъуи лъытэныгъэ фашӀыным пае. Ыкъо лъытэныгъэ фэзымышӀырэм Ты лъапӀэу ар къэзыгъэкӀуагъэми лъытэныгъэ фимышӀэу мэхъу. 24 Шъьшкъэ дэдэр шъосэӀо, сэ сигущыӀэхэм ядэӀоу, сыкъэзыгъэкӀуагъэмкӀэ шӀошъхъуныгъэ зиӀэ хъурэм мыкӀодыжьын щыӀэныгъэ иӀэ хъугъэ. Тхьэм ар ыгъэмысэщтэп, ау ар лӀэныгъэм ӀэкӀэкӀыжьи, щыӀэныгъэм ӀэкӀэхьагъ. 25 Шъыпкъэ дэдэр шъосэӀо, лӀагъэмэ Тхьэм Ыкъо ымакъэ зэхахынышъ, ежьым едэӀухэрэм щыӀэныгъэ зыщагъотыщт мафэр къэкӀощт ыкӀи къэкӀогъах. 26 Сыда пӀомэ Ты лъапӀэм цӀыфхэм щыӀэныгъэ зэраритырэм фэдэу, ежь Ыкъуи цӀыфхэм щыӀэныгъэ аритынэу тетыгъо къыритыгъ. 27 Сэ ЦӀыф Лъэпкъым Ыкъоу сызэрэщытым пае, цӀыфхэм хьыкум атесшӀыхьанэу Ты лъапӀэм тетыгъо къыситыгъ. 28 Ар шъумыгъэшӀагъо, сыда пӀомэ къэхэмэ ачӀэлъ пстэуми Тхьэм Ыкъо ымакъэ зэхахынышъ, къэхэм къызщычӀэкӀыжьыщт мафэр къэкӀощт. 29 ШӀу зышӀагъэхэр псэунхэу къэтэджыжьыщтых, е зышӀагъэхэми ямысагъэ фэшъуашэу агъотыжьынэу къэтэджыжьыщтых. 30 Сэрсэрэу зи сшӀэн слъэкӀыщтэп, ау Тхьэм къыӀоу зэрэзэхэсхырэм фэдэу, цӀыфмэ хьыкум атесэшӀыхьэ; хьыкумэу сэ атесшӀыхьарэри зафэ, сыда пӀомэ сэ сызыфаем ыуж симытэу, сэ сыкъэзыгъэкӀуагъэр зыфаер згъэцэкӀэным ыуж сит.
Шыхьатхэу Исус фэхъухэрэр
31 Сэрсэрэу шыхьат сызфэхъужьмэ, сишыхьатныгъэ хъунэу щытэп, 32 ау нэмыкӀ горэ шыхьат къысфэхъунэу щыӀ. Ащ сэ къысэхьылӀагъэу къыушыхьатырэр зэрэшъыпкъэр сэшӀэ. 33 Шъо лӀыкӀохэр Иуан фэжъугъэкӀуагъэх, ежьыри шъыпкъагъэм шыхьат фэхъугъ. 34 Зы цӀыф горэ шыхьат къысфэхъунэу сищыкӀагъэп, ау шъо шъумыкӀодэу Тхьэм шъукъигъэнэжьыным пае, ар къэсэӀо. 35 Иуан остыгъэу къэнэфырэм фэдагъ. Ащ инэфынэ тӀэкӀурэ шъурыгушӀонэу шъуфэягъ. З6 Иуан шыхьатныгъэу къысфишӀыгъэм нахьи нахь шыхьэтныгъэшхо сиӀ. Сэ згъэцэкӀэн фэе Ӏофхэу Ты лъапӀэм спшъэ къырилъхьагъэхэр сэгъэцакӀэх. А Ӏофхэр ары Ты лъапӀэм сыкъызэригъэкӀуагъэмкӀэ шыхьат къысфэхъухэрэр. 37 Ты лъапӀэу сэ сыкъэзыгъэкӀуагъэр ежь ышъхьэкӀэ шыхьат къысфэхъугъ. Ащ ымакъэ егъашӀэми зэхэшъухыгъэп, ынапи шъулъэгъугъэп. 38 Ащ сыкъызэригъэкӀуагъэмкӀэ шӀошъхъуныгъэ зэрэшъуимыӀэм пае, ащ игущыӀэхэр шъугухэм арылъ зэпытхэп. 39 Тхьэм игущыӀэ тхыгъэхэм мыкӀодыжьын щыӀэныгъэ ахэжъугъотэн шъуӀоу, лъэшэу шъуахэплъэ. Ахэр ары шыхьат къысфэхъухэрэр. 40 Ау щытми, а щыӀэныгъэр шъуиӀэ хъуным пае, садэжь шъукъэкӀонэу шъуфаеп. 41 ЦӀыфхэр къысщытхъунхэу ыуж ситэп. 42 Ау шъо шъусэшӀэ: Тхьэм ишӀулъэгъуныгъэ шъо шъугухэм арылъэп. 43 Сэ Сятэ ыцӀэкӀэ сэ сыкъэкӀуагъ, ау шъо сыжъудэрэп; ау нэмыкӀ горэ ежь ыцӀэкӀэ къакӀомэ, ар жъудэщт. 44 Тхьэ закъом ыдэжь къикӀырэ щытхъум ыуж шъуимытэу, зыр адрэм шъущытхъоу шъущытмэ, сыдэущтэу шӀошъхъуныгъэ шъуиӀэ хъуна? 45 Ты лъапӀэм ыпашъхьэ шъущызгъэмысэнкӀэ шъумыгугъ. Шъо шъузыгъэмысэщтыр пегъымбар Мусэу шъузыщыгугъырэр ары. 46 МусэкӀэ шӀошъхъуныгъэ шъуиӀагъэмэ, сэркӀи шӀошъхъуныгъэ шъуиӀэщтыгъ, сыда пӀомэ Мусэ зигугъу ышӀыгъэр сэры. 47 Ащ ытхыгъэхэр шъушӀошъ зымыхъукӀэ, сэ сӀохэрэр сыдэущтэу шъушӀошъы хъуных?
Исус нэбгырэ минитф зэригъэшхагъэр
1 Ащ нэуж Галилей зыцӀэ псыхъураем (Тивериадэ зыцӀэ псыхъураер ары) Исус къуашъомкӀэ зэпырыкӀыжьыгъ. 2 Сымаджэхэр ыгъэхъужьхэзэ, нэшэнэ гъэшӀэгъонышхохэу Исус къыгъэлъэгъуагъэхэр зэралъэгъугъэхэм пае, цӀыф купышхо ыуж итэу кӀощтыгъ. 3 Исус Ӏуашъхьэм дэкӀоягъ, ащ дэжьыми тетӀысхьагъ, игъогу рыкӀохэрэр игъусэхэу. 4 Джуртмэ ямэфэкӀ мэфэшхоу Пасхъэ зыцӀэр къэблэгъагъ. 5 Исус ынапӀэхэр къыӀэтхи, цӀыфыбэхэр ыдэжь къакӀохэу зелъэгъум, игъогу рыкӀохэрэм язэу Филипп зыцӀэм риӀуагъ: Мы цӀыфхэм ядгъэшхынэу хьалыгъу тыдэ къыщытщэфыщта? 6 Исус ар зыкӀиӀуагъэр Филипп ыгъэунэфынэу ары; сыда пӀомэ ежьым ышӀэн фаер ышӀэщтыгъ. 7 Хэти тӀэкӀу ышхынэу динар шъитӀур хьалыгъу уасэ афырикъущтэп, ыӀуи, Филипп Исус пэгъокӀ къыритыжьыгъ. 8 Исус игъогу рыкӀохэрэм ащыщэу Симон Петрэ ышэу Индрыс зыцӀэм къыӀуагъ: 9 Хьэ хьалыгъуитфырэ пцэжъыитӀурэ зыӀыгъырэ кӀэлэ цӀыкӀу горэ къытхэт, ау мыщ фэдиз цӀыфмэ ар сыдэущтэу афырикъуна? 10 ЦӀыфхэр ежъугъэтӀысэхых, къыӀуагъ Исус. А чӀыпӀэм уцыбэ щыӀагъ. Арэущтэу лӀыхэу зипчъагъэ минитф фэдиз хъущтыгъэхэр етӀысэхыгъэх. 11 ЕтӀанэ Исус хьалыгъухэр къыштэхи, Тхьэм щытхъу фишӀи, игъогу рыкӀохэрэм аритыгъ. Ахэми цӀыфхэу щысхэм афагощыгъ, пцэжъыехэми ащыщэу хэти зыфаем фэдизэу аратыгъ. 12 ЗызагъэшхэкӀыжьым, Исус игъогу рыкӀохэрэм ариӀуагъ: Зи хэмыкӀодыкӀыным пае, къялыжьыгъэ хьалыгъу такъырхэр шъуугъоижьых. 13 Арэущтэу ахэр аугъоижьыгъэх, хьэ хьалыгъуитфым щыщэу шхагъэмэ къялыжьыгъэ такъырхэр мэтэ пшӀыкӀутӀу арызэу аугъоижьыгъ. 14 Нэшэнэ гъэшӀэгъонышхоу Исус къыгъэлъэгъуагъэр цӀыфмэ залъэгъум, аӀуагъ: Дунаем къэкӀон фае пегъымбарыр шъыпкъэу мырын фаеба? 15 Ау цӀыфхэр къэкӀонхэшъ, ежьыр аубытынышъ, лӀыгъэкӀэ пачъыхьэ ашӀынэу агу зэрэхэлъыр Исус ешӀэти, ӀукӀыжьи, изакъоу Ӏуашъхьэм дэкӀоежьыгъ.
Исус псы кӀыӀум тетэу зэрэкӀуагъэр
16 Пчыхьэр къызэсым, Исус игъогу рыкӀохэрэр псыӀушъом ехыгъэх. 17 Ащ дэжьым къуашъом итӀысхьэхи, псыхъураем зэпырыкӀхэу КапернаумкӀэ ежьагъэх. Мэзахэ хъугъэхагъ, ау Исус ахэмэ адэжь джыри къэкӀожьыгъагъэгоп. 18 Псыхъураер ьггъэуалъэу жьыбгъэшхо къепщэщтыгъ. 19 Стадие тӀокӀырэ тфырэщэкӀ фэдиз къуашъор зафым ыуж, псы кӀыӀум тетэу Исус къакӀоу, къуашъом пэгъунэгъоу къэхъоу алъэгъугъ. Ар залъэгъум, къэщтагъэх. 20 Ау Исус къариӀуагъ: Сэры ар, шъумыщын! 21 Джащыгъум Исус къуашъом къырагъэтӀысхьанэу фэягъэх, ардэдэми къуашъор зыдэкӀощтыгъэ псыӀушъом нэсыгъ.
Исусэу цӀыфхэм щыӀэныгъэ язытырэ хьалыгъур
22 ЯтӀонэрэ мафэм цӀыф купышхоу псыхъураем иадрабгъу щытхэм Исус игъогу рыкӀохэрэр зэрытӀысхьэгъэгъэ къуашъом нэмыкӀ къуашъо горэ ащ дэжьым Ӏутэу зэрэщымытыгъагъэм гу лъатагъ. Исус а къуашъом игъогу рыкӀохэрэм адимытӀысхьэгъагъэу, язакъоу ахэр зэрэӀукӀыгъагъэхэми гу лъатагъ. 23 ЕтӀанэ Зиусхьан Исус Тхьэм щытхъу зыфешӀым ыуж, цӀыфмэ хьалыгъухэр зыщашхыгъэгъэ чӀыпӀэм пэгъунэгъоу, Тивериадэ къалэм къикӀыгъэхэу, нэмыкӀрэ къуашъохэр къыӀухьагъэх. 24 А цӀыф купышхом Исуси игъогу рыкӀохэрэри а чӀыпӀэм щымыӀэжьхэу залъэгъум, ежьхэр къуашъохэм арытӀысхьэхи, Исус лъыхъухэу Капернаум къалэм кӀуагъэх. 25 Исус псыхъураем иадрабгъу щыӀэу къызагъотым, къыраӀуагъ: Равви, сыдигъо мыщ укъэкӀуагъа? 26 Шъыпкъэ дэдэр шъосэӀо, ариӀуагъ Исус ахэмэ, шъо нэшэнэ гъэшӀэгъонышхохэр зэрэшъулъэгъугъэхэр арэп шъукъызкӀыслъыхъурэр, хьалыгъухэм ащыщ шъушхи, зыжъугъэшхэкӀыгъэти ары нахь. 27 Шхынэу кӀодырэм ыужы шъуимыт, шхынэу мыкӀодэу цӀыфмэ мыкӀодыжьын щыӀэныгъэ яӀэ зыгъэхъурэм ыужы шъуит нахь. А шхыныр ары ЦӀыф Лъэпкъым Ыкъо къышъуитыщтыр; сыда пӀомэ Тхьэу Ты лъапӀэм ЦӀыф Лъэпкъым Ыкъо зэридэрэм имыхъур къытырилъхьагъ. 28 Джащыгъум Исус къеупчӀыгъэх: Адэ, Тхьэр зыфэе Ӏофхэр дгъэцэкӀэнхэм пае, тэ сыда тшӀэн фаер? 29 Тхьэм къыгъэкӀуагъэмкӀэ шӀошъхъуныгъэ шъуиӀэныр ары Тхьэр зыфэе Ӏофыр, ариӀуагъ Исус ахэмэ. 30 Сыд фэдэ нэшэнэ гъэшӀэгъонышхо тэбгъэлъэгъуна, ар тлъэгъоу, оркӀэ шӀошъхъуныгъэ тиӀэным пае? Сыда пшӀэщтыр? къыраӀожьыгъ ахэмэ. 31 Тятэжъхэм шъоф нэкӀым мэнн зыцӀэ шхыныр щашхыщтыгъ, Тхьэм игущыӀэ тхыгъэхэм зэрарытым фэдэу, «Уашъом къикӀырэ хьалыгъу ашхынэу Тхьэм къаритыгъ». 32 Шъыпкъэ дэдэр шъосэӀо, ариӀуагъ Исус, пегъымбар Мусэ арэп уашъом къикӀырэ хьалыгъур къышъозытыгъагъэр, сэ Сятэ ары нахь уашъом къикӀырэ хьалыгъу шъыпкъэр къышъозытырэр; 33 сыда пӀомэ уашъом къехэу, дунаем ицӀыфмэ щыӀэныгъэ къязытырэр ары Тхьэм ихьалыгъу. 34 А хьалыгъур къытэт зэпыт, тхьаматэ, къыраӀуагъ ахэмэ. 35 ЦӀыфмэ щыӀэныгъэ язытырэ хьалыгъур сэры, ариӀуагъ Исус. Садэжь къакӀорэр мэлэкӀэжьыщтэп, сэркӀэ шӀошъхъуныгъэ зиӀэр егъашӀэми псыфалӀи лӀэжьыщтэп. 36 Ау къызэрэшъосӀуагъэм фэдэу, сэ сышъулъэгъугъэ пэтми, шӀошъхъуныгъэ шъуиӀэ хъурэп. 37 Ты лъапӀэм къыситырэ цӀыф пстэури садэжь къэкӀощтых, хэт щыщми садэжь къакӀорэри ӀузгъэкӀыжьыщтэп. 38 Сыда пӀомэ сэ сызыфаер згъэцэкӀэнэу арэп уашъом сыкъызфехыгъэр, сэ сыкъэзыгъэкӀуагъэр зыфаер згъэцэкӀэнэу ары нахь. 39 Сэ Сятэу сыкъэзыгъэкӀуагъэр зыфаер ежьым цӀыфэу сэ къыситыгъэхэмэ ащыщэу зи мыкӀодынэу ары, ахърэт мафэми а цӀыфыр сэ къэзгъэтэджыжьыныр ары. 40 Шъыпкъэ, хэт щыщми Къо лъапӀэр зылъэгъоу, ежьымкӀэ шӀошъхъуныгъэ зиӀэм мыкӀодыжьын щыӀэныгъэ иӀэ зэрэхъущтыр ары Сятэ зыфаер; ахърэт мафэми а цӀыфыр сэ къэзгъэтэджыжьыщт. 41 «Уашъом къехыгъэ хьалыгъур сэры», ыӀуи, Исус зэриӀуагъэм пае, джуртхэм ар агу римьгхьэу, 42 аӀуагъ: Юсыф ыкъоу Исус арыба мыр? Ежь ятэрэ янэрэ тэшӀэ. «Уашъом сыкъехыгъ», ыӀоу сыдэущтэу къыӀон ылъэкӀыра? 43 Сэ къэсӀуагъэр сыда шъугу зыкӀемыӀурэр? ариӀуагъ Исус. 44 Ты лъапӀэу сыкъэзыгъэкӀуагъэм къысфимыщэмэ, зы цӀыфи садэжь къэкӀон ылъэкӀырэп. Садэжь къакӀорэри ахърэт мафэм сэ къэзгъэтэджыжььпцт. 45 Пегъымбархэм мырэущтэу атхыгъ: «Тхьэм зэкӀэмэ ахэмэ шъыпкъагъэр аригъэшӀэщт». Хэт щыщми Ты лъапӀэм къыӀохэрэм ядэӀоу, ахэр зэзыгъашӀэрэр садэжь къэкӀощт. 46 Тхьэм щыщым нэмыкӀэу Ты ЛъапӀэр зыми ылъэгъугъэп. Ежьыр ары Ты лъапӀэр зылъэгъугъэр. 47 Шъыпкъэ дэдэр шъосэӀо, сэркӀэ шӀошъхъуныгъэ зиӀэ хъурэм мыкӀодыжьын щыӀэныгъэ иӀэ хъугъэ. 48 ЦӀыфмэ щыӀэныгъэ язытьфэ хьалыгъур сэры. 49 Шъуятэжъхэм шъоф нэкӀым мэнн шхыныр щащхыщтыгъ, ау щытми лӀагъэх. 50 Ау уашъом къехыгъэ хьалыгъур мары. Зыгорэм ар ышхымэ лӀэжьыщтэп. 51 ЦӀыфмэ щыӀэныгъэ язытырэ хьалыгъоу уашъом къехыгъэр сэры. А хьалыгъум щыщ зышхырэр егъашӀэми щыӀэщт. Дунаем ицӀыфхэм щыӀэныгъэ яӀэ згъэхъуным пае, хьалыгъоу стыщтыр сэ спкъы ары. 52 Мы лӀым ыпкъ сыдэущтэу тигъэшхын ылъэкӀыщт?аӀуи, джуртхэр лъэшэу зэнэкъокъухэу аублагъ. 53 Шъыпкъэ дэдэр шъосэӀо, ариӀуагъ Исус ахэмэ, ЦӀыф Лъэпкъым Ыкъо ыпкъ шъумышхэу, ылъи шъуемышъомэ, щыӀэныгъэ шъухэлъыщтэп. 54 Сэ спкъы зышхэу, слъи ешъорэм мыкӀодыжьын щыӀэныгъэ иӀэ хъугъэ, ахърэт мафэми сэ ар къэзгъэтэджыжьыщт. 55 Сыда пӀомэ сэ спкъы шхын шъыпкъ, сэ слъи шъоны шъыпкъэшъ ары. 56 Сэ спкъы зышхэу, слъи ешъорэм ыгу силъ зэпытыщт, ежьыри сыгу илъ зэпытыщт. 57 ЩыӀэныгъэ шъыпкъэ къыздикӀырэ Ты лъапӀэм сыкъигъакӀуи, ищыӀэныгъэ ежьым ыдэжь къызэрикӀырэм фэдэу, сэ спкъы зышхырэм ищыӀэныгъэ садэжь къикӀыщт. 58 Мыры уашъом къехыгъэ хьалыгъур. А хьалыгъур шъуятэжъхэм ашхыщтыгъэ мэнн шхыным фэдэп. Ар ашхыщтыгъэ пэтми лӀагъэх, ау мы хьалыгъур зышхырэр егъашӀэми щыӀэщт. 59 Исус Капернаум къалэм дэт синэгогум чӀэтэу, цӀыфхэм Тхьэм игущыӀэхэр аригъашӀэхэ зэхъум, а гущыӀэхэр къыӀуагъэх.
ГущыӀэхэу цӀыфхэм мыкӀодыжьын щыӀэныгъэ яӀэ зыгъэхъухэрэр
60 Исус къыӀуагъэхэр зызэхаххэм, игъогу рыкӀохэрэм ащыщхэу бэмэ къаӀуагъ: Мыщ къыӀохэрэр сыдэу гущыӀэ къинха! Хэт ахэмэ ядэӀун зылъэкӀырэр? 61 Исус къыӀуагъэхэр ахэмэ агу зэремыӀухэрэр ыгукӀэ ешӀэти ариӀуагъ: Сэ къэсӀуагъэхэр шъугу рихьыхэрэп, ара? 62 Ау ЦӀыф Лъэпкъым ЬӀкъо ыпэкӀэ зыдэщыӀагъэм дэкӀоежьэу шъулъэгъумэ, сыда етӀанэ шъуӀощтыр? 63 Тхьэм Ыпсэ ЛъапӀэ ары цӀыфхэм мыкӀодыжьын щыӀэныгъэ къязытырэр. Сэ спкъы шъозгъэшхынэу арэп зыфасӀорэр. Ащ ишӀуагъэ къакӀорэп. ГущыӀэхэу къышъосӀуагъэхэм Тхьэм Ыпсэ ЛъапӀи мыкӀодыжьын щыӀэныгъэри шъуиӀэхэ къашӀы. 64 Ау шӀошъхъуныгъэ зимыӀэхэр къышъухэтых. Исус арэущтэу зыкӀиӀуагъэр ахэмэ ащыщхэу шӀошъхъуныгъэ зимыӀэхэри, тетыгъо зиӀэхэм ежьыр аӀэкӀэзыгъэхьанэу щытыгъэри апэм щегъэжьагъэу ышӀэщтыгъэти ары. 65 ЕтӀани Исус къыпигъэхъожьыгъ: Джары, «Ты лъапӀэм римыгъэлъэкӀмэ, зы цӀыфи садэжь къэкӀон ылъэкӀыщтэп,» сӀуи зыкӀэсӀуагъэр. 66 Ащ щегъэжьагъэу Исус игъогу рыкӀохэрэмэ ащыщхэу бэ игъогу текӀыжьхи, гокӀыжьыгъэх. 67 Арэущтэу зэхъум, Исус игъогу рыкӀорэ нэбгырэ пшӀыкӀутӀумэ ариӀуагъ: Шъори шъузбгъодэкӀыжьынэу шъуфая? 68 Зиусхьан, хэт ыдэжь тыкӀона, адэ? ыӀуи, Симон Петрэ Исус къыриӀуагъ. МыкӀодыжьын щыӀэныгъэ тиӀэ зыгъэхъурэ гущыӀэхэр о уиӀэх, 69 Христосэу щыӀэныгъэ шъыпкъэ къыздикӀырэ Тхьэм узэриКъор тшӀошъ хъугъэ ыкӀи тшӀагъэ. 70 Шъо пшӀыкӀутӀур сигъогу шъукъырыкӀонэу шъукъыхэсхыгъэба? Ау щытми, шъуащыщэу зыр джынапцӀэу щыт,ариӀуагъ Исус ахэмэ. 71 Исус зыфиӀуагъэр Симон Искариот ыкъоу Иудэ ары. А Симон Искариотыр Исус игъогу рыкӀорэ нэбгырэ пшӀыкӀутӀумэ ащыщэу щытыгъэ пэтми, нэужым Исус тетыгъо зиӀэхэм аӀэкӀэзыгъэхьанэу щытыгъэр ежьыр ары.
Исус ышхэм яшӀошъмыхъуныгъ
1 Ащ нэужым Исус Галилей хэкум къыщикӀухьэщтыгъ. Джуртхэм ежьыр аукӀынэу ыуж итыгъэхэти, Иудей хэкум къыщикӀухьанэу фэягъэп. 2 Джурт мэфэкӀ мэфэшхо мафэхэу цӀыфхэр чэлхэм зыщачӀэсхэрэр къэблэгъагъэх. 3 Арыти, ышхэм Исус къыраӀуагъ: Ӏофышхо гъэшӀэгъонхэу пшӀэхэрэр уигъогу рыкӀохэрэм алъэгъунхэм пае, мыщ дэжьым икӀыжьи, Иудей хэкум кӀожь. 4 ЦӀыфхэм зязыгъэшӀэнэу фаем шъэфэу Ӏоф ышӀэрэп. Мы Ӏофышхо гъэшӀэгъонхэр бгъэцакӀэхэмэ, дунаем ицӀыфхэмэ зягъэлъэгъу. 5 Сыда пӀомэ Исус ыш дэдэхэми ежьымкӀэ шӀошъхъуныгъэ яӀэу щытыгъэп. 6 Арыти, Исус ахэмэ ариӀуагъ: ШъоркӀэ сыдигъуи игъу, ау сэ сигъо къэсыгъэгоп. 7 Дунаем ицӀыфхэм шъо шъуауджэгъун алъэкӀыщтэп, ау сэ сауджэгъу. Ахэмэ Ӏофхэу ашӀэхэрэр зэрэбзаджэхэмкӀэ сэ шыхьат сызэрэхъурэр ары сызкӀауджэгъурэр. 8 Шъо мэфэкӀ мэфэшхо мафэхэм апае Ерусалим шъукӀу. Сэ а мафэхэм апае сыкӀощтгоп, сыда пӀомэ сэ сигъо къэсыгъэгопышъ ары. 9 Исус арэущтэу зареӀом, Галилей хэкум къэнагъ.
МэфэкӀ мэфэшхо мафэхэу цӀыфхэр чэлхэм зыщачӀэсхэрэр ыгъэмэфэкӀэнхэм пае, Исус Ерусалим зэрэкӀуагъэр
10 Ау Исус ышхэр мэфэкӀ мэфэшхохэм апае зекӀохэм ыуж, Исуси кӀуагъэ, ау цӀыфмэ амышӀэу, къамылъэгъоу кӀуагъэ. 11 А мэфэкӀ мэфэшхо мафэхэм адэжь джуртхэм, «Исус тыдэ щыӀа?» аӀозэ лъыхъущтыгъэх. 12 ЦӀыф купышхохэм Исус игугъу бэрэ ашӀэу зэӀушъашъэщтыгъэх. Ахэмэ ащыщхэу заулэмэ аӀощтыгъ: Ар цӀыф дэгъу. Хьау, ар цӀыф дэгъоп, цӀыфхэр гъогу занкӀэм тырещых,аӀощтыгъ адрэхэм. 13 Ау джуртхэмэ зэращыщынэщтыгъэхэм пае, цӀыфмэ апашъхьэ зыми Исус игугъу щишӀыщтыгъэп. 14 А мэфэкӀ мэфэшхо мафэхэм азыныкъо зыблэкӀым ыуж, Исус Тхьэм иунэшхо чӀахьи, цӀыфхэм Тхьэм игущыӀэхэр аригъашӀэхэу ыублагъ. 15 Мы лӀыр емыджагъэу, мыщ фэдиз шӀэныгъэ тыдэ къырихыгъа? агъэшӀагъозэ аӀуагъ джуртхэм. 16 ГущыӀэхэу сэ цӀыфхэм язгъашӀэхэрэр сэ садэжь къикӀыхэрэп, сэ сыкъэзыгъэкӀуагъэм ыдэжь къекӀыхэ нахь. 17 Тхьэр зыфаер зыгъэцэкӀэнэу фаем гущыӀэхэу сэ цӀыфхэм язгъашӀэхэрэр Тхьэм ыдэжь къикӀыхэми, сэ садэжь къикӀыхэми ышӀэщт. 18 Ежьым ыцӀэкӀэ къэгущыӀэрэр ежь ышъхьэ ищытхъу ыуж ит, ау къэзыгъэкӀуагъэм ищытхъу ыуж итым шъыпкъагъэ иӀ, зи пхэнджи ащ хэлъэп. 19 Пегъымбар Мусэ Тэурат хабзэр къышъуфигъэнагъэба? Ау щытми, Тэурат хабзэм итхэр зыгъэцакӀэрэ цӀыф къышъухэтэп. Сыда сышъуукӀынэу сауж шъузкӀитыр? ариӀуагъ Исус ахэмэ. 20 ДжынаштӀэ о пхэс, къаӀожьыгъ цӀыфхэмэ. Хэта о узыукӀынэу уауж итыр? 21 Зы Ӏофышхо гъэшӀэгъон закъо шэмбэт мафэм зэрэсшӀагъэм пае, шъо зэкӀэми шъогъэшӀагъо, ариӀожьыгъ Исус ахэмэ. 22 Шъуеплъ, пегъымбар Мусэ сунэт шӀыныр хабзэу къышъуфигъэнагъэшъ, (ау шъыпкъэмкӀэ сунэт шӀыныр зыдэжь къикӀыгъэр Мусэ арэп, тятэжъышхохэр ары нахь), шъо шэмбэт мэфэ дэдэми цӀыфыр сунэт шъошӀыба? 23 Джы, пегъымбар Мусэ и Тэурат хабзэ ит унашъоу сунэт шӀыным ехьылӀагъэм шъуемыдэӀоу шъумыхъуным пае, шэмбэт мэфэ дэдэми цӀыфыр сунэт шъушӀынэу шъуфит. Арэущтэу зыхъукӀэ, сыд пае шъукъысфэгубжыра, зы лӀы горэ шэмбэт мафэм зэрэзгъэхъужьыгъапэм пае? 24 Ӏоф плъышъом шъуеплъэу хьыкум шъумышӀы, ау шъыпкъагъэм тетэу хьыкум шъушӀы.
Исус Христосыр арэу шъуӀуа?
25 Джащыгъум Ерусалим щыщ цӀыфхэм ащыщхэу заулэмэ аӀуагъ: АукӀынэу зыуж итхэр мырба? 26 Шъуеплъ, цӀыф пстэуми апашъхьэ къызэрэщыгущыӀэрэм, ау щытми зи раӀорэп. Тэ титхьаматэхэм ар зэрэХристосыр зэрагъэшӀагъэ, шъуӀуа? 27 Ау мыр зыщыщыр тэшӀэ. Ау Христос къызыкӀокӀэ, зыщыщыр зыми ышӀэщтэп. 28 Джащыгъум Исус Тхьэм иунэшхо чӀэтэу, цӀыфхэм Тхьэм игущыӀэхэр аригъашӀэхэзэ, мэкъэшхокӀэ къыӀуагъ: Сэ сышъошӀэ, сызыщыщыри шъошӀэ. Сэрсэрэу мыщ дэжьым сыкъэкӀуагъэп, сэ сыкъэзыгъэкӀуагъэм шъыпкъагъэ иӀ. Ежьыр шъо шъушӀэрэп, 29 ау сэ ежьыр сэшӀэ, сыда пӀомэ сэ ежьым сыщыщ, ежьыри ары сыкъэзыгъэкӀуагъэр. 30 Исус ар зеӀом, аубытынэу фежьагъэх, ау ежьыр зыщаубытыщтым игъо къэсыгъэгопти, цӀыф зи ӀэкӀэ нэсыгъэп. 31 Ау цӀыф купышхом щыщхэу бэмэ ежьымкӀэ шӀошъхъуныгъэ яӀэ хъугъэ. Христос къызыкӀокӀэ, мы лӀым нахьи нахьыбэу нэ шэнэ гъэшӀэгъонышхохэр къыгъэлъэгъошъун, шъуӀуа?аӀощтыгъ ахэмэ.
Фарисейхэмрэ дин пэщэшхохэмрэ Исус аубытынэу Ӏофтабгэхэр зэрагъэкӀуагъэхэр
32 ЦӀыф купышхор ащ фэдэу Исус ехьылӀагъэу Ӏушъашъэхэу фарисейхэм зызэхахым, ахэмрэ дин пэщэшхохэмрэ Исус аубытынэу Ӏофтабгэхэр агъэкӀуагъэх. 33 Ау Исус къыӀуагъ: Сэ зы тӀэкӀурэ сышъухэтыщт, етӀанэ сыкъэзыгъэкӀуагъэм ыдэжь сыкӀожьыщт. 34 Шъукъыслъыхъужьыщт, ау сыкъэжъугъотыжьыщтэп, сыздэщыӀэми шъукъэкӀон шъулъэкӀыщтэп. 35 Тыда ар дгъотын тымылъэкӀынэу зыдэкӀонэу ыгу хэлъыр? аӀуи, джуртхэм зэраӀожьыгъэ. Тэ тицӀыфхэу урымхэм ахэгощагъэхэу псэухэрэм адэжь кӀонышъ, урымхэм Ӏофхэр аригъэшӀэщтых, шъуӀуа? 36 «Шъукъыслъыхъужьыщт, ау сыкъэжъугъотыжьыщтэп, сыздэщыӀэми шъукъэкӀон шъулъэкӀыщтэп», зыфиӀуагъэм сыда шъуӀуа къыригъэкӀыгъэр?
Псыхъохэу цӀыфхэм щыӀэныгъэ шъыпкъэ яӀэ зыгъэхъухэрэр
37 МэфэкӀ мэфэшхо мафэхэм ащыщэу аужырэ мафэу анахь мэфэ лъапӀэм Исус къиуцуи, мэкъэшхокӀэ къыӀуагъ: ПсыфалӀэ лӀэрэр садэжь къэрэкӀуи ерэшъу. 38 Тхьэм игущыӀэ тхыгъэхэм зэрарытым фэдэу, «СэркӀэ шӀошъхъуныгъэ зиӀэм псыхъохэу щыӀэныгъэ шъыпкъэ иӀэ зыгъэхъухэрэр ыгу къичъыщтых». 39 Исус зыфиӀуагъэр ежьымкӀэ шӀошъхъуныгъэ зиӀэхэмэ Тхьэм ежь Ыпсэ ЛъапӀэу агухэм къарилъхьащтыр ары. Ащ нэсыфэ Тхьэм ежь Ыпсэ ЛъапӀэр шӀошъхъуныгъэ зиӀэхэм агухэм къарилъхьэгъагъэгоп, сыда пӀомэ Исус ищытхъушхо джыри иӀэ хъугъагъэгоп.
Щыфхэр Исус ехьылӀагъэу зэрэзэгурымыӀуагъэхэр
40 А гущыӀэхэр зызэхаххэм, цӀыф купышхом щыщ заулэмэ аӀощтыгъ: Шъыпкъэу мыры пегъымбарыр. 41 Джары Христосыр, аӀощтыгъ адрэхэм. Ау нэмыкӀхэми аӀощтыгъ: Христосыр Галилей хэкум щыщыщтэп, арыба? 42 Тхьэм игущыӀэ тхыгъэхэм арытба, Христос Даутэ къытехъукӀыгъэ цӀыфхэм зэращыщыщтри, Даутэ зыщыщ къалэу Вифлеем зыцӀэм зэрэщыщыщтри? 43 Арэущтэу Исус ехьылӀагъэу цӀыфхэр купкупэу зэрэгъэхъугъэх. 44 Ахэмэ ащыщэу зы куп Исус ыубытынэу фэягъэ, ау зыгори ащ ӀэкӀэ нэсыгъэп.
Тетыгъо зиӀэхэм яшӀошъмыхъуныгъ
45 Арэущтэу а Ӏофтабгэхэр дин пэщэшхохэмрэ фарисейхэмрэ адэжь къэкӀожьыгъэх. КъызэкӀожьхэм, адрэхэм яупчӀыгъэх: Сыд пае Исус къыздэшъумыщагъа? 46 А лӀыр къызэрэгущыӀэрэм фэдэу, зы цӀыф егъашӀэми гущыӀагъэп, аӀуагъ Ӏофтабгэхэм. 47 Ащыгъум шъори шъудихьыхыгъэба? араӀожьыгъ фарисейхэм. 48 Тэ титхьаматэхэм ащыщэу зыгорэми, фарисейхэм ащыщэу зыгорэми ежьымкӀэ шӀошъхъуныгъэ иӀэ хъугъа? 49 Ау мы цӀыф купышхоу пегъымбар Мусэ и Тэурат хабзэ зымышӀэрэм Тхьэм ынае къащифагъэу щыт. 50 Фарисейхэм ащыщэу Никодим зыцӀэм (ежьыр ары Исус ыдэжь чэщым къэкӀогъагъэр) адрэмэ ариӀуагъ: 51 Ыпэ рапшӀэу емыупчӀэу, ышӀэрэр тэрэзэу зэримыгъашӀэу, тихабзэ цӀыфым хьыкум тырешӀыхьа? 52 Ори Галилей хэкум ущыща? къыраӀуагъ Никодим. Тхьэм игущыӀэ тхыгъэхэм ахаплъи, пегъымбар горэ Галилей зэрэщымыщыр къэпшӀэщт. 53 ЕтӀанэ ахэр зэбгырыкӀыжьхи, хэти ядэжь кӀожьыгъэ.
Бзылъфыгъэу зинэ зышӀэ пэтэу аубытыгъэр
1 Исус Елеон зыцӀэ Ӏуашъхьэм кӀуагъэ. 2 Нэф къызэшъым, Тхьэм иунэшхо чӀэхьажьыгъ, цӀыфхэри зэкӀэ ежьым ыдэжь къэкӀуагъэх. Исус тӀыси, Тхьэм игущыӀэхэр аригъашӀэхэу ыублагъ. 3 Ащ дэжьым зы бзылъфыгъэ горэу зинэ зышӀэ пэтэу къаубытыгъэр Тэурат егъэджэкӀо пащэхэми фарисейхэми Исус къыфащи, утыгум къырагъэуцуи, 4 къыраӀуагъ: Дин гъэсакӀу, мы бзылъфыгъэр, зинэ ышӀэ пэтэу, къаубытыгъ. 5 Мыщ фэдэхэм мыжъохэмкӀэ тяозэ, тыукӀынхэу Тэурат хабзэм зэритым фэдэу, пегъымбар Мусэ унашъо къытфишӀыгъ. О сыда епӀуалӀэрэр? 6 Арэущтэу зыкӀаӀуагъэр Исус Ӏоф хагъэфэнышъ, зэрагъэмысэн горэ къагъотыныр ары. Ау Исус зиуфи, ӀапэкӀэ чӀыгум зыгорэ тыритхагъ. 7 Зэпамыгъэоу къеупчӀыхэ зэхъум, Исус зыкъиузэнкӀыжьи ариӀуагъ: Шъуащыщэу псэкӀод зимыӀэр апэу бзылъфыгъэм мыжъокӀэ ерэу. 8 Ар зареӀом, зиуфэжьи, чӀыгум тыритхэу ыублэжьыгъ. 9 Ар зызэхахым, агухэмкӀэ загъэмысэжьэу, анахьыжъхэр апэ итхэу, зым ыуж адрэр итэу, аужырэм нэс зэкӀэ ӀукӀыжьыгъэх. Исус изакъоу къэнагъ, бзылъфыгъэри утыгум къинагъ. 10 Исус зыкъиузэнкӀыжьи, бзылъфыгъэм нэмыкӀ зи ылъэгъужьыгъэпти, ащ риӀуагъ: О бзылъфыгъ, узыгъэмысэщтыгъэхэр тыдэ щыӀэха? Узыгъэмысэнэу цӀыф зи къэнагъэп, ара? 11 Хьау, Зиусхьан, къыӀуагъ бзылъфыгъэм, цӀыф зи къэнагъэп. Сэри узгъэмысэрэп, къыӀуагъ Исус. КӀожь, джы щегъэжьагъэу псэкӀод умышӀэжь.
Исусэу мы дунаем инэфынэр
12 Исус джыри цӀыфмэ адэгущыӀи къыӀуагъ: Дунаем инэфынэр сэры. Сэ сауж къырыкӀорэр шӀун кӀыгъэм хэтэу зекӀощтэп, щыӀэныгъэм инэфынэ ыгъо тыщт нахь. 13 О орорэу шыхьат узфэхъужьы, къыраӀуагъ фарисейхэм. Арышъ, уишыхьатныгъэ хъунэу щытэп. 14 Сэ шыхьат сызфэхъужьми, сишыхьатныгъэ хъунэу щыт, ариӀожьыгъ Исус ахэмэ, сыда пӀомэ сэ сызщыщри сыздакӀорэри сэшӀэ. Ау шъо сызщыщри сыздакӀорэри шъушӀэрэп. 15 Мы дунаем ицӀыфхэм Ӏофхэм хьыкум зэратрашӀыхьэрэм фэдэу хьыкум шъошӀы. Сэ зыми хьыкум тесшӀыхьэрэп. 16 Ау зыгорэм хьыкум тесшӀыхьэ хъумэ, ащыгъум хьыкумэу тесшӀыхьарэр шъыпкъэу щыт, сыда пӀомэ, сэ зизакъоп, Ты лъапӀэу сыкъэзыгъэкӀуагъэри сигъус. 17 НэбгыритӀумэ къаушыхьатырэр шыхьатныгъэ хъунэу зэрэщытыр шъо шъуп Тэурат хабзэ ит. 18 Сэрсэрэу шыхьат сызфэхъужьы. Ты лъапӀэу сыкъэзыгъэкӀуагъэри шыхьат къысфэхъу. 19 Арыти къеупчӀыгъэх: Тыдэ щыӀа уятэ? Сэри Сяти шъо тышъушӀэрэп, пэгъокӀ ытыжьыгъ Исус. Сэ сышъушӀэщтыгъэмэ, Сяти шъушӀэщтыгъэ. 20 Исус Тхьэм иунэшхо чӀэтэу, цӀыфхэм Тхьэм тын фа шӀэу ахъщэр зыдалъхьэрэ пхъуантэхэм адэжь щытэу, цӀыфхэм Тхьэм игущыӀэхэр аригъашӀэхэ зэхъум, а гущыӀэхэр къыӀуагъэх. Зыми ар ыубытэу фежьагъэп, сыда пӀомэ ежьыр зыщаубытыщтым игъо къэсыгъэгопти ары.
Сэ сыздакӀорэм шъо шъукъэкӀон шъулъэкӀыщтэп
21 Исус джыри ахэмэ ариӀуагъ: Сэ сышъухэкӀыжьыщт, шъори шъукъыслъыхъужьыщт, ау шъуипсэкӀодхэр шъутелъхэу шъулӀэжьыщт. Сэ сыздакӀорэм шъо шъукъэкӀон шъулъэкӀыщтэп. 22 Ежьежьырэу зиукӀыжьыщта? аӀуагъ джуртхэм. Ара, «Сэ сыздакӀорэм шъо шъукъэкӀон шъулъэкӀыщтэп», зыкӀиӀорэр? 23 Шъо ыхэ шъущыщ, ау сэ ыпшъэ сыщыщ, ариӀуагъ Исус. Шъо мы дунаем шъущыщ, сэ мы дунаем сыщыщэп. 24 «ШъуипсэкӀодхэр шъутелъхэу шъулӀэжьыщт», шъосӀуагъэ. Шъыпкъэ, сэ хэтми сызщыщыр къызышъуасӀокӀэ, шъушӀошъ мыхъумэ, шъуипсэкӀодхэр шъутелъхэу шъулӀэжьыщт. 25 О хэта узщыщыр адэ? къыраӀуагъ ахэмэ. Апэм щегъэжьагъэу сэ хэтми сызщыщыр къызэрэшъосӀуагъэм фэдэу сыщыт, ариӀожьыгъ Исус. 26 Шъо къышъохьылӀагъэу сэ сӀонэу ыкӀи шъузэрызгъэмысэнэу Ӏаджи сиӀ, ау сэ сыкъэзыгъэкӀуагъэр шъыпкъэ, ащ къыӀохэу зэхэсхыгъэхэр дунаем ицӀыфмэ ясэӀох. 27 Исус Ты лъапӀэм ехьылӀагъэу къызэрадэгущыӀэрэр къагурыӀуагъэп. 28 Арыти, Исус ариӀуагъ: ЦӀыф Лъэпкъым Ыкъо зышъуӀэтыкӀэ, сэ хэтми сызщыщри сэрсэрэуи зи сымыгъэцакӀэу, Сятэ гущыӀэхэу сигъэшӀагъэхэр къызэрэсӀохэрэр къэшъушӀэщт. 29 СыкъэзыгъэкӀуагъэр сэ сигъусэ, сизакъоу сыкъигъэнагъэп, сыда пӀомэ ежьым игъоу ылъытэрэ Ӏофхэр сэ сыдигъуи сэгъэцакӀэхэшъ ары. 30 Исус а гущыӀэхэр къыӀохэзэ, цӀыфыбэмэ ежьымкӀэ шӀошъхъуныгъэ яӀэ хъугъэ.
Шъыпкъагъэм шъхьафит шъуишӀыжьыщт
31 Исус джуртхэу шӀошъхъуныгъэ къыфызиӀэ хъугъэхэм ариӀуагъ: Сэ сигущыӀэхэр шъугухэм арылъхэмэ, шъыпкъэу сигъогу рыкӀохэрэм шъуащыщ. 32 Джащыгъум шъыпкъагъэр къэшъушӀэщт, шъыпкъагъэми шъхьафит шъуишӀыжьыщт. 33 Тэ Ибрахьимэ къытехъукӀыгъэ цӀыфхэм тащыщ, егъашӀэми зыми тырипщылӀыгъэп, къыраӀожьыгъ ахэмэ. «Шъхьафит шъухъужьыщт» зыфапӀорэм сыда къибгъэкӀырэр? 34 ӀПъыпкъэ дэдэр шъосэӀо, ариӀуагъ Исус. Хэти псэкӀод зышӀэрэр псэкӀодшӀэным пщылӀы фэхъужьы. 35 Ау пщылӀыр унэм къинэжьы зэпытыщтэп. Ятэ ыкъу ары унэм къинэжьы зэпытыщтыр. 36 Арышъ, Къо лъапӀэм шъхьафит шъуишӀыжьмэ, шъхьафит шъыпкъэ шъухъужьыщт. 37 Ибрахьимэ къытехъукӀыгъэ цӀыфхэм шъузэращыщыр сэшӀэ, ау сигущыӀэхэр шъугухэм арылъхэрэпышъ, сышъуукӀынэу сауж шъуит. 38 Сэ Сятэ дэжь щыслъэгъутъэхэр ары къасӀохэрэр, шъори шъуятэ ыдэжь щыжъулъэгъугъэ Ӏофхэр ары жъугъэцакӀэхэрэр.
Шъуятэ шэйтаныр ары
39 Тэ тятэр Ибрахьимэ ары, аӀуи, джуртхэм Исус къыраӀуагъ. Ибрахьимэ шъурибынхэу щытыгъэмэ, Ибрахьимэ иӀофхэр жъугъэцэкӀэщтгъэх, ариӀожьыгъ Исус. 40 Ау джы сышъуукӀынэу сауж шъуит, Тхьэм къыӀорэ шъыпкъагъэр зэхэсхыгъэу къышъосӀуагъэ пэтми, сышъуукӀынэу сауж шъуит. Ибрахьимэ ащ фэдэ Ӏофхэр ышӀэщтыгъэхэп. 41 Шъо шъуятэ Ӏофхэу ыгъэцакӀэхэрэр шъори шъогъэцакӀэх. ЗинэкӀэ тэ тыкъэхъугъэп, къыраӀуагъ Исус. Ты закъоу тиӀэр Тхьэр ары. 42 Тхьэр шъуятэу щытыгъэмэ, сэ шӀу сышъулъэгъущтыгъ, ариӀуагъ Исус, сыда пӀомэ сэ Тхьэм сыщыщэу мыщ дэжьым сыкъэкӀуагъ. Сэрсэрэу сыкъэкӀуагъэп, ежьым сыкъигъэкӀуагъэ нахь. 43 Сэ къасӀохэрэр сыд пае къыжъугурымыӀохэра? Сэ къасӀохэрэм шъуядэӀун шъулъэкӀырэпышъ ары къызкӀыжъугурымыӀорэр. 44 Шъуятэ шэйтаныр ары. Шъуятэ зыфаер ары шъо жъугъэцэкӀэнэу шъузыфаер. Апэм щегъэжьагъэу ар цӀыф укӀакӀоу щыт, шъыпкъагъэми тетэп, сыда пӀомэ шъыпкъагъэ зи хэлъыпышъ ары. Ащ пцӀы зиусыкӀэ, ыгу илъыр къеӀо, сыда пӀомэ ар пцӀыусышъ, пцӀыри къызхэкӀырэр ежьырышъ ары. 45 Ау сэ шъыпкъагъэр къызэрэсӀорэм пае, къасӀохэрэр шъушӀошъ хъурэп. 46 Сэ псэкӀод сшӀагъэу шъуащыщ горэм къыушыхьатын ылъэкӀына? Шъыпкъагъэр къэсэӀо пэтми, сыд пае къасӀохэрэр шъушӀошъ мыхъура? 47 Тхьэм ибынхэр ежьым игущыӀэхэм ядэӀух, ау шъо Тхьэм игущыӀэхэм шъузкӀямыдэӀурэр Тхьэм ибынхэу шъущытэпышъ ары.
Ибрахьимэ къэхъуным ыпэкӀэ сэ сыщыӀ
48 Самарие цӀыфхэм уащыщ, джынапцӀи о пхэс тэӀо. Тэ къатӀорэр шъыпкъэба? аӀуи, джуртхэмэ Исус къыраӀожьыгъ. 49 ДжынапцӀэ сэ схэсэп, ариӀожьыгъ Исус. Сэ Сятэ лъытэныгъэ фэсэшӀы, ау шъо шъукъысэхъоны. 50 Сэ сищытхъу ыуж ситэп, ау сищытхъу ыуж итэу, цӀыфхэм хьыкум атезышӀыхьэрэр щыӀ. 51 Шъыпкъэ дэдэр шъосэӀо, сэ сигущыӀэхэр зыгъэцакӀэрэм егъашӀэми лӀэныгъэр ылъэгъущтэп. 52 Исус ар зеӀом, джуртхэмэ къыраӀожьыгъ: ДжынапцӀэр о зэрэпхэсыр джы тшӀагъэ. Ибрахьимэ лӀагъэ, пегъымбархэри лӀагъэх, ау о «Сэ сигущыӀэхэр зыгъэцакӀэрэр егъашӀэми лӀэжьыщтэп», оӀо. 53 Тятэжъышхо Ибрахьимэ нахьи унахь ина о? Ар лӀагъэ, пегъымбархэри лӀагъэх. О ухэтэу зыплъытэжьыра? 54 Сэ сыкъызщытхъужьмэ, сищытхъу зи уасэ иӀэп,пэгъокӀ ытыжьыгъ Исус. Ау сэ сищытхъу зышӀырэр Сятэу шъо шъуи Тхьэу зыфашъуӀорэр ары. 55 Ар шъо шъушӀэрэп, ау сэ ар сэшӀэ. Ар сымышӀэу сӀуагъэмэ, сэри шъощ фэдэу пцӀыусэу сыхъущтыгъ. Ау ар сэшӀэ, игущы Ӏэхэри сэгъэцакӀэх. 56 Шъуятэжъышхо Ибрахьимэ симафэ зэрилъэгъущтымкӀэ гушӀощтыгъэ. Ар ылъэгъугъ ыкӀи гушӀуагъэ. 57 Илъэс шъэныкъо умыныбжьэу, ау щытми Ибрахьимэ плъэгъугъэу оӀо, аГуи, джуртхэм Исус къыраГуагъ. 58 Шъыпкъэ дэдэр шъосэӀо, ариӀуагъ Исус ахэмэ. Ибрахьимэ къэхъуным ыпэкӀэ, сэ сыщыӀ. 59 Исус ар зареӀом, аукӀыным пае еонхэу мыжъохэр къаштагъэх. Ау Исус амылъэгъоу къахэкӀыжьи, Тхьэм иунэшхо къычӀэкӀыжьыгъ.
Исус нэшъоу къэхъугъэ лӀы горэ зэригъэхъужьыгъэр
1 Исус къыкӀухьэзэ, нэшъоу къэхъугъэ лӀы горэ ылъэгъугъ. 2 Исус игъогу рыкӀохэрэр ежьым къеупчӀыгъэх: Равви, мы лӀыр нэшъоу къэхъунэу хэта псэкӀод зышӀагъэр, ежьыр ара, ятэянэхэр ара? 3 Мы лӀыри ятэянэхэри арэп зилажьэр, ау нэшъоу къызкӀэхъугъэр, ежьым къехъулӀэрэмкӀэ Тхьэм иӀоф нафэу хъуныр ары, пэгъокӀ ытыжьыгъ Исус. 4 Мафэу щэтыфэ, сыкъэзыгъэкӀуагъэм иӀофхэр сэ згъэцэкӀэнхэ фае. Чэщыр къэсыщт. Чэщыр къызысыкӀэ, зыми зи ышӀэн ылъэкӀырэп. 5 Дунаем сытетыфэкӀэ, дунаем инэфынэр сэры. 6 Исус ар къызеӀом, чӀыгум теужъунтхи, ӀупсымкӀэ ятӀэ зэхишӀыхьи, а зэхишӀыхьагъэр нэшъум ынэмэ ащифагъ. 7 Силоам зыцӀэ псыхъурэе зыгъэпскӀыпӀэм кӀуи, зыщытхьакӀ, ыӀуи Исус нэшъум риӀуагъ. (Силоам къикӀырэр «АгъэкӀуагъэр» ары.) Нэшъур кӀуи, зитхьакӀи, ылъэгъоу хъугъэу къэкӀожьыгъ. 8 Гъунэгъухэми, ар нэшъоу зэрэщытыгъэр зылъэгъугъагъэхэми аӀуагъ: ЛъэӀуакӀоу щысыщтыгъэр арыба мыр? 9 Ары, ыӀуагъ зы купым. Хьау, арэп, ащ фэд ныӀэп, аӀуагъ нэмыкӀхэм. Сэры ар, ыӀуагъ ежьым. 10 O унэхэр сыдэущтэу къаплъэхэу хъугъа? къеупчӀыгъэх ахэр. 11 Исус зыцӀэ лӀым ятӀэ зэхишӀыхьи, а зэхишӀыхьагъэр сынэмэ къащифи, «Силоам зыцӀэ псыхъурэе зыгъэпскӀыпӀэм кӀуи, зыщытхьакӀ», къысиӀуагъ. Арэущтэу сыкӀуи, зызысэтхьакӀым, сынэхэр къаплъэхэу хъугъэ, къыӀожьыгъ а лӀым. 12 Тыдэ щыӀа ар? къеупчӀыгъэх ахэр. СшӀэрэп, къыӀожьыгъ ащ.
Исус Ӏофышхо гъэшӀэгъонэу ышӀагъэр фарисейхэм зэрагъэунэфыгъэр
13 Джащыгъум а лӀэу нэшъоу щытыгъэр фарисейхэм адэжь ащагъ. 14 Ау Исус ятӀэ зэхишӀыхьи, нэшъум ынэхэр къызигъэплъэгъэ мафэр шэмбэт мэфагъ. 15 Арыти, фарисейхэр а лӀым къеупчӀыгъэх: Сыдэущтэу унэхэр къаплъэхэу хъугъэ? ЯтӀэ сынэхэм къатырилъхьи, зызысэтхьакӀым, слъэгъоу хъугъэ, къыӀожьыгъ а лӀым. 16 Мы лӀыр Тхьэм ыдэжь къикӀырэп, аӀуагъ фарисейхэм ащыщхэу заулэмэ, сыда пӀомэ шэмбэт мафэр ыгъэлъапӀэрэп. ПсэкӀодышӀэ лӀы горэм ащ фэдэ нэшэнэ гъэшӀэгъонышхохэр ышӀэн ылъэкӀына? аӀуагъ нэмыкӀхэм. Арэущтэу ахэр купкупэу зэрэгъэхъугъэх. 17 O унэхэр ары къыгъэплъагъэхэр. А лӀым сыда епӀуалӀэрэр? джыри еупчӀыжьыгъэх нэшъоу щытыгъэм. Ар зы пегъымбар гор, пэгъокӀ ытыжьыгъ а лӀым. 18 Ау щытми, а лӀэу зынэхэр къаплъэхэу хъугъэм ятэянэхэр къарагъащэхэу яупчӀыхэфэ, ар нэшъоу зэрэщытыгъэри, ынэхэр къаплъэхэу зэрэхъугъэри джуртмэ ашӀошъ хъугъэп. 19 Шъо шъукъоу нэшъоу къэхъугъэу зыфашъуӀорэр ара мыр? яупчӀыгъэх ахэмэ. Сыдэущтэу ылъэгъоу хъугъа? 20 Мыр тэ зэрэткъори, нэшъоу къызэрэхъугъэри тэ тэшӀэ, къаӀуагъ ятэянэмэ. 21 Ау джы ылъэгъоу зэрэхъугъэри, ынэхэр къэзыгъэплъагъэри тшӀэрэп. Ежьым шъуеупчӀ, ежь ышъхьэкӀэ пэгъокӀ къышъуитыжьынэу ыныбжь икъугъ. 22 Ятэянэхэм арэущтэу къызкӀаӀуагъэр джуртхэм ащыщынэщтыгъэхэти ары; сыда пӀомэ хэт щыщми Исус зэрэХристосыр зыдагъэр синэгогум чӀафынэу джуртмэ зэдаштагъэу щытыгъэти ары. 23 Джары, «Ыныбжь икъугъ, ежьым шъуеупчӀ», аӀуи, ятэянэхэмэ къызкӀаӀуагъэр. 24 Арыти, джуртхэр нэшъу щытыгъэм ятӀонэрэу къеджэхи раӀуагъ: Тхьэм щытхъу фэшӀ. Мы лӀыр псэкӀодышӀэу зэрэщытыр тэ тэшӀэ. 25 Ар лӀы псэкӀодышӀэу щытмэ сшӀэрэп, къыӀожьыгъ нэшъоу щытыгъэм. Ау мы зыр сэшӀэ, сэ нэшъоу сыщытыгъ, ау джы слъэгъоу хъугъэ. 26 Сыд ащ къыуишӀагъэр? еупчӀыгъэх ахэр. Сыдэущтэу унэхэр къыгъэплъагъэха? 27 ӀПъосӀогъахэ, ау шъукъедэӀугъэп, сыд пае джыри зэ зэхэшъухынэу шъуфая? къариӀуагъ нэшъоу щытыгъэм. Шъори ащ игъогу шъурыкӀонэу шъуфая? 28 Арэущтэу къызареӀом, ехъоныгъэх ыкӀи раӀуагъ: О мы лӀым игъогу рыкӀохэрэм уащыщ, ау тэ пегъымбар Мусэ игъогу рыкӀохэрэм тащыщ. 29 Тхьэр пегъымбар Мусэ къызэрэдэгущыӀагъэр тэшӀэ, ау мы лӀыр къыздикӀыгъэр тэ тшӀэрэп. 30 Ар къыздикӀыгъэр зэрэшъумышӀэрэр арыба гъэшӀэгъоныр, ау щытми ащ сынэхэр къыгъэплъагъэх,къариӀуагъ а лӀым. 31 Тхьэр псэкӀодышӀэ цӀыфхэм зэрямыдэӀурэр тэшӀэ, ау Тхьэм ищынагъо зыгу илъэу, Тхьэм игъоу ылъытэрэ Ӏофхэр зыгъэцакӀэрэр ары Тхьэр зэдэӀурэр. 32 Ау цӀыф горэм нэшъоу къалъфыгъэр къыгъэплъагъэу егъашӀэми цӀыфмэ зэхахыгъэп. 33 Мы лӀыр Тхьэм ыдэжь къимыкӀыгъэмэ, ащ зи ыгъэцэкӀэн ылъэкӀыщтгъэп. 34 О упсэкӀодышӀэ хъураеу укъалъфыгъ, раӀожьыгъ ахэмэ. О зыгорэ тэбгъэшӀэщта? ЕтӀанэ синэгогум къычӀафыгъ.
Фарисейхэм янэшъугъ
35 А лӀыр синэгогум къызэрэчӀафыгъэр Исус зэхихыгъ, ащ нэужми ар зелъэгъум риӀуагъ: Тхьэм ыКъокӀэ шӀошъхъуныгъэ уиӀа? 36 Тхьаматэ, пэгъокӀ къытыжьыгъ а лӀым, шӀошъхъуныгъэ сиӀэным пае, хэта зыфапӀорэр къысаӀу! 37 Ар о плъэгъугъэ, сэ, джы къыбдэгущыӀэрэр, ары,риӀуагъ Исус. 38 ШӀошъхъуныгъэ сиӀэ хъугъэ, Зиусхьан, ыӀуи, а лӀыр Исус ыпашъхьэ лъэгонджэмышъхьэкӀэ итӀысхьагъ. 39 Зымылъэгъухэрэм алъэгъу хъужьынэу, зылъэгъоу зызышӀошӀыжьхэрэми амылъэгъужь хъуным пае, цӀыфхэм хьыкум атесшӀыхьанэу мы дунаем сэ сыкъытехьагъ, къыӀуагъ Исус. 40 Фарисейхэм ащыщхэу Исус игъусагъэхэм Исус ар къыӀуагъэу зызэхахым, къеупчӀыгъэх: Тэри тынэшъоу ара зыфапӀорэр? 41 Шъунэшъугъэмэ, псэкӀод шъуиӀэщтгъэп, ау «Тэлъэгъу» шъоӀошъ, шъуипсэкӀод къышъутенэжьы, ариӀожьыгъ Исус.
Мэлэхъо дэгъур
1 Шъыпкъэ дэдэр сэ шъосэӀо, мэлэщым къэлапчъэмкӀэ дэмыхьэу, нэмыкӀ чӀыпӀэкӀэ дэпшыеу дахьэрэр тыгъуакӀоу ыкӀи хъункӀакӀоу щыт. 2 Ау къэлапчъэмкӀэ дахьэрэр мэлхэм ямэлахъо ары. 3 УхъумакӀом мэлахъом къэлапчъэр къыфыӀуехы, мэлхэри мэлахъом ымакъэ едэӀух. Мэлахъор ежь имэлхэм ацӀэкӀэ яджэ ыкӀи къыдещых. 4 Мэлахъом имэл пстэури къыздищхэкӀэ, апэ итэу макӀо. Мэлхэри ыуж итхэу макӀох, сыда пӀомэ ымакъэ ашӀэжьышъ ары. 5 Ау зы хымэ горэм ыуж ихьащтхэп, кӀатхъужьы нахь, сыда пӀомэ хымэ макъэр ашӀэжьырэпышъ ары. 6 А гъэсэныгъэ тхыдэр Исус ариӀуагъ. Ау ащ къикӀырэр ахэмэ къагурыӀуагъэп. 7 Арыти, Исус джыри къыӀуагъ: Шъыпкъэ дэдэр шъосэӀо, мэлэщым икъэлапчъэр сэры. 8 СапэкӀэ къэкӀогъэ пстэури тыгъуакӀох ыкӀи хъункӀакӀох, мэлхэри ахэмэ ядэӀугъэхэп. 9 Къэлапчъэр сэры. СэркӀэ дахьэрэр мыкӀодэу къэнэжьыщт, дэхьащткъыдэкӀыжьыщт, хъупӀи ыгъотыщт. 10 ТыгъуакӀор къызфакӀорэр тыгъонэуи, ыукӀынэуи, ыгъэкӀодынэуи ары. Сэ сыкъызфэкӀуагъэр щыӀэныгъэшхоу икъугъэр цӀыфмэ ястыныр ары. 11 Мэлэхъо дэгъур сэры. Мэлэхъо дэгъум ыпсэ мэлхэм апае еты. 12 Мэлхэр зимыеу, ыпкӀэкӀэ лажьэрэр мэлахъоу щытэп. Ащ тыгъужъыр къакӀоу зилъэгъукӀэ, мэлхэр къегъанэхэшъ, кӀетхъужьы. ЕтӀанэ тыгъужъыр мэлхэм къахэлъадэшъ, елӀых ыкӀи зэбгырефых. 13 А лӀым зыкӀыкӀитхъужьырэр ыпкӀэкӀэ лажьэу, мэлхэм зэрафэмыгумэкӀырэр ары. 14,15 Мэлэхъо дэгъур сэры. Ты лъапӀэм сыкъишӀэу, сэри Ты лъапӀэр зэрэсшӀэрэм фэдэу симэлхэр сэшӀэх, мэлхэми сыкъашӀэ. Сэ спси симэлхэм апае сэты. 16 Мы мэл Ӏэхъогъум щымыщхэу нэмыкӀ мэлхэри сиӀэх. Ахэри къэсщэнхэ фае, ахэри сымакъэ къедэӀущтых. Арэущтэу зы мэл Ӏэхъогъоуи зы мэлахъоуи хъущт. 17 Сэ спсэ къэсштэжьынэу зэрэстырэр ары Ты лъапӀэм шӀу сызкӀилъэгъурэр. 18 Сэ спсэ зыми стырихырэп, сэрсэрэу ар сэты. Ар стынэуи къэсштэжьынэуи лъэкӀыныгъэ сиӀ. А унашъор сэ Сятэ къысфишӀыгъ. 19 А гущыӀэхэм апае джуртхэр джыри зэ купкупэу зэрэгъэхъугъэх. 20 Ащ джынапцӀэ хэс, ыӀорэр ышӀэжьырэп. Сыда ащ шъузкӀедэӀурэр? аӀощтыгъэ ахэмэ ащыщхэу бэмэ. 21 Ау нэмыкӀхэм аӀощтыгъ: А къыӀохэрэр джынапцӀэ зыхэс лӀым игущыӀэхэп. ДжынапцӀэм нэшъур къыгъэплъэн ылъэкӀына?
Джуртхэм Исус зэрамыштагъэр
22 ЕтӀанэ Тхьэм иунэшхо ежьым фагъази, къызэрэратыжьыгъагъэм пае, мэфэкӀ мэфэшхо мафэхэу Ерусалим щагъэмэфэкӀыхэрэр къэсыгъэх. КӀымэфагъ. 23 Исуси Тхьэм иунэшхо чӀэтэу, пачъыхьэ Сэлмэн ыцӀэкӀэ заджэхэрэ щагоу шъхьэ зытелъ пкъэу къэлапчъэхэр зиӀэм къыщикӀухьэщтыгъэ. 24 Джуртмэ Исус къауцухьи къеупчӀыгъэх: Нафэу къытэмыӀоу, сыд фэдизрэ джыри тэмыгъашӀэу тыщыбгъэӀэщта? Христосыр орымэ, занкӀэу къытаӀу. 25 ШъосӀуагъэба, ау шъо шъушӀошъ хъурэп, ариӀожьыгъ Исус. Сэ Сятэ ыцӀэкӀэ згъэцакӀэрэ Ӏофхэр шыхьат къысфэхъух. 26 Ау шъо шъушӀошъ хъурэп, сыда пӀомэ зэрэшъосӀуагъэм тетэу симэлхэм шъо шъуащыщэп. 27 Симэлхэр сымакъэ къедэӀух. Сэ ахэр сэшӀэх, ахэри сауж итхэу къэкӀох. 28 Ахэмэ мыкӀодыжьын щыӀэныгъэ ясэты, егъашӀэми кӀодыжьыщтхэп. Зыми ахэр . сӀэкӀихынхэ ылъэкӀыщтэп. 29 Сэ Сятэу ахэр къысэзытыгъэр зэкӀэмэ анахь ин. Зыми ахэр Сятэ ӀэкӀихынхэ ылъэкӀыщтэп. 30 Ты лъапӀэмрэ сэррэ тыз. 31 Исус ар зареӀом, джуртхэмэ ежьыр аукӀыным пае, еонхэу мыжъохэр къаштагъэх. 32 Ау Исус ариӀуагъ: Ты лъапӀэм ыдэжь къикӀыгъэу, Ӏофышхо гъэшӀэгъон Ӏаджи шъозгъэлъэгъугъэ. Ахэмэ ащыщэу тара мыжъохэмкӀэ шъукъысаозэ, сызтешъуукӀыхьанэу шъузыфаер? 33 Ӏофышхо гъэшӀэгъон горэ о зэрэпшӀагъэр арэп мыжъохэмкӀэ тыкъыуаозэ, утыукӀынэу тызыкӀыфаер, ау о уцӀыфэу «Сытхь» пӀоу, Тхьэр зэрэбгъэпцӀырэр ары,къыраӀожьыгъ джуртхэм. 34 Шъо шъуи Тэурат хабзэ итба, Тхьэм мырэущтэу зэриӀуагъэр: «Сэ сӀуагъэ шъо тхьэхэу шъузэрэщытыр?» ариӀожьыгъ Исус. Тхьэм игущыӀэ тхыгъэхэри укъуагъэхэу хъущтэп. 35 Арэущтэу ежь игущыӀэхэр цӀыфхэу къызфэкӀуагъэхэмэ «Шъо тхьэхэу шъущыт», ыӀуи, Тхьэм ариӀуагъ. 36 Арышъ, сэ Ты лъапӀэм къыгъэнэфагъэу мы дунаем къыгъэкӀуагъэм, «Сэ Тхьэм сыри Къу», зэрэсӀуагъэм пае, сыдэущтэу «О Тхьэр огъэпцӀы», къысэшъуӀон шъулъэкӀыра? 37 Сэ Сятэ иӀофхэр сымыгъэцакӀэхэу щытмэ, сэркӀэ шӀошъхъуныгъэ зишъумыгъаӀ. 38 Ау сэ Сятэ иӀофхэр згъэцакӀэхэу щытмэ, сэркӀэ шӀошъхъуныгъэ шъуимыӀэ пэтми, а ӀофхэмкӀэ шӀошъхъуныгъэ зижъугъаӀ. Ащыгъум сэ Ты лъапӀэм сыщыщэу ыгу сызэрилъ зэпытри, Ты лъапӀэри сэ къысщыщэу сыгу зэрилъ зэпытри къэшъушӀэщт ыкӀи къыжъугурыӀощт. 39 Джыри зэ Исус аубытынэу фежьагъэх, арышъхьакӀэ ежьыр аӀэпыкӀыгъ. 40 Ащ нэужым Исус Иордан зыцӀэ псыхъом джыри зэпырыкӀыжьи, Иуан цӀыфхэр зыщиумэхъыщтыгъэ чӀыпӀэм кӀуи, ащ дэжьым къэнагъ. 41 ЦӀыфыбэхэри ыдэжь къэкӀуагъэх. Иуан зы нэшэнэ гъэшӀэгъонышхуи къыгъэлъэгъуагъэп, ау мы лӀым ехьылӀагъэу къыӀуагъэхэр зэкӀэ шъыпкъэх, къаӀуагъ ахэмэ. 42 А чӀыпӀэми цӀыфыбэмэ ИсускӀэ шӀошъхъуныгъэ яӀэ хъугъэ.
Лазар зэрэлӀагъэр
1 ЛӀы горэ Лазар ыцӀэу сымаджэу щытыгъ. Ар Вифание къуаджэм щыщыгъ. Мерэми ышыпхъу Марфи а къуаджэм щыщыгъэх. 2 А Мерэм ары осэшхо зиӀэ дагъэр Зиусхьаным ылъакъохэм ащифи, ышъхьацкӀэ зылъэкӀыжьыгъэр. Ащ ышы Лазар ары сымаджэу щытыгъэр. 3 Арэущтэу зэхъум, зэшыпхъуитӀум Исус лӀыкӀо фагъакӀуи рырагъэӀуагъ: Зиусхьан, о шӀу плъэгъурэр сымадж. 4 Исус ар зызэхехым, къыӀуагъ: А узыр лӀэныгъэ къызхэкӀырэ узэп, Тхьэм щытхъушхо фэзышӀыщт уз нахь. А узым къыхэкӀыкӀэ цӀыфхэм Тхьэм Ыкъо щытхъушхо фашӀыщт. 5 Исус, Марфи, Марфэ ышыпхъуи, Лазари шӀу ылъэгъущтыгъэх. 6 Лазар зэрэсымаджэр Исус зызэхехым, зыдэщыӀэ чӀыпӀэм джыри мэфитӀукӀэ къэнагъ. 7 Ащ нэуж игъогу рыкӀохэрэм ариӀуагъ: Иудей хэкум джыри тыжъугъэкӀожь. 8 Равви, джуртхэр мыжъохэмкӀэ къыоонхэу уаукӀынэу уауж зитыгъэр бэ шӀагъап, джыри ащ окӀожьа?къыраӀуагъ игъогу рыкӀохэрэмэ. 9 Мафэр сыхьат пшӀыкӀутӀу мэхъуба? къыӀожьыгъ Исус. Мафэм зекӀорэр лъэпаорэп, сыда пӀомэ дунаем инэфынэ елъэгъушъ ары. 10 Ау чэщым зекӀорэр мэлъэпао, сыда пӀомэ нэфынэм хэтэпышъ ары. 11 Исус а гущыӀэхэр зареӀохэ ужым, ариӀуагъ: Тиныбджэгъу Лазар хэчъыягъ, ау къэзгъэушыжьынэу сэкӀо. 12 Зиусхьан, хэчъыягъэмэ хъужьыщт, къыраӀуагъ игъогу рыкӀохэрэм. 13 Ау Исус зыфиӀуагъэр Лазар зэрэлӀагъэр ары, ау игъусэхэм къызэрагурыӀуагъэр чъыен къызэрыкӀом Исус тегущыӀэу ары. 14 Джащыгъум Исус нафэу ариӀуагъ: Лазар лӀагъэ. 15 Ау шъощ пае сигуапэ ащ дэжьым сызэрэщымыӀагъэр, шӀошъхъуныгъэ шъуиӀэ хъуным пае. Ау некӀо ыдэжь тыжъугъакӀу. 16 Исус арэущтэу зареӀом, Фомэу ТӀуазэкӀэ заджэхэрэм адрэ нэбгырэхэу Исус игъогу рыкӀохэрэм ариӀуагъ: НекӀох, тэри Исус тыдэрэкӀод.
Исусэу лӀагъэхэр къэзыгъэтэджыжьэу, щыӀэныгъэ язытырэр
17 ЕтӀанэ ащ дэжьым зынэсым, Лазар къэунэм зычӀалъхьажьыгъэр мэфиплӀ зэрэхъугъэр Исус къышӀагъ. 18 Вифание къуаджэр стадие пшӀыкӀутфыкӀэ Ерусалим пэчыжьэу щыт. 19 Лазар зэрэлӀагъэм пае, джуртыбэ тхьаусхакӀо Марфэрэ Мерэмрэ къафэкӀуагъэх. 20 Марфэ Исус къызэрэкӀорэр зызэхехым, ащ пэгъокӀыгъ, ау Мерэм унэм къинагъ. 21 Зиусхьан, ыӀуи, Марфэ Исус къыриӀуагъ. О мыщ ущыӀагъэемэ, сэ сшы лӀэщтыгъэп. 22 Ау о Тхьэм сыд щыщкӀи уелъэӀумэ, джыри ар къызэрэпфишӀэщтыр сэшӀэ. 23 О пшы къэтэджыжьыщт, риӀуагъ Исус. 24 Аужырэ мафэу лӀагъэхэр къэзыщытэджыжьыщтым ари къызэрэтэджыжьыщтыр сэшӀэ, къыриӀожьыгь Марфэ. 25 ЛӀагъэхэр къэзыгъэтэджыжьэу, щыӀэныгъэр язытырэр сэры; сэркӀэ шӀошъхъуныгъэ зиӀэр лӀэми щыӀэщт; 26 хэти ащ фэдэ щыӀэныгъэ зиӀэ хъоу, сэркӀэ шӀошъхъуныгъэ зиӀэр егъашӀэми лӀэжьыщтэп. Ар пшӀошъ мэхъуа? риӀуагъ Исус. 27 Ары, Зиусхьан, къыриӀожьыгъ Марфэ. Христосэу Тхьэм Ыкъоу дунаем къэкӀон фэягъэр орэу зэрэщытыр сшӀошъ мэхъу. 28 Марфэ ар къызеӀом, ыгъэзэжьи, ышыпхъу Мерэм къеджи, шъэфэу риӀуагъ: Дин гъэсакӀор къэкӀуагъэу къыоджэ. 29 Мерэм ар зызэхехым, псынкӀэу къэтэджи, Исус ыдэжь къэкӀуагъ. 30 Исус джыри къуаджэм дэхьэгъагъэгоп, Марфэ зыщыӀукӀагъэм ыдэжь щытыгъ. 31 Джуртхэу тхьаусхакӀо къэкӀуагъэхэр Мерэм игъусэхэу унэм исыгъэхэм Мерэм псынкӀэу тэджи, унэм икӀыгъэу залъэгъум, къэунэм кӀонышъ, ащ дэжьым щыгъынэу ашӀошӀи, ыуж ихьагъэх. 32 Ау Мерэм Исус зыдэщыӀэм къакӀуи, Исус зелъэгъум, ылъакъохэм адэжь зыщыридзыхи къыриӀуагъ: Зиусхьан, о мыщ ущыӀагъэемэ, сэ сшы лӀэщтыгъэп. 33 Исус Мерэм гъэу, ащ игъусэхэу къэкӀогъэ джуртхэри гъыхэу зелъэгъухэм, ыгу къеуи, лъэшэу гумэкӀыгъэ. 34 Тыда хьадэр зыщычӀэшъулъхьажьыгъэр? къыӀуагъ Исус. Зиусхьан, къакӀуи, еплъ, къыраӀуагъ ахэмэ. 35 Джащыгъум Исус къэгъыгъ. 36 Ар залъэгъум, джуртмэ къаӀуагъ: Ащ шӀу зэрилъэгъущтыгъэм шъуеплъ! 37 Мы лӀэу нэшъум ынэхэр къэзыгъэплъагъэм а лӀыр ымыгъэлӀэн ылъэкӀыщтыгъэба? къаӀуагъ ахэмэ ащыщхэу заулэмэ.
Исус Лазар лӀагъэхэм къызэрахигъэтэджыкӀыжьыгъэр
38 Исус ыгу лъэшэу къыхаӀэу, къэунэм кӀуагъэ. Ар гъочӀэгъэу щытыгъ, мыжъуи ащ Ӏуалъхьажьыгъэу щытыгъ. 39 Мыжъор Ӏушъух, къыӀуагъ Исус. Зиусхьан, ыӀуи, лӀагъэм ышыпхъу Марфэ Исус къыриӀуагъ, ар зылӀагъэр мэфиплӀ мэхъу, мэ Ӏае къыпихы хъугъэ. 40 ШӀошъхъуныгъэ уиӀэмэ, Тхьэм ищытхъушхо зэрэплъэгъущтыр къыосӀуагъэба? риӀуагъ Исус. 41 Арэущтэу лӀагъэр зычӀэлъ гъочӀэгъым Ӏулъ мыжъор Ӏуахыгъ. Исуси уашъом дэплъыий къыӀуагъ: Сэ Сят! СилъэӀу укъызэредэӀугъэмкӀэ щытхъу къыпфэсэшӀы. 42 Сыдигъуи силъэӀухэм укъызэрядэӀурэр сэшӀэ. О сыкъызэрэбгъэкӀуагъэмкӀэ мыщ дэжьым щыт цӀыф купышхом шӀошъхъуныгъэ яӀэ хъуным пае, мы гущыӀэхэр къэсӀуагъэх. 43 Исус ар къызеӀом ыуж, мэкъэшхокӀэ къыӀуагъ: Лазар, къычӀэкӀ! 44 ЛӀагъэм ыӀэхэми ылъакъохэми чэфынхэр къящэкӀыгъэхэу, ынэгуи шэкӀ фыжь ещэкӀыгъэу къычӀэкӀыгъ. Чэфынхэу ещэкӀыгъэхэр къытешъухыжьи, орэкӀожь! ариӀуагъ Исус.
Тхьэмэтэ Хэсэшхом щыщ тхьаматэхэм Исус тхьагъэпцӀыгъэкӀэ аукӀынэу гухэлъ зэрашӀыгъэр
45 Исус Ӏофышхо гъэшӀэгъонэу ышӀагъэр залъэгъум, Мерэм ыдэжь къэкӀогъэгъэ джуртхэм ащыщхэу бэмэ ИсускӀэ шӀошъхъуныгъэ яӀэ хъугъэ. 46 Ау а джуртхэмэ ащыщэу куп фарисеймэ адэжь кӀохи, Исус ышӀагъэр араӀотэжьыгъ. 47 Дин пэщэшхохэмрэ фарисейхэмрэ хъугъэшӀагъэр зызэхахым, Тхьэмэтэ Хэсэшхом щыщхэр зэӀуагъэкӀагъэх. Сыда тшӀэщтыр? аӀозэ зэхэупчӀыхьажьыгъэх. Мы лӀым нэшэнэ гъэшӀэгъонышхоу Ӏаджи къегъэлъагъо. 48 Ащ тыпэмыуцоу къэдгъанэмэ, цӀыф пстэуми ащкӀэ шӀошъхъуныгъэ яӀэ хъущт. Рим къэралыгъошхом щыщхэу, мы хэгъэгур зыӀэ илъхэр къэкӀонхэшъ, Тхьэм иунэшхуи ттырахынышъ, тэ тлъэпкъи агъэкӀодыщт. 49 Джуртхэм ащыщэу, а илъэсым дин пэщэшхоу щытэу Кайафэ зыцӀэм адрэмэ ариӀуагъ: Шъо зи шъушӀахэрэп. 50 Тэ тлъэпкъ зэкӀэ кӀодыным нахьи, лъэпкъым пае зы нэбгырэ закъо лӀэмэ, тэркӀэ зэрэнахьышӀур къыжъутурыӀорэба? 51 Ар ежьежьырэу къыӀуагъэп, ау а илъэсым дин пэщэшхоу щытыгъэти, джурт лъэпкъым пае Исус ыпсэ зэритыщтыр Тхьэм ащ ыгу къырилъхьи, къыригъэӀуагъ. 52 Исус ыпсэ зыфитыщтыр джурт лъэпкъым пае закъор армырэу, Тхьэм ибынхэу зэбгыридзыгъэхэр зы хъунхэуи зы чӀыпӀэ щиугъоижьынхэуи ары. 53 Арыти, а мафэм щегъэжьагъэу Исус аукӀынэу рахъухьагъ. 54 Ащ къыхэкӀэу цӀыфхэм алъэгъоу Исус джуртхэмэ къахэхьажьыгъэп, ау а чӀыпӀэм икӀи, шъоф нэкӀым ылъэ ныкъокӀэ ит къуаджэу Ефраим зыцӀэм кӀуи, игъогу рыкӀохэрэр игъусэхэу ащ дэжьым къэнагъ. 55 Джуртхэм ямэфэкӀ мэфэшхоу Пасхъэ зыцӀэр къэблэгъагъэти, диным къызэриӀорэм тетэу, мэфэкӀ мэфэшхом ыпэкӀэ загъэкъэбзэжьынэу а хэкум щыщхэу цӀыфыбэхэр Ерусалим къэкӀуагъэх. 56 Джащыгъум Исус лъыхъущтыгъэх, Тхьэм иунэшхо чӀэтхэуи зэхэупчӀыхьажьыщтыгъэх: Сыда шъуӀорэр шъо? МэфэкӀ мэфэшхом пае ар къэкӀонба? 57 Ау дин пэщэшхохэмрэ фарисейхэмрэ Исус аубытыным пае, унашъо къыдагъэкӀыгъагъ: Хэти Исус зыдэщыӀэр зышӀэрэм макъэ къытигъэӀун фае.
Мерэм Вифание къуаджэм дагъэу осэшхо зиӀэр Исус ылъакъохэм зэращифагъэр
1 МэфэкӀ мэфэшхоу Пасхъэ зыцӀэр къэсынкӀэ мэфих къэнагъэу, Исус Вифание къуаджэм къэкӀуагъ. Лазарэу Исус лӀагъэхэм къахигъэтэджыкӀыжьыгъэр ащ дэжьым щыпсэущтыгъ. 2 Исус пчыхьэшъхьашхэ къыфагъэхьазырыгъ, Марфи бысымгуащэу щытыгъ. Исус игъусэу Ӏанэм пэсыгъэхэм Лазари ахэсыгъ. 3 Джащыгъум Мерэм нард зыцӀэ къэкӀыгъэм идагъэ къабзэу ыкӀи осэшхо зиӀэу, мэӀэшӀу зыпихырэм щыщ зы апч къышти, Исус ылъакъохэм ащифи, ышъхьацкӀи ылъэкӀыжьыгъэх. Дагъэм къыпихырэ мэ ӀэшӀур унэм изы хъугъэ. 4 Ау Исус игъогу рыкӀохэрэм ащыщэу Иудэ Симон Искариотэу, Исус тетыгъо зиӀэхэм аӀэкӀэзыгъэхьанэу щытыгъэм къыӀуагъ: 5 Мы дагъэу осэшхо зиӀэр динар шъищкӀэ тщэу тхьамыкӀэхэм сыда зыкӀятымытыгъэр? 6 Иудэ ар зыкӀиӀуагъэр тхьамыкӀэхэм ыгу афэгъукӀэ арэп, тыгъуакӀоу щытыгъэти ары нахь. Ащ ахъщалъэр ыӀыгъыгъэти, ащ ахъщэу ралъхьэрэм хэтыгъухьэщтыгъ. 7 А бзылъфыгъэм ыуж икӀ, къыӀуагъ Исус. Сэ сызщычӀалъхьажьыщт мафэм пае мы дагъэр сфиухъумагъ. 8 Сыда пӀомэ тхьамыкӀэхэр шъо къышъухэт зэпытых, ау сэ сышъухэт зэпытыщтэп. 9 ЦӀыф купышхоу джуртхэм ащьпцхэм Исус ащ дэжьым зэрэщыӀэр зэхахыгъэти къэкӀуагъэх, ау къызфэкӀуагъэхэр Исус изакъоп, Лазарэу лӀагъэхэм къахигъэтэджыкӀыжьыгъэри зэрагъэлъэгъунэу арыгъэ. 10 Арэущтэу дин пэщэшхохэм Лазари аукӀынэу рахъухьагъ, 11 сыда пӀомэ Лазар пае джуртыбэхэр ятхьаматэхэм агокӀыхи, ИсускӀэ шӀошъхъуныгъэ яӀэ хъутъэ.
Щытхъушхо иӀэу, Исус Ерусалим зэрэдэхьагъэр
12 ЯтӀонэрэ мафэм мэфэкӀ мэфэшхом пае къэкӀогъэ цӀыф купышхохэм Исус Ерусалим къызэрэкӀорэр зэхахыгъ. 13 Зызэхахым, палмэ чъыгым икъутамэхэр аштэхи, Исус пэгъокӀынхэу дэкӀыгъэх, мэкъэшхокӀэ къаӀозэ: Хьусаннэ! Израил ипачъыхьэу Зиусхьаным ыцӀэкӀэ къакӀорэм щытхъушхор ий! 14 ЕтӀанэ Исус зы щыд къунан къыгъоти, тетӀысхьагъ, Тхьэм игущыӀэ тхыгъэхэм зэрарытым фэдэу, 15 «Умыщын Сион къалэ. Мары, уипачъыхьэ щыд къунаным тесэу къэкӀо». 16 Исус игъогу рыкӀохэрэм а хъугъэшӀагъэм къикӀырэр къагурыӀуагъэп, ау Исус щытхъушхо иӀэ хъугъэу, уашъом зыдэкӀоежьым ыуж, Исус ехьылӀагъэу Тхьэм игущыӀэ тхыгъэхэм а гущыӀэхэр зэрарытхэри, а гущыӀэхэм атетэу цӀыфхэр Исус зэрэдэзекӀуагъэхэри агу къэкӀыжьыгъ. 17 ЦӀыфхэу купышхом хэтхэу Исус игъусагъэхэм адрэ цӀыфхэм араӀуатэ зэпытыщтыгъ, Исус Лазар еджи, къэунэм къычӀигъэкӀыжьи, лӀагъэхэм къызэрахигъэтэджыкӀыжьыгъэр. 18 А нэшэнэ гъэшӀэгъоныпгхор къызэригъэлъэгъуагъэр цӀыфыбэмэ зэхахыгъэти, Исус пэгъокӀынхэу дэкӀыгъэх. 19 Ар залъэгъум, фарисеймэ зэраӀожьыгъ: Шъуеплъ, ежьым зи ешъушӀэн зэрэшъумылъэкӀырэр шъолъэгъу. Мары дунаем ицӀыф пстэури ежьым ыуж ехьэх.
Исус ежьыр зэраукӀыщтыр къызэриӀуагъэр
20 МэфэкӀ мэфэшхом Тхьэм щелъэӀунхэу къэкӀуагъэхэмэ урым цӀыф заулэхэр ахэтыгъэх. 21 Ахэр Галилей хэкум ит Вифсайдэ къалэм щыщ Филипп ыдэжь кӀохи елъэӀугъэх: Тхьаматэ, Исус тлъэгъунэу тыфай. 22 Филиппи кӀуи, Индрыс риӀуагъ. ЕтӀанэ Филиппрэ Индрысрэ кӀохи, Исус раӀуагъ. 23 ЦӀыф Лъэпкъым Ыкъо ищытхъушхо цӀыфхэм зыщалъэгъущт сыхьатыр къэсыгъ, къариӀуагъ Исус. 24 ӀПъыпкъэ дэдэр шъосэӀо, коцыцэр чӀыгум хафэу мылӀэмэ, изакъоу къэнэжьы, ау чӀыгум хафэу зылӀэкӀэ, гъэбэжъушхо къыхьыщт. 25 Зыпсэ шӀу зылъэгъурэм ыпсэ шӀокӀодыщт, ау зыпсэ мы дунаем щызыуджэгъурэм сыдигъуи щыӀэнэу къыгъэнэжьыщт. 26 Сэ къысфэлажьэрэр сауж къырэрэкӀу. Сэ сыздэщыӀэми къысфэлажьэрэри щыӀэщт. Ты лъапӀэм сэ къысфэлажьэрэм лъытэныгъэ фишӀыщт. 27 Джы сэгумэкӀы. Сыд сӀона? Сэ Сятэ мы къиныгъэм сыхэхыжь, есӀона? Мы къиныгъэр сщэчынэу ары дунаем сыкъызфэкӀуагъэр. 28 Сэ Сятэ о пцӀэ ищытхъушхо цӀыфхэм ягъэлъэгъу. Исус ар зеӀом, уашъом зы макъэ къиӀукӀыгъ: Сэ сцӀэ ищытхъушхо цӀыфхэм язгъэлъэгъугъ, джыри зэ язгъэлъэгъужьыщт. 29 ЦӀыф купышхом хэт цӀыфхэу ащ дэжьым щытхэм ар зызэхахым, аӀуагъ: Ар шыблэ гъогъо макъ. МэлэӀич горэ ащ къыдэгущыӀагъ, аӀуагъ нэмыкӀхэмэ. 30 Мы макъэр сэщ пае къэӀугъэп, шъощ пае нахь,къыӀуагъ Исус. 31 Джы Тхьэм дунаем ицӀыфхэм хььпсум атыришӀыхьащт. Джы Тхьэм мы дунаем ипщ тыридзыщт. 32 Ау цӀыфхэм сэ сыкъызаӀэтыкӀэ, цӀыф пстэури садэжь къэсщэщтых. 33 Ежьыр зэрэлӀэщт шӀыкӀэр ахэмэ агуригъэӀоным пае, Исус а гущыӀэхэр къыӀуагъэх. 34 Христос егъашӀэми зэрэщыӀэщтыр Тэурат хабзэм тигъэшӀагъ, къыраӀуагъ цӀыф купышхом. ЦӀыфхэм ЦӀыф Лъэпкъым Ыкъо къызэраӀэтыщтыр къэоӀо, ар сыдэу хъура? ЦӀыф Лъэпкъым Ыкъоу зыфапӀорэр хэта? 35 Нэфынэр джыри зы тӀэкӀурэ къышъухэтыщт, ариӀуагъ Исус ахэмэ. ШӀункӀыгъэр къышъутемыоу нэфынэр шъуиӀэфэ шъукӀу. ШӀункӀыгъэм хэтэу зекӀорэм зыдакӀорэр ышӀэрэп. 36 Нэфынэм ибынхэу шъухъуным пае, нэфынэр шъуиӀэфэ, нэфынэмкӀэ шӀошъхъуныгъэ зижъугъаӀ. А гущыӀэхэр Исус къызеӀохэм ыуж, ахэмэ ахэкӀи, амылъэгъужьы хъугъэ.
Джуртхэм яшӀошъмыхъуныгъ
37 Исус ащ фэдиз нэшэнэ гъэшӀэгъонышхохэр ахэмэ апашъхьэ къыщигъэлъэгъуагъэхэми, ежьымкӀэ шӀошъхъуныгъэ яӀэ хъугъэп. 38 Арэущтэу зыфэхъугъэр мы гу щыӀэхэу пегъымбар Исайас къыӀуагъэхэр къэшъыпкъэжьынхэр ары: «Зиусхьан, къэбарэу дгъэӀугъэр хэта зышӀошъ хъугъэр? Тхьэу Зиусхьаным ыкӀочӀэшхуи хэта нафэ зыфэхъугъэр?» 39 А гущыӀэхэр шъыпкъэх. А цӀыфхэм шӀошъхъуныгъэ яӀэ хъун алъэкӀыщтыгъэп, сыда пӀомэ пегъымбар Исайас итхылъ итэу нэмыкӀ чӀыпӀэм ыдэжь къызэриӀуагъэм фэДэу, 40 «Тхьэм ахэмэ анэхэр нэшъоу къыгъэхъугъэх, агухэри гуркъэхэу къыгъэхъугъэх. Арэущтэу анэхэмкӀэ алъэгъурэп, агухэмкӀи къагурыӀорэп, ыгъэхъужьынхэм паий, Тхьэм ыдэжь къагъэзэжьрэп». 41 Пегъымбар Исайас Исус щытхъушхоу иӀэнэу щытыгъэр зэрилъэгъугъэм пае, а гущыӀэхэр къыӀуагъэх. Зигугъу ышӀыгъэр Исус ары. 42 Ау щытми, джурт тхьаматэхэм ащыщхэу бэмэ ИсускӀэ шӀошъхъуныгъэ яӀэ хъугъэ, ау цӀыфмэ апашъхьэ ар къыщаӀуагъэп, сыда пӀомэ «Синэгогум тыкъычӀафыщт», аӀозэ, фарисейхэм ащыщынэщтыгъэхэти ары. 43 Сыда пӀомэ Тхьэм ищытхъу нахьи цӀыфмэ ящытхъу нахьышӀу алъэгъущтыгъ. 44 ЕтӀанэ Исус мэкъэшхокӀэ къыӀуагъ: СэркӀэ шӀошъхъуныгъэ зиӀэ хъурэм шӀошъхъуныгъэ зыфиӀэ хъурэр сэ сизакъоу арэп, сэ сыкъэзыгъэкӀуагъэмкӀи шӀошъхъуныгъэ иӀэ мэхъу. 45 Сэ сызылъэгъурэм сэ сыкъэзыгъэкӀуагъэри елъэгъу. 46 СэркӀэ шӀошъхъуныгъэ зиӀэр шӀункӀыгъэм къыхэмынэным пае, нэфынэу дунаем сыкъэкӀуагъ. 47 Сэ сигущыӀэхэр зэхэзыххэу, ахэмэ ямыдэӀурэр сэ згъэмысэщтэп. Сыда пӀомэ дунаем ицӀыфхэр згъэмысэнхэу арэп сыкъызфэкӀуагъэр, ахэр мыкӀодхэу къэзгъэнэжьынхэу ары нахь. 48 Сэ сызэзымыпэсэу сигущыӀэхэри зы мыдэрэм ежьыр зыгъэмысэн горэ иӀ. ГущыӀэхэу къэсӀуагъэхэм ахърэт мафэм а цӀыфыр агъэмысэщт. 49 Сыда пӀомэ сэрсэрэу сигущыӀэхэр къэсӀуагъэхэп, ау Ты лъапӀэу сыкъэзыгъэкӀуагъэм къэсӀощтхэр унашъо къысфишӀыгъ. 50 Ащ иунашъо цӀыфхэм мыкӀодыжьын щыӀэныгъэ яӀэ зэригъэхъурэр сэшӀэ. Арышъ, къасӀохэрэр зэкӀэ Ты лъапӀэм къызэриӀуагъэм тетэу сэ къэсэӀожьых.
Исус игъогу рыкӀохэрэм алъакъохэр зэритхьакӀыгъэхэр
1 Пасхъэ зыцӀэ мэфэкӀ мэфэшхор къэсынэу щытыгъ. Дунаем ехыжьынышъ, Ты лъапӀэм ыдэжь зыщигъэзэжьыщт сыхьатыр къызэрэсыгъэр Исус ышӀэщтыгъ. Ежь ицӀыфхэу дунаем тетхэр шӀу ылъэгъущтыгъэх, кӀэухыми нэсыфэ шӀу ылъэгъущтыгъэх. 2 Пчыхьэшъхьашхэ ашӀыщтыгъ. Исус тетыгъо зиӀэхэм аӀэкӀигъэхьанэу шэйтаным Симон Искариот ыкъоу Иудэ ыгу рилъхьэгъах. 3 Исус ыӀэ Ты лъапӀэм зэкӀэ къызэрэрилъхьагъэри, Тхьэм зэрэщыщри, Тхьэм ыдэжь зэригъэзэжьыщтри ышӀэщтыгъ. 4 Арэущтэу Исус Ӏанэм пэкӀи, ищыгъын кӀыӀутелъ зыщихи, ӀэплъэкӀ къышти, ыбгы къырищэкӀыгъ. 5 ЕтӀанэ лэджэным псы ригъахъуи, игъогу рыкӀохэрэм алъакъохэр афитхьакӀыхэу, ӀэплъэкӀэу ыбг ещэкӀыгъэмкӀи афилъэкӀыжьхэу ыублагъ. 6 Исус Симон Петрэ зыбгъодахьэм, Симон Петрэ ащ къыриӀуагъ: Зиусхьан, э слъакъохэр о птхьакӀыхэ хъуна? 7 Сэ сшӀэрэр джы о къыбгурыӀорэп, ау етӀанэ къыбгурыӀощт, риӀожьыгъ Исус. 8 Сэ слъакъохэр егъашӀэми озгъэтхьакӀынхэп, къыриӀуагъ Петрэ. ПфэсымытхьакӀымэ, сигъогу рыкӀохэрэм уащыщэп,риӀожьыгъ Исус. 9 0 Зиусхьан, ащыгъум слъакъомэ ямызакъоу сӀэхэри сшъхьи сфэтхьакӀых, къыриӀуагъ Симон Петрэ. 10 ЗызыгъэпскӀыгъэм ылъакъохэр ары ныӀэп ытхьакӀынхэ фаер, риӀуагъ Исус, сыда пӀомэ ар зэкӀэ къабзэ; шъори шъукъабз, ау шъо зэкӀэ шъукъабзэп. 11 Исус «Шъо зэкӀэ шъукъабзэп» зыкӀиӀуагъэр ежь тетыгъо зиӀэхэм аӀэкӀэзыгъэхьанэу щытыгъэр зэрахэтыр ышӀэщтыгъэти ары. 12 Исус ахэмэ алъакъохэр ытхьакӀыхи, ищыгъынхэр зыщилъэжьхи зэтӀысыжьым, яупчӀыгъ: КъышъуфэсшӀагъэр шъошӀа? 13 Шъо «Дин ГъэсакӀокӀэ» ыкӀи «ЗиусхьанкӀэ» шъукъысэджэ; шъуӀорэр тэрэз, аущтэуи сыщыт. 14 Сэ шъуи Зиусхьанэу ыкӀи шъуи ГъэсакӀоу сыщыт пэтми, шъо шъулъакъохэр къышъуфэстхьакӀыгъэх. Шъори шъулъакъохэр зэфэшъутхьакӀыжьынхэ фае. 15 ШъушӀэн фаер шъозгъэлъэгъугъ, сэ къышъуфэсшӀагъэм фэдэу, шъори шъушӀэным пае. 16 Шъыпкъэ дэдэр шъосэӀо, Ӏофтабгэр итхьаматэ нахьи нахь инэп; ащ фэдэуи лӀыкӀор ежьыр зыгъэкӀуагъэм нахьи нахь инэп. 17 Мы Ӏофхэр къыжъугурыӀохэу, шъогъэцакӀэхэмэ сыхьатмафэ шъуежьагъ. 18 Ау шъо зэкӀэми къышъохьылӀагъэу ар сэ къасӀорэп. Сэ къыхэсхыгъэхэр сэшӀэх, ау мы гущыӀэхэу Тхьэм игущыӀэ тхыгъэхэм арытхэр къэшъыпкъэжьынхэ фае: «Сихьалыгъу зышхыгъэм ылъэдакъэ къысфигъэзэжьи, пый къысфэхъугъ». 19 Ар къэхъуным ыпэкӀэ, джы сэ шъосэӀо, ар хъу зыхъукӀэ, сэ сызэрэХристосымкӀэ шӀошъхъуныгъэ шъуиӀэ хъуным пае. 20 Шъыпкъэ дэдэр шъосэӀо, сэ къэзгъакӀорэр къезыгъэблагъэрэм сэри сыригъэблэгъагъэу мэхъу, сэ сезыгъэблагъэрэми сэ сыкъэзыгъэкӀуагъэри ригъэблэгъагъэу мэхъу.
Исус игъогу рыкӀохэрэм ащыщэу зыгорэм ежьыр тетыгъо зиӀэхэм зэраӀэкӀигъэхьащтыр къызэриӀуагъэр
21 Исус а гущыӀэхэр къызеӀохэм ыуж, къэгумэкӀи, къыушыхьатэу къыӀуагъ: Шъыпкъэ дэдэр шъосэӀо, шъуащыщэу зыгорэм тетыгъо зиӀэхэм саӀэкӀигъэхьащт. 22 Ар къызеӀом, Исус ахэмэ ащыщэу зыфиӀорэр игъогу рыкӀохэрэм амышӀэу, зыр адрэм еплъыжьыщтыгъ. 23 Игъогу рыкӀохэрэм ащыщэу Исус анахьышӀоу ылъэгъурэр ежьым къыбгъодэсэу Ӏанэм пэсыгъ. 24 Симон Петрэ а нэбгырэу Исус къыбгъодэсым Ӏэ фишӀыгъ, Исус зыфиӀорэмкӀэ еупчӀынэу. 25 А лӀым Исус ыбгъэгу зычӀидзи, еупчӀыгъ: Зиусхьан, хэта а зыфапӀорэр? 26 Мы хьалыгъу Ӏулъхьэр апсым хэзгъэонышъ, зэстыщтыр ары зыфасӀорэр, пэгъокӀ ытыжьыгъ Исус. ЕтӀанэ хьалыгъу Ӏулъхьэр апсым хигъауи, Симон Искариот ыкъо Иудэ ритыгъ. 27 Иудэ а хьалыгъу Ӏулъхьэр зештэм, ыгу Шэйтаныр къихьагъ. ПшӀэнэу о угу илъыр шӀэхэу шӀэ! ыӀуи, Исус Иудэ риӀуагъ. 28 Ау Исус ащ арэущтэу зыкӀыриӀуагъэр Ӏанэм пэсыгъэмэ ащыщэу зыми къыгурыӀуагъэп. 29 Иудэ ахэмэ яахъщалъэ ыӀыгъыгъэти, е «Пасхъэ мэфэшхом пае тищыкӀагъэр къэщэф», е «ТхьамыкӀэхэм зыгорэ ят», ыӀозэ, Исус ащ риӀуагъэу заулэмэ къашӀошӀыгъ. 30 Иудэм хьалыгъу Ӏулъхьэр Исус къызэрэӀихэу, унэм икӀыгъ. Чэщэу щытыгъ.
УнэшъуакӀэр
31 Иудэ унэм зекӀым, Исус къыӀуагъ: Джы цӀыфхэм ЦӀыф Лъэпкъым Ыкъо ищытхъушхо алъэгъунэу щыт, ащи Тхьэм ищытхъушхо аригъэлъэгъунэу щыт. 32 Ащ Тхьэм ищытхъушхо цӀыфхэм арегъэлъэгъушъ, ежь Тхьэми ЦӀыф Лъэпкъым Ыкъо ищытхъушхо цӀыфхэм аригъэлъэгъущт. Бэ темышӀэуи Тхьэм ащ ищытхъушхо аригъэлъэгъущт. 33 Сибынхэр, сышъуигъусэнэу къэнэжьырэр бэп. Шъо шъукъыслъыхъущт, ау «СыздакӀорэм шъо шъукъэкӀон шъулъэкӀыщтэп», сӀуи, джуртмэ зэрясӀуагъэм фэдэу, джы шъори шъосэӀо. 34 УнэшъуакӀэ шъосэты: ШӀу шъузэрэлъэгъу. Сэ шӀу шъузэрэслъэгъугъэм фэдэу, шъори шӀу шъузэрэлъэгъу. 35 Шъо шӀу шъузэрэлъэгъумэ, шъо сигъогу шъузэрэрыкӀорэр цӀыф пстэуми ашӀэщт.
«Сэ сыкъэмышӀэу къэпӀощт,» ыӀуи, Исус Петрэ зэрэриӀуагъэр
36 Симон Петрэ Исус къыриӀуагъ: Зиусхьан, тыда уздакӀорэр? Сэ сыздакӀорэм джы укъыскӀэлъыкӀон плъэкӀыщтэп, ау етӀанэ укъыскӀэлъыкӀощт, риӀожьыгъ Исус. 37 Зиусхьан, къыриӀуагъ Петрэ. Сыд джы сыкъыпкӀэлъыкӀон зыкӀэсымылъэкӀырэр? Ощ пае сэ спсэ стыщт. 38 Сэщ пае о упсэ птыщта? пэгъокӀ ытыжьыгъ Исус. Шъыпкъэ дэдэр осэӀо, атакъэр Ӏоным ыпэкӀэ сэ сыкъэмышӀэу гъогогъуищэ къэпӀощт!
Исусэу Ты лъапӀэм ыдэжь кӀорэ гъогур
1 ШъумыгумэкӀ. ТхьэмкӀэ шӀошъхъуныгъэ зижъугъаӀ, сэркӀи шӀошъхъуныгъэ зижъугъаӀ. 2 Сэ Сятэ иунэшхо унэхэу хэтхэр бэ; арэу щымытыгъэмэ, шъосӀощтыгъэ: «ЧӀыпӀэ къышъуфэзгъэхьазырынэу сыкӀощт». 3 СыкӀоу, чӀыпӀэ къызышъуфэзгъэхьазыркӀэ, сыкъэкӀожьынышъ, сэ сыздэщыӀэм шъори шъущыӀэнэу шъуздэсщэщт. 4 СыздакӀорэм игъогу шъо шъошӀэ. 5 Зиусхьан, къыриӀуагъ Фомэ Исус, уздакӀорэр тшӀэрэп. Арышъ, уздакӀорэм игъогу сыдэущтэу тшӀэн тлъэкӀына? 6 Гъогури, шъыпкъагъэри, щыӀэныгъэри сэры, риӀожьыгъ Исус. Сэ сигъогу рымыкӀомэ, Ты лъапӀэм ыдэжь цӀыф зи кӀошъущтэп. 7 Сэ сышъошӀэмэ, Сяти шъошӀэ. Джы щегъэжьагъэу Сятэ шъошӀэ ыкӀи шъулъэгъугъэ. 8 Зиусхьан, ыӀуи, Филипп Исус къыриӀуагъ. Ты лъапӀэр тэгъэлъэгъуи, ар тфырикъущт. 9 Мыщ фэдизрэ сышъуигъусагъэу, джыри о сыкъэмышӀэу ара, Филипп? риӀуагъ Исус. Сэ сызылъэгъугъэм Ты лъапӀэри ылъэгъугъ. Арышъ, о «Ты лъапӀэр тэгъэ лъэгъу», сыдэущтэу пӀошъура? 10 Сэ Ты лъапӀэм сыщыщэу, ежь ыгу сызэрилъ зэпытри, Ты лъапӀэри сэ къысщыщэу, сэ сыгу зэрилъ зэпытри пшӀошъ хъурэба? ГущыӀэхэу къышъуасӀохэрэр сэрсэрэу къасӀохэрэп. Ты лъапӀэу къысщыщэу, сэ сыгу илъ зэпытым иӀофхэр егъэцакӀэх. 11 Сэ Ты лъапӀэм сыщыщэу, ежь ыгу сызэрилъ зэпытри, Ты лъапӀэри сэ къысщыщэу, сэ сыгу зэрилъ зэпытри зысӀокӀэ, шъушӀошъ жъугъэхъу. Ар мыхъуми, Ӏофхэу сэ згъэцакӀэхэрэм апае шӀошъхъуныгъэ зижъугъаӀ. 12 ПӀъыпкъэ дэдэр шъосэӀо, сэркӀэ шӀошъхъуныгъэ зиӀэм Ӏофхэу сэ згъэцакӀэхэрэр ыгъэцэкӀэщтых, ахэмэ анахьи нахь Ӏофышхохэри ыгъэцэкӀэщтых, сыда пӀомэ сэ Ты лъапӀэм ыдэжь сыкӀожьыщт. 13 Сэ сцӀэкӀэ сыд щыщкӀи Ты лъапӀэм шъуелъэӀумэ, ар сэ къышъуфэсшӀэщт, Ыкъо Ты лъапӀэм ищытхъушхо цӀыфхэм аригъэлъэгъуным пае. 14 Сэ сцӀэкӀэ сыд щыщкӀи шъукъысэлъэӀумэ, сэ ар къышъуфэсшӀэщт.
Тхьэм Ыпсэ ЛъапӀэ къафыригъэхынэу Исус игъогу рыкӀохэрэр зэригъэгугъагъэхэр
15 Шъо сэ шӀу сышъулъэгъумэ, сиунашъохэр жъугъэцэкӀэщтых. 16 Сэ Ты лъапӀэм селъэӀунышъ, ащ шъуигукъао Шъушъхьэщызыхыжьын нэмыкӀ горэ къышъуфыригъэхыщт. Ар шъуигъусэ зэпытыщт. 17 Тхьэм Ыпсэ ЛъапӀэу цӀыфхэм шъыпкъагъэр языгъашӀэрэр ары. Дунаем ицӀыфхэм ар зэрамылъэгъурэм ыкӀи зэрамышӀэрэм пае, ар агу илъынэу адэн алъэкӀырэп, ау шъо ар шъошӀэ, сыда пӀомэ шъуигъусэшъ ыкӀи шъугу илъ зэпытышъ ары. 18 Шъыпкъэ, шъо ибэу шъукъэзгъэнэщтэп; шъуадэжь сыкъэкӀожьыщт. 19 ТӀэкӀу шӀэмэ, дунаем ицӀыфхэм салъэгъужьыщтэп, ау шъо сышъулъэгъущт, сыда пӀомэ сэ сыщыӀэшъ, шъори шъущыӀэщт. 20 Ау Сятэ ыгу сызэрилъ зэпытри, шъори сэ сыгу шъузэрилъ зэпытри, сэри шъо шъугухэм сызэрарылъ зэпытри а мафэм шъо шъушӀэщт. 21 Сиунашъохэр зиӀэу, ахэр зыгъэцакӀэрэр ары сэ шӀу сызылъэгъурэр. Сэ шӀу сызылъэгъурэр Сяти шӀу къылъэгъущт. Сэри ар шӀу слъэгъущт ыкӀи зыкъезгъэлъэгъущт. 22 Джащыгъум Иудэ (Иудэ Искариот зыцӀэр арэп) Исус къыриӀуагъ: Зиусхьан, дунаем ицӀыфхэм о зямыгъэлъэгъоу, тэ зыкъытэбгъэлъэгъунэу оӀо, ар сыдэущтэу хъура? 23 Сэ шӀу сызылъэгъурэм сигущыӀэхэр ыгъэцэкӀэщтых, риӀожьыгъ Исус. Сэ Сяти ар шӀу къылъэгъущт, а цӀыфыми ыдэжь тэ тыкъэкӀонышъ, ащ ыгу тилъыщт. 24 ШӀу сызымылъэгъурэм сигущыӀэхэр ыгъэцакӀэхэрэп. ГущыӀэхэу къасӀохэу зэхэшъуххэрэр сэ сигущыӀэхэу щытхэп, Ты лъапӀэу сыкъэзыгъэкӀуагъэм игущыӀэхэу щытхэ нахь. 25 Сышъуигъусэфэ, а гущыӀэхэр шъосӀуагъэх. 26 Ау шъуигукъао Шъушъхьэщызыхыжьрэр, Тхьэм Ыпсэ ЛъапӀэ ары, сэ сцӀэкӀэ Ты льапӀэм къышъуфыригъэхыщт. Ащ зэкӀэ шъуигъэшӀэщт, сэ къышъосӀуагъэхэри зэкӀэ шъугу къыгъэкӀыжьыщтых. 27 Гупсэфыныгъэ къышъуфэсэгъанэ, сигупсэфыныгъэ шъосэты. Гупсэфыныгъэу сэ шъостырэр дунаем къышъуитын ылъэкӀырэп. ШъумыгумэкӀ ыкӀи шъумыщын. 28 «СышъухэкӀыжьми, шъуадэжь сыкъэкӀожьыщт» сӀуи, зэрэшъосӀуагъэр зэхэшъухыгъэ. Сэ шӀу сышъулъэгъугъэмэ, «Ты лъапӀэм ыдэжь сыкӀожьыщт» сӀуи, сэ зэрэсӀуагъэмкӀэ шъугушӀощтыгъ, сыда пӀомэ Ты лъапӀэр сэщ нахьи нахь ин. 29 Мы Ӏофыр къэхъуным ыпэкӀэ шъосӀуагъэ, ар хъу зыхъукӀэ, шӀошъхъуныгъэ шъуиӀэ хъуным пае. 30 Бащэрэ сыкъыжъудэгущыӀэжьыщтэп, сыда пӀомэ мы дунаем ипщ къакӀо пэт. Ащ иӀоф сэ къысхэлъэп. 31 Ау Ты лъапӀэр сэ шӀу зэрэслъэгъурэри, унашъоу къысфишӀыгъэхэр зэрэзгъэцакӀэхэрэри дунаем ицӀыфхэм ашӀэн фае. Шъукъэтэджи, мыщ тыӀужъугъэкӀыжь.
Исусэу сэнэшъхьэ къулэ шъыпкъэр
1 Сэнэшъхьэ къулэ шъыпкъэр сэры, сэнэшъхьашӀэри сэ Сятэ ары. 2 Сикъутамэхэм ащыщэу зи къызпымыкӀэрэр пеупкӀы. Сыдрэ къутамэуи къызпыкӀэрэр еукъэбзы, нахьыбэ къыпыкӀэным пае. 3 ГущыӀэхэу шъосӀуагъэхэмкӀэ шъо шъугухэр укъэбзыгъахэ. 4 Сэ шъугухэм сарыжъугъэлъ зэпыт, шъори сыгу шъуилъ зэпытыщт. Къутамэр сэнэшъхьэ къулэм пымытмэ, зи къызэрэпымыкӀэшъущтым фэдэу, шъори шъугухэм сарышъумыгъэлъ зэпытмэ, шӀугъэ къышъупыкӀыщтэп. 5 Сэнэшъхьэ къулэр сэры, къутамэхэри шъоры. ЦӀыф горэм ыгу сэ силъ зэпытэу, ежьыри сыгу илъ зэпытмэ, а цӀыфым бэу шӀугъэ къыпыкӀыщт; сыда пӀомэ сэ сышъуигъусэу щымытмэ, зи шъушӀэн шъулъэкӀыщтэп. 6 ЦӀыф горэм ыгу симылъ зэпытмэ, къутамэм фэдэу ар чӀадзыжьынышъ, гъужьыщт. Ащ фэдэ къутамэхэр аугъоинхэшъ, машӀом падзэнхэшъ, агъэстыжьыщтых. 7 Шъо шъугухэм сарылъ зэпытэу, сигущыӀэхэри шъугухэм арылъ зэпытхэмэ, сыд шъузыфаемкӀэ Сятэ шъуелъэӀу, ащыгъум шъузэрелъэӀурэри шъуиӀэ хъущт. 8 ЦӀыфмэ сэ Сятэ щытхъушхо зэрэфяжъугъэшӀыщтыр шъо бэу шӀугъэ къызэрэшъупыкӀырэр ары. Арэущтэу сигъогу шъузэрэрыкӀорэр къэжъугъэлъэгъощт. 9 Ты лъапӀэм шӀу сызэрилъэгъугъэм фэдэу, сэри шъо шӀу шъуслъэгъугъ. СишӀулъэгъуныгъэ зыхэшъумыгъэн. 10 Сиунашъохэр зыжъугъэцакӀэхэкӀэ, сэ шъо шӀу шъуслъэгъу зэпытыщт, сэри Сятэ иунашъохэр зэрэзгъэцэкӀагъэхэм пае, ащ сэ шӀу сызэрилъэгъу зэпытрэм фэдэу. 11 А Ӏофхэр къызыфышъосӀуагъэхэр сигушӀуагъо шъугухэм арылъынышъ, шъуигушӀуагъуи икъугъэу хъуныр ары. 12 Мыры сиунашъо: Сэ шъо шӀу шъузэрэслъэгъугъэм фэдэу, шъори шӀу шъузэрэлъэгъун фае. 13 ЦӀыфэу ежь иныбджэгъухэм апае зыпсэ зытырэм ишӀулъэгъуныгъэ нахьи нахь шӀулъэгъуныгъэшхо щыӀэп. 14 Сиунашъохэр шъогъэцакӀэхэмэ, шъори шъусиныбджэгъух. 15 Джы шъо ӀофтабгэхэкӀэ сышъоджэжьрэп, сыда пӀомэ Ӏофтабгэм ежь итхьаматэ игухэлъ ышӀэрэп. Сэ шъо синыбджэгъухэкӀэ сышъоджагъ, сыда пӀомэ Сятэ къыӀохэу зэхэсхыгъэхэр зэкӀэ къышъуфэсӀотэжьыгъэх. 16 Шъо сэ сыкъыхэшъухыгъэп, ау сэ шъо шъукъыхэсхыгъ. Шъо шъукӀонышъ, шӀугъэ къышъупыкӀынышъ, а шӀугъэри къэнэжьынэу згъэнэфагъэ. Джащыгъум сэ сцӀэкӀэ сыд щыщкӀи Ты лъапӀэм шъуелъэӀумэ, ащ шъо къышъуфишӀэщт. 17 ШӀу шъузэрэлъэгъуныр ары унашъоу къышъуфэсшӀырэр.
Дунаем ицӀыфхэм Исус игъогу рыкӀохэрэр зэрауджэгъухэрэр
18 Дунаем ицӀыфхэм шъуауджэгъоу щытмэ, шъо шъуауджэгъуным ыпэкӀэ, сэри сауджэгъугъэу зэрэщытыгъэр зыщышъумыгъэгъупш. 19 Мы дунаем шъущыщыгъэмэ, мы дунаем ицӀыфхэм ежьхэм афэдэу шӀу шъуалъэгъущтыгъ. Джы зэрэщытымкӀэ, мы дунаем шъущыщэп, ау мы дунаем шъуиӀахьэ хэмылъынэу шъо шъукъыхэсхыгъ. Джары дунаем ицӀыфхэм шъузыкӀауджэгъурэр. 20 Сэ къышъосӀогъэ гущыӀэхэр зыщышъумыгъэгъупшэх: Ӏофтабгэр итхьаматэ нахьи нахь инэп. Сэ къин сагъэщэчыгъ, шъори къин шъуагъэщэчыщт. Сэ сигущыӀэхэм ядэӀухэу щытыгъэхэмэ, шъо шъуигущыӀэхэми ядэӀущтых. 21 Ау сэ сцӀэ зэрэжъугъэлъапӀэрэм пае, а бзэджагъэ пстэури къышъуашӀэщт, сыда пӀомэ сэ сыкъэзыгъэкӀуагъэр ашӀэрэпышъ ары. 22 Сэ сыкъакӀуи, сигущыӀэхэр ясымыӀуагъэхэмэ, псэкӀод яӀэщтгъэп, ау джы псэкӀодхэу ашӀагъэхэм апае фэгъэгъу зи яӀэп. 23 Сэ сызыуджэгъурэм Сяти еуджэгъу. 24 Сэщ нэмыкӀ зыми ымышӀэгъэ Ӏофышхохэр ахэмэ апашъхьэ щысымышӀагъэхэмэ, ахэмэ псэкӀод яӀэщтгъэп. Ау джы а Ӏофышхохэу сэ сшӀагъэхэр алъэгъугъэхэ пэтми, сэри Сяти тыкъауджэгъу. 25 Ау арэущтэу зыфэхъун фаер мы гущыӀэхэу ахэмэ я Тэурат хабзэ итхэр къэшъыпкъэжьынхэр ары: «Сэ лажьэ симыӀэ пэтми, сауджэгъугъ». 26 Ау Ты лъапӀэм ыдэжь къикӀэу шъуигукъао Шъушъхьэщызыхыжьрэр къышъуфезгъэхыщт. Ар Ты лъапӀэм ыдэжь къикӀэу, ащ Ыпсэ ЛъапӀэу цӀыфхэм шъыпкъагъэр языгъашӀэрэр ары. Ар къызыкӀокӀэ, шыхьат сэ къысфэхъущт. 27 ӀПъори шыхьат шъукъысфэхъущт, сыда пӀомэ апэм щегъэжьагъэу шъусигъусэу щытыгъэти ары.
1 А Ӏофхэр зэкӀэ къызыфышъосӀуагъэхэр сэ сигъогу шъутемыкӀынэу ары. 2 Синэгогухэм шъукъачӀафыщт. Ащ имызакъоу, хэт щыщми шъузыукӀырэр Тхьэм фэлажьэкӀэ зыгугъэщт мафэри къэсыщт. 3 Ты лъапӀэри сэри тызэрамышӀагъэм пае, а Ӏофхэр ашӀэщт. 4 Ау а Ӏофхэр джы къызфышъосӀуагъэхэр а мафэр къызыскӀэ, ахэр къызэрэшъосӀуагъэхэр шъугу къэжъугъэкӀыжьынхэу ары. Сышъуигъусагъэти, нахьыпэкӀэ ахэр сэ къышъуасӀощтыгъэхэп.
Тхьэм Ыпсэ ЛъапӀэ Ӏофхэу ыгъэцакӀэхэрэр
5 Джы сыкъэзыгъэкӀуагъэм ыдэжь сыкӀожьыщт. Ау шъуащыщ гори «Тыдэ укӀорэ?» ыӀоу къысэупчӀырэп. 6 Ау а Ӏофхэр зэрэшъосӀуагъэхэм пае, шъугу мапэ. 7 Ау шъыпкъэр шъосэӀо, сэ сызэрэшъухэкӀырэр шъоркӀэ нахьышӀу; сыда пӀомэ сышъухэмыкӀымэ, шъуигукъао Шъушъхьэщызыхыжьрэр къышъуфэкӀощтэп. СызыкӀокӀэ, ар къышъуфезгъэхыщт. 8 Шъуигукъао Шъушъхьэщызыхыжьрэр къызыкӀокӀэ, псэкӀодшӀэныр зыфэдэри, шъыпкъагъэр зыфэдэри, Тхьэм мы дунаем ицӀыфхэм хьыкум зэратыришӀыхьащтри зэхаригъэшӀыкӀыщт: 9 сэркӀэ шӀошъхъуныгъэ яӀэ зэрэмыхъугъэр зэрэпсэкӀодыр зэхаригъэшӀыкӀыщт. 10 Шъыпкъагъэ зэрэсиӀэри зэхаригъэшӀыкӀыщт, сыда пӀомэ сэ Ты лъапӀэм ыдэжь сыдэкӀоежьынышъ, сышъулъэгъужьыщтэп. 11 Тхьэм ихьыкум цӀыфхэм атыришӀыхьаныр зыфэдэри зэхаригъэшӀыкӀыщт, сыда пӀомэ Тхьэм мы дунаем ипщ ыгъэмысэгъах. 12 Джыри къышъосӀонэу щыӀэр бэ, ау джы шъо ар шъущыӀэн шъулъэкӀыщтэп. 13 Ау Тхьэм Ыпсэ ЛъапӀэу цӀыфхэм шъыпкъагъэр языгъашӀэрэр къызыкӀокӀэ, шъыпкъагъэр зэкӀэ зэхэшъуигъэшӀыкӀыщт. Ежьежьырэу зи къыӀощтэп, Тхьэм къыӀохэу зэхиххэрэр ары къыӀощтхэр, къэхъущткъэшӀэщтхэри къышъуигъэӀущтых. 14 Ащ щытхъушхо къысфишӀыщт, сыда пӀомэ Ӏофхэу шъуигъэшӀэщтхэр зэкӀэ сэ садэжь къекӀыхэшъ ары. 15 Ты лъапӀэм иӀэр зэкӀэ сэсый. Ары зыкӀэсӀуагъэр Тхьэм Ыпсэ ЛъапӀэу цӀыфхэм шъыпкъагъэр языгъашӀэрэр Ӏофхэу сӀохэрэр къызэрэшъуигъэшӀэжьыщтхэр.
Исус игъогу рыкӀохэрэм ягукъао текӀынышъ, гушӀуагъокӀэ зэрэзэблихъущтыр
16 ТӀэкӀу шӀэмэ, сышъулъэгъужьыщтэп, етӀани тӀэкӀу шӀэмэ сышъулъэгъужьыщт; сыда пӀомэ Ты лъапӀэм ыдэжь сыдэкӀоежьыщтышъ ары. 17 Исус ар зеӀом, игъогу рыкӀохэрэм ащыщхэу заулэмэ зэраӀожьыгъ: «ТӀэкӀу шӀэмэ сышъулъэгъужьыщтэп, етӀани тӀэкӀу шӀэмэ сышъулъэгъужьыщт», ыкӀи «Ты лъапӀэм ыдэжь сыдэкӀоежьыщт», зиӀокӀэ къыригъэкӀырэр сыд шъуӀуа? 18 Арэущтэу ахэмэ аӀо зэпытыщтыгъ: «ТӀэкӀу шӀэмэ» зыфиӀорэм къыригъэкӀырэр тшӀэрэп. 19 Исус ахэр къеупчӀыхэмэ зэрашӀоигъор къышӀи ариӀуагъ: «ТӀэкӀу шӀэмэ сышъулъэгъужьыщтэп, етӀани тӀэкӀу шӀэмэ сышъулъэгъужьыщт», сӀуи, зыфэсӀуагъэмкӀэ шъузэупчӀыжьа? 20 Шъыпкъэ дэдэр шъосэӀо, шъо шъугъыщт ыкӀи шъупыхьащт, ау дунаем ицӀыфхэр гушӀощтых. Шъо шъугу къеощт, ау шъуигукъао текӀынышъ, гушӀуагъокӀэ зэблихъущт. 21 Бзылъфыгъэм сабый къыфэхъунэу зыхъукӀэ, къин ещэчы, сыда пӀомэ къин зыщищэчын фае игъор къэсыгъэшъ ары. Ау бын къызыфэхъукӀэ, гушӀозэ къинэу ыщэчыгъэр щэгъупшэжьы, сыда пӀомэ дунаем зы цӀыф къытехъуагъэшъ ары. 22 Ащ фэдэу шъори джы гукъао шъуиӀ, ау сэ шъуслъэгъужьыщт. Джащыгъум шъори шъугушӀожьыщт, а гушӀуагъори зыми шъутырихыщтэп. 23 А мафэм зыкӀи шъукъысэупчӀыщтэп. Шъыпкъэ дэдэр шъосэӀо, сэ сцӀэкӀэ Ты лъапӀэм сыд щыщкӀи шъуелъэӀумэ, ар къышъуфишӀэщт. 24 Джы нэсы сэ сцӀэкӀэ Сятэ зыкӀи шъуелъэӀугъэп. ШъуелъэӀуи, шъузэрелъэӀурэри шъуиӀэ ыгъэхъущт, шъуигушӀуагъо икъугъэу хъуным пае. 25 А Ӏофхэр гъэсэныгъэ тхыдэхэмкӀэ шъосӀуагъэх. Ау гъэсэныгъэ тхыдэхэмкӀэ сыкъызыжъудэмыгущыӀэжьын мафэр къэсыщт. А мафэр къызыскӀэ, Ты лъапӀэм ехьылӀагъэу нафэу шъосӀощт. 26 А мафэм сэ сцӀэкӀэ Ты лъапӀэм шъуелъэӀущт. Шъо къышъохьылӀагъэу Ты лъапӀэм селъэӀунэу шъуасӀорэп; 27 сыда пӀомэ шъо сэ шӀу сышъулъэгъугъэу, Тхьэм сызэрэщыщымкӀэ шӀошъхъуныгъэ шъуиӀэ зэрэхъугъэм пае, ежь Ты лъапӀэми шъо шӀу шъуелъэгъу. 28 Ты лъапӀэм сыщыщэу сэ дунаем сыкъытехьагъ. Джыри зэ дунаем сытекӀыжьынышъ, Ты лъапӀэм ыдэжь сыдэкӀоежьыщт. 29 Джы гъэсэныгъэ тхыдэ хэмытэу, нафэу укъэгущыӀэ, къаГуагъ Исус игъогу рыкӀохэрэм. 30 О зэкӀэри зэрэпшӀэрэри, цӀыф горэм ыгу илъыр пшӀэным пае, а цӀыфыр къыоупчӀыжьынэу щыкӀагъэ зэрэуимыӀэри джы зэдгъэшӀагъ. Ащ пае Тхьэм о узэрэщыщымкӀэ шӀошъхъуныгъэ тиӀ. 31 Джы шӀошъхъуныгъэ шъуиӀэ хъугъа? ариӀуагъ Исус ахэмэ. 32 Мары, шъо шъузэбгырыкӀыжьэу, шъуащыщэу хэти иунэ зигъэзэжьыщт игъор къэсы пэт ыкӀи къэсыгъах. Сэ сизакъоу утыгум сыкъишъунэщт, ау сэ сизакъоп, сыда пӀомэ, Ты лъапӀэр сигъусэшъ ары. 33 А Ӏофхэр сэ къызфышъосӀуагъэхэр сэ шъугухэм сызэрарылъым пае, гупсэфыныгъэ шъуиӀэ хъуныр ары. Дунаем къин щышъущэчыщт, ау шъугу шъумыгъэкӀоды: сэ дунаем сытекӀуагъ.
Исус Тхьэм зэрелъэӀугъэр
1 А гущыӀэхэр къызеӀохэ ужым, Исус уашъом дэплъыий къыӀуагъ: Сэ Сят, игъор къэсыгъ. О пкъо ищытхъушхо цӀыфхэм ягъэлъэгъу, о пКъуи о уищытхъушхо цӀыфхэм аригъэ лъэгъуным пае. 2 Сыда пӀомэ цӀыф пстэуми тетыгъо афыриӀэнэу о Пкъо ыӀэ ахэр иплъхьагъэх, о ащ ыӀэ иплъхьэгъэ цӀыф пстэуми мыкӀодыжьын щыӀэныгъэ аритыным пае. 3 ЦӀыфхэм мыкӀодыжьын щыӀэныгъэ яӀэ зэрэхъурэ гъогур о Тхьэ шъыпкъэ закъор узэрашӀэщтри, о къэбгъэкӀогъэ Исус Христос зэрашӀэштри ары. 4 Сэ Ӏофэу згъэцэкӀэнэу спшъэ къиплъхьагъэр зэрэзгъэцэкӀагъэмкӀэ дунаем ицӀыфхэм о уищытхъушхо язгъэлъэгъугъ. 5 Джы, Сят, дунаер къэхъуным ыпэкӀэ, уадэжь щысиӀэгъэ щытхъушхом фэдэ щытхъушхо уадэжь щысиӀэ гъэхъу. 6 Дунаем яӀахьэ хэмылъынэу сэ сӀэ къиплъхьэгъэ цӀыфмэ о уязгъэшӀагъ. Ахэр о уицӀыфхэу щытыгъэх, сэ сӀэ къиплъхьагъэх, уигущыӀэхэри агъэцэкӀагъэх. 7 Сэ сӀэ къиплъхьагъэр зэкӀэ уадэжь къызэрикӀыгъэр ахэмэ джы ашӀэ; 8 сыда пӀомэ о сӀэ къиплъхьэгъэ гущыӀэхэр сэ ахэмэ аӀэ ислъхьажьыгъэх. Ахэмэ а гущыӀэхэр аштагъэх. Сэ о сызэрэпщыщым ишъыпкъагъэ зэрагъэшӀагъ, о сыкъызэрэбгъэкӀуагъэмкӀи шӀошъхъуныгъэ яӀэ хъугъэ. 9 Сэ ахэмэ апае сыолъэӀу. Дунаем ицӀыфхэр арэп сыкъызфыолъэӀурэр, о сэ сӀэ къиплъхьэгъэ цӀыфхэр ары нахь, сыда пӀомэ ахэр оуиех. 10 ЦӀыфхэу сэ сӀэ илъхэр зэкӀэри оуиех, уицӀыфхэри зэкӀэ сэсиех. Ахэми сищытхъушхо агъэнафэ. 11 Сэ джы дунаем сытетыжьыщтэп, ау ахэр джыри дунаем тетых. Сэ уадэжь сыкъэкӀожьыщт. Сятэ лъапӀ, о пцӀэу къысэптыгъэм ыкӀуачӀэкӀэ ахэр къэухъумэх, оррэ сэррэ зы тызэрэхъурэм фэдэу, ахэри зы хъунхэм пае. 12 Сэ ахэмэ сырягъусэу зыщэтым, о пцӀэу къысэптыгъэм ыкӀуачӀэкӀэ ахэр къэсыухъумэщтыгъэх ыкӀи сафэсакъыщтыгъ. КӀодын фае цӀыфым нэмыкӀ ахэмэ ащыщэу зи кӀодыгъэп, Тхьэм игущыӀэ тхыгъэхэм арытхэр къэшъыпкъэжьынхэм пае. 13 Ау джы уадэжь сыкъэкӀожьыщт. Дунаем сытетыфэ, мы гущыӀэхэр къэсэӀох, сигушӀуагъо ахэмэ агухэм икъугъэу арылъ хъуным пае. 14 О уигущыӀэхэр ахэмэ аӀэ ислъхьажьыгъэх. Сэ мы дунаем сызэрэщымыщым фэдэу, ахэри мы дунаем зэрэщымыщхэм пае, мы дунаем ицӀыфхэм ахэр ауджэгъугъэх. 15 СыкъызэрэолъэӀурэр ахэр шэйтаным о щыуухъумэнхэр ары, ахэр дунаем тепхыжьынхэр арэп. 16 Сэ мы дунаем сызэрэщымыщым фэдэу, ахэри мы дунаем щыщхэп. 17 Ахэмэ шъыпкъагъэмкӀэ зыкъыуатыжьынэу гъэхъу. О уигущыӀэхэр ары шъыпкъагъэу щытхэр. 18 О дунаем сыкъызэрэбгъэкӀуагъэм фэдэу, сэри ахэр дунаем згъэкӀуагъэх. 19 Сэ ахэмэ яхьатыркӀэ зыкъыосэты, ахэми шъыпкъэу зыкъыуатыгъэу хъуным пае. 20 Ахэмэ язакъоу арэп сэ сыкъызфыолъэӀурэр, ахэмэ ягущыӀэхэмкӀэ сэркӀэ шӀошъхъуныгъэ зиӀэ хъущт цӀыфхэми сыкъафыолъэӀу. 21 Ахэр зэкӀэри зы орэхъух. О Сятэ сэ сыгу уилъ зэпытэу, сэри о угу сызэрилъ зэпытым фэдэу, тэ ахэми агухэм тарылъ зэпытынэу сыкъыолъэӀу. Ащыгъум о сыкъызэрэбгъэкӀуагъэмкӀэ дунаем ицӀыфмэ шӀошъхъуныгъэ яӀэ хъущт. 22 О сэ щытхъушхо сиӀэ зэрэбгъэхъугъэм фэдэу, сэри ахэмэ щытхъушхо яӀэ згъэхъугъэ, тэ зы тызэрэщытым фэдэу, ахэри зы хъунхэм пае: 23 Сэ ахэмэ агухэм сарылъ зэпытэу, о сэ сыгу уилъ зэпытэу, шъыпкъэу зы орэхъух. Ащыгъум о сыкъызэрэбгъэкӀуагъэри, сэ шӀу сызэрэплъэгъугъэм фэдэу, ахэри шӀу зэрэплъэгъугъэхэри дунаем ицӀыфхэм ашӀэщт. 24 Сят, цӀыфхэу о сӀэ къиплъхьагъэхэр сэ сыздэщыӀэм сигъусэхэу щыӀэнхэу сэ сшӀоигъу, сэ щытхъушхоу сиӀэ бгъэхъугъэр алъэгъуным пае. А щытхъушхор сиӀэ зыкӀэбгъэхъугъэр дунаер къэхъуным ыпэкӀэ, шӀу сызэрэплъэгъугъэр ары. 25 Сятэ заф, дунаем ицӀыфхэм о уашӀэрэп, ау сэ усэшӀэ. СицӀыфхэм о сыкъызэрэбгъэкГуагъэр ашӀэ. 26 Сэ о ахэмэ уязгъэшӀагъ ыкӀи уязгъэшӀэщт, шӀулъэгъуныгъэу о къысфыуиӀэр ахэми агухэм арылъ зэпытыным паий, сэри ахэмэ агухэм сарылъ зэпытыным паий.
Исус зэраубытыгъэр
1 Исус а гущыӀэхэр къызеӀохэ ужым, дэкӀи, игъогу рыкӀохэрэр игъусэхэу Кедрон зыцӀэ къуладжэм зэпырыкӀыгъ. Ащ дэжьым хатэ горэ Ӏутыгъ. Исусрэ игъогу рыкӀохэрэмрэ а хатэм дэхьагъэх. 2 Иудэу Исус тетыгъо зиӀэхэм аӀэкӀэзыгъэхьанэу щытыгъэм а чӀыпӀэр ышӀэщтыгъ, сыда пӀомэ Исусрэ игъогу рыкӀохэрэмрэ а чӀыпӀэм бэрэ щызэӀукӀэщтыгъэх. 3 Джарэущтэу дзэлӀ купрэ ухъумэкӀо купэу дин пэщэшхохэми фарисейхэми агъэкӀуагъэмрэ Иудэ зыдищагъэх. Ахэмэ машӀо зыпыгъэнэгъэ бэщхэри, остыгъэхэри, Ӏашэхэри аӀыгъхэу къэкӀуагъэх. 4 Исус къехъулӀэщтыр зэкӀэ ешӀэти, апэгъокӀи яупчӀыгъ: Хэта шъузлъыхъурэр? 5 Назарет щыщ Исус ары, къыраӀуагъ ахэмэ. Сэры ар,ариӀуагъ Исус. Иудэу Исус ахэмэ аӀэкӀэзыгъэхьанэу щытыгъэр ахэмэ ахэтыгъ. 6 Исус, «Сэры ар», ыӀуи зареӀом, ахэр зэкӀакӀохи, чӀыгум зытырадзагъ. 7 Хэта шъузлъыхъурэр? ыӀуи, Исус джыри зэ яупчӀыгъ. Назарет щыщ Исус ары, къыраӀожьыгъ ахэмэ. 8 Сэры ар шъосӀуагъэба? ариӀуагъ Исус. Сэрымэ шъузлъыхъурэр, сигъусэхэмэ зи яшъумышӀэу, орэкӀожьых! 9 Исус арэущтэу зыфиӀуагъэр ежьым мы гущыӀэхэу Ты лъапӀэм риӀогъагъэхэр къэшъыпкъэжьынхэр ары: О сӀэ къиплъхьэгъэ цӀыфхэм ащыщэу зи згъэкӀодыгъэп. 10 Симон Петрэ сэшхо зыдиӀыгъыгъэти, ар къырихи, дин пэщэшхом иунэӀут еуи, иджабгъу тхьакӀумэ гуиупкӀыгъ. А унэӀутым ыцӀагъэр Малх. 11 Сэшхор сапӀэм илъхьажь, ыӀуи, Исус Петрэ риӀуагъ. Ты лъапӀэм къыситыгъэ къиныгъэм ишъуалъэ итым сешъон фаеба?
Исус дин пэщэшхом ыпашъхьэ зэрэращагъэр
12 ЕтӀанэ дзэ пащэр ягъусэу дзэлӀ купымрэ джурт ухъумакӀохэмрэ Исус аубыти, Ӏэхъу тыралъхьагъ. 13 Ыпэ ра пшӀэу Аннэ зыцӀэм ыдэжь ащагъ. Аннэ а илъэсым идин пэщэшхоу Кайафэ зыцӀэм ишӀупщэу щытыгъ. 14 А Кайафэ ары адрэ джуртхэм агурызыгъаӀоу мырэущтэу языӀогъагъэр: «Тэ тлъэпкъ зэкӀэ лӀэным нахьи, зы нэбгырэ закъо лӀэмэ нахьышӀу».
Петрэ Исус ымышӀэу къызэриӀуагъэр
15 Симон Петрэрэ Исус игъогу рыкӀохэрэм ащыщэу нэмыкӀ зыгорэмрэ Исус кӀэлъыкӀощтыгъэх. А лӀэу Исус игъогу рыкӀорэр дин пэщэшхом инэӀуасэу щытыгъэти, Исус игъусэу дин пэщэшхом ищагу дэхьагъ. 16 Ау Петр дэмыхьэу, къэлэпчъэ кӀыбым къэнагъ. Ащ нэужым Исус игъогу рыкӀорэ лӀэу дин пэщэшхом инэӀуасэу щытыр къыдэкӀыжьи, пчъэӀут пшъашъэм дэгущыӀи, Петрэ щагум дищагъ. 17 Ори а лӀым игъогу рыкӀохэрэм уащыщба? ыӀуи, пчъэӀут пшъашъэм Петрэ къыриӀуагъ. Хьау, сэ ахэмэ сащыщэп, ыӀуагъ Петрэ. 18 ЧъыӀэу щытыгъэти, унэӀутхэмрэ адрэ лӀыхэмрэ шӀомыкӀ машӀо ашӀыгъэу, зырагъэоу щытыгъэх. Петри ахэмэ задыригъэоу ахэтыгъ.
Дин пэщэшхор Исус зэреупчӀыгъэр
19 Джащыгъум дин пэщэпгхор Исус къеупчӀыгъ: О уигъогу рыкӀохэрэр хэтха? Ӏофхэу цӀыфхэм ябгъашӀэхэрэр сыдха? 20 Шъэф хэмылъэу дунаем ицӀыфмэ садэгущыӀэщтыгъ, пэгъокӀ ритыжьыгъ Исус. Синэгогуми, Тхьэм иунэшхоми, джуртхэр зэкӀэ зыщызэӀукӀэхэрэми, цӀыфхэм Тхьэм игущыӀэхэр щязгъашӀэ зэпытыщтыгъ. Шъэфэу зи сӀуагъэп. 21 Сыда сэ укъызкӀысэупчӀырэр? Гущы Ӏэхэу ясӀуагъэхэр зэхэзыхыгъэмэ яупчӀ. Ахэмэ гущыӀэхэу сэ сӀуагъэхэр ашӀэхэба? 22 Исус арэущтэу къызеӀом, ухъумакӀохэм ащыщэу пэгъунэгъоу щытым Исус къенэпэшъуауи ыӀуагъ: Дин пэщэшхом сыдэущтэу укъыдэгущыӀэжьыра? 23 Мыхъун къэсӀуагъэмэ, ар къысэгъэлъэгъу, риӀуагъ Исус. Ау шъыпкъэр къэсӀуагъэмэ, сыд пае укъысаора? 24 Исус Ӏэхъу телъэу дин пэщэшхоу Кайафэ ыдэжь Аннэ дзэлӀхэм аригъэщэгъагъ.
Петрэ Исус ымышӀэу джыри зэ зэриӀуагъэр
25 Ащ нэсыфэ Симон Петрэ машӀом Ӏутэу зыригъэущтыгъ. Ори а лӀым игъогу рыкӀохэрэм уащыщба? къыраГуагъ адрэхэмэ. Хьау, сэ ахэмэ сащыщэп, ыӀуагъ Петрэ афемыуцолӀэжьэу. 26 Дин пэщэшхом иунэӀутхэм ащыщэу зытхьакӀумэ Петрэ гуиупкӀыгъэм иблагъэ горэм къыӀуагъ: А лӀым уригъусэу хатэм удэслъэгъуагъэба? 27 Хьау, ар шъыпкъэп, ыӀуи, Петрэ джыри зэ еуцолӀэжьыгъэп. Ардэдэм атакъэр къэӀуагъ.
Исус Ӏэшъхьэтетэу Пилат ыпашъхьэ зэрэращагъэр
28 Ащ нэуж Кайафэ иунэ Исус ращыжьи, Рим Ӏэшъхьэтетым иунэшхоу преторие зыцӀэм чӀащагъ. Нэф шъыгъагъэ. А джуртхэр преторием чӀэхьагъэхэп, сыда пӀомэ Пасхъэ мэфэкӀ мэфэшхо пчыхьэшъхьашхэр ашӀынэу фэягъэхэти, мыкъабзэу зашӀынэу фэягъэхэп. 29 Арыти, Ӏэшъхьэтетэу Пилат зыцӀэр преторием къычӀэкӀи ариӀуагъ: Мы лӀыр сыда зэрыжъугъэмысэрэр? 30 Мы лӀым бзэджагъэ ышӀагъэу щымытыгъэмэ, уадэжь къатщэщтыгъэп, къыраӀожьыгъ ахэмэ. 31 Шъо шъущэжьи, шъуихабзэ тетэу ышӀагъэм фэшъуашэу хьыкум тешъушӀыхь! ариӀуагъ Пилат. Тэ зыгорэм укӀ тетлъхьан тыфитэп, аӀуи, джуртмэ Пилат къыраӀуагъ. 32 Арэущтэу зыфэхъугъэр Исус лӀакӀэу фэхъущтыр агуригъэӀоным пае, къыӀогъэгъэ гущыӀэхэр къэшъыпкъэжьынхэр ары. 33 Джащыгъум Пилат джыри преторием чӀэхьажьи, Исус къаригъащи риӀуагъ: Джуртхэм уряпачъыхьа? 34 Ар орорэу къэоӀуа, хьауми нэмыкӀхэр къыбдэгущыӀэхэзэ, сэ къысэхьылӀагъэу ар аӀуагъа? къыӀожьыгъ Исус. 35 Сэ сыджурта? пэгъокӀ къытыжьыгъ Пилат. О плъэпкъырэ дин пэщэшхохэмрэ укъысфащагъ. Сыда пшӀагъэр? 36 Сипачъыхьагъу мы дунаем щыщэп, пэгъокӀ къытыжьыгъ Исус. Сипачъыхьагъу мы дунаем щыщыгъэмэ, джуртхэм саӀэкӀэмыфэным пае, къысфэлажьэхэрэр заощтгъэх. Ау сэ сипачъыхьагъу мы дунаем щыщэп. 37 О упачъыхь ащыгъум? ыӀуи, Пилат Исус риӀуагъ. Ары, къызэрэпӀорэм фэдэу сэ сыпачъыхь, къыӀо жьыгъ Исус. Шъыпкъэ, сэ сыкъызфэхъугъэри, дунаем сыкъызфытехьагъэри шъыпкъагъэр къэсыушыхьатыныр ары. Хэтми шъыпкъагъэм ыуж итыр сэ сигущыӀэ къедэӀущт. 38 Шъыпкъагъэу зыфапӀорэр сыда? ыӀуи, Пилат Исус риӀуагъ.
Исус укӀ зэрэтыралъхьагъэр
Пилат ар къызэреӀоу, джыри зэ джуртмэ адэжь дэкӀыжьи ариӀуагъ: Мы лӀыр сэ зэрызгъэмысэн зи езгъотылӀэрэп. 39 Ау Пасхъэ мэфэкӀ мэфэпгхо къэси, хьапсчӀэс горэ шъхьафитэу къышъуфэстӀупщыжьыныр шъуихабзэ. Арышъ, «Джуртхэм япачъыхьэу» зыфаӀорэр шъхьафитэу къышъуфэстӀупщыжьынэу шъуфая? 40 Мы лӀыр арэп тызыфаер, Вараввэ шъхьафитэу къытфэтӀупщыжь! аӀозэ къэзэрэгъэкууагъэх ахэр. Вараввэу зыцӀэр хъункӀакӀоу щытыгъ.
1 Ащ нэужым Пилат дзэлӀхэм Исус аригъэубыти, къамыщкӀэ ригъэуагъэх. 2 ДзэлӀхэм панэм хэшӀыкӀыгъэу пачъыхьэ тандж абли, Исус ышъхьэ тыралъхьагъ. Плъыжь чӀапцӀэу зы шъошэ кӀыхьи щалъагъ. 3 ЕтӀанэ къыбгъодахьэхэти аӀощтыгъ: Опсэу, джуртмэ япачъыхь! ЕтӀанэ енэпэшъоуагъэх. 4 Пилат джыри зэ преторием къычӀэкӀыжьи, джуртмэ ариӀуагъ: Зэрызгъэмысэн зи зэресымыгъотылӀэрэр шъушӀэным пае, мары, къышъуфэсэщы. 5 Ащ нэуж Исус панэ танджыр ышъхьэ телъэу, шъошэ кӀыхьэ плъыжь чӀапцӀэр щыгъэу къычӀэкӀыгъ. Пилат цӀыфхэм ариӀуагъ: Мары а цӀыфыр. 6 Ау дин пэщэшхохэмрэ ухъумакӀохэмрэ Исус залъэгъум, къэзэрэгъэкуощтыгъэх: Къащым теГулӀ! Къащым теГулӀ! Ар шъо шъущэжьи, къащым тешъуӀулӀ, ариӀуагъ Пилат, сыда пӀомэ сэ зэрызгъэмысэн зи езгъотылӀэрэп. 7 Тэ хабзэ тиӀ, къыраӀожьыгъ джуртхэм. А хабзэу тиӀэм тетэу ар лӀэн фае, сыда пӀомэ Тхьэм Ыкъоу зишӀыгъэшъ ары. 8 Пилат а гущыӀэхэр зызэхеххэм, лъэшэу къэщтагъ. 9 Джыри преторием чӀэхьажьи, Исус риӀуагъ: Тыдэ ущыща? Исус пэгъокӀ зи ритыжьыгъэп. 10 УкъыздэгущыӀэрэп, ара? ыӀуи, Пилат Исус риӀуагъ. ПшӀэрэба, шъхьафитэу устӀупщыжьынэуи, къащым урязгъэӀулӀынэуи тетыгъо зэрэсиӀэр. 11 ЬӀпшъэ щыӀэ Тхьэм къыуимытыгъэмэ, зи къысэпшӀэнэу тетыгъо уиӀэщтгъэп, къыриӀожьыгъ Исус. Арэущтэу зэрэщытым пае, о сыкъыпӀэкӀэзыгъэхьагъэм нахьи нахьыбэу псэкӀод иӀ. 12 Ащ щегъэжьагъэу Исус шъхьафитэу зэритӀупщыжьыным Пилат ыуж итыгъ. АрышъхьакӀэ джуртхэр къэзэрэгъэкуощтыгъэх: Ар шъхьафитэу птӀупщыжьмэ, Кайсарым уриныбджэгъоп. Хэтми ежьым пачъыхьэ зызышӀыжьырэр Кайсарым ипый. 13 Пилат а гущыӀэхэр зызэхеххэм, Исус къычӀищи, хьыкум тӀысыпӀэм тетӀысхьагъ. А тӀысыпӀэр зыдэщыӀэ чӀыпӀэм ыцӀэ Лифосторотон, джуртыбзэкӀи Гаввафэ ары. 14 А мафэр Пасхъэ зыцӀэ мэфэкӀ мэфэшхом ыпэ бэрэскэшхо мэфагъ. Сыхьатыр пшӀыкӀутӀум дэжьыгъ. Мары шъуипачъыхьэ! ариӀуагъ Пилат джуртмэ. 15 Ӏущ, Ӏущ, ар къащым теӀулӀ, къэзэрэгъэкуощтыгъэх ахэр. Шъуипачъыхьэ къащым тесӀулӀэна? ариӀожьыгъ Пилат. Кайсарым нэмыкӀ пачъыхьэ тиӀэп, аӀожьыгъ дин пэщэшхохэмэ. 16 Арэущтэу къызыраӀом, Пилат Исус къащым тыраӀулӀэнэу аӀэкӀилъхьагъ.
Исус къащым зэрэтыраӀулӀагъэр
ЕтӀанэ Исус зыдащи, ӀукӀыжьыгъэх. 17 Джарэущтэу Исус икъащ ыхьэу, къалэм дэкӀи, чӀыпӀэу «Шъхьапкъ ЧӀыпӀэ» зыфаӀорэм ащагъ. А чӀыпӀэр джуртыбзэкӀэ Голгофэ зыцӀэр ары. 18 А чӀыпӀэм Исус къащым щыраӀулӀыгъ. НэбгыритӀу игъусэуи, зыр зы бгъумкӀэ адрэр адрэбгъумкӀэ, Исус азыфагу дэтэу къащхэм атыраӀулӀагъэх. 19 Пилат пхъэмбгъу горэм «Назарет щыщ Исусэу джуртмэ я Пачъыхьэ» ыӀоу, идзэлӀхэм тыраригъатхи, къащым тыраригъэгъэуцуагъ. Ар джуртыбзэкӀи, урымыбзэкӀи, латинабзэкӀи тетхагъэу щытыгъ. 20 Исус къащым зыщыраӀулӀыгъэ чӀыпӀэр къалэм игъунэгъути, джуртхэм ащыщхэу ащ еджагъэхэр бэу щытыгъэх. 21 Ау джуртхэм ядин пэщэшхохэм Пилат къыраӀуагъ: «Джуртмэ я Пачъыхь» пӀоу утемытх, ау Исус «Сэ джуртхэмэ сыря Пачъыхь» ыӀуи, зэриӀощтыгъэр тетх. 22 Сэ тестхагъар тестхэгъах, къыӀожьыгъ Пилат. 23 ДзэлӀхэм Исус къащым зыраӀулӀым, ищыгъынхэр аштэхи, хэтрэ дзэлӀым Ӏахьэ фашӀэу, ӀэхьиплӀэу агощыгъэх. Джанэри аштагъ, арышъхьакӀэ джанэр мыдыгъэу, ыпшъэ щегъэжьагъэу ылъапэ нэсы шъагъэу, зы шэкӀышхоу щытыгъ. 24 Мыр зэготэшъумыгъэтхъэу, пхъэдз итэжъугъадзи, зытефэрэм еттыщт, зэраӀожьыгъ ахэмэ. Арэущтэу зыфэхъугъэр мы гущыӀэхэу Исус ехьылӀагъэу Тхьэм игущыӀэ тхыгъэхэм арытхэр къэшъыпкъэжьынхэр ары: Сэ сищыгъынхэр зэфагощыгъэх, сиджанэ пае пхъэдз ашӀыгъ. ГА гущыӀэхэу тхыгъэхэм атетэу дзэлӀмэ ашӀагъ. 25 Исус икъащ ыдэжь яни, янэ ышыпхъуи, Клеопэ зыцӀэм ишъхьэгъусэ Мерэми, Магдэлэ къуаджэм щыщ Мерэми щытыгъэх. 26 Исус янэрэ игъогу рыкӀохэрэм ащыщэу ежьым анахьышӀоу ылъэгъурэмрэ ащ дэжьым щытхэу къызелъэгъухэм, янэ къыриӀуагъ: О бзылъфыгъ, джы мары о пкъо! 27 ЕтӀанэ а нэбгырэу игъогу рыкӀорэм риӀуагъ: Джы мары уянэ! А сыхьатым къыщегъэжьагъэу а лӀэу Исус игъогу рыкӀорэм ежь иунэ Исус янэ щигъэпсэунэу ыщагъ.
Исус зэрэлӀагъэр
28 Ащ нэужым иӀоф зэриухыгъэр Исус ешӀэти, Тхьэм игущыӀэ тхыгъэхэм арытхэр къэшъыпкъэжьынхэм пае къыӀуагъ: ПсыфалӀэ сэлӀэ. 29 Ащ дэжьым сэнэпс шӀоӀугъэ изэу зы апс горэ щытыгъ. КӀышъор зэраӀотырэ горэ сэнэпс шӀоӀугъэм хагъауи, хьисоп зыцӀэ къамыл бэщым палъхьи, Исус ыжэ рахьылӀагъ. 30 Исус сэнэпс шӀоӀугъэм зыкӀэшъу ужым, ыӀуагъ: СиӀоф ухыгъэ. ЕтӀанэ ышъхьэ къыуфи, ыпсэ ытыгъ. 31 Бэрэскэшхо мэфагъ. А шэмбэтыр мэфэшхуагъ. Шэмбэт мафэм хьадэхэр къащхэм апамыгъэлъынхэм пае, джуртхэр Пилат елъэӀугъэх: Унашъо шӀы. Къащхэм раӀулӀыгъэхэм алъэкӀапӀэхэр зэпарэутхи, хьадэхэр къащхэм къапарэхыжьых. 32 Джарэущтэу дзэлӀхэр къакӀохи, апэрэм ылъэкӀапӀэхэр зэпаутыгъэх. ЕтӀанэ адрэ нэбгырэу Исус игъусэу адрэ къащым еӀулӀыгъэм ылъэкӀапӀэхэр зэпаутыгъэх. 33 АрышъхьакӀэ, Исус ыдэжь Ӏухьэхи, зэрэлӀагъэр залъэгъум, ащ ылъэкӀапӀэхэр зэпаутыгъэхэп. 34 Ау дзэлӀмэ ащыщэу зыгорэ Исус ычапэ пчыкӀэ хэпыджагъ. Зэрэхэпыджэу, лъи пси ащ къикӀыгъэх. 35 Хъугъэр зылъэгъугъэм ар къыушыхьатыгъ, къыушыхьатыгъэри шъыпкъэ. Ар зэрэшъыпкъэр ащ ешӀэ. Шъо шӀошъхъуныгъэ шъуиӀэныр ары ащ къызкӀиушыхьатырэр. 36 Мы Ӏофхэр зэкӀэ аущтэу зыфэхъугъэхэр мы гущыӀэхэу Тхьэм игущыӀэ тхыгъэхэм арытхэр къэшъыпкъэжьынхэр ары: Ащ ыкъупшъхьэхэм ащыщэу зи зэпыутыщтэп. 37 Ащ нэмыкӀэуи Тхьэм игущыӀэ тхыгъэхэм мырэущтэу арыт: Зыхэпыджагъэхэм еплъыщтых.
Исус ихьадэ къэунэм зэрэчӀалъхьажьыгъэр
38 Юсыф ыцӀэу, Аримафей къуаджэм щыщэу, зы лӀы горэ щыӀагъ. Ар Исус игъогу рыкӀохэрэм шъэфэу ащыщыгъ, сыда пӀомэ джуртмэ ащыщынэщтыгъэти ары. Ар Пилат ыдэжь кӀуи елъэӀугъ: Исус ихьадэ къащым къыпысхыжьынэу фит сышӀ. Пилат фит зешӀым, Юсыф кӀуи, Исус ихьадэ къащым къыпихыжьыгъ. 39 Юсыф игъусэу Никодими къэкӀуагъ. Никодим ары Исус ыдэжь чэщым къэкӀогъагъэр. Ащ литришъэ фэдиз зэхэгъэкӀухьагъэу, мэ ӀэшӀу зыпихырэ уцхэу смирнэрэ алоерэ зыцӀэхэр къыздихьыгъэх. 40 ЕтӀанэ а нэбгыритӀумэ Исус ихьадэ къащым къыпахыжьи, джуртмэ хьадэр зэрэчӀалъхьажьырэ хабзэм тетэу, мэӀэшӀу зыпихырэ уцхэр игъусэхэу, чэфынхэр хьадэм ращэкӀыгъэх. 41 Исус къащым зыщыраӀулӀыгъэ чӀыпӀэм хатэ горэ щытыгъ. А хатэм къэунакӀэу егъашӀэми зы хьадэ зычӀамылъхьажьыгъэр дэтыгъ. 42 Джуртмэ шэмбэт мафэм пае зызыщагъэхьазырырэ мафэу щытыгъэти, а къэунэри гъунэгъугъэти, Исус ихьадэ ащ чӀалъхьажьыгъ.
Исус лӀагъэхэм къызэрахэтэджыкӀыжьыгъэр
1 Тхьамафэм иапэрэ мафэм, пчэдыжьым жьэу джыри мэзахэу, Магдалэ къуаджэм щыщ Мерэм къэунэм кӀуагъэ. ЗэкӀом, мыжъошхор къэунэм ӀугъэукӀорэикӀыгъэу ылъэгъугъ. 2 Мерэм ащ фэдэу зелъэгъум, Симон Петрэрэ игъогу рыкӀохэрэм ащыщэу Исус анахьышӀоу ылъэгъурэмрэ адэжь чъи ариӀуагъ: Зиусхьаныр къэунэм чӀахыгъ, зыдахьыгъэри тшӀэрэп. 3 Петрэрэ адрэ лӀэу Исус игъогу рыкӀорэмрэ унэм икӀыхи, къэунэмкӀэ ежьагъэх. 4 ТӀури зэгъусэхэу чъагъэх, ау адрэ лӀэу Исус игъогу рыкӀорэр Петрэ нахьи нахь псынкӀэу чъи, ыпэ къэунэм нэсыгъ. 5 Зиуфи, чӀаплъи, чэфынхэр щылъхэу ылъэгъугъэх, ау къэунэм чӀэхьагъэп. 6 Ащ ыуж итэу, Симон Петрэ къэси, къэунэм чӀэхьагъ. ЗычӀахьэм, чэфынхэр ащ дэжьым щылъхэу ылъэгъугъэх, 7 ау чэфынэу Исус ышъхьэ ещэкӀыгъагъэр адрэ чэфынхэм абгъодэмылъэу, зэкӀоцӀыщыхьагъэу изакъоу зы чӀыпӀэм щылъыгъ. 8 ЕтӀанэ адрэ лӀэу Исус игъогу рыкӀорэр ыпэ къэсыгъагъэри къэунэм чӀэхьагъ. Ащи зэкӀэ ылъэгъуи, ышӀошъ хъугъэ; 9 сыда пӀомэ Исус лӀагъэхэм къахэтэджыкӀыжьын фаеу зэрэщытыр Тхьэм игущыӀэ тхыгъэхэм зэрарытым фэдэу, ахэмэ къагурыӀогъагъэгоп. 10 ЕтӀанэ а лӀыхэу Исус игъогу рыкӀохэрэм адэжь агъэзэжьыгъ.
Исус Магдалэ къуаджэм щыщ Мерэм зыкъызэрэригъэлъэгъугъэр
11 Мерэм къэунэм ыдэжь щытэу гъыщтыгъ. Гъызэ къэунэм чӀэплъэнэу зызеуфэм, 12 мэлэӀичӀитӀу фыжьыкӀэ фэпагъэхэу, Исус ихьадэ зыдэщылъыгъагъэм ыдэжь, зыр ышъхьэкӀэ адрэр ылъапэкӀэ, щысхэу ылъэгъугъэх. 13 О бзылъфыгъ! Сыда узкӀэгъырэр? аӀуи, ахэмэ Мерэм къыраӀуагъ. Си Зиусхьан ихьадэ чӀахыгъ, зыдахьыгъэри сшӀэрэп,ариӀожьыгъ Мерэм. 14 Ар къыӀуагъэу зыкъызызэрегъэзэкӀым, Исус щытэу ылъэгъугъ, ау ар зэрэИсусыр ышӀагъэп. 15 О бзылъфыгъ, сьгда узкӀэгъырэр? къыриГуагъ Исус. Хэта узлъыхъурэр? Мерэм хатэм пэсырэ лӀыр арэу къышӀошӀи риӀуагъ: Тхьаматэ, орымэ ар чӀэзыхыгъэр зыдэпхьыгъэр къысаГуи, сэ ар схьыжьыщт. 16 Мерэм! къыриӀуагъ Исус. Ар зеӀом, Мерэм зыкъызэригъэзэкӀи, джуртыбзэкӀэ риӀуагъ: Раввуни! (Раввуним къикӀырэр «Дин ГъэсакӀор» ары.) 17 Укъызнэмыс, къыӀуагъ Исус, сыда пӀомэ Ты лъапӀэм ыдэжь джыри сыдэкӀоежьыгъэгопышъ ары, ау сшыхэм адэжь кӀуи, ахэмэ яӀу: «Сэ Сятэ шъори Шъуятэу, сэ си Тхьэу шъори шъуи Тхьэм ыдэжь сыдэкӀоежьыщт». 18 Ар къызыреӀом, Магдалэ къуаджэм щыщ Мерэм Исус игъогу рыкӀохэрэм адэжь кӀуи, Зиусхьаныр зэрилъэгъугъэри мы гущыӀэхэр къызэриӀуагъэхэри ариӀотэжьыгъ.
Исус игъогу рыкӀохэрэм зыкъызэраригъэлъэгъугъэр
19 А мэфэ дэдэм, тхьамафэм иапэрэ мафэу арыгъэ, пчыхьашъхьэм Исус игъогу рыкӀохэрэр унэ горэм щызэӀукӀагъэх. Джуртмэ ащыщынэщтыгъэхэти, унэу зыщызэӀукӀагъэм ипчъэхэр агъэпытагъэх. Джащыгъум Исус адэжь къакӀуи, пчэгум къиуцуи къариӀуагъ: Гупсэфыныгъэ шъуиӀэу шъопсэу! 20 Ар къызеӀом, ыӀэхэри ычапэри къаригъэлъэгъугъэх. Зиусхьаныр залъэгъум, игъогу рыкӀохэрэр гушӀуагъэх. 21 Гупсэфыныгъэ шъуиӀэу шъопсэу! къариӀуагъ Исус джыри зэ. Ты лъапӀэм сэ сыкъызэригъэкӀуагъэм фэдэу, сэри шъусэгъакӀо. 22 Ар къызеӀо ужым, игъогу рыкӀохэрэм япщи ариӀуагъ: Тхьэм Ыпсэ ЛъапӀэ шъугухэм арысэжъугъалъхь. 23 ПсэкӀодхэр шъо зыфэжъугъэгъурэм фэгъущтых, зы фэшъумыгъэгъурэми фэгъущтхэп.
«О уси Зиусхьан ыкӀи уси Тхь», Фомэ Исус зэрэриӀуагъэр
24 Исус игъогу рыкӀорэ нэбгырэ пшӀыкӀутӀумэ язэу Фомэу ТӀуазэкӀэ заджэхэрэр Исус къызэкӀом, адрэмэ ягъусагъэп. 25 Адрэ лӀыхэу Исус игъогу рыкӀохэрэм къыраӀуагъ: Зиусхьаныр тлъэгъугъэ. ГъучӀыӀунэ опӀэ гъуанэхэр Исус ыӀэмэ атесымылъагъохэу, сэ сӀэхъуамбэ а гъучӀыӀунэ уапӀэ гъуанэхэм атесымылъхьэу, сэ сӀи Исус ычапэ тесымылъхьэу сшӀошъы хъущтэп, ариӀуагъ Фомэ ахэмэ. 26 Мэфий зытешӀэм ыуж Исус игъогу рыкӀохэрэр джыри унэм исыгъэх, Фоми ягъусагъ. Пчъэхэр агъэпытагъэхэ пэтми, Исус къакӀуи, пчэгум къиуцуи къариӀуагъ: Гупсэфыныгъэ шъуиӀэу шъопсэу! 27 ЕтӀанэ Исус Фомэ риӀуагъ: О пӀэхъуамбэ мо къытелъхь, сӀэмэ къяплъ. Ши къэщэий, сэ счапэ къытелъхь, пшӀошъ мыхъоу ущымытэу, шӀошъхъуныгъэ зигъаӀ. 28 О уси Зиусхьан ыкӀи уси Тхь! Фомэ Исус риӀуагъ. 29 Сэ сыплъэгъугъэти, пшӀошъ хъугъэ, къыриӀуагъ Исус. Мы Ӏофхэр амылъэгъугъэхэ пэтми, шӀошъхъуныгъэ зиӀэ хъугъэхэр сыхьатмафэ ежьагъэх.
Мы тхылъыр зыфэттхыгъэр
30 Мы нэшэнэ гъэшӀэгъонышхохэм анэмыкӀэу Исус игъогу рыкӀохэрэм апашъхьэ мы тхылъым имытхэу, нэшэнэ гъэшӀэгъонышхо Ӏаджыхэри къыгъэлъэгъуагъэх. 31 Ау мы Ӏофхэр зыфэттхыгъэр Исусыр Христосэу Тхьэм Ыкъоу зэрэщытымкӀэ шӀошъхъуныгъэ шъуиӀэ хъуныр ары, а шӀошъхъуныгъэмкӀи Исус ыцӀэкӀэ мыкӀодыжьын щыӀэныгъэ шъуиӀэ хъуныр ары.
Исус игъогу рыкӀохэрэм ащыщхэу нэбгыриблымэ зыкъызэраригъэлъэгъугъэр
1 Ащ нэуж Тивериадэ зыцӀэ псыхъураем игъогу рыкӀохэрэм джыри зэ Исус зыкъаригъэлъэгъугъ. Ар зэрэхъугъэр мары: 2 Симон Петрэрэ, Фомэу ТӀуазэкӀэ заджэхэрэмрэ, Галилей хэкум ит Канэ къуаджэм щыщ Нафанаилрэ, Зеведей ыкъуитӀурэ, нэмыкӀ нэбгыритӀоу Исус игъогу рыкӀохэрэмрэ зэгъусагъэх. 3 Пцэжъыяшэ сыкӀощт, ыӀуи, Симон Петрэ адрэмэ ариӀуагъ. Тэри тыкъыбдэкӀощт, къыраӀожьыгъ ахэмэ. ЕтӀанэ ежьэхи, къуашъом итӀысхьэхи, кӀуагъэх, а чэщым зи къаубытыгъэп. 4 Нэф къызэшъым, Исус псыӀушъом Ӏутыгъ, ау ар зэрэИсусыр игъогу рыкӀохэрэм ашӀэжьыгъэп. 5 Ныбджэгъухэр, ариӀуагъ Исус, пцэжъые къэшъуубытыгъа? Хьау, зи къэтыубытыгъэп, къыраӀожьыгъ ахэмэ. 6 Къуашъом иджабгъу лъэныкъокӀэ хъытыур хажъудзи, къэшъуубытыщт, ариӀуагъ Исус. Ар къызеӀом, хъытыур хадзи, пцэжъыябэр хъытыум къызэрихьагъэм пае, хъытыур къыхахыжьын алъэкӀыгъэп. 7 Игъогу рыкӀохэрэм ащыщэу Исус анахьышӀоу ылъэгъурэм Петр риӀуагъ: Мыр Зиусхьаныр ары. Симон Петрэ ар зэрэЗиусхьаныр зызэхехым, ищыгъын кӀыӀутелъ зыщихыгъагъэти, ар къызэрищэкӀыжьи, псым зыхидзагъ. 8 Адрэ лӀыхэу Исус игъогу рыкӀохэрэм пцэжъыехэр зэрылъ хъытыур къыздалъэшъузэ, къуашъом исхэу къэсыгъэх, сыда пӀомэ псыушъом пэчыжьэу щытыгъэхэп, Ӏэнтэгъу шъитӀум фэдиз ныӀэп зэрэпэчыжьагъэхэр, 9 ПсыӀушъом къэзынэсхэм, шӀомыкӀ машӀор хэгъэнагъэу, ащ пцэжъые телъэу, хьалыгъуи бгъодэлъэу алъэгъугъ. 10 Джы къэшъуубытыгъэ пцэжъыехэм ащыщ къэшъухь, ариӀуагъ Исус. 11 Симон Петрэ къуашъом ыдэжь кӀуи, пцэжъые инхэр зэрыз хъытыур Ӏушъом къытырилъэшъуагъ. Пцэжъыехэу хъытыум илъыгъэхэр шъэрэ шъэныкъорэ щырэ хъущтыгъэ. Ащ фэдиз илъыгъэхэ пэтми, хъытыур зэӀэтхъыгъэп. 12 ШъукъакӀуи, пчэдыжьышхэ шъушӀы, ариӀуагъ Исус. О хэт ущыща? ыӀоу, игъогу рыкӀохэрэм ащыщэу зи Исус къеупчӀынэу тегушхуагъэп. Ар зэрэЗиусхьаныр ашӀагъ. 13 Исус къакӀуи, хьалыгъур къышти аритыгъ. Ащ фэдэу пцэжъыехэри аритыгъ. 14 Исус лӀагъэхэм къызахэтэджыкӀыжьы ужым, игъогу рыкӀохэрэм зыкъызэраригъэлъэгъугъэр мыр ящэнэрэу щытыгъ.
Исус Петрэ зэрэдэгущыӀагъэр
15 Зэшхэхэм ыуж, Исус Симон Петрэ риӀуагъ: Иуан ыкъо Симон, мыхэмэ сызэралъэгъурэм нахьи нахьышӀоу сыолъэгъуа? Ары, Зиусхьан, къыриӀожьыгъ Петрэ. ШӀу узэрэслъэгъурэр о ошӀэ. Сэ сишъынэхэр гъэхъух, риӀуагъ Исус. 16 Иуан ыкъо Симон, шӀу сыолъэгъуа? ыӀуи, ятӀонэрэу Исус Петрэ риӀуагь. Ары, Зиусхьан, къыриӀожьыгъ Петрэ. ШӀу узэрэслъэгъурэр о ошӀэ. Сэ симэлхэм Ӏахъоу афэхъу, риӀуагъ Исус. 17 Иуан ыкъо Симон, шӀу сыолъэгъуа? ыӀуи, ящэнэрэу Исус Петрэ риӀуагъ. «ШӀу сыолъэгъуа?» ыӀуи, ящэнэрэу Исус зэреупчӀыгъэм пае, Петрэ ыгу къеуи къыриӀожьыгъ: Зиусхьан, зэкӀэри о ошӀэ, шӀу узэрэслъэгъурэри ошӀэ. Симэлхэр гъэхъух, риӀуагъ Исус. 18 Шъыпкъэ дэдэр осэӀо, уикӀэлэгъу орорэу убгы бгырыпх иплъхьэти, узыфаем укӀощтыгъ. Ау жъы узыхъукӀэ, о пӀэхэр фэпщэйхэзэ, нэмыкӀ горэм бгырыпхыр убгы къырилъхьанышъ, уздэкӀонэу узыфэмыем уищэщт. 19 Исус ащ фэдэу зыфыриӀуагъэр лӀакӀэу Петрэ фэхъущтэу, Тхьэм щытхъушхо зэрыфишӀыщт шӀыкӀыр гуригъэӀоныр арыгъэ. Исус ар зыреӀом ыуж риӀуагъ: Сэ сауж къырыкӀу.
Исусрэ игъогу рыкӀохэрэм ащыщэу анахьышӀоу ылъэгъурэмрэ
20 Петрэ зыкъызызэрегъэзэкӀым, игъогу рыкӀохэрэм ащыщэу Исус анахьышӀоу ылъэгъурэр ауж итэу къакӀоу ылъэгъугъ. А лӀыр ары пчыхьэшъхьашхэм дэжь Исус къыбгъодэсэу Ӏэнэм пэсэу къезыӀогъагъэр: Зиусхьан, хэт тетыгъо зиӀэхэм уаӀэкӀэзыгъэхьащтыр? 21 Петрэ а лӀыр зелъэгъум, Исус къеупчӀыгъ: Зиусхьан, мы лӀыр сыдэу хъущт? 22 Сэ дунаем къэсэгъэзэжьыфэкӀэ, ар щыӀэнэу сыфаемэ, сыда уиӀофэу ащ хэлъыр? риӀожьыгъ Исус. О сауж къырыкӀу! 23 Арэущтэу, «А лӀэу Исус игъогу рыкӀорэр лӀэщтэп», зыӀорэ къэбар шӀошъхъуныгъэ зиӀэ къошхэм ахэхьагъ. АрышъхьакӀэ, «Ар лӀэщтэп», ыӀоу Исус Петрэ къыриӀогъагъэп. Исус къыриӀогъагъэр мары: «Сэ къэсэгъэзэжьфэкӀэ, ар щыӀэнэу сыфаемэ, сыд уиӀофэу ащ хэлъыр?» 24 А лӀэу Исус игъогу рыкӀорэр ары мы Ӏофхэр къэзыушыхьатырэри ахэр зытхыгъэри. Ащ къыушыхьатырэр зэрэшъыпкъэр тэ тэшӀэ. 25 Исус нэмыкӀ Ӏофыбэхэри ышӀагъэх. СызэрэгугъэрэмкӀэ, ахэр зэкӀэри зырызэу тхыгъэхэмэ, тхыгъэн фаеу тхылъхэр дунаем тефэщтгъэхэп. Амин.
Тхьэм ежь Ыпсэ ЛъапӀэ апостолхэм къафыригъэхынэу къызэригъэгугъагъэхэр
1,2 Феофил лъапӀ, апэм къыщегъэжьагъэу Тхьэм Исус уашъом зыдищэежьыгъэ мафэм нэсыфэ, Исус ышӀэгъэ Ӏоф пстэури, цӀыфхэм аригъэшӀэгъэ Ӏоф пстэури апэрэ тхылъэу сэ стхыгъэм ит. Исус, Тхьэм ежьыр уашъом дищэежьыным ыпэкӀэ, къыхихыгъэ апостолхэм Тхьэм Ыпсэ ЛъапӀэ ыкӀуачӀэкӀэ унашъохэр афишӀыгъэх. 3 Исус къин зещэчым ыуж, щэч хэмылъэу лӀагъэхэм къызэрахэтэджыкӀыжьыгъэр бэрэ афигъэшъыпкъэжьэу ахэ мэ заригъэлъэгъущтыгъ. Мэфэ тӀокӀитӀум къыкӀоцӀ апостолхэм бэрэ заригъэлъэгъущтыгъ, Тхьэм и Тетыгъошхо иӀофхэм яхьылӀагъэуи къадэгущыӀэщтыгъ. 4 Исус ахэмэ ягъусэ зэхъум, унашъо афишӀыгъ: Ерусалим къалэм шъудэмыкӀ, ау сэ зигугъу къышъуфэсшӀыгъэу, Ты лъапӀэм шъукъызэригъэгугъагъэм шъупаплъ; 5 сыда пӀомэ Иуан псыкӀэ цӀыфхэр ыумэхъыщтыгъэх, ау мэфэ заулэ зытешӀэкӀэ, Тхьэм ежь Ыпсэ ЛъапӀэкӀэ шъуиумэхъыщт.
Исус уашъом зэрэдэкӀоежьыгъэр
6 Зызэрэугъоихэм, апостолхэр Исус къеупчӀыгъэх: Зиусхьан, Израил ипачъыхьагъу мы мафэхэм зэтебгъэуцожьыщта? 7 Ты лъапӀэм итетыгъошхокӀэ уахътэхэуи лъэхъанэхэуи ыгъэнэфагъэхэр шъушӀэнхэ шъуфитэп, ариӀожьыгъ Исус. 8 Ау Тхьэм Ыпсэ ЛъапӀэ къызышъуфехыкӀэ, лъэкӀыныгъэ шъуиӀэ хъунышъ, Ерусалими, Иудей хэкуми зэкӀэ, Самарие хэкуми зэкӀэ, дунаем ыкъуапэ нэс шыхьат шъукъыщысфэхъущт. 9 Исус а гущыӀэхэр къызеӀохэм ыуж, ахэмэ алъэгъоу Тхьэм ар уашъом дищэежьыгъ. Зы ошъуапщэ горэ Исус къышъхьэщырыхьи, ежьыр амылъэгъужьы хъугъэ. 10 Исус уашъом зыдэкӀоежьым, апостолхэм анэхэр уашъом тырагъэдыкъагъэхэу, ошӀэдэмышӀэу лӀитӀу шъошэ фыжькӀэ фэпагъэхэу ахэмэ адэжь къэуцугъэх. 11 Шъо Галилей цӀыфхэр, къаГуагъ а лӀитӀумэ, сыд пае мыщ дэжьым шъущытэу уашъом шъудэплъыера? Мы Исусэу Тхьэм уашъом дищэежьыгъэр уашъом дэкӀоежьыгъэу зэрэшъулъэгъугъэм фэдэ къабзэу къехыжьыщт.
Апостолхэм ежьхэм ащыщ хъунэу Иудэ ычӀыпӀэкӀэ Матфый зэрэхахыгъэр
12 Ащ нэужым апостолхэр Елеон Ӏуашъхьэм ехыжьхи, Ерусалим агъэзэжьыгъ. Елеон Ӏуашъхьэр Ерусалим игъунэгъоу щыт, шэмбэт гъогум икӀыхьагъэ фэдизэу. 13 Къалэм дэхьажьхи, ахэр зэрыс унэ лъагэм дэкӀоежьыгъэх; мыхэр арыгъэх: Петрэ, Иуан, Якъубэ, Индрыс; етӀанэ Филипп, Фомэ, Варфоломей, Маттэ; Алфей ыкъо Якъуб, Симонэу зихэгъэгу ыгу етыгъэу фэлажьэщтыгъэр, Якъубэ ыкъо Иудэ. 14 Бзылъфыгъэ заулэ, Исус янэу Мерэм, Исус ышхэр ягъусэхэу, ахэмэ зэкӀэ зэдаштэу Тхьэм елъэӀу зэпытыщтыгъэх. 15 А мафэхэм ИсускӀэ шӀошъхъуныгъэ зиӀэ купэу нэбгыришъэрэ тӀокӀырэ фэдиз хъущтыгъэм Петрэ къыхэуцуи къыӀуагъ: 16 Сшыхэр, Тхьэм игущыӀэ тхыгъэхэм арыт гущыӀэхэу Тхьэм Ыпсэ ЛъапӀэ пачъыхьэ Даутэ ыгу къырилъхьэхи, Иудэ зыцӀэм ехьылӀагъэу къыригъэӀуагъэхэр къэкъыпкъэжьынхэ фэягъэх. А Иудэ ары Исус къэзыубытыгъэхэм гъогур языгъэлъэгъугъэр. 17 Ари тэ тщыщыгъ, мы Ӏофыми тигъусэу рылажьэщтыгъ. 18 Бзэджагъэу ышӀагъэм пае пкӀэу ратыгъэмкӀэ Иудэ хьасэ къыщэфыгъ. А хьасэм бгъэгукӀэ тефи, ыныбэ зэ гоути, икӀэтӀыйхэр зэкӀэ къикӀыгъэх. 19 Ерусалим дэс цӀыф пстэуми Иудэ къехъулӀагъэм икъэбар зэхахыгъ, абзэкӀи а хьасэм АкелдамэкӀэ еджэщтыгъэх. Ащ къикӀырэр «Лъыосэ Хьасэ». 20 ЕтӀанэ Петрэ къыпигъэхъожьыгъ: Сэбурым мыщ фэдэу ит: «Иунэ нэкӀ орэхъу. Зи ерэмыс». Мыщ фэдэуи ит: «Ащ ипшъэрылъ нэмыкӀ горэм ерэштэжьи, ычӀыпӀэ ерэуцожь». 21, 22 Арыти, Исус лӀагъэхэм къызэрахэтэджыкӀыжьыгъэр Иудэ ычӀыпӀэкӀэ нэмыкӀ горэм къыддиушыхьатын фае. А шыхьатыр Исус къытхахьэу, къытхэкӀэу зыщытыгъэ лъэхъанэм зэкӀэ, Иуан Исус зиумэхъыгъэ мафэм щегъэжьагъэу Тхьэм Исус уашъом дищэежьыфэ, тигъусагъэхэм ащыщын фае. 23 Арэущтэу нэбгыритӀу агъэуцугъ: Юсыфэу ВарсавэкӀэ заджэхэрэмрэ (ащ Иусти раӀуагъ) Матфыйрэ. 24,25 ЕтӀанэ Тхьэм елъэӀухэзэ аӀуагъ: Зиусхьан, о цӀыф пстэуми агухэм арылъыр ошӀэ. Мы нэбгыритӀумэ ащыщэу, апостолым иӀоф ышӀэнэу хэпхыгъэр къытэгъэлъэгъу; сыда пӀомэ Иудэ а Ӏофыр къыгъани, ежь фэшъошэ чӀыпӀэ кӀуагъэ. 26 ЕтӀанэ пхъэдз ашӀи, пхъэдзыр Матфый тефагъ. Арэущтэу апостол пшӀыкӀузымэ ягъусэу Матфыий апостолэу хъугъэ.
Тхьэм Ыпсэ ЛъапӀэ ИсускӀэ шӀошъхъуныгъэ зиӀэхэм къызэрафехыгъэр
1 Пэнтэкост зыцӀэ мэфэкӀ мэфэшхор къызэсым, шӀошъхъуныгъэ зиӀэхэр зэкӀэ зы чӀыпӀэм щытыгъэх. 2 ОшӀэ дэмышӀэу жьыбгъэшхоу къепщэрэм ибырсыр мэкъэшхо фэдэ макъэ уашъом къехи, унэу зэрысхэм зэкӀэ мэкъэшхор из хъугъэ. 3 МашӀом фэдэу бзэгухэр къафэлъэгъуагъэх. А бзэгухэм загощи, ахэмэ ащыщэу хэтрэ зы цӀыфым зы бзэгу къытенагъэу хъугъэ. 4 Тхьэм Ыпсэ ЛъапӀэ зэкӀэми агухэм инэу арылъ хъуи, хымабзэхэмкӀэ къэгущыӀэхэу аублагъ, Тхьэм Ыпсэ ЛъапӀэ къызэригъэгущыӀагъэхэм фэдэу. 5 Дунаем сыдрэ лъэпкъи щыщхэу Тхьэм ищынагъо зыгу илъ джуртхэр Ерусалим дэсыгъэх. 6 А бырсыр мэкъэшхор къызэхъум, зыфахьын амышӀэу, цӀыфыбэхэр зэхэлъэдагъэх; сыда пӀомэ хэти ежь ыбзэкӀэ ахэр къэгущыӀэхэу зэхахыгъэти ары. 7 Лъэшэу агъэшӀагъоу зэраӀожьыщтыгъ: Мы къэгущыӀэрэ лӀыхэр зэкӀэ Галилей хэкум щыщхэба? 8 Ащыгъум тэ тщыщэу, хэти ежь ыбзэкӀэ ахэр къэгущыӀэхэу зэхихын ылъэкӀэу сыдэущтэу хъура? 9 Парфие хэгъэгум щыщхэми, Мидие хэгъэгум щыщхэми, Елам хэгъэгум щыщхэми, Месопотамие хэгъэгум исхэми, хэкухэу Иудейрэ Каппадокиерэ арысхэми, хэкухэу Понтрэ Асиерэ арысхэми, 10 хэкухэу Фригиерэ Памфилиерэ арысхэми, Мысырымрэ Ливие хэгъэгум щыщ Кириние къалэм пэгъунэгъу лъэныкъомрэ арысхэми, Рим къэлэшхом къикӀыгъэхэми, 11 джуртхэми, прозелитхэми, Крит хыгъэхъунэм щыщхэми, арабхэми, тэ зэкӀэ тыбзэхэмкӀэ Тхьэм Ӏофышхохэу ышӀагъэхэм якъэбар ахэмэ къаӀуатэу зэхэтэхы. 12 ЦӀыф пстэуми агъэшӀагъоу, зыфахьын амышӀэу зэраӀожьыщтыгъ: Сыда щыщ мы къэхъугъэр? 13 Зыгорэхэри акӀэнакӀэхэу къаӀуагъ: Сэнэпс ӀэшӀум ыгъэутэшъуагъэх.
Пэнтэкост мэфэкӀ мэфэшхом Петрэ цӀыф купышхом хэтхэм апашъхьэ къызэрэщыгущыӀагъэр
14 Джащыгъум Петрэ апостол пшӀыкӀузымэ ягъусэу къэтэджи, ымакъэ къыӀэти, гущыӀэу къыублагъ. Сшы джуртхэмрэ, Ерусалим дэсхэмрэ, мыр зэжъугъашӀэ, къасӀохэрэми шъукъядэӀу. Ӏ5 Шъо шъузэрэгугъэрэм фэдэу мы лӀыхэр утэшъуагъэхэп, сыда пӀомэ пчэдыжьым сыхьатыр бгъу хъугъэ ныӀэп. 16 Ау мыщ дэжьым къыщыхъугъэр пегъымбар Иоил Ӏофэу мырэущтэу зытегущыӀагъэр ары: 17 «Тхьэм мырэущтэу еӀо: Дунаем иаужырэ мафэхэм сэ Спсэ ЛъапӀэ цӀыф пстэуми къафезгъэхыщт. СигущыӀэхэр шъо шъукъохэмрэ шъупхъухэмрэ агухэм къарыслъхьанхэшъ, къязгъэӀощтых. ШъуикӀалэхэми Ӏофхэр къафэзгъэлъэгъощтых, шъуинахьыжъхэми пкӀыхьапӀэхэр язгъэлъэгъущтых. 18 А мафэхэм къысфэлажьэрэ цӀыфхэм, хъулъфыгъэми бзылъфыгъэми, сэ Спсэ ЛъапӀэ къафезгъэхыщт, сигущыӀэхэри ахэм агухэм къарыслъхьанхэшъ,къязгъэӀощтых. 19 Уашъом Ӏофышхо гъэшӀэгъонхэр къыщызгъэ лъэгъощтых, чӀылъэми нэшэнэ гъэшӀэгъонышхохэр къыщызгъэл ъэгъощтых, лъы, машӀо, Ӏугъошхо къэхъущтых. 20 Зиусхьаным имэфэшхоу щытхъушхо зиӀэр къэкӀоным ыпэкӀэ, тыгъэри шӀункӀ къэхъущт, мазэри лъым фэдэу хъущт. 21 Хэт щыщми Зиусхьаныр къыдэӀэпыӀэнэу елъэӀурэри мыкӀодэу къэнэжьыщт». 22 Ащ нэужым Петрэ джыри ипсалъэ къыпидзэжьыгъ: Шъо, Израил лӀыхэр, мы гущыӀэхэм шъукъядэӀу: Тхьэм Назарет щыщ Исус ежьым зэрэщыщыр шъоркӀэ къыгъэшъыпкъэжьыгъ. Тхьэм ар къызэригъэшъы пкъэжьыгъэр Исус лъэкӀьгаыгъэ зыхэлъ Ӏофышхохэмрэ Ӏофышхо гъэшӀэгъонхэмрэ шъуадэжь зэрэщыригъэшӀагъэхэри, нэшэнэ гъэшӀэгъонышхохэр зэрэщыригъэгъэлъэгъуагъэхэри ары. 23 Тхьэм гухэлъэу ыухыгъэм тетэуи, Тхьэм ар къэхъуным ыпэ къэхъунэу зэришӀэщтыгъэм фэдэуи, Исус къышъуӀэкӀэхьагъ. ЦӀыф бзаджэхэм шъо къащым ряжъугъэӀулӀи яжъугъэукӀыгъ. 24 Ау Тхьэм ар лӀэныгъэм икъин щэчыныгъэм хищыжьыгъэу, лӀагъэхэм къахигъэтэджыкӀыжьыгъ; сыда пӀомэ лӀэныгъэм ар ыӀыгъынэу хъущтыгъэп. 25 Пегъымбар Даутэ Исус ехьылӀагъэу мырэущтэу къыӀуагъ: «Зиусхьаныр сапашъхьэ итэу слъэгъу зэпытыгъ. ЗыкӀи симыгъэгумэкӀыным пае, ар сиджабгъукӀэ къызгот. 26 Арышъ, сыгу мэгушӀо, сыжэбзэгуи мэгушӀо. Спкъи гугъэпӀэшӀу иӀэу псэфыжьыщт, 27 сыда пӀомэ лӀагъэхэм ядунае сэ спсэ къыщыбгъэнэжьыщтэп. Къыпфэлажьэрэ цӀыф лъапӀэм ихьадэ бгъэшъущтэп. 28 ЩыӀэныгъэм ыдэжь кӀорэ гъогухэр сэбгъэшӀагъэх. Уадэжь сэ сыщыбгъэгушӀожьыщт». 29 Сшыхэр, тятэжъышхо Даутэ ехьылӀагъэу гушхоныгъэкӀэ сыкъэгущыӀэн сыфит. Ар дунаем ехыжьыгъагъ ыкӀи чӀалъхьажьыгъагъ, непэ къэсыфэ икъэунэ тадэжь щыӀ. 30 Даутэ пегъымбарэу щытыгъ, ащи ышӀэщтыгъ, Христосэу ежь Даутэ къытехъукӀынэу щытыгъэ цӀыфхэм ащыщыр ежь Даутэ ипачъыхьэ тӀысыпӀэ тыригъэтӀысхьанэу Тхьэм гущыӀэ пытэкӀэ къызэригъэгугъагъэр. 31 Арышъ, Даутэ къэхъущтыр ешӀэти, Христос къытегущыӀэу «Тхьэм ар лӀагъэхэмэ ядунае къыщигъэнэжьыщтэп», ыкӀи «ащ ихьадэ ыгъэшъущтэп» ыӀуи къызеӀом, зыфиӀуагъэр Христос лӀагъэхэм къахэтэджыкӀыжьынэу зэрэщытыгъэр ары. 32 А Исус ары Тхьэм лӀагъэхэм къахигъэтэджыкӀыжьыгъэр, а Ӏофыми тэ зэкӀэри тыришыхьат. 33 Тхьэм Исус уашъом дищэежьи, иджабгъукӀэ зыгуегъэтӀысхьэм ыуж, Ты лъапӀэм ежь Ыпсэ ЛъапӀэу къызэригъэгугъагъэр къыритыгъ, зэрэшъулъэгъурэм ыкӀи зэрэзэхэшъухырэм фэдэуи Исус Тхьэм Ыпсэ ЛъапӀэ къытфыригъэхыгъ. 34 Сыда пӀомэ Даутэ уашъом дэкӀоежьыгъэп, ау мырэущтэу къыӀуагъ: «Тхьэу Зиусхьаным сэ си Зиусхьан къыриӀуагъ: 35 О уипыихэр лъэгукӀэтын пфэсшӀыхэфэ, сэ сиджабгъукӀэ къызготӀысхь». З6 Арышъ, Израил цӀыф пстэуми мыр яшъыпкъэу арэшӀ: Мы Исусэу шъо къащым ешъуӀулӀыгъэр, Тхьэм ыкӀи Зиусхьанэу ыкӀи Христосэу къыгъэхъугъ. 37 ЦӀыфхэм ар зызэхахым, агу хэуӀагъ. Ахэмэ Петрэрэ адрэ апостолхэмрэ къараӀуагъ: Тшыхэр, сыда тэ тшӀэн фаер? 38 ШъуипсэкӀодхэм шъуафыкӀэгъожьи, Исус Христос ыцӀэкӀэ шъо пстэуми зытэжъугъэумэхъ, Тхьэм шъуипсэкӀодхэр къышъуфигъэгъунхэм пае, ариӀожьыгъ Петрэ. Ащыгъум Тхьэм итынэу ежь Ыпсэ ЛъапӀэ шъугухэм къарилъхьащт. 39 Тхьэм ежь Ыпсэ ЛъапӀэ зыфыригъэхынэу къыгъэгугъагъэхэр шъори, шъуибынхэри, чыжьэу щыӀэ цӀыфхэри зэкӀэ цӀыфхэу ежь ибын хъунхэу Зиусхьанэу ти Тхьэ зэкӀэ заджэхэрэр ары. 40 НэмыкӀ гущыӀабэкӀэ Петрэ ахэмэ афигъэпытэу ялъэӀугъ: Мы лъэпкъ къуанчэм Тхьэм зыхежъугъэщыжьи, шъумыкӀодэу зыкъежъугъэгъэнэжь. 41 Арэущтэу Петрэ игущыӀэхэр зыштагъэхэм зарагъэумэхъыгъ. А мафэм шӀошъхъуныгъэ зиӀэхэм япчъагъэ минищ фэдиз хэхъуагъ. 42 Емызэщхэу шӀошъхъуныгъэ зиӀэ хъугъэ цӀыфхэм апостолхэм Тхьэм игущыӀэхэр зарагъэгъашӀэхэу зэпытыщтыгъэх, зэкъошхэм фэдэуи зэхэтыгъэх, хьалыгъу зэгуачы зэпытыщтыгъ, Тхьэми елъэӀу зэпытыщтыгъэх.
ШӀошъхъуныгъэ зиӀэхэм язэкъошныгъ
43 Апостолхэм Ӏофышхо гъэшӀэгъон Ӏаджыхэр ашӀагъэхэти, нэшэнэ гъэшӀэгъонышхо Ӏаджыхэри къагъэлъэгъуагъэхэти, цӀыфхэм зэкӀэ агухэм щынагъо арылъ хъугъэ. 44 ШӀошъхъуныгъэ зиӀэхэр зэкӀэ зэгъусагъэх, яӀэри зэкӀэ язэфэдагъ. 45 Ямылъкухэмрэ яхьапщыпхэмрэ ащэхи, къыкӀэкӀыгъэм щыщ хэти ищыкӀагъэм фэдиз ратыгъ. 46 Зыгузыпсэу мафэ къаси Тхьэм иунэшхо щызэӀукӀэ зэпытыщтыгъэх. Яунэхэми хьалыгъур щызэгуачыщтыгъ, гушӀохэу агу шъыпкъэхэкӀэ зэдашхэщтыгъэх. 47 Тхьэм ищытхъу ашӀыщтыгъ, цӀыф пстэуми агуи яӀущтыгъ. Зиусхьаным цӀыфхэу мыкӀодхэу къыгъэнэжьхэрэмкӀэ шӀошъхъуныгъэ зиӀэхэм япчъагъэ мафэ къэси хигъахъощтыгъ.
Петрэрэ Иуанрэ Тхьэм иунэшхо икъэлапчъэ дэжь зылъакъохэм атеуцон зымылъэкӀырэ лӀы горэ зэрэщагъэхъужьыгъэр
1 Зы мафэ горэм щэджэгъоужым цӀыфхэр Тхьэм зыщелъэӀурэ сыхьат щым дэжь Петрэрэ Иуанрэ Тхьэм иунэшхо кӀощтыгъэх. 2 Зы лӀы горэ, къызыхъугъэм щегъэжьагъэу ылъакъохэм атеуцон ымылъэкӀэу, Тхьэм иунэшхо икъэлапчъэхэм ащыщхэу «Къэлапчъэ дах» зыфаӀорэм къахьыщтыгъ. Ар мафэ къэси къахьыти, Тхьэм иунэшхо чӀахьэхэрэм сэдакъэкӀэ ялъэӀунэу а къэлапчъэм дэжь агъэтӀысыщтыгъ. 3 А лӀым Петрэрэ Иуанрэ Тхьэм иунэшхо чӀахьэхэзэ зелъэгъухэм, ялъэӀугъ: Сэдакъэ къысэшъут! хэтэджыкӀьгжьыгъэр агу къагъэкӀыжьызэ, ИсускӀэ шӀошъхъуныгъэ зиӀэхэр зэдашхэх. 4 Петрэрэ Иуанрэ анэхэр а лӀым тырагъэдыкъагьэхэу, еплъыхэзэ, Петрэ къыӀуагъ: Мо зэ къытэплъ! 5 Зыгорэ къыратынкӀэ ащыгугъэу а лӀыр афыдэплъыягъ. 6 Дышъи тыжьыни сэ зи сиӀэп, къыӀуагъ Петрэ, ау сиӀэр осэты: Назарет къалэм щыщ Исус Христос ыцӀэкӀэ унашъо пфэсэшӀы, къэтэджи, къэкӀухь! 7 ЕтӀанэ Петрэ а лӀым ыӀэ джабгъу къыубыти къыгъэтэджыгъ. Ардэдэм а лӀым ылъакъохэмрэ ылъэгуанджэхэмрэ кӀуачӀэ къахэхьажьыгъ. 8 Ар къызщылъэти, ылъакъохэм атеуцожьи, къыкӀухьэу ыублагъ. ЕтӀанэ Петрэрэ Иуанрэ ягъусэу Тхьэм иунэшхо чӀахьи, къыкӀухьэу, дэпкӀаезэ Тхьэм щытхъу фишӀыгъ. 9 ЦӀыф пстэуми ар къыкӀухьэу, Тхьэм щытхъу фишӀэу алъэгъугъ. 10 Залъэгъум, Тхьэм иунэшхо «и Къэлапчъэ дах» зыфаӀорэм ыдэжь лъэӀуакӀоу щысыщтыгъэр арэу цӀыфхэм къашӀэжьыгъ, агучӀи изыгъэу а лӀым къехъулӀагъэр лъэшэу агъэшӀэгъуагъ.
Петрэ цӀыф купышхом ыпашъхьэ къызэрэщыгущыӀагъэр
11 ЛӀэу агъэхъужьыгъэр Петрэрэ Иуанрэ ауж имыкӀэу, цӀыфхэм зэкӀэ лъэшэу агъэшӀагъоу пачъыхьэ Сэлмэн ыцӀэкӀэ заджэхэрэ щагоу шъхьэ зытелъ пкъэу къэлапчъэхэр зиӀэм ыдэжь чъэхи, а нэбгырищым адэжь къыщызэрэугъоигъэх. 12 Петрэ ар зелъэгъум, цӀыфмэ ариӀуагъ: Израил лӀыхэр, сыд пае ар жъугъэшӀагъора? Сыд пае ащ фэдизэу тэ шъукъытэплъыра? Тэртэрэу лъэкӀыныгъэшхо тиӀэу, е Тхьэр инэу тэ тэгъэлъапӀэшъ, мы лӀым зекӀон едгъэлъэкӀыгъэу шъогугъа? 13 Мы лӀым къехъулӀагъэмкӀэ Ибрахьимэ, Исхьакъ, Якъубэ я Тхьэу тятэжъышхохэм я Тхьэ цӀыфхэм апашъхьэ Ыкъо Исус ищытхъушхо къыщигъэлъэгъуагъ. Ар тетыгъо зиӀэхэм шъо аӀэкӀэжъугъэхьагъ. Ӏэшъхьэтет Пилат ар шъхьафитэу къытӀупщыжьынэу тыриубытагъэ пэтми, ащ ыпашъхьэ Исус щызэшъупэсыгъэп. 14 ЦӀыф ЛъапӀэу ыкӀи Зафэр зэшъупэсыгъэп, зы укӀакӀо горэ шъхьафитэу къышъуфитӀупщыжьынэуи Ӏэшъхьэтет Пилат шъуелъэӀугъ. 15 ЩыӀэныгъэ шъыпкъэр цӀыфмэ язытырэр арэущтэу шъуукӀыгъэ, ау Тхьэм ар лӀагъэхэм къахигъэтэджыкӀыжьыгъ. Тэри а Ӏофым тыришыхьат. 16 Мы лӀэу шъулъэгъурэм ыкӀи шъушӀэрэм Исус ыцӀэ зэрэщыгутъыгъэм пае, кӀуачӀэ иӀэ хъугъэ. Исус ыцӀэрэ Исус ыдэжь къикӀырэ шӀошъхъуныгъэмрэ ары шъо пстэуми шъуапашъхьэ мы лӀыр щызыгъэхъужьыпагъэр. 17 —Ащ нэмыкӀэу, сшыхэр, шъори шъуитхьаматэхэми Исус ешъушӀагъэр зэхэшъумышӀыкӀэу зэрэшъушӀагъэр сэшӀэ. 18 Тхьэм пегъымбар пстэуми агухэм къарилъхьи, къаригъэӀуагъ, ежь и Христос къиныбэ ыщэчын фаеу зэрэщытыщтыр, Тхьэм зэриухыгъэм тетэуи хъутъэ. 19 Арыти, Тхьэм шъуипсэкӀодхэр къышъуфигъэгъунхэм пае, ахэмэ шъуафыкӀэгъожьи, Тхьэм игъогу шъутехь. 20 Ащыгъум шъугухэм зызыщагъэпсэфыжьын лъэхъанэхэр Зиусхьаным ыдэжь къикӀыщтых, Тхьэм Христосэу къышъуфигъэнэфэгъэ Исуси къыгъэкӀожьыщт. 21 Тхьэм зэпстэури тэрэзэу зэтригъэуцожьыфэ, Христос уашъом щыӀэн фае, Тхьэм ипегъымбар лъапӀэхэм агухэм къарилъхьи, къызэраригъэӀуагъэм тетэу. 22 ГущыӀэм пае, пегъымбар Мусэ къыӀуагъ: «Зиусхьанэу шъуи Тхьэм шъушыхэм ащыщэу, сэ сфэдэ пегъымбар горэ къыгъэкӀощт. Ащ къышъуиӀощт пстэуми шъуядэӀун фае. 23 А пегъымбарым къыӀохэрэм хэт щыщми ямыдэӀурэр лъэпкъым хэкӀынышъ, кӀодыжьыщт». 24 Адрэ пегъымбар пстэуми, пегъымбар Самуел щегъэжьагъэу ащ къыкӀэлъыкӀуагъэхэми, пегъымбархэу Тхьэм игущыӀэхэр зыгу къырилъхьэхи, къызэригъэӀогъэ пстэуми мы мафэхэм ягугъу ашӀыщтыгъ. 25 Пегъымбархэм ажэкӀэ Тхьэм цӀыфхэр къызэригъэгугьэгъэ Ӏофхэр зыгъотхэрэр шъоры, Тхьэм ежьыррэ шъуятэжъышхохэмрэ азыфагу дилъхьэгъэ зэзэгъыныгъэм иӀэхьышӀуи зыгъотхэрэр шъоры, Тхьэм пегъымбар Ибрахьимэ зэрэриӀуагъэм тетэу, «О къыптехъукӀыщт цӀыфым дунаем ылъэпкъ пстэуми сынэшӀу щыфэныгъэр анигъэсынэу сшӀыщт». 26 Тхьэм ежь Ыкъуи къызегъэлъагъом, лъэпкъхэм апэу ежь Ыкъо къызфигъэкӀуагъэр шъоры, шъуащышу хэти шъуащыщэу хэти игъогу бзаджэ тырыригъэгъэкӀэу, ынэшӀу къыщыригъэфэным пае.
Джурт тхьаматэхэм Петрэрэ Иуанрэ Тхьэмэтэ Хэсэшхом ыпашъхьэ зэрэращагъэхэр
1 Петрэрэ Иуанрэ цӀыфхэм адэгущыӀэхэзэ, дин пащэхэр, Тхьэм иунэшхо иухъумакӀохэм ятхьаматэ, саддукейхэр лъэшэу губжыгъэхэу итӀум къабгъодэхьагъэх; 2 сыда пӀомэ Петрэрэ Иуанрэ цӀыфхэм Тхьэм игущыӀэхэр арагъашӀэхэу, Исус лӀагъэхэм къызэрахэтэджыкӀыжьыгъэм пае, лӀагъэхэр къызэрэтэджыжьыщтхэр агъэӀущтыгъэти ары. 3 Арэущтэу ахэмэ Петрэрэ Иуанрэ аубытхи, пчыхьашъхьэ хъугъэти, ятӀонэрэ мафэм нэсы хьапсым чӀагъэсыгъэх. 4 Петрэрэ Иуанрэ къэбарэу агъэӀурэр зэхэзыхыгъэхэм ащыщхэу бэмэ ИсускӀэ шӀошъхъуныгъэ яӀэ хъугъэ. Ахэмэ япчъагъэ нэбгырэ минитф фэдиз хъугъэ. 5 ЯтӀонэрэ мафэм джурт тхьаматэхэр, нахьыжъхэр, Тэурат егъэджэкӀо пащэхэр Ерусалим щызэӀукӀагъэх. 6 Дин пэщэшхоу Аннэ зыцӀэр ащ дэжьым щыӀагъ, етӀанэ Кайафэ, Иуан, Александр, нэмыкӀ лӀыхэу дин пэщэшхом иунагъо щыщхэр ащ дэжьым щыӀагъэх. 7 Ахэмэ Петрэрэ Иуанрэ утыгум къыращэхи яупчӀыгъэх: Сыд фэдэ кӀуачӀэкӀэ, е хэт ыцӀэкӀэ а лӀыр хъужьыгъа? 8 Ар зэӀом, Тхьэм Ыпсэ ЛъапӀэ Петрэ ыгу инэу илъ хъуи ариӀуагъ: ӀПъо тэ тлъэпкъ итхьаматэхэри, нахьыжъхэри! 9 ЛӀэу зылъакъохэм атеуцон зымылъэкӀэу щытыгъэм тэ шӀоу фэтшӀагъэм иӀоф шъухаплъэзэ, «Сыдэущтэу ар хъужьыгъа?» шъуӀозэ, непэ шъукъытэупчӀы. 10 Арышъ, шъо зэпстэуми, Израил лъэпкъым зэкӀэ мыр зэжъутъашӀэ: Назарет къалэм щыщ Исус Христос ыцӀэ ыкӀуачӀэ ары мы лӀыр зыгъэхъужьыпагъэр, ащ паий ар шъуапашъхьэ ит. Исус ары къащым тешъуӀулӀагъэр, ау Тхьэм ар лӀагъэхэм къахигъэтэджыкӀыжьыгъ. 11 Ежьыр ары «Унэ зышӀыхэрэм зэрамыпэсэу чӀадзыжьыгъэ мыжъоу мыжъо лъэпсэ дэдэу унэм фэхъугъэр». 12 ЦӀыфхэр мыкӀодхэу къэзыгъэнэжьырэ закъор Исус ары. Ащ ыцӀэ нэмыкӀэу, Тхьэм уашъом ычӀэгъ чӀэт цӀыфхэм аритыгъэу зи щыӀэп тымыкӀодэу тыкъэзыгъэнэжьын зылъэкӀынэу. 13 Джурт тхьаматэхэм Петрэрэ Иуанрэ ягушхоныгъэ залъэгъум, гъэсэныгъэ зимыӀэ лӀы къызэрыкӀохэу зэрэщытхэми гу зылъатэм, агъэшӀэгъуагъ, Исус зэригъусагъэхэри къашӀэжьыгъ. 14 Ау а лӀэу агъэхъужьыгъэр ахэмэ ягъусэу ащ дэжьым щытэу алъэгъугъэти, ащ нахьыбэ араӀожьын алъэкӀыгъэп. 15 Арэущтэу зэхъум, Синедрион хасэ унэм Петрэрэ Иуанрэ чӀагъэкӀыжьхи, ежьхэр зэупчӀыжьхэу аублагъ. 16 ЗэупчӀыжьхэзэ мырэущтэу зэраӀожьыгъ: Мы лӀитӀум сыда ятшӀэщтыр? Ерусалим дэс цӀыф пстэуми ахэмэ Ӏофышхо гъэшӀэгъон зэрашӀагъэр ашӀэ. «Ӏофышхо ашӀагъэп», тэ тӀо хъущтэп. 17 Ау хъугъэм икъэбар ащ нахьи нахьыбэу цӀыфмэ ахэмыхьаным пае, «Исусым ыцӀэкӀэ зы цӀыф горэм шъудэгущыӀэмэ, къины бэ шъодгъэщэчыщт», тӀонышъ, мы лӀыхэм афэдгъэпытэн фае. 18 ЕтӀанэ Петрэрэ Иуанрэ хэсэ унэм къычӀащэжьхи, Исус ыцӀэкӀэ зи къамыӀожьынэуи, цӀыфхэм зи арамыгъэшӀэжьынэуи афагъэпытагъ. 19 Ау Петрэрэ Иуанрэ ахэмэ араӀожьыгъ: Тхьэм тедэӀуным нахьи, шъо тышъодэӀуныр ТхьэмкӀэ тэрэза, мытэрэза, шъоршъорэу хьыкум тешъушӀыхьан фае. 20 Ау тэ Ӏофхэу тлъэгъугъэхэмрэ зэхэтхыгъэхэмрэ къэтымыӀо хъущтэп. 21 ЕтӀанэ джурт тхьаматэхэм, «ШъукъытэмыдэӀумэ, къиныбэ шъодгъэщэчыщт», аӀуи, джыри зэ афагъэпыти къатӀупщыжьыгъэх. Ахэмэ къин арагъэщэчынэу ушъхьагъу агъотыгъэп, сыда пӀомэ а хъугъэшӀагъэм пае, цӀыф пстэуми Тхьэм щытхъу фашӀыщтыгъэти ары. 22 Мы Ӏофышхо гъэшӀэгъонымкӀэ апостолхэм агъэхъужьыгъэ лӀым ыныбжь илъэс тӀокӀитӀум ехъущтыгъ.
ШӀошъхъуныгъэ зиӀэхэр Тхьэм зэрелъэӀугъэхэр
23 Петрэрэ Иуанрэ къызатӀупщыжьхэм, ягъусэхэм адэжь агъэзэжьи, дин пэщэшхохэмрэ нахьыжъхэмрэ къараӀуагъэр аӀотэжьыгъ. 24 Ахэмэ ар зызэхахым, зэдаштэу амакъэ инэу къаӀэти, Тхьэм елъэӀугъэх: Зиусхьан, уашъори, чӀыри, хыри, ахэмэ ащыӀэ пстэури къэзыгъэхъутъэр оры. 25 Тятэжъышхо Даутэ ыжэкӀэ о укъэгущыӀагъ. Ар о къыпфэлажьэу щытыгъ, о Ппсэ ЛъапӀэ илъэкӀыныгъэкӀи мы гущыӀэхэр ащ ебгъэӀуагъэх: «Хымэ лъэпкъхэр сыда зыкӀэгубжыхэрэр? ЦӀыфхэм пкӀэ зимыӀэ гухэлъхэри сыда зыфыряӀэр? 26 Дунаем ипачъыхьэхэм зыкъаӀэтыгъ, пащэхэри зэрэугъойхи, Зиусхьанэу Тхьэмрэ ежь и Христосэу дагъэ зыщи фагъэмрэ апэуцунхэу зэгурыӀуагъэх». 27 А гущыӀэхэр шъыпкъэх, сыда пӀомэ пщы Иродрэ Ӏэшъхьэтет Понтый Пилатрэ хымэ лъэпкъхэмрэ Израил цӀыфхэмрэ ягъусэхэу, о Пкъо лъапӀэ Исусэу дагъэ зыщыпфагъэм пэуцунхэу мы къалэм щызэрэугъоигъэх. 28 О пкӀочӀэшхокӀи, уигухэлъ тетэуи хъун фэегъэ Ӏофхэу ыпэкӀэ бгъэнэфагъэхэр ахэмэ агъэцэкӀагъэх. 29 Джы, Зиусхьан, «ШъукъытэмыдэӀумэ, къиныбэ шъодгъэщэчыщт», аӀозэ, ахэмэ къызэраӀорэм еплъ, уигущыӀэхэр гушхоныгъэ пстэумкӀи дгъэӀунхэу тэ, къыпфэлажьэхэрэм, кӀуачӀэ къытэт. 30 Арышъ, Пкъо лъапӀэу Исус ыцӀэкӀэ сымаджэхэр бгъэхъужьынхэуи, нэшэнэ гъэшӀэгъонышхохэр къэбгъэлъэгъонхэуи, Ӏофышхо гъэшӀэгъонхэр пшӀэнхэуи о пӀэ къэщэй. 31 Тхьэм зелъэӀухэ ужым, чӀыпӀэу зыщызэрэугъоигъэхэр къэсысыгъ. Тхьэм Ыпсэ ЛъапӀэ зэкӀэмэ агухэм инэу арылъ хъуи, гушхоныгъэкӀэ Тхьэм игущыӀэхэр агъэӀоу рагъэжьагъ.
ШӀошъхъуныгъэ зиӀэхэм мылъкоу яӀэр язэрэзэфэдагъэр
32 ИсускӀэ шӀошъхъуныгъэ зиӀэхэр зэкӀэ зыгузыпсэу щытыгъэх. Зыми имылъку ехьылӀагъэу «Мыр сэсый» ыӀуагъэп, ар зэкӀэ язэфэдагъ. 33 Апостолхэр Исус лӀагъэхэм къызэрахэтэджыкӀыжьыгъэм лъэкӀыныгъэшхокӀэ шыхьат фэхъугъэх, Тхьэм ынэшӀуи зэкӀэми инэу къащифэу щытыгъ. 34 ЩыкӀагъэ зиӀэ цӀыф зи ахэтыгъэп; сыда пӀомэ, е чӀыгу, е унэ зиӀэ пстэуми ахэр ащэжьхэти, ахъщэу къыкӀэкӀыгъэр къахьыти, 35 апостолхэм апашъхьэ ралъхьэщтыгъ. А ахъщэм щыщэу апостолхэм хэти ищыкӀагъэм фэдиз ратыщтыгъ. 36 Кипр хыгъэхъунэм щыщэу, Левый унэгъо лъэпкъым щыщэу лӀы горэ щыӀагъ. А лӀым Юсыф ыцӀагъ. Апостолхэр ащ ВарнавэкӀэ еджэщтыгъэх. (Варнавэ зыфаӀорэ лӀыцӀэм къикӀырэр «ЦӀыфхэр Зыгъэгушхорэр» ары. 37 Ащ хьасэу иӀагъэр ыщи, ахъщэр къыхьи, апостолхэм апашъхьэ къырилъхьагъ.
Ананыйрэ Сапфирэрэ якъэбар
1 Ананый ыцӀэу, лӀы горэ щыӀагъ. Ежьымрэ ишъхьэгъусэу Сапфирэрэ мылъку горэ ащагъ. 2 Шъузым ышӀэзэ, Ананый мылъкум ыуасэ щыщ ежьым пае зы тӀэкӀу хихи, къэнагъэр ыхьи, апостолхэм апашъхьэ рилъхьагъ. 3 Ананый, къыӀуагъ Петрэ, Тхьэм Ыпсэ ЛъапӀэ пцӀы фэуусынэуи, чӀыгум ыуасэ щыщ ощ пае хэпхынэуи шэйтаным угу къырилъхьанэу сыдэущтэу хъугъа? 4 ЧӀыгур пщэным ыпэкӀэ, оуиеу щытыгъэба? Зыощэм ыуж, ахъщэм узыфаер епшӀэн плъэкӀыщтыгъэба? Мыщ фэдэу пшӀэнэу сыд пае угу иплъхьагъ? ПцӀы зыфэуусыгъэр цӀыфхэр арэп, Тхьэр ары нахь. 5 Ананый а гущыӀэхэр зызэхеххэм, зэхафи, ыпсэ хэкӀыгъ. ХъутъэшӀагъэр зэхэзыхыгъэхэр зэкӀэ щынэгъошхом хэфагъэх. 6 КӀэлэ ныбжьыкӀэ куп къакӀохи, ихьадэ чэфын ращэкӀи, унэм рахыжьи, къэм чӀалъхьажьыгъ. 7 Сыхьэтищ фэдиз тешӀагъэу, къэхъугъэр ымышӀэу Ананый ишъхьэгъусэ унэм къихьагъ. 8 КъысаӀу, риӀуагъ Петрэ, чӀыгур мыщ фэдиз ахъщэкӀэ шъущагъа? Ары, ащ фэдиз ахъщэр ары зэрытщагъэр, къыӀуагъ бзылъфыгъэм. 9 Сыд пае Зиусхьаным Ыпсэ ЛъапӀэ жъугъэунэфынэу шъузэрэгъэгугъэжьыгъа? риӀуагъ Петрэ. Еплъ, уилӀ ихьадэ къэм чӀэзылъхьажьыгъэхэр пчъэӀупэм Ӏутых, о уихьади рахыжьыщт. 10 Ардэдэм бзылъфыгъэр Петрэ ылъакъохэм адэжь щызэхафи, ыпсэ хэкӀыгъ. КӀэлэ ныбжьыкӀэхэр къызехьэхэм, ари лӀагъэу къагъотыгъ. Ихьадэ унэм рахыжьи, дахи, ишъхьэгъусэ бгъодэлъэу чӀалъхьажьыгъ. 11 Чылыс зэӀукӀэм щыщ пстэури хъугъэшӀагъэхэр зэхэзыхыгъэ пстэури щынэгъошхом хэфагъэх.
Апостолхэм нэшэнэ гъэшӀэгъонышхо Ӏаджи зэрагъэлъэгьуагьэмрэ Ӏофышхо гъэшӀэгъон Ӏаджи зэрашӀагъэмрэ
12 Апостолхэм цӀыфхэм апашъхьэ нэшэнэ гъэшӀэгъонышхо Ӏаджи къыщагъэлъагъощтыгъ, Ӏофышхо гъэшӀэгъон Ӏаджи щашӀэщтыгъ. ШӀошъхъуныгъэ зиӀэ пстэуми зэдаштэу, пачъыхьэ Сэлмэн ыцӀэкӀэ заджэхэрэ щагоу шъхьэ зытелъ пкъэу къэлапчъэхэр зиӀэм щызэӀукӀэщтыгъэх. 13 ЦӀыфхэр шӀошъхъуныгъэ зиӀэхэм ахэхьанхэу загъэгушхощтыгъэп, ау лъытэныгъэ афыряӀэу щытыгъ. 14 Ащ имызакъоу, цӀыф нахьыбэ, хъулъфыгъэхэми, бзылъфыгъэхэми, ЗиусхьанымкӀэ шӀошъхъуныгъэ яӀэ хъоу, агохьэ зэпытыщтыгъэх. 15 Арышъ, Петрэ зыблэкӀыкӀэ, зи мыхъуми, иныбжьыкъу сымаджэхэм ащыщхэм къатыридзэным пае, цӀыфхэм ясымаджэхэр пӀэхэми пӀуаблэхэми ателъхэу къахьыхэти, урамхэм къатыралъхьащтыгъэх. 16 Ерусалим игъунэгъу къалэхэми цӀыфыбэхэр къарыкӀыхэти, ясымаджэхэмрэ джынэпцӀэ Ӏаехэм рагъэзыгъэхэмрэ къахьыщтыгъэх. Апостолхэм ахэр зэкӀэ агъэхъужьыщтыгъэх.
Джурт тхьаматэхэм апостолхэм къин зэрарагьэщэчыгъэр
17 ЕтӀанэ дин пэщэшхомрэ дин пэщэшхом игъусэ пстэухэмрэ шъугъоныр агу къихьагъ. Дин пэщэшхом игъусэхэр диным рыкӀорэ цӀыф купэу саддукей купкӀэ заджэхэрэм щыщыгъэх. 18 Апостолхэр аубытхи, къалэм ихьапс чӀадзагъэх. 19 Ау чэщым Зиусхьаным имэлэӀич хьапсым ипчъэхэр Ӏуихыхи, ахэр къычӀищыжьхи къыӀуагъ: 20 ШъукӀожьи, Тхьэм иунэшхо шъучӀахьи, мы щыӀэныгъэ лъапӀэм икъэбар зэкӀэ цӀыфмэ яшъуӀуат. 21 Апостолхэр едэӀухи, нэф къызэшъым, Тхьэм иунэшхо чӀахьэхи, а къэбарыр цӀыфхэм арагъашӀэу аублагъ. Дин пэщэшхомрэ ащ игъусэхэмрэ къызэкӀохэм, Тхьэмэтэ Хэсэшхом щыщхэм (Израил цӀыфмэ янахьыжъхэр ары) къяджэхи, апостолхэр къащэнхэм пае ухъумакӀохэр хьапсым агъэкӀуагъэх. 22 Ау ухъумакӀохэр хьапсым зэкӀохэм, апостолхэр ащ чӀэсхэу агъотыгъэхэп. Арыти, къагъэзэжьи къаӀуагъ: 23 Хьапсыр пытэу гъэпытагъэу, ухъумакӀохэри пчъэхэм аӀутхэу къэдгъотыгъ, ау пчъэхэр Ӏутхи, тызычӀахьэм, зи чӀэдгъотагъэп. 24 Тхьэм иунэшхо иухъумакӀохэм ятхьаматэмрэ дин пэщэшхохэмрэ ар зызэхахым, зыфахьын ашӀагъэп. 25 Джащыгъум зыгорэ къакӀуи, къэбар ахэмэ къафихьызэ ариӀуагъ: Шъо хьапсым чӀэжъудзэгъэгъэ цӀыфхэр Тхьэм иунэшхо чӀэтхэу, цӀыфхэм Ӏофхэр арагъашӀэх. 26 Ар зареӀом, илӀыхэр игъусэхэу ухъумакӀохэм ятхьаматэр кӀуи, апостолхэр къащагъэх, ау лӀыгъэкӀэ къащагъэхэп, сыда пӀомэ цӀыфхэр мыжъохэмкӀэ яонхэшъ, зэраукӀынхэм щыщынэщтыгъэхэти ары. 27 Апостолхэр къащэхи, Тхьэмэтэ Хэсэшхом ыпашъхьэ ращагъэх. Дин пэщэшхор яупчӀэу ыубли, мырэущтэу ыӀуагъ: 28 «Мы лӀым ыцӀэкӀэ цӀыфхэм зи яшъумыгъашӀ!» тӀуи, унэшъо пытэ къышъуфэтшӀыгъэба? Ау шъо Ӏофхэу цӀыфхэм яжъугъэшӀагъэхэр Ерусалим диз хъутъэ. Джы мы лӀым ылъ къыттежъугъэфэнэу шъугу хэлъ. 29 ЦӀыфхэм анахьи Тхьэм нахь тедэӀун фае, пэгъокӀ къатыжьыгъ Петрэрэ адрэ апостолхэмрэ. 30 Тятэжъхэм я Тхьэ Исус лӀагъэхэм къахигъэтэджыкӀыжьыгъ. Ар шъо пкъэум ешъуӀулӀи, жъугъэлӀагъэ. 31 Исус Израил цӀыфхэр япсэкӀодхэм афыкӀыригъэгьожьынхэшъ, къафэгъунхэм пае, Тхьэм Исус тхьаматэу ыкӀи цӀыфхэр мыкӀодхэу къэзыгъэнэжьынэу уашъом дищэежьи, ежьым иджабгъукӀэ зыгуигъэтӀысхьагъ. 32 Тэри Тхьэм Ыпсэ ЛъапӀи мы Ӏоф пстэуми тыряшыхьат. Тхьэм ежь Ыпсэ ЛъапӀэ ежьым едэӀурэ цӀыфхэм агухэм къарелъхьэ. , 33 Тхьэмэтэ Хэсэшхом щыщхэм ар зызэхахым, къызэкӀэплъыхьэхи, апостолхэр аукӀынхэу фэягъэх. 34 Ау фарисей горэ, Гамалил ыцӀэу, цӀыф пстэуми лъытэныгъэ зыфыряӀэ Тэурат егъэджэкӀо пащэу щытыр Тхьэмэтэ Хэсэшхом хэсэу къэтэджи, апостолхэр унэм тӀэкӀукӀэ чӀащынхэу унашъо ышӀыгъ. 35 ЕтӀанэ Тхьэмэтэ Хэсэшхом щыщхэм ариӀуагъ: Израил лӀыхэр, мы лӀыхэм яшъушӀэщтымкӀэ шъузфэсакъыжь, 36 сыда пӀомэ бэмышӀэу Февдэ ыцӀэу, зы лӀы горэ щыӀагъ. Ежьыр лӀы инэу цӀыфхэм ашӀуигъэшӀэу, нэбгырэ шъиплӀ фэдиз гъусэ къыфэхъутъэх, ау цӀыфхэм ар аукӀыгъ, игъусэхэри зэбгырыкӀыжьхи, кӀодыжьыгъэх. 37 Ащ къынэуж цӀыфхэм япчъагъэ залъытэм, Иудэ зыцӀэ лӀэу Галилей хэкум щыщыр къэтэджи, цӀыф Ӏэджи гъусэ къыфэхъугъ. ЦӀыфхэм ари аукӀыгъ, игъусэ пстэури зэбгырыкӀыжьыгъэх. 38 Джы мыр шъосэӀо: Мы лӀыхэм ауж шъуикӀыжьи, шъутӀупщыжьых. Ахэмэ ягухэлри яӀофи къызхэкӀырэр цӀыфыр арымэ, кӀодыжьыщт. 39 Ау яӀоф къызхэкӀырэр Тхьэр арымэ, ахэр жъугъэуцунхэ шъулъэкӀыщтэп. Шъузфэсакъыжь, Тхьэм шъупэуцоу къычӀэкӀынкӀи мэхъу. 40 Арэущтэу Гамалил къыӀуагъэхэм ядэӀугъэх. ЕтӀанэ апостолхэм къяджэжьхи, къамыщкӀэ яуагъэх. Ащ нэужым Исус ыцӀэкӀэ цӀыфмэ зи арамыӀонэу унашъо афашӀи атӀупщыжьыгъэх. 41 Арэущтэу Исус ыцӀэкӀэ лые къарахынэу Тхьэм къызэрафигъэшъошагъэмкӀэ щыгушӀукӀхэу, апостолхэр Тхьэмэтэ Хэсэшхо унэм къычӀэкӀыжьыгъэх. 42 Мафэ къэси Тхьэм иунэшхуи унэхэми цӀыфхэм Тхьэм игущыӀэхэр щарагъашӀэ зэпытыщтыгъэх, къэбарышӀоу Исусыр Христосэу зэрэщытри цӀыфхэм арагъэӀу зэпытыщтыгъэх.
Апостолхэм ежьхэм адэӀэпыӀэнхэу нэбгырибл ЭӀэрагъэнэфагъэхэр
1 А мафэхэм ИсускӀэ шӀошъхъуныгъэ зиӀэхэр нахьыбэ хъухэ зэхъум, урымыбзэкӀэ гущыӀэрэ джуртхэм джурт ыбзэкӀэ гущыӀэрэ джуртхэм афэтхьаусыхэхэу аӀуагъ: Мафэ къэси шхын зыжъугощыкӀэ, тэ тишъузабэхэр пхъэтэпэмыхь шъошӀы. 2 Арэущтэу зэхъум, апостол пшӀыкӀутӀур ИсускӀэ шӀошъхъуныгъэ зиӀэ цӀыфхэм зэкӀэ къяджэхи къаӀуагъ: ПӀхын дгощыным пае, Тхьэм игущыӀэхэм цӀыфхэр ятымыгъэдэӀунхэр тэрэзэп. 3 Арэущтэу зэрэщытым пае, тшыхэр, цӀыф пстэуми лъытэныгъэ зыфыряӀэу, Тхьэм Ыпсэ ЛъапӀэ инэу зыгу илъхэу, зэхэшӀыкӀыныгъэ зиӀэ нэбгырибл шъуащыщэу къыхэшъух. Мы Ӏофыр ахэмэ апшъэ итлъхьан. 4 Тэри Тхьэм телъэӀунми, Тхьэм игущыӀэхэр цӀыфмэ ядгъэӀунхэми тыпылъ зэпытыщт. 5 Мы гущыӀэхэр цӀыфхэу зэӀукӀагъэхэм зэкӀэ агу еӀугъэх. Арэущтэу Стефанэу шӀошъхъуныгъэмрэ Тхьэм Ыпсэ ЛъапӀэрэ инэу зыгу илъ лӀы къыхахыгъ. Ащ нэмыкӀэу Филипп, Прохор, Никан, Тимон, Пармен, Николаеу Антиохие къалэм щыщэу, джуртэу хъугъэр къыхахыгъэх. 6 Ахэр апостолхэм апашъхьэ щагт>эуцугъэх. Апостолхэр Тхьэм елъэӀугъэх, аӀэхэри ахэмэ ашъхьэхэм атралъхьагъэх. 7 Арэущтэу Тхьэм игущыӀэхэм а лъэныкъом инэу зыщаубгъущтыгъ. ИсускӀэ шӀошъхъуныгъэ зиӀэхэм япчъагъэ Ерусалим бэу щыхэхъуагъ. Дин пащэхэм ащыщ купышхоми шӀошъхъуныгъэ яӀэ хъугъэ.
Стефан зэраубытыгъэр
8 Стефан Тхьэм ынэшӀу инэу къызщифагъэу, лъэкӀыныгъэшхо зиӀэ лӀэу щытыгъ. Ащ Ӏофышхо гъэшӀэгъонхэр ышӀэщтыгъэх, нэшэнэ гъэшӀэгъонышхохэри цӀыфмэ апашъхьэ къыщигъэлъагъощтыгъэх. 9 Шъхьафитныгъэ зиӀэ хъутъэхэу зыфаӀорэ лӀыхэм ясинэгогу щыщхэр (ахэр Кириние къалэм, Александрие къалэм, Киликие хэкум, Асие хэкум щыщыгъэх) Стефан енэкъокъухэу аублагъ. 10 Ау Стефан изэхэшӀыкӀыныгъэ паий, игущыӀэхэр Тхьэм Ыпсэ ЛъапӀэ къызэрэригъэӀуагъэхэм паий ежьым пэуцужьынхэ алъэкӀыщтыгъэп. 11 Джащыгъум ахэмэ цӀыф заулэмэ мырэущтэу арагъэӀуагъ: Мы лӀыр пегъымбар Мусэмрэ Тхьэмрэ яхъонэу зэхэтхыгъ. 12 Арэущтэу заӀом, цӀыфхэри, нахьыжъхэри, Тэурат егъэджэкӀо пащэхэри зэкӀагъэплъыхьагъэх. Ахэми Стефан аубыти, Тхьэмэтэ Хэсэшхом ыпашъхьэ ращагъ. 13 Шыхьат нэпцӀхэри къащагъэх. А шыхьатхэм мырэущтэу аӀуагъ: Мы лӀыр мы чӀыпӀэ лъапӀэмрэ Тэурат хабзэмрэ яхъоны зэпыт. 14 Сыда пӀомэ Назарет къалэм щыщ Исус мы чӀыпӀэр зэхикъутэщт, пегъымбар Мусэ къытфигъэнэгъэ хабзэхэри зэблихъущтых, мы лӀым къыӀоу тэ зэхэтхыгъ. 15 Тхьэмэтэ Хэсэшхом щыщ пстэури Стефан езэрэгъэплъыгъэх. Ащ ынапэ мэлэӀич напэм фэдэу къащыхъугъ.
Стефан ТхӀьэмэтэ Хэсэшхом ыпашъхьэ къызэрэщыгущыӀагъэр
1 ЕтӀанэ дин пэщэшхор Стефан еупчӀыгъ: Мы лӀыхэм къаӀохэрэр шъыпкъэха? 2 Тшыхэри, тятэхэри, шъукъэдаӀу! къыӀожьыгъ Стефан. Тятэжъышхо Ибрахьимэ Харан къалэм дэмытӀысхьэ рапшӀэу, щытхъушхо зиӀэ Тхьэр Месопотамие хэгъэгум ащ къыщыфэлъэгъуагъ. 3 Тхьэм мырэущтэу къыриӀуагъ: «О уихэгъэгуи, уиблагъэхэми ахэкӀи, сэ озгъэлъэгъущт хэгъэгум кӀо!» 4 Арэущтэу Ибрахьимэ Халдей хэгъэгум икӀи, Харан къалэм кӀуи, дэтӀысхьагъ. Ятэ зэлӀэ ужым, мы хэгъэгоу шъо шъузэрысым Тхьэм къыгъэкощи къэкӀуагъ. 5 Мыщ дэжьми Тхьэм Ибрахьимэ мылъку зи къыщыритыгъэп, лъэкъо тегъэуцуапӀэ фэдиз чӀыгум щыщи къыритыгъэп. Ау Ибрахьимэ а мафэхэм зи сабый имыӀагъэ пэтми, мы хэгъэгур ежьымрэ ежьым къытехъукӀыщтхэмрэ хэгъэгу афэхъунэу Тхьэм къыгъэгугъагъ. 6 Тхьэм мырэущтэу къыӀуагъ: «О къыптехъукӀыщтхэр илъэс шъиплӀкӀэ хымэ хэгъэгум щыпсэущтых, цӀыфхэм ахэр агъэпщылӀхэзэ, лыехэри къарахыщтых. 7 Ау ахэр зыгъэпщылӀырэ лъэпкъым сэ езгъэпщыныжьыщт. Ащ ыужым о къыптехъукӀыщтхэр а хэгъэгум икӀынхэшъ, кӀонхэшъ, мы чӀыпӀэм сыщагъэлъэпӀэщт». 8 ЕтӀанэ Тхьэм ежьымрэ Ибрахьимэрэ азыфагу зэзэгъыныгъэ зэрэдилъхьагъэм итамыгъэу, Ибрахьимэ сунэтшӀыныр къыфигъэнагъ. ЕтӀанэ Ибрахьимэ Исхьакъ къыфэхъуи, яенэрэ мафэм сунэт ышӀыгъ. Ащ нэужым Исхьакъи къыщи, Якъубэ къыфэхъугъ. Якъуби тэ тятэжъышхоу пшӀыкӀутӀумэ ятэу афэхъугъ. 9 Ау тятэжъышхохэр ежьхэм аш Юсыф ешъугъухэти, пщылӀ фэдэу Мысырым ащэнэу лӀы куп горэм ращагъ. Ау Тхьэр Юсыф игъусагъ, 10 икъин пстэуми къахищыжьыгъ. Тхьэм Юсыф зэхэшӀыкӀыныгъэ къырити, Мысырым ипачъыхьэ Фыраун ынэшӀу къыщыригъэфагъ. Фыраун Мысырыми ежь иунэшхоми Юсыф пащэу афишӀыгъ. 11 Ащ нэужым гъэблэшхорэ тхамыкӀэгъэшхорэ Мысыр хэгъэгуми зэкӀэ Ханаан хэгъэгуми къащыхъугъ. Тятэжъышхохэми шхын агъотыщтыгъэп. 12 Якъубэ Мысырым гъомлапхъэ щыӀэу зызэхехым, апэу тятэжъхэр ащ дэжьым ыгъэкӀуагъэх. 13 Ышхэр Мысырым ятӀонэрэу къызэкӀохэм, Юсыф зыкъаригъэшӀэжьыгъ. Фырауни Юсыф иунагъо ышӀэу хъугъэ. 14 ЕтӀанэ Юсыф ышхэр ыгъакӀохи, ятэу Якъубэ къэбар фаригъэхьыгъ, зэкӀэ иунэкъощхэр, нэбгырэ тӀокӀищырэ пшӀыкӀутфырэ Мысырым къэкӀон хэу. 15 Арэущтэу Якъубэ Мысырым кӀуагъэ. Ащ ежьыри тятэжъхэри щылӀагъэх. 16 Ахэмэ яхьадэхэр Сихэм къалэм ахьыжьхи, Ибрахьимэ тыжьын ахъщэкӀэ Емор ыкъохэм къащищэфыгъэ къэунэм чӀалъхьажьыгъэх. 17 Тхьэм Ибрахьимэ къызэригъэгугъагъэм игъэшъыпкъэжьыгъо къэсы зэхъум, тэ тлъэпкъ Мысырым нахьыбэ щыхъу зэпытыщтыгъ, 18 нэмыкӀ лӀэу Юсыф зымышӀэщтыгъэр пэчъыхьэу хъуным нэсыфэ. 19 А пачъыхьэр тицӀыфхэм тхьагъэпцӀыгъэкӀэ адэзекӀощтыгъ, тицӀыфхэм ясабыйхэри ымыгьэпсэунхэм пае, чӀаригъэдзыжьхэу тятэжъхэм лые арихыщтыгъ. 20 А мафэхэм пегъымбар Мусэ къэхъугъ, Тхьэм ыдэжькӀи сабый дахэу щытыгъ. МэзищкӀэ ятэ иунэ щаӀыгъыгъ, етӀанэ губгъом къыщагъэнагъ. 21 Губгъом къызыщагъанэм, Фыраун ыпхъу къыхьи, ыкъо фэдэ ыпӀугъ. 22 Арэущтэу Мысыр цӀыфхэм зэхэшӀыкӀыныгъэу яӀэгъэ пстэури Мусэ рагъэшӀагъ, Муси игущыӀэхэмкӀи ышӀэгъэ ӀофхэмкӀи лъэкӀыныгъэ зиӀэ лӀэу щытыгъ. 23 Мусэ ыныбжь илъэс тӀокӀитӀум зынэсым, ышхэу Израил цӀыфхэр зэригьэлъэгъунхэу рихъухьагъ. 24 Мысыр лӀы горэм Израил лӀыхэм ащыщэу зыгорэм лые рихэу зелъэгъум, ӀэпыӀэгъу фэхъуи, лые къезыхырэм ышӀэгъэ Ӏофым ипэгъокӀ ригъэгъотызэ, еуи ыукӀыгъ. 25 Мусэ ыпгхэм зэхашӀыкӀынэу шӀошӀыгъ Тхьэм ежьым ахэр къиным къызэрэхыригъэщыжьыщтхэр, ау ахэмэ зэхашӀыкӀыгъэп. 26 ЯтӀонэрэ мафэм ышхэм ащыщхэу нэбгыритӀу зэзаохэу Мусэ зелъэгъум, зэригъэшӀужьынхэм пае ариӀуагъ: «Шъо лӀитӀур, шъо шъузэкъош, сыд пае лые зэшъухыра?» 27 Ау ышы лые езыхырэр Мусэ еӀункӀи риӀуагъ: «Хэта о тхьаматэу укъытфэхъунэуи хьыкум къыттепшӀыхьанэуи укъэзыгъэлъэгъуагъэр? 28 Тыгъуасэ Мысыр лӀыр зэрэуукӀыгъэм фэдэу сыуукӀынэу уфая?» 29 А гущыӀэхэр Мусэ зызэхеххэм, хэхьажьи, Мадиам хэгъэгум кӀуи, итӀысхьагъ. Ащ къуитӀу къыщыфэхъугъэх. 30 Илъэс тӀокӀитӀу зытешӀэм, Синай къушъхьэм дэжь шъоф нэкӀым пэнэ куандэу машӀо зыхэнагъэм хэтэу,мэлэӀич горэ Мусэ къыщыфэлъэгъуагъ. 31 Мусэ ар зелъэгъум, ыгъэшӀэгъуагъ. Нахь тэрэзэу еплъынэу зекӀуалӀэм, Зиусхьаным ымакъэ къэӀугъ: 32 «уятэжъышхохэм я Тхьэу Ибрахьимэ, Исхьакъ, Якъубэ я Тхьэр сэры». Мусэ къэкӀэзэзи, еплъынэу тегушхуагъэп. 33 ЕтӀанэ Зиусхьаным къыриӀуагъ: «О уицуакъэхэр зыщыхых, сыда пӀомэ узытет чӀыпӀэр чӀыпӀэ лъапӀэшъ ары. 34 Сэ слъэпкъ гузэжъогъу Мысырым зэрэщыхэтыр слъэгъугъэ, ящэӀу макъэхэри зэхэсхыгъэх. Ахэр къиным къыхэсщыжьынхэу сыкъехыгъ. КӀо, о Мысырым узгъэкӀожьыщт». 35 (ЕтӀанэ Стефан ипсалъэ джыри къыпидзэжьыгъ:) Ахэмэ, «Хэта о тхьаматэу укъытфэхъунэуи хьыкум къыттепшӀыхьанэуи укъэзыгъэлъэгъуагъэр?» аӀоу, амыдэу зыфаӀогъэгъэ Мусэ ары. А Мусэ дэдэр ары ахэмэ тхьаматэ афэхъунэуи шъхьафит ышӀынхэуи Тхьэм къыгъэкӀуагъэр, мэлэӀичэу пэнэ куандэм хэтэу къыфэлъэгъуагъэм иӀэпыӀэгъукӀэ. 36 Муси ары Израил цӀыфхэр Мысырым къизыщыжьыгъэр, Мысырыми, Хы Плъыжьми, илъэс тӀокӀитӀо шъоф нэкӀыми Ӏофышхо гъэшӀэгъонхэр къащызышӀагъэр, нэшэнэ гъэшӀэгъонышхохэри къащызыгъэлъэгъуагъэр. 37 А Мусэ ары Израил цӀыфхэм языӀуагъэри: «Шъушыхэм ащыщэу сэ сфэдэу пегъымбар горэ Зиусхьанэу Тхьэм къышъуфигъэкӀощт». 38 Мусэ ары тятэжъхэу шъоф нэкӀым щызэӀукӀэщтыгъэхэм ахэтыгъэр. Мусэ мэлэӀичэу Синай къушъхьэм къыщыдэгущыӀагъэм игъусагъ, мыкӀодыжьын гущыӀэхэри тэ къытфигъэнэжьынхэу къыӀэкӀэхьагъэх. 39 Ау тятэжъхэр Мусэ едэӀунхэу фаещтыгъэхэп. Мусэ зэрамыпэсэу агухэмкӀэ Мысырым зыфагъэзагъэ. 40 Ахэмэ Хьарун раӀуагъ: «Тапэ итхэу ахьынхэу тхьэ сурэтхэр тфэшӀых! Мысырым тыкъизыщыжьыгъэ Мусэ къехъулӀагъэр тшӀэрэп». 41 А мафэхэм шкӀэ теплъэ иӀэу тхьэ нэпцӀ ашӀи, къурмэн ащ фашӀыгъ. Ахэмэ ежьхэм аӀэкӀэ ашӀыгъэ тхьэ нэпцӀым щыгушӀукӀхэу, ешхэешъошхо ашӀыгъ. 42 Ау Тхьэм ыкӀыб ахэмэ къафигъази, ахэмэ уашъом ипкъыгъохэм тхьэпӀалъэу ялъэӀунхэу къыгъэнагъэх, пегъымбархэм ятхылъ зэритым фэдэу: «Шъо Израил цӀыфхэр, илъэс тӀокӀитӀо шъоф нэкӀым шъузетым, къурмэныпхъэу шӀошъубзыщтыгъэр сэра къызфэшъушӀыщтыгъэр? 43 Хьау, къурмэн къызфэшъушӀыщтыгъэр сэрэп, ау къэшъухьыщтыгъэр шъуитхьэ нэпцӀэу Молох зыцӀэм итхьэлъэӀупӀэ щэтыри, шъуитхьэ нэпцӀэу Ремфан ижъуагъо исурэти ары. Мыхэр ары шъуялъэӀунхэу тхьэ нэпцӀхэу шъушӀыгъэхэр. Арэущтэу зыхъукӀэ, Вавилон зыцӀэ къэлэшхом нахьи нахь чыжьэу шъуипыйхэм шъуязгъэщэщт». 44 Тятэжъхэм шыхьатныгъэм итхьэлъэӀупӀэ чэтэнгъэӀагъэр шъоф нэкӀым щыряӀагъ. А чэтэнгъэӀагъэр Тхьэм Мусэ унашъо къызэрэфишӀыгъагъэм фэдэу ашӀыгъагъ, чэтэнгъэӀагъэм ышъо теплъэу Мусэ ылъэгъугъагъэм тетэу. 45 Ащ ыужым тэ тятэжъхэм а чэтэнгъэӀагъэр къакӀэныгъэу, къыздахьыгъ. Тхьэм ахэмэ апашъхьэ хымэ лъэпкъхэр къырифыхэзэ, Исус Навин тятэжъхэм япащэу а лъэпкъхэм яхэгъэгу къызатырахым, а чэтэнгъэӀагъэр къыздахьыгъ. ЕтӀанэ пачъыхьэ Даутэ имафэхэм анэсыфэ, чэтэнгъэӀагъэр а хэгъэгум къинагъ. 46 Тхьэм ынэшӀу Даутэ щифагъ. Даутэ Тхьэм елъэӀугъ: «О Якъубэ ури Тхь, унэшхо къыпфэсшӀынэу фит сыкъэшӀ». 47 Ау пачъыхьэ Сэлмэн ары Тхьэм унэшхор фэзышӀыгъэр. 48 Ау анахь Иныр цӀыфхэм аӀэкӀэ ашӀыгъэ унэхэмэ арысэп. Зиусхьаным къызэриӀорэр пегъымбарым итхылъ зэритым фэдэу: 49 «Уашъор ары сипачъыхьэ тӀысыпӀэ, чӀылъэри ары силъэгукӀэтыныр. Сыд фэдэ уна къысфэшъушӀыщтыр? Тыдэ щыӀа зызщызгъэпсэфыщт чӀыпӀэр? 50 Мыхэр зэкӀэ къэзыгъэшӀыгъэр сэрыба?» 51 Шъо цӀыф къаигъэхэр! ШъугухэмкӀи шъутхьакӀумэхэмкӀи Тхьэр зымышӀэрэ цӀыфхэм шъуафэд. Шъо шъуятэжъхэм шъуафэдэу, Тхьэм Ыпсэ ЛъапӀэ шъупэуцу зэпыты. 52 Шъуятэжъхэм къин зэрамыгъэщэчыгъэ пегъымбар горэ щыӀагъа? Хьау, щыӀагъэп. Шъыпкъагъэр ЗиӀэр дунаем къызэрэтехьащтыр къэзыгъэӀухэрэри аукӀыгъэх. Шъори тетыгъо зиӀэхэм ар аӀэкӀэшъугъахьи, яжъугъэукӀыгъ. 53 МэлэӀичхэм Тэурат хабзэр къызыӀэкӀалъхьагъэр шъоры, ау щытми Тэурат хабзэм итхэр жъугъэцакӀэрэп.
Стефан мыжъокӀэ еохэзэ зэраукӀыгъэр
54 Тхьэмэтэ Хэсэшхом щыщхэм Стефан къыӀорэр зызэхахым, къызэкӀэплъыхьагъэхэу, ацэхэр зэрагъэшхыщтыгъэх. 55 Ау Тхьэм Ыпсэ ЛъапӀэ Стефан ыгу инэу илъ хъуи, уашъом дэплъыий, Тхьэм ищытхъушхуи Исус Тхьэм иджабгъукӀэ готэуи ылъэгъугъ. 56 Шъуеплъ, къыӀуагъ Стефан, уашъохэр зэӀухыгъэхэу, ЦӀыф Лъэпкъым Ыкъо Тхьэм иджабгъукӀэ готэу сэлъэгъу. 57 Джащыгъум ахэмэ атхьакӀумэхэр ӀуапӀохи, мэкъэшхокӀэ куохэу тезэрэгъэбэнагъэх. 58 ЕтӀанэ Стефан къалэм далъэшъуи, мыжъокӀэ еохэзэ, аукӀэу аублагъ. Шыхьатхэм ящыгъынхэр Саул зыцӀэу зы кӀалэ горэм ылъакъохэм адэжь щагъэтӀылъыгъэх. 59 АукӀынэу мыжъомкӀэ еохэ зэхъум, Стефан елъэӀугъ: Зиусхьан Исус, спсэ хэх! 60 ЕтӀанэ лъэгонджэмышъхьэкӀэ тӀыси, мэкъэшхокӀэ къэкууи къыӀуагъ: Зиусхьан, мы псэкӀодыр мы цӀыфхэм апшъэ имылъхь! Ар къыӀуи, ыпсэ хэкӀыгъ.
1 Саул Стефан зэраукӀыгъэр игъоу ылъэгъугъ.
Саул чылыс зэӀукӀэм щыщхэм къин зэраригъэщэчыщтыгъэр
А мэфэ дэдэм цӀыфхэм чылыс зэӀукӀэм щыщхэу Ерусалим дэсхэм лъэшэу къин арагъэщэчэу аублагъ. Апостолхэм анэмыкӀэу, шӀошъхъуныгъэ зиӀэ пстэури Иудей хэкумрэ Самарие хэкумрэ ащызэбгырыкӀыжьыгъэх. 2 Тхьэм ищынагъо зыгу илъ лӀыхэм Стефан чӀалъхьажьи, хьэдэгъэшхо фашӀыгъ. 3 Ау Саул чылыс зэӀукӀэм щыщхэр ыгъэкӀодынхэу ыуж итыгъ. Зы унэм икӀымэ, адрэ унэм ихьэзэ, илӀыхэм хъулъфыгъэхэри бзылъфыгъэхэри лӀыгъэкӀэ раригъэщыхэти, хьапсым чӀаригъадзэщтыгъэх.
Филнпп къэбарышӀур Самарие хэкум зэрэщигъэӀущтыгъэр
4 ЦӀыфхэу зэбгырыкӀыжьыгъагъэхэм къакӀухьэзэ, къэбарышӀур цӀыфхэм арагъэӀущтыгъ. 5 Филипп Са марие хэкум щыщ къалэ горэм къакӀуи, ащ дэс цӀыфмэ Христос ехьылӀэгъэ къэбарыр аригъэӀугъ. 6 ЦӀыф купышхохэм Филипп къэгущыӀэу зэхахэу, Ӏофышхо гъэшӀэгъонхэу ышӀэщтыгъэхэри залъэгъухэм, къыӀохэрэм яшъыпкъэу ядэӀущтыгъэх; 7 сыда пӀомэ цӀыфыбэхэм ахэс джынэпцӀэ Ӏаехэр кӀыихэу ахэкӀыщтыгъэх, зыӀэпкълъэпкъ узым зэкӀиубытэгъэ цӀыфыбэхэри, цӀыф лъащэхэри Филипп ыгъэхъужьыщтыгъэх. 8 Арэущтэу а къалэм ицӀыфхэм гушӀогъошхо яӀэ хъугъэ. 9 Ау а къалэм Симон ыцӀэу зы лӀы горэ дэсыгъ. Зы заулэрэ ушхъухьаныгъэм пылъыгъэу, ежьыр лӀы инэу ашӀуигъэшӀэу Самарие хэкум ис цӀыфмэ ашӀогъэшӀэгъоныщтыгъ. 10 Мы лӀыр Тхьэм илъэкӀыныгъэшхоу «ЛъэкӀыныгъэ Инэу» зыфаӀорэр ары, аӀозэ, цӀыф пстэури, ини цӀыкӀуи, Симон къыӀохэрэм агу етыгъэу ядэӀущтыгъэх. 11 БэшӀагъэу иушхъухьаныгъэ ахэмэ инэу агъэшӀагъоти, яшъыпкъэу едэӀущтыгъэх. 12 Ау Тхьэм и Тетыгъошхо ехьылӀэгъэ къэбарышӀумрэ Исус Христос ыцӀэ ехьылӀэгъэ къэбарышӀумрэ Филипп аригъэӀухэу, цӀыфхэм шӀошъхъуныгъэ яӀэ хъу зэхъум, хъулъфыгъэхэми бзылъфыгъэхэми Филипп зырагъэумэхъыгъ. 13 Ежь Симони ИсускӀэ шӀошъхъуныгъэ иӀэ хъуи, Филипп зыригъэумэхъыгъэу, ыуж итэу кӀощтыгъ. Филипп нэшэнэ гъэшӀэгъонышхохэу къыгъэлъагъощтыгъэхэри Ӏофышхо гъэшӀэгъонхэу ышӀэщтыгъэхэри Симон зилъэгъухэкӀэ, ыгъэшӀагъощтыгъэх. 14 Ерусалим дэс апостолхэм Самарие цӀыфхэм Тхьэм игущыӀэхэр зэрадагъэхэр зызэхахым, Петрэрэ Иуанрэ ахэмэ адэжь агъэкӀуагъэх. 15 Петрэрэ Иуанрэ зынэсхэм, Тхьэм Ыпсэ ЛъапӀэ шӀошъхъуныгъэ зиӀэхэм агухэм арылъ хъунэу Тхьэм афелъэӀугъэх; 16 сыда пӀомэ Тхьэм Ыпсэ ЛъапӀэ ахэмэ ащыщэу зыми къыфехыгъагъэгоп, Зиусхьанэу Исус ыцӀэкӀэ Филипп ахэр ыумэхъыгъагъэхэ ныӀэп. 17 Джащыгъум Петрэрэ Иуанрэ аӀэхэр ахэмэ атралъхьахи, Тхьэм Ыпсэ ЛъапӀэ а шӀошъхъуныгъэ зиӀэхэм агухэм арылъ хъугъэ. 18 Апостолхэм аӀэхэр затыралъхьэм, а цӀыфхэм Тхъэм Ыпсэ ЛъапӀэ агухэм арылъ зэрэхъугъэр Симон зелъэгъум, апостолхэм ахъщэ къафихьи, мырэущтэу къыӀуагъ: 19 Сэ сӀэхэр цӀыф горэм теслъхьэхэмэ, Тхьэм Ыпсэ ЛъапӀэ ыгу илъ хъуным пае, сэри мы лъэкӀыныгъэр къысэшъут. 20 Тхьэм итын ахъщэкӀэ къэпщэфышъунэу гапӀошӀыгъэшъ, уиахъщи ори шъузэдэрэкӀод, риӀуагъ Петрэ. 21 Тхьэм ыдэжькӀэ угу шъыпкъагъэ илъэпти, мы Ӏофым ущыщэп ыкӀи уиӀахьи хэлъэп ыкӀи. 22 Арышъ, мы бзэджагъэу уиӀэм фыкӀэгъожьи, Тхьэм елъэӀу. Мыхъун гухэлъэу уиӀэр Тхьэм къыпфигъэгъункӀи мэхъу; 23 сыда пӀомэ шъугъоныр о угу инэу илъэу, бзэджагъэми узэкӀиубытагъэу сэлъэгъу. 24 КъэшъуӀуагъэхэм ащыщэу зи къысэмыхъулӀэнэу Тхьэм шъукъысфелъэӀу, къыӀожьыгъ Симон. 25 Апостолхэр Зиусхьаным шыхьат фэхъухи, игущыӀэхэр къызагъэӀухэ ужым, Самарие хэкум щыщ къоджабэмэ къэбарышӀур ащагъэӀузэ, Ерусалим агъэзэжьыгъ. Филиппрэ Ефиопие хэгъэгум щыщ Ӏэшъхьэтетымрэ 26 Тэджи, Ерусалим дэкӀи, Газэ къалэм кӀорэ гъогум щэджагъбм дэжь техь! ыӀуи, Зиусхьаным имэлэӀич Филипп къыриӀуагъ. Ар шъоф нэкӀым кӀорэ гъогоу щыт. 27 Арэущтэу Филипп тэджи, гъогум техьагъ. КӀозэ, Ефиопие хэгъэгум щыщ лӀы горэм ӀукӀагъ. А лӀыр Ефиопием ибзылъфыгъэ пачъыхьэу Кандакие фэлажьэрэ Ӏэшъхьэтетхэм ащыщыгъ. Бзылъфыгъэ пачъыхьэм имылъку зэкӀэ ащ ыӀэ илъыгъ. Ар Ерусалим Тхьэм щелъэӀунэу къэкӀогъагъ. 28 Ихэгъэгу ыгъэзэжьынэу кум итӀысхьагъэу, пегъымбар Исайас ытхыгъэ тхылъым еджэщтыгъ. 29 А кум екӀуалӀи, ащ готэу кӀо! ыӀуи, Тхьэм Ыпсэ ЛъапӀэ Филипп къыриӀуагъ. 30 Филипп кум екӀуалӀи, а лӀыр пегъымбар Исайас ытхыгъэ тхылъым еджэу зызэхехым, къыӀуагъ: Узаджэрэм къикӀырэр къыбгурэӀуа? 31 Зыгорэм зэхэсимыгъэшӀыкӀмэ, сыдэущтэу къызгурыӀон слъэкӀына? къыӀожьыгъ Ӏэшъхьэтетым. ЕтӀанэ ар Филипп елъэӀугъ: КъитӀысхьи, къызготӀысхь. 32 Ӏэшъхьэтетыр Тхьэм игущыӀэ тхыгъэхэм арытхэу зэджагъэхэр мы гущыӀэхэр ары: «Мэлым фэдэу шӀуабзынэу ащагъ. Зыупхъорэм ыпашъхьэ шъынэр зи ымыӀоу зэрэщытым фэдэу, ежьым ыжэ зэтырихыгъэп. 33 Ежьыр агъэпыутыгъ, зэфагъи хэмылъэу хьыкум тырашӀыхьагъ. А лъэхъанэм ицӀыфхэм ябзэджагъэ зынэсыгъэр хэт къэзыӀон зылъэкӀырэр? Сыда пӀомэ ыпсэ мы дунаем щыхахыгъ». 34 Мыр къысэпӀонкӀэ сыолъэӀу, ыӀуи, Ӏэшъхьэтетым Филипп къыриӀуагъ. Пегъымбарым зигутъу ышӀырэр хэта? Ежьыр ара, нэмыкӀ цӀыф гора? 35 Джащыгъум Филипп а гущыӀэ дэдэхэу Тхьэм игущыӀэ тхыгъэхэм арытхэмкӀэ къыубли, Исус ехьылӀэгъэ къэбарышӀур Ӏэшъхьэтетым риӀуагъ. 36 Гъогум рыкӀохэзэ, псы горэм ыдэжь нэсыгъэх. Ӏэшъхьэтетым къыӀуагъ: Мыщ псы щыӀ. Сэ сыуумэхъымэ, хъунба? 37 ЗэкӀэ о угукӀэ шӀошъхъуныгъэ уиӀэмэ, усыумэхъымэ хъущт, риӀуагъ Филипп. Исус Христос Тхьэм зэриКъомкӀэ шӀошъхъуныгъэ сиӀ, къыӀожьыгъ Ӏэшъхьэтетым. 38 ЕтӀанэ Ӏэшъхьэтетым кур зыфырэм ар къыригъэгъэуцуи, Ӏэшъхьэтетымрэ Филиппрэ псым хахьэхи, Филипп адрэр ыумэхъыгъ. 39 Псым къызыхэкӀыжьхэм, Зиусхьаным ЬӀпсэ ЛъапӀэ Филипп нэмыкӀ чӀыпӀэ горэм ошӀэдэмышӀэу ыхьыгъ, Ӏэшъхьэтетми Филипп ылъэгъу жьыгъэп. ГушӀуагъом хэтэу игъогу техьажьыгъ. 40 Ау Филипп Азот къалэм къыщылъэгъуагъ. Кесарие къалэм нэсы къыкӀухьэзэ, къэбарышӀур къэлэ пстэуми ащигъэӀущтыгъ.
Саул Исус игъогу зэрэтехьагъэр
1 Саул ИсускӀэ шӀошъхъуныгъэ зиӀэхэм инэу афэгубжэу, «Исус игъогу шъутемыкӀымэ, шъутыукӀыщт», ыӀозэ ариӀо зэпытыщтыгъ. Дин пэщэшхом ыдэжь кӀуи елъэӀугъ: 2 Дамаск къалэм щыӀэ синэгогухэм тхылъхэр афэтхыхи, къысэтых. Саул ар зыфишӀагъэр Исус игъогу тетхэм ащыщхэр Дамаск къыщигъотхэмэ, хъулъфыгъэхэми бзылъфыгъэхэми, илӀыхэм ахэмэ Ӏэхъухэр атыраригъалъхьахэу Ерусалим къыщэнхэр ары. 3 Саул гъогум рыкӀозэ, Дамаск игъунэгъу зэхъум, ошӀэдэмышӀэу нэфынэ уашъом къехи къыуцухьагъ. 4 Саул чӀыгум тефагъэу, макъэ горэм къыриӀоу зэхихыгъ: Саул, Саул, сыд пае къин сэ сэбгъэщэчырэ? 5 O ухэта, Зиусхьан? ыӀуи, Саул къыӀуагъ. Исусэу къин зэбгъэщэчырэр сэры, къыӀожьыгъ адрэ макъэм. Цур зием ибэщ кӀыхьэ папцӀэ цур ылъакъокӀэ къызэрешъутырырэм фэдэу ошӀымэ, уиягъэ зэогъэкӀыжьы. 6 Ау къэтэджи, къалэм дахь. О пшӀэн фаер ащ дэжьым зыгорэм къыщыуиӀощт. 7 Саул игъусэхэм зы гущыӀэ горэ къамыӀоу, ащ дэжьым щытхэу къэнагъэх. Макъэр зэхахыгъ, ау цӀыф зи алъэгъугъэп. 8 Саул чӀыгум къытетэджыкӀыджьыгъ, ау ынэхэр къызызэтырехыжьхэм, ахэмэ зи амылъэгъужьэу къэнагъ. Арыти, Паул ыӀэ аӀыгъэу Дамаск дащагъ. 9 Саул мэфищым зи ымылъэгъоу щытыгъ, шхагъэп ыкӀи ешъуагъэп ыкӀи. 10 ИсускӀэ шӀошъхъуныгъэ зиӀэхэм ащыщэу Ананый Дамаск дэсыгъ. Зиусхьаныр ащ къыфэлъагъуи къеджагъ: Ананый! Сэры, Зиусхьан, ыӀуи, Ананый къыӀожьыгъ. 11 Тэджи, «Урам ЗэнкӀ» зыфаӀорэ урамым тет Иудэ иунэ кӀо, ыӀуи, Зиусхьаным Ананый къыриӀуагъ. Ащ дэжьым Саул ыцӀэу Тарс къалэм щыщым кӀэупчӀ, сыда пӀомэ ар Тхьэм елъэӀу. 12 Ынэхэри къыгъэплъэжьынхэм пае, Ананый зы лӀы горэ ыдэжь къакӀоу, ыӀэхэр къытырилъхьахэу къыфэлъэгъуагъ. 13 Зиусхьан, къыӀожьыгъ Ананый, мы лӀым уицӀыф лъапӀэхэу Ерусалим дэсхэм къинэу аригъэщэчыгъэхэр зыфэдизхэр цӀыфыбэмэ къысаӀуагъ. 14 Джы дин пэщэпгхохэм фитыныгъэ къаӀихыгъэу, илӀыхэм о къыолъэӀурэ цӀыф пстэуми Ӏэхъухэр атыраригъэлъхьанхэм пае, мыщ дэжьым къэкӀуагъ. 15 Ау Зиусхьаным Ананый къыриӀуагъ: КӀо! Хымэ лъэпкъхэми, пачъыхьэхэми, Израил цӀыфхэми сэ сцӀэ икъэбар анигъэсынэу мы лӀыр сэ къыхэсхыгъ. 16 Сэ сцӀэ пае къинэу ыщэчын фаер зыфэдизыр сэ сшъхьэкӀэ езгъэлъэгъущт. 17 Арэущтэу Ананый а унэм кӀуи ихьагъ. ЫӀэхэр Саул ышъхьэ тырилъхьэхи къыӀуагъ: Саул, сэ сшы, мыщ дэжьым укъакӀо зэхъум, Зиусхьан Исусэу гъогум къыщыпфэлъэгъуагъэм сыкъигъэкӀуагъ, о унэхэр къэплъэжьынхэм паий, Тхьэм Ыпсэ ЛъапӀэ инэу угу илъ хъуным паий. 18 Ар къызеӀом, пцэжъые шъомпӀэ цӀыкӀухэм афэдэхэу Саул ынэхэм зыгорэхэр къакӀэтэкъухи, ынэхэри къэплъэжьыгъэх. ЕтӀанэ Саул къэтэджи, Ананый ар ыумэхъыгъ. 19 Ащ нэужым Саул шхагъэ, ыкӀуачӀи къыгъотыжьыгъ.
Саул къэбарышӀур Дамаск къалэм зэрэщигъэӀущтыгъэр
ЕтӀанэ ИсускӀэ шӀошъхъуныгъэ зиӀэхэу Дамаск къалэм дэсхэм адэжь Саул мафэ заулэрэ щыӀагъ. 20 Исус Тхьэм зэриКъор синэгогухэм ардэдэм ащигъэӀоу ыублагъ. 21 Ар зэхэзыхыгъэ цӀыфхэм зэкӀэм агъэшӀагъоу къаӀощтыгъ: Мы лӀыр арыба Исус елъэӀурэ цӀыфхэм Ерусалим къин щязыгъэщэчыщтыгъэр? ИлӀыхэм Исус елъэӀухэрэм Ӏэхъухэр атыраригъэлъхьанхэшъ, дин пэщэшхохэм адэжь ыщэнхэу мыщ къэкӀуагъэу щытба? 22 Ау Саул нахь лъэкӀыныгъэ иӀэ хъугъэ. Исус зэрэХристосыр къыгъэшъыпкъэжьызэ, Дамаск дэс джуртхэмэ ежьым къыраӀожьыщтыр амышӀэу къыгъэнагъэх.
Саул джуртхэм зэраӀэпыкӀыгъэр
23 Мафэ пчъагъэ зытешӀэ ужым, Саул аукӀынэу джуртхэм гухэлъ ашӀыгъ. 24 Ау ахэмэ ягухэлъ Саул къышӀагъ. Ар аукӀынэу чэщи мафи къэлапчъэмэ аӀутхэу паплъэщтыгъэх. 25 Ау шӀошъхъуныгъэ зиӀэхэм чэщым Саул зыдащи, къэлэ дэпкъым хэт гъуанэ горэмкӀэ мэтэшхом исэу дэпкъым ратӀупщэхыгъ.
Саул ИсускӀэ шӀошъхъуныгъэ зиӀэхэу Ерусалим дэсхэм адэжь зэрэкӀуагьэр
26 Саул Ерусалим зынэсым, ИсускӀэ шӀошъхъуныгъэ зиӀэхэм ахэхьанэу пылъыгъ, ау ащ ИсускӀэ шӀошъхъуныгъэ иӀэ зэрэхъугъэр ахэмэ ашӀошъ мыхъоу щыщынэщтыгъэх. 27 Ау Варнавэ Саул зыдищи, апостолхэм адэжь кӀуагъэ. Саул гъогум Зиусхьаныр зэрэщилъэгъугъэри, Зиусхьаныр Саул къызэрэдэгущыӀагъэри, Саул етӀанэ Исус ыцӀэкӀэ къэбарышӀур гушхоныгъэкӀэ Дамаск зэрэщигъэӀущтыгъэри Варнавэ ахэмэ ариӀотэжьыгъ. 28 Арэущтэу зэхъум, Саул ИсускӀэ шӀошъхъуныгъэ зиӀэхэм ахахьэмэ, ахэкӀыжьызэ, ахэмэ адэжь Ерусалим щыӀагъ, Зиусхьаным ыцӀэкӀи цӀыфмэ къэбарышӀур гушхоны гъэкӀэ аригъэӀущтыгъ. 29 УрымыбзэкӀэ гущыӀэрэ джуртхэм адэгущыӀэщтыгъ ыкӀи янэкъокъущтыгъ, ау ахэмэ ар къаукӀынэу пылъыгъэх. 30 Зэшыхэм ар къызашӀэм, Саул Кесарие къалэм ращэхи, Тарс къалэм агъэкӀуагъ. 31 Арэущтэу зэкӀэ Иудей хэкум, зэкӀэ Галилей хэкум, зэкӀэ Самарие хэкум арыс чылыс зэӀукӀэхэм мамырныгъэ яӀэ хъугъэ. ШӀошъхъуныгъэ зиӀэхэм гурэ псэрэкӀэ нахь лъэкӀыныгъэ агъотызэ, Зиусхьаным ищынагъо агухэм арылъэу, Тхьэм Ыпсэ ЛъапӀэ ыгъэгушхохэу, нахьыбэ хъугъэх.
Петрэ Еней зэригъэхъужьыгъэр
32 Петрэ хэкур къыкӀухьэ зэхъум, Тхьэм ицӀыф лъапӀэхэу Лиддэ къалэм дэсхэм адэжь кӀуагъэ. 33 Ащ дэжьым Еней ыцӀэу лӀы горэм щыӀукӀагъ. Илъэсий хъугъэу, ыӀэпкълъэпкъ узым зэкӀиубытагъэу ар пӀэм хэлъыгъ. 34 Еней, риӀуагъ Петрэ, Исус Христос уегъэхъужьы. Къэтэджи, уипӀэ Ӏухыжь! Ардэдэм Еней къэтэджыжьыгъ. 35 Лиддэ къалэм зэкӀэ дэсхэми Сарон зыцӀэ шъоф зэшъхьэзашъом зэкӀэ тесхэми зэкӀэ Еней залъэгъум, Зиусхьаным игъогу техьагъэх.
Петрэ Тавифэ бзылъфыгъэр лӀагъэхэм къызэрахигъэтэджыкӀыжьыгъэр
36 Иоппие къалэм ИсускӀэ шӀошъхъуныгъэ зиӀэ бзылъфыгъэ горэ, Тавифэ ыцӀэу, дэсыгъ. (Тавифэм къикӀырэр «Мэз Пчэныр» ары.) ШӀубэ ышӀэу, сэдакъэхэр ыты зэпытыщтыгъ. 37 А мафэхэм ар сымаджэ хъуи лӀагъэ. Ар агъэпскӀыжьи, унэ лъагэм ыкӀоцӀ ралъхьагъ. 38 Лиддэ къалэр Иоппие къалэм игъунэгъути, Петрэ ащ дэжьым зэрэщыӀэр ИсускӀэ шӀошъхъуныгъэ зиӀэхэм зызэхахым, «Зымыгъэгужъоу, тадэжь къакӀо!» Петрэ раӀонэу лӀыкӀуитӀу лъагъэкӀуагъ. 39 Петрэ къэтэджи, къадэкӀуагъ. Иоппие къалэм зынэсым, унэ лъагэм ращагъ. Шъузабэхэм зэкӀэ Петрэ къауцухьи, Тавифэ ягъусэу зыщэтым, джанэхэуи щыгъынхэуи ышӀыгъагъэхэр, гъыхэзэ къырагъэлъэгъугъэх. 40 Петрэ цӀыфхэр зэкӀэ унэм ригъэкӀыхи, лъэгонджэмышъхьэкӀэ тӀыси, Тхьэм елъэӀугъ. ЕтӀанэ хьадэм зыфигъази къыӀуагъ: Тавифэ, къэтэдж! Тавифэ ынэхэр къызэтрихыхи, Петрэ зелъэгъум, къэтэджи къэтӀысыгъ. 41 Петрэ ащ ыӀэ ыубыти къыгъэтэджыгъ. ЕтӀанэ Тхьэм ицӀыф лъапӀэхэмрэ шъузабэхэмрэ къяджи, Тавифэ псаоу аритыжьыгъ. 42 А къэбарыр Иоппие къалэм дэсхэм зэкӀэ зэлъашӀэ хъугъэ, цӀыфыбэхэми ЗиусхьанымкӀэ шӀошъхъуныгъэ яӀэ хъугъэ. 43 ЕтӀанэ Симон ыцӀэу, шъуашӀэ горэм ихьакӀэу Петрэ мэфэ пчъагъэкӀэ Иоппие къалэм къыдэнагъ.
Корнелый илӀыкӀохэм Петрэ къызэраригъэщагьэр
1 Корнелый зыцӀэу зы лӀы горэ Кесарие къалэм дэсыгъ. Италие хэгъэгум щыщ дзэм хэтхэу, нэбгыришъэ хъурэ купхэм япащэхэм ар ащыщыгъ. 2 Ежьми иунагъом зэкӀэми Тхьэр агъэлъапӀэу щытыгъ, Тхьэм ищынагъуи агухэм арылъыгъ. Джуртхэм ахэт тхьамыкӀэхэм сэда къэ бэу аритыщтыгъ, Тхьэм елъэӀу зэпытыщтыгъ. 3 Щэджэгъоужым сыхьатыр щым пэгъунэгъу хъугъэу, Тхьэм имэлэӀич ащ къекӀуалӀи, «Корнелый!» ыӀоу къеджэзэ нафэу къыфэлъэгъуагъ. 4 Корнелый къэщыни, ынэхэр тыригъэкъагъэхэу риӀуагъ: Зиусхьан, сыда узыфаер? УитхьэлъэӀухэри уисэдакъэхэри Тхьэм ыпашъхьэ ихьагъэх, Тхьэми ахэр щымыгъупшэжьыгъэхэу ыгу илъых, къыриӀожьыгъ мэлэӀичым. 5 ПетрэкӀэ заджэхэрэ Симон къыздащэнэу Иоппие къалэм лӀыкӀохэр гъакӀох. 6 Ар шъуашӀэ Симонэу зиунэ хы Ӏушъом Ӏутым ихьакӀэу щыт. 7 Ар къезыӀогъэ мэлэӀичыр зыӀокӀыжьым, Корнелый иунэӀутхэм ащыщхэу нэбгыритӀурэ иӀофтабгэ дзэлӀхэм ащыщэу Тхьэр зыгъэлъапӀэрэмрэ къяджи, 8 хъугъэшӀагъэхэр зэкӀэ афиӀотэжьхи, Иоппие къалэм ыгъэкӀуагъэх. 9 ЯтӀонэрэ мафэм ахэр гъогум рыкӀохэзэ къалэм игъунэгъу зэхъухэм, сыхьатыр пшӀыкӀутӀум пэгъунэгъу хъугъэу, Петрэ Тхьэм елъэӀунэу унашъхьэм дэкӀоягъ. 10 Джащыгъум мэлакӀэ къэлӀагъэти, зыгорэ ышхынэу фэягъ. Шхыныр агъэхьазыры зэхъум, Тхьэм Петрэ зыгорэ къыфигъэлъэгъуагъ. 11 Уашъор зэӀухыгъэу, шэкӀ фыжь иным фэдэу зыгорэ къехэу ылъэгъугъ. Ар къопиплӀымкӀэ кӀэшӀагъэу, чӀыгум къырагъэлэлэхыгъэм фэдэу щытыгъ. 12 Сыд фэдэрэ лъэпкъыгъуи щыщхэу лъэкъуиплӀкӀэ кӀорэ псэушъхьэхэр, ныбэкӀэ цуахъорэ псэушъхьэхэр, ошъогу бзыухэр а шэкӀ фыжьым кӀоцӀылъыгъэх. 13 ЕтӀанэ зы макъэ горэм Петрэ къыриӀуагъ: Петрэ, къэтэдж. ШӀобзи, шхэ. 14 Хьау, Зиусхьан, къыӀожьыгъ Петрэ, ар хъухэщтэп. Мышхыпхъи, хьэрами сэ егъашӀэми сшхыгъэп. 15 ЯтӀонэрэу а макъэм Петрэ къыриӀуагъ: Тхьэм къабзэу ыкӀи шхыпхъэу зыфиӀуагъэр о хьэрамэу умыӀо. 16 Арэущтэу гъогогъуищэ хъугъэ. ЕтӀанэ шэкӀ фыжьыр уашъом дэкӀоежьыгъ. 17 Къыфэлъэгъуагъэм къикӀырэм Петрэ ыгукӀэ егупшысэзэ, Корнелый къыгъэкӀогъэ лӀыхэр Симон иунэ кӀэупчӀэхэзэ, ар къагъотыгъэу къэлапчъэм Ӏутыгъэх. 18 ПетрэкӀэ заджэхэрэ Симон мы унэм иса? аӀоу, къэупчӀэхэзэ джагъэх. 19 Петрэ къыфэлъэгъуагъэм егупшысэзэ, Тхьэм Ыпсэ ЛъапӀэ къыриӀуагъ: Мары нэбгырищ къыплъэхъух. 20 Къэтэджи, унэм ех, уемынэгуеу ахэмэ адакӀу; сыда пӀомэ ахэр къэзыгъэкӀуагъэр сэры. 21 Петрэ ехи, лӀыхэм ариӀуагъ: Шъо шъузлъыхъурэр сэры. Ӏоф горэ шъуиӀэу шъукъэкӀуагъа? 22 Тэ тыкъэзыгъэкӀуагъэр дзэ пащэу Корнелый ары,къаӀуагъ а лӀыхэм. Ар шъыпкъагъэ зиӀэу, Тхьэм ищынагъо зыгу илъэу, джурт лъэпкъым зэкӀэ лъытэныгъэ зыфыряӀэ лӀэу щыт. Ащ иунэ лӀыкӀохэм укъыраригъэщэнышъ, къапӀохэрэм ядэӀунэу мэлэӀич лъапӀэ горэм унашъо къыфишӀыгъ. 23 Джащыгъум Петрэ ахэр къыригъэблагъэхи, ыхьэкӀагъэх. ЯтӀонэрэ мафэм Петрэ ахэмэ ягъусэу гъогум техьагъ. Иоппие къалэм щыщ ышы заули игъусагъэх. 24 Ащ къыкӀэлъыкӀорэ мафэм Кесарие къалэм нэсыгъэх. Корнелый иунэкъощхэри иблагъэхэри къыугъоигъэхэу, Петрэрэ игъусэхэмрэ апаплъэщтыгъэх. 25 Петрэ. унэм зехьэм, Корнелый ащ пэгъокӀи, ылъакъохэм адэжь зыщыридзыхи, лъэгонджэмышъхьэкӀэ тӀысыгъэ. 26 Ау Петрэ Корнелый къыгъэтэджыжьи ыӀуагъ: Къэтэдж, сэри сыцӀыф ныӀэп. 27 ЕтӀанэ Петрэ Корнелый дэгущыӀэзэ унэм зехьэм, цӀыфыбэхэр щызэрэугъоигъэхэу ылъэгъутъ. 28 Джурт горэ хымэ лъэпкъым щыщхэм е ахэхьанэу е яунэ ихьанэу тихабзэкӀэ зэрэмыхъущтыр шъори шъо шӀэ, ариӀуагъ Петрэ ахэмэ. Ау зы цӀыф горэ е мыкъабзэу, е шӀоеу сымылъытэн фаеу Тхьэм зэхысигъэшӀыкӀыгъ. 29 Арыти, мы лӀыкӀохэм сыкъызяшъогъащэм, зыми семынэгуеу сыкъэкӀуагъ. Джы сышъоупчӀы, Ӏоф горэ шъуиӀэу сыкъяжъугъэщагъа? 30 МэфиплӀкӀэ узэкӀэӀэбэжьмэ мы сыхьатым, щэджэгъоужым сыхьатыр щым, сиунэ Тхьэм сыщелъэӀущтыгъ,къыӀожьыгъ Корнелый. ОшӀэдэмышӀэу щыгъын фыжь лыдхэр щыгъхэу, зы лӀы горэ сапашъхьэ къиуцуи, 31 къыӀуагъ: «Корнелый, Тхьэм уитхьэлъэӀу зэхихыгъ, уисэдакъэхэри щымыгъупшэжьыгъэхэу ыгу илъых. 32 ПетрэкӀэ заджэхэрэ Симон къыздащэнэу Иоппие къалэм лӀыкӀохэр гъакӀох. Ар шъошӀэ Симонэу зиунэ хыӀушъом Ӏутым ихьакӀэу щыт. Ар къэкӀонышъ, къыбдэгущыӀэщт». 33 Арыти, занкӀэу къыплъызгъэкӀуагъэх. УкъызэрэкӀуагъэр дэгъоу пшӀагъэ. Джы тэ зэпстэури о къэпӀонхэу, Зиусхьаным унашъо къыпфишӀыгъэхэм тядэӀунэу мыщ дэжьым Тхьэм ыпашъхьэ тит.
Петрэ Корнелый иунэ къэбарышӀур къызэрэщиӀотагъэр
34 ЕтӀанэ Петрэ мырэущтэу къыӀуатэ ыублагъ: Тхьэр цӀыфхэм ятеплъэ емыплъэу, цӀыф пстэури изэфэдэхэу зэрэщытыр шъыпкъэу зэзгъэшӀагъ. 35 Сыд фэдэрэ лъэпкъыми щыщэу, ежь ищынагъо зыгу илъэу шъыпкъагъэр зыгъэцакӀэрэр Тхьэм ештэ. 36 КъэбарышӀоу Тхьэм Израил цӀыфхэм анигъэсыгъэр шъо шъошӀэ. Мырэущтэу зыӀорэ къэбарышӀур ары: Исус Христосэу цӀыф пстэуми я Зиусхьан ары цӀыфхэр Тхьэм езыгъэшӀужьырэр. 37 Иуан ежьым зырагъэумэхъынэу цӀыфхэм заригъэӀум ыуж, Галилей хэкум къыщегъэжьагъэу зэкӀэ Иудей хэкум къыщыхъугъэхэр шъо шъошӀэх. 38 Назарет щыщ Исус икъэбар шъошӀэ. Тхьэм ежь Ыпсэ ЛъапӀэрэ лъэкӀыныгъэшхомрэ ащ къыфыригъэхыгъэх. Тхьэр ащ зэригъусагъэм пае, шӀугъэ ышӀэу, шэйтаным илъэкӀыныгъэкӀэ ригъэзыгъэ цӀыф пстэури ыгъэхъужьхэу къыкӀухьащтыгъ. 39 А Исус джуртхэм яхэгъэгуи Ерусалими Ӏофхэу щишӀагъэхэм зэкӀэ тэ тыряшыхьат. Ар пкъэум тыраӀулӀи агъэлӀагъ. 40 Ау ящэнэрэ мафэм Тхьэм ар лӀагъэхэм къахигъэтэджыкӀыжьи, цӀыфхэм ар аригъэлъэгъугъ. 41 Ау Тхьэм ар зэригъэлъэгъугъэхэр цӀыф пстэури арэп, Тхьэм ыпэкӀэ къыгъэнэфэгъэгъэ шыхьатхэр ары нахь. Исус лӀагъэхэм къызахэтэджыкӀыжьым ыуж, тэ ежь игъусэу дашхэхэу ыкӀи дешъохэу щытыгъэхэр ары Тхьэм ар зэригъэлъэгъугъэхэр. 42 Тхьэм игущыӀэхэр цӀыфмэ ядгъэӀунхэуи, псаухэми, лӀагъэхэми хьыкум атезышӀыхьанэу Тхьэм къыгъэнэфагъэр зэрэИсусыр къэтыушыхьатынэуи, Тхьэм унашъо къытфишӀыгъ. 43 Хэтми ИсускӀэ шӀошъхъуныгъэ зиӀэм ипсэкӀодхэр Исус ыцӀэкӀэ зэрэфэгъупггхэмкӀэ пегъымбар пстэури Исус шыхьат фэхъух.
Тхьэм Ыпсэ ЛъапӀэ хымэ лъэпкъхэм ащьпцхэм къызэрафехыгъэр
44 Петрэ а гущыӀэхэр къыӀохэзэ, ахэр зэхэзыхыгъэ пстэуми Тхьэм Ыпсэ ЛъапӀэ къафехыгъ. 45 Петрэ игъусэхэу къэкӀогъэгъэ шӀошъхъуныгъэ зиӀэ лӀыхэу сунэт ашӀыгъэхэу щытыгъэхэм Тхьэм итынэу ежь Ыпсэ ЛъапӀэ хымэ лъэпкъхэм ащыщхэми къызэрафыригъэхыгъэр агъэшӀэгъуагъ; 46 сыда пӀомэ а хымэхэм амышӀэрэ бзэхэмкӀэ къэгущыӀэхэу, Тхьэм щытхъу фашӀэу зэхахыгъ. Джащыгъум Петрэ къыӀуагъ: 47 Мы цӀыфхэу тэщ фэдэу Тхьэм Ыпсэ ЛъапӀэ зыгу илъ хъугъэхэр псыкӀэ тэ тыумэхъыхэмэ, зыгорэм ымыдэн ылъэкӀына? 48 ЕтӀанэ Исус Христос ыцӀэкӀэ ахэр аумэхъынхэу унашъо ышӀыгъ. ЕтӀанэ мэфэ заулэрэ ахэмэ адэжь къэтынэу Петрэ елъэӀугъэх.
Петрэ Ерусалим ичылыс зэӀукӀэм щыщхэм хъугъэшӀагъэр къызэрариӀотэжьыгъэр
1 Хымэ лъэпкъхэм щыщхэми Тхьэм игущыӀэхэр зэраштагъэхэр апостолхэмрэ Иудей хэкум ис ышыхэмрэ зэха хыгъ. 2 Арэущтэу Петрэ Ерусалим зыдэкӀуаем, сунэт ашӀыгъэхэм Петрэ ышӀагъэр амыдэу 3 ащ къыраӀуагъ: О сунэт амышӀыгъэхэм яунэ уихьи уадэшхагъ. 4 Джащыгъум Петрэ хъугъэшӀагъэхэр зырызэу къагуригъэӀонэу ыублагъ: 5 Иоппие къалэм сэ Тхьэм сыщелъэӀущтыгъ. Джащыгъум Тхьэм сэ сызэшъхьэщифи, шэкӀ фыжь иным фэдэу зыгорэ уашъом къехэу къысфэлъэгъуагъ. Ар къопиплӀымкӀэ кӀэшӀагъэу, уашъом къехэу, къырагъэлэлэхыгъэм фэдэу сапашъхьэ къэсыгъ. 6 ШэкӀ фыжьым сызеплъым, лъэкъуиплӀкӀэ кӀорэ былымхэри, хьакӀэкъуакӀэхэри, ныбэкӀэ цуахъорэ псэушъхьэхэри, ошъогу бзыухэри слъэгъугъэх. 7 «Петрэ, къэтэдж. ШӀобзи, шхэ», макъэ горэм къысиӀоу зэхэсхыгъ. 8 «Хьау, Зиусхьан, ар хъухэщтэп, мышхыпхъи, хьэрами егъашӀэми зыӀуслъхьагъэп», сӀуи, пэгъокӀ естыжьыгъ. 9 А макъэм ятӀонэрэу уашъом къиӀукӀэу къыӀожьыгъ: «Тхьэм къабзэу ыкӀи шхыпхъэу зыфиӀуагъэхэр, о хьэрамэу умыӀо». 10 Арэущтэу гъогогъуищэ хъугъэ. ЕтӀанэ зэкӀэ уашъом дэкӀоежьыгъ. 11 Ардэдэм Кесарие къалэм къикӀыхэу садэжь къагъэкӀогъэ нэбгырищ сэ сызэрыс унэм икъэлапчъэ къакӀохи къыӀууцуагъэх. 12 Семынэгуеу ахэмэ садэкӀонэу Тхьэм Ыпсэ ЛъапӀэ къысиӀуагъ. Мы зэшы нэбгырихыри сигъусэхэу тэ тыкӀохи, а лӀым иунэ тихьагъ. 13 А лӀым къытиӀотагъ мэлэӀич горэ иунэ итэу мырэущтэу ыӀозэ, зэрэщилъэгъугъэр: «ПетрэкӀэ заджэхэрэ Симон къыздащэнэу лӀыкӀохэр гъакӀох. 14 Оррэ уиунагъорэ зэкӀэ шъумыкӀодэу, шъукъэзыгъэнэжьыщт гущыӀэхэр ащ къыуиӀощтых». 15 Сэ сыкъэгущыӀэу зысэублэм, Тхьэм Ыпсэ ЛъапӀэ ахэмэ къафехыгъ, апэу тэри къызэрэтфехыгъагъэм фэдэу. 16 «Иуан псыкӀэ цӀыфхэр ыумэхъыщтыгъэх, ау Тхьэм ежь Ыпсэ ЛъапӀэкӀэ шъо шъуиумэхъыщт», ыӀуи Зиусхьаным къыӀогъэгъэ гущыӀэхэр джащыгъум сыгу къэкӀыжьыгъэх. 17 Зиусхьанэу Исус ХристоскӀэ шӀошъхъуныгъэ тэ тиӀэ зэхъум, Тхьэм Ыпсэ ЛъапӀэ тэ къызэрэтфыригъэхыгъэм фэдэу, ахэми къафыригъэхыгъэу, сэ сыхэта, Тхйэм сыпэуцужьынэу? 18 Ахэмэ мы Ӏофхэр зызэхаххэм, заушъэфыгъ. Тхьэм ищытхъу ашӀэу къаӀуагъ: Ащыгъум хымэ лъэпкъхэри япсэкӀодхэм афыкӀэгъожьынхэшъ, мыкӀодыжьын щыӀэныгъэ яӀэ хъунэу Тхьэм игъо ылъытагъ.
Антиохие къалэм чылыс зэӀукӀэ щыӀэу зэрэхъугъэр
19 Стефан мыжъокӀэ еохэзэ, заукӀым ыуж, ИсускӀэ шӀошъхъуныгъэ зиӀэхэм къиныбэ зэрагъэщэчыщтыгъэхэм пае, ахэр зэбгырыкӀыжьыгъэх. Исус ехьылӀэгъэ къэбарышӀур джуртхэм анэмыкӀэу зыми рамыӀуатэу, ахэр Финикие хэкум, Кипр зыцӀэ хыгъэхъунэм, Антиохие къалэм анэсы кӀуагъэх. 20 Ау ахэмэ ащыщхэу зы купэу Кипр хыгъэхъунэм щыщ лӀыхэри, Кириние къалэм щыщ лӀыхэри Антиохие къалэм зэкӀохэм, Зиусхьанэу Исус ехьылӀэгъэ къэбарышӀур урымхэми араӀуатэщтыгъ. 21 Зиусхьаныр ягъусагъ, цӀыфыбэми шӀошъхъуныгъэ яӀэ хъоу, Зиусхьаным игъогу техьагъэх. 22 Мы Ӏофхэм якъэбар Ерусалим щыӀэ чылыс зэӀукӀэм щыщхэм анэсыгъ. Занэсым, Варнавэ Антиохием агъэкӀуагъ. 23 Варнавэ Антиохием кӀуи, Тхьэм ынэшӀу ахэмэ къызэращифагъэр зелъэгъум гушӀуагъэ, агу етыгъэу, емызэщхэу Зиусхьаным фэшъыпкъэнхэуи афигъэпытагъ. 24 Варнавэ цӀыф дэгъоу щытыгъ. Тхьэм ЬӀпсэ ЛъапӀи шӀошъхъуныгъэри инэу ыгу илъыгъэх. Арэущтэу ЗиусхьанымкӀэ шӀошъхъуныгъэ зиӀэ цӀыфхэм япчъагъэ инэу хэхъуагъ. 25 ЕтӀанэ Саул лъыхъунэу Варнавэ Тарс къалэм кӀуагъэ. Ащ дэжьым Саул къызегъотым, Антиохием зыдищагъ. 26 Зы илъэсым икӀыхьагъэкӀэ чылыс зэӀукӀэм щыщхэм ягъусэу зэрэугъоихэзэ, цӀыф купышхом Тхьэм игущыӀэхэр арагъашӀэщтыгъэх. ИсускӀэ шӀошъхъуныгъэ зиӀэхэм «ХристианхэкӀэ» апэ дэдэу зыщяджагъэхэр Антиохие ары. 27 А мафэхэм пегъымбар куп Ерусалим къикӀыхи, Антиохие къэкӀуагъэх. 28 Ахэмэ ащыщэу Агав зыцӀэр къэтэджи, зэкӀэ дунаем гъэблэшхо къызэрэщыхъущтыр Тхьэм Ыпсэ ЛъапӀэ ащ ыгу къырилъхьи къыригъэӀуагъ. Кайсар Клаудый итетыгъоми арэущтэу хъугъэ. 29 Джащыгъум ИсускӀэ шӀошъхъуныгъэ зиӀэхэм, хэти зэрилъэкӀырэм фэшъуашэу, Иудей хэкум ис ашыхэм ӀэпыӀэгъу афэхъунхэу тыраубытагъ. 30 ШӀошъхъуныгъэ зиӀэхэм арэущтэу ашӀызэ, аугъоигъэ ахъщэр Варнавэрэ Саулрэ аӀэкӀалъхьи, ахэми чылыс зэӀукӀэм инахьыжъхэм афарагъэхьыгъ.
Тетыгъо зиӀэхэм Якъубэ зэраукӀыгъэр ыкӀи Петрэ хьапсым зэрэчӀадзагъэр
1 А мафэхэм пачъыхьэ Ирод идзэлӀхэм чылыс зэӀукӀэм щыщхэу цӀыф заулэ аригъэубытхи, лые араригъэхэу ыублагъ. 2 Иуан ышэу Якъубэ сэшхокӀэ аригъэукӀыгъ. 3 Ар джуртхэм агу зэрэрихьырэр Ирод зелъэгъум, ащ ыужкӀэ идзэлӀхэм Петри аригъэубытыгъ. Ар зыхъугъэр Хьалыгъу Мыгъэтэдж зыщашхырэ мэфэкӀ мэфэшхохэр ары. 4 Ирод Петрэ зарегъэубытым, хьапсым чӀаригъа дзи, дзэм щыщхэу нэбгырэ плӀырыплӀэу купиплӀ ар аухъумэнэу аӀэкӀилъхьагъ. ЕтӀанэ Пасхъэ зыцӀэ мэфэкӀ мэфэшхор зыблэкӀыкӀэ, хьыкумышӀэм ыпашъхьэ рищэнэу Ирод ыгу хэлъыгъ. 5 Арэущтэу Петрэ хьапсым чӀадзагъэу щытыгъ, ау чылыс зэӀукӀэм щыщхэм яшъыпкъэу Тхьэм ащ фелъэӀущтыгъэх.
МэлэӀич горэм Петрэ хьапсым къызэрэчӀищыжьыгъэр
6 Пачъыхьэ Ирод Петрэ хьыкумышӀэм ыпашъхьэ зыщырищэщт мафэм ыпэрэ чэщым Петрэ ӀэхъуитӀу телъэу, дзэлӀитӀум азыфагу дэлъэу щычъыещтыгъ. УхъумакӀохэри пчъэм Ӏутхэу хьапсыр къаухъумэщтыгъ. 7 ОшӀэдэмышӀэу Зиусхьаным имэлэӀич а унэм къыщылъагъуи, нэфынэшхо унэм къыщынэфыгъ. МэлэӀичыр Петрэ ыбгъукӀэ етӀыргуи къыгъэущыгъ. ПсынкӀэу тэдж! ыӀуагъ. Петрэ ӀэхъуитӀоу телъхэр тезыгъэх. 8 Зыфап, уицуакъэхэри зыщылъэх, риӀуагъ мэлэӀичым Петрэ. Петрэ арэущтэу ышӀыгъ. ЕтӀанэ мэлэӀичым риӀуагъ: Уищыгъын кӀыӀутелъ зыщылъэжьи, сауж уитэу къакӀо. 9 Арэущтэу Петрэ мэлэӀичым ыуж итэу хьапсым къычӀэкӀыжьыгъ. Ау мэлэӀичым ышӀагъэхэр шъыпкъэмэ, мышъыпкъэмэ Петрэ ышӀэщтыгъэп, зыгорэ къыфэлъагъоу къышӀошӀыгъ. 10 Апэрэ ухъумэкӀо купми, ятӀонэрэ ухъумэкӀо купми къаблэкӀхи, къэлэ дэхьапӀэм Ӏут гъучӀ къэлапчъэм дэжь нэсыгъэх. Къэлапчъэр ежьежьырэу ахэмэ къафызэӀукӀыгъ. Къэлапчъэм дэкӀхи, зы урамым икӀыхьагъэкӀэ зырэкӀохэ ужым, ошӀэдэмышӀэу мэлэӀичым Петрэ къыгъани ӀукӀыжьыгъ. 11 Петрэ зыкъызешӀэжьым, къыӀуагъ: Зиусхьаным имэлэӀич къыгъакӀуи, Ирод ыӀэ сыкъыӀэкӀихэу, джурт цӀыфхэми къысэхъулӀэнэу зыфаӀорэ Ӏэягъэ пстэури симыгъэлъэгъузэ, сымыкӀодэу сыкъызэ ригъэнэжьыгъэр джы шъыпкъэу къэсшӀагъ. 12 Петрэ къехъулӀагъэр къызешӀэжьым, Иуанэу МарккӀэ заджэхэрэм янэу Мерэм иунэ кӀуагъэ. ЦӀыфыбэхэр ащ дэжьым къыщызэрэугъоигъэхэу, Тхьэм елъэӀущтыгъэх. 13 Петрэ къэлапчъэм зытеом, ар къызэӀуихынэу Родэ зыцӀэу унэӀут пшъашъэ горэ къэкӀуагъ. 14 Петрэ ымакъэ къызешӀэжьым, гушӀуагъом хэтэу къэлапчъэр Ӏуимыхэу унэм илъэдэжьи, Петрэ къэлапчъэм зэрэӀутыр адрэмэ ариӀуагъ. 15 КъапӀорэр пшӀэрэп, къыраӀожьыгъ ахэмэ. Ау ыӀуагъэм пшъашъэр текӀыгъэп. Джащыгъум къаӀуагъ: Ар Петрэ имэлэӀичын фае. 16 Ау Петрэ къэлапчъэм зэпымыоу теощтыгъэ. Къэлапчъэр Ӏуахи, Петрэ залъэгъум, лъэшэу агъэшӀэгъуагъ. 17 Заушъэфынэу Петрэ Ӏэ афшпӀи, Зиусхьаным хьапсым къызэрэчӀищыжьыгъэр ахэмэ ариӀотэжьыгъ. ЕтӀанэ къыӀуагъ: Якъуби адрэ тшыхэми хъугъэшӀагъэр яжъугъашӀ. Ар къызеӀом, а унэм икӀи, нэмыкӀ чӀыпӀэ горэм кӀуагъэ. 18 Нэф къызэшъым, дзэлӀхэр гузэжъогъушхо хэфагъэхэу зэупчӀыжьыгъэх: Петрэ сыда къехъулӀагъэр? 19 Пачъыхьэ Ирод дзэлӀхэр Петрэ лъигъэхъухи къызамыгъотым, ухъумакӀохэм тэрэзэу зяупчӀым ыуж, дзэлӀхэм а ухъумакӀохэр аригъэукӀыгъэх. Пачъыхьэ Ирод етӀанэ Иудей хэкум икӀи, Кесарие къалэм ехи, ащ дэжьым къыдэнагъ.
Пачъьгхьэ Ирод зэрэлӀагъэр
20 Пачъыхьэ Ирод Тир къалэм дэсхэмрэ Сидон къалэм дэсхэмрэ инэу афэгубжыгъэу щытыгъ. А къалэхэм адэсхэр зэгурыӀохи, пачъыхьэм ыдэжь къэкӀуагъэх. Пачъыхьэм фэлажьэрэ Ӏэшъхьэтетэу Власт гурыӀохи, пачъыхьэр къаригъэшӀужьынэу елъэӀугъэх. Сыда пӀомэ пачъыхьэм ихэгъэгу гъомлапхъэхэу къикӀыхэрэр ары ахэр зэрыпсэущтыгъэхэр. 21 Ирод ыгъэнэфэгъэ мафэм ипачъыхьэ щыгъынхэр щыгъхэу, пачъыхьэ тӀысыпӀэм тетӀысхьи, ахэмэ апашъхьэ къыщыгущыӀагъ. 22 Мыр цӀыф макъэп, Тхьэм ымакъэ нахь, цӀыфхэм аӀоти джэщтыгъэх. 23 Пачъыхьэ Ирод Тхьэм щытхъушхор зэрэфимышӀыгъэм пае, Тхьэм имэлэӀич горэ ардэдэм ащ къыригъаозэ, хьамылыухэм ар ашхызэ, ыпсэ хэкӀыгъ. 24 Ау Тхьэм игущыӀэхэр нахь цӀыфыбэмэ анэсхэзэ, зыщаубгъущтыгъ. 25 Варнавэрэ Саулрэ яӀоф заухым, Ерусалим къыдэкӀыжьхи, МарккӀэ заджэхэрэ Иуан ягъусэу зыдащи, Антиохие къалэм агъэзэжьыгъ.
Антиохием щыӀэ чылыс зэӀукӀэм щыщхэм Варнавэрэ Саулрэ Тхьэм фэлэжьэнхэу зэрагъэнэфагъэхэр
1 Пегъымбархэри, дин гъэсакӀохэри Антиохием щыӀэ чылыс зэӀукӀэм щыщхэм ахэтыгъэх: Варнавэ, «ШӀуцӀэкӀэ» заджэхэрэ Симон, Кириние къалэм щыщ Луцый, Манаил (ар пщы Ирод игъусэу апӀугъагъ) ыкӀи Саул. 2 Ахэр Тхьэм елъэӀухэзэ, чэщи мафи анэкӀы зэхъум, Тхьэм Ыпсэ ЛъапӀэ ахэмэ къариӀуагъ: Варнавэрэ Саулрэ сэ сыкъызфяджэгъэ Ӏофым пае къысфыхэшъ ухых. 3 ЕтӀанэ ахэмэ чэщи мафи занэкӀы ужым, Тхьэм елъэӀугъэх, аӀэхэри ахэмэ ашъхьэхэр атралъхьэхи, яӀоф ашӀэнэу агъэкӀуагъэх.
Апостолхэм Кипр хыгъэхъунэм Тхьэм игущыӀэхэр зэрэщагъэӀущтыгьэхэр
4 Варнавэрэ Саулрэ Тхьэм Ыпсэ ЛъапӀэ ыгъэкӀуагъэхэу, Селевкие къалэм нэсыгъэх. Ащ дэжьым къухьэкӀэ щежьэхи, Кипр хыгъэхъунэм кӀуагъэх. 5 Саламин къалэм дэжь зынэсхэм, джуртхэм ясинэгогухэм Тхьэм игущыӀэхэр щагъэӀущтыгъэх. Иуан ахэмэ ӀэпыӀэгъу афэхъунэу ягъусагъ. 6 Хыгъэхъунэм икӀыхьагъэкӀэ Паф къалэм нэс къызэкӀохэм, ушхъухьаныгъэ Ӏофым пылъ джурт пегъымбар нэпцӀ горэм ӀукӀагъэх. А лӀым Варисус ыцӀагъ. 7 Ар хыгъэхъунэм иӀэшъхьэтетэу Сергый Паул игъусагъ. Сергый Паул цӀыф губзыгъэу щытыгъ. Ар Тхьэм игущыӀэхэм ядэӀунэу фэягъэти, Варнавэрэ Саулрэ къаригъэщагъэх. 8 Ау ушхъухьаныгъэ Ӏофым пылъэу Елимэ (Елимэ къикӀырэр «Ушхъухьаныгъэ Ӏофым Пылъыр» ары) Ӏэшъхьэтетыр шӀошъхъуныгъэм игъогу тыримыгъэхьаным ыужитыгъэти, Варнавэрэ Саулрэ апэуцужьыщтыгъ. 9 Ау Саулэу ПаулкӀи заджэхэрэм ыгу Тхьэм Ыпсэ ЛъапӀэ инэу илъ хъуи, ынэхэр Елымэ тыригъэдыкъэхи къыӀуагъ: 10 О шэйтаным урикъу, о зэкӀэ шъыпкъагъэм урипый. ТхьагъэпцӀыгъэ пстэури бзэджэгъэ пстэури угу инэу илъых. Тхьэм игъогу занкӀэхэр къуанчэ пшӀынхэу упылъыным ыуж уикӀыжьыщтба? 11 Джы Зиусхьаным ыӀэ къыптелъ. Заулэрэ тыгъэм инэфынэ умылъэгъоу, нэшъоу ухъущт. Ардэдэм пщагъори шӀункӀыри Елымэ къыфехыгъэх. ЕтӀанэ къыкӀухьэзэ, къезыщэкӀын цӀыф горэм лъыхъу щтыгъ. 12 Ӏэшъхьэтетым хъугъэшӀагъэр зелъэгъум, шӀошъхъуныгъэ иӀэ хъугъэ. Варнавэрэ Паулрэ Ӏофхэу Зиусхьаным ехьылӀагъэу къырагъашӀэхэрэр ыгъэшӀагъощтыгъэх.
Паулрэ Варнавэрэ Писидне хэкум щыщ Антиохие къалэм зэрэкӀуагъэхэр
13 ЕтӀанэ Паулрэ игъусэхэмрэ Паф къалэм къухьэкӀэ щежьэхи, Памфилие хэкум щыщ Пергие къалэм кӀуагъэх. Ащ дэжьым Иуан ахэр къыгъанэхи, Ерусалим ыгъэзэжьыгъ. 14 Адрэ нэбгыритӀур Пергие къалэм блэкӀхи, Писидие хэкум щыщ Антиохие къалэм нэсыгъэх. Шэмбэт мафэм синэгогум чӀахьэхи тӀысыгъэх. 15 Тэурат хабзэм итхэмрэ пегъымбархэм атхыгъэ тхылъхэм арытхэмрэ ащыщхэу зыгорэхэм зяджэхэ ужым, синэгогу пащэхэм зыгорэ агъакӀуи арырагъэӀуагъ: Тэ тшьгхэр, мы цӀыфхэр зэрыжъугъэгушхон гущыӀэхэр шъуиӀэхэмэ, къашъуӀох. 16 Паул къэтэджи, Ӏэ афишӀи къыӀуагъ: Шъо Израил цӀыфхэри, Тхьэм ищынагъо зыгу илъхэри, шъукъэдаӀу. 17 Израил лъэпкъым и Тхьэ тэ тятэжъхэр къыхихыгъэх. Тэ тлъэпкъ Мысыр хэгъэгум зесым, лъэпкъышхоу ышӀи, лъэкӀыныгъэшхокӀэ ащ дэжьым къырищыжьыгъэх. 18 ЕтӀанэ илъэс тӀокӀитӀо шъоф нэкӀым щигъашхэщтыгъэх. 19 Ханаан хэгъэгум щьшсэурэ лъэпкъиблир ыгъэкӀодхи, ахэмэ яхэгъэгу Израил лъэпкъым иӀахьэ хъунэу къыфигъэнэжьыгъ. 20 Ар зэкӀэ илъэс шъиплӀырэ шъэныкъорэм ыкӀоцӀым фэдиз хъугъэ. Ащ ыужым, хьыкумышӀэхэр Тхьэм ахэмэ аритыгъэх, пегъымбар Самуел имафэхэм нэсыфэ. 21 ЕтӀанэ пачъыхьэ афигъэнэфэнэу Израил цӀыфхэр Самуел елъэӀугъэх. Вен иамин иунэгъо лъэпкъ щыщэу, Кис ыкъо Саул пачъыхьэ афэхъунэу Тхьэм аритыгъ. ЕтӀанэ илъэс тӀокӀитӀурэ ар пачъыхьэу щытыгъ. 22 Тхьэм ар тыригъэкӀыжьи, Даутэ пачъыхьэу тыригъэхьагъ. Тхьэм Даутэ мырэущтэу шыхьат фэхъугъ: «Иессэ ыкъоу Даутэ сыгу зэӀурэ цӀыфэу къэзгъотыгъ. Сэ сызыфаехэр зэкӀэ ащ ыгъэцэкӀэщтых». 23 Мы лӀым къытехъукӀыгъэ цӀыфхэм ащыщэу, Израил цӀыфхэр мыкӀодхэу къэзыгъэнэжьырэр Исус ары, Тхьэм къафигъэкӀуагъ, ятэжъхэр къызэригъэгугъэгъагъэхэм фэдэу. 24 Исус къэкӀоным ыпэкӀэ Иуан, «ШъуипсэдкӀодхэм шъуафыкӀэгъожьи, зысэжъугъэумэхъ», ыӀоу, Израил цӀыфхэм зэкӀэ аригъэӀугъ. 25 Иуан иӀоф ыухызэ къыӀуагъ: «Сэ хэтэу сышъушӀошӀыра? Шъо шъузпаплъэрэр сэрэп. Шъо шъузпаплъэрэр саужкӀэ къэкӀощт, ащ ицокъэлъэпсхэр фэстӀэтэныхэуи сифэшъуашэп». 26 (Паул джыри ипсалъэ къыпидзэжьыгъ:) Сэ сшыхэу Ибрахьим къытехъукӀыгъэ цӀыфхэри, шъо къышъухэтхэу нэмыкӀ цӀыфхэу Тхьэм ищынагъо зыгу илъхэри, Тхьэм цӀыфхэр мыкӀодхэу къызэригъэнэжьхэрэм икъэбар къызнэсыгъэхэр тэры. 27 Ерусалим дэсхэмрэ ахэмэ ятхьаматэхэмрэ цӀыфхэр мыкӀодхэу къэзыгъэнэжьырэр зэрэИсусыр къашӀэжьыгъэп. УкӀ ежьым къытралъхьагъ, ау арэущтэу пегъымбархэм ягущыӀэхэу шэмбэт мафэ къэсми синэгогухэм щызаджэхэрэр къагъэшъыпкъэжьыгъэх. 28 УкӀ Исус зыкӀытралъхьащт Ӏоф амыгъотыгъэ пэтми, Ӏэшъхьэтетэу Пилат ар ыукӀынэу елъэӀущтыгъэх. 29 Исус ехьылӀагъэу Тхьэм игущыӀэ тхыгъэхэм арытхэр зэкӀэ ахэмэ загъэцакӀэ ужым, Исус игъусэхэм ежь ихьадэ къащым къыпахыжьи, къэунэм чӀалъхьажьыгъ. 30 Ау Тхьэм ар лӀагъэхэм къахигъэтэджыкӀыжьыгъ. 31 ЕтӀанэ Исус ежь игъусэхэу Галилей хэкум къикӀыгъэхэу, Ерусалим къэкӀогъагъэхэм мафэ пчъагъэхэм акӀоцӀ заригъэлъэгъущтыгъ. Джы ахэр ары тэ тлъэпкъ ыпашъхьэ Исус шыхьат щыфэхъухэрэр. 32 Джы мы къэбарышӀур тэ къышъотэӀо: Тхьэм Исус лӀагъэхэм къызэрахигъэтэджыкӀыжьыгъэмкӀэ тэ тятэжъхэр къызэригъэгугъэгъэ Ӏофхэр къыгъэхъухэзэ, тэ ахэмэ атехъукӀыгъэ цӀыфхэм къытфигъэшъыпкъэжьыгъ. 33 Сэбурым итэу ятӀонэрэ орэдым Тхьэм Исус къызэрэщыриӀорэм фэдэу: «Оры Скъор, непэ ты сыпфэхъугъ». 34 Тхьэм Исус лӀагъэхэм къызэрахигъэтэджыкӀыжьыгъэр егъашӀэми мылӀэжьыным пае, мы гущыӀэхэмкӀэ Тхьэм къыӀуагъ: «СынэшӀу щыфэныгъэ лъапӀэр шъыпкъэмкӀэ шъо къышъулъызгъэсыщт, Даутэ зэрэзгъэгугъэгъагъэм фэдэу». 35 Тхьэм игущыӀэ тхыгъэхэм ащыщэу нэмыкӀ чӀыпӀэм ыдэжь зэритым фэдэу, «О къыпфэлажьэрэм ихьадэ бгъэшъущтэп». 36 Сыда пӀомэ Тхьэм игухэлъ тетэу Даутэ имафэхэм Тхьэм фэлажьэщтыгъ, етӀанэ дунаем ехыжьыгъ. Ятэжъхэм адэжь къэунэм чӀалъхьажьи, ихьади шъугъэ. 37 Ау Тхьэм лӀагъэхэм къахигъэтэджыкӀыжьыгъэр джыри зэ лӀэжьыгъэп, ихьади шъужьыгъэп. 38 Арышъ, сэ сшыхэр, мыр зэжъугъашӀэ, шъо шъуипсэкӀодхэр Исус къызэрэшъуфигъэгъухэрэм икъэбар къышъотэгъэӀу. 39 Исус ежьымкӀэ хэти шӀошъхъуныгъэ зиӀэм ипсэкӀод пстэури тырехых, ау пегъымбар Мусэ и Тэурат хабзэ псэкӀодхэр къышъутырихын ылъэкӀырэп. 40 Шъузфэсакъыжь, пегъымбархэм мы гущыӀэхэу къаӀуагъэхэр къышъорэмыхъулӀэх: 41 «ШъукъэдаӀу, шъо Тхьэм къыӀуагъэхэм нэмыплъ языххэрэр, жъугъэшӀагъуи шъукӀод; сыда пӀомэ шъо шъуимафэхэм Ӏофышхо горэ згъэцэкӀэщт. А Ӏофышхом икъэбар зыгорэм къышъуиӀуагъэми, шъо шъушӀошъ хъущтгъэп». 42 Паулрэ Варнавэрэ синэгогум къычӀэкӀыжьхэзэ, къыкӀэлъыкӀорэ шэмбэт мафэм а Ӏофхэм атегущыӀэжьынхэу цӀыфхэр къялъэӀугъэх. 43 ЗэӀукӀэр зызэбгырэкӀыжьым, джуртхэм ащыщхэу бэхэри, хымэхэу джурт хъугъэхэм ащыщхэу бэхэри Паулрэ Варнавэрэ ягъусэхэу кӀощтыгъэх. ИтӀур ахэмэ адэгущыӀэхи, Тхьэм ынэшӀу къызэращифэщтым ыуж ит зэпытынхэу афагъэпытагъ. 44 КъыкӀэлъыкӀорэ шэмбэт мафэм Тхьэм игущыӀэхэм ядэӀунхэм пае, къалэм дэс цӀыф пстэури къэнэгъэ шӀагъо щымыӀэу зэрэугъоигъэх. 45 Ау джуртхэм цӀыф купышхохэр залъэгъухэм, шъугъоныр агу къихьи, ехъонхэзэ, Паул къыӀуагъэхэм апэуцужьыщтыгъэх. 46 Джащыгъум Паулрэ Варнавэрэ гушхоныгъэкӀэ къаӀуагъ: Тхьэм игущыӀэхэр ыпэ рапшӀэу шъо къышъотӀонхэ фэягъ. Ау шъо Тхьэм игущыӀэхэр щыжъугъэзыехэу, арэущтэу мыкӀодыжьын щыӀэныгъэ шъуиӀэ хъунэу зыфэжъугъэшъуашэрэп. Арышъ, хымэ лъэпкъхэм ащыщхэм тэ зафэтэгъазэ; 47 сыда пӀомэ Тхьэм мырэущтэу унашъо къытфишӀыгъ: «Хымэ лъэпкъхэм нэфынэ уафэхъунэу узгъэуцугъ, дунаем ыкъуапэхэм анэсыфэ, цӀыфхэр мыкӀодхэу Тхьэм къыуигъэгъэнэжьынхэм пае». 48 Хымэ лъэпкъхэм ащыщхэм ар зызэхахым, гушӀохи, Зиусхьаным игущыӀэхэм щытхъу афашӀыгъ. МыкӀодыжьын щыӀэныгъэ яӀэ хъунэу Тхьэм ыгъэнэфэгъэ цӀыф пстэуми шӀошъхъуныгъэ яӀэ хъугъэ. 49 Зиусхьаным игущыӀэхэр а хэкум тыдэкӀи цӀыфхэм анэсхэу хъугъэ. 50 Ау джуртхэм лъытэныгъэ зиӀэ бзылъфыгъэхэу Тхьэр зыгъэлъапӀэхэрэмрэ къалэм итхьаматэхэмрэ къызэкӀагъэплъыхьагъэх. ЕтӀанэ цӀыфхэр Паулрэ Варнавэрэ атебэнэнхэу зэкӀагъэблагъэх, яхэкуми къарафыгъэх. 51 Паулрэ Варнавэрэ алъакъохэм акӀэрылъ сапэр цӀыфхэм апашъхьэ щыкӀэрагъэтэкъужьи, Иконие къалэм кӀуагъэх. 52 Ау ИсускӀэ шӀошъхъуныгъэ зиӀэхэм агухэм гушӀуагъорэ Тхьэм Ыпсэ ЛъапӀэрэ инэу арылъ хъутъэх.
Паулрэ Варнавэрэ Иконие къалэм Тхьэм игущыӀэхэр зэрэщагьэӀущтыгьэхэр
1 Иконие къалэм Паулрэ Варнавэрэ зынэсхэм, яхабзэ тетэу, джуртхэм ясинэгогу чӀэхьагъэх. Джуртхэмрэ урымхэмрэ ащыщхэу бэмэ шӀошъхъуныгъэ яӀэ агъэхъузэ, адэгущыӀагъэх. 2 Ау шӀошъхъуныгъэ зиӀэ хъунхэу зымыдэрэ джуртхэм хымэ лъэпкъхэм ащыщхэр зэкӀагъэплъыхьахи, шыхэмэ къафагъэгубжыгъэх. 3 Паулрэ Варнавэрэ Зиусхьаным икъэбар гушхоныгъэкӀэ цӀыфхэм араӀозэ, а къалэм бэрэ щыӀагъэх. Зиусхьаными ынэшӀу щыфэныгъэм ехьылӀэгъэ къэбарышӀур ыгъэшъыпкъэжьызэ, нэшэнэ гъэшӀэгъонышхохэр къагъэлъэгъонхэуи Ӏофышхо гъэшӀэгъонхэр ашӀэнхэуи Паулрэ Варнавэрэ лъэкӀыныгъэ аритыгъ. 4 Ау къалэм ицӀыфхэр лӀэныкъуитӀоу зэрэгъэхъугъэх. Зы купыр джуртхэм агохьагъэх, адрэ купри апостолхэм агохьагъэх. 5 ЕтӀанэ хымэ лъэпкъхэм ащыщхэри, джуртхэри, ахэмэ ятхьаматэхэри ягъусэхэу зэгурыӀохи, Паулрэ Варнавэрэ лые къарахынэуи мыжъохэмкӀэ къяохэзэ, къаукӀынхэуи гухэлъ ашӀыгъ. 6 Паулрэ Варнавэрэ ахэмэ ягухэлъ къызашӀэм, Ликаоние хэкум щыщ къалэхэу Листрэрэ Дервиерэ ахэмэ яӀэгъоблагъо хэкумрэ кӀатхъужьыгъ. 7 А чӀыпӀэхэми къэбарышӀур щагъэӀугъ.
Паулрэ Варнавэрэ Листрэ къалэм Тхьэм игущыӀэхэр зэрэщагъэӀущтыгьэхэр
8 Листрэ къалэм лӀы сэкъат горэ дэсыгъ. Къызыхъугъэм щегъэжьагъэу ылъакъохэм атеуцон ымылъэкӀэу, егъашӀэми земыкӀошъоу ащ дэжьым щысыгъ. 9 Паул къэгущыӀэ зэхъум, а лӀыр едэӀущтыгъ. Паул а лӀым зеплъым, хъужьынэу ащ шӀошъхъуныгъэ иӀэу зелъэгъум, 10 мэкъэшхокӀэ къыӀуагъ: Зиусхьанэу Исус Христос ыцӀэкӀэ къыосэӀо: Къэтэджи, плъакъохэм къатеуцу. А лӀыр къызщылъэти, къыкӀухьэу ыублагъ. 11 Паул ышӀагъэр цӀыф купышхохэм залъэгъум, мэкъэшхокӀэ Ликаоние хэкум ыбзэкӀэ къаӀуагъ: Тхьэхэр цӀыф плъышъоу къытфехыгъэх. 12 Варнавэ ЗевскӀэ еджагъэх, къэгущыӀэрэр Паул арыти, ащ ЕрмыйкӀэ еджагъэх. 13 Зевс иунэшхоу къалэм тӀэкӀу дэдзыгъэу щытым идин пащэм цӀыфхэм цухэр къэлапчъэм къаригъащэхи, танджэхэри къаригъэхьыхи, ежьыми цӀыф купыпгхоми Варнавэрэ Паулрэ къурмэн афашӀынэу фэягъэх. 14 Ау апостолхэу Варнавэрэ Паулрэ ар зызэхахым, афамыдэу ящыгъынхэр зэӀатхъыжьхи, цӀыф купышхом ахэлъадэхи, куохэу къаӀуагъ: 15 Шъо лӀы купыр, сыда мы шъушӀэхэрэр? Шъо тышъуфэдэу тэри тыцӀыф. Мы тхьэ нэпцӀхэу зишӀуагъэ къэмыкӀощтхэм шъуакӀыб афэжъугъэзэжьэу Тхьэ шъыпкъэу псаоу щытым зыфэжъугъэзэжьыным пае, къэбарышӀур къышъуфэтэгъэӀу. Тхьэр ары уашъори, чӀыри, хыри, ахэмэ ащыпсэурэ пстэури къэзыгъэхъугъэр. 16 БлэкӀыгъэ лъэхъанэхэм лъэпкъ пстэури зэрэфаехэу ежь ягъогу рыкӀонхэу фит ышӀыгъагъэх. 17 Ау щытми, Тхьэм шыхьат имыӀэу зыкъигъэнагъэп: Уашъом къикӀэу ощх къышъуфыригъэщхызэ, игъом гъажъор къышъуфигъэкӀызэ, шхын шъуфимыгъэныкъозэ, шъуигъэгушӀозэ шӀугъэ къышъуфишӀагъ. 18 Паулрэ Варнавэрэ арэущтэу аӀозэ, къурмэн зыфарамыгъэшӀэу, цӀыф купышхор ерагъэу зэтыраӀэжьагъэх. 19 Ащ нэужым Антиохие къалэмрэ, Иконие къалэмрэ къарыкӀхэу джурт куп къэкӀуагъ. Апостолхэм гушхоныгъэкӀэ Тхьэм игущыӀэхэр агъэӀухэзэ, а джуртхэм цӀыфхэр апостолхэм агуагъэкӀыгъэх, мырэущтэу аӀозэ: «Мы лӀыхэм шъыпкъэр къаӀорэп, пцӀы къаусы нахь». ЕтӀанэ а джуртхэм цӀыф купышхор зэкӀагъэплъыхьэхи, Паул мыжъокӀэ къеохэзэ, къаукӀынэу пылъыгъэх, лӀагъэуи аӀозэ, къалэм далъэшъугъ. 20 Ау етӀанэ Паул игъусэхэм къауцухьи, Паул къэтэджи, къалэм дэхьажьыгъ. ЯтӀонэрэ мафэм Варнавэ игъусэу Паул Дервие къалэм кӀуагъэ.
Паулрэ Варнавэрэ Сирие хэкум щыщ Антиохие къалэм зэрагъэзэжьыгъэр
21 Паулрэ Варнавэрэ Дервие къалэми къэбарышӀур щагъэӀузэ, цӀыфыбэхэр Исус игъогу зытырагъахьэхэ ужым, къалэхэу Листрэ, Иконие, Антиохие агъэзэжьыгъ. 22 А къалэхэм ИсускӀэ шӀошъхъунгъэ зиӀэ хъугъэхэр щагъэгушхохи, шӀошъхъуныгъэм игъогу темыкӀынхэу афагъэпытэзэ араГуагъ: Тхьэм и Тетыгъошхо ыӀэчӀэгъ къин тщэчызэ тычӀэхьан фае. иПаулрэ Варнавэрэ тэдрэ чылыс зэӀукӀэм нахьыжъхэр фагъэнафэхи, Тхьэм елъэӀухэзэ, чэщи мафи анэкӀэу, ахэмэ Зиусхьанэу шӀошъхъуныгъэ зыфыряӀэ хъугъэм ынаӀэ къатыригъэтынэу фагъэзагъэх. 24 Ащ нэужым Писидие хэкум кӀоцӀырыкӀыхи, Памфилие хэкум нэсыгъэх. 25 Пергие къалэм Зиусхьаным игущыӀэхэр къызыщагъэӀухэ ужым, Атталие къалэм ехыгъэх. 26 А къалэм къыдэкӀыхи, къухьэкӀэ Антиохие къалэм кӀуагъэх. Антиохиер ары чылыс зэӀукӀэм щыщхэм Паулрэ Варнавэрэ джы агъэцэкӀэгъэ Ӏофым пае, Тхьэм ынэшӀу къащифэнэу зыщыфагъэзагъэр. 27 Паулрэ Варнавэрэ Антиохием зынэсхэм, чылыс зэӀукӀэм щыщхэр аугъоихи, Тхьэм ахэмэ аригъэгъэцэкӀэгъэ Ӏоф пстэури къаӀотэжьыгъэх, хымэ лъэпкъхэм ащыщхэми шӀошъхъуныгъэ яӀэ хъунэу Тхьэм пчъэр зэрафыӀуихыгъэри къаӀотэжьыгъ. 28 ЕтӀанэ ИсускӀэ шӀошъхъуныгъэ зиӀэхэм адэжь бэрэ щыӀэнхэу къэнагъэх.
Апостолхэмрэ нахьыжъхэмрэ Ерусалим зэӀукӀэ зэрэщашӀыгъэр
1 Зы лӀы горэхэр Иудей хэкум къикӀыхи, Антиохием къакӀохи, ашыхэмэ арагъашӀэу аублагъ, мырэущтэу аӀозэ: Пегъымбар Мусэ и Тэурат хабзэ сунэт шъуашӀын фаеу зэритым пае, сунэт шъуамышӀымэ, шъумыкӀодэу Тхьэм шъу къигъэнэжьыщтэп. 2 Паулрэ Варнавэрэ ахэмэ агурымыӀохэу, лъэшэу янэкъокъугъэх. Арыти, Паулрэ Варнавэрэ цӀыф заулэ ягъусэхэу, мы Ӏофым ехьылӀагъэу Ерусалим дэс апостолхэмрэ нахьыжъхэмрэ адэжь агъэкӀонхэу ашыхэм тыраубытагъ. 3 Арэущтэу чылыс зэӀукӀэм щыщхэр Паулрэ Варнавэрэ адэкӀуатэхэзэ, гъогум тырагъэхьагъэх. Паулрэ Варнавэрэ хэкухэу Финикиерэ Самариерэ кӀоцӀырыкӀыгъэх. КӀоцӀырыкӀыхэ зэхъум, хымэ лъэпкъхэм ащыщхэр Тхьэм игъогу зэрэтехьагъэхэм икъэбар афаӀотэжьызэ, ашы пстэури инэу агъэгушӀуагъэх. 4 Ерусалим зынэсхэм, чылыс зэӀукӀэм щыщхэми, апостолхэми, нахьыжъхэми ахэр рагъэблэгъагъэх. Тхьэм ахэмэ ашӀэнхэу аригъэлъэкӀыгъэ Ӏоф пстэури араӀотэжьыгъэх. 5 Ау шӀошъхъуныгъэ зиӀэ лӀы горэхэу диным рыкӀорэ цӀыф купэу фарисей купкӀэ заджэхэрэм ащыщхэр къэтэджхи къаГуагъ: Хымэ лъэпкъхэм ащыщхэри сунэт шъушӀынхэ фае, пегъымбар Мусэ и Тэурат хабзэ итхэри яжъугъэгъэцэкӀэнхэ фае. 6 А Ӏофым тегущыӀэнхэу апостолхэри нахьыжъхэри зэрэутъоигъэх. 7 Бэрэ зызэнэкъокъухэ ужым, Петрэ къэтэджи, адрэхэм ариӀуагъ: Сшыхэр, шъори шъошӀэба, хымэ лъэпкъхэм ащыщхэм ЗиусхьанымкӀэ шӀошъхъуныгъэ яӀэ хъуным пае, къэбарышӀур язгъэӀунэу блэкӀыгъэ мафэхэм Тхьэм шъо сэ сыкъызэрэшъухихыгъэр? 8 Тхьэу цӀыфхэм агухэм арылъыр зышӀэрэм ежь Ыпсэ ЛъапӀэ тэ къызэрэтфыригъэ гъэхыгъэм фэдэу, хымэ лъэпкъхэм ащыщхэми къафыригъэхызэ, ахэр зэридэхэрэр къыгъэлъэгъуагъ. 9 Тэррэ ахэмрэ тазыфагу Тхьэм зэхэдз зи ышӀыгъэп, сыда пӀомэ ахэми агухэр шӀошъхъуныгъэмкӀэ ыгъэкъэбзэжьыгъэх. 10 Тэри тятэжъхэми тфэмыхьыгъэ къиныр ИсускӀэ шӀошъхъуныгъэ зиӀэхэм атешъулъхьэзэ, сыда Тхьэр жъугъэунэфынэу ыуж шъузыкӀитыр? 11 Ау ти Зиусхьанэу Исус Христос ынэшӀу щыфэныгъэм игъогукӀэ тэ тымыкӀодэу, Тхьэм тыкъызэригъэнэжьырэр тшӀошъ мэхъу, ынэшӀу щыфэныгъэ игъогукӀэ хымэ лъэпкъхэм ащыщхэри мыкӀодхэу, Тхьэм къызэригъэнэжьыхэрэм фэдэу. 12 ЗэӀукӀэгъэ цӀыф пстэуми заушъэфи, хымэ лъэпкъхэм адэжь Тхьэм Варнавэрэ Паулрэ нэшэнэ гъэшӀэгъонышхохэу къыщаригъэгъэлъэгъуагъэхэри, Ӏофышхо гъэшӀэгъонхэу щаригъэшӀагъэхэри къызаӀотэжьхэм, ядэӀугъэх. 13 ЕтӀанэ гущыӀэныр заухым, Якъубэ къэгущыӀэу ыублагъ: Сшыхэр, къасӀорэм шъукъедэӀу. 14 Тхьэр лъэпкъэу ежь ыцӀэкӀэ зэреджэщтыр къыхихыным пае, хымэ лъэпкъхэм ащыщхэм яплъынэу апэу зэрэхъугъэр Симон зэхэтигъэшӀыкӀыгъ. 15 Пегъымбархэм ягущыӀэхэр Петрэ къыӀуагъэхэм атефэх. Тхьэм игущыӀэ тхыгъэхэм зэрарытым фэдэу, 16 «ЕтӀанэ къэзгъэзэжьынышъ, пачъыхьэ Даутэ иунэу зэхэфагъэр зэтезгъэуцожьыщт», Зиусхьаным еӀо. «Зэхэкъутагъэхэри сшӀыжьынхэшъ, а унэр зэтезгъэуцожьыщт, 17 дунаем ицӀыфхэу къэнагъэхэмрэ сэ сицӀыфхэу хъунхэу сызэджэгъэ хымэ лъэпкъ пстэумрэ Зиусхьаным лъыхъунхэм пае. 18 Мырэущтэу зыӀуагъэр Зиусхьанэу мы Ӏофхэр бэшӀагъэу цӀыфмэ языгъэшӀагъэр ары». 19 Якъубэ етӀанэ къыпигъэхъожьыгъ: Арышъ, сэ сызэрэгугъэрэмкӀэ, хымэ лъэпкъхэм ащыщхэу, Тхьэм игъогу техьэхэрэм къин атетлъхьэ хъущтэп. 20 Ау цӀыфхэм тхьэ нэпцӀхэм афашӀыгъэ къурмэныпхъэм ыл, зинэ шӀэным, атхьалэгъэ псэушъхьэхэм ал, лъым зыщадзыенэуи, ежьхэм къарамышӀэнэу зыфэмыер нэмыкӀ цӀыфхэм арамышӀэнэуи тэ афэттхын фае; 21 сыда пӀомэ пэсэрэ зэманхэм къащегъэжьагъэу пегъымбар Мусэ и Тэурат хабзэ итхэр къэлэ пстэуми щызыгъэӀухэрэри шэмбэт мафэ къэси ащ итхэм зыщяджэхэрэ синэгогухэри щыӀэх.
Апостолхэмрэ нахьыжъхэмрэ хымэ лъэпкъхэм ащыщхэу шӀошъхъуныгъэ зиӀэ хъугъэхэм тхылъэу афатхыгъэр
22 Арэущтэу чылыс зэӀукӀэр зэрэщытэу ягъусэу апостолхэмрэ нахьыжъхэмрэ тыраубытагъ ежьхэм яцӀыфхэм ащыщхэу лӀы заулэ хахынхэу, Паулрэ Варнавэрэ Антиохие адагъэкӀонхэм пае. Ашыхэм ятхьаматэхэм ащыщхэу Иудэу ВарсавэкӀэ заджэхэрэмрэ Силэрэ хахыгъэх. 23 Мырэущтэу тхылъ атхи аратыгъ: «Тэ тышъушыхэу апостолхэри, нахьыжъхэри, шъо хымэ лъэпкъхэм ащыщ шыхэу Антиохие къалэм дэсхэми, Сирие хэкуми Киликие хэкуми арысхэми, шӀуфэс къышъотэхыжьы. 24 ЦӀыф заулэ тэ къытхэкӀыхи, «Сунэт шъуашӀын фае, Мусэ и Тэурат хабзэ итхэми шъуядэӀун фае», аӀозэ, ягущыӀэхэмкӀэ шъузэӀагъэхьагъэуи шъуагъэгумэкӀыгъэуи тэ зэхэтхыгъ, ау тэ ахэр къэдгъэкӀуагъэхэп. 25 Арышъ, тэ тызэӀукӀагъ. ЛӀы заулэ тэ къыхэтхынышъ, тэ шӀу тлъэгъурэ Варнавэрэ Паулрэ ягъусэхэу къышъуфэдгъэкӀонхэу тызэгурыӀуагъ. 26 ИтӀур Зиусхьанэу Исус Христос ыцӀэ фэлажьэхэзэ, апсэ еблэжьыгъэхэп. 27 Арэущтэу Иудэрэ Силэрэ къышъуфэтэгъакӀох. Ажэми тэ ттхыгъэр ажэкӀэ къыжъугурагъэӀощт. 28 Мы унашъохэу шъузэдэӀун фаехэм анэмыкӀэу, зи къышъутетымылъхьанэу Тхьэм Ыпсэ ЛъапӀи тэри игъоу тлъытагъэ: 29 ЦӀыфхэм тхьэ нэпцӀхэм афашӀыгъэ къурмэныпхъэм ыл, лъым, атхьалэгъэ псэушъхьэхэм ал, зинэ шӀэным защыжъудзый. Шъо къышъуашӀэнэу шъузыфэмыери нэмыкӀ цӀыфхэм яшъумышӀ. А Ӏофхэм защыжъудзыемэ, дэгъур шъошӀэ. Шъотхъэжь». 30 Арэущтэу а лӀыхэр гъогум тырагъэхьагъэх. Ахэр Антиохие зынэсхэм, чылыс зэӀукӀэм щыщхэр аугъоихи, тхылъыр аратыгъ. 31 Ахэр тхылъым зеджэхэм, къэбарэу ащ итым ыгъэгушхохэзэ ыгъэгушӀуагъэх. 32 Иудэрэ Силэрэ, ежьхэр пегъымбархэу щытхэу, гущыӀабэкӀэ ашыхэм агухэр агъэпытэхэзэ, агъэгушхуагъэх. 33 Ахэр зы тӀэкӀурэ ащ дэжьым зыдэсхэ ужым, къэзыгъэкӀуагъэхэм адэжь агъэзэжьынэу ашыхэм гъогу мафэкӀэ гъогум къытырагъэхьажьыгъэх. 34 Ау Силэ Антиохие къыдэнэнэу тыриубытагъ, Иудэми Ерусалим ыгъэзэжьыгъ. 35 Паулрэ Варнавэрэ Антиохие къыдэнагъэх. НэмыкӀыбэхэм ягъусэхэу, цӀыфхэм Зиусхьаным игущыӀэхэр арагъашӀэхэзэ, къэбарышӀури арагъэӀузэ, Антиохие дэсыгъэх.
Паулрэ Варнавэрэ зэрэзэгокӀыгъэхэр
36 Зы тӀэкӀу тешӀагъэу Паул Варнавэ риӀуагъ: Тхьэм игущыӀэхэр зыщьгдгъэӀугъэ къэлэ пстэуми адэс тшыхэм адэжь дгъэзэжьынышъ, зыфэдэхэр зэрэщытхэр зэдгъэлъэгъунхэу тыгъэкӀожь. 37 Варнавэ Иуан МарккӀи заджэхэрэр ягъусэу зыдищэнэу фэягъ. 38 Ау Паул ар ягъусэу зыдищэнэу игъоу ылъытагъэп; сыда пӀомэ Иуан МарккӀэ заджэхэрэр Памфилие хэкум ахэмэ щагокӀи, Ӏоф адишӀэнэу адэкӀогъагъэп. 39 Паулрэ Варнавэрэ ащ фэдизэу зэрэзэнэкъокъугъэхэм пае, зэгокӀыгъэх. Варнавэ Марк зыдищи, Кипр хыгъэхъунэм къухьэкӀэ кӀуагъэ. 40 Ау Паул гъусэ фэхъунэу Силэ къыхихыгъ. Ашыхэм Тхьэм ынэшӀу ахэмэ къащифэнэу зыфагъазэ ужым, ахэр гъогум техьагъэх. 41 Чылыс зэӀукӀэхэм ащыщхэр агъэгушхохэзэ, Сирие хэкумрэ Киликие хэкумрэ къакӀухьэщтыгъэх.
Тимофей Паулрэ Силэрэ гъусэ зэрафэхъугъэр
Ащ нэужым Паул Дервие къалэм, етӀанэ Листрэ къалэм нэсыгъ. Тимофей зыцӀэу ИсускӀэ шӀошъхъуныгъэ зиӀэ лӀы горэ а къалэм дэсыгъ. Ащ янэ шӀошъхъуныгъэ зиӀэ джуртэу щытыгъ, яти урымэу щытыгъ. 2 Къалэхэу Листрэрэ Икониерэ адэс ашыхэм а лӀым лъытэныгъэ фыряӀэу щытыгъ. 3 Паул Тимофей зыдищэнэу фэягъ. Джуртхэу а лъэныкъом исхэм апае Паул зыгорэм Тимофей сунэт ригъэшӀыгъ; сыда пӀомэ Тимофей ятэ урымэу зэрэщытыр зэкӀэми ашӀэщтыгъэти ары. 4 Къалэхэр къакӀухьэхэу, Ерусалим дэс апостолхэмрэ нахьыжъхэмрэ ашӀыгъэ унашъохэм ядэӀунхэм пае, шӀошъхъуныгъэ зиӀэхэм а унашъохэр араӀуагъэх. 5 Арэущтэу чылыс зэӀукӀэхэм ащыщхэм нахь шӀошъхъуныгъэшхо яӀэ хъузэ, мафэ къэси шӀошъхъуныгъэ зиӀэхэм япчъагъэ хахъощтыгъ. Троадэ къалэм Тхьэм Паул зыгорэ къызэрэщыфигъэлъэгъуагъэр 6 Паулрэ игъусэхэмрэ Асие хэкум Тхьэм игущыӀэхэр щагъэӀунхэу Тхьэм Ыпсэ ЛъапӀэ фит ымышӀыхэзэ, ахэр Фригиерэ Галатиерэ яхэку зэпырыкӀыжьыгъэх. 7 Мисие хэкум зынэсхэм, Вифиние хэкум ихьанхэу пылъыгъэх, ау Исус Ыпсэ ЛъапӀэ ихьанхэу фит ышӀыгъэхэп. 8 Арэущтэу Мисие хэкум кӀоцӀырыкӀыхи, Троадэ къалэм ехыгъэх. 9 Чэщым Тхьэм Паул зыгорэ къыфигъэлъэгъуагъ. Македоние хэкум щыщэу зы лӀы горэ ащ дэжьым щытэу къелъэӀугъ: Македонием къакӀуи, ӀэпыӀэгъу къытфэхъу. 10 Паул ар къызэрэфэлъагъоу, къэбарышӀур а цӀыфхэми ядгъэӀунэу Тхьэр къызэрэтэджагъэм тыщыгугъэу, Македоние хэкум тыкӀонэу зыдгъэхьазырыгъ.
Лидие зыцӀэ бзылъфыгъэр Исус игъогу зэрэтехьагъэр
11 Арэущтэу Троадэ къалэм къухьэкӀэ тыщежьи, занкӀэу Самофракие хыгъэхъунэм тыкӀуи, ятӀонэрэ мафэми Неапол къалэм тынэсыгъ. 12 ЕтӀанэ ащ дэжьыми тыдэкӀи, Филиппи къалэм тыкӀуагъ. Ар Македоние хэкум щыщэу а лъэныкъом икъэлэшхоу щытыгъ. А къалэр зыгъэуцугъагъэр Рим къэралыгъошхом ицӀыфхэр ары. А къалэм мафэ заулэрэ тыдэсыгъ. 13 Шэмбэт мафэм къалэм тыдэкӀи, псыхъом тыкӀуагъ. Ащ дэжьым цӀыфхэр Тхьэм зыщелъэӀурэ чӀыпӀэ щыдгъотыщт тӀуи, тытӀыси, зэрэутъоигъэхэ бзылъфыгъэмэ тадэгущыӀагъ. 14 Зы бзылъфыгъэ горэ, Лидие ыцӀэу, къэдаӀощтыгъ. Ар Фиатирэ къалэм щыщэу, шэкӀ плъыжь чӀапцӀэ лъапӀэр зыщэхэрэм ащыщыгъ. Ар Тхьэр зыгъэлъэпӀэрэ бзылъфыгъэу щытыгъ. Паул къыӀохэрэм ыгу етыгъэу ядэӀунэу Зиусхьаным ащ ыгу зэӀуихыгъ. 15 Ари ащ иунэ исхэри тыумэхъыгъэх. Зытэумэхъхэм, бзылъфыгъэр къытэлъэӀуи къыӀуагъ: ЗиусхьанымкӀэ шӀошъхъуныгъэ зиӀэхэм сащыщэу шъолъытэмэ, сиунэ шъуисынэу шъукъеблагъ. Арэущтэу ыӀозэ, тыкъигъэнагъ.
Тетыгъо зиӀэхэм Паулрэ Силэрэ Филиппи къалэм хьапсым зэрэщычӀадзагъэхэр
16 Зы мафэ горэм цӀыфхэр Тхьэм зыщелъэӀурэ чӀыпӀэм тыкӀозэ, джынапцӀэ зыхэсэу, къэхъущткъэшӀэщт Ӏофхэр къэзыӀон зылъэкӀырэ унэӀут пшъашъэ горэ къытӀукӀагъ. КъэхъущткъэшӀэщтхэр къыӀохэзэ, итхьаматэхэмэ ахъщабэ къафигъахъэщтыгъ. 17 А пшъашъэр Паулрэ тэррэ тауж имыкӀэу, кууозэ мырэущтэу къыӀощтыгъ: Мы лӀыхэр Тхьэу анахь Иным илӀыкӀох. ШъумыкӀодэу, Тхьэм шъукъызэригъэнэжьырэ гъогур ахэмэ къышъуагъэӀу. 18 Джарэущтэу мэфэ заулэрэ ышӀагъ. ЕтӀанэ Паул губжи, зыкъызэригъэзэкӀи, джынапцӀэм риӀуагъ: Исус Христос ыцӀэкӀэ мы пшъашъэм ухэкӀынэу унашъо къыпфэсэшӀы. Ардэдэм джынапцӀэр пшъашъэм хэкӀыжьыгъ. 19 Ахъщэ къэкӀуапӀэу зыщыгугъыхэрэр зэрэщымыӀэжьыр пшъашъэм итхьаматэхэм залъэгъум, Паулрэ Силэрэ аубытхи, къалэм изэхэхьапӀэм тетыгъо зиӀэхэм апашъхьэ кӀуачӀэкӀэ ралъэшъуагъэх. 20 Ӏэшъхьэтетхэм апашъхьэ зыращэхэм, мырэущтэу къаӀуагъ: Мы лӀыхэр джуртых. Тикъалэ инэу зэӀагъахьэ. 21 Тэ Рим къэралыгъошхом ицӀыфхэм хабзэхэу зетымыхьэпхъэнхэри тымышӀапхъэхэри мы лӀыхэм агъэӀух. 22 ЦӀыф купышхор ахэмэ ягъусэхэу Паулрэ Силэрэ атебэнагъэх. Ӏэшъхьэтетхэм Паулрэ Силэрэ ящыгъынхэр зэӀатхъыжьхи, къамыщкӀэ яонхэу дзэлӀхэм унашъо афашӀыгъ. 23 Утыныбэ зарахы ужым, хьапсым чӀадзагъэх. Хьапс ухъумакӀоми афэсакъыпэу ыухъумэнхэу унашъо фашӀыгъ. 24 Арэущтэу унашъо зыфашӀым, ухъумакӀом ахэр хьапсым иунэ кӀоцӀ дэдэм чӀидзэхи, алъакъохэри пкъэум рипхыгъэх. 25 Чэщныкъом ыдэжь Паулрэ Силэрэ Тхьэм елъэӀущтыгъэх, тхьэщытхъу орэдхэри къаӀощтыгъэх. Адрэ хьапсчӀэсхэри ахэмэ ядэӀущтыгъэх. 26 ОшӀэдэмышӀэу хьапсым ылъапсэхэр хъыехэзэ, чӀыгур инэу къэсысыгъ. Ардэдэм хьапсым ипчъэхэр зэкӀэ къызэӀукӀыгъэх. ГъучӀ лъэхъухэу хьапсчӀэсхэм ателъыгъэхэри зэкӀэ атезыгъэх. 27 Хьапс ухъумакӀор къэущи, хьапсым ипчъэхэр зэӀухыгъэхэу зелъэгъум, хьапсчӀэсхэр хэхьажьыгъэхэу ыӀуи, исэшхо къырихи, зиукӀыжьэу ыублагъ. 28 Ау Паул мэкъэпгхокӀэ къэкууи къыӀуагъ: Лые зэмыхыжь! Тэ зэкӀэри мыщ тыщыӀ! 29 ЕтӀанэ хьапс ухъумакӀом зыгорэм остыгъэ нэфынэ къыригъэхьи, хьапсым чӀэлъади, Паулрэ Силэрэ апашъхьэ кӀэзэзэу чӀыгум зыщыридзыхыгъ. 30 ЕтӀанэ хьапсым ахэр къычӀищыхи, мырэущтэу къыӀуагъ: Шъо тхьаматэхэр, сымыкӀодэу, Тхьэм сыкъигъэнэжьыным пае, сыда сшӀэн фаер? 31 Зиусхьан ИсускӀэ шӀошъхъуныгъэ зигъаӀи, ори уиунагъуи шъумыкӀодэу Тхьэм шъукъигъэнэжьыщт, къаӀожьыгъ ахэмэ. 32 ЕтӀанэ Паулрэ Силэрэ хьапс ухъумакӀоми, ащ иунэ ис пстэуми Зиусхьаным игущыӀэхэр араӀотагъэх. 33 Чэщым а сыхьат дэдэм хьапс ухъумакӀом Паулрэ Силэрэ унэ горэм рищэхи, яуӀагъэхэр афитхьакӀыгъэх. Ащ лъыпытэу ежьми иунагъо пстэуми зырагъэумэхъыгъ. 34 Ащ нэужым хьапс ухъумакӀом ахэр ежь иунэ рищэхи, ыгъэшхэнхэу Ӏанэ къафиштагъ. ТхьэмкӀэ шӀошъхъуныгъэ яӀэ зэрэхъугъэм пае, ежьыри иунагъуи гушӀуагъэх. 35 Нэф къызэшъым, Ӏэшъхьэтетхэм яӀофтабгэхэм «Мы лӀыхэр тӀупщыжьых», раӀонэу хьапс ухъумакӀом ыдэжь агъэкӀуагъэх. 36 Хьапс ухъумакӀом а къэбарыр Паул къыриӀуагъ: Ӏэшъхьэтетхэм шъуатӀупщыжьынэу яӀофтабгэхэр къагъэкӀуагъэх. Арышъ, джы шъучӀэкӀыжь. Гъогу мафэх. 37 Тэ Рим цӀыфхэм тащыщ пэтми, хьыкумышӀэм ыпашъхьэ тырамыщэу, цӀыфмэ алъэгъоу къамыщкӀэ къытаохи, хьапсым тычӀадзагъ, ариӀожьыгъ Паул. Джы шъэфэу татӀупщыжьына? Хьау, ар хъущтэп! Ежьхэр къэрэкӀохи, тыкъычӀарэщыжь! 38 Ӏофтабгэхэм а гущыӀэхэр Ӏэшъхьэтетмэ араӀотэжьыгъэх. Паулрэ Силэрэ Рим къэралыгъошхом ицӀыфхэм зэращыщхэр Ӏэшъхьэтетмэ зызэхахым, щынагъэх. 39 Ахэр къакӀохи, «Губгъэн къытфэшъумылъэгъу», аӀуи къялъэӀугъэх. Хьапсым къычӀащыжьхи, къалэм дэкӀыжьынхэу къялъэӀугъэх. 40 Паулрэ Силэрэ хьапсым къызычӀэкӀыжьхэм, Лидие иунэ кӀуагъэх. Ащ дэжьым ашыхэр щалъэгъухи, агъэгушхуагъэх. ЕтӀанэ къалэм дэкӀыжьыгъэх.
Фессалоникэ къалэм ицӀыфхэм Паулрэ игъусэхэмрэ къин зэрарагъэщэчыгъэр
1 Паулрэ игъусэхэмрэ Амфипол къалэмрэ Аполлоние къалэмрэ къаблэкӀхи, Фессалоникэ къалэм къэкӀуагъэх. джуртхэм а къалэм синэгогу щыряӀагъ. 2 Паул ихабзэ тетэу ахэмэ адэжь синэгогум чӀахьи, шэмбэт мэфищэу Тхьэм игущыӀэ тхыгъэмэ ащыщ къафеджэзэ янэкъокъугъ. 3 Христос къин ыщэчынышъ, лӀагъэхэм къахэтэджыкӀыжьын фаеу зэрэщытыгъэр зэхаригъэшӀыкӀызэ, къафигъэшъыпкъэжьыгъ. Исусэу зикъэбар сэ къышъозгъэӀурэр Христосэу щыт, къыӀуагъ. 4 Джуртхэм ащыщхэу заулэмэ шӀошъхъуныгъэ яӀэ хъуи, Паулрэ Силэрэ гъусэ афэхъугъэх. Ащ нэмыкӀэу Тхьэр зыгъэлъапӀэрэ урымхэм ащыщхэу бэхэми, бзылъфыгъэ цӀэрыӀохэм ащыщхэу бэхэми шӀошъхъуныгъэ яӀэ хъугъэ. 5 Ау шӀошъхъуныгъэ зиӀэ мыхъугъэ джуртхэр мэшъугъохэти, цӀыф зэхэхьапӀэм хъулъфыгъэ дэихэр къыщагъотхи, цӀыф купышхо аугъоий, къалэр къагъэбырсырыгъ. ЕтӀанэ Иасон иунэ Ӏулъадэхи, Паулрэ Силэрэ къыращынхэшъ, цӀыфхэм апашъхьэ къыращэнхэу ауж итыгъэх. 6 Ахэр замыгъотхэм, Иасонрэ къош заулэрэ къалэм итхьаматэхэм апашъхьэ ралъашъохи, куохэзэ, мырэущтэу къаӀуагъ: Дунаер зэкӀэ зэӀэзыгъахьэрэ цӀыфхэр мыщ дэжьыми къэкӀуагъэх. 7 Иасон ахэр иунэ ригъэблэгъагъэх. «НэмыкӀ пачъыхьэу Исус зыцӀэр щыӀ», аӀозэ, Кайсарым иунашъохэм апэуцожьых. 8 Ахэмэ арэущтэу аӀозэ, а гущыӀэхэр зэхэзыхыгъэ цӀыф купышхомрэ къалэм итхьаматэхэмрэ къагъэбырсырыгъэх. 9 Ащ нэужым къалэм итхьаматэхэм Иасонрэ игъусэхэмрэ шэсы ахъщэр арагъэгъэтӀылъи атӀупщыжьыгъэх.
Верие къалэм ицӀыфхэм ащыщхэу бэхэр Исус игъогу зэрэтехьагъэхэр
10 Чэщ зэрэхъоу, ашыхэм Паулрэ Силэрэ Верие къалэм агъэкӀуагъэх. Ахэр зынэсхэм, джуртхэм ясинэгогу чӀэхьагъэх. 11 Фессалоникэ къалэм дэсхэм анахьи Верие къалэм дэсхэм нахь шъыпкъагъэ яӀагъ. Тхьэм игущыӀэхэр ягуапэу аштагъэх. Паул къыӀуагъэхэр Тхьэм игущыӀэ тхыгъэхэм арытхэм атефэхэмэ алъэгъуным пае, мафэ къэси Тхьэм игущыӀэ тхыгъэхэм ахэплъыхьэщтыгъэх. 12 Джуртхэм ащыщхэу бэхэми, лъытэныгъэ зиӀэ урым бзылъфыгъэхэмрэ хъулъфыгъэхэмрэ ащыщхэу купхэми, шӀошъхъуныгъэ яӀэ хъугъэ. 13 Паул Верие къалэми Тхьэм игущыӀэхэр щигъэӀухэу зэрэщытыр Фессалоникэ щыщ джуртхэм къызашӀэжьым, Верие къакӀохи, цӀыф купышхор зэкӀагъэплъыхьагъэх ыкӀи къагъэбырсырыгъэх. 14 Ардэдэм ышыхэм Паул хыӀушъом агъэкӀуагъ, ау Силэрэ Тимофейрэ Верие къалэм къыдэнагъэх. 15 Паул зыщэхэрэм Афинэ къалэм нэсы ащагъ. Силэрэ Тимофейрэ ыдэжь шӀэхэу къэкӀонхэу Паул зыщагъэхэм унашъо зафешӀым ыуж, ахэмэ агъэзэжьыгъ.
Паул Афинэ къалэм дэс цӀыфхэм апашъхьэ къызэрэщыгущыӀагъэр
16 Паул Афинэ къалэм Силэрэ Тимофейрэ щапаплъэзэ, тхьэ нэпцӀ сурэтхэр къалэм дизэу зелъэгъум, ыгу къеуагъ. 17 Арэущтэу Паул джуртхэмрэ Тхьэр зыгъэлъапӀэхэрэмрэ синэгогум щянэкъокъущтыгъ, мафэ къэси зэхэхьапӀэм цӀыфхэу щызэӀукӀэхэрэм щянэкъокъущтыгъ. 18 Философхэу эпикурейхэмрэ стоикхэмрэ зыцӀэхэм ащыщхэу зы куп Паул къенэкъокъухэу аублагъ. Мы шъхьаубатэм сыда къыӀонэу зыфаер? аӀуагъ зызаулэмэ. Мы лӀым хыматхьэхэм якъэбар зэрехьэ, аӀуагъ адрэхэмэ. Арэущтэу зыкӀаӀуагъэр Паул Исус ехьылӀэгъэ къэбарышӀумрэ лӀагъэхэр къызэрэтэджыжьыщтхэм ехьылӀэгъэ къэбарышӀумрэ зэраригъэӀущтыгъэхэр ары. 19 ЕтӀанэ а философхэм Ареопаг Ӏуашъхьэм щызэӀукӀэрэ хасэм ыдэжь Паул зыдащи къыраӀуагъ: ӀофыкӀэхэу о цӀыфхэм ябгъашӀэхэрэр зэхэтэбгъэшӀыкӀынха? 20 Сыда пӀомэ гущыӀэ гъэшӀэгъонхэр тэ ттхьакӀумэхэм о къареогъадзэх. Ахэмэ къарыкӀырэр тшӀэмэ тшӀоигъу. 21 Афинэ къалэм щыщ пстэуми, хымэхэу ащ дэсхэми къэбарыкӀэхэр къаӀонхэмрэ ядэӀунхэмрэ нэмыкӀкӀэ мафэхэр агъакӀощтыгъэхэп. 22 ЕтӀанэ Паул Ареопаг Ӏуашъхьэм щызэӀукӀэрэ хасэм ыпашъхьэ къиуцуи, мырэущтэу къыӀуагъ: Шъо Афинэ лӀыхэр! Лъэныкъо пстэумкӀэ шъо тхьэ Ӏаджыхэр инэу жъугъэлъапӀэхэу сэлъэгъу; 23 сыда пӀомэ сэ къэскӀухьэзэ, шъуитхьэлъэӀупӀэхэм сызяплъым, мырэущтэу зытетхэгъэ къурмэншӀыпӀэ горэ къэзгъотыгъ: «ТымышӀэрэ Тхьэм пае». Арышъ, шъо шъумышӀэрэ Тхьэу жъугъэлъапӀэрэм икъэбар ары сэ шъо шъозгъэӀурэр. 24 Тхьэу дунаери дунаем тетхэри къэзыгъэхъугъэр уашъоми чӀылъэми я Зиусхьанэу щыт. Ар цӀыфхэм аӀэкӀэ ашӀыгъэ тхьэлъэӀупӀэ унэшхохэм арысэу щытэп. 25 Ащ зыгорэ зэрищыкӀагъэм фэдэу, цӀыфмэ аӀэкӀэ ӀэпыӀэгъу фэхъунхэу ищыкӀагъэп. Ежьыр ары псэ зыхэт пстэури щызыгъаӀэхэрэри, жьы къязыгъащэрэри, ящыкӀагъэ пстэури язытрэри. 26 Тхьэм зы цӀыф закъом цӀыф лъэпкъ пстэури къыхигъэхъукӀыгъэх, дунаем тыдэкӀи щыпсэунхэм пае. Ятетыгъохэмрэ япсэупӀэхэмрэ гъунэу афэхъущтхэр къыгъэнэфагъэх. 27 Тхьэм цӀыфхэр къызфигъэхъугъэр ахэр ежьым лъыхъоу ыкӀи Ӏэбэлъабэхэзэ, зыгорэущтэу къагъотыныр ары. Ау щытми, Тхьэр тэ тщыщэу хэти пэчыжьэп, 28 «Ежьыр ары тызыгъэпсэурэри, къэтэзыгъэкӀухьэрэри, тыщызыгъаӀэрэри», зыгорэм зэриӀуагъэм фэдэу. «Тэ тырибын», шъо шъуитха кӀохэм ащыщэу зы куп къызэриӀуагъэм фэдэу. 29 Арышъ, Тхьэм тызэрибыным пае, цӀыфхэм яӀэпэӀэсагъэрэ яакъылыгъэрэкӀэ ашӀыгъэхэу дышъэм, тыжьыным, мыжъом ахашӀыкӀыгъэ шъо теплъэхэм Тхьэ афэдгъадэ хъущтэп. 30 БлэкӀыгъэ лъэхъанэхэм цӀыфмэ шӀэныгъэ ямыӀэу зыщэтым, Тхьэр наекӀэ ахэмэ къяплъыгъагъэп, ау джы цӀыф пстэури, тыдэ щыӀэхэми, япсэкӀодхэм афыкӀэгъожьынхэу унашъо къафешӀы; 31 сыда пӀомэ Тхьэм зы мафэ къыгъэнэфагъ. А мафэм Тхьэм ежьым къыгъэнэфэгъэ лӀым дунаем ицӀыф пстэуми шъыпкъагъэкӀэ хьыкум атыригъэшӀыхьащт. Ащ фэдэу зэрэхъущтыр Тхьэм цӀыф пстэуми къафигъэшъыпкъэжьыгъ а лӀыр лӀагъэхэм къызэрахигъэтэджыкӀыжьыгъэмкӀэ. 32 ЛӀагъэхэр къызэрэтэджыжьыщтхэм икъэбар Паул къыӀоу зызэхахым, зы куп Паул дэхьащхыгъ, ау адрэ купым ыӀуагъ: О зикъэбар къэпӀуагъэм джыри тедэӀунэу тыфай. 33 Арэущтэу Паул ахэмэ ахэкӀыжьыгъ. 34 Ау цӀыф заули Паул гъусэ фэхъухи, шӀошъхъуныгъэ яӀэ хъугъэ. Ареопаг Ӏуашъхьэм щызэӀукӀэрэ хасэм щыщ Дионисый, етӀанэ Дамар зыцӀэу зы бзылъфыгъэ горэмрэ нэмыкӀ купымрэ а шӀошъхъуныгъэ зиӀэ хъугъэхэм ащыщыгъэх.
Паул Коринф къалэм Тхьэм игущыӀэхэр зэрэщигъэӀущтыгъэхэр
1 Ащ нэужым Паул Афинэ къалэм дэкӀыжьи, Коринф къалэм кӀуагъэ. 2 Паул а къалэм зы джурт горэ, Акилэ ыцӀэу, Понт хэкум къыщыхъугъэр къыщигъоти ӀукӀагъ. Ежьымрэ ишъхьэгъусэ Прискиллэмрэ Италие хэгъэгум къикӀыгъакӀэхэу щытыгъэх; сыда пӀомэ Кайсар Клаудый джуртхэр зэкӀэ Рим къэлэшхом къыдэкӀыжьын хэу унашъо афишӀыгъагъ. Паул Акилэрэ Прискиллэрэ адэжь кӀуагъэ. 3 Ясэнэхьэтхэр зэфэдэу зэрэщытым пае, Паул ахэмэ адэжь щыӀэу адэлажьэщтыгъ. Ахэмэ ясэнэхьэт чэтэгъэӀэгъэшӀыныр арыгъэ. 4 Шэмбэт мафэ къэсми Паул къыӀохэрэр джуртхэмрэ урымхэмрэ ашӀошъ ыгъэхъуным ыуж итэу, синэгогум щянэкъокъущтыгъ. 5 Силэрэ Тимофейрэ Македоние хэкум къызекӀыхэм, Паул ыгу етыгъэу Тхьэм игущыӀэхэр цӀыфмэ ариӀотэнхэм пылъзэ, Исус зэрэХристосыр джуртмэ апашъхьэ къыщиушыхьатэу щытыгъ. 6 Ау джуртхэр Паул пэуцужьхи зехъонхэм, ищыгъынхэр ахэмэ апашъхьэ щиутхыпкӀыхи, мырэущтэу ариӀуагъ: Шъо шъулъы шъо шъушъхьэ къытерэфэжь! Сэ лажьэ зи сиӀэп. Джы щегъэжьагъэу хымэ лъэпкъхэм зафэзгъэзэшт. 7 Арэущтэу Паул синэгогум къычӀэкӀыжьи, Тхьэр зыгъэлъапӀэрэ лӀы горэу Иуст иунэ кӀуагъэ. Ащ иунэ синэгогум бгъодэтыгъ. 8 Синэгогум ипащэу Крисп, иунагъо зэкӀэ игъусэу, ЗиусхьанымкӀэ шӀошъхъуныгъэ иӀэ хъугъэ. Коринф къалэм дэсхэу Паул едэӀухэрэм ащыщхэу цӀыфыбэми шӀошъхъуныгъэ яӀэ хъуи зырагъэумэхъыгъ. 9 Зы чэщ горэм Зиусхьаныр Паул къыфэлъагъуи къыриӀуагъ: Умыщын, зымыушъэфэу, къэгущыӀэ зэпыт, 10 сыда пӀомэ сэ сыуигъусэщт. О лые къыуихынэу зыми ыӀэ къыбнэсыщтэп. Сэ сицӀыфхэм ащыщхэу бэ мы къалэм дэсых. 11 Арэущтэу Паул цӀыфхэм Тхьэм игущыӀэхэр аригъашӀэхэзэ, зы илъэсырэ ныкъорэ а къалэм дэсыгъ. 12 Галлион Ахаие хэкум иӀэшъхьэтетэу хъу зэхъум, джуртхэр зэгъусэ хъухи, Паул тебанэхи, хьыкумышӀэм ыпашъхьэ ращагъ. 13 Хабзэм иунашъо темытэу Тхьэр агъэлъэпӀэнэу мы лӀым цӀыфхэм арегъашӀэ, къаӀуагъ ахэмэ. 14 Паул къэгущыӀэнэу къызщыригъэжьэщтым, Галлион джуртхэм ариӀуагъ: Шъо джуртхэр, мы лӀым мыхъун горэ е бзэджагъэ горэ ышӀагъэмэ, сэ сигуапэу сышъодэӀущтыгъ. 15 Ау джы гущыӀэхэмкӀи, цӀэхэмкӀи, шъо шъуи Тэурат хабзэкӀи шъузэрэзэнэкъокъурэм пае, шъоршъорэу мы Ӏофым шъухаплъ. Сэ мы Ӏофым хьыкум тесшӀыхьанэу сыфаеп. 16 Ащ нэужым Галлион ахэр хьыкумышӀ унэм къычӀигъэкӀыжьыгъэх. 17 ЕтӀанэ ахэмэ зэкӀэ синэгогум ипащэу Сосфен аубыти, хьыкумышӀы унэм ипчъэӀупэ щеуагъэх. Ау Галлион ащ ыгъэгумэкӀыгъэп.
Паул Сирие хэкум щыщ Антиохие къалэм зэригъэзэжьыгъэр
18 Паул Коринф къалэм мэфэ пчъагъэр зыдэсым ыуж, ышыхэм аӀапэ ыубытыжьи, Прискиллэрэ Акилэрэ игъусэхэу, Сирие хэкум кӀонэу къухьэ горэм итӀысхьагъ. Кенхрей къалэм Паул ышъхьэ джашъоу щаригъэупсыгъ; сыда пӀомэ тхьэрыӀуагъэ ышӀыгъагъэти ары. 19 Ефес къалэм къызынэсхэм, Паул Прискиллэрэ Акилэрэ къыгъанэхи, синэгогум чӀахьи, джуртхэм щянэкъокъугъ. 2 °Паул ахэмэ адэжь нахь баӀорэ щыӀэнэу къызелъэӀухэм, ыдагъэп. 21 Ау ежьэжьынэу аӀапэ зеубытыжьым, ыӀуагъ: КъэкӀощт мэфэкӀ мэфэшхом Ерусалим сыщыӀэн фае, ау Тхьэм ыӀомэ, шъуадэжь къэзгъэзэжьыщт. ЕтӀанэ Ефес къалэм къухьэкӀэ щежьэжьыгъ. 22 Кесарие къалэм зынэсым, Ерусалим дэкӀоягъ. Чылыс зэӀукӀэм щыщхэм шӀуфэс арихи, етӀанэ Антиохие къалэм ехыгъ. 23 Зы тӀэкӀурэ Антиохием зыдэс нэужым, Паул гъогум техьажьи, ИсускӀэ шӀошъхъуныгъэ зиӀэ пстэуми агухэр ыгъэпытэхэзэ, зэкӀэлъыкӀоу Галатиерэ Фригиерэ яхэку къыкӀухьагъ.
Аполлос Тхьэм игущыӀэхэр Ефес къалэм зэрэщигьэӀущтыгъэхэр
24 А мафэхэм Александрие къалэм щыщэу, Аполлос зыцӀэу джурт горэ Ефес къэкӀуагъ. Ар жашӀоу щытыгъ, Тхьэм игущыӀэ тхыгъэхэмкӀи шӀэныгъэшхо иӀагъ. 25 Зиусхьаным игъогу икъэбар ежьыр рагъэшӀагъэу щытыгъ. Ыпсэ етыгъэу къэгущыӀэзэ, шъыпкъагъэм тетэу Исус икъэбар цӀыфхэм аригъашӀэщтыгъ. Ау щытми, умэхъыныгъэу Иуан зытегущыӀэщтыгъэм нэмыкӀ умэхъыныгъэр зэрэщыӀэр ышӀэщтыгъэп. 26 Ар гушхоныгъэкӀэ синэгогум къыщыгущыӀэу ригъэжьагъ. Прискиллэрэ Акилэрэ Аполлос къэгущыӀэу зызэхахым, ар яунэ къащи, Зиусхьаным игъогу икъэбар нахь дэгъоу къыгурагъэӀуагъ. 27 Аполлос Ахаие хэкум кӀонэу гухэлъ зешӀым, ышыхэм а къалэм дэс шӀошъхъуныгъэ зиӀэхэм тхылъ афатхыгъ, «Аполлос къызыкӀокӀэ ежъутъэблагъ», аӀозэ. Аполлос ащ дэжьым зынэсым, Тхьэм ынэшӀу къызэращифагъэм пае, шӀошъхъуныгъэ зиӀэ хъугъэхэм инэу адэӀэпыӀэщтыгъ. 28 Сыда пӀомэ Тхьэм игущыӀэ тхыгъэхэм арытхэмкӀэ Исус зэрэХристосыр къафигъэшъыпкъэжьызэ, гущыӀэ лъэшхэмкӀэ цӀыфхэм апашъхьэ джуртхэм щатекӀуагъ.
Паул Тхьэм игущыӀэхэр Ефес къалэм зэрэщигъэӀущтыгъэхэр
1 Аполлос Коринф къалэм щыӀэ зэхъум, Паул ыпшъэрэ хэкухэм акӀоцӀырыкӀи, Ефес къалэм нэсыгъ. Ащ дэжьым ИсускӀэ шӀошъхъуныгъэ зиӀэ нэбгырэ куп къыщигъотхи, мырэущтэу яупчӀыгъ: 2 ШӀошъхъуныгъэ шъуиӀэ зэхъум, Тхьэм Ыпсэ ЛъапӀэ шъугухэм арылъ хъугъа? Тхьэм Ыпсэ ЛъапӀэ щыӀэуи тэ зэхэтхыгъэп, къыраӀожьыгъ ахэмэ. 3 Умэхъыныгъэу шъузэраумэхъыгъэм къикӀырэр сыда? яупчӀыгъ Паул. Умэхъыныгъэу Иуан зытегущыӀэщтыгъэр ары, къаӀожьыгъ ахэмэ. 4 Иуан зипсэкӀодхэм афыкӀэгъожьыгъэхэр ыумэхъыщтыгъэх, къыӀуагъ Паул. Иуан ежь ыужкӀэ къэкӀощтымкӀэ, Христос Исус ары, цӀыфхэм шӀошъхъуныгъэ яӀэн фаеу ариӀуагъ. 5 Ар зызэхахым, Зиусхьанэу Исус ыцӀэкӀэ зарагъэумэхъыгъ. 6 Паул ыӀэхэр затрелъхьэм, Тхьэм Ыпсэ ЛъапӀэ къафехи, амышӀэрэ бзэхэмкӀэ къэгущыӀагъэх. Тхьэм ежь игущыӀэхэри ахэмэ агухэм къарилъхьэхэу ахэр къаригъэӀуагъэх. 7 Ахэр нэбгырэ пшӀыкӀутӀум фэдиз хъущтыгъэх. 8 ЕтӀанэ Паул синэгогум чӀахьэти, цӀыфхэм гушхоныгъэкӀэ янэкъокъузэ, ашӀошъ ыгъэхъухэзэ, Тхьэм и Тетыгъошхо икъэбар мэзищэ ариӀуатэщтыгъ. 9 Ау зы куп къаигъагъэкӀэ зекӀуагъэ, цӀыфхэм апашъхьэ Зиусхьаным игъогу ӀэягъэкӀэ щытегущыӀэу, шӀошъхъуныгъэ иӀэ хъунэу ыдагъэп. Джащыгъум Паул ахэмэ къахэкӀыжьи, ИсускӀэ шӀошъхъуныгъэ зиӀэхэр къахищыжьыгъэх, мафэ къэси Тиранн иеджапӀэ Тхьэм игущыӀэхэр щигъэӀущтыгъэх. 10 Асие хэкум ис урымхэри джуртхэри зэкӀэ Зиусхьанэу Исус ехьылӀэгъэ къэбарышӀум ригъэдэӀухэзэ, Паул илъэситӀо ыукъудыигъ.
Скевэ ыкъохэм джынапцӀэхэр цӀыфхэм ахафьппъухэмэ еплъыхэу зэрэщытыгъэхэр
11 Тхьэм Паул Ӏофышхо гъэшӀэгъон дэдэхэр ышӀэнхэу ригъэлъэкӀыщтыгъ. 12 Паул ыкӀышъо нэсыгъэ ӀэплъэкӀхэри кӀыӀутелъхэри сымаджэхэм атралъхьащтыгъэх. ЗатралъхьахэкӀэ, ахэр хъужьыщтыгъэх, ахэми ахэс джынапцӀэхэри ахэкӀыжьыщтыгъэх. 13 Ау джурт купэу цӀыфхэм джынапцӀэхэр ахэзыфыхэу къэзыкӀухьэщтыгъэхэм Исус ыцӀэ къаӀозэ, джынапцӀэхэр цӀыфхэм ахафышъухэмэ еплъыщтыгъэх. Исусэу зикъэбар Паул къыгъэӀурэм ыцӀэкӀэ мы цӀыфым шъухэкӀынэу унашъо къышъуфэсэшӀы, аӀощтыгъ ахэмэ. 14 Джурт дин пэщэшхоу Скевэ ыкъуибли арэущтэу ашӀыщтыгъ. 15 Исус сэшӀэ, Паул икъэбари зэхэсхыгъ, ау шъо хэт шъущыщ? пэгъокӀ аритыжьыгъ джынэпцӀэ Ӏаем. 16 ЕтӀанэ джынапцӀэр зыхэс цӀыфыр атебани, зэкӀэми атекӀуагъ. Ахэмэ лыешхо зэрарихыгъэм пае, пцӀанэхэу, уӀагъэхэу унэм ичъыжьыгъэх. 17 Мы къэбарыр Ефес дэс урымхэми джуртхэми зызэхахым, зэкӀэри щынэгъошхом хэфагъэх. Арэущтэу Зиусхьанэу Исус ыцӀэ щытхъу фашӀыщтыгъ. 18 ШӀошъхъуныгъэ зиӀэ хъугъэхэм ащыщхэу бэ къакӀохи, бзэджагъэхэу ашӀагъэхэр цӀыфмэ зэхахызэ Тхьэм ыпашъхьэ ралъхьагъэх. 19 Ушхъухьаныгъэм пылъ цӀыф Ӏаджыми ятхылъхэр къаугъоихи, цӀыф пстэуми апашъхьэ щагъэстыгъэх. А тхылъхэм ауасэхэр залъытэхэм, тыжьын ахъщэ мин шъэныкъо хъугъэ. 20 Арэущтэу Зиусхьаным игущыӀэхэр цӀыф нахьыбэхэм анэсхэу, инэу зыщаубгъущтыгъ.
Ефес къалэм дэсхэм бырсырышхо зэрашӀыгъэр
21 Мы Ӏофхэр зэкӀэ къызэхъухэ ужым, Паул хэкухэу Македониерэ Ахаиерэ акӀоцӀырыкӀынышъ, Ерусалим кӀонэу ыгу риубытагъ. Ерусалим сызыкӀорэ ужым, Рим къэлэшхоми сыкӀон фае, ыӀуагъ. 22 Паул иӀэпыӀэгъухэм ащыщхэу нэбгыритӀоу Тимофейрэ Ерастрэ Македоние хэкум кӀонхэу ыпэ ыгъэкӀуагъэх. Ежьыр Асие хэкум зы тӀэкӀукӀэ къэнагъ. 23 А мафэхэм Зиусхьаным игъогу пае бырсырышхо къэхъугъ; 24 сыда пӀомэ Димитрый ыцӀэу, зы тыжьынашӀэ горэ а къалэм дэсыгъ. Артемидэ зыфаӀорэ тхьэ нэпцӀ бзылъфыгъэ горэм итхьэлъэӀупӀэ унэ цӀыкӀужьыехэу тыжьыным къыхэшӀыкӀыгъэхэр ышӀыхэзэ, тыжьынашӀэмэ федабэ а Димитрый къафихьыщтыгъэ. 25 Димитрый а тыжьынашӀэхэри ащ фэдэ ӀэшӀагъэ Ӏоф зиӀэхэри ыугъоихи мырэущтэу къыӀуагъ: ЛӀы куп, мы Ӏофым тибаиныгъэ къызэрэхэкӀырэр шъошӀэ. 26 Мы Паул Ефес къалэм имызакъоу, Асие нахьыбэми, «ЦӀыфхэм ашӀыгъэ тхьэ шъо теплъэхэр тхьэ шъыпкъэхэу щытхэп», ыӀозэ, цӀыф купышхом ашӀошъ ыгъэхъузэ зэригъэгъощагъэхэр шъо шъолъэгъу ыкӀи зэхэшъохы. 27 Тэ тиӀэшӀэгъэ Ӏофыр цӀыфхэм зэрэзэрамыпэсыщтым изакъоу арэп щынагъор, ау Артемидэ бзылъфыгъэ тхьэшхом итхьэлъэӀупӀэ унэшхоми пхъатэ зэрэпамыхьыжьыщтри, Асие хэкуми зэкӀэ дунаеми зэкӀэ щыдгъэлъапӀэрэ Артемидэ ищытхъушхо зэрэкӀодыжьыщтри ары щынагъор. 28 Ар зызэхахым, лӀы купышхор лъэшэу губжыхи къэкуощтыгъэх: Ефес къалэм и Артемидэ лъэпӀэ дэд. 29 Бырсырышхо къалэм къыщыхъугъ. Македонием щыщхэу Паул игъогу гъусэхэу Гайрэ Аристархрэ аубытхи, зыдащэхэзэ, зэкӀэ зэхэтхэу зэӀукӀапӀэм илъэдагъэх. 30 Паул цӀыфмэ ахэхьанэу фэягъ, ау ИсускӀэ шӀошъхъуныгъэ зиӀэхэм фадагъэп. 31 Асие хэкум итхьаматэхэм ащыщхэу, Паул иблагъэу щытхэм макъэ рагъэӀуи, «ЗэӀукӀапӀэм умыкӀу», аӀозэ елъэӀугъэх. 32 Джащыгъум зым зы ыӀозэ, адрэми нэмыкӀ ыӀозэ, цӀыфхэр зэрэгъэкуощтыгъэх; сыда пӀомэ зэӀукӀэгъэ цӀыфхэм бырсырышхо къахэхъухьагъэти ары. Нахьыбэми зыкӀызэӀукӀагъэхэр ашӀэщтыгъэп. 33 Джуртмэ Александрэ цӀыф купышхом къыхырагъэщыжьи, цӀыфхэм апашъхьэ къырагъэуцуагъ. Александрэ ыӀэ къыӀэти, цӀыфхэм апашъхьэ къыщыгущыӀэнэу фэягъ. 34 Ау Александрэ джуртэу зэрэщытыр зашӀэм, зы макъэкӀэ сыхьэтитӀукӀэ зэкӀэри куощтыгъэх: Ефес къалэм и Артемидэ лъэпӀэ дэд. 35 Аужыпкъэм къалэм итхакӀо цӀыф купышхор ыгъэсамбыри къыӀуагъ: Ефес лӀыхэр! Бзылъфыгъэ тхьэшхоу Артемидэрэ ащ ышъо теплъэу уашъом къефэхыгъэмрэ яухъумакӀоу Ефес къалэр зэрэщытыр зымышӀэрэ цӀыф щыӀа? 36 Ефес къалэр ахэмэ яухъумакӀоу зэрэщытым щэч хэлъэпти, шъо зыжъугъэсамбырынышъ, шъхьэпсынкӀэу шъумызекӀу. 37 Мы лӀыхэр тхьэлъэӀупӀэ унэшхохэм ямытыгъуагъэхэу, титхьэу бзылъфыгъэм къемыхъоныгъэхэу, шъо мыщ дэжьым къэшъущагъэх. 38 Димитрыйрэ ежь игъусэу ӀэшӀэгъэ Ӏоф зиӀэхэмрэ цӀыф горэм дэон Ӏоф фыряӀэмэ, Ӏэшъхьэтетхэр цӀыфхэм ядэон Ӏофхэм зыщахаплъэрэ мафэхэр щыӀэх. Дэон Ӏоф азыфагу дэлъмэ, зэрэдаох. 39 Ащ нэмыкӀэу зыгорэм шъуфаемэ, къалэм дэсхэм яхасэу хабзэм тетым а Ӏофыр зэшӀуихын фае. 40 Ӏофхэу непэ хъугъэхэм апае, «ЗыкъэшъоӀэты», аӀоу, Рим тетыгъо зиӀэхэм тагъэмысэнэу щынагъо щыӀ. Сыда пӀомэ мы бырсырышхор зэрэтшӀыгъэм пае, къытфагъэгъунэу ушъхьагъу тшӀынэу зи тиӀэп. А гущыӀэхэр къызеӀохэ ужым, цӀыфхэр зэбгыригъэкӀыжьыгъэх.
Паул Македоние хэкумрэ Грецие хэгъэгумрэ зэрэкӀуагъэр
1 Бырсырышхор зэуцужьым, Паул ИсускӀэ шӀошъхъуныгъэ зиӀэхэр къаригъащэхи ыгъэгушхуагъэх. ЕтӀанэ аӀапэхэр ыубытыжьхи, Македоние хэкум кӀонэу гъогум техьагъ. 2 А лъэныкъохэр къыкӀухьэхэзэ, шӀошъхъуныгъэ зиӀэхэр гущыӀабэкӀэ ыгъэгушхохэзэ, Грецие нэсыгъ. 3 Ащ дэжьым мэзищэ щыӀагъ. Сирием къухьэкӀэ кӀонэу фае зэхъум, джуртхэм гъэбылъыгъэкӀэ аукӀынэу агу зэрэхэлъым пае, Македонием игъогукӀэ ыгъэзэжьынэу тыриубытагъ. 4 Мы лӀыхэр Паул игъусагъэх: Верие къалэм щыщэу Пирр ыкъо Сосипатер; Фессалоникэ къалэм щыщхэу Аристархрэ Секундрэ; Дервие къалэм щыщэу Гай; етӀанэ Тимофей; етӀанэ Асие хэкум щыщхэу Тихикрэ Трофимрэ. 5 Ахэр тэ тапэ итхэу кӀохи, Троадэ къалэм къыщытпэплъагъэх. 6 Ау Хьалыгъу Мыгъэтэдж зыщашхырэ мэфэкӀ мэфэшхохэр зыблэкӀыхэ нэужым, Филиппи къалэм къухьэкӀэ тыщежьагъ. Троадэ къалэм адрэмэ адэжь мэфитфыкӀэ тынэсыгъ. Ащ дэжьыми мэфиблэ тыщыӀагъ.
Троадэ къалэм Паул лӀагъэхэм Евтих къызэрахигъэтэджыкӀыжьыгъэр
7 Тхьамафэм иапэрэ мафэм хьалыгъу зэготчынэу тызэрэугъоигъ. Паул ятӀонэрэ мафэм гъогум техьанэу ыгукӀэ риубытагъэу, шӀошъхъуныгъэ зиӀэхэм Тхьэм игущыӀэхэр ариӀохэзэ, чэщныкъом нэсыфэ гущыӀэныр ыукъудыигъ. 8 Тэ тызыщызэрэугъоирэ унэ Ӏэтыгъэм остыгъэ бэу къыщыблэщтыгъэх. 9 Евтих зыцӀэу зы кӀалэ горэ шъхьангъупчъэм Ӏусэу, Паул гущыӀэныр ымыухы зэхъум, куоу хэчъыягъ. Хэчъыягъэти, щэу зэтет унэм къефэхи, укӀыгъэу къаштэжьыгъ. 10 Паул ехи, кӀалэм зытыридзи, ӀаплӀ рищэкӀи къыӀуагъ: ШъумыгумэкӀ. Ыпсэ хэт! 11 Паул етӀацэ къыдэкӀоежьи, хьалыгъур зэгуичи, адрэхэм ягъусэу ышхыгъ. Нэф ошъыфэ, ахэмэ бэрэ адэгущыӀи, гъогум техьагъ. 12 Агухэр инэу къаӀэтыгъэу, кӀалэр ядэжь псаоу къащэжьыгъ.
Паул Троадэ къалэм дэкӀи, Милит къалэм зэрэкӀуагъэр
13 Тэ ыпэкӀэ къухьэм текӀуалӀи, титӀысхьи, Асс къалэу Паул зыщидгъэтӀысхьащтым тежьагъ. Паул а къалэм нэсы лъэсэу кӀонэу ыгу хэлъти, Ӏофыр арэущтэу ыгъэпсыгъагъ. 14 ЕтӀанэ Асс къалэм къызыщытӀокӀэжьым, Паул къухьэм къидгъэтӀысхьи, Митилинэ къалэм тыкӀуагъ. 15 А къалэм тыщежьи, ятӀонэрэ мафэм Хиос хыгъэхъунэм фэзанкӀэу тыуцугъ. Ыужырэ мафэм Самос хыгъэхъунэм тыкӀуагъ. Трогиллие къалэм тыщыуцуи, ыужырэ мафэм Милит къалэм тынэсыгъ. 16 Асие хэкум уахътэр щимыгъэкӀодыным пае, Паул Ефес къалэм къыщымыуцоу, блэкӀынэу тыриубытэгъагъ. Сыда пӀомэ амал иӀэмэ, Пэнтэкост зыцӀэ мэфэкӀ мэфэшхор къэсыным ыпэкӀэ, Ерусалим нэсынэу гузажъощтыгъ.
Ефес къалэм щыӀэ чылыс зэӀукӀэм инахьыжъхэм аужырэ къэбарэу Паул ариӀуагъэр
17 Милит къалэм тызыщэӀэм, Паул Ефес щыӀэ чылыс зэӀукӀэм инахьыжъхэр къаригъэщагъэх. 18 Ахэр къызэкӀохэм, Паул ариӀуагъ: Апэрэ мафэм щегъэжьагъэу Асие хэкум сыкъызехьэм, шъуадэжь щызгъэкӀогъэ уахътэр зэкӀэ сищыӀакӀэ зыфэдагъэр шъо шъошӀэ. 19 Пэгагъэ зи сыгу имылъэу, бэрэ сыгъызэ, джуртхэм шъэфэу бзэджагъэхэу къысашӀэнхэу агу хэлъыгъэхэмкӀэ къиныбэ сагъэщэчызэ, Зиусхьаным сыфэлажьэщтыгъ. 20 ЗишӀуагъэ къышъокӀыщт къэбархэр къышъосӀонхэу зыкӀи зыщысымыдзыеу, цӀыфхэм апашъхьи шъуиунэхэми къащышъозгъэӀугъэх ыкӀи къащышъозгъэшӀагъэх. 21 Джуртхэри урымхэри япсэкӀодхэм афыкӀэгъожьынхэшъ, Тхьэм ыдэжь агъэзэжьынэуи, Зиусхьанэу ИсускӀэ шӀошъхъуныгъэ зырягъэӀэнэуи афэзгъэпытэзэ язгъэӀущтыгъ. 22 Джы къысэхъулӀэщтыр сымышӀэу, Тхьэм Ыпсэ ЛъапӀэ седэӀузэ, Ерусалим сэкӀо. 23 Ау Ӏэхъулъэхъухэри гузэжъогъухэри къызэрэспэӀутхэр Тхьэм Ыпсэ ЛъапӀэ сигъашӀэзэ, къэлэ пстэуми къащеушыхьаты. 24 Спсэ сэркӀэ лъапӀэу ыкӀи уасэ иӀэу слъытэрэп, ау Зиусхьан Исус Ӏофэу спшъэ къырилъхьагъэр згъэцэкӀэн фаеу щыт: Тхьэм ынэшӀу щыфэныгъэм ехьылӀэгъэ къэбарышӀур цӀыфхэм язгъэӀуныр ары. 25 Тхьэм и Тетыгъошхо ехьылӀэгъэ къэбарыр шъозгъэӀузэ, шъо зэкӀэми шъуадэжь къыщыскӀухьэщтыгъ. Шъуащыщэу зыми сынапэ зэримылъэгъужьыщтыр сэшӀэ. 26 Арышъ, зы цӀыф ылъ спшъэ къызэрэдэмыфэщтыр непэ шъыпкъэу къышъосэӀо; 27 сыда пӀомэ Тхьэр зыфэе пстэури шъозгъэӀуным зыщыздзыягъэп. 28 Шъо шъузфэсакъыжьи, Тхьэм Ыпсэ ЛъапӀэ шъо ухъумакӀоу шъузыфигъэуцугъэ цӀыф купым шъуфэсакъ. Мэлахъом мэлхэм ынаӀэ зэратригъэтырэм фэдэу, Зиусхьанми Тхьэми ячылыс зэӀукӀэм щыщхэу, Исус илъыуасэкӀэ къыщэфыгъэхэм шъунаӀэ атежъугъэт. 29 Сыда пӀомэ сэ дунаем сызехыжьым ыуж, Ӏэхъогъум шъхьамысыщт тыгъужъ мэхъаджэхэр къызэрэшъухэхьащтхэр сэ сэшӀэ. 30 ПӀъо ИсускӀэ шӀошъхъуныгъэ зиӀэхэми цӀыфхэр къышъухэкӀыщтых, зигъогу пхэнджы шъутезыгъэхьаным пае, шъыпкъагъэр зэзыхъокӀыным пылъхэр. 31 Арышъ, шъумычъыеу шъусакъ! Сынэпс къехызэ, илъэсищым чэщи мафи зэпымыоу шъуащыщэу хэти зэрэгурызгъэӀуагъэр зыщышъумыгъэгъупш. 32 Джы Тхьэми ынэшӀу щыфэныгъэм ехьылӀэгъэ гущыӀэхэми шъуафэсэгъазэ. А гущыӀэхэм гурэ псэрэкӀэ кӀуачӀэ шъуагъэгъотын алъэкӀы, Тхьэм ицӀыфхэу ежьым зыкъезытыгъэ пстэуми шъурягъусэу ӀэхьышӀу къышъулъагъэӀэсыни алъэкӀы. 33 Зы цӀыфым итыжьыни, идышъи, ищыгъыни сянэцӀыгъэп. 34 Сигъусэхэмрэ сэррэ тищыкӀагъэхэр сэ сӀэхэмкӀэ къызэрэзгъэхъагъэр шъо шъошӀэ. 35 Мырэущтэу тыулэузэ, лъэкӀыныгъэ зимыӀэхэм тадэӀэпыӀэн зэрэфаер лъэныкъо пстэумкӀи шъозгъэлъэгъугъэ. Ежь Зиусхьан Исус гущыӀэхэу къыӀуагъэхэр зыщыдгъэгъупшэжьынхэ фаеп: «КъыпӀэкӀэхьаным нахьи птыныр нахь сыхьатмаф». 36 А гущыӀэхэр къызеӀохэ ужым, Паул лъэгонджэмышъхьэкӀэ тӀыси, ахэмэ зэкӀэм ягъусэу Тхьэм елъэӀугъ. 37 ЗэкӀэри инэу гъыгъэх, Паул ӀаплӀи ращэкӀи ебэугъэх. 38 Анахьыбэу агу къеуагъэр Паул ынапэ егъашӀэми зэрамылъэгъужьыщтыр къызэриӀуагъэр ары. ЕтӀанэ къухьэм нэс Паул дэкӀотагъэх.
Паул Ерусалим зэрэкӀуагъэр
1 Ахэмэ тыкъызахэкӀыжьым, къухьэмкӀэ тежьи, занкӀэу Кос къалэм тыкӀуагъ. ЯтӀонэрэ мафэм Родос къалэм тыкӀуи, ащ тыщежьи, Патарэ къалэм тынэсыгъ. 2 Фи никие хэкум кӀорэ къухьэ горэ къэдгъоти, титӀысхьи, тежьагъ. 3 Кипр хыгъэхъунэр къызэлъагъом, къухьэм исэмэгубгъукӀэ ар къэдгъанэзэ, Сирие хэкум тыкӀуи, Тир къалэм къухьэр щеуцолӀагъ, сыда пӀомэ а къалэм къухьэр щаунэкӀын фэягъ. 4 ИсускӀэ шӀошъхъуныгъэ зиӀэхэр а къалэм къыщыдгъотхи, мэфиблэ ахэмэ адэжь тыкъэнагъ. Тхьэм Ыпсэ ЛъапӀэ ахэмэ зэхаригъэшӀыкӀыгъэу, Ерусалим мыкӀонэу Паул къыраӀуагъ. 5 Ау а къалэм тызэрэщыӀэн фэе уахътэр зытешӀэм, ащ тыдэкӀи, тигъогу тытехьажьыгъ. ШӀошъхъуныгъэ зиӀэхэр зэкӀэ, бзылъфыгъэхэри сабыйхэри ягъусэхэу, къалэм къыддыдэкӀыгъэх. ЕтӀанэ хыӀушъом лъэгонджэмышъхьэкӀэ тыщытӀыси, Тхьэм телъэӀугъ. 6 Зым адрэм ыӀапэ ыубытыжьи, къухьэм титӀысхьажьыгъ, ахэми ядэжь агъэзэжьыгъ. 7 ЕтӀанэ Тир къалэм тыщежьи, къухьэкӀэ кӀоныр тыухызэ, Птолемаидэ къалэм тынэсыгъ. Ащ дэжьым тшыхэм шӀуфэс щятхи, зы мафэ ахэмэ адэжь тыщыӀагъ. 8 ЯтӀонэрэ мафэм ащ тыдэкӀыжьи, Кесарие къалэм тыкӀуагъ. А къалэм Филипп зыцӀэу, Тхьэм игущыӀэхэр зыгъэӀурэм иунэ тихьи, ащ ыдэжь тыкъэнагъ. Ар нэбгыриблым ащыщыгъ. 9 А Филипп дэмыкӀуагъэхэу пхъуиплӀ иӀагъ. Тхьэм ежь игущыӀэхэр ахэмэ агухэм къарилъхьахэу къаригъаӀощтыгъэх. 10 Мэфэ заулэрэ ащ дэжь тызыщэӀэм, Агав зыцӀэу зы пегъымбар горэ Иудей хэкум къикӀи къэкӀуагъ. 11 Тадэжь къакӀуи, Паул ибгырыпх къышти, ежь ыӀэхэри ылъакъохэри зэтырипхэхи къыӀуагъ: Тхьэм Ыпсэ ЛъапӀэ мырэущтэу къеӀо: «джуртхэм мы бгырыпхыр зиер Ерусалим щызэтырапхэнышъ, хымэ лъэпкъхэм аӀэкӀалъхьащт». 12 А гущыӀэхэр зызэхэтэххэм, тэри а чӀыпӀэм щыпсэурэ тшыхэри Ерусалим мыкӀонэу Паул телъэӀугъ. 13 Джащыгъум Паул пэгъокӀ къытыжьыгъ: Сыда шъушӀэрэр? Шъугъызэ, сыда сыгу къызкӀежъугъаорэр? Си Зиусхьан Исус ыцӀэ пае Ерусалим сыщырапхыщтми, сыщылӀэщтми сыфэхьазыр. 14 Паул къэдгъэнэнэу зытэмылъэкӀым, «Тхьэм ыӀуагъэр орэхъу», тӀуи зытыушъэфыгъ. 15 А мафэхэм ауж зыдгъэхьазыри, Ерусалим тыкӀуагъ. 16 Кесарием щыщхэу, ИсускӀэ шӀошъхъуныгъэ зиӀэ цӀыф заулэ тигъусагъэх. Ахэмэ Мнасон зыцӀэм иунэу тызыщыпсэущтым тащагъ, Мнасон Кипр хыгъэхъунэм щыщыгъ, ежьыри апэ дэдэу ИсускӀэ шӀошъхъуныгъэ зиӀэ хъугъэхэм ащыщыгъ.
Паул Якъубэ ыдэжь зэрэкӀуагъэр
17 Ерусалим тызынэсым, тшыхэм ягуапэу тырагъэблэгъагъ. 18 ЯтӀонэрэ мафэм Паул тигъусэу Якъубэ ыдэжь тыкӀуагъ. Нахьыжъхэр зэкӀэ ащ дэжьым щыӀагъэх. 19 Паул ахэмэ шӀуфэс арихи, иӀофкӀэ Тхьэм хымэ лъэпкъхэм адэжь Ӏофхэу щишӀагъэхэр зырызхэу афиӀотэжьыгъэх. 20 Паул ахэр къыӀуатэхэу зызэхахым, ахэмэ Тхьэм щытхъу фашӀыгъ. ЕтӀанэ Паул къыраӀуагъ: О тшы, джуртхэм ащыщхэу мин пчъагъэхэм шӀошъхъуныгъэ яӀэ зэрэхъугъэри, Мусэ и Тэурат хабзэ яшъыпкъэу зэрэпылъхэри олъэгъу. 21 Ясабыйхэр сунэт амышӀынхэуи яхабзэхэм атемытынхэуи пӀоу, джуртхэу хымэ лъэпкъхэм ахэсхэри зэкӀэ пегъымбар Мусэ игъогу текӀынхэу о ябгъашӀэу аӀозэ цӀыфхэм зэрахьэрэ къэбар пхэнджыр а шӀошъхъуныгъэ зиӀэхэм зэхахыгъ. 22 Сыда тшӀэщтыр? ЦӀыфхэр къэзэрэугъоищтых; сыда пӀомэ о укъызэрэкӀуагъэр зэхахыщт. 23 Арышъ, тэ къызэрэуатӀорэм фэдэу зекӀо. ТхьарыӀо зышӀыгъэ нэбгыриплӀ тиӀ. 24 Ахэр зыдащэхи, ягъусэу Тэурат хабзэм иунашъо тетэу зыгъэкъэбзэжьи, ашъхьэхэр ябгъэупсынхэм пае ахъщэ ят. Ар залъэгъукӀэ, о къыохьылӀагъэу зэхахыгъэ къэбархэр шъыпкъэхэу зэрэщымытхэри, орорэу Тэурат хабзэм утетэу, Тэурат хабзэм итхэр зэрэбгъэцакӀэхэрэри цӀыф пстэуми ашӀэщт. 25 Ау хымэ лъэпкъхэм ащыщхэу ИсускӀэ шӀошъхъуныгъэ зиӀэ хъугъэхэм тэ зэдэтштэгъэ Ӏофыр тхылъкӀэ зэрядгъэшӀа гъэм фэдэу, цӀыфхэм тхьэ нэпцӀхэм афашӀыгъэ къурмэныпхъэм ыл, лъым, атхьалэгъэ псэушъхьэхэм ал, зинэ шӀэным защадзыен фае. 26 ЯтӀонэрэ мафэм Паул а лӀыхэр зыдищэхи, ягъусэу зигъэкъэбзэжьыгъ. ЕтӀанэ Тхьэм иунэшхо чӀахьи, ежьымрэ а лӀыхэмрэ зызыщагъэкъэбзэжьырэ мафэхэр заухыщтри, якъурмэн зырыз дин пащэм зырагъэшӀыщт мафэри дин пащэхэм ариӀуагъ.
Джуртхэр Тхьэм иунэшхо Паул зэрэщытебэнагъэхэр
27 А мэфиблыр зыщыблэкӀыным, Асие хэкум щыщэу джурт заулэмэ Тхьэм иунэшхо Паул щалъэгъугъ. ЦӀыф купышхор зэкӀэ зэкӀагъэплъыхьи, Паул аубыти, 28 мырэущтэу кууагъэ: Шъо Израил лӀыхэр шъукъыддэӀэпыӀ! Тэ тлъэпкъми, ти Тэурат хабзэми, мы чӀыпӀэ лъапӀэми къапэуцунхэу тыдэкӀи цӀыфхэм зэкӀэ щязыгъашӀэрэ лӀыр мыр ары. Ащ нэмыкӀэу урымхэри Тхьэм иунэшхо чӀигъахьэхэзэ, мы чӀыпӀэ лъапӀэр ыуцӀэпӀыгъ. 29 Арэущтэу зыкӀаӀуагъэр ыпэкӀэ Ефес къалэм щыщ Трофим Паул игъусэу къалэм щалъэгъугъагъэти ары. Паул ар чӀэмыхьапхъэу Тхьэм иунэшхо чӀигъэхьагъэу ашӀошӀыгъ. 30 Къалэм дэс цӀыф пстэури къэтэджхи, зэхэлъэдагъэх. Паул аубыти, Тхьэм иунэшхо къычӀащыжьыгъ. Ардэдэми пчъэхэр агъэпытагъэх. 31 Паул аукӀынэу зыпэхьэхэм, Ерусалим зэкӀэ зэрэзэӀыхьагъэм икъэбар Рим дзэ пэщэшхом ыдэжь нэсыгъ. 32 Дзэ пэщэшхом ардэдэм дзэлӀхэри, дзэ пащэхэри зыдищэхи, цӀыфхэм ахэлъэдагъ. ЦӀыфхэм дзэ пэщэшхори дзэлӀхэри залъэгъухэм, Паул еонхэм ыуж икӀыжьыгъэх. 33 Джащыгъум дзэ пэщэшхор къыӀухьи, Паул дзэлӀхэм аригъэубыти, гъучӀ ӀэхъуитӀу тыралъхьанэу унашъо афишӀыгъ. ЕтӀанэ яупчӀыгъ: Мыр хэта? Сыда ышӀагъэр? 34 ЦӀыф купышхом хэтхэм ащыщэу зым зыр ыӀозэ, адрэм нэмыкӀ ыӀозэ зэрэгъэкуощтыгъэх. Бырсырышхом къыхэкӀыкӀэ дзэ пэщэшхом шъыпкъэр зэригъэшӀэн ылъэкӀыгъэпти, Паул пытапӀэм дзэлӀхэм аригъэщагъ. 35 ДэкӀояпӀэм Паул зынэсым, цӀыф купышхор къызэрэтебэнагъэхэм пае, дзэлӀхэм ар ӀэкӀэ ахьын фае хъугъэ. 36 ЦӀыф купышхом хэтхэу Паул къыкӀэлъыкӀощтыгъэхэр куощтыгъэх: УкӀы ар.
Паул цӀыф купышхом хэтхэм апашъхьэ къызэрэщыгущыӀагъэр
37 ДзэлӀхэм Паул пытапӀэм ащэн фаеу зэхъум, Паул дзэ пэщэшхом риӀуагъ: Зыгорэ къыосӀонэу фит сыкъэпшӀына? Урымыбзэ ошӀа? къыӀожьыгъ ащ. 38 Мысырым щыщэу, бэмышӀэу цӀыфхэм зыкъязыгъэӀэтыгъэу, укӀэкӀо миниплӀ шъоф нэкӀым изыщагъэр орыба? 39 Сэ сыджурт, къыӀожьыгъ Паул, Киликие хэкум щыщэу, лъытэныгъэ зиӀэ Тарс къалэм ицӀыфхэм сащыщ. ЦӀыфмэ апашъхьэ сыкъыщыгущыӀэнэу фит сыкъэшӀ. 40 Дзэ пэщэшхом фит къызешӀым, Паул дэкӀояпӀэм теуцуи, ыӀэ цӀыфхэм афиӀэтыгъ. ЗэкӀэми зызаушъэфым, Паул джуртыбзэкӀэ мырэущтэу къыӀуагъ:
1 Тэ тшыхэри тятэхэри, зызгъэхыижьынэу къышъосӀощтым шъукъедэӀу. 2 Ахэмэ Паул джуртыбзэкӀэ адэгущыӀэу зызэхахым, нахь заушъэфыгъ. ЕтӀанэ Паул къыӀуагъ: 3 Сэ сыджурт, Киликие хэкум щыщэу Тарс къалэм сыкъыщыхъугъ. Мы къалэу Ерусалим сыщапӀугъ. Гамалил зыцӀэм ылъакъохэм адэжь сыщысэу, тятэжъхэм я Тэурат хабзэ фэсакъыпэу сигъэшӀагъэ. Непэ шъо пстэури Тхьэм шъузэрэфэлажьэрэм фэдэ къабзэу, сыгуи сыпси етыгъэу Тхьэм сыфэлажьэ. 4 Зиусхьаным игъогу рыкӀохэрэм олӀэхэфэкӀэ, къин язгъэщэчыщтыгъ. СицӀыфхэм ахэмэ яхъулъфыгъэхэми ябзылъфыгъэхэми Ӏэхъу атырязгъалъхьэти, хьапсым чӀязгъадзэщтыгъэх. 5 Ар зэрэшъыпкъэр дин пэщэшхоми Тхьэмэтэ Хэсэшхом щыщ пстэуми къысфаушыхьатын алъэкӀы. Ахэмэ Дамаск дэс джурт тшыхэм тхылъхэр афатхыххи къысатыгъэх. ЕтӀанэ Дамаск сыкӀонэу щытыгъ, а гъогум рыкӀохэрэм Ӏэхъухэр ателъхэу сицӀыфхэм Ерусалим къязгъэщэнхэшъ, титхьаматэхэм ахэмэ къин атырязгъэлъхьаным пае.
Паул Зиусхьанэу Исус игъогу зэрэтехьагъэм икъэбар къызэриӀотэжьыгъэр
6 Дамаск сыкӀозэ, къалэм игъунэгъоу сызынэсым, щэджагъом дэжь ошӀэдэмышӀэу зы нэфынэ уашъом къехи, сыкъиуцухьагъ. 7 ЧӀыгум сытефагъэу, зы макъэ горэм къысиӀоу зэхэсхыгъ: «Саул, Саул, сыд пае къин сэ сэбгъэщэчырэ?» 8 «0 ухэта, Зиусхьан?» сӀуагъэ. «Назарет щыщ Исусэу къин зэбгъэщэчырэр сэры», къысиӀожьыгъ ащ. 9 Сигъусэхэм нэфынэр алъэгъугъ, ау сэ къыздэгущыӀагъэм ымакъэ зэхахыгъэп. 10 «Сыда сшӀэщтыр, Зиусхьан?» сӀуагъэ. «Къэтэджи, Дамаск кӀо», къысиӀожьыгъ Зиусхьаным. «О пшӀэнхэу Тхьэм къыпфигъэнэфагъэхэр зэкӀэ ащ дэжьым зыгорэм къыщыуиӀощтых». 11 А нэфынэшхом къыхэкӀыкӀэ сынэхэм зи амылъэгъужь зэрэхъугъэм пае, сигъусэхэм сӀэ аӀыгъэу Дамаск сащагъ. 12 Ананый зыцӀэу, Тэурат хабзэм итхэм арыкӀоу, Тхьэм ищынагъо зыгу илъ лӀы горэ Дамаск дэсыгъ. Джурт пстэуми ащ лъытэныгъэ фыряӀэу щытыгъ. 13 Ар садэжь къакӀуи, къызбгъодахьи къысиӀуагъ: «Сшы Саул, о унэхэр къэплъэжьыщтых», къысиӀуагъ. Ардэдэм сынэхэр къэплъэжьхи, а лӀыр сэ слъэгъугъэ. 14 «Тхьэр зыфаер зэбгъэшӀэнэу, Шъыпкъагъэр Зиер плъэгъунэуи ащ ымакъэ зэхэпхынэуи тятэжъхэм я Тхьэ укъигъэнэфагъ», къыӀуагъ Ананый. 15 «Арышъ, о Ӏофхэу плъэгъугъэхэмрэ зэхэпхыгъэхэмрэ цӀыфхэм зэкӀэ апашъхьэ къыщыпӀохэзэ, Шъыпкъагъэр Зием уришыхьатыщт. 16 Джы сыда зызкӀэбгъэгужъорэр? Къэтэджи, зысэгъэумэхъи, Зиусхьаным елъэӀуи, ащ уипсэкӀодхэр угу рырегъэукъэбзыкӀыжьых».
Зиусхьаным игущыӀэхэр хымэ лъэпкъхэм аригъэӀунхэу Паул зэригъэкӀуагъэр
17 ЕтӀанэ Ерусалим къэзгъэзэжьи, Тхьэм иунэшхо сычӀахьи, ащ сычӀэтэу сызыщелъэӀум, зыгорэ къысфэлъэгъуагъ. 18 Исус сэ слъэгъуи, ащ къысиӀуагъ: «ЗыгъэпсынкӀи, шӀэхэу Ерусалим дэкӀ, сыда пӀомэ шыхьатныгъэу къысфэпшӀырэр адэщтэп». 19 «Зиусхьан», къэсӀожьыгъ сэ, «оркӀэ шӀошъхъуныгъэ зиӀэхэр сэ сицӀыфхэм хьапсым чӀязгъадзэхэу зэрэщытыгъэри, синэгогухэм щязгъаохэу зэрэщытыгъэри мы цӀыфхэм ашӀэ. 20 О уишыхьатэу Стефан ылъ къызыкӀагъэкӀым, сэ ащ дэжьым сыщытыгъ. ЗэраукӀыгъэри афэздагъ, зыукӀыгъэхэми ящыгъынхэр афэсыухъумагъэх». 21 «КӀожь», къысиӀуагъ Зиусхьаным. «Хымэ лъэпкъхэм адэжь чыжьэу узгъэкӀощт».
Паулрэ Римыдзэ пэщэшхомрэ
22 Паул мы гущыӀэхэр къеӀохэфэ нэс, цӀыфхэр едэӀущтыгъэх. Джащыгъум мэкъэшхокӀэ къэзэрэгъэкууагъэх: А лӀыр дунаем техыжь. Псэунэу фэшъуашэп! 23 Ахэр къэзэрэгъэкуохэзэ, ящыгъынхэр дадзыехэзэ, сапэр датэкъуаещтыгъ. 24 Джащыгъум дзэ пэщэшхом дзэлӀхэм Паул пытапӀэм аригъэщагъ. ЦӀыфхэр Паул пэуцухэзэ, арэущтэу зыкӀэкуохэрэр зэригъэшӀэным пае, къамыщкӀэ еохэзэ еупчӀынхэу дзэ пэщэшхом дзэлӀхэм унашъо афишӀыгъ. 25 КъамыщкӀэ Паул еонхэм пае, шъо кӀапсэхэмкӀэ зырапхым, Паул ащ дэжьым щыт дзэ пащэм риӀуагъ: ХьыкумышӀэм ыпашъхьэ ишъумыщэу, Рим цӀыфхэм ащыщэу зыгорэм къамыщкӀэ шъуеонэу шъуихабзэкӀэ хъущта? 26 Дзэ пащэм ар зызэхехым, дзэ пэщэшхом ыдэжь кӀуи, ар ригъэшӀагъ. Сыда пшӀэщтыр? Мы лӀыр Рим цӀыфхэм ащыщ, риӀуагъ ащ. 27 Дзэ пэщэшхор Паул къыбгъодахьи къыриӀуагъ: КъысаӀу! О Рим цӀыфхэм уащыща? Сащыщ, къыӀуагъ ГТаул. 28 Рим цӀыфхэм сащыщ хъуным пае, ахъщабэ тезгъэкӀодагъ, къыӀуагъ дзэ пэщэшхом. Сэ Рим цӀыфэу сыкъэхъугъ, къыӀуагъ Паул. 29 Паул еупчӀынхэу щытыгъэхэр занкӀэу зэкӀэкӀожьыгъэх. Дзэ пэщэшхом Паул Рим цӀыфхэм зэращыщыр къызешӀэм, дзэлӀхэм Паул Ӏэхъу зэрэтраригъэлъхьагъэм пае, щынагъэ.
Тхьэмэтэ Хэсэшхом ыпашъхьэ Паул зэрэращагъэр
30 ЯтӀонэрэ мафэм джуртхэм Паул зэрагъэмысагъэр дзэ пэщэшхом зэригъэшӀэпэнэу фэягъэти, дзэлӀхэм Паул къаригъэтӀэтэжьи, дин пэщэшхохэри Тхьэмэтэ Хэсэшхом щыщ пстэури зэрэугъоинхэу унашъо ышӀыгъ. ЕтӀанэ Паул къыщи, апашъхьэ къыригъэуцуагъ.
Паул Тхьэмэтэ Хэсэшхом щыщхэм ахаплъи ариӀуагъ: Сшыхэр, сэ непэ нэсы Тхьэм ыпашъхьэ гукъэбзагъэкӀэ мыхъун зи зыдэсымышӀэжьэу сыщыпсэугъ. 2 Дин пэщэшхоу Ананый Паул ыдэжь щытхэм ыжэ еонхэу ариӀуагъ. 3 Джащыгъум Паул ащ риӀуагъ: Тхьэр къыоожьыщт. Дэпкъэу фыжьэу къэлъэгъоным пае, агъэлагъэм уфэд. Хабзэм тетэу хьыкум къыстепшӀыхьанэу ущыс, ау щытми орорэу хабзэм утекӀэу къысэогъаоха? 4 Ащ дэжьым щытхэм Паул къыраӀуагъ: Тхьэм идин пэщэшхом уехъона? 5 Сшыхэр, ар зэрэ дин пэщэшхор сшӀэщтыгъэп, къыӀуагъ Паул. Сыда пӀомэ Тхьэм игущыӀэ тхыгъэхэм арыт: «О плъэпкъ итхьаматэ ӀэягъэкӀэ утегущыӀэ хъущтэп». 6 Тхьэмэтэ Хэсэшхом щыщхэм ащыщэу зы куп саддукейхэу, адрэ купыри фарисейхэу Паул ышӀэщтыгъэти, Тхьэмэтэ Хэсэшхом хэтэу къыӀуагъ: Сшыхэр, сэ сыфарисей, сяти фарисеу щытыгъ. ЛӀагъэхэр къызэрэтэджыжьыщтхэм сызэрэщыгугъырэм пае, хьыкумышӀэм ыпашъхьэ сыращагъ. 7 Арэущтэу къызеӀом, фарисейхэмрэ саддукейхэмрэ зэщыхьанхэу аублагъ, лъэныкъуитӀоуи зэрэгъэхъугъэх; 8 сыда пӀомэ саддукейхэм «ЛӀагъэхэр къэтэджыжьхэрэп, мэлэӀич щыӀэп, псэ щыӀэп», аӀо, ау саддукейхэм афэмыдэхэу фарисейхэм ахэмкӀэ зэкӀэ шӀошъхъуныгъэ яӀ. 9 Джащыгъум Тхьэмэтэ Хэсэшхом щыщхэр мэкъэшхокӀэ къэзэрэгъэкуохи, фарисейхэм ащыщхэу Тэурат егъэджэкӀо пэщэ заулэ къэтэджыхи, адрэхэм янэкъокъухэу къаӀуагъ: Мы лӀым мыхъун горэ етлъэгъулӀэрэп. Псэ горэ е мэлэӀич горэ къыдэгущыӀэгъэнкӀи мэхъу. Тхьэм тыпэрэмыуцу. 10 Лъэшэу зэрэзэщыхьагъэхэм пае, ахэмэ Паул зэпкъыратхъынкӀэ дзэ пэщэшхор щыни, Паул ахэмэ къахащынышъ, пытапӀэм ащэнэу дзэлӀхэм унашъо афишӀыгъ. 11 ЯтӀонэрэ чэщым Зиусхьаныр Паул къыфэлъагъуи къыриӀуагъ: Угу умыгъэкӀоды! Ерусалим шыхьат укъыщызэрэсфэхъугъэм фэдэу, Рим къэлэшхоми шыхьат укъыщысфэхъун фае.
Паул шъэфэу аукӀынэу джуртхэм гухэлъ зэрашӀыгъэр
12 ЯтӀонэрэ мафэм ипчэдыжь джурт заулэ зэгурыӀуи, тхьэ аӀуагъ: Паул тэукӀыфэ, тышхэщтэп ыкӀи тешъощтэп. 13 Тхьэ зыӀуагъэхэр нэбгырэ тӀокӀитӀум нахьыбэ хъущтыгъэх. Ахэр дин пэщэшхохэмрэ нахьыжъхэмрэ адэжь кӀохи араӀуагъ: 14 Паул тэукӀыфэ, тымышхэнэу тхьэ тӀуагъэ. 15 Арышъ, «Паул иӀоф нахь тэрэзэу тыхэплъэным пае, тадэжь къащэ», шъуелъэӀузэ шъоррэ Тхьэмэтэ Хэсэшхом щыщхэмрэ дзэ пэщэшхом макъэ ежъугъэӀу. Паул мыщ дэжьым къэмысызэ, тыукӀынэу тыхьазыр. 16 Ау Паул ышыпхъу ыкъо ахэмэ ягухэлъ къышӀи, пытапӀэм кӀуи, Паул а къэбарыр ригъэшӀагъ. 17 Паул дзэ пащэхэм ащыщэу зыгорэм къеджи риӀуагъ: Дзэ пэщэшхом ыдэжь мы кӀалэр щэ. Зыгорэ риӀонэу фай. 18 Дзэ пащэм кӀалэр зыдищи, дзэ пэщэшхом ыдэжь кӀуи риӀуагъ: ТихьапсчӀэсэу Паул зыцӀэр къысаджи, мы кӀалэм зыгорэ къыуиӀонэу фаешъ, уадэжь къэсщэнэу къысэлъэӀугъ. 19 Дзэ пэщэшхом кӀалэм ыӀэ ыубыти, зы лъэныкъокӀэ Ӏуищи еупчӀыгъ: КъысэпӀонэу сыда узыфаер? 20 «Паул иӀоф нахь тэрэзэу тыхэплъэным пае, неущ Тхьэмэтэ Хэсэшхом ыпашъхьэ къащэ», аӀоу, джуртхэр къыолъэӀунхэу зэгурыӀуагъэх, къыӀожьыгъ кӀалэм. 21 Ау ахэмэ уямыдэӀу; сыда пӀомэ ахэмэ ащыщхэу нэбгырэ тӀокӀитӀум нахьыбэ хъухэу, Паул аукӀыным пае, шъэфэу пэсых. Ахэмэ ар аукӀыфэ, мышхэнхэуи емышъонхэуи тхьэ аӀуагъ. Загъэхьазырыгъэу уиунашъо паплъэх ныӀэп. 22 Дзэ пэщэшхом кӀалэр ыгъэкӀотэжьызэ къыриӀуагъ: Мыр къызэрэсэпӀуагъэр зыми емыӀу!
Паул Ӏэшъхьэтет Феликс ыдэжь зэращагъэр
23 ЕтӀанэ дзэ пэщэшхор дзэ пащэхэм ащыщхэу нэбгыритӀу ыдэжь къяджи ариӀуагъ: ДзэлӀ нэбгырэ шъитӀу, шыухэу нэбгырэ тӀокӀищырэ пшӀырэ, пчыхэр зыӀыгъ дзэлӀхэу нэбгырэ шъитӀу нычэпэ сыхьатыр бгъум Кесарие къалэм кӀонхэу жъугъэхьазырых. 24 Шыхэри Паул фэжъугъэхьазырхи, шы горэм тежъугъэтӀысхьи, Ӏэшъхьэтет Феликс ыдэжь шъущэ. 25 Дзэ пэщэшхом мыщ фэдэ гущыӀэхэр зэрыт тхылъыри ытхыгъ: 26 «Сэ Клаудый Лисый, о лъытэныгъэшхо зиӀэ Ӏэшъхьэтет Феликс, шӀуфэс осэхыжьы. 27 Мы лӀыр джуртхэм аубыти, аукӀынэу фежьэгъагъэх, ау сидзэлӀхэр сигъусэхэу сыкъакӀуи, къаӀэпысхыжьыгъ, сыда пӀомэ Рим цӀыфхэм зэращыщыр къэсшӀагъэти ары. 28 Зэрагъэмысэрэр зэзгъэшӀэнэу сыфаеу, я Тхьэмэтэ Хэсэшхо ыпашъхьэ дзэлӀхэм къырязгъэщагъ. 29 Ахэмэ зэрагъэмысэхэрэр яхабзэ епхыгъэхэ нахь, е укӀ е хьапс зифэшъошэ Ӏоф а лӀым зи ымышӀагъэу къызэзгъэшӀагъ. 30 Ау джуртхэм мы лӀыр шъэфэу аукӀынэу агу зэрэхэлъыр зыгорэм сигъэшӀагъэти, дзэлӀхэм уадэжь занкӀэу къязгъэщагъ. Къедаохэрэми зэрагъэмысэрэ Ӏофхэр уапашъхьэ къыщаӀонхэу макъэ язгъэӀугъ. Отхъэжь!» 31 Арэущтэу яунашъо тетэу дзэлӀхэм Паул зыдащи, чэщым Антипатридэ къалэм нагъэсыгъ. 32 ДзэлӀхэм ятӀонэрэ мафэм шыухэм Паул Кесарием ащэнэу къагъанэхи, ежьхэм пытапӀэм агъэзэжьыгъ. 33 Шыухэр Кесарие къалэм зынэсхэм, Ӏэшъхьэтетым тхылъыр ратыгъ, Паули ащ фагъэзагъ. 34 Ӏэшъхьэтетыр тхылъым еджи, Паул зыщыщ хэкумкӀэ къеучӀыгъ. Киликие хэкум щыщэу зызэхехым, къыӀуагъ: 35 Къыодаохэрэр къызысхэкӀэ, тэрэзэу сыоупчӀыщт. Ӏэшъхьэтетым етӀанэ Ирод пачъыхьэ унэшхоу преторие зыцӀэр ыгъэуцугъагъэм дзэлӀхэм Паул щаухъумэнэу унашъо ышӀыгъ.
Ӏэшъхьэтет Феликс ыпашъхьэ джуртхэр Паул зэрэщедэуагъэхэр
Мэфитф нэужым дин пэщэшхо Ананый, нахьыжъхэм ащыщэу купрэ очыл Тертуллрэ игъусэхэу, Кесарие къалэм къехыгъ. Паул зэрагъэмысэхэрэр Ӏэшъхьэтетым ыпашъ хьэ къыщаӀотагъэх. 2 Паул къызыращэм, Тертулл ар къыгъэмысэу мырэущтэу къыӀоу ыублагъ: Лъытэныгъэшхо зиӀэ Феликс, о уитетыгъокӀэ мамырныгъэшхо тиӀэу тэпсэу; унаӀи тебгъэтэзэ, мы хэгъэгур нахь зэтегъэпсыхьагъэу хъугъэ. 3 Арышъ, сыдигъуи, тыдэ тыщыӀэми, щытхъу къыпфэтэшӀы. 4 Бащэрэ усымыгъэулэоу, уигуапэу укъытэдэӀунэу сыкъыолъэӀу. 5 Сыда пӀомэ къызэрэтшӀагъэмкӀэ мы лӀыр емынэ гор, дунаем тет джурт пстэуми зыкъарегъэӀэты, диным рыкӀорэ цӀыф купэу Назарет купкӀэ заджэхэрэми ятхьаматэу щыт. 6 Тхьэм иунэшхуи мыкъабзэу ышӀыным пылъыгъ. Ар къэтыубыти, тэ тихабзэ тетэу хьыкум тетшӀыхьанэу тыфэягъ, 7 ау дзэ пэщэшхо Лисый къакӀуи, лӀыгъэкӀэ къыттырихыжьи, уадэжь дзэлӀхэм къаригъэщагъ. 8 ЕтӀанэ Лисый тэ а лӀым тыридэогъоу уадэжь тыкъэкӀонэу унашъо ышӀыгъ. Орорэу ащ уеупчӀымэ, зэрыдгъэмысэхэрэм яшъыпкъагъэ зэбгъэшӀэн плъэкӀыщт. 9 Очыл Тертулл а гущыӀэхэу къыӀуагъэхэр джуртхэм шъыпкъэхэу аӀозэ, ащ ӀэпыӀэгъу фэхъугъэх.
Ӏэшъхьэтет Феликс ыпашъхьэ Паул зызэрэщиухыижьыгъэр
10 Ӏэшъхьэтетым Паул Ӏэ зыфешӀым, Паул къыӀуагъ: Илъэсыбэ хъугъэу мы лъэпкъым ихьыкум Ӏоф о ппшъэ зэрилъыр сшӀэзэ, зызгъэхыезэ, сиӀоф сигуапэу уапашъхьэ къисэлъхьэ. 11 Мэфэ пшӀыкӀутӀум нахьыбэ темышӀагъэу Ерусалим Тхьэм сыщелъэӀунэу сыкъызэрэкӀуагъэм ишъыпкъагъэ зэбгъэшӀэн плъэкӀыщт. 12 Тхьэм иунэшхуи зы цӀыф горэм сыщенэкъокъоу, синэгогуми, къалэми цӀыф купышхо щызгъэбырсырыхэуи щытыгъэп. 13 Сидэогъухэм сызэрагъэмысэрэ Ӏоф пстэуми ащыщэу зи къагъэшъыпкъэжьын алъэкӀыщтэп. 14 Ау тятэжъхэм я Тхьэ сыфэлажьэзэ, мы цӀыфхэм пхэнджэу зыфаӀорэ гъогум сызэрэрыкӀорэм сеуцуалӀэ. Тэурат хабзэм ит пстэумкӀи пегъымбархэм атхыгъэ тхылъхэм арыт пстэумкӀи шӀошъхъуныгъэ сиӀ. 15 Шъыпкъагъэ зиӀэхэмрэ зимыӀэхэмрэ Тхьэм къызэригъэтэджыжьынхэу мо щыт лӀыхэр Тхьэм зэрэщыгугъыхэрэм фэдэу, сэри Тхьэм сыщэгугъы. 16 Арышъ, Тхьэми цӀыфхэми апашъхьэ гукъэбзагъэкӀэ мыхъун зи зыдэсымышӀэжьэу сызэрэпсэуным сыдигъуи ыуж сит. 17 Илъэсыбэ Ерусалим сыщымыӀагъэу, сэдакъэхэр сэ слъэпкъ фэсхьынхэуи къурмэн сшӀынэуи джыри зэ сыкъэкӀуагъ. 18 Арэущтэу сшӀэ пэтызэ, Тэурат хабзэм иунашъо тетэу зызгъэкъэбзэжьыгъэу, Тхьэм иунэшхо сычӀэтэу сыкъыщагъотыгъ. ЦӀыф купыпгхоми сахэтыгъэп, бырсыри щыӀагъэп. 19 Ау Асие хэкум щыщ джурт куп ащ дэжьым щыӀагъэх. Ахэмэ сызэрагъэмысэн щыӀэмэ, джы уапашъхьэ къыщылъагъохэу ар къаӀон фэягъ. 20 Е мо щытхэм, сэ Тхьэмэтэ Хэсэшхом ыпашъхьэ сызыращэм, бзэджагъэу сшӀагъэу къагъотыгъэр къарэӀу. 21 «ЛӀагъэхэр къызэрэтэджыжьыщтхэмкӀэ шӀошъхъуныгъэ зэрэсиӀэм пае, непэ хьыкумышӀэм ыпашъхьэ сишъущагъ», сӀуи, мы цӀыфхэм сахэтэу мэкъэшхокӀэ къызэрэсӀогъагъэр арыщтын сызэрагъэмысэрэр. 22 Джащыгъум Феликсэу Зиусхьаным игъогу икъэбар тэрэзэу зышӀэщтыгъэм яӀоф зыхэплъэн пӀалъэр лъигъэкӀуатэзэ къыӀуагъ: Дзэ пэщэшхо Лисый къызэрэкӀоу, шъуиӀоф хьыкум тесшӀыхьан. 23 ЕтӀанэ Феликс дзэ пащэм унашъо фишӀыгъ Паул къин рамыгъэлъэгъузэ аухъумэнэу, игъусэхэри лъыплъэнхэу фит ышӀынхэу.
Паул Феликсрэ Друзиллэрэ зэрадэгущыӀагъэр
24 Мэфэ заулэ тешӀагъэу, Феликс ишъхьэгъусэ Друзиллэ игъусэу къэкӀуагъ. Друзиллэ джуртэу щытыгъ. Феликс ицӀыфхэм Паул къаригъащи, Паул Христос ИсускӀэ шӀошъхъуныгъэм къызэрэтегущыӀэрэм едэӀущтыгъ. 25 Ау шъыпкъагъэм, зыщыӀэныгъэм, къэкӀощт ахърэт мафэм Паул къызатегущыӀэм, Феликс къащти къыӀуагъ: ДжырэкӀэ кӀожь, игъо сыфифэмэ, етӀанэ укъязгъэщэжьын. 26 Паул ахъщэ къыритынкӀэ гугъэщтыгъ. Арыти, бэрэ къаригъащэзэ дэгущыӀэщтыгъ. 27 ИлъэситӀу зытешӀэ ужым, Феликс ычӀыпӀэ Порцый Фест зыцӀэр къихьагъ. Ау Феликс джуртхэм шӀугъэ горэ афишӀэнэу фэягъэти, Паул хьапсым къычӀигъэнагъ.
«Кайсарым сиӀоф хьыкум тырерэшӀыхь», ыӀуи, Паул Ӏэшъхьэтет Фест зэрелъэӀугъэр 1 Ӏэшъхьэтетэу Фест зыцӀэр хэкум къызэкӀом, мэфищ тешӀагъэу Кесарие къалэм дэкӀи, Ерусалим кӀуагъэ. 2 Джащыгъум дин пэщэшхохэмрэ джуртхэм ятхьаматэхэмрэ Паул едэонхэм пае, Фест ыдэжь къэкӀуагъэх. 3 Ахэмэ яхьатыркӀэ Фест дзэлӀхэм Паул Ерусалим къаригъэщэнэу ыуж имыкӀхэу елъэӀугъэх, сыда пӀомэ Паул гъогум рыкӀозэ, шъэфэу ар аукӀынэу агу хэлъыгъ. 4 Ау Фест ариӀуагъ: Паул Кесарие хьапсым чӀэс. Сэри бэ темышӀэу ащ дэжь сыкӀощт. 5 А лӀым бзэджагъэ горэ ышӀагъэмэ, шъуитхьаматэхэм ащыщэу зы куп сигъусэу къэрэкӀуи къерэдау. 6 Фест е мэфий е мэфипшӀ нахьыбэ ахэмэ адэжь щымыӀагъэу, Кесарием ехыгъ. ЯтӀонэрэ мафэм хьыкум ышӀынэу итӀысыпӀэ тетӀысхьи, дзэлӀхэм Паул къаригъэщагъ. 7 Паул къызэлъагъом, Ерусалим къикӀыгъэ джуртхэм къауцухьи, бзэджэгъэшхо пчъагъэкӀэ агъэмысэу аублагъ, ау къаӀуагъэхэр къагъэшъыпкъэжьынхэ алъэкӀыгъэп. 8 Джуртхэм я Тэурат хабзэкӀи, Тхьэм иунэшхокӀи, КайсарымкӀи мыхъомышӀагъэ зи сшӀагъэп, къыӀуагъ Паул зигъэхыижьэу. 9 Фест джуртхэм шӀугъэ горэ афишӀэнэу фэягъэти, Паул къыриӀуагъ: Мы Ӏофым хьыкум тесшӀыхьаным пае, Ерусалим укӀонэу уфая? 10 ХьыкумышӀэу Кайсарым ихьыкум сиӀоф тезышӀыхьан фаем ыпашъхьэ сит, къыӀожьыгъ Паул. О дэгъоу зэрэпшӀэрэм фэдэу сэ джуртхэм зи мыхъун ясшӀагъэп. 11 Ау укӀ зифэшъошэ мыхъун горэ сшӀагъэу силажьэмэ, укӀым зыщыздзыенэу сыфаеп. Ау къызэрысэдаохэрэм шъыпкъагъэ зи ахэмылъмэ, зыми ахэмэ саӀэкӀигъэхьан ылъэкӀыщтэп. Кайсарым сиӀоф хьыкум тырерэшӀыхь! 12 Фест иӀэпыӀэгъухэм задэгущыӀэ ужым, къыӀуагъ: Кайсарым сиӀоф хьыкум тырерэшӀыхь, пӀуи къызэрэпӀуагъэм пае, Кайсарым ыдэжь укӀощт!
Фест Паул икъэбар пачъыхьэ Агрипнэ зэрэриӀуагъэр
13 Мэфэ заулэ зытешӀэ ужым, пачъыхьэ Агриппэрэ ышыпхъу Вереникэрэ Фест шӀуфэс къырахынэу Кесарием къэкӀуагъэх. 14 Ахэр мэфэ заулэрэ щыӀагъэхэу, Фест Паул иӀоф пачъыхьэм ыпашъхьэ рилъхьи риӀуагъ: Зы лӀы горэ хьапсым чӀэсэу Феликс къысфигъэнагъ. 15 Сэ Ерусалим сызыщэӀэм, дин пэщэшхохэмрэ Джуртхэм янахьыжъхэмрэ садэжь къакӀохи, а лӀым едаохэу, мысагъэ теслъхьанэу къысэлъэӀугъэх. 16 Ау сэ ахэмэ ясӀожьыгъ: «Зы лӀы горэ къедаохэрэм апашъхьэ къихьэу, зэрагъэмысэрэм ипэгъокӀ аритэу, зиухыижьынэу фитыныгъэ къырамытмэ, укӀ тыралъхьанэу Рим хабзэмкӀэ хъущтэп». 17 Ахэр садэжь къызэкӀохэм, Ӏофыр сымыгъэгужъоу ятӀонэрэ мафэм хьыкум тесшӀыхьанэу ситӀысыпӀэ сытетӀысхьи, а лӀыр дзэлӀхэм къязгъэщагъ. 18 Къедаохэрэр къэтэджыгъэх. Ӏоф мыхъомышӀагъэкӀэ агъэмысэщт, сӀуи, ау зэрагъэмысэн бзэджэшӀагъэхэу сызэрэгугъагъэхэм ащыщкӀэ агъэмысагъэп. 19 Ау ежьхэм ядин ехьылӀагъэу Ӏоф заулэхэмкӀэ зэгурыӀощтыгъэхэп. Исус зыцӀэ лӀы лӀагъэу, Паул псаоу зыфиӀуагъэмкӀи зэгурыӀощтыгъэхэп. 20 Мыщ фэдэ Ӏофхэм хьыкум зэратесшӀыхьащт шӀыкӀэр сшӀагъэпти, а лӀым сеупчӀыгъ: «Ерусалим укӀоу, ащ дэжьым хьыкум къыщыптесшӀыхьанэу уфая?» 21 Паул иӀоф Кайсарым хьыкум тырешӀыхьэфэ, хьапсым чӀагъэсынэу къызэлъаӀом, ар Кайсарым ыдэжь сэгъэкӀофэ, хьапсым чӀагъэсынэу унашъо сшӀыгъэ. 22 Сэ сшъхьэкӀэ а лӀым къыӀохэрэм сядэӀунэу сыфай,ыӀуи, Агриппэ Фест къыриӀуагъ. Неущ уезгъэдэӀун, къыӀожьыгъ Фест. 23 ЯтӀонэрэ мафэм цӀыфхэм лъытэныгъэшхо къафашӀызэ, Агриппэрэ Вереникэрэ цӀыфхэм хьыкум зыщатырашӀыхьэрэ унэшхом къихьагъэх. Ахэмэ ягъусэхэу дзэ пэщэшхохэри къалэм итхьаматэхэри къихьагъэх. ЕтӀанэ Фест унашъо ышӀи, Паул къащагъ. 24 Ори пачъыхьэ Агриппэ, шъори мыщ дэжьым тигъусэхэу щыӀэ цӀыф пстэури, мы лӀым шъуеплъ! къыӀуагъ Фест. Джурт пстэури Ерусалими мыщ дэжьыми садэжь къакӀохи, агъэмысэзэ, «А лӀыр нахьыбэрэ псэу хъущтэп», аӀозэ зыфэкуощтыгъэхэр мы лӀыр ары. 25 УкӀ зифэшъошэ бзэджагъэ зи ымышӀагъэу къэзгъотыгъ, ау ежьым «Кайсарым сиӀоф хьыкум тырерэшӀыхь», ыӀуи лъэӀуагъэти, Кайсарым ыдэжь згъэкӀонэу тесыубытагъ. 26 Ау гъэнэфэгъэ къэбар зи ежьым ехьылӀагъэу Кайсарым фэстхынэу сиӀэп. Арыти, шъо пстэуми шъуапашъхьэ къырязгъэщагъ, зэкӀэми анахьэу оры, пачъыхьэ Агриппэ, тызеупчӀы ужым, стхыщтыр сшӀэным пае; 27 сыда пӀомэ зэрыдгъэмысэрэр ятымыгъашӀэу, хьапсчӀэс горэ афядгъэщэныр емыкӀоу сэлъытэ.
Пачъыхьэ Агриппэ ыпашъхьэ Паул зызэрэщиухыижьыгъэр
1 Ащ нэужым Агриппэ Паул риӀуагъ: Зыуухыижьэу укъэгущыӀэнэу уфит. Паул ыӀэ къыӀэти, зиухыижьэу къыӀуагъ: 2 Пачъыхьэ Агриппэ, джуртхэм сызэрагъэмысэрэ Ӏоф пстэумкӀи о уапашъхьэ зызэрэщысыухыижьырэр сэ насыпышӀуагъэу зыфэсэлъытэжьы. 3 Анахьэу, джуртхэм яхабзэхэри зэрызэнэкъокъурэ Ӏоф пстэури дэгъоу зэрэпшӀэхэрэм паешъ ары. Арышъ, сэ къасӀохэрэм уигуапэу укъядэӀункӀэ сыолъэӀу. 4 СикӀэлэгъу къыщегъэжьагъэу, сэ слъэпкъ сыхэтэу Ерусалим сызэрэщыпсэурэр джурт пстэуми дэгъоу ашӀэ. 5 Ахэмэ сызашӀэрэр бэшӀагъэ. Диным рылажьэрэ цӀыф купхэм ащыщэу анахь пытэу Фарисей купкӀэ заджэхэрэм игъогу сырыкӀоу зэрэщытыгъэр ахэр фаехэмэ, къаушыхьатын алъэкӀыщт. 6 Тхьэм тятэжъхэр къызэригъэгугъэгъэхэ Ӏофым сызэрэщыгугъырэм пае, джы хьыкумышӀэм ыпашъхьэ сыкъыращагъ. 7 Тхьэм тятэжъхэр къызэригъэгугъэгъэ дэдэр ары тэ тлъэпкъ иунэгъо лъэпкъ пшӀыкӀутӀур чэщи мафи агу етыгъэу, Тхьэм фэлажьэхэзэ, къагъотынэу зыщыгугъыхэу зыпаплъэхэрэр. О пачъыхь, сэри ащ сызэрэщыгугъырэр ары джуртхэр къызкӀысэдаохэрэр. 8 Тхьэм лӀагъэхэр къызэригъэтэджыжьыщтхэр къэмыхъун Ӏофэу сыд пае шъулъытэрэ? 9 ЗэрэслъэкӀэу Назарет щыщ Исус ыцӀэ сыпэуцужьын фаеу сэри сшӀошъ хъущтыгъэ. 10 Ерусалим арэущтэу щысшӀыщтыгъ. Дин пэщэшхохэм фитыныгъэ къаӀысхи, сицӀыфхэм Тхьэм ицӀыф лъапӀэхэм ащыщхэу бэхэр хьапсым чӀязгъадзэщтыгъэх. Тетыгъо зиӀэхэм ахэмэ укӀ хьыкум затыралъхьэм, сэри ар игъоу слъытагъэ. 11 Синэгогу пстэуми ахэмэ бэрэ къин щязгъэщэчыщтыгъ, Исус езгъэхъонынхэуи сыпылъыщтыгъ. Лъэшэу сафэгубжэу, къин язгъэщэчынэу хымэ къалэхэми анэсыфэ сакӀэлъыкӀощтыгъ.
Паул Зиусхьан Исус игъогу зэрэтехьагъэм икъэбар къызэриӀотэжьыгъэр
12 Арэущтэу дин пэщэшхохэм фитыныгъэ къаӀысхыгъэу, пшъэрылъи къысатыгъэу, Дамаск сыкӀонэу щытыгъ. 13 Шэджагъом дэжь гъогум сырыкӀозэ, тыгъэм нахьи нахь лыдырэ нэфынэ горэ уашъом къехэу, сигъусэхэмрэ сэррэ тыкъиуцухьэу слъэгъугъэ, типачъыхь. 14 Тэ зэкӀэ чӀыгум тытефи, джуртыбзэкӀэ зы макъэ горэм мырэущтэу къыӀоу зэхэсхыгъ: «Саул, Саул, сыд пае къин сэ сэбгъэщэчыра? Цур зием ибэщ кӀыхьэ папцӀэм цур ылъакъокӀэ къызэрешъутырырэм фэдэу ошӀымэ, уиягъэ зэогъэкӀыжьы». 15 «О ухэта, Зиусхьан?» сӀуагъэ. «Исусэу къин зэбгъэщэчырэр сэры», къыӀожьыгъ Зиусхьаным. 16 «Ау джы къэтэджи, о плъакъомэ къатеуцожь. Сэ къысфэлажьэрэ лӀы ухъунэу, Ӏофхэу плъэгъугъэхэмрэ озгъэлъэгъущтхэмрэ къэуушыхьатынхэуи узгъэнэфагъ ыкӀи зыозгъэлъэгъугъ. 17 О плъэпкърэ, хымэхэу узфэзгъэкӀощтхэмрэ укъаӀэпысхыжьыщт. 18 Ахэр шӀункӀыгъэм къыхэкӀынхэшъ, нэфынэм зыкъыфагъэзэным паий, шэйтаным итетыгъо ыӀэчӀэгъ къычӀэкӀынхэшъ, Тхьэм зыкъыфагъэзэным паий, ахэмэ анэхэр къэбгъэплъэжьынхэу адэжь усэгъакӀо. Арэущтэу сэркӀэ шӀошъхъуныгъэ зэряӀэм пае, япсэкӀодхэр афэгъущтых, Тхьэм ицӀыфхэу ежьым зыкъезытыгъэхэм ӀэхьышӀоу къалъысыщтри ахэми къалъысыщт».
Паул джуртхэмрэ хымэ лъэпкъхэмрэ апашъхьэ Исус шыхьат зэрэщыфэхъугъэр
19 Арышъ, пачъыхьэ Агриппэ, уашъом щыщэу зыкъысэзыгъэлъэгъугъэм сыпэуцужьыгъэп. 20 Апэу Дамаск къалэм дэсхэм, етӀанэ Ерусалим дэсхэми, Иудей хэкум зэкӀэ исхэми, хымэ лъэпкъхэм ащыщхэми язгъэӀущтыгъ, япсэкӀодхэм афыкӀэгъожьынхэшъ, Тхьэм игъогу техьанхэу зэрэфаери, япсэкӀодхэм зэрафыкӀэгъожьыгъэм фэшъошэ ӀофышӀухэр агъэцэкӀэнхэ зэрэфаери. 21 Джары джуртхэм Тхьэм иунэшхо сыщаубыти, саукӀынэу зыкӀыпылъыгъэхэр. 22 Ау непэ нэсыфэкӀэ Тхьэр ӀэпыӀэгъу къысфэ хъузэ, цӀыкӀуми инми апашъхьэ мыщ дэжьым сыщытэу шъыпкъагъэм шыхьат сыфэхъу. Пегъымбархэмрэ пегъымбар Мусэрэ къэхъун фэе Ӏофхэу зыфаӀуагъэхэм анэмыкӀхэр къасӀохэрэп; 23 Христос къин ыщэчын фаеу зэрэщытыгъэри, апэрэу лӀагъэхэм къахэтэджыкӀыжьыгъэу, ежь ылъэпкърэ хымэ лъэпкъхэмрэ нэфынэм икъэбар къаригъэӀунэу зэрэщытыгъэри ары зыфасӀохэрэр.
Паул Агриппэ шӀошъхъуныгъэ зыригъэӀэнэу зэрелъэӀугъэр
24 Паул арэущтэу зиухыижьы зэхъум, Фест мэкъэшхокӀэ къыӀуагъ: Паул, удел о. УишӀэныгъэшхо пшъхьэ зэригъэкӀокӀыгъ. 25 Сэ сшъхьэ зэкӀокӀыгъэп, лъытэныгъэ зиӀэ Фест,къыӀожьыгъ Паул, сэ къасӀохэрэр гущыӀэ шъыпкъэх ыкӀи гущыӀэ губзыгъэх. 26 Пачъыхьэм мы Ӏофхэр ешӀэх, ащ ыпашъхьи гушхоныгъэкӀэ сыкъыщэгущыӀэ. Ащ гузылъимытэгъэ Ӏоф а Ӏофхэм зэрахэмытым сицыхьэ телъ, сыда пӀомэ мы Ӏофхэр зэкӀэ зы къогъу горэм къы щыхъугъэхэп. 27 Пачъыхьэ Агриппэ, пегъымбархэм атхыгъэхэмкӀэ шӀошъхъуныгъэ уиӀа? ШӀошъхъуныгъэ зэрэуиӀэр сэшӀэ. 28 Арэущтэу псынкӀэу Христос игъогу сытебгъэхьанэу огугъа? ыӀуи, Агриппэ Паул къыриӀуагъ. 29 ПсынкӀэми мыпсынкӀэми о уимызакъоу, ау непэ сэ къасӀохэрэр зэхэзыхырэ пстэури сэ сфэдэ хъунхэу Тхьэм селъэӀу, ау Ӏэхъулъэхъу атерэмылъ, къыӀожьыгъ Паул. 30 Ащ нэужым пачъыхьэр, Ӏэшъхьэтетыр, Вереникэ, ахэмэ ягъусэхэу щысхэр къэтэджыжьхи, унэм икӀыжьыгъэх. 31 Унэм зекӀыжьхэм, зэраӀожьыгъ: УкӀ е хьапс зифэшъошэ Ӏоф мы лӀым зи ышӀагъэп. 32 ЕтӀанэ Агриппэ Фест риӀуагъ: Мы лӀым иӀоф Кайсарым хьыкум тыришӀыхьанэу мылъэӀуагъэмэ, шъхьафитэу ттӀупщыжьын тлъэкӀыщтыгъэ.
Рим къэлэшхом кӀонэу Паул къухьэ горэм зэритӀысхьагъэр
1 Италием къухьэкӀэ тэ тызэрэкӀощтыр Ӏэшъхьэтет Фест зытыреубытэм, Паули нэмыкӀрэ хьапсчӀэс купи Кайсарым идзэ ыцӀэкӀэ заджэхэу, нэбгырэ шъих хъурэ дзэлӀ купым ипащэхэм ащыщэу, Иулый зыцӀэм ыӀэ рилъхьагъэх. 2 Адрамит къалэм щыщ къухьэу Асие хэкум ихыӀушъо Ӏут къалэхэм кӀонэу щытыгъэм титӀысхьи, ащ тыщежьагъ. Аристарх зыцӀэу Македоние хэкум ит Фессалоникэ къалэм щыщыр тигъусагъ. 3 ЯтӀонэрэ мафэм Сидон къалэм тыӀухьагъ. Иулый Паул нэшӀукӀэ къеплъи, Паул игъусэхэу ащ дэжьым дэсхэм Паул ищыкӀагъэхэр ратынхэм пае, ахэмэ адэжь кӀонэу фит ышӀыгъ. 4 Ащ дэжьым тэ тыкъыщежьи, жьыбгъэр къызэрэтпеорэм пае, Кипр хыгъэхъунэм ылъэныкъоу жьыбгъэ къызыщемыпщэрэм тыготэу тыкӀуагъ. 5 Киликие хэкумрэ Памфилие хэкумрэ афэзанкӀэу щыт хьгм тызэпырыкӀи, Ликие хэкум щыщэу Мирэ къалэм тынэсыгъ. 6 Ащ дэжьым Александрие къалэм щыщэу, Италием кӀонэу къухьэ горэ дзэ пащэм къыщигъоти тыригъэтӀысхьагъ. 7 Мэфэ заулэрэ макӀэмакӀэу тыкӀозэ, къинкӀэ Книд къалэм фэзанкӀэу тынэсыгъ. Жьыбгъэм занкӀэу тигъэкӀуагъэпти, хым къыхэщэекӀыгъэ чӀыгу къуапэу Салмонэ зыцӀэм тыблэкӀызэ, Крит хыгъэхъунэм ылъэныкъоу жьыбгъэр къызыщемыпщэрэм тыготэу тыкӀуагъ. 8 Хыгъунэм тыготэу къинкӀэ тыкӀозэ, Ласей къалэм пэгъунэгъоу «КъухьэуцупӀэшӀухэр» зыфаӀорэ чӀыпӀэм тынэсыгъ. 9 Охътабэ блэкӀыгъагъ, къухьэкӀи узекӀоныр щынагъоу хъугъагъэ, сыда пӀомэ нэкӀ мафэри блэкӀыгъах. Арыти, Паул лӀыхэм агуригъаӀозэ, 10 мырэущтэу ариӀуагъ: Шъо, лӀы купыр, сэ зэрэслъэгъурэмкӀэ, тигъогу щынагъо хэлъ, хьылъэхэмрэ къухьэмрэ ямызакъоу, тпсэхэри тшӀокӀодынхэу щынагъо щыӀ. 11 Ау дзэ пащэр Паул къыӀуагъэхэм анахьи, къухьэм итхьаматэми къухьэр зиеми къаӀуагъэхэм нахь ядэӀущтыгъ. 12 КӀымафэр ащ дэжьым щыдгъэкӀонэу къухьэуцупӀэшӀоу зэрэщымытыгъэм пае, а чӀыпӀэм тыкъыщежьэжьынышъ, амал иӀэмэ, Финик зыцӀэ къухьэуцупӀэм тынэсынышъ, кӀымафэр ащ щыдгъэкӀонэу нахьыбэр зэгурыӀуагъэ. Финик зыцӀэ къухьэуцупӀэр Крит хыгъэхъунэм икъухьэуцупӀэхэм ащыщыгъ, къыблэ тыгъэ къохьэпӀэ лъэныкъокӀи, темыр тыгъэ къохьэпӀэ лъэныкъокӀи фэгъэзагъэу щытыгъ.
Хым жьыбгъэшхо зэрэщыхъугъэр
13 КъыблэмкӀэ къикӀэу жьыбгъэ тӀэкӀу къепщэ зэхъум, агу хэлъыр къадэхъугъэу ашӀошӀи, ежьэхи, Крит хыгъунэм готхэу кӀощтыгъэх. 14 Ау бэ темышӀэу, «Темыр тыгъэ къыкъокӀыпӀэмкӀэ къикӀырэ жьыбгъэшхор» хыгъэхъунэм къикӀи къапеуагъ. 15 Жьыбгъэшхом къухьэр ыубытыгъ, къухьэри жьыбгъэшхом пэдгъэуцужьын тымылъэкӀызэ, ыуж тикӀыжьи, жьыбгъэшхом къухьэр рифыжьагъ. 16 Клаудэ зыцӀэ хыгъэхъунэ цӀыкӀу горэм ылъэныкъоу жьыбгъэ къызыщемыпщэрэм тыготэу тыкӀуи, къинкӀэ къухьэм икъуашъо мыкӀодэу къэдгъэнэжьыгъ. 17 Къуашъор къаӀэти, къухьэм ыкӀоцӀ къызырагъэхы ужым, кӀэпсэшхохэр къухьэм ычӀэгъыкӀэ чӀащыхи, жьыбгъэшхом зэпкъыримыутыным пае, къухьэм къыращэкӀыгъ. Къухьэр Сыртис зыцӀэ чэнджыпӀэм къытенэнкӀэ щынагъэхэти, чэтэнхэр къырагъэхыгъэх, арэущтэу жьыбгъэшхом зырагъэфыщтыгъ. 18 ЯтӀонэрэ мафэми жьыбгъэр щынэгъошхуагъэти, хьылъэхэр хым хадзэу аублагъ. 19 Ящэнэрэ мафэм къухьэм иӀэмэпсымэхэм ащыщхэр тэ тӀэхэмкӀэ хым хэтыдзэхэу тыублагъэ. 20 Мэфэ заулэрэ тыгъи жъуагъуи къэмылъагъохэу, жьыбгъэшхор зэпыугъэпти, тымыкӀодэу тыкъэнэжьынэу гугъапӀэ тиӀэжьыгъэп. 21 ЛӀыхэр мышхэхэу бэ зытешӀэм, Паул ахэмэ апашъхьэ къиуцуи къыӀуагъ: Шъо, лӀы купыр, сэ шъукъысэдэӀоу Крит шъукъыщемыжьэгъагъэмэ, зэрар зи шъуиӀэщтгъэп, зи жъугъэ кӀодыщтгъэп. 22 Ау джы шъугу шъумыгъэкӀоды, къышъосэӀо, сыда пӀомэ шъуащыщэу зи кӀодыщтэп. Къухьэр ары ныӀэп кӀодыщтыр. 23 Тхьэу зибынхэм сащыщэу, сызфэлажьэрэм имэлэӀич нычэпэ къысфэлъагъуи, 24 къыӀуагъ: «Умыщын, Паул! Кайсарым ыпашъхьэ уиуцон фае. Къухьэм исхэу къыбдакӀохэрэ пстэури о уихьатыркӀэ Тхьэм ынэшӀу щыфэныгъэкӀэ мыкӀодхэу къыгъэнэжьыщтых». 25 Арышъ, шъо, лӀы купыр, шъугу шъумыгъэкӀоды. Тхьэм сэ къызэрэсиӀуагъэм фэдэу зэрэхъущтымкӀэ ежьым сыщэгугъы. 26 Ау жьыбгъэшхом зы хыгъэхъунэ горэм тырифылӀэн фае. 27 ЯпшӀыкӀуплӀэнэрэ чэщым Адриэхым тыхэтэу жьыбгъэшхом къухьэр ыфызэ, чэщныкъом дэжь лӀыхэм чӀыгу горэ гъунэгъу къызэрэхъугъэм гу лъатагъ. 28 Хым икуугъэ зашым, ӀэплӀэкӀу тӀокӀ хъугъэ. ТӀэкӀу джыри тыкӀохи, етӀани куугъэр зашым, ӀэплӀэкӀу пшӀыкӀутф хъугъэ. 29 Жьыбгъэшхом къухьэр мыжъошхохэм ашӀуигъэнэнкӀэ щынагъэхэти, къухьэм ыкӀэкӀэ гъурзиплӀ радзыхыгъэу, нэф къэшъыным гузажъохэу паплъэщтыгъэх. 30 Шъэфэу хэхьажьынхэм пае къухьэр зыфыхэрэм ащ ыпэкӀэ гъурз заулэ радзыхырэм фэдэу зашӀи, къуашъор хым ратӀупщэхыгъ. 31 Джащыгъум Паул дзэ пащэмрэ дзэлӀхэмрэ ариӀуагъ: А лӀыхэр къухьэм къимынэхэмэ, шъупсэхэр мыкӀодхэу къэжъугъэнэжьынхэ шъулъэкӀыщтэп. 32 Паул арэущтэу зареӀом, дзэлӀмэ къуашъом икӀэпсэшхохэр зэпаупкӀыхи, къуашъор рагъэфэхыгъ. 33 Нэф зэшъым ыуж, Паул зэкӀэри шхэнхэу ялъэӀоу, мырэущтэу къыӀуагъ: Непэ мэфэ пшӀыкӀуплӀ мэхъу, шъо гузэжъогъум шъухэтэу зи зышъумышхыгъэр. 34 Арышъ, шъушхэнэу лъэшэу сышъолъэӀу, шъумыкӀодэу шъукъэнэжьыным пае, ар шъуищыкӀагъ. Шъуащыщэу зыми ышъхьац налъэ кӀодыщтэп. 35 Паул арэущтэу къызеӀо ужым, хьалыгъу къышти, зэкӀэмэ апашъхьэ Тхьэм щытхъу щыфишӀи, хьалыгъур зэгуичи, ышхэу ыублагъ. 36 ЗэкӀэми гу къызыӀэпашӀыхьажьи, ахэри шхагъэх. 37 Тэ къухьэм ис пстэури нэбгырэ шъитӀурэ тӀокӀищырэ пшӀыкӀухырэ тыхъущтыгъ. 38 Ахэмэ зызагъэшхэкӀыжьым, коц хьылъэхэр хым хадзэхэзэ, къухьэр нахь псынкӀэ ашӀыгъ.
Къухьэр зэрэзэхэкъутагъэр
39 Нэф къызэшъым, хыӀушъор ашӀэжьыгъэп, ау пшахъо Ӏулъэу зы хытГуалэ горэ алъэгъугъ. Амал иӀэмэ, ащ къухьэр рафылӀэнэу тыраубытагъ. 40 Гъурзэхэм якӀэпсэшхохэр зэпаупкӀыхи, хым къыхагъэнагъэх. Ардэдэм къухьэр зыгъэӀорышӀэрэ хьанцэхэм якӀэпсэшхохэри атӀэтагъэх. ЕтӀанэ чэтэн цӀыкӀур жьыбгъэм щагъаӀи, хыӀушъом фаузэнкӀыгъ. 41 Ау къухьэр пшэхъолъэ чӀыпӀэ горэм хахьи, пшахъом къытенагъ. Къухьэм ыпэкӀэ мыхъыешъоу чэнджыпӀэм тенагъ, хыор лъэшхэми къухьэм ыкӀэ зэпкъыраутэу аублагъ. 42 ХьапсчӀэсхэм ащыщэу зыгорэ есызэ хэмыхьажьыным пае, дзэлӀхэм ахэр аукӀынхэ агу хэлъыгъ. 43 Дзэ пащэм Паул мыкӀодэу къыгъэнэжьынэу фэягъэти, дзэлӀхэм ягухэлъ аримыгъашӀэу, есыкӀэ зышӀэхэрэм апэ псым зыхадзэнышъ, хыӀушъом Ӏусыхьанхэу унашъо афишӀыгъ. 44 Къэнагъэхэри пхъэмбгъухэмрэ къухьэм щыщ къутафэхэмрэ ателъхэу хыӀушъом зынагъэсынэу ариӀуагъ. Арэущтэу зэкӀэри хыӀушъом нэсхи, псаухэу къэнэжьыгъэх.
Мелит хыгъэхъунэм Паул къыщехъулӀагъэхэр
1 Тыпсаоу тыкъызэнэжьым, а хыгъэхъунэм МелиткӀэ зэреджэхэрэр зэдгъэшӀагъ. 2 Хыгъэхъунэм исхэр шӀугъэшхокӀэ къытпэгъокӀыгъэх. Ощхышхоу ыкӀив чъыӀэшхоу зэрэщытым пае, машӀо ашӀи, тэ зэкӀэ тырагъэблэгъагъ. 3 ГТаул чы бэу ыугъои, машӀом зытырелъхьэм, фэбагъэм блэ горэ чыхэм къахигъэкӀи, ыӀэ къеуи, къыкӀэрылэлэу къыкӀэрынагъ. 4 Хыгъэхъунэм исхэмэ блэр Паул ыӀэ къыпылэлэу залъэгъум, зэраӀожьыгъ: Мы лӀыр укӀакӀо горэу щытын фае; сыда пӀомэ хым псаоу къыхэкӀыжьыгъэми, Тхьэм ишъыпкъагъэ ар псэунэу фит ышӀыгъэп. 5 Ау Паул ыӀэ ыгъэсыси, блэр машӀом хидзи, блэм иягъэ Паул къекӀынэу хъугъэп. 6 «А лӀыр бэгыщт е ошӀэдэмышӀэу зэхэфэнышъ, лӀэщт», аӀуагъ ахэмэ, ау бэрэ пэплъагъэхэу, Паул зи къыщымышӀыгъэу залъэгъум, ягупшысакӀэ зэблахъуи, «Мыр тхьэ гор», аӀуагъ. 7 А чӀыпӀэм игъунэгъоу хыгъэхъунэм итхьаматэу Публый зьщӀэм чӀыгушхохэр щыриӀагъэх. Ащ тыригъэблагъи, мэфищэ игуапэу тихьакӀагъ. 8 Публый ятэ плъырыстырымрэ ныбэузымрэ зыкӀаубытагъэу пӀэм сымаджэу хэлъыгъ. Паул сымаджэм ыдэжь ихьи, Тхьэм фелъэӀуи, ыӀэхэр тырилъхьэхи, ыгъэхъужьыгъ. 9 Арэущтэу зэхъум, хыгъэхъунэм щыӀэ нэмыкӀ сымаджэхэри Паул ыдэжь къакӀохи, Паул ахэри ыгъэхъужьыгъэх. 10 Гъогогъу пчъагъэкӀэ лъытэныгъэ къытфашӀыгъ, тыкъызежьэжьыми, тищыкӀагъэхэр къытфахьыгъ.
Паул Рим къэлэшхом зэрэнэсыгъэр
11 Мэзищ зытешӀэм, Александрие къалэм щыщэу, «Тхьэ ТӀуазэхэр» зыфаӀорэ къухьэу, а хыгъэхъунэм кӀымафэм щыӀагъэм титӀысхьи, ащ тыкъыщежьагъ. 12 Сиракуз къалэм тыӀухьи, мэфищэ ащ тыщыӀагъ. 13 Ащ тыкъыщежьи, Ригие къалэм тынэсыгъ. Зы мафэм ыуж къыблэм къикӀырэ жьыбгъэр къепщэу ыубли, ятӀонэрэ мафэм Путеол къалэм тынэсыгъ. 14 Ащ тшы заулэ къыщыдгъотхи, ахэмэ адэжь мэфиблэ тыщыӀэнэу къытэлъэӀухи тырагъэблэгъагъ. Ащ нэужым Рим къэлэшхом тыкӀонэу гъогум тытехьажьыгъ. 15 Рим дэс тшыхэм тыкъызэрэкӀощтыр зэхахыгъагъэти, «Аппый ЗэхэхьапӀэ» зыцӀэ къалэмрэ «ХьэкӀэщыпӀищ» зыцӀэ къалэмрэ анэсы къытпэгъокӀынхэу къэкӀуагъэх. Паул ахэр зелъэгъухэм, Тхьэм щытхъу фишӀи, гу къызыӀэпишӀыхьажьыгъ. 16 Рим тыкъызынэсым, Рим тетыгъо зиӀэхэм Паулрэ ежьым иухъумакӀо дзэлӀымрэ язакъоу дэсынхэу фит ашӀыгъэх.
Паул Рим къэлэшхом къэбарышӀур зэрэщигъэӀущтыгъэр
17 Мэфищ нэужым Паул джуртхэм ятхьаматэхэр къаригъэщагъэх. Ахэр къызызэрэугъоихэм, ариӀуагъ: Сшыхэр, тэ тлъэпкъ мыхъун зи есымышӀагъэу, тятэжъхэм яхабзэхэми сатемыкӀыгъэ пэтми, Ерусалим сыщаубыти, Рим цӀыфхэм саӀэкӀалъхьагъ. 18 Ахэр сэ сиӀоф зыхэплъэхэм ыуж, укӀ зифэшъошэ мыхъун зи къысагъотылӀагъэпти, сыкъатӀупщыжьынэу фэягъэх. 19 Ау джуртхэр Рим цӀыфхэм сызэратӀупщыжьыщтым зыпэуцужьхэм, Кайсарым сиӀоф хьыкум тыришӀыхьанэу сылъэӀон фаеу хъугъэ. Ау сэ слъэпкъ седэоныр арэп арэущтэу зыфэсшТагъэр. 20 Ӏофхэр арэущтэу зэрэщытхэр ары шъуслъэгъунэу ыкӀи сыкъыжъудэгущыӀэнэу шъукъызкӀязгъэщагъэр. Шъыпкъэ, Израил цӀыфхэр зыщыгугъыхэу, зыпаплъэхэрэм пае Ӏэхъухэр стелъых. 21 О уикъэбар зэрыт тхылъ горэ Иудей хэкум къикӀэу къытфэкӀуагъэп, къыраӀожыгъ ахэмэ. Ащ дэжьым къикӀыхэу, мыщ дэжьым къэкӀогъэ тшыхэми ощ пае къэбар Ӏае горэ ыкӀи къытфахьыгъэп ыкӀи къытаӀуагъэп. 22 О уигупшысэхэр къапӀохэзэ, тябгъэдэӀумэ тшӀоигъу; сыда пӀомэ цӀыфхэр тыдэкӀи а цӀыф купэу диным рыкӀорэм зэрэщыпэуцухэрэр тэ тэшӀэ. 23 Зы мафэ горэ агъэнафи, Паул зэрыс унэм цӀыф купышхо къэкӀуагъ. Пчэдыжьым щегъэжьагъэу пчыхьашъхьэм нэсы Тхьэм и Тетыгъошхо икъэбар Паул агуригъаӀозэ, а тетыгъошхом шыхьат фэхъугъ. Пегъымбар Мусэ и Тэурат хабзэ итхэмрэ пегъымбархэм атхыгъэ тхылъхэм арытхэмрэ ащыщхэм къяджэзэ, Паул Исус ехьылӀагъэу къыӀохэрэр ашӀошъ ыгъэхъуным пылъыгъ. 24 Паул къыӀуагъэхэр зы куп ышӀошъ хъугъэ, нэмыкӀхэми ашӀошъ хъугъэп. 25 А джуртхэр зэгурымыӀохэу зэбгырыкӀыжьынхэм ыпэкӀэ, Паул мы гущыӀэхэр къыӀуагъэх: Тхьэм Ыпсэ ЛъапӀэ пегъымбар Исайас шъуятэжъхэм яхьылӀагъэу шъыпкъагъэр къыригъэӀуагъ: 26 «Мы лъэпкъым ыдэжь кӀуи, мырэущтэу еӀу: Шъо егъашӀэм зэхэшъухы зэпытыщт, ау къыжъугурыӀощтэп; шъо егъашӀэм шъулъэгъу зэпытыщт, ау гу лъышъутэщтэп. 27 Сыда пӀомэ мы цӀыф лъэпкъым щыщхэм агухэм гулъытэ ямыӀэ хъугъэ. Ахэмэ атхьакӀумэхэмкӀэ жъажъэу зэхахы, анэхэри аупӀыцӀагъэх. Арэущтэу щымытыгъэмэ, анэхэмкӀэ алъэгъущтыгъ, атхьакӀумэхэмкӀи зэхахыщтыгъ, агухэмкӀи къагурыӀощтыгъ, садэжьи къагъэзэжьыгъэмэ, сэ ахэр згъэхъужьыщтыгъэх». 28 Арышъ, цӀыфхэр мыкӀодхэу, Тхьэм къызэригъэнэжьхэрэм икъэбар хымэ лъэпкъхэм Тхьэм къызэранигъэсыгъэр шъо зэжъугъашӀэ. Ахэри а къэбарым едэӀущтых! 29 Паул а гущыӀэхэр къызеӀохэм, джуртхэр лъэшэу зэцӀацӀэхэзэ, унэм икӀыжьыгъэх. 30 Паул чырэкӀэ ыубытыгъэ унэм илъэситӀум щыпсаоу, ыдэжь къакӀорэ цӀыф пстэури ригъэблагъэщтыгъэх. 31 Зы цӀыфи зыкӀи къыпэмыуцоу, Тхьэм и Тетыгъошхо икъэбар ыгъэӀущтыгъ, Зиусхьанэу Исус Христос ехьылӀагъэу гушхоныгъэкӀи цӀыфхэм аригъашӀэщтыгъ.
ШӀуфэс ехыныр
1 Сэ сы Якъубэ, Тхьэмрэ Зиусхьанэу Исус Христосрэ сафэлажьэ. Шъо дунаем итэкъухьагъэхэу щыпсэурэ унэгъо лъэпкъ пшӀыкӀутӀум шӀуфэс шъосэхыжьы.
ШӀошъхъуныгъэмрэ зэхэшӀыкӀыныгъэмрэ
2 Сшыхэр, шъуишӀошъхъуныгъэ ишъыпкъагъэ зыгъэунэфырэ къин зэфэшъхьафхэм шъуахафэмэ, шъугушӀу, 3 сыда пӀомэ мы къинхэм шъуишӀошъхъуныгъэ ишъыпкъагъэ загъэунэфы ужым, а къинхэм теубытэныгъэ къарыкӀэу зэрэщытыр шъошӀэ. 4 Теубытэныгъэми иӀоф рерэгъэкъу, лъэныкъо пстэумкӀи зишъыпкъагъэ щыкӀагъэ зимыӀэ цӀыф икъугъэхэу шъухъуным пае. 5 Ау шъуащыщэу зыгорэм изэхэшӀыкӀыныгъэ щыкӀагъэ иӀэмэ, Тхьэм ерэлъэӀу, ащи зэхэшӀыкӀыныгъэ къыритыщт. Сыда пӀомэ зыми емыгыеу, игуапэу Тхьэм зэкӀэми аретышъ ары. 6 Ау емыхъырэхъышэу, шӀошъхъуныгъэкӀэ ерэлъэӀу, сыда пӀомэ Тхьэм ехъырэхъышэрэр хыорэу жьыбгъэм адыкӀи мыдыкӀи ыфызэ, зэридзэрэм фэд. 7 Тхьэм зыгорэ къыритынкӀэ ащ фэдэ цӀыфыр орэмыгугъэ. 8 Ар темыубытагъэу, акъыл тӀуанэ зиӀэ цӀыф, ышӀэрэ пстэумкӀи теубытэныгъэ иӀэп.
ТхьамыкӀагъомрэ баиныгъэмрэ
9 Къош тхьамыкӀэр Тхьэм ар зэриӀэтыгъэмкӀэ орэгушӀо. 10 Ау баир Тхьэм ар зэригъэцӀыкӀугъэмкӀи орэгушӀо, сыда пӀомэ уцым икъэгъагъэ фэдэу кӀодыжьыщт. 11 Тыгъэр къыкъокӀы, къыдэкӀуае, фэбэ дэдэ мэхъу. Фэбагъэми уцыр егъэгъу. Уцым икъэгъагъэ къыпэтэкъушъ, идэхагъэ мэкӀодыжьы. Джащ фэдэу лӀы баир иӀофхэм апылъызэ кӀодыжьыщт.
Къинхэу цӀыфхэм яшъыпкъагъэ зыгъэунэфыхэрэмрэ Ӏофхэу цӀыфхэм псэкӀод ашӀэнэу дэзыхьыххэрэмрэ
12 ЦӀыфэу зишъыпкъагъэ гъэунэфыгъэу хъу зыхъукӀэ, теубытэныгъэ зиӀэр сыхьатмафэ ежьагъ, сыда пӀомэ ишъыпкъагъэ гъэунэфыгъэу зыхъурэ ужым, мыкӀодыжьын щыӀэныгъэ танджэу ежьыр шӀу зылъэгъухэрэр къызэригъэгугъагъэхэр Тхьэм а цӀыфым къыритыщт. 13 ЦӀыф горэ ишъыпкъагъэ зыгъэунэфырэ къиным хафэмэ, «Тхьэр ары сызыгъэунэфэу сыдэзыхьыхрэр», ерэмыӀу. Бзэджагъэм Тхьэр зыӀэпищэшъущтэп. Тхьэми зыми бзэджагъэ ышӀэнэу дихьыхыщтэп. 14 Хэти ежь ихъопсэныгъэ Ӏаехэр ары зыӀэпызыщэхэу ыкӀи зыдэзыӀыгъхэу дэзыхьыххэрэр. 15 Хъопсэныгъэ Ӏаер лъэрмыхьэ хъумэ, псэкӀодшӀэныр къелъфы; псэкӀодшӀэнри икъугъэу хъу зыхъукӀэ, лӀэныгъэр къелъфы. 16 Сшы лъапӀэхэр, зыми зешъумыгъэгъапцӀ. 17 Сыдрэ тын дэгъури тын шъыпкъэри уашъом ыдэжь къекӀы, уашъом щыӀэ нэфынэхэм Ятэ лъапӀэ ыдэжь къекӀы. ЗызэзыхъокӀырэ жьаухэм афэдэу ащ зызэблихъужьырэп. 18 Ежь фэягъэти шъыпкъагъэм игущыӀэхэмкӀэ ибынэу тигъэхъугъ, ежьым къыгъэхъугъэ пстэуми ащыщхэу апэрэу тыхъуным пае.
Тхьэм игущыӀэхэм уядэӀунымрэ бгъэцэкӀэнхэмрэ
19 Сшы лъапӀэхэр, мыр зэжъугъашӀэ. Хэти дэӀонымкӀэ псынкӀэу орэхьазыр, ау шӀэхэу орэмыгущыӀэ, псынкӀэуи орэмыгубж. 20 Сыда пӀомэ цӀыфым игубжыныгъэ Тхьэм ыдэжькӀэ шъыпкъагъэр ыгъэцакӀэрэп. 21 Арышъ, къышъуханэрэ гу шӀоигъэ пстэури бзэджагъэ пстэури хэшъунэжьых. Тхьэм шъугухэм къарилъхьэгъэ гущыӀэхэу шъупсэхэр мыкӀодхэу къэзыгъэнэжьын зылъэкӀыщтхэр гушъэбагъэкӀэ шъуубытых. 22 Тхьэм игущыӀэхэм шъуядэӀу къодыекӀэ хъущтэп, жъугъэцэкӀэнхэ фае. Армырмэ зышъогъэпцӀэжьы. 23 Сыда пӀомэ а гущыӀэхэм ядэӀоу зымыгъэцакӀэрэр зынапэу гъунджэм къищырэм еплъырэ цӀыфым фэд. 24 Ар зэплъыжьышъ, ӀокӀыжьы, итеплъи зыфэдагъэр щэгъупшэжьы. 25 Ау цӀыфэу ышӀэрэ пстэумкӀэ сыхьатмафэ ежьагъэр мыры: Тхьэм иунашъохэу щыкӀагъэ зимыӀэхэу ыкӀи икъугъэхэу, цӀыфхэм шъхьафитныгъэ яӀэ зыгъэхъухэрэм дэгъоу ахэплъэрэ зэпытэу, Ӏофхэу зэдэӀугъэхэри щымыгъупшэжьэу зыгъэцакӀэрэр ары. 26 Тхьэм ищынагъо ыгу зэрилъыр зыгорэ шӀошӀэу, ау ыбзэгу ымыубытмэ ащ зыкъегъэпцӀэжьы, идини пкӀэ иӀэп. 27 Ау Тхьэу Ты лъапӀэм ыдэжькӀэ Тхьэм ищынагъо къабзэу, щыкӀагъэ зимыӀэр мыр ары: гузэжъогъум хэтхэу ибэхэмрэ шъузабэхэмрэ уакӀэлъыплъэнри, лажьэ уимыӀэу мы дунаем ибзэджагъэ зыщыбдзыенри ары.
ЦӀыфхэм ятеплъэ шъуемыплъэу, цӀыф пстэури шъуизэфэдэн фаех
1 Сшыхэр, ти Зиусхьанэу Исус Христосэу щытхъушхо зиӀэмкӀэ шӀошъхъуныгъэ шъуиӀэзэ, цӀыфхэм ятеплъэ шъуемыплъэу, цӀыф пстэури шъуизэфэдэн фаех. 2 Дышъэ Ӏэлъын ыӀэхъуамбэ пылъэу, щыгъын лъапӀэхэр щыгъхэу зы лӀы бай гори, щыгъыныжъхэр щыгъхэу зы лӀы тхьамыкӀэ гори шъуизэӀукӀэ къыхэхьагъэу тӀон. 3 Щыгъын лъапӀэхэр зыщыгъырэ лӀым шъуеплъэу, «Мо, къебла гъи тӀыс», ешъуӀомэ, ау тхьамыкӀэм, «Модэ щыт», шъуӀоу, е «Мо слъакъохэм адэжь къэтӀыс», ешъуӀомэ, 4 ащыгъум цӀыф зэхэдзыныгъэ шъошӀыба? ХьыкумышӀэхэу гупшысэ Ӏаехэр зиӀэхэм афэдэу шъухъугъэба? 5 Сшы лъапӀэхэр, шъукъэдаӀу. Мы дунаем ицӀыф тхьамыкӀэхэр арыба Тхьэм къыхихыгъэхэр, шӀошъхъуныгъэмкӀэ баиныгъэ шъыпкъэр агъотыжьыным паий, Тхьэм ежьыр шӀу зылъэгъухэрэр къызэригъэгугъэгъэ тетыгъошхомкӀэ ӀэхьышӀу къалъысыным паий? 6 Ау шъо тхьамыкӀэр зэшъупэсыгъэп. Байхэр арыба шъуезыгъэзыхэрэри, хьыкумышӀэхэм апашъхьэ шъуизыщэхэрэри? 7 Ахэр арыба шъо къызэрышъуаджэхэрэ цӀэу Исус Христос ыцӀэ лъапӀэм ӀэягъэкӀэ тегущыӀэхэрэр? 8 Тхьэм игущыӀэ тхыгъэхэм арытэу, типачъыхьэ иунашъоу, «О пшъхьэ шӀу зэрэплъэгъурэм фэдэу, уигъунэгъуи шӀу лъэгъу», ыӀоу зыфиӀорэр шъыпкъагъэкӀэ шъогъэцакӀэмэ, дэгъоу шъошӀэ. 9 Ау цӀыфхэм ятеплъэ шъуеплъэу, цӀыф пстэури шъуизэфэдэхэу щымытхэмэ, псэкӀод шъошӀэ, Тхьэм иунашъохэми шъуатекӀыгъэу мысэ шъохъу. 10 Зыгорэ Тхьэм иунашъохэм зэкӀэм ядэӀоу, ау зы унэшъо закъом текӀымэ, унашъо пстэуми атекӀыгъэу мысэ мэхъу. 11 Сыда пӀомэ «Зинэ умышӀэ», зыӀуагъэм ыкӀи «ЦӀыф умыукӀы» ыӀуагъ. Арышъ, зинэ умышӀэу цӀыф горэ уукӀымэ, Тхьэм иунашъо утекӀыгъэу мэхъу. 12 Арышъ, Тхьэм иунашъохэу цӀыфхэм шъхьафитныгъэ яӀэ зыгъэхъушъухэрэм атетэу Тхьэм хьыкум зытыришӀыхьащт цӀыфхэм зэрафэшъуашэм фэдэу, шъугущыӀ ыкӀи шъузекӀу. 13 Сыда пӀомэ гукӀэгъуныгъэ зыгу имылъым Тхьэм гукӀэгъуныгъэ фимышӀэу хьыкум тыришӀыхьащт. Ау гукӀэгъуныгъэр гъэмысэныгъэм текӀощт.
ШӀошъхъуныгъэмрэ шӀушӀэнымрэ
14 Сшыхэр, зыгорэм шӀугъэ ымышӀэу, «ШӀошъхъуныгъэ сиӀ», ыӀомэ, сыда ащ ишӀуагъэу къэкӀощтыр? Ащ фэдэ шӀошъхъуныгъэм а цӀыфыр мыкӀодэу къыгъэнэ жьын ылъэкӀына? 15 Шъу зы шы горэм е шъу зы шыпхъу горэм щыгъыни, мафэм ышхыщт шхыни имыӀэу тӀон. 16 «Гъогу мафэх, гупсэфыныгъэ шъуиӀэу шъопсэу. Зыжъугъэфаб ыкӀи зыжъугъэшхэкӀ», ыӀоу шъуащыщэу зыгорэм ахэмэ ариӀоу, ау ящыкӀагъэр аримытымэ, сыда ащ ишӀуагъэу къэкӀощтыр? 17 ШӀошъхъуныгъэм иӀоф ащ фэдэу щыт. ШӀу зымышӀэрэм ишӀошъхъуныгъэ лӀагъэм фэд. 18 Ау зыгорэм къыӀонкӀи мэхъу: Зы цӀыфым шӀошъхъуныгъэ иӀ, адрэм шӀушӀагъэхэр иӀэх. Ащ фэдэ цӀыфым сэ есӀон: ШӀушӀагъэхэр зимыгъусэ шӀошъхъуныгъэу зыфапӀорэр сэгъэлъэгъу, шӀоу сшӀэхэрэмкӀэ сишӀошъхъуныгъэ озгъэлъэгъущт. 19 Зы Тхьэ нахь зэрэщымыӀэмкӀэ шӀошъхъуныгъэ уиӀ. Ар дэгъу. ДжынапцӀэхэми ар ашӀошъ мэхъу ыкӀи мэкӀэзэзых. 20 О зэхэшӀыкӀыныгъэ зимыӀэ цӀыф, шӀушӀагъэхэр зимыгъусэ шӀошъхъуныгъэм ишӀуагъэ къызэрэмыкӀощтыр къыбгурызгъэӀонэу уфая? 21 Тятэжъышхо Ибрахьимэ ыкъо Исхьакъ къурмэншӀыпӀэм зытырелъхьэм, ышӀагъэм пае Тхьэм ежьым ыдэжькӀэ ащ шъыпкъагъэ иӀэу ылъытагъэба! 22 Арэущтэу Ибрахьимэ ишӀошъхъуныгъэрэ ишӀушӀагъэхэмрэ зэрэзэгъусагъэхэр олъэгъу. Ибрахьимэ ишӀушӀагъэхэр ары ишӀошъхъуныгъэ изыгъэкъугъэхэр. 23 Мы гущыӀэхэу Тхьэм игущыӀэ тхыгъэхэм арытхэри къэшъыпкъэжьыгъэх: «Ибрахьимэ ТхьэмкӀэ шӀошъхъуныгъэ иӀэ хъугъэ. Арыти, Тхьэм ежьым ыдэжькӀэ ащ шъыпкъагъэ иӀэу ылъытагъ». Тхьэм иныбджэгъукӀи Ибрахьимэ еджэщтыгъэх. 24 Арэущтэу шъолъэгъуба, цӀыфым шӀошъхъуныгъэ зэриӀэм имызакъоу шӀу зэришӀэрэри ары Тхьэм ежьым ыдэжькӀэ ащ шъыпкъагъэ иӀэу зыкӀилъытэрэр? 25 Ащ фэдэу бзылъфыгъэ хэтакӀоу Раав зыцӀэм джурт лӀыкӀохэр ригъэблагъэхи, нэпэмыкӀ гъогукӀэ зыкӀарегъэтхъужьым, ышӀагъэм пае Тхьэм ежьым ыдэжькӀэ ащ шъыпкъагъэ иӀэу ылъытагъэба? 26 Арэущтэу псэ зимыӀэ пкъыр зэрэлӀагъэм фэдэу, шӀушӀагъэхэр зимыгъусэ шӀошъхъуныгъэри лӀагъэм фэд.
Бзэгур уубытыныр
1 Сшыхэр, шъуащыщэу бэ гъэсакӀоу орэмыхъу, сыда пӀомэ Тхьэм тэ гъэсакӀохэм хьыкумэу къыттришӀыхьащтыр нахь хьыкумышхоу зэрэхъущтыр шъошӀэ. 2 Тэ зэкӀэми Ӏаджыри псэкӀод тэшӀэ. ЦӀыф горэм игущыӀэхэмкӀэ псэкӀод ымышӀэмэ, зишъыпкъагъэ щыкӀагъэ зимыӀэ цӀыф икъугъэу щыт, ыпкъ зэкӀэ ыгъэӀорышӀэн елъэкӀы. 3 ӀПыхэм шхоӀур ажэмэ адэтэлъхьэ, дгъэӀорышӀэнхэм пае. АщкӀэ зэкӀэ апкъ зетэщэ. 4 Къухьэхэми шъуяплъ. Ахэр иных, жьыбгъэшхохэми афых. Ау щытми, къухьэр зезыфэрэм къухьэм ыкӀэ пыт хьанцэ цӀыкӀумкӀэ зыдыфаем егъазэ. 5 Ащ фэдэу бзэгури пкъым щыщэу зы пкъыгъо цӀыкӀу, ау бэ егъахъэ. Шъуеплъ, мэшӀо цӀыкӀум мэзышхор зэрэзэкӀигъанэрэм. 6 Бзэгури зыгъэкӀодырэ машӀом фэд. Мы дунаем ибзэджагъэ ащ тиз. Тэ тпкъы щыщхэм ащыщэу бзэгур ары пкъыр зэкӀэ мыкъабзэу зышӀырэр, щыӀэныгъэм ищэрэхъи машӀо хэзыгъанэрэр. Джэхьнэмым имашӀу ары ежь бзэгум машӀо къыкӀэзыдзагъэр. 7 Сыдрэ хьакӀэкъуакӀи, бзыуи, ныбэкӀэ цуахъорэ псэушъхьи, псым хэс псэушъхьи цӀыфхэмэ агъэӀасэх ыкӀи агъэӀэсагъэх, 8 ау бзэгур зыми ыгъэӀэсэн ылъэкӀырэп. Ар къэбгъэуцун умылъэкӀэу бзаджэ гор, лӀэныгъэ къызхэкӀырэ щынаутри хиз. 9 БзэгумкӀэ Тхьэу Ты лъапӀэм щытхъу фэтэшӀы, бзэгумкӀи ежь фэдэнхэу Тхьэм къыгъэхъугъэ цӀыфхэм тяхъоны. 10 А жэ дэдэм щытхъури хъонэныри къыдэкӀых. Арэущтэу щытмэ хъущтэп, сшыхэр. 11 А зы псынэ дэдэм псы ӀэшӀури псы дыджыри къикӀын ылъэкӀына? 12 Сшыхэр, ынджыр чъыгым зейтун къыпыкӀэн ылъэкӀына? Е сэнэшъхьэ къулэм ынджыр къыпыкӀэн ылъэкӀына? Джащ фэдэу псынэ щыугъэм псы ӀэшӀу къикӀын ылъэкӀыщтэп.
ЗэхэшӀыкӀыныгъэу уашъом къикӀырэр
13 Шъо шъуащыщэу хэта зэхэшӀыкӀыныгъи гулъытэныгъи зиӀэр? Ащ изекӀокӀэ дэгъукӀэ гушъэбагъэу зэхэшӀыкӀыныгъэм къикӀырэр иӀэу, ишӀушӀагъэхэр къерэгъэлъагъох. 14 Ау шъугъоныгъэ дыджымрэ зэщыхьаныгъэмрэ шъугухэм арылъхэмэ, шъузыщымытхъужь, шъыпкъагъэри шъумыгъэпцӀы. 15 Ащ фэдэ зэхэшӀыкӀыныгъэр уашъом къикӀырэп, ар мы дунаем щыщ нахь. Тхьэм Ыпсэ ЛъапӀи хэлъэп, джынапцӀэхэр хэлъхэ нахь. 16 Сыда пӀомэ шъугъоныгъэрэ зэщыхьаныгъэрэ зыдэщыӀэм, Ӏофхэр зэӀыхьагъэхэу щэхъух, сыдрэ дэигъэри щыӀэ мэхъу. 17 Ау уашъом къикӀырэ зэхэшӀыкӀыныгъэр ыпэ рапшӀэу къабзэ, етӀанэ зэшӀужьыныгъэ хэлъ, гушъабэ, ӀорышӀэ, гукӀэгъу хэлъ зэпыт, шӀу ешӀэ зэпыт, зафэ, тхьагъэпцӀы • гъэри хэлъэп. 18 ЗэшӀужьыныгъэ зышӀэхэрэр ары шъыпкъагъэр къызхэкӀырэ чылапхъэр гупсэфыныгъэкӀэ цӀыфхэм агухэм арызылъхьэхэрэр.
Мы дунаем ныбджэгъу уфэхъуныр
1 Зэпыиныгъэрэ зэщыхьаныгъэрэ тыдэ къикӀыхэу къышъухахьэхэра? Хъопсэныгъэ Ӏаехэу шъугухэм ащызаохэрэр арыба къызхэкӀыхэрэр? 2 Зыгорэм шъуфай, ау къыжъудэхъурэп. ШъоукӀы ыкӀи шъохъуапсэ, ау шъузыфаер шъуӀэкӀахьэрэп. Шъузэщэхьэх ыкӀи шъузэпый. Тхьэм къышъуитынэу шъуелъэӀурэпышъ, зи шъуиӀэп. 3 Тхьэм шъуелъэӀуми, зи къышъуитырэп, сыда пӀомэ Ӏэягъэ шъугу хэм арылъэу, шъугухэр зыкӀэхъопсырэ Ӏофхэм атежъугъэкӀодыныр ары Тхьэм шъузфелъэӀурэр. 4 Шъо зинэ зышӀэхэрэм шъуафэд. Мы дунаем ныбджэгъу шъуфэхъуным Тхьэм пый шъуфэхъуныр ары къикӀырэр, шъошӀэба ар? Арэущтэу хэти дунаем ныбджэгъу фэхъунэу фаер Тхьэм пый фэхъу. 5 Хьауми Тхьэм игущыӀэ тхыгъэхэм мырэущтэу зэрарытыр хьаулыеу шъогугъа: «Тыгухэм арылъ псэр лъэшэу мэшъугъо?» 6 Ау тыгухэм арылъым нахьи, Тхьэм ынэшӀу щыфэныгъэ нахь ин. Арышъ, Тхьэм игущыӀэ тхыгъэхэм мырэущтэу арыт: «Тхьэр пэгагъэ зыгу илъ цӀыфым пэуцужьы, ау пэгагъэ зыгу имылъым ынэшӀу къыщефэ». 7 Арышъ, Тхьэм шъуфэӀорышӀ. Шэйтаным шъупэуцуи, шъуапашъхьэ икӀынышъ, кӀитхъужьыщт. 8 Тхьэм пэгъунэгъу шъухъуи, ежьыри къышъупэгъунэгъу хъущт. ШъуӀэхэр жъугъэкъабзэх, шъо псэкӀод зышӀэхэрэм, шъугухэр жъугъэкъабзэх, шъо теубытэныгъэ зимыӀэхэу, акъыл тӀуанэхэр зиӀэхэм. 9 Шъунэшхъэй, шъугъ, ыкӀи шъупыхь. Шъуидэхьашхын гъынкӀэ, шъуигушӀуагъуи нэшхъэигъэкӀэ зэблэхъугъэу орэхъу. 10 Тхьэм ыпашъхьэ зыщыжъугъэцӀыкӀуи, ежьыми шъукъиӀэтыщт.
Тшы горэм хьыкум тепшӀыхьаныр
11 Сшыхэр, ӀэягъэкӀэ шъузэтемыгущыӀэжь. ЦӀыфэу зыш ӀэягъэкӀэ тегущыӀэу зыгъэмысэрэр Тхьэм иунашъохэм ӀэягъэкӀэ атегущыӀэ, ахэри егъэмысэх. Ау Тхьэм иунашъохэр бгъэмысэхэмэ, ахэр умыгъэцэкӀагъэхэу мэхъу, хьыкум атепшӀыхьагъэуи мэхъу. 12 ЦӀыфхэм унашъохэр афэзышӀэу, хьыкум атезышӀыхьэрэр зы закъоу мэхъу, цӀыфхэр мыкӀодхэу къэзыгъэнэжьынэу ыкӀи зыгъэкӀодынэу лъэкӀыныгъэ ЗиӀэр ары. Ау о хэт ущыщ, уигъунэгъу бгъэмысэжьынэу?
Узщымытхъужь
13 Джы шъукъэдаӀу, шъо, мырэущтэу зыӀохэрэр: «Непэ е неущ мо къалэм е адрэ къалэм тыкӀонышъ, зы илъэс тыкъэтыщт, щэфщэжьынымкӀэ ахъщэ къэдгъэхъэщт». 14 Ау неущ хъущтыр шъушӀэрэп. ШъуищыӀэныгъэ сыд фэда? Зы тӀэкӀурэ къэлъагъоу, етӀанэ кӀодыжьырэ пахъэм шъуфэд. 15 Ау арэущтэу шъумыӀоу мырэущтэу шъуӀон фае: «Зиусхьаныр фаемэ, тыпсэущт, мыхэр е мохэр тшӀэщтых». 16 Ау джы зышъошӀошӀыжьы ыкӀи шъузыщэтхъужьы. Ащ фэдэ зыщытхъужьыныр зэкӀэ дэи. 17 Арышъ, шӀугъэу ыгъэцэкӀэн фаер гурыӀо пэтми, зымыгъэцакӀэрэм псэкӀод ешӀэ.
Шъо, байхэр, шъузфэсакъыжь
1 Шъо, цӀыф байхэр, шъукъэдаӀу. Насыпынчъагъэу къышъулъыӀэсыщтым пае шъугъ ыкӀи шъупыхь. 2 Шъуимылъку шъугъэ, хъунэхэми шъуищыгъынхэр ашхыгъэх. 3 Шъуидышъи шъуитыжьыни улъыигъэх. Ахэмэ яулъыигъэ шыхьатэу къышъупэуцущт, шъупкъыри ыгъэкӀодыщт, машӀом зэригъэкӀодырэм фэдэу. Мы дунаем иаужырэ мафэхэм мылъку шъуугъоигъэ. 4 ӀофшӀакӀохэу шъуихьасэхэр зыхыжьыгъэхэу, лэжьапкӀэ зэшъумытхэу къэжъугъэнагъэхэр шъуагъэмысэзэ къэкуох. ХынакӀохэм якуо макъэ Зиусхьан Сэваоф ытхьакӀумэхэм анэсыгъ. 5 Мы дунаем ахъщабэ зытежъугъэкӀуадэу, зыжъугъэтхъэжьэу шъущыпсэугъ. ШӀуабзынэу агъэшхэгъэ былымым фэдэу, шъузышӀуабзыщт мафэм пае псэкӀодшӀэнымкӀэ зыжъугъэшхэкӀыгъ. 6 Шъыпкъагъэ зиӀэ цӀыфыр жъугъэмыси, шъуукӀыгъэ. Ар шъо къышъупэуцужьыгъэп.
ЩыӀагъэ зибгъэӀэнымрэ тхьэлъэӀунымрэ
7 Арышъ, сшыхэр, Зиусхьаныр къэкӀожьыфэ, щыӀагъэ зижъугъаӀ. МэкъумэщышӀэм чӀыгум хипхъэгъэ чылэпхъэ лъапӀэр къэкӀэу лэжьыгъэ охъуфэ, зэрэпаплъэрэм шъуеплъ. ЬӀпэрэ ощхыри ыужырэ ощхыри къещхыфэ, щыӀагъэ иӀэу пэплъэ. 8 Джащ фэдэу шъори щыӀагъэри гупытэныгъэри зижъугъаӀ, сыда пӀомэ Зиусхьаныр дунаем къызыкӀожьыщт мафэр къэблэгъагъ. 9 Сшыхэр, шъузэфэмытхьаусых, Тхьэм шъуимыгъэмысэным пае. ЦӀыфхэм хьыкум АтезышӀыхьэрэр пчъэӀупэм Ӏут. 10 Сшыхэр, Зиусхьаным ыцӀэкӀэ къэгущыӀэгъэ пегъымбархэм щысэ атешъух. Къин ащэчы зэхъум, щыӀагъэ зырагъэӀагъ. 11 Теубытэныгъэ зиӀэхэр сыхьатмафэ ежьагъэхэу тэӀо. Пегъымбар Аюбэ итеубытэныгъэ икъэбар зэхэшъухыгъэ. Аужьыпкъэм Зиусхьаным ащ шӀу къызэрэригъэгъотыжьыгъэри шъошӀэ, сыда пӀомэ Зиусхьаным гукӀэгъуныгъэшхо иӀ ыкӀи ыгу къытэгъу. 12 Сшыхэр, зэкӀэмэ апэу, тхьарыӀо шъумышӀы. УашъомкӀи, чӀылъэмкӀи, сыд щыщкӀи тхьарыӀо шъумышӀы. «Ары», шъуӀоу щытмэ, жъугъэшъыпкъэжь, «Хьау, арэп», шъуӀоу щытмэ, ари жъугъэшъыпкъэжь, Тхьэм шъуимыгъэмысэным пае. 13 Шъуащыщэу зыгорэм къин ыщэчымэ, Тхьэм ерэлъэӀу. Зыгорэ гушӀомэ, тхьэщытхъу орэдхэр къерэӀох. 14 Шъуащыщэу зыгорэ сымаджэмэ, чылыс зэӀукӀэм инахьыжъхэм къярэдж. Ахэмэ Зиусхьаным ыцӀэкӀэ дагъэ щыфарэшӀи ферэлъэӀух, 15 шӀошъхъуныгъи яӀэу Тхьэм елъэӀухэмэ, сымаджэр хъужьыщт. Зиусхьаным ар къыгъэтэджыжьыщт. ПсэкӀод ышӀагъэми, фэгъущт. 16 Арышъ, Тхьэм шъуигъэхъужьыным пае, шъуипсэкӀодхэр зым адрэм ыпашъхьэ рерэлъхьэхи, Тхьэм шъузэфелъэӀужь. Шъыпкъагъэ зиӀэ цӀыфым итхьэлъэӀу лъэкӀыныгъэ иӀ ыкӀи бэ егъахъэ. 17 Пегъымбар Иляс тэщ фэдэу цӀыфэу щытыгъ. Ощх къемыщхыным пае, Тхьэм ишъыпкъэу елъэӀуи, илъэсищырэ мэзихырэ чӀыгум ощх къытещхагъэп. 18 ЕтӀани Тхьэм елъэӀужьи, Тхьэм ощх къыригъэщхи, чӀыгум хэлъхэр къэкӀыжьынхэу ежьагъэх. 19 Сшыхэр, шъуащыщэу зыгорэ шъыпкъагъэм игъогу текӀы хъумэ, ар гъогу занкӀэм тезыгъэхьажьырэм мыр ерэшӀ: 20 ПсэкӀодышӀэ цӀыфэу игъогу пхэнджым тетыр хэтми гъогу занкӀэм тезыгъэхьажьырэм адрэр лӀэныгъэм къыхищыжьынышъ, псэкӀодыбэхэри къыфэгъущтых.
ШӀуфэс ехыныр
1 Сэ сы Петрэ, Исус Христос иапостолэу сыщыт. Шъо Тхьэм ицӀыф лъапӀэхэу зэбгырыкӀыгъэхэу хэкухэу Понт, Галатие, Каппадокие, Асие, Вифиние ащыпсэухэрэм мы тхылъыр къышъуфэсэтхы. 2 Тхьэу Ты лъапӀэм ыпэкӀэ зэриухыгъэм тетэу, ибынхэм ащыщ шъухъунэу шъукъыхихыгъ, ежь Ыпсэ ЛъапӀи шъугухэр егъэкъэбзэ зэпытых, Исус Христос нахьыбэрэ шъуедэӀуным паий, ащ ылъэу къащым щыкӀэкӀыгъэмкӀэ къабзэ шъухъуным паий. Тхьэм ынэшӀу инэу къышъущерэфэ зэпыт, гупсэфыныгъэшхуи къышъуерэт зэпыт.
МыкӀодыжьын гугъапӀэ
3 Тхьэу ти Зиусхьанэу Исус Христос Ятэ щытхъушхор ий! Исус лӀагъэхэм къызэрахигъэтэджыкӀыжьыгъэмкӀэ Тхьэм игукӀэгъуныгъэшхокӀэ икӀэрыкӀэу тыкъалъфыжьыгъэу тигъэхъугъ. Арэущтэу мыкӀодыжьын гугъапӀэ тиӀэ хъугъэ, 4 ӀэхьышӀоу Тхьэм ицӀыфхэм афигъэхьазырыгъэри къытлъысыщт. А мыкӀодыжьын ӀэхьышӀоу щыкӀагъэ зимыӀэу, зэрэщытэу къанэрэр Тхьэм уашъом къыщышъу феухъумэ. 5 ШӀошъхъуныгъэ зэрэшъуиӀэм пае, Тхьэм илъэкӀыныгъэкӀэ шъукъеухъумэ, шъумыкӀодэу шъукъызэригъэнэжьыгъэр дунаем иаужырэ мафэхэм нафэу къэхъуным пае. 6 Арышъ, зы тӀэкӀурэ къин зэфэшъхьаф зэрэшъущэчрэм пае, джы шъугу къеон фаеми шъугушӀу. 7 А къинхэр зыфэшъущэчхэрэр шъуишӀошъхъуныгъэ загъэунэфы ужым, ишъыпкъагъэ нафэу хъуныр ары. Дышъэм ишъыпкъагъэ машӀомкӀэ агъэунэфы пэтми, а дышъэр кӀодыжьыщт. ШъуишӀошъхъуныгъэ а дышъэм нахьи нахь лъапӀ. Арэущтэу Исус Христос къызыкӀожьыщт мафэм дэжь шъуишӀошъхъуныгъэ ишъыпкъагъэ пае, Тхьэм шъхьэкӀэфыныгъи, щытхъуи, лъытэныгъи къышъуфишӀыщт. 8 Исус Христос шъумылъэгъугъэ пэтми, шӀу шъолъэгъу. Джы шъумылъэгъуми, ежьымкӀэ шӀошъхъуныгъэ шъуиӀ, къэпӀон умылъэкӀынэу, щытхъушхо зыхэлъ гушӀогъошхуи шъугухэм арылъ. 9 Сыда пӀомэ аужыпкъэм шъуишӀошъхъуныгъэкӀэ шъумыкӀодэу Тхьэм шъукъызэригъэнэжьыщтым шъунэсы. 10 Тхьэм ынэшӀу къызэрэшъущифэщтым икъэбар зыгъэӀугъэ пегъымбархэм цӀыфхэр мыкӀодхэу Тхьэм къызэригъэнэжьыщтхэм ехьылӀэгъэ къэбар пстэуми ахаплъэщтыгъэх, ахэри агъэунэфыщтыгъэх. 11 Христос къинхэр ыщэчынхэшъ, ащ нэужым щытхъушхо иӀэ зэрэхъущтыр пегъымбархэм агухэм арылъ Христос Ыпсэ ЛъапӀэ къызеӀом, уахътэу зытегущыӀэрэри, Христос къызэрэкӀожьыщт шӀыкӀэри пегъымбархэм зэрагъэшӀэнэу ыуж итыгъэх. 12 Пегъымбархэр Ӏофхэу къызтегущыӀэхэу щытыгъэхэр ежьхэм яуахътэ къэмыхъухэзэ, шъо шъуиуахътэ къызэрэхъущтхэр Тхьэм къагуригъэӀогъагъ. Тхьэм ежь Ыпсэ ЛъапӀэу уашъом къафыригъэхыгъэм илъэкӀыныгъэкӀэ къэбарышӀур шъозыгъэӀугъэхэм мы Ӏофхэм якъэбар джы къышъуаӀотагъ. МэлэӀичхэри мы Ӏофхэм ахэплъыхьанхэу фаех.
ГукъэбзагъэкӀэ шъузекӀу
13 Арышъ, шъуицыякӀэхэр дэупкӀагъэхэу, шъугухэмкӀэ хьазырэу шъущыт. ЗыщыӀэныгъэ зижъугъаӀ. Исус Христос къызыкӀожьыщт мафэм дэжь Тхьэм ынэшӀу къызэрэшъущифэщтым шъуишъыпкъэу шъущыгугъэу шъупаплъ. 14 Шъыпкъагъэр зыфэдэр шъумышӀэу, шъуихъопсэныгъэ Ӏаехэм шъукъыращэкӀэу зэрэщытыгъэм фэдэу, джы сабый ӀорышӀэхэм афэдэу зыкъыряшъумыгъэщэкӀ. 15 Ау Тхьэу зибынхэм ащыщ шъухъунэу къышъоджагъэр лъапӀэу зэрэщытым фэдэу, шъори шъугу лъапӀэу ыкӀи шъугу къабзэу шъушӀэрэ пстэури шъушӀэ. 16 Сыда пӀомэ Тхьэм къызэриӀорэр игущыӀэ тхыгъэхэм арыт: «Сэ лъапӀэу сызэрэщытым пае, шъори лъапӀэу шъущытын фае». 17 Тхьэу цӀыфхэм ятеплъэ емыплъэу, цӀыф пстэури зизэфэдэхэу щытэу, хэти ышӀагъэм тетэу шъыпкъагъэкӀэ хьыкум тезышӀыхьэрэм шъузелъэӀукӀэ, «О, Ты лъапӀ», ешъоӀо. Арышъ, шъухымэу мы дунаем щыжъугъакӀорэ уахътэр Тхьэм ищынагъо шъугухэм арылъэу щыжъугъакӀу. 18 Сыда пӀомэ зэрэшъушӀэрэм фэдэу, шъуятэжъхэм къакӀэныжьыгъэ псэукӀэу пкӀэ зимыӀэм шъухищыжьынэу Христос шъушъхьэ ыщэфыжьыгъ. Шъушъхьэ зэрищэфыжьыгъэр кӀодыжьын тыжьыныр е дышъэр арэп, 19 ежьым ылъэу уасэ зыфэпшӀынэу щымытыр ары нахь. Ежьыр щыкӀагъэ зимыӀэу, бжьыгъэ зытемылъ шъынэм фэд. 20 Дунаер къыгъэхъуным ыпэкӀэ, Тхьэм Христос къыхихыгъ, ау джы дунаем икӀэух дэжь шӀугъэ къыжъудигъэхъунэу Христос къэлъэгъуагъ. 21 Христос ТхьэмкӀэ шӀошъхъуныгъэ шъуиӀэ ыгъэхъугъ. Тхьэр ары Христос лӀагъэхэм къахэзыгъэтэджыкӀыжьыгъэр, щытхъушхори къезытыгъэр. Ащ пае ТхьэмкӀэ шӀошъхъуныгъэ шъуиӀэ хъугъэ, Тхьэми шъущэгугъы. 22 Шъыпкъагъэм шъузэредэӀугъэм пае, шъугухэр къабзэу хъугъэх. Арэущтэу шъушыхэр пцӀы хэмылъэу шӀу шъолъэгъух. Арышъ, гукъэбзагъэкӀэ шӀу шъузэрэлъэгъу зэпыт, 23 сыда пӀомэ икӀэрыкӀэу шъукъалъфыжьыгъэу шъущыт. ИкӀэрыкӀэу шъукъызэралъфыжьыгъэр кӀодыжьын чылапхъэп, мыкӀодыжьын чылапхъэ нахь. А чылапхъэу щыӀэныгъэ къызхэкӀэу, Тхьэм игущыӀэу егъашӀэм зэрэщытэу къэнэжьыщтыр ары. 24 Сыда пӀомэ Тхьэм игущыӀэ тхыгъэхэм зэрарытым фэдэу, «ЦӀыф пстэури уцым фэдэх, зэкӀэ ящытхъуи уцым икъэгъагъэ фэд. Уцыр мэгъужьы, къэгъагъэри мэкӀодыжьы. 25 Ау Тхьэм игущыӀэхэр мыкӀодыжьхэу егъашӀэм къэнэх». А гущыӀэхэр ары Тхьэм фэлажьэрэ цӀыфхэм къышъуагъэӀугъэхэр.
Лъэпкъ лъапӀэр
1 Арышъ, бзэджэгъэ пстэури, тхьагъэпцӀыгъэ пстэури, нэпитӀугъэри, шъугъоныгъэри, цӀыфхэм ӀэягъэкӀэ шъуатегущыӀэнри хэшъунэжьых. 2 Сабыеу къалъфыгъакӀэхэр янэ ибыдзыщэ зэрэкӀэхъопсыхэрэм фэдэу, шъори Тхьэм игущыӀэхэу щэ къабзэм фэдэхэм шъуакӀэхъопс ахэмкӀэ ины шъухъоу, шъумыкӀодэу Тхьэм шъукъигъэнэжьыным пае. 3 Сыда пӀомэ Зиусхьаныр зэрэшӀур зэжъугъэшӀагъэ. 4 Зиусхьаным пэгъунэгъу шъухъу. Ары щыӀэныгъэ зиӀэ мыжъоу цӀыфхэм зэрамыпэсэу чӀадзыжьыгъэр, ау Тхьэм ар къыхихыгъ, ежьымкӀэ ащ осэшхо иӀ. 5 Шъори щыӀэныгъэ зиӀэ мыжъохэм шъуафэдэу, Тхьэм Ыпсэ ЛъапӀэ зыдэщыӀэ унэпгхом щыщ шъухъу. Джарэущтэу дин пэщэ лъапӀэхэу шъухъущт, къурмэныпхъэхэу Исус Христос Ӏофэу ышӀагъэм пае, Тхьэм ыгу зэӀухэрэри гурэ псэрэкӀэ Тхьэм ешъухьылӀэшъущтых. 6 Сыда пӀомэ Тхьэм къызэриӀуагъэр игущыӀэ тхыгъэхэм арыт: «ШъукъэдаӀу, сэ къыхэсхыгъэу, мыжъо лъапсэу осэшхо зиӀэр Сион къалэм щысэгъэтӀы лъы. А мыжъомкӀэ шӀошъхъуныгъэ зиӀэр кӀэгъожьы щтэп». 7 Шъо шӀошъхъуныгъэ зиӀэхэмкӀэ а мыжъом осэшхо иӀ. Ау шӀошъхъуныгъэ зимыӀэхэмкӀэ «Унэ зышӀыхэрэм зэрамыпэсэу чӀадзыжьыгъэ мыжъор унэм мыжъо лъэпсэ дэдэу фэхъугъ», 8 ащ нэмыкӀэуи, «ЦӀыфхэр зыгъэлъэпаорэ мыжъоуи, цӀыфхэр чӀыгум тезыгъафэрэ мыжъошхоуи» хъугъэ. Тхьэм игущыӀэхэм зэрямыдэӀухэрэм пае, мэлъэпаох, Тхьэм ахэмэ зэрафигъэнэфагъэм фэдэу. 9 Ау шъо Тхьэм къыхихыгъэ унэгъо лъэпкъэу, Тхьэу пачъыхьэм фэлажьэрэ дин пащэхэу, лъэпкъ лъапӀэу, Тхьэм ицӀыфхэу шъущыт. Арэущтэу зыфэхъугъэр шӀункӀыгъэм шъукъыхэкӀыжьынышъ, нэфынэ гъэшӀэгъонышхом шъухэхьанэу къышъоджэгъэ Тхьэм иӀоф гъэшӀэгъонхэр жъугъэӀунхэр ары. 10 Пасэм Тхьэм ылъэпкъэу шъущытыгъэп, джы Тхьэм шъурилъэпкъ. Пасэм Тхьэм гукӀэгъу къышъуфимышӀэу щытыгъ, джы гукӀэгъу къышъуфешӀы.
Тхьэм фэлажьэрэ цӀыфхэм яфэшъуашэу шъузекӀу
11 СилъапӀэхэр, шъо хымэхэу ыкӀи мы дунаем хымэхэсхэу щыпсэухэрэм, хъопсэныгъэ Ӏаехэу шъупсэ къыпэуцухэрэм защышъудзыенэу сышъолъэӀу. 12 Тхьэр зымышӀэхэрэм апашъхьэ дахэу шъущызекӀу. Сыда пӀомэ «Мы цӀыфхэр бзэджашӀэх», аӀозэ, ӀэягъэкӀэ къышъутегущыӀэхэми, шъуишӀушӀагъэхэр алъэгъунхэшъ, Тхьэр ахэмэ зяплъыщт мафэм дэжь ахэми Тхьэм щытхъу фашӀыщт. 13 Зиусхьаным игъогу шъузэрэрыкӀорэм пае, тетыгъо зиӀэ цӀыф пстэуми шъуафэӀорышӀ: зэкӀэмкӀи тетыгъо зиӀэ пачъыхьэр арыми, ащ шъуфэӀорышӀ, 14 бзэджашӀэхэмэ къин атезылъхьанэуи, шӀу зышӀэхэрэм ащытхъунхэуи пачъыхьэм къыгъэкӀогъэ Ӏэшъхьэтетхэр арыми, ахэмэ шъуафэӀорышӀ. 15 Сыда пӀомэ шӀу зэрэтшӀэрэмкӀэ гулъытэ зимыӀэ цӀыфхэу зи зымышӀэхэрэм ажэ ядгъэубытыныр ары Тхьэр зыфаер. 16 ШъхьафитныгъэкӀэ шъузекӀу, ау бзэджэшӀэнымкӀэ шъхьафитныгъэр ушъхьагъу шъумышӀы, ау Тхьэм фэлажьэрэ цӀыфхэм яфэшъуашэу шъузекӀу. 17 ЦӀыф пстэуми лъытэныгъэ афэшъушӀ, шъушыхэри шӀу шъулъэгъух, Тхьэми шъущыщын, пачъыхьэми лъытэныгъэ фэшъушӀ.
Христос къин зэрищэчыгъэм фэдэу, шъори къин шъущэчызэ, илъэужхэм шъуарыкӀу
18 Шъо, унэӀутхэр, лъытэныгъэ пстэумкӀи шъуитхьаматэхэм шъуафэӀорышӀ, тхьэмэтэ шъабэу ыкӀи шэнышӀом изакъоп, тхьэмэтэ пхъашэри ары. 19 Сыда пӀомэ лажьэ имыӀэми, къин зырагъэщэчкӀэ, Тхьэм егупшысэу ыгукӀэ щыӀагъэ зиӀэр ары Тхьэм ыгу зэӀурэр. 20 Ау мыхъун шъушӀагъэу къызышъуаохэкӀэ, шъугухэмкӀэ щыӀагъэ зижъугъаӀэмэ, шъоркӀэ сыд фэдэ щытхъуа ащ хэлъыр? Ау шӀу шъушӀэ пэтми, къин зышъуагъэщэчкӀэ шъугухэмкӀэ щыӀагъэ зижъугъэӀэныр ары Тхьэм ыгу зэӀурэр. 21 Арэущтэу шъузекӀонэу Тхьэр къышъоджагъ, сыда пӀомэ Христоси шъощ пае къин ыщэчыгъ, илъэужхэм шъуарыкӀонэу шъушӀапхъэхэри шъуигъэлъэгъугъэх. 22 «Ежьым псэкӀод зи ышӀагъэп, узыгъэпцӀэн гущыӀи ыжэ зи къыдэкӀыгъэп». 23 Къехъоныщтыгъэхэми, яхъоныжьыщтыгъэп. Къин езыгъэщэчыщтыгъэ цӀыфхэми, «Сэ къин шъозгъэщэчыжьыщт», ариӀуагъэп, ау а Ӏофыр Тхьэу цӀыфхэм хьыкум зэфагъэкӀэ атезышӀыхьэрэм фигъэзагъ. 24 Къащым зыраӀулӀым, типсэкӀодхэр къыттырихызэ, ахэмэ яфэшъошэ къиныр ежь ыпкъ тырилъхьагъ, псэкӀодым илъэкӀыныгъэ тэ тыкъыӀэкӀищыжьыгъэу, шъыпкъагъэм тыфэпсэуным пае. Ежь иуӀагъэхэмкӀэ шъуигъэхъужьыгъ. 25 Сыда пӀомэ шъо гъощэгъэ мэлхэм шъуафэдэу шъущытыгъ, ау шъупсэхэм яухъумакӀоу ыкӀи шъуимэлахъо ыдэжь джы шъукъэкӀожьыгъ.
ЛӀыхэмрэ шъузхэмрэ зэрэзэфыщытынхэ фаер
1 Шъо, шъузхэм, шъосэӀо, шъуилӀыхэм шъуафэӀорышӀ. Ар шъушӀэмэ, ахэмэ ащыщхэр Тхьэм игущыӀэхэм ямыдэӀухэми, шъо, шъузхэм, зи шъумыӀоу, шъуизекӀуакӀэкӀэ шӀошъхъуныгъэ яӀэ хъущт, 2 гукъэбзагъэрэ Тхьэм ищынагъорэкӀэ шъузэрэзекӀорэр залъэгъукӀэ. 3 Дахэ шъузышӀырэр шъуитеплъэ арэу щэрэмыт, шъхьац блэнри, дышъэкӀэ зыжъугъэдэхэнри, щыгъын дахэхэри арэу орэмыхъу, 4 ау цӀыфхэм амылъэгъоу шъугухэм арылъэу, гушъэбагъэмрэ гупсэфыныгъэмрэ къарыкӀырэ дэхагъэу мыкӀодыжьыщтыр дахэ шъузышӀырэр арэу орэхъу. ТхьэмкӀэ ащ осэшхо иӀ. 5 Сыда пӀомэ джары пасэм бзылъфыгъэ лъапӀэхэу Тхьэм щыгугъыхэу щытыгъэхэм зызэрагъэдахэщтыгъэ шӀыкӀэр, ялӀыхэми афэӀорышӀэщтыгъэх. 6 Арэущтэу Сарэ тхьаматэкӀэ еджэу, Ибрахьимэ едэӀущтыгъ. ШӀу шъушӀэу зыми шъущымыщынэмэ, шъори Сарэ шъурибын. 7 Шъо, лӀыхэм, шъосэӀо, гурыӀоныгъэкӀэ шъуишъузхэм шъуадэзекӀу. Сыда пӀомэ ахэмэ акӀуачӀэ шъо шъукӀуачӀэ нахьи нахь макӀэшъ ары. Лъытэныгъи афэшъушӀ, сыда пӀомэ шъо шъуигъусэу Тхьэм ынэшӀу щыфэныгъэкӀэ ахэми ӀэхьэшӀоу щыӀэныгъэ къаретышъ ары. Арэущтэу шъушӀэмэ, шъуитхьэлъэӀухэм зи къапэуцужьыщтэп.
ШӀу зэрашӀэрэм пае, ХристоскӀэ шӀошъхъуныгъэ зиӀэхэм къин ащэчы
8 Аужыпкъэм шъо пстэури зыгу зыпсэу шъущыт. Зыр зым фэгумэкӀэу, шъузэкъошэу шъузэрэхъугъэм пае, шӀу шъузэрэлъэгъоу, гукӀэгъу шъуиӀэу, пэгагъэ шъугухэм арымылъэу шъузекӀу. 9 Бзэджагъэм бзэджагъэкӀэ шъупэмыгъокӀыжь, хъуанэрэми хъонкӀэ шъупэмыгъокӀыжь. Ащ ычӀыпӀэкӀэ, «Тхьэм ынэшӀу къышъущерэф», яшъуӀу; сыда пӀомэ ибынхэм ащыщ шъухъунэу Тхьэр къызфышъо джагъэр ынэшӀу къызэрэшъущифэрэр ӀэхьышӀоу къышъулъысыныр ары. 10 Сыда пӀомэ «ЩыӀэныгъэр шӀу зылъэгъоу, мэфэшӀухэр зылъэгъун фэе цӀыфым, бзаджэ Ӏоным ыбзэгу щерэухъум, ыӀупэхэри тхьагъэпцӀыгъэм щерэухъумэх. 11 Бзэджагъэм зыщерэдзыий, шӀу ерэшӀ. Зэзэгъыныгъэм игъогу лъыхъоу ыуж ерэт. 12 Сыда пӀомэ Зиусхьаным ынаӀэ шъыпкъагъэ зиӀэ цӀыфхэм атырегъэты. ЫтхьакӀумэхэри ахэмэ ятхьэлъэӀухэм ядэӀух. Ау бзэджашӀэхэм Зиусхьаным ыкӀыб афегъазэ, (дунаем тыригъэкӀодыкӀынхэм пае)». 13 Шъуишъыпкъэу шӀушӀэным ыуж шъуитмэ, хэт зиягъэ къышъозыгъэкӀын зылъэкӀыщтыр? 14 Ау шъыпкъагъэм пае къин шъущэчми, сыхьатмафэ шъуежьагъ. Арышъ, цӀыфхэм зяшъумыгъэгъащт ыкӀи зыми зешъумыгъэгъэгумэкӀ. 15 Зиусхьанэу Тхьэр шъутухэмкӀэ жъугъэлъапӀэ. ГугъапӀэу шъуиӀэмкӀэ хэт къышъоупчӀыми, гушъэбагъэкӀи Тхьэм ищынагъокӀи пэгъокӀ ешъутыжьынэу сыдигъуи хьазырэу шъущыт. 16 Мыхъун зи зыдэшъумышӀэжьэу шъугухэр къабзэу щыжъугъэтых, Христос зыгу илъхэм яфэшъуашэу шъуизекӀокӀэ дэгъу ехъоныхэрэр аӀуагъэхэмкӀэ укӀытэжьынхэм пае. 17 Тхьэр арэущтэу фаемэ, шӀу зэрэшъушӀэрэм пае, къин шъущэчыныр нахьышӀу, бзэджэшӀэным пае къин шъущэчыным нахьи. 18 Сыда пӀомэ Христос Тхьэм пэгъунэгъу тигъэхъуным пае, типсэкӀодхэм апае зэ къин ыщэчыгъ, джыри зэ ахэмэ къин афимыщэчыжьынэу. Ежьым шъыпкъагъэ иӀэу, шъыпкъагъэ зимыӀэхэмэ апае къин ыщэчыгъ. ЦӀыфхэм загъалӀэм, лӀэн фаеу щыт цӀыфэу щытыгъ. Тхьэм ар лӀагъэхэм къызахегъэтэджыкӀыжьым, мылӀэны псэу щытыгъ. 19 Ыпсэ илъэкӀыныгъэкӀэ чӀыпӀэ шӀункӀым хэс псэхэм адэжь кӀуи, Тхьэм икъэбар аригъэӀугъ. 20 Ахэр арыгъэх Нухьэ къухьэр ышӀынэу зыпылъыгъэ мафэхэм Тхьэр щыӀэгъэшхокӀэ къапаплъэщтыгъэми, ежьым емыдэӀугъэхэр. Къухьэм исхэу, нэбгырий хъухэу, цӀыф заулэ псым щымыкӀодхэу къэнэжьыгъэх. 21 Ащ фэдэу, диным ехьылӀагъэу тетыгъо зиӀэ цӀыф горэм зызэрежъугъэумэхъырэмкӀэ Исус Христос лӀагъэхэм къызэрахэтэджыкӀыжьыгъэм пае, шъумыкӀодэу Тхьэм джы шъукъегъэнэжьы. Зяжъугъэумэхъыныр зыфасӀорэр шъупкъыхэм шӀоигъэр атешъуукъэбзыкӀыныр арэп, шъугухэмкӀэ мыхъун зи зыдэшъумышӀэжьэу, Тхьэм шъуфэшъыпкъэнэу гущыӀэ ешъутыныр ары нахь. 22 Исус Христос уашъом дэкӀоягъэу джы мэлэӀичхэри, тетыгъорэ лъэкӀыныгъэрэ зиӀэхэри ежьым фэӀорышӀэхэу Тхьэм иджабгъукӀэ гос.
ШӀошъхъуныгъэ зимыӀэхэм афэдэу шъумызекӀу
1 Арышъ, Христос ыпкъыкӀэ къин зэрищэчыгъэм пае, шъори ежь игупшысакӀэкӀэ лъэкӀыныгъэ зижъугъэӀэн фае, сыда пӀомэ хэтми ыпкъыкӀэ къин зыщэчыгъэм псэкӀодым иӀоф хэлъыжьэп. 2 Арэущтэу мы дунаем тыщыпсэунэу къытфэнэжьырэ мафэхэм цӀыфхэр зыкӀэхъопсырэ Ӏофхэм атетэу тымызекӀожьэу, Тхьэр зэрэфаем тетэу тэзекӀо. 3 Тхьэр зымышӀэрэ цӀыфхэр зекӀонхэу зэрякӀасэм фэдэу, шъори пасэм шъузэрэзекӀощтыгъэр икъугъэба? МыхъомышӀэ псэукӀэм зешъутызэ шъупсэущтыгъ, хъопсэныгъэ шӀойхэми шъукъыращэкӀыщтыгъ, утэшъоныгъэми, ешхэешъоныгъэми шъушъхьарытӀупщэу шъуапылъыщтыгъ. Тхьэ нэпцӀ гъэлъэпӀэныгъэ емыкӀуми шъухэтыщтыгъ. 4 Ахэмэ ямыхъомышӀэ псэукӀэу гъунэ зимыӀэм джы гъусэ шъузэрэфэмыхъурэм пае, агъэшӀагъо ыкӀи къышъохъоных. 5 Ау бэ темышӀэу псаухэми лӀагъэхэми хьыкум атезышӀыхьащтым пэгъокӀ ратын фае. 6 Сыда пӀомэ Христос лӀагъэхэми къэбарышӀур зыфаригъэӀугъэр Тхьэм цӀыф пстэуми лӀэныгъэм ихьыкум зэратыришӀыхьэрэм фэдэу, ахэр мы дунаем зытетхэм, лӀэныгъэм ихьыкум атришӀыхьагъэ пэтми, Тхьэр зэрэпсэурэм фэдэу, ахэри псэунхэр ары. 7 Ау Ӏоф пстэуми якӀэух къэблэгъагъ. Арышъ, Тхьэм шъуелъэӀушъуным пае, гурыӀоныгъэри зыщыӀэныгъэри зижъугъаӀ. 8 ЗэкӀэмэ апэу шъугу етыгъэу шӀу шъузэрэлъэгъу, сыда пӀомэ шӀулъэгъуныгъэм псэкӀодыбэ егъэгъу. 9 Шъумытхьаусыхэу шъузэрэгъэхьакӀ. 10 Тхьэм. ынэшӀу щыфэныгъэкӀэ лъэкӀыныгъэ зэфэшъхьафхэу шъуӀэ къырилъхьагъэхэм шӀоу шъуарылажьэу, лъэкӀыныгъэу Тхьэм хэти ыӀэ къырилъхьагъэмкӀэ ишӀуагъэ адрэхэм арерэгъэкӀыжь. 11 КъэгущыӀэрэм Тхьэм ыдэжь къикӀырэ гущыӀэхэр къерэӀожьых. ЦӀыфхэм зишӀуагъэ языгъэкӀырэм Тхьэм лъэкӀыныгъэу къыритырэмкӀэ ишӀуагъэ арерэгъэкӀ. Ар шъушӀэмэ, Исус Христос шъугухэм зэрарылъым пае, шъушӀэрэ пстэумкӀи цӀыфхэм Тхьэм щытхъу фяжъугъэшӀыщт. МыкӀодыжьын щытхъушхори лъэкӀыныгъэшхори Тхьэм ий. Амин.
Христос игъогу шъузэрэрыкӀорэм пае, къин шъущэчыщт
12 СилъапӀэхэр, шъуишъыпкъагъэ зыгъэунэфырэ къинышхоу шъущэчрэр шъумыгъэшӀагъо, къышъохъулӀэрэри гъэшӀэгъонэу къышъущэрэмыхъу. 13 Ау Христос къинхэу ыщэчыгъэхэмкӀэ Ӏахьэ зэрэшъуиӀэм пае шъугушӀу, сыда пӀомэ Христос щытхъушхо иӀэу къызылъэгъощт мафэм ыдэжь гушӀогъошхо шъуиӀэщт. 14 Христос ыцӀэ зэрэжъугъэлъапӀэрэм пае, цӀыфхэр къышъохъонхэмэ, сыхьатмафэ шъуежьагъ, сыда пӀомэ Тхьэм Ыпсэ ЛъапӀэу щытхъушхо зиӀэр шъуигъусэ. 15 Шъуащыщэу зыгорэм къин ыщэчы хъумэ, цӀыф укӀакӀоу, е тыгъуакӀоу, е бзэджашӀэу, е иӀоф зыхэмылъым пылъэу щытзэ, зыкӀищэчрэр арэу орэмыхъу. 16 Ау Христос игъогу зэрэрыкӀорэм пае, зыгорэм къин ыщэчмэ орэмыукӀытэ, ау Христос игъогу рыкӀохэрэм зэращы щым пае, Тхьэм щытхъу ферэшӀ. 17 Сыда пӀомэ Тхьэм ежь иунагъо хьыкум тыришӀыхьанэу зиублэщт уахътэр къэсыгъ. ХьыкумшӀыныр тэркӀэ къеублэмэ, Тхьэм икъэбарышӀу емыдэӀухэрэм сыда къяхъулӀэщтыр?» 18 «Шъыпкъагъэ зиӀэ цӀыфхэри ерагъэу мыкӀодхэу къэнэжьхэмэ, Тхьэм ищынагъо зыгу имылъхэми псэкӀод зышӀэ хэрэми сыда къяхъулӀэщтыр?» 19 Арышъ, Тхьэр зыфаем тетэу къин зыщэчхэрэм Тхьэу ахэр къэзыгъэхъугъэу узщыгугъышъущтым ыӀэ зырарэлъхьи, шӀу арэшӀэ зэпыт.
Мэлахъом мэлхэм ынаӀэ зэратригъэтырэм фэдэу, Тхьэм ицӀыфхэм шъунаӀэ атежъугъэт
1 Чылыс зэӀукӀэм инахьыжъхэу къышъухэтхэм сышъолъэӀу. Сэри чылыс зэӀукӀэ горэм инахьыжъхэм сащыщ. Христос къинхэу ыщэчыгъэхэм сыряшыхьат, Христос ищытхъушхоу къэлъэгъонэу щытымкӀи Ӏахьэ сиӀэщт. СызэрэшъолъэӀурэр мыры: 2 Мэлахъом мэлхэм ынаӀэ зэратригъэтырэм фэдэу, шъори Тхьэм ицӀыфхэу шъуадэжь щыӀэхэм мэлахъо шъуафэхъуи, шъунаӀэ атежъугъэт, егъэзыгъэ хэмылъэу, ау шъуигуапэу, Тхьэм ыгу зэреӀурэм фэдэу. Мылъкум шъукӀэмыхъопсэу, шъугу етыгъэу ахэмэ шъуафэлажь. 3 Ау шъуӀэ илъ цӀыфхэм лӀыгъэкӀэ тетыгъо афышъуиӀэу шъуадемызекӀу, ау шапхъэ шъуафэхъуным пае, шӀу шъушӀэ. 4 ЕтӀанэ Христосэу апэрэ мэлахъор къызылъэгъожькӀэ, текӀоныгъэм итанджэу щытхъушхо зиӀэу мыкӀодыжьыщтыр къышъуитыщт. 5 Шъо, ныбжьыкӀэхэри, нахьыжъхэм шъуафэӀорышӀ. Пэгагъэ шъугухэм арымылъэу шъузэфыщыт, сыда пӀомэ «Тхьэр пэгагъэ зыгу илъ цӀыфым пэуцу, ау пэгагъэ зыгу имылъым ынэшӀу къыщефэ». 6 Арышъ, лъэкӀыныгъэ зиӀэ Тхьэм ыпашъхьэ зыщыжъугъэцӀыкӀу, ежьым ыгъэнэфэгъэ уахътэр къызыскӀэ, шъукъиӀэтыжьыным пае. 7 ШъуигумэкӀыгъо пстэури Тхьэм фэжъугъаз, сыда пӀомэ ащ ынаӀэ къышъутырегъэтышъ ары. 8 ЗыщыӀэныгъэ зижъугъаӀ, шъумычъыеуи шъусакъ. Гъуахъорэ аслъаным фэдэу, шъуипыеу шэйтаным зыгорэ зэхицунтхъэным лъыхъузэ къекӀухьэ. 9 ШӀошъхъуныгъэм игъогу шъукъызэкӀэмыкӀожьэу шъутетэу, шэйтаным шъупэуцужь, сыда пӀомэ шъушыхэм, дунаем тыдэ щыӀэхэми, ащ фэдэ къинхэр зэращэчхэрэр шъошӀэ. 10 НэшӀу щыфэныгъэ пстэури зиӀэ Тхьэм ищытхъушхоу мыкӀодыжьыщтымкӀэ Ӏахьэ шъуиӀэнэу къышъоджагъ, Христос Исус шъугухэм зэрарылъым пае. Зы тӀэкӀурэ къин зышъущэчырэ ужым, ежь Тхьэм шъукъызэтыригъэуцожьынышъ, шъугухэр ыгъэпытэнхэшъ, шӀошъхъуныгъэм игъогу шъукъызэкӀэмыкӀожьэу, пытэу шъутыригъэтыщт. 11 МыкӀодыжьын лъэкӀыныгъэшхор Тхьэм ий. Амин.
Аужырэ шӀуфэс гущыӀэхэр
12 Сшы шъыпкъэу слъытэрэ Силуан иӀэпыӀэгъукӀэ тӀэкӀу къышъуфэсэтхы. Зыфэстхырэр шъушӀошъ згъэхъунэуи, къыжъугурызгъэӀонэуи, Тхьэм ынэшӀу щыфэныгъэм ехьылӀагъэу стхыгъэр зэрэшъыпкъэм шыхьат сыфэхъунэуи ары. Гъогу шъыпкъэм шъутемыкӀэу, Тхьэм ынэшӀу щыфэныгъэм зыхэшъумыгъэн. 13 Тхьэм шъукъызэрэхихыгъэм фэдэу, Вавилон щыӀэ чылыс зэӀукӀэу Тхьэм къыхихыгъэм шӀуфэс къышъуехыжьы. Скъо Марки шӀуфэс къышъуехыжьы. 14 ШӀулъэгъуныгъэкӀэ ӀаплӀ зэшъущэкӀызэ, шӀуфэс зэшъухыжь. Шъо зэкӀэ Христос зыгу илъхэм гупсэфыныгъэ Тхьэм къышъуерэт. Амин.
ШӀуфэс ехыныр
1 Сэ, Симон Петр, мы тхылъыр сэтхы. Исус Христос сыфэлажьэ, иапостолэуи сыщыт. Ти Тхьэу тымыкӀодэу тыкъэзыгъэнэжьырэ Исус Христос изэфагъэкӀэ осэшхо зиӀэ шӀошъхъуныгъэу тиӀэм фэдэ шӀошъхъуныгъэ зиӀэ хъугъэ цӀыфхэр ары мы тхылъыр зыфэстхыхэрэр. 2 Ти Тхьэмрэ ти Зиусхьанэу Исус Христосрэ нахьышӀоу зэрэшъушӀэхэрэмкӀэ Тхьэм ынэшӀу инэу къышъущерэфэ зэпыт, гупсэфыныгъэшхуи къышъуерэт зэпыт.
Тхьэм ибынхэм ащыщ шъухъунэу къызэрэшъоджагъэри шъукъызэрэхихыгъэри къэжъугъэшъыпкъэжьых
3 Тхьэм ищьшагъо тыгухэм арылъэу тыпсэуным пае, тищыкӀагъэ пстэури Христос Тхьэм илъэкӀыныгъэшхокӀэ къытитыгъ. Арэущтэу зыкӀишӀагъэр Тхьэу зищытхъу шхокӀи зишӀугъэшхокӀи зибынхэм ащыщ тыхъунэу къытэджагъэр зэрэтшӀэрэр ары. 4 Арэущтэу Тхьэм тыкъызэригъэгугъэгъэ Ӏэхьышхохэу осэшхо зиӀэхэр къытитыгъэх, ахэмкӀи дунаем тет хъопсэныгъэ Ӏаехэу цӀыфхэр зыгъэкӀодхэрэм защышъудзыенышъ, Тхьэм ищытыкӀэкӀэ Ӏахьэ шъуиӀэным пае. 5 Арышъ, шъуишӀошъхъуныгъэ шӀугъэри зэрэхэжъугъэхъоным ыуж шъуит; шӀугъэми шӀэныгъэр хэжъугъахъу; 6 шӀэныгъэми зыщыӀэныгъэ хэжъугъахъу; зыщыӀэныгъэми теубытэныгъэ хэжъугъахъу; теубытэныгъэми Тхьэм ищынагъо хэжъугъахъу; 7 Тхьэм ищынагъоми зэкъошныгъэ хэжъугъахъу; зэкъошныгъэми шӀулъэгъуныгъэ хэжъугъахъу. 8 Мыхэр зэкӀэ къышъухэлъхэу ыкӀи къышъухахъохэмэ, зи къэшъумыгъахъэу, шӀугъи къышъухэмыкӀэу шъукъэнэщтэп, ти Зиусхьанэу Исус Христоси нахьышӀоу шъушӀэщт. 9 Ау мы Ӏофхэр зыхэмылъ цӀыфыр нэшъу, ынэхэри зэтепӀуагъэх. А цӀыфым ыгу ипсэкӀодхэр Тхьэм зэрэригъэкъэбзыкӀыжьыгъэхэр щыгъупшэжьыгъ. 10 Арэущтэу зэрэщытым пае, сшыхэр, Тхьэм ибынхэм ащыщ шъухъунэу къызэрэшъоджагъэри шъукъызэрэхихыгъэри къэзэрэжъугъэшъыпкъэжьыным нахьыбэу ыуж шъуит зэпыт. Арэущтэу шъушӀымэ, Тхьэм игъогу егъашӀэми шъутекӀыщтэп, 11 сыда пӀомэ арэущтэу ти Зиусхьанэу тымыкӀодэу тыкъэзыгъэнэжьырэ Исус Христос и Тетыгъошхоу мыкӀодыжьыщтым ыӀэчӀэгъ шъучӀэхьанэу фит шъухъущт. 12 Арышъ, мы Ӏофхэр шъушӀэ пэтми, шъыпкъагъэу шъуиӀэми пытэу шъутет пэтми, мыхэр зэкӀэ шъугу къэзгъэкӀыжь зэпытыщтых. 13 Спкъы ичэтэнгъэӀагъэ сычӀэтэу сэпсэуфэ, мы Ӏофхэр шъугу къызэрэзгъэкӀыжьырэмкӀэ шъукъэзгъэущыныр тэрэзэу сэлъытэ. 14 Бэ темышӀэу спсэ спкъы зэрэхэкӀыжьыщтыр сэшӀэ, ти Зиусхьанэу Исус Христос къызэрэзгуригъэӀуагъэм фэдэу. 15 Мы дунаем сызехыжьырэ ужми, мы Ӏофхэр сыдигъуи шъугу къызэрэжъугъэкӀыжьышъущтхэм джы сыпылъыщт.
Апостолхэм къэбарэу къаӀуагъэр шъыпкъэ
16 Исус Христос лъэкӀыныгъэшхоу иӀэмрэ дунаем къызэригъэзэжьыщтымрэ якъэбар къызышъотэгъэӀум, тэ Ӏушэу къэтыугупшысыгъэ тхыдэжъхэр къышъуфэтӀотагъэхэп, тынэхэмкӀэ ежь ищытхъушхо тлъэгъугъэ нахь. 17 Сыда пӀомэ «Мары сэ шӀу слъэгъурэ Скъо кӀасэу сыгу зэӀурэр», ыӀоу, щытхъушхо зиӀэ анахь Иным ымакъэ къызынэсым, Тхьэу Ты лъапӀэм лъытэныгъэшхорэ щытхъушхорэ ащ фигъэшъошагъ. 18 А макъэу уашъом къиӀукӀыгъэр тэ ттхьакӀумэхэмкӀэ зэхэтхыгъ, сыда пӀомэ тыригъусэу Ӏошъхьэ лъапӀэм тытетыгъ. 19 Ащ нэмыкӀэуи нахь цыхьэшӀэгъухэуи пегъымбархэм къаӀуагъэхэр щыӀэх. Нэф къэшъынышъ, нэфылъ жъуагъор шъугу къыщыкъокӀыфэ, ахэмэ къаӀуагъэхэу, чӀыпӀэ мэзахэ горэм къыщынэфырэ остыгъэм фэдэхэм шъуафэсакъызэ шъуядэӀумэ, шӀу шъошӀэ. 20 ЗэкӀэмэ апэу мыр шъушӀэн фае: Тхьэм игущыӀэ тхыгъэхэм арытхэу пегъымбархэм къаӀуагъэхэр зыми ежьежьырэу зэхифынхэ ылъэкӀыщтэп. 21 Пегъымбархэм ягущыӀэхэр ежьежьырэу къаГуагъэхэп, ау Тхьэм Ыпсэ ЛъапӀэ а гущыӀэхэр пегъымбархэм агухэм къарилъхьэхи, къаригъэӀуагъэх.
Пегъымбар нэпцӀхэмрэ дин гъэсэкӀо нэпцӀхэмрэ
1 Ау Тхьэм ылъэпкъ пегъымбар нэпцӀхэри хэтыгъэх. Ащ фэдэу дин гъэсэкӀо нэпцӀхэр шъори къышъухэтыщтых. ЦӀыфхэм гу лъамытэу ахэр зыгъэунэхъун Ӏофхэр арагъашӀэщтых. Зиусхьанэу ашъхьэ къэзыщэфыжьыгъэри адэщтэп. Арэущтэу псынкӀэу ежьхэм загъэунэхъужьы. 2 Ахэмэ ямыхъомышӀэ псэукӀэ игъогу цӀыфыбэ техьащт, арэущтэуи шъыпкъагъэм игъогу цӀыфыбэ къырагъэхъоныщт. 3 ЯнэйпсыягъэкӀэ гущыӀэ нэпцӀхэр къаӀохэзэ, шъуишӀуагъэ зэрагъэкӀыщт. Тхьэм ахэр зигъэмысэхэрэр бэшӀагъэ, Тхьэу ахэр зыгъэкӀодыщтри чъыерэп. 4 Сыда пӀомэ Тхьэр мэлэӀичхэу псэкӀод зышӀагъэхэми ашъхьасыгъэп, ау Ӏэхъулъэхъухэр атрилъхьэхи, цӀыфхэм хьыкум зыщатыришӀыхьащт ахърэт мафэм нэсы, джэхьнэмым ишӀункӀыгъэ хэтынхэу фигъэзагъэх. 5 Тхьэр пасэми дунаем къышъхьасыгъэп, псы къиушхор Тхьэм ищынагъо зыгу имылъ цӀыфхэм ядунай къызытырегъаом. Ау пегъымбар Нухьэ шъыпкъагъэм игъогу икъэбар зэригъэӀущтыгъэм пае, нэбгырибл игъусэхэу Тхьэм ар мыкӀодэу къыгъэнэжьыгъ. 6 Къалэхэу Содомрэ Гоморрэрэ кӀодынхэу ыгъэмысэхи, машӀокӀэ ыгъэстыхи, яжьэу ыгъэхъугъэх. Арэущтэу ахэмэ къяхъулӀагъэмкӀэ ежь ищынагъо зыгу имылъ цӀыфхэм къяхъулӀэщтыр Тхьэм къыгъэлъэгъуагъ. 7 Шъыпкъагъэ зиӀэ Лутэу а цӀыфхэу Тхьэм иунашъохэм атекӀыгъэхэм ямыхъомышӀэ псэукӀэ къыхэкӀыкӀэ улэугъэр ахэмэ адэмыкӀодэу Тхьэм къыгъэнэжьыгъ, 8 сыда пӀомэ мы лӀэу шъыпкъагъэ зиӀэр адэпсэоу, хабзэ зыхэмылъ Ӏофхэу ашӀэщтыгъэхэр зелъэгъухэм ыкӀи зызэхеххэм, ыгоу шъыпкъагъэ зиӀэм мафэ къэси къеощтыгъ. 9 Ащ фэдэу Тхьэм ищынагъо зыгу илъхэм яшӀошъхъуныгъэ гъэунэфыгъэу хъу зыхъукӀэ, зэрэхищыжьыщт шӀыкӀэр ешӀэ. Шъыпкъагъэ зимыӀэхэми ябзэджагъэ аригъэпщыныжьызэ, ахърэт мафэм нэсы къызэригъэнэщт шӀыкӀэри ешӀэ ащ, 10 зэкӀэми апэу цӀыфхэу зипсэкӀодышӀэ шэныжъым ихъопсэныгъэ мыкъабзэхэм къыращэкӀхэу, тетыгъо зиӀэхэр зэзымыпэсхэрэр ары. Дысыхэу, къаигъэхэу, уашъом щьттхъушхо щызиӀэхэми яхъоныным щымыщьтнэхэу щытых. 11 МэлэӀичхэм а цӀыфхэм анахьи нахь лъэкӀыныгъи, нахь тетьтгъуи яӀэ пэтми, Тхьэм ыпашъхьэ ахэмэ щяхъонхэрэп ыкӀи щагъэмысэхэрэп. 12 Ау мы цӀыфхэр зыфэдэхэр акъыл зимыӀэ хьакӀэкъуакӀэхэу зищытыкӀэ къырищэкӀхэу зэрэщытым фэдэу, зекӀохэрэр ары. А цӀыфхэр аубытьтнхэм ыкӀи агъэкӀодынхэм пае, къэхъугъэх. Зи зыхамышӀыкӀрэ Ӏофхэм яхъоных. НэмыкӀрэ цӀыфхэр зэрагъэунэхъухэрэмкӀэ ежьхэм загъэунэхъужььт. 13 Бзэджагъэу ашӀагъэм ифэшъуашэ агъотыжьыщт. Мэфэ реным ахъщабэ зытырагъэкӀодэжьэу загъэтхъэжьынэу ягуап. КъызыжъудашхэкӀэ, укӀытагъохэу ыкӀи нэпэтеххэу щытхэзэ, шъукъызэрагъапцӀэрэмкӀэ загъэтхъэжьы. 14 Зинэ шӀэным анэхэр фалӀэхэу, псэкӀодшӀэнымкӀэ загъэшхэкӀын алъэкӀырэп. Тхьэм игъогу шъыпкъэу темытхэр зыӀэпащэх. Агухэр нэйпсыягъэм есагъэх ахэмэ Тхьэм ынае къащифагъ. 15 Гъогу занкӀэм текӀыхи, гъощагъэх. Восор ыкъоу Валаам игъогу техьагъэх. Ахъщэ къыгъэхъэным пае, бзэджагъэ зышӀэн зигуапэу щытыгъэр ары. 16 Ау бзэджагъэу ышӀагъэм пае, щыд горэ егыигъ. Щыдэу бзэ зимыӀэр цӀыф макъэкӀэ къэгущыӀи, пегъэмбарым иделагъэ пэуцугъ. 17 А цӀыфхэр псынэ гъужьыгъэхэми жьыбгъэшхом зэрифэрэ ошъуапщэхэми афэдэх. МыкӀодыжьын шӀункӀыгъэм икуупӀэ Тхьэм ахэмэ къафигъэнэфагъ. 18 Ахэмэ пэгагъэ зыхэлъ гущыӀэхэмрэ пкӀэ зимыӀэ гущыӀэхэмрэ къаӀохэзэ, гъогу пхэнджым гъощагъэхэу тетхэм къаГэпыкӀыжьхэу зыублагъэ цӀыфхэр зыӀэпащэх. Ахэр зэрызыӀэпащэхэрэ шӀыкӀэр мары: Ӏофхэу цӀыфым ипсэкӀодышӀэ шэныжъыр зыкӀэхъопсыхэрэр агъэцэкӀэнхэуи, мыхъомышӀэ псэукӀэм зыратынэуи агъэгушхох. 19 Шъхьафитныгъэу зыфаӀорэмкӀи агъэгугъэх, ау ежьхэр кӀодыныгъэм ипщылӀых, сыда пӀомэ сыд щыщми тетыгъо къыпфызиӀэм ипщылӀ ухъугъ. 20 А цӀыфхэм ти Зиусхьанэу ыкӀи тымыкӀодэу тыкъэзыгъэнэжьырэ Исус Христос зэрашӀагъэмкӀэ дунаем ибзэджэгъэ шӀоим зыщадзыягъэу, ау етӀанэ бзэджагъэм зырагъэубытыжьэу тетыгъо афыриӀэу хъужьмэ, кӀэухым дэжь ахэмэ яӀоф ыпэм нахьи нахь Ӏае мэхъу. 21 Шъыпкъагъэм игъогу ашӀагъэу, етӀанэ текӀыжьхэу унэшъо лъапӀэу апостолхэм къафагъэнагъэм акӀыб фагъэзэным нахьи, Христос икъэбарышӀу игъогу амышӀагъэмэ, ежьхэмкӀэ нахьышӀущтыгъ. 22 ГущыӀэжъ шъыпкъэм тетэу ахэмэ къяхъулӀагъ: «Хьэм къыжыгъэм фегъэзэжьы», ыкӀи «Къоу агъэкъэбзэжьыгъэм шӀоим зыхигъэукӀорэинэу фегъэзэжьы».
Зиусхьаным дунаем къыгъэзэжьынэу тыкъигъэгугъагъ
1 Мыры ятӀонэрэ тхылъэу къышъуфэстхырэр, силъапӀэхэр. А тхылъитӀумкӀи мы Ӏофхэр шъугу къызэрэзгъэкӀыжьырэмкӀэ шъыпкъэу къыжъугурызгъэӀонэу сыпылъ. 2 Пегъымбар лъапӀэхэм къаӀогъэ гущыӀэхэри, ти Зиусхьанэу тымыкӀодэу Тыкъэзыгъэнэжьырэм шъуиапостолхэм къаригъэӀогъэ унашъори шъугу къэжъугъэкӀыжьынэу сыфай. 3 ЗэкӀэмэ апэу мыр шъушӀэн фае: Мы дунаем иаужыпкъэрэ мафэхэм мыукӀытэрэ кӀэнэкӀакӀохэр къэтэджыщтых. Яхъопсэныгъэ Ӏаехэм къыращэкӀыхэзэ, 4 мырэущтэу аӀощт: «Исус къыгъэзэжьынэу тыкъигъэгугъагъ. Адэ, тыдэ щыӀа? Сыда пӀомэ тятэжъхэр дунаем ехыжьыгъэх, ау Тхьэм дунаер къызигъэхъугъэм щегъэжьагъэу зэкӀэ зэрэщытыгъэм фэдэу щыт». 5 Арэущтэу егупшысэхэу, бэшӀагъэу Тхьэм игущыӀэкӀэ уашъохэмрэ чӀылъэмрэ псым къыхигъэшӀыкӀыхэу, псымкӀэ къызэригъэхъугъэхэр ашӀэрэп. 6 Псыри Тхьэм пэсэрэ дунаем къытыригъауи, ыгъэкӀодыгъагъ. 7 Ащ фэдэу джырэ уашъохэмрэ джырэ чӀылъэмрэ а гущыӀэ дэдэмкӀэ Тхьэм машӀом къыфигъэнэжьыгъэх. Тхьэм цӀыфхэм хьыкум атришӀыхьанышъ, ежь ищынагъо зыгу имылъхэр зыкӀодыжьыщт ахърэт мафэм нэсы ахэр къыгъэнэщтых. 8 Мы шъыпкъэр шъоркӀэ мынафэу щэрэмыт, силъапӀэхэр: Зиусхьаным ыдэжькӀэ зы мафэр илъэс миным фэд, илъэс минри зы мафэм фэд. 9 ЦӀыф куп зэрэгугъэрэм фэдэу, Зиусхьаным Ӏофхэу цӀыфхэр къызэригъэгугъагъэхэр ыгъэцэкӀэнхэу ыгъэгужъощтэп. Ау Тхьэм щыӀагъэ къышъуфыриӀ, сыда пӀомэ цӀыф зи кӀодынэу фэмыеу, цӀыф пстэуми япсэкӀодхэм афыкӀэгъожьынхэу фаешъ ары. 10 Ау Зиусхьаныр къызыкӀожьыщт мафэр тыгъуакӀом фэдэу амышӀахэу къэсыщт. А мафэм мэкъэшхо пыӀукӀызэ, уашъохэр кӀодыжьыщтых, мы дунаер къызхэшӀыкӀыгъэ пстэури машӀокӀэ стынхэшъ, кӀодыжьыщтых. ЧӀылъэри ащ тет пстэури машӀокӀэ стыжьыщтых. 11,12 ЗэкӀэри арэущтэу зэрэкӀодыжьыщтым пае, Тхьэм имафэ шъупаплъэу, а мафэр нахь псынкӀэу къызэрэсы щтым ыуж шъуитэу, гукъэбзагъэкӀи Тхьэм ищынагъокӀи шъупсэун фае. А мафэр къызыскӀэ, уашъохэр машӀокӀэ кӀодыжьыщтых. Дунаер къызхэшӀыкӀыгъэхэри фэбэгъэшхом ыгъэткӀущтых. 13 Ау Тхьэм тыкъызэригъэгугъагъэм тетэу, шъыпкъагъэ зыдэщыӀэ ошъуакӀэри чӀылъакӀэри щыӀэ зэрэхъущтым тыщыгугъэу тыпэплъэ. 14 Арышъ, силъапӀэхэр, ахэмэ шъузэрапаплъэрэм пае, лажьэ зи шъуимыӀэу, зыми шъузэригъэмысэн зи щымыӀэу, гупсэфыныгъи шъуиӀэу, Тхьэм ыпашъхьэ шъузэрихьащтым ыуж шъуит. 15 ШъумыкӀодэу шъукъигъэнэжьынэу игъо къышъуфыригъэфэныр ары Зиусхьаным щыӀагъэ зыфиӀэр, ар зыгурыжъугъаӀу, тэ тшы Паулэу шӀу тлъэгъурэм Тхьэм къыритыгъэ зэхэшӀыкӀыныгъэмкӀэ къызэрэшъуфитхыгъэм фэдэу. 16 Мы Ӏофхэм къатегущыӀэзэ, итхылъ пстэуми арэущтэу арытэу ытхыгъ. Итхылъхэм гурыӀогъуаехэри арытых. ЗэхэшӀыкӀыныгъэ зимыӀэхэу, агухэмкӀэ теубытэныгъэ зимыӀэ цӀыфхэм Паул итхылъхэр зэӀагъахьэ, адрэ тхылъ лъапӀэхэр зэрэзэӀагъахьэхэрэм фэдэу. Арэущтэу зэрашӀэрэмкӀэ загъэкӀодыжьы. 17 Арышъ, силъапӀэхэр, мыр шъушӀэгъахэшъ, Тхьэм иунашъохэм атекӀырэ цӀыфхэм ягъогу пхэнджхэм шъузэрэдамыхьыхыными, шъыпкъагъэу шъузытетым шъузэрэтемыкӀыжьыными шъуфэсакъ. 18 Ти Зиусхьанэу тымыкӀодэу Тыкъэзыгъэнэжьырэ Исус Христос ынэшӀу къызэрэшъущифэ зэпытыными, ежьыр нахьышӀоу зэрэшъушӀэными ыуж шъуит. Джыри мыухыжьын мафэми нэсыфэ щытхъушхор ий. Амин.
ГущыӀэу щыӀэныгъэ шъыпкъэ къытэзытырэр
1 УблапӀэм къыщегъэжьагъэу щыӀагъэу, тэ зэхэтхыгъэу, тынэхэмкӀи тлъэгъугъэу, тызэплъыгъэу, тӀэхэмкӀи тызтеӀэбагъэр цӀыфхэм щыӀэныгъэ язытырэ ГущыӀэр ары, ежьыри ары зикъэбар къэтӀуатэрэр. 2 А щыӀэныгъэр къэлъэгъуагъ. Ар тлъэгъугъэ, шыхьати тыфэхъутъ. А мыкӀодыжьын щыӀэныгъэу Ты лъапӀэм ыдэжь щыӀагъэу, тэ къытфэлъэгъуагъэм икъэбар къышъуфэтэӀуатэ. 3 Гъусэ шъукъытфэхъуным пае, тэ тлъэгъугъэу ыкӀи зэхэтхыгъэм икъэбар къышъуфэтэӀуатэ. Гъусэныгъэ зыфытиӀэхэр Ты лъапӀэмрэ ежь Ыкъоу Исус Христосрэ ары. 4 Мыр зыфэттхырэр шъуигушӀуагъо щыкӀагъэ зи имыӀэу, икъугъэу хъуныр ары.
Тхьэр нэфынэу щыт
5 Къэбарэу Тхьэм Ыкъо къытиӀуагъэу тэ къышъодгъэӀурэр мары: Тхьэр нэфынэу щыт, шӀункӀыгъи зи ежьым хэлъэп. 6 Тхьэм тэ тыригъусэу тӀо пэтми, етӀани шӀункӀыгъэм тыхэтэу тызекӀомэ, пцӀы тэусы, шъыпкъагъэри дгъэцакӀэрэп. 7 Тхьэр нэфынэм зэрэхэтым фэдэу, нэфынэм тыхэтэу тызекӀомэ, гъусэныгъэ зэфытиӀ, Ыкъоу Исус ылъэу къащым щыкӀэкӀыгъэми псэкӀод пстэури тыгухэм арегъэкъэбзыкӀыжьых. 8 ПсэкӀод зи тимыӀэу тӀомэ, зытэгъэпцӀэжьы, шъыпкъагъи тыгухэм арылъэп. 9 Ау . типсэкӀодхэр Тхьэм ыцашъхьэ итлъхьэхэмэ, ар шъыпкъэу ыкӀи зафэу зэрэщытым пае, типсэкӀодхэр къытфигъэгъущтых, зэкӀэ къончагъэхэри тыгухэм аригъэкъэбзыкӀыжьыщтых. 10 Тэ псэкӀод тымышӀагъэу тӀомэ, Тхьэр пцӀыусэу тӀуагъэу мэхъу, игущыӀэхэри тыгухэм арылъхэп.
Христос Ты лъапӀэм тэ къытфелъэӀу
1 Шъо, сибынхэм афэдэхэр, псэкӀод шъумышӀэным пае, мыр къышъуфэсэтхы. Ау зыгорэм псэкӀод ышӀэмэ, Ты лъапӀэм тэ къытфелъэӀунэу зыгорэ тиӀ ар шъыпкъагъэ зиӀэ Исус Христос ары. 2 Къурмэныпхъэу тэ типсэкӀодхэр тфэзыпщыныжьырэр ежьыр ары, ау тэ типсэкӀодхэм язакъоп, дунаем ицӀыф пстэуми япсэкӀодхэри ары. 3 Тхьэр шъыпкъэу зэрэтшӀэрэр тэзыгъашӀэрэр иунашъохэр зэрэдгъэцакӀэхэрэр ары. 4 ЦӀыф горэм, «Тхьэр сэшӀэ», еӀо пэтми, Тхьэм иунашъохэр ымыгъэцакӀэхэмэ, ар пцӀыус, шъыпкъагъи ащ хэлъэп. 5 Ау зыгорэм Тхьэм игущыӀэхэр ыгъэцакӀэхэмэ, шъыпкъэу Тхьэм ишӀулъэгъуныгъэ щыкӀагъэ зи имыӀэу, икъугъэу а цӀыфым ыгу илъ. Тхьэр тыгухэм зэрарылъыр тэзыгъашӀэрэр мары: 6 «Тхьэр сыгу илъ» зыӀорэр Исус зэрэзекӀощтыгъэм фэдэу зекӀон фае.
УнэшъуакӀэр
7 СилъапӀэхэр, унэшъуакӀэ горэп сэ къышъуфэстхырэр, апэм къыщегъэжьагъэу шъуиӀэгъэ унэшъожъыр ары нахь. А унэшъожъыр къэбарэу зэхэшъухыгъэр ары. 8 Ау щытми, унашъоу къышъуфэстхырэр унэшъуакӀ; а унашъом ишъыпкъагъэ Христос шъо къышъуфигъэлъэгъуагъ, сыда пӀомэ шӀункӀыгъэр мэкӀодыжьы, нэфынэ шъыпкъэр къэлъэгъогъах. 9 ЦӀыф горэм «Сэ нэфынэм сыхэт», еӀо пэтми, ышы ыуджэгъумэ, ар шӀункӀыгъэм джыри хэт. 10 Зыш шӀу зылъэгъурэр нэфынэм хэт, ащи псэкӀод ышӀэнэу зыгъэлъэпэон зи щыӀэп. 11 Ау зыш зыуджэгъурэр шӀункӀыгъэм хэт, шӀункӀыгъэми хэтэу мэзекӀо, зыдакӀорэри ышӀэрэп, сыда пӀомэ шӀункӀыгъэм ынэхэр нэшъоу ыгъэхъугъэхэшъ ары. 12 Шъо, сибынхэм афэдэхэр, шъуипсэкӀодхэр Христос ыцӀэкӀэ къызэрэшъуфэгъугъэхэм пае, къышъуфэсэтхы. 13 Шъо, тыхэр, ублапӀэм къыщегъэжьагъэу ЩыӀэр зэрэшъушӀэрэм пае, къышъуфэсэтхы. Шъо, кӀалэхэр, шэйтаным шъузэрэтекӀуагъэм пае, къышъуфэсэтхы. Шъо, сабыйхэр, Ты лъапӀэр зэрэшъушӀэрэм пае, къышъуфэсэтхы. 14 Шъо, тыхэр, ублапӀэм къыщегъэжьагъэу ЩыӀэр зэрэшъушӀэрэм пае, къышъуфэсэтхы. Шъо, кӀалэхэр, лъэкӀыныгъэ зэрэшъуиӀэм пае, къышъуфэсэтхы. Тхьэм игущыӀэхэр шъугухэм арылъых, шэйтаными шъутекӀуагъ. 15 Мы дунаери мы дунаем иӀофхэри шӀу шъумылъэгъух. Мы дунаер шӀу зылъэгъурэ цӀыфым ыгу Ты лъапӀэм ишӀулъэгъуныгъэ илъэп. 16 Сыда пӀомэ мы дунаем иӀофхэу цӀыфхэм япсэкӀодышӀэ шэныжъ зыкӀэхъопсырэ Ӏофхэри, цӀыфхэм анэхэр зыкӀэхъопсырэ Ӏофхэри, цӀыфхэр зэрыпэгэрэ Ӏофхэри Ты лъапӀэм ыдэжь къикӀыхэрэп, мы дунаер ары нахь къыздикӀыхэрэр. 17 Мы дунаери, мы дунаем иӀофхэу цӀыфхэр зыкӀэхъопсыхэрэри мэкӀодыжьых, ау Тхьэр зыфаер зыгъэцакӀэрэ цӀыфыр егъашӀэми щыӀэщт.
Антихристос
18 Шъо, сибынхэм афэдэхэр, мыр аужырэ сыхьат дэдэр ары. Антихристосыр къызэрэкӀощтыр зэрэзэхэшъухы гъэм фэдэу, джы Антихристос Ӏаджи къэкӀуагъэ. Арэущтэу аужырэ сыхьат дэдэр къызэрэсыгъэр тэшӀэ. 19 А цӀыфхэр тэ тхэкӀыгъэх, ау ахэр тэ тщыщыгъэхэп. Сыда пӀомэ ахэр тэ тщыщыгъэхэмэ, тадэжь къанэщтыгъэх. Ау тэ тхэкӀыгъэх, арэущтэуи ахэмэ ащыщэу зи тэ зэрэтщымыщыр нафэ хъугъэ. 20 Ау Христос Ыпсэ ЛъапӀэ къышъуфыригъэхыгъ, шъо зэкӀэми шъыпкъагъэри шъошӀэ. 21 Шъыпкъагъэр шъумышӀэу сӀозэ арэп тхылъ къызкӀышъуфэстхырэр, ау шъошӀэшъ ары. Шъыпкъагъэм зы пцӀы къызэрэхэмыкӀыщтри шъошӀэ. 22 Хэта адэ пцӀы зыусырэр? Исус зэрэХристосыр зымыдэрэр ары. Ащ фэдэ цӀыфыр ары Антихристосыр. Ты лъапӀэри Къо лъапӀэри ащ ыдэхэрэп. 23 Хэти Къо лъапӀэр зымыдэрэм ыгу Ты лъапӀэри илъэп. Къо лъапӀэр зыдэрэм ыгу Ты лъапӀэри илъ. 24 Арышъ, апэм къыщегъэжьагъэу зэхэшъухыгъэр шъугухэм арыжъугъэлъ зэпыт. Апэм къыщегъэжьагъэу зэхэшъухыгъэр шъугухэм арылъ зэпытмэ, Къо лъапӀэри Ты лъапӀэри шъугухэм арылъ зэпытыщтых. 25 Христос тыкъызэригъэгугъагъэр мыкӀодыжьын щыӀэныгъэр ары. 26 Тхьэм игъогу шъо шъутезыгъэкӀынэу ыуж итхэм яхьылӀагъэу мы Ӏофхэр къышъуфэсэтхых. 27 Ау шъо Христос ежь Ыпсэ ЛъапӀэ къышъуфыригъэхыгъ, Ыпси шъугухэм арылъ зэпыт, зыгорэми зыгорэ шъуигъэшӀэнэу шъуищыкӀагъэп, сыда пӀомэ Христос Ыпсэ ЛъапӀэ Ӏоф пстэуми яхьылӀагъэу шъуегъашӀэ. Ащ шъыпкъагъэ иӀ, пцӀы ащ зи хэлъэп. Ащ зэрэшъуигъэшӀагъэм фэдэу, Христос шъугухэм арыжъугъэлъ зэпыт.
Тхьэм ибынхэр
28 Арэущтэу, шъо, сибынхэм афэдэхэр, Христос дунаем къызыкӀожьыщт мафэр къэсыгъэу ежьыр къызылъагъокӀэ, ежь ыпашъхьэ гушхоныгъэ щытиӀэу, тымыукӀытэжьыным пае, ежьыр шъугухэм арыжъугъэлъ зэпыт. 29 Христос шъыпкъагъэр зэриӀэр шъошӀэшъ, хэти шъыпкъагъэр зыгъэцакӀэрэри Тхьэм зэрибыныр шъошӀэ.
1 Ты лъапӀэм шӀулъэгъуныгъэшхоу къытфыриӀэм шъуегупшыс, «Шъо шъусибын», еӀо. Ежь ибынхэуи тыщыт. Мы дунаем ицӀыфхэм тызкӀамышӀэрэр Ты лъапӀэр зэрамышӀагъэр ары. 2 СилъапӀэхэр, джы Тхьэм тырибын, тэ тызфэдэ хъущтыр джыри нафэу щытэп. Ау ар нафэ хъу зыхъукӀэ, ежьым фэдэу тызэрэхъущтыр тэшӀэ, сыда пӀомэ ежьыр зэрэщытыр тлъэгъущт. 3 Хэти Христос щыгугъэу, арэущтэу зэрэхъущтыми щыгугъэу паплъэрэ цӀыфым ыгу егъэкъабзэ, Христос ыгу къабзэу зэрэщытым фэдэу. 4 Хэти псэкӀод зышӀэрэр Тхьэм иунашъо текӀы, сыда пӀомэ псэкӀодшӀэныр унашъом текӀыныр ары. 5 Ау Христос типсэкӀодхэр ттырихынхэу къызэрэкӀуагъэр шъо шъошӀэ. Ежьыми псэкӀод зи хэлъэп. 6 Хэти Христос зыгу илъ зэпытым псэкӀод ышӀэу щыт зэпытыщтэп. Ау хэти псэкӀод зышӀэрэм Тхьэр шӀошъхъуныгъэкӀэ ылъэгъугъэп ыкӀи ышӀагъэп. 7 Шъо, сибынхэм афэдэхэр, зыми зыкъешъумыгъэгъапцӀ. Шъыпкъагъэр зыгъэцакӀэрэм шъыпкъагъэ иӀ, Христос шъыпкъагъэр зэриӀэм фэдэу. 8 ПсэкӀод зышӀэрэр шэйтаным ибын, сыда пӀомэ ублапӀэм щегъэжьагъэу шэйтаным псэкӀод ешӀэшъ ары. Тхьэм Ыкъо мы дунаем къызфэкӀуагъэр шэйтаным иӀофхэр ыгъэкӀодынхэу ары. 9 Хэти Тхьэм ибын хъугъэм псэкӀод ышӀэу щыт зэпытыщтэп, сыда пӀомэ Тхьэм ащ ыгу къырилъхьагъэр ежь Ыпсэ ЛъапӀэ ары, ари Тхьэм ибын ыгу илъ зэпытыщт. Тхьэм Ыпсэ ЛъапӀэ псэкӀод ышӀэн зэримылъэкӀырэм пае, Тхьэм ибын псэкӀод ышӀэу щыт зэпытыщтэп. 10 Тхьэм ибынхэри шэйтаным ибынхэри зэрэзэхэбдзыщтхэр мары: Хэти шъыпкъагъэр зымыгъэцакӀэрэр Тхьэм ибынхэм ащыщэп, ащ фэдэуи хэти зыш шӀу зымылъэгъурэр Тхьэм ибынхэм ащыщэп.
ШӀу шъузэрэлъэгъу
11 Апэм къыщегъэжьагъэу къэбарэу зэхэшъухыгъэр мыры: ШӀу шъузэрэлъэгъу. 12 ӀПэйтаным ибынхэм ащыщэу Каин зыцӀэу зыш зыукӀыгъэм фэдэу шъумыхъу. Ышы сыда зыкӀиукӀыгъэр? Ежьым ышӀагъэхэр бзаджэхэу, ыш ышӀагъэхэр шъыпкъэхэу щытыгъэхэти ары. 13 Сшыхэр, мы дунаем ицӀыфхэм шъуауджэгъумэ шъумыгъэшӀагъо. 14 Тшыхэр шӀу зэрэтлъэгъухэрэм пае, лӀэныгъэм тыӀэкӀэкӀи, щыӀэныгъэм тызэрэӀэкӀэхьагъэр тэшӀэ. Зыш шӀу зымылъэгъурэр лӀэныгъэм ыӀэ илъ. 15 Хэти зыш зыуджэгъурэр цӀыф укӀакӀоу щыт. МыкӀодыжьын щыӀэныгъэ цӀыф укӀакӀом ыгу зэримылъыр шъо шъошӀэ. 16 ШӀулъэгъуныгъэр зыфэдэр тэзыгъашӀэрэр мыры: Исус Христос ыпсэ тфитыгъ. Тэри тыпсэ тшыхэм афэттын фае. 17 Зыгорэм дунаем имылъку иӀэу, ау щытми ыш щыкӀагъэ иӀэу зилъэгъукӀэ, ыгу фигъэпытэмэ, Тхьэм ишӀулъэгъуныгъэ сыдэущтэу ыгу илъын? 18 Шъо, сибынхэм афэдэхэр, бзэмрэ гущыӀэмрэ язакъокӀэ шӀу тызэрэлъэгъумэ икъущтэп. ШӀушӀагъэхэмрэ шъыпкъагъэмрэкӀэ шӀу тызэрэлъэгъун фае.
Тхьэм ыпашъхьэ гушхоныгъэ щытиӀэныр
19 ШӀу тызэрэлъэгъуныр ары шъыпкъагъэм тызэрэтетыр тэзыгъашӀэрэри, 20 тыгухэм тагъэмысэ къэсми, Тхьэм ыпашъхьэ тыгухэр щызыгъэпсэфырэри. Сыда пӀомэ Тхьэр тыгухэм анахьи нахь ин ыкӀи зэкӀэри ешӀэшъ ары. 21 Арэущтэу силъапӀэхэр, тыгухэм тамыгъэмысэмэ, гушхоныгъэкӀэ Тхьэм пэгъунэгъу тэхъу. 22 Тхьэм иунашъохэри, ежьым Ӏофхэу игъоу ылъытэхэрэри зэрэдгъэцакӀэхэрэм пае, тызкӀэлъэӀурэр къытеты. 23 Мары иунашъо: Ыкъо Исус Христос ыцӀэкӀэ шӀошъхъуныгъэ зэрэтиӀэнри, Христос унашъо къызэрэтфишӀыгъэм фэдэу, шӀу тызэрэзэрэлъэгъунри ары. 24 Тхьэм иунашъохэр зыгъэцакӀэрэ цӀыфым ыгу Тхьэр илъ зэпыт, а цӀыфри Тхьэм ыгу илъ зэпыт. Тхьэр тыгу зэрилъ зэпытыр тэзыгъашӀэрэр, ежь Ыпсэ ЛъапӀэу тыгухэм къарилъхьагъэр ары.
Тхьэм Ыпсэ ЛъапӀэрэ Антихристос ыпсэрэ
1 СилъапӀэхэр, «Тхьэм Ыпсэ ЛъапӀэ сыгу илъ», ыӀоу, хэти зыӀорэр шъушӀошъ шъумыгъэхъу, ау агухэм арылъыр Тхьэм Ыпсэ ЛъапӀэ арымэ жъугъэунэфы, сыда пӀомэ пегъымбар нэпцӀ Ӏаджи дунаем къыщылъэгъуагъэх. 2 Зы цӀыф горэм Тхьэм Ыпсэ ЛъапӀэ ыгу илъмэ, къэшъозыгъэшӀэщтыр мары: Исус Христос дунаем цӀыфэу къызэрэкӀуагъэр хэтми зыдэрэм ыгу Тхьэм Ыпсэ ЛъапӀэ илъ. 3 Хэтми Исус Христос дунаем цӀыфэу къызэрэкӀуагъэр зымыдэрэми ыгу Тхьэм Ыпсэ ЛъапӀэ илъэп. А цӀыфым ыгу илъыр Антихристос ыпсэ ары. Ар къызэрэкӀощтыр зэхэшъухыгъ. Джы ар дунаем къэкӀогъах. 4 Шъо, сибынхэм афэдэхэр, Тхьэм шъурибын, пегъымбар нэпцӀхэми шъуатекӀуагъ, сыда пӀомэ псэу шъугухэм арылъыр псэу мы дунаем ицӀыфхэм агухэм арылъым нахьи нахь ин. 5 А пегъымбар нэпцӀхэр мы дунаем ибыных. Арышъ, мы дунаем иӀофхэм атегущыӀэх, мы дунаем ицӀыфхэри ахэмэ ядэӀух. 6 Ау тэ Тхьэм тырибын. ЦӀыфэу Тхьэр зышӀэрэр тэ къытэдэӀу, ау Тхьэм ибынэу щымытыр тэ къытэдэӀурэп. Джары шъыпкъагъэм Ыпсэ зыгу илъыри, гъэпцӀэныгъэм ыпсэ зыгу илъыри тэзыгъашӀэрэр.
Тхьэр шӀулъэгъуныгъэу щыт
7 СилъапӀэхэр, шӀу тызэрэжъугъэлъэгъу, сыда пӀомэ шӀулъэгъуныгъэр Тхьэм ыдэжь къекӀышъ ары. Хэти шӀулъэгъуныгъэ зыгу илъыр Тхьэм ибын ыкӀи Тхьэр ешӀэ. 8 ШӀулъэгъуныгъэ зыгу имылъым Тхьэр ышӀэрэп, сыда пӀомэ Тхьэр шӀулъэгъуныгъэу щыт. 9 Тхьэм шӀу тызэрилъэгъурэр мырэущтэу къыгъэнэфагъ: Ежь Ыкъо закъо щыӀэныгъэ къытитыным пае, Тхьэм дунаем къыгъэкӀуагъ. 10 ШӀулъэгъуныгъэу зыфасӀорэр мыры: ШӀулъэгъуныгъэу Тхьэм фытиӀэр арэп, ау тэ Тхьэм шӀу тилъэгъуи, типсэкӀодхэр тфэзыпщыныжьырэ къурмэныпхъэ хъунэу ежь Ыкъо къызэригъэкӀуагъэр ары. 11 СилъапӀэхэр, Тхьэм ащ фэдизэу шӀу тызэрилъэгъугъэм пае, тэри шӀу тызэрэлъэгъун фае. 12 Зыми Тхьэр егъашӀэми нэкӀэ ылъэгъугъэп, ау шӀу тызэрэлъэгъумэ, Тхьэр тыгухэм арылъ зэпыт, ишӀулъэгъуныгъи икъугъэу тыгухэм арылъ. 13 Тхьэм ыгу тызэрилъ зэпытри, ежьыр тыгухэм зэрарылъ зэпытри тэзыгъашӀэрэр Тхьэм ежь Ыпсэ ЛъапӀэу тыгухэм къарилъхьагъэр ары. 14 Ты лъапӀэм дунаем ицӀыфхэр мыкӀодхэу къыгъэнэжьынхэм пае, ежь ЬӀкъо къызэригъэкӀуагъэр тлъэгъугъэ ыкӀи шыхьат тыфэхъу. 15 Исус Тхьэм Ыкъоу зэрэщытыр зыдэрэ цӀыфым ыгу Тхьэр илъ зэпытыщт, а цӀыфри Тхьэм ыгу илъ зэпытыщт. 16 Арэущтэу Тхьэм шӀулъэгъуныгъэу къытфыриӀэр тшӀагъэ, а шӀулъэгъуныгъэми тыщэгугъы. Тхьэр шӀулъэгъуныгъэу щыт. ШӀулъэгъуныгъэр зыгу илъ зэпыт цӀыфыр Тхьэм ыгу илъ зэпытыщт, Тхьэри а цӀыфым ыгу илъ зэпытыщт. 17 Ахърэт мафэм гушхоныгъэ тиӀэнэу Тхьэм ишӀулъэгъуныгъэ икъугъэу тыгухэм арылъ, сыда пӀомэ Христос зэрэщытым фэдэу, тэри мы дунаем тыщыщыт. 18 Тхьэм ишӀулъэгъуныгъэ зыгу илъыр щынэрэп, шӀулъэгъуныгъэу икъугъэми щынагъор хефыжьы. Щынагъор ахърэт мафэм икъин щэчыныгъэм епхыгъ. ШӀулъэгъуныгъэ икъугъэр щынэрэ цӀыфым ыгу илъэп. 19 Тхьэм ыпэ рапшӀэу тэ шӀу тызэрилъэгъугъэм пае, тэ тыгухэми шӀулъэгъуныгъэ арылъ. 20 Зыгорэм, «Тхьэр шӀу сэлъэгъу», еӀо пэтми, ыш ыуджэгъумэ, ар пцӀыус. Сыда пӀомэ ышэу нэкӀэ ылъэгъугъэр шӀу зымылъэгъурэм нэкӀэ ымылъэгъугъэ Тхьэр шӀу ылъэгъун ылъэкӀыщтэп. 21 Тхьэм мы унашъор къытфишӀыгъ: Тхьэр шӀу зылъэгъурэм ыши шӀу ылъэгъун фае.
Дунаем текӀорэр шӀошъхъуныгъэр ары
1 Хэтми Исус зэрэХристосымкӀэ шӀошъхъуныгъэ зиӀэр Тхьэм ибын. Хэтми тыр шӀу зылъэгъурэм ыкъуи шӀу елъэгъу. 2 Тхьэм ибынхэр шӀу зэрэтлъэгъухэрэр тэзыгъашӀэрэр Тхьэр шӀу зэрэтлъэгъурэмрэ иунашъохэр зэрэдгъэцакӀэхэрэмрэ ары. 3 Тхьэр шӀу тлъэгъоу щытмэ, иунашъохэр дгъэцэкӀэщтьгх. Иунашъохэри къинхэп. 4 Сыда пӀомэ хэтми Тхьэм ибынэу щытыр дунаем ипсэкӀодшӀэн Ӏофхэм атекӀо. Дунаем ипсэкӀодшӀэн Ӏофхэм тызэратекӀуагъэр тишӀошъхъуныгъэ ары. 5 Хэта дунаем текӀорэр? Исус Тхьэм Ыкъоу зэрэщытыр зышӀошъ хъурэр ары ныӀэп.
Къо лъапӀэм ехьылӀэгъэ шыхьатныгъэр
6 Исус Христос ары псырэ лъырэкӀэ къэкӀуагъэр. Псым изакъокӀэ къэкӀуагъэп, псырэ лъырэкӀэ нахь. Тхьэм Ыпсэ ЛъапӀэ ары ар къэзыушыхьатырэр, сыда пӀомэ Тхьэм Ыпсэ ЛъапӀэ ары шъыпкъагъэр. 7 Уашъом шыхьа тэу щыхъухэрэр щы мэхъу: Ты лъапӀэр, Тхьэм игущыӀэхэр, Тхьэм ЬӀпсэ ЛъапӀэ. Ищыри зы мэхъух. 8 ЧӀылъэм шыхьатэу щыхъухэрэр щы мэхъу: Тхьэм ЬӀпсэ ЛъапӀэ, псыр, лъыр; ищыми къаӀорэр зэтефэ.9 ЦӀыфхэм яшыхьатныгъэ тэдэ, ау Тхьэм ишыхьатныгъэ нахь ин, сыда пӀомэ ар Тхьэм шыхьатныгъэу ежь Ыкъо фишӀагъэр ары. 10 Тхьэм ЫкъокӀэ шӀошъхъуныгъэ зиӀэ цӀыфым ыгу шыхьатныгъэр илъ. ТхьэмкӀэ шӀошъхъуныгъэ зимыӀэ цӀыфым Тхьэр пцӀыусэу ыӀуагъэу мэхъу, сыда пӀомэ Тхьэм ежь Ыкъо шыхьатныгъэу фишӀагъэр ышӀошъ хъугъэпышъ ары. 11 Шыхьатныгъэр мары: Тхьэм мыкӀодыжьын щыӀэныгъэ къытитыгъ, а мыкӀодыжьын щыӀэныгъэри Тхьэм ежь Ыкъо тэ къытыригъэтыгъ. 12 Къо лъапӀэр зыгу илъ цӀыфым а щыӀэныгъэр иӀ. Къо лъапӀэр зыгу имылъым а щыӀэныгъэр иӀэп.
МыкӀодыжьын щыӀэныгъэр
13 Шъо, Тхьэм Ыкъо ыцӀэкӀэ шӀошъхъуныгъэ зиӀэхэм, мыкӀодыжьын щыӀэныгъэ шъуиӀэ зэрэхъугъэр шъушӀэным пае, мы Ӏофхэр къышъуфэсэтхых. 14 Тхьэр зэрэфаем тетэу зыгорэкӀэ телъэӀумэ, къызэрэтэдэӀущтыр тэшӀэшъ, гушхоныгъэкӀэ ежьым пэблагъэ тэхъу. 15 Сыд щыщкӀи телъэӀумэ, къызэрэтэдэӀущтыр тэшӀэшъ, тызэрелъэӀугъэр тиӀэ зэрэхъугъэр тэшӀэ. 16 Ыш лӀэныгъэ къызхэмыкӀырэ псэкӀод ышӀэу зылъэгъурэр Тхьэм ерэлъэӀу, Тхьэми а тшы щыӀэныгъэ къы ритыщт лӀэныгъэ къызхэмыкӀырэ псэкӀод зышӀагъэр ары зыфасӀорэр. ЛӀэныгъэ къызхэкӀырэ псэкӀодри щыӀ. Ащ фэдэ псэкӀодым пае Тхьэм ерэлъэӀу сӀорэп. 17 Къончагъэ пстэури псэкӀод мэхъу, ау лӀэныгъэ къызхэмыкӀырэ псэкӀоди щыӀ. 18 Хэтми Тхьэм ибынэу щытым псэкӀод ышӀэ зэпытэу зэрэщымытыр тэшӀэ; ау Тхьэм ибын зыфэсакъыжьы, шэйтанри ащ къынэсыщтэп. 19 Тэ Тхьэм тызэрибыныр тэшӀэ, дунаер зэкӀэ шэйтаным ыӀэ зэрилъыри тэшӀэ. 20 Тхьэм Ыкъо къакӀуи, Тхьэ шъыпкъэр тшӀэнэу зэхэшӀыкӀыныгъэ къызэрэтитыгъэр тэшӀэ. Шъыпкъагъэ ЗиӀэр тыгухэм арылъ Тхьэм Ыкъоу Исус Христос ары. Ар Тхьэ шъыпкъэу щыт, цӀыфхэм мыкӀодыжьын щыӀэныгъэ язытырэр ежьыри ары. 21 Шъо, сибынхэм афэдэхэр, тхьэ нэпцӀхэм защышъуухъум. Амин.
ШӀуфэс ехыныр
1 Сэ чылыс зэӀукӀэм инахьыжъхэм сащыщэу, Тхьэм о къыхихыгъэ гощэ лъапӀэу ыкӀи уибынхэу шъыпкъагъэкӀэ шӀу слъэгъухэрэм мы тхылъыр къышъуфэсэтхы. Шъо шӀу шъузылъэгъурэр сэ сизакъоп, шъыпкъагъэр зэзыгъэшӀэгъэ пстэуми шӀу шъуалъэгъу. 2 Шъыпкъагъэу тыгухэм арылъэу, егъашӀэми илъыщтым къыхэкӀыкӀэ шъо шӀу шъутэлъэгъу. 3 Тхьэу Ты лъапӀэмрэ Ты лъапӀэм Ыкъоу Зиусхьанэу Исус Христосрэ тэ шъыпкъагъэр зышӀэхэрэми шӀу зэрэлъэгъухэрэми анэшӀу къытщафэщт, гукӀэгъуныгъэшхуи къытфашӀыщт, гупсэфыныгъи къытатыщт.
Шъыпкъагъэмрэ шӀулъэгъуныгъэмрэ
4 Ты лъапӀэм къытфишӀыгъэ унашъом фэдэу, уибынхэм ащыщэу куп шъыпкъагъэм тетэу зекӀохэу зысэлъэгъум, лъэшэу сыгушӀуагъ. 5 Джы гощэ лъапӀ, сыо лъэӀу: ӀШу тызэрэжъугъэлъэгъу. Ар унэшъуакӀэм фэдэу къыпфэстхырэп, ар апэм къыщегъэжьагъэу тиӀэгъэ унашъоу щыт. 6 ШӀулъэгъуныгъэу зыфасӀорэр Тхьэм иунашъохэм татетэу тызекӀоныр ары. Апэм къыщегъэжьагъэу зэхэшъухыгъэ унашъор шӀулъэгъуныгъэм шъутетэу шъузэрэзекӀорэр ары. 7 Исус Христос дунаем цӀыфэу къызэрэкӀуагъэр зымыдэрэ цӀыфыбэу нэмыкӀ цӀыфхэр зыгъапцӀэхэрэр дунаем къыщылъэгъуагъэх. Ащ фэдэ цӀыфхэр гъэпцӀакӀохэу ыкӀи Антихристосхэу щытых. 8 Ӏофэу къэжъугъэхъагъэр шъумыгъэкӀодэу, шъуиӀэхьышӀу икъугъэу жъугъотыжьыным пае, шъузфэсакъыжь. 9 Хэти Христос тигъэшӀэгъэ Ӏофхэм атемыт зэпытэу, атекӀырэ цӀыфым ыгу Тхьэр илъэп, ау Христос тигъэшӀэгъэ Ӏофхэм атет зэпытым ыгу Ты лъапӀэри Къо лъапӀэри илъых. 10 Шъуадэжь зыгорэ къакӀоу, Исус тигъэшӀэгъэ Ӏофхэм атемытэу шъуигъашӀэмэ, ар шъуиунэ къишъумыгъахь, шӀуфэси ешъумых. 11 Сыда пӀомэ ащ шӀуфэс езыхырэр ащ ибзэджэшӀагъэхэмкӀи игъусэу щыт.
Аужырэ шӀуфэс гущыӀэхэр
12 Джыри къышъуфэстхынэу сиӀэр бэ, ау тхылъыпӀэрэ мэрчэп къамзийрэкӀэ стхынэу сыфаеп. Ау тигушӀуагъо икъугъэу хъуным пае, шъуадэжь сыкъэкӀонышъ, тызэдэтӀысэу тызэдэгущыӀэным сыщэгугъы. 13 Пшыпхъоу Тхьэм къыхихыгъэм ибынхэм шӀуфэс къыуахыжьы. Амин.
ШӀуфэс ехыныр
1 Сэ чылыс зэӀукӀэм инахьыжъхэм сащыщэу, о Гай лъапӀэу шъыпкъагъэкӀэ шӀу слъэгъурэм мы тхылъыр къыпфэсэтхы. 2 СилъапӀ, упсаоу, пстэумкӀи утхъэжьэу ущыӀэнэу Тхьэм селъэӀу, угурэ упсэрэ зэрэпсэфырэм фэдэу. 3 Сыда пӀомэ тшы куп заулэ къакӀуи, о уишъыпкъагъэ тегущыӀэхэзэ, шъыпкъагъэм тетэу узэрэзекӀорэр къызаушьгхьатым, лъэшэу сыгушӀуагъ. 4 Сибынхэр шъыпкъагъэм тетхэу зэрэзекӀохэрэр зызэхэсхыкӀэ, ащ нахьи нахь гушӀогъошхо зи сиӀэп. 5 СилъапӀ, тшыхэр хымэхэу щытхэ пэтми, шӀоу афапшӀэрэмкӀэ шъыпкъагъэ уиӀэу озекӀо. 6 Ахэмэ чылыс зэӀукӀэм ыпашъхьэ уишӀулъэгъуныгъэ къыщыфаушьгхьатыгъ. Тхьэм ыгу зэреӀурэм тетэу, ягъогукӀэ ахэмэ ӀэпыӀэгъу уафэхъумэ, шӀу пшӀагъэу мэхъу. 7 Сыда пӀомэ а тшыхэм шӀошъхъуныгъэ зимыӀэхэм ӀэпыӀэгъу зи къаӀамыхэу, Христос ыцӀэ пае гъогум техьагъэх. 8 Арышъ, ащ фэдэ цӀыфхэм ӀэпыӀэгъу тафэхъун фае, Ӏофэу шъыпкъагъэм фашӀэрэмкӀэ гъусэ тафэхъуным пае.
Диотрефрэ Димитрыйрэ
9 Чылыс зэӀукӀэм тхылъ фэстхыгъ, ау Диотрефэу ахэмэ пащэу афэхъунэу фаем тидэрэп. 10 Арышъ, сыкъызыкӀокӀэ, Ӏофхэу ащ ышӀэхэрэр къэзгъэнэфэщтых, гущыӀэ ӀаехэмкӀэ къызэрэттегущыӀэрэр ары. Ащи къыщымыуцоу тшыхэр ригъэблагъэхэрэп, езыгъэблэгъэнхэу фаехэми афимыдэу апэуцу, чылыс зэӀукӀэми чӀефыжьых. 11 СилъапӀ, ер зышӀэрэм илъэужхэм шъуарымыкӀоу, шӀугъэ зышӀэрэм илъэужхэм шъуарыкӀо. ШӀугъэ зышӀэрэр Тхьэм ибын. Ер зышӀэрэм шӀошъхъуныгъэкӀэ Тхьэр ылъэгъугъэп. 12 ЦӀыф пстэури Димитрый шӀукӀэ шыхьат къыфэхъух, ежь шъыпкъагъэри шӀукӀэ ащ шыхьат фэхъу. Тэри шӀукӀэ шыхьат тыфэхъу, тишыхьатныгъи зэрэшъыпкъэр ошӀэ.
Аужырэ шӀуфэс гущыӀэхэр
13 Къыпфэстхынэу сиӀэр бэ, ау джы къэлэмрэ мэрчэп къамзыйрэкӀэ къыпфэстхынэу сыфаеп. 14 ШӀэхэу услъэгъунышъ, тызэдэтӀысэу тызэдэгущыӀэным сыщэгугъы. 15 Гупсэфыныгъэ уиӀэу опсэу. МыщкӀэ щыӀэ ныбджэгъухэми шӀуфэс къыуахыжьы. МодэкӀэ щыӀэ ныбджэгъухэм ацӀэкӀи шӀуфэс сфяхыжьи, аӀапэ сфэубытыжь. Амин.
ШӀуфэс ехыныр
1 Сэ сы Иудэ, Исус Христос сыфэлажьэ, Якъуби сыриш. Шъо, Тхьэу Ты лъапӀэм ибынхэм ащыщ хъунхэу къызэджагъэхэу, зыгу ыгъэкъабзэхэу, Исус Христос къыухъумэхэрэм, мы тхылъыр къышъуфэсэтхы. 2 Тхьэм гукӀэгъуныгъэшхо къышъуферэшӀ зэпыт, гупсэфыныгъэшхуи шӀулъэгъуныгъэшхуи къышъуерэт зэпыт.
Дин гъэсэкӀо нэпцӀхэр
3 СилъапӀэхэр, шъори тэри тымыкӀодэу Тхьэм тыкъызэригъэнэжьыгъэм ехьылӀагъэу къышъуфэстхынэу лъэшэу сыфэягъ. Ау етӀанэ шӀошъхъуныгъэу Тхьэм ицӀыф лъапӀэхэм аӀэ зэ къырилъхьагъэм пытэу шъутетынэу сышъолъэӀуным пае, къышъуфэстхын фаеу слъытагъэ. 4 Сыда пӀомэ цӀыф заулэм шъумышӀахэу зыкъышъуха гъэкӀокӀагъ. Тхьэм ахэр зэригъэмысэщтхэр игущыӀэ тхыгъэхэм бэшӀагъэу арыт. Тхьэм ищынагъо ахэмэ агухэм арылъэп. Ти Тхьэ ынэшӀу цӀыфхэм къызэращифэрэм икъэбар мыхъомышӀэ псэукӀэм зыратынэу ушъхьагъу ашӀы. Типащэу ыкӀи ти Зиусхьан закъоу Исус Христосыр адэрэп. 5 Мыр шъушӀэ пэтми, шъугу къэзгъэкӀыжьынэу сыфай: Зиусхьаным ежь ылъэпкъ Мысыр хэгъэгум къырищыжьи, мыкӀодэу къыгъэнэжьыгъэ пэтми, шӀошъхъуныгъэ зимыӀэхэр ащ нэужым ыгъэкӀодыгъэх. 6 МэлэӀичхэу зитетыгъо зыщыряӀэ чӀыпӀэр къэзыгъэнагъэхэу, Тхьэм къафигъэнэфэгъэ чӀыпӀэм икӀыгъэхэр Тхьэм цӀыфхэм хьыкум зыщатришӀыхьащт мэфэшхом нэсыфэ, егъашӀэм мыкӀодыжьын Ӏэхъулъэхъухэр ателъхэу шӀункӀыгъэм хегъэтых. 7 Ащ фэдэу къалэхэу Содомрэ Гоморрэрэ яцӀыфхэмрэ а къалэхэм яӀэгъоблагъохэм арыт къалэхэм яцӀыфхэмрэ зинэри, цӀыфмэ амышӀэпхъэ емыкӀу Ӏофхэри ашӀэщтыгъэх. Ныбжьи мыухыжьын машӀом икъинышхо Тхьэм ахэмэ аригъэщэчэу, ахэмэ ягъогу тырымыкӀоным пае, ахэр шапхъэ къытфишӀыгъ. 8 Ащ фэдэу мы цӀыфхэм пкӀыхьапӀэхэу алъэгъухэрэм апае, апкъыхэр аушӀоих; тетыгъо зиӀэхэр адэхэрэп, уашъом щытхъушхо щызиӀэхэми яхъоных. 9 Апэрэ мэлэӀичэу Михаилымрэ шэйтанымрэ пегъымбар Мусэ ихьадэ зэтырахы зэхъум, Михаил шэйтаным хъонэн гущыӀэкӀэ ыгъэмысэнэу тегушхуагъэп, «Зиусхьаным къыпферэмыд!» ыӀуи, риӀуагъэ ныӀэп. 10 А цӀыфхэм зи зэхамышӀыкӀырэ Ӏофхэми яхъоных; ау акъыл зимыӀэ хьакӀэкъуакӀэхэм ящытыкӀэ игъогукӀэ Ӏофхэр зэрэзэхашӀыкӀхэрэм фэдэу, а цӀыфхэм Ӏофхэу зэхашӀыкӀхэрэр ары ахэр зыгъэунэхъухэрэр. 11 Ахэр сыхьатмыгъо ежьагъэх, сыда пӀомэ ахэр Каин игъогу техьагъэх, Валаами зэрэзекӀуагъэм фэдэу, ахэми ахъщэм пае бзэджагъэ ашӀэ, Корей фэдэу якъаигъагъэкӀэ мэунэхъух. 12 ШъузызэдашхэкӀэ, ащ фэдэ цӀыфхэр шъоркӀэ укӀытагъо мэхъух: къыжъудашхэзэ, мыукӀытэхэу загъэшхэкӀын алъэкӀырэп. Ахэр жьыбгъэм зэрифэхэу, псы къызхэмыкӀырэ пщэхэм афэдэх. Бжыхьэм зи къызпымыкӀэхэу, зылъапсэ ратхъыжьыгъэхэу, тӀо лӀэгъэ чъыгхэр ары зыфэдэхэр. 13 Хыорышхохэу зишӀой дэзыдзыехэрэм афэдэх, жъогъо гъощагъэхэу, шӀункӀыгъэм икуупӀэ егъашӀэм Тхьэм зыфигъэнэфагъэхэм афэдэхэу щытых. 14 Енохоу Адэм зыцӀэм къытехъукӀыгъэ цӀыфхэм ащыщэу яхэнэрэм ыгу Тхьэм ежь игущыӀэхэу къырилъхьагъэхэр къыӀохэзэ, а цӀыфхэм яхьылӀагъэу мыщ фэдэу къыӀуагъ: «ШъукъэдаӀу, пчъагъэ зимыӀэ мэлэӀич лъапӀэхэр игъусэхэу Зиусхьаныр къэкӀощт. 15 КъызфэкӀощтыр цӀыф пстэуми хьыкум атришӀыхьанэуи ары, ахэмэ ащыщхэу Тхьэм ищынагъо зыгу имылъ пстэуми ямысэгъэ пстэури аригъэлъэгъунэуи ары. Тхьэм ищынагъо агухэм арымылъэу, бзэджагъэ Ӏофхэу ашӀэгъэ пстэумэ апаий, гущыӀэ пхъашэхэу Зиусхьаным ехьылӀагъэу аӀогъэ пстэуми апаий мысэ зэрэхъугъэхэр а псэкӀодышӀэ цӀыфхэу Тхьэм ищынагъо зыгу имылъхэм аригъэлъэгъущт. 16 Ахэр зыкӀи мыразэхэу мэтхьаусыхэ зэпытых. Яхъопсэныгъэ Ӏаехэм къыращэкӀхэу мэзекӀох. Ажэхэм гущыӀэ пэгагъэхэм анэмыкӀ къадэкӀырэп. ЦӀыфхэм яшӀуагъэ ежьхэм зэрагъэкӀыжьыным пае, ащэтхъужьых.
Теубытэныгъэ зижъугъаӀ
17 Ау шъо, силъапӀэхэр, ти Зиусхьанэу Исус Христос иапостолхэм Ӏофхэу къэхъунхэу къаӀощтыгъэхэр шъугу къэжъугъэкӀыжьых. 18 КъышъуаӀощтыгъэр мыры: «Мы дунаем иаужьыпкъэрэ уахътэ кӀэнэкӀакӀохэу зихъопсэныгъэ Ӏае мыкъабзэхэм къыращэкӀхэу зекӀохэрэр къэлъэгъощтых». 19 Ащ фэдэ цӀыфхэр ары шъузэгурызымыгъаӀохэрэр. Ахэмэ ящытыкӀэ къырищэкӀхэу зэрэщытым фэдэу мэзекӀох, Тхьэм Ыпсэ ЛъапӀи агухэм арылъэп. 20 Ау шъо, силъапӀэхэр, гурэ псэрэкӀэ нахь лъэкӀыныгъэ зыфэжъугъотыжьэу, шъуишӀошъхъуныгъэ лъэпӀэ дэдэм ишъыпкъагъэ шъузэрэтетыщтым ыуж шъуит. Тхьэм Ыпсэ ЛъапӀэ илъэкӀыныгъэкӀи Тхьэм шъуелъэӀу. 21 Ти Зиусхьанэу Исус Христос гукӀэгъу къышъуфишӀынышъ, мыкӀодыжьын щыӀэныгъэ къызэрэшъуитыщтым шъупаплъэзэ, Тхьэм ишӀулъэгъуныгъэ зыхэшъумыгъэн. 22 ЗэхэшӀыкӀыныгъэ зижъугъаӀэзэ, цӀыфхэу тишӀошъхъуныгъэ ехъырэхъышэхэрэм гукӀэгъу афэшъушӀ. 23 НэмыкӀхэри машӀом къыхэшъущыжьхи, мыкӀодхэу къэжъугъэнэжьых. ЕтӀанэ нэмыкӀ цӀыфхэми щынэкӀэ гукӀэгъу афэшъушӀ. Апкъымэ агъэушӀоигъэ щыгъынхэми защыжъудзый.
Тхьэм щытхъу фэтэжъугъэшӀ
24 Игъогу шъутекӀыным Тхьэм шъущиухъумэн ылъэкӀыщт, лажьи зи шъуимыӀэу, гушӀогъошхуи шъухэлъэу, щытхъушхо ЗиӀэм ыпашъхьэ шъуригъэуцон ылъэкӀыщт. 25 Тхьэ закъоу тымыкӀодэу, Исус Христос тыкъезыгъэгъэнэжьыгъэм щытхъушхори, иныгъэри, лъэкӀыныгъэшхори, тетыгъошхори иех, лъэхъан пстэумэ апэуи, джыри, егъашӀэми. Амин.
ШӀуфэс ехыныр
1 Сэ сы Паул, Исус Христос сыфэлажьэ. Христос иапостол сыхъунэу Тхьэр къысаджи, ежьым ыдэжь къикӀырэ къэбарышӀур згъэӀунэу сигъэнэфагъ. 2 А къэбарышӀур ипегъымбархэм ажэкӀэ Тхьэм цӀыфхэр ыгъэгугъагъэх, игущыӀэ тхыгъэ лъапӀэхэм зэрарытым фэдэу. 3 А къэбарышӀур Ыкъо ехьылӀагъ. Ар цӀыфэу къэхъугъэу, пачъыхьэ Даутэ къытехъукӀыгъэ цӀыфхэм ащыщыгъ. 4 Исус лӀагъэхэм къызэрахэтэджыкӀыжьыгъэмкӀэ Тхьэм Ыпсэ ЛъапӀэ ар Тхьэм зэриКъор лъэкӀыныгъэкӀэ къыгъэнэфагъ. Ежьыр ары Исус Христосэу ти Зиусхьаныр. 5 Тхьэм Христос ынэшӀу сэ къысщыригъафи, Христос ыцӀэкӀэ лъэпкъ пстэуми шӀошъхъуныгъэ яӀэ згъэхъоу, ежьым езгъэдэӀунхэм пае, апостолэу сигъэнэфагъ. 6 Шъори ахэмэ шъуащыщ, Исус Христос шъори ибынхэм ащыщ шъухъунэу къышъоджагъ. 7 Шъо, Рим къэлэшхом дэсхэу, Тхьэм шӀу ылъэгъухэу, ицӀыф лъапӀэхэм ащыщ хъунхэу къызэджагъэхэм, мы тхылъыр къышъуфэсэтхы. Тхьэу Тятэ лъапӀэмрэ Зиусхьанэу Исус Христосрэ анэшӀу къышъущарэфи, гупсэфыныгъэ къышъуарэт.
Паул Рим къэлэшхом кӀонэу зэрэфэягъэр
8 Ыпэ рапшӀэу шъуишӀошъхъуныгъэ икъэбар дунаем тыдэкӀи цӀыфхэм зэрэщагъэӀурэм пае, Исус Христос ыцӀэкӀэ шъо пстэуми пае Тхьэм щытхъу фэсэшӀы, 9 сыда пӀомэ Тхьэу Зыкъо ехьылӀэгъэ къэбарышӀур згъэӀузэ, сыгу етыгъэу сызфэлажьэрэ Тхьэр сишыхьат. Ащ селъэӀу зыхъукӀэ, сыдигъуи зэпымыоу шъуигугъу зэрэсшӀырэмкӀэ ар сишыхьат. 10 Тхьэм ыӀомэ шъуадэжь аужыпкъэм сыкъэкӀонэу къыздэхъункӀэ селъэӀу. 11 Сыда пӀомэ Тхьэм Ыпсэ ЛъапӀэ ыдэжь къикӀэу, шъугухэр зыгъэпытэн шӀугъэ горэ шъозгъэгъотыным пае, шъуслъэгъунэу инэу сшӀоигъу. 12 А зы шӀошъхъуныгъэу тиӀэмкӀэ тызэрэгъэгушхоныр ары зыфасӀорэр. 13 Шъуадэжь сыкъэкӀонэу бэрэ сыгу зэрэхэлъыгъэр шъушӀэн фае, сшыхэр, ау джы нэсыфэ пэрыохъу горэ къысфэхъущтыгъ. НэмыкӀ лъэпкъхэм адэжь шӀугъэ къызхэкӀырэ Ӏоф зэрэщысшӀагъэм фэдэу, шъуадэжьи Ӏоф щысшӀэнэу сыфай. 14 Урымхэми, нэмыкӀ лъэпкъхэми, зэхэшӀыкӀыныгъэ зиӀэхэми, зимыӀэхэми пшъэрылъ афысиӀ. 15 Джары шъо Рим къэлэшхом дэсхэм къэбарышӀур шъозгъэӀунэу инэу зыкӀысшӀоигъор.
КъэбарышӀум лъэкӀыныгъэу хэлъыр
16 Христос ехьылӀэгъэ къэбарышӀум сытеукӀытыхьэрэп, сыда пӀомэ къэбарышӀур ары Тхьэм илъэкӀыныгъэу хэти шӀошъхъуныгъэ зиӀэр мыкӀодэу къэзыгъэнэжьырэр, апэу джуртыр етӀанэ мыджуртыр. 17 Сыда пӀомэ Тхьэм ежьым ыдэжькӀэ цӀыфым шъыпкъагъэ иӀэу зэрилъытэрэ гъогур къэбарышӀум къегъэнафэ. Ыпэ къыщегъэжьагъэу ыкӀэ нэс а Ӏофыр зэрэхъурэр шӀошъхъуныгъэм игъогукӀэ ары, Тхьэм игущыӀэ тхыгъэхэм зэрарытым фэдэу, «ШӀошъхъуныгъэ зэриӀэм пае, Тхьэм ыдэжькӀэ шъыпкъагъэ зиӀэр псэущт».
ЦӀыф пстэуми Тхьэм ыдэжькӀэ лажьэу яӀэр
18 Тхьэм ищынагъо цӀыфхэм агухэм зэрарымылъым паий, ябзэджагъэ пстэуми апаий игубжэу уашъом къехырэр Тхьэм къегъэнафэ, сыда пӀомэ ябзэджагъэкӀэ шъыпкъагъэр агъэбылъынэу ыуж итых. 19 Тхьэм ехьылӀагъэу цӀыфмэ ашӀэшъущтыр ахэмкӀэ нафэ, Тхьэм ар къафигъэнэфагъ. 20 Сыда пӀомэ Тхьэм дунаер къызигъэхъугъэм щегъэжьагъэу, ежь ищытыкӀэу амылъэгъушъурэм Тхьэм къыгъэхъугъэхэмкӀэ цӀыфхэм нафэу гу лъатэн алъэкӀы. ИщытыкӀэ амылъэгъушъоу зыфасӀорэр илъэкӀыныгъэшхоу мыкӀодыжьыщтри ары, ежьыр Тхьэу зэрэщытри ары. Арышъ, цӀыфхэм зызэрагъэхыен зи щыӀэп. 21 Тхьэр ашӀагъэ пэтми, Тхьэм фэшъуашэу лъытэныгъи щытхъушхуи фашӀыгъэп. Ау ягупшысэхэр хьаулыеу хъугъэх, агухэу зэхэшӀыкӀыныгъэ зимыӀэхэри шӀункӀы хъугъэх. 22 ЗэхэшӀыкӀыныгъэ яӀэу зашӀошӀыжьэу, зэхэшӀыкӀыныгъэ ямыӀэу хъугъэх. 23 ЦӀыфхэм щытхъушхо зиӀэ Тхьэу мыкӀодыжьыщтыр амыгъэлъапӀэу щытыгъэх. Тхьэм фагъадэхэу, ежьхэм аӀэкӀэ ашӀыгъэ шъо теплъэхэу кӀодыжьыщт цӀыфхэм, бзыухэм, лъэкъуиплӀкӀэ зекӀохэрэм, ныбэкӀэ цуахъохэрэм афэдэхэр тхьэпӀалъэу агъэлъэпӀагъэх. 24 Арышъ, ахэмэ агухэр Ӏоф мыхъунхэм акӀэхъопсхэу, апкъыхэмкӀэ мыхъун зэрашӀэжьынэу, шӀоигъэм хэтхэу Тхьэм къыгъэнагъэх. 25 Тхьэм ишъыпкъагъэ ычӀыпӀэ пцӀыр рагъэуцуагъ. Тхьэу зэкӀэ къэзыгъэхъугъэр амыгъэлъапӀэу ыкӀи фэмылажьэхэу, Тхьэм къыгъэхъугъэхэр агъэлъэпӀагъэх, ахэми афэлэжьагъэх. Ежь Тхьэм мыкӀодыжьын щытхъушхор ий. Амин. 26 Арышъ, агу зыкӀэхъопсырэ Ӏоф мыхъунхэм апылъынхэу Тхьэм ахэр къыгъэнагъэх. Ябзылъфыгъэхэри зэрэщытын фаем текӀыхи, зым адрэм мыхъун ришӀэжьыгъ. 27 Ащ фэдэу хъулъфыгъэхэри зэрэщытын фаем текӀыхи, яшъузхэм якӀолӀэжьыныр ханэжьи, зы лӀыр адрэ лӀым кӀэхъопс хъугъэ. Арэущтэу хъулъфыгъэхэми мьгхъун зэрашӀэжьи, апкъыхэмкӀэ язекӀокӀэ емыкӀу ифэшъуашэ агъотыжьыгъ. 28 Ащ нэмыкӀэу Тхьэр ашӀэнэу зэрамыдагъэм пае, емыкӀу Ӏофхэр ашӀэнхэу акъыл къуанчэр яӀэу Тхьэм къыгъэнагъэх. 29 Мышъыпкъэгъэ пстэури, зинэ пстэури, тхьагъэпцӀыгъэ пстэури, нэйпсыягъэ пстэури, бзэджагъэ пстэури агухэм арызы хъугъэ. Шъугъонри, цӀыф укӀынри, зэщыхьанри, пцӀы усынри, уджэгъунри агухэм арылъ зэпытых. 30 Ахэр бзэгухьэх, цӀыфхэм ӀэягъэкӀэ атегущыӀэх, Тхьэр ауджэгъу, цӀыфхэм агу хагъэкӀы, зыщэтхъужьых, загъэпагэ, бзэджагъэхэр къаугупшысых, ятэянэхэми афэӀорышӀэхэрэп. 31 ЗэхэшӀыкӀыныгъэ яӀэп, ягущыӀэхэр агъэцакӀэхэрэп, гуфэбагъи яӀэп, зэшӀужьыныгъэри гукӀэгъуныгъэри зыфэдэхэр ашӀэрэп. 32 А цӀыфхэм Тхьэм иунэшъо зафэр ашӀэ, ащ фэдэ Ӏофхэр зышӀэхэрэм укӀ зэрафэшъуашэр. Ау щытми, ежьхэм ащ фэдэхэр зэрашӀэхэрэм имызакъоу, а Ӏофхэр зышӀэхэрэри адэх.
Тхьэм нДыфхэм хьыкум зэратришӀыхьэрэр зафэ
1 О хэт ущыщми, нэмыкӀ зыгорэ бгъэмысэмэ, зызэрыбгъэхыижьын зи щыӀэп. Ар зэрэбгъэмысэрэмкӀэ о зыогъэмысэжьы, сыда пӀомэ адрэр зэрыбгъэмысэрэ Ӏофхэр ори ошӀэх. 2 Ащ фэдэ Ӏофхэр зышӀэхэрэм Тхьэм шъыпкъагъэм тетэу хьыкум зэратришӀыхьащтыр тэшӀэ. 3 Ау а Ӏофхэр зышӀэхэрэр о бгъэмысэхэу щыт пэтми, ори ахэмэ ашӀагъэм фэдэу пшӀэу, Тхьэм ихьыкум къыптримышӀыхьанэу огугъа? 4 Хьауми Тхьэм ишӀугъэшхо, игу шъэбэгъэшхо, ищыӀэгъэшхо зэмыпэсхэу ара? Тхьэм ишӀугъэшхокӀэ уипсэкӀодхэм уафыкӀэгъожьынэу игъо къызэрэпфигъафэрэр къыбгурыӀорэба? 5 Ау уигуркъагъэкӀи, угукӀэ уипсэкӀодхэм узэрафыкӀэмыгъожьырэмкӀи мафэу Тхьэм игубжырэ ихьыкум зафэрэ къызылъэгъощтым дэжь Тхьэм губжэу къыптырилъхьащтым хэогъахъо. 6 Тхьэм хэти Ӏофхэу ышӀагъэхэмяфэшъуашэ ригъэгъотыжьыщт. 7 ШӀушӀэным ыуж имыкӀхэу, щытхъушхом, лъытэныгъэшхом, мылӀэныгъэм ауж итхэм мыкӀодыжьын щыӀэныгъэ аритыщт. 8 Ау цӀыфхэу зызыгъэкъаигъэхэу, шъыпкъагъэм фэмыӀорышӀэхэу, бзэджагъэм зезытхэрэм Тхьэм игубжышхо къалъигъэсыщт. 9 Тхьэм хэти бзэджагъэ зышӀэрэм гузэжъогъурэ гухэкӀыгъорэ къылъигъэсыщт, апэу джуртым етӀанэ мьщжуртым. 10 Ау Тхьэм хэтэуи шӀу зышӀэрэм щытхъу, лъытэныгъэ, гупсэфыныгъэ къылъигъэсыщт, апэу джуртым етӀанэ мьгджуртым. 11 Сыда пӀомэ Тхьэр цӀыфхэм ятеплъэ емыплъэу, цӀыф пстэури изэфэдэхэу щытых. 12 Пегъымбар Мусэ и Тэурат хабзэ зимыӀэхэу, псэкӀод зышӀэгъэ цӀыф пстэуми Тэурат хабзэр ямыӀагъэ пэтми, кӀодыжьыщтых. Тэурат хабзэм ыӀэчӀэгъ чӀэтхэу, псэкӀод зышӀэгъэ цӀыф пстэури Тэурат хабзэм тетэу Тхьэм ыгъэмысэщтых. 13 Сыда пӀомэ Тэурат хабзэм итхэр зэхэзыххэрэр арэп Тхьэм ыдэжькӀэ шъыпкъагъэ зиӀэхэр, Тэурат хабзэм итхэр зыгъэцакӀэхэрэр ары нахь. 14 Хымэ лъэпкъхэм ащыщхэу Тэурат хабзэр зимыӀэхэм гурыӀоныгъэу ахэлъымкӀэ Тэурат хабзэм итхэр загъэцакӀэхэкӀэ, Тэурат хабзэр ямыӀэ пэтми, хабзэр зыфэдэр зэрашӀэрэр къагъэлъагъо, 15 сыда пӀомэ Тэурат хабзэм иунашъохэр агухэм арытхагъэхэу зэрарылъхэр а цӀыфхэм къагъэлъагъо. Арэущтэу зэрэщытыр агухэми къаушыхьаты, а цӀыфхэм ягупшысэхэмкӀи зэ загъэмысэ, зэ загъэхые. 16 А Ӏофыр арэущтэу зэрэщытыр нафэ хъущт, къэбарышӀоу згъэӀурэм тетэу, цӀыфхэм агухэм арылъ шъэфхэм Тхьэм Исус Христос хьыкум зыщатрыригъэшӀыхьащт мафэм дэжь.
Джуртхэмрэ Тэурат хабзэмрэ
17 «Сэ сыджурт», оӀо. Тэурат хабзэм ущэгугъы ыкӀи «Тхьэр сэшӀэ», пӀозэ узщэтхъужьы. 18 Тэурат хабзэм итхэр зэрэуагъэшӀагъэм пае, Тхьэр зыфаер ошӀэ, дэгъур зыфэдэри зэхэпшӀыкӀын плъэкӀыщт. 19 ШӀэныгъэ пстэури шъыпкъагъэ пстэури зэрыт Тэурат хабзэр о пӀэ илъэу, нэщъухэм уряпэрытэу, шӀункӀыгъэм хэтхэми урянэфынэу узщэгугъыжьы. 20 ШӀэныгъэ зимыӀэхэм агурызыгъэӀощтыр орэу, ныбжьыкӀэхэми Ӏофхэр языгъэшӀэщтыр орэу узщэгугъыжьы. 21 НэмыкӀрэ цӀыфым Ӏофхэр еогъашӀэх, о пшъхьэ еогъашӀа? 22 ЦӀыфхэр мытыгъонхэу яоӀо, о пшъхьэкӀэ отыгъуа? «Зинэ умышӀэ», цӀыфхэм яоӀо, о пшъхьэкӀэ зинэ ошӀа? Тхьэ нэпцӀхэм ашъо теплъэхэр зэппэсхэрэп, тхьэ нэпцӀхэм ашъо теплъэхэр зэрыт унэхэр о пшъхьэкӀэ охъункӀэха? 23 Тэурат хабзэр зэрэуиӀэм пае узщэтхъужьы, ау Тэурат хабзэм итхэм узэратекӀырэмкӀэ Тхьэр огъэпыута? 24 Тхьэм игущыӀэ тхыгъэхэм зэрарытым фэдэу, «Шъощ пае хымэ лъэпкъхэм щыщхэр Тхьэм ыцӀэ ехъоных». 25 Сунэт уашӀыгъэу щытыным пкӀэ иӀ, Тэурат хабзэм итхэр зыбгъэцакӀэхэкӀэ. Ау Тэурат хабзэм итхэм уатекӀымэ, сунэт уашӀыгъэу ущыт пэтми, сунэт уамышӀыгъэм уфэд. 26 Сунэт амышӀыгъэ цӀыфым Тэурат хабзэм иунашъохэр ыгъэцакӀэхэмэ, сунэт амышӀыгъэу щыт пэтми, Тхьэм ар сунэт ашӀыгъэ цӀыфым фэдэу ылъытэнба? 27 Ащыгъум зыпкъымкӀэ сунэт амышӀыгъэ цӀыфэу Тэурат хабзэм итхэр зыгъэцакӀэрэм о сунэт уашӀыгъэр уигъэмысэщт. Сыда пӀомэ Тэурат хабзэу тхыгъэр о пӀэ илъэу ыкӀи сунэт уашӀыгъэу ущыт пэтми, Тэурат хабзэм итхэм уатекӀы. 28 Сыда пӀомэ итеплъэкӀэ джуртым фэдэу къэлъагъорэр арэп джурт шъыпкъэу щытыр, сунэтэу пкъым къыхэщэу ашӀырэри арэп сунэт шъыпкъэу щытыр. 29 Ау джурт шъыпкъэу щытыр ыгукӀэ джуртэу щытыр ары. Сунэт шъыпкъэу щытыр сунэтэу гум илъыр ары. Ар зыпкъы къикӀырэр тхыгъэ горэу арэп, Тхьэм Ыпсэ ЛъапӀэ ары нахь. Ащ фэдэ цӀыфым ищытхъу цӀыфым ыдэжь къикӀырэп, Тхьэм ыдэжь къекӀы нахь.
1 Ащыгъум джуртэу ущытыныр сыд фэда зэрэнахьышӀур? Е сунэт уашӀыгъэу ущытыным сыд ишӀуагъэу къакӀорэр? 2 Лъэныкъо пстэумкӀи ишӀуагъэу къакӀорэр бэу ины. Ыпэ рапшӀэу, Тхьэм ежь игущыӀэхэр къызыӀэкӀилъхьагъэхэр джуртхэр ары. 3 Ахэмэ ащыщхэу куп мышъыпкъэхэу къычӀэкӀыгъэхэмэ, ахэмэ ямышъыпкъагъэ Тхьэм ишъыпкъагъэ ыгъэкӀодыжьышъущта? 4 Хьау, ыгъэкӀодыжьышъущтэп. Тхьэр сыдигъуи шъыпкъэ, ау хэтрэ цӀыфи пцӀыус, Тхьэм игущыӀэ тхыгъэхэм зэрарытым фэдэу, «О Тхьэ, гущыӀэхэу къапӀохэрэмкӀэ узаф, уагъэмысэми уишъыпкъагъэ нафэ хъущт». 5 Тэ тибзэджагъэ Тхьэр зэрэшъыпкъэр нахь къегъэнафэмэ, сыд тӀона? Игубж къызыттрилъхьэкӀэ, Тхьэр мызафэу тӀона? ЦӀыфхэр къызэрэгущыӀэхэрэм фэдэу, ахэр къэсэӀох. 6 Хьау, ар хъухэщтэп. Тхьэр зафэ. Тхьэр мызафэмэ, дунаем ицӀыфхэм сыдэущтэу хьыкум атыришӀыхьэшъущта? 7 Зыгорэм мырэущтэу къыӀонкӀи мэхъу: «Сэ симышъыпкъагъэ Тхьэр зэрэшъыпкъэр нахь къыгъэнафэу, Тхьэм ищытхъушхо цӀыфхэм нахьышӀоу къаригъэлъэгъумэ, псэкӀод зышӀэрэм фэдэу Тхьэм сыда сызкӀигъэмысэщтыр?» 8 ШӀугъи къыхэкӀыным пае, бзэджагъэ тшӀэна? А гущыӀэ дэдэхэр тыжэ къыдэкӀыгъэхэу аӀозэ, цӀыф заулэхэр ӀэягъэкӀэ къыттегущыӀэх. Тхьэм ащ фэдэ цӀыфхэм яфэшъуашэ аригъэпщыныжьыщт.
Шъыпкъагъэ зиӀэ цӀыф зи щыӀэп
9 Сыд етӀанэ, тэ джуртхэр нэмыкӀ цӀыфхэм анахьи тынахьышӀуа? Хьау, тэ зыкӀи танахьышӀоп. Джурт пстэури, нэмыкӀ лъэпкъхэм ащыщ пстэури псэкӀодым ыӀэ зэрилъхэр къэдгъэнэфагъ, 10 Тхьэм игущыӀэ тхыгъэхэм зэрарытым фэдэу, «Шъыпкъагъэ зиӀэ цӀыф зи щыӀэп. 11 ЗэхэшӀыкӀыныгъэ зиӀэ цӀыфи зи щыӀэп, Тхьэм игъогу лъыхъурэ цӀыфи зи щыӀэп. 12 ЗэкӀэри Тхьэм игъогу текӀыгъэх; зэкӀэми пкӀэ ямыӀэжь хъугъэ. ШӀу зышӀэрэри зи щыӀэп. 13 Ачыйхэр шъхьэ зытемылъ къэ шӀоихэм афэдэх. АбзэгукӀэ цӀыфхэр агъапцӀэх. Блэм ищэнаут аӀупэхэм ателъ. 14 Ажэхэми хъонэным идыдж адиз. 15 Ахэмэ цӀыфым ылъ агъэчъэным пае лъэчъэх. 16 Тыдэ зыдакӀохэрэми цӀыфхэр щагъэкӀодых ыкӀи къин щарагъэщэчы. 17 Зэзэгъыныгъэм игъогу ашӀэрэп. 18 Тхьэм ищынагъуи агухэм арылъэп». 19 Тэурат хабзэм къыӀохэрэр Тэурат хабзэм ыӀэчӀэгъ чӀэт цӀыфхэм зэрариӀохэрэр тэшӀэ. Арэущтэу цӀыф пстэуми ажэ аригъэубытыгъэу хъугъэ, дунаем тет цӀыф пстэури Тхьэм ыдэжькӀэ мысэхэу хъугъэ, 20 сыда пӀомэ цӀыф горэм Тэурат хабзэм итхэр зэригъэцакӀэхэрэмкӀэ Тхьэм ыдэжькӀэ шъыпкъагъэ иӀэ хъущтэп. Ау Тэурат хабзэм итхэр ары псэкӀод зэрэтшӀагъэр тэзыгъашӀэхэрэр.
ЦӀыфхэм шӀошъхъуныгъэмкӀэ Тхьэм ыдэжькӀэ шъыпкъагъэ яӀэ зэрэхъурэр
21 Ау джы Тэурат хабзэм иӀоф хэмылъэу, Тхьэм ежьым ыдэжькӀэ цӀыфхэм шъыпкъагъэ яӀэу зэрилъытэрэ гъогур къыгъэнэфагъ. Тэурат хабзэм итхэмрэ пегъымбархэм къаӀуагъэхэмрэ а гъогум шыхьат фэхъух. 22 Исус ХристоскӀэ шӀошъхъуныгъэу яӀэм игъогу ары Тхьэм ежьым ыдэжькӀэ цӀыфхэм шъыпкъагъэ яӀэу зэрилъытэрэ гъогур. ХристоскӀэ шӀошъхъуныгъэ зиӀэ пстэуми шъыпкъагъэ яӀэу елъытэ. ЦӀыф зэхэдзыныгъэ зи щыӀэп, 23 сыда пӀомэ цӀыф пстэуми псэкӀод ашӀагъ, Тхьэм ыдэжь къикӀырэ щытхъушхомкӀи Ӏахьэ яӀэп. 24 Христос Исус ашъхьэ зэрищэфыжьыгъэм пае, Тхьэм ынэшӀу щыфэныгъэкӀэ уасэ амытэу ежьым ыдэжькӀэ шъыпкъагъэ яӀэу елъытэх. 25 ИсускӀэ шӀошъхъуныгъэ зиӀэхэр ащ ылъэу къащым щыкӀэкӀыщтымкӀэ Тхьэм ежь ешӀужьыгъэхэу ыгъэхъуным пае, Исус къурмэныпхъэу ыгъэнэфагъ. Тхьэм ишъыпкъагъэ къыгъэшъыпкъэжьынэу ары Исус къурмэныпхъэу зыфигъэнэфагъэр. Сыда пӀомэ Тхьэм игушъэбагъэкӀэ пасэм цӀыфхэм япсэкӀодшӀагъэхэр аригъэпщыныжьыгъагъэхэп. 26 Ащ нэмыкӀэу Тхьэм Исус къурмэныпхъэу зыфигъэнэфагъэр джырэ лъэхъанэми ежь ишъыпкъагъэ къыгъэшъыпкъэжьынэу ары: Ежь шъыпкъагъэ зэриӀэри, ИсускӀэ шӀошъхъуныгъэ зиӀэхэми ежьым ыдэжькӀэ шъыпкъагъэ яӀэу зэрилъытэхэрэри ары Тхьэм ащ фэдэу къыгъэлъагъорэр. 27 Ащыгъум тызэрызыщытхъужьрэр щыӀэжьа? Хьау, щыӀэжьэп. Тара хабзэу ар зыӀорэр? Ӏофхэу тшӀэн фаехэр зыӀорэ хабзэр ара? Хьау, шӀошъхъуныгъэм ихабзэ ары. 28 Сыда пӀомэ цӀыфым шӀошъхъуныгъэ зэриӀэм пае, Тхьэм ежьым ыдэжькӀэ ащ шъыпкъагъэ иӀэу зэрилъытэрэр тшӀошъ мэхъу. Тэурат хабзэм иӀоф ащ хэлъэп. 29 Тхьэр джурт закъохэм я Тхьэу щыта, хьауми нэмыкӀ лъэпкъхэми я Тхьэу щыта? Адэ, нэмыкӀ лъэпкъхэми я Тхьэу щыт. 30 Сыда пӀомэ зы Тхьэ закъо нахь щыӀэп. Сунэт ашӀыгъэхэу щытхэм шӀошъхъуныгъэ зэряӀэм пае, Тхьэм ежьым ыдэжькӀэ ахэмэ шъыпкъагъэ яӀэу ылъытэщтых, сунэт амышӀыгъэхэу щытхэми яшӀошъхъуныгъэкӀэ Тхьэм ыдэжькӀэ шъыпкъагъэ яӀэщт. 31 Арэущтэу тӀомэ, шӀошъхъуныгъэмкӀэ Тэурат хабзэр тэгъэкӀода? Хьау, дгъэкӀодырэп, Тэурат хабзэр тэгъэшъыпкъэжьы нахь.
Ибрахьимэ икъэбар шӀошъхъуныгъэм къикӀырэр къызэригъэнафэрэр
1 Тятэжъышхо Ибрахьимэ ехьылӀагъэу сыда тӀощтыр? Ежьежьырэу сыд ыгъэхъагъэр? 2 Ибрахьимэ Ӏофхэу ышӀагъэхэм апае, Тхьэм ежьым ыдэжькӀэ шъыпкъагъэ иӀэу ылъытагъэмэ, Ибрахьимэ зэрызыщытхъужьынэу зыгорэ иӀэщтыгъ ау Тхьэм ыдэжькӀэп. 3 Сыда пӀомэ Тхьэм игущыӀэ тхыгъэхэм сыда арытыр? «Ибрахьимэ ТхьэмкӀэ шӀошъхъуныгъэ иӀэ хъугъэти, Тхьэм ежьым ыдэжькӀэ ащ шъыпкъагъэ иӀэу ылъытагъ». 4 Зыгорэм Ӏоф зишӀэкӀэ, лэжьапкӀэр тынэу къыратырэп, ифэшъуашэшъ къыраты нахь. 5 Ау шӀушӀагъэхэм ащымыгугъырэ цӀыфэу ТхьэмкӀэ шӀошъхъуныгъэ зиӀэм иӀоф зытетыр мары. А цӀыфым ТхьэмкӀэ шӀошъхъуныгъэ зэриӀэм пае, ащ къикӀырэр Тхьэу псэкӀод зышӀэгъэ цӀыфхэм ежьым ыдэжькӀэ шъыпкъагъэ яӀэу зылъытэн зылъэкӀырэмкӀэ шӀошъхъуныгъэ зэриӀэм пае, Тхьэм ежьым ыдэжькӀэ а цӀыфым шъыпкъагъэ иӀэу ылъытэщт. 6 Джары пачъыхьэ Даути зытегущыӀагъэр, шӀушӀагъэхэм яӀоф хэмылъэу, Тхьэм ежьым ыдэжькӀэ шъыпкъагъэ иӀэу ылъытэрэ цӀыфыр сыхьатмафэ зэрежьагъэр къызеӀом: 7 «ЗибзэджэшӀагъэхэр Тхьэм зыфигъэгъугъэхэу, зипсэкӀодхэр зыфигъэкӀодыгъэ цӀыфхэр сыхьатмафэ ежьагъэх. 8 Зиусхьаным зипсэкӀодхэр зыфимылъытэрэ цӀыфыр сыхьатмафэ ежьагъ». 9 А сыхьэтмэфагъэр зыгъотхэрэр сунэт ашӀыгъэхэу щытхэм язакъоу ара, хьауми сунэт амышӀыгъэхэу щытхэри ара? Сунэт амышӀыгъэхэу щытхэри ары, сыда пӀомэ Ибрахьимэ шӀошъхъуныгъэ иӀэ зэрэхъугъэм пае, Тхьэм ежьым ыдэжькӀэ ащ шъыпкъагъэ иӀэу зэрилъытагъэр къэтӀуагъ. 10 Тхьэм ежьым ыдэжькӀэ Ибрахьимэ шъыпкъагъэ иӀэу зилъытагъэр Ибрахьимэ сунэт ашӀыным ыпа, хьаури ыужа? Ыуж арэп, ыпагъ. 11 Ибрахьимэ сунэт ашӀыным ыпэкӀэ, шӀошъхъуныгъэ зэриӀагъэм пае, Тхьэм ежьым ыдэжькӀэ ащ шъыпкъагъэ иӀэу зэрилъытагъэр къэзыгъэлъагъорэ мыхъурэу ыкӀи тамыгъэу сунэт шӀыныр ащ къыфигъэнагъ. А Ӏофыр ащ фэдэу зыщыткӀэ, Ибрахьимэ сунэт амышӀыгъэ цӀыфхэу шӀошъхъуныгъэ зиӀэхэм ятэ фэдэу афэхъу, Тхьэм ежьым ыдэжькӀэ ахэми шъыпкъагъэ яӀэу ылъытэным пае. 12 Ибрахьимэ сунэт ашӀыгъэ цӀыфхэми ятэ фэдэу афэхъу. Ахэми ятэ фэдэу зыкӀафэхъугъэр сунэт зэрашӀыгъэхэм изакъоп, ахэр Ибрахьимэ илъэужхэм атехьагъэхэу, ар сунэт ашӀыным ыпэ, шӀошъхъуныгъэм игъогоу зэрыкӀуагъэм ахэри зэрэрыкӀохэрэри ары.
Ибрахьимэ Тхьэм зэрэщыгугъыгъэм пае, Тхьэм къызэригъэгугъагъэр иӀэ хъугъэ
13 Тхьэм Ибрахьимэрэ ащ къытехъукӀыщт цӀыфхэмрэ къыгъэгугъагъэх чӀылъэр яӀэхьышӀоу къызэралъысыщтымкӀэ. Ибрахьимэ Тэурат хабзэм итхэр ыгъэцэкӀагъэхэу арэп Тхьэм а ӀэхьышӀумкӀэ зыкӀигъэгугъагъэр, ау Ибрахьимэ шӀошъхъуныгъэ зэриӀагъэм пае, Тхьэм ежьым ыдэжькӀэ ащ шъыпкъагъэ иӀэу зэрилъытагъэр ары нахь. 14 Тэурат хабзэм итхэр зыгъэцакӀэхэрэр арыгъэмэ, Тхьэм цӀыфхэр къызэригъэгугъэгъэ ӀэхьышӀур къызылъысыщтхэр, ащыгъум шӀошъхъуныгъэр хьаулыеу хъущтыгъ, Тхьэм къызэригъэгугъагъэми пкӀэ иӀэщтыгъэп. 15 Сыда пӀомэ Тэурат хабзэм Тхьэм игубж къехьы, ау хэбзэ унашъо зыдэщымыӀэм хабзэм текӀыни щыӀэп. 16 Арышъ, Тхьэм къыгъэгугъагъэхэр шӀошъхъуныгъэ зиӀэхэр ары. Арэущтэу зыфэхъугъэр Тхьэм тыкъызэригъэгугъэгъэ Ӏофхэр ынэшӀу щыфэныгъэкӀэ къызэрэтитырэр нафэ хъунри ары, шӀошъхъуныгъэ зиӀэхэу, Ибрахьимэ къытехъукӀыгъэ цӀыф пстэуми Тхьэм къызэригъэгугъэгъэ Ӏофхэр агъотышъунри ары Ибрахьимэ къытехъукӀыгъэ цӀыфхэу зыфасӀохэрэр Тэурат хабзэм тетхэу рыкӀохэрэм ямызакъоу, Тэурат хабзэм темытхэу Ибрахьимэ шӀошъхъуныгъэу иӀагъэм фэдэ шӀошъхъуныгъэ зиӀэхэри ары. Шъыпкъэ, Ибрахьимэ тэ пстэуми тятэ фэдэу къытфэхъу, 17 Тхьэм Ибрахьимэ риӀуагъэу, Тхьэм игущыӀэ тхыгъэхэм зэрарытым фэдэу, «Лъэпкъ Ӏаджыми ты уафэхъунэу узгъэнэфагъ». Тхьэм ыдэжькӀэ Ибрахьимэ тэ пстэуми тят. Тхьэр ары Ибрахьимэ шӀошъхъуныгъэ зыфыриӀагъэр Тхьэу лӀагъэхэр къэзыгъэхъужьрэр, илъэкӀыныгъэкӀи щымыӀэ Ӏофхэр къэзыгъэхъурэр. 18 ГугъапӀэ зыщэмыӀэжьым, Ибрахьимэ Тхьэм щыгугъэу, шӀошъхъуныгъэ иӀагъ. Арэущтэу, «О къыптехъукӀыщт цӀыфхэр уашъом ижъуагъохэм фэдизэу бэ хъущтых», ыӀуи, Тхьэм ащ къызэрэриӀогъагъэм фэдэ къабзэу Ибрахьимэ лъэпкъ Ӏаджыми ты афэхъугъ. 19 ИшӀошъхъуныгъэ зи къыщымыкӀэу, ыпкъ лӀэныгъэм пэблагъэ зэрэхъугъэм еплъыгъэп, сыда пӀомэ илъэсишъэм пэгъунэгъугъэти ары Сарэ сабый къызэрэхэмыкӀыщтми еплъыгъэп. 20 ШӀошъхъуныгъэ иӀэу Тхьэм къызэригъэгугъагъэмкӀэ гуцафэ ышӀыгъэп. ИшӀошъхъуныгъэ нахь пытэу хъуи, Тхьэм щытхъу фишӀыгъ. 21 Тхьэм къызэригъэгугъагъэр ыгъэцэкӀэн зэрилъэкӀыщтым щыгугъыныгъэшхо иӀагъ. 22 ТхьэмкӀэ ащ фэдизэу шӀошъхъуныгъэ зэриӀагъэм пае, Тхьэм ежьым ыдэжькӀэ ащ шъыпкъагъэ иӀэу ылъытагъ. 23 «Тхьэм ежьым ыдэжькӀэ ащ шъыпкъагъэ иӀэу ылъытагъ» зыфаӀорэ гущыӀэхэр зэхьылӀагъэхэр Ибрахьимэ изакъоу арэп, 24 тэри ары. Тхьэм ежьым ыдэжькӀэ тэри шъыпкъагъэ тиӀэу тилъытэщт тэ, Исус Христосэу ти Зиусхьан лӀагъэхэм къахэзыгъэтэджыкӀыжьыгъэ ТхьэмкӀэ шӀошъхъуныгъэ зиӀэхэм, тэри ежьым ыдэжькӀэ шъыпкъагъэ тиӀэу тилъытэщт. 25 Тэ псэкӀод зэрэтшӀагъэм пае, Тхьэм Исус лӀэныгъэм ӀэкӀигъэфагъ, ежьым ыдэжькӀэ тэ шъыпкъагъэ тиӀэу тилъытэным паий, Тхьэм ар лӀагъэхэм къахигъэтэджыкӀыжьыгъ.
Тхьэм ежьым ыдэжькӀэ шъыпкъагъэ тиӀэу тызэрилъытэрэм шӀугъэу къыхэкӀырэр
1 Арышъ, шӀошъхъуныгъэ зэрэтиӀэм пае, Тхьэм ежьым ыдэжькӀэ шъыпкъагъэ тиӀэу телъытэ. Арэущтэу зэрэщытым пае, ти Зиусхьанэу Исус Христос Тхьэм ыдэжькӀэ гупсэфыныгъэ къытитыгъэу щыт. 2 Христос ары шӀошъхъуныгъэ зэрэтиӀэм пае, Тхьэм ынэшӀу къытщифэнэу гъогу къытфыӀузыхыгъэр. Тхьэм ынэшӀу щыфэныгъэр къыднегъэс зэпыт, ежь ищытхъушхомкӀи Ӏахьэ къытлъысыщтым тыщыгугъэу, тызэрэпаплъэрэм пае, тэгушӀо. 3 Ащ нахьи, гузэжъогъухэу тщэчыхэрэми тащэгушӀукӀы, сыда пӀомэ гузэжъогъу щэчыныгъэм теубытэныгъэр къызэрэхэкӀырэр тэшӀэ. 4 Теубытэныгъэми Тхьэм ыгу зэӀурэ шэнышӀур къыхэкӀы. ШэнышӀуми Тхьэм ӀэхьышӀур къызэрэтитыщтым тызэрэщыгугъырэр къыхэкӀы. 5 А щыгугъыныгъэми тыкӀигъэгъожьырэп, сыда пӀомэ Тхьэм ежь Ыпсэ ЛъапӀэу къытитыгъэмкӀэ ишӀулъэгъуныгъэ инэу тыгухэм къарилъхьагъ. 6 Тхьэм ыгъэнэфэгъэ уахътэм ыдэжь тэ тшъхьэкӀэ ӀэпыӀэгъу тызфэмыхъужьышъоу, тэ цӀыфхэу Тхьэм ищынагъо зыгу имылъхэм апае Христос лӀагъэ. 7 Шъыпкъагъэ зиӀэ цӀыфым ычӀыпӀэкӀэ зыгорэ лӀэми, ар бэу хъугъуае. ЦӀыфышӀум ычӀыпӀэкӀэ зыгорэ лӀэнкӀи мэхъу. 8 Ау шӀулъэгъуныгъэу къытфыриӀэр Тхьэм мырэущтэу къыгъэлъэгъуагъ: Тэ тыпсэкӀодышӀэ пэтызэ, Христос тэщ пае лӀагъэ. 9 Христос къащым лъэу щыкӀэкӀыгъэм пае, Тхьэм ежьым ыдэжькӀэ шъыпкъагъэ тиӀэу телъытэ. Арэущтэу зэрэхъугъэм пае, ащ нахьи бэкӀэ нахьыбэу Христос Тхьэм игубж тыкъыӀэкӀихыжьыщт. 10 Сыда пӀомэ тэ Тхьэм тырипыеу тызыщэтым, ежь Ыкъо илӀэныгъэкӀэ Тхьэм ежьым тешӀужьыгъэу тигъэхъугъ. Джы Тхьэм ежьым тешӀужьыгъэу тигъэхъугъэу, Ыкъо ищыӀэныгъэмкӀэ ащ нахьи нахьыбэу тымыкӀодэу тыкъигъэнэжьыщт. 11 ТымыкӀодэу Тхьэм тыкъызэригъэнэжьыщтым имызакъоу, ти Зиусхьанэу Исус Христос Тхьэм тыщегъэгушӀукӀы. Христос ары Тхьэм тешӀужьыгъэу тызыгъэхъугъэр.
Христосрэ Адэмрэ зэрэзэфэмыдэхэр
12 ПсэкӀодыр дунаем къытехьанэу зыпкъ къикӀыгъэр зы цӀыф. ПсэкӀодым игъусэу лӀэныгъэри дунаем къытехьагъ. Арэущтэу цӀыф пстэуми псэкӀод зэрашӀагъэм пае, лӀэныгъэр зэралъысырэр яӀахьэу хъугъэ. 13 Сыда пӀомэ Тэурат хабзэр къэкӀоным ыпэкӀэ, псэкӀодыр дунаем тетыгъ. Ау хэбзэ унашъохэр щымыӀэхэу, Тхьэм цӀыфхэм япсэкӀодхэр афилъытэхэрэп. 14 АрышъхьакӀэ Адэм зыцӀэм имафэхэм къащегъэжьагъэу пегъымбар Мусэ имафэхэм анэсы, лӀэныгъэм цӀыфхэм тетыгъо афыриӀэу щытыгъ. Ахэмэ псэкӀодхэу ашӀагъэхэр, Адэм Тхьэм иунашъо зытекӀым, псэкӀодэу ышӀагъэм фэмыдэ щтыгъэхэ пэтми, лӀэныгъэм тетыгъо афыриӀэу щытыгъ. Ыджы Адэмрэ Христосэу дунаем къэкӀонэу щытыгъэмрэ зэфэтэжъугъэгъад. 15 Адэм ипсэкӀодшӀагъэ тынышхоу Тхьэм ынэшӀу щыфэныгъэкӀэ къытитырэм фэдэп. Сыда пӀомэ зы нэбгырэ закъом ипсэкӀодшӀагъэм къыхэкӀыкӀэ цӀыфыбэ лӀагъэ. Ау а псэкӀодшӀагъэм нахьи, Тхьэм ынэшӀу щыфэныгъэ бэкӀэ нахь ин, итынышхоу зы нэбгырэу Исус Христос ынэшӀу щыфэныгъэкӀэ цӀыфыбэмэ аритырэри бэкӀэ нахь ин. 16 Ащ фэдэуи Тхьэм итынышхо къыхэкӀырэр а нэбгырэ закъом ипсэкӀодшӀагъэ къыхэкӀыгъэм фэдэп. Сыда пӀомэ а нэбгырэ закъом псэкӀодэу ышӀагъэм къыхэкӀыгъэр Тхьэм мысэу зэрилъытагъэр ары. Ау цӀыфхэм псэкӀодыбэ ашӀагъэ пэтми, Тхьэм ежьым ыдэжькӀэ ахэмэ шъыпкъагъэ яӀэу зэрилъытэхэрэр ары Тхьэм ынэшӀу щыфэныгъэкӀэ тынышхоу аритырэр. 17 Сыда пӀомэ зы нэбгырэ закъом ипсэкӀодшӀагъэ къыхэкӀыкӀэ лӀэныгъэм дунаем ицӀыфхэм тетыгъо афыриӀэ хъугъэ. Ау ащ нахьи бэкӀэ нахьыбэу, нэбгырэ закъоу Исус Христос ышӀагъэм пае цӀыфхэу Тхьэм ынэшӀу инэу зыщифэхэу, уасэ амытэу ежьым ыдэжькӀэ шъыпкъагъэ яӀэу ылъытэхэрэм щыӀэныгъэ агъотынышъ, тетыгъо яӀэ хъущт. 18 Арышъ, зы псэкӀодшӀэгъэ закъом къыхэкӀыгъэр Тхьэм цӀыф пстэури мысэхэу зэрилъытагъэхэр ары. Ащ фэдэу зы нэбгырэ закъом шъыпкъэгъэ Ӏофэу ышӀагъэм къыхэкӀырэр Тхьэм цӀыф пстэуми щыӀэныгъэ аритзэ, ежьым ыдэжькӀэ шъыпкъагъэ яӀэу зэрилъытэхэрэр ары. 19 Сыда пӀомэ зы нэбгырэ закъо Тхьэм зэремыдэӀугъэм пае, цӀыфыбэ псэкӀодышӀэхэу хъугъэх. Ащ фэдэу зы нэбгырэ закъо Тхьэм зэредэӀугъэм паий, Тхьэм ежьым ыдэжькӀэ цӀыфыбэми шъыпкъагъэ яӀэу ылъытэщтых. 20 ЕтӀанэ Тэурат хабзэр къызэкӀом, псэкӀодшӀагъэхэр нахьыбэ хъугъэх. Ау псэкӀодшӀагъэхэр нахьыбэ хъу зэхъум, Тхьэм ынэшӀу щыфэныгъэри нахь ин хъугъэ. 21 Арышъ, псэкӀодым цӀыфхэм тетыгъо афыриӀэу, лӀэныгъэр яӀахьэу къызэралъигъэсыгъэм фэдэу, Тхьэм ынэшӀу щыфэныгъэм цӀыфхэм тетыгъо афыриӀэу, Исус Христосэу ти Зиусхьан Ӏофэу ышӀагъэм пае, Тхьэм ежьым ыдэжькӀэ цӀыфхэм шъыпкъагъэ яӀэу ылъытэщтых, мыкӀодыжьын щыӀэныгъи аритыщт.
ПсэкӀодым иӀоф къытхэмылъыжьэу, Христос тыгухэм зэрарылъым пае, тэпсэу
1 Сыд тӀона етӀанэ? Тхьэм ынэшӀу щыфэныгъэ нахь къыднигъэсыным пае, псэкӀод тшӀэ зэпытына? 2 Хьау, ар хъухэщтэп. ПсэкӀодым иӀоф къытхэмылъыжьэу, псэкӀодым ыдэжькӀэ цӀыф лӀагъэхэм тафэд. Ащыгъум псэкӀод тшӀэ зэпытэу тыпсэушъуна? 3 Христос Исус тыгухэм арылъынэу тэ зэкӀэ тызаумэхъым, Христос илӀэныгъэ тиӀахьэ хэлъынэу тызэраумэхъыгъэр шъошӀэба? 4 Тызаумэхъым, Христос тыригъусэу тылӀи, ежь тыригъусэу тычӀалъхьажьыгъэм фэд, Ты лъапӀэм илъэкӀыныгъэу щытхъушхо зиӀэмкӀэ Христос лӀагъэхэм къызэрахэтэджыкӀыжьыгъэм фэдэу, тэри щыӀэныгъакӀэ тиӀэу тыпсэуным пае. 5 Христос гъусэ тыфэхъуи, ар зэрэлӀагъэм фэдэу тэри тызэрэлӀагъэм пае, ар лӀагъэхэм къызэрахэтэджыкӀыжьыгъэм фэдэу, тэри тыригъусэу лӀагъэхэм тыкъахэтэджыкӀыжьыщт. 6 Сыда пӀомэ тишэныжъ бзаджэ Христос игъусэу къащым зэрэтыраӀулӀагъэр тэшӀэ, тыгухэм арылъ псэкӀодым илъэкӀыныгъэ кӀодыным пае. Ащ пае тэ псэкӀодым тырипщылӀыжьыщтэп. 7 Сыда пӀомэ цӀыфэу лӀагъэр псэкӀодым ыӀэмычӀэ чӀэкӀыжьыгъ. 8 Христос тыригъусэу тызэрэлӀагъэм пае, ежьым тыригъусэу тызэрэщыӀэщтри тшӀошъ мэхъу. 9 Тхьэм лӀагъэхэм къахигъэтэджыкӀыжьыгъэу, Христос зэрэмылӀэжьыщтыр тэшӀэ. Шэныгъэм тетыгъо къыфыриӀэжьэп. 10 Христос зэлӀэм, джыри зэ мылӀэжьынэу, псэкӀодым ыдэжькӀэ лӀагъэ. Джы щыӀэныгъэ иӀэу Тхьэм фэпсэу. 11 Арэущтэу Христос Исусэу ти Зиусхьан шъугухэм зэрарылъым пае, шъори псэкӀодым иӀоф къышъухэмылъыжьэу, псэкӀодым ыдэжькӀэ цӀыф лӀагъэхэм шъуафэдэу, Тхьэм шъуфэпсэоу зышъулъытэжь. 12 Арышъ, псэкӀодым шъупкъыхэу лӀэщтхэми тетыгъо афыриӀэу орэмыхъу, шъуихъопсэныгъэ мыхъунхэм шъуафэмыӀорышӀэнэу. 13 Шъупкъы щыщхэм псэкӀод ашӀэнэу бзэджагъэм иӀашэхэм афэдэхэу шъумыгъэхъух, лӀагъэхэм къахэтэджыкӀыжьыгъэ цӀыфхэми шъуафэдэу Тхьэм зешъут. Шъу пкъы щыщхэри шъыпкъагъэм иӀашэхэм афэдэхэу Тхьэм фэжъугъазэх. 14 ПсэкӀодым тетыгъо къышъуфыриӀэщтэп, сыда пӀомэ хэбзэ унашъохэм аӀэчӀэгъ шъучӀэтэп, Тхьэм ынэшӀу щыфэныгъэм ыӀэчӀэгъ шъучӀэт нахь.
Шъыпкъагъэр дгъэцэкӀэнэу типшъэрылъ
15 Сыд етӀанэ? Хабзэм иунашъохэм аӀэчӀэгъ тычӀэмытэу, Тхьэм ынэшӀу щыфэныгъэм ыӀэчӀэгъ тызэрэчӀэтырэм пае, псэкӀод тшӀэнэу тыфита? Хьау, ар хъухэщтэп. 16 Шъо шъошӀэба, зыгорэм ипщылӀхэм афэдэу шъуедэӀунэу зешъутымэ, шъузэдэӀурэ цӀыфым шъыпкъэу шъурипщылӀэу зэрэхъурэр? ПсэкӀодым шъурипщылӀмэ, лӀэныгъэм игъогу шъутет, ау Тхьэм шъуедэӀумэ, ежьым ыдэжькӀэ шъыпкъагъэ шъуиӀэу шъуилъытэщт. 17 Ау Тхьэм щытхъу фэтэшӀы, сыда пӀомэ псэкӀодым шъурипщылӀыщтыгъ, ау тишӀошъхъуныгъэ тигъашӀэрэ Ӏофхэу зызэшъутыгъэхэм джы шъугу етыгъэу шъуядэӀу. 18 Тхьэм псэкӀодым илъэкӀыныгъэ шъукъыӀэкӀихыжьи, шъхьафит шъуишӀыжьыгъ, шъыпкъагъэми пщылӀ шъуфэхъужьыгъ. 19 ШъуигурыӀоныгъэ зэримыкъугъэм пае, цӀыфхэр къызэрэгущыӀэхэрэм фэдэу, къыжъугурызгъэӀонэу мыр къэсэӀо. Шъупкъы щыщхэм бзэджагъэ яжъугъэшӀэнэу шӀоигъэмрэ бзэджагъэмрэ пщылӀхэу зяшъутэу зэрэщытыгъэм фэдэу, джы гукъэбзагъэм игъогу шъурыкӀонэу шъупкъы щыщхэр шъыпкъагъэм фэпщылӀынхэу фэжъугъазэх. 20 Сыда пӀомэ псэкӀодым шъурипщылӀэу шъузыщэтым, шъыпкъагъэр шъозыгъэгъэцэкӀэн зи щыӀагъэп. 21 Ащ дэжьым сыда шъуишӀуагъэу къэкӀуагъэр? ШъуишӀуагъэ зи къэкӀуагъэп. Ащ фэдэ Ӏофхэу джы шъузтеукӀытыхьажьхэрэм къахэкӀырэр лӀэныгъэр ары. 22 Ау джы Тхьэм псэкӀодым илъэкӀыныгъэ шъукъыӀэкӀихыжьи, шъхьафит шъуишӀыжьыгъ, Тхьэми пщылӀ шъуфэхъугъ. Ащ шӀугъэу къыхэкӀырэр гукъэбзагъэм игъогу шъузэрэрыкӀорэр ары, ӀэхьышӀоу къышъулъысыщтри мыкӀодыжьын щыӀэныгъэ" ары. 23 Сыда пӀомэ псэкӀодым къыхэкӀырэр лӀэныгъэр ары. Ау Исус Христосэу ти Зиусхьан тыгухэм зэрарылъым пае, Тхьэм тынышхоу къытитырэр мыкӀодыжьын щыӀэныгъэр ары.
ЗэлӀзэшъузыным ехьылӀэгъэ хабзэмрэ Христос тызэрэфыщытынымрэ
1 Сшыхэр, хабзэм итхэу тхыгъэхэр зышӀэрэ цӀыфхэу шъущытышъ, цӀыфыр опсэуфэ хабзэм тетыгъо зэрэфыриӀэр шъошӀэба? 2 ГущыӀэм пае, шъузым илӀ опсэуфэ, хабзэмкӀэ а шъузыр а лӀым епхыгъэу щыт. Ау илӀ зылӀэкӀэ, хабзэм шъузыр шъхьафит ешӀы. 3 Арышъ, илӀ псаоу пэтызэ, шъузыр нэмыкӀрэ лӀы горэм дэпсэумэ, зинэ ышӀагъэу аӀощт. Ау илӀ зылӀэкӀэ, а унашъом шъузым тетыгъо фыриӀэжьэп. НэмыкӀрэ лӀы горэм дэкӀожьмэ, зинэ ышӀагъэу хъурэп. 4 Ащ фэдэу, сшыхэр, Христос ыпкъ зэрэлӀагъэм пае, Тэурат хабзэм иӀоф къышъухэмылъыжьэу, а хабзэм ыдэжькӀэ шъо цӀыф лӀагъэхэм шъуафэд. Джы Христосэу Тхьэм лӀагъэхэм къахигъэтэджыкӀыжьыгъэм ие шъухъугъ, Тхьэм ищытхъукӀэ шӀугъэ дгъэцэкӀэным пае. 5 Сыда пӀомэ типсэкӀодышӀэ шэныжъ игъогу тырыкӀо зэхъум, Тэурат хабзэм зэкӀигъэплъыхьэгъэ псэкӀодышӀэ хъопсэныгъэхэр тпкъы щыщхэм ахэлъыгъэх, лӀэныгъэр а хъопсэныгъэхэм къахэкӀэу. 6 Ау джы Тэурат хабзэу тызыпхэу щытыгъэм иӀоф къытхэмылъыжьэу, а хабзэм ыдэжькӀэ цӀыф лӀагъэхэм тафэдэу тыхъуи, Тхьэм Тэурат хабзэм ыӀэчӀэгъ тыкъычӀихыжьи, шъхьафит тишӀыжьыгъ. Арышъ, Тхьэм тызэрэфэлажьэрэ шӀыкӀэр ыпэрэм фэдэу тхыгъэ хабзэм тетэу арэп, Тхьэм Ыпсэ ЛъапӀэ ихэбзакӀэ тетэу ары нахь.
Тэурат хабзэмрэ псэкӀодымрэ
7 Джы сыд тӀона? Тэурат хабзэм псэкӀод хэлъа? Хьау, ар хъухэщтэп! Ау Тэурат хабзэм иунашъохэр щымыӀагъэхэмэ, псэкӀодыр зыфэдэр сшӀэщтгъэп, сыда пӀомэ Тэурат унашъом «Хъопсэныгъэ мыхъун угу имыгъэлъ», къымыӀуагъэмэ, хъопсэныгъэ мыхъуныр зыфэдэр сшӀэщтыгъэп. 8 Ау псэкӀодым игъо фифи, а унашъомкӀэ сыд щыщырэ хъопсэныгъэ мыхъуныр сыгу къырилъхьагъ; сыда пӀомэ Тэурат хабзэр щымыӀэмэ, псэкӀодри лӀагъэм фэд. 9 Зэгорэм Тэурат хабзэр сымышӀэу сыпсэущтыгъ. Ау Тхьэм иунашъо къызэкӀом, псэкӀодым кӀуачӀэ иӀэ хъуи, 10 сэри лӀагъэм фэдэу сыхъугъ. Арэущтэу цӀыфхэм щыӀэныгъэ агъотыным пае, унашъоу Тхьэм къытфишӀыгъэм сигъэлӀагъ. 11 Тхьэм иунашъокӀэ псэкӀодым игъо къыфифи, сигъэпцӀагъ, а унашъомкӀи сигъэлӀагъ. 12 Арэущтэу Тэурат хабзэр лъапӀэ, унашъори лъапӀэ, зафэ ыкӀи дэгъу ыкӀи. 13 Ащыгъум зы Ӏоф дэгъу горэм сигъэлӀагъэу ара? Хьау, ар хъухэщтэп. Ау псэкӀодыр зыфэдэр нафэ хъуным пае, Тэуратым ихэбзэшӀукӀэ псэкӀодым сигъэлӀагъ. Арэущтэу унашъомкӀэ псэкӀодым идэигъэшхо нафэ мэхъу. 14 Тэурат хабзэр Тхьэм ыдэжь къызэрикӀыгъэр тэшӀэ. Ау сэ сыцӀыф тхьамыкӀ, псэкӀодыми сырипщылӀ. 15 Ӏофэу сэ сшӀэрэр къызгурыӀорэп; сыда пӀомэ Ӏофэу сшӀэнэу сызыфаер згъэцакӀэрэп, ау сыуджэгъурэ Ӏофыр сэгъэцакӀэ. 16 Ау Ӏофэу сшӀэнэу сызыфэмыер згъэцакӀэмэ, Тэурат хабзэр дэгъоу зэрэщытыр зэрэздэрэр ары ащ къикӀырэр. 17 Арышъ, псэкӀод зышӀэрэр сэрэп, сыгу илъ псэкӀодыр ары нахь. 18 СипсэкӀодышӀэ шэныжъ сеплъымэ, шӀугъэ сыгу зэримылъыр сэшӀэ; сыда пӀомэ шӀугъэ сшӀэнэу сыфаеми, згъэцэкӀэнэу скӀуачӀэ къыхьырэп. 19 ШӀугъэу сшӀэнэусызыфаер згъэцакӀэрэп, ау бзэджагъэу сшӀэнэу сызыфэмыер сэгъэцакӀэ. 20 Ащыгъум Ӏофэу сшӀэнэу сызыфэмыер згъэцакӀэмэ, ар зыгъэцакӀэрэр сэрэп, сыгу илъ псэкӀодыр ары нахь. 21 Арэущтэу мыщ фэдэ хабзэ мы Ӏофым хэлъэу сэлъэгъу: ШӀугъэ згъэцэкӀэнэу сыфаеми, бзэджагъэр сапэ къысшӀуфефэ. 22 Сыда пӀомэ сыгукӀэ Тхьэм ихабзэ сыщэгушӀукӀы, 23 ау спкъы щыщхэм нэмыкӀ хэбзэжъ ахэлъэу сэлъэгъу. А хэбзэжъыр сиакъыл ыдэрэ хэбзэшӀум пэуцу. А хэбзэжъым спкъы щыщхэм ахэлъ псэкӀод хэбзэжъым сыфегъэпщылӀы. 24 Сыдэу сыцӀыф тхьамыкӀа! Спкъэу сызыгъэкӀодырэм сыкъыхищыжьэу, сымыкӀодэу хэт сыкъэзыгъэнэжьыщтыр? 25 Тхьэм щытхъушхор ий. Ежьыр ары Исус Христосэу ти Зиусхьан спкъэу сызыгъэкӀодырэм сыкъыхыригъэщыжьэу, сымыкӀодэу сыкъэзыгъэнэжьыщтыр. Арэущтэу сиакъылкӀэ Тхьэм ихабзэ сырипщылӀ, ау сипсэкӀодышӀэ шэныжъкӀэ псэкӀодым ихабзэ сырипщылӀ.
Тхьэм Ыпсэ ЛъапӀэ илъэкӀыныгъэкӀэ тыпсэуныр
1 Арышъ, зипсэкӀодышӀэ шэныжъ игъогу рымыкӀохэу, Тхьэм Ыпсэ ЛъапӀэ игъогу нахь рыкӀорэ цӀыфхэу, Христос Исус зыгу илъхэр Тхьэм зыкӀи ыгъэмысэщтхэп. 2 Сыда пӀомэ Исус Христос тыгухэм арылъэу, Тхьэм Ыпсэ ЛъапӀэу щыӀэныгъэ шъыпкъэр къытэзытырэм ихабзэ псэкӀодымрэ лӀэныгъэмрэ яхабзэ ыӀэчӀэгъ сыкъычӀихыжьи, шъхьафит сишӀыжьыгъ. 3 ТипсэкӀодышӀэ шэныжъ ибзэджагъэ пае, Тэурат хабзэм лъэкӀыныгъэ имыӀэу ымышӀэшъугъэр Тхьэм ышӀагъ. Ежь Ыкъо псэкӀодышӀэ цӀыфхэм апкъ фэдэу пкъы иӀэу, псэкӀодхэм апае къурмэныпхъэ хъунэу Тхьэм къыгъэкӀуагъ, арэущтэуи а пкъымкӀэ псэкӀодыр ыгъэмысагъ. 4 Тхьэм арэущтэу зыфишӀагъэр тэ, типсэкӀодышӀэ шэныжъ игъогу тырымыкӀоу, Тхьэм Ыпсэ ЛъапӀэ игъогу нахь рыкӀохэрэм, шъыпкъагъэр дгъэцэкӀэныр ары, шъыпкъагъэр дгъэцэкӀэн фаеу, Тэурат хабзэм ыӀоу зэритым фэдэу. 5 Сыда пӀомэ цӀыфхэу зипсэкӀодышӀэ шэныжъ игъогу рыкӀохэрэм яшэныжъ зыкӀэхъопсырэ Ӏофхэм ягупшысэ зэпытых, ау Тхьэм Ыпсэ ЛъапӀэ игъогу рыкӀохэрэр Тхьэм Ыпсэ ЛъапӀэ иӀофхэм ягупшысэх. 6 ШъуипсэкӀодышӀэ шэныжъ зыкӀэхъопсырэ Ӏофхэм шъуягупшысэным Ӏэягъэу къыхэкӀырэр лӀэныгъэр ары, ау Тхьэм Ыпсэ ЛъапӀэ иӀофхэм шъуягупшысэным шӀугъэу къыхэкӀырэр щыӀэныгъэрэ гупсэфыныгъэрэ ары, 7 сыда пӀомэ цӀыфэу зипсэкӀодышӀэ шэныжъ зыкӀэхъопсырэ Ӏофхэм ягупшысэрэр Тхьэм ипый мэхъу. А цӀыфыр Тхьэм ихабзэ иунашъо едэӀурэп, едэӀуни ылъэкӀырэп. 8 Шъыпкъэ, цӀыфхэу зипсэкӀодышӀэ шэныжъым игъогу рыкӀохэрэм Тхьэм ыгу яӀурэп. 9 АрышъхьакӀэ шъо шъуипсэкӀодышӀэ шэныжъ игъогу шъурыкӀоу щытэп, Тхьэм Ыпсэ ЛъапӀэ шъыпкъэу шъугухэм арылъмэ, Тхьэм Ыпсэ ЛъапӀэ игъогу шъурэкӀо нахь. Христос Ыпсэ ЛъапӀэ зыгу имылъыр Христос ицӀыфхэм ащыщэп. 10 Ау Христос шъугухэм арылъмэ, шъуипсэкӀодхэм къахэкӀыкӀэ шъупкъыхэр лӀэщтхэми, Тхьэм ежьым ыдэжькӀэ шъыпкъагъэ шъуиӀэу шъузэрилъытэрэм пае, шъугурэ шъупсэрэкӀэ шъупсаоу шъущыт. 11 Тхьэу Исус лӀагъэхэмэ къахэзыгъэтэджыкӀыжьыгъэм Ыпсэ ЛъапӀэ шъугухэм арылъмэ, ащыгъум Тхьэу Христос лӀагъэхэм къахэзыгъэтэджыкӀыжьыгъэм Ыпсэ ЛъапӀэу шъугухэм арылъым илъэкӀыныгъэкӀэ шъупкъыхэу лӀэщтхэми щыӀэныгъэ къаритыщт. 12 Арышъ, тшыхэр, типсэкӀодышӀэ шэныжъ игъогу тырыкӀонэу тпшъэ илъэп. 13 Сыда пӀомэ шъуипсэкӀодышӀэ шэныжъ игъогу шъурыкӀомэ, шъукӀодыщт, ау Тхьэм Ыпсэ ЛъапӀэ илъэкӀыныгъэкӀэ бзэджагъэу шъушӀэхэрэр жъугъэкӀодхэмэ, щыӀэныгъэ шъыпкъэр жъугъотыщт. 14 Тхьэм Ыпсэ ЛъапӀэ едэӀурэ цӀыф пстэури Тхьэм ибыных. 15 Тхьэм ежь Ыпсэ ЛъапӀэу шъугухэм къарилъхьагъэм шъуигъэпщылӀэу ыкӀи шъуигъэщынэу щытэп. Ау Тхьэм ежь Ыпсэ ЛъапӀэу шъугухэм къарилъхьагъэм Тхьэм ибын фэдэу шъуедэ. А Псэ ЛъапӀэм, «Аввэу Ты лъапӀэ!» тӀоу, Тхьэм тырегъаджэ. 16 Тхьэм Ыпсэ ЛъапӀэ Тхьэм тызэрибынхэр къыӀозэ, тыгухэм ягъусэу къеушыхьаты. 17 Тхьэм тызэрибыным пае, Тхьэм ибынхэм ӀэхьышӀоу къалъысырэр тэри къытлъигъэсыщт. А ӀэхьышӀоу Тхьэм Христос къылъигъэсырэри Христос тыригъусэу тэри къытлъигъэсыщт, сыда пӀомэ Христос тыригъусэу къин тщэчмэ, Христос тыригъусэуи Тхьэм щытхъушхо тиӀэ ыгъэхъущт.
Щытхъушхоу къэлъэгъощтыр
18 Мы лъэхъанэм къинхэу тщэчхэрэр щытхъушхоу Тхьэм джы нэсыфэ цӀыфхэм аримыгъэшӀагъэу, тиӀэ ыгъэхъущтым фэбгъэдэн зэрэфэмышъуашэм сыщэгугъы. 19 Тхьэм къыгъэхъугъэ пстэури гузажъохэзэ пэплъэх. Зыпаплъэхэрэр Тхьэм ежь ибынхэм а щытхъушхор яӀэ къызэригъэхъурэр ежь къыгъэхъугъэ пстэуми къызыщаригъэлъэгъущт мафэр ары. 20 Сыда пӀомэ Тхьэм ежь къыгъэхъугъэ пстэуми ягухэлъ амыгъотынэу ыухыгъ. Арэущтэу зыкӀэхъугъэр ежьхэр арэущтэу фэягъэхэкӀэ арэп, ау ягухэлъ амыгъотынэу зыухэсыгъэ Тхьэр фэя гъэти ары. 21 Ау Тхьэм къыгъэхъугъэ пстэури Ӏофэу зыщыгугъыхэу зыпалъэхэрэр мыхэр ары: Тхьэм ахэр кӀодыныгъэм ипщылӀыныгъэ къыхихыжьхэу, шхьафит ышӀыжьынхэри, Тхьэм ибынхэм яшъхьафитныгъэрэ ящытхъушхорэ ахэми яӀэ хъунри ары. 22 Сыда пӀомэ Тхьэм къыгъэхъугъэ пстэури джы нэсыфэ щэӀухэзэ, сабыйн къызфэхъущт бзылъфыгъэм къин зэрищэчрэм фэдэу, къин зэращэчрэр тэшӀэ. 23 Ау къин зыщэчхэрэр Тхьэм къыгъэхъугъэхэм язакъоп. Тхьэм итын хэм ащыщэу апэрэу ежь Ыпсэ ЛъапӀэ тэ, зыгу къырилъхьагъэхэри, тыгукӀэ тэщэӀу, Тхьэм ибын фэдэу тидэнышъ, тпкъыхэр шъхьафит зыщишӀыжьыщт мафэм тишъыпкъэу тыпаплъэу. 24 Сыда пӀомэ мы Ӏофхэм тащыгугъэу тызэрапаплъэрэм пае, тымыкӀодэу Тхьэм тыкъигъэнэжьыгъ. Ау Ӏофхэу тызщыгугъыхэу тызпаплъэхэрэр къэлъагъохэмэ, ащыгъум ахэмэ тапэплъэу тыщытэп. Сыда пӀомэ ынэкӀэ ылъэгъурэм хэта щыгугъэу паплъэрэр? 25 Ау тэ тынэкӀэ тымылъэгъурэм тыщыгугъэу тыпэплъэшъ, теубытэныгъэ тиӀэу тыпэплъэ. 26 Ащ фэдэу тэ, лъэкӀыныгъэ зимыӀэхэм, Тхьэм Ыпсэ ЛъапӀэ къыддэӀэпыӀэ; сыда пӀомэ Тхьэм тызэрелъэӀун фэе шӀыкӀэр тшӀэрэп. Ау гущыӀэхэм къамыӀошъурэ щэӀуныгъэхэмкӀэ Тхьэм Ыпсэ ЛъапӀэ Тхьэм къытфелъэӀу. 27 Тхьэу цӀыфхэм агухэм арылъыр зыгъэунэфырэм ежьым Ыпсэ ЛъапӀэ ыгу илъыри ешӀэ, сыда пӀомэ Тхьэр зэрэфаем тетэу Ыпсэ ЛъапӀэ Тхьэм ицӀыф лъапӀэхэм афелъэӀу. 28 Тхьэр шӀу зылъэгъурэ цӀыфхэу, игухэлъ тетэу ибынхэм ащыщ хъунхэу зэджагъэхэм Ӏоф пстэуми яшӀуагъэ Тхьэм зэраригъэкӀырэр тэшӀэ. 29 Тхьэм цӀыфхэу къыхихыгъэхэр ежь Ыкъо фэдэнхэу ыгъэнэфагъэх, Ыкъо къошыбэ апэ итыным пае. 30 Тхьэм цӀыфхэу ыгъэнэфагъэхэр ибынхэм ащыщ хъунхэуи яджагъ. Зэджагъэхэри ежьым ыдэжькӀэ шъыпкъагъэ яӀэу ылъытагъэх. Ежьым ыдэжькӀэ шъыпкъагъэ зиӀэхэу ылъытагъэхэми щытхъушхо яӀэ ыгъэхъугъ.
Тхьэм шӀулъэгъуныгъэу къытфыриӀэр
31 Ахэр зытӀорэ ужым, джыри сыд тӀона? Тхьэр тигъусэмэ, хэта къытпэуцужьын зылъэкӀыщтыр? 32 Тхьэу Зыкъо шъхьамысыжьэу тэ зэпстэуми пае къурмэныпхъэу зы шӀыгъэм Ыкъо тыригъусэуи шӀугъэ пстэури къытитынба? 33 Тхьэм къыхихыгъэ цӀыфхэр хэт зыгъэмысэн зылъэкӀыщтыр? Тхьэр ары ежьым ыдэжькӀэ ахэмэ шъыпкъагъэ яӀэу зылъытэрэр. 34 Хэта тызыгъэмысэн зылъэкӀыщтыр? Сыда пӀомэ Христос Исус лӀи, лӀагъэхэм къахэтэджыкӀыжьыгъ. Джы Тхьэм иджабгъукӀэ гос, Тхьэми къытфелъэӀу. 35 Тхьэм шӀулъэгъуныгъэу къытфыриӀэм хэт тыпызыгъэкӀын зылъэкӀыщтыр? Гузэжъогъу тыхэтми, гухэкӀыгъо тиӀэми, къин тагъэщэчми, мэлакӀэ тылӀэми, зыщытлъэн тимыӀэми, щынагъо тыхэтми, сэшхокӀэ тагъэщынэми мы къэтӀуагъэ пстэуми Тхьэм ишӀулъэгъуныгъэ тыпагъэкӀын алъэкӀырэп. 36 Тхьэм игущыӀэ тхыгъэхэм зэрарытым фэдэу, «(О Тхьэ), ощ пае тызэраукӀыщтымкӀэ мафэ къэс щынагъо щыӀ. ШӀуабзыщт мэлхэм афэдэу талъытэ». 37 Ау мы Ӏоф пстэумкӀи шӀу тызылъэгъугъэм илъэкӀыныгъэкӀэ текӀоныгъэшхор тэтый. 38 Сыда пӀомэ хэти Тхьэм шӀулъэгъуныгъэу къытфыриӀэм тыпигъэкӀын зэримылъэкӀыщтым сыщэгугъы; лӀэныгъэми, псэуныгъэми, мэлэӀичхэми, джынэ пащэхэми, лъэкӀыныгъэ зиӀэ джынэхэми, джы Ӏофхэу щыӀэхэми, къэкӀощт уахътэм Ӏофхэу щыӀэщтхэми, 39 уашъом сыд щыщ щыӀэми, чӀылъэ чӀэгъми, сыд щыщ щыӀэми а шӀулъэгъуныгъэм тыпызыгъэкӀын зи щыӀэп. Тхьэм къыгъэхъугъэ пстэуми ащыщэу зи Тхьэм шӀулъэгъуныгъэу Исус Христосэу ти Зиусхьан къытыригъэгъэлъэгъугъэм тыпигъэкӀын ылъэкӀыщтэп.
Израил лъэпкъыр
1 Христос сыгу зэрилъым пае, къэсӀощтыр шъыпкъэ, пцӀы сыусырэп. Тхьэм Ыпсэ ЛъапӀэ игъусэу сыгуи ар зэрэшъыпкъэр къысфеушыхьаты. 2 Сэ зыфасӀорэр мыры: ГухэкӀышхорэ зэпымыужьырэ гукъаорэ сиӀ. 3 Сшыхэу слъэпкъ щыщхэм сишӀуагъэ якӀыщтыгъэмэ, Тхьэм ынае къысщифэзэ, Христос сызыпигъэкӀынэу сэ сшӀоигъощтгъэ. 4 А сшыхэр Израил лъэпкъыр ары. Ахэр ары ибынхэм афэдэу Тхьэм ыдагъэхэр. Ахэр ары ищытхъушхо зэригъэлъэгъугъэхэр. Тхьэм ежьымрэ ахэмрэ азыфагу зэзэгъыныгъэхэр дилъхьагъэх. Ахэр ары Тэурат хабзэр зэритыгъэхэр. Ахэри ары ежьыр зэрагъэлъэпӀэн фэе шӀыкӀэр зэригъэлъэгъугъэхэр. Ахэри ары ӀэхьышӀукӀэ къыгъэгугъагъэхэр. 5 Ахэр ары тятэжъышхохэм къатехъукӀыгъэ цӀыфхэр. ЦӀыфым фэдэу ежь Христоси ахэмэ алъэпкъ щыщ. Ежьыр ары зэкӀэмэ анахь инэу, мыкӀодыжьын щытхъушхор зиӀэ Тхьэр. Амин. 6 Ау Тхьэм игущыӀэхэр ымыгъэшъыпкъагъэхэу арэп сӀорэр. Сыда пӀомэ Израил лъэпкъым щыщ цӀыф пстэури арэп Израил цӀыф шъыпкъэхэу щытхэр. 7 Ибрахьимэ къытехъукӀыгъэ цӀыф пстэури арэп Ибрахьимэ ибын шъыпкъэхэу щытхэр. (Ау Тхьэм Ибрахьимэ къыриӀуагъ:) «Исхьакъ къытехъукӀыщт цӀыфхэр ары о уибын шъыпкъэхэкӀэ зэджэщтхэр». 8 Ащ къикӀырэр, Ибрахьимэ къытехъукӀыгъэ бын пстэури арэп Тхьэм ибынхэу щытхэр. Ау бынхэу Тхьэм Ибрахьимэ къызэригъэгугъагъэм тетэу, ащ къытехъукӀыгъэхэр ары Тхьэм Ибрахьимэ къытехъукӀыгъэ цӀыф шъыпкъэхэу ылъытэхэрэр. 9 Сыда пӀомэ Тхьэм Ибрахьимэ къызэригъэгугъагъэр мыры: «Згъэнэфэгъэ лъэхъанэм сыкъызыкӀожьыкӀэ, Сарэ къо къыфэхъущт». 10 Ащ нэмыкӀэу, Ревеккэ Исхьакъ иехэу къуитӀу къыфэхъунэу лъэрмыхьэ зэхъум, Ӏофыр зытетыгъэр ащ фэдагъ. 11,12 КӀалэхэр къэмыхъугъэхэу, шӀуи бзаджи амышӀагъэу, Тхьэм Ревеккэ къыриӀуагъ: «Нахьыжъыр нахьыкӀэм фэӀофтэбгэщт». Тхьэм арэущтэу зыфиӀуагъэр цӀыф горэ къызэрэхихырэмкӀэ ежь игухэлъ ыгъэцэкӀэныр ары. Арэущтэу цӀыфым Ӏофхэу ышӀагъэхэм ямылъытыгъэу, цӀыфэу зыфаер Тхьэм къыхехы, 13 игущыӀэ тхыгъэхэм арытэу Тхьэм зэриӀуагъэм фэдэу, «Якъубэ шӀу слъэгъугъэ, ау Исав сыуджэгъугъэ». 14 Джы сыд тӀона? Тхьэр мызафа? Хьау, ар хъухэщтэп. 15 Сыда пӀомэ Тхьэм пегъымбар Мусэ къыриӀуагъ: «ЦӀыф горэм сыгу езгъэгъунэу сыфаемэ, сыгу егъущт. Зыгорэм гукӀэгъу фэсшӀэнэу сыфаеми, гукӀэгъу фэсшӀыщт». 16 Арэущтэу Тхьэм цӀыф горэ къызэрэхихырэр зэпхыгъэр цӀыфыр зыфаер, е цӀыфым Ӏофхэу ышӀэхэрэр арэп, Тхьэм игукӀэгъуныгъэшху ары нахь а Ӏофыр зэпхыгъэр. 17 Сыда пӀомэ Тхьэм игущыӀэ тхыгъэхэм арыт, Тхьэм Мысырым ипачъыхьэ Фыраун къызэрэриӀуагъэр: «Мыр ары пачъыхьэу узфэзгъэуцугъэр цӀыфмэ дунэе пстэуми сцӀэ щагъэӀунэу силъэкӀыныгъэ къэозгъэгъэнэфэныр ары». 18 Арэущтэу Тхьэм цӀыф горэм гукӀэгъу къыфишӀынэу фаемэ, гукӀэгъу къыфешӀы, цӀыф горэ гуркъэ ыгъэхъунэу фаеми, гуркъэ егъэхъу.
Тхьэм игубжрэ игукӀэгъуныгъэрэ
19 Ащыгъум о къысэпӀонкӀи мэхъу: «Арэущтэу щытмэ, Тхьэм цӀыфхэр сыда зыкӀигъэмысэхэрэр? Сыда пӀомэ Тхьэм ыӀуагъэм пэуцун хэта зылъэкӀьццтыр?» 20 Ау, о цӀыф, о хэта ущыщ, Тхьэм уенэкъокъунэу? Хьакъушыкъум цӀыфэу ар зышӀыгъэм, «Сыд мыщ фэдэу сызкӀэпшӀыгъэр?» риӀона? 21 АнахьышӀу хьакъушыкъури къызэрыкӀо хьакъушыкъури къошынышӀэм а зы ятӀэм хишӀыкӀынэу фитба? 22 Ау Тхьэм игубж къыгъэнэфэнэуи илъэкӀыныгъэшхо цӀыфмэ аригъэшӀэнэуи фэягъэти, зыфэгубжырэ цӀыфхэу ыгъэкӀодынхэу щытыгъэхэм щыӀэгъэшхокӀэ ашъхьасыгъ. 23 Тхьэр ахэмэ зыфашъхьасыгъэр гукӀэгъу зыфишӀырэ цӀыфхэу щытхъушхо зиӀэ хъунхэу ыгъэпсыгъэхэм ежьым ищытхъушхо иинагъэ аригъэшӀэныр ары. 24 Ибынхэм ащыщ хъунхэу Тхьэр къызэджагъэхэр тэры тэ, джуртхэм, тимызакъоу нэмыкӀрэ лъэпкъхэми ащыщхэр. 25 Пегъымбар Осие итхылъ итэу, Тхьэм къызэриӀорэм фэдэу, «Слъэпкъ щымыщыгъэ цӀыфхэм 'сэ слъэпкъкӀэ' сяджэщт; шӀу сымылъэгъугъэ лъэпкъыми 'шӀу слъэгъурэ лъэпкъкӀэ' седжэщт. 26 ыкӀи «'Шъо слъэпкъэу шъущытэп', ыӀуи, Тхьэм зыщиӀогъэ чӀыпӀэм 'ЩыӀэныгъэ къэзытырэ Тхьэм ибынхэкӀэ' щяджэ щтых». 27 Пегъымбар Исайас Израил лъэпкъым ехьылӀагъэу къыӀуагъ: «Израил лъэпкъым ипчъагъэ хым ипшахъо фэдизми, ахэмэ ащыщхэу мыкӀодхэу Тхьэм къыгъэнэжьыщтхэр макӀэ ныӀэп. 28 Сыда пӀомэ псынкӀэу, зи къэмынэу Тхьэм мы дунаем ицӀыфхэм хьыкум атришӀыхьащт». 29 Пегъымбар Исайас ыпэкӀэ къызэриӀуагъэм фэдэу, «Зиусхьанэу Сэваоф бынхэр къытфимыгъэнагъэхэмэ, къалэхэу Содомрэ Гоморрэрэ тафэдэщтыгъ».
Израилрэ Христос ехьылӀэгъэ къэбарышӀумрэ
30 Джы сыд тӀона? Хымэ лъэпкъхэм шъыпкъагъэ зэряӀэщтым ыуж итхэу щымытыгъэхэ пэтми, шӀошъхъуныгъэ яӀэу зэрэщытыгъэхэм пае, Тхьэм ежьым ыдэжькӀэ ахэмэ шъыпкъагъэ яӀэу ылъытагъэх. 31 Ау Израил цӀыфхэу Тхьэм ыдэжькӀэ шъыпкъагъэ яӀэ зыгъэхъун хабзэм ыуж итыгъэхэм а хабзэр агъотыгъэп. 32 Сыд зыкӀамыгъотыгъэр? ШӀошъхъуныгъэм игъогу амыдэу, Ӏофэу ашӀагъэхэм ягъогукӀэ Тхьэм ыдэжькӀэ шъыпкъагъэ зэряӀэщтым ыуж итхэу щытыгъэхэти ары. ЦӀыфхэр зыгъэлъэпаорэ мыжъом елъэпэуагъэх. 33 ИгущыӀэ тхыгъэхэм арытэу Тхьэм къызэриӀорэм фэдэу, «ЦӀыфхэр зыгъэлъэпаорэ мыжъоу, мыжъошхоу цӀыфхэр чӀыгум тезыгъафэхэрэр, Сион зыцӀэ къалэм щэсэгъэтӀылъы. А мыжъошхомкӀэ шӀошъхъуныгъэ зиӀэр кӀэгъожьыщтэп».
Сшыхэр, сыгу зыкӀэхъопсырэри Тхьэм сызэрелъэӀу зэпытырэри сэ слъэпкъ Израил мыкӀодэу къыгъэнэжьыныр ары. 2 Агу етыгъэу Тхьэм зэрэфэлажьэхэрэмкӀэ сыряшыхьат, ау зэхэшӀыкӀыныгъэм тетхэу лажьэхэрэп. 3 Тхьэм ежьым ыдэжькӀэ цӀыфхэм шъыпкъагъэ яӀэу зэрилъытэрэ гъогур къагурымыӀоу, ежьхэм ягъогукӀэ Тхьэм ыдэжькӀэ шъыпкъагъэ зэряӀэщтым ыуж зэритыгъэхэм пае, Тхьэм ежьым ыдэжькӀэ шъыпкъагъэ яӀэу зэрилъытэрэ гъогур адагъэп. 4 Сыда пӀомэ Тэурат хабзэм игугъапӀэ Христос ары, Тхьэми хэти ХристоскӀэ шӀошъхъуныгъэ зиӀэм ежьым ыдэжькӀэ шъыпкъагъэ иӀэу елъытэ.
Тхьэм хэти мыкӀодэу къыгъэнэжьын ылъэкӀыщт
5 ЦӀыфым Тэурат хабзэм итхэр зэригъэцакӀэхэрэм пае, Тхьэм ежьым ыдэжькӀэ ащ шъыпкъагъэ иӀэу зэрилъы тэрэм ехьылӀагъэу пегъымбар Мусэ мырэущтэу ытхыгъ: «Тэурат хабзэм итхэр зыгъэцакӀэрэм Тэурат хабзэмкӀэ щыӀэныгъэ иӀэщт». 6 Ау цӀыфым шӀошъхъуныгъэ зэриӀэм пае, Тхьэм ежьым ыдэжькӀэ ащ шъыпкъагъэ иӀэу зэрилъытэрэм ехьылӀагъэу Тхьэм игущыӀэ тхыгъэхэм мырэущтэу арыт: «Хэта уашъом дэкӀоещтыр, угукӀэ умыӀо», (а гущыӀэхэм къарыкӀырэр уашъом дэкӀоеныр ары, Христосэу цӀыфхэр мыкӀодхэу къэзыгъэнэжьырэр къырищэхыным пае). 7 Е «Хэта чӀылъэм икуупӀэ ехыщтыр?» умыӀо, (Христос лӀагъэхэм къахищэным пае, къыдищэежьыныр ары а гущыӀэхэм къарыкӀырэр). 8 Ау Тхьэм игущыӀэ тхыгъэхэм сыда арытыр? «Тхьэм игущыӀэхэр къыппэгъунэгъух, ужи дэлъых, угуи илъых». А гущыӀэхэу шӀошъхъуныгъэм ехьылӀагъэхэр ары шъузэдгъэӀухэрэр. 9 УжэкӀэ цӀыфхэм апашъхьэ Исус Зиусхьанэу зэрэщытыр къыщыпӀомэ, Тхьэм ар лӀагъэхэм къызэрахигъэтэджыкӀыжьыгъэмкӀи угукӀэ шӀошъхъуныгъэ уиӀэмэ, умыкӀодэу Тхьэм укъигъэнэжьыщт. 10 Сыда пӀомэ цӀыфэу зыгукӀэ шӀошъхъуныгъэ зиӀэм Тхьэм ежьым ыдэжькӀэ шъыпкъагъэ иӀэу ылъытэщт, цӀыфмэ апашъхьэ Исус Зиусхьанэу зэрэщытыр къыщызыӀорэри мыкӀодэу Тхьэм къыгъэнэжьыщт. 11 Тхьэм игущыӀэ тхыгъэхэм Христос ехьылӀагъэу зэрарытым фэдэу, «Хэти ежьымкӀэ шӀошъхъуныгъэ зиӀэр кӀэгъожьыщтэп». 12 Джуртми урымми азыфагу зэхэдзыныгъэ зи дэлъэп. А зы Зиусхьаныр зэкӀэми я Зиусхьан, ежьым елъэӀурэ пстэуми шӀу къафешӀэ. 13 Сыда пӀомэ «Хэти къыдэӀэпыӀэнэу ежььым елъэӀурэр мыкӀодэу Зиусхьаным къыгъэнэжьыщт». 14 Ау ЗиусхьанымкӀэ шӀошъхъуныгъэ ямыӀэмэ, сыдэущтэу елъэӀунха? Ащ икъэбари зэхамыхыгъэмэ, сыдэущтэу шӀошъхъуныгъэ яӀэ хъущта? Икъэбари зыми аримыгъэӀумэ, сыдэущтэу зэхахына? 15 Тхьэми цӀыфхэр къы мыгъакӀохэмэ, сыдэущтэу ахэмэ Христос ехьылӀэгъэ къэбарышӀур агъэӀуна? Тхьэм игущыӀэ тхыгъэхэм зэрарытым фэдэу, «КъэбарышӀур зыгъэӀурэ цӀыфхэм алъакъохэр сыдэу дахэха!» 16 Ау щытми, къэбарышӀум едэӀунхэу цӀыф пстэуми адагъэп. Сыда пӀомэ пегъымбар Исайас мырэущтэу къыӀуагъ: «Зиусхьан, къэбарышӀоу дгъэӀугъэр хэта зышӀошъ хъугъэр?» 17 Арэущтэу къэбарышӀур зэрэзэхахырэмкӀэ цӀыфхэм шӀошъхъуныгъэ яӀэ мэхъу, зыгорэм Тхьэм игущыӀэхэр зэригъэӀухэрэмкӀи а къэбарышӀур зэхахы. 18 Ау сэ сэупчӀэ: КъэбарышӀур зэхамыхыгъэу ара? Хьау, бэу зэхахыгъ, сыда пӀомэ Тхьэм игущыӀэ тхыгъэхэм зэрарытым фэдэу, «КъэбарышӀур зыгъэӀугъэмэ амакъэ чӀылъэм тыдэкӀи цӀыфхэм щызэхахыгъ, ягущыӀэхэри чӀылъэм ыкъуапэхэм анэсыгъэх». 19 Джыри зэ сэ сэупчӀэ: Израил цӀыфхэм къэбарышӀур къагурымыӀуагъэу ара? Хьау, бэу къагурыӀуагъ, сыда пӀомэ Тхьэм ыцӀэкӀэ пегъымбар Мусэ апэрэу къыӀуагъ: «Зы лъэпкъ горэм щымыщхэм шъуязгъэшъугъощт, зэхэшӀыкӀыныгъэ зимыӀэ лъэпкъыми шъуфэзгъэгубжыщт». 20 ЕтӀанэ Тхьэм ыцӀэкӀэ пегъымбар Исайас гушхоныгъэкӀэ къыӀуагъ: «Къыслъымыхъугъэ цӀыфхэм сыкъагъотыгъ, къыскӀэмыупчӀагъэхэми зязгъэлъэгъугъ». 21 Ау Израил лъэпкъым ехьылӀагъэу мырэущтэу къеӀо: «КъысэмыдэӀурэ лъэпкъ къаигъэр къысэшӀужьыным пае, мэфэ реным сӀэхэр фэсщэигъэх».
Тхьэм Израил лъэпкъым гукӀэгъу къызэрыфишӀырэр
1 ЕтӀанэ сэупчӀэ: Тхьэр ежь ылъэпкъ фэмыежьэу хъугъа? Хьау, ар хъухэщтэп. Сыда пӀомэ сэри Израил лъэпкъым сыщыщ, Ибрахьимэ къытехъукӀыгъэ цӀыфхэм сащыщ, Вениамин иунэгъо лъэпкъ сыщыщ. 2 Шъыпкъэ, Тхьэм лъэпкъэу къыхихыгъэм фэмыежьэу хъугъэу щытэп. Тхьэм игущыӀэ тхыгъэхэм арытэу, пегъымбар Иляс икъэбар зэрыт чӀыпӀэм ыдэжь итыр шъошӀэба? Иляс Израил цӀыфхэм яхьылӀагъэу Тхьэм ыпашъхьэ мырэущтэу ыӀуи щытхьаусхагъ: 3 «3иусхьан, уипегъэмбархэр аукӀыгъэх, уикъурмэншӀыпӀэхэри зэхакъутагъэх. Сэ сизакъоу сыкъэнагъ, спси ыуж итых». 4 Ау Тхьэм Иляс сыда къыриӀожьыгъэр? «Тхьэ нэпцӀэу Ваал ыпашъхьэ лъэгонджэмышъхьэкӀэ мытӀысыгъэхэу цӀыф минибл къызфэзгъэнагъ». 5 Джыри арэущтэу щыт. Тхьэм ынэшӀу щыфэныгъэкӀэ ежьым къыхихыгъэхэу, цӀыф куп къэнагъэхэу щыӀэх. 6 Тхьэм ахэр къызкӀыхихыгъэхэр ынэшӀу къызэращифэрэр ары. Ахэмэ ӀофышӀухэу ашӀагъэхэм яӀоф ащ хэлъэп. Армырмэ Тхьэм ынэшӀу щыфэныгъэ нэшӀу щыфэныгъэ хъужьрэп. 7 Сыд етӀанэ? Израил лъэпкъыр зылъыхъугъэр агъотыгъэп, ау Тхьэм къыхихыгъэ цӀыф купым агъотыгъ. Къэнагъэхэр гуркъэхэу хъугъэх. 8 Тхьэм игущыӀэ тхыгъэхэм зэрарытым фэдэу, «Тхьэм ахэмэ агухэм гулъытэ ямыӀэу ыгъэхъугъэх. Анэхэми амылъэгъоу, атхьакӀумэхэми зэхамыхэу ыгъэхъугъэх, непэрэ мафэм нэсыфэ». 9 Пачъыхьэ Даути къыӀуагъ: «Ахэмэ яешхэешъошхо лъахъи, хъытыуи, ахэр зыгъэлъэпаорэ мыжъуи афэрэхъу. Тхьэм яфэшъуашэ арерэгъэпщыныжь. 10 Ахэмэ амылъэгъушъунэу Тхьэм анэхэр ерэгъэушӀункӀых, егъашӀэми атхыцӀэхэр ерэуфэх».
Хымэ лъэпкъхэр мыкӀодхэу, Тхьэм къызэригъэнэжьхэрэр
11 Арышъ сэупчӀэ: джуртхэр зэлъэпаохэм, тефэпагъэха? Хьау, ар хъухэщтэп. Ау джуртхэр гъогу занкӀэм зэрэтекӀыгъэхэм пае, нэмыкӀрэ лъэпкъхэр мыкӀодхэу къэнэжьынхэу Тхьэм гъогу афишӀыгъ, джуртхэр ахэмэ аригъэшъугъунхэм пае. 12 Джуртхэр гъогу занкӀэм зэрэтекӀыгъэхэм пае, дунаем тет нэмыкГрэ цӀыфхэм шӀубэ агъотыгъ, джуртхэми яӀоф къызэрадэмыхъугъэм пае, нэмыкӀрэ лъэпкъхэм шӀубэ агъотыгъ. Арышъ, джуртхэу мыкӀодхэу Тхьэм къыгъэнэжьыщтхэм япчъагъэ зикъукӀэ, сыдэу шӀуба ащ къыхэкӀыщтыр! 13 Джы шъо, хымэ лъэпкъхэм, сыкъыжъудэгущыӀэ: Шъо хымэ лъэпкъхэм шъуиапостолэу сызэрэхъугъэм пае, сиӀоф сэгъэлъапӀэ. 14 СиӀоф зыфэзгъэлъапӀэрэр сэ слъэпкъ щыщхэр шъо хымэ лъэпкъхэм шъуязгъэшъугъунышъ, ахэмэ ащыщхэу зы куп мыкӀодхэу Тхьэм къыгъэнэжьынхэу ары. 15 Сыда пӀомэ Тхьэм джуртхэр ымыдэхэ зэхъум, дунаем тет нэмыкӀ цӀыфхэр ежьым ешӀужьыгъэхэу ыгъэхъугъэх. Ащыгъум Тхьэм джуртхэр джыри зэ зидэжьхэкӀэ, сыд фэдэщт? Ар лӀагъэхэм ахэр къызэрахэтэджыкӀыжьхэрэм фэдэщт. 16 Тхьацум иапэрэ Ӏахьэ Тхьэм ратымэ, тхьацур зэкӀэри Тхьэм ий. Чъыгым ылъапсэ Тхьэм иемэ, чъыг къутамэхэри Тхьэм иех. 17 Хатэм дэт зейтун чъыгым икъутамэхэм ащыщхэу заулэ Тхьэм гуикӀыкӀи, о, шъофым ит зейтун чъыг къутамэм фэдэр адрэ къутамэхэм ачӀыпӀэ угуигъэуцуагъ. Хатэм дэт зейтун чъыгым икъутамэхэу къэнагъэхэм урягъусэу а чъыгым ылъапсэми ипсыми яшӀуагъэ къыуагъэкӀы. 18 Арышъ, Тхьэм а чъыгым гуикӀыкӀыгъэ къутамэхэм апашъхьэ узщыщымытхъужь. Узщытхъужьмэ, мыр зыщымыгъэгъупш: О уишӀуагъэ лъапсэм ебгъэкӀы рэп, лъапсэм ишӀуагъэ о къыуегъэкӀы нахь. 19 Ащыгъум о къысэпӀонкӀи мэхъу: «Чъыгым сэ сыгуигъэуцонэу а къутамэхэр Тхьэм чъыгым гуикӀыкӀыгъэх». 20 Шъыпкъэ, ахэмэ шӀошъхъуныгъэ зэрямыӀэм пае, Тхьэм чъыгым гуикӀыкӀыгъэх, ау о шӀошъхъуныгъэ зэрэуиӀэм пае, пчӀыпӀэ укъенэ. Арышъ, зымыгъэпаг, щынагъуи зигъаӀ. 21 Сыда пӀомэ хатэм дэт чъыгым икъутамэхэм Тхьэр ашъхьамысыгъэмэ, о къыпшъхьасыщта? 22 Мары Тхьэм ишӀугъэрэ ипхъэшагъэрэ: игъогу текӀыгъэхэм афэпхъашэу щыт, ау о Тхьэм ишӀугъэ зыхэмыгъэнмэ, ишӀугъэ къыплъигъэсыщт. Армырмэ, ори а чъыгым угуикӀыкӀыщт. 23 Джуртхэми яшӀошъмыхъуныгъэ ханэжьмэ, Тхьэм ахэри чъыгым гуигъэуцожьыщтых, сыда пӀомэ, Тхьэм ахэр гуигъэуцожьынхэ ылъэкӀыщт. 24 Шъо, (хымэ лъэпкъхэр), шъофым ит зейтун чъыгым Тхьэм шъугуикӀыкӀи, хатэм дэт зейтун чъыгым шъугуигъэуцожьыгъ. Ащыгъум хатэм дэт зейтун чъыгым щыщ къутамэхэр, (джуртхэр ары), ежьхэм ячъыг гуигъэуцожьынхэу ТхьэмкӀэ нахь къинына?
Тхьэм Израил лъэпкъым ежь ыдэжь къызэригъэгъэзэжьырэр
25 Сшыхэр, Ӏушыщэу шъузышӀомышӀыжьыным пае, мы шъэфыр шъумышӀэу шъущытынэу сыфаеп. Хымэ лъэпкъхэм ащыщхэу Тхьэм игъогу техьащтхэм япчъагъэ екъуфэ, Израил лъэпкъым щыщ купым гуркъагъэ яӀэу Тхьэм ыгъэхъугъэх. 26 Арэущтэу Израил лъэпкъыр зэкӀэ мыкӀодэу Тхьэм къыгъэнэжьыщт, игущыӀэ тхыгъэхэм зэрарытым фэдэу, «ЦӀыфхэр мыкӀодхэу къэзыгъэнэжьыщтыр Сион къалэм къыдэкӀыщт. Ар къызыкӀокӀэ, бзэджагъэр Якъубэ ылъэпкъ хигъэкӀодыкӀыжьыщт». 27 (ЕтӀанэ Тхьэм ыГуагъ:) «Мы зэзэгъыныгъэр ары сэррэ ахэмрэ тазыфагу дэслъхьащтыр, япсэкӀодхэр затесхыжьхэкӀи». 28 Джуртхэм къэбарышӀур зэрамыдагъэм пае, шъо шъуишӀуагъэ а Ӏофым къыхэкӀэу Тхьэм ипый хъугъэх. Ау Тхьэм джуртхэр къызэрэхихыгъэхэм пае, ахэр шӀу елъэгъух, ятэжъышхохэм яхьатыркӀэ. 29 Сыда пӀомэ Тхьэм цӀыфхэм тынхэр заритхэкӀэ, ибынхэм ащыщ хъунхэуи зяджэкӀэ, арэущтэу зэришӀагъэм фыкӀэгъожьырэп. 30 Шъо (хымэ лъэпкъхэр), Тхьэм шъуедэӀущтыгъэп, ау Израил лъэпкъыр Тхьэм зэремыдэӀугъэм пае, джы Тхьэм шъо гукӀэгъу къышъуфишӀыгъ. 31 Ащ фэдэу джы джуртхэр Тхьэм едэӀухэрэп, шъо гукӀэгъоу къышъуфишӀыгъэмкӀэ Тхьэм ахэми гукӀэгъу къафишӀыным пае. 32 Сыда пӀомэ Тхьэм цӀыф пстэури мыдэӀоныгъэм хэтхэу къыгъэнагъэх, ахэмэ зэкӀэмэ гукӀэгъу къафишӀыным пае. 33 Тхьэм ишӀугъэшхо, изэхэшӀыкӀыныгъэшхо, ишӀэныгъэшхо сыдэу инха! Игухэлъышхохэр зыми зэхифын ылъэкӀыщтэп. ИӀофхэм аужы зи ихьан ылъэкӀыщтэп. 34 «Хэта Зиусхьаным ыгу илъыр зышӀэрэр? Хэта ащ упчӀэгъу фэхъугъэр? 35 Хэта Тхьэм зыгорэ езытыгъэр Тхьэм ащ тын къыритыжьынэу?» 36 Ӏоф пстэури Тхьэм ыӀэ къикӀыгъ. ИлъэкӀыныгъэкӀи ищытхъушхо паий Ӏоф пстэури щыӀ. МыкӀодыжьын щытхъушхор Тхьэм ий. Амин.
Христос тыгухэм арылъэу тызэрэзекӀон фаер
1 Арышъ, Тхьэм гукӀэгъу къызэрэтфишӀыгъэм пае, инэу сышъолъэӀу: Тхьэм ыгу зэӀурэ къурмэныпхъэ псаоу, къурмэныпхъэ лъапӀэм фэдэу зешъут. Ары гурэ псэрэкӀэ Тхьэр зэрэжъугъэлъэпӀэн фаер. 2 Мы лъэхъанэм ихабзэхэмэ шъукъыращэкӀэу шъущымыт. Ау Тхьэм шъугухэм арылъхэр зэрерэхъокӀых, шэнышӀу шъуиӀэным пае. Арэущтэу шъушӀымэ, Тхьэр зыфаер къыжъугурыӀощт, дэгъур зыфэдэри, Тхьэм ыгу зэӀурэри, щыкӀагъэ зимыӀэ икъугъэр зыфэдэри къыжъугурыӀощт. 3 Тхьэм ынэшӀу сэ къызэрэсщифагъэм пае, шъуащыщэу хэти есэӀо: узышӀомышӀыжь ыкӀи зымыгъэин, шӀошъхъуныгъэу Тхьэм о къыпфигъэшъошагъэм ишапхъэ тетэуи гурыӀоныгъэкӀэ зэплъыжь. 4 Сыда пӀомэ тпкъы щыщхэр бэ, ау ахэмэ зэкӀэмэ Ӏофхэу ашӀэхэрэр зэп. 5 Джащ фэдэу тэри бэ тэхъу пэтми, Христос тыгухэм зэрарылъым пае, зы зыпкъы закъо тэхъу, хэт пэпчъи адрэхэм ащыщ. 6 Тхьэм ынэшӀу хэти къызэрэщифагъэм елъытыгъэу лъэкӀыныгъэ зэфэшъхьафхэр тиӀэх. Тхьэм игущыӀэхэр зыгорэм ыгу къьфилъхьэхэу, ахэр къыӀонхэу лъэкӀыныгъэ къыритыгъэмэ, а цӀыфым шӀошъхъуныгъэу иӀэм тетэу Тхьэм игущыӀэхэр къерэӀох. 7 ЦӀыфхэм ишӀуагъэ аригъэкӀынэу Тхьэм зыгорэм лъэкӀыныгъэ къыритыгъэмэ, а цӀыфым ахэмэ ишӀуагъэ арерэгъэкӀ. ЦӀыфхэм Ӏофхэр аригъэшӀэнхэу Тхьэм зыгорэм лъэкӀыныгъэ къыритыгъэмэ, а цӀыфым Ӏофхэр арерэгъашӀэх. 8 ЦӀыфхэр ыгъэгушхонхэу Тхьэм зыгорэм лъэкӀыныгъэ къыритыгъэмэ, ерэгъэгушхох. ИӀэр цӀыфхэм адигощынэу Тхьэм зыгорэм лъэкӀыныгъэ къыритыгъэмэ, игуапэу адерэгощ. Тхьэмэтэнэу Тхьэм зыгорэм лъэкӀыныгъэ къыритыгъэмэ, егугъоу орэтхьамат. ЦӀыфхэм гукӀэгъу афишӀынэу Тхьэм зыгорэм лъэкӀыныгъэ къыритыгъэмэ, гушӀуагъокӀэ гукӀэгъу аферэшӀ.
ШӀулъэгъуныгъэр
9 ШъуишӀулъэгъуныгъэ шъыпкъэу орэхъу. Бзэджагъэм зыщышъудзый, дэгъугъэм ыуж шъуит. 10 Зэкъ6 шхэм фэдэу шӀу шъузэрэлъэгъу; шъушъхьэ зэрэшъулъытэрэм нахьи, адрэхэр нахь шъулъытэх. 11 Гуетыныгъэшхо зижъугъэӀэ зэпыт, Зиусхьаным шъуфэлэжьэным гурэ псэрэкӀэ зешъут. 12 Ӏофхэу шъузщыгугъыхэу, шъузпаплъэхэрэм шъуакӀэгушӀу. Гузэжъогъу шъухафэмэ, теубытэныгъэ зижъугъаӀ. Тхьэм шъуелъэӀу зэпыт. 13 Тхьэм ицӀыф лъапӀэхэм щыкӀагъэ яӀэмэ, шъуадэӀэпыӀ. ХьакӀэр жъугъэлъэпӀэными шъупылъ. 14 Къин шъозыгъэщэчхэрэм Тхьэм ынэшӀу къащифэнэу шъуелъэӀу. Ары, сэӀо, ахэмэ шъуямыбгэу, Тхьэм ынэшӀу къащифэнэу шъуелъэӀу. 15 ГушӀохэрэм шъуадэгушӀу, гъыхэрэми шъуадэгъ. 16 ШъуигупшысакӀэ зы орэ хъу. Зышъумыгъэпаг, цӀыф цӀыкӀухэми ныбджэгъуныгъэ адэшъушӀ. ШъузышӀомышӀыжь. 17 Зыгорэм ибзэджагъэ бзэджагъэкӀэ шъупэмыгъокӀыжь. ЦӀыф пстэуми шӀоу алъытэрэр зэрэшъушӀэным ыуж шъуит. 18 Амал иӀэмэ, шъулъэкӀыщтым фэдизкӀэ цӀыф пстэуми шъузэрагурыӀоным ыуж шъуит. 19 СилъапӀэхэр, зыгорэм бзэджагъэ къышъуихмэ, бзэджагъэ ешъумыхыжь, ау Тхьэм цӀыфым ибзэджагъэ рерэгъэпщыныжь, сыда пӀомэ Зиусхьаным къызэриӀорэр игущыӀэ тхыгъэхэм арыт: «ЦӀыфхэм ябзэджагъэ языгъэпщыныжьыщтыр сэры, яфэшъуашэ язгъэгъотыжьыщт». 20 Арэущтэу «Уипый мэлакӀэ лӀэмэ, гъашхэ, псыфалӀэ лӀэмэ, егъашъу; сыда пӀомэ арэущтэу зыпшӀырэм, шӀомыкӀ плъыгъэхэр ышъхьэ теплъхьащтых». 21 Бзэджагъэр зыптемыгъакӀоу, шӀушӀэнымкӀэ бзэджагъэм текӀу.
Тетыгъо зиӀэхэм шъуафэӀорышӀ
1 Хэти тетыгъо зиӀэхэм афэрэӀорышӀ. Сыда пӀомэ Тхьэм ымыдэмэ, зыми тетыгъо иӀэ хъущтэп. Тетыгъо зиӀэхэу щыӀэхэр зыгъэнэфагъэр Тхьэр ары. 2 Арышъ, тетыгъо зиӀэхэм апэуцурэ цӀыфыр Тхьэм ыгъэнэфэгъэ цӀыфхэр ары зыпэуцухэрэр. Арэущтэу зышӀэхэрэм мысагъэ зылъагъэсыжьы. 3 Сыда пӀомэ шӀугъэ зышӀэхэрэр тетыгъо зиӀэхэм ащыщынэнхэу ящыкӀагъэп, бзэджагъэ зышӀэхэрэр ары ахэмэ ащыщынэн фаехэр. Тетыгъо зиӀэм ущымыщынэнэу уфая? ШӀугъэ шӀи, ар къыпщытхъужьыщт. 4 Сыда пӀомэ тетыгъо зиӀэм ишӀуагъэ къыуигъэкӀынэу Тхьэм фэлажьэ. Ау бзэджагъэ пшӀэмэ, ущыщынэн фае, сыда пӀомэ тетыгъо зиӀэм сэшхор хьаулыеу ыӀыгъырэп. БзэджашӀэхэм яфэшъошэ къин атырилъхьанэу Тхьэм фэлажьэ. 5 Арышъ, тетыгъо зиӀэхэм уафэӀорышӀэн зыкӀыфаер уифэшъошэ къиныр Тхьэм къыптырилъхьанымкӀэ узэрэщыщынэрэ закъор арэп, ахэмэ уафэӀорышӀэныр зэрэтэрэзыр угукӀэ зэрэпшӀэрэри ары. 6 Ары хьакъулахь ахъщэр ахэмэ зыкӀяшъутырэр; сыда пӀомэ тетыгъо зиӀэхэр а Ӏофым пылъхэ зыхъукӀэ, Тхьэм фэлажьэх. 7 Арышъ, цӀыф пстэуми яфэшъуашэ яшъутыжь. Хьакъулахьэу цӀыфхэм атыралъхьэрэр арыми, ар яшъутыжь; хьакъулахьэу хьапщыпхэм атыралъхьэрэр арыми, ари яшъутыжь; гъэлъэпӀэныр арыми, гъэлъэпӀэн яшъухыжь, лъытэныгъэр арыми, лъытэныгъэ афэшъушӀыжь.
Зэкъошхэм фэдэу шӀу шъузэрэлъэгъу
8 ШӀу шъузэрэлъэгъуным ичӀыфэ нэмыкӀэу, зыми ичӀыфэ зытешъумыгъэлъ; сыда пӀомэ зигъунэгъу шӀу зылъэгъурэм Тэурат хабзэм итхэр ыгъэцэкӀагъэх. 9 Мы унашъохэу «Зинэ умышӀэ», «ЦӀыф умыукӀы», «Умытыгъу», «НэмыкӀ цӀыфхэм пцӀы атемылъхь», «Хъопсэныгъэ мыхъун угу имыгъэлъ» зыфаӀохэрэмрэ адрэ унэшъо пстэумрэ зэкӀэзыубытэрэр мы унашъор ары: «О пшъхьэ шӀу зэрэплъэгъурэм фэдэу, уигъунэгъуи шӀу лъэгъу». 10 Зигъунэгъу шӀу зылъэгъурэм иягъэ ригъэкӀырэп. Арышъ, шӀулъэгъуныгъэ уиӀэмэ, хабзэм итхэр бгъэцэкӀагъэхэу мэхъу.
Христос дунаем къызыкӀожьыщт мафэр къэблэгъагъ
11 Арышъ, арэущтэу шъузекӀу. Уахътэр къызнэсыгъэр шъошӀэ, шъукъызыущын фае сыхьатыр къэсыгъ. Сыда пӀомэ апэу шӀошъхъуныгъэ тиӀэ зыхъугъэ мафэм нахьи, тымыкӀодэу Тхьэм тыкъызигъэнэжьыщт мафэр джы нахь къытпэблагъэ хъугъэ. 12 Чэщыр хэкӀотагъ, мафэри къэблэгъагъ. Арышъ, шӀункӀыгъэм иӀоф бзаджэхэр хэтэ жъугъэнэжьых, нэфынэм иӀашэхэри къэтэжъугъаштэх. 13 Мафэм инэфынэ щыпсэурэ цӀыфхэм афэдэу хабзэм тетэу тыжъугъэзекӀу; шъхьарытӀупщэу ешхэешъошхомрэ ешъонымрэ орэмыхъу, зинэ шӀэныр, мыхъомышӀэ псэукӀэр, зэщыхьаныр, шъугъоныр къэрэмыхъух. 14 Ау Зиусхьанэу Исус Христос шъуишъуашэ фэдэу орэхъу, шъуипсэкӀодышӀэ шэныжъ ихъопсэныгъэ мыхъунхэми шъуафэмыӀорышӀ.
Шъушы шъумыгъэмысэ
1 ШӀошъхъуныгъэ макӀэ зиӀэр пыдзы шъумышӀы, ишӀошӀхэмкӀэ шъуемынэкъокъоу. 2 Зы нэбгырэм сыд щыщи ышхынэу зэрэфитымкӀэ шӀошъхъуныгъэ иӀ, ау шӀошъхъуныгъэ макӀэ зиӀэм хатэм къыдакӀэхэрэм анэмыкӀ ышхыхэрэп. 3 Шхэрэм мышхэрэр зэримыпэсы хъущтэп. Мышхэрэми шхэрэр ыгъэмысэ хъущтэп, сыда пӀомэ Тхьэм а цӀыфыри ыдагъ. 40 хэта ущыщ, нэмыкӀ зыгорэм фэлажьэрэр бгъэмысэнэу? Ар гъогу тэрэзым тетми, темытми, ежь и Зиусхьан иӀофба? Ари тетыщт, сыда пӀомэ Тхьэм тыригъэтын ылъэкГыщт. 5 Зы цӀыфым мафэ горэ нахь егъэлъапӀэ, адрэ цӀыфми мафэхэр зэфэдэхэу елъытэх. Хэти ежь ыгукӀэ зэрэтеубытагъэм тетэу зекӀон фае. 6 Мафэ горэ зыгъэлъапӀэрэм Зиусхьаным лъытэныгъэ фишӀынэу а мафэр егъэлъапӀэ. ЗымыгъэлъапӀэрэми Зиусхьаным лъытэныгъэ фишӀынэу арэущтэу ешӀы. Сыд щыщи зышхырэми Зиусхьаным лъытэныгъэ фишӀынэу ешхы, сыда пӀомэ ышхырэм пае Тхьэм щытхъу фешӀы. Мышхэрэми Зиусхьаным лъытэныгъэ фишӀынэу арэущтэу ешӀы, ащи Тхьэм щытхъу фешӀы. 7 ЦӀыф зи ежь ышъхьэ закъо пае псэурэп. Джащ фэдэу, цӀыф зи ежь ышъхьэ закъо пае лӀэрэп. 8 Тыпсэуми, Зиусхьаным тыфэпсэу, тылӀэми Зиусхьаным тыфэлӀэ. Арышъ, тыпсэуми, тылӀэми, Зиусхьаным тырий. 9 Христоси лӀи, лӀагъэхэм къахэтэджыкӀыжьи, псэужьыгъ. Зыфэпсэужьыгъэр псэухэмрэ лӀагъэхэмрэ я Зиусхьанэу хъуныр ары. 10 О пшы сыда зыкӀэбгъэмысэрэр? Е о пшы сыд пае зэмыпэсыра? Тэ пстэури Тхьэм ихьыкум тӀысыпӀэ лъапӀэ ыпашъхьэ тиуцон фае. 11 Сыда пӀомэ Тхьэм игущыӀэ тхыгъэхэм арыт: «Сэ сыпсау, къеӀо Зиусхьаным, сапашъхьи цӀыф пстэуми алъэгуанджэхэр щауфэщтых. Сыдрэ бзэгуми сызэрэТхьэр къыӀощт». 12 Арэущтэу тэ пстэури Тхьэм ыпашъхьэ тихьанышъ, ащ пэгъокӀ гущыӀэ еттын фае.
Шъо шъуилажьэкӀэ шъушы псэкӀод ерэмышӀ
13 Арышъ, тэ тызэрэгъэмысэн фаеп. Ау зыгъэлъэпаорэ мыжъо, е псэкӀодшӀэным фыдэзыхьыхырэ Ӏоф горэ шъушы игъогу тешъумылъхьанэу тешъуубытэн фае. 14 Зиусхьанэу Исус сыгу зэрилъым пае, зы шхын горэ зэрэмыхьэрамыр сэшӀэ, сицыхьи телъ. Ау зыгорэм хьэрамэу елъытэмэ, ежьымкӀэ хьэрамэу мэхъу. 15 О шхынэу пшхырэм пае пшы ыгу къебгъаомэ, шӀулъэгъуныгъэм тетэу узекӀожьрэп. О шхынэу пшхырэмкӀэ пшэу Христос зыфэлӀагъэр умыгъэкӀоды. 16 Шъо дэгъоу шъулъытэрэр цӀыфхэм дэеу алъытэнэу орэмыхъу. 17 Сыда пӀомэ Тхьэм и Тетыгъошхо иӀофхэр зэхьылӀагъэхэр шхынымрэ ешъонымрэ арэп, шъыпкъагъэр, гупсэфыныгъэр, Тхьэм Ыпсэ ЛъапӀэ ыдэжь къикӀырэ гушӀуагъор ары нахь. 18 ЦӀыфэу Христос арэущтэу фэлажьэрэм Тхьэм ыгу еӀу, цӀыфхэми ар ягуапэ. 19 Арышъ, зэзэгъыныгъэ къэзыхьырэ Ӏофхэми, гурэ псэрэкӀэ нахь лъэкӀыныгъэ зэрыдгъотырэ Ӏофхэми ауж тижъугъэт. 20 Шхыным пае Тхьэм иӀоф умыгъэкӀоды. Шхын пстэури хьалэл, ау шхынэу о пшхырэмкӀэ зыгорэм игъогу зыгъэлъэпаорэ мыжъо теплъхьамэ, псэкӀод мэхъу. 21 Лы умышхынри, сэнэпс уемышъонри, о пшы игъогу зыгъэлъэпаорэ мыжъо тезылъхьэрэ Ӏоф упымылъынри, е псэкӀодшӀэным фыдэзыхьыхырэ Ӏофым упымылъынри шӀу. Ащ фэдэу о пшы ымылъэкӀыжьэу зышӀырэ Ӏофым упымылъынри шӀу. 22 Мы Ӏофхэм яхьылӀагъэу шӀошъхъуныгъэу уиӀэр Тхьэмрэ оррэ шъуазыфагу дэлъэу орэхъу. Шхынэу ышхырэм пае зызымыгъэмысэжьрэр сыхьатмафэ ежьагъ. 23 Ау шхынэу ышхырэр зэрэхьалэлымкӀэ гуцафэ ышӀэу шхэрэм шӀошъхъуныгъэ имыӀэу зэрэшхэрэм пае, Тхьэм егъэмысэ, сыда пӀомэ шӀошъхъуныгъэ тимыӀэу сыд щыщэу тшӀэрэр псэкӀод мэхъу.
Паул Тхьэм щытхъушхо зэрэфишӀырэр
24 Сэ сикъэбарышӀоу, Исус Христос ехьылӀэгъэ къэбарышӀоу згъэӀурэм тетэу, къэбарэу мыухыжьын лъэхъанэхэм къащегъэжьагъэу Тхьэм шъэфэу къыгъэнагъэу, ау джы къыгъэнэфагъэм тетэу Тхьэм шъугухэр ыгъэпытэнхэ ылъэкӀыщт. 25 Джы Тхьэу мыкӀодыжьыщтым иунашъокӀэ пегъымбархэм атхыгъэхэм а къэбарыр къагъэнэфагъ, Тхьэм фэлажьэхэрэм лъэпкъ пстэуми ТхьэмкӀэ шӀошъхъуныгъэ яӀэ хъунышъ, ежьым едэӀунхэм пае, а къэбарыр арагъэӀугъ. 26 ЗэхэшӀыкӀыныгъэшхо зиӀэ Тхьэ закъом Исус Христос ышӀэгъэ Ӏофхэм пае щытхъушхор ий. Амин.
Тэ тшъхьэ изакъо арэп, тигъунэгъуи ары тишӀуагъэ зэдгъэкӀын фаер
1 Тэ шӀошъхъуныгъэшхо зиӀэхэр тишӀуагъэ ыуж тимытэу, шӀошъхъуныгъэ макӀэ зиӀэхэм яхьылъэхэмкӀэ ӀэпыӀэгъу тафэхъун фае. 2 Тэ тщыщэу хэти игъунэгъу шӀу ригъэгъотызэ ыгъэрэзэн фае, гурэ псэрэкӀи нахь лъэкӀыныгъэ ригъэгъотын фае. 3 Сыда пӀомэ ежь Христоси ежь ишӀуагъэ зэригъэкӀыжьыгъэп, ау Тхьэм игущыӀэ тхыгъэхэм зэрарытым фэдэу, «О си Тхьэ, къыохъоныгъэх, ау къаӀуагъэхэр сэ къыстефагъэх». 4 Сыда пӀомэ Тхьэм игущыӀэ тхыгъэхэм арыт пстэури зыфатхыгъэр шъыпкъагъэр тагъэшӀэныр ары. Арэущтэу Тхьэм игущыӀэ тхыгъэхэм теубытэныгъэрэ гушхоныгъэрэ тиӀэ агъэхъузэ, Тхьэм ӀэхьышӀур къызэрэтлъигъэсыщтым тыщагъэгугъы. 5 Теубытэныгъэрэ гушхоныгъэрэ къытэзытырэ Тхьэм зы гупшысакӀэ шъуиӀэу, Христос Исус игъогу шъурыкӀоу шъуерэгъэпсэу. 6 Арэущтэу Тхьэу ти Зиусхьанэу Исус Христос Ятэ зыгузыпсэу шъужэ къыдэкӀызэ щытхъу фэшъушӀыщт. 7 Арэущтэу шъо Христос шъузэридагъэм фэдэу, шъори зым зыр ыдэн фае, цӀыфхэм Тхьэм ищытхъу ашӀыным пае. 8 Сыда пӀомэ сэ сэӀо, джуртхэм ишӀуагъэ аригъэкӀынэу Исус Христос къэкӀуагъ. Ахэмэ ишӀуагъэ аригъэкӀынэу къызфэкӀуагъэр тятэжъышхохэр Тхьэм къызэригъэгугъэгъэ Ӏофхэр Исус къызэригъэшъыпкъэжьхэрэмкӀэ Тхьэм ишъыпкъагъэ аригъэлъэгъунэу ары. 9 Ащ нэмыкӀэуи Исус ишӀуагъэ ахэмэ аригъэкӀынэу къызфэкӀуагъэр хымэ лъэпкъхэм Тхьэм игукӀэгъуныгъэ пае щытхъу фаригъэшӀыныр ары, Тхьэм игущыӀэ тхыгъэхэм зэрарытым фэдэу, «Ащ пае, о си Зиусхьан, хымэ лъэпкъхэм сахэтэу уищытхъу сшӀыщт, щытхъу орэдхэри о пцӀэкӀэ къэсӀощтых». 10 Тхьэм игущыӀэ тхыгъэхэм мырэущтэуи арыт: «Шъо, хымэ лъэпкъхэр, Тхьэм ылъэпкъ шъуригъусэу шъугушӀу». 11 Мырэущтэуи арыт: «Шъо, хымэ лъэпкъ пстэуми, Зиусхьан ищытхъу шъушӀы, шъо, лъзпкъ пстэуми, ищытхъу шъушӀы». 12 Пегъымбар Исайаси мырэущтэу къыӀуагъ: «Иессе къытехъукӀыщт бын лъапӀэр къэкӀонышъ, хымэ лъэпкъхэмэ тхьаматэ афэхъущт. Хымэ лъэпкъхэр ащ щыгугъыхэу, пэплъэщтых». 13 ЕжьымкӀэ шӀошъхъуныгъэ зэрэшъуиӀэм пае, Тхьэу ӀэхьышӀур ежьым къызэрэтлъигъэсыщтым тыщызыгъэгугъырэм гушӀогъошхорэ гупсэфыныгъэшхорэ шъугухэм къарерэлъхьах, ежьым Ыпсэ ЛъапӀэ илъэкӀыныгъэкӀэ шъугухэм щыгугъыныгъэшхо арыз хъуным пае.
Паул гушхоныгъэ хэлъэу тхэнэу зыкӀэхъурэр
14 Сшыхэр, шъугухэм шӀугъэшхо зэрарылъымкӀи, шӀэныгъэшхо зэрэшъуиӀэмкӀи, зым зым Ӏоохэр ригъэшӀэнхэ зэрилъэкӀырэмкӀи цыхьэ къышъуфэсэшӀы. 15 Ау щытми, мы Ӏофхэр шъугу къэзгъэкӀыжьынхэу чӀыпӀэчӀыпӀэу гушхоныгъэ хэлъэу къышъуфэсэтхы. Гушхоныгъэ хэлъэу зыкӀэстхырэр хымэ лъэпкъхэм адэжь Исус Христос сыфэлэжьэнэу Тхьэм ынэшӀу щыфэныгъэкӀэ сызэригъэнэфагъэр ары. 16 Тхьэм ыдэжь къикӀыгъэ къэбарышӀур згъэӀузэ, дин пэщэ Ӏоф сэшӀэ. Тхьэм ыдэжь къикӀыгъэ къэбарышӀур зыфэзгъэӀурэр Тхьэм Ыпсэ ЛъапӀэ хымэ лъэпкъхэм агухэр зэригъэкъэбзэжьыгъэхэм пае, ахэр Тхьэм ыгу зэӀурэ къурмэныпхъэм фэдэу хъунхэр ары. 17 Исус Христос сыгу илъэу Ӏофэу Тхьэм фэсшӀагъэм сыщэгушӀукӀы. 1819 Сэ сигущыӀэхэмкӀи, Ӏофхэу сшӀагъэхэмкӀи, нэшэнэ гъэшӀэгъонышхохэмрэ Ӏофышхо гъэшӀэгъонхэмрэ ялъэкӀыныгъэкӀи, Тхьэм Ыпсэ ЛъапӀэ илъэкӀыныгъэкӀи, хымэ лъэпкъхэр Тхьэм езгъэдэӀунхэу Христос Ӏофхэу сигъэгъэхъагъэхэм анэмыкӀ сытегущыӀэнэу сытегушхурэп. Арэущтэу Ерусалим щегъэжьагъэу Иллирик хэкум нэсыфэ, Христос ехьылӀэгъэ къэбарышӀур тыдэкӀи цӀыфхэм икъутъэу щязгъэӀугъ. 20 НэмыкӀ цӀыф горэм ыгъэуцугъэ лъапсэм сиӀоф тесымыгъэуцоу, Христос ыцӀэ зыщамышӀэгъэ чӀыпӀэмэ къэбарышӀур зэращызгъэӀуным ренэу ыуж ситыгъ. 21 Тхьэм игущыӀэ тхыгъэхэм зэрарытым фэдэу, «Ежьым икъэбар зынэмысыгъэхэм ежьыр алъэгъущт, икъэбар зэхэзымыхыгъэхэми зэхашӀыкӀыщт».
Рим къэлэшхом кӀонэу Паул ыгу зэрэхэлъыгъэр
22 Джары шъуадэжь сыкъэкӀонэу бэрэ ыуж ситыгъэ пэтми, къызкӀыздэмыхъугъэр. 23 Ау джы мы лъэныкъом сэркӀэ Ӏоф щымыӀэжьэу, илъэсыбэ хъугъэу шъуадэжь сыкъэкӀонэу сызэрэфэягъэм паий, 24 Испание хэгъэгум сыкӀо зыхъукӀэ, шъуадэжь сыкъэкӀощт. Сыда пӀомэ сигъогукӀэ сыкъышъухэхьанышъ, шъуслъэгъунэуи, шъуиныбджэгъугъэ сыгу ыгъэпсэфынышъ, сигъогукӀэ ӀэпыӀэгъу шъукъысфэхъунэуи сыщэгугъы. 25 Джы Тхьэм ицӀыф лъапӀэхэм ӀэпыӀэгъу зэрафэхъущт ахъщэр афэсхьызэ, Ерусалим сыкӀонэу сыгу хэлъ. 26 Сыда пӀомэ хэкухэу Македониерэ Ахаиерэ ащыпсэурэ шӀошъхъуныгъэ зиӀэхэм Тхьэм ицӀыф лъапӀэхэу Ерусалим дэсхэм ахэт тхьамыкӀэхэм ӀэпыӀэгъу афэхъухэзэ, ахъщэ зэхадзэнэу ягуапэу аухэсыгъ. 27 ӀэпыӀэгъу афэхъунхэу ягуапэу аухэсыгъ, адэӀэпыӀэнхэуи япшъэрылъ. Сыда пӀомэ Тхьэм джуртхэр зэригъэгугъэгъэ ӀэхьышӀум щыщ хымэ лъэпкъхэми яӀэ хъугъэ. Арышъ, хымэ лъэпкъхэми мы дунаем иӀэхьышӀоу яӀэмкӀэ яшӀуагъэ джуртхэм арагъэкӀын фае. 28 А пшъэрылъыр згъэцакӀэзэ, ахъщэу зэхадзагъэр Ерусалим дэсхэм заӀэкӀэслъхьэ ужым, шъуадэжькӀэ сикӀынышъ, етӀанэ Испанием сыкӀощт. 29 Шъуадэжь сыкъызыкӀокӀэ, Христос ынэшӀу щыфэныгъэшхом сыригъусэу сыкъызэрэкӀощтыр сэшӀэ. 30 Сшыхэр, мыщкӀэ сышъолъэӀу: Ти Зиусхьанэу Исус Христос ыцӀэкӀи, Тхьэм Ыпсэ ЛъапӀэ ыдэжь къикӀырэ шӀулъэгъуныгъэм паий, гъусэ шъукъысфэхъуи, шъугу етыгъэу Тхьэм шъукъысфелъэӀу. 31 Иудей хэкум ис шӀошъхъуныгъэ зимыӀэхэм Тхьэм сащиухъумэнэуи, Тхьэм ицӀыф лъапӀэхэу Ерусалим дэсхэм ӀэпыӀэгъу зэрафэхъун ахъщэу афэсхьыщтым агу еӀунэуи шъуелъэӀу. 32 Джащыгъум, Тхьэм ыӀомэ, гушӀуагъокӀэ шъуадэжь сыкъэкӀонышъ, сышъуигъусэу зызгъэпсэфыжьыщт. 33 Гупсэфыныгъэ къытэзытырэ Тхьэр шъуерэгъус. Амин.
ШӀуфэс ехыныр
1 Тшыпхъоу Фивэ зыцӀэу, Кенкрей къалэм щыӀэ чылыс зэӀукӀэм ӀэпыӀэгъу фэхъурэм шъуапашъхьэ сыкъыщыщытхъунэу сыфай. 2 Зиусхьаныр ащ ыгу зэрилъым пае, Тхьэм ицӀыф лъапӀэхэм зэрэрагъэблэгъэн фаем фэдэу ежъугъэблагъи, ищыкӀагъэмкӀи ӀэпыӀэгъу шъуфэхъу, сыда пӀомэ цӀыфыбэмэ сэри сахэтэу, ар ӀэпыӀэгъу къытфэхъугъ. 3 Прискиллэрэ Акилэрэ сигъусэхэу Исус Христос фэлажьэхэрэм аӀапэхэр сфэшъуубытыжьых. 4 Ахэмэ сэ спсэ мыкӀодэу къагъэнэжьыным пае, ежьхэм апсэ шъхьасыжьыгъэхэп. Ахэмэ щытхъу афэзышӀырэр сэ сизакъоп, хымэ лъэпкъхэм ячылыс зэӀукӀэ пстэури ары. ӀПӀошъхъуныгъэ зиӀэхэу яунэ щызэрэугъоихэрэм аӀапэ сфэшъуубытыжь. 5 ӀПӀу слъэгъурэ Епенет ыӀапэ сфэшъуубытыжь. Ахаие хэкум апэрэу ХристоскӀэ шӀошъхъуныгъэ зиӀэ хъугъэр ары. 6 Мерэмэу бэрэ къытфэлэжьагъэм ыӀапэ сфэшъуубытыжь. 7 Сиунэкъощхэу хьапсым къыздычӀэсыгъэхэ Андроникрэ Юныйрэ аӀапэ сфэшъуубытыжь. Ахэр апостол цӀэрыӀохэм ащыщых. Сэ сапэкӀэ ахэмэ ХристоскӀэ шӀошъхъуныгъэ яӀэ хъугъэ. 8 Христос зыгу илъэу, шӀу слъэгъурэ Амплый ыӀапэ сфэшъуубытыжь. 9 Урбанэу тигъусэу Христос фэлэжьагъэмрэ шӀу слъэгъурэ Стахыйрэ аӀапэ сфэшъуубытыжь. 10 Христос зыгу илъэу, Тхьэм зишъыпкъагъэ ыгъэунэфыгъэ Апеллес ыӀапэ сфэшъуубытыжь. Аристовул иунагъо щыщхэм аӀапэ сфэшъуубытыжь. 11 Сиунэкъощ Иродион ыӀапэ сфэшъуубытыжь. Зиусхьаныр зыгу илъхэу, Наркисс иунагъо щыщхэм аӀапэ сфэшъуубытыжь. 12 Зиусхьаным бэу фэлажьэрэ бзылъфыгъэхэу Трифенэрэ Трифосэрэ аӀапэ сфэшъуубытыжь. ЕтӀани Зиусхьаным бэу фэлэжьэгъэ бзылъфыгъэу Персидэу шӀу тлъэгъурэм ыӀапэ сфэшъуубытыжь. 13 Руфэу Зиусхьаным къыхихыгъэмрэ ащ янэу сянэ фэдэу щытымрэ аӀапэ сфэшъуубытыжь. 14 Асинкрит, Флегон, Ерм, Патров, Ермый, ахэмэ ягъусэхэу адрэ шыхэм аӀапэ сфэшъуубытыжь. 15 Филолог, бзылъфыгъэ Юлие, Нирей, ащ ышыпхъу, Олимпан ахэмэ ягъусэхэу Тхьэм ицӀыф лъэпӀэ пстэум аӀапэ сфэшъуубытыжь. 16 ГукъэбзагъэкӀэ ӀаплӀ зэшъущэкӀэу, шӀуфэс зэшъухыжь. Христос ичылыс зэӀукӀэ пстэуми шӀуфэс къышъуахыжьы. 17 Сшыхэр, тишӀошъхъуныгъэ тигъашӀэрэ Ӏофхэм къапэуцухэзэ, шъузэгурызымыгъаӀохэу, цӀыфхэу адрэ цӀыфхэр гъогу занкӀэм тезыгъэкӀхэрэм защышъуухъумэнэу сышъолъэӀу. Ахэмэ защышъудзый. 18 Сыда пӀомэ ащ фэдэ цӀыфхэр ти Зиусхьанэу Исус Христос фэлажьэхэу щытхэп, ахэр зыфэлажьэхэрэр аныбэхэр ары. ГъэшӀуабзэмкӀи гущыӀэ дахэхэмкӀи цӀыф къызэрыкӀохэр дахьыхых. 19 КъэбарышӀум шъузэредэӀурэм икъэбар цӀыф пстэуми зэхахыгъ. Сэ сыкъышъущэгушӀукӀы, ау шӀугъэр зыфэдэр зэхэшъушӀыкӀынэуи, бзэджагъэ зи шъушъхьэ къимыхьанэуи сыфай. 20 Гупсэфыныгъэр къытэзытырэ Тхьэм бэмышӀэу шэйтаныр шъулъэкъо чӀэгъ чӀышъуигъэщытӀыхьащт. Ти Зиусхьанэу Исус ынэшӀу къышъущерэф. Амин. 21 Къыздэлажьэрэ Тимофей, сиунэкъощхэу Луцый, Иасон, Сосипатрэ шӀуфэс къышъуахыжьы. 22 Тертиеу Паул мы тхылъыр зэригъэтхырэр сэры. Зиусхьаныр сыгу илъэу шӀуфэс къышъосэхыжьы. 23 Гаеу, сэ Паул сибысымыми, чылыс зэӀукӀэм зэкӀэми ибысымыми, шӀуфэс къышъуехыжьы. Къалэм иахъщэ зыӀэ илъ Ерастрэ тшы Квартрэ шӀуфэс къышъуахыжьы. 24 Ти Зиусхьанэу Исус Христос ынэшӀу шъо пстэуми къышъущерэф. Амин.
ШӀуфэс ехынымрэ Тхьэм ищытхъу шӀыгъэнымрэ
1 Сэ сы Паул. Тхьэр фэягъэти, Исус Христос иапостол сыхъунэу къысэджагъ. Тэ тшы Сосфен сигъусэу мы тхылъыр сэтхы. 2 Зыфэстхыхэрэр шъо цӀыфхэу Коринф къалэм ичылыс зэӀукӀэ щыщхэр ары. Тхьэм Христос Исус шъугухэм арылъынэу шъуигъэнэфагъ, тыдэкӀи ти Зиусхьанэу Исус Христос елъэӀурэ цӀыф пстэуми шъурягъусэу, ежьым ицӀыф лъапӀэхэм ащыщ шъухъунэу къышъоджагъ. Христос ахэми тэри ти Зиусхьан. 3 Тхьэу Тятэ лъапӀэрэ Зиусхьанэу Исус Христосрэ анэшӀу къышъущарэфи, гупсэфыныгъэ къышъуарэт. 4 Христос шъугухэм зэрарылъымкӀэ Тхьэм ынэшӀу къызэрэшъущифагъэм пае, Тхьэм ищытхъу сэшӀы зэпыт. 5 Сыда пӀомэ Христос шъугухэм зэрарылъымкӀэ лъэны къо пстэумкӀи Тхьэм ынэшӀу къышъущифагъ. Лъэныкъо пстэумкӀи зэхэшъушӀыкӀынэуи, шъукъэгущыӀэнэуи лъэкӀыныгъэ къышъуитыгъ, 6 сыда пӀомэ тэ шыхьатныгъэу Христос фэтшӀыгъэм шъугухэм лъапсэ афишӀыгъ. 7 Арэущтэу зэрэщытым пае, ти Зиусхьанэу Исус Христос къызылъэгъожьыщт мафэм шъупаплъэзэ, тынхэу Тхьэм ибынхэм аритхэрэм ащыщэу шъуимыӀэу зи щыӀэп. 8 Ти Зиусхьанэу Исус Христос къызылъэгъожьыщт мафэм ыдэжь зыми шъузэригъэмысэн зи щымыӀэу, кӀэухым нэсы гъогу занкӀэм пытэу шъутыригъэтыщт. 9 Тхьэр шъыпкъэ. Ежьыр ары Ыкъоу Исус Христосэу ти Зиусхьан гъусэу шъуфыщытынэу къышъоджагъэр. Чылыс зэӀукӀэм щыщхэр зэрэзэгурымыӀуагъэхэр 10 Сшыхэр, шъо пстэури шъузэгурыӀонэуи, купкупэу шъузэрэмыгъэхъоу зыгу зыпсэу шъущытынэуи ти Зиусхьанэу Исус Христос ыцӀэкӀэ сышъолъэӀу. 11 Сшыхэр, шъузэрэзэгурымыӀорэр бзылъфыгъэу Хлой иунагъо щыщхэм сагъэшӀагъэ. 12 Сэ зыфасӀорэр мыры: Шъуащыщэу зыгорэм еӀо: «Сэ Паул икуп сыщыщ», нэмыкӀ горэми еӀо: «Сэ Аполлос икуп сыщыщ», етӀанэ нэмыкӀ горэми еӀо: «Сэ Кифэ икуп сыщыщ», етӀанэ нэмыкӀ горэми еӀо: «Сэ Христос икуп сыщыщ». 13 Христос гощыгъэу хъугъа? Паул ара шъощ пае къащым тыраӀулӀагъэр? Хьаури, сэ, Паул, сцӀэкӀэ шъуаумэхъыгъа? 14 Криспрэ Гайрэ анэмыкӀэу шъуащыщэу зи зэрэсымыумэхъыгъэмкӀэ Тхьэм щытхъу фэсэшӀы. 15 Арэущтэу сэ сцӀэкӀэ шъуаумэхъыгъэу зыми къыӀон ылъэкӀыщтэп. 16 Шъыпкъэ, Стефан иунагъо щыщхэри сыумэхъыгъэх. Ащ нэмыкӀэу, зыгорэ сыумэхъыгъэмэ сшӀэрэп. 17 Сыда пӀомэ Христос сыкъызфигъэкӀуагъэр цӀыфхэр сыумэхъынхэу арэп, къэбарышӀур язгъэӀунэу ары нахь ау цӀыфхэм зэхэшӀыкӀыныгъэу зыфаӀорэр зыхэлъ гущыӀэхэмкӀэ арэп. Арэущтэу щымытмэ, Христос къащым зэрэкӀэрылӀыхьагъэм икъэбар лъэкӀыныгъэу хэлъыр кӀодыжьыщтыгъ.
Христос ары Тхьэм изэхэшӀыкӀыныгъэшхори илъэкӀыныгъэшхори
18 Сыда пӀомэ кӀодыпӀэм игъогу тетхэмкӀэ къащым икъэбар делагъэу щыт, ау тэ мыкӀодхэу Тхьэм къыгъэнэжьхэрэмкӀэ Тхьэм илъэкӀыныгъэшхо къащым хэлъ. 19 Сыда пӀомэ Тхьэм къызэриӀорэр игущыӀэ тхыгъэхэм арыт: «ЗэхэшӀыкӀыныгъэ зиӀэхэм язэхэшӀыкӀыныгъэу зыфаӀорэр згъэкӀодыщт, Ӏушыныгъэ зиӀэхэми яӀушыныгъэу зыфаӀорэр сымыдэу, лъэныкъокӀэ езгъэзыщт». 20 Арэущтэу зэрэщытым пае, цӀыфэу зэхэшӀыкӀыныгъэ зиӀэр тыдэ къэнагъа? Тэурат егъэджэкӀо пащэр тыдэ къэнагъа? Мы лъэхъанэм щыщ цӀыфэу гущыӀэхэмкӀэ нэкъокъоным фэӀазэр тыдэ къэнагъа? Тхьэм мы дунаем изэхэшӀыкӀыныгъэ делагъэу къыгъэлъэгъуагъэба? 21 Сыда пӀомэ Тхьэм изэхэшӀыкӀыныгъэшхокӀэ зэриухыгъэм тетэу, мы дунаем ицӀыфхэм язэхэшӀыкӀыныгъэу зыфаӀорэмкӀэ Тхьэр зыфэдэр ашӀагъэп, ау тэ дгъэӀурэ къэбарышӀоу ахэмэ делагъэу къашӀошӀырэмкӀэ ХристоскӀэ шӀошъхъуныгъэ зиӀэхэр мыкӀодхэу къыгъэнэжьынхэу Тхьэм игъоу ылъытагъ. 22 Джуртхэр нэшэнэ гъэшӀэгъонышхохэм афаех, урымхэри зэхэшӀыкӀыныгъэм лъэхъух. 23 Ау тэ Христосэу къащым тыраӀулӀагъэм икъэбар тэгъэӀу: джуртхэмкӀэ ар агу зэмыӀун Ӏоф мэхъу, нэмыкӀрэ лъэпкъхэмкӀи делагъэу мэхъу. 24 Ау тэ, Тхьэм ибынхэм ащыщ хъунхэу къызэджагъэхэмкӀэ, джуртми урымми, Христос ары Тхьэм илъэкӀыныгъэшхори изэхэшӀыкӀыныгъэшхори. 25 Сыда пӀомэ Тхьэм иделагъэу зыфаӀорэм цӀыфхэм язэхэшӀыкӀыныгъэу зыфаӀорэм нахьи нахь зэхэшӀыкӀыныгъэшхо иӀ, Тхьэм икӀочӀэнчъагъэу зыфаӀорэри цӀыфхэм ялъэкӀыныгъэ нахьи нахь лъэш. 26 Сшыхэу Тхьэм ибынхэм ащыщ хъунхэу къызэджагъэхэр шъузэплъыжь. Мы дунаем ицӀыфхэм зэхэшӀыкӀыныгъэ зиӀэхэу алъытэхэрэри, тетыгъо зиӀэхэри, унэгъо байхэм ащыщхэри бэу хъухэу къышъухэтхэп. 27 Ау зэхэшӀыкӀыныгъэ зиӀэ цӀыфхэр ыгъэукӀытэжьынхэм пае, мы дунаем ицӀыфхэм делэхэу зыфаӀорэ цӀыфхэр Тхьэм къыхихыгъэх. ЛъэкӀыныгъэ зиӀэхэри ыгъэукӀытэжьынхэм пае, мы дунаем лъэкӀыныгъэ щызимыӀэхэри Тхьэм къыхихыгъэх. 28 Мы дунаем ицӀыфхэм тхьамыкӀэхэу зыфаӀорэ цӀыфхэри, зэрамыпэсырэ цӀыфхэри Тхьэм къыхихыгъэх. Арэущтэу пкӀэ зимыӀэхэу зыфаӀорэ цӀыфхэр ары Тхьэм къыхихыгъэхэр, пкӀэ зиӀэхэу зыфаӀорэ цӀыфхэр ыгъэцӀыкӀунхэм пае. 29 Тхьэм арэущтэу зыфишӀагъэр ежьым ыпашъхьэ цӀыф зи зыщыщымытхъужьыныр ары. 30 Христос Исус шъугухэм арылъэу зыгъэхъугъэр Тхьэр ары. Христос Исус тэркӀэ Тхьэм ыдэжь къикӀыгъэ зэхэшӀыкӀыныгъэшхоу хъугъэ. Ежьыри ары Тхьэм ежьым ыдэжькӀэ шъыпкъагъэ тиӀэу тэзыгъэлъытэрэр, тыгухэр зыгъэкъэбзэжьырэри, тшъхьэхэр зыщэфыжьыгъэри. 31 Арышъ, Тхьэм игущыӀэ тхыгъэхэм зэрарытым фэдэу, «Зыгорэ зыгорэм щытхъумэ, Зиусхьаным щэрэтхъу».
Христос къащым зэрэкӀэрылӀыхьагъэм икъэбар
1 Тхьэм ехьылӀэгъэ шыхьатныгъэр шъозгъэӀунэу шъуадэжь сыкъызэкӀом, сшыхэр, гущыӀэ дахэхэр къасӀохэу, зэхэшӀыкӀыныгъэшхокӀи сыжъудэгущыӀэу арэп а къэбарыр зэрэшъозгъэӀугъэр. 2 Шъуадэжь сызыщэӀэм, Исус Христос икъэбар нэмыкӀэу зи сымышӀэнэу тесыубытагъ, зэкӀэмэ апэу ежьыр къащым зэрэтыраӀулӀагъэр. 3 КӀуачӀэ симыӀэу, сыщынэу, сыгуи лъэшэу кӀэзэзэу шъуадэжь сыщыӀагъ. 4 КъэсӀуагъэхэмрэ къэбарэу згъэӀугъэмрэ цӀыфым изэхэшӀыкӀыныгъэ зыхэлъхэу, пшӀошъ зыгъэхъун гущыӀэхэр ахэлъыгъэхэп, ау сигущыӀэхэр къыгъэшъып къэжьхэзэ, Тхьэм Ыпсэ ЛъапӀэ илъэкӀыныгъэ ахэмэ ягъусагъ. 5 Арэущтэу зыфэхъугъэр шъуишӀошъхъуныгъэ цӀыфым изэхэшӀыкӀыныгъэ темытэу, Тхьэм илъэкӀыныгъэ тетыныр ары.
Тхьэм изэхэшӀыкӀыныгъэшху
6 Ау щытми, цӀыфхэу Тхьэм иӀофхэмкӀэ зизэхэшӀыкӀ икъугъэхэм зэхэшӀыкӀыныгъэ зыхэлъ къэбар ятэгъэӀу, ау мы лъэхъанэми, мы лъэхъанэм тетыгъо зиӀэхэу кӀодыжьыщтхэми язэхэшӀыкӀыныгъэ арэп. 7 Ау зэхэшӀыкӀыныгъэу зикъэбар дгъэӀурэр Тхьэм изэхэшӀыкӀыныгъэшхоу шъэфэу щытыр ары. Тхьэм а зэхэшӀыкӀыныгъэшхор цӀыфхэм аримыгъэшӀагъэу щытыгъ, ау лъэхъанэхэм апэ Тхьэм зэригъэнэфагъэм тетэу, а зэхэшӀыкӀыныгъэшхом игъогукӀэ тэ щытхъушхо тиӀэ хъущт. 8 Мы лъэхъанэм тетыгъо зиӀэхэм ащыщэу зыми а зэхэшӀыкӀыныгъэшхор къышӀагъэп. Ахэмэ ашӀагъэмэ, щытхъушхо зиӀэ Зиусхьаныр къащым тыраӀулӀэщтыгъэп. 9 Ау Тхьэм игущыӀэ тхыгъэхэм зэрарытым фэдэу, «Ӏофхэу нэм ымылъэгъугъэхэри, зы тхьакӀумэм зэхимыхыгъэхэри, цӀыфым ыгу къэмыкӀыгъэхэри, а Ӏофхэр ары Тхьэм цӀыфхэу ежьыр шӀу зылъэгъухэрэм афигъэхьазырыгъэхэр». 10 А Ӏофхэр Тхьэм ежьым Ыпсэ ЛъапӀэкӀэ тэ къытфигъэнэфагъэх; сыда пӀомэ Тхьэм Ыпсэ ЛъапӀэ Ӏоф пстэури егъэунэфы, Тхьэм иӀофхэм якуупӀэхэми анэсы. 11 Сыда пӀомэ цӀыфым ыгу илъыр ежь ышъхьэ нэмыкӀэу цӀыфхэм ащыщэу хэт ышӀэна? Ащ фэдэ къабзэу Тхьэм ыгу илъыр Тхьэм Ыпсэ ЛъапӀэ нэмыкӀэу зыми ышӀэрэп. 12 Ау Тхьэм тэ тыгухэм къарилъхьэгъэ псэр мы дунаем ыпсэ арэп, ежь Ыпсэ ЛъапӀ ары, Тхьэм тынхэу къытитыгъэхэр къэтшӀэнхэм пае. 13 Арэущтэу цӀыфхэу Тхьэм Ыпсэ ЛъапӀэ зыгу илъхэм Тхьэм Ыпсэ ЛъапӀэ иӀофхэр зэхядгъэшӀыкӀхэу, Тхьэм тынхэу къытитыгъэхэм татегущыӀэ, ау тызэрыгущыӀэхэрэр цӀыфым изэхэшӀыкӀыныгъэ тигъэшӀэгъэ гущыӀэхэр арэп, Тхьэм Ыпсэ ЛъапӀэ тигъэшӀэгъэ гущыӀэхэр ары нахь. 14 Тхьэм Ыпсэ ЛъапӀэ зыгу имылъ цӀыфым Ӏофхэу Тхьэм Ыпсэ ЛъапӀэ ыдэжь къикӀыхэрэр ыдэхэрэп. Ахэр ежьымкӀэ делагъэу щытых, ахэр зэхишӀыкӀынхэуи ылъэкӀыщтэп, сыда пӀомэ Тхьэм Ыпсэ ЛъапӀэ закъу ары цӀыфхэм ахэр зэхязыгъэшӀыкӀышъущтыр. 15 Ау цӀыфэу Тхьэм Ыпсэ ЛъапӀэ зыгу илъым Ӏоф пстэури зэхешӀыкӀы, ау зыми а цӀыфыр зэхишӀыкӀын ылъэкӀыщтэп. 16 «Зиусхьаным ыгу илъыр хэта зышӀагъэр зыгорэ ащ ригъэшӀэнэу?» Ау Христос ыгу илъыр тэ тыгухэми арылъ.
Тызэгъусэу Тхьэм тыфэлажьэ
1 Сшыхэр, Тхьэм Ыпсэ ЛъапӀэ зыгу илъ цӀыфхэм сызэрадэгущыӀэрэм фэдэу, сыкъыжъудэгущыӀэн слъэкӀыщтыгъэп, ау мы дунаем ицӀыфхэм сызэрадэгущыӀэрэм фэдэу сыкъыжъудэгущыӀэщтыгъ. Сыда пӀомэ Христос иӀофхэмкӀэ сабый цӀыкӀухэм шъуафэдэу шъущытыгъ. 2 Сэ шхын шъозгъэшхыщтыгъэп, щэ шъуезгъашъощтыгъэ нахь. Шхын шъушхын шъулъэкӀыщтыгъэп, джыри шъулъэкӀырэп. 3 Сыда пӀомэ джыри мы дунаем ицӀыфхэм шъуафэд. Шъугъонымрэ зэщыхьанымрэ шъуазыфагу илъхэшъ, мы дунаем ицӀыфхэм шъуафэдэба? Адрэ цӀыфхэр зэрэзекӀорэ хабзэм фэдэу, шъори шъузекӀорэба? 4 Сыда пӀомэ шъуащыщэу горэм «Сэ Паул икуп сыщыщ», нэмыкӀ горэми «Сэ Аполлос икуп сыщыщ», зиӀокӀэ, мы дунаем ицӀыфхэм шъуафэдэба? 5 Паул хэт щыща? Аполлос хэт щыща? ШӀошъхъуныгъэ шъуиӀэ зыгъэхъугъэхэу, Тхьэм фэлажьэрэ цӀыфхэу тыщытыгъ ныӀэп, Зиусхьаным тэ тщыщэу хэти Ӏофэу ыпшъэ къызэрэрилъхьагъэм фэдэу. 6 Сэ кӀэхэр хэслъхьагъэх, Аполлос псыр кӀигъэхъуагъ, ау Тхьэр ары къэзыгъэкӀыгъэр. 7 Арэущтэу кӀэхэр хэзылъхьэрэми, псыр кӀэзыгъахъорэми пкӀэ яӀэп, къэзыгъэкӀырэ Тхьэ закъор ары нахь. 8 КӀэхэр хэзылъхьэрэри псыр кӀэзыгъахъорэри зэфэдэх. Хэти иӀоф фэшъуашэу иӀэхьышӀу ыгъотыжьыщт. 9 Сыда пӀомэ тызэгъусэу Тхьэм тыфэлажьэ. Шъо Тхьэм ихьасэ шъуфэд, Тхьэм ышӀырэ унэм шъуфэд. 10 Тхьэм ынэшӀу къызэрэсщифагъэм тетэу, зэхэшӀыкӀыныгъэ зиӀэу унэ зышӀырэм фэдэу а унэм лъапсэ фэзгъэуцугъ. НэмыкӀ зыгорэми а лъапсэм тырешӀыхьэ. Ау хэтми а лъапсэм зэрэтыришӀыхьэрэ шӀыкӀэм дэгъоу ерэплъ. 11 Сыда пӀомэ Тхьэм ыгъэуцугъэ лъапсэр Исус Христос ары. Ащ нэмыкӀ лъапсэ зыми ыгъэуцун ылъэкӀыщтэп. 12 Зыгорэм дышъэр, тыжьыныр, мыжъо лъапӀэхэр, пхъэр, уцыр, е уарзэр а лъапсэм тыришӀыхьэмэ, 13 хэти иӀоф зыфэдэр нафэ хъущт, сыда пӀомэ Зиусхьаныр къэзылъэгъожьыщт мафэм ар къыгъэнэфэщт. А мафэр машӀо игъусэу къэкӀощт, машӀоми хэти иӀоф зыфэдэр къыгъэунэфыщт. 14 Зыгорэм а лъапсэм тыришӀыхьагъэр къанэмэ, ащ ифэшъошэ ӀэхьышӀу ыгъотыжьыщт. 15 Ау зыгорэм лъапсэм тыришӀыхьагъэр машӀокӀэ стымэ, ащ иӀэхьышӀу шӀокӀодыщт. Ежьыр мыкӀодэу къэнэжьыщт, ау машӀом къыхэкӀыжьырэ цӀыфыр къызэрэнэжьырэм фэдэу, ерагъэу къэнэжьыщт. 16 Тхьэм иунэшхо шъузэрэфэдэри, Тхьэм Ыпсэ ЛъапӀэ шъугухэм зэрарылъыри шъошӀэба? 17 Зыгорэм Тхьэм иунэшхо зэхикъутэмэ, Тхьэм а цӀыфыр ыгъэкӀодыжьыщт, сыда пӀомэ Тхьэм иунэшхо лъапӀэ. А унэшхоми шъуфэд. 18 Зыми зерэмыгъэпцӀэжь. Шъуащыщэу зыгорэм мы лъэхъанэм зэхэшӀыкӀыныгъэ иӀэу зелъытэмэ, зэхэшӀыкӀыныгъэ имыӀэу орэхъу, шъыпкъэмкӀэ зэхэшӀыкӀыныгъэ иӀэяым пае. 19 Сыда пӀомэ мы дунаем ицӀыфхэм зэхэшӀыкӀыныгъэ зыфаӀорэр Тхьэм ыдэжькӀэ делагъэ, Тхьэм игущыӀэ тхыгъэхэм зэрарытым фэдэу, «ЗэхэшӀыкӀыныгъэ зиӀэхэм зэхэшӀыкӀыныгъэу зыфаӀорэмкӀэ Тхьэм ыубытыщтых». 20 Мырэущтэуи Тхьэм игущыӀэ тхы гъэхэм арыт: «ЗэхэшӀыкӀыныгъэ зиӀэхэм ягухэлъхэм пкӀэ зэрямыӀэр Зиусхьаным ешӀэ». 21 Арышъ, хэт щыщ цӀыфи зы цӀыф горэм щэрэмытхъу, сыда пӀомэ зэкӀэ шъошъуий, 22 Паул, Аполлос, Кифэ, дунаер, щыӀэныгъэр, лӀэныгъэр, джы щыӀэри щыӀэщтри шъошъуиех. 23 Ау шъо Христос шъурий, Христоси Тхьэм ий.
Христос иапостолхэр
1 Арэущтэу Христос фэлажьэрэ цӀыфхэуи, Тхьэм ишъэфхэр зыӀэ къырилъхьэгъэ цӀыфхэуи талъытэн фае. 2 ЦӀыфэу Ӏоф горэ зыӀэ иплъхьэрэр узщыгугъышъун цӀыфэу щытын фае. 3 Шъори, нэмыкӀ цӀыфхэри шъукъызэрэсэплъырэм сэркӀэ зи хэлъэп. Сэри хьыкум зытесшӀыхьэжьрэп. 4 Сэ сыгукӀэ мыхъун горэ зыдэсшӀэжьрэп, ау ащкӀэ зи симылажьэу сыхъугъэп. СиӀоф хьыкум тезышӀыхьэрэр Зиусхьаныр ары. 5 Арышъ, игъо къэмысы рапшӀэу, Зиусхьаныри къэмыкӀоу, Ӏоф горэм хьыкум тешъумышӀьгхь. Зиусхьаным Ӏофхэу шӀункӀыгъэм хэгъэбылъхьагъэхэр къыгъэнэфэщтых, цӀыфхэм агухэм арылъхэри нафэ къышӀыщтых. Ащыгъум Тхьэм хэти щытхъоу фэшъуашэр къыритыжьыщт. 6 Сшыхэр, шъуишӀуагъэ къэкӀоным пае, сӀуагъэхэр сэ сшъхьэрэ Аполлосрэ сакъыттегущыӀэу сӀуагъэх, Тхьэм игущыӀэ тхыгъэхэм шъуатемыкӀынэу шъодгъэшӀэным пае. Ащыгъум зы цӀыфым нэмыплъ рихэу, нэмыкӀ цӀыфым рыпагэу шъуащыщэу зи къэнэжьыщтэп. 7 Адрэ цӀыфхэм анахьи унахь инэу хэт узылъытэрэр? Тхьэм къыуимытыгъэу сыда уиӀэр? УиӀэр къыозытыгъэр Тхьэр арышъ, сыд пае узщытхъужьра, Тхьэм ар къыуимытыгъэм фэдэу? 8 ЗыжъугъэшхэкӀыгъаха? Бай шъухъугъаха? Тэ тышъуимыгъусэу пачъыхьэ шъухъугъа? ШъыпкъэмкӀэ па чъыхьэ шъухъугъагъоит, ащыгъум тэри тышъуигъусэу пачъыхьэ тыхъущтыгъ. 9 Тэ апостолхэм тиӀоф сызэреплъырэр мыры: укӀ зытыралъхьэгъэ цӀыфхэм тафэдэу аужьырэ дэдэ чӀыпӀэм тэ, апостолхэр, Тхьэм тыщигъэуцугъэм фэд. Дунае пстэури, мэлэӀичхэри, цӀыфхэри, ӀэягъэкӀэ къытэплъынхэу зэкӀэмэ апашъхьэ тырагъэуцуагъэм фэд. 10 Христос игъогу тызэрэрыкӀорэм пае, зэхэшӀыкӀыныгъэ зимыӀэ цӀыфхэм тафэдэу тыщыт, ау шъо Христос зыгу илъ цӀыф Ӏушхэу зышъолъытэжьы. Тэ лъэкӀыныгъэ тимыӀэу тыщыт, ау шъо лъэкӀыныгъэ шъуиӀ. ЦӀыфхэм лъытэныгъи къышъуфашӀы, ау тэ нэмыплъ къытахы. 11 Мы сыхьат дэдэм нэсыфэ, мэлакӀи псыфалӀи тэлӀэ. Зыщытлъэн тиӀэп, цӀыфхэми лые къытахы, уни тиӀэп. 12 Тэ тӀэхэмкӀэ тылажьэзэ, тэулэу. ЦӀыфхэр къызытэхъонхэкӀэ, «Тхьэм ынэшӀу къышъущерэф», ятэӀожьы. ЦӀыфхэм къин зытагъэщэчкӀэ, тэщыӀэ. 13 ЦӀыфхэр ӀэягъэкӀэ къызыттегущыӀэхэкӀэ, дахэкӀэ ахэмэ тапэгъокӀыжьы. Дунаем ихэкӀэу, чӀыгум ишӀоим фэдэу тыкъэнэжьыгъ. 14 ШъузгъэукӀытэжьынэу арэп мыр зыфэстхырэр, ау шъо сибын лъапӀэхэм шъуафэдэу къыжъугурызгъэӀонэу ары. 15 Христос игъогу ехьылӀагъэу шъуагъэшӀэнэу цӀыф мин шъуиӀэми, ты бэу шъуиӀэп. Сыда пӀомэ къэбарышӀур къызышъосэгъэӀум, ты фэдэу сыкъышъуфэхъугъ, Христос Исус шъугухэм арылъ зэрэхъугъэм пае. 16 Арышъ, сышъолъэӀу, сэ силъэужхэм шъуарыкӀу. 17 Ащ пае Зиусхьаныр зыгу илъэу, узщыгугъышъунэу щыт Тимофееу сикӀэлэ лъапӀэм фэдэу щытыр къышъуфэсэгъакӀо. Чылыс зэӀукӀэ пстэуми зэрязгъашӀэрэм тетэу, Христос игъогу сытетэу сызэрэзекӀорэ шӀыкӀэр Тимофей шъугу къыгъэкӀыжьыщт. 18 Шъуадэжь сыкъэмыкӀонэу гугъэхэу, шъуащыщэу заулэмэ зашӀошӀыжьы. 19 Ау Зиусхьаным ыӀомэ, бэ темышӀэу шъуадэжь сыкъэкӀощт. Ащыгъум а зызышӀошӀыжьхэрэм ягущыӀэхэм ямызакъоу ялъэкӀыныгъи згъэунэфыщт, 20 сыда пӀомэ Тхьэм и Тетыгъошхо иӀоф зыдэщыӀэр гущыӀэныр арэп, Тхьэм илъэкӀыныгъэ ары нахь. 21 Сыда шъузыфаер? Бэщ сӀыгъэу шъуадэжь сыкъэкӀонэу ара, хьауми шӀулъэгъуныгъэрэ гушъэбагъэрэкӀэ сыкъэкӀонэу ара?
Паул зинэ зышӀэгъэ лӀыр зэригъэмысагъэр
1 Зинэ шӀэн зэрэшъухэлъыр цӀыфхэм къаӀотэжьы: Зыгорэм ятэ ишъуз егъэшъузыжьы. Ащ фэдэ зинэ шӀэн хабзэ хымэ лъэпкъхэми ахэлъэп. 2 Ау щытми, шъузышӀошӀыжьы! Арэущтэу шъузышӀошӀыжьыным ычӀыпӀэкӀэ шъугу къеоу, ар зышӀэгъэ лӀыр зыхэжъугъэкӀын фэягъ. 3 Сэ сшъхьэрэ спкъырэкӀэ шъуадэжь сыщымыӀэ пэтми, сыгурэ спсэрэкӀэ шъуадэжь сыщыӀ, шъуадэжьи шъыпкъэу сыщыӀэм фэдэу, ар зышӀагъэр згъэмысэгъахэ. 4 Ти Зиусхьанэу Исус ыцӀэкӀэ шъузэӀукӀэу, сэри сыгурэ спсэрэкӀэ шъуадэжь сыщыӀэ зыхъукӀэ, ти Зиусхьанэу Исус Христос илъэкӀыныгъэкӀэ 5 а лӀыр шэйтаным фэжъугъаз, ыпкъ кӀодэу, Зиусхьаныр къызыкӀожьыщт мафэм ыдэжь ыпсэ мыкӀодэу къэнэжьыным пае. 6 Шъузэрэзыщытхъужьырэр дэгъоп. Тэджэпс тӀэкӀум тхьацур зэкӀэ зэригъэшӀоӀурэр шъошӀэба? 7 Арышъ, псэкӀодым итэджэпсыжъ зыхэшъух, тхьацукӀэ къабзэм фэдэу шъухъуным пае джыри тхьацу мышӀоӀу къабзэу шъузэрэщытым фэдэу. Сыда пӀомэ Христос къурмэныпхъэ къытфэхъугъ. Ар шъынэу Пасхъэ мэфэкӀ мэфэшхохэм адэжь Тхьэм къурмэныпхъэу фашӀыщтыгъэм фэд. 8 Арышъ, мэфэкӀ мэфэшхор тэжъугъэгъэлъапӀэ, ау бзэджагъэмрэ дэигъэмрэ ятэджэпсыжъэу орэмыхъу, ау гукъэбзагъэмрэ шъыпкъагъэмрэ яхьалыгъу мышӀоӀу къабзэкӀэ мэфэкӀ мэфэшхор тэжъугъэгъэлъапӀэ. 9 Зинэ зышӀэхэрэм гъусэ шъуафэмыхъунэу къышъуфэстхыгъ. 10 Сэ къезгъэубытыгъэр мы дунаем ицӀыфхэм ащыщхэу зинэ зышӀэхэрэри, нэйпсыехэри, хъункӀакӀохэри, тхьэ нэпцӀхэр зыгъэлъапӀэхэрэри арэп. Арэущтэу щытыгъэмэ, дунаем шъутекӀыжьын фаеу хъущтыгъ. 11 Ау къышъуфэстхыгъэр мыры: Зыгорэ шъушыкӀэ зэджэжьэу щытми, зинэ ышӀэмэ, е нэйпсыеу щытмэ, е тхьэ нэпцӀхэр егъэлъапӀэхэмэ, е нэмыкӀ цӀыфхэм ӀэягъэкӀэ атегущыӀэмэ, е ешъуакӀоу щытмэ, е хъункӀакӀоу щытмэ, ащ фэдэ цӀыфым гъусэ шъуфэмыхъу. Ащ фэдэ цӀыфым ыкӀи шъудэмышх. 12 Чылыс зэӀукӀэм щымыщхэм сэ хьыкум атесшӀыхьанэу сиӀоф хэлъа? Чылыс зэӀукӀэм щыщхэр арыба, хьыкум зытешъушӀыхьан фаер? 13 Чылыс зэӀукӀэм щымыщхэм Тхьэм хьыкум атришӀыхьащт. «Арышъ, цӀыф бзаджэр зыхэжъугъэкӀ».
Христианхэр зэдао хъущтэп
1 Шъуащыщ горэм нэмыкӀ горэм дэон Ӏоф фыриӀэмэ, Тхьэм ицӀыф лъапӀэхэм апашъхьэ римыщэу, хьыкумышӀэхэу ТхьэмкӀэ шӀошъхъуныгъэ зимыӀэхэм апашъхьэ рищэнэу сыдэущтэу гушхора? 2 Тхьэм ицӀыф лъапӀэхэм дунаем ицӀыфхэм хьыкум зэратырашӀыхьащтыр шъошӀэба? Дунаем ицӀыфхэм хьыкум атешъушӀыхьащтмэ, дэон Ӏоф цӀыкӀухэмкӀи хьыкум шъушӀынэу шъуифэшъуашэба? 3 МэлэӀичхэмэ хьыкум тэ зэратетшӀыхьащтыр шъошӀэба? Ащ нахьи нахьыбэу мы дунаем иӀофхэмкӀэ хьыкум тшӀышъунба? 4 Ащ фэдэ дэон Ӏоф шъуиӀэ зыхъукӀэ, чылыс зэӀукӀэм щыщхэм зэрамыпэсэрэ цӀыфхэм а Ӏофым хьыкум тыряшъумыгъэшӀыхь. 5 ШъузгъэукӀытэжьынэу ар сэӀо. Зэшыхэм язэдэон ӀофыкӀэ хьыкум зышӀын зылъэкӀынэу, зэхэшӀыкӀыныгъэ зиӀэ зыгорэ къышъухэтба? 6 Ау джы зэрэхъурэмкӀэ, зы къошым адрэ къошыр хьыкумышӀэм ыпашъхьэ рещэ шӀошъхъуныгъэ зимыӀэхэм апашъхьэ ащ фэдэу ешӀэ. 7 Шъыпкъэм шъуфаемэ, шъуащыщэу зыгорэм адрэ къошыр хьыкумышӀэм ыпашъхьэ зэрэрищэрэр шъоркӀэ емыкӀу. Арэущтэу шъушӀыным нахьи, адрэхэм яягъэ къызяжъугъэгъэкӀымэ нахьышӀу, зяжъугъэгъапцӀэми нахьышӀу. 8 Ау шъо шъушъхьэкӀэ шъушы дэдэхэми шъуиягъэ яшъогъэкӀы ыкӀи къэшъогъапцӀэх. 9 Шъыпкъагъэ зимыӀэ цӀыфхэм Тхьэм и ТетыгъошхокӀэ Ӏахьэ къызэралъымысыщтыр шъошӀэба? Шъушъхьэ шъумыгъэпцӀэжь: Зинэ зышӀэхэрэми, тхьэ нэпцӀхэр зыгъэлъапӀэхэрэми, хъулъфыгъэхэм шъузпӀалъэу якӀуалӀэхэрэми, 10 тыгъуакӀохэми, нэйпсыехэми, ешъуакӀохэми, нэмыкӀ цӀыфхэм ӀэягъэкӀэ атегущыӀэхэрэми, хъункӀакӀохэми Тхьэм и ТетыгъошхокӀэ Ӏахьэ къалъысыщтэп. 11 Шъуащыщ зыгорхэри ахэмэ афэдэ цӀыфхэу щытыгъэх Ау ти Зиусхьанэу Исус Христос ыцӀэкӀи, ежь Ыпсэ ЛъапӀэ илъэкӀыныгъэкӀи Тхьэм шъуипсэкӀодхэр шъугухэм ариукъэбзыкӀыжьыгъэх, ежь ибынхэуи шъуигъэнэфагъ, ежьым ыдэжькӀи шъыпкъагъэ шъуиӀэу шъуилъытагъ.
ШъупкъыхэмкӀэ Тхьэр жъугъэлъапӀэ
12 «Сыд щыщи сшӀэн сыфит», цӀыфхэм аӀо. Ар шъыпкъэ, ау Ӏоф пстэуми яшӀуагъэ къытэкӀыщтэп. Сыд щыщи сшӀэн сыфит, ау зы Ӏоф горэм тетыгъо къысфыриӀэ хъущтэп. 13 «Шхыныр ныбэм пае щыӀ, ныбэри шхыным пае», цӀыфхэм аӀо. Ари шъыпкъэ, ау Тхьэм тӀури ыгъэкӀодыщт. Ау пкъыр зинэ шӀэным пае щыӀэп, Зиусхьаным пае нахь. Зиусхьанри пкъым пае щыӀ. 14 Тхьэм Зиусхьаныр лӀагъэхэм къахигъэтэджыкӀыжьыгъ. ИлъэкӀыныгъэкӀэ тэри лӀагъэхэм тыкъахигъэтэджыкӀыжьыщт. 15 Шъупкъыхэр Христос ыпкъ щыщхэм зэрафэдэхэр шъошӀэба? Ащыгъум Христос ыпкъ щыщхэр бзылъфыгъэ хэтакӀом ыпкъ щыщхэу згъэхъуна? Хьау, ар хъухэщтэп. 16 Зыгорэ бзылъфыгъэ хэтакӀо горэм гъусэ фэхъумэ, а тӀур зыпкъ зэрэхъурэр шъушӀэрэба? Сыда пӀомэ Тхьэм игущыӀэ тхыгъэхэм арыт: «ИтӀур зыпкъ хъущтых». 17 Ау зыгорэ Зиусхьаным гъусэ фэхъумэ, зыгузыпсэу дэхъущт. 18 Зинэ шӀэным зыщышъудзый! Сыд фэдэрэ нэмыкӀ псэкӀодэу цӀыфым ышӀэрэр ыпкъы епхыгъэп, ау зинэ зышӀэрэм ежь ыпкъы псэкӀод решӀэжьы. 19 Шъупкъыхэр Тхьэм Ыпсэ ЛъапӀэу шъугухэм арылъым зэриунэ лъапӀэр, шъупкъыхэри шъошъуиехэу зэрэщымытхэр шъошӀэба? 20 Тхьэм пкӀэ лъапӀэкӀэ шъуищэфыгъ. Арышъ, шъупкъыхэмкӀи шъуипсэхэмкӀи Тхьэр жъугъэлъапӀэ.
ЗэлӀзэшъузыныр
1 Къысфэшъутхыгъэ Ӏофхэм яхьылӀагъэу мыр къэсэӀо: ЛӀым шъуз къымыщэныр шӀу. 2 Ау зинэ шӀэным зыщиухъумэным пае, хэти шъуз ерэӀ, хэтрэ шъузми ежьым илӀ ерэӀ. 3 ЛӀым шъузым фишӀэн фаер ферэшӀ, шъузыми лӀым фишӀэн фаер ферэшӀ. 4 Шъузым ежьым ыпкъ тетыгъо фыриӀэп, тетыгъо фызиӀэр илӀ ары нахь. Ащ фэдэуи, лӀым ыпкъ тетыгъо фыриӀэп, тетыгъо фызиӀэр ишъуз ары нахь. 5 ТӀури шъузэгурыӀоу ыкӀи уахътэу жъугъэнэфагъэмкӀэ нэкӀынымрэ тхьэлъэӀунымрэ шъуапылъынэу мыхъумэ, зыщышъумыдзый. ЕтӀанэ зышъумыщыӀэшъумэ, шъузэкӀолӀэжь, шэйтаным шъудимыхьыхыным пае. 6 Мыр унашъоу къышъуфэсшӀырэп, арэущтэу шъушӀэнэу фит шъусэшӀы нахь. 7 Сэщ фэдэу цӀыфхэр зэкӀэ щытынхэу сыфаещтыгъ. Ау Тхьэм хэти ежь илъэкӀыныгъэ къыритыгъ, зым зы лъэкӀыныгъэ, адрэми нэмыкӀ лъэкӀыныгъэ къыритыгъ. 8 Къэзымыщагъэхэм, дэмыкӀуагъэхэм, шъузабэхэм мыр ясэӀо: Сэщ фэдэу къамыщэу къанэхэмэ шӀу. 9 Ау защыӀэн амылъэкӀымэ, къарэщ. ХъопсэныгъэмкӀэ машӀом фэдэу гур стыным нахьи, къащэныр нахьышӀу. 10 Къэзыщагъэхэмрэ дэкӀуагъэхэмрэ мырэущтэу унашъо афэсэшӀы. Унашъо афэзышӀырэр сэрэп, Зиусхьаныр ары нахь: Шъузыр илӀ гокӀыжьы хъущтэп. 11 Ау шъузыр илӀ гокӀыжьмэ, дэмыкӀожьэу къэнэн фае, е илӀ ешӀужьын фае. Ащ фэдэу лӀыми ишъуз ытӀупщыжьы хъущтэп. 12 Адрэ къанэрэ цӀыфхэм сэ ясэӀо, Зиусхьаныр арэп языӀорэр: шъу шы горэм шӀошъхъуныгъэ зимыӀэ шъуз иӀэмэ, шъузми ащ дэпсэунэу ыдэмэ, ар ытӀупщыжьы хъущтэп. 13 Ащ фэдэу шъуз горэм шӀошъхъуныгъэ зимыӀэ лӀы иӀэмэ, лӀыми ащ дэпсэунэу ыдэмэ, шъузыр лӀым гокӀыжьы хъущтэп. 14 Сыда пӀомэ шӀошъхъуныгъэ зимыӀэ лӀыр, ишъуз ихьатыркӀэ, Тхьэм ий. Ащ фэдэуи, шӀошъхъуныгъэ зимыӀэ шъузыри, илӀ ихьатыркӀэ, Тхьэм ий. Армырмэ шъуибынхэр мыкъабзэхэу щытыщтгъэх, ау джы ахэри Тхьэм иех. 15 Ау шӀошъхъуныгъэ зимыӀэр ишъхьэгъусэ гокӀыжьынэу фаемэ, горэкӀыжь. Арэущтэу зыхъукӀэ, шӀошъхъуныгъэ зиӀэ шыр е шыпхъур ишъхьэгъусэ епхыгъэу щытэп. Сыда пӀомэ гупсэфыныгъэкӀэ тыпсэунэу Тхьэр къытэджагъ. 16 О шъуз, сыдым уигъашӀэра уилӀ мыкӀодэу къэбгъэнэжьынкӀи мэхъу. О лӀы, сыдым уигъашӀэра уишъуз мыкӀодэу къэбгъэнэжьынкӀи мэхъу.
Хэти Тхьэм щыӀакӀэу къыфигъэнэфагъэм тетэу зекӀон фае
17 Хэти Тхьэм щыӀакӀэ ащ къызэрэфигъэнэфагъэм фэдэу, Зиусхьаныр ибынхэм ащыщ хъунэу къызеджэм зэрэщытыгъэм фэдэу, зекӀон фае. Чылыс зэӀукӀэ пстэумкӀи ары сиунашъор. 18 Тхьэр цӀыф горэм къызеджэм, сунэт ашӀыгъэу щытыгъэмэ, зэрэщытэу щэрэт. Тхьэр цӀыф горэм къызеджэм, сунэт амышӀыгъэу щытыгъэмэ. ари зэрэщытэу щэрэт. 19 Сунэт ташӀыгъэу тыщытми, тыщымытми, арэп Ӏофыр зыдэщыӀэр. Ӏофыр зыдэщыӀэр Тхьэм иунашъохэр дгъэцэкӀэнхэр ары. 20 Тхьэр хэти къызеджэм зэрэщытыгъэм фэдэу щэрэт. 21 Тхьэр о къызыоджэм, пщылӀэу ущытыгъэмэ, ащ земыгъэгъэгумэкӀ. Ау шъхьафит ухъун плъэкӀымэ, игъор блэмыгъэкӀ. 22 Сыда пӀомэ Зиусхьаныр къызеджэм, пщылӀэу щытыгъэр шъхьафитэу хъугъэ, Зиусхьаныр ащ ыгу илъ зэрэхъугъэм пае. Ащ фэдэуи Зиусхьаныр къызеджэм, шъхьафитэу щытыгъэр Христос фэлажьэхэрэм ащыщ хъугъэ. 23 Тхьэм пкӀэ лъапӀэкӀэ шъуищэфыгъ. Арышъ, нэмыкӀырэ цӀыфхэм пщылӀ шъуафэмыхъу. 24 Арэущтэу, сшыхэр, хэти Тхьэр къызеджэм зэрэщытыгъэм фэдэу, арэущтэу Тхьэм ыпашъхьэ щэрэт.
КъэзымыщагъэдэмыкӀуагъэхэмрэ шъузабэхэмрэ
25 Пшъашъэхэм яхьылӀагъэу Зиусхьаным ышӀыгъэ унашъо сиӀэп. Ау Зиусхьаным ынэшӀу щыфэныгъэкӀэ узщыгугъышъун цӀыфэу сызэрэщытым пае, мы Ӏофым сызэрэхаплъэрэр шъосэӀо. 26 Джырэ гузэжъогъоу тызхэтым пае, шъузэрэщытым фэдэу шъущытыныр нахьышӀоу сэлъытэ. 27 Зы шъуз горэм уепхыгъэмэ, утӀупщыжьыным ыуж уимыт. Шъуз уимыӀэмэ, шъуз улъымыхъу. 28 Ау къапщэмэ, ащкӀэ псэкӀод пшӀагъэ хъурэп; пшъашъэ гори дакӀомэ, ащкӀэ псэкӀод ышӀагъэ хъурэп. Ау къэзыщэхэрэридакӀохэрэри мы дунаем игузэжъогъу хэфэщтых, ар къышъомыхъулӀэнэуи сыфай. 29 Сшыхэр, зыфасӀорэр мыры: уахътэу къэнэжьырэр макӀэ. Уахътэр макӀэу зэрэщытым пае, джы щегъэжьагъэу шъуз зиӀэхэр шъуз зимыӀэхэм афэдэхэу орэхъух; 30 гъыхэрэри мыгъыхэрэм афэдэхэу орэхъух; гушӀохэрэри мыгушӀохэрэм афэдэхэу орэхъух; зыгорэ къэзыщэфхэрэр зи зыӀэкӀэмыхьэхэрэм афэдэхэу орэхъух; 31 мы дунаем иӀофхэм апылъхэрэри а Ӏофхэм апымылъыщэхэрэм афэдэхэу орэхъух; сыда пӀомэ мы дунаем ищытыкӀэ мэкӀоды пэтышъ ары. 32 ГумэкӀ шъуимыӀэнэу сыфай. Къэзымыщагъэм Зиусхьаным иӀофхэм ынаӀэ атырегъэты Зиусхьаным ыгу къызэреӀуным ыуж ит. 33 Къэзыщагъэми дунаем иӀофхэм ынаӀэ атырегъэты шъузым ыгу къызэреӀуным ыуж ит. Шъузымрэ пшъашъэмрэ яӀоф зытетыр зэфэшъхьафы. 34 ДэмыкӀогъэ пшъашъэм Зиусхьаным иӀофхэм ынаӀэ атырегъэты, ыпкъырэ ыгурэкӀэ зэрэкъэбзэщтым ыуж ит. ДэкӀуагъэм дунэе Ӏофхэм ынаӀэ атырегъэты илӀ ыгу къызэреГуным ыуж ит. 35 Мы Ӏофхэр къызыфасӀорэр Ӏэхъулъэхъу къышъутеслъхьанэу арэп, ау сишӀуагъэ шъозгъэкӀэу, хабзэм тетэу зэпымыоу, зыми шъуимыгъэуцоу Зиусхьаным шъуфэзгъэлэжьэнэу ары. 36 ЛӀы горэм къыщэнэу ыгъэнэфэгъэ пшъашъэу зыныбжь икъугъэр къымыщэу къыгъэнэныр емыкӀоу ылъытэмэ, къерэщ, псэкӀод ышӀагъэ хъурэп. Ахэмэ къа рэщ. 37 Ау лӀы горэм къымыщэнэу ыгукӀэ пытэу тыриубытагъэу, зымкӀи емыгъэзыгъэу щытынкӀи мэхъу. ИшӀоигъоныгъэ ыӀэ илъ, ыгъэнэфэгъэ пшъашъэри къымыщэнэу тыриубытэгъах. А лӀым пшъашъэр къымыщэмэ, тэрэзэу мэзекӀо. 38 Арэущтэу ыгъэнэфэгъэ пшъашъэр къэзыщэрэр тэрэзэу мэзекӀо, ау къэзымыщэрэр нахь тэрэзэу мэзекӀо. 39 ИлӀ псэуфэ шъузыр ащ епхыгъэу щыт. Ау лӀыр лӀэмэ, шъузыр хэтми зыфаеми дэкӀожьынэу фит, ау зыдакӀорэ лӀым ыгу Зиусхьаныр илъын фае. 40 Ау сызэрэхаплъэрэмкӀэ, зэрэщытэу къанэмэ, нахь сыхьатмафэ ежьагъэу щыт сэ сыгуи Тхьэм Ыпсэ ЛъапӀэ илъэу сэгугъэ.
Къурмэныпхъэу тхьэ нэпцӀхэм афашӀыгъэм ыл ехьылӀагъ
1 Къурмэныпхъэу тхьэ нэпцӀхэм афашӀыгъэм ыл ехьылӀагъэу мыр къэсэӀо: Тэ зэкӀэми шӀэныгъэ зэрэтиӀэр тэшӀэ. ШӀэныгъэм цӀыфхэм зашӀуегъэшӀошӀыжьы, ау шӀулъэгъуныгъэм цӀыфхэм гурэ псэрэкӀэ лъэкӀыныгъэ арегъэгъоты. 2 Зы цӀыф горэм шӀэныгъэ иӀэу шӀошӀмэ, зэришӀэн фаем фэдэу джыри ышӀэрэп. 3 Ау цӀыфэу Тхьэр шӀу зылъэгъурэр Тхьэм къешӀэ. 4 Арэущтэу къурмэныпхъэу тхьэ нэпцӀхэм афашӀыгъэм ыл ехьылӀагъэу мыр сэӀо: А тхьэ нэпцӀхэр дунаем зыкӀи зэрэщымыӀэхэри, зы Тхьэ закъом нэмыкӀ Тхьэ зэрэщымыӀэри тэшӀэ. 5 Уашъоми чӀылъэми цӀыфхэм тхьэу алъытэхэрэр щыӀэхэми, (цӀыфхэм тхьэу алъытэхэрэмрэ зиусхьанхэу алъытэхэрэмрэ бэу зэрэщыӀэхэм фэдэу) 6 тэ зы Тхьэ закъоу тиӀэр Ты лъапӀэр ары. ЗэкӀэри къэзыгъэхъугъэр ежьыр ары, ежьым паий тыщыӀ. Зы Зиусхьан закъоу тиӀэр Исус Христос ары. Тхьэм ащ зэкӀэри къыригъэгъэхъугъ, ащи щыӀэныгъэ къытеты. 7 Ау зэкӀэми а шӀэныгъэр яӀэп. ЦӀыф заули тхьэ нэпцӀхэм ясагъэхэшъ, ащ фэдэ лы зашхыкӀэ, тхьэ нэпцӀ горэм къурмэныпхъэу фэхъугъэ шъыпкъэм фэдэу, а лыр ашхы. Арышъ, а лыр хьалэл е мыхьалэл амышӀэу, агухэмкӀэ еджэнджэшхэу, а лыр зашхыкӀэ, агухэр аушӀоих. 8 Гъомылапхъэм Тхьэм нахь пэгъунэгъэу тигъэхъурэп. Тышхэмэ тишӀуагъэ къакӀорэп, тымышхэми тиягъэ къакӀорэп. 9 Ау шӀошъхъуныгъэ макӀэ зиӀэхэм ягъогу шъуифитыныгъэ зыгъэлъэпаорэ мыжъоу щафэмыхъунэу шъуфэсакъ. 10 Сыда пӀомэ а лыр хьалэл е мыхьалэл ымышӀэу, ыгукӀэ еджэнджэшрэм о шӀэныгъэ зиӀэм тхьэ нэпцӀым иунэшхо ащ фэдэ лыр щыпшхэу ылъэгъумэ, а лыр ащи ебгъэшхынба? 11 Арэущтэу уишӀэныгъэкӀэ шӀошъхъуныгъэ макӀэ зиӀэ пшэу Христос ыпсэ зыфитыгъэр огъэкӀоды. 12 Шъушыхэу а лыр хьалэл е мыхьалэл амышӀэу агухэмкӀэ еджэнджэшхэрэм псэкӀод яшъушӀэу, агухэмкӀэ зяжъугъэгъэмысэмэ, Христос ары псэкӀод зашъушӀэрэр. 13 Арышъ, шхынэу сшхырэмкӀэ сшы псэкӀод езгъашӀэмэ, лы сшхыжьыщтэп, сшы псэкӀод есымыгъэшӀэным пае.
Апостолым фитыныгъэу иӀэхэр
1 Сэ сыапостолба? Сэ сышъхьафитба? Исус Христосэу ти Зиусхьан слъэгъугъэба? Зиусхьаным Ӏофэу фэсшӀагъэм шӀугъэу къыхэкӀыгъэр шъорыба? 2 НэмыкӀ цӀыфхэмкӀэ апостолэу сыщымытми, шъоркӀэ сыапостол. Зиусхьаныр шъугухэм арылъ зэрэхъугъэм пае, сызэрэ апостолыр къэзыгъэшъыпкъэжьырэ мыхъурыр шъоры. 3 Хьыкум сэ къыстезышӀыхьанэу фаехэмэ мыры ясӀорэр: 4 Тэри тышхэнэу ыкӀи тешъонэу тыфитба? 5 Кифэ, адрэ апостолхэм, Зиусхьаным ышхэм тафэдэу, тэри шӀошъхъуныгъэ зиӀэ шъуз гъусэ зыфэтшӀынэу тыфитба? 6 ЗызыӀыгъыжьынэу ежь зыӀэхэмкӀэ лэжьэн фэе закъохэр сэррэ Варнавэрэ ара? 7 ДзэлӀыр ежь иахъщэкӀэ мэзауа? Хэта сэнэшъхьэ хатэ зышӀэу сэнашъхьэ зымышхырэр? Ащ фэдэу, щэ емышъоу Ӏэхъогъур хэта зыгъэхъурэр? 8 ЦӀыфхэр зэрэгущыӀэхэрэм фэдэу, мы Ӏофхэр сэӀоха? Хьау, Тэурат хабзэм ащ фэдэ къабзэу итба? 9 Сыда пӀомэ пегъымбар Мусэ и Тэурат хабзэ мырэущтэу ит: «Цум лэжьыгъэр зиӀокӀэ, ыжэ зэтемыпх». Арэущтэу зиӀокӀэ, цухэр ара Тхьэр зыфэгумэкӀырэр? 10 Щэч хэмылъэу Тхьэм зыфиӀорэр тэрыба? Ары, тэщ пае ар тхыгъэ; сыда пӀомэ лӀэу жъорэми лэжьыгъэр зыӀорэми лэжьыгъэм щыщ яӀахьэ къалъысынэу гугъэ ямыӀэу лажьэхэ хъущтэп. 11 Ащ фэдэу, Тхьэм Ыпсэ ЛъапӀэ ичылэпхъэшӀу шъугухэм арытлъхьагъэшъ, шъо тэ тиӀоф шӀугъэу къыхэкӀырэр зыгъотхэрэм мы дунаем тищыкӀагъэр къытэшъутымэ, баща? 12 НэмыкӀ цӀыфхэм ящыкӀагъэр зэряшъутыщтым щыгугъынхэу фитыныгъэ яӀэмэ, ахэмэ анахьыбэу тэ бэкӀэ нахь фитыныгъэ тиӀэба? Ау а фитыныгъэм ишӀуагъэ къызэдгъэкӀыгъэп. Ар мыхъоу, Христос ехьылӀэгъэ къэбарышӀум пэрыохъу тыфэмыхъуным пае, Ӏоф пстэури тэщыӀэ. 13 ЦӀыфхэм Тхьэм иунэшхо пае псапэу атырэм щыщ ащ щылажьэхэрэм яшхын Ӏахьэ зэрагъотырэр шъошӀэба? Къурмэн шӀыпӀэм щылажьэхэрэми къурмэныпхъэу ащ телъым щыщ яӀахьэ зэрагъотырэр шъошӀэба? 14 Ащ фэдэу, къэбарышӀур зыгъэӀухэрэм зэрыпсэун Ӏахьэр къэбарышӀумкӀэ зэрагъотын фаемкӀэ Зиусхьаным унашъо ышӀыгъ. 15 Ащ фэдэ фитыныгъэм ишӀуагъэ къызэзгъэкӀыгъэп, а фитыныгъэри къэзгъотынэу арэп мыр зыфэстхырэр. Сызэрыпагэрэ Ӏофыр зыгорэм ыгъэкӀодыным нахьи, лӀэ ныгъэр нахь къэсэштэ. 16 Ау къэбарышӀур зэрэзгъэӀурэм сырыпэгэн слъэкӀыщтэп, сыда пӀомэ къэбарышӀур сымыгъэӀу хъущтэп. КъэбарышӀур сымыгъэӀумэ, сыхьатмыгъо сежьагъ. 17 Ар сыфаеу сшӀэмэ, ӀэхьышӀу згъотыщт. Ау сыфэмыеу сшӀэмэ, Ӏофэу Тхьэм спшъэ къырилъхьагъэр сэгъэцакӀэ ныӀэп. 18 Сыда ащыгъум сиӀэхьышӀу? СиӀэхьышӀу мыры: къэбарышӀум сыфэлажьэу, сифитыныгъэ ишӀуагъэ зэсымыгъэкӀэу, уасэ хэмылъэу ар зэрэзгъэӀурэр ары. 19 Сыда пӀомэ зыми тетыгъо къысфыримыӀэу, сышъхьафит пэтми, цӀыфыбэ Христос игъогу тезгъэхьанхэм пае, цӀыф пстэуми Ӏофтабгэ сафэхъугъ. 20 Джуртхэр Христос игъогу тезгъэхьанхэм пае, джуртхэм сафэдэу зысшӀыгъ. Тэурат хабзэм ыӀэчӀэгъ сычӀэмыт пэтми, Тэурат хабзэм ыӀэчӀэгъ чӀэт цӀыфхэр Христос игъогу тезгъэхьанхэм пае, Тэурат хабзэм ыӀэчӀэгъ чӀэт цӀыфхэм афэдэу зысшӀыгъ. 21 Ащ фэдэу, Тэурат хабзэм ыӀэчӀэгъ чӀэмыт цӀыфхэри Христос игъогу тезгъэхьэнхэм пае, Тэурат хабзэм ыӀэчӀэгъ чӀэмыт цӀыфхэм афэдэу зысшӀыгъ. Тхьэм ихабзэ ыӀэчӀэгъ сычӀэмытэу арэп ащ къикӀырэр, Христос ихабзэ ыӀэчӀэгъ сычӀэт. 22 ШӀошъхъуныгъэ макӀэ зиӀэхэм сишӀуагъэ язгъэкӀыным пае, шӀошъхъуныгъэ макӀэ зиӀэхэм афэдэу зысшӀыгъ. Лъэныкъо пстэумкӀи цӀыф пстэуми афэдэу зысшӀыгъ, зи мыхъуми цӀыф заулэ мыкӀодхэу къэнэжьынхэм пае. 23 КъэбарышӀум сишӀуагъэ езгъэкӀыным пае, мы Ӏоф пстэури сэшӀэ, къэбарышӀум шӀугъэу къыхэкӀырэм щыщ сиӀахьэ згъотыным пае. 24 Зэпачъэхэрэр зэкӀэри мачъэх, арышъхьакӀэ ахэмэ ащыщэу зыр ары ныӀэп текӀоныгъэм итандж къэзыхьырэр, ари шъошӀэба? Ар къэшъухьыным пае, шъучъ. 25 Хэт чъэми, зэкӀэмкӀи зещыӀэ. Ахэмэ кӀодыжьын тандж къахьыным пае, мачъэх, ау тэ мыкӀодыжьын тандж къызэрэтхьыным ыуж тит. 26 Арышъ, сызэрэчъэрэр сыздачъэрэ чӀыпӀэр сымышӀэу арэп. Жьыбгъэм бжымкӀэ хаорэм сыфэдэп. 27 Ау спкъы къин есэгъэщэчы ыкӀи сэгъэдаӀо, адрэ цӀыфхэм къэбарышӀур зязгъэӀу ужым, Тхьэм симыдэу сыкъэмынэным пае.
Тхьэ нэпцӀхэм шъуафэсакъ
1 Сшыхэр, тятэжъхэр пегъымбар Мусэ игъусэхэу пстэури ошъуапщэ горэ пащэ афэхъоу, а ошъуапщэм ычӀэгъ зэрэщызекӀощтыгъэхэри, ахэр зэкӀэ хым зэпырыкӀыжьхи, къызэрэхэкӀыжьыгъэхэри шъумышӀэу шъущытынэу сыфаеп. 2 Ошъуапщэр пащэ афэхъоу, хым зэпырыкӀыжьыгъэ цӀыф пстэури пегъымбар Мусэ игъогу рыкӀонхэу зэрагъэумэхъыгъэм фэдэу щытыгъ. 3 Ахэмэ зэкӀэми Тхьэм ыдэжь къикӀыгъэ шхыныр ашхыщтыгъ. 4 Ахэр зэкӀэ Тхьэм зэригъашъощтыгъэ псыми ешъощтыгъэх, сыда пӀомэ псэу зэшъоштыгъэр къадэкӀощтыгъэ мыжъошхом къыхэкӀыщтыгъ. А мыжъошхор Христос арыгъэ. 5 Ау ахэмэ анахьыбэхэм Тхьэм ыгу яӀугъэп. Арэущтэу шъоф нэкӀым щыкӀодыгъэх. 6 Ахэр Ӏоф бзаджэхэм зэракӀэхъопсыщтыгъэхэм фэдэу, такӀэмыхъопсынэу ахэмэ къяхъулӀагъэр тэркӀэ нэшан. 7 Ахэмэ ащыщэу купым фэдэу тхьэ нэпцӀхэр шъумыгъэлъапӀэх, Тхьэм игущыӀэ тхыгъэхэм зэрарытым фэдэу, «ЦӀыфхэр шхэнхэу ыкӀи ешъонхэу тӀысыгъэх. ЕтӀанэ джэгунхэу тэджыжьыгъэх». 8 Ахэмэ ащыщэу купым зэрашӀэщтыгъэм фэдэу, зинэ тэшъумыгъашӀ. Арэущтэу нэбгырэ мин тӀокӀырэ щырэ зы мэфэ закъокӀэ кӀодыгъэх. 9 Зиусхьанри тэшъумыгъэгъэунэфы, ахэмэ ащыщэу купым зэрагъэунэфыщтыгъэм фэдэу. Ахэр блэхэм аукӀыгъэх. 10 Шъумытхьаусых, ахэмэ ащыщэу купым зэра шӀэщтыгъэм фэдэу. Ахэр лӀэныгъэ къэзыхьырэ мэлэӀичым ыгъэкӀодыгъэх. 11 Мы Ӏофхэр ахэмэ къяхъулӀагъэх, цӀыфхэм нэшанэу къафэхъуным пае. Тэ цӀыфхэу лъэхъанэхэм якӀэух къызнэсыгъэхэм къыдгурагъэӀоным пае, мы Ӏофхэр атхыгъэх. 12 Ау цӀыфэу пытэу щытэу гугъэрэр темыфэным фэрэсакъ. ЦӀыфхэм псэкӀод ашӀэнэу дэзыхьыхын Ӏофхэу адрэ цӀыфхэм апэ къифэхэрэм анэмыкӀ шъуапэ къифагъэхэп. Тхьэр шъыпкъэ, зэрэшъулъэкӀыщтым блэкӀэу, псэкӀод шъушӀэнэу дэзыхьыхын Ӏоф горэ шъуапэ къифэнэу фит ышӀыщтэп. Ау псэкӀод шъушӀэнэу дэзыхьыхын Ӏоф горэ шъуапэ къызифэкӀэ, ащ шъупэуцужьышъунэу Тхьэм гъогу къышъуфишӀыщт. 14 Арышъ, силъапӀэхэр, тхьэ нэпцӀ гъэлъэпӀэным зыщышъудзый. 15 Шъо, зэхэшӀыкӀыныгъэ зиӀэхэм, ахэр шъосэӀох. Сэ къасӀорэм шъо шъушъхьэкӀэ хьыкум тешъушӀыхьажь. 16 Ти Зиусхьан Исус илӀэныгъэ тыгу къэдгъэкӀыжьэу, тызэгъусэу тызышхэкӀэ, сэнэпс шъуалъэм пае Тхьэм щытхъу фэтэшӀы. Сэнэпсым тызешъокӀэ, Христос ылъэу къащым щыкӀэкӀыгъэмкӀэ ежьым гъусэ тыфэхъуба? Хьалыгъур зызэготчыкӀэ, Христос ыпкъ гъусэ тыфэхъуба? 17 Хьалыгъур зызакъоу зэрэщытым пае, тэ бэу тыхъуми, зы тэхъу; сыда пӀомэ а зы хьалыгъу закъом тиӀахьэ хэлъ. 18 Израил лъэпкъым шъуеплъ. Къурмэныпхъэм ыл зышхыхэрэм Тхьэу къурмэн зыфашӀырэм гъусэ фэхъухэба? 19 Сэ зыфасӀорэр сыда? Къурмэныпхъэм ыл зыгорэ щытэу, е тхьэ нэпцӀыр зыгорэ щытэу сэӀуа? 20 Хьау, ар сӀуахэрэп. Ау хымэ лъэпкъхэм къурмэн зашӀыкӀэ, джынапцӀэхэм шъыпкъэкӀэ къурмэн афашӀы нахь, Тхьэм фашӀырэп. Ау шъо джынапцӀэхэм гъусэ шъуафэхъунэу сыфаеп. 21 Зиусхьаным ишъуалъэми джынапцӀэхэмэ яшъуалъэми шъурешъо хъущтэп. Зиусхьаным иӀанэми джынапцӀэхэмэ яӀанэми шъупэсы хъущтэп. 22 Хьауми Зиусхьаныр дгъэгубжынэу тыпылъа? Ежьым нахьи тынахь лъэша?
Сыд шъушӀэми, цӀыфхэм Тхьэм щытхъу фяжъугъэшӀыным пае, ар шъушӀэ
23 «Сыд щыщи тшӀэн тыфит», цӀыфхэм аӀо. Ар шъыпкъэ, ау Ӏоф пстэури ӀэпыӀэгъу къытфэхъухэрэп. Сыд щыщи тшӀэн тыфит, ау Ӏоф пстэуми яшӀуагъэк къытэкӀырэп. 24 Хэти ежь ишӀуагъэ ыуж ерэмыт, нэмыкӀ цӀыфхэм яшӀуагъэ ыуж ерэт нахь. 25 Бэдзэрым щащэрэр зэкӀэ шъушхы, щэч зи шъугу къишъумыгъахьэу. 26 Сыда пӀомэ «ЧӀылъэри чӀылъэм тет пстэури Зиусхьаным ий». 27 ШӀошъхъуныгъэ зимыӀэ горэм шъуигъэшхэнэу шъуригъэблэгъагъэу щытмэ, шъукӀонэуи шъуфаемэ, щэч шъугу къишъумыгъахьэу, Ӏанэм къытралъхьэрэри шъушхы. 28 Ау зы цӀыф горэм, «Мыр тхьэ нэпцӀхэм афашӀыгъэ къурмэныпхъэм ыл», къышъуиӀомэ, къышъозыӀуагъэм паерэ гу илъым паерэ ар шъумышхы; сыда пӀомэ «ЧӀылъэри чӀылъэм тет пстэури Зиусхьаным ий». 29 Гум илъэу зыфасӀорэр шъо шъугухэм арылъыр арэп, къышъозыӀуагъэм ыгу илъыр ары нахь; сыда пӀомэ нэмыкӀ цӀыф горэм щэчэу ыгу къыригъахьэрэм сифитыныгъэ сыд пае ыгъэмысэна? 30 Тхьэм щытхъу сэ фэсшӀэу зыгорэ сшхымэ, зэрэсшхырэмкӀэ сыд пае цӀыфхэм сагъэмысэщта? 31 Арышъ, шъушхэми, шъуешъоми е нэмыкӀ горэ шъушӀэми, цӀыфмэ Тхьэм щытхъушхо фяжъугъэшӀыным тетэу ар шъушӀэ. 32 Джуртхэми, урымхэми, Тхьэм ичылыс зэӀукӀэм щыщхэми ягъогукӀэ зыгъэлъэпаорэ мыжъо шъуафэмыхъу. 33 Сэри Ӏофэу сшӀэрэ пстэумкӀэ цӀыф пстэуми агу къызэрэсэӀуным сыпылъ, сыда пӀомэ сэ сишӀуагъэ ыуж ситэп, цӀыфыбэмэ яшӀуагъэ ыуж сит нахь, ахэр мыкӀодхэу Тхьэм къыгъэнэжьынхэм пае.
1 Христос илъэужхэм сызэрарыкӀорэм фэдэу, шъори силъэужхэм шъуарыкӀу. Бзылъфыгъэхэр Тхьэм елъэӀухэ зыхъукӀэ, шъхьэтехъо зытырахъон фае 2 КъэсӀуагъэ пстэури шъугу къызэрэжъугъэкӀыжьырэм паий, Ӏофхэу шъозгъэшӀагъэхэм шъузэратетым паий сышъущэтхъужьы. 3 Мыр шъушӀэнэу сыфай: Хэтрэ лӀи ышъхьэ Христосыр ары, хэтрэ шъузи ышъхьэ илӀ ары, Христос ышъхьэри Тхьэр ары. 4 Хэтрэ хъулъфыгъэу шъхьэтехъо зытезыхъуагъэу Тхьэм елъэӀурэм е Тхьэм ежь игущыӀэхэр зыгу къырилъхьэхэу, ахэр къэзыӀорэм ышъхьэ егъэпыутыжьы. 5 Ащ фэдэу хэтрэ бзылъфыгъэу шъхьэтехъо зытезымыхъуагъэу Тхьэм елъэӀурэм е Тхьэм ежь игущыӀэхэр зыгу къырилъхьэхэу, ахэр къэзыӀорэм ышъхьэ егъэпыутыжьы, сыда пӀомэ а бзылъфыгъэм ышъхьэ упсыгъэм фэд. 6 Зы бзылъфыгъэ горэм шъхьэтехъо зытырихъонэу фэмыемэ, ышъхьац перэупкӀ. Ау бзылъфыгъэмкӀэ ышъхьац пиупкӀыныр, е ышъхьэ ыупсыныр емыкӀоу зэрэщытым пае, шъхьэтехъо зытырерэхъу. 7 Хъулъфыгъэм ышъхьэ техъон фишӀын фаеп, сыда пӀомэ хъулъфыгъэр Тхьэм итеплъэ фэдэшъ ары, Тхьэм ищытхъуи къегъэлъагъошъ ары. Ау шъузым илӀ ищытхъушхо къегъэлъагъо. 8 Сыда пӀомэ хъулъфыгъэр бзылъфыгъэм къыхэкӀыгъэп, бзылъфыгъэр хъулъфыгъэм къыхэкӀыгъэ нахь. 9 Тхьэм хъулъфыгъэри бзылъфыгъэм къыфигъэхъугъэп, бзылъфыгъэр хъулъфыгъэм къыфигъэхъугъ нахь. 10 Ащ пае, лӀым итетыгъо ыӀэчӀэгъ шъузыр зэрэчӀэтым инэшанэу ыкӀи мэлэӀичхэм апае, ышъхьэ шъхьэтехъо тырерэхъу. 11 Ау щытми, тэ, Зиусхьаныр зыгу илъ цӀыфхэмкӀэ бзылъфыгъэри хъулъфыгъэм епхыгъэу щыт, хъулъфыгъэри бзылъфыгъэм епхыгъэу щыт. 12 Сыда пӀомэ бзылъфыгъэр хъулъфыгъэм къызэрэхэкӀыгъэм фэдэу, хъулъфыгъэри бзылъфыгъэм къыхэкӀы, ау Ӏоф пстэури къы зхэкӀырэр Тхьэр ары. 13 Шъори хьыкум тешъушӀыхь: Ышъхьэ зи тыримыхъуагъэу бзылъфыгъэр Тхьэм елъэӀумэ, емыкӀоу щытба? 14 ЦӀыфым ыгукӀэ ешӀэба, хъулъфыгъэм ышъхьац кӀыхьэмэ, къызэремыкӀурэр, 15 ау бзылъфыгъэм ышъхьац кӀыхьэмэ къызэрекӀурэр? Сыда пӀомэ Тхьэм бзылъфыгъэм шъхьац кӀыхьэ ритыгъ, ышъхьэ тырихъоным пае. 16 Ау зыгорэ мы ӀофымкӀэ къытэнэкъокъунэу фаемэ, тэри Тхьэм ичылыс зэӀукӀэхэми нэмыкӀ хабзэ зэрэтимыӀэр ерэшӀ.
Зиусхьаным ипчыхьэшъхьашх
17 Ау мы унашъохэр сэ къышъуфэсшӀыхэу сышъущытхъужьын слъэкӀыщтэп. Сыда пӀомэ шъузэрэзэӀукӀэрэм шӀу къыхэкӀырэп, Ӏае къыхэкӀы нахь. 18 АпэрэмкӀэ, чылысым шъущызэӀукӀэмэ, купкупэу шъузэрэзэхэкӀырэр зэхэсэхы. Зы лъэныкъокӀэ, ар сэ сшӀошъ мэхъу. 19 Купкупэу шъузэхэкӀын фае, шъуащыщхэу шъыпкъагъэ зиӀэхэр нафэу хъуным пае. 20 Ащ нэмыкӀэу шъушхэнэу шъузызэӀукӀэкӀэ, Зиусхьаным ипчыхьэшъхьашхэ арэп шъушхырэр. 21 Сыда пӀомэ шъушхэ зыхъукӀэ, шъуащыщэу хэти адрэм емыжэу, ежьым ишхын ышхэу еублэ. Арэущтэу зыр мэлакӀэ лӀэу къэнэ, адрэр мэуташъо. 22 ӀПъущышхэнэу ыкӀи шъущешъонэу унэхэр шъуиӀэба? Хьауми Тхьэм ичылыс зэӀукӀэ зэшъумыпэса, зи зимыӀэхэри шъогъэукӀытэжьха? Сыда шъосӀощтыр? Сэ сышъущытхъужьына? Хьау, сышъущытхъужьынэп. 23 Сыда пӀомэ мы Ӏофхэу къышъуфэзгъэнагъэхэр ежь Зиусхьаным къысфигъэнэфагъэх: Зиусхьаныр тетыгъо зиӀэхэм заӀэкӀэхьэгъэ чэщым хьалыгъур къышти, 24 Тхьэм щытхъу фишӀи, зэгуичи къыӀуагъ: «Мы хьалыгъур сэ спкъэу шъо шъуишӀуагъэ къэкӀонэу зэгочыщтыр ары. Шъугу сыкъэжъугъэкӀыжьыным пае, мы хьалыгъур шъушхы». 25 Ащ фэдэу, пчыхьэшъхьашхэм ыуж Зиусхьаным шъуалъэр къышти къыӀуагъ: «Мы шъуалъэм сэнэпсэу итым къикӀырэр зэзэгъыныгъакӀэу Тхьэм ежьымрэ шъоррэ шъуазыфагу дилъхьэрэр ары. А зэзэгъыныгъакӀэр къэзыгъэшъыпкъэжьырэр лъэу сэ къыскӀэкӀыщтыр ары. Мы сэнэпсым шъуешъо къэсми, шъугу сыкъэжъугъэкӀыжьыным пае, шъуешъу». 26 Сыда пӀомэ Зиусхьаныр къэкӀожьыфэ, мы хьалыгъур шъушхы къэсми, мы шъуалъэм итыми шъуешъо къэсми, Зиусхьаныр зэрэлӀагъэм икъэбар шъогъэӀу. 27 Арышъ, хэтми фэмышъуашэу Зиусхьаным ихьалыгъу зышхырэм, е ащ ишъуалъэ итым ешъорэм Зиусхьаным ыпкъырэ ылъырэ яхьылӀагъэу псэкӀод ышӀагъэу мысэ мэхъу. 28 Хэтми ежь ыгу илъыр ерэгъэунэфы, етӀанэ хьалыгъур ерэшх, шъуалъэм итыми ерэшъу. 29 Хьалыгъур Зиусхьаным зэрипкъыр зэхимышӀыкӀэу, фэмышъуашэу ар зышхэу, сэнэпсыми ешъорэм, зэрэшхэрэмкӀи зэрешъорэмкӀи мысагъэ зылъегъэсыжьы. 30 Ащ пае лъэкӀыныгъэ зимыӀэу ыкӀи сымаджэу цӀыфыбэ къышъухэт, лӀагъэхэри макӀэхэп. 31 Тэ зыдгъэунэфыжьыгъэмэ, Тхьэм арэущтэу тигъэпщынэщтыгъэп. 32 Ау мы уахътэм Зиусхьаным хьыкум къызыттришӀыхьэкӀэ, тегъэдаӀо, дунаем ицӀыфхэм тырягъусэу мысэ тымыхъуным пае. 33 Арышъ, сшыхэр, шъушхэным пае шъузэӀукӀэмэ, зыр зым ерэж. 34 Зыгорэ мэлакӀэ лӀэмэ, иунэ щэрэшх, шъузызэӀукӀэкӀэ мысэ шъумыхъуным пае. Адрэ Ӏофхэу къанэхэрэм яхьылӀагъэу сыкъызыкӀокӀэ, яунашъо сшӀыщт.
ЛъэкӀыныгъэхэу Тхьэм Ыпсэ ЛъапӀэ цӀыфхэм къаритхэрэр
1 Сшыхэр, Тхьэм Ыпсэ ЛъапӀэ цӀыфхэм лъэкӀыныгъэхэу къаритхэрэр зыфэдэхэр шъумышӀэу шъукъэзгъэнэнэу сыфаеп. 2 Христос шъумышӀэу шъузыщэтым, тхьэ нэпцӀ бзакохэм шъукъыращэкӀэу зэрэщытыгъэм фэдэу, ахэмэ адэжь шъузэрэкӀощтыгъэр шъошӀэ. 3 Арышъ, мыр къыжъугурызгъэӀонэу сыфай: Тхьэм Ыпсэ ЛъапӀэ илъэкӀыныгъэкӀэ къэгущыӀэу, хэти Исус ебгын ылъэкӀыщтэп, Тхьэм Ыпсэ ЛъапӀэ илъэкӀыныгъэкӀи мыхъоу, «Исусыр ары Зиусхьаныр», ыӀошъущтэп. 4 Тхьэм Ыпсэ ЛъапӀэ цӀыфхэм лъэкӀыныгъэхэу къаритхэрэр зэфэшъхьафых, ау Тхьэм Ыпсэ ЛъапӀэ зы. 5 Ӏофхэу цӀыфхэм Зиусхьаным фашӀэхэрэр зэфэшъхьафых, ау а цӀыф пстэури зы Зиусхьан дэдэм фэлажьэх. 6 Тхьэм цӀыфхэм Ӏоф ашӀэнэу лъэкӀыныгъэ зэраритырэр зэфэмыдэу щыт, ау а Ӏофхэр зэкӀэ цӀыф пстэуми ашӀэнхэу лъэкӀыныгъэ язытырэ Тхьэр зы. 7 Тхьэм Ыпсэ ЛъапӀэ хэти зэфэмыдэу зыкъырегъэлъагъу, шӀошъхъуныгъэ зиӀэ пстэуми ишӀуагъэ аригъэкӀыным пае. 8 Тхьэм ежь Ыпсэ ЛъапӀэ къыбгъодэкӀэу, зэхэшӀыкӀыныгъэ зиӀэ гущыӀэхэр къыӀонхэу зы цӀыф горэм лъэкӀыныгъэ къыреты, нэмыкӀ цӀыфми Тхьэм ежь Ыпсэ ЛъапӀэ тетэу, шӀэныгъэ зиӀэ гущыӀэхэр къыӀонхэу лъэкӀыныгъэ къыреты. 9 НэмыкӀ цӀыфми а Псэ ЛъэпӀэ дэдэм къыбгъодэкӀэу, шӀошъхъуныгъэ иӀэнэу лъэкӀыныгъэ къыреты; нэмыкӀ цӀыфми а Псэ ЛъэпӀэ дэдэм къыбгъодэкӀэу, сымаджэхэр ыгъэхъужьынхэу лъэкӀыныгъэхэр къыретых. 10 НэмыкӀ цӀыфми Ӏофышхо гъэшӀэгъонхэр ышӀэнхэу лъэкӀыныгъэ къыреты; нэмыкӀ цӀыфым ыгу Тхьэм ежь игущыӀэхэр къырилъхьэхэу, ахэр къыӀонхэу лъэкӀыныгъэ къыреты; нэмыкӀ цӀыфми Ӏоф горэ Тхьэм Ыпсэ ЛъапӀэ ыдэжь къикӀымэ, къимыкӀымэ, зэхишӀыкӀынэу лъэкӀыныгъэ къыреты; етӀанэ нэмыкӀ цӀыфми ымышӀэрэ бзэхэмкӀэ къэгущыӀэнэу лъэкӀыныгъэ къыреты; нэмыкӀ цӀыфми а бзэхэр зэридзэкӀынхэу лъэкӀыныгъэ къыреты. 11 А Псэ ЛъэпӀэ дэдэр ары цӀыфхэм ахэр ашӀэнхэу лъэкӀыныгъэхэр къязытырэр. Хэти шъхьафэу, Тхьэм Ыпсэ ЛъапӀэ зэрэфаем тетэу реты.
Пкъыр зы, пкъым щыщхэр бэ
12 Пкъым щыщхэр бэ хъухэми, пкъыр зы. Пкъым щыщ пстэури бэ хъухэми, а зы пкъым щыщых. Христос иӀоф арэущтэу щыт. 13 Сыда пӀомэ тэ тыджуртми, тыурымми, тыпщылӀми, тышъхьафитми, тэ зэкӀэ а зы Псэ ЛъапӀэр тыгухэм арылъынэу тызаумэхъым, Христос ыпкъ щыщ тыхъугъ, Христосми а зы Псэ ЛъапӀэм тэ пстэуми тиӀахьэ хэлъэу ыгъэхъугъ. 14 Сыда пӀомэ пкъым щыщхэр зэп, бэ мэхъух нахь, 15 Лъакъом «Ӏэу сызэрэщымытым пае, пкъым сыщыщэп», ыӀомэ, ащ пае пкъым щымыщэу мэхъуа? 16 ТхьакӀумэми «Нэу сызэрэщымытым пае, пкъым сыщыщэп», ыӀомэ, ащ пае пкъым щымыщэу мэхъуа? 17 Пкъыр зэкӀэ нэу щытыгъэмэ, зэхэхыныгъэм иӀоф сыдэущтэу хъущтыгъ? Ащ фэдэуи пкъыр зэкӀэ тхьакӀумэу щытыгъэмэ, пэмэныгъэм иӀоф сыдэущтэу хъущтыгъ? 18 Ау Тхьэм пкъым щыщ пстэури зэхилъхьагъ, сыд фэди ежьыр зэрэфаем тетэу. 19 Пкъым щыщхэр зэкӀэ зы закъоу щытыгъэмэ, пкъыр тыдэ къэнэщтыгъа? 20 Ау джы зэрэщытымкӀэ пкъым щыщхэр бэ мэхъух, ау пкъыр зызакъо. 21 Нэм «Сэ усищыкӀагъэп», ыӀоу, Ӏэм риӀошъущтэп. Шъхьэми «Сэ шъусищыкӀагъэп», ыӀоу, лъакъохэм ариӀошъущтэп. 22 Ау пкъым щыщхэу адрэмэ анахьи нахь кӀуачӀэ зимыӀэхэу къэлъагъохэрэр нахь тищыкӀагъэх. 23 Пкъым щыщхэу лъытэныгъэ зифэмышъуашэу тлъытэхэрэми нахь тафысакъы. 24 Пкъым щыщхэу тызтеукӀытэхьэхэрэри нахь екӀоу тэгъэбылъых. Пкъым щыщхэу тызтемыукӀытыхьэхэрэм ар ящыкӀагъэп. Ау пкъым щыщхэу лъытэныгъэ зимыӀэхэм адрэ щыщхэм анахьи нахь лъытэныгъэ аритэу, Тхьэм пкъыр зэхилъхьагъ. 25 Тхьэм арэущтэу зыфишӀагъэр тэ ежь ыпкъ щыщхэр тызэпэмыуцоу, тызэфэдэу тызэфэсакъыжьыныр ары. 26 Арышъ, пкъым щыщэу зыгорэм къин ыщэчмэ, а пкъым щыщ пстэуми дащэчы. Ащ фэдэу, пкъым щыщэу зыгорэм лъытэныгъэ ыгъотымэ, а пкъым щыщ пстэури дэгушӀох. 27 Шъо Христос шъурипкъ, шъуащыщэу хэти а пкъым шъущыщ. 28 Чылыс зэӀукӀэм фэлэжьэнхэу Тхьэм апэрэмкӀэ цӀыф заулэ апостолхэу къыгъэнэфагъэх. ЯтӀонэрэмкӀи, цӀыф заулэ пегъымбархэу къыгъэнэфагъэх. ЯщэнэрэмкӀи, цӀыф заулэмэ адрэ цӀыфхэм Ӏофхэр арагъэшӀэнхэу къыгъэнэфагъэх. ЕтӀанэ Ӏофышхо гъэшӀэгъонхэр ашӀэнхэу цӀыф заули къыгъэнэфагъэх. ЕтӀанэ сымаджэхэр агъэхъужьынхэм пае, лъэкӀыныгъэхэр яӀэнхэу цӀыф заули къыгъэнэфагъэх. НэмыкӀхэри адрэ цӀыфхэм ӀэпыӀэгъу афэхъунхэу, нэмыкӀхэри пэрытынхэу, етӀанэ нэмыкӀхэми ежьхэм амышӀэрэ бзэхэмкӀэ къэгущыӀэнхэу къыгъэнэфагъэх. 29 ЦӀыф пстэури апостолхэу щытхэп, арыба? ЦӀыф пстэури пегъымбархэу щытхэп, арыба? ЦӀыф пстэуми адрэ цӀыфхэм Ӏофхэр арагъашӀэхэрэп, арыба? ЦӀыф пстэуми Ӏофышхо гъэшӀэгъонхэр ашӀэхэрэп, арыба? 30 ЦӀыф пстэуми сымаджэхэр агъэхъужьынхэу лъэкӀыныгъэхэр яӀэхэп, арыба? АмышӀэрэ бзэхэмкӀи цӀыф пстэури къэгущыӀэхэрэп, арыба? ЦӀыф пстэуми ащ фэдэ бзэхэр зэрадзэкӀыхэрэп, арыба? 31 Ау лъэкӀыныгъэхэу анахь инхэм ауж шъуит. Джы гъогоу анахьышӀур шъозгъэлъэгъущт.
ШӀулъэгъуяыгъэр
1 ЦӀыфхэмрэ мэлэӀичхэмрэ абзэхэмкӀэ сыгущыӀэу, ау шӀулъэгъуныгъэ сыгу имылъмэ, жъгъырэу макъэ зыпыӀукӀырэ гъуаплъэмрэ мэкъае зыпыӀукӀырэ одджынымрэ сафэд. 2 Тхьэм ежь игущыӀэхэр сыгу къырилъхьэхэу, ахэр къэсӀонхэу лъэкӀыныгъэ къыситыгъэу сиӀэми, шъэф пстэури сэшӀэми, шӀэныгъэ пстэури сиӀэми, къушъхьэхэр нэмыкӀ чӀыпӀэм згъэкощынхэу шӀошъхъуныгъэ сиӀэми, ау шӀулъэгъуныгъэ сыгу имылъмэ, зэуи сыщытэп. 3 СиӀэр зэкӀэ щыкӀагъэ зиӀэхэм ястыми, цӀыфхэм спкъы.машӀокӀэ агъэстынэу ястыми, ау шӀулъэгъуныгъэ сыгу имылъмэ, ишӀуагъэ къысэкӀыщтэп. 4 ШӀулъэгъуныгъэм щыӀагъэ иӀ, гукӀэгъуныгъэри иӀ. ШӀулъэгъуныгъэр шъугъорэп, зыщытхъужьрэп ыкӀи зышӀошӀыжьрэп. 5 ШӀулъэгъуныгъэр емыкӀоу зекӀорэп, ежь ышъхьэ ишӀуагъэ ыуж итэп, зигъэгусэрэп, бзэджагъэм егупшысэрэп. 6 ШӀулъэгъуныгъэр бзэджагъэм фэгушӀорэп, шъыпкъагъэм фэгушӀо нахь. 7 ШӀулъэгъуныгъэм мыхъун пстэури егъэгъу, ТхьэмкӀэ шӀошъхъуныгъэ иӀэ зэпыт, Тхьэм щегугъы зэпыт, теубытэныгъэ иӀэ зэпыт. 8 ШӀулъэгъуныгъэр ныбжьи кӀодыжьыщтэп. Тхьэм ежь игущыӀэхэр цӀыфхэм агухэм къарилъхьахэу, цӀыфхэм къызэраӀохэрэм илъэкӀыныгъэ уцужьыщт. ЦӀыфхэм амышӀэрэ бзэхэмкӀи къызэрэгущыӀэхэрэм илъэкӀыныгъэри зэпыужьыщт. ШӀэныгъэри кӀодыжьыщт. 9 Арэущтэу зыкӀэхъущтыр тишӀэныгъэ щыкӀэгъэнчъэу, икъугъэу зэрэщымытыр ары, Тхьэм ежь игущыӀэхэр цӀыфхэм агухэм къарилъхьэхэу, цӀыфхэм ахэр къызэраӀохэрэм илъэкӀыныгъи щыкӀэгъэнчъэу, икъугъэу зэрэщымытыр ары, 10 Ау щыкӀагъэ зимыӀэу, икъугъэ Ӏофыр къызыкӀокӀэ, щыкӀагъэ зиӀэу, имыкъугъэ Ӏофыр кӀодыжьыщт. 11 Сабыеу сызыщэтым, сабыим фэдэу сыгущыӀэщтыгъ, сабыим фэдэу сыгупшысэщтыгъ ыкӀи къызгурыӀощтыгъ. Ау лӀы сызэхъум, а сабыиныгъэр хэсынэжьыгъ. 12 Джы Ӏоф пстэури мынафэу гъунджэм тызэри плъэрэм фэдэу тэлъэгъу, ау а мафэм зэкӀэ нафэу тлъэгъущт, зы цӀыф горэм тызэрэпэӀууцорэм фэдэу. Джы сишӀэныгъэ щыкӀагъэ иӀэу, имыкъугъэу щыт, ау а мафэм зэкӀэ сшӀэщт, Тхьэм шъыпкъэу сызэришӀэрэм фэдэу. 13 Арэущтэу мы Ӏофищыр мыкӀодыжьынхэу щытых: шӀошъхъуныгъэр, Тхьэм ӀэхьышӀур къызэрэтитыщтым щыгугъыгъэньф, шӀулъэгъуныгъэр. Ау ахэмэ ащыщэу анахь иныр шӀулъэгъуныгъэр ары.
НэмыкӀ лъэкӀыныгъэхэу Тхьэм Ыпсэ ЛъапӀэ пДыфхэм къаритхэрэр
1 ШӀулъэгъуныгъэр шъугухэм зэрарылъыщтым шъуишъыпкъэу ыуж шъуит. Тхьэм лъэкӀыныгъэхэр къызэрэшъуитыщтхэм ыуж шъуит, анахьэу Тхьэм ежь игущыӀэхэр шъугухэм къарилъхьанхэшъ, ахэр къэшъуӀонхэу лъэкӀыныгъэ къызэрэшъуитыщтым ыуж шъуит. 2 Сыда пӀомэ Тхьэм Ыпсэ ЛъапӀэ илъэкӀыныгъэкӀэ ымышӀэрэ бзэкӀэ къэгущыӀэрэр цӀыфмэ адэгущыӀэрэп, Тхьэм дэгущыӀэ нахь, сыда пӀомэ къыӀохэрэр зыми къыгурыӀохэрэп. Тхьэм Ыпсэ ЛъапӀэ илъэкӀыныгъэкӀэ шъэфхэр къеӀох. 3 Ау Тхьэм ежь игущыӀэхэр цӀыфэу зыгу къьфилъхьэу, ахэр къэзыӀорэр цӀыфмэ адэгущыӀэ, гурэ псэрэкӀэ нахь лъэкӀыныгъэ арегъэгъоты, агурегъаӀо ыкӀи егъэгушхох. 4 ЦӀыфэу ымышӀэрэ бзэкӀэ къэгущыӀэрэм гурэ псэрэкӀэ нахь лъэкӀыныгъэ зыфегъотыжьы, ау Тхьэм ежь игущыӀэхэр зыгу къырилъхьэу, ахэр къэзыӀорэм чылыс зэӀукӀэм щыщхэм гурэ псэрэкӀэ нахь лъэкӀыныгъэ арегъэгъоты. 5 Шъо зэкӀэми шъумышӀэрэ бзэхэмкӀэ шъукъэгущыӀэнэу сыфай, ау ащ нахьи Тхьэм ежь игущыӀэхэр шъугухэм къарилъхьанхэшъ, ахэр къызэрэшъуӀонхэм илъэкӀыныгъэ шъуиӀэнэу сыфай. Тхьэм ежь игущыӀэхэр зыгу къырилъхьэу, ахэр къэзыӀорэр цӀыфэу ымышӀэрэ бзэкӀэ къэгущыӀэрэм нахьи нахь ин, а бзэр зыгорэм зэримыдзэкӀымэ, чылыс зэӀукӀэм щыщхэм гурэ псэрэкӀэ нахь лъэкӀыныгъэ аригъэгъотыным пае. 6 Джы, сшыхэр, шъуадэжь сыкъакӀоу сымышӀэрэ бзэкӀэ сыкъэгущыӀэмэ, сыда сишӀуагъэу шъозгъэкӀыщтыр? Тхьэм къысфигъэнэфэгъэ Ӏофхэр шъосымыӀохэу, е шӀэныгъэ къышъосымытэу, е Тхьэм ежь игущыӀэхэу сыгу къырилъхьэхэрэр, къэсымыӀохэмэ, е Ӏоф горэхэр шъосымыгъашӀэхэмэ, сишӀуагъэ зи шъозгъэкӀырэп, арыба? 7 Ащ фэдэу, шыкӀэпщынэрэ, къамылрэ, е адрэ псэ зыхэмылъэу макъэ къызпыӀукӀырэмэ мэкъэ зэфэшъхьафхэр ямыӀэмэ, орэдэу къарагъаӀорэр сыдэущтэу зэхэпшӀыкӀыщта? 8 Бжъэмыешхом ымакъэ мынафэмэ, хэта заом зыфэзыгъэхьазырыщтыр? 9 Шъо шъуиӀоф зытетыр ащ фэд. Шъо шъубзэгукӀэ цӀыфхэм зэхамышӀыкӀырэ гущыӀэхэр къашъуӀохэмэ, сыдэущтэу къашъуӀорэр зэхашӀыкӀыщта? Жьыбгъэм шъудэгущыӀэщт ныӀэп. 10 Дунаем бзэ зэфэшъхьафыбэхэр тетых, зэкӀэ ахэми зыгорэ къарэкӀы. 11 Ау бзэм къикӀырэр зэхэсымышӀыкӀымэ, къэгущыӀэрэм хымэ сыфэхъущт, ежьыри хымэ къысфэхъущт. 12 Арэущтэу шъори Тхьэм ежь ЬӀпсэ ЛъапӀэ къыбгъодэкӀэу, лъэкӀыныгъэхэр къызэрэшъуитыщтхэм ыуж шъуитышъ, чылыс зэӀукӀэм щыщхэм гурэ псэрэкӀэ нахь лъэкӀыныгъэ яжъугъэгъотыным пае, ащ фэдэ лъэкӀыныгъэхэр щыкӀэгъэнчъэу икъугъэу шъуиӀэ зэрэхъущтым ыуж шъуит. 13 Арышъ, цӀыфэу ымышӀэрэ бзэкӀэ къэгущыӀэрэм а бзэр зэридзэкӀынэуи лъэкӀыныгъэ къыритынкӀэ Тхьэм ерэлъэӀу. 14 Сыда пӀомэ сымышӀэрэ бзэкӀэ Тхьэм селъэӀумэ, спсэкӀэ селъэӀу, ау сиакъыл лажьэрэп. 15 Сыда ащыгъум сшӀэщтыр? СпсэкӀи сиакъылкӀи Тхьэм селъэӀущт. СпсэкӀи сиакъылкӀи тхьэщытхъу орэдхэр къэсӀощтых. 16 Сыда пӀомэ умышӀэрэ бзэкӀэ Тхьэм Ыпсэ ЛъапӀэ илъэкӀыныгъэкӀэ Тхьэм ищытхъу пшӀымэ, мы Ӏофхэр зэхэзымышӀыкӀырэ цӀыфхэм ащыщэу зыгорэм уитхьэщытхъу сыдэущтэу «Амин» фиӀон ылъэкӀына? КъапӀорэр гурыӀорэп, арыба? 17 О дэгъоу Тхьэм ищытхъу ошӀы, ау адрэм ишӀуагъэ къакӀорэп. 18 Тхьэм Ыпсэ ЛъапӀэ илъэкӀыныгъэкӀэ сымышӀэрэ бзэкӀэ шъо пстэуми анахьи нахьыбэу сызэрэгущыӀэрэмкӀэ Тхьэм щытхъу фэсэшӀы. 19 Ау чылыс зэӀукӀэм сыщыӀэу, сымышӀэрэ бзэкӀэ гущыӀэ мин къэсӀоным нахьи, цӀыфхэм Ӏоф горэхэр язгъэшӀэнхэм пае, сиакъылкӀэ гущыӀитф къэсӀоныр нахь къэсэштэ. 20 Сшыхэр, шъуигупшысакӀэкӀэ сабыйхэм шъуафэдэу шъумыхъу. Ау бзэджагъэмкӀэ сабыйхэм лажьэ зэрямыӀэм фэдэу, шъори шъухъу, шъуигупшысакӀэкӀи зыныбжь икъугъэ цӀыфхэм афэдэу шъухъу. 21 Зиусхьаным мырэущтэу къызэриӀорэр Тэурат хабзэм ит: «ХымабзэхэмкӀи хымэхэм абзэгухэмкӀи мы лъэпкъым сыдэгущыӀэщт, ау щытми къысэдэӀущтхэп». 22 Арышъ, Тхьэм Ыпсэ ЛъапӀэ илъэкӀыныгъэкӀэ цӀыф горэм ымышӀэрэ бзэхэмкӀэ гущыӀэмэ, ар нэшанэ зыфэхъухэрэр шӀошъхъуныгъэ зиӀэхэр арэп, шӀошъхъуныгъэ зимыӀэхэр ары нахь. Ау Тхьэм ежь игущыӀэхэр зыгу къырилъхьэрэ цӀыфым ахэр къызиӀохэкӀэ, ар нэшанэ зыфэхъухэрэр шӀошъхъуныгъэ зимыӀэхэр арэп, шӀошъхъуныгъэ зиӀэхэр ары нахь. 23 Чылыс зэӀукӀэм щыщ пстэури зэрэугъоигъэхэу, шъумышӀэрэ бзэхэмкӀи шъо зэкӀэ шъугущыӀэу, ащ фэдэ Ӏофхэр зымышӀэрэ цӀыф заулэ, е шӀошъхъуныгъэ зимыӀэ цӀыф заулэ а зэӀукӀэм къыхахьэмэ, «Шъо шъудел», аӀонба? 24 Ау шъо пстэуми Тхьэм ежь игущыӀэхэу шъугухэм къарилъхьэхэрэр къашъуӀохэ зьгхъукӀэ, шӀошъхъуныгъэ зимыӀэ цӀыф горэ, е ащ фэдэ Ӏофхэр зымышӀэрэ цӀыф горэ шъуизэӀукӀэ къыхахьэмэ, шъо зэкӀэми къашъуӀорэ гущыӀэхэм зэхырагъэшӀыкӀыщт псэкӀодышӀэ цӀыфэу зэрэщытыр, ыгу илъыри агъэунэфыщт. 25 Арэущтэу а цӀыфым ыгу илъ шъэфхэр нафэ къэхъух. ЬӀбгъэгукӀэ чӀыгум зытыридзэнышъ, Тхьэр ыгъэлъэпӀэщт, «ШъыпкъэмкӀэ Тхьэр шъуигъусэ», къыӀозэ.
Чылыс зэӀукӀэм екӀоу ыкӀи зэгъэзэфагъэу Тхьэр ыгъэлъэпӀэн фае
26 Сыд етӀанэ, сшыхэр? ШъузызэӀукӀэкӀэ, зым тхьэщытхъу орэд къерэӀу, адрэм Ӏоф горэ шъуерэгъашӀэ, нэмыкӀми Тхьэм къыфигъэнэфэгъэ Ӏоф горэ къерэӀуат, нэмыкӀри ымышӀэрэ бзэкӀэ орэгущыӀэ, нэмыкӀми ар зэрерэдзэкӀ. Мы Ӏоф пстэуми гурэ псэрэкӀэ нахь лъэкӀыныгъэ шъуагъэгъотынэу орэхъу. 27 Ежьхэм амышӀэрэ бзэкӀэ цӀыф горэхэр къэгущыӀэхэ хъумэ, нэбгыритӀу е нэ бгырищ, нахьыбэ орэмыхъу, зыр зым ыуж итэу орэгущыГэ. НэмыкГми ахэмэ къаӀорэр зэрерэдзэкӀ. 28 Ау зэзыдзэкӀышъун цӀыф горэ щымыӀэмэ, ымышӀэрэ бзэкӀэ къэгущыӀэрэм чылыс зэӀукӀэм зыщерэушъэф. ЫгукӀэ орэгущыӀ, Тхьэми дэрэгущыӀ. 29 ЦӀыфхэу Тхьэм ежь игущыӀэхэр зыгу къырилъхьэхэу, ахэр къэзыӀонхэу лъэкӀыныгъэ зэритхэрэм ащыщхэу нэбгыритӀу е нэбгырищ шъуизэӀукӀэ къыщэрэгущыӀэх, къаӀохэрэри адрэхэм арэгъэунэфых. 30 Тхьэм зэӀукӀэм хэсхэм ащыщэу зыгорэм Ӏоф горэ къыфигъэнафэмэ, апэу къэгущыӀэрэм зерэушъэф. 31 Сыда пӀомэ шъо зэкӀэмэ Тхьэм ежь игущыӀэхэу шъугухэм къарилъхьэхэрэр зыр зым ыуж итэу къэшъуӀонхэ шъулъэкӀыщт, адрэ цӀыфхэм зэкӀэми зыгорэ зэрагъэшӀэным паий, зэкӀэри гушхонхэм паий. 32 ЦӀыфхэу Тхьэм ежь игущыӀэхэр зыгу къырилъхьэхэу, ахэр къэзыӀонхэу лъэкӀыныгъэ зэритыхэрэм аӀэ а лъэкӀыныгъэр илъ, 33 сыда пӀомэ Тхьэр гупсэфыныгъэм и Тхьэу щыт нахь, зэхэтхъогъэ Ӏофым и Тхьэу щытэп. Тхьэм ицӀыф лъапӀэхэм ячылыс зэӀукӀэ пстэуми яӀоф зытетыр ащ фэд. 34 Бзылъфыгъэхэм чылыс зэӀукӀэм зыщарэушъэф. Ахэр гущыӀэнхэу фитхэп, ау Тэурат хабзэм зэритым фэдэу, ялӀыхэм афэӀорышӀэнхэ фае. 35 Зы Ӏоф горэ зэрагъэшӀэнэу фаехэмэ, яшъхьэгъусэмэ унэм щярэупчӀых; сыда пӀомэ чылыс зэӀукӀэм хэсэу бзылъфыгъэр къэгущыӀэныр екӀурэп. 36 Тхьэм игущыӀэхэр шъуадэжь къикӀыгъэха, сэӀо? Хьауми а гущыӀэхэр цӀыфхэу зынэсыгъэхэр шъо шъуизакъуа? 37 ЦӀыф горэм ыгу Тхьэм ежь игущыӀэхэр къырилъхьэхэу, ахэр къыӀонхэу лъэкӀыныгъэ иӀэу мэгугъэмэ, е Тхьэм Ыпсэ ЛъапӀэ ыгу илъэу мэгугъэмэ, мы къышъуфэстхырэр Зиусхьаным зэриунашъор къыгурэрэӀу. 38 Ар къызыгурымыӀорэ цӀыфым къыгурэрэмыӀу. 39 Арышъ, сшыхэр, Тхьэм ежь игущыӀэхэр шъугухэм къарилъхьанхэшъ, ахэр къэшъуӀонхэу лъэкӀыныгъэ къызэрэшъуитыщтым ыуж шъуит, амышӀэрэ бзэхэмкӀи цӀыфхэр къэшъумыгъэгущыӀэнхэу шъупымылъ. 40 Ау Ӏофхэр зэкӀэ екӀухэу ыкӀи зэгъэзэфагъэхэу орэхъу.
Христос лӀагъэхэм къызэрахэтэджыкӀыжьыгъэм ехьылӀагъ
1 КъэбарышӀоу къышъозгъэӀугъэр шъугу къэзгъэкӀыжьынэу сыфай. А къэбарышӀур шъудагъэу шъуишъыпкъэу шъутет. 2 А къэбарышӀумкӀи шъумыкӀодэу Тхьэм шъукъегъэнэжьы, шъозгъэшӀэгъэ Ӏофхэм пытэу шъуатетмэ. Армырмэ, хьаулыеу шӀошъхъуныгъэ шъуиӀэ хъугъэ. 3 Сыда пӀомэ Ӏоф пстэуми апэу къэбарышӀоу Христос къысӀэкӀилъхьагъэр къышъуфэзгъэнагъ: Тхьэм игущыӀэ тхыгъэхэм атетэу, Христос типсэкӀодхэр ыпщыныжьынхэм пае, лӀагъэ. 4 Къэунэм чӀалъхьажьыгъ, ау ящэнэрэ мафэм Тхьэм лӀагъэхэм ар къахигъэтэджыкӀыжьыгъ, Тхьэм игущыӀэ тхыгъэхэм атетэу. 5 ЕтӀанэ Христос Кифэ зыкъыригъэлъэгъугъ. Ащ ыуж игъогу рыкӀорэ нэбгырэ пшӀыкӀутӀумэ зыкъаригъэлъэгъугъ. 6 ЕтӀанэ зэ къош шъитфым къехъумэ зыкъаригъэлъэгъугъ. Ахэмэ ащыщэу анахьыбэр джыри псэух, заули дунаем ехыжьыгъ. 7 Ащ ыуж Якъуби зыкъыригъэлъэгъугъ, етӀани апостол пстэуми зыкъаригъэлъэгъугъ. 8 ЗэкӀэми аужкӀэ сэ сабыйхэр къызэралъфырэ хабзэм фэмыдэу къалъфыгъэ сабыим фэдэм зыкъысигъэлъэгъугъ. 9 Сыда пӀомэ апостолхэм ащыщэу анахь цӀыкӀур сэры, апостол къысаӀонэуи сифэшъуашэп, сыда пӀомэ Тхьэм ичылыс зэӀукӀэ щыщхэм къин язгъэщэчыщтыгъэти ары. 10 Ау Тхьэм ынэшӀу къызэрэсщифагъэм пае, джы сызэрэщытым фэдэу сыхъугъ. ЫнэшӀу къызэрэсщифагъэр хьаулыеу хъугъэп. Адрэхэм зэкӀэми анахьи нахьыбэу сылэжьагъ, ау сэрсэрэу сылэжьагъэп, Тхьэм ынэшӀу къысщифи, сигъэлэжьагъэ нахь. 11 КъэбарышӀур цӀыфхэм языгъэӀурэр сэрэу щытми, адрэ апостолхэр арэу щытми, а къэбарышӀур ары дгъэӀурэр. А къэбарышӀумкӀэ шъори шӀошъхъуныгъэ шъуиӀэ хъугъэ.
ЛӀагъэхэм якъэтэджыжьыныгъэ
12 Тхьэм Христос лӀагъэхэм къызэрахигъэтэджыкӀыжьыгъэм икъэбар тэгъэӀу пэтми, шъуащыщэу заулэм, «ЛӀагъэхэр къэтэджыжьыщтхэп», аӀоу, сыдэущтэу аӀон алъэкӀыра? 13 ЛӀагъэхэр къэмытэджыжьыщтхэмэ, ащыгъум Тхьэм Христоси лӀагъэхэм къахимыгъэтэджыкӀыжьыгъэу хъущтыгъэ. 14 Ау Тхьэм Христос лӀагъэхэм къахимыгъэтэджыкӀыжьыгъэмэ, къэбарышӀоу шъодгъэӀурэм пкӀэ иӀэщтыгъэп, тишӀошъхъуныгъи пкӀэ иӀэщтыгэп. 15 Ащ нэмыкӀэуи, Тхьэм шыхьат нэпцӀ тыфэхъугъэу къычӀэкӀыщтыгъ, сыда пӀомэ Тхьэм Христос лӀагъэхэм къызэрахигъэтэджыкӀыжьыгъэм шыхьат тыфэхъугъ, ау «Тхьэм лӀагъэхэр къыгъэтэджыжьыщтхэп», аӀо а цӀыфхэм зэраӀорэм тетэу шъыпкъэмэ, Тхьэм Христоси къымыгъэтэджыжьыгъэу хъущтыгъэ. 16 Сыда пӀомэ Тхьэм лӀагъэхэр къымыгъэтэджыжьыщтхэмэ, Христоси къымыгъэтэджыжьыгъэу хъущтыгъэ. 17 Ау Тхьэм Христос лӀагъэхэм къахимыгъэтэджыкӀыжьыгъэмэ, шъуишӀошъхъуныгъэ хьаулыеу хъущтыгъ, шъуипсэкӀодхэри джыри къышъутелъыщтыгъэх. 18 Ащыгъум цӀыфхэу ХристоскӀэ шӀошъхъуныгъэ зиӀэхэу лӀагъэхэр кӀодыгъэхэу щытыщтыгъэх. 19 Мы дунаем ищыӀэныгъэ закъо пае Христос тыщыгугъымэ, цӀыф пстэуми анахьи нахь сыхьатмыгъо ежьагъэхэр тэры. 20 Ау зэрэщытымкӀэ, Тхьэм Христос лӀагъэхэм къахигъэтэджыкӀыжьыгъ, Тхьэм адрэ лӀагъэхэр къызэригъэтэджыжьыщтхэмкӀэ Христос шэсы къытфэхъуным пае. 21 Сыда пӀомэ лӀэныгъэр къызпкъырыкӀыгъэр зы цӀыф, ащ фэдэуи лӀагъэхэм якъэтэджыжьыныгъэ къызпкъырыкӀырэри зы цӀыф. 22 ЦӀыф пстэури Адэм зыцӀэм къызэрэтехъукӀыгъэхэм пае, мылӀэнхэ мыхъунэу зэрэщытым фэдэу, Христос зыгу илъ цӀыф пстэури Тхьэм къыгъэпсаужьыщтых. 23 Ау а Ӏофыр зэрэхъущтыр хэти ичэзыу тетэу ары: апэу лӀагъэхэм къахэтэджыкӀыжьыгъэр Христос ары. ЕтӀанэ ащ дунаем къызигъэзэжькӀэ, ицӀыфхэр къэтэджыжьыщтых. 24 Ащ ыуж дунаем икӀэух къэ сыщт. Ар къызыскӀэ, Христос Ӏэшъхьэтет пстэури, тетыгъо зиӀэ пстэури, лъэкӀыныгъэ зиӀэ пстэури зегъэкӀоды ужым, ащ Тхьэу Ты лъапӀэм тетыгъошхор ритыщт. 25 Сыда пӀомэ Христос тетыгъор иӀэн фае, Тхьэм Христос ипыйхэр зэкӀэ Христос ылъэгу чӀэгъ чӀигъэуцофэ нэс. 26 Ыужырэ пыеу Тхьэм ыгъэкӀодыжьыщтыр лӀэныгъэр ары; 27 сыда пӀомэ Тхьэм игущыӀэ тхыгъэхэм зэрарытым фэдэу, «Тхьэм зэкӀэри Христос ылъэгу чӀэгъ чӀигъэуцуагъ». Тхьэм зэкӀэри Христос итетыгъо ыӀэчӀэгъ чӀигъэуцуагъэу ыӀозэ, Тхьэм игущыӀэ тхыгъэхэм арытышъ, зэкӀэри Христос итетыгъо ыӀэчӀэгъ чӀэзыгъэуцогъэ Тхьэр зэрямыгъусэр нафэ. 28 Тхьэм зэкӀэри Ыкъоу Христос итетыгъо ыӀэчӀэгъ зычӀегъэуцо ужым, ыКъуи Тхьэу ыӀэчӀэгъ зэкӀэри чӀэзыгъэуцуагъэм ыӀэчӀэгъ чӀэуцожьыщт. Арэущтэу Тхьэр зэкӀэ цӀыфхэм адэжькӀэ зэкӀэ мэхъу. 29 Тхьэм лӀагъэхэр къымыгъэтэджыжьыщтхэмэ, лӀагъэхэм ачӀыпӀэкӀэ цӀыфхэу диным ехьылӀагъэу тетыгъо зиӀэ цӀыф горэм зезыгъэумэхъыхэрэм сыда агу хэлъыр? Тхьэм лӀагъэхэр къымыгъэтэджыжьыщтхэмэ, лӀагъэхэм ачӀыпӀэкӀэ сыд пае зырагъэумэхъыра? 30 Тэри, сыхьат къэс щынагъом сыд пае зыхэдгъафэра? 31 Сшыхэр, Христос Исусэу ти Зиусхьан шъугухэм зэрарылъымкӀэ сызэрэпагэрэр зэрэшъыпкъэм фэдэу, мафэ къэси лӀэныгъэм сызэрэпэӀутри шъыпкъэ. 32 ЦӀыфхэм ягупшысакӀэ тетэу сегупшысэщтыгъэмэ, Ефес къалэм сыщыӀэу, цӀыфхэу хьакӀэкъуакӀэхэм афэдэхэм сызябэным, сыда ишӀуагъэу къэкӀуагъэр? Тхьэм лӀагъэхэр къымыгъэтэджыжьыщтхэмэ, «Тыжъугъашх, ыкӀи тешъугъашъу, сыда пӀомэ неущ тылӀэщт». 33 Арышъ, цӀыфхэм зяшъумыгъэгъапцӀ: Ныбджэгъу дэихэм шэнышӀу зиӀэр агъэкӀоды. 34 ЕкӀоу зэрэщытым тетэу зышъушӀэжь. ПсэкӀодшӀэным ыуж шъуикӀ; сыда пӀомэ Тхьэр зымышӀэрэ заулэ къышъухэт. ШъузгъэукӀытэжьынэу ар сэӀо.
ЛӀагъэхэм къахэтэджыкӀыжьыгъэ цӀыфхэм апкъ
35 Ау зыгорэм къыӀонкӀи мэхъу: «ЛӀагъэхэр сыдэущтэу къэтэджыжьыщтха? Апкъ сыд фэдэщта?» 36 О гурыӀоныгъэ зимыӀэ цӀыф! ЧӀым хаплъхьэрэр мылӀэмэ, къэпсэужьышъущтэп. 37 Зыгорэ чӀым зыхаплъхьэкӀэ, къыхэкӀыщтым ыпкъ арэп хаплъхьэрэр, чылапхъэ къодые нахь, коцым ичылапхъи е нэмыкӀым ичылапхъи. 38 Тхьэр зэрэфаем тетэу пкъы къыреты, сыдрэ зы чылэпхъэ лъэпкъми ежьым иунаеу пкъы къыреты. 39 Пкъыхэр зэкӀэ зэфэмыдэхэу щытых. ЦӀыфым ыпкъ зы, хьакӀэкъуакӀэхэм апкъи шъхьафы, бзыухэми апкъ нэмыкӀ, пцэжъыехэри ары. 40 Уашъом щыӀэ пкъыхэр щыӀэх. ЧӀылъэм щыӀэ пкъыхэри щыӀэх. Уашъом щыӀэ пкъыхэми ящытхъу шъхьафы, чӀылъэм щыӀэ пкъыхэми ящытхъу шъхьафы. 41 Тыгъэм ежь ищытхъу иӀ, мазэми нэмыкӀ щытхъу иӀ, жъуагъохэри ары. ЯщытхъукӀэ жъуагъохэри зэтекӀых. 42 ЛӀагъэхэм якъэтэджыжьыныгъэ иӀоф арэущтэу щытыщт. Чылапхъэу чӀым халъхьэрэм фэдэу, пкъэу чӀа лъхьэрэр кӀодыщт, ау пкъэу къэтэджыжьыщтыр мыкӀодэу къэнэжьыщт. 43 Зэрамыпэсэу чӀым чӀалъхьэ, ау щытхъушхо иӀэу къэтэджыжьыщт. ЛъэкӀыныгъэ имыӀэу чӀалъхьэ, ау лъэкӀыныгъэ иӀэу къэтэджыжьыщт. 44 ЧӀалъхьэрэр лымрэ къупшъхьэмрэ къахэхъукӀыгъэ пкъыр ары, ау къэтэджыжьыщтыр пкъэу Тхьэм Ыпсэ ЛъапӀэ цӀыфым къыритыщтыр ары. Лымрэ къупшъхьэмрэ къахэхъукӀыгъэ пкъы щыӀэмэ, пкъэу Тхьэм Ыпсэ ЛъапӀэ цӀыфым къыритырэри щыӀ. 45 Мырэущтэу Тхьэм игущыӀэ тхыгъэхэм арыт: «Апэрэ цӀыфэу Адам зыцӀэр псэ зыхэлъ цӀыфэу хъугъэ» Ау ыужыпкъэрэ Адэмыр мыкӀодыжьын щыӀэныгъэ къытэзытырэ псэр ары. 46 Апэу къакӀорэр пкъэу Тхьэм Ыпсэ ЛъапӀэ цӀыфым къыритырэр арэп, лымрэ къупшъхьэмрэ къахэхъукӀыгъэ пкъыр ары нахь. ЫужкӀэ пкъэу Тхьэм Ыпсэ ЛъапӀэ цӀыфым къыритырэр къэкӀощт. 47 Апэрэ цӀыфыр мы дунаем щыщыгъ, Тхьэм ар ятӀэм къыхигъэхъукӀыгъ. ЯтӀонэрэ цӀыфыр уашъом щыщ, Зиусхьа ныр ары. 48 Мы дунаем тет цӀыфхэр Тхьэм ятӀэм къыхигъэхъукӀыгъэ цӀыфым фэдэх. Ащ фэдэу, уашъом щыпсэурэ цӀыфхэри уашъом щыщым фэдэщтых. 49 Тхьэм ятӀэм къыхигъэхъукӀыгъэ цӀыфым тызэрэфэдэм фэдэу, уашъом щыщми тыфэдэщт. 50 Ау, сшыхэр, мыр шъосэӀо: лымрэ лъымрэ къахэхъукӀыгъэ цӀыфым Тхьэм и ТетыгъошхокӀэ Ӏахьэ къылъысышъущтэп. Ащ фэдэу кӀодын фаем мыкӀодыжьын щыӀэныгъэ ӀэхьышӀоу къылъысыщтэп. 51 ШъукъэдаГу, зы шъэф горэ шъосэӀо: Тэ зэкӀэ тылӀэщтэп, ау 52 ошӀэдэмышӀэу, нэгъэупӀэпӀэгъум дунаем икӀэух дэжь бжъэмыешхом ымакъэ къызыӀукӀэ, Тхьэм тэ зэкӀэ тызэблихъущт. Сыда пӀомэ бжъэмыешхом ымакъэ къэӀущт, лӀагъэхэри мыкӀодыжьынэу къэтэджыжьыщтых, Тхьэми тызэблихъущт. 53 Сыда пӀомэ кӀодыжьынэу щыт пкъым мыкӀодыныгъэм ишъуашэ зыщилъэн фае, лӀэжьынэу щыт пкъыми мыкӀодыжьын щыӀэныгъэм ишъуашэ зыщилъэн фае. 54 ЕтӀанэ кӀодыжьынэу щыт пкъым мыкӀодыныгъэм ишъуашэ зыщелъэ ужым, лӀэжьынэу щыт пкъыми мыкӀодыжьын щыӀэныгъэм ишъуашэ зыщелъэ ужым, ащыгъум мы гущыӀэхэу Тхьэм игущыӀэ тхыгъэхэм арытхэр къэшъыпкъэжьыщтых: «Тхьэм текӀоныгъэр къыхьи, лӀэныгъэр ыгъэкӀодыгъ». 55 «О лӀэныгъ, уищэ ыкӀуачӀэ тыдэ щыӀа? О джэхьнэмы, уитекӀоныгъэ тыдэ щыӀа?» 56 ЛӀэныгъэм ищэ псэкӀодыр ары, унашъохэмкӀи псэкӀодым тетыгъо къытфыриӀ. 57 Ау Тхьэм щытхъушхор ий. Ащ ти Зиусхьанэу Исус Христос текӀоныгъэр къытыригъэтыгъ. 58 Арышъ, сшы лъапӀэхэр, зыми Тхьэм игъогу зытырешъумыгъэгъэкӀэу, шъузытет шъыпкъагъэм шъутет. Шъу зышъхьамысыжьэу Зиусхьаным иӀоф ыуж шъуит зэпыт, сыда пӀомэ Зиусхьаным Ӏофэу фашъушӀэрэр хьаулыеу зэрэмыхъущтыр шъошӀэшъ ары.
Ахъщэу Тхьэм ицӀыф лъапӀэхэм апае Коринф цӀыфхэм аугъоирэр
1 Ахъщэу Тхьэм ицӀыф лъапӀэхэм апае къэшъуугъоирэм ехьылӀагъэу мыр шъосэӀо. Галатие хэкум щыӀэ чылыс зэӀукӀэхэм ашӀэнэу зэрясӀуагъэм фэдэу, шъори шъушӀэ: 2 Хэти къыгъэхъагъэм фэшъуашэу Ӏахьэ горэ тхьамафэм иапэрэ мафэ къэс зэӀуерэгъакӀи, ерэгъэтӀылъ. Сэ сыкъызыкӀокӀэ, шъумыугъоижьыным пае, арэущтэу шъушӀэ. 3 СыкъызыкӀокӀэ, къошхэу хэшъухыгъэхэм тхылъ ястынышъ, шъуитын зыдязгъахьынышъ, Ерусалим згъэкӀощтых. 4 Сэри сыкӀонэу хъунэу тыхаплъэмэ, ахэр къыздэкӀощтых.
Паул игухэлъхэр
5 Македоние хэкум сызыкӀоцӀырэкӀы ужым, шъуадэжь сыкъэкӀощт; сыда пӀомэ Македоние хэкум сыкӀоцӀырыкӀынэу сыгу хэлъ. 6 Шъуадэжь тӀэкӀурэ сыкъэнэнкӀи е кӀымафэр щызгъэкӀонкӀи мэхъу. Арэущтэу тыдэ сыкӀощтми, сигъогухэмкӀэ ӀэпыӀэгъу шъукъысфэхъун. 7 Мы зэгъогум гузэжъогъукӀэ шъуслъэгъоу шъуикъалэ сыблэкӀынэу сыфаеп, ау Зиусхьаным ыӀомэ, шъуадэжь тӀэкӀурэ сыкъэнэн сыгу хэлъ. 8 Пэнтэкост зыцӀэ мэфэкӀ мэфэшхом нэсы Ефес къалэм сыкъыдэнэщт, 9 сыда пӀомэ къэлэпчъэшхоу ыкӀи къэлэпчъэ шъуамбгъоу Тхьэм къысфызэӀуихыгъ, къыспэуцухэрэри бэ. 10 Тимофей къызыкӀокӀэ, щынагъо имыӀэу шъуадэжь зэрэщыӀэным шъупылъ. Сэщ фэдэу ащи Зиусхьаным иӀоф ешӀэ. 11 Зыми пхъэтэпымыхьэу ерэмышӀ. Разэу садэжь къэкӀонэу игъогукӀэ ӀэпыӀэгъу шъуфэхъу. Сшыхэр сигъусэхэу ащ сыпэплъэ. 12 Тшы Аполлос ехьылӀагъэу мыр шъосэӀо. Тшыхэм ягъусэу шъуадэжь кӀонэу инэу селъэӀугъ. Ау джы кӀонэу фэягъахэп. Игъо фифэмэ, кӀощт. Аужырэ шӀуфэс гущыӀэхэр 13 Шъумычъыеу шъусакъ, шӀошъхъуныгъэм игъогу шъутемыкӀ, лӀыгъи пытагъи зыхэжъугъэлъ. 14 ШъушӀэрэр зэкӀэ шӀулъэгъуныгъэкӀэ шъушӀэ. 15 Сшыхэр, зы Ӏоф горэмкӀэ сышъолъэӀу. ЗэрэшъушӀэрэм фэдэу, Ахаие хэкум ис цӀыфхэм ащыщхэу Стефан иунагъу ары апэу шӀошъхъуныгъэ зиӀэ хъугъэр. Тхьэм ицӀыф лъапӀэхэм адэӀэпыӀэнхэм иӀоф зыратыгъ. 16 СышъолъэӀу, ащ фэдэ цӀыфхэм, хэт ахэмэ адэлажьэми, адэулэуми, шъуафэӀорышӀ. 17 Стефан, Фортунат, Ахаик садэжь къызэкӀохэм, сыгушӀуагъ. Шъо мо шъузэрэщымыӀэм пае, шъучӀыпӀэ аубытыгъ. 18 Ахэмэ сэ сыгуи шъо шъугухэри агъэпсэфыжьыгъэх. Ащ фэдэ цӀыфмэ лъытэныгъэ афэшъушӀ. 19 Асие хэкум щыӀэ чылыс зэӀукӀэхэм шӀуфэс къышъуахыжьы. Зиусхьаныр шъо шъугухэми ахэмэ агухэми зэрарылъым пае, Акилэрэ Прискиллэрэ гуфэбагъэкӀэ шӀуфэс къышъуахыжьы. Ахэмэ яунэ щызэӀукӀэрэ чылыс зэӀукӀэм щыщхэми шӀуфэс къышъуахыжьы. 20 Тшы пстэуми шӀуфэс къышъуахыжьы. ГукъэбзагъэкӀэ ӀаплӀ зэшъущэкӀэу, шӀуфэс зэшъухыжь. 21 Сэ Паул сӀэкӀэ сишӀуфэс мыщ дэжьым щэсэтхы. 22 Зыгорэм Зиусхьаныр шӀу ымылъэгъумэ, Тхьэм ынае ащ къыщерэф. Маранафэ! 23 Ти Зиусхьан Исус ынэшӀу къышъущерэф. 24 Христос Исус шъугухэм зэрарылъым пае, шъо зэкӀэри шӀу шъусэлъэгъу. Амин.
ШӀуфэс ехыныр
1 Сэ сы Паул. Тхьэр фэягъэти, Исус Христос иапостолэу сыхъугъ. Тшы Тимофей сигъусэу шъо, Тхьэм ичылыс зэГукӀэу Коринф къалэм щыӀэм щыщхэмрэ Тхьэм ицӀыф лъапӀэхэу Ахаие хэкум зэкӀэ щыпсэухэрэмрэ мы тхылъыр къышъуфэсэтхы. 2 Тхьэу Тятэ лъапӀэрэ Зиусхьанэу Исус Христосрэ анэшӀу къышъущарэфи, гупсэфыныгъэ къышъуарэт.
Паул Тхьэм щытхъу зэрэфишӀырэр
3 Тхьэу ти Зиусхьанэу Исус Христос Ятэ щытхъушхор ий. ГукӀэгъуныгъэшхо зиӀэ Ты лъапӀэу, гъэгушхоны гъэри зэкӀэ зыдэжь къикӀырэ Тхьэр ары. 4 Сыд фэдэ гузэжъогъу тыхэтми ащ тегъэгушхо. Арэущтэу Тхьэм тызэригъэгушхуагъэм фэдэ къабзэу, тэри сыд фэдэ гузэжъогъу хэтхэри дгъэгушхонхэ тлъэкӀыщт. 5 Сыда пӀомэ Христос къинхэу ыщэчыгъэхэм тиӀэхьышхо зэрахэлъым фэдэу, Христос тыгухэм арылъэу Тхьэм инэу тегъэгушхо. 6 Тэ гузэжъогъу тызыхэткӀэ, ащ тызыфыхэтыр шъо Тхьэм шъуигъэгушхонэу ыкӀи шъумыкӀодэу шъукъигъэнэжьынэу ары. Тхьэм тызигъэгушхокӀэ, тызыфигъэгушхорэр тэ къинхэу тщэчхэрэм фэдэ къинхэр теубытэныгъэкӀэ шъущэчынэу шъуигъэлъэкӀызэ, шъуигъэгушхонэу ары. 7 Инэу тыкъышъущэгугъы, сыда пӀомэ къинхэу тщэчхэрэм шъуиӀахьэ зэрахэлъым фэдэу, Тхьэм тызэригъэгушхорэм фэдэу, шъори шъузэригъэгушхощтыр тэшӀэшъ ары. 8 Асие хэкум гузэжъогъоу тызщыхэтыгъэм икъэбар шъумышӀэу щытынэу тыфаеп. Псаоу тыкъэнэжьынэу гугъапӀэ тимыӀэжьэу, тфэщэчыщтым нахьи нахьыбэ гузэжъогъушхо дэдэм тыхэтыгъ. 9 Шъыпкъэу, хьыкумышӀэм укӀ хьыкум къыттыралъхьанэу къыӀуагъэм фэдэу къытщыхъугъ. Ар зыфэхъугъэр тэ тшъхьэ тыщымыгугъэу, лӀагъэхэр къэзыгъэтэджыжьырэ Тхьэм тыщыгугъыныр ары. 10 Ащ фэдэ лӀэныгъэу къытпыщытым Тхьэм тыкъыӀэкӀихыжьыгъ, ыкӀи тыкъыӀэкӀихыжьыщт. ШъуитхьэлъэӀухэмкӀи шъукъыддэӀэпыӀэзэ, Тхьэм аргорэу тыкъыӀэкӀихищыжьынэу ежьым тыщэгугъы. 11 Арэущтэу цӀыфыбэ къытфелъэӀунышъ, Тхьэм ынэшӀу къытщифэщт, ынэшӀу къызэрэтщифагъэм паий, цӀыфыбэмэ тэ тцӀэкӀэ Тхьэм ищытхъу ашӀыщт.
Паул игухэлъ зыкӀызэблихъугъэр
12 Мыры тызэрызыщытхъужьырэр: гъэпцӀэныгъэ зи къытхэмылъэу, Тхьэм ыгу зэӀурэ гухэлъ къэбзагъэ тиӀэу мы дунаем, пстэуми апэу шъуадэжь, тызэрэщызекӀуагъэмкӀэ тыгухэр шыхьат къытфэхъух. Тхьэм ынэшӀу къызэрэтщифагъэм тетэу, арэущтэу тызекӀуагъ, мы дунаем ицӀыфхэм язэхэшӀыкӀыныгъэу зыфаӀорэм тетэу арэп. 13,14 Сыда пӀомэ шъузэджэшъуным ыкӀи къыжъугурыӀошъуным нэмыкӀ къышъуфэттхырэп. Икъугъэу къы жъугурымыӀуагъэри икъугъэу къызэрэжъугурыӀощтым сыщэгугъы. Ащыгъум ти Зиусхьан Исус къызыкӀожьыщт мафэм дэжь тэ шъоркӀэ тызэрэзыщытхъужьыщтым фэдэу, шъори тэркӀэ шъузщытхъужьыщт. 15 Ащ сыщэгугъыти, апэу шъуадэжь сыкъэкӀонэу сыфэягъ, тӀо ишӀуагъэ къышъокӀыным пае. 16 Македоние хэкум сызыкӀокӀэ, шъуадэжь дырескӀозэ ащ сыкӀонэу сыгу хэлъыгъ; Македонием сыкъызикӀыжькӀи, шъуадэжь къыдырескӀозэ Иудей хэкум сыкӀоным пае, сигъогукӀэ ӀэпыӀэгъу шъукъысфэхъунэу сыфэягъ. 17 Арэущтэу гухэлъ сиӀэ зэхъум, сыгу илъыр сымышӀэу сызекӀуагъэу ара? Е мы дунаем ицӀыфхэм ягухэлъхэр зэрашӀыхэрэм фэдэу, сигухэлъхэр сэшӀыха? Зэ, «Ары», зэ, «Хьау, арэп», сӀонэу сихабза? 18 ГущыӀэу къышъотӀуагъэр зэ арэу, зэ армырэу зэрэщымытыр, Тхьэм ишъыпкъагъэмкӀэ сэӀо. 19 Сыда пӀомэ Силуан, Тимофей, сэры, Тхьэм ыКъоу Исус Христосэу зикъэбар шъуадэжь щыдгъэӀугъэр зэ арэу зэ армырэу щытэп, ау Исус Христосыр ары Тхьэм тыкъызэригъэгугъэгъэ Ӏофхэр къэзыгъэхъурэр ыкӀи шъыпкъэу зышӀырэр. 20 Сыда пӀомэ Тхьэм тыкъызэригъэгугъэгъэ Ӏоф пстэуми «Ары» ыкӀи «Амин» афэхъоу, ахэр къэзыгъэхъурэр ыкӀи шъыпкъэу зышӀырэр Христос ары, тэ Тхьэм щытхъушхо фэтшӀыным пае. 21 Тхьэр ары шъори тэри Христос игъогу пытэу тытезыгъэтырэри, тиӀоф тшӀэнэу тызыгъэнэфагъэри. 22 Ежьыр ары ибынхэм тызэращыщыр тэзыгъашӀэрэ мыхъурэу ыкӀи шӀугъэ къызэрэтигъэгъотыщтым ищэсэу ежьым Ыпсэ ЛъапӀэ тыгухэм къарызылъхьагъэр. 23 Шъыпкъагъэр сымыӀомэ, сэрэкӀод. Сыкъышъушъхьасынэу ары Коринф къалэм джырэ нэсы сыкъызкӀэмыкӀуагъэр, Тхьэр ащкӀэ шыхьат къысфэхъунэу зыфэсэгъазэ. 24 ӀПъо шъуишӀошъхъуныгъэ тетыгъо фытиӀэнэу тыфаеп, шъудгъэгушӀонэу тыкъыжъудэлажьэ нахь, сыда пӀомэ шӀошъхъуныгъэм игъогу пытэу шъутет.
1 Арышъ, шъугу хэзгъэкӀынэу шъуадэжь джыри зэ сыкъэмыкӀожьынэу тесыубытагъ. 2 Сыда пӀомэ сэ шъугу хэзгъэкӀымэ, шъо зыгу хэзгъэкӀыхэрэм нэмыкӀэу сызыгъэгушӀонэу хэта къэнэжьырэр? 3 Шъо сызыгъэгушӀон фаехэм сыкъызыкӀокӀэ сыгу хэшъумыгъэкӀынэу ары зэрэстхыгъэм фэдэу къызфышъуфэстхыгъэр. Ӏофэу сэ сызыгъэгушӀорэм шъо зэкӀэ шъузэригъэгушӀорэм сицыхьэ телъ. 4 Сыда пӀомэ гузэжъогъушхорэ гумэкӀыгъошхорэ сиӀэу, сыгъэуи къышъуфэстхыгъ. Шъугу хэзгъэкӀынэу арэп къызфэстхыгъэр шӀулъэгъуныгъэшхоу къышъуфысиӀэр шъозгъэшӀэнэу ары нахь.
Паул ыгу хэзыгъэкӀыгъэм зэрэфигъэгъугъэр
5 Зыгорэм нэмыкӀ горэм ыгу хигъэкӀыгъэмэ, зыгу хигъэкӀыгъэр сэрэп, есымыгъэлыенэу шъо зэкӀэми гухэкӀыныгъэ Ӏахьэ къышъуфэхъугъ. 6 Шъуащыщэу нахьыбэмэ ащ фэдэ цӀыфым а къинэу тешъулъхьагъэр икъущт. 7 Арышъ, гухэкӀыныгъэшхом а цӀыфыр ымыгъэкӀодыным пае, ащ фэжъугъэгъун ыкӀи жъугъэгушхон фае. 8 Арэущтэу зэрэщытым пае, шъуишӀулъэгъуныгъэ шъыпкъэу ежъугъэлъэгъунэу сышъолъэӀу. 9 Сыкъызфэтхагъэр шъуишъыпкъагъэ зынэсырэр згъэунэфынэуи, сыд щыщымкӀэ шъукъысфэӀорышӀэу шъущытмэ зэзгъэшӀэнэуи ары. 10 Шъо зыфэжъугъэгъурэ цӀыфым сэри фэсэгъэгъу. Ӏофэу згъэгъугъэр, згъэгъун Ӏоф щыӀагъэмэ, сишӀуагъэ шъозгъэкӀыным пае, Христос ыпашъхьэ щызгъэгъугъ, 11 шэйтаным тыкъимыгъэпцӀэным пае. Сыда пӀомэ ащ игухэлъхэр тэ тымышӀэу щытэп.
Троадэ къалэм Паул гумэкӀыныгъэу зыщыӀукӀагъэр
12 Христос ехьылӀэгъэ къэбарышӀур згъэӀунэу Троадэ къалэм сызэкӀом, Зиусхьаным зы пчъэ къысфызэӀуихыгъэ пэтми, 13 гупсэфыгъо сиӀагъэп, сыда пӀомэ сшы Тит ащ щызгъотыгъэп. Арэущтэу, сшыхэм аӀапэ сы убытыжьи, Македоние хэкум сыкӀонэу гъогум сытехьажьыгъ.
Христос текӀоныгъэр къызэрэтигъэхьырэр
14 Тхьэм щытхъушхор ий. Христос тыгухэм арылъэу Тхьэм текӀоныгъэр къытегъэхьы зэпыт, тэ Ӏофэу тшӀэрэмкӀи Христос ехьылӀэгъэ къэбарэу мэ ӀэшӀум фэдэр тыдэкӀи цӀыфхэм ахегъахьэ. 15 Сыда пӀомэ цӀыфхэу мыкӀодхэу Тхьэм къыгъэнэжьхэрэми, цӀыфхэу кӀодыпӀэм игъогу тетхэми тахэтэу, тэ тызфэдэр Христос уцэу мэ ӀэшӀу къызпихэу, Тхьэм ыпашъхьэ рихьылӀэрэр ары. 16 Зы цӀыф горэхэм алъэныкъокӀи лӀэныгъэ къызхэкӀырэ мэ Ӏаем тыфэд, адрэ цӀыфхэм алъэныкъокӀи щыӀэныгъэ къызхэкӀырэ мэ ӀэшӀум тыфэд. Ащ фэдэу Ӏоф ыгъэцэкӀэнэу хэта зылъэкӀыщтыр? 17 Сыда пӀомэ цӀыфыбэу Тхьэм игущыӀэхэр зэӀызыгъахьэхэрэм тафэдэп. Арэущтэу мыхъоу, Христос тыгухэм арылъэу, шъыпкъагъэ тиӀэу Тхьэм тырилӀыкӀошъ, ежьым ыпашъхьэ игущыӀэхэр тэгъэӀух.
ЗэзэгъыныгъакӀэм икъэбар цӀыфхэм ятэгъашӀэ
1 Тызщытхъужьынэу джыри зэ къэтыубла? Хьауми зыгорэм къышъуфитхыгъэу е шъо шъутхыгъэу къытщытхъурэ тхылъ горэ тищыкӀагъа, цӀыф заулэмэ зэрящыкӀагъэм фэдэу? 2 Шъо къытщытхъурэ тхылъым шъуфэд. Ар тыгухэм арытхагъэу щыт. ЦӀыф пстэуми а тхылъыр ашӀэн ыкӀи еджэнхэ алъэкӀыщт. 3 ТиӀоф шӀугъэу къыхэкӀыгъэу, Христос ытхыгъэ тхылъым фэдэу шъузэрэщытыр къэшъогъэлъагъо. А тхылъыр къамзый мэрчэпкӀэ тхыгъэп, щыӀэныгъэ къытэзытырэ Тхьэм Ыпсэ ЛъапӀэкӀэ тхыгъэ нахь. Мыжъобгъухэми атетхагъэу щытэп, цӀыфхэм агухэм арытхагъэу щыт нахь. 4 Христос Тхьэм тызэрэщигъэгугъырэм пае, арэущтэу тэӀо. 5 Тэртэрэу тилъэкӀыныгъэкӀэ зыгорэ къэтыгупшы сын тлъэкӀэу тӀорэп, ау лъэкӀыныгъэ къытэзытырэр Тхьэр ары. 6 Ащ зэзэгъыныгъакӀэм тыфэлэжьэнэу лъэкӀыныгъэ къытитыгъ. А зэзэгъыныгъэр гущыӀэ тхыгъэхэм атет зэзэгъыныгъэу щытэп, Тхьэм Ыпсэ ЛъапӀэ ыдэжь къикӀырэ зэзэгъыныгъэу щыт нахь; сыда пӀомэ гущыӀэ тхыгъэм егъалӀэ, ау Тхьэм Ыпсэ ЛъапӀэ къегъэпсэужьы. 7 ХьарыфхэмкӀэ мыжъобгъухэм атетхэгъэ Тэурат хабзэм Ӏофэу ышӀагъэм лӀэныгъэ цӀыфхэм къафигъэкӀонэу арыгъэ пэтми, щытхъушхо иӀэу къэкӀуагъ. Арэущтэу пегъымбар Мусэ ынэгу нэфынэшхоу кӀэтыр текӀыжьэу щытыгъэ пэтми, Израил цӀыфхэр ынэгу еплъынхэ алъэкӀыщтыгъэп. 8 Арэущтэу зэрэщытым пае, Тхьэм Ыпсэ ЛъапӀэ Ӏофэу ышӀэрэм ащ нахьи нахь щытхъушхо иӀэн фаеба? 9 Тэурат хабзэу цӀыфхэр зыгъэмысэрэм Ӏофэу ышӀагъэм щытхъушхо иӀагъэмэ, Тхьэм Ыпсэ ЛъапӀэу цӀыфхэм Тхьэм ыдэжькӀэ шъыпкъагъэ яӀэу зыгъэхъурэм Ӏофэу ышӀэрэм ащ нахьи бэкӀэ нахь щытхъушхо иӀэн фае. 10 Сыда пӀомэ Тэурат хабзэу щытхъушхо иӀэу щытыгъэм щытхъу зи имыӀэжьэу къэнэ, ыужкӀэ къэкӀогъэ къэбарышӀоу нахь щытхъушхо зиӀэм фэбгъадэмэ. 11 Тэурат хабзэу кӀодыжьыщтыгъэм щытхъушхо иӀагъэмэ, къэбарышӀоу мыкӀодэу къэнэжьырэм ащ нахьи бэкӀэ нахь щытхъушхо иӀэн фае. 12 Арышъ, ащ фэдэ щыгугъыгъэныр зэрэтиӀэм пае, тыгушхоу тыкъэгущыӀэ. 13 Пегъымбар Мусэ зэрэзекӀуагъэм фэдэу тызекӀорэп. Израил цӀыфхэм ащ ынэгу кӀэт нэфынэшхор зэрэкӀодырэр амылъэгъуным пае, ынэгу рихъуагъ. 14 Яакъылхэр гуркъэхэу хъугъэх. Непэрэ мафэм нэсы пэсэрэ зэзэгъыныгъэм итхылъхэм зяджэхэкӀэ, яакъылхэр ихъуагъэхэу къэнэх, сыда пӀомэ Христос закъор а нэ кӀурыхъор Ӏузыхыжьын зылъэкӀырэр. 15 Израил цӀыфхэр непи пегъымбар Мусэ и Тэурат хабзэ зеджэхэкӀэ, агу техъон иӀ. 16 Ау зыгорэм Зиусхьаным зызэрэфигъазэу, а техъуагъэр техыгъэ мэхъу. 17 Зиусхьаныр Тхьэм Ыпсэ ЛъапӀэ ары, ар зыдэщыӀэми шъхьафитныгъэри щыӀ. 18 Тэ зэкӀэ, зынэгу имыхъуагъэу Зиусхьаным ищытхъушхо гъунджэм къызэрищырэм фэдэу еплъыхэрэм, нахь щытхъушхо тиӀэ хъу зэпытэу, ежьым фэдэ тыхъоу, зэблэхъугъэу тэхъу зэпыт. Ар зэкӀэри къызхэкӀырэр Зиусхьаным Ыпсэ ЛъапӀэ ары.
Мылъкушхоу ятӀэм хэшӀыкӀыгъэ хьакъушыкухэм арылъыр
1 Арышъ, Тхьэм ынэшӀу щыфэныгъэкӀэ мы Ӏофыр тэ тпшъэ къырилъхьагъэшъ, тыгу дгъэкӀодырэп. 2 Гъэбылъыгъэ емыкӀу Ӏофхэми зафэдгъазэрэп. ТхьагъэпцӀыгъэкӀэ тызекӀорэп, Тхьэм игущыӀэхэри зэӀыдгъахьэхэрэп. Ау шъыпкъагъэр зэрафэдгъэнафэрэмкӀэ цӀыф пстэуми агухэмкӀэ тызэрадэным Тхьэм ыпашъхьэ тыщыпылъ. 3 Ау къэбарышӀоу дгъэӀурэр мынафэмэ, кӀодыпӀэм игъогу тетхэр ары зыфэмынафэр. 4 Шэйтанэу мы дунаем итхьэм шӀошъхъуныгъэ зимыӀэхэм агухэр нэшъу ышӀыгъэх. Арэущтэу зыфишӀагъэр Христосэу Тхьэм фэдэ къабзэу щытым ищытхъушхо ехьылӀэгъэ къэбарышӀум инэфынэу ахэмэ къатепсырэр амылъэгъуныр ары. 5 Къэбарэу цӀыфхэм ядгъэӀурэр зэхьылӀагъэр тэрэп, Исус Христос Зиусхьанэу зэрэщытыр ары нахь. Тэри Исус игъогу тызэрэрыкӀорэм пае тыкъышъуфэлажьэ. 6 Сыда пӀомэ «ШӀункӀыгъэм нэфынэ къыхэрэкӀ», ыӀоу зыӀуагъэ Тхьэм инэфынэ тыгухэм къаридзагъ. А нэфынэм Тхьэм ищытхъушхоу Христос ынэгу къыхэщырэр зыфэдэр тегъашӀэ. 7 Ау мы мылъкушхор тэ, ятӀэм хэшӀыкӀыгъэ хьакъушыкъухэм фэдэхэм, тыгухэм арылъэу тиӀ. Арэущтэу зыфэхъугъэр лъэкӀыныгъэшхо зиӀэр Тхьэр арэу, тэрмырэу нафэу хъуныр ары. 8 Лъэныкъо пстэумкӀи чӀыпӀэ зэжъу тыраубытагъэм фэд, ау тыдэкъузагъэу щытэп. ТшӀэщтыр тшӀахэрэп, ау тыгу дгъэкӀодырэп. 9 ЦӀыфхэм къин тагъэщэчы, ау Тхьэм тизакъоу тыкъигъанэрэп. ЧӀыгуми тытырадзэ, ау тыкӀодырэп. 10 Тэ тпкъыхэм ахэлъэу Зиусхьан Исус илӀэныгъэ къетэхьэкӀы зэпыт, Исус ищыӀэныгъэ тпкъыхэмкӀэ нафэу къэлъэгъоным пае. 11 Сыда пӀомэ тыщыӀэ пэтэу Исус тызэрэфэлажьэрэм пае, лӀэныгъэр къытшъхьащыт зэпыт, Исус ищыӀэныгъэ тпкъыхэу лӀэщтхэм зэрахэлъыр нафэу къэлъэгъоным пае. 12 Арэущтэу лӀэныгъэр тэ къытхэлъэу Ӏоф ешӀэ, ау щыӀэныгъэр шъо къышъухэлъэу Ӏоф ешӀэ. 13 «ШӀошъхъуныгъэ сиӀэти, сыкъэгущыӀагъ», Тхьэм игущыӀэ тхыгъэхэм арыт. Ащ фэдэ шӀошъхъуныгъэ тэри тиӀэу, тыкъэгущыӀэ, 14 сыда пӀомэ Тхьэу Зиусхьанэу Исус лӀагъэхэм къахэзыгъэтэджыкӀыжьыгъэм Исус тыгухэм арылъэу тэри тыкъигъэтэджыжьынышъ, шъо тышъуигъусэу ежьым ыпашъхьэ тызэрэригъэуцощтыр тэшӀэ. 15 Мыр зэкӀэ зыфэхъурэр ишӀуагъэ шъо къышъокӀыныр ары. Арэущтэу Тхьэм ынэшӀу щыфэныгъэ цӀыф нахьыбэмэ анэс къэс, цӀыф нахьыбэми ищытхъушхо ашӀыщт, илъытэныгъэшхо къагъэлъагъозэ.
Тыгу дгъэкӀодырэп
16 Арышъ, тыгу дгъэкӀодырэп. Тпкъыхэр кӀодыхэ зэпытми, Тхьэм мафэ къэс тыгухэм арылъыр егъэкӀэжьы зэпыт. 17 Сыда пӀомэ джы гузэжъогъу макӀэу ыкӀи кӀакоу тызхэтым шӀугъэу къыхэкӀырэр гузэжъогъоу тызхэтым фэмыгъэдэшъун щытхъушхоу мыкӀодыжьыщтыр ары. 18 Арэущтэу цӀыфхэм Ӏофэу алъэгъушъухэрэм тяплъырэп, Ӏофэу амылъэгъушъухэрэм тяплъы нахь. Сыда пӀомэ Ӏофэу алъэгъушъухэрэр кӀодыжьыщтых, ау Ӏофэу амылъэгъушъухэрэр мыкӀодыжьхэу къэнэжьыщтых.
1 Мы дунаем тызэрыщыпсэурэ чэтэнгъэӀагъэу тпкъы кӀодмэ, Тхьэм къытфишӀыгъэ псэупӀэу, ӀэкӀэ мышӀыгъэу, мыкӀодыжьын унэ уашъом зэрэщытиӀэщтыр тэшӀэ. 2 Ащ нэсыфэ уашъом щыщ унэм тыщыпсэунэу тыкӀэхъопсэу тыхэщэтыкӀы. 3 Арэущтэу тыфэпагъэу пцӀанэу тыкъэнэщтэп. 4 Мы тпкъэу чэтэнгъэӀагъэм фэдэм тыщэпсэуфэ, тыхэщэтыкӀы, гузэжъогъуи тыхэт, сыда пӀомэ лӀэн фэе пкъыр дгъэтӀылъынэу тыфэмыеу, уашъом щыщ пкъыр къытхалъхьаным тыфай. Арэущтэу лӀэн фаем ычӀыпӀэ щыӀэныгъэм ыубытыщт. 5 Тхьэр ары мы Ӏофым пае тыкъэзыгъэхъугъэр, шэсым фэдэу Ыпсэ ЛъапӀи тыгухэм къарызылъхьагъэр. 6 Арышъ, сыдигъуи тэгушхо, пкъи тыщэпсэуфэ, Зиусхьаным тызэрэпэчыжьэр тэшӀэ. 7 Сыда пӀомэ шӀошъхъуныгъэм тетэу тэзекӀо нахь, тлъэгъурэм тетэу тызекӀорэп. 8 Тэгушхо ыкӀи тпкъыхэм тахэкӀынышъ, Зиусхьаным тыригъусэу тыщыӀэныр нахь къатштэщтыгъ. 9 Арышъ, пкъым тыхэлъми, тыхэмылъми, Зиусхьаным ыгу къызэдгъэӀуным лъэшэу ыуж тит. 10 Сыда пӀомэ тэ зэкӀэми Христос хьыкум къыттришӀыхьанэу итӀысыпӀэ лъапӀэ ыпашъхьэ тиуцон фае, мы дунаем хэти щишӀагъэм ифэшъуашэ, шӀугъэми бзэджагъэми ыгъотыжьыным пае.
Тхьэм Христос Ӏофэу ышӀагъэмкӀэ ежьым тешӀужьыгъэу тызэригъэхъугъэр
11 Зиусхьаным ищынагъо тыгухэм арылъыныр зыфэдэр зэрэтшӀэрэм пае, цӀыфхэр ащ игъогу тедгъэхьанхэм тыпылъ. Тыгухэм арылъыр ТхьэмкӀэ нафэ, шъори шъугухэмкӀэ тыгухэм арылъыр зэрэшъушӀэрэм сыщэгугъы. 12 Шъуапашъхьэ джыри зэ тызщытхъужьрэп, ау цӀыфхэу зыгухэм арылъым емыплъыхэу, зитеплъэкӀэ зыщытхъужьхэрэм зыгорэ яшъодгъэӀоным пае, шъутщытхъу жьынэу игъо шъуитэгъафэ. 13 Сыда пӀомэ тэ тшъхьэ зэкӀокӀыгъэмэ, ар Тхьэм ищытхъу къэкӀоным пае. Тшъхьэ зэмыкӀокӀыгъэмэ, шъо шъуишӀуагъэ ащ къекӀы. 14 Сыда пӀомэ Христос шӀулъэгъуныгъэу къытфыриӀэм тызӀэкӀиубытагъ. Зы нэбгырэ закъо цӀыф пстэуми зэрафэлӀагъэм пае, зэкӀэри лӀагъэхэм афэдэхэу зэрэщытхэм тыщэгугъы. 15 Псэухэр ежьхэм ашъхьэкӀэ зыфэмыпсэухэу, ау ахэмэ апае лӀагъэу, лӀагъэхэми къахэтэджыкӀыжьыгъэм фэпсэунхэм фэшӀ, цӀыф пстэуми апае Христос лӀагъэ. 16 Арышъ, джы щегъэжьагъэу мы дунаем ицӀыфхэр цӀыфхэм зэряплъыхэрэм фэдэу, тэ зыми теплъыжьрэп. Арэущтэу зэгорэм Христос теплъыщтыгъэми, джы теплъыжьрэп. 17 Арышъ, Христос зы цӀыф горэм ыгу илъ хъумэ, а цӀыфыр Тхьэм икӀэрыкӀэу къыгъэхъужьыгъ. А цӀыфым ищыӀэкӀэжъ блэкӀыгъ, щыӀэкӀакӀэр ыублагъ. 18 Ар зэкӀэри Тхьэм ыдэжь къекӀы. Ащ Христос Ӏофэу ригъэшӀагъэмкӀэ тешӀужьыгъэу тигъэхъугъ, цӀыфхэр ежьым едгъэшӀужьынхэм иӀофи тэ тпшъэ къырилъхьагъ. 19 Сэ зыфасӀорэр мыры: ЦӀыфхэм псэкӀод ашӀагъэу щыт пэтми, Тхьэм ежьым ыдэжькӀэ ахэр мысэхэу ымылъытэхэзэ, Ӏофэу Христос ригъэшӀагъэмкӀэ дунаем ицӀыфхэр ежьым ешӀужьыгъэхэу ыгъэхъугъэх, цӀыфхэр ежьым ешӀужьыгъэхэу зэригъэхъухэрэм икъэбарэри ядгъэӀунэу тэ тпшъэ къырилъхьагъ. 20 Арышъ, тэ Христос тырилӀыкӀох. ТыжэкӀэ Тхьэр къышъолъэӀу. Христос ыцӀэкӀэ тышъолъэӀу: Тхьэм шъуешӀужь. 21 Сыда пӀомэ Христосэу псэкӀод зи зымышӀагъэр Тхьэм псэкӀодым икъурмэныпхъэу ышӀыгъ, Христос тыгухэм арылъэу Тхьэм ежьым ыдэжькӀэ шъыпкъагъэ тиӀэу тилъытэным пае.
1 Тхьэм тыдэлажьэу, Тхьэм ынэшӀу хьаулыеу къышъущифагъэу къычӀэмыкӀыным шъуфэсакъынэу тышъолъэӀу. 2 Сыда пӀомэ Тхьэм къызэриӀорэр игущыӀэ тхыгъэхэм арыт: «Игъоу зыслъытэгъэ мафэм сыкъыодэӀугъ, цӀыфхэр мыкӀодхэу, къызызгъэнэжьырэ мафэми ӀэпыӀэгъу сыкъыпфэхъугъ». ШъукъэдаГу, Тхьэм игъоу ылъытэрэ уахътэр джы дэдэр ары, цӀыфхэр мыкӀодхэу Тхьэм къызигъэнэжьырэ мафэри джы дэдэр ары. 3 ЦӀыфхэм Ӏофэу тшӀэрэр ашӀомытэрэзыным пае, зыкӀи цӀыф горэм игъогу зыгъэлъэпаорэ мыжъо тетлъхьанэу тыфаеп. 4 Арэущтэу зэрэщытым пае, Тхьэм тызэрэфэлажьэрэр лъэныкъо пстэумкӀи тэгъэлъагъо: теубытэныгъэшхо зэрэтиӀэмкӀи, гузэжъогъу тыхэтми, къин тлъэгъуми, гухэкӀ тиӀэми, 5 къытаохэми, хьапсым тычӀадзагъэу тычӀэсми, бырсырышхо тыхафэми, тыулэуми, тичъые щыкӀагъэ фэхъуми, мэлакӀэ тылӀэми; 6 гукъэбзагъэкӀи, шӀэныгъэкӀи, щыӀагъэкӀи, шӀугъэкӀи; Тхьэм Ыпсэ ЛъапӀэ тыгухэм зэрарылъымкӀи, пцӀы зыхэмылъ шӀулъэгъуныгъэмкӀи, Тхьэм тызэрэфэлажьэрэр тэгъэлъагъо; 7 шъыпкъагъэр зэрэтӀорэмкӀи, Тхьэм илъэкӀыныгъэшхокӀи, Ӏэ джабгъуми Ӏэ сэмэгуми арылъэу шъыпкъагъэм иӀашэхэмкӀи; 8 цӀыфхэм лъытэныгъэ къытфашӀыми, къытфамышӀыми, ӀэягъэкӀэ къыттегущыӀэхэми, къытщытхъужьхэми Тхьэм тызэрэфэлажьэрэр тэгъэлъагъо; цӀыфхэр тэгъэгъуащэхэу талъытэ, ау шъыпкъагъэ зиӀэ цӀыфхэу тыщыт; 9 цӀыфхэм тамышӀапхъэ фэдэу къытэплъых, ау цӀыф пстэуми ташӀэ; тылӀагъэ фэдэу къытэплъых, ау мары тыщыӀ; къин къыттралъхьэ, ау таукӀырэп; 10 тыгу хагъэкӀы, ау тэгушӀо зэпыт; тэ тытхьамыкӀ, ау цӀыфыбэхэр бай тэшӀых; зи тимыӀэу къэлъагъо, ау зэкӀэри тиӀ. 11 Шъо, Коринф цӀыфхэр, нафэу тыкъыжъудэгущыӀагъ, тыгухэри къышъуфызэӀутхыгъ. 12 Тыгухэр къышъуфэдгъэпытагъэп, ау шъо шъугухэр къытфэжъугъэпытагъ. 13 Ащ ипэгъокӀ фэдэу, шъори шъугухэр къытфызэӀушъухых. Сабыйхэм сызэрадэгущыӀэрэм фэдэу сыкъыжъудэгущыӀэ.
ЩыӀэныгъэ зиӀэ Тхьэм иунэр тэры
14 ШӀошъхъуныгъэ зимыӀэхэм гъусэ шъуафэхъунэу зыбжь шъуадыкӀэмыуцу. Шъыпкъагъэмрэ бзэджагъэмрэ сыдэущтэу гъусэ зэфэхъущтха? Нэфынэмрэ шӀункӀыгъэмрэ сыд фэдэ гъусагъа зыфыряӀэр? 15 Христосрэ Велиаррэ сыд фэдэ зэзэгъыныгъэ азыфагу дэлъына? ШӀошъхъуныгъэ зиӀэмрэ зимыӀэмрэ сыдэущтэу яӀахьэ зэхэлъына? 16 Тхьэм иунэшхорэ тхьэ нэпцӀхэмрэ сыд фэдэ зэзэгъыныгъэ азыфагу дэлъына? Сыда пӀомэ щыӀэныгъэ зиӀэ Тхьэм иунэшхор тэры, Тхьэм къызэриӀуагъэм фэдэу: «Сэ ахэмэ сахэсыщт ыкӀи сахэтыщт. Сэ ахэмэ я Тхьэу сыщытыщт, ахэри сэ слъэпкъэу щытыщтых. 17 'Арышъ', къеӀо Зиусхьаным, 'ахэмэ шъуакъыхэкӀи, зы лъэныкъоу шъухъу. Мыкъабзэм шъунэмыси, ащыгъум сэ шъо шъусштэщт. 18 Сэ Ты сыкъышъуфэхъущт, шъори къорэ пхъурэ шъукъысфэхъущт', лъэкӀыныгъэшхо пстэури зиӀэ Зиусхьаным къеӀо».
1 ТилъапӀэхэр, а ӀофхэмкӀэ Тхьэм тыкъызэригъэгугъагъэм пае, тпкъыхэмрэ тыгухэмрэ зыгъэушӀоирэ пстэури зыхэтэжъутъэгъэкъэбзыкӀыжьи, Тхьэм ищынагъо тыгухэм арылъэу, тыгухэм якъэбзагъэ зэридгъэкъуным ыуж тижъугъэт.
Паул зэрэгушӀорэр
2 Шъугухэр къытфызэӀушъухых: Зыми тиягъэ едгъэкӀыгъэп, хэти дгъэунэхъугъэп, зыми ишӀуагъэ зэдгъэкӀыгъэп. 3 Шъо шъузгъэмысэнэу арэп ар зыфасӀорэр; сыда пӀомэ ыпэкӀэ къызэрэсӀогъагъэм фэдэу, тызэгъусэу тыпсэунэу, тызэгъусэуи тылӀэнэу тыгухэм шъуарылъ. 4 Инэу сыкъышъущэгугъы. Бэу сызэрыпагэрэр шъоры. Гузэжъогъу пстэуми тахэтми, гушхоныгъэшхорэ гушӀогъошхорэ тиӀэх. 5 Сыда пӀомэ Македоние тыкъызэкӀом, тэ тпкъыхэмкӀэ гупсэфыгъо дгъотыгъэп, лъэныкъо пстэумкӀи гузэжъогъу тыхэтыгъ, зэнэкъокъуныгъэхэми тахэтыгъ, щынагъуи тыгухэм арылъыгъ. 6 Ау Тхьэу зыгу кӀодыгъэхэр зыгъэгушхорэм Тит къызэрэкӀуагъэмкӀэ тигъэгушхуагъ. 7 Ау ар къызэрэкӀуагъэм изакъоу арэп тызыгъэгушхуагъэр, шъо Тит зэрэжъугъэгушхуагъэм икъэбари ары. Сышъулъэгъунэу инэу зэрэшъушӀоигъорэри, шъузэрэгъырэри, шъукъызэрэсфэгумэкӀырэри къытиӀотэжьыгъ. Арэущтэу ыпэрэм нахьи нахь сыгушӀуагъ. 8 Тхылъэу къышъуфэстхыгъэмкӀэ шъугухэр хэзгъэкӀыгъэми, ащ сыфыкӀэгъожьырэп. СыкӀэгъожьын слъэкӀыщтыгъ; сыда пӀомэ а тхылъым шъугухэр зэрэхигъэкӀыгъэхэр сэлъэгъу, ау шъугухэр хигъэкӀыгъэхэу зэрэщытыгъэр зы зэман макӀэ ныӀэп. 9 Ау джы сэ сэгушӀо. СызыгъэгушӀорэр шъугухэр зэрэхэкӀыгъэр арэп, шъуигухэкӀымкӀэ шъуипсэкӀодхэм шъузэрафыкӀэгъожьыгъэр ары нахь; сыда пӀомэ Тхьэр зыфаем тетэу шъугу хэдгъэкӀыгъ. Арэущтэу тиягъэ зи шъодгъэкӀыгъэп. 10 ГухэкӀэу Тхьэр зыфаем тетым шӀугъэу къыхэкӀырэр типсэкӀодхэм тафыкӀэгъожьыныр ары. ТипсэкӀодхэм тафыкӀэгъожьыным шӀугъэу къыхэкӀырэри тымыкӀодэу Тхьэм тыкъызэригъэнэжьырэр ары. Ащ фэдэ гухэкӀым уфыкӀэгъожьыщтэп, ау мы дунаем игухэкӀ Ӏэягъэу къыхэкӀырэр лӀэныгъэр ары. 11 Сыда пӀомэ мы гухэкӀэу Тхьэр зыфаем тетым шъоркӀэ шӀугъэу къыхэкӀыгъэм шъуеплъ: Мы ӀофымкӀэ сыд гузэжъогъушхо шъуиӀэ хъугъа, зыжъугъэхыенэу сыд фэдизэ шъупылъыгъа, мысэми сыд фэдизэ шъуфэгубжыгъа, сыд щынэгъэшхо шъугухэм арылъ хъугъа, сыд фэдизэ шъукъысфэягъа, сыд гуетыныгъэшхо шъуиӀэ хъугъа, мыхъун зышӀагъэм ифэшъуашэр ежъугъэпщыныжьыным сыд фэдизэ шъупылъыгъа. Лъэныкъо пстэумкӀи мы ӀофымкӀэ шъузэрэхыер къэжъугъэнэфагъ. 12 Арышъ, сыкъышъуфэтхагъэми, мыхъун зышӀагъэр, е мыхъун зэришӀагъэр арэп анахьэу сызэгупшысагъэр, ау тыкъызэрэшъуфэгумэкӀырэр Тхьэм ыпашъхьэ къышъуфэзгъэнэфэнэу сыфэягъ. 13 А Ӏоф пстэуми тагъэгушхуагъ. Тыгушхоным къыхахъоу шъо Тит ыгу зэрэжъугъэпсэфыжьыгъэм пае, ар зэрэгушӀуагъэр зытэлъэгъум, тэри гушӀогъошхо тиӀэ хъугъэ. 14 Тит ыпашъхьэ сыкъыщышъущытхъугъ, шъори сыжъугъэукӀытэжьыгъэп. Ау шъыпкъагъэр зэкӀэ къызэрэшъотӀуагъэм фэдэу, Тит ыпашъхьэ Ӏофхэу тыкъызэрэщышъущытхъугъэхэри шъыпкъэу къычӀэкӀыжьыгъэх. 15 Шъо зэкӀэ ежьым шъузэредэӀугъэу ыкӀи шъущынэу, шъугухэр кӀэзэзхэу шъузэрэпэгъокӀыгъэр Тит ыгу къызыкӀыжькӀэ, ыгукӀэ лъэшэу къышъуфэраз. 16 Сыд щыщымкӀи сышъущыгугъынэу зэрэслъэкӀырэр сигуапэ.
ЩыкӀагъэ зиӀэ къошхэм ахъщэ афаугъоиныр
1 Джы, сшыхэр, Македоние хэкум щыӀэ чылыс зэӀукӀэхэм Тхьэм ынэшӀу къызэращифагъэр шъодгъэшӀэнэу тыфай. 2 Гузэжъогъу хэтхэу, яшъыпкъагъэ инэу гъэунэфыгъэ зэхъум, тхьамыкӀэ дэдэу щытыгъэхэми, ягушӀогъошхокӀэ ямылъку шъхьамысыжьхэу тшыхэм адэӀэпыӀагъэх. 3 АлъэкӀыщтыгъэм фэдиз ыкӀи нахьыби ежьхэр фаехэу зэратыгъэмкӀэ сыряшыхьат. 4 Тигъусэхэу Тхьэм ицӀыф лъапӀэхэм адэӀэпыӀэнкӀэ фит тшӀынхэу яшъыпкъэу къытэлъэӀугъэх. 5 Тызыщыгугъыгъэм изакъоп къатыгъэр, ау ыпэрапшӀэу Зиусхьаным ежьхэм зырати, етӀанэ Тхьэр зэрэфаем тетэу тэ зыкъытатыжьыгъ. 6 Арэущтэу Тит ахъщэр шъуугъоин Ӏофыр ыублагъэти, мы ӀофышӀур шъуигъэухыжьынэу телъэӀугъ. 7 ШӀошъхъуныгъэмкӀи, гущыӀэнымкӀи, шӀэныгъэмкӀи, гуетыныгъэшхо пстэумкӀи, шӀулъэгъуныгъэу къытфышъуиӀэмкӀи, а Ӏоф пстэумкӀэ шъузэрэбаим фэдэу, мы ӀофымкӀи шъуимылъку шъушъхьамысыжьэу шъупылъ. 8 Мыр унашъоу сэ къышъуфэсшӀырэп, ау нэмыкӀхэм гуетыныгъэшхоу яӀэм фэзгъадэзэ, шӀулъэгъуныгъэу шъуиӀэм ишъыпкъагъэ згъэунэфынэу сыфай. 9 Сыда пӀомэ ти Зиусхьанэу Исус Христос ынэшӀу къызэрэтщи фагъэр шъошӀэ. Ар баеу щытыгъэми, тэщ пае тхьамыкӀэ хъугъэ, итхьэмыкӀагъэкӀэ бай шъухъуным пае. 10 Ахъщэ шъуугъоин Ӏофым сызэрэхаплъэрэр шъосэӀо; сыда пӀомэ ащ ишӀуагъэ къышъокӀыщт. БлэкӀыгъэ илъэсым къыщыублагъэу мы Ӏофыр зэрежъугъэжьагъэм имызакъоу, цӀыфхэу мы Ӏофыр апэ дэдэу зышӀэнхэу зыгу хэлъ хъугъэхэр шъоры. 11 Джы а Ӏофыр шъуухы, шъушӀэнэу шъуишъыпкъэу шъузкӀэхъопсыгъэр мылъкоу шъуиӀэм ифэшъуашэу жъугъэцэкӀагъэ хъуным пае. 12 Сыда пӀомэ цӀыфыр тэным фэхьазырмэ, иӀэм елъытыгъэу ары нахь, имыӀэм елъытыгъэу арэп, Тхьэм а тыныр зэридэрэр. 13 НэмыкӀ цӀыфхэм псынкӀагъо афэхъоу, шъо гузэжъогъу шъухэфэн фаеу арэп зыфасӀорэр, ау шъо шъуитӀум шъузэфэдэу шъузэдэӀэпыӀэн фае. 14 Джырэ уахътэм шъо къышъолыжьыгъэ мылъкумкӀэ ахэмэ ящыкӀагъэр яшъутын фае. ЕтӀанэ шъо щыкӀагъэ шъуиӀэ хъумэ, ахэмэ къялыжьыгъэ мылъкумкӀэ шъо шъуищыкӀагъэр къышъуатыщт. Арэущтэу шъо шъуитӀум шъузэфэдэщт. 15 Тхьэм игущыӀэ тхыгъэхэм зэрарытым фэдэу, «Бэ зыугъоигъэм къелыжьыгъэ щыӀагъэп, мэкӀэ зыугъоигъэми зыфэныкъо иӀагъэп».
Титрэ ащ игъогогъухэмрэ
16 Сэ шъощ пае гумэкӀыныгъэу сиӀэм фэдэ гумэкӀыныгъэ Тхьэм Тит ыгу къызэрэрилъхьагъэм пае, щытхъу фэсэшӀы. 17 Тит тызэрелъэӀугъэр ыдагъэ къодыеп, ау ыгу лъэшэу етыгъэу ежьыр фаеу шъуадэжь къэкӀо. 18 Ащ игъусэу къэбарышӀур зэригъэӀурэмкӀэ чылыс зэӀукӀэ пстэури зыщытхъурэ тшы къэтэгъакӀо. 19 Ащ нэмыкӀэу Зиусхьаным щытхъу фэтшӀыным паий, гумэкӀыныгъэшхоу къышъуфытиӀэр шъодгъэлъэгъуным паий мы Ӏофэу зишӀуагъэ къакӀорэр тшӀэ зыхъукӀэ, къыддэкӀонэу чылыс зэӀукӀэхэм а тшы къыхахыгъ. 20 Арэущтэу мы тынышхомкӀэ тызэрызекӀорэ шӀыкӀэм пае, цӀыфхэм тызэрагъэмысэщтым зыщытыдзыенэу тыфай. 21 Сыда пӀомэ Зиусхьаным ыдэжькӀи цӀыфмэ адэжькӀи шӀугъэ зэрэтшӀэным тыпылъ. 22 Ащ нэмыкӀэу тшэу зигуетыныгъэшхо бэрэ ыкӀи лъэныкъо ӀаджыкӀэ къытфэзыгъэшъыпкъэжьыгъэр адрэхэм ягъусэу къышъуфэтэгъакӀо. Джы инэу къызэрэшъущыгугъырэм пае, ыпэрэм нахьи нахь гуетыныгъэшхо иӀэ хъугъэ. 23 ТиткӀэ шъукъысэупчӀымэ, ар сигъусэу къышъуфэлажьэ. Мы тшыхэмкӀэ шъукъысэупчӀымэ, ахэр чылыс зэӀукӀэхэм ялӀыкӀохэу Христос щытхъу фэзышӀыхэрэр ары. 24 Арышъ, чылыс зэӀукӀэхэм апашъхьэ шъуишӀулъэгъуныгъи шъыпкъагъэм тетэу тыкъызэрэшъущытхъугъэри мы тшыхэм къафэжъугъэшъыпкъэжь.
Игуапэу зытырэр ары Тхьэм шӀу ылъэгъурэр
1 Мы ӀэпыӀэгъоу Тхьэм ицӀыф лъапӀэхэм афядгъэхьырэм ехьылӀагъэу къышъуфэстхынэу сищыкӀагъэп, 2 сыда пӀомэ шъуигуетыныгъэшхо сэшӀэ. Шъо Ахаие хэкум исхэм блэкӀыгъэ илъэсым щегъэжьагъэу Тхьэм ицӀыф лъапӀэхэм ӀэпыӀэгъу шъуафэхъунэу хьазырэу шъущытэу сӀуи, Македоние хэкум щыщхэм апашъхьэ сыщышъущытхъугъ. Шъуигуетыныгъэшхо ахэмэ анахьыбэри ӀэпыӀэгъу хъунхэу ыгъэгушхуагъ. 3 Ау мы ӀофымкӀэ шъуищытхъоу сшӀыгъэр пкӀэ имыӀэу къычӀэмыкӀыным ыкӀи зэрэсӀуагъэм фэдэу шъухьазырыным пае, тшыхэр шъуадэжь къэсэгъакӀох. 4 Сыда пӀомэ Македоние хэкум щыщхэр къызыздакӀохэкӀэ, шъумыхьазырэу къычӀыкӀымэ, тыкъызэрэшъущыгугъыгъэм пае тыукӀытэжьыщт шъо шъузэрэукӀытэжьыщтыр къэсӀонэу ищыкӀагъэп. 5 Арыти, тшыхэр шъуадэжь сапэ итхэу кӀонхэшъ, тыкъызэрыжъугъэгугъэгъэ тыныр ыпэкӀэ къызэрэжъутъэхьазырыным лъыплъэнхэу сялъэӀун фаеу сэлъытэ. Арэущтэу шъуимыгуапэ хъурэ тынэу мыхъоу, шъуигуапэ хъурэ тынэу ар хьазырыщт. 6 Сэ зыфасӀорэр мары: МакӀэ зыпхъырэм макӀэ къыхыжьыщт. Бэ зыпхъырэми бэ къыхыжьыщт. 7 Хэти ыгукӀэ зэрэтыриубытагъэм фэдэу ерэт, гухэкӀ хэмылъэу, емыгъэзыгъэу ерэт; сыда пӀомэ игуапэу зытырэр ары Тхьэм шӀу ылъэгъурэр. 8 Тхьэм гъунэ имыӀэу ынэшӀу инэу къышъущифэн ылъэкӀыщт. Арэущтэу лъэныкъо пстэумкӀи шъуищыкӀагъэр зэкӀэ шъуиӀэ зэпытыщт, сыд щыщырэ Ӏоф дэгъум паий къэшъутынэу икъуным нахьи нахьыбэ шъуиӀэщт. 9 Тхьэм игущыӀэ тхыгъэхэм зэрарытым фэДэу, «Бэу тхьамыкӀэхэм афигощыгъ. Ишъыпкъагъэ егъашӀэми щыӀэщт». 10 Зыпхъырэм чылапхъэ езытырэ Тхьэу, хьалыгъуи ышхынэу езытырэм чылапхъэ къышъуитынышъ, ыгъэбэгъощт. Шъуишъыпкъагъэ шӀугъэу къыхэкӀырэри ыгъэбэгъощт. 11 Сыдигъуи тынкӀэ шъуимылъку шъушъхьамысыжьынэу сыдрэмкӀи Тхьэм бай шъуишӀыщт. Арэущтэу тынкӀэ шъуимылъку шъузэрэшъхьамысыжьырэм пае, а тыныр тшыхэм заӀэкӀэдгъахьэкӀэ, цӀыфыбэмэ Тхьэм ищытхъушхо яжъугъэшӀыщт. 12 ӀэпыӀэгъу шъузэрэхъурэмкӀэ Тхьэм ицӀыф лъапӀэхэм ящыкӀагъэмкӀэ ӀэпыӀэгъу шъузэрафэхъурэм имызакъоу, цӀыфыбэми Тхьэм ищытхъушхо инэу яшъогъэшӀы. 13 Арэущтэу тшыхэм ӀэпыӀэгъу шъузэрафэхъурэмкӀэ шъуишъыпкъагъэ къызыжъугъэшъыпкъэжькӀэ, Христос ехьылӀэгъэ къэбарышӀум шыхьат шъузэрэфэхъурэм ыкӀи шъузэредэӀурэм пае, тшыхэм Тхьэм ищытхъу ашӀыщт. Ащ нэмыкӀэуи шъушъхьамысыжьэу шъуимылъку щыщ ахэми нэмыкӀ цӀыфхэми зэряшъутырэм пае, тшыхэм Тхьэм ищытхъу ашӀыщт. 14 Арэущтэу Тхьэм ынэшӀу инэу къызэрэшъущифагъэм пае, гуфэбэныгъэ къышъуфыряӀэу Тхьэм къышъуфелъэӀущтых. 15 Тхьэм итынышхоу къэмыӀошъущт иным пае, Тхьэм щытхъу фэтэжъугъэшӀ.
Паул апостол тетыгъоу иӀэр
1 Сэ, Паул, зэрэшъуӀорэмкӀэ шъуапашъхьэ сит зыхъукӀэ, сыщынэу сыщыт, ау сыкъышъупэчыжьэ зыхъукӀэ, сэгушхо сэ Христос игушъэбагъэрэ иӀэсагъэрэкӀэ сышъолъэӀу. 2 Мы дунаем ицӀыфхэм афэдэу шъозекӀо, аӀоу тызыгъэмысэрэ цӀыфхэм шъуадэжь сыкъызыкӀокӀэ, гушхоныгъэ хэлъэу сапэгъокӀынэу сыгу зэрэхэлъым фэдэу, гушхоныгъэ хэлъэу сыкъышъупэгъокӀынэу щыкӀагъэ щымыӀэнэу сышъолъэӀу. 3 Сыда пӀомэ мы дунаем тытет пэтми, мы дунаем ицӀыфхэм ягухэлъ тыгу хэлъэу тызаорэп. 4 Ӏашэхэу тызэрызаохэрэр мы дунаем иӀашэхэп, ау бзэджагъэм ипытапӀэхэр зэхакъутэнхэу Тхьэм ыдэжь къикӀырэ кӀуачӀэ ахэлъ. Гупшысэ пхэнджхэри, 5 цӀыфхэм Тхьэр зэрашӀэным пэуцунэу зыкъэзыӀэтырэ пэгэныгъэри зэкӀэ тэгъэкӀодых, сыд щыщырэ гухэлъи Христос едэӀунэу тэубыты. 6 Шъо шъуидэӀоныгъэ щыкӀагъэ зи имыӀэу, икъугъэу зэрэхъоу, хэтми мыдаӀорэми ифэшъуашэ едгъэпщыныжьынэу тыхьазыр. 7 Шъунэ къыпэкӀафэрэр шъолъэгъу ныӀэп. Шъуащыщэу зыгорэм ыгу Христос илъэу ышӀошъ хъумэ, ащ фэдэ къабзэу Христос тэри тыгухэм зэрарылъым ерэгупшыс. 8 ШъусымыгъэкӀодынэу, ау гурэ псэрэкӀэ нахь лъэкӀыныгъэ шъозгъэгъотынэу Зиусхьаным тетыгъоу къыситыгъэм ехьылӀагъэу бащэу сызщытхъужьэу сыублэмэ, сыукӀытэрэп. 9 СитхылъхэмкӀэ шъузгъэщыным сыпылъ фэдэу къэлъэгъонэу сыфаеп. 10 Сыда пӀомэ зыгорэм мырэущтэу къеӀо: «ИтхылъхэмкӀэ пхъашэ ыкӀи лъэш, ау ежьыр лъэкӀыныгъэ зимыӀэ гор, ыӀорэри пхъатэ пахьырэп». 11 Арэущтэу зыӀорэм мыр ерэшӀ: шъуадэжь тыщымыӀэу титхылъхэмкӀэ къатӀорэр, шъуадэжь тыкъызыкӀокӀи дгъэцэкӀэщт. 12 Зышъхьэ щытхъужьхэрэм запэтшӀыжьынэу е зафэдгъэдэнэу тытегушхорэп. Зым адрэм зызыригъэпшэжькӀи, зызыфигъэдэжькӀи, зэхэшӀыкӀыныгъэ яӀэп. 13 Гъунэ имыӀэу тызщытхъужьынэу тыфаеп, Тхьэм Ӏофэу къытфигъэнэфагъэм игъунапкъэхэми таблэкӀыщтэп. А Ӏофым игъунапкъэхэм акӀоцӀ шъо шъуит. 14 Гъунапкъэхэу тиӀэхэм таблэкӀырэп, шъуадэжь тыкъэмыкӀогъагъэм фэдэу. Сыда пӀомэ Христос ехьылӀэгъэ къэбарышӀур зыгъэӀунхэу апэрэхэу шъуадэжь къэкӀуагъэхэр тэры. 15 Тхьэм Ӏофэу къытфигъэнэфагъэм игъунапкъэхэм акӀыбкӀэ адрэ цӀыфхэм Ӏофэу ашӀагъэмкӀэ тызщытхъужьрэп, ау шъуишӀошъхъуныгъэ нахь пытэ хъоу, Ӏофэу шъуадэжь щытшӀагъэм зызэриушъобгъущтым тыщэгугъы, Тхьэм гъунапкъэу къытфигъэнэфагъэхэм атетэу. 16 Арэущтэу нэмыкӀ цӀыфым гъунапкъэу иӀэхэм ягъунапӀэ Ӏофэу щишӀагъэмкӀэ тызщымытхъужьэу, шъуакӀыбкӀэ щыӀэ хэкухэми къэбарышӀур ащыдгъэӀущт. 17 Ау зыгорэ зыгорэм щытхъужьмэ, Зиусхьанымрэ Зиусхьаным ышӀагъэмрэ щэрэтхъу. 18 Сыда пӀомэ ышъхьэ щытхъужьрэр арэп Зиусхьаным ыдэрэр, ежь Зиусхьаныр зыщытхъурэр ары нахь.
Паул апостол нэпцӀхэм зэратегущыӀэрэр
1 Сэ сиделагъэ тӀэкӀу къысфэшъущыӀэгъагъот. Шъо ар къысфэшъущыӀэщт. 2 Тхьэм ыдэжь къикӀырэ шъугъоныгъэмкӀэ шъо сышъуфэшъугъо, сыда пӀомэ шъо пшъэшъэ къабзэм фэдэу, лӀы закъоу Христос ыпашъхьэ шъуизгъэхьанышъ, ащ шъудэкӀонэу шъузгъэнэфагъ. 3 Ау блэжъым итхьагъэпцӀыгъэкӀэ бзылъфыгъэу Евэ зыцӀэр зэригъэпцӀэгъагъэм фэдэу, шъори шъушъхьэ зэӀигъахьэзэ, шъыпкъагъэу Христос фышъуиӀэм шъуакӀыб фэжъугъэзэнкӀэ сэщынэ. 4 Сыда пӀомэ зыгорэ шъуадэжь къакӀоу, Исус ехьылӀэгъэ къэбарэу тэ шъодгъэӀугъэм нэмыкӀ къэбар ыгъэӀумэ, шъуигуапэу ар фэшъощыӀэ. Е Тхьэм Ыпсэ ЛъапӀэу шъугухэм арылъ дгъэхъугъэм нэмыкӀ псэ горэ шъугухэм арылъ ыгъэхъумэ, ари шъуигуапэу фэшъощыӀэ. Е шъушӀошъ хъугъэ къэбарышӀум нэмыкӀ къэбарышӀоу зыфиӀорэр зыгорэм ыгъэӀумэ, ари шъуигуапэу фэшъощыӀэ. 5 Ау а апостол джадэхэу зыфашъуӀохэрэм анахьи зыкӀи сынахь цӀыкӀоу зыслъытэжьрэп. 6 ГущыӀэнкӀэ сымыӀазэми, шӀэныгъэм сырыӀаз. ШӀэныгъэмкӀэ сызэрэӀазэр сыдигъуи лъэныкъо пстэумкӀи къышъуфэзгъэнэфагъ. 7 Уасэ хэмылъэу Тхьэм ыдэжь къикӀыгъэ къэбарышӀур къышъозгъэӀузэ, шъузгъэиныным пае, зызэрэзгъэцӀыкӀугъэмкӀэ емыкӀу сшӀагъэу хъугъа? 8 НэмыкӀ чылыс зэӀукӀэхэм уасэ къаӀысхызэ, сышъуфэлэжьэным пае, ахэмэ ахъщэ тырязгъэгъэкӀодагъ. Шъуадэжь сызыщэӀэм, щыкӀагъэ сиӀагъэми, зыми хьылъэ сыфэхъугъэп. 9 Сыда пӀомэ сшыхэу Македонием къикӀыгъэхэу къэкӀуагъэхэм сищыкӀагъэр рагъэкъугъ. ЗыкӀи хьылъэ сызэрэшъуфэмыхъуным сыпылъыгъ ыкӀи сыпылъыщт. 10 Христос ишъыпкъагъэу сыгу илъымкӀэ сэӀо, Ахаие хэкум зэкӀэ исхэм ащыщэу зыми а щытхъоу сиӀэр сӀихын ылъэкӀыщтэп. 11 Сыд пае арэущтэу сызекӀора? ШӀу шъусымылъэгъоу ара? Хьау, шӀу шъузэрэслъэгъурэр Тхьэм ешӀэ. 12 Ау сызэрэзекӀощтыгъэм фэдэу, сызекӀо зэпытыщт. «Паул зэрэлажьэрэм фэдэ къабзэу тэри тэлажьэ», зыӀоу зыщытхъужьхэрэр зыщытхъужьынхэу игъо афизгъэфэнэу сыфаеп. 13 Ащ фэдэ цӀыфхэр апостол нэпцӀых, лэжьэкӀо гъэпцӀакӀох. Христос иапостолхэм афэдэу загъэлъагъо ныӀэп. 14 Ар гъэшӀэгъонэп. Ежь шэйтанми нэфынэм имэлэӀич фэдэу нэпцӀкӀэ зегъэлъагъо. 15 Арышъ, шэйтаным фэлажьэхэрэр шъыпкъагъэм фэлажьэхэрэм афэдэу нэпцӀкӀэ загъэлъагъомэ, ар Ӏофышхоп. Ау кӀэухэу афэхъущтыр Ӏофэу ашӀэхэрэм яхьылӀагъэу хъущт.
Паул апостолэу зэрэщытыгъэм пае къинэу ыщэчыщтыгъэхэр
16 Джыри сэӀо, зыми зэхэшӀыкӀ зимыӀэм фэдэу серэмылъыт. Ау арэущтэу сышъолъытэмэ, зэхэшӀыкӀ зимыӀэм шъузэрэпэгъокӀырэм фэдэу шъукъыспэгъокӀ, тӀэкӀу сызщытхъужьын слъэкӀыным пае. 17 Джы сӀорэр Зиусхьаныр арэп къэсэзыгъаӀорэр. Арэущтэу сыгушхоу сызщытхъужьмэ, зэхэшӀыкӀ зимыӀэм фэдэу сэгущыӀэ. 18 Мы дунаем ицӀыфхэм яхабзэ фэдэу, цӀыфыбэхэр зэрэзщытхъужьхэрэм пае, сэри сызщытхъужьыщт. 19 Шъо шъузэрэӀушым пае, зэхэшӀыкӀ зимыӀэхэр шъуигуапэу шъощыӀэх. 20 Зыгорэм шъуигъэпщылӀми, е шъуишхын шъушӀуешхыжьми, е шъуихъункӀэми, е шъуапашъхьэ зыщигъэпагэми, е шъунэпашъо къеоми, ар шъощыӀэ. 21 СыукӀытэзэ сэӀо, ащ фэдэ Ӏофхэр тшӀэнхэу лъэкӀ тиӀагъэп. ЦӀыф горэ Ӏоф горэмкӀэ зыщытхъужьыным тегушхомэ, сэри а ӀофымкӀэ сызщытхъужьынэу сытегушхо зэхэшӀыкӀ зимыӀэм фэдэу сэгущыӀэ. 22 Ахэр джуртха? Сэри сыджурт. Ахэр Израил цӀыфха? Сэри сы Израил цӀыф. Ахэр Ибрахьимэ къытехъукӀыгъэ цӀыфхэм ащыщха? Сэри сащыщ. 23 Ахэр Христос фэлажьэха? Ахэмэ анахьи нахьыбэу сыфэлажьэ. Акъыл зимыӀэм фэдэу сэгущыӀэ. Ахэмэ анахьи нахьыбэу сылэжьагъ, нахьыбэуи хьапсым сычӀэсыгъ, цӀыфхэр нахьыбэуи къамыщкӀэ къысэуагъэх, нахьыбэуи лӀэныгъэм игъунэгъоу сыхъугъ. 24 Къамыщ огъу тӀокӀитӀум зы щыкӀэу джуртхэр гъогогъуитфэ къысэуагъэх. 25 Гъогогъуищэ Рим тетыгъо зиӀэхэр бэщкӀэ къысэуагъэх. Зэ цӀыфхэм саукӀыным пае, мыжъокӀэ къысэуагъэх, сызэрытӀысхьэгъэ къухьэхэм ащыщэу щыр чӀихьагъ, зы чэщрэ зы мафэрэ хыорхэм сахэлъыгъ. 26 Гъогуми бэрэ сатетыгъ. Псыхъохэм сызазэпырэкӀым, щынагъо сыхэфагъ, хъункӀакӀохэми сахафэу, слъэпкъ щыщхэми сахэтэу, хымэ лъэпкъхэм ащыщхэми сахэтэу щынагъо сыхэфагъ; къалэхэми сащыӀэу, шъоф нэкӀхэми сарытэу, хыми сытетэу щынагъо сыхэфагъ; сшы нэпцӀхэми сахэтэу щынагъо сыхэфагъ. 27 Бэрэ сылажьэзэ зызгъэулэугъ, сымычъыеу чэщыби исхыгъ; мэлакӀи псыфалӀи сылӀагъ, бэри шхын сымыгъотэу сыкъэнагъ; чъыӀэми щыгъын икъунэу сщымыгъэу къысэкӀугъ. 28 Ӏоф пстэуми анэмыкӀэу чылыс зэӀукӀэ пстэуми сафэгумэкӀызэ мафэ къэси сэгузажъо. 29 Хэти гурэ псэрэкӀэ лъэкӀыныгъэ зимыӀэми, сэ сыригъус. ПсэкӀодым хэт зыӀэпищэми сыгу машӀом ыстырэм фэдэу мэхъу. 30 Сызщытхъужьын фаемэ, лъэкӀыныгъэ зэрэсимыӀэм пае сызщытхъужьыщт. 31 Тхьэу ти Зиусхьанэу Исус Христос Ятэу мыкӀодыжьын щытхъушхор зием пцӀы зэрэсымыусырэр ешӀэ. 32 Пачъыхьэ Аретэ фэлажьэрэ Ӏэшъхьэтетым саригъэубытыным пае, ицӀыфхэм Дамаск къалэм икъэлапчъэхэр аригъэухъумагъэх. 33 Ау къалэ дэпкъым хэт шъхьангъупчъэ горэмкӀэ матэм сисэу синыбжэгъухэм сыкъыратӀупщэхи, Ӏэшъхьэтетым сыкъыӀэпыкӀыжьыгъ.
Зиусхьаным Паул Ӏофхэу къыригъэлъэгъугъэхэри къыфигъэнэфагъэхэри
1 ИшӀуагъэ къэмыкӀощтми, сызщытхъужьын фае. Зиусхьаным сигъэлъэгъугъэ Ӏоф гъэшӀэгъонхэми, къысфигъэнэфэгъэ Ӏоф гъэшӀэгъонхэми сакъытегущыӀэщт. 2 Христос зыгу илъ лӀы горэ сэшӀэ. Илъэс пшӀыкӀуплӀкӀэ узэкӀэӀэбэжьмэ, Тхьэм ар ящэнэрэ уашъом дихьыягъ. Пкъы хэлъыгъа, хэмылъыгъа, сэ сшӀэрэп, Тхьэм ар ешӀэ. 3,4 Тхьэм а лӀыр дихьыий, джэнэтым зэрэригъэхьагъэр сэшӀэ. Пкъы хэлъыгъа, хэмылъыгъа сэ сшӀэрэп, Тхьэм ар ешӀэ. КъэпӀон умылъэкӀын гущыӀэхэу, цӀыфым къыӀотэжьынхэу зыфимытхэр а лӀым зэхихыгъэх. 5 А лӀым сыщытхъужьынэу сыфай; сэ сшъхьэкӀэ лъэкӀыныгъэ зэрэсимыӀэм нэмыкӀкӀэ сызщытхъужьынэу сыфаеп. 6 Сызщытхъужьынэу сыфэягъэми, зэхэшӀыкӀ зимыӀэм сыфэдэщтыгъэп, сыда пӀомэ шъыпкъагъэр къасӀощтыгъ. Ау зысэщыӀэ, зыгорэм Ӏофхэу сшӀэхэрэр зилъэгъухэкӀэ, е гущыӀэхэу сэ къасӀохэрэр зызэхихыхэкӀэ, сызэрилъытэрэм нахьи нахьыбэу симылъытэным пае. 7 Тхьэм къысфигъэнэфэгъэ Ӏофышхохэм апае зысымыгъэиныщэным пае, уз горэу къысхэорэ панэм фэдэр спкъы хэлъ хъугъэ. Ар шэйтаным иӀофтабгэ фэд. Зысымыгъэиныщэным пае, лые къысехы. 8 А панэр хихыжьынэу Зиусхьаным гъогогъуищэ селъэӀугъ. 9 Ау Зиусхьаным къысиӀуагъ: «Сэ сынэшӀу къызэрэпщысфэрэр оркӀэ икъун, сыда пӀомэ о лъэкӀыныгъэ уимыӀэ зыхъукӀэ, силъэкӀыныгъэшхо нахь къэлъагъо». Арэущтэу Христос илъэкӀыныгъэ къысхэлъыным пае, лъэкӀыныгъэ зэрэсимыӀэмкӀэ нахь сигуапэу сызщытхъужьыщт. 10 Арышъ, Христос сызэрэфэлажьэрэм пае, лъэкӀыныгъэ симыӀэми, къысэхъонхэми, къин слъэгъуми, къин сагъэщэчми, гухэкӀ сиӀэми сэгушӀо; сыда пӀомэ лъэкӀыныгъэ симыӀэ зыхъукӀэ, нахь лъэш сэхъу.
Паул шӀошъхъуныгъэ зиӀэ цӀыфхэу Коринф дэсхэм зэрафэгумэкӀырэр
11 ЗэхэшӀыкӀ зимыӀэм фэдэу сыкъэгущыӀагъ, ау арэущтэу сыкъэгущыӀэнэу шъо сежъугъэзыгъ. Шъо шъукъысщытхъужьын фэягъ, сыда пӀомэ сэ пкӀэ симыӀэми, а апостол джадэхэу зыфашъуӀохэрэм анахьи сэ зыкӀи санахь цӀыкӀоп. 12 Апостолэу сызэрэщытыр къэзыгъэшъыпкъэжьырэ Ӏофхэу нэшэнэ гъэшӀэгъонышхохэри, Ӏофышхо гъэшӀэгъонхэри, лъэкӀыныгъэ зыхэлъ Ӏофышхохэри шъуадэжь теубытэныгъэшхокӀэ сэ щысшӀагъэх. 13 Сэ хьылъэ сызэрэшъуфэмыхъугъэм нэмыкӀэу, адрэ чылыс зэӀукӀэхэм сызэрадэзекӀуагъэм нахьи нахь дэеу сыкъыжъудэзекӀуагъа? Хьылъэ сызэрэшъуфэмыхъугъэмкӀэ губгъэн къысфэшъумылъэгъу. 14 Джы ящэнэрэу шъуадэжь сыкъэкӀонэу сыхьазыр, ау хьылъэ сышъуфэхъущтэп, сыда пӀомэ сызыфаер шъуимылъкоп, шъоры нахь. Бынхэм ятэянэхэмэ мылъку афаугъоинэу апшъэ илъэп, ау ятэянэхэр ары зибынхэм афэзыугъоин фаехэр. 15 Сэ инэу шъо шӀу шъуслъэгъоу, шъо нахь макӀэу шӀу сышъулъэгъужьыми, шъо шъупсэхэмэ апае зэкӀэ сиӀэр згъэкӀодынэу, сэ сшъхьэкӀи зызгъэкӀодыжьынэу сигопэщт. 16 Арэущтэуи орэхъу, хьылъэ сышъуфэхъугъэп. Ау тхьагъэпцӀыгъэкӀэ сыжъудэзекӀуи, шъусыубытыгъэу шъоӀо. 17 Шъуадэжь сэ къэзгъэкӀогъэ лӀыхэм ащыщэу зыгорэмкӀэ шъуишӀуагъэ къызэзгъэкӀыгъа? 18 Тит шъуадэжь кӀонэу селъэӀугъ, сшыхэм ащыщэуи зы гъусэ фэсшӀыгъ. Тит шъуишӀуагъэ къызэригъэкӀыгъэп, арыба? Зыгу зыпсэкӀэ тызекӀоу, а зы гъогум тытетыгъэба? 19 Мыщ фэдизэу тызпылъыгъэр шъуапашъхьэ зыщыдгъэхыеныр арэу шъогугъа? Ау Христос тыгухэм арылъэу Тхэм ыпашъхьэ тыщыгущыӀагъ ыкӀи, силъапӀэхэр, мы Ӏоф пстэури зыфатшӀэрэр гурэ псэрэкӀэ нахь лъэкӀыныгъэ шъодгъэгъотыныр ары. 20 Сыда пӀомэ шъуадэжь сыкъызыкӀокӀэ, сызэрэфаеу шъо шъущымытэу шъузгъотэу, шъори шъузэрэфаеу сэ сыщымытэу сыжъугъотынкӀэ сэщынэ. Зэщыхьаныр, шъугъоныр, губжыныр, зэмызэгъыныр, нэмыкӀ цӀыфхэм ӀэягъэкӀэ атегущыӀэныр, бзэгухьаныр, зышӀошӀыжьыныр, зэхэтхъогъэ Ӏофхэр къэхъунхэкӀэ сэщынэ. 21 Шъуадэжь къызыкӀожькӀэ, шъуапашъхьэ Тхьэм аргорэу сыщигъэцӀыкӀунэу сэщынэ, псэкӀод зы шӀэгъэ цӀыфыбэу зигумыкъэбзэным, зизинэ шӀэным, зимыхъомышӀэ псэукӀэу зыхэтхэм афыкӀэмыгъожьыгъэхэм сыгу къырагъэонэуи сэщынэ.
Паул шӀошъхъуныгъэ зиӀэ цӀыфхэу Коринф дэсхэм аужырэ Ӏофхэу агуригъэӀуагъэхэр
1 Шъуадэжь сыкъызэрэкӀорэр мыр ящэнэрэу мэхъу. Ащыгъум сыдрэ Ӏофэу шъуащыщэу зыгорэ зэрыжъугъэмысэрэр анахь макӀэми шыхьатитӀум е шыхьатищым къаӀорэмкӀэ гъэшъыпкъагъэу хъун фае. 2 ЯтӀонэрэу шъуадэжь сызыщэӀэм, мыр къышъуфэзгъэпытэгъагъ. Джы шъуадэжь сыщымыӀэу джыри зэ къышъуфэсэгъэпытэ: ЫпэкӀэ псэкӀод зышӀагъэхэмрэ, адрэ къэнэгъэ цӀыф пстэумрэ сыкъызыкӀожькӀэ сашъхьасыщтэп, 3 сыда пӀомэ къасӀохэрэр къэсэзыгъаӀорэр зэрэХристосыр къэзгъэшъыпкъэжьынэу шъуфай. Христос къызыжъудэзекӀокӀэ, лъэкӀыныгъэ имыӀэу щытэп. ИлъэкӀыныгъэшхо шъуадэжь къыщегъэлъагъо. 4 ЛъэкӀыныгъэ имыӀэу къащым тыраӀулӀагъэ пэтми, Тхьэм илъэкӀыныгъэкӀэ джыри псау. Ащ фэдэу Христос тыгухэм арылъэу тэри лъэкӀыныгъэ тимыӀэ пэтми, Тхьэм илъэкӀыныгъэкӀэ тэри Христос тигъусэу тыпсзущт, тышъуфэлэжьэным пае. 5 ШъуишӀошъхъуныгъэ шъыпкъэмэ зэжъугъэшӀэным пае зыжъугъэунэфыжь. Шъо шъушъхьэкӀэ Исус Христос шъугухэм зэрарылъыр шъошӀэба! Армырмэ шъузэрэщытын фэем фэдэу шъущымытэу къычӀэкӀыгъ. 6 Тэ тызэрэщытын фаем фэдэу тыщытэу къызэрэчӀэкӀыгъэр зэрэшъушӀэрэм сицыхьэ телъ. 7 МыхъомышӀагъэ горэ шъумыгъэцэкӀэнэу Тхьэм телъэӀу. Арэущтэу тызфелъэӀурэр тызэрэщытын фаем фэдэу тыщытэу къычӀэкӀыныр арэп, тэ тызэрэщытын фаем фэдэу тыщымытэу къычӀэкӀыми, шъо шӀутъэр жъугъэцэкӀэныр ары нахь. 8 Сыда пӀомэ шъыпкъагъэм тыпэуцоу зи тшӀэн тлъэкӀыщтэп, ау шъыпкъагъэм пае зыгорэ тшӀэн тлъэкӀыщт. 9 ЛъэкӀыныгъэ тэ тимыӀэми, шъо лъэкӀыныгъэ шъуиӀэ зыхъукӀэ тэгушӀо. Зишъыпкъагъэ щыкӀагъэ зи зимыӀэ цӀыф икъугъэхэу шъуигъэхъунэу Тхьэм телъэӀу. 10 Шъуадэжь сыщымыӀэу мы Ӏофхэр зыфышъуфэстхырэр шъуадэжь сыкъызыкӀокӀэ, Зиусхьаным къыситыгъэ тетыгъомкӀэ пхъашэу сыкъыжъудэзекӀон фаеу мыхъунэу ары. Шъузгъэунэхъунэу арэп, гурэ псэрэкӀэ нахь лъэкӀыныгъэ шъозгъэгъотынэу ары нахь, Зиусхьаным а тетыгъор къызфыситыгъэр.
Аужырэ шӀуфэс гущыӀэхэр
11 Аужыпкъэм, сшыхэр, шъотхъэжь, зишъыпкъагъэ щыкӀагъэ зи зимыӀэ цӀыф икъугъэхэу шъухъуным ыуж шъуит, зысэжъугъэгъэгушху, шъуигупшысакӀэ зы орэхъу, гупсэфыныгъэ шъуиӀэу шъопсэу. ЕтӀанэ Тхьэу шӀулъэгъуныгъэмрэ гупсэфыныгъэмрэ зыдэжь къикӀырэр шъуигъусэщт. 12 ГукъэбзагъэкӀэ ӀаплӀ зэшъущэкӀэу шӀуфэс зэшъухыжь. Тхьэм ицӀыф лъэпӀэ пстэуми шӀуфэс къышъуахыжьы. 13 Ти Зиусхьанэу Исус Христос ынэшӀу щыфэныгъэ, Тхьэм ишӀулъэгъуныгъэ, Тхьэм Ыпсэ ЛъапӀэ шъо пстэуми шъуерэгъусэх. Амин.
ШӀуфэс ехыныр
1 Сэ сыапостол Паул. Апостол сыхъунэу сыкъыхэзыхыгъэхэр цӀыфхэр арэп, цӀыф горэми сыкъигъэкӀуагъэп, сыкъыхэзыхыгъэхэр Исус Христосрэ ар лӀагъэхэм къахэзыгъэтэджыкӀыжьыгъэ Тхьэу Ты лъапӀэмрэ ары. 2 Сэррэ сигъусэ сшы пстэумрэ Галатие хэкум щыӀэ чылыс зэӀукӀэхэм шӀуфэс шъотэхыжьы. 3 Тхьэу Тятэ лъапӀэрэ Зиусхьанэу Исус Христосрэ анэшӀу къышъущарэфи, гупсэфыныгъэ къышъуарэт. 4 Исус Христос ары джырэ дунаем ибзэджагъэ илъэкӀыныгъэ тыӀэкӀихыжьыным пае, ти Тхьэу ыкӀи Тятэ лъапӀэ зэрэфэягъэм тетэу, типсэкӀодхэр ыпщыныжьынхэм пае, зыпсэ зытыгъэр. 5 МыкӀодыжьын щытхъушхор ий. Амин.
НэмыкӀ къэбарышГу зи щыӀэп
6 Христос ынэшӀу щыфэныгъэкӀэ Тхьэу зибынхэм ащыщ шъухъунхэу къышъоджагъэм игъогу шъутекГэу, ащ фэдэу псынкӀэу нэмыкӀ къэбарышӀоу зыфаӀорэм игъогу шъузэрэтехьагъэр лъэшэу сэгъэшӀагъо. 7 НэмыкӀ къэбарышӀу зи щыӀэп. Ау цӀыф заулэмэ шъушъхьэхэр зэӀагъэхьэ, Христос ехьылӀэгъэ къэбарышӀури зэблахъунэу фаех. 8 КъэбарышӀоу тэ шъодгъэӀугъэм нэмыкӀ къэбарышӀоу зыфиӀорэр къышъозыгъэӀурэм, тэрми уашъом щыщ мэлэӀичми, Тхьэм ынае къыщерэф. 9 ЫпэкӀэ къэтӀогъагъэр джыри къэсэӀожьы: КъэбарышӀоу шъудагъэм нэмыкӀ къэбарышӀоу зыфиӀорэр къышъозыгъэӀурэм Тхьэм ынае къыщерэф. 10 Джы цӀыфхэм сызэрадэным сыпылъа, хьауми Тхьэм сызэридэныр ара сызыпылъыр? Хьауми цӀыфхэм агу къызэрэсэӀуныр ара сызыпылъыр? Джырэ нэсы цӀыфхэм агу къызэрэсэӀуным сыпылъыгъэмэ, Христос сыфэлажьэу сыщытыщтыгъэп.
Паул апостолэу зэрэхъугъэр
11 Сшыхэр, сэ шъозгъэӀугъэ къэбарышӀур цӀыфым ыдэжь къызэримыкӀыгъэр шъушӀэнэу сыфай. 12 Зы цӀыф горэм а къэбарышӀур къыӀысхыгъэп, зыми ар сигъэшӀагъэп, ау ежь Исус Христос а къэбарышӀур къысфигъэнэфагъ. 13 Джурт диным сыпылъэу сищыӀакӀэу щытыгъэм икъэбар зэхэшъухыгъэ. Тхьэм ичылыс зэӀукӀэ къин дэдэ езгъэщэчэу, згъэкӀодыным ыуж ситыгъ. 14 Слъэпкъ щыщхэу силэгъубэхэм анахьи, джурт диным сызэрэпылъыгъэмкӀэ апэ ситыгъ. Тятэжъхэм къытфагъэнэгъэ хабзэхэм сыгу етыгъэу сапылъыгъ. 1516 Ау сянэ ышъо сыхэлъэу Тхьэм сыкъыхихыгъ. ЫнэшӀу щыфэныгъэкӀи ибынхэм ащыщ сыхъунэу къысэджагъ. ЕтӀанэ Ыкъо ехьылӀэгъэ къэбарышӀур хымэ лъэпкъхэм язгъэӀуным пае, Ыкъо сигъэлъэгъунэу Тхьэм игъоу зелъытэм, зы цӀыфи упчӀэгъу сшӀыгъэп. 17 Сэ сапэ апостол хъугъэ цӀыфхэу Ерусалим дэсыгъэхэм адэжь сыкӀуагъэп, ау Аравие хэгъэгум сыкӀуи, етӀанэ Дамаск къалэм згъэзэжьыгъэ. 18 Илъэсищ зытешӀэм ыуж, тызэрэшӀэнэу Кифэ ыдэжь Ерусалим сыкӀуагъ, ащ дэжьи мэфэ пшӀыкӀутфэ сыщыӀагъ. 19 Зиусхьаным ышы Якъубэ нэмыкӀэу, адрэ апостолхэм ащыщэу зи слъэгъугъэп. 20 Тхьэ сэӀо, къышъуфэстхырэмкӀэ пцӀы сыусырэп. 21 Ащ ыужым Сириерэ Киликиерэ зыцӀэ хэкухэм сащыӀагъ. 22 Христос ичылыс зэӀукӀэхэу Иудей хэкум щыӀэхэм сынапэ алъэгъутъэу сашӀэщтыгъэп. 23 Ахэмэ цӀыфхэм мырэущтэу зэраӀорэр зэхахыщтыгъ ныӀэп: «ЛӀэу ыпэкӀэ къин тэзыгъэщэчыгъэу, тишӀошъхъуныгъэ зыгъэкӀодынэу тауж итыгъэм а шӀошъхъуныгъэм икъэбарышӀу джы цӀыфхэм арегъэӀу». 24 Арэущтэу сэщ пае Тхьэм щытхъу фашӀыщтыгъ.
Адрэ апостолхэм Паул зэрадагъэр
1 ЕтӀанэ илъэс пшӀыкӀуплӀ тешӀагъэу, Варнавэ сигъусэу Ерусалим сыкӀуагъ. Тити гъусэу зыдэсщагъ. 2 Ерусалим сыкӀон фаеу Тхьэм къызгуригъэӀуагъэти, сыкӀуагъ. КъэбарышӀоу хымэ лъэпкъхэм язгъэӀурэр тхьаматэхэм язакъоу апашъхьэ ислъхьагъ, Ӏофэу сшӀэрэр ыкӀи сшӀагъэр хьаулыеу мыхъуным пае. 3 Титэу сигъусагъэр Урым лъэпкъым щыщ пэтми, сунэт заригъэшӀынэу рагъэзыгъэп. 4 Сыда пӀомэ къош нэпцӀ заулэхэу тшыхэм захэзыгъэкӀокӀагъэхэр арэущтэу фэягъэх. Христос Исус тыгухэм зэрарылъым пае, шъхьафитныгъэу тиӀэм еплъакӀохэу, ахэмэ Тэурат хабзэм ыӀэчӀэгъ тычӀагъэуцожьыным ыуж итыгъэх. 5 Ау къэбарышӀум ишъыпкъагъэ мыкӀодэу къышъуфэдгъэнэным пае, а цӀыфхэм зыкӀи тафызэкӀэкӀуагъэп ыкӀи тафэӀорышӀагъэп. 6 Тшыхэм тхьаматэхэу алъытэхэрэм ахэр тхьаматэхэу щытхэми щымытхэми сизэфэдэ; Тхьэр цӀыфхэм ятеплъэ емыплъэу, цӀыф пстэури изэфэдэхэу щытых ахэмэ къэбарышӀоу сэ згъэӀурэм зи хагъэхъуагъэп. 7 Ау сунэт ашӀыгъэхэу щытхэм къэбарышӀур аригъэӀунэу Тхьэм Петрэ ыпшъэ къызэрэрилъхьагъэм фэдэу, сунэт амышӀыгъэхэу щытхэм къэбарышӀур язгъэӀунэу Тхьэм спшъэ къызэрэрилъхьагъэр агурыӀуагъ. 8 Сыда пӀомэ Петрэ сунэт ашӀыгъэхэу щытхэм апостол Ӏофэу афишӀэрэмкӀэ къыдэлажьэу щытыгъэ Тхьэр сэри сунэт амышӀыгъэхэу щытхэм апостол Ӏофэу афасшӀэрэмкӀэ къыздэлажьэу щытыгъ. 9 Тшыхэм тхьаматэ пкъэухэу алъытэхэрэ Якъубэ, Кифэ, Иуан Тхьэм ынэшӀу къызэрэсщифагъэр ашӀагъэти, ахэр, сэры, Варнавэ тызэрэзэдэлажьэрэм инэшанэ фэдэу тӀэхэр аубытыгъэх: Тэ хымэ лъэпкъхэм адэжь тыкӀон фэягъ, ахэри сунэт ашӀыгъэхэу щытхэм адэжь кӀонхэ фэягъ. 10 «ТитхьамыкӀэхэм шъуадэӀэпыӀэнэу зыщышъумыгъэгъупш», аӀозэ, а зы Ӏоф закъор ары къызэрытэлъэӀугъэхэр. А Ӏоф дэдэми сишъыпкъэу сыпылъыгъ.
Паул Петрэу КифэкӀэ заджэхэрэм зэрэпэуцугъэр
11 Кифэ Антиохие къалэм къызэкӀом, Ӏоф горэмкӀэ мысэ хъугъэти, ыпашъхьэ сихьи сыпэуцугъ. 12 Сыда пӀомэ Якъубэ ыдэжь лӀы заулэ къимыкӀыхэ рапшӀэу, Петрэ мыджуртхэм адашхэщтыгъ. Ау а лӀыхэр къызэкӀохэм, сунэт ашӀыгъэхэу щытхэм ащыщынагъэти, Петрэ зэкӀэкӀожьи, мыджуртхэм ыкӀыб афигъэзагъ. 13 Адрэ джуртхэри Петрэ инэпитӀугъэкӀэ гъусэ фэхъугъэх. Варнави ахэмэ янэпитӀугъэкӀэ зыӀэпаригъэщагъ. 14 КъэбарышӀум ишъыпкъагъэ темытхэу зэрэзекӀуагъэхэр зысэлъэгъум, зэкӀэмэ апашъхьэ Петрэ щесӀуагъ: «О уджурт пэтми, джурт хабзэхэм уатемытэу, хымэ лъэпкъхэм яхабзэхэм уатетэу опсэу. Арышъ, сыд паекӀэ джурт хабзэкӀэ мыджуртхэр бгъэпсэунхэм упылъа?»
Адрэ лъэпкъхэм афэдэхэу, джуртхэми Исус ХристоскӀэ шӀошъхъуныгъэ яӀэмэ, мыкӀодхэу къэнэжьыщтых
15 Тэ джуртэу тыкъэхъугъ. Хымэхэу псзкӀод зышӀэхэрэм тащыщэп. 16 Ау тэ тыджуртми мыр тэшӀэ: зы цӀыф горэм Тэурат хабзэм итхэр зэригъэцакӀэхэрэм пае, Тхьэм ежьым ыдэжькӀэ шъыпкъагъэ иӀэу ылъытэщтэп, Исус ХристоскӀэ шӀошъхъуныгъэ зэриӀэм пае ары нахь. Арэущтэу тэри Христос ИсускӀэ шӀошъхъуныгъэ тиӀэ хъугъэ, ХристоскӀэ шӀошъхъуныгъэ тиӀэ зэрэхъугъэм фэшӀкӀэ, Тхьэм ежьым ыдэжькӀэ шъыпкъагъэ тиӀэу тилъытэным пае. Тэурат хабзэм итхэр дгъэцэкӀэным иӀоф ащ хэлъэп, сыда пӀомэ цӀыф горэм Тэурат хабзэм итхэр зэригъэцакӀэхэрэм пае, Тхьэм ежьым ыдэжькӀэ ащ шъыпкъагъэ иӀэу ылъытэщтэп. 17 Ау Христос тыгухэм зэрарылъым пае, Тхьэм ежьым ыдэжькӀэ шъыпкъагъэ тиӀэу тызэрилъытэщтым тыщыгугъэу, псэкӀод зытелъ цӀыфхэу тыщытыгъэмэ, Христос псэкӀод тигъэшӀагъэу хъущтыгъа? Хьау, ар хъухэщтэп. 18 Сыда пӀомэ, зэхэскъутагъэр зэхэзгъэуцожьмэ, Тхьэм иунашъохэм сызэратекӀыгъэр ащыгъум къэсэгъэшъыпкъэжьы. 19 Тэурат хабзэм иӀоф къысхэмылъыжьэу, Тэурат хабзэм ыдэжькӀэ цӀыф лӀагъэм сыфэд ар къызпкъырыкӀыгъэр Тэурат хабзэр ары Тхьэм сыфэпсэуным пае. Христос сыригъусэу къащым сытыраӀулӀагъэм фэд. 20 Арышъ, джы псэурэр сэрэп, сыгу илъ Христос ары нахь. Мы дунаем щыӀэныгъэу щысиӀэр, Тхьэм ЫкъокӀэ шӀошъхъуныгъэ сыгу илъэу сиӀ. Ащ шӀу силъэгъуи, ыпсэ сэщ пае ытыгъ. 21 Тхьэм ынэшӀу щыфэныгъэ сыфэмыеу щытэп, сыда пӀомэ Тхьэм ежьым ыдэжькӀэ Тэурат хабзэм итхэр зыгъэцакӀэрэ цӀыфым шъыпкъагъэ иӀэу ылъытагъэмэ, ащыгъум Христос хьаулыеу лӀагъэу хъущтыгъ.
Тэурат хабзэм игъогу тырыкӀона, хьауми шӀошъхъуныгъэм игьогу тырыкӀона?
1 Шъо зэхэшӀыкӀ зимыӀэ Галатие цӀыфхэр! Хэт шъо шъудэзыхьыхыгъэр? ЗэхэугуфыкӀ къышъуфэтӀотэжьыгъэба Исус Христос къащым зэрэтыраГулӀагъэр? 2 Мы зы закъор сэжъугъэшӀэнэу сыфай. Тхьэм Ыпсэ ЛъапӀэ шъугухэм арылъ зэрэхъугъэр Тэурат хабзэм итхэр жъугъэцэкӀэнхэм игъогукӀэ арыгъа, хьауми къэбарышӀоу зэхэшъухыгъэмкӀэ шӀошъхъуныгъэ шъуиӀэ хъуным игъогукӀэ арыгъа? 3 Ащ фэдизэу зэхэшӀыкӀыныгъэ шъуимыӀэу шъущыта? Къызышъуублагъэм дэжь Тхьэм Ыпсэ ЛъапӀэ шъущыгугъыщтыгъ, джы зишъыпкъагъэ щыкӀагъэ зимыӀэ цӀыф икъугъэхэу шъузэрэхъуным шъо шъукӀуачӀэкӀэ шъунэсынэу шъуфая? 4 Хьаулыеу ащ фэдиз къиныбэ шъущэчыгъа? Хьау, хьаулыеу щытыгъэп, арыба? 5 Тхьэм ежьым Ыпсэ ЛъапӀэ шъугухэм къарелъхьэ, Ӏофышхо гъэшӀэгъонхэри шъуадэжь щешӀэх. Арэущтэу зыкӀишӀырэр Тэурат хабзэм итхэр жъугъэцакӀэхэу ара, е къэбарышӀоу зэхэшъухыгъэмкӀэ шӀошъхъуныгъэ шъуиӀэ зэрэхъугъэр ара? 6 Джащ фэд Тхьэм игущыӀэ тхыгъэхэм зэрарытым фэдэу, «Ибрахьимэ ТхьэмкӀэ шӀошъхъуныгъэ иӀэ хъугъэти, Тхьэм ежьым ыдэжькӀэ ащ шъыпкъагъэ иӀэу ылъытагъ». 7 Арэущтэу шӀошъхъуныгъэ зиӀэхэр Ибрахьимэ ибын шъыпкъэхэу зэрэщытхэр зэжъугъашӀэ. 8 Тхьэм игущыӀэ тхыгъэхэм арыт, хымэ лъэпкъхэм ащыщхэми ежьымкӀэ шӀошъхъуныгъэ зэряӀэм пае, ежьым ыдэжькӀэ шъыпкъагъэ яӀэу Тхьэм зэрилъытэщтхэр. Арэу зыхъукӀэ, Тхьэм игущыӀэ тхыгъэхэм арыт, Тхьэм мырэущтэу ыӀозэ, Ибрахьимэ къэбарышӀур къызэрэриӀуагъэр: «Лъэпкъ пстэуми сынэшӀу щыфэныгъэ анэбгъэсынэу сшӀыщт». 9 Арэущтэу Ибрахьимэу ТхьэмкӀэ шӀошъхъуныгъэ зиӀэм Тхьэм ынэшӀу къызэрэщифагъэм фэдэу, ежьымкӀэ шӀошъхъуныгъэ зиӀэ пстэуми ынэшӀу къащифэщт. 10 Тэурат хабзэм итхэр агъэцакӀэхэмэ, Тхьэм ежьым ыдэжькӀэ шъыпкъагъэ яӀэу зэрилъытэщтхэм щыгугъырэ пстэуми Тхьэм ынае къащифагъ, сыда пӀомэ Тхьэм игущыӀэ тхыгъэхэм арыт: «Тэурат хабзэм итхылъ ит пстэури сыдигъуи зымыгъэцакӀэрэм Тхьэм ынае къыщефэ». 11 Тэурат хабзэм итхэм ягъэцэкӀэн игъогукӀэ Тхьэм ыдэжькӀэ зыми шъыпкъагъэ зэримыӀэр нафэ, сыда пӀомэ Тхьэм игущыӀэ тхыгъэхэм зэрарытым фэдэу, «ШӀошъхъуныгъэ зэриӀэм пае, Тхьэм ыдэжькӀэ шъыпкъагъэ зиӀэр псэущт». 12 Тэурат хабзэм итхэр бгъэцэкӀэнхэм иӀоф шӀошъхъуныгъэ уиӀэным иӀоф епхыгъэу щытэп, ау Тхьэм игущыӀэ тхыгъэхэм зэрарытым фэдэу, «Тэурат хабзэм итхэр зыгъэцакӀэрэр ащкӀэ псэущт». 13 Ау тимысагъэ фэшъошэ къиныр Христос зэрэзытырилъхьагъэмкӀэ Тэурат хабзэм тызэригъэмысэгъэ Ӏофыр ттырихыжьи, тшъхьэхэр къыщэфыжьыгъэх, сыда пӀомэ Тхьэм игущыӀэ тхыгъэхэм зэрарытым фэдэу, «Хэтми пкъэум кӀэрагъэлӀыхьарэм Тхьэм ынае къыщефэ». 14 Христос тшъхьэхэр къызфищэфыжьыгъэхэр Тхьэм Ибрахьимэ къызэригъэгугъэгъэ нэшӀу щыфэныгъэр ежь Христос Исус хымэ лъэпкъхэми анигъэ сынри, шӀошъхъуныгъэ зэрэтиӀэм пае Тхьэм тызэригъэгугъэгъэ Ыпсэ ЛъапӀи тыгумэ къарилъхьанри ары.
Тэурат хабзэмрэ Тхьэм игъэгугъэныгъэрэ зэфэмыдэхэу зэрэщытхэр
15 Сшыхэр, мы дунаем иӀофхэм шапхъэ атесэхы: ЦӀыфмэ зэдаштэгъэ зэзэгъыныгъэр къызагъэшъыпкъэжьы ужым, зыми ар ыгъэкӀодын ылъэкӀыщтэп, зыми ащ хигъэхъони ылъэкӀыщтэп. 16 Ащ фэдэу Тхьэм Ибрахьимэрэ ащ къытехъукӀыщт бынымрэ ӀэхьышӀухэмкӀэ къыгъэгугъагъэх. «О къыптехъукӀыщт быныр», зы нэбгырэ закъо къырагъэкӀэу Тхьэм игущыӀэ тхыгъэхэм арыт. Ащ къикӀырэр Христос ары. «О къыптехъукӀыщт цӀыфхэр», ыӀоу бэ къырагъэкӀэу арытэп. 17 Сэ зыфасӀорэр мары: Илъэс шъиплӀырэ щэкӀырэ Тхьэм ежьыррэ Ибрахьимэрэ азыфагу зэзэгъыныгъэ зыделъхьэ ужым къэлъэгъогъэ Тэурат хабзэм а зэзэгъыныгъэр ыгъэкӀодын ылъэкӀыщтэп, Тхьэм ӀэхьышӀоу Ибрахьимэрэ ащ къытехъукӀыщт бынымрэ къызэригъэгугъагъэри ымыгъэхъун ылъэкӀыщтэп. 18 Ау Тхьэм цӀыфхэм ӀэхьышӀур къалъигъэсыныр Тэурат хабзэм итхэм ягъэцэкӀэн епхыгъэу щытмэ, ащыгъум Тхьэм ӀэхьышӀур къызэригъэгугъагъэхэм епхыгъэу щытыжьэп. Ау шъыпкъэу зэрэщытымкӀэ, Тхьэм Ибрахьимэ къызэригъэгугъагъэр ары ынэшӀу шыфэныгъэкӀэ а ӀэхьышӀур зыкӀылъигъэсыгъэр. 19 Ащыгъум Тэурат хабзэр зыкӀыщыӀэр сыда? Хабзэм текӀыныр зыфэдэр цӀыфмэ агуригъэӀоным пае, Тхьэм Тэурат хабзэр къафыригъэхыгъ. Ибрахьимэ къытехъукӀыщт бынэу Тхьэм къызэригъэгугъагъэр къэкӀофэ, Тэурат хабзэм тетыгъо иӀэн фэягъ. Тхьэм Тэурат хабзэр мэлэӀичхэм аӀэкӀилъхьи, ахэми лӀыкӀо горэм ӀэкӀалъхьажьыгъ. 20 Зы нэбгырэ нахь щымыӀэмэ, лӀыкӀо ищыкӀагъэп, ау Тхьэр зы закъу.
ПщылӀхэмрэ къохэмрэ
21 Тэурат хабзэр Тхьэм Ибрахьимэ ӀэхьышӀухэу къызэригъэгугъагъэхэм апэуцуа? Хьау, ар хъухэщтэп. Ау цӀыфхэм щыӀэныгъэ яӀэ зыгъэхъун зылъэкӀырэ хабзэ щыӀагъэмэ, а хабзэмкӀэ Тхьэм ыдэжькӀэ цӀыфхэм шъыпкъагъэ яӀэ хъущтыгъ. 22 Ау дунаем ицӀыф пстэури псэкӀодым ыӀэ зэрилъхэр Тхьэм игущыӀэ тхыгъэхэм арыт. Арэущтэу зыфэхъугъэр Исус ХристоскӀэ шӀошъхъуныгъэ зиӀэхэр Тхьэм ӀэхьышӀоу къызэригъэгугъагъэр а цӀыфхэу шӀошъхъуныгъэ зиӀэхэм агъотыжьыныр ары. 23 ШӀошъхъуныгъэм игъогу щымыӀэу, Тэурат хабзэм тызэкӀоцӀипхагъэу тиухъумэу тиӀыгъыгъ, шӀошъхъуныгъэм игъогу къэлъэгъофэ. 24 Арэущтэу шӀошъхъуныгъэ зэрэтиӀэм фэшӀ, Тхьэм ежьым ыдэжькӀэ шъыпкъагъэ тиӀэу тилъытэным пае, Тэурат хабзэм Исус Христос дэжь тищэнэу пащэ къытфэхъугъ. 25 Ау джы шӀошъхъуныгъэм игъогу къызылъагъо ужым, Тэурат хабзэм тетыгъо къытфыриӀэжьэп. 26 Сыда пӀомэ Христос ИсускӀэ шӀошъхъуныгъэ зэрэшъуиӀэм пае, шъо пстэури Тхьэм шъурибын. 27 Шъо пстэури Христос зыгу илъынэу аумэхъыгъэхэу щытхэм Христос ишэн шъуашэу зэшъущэкӀыгъ. 28 Джуртрэ урымрэ, пщылӀрэ шъхьафитрэ, хъулъфыгъэрэ бзылъфыгъэрэ пӀозэ зэхэбдзынхэу щытыжьэп, сыда пӀомэ Христос Исус шъугухэм зэрарылъым пае, шъо зэкӀэ зы шъухъугъ. 29 Христос шъузэрием пае, Ибрахьимэ къытехъукӀыгъэ цӀыфхэм шъуащыщ. Ащыгъум Тхьэм Ибрахьимэрэ ащ къытехъукӀыгъэ цӀыфхэмрэ ӀэхьышӀоу къызэригъэгугъагъэхэр шъори къышъулъысыщт.
1 Сэ зыфасӀорэр мары: къоу ятэ имылъку къызӀэкӀэхьащтыр оцӀыкӀуфэ, мылъкур зэкӀэ къыӀэкӀэхьащтми, унэӀутым фэдэ къабзэу щыт. 2 ЦӀыфхэу зынаӀэ ащ къытет хэмрэ имылъку зезыхьахэрэмрэ афэӀорышӀэн фае, ятэ ыгъэнэфэгъэ мафэр къэсыфэ. 3 Джащ фэдэу, тэри Тхьэм иӀофхэмкӀэ джыри цӀыкӀоу тызыщэтым, цӀыфхэм мы дунаем ехьылӀагъэу къызэрыкӀо гурыӀоныгъэу яӀэхэм тыряпщылӀыщтыгъ. 4 Ау уахътэр икъугъэ зэхъум, Тхьэм Ыкъо къыгъэкӀуагъ. Ар бзылъфыгъэм къыхэкӀыгъ, Тэуратым ихабзэ ыӀэчӀэгъ чӀэтыгъ. 5 Тхьэм ар къызфигъэкӀуагъэр ащ Тэурат хабзэм ыӀэчӀэгъ чӀэтыгъэхэр къычӀихыжьынхэшъ, ашъхьэ ыщэфыжьынэу арыгъэ, Тхьэм тэ зэкӀэри ибын фэдэу тидэным пае. 6 Тхьэм шъузэрибынхэм пае, Ыкъо Ыпсэ ЛъапӀэу «Аввэу Тят!» зыӀоу къаджэрэр Тхьэм шъугумэ къарилъхьагъ. 7 Арышъ, о уунэӀутыжьэп, къоу ухъугъ нахь. Къоу узэрэхъугъэм пае, Тхьэм ибынхэм ӀэхьышӀоу къалъигъэсырэр ори къыплъигъэсыщт.
Паул Галатие цӀыфхэм зэрафэгумэкӀырэр
8 Пасэм Тхьэр шъумышӀэу зыщэтым, тхьэ зыфаӀохэу, ау шъыпкъэмкӀэ тхьэхэу щымытхэм шъуафэлажьэщтыгъ. 9 Ау джы Тхьэр шъушӀэу хъугъэу, хьауми Тхьэм шъукъишӀагъэу сӀомэ нахьышӀуба, а къызэрыкӀо гурыӀоныгъэхэу лъэкӀыныгъэ зимыӀэхэу ыкӀи тхьамыкӀэхэмэ зафэжъугъэзэжьынэу шъузкӀыфаер сыда? Джыри зэ ахэмэ пщылӀ шъуафэхъужьынэу ара? 10 Гъэнэфэгъэ мафэр, мазэр, уахътэр, илъэсыр шъогъэлъапӀэх. 11 Сэ сышъуфэгумэкӀы, хьаулыеу шъощ пае сыулэугъэкӀэ сэщынэ. 12 СышъолъэӀу, сшыхэр, сэщ фэдэу шъухъу, сыда пӀомэ сэри шъощ фэдэу сыхъугъ. Мыхъун зи къысэшъушӀагъэп. 13 Апэ дэдэу къэбарышӀур зышъосэгъэӀум, сызэрэсымэджагъэр шъошӀэ. 14 Сэ сисымэджэныгъэ къин шъуигъэлъэгъугъэ пэтми, нэмыплъ къысэшъухыгъэп, шъукъысфэмыеуи хъугъэп. Тхьэм имэлэӀичэу сыщытыгъэм фэдэу, Христос Исусэу сыщытыгъэм фэдэу, шъукъыспэгъокӀыгъ. 15 Бэу шъутхъэжьыщтыгъ. ШъулъэкӀынэу щытыгъэмэ, шъунэхэри къысэшъутынхэу къызэришъутхъыщтыгъэмкӀэ шъуишыхьат сэхъу. 16 Шъыпкъэр къызэрэшъосӀуагъэм пае, пыеу сыкъышъуфэхъугъа? 17 А цӀыфхэр шъо къышъогугъух, ау ахэмэ ягухэлъ шӀоп. Тэ шъудбгъодащыным пылъых, шъо ахэмэ шъуягугъужьыным пае. 18 Гухэлъыр дэгъумэ, зыр зым егугъуныр сыдигъуи дэгъу, сэ шъуадэжь сыщымыӀэми джары зытетыр. 19 Сибынхэр, шъощ пае сабый къызфэхъущт бзылъфыгъэу гутъум хэтым сыфэд, Христос шъугухэм арылъ охъуфэ. 20 Джы шъуадэжь сыщыӀагъэмэ, сымакъэ мэкъэ шъабэкӀэ зэблэсхъумэ сшӀоигъуагъ, сыда пӀомэ шъосӀон сшӀэрэп.
Хьэджэррэ Сарэрэ
21 КъысашъуӀу, шъо, цӀыфхэу Тэурат хабзэм ыӀэчӀэгъ чӀэтынхэу фаехэм, Тэурат хабзэм итхэр зэхэшъушӀыкӀхэрэба? 22 Тхьэм игущыӀэ тхыгъэхэм арыт Ибрахьимэ къуитӀу зэриӀагъэр, зыр иунэӀут бзылъфыгъэмкӀэ, адрэри унэ шъхьэгъусэмкӀэ. 23 УнэӀут бзылъфыгъэм ыкъо сабый къызэрэхъурэ шӀыкӀэм фэдэу къэхъугъ, ау ишъхьэгъусэ ыкъо Тхьэм Ибрахьимэ къызэригъэгугъагъэм тетэу къэхъугъ. 24 А Ӏофым зы гъэбылъыгъэ Ӏоф горэ къикӀэу хэлъ, сыда пӀомэ а бзылъфыгъитӀур зэзэгъыныгъитӀум фэбгъэдэн плъэкӀыщт. УнэӀут бзылъфыгъэу Хьэджэр Синай къушъхьэм Тхьэм ежьыррэ пегъымбар Мусэрэ азыфагу щыдилъхьэгъэ зэзэгъыныгъэм фэд. А бзылъфыгъэм къыфэхъугъэхэр пщылӀхэу щытыгъэх. 25 Хьэджэр Аравие хэкум щыӀэ Синай къушъхьэм фэбгъэдэн плъэкӀыщт. А бзылъфыгъэр джырэ Ерусалими фэд. Сыда пӀомэ Ерусалимрэ ащ дэс цӀыфхэмрэ пщылӀыныгъэм хэтых. 26 Ау уашъом щыӀэ Ерусалим шъхьафит. Ар тэ зэкӀэми ны фэдэу къытфэхъу. 27 Сыда пӀомэ Тхьэм игущыӀэ тхыгъэхэм мырэущтэу арыт: «ГушӀо, о сабый къызхэмыкӀэу, сабый къызфэмыхъугъэ бзылъфыгъ. О, сабый гугъуехьыныр зымышГэрэр, мэкъэшхокӀэ гушӀо! Сыда пӀомэ лӀы зиӀэм нахьи лӀым ытӀупщыжьыгъэ бзылъфыгъэм сабиеу иӀэхэр нахьыб». 28 Сшыхэр, Тхьэм Ибрахьимэ къызэригъэгугъагъэм пае, Исхьакъ Ибрахьимэ ибын зэрэхъугъэм фэдэкъабзэу, тэри Тхьэм ибын тыхъугъ. 29 Хьэджэр зыцӀэ бзылъфыгъэ унэӀутымкӀэ Ибрахьимэ къыфэхъугъэ ыкъо, ыкъоу Тхьэм Ыпсэ ЛъапӀэ Ибрахьимэ къызэригъэгугъагъэм тетэу къэхъугъэм а уахътэм къин ригъэщэчыгъ. Джыри ащ фэд. 30 Ау Тхьэм игущыӀэ тхыгъэхэм арытыр сыда? Мырэущтэу арыт: «Мы унэӀут бзылъфыгъэмрэ ащ ыкъорэ ӀугъэкӀыжьых, сыда пӀомэ шъхьэгъусэу шъхьафитэу щытым ыкъо мылъкоу къыфынэжьырэмкӀэ унэӀут бзылъфыгъэм ыкъо Ӏахьэ къылъысыщтэп». 31 Арышъ, сшыхэр, бзылъфыгъэ унэӀутым тырибынэп, шъхьэгъусэу шъхьафитэу щытым тырибын нахь.
Христос шъхьафитныгъэ къызэрэтитыгъэр
1 Арышъ, шъхьафитныгъэу Христос къышъуитыгъэм пытэу шъутетэу, джыри зэ пщылӀыныгъэм ибжь цӀыфхэм зытряшъумыгъэ лъхьажь. 2 Сэ, Паул, шъуасӀорэм шъуедэӀу, цӀыфхэм сунэт зяжъугъэшӀымэ, Христос ишӀуагъэ къышъокӀыщтэп. 3 Джыри сэ къэсэушыхьаты, хэтми сунэт зязыгъэшӀырэм Тэурат хабзэм ит пстэури ыгъэцэкӀэн фае. 4 Шъо Тэурат хабзэм итхэр жъугъэцэкӀэнхэм игъогукӀэ Тхьэм ежьым ыдэжькӀэ шъыпкъагъэ шъуиӀэу шъузэрилъытэщтым ыуж шъуитэу шъущытмэ, Христос шъубгъодэкӀыгъ. Тхьэм ынэшӀуи къышъущимыфэжьэуи хъугъэ. 5 Ау тэ шӀошъхъуныгъэ зэрэтиӀэм пае, Тхьэм ежьым ыдэжькӀэ шъыпкъагъэ тиӀэу тызэрилъытэщтым тыпэплъэ. Тхьэм Ыпсэ ЛъапӀи арэущтэу зэрэхъущтым тыщегъэгугъы. 6 Сыда пӀомэ Христос Исус тыгухэм арылъмэ, сунэт ташӀыгъэу тыщытми, тыщымытми, арэп Ӏофыр зыдэщыӀэр. Ӏофыр зыдэщыӀэр тишӀошъхъуныгъэ шӀулъэгъуныгъэ къызэрэхэкӀырэр ары. 7 Гъогу занкӀэм шъутетэу шӀоу шъурыкӀощтыгъ. ПӀъыпкъагъэм шъуримыгъэдэӀоу, хэта пэрыохъу къышъуфэхъугъэр? 8 Арэущтэу шъозыгъэшӀагъэр Тхьэу зибынхэм ащыщ шъухъунэу къышъуаджэрэр арэп. 9 «Тэджэпсыр макӀэми, тхьацур зэкӀэ егъэшӀоӀу». 10 Зиусхьаныр тыгухэм зэрарылъым пае, Ӏофхэр сэ къызэрэзгурыӀохэрэм фэдэу, шъори къыжъугурыӀонхэм сыщэгугъы. Хэт щыщми шъузыгъэгумэкӀырэм имысагъэ фэшъуашэр ыгъотыжьыщт. 11 Сшыхэр, цӀыфхэр сунэт ашӀыгъэхэу щытын фаеу джыри ясэгъэӀу зэпытмэ, (сэ язгъэӀугъэу аӀозэ, цӀыфхэм пцӀыкӀэ зэраӀорэм фэдэу), сыд пае цӀыфхэм джыри къин сагъэщэчыра? ЦӀыфхэр сунэт ашӀыгъэхэу щытын фаеу джыри язгъэӀу зэпытыгъэмэ, ащыгъум Христос къащым зэрэкӀэрылӀыхьагъэм икъэбар цӀыфхэм агу зэмыӀун зи къыхэнэжьыщтгьэп. 12 ШъузыгъэгумэкӀыхэрэр ӀуагъэкӀыгъагъэхэмэ! 13 Сшыхэр, шъхьафитныгъэ шъуиӀэнэу Тхьэр къышъоджагъ. Ау шъуишъхьафитныгъэ шъуипсэкӀодышӀэ шэныжъ зыкӀэхъопсырэр шъушӀэнэу ушъхьагъоу орэмыхъу. Ау шӀулъэгъуныгъэкӀэ зыр зым Ӏофтабгэ фэрэхъу. 14 Сыда пӀомэ Тэурат хабзэм ит пстэури мы унэшъо закъом къеубыты: «О пшъхьэ шӀу зэрэплъэгъурэм фэдэу, уигъунэгъуи шӀу лъэгъу». 15 Ау шъузэцакъэу ыкӀи шъузэрэшх зэпытмэ, шъузэрэмыгъэкӀодыжьыным шъуфэсакъ.
ШӀугъэу Тхьэм Ыпсэ ЛъапӀэ ыдэжь къикӀыхэрэмрэ Ӏэягъэу цӀыфым ипсэкӀодышӀэ шэньгжъ къыхэкӀыхэрэмрэ
16 Арышъ, къышъосэӀо: Тхьэм Ыпсэ ЛъапӀэ къызэрэжъугуригъаӀорэм тетэу шъузекӀу. Ащыгъум шъуипсэ кӀодышӀэ шэныжъ зыкӀэхъопсырэр жъугъэцэкӀэщтэп. 17 ЦӀыфым ипсэкӀодышӀэ шэныжъ зыфаер Тхьэм Ыпсэ ЛъапӀэ зыфаем пэуцу. Тхьэм Ыпсэ ЛъапӀэ зыфаери цӀыфым ипсэкӀодышӀэ шэныжъ зыфаем пэуцужьы. Шъузыфаер шъумыгъэцэкӀэшъунэу ахэр зэпэуцужьых. 18 Ау Тхьэм ЬӀпсэ ЛъапӀэ къызэрэжъугуригъаӀорэм тетэу шъузекӀомэ, Тэурат хабзэм ыӀэчӀэгъ шъучӀэтыжьыщтэп. 19 ЦӀыфым ипсэкӀодышӀэ шэныжъ Ӏэягъэу къыхэкӀыхэрэр нафэх. Мыхэр арых: Зинэ шӀэныр, гумыкъэбзагъэр, мыхъомышӀэ псэукӀэр, 20 тхьэ нэпцӀхэр гъэлъэпӀэгъэныр, ушхъухьаныр, зэпыиныр ыкӀи зэщыхьаныр, шъугъоныр, губжыныр, цӀыфым ежьым ышъхьэ нэмыкӀ шӀу ымылъэгъуныр, зэмызэгъыныр, купкупэу зэхэкӀыныр, 21 зэрэуджэгъуныр, цӀыф укӀыныр, утэшъоныр, шъхьарытӀупщэу ешхэешъошхо шӀыныр, ащ фэдэ нэмыкӀ Ӏофхэри. Ыпэм къызэрэшъосӀуагъэм фэдэу джыри шъосэӀожьы, ащ фэдэхэр зышӀэхэрэм Тхьэм и ТетыгъошхокӀэ Ӏахьэ къалъысыщтэп. 22 Ау шӀугъэу Тхьэм Ыпсэ ЛъапӀэ ыдэжь къикӀыхэрэр мыхэр арых: шӀулъэгъуныгъэр, гушӀуагъор, гупсэфыныгъэр, щыӀагъэр, шӀугъэр, гукӀэгъуныгъэр, шӀошъхъуныгъэр, 23 гушъэбагъэр, зыщыӀэныгъэр. Мы Ӏофхэм къапэуцужьырэ хабзэ зи щыӀэп. 24 Христос зыгу илъ цӀыфхэм япсэкӀодышӀэ шэныжъи, шӀу алъэгъугъэ бзэджагъэхэри, яхъопсэныгъэ мыхъунхэри къащым тыраӀулӀагъэхэм фэд. 25 Тхьэм Ыпсэ ЛъапӀэ арышъ щыӀэныгъэ къытэзытырэр, ащ къызэрэдгуригъаӀорэм тетэу тызекӀон фае. 26 ТызышӀошӀыжьэу, тызэрэгъэгубжэу ыкӀи тызэшъугъоу тыщэрэмыт.
Зым ихьылъэ адрэм ерэӀэт
1 Сшыхэр, зы цӀыф горэм псэкӀод ышӀэмэ, шъо Тхьэм Ыпсэ ЛъапӀэ зыгу илъхэм, гушъэбагъэкӀэ ар гъогу тэрэзым къытежъугъэхьажь. Ау псэкӀодшӀэным зыде шъумыгъэхьыхыным шъуфэсакъ. 2 Зым ихьылъэ адрэм ерэӀэт. Арэущтэу шъушӀымэ, Христос иунашъо жъугъэцэкӀагъэу мэхъу. 3 Зыгорэ цӀыкӀоу щыт пэтми, инэу зелъытэжьмэ, ышъхьэ егъэпцӀэжьы. 4 Хэти ежь иӀоф зытетыр ерэгъэунэфы. А Ӏофыр дэгъумэ, нэмыкӀ цӀыфым иӀоф емыплъэу ежь иӀоф зытетым рыпэгэн ылъэкӀыщт, 5 сыда пӀомэ хэти ихьылъэ ежь ыпшъэ илъ. 6 Тхьэм игущыӀэхэр зэзыгъашӀэрэм шӀоу иӀэ пстэуми щыщ езыгъашӀэрэм иӀахьэу рерэт. 7 ЗышъумыгъэпцӀэжь. Тхьэм зышъуигъэгъэгщӀэщтэп. ЦӀыфым хьасэм зэрэхилъхьэрэм фэдэу къыгъотыжьыщт. 8 ЦӀыфэу зипсэкӀодышӀэ шэныжъ ихьасэ хэзылъхьэрэм кӀодыныгъэр къыгъотыжьыщт. Ау Тхьэм Ыпсэ ЛъапӀэ ихьасэ хэзылъхьэрэм мыкӀодыжьын щыӀэныгъэ къыгъотыжьыщт. 9 Темызэщэу шӀу тшӀэным тыпыжъугъэлъ зэпыт. Темызэщэу тыпылъмэ, игъо къызыскӀэ, шӀугъэ къэдгъотыжьыщт. 10 Арышъ, игъо тыфифэ къэс, цӀыф пстэуми шӀу афэтэжъугъашӀ, зэкӀэмэ апэу шӀошъхъуныгъэ зиӀэхэм яунагъо щыщхэр ары шӀу зыфэтшӀэн фаехэр.
Аужырэ Ӏофхэу Паул Галатие цӀыфхэм агуригъаӀохэрэмрэ Тхьэм щытхъу зэрэфишӀырэмрэ
11 Сэ хьарыфышхохэу сӀэкӀэ къызэрышъуфэстхыгъэхэм шъуяплъ. 12 Дунаем ицӀыфмэ ящытхъу фэе цӀыфхэр ары сунэт зяжъугъэшӀынэу шъуезыгъэзынхэу пылъхэр. Арэущтэу зыфашӀэрэ закъор Христос икъащ пае ежьхэм къин зэрамыгъэщэчыныр ары. 13 ЦӀыфхэу сунэт ашӀыгъэ дэдэхэми Тэурат хабзэм итхэр агъэцакӀэхэрэп, ау сунэт шъуашӀынхэу ыуж итых, сунэт шъузэрашӀыгъэмкӀэ зыщытхъужьынхэм пае. 14 Ау сэ ти Зиусхьанэу Исус Христос икъащ нэмыкӀ сыщытхъужьынэу сыфаеп. Исус къащым зэрэкӀэрылӀыхьагъэм пае, мы дунаем иӀофхэм пкӀэ зи ямыӀэжьэу, садэжькӀэ ахэр къащым тыраӀулӀагъэхэм фэд, сэри мы дунаем иӀофхэм адэжькӀэ цӀыфхэм къащым сытыраГулӀагъэм фэд. 15 Сунэт ташӀыгъэу тыщытми, тыщымытми, арэп Ӏофыр зыдэщыӀэр. Ӏофыр зыдэщыӀэр икӀэрыкӀэу тыкъалъфыжьыгъэу тыхъуныр ары. 16 Мы унашъом тет цӀыф пстэумрэ Тхьэм и Израил цӀыфхэмрэ Тхьэм гупсэфыныгъэ къарерэт, гукӀэгъуныгъэри къаферэшӀ. 17 Аужыпкъэм зыми серэмыгъэгумэкӀ, сыда пӀомэ уӀэгъэ тыркъохэр сэ спкъы зыкӀэтелъхэр Исус сызэрэфэлажьэрэр ары. 18 Сшыхэр, ти Зиусхьанэу Исус Христос ынэшӀу шъугухэм къащерэф. Амин.
ШӀуфэс ехыныр
1 Сэ сы Паул. Тхьэр фэягъэти, Исус Христос иапостолэу сыхъугъ. Шъо, Тхьэм ицӀыф лъапӀэхэу, Ефес къалэм дэсхэу, Исус Христос зыгу илъхэу, ежьым фэшъыпкъэхэм, мы тхылъыр къышъуфэсэтхы. 2 Тхьэу Тятэ лъапӀэрэ Зиусхьанэу Исус Христосрэ анэшӀу къышъущарэфи, гупсэфыныгъэ къышъуарэт.
Христос тыгухэм зэрарылъым пае, гурэ псэрэкӀэ Тхьэм ынэшӀу къызэрэтщифэрэр
3 Тхьэу ти Зиусхьанэу Исус Христос Ятэ щытхъушхор ий. Христос тыгухэм зэрарылъым пае, уашъом епхыгъэу, лъэныкъо пстэумкӀи гурэ псэрэкӀэ Тхьэм ынэшӀу къыт щифагъ. 4 Сыда пӀомэ Тхьэм дунаер къыгъэхъуным ыпэкӀэ, Христос тыгухэм зэрарылъымкӀэ ежь ибынхэм ащыщ тыхъунэу тыкъыхихыгъ, тыгухэр къабзэхэу, лажьэ зи тимыӀэу, шӀулъэгъуныгъэ тыгухэм арылъэу ежь ыпашъхьэ тыщыпсэуным пае. 5 Исус Христос Ӏофэу ышӀэщтым пае, Тхьэм ежь ибынхэм афэдэу тидэнэу бэшӀагъэу тигъэнэфагъ, игъоу зэрилъытагъэм ыкӀи ыгу хэлъыгъэм тетэу. 6 Арэущтэу зыфишӀагъэр ищытхъушхо тетэу ынэшӀу къызэрэтщифагъэм пае, тэ щытхъу фэтшӀынэу ары. Сыда пӀомэ Тхьэм ежь Ыкъоу шӀу ылъэгъурэм инэу ынэшӀу къытщыригъэфагъ. 7 Христос ылъэу къащым щыкӀэкӀыгъэмкӀэ тэ тшъхьэ ыщэфыжьыгъ, типсэкӀодхэри къытфигъэгъугъэх Тхьэм ынэшӀу щыфэныгъэшхом тетэу. 8 ЗэхэшӀыкӀыныгъэ пстэумрэ гурыӀоныгъэ пстэумрэ ягъусэу Тхьэм ынэшӀу щыфэныгъэшхор къытэнигъэсыгъ. 9 Тхьэм игухэлъ шъэфэу Христос ригъэгъэцэкӀэнэу ыухыгъэр игъоу зэрилъытагъэм тетэу къыдгуригъэӀуагъ. 10 Тхьэм игухэлъэу игъо къызыскӀэ ыгъэцэкӀэщтыр, уашъохэми чӀылъэми щыӀэр зэкӀэ зы ышӀыхэзэ, Христос итетыгъо ыӀэчӀэгъ чӀигъэуцоныр ары. 11 Христос тыгухэм зэрарылъым пае, Тхьэм тэри ӀэхьышӀур къытлъигъэсыгъ. Тхьэм гухэлъэу ыухыгъэм тетэу, а ӀэхьышӀур къытлъысынэу бэшӀагъэу тигъэнэфагъ. Ежьыр ары игухэлърэ зыфаемрэ атетэу Ӏоф пстэури зыгъэцакӀэрэр. 12 Тхьэм арэущтэу зыфишӀагъэр тэ апэрэхэу Христос щыгугъыхэу, пэплъагъэхэм Тхьэм илъытэныгъэшхо щытхъу фэтшӀынэу ары. 13 Шъо шъугухэми Христос арылъ хъугъэ. Христос шъугухэм арылъ зыхъугъэр шъыпкъагъэм ехьылӀэгъэ къэбарэу, шъумыкӀодэу шъукъэзыгъэнэжьырэ къэбарышӀур зызэхэшъухыгъэр ары. ХристоскӀэ шӀошъхъуныгъэ шъуиӀэ зэхъум, Тхьэм ежь Ыпсэ ЛъапӀэу тыкъызэригъэгугъагъэр мыхъурым фэдэу шъугухэм къарилъхьагъ. 14 Тэ, Тхьэм ицӀыфхэу щытхэм, тшъхьэхэр ыщэфыжьхэфэ, ӀэхьышӀур тэ къызэрэтлъигъэсыщтымкӀэ Тхьэм Ыпсэ ЛъапӀэ тишэсы, Тхьэм илъытэныгъэшхо щытхъу фэтшӀыным пае.
Паул Тхьэм зэрелъэӀурэр
15 Арышъ, Зиусхьанэу ИсускӀэ шӀошъхъуныгъэу шъуиӀэмрэ шӀулъэгъуныгъэу Тхьэм ицӀыф лъапӀэхэм афышъуиӀэмрэ якъэбар зызэхэсхыгъэм щегъэжьагъэу, 16 Тхьэм селъэӀу зыхъукӀэ, шъуигугъу сэшӀы ыкӀи шъощ пае Тхьэм щытхъу фэсэшӀы зэпыт. 17 Ти Зиусхьанэу Исус Христос и Тхьэу, щытхъушхо зиӀэ Ты лъапӀэм сызэрелъэӀурэр, шъо ежьыр нахьышӀоу шъушӀэным пае, ежь Ыпсэ ЛъапӀэу зэхэшӀыкӀыныгъэ тиӀэу зыгъэхъурэри, Тхьэр зыфэдэр къытфэзыгъэнафэрэри шъугухэм къарилъхьанэу ары. 18 Шъутухэр къыгъэплъэжьынхэуи Тхьэм селъэӀу. Ащ фэдэу сызфелъэӀурэр гутъапӀэу Тхьэр къызфышъоджагъэр шъушӀэнэу ары, ицӀыф лъапӀэхэм тырягъусэу щытхъушхо зиӀэ Ӏэхьышхоу къытлъигъэсырэри 19 шъушӀэнэу ары, тэ, шӀошъхъуныгъэ зиӀэхэм, тыгухэм арылъэу, Тхьэм илъэкӀыныгъэшхоу гъунэ зимыӀэри шъушӀэнэу ары. 20 А лъэкӀыныгъэшхор зыфэдэр лъэкӀыныгъэшхоу Тхьэм Христос лӀагъэхэм къызэрахигъэтэджыкӀыжьэу, иджабгъукӀэ уашъом зэрыщызыгуигъэтӀысхьагъэр ары. 21 Ӏэшъхьэтетхэми, тетыгъо зиӀэ пстэуми, кӀочӀэшхо пстэуми, пэщэ пстэуми, мы дунаем имызакъоу къэкӀощт дунаеми зигугъу щашӀырэ цӀэ пстэуми Тхьэм Христос апшъэ ышӀыгъ. 22 Тхьэм щыӀэ пстэури Христос ылъэгу чӀэгъ чӀигъэуцуи, зэкӀэми апшъэ щыӀэнэуи, чылыс зэӀукӀэм ышъхьэу щытынэуи ыгъэнэфагъ. 23 Чылыс зэӀукӀэр Христос ыпкъ фэд. Христосэу тыдэкӀи щыӀэ пстэуми щыкӀагъэ зи ямыӀэу, икъугъэу зыгъэхъурэр икъугъэу чылыс зэӀукӀэм хэлъ.
Христос тыгухэм арылъ зэрэхъугъэм пае, икӀэрыкӀэу тыкъалъфыжьыгъэу тыхъугъ
1 Шъуибзэджагъэрэ шъуипсэкӀодхэмрэ къахэкӀыкӀэ, лӀагъэхэм шъуафэдэу шъущытыгъ. 2 А Ӏофхэм ягъогу шъурыкӀощтыгъ. Мы дунаем ихэбзэжъ Ӏае шъутетэу, жьыбгъэм тетыгъо щызиӀэ Ӏэшъхьэтетэу, джынапцӀэу Тхьэм емыдэӀухэрэм агухэм арылъыр зэрэфаем тетэу шъузекӀощтыгъ. 3 Тэ пстэури а цӀыфхэм тахэтэу, типсэкӀодышӀэ шэныжъ зыкӀэхъопсыщтыгъэ Ӏоф мыхъунхэм атетэу тыпсэущтыгъ. ТипсэкӀодышӀэ шэныжърэ тигупшысэхэмрэ зыкӀэхъопсыщтыгъэ Ӏофхэр дгъэцакӀэщтыгъэх. Тишэныжъ уеплъымэ, нэмыкӀ цӀыфхэм тафэдэу, тэри Тхьэм игубж ыӀэчӀэгъ тычӀэтыгъ. 45 ТипсэкӀодхэм къахэкӀыкӀэ лӀагъэхэм тафэдэу тыщытыгъэ пэтми, Тхьэу гукӀэгъуныгъэшхо зиӀэм шӀулъэгъуныгъэшхоу къытфыриӀэм пае, Христос тыригъусэу тыкъигъэпсэужьыгъ. Тхьэм ынэшӀу щыфэныгъэкӀэ тымыкӀодэу тыкъигъэнэжьыгъ. 6 Христос тыгухэм зэрарылъым пае, ащ тыригъусэу Тхьэм тыкъигъэтэджыжьыгъ, ащ тыригъусэуи уашъом тӀысыпӀэ къыщытитыгъ. 7 Тхьэм арэущтэу зыфишӀагъэр Христос Исус шӀугъэу къытфыригъэшӀагъэмкӀэ ежь ынэшӀу щыфэныгъэшхоу гъунэ зимыӀэр къэкӀощт лъэхъанэхэм яцӀыфхэми аригъэлъэгъуныр ары. 8 Тхьэм ынэшӀу щыфэныгъэкӀэ шъумыкӀодэу шъукъигъэнэжьыгъ, шӀошъхъуныгъэ шъуиӀэ зэрэхъугъэм пае. Ар къызпкъырыкӀыгъэр шъорэп, ар Тхьэм итын нахь. 9 ПИу зэрэтшӀагъэр арэп тымыкӀодэу Тхьэм тыкъызкӀигъэнэжьырэр. ЦӀыфыр зыщымытхъужьыным пае, Тхьэм а Ӏофыр арэущтэу ыгъэпсыгъ. 10 Сыда пӀомэ джы тызэрэщытым фэдэу тызыгъэхъурэр Тхьэр ары. Христос тыгухэм зэрарылъымкӀэ Тхьэм тигъэхъутъ, ӀофышӀухэу Тхьэм къытфигъэпсыгъагъэхэр дгъэцэкӀэнхэм пае.
ХристоскӀэ шӀошъхъуныгъэ зиӀэхэр зы лъэпкъ зэрэхъухэрэр
11 Арышъ, шъо, хымэ лъэпкъэу къалъфыгъэхэр, шъукъэдаӀу. Сунэт ашӀыгъэхэр (ӀэкӀэ сунэт ашӀыгъэхэр ары зыфасӀохэрэр) шъо, «сунэт амышӀыгъэхэкӀэ» заджэхэрэм, мыр шъугу къэжъугъэкӀыжьын фае: 12 пасэм Христос шъугухэм арымылъэу шъупсэущтыгъ. Израил лъэпкъым шъущымыщэу, Тхьэм а лъэпкъыр къызэригъэгугъэгъэ Ӏофхэм атет зэзэгъыныгъэхэмкӀэ Ӏахьэ шъуимыӀэу, хымэхэу шъущытыгъ. ГугъапӀэ шъуимыӀэу, Тхьэр шъумышӀэу мы дунаем шъутетыгъ. 13 Ау джы, Христос шъугухэм арылъ зэрэхъугъэм пае, шъо, зэгорэм Тхьэм пэчыжьэу щытыгъэхэр, Христос ылъэу къащым щыкӀэкӀыгъэмкӀэ джы Тхьэм пэгъунэгъу шъухъугъ. 14 Сыда пӀомэ ежь Христос ары тызэзьггъэшӀужьыгъэр. Ежьыр ары итӀур зы зышӀыгъэри, ыпкъыкӀэ ахэмэ азыфагу дэлъыгъэ пыиньггъэм идэпкъ зэхэзьггъэуагъэри. 15 Унашъохэмрэ хабзэхэмрэ зэрьгт Тэурат хабзэр лъэньгкъокӀэ ригъэзьггъ. Христос арэущтэу зьгфишӀьггъэр цӀьгфхэр ежььгм ешӀужььгнхэу ьггъэхъузэ, а лъэпкъитӀур зьг лъэпкъыкӀэу ьггъэхъунэу арьг, 16 зэпьгиньггъэри къащьгм щигъэкӀодэу, итӀур зьгпкъьг хъугъэу, Христос къащьгм зэрэкӀэрьглӀьгхьагъэмкӀэ ахэр Тхьэм ешӀужььггъэхэу ьггъэхъунхэу арьг. 17 Христос къакӀуи, шъо, Тхьэм пэчьгжьэу щьгтьггъэ цӀьгфхэми, пэгъунэгъу щьгтьггъэ цӀьгфхэми, зэшӀужььгньггъэм икъэбар къьгшъуигъэӀугъ. 18 Сьгда пӀомэ Христос Ӏофэу ьгшӀагъэм пае, а зьг Псэ ЛъапӀэр тьггухэм арьглъэу, тэ титӀуи Тьг лъапӀэм пэгъунэгъу тыхъун тэлъэкӀьг. 19 Арьгшъ, хьгмэхэу ьгкӀи хэхэсхэу шъущьгтыжьэп, ау Тхьэм ицӀьгф лъапӀэхэм яхэгърьгехэу шъухъугъ, Тхьэм иунагъо шъущьгщэуи шъухъугъ. 20 Апостолхэмрэ пегъьгмбархэмрэ лъапсэу агъэуцугъэм шъутет. Ежь Христос Исус арьг лъэпсэ мьгжъошхор. 213 иусхьанэу Исус ары унэр зэкӀэри зэхэзьггъэуцорэр, ежььгри а унэм зэрэщьгӀэм пае, Тхьэм иунэшхо лъапӀэ хъунэу хэхъо. 22 Шъо Христос шъугухэм арьглъэу мьгжъохэм шъуафэдэу, Тхьэм Ыпсэ ЛъапӀэ зэрьгс унэм Христос шъори шъухегъэуцо.
Паул хымэ лъэпкъхэм Ӏофэу афишӀагъэм къызэрэтегущыӀэрэр
1 Ащ пае, сэ, Паул, Христос Исус сьгфэлажьэу, шъо хьгмэ лъэпкъхэм къэбарьгшӀур къьгзэрэшъозгъэӀурэм пае, хьапсьгм сьгчӀадзагъэу сьгчӀэс. 2 Тхьэм ьгнэшӀу щьгфэньггъэкӀэ Ӏоф къьгшъуфэсшӀэнэу спшъэ къьгзэрэрилъхьагъэм икъэбар зэхэшъухьггъэн фае. 3 Тхьэм игухэлъ шъэф къысфигъэнафи, сигъэшӀагъэ, кӀэкӀэу къызэрэшъуфэстхыгъэм фэдэу. 4 Мы тхылъым шъузеджэкӀэ, Христос ехьылӀэгъэ шъэфым зэхэшӀыкӀыныгъэу фысиӀэм гу лъышъутэн шъулъэкӀыщт. 5 А шъэфыр Тхьэм ЬӀпсэ ЛъапӀэ мы уахътэм апостол лъапӀэхэмрэ пегъымбар лъапӀэхэмрэ зэрафигъэнэфагъэм фэдэу, ыпэрэ лӀэшӀэгъухэм ащыпсэущтыгъэ цӀыфхэм Тхьэм аригъэшӀэгъагъэп. 6 А шъэфыр мыры: Христос Исус хымэ лъэпкъхэм агухэм арылъ хъоу, къэбарышӀур зэрадэрэмкӀэ Тхьэм Израил лъэпкъым ӀэхьышӀоу къылъигъэсырэр ахэми къалъегъэсы; а лъэпкъхэри Израил игъусэхэу зы пкъым щыщых, Тхьэм Израил лъэпкъыр ӀофышӀухэу къызэригъэгугъагъэхэм ахэми яӀахьэ ахэлъ. 7 Тхьэм лъэкӀыныгъэу къысхилъхьагъэм тетэу, мы Ӏофыр згъэцэкӀэнэу ынэшӀу щыфэныгъэкӀэ тынэу къызэрэситыгъэмкӀэ мы къэбарышӀум сыфэлэжьэнэу сигъэнэфагъ. 8 Тхьэм ицӀыф лъапӀэхэм анахьи нахь цӀыкӀоу сыщытми, Тхьэм ынэшӀу щыфэныгъэкӀэ мы Ӏофыр спшъэ къырилъхьагъ: Христос хэлъ баиныгъэшхоу зыми ымыгъэунэфышъущтым икъэбар хымэ лъэпкъхэм язгъэӀунри, 9 Тхьэм игухэлъ шъэф цӀыф пстэуми нафэ афэсшӀынри ары. БлэкӀыгъэ лъэхъанэхэм ащегъэжьагъэу а гухэлъ шъэфыр Тхьэу зэкӀэ къэзыгъэхъугъэм аригъэшӀагъэу щытыгъэп. 10 Тхьэм арэущтэу зыфишӀагъэр чылыс зэӀукӀэмкӀэ изэхэшӀыкӀыныгъэ зэмылӀэужыгъом икъэбар ошъо лъэныкъом щыӀэ Ӏэшъхьэтетхэми, тетыгъо зиӀэхэми джырэ уахътэм щаригъэшӀэнэу ары. 11 Тхьэм а Ӏофыр ыгъэцэкӀагъ мыкӀодыжьын гухэлъэу Тхьэм Христос Исусэу ти Зиусхьан ригъэгъэцэкӀагъэм тетэу. 12 Христос тыгухэм арылъэу, ежьымкӀэ шӀошъхъуныгъэ зэрэтиӀэм пае, тыгушхоу ыкӀи ежьым тыщыгугъэу Тхьэм пэблагъэ тыхъун тэлъэкӀы. 13 Арышъ, шъо сишӀуагъэ шъозгъэкӀынэу къин зэрэсщэчырэм пае, шъугу шъумыгъэкӀодынэу сышъолъэӀу. А къинэу сэ сщэчырэм шъоркӀэ щытхъу хэлъ.
Паул шӀошъхъуныгъэ зиӀэхэу Ефес дэсхэм Тхьэм зэрафелъэӀурэр
14 Арышъ, ти Зиусхьанэу Исус Христос Ятэ ыпашъхьэ лъэгонджэмышъхьэкӀэ сетӀысхьэ. 15 Ежьыр ары Ты лъапӀэу уашъоми чӀылъэми ащыӀэу, сыдрэ унагъоу зыфаӀорэми ыцӀэ къызхэкӀырэр. 16 Тхьэм ищытхъушхо тетэу, ежь Ыпсэ ЛъапӀэкӀэ шъугухэр лъэкӀыныгъэкӀэ ыгъэпытэнхэу селъэӀу, 17 шъушӀошъ зэрэхъугъэмкӀэ Христос шъугухэм арылъыным пае. 18 Шъулъапсэхэр шӀулъэгъуныгъэм хэлъхэу ыкӀи ащ шъутетэу, Тхьэм ицӀыф лъэпӀэ пстэуми шъурягъусэу, Христос ишӀулъэгъуныгъэ ишъомбгъуагъи, икӀыхьагъи, икууагъи, илъэгагъи къыжъугурыӀонхэм пае, лъэкӀыныгъэ шъуиӀэнэу Тхьэм селъэӀу. 19 А шӀулъэгъуныгъэу шӀэныгъэ пстэури зынэмысырэр шъушӀэнэу орэхъу, Тхьэм ишэн зэкӀэ къышъухэлъыным пае. 2 °Тхьэм щытхъушхор ий. Ежь илъэкӀыныгъэу къыт хэлъымкӀэ Ӏофэу тызэрелъэӀушъущтхэмрэ тызэгупшысэ шъущтхэмрэ анахьи, егъэлыягъэу нахьыбэ ышӀэн елъэкӀы. 21 Тэ Христос Исус зыгухэм арылъэу, чылыс зэӀукӀэм щыщхэм мыкӀодыжьын лъэхъанэу къэкӀощтхэмкӀи лӀэ шӀэгъоу къэкӀощтхэмкӀи щытхъушхор Тхьэм фэтэжъугъэшӀ. Амин.
Зыпкъ закъом фэдэу тызэрэхъурэр
1 Сэ Зиусхьаным сызэрэфэлажьэрэм пае, хьапсым сычӀадзагъэу сычӀэсэу сышъолъэӀу: псэукӀэу шъуиӀэнэу Тхьэр къызфышъоджагъэм тетэу шъузекӀу. 2 Мыпэгэныгъэри, гушъэбагъэри, щыӀагъэри шъугухэм арыжъугъэлъхэу, шӀулъэгъуныгъэкӀэ зым зыр ерэщыӀ. 3 Зэзэгъыныгъэу шъузэзыпхырэмкӀэ Тхьэм Ыпсэ ЛъапӀэ зы шъуищытыныгъэу шъуигъэгъотырэр зэрэшъуухъумэным ыуж шъуит. 4 Пкъэу тызщыщыр зы, Тхьэм Ыпсэ ЛъапӀи зы, Ӏофэу тызщыгугъэу тызпаплъэу, Тхьэр къызфыШъоджагъэри зы. 5 Зиусхьаныри зы, шӀошъхъуныгъэри зы, тызкӀаумэхъырэри зы. 6 Тхьэу цӀыф пстэуми Ятэ лъапӀи зы. Ащ цӀыф пстэуми тетыгъо афыриӀ, зэкӀэмкӀи Ӏоф ешӀэ, тэ зэкӀэми ар тыгухэм арылъ. 7 Тэ тщыщэу хэти Христос ынэшӀу къыщифагъ, хэти тынэу къыритынэу зэрэфигъэшъошагъэм тетэу. 8 Джары Тхьэм игущыӀэ тхыгъэхэм зыкӀарытыр: «ЫпшъэкӀэ зыдэкӀоежьым, гъэрхэри игъусэхэу зыдыдищэягъэх, цӀыфхэми тынхэр аритыгъэх». 9 (ЫпшъэкӀэ дэкӀоежьыгъ зыфиӀорэ гущыӀэхэм къарыкӀырэр ыпэкӀэ чӀылъэм ыхэ дэдэм нэс къызэрехыгъэр ары. 10 Ыхэ дэдэм нэс къехыгъэр ежь дэдэр ары ошъо пстэуми анахьи нахь лъагэу дэкӀоежьыгъэр, щыӀэ пстэуми щыкӀагъэ зи ямыӀэу, икъугъэу ыгъэхъуным пае.) 11 Христос цӀыфхэм тынхэр зэраритыгъэхэр мары: ежьым цӀыф заулэ апостолхэу ыгъэнэфагъэх, нэмыкӀхэри пегъымбархэу ыгъэнэфагъэх, адрэхэри ежьым икъэбарышӀу агъэӀунэу ыгъэнэфагъэх, етӀани нэмыкӀхэри дин пащэхэу ыкӀи дин гъэсакӀохэу ыгъэнэфагъэх. 12 Тхьэм ахэр зыфигъэнэфагъэхэр ицӀыф лъапӀэхэр ежьым фэлэжьэнхэу аригъэлъэкӀынри, Христос ыпкъ щыщхэм гурэ псэрэкӀэ нахь лъэкӀыныгъэ аригъэгъотынри ары. 13 Арэущтэу тэ зэкӀэ Тхьэм ЫкъокӀэ шӀошъхъуныгъэ тиӀэу, ари тшӀэу, зы тыхъущт, Христос зишъыпкъагъэ щыкӀагъэ зи зимыӀэ цӀыф икъугъэу зэрэщытым фэдэу, тэри зишъыпкъагъэ щыкӀагъэ зи зимыӀэ цӀыф икъугъэхэу тыхъущт. 14 ЕтӀанэ тысабыижьыщтэп, хыорхэм адыкӀэ мыдыкӀэ тызэрамыдзэжьэу, цӀыф заулэм адрэ цӀыфхэм Ӏофхэу арагъашӀэхэрэм яжьыбгъэ пстэуми тызэрафыжьыщтэп. ЦӀыфхэу адрэ цӀыфхэр дахьыхынхэмкӀэ фэӀазэхэм ятхьагъэпцӀыгъэ тыкъыфэнэжьыщтэп. 15 Арэущтэу мыхъоу, шӀулъэгъуныгъэр тыгухэм арылъэу, шъыпкъагъэр къатӀозэ, сыд фэдэ лъэныкъокӀи Христос тыфэдэнэу къытхэхъощт. Ежьыр ары шъхьэр. 16 Ежь Христос ары пкъым кӀуачӀэ езыгъэгъотырэри, пкъыр зэзыпхырэ щыӀэ пстэумкӀэ пкъыр зэкӀэ зэхэзыгъэуцорэри, зэкӀэзыубытэрэри. Арэущтэу пкъым щыщэу тэдрэ Ӏахьэр зэрэлэжьэн фаем фэдэу <зылажьэкГэ, пкъым хэхъо, шӀулъэгъуныгъэкӀи нахь кӀуачӀэ егъоты.
Христос зыгу илъхэм щыӀэкӀакӀэу яӀэр
17 Зиусхьаным ыцӀэкӀэ лъэшэу къышъуфэсэгъэпытэ: Хымэ лъэпкъхэм яшъхьэнэкӀыгъэкӀэ зэрэзекӀохэрэм фэдэу шъумызекӀу. 18 ЯзэхэшӀыкӀыныгъэ шӀункӀы, ягуркъагъэ къыхэкӀыкӀи зи амышӀэу, Тхьэм цӀыфхэм къаритырэ щыӀэныгъэм пэчыжьэх. 19 Агухэм гулъытэ зи ямыӀэу, мыхъомышӀэ псэукӀэм зыратыгъ, загъэшхэкӀыни амылъэкӀэу, сыд щыщырэ гумыкъэбзагъэм пылъых. 20 Ау Христос икъэбар шъозыгъэшӀэгъэ цӀыфхэм арэущтэу шъузекӀонэу шъуагъэшӀагъэп. 21 Сыда пӀомэ Христос икъэбар шъо зэхэшъухыгъ, ежьыри шъугухэм арылъэу, ежьым хэлъ шъыпкъагъэр зэжъугъэшӀагъ. 22 ШъуипсэукӀэжъ щыщ шъуишэныжъ бзаджэр хэшъунэжьын зэрэфаер зэжъугъэшӀагъ. Сыда пӀомэ шъуишэныжъ бзаджэ ихъопсэныгъэ мыхъунхэу шъукъэзыгъапцӀэхэрэмкӀэ шъуигъэкӀоды пэтыгъ. 23 Шъугухэм арылъи шъуигупшысакӀи Тхьэм зэрежъугъэхъокӀын зэрэфаери зэжъугъэшӀагъэ. 24 Шъыпкъагъэрэ гукъэбзагъэрэ шъыпкъэу шъуиӀэнэуи, ежьым шъуфэдэнэуи, Тхьэм шъукъигъэхъужьыгъэу, шэныкӀэшӀур шъуашэу зэшъущэкӀын зэрэфаери зэжъугъэшӀагъэ. 25 Арышъ, пцӀыусыныр хэшъунэжьи, хэти игъунэгъу шъыпкъагъэр рерэӀу, сыда пӀомэ тэ зэкӀэри зы пкъы закъом тыщыщ. 26 ПӀъугубжыми, псэкӀод шъумышӀэ. Шъугубжыгъэу, тыгъэр къошъумыгъэхьажь. 27 ПӀэйтаным гъогу ешъумыт. 28 ТыгъуакӀор орэмытыгъожь, ау орэлажьи, ыӀэхэмкӀэ шӀу ерэшӀ, щыкӀагъэ зиӀэхэм афигощынэу иӀэным пае. 29 ГущыӀэ емыкӀухэр шъужэхэм къадэшъумыгъэкӀых, ау адрэ цӀыфхэм зэрящыкӀагъэм фэшъуашэу, гурэ псэрэкӀэ нахь лъэкӀыныгъэ яжъугъэгъотызэ, гущыӀэшӀухэр шъужэхэм къадэжъугъэкӀыхэ нахь, цӀыфхэу зэхэзыххэрэм шъуишӀуагъэ яжъугъэкӀыным пае. 30 Тхьэм Ыпсэ ЛъапӀэ ыгу хэшъумыгъэкӀ. Тхьэм шъушъхьэхэр зищэфыжьыщт мафэм нэсыфэ, ежь Ыпсэ ЛъапӀэ мыхъурым фэдэу, Тхьэм шъугухэм къарилъхьагъ. 31 Сыд фэдэ гу жъри, къызэкӀэплъыхьанри, губжыни, куохьауни, цӀыфхэм ӀэягъэкӀэ атегущыӀэни, сыд щыщырэ бзэджагъи хэшъунэжьых. 32 Зыр зым шӀу фэрэхъу, гукӀэгъу зэфэшъушӀ ыкӀи зэфэжъугъэгъу, Тхьэм Христос шъок къызэрэшъуфыригъэгъэгъугъэм фэдэу.
1 Тхьэм шӀу ылъэгъурэ бынхэу шъузэрэщытым пае, ежьым илъэужхэм шъуарыкӀу. 2 Христос шӀу тилъэгъуи, мэ ӀэшӀу зыпихырэ тынэуи Тхьэм ыгу зэӀурэ къурмэныпхъэуи тэщ пае ыпсэ зэритыгъэм фэдэу, шӀулъэгъуныгъэ шъугухэм арылъэу шъузекӀу. 3 Ау Тхьэм ицӀыф лъапӀэхэм зэряфэшъуашэм фэдэу, зинэ шӀэным, е сыд щыщырэ гумыкъэбзагъэм, е нэйпсыягъэм ягугъу шъуадэжь щышъушӀы хъущтэп. 4 ЕмыкӀу гущыӀэныр, делагъэ гущыӀэныр, мыхъун сэмэркъэуныр шъо къышъуфэшъуашэп, Тхьэм ищытхъу шъушӀын фае нахь. 5 Сыда пӀомэ мы Ӏофыр зэжъугъашӀэ: Зинэ зышӀэрэ цӀыфым, е зыгу мыкъабзэ цӀыфым, е нэйпсые цӀыфым ащ фэдэ цӀыфым тхьэ нэпцӀыр ыгъэлъапӀэу мэхъу Христосрэ Тхьэрэ я ТетыгъошхокӀэ Ӏахьэ къылъысыщтэп. 6 ГущыӀэ мыщыухэкӀэ зыми зыкъешъумыгъэгъапцӀ, сыда пӀомэ ащ фэдэ Ӏофхэм апае Тхьэм емыдэӀухэрэм игубж къалъигъэсыщт. 7 Арышъ, ащ фэдэ цӀыфхэм гъусэ шъуафэмыхъу. 8 Сыда пӀомэ зэгорэм шӀункӀыгъэм шъуфэдэу шъущытыгъагъ, ау джы Зиусхьаныр шъугухэм зэрарылъым пае, нэфынэу шъухъугъ. Нэфынэм ибынхэр зекӀонхэ зэрэфаем фэдэу шъузекӀу, 9 сыда пӀомэ нэфынэм шӀугъэу къыхэкӀырэр шӀугъэ пстэури, зэфэныгъэ пстэури, шъыпкъэгъэ пстэури ары. 10 Зиусхьаным Ӏофхэу игъоу ылъытэхэрэр жъугъэунэфых ыкӀи зэжъугъашӀэх. 11 ПкӀэ зимыӀэ шӀункӀыгъэ Ӏофхэм шъуиӀоф ахэшъумылъхь, ау а Ӏофхэр зыфэдэхэр жъугъэнафэх. 12 Сыда пӀомэ ащ фэдэ цӀыфхэм Ӏофхэу шъэфэу ашӀэхэрэм ягугъу пшӀынри емыкӀу. 13 Ау нэфынэм Ӏофхэр зэкӀэ къызигъэнафэхэкӀэ, ахэр къэлъагъох, сыда пӀомэ къэлъагъорэ пстэури нэфынэу мэхъу. 14 Джары мырэущтэу зыкӀаӀорэр: «О, чъыерэр, къэущыжь, лӀагъэхэм къахэтэджыкӀыжьи, Христос нэфынэр къыптригъэпсэщт». 15 Арышъ, шъузэрэзекӀорэм инэу шъуфэсакъ, зэхэшӀыкӀыныгъэ зимыӀэхэм шъуафэмыдэу, зэхэшӀыкӀыныгъэ зиӀэхэм шъуафэдэу шъузекӀу. 16 Игъор блэшъумыгъэкӀ, сыда пӀомэ мы мафэхэр бзаджэхэшъ ары. 17 Арышъ, шъумыгупшысэу шъумызекӀу, Зиусхьаныр зыфаери зыгурыжъугъаӀу. 18 СэнэпсымкӀэ зышъумыгъэуташъу. Ащ къыхэкӀырэр мыхъомышӀэ псэукӀэр ары. Тхьэм ЬӀпсэ ЛъапӀи икъугъэу шъугухэм арыжъугъэлъ. 19 ОрэдхэмкӀи, тхьэщытху орэдхэмкӀи, Тхьэм ЬӀпсэ ЛъапӀэ шъугухэм къарилъхьэрэ орэдхэмкӀи шъузэдэгущыӀ. Шъугу етыгъэу Зиусхьаным щытхъу фэшъушӀэу, ежьым пае орэд къашъуӀо. 20 Ти Зиусхьанэу Исус Христос ыцӀэкӀэ Ӏоф пстэуми апае Тхьэу Ты лъапӀэм щытхъу фэшъушӀ зэпыт. 21 Христос ищынагъо шъугухэм арылъэу, шъузэфэӀорышӀ.
Шъузымрэ лӀымрэ зэрэзэфыщытынхэ фаер
22 Шъо, шъузхэр, Зиусхьаным шъузэрэфэӀорышӀэрэм фэдэу, шъуилӀыхэми шъуафэӀорышӀ. 23 Сыда пӀомэ Христос чылыс зэӀукӀэм ышъхьэу зэрэщытым фэдэу, лӀыри ишъуз ышъхьэу щыт. Чылыс зэӀукӀэр Христос ыпкъэу щыт, ежьыри ары а пкъыр мыкӀодэу къэзыгъэнэжьырэр. 24 Чылыс зэӀукӀэр Христос зэрэфэӀорышӀэрэм фэдэу, шъузыри сыд щыщымкӀи илӀ фэӀорышӀэн фае. 25 Христос чылыс зэӀукӀэр шӀу ылъэгъоу, ыпсэ ащ зэрэфитыгъэм фэдэу, хэтрэ лӀи ишъуз шӀу ерэлъэгъу. 26 Христос ыпсэ зыфитыгъэр псыкӀи игущыӀэхэмкӀи чылыс зэӀукӀэм щыщхэр ыгъэкъабзэхэу, ахэмэ гукъэбзагъэ яӀэ хъунэу ары. 27 Ащ нэмыкӀэу, Христос ыпсэ зыфитыгъэр чылыс зэӀукӀэм идэхагъэкӀэ, бжьыгъэ, е зэлъагъэ, е ащ фэдэ щыкӀагъэ зи имыӀэу, гукъэбзагъэ иӀэу, лажьэ зи имыӀэу, ежь ыпашъхьэ ригъэуцонэу ары. 28 Ащ фэдэу лӀым ыпкъы унае фэдэу ишъуз шӀу ылъэгъун фае. Зишъуз шӀу зылъэгъурэм ышъхьэ шӀу елъэгъужьы. 29 Зыми ежьым ыпкъ зыкӀи ыуджэгъужьыгъэп, ау пкъым ищыкӀагъэр регъэгъоты ыкӀи егугъу, Зиусхьаныр чылыс зэӀукӀэм зэрегугъурэм фэдэу; 30 сыда пӀомэ Христос ыпкъ тыщыщ, ыл тыщыщ, икъупшъхьэхэми тащыщ. 31 Тхьэм игущыӀэ тхыгъэхэм зэрарытым фэдэу, «Ащ къыхэкӀыкӀэ лӀыр ятэянэхэм ахэкӀынышъ, ишъуз гъусэ фэхъунышъ, а тӀури зыпкъ хъущтых». 32 А гущыӀэхэм шъэфэу ахэлъыр шъэфышху: Сэ къызэрэзгурыӀорэмкӀэ, а гущыӀэхэр зэхьылӀагъэхэр Христосрэ чылыс зэӀукӀэмрэ ары. 33 Арэущтэу шъуащыщ пэпчъ ежь ышъхьэ шӀу зэрилъэгъурэм фэдэу, ишъузи шӀу ерэлъэгъу. Шъузыми илӀ лъытэныгъэ ферэшӀ.
Ятэянэхэмрэ ялъфыгъэхэмрэ зэрэзэфыщытынхэ фаер
1 Шъо, бынхэр, Зиусхьаныр шъугухэм зэрарылъым пае, шъуятэшъуянэхэм шъуядэӀу. Арэущтэу зышъушӀыкӀэ, тэрэзэу шъозекӀо. 2 «Уятэрэ уянэрэ лъытэныгъэ афэшӀ», ыӀуи, джары апэрэ унашъоу Тхьэм мы гъэгугъэныгъэр зэрипхыгъэр, мырэущтэу ыӀозэ, 3 «шГугъэ къыохъулӀэным ыкӀи бэрэ мы дунаем ущыпсэуным пае». 4 Шъо, тыхэри, шъуибынхэр шъумыгъэгубжых, ау Зиусхьаныр зэрэфаем тетэу, шъупӀух ыкӀи агурыжъугъаГу.
УнэӀутхэмрэ тхьаматэхэмрэ зэрэзэфыщытынхэ фаер
5 Шъо, унэӀутхэр, мы дунаем шъутетыфэ, шъуитхьаматэхэм шъуащыщынэу, шъугухэри кӀэзэзхэу шъуядэӀу, гу шъыпкъэкӀи Христос шъузэредэӀурэм фэдэу, ахэми шъуядэӀу. 6 ШъуядэӀу сэӀо, ау агу къызэдгъэӀун шъуӀоу, анэхэмкӀэ гъунэ къызэрэшъулъафырэм ыдэжь изакъоп, ау Христос шъузэрэфэлажьэрэм пае, сыдигъуи шъугу етыгъэу шъуядэӀузэ, Тхьэр зыфаер жъугъэцакӀэ. 7 ЦӀыфхэм шъузэрафэлажьэрэм фэдэу орэмыхъу, Зиусхьаным шъузэрэфэлажьэрэм фэдэу, шъуигуапэу шъуитхьаматэхэм шъуафэлажь, 8 сыда пӀомэ хэт щыщ цӀыфми, унэГутми шъхьафитми, сыд фэдэ шӀугъэ ышӀэми, иӀэхьышӀу Зиусхьаным ащ къызэрэлъигъэсыщтыр шъо шъошӀэ. 9 Шъо, тхьаматэхэр, шъори шъуиунэӀутхэм джащ фэдэу шъуадэзекӀоу, пхъэшагъэкӀэ шъуапэмыгъокӀ, сыда пӀомэ шъо бгъуитӀуми а зы Зиусхьаныр уашъом зэрэщышъуиӀэр шъошӀэшъ ары. Ар цӀыфхэм ятеплъэ емыплъэу, цӀыф пстэури изэфэдэхэу щытых.
Тхьэм иӀэшэшъуашэхэр
10 Аужыпкъэм Зиусхьаным илъэкӀыныгъэшхокӀэ кӀуачӀэ зижъугъаӀ. 11 Тхьэм иӀэшэшъуашэхэмкӀэ зэкӀэ зышъуфап, шэйтаным итхьагъэпцӀыгъэ гухэлъхэм шъуапэуцужьыным пае. 12 Сыда пӀомэ тызэзаохэрэр лымрэ лъымрэ къахэхъукӀыгъэ цӀыфхэр арэп, ау джынэпцӀэ Ӏэшъхьэтетхэри, тетыгъо зиӀэхэри, мы дунэе шӀункӀым ипэщэшхоу джынапцӀэхэри, бзэджагъэм иджынапцӀэу ошъо лъэныкъомкӀэ щыӀэхэри ары. 13 Арышъ, Тхьэм иӀэшэшъуашэхэр къэшъуӀэтых, мэфаер къызыскӀэ, шъузэкӀэмыкӀожьыным ыкӀи зэкӀэми шъузатекӀо ужым шъулъакъохэм шъуатетыным пае. 14 Джащ фэдэу пытэу шъущыт; шъыпкъагъэр шъуибгырыпхым фэдэу зижъугъаӀ; шъыпкъагъэу Тхьэм ыдэжькӀэ тиӀэри ашъоджанэм фэдэу зыщышъулъ. 15 Тхьэм ежьым тешӀужьыгъэу тызэригъэхъурэм икъэбарышӀу жъугъэӀуным ихьазырыни цуакъэхэм афэдэу зыщышъулъ. 16 Ахэмэ анэмыкӀэу, шӀошъхъуныгъэр мэӀум фэдэу къэшъуӀэт. АщкӀэ шэйтаным ищэу плъыгъэхэр жъугъэкӀосэнхэ шъулъэкӀыщт. 17 ШъумыкӀодэу Тхьэм шъукъызэригъэнэжьырэр танджэм фэдэу къэшъуӀэт. Сэшхоу Тхьэм Ыпсэ ЛъапӀэ къышъуитырэр къэшъуӀэт. А сэшхор Тхьэм игущыӀэхэр ары. 18 Сыдигъуи Тхьэм Ыпсэ ЛъапӀэ илъэкӀыныгъэкӀэ тхьэлъэӀу пстэумкӀи шъуелъэӀу, шъуищыкӀагъэмкӀи Тхьэм шъуелъэӀу. Шъусакъэу ыкӀи шъуемызэщэу Тхьэм ицӀыф лъапӀэхэм зэкӀэмэ шъуафелъэӀу зэпыт. 19 Сэщ паий, сыжэ зызэтесхыкӀэ, къэбарышӀум ишъэф гушхоныгъэкӀэ къэсӀонхэу гущыӀэхэр Тхьэм сыгу къы рилъхьанхэу шъуелъэӀу. 20 Ӏэхъулъэхъу къыстыралъхьагъэу, мы къэбарышӀум сырилӀыкӀу. КъэбарышӀур гушхоныгъэкӀэ къызэрэсӀон фаем фэдэу къэсӀонэу Тхьэм шъукъысфелъэӀу.
Аужырэ шӀуфэс гущыӀэхэр
21 Шъори сикъэбархэмрэ Ӏофхэу сшӀэхэрэмрэ шъушӀэнхэм пае, шӀу тлъэгъурэ тшы Тихик зэкӀэ шъуигъэшӀэщт. Ар Зиусхьаным иӀофкӀэ шъыпкъагъэкӀэ ӀэпыӀэгъоу щыт. 22 Мы Ӏоф дэдэу тиӀофхэр зытетхэр шъуигъэшӀэнри шъуигъэгушхонри ары Тихик шъуадэжь къызфэзгъакӀорэр. 23 Тхьэу Ты лъапӀэмрэ Зиусхьанэу Исус Христосрэ тшыхэм гупсэфыныгъэрэ шӀулъэгъуныгъэу шӀошъхъуныгъэ зигъусэмрэ къарарэт. 24 МыкӀодыжьын шӀулъэгъуныгъэ зиӀэхэу, ти Зиусхьанэу Исус шӀу зылъэгъухэрэм Тхьэм ынэшӀу къащерэф. Амин.
ШӀуфэс ехьшыр
1 Сэ сы Паул. Сэррэ Тимофейрэ Христос Исус тыфэлажьэ. Тимофей сигъусэу шъо, Тхьэм ицӀыф лъапӀэхэу, Филиппи къалэм дэсхэу, Исус Христос зыгу илъхэм, шъуичылыс иӀэшъхьэтетхэмрэ иӀэпыӀэгъухэмрэ шъуигъусэхэу, мы тхылъыр къышъуфэсэтхы. 2 Тхьэу Тятэ лъапӀэрэ Зиусхьанэу Исус Христосрэ анэшӀу къышъущарэфи, гупсэфыныгъэ къышъуарэт.
Паул шӀошъхъуныгъэ зиӀэхэу Филиппи дэсхэм Тхьэм зэрафелъэӀурэр
3 Сыгу шъукъэкӀ къэси, си Тхьэ щытхъу фэсэшӀы. 4 Сыдигъуи шъо пстэуми пае Тхьэм сызелъэГукӀэ, гушӀуагъокӀэ селъэГу, 5 сыда пӀомэ апэрэ мафэм къыщегъэжьагъэу джырэ нэсыфэ, Ӏофэу къэбарышӀум сэ фэсшӀагъэмкӀэ шъуиӀахьэ хэлъыгъэшъ ары. 6 Тхьэм Ӏофэу шъугухэм ащиублагъэр Исус Христос дунаем къызыкӀожьыщт мафэм нэсы зэрэригъэкъущтым сыщэгугъы. 7 Арэущтэу шъо пстэуми пае сызэрэгупшысэрэр тэрэз, сыда пӀомэ Ӏэхъулъэхъу къыстыралъхьагъэу щытми, къэбарышӀум пэуцухэрэм пэгъокӀ ястыми, къэбарышӀум ишъыпкъагъэ къэзгъэлъагъоми, сыгу шъуилъ зэпыт, шъо пстэури, сигъусэхэу Тхьэм ынэшӀу къызщифэхэрэр. 8 Исус Христос ишӀулъэгъуныгъэ сыгу илъэу шӀу шъузэрэслъэгъурэмкӀэ Тхьэр сишыхьат. 9 Тхьэм сызэрелъэӀурэр шӀэныгъэмрэ зэхэшӀыкӀыныгъэ пстэумрэ ягъусэу, шӀулъэгъуныгъэ нахьыбэ шъуиӀэ зэпытыныр ары. 10 ЕтӀанэ нахьышӀур зыфэдэр зэхэшъушӀыкӀын шъулъэкӀыщт, шъугухэри къабзэхэу, зыми шъузэригъэмысэн зи щымыӀэу, Христос дунаем къызыкӀожьыщт мафэм дэжь шъущытыщт. 11 Арэущтэу шӀугъэу шъыпкъагъэм къыхэкӀырэр Исус Христос шъугухэм инэу къарилъхьащт, цӀыфмэ Тхьэм щытхъушхо фашӀыным ыкӀи ежьыр агъэлъэпӀэным пае.
Христос уфэлэжьэныр ары щыӀэныгъэ шъыпкъэр
12 ШъушӀэнэу сыфай, сшыхэр, сэ къысэхъулӀэгъэ Ӏофхэм яшӀуагъэ къэбарышӀу гъэӀуным иӀоф къызэрэрагъэкӀыгъэр. 13 Арэущтэу Кайсарым иунэшхоу преторие иухъумакӀохэмрэ адрэ цӀыф пстэумрэ нафэ афэхъугъ, Христос сызэрэфэлажьэрэр ары Ӏэхъулъэхъур къызкӀыстыралъхьагъэр. 14 Ащ нэмыкӀэу, цӀыфхэм Ӏэхъулъэхъу къызэрэстыралъхьагъэм пае, сшыхэу Зиусхьаныр зыгу илъхэм янахьыбэхэм агухэм зыкъаӀэтызэ, мыщынэхэу Тхьэм игущыӀэхэр нахь гушхоныгъэкӀэ агъэӀухэу аублагъ. 15 Шъыпкъэ, шъугъонымрэ зэщыхьанымрэ агухэм арылъхэу, Христос икъэбар зыгъэӀухэрэри щыӀэх, ау нэмыкӀ цӀыфхэм агухэм шӀугъэ зэрарылъым пае, Христос икъэ бар агъэӀу. 16 Апэрэхэм агухэм зэщыхьаныгъэ арылъэу, гумыкъэбзагъэкӀэ Христос икъэбар агъэӀу. СиӀэхъулъэхъу джыри нахь щэчыгъуаеу ашӀынэу агу хэлъ. 17 Адрэхэм шӀулъэгъуныгъэ агухэм зэрарылъым пае, Христос икъэбар агъэӀу. Христос икъэбарышӀу пэуцухэрэм пэгъокӀ ястыжьынэу Тхьэм сызэригъэнэфагъэр ашӀэ. 18 Ар Ӏофэп. Арэущтэуми мырэущтэуми, гухэлъ бзаджэкӀи гухэлъышӀукӀи, Христос икъэбар агъэӀу хъумэ, сэгушӀо. ЫкӀи сыгушӀо зэпытыщт, 19 сыда пӀомэ Тхьэм шъузэрелъэӀурэм паий, Исус Христос Ыпсэ ЛъапӀэ ӀэпыӀэгъу къызэрэсфэхъурэм паий, мы къиным сыкъызэрэхэкӀыжьыщтыр сэшӀэшъ ары. 20 ЗыкӀи сызтеукӀытыхьан Ӏоф горэ щымыӀэу, джыри сыдигъуи, сыпсауми, сылӀэми, спкъыкӀэ Христос гушхоныгъэкӀэ зэрэзгъэлъэпӀэн зэпытыщтым сыкӀэхъопсы ыкӀи сыщэгугъы. 21 Сыда пӀомэ сэ щыӀэныгъэ шъыпкъэу зыфасӀорэр Христос сыфэлэжьэныр ары, сылӀэми ишӀуагъэ къысэкӀыщт. 22 Ау мы пкъым сыщыпсэунэу щытмэ, шӀугъэ къызхэкӀырэ Ӏоф сшӀэн слъэкӀыщт. Ау а ӀофитӀум язэу къыхэсхыщтыр сшӀэрэп. 23 А ӀофитӀумэ сырагъэзы. Мы дунаем сехыжьынышъ, Христос сыригъусэнэу сшӀоигъу. Ар бэкӀэ нахьышӀу. 24 Ау мы пкъым сыкъыхэнэныр шъоркӀэ нахь щыкӀэгъэшхоу щыт. 25 Ащ сыщыгугъэу, мыщ дэжьым сыкъызэрэнэжьыщтри, гушӀуагъо игъусэу шъуишӀошъхъуныгъэ нахь пытэ хъу зэпытыным пае, шъуадэжь сызэрэщыӀэщтри сэшӀэ. 26 Ащыгъум шъуадэжь сыкъызыкӀожькӀэ, Христос Исус къысфишӀэгъэ Ӏофым лъэшэу шъущыгушӀукӀын шъулъэкӀыщт. 27 ЗэкӀэми апэу Христос ехьылӀэгъэ къэбарышӀум фэшъуашэу шъузекӀу. Ащыгъум сыкъакӀоу шъуслъэгъумэ, е сыщымыӀэу шъуикъэбар зэхэсхымэ, зыгузыпсэу гъогу занкӀэм шъыпкъэу шъурыкӀоу, шъузэгурыӀоу, къэбарышӀоу шъушӀошъ хъурэм пае инэу шъузэдэлажьэу, 28 къышъупэуцухэрэм зыкӀи шъузэращымыщынэрэри сшӀэщт. Ахэр зэрэкӀодыжьыщтхэри, шъо шъумыкӀодэу шъукъызэрэнэжьыщтри шъуизекӀуакӀэ нафэу аригъэлъэгъущт. ӀПъумыкӀодэу шъукъэзыгъэнэжьыщтыр Тхьэр ары. 29 Сыда пӀомэ ХристоскӀэ шӀошъхъуныгъэ шъуиӀэным имызакъоу, Христос паий къин шъущэчынэу Тхьэм ынэшӀу щыфэныгъэкӀэ фит шъуишӀыгъ. 30 Сэ бэнэным сыхэтэу зэрэшъулъэгъугъэм фэдэу, шъори джы шъухэт, джыри а бэнэным сызэрэхэтыр зэхэшъухыгъ.
Христосыр ары Зиусхьаныр
1 Христосэу шъугухэм арылъым шъуегъэгушхоба? ИшӀулъэгъуныгъэ шъуигукъао къышъушъхьэщихырэба? Тхьэм Ыпсэ ЛъапӀэ шъугухэм арылъба? Гуфэбэныгъэри гукӀэгъуныгъэри зэфышъуиӀэба? 2 Ащыгъум сигушӀуагъо ижъугъэкъу: шъуигупшысакӀэ зы орэхъу, а зы шӀулъэгъуныгъэр шъуерэӀ, зыгузыпсэу шъущыт. 3 Зэщыхьанри зышӀошӀыжьынри шъугухэм арылъхэу зи шъумышӀэ, шъумыпагэуи нэмыкӀ цӀыфхэр шъушъхьэ зэрэшъулъытэжьырэм нахьи нахь инхэу шъулъытэх. 4 Хэти ежь ышъхьэ иӀоф закъо ерэмыплъ, нэмыкӀ цӀыфхэм яӀофми ерэплъ. 5 ШъуигупшысакӀэ Христос Исус игупшысакӀэ фэдэу орэхъу: 6 Христос Исус Тхьэм ищытыкӀэ хэлъыгъэ пэтми, Тхьэм фэдэу зэрэщытым ежь ышъхьэ ишӀуагъэ къыригъэкӀыжьынэу ыуж итыгъэп. 7 Ау ежьым зигъэцӀыкӀуи, Ӏофтабгэм ищытыкӀэ иӀэ хъугъэ. ЦӀыфым фэдэу хъугъэ, итеплъи цӀыф хэм ятеплъэ фэдэу щытыгъ. 8 Ежьым зигъэцӀыкӀуи, лӀэныгъэм нэсыфэ Тхьэм фэӀорышӀагъ, къащым зыщыкӀэрылӀыхьагъэм нэс. 9 Арышъ, Тхьэм ар ыгъэини, цӀэ пстэуми анахь цӀэшхор къыритыгъ. 10 Арэущтэу зыфэхъугъэр Исус ыцӀэ щытхъу фашӀэу, щыӀэ пстэури лъэгонджэмышъхьэкӀэ тӀысынхэр ары, уашъоми, чӀылъэми, чӀылъэ чӀэгъыми щыӀэхэр ары, 11 бзэгу пстэуми Исус Христос зэрэЗиусхьаныр зэкӀэмэ апашъхьэ къыщаӀонри ары. Арэущтэуи Тхьэу Ты лъапӀэм щытхъушхо фашӀыщт.
Жъуагъохэм шъуафэдэу цӀыфхэм шъукъызэрахэлыдыкӀыщтыр
12 Арышъ, силъапӀэхэр, шъуадэжь сызыщэӀэм, шъукъысфэӀорышӀэу шъузэрэщытыгъэм фэдэу, джы шъуадэжь сызыщымыӀэми, ащ нахьи бэкӀэ нахь шъукъысфэӀорышӀэн фае: Тхьэм ищынагъо шъугухэм арылъэу, шъугухэр кӀэзэзхэу, шъумыкӀодэу шъукъызэрэнэжьыщтым лъэшэу ыуж шъуит, 13 сыда пӀомэ ежьым игъоу ылъытэрэ Ӏофхэм шъуафэенэуи жъугъэцэкӀэнхэуи шъозыгъэлъэкӀырэр Тхьэр ары. 14 Сыд шъушӀэми, шъумытхьаусыхэу ыкӀи шъуемыхъырэхъышэу шъушӀэ, 15 лажьэ зи шъуимыӀэным ыкӀи гукъэбзагъэ шъуиӀэным пае. Ащ фэдэу зыхъукӀэ, зыми шъузэригъэмысэн зи щымыӀэу, цӀыф къаигъэхэм ыкӀи къуанчэхэм шъуахэтэу, Тхьэм шъурибыныщт. 16 ЩыӀэныгъэр тиӀэ зыгъэхъурэ гущыӀэхэр шъуӀэ илъхэу, дунэе шӀункӀым жъуагъохэм шъуафэдэу а цӀыфхэм шъукъахэлыдыкӀыщт. Арэущтэу зыхъукӀэ, хьаулыеу сызэрэмылэжьагъэм ыкӀи сызэрэмыулэугъэм Христос дунаем къызыкӀожьыщт мафэм дэжь сырыгушӀощт. 17 Шъо Тхьэм къурмэныпхъэу фэшъушӀырэр шъуишӀошъхъуныгъ ары. А къурмэныпхъэм сищыӀэныгъэ ылъ текӀагъэ хъуми, сыгушӀощт, шъори зэкӀэ сышъуигъусэу сыгушӀощт. 18 Арышъ, шъори шъуигопэн фае, шъусигъусэуи шъугушӀон фае.
Тимофейрэ Епафродитрэ
19 Тимофей бэ темышӀэу къышъуфэзгъэкӀонэу Зиусхьанэу Исус сыщэгутъы, шъуикъэбархэр зэхэсхыхэмэ сыгу псэфыжьыным пае. 20 Ишъыпкъэу къышъуфэгумэкӀырэр Тимофей нэмыкӀ зи сиӀэп. 21 ЦӀыф пстэури ежь яӀофхэм ауж итых нахь, Исус Христос игъоу ылъытэрэ Ӏофхэм ауж итхэп. 22 Тимофей ишъыпкъагъэ шъо шъошӀэ. Ыкъо ятэ зэрэдэлажьэрэм фэдэу, къэбарышӀу гъэӀуным иӀофкӀэ къыздэӀэпыӀагъ. 23 СиӀофхэр зэрэхъущтхэр зэрэсшӀэу, къышъуфэзгъэкӀонкӀэ сэгугъэ. 24 Сэри бэ темышӀэу шъуадэжь сыкъэкӀожьынэу Зиусхьаным сыщэгугъы. 25 Ащ нэмыкӀэу, Епафродит къышъуфэзгъэкӀожьын фаеу сэлъытэ. Ар тэ тшы, ежьыррэ сэррэ тызэдэлэ жьагъ ыкӀи тызэдэулэугъ. Джары шъо шъуилӀыкӀоу, ӀэпыӀэгъу сищыкӀагъэ зэхъум, къыслъыплъэнэу къысфэжъугъэкӀогъагъэр. 26 Шъо зэкӀэ шъуилъэгъужьынэу ар лъэшэу къышъуфэлӀэ, зэрэсымэджагъэр зэрэзэхэшъухыгъэм паий мэгумэкӀы. 27 Шъыпкъэ, лӀэныгъэм нэсыгъэу сымаджэу щытыгъ. Ау Тхьэм гукӀэгъу къыфишӀыгъ, ежьым изакъоп, сэри гукӀэгъу къысфишӀыгъ, сыгу къемыо зэпытыным пае. 28 КъышъуфэзгъэкӀожьынэу сызфэгузажъорэр ар шъулъэгъужьмэ, шъо гушӀуагъо шъуиӀэнэуи, сэ сигумэкӀыныгъэ нахь макӀэ хъунэуи ары. 29 Зиусхьаныр шъо шъугухэм зэрарылъым фэдэу, ащ ыгуи зэрилъым пае, гушӀогъо пстэумкӀэ шъупэгъокӀ. Ежьым фэдэ цӀыфхэм лъытэныгъэ афэшъушӀ, 30 сыда пӀомэ Христос иӀоф пае лӀэныгъэм пэблагъэ хъугъэ. Шъо сэ къысфэшъушӀэн шъумылъэкӀыгъэ ӀэпыӀэгъур къысфишӀэным пае, ыпсэ шъхьамысыжьэу лӀэныгъэм пэблагъэ хъугъэ.
Тхьэм ыдэжь къикӀырэ шъыпкъагъэр
1 Аужыпкъэм, сшыхэр, Зиусхьаныр шъугухэм зэрарылъым пае шъугушӀу. А Ӏоф дэдэхэр джыри зэ къышъуфэстхыжьынхэу сэркӀэ къинэп, ахэр зэрэстхыжьхэрэми ишӀуагъэ къышъокӀыщт. 2 Хьэхэм афэдэ цӀыфхэу, бзэджагъэ зышӀэхэу, адрэ цӀыфхэр сунэт зышӀыхэрэм защышъудзый. 3 Шъыпкъэу сунэт ашӀыгъэу щытхэр тэры, тэ, Тхьэм Ыпсэ ЛъапӀэ илъэкӀыныгъэкӀэ Тхьэм фэлажьэхэу, Христос Исус рыпагэхэу, пкъым епхыгъэ Ӏофхэм ащымыгугъыхэрэр. 4 Арэущтэу щыт пэтми, сэри ащ фэдэ Ӏофхэм сащыгугъын слъэкӀыщтыгъ. ЦӀыф горэ пкъым епхыгъэ Ӏофхэм ащыгугъын ылъэкӀынэу къышӀошӀымэ, сэ а цӀыфым нахьи а Ӏофхэм нахь сащыгутъын слъэкӀыщт. 5 Сэ мэфий сыныбжьэу сунэт сашӀыгъ, Израил лъэпкъым сыщыщ, Вениамин иунэгъо лъэпкъ сыщыщ, джуртмэ сыкъахэкӀыгъ, Тэурат хабзэм тетэу сырыкӀоу фарисей купым сыщыщыгъ. 6 Тхьэ гъэлъэпӀэным сыгу етыгъэу сыпылъэу, чылыс зэӀукӀэм щыщхэм къин язгъэщэчыщтыгъ. Тэурат хабзэм итхэр бгъэцэкӀэнхэм ягъогукӀэ шъыпкъагъэ бгъотыщтыгъэмэ, зыми сызэригъэмысэн зи щыӀэщтыгъэп. 7 Ау джы Христос зыфэдэр зэзгъэшӀэным пае, Ӏофхэу сишӀуагъэ къэкӀощтыгъэхэм пкӀэ ямыӀэжьэу сэлъытэ. 8 Шъыпкъэ, Ӏоф пстэуми пкӀэ ямыӀэжьэу сэлъытэ. Сыда пӀомэ си Зиусхьанэу Христос Исус зыфэдэр зэзгъэшӀэныр Ӏофхэу щыӀэ пстэуми анахьи нахьышӀу. Ежьым сыфэлэжьэным пае, зэкӀэри хэсынагъ, Ӏоф пстэуми пкӀэ ямыӀэжьэу сэлъытэ, Христос сиӀэхьышӀоу хъуным ыкӀи 9 ежьыр сыгу илъыным пае. Тхьэм ежьым ыдэжькӀэ шъыпкъагъэ сиӀэу сызкӀилъытэрэм сэ ӀофышӀухэу сшӀагъэхэм яӀоф хэлъэп. Сэ зыфасӀорэр Тхьэм ежьым ыдэжькӀэ шъыпкъагъэ сиӀэу сызкӀилъытэрэр ХристоскӀэ шӀошъхъуныгъэ зэрэсиӀэр ары. Тэурат хабзэм итхэр згъэцэкӀэнхэм иӀоф ащ хэлъэп. А шъыпкъагъэу сиӀэр Тхьэм ыдэжь къекӀы, шӀошъхъуныгъэми тет. 10 Христос зыфэдэр зэзгъэшӀэнэу сыфай, ар лӀагъэхэм къызэрахэтэджыкӀыжьыгъэм ыдэжь къикӀырэ лъэкӀыныгъэр зыфэдэри зэзгъэшӀэнэу сыфай. Христос къинхэу ыщэчыгъэхэм сиӀахьэ ахэлъынэу сыфай, ежьыр зэлӀэм, зэрэщытыгъэм фэдэуи сыхъунэу сыфай. 11 Арэущтэу Тхьэм лӀагъэхэм сыкъахигъэтэджыкӀыжьыным сыщэгугъы. Ӏофхэу сызщыгугъыхэрэм сызэралъыӀэсыным ыуж сит 12 А Ӏофхэу сызщыгугъыхэрэм салъыӀэсыгъэу, е зишъыпкъагъэ щыкӀагъэ зи зимыӀэ цӀыф икъугъэу сыхъугъэу сӀорэп. Ау а Ӏофхэм сызэралъыӀэсыным ыуж сит, Христос Исус ицӀыфхэм ащыщ сыхъунэу къызэрэслъыӀэсыгъэм фэдэу. 13 Сшыхэр, Ӏофхэу сызщыгугъыхэрэм салъыӀэсыгъэу зыслъытэжьрэп, ау зы Ӏоф закъо сэшӀэ: БлэкӀыгъэ Ӏофхэр сэ сщыгъупшэжьхэу, сапэкӀэ ит Ӏофхэм сызэралъыӀэсыным ыуж сит. 14 Зэпэчъэным хахьэрэм фэдэу тыныр къэсхьыным пае, кӀэухым сызэрэнэсыным ыуж сит. А тынэу зыфасӀорэр уашъом сыщыпсэуныр ары, ар къэсхьынри ары, ибынхэм ащыщ сыхъунэу Тхьэм Исус Христос сызфыригъэджагъэр. 15 Тэ тщыщэу хэтрэ цӀыфэу Христос иӀофхэм яхьылӀагъэу щыкӀагъэ зи зимыӀэ цӀыф икъугъэу хъугъэр арэущтэу гупшысэн фае. Ӏоф горэм ехьылӀагъэу нэмыкӀ гупшысакӀэ шъуиӀэмэ, Тхьэм ари нафэ къышъуфишӀыщт. 16 Ау тызнэсыгъэм фэшъуашэу тыгупшысэн фае, ащ тетэуи тызекӀон фае. 17 Сшыхэр, силъэужхэм шъуакъырыкӀу. ШъузэрэзекӀон фаем ишапхъэу шъодгъэлъэгъугъэм тетэу зекӀохэрэм шъуакӀырыплъ. 18 Сыда пӀомэ бэрэ къызэрэшъосӀуагъэм фэдэу, джыри сынэпсхэр къехыхэзэ шъосэӀо: ЦӀыфыбэ Христос икъащ пыеу фэхъугъэх. 19 А цӀыфхэм кӀэухэу къалъысыщтыр кӀодыныгъэр ары, ятхьэри ныбэр ары, зэрыпэгэрэ Ӏофхэри укӀытэжьыпхъэх. Мы дунаем иӀофхэм анэмыкӀкӀэ ягупшысэхэрэп. 20 Ау тэ тихэку уашъор ары. Зиусхьанэу Исус Христосэу уашъом къехынышъ, тымыкӀодэу тыкъэзыгъэнэжьыщтым тежэ. 21 Ежь илъэкӀыныгъэшхоу зэрылажьэу, Ӏоф пстэури итетыгъо ыӀэчӀэгъ зэрычӀигъэуцорэмкӀи тпкъы тхьамыкӀэхэр зэблихъунхэшъ, ежь ыпкъэу щытхъушхо зиӀэм фэдэхэу ыгъэхъущтых.
1 Арышъ, шъо, сшыхэу шӀу слъэгъухэу, нэкӀэ слъэгъунхэу сызфалӀэхэрэм, сигушӀуагъори ситанджыри шъоры. ШӀу слъэгъухэрэр, Зиусхьаныр шъугухэм зэрарылъым пае, гъогу занкӀэм пытэу шъутетын фае.
Аужырэ Ӏофхэу Паул шӀошъхъуныгъэ зиӀэхэу Филиппи дэсхэм агуригъаӀохэрэр
2 Зиусхьаныр агухэм зэрарылъым пае, бзылъфыгъэхэу Еводиерэ Синтихиерэ зы гупшысакГэ хъунхэу сялъэӀу. эО, къыздэлажьэрэ ныбджэгъу шъыпкъ, ахэмэ уадэӀэпыӀэнэу сыолъэӀу. Ахэри къэбарышӀур цӀыфхэм язгъэӀунымкӀэ къыздэлэжьагъэх, Климентрэ адрэ къыздэлажьэхэрэмрэ ягъусэхэу. Ахэмэ ацӀэхэр мыкӀодыжьын щыӀэныгъэ зыгъотыщт цӀыфхэм ацӀэхэр зэрыт тхылъым итых. 4 Шъо, Зиусхьаныр зыгу илъхэр, шъугушӀо зэпыт. Джыри зэ шъосэӀожьы: шъугушӀу. 5 Шъуигушъэбагъэ цӀыф пстэуми нафэ афэрэхъу. Зиусхьаныр дунаем къызыкӀожьыщт мафэр къэблэгъагъ. 6 Сыд щыщми зешъумыгъэгъап, ау сыд щыщырэ ӀофкӀи Тхьэм шъуелъэӀузэ, щытхъу фэшъушӀызэ, шъуиӀэпыӀэгъу хъунэуи шъуелъэӀузэ, шъуищыкӀагъэхэр ежъугъашӀэх. 7 ЕтӀанэ Тхьэм ыдэжь къикӀырэ гупсэфыныгъэу цӀыфхэм къагурыӀошъущтым нахьи, бэкӀэ нахь иным шъугухэри шъуигупшысэхэри Христос Исус шъугухэм зэрарылъым пае къыухъу мэщтых. 8 Аужыпкъэм, сшыхэр, сыд Ӏофи шъыпкъэу щытми, сыд Ӏофи лъытэныгъэ ифэшъуашэми, сыд Ӏофи зафэу щытми, сыд Ӏофи къабзэу щытми, сыд Ӏофи шъугу зэӀурэми, сыд Ӏофи гуапэу щытми, сыд Ӏофи хэбзэшӀу хэлъми, сыд Ӏофи щытхъу ифэшъуашэми, ащ фэдэ Ӏофхэм шъуягупшыс. 9 Ӏофхэу сэ шъозгъэшӀагъэхэри, къышъуфэзгъэнагъэхэри, сэ къасӀохэу зэхэшъухыгъэхэри, сэ сшӀэхэу шъулъэгъугъэхэри жъугъэцакӀэх. Ащыгъум гупсэфыныгъэ къытэзытырэ Тхьэр шъуигъусэ зэпытыщт.
ШӀошъхъуныгъэ зиӀэхэу Филиппи дэсхэм тынэу къыратыгъэм пае, Паул щытхъу зэрафишӀырэр
10 Джыри зэ сэ шъукъызэрэсэгугъужьыгъэм пае, Зиусхьаныр сыгу илъэу, лъэшэу гопэшхо сиӀэ хъугъэ. ЫпэкӀи шъукъысфэгумэкӀыщтыгъ, ау шъукъыздэӀэпыӀэнэу игъо шъуфифагъэп. 11 ЩыкӀагъэ горэ зэрэсиӀэр арэп арэущтэу зыкӀасӀорэр, сыда пӀомэ сэ сыд къысэхъулӀэми сырырэзэнэу зызгъэсагъ. 12 ТхьамыкӀагъом сыхэтынри, баиныгъэм сыхэтынри зыфэдэр сэшӀэ. СышхэкӀыгъэми, мэлакӀэ сэлӀэми, сыбаими, сытхьамыкӀэми, сыдигъуи, сыд къысэхъулӀэми, сырырэзэнэу зызгъэсагъ. 13 Исус Христосэу сэзыгъэлъэкӀырэм ыкӀуачӀэкӀэ зэкӀэ сшӀэн слъэкӀыщт. 14 Ау щытми, гузэжъогъоу сызхэтымкӀэ гъусэ шъукъызэрэсфэхъугъэр дэгъоу шъушӀагъэ. 15 ПӀъо, Филипп къалэм дэсхэм, зэрэшъушӀэрэмкӀэ, къэбарышӀур згъэӀунэу сыублагъэу Македоние хэкум сыкъызекӀым, ӀэпыӀэгъу хъунымрэ ӀэпыӀэгъум ипэгъокӀ гъотыжьынымрэ яӀофкӀэ шъощ нэмыкӀэу чылыс зэӀукӀэмэ ащыщэу зи гъусэ къысфэхъугъэп. 16 Фессалоникэ къалэм сызыщэӀэм, сищыкӀагъэхэр заулэрэ шъуилӀыкӀохэм къысфяжъугъэхьыгъэх. 17 Ар зыкӀасӀорэр шъуитын сехъуапсэу арэп, ау шъуитын ипэгъокӀ фэдэу шӀу зэрэжъугъотыныр ары. 18 Шъуитын пстэури къысӀэкӀэхьагъ, сфырикъуным нахьыби сиӀэ хъугъэ. Епафродит къысфежъугъэхьыгъэ тынхэр къысӀэкӀэхьагъэхэшъ, щыкӀагъэ зи сиӀэп. Ахэр Тхьэм ыдэрэ къурмэныпхъэу, ыгу зэӀоу, мэӀэшӀу къызпихырэм фэдэх. 19 Си Тхьэ ибаиныгъэшхоу щытхъушхо зиӀэм фэшъуашэу шъуищыкӀагъэхэр зэкӀэ Христос къышъуригъэтыщт. 20 Тхьэу Тятэ лъапӀэ мыкӀодыжьын щытхъушхор ий. Амин.
Аужырэ шӀуфэс гущыӀэхэр
21 Тхьэм ицӀыф лъапӀэхэу, Христос Исус зыгу илъхэм аӀапӀэ сфэшъуубытыжь. Сигъусэ сшыхэм шӀуфэс къышъуахыжьы. 22 Тхьэм ицӀыф лъапӀэхэм зэкӀэмэ шӀуфэс къышъуахыжьы, анахьэу Кайсарым иунэшхо щыщхэр ары. 23 Зиусхьанэу Исус Христос ынэшӀу шъо шъугухэм къащерэф. Амин.
ШӀуфэс ехыныр
1 Сэ сы Паул. Тхьэр фэягъэти, Исус Христос иапостолэу сыхъугъ. Тшы Тимофей сигъусэу, 2 шъо, Тхьэм ицӀыф лъапӀэхэу, Колоссэ къалэм дэсхэу, Христос зыгу илъхэу, ежьым фэшъыпкъэу щыт тшыхэм, мы тхылъыр къышъуфэсэтхы. 3 Тхьэу Тятэ лъапӀэрэ Зиусхьанэу Исус Христосрэ анэшӀу къышъущарэфи, гупсэфыныгъэ къышъуарэт. ШӀошъхъуныгъэ зиӀэхэу Колоссэ дэсхэм апае Паул Тхьэм щытхъу зэрэфишӀырэр Тхьэм тышъуфелъэӀу къэси, Тхьэу ти Зиусхьанэу Исус Христос Ятэ щытхъу фэтэшӀы, 4 сыда пӀомэ, Христос ИсускӀэ шӀошъхъуныгъэу шъуиӀэмрэ, шӀулъэгъуныгъэу Тхьэм ицӀыф лъэпӀэ пстэуми афышъуиӀэмрэ якъэбар зэхэтхыгъэ. 5 Ащ фэдэ шӀошъхъуныгъэмрэ шӀулъэгъуныгъэмрэ зыкӀышъуиӀэр ӀэхьышӀоу Тхьэм уашъом къыщышъуфигъэхьазырыгъэр къызэрэшъуитыщтым шъущыгугъэу, шъузэрэпаплъэрэр ары. КъэбарышӀоу къышъонэсыгъэм игущыӀэ шъыпкъэхэмкӀэ Тхьэм шӀугъэу къышъуфигъэхьазырыгъэм икъэбар зэхэшъухыгъэ. 6 Дунэе пстэумкӀи къэбарышӀум шӀутъэ къыхэкӀы, цӀыф нахьыбэми анэсы зэпыт. Арэущтэу шъуадэжьи щыхъугъ, къэбарышӀур зэхэшъухи, Тхьэм ынэшӀу щыфэныгъэр шъыпкъэу къызыжъугурыӀогъэ мафэм щегъэжьагъэу. 7 ШӀу тлъэгъурэ Епафрасэу къыддэлажьэрэм къэбарышӀур шъуигъэшӀагъ. Ащ ишӀуагъэ къышъуигъэкӀэу шъыпкъагъэкӀэ Христос фэлажьэ. 8 Ащ шъуишӀулъэгъуныгъэу Тхьэм Ыпсэ ЛъапӀэ ыдэжь къикӀырэм икъэбари къытиӀотагъ. 9 Арышъ, шъо шъуикъэбар зызэхэтхыгъэ мафэм щегъэжьагъэу, Тхьэм тышъуфелъэӀунэу хэтынэжьыгъэп. Тхьэр зыфаер икъугъэу къыжъугуригъэӀонэуи, Ыпсэ ЛъапӀэ ыдэжь къикӀырэ зэхэшӀыкӀыныгъэрэ гулъытэныгъэрэ зэкӀэ шъуиӀэнэу телъэӀу. 10 Ащыгъум лъэныкъо пстэумкӀи Зиусхьаным ыгу къызэжъугъэӀоу, ежьым шъуфэшъуашэу шъузекӀощт. ШъушӀэрэ Ӏоф дэгъу пстэуми шӀугъэ къахэкӀыщт, Тхьэри нахьышӀоу шъушӀэ зэпытыщт. 11 Сыд щыщымкӀи теубытэныгъэрэ щыӀагъэрэ шъуиӀэнэу Тхьэм щытхъушхо зиӀэ лъэкӀыныгъэу иӀэмкӀэ зэкӀэ шъугухэр ыгъэпытэнхэу орэхъу. 12 ГушӀуагъокӀи Тхьэу Ты лъапӀэм щытхъу фэшъушӀ. Нэфынэр зыдэщыӀэ чӀыпӀэм Тхьэм ежь ицӀыф лъапӀэхэм ӀэхьышӀоу афигъэхьазырыгъэмкӀэ шъори Ӏахьэ къышъулъысынэу къышъуфигъэшъошагъ. 13 ШӀункӀыгъэм итетыгъо ыӀэчӀэгъ тыкъычӀихыжьи, Ыкъоу шӀу ылъэгъурэм итетыгъо ыӀэчӀэгъ тычӀигъэуцуагъ. 14 Ыкъу ары лъэу къащым щыкӀэкӀыгъэмкӀэ тэ тшъхьэхэр зыщэфыжьыгъэр, типсэкӀодхэри къытфэзыгъэгъугъэр.
Христос Тхьэм къыгъэхъугъэ пстэуми апшъэ щыӀ
15 Христос Тхьэу цӀыфхэм амылъэгъурэм ишъо теплъэ иӀ. Джары Тхьэм къыгъэхъугъэ пстэуми апшъэ щыӀэу ЫкъокӀэ заджэрэр. 16 Тхьэм Христос зэкӀэри къыригъэгъэхъутъ, уашъоми чӀылъэми щыӀэ пстэури, цӀыфхэм алъэгъурэ Ӏофхэри, амылъэгъурэ Ӏофхэри, пачъыхьэ тӀысыпӀэхэм тетӀысхьэхэрэри, пащэхэри, Ӏэшъхьэтетхэри, тетыгъо зиӀэхэри Тхьэм ежь Ыкъо зэкӀэри къыригъэгъэхъугъ, Ыкъо ищытхъушхо паий щыӀэх. 17 Ахэр зэкӀэ зыщэмыӀэхэм, Къо лъапӀэр щыӀагъ. Ежьыми зэкӀэ зэкӀеубытэ. 18 Пкъэу чылыс зэӀукӀэм ышъхьэр ежьыр ары. Ежьыр ары чылыс зэӀукӀэр зэтезыгъэуцуагъэр, апэрэу лӀагъэхэм къахэтэджыкӀыжьыгъэри ежьыр ары. Арэущтэу зэкӀэмкӀи апэрэр ежьыр ары. 19 Сыда пӀомэ Тхьэм игъоу ылъытагъэти, ищытыкӀэ зэкӀэ Ыкъо хэлъ хъугъэ. 20 Лъэу Ыкъо къащым щыкӀэкӀыгъэмкӀэ Тхьэм зэшӀужьыныгъэ ыгъэхъузэ, Ӏофэу Ыкъо ышӀагъэмкӀэ чӀылъэми уашъоми щыӀэр зэкӀэ ежьым ешӀужьыгъэу ыгъэхъунэу игъоу ылъытагъ. 21 Пасэм Тхьэм бэу шъупэчыжьэу шъущытыгъагъ. ШъугухэмкӀэ шъурипыеу бзэджагъэхэр шъушӀэщтыгъэх. 22 Ау шъугухэр къабзэхэу, лажьэ зи шъуимыӀэу, зыми шъузэригъэмысэн зи щымыӀэу, Тхьэм ежь ыпашъхьэ шъуригъэуцоным пае, Христос лымрэ лъымрэ къахэхъукӀыгъэ пкъы иӀэу зэрэлӀагъэмкӀэ джы ежь ышъхьэкӀэ шъуешӀужьыгъэу шъуигъэхъугъ. 23 Ау шъуиӀэхьышӀу хъун Ӏофхэу къэбарышӀоу зэхэшъухыгъэм шъузщигъэгугъыгъэхэм зыми зыхешъумыгъэгъэнэу, шӀошъхъуныгъэм игъогу шъутемыкӀэу шъыпкъагъэкӀэ шъурыкӀон фае. Тхьэм фэлажьэхэрэм а къэбарышӀур ошъо чӀэгъым щыпсэурэ цӀыф пстэуми арагъэӀугъ. Сэ, Паул, а къэбарышӀум сыфэлажьэ.
Паул чылыс зэӀукӀэм зэрэфэлажьэрэр
24 Джы сэ сишӀуагъэ шъозгъэкӀызэ, къин сщэчми, сэгушӀо, сыда пӀомэ гузэжъогъухэу Христос ыпкъэу чылыс зэӀукӀэм сишӀуагъэ езгъэкӀыным пае, сшэчынхэу къысфигъэнэфагъэхэр джы сэ спкъыкӀэ исэгъэкъух. 25 Тхьэм Ӏофэу спшъэ къырилъхьагъэм тетэу, Тхьэм икъэбарышӀу икъугъэу шъозгъэӀуным пае, чылыс зэӀукӀэхэм сафэлажьэ. 26 А къэбарышӀур блэкӀыгъэ лъэхъанэхэмрэ лӀэшӀэгъухэмрэ ащегъэжьагъэу шъэфым фэдэу Тхьэм цӀыф хэм аримыгъэшӀагъэу щытыгъ. Мы уахътэм Тхьэм а шъэфыр ицӀыф лъапӀэхэм афигъэнэфагъ. 27 Хымэ лъэпкъхэм щытхъушхо гъэшӀэгъонэу а шъэфым афыхэлъыр Тхьэм ицӀыф лъапӀэхэм аригъэшӀэнэу игъоу ылъытагъ. А шъэфыр мары: Христос шъугухэм арылъ, ар шъугухэм зэрарылъым паий, щытхъушхо шъуиӀэ зэрэхъущтым шъущыгугъэу, шъупэплъэ. 28 Арэущтэу Христос ехьылӀэгъэ къэбарыр тэгъэӀу. Хэтрэ цӀыфи ыгу Христос илъэу, зишъыпкъагъэ щыкӀагъэ зи зимыӀэ цӀыф икъугъэу Тхьэм ыпашъхьэ идгъэуцоным пае, зэкӀэ зэхэшӀыкӀыныгъэмкӀэ гурытэгъаӀо ыкӀи етэгъашӀэ. 29 Ар згъэцэкӀэным пае, Христос зэкӀэ лъэкӀыныгъэу лъэшэу къысхилъхьагъэмкӀэ сишъыпкъэу сэлажьэ ыкӀи сэулэу.
1 Шъощ паий, Лаодикие къалэм дэсхэу шӀошъхъуныгъэ зиӀэхэм апаий, сэ сынапэ зымылъэгъугъэ пстэуми апаий лъэшэу сызэрэлажьэрэр шъозгъэшӀэнэу сыфай. 2 Лъэшэу сызфэлажьэрэр а цӀыфхэр згъэгушхонхэуи, шӀулъэгъуныгъэкӀэ зыгузыпсэу хъунхэуи ары. Арэущтэу Тхьэм ишъэфэу Христос къашӀэным пае, осэшхо зиӀэ зэхэшӀыкӀыныгъэу икъугъэр яӀэ хъущт. 3 Осэшхо зиӀэ зэхэшӀыкӀыныгъэшхо пстэумрэ шӀэныгъэшхо пстэумрэ Христос хэлъых. 4 Ар къызфышъуасӀорэр тхьагъэпцӀыгъэ гущыӀэхэмкӀэ зыми шъудимыхьыхынэу ары. 5 Сэ спкъыкӀэ шъуадэжь сыщымыӀэми, сыгурэ спсэрэкӀэ шъуадэжь сыщыӀ. ГъэпсыкӀэшӀоу шъуиӀэри ХристоскӀэ шӀошъхъуныгъэу шъуиӀэм ипытагъи зыслъэгъукӀэ, сэгушӀо.
Христос щыӀэныгъэ икъугъэр къызэрэтитырэр
6 Христос Исус Зиусхьанэу зэрэшъудагъэм пае, ар шъугухэм арылъэу шъузекӀу. 7 Шъулъапсэхэр Христос хэжъугъэлъых, шъуищыӀэныгъи ащ тежъугъэт. Зэрэшъодгъэ шӀагъэм фэдэу, ежьымкӀэ шӀошъхъуныгъэ пытэ шъуиӀэу, щытхъу фэшъушӀ зэпыт. 8 Шъуфэсакъ, мы дунаем изэхэшӀыкӀыныгъэ нэкӀэу, цӀыфхэр зыгъапцӀэрэмкӀэ зыми зыдешъумыгъэхьых. Ащ фэдэ зэхэшӀыкӀыныгъэр къызхэкӀырэр Христос арэп, тятэжъхэм къакӀэныжьыгъэ хабзэхэмрэ мы дунаем ехьылӀагъэу цӀыфхэм къызэрыкӀо гурыӀоныгъэхэу яӀэхэмрэ ары нахь. 9 Сыда пӀомэ Тхьэм ищытыкӀэ зэкӀэ Христос ыпкъ хэлъ. 10 Христос шъугухэм зэрарылъымкӀэ ежьым ищыӀэныгъэ икъугъэу къышъухэлъ. Ежьыр зэкӀэ Ӏэшъхьэтетхэмрэ тетыгъо зиӀэхэмрэ апшъэ щыӀ. 11 Ежьыр шъугухэм зэрарылъым пае, сунэт шъуашӀыгъэм фэд. Ар цӀыфхэм ӀэкӀэ ашӀыгъэ сунэтэу щытэп. Ар къызпкъырыкӀыгъэр Христос ары. Ар зыхъугъэр Христос шъуипсэкӀодышӀэ шэныжъ зыхышъуигъэнэжьыгъэ мафэр ары. 12 Шъузаумэхъым, Христос шъуригъусэу шъучӀалъхьажьыгъэм фэд. Шъузаумэхъым дэжь, Тхьэу Исус лӀагъэхэм къахэзыгъэтэджыкӀыжьыгъэм илъэкӀыныгъэкӀэ шӀошъхъуныгъэ шъуиӀэ зэрэхъугъэм пае, Тхьэм Христос шъуригъусэу лӀагъэхэм шъукъахигъэтэджыкӀыжьыгъэм фэд. 13 ПсэкӀодхэр зэрэшъушӀагъэхэм ыкӀи шъугухэмкӀэ сунэт шъузэрамышӀыгъэм пае, лӀагъэхэм шъуафэдэу шъущытыгъагъ, ау Тхьэм Христос шъуригъусэу шъуигъэпсэужьыгъ. Тхьэм типсэкӀодхэр зэкӀэ къытфигъэгъугъэх. 14 ТичӀыфэхэу унашъохэр зигъусэхэр зэрыт тхылъым илъэкӀыныгъэ Тхьэм ыгъэкӀодыгъ. А тхылъыр къытпэуцугъ, ау Тхьэм ар Христос икъащ тыриӀулӀэу, лъэныкъокӀэ ригъэзыгъ. 15 Христос къащым зыкӀэрылӀьгхьэм, джынэпцӀэ Ӏэшъхьэтетхэмрэ джынэпцӀэ тетыгъо зиӀэхэмрэ ялъэкӀыныгъэ аӀихыжьи, ахэмэ зэратекӀуагъэр шъхьэихыгъэу къыщигъэлъагъоу, анапэ тырихыгъ. 16 Арышъ, шъушхырэмрэ шъузашъорэмрэ яхьылӀагъэуи, мэфэкӀ мэфэшхом, мэзакӀэ мэфэшхом, зыгъэпсэфыгъо мафэм ягъэлъэпӀэным ехьылӀагъэуи зыгорэм хьыкум къышъутыришӀыхьанэу фит шъумышӀы. 17 А Ӏоф пстэури къэкӀонэу щытыгъэ Ӏофхэм яжьау ныӀэп, ау жьаур зиер Христос ары. 18 Шъо шъушъхьэ егъэлыягъэу жъугъэцӀыкӀун фаеуи, мэлэӀичхэр жъугъэлъэпӀэнхэ фаеуи зыӀорэм зыдешъумыгъэхьых. Ащ фэдэ цӀыфым Тхьэм Ӏофхэу къыригъэлъэгъугъэу зыфиӀохэрэм атегущыӀэ зэпытэу, мы дунаем ицӀыфхэм ягупшысакӀэ зэриӀэм пае, хьаулыеу зышӀошӀыжьы. 19 Ащ фэдэ цӀыфыр Христосэу шъхьэу щытым гъусэ фэхъурэп. Шъхьэр ары пкъыр зэзыпхэу, щыӀэхэмкӀи фэхыгъэхэмкӀи пкъым зэкӀэм кӀуачӀэ езыгъэгъотэу, ар зэкӀэзыубытэрэр. Арэущтэу Тхьэр зэрэфаем фэдэу пкъым хэхъо. 20 Христос шъуригъусэу шъулӀагъэм фэд, цӀыфхэм къызэрыкӀо гурыӀоныгъэхэу мы дунаем ехьылӀагъэу яӀэхэми тетыгъо къышъуфыряӀэжьэп. Адэ, Ӏофыр арэущтэу щытышъ, мы дунаем ицӀыфхэм шъуащыщэу шъущытыгъэм фэдэу шъузекӀоу, мыщ фэдэ унашъохэм сыд пае шъуядэӀура: 21 «Мы шхыным уемыӀ!» «Мыр умышхы!» «Мыщ унэмыс!»? 22 Ащ фэдэ унашъохэр зэхьылӀагъэхэр шхынхэу цӀыфхэм къызэраӀэкӀахьэу, кӀодыжьхэрэр ары. А унашъохэр цӀыфмэ ашӀыгъэ унашъохэу, нэмыкӀ цӀыфхэм арагъашӀэхэрэр ары. 23 ЦӀыфхэм къин ащэчызэ, Тхьэр агъэлъэпӀэнэуи, ашъхьэ егъэлыягъэу агъэцӀыкӀунэуи, апкъыхэм къин арагъэщэчынэуи а унашъохэм зэрэрагъэзхэрэм пае, зэхэшӀыкӀыныгъэ ахэлъэу теплъэ яӀ, ау пкӀэ яӀэп. Сыда пӀомэ Ӏоф мыхъомышӀэхэу цӀыфхэм агу зыкӀэхъопсыхэрэм апэуцунхэу ӀэпыӀэгъу афэхъунхэ алъэкӀырэпышъ ары.
1 Тхьэм шъо Христос шъуригъусэу лӀагъэхэм шъукъахигъэтэджыкӀыжьыгъэм фэд. Арышъ, уашъоу Тхьэм иджабгъукӀэ госэу Христос зыдэщыӀэм иӀофхэм ауж шъуит. 2 Мы дунаем иӀофхэм шъуямыгупшысэу, уашъом иӀофхэм шъуягупшыс. 3 Сыда пӀомэ шъо шъулӀагъэм фэд, шъуищыӀэныгъэ шъыпкъи мыкӀодэу, Тхьэр зыдэщыӀэм дэжь Христос къышъуфегъэнэжьы. 4 Христосэу тищыӀэныгъэшӀу шъыпкъэу щытыр къызылъагъокӀэ, шъори ащ шъуригъусэу щытхъушхо шъуиӀэу шъукъэлъэгъощт. 5 Арышъ, шъуишэныжъ бзаджэ иӀофхэр жъугъэкӀодых: Зинэ шӀэнри, гумыкъэбзагъэри, хъопсэныгъэ мыхъомышӀэхэри, хъопсэныгъэ Ӏаехэри, нэйпсыягъэри нэйпсыягъэр тхьэ нэпцӀ гъэлъэпӀэным фэдэу мэхъу. 6 Ащ фэдэ Ӏофхэм апае Тхьэм емыдэӀухэрэм игубж къалъигъэсыщт. 7 А цӀыфхэм шъузягъусэм, шъори ащ фэдэ Ӏофхэм шъуапылъыщтыгъ. 8 Ау джы мыщ фэдэ Ӏофхэр зэкӀэ хэжъунэжьынхэ фае: губжынри, къызэкӀэплъыхьанри, бзэджагъэри, нэмыкӀ цӀыфхэм ӀэягъэкӀэ атегущыӀэнри, емыкӀу гущыӀэнри. 9 ШъузэрэмыгъэпцӀэжь, сыда пӀомэ шъуишэныжъ бзаджэ иӀофхэр игъусэхэу хэшъунэжьи, 10 шэньнпӀукӀэр шъуашэм фэдэу зэшъущэкӀыгъ. Тхьэу а шэнышӀур къэзыгъэхъутъэм ежьым ишэн фэдэу хъоу, ар егъэкӀэжьы зэпыт, ежьыр зыфэдэр шъыпкъэу зэжъугъэшӀэным пае. 11 Арыпгъ, цӀыф зэхэдзыныгъэ азыфагу зи дэмылъэу, урымри, джуртри, сунэт ашӀыгъэу щытри щымытри, хымэри, Скиф хэкум щыщри, пщылӀри, шъхьафитри зэфэдэх. Христос зэкӀэмэ апшъэ щыӀ, ежьыри шъо зэкӀэми шъугухэм арылъ. 12 Шъо, гукъэбзагъэ зиӀэхэу, Тхьэм къыхихыгъэ цӀыфхэу, ежьым шӀу ылъэгъухэрэм, гукӀэгъуныгъэри, шӀугъэри, мыпэгэныгъэри, гушъэбагъэри, щыӀагъэри шъугухэм арыжъутъэлъых. 13 Зым зыр ерэщыӀ, зым зым гукъанэ горэ фыриӀэмэ, зэфэжъугъэгъу. Христос къызэрэшъуфигъэгъутъэм фэдэу, шъори зэфэжъугъэгъу. 14 ЗэкӀэмэ апэу шӀулъэгъуныгъэр шъугухэм арыжъугъэлъ. ШӀулъэгъуныгъэр ары зы шъущытынэуи, зишъыпкъагъэ щыкӀагъэ зи зимыӀэ цӀыф икъугъэхэу шъухъунэуи шъо зэкӀэ шъузэзыпхырэр. 15 Христос къышъуитырэ гупсэфыныгъэр шъугухэм тетыгъор ащыриӀэнэу орэхъу. Зы пкъым шъуфэдэу а гупсэфыныгъэр шъуиӀэнэу Тхьэр къышъоджагъ. Ежьыми щытхъу фэшъушӀ. 16 Христос игущыӀэхэр шъугухэм куоу арыжъугъэлъ зэпыт. ЗэхэшӀыкӀыныгъэмкӀэ зэкӀэ зым зым рерэгъашӀ ыкӀи гурерэгъаӀу. ШъугухэмкӀи Зиусхьаным щытхъу фэшъушӀэу, орэдхэри, тхьэщытхъу орэдхэри, Тхьэм Ыпсэ ЛъапӀэ шъугухэм къарилъхьэрэ орэдхэри Тхьэм пае къашъуӀох. 17 Зиусхьанэу Исус ыцӀэкӀэ Тхьэу Ты лъапӀэм щытхъу фэшъушӀызэ, сыд шъушӀэми, сыд къашъуӀоми, Исус ыцӀэкӀэ ар шъушӀэ.
ШӀошъхъуныгъэ зиӀэ унагъохэм язекӀуакӀ
18 Шъо, шъузхэр, шъуилӀыхэм шъуафэӀорышӀ, Зиусхьаныр зыгу илъ цӀыфхэм зэряфэшъуашэм фэдэу. 19 Шъо, лӀыхэр, шъуащыщэу хэти ишъуз шӀу ылъэгъун фае, фэмыпхъашэуи щытын фае. 20 Шъо, бынхэр, шъуятэ шъуянэхэм зэкӀэмкӀи шъуядэӀу, сыда пӀомэ ар Зиусхьаным игъоу елъытэ. 21 Шъо, тыхэри, шъуибынхэр шъумыгъэгубжых, агу мыкӀодыным пае. 22 Шъо, унэӀутхэр, мы дунаемкӀэ шъуитхьаматэхэм зэкӀэмкӀи шъуядэӀу. ШъуядэӀу сэӀо, ау агу къызэдгъэӀун шъуӀоу, анэхэмкӀэ гъунэ къызэрэшъулъафырэм ыдэжь изакъоп, ау Тхьэм ищынагъо шъугухэм зэрарылъым пае, сыдигъуи шъугу етыгъэу шъуафэлажь. 23 Сыд шъушӀэми, цӀыфхэм зэрафашъушӀэрэм фэдэу орэмыхъу, ау Зиусхьаным зэрэфашъушӀэрэм фэдэу, шъугу етыгъэу шъушӀэ, 24 сыда пӀомэ Зиусхьаным ицӀыфхэм афигъэхьазырыгъэ ӀэхьышӀур шъо Ӏофэу шъушӀагъэм пае, къызэрэшъулъысыщтыр шъошӀэшъ ары. Зиусхьанэу Христос ары шъузфэлажьэрэр. 25 Тхьэм бзэджагъэ зышӀэрэм ибзэджагъэ ригъэпщыныжьыщт; сыда пӀомэ Зиусхьаныр цӀыфхэм ятеплъэ емыплъэу, цӀыф пстэури изэфэдэхэу щытых.
1 Шъо, тхьаматэхэр, уашъомкӀэ шъори Зиусхьан зэрэшъуиӀэр шъошӀэшъ, шъуиунэӀутхэм шъузэрадэзекӀон фаем тетэуи зафэуи шъуадэзекӀу.
Аужырэ Ӏофхэу Паул шӀошъхъуныгъэ зиӀэхэу Колоссэ дэсхэм агуригъаӀохэрэр
2 Тхьэм шъуелъэӀу зэпыт. Тхьэм шъуелъэӀу зыхъукӀэ, шъумычъыеу шъусакъ, Тхьэм ищытхъуи шъушӀы. 3 Тхьэм тэри шъукъытфелъэӀу. Христос ехьылӀэгъэ Ӏоф шъэф хэр цӀыфмэ ядгъэӀушъуным фэшӀ, къэбарышӀум пае пчъэр тфыӀуихынэу Тхьэм шъуелъэӀу. А къэбарышӀур цӀыфхэм зэрязгъэӀугъэр ары хьапсым сычӀадзагъэу сызкӀычӀэсыр. 4 ЗэрэзгъэӀун фаем фэдэу, а къэбарышӀур цӀыфхэм нафэу язгъэӀушъунэу Тхьэм шъукъысфелъэӀу. 5 Игъор блъэшъумыгъэкӀэу, зэхэшӀыкӀыныгъэкӀэ шъущымыщ цӀыфхэм шъуадэзекӀу. 6 ГущыӀэ мыщыухэр ахэмылъхэу, шъуигущыӀэхэр орэгуапэх. Хэти пэгъокӀ зэрешъутын фаер зэжъугъашӀэ.
Аужырэ шӀуфэс гущыӀэхэр
7 ШӀу тлъэгъурэ тшы Тихик сикъэбархэр зэкӀэ шъуигъэшӀэщтых. Ар Зиусхьаным иӀофкӀэ шъыпкъагъэкӀэ ӀэпыӀэгъоу щыт ыкӀи къыддэлажьэ. 8 Мы Ӏоф дэдэу тиӀофхэр зытетхэр шъуигъэшӀэнри шъуигъэгушхонри ары Тихик шъуадэжь къызфэзгъакӀорэр. 9 Ащ игъусэу Онесимэу тызщыгутъышъунэу ыкӀи шӀу тлъэгъурэ тшыр къэсэгъакӀо. Ар шъуицӀыфхэм ащыщ. ИтӀум мыщ дэжьым къыщыхъугъэ Ӏоф пстэури шъуагъэшӀэщт. 10 Аристархэу хьапсым къыздычӀэсым шӀуфэс къышъуехыжьы. Варнавэ иунэкъощ Марк шӀуфэс къышъуехыжь. Марк ехьылӀагъэу унашъо сэ къышъуфэсшӀыгъ: Шъуадэжь къакӀомэ, дахэу ежъугъэблагъ. 11 Исусэу ИусткӀэ заджэхэрэми шӀуфэс къышъуехыжьы. Тхьэм и Тетыгъошхо пае къыздэлажьэрэ цӀыфхэм джуртхэу ахэтхэр ахэр ары ныӀэп. Ахэмэ инэу сагъэгушхуагъ. 12 Епафрасэу шъуицӀыфхэм ащыщэу, Христос Исус фэлажьэрэм шӀуфэс къышъуехыжьы. Тхьэм игъогу пытэу шъутыригъэтынэуи, сыд фэдэ лъэныкъокӀи ежь зыфэе Ӏоф пстэури зыфэдэхэр икъугъэу шъуигъэшӀэнхэуи Епафрас ишъыпкъэу къышъуфелъэӀу зэпыт. 13 Епафрас инэу шъо къызэрэшъуфэлажьэрэмкӀи, тшыхэу Лаодикиерэ Иераполрэ къалэхэм адэсхэм инэу зэрафэлажьэрэмкӀи сыришыхьат. 14 ТиӀазэ Лукэу шӀу тлъэгъурэмрэ Димасрэ шӀуфэс къышъуахыжьы. 15 Лаодикие дэс тшыхэми, Нимфани, ащ иунэ щызэрэӀугъоирэ чылыс зэӀукӀэм щыщхэми аӀапӀэ сфэшъуубытыжь. 16 Мы тхылъым шъузеджэрэ ужым, Лаодикие щыӀэ чылыс зэӀукӀэм щыщхэри мы тхылъым ерэджэх. Шъори Лаодикие щыӀэ чылыс зэӀукӀэм щыщхэм ситхылъэу къышъуфарагъэхьыщтым шъуедж. 17 «Зиусхьаным о ппшъэ къырилъхьэгъэ Ӏофыр гъэцакӀэ», шъуӀуи, Архипп сфешъуӀожь. 18 Сэ, Паул, мы шӀуфэс гущыӀэхэр сӀэкӀэ сэтхых. Мы Ӏэхъулъэхъоу къыстыралъхьагъэр зыщышъумыгъэгъупшэжь. Христос ынэшӀу шъо пстэуми къышъущерэф. Амин.
ШӀуфэс ехыныр
1 Сэ сы Паул. Силуанрэ Тимофейрэ сигъусэхэу, шъо, Тхьэу Ты лъапӀэмрэ Зиусхьанэу Исус Христосрэ зиехэу, Фессалоникэ къалэм щыӀэ чылыс зэӀукӀэм щыщхэм, мы тхылъыр къышъуфэсэтхы. Тхьэу Ты лъапӀэмрэ Зиусхьанэу Исус Христосрэ анэшӀу къышъущарэфи, гупсэфыныгъэ къышъуарэт.
Паул шӀошъхъуныгъэ зиӀэхэу Фессалоникэ дэсхэм апае Тхьэм щытхъу зэрэфишӀырэр
2 Шъо пстэуми апае Тхьэм щытхъу фэтэшӀы зэпыт, Тхьэм тызелъэӀукӀи, шъуигугъу тэшӀы. 3 Ти Тхьэу Ты лъапӀэм ыпашъхьэ шъуишӀошъхъуныгъэ шӀушӀагъэхэр шъуигъэшӀагъэхэу зэрэщытым игугъу щэтэшӀы зэпыт. ШъуишӀулъэгъуныгъэ инэу шъуигъэлэжьагъэу зэрэщытми, ти Зиусхьанэу Исус Христос шъущыгугъэу шъузэрэпаплъэрэм пае, теубытэныгъэ шъуиӀэ зэрэхъугъэми ягугъу Тхьэм ыпашъхьэ щэтэшӀы зэпыт. 4 Шъо, тшыхэу Тхьэм шӀу ылъэгъухэрэр, Тхьэм ибын шъухъунэу шъукъызэрэхихыгъэр тэшӀэ, 5 сыда пӀомэ къэбарышӀур къызэрышъодгъэӀугъэр гущыӀэхэм язакъоу арэп, кӀуачӀэкӀи Тхьэм Ыпсэ ЛъапӀэ илъэкӀыныгъэкӀи къэбарышӀур къышъодгъэӀугъэ нахь. Икъугъэуи къэбарышӀур шъушӀошъ дгъэхъугъэ. Тызышъухэтым, тишӀуагъэ шъодгъэкӀэу тызэрэзекӀощтыгъэр шъошӀэ. 6 Тэ тилъэужхэми Зиусхьаным илъэужхэми шъо шъуарыкӀощтыгъ. Сыда пӀомэ гузэжъогъушхо шъухэтыгъэ пэтми, Тхьэм Ыпсэ ЛъапӀэ гушӀуагъоу шъугухэм къарилъхьагъэмкӀэ Тхьэм игущыӀэхэр шъудагъэх. 7 Арэущтэу Македоние хэкумрэ Ахаие хэкумрэ арысхэу шӀошъхъуныгъэ зиӀэ цӀыф пстэуми шапхъэ шъуафэхъугъ. 8 Сыда пӀомэ Зиусхьаным ехьылӀэгъэ къэбарышӀур шъуадэжь къикӀэу зынэсыгъэхэр Македоние хэкумрэ Ахаие хэкумрэ язакъоп, ау ТхьэмкӀэ шӀошъхъуныгъэ шъуиӀэ зэрэхъугъэм икъэбар тыдэкӀи цӀыфхэм щашӀэ хъугъэ. Арышъ, а Ӏофым ехьылӀагъэу цӀыфхэм ащ нахьи нахьыбэ ятӀон ищыкӀагъэп, 9 сыда пӀомэ дахэу тызэрежъугъэблэгъагъэри, щыӀэныгъэ зиӀэ Тхьэ шъыпкъэм шъуфэлэжьэным пае, тхьэ нэпцӀхэм шъуакӀыб зэрафэжъугъэзагъэри ахэмэ къаӀотэжьы. 10 Тхьэм Ыкъоу лӀагъэхэм къахигъэтэджыкӀыжьыгъэр уашъом къызэрехыжьыщтым шъупэплъэ Исусэу Тхьэм игубжэу къэкӀощтым тыкъыӀэкӀэзыхыжьыщтыр ары.
Паул Фессалоникэ Ӏофэу щишӀагъэр
1 Шъуадэжь тыкъызэрэкӀуагъэм пкӀэ имыӀэу зэрэмыхъугъэр шъошӀэ. 2 ЗэрэшъушӀэрэм фэдэу, Филиппи къалэм тызыщэӀэм, цӀыфхэм къиныбэ щытагъэщэчыщтыгъэми, къыщытэхъоныщтыгъэхэми, шъуадэжь цӀыфыби къыщытпэуцущтыгъэхэми, Тхьэм тигъэгушхуи, ежь ыдэжь къикӀырэ къэбарышӀур шъодгъэӀугъ. 3 Сыда пӀомэ къэбарышӀур шъо шъушӀошъ хъунэу тыкъызкӀышъолъэӀурэр Тхьэм ар дгъэӀунэу тэ тпшъэ къызэрэрилъхьагъэр ары. Тыгъощагъэу щытэп, тыгухэри мыкъабзэу щытхэп, шъудгъэпцӀэнэуи тыпылъэп. 4 Ау Тхьэм а Ӏофыр дгъэцэкӀэнэу къытфигъэшъуаши, къэбарышӀур цӀыфмэ ядгъэӀунэу тэ тпшъэ къызэрэрилъхьагъэм пае, къэбарышӀур къэтэӀотэжьы. ЦӀыфмэ агу къызэдгъэӀунэу тыпылъэп, ау Тхьэу тыгухэм яшъыпкъагъэ зыгъэунэфырэм ыгу къызэдгъэӀуныр ары тызпылъыр. 5 ГъэшӀобзэ нэпцӀкӀэ шъо тыкъышъупэгъокӀэу зэрэщымытыгъэр шъошӀэ, шъуишӀуагъэ тэ къызэдгъэкӀынэу гъэбылъыгъэ гухэлъи тиӀагъэп. АщкӀэ Тхьэр тишыхьат. 6 Шъорми, нэмыкӀ цӀыфхэми щытхъу къызфядгъэшӀынэу тыпылъыгъэп. 7 Христос тыриапостолэу, тетыгъоу тиӀэмкӀи тыкъышъупэгъокӀын тлъэкӀыщтыгъэми, ныр исабыйхэм шӀукӀэ зэрадэзекӀорэм фэдэу, тэри шӀукӀэ тыкъыжъудэзекӀощтыгъ. 8 Ащ фэдизэу шӀу шъутлъэгъугъэти, Тхьэм ыдэжь къикӀырэ къэбарышӀур шъодгъэӀун закъор арэп тызфэягъэр, тпсэ къышъуфэттынэуи тыфэягъ. Ащ фэдизэу шӀу шъутлъэгъугъ. 9 Тшыхэр, зыдгъэулэу зэрэщытыгъэри, къин тлъэгъоу тылажьэу зэрэщытыгъэри шъугу къэжъугъэкӀыжь. Шъуащыщэу зыми хьылъэ тыфэмыхъуным пае, Тхьэм ыдэжь къикӀырэ къэбарышӀур къызышъотэгъэӀум, чэщи мафи тылажьэщтыгъ. 10 Зыми тызэригъэмысэн зи щымыӀэу, гукъэбзагъэкӀи, шъыпкъагъэкӀи, шъо, шӀошъхъуныгъэ зиӀэхэм, тышъухэтэу зэрэщытыгъэмкӀэ шъутишыхьат, Тхьэри тишыхьат. 11 Тыр ибын зэрэдэзекӀорэм фэдэу, шъо шъуащыщэу хэти тыдэзекӀоу зэрэщытыгъэр шъошӀэ. 12 Тхьэу зитеты гъошхо ыӀэчӀэгъ шъучӀэхьанэуи, зищытхъушхокӀэ Ӏахьэ шъуиӀэнэуи къышъоджагъэм шъуфэшъуашэу шъузекӀонэу къыжъугурыдгъэӀуагъ, шъудгъэгушхуагъ ыкӀи тышъолъэӀугъ. 13 Тхьэм щытхъу фэтэшӀы зэпыт. Сыда пӀомэ Тхьэм игущыӀэхэр зышъотэгъэӀухэм, цӀыфхэм ягущыӀэхэм афэмыдэхэу, ау Тхьэм игущыӀэхэм афэдэхэу шъудагъэх, Тхьэм игущыӀэхэуи шъыпкъэмкӀэ щытых ахэр. А гущыӀэхэр шъо шӀошъхъуныгъэ зиӀэхэм шъугухэм арылъхэу, Ӏоф щашӀэ. 14 Христос Исус зыгу илъэу, Иудей хэкум щыӀэ чылыс зэӀукӀэхэм ащыщ цӀыфхэм ялъэужхэм шъуатехьагъ. Сыда пӀомэ джуртхэм ахэмэ къин зэрарагъэщэчыщтыгъэм фэдэу, шъулъэпкъ щыщхэм шъо къин шъуагъэщэчыщтыгъ. 15 Джуртхэм Зиусхьанэу Исусрэ пегъымбархэмрэ аукӀыгъэх, тэри къин тагъэщэчыгъ. Ахэр Тхьэм ыгу зэмыӀурэ цӀыфых, цӀыф пстэуми япыих. 16 Хымэ лъэпкъхэр мыкӀодхэу, Тхьэм къыгъэнэжьынхэм пае, къэбарышӀур зятэгъэӀум, къытпэуцунхэу пылъыгъэх. Арэущтэу япсэкӀодхэм япчъагъэ рагъэкъоу, зэтыралъхьахэ зэпыт. Ау Тхьэм игубж аужыпкъэм къатефагъ.
Паул шӀошъхъуныгъэ зиӀэхэу Фессалоникэ дэсхэр джыри зэ ылъэгъужьынхэу зэрэфэягъэр
17 Тыгурэ тпсэрэкӀэ шъуадэжь тыщыӀэу, тпкъыкӀэ зы заулэрэ тыкъызыжъубгъодэкӀыжьым, тшыхэр, тыкъышъуфалӀэу шъузэдгъэлъэгъуным инэу тыпылъыгъ. 18 Шъуадэжь тыкъэкӀонэу тыфэягъ. Сэ, Паул, мызэу мытӀоу сыкъэкӀонэу сыпылъыгъ, ау шэйтаным къыддигъэхъугъэп. 19 ТызыгъэгушӀорэри, тиӀэхьышӀу тыпаплъэзэ, тиӀэ зэрэхъущтым тыщызыгъэгугъырэри шъорыба? ТекӀоныгъэр къызэрэтхьыгъэр къэзыгъэлъагъорэ танджэу, Зиусхьанэу Исус къызыкӀожьыщт мафэм дэжь ежьым ыпашъхьэ щытиӀэу тызэрыпэгэщтыр шъорыба? 20 Шъыпкъэ, тищытхъуи, тигушӀуагъуи къызхэкӀырэр шъоры.
1 Ащ нахьыбэ тфэмыщэчыжьэу, тизакъоу Афинэ къалэм тыкъыдэнэнэу тетыубытагъ. 23 Тимофей тэ тшэу щыт, Тхьэм фэлажьэу, Христос ехьылӀэгъэ къэбарышӀур цӀыфхэм ягъэӀун ӀофымкӀи къыддэлажьэ, Ар шъуадэжь къэдгъэкӀуагъ. Ар къызфэзгъэкӀуагъэр мы гузэжъогъухэм шъуащыщэу хэти гъогу занкӀэм тырамыгъэкӀыным пае, шъугухэр ыгъэпытэнхэуи, шъуишӀошъхъуныгъэ шъутетынэу шъуигъэгушхонэуи ары. Ащ фэдэ гузэжъогъухэм тахэфэн фаеу зэрэщытыр шъо шъошӀэ. 4 Шъуадэжь тызыщэӀэм, гузэжъогъу тызэрэхэфэщтыр шъотӀогъагъэ. Шъо зэрэшъушӀэрэм фэдэу, арэущтэуи хъугъэ. 5 Арышъ, ащ нахьыбэ сфэмыщэчыжьэу, шъуишӀошъхъуныгъэ зытетыр зэзгъэшӀэнэу Тимофей шъуадэжь къэзгъэкӀуагъ. Шэйтанэу цӀыфхэм псэкӀод языгъэшӀэнэу ыуж итым зыгорэкӀэ шъудихьыхыгъэу, тиӀоф хьаулыеу хъугъэкӀэ сыщынэщтыгъ. 6 Джы Тимофей шъуадэжь къикӀыжьи, тадэжь къэкӀожьи, шъуишӀошъхъуныгъэрэ шъуишӀулъэгъуныгъэрэ якъэбар дахэхэр къытфихьыгъэх. ШӀукӀэ шъугу тэ тыкъызэрэкӀыжь зэпытри, тэ шъо шъутлъэгъунэу тызэрэкӀэхъопсырэм фэдэу, шъори тэ тышъулъэгъунэу шъузэрэкӀэхъопсырэри ащ къытиӀотэжьыгъ. 7 Тшыхэр, къин пстэуми гузэжъогъу пстэуми тахэт пэтми, шъуишӀошъхъуныгъэ икъэбаркӀэ тыжъугъэгушхуагъ. 8 Джы Зиусхьаным игъогу пытэу шъузэрэтетым пае, шъыпкъэу тэпсэу. 9 Шъощ пае гушӀуагъоу Тхьэм ыпашъхьэ щытиӀэ пстэуми ипэгъокӀ фэдэу, икъунэу шъощ пае сыдэущтэу Тхьэм щытхъу фэтшӀына? 10 Шъутлъэгъужьынэуи, шъуишӀошъхъуныгъэ ищыкӀагъэхэр идгъэкъужьынхэуи чэщи мафи тыгу етыгъэу Тхьэм телъэӀу. 11 Ежь ти Тхьэу Тятэ лъапӀэрэ ти Зиусхьанэу Исус Христорэ шъуадэжь тыкъэкӀожьынэу гъогу къытфызэӀуарэх. 12 Тэ шӀу шъузэрэтлъэгъурэм фэдэу, Зиусхьаным нахьышӀужьэу шъузэригъэлъэгъужьы зэпытынэуи цӀыф пстэу ри шӀу шъуигъэлъэгъужь зэпытынхэуи орэхъу. 13 Ти Зиусхьанэу Исус Христос ицӀыф лъэпӀэ пстэури игъусэхэу мы дунаем къызыкӀожьыкӀэ, зыми шъузэригъэмысэн зи щымыӀэу, гукъэбзагъэкӀэ Тхьэу Тятэ лъапӀэ ыпашъхьэ шъуиуцоным пае, шъугухэр ерэгъэпытэх.
ЗекӀуакӀэу Тхьэм ыгу зэӀурэр
1 Аужыпкъэм, тшыхэр, мыр шъосэӀо. Тхьэм ыгу къышъоӀуным пае, шъузэрэзекӀон фаер шъодгъэшӀагъ. Арэущтэуи шъозекӀо. Арэущтэу шъузекӀо зэпытынэу Исус ыцӀэкӀэ тышъолъэӀу ыкӀи къышъуфэтэгъэпытэ. 2 Зиусхьанэу Исус ыцӀэкӀэ унашъохэу тэ къышъуфэтшӀыгъэхэр шъошӀэх. 3 Тхьэр зыфаер гукъэбзагъэкӀэ шъузэрэпсэунри, зинэ шӀэным зызэрэщышъудзыенри ары. 4 , 5 Ащ нэмыкӀэуи Тхьэр зыфаер ежьыр зымышӀэрэ хымэ лъэпкъхэм ащыщ цӀыфхэу зыгукӀэ зыкӀэхъопсырэ зинэ мыхъун Ӏофхэм зязытхэрэм шъуафэмыдэу, гукъэбзагъэкӀэ щытхъу хэлъэу, шъуащыщэу хэти ежь ыпкъ тетыгъо зэрэфыриӀэщтыр ары. 6 ЕтӀанэ а ӀофымкӀэ зыми ыш мыхъун римышӀэнэу е къымыгъэпцӀэнэу Тхьэр фай. КъызэрэшъотӀуагъэм ыкӀи къызэрэжъугурыдгъэӀуагъэм фэдэу, ащ фэдэ бзэджагъэ зышӀэрэ цӀыф пстэуми яфэшъуашэ Зиусхьаным аригъэпщыныжьыщт. 7 Сыда пӀомэ тыгухэр мыкъабзэу тыпсэунэу арэп Тхьэр къызфытэджагъэр, тыгухэр къабзэу тыпсэунэу ары нахь. 8 Арышъ, мы унашъор зымыдэрэм, цӀыфыр арэп ымыдэрэр, Тхьэу зы Псэ ЛъапӀэ тыгухэм къарызылъхьэрэр ары нахь. 9 Зэкъошхэм афэдэу, шӀу шъузэрэлъэгъун зэрэфаер къышъуфэстхынэу ищыкӀагъэп. ШӀу шъузэрэлъэгъунэу Тхьэм шъуигъэшӀагъэ. 10 Македоние хэкум зэкӀэ ис шы пстэури шӀу шъолъэгъух. Ахэр нахьыбэжьэу шӀу шъулъэгъу зэпытынхэу сышъолъэӀу. 11 Ӏасэу шъупсэоу, нэмыкӀ цӀыфхэм яӀоф шъуиӀоф хэшъумылъхьэу, шъуӀэхэмкӀэ шъулажьэу шъузэрэпсэущтым ыуж шъуит, унашъо къызэрэшъуфэтшӀыгъэм фэдэу. 12 Арэущтэу къышъущымыщ цӀыфхэм апашъхьэ хабзэм тетэу шъупсэущт, щыкӀагъи зи шъуиӀэщтэп.
Зиусхьанэу Исус мы дунаем къызэрэкӀожьыщтыр
13 Тшыхэр, лӀагъэхэм яӀоф зытетыр шъумышӀэу шъукъыдгъэнэнэу тыфаеп, нэмыкӀ цӀыфхэу гугъапӀэ зимыӀэхэм агу къызэреорэм фэдэу, шъугу къемыоным пае. 14 Исус лӀи, лӀагъэхэм къызэрахэтэджыкӀыжьыгъэмкӀэ шӀошъхъуныгъэ тиӀ. Арышъ, ИсускӀэ шӀошъхъуныгъэ зиӀэхэу лӀагъэхэр Исус игъусэхэу Тхьэм ежьым ыдэжь къызэрищэщтхэр тшӀошъ мэхъу. 15 Зиусхьаным игущыӀэхэм атетэу мыр къышъотэӀо: Зиусхьаныр дунаем къызыкӀожькӀэ, тэ, псаоу къэнагъэхэр, лӀагъэхэм апэ тишъыщтэп. 16 Тхьэм иунашъо хъоу, апэрэ мэлэӀичым ымакъэрэ Тхьэм ыбжъэмыешхо ымакъэрэ къызыӀухэкӀэ, ежь Зиусхьаныр уашъом къехыжьыщт. КъызехыжькӀэ, ХристоскӀэ шӀошъхъуныгъэ зиӀэхэу лӀагъэхэр апэу къэтэджыжьыщтых. 17 ЕтӀанэ тэ, псаоу къэнагъэхэр, ахэмэ тырягъусэу Тхьэм тыдихьыещт, ошъуапщэхэм тахэтэу, жьыбгъэм хэтэу Зиусхьаным тыщыпэгъокӀыным пае. ЕтӀанэ Зиусхьаным тыригъусэ зэпытыщт. 18 Мы гущыӀэхэмкӀэ шъузэрэгъэгушху.
1 Тшыхэр, а Ӏофхэр къызыхъущт лъэхъанэхэми сыхьатхэми яхьылӀагъэу къышъуфэттхынэу ищыкӀагъэп. 2 ТыгъуакӀор чэщым цӀыфхэм амышӀахэу къызэрэкӀорэм фэдэу, Зиусхьаныр дунаем къызыкӀожьыщт мафэм дэжь къызэрэкӀощтыр шъошӀэ. 3 «Джы гупсэфыгъо тиӀ, щынагъо зи щыӀэп», цӀыфхэм заӀокӀэ, етӀанэ амышӀахэу къинышхо къафэкӀощт, шъуз лъэрмыхьэм къинышхо къызэрэфакӀорэм фэдэу. Ащ хэкӀыжьыпӀэ щыӀэщтэп. 4 Ау шъо, тшыхэр, шӀункӀыгъэм шъухэтэп. Арышъ, а мафэр тыгъуакӀом фэдэу шъумышӀахэу къышъуфэкӀощтэп. 5 Шъо зэкӀэри нэфынэм шъурибын, мафэми шъу рибын. Тэ чэщыми шӀункӀыгъэми ябынхэм тащыщэп. 6 Арышъ, адрэ цӀыфхэр зэрэчъыехэрэм фэдэу, тычъые хъущтэп, ау тымычъыеу тысакъын фае, зыщыӀэныгъи тиӀэн фае. 7 Сыда пӀомэ чэщыр ары цӀыфхэу чъыехэрэр зычъыехэрэр, чэщыри ары ешъохэрэр зешъохэрэр. 8 Ау тэ мафэм ибынхэу тыщытышъ, зыщыӀэныгъэ зитэжъугъэгъаӀ. ШӀошъхъуныгъэмрэ шӀулъэгъуныгъэмрэ ашъоджанэм фэдэу зыщытэжъугъалъ, тымыкӀодэу Тхьэм тыкъызэригъэнэжьыщтыми тыщыгугъэу, тызэрэпаплъэрэр танджэм фэдэу къэтэжъугъэӀэт. 9 Сыда пӀомэ Тхьэм игубж къыттыригъэфэнэу арэп ибын тыхъунэу тызфигъэнэфагъэр, ти Зиусхьанэу Исус Христос тымыкӀодэу тыкъыригъэгъэнэжьынэу ары нахь. 10 Тэщ пае Исус лӀагъэ, къызыкӀожькӀэ тыпсэуми, тылӀагъэми ежьым тыригъусэу тыпсэуным пае. 11 Арышъ, шъузэрэгъэгушху, зым адрэми нахь лъэкӀыныгъэ гурэ псэрэкӀэ рерэгъэгъот.
Аужырэ Ӏофхэу Паул шӀошъхъуныгъэ зиӀэхэу Фессалоникэ дэсхэм агуригъаӀохэрэр
12 Тшыхэр, къышъуфэлажьэхэу, Зиусхьаным иӀофхэмкӀэ тетыгъо къышъуфызиӀэ цӀыфхэу къыжъугурызыгъаӀохэрэм лъытэныгъэ афэшъушӀынэу тышъолъэӀу. 13 Ахэмэ Ӏофэу ашӀэрэм пае лъытэныгъэшхо афэшъушӀ ыкӀи шӀу шъулъэгъух. ШъузэгурыӀу. 14 Тшыхэр, тышъолъэӀу, лэжьэнхэу зымыдэхэрэм агурыжъугъаӀу, зыгу кӀодыгъэхэр жъугъэгушхох, ӀэпыӀэгъу зищыкӀагъэхэми шъуадэӀэпыӀ, щыӀагъэкӀэ цӀыф пстэуми шъуапэгъокӀ. 15 Хэти зыгорэм ибзэджагъэ бзэджагъэкӀэ пэрэмыгъокӀыжь. Ау шъо шӀу зэрэзэфэшъушӀэщтым шъупылъ, цӀыф пстэуми шӀу зэрафэшъушӀэщтыми ыуж шъуит зэпыт. 16 Сыдигъуи шъугушӀу. 17 Зэпымыоу Тхьэм шъуелъэӀу. 18 Сыд къышъохъулӀэми, Тхьэм щытхъу фэшъушӀ, сыда пӀомэ шъо Исус Христос зыгу илъхэм арэущтэу шъузэрэзекӀорэр ары Тхьэр зыфаер. 19 Тхьэм ыПсэ ЛъапӀэ имашӀо шъумыгъэкӀуасэ. 20 Тхьэм ежь игущыӀэхэр цӀыфхэм агухэм къарилъхьэхэу, къызэраригъаӀохэрэр пхъэтэпэмыхь шъумышӀых. 21 Ӏоф пстэуми яшъыпкъагъэ жъугъэунэфы, дэгъуми шъутет. 22 Сыд фэдэ бзэджагъэми зыщышъудзый! 23 Гупсэфыныгъэ къытэзытырэ Тхьэм шъугухэр икъукӀэ ерэгъэкъэбзэжь, иягъи къышъомыкӀэу шъутуи, шъупси, шъупкъи къерэухъум, Зиусхьанэу Исус Христос дунаем къызыкӀожьыкӀэ, зыми шъузэригъэмысэн зи щымыӀэным пае. 24 Тхьэу къышъуаджэрэр шъыпкъэ, ащи а Ӏофыр ыгъэцэкӀэщт. 25 Тшыхэр, Тхьэм шъукъытфелъэӀу. 26 Тшы пстэуми гукъэбзагъэкӀэ ӀаплӀ яшъущэкӀэу шӀуфэс сфяшъухыжь. 27 Мы тхылъым шъушы пстэуми шъукъафеджэнэу Зиусхьаным ыцӀэкӀэ унашъо къышъуфэсэшӀы. 28 Ти Зиусхьанэу Исус Христос ынэшӀу къышъущерэф. Амин.
ШӀуфэс ехыныр
1 Сэ сы Паул. Шъо, Тхьэу Тятэ лъапӀэрэ Зиусхьанэу Исус Христосрэ зиехэу, Фессалоникэ къалэм щыӀэ чылыс зэӀукӀэм щыщхэм, Силуанрэ Тимофейрэ сигъусэхэу мы тхылъыр къышъуфэсэтхы. 2 Тхьэу Тятэ лъапӀэрэ Зиусхьанэу Исус Христосрэ анэшӀу къышъущарэфи, гупсэфыныгъэ къышъуарэт.
Тхьэм зафэу цӀыфхэм хьыкум къызэратришӀыхьащтыр
3 Тшыхэр, шъощ пае Тхьэм щытхъу фэтшӀы зэпытын фае. Ари тэрэз, сыда пӀомэ шъуишӀошъхъуныгъэ хэхъо зэпыт, пгъуащыщэу хэти адрэм шӀулъэгъуныгъэу фыриӀэми хэхъо зэпыт. 4 Арышъ, цӀыфхэм сыд фэдиз къин шъуагъэщэчми, сыд фэдиз гузэжъогъу шъухэтми, теубытэныгъэрэ шӀошъхъуныгъэрэ зэрэшъуиӀэм пае, Тхьэм ичылыс зэӀукӀэхэм адэжь шъуищытхъу щэтэшӀы. 5 А Ӏоф пстэуми Тхьэм ихьыкум зафэу зэришӀырэр къагъэшъыпкъэ, сыда пӀомэ теубытэныгъэ шъуиӀэу зэрэщытым пае, Тхьэм и Тетыгъошхоу къин зыфэшъушэчырэм ыӀэчӀэгъ шъучӀэхьанэу къышъуфигъэшъошэщт. 6 ЦӀыфхэу шъо гузэжъогъу шъухэзыдзэхэрэр гузэжъогъум хидзэжьынхэу Тхьэм зафэу елъытэ. 7 Шъо, гузэжъогъум хэтхэр, шъутигъусэу гупсэфыныгъэ къышъуитыжьынри Тхьэм зафэу елъытэ. Ар зыхъущтыр Зиусхьанэу Исус уашъом къехэу имэлэӀичхэу лъэкӀыныгъэ зиӀэхэр игъусэхэу къызылъэгъожьыщт мафэр ары. 8 Тхьэр зымышӀэрэ цГыфхэу, ти Зиусхьанэу Исус ехьылӀэгъэ къэбарышӀум емыдэӀухэрэм ябзэджагъэ аригъэпщыныжьыным пае, мэшӀошхоу плъыгъэр къыздихьызэ, Зиусхьанэу Исус дунаем къэкӀожьыщт. 9 А цӀыфхэр Зиусхьаным ынапэрэ, ежь илъэкӀыныгъэшхоу щытхъушхо зиӀэмрэ апэчыжьэхэу, мыухыжьын кӀодыныгъэр Ӏахьэу Тхьэм атырилъхьащт. 10 Ар къызыхъущтыр Зиусхьаныр дунаем къызыкӀожьыщт мафэр ары. А мафэм ицӀыф лъапӀэхэм ежьым щытхъу къыфашӀыщт, ежьымкӀэ шӀошъхъуныгъэ зиӀэ хъугъэ цӀыфхэми зэкӀэ ежьыр агъэшӀэгъощт. Шъори а цӀыфхэм шъуахэтыщт, сыда пӀомэ тишыхьатныгъэ шъушӀошъ хъугъэшъ ары. 11 Джары шъощ пае зэпымыоу Тхьэм тызкӀелъэӀурэр. Тхьэр къызэрэшъоджагъэм тетэу, ибынхэу шъущытынэу къышъуфигъэшъошэнэу телъэӀу. ИлъэкӀыныгъэшхокӀи шӀугъэу шъугухэм арылъ пстэури шъуигъэгъэцэкӀэнэуи, шъуишӀошъхъуныгъэ къыхэкӀырэ ӀофышӀу пстэури рышъуигъэгъэкъунэуи Тхьэм телъэӀу. 12 Арэущтэу ти Зиусхьанэу Исус ыцӀэ цӀыфхэм щытхъу фяжъугъэшӀыщт, Зиусхьаныр шъугухэм зэрарылъым паий, шъори щытхъу шъуиӀэ хъущт. Ти Тхьэрэ ти Зиусхьанэу Исус Христосрэ анэшӀу къызэрэшъущафэрэм тетэу арэущтэу хъущт.
Бзэджэныгъэм ицӀыф
1 Ти Зиусхьанэу Исус Христос дунаем къызэрэкӀожьыщтымрэ ежьым ыдэжь тызэрэщызэрэугъоижьыщтымрэ яхьылӀагъэу, тшыхэр, мырэущтэу тышъолъэӀу: 2 Христос дунаем къызыкӀожьыщт мафэр къэсыгъэу ыӀозэ, цӀыф горэм ежь ыгу Тхьэм Ыпсэ ЛъапӀэ къырилъхьагъэу пцӀыкӀэ къыӀоми, е цӀыфхэм а мафэр къэсыгъэу аӀоми, е тэ тхылъкӀэ арэущтэу ттхыгъэу цӀыфхэм пцӀыкӀэ аӀоми, а Ӏофым псынкӀэу зешъумыгъэгъэгумэкӀ ыкӀи зешъумыгъэгъэщын. 3 Хэт щыщми зыкӀи зыкъешъумыгъэгъапцӀ. ЦӀыфхэм акӀыб Тхьэм фагъазэным ыпэкӀэ, бзэджэныгъэм ицӀыфэу Тхьэм ыгъэкӀодыжьыщтыр къэлъэгъоными ыпэкӀэ, а мафэр къэсыщтэп. 4 А цӀыфыр тхьэхэу зыфаӀохэрэми, цӀыфхэм агъэлъапӀэрэ Ӏоф пстэуми апэуцужьыщт, ахэмэ пстэуми анахьи нахь инэу зилъытэжьыщт. Тхьэм иунэшхуи итӀысхьанышъ, «Сэ сы Тхь», ыӀощт. 5 Шъуадэжь сызыщэӀэм, мы Ӏофхэр къызэрэшъосӀуагъэхэр шъугу къэкӀыжьырэба? 6 Бзэджэныгъэм ицӀыф джы гъогу езымытырэри шъо шъошӀэ. Ау игъор къызыскӀэ, бзэджэныгъэм ицӀыф къэлъэгъощт. 7 Сыда пӀомэ бзэджэныгъэм илъэкӀыныгъэ шъэф джы Ӏоф ешӀэ. Ау джы нэсы бзэджэныгъэм ицӀыф гъогу езымытыгъэр ыпэ рапшӀэу ӀукӀыжьын фае. 8 ЕтӀанэ бзэджэныгъэм ицӀыф къэлъэгъощт. Ау Зиусхьанэу Исус шытхъушхо иӀэу къызыкӀожьыкӀэ, ыжэкӀэ къыщэрэ жьымкӀэ ар ыукӀыжьыщт ыкӀи ыгъэкӀодыжьыпэщт. 9 Бзэджэныгъэм ицӀыф къызыкӀокӀэ, шэйтаным илъэкӀыныгъэ иӀэу къэкӀощт. ЛъэкӀыныгъэ Ӏофышхо нэпцӀхэри зэкӀэ, нэшэнэ гъэшӀэгъонышхо нэпцӀхэри, Ӏофышхо гъэшӀэгъон нэпцӀхэри цӀыфхэм аригъэлъэгъущтых. 10 Сыд щыщырэ бзэджэныгъэкӀи цӀыфхэу кӀодыпӀэм игъогу тетхэр ыгъэпцӀэщтых. Ахэр зыкӀэкӀодхэрэр мыкӀодхэу зыкъагъэнэжьыным пае, шъыпкъагъэр шӀу алъэгъунэу зэрамыдагъэр ары. 11 Арышъ, пцӀыр ашӀошъ хъуным пае, Тхьэм ахэмэ ягупшысакӀэ зэрегъэкӀокӀы. 12 Арэущтэу шъыпкъагъэр зышӀошъ мыхъугъэхэу бзэджагъэм зыгу еӀурэ цӀыф пстэури Тхьэм ыгъэмысэщтых.
ШъумыкӀодэу шъукъигъэнэжьыным пае, Тхьэм шъукъыхихыгъ
13 Ау шъо, тшыхэу Зиусхьаным шӀу ылъэгъухэрэр, шъощ пае Тхьэм щытхъу фэтшӀы зэпытын фае, сыда пӀомэ ублапӀэм щегъэжьагъэу шъумыкӀодэу шъукъигъэнэжьыным пае, Тхьэм шъукъыхихыгъ. Тхьэм ежь Ыпсэ ЛъапӀэу шъугухэр зыгъэкъэбзэжьырэм илъэкӀыныгъэкӀи, шъыпкъагъэр шъушӀошъ зэрэхъугъэмкӀи шъумыкӀодэу шъукъегъэнэжьы. 14 Тхьэр ибынхэм ащыщ шъухъунэу къызэрэшъоджагъэр къэбарышӀоу шъодгъэӀугъэр ары. Арэущтэу ти Зиусхьанэу Исус Христос ищытхъушхокӀэ Ӏахьэ къышъулъысыщт. 15 Арышъ, тшыхэр, шъукъызэкӀэмыкӀожьэу, жэкӀи тхылъымкӀи шъодгъэшӀэгъэ Ӏофхэм пытэу шъуатетэу гъогум шъурыкӀон фае. 16,17 Тхьэу Тятэ лъапӀэу шӀу тызылъэгъугъэу, зынэшӀу щыфэныгъэмкӀэ сыдигъуи тызыгъэгушхорэм шӀум тыщегъэгугъы. Ежьымрэ ти Зиусхьанэу Исус Христосрэ сыд щыщырэ шӀугъэ жъугъэцэкӀэным ыкӀи шъуӀоным пае шъуарэгъэгушху, шъугухэри арэгъэпытэхэ.
Тхьэм шъукъытфелъэӀу
1 Аужыпкъэм, тшыхэр, шъуадэжь зэрэщыхъугъэм фэдэу, Зиусхьаным икъэбарышӀу цӀыфхэм тыдэкӀи анэсынэуи, цӀыфхэм а къэбарышӀум щытхъу фашӀынэуи Тхьэм шъуелъэӀу. 2 ЦӀыф бзэджэнаджэхэм тэ тащиухъумэнэу Тхьэм шъуелъэӀу, сыда пӀомэ зэкӀэ цӀыфхэм шӀошъхъуныгъэ яӀэу щытэп. 3 Ау Зиусхьаныр шъыпкъэ. Ащ шъугухэр ыгъэпытэщтых, шэйтанми шъущиухъумэщт. 4 Тиунашъохэр зэрэжъугъэцакӀэхэрэмкӀи зэрэжъугъэцэкӀэщтхэмкӀи Зиусхьаным тыкъышъущегъэгугъы. 5 Тхьэм ишӀулъэгъуныгъэрэ Христос итеубытэныгъэрэ Зиусхьаным шъугухэр аферэгъазэх.
ШӀошъхъуныгъэ зиӀэхэр мылажьэхэ хъущтэп
6 Тшыхэр, хэтрэ шэу лэжьэнэу зымыдэу, къышъуфэдгъэнэгъэ унашъохэм атемытым зыщышъудзыенэу ти Зиусхьанэу Исус Христос ыцӀэкӀэ унашъо къышъуфэтэшӀы. 7 Шъоршъорэу шъошӀэ тилъэужхэм шъузэрарыкӀон фаер. Шъуадэжь тызыщэӀэм, тымылажьэу тыщытыгъэп. 8 ЗыдгъэхьакӀэу зыми ихьалыгъуи тшхыгъэп. Ау тыулэоу ыкӀи лъэшэу тылажьэу, шъуащыщэу зыми хьылъэ тыфэмыхъуным пае, чэщи мафи Ӏоф тшӀэщтыгъ. 9 ЗышъодгъэхьакӀэнэу фитыныгъэ тимыӀэу щытыгъэп, ау тилъэужхэм шъуарыкӀоным пае, шапхъэу тышъуфэхъунэу тызэрэфэягъэр ары тызкӀэлэжьагъэр. 10 Шъуадэжь тызыщэӀэм, мы унашъор къышъуфэтшӀыгъ: лэжьэнэу зымыдэрэр орэмышхэ. 11 Сыда пӀомэ шъуащыщхэу заулэмэ лэжьэнхэкӀэ амыдэу зэхэтхыгъэ. Ахэмэ Ӏоф зи ашӀэрэп, ау яӀоф зыхэмылъым пылъых. 12 Ащ фэдэ цӀыфхэр самбырэу лэжьэнхэу, ежь яхьалыгъуи ашхынэу ти Зиусхьанэу Исус Христос ыцӀэкӀэ унашъо афэтэшӀы ыкӀи тялъэӀу. 13 Шъо, тшыхэр, мыр шъотэӀо, шъуемызэщэу шӀушӀэным шъупылъ. 14 ЦӀыф горэ мы тхылъым итхэу шъуатӀохэрэм ямыдэӀумэ, а цӀыфым гу лъышъут, жъугъэукӀытэжьыным паий, ащ гъусэ шъуфэмыхъу. 15 Ау шъуипыим фэдэу шъуемыплъ, шъушы фэдэу гурыжъугъаӀо нахь.
Аужырэ шӀуфэс гущыӀэхэр
16 ЗэкӀэ гупсэфыныгъэ къытэзытырэ Зиусхьаным зэкӀэмкӀи сыдигъуи гупсэфыныгъэ къышъуерэт. Зиусхьаныр шъо пстэуми шъуерэгъусэ. 17 Сэ, Паул, сэ сӀэкӀэ мы шӀуфэс гущыӀэхэр къышъуфэсэтхых. Мары къышъуфэстхырэр: 18 ТиЗиусхьанэу Исус Христос ынэшӀу шъо пстэуми къышъущерэф. Амин.
ӀШуфэс ехыныр
1 Сэ сы Паул. ТымыкӀодэу тыкъэзыгъэнэжьырэ Тхьэмрэ Зиусхьанэу Исус Христосэу тызщыгугъырэмрэ яунашъокӀэ Исус Христос иапостолэу сыхъугъэ. 20 Тимофееу, шӀошъхъуныгъэ зэрэуиӀэм пае, скъо шъыпкъэм фэдэу хъугъэм, мы тхылъыр къыпфэсэтхы. Тхьэу Ты лъапӀэмрэ Христос Исусэу ти Зиусхьанрэ анэшӀу къыпщарэфи, гукӀэгъуныгъэ къыпфарэшӀи, гупсэфыныгъэ къыуарэт.
Дин гъэсэкӀо нэпцӀхэр
3,4 Сэ Македоние хэкум сыкӀо зэхъум, сыкъызэрэолъэӀугъэм фэдэу, цӀыфхэм Ӏоф пхэнджхэр арамыгъэшӀэн хэуи, тхыдэжъхэми, гъунэ зимыӀэ унэгъо лъэпкъ зэтекӀхэми апымылъынхэуи цӀыф заулэмэ унашъо афэпшӀыным пае, Ефес къалэм къыдан. Ащ фэдэ Ӏофхэм къарыкӀырэр зэнэкъокъуныгъэхэр ары. Тхьэм игухэлъэу шӀошъхъуныгъэмкӀэ зиӀоф зыгъэцакӀэрэм а Ӏофхэм яшӀуагъэ рагъэкӀырэп. 5 Мы унашъор зыфэтшӀырэр мары: Гу къабзэу мыхъун зи зыдэзымышӀэжьырэмрэ шӀошъхъуныгъэ шъыпкъэмрэ къарыкӀырэ шӀулъэгъуныгъэр тиӀэ хъуныр ары. 6 ЦӀыф заулэхэр ахэмэ атекӀыгъэхэу, пкӀэ зимыӀэ зэнэкъокъуныгъэхэм зафагъэзагъ. 7 Тэурат егъэджэкӀо пащэхэу залъытэ пэтми, къаӀохэрэри гушхоныгъэкӀэ зытегущыӀэрэ Ӏофхэри ашӀэхэрэп. 8 Хабзэр зэрэдэгъур тэшӀэ, цӀыфыр хабзэм зэрэфыщытын фаем тетэу фыщытмэ. 9 Шъыпкъагъэ зиӀэ цӀыфхэм хабзэр зэрафамыгъэуцутъэр тэшӀэ, ау хабзэр зыфагъэуцугъэхэр мыхэр арых: хабзэм текӀыхэрэри, хабзэм пэуцухэрэри, Тхьэм ищынагъо зыгу имылъхэри, псэкӀод зышӀэхэрэри, зыгу мыкъабзэхэри, Тхьэр зымыгъэлъапӀэхэрэри, ятияни зыукӀыхэрэри, цӀыф укӀакӀохэри, 10,11 зинэ зышӀэхэрэри, хъулъфыгъэхэм шъузпӀалъэу якӀуалӀэхэрэри, цӀыфыр зыщэхэрэри, пцӀы зыусхэрэри, шыхьат нэпцӀ хъухэрэри, хэт щыщми къэбарышӀум тигъашӀэрэ Ӏофхэу тызщыгугъышъунэу щытхэм атемытхэрэри. А къэбарышӀоу щытхъушхо зиӀэр згъэӀунэу Тхьэу щытхъушхо зиӀэм спшъэ къырилъхьагъ.
Паул Тхьэм игукӀэгъуныгъэ пае щытхъу зэрэфишӀырэр
12 Исус Христосэу Ти Зиусхьанэу сиӀоф сшӀэнэу сэзыгъэлъэкӀыгъэм щытхъу фэсэшӀы. Ащ цыхьэ къысфишӀи, мы Ӏофыр спшъэ къызэрэрилъхьагъэм пае, щытхъу фэсэшӀы. 13 Сэ ежьыр згъапцӀэщтыгъ, ицӀыфхэми къин язгъэщэчыщтыгъ, ежьыми сехъоныщтыгъэ пэтми, гукӀэгъу къысфишӀыгъ, сыда пӀомэ шӀошъхъуныгъэ симыӀэу Ӏофхэу сшӀэщтыгъэхэр къызгурымыӀохэу сызекӀощтыгъэти ары. 14 Ау ти Зиусхьанэу Исус Христос Исус ынэшӀу инэу сэ къысщифагъ, Христос Исус сыгу илъ зэрэхъугъэм паий, шӀошъхъуныгъэрэ шӀулъэгъуныгъэрэ сыгу илъ хъугъэх. 15 Мы гущыӀэхэр шъыпкъэх, цӀыф пстэуми ахэр адэнхэуи яфэшъуаш: ПсэкӀод зышӀэхэрэр мыкӀодхэу къыгъэнэжьынхэм пае, Исус Христос мы дунаем къэкӀуагъ. Ахэмэ ащыщэу апэ итыр сэры. 16 Ау Исус Христос зэкӀэмэ апэу сэ гукӀэгъу къызфысфишӀыгъэр сэ къызэрэздэзекӀорэмкӀэ ищыӀэгъэшхо къыгъэлъэгъонэуи ары, ежьымкӀэ шӀошъхъуныгъэ зиӀэ хъун цӀыфхэу мыкӀодыжьын щыӀэныгъэ зыгъотыщтхэм шапхъэ сафэхъунэуи ары. 17 ЕгъэшӀэрэ пачъыхьэу, мылӀэжьыщтэу, цӀыфхэм амылъэгъоу, Тхьэ закъоу щытым мыкӀодыжьын лъытэныгъэшхомрэ щытхъушхомрэ ий. Амин. 18 Скъо Тимофей, Тхьэм ежь игущыӀэхэу о къыохьылӀагъэу цӀыф заулэмэ агухэм къарилъхьэхи, къаригъэӀуагъэхэм атетэу мы унашъор о къыпфэсэшӀы. А гущыӀэхэм атетэу дзэлӀ дэгъур шӀоу зэрэзаорэм фэдэу, 19 шӀошъхъуныгъэ уиӀэу, угукӀэ мыхъун зи зыдэмышӀэжьэу, угу етыгъэу уиӀоф шӀэ. ЦӀыф заулэмэ агухэмкӀэ мыхъун зи зыдамышӀэжьыныр яӀэнэу зэрамыдагъэм пае, шӀошъхъуныгъэм игъогу текӀыжьыгъэх. 20 Именейрэ Александрэрэ ащ фэдэ цӀыфхэм ащыщых. Ахэр шэйтаным сэ фэзгъэзагъэх, Тхьэр амыгъэпцӀэнэу зэрагъэшӀэным пае.
Тхьэм уелъэӀуныр
1 ЗэкӀэмэ апэу сышъолъэӀу, цӀыф пстэуми апае Тхьэм шъуелъэӀу, ӀэпыӀэгъу афэхъунэуи шъуелъэӀу, шӀугъэ аригъэгъотынэуи шъуелъэӀу, Тхьэми щытхъу фэшъушӀ. 2 Тхьэм ищынагъо тыгухэм арылъэу, гукъэбзагъэкӀи, самбырэу ыкӀи гупсэфэу тыпсэушъуным пае, пачъыхьэхэмрэ тетыгъо зиӀэхэмрэ Тхьэм шъуафелъэӀу. 3 Ар дэгъу, Тхьэу тымыкӀодэу тыкъэзыгъэнэжьырэми ар игъоу елъытэ. 4 Ежьым цӀыф пстэури мыкӀодхэу къыгъэнэжьынхэуи, шъыпкъагъэр зэрашӀэнэуи фай. 5 Сыда пӀомэ Тхьэр зы, цӀыфхэр Тхьэм ыдэжь зыщэрэри зы, ар цӀыфэу Христос Исус ары. 6 Ащ ыпсэ шъхьэщэфыжьэу цӀыф пстэуми апае ытыгъ. Исус арэущтэу игъо дэдэм тефэу, Тхьэм игухэлъ ыгъэшъыпкъэжьыгъ. 7 Джы мары Христос ехьылӀэгъэ къэбарышӀур згъэӀунэуи, апостол сыхъунэуи Тхьэм сызфигъэнэфагъэр: шӀошъхъуныгъэмрэ шъыпкъагъэмрэ якъэбар хымэ лъэпкъхэм язгъэшӀэнэу ары сэ шъыпкъагъэр къэсэӀо, пцӀы сыусырэп. 8 ЛӀыхэр тыдэкӀи Тхьэм елъэӀунхэу сыфай, гукъэбзагъэкӀи аӀэхэр аӀэтызэ, мыгубжыхэу, Тхьэми емыхъырэхъышэхэу. 9 Ащ нэмыкӀэу бзылъфыгъэхэри укӀытагъо ахэлъэу, хэбзэшӀум тетэу, екӀоу зафэпэнэу сыфай. Шъхьац блэныгъэкӀи, дышъэмкӀи, налмэсналкъутэхэмкӀи, щыгъын лъапӀэхэмкӀи замыгъэкӀэракӀэу, 10 шӀушӀагъэхэмкӀэ зарэгъэкӀэракӀ, «Тхьэм ищынагъо тыгухэм арылъ», зыӀорэ бзылъфыгъэхэм зэряфэшъуашэм фэдэу. 11 Бзылъфыгъэм зи ымыӀоу, бэу ӀорышӀэу, Тхьэм иӀофхэр зэригъэшӀэнхэ фае. 12 Бзылъфыгъэм Тхьэм иӀофхэр цӀыфхэм аригъэшӀэнхэуи, лӀы горэм тетыгъо фыриӀэнэуи сыдэрэп. Зи ымыӀоу щытын фае. 13 Сыда пӀомэ Тхьэм апэу къыгъэхъугъэр Адэм ары, етӀанэ Евэ. 14 Блэм зыкъезыгъэгъэпцӀагъэри Адэм арэп, бзылъфыгъэр ары нахь. Арэущтэу бзылъфыгъэр Тхьэм игъогу текӀыгъ. 15 Ау шӀошъхъуныгъэ, шӀулъэгъуныгъэ, къэбзагъэ ыгу илъ зэпытхэу бзылъфыгъэр хэбзэшӀум тетэу щыӀэмэ, сабый къызэрэфэхъурэмкӀэ мыкӀодэу къэнэжьыщт.
Чылыс зэӀукӀэм иӀэшъхьэтет ишэн зэрэщытын фаер
1 Мы гущыӀэхэр шъыпкъэх: чылыс зэӀукӀэм иӀэшъхьэтет хъунэу зыгорэм шӀоигъомэ, Ӏофэу зыуж итыр Ӏоф дэгъу. 2 Ӏэшъхьэтетыр зыми зэригъэмысэн зи зыбгъодэмылъэу, зы шъуз нахь зимыӀэу, зыщыӀэныгъэри гулъытэри зиӀэу, хэбзэшГум тетэу, хьакӀэхэр зыгъэлъапӀэу, цӀыфхэм шъыпкъагъэр языгъэшӀэн зылъэкӀырэ лӀэу щытын фае. 3 Ащ нэмыкӀэуи ешъуакӀоу е лӀы Ӏэлэу щыты хъущтэп, ау Ӏасэу, мыцӀэцӀалэу, мылъкум кӀэмыхъопсэуи щытын фае. 4 Иунагъо дэгъоу зэрихьэу, ибынхэм лъытэныгъэ къызфаригъэшӀэу, ыгъэӀорышӀэнхэ фае. 5 Сыда пӀомэ ежьым иунагъо зезымыхьэшъурэр Тхьэм ичылыс зэӀукӀэ сыдэущтэу кӀэлъыплъэшъуна? 6 Ӏэшъхьэтетыр шӀошъхъуныгъэ зиӀэ хъугъакӀэхэм ащыщэу щыты хъущтэп. Армырмэ зышӀошӀыжьынышъ, шэйтаныр мысэ зэрэхъугъэм фэдэу, ари мысэ хъущт. 7 ЦӀыфхэр ӀэягъэкӀэ къытемыгущыӀэнхэм ыкӀи шэйтаным ихъытыу имыфэным пае, чылыс зэӀукӀэм щымыщхэри шӀоу шыхьат зыфэхъурэ цӀыфэу щытын фае.
Чылыс зэӀукӀэм иӀэпыӀэгъухэм яшэн зэрэщытын фаер
8 Ащ фэдэу чылыс зэӀукӀэм иӀэпыӀэгъухэри лъытэныгъэ зифэшъуашэхэу, бзэгуитӀу зыӀумылъхэу, сэнэпсым емынэцӀхэу, мылъкуми кӀэмыхъопсырэ лӀыхэу щытын фаех. 9 АгухэмкӀи мыхъун зи зыдамышӀэжьэу, шӀошъхъуныгъэм ишъэф аӀыгъын фае. 10 Ау ыпэ рапшӀэу яшъыпкъагъэ жъугъэунэфын фае. Ахэр зыми зэригъэмысэнхэ зи щымыӀэмэ, ӀэпыӀэгъухэм ащыщхэу орэхъух. 11 Ащ фэдэу а ӀэпыӀэгъухэм яшъузхэри лъытэныгъэ зифэшъуашэхэу, нэмыкӀ цӀыфхэм ӀэягъэкӀэ атемыгущыӀэхэу, зыщыӀэныгъэ зиӀэхэу, лъэныкъо пстэумкӀи узщыгугъышъун цӀыфхэу щытын фаех. 12 ӀэпыӀэгъур зы шъуз нахь зимыӀэу, ибынхэмрэ иунагъорэ дэгъоу зезыхьэрэ лӀэу щытын фае. 13 ӀэпыӀэгъухэу зиӀоф дэгъоу зыгъэцэкӀагъэхэм лъытэныгъэ агъоты, Христос ИсускӀэ шӀошъхъуныгъэу яӀэм гушхоныгъэкӀи тегущыӀэнхэ алъэкӀыщт.
Шъэфэу тишӀошъхъуныгъэ хэлъыр
14 Бэ темышӀэу уадэжь сыкъэкӀонэу сыгугъэу, мы тхылъыр къыпфэсэтхы. 15 Сыкъэгужъомэ, Тхьэм иунагъо щыщхэр зэрэзекӀонхэ фаер мы тхылъым уигъэшӀэщт. Тхьэм иунагъо щыщхэр щыӀэныгъэ зиӀэ Тхьэм ичылыс зэӀукӀ ары. А чылыс зэӀукӀэр шъыпкъагъэр зытет пкъэури лъапсэри ары. 16 ШъыпкъэмкӀэ шъэфэу тишӀошъхъуныгъэ хэлъыр ины: Тхьэр цӀыфэу къэлъэгъуагъ. Тхьэм ыПсэ ЛъапӀэ ащ ишъыпкъагъэ къыгъэшъыпкъэжьыгъ. МэлэӀичхэм заригъэлъэгъугъ. Ежьым фэлажьэхэрэм ежь икъэбар хымэ лъэпкъ хэм арагъэӀугъ. Дунаем тет цӀыфхэм ежьымкӀэ шӀошъхъуныгъэ яӀэ хъугъэ. Щытхъушхо иӀэу Тхьэм ар уашъом дихьыежьыгъ.
Щыфыбэ шӀошъхъуныгъэм игъогу зэрэтекӀыжьыпэщтхэр
1 Тхьэм Ыпсэ ЛъапӀэ нафэу къеӀо, дунаем иаужырэ лъэхъанэхэм цӀыфыбэ шӀошъхъуныгъэм игъогу зэрэтекӀыжьыпэщтхэр. ЦӀыфхэр дэзыхьыхырэ джынэхэми, Ӏофхэу джынапцӀэхэм цӀыфмэ арагъашӀэхэрэми ядэӀущтых. 2 ДжынапцӀэхэм Ӏофхэу цӀыфхэм арагъашӀэхэрэр къызпкъырыкӀхэрэр нэпитӀу зиӀэ пцӀыусхэр ары. ШӀури ери зэхадзыжьын амылъэкӀыжьынэу гъучӀ тамыгъэ плъыгъэмкӀэ ахагъэстыкӀыгъэм фэдэу, ащ фэдэ цӀыфхэм агухэр щытыщтых. 3 КъэщэныгъэдэкӀоныгъэмрэ гъэнэфэгъэ гъомлапхъэхэм яшхыныгъэмрэ мыхъун Ӏофхэу щытхэу а пцӀыусхэм цӀыфхэм араӀо. Ау Тхьэм а гъомлапхъэхэр къыгъэхъугъэх, шӀошъхъуныгъэ зиӀэхэу, шъыпкъагъэр зышӀэхэрэм Тхьэм щытхъу фашӀэу ахэр ашхынхэм пае пае, 4 сыда пӀомэ Тхьэм къыгъэхъугъэ пстэури шӀу. Тхьэм щытхъу фэпшӀэу къапштэмэ, зи хэбдзыжьы хъущтэп, 5 сыда пӀомэ, Тхьэм игущыӀэхэмрэ Тхьэм узэрелъэӀурэмрэкӀэ ар къабзэ мэхъу.
Исус Христос шӀоу узэрэфэлэжьэщтыр
6 Мы Ӏофхэр тшыхэм агурыбгъаӀохэмэ, ащыгъум шӀошъхъуныгъэм игущыӀэхэмкӀи, тишӀошъхъуныгъэ тигъашӀэрэ ӀофышӀухэу узтетхэмкӀи лъэкӀыныгъэ зэбгъэгъотэу, Исус Христос шӀоу фэлажьэхэрэм уащыщ. 7 Тхьэм ищынагъо зыхэмылъ ныожъ тхыдэжъхэм защыдзый. Ау Тхьэм ищынагъо угу зэрилъыным ыуж ит. 8 Пкъыр ебгъэсэным ишӀуагъэу къакӀорэр щыӀ, ау Тхьэм ищынагъо угу зэрилъыным сыд фэдэ лъэныкъокӀи ишӀуагъэ къэкӀо, сыда пӀомэ Тхьэм ищынагъо угу илъыным джырэ щыӀэныгъэмрэ къэкӀощт щыӀэныгъэмрэ апае шӀум ущегъэгугъы. 9 А гущыӀэхэр шъыпкъэх, цӀыф пстэуми ахэр адэнхэу яфэшъуаш. 10 Тыулэузэ, тишъыпкъэу тызкӀэлажьэрэр цӀыф пстэури, зэкӀэмэ апэу шӀошъхъуныгъэ зиӀэхэр, мыкӀодхэу къэзыгъэнэжьырэ Тхьэу щыӀэныгъэ зиӀэм тызэрэщыгугъырэр ары. 11 Мы ӀофхэмкӀэ цӀыфхэм унашъо афэшӀ, ахэри ягъашӀэх. 12 УиныбжьыкӀагъэ пае зыми нэмыплъ къызэремыгъэт, ау гущыӀэхэмкӀи, зекӀуакӀэмкӀи, шӀулъэгъуныгъэмкӀи, шӀошъхъуныгъэмкӀи, гукъэбзагъэмкӀи шӀошъхъуныгъэ зиӀэхэм шапхъэ афэхъу. 13 Сэ сыкъэкӀожьыфэ, Тхьэм игущыӀэ тхыгъэхэм цӀыфхэм апашъхьэ укъызэряджэщтми, цӀыфхэм зэрагурыбгъэӀощтми, зэрябгъэшӀэщт ми апылъ. 14 Тхьэм ынэшӀу къыпщифэнэу чылыс зэӀукӀэм инахьыжъхэм аӀэхэр о пшъхьэ къытыралъхьахэзэ, Тхьэм ежь игущыӀэхэр о къыохьылӀагъэу ахэмэ агухэм къарилъхьэхи, къызарегъаӀохэ ужым, Тхьэм ыПсэ ЛъапӀэм лъэкӀыныгъэу къыуитыгъэм узэрэпылъыщтым ыуж ит. 15 Мы Ӏофхэм апылъ, уапэкӀэ зэребгъэхъурэр зэкӀэмэ нафэ афэхъуным пае, а Ӏофхэм ауж ит зэпыт. 16 Зыфэсакъыжь, Ӏофхэу цӀыфхэм ябгъашӀэхэрэми афэсакъ. А Ӏофхэмэ унаӀэ атегъэт зэпыт. Арэущтэу пшӀымэ, къыодэӀурэ цӀыфхэр мыкӀодхэу къэбгъэнэжьыщтых, о пшъхьи мыкӀодэу къэбгъэнэжьыщт.
Шъузабэхэр, нахьыжъхэр, унэӀутхэр
1 ЛӀыжъым уфэмыгубж, ау тым фэдэу гурыгъаӀу; кӀалэхэми пшыхэм узэрафыщытым фэдэу афыщыт; 2 бзылъфыгъэ нахьыжъхэми ныхэм узэрафыщытым фэдэу афыщыт, бзылъфыгъэ ныбжьыкӀэхэми шыпхъухэм узэрафыщытым фэдэу зэкӀэ гукъэбзагъэкӀэ афыщыт. 3 Шъузабэу зизэкъо дэдэхэм лъытэныгъэ афэшӀ. 4 Зы шъузабэ горэм ибынхэмрэ ибынхэм къакӀэхъуагъэхэмрэ иӀэхэмэ, ежьхэм яунагъо лъытэныгъэ фашӀынэу ыпэ рапшӀэу зэрарэгъашӀ, ятэянэхэмэ къафашӀагъэри афарэшӀэжь, сыда пӀомэ ар Тхьэм игъоу елъытэ. 5 Шъузабэу зизэкъо дэдэу къэнагъэр Тхьэм щэгугъы, чэщи мафи Тхьэр къыдэӀэпыӀэнэу елъэӀу зэпыт. 6 Ау шъузабэу зызэригъэтхъэжьыным нэмыкӀ емыгупшысэрэр, псаоу щыт пэтми, лӀагъэм фэд. 7 ШӀошъхъуныгъэ зиӀэхэр зыми зэригъэмысэнхэ зи щымыӀэным пае, мы Ӏоф пстэумкӀи унашъо афэшӀ. 8 Ау цӀыфэу зиунэкъощхэм, зэкӀэмэ анахьи иунэ исхэм, акӀэлъымыплъэрэм ишӀошъхъуныгъэ ыгъэпцӀыгъ. Ар шӀошъхъуныгъэ зимыӀэм нахьи нахь дэижь. 9 Шъузабэхэм ацӀэхэр зэрыт тхылъым шъузабэу зыцӀэ ратхэн фаер зыныбжь тӀокӀищым нэсыгъэу, зэ нахь дэмыкӀуагъэу, 10 зишӀушӀагъэхэмкӀэ цӀыфхэр шыхьат зыфэхъурэр ары: гущыӀэм пае, бын зыпӀугъэу, хьакӀэхэр зыгъэлъэпӀагъэу, Тхьэм ицӀыф лъапӀэхэм алъакъохэр афэзытхьакӀыгъэу, гузэжъогъу хэтхэм адэӀэпыӀагъэу, шӀушӀэгъэ пстэуми апылъыгъэ шъузабэр ары. 11 Шъузэбэ ныбжьыкӀэхэм ацӀэхэр а тхылъым имытхэх. Сыда пӀомэ хъопсэныгъэ агу къихьэмэ, Христос акӀыб къыфагъазэзэ, дэкӀожьынхэу фэещтых. 12 Арэущтэу гущыӀэ пытэу Христос ратыгъэр зэрамыгъэцэкӀагъэм пае, мысэхэу мэхъух. 13 Ащ нэмыкӀэуи, Ӏоф амышӀэу унэ ихьэ икӀэу къакӀухьэу яхабз. Ӏоф зэрамышӀэрэм изакъоп, Ӏоржъорхэу, яӀоф зыхэмылъым яӀоф халъхьэу, амыӀуапхъэхэри аӀох. 14 Арышъ, шъузэбэ ныбжьыкӀэхэр дэкӀожьынхэу, быни къакӀэхъонэу, яунагъуи зэрахьанэу, джэгъогъоу шэйтаныр ӀэягъэкӀэ атегущыӀэнэу игъо рамыгъэфэнэу сыфай. 15 Сыда пӀомэ ахэмэ ащыщхэр гъогу занкӀэм текӀыхи, шэйтаным игъогу техьагъэх. 16 ШӀошъхъуныгъэ зиӀэ бзылъфыгъэ горэм иунэ шъузабэхэр исхэмэ, ар ахэмэ алъыплъэн фае. Чылыс зэӀукӀэм ахэр хьылъэ фэрэмыхъух, шъузабэу зизэкъо дэдэхэм чылыс зэӀукӀэр алъыплъэшъуным пае. 17 Нахьыжъхэу чылыс зэӀукӀэр дэгъоу зезыхьэхэрэм лъытэныгъэ нахьыбэ яфэшъуаш, зэкӀэмэ апэу Тхьэм игущыӀэхэр цӀыфхэм языгъэӀухэу, языгъашӀэхэрэр ары. 18 Сыда пӀомэ Тхьэм игущыӀэ тхыгъэхэм арыт: «Цум лэжьыгъэр ыӀо зыхъукӀэ, ыжэ зэтемыпх», ыкӀи «ЛэжьакӀом илэжьапкӀэ ыгъотынэу ифэшъуаш». 19 ШыхьатитӀум, е шыхьатищым къаӀорэмкӀэ гъэшъыпкъагъэ мыхъумэ, зыгорэм чылыс зэӀукӀэм инахьыжъхэм ащыщ горэ зэригъэмысэрэр умыдэ. 20 ПсэкӀод зышӀэхэрэм зэкӀэмэ апашъхьэ ащыгурыгъаӀу, адрэхэр щынэнхэм пае. 21 Тхьэм, Зиусхьанэу Исус Христос, Тхьэм къыхихыгъэ мэлэӀичхэм апашъхьэ пытэу унашъо къыщыпфэсэшӀы, къыпшӀошӀырэ пхэнджыгъэ Ӏоф хэмылъэу, зыгорэм ылъэныкъокӀи удемыӀэу, мы Ӏоф пстэури гъэцакӀэх. 22 ЦӀыф горэ Зиусхьаным фэлэжьэнэу бгъэнэфэным пае, о пӀэхэр ышъхьэ теплъхьанхэу Ӏофым удэмыгузажъу. НэмыкӀ цӀыфхэм япсэкӀодхэм уиӀахьэ ахэлъэу умышӀы. Гукъэбзагъэ зигъэӀэ зэпыт. 23 Псы къодые уемышъу, ау уныбэрэ бэрэ къыпфакӀорэ узхэмрэ апае сэнэпс тӀэкӀу ешъу. 24 ЦӀыф заулэмэ япсэкӀодшӀагъэхэр нэрылъэгъух, а цӀыфхэри унэшъо шӀыпӀэм нэмысхэ рапшӀэу мысэу мэхъух. НэмыкӀ цӀыфхэм япсэкӀодшӀагъэхэр ауж итхэу, ыужкӀэ нэрылъэгъу мэхъух. 25 Ащ фэдэу шӀушӀагъэхэри нафэх. ШӀушӀагъэхэу нэрылъэгъоу щымытхэри гъэбылъыгъэу къэнэжьышъущтхэп.
1 УнэӀутыгъэм ибжь зытелъ пстэуми ятхьаматэхэм лъытэныгъэ зэкӀэ яфэшъуашэу алъытэн фае, цӀыфхэр Тхьэм ыцӀэрэ тишӀошъхъуныгъэ тигъэшӀэрэ Ӏофхэмрэ ямыхъонынхэм пае. 2 УнэӀутхэу шӀошъхъуныгъэ зиӀэ тхьаматэхэр зиӀэхэм зэкъошхэу зэрэщытым пае, ахэмэ нэмыплъ арарэмыт, ау джыри нахьышӀужьэу афэлэжьэнхэ фае. Сыда пӀомэ Ӏофэу ашӀэрэм зишӀуагъэ къекӀырэр шӀошъхъуныгъэ зиӀэхэу шӀу алъэгъухэрэр ары. Мы Ӏофхэр унэӀутхэм ягъашӀэх ыкӀи афэгъэпытэх.
ЦӀыф заулэм Ӏоф нхэнджхэу адрэ цӀыфхэм арагъашӀэхэрэмрэ мылъку кӀэхъопсынымрэ яхьылӀагъ
3 Зыгорэм Ӏоф пхэнджхэр шъуигъашӀэхэу, ти Зиусхьанэу Исус Христос игущыӀэхэу тызщыгугъышъунэу щытхэм атемытмэ, Тхьэм ищынагъо тыгухэм арылъыным ехьылӀагъэу тишӀошъхъуныгъэ тигъэшӀэрэ Ӏофхэми атемытмэ, 4 а цӀыфыр зышӀошӀыжьы ыкӀи зи зэхишӀыкӀырэп. Ар зэнэкъокъунымрэ гущыӀэхэмкӀэ зэщыхьанымрэ акӀэхъопсы. А Ӏофхэм къарыкӀхэрэр шъугъоныр, зэмызэгъыныр, нэмыкӀ цӀыфхэм ӀэягъэкӀэ атегущыӀэныр, зым зым гуцафэ фишӀыныр, 5 зиакъыл зэщыкъуагъэу, шъыпкъагъэм пэчыжьэ цӀыфхэм язэщыхьаныгъэу пкӀэ зимыӀэр ары. Тхьэ гъэлъэпӀэныгъэр чар къэкӀуапӀэу ашӀошӀы. Ащ фэдэхэм защыдзый. 6 Шъыпкъэ сэӀо, цӀыф горэм иӀэм рыразэу щытмэ, Тхьэм ищынагъуи ыгу илъмэ, шӀуагъэу ащ хэлъыр ины. 7 Сыда пӀомэ дунаем тыкъызытехьэм, зи къыздэттхьыгъэп, дунаем тызытекӀыкӀи зи тетхынэуи тлъэкӀыщтэп. 8 Ау шхынэу тшхыщтымрэ щыгъынхэмрэ тиӀэхэмэ, ахэмэ тарырэзэщт. 9 Ау баи хъунхэу фаехэр псэкӀодшӀэным фыдэзыхьыхын Ӏофым хафэх, шэйтанми ӀэкӀэфэх. ПкӀэ зимыӀэ хъопсэныгъэхэу зиягъэ къакӀохэу, цӀыфхэри зыгъэунэхъухэу, кӀодыпӀэм зыӀэпызыщэхэрэм а цӀыфхэр аубытых. 10 Сыда пӀомэ бзэджэныгъэ пстэури къызхэкӀырэр ахъщэр шӀулъэгъуныгъэр ары. ЦӀыф заулэ ахъщэм кӀэхъопсыхэу, шӀошъхъуныгъэм игъогу текӀыхи, гухэкӀ Ӏаджи къызфахььгжьыгъ.
ШӀошъхъуныгъэм шӀоу фэлажьэ
11 Ау о, Тхьэм ицӀыф, а Ӏофхэм защыдзый. Шъыпкъагъэр, Тхьэм ищынагъор, шӀошъхъуныгъэр, шӀулъэгъуныгъэр, теубытэныгъэр, гушъэбэныгъэр угу зэрилъынхэм ауж ит. 12 ШӀошъхъуныгъэм шӀоу узэрэфэлэжьэным пылъ. МыкӀодыжьын щыӀэныгъэ зэгъэгъот; сыда пӀомэ шыхьатыбэмэ апашъхьэ шӀошъхъуныгъэ зэрэуиӀэм шӀоу шыхьат укъызыфэхъум, ар бгъотынэу Тхьэр къыоджагъ. 13 Тхьэу зэкӀэми щыӀэныгъэ къязытырэм ыпашъхьэрэ, Христос Исусэу Понтый Пилат зэхихэу шъыпкъагъэм шыхьат дэгъу фэхъугъэм ыпашъхьэрэ, пытэу унашъо къыпфэсэшӀы: 14 зи уимылажьэу, зыми узэригъэмысэни зи щымыӀэу, тиунашъо гъэцакӀэ, ти Зиусхьанэу Исус Христос дунаем къызыкӀожьыщт мафэм нэсыфэ. 15 Игъо къызыскӀэ, Тхьэм а мафэр къыгъэлъэгъощт Тхьэу щытхъушхо зиӀэу, лъэкӀыныгъэшхо зиӀэ закъор, пачъыхьэхэм я Пачъыхьэжь, тхьаматэхэм я Тхьэмэтэжь. 16 Ежь Тхьэ закъор ары мылӀэжьыщтыр, узэмыкӀолӀэшъущт нэфынэми хэтыр. ЦӀыфхэм ащыщэу зыми ар нэкӀэ ылъэгъугъэп, ылъэгъуни ылъэкӀыщтэп. Лъытэныгъэшхори мыкӀодыжьын лъэкӀыныгъэшхори ий. Амин. 17 Мы. дунаем баи щыхъугъэхэр зашӀомышӀыжьынэуи, мылъку нэпцӀым щымыгутъыхэу, Тхьэм нахь щыгугъынхэуи унашъо афэшӀ. Сыда пӀомэ тызыгъэтхъэжьынэу зэкӀэ икъоу къытэзытырэр Тхьэр ары. 18 ӀШушӀэным пылъынхэуи, шӀушӀэнымкӀэ баи хъунхэуи, ямылъку шъхьамысыжьхэу, яӀэм щыщ ягуапэу нэмыкӀ цӀыфмэ аратынэуи унашъо афэшӀ. 19 Арэущтэу ашӀымэ, мылъкушхо зыфаугъоижьыгъэу мэхъу. МыкӀодыжьын щыӀэныгъэ зэрагъэгъотыным пае, а мылъкушхор къэкӀощт дунаем лъапсэ щафэхъу. 20 О Тимофей, Ӏофэу Тхьэм о ппшъэ къырилъхьагъэм фэсакъ. Тхьэм ищынагъо зыхэмылъ гущыӀэ мыщыухэмрэ пэгущыӀэныгъэу пцӀыкӀэ шӀэныгъэкӀэ заджэхэрэмрэ защыдзый. 21 Сыда пӀомэ «А шӀэныгъэр тиӀ», зыфаӀожьэу, цӀыф заулэ шӀошъхъуныгъэм игъогу текӀыгъэх. Тхьэм ынэшӀу къыпщерэф. Амин.
ШӀуфэс ехыныр
1 Сэ сы Паул. Тхьэр фэягъэти, Исус Христос тыгухэм зэрарылъымкӀэ мыкӀодыжьын щыӀэныгъэ къэдгъотынэу Тхьэм тыкъызэригъэгугъагъэм икъэбар цӀыфхэм язгъэӀунэу Исус Христос иапостолэу сыхъугъ. 2 ШӀу слъэгъурэ скъоу Тимофеим мы тхылъыр фэсэтхы. Тхьэу Ты лъапӀэмрэ ти Зиусхьанэу Христос Исусрэ анэшӀу къыпщарэфи, гукӀэгъуныгъэ къыпфарэшӀи, гупсэфыныгъэ къыуарэт.
Христос икъэбарышӀу фэшъыпкъэнэу Паул Тимофей зэригъэгушхуагъэр
3 Сятэжъхэм сафэдэу сыгукӀэ мыхъун зи зыдэсымышӀэжьэу, сызфэлажьэрэ Тхьэм щытхъу фэсэшӀы. Тхьэм се лъэӀузэ, чэщи мафи уигугъу сшӀы зэпытэу, Тхьэм щытхъу фэсэшӀы. 4 Унэпсхэр сыгу къэкӀыжьхэу, гушӀуагъо сыгу из хъуным пае, услъэгъужьынэу сшӀоигъу. 5 УишӀошъхъуныгъэ шъыпкъэ сыгу къэкӀыжьы. Ащ фэдэ шӀошъхъуныгъэ уянэжъэу Лоидэрэ уянэу Евникэрэ агухэм арылъыгъ; джы ар о угуи зэрилъым сыщэгугъы. 6 Арышъ, сэ сӀэхэр о пшъхьэ къызэрэтеслъхьагъэхэмкӀэ Тхьэм лъэкӀыныгъэу къыуитыгъэм имашӀо къызэкӀэбгъэнэнэу угу къэсэгъэкӀыжьы. 7 Сыда пӀомэ Тхьэм ежь Ыпсэ ЛъапӀэу тыгухэм къарилъхьагъэм щынагъо тыгухэм арылъэу ыгъэхъурэп, лъэкӀыныгъэ, шӀулъэгъуныгъэ, зыщыӀэныгъэ тыгухэм арылъхэу егъэхъу нахь. 8 УмыукӀытэу ти Зиусхьан шыхьат фэхъу. Сэри ежьым сызэрэфэлажьэрэм пае, хьапсым сызэрэчӀадзагъэм фэшӀ, укъыстемыукӀытыхьажь, Тхьэм илъэкӀыныгъэкӀи къэбарышӀум пае къин къыздэщэч. 9 Тхьэр ары тымыкӀодэу тыкъэзыгъэнэжьыгъэри, гукъэбзагъэкӀэ тыпсэунэу къытэджагъэри. Арэущтэу зыкӀишӀагъэр ежьым ащ фэдэ гухэлъ ышӀыгъэу, ынэшӀу къызэрэтщифагъэр ары. ТишӀушӀагъэхэм яӀоф ащ хэлъэп. Тхьэм Христос Исус ынэшӀу къызытщыригъэфагъэр лъэхъан пстэуми апэ ары, 10 ау джы тымыкӀодэу тыкъэзыгъэнэжьырэ Исус Христос къызэрэлъэгъуагъэмкӀэ Тхьэм ынэшӀу щыфэныгъэр нафэ къэхъугъ. Исус Христос лӀэныгъэр ыгъэкӀодыгъ, къэбарышӀумкӀи мыкӀодыжьын щыӀэныгъэ къытфигъэнэфагъ. 11 А къэбарышӀур цӀыфхэм язгъэӀунэуи, иапостол сыхъунэуи, а къэбарышӀур цӀыфхэм язгъэшӀэнэуи Тхьэм сыкъигъэнафагъ. 12 Джары мы къиныр зыкӀэсщэчырэр; ау сэ сыукӀытэрэп, сыда пӀомэ Исус Христосэу шӀошъхъуныгъэ зыфысиӀэр сэшӀэ, ежьыми Ӏофэу сэ спшъэ къырилъхьагъэм а мафэм нэсыфэ къыфэсакъын зэрилъэкӀыщтым сыщэгугъы. 13 Христос Исус угу зэрилъым пае, шӀошъхъуныгъэрэ шӀулъэгъуныгъэрэ уиӀэхэу, гущыӀэхэу сэ къасӀохэу зэхэпхыгъэхэу, узщыгугъышъунэу щытхэр шапхъэм фэдэу Ӏыгъхэу уатемыкӀ. 14 Тхьэм Ӏофэу о ппшъэ къыри лъхьагъэр Тхьэм Ыпсэ ЛъапӀэу тыгухэм арылъымкӀэ къэухъум. 15 Асие хэкум ис пстэури, ахэмэ ащыщэу Фигеллрэ Ермогенрэ, сызэрэханэжьыгъэр о ошӀэ. 16 Зиусхьаным Онесифор иунагъо гукӀэгъу къыферэшӀ, сыда пӀомэ бэрэ ащ сыгу ыгъэпсэфыжьыгъ, Ӏэхъулъэхъу стелъыгъэ пэтми, къыстеукӀытыхьагъэп. 17 Ар Рим къэлэшхом къызэкӀом, сыкъегъотыфэ, емызэщэу къыслъыхъугъ. 18 Ахърэт мафэм Зиусхьаным ащ гукӀэгъуныгъэ ферэшӀ. Ефес къалэм бэрэ къызэрэщыздэӀэпыӀагъэр о нахьышӀоу ошӀэ.
Исус Христос шӀоу фэбанэрэ дзэлӀышӀу
1 Арышъ, о скъо, Христос Исусэу тыгухэм арылъым ынэшӀу къызэрэшцифэрэмкӀэ угу гъэпытэ. 2 Ӏофхэу шыхьат Ӏаджыхэми апашъхьэ сэ къасӀохэу зэхэпхыгъэхэр, узщыгугъышъун цӀыфхэу нэмыкӀхэм ахэр языгъэшӀэн зылъэкӀыщтхэм апшъэ илъхьэх. 3 Исус Христос идзэлӀ дэгъу фэдэу къин къыздэщэч. 4 Дзэм емыпхыгъэ Ӏофхэм дзэлӀым зыдаригъэхьыхрэп дзэ пащэм ыгу къызэригъэӀунэу шӀоигъу. 5 Ащ фэдэу, зэпэчъэныгъэм ихабзэ тетэу мычъэрэм текӀоныгъэм итандж къыратырэп. 6 МэкъумэщышӀэу зиӀоф къин зышӀэрэм лэжьыгъэу къахыжьыгъэм щыщэу иӀахьэ апэу къыратын фае. 7 КъасӀорэм егупшыс. Зиусхьаным Ӏоф пстэумкӀи зэхэшӀыкӀыныгъэ къыуитыщт. 8 Исус Христос угу къэгъэкӀыжь; ар пачъыхьэ Даутэ къытехъукӀыгъэ цӀыфхэм ащыщыгъ, лӀагъэхэми Тхьэм ар къахигъэтэджыкӀыжьыгъ. Джары къэбарышӀоу згъэӀоу, 9 къин зыфэсщэчэу, бзэджашӀэм фэдэу Ӏэхъулъэхъу къызфыстыралъхьагъэр. Ау Тхьэм игущыӀэхэм Ӏэхъулъэхъу атыралъхьан алъэкӀыщтэп. 10 Ащ пае, Тхьэм къыхи хыгъэ цӀыфмэ сишӀуагъэ язгъэкӀыным пае, теубытэныгъэкӀэ къин пстэури сэщыӀэ. Арэущтэу Христос Исус ахэмэ агухэм зэрарылъым пае, ахэри мыкӀодхэу къэнэжьыщтых, мыкӀодыжьын щытхъушхуи яӀэ хъущт. 11 Мы гущыӀэхэр шъыпкъэх: Христос тыригъусэу тылӀагъэмэ, тыригъусэуи тыщыӀэщт. 12 ТеубытэныгъэкӀэ къин тщыӀэмэ, ежьым тыригъусэу тетыгъо тиӀэщт. «Ежь игъогу рыкӀохэрэм тащыщэп», тӀомэ, ежьыми «Ахэр сигъогу рыкӀохэрэм ащыщхэп», къытфиӀожьыщт. 13 Шъыпкъагъэ тимыӀэми, ежьым шъыпкъагъэ иӀэ зэпытыщт, сыда пӀомэ ежьым зигъэпцӀэжьын ылъэкӀыщтэп.
Тхьэм фэлажьэрэ цӀыфэу ыгу зэӀурэр
14 А Ӏофхэр агу къэгъэкӀыжьых. ГущыӀэхэм яхьылӀагъэу зэмынэкъокъунхэу Зиусхьаным ыпашъхьэ лъэшэу щагурыгъаӀу. Зэнэкъокъуныгъэм ишӀуагъэ къакӀорэп, ащ едэӀухэрэми иягъэ арегъэкӀы. 15 Тхьэм зишъыпкъагъэ ыгъэунэфыгъэ цӀыфэу, Ӏофэу ышӀагъэм теукӀытыхьажьынэу зимыщыкӀагъэу, шъыпкъагъэм игущыӀэхэр тэрэзэу цӀыфмэ языгъашӀэрэу Тхьэм ыдэжькӀэ узэрэщытыным ыуж ит. 16 Тхьэм ищынагъо зыхэмылъ гущыӀэ мыщыухэм защыдзый; сыда пӀомэ ащ фэдэхэм апылъхэм Тхьэм нахь пэчыжьэ зашӀы зэпыт. 17 Кансэр зыцӀэ узым фэдэу, Ӏофхэу ахэмэ цӀыфхэм арагъашӀэхэрэр анахьыбэмэ анэсыщтых. ИменейрэФилитрэ а цӀыфхэм ащыщых. 18 ИтӀур шъыпкъагъэм игъогу текӀыхи, тэ, шӀошъхъуныгъэ зиӀэхэр, лӀагъэхэм тыкъахэтэджыкӀыжьыгъэу аӀозэ, зэраӀорэмкӀэ цӀыф заулэмэ яшӀошъхъуныгъэ агъэкӀоды. 19 Ау Тхьэм ыгъэуцугъэ лъэпсэ пытэр щыӀэ зэпытыщт. Мыхъурым фэдэу мырэущтэу ащ тедзагъ: «Зиусхьаным ежь ицӀыфхэр ешӀэх», ыкӀи «Хэти Зиусхьаным ыцӀэ зыдэрэм ыкӀыб бзэджэныгъэм игъогу ферэгъаз». 20 Унэшхо горэм дышъэмрэ тыжьынымрэ ахэшӀыкӀыгъэ хьакъушыкъухэм ямызакъоу, пхъэмрэ ятӀэмрэ ахэшӀыкӀыгъэ хьакъушыкъухэри илъых. Хьакъушыкъу шӀу дэдэхэр ахэтых, къызэрыкӀо хьакъушыкъухэри ары. 21 Зыгорэм ыгу ыгъэкъэбзэжьэу, мы Ӏоф бзаджэхэм защидзыемэ, хьакъушыкъу шӀу дэдэм фэдэу хъущт. А цӀыфым Зиусхьаным зыритыгъэу, ишӀуагъэ Зиусхьаными ригъэкӀэу, шӀушӀэгъэ пстэуми афэхьазырэу хъущт. 22 Ау ныбжьыкӀагъэм ихъопсэныгъэ Ӏаехэм защыдзый. ГукъэбзагъэкӀэ Зиусхьаным елъэӀухэрэм урягъусэу шъыпкъагъэмрэ, шӀошъхъуныгъэмрэ, шӀулъэгъуныгъэмрэ, гупсэфыныгъэмрэ ауж ит. 23 Ау пкӀэ зимыӀэхэу, шӀэныгъэ зыхэмылъ зэнэкъокъуныгъэхэм защыдзый. Ахэмэ зэщыхьаныгъэ къызэрахэкӀырэр ошӀэшъ ары. 24 Зиусхьаным фэлажьэрэ цӀыфыр зэщыхьаныгъэм пылъ хъущтэп. Ау цӀыф пстэуми афэшӀоу, цӀыфхэм шъыпкъагъэр языгъэшӀэн зылъэкӀэу, зызымыгъэгусэрэ цӀыфэу щытын фае. 25 Ежьым къыпэуцухэрэм гушъэбагъэкӀэ агуригъэӀон фае. Шъыпкъагъэр ашӀэным пае, Тхьэм ахэри кӀигъэгъожьынхэкӀи мэхъу. 26 Арэущтэу хъумэ, зыфаер шэйтаным аригъэшӀэнэу зиубытыхэрэ ужым, ащ ихъытыу икӀыжьыщтых.
Дунаем иаужырэ мафэхэм псэущт цӀыфхэм яшэн зыфэдэщтыр
1 Дунаем иаужырэ мафэхэм уахътэ къинхэр къызэрэкӀощтхэр пшӀэн фае. 2 Сыда пӀомэ цӀыфхэм ежь ашъхьэкӀэ шӀу залъэгъужьыщт, ахъщэри шӀу алъэгъущт, зыщытхъужьыщтых, пэгэщтых, хъонэщтых, ятэянэхэм ядэӀужьыщтхэп, рэзэныгъэ ахэлъыщтэп, Тхьэр агъэлъэпӀэщтэп, шӀулъэгъуныгъи ахэлъыщтэп; 3 зэшӀужьыныгъэр зыфэдэр ашӀэщтэп, нэмыкӀ цӀыфхэм ӀэягъэкӀэ атегущыӀэщтых, зыщыӀэныгъэ яӀэщтэп, жъалымыщтых, шӀугъэр шӀу алъэгъущтэп; 4 уащымыгугъышъунэу щытыщтых, шъхьэпсынкӀэу щытыщтых, зашӀошӀыжьыщт; Тхьэр шӀу алъэгъуным нахьи, загъэтхъэжьыныр нахьышӀу алъэгъущт; 5 Тхьэм ищынагъо агухэм арылъым фэдэу зыкъа гъэлъэгъощт, ау Тхьэм илъэкӀыныгъэ адэщтэп. Ащ фэдэ цӀыфхэм защыдзый. 6 А цӀыфхэм ащыщхэу зы заулэ унэмэ арыцӀанлъэнхэзэ, бзылъфыгъэхэу зипсэкӀодхэм ахэкӀуадэхэу, зэмылӀэужыгъо хъопсэныгъэ мыхъомышӀэхэм зыкъырязыгъэщэкӀыхэрэр дахьыхьых. 7 А бзылъфыгъэхэм сыдигъуи Ӏофхэр зэрагъашӀэхэми, шъыпкъагъэр къашӀэн алъэкӀырэп. 8 Ианныйрэ Иамврыйрэ пегъымбар Мусэ зэрэпэуцугъэхэм фэдэу, мы цӀыфхэри шъыпкъагъэм пэуцужьых. Ахэр зиакъыл зэщыкъогъэ цӀыфых, зишӀуагъэ къэмыкӀожьыщт шӀошъхъуныгъэ яӀ. 9 Ау ахэмэ яӀоф бэрэ къадэхъущтэп; сыда пӀомэ Ианныйрэ Иамврыйрэ яделагъэ цӀыф пстэумкӀи нафэ зэрэхъугъэм фэдэу, мы цӀыфхэм яделагъи цӀыф пстэумкӀи нафэ хъущт.
Аужырэ Ӏофхэу Паул Тимофей фигъэпытэхэрэр
10 Ӏофхэу сэ цӀыфхэм язгъэшӀагъэхэри, сизекӀуакӀи, сигухэлъи, сишӀошъхъуныгъи, сищыӀагъи, сишӀулъэгъуныгъи, ситеубытэныгъи ошӀэх. 11 Къалэхэу Антиохие, Иконие, Листрэ цӀыфхэм къинэу щысагъэщэчыгъэхэри, къиныбэу щысщэчыгъэхэри ошӀэх. Къинышхохэр сагъэщэчыгъэх, ау Зиусхьаным зэкӀэми сыкъахищыжьыгъ. 12 Шъыпкъэ, Тхьэм ищынагъуи Христос Исусри хэти зыгу илъхэу псэунэу фаем цӀыфхэм къин рагъэщэчыщт. 13 Ау цӀыф бзаджэхэми, гъэпцӀакӀохэми ябзэджэныгъэ рагъэхъущт; ахэмэ нэмыкӀ цӀыфхэр дахьыхых, ежь ашъхьэкӀи зыдахьыхыжьы. 14 Ау о Ӏофхэу зэбгъэшӀагъэхэми, узщыгугъыхэрэми атет зэпыт, сыда пӀомэ ахэр озыгъэшӀэгъэ цӀыфхэр ошӀэх. 15 Ащ нэмыкӀэу, уисабыигъо щегъэжьагъэу Тхьэм игущыӀэ тхыгъэ лъапӀэхэм арытхэр зэбгъэшӀагъэх. Христос ИсускӀэ шӀошъхъуныгъэу уиӀэмкӀэ умыкӀодэу, укъызэрэнэжьыщтыр а тхылъхэм арытхэм къыбгу рагъэӀон алъэкӀы. 16 Тхьэм игущыӀэтхыгъэ лъэпӀэ пстэуми арытхэр Тхьэм Ыпсэ ЛъапӀэ ыдэжь къикӀыгъэх. ӀДӀыфхэм шъыпкъагъэр ябгъэшӀэным, уягыиным, бгъэдэӀонхэм ыкӀи шъыпкъагъэр зиӀэ псэукӀэр ябгъэшӀэным пае яшӀуагъэ къэкӀо. 17 Арэущтэу Тхьэм фэлажьэрэ цӀыфыр тэдрэ ӀофышӀуи хьазырэу ыкӀи фэгъэпсыгъэу щытыщт.
1 Тхьэм ыпашъхьи, Исус Христосэу псаухэмрэ лӀагъэхэмрэ хьыкум атезышӀыхьащтым ыпашъхьи, Христос дунаем къызэрэкӀожьыщтымкӀи тетыгъоу иӀэмкӀи инэу унашъо къыщыпфэсэшӀы:2 Тхьэм игущыӀэхэр цӀыфхэм ягъэӀужьых, игъо щытми, щымытми, ахэр ябгъэшӀэнхэм пылъ. АгурыгъаӀу, ягыижь, гъэгушхох, зэкӀэ щыӀагъэмкӀэ шъыпкъагъэр ягъашӀ. 3 Сыда пӀомэ тишӀошъхъуныгъэ тигъэшӀэрэ Ӏофхэу тызщыгугъышъунэу щытхэр цӀыфхэм замыдэщт уахътэр къэкӀощт. ЦӀыфхэм атхьакӀумэхэу хъупцӀхэрэм гущыӀэ гохьыхэр рагъэӀухэу, агухэр зыкӀэхъопсырэ Ӏофхэр языгъэшӀэщт цӀыфхэр къызфагъотыжьыщтых. 4 Ау шъыпкъагъэр зэхахынэу амыдэу, гъощагъэхэу, тхыдэжъ гъэшӀэгъонхэм апылъыщтых. 5 Ау сыд хъуми, о зыщыӀэныгъэ зигъаӀ. Къин щэчи, къэбарышӀур зыгъэӀурэ цӀыфым иӀоф шӀи, уиӀоф гъэцакӀэ. 6 Сыда пӀомэ сэ къурмэныпхъэ сыхъоу, дунаем сехыжьынэу сиуахътэ къэсыгъ. 7 КъэбарышӀум пае дэгъоу сыбэнагъ, сызэрэчъэщтыгъэр сыухыгъэ, шӀошъхъуныгъэр сыухъумагъэу сиӀ. 8 Джы Зиусхьаным шъыпкъагъэм итандж хьазырэу къысфигъэнагъ. А танджыр Зиусхьанэу шъыпкъагъэ зиӀэ хьыкум зышӀырэм ахърэт мафэм къысфигъэшъошэщт, ау сэ сизакъоу арэп, ежь дунаем къызэрэкӀожьыщтым щыгушӀукӀыгъэ пстэури ары.
Паулрэ Тимофейрэ ашъхьэкӀэ яӀофхэм яхьылӀагъ
9 Садэжь шӀэхэу укъызэрэкӀоным пылъ. 10 Сыда пӀомэ Димас мы дунаер шӀу ылъэгъузэ, сэ сыкъигъани, Фесса лоникэ къалэм кӀуагъэ. Крискент Галатие хэкум кӀуагъэ, Тити Далматие хэкум кӀуагъэ. Садэжь къэнагъэр Лука закъор ары. 11 Марк къыздащи къакӀо, сыда пӀомэ сиӀофкӀэ ащ иӀэпыӀэгъу сищыкӀагъ. 12 Тихик Ефес къалэм згъэкӀуагъэ. 13 УкъызыкӀокӀэ, Троадэ къалэм Карп ыдэжь къэзгъэнэгъэ кӀакори, тхылъхэри, анахьэу шъом хэшӀыкӀыгъэ тхылъхэр, къыздахьыжьых. 14 ГъоплъашӀэ Александр лыешхо къысихыгъ. Зиусхьаным ащ иӀофхэм яфэшъуашэ къыригъэпщыныжьыщт. 15 Ори ащ уфэсакъын фае, сыда пӀомэ тэ тигущыӀэхэм ар лъэшэу апэуцужьыгъ. 16 ХьыкумышӀэм ыпашъхьэ зыщызгъэхыенэу апэ дэдэу сызыпэлъым, зы нэбгыри ӀэпыӀэгъу къысфэхъугъэп, пстэуми гум сыранэжьыгъ. КъысашӀагъэм пае Тхьэм арерэмыгъэпщыныжь. 17 Хымэ пстэуми зэхахыным пае, ежь икъэбарышӀу зэкӀэ язгъэӀунэу Зиусхьан къызбгъодахьи, кӀуачӀэ къыситыгъ. Аслъаным ыжэ сыкъыдихыжьыгъэм фэд. 18 Зиусхьаным бзэджэгъэ пстэуми сахищыжьыщт ыкӀи сиухъумэзэ, ежь и Тетыгъошхоу уашъом щыӀэм ыӀэчӀэгъ сычӀищэщт. МыкӀодыжьын щытхъушхор Зиусхьаным ий. Амин.
Аужырэ шӀуфэс гущыӀэхэр
19 Прискиллэ, Акилэ, Онесифор иунагъо щыщхэм аӀапэ сфэубытыжь. 20 Ераст Коринф къалэм къддэнагъ Трофим Милит къалэм сымаджэу къыдэсынагъ. 21 КӀымафэр къэмысызэ укъызэрэкӀоным пылъ. Еввул, Пуд, Лин, бзылъфыгъэу Клавдие, зэкӀэ тшыхэми шӀуфэс къыуахыжьы. 22 Зиусхьаныр ппсэ гъусэ фэрэхъу. Тхьэм ынэшӀу къышъущерэф. Амин.
ШӀуфэс ехыныр
1 Сэ сы Паул, Тхьэм сыфэлажьэ, Исус Христос иапостолэуи сыщыт. Апостол сызфэхъугъэр Тхьэм къыхихыгъэ цӀыфхэм шӀошъхъуныгъэ яӀэ згъэхъунэуи, Тхьэм игъогу ехьылӀэгъэ шъыпкъагъэр язгъэшӀэнэуи ары. 2 Арэущтэу мыкӀодыжьын щыӀэныгъэ зэрагъотыщтым щыгугъыхэу, пэплъэщтых. А мыкӀодыжьын щыӀэныгъэр цӀыфхэм аритынэу шъыпкъагъэ зиӀэ Тхьэм лъэхъанэхэм апэ цӀыфхэр къыгъэгугъагъэх. 3 КъэбарышӀоу згъэӀурэмкӀэ Тхьэм икъэбар игъо дэдэм нафэ ышӀыгъ. ТымыкӀодэу тыкъэзыгъэнэжьырэ Тхьэм а къэбарышӀур сэ спшъэ къырилъхьи, згъэӀунэу унашъо къысфишӀыгъ. 4 O, Тит, мы тхылъыр къыпфэсэтхы. А зы шӀошъхъуныгъэр зэрэтиӀэм пае, сэ скъо шъыпкъэм фэдэу ухъугъ. Тхьэу Ты лъапӀэмрэ Зиусхьанэу Исус Христосэу тымыкӀодэу тыкъэзыгъэнэжьырэмрэ анэшӀу къыпщарэфи, гупсэфыныгъэ къыуарэт.
Чылыс зэӀукӀэм фэлажьэрэ тхьаматэхэм яшэн зэрэщытын фаер
5 Крит хыгъэхъунэм укъызфэзгъэнагъэр Ӏофхэу къэнагъэхэр уухынхэуи, сэ унашъо къызэрэпфэсшӀыгъэм фэдэу, тэдрэ къали нэхьыжъхэр чылыс зэӀукӀэхэм афэбгъэнэфэнхэуи ары. 6 Нахьыжъыр зыми зэригъэмысэн зи зыбгъодэмылъэу, зы шъуз нахь зимыӀэ лӀэу щытын фае. Ибынхэми шӀошъхъуныгъэ яӀэн фае. Ахэр мыхъомышӀэ псэукӀэмкӀи мыдэӀоныгъэмкӀи мысэхэу хъухэ хъущтэп. 7 Тхьэм иӀоф чылыс зэӀукӀэм иӀэшъхьэтет ыпшъэ зэрилъым пае, зыми зэригъэмысэн зи зыбгъодэмылъ лӀэу щытын фае: къаигъэу ыкӀи псынкӀэу губжэу щыты хъущтэп, ешъуакӀоуи, лӀы Ӏэлэуи, мылъкум кӀэхъопсэуи щыты хъущтэп. 8 Ау хьакӀэхэр зыгъэлъапӀэу, шӀур шӀу зылъэгъоу, гулъытэ зиӀэу, зафэу, гукъэбзагъэ зиӀэу, зыщыӀэныгъэ зиӀэ лӀэу щытын фае. 9 ЕтӀанэ Ӏоф шъыпкъэхэу шъодгъэшӀагъэхэм пытэу атетын фае. Арэущтэу тишӀошъхъуныгъэ тигъашӀэрэ Ӏофхэу тызщыгугъышъунэу щытхэмкӀэ цӀыфхэр ыгъэгушхонхэ ылъэкӀыщт, а Ӏофхэм апэуцухэрэми агуригъэӀон ылъэкӀыщт. 10 Сыда пӀомэ цӀыф мыдаӀохэу бэ щыӀэх, зэкӀэми апэу сунэт ашӀыгъэхэу щытхэм ащыщхэр ары. ПкӀэ зимыӀэ гущыӀэхэр къаӀо зэпытых, нэмыкӀ цӀыфхэри дахьыхых. 11 Ахэмэ ажэ ябгъэубытын фае. ЦӀыфхэм арамыгъэшӀапхъэ Ӏофхэр арагъашӀэхэзэ, емыкӀу шӀыкӀэкӀэ ахъщэ къагъэхъэным пае, унагъохэр зэрэунагъохэу агъэкӀодых. 12 Ахэмэ ащыщэу тхакӀо горэм къыӀуагъ: «Крит цӀыфхэм пцӀы аусы зэпыт, хьакӀэкъуакӀэ бзаджэхэм афэдэх, фэмыфых ыкӀи бэшхых». 13 А тхакӀом ишыхьатныгъэ шъыпкъэ. Арышъ, пхъашэу агурыгъаӀу, зишӀуагъэ къакӀорэ шӀошъхъуныгъэ яӀэ хъуным паий, 14 джуртхэм ятхыдэжъхэми, шъыпкъагъэм зыкӀыб фэзыгъэзагъэхэм яунашъохэми анаГэ тырамыдзэным паий. 15 Зыгу къабзэхэм адэжькӀэ зэкӀэ къабзэ мэхъу, ау зыгу мыкъабзэхэм адэжькӀи, ТхьэмкӀэ шӀошъхъуныгъэ зимыӀэхэм адэжькӀи къабзэ зи щыӀэп. Яакъыли зэщыкъуагъэ. Агухэми шӀури ери зэхадзыжьын алъэкӀырэп. 16 Тхьэр ашӀэу аӀо, арышъхьакӀэ Ӏофхэу ашӀэхэрэмкӀэ Тхьэр зэрамышӀэрэр нафэу къагъэлъагъо. Ахэр гущыкӀыгъо цӀыфых, мыдаӀох, зыкӀи яшӀуагъэ къэмыкӀоу щыт.
ТишӀошъхъуныгъэ тигъэшӀэрэ Ӏофхэу тызщыгугъышъунэу щытхэр
1 ТишӀошъхъуныгъэ тигъэшӀэрэ Ӏофхэу тызщыгугъышъунэу щытхэм уатетэу цӀыфхэм ябгъэшӀэн фае. 2 ЛӀыжъхэм ягъашӀ, зыщыӀэныгъэ яӀэнэуи, лъытэныгъэ ахэлъэу зекӀонхэуи, гулъытэ яӀэнэуи, зишӀуагъэ къакӀорэ шӀошъхъуныгьэ, шӀулъэгъуныгъэ, теубытэныгъэ къызахагъэфэнхэуи. 3 Ащ фэдэу ныохэми ягъашӀ, Тхьэм ибзылъфыгъэ лъапӀэхэм яфэшъуашэу зекӀонхэуи, нэмыкӀ цӀыфхэм ӀэягъэкӀэ атемыгущыӀэнхэуи, сэнэпс ешъоным пщылӀ фэмыхъунхэуи, цӀыфхэм шӀур арагъэшӀэнэуи. 45 ЕтӀанэ Тхьэм игущыӀэхэм хэти ямыхъоныным пае, а ныохэм бзылъфыгъэ ныбжьыкӀэхэм агурагъэӀон фае ялӀыхэмрэ ябынхэмрэ шӀу алъэгъунхэуи, гулъытэ яӀэнэуи, гукъэбзагъэкӀэ псэунхэуи, яунагъохэм дэгъоу алъыплъэнхэуи, шӀоу щытынхэуи, ялӀыхэм афэӀорышӀэнхэуи. 6 КӀалэхэми гулъытэ яӀэнэу агурыгъаГу. 7 ШӀу зэрэпшӀэрэмкӀэ лъэныкъо пстэумкӀи цӀыфхэм шапхъэ афэхъу. Угу етыгъэу, лъытэныгъэ къыпфэшъуашэу Тхьэм игущыӀэхэр ягъашӀэх. 8 Зыми зэригъэмысэн зи зыбгъодэмылъэу, узыщыгугъышъунэу щыт къэбархэр ягъашӀэх, къытфаӀон Ӏае амыгъотэу, о къыппэуцурэ цӀыфхэр укӀытэжьынхэм пае. 9 УнэӀутхэри ятхьаматэхэм зэкӀэмкӀи афэӀорышӀэнхэуи, агу къызэрэзэрагъэӀуным пылъынхэуи, апэмыгущыӀэжьынхэуи ягъашӀ. 10 Ащ нэмыкӀэу мытыгъонхэуи, сыдигъуи зэкӀэмкӀи яшъыпкъагъэ къагъэлъэгъонэуи ягъашӀ. Арэущтэу ахэмэ ашӀэрэ Ӏоф пстэумкӀи адрэ цӀыфхэм Ӏофхэу тишӀошъхъуныгъэ тигъашӀэхэрэм щытхъу афарагъэшӀыщт. А Ӏофхэр Тхьэу тымыкӀодэу тыкъэзыгъэнэжьырэм ехьылӀагъэу щытых. 11 Сыда пӀомэ цӀыф пстэури мыкӀодхэу къыгъэнэжьынхэм пае, Тхьэм ынэшӀу щыфэныгъэ къыгъэлъэгъуагъ. 12 Тхьэм ынэшӀу щыфэныгъэ тигъэшӀэрэ Ӏофхэр мыхэр ары: Тхьэм ищынагъо зыхэмылъ псэукӀэми, мы дунаем ихъопсэныгъэ мыхъомышӀэхэми такӀыб афэдгъэзэнри, гулъытэрэ шъыпкъагъэрэ тиӀэхэу, Тхьэм ищынагъуи тыгухэм арылъэу, мы лъэхъанэм тыпсэунри ары. 13 Арэущтэу тыпсэун фае, ти Тхьэшхоу, тымыкӀодэу тыкъэзыгъэнэжьырэ Исус Христос ищытхъушхо къэзылъэгъощт мафэм тыпэплъэфэ. А гушӀогъо мафэр къызэрэкӀощтым тыщыгугъэу тыпэплъэ. 14 Христос тэщ пае ыпсэ ытыгъ. Ыпсэ зыфитыгъэр бзэджэныгъэ пстэуми тыкъаӀэкӀихыжьэу, тэ тшъхьэхэр ыщэфынхэуи, шӀушӀэным тыгу етыгъэу тыпылъэу, ежь ылъэпкъ тыхъуным пае, тыгухэр ыгъэкъэбзэжьынхэуи ары. 15 А Ӏофхэр ары цӀыфхэм ябгъэшӀэн фаехэр. Тетыгъоу зэкӀэ уиӀэмкӀэ цӀыфхэр гъэгушхох ыкӀи агурыгъаӀу. Зыми нэмыплъ къызэремыгъэт.
ШӀу зэрэпшӀэным пылъ
1 УицӀыфхэм агу къэгъэкӀыжь, Ӏэшъхьэтетхэмрэ тетыгъо зиӀэхэмрэ афэӀорышӀэнхэуи, ядэӀунхэуи, сыд фэдэ шӀушӀэным фэхьазырынхэуи. 2 Ащ нэмыкӀэу агу къэгъэкӀыжь, зыми ӀэягъэкӀэ темыгущыӀэнхэуи, цӀэцӀалэу щымытынхэуи, ӀэсагъэкӀи гушъэбагъэкӀи зэкӀэ цӀыфхэм афыщытынхэу и. 3 Сыда пӀомэ тэри зэхэшӀыкӀыныгъэ тимыӀэу, Тхьэм темыдэӀоу тыпсэущтыгъ. Тыгъощагъэу тыщытыгъ, тыгухэр зыкӀэхъопсыщтыгъэ Ӏоф мыхъомышӀэ зэмылӀэужыгъохэмрэ тызыгъатхъэщтыгъэ Ӏоф мыхъомышӀэ зэмылӀэужыгъохэмрэ тыряпщылӀыщтыгъ. Бзэджэныгъэрэ шъугъоныгъэрэкӀэ тыпсэущтыгъ, гущыкӀыгъоу тыщытыгъ, тэзэрэуджэгьущтыгъ. 4 Ау тымыкӀодэу тыкъэзыгъэнэжьырэ Тхьэм ишӀугъэрэ шӀулъэгъуныгъэу цӀыфхэм афыриӀэмрэ къызытфегъэнафэм, 5 тымыкӀодэу тыкъигъэнэжьыгъ. Шъыпкъагъэ зиӀэ Ӏофхэу тэ тшӀагъэхэм яӀоф ащ хэлъыгъэп. Тхьэм гукӀэгъуныгъэ зэриӀэр ары тымыкӀодэу тыкъызкӀигъэнэжьыгъэр. Тхьэм Ыпсэ ЛъапӀэ тыгухэр къызэригъэкъэбзэжьыгъэмкӀэ икӀэрыкӀэу тыкъалъфыжьыгъэу тигъэхъугъ, тыгухэм арылъхэри зэрихъокӀыгъэх. 6 ТымыкӀодэу тыкъэзыгъэнэжьырэ Исус Христос Тхьэм иунашъокӀэ Тхьэм Ыпсэ ЛъапӀэ инэу къытфыригъэхыгъ. 7 ТымыкӀодэу Тхьэм тыкъызфигъэнэжьыгъэр ынэшӀу щыфэныгъэкӀэ ежь ыдэжькӀэ шъыпкъагъэ тиӀэу тилъытагъэу, мыкӀодыжьын щыӀэныгъэу тызщыгугъэу, тызпаплъэрэр тиӀэхьышӀоу къытлъысыныр ары. 8 А гущыӀэхэр шъыпкъэх. ТхьэмкӀэ шӀошъхъуныгъэ зиӀэхэр шӀушӀэным пылъынхэм пае, а Ӏофхэм унаГэ бэу атебгъэтынэу сыфай. А Ӏофхэр дэгъух, яшӀуагъэ цӀыфхэм якӀы. 9 ПкӀэ зимыӀэ зэнэкъокъуныгъэм, унэгъо лъэпкъзэтекӀхэм, Тэурат хабзэм ехьылӀэгъэ зэмызэгъыныгъэм, зэщыхьаныгъэм защыдзый, сыда пӀомэ ащ фэдэ Ӏофхэм яшӀуагъэ зи къакӀорэп, пкӀи яӀэп. 10 ШъузэгурызымыгъаӀорэ цӀыфым зэ, тӀо еушъый, къыомыдэӀумэ зыщыдзый. 11 А цӀыфыр зэщыкъуагъэу, зэрэпсэкӀодышӀэ цӀыфыр ошӀэ. Ежьым ышъхьэкӀэ зигъэмысэжьыгъ.
Аужырэ гущыӀэхэр
12 Артемрэ Тихикрэ уадэжь къызызгъакӀохэкӀэ, садэжь Никопол къалэм псынкӀэу укъызэрэкӀоным пылъ. КӀымафэр ащ щызгъэкӀонэу сыгу хэлъ. 13 Очыл Зинэрэ Аполлосрэ ягъогу зытехьэхэкӀэ, щыкӀагъэ зи ямыӀэу гъогумкӀэ ӀэпыӀэгъу афэхъу. 14 ТицӀыфхэм шӀу зэрашӀэщтым пылъынхэу зэрарэгъашӀ, щыкӀэгъэшхо зиӀэхэм ӀэпыӀэгъу афэхъунхэм пае. ЯшӀуагъэ къэмыкӀоу къэрэмынэх. 15 Сигъусэ пстэуми шӀуфэс къыуахыжьы. ШӀошъхъуныгъэ зиӀэхэу шӀу тызылъэгъухэрэм аӀапэхэр сфэубытыжьых. Тхьэм ынэшӀу шъо зэкӀэми къышъущерэф. Амин.
ШӀуфэс ехыныр
1 Сэ сы Паул. Исус Христос сызэрэфэлажьэрэм пае, хьапсым сычӀадзагъэу сычӀэс. ШӀу тлъэгъоу къыддэлажьэрэ Филимон, чылыс зэӀукӀэм щыщхэу уиунэ щызэрэугъоихэрэм, 2 тшыпхъоу Апфие, Христос пае тэ къыддэлажьэрэ Архипп, тшы Тимофей сигъусэу мы тхылъыр къышъу фэсэтхы. 3 Тхьэу Тятэ лъапӀэрэ Зиусхьанэу Исус Христосрэ анэшӀу къышъущарэфи, гупсэфыныгъэ къышъуарэт.
Паул Тхьэм щытхъу зэрэфишӀырэмрэ зэрелъэӀурэмрэ
4 Тхьэм селъэӀу зыхъукӀэ, уигугъу сэшӀы зэпыт, си Тхьи щытхъу фэсэшӀы. 5 Сыда пӀомэ Зиусхьанэу ИсускӀэ шӀошъхъуныгъэу уиӀэмрэ Тхьэм ицӀыф лъэпӀэ пстэуми шӀулъэгъуныгъэу афыуиӀэмрэ якъэбар зэхэсхыгъэшъ ары. 6 ШӀошъхъуныгъэу тиӀэмкӀэ гъусэ укъытфэхъугъ, Христос тыгухэм зэрарылъым пае, Тхьэм шӀоу къытфишӀэрэ пстэури а гъусэныгъэу оррэ тэррэ зэфытиӀэм нахьыбэ къыдгуригъэӀонэу селъэӀу. 7 УишӀулъэгъуныгъэмкӀэ инэу сыбгъэгушӀуагъ ыкӀи сыбгъэгушхуагъ, сыда пӀомэ о, сшы, Тхьэм ицӀыф лъапӀэхэм агу бгъэпсэфыжьыгъ.
Паул Онесим пае Филимон зэрелъэӀурэр
8 Арышъ, Христос тыгухэм зэрарылъым пае, пшӀэн фаер унашъо пфэсшӀынэу гушхоныгъэ сиӀэ пэтми, 9 шӀулъэгъуныгъэкӀэ сыкъыолъэӀунэу нахь къэсэштэ. Сэ, Паул, сылӀыжъэу ыкӀи Исус Христос сызэрэфэлажьэрэм пае, хьапсым сычӀадзагъэу сычӀэсэу, 10 скъо Онесим пае сыолъэӀу, сыда пӀомэ хьапсым сычӀэсэу ар скъо фэдэу хъугъэ. 11 ЫпэкӀэ оркӀэ Онесим ишӀуагъэ къэкӀощтыгъэп, ау джы оркӀи сэркӀи ишӀуагъэ къэкӀо. 12 Ар спсэ фэдэу шӀу слъэгъурэр джы къыпфэсэгъэкӀожьы. 13 КъэбарышӀур зэрэзгъэӀурэм пае, хьапсым сычӀэсфэ, о пчӀыпӀэкӀэ ӀэпыӀэгъу къысфэхъунэу садэжь щызгъэӀэнэу сыфаещтыгъ, 14 ау о умыдэу ар сэ сшӀэнэу сыфэягъэп, о уишӀушӀагъэ егъэзыгъэ хэмылъэу, о ар уигуапэу пшӀэным пае. 15 Зы уахътэ горэкӀэ Онесим къыбгъодэкӀыгъэу зыкӀэхъугъэр 16 унэӀутым фэдэу мыхъужьэу, ау унэӀутым нахьи нахьышӀужьэу, шӀу плъэгъурэ тшы фэдэу егъашӀэм бгъотыжьынэу къычӀэкӀынкӀи мэхъу. СэркӀэ ар бэу лъапӀэу щыт, оркӀи ащ нахьи нахь лъэпӀэжь, цӀыф фэдэу ыкӀи Зиусхьаныр зыгу илъ пшы фэдэу. 17 Сыкъыбдэлажьэу сыолъытэмэ, сэ сызэребгъэблагъэщтыгъэм фэдэу, ари егъэблагъ. 18 ЗыгорэкӀэ иягъэ къыокӀыгъэмэ, е уичӀыфэ телъмэ, сэ ар къысфэгъаз. 19 Сэ, Паул, ар сэ остыжьыщт, сэ сӀэкӀэ сэтхы, ау Христос угу зэрилъым пае, сичӀыфэ о зэрэптелъыр къыосӀонэу ищыкӀагъэп. 20 Ары, сшы, Зиусхьаным пае уишӀуагъэ къысэгъэкӀ. Зиусхьаныр угу зэрилъым пае, сыгу гъэпсэфыжь. 21 УкъызэрэсэдэӀущтымкӀэ сицыхьэ птелъэу къыпфэсэтхы. СыкъызэрэолъэӀурэм нахьи нахьыбэ зэрэпшӀэщтри сэшӀэ. 22 НэмыкӀ горэмкӀэ сыолъэӀу: хьакӀэщ горэ къысфэгъэхьазыр; сыда пӀомэ Тхьэм шъукъызэрэсфелъэӀугъэм ипэгъокӀ фэдэу сыкъышъуитыжьынэу сыщэгугъы.
Аужырэ шӀуфэс гущыӀэхэр
23 Епафрасэу Христос Исус зэрэфэлажьэрэм пае, сигъусэу хьапсым чӀадзагъэу чӀэсым шӀуфэс къыуехыжьы. 24 Сэ къыздэлажьэрэ Марки, Аристархи, Димаси, Лукъи шӀуфэс къыуахыжьы. 25 Зиусхьанэу Исус Христос ынэшӀу шъугумэ къащерэф. Амин.
Ыкъо ыжэкӀэ Тхьэр къызэрэгущыӀагъэр
1 Пасэм Тхьэр пегъымбархэм ажэкӀэ бэрэ ыкӀи зэтефыгъэу тятэжъхэм къадэгущыӀэщтыгъ. 2 Ау мы уахътэм, мы дунаем иаужрэ дэдэ мафэхэм, Ыкъо ыжэкӀэ тэ къыддэгущыӀагъ. Тхьэм Ӏоф пстэури Ыкъо иӀэхьышӀоу хъунэу ыгъэнэфагъ, ащи дунаер къыригъэгъэхъугъ. 3 Тхьэм ищытхъушхо инэфынэ Ыкъо ыдэжь къикӀэу къепсы; Ыкъо ищытыкӀэ Тхьэм ищытыкӀэ фэдэкъабз, игущыӀэу лъэкӀыныгъэшхо зиӀэмкӀи щыӀэ пстэури щегъаӀэ. ЬӀкъо цӀыфмэ агухэм псэкӀодхэр зэраригъэкъэбзыкӀыжьыщт гъогу къафишӀыгъ, уашъоми дэкӀоежьи, тетыгъошхор зэкӀэ зиӀэ Тхьэм иджабгъукӀэ готӀысхьагъ. 4 Тхьэм «Скъо» ыӀозэ ащ къыриӀоу, къызэреджэрэ цӀэшхор мэлэӀичхэм ацӀэ зэрэнахь лъапӀэм фэдэу, Тхьэм ежь Ыкъо мэлэӀичхэм апшъэ ышӀыгъ.
Къо лъапӀэр мэлэӀичхэм апшъэ щыӀ
5 Сыда пӀомэ Тхьэм мэлэӀичхэм ащыщэу зыгорэм, «Оры сКъор, непэ Ты сыпфэхъугъ», ыӀуи риӀуагъа? Тхьэм мэлэӀич горэми ехьылӀагъэу, «Сэ Ты сыфэхъущт, ежьыри Скъо хъущт», ыӀуи къыӀуагъа? 6 ЕтӀани Тхьэм ежь къыхихыгъэ Ыкъо кӀасэ дунаем къызытырегъахьэм, къыӀуагъ: «Тхьэм имэлэӀич пстэуми ар арэгъэлъапӀ». 7 МэлэӀичхэм яхьылӀагъэу Тхьэм мырэущтэу къыӀуагъ: «Тхьэм имэлэӀичхэр жьыбгъэм фэдэхэу егъэхъух, а Ӏофтабгэхэр мэшӀотхъуабзэхэм афэдэхэу егъэхъух». 8 Ау ыКъо ехьылӀагъэу Тхьэм мырэущтэу къыӀуагъ: «О Тхьэ, уитетыгъошхо тӀысыпӀэ егъашӀэм утесыщт. Уитетыгъошхо ибэщ зэфагъэр ары. 9 Шъыпкъагъэр шӀу олъэгъу, бзэджагъэри оуджэгъу. Ащ пае Тхьэу уи Тхьэ уигъусэхэм анахьи гушӀуагъом идагъэ о нахь къыпщифагъ». 10 Тхьэм мырэущтэуи къыӀуагъ: «О Зиусхьан, ублапӀэм дэжь чӀылъэм ылъапсэхэр хэбгъэуцуагъэх, уашъохэри уиӀэшӀагъэх. 11 Ахэр кӀодыжьыщтых, ау о умыкӀодэу укъэнэжьыщт. Щыгъыным фэдэу ахэр жъы хъущтых. 12 Щыгъыным фэдэу зэкӀоцӀыпщыхьащтых, зэхъокӀыгъэуи хъущтых; ау о узэрэщытым фэдэу утетэу укъэнэжьыщт, о уиилъэсхэми кӀэух яӀэщтэп». 13 Тхьэм мэлэӀичхэм ащыщэу зыгорэми, «О уипыихэр лъэгукӀэтын пфэсшӀыхэфэ, сэ сиджабгъукӀэ къызготӀысхь», ыӀуи риӀуагъа? 14 Арэущтэу мэлэӀичхэр Тхьэм фэлажьэрэ псэхэу щытых, цӀыфхэу мыкӀодхэу Тхьэм къызэригъэнэжьыщтхэр зиӀэхьышӀу къызлъысыщтхэм афэӀофтэбгэнхэуи Тхьэм ахэр къегъакӀох.
ТымыкӀодэу Тхьэм тыкъызэригъэнэжьырэм икъэбарышӀу лъапӀэ
1 Арэущтэу зэрэщытым фэшӀ Тхьэм игъогу тытемыкӀыным пае, гущыӀэхэу зэхэтхыгъэхэм лъэшэу тынаӀэ атедгъэтын фае. 2 Сыда пӀомэ гущыӀэхэу мэлэӀичхэм къагъэӀугъэхэм уащыгугъышъунхэу къычӀэкӀыгъэх, хэти а гущыӀэхэм атекӀыгъэми, е ямыдэӀугъэми Тхьэм ифэшъуашэ къыригъэпщыныжьыгъ. 3 Арышъ, тымыкӀодэу Тхьэм тыкъызэригъэнэжьырэм икъэбарышӀу лъапӀэ тимыгъапэмэ, тэри тифэшъуашэ Тхьэм зэрэтигъэпщыныжьыщтым сыдэущтэу тыӀэкӀэкӀыщта? Ежь Зиусхьаныр ары ыпэ рапшӀэу а къэбарыр къытэзыгъэӀугъэр, ащ къыӀуагъэхэр зэхэзыхыгъэхэми а къэбарыр къытфагъэшъыпкъэжьыгъ. 4 Тхьэри нэшэнэ гъэшӀэгъонышхохэмкӀи, Ӏофышхо гъэшӀэгъонхэмкӀи, лъэкӀыныгъэ зыхэлъ Ӏофышхо зэтефыгъэхэмкӀи а къэбарышӀум шыхьат фэхъугъ. Ащ нэмыкӀэу Тхьэр зэрэфэягъэм тетэу, ежь Ыпсэ ЛъапӀэкӀэ Ӏоф зэфэшъхьафхэр ашӀэнхэу цӀыфхэм лъэкӀыныгъэхэр афигощыгъэх.
Христос ары пащэ къытфэхъоу, тымыкӀодэу тыкъэзыгъэнэжьырэр
5 КъэкӀощт дунаеу джы зигугъу тшӀырэр Тхьэм зыӀэ къырилъхьагъэхэр мэлэӀичхэр арэп. 6 Ау Тхьэм игущыӀэ тхыгъэхэм арытэу, зы чӀыпӀэ горэм ыдэжь зыгорэм мырэущтэу къыщиушыхьатыгъ: «О Тхьэ, цӀыфыр сыда, ащ уегупшысэнэу, цӀыф лъэпкъым ыкъо сыда, о ащ укӀэлъыплъэнэу? 7 ТӀэкӀурэ мэлэӀичхэм анахьи нахь цӀыкӀоу бгъэхъугъ. ЕтӀанэ щытхъушхорэ лъытэныгъэшхорэ фэбгъэшъошагъэх. 8 ЗэкӀэри ежьым ылъэгу чӀэгъ чӀэбгъэуцуагъ». Тхьэм зэкӀэри цӀыфым ылъэгу чӀэгъ зычӀегъэуцом, ащ ылъэгу чӀэгъ чӀэмытэу зи къыгъэнагъэп. Ау джы пстэури цӀыфым ылъэгу чӀэгъ чӀэтэу тлъэгъурэп. 9 Ау Исус къин ыщэчэу зэрэлӀагъэм пае, Тхьэм ащ щытхъушхорэ лъытэныгъэшхорэ зэрэфигъэшъошагъэхэр тэлъэгъу. Сыда пӀомэ Тхьэм ынэшӀу щыфэныгъэкӀэ Исус цӀыф пстэуми ачӀыпӀэкӀэ лӀэныгъэр ылъэгъуным пае, Тхьэм ар тӀэкӀурэ мэлэӀичхэм анахьи нахь цӀыкӀоу ыгъэхъугъ. 10 ЦӀыфыбэ ибынхэу хъунхэм ыкӀи щытхъушхомкӀэ Ӏахьэ къалъысыным пае, Тхьэу зэкӀэри къэзыгъэхъугъэу, зэкӀэри зыфыщыӀэм Исус къинэу ыщэчыгъэмкӀэ ифэшъошэ тетыгъор иӀэу зэригъэхъугъэр къекӀоу щытыгъ. Сыда пӀомэ цӀыфхэр мыкӀодхэу къызэригъэнэжьырэ гъогум тезыгъахьэу, пащэ афэхъурэр Исус ары. 11 Сыда пӀомэ Исусэу цӀыфхэм агухэр зыгъэкъэбзэжьырэмрэ цӀыфхэу зыгу къабзэ хъухэрэмрэ а зы Ты лъапӀэм ибыных. Ащ пае, Исус темыукӀытыхьэу ахэмэ ышыхэкӀэ яджэ. 12 Ащ Тхьэм мырэущтэу риӀуагъ: «Сэ сшыхэм уикъэбар язгъэшӀэщт. УицӀыфхэм язэӀукӀи сыхэтэу сэ щытхъушхо о къыпфэсшӀыщт». 13 Мырэущтэуи къыӀуагъ: «Тхьэм сыщыгугъыщт». ЕтӀани къыӀуагъ: «Мары, сэррэ Тхьэм къыситыгъэ бынхэмрэ». 14 А бынхэр лымрэ лъымрэ къахэхъукӀыгъэ цӀыфых. Арышъ, Исуси лымрэ лъымрэ къахэхъукӀыгъэ цӀыф хъугъэ, илӀэныгъэкӀэ шэйтанэу лӀэныгъэм тетыгъо фызиӀэр ыгъэкӀодыным паий, 15 лӀэныгъэм зэрэщыщынагъэхэм фэшӀ, щыӀэхэфэ шэйтаным ипщылӀхэу щыӀагъэхэр шъхьафит ышӀынхэм паий. 16 Сыда пӀомэ Исус зыдэӀэпыӀэхэрэр мэлэГичхэр арэп, Ибрахьимэ къытехъукӀыгъэ цӀыфхэр ары нахь. 17 Арышъ, Тхьэм фэлажьэрэ дин пэщэшхоу гукӀэгъу зиӀэу, Тхьэм фэшъыпкъэу хъуным пае, ышхэм сыд щыщымкӀи афэдэу хъун фэягъ, цӀыфмэ япсэкӀодхэр атырихынхэм пае. 18 ӀПэйтаным Исус псэкӀод ригъэшӀэнэу зыпэлъым, Исус къин зэрищэчыгъэм пае, цӀыфхэу шэйтаным псэкӀод зэригъэшӀэнэу пылъхэм адэӀэпыӀэн ылъэкӀыщт.
Исус пегъымбар Мусэ нахьи нахь лъапӀ
1 Сшы лъапӀэхэр, Тхьэр шъори ежь ибынхэм ащыщ шъухъунэу къышъоджагъ. Арышъ, тишӀошъхъуныгъэ идин эщэшхоу хъунэу Тхьэм къытфигъэкӀогъэ Исус шъуегупшыс. 2 Пегъымбар Мусэ Тхьэм иунагъо щыщ цӀыф пстэуми шъыпкъагъэ афыриӀэу зэрэщытыгъэм фэдэу, Исуси Тхьэу ежьыр зыгъэнэфагъэм шъыпкъагъэ фыриӀэу щытыгъ. 3 Унэм нахьи унэ зышӀырэм нахь щытхъу зэриӀэм фэдэу, Мусэ нахьи Исуси нахь щытхъу ифэшъуаш. 4 Сыда пӀомэ цӀыф горэм ымышӀыгъэ унэ щыӀэп, ау пстэури зышӀыгъэр Тхьэр ары. 5 Мусэ Тхьэм фэлажьэу Тхьэм иунэ зэкӀэ Ӏофхэу щишӀэщтыгъэхэмкӀэ шъыпкъагъэ иӀэу щытыгъ, Тхьэм къыӀощтхэми шыхьат афэхъугъ. 6 Ау Христос Тхьэм иунагъо зыӀэ илъ Къор ары. Тыгу тымыгъэкӀодэу Ӏофхэу тызэрыгушӀохэу ыкӀи тызщыгугъыхэу тызпаплъэхэрэм кӀэухым нэсы шъыпкъэу татетэу тырыкӀомэ, тэри ащ иунагъо тыщыщ.
Тхьэм ицӀыфхэм языгъэпсэфыпӀ
7 Арышъ, Тхьэм Ыпсэ ЛъапӀэ зэриӀорэм фэдэу, «Непэ Тхьэм ымакъэ зэхэшъухымэ, 8 шъутухэр гуркъэхэу щышъумыгъэт, шъуятэжъхэм шъоф нэкӀым зэрэщашӀэщтыгъэм фэдэу. Ахэр Тхьэм едэӀунхэу адэщтыгъэп, Тхьэм ищыӀагъэ зынэсырэр агъэунэфынэуи пылъ ыщтыгъэх». 9 (Тхьэм мырэущтэу еӀо:) «Шъоф нэкӀым шъуятэжъхэм сищыӀагъэ зынэ сырэри сиӀофхэр зыфэдэхэри агъэунэфынхэу пылъыщтыгъэх. Илъэс тӀокӀитӀум сиӀофхэр алъэгъущтыгъэх. 10 Ащ пае, а цӀыфхэм сафэгубжи мырэущтэу сӀуагъэ: 'Ахэр агухэмкӀэ мэгъощэ зэпытых, сигъогухэр зыфэдэхэри ашӀэхэрэп'. 11 Арэущтэу сафэгубжэу, 'Сэ ахэр сизыгъэпсэфыпӀэ къизгъэхьащтхэп', сӀуи, къэсӀуагъэр згъэшъыпкъэжьызэ, гущыӀэ пытэкӀэ сӀуагъэ». 12 Сшыхэр, шъуащыщэу хэти щыӀэныгъэ зиӀэ Тхьэм игъогу ыкӀыб фигъэзэжьэу, шӀошъхъуныгъэ зимыӀэ гу бзаджэ зэримыӀэным шъуфэсакъ. 13 Ау псэкӀодшӀэным итхьагъэпцӀыгъэкӀэ шъуащыщэу зыгорэм ыгу гуркъэу мыхъуным пае, мафэ къэси шъузэрэгъэгушху, «Непэ» зыфаӀорэ лъэхъанэм тытетыфэ. 14 Сыда пӀомэ Ӏофхэу ыпэм тызщыгугъыгъэхэм кӀэухым нэсы шъыпкъэу татетэу тырыкӀомэ, тэ пстэури Христос игъусэхэм тащыщэу тэхъу. 15 Тхьэм игущыӀэ тхыгъэхэм зэрарытым фэдэу, «Непэ Тхьэм ымакъэ зэхэшъухымэ, шъугухэр гуркъэхэу щышъумыгъэт, шъуятэжъхэм шъоф нэкӀым зэрэщашӀэщтыгъэм фэдэу>. 16 Тхьэм ымакъэ зэхэзыхыгъэхэу, едэӀунхэу зымыдагъэхэр хэтха? Пегъымбар Мусэ Мысырым къырищыжьыгъэгъэхэ цӀыф пстэури арыба? 17 Тхьэр илъэс тӀокӀитӀум цӀыфхэу зыфэгубжыщтыгъэхэр хэтха? ПсэкӀод зышӀагъэхэу, зыпкъыхэр шъоф нэкӀым къинэжьыгъэхэр арыба? 18 ЕтӀани «Сэ ахэр сизыгъэпсэфыпӀэ къизгъэхьащтхэп», ыӀуи, къыӀуагъэр ыгъэшъыпкъэжьызэ, Тхьэм гущыӀэ пытэкӀэ зэриӀуагъэхэр хэтха? ЕдэӀунхэу зымыдагъэхэр арыба? 19 Арэущтэу ахэмэ шӀошъхъуныгъэ яӀэу зэрэщымытыгъэм пае, Тхьэм изыгъэпсэфыпӀэ ихьанхэу амылъэкӀэу къызэрэнагъэхэр тэлъэгъу.
1 Тхьэм изыгъэпсэфыпӀэ тызэрихьанымкӀэ тыкъызэригъэгугъэгъэ Ӏофыр джыри зэрэщытым тетышъ, шъуащыщэу зыгорэ ащ имыхьагъэу къычӀэмыкӀыным пае, шъузфэсакъыжь. 2 А зыгъэпсэфыпӀэм икъэбар ахэмэ зэранэсыгъэм фэдэу, тэри къытэнэсыгъ. Ау ахэмэ къэбарышӀоу зэхахыгъэм ишӀуагъэ къякӀыгъэп, сыда пӀомэ а къэбарышӀур зызэхахым, ашӀошъ хъугъэп. 3 Ау тэ, шӀошъхъуныгъэ зиӀэ хъугъэхэр, ары Тхьэм изыгъэпсэфыпӀэ ихьащтхэр, Тхьэм къызэриӀуагъэм фэдэу, «Сафэгубжэу, 'Сэ ахэр сизыгъэпсэфыпӀэ къизгъэхьащтхэп', сӀуи, зыфэсӀуагъэр згъэшъыпкъэжьызэ, гущыӀэ пытэкӀэ сӀуагъэ». Тхьэм дунаер къызигъэхъугъэм щегъэжьагъэу иӀофхэр ыухыгъэхэу щытыгъэ пэтми, арэущтэу ыӀуагъ. 4 Сыда пӀомэ яблэнэрэ мафэм ехьылӀагъэу Тхьэм къызэриӀорэр игущыӀэ тхыгъэхэм арытэу чӀыпӀэ горэм ыдэжь ит: «Тхьэм иӀоф пстэури ыухыгъэхэу, яблэнэрэ мафэм зигъэпсэфыжьыгъ». 5 А чӀыпӀэм дэжь Тхьэм къызэриӀорэри ит: «Сэ ахэр сизыгъэпсэфыпӀэ къизгъэхьащтхэп». 6 Арэущтэу Тхьэм изыгъэпсэфыпӀэ ихьанхэу цӀыф заулэ джыри щыӀэх. Ау цӀыфхэу пасэм а зыгъэпсэфыпӀэм икъэбар зынэсыгъэхэр Тхьэм едэӀунхэу зэрамыдагъэм пае, изыгъэпсэфыпӀэ ихьагъэхэп. 7 Арэущтэу зэрэщытым пае, ащ нэужым бэ тешӀагъэу, Тхьэм мы гущыӀэхэр пегъымбар Даутэ ыгу къырилъхьэхи, къызырегъаӀохэм, нэмыкӀ мафэу «Непэ» зыфиӀуагъэр къыгъэнэфагъ, ыпэкӀэ зэрэтӀуагъэм фэдэу, «Непэ Тхьэм ымакъэ зэхэшъухымэ, шъугухэр гуркъэхэу щышъумыгъэт». 8 Сыда пӀомэ Исус Навин Тхьэм изыгъэпсэфыпӀэ ахэр ригъэхьагъэхэмэ, Тхьэм нэмыкӀ мафэу «Непэ» зыфиӀуагъэм икъэбар къыӀощтыгъэп. 9 Арышъ, Тхьэм яблэнэрэ мафэм зызэригъэпсэфыжьыгъэм фэдэу, Тхьэм ицӀыфхэри ежь изыгъэпсэфыпӀэ джыри ихьащтых; 10 сыда пӀомэ хэт щыщми Тхьэм изыгъэпсэфыпӀэ ихьэрэм иӀоф ыухыгъэу зегъэпсэфыжьы, Тхьэм иӀофхэр ыухыгъэхэу зызэригъэпсэфыжьыгъэм фэдэу. 11 Арышъ, а зыгъэпсэфыпӀэм тызэрихьащтым ыуж тижъугъэт. Тятэжъхэр Тхьэм едэӀунхэу зэрамыдагъэм фэдэу, тэ тщыщэу зыгорэ Тхьэм емыдэӀоу орэмыхъу. Армырмэ, Тхьэм изыгъэпсэфыпӀэ тихьащтэп. 12 Тхьэм игущыӀэхэм щыӀэныгъэшхорэ лъэкӀыныгъэшхомрэ ахэлъых. Ахэр бгъуитӀуцэ сэшхо чаным нахьи нахь чаных. Псэри, гури, къупшъхьэри, куцӀыри зэхадзы жьынхэу цӀыфым икуупӀэ нэсы пхырэкӀых. ЦӀыфым игупшысэхэри игухэлъхэри зэхафых. 13 Тхьэм къыгъэхъугъэ пстэуми ащыщэу зи ежьым ыпашъхьэ гъэбылъыгъэу щыӀэп. Тхьэм ынэхэм апашъхьэ Ӏоф пстэури шъхьэихыгъэу ыкӀи нафэу щытых. Ежьыр ары пэгъокӀыр зэттыщтыр.
Дин пэщэшхоу къытфэхъугъэр Исус ары
14 Арышъ, уашъом дэкӀоежьыгъэу, Исусэу Тхьэм Ыкъо дин пэщэшхоу тиӀэшъ, шӀошъхъуныгъэу тиӀэм тытетэу шъыпкъагъэкӀэ тырыжъугъакӀу. 15 Сыда пӀомэ дин пэщэшхоу тиӀэр лъэкӀыныгъэ зэрэтимыӀэр зыгурыӀон зымылъэкӀырэ дин пэщэшхоу арэп. Шэйтаным псэкӀод тигъэшӀэнэу зэрэпылъым фэдэу, лъэныкъо пстэумкӀи тидин пэщэшхуи псэкӀод ригъэшӀэнэу пылъэу щытыгъ, ау псэкӀод зи ригъэшӀэшъугъэп. 16 Арышъ, ӀэпыӀэгъу тищыкӀагъэ зыхъукӀэ, Тхьэм гукӀэгъу къытфишӀынэу ыкӀи ынэшӀу къытщифэнэу, гукӀэгъуныгъэ зиӀэ Тхьэм итӀысыпӀэ лъапӀэ гушхоныгъэ тиӀэу тыӀужъугъахь.
1 ЦӀыфхэм ачӀыпӀэкӀэ ежьым фэлэжьэнэуи, тынхэр ежьым фихьынхэуи, цӀыфхэм япсэкӀодхэр ыпщыныжьынхэм пае, къурмэнхэр фишӀынхэуи Тхьэм хэтрэ дин пэщэшхор цӀыфхэм къахехы. 2 Дин пэщэшхор ыгурэ ыпсэрэкӀэ лъэкӀыныгъэ зимыӀэ цӀыфэу зэрэщытым пае, зэхэшӀыкӀыныгъэ зимыӀэхэу, гъощэгъэ цӀыфхэм гушъэбэныгъэкӀэ адэзекӀон елъэкӀы. 3 Арэу зыхъукӀэ, дин пэщэшхом ежьым ипсэкӀодхэри цӀыфхэм япсэкӀодхэри ыпщыныжьынхэм пае, Тхьэм къурмэн фишӀын фае. 4 Лъытэныгъэу дин пэщэшхоу хъуныр зыми ежьежьырэу зыфигъэшъошэшъущтэп. Ау Тхьэр Хьарун къызэреджагъэм фэдэу, дин пэщэшхоми къеджэн фае. 5 Арэущтэу Христоси лъытэныгъэу дин пэщэшхоу хъуныр зыфигъэшъошагъэп, ау Тхьэм ащ къыриӀуагъ: «Оры Скъор, непэ Ты сыпфэхъутъ». 6 Тхьэм къызэриӀуагъэри игущыӀэ тхыгъэхэм арытэу, нэмыкӀ чӀыпӀэм ыдэжь ит: «Мелхиседекъ фэдэу ори егъашӀэм дин пащэу ущытыщт». 7 Исус дунаем зытетыгъэ мафэхэм мэкъэшхокӀэ джэзэ, ынэпсхэри къеххэу, Тхьэу лӀэныгъэм къыӀэкӀэзыхышъущтым лъэшэу елъэӀугъ. ИдэӀоныгъэ пае ащ ымакъэ Тхьэм зэхихыгъ. 8 Ежьыр Тхьэм Ыкъоу щытыгъэ пэтми, къинэу ыщэчыгъэхэмкӀэ Тхьэр зэрэфаем тетэу, едэӀоу щытыгъ. 9 ИӀоф зырегъэкъум, ежьым къедэӀурэ цӀыф пстэури сыдигъуи мыкӀодхэу къэзыгъэнэжьырэр ежьыр арэу хъугъэ, 10 Тхьэми ар дин пэщэшхоу, Мелхиседекъ фэдэу, ыгъэнэфагъ.
ШӀошъхъуныгъэм игъогу шъутемыкӀ
11 Мы Ӏофым ехьылӀагъэу къэтӀон фэягъэр бэ. Ау шъутхьакӀумэхэр жъажъэу хъугъэхэшъ, а Ӏофхэр зэхэшъозгъэшӀыкӀыныр къин. 12 Уахътэу блэкӀыгъэм шъузеплъыкӀэ, мы уахътэм шъощ нэмыкӀ цӀыфхэм Христос ехьылӀэгъэ къэбарышӀур яжъугъэшӀэн фэягъэ, ау Тхьэм игущыӀэхэм яхьылӀэгъэ Ӏофхэу апэ дэдэу зэжъутъэшӀагъэхэр зыгорэм шъуигъэшӀэжьынхэу шъуищыкӀагъ. ПӀъуищыкӀагъэр шхыныр арэп, быдзыщэр ары нахь! 13 Щэ нахь емышъорэр сабый ныӀэп. ПӀъыпкъагъэм иӀоф зэхишӀыкӀырэп. 14 ПӀхыныр зыныбжь икъугъэхэм апае. Ахэмэ шӀумрэ емрэ агухэмкӀэ зэхадзыжьынхэу есэхи зэрагъэшӀагъ.
1 Христос ехьылӀэгъэ Ӏофхэу апэ дэдэу шъуагъэшӀагъэхэм таблэжъугъэкӀи, цӀыфхэу зыныбжь икъугъэхэмэ зэрагъэшӀэн фэе Ӏофхэм зафэтэжъугъэгъаз. ТишӀошъхъуныгъэ ылъапсэхэр джыри зэ зэхэтэшъумыгъэгъэуцожьых. А лъэпсэ Ӏофхэр мыхэр ары: лӀэныгъэ къызхэкӀырэ Ӏоф мыхъомышӀэхэу шъушӀагъэхэм шъуафыкӀэгъожьынри, ТхьэмкӀэ шӀошъхъуныгъэ шъуиӀэнри; 2 умэхъыныгъэм ехьылӀэгъэ Ӏофхэу зэжъугъэшӀагъэхэри, цӀыфхэм атеӀэбэнри Тхьэм ынэшӀу къащифэным пае; лӀагъэхэм якъэтэджыжьынри, Тхьэм ихьыкумэу мыкӀодыжьыщтыр цӀыфхэм атришӀыхьанри. 3 Тхьэм ыӀомэ, а Ӏофхэм таблэкӀыщт. 4 Сыда пӀомэ цӀыфхэу зэгорэм Тхьэм инэфынэ хэтыгъэхэу, етӀани зыкӀыб Тхьэм фэзыгъэзагъэхэм япсэкӀодхэм афыкӀэгъожьынхэу къябгъэгъэзэжьын плъэкӀыщтэп. Ахэмэ уашъом щыӀэ Тхьэм итын зыфэдэр ашӀэщтыгъ; Тхьэм Ыпсэ ЛъапӀи агухэм арылъыгъ; 5 Тхьэм игущыӀэхэм яшӀугъэри, къэкӀощт дунаем илъэкӀыныгъэхэри ашӀэщтыгъэх. 6 Ау щытми, акӀыб Тхьэм фагъэзэжьыгъ. ЯпсэкӀодхэм афыкӀэгъожьынхэу къябгъэгъэзэжьын плъэкӀыщтэп, сыда пӀомэ Тхьэм Ыкъо джыри зэ къащым тыраӀулӀэрэм фэд, цӀыфмэ апашъхьэ ынапэ щытырахырэми фэд. 7 ЧӀыгоу бэрэ ощх къызтещхэу, цӀыфхэу ар зылэжьхэрэмкӀэ зишӀуагъэ къакӀорэ лэжьыгъэ къызщыкӀырэм Тхьэм ынэшӀу къыщефэ. 8 Ау панэрэ пырэжъыерэ къызщыкӀырэ чӀыгум пкӀэ иӀэп. Бэ темышӀэу Тхьэм ынае а чӀыгум къыщифэщт. Ыужыпкъэми ар агъэстыжьыщт. 9 СилъапӀэхэр, арэущтэу тӀо пэтми, шъуиӀоф нахьышӀоу зэрэщытми, шъумыкӀодэу Тхьэм шъукъызэригъэнэжьыщт гъогум шъузэрэтетми тащэгугъы. 10 Сыда пӀомэ Тхьэр зафэ. Ӏофэу шъушӀагъэр щыгъупшэщтэп. Тхьэм ицӀыф лъапӀэхэм ӀэпыӀэгъу шъузэрафэхъугъэмрэ джыри ӀэпыӀэгъу шъузэрафэхъурэмрэкӀэ шӀулъэгъуныгъэу Тхьэм фэжъугъэлъэгъуагъэри щыгъупшэщтэп. 11 Ӏофхэу шъузщыгугъыхэу, шъузпаплъэхэрэр жъугъотынхэм пае, шъуащыщэу хэти ыгу етыгъэу кӀэухым нэсы Тхьэм иӀофхэм емызэщэу апылъымэ тшӀоигъу. 12 Фэмыфэу шъущымыт, ау шӀошъхъуныгъэмрэ щыӀагъэмрэ зэряӀэм пае, Тхьэм Ӏофхэу къызэригъэгугъагъэхэр цӀыфхэу зиӀэхьышӀу къызлъысыщтхэм ялъэужхэм шъуарыкӀу.
Тхьэм тыкъызэригъэгугъагъэр ыгъэцэкӀэжьыщт
13 Тхьэм игущыӀэ Ибрахьимэ къызыретым, ежьым нахьи нахь ин зэрэщымыӀэм пае, къыӀуагъэр къыгъэшъыпкъэжьызэ, ежьым ыцӀэкӀэ гущыӀэ пытэкӀэ мырэущтэу къыӀуагъ: 14 «ШъыпкъэмкӀэ сынэшӀу къыпщысфэщт, быныби къыптезгъэхъукӀыщт». 15 Арэущтэу Ибрахьимэ щыӀагъэ зыригъаӀи, Тхьэм къызэригъэгугъагъэр иӀэ хъугъэ. 16 ЦӀыфмэ ежьхэм анахьи нахь инэу зыгорэмкӀэ тхьарыӀо ашӀэу яхабз. ТхьарыӀом къаӀогъэ гущыӀэхэр егъэшъыпкъэжьых, зэнэкъокъун Ӏофми кӀэух фешӀы. 17 Арэущтэу Тхьэм Ӏофхэу къызэригъэгугъагъэхэр зиӀэхьышӀу къызлъысыщтхэм игухэлъ зэрэзэблимыхъущтыр аригъэлъэгъунэу фэягъэти, Ӏофхэу къызэригъэгугъагъэхэр зэригъэцэкӀэщтхэр гущыӀэ пытэкӀэ къафигъэшъыпкъэжьыгъ. 18 Арэущтэу зэблэмыхъушъун ӀофитӀу щыӀ. Ар Тхьэу зэрэщытым пае, а ӀофитӀур зэримыгъэцэкӀэн гъогу щыӀэп. Тэ Тхьэр ухъумакӀоу къызфэхъунэу, ежьым пэгъунэгъу хъугъэ цӀыфхэр Тхьэм тапэ къырилъхьэгъэ Ӏофхэу тызщыгугъыхэу, тызпаплъэхэрэр къызнэдгъэсынхэу мы ӀофитӀумэ тагъэгушхо. 19 ГугъапӀэу Христос фытиӀэр пытэу ыкӀи цыхьэшӀэгъоу, гъурзым фэдэу тыгухэм арылъ. Ащ пае пэӀухъоу Тхьэм иунэшхо ыкӀоцӀ щыӀэм тыблэкӀызэ, унэ кӀоцӀэу анахь лъапӀэм тихьан тлъэкӀыщт. 20 Тэщ пае Исус а унэ кӀоцӀэу анахь лъапӀэм тапэу ихьагъ. Мелхиседекъ фэдэу егъэшӀэрэ дин пэщэшхоу хъугъэ.
Дин пащэу Мелхиседекъ
1 Мелхиседекъ Салэм къалэм ипачъыхьэу ыкӀи Тхьэу анахь Иным фэлажьэрэ дин пащэу щытыгъ. Ибрахьимэ пачъыхьабэмэ затекӀо ужым къызегъэзэжьым, Мелхиседекъ ащ пэгъокӀи, Тхьэм ынэшӀу къыщыригъэфагъ. 2 Джащыгъум Ибрахьимэ мылъкоу заомкӀэ къыхьыгъэм ызыпшӀанэ Мелхиседекъ ритыгъ. Мелхиседекъ ыцӀэ къикӀырэм тетэу, ыпэ рапшӀэу «шъыпкъагъэ зиӀэ пачъыхьэу» щыт, етӀанэ Салэм ипачъыхьэу щыт, ащ къикӀырэр «цӀыфхэр зэзыгъэшӀурэ пачъыхьэр» ары. 3 Яти яни имыӀэу, унэгъо лъэпкъ зэтекӀ имыӀэу, имафэхэм ублапӀэ ямыӀэу, ищыӀэныгъи ухыпӀэ имыӀэу, Тхьэм Ыкъо фэдэу Мелхиседекъ егъэшӀэрэ дин пащэу щыт. 4 Мелхиседекъ иинагъэ шъуеплъ: Тятэжъышхоу Ибрахьимэ мылъкоу заомкӀэ къыхьыгъэм ызыпшӀанэ ащ ритыгъ. 5 Левый къытехъукӀыгъэ цӀыфхэм ащыщхэу дин пащэ хъугъэхэм Израил цӀыфхэм къагъахъэрэм ызыпшӀанэ къаӀахынэу Тэурат хабзэм иунашъо ит. Ащ къикӀырэр, а пшӀанэр къызыӀаххэрэр ашыхэу Ибрахьимэ къытехъукӀыгъэ цӀыфхэр ары. 6 Ау Мелхиседекъ, Левый къытехъукӀыгъэ цӀыфхэм ащыщэу щымытыгъэ пэтми, Ибрахьимэ мылъкоу заомкӀэ къыхьыгъэм ызыпшӀанэ къыӀихыгъ. Ащ нэмыкӀэуи Мелхиседекъ Ибрахьимэу Тхьэм ӀэхьышӀукӀэ къыгъэгугъагъэм Тхьэм ынэшӀу къыщыригъэфагъ. 7 Щэч хэмылъэу, цӀыфэу адрэ цӀыфым Тхьэм ынэшӀу къыщызыгъафэрэр адрэм нахьи нахь ин. 8 ЕтӀанэ дин пащэхэу цӀыфмэ пшӀанэр къаӀызыххэрэм яӀоф ухаплъэмэ, ахэр лӀэнхэ фэе цӀыфхэу щытых. Ау Мелхиседекъэу Ибрахьимэ пшӀанэр къыӀызыхыгъэм иӀоф ухаплъэмэ, ар зэрэпсэурэмкӀэ Тхьэм игущыӀэ тхыгъэхэр шыхьат фэхъух. 9 Левый къытехъукӀыгъэ цӀыфхэм мы лъэхъанэм пшӀанэр адрэ цӀыфхэм къаӀахы пэтми, Ибрахьимэ пшӀанэр Мелхиседекъ зыретым, Левый пшӀанэр Мелхиседекъ ритыгъэу пӀоми хъущт, 10 сыда пӀомэ Мелхиседекъ Ибрахьимэ зыпэгъокӀым, Левый къэмыхъугъэу щытыгъэ пэтми, ятэжъышхоу Ибрахьимэ ыпкъ зэрэхэлъыгъэр пӀоми хъущт. 11 Арэущтэу дин пащэхэу Левый иунэгъо лъэпкъ щыщхэм Ӏофэу ашӀагъэмкӀэ Тхьэм игухэлъ икъугъэу хъугъэмэ, (сыда пӀомэ пегъымбар Мусэ и Тэурат хабзэ дин пащэхэу Левый иунэгъо лъэпкъ щыщхэм яӀоф епхыгъэу щыт), ащыгъум Хьарун фэмыдэу Мелхиседекъ фэдэу, нэмыкӀ дин пащэ къэкӀон фаеу хъущтыгъэп. 12 Сыда пӀомэ Тхьэм дин пэщэ лъэпкъыр зызэблихъукӀэ, хабзэри зэблэхъугъэу хъун фае. 13 ЕтӀанэ ти Зиусхьан Исусэу мы Ӏофхэр зэхьылӀагъэхэр нэмыкӀ унэгъо лъэпкъ щыщыгъ. Ежьым унэгъо лъэпкъ щыщэу зыми дин пащэу къурмэншӀыпӀэм Ӏоф щишӀагъэп. 14 Сыда пӀомэ ти Зиусхьан Иудэ унэгъо лъэпкъым зэрэщыщыр нафэ. Пегъымбар Мусэ дин пащэхэм къызатегущыӀэм, а унэгъо лъэпкъым игугъу ышӀыгъэп. 15 Мелхиседекъ фэдэу нэмыкӀ дин пащэ къызэрэлъэгъуагъэм Ӏофэу зыфэсӀуагъэр нахь нафэу ешӀы. 16 Мелхиседекъ иунэгъо лъэпкъ зэтекӀ ехьылӀэгъэ хабзэхэмрэ цӀыф унашъохэмрэ арэп ар дин пащэу зыгъэхъугъэхэр, ау зыми ымыгъэкӀодышъун щыӀэныгъэм илъэкӀыныгъэ ары дин пащэу зыгъэхъугъэр. 17 Сыда пӀомэ Тхьэм игущыӀэ тхыгъэхэм мырэущтэу арыт: «Мелхиседекъ фэдэу ори егъашӀэм дин пащэу ущытыщт». 18 Ыпэрэ хабзэм лъэкӀыныгъэ имыӀэу зэрэщытыгъэм ыкӀи ишӀуагъэ цӀыфхэм аримыгъэкӀэу зэрэщытыгъэм пае, Тхьэм ар зы бгъукӀэ ригъэзэкӀыгъ. 19 Сыда пӀомэ Тэурат хабзэм Ӏоф ыкӀагъэ зи имыӀэу, икъугъэу ыгъэхъун ылъэкӀыгъэп. Ау джы Тхьэм тызщигъэгугъырэ Ӏофыр нахьышӀу, а Ӏофыми Тхьэм пэблагъэ тыхъунэу тегъэлъэкӀы. 20 Ащ нэмыкӀэу Тхьэм гущыӀэ пытэкӀэ къыгъэшъыпкъэжьыгъ Исус дин пащэу зэрэхъущтыр. 21 НэмыкӀ цӀыфхэр Тхьэм игущыӀэ пытэ хэмылъэу дин пащэхэу хъугъэх, ау Исус дин пащэ хъу зэхъум, Тхьэм къыӀуагъэр гущыӀэ пытэкӀэ къыгъэшъыпкъэжьыгъ, сыда пӀомэ Тхьэм мырэущтэу къыриӀуагъ: «Сэ, Зиусхьаныр, къэсӀуагъэр згъэшъыпкъэжьызэ, гущыӀэ пытэкӀэ сӀуагъэ ыкӀи сыкӀэгъожьыщтэп: О егъашӀэм дин пащэу ущытыщт». 22 Арэущтэу зэзэгъыныгъэу Тхьэм ежьыррэ тэррэ тазыфагу дилъхьагъэр зэрэнахьышӀум тыщызыгъэгугъырэр Исус ары. 23 Ащ нэмыкӀэуи адрэ дин пащэхэр бэ хъугъэх, сыда пӀомэ дин пащэхэу Тхьэм фэлэжьэн зэпытынхэу лӀэныгъэм фит ышӀыгъэхэп. 24 Ау Исус егъашӀэм зэрэщыӀэщтым пае, идин пэщэ Ӏоф нэмыкӀ горэм къыфигъэнэжьыщтэп. 25 Ащ паий Тхьэм пэблагъэ хъунхэу Исус зэригъэлъэкӀырэ цӀыфхэр мыкӀодхэу къыгъэнэжьынхэ сыдигъуи елъэкӀы, сыда пӀомэ Исус а цӀыфхэм Тхьэм афелъэӀунэу егъашӀэм щыӀ. 26 Ащ фэдэ дин пэщэшхор ары тищыкӀагъэр: зыгу къабзэу, зыми зэригъэмысэн зи зыбгъодэмылъэу, лажьэ зи зимыӀэу, псэкӀод зышӀэрэ цӀыфхэм ахэкӀыжьыгъэу, уашъохэм апшъэ дэкӀоежьыгъэу щыӀэ дин пэщэшхор ары. 27 Адрэ дин пэщэшхохэм, ыпэ рапшӀэу ежьхэм япсэкӀодхэр апщыныжьынхэм пае, етӀанэ адрэ цӀыфхэм япсэкӀодхэри апщыныжьынхэм пае, мафэ къэси къурмэн ашӀынэу зэрящыкӀагъэм фэдэу, Исус ищыкӀагъэп; сыда пӀомэ ежь къурмэныпхъэу зызешӀым, цӀыфхэм япсэкӀодхэр ыпщыныжьынхэм пае, джыри зэ къурмэныпхъэу мыхъужьынэу, къурмэныпхъэу хъугъэ. 28 Зыгурэ зыпсэрэкӀэ лъэкӀыныгъэ зимыӀэ цӀыфхэр дин пэщэшхохэу хъунхэу Тэурат хабзэм иунашъо егъэнафэх; ау Тэурат хабзэр къызэкӀо ужым, Тхьэм къыӀуагъэр гущыӀэ пытэкӀэ къызегъэшъыпкъэжьым, Ыкъоу зишъыпкъагъэ егъашӀэм щыкӀагъэ зи зимыӀэ цӀыф икъугъэу щытыр дин пэщэшхоу хъунэу къыгъэнэфагъ.
Исусэу тидин пэщэшхор
1 Шъыпкъэу зыфатӀорэр мары: Уашъохэм ащыӀэу, тетыгъошхор зэкӀэ зиӀэ Тхьэм итӀысыпӀэ лъапӀэ иджабгъукӀэ госэу дин пэщэшхо тиӀ. 2 ЧэтэнгъэӀэгъэ шъыпкъэу Тхьэр зыдэщыӀэм дин пэщэшхоу Ӏоф щешӀэ. АчэтэнгъэӀагъэр зыгъэуцугъэр цӀыфхэр арэп, Зиусхьаныр ары нахь. 3 Тхьэм хэтрэ дин пэщэшхуи тынхэри ежьым фихьынхэуи, къурмэнхэр фишӀынхэуи къегъэнафэ. Ащ пае, тидин пэщэшхуи Тхьэм къурмэныпхъэ горэ фишӀын фае. 4 Исус дунаем тетыгъэмэ, дин пащэу щытыщтыгъэп, сыда пӀомэ Тэурат хабзэм ит унашъом тетэу, Тхьэм тынхэр фэзыхьырэ дин пащэхэр щыӀэх. 5 Ахэр дин пащэхэу Ӏоф зыщашӀэрэр Тхьэм иунэшхоу уашъо щыӀэм ышъо теплъэ е ижьау ныӀэп. Сыда пӀомэ пегъымбар Мусэ чэтэнгъэӀагъэр ыгъэуцоу зыфежьэм, Тхьэм ащ унашъо къыфишӀыгъ: «Къушъхьэм утетэу зэкӀэ къызэрэозгъэлъэгъугъэм тетэу, зэрэпшӀыщтым фэсакъ». 6 Зэзэгъыныгъэу Исус Тхьэмрэ цӀыфхэмрэ азыфагу дэлъэу ыгъэхъугъэр апэрэ зэзэгъыныгъэм нахьи зэрэнахь иным фэдэу, Исус дин пэщэшхо Ӏофэу ышӀэрэр адрэ дин пэщэшхохэм яӀоф нахьи нахь Ӏофышху, сыда пӀомэ аужырэ зэзэгъыныгъэмкӀэ Ӏофхэу Тхьэм цӀыфхэр къызэригъэгугъагъэхэр нахьышӀоу щытых. 7 Апэрэ зэзэгъыныгъэм зи щыкӀагъэ имыӀагъэмэ, нэмыкӀ зэзэгъыныгъэ ащ ычӀыпӀэ ихьанэу ищыкӀэгъэщтыгъэп. 8 Ау пегъымбарым цӀыфхэр ыгъэмысэхэу къыӀуагъ: «Зиусхьаным мырэущтэу къеӀо: Сэррэ Израил' унэгъо лъэпкъымрэ Иудэ унэгъо лъэпкъымрэ зэзэгъыныгъакӀэ тазыфагу сэ зыдэслъхьащт мафэхэр къэсыщтых. 9 Ау мы зэзэгъыныгъэр зэрэщытыщтыр ятэжъхэр Мысырым сэ къызесэщыжьхэм, зэзэгъыныгъэу сэрырэ ахэмрэ тазыфагу дэслъхьагъэр зэрыщытыгъэм фэдэу арэп, сыда пӀомэ зэзэгъыныгъэу тазыфагу дэслъхьа гъэм игъогу ахэр рыкӀо зэпытыгъэхэп. Арышъ, ахэмэ пхъэтэпэмыхьэу сяплъы хъугъэ, Зиусхьаным къеӀо. 10 А мафэхэм ауж зэзэгъыныгъэу сэрырэ Израил лъэпкъымрэ тазыфагу дэслъхьащтыр мары: Сиунашъохэр ахэмэ ашъхьэхэм арыслъхьащтых, агухэми атестхэщтых. Сэ ахэмэ я Тхьэу сыщытыщт, ахэри сэ слъэпкъэу щытыщтых, Зиусхьаным къеӀо. 11 Арэущтэу зыхъукӀэ, 'Зиусхьаныр зыфэдэр зэгъашӀэ', аӀоу, зэгъунэгъухэми зэшыхэми зэраӀожьыщтэп, сыда пӀомэ цӀыкӀухэм къащегъэжьагъэу инхэр къыхиубытхэу зэкӀэми сашӀэщт. 12 БзэджашӀэхэми сэ гукӀэгъу афэсшӀыщт. ЯпсэкӀодхэри, бзэджагъэу ашӀагъэхэри сыгу изгъэлъыжьыщтхэп». 13 Тхьэм «зэзэгъыныгъакӀэ» зэриӀуагъэмкӀэ апэрэ зэзэгъыныгъэр жъы зэрэхъугъэр къыгъэлъэгъуагъ. Сыд щыщи жъы хъугъэу, лъэкӀыныгъэ зимыӀэжьыр бэ темышӀэу кӀодыжьыщт.
ЦӀыфхэм шъыпкъагъэкӀэ Тхьэр зэрагъэлъэпӀэн фэе шӀыкӀэр
1 Апэрэ зэзэгъыныгъэм тетэу цӀыфхэм Тхьэр зэрагъэлъэпӀэн фэе шӀыкӀэм ехьылӀэгъэ унашъохэр щыӀагъэх. ЦӀыфхэм аӀэкӀэ ашӀыгъэу, Тхьэр зыщагъэлъэпӀэн чӀыпӀи щыӀагъ. 2 Сыда пӀомэ унитӀу зиӀэ чэтэнгъэӀагъэ горэ агъэуцугъ. Апэрэ унэу Унэ КӀоцӀ ЛъапӀэу ЗыфаӀорэм ыкӀоцӀы остыгъэ тетыпӀэр, Ӏанэр, Тхьэм ыпашъхьэ агъэтӀылъыгъэ хьалыгъур щыӀагъэх. 3 ПэӀухъо горэм ыкӀыбкӀэ Унэ КӀоцӀэу анахь ЛъапӀэу зыфаӀорэр щыӀагъ. 4 МэӀэшӀу зыпихырэ уцхэм ягъэстыпӀэу дышъэм хэшӀыкӀыгъэмрэ тыдэкӀи дышъэ зытебзэгъэ пхъуантэу Тхьэм ежьыррэ цӀыфхэмрэ азыфагу дилъхьэгъэ зэзэгъыныгъэм ипхъуантэу зыфаӀорэмрэ а унэ кӀоцӀым итыгъэх. Дышъэм хэшӀыкӀыгъэ хьакъушыкъоу мэнн зыцӀэ шхыныр зэрылъыр, Хьарун ибэщэу тхьапэхэр къызпыкӀагъэр, мыжъобгъуитӀоу Тхьэм иунашъохэр зэрытхэр а пхъуантэм дэлъыгъэх. 5 А пхъуантэм ышъхьагъкӀэ Тхьэм ищытхъушхо къэзыушыхьатырэ Херувим зыфаӀорэ мэлэӀичхэр щытыгъэх. Ахэмэ атамэхэмкӀэ Тхьэм цӀыфхэм япсэкӀодхэр къызщафигъэгъурэ чӀыпӀэр къаухъумэщтыгъэх. Ау джы мы Ӏофхэм зырызэу татегущыӀэн тлъэкӀыщтэп. 6 Мы Ӏофхэр мырэущтэу гъэпсыгъэхэу, яӀоф ашӀэнэу дин пащэхэр апэрэ унэ кӀоцӀым ихьэ зэпытыщтыгъэх. 7 Ау ятӀонэрэ унэ кӀоцӀым дин пэщэшхом нэмыкӀ зи ихьагъэп, ари илъэсым зэ нахьыбэу ихьэщтыгъэп. Ащ дэжьым къурмэныпхъэм ыл зыдимыхьэу ихьэщтыгъэп. А къурмэныр ежьым ипсэкӀодхэр ыпщыныжьынхэм паий, цӀыфмэ амышӀахэу ашӀэгъэ псэкӀодхэр ыпщыныжьынхэм паий ышӀыгъ. 8 Тхьэм Ыпсэ ЛъапӀэ а гъэпсыкӀэмкӀэ къегъэнафэ, Унэу КӀоцӀэу анахь ЛъапӀэу уашъом щыӀэм ыдэжь кӀорэ гъогур зэрэӀумыхыгъэр, а чэтэнгъэӀэгъэжъыр щэтыфэ. 9 А Ӏоф пстэуми джырэ лъэхъанэм Ӏофыр зытетыр къагъэлъагъо: цӀыфхэм тынхэу Тхьэм фахьыхэрэмрэ къурмэнхэу фашӀыхэрэмрэ агухэм якъэбзагъэ икъугъэу агъэхъун алъэкӀырэп. 10 А тынхэри а къурмэнхэри зэпхыгъэ Ӏоф закъохэр шхэнми ешъонми яӀофрэ, диным ехьылӀагъэу зэфэмыдэ шӀыкӀэхэу цӀыфхэм зызэрагъэкъэбзэжьынхэм яӀофрэ ары. Ахэр цӀыфхэм апкъ епхыгъэ унашъох; Тхьэм Ӏофхэр зэкӀэ зэблехъужьыфэ, а унашъохэр щыӀэнхэ фэягъэ ныӀэп. 11 Ау Христос джы щыӀэ ӀофышӀухэр къыздихьыхэзэ, дин пэщэшхоу къэкӀуагъ. Мы дунаем тет чэтэнгъэӀагъэм нахьи нахь чэтэнгъэӀэгъэшхоу ыкӀи чэтэнгъэӀагъэ нахь икъугъэу щытым ыкӀоцӀ дин пэщэшхоу Ӏоф щешӀэ. А чэтэнгъэӀагъэр цӀыфхэм аӀэкӀэ ашӀыгъэ чэтэнгъэагъэу щытэп, ащ къикӀырэр а чэтэнгъэӀагъэр мы дунаеу Тхьэм къыгъэхъугъэм щыщэп. 12 Пчэнымрэ танэмрэ якъурмэныпхъэ лъыр зыдимыхьэу, ежьым ылъэу къащым щыкӀэкӀыгъэу, Унэу КӀоцӀэу анахь ЛъапӀэу уашъом щыӀэм Христос, джыри зэ имыхьажьынэу, зэ закъоу ихьагъ. Арэущтэу ежьым ылъкӀэ мыкӀодыжьын шъхьафитныгъэ тигъэгъотызэ, тэ тшъхьэхэр ыщэфыжьыгъэх. 13 Дин пащэхэм пчэнхэмрэ шкӀэхэмрэ якъурмэныпхъэ лъырэ чэмым ияжьэрэ цӀыфхэу Тхьэм ыдэжькӀэ мыкъабзэхэу щытхэм атыраутхэщтыгъэх, ахэр къабзэхэу хъужьынхэм пае. 14 Ащ нахьи нахьыбэу лӀэныгъэр къызхэкӀырэ Ӏофхэм тапыкӀыжьынэуи, щыӀэныгъэрэ шъыпкъагъэрэ зиӀэ Тхьэм тыфэлэжьэнэуи Христос ылъ тыгухэр егъэкъэбзэжьых. Христос щыкӀагъэ зи зимыӀэ къурмэныпхъэ икъугъэу щытым фэдэу, Тхьэм Ыпсэ ЛъапӀэу сыдигъуи щыӀэм илъэкӀыныгъэкӀэ Тхьэм зыритыгъ. 15 Джащ паий, Христосыр ары Тхьэмрэ цӀыфхэмрэ азыфагу зэзэгъыныгъакӀэр дэлъэу зыгъэхъурэр, Тхьэр зибынхэм ащыщ хъунхэу къызэджэгъэ цӀыфхэм мыкӀодыжьынэу щыт ӀэхьышӀоу къызэригъэгугъагъэхэр къалъысынхэм пае. Сыда пӀомэ цӀыфхэу апэрэ зэзэгъыныгъэм ыӀэчӀэгъ чӀэтхэу, псэкӀод зышӀагъэхэм ашъхьэхэр Христос илӀэныгъэкӀэ ыщэфыжьыгъэх. 16 Осыет щыӀэмэ, осыетыр къэзыщӀыгъэр зэрэлӀагъэр къагъэшъыпкъэжьын фае, 17 сыда пӀомэ осыетыр зыбгъэцакӀэ хъущтыр, ар къэзышӀыгъэр зылӀэрэ ыужыр ары ныӀэп. КъэзышӀыгъэр псаумэ, осыетыр бгъэцакӀэ хъущтэп. 18 Ащ паий, апэрэ зэзэгъыныгъэри бгъэцакӀэ хъун зэзэгъыныгъэу зыгъэхъугъэ закъор лъыр ары. 19 Сыда пӀомэ, пегъымбар Мусэ Тэурат хабзэм иунашъохэр зэкӀэ цӀыф пстэуми зарегъэӀум ыуж, цы плъыжь чӀапцӀэр иссоп зыцӀэ куандэм икъутамэхэм апишӀи, танэхэмрэ пчэнхэмрэ алъ псы игъусэу ышти, а къутамэхэмкӀэ тхылъымрэ цӀыф пстэумрэ атриутхагъ. 20 Мусэ етӀанэ къыӀуагъ: «Мы лъыр ары зэзэгъыныгъэу Тхьэм унашъо къызэрэшъуфишӀыгъэм фэдэу шъузэредэӀун фаер къэзыгъэшъыпкъэжьырэр». 21 Ащ фэдэуи чэтэнгъэӀагъэмрэ Тхьэр зэрагъэлъапӀэрэ псэуалъэ пстэумрэ лъы атриутхагъ. 22 ӀПъыпкъэ, Тэурат хабзэм зэритым фэдэу, сыд щыщри къэнагъэ шӀагъо щымыӀэу, лъыкӀэ агъэкъэбзэжьы, къурмэнылъи хэмылъэу псэкӀод гъэгъуныгъэ щыӀэп.
Христос къурмэныпхъэу зишӀызэ, цӀыфхэм япсэкӀодхэр зэратрихыжьрэр
23 Арэущтэу а Ӏофхэу сызтегущыӀагъэхэу, уашъом щыӀэ Ӏоф шъыпкъэхэм ашъо теплъэхэу щытхэр мы къурмэнхэмкӀэ агъэкъэбзэжьын фэягъэ. Ау уашъом щыӀэ Ӏофхэм а къурмэнхэм анахьи нахь къурмэнышӀухэр яфэшъуашэх. 24 Сыда пӀомэ цӀыфмэ ашӀыгъэ чэтэнгъэӀагъэу Тхьэр зыдэщыӀэ чӀыпӀэ шъыпкъэм ышъо теплъэу щытыр арэп Христос зэрыхьагъэр, уашъоу Тхьэр зыдэщыӀэ чӀыпӀэ дэдэр ары зэрыхьагъэр, джы тэщ пае Тхьэм ыпашъхьэ ихьанэу. 25 Дин пэщэшхор Унэ КӀоцӀэу анахь ЛъапӀэу зыфаӀорэм илъэс къэс ежьым ылъ мыхъоу, къурмэныпхъэм ылъ зыдихьэу ихьащтыгъ. Ау Христос уашъоу Тхьэр зыдэщыӀэ чӀыпӀэм зыфихьагъэр бэрэ къурмэныпхъэу зишӀыныр арэп, джыри зэ къурмэныпхъэ зимышӀыжьынэу, зэ закъо къурмэныпхъэу зишӀыныр ары нахь. 26 Арэущтэу щымытыгъэмэ, Тхьэм дунаер къызигъэхъугъэм щегъэжьагъэу Христос бэрэ ыщэчын фаеу хъущтыгъ. Ау ежьым къурмэныпхъэу зызэришӀыгъэмкӀэ псэкӀодыр ыгъэкӀодынэу джы лъэхъанэхэм якӀэух дэжь, джыри зэ къэмылъэгъожьынэу, зэ закъо къэлъэгъуагъ. 27 ЦӀыф пстэури зэ лӀэжьын фаех, етӀанэ Тхьэм хьыкум атришӀыхьащт. 28 Ащ фэдэуи цӀыфыбэмэ япсэкӀодхэр атрихыжьынхэу Христоси зэ закъо къурмэныпхъэу зишӀыгъ. ЕтӀани зэ къэлъэгъожьыщт. КъызылъэгъожькӀэ, цӀыфхэм япсэкӀодхэр атрихыжьынхэу арэп къызфэкӀощтыр, цӀыфхэу ежьыр къызэрэкӀожьыщтым щыгугъыхэу, паплъэхэрэр мыкӀодхэу къыгъэнэжьынхэу ары нахь.
1 Тэурат хабзэр ӀофышӀухэу къэкӀощтхэм яжьаоу щытыгъэ ныӀэп, а ӀофышӀухэр зэрэщытыщтхэри шъыпкъагъэкӀэ къыгъэлъэгъон ылъэкӀыщтыгъэп. Арышъ, а къурмэн дэдэхэу илъэс къэси ашӀы зэпытыщтыгъэхэмкӀэ цӀыфхэу Тхьэм пэгъунэгъу хъунхэу фаехэр Тэурат хабзэм Тхьэм ыдэжькӀэ зишъыпкъагъэ зи щыкӀагъэ зимыӀэ цӀыф икъугъэхэу ыгъэхъунхэ ылъэкӀыщтыгъэп. 2 Ар ылъэкӀыщтыгъэмэ, цӀыфхэм къурмэншӀыныр ханэжьыщтыгъ. Сыда пӀомэ Тхьэм пэгъунэгъу хъунхэу фаехэр а къурмэнхэмкӀэ къабзэу хъущтгъэхэмэ, япсэкӀодхэр агухэмкӀэ зыдашӀэжьыщтыгъэхэп. 3 Ау а къурмэнхэм илъэс къэси япсэкӀодхэр агу къагъэкӀыжьыщтыгъэх, 4 сыда пӀомэ шкӀэхэмрэ пчэнхэмрэ алъ цӀыфхэм япсэкӀодхэр атырихын ылъэкӀыщтэп. 5 Арышъ, Христос мы дунаем къытехьанэу зэхъум, ащ Тхьэм мырэущтэу риӀуагъ: «Къурмэнхэми тынхэми уафэягъэп, ау пкъы къысфэбгъэхьазырыгъ. 6 ЦӀыфхэм машӀокӀэ агъэстырэ къурмэнхэри, япсэкӀодхэр зытырахынхэм пае ашӀырэ къурмэнхэри игъоу плъытагъэхэп. 7 ЕтӀанэ сэ сӀуагъэ: 'О Тхьэ, мары, узыфаер згъэцэкӀэнэу сыкъэкӀуагъ, уитхылъ сикъэбар зэритым фэдэу'». 8 Христос арэущтэу къызеӀом, ыпэ рапшӀэу къыӀуагъэхэр мыхэр ары: «Къурмэнхэми, тынхэми, цӀыфхэм агъэстырэ къурмэнхэми, япсэкӀодхэр зытрахынхэм пае, ашӀырэ къурмэнхэми уафэягъэп ыкӀи игъоу плъытагъэхэп». ЦӀыфхэм а къурмэнхэр Тэурат хабзэм иунашъо тетэу ашӀыщтыгъэ пэтми, Христос арэущтэу къыӀуагъ. 9 ЕтӀанэ мырэущтэу къыӀуагъ: «О Тхьэ, мары, узыфаер згъэцэкӀэнэу сыкъэкӀуагъ». Арэущтэу Христос апэрэ Ӏофхэр зы бгъукӀэ ригъэзэкӀыгъэх, ахэмэ ачӀыпӀэ ятӀонэрэ Ӏофыр ригъэуцоным пае. 10 Исус Христос Тхьэр зыфэя гъэр зэригъэцэкӀагъэм пае, ежьым ыпкъ зэзакъо къурмэныпхъэу зэришӀыгъэмкӀэ, джыри зэ къурмэныпхъэу ымышӀыжьынэу, тыгухэр ыгъэкъэбзэжьыгъэх. 11 Хэтрэ дин пащи идин пэщэ Ӏоф мафэ къэс ешӀэ. А къурмэн дэдэхэу цӀыфмэ япсэкӀодхэр атезыхын зымылъэкӀхэрэр ешӀы зэпытых. 12 Ау Христос цӀыфмэ япсэкӀодхэр егъашӀэм ыпщыныжьыпэнхэм пае, зы къурмэныпхъэ закъоу зешӀы ужым, Тхьэм иджабгъукӀэ щысынэу готӀысхьагъ. 13 А уахътэм къыщегъэжьагъэу Христос пэплъэ, ипыйхэр Тхьэм ащ лъэгукӀэтын зыфишӀыщт мафэм. 14 Арэущтэу зэзакъо къурмэныпхъэу зызэришӀыгъэмкӀэ зыгу къабзэ хъухэрэм егъашӀэм Тхьэм ыдэжькӀэ зишъыпкъагъэ зи щыкӀагъэ зимыӀэ цӀыф икъугъэхэу ыгъэхъугъэх. 15 Тхьэм Ыпсэ ЛъапӀи мы ӀофымкӀэ къытфеушыхьаты; сыда пӀомэ ыпэ рапшӀэу мырэущтэу къеӀо: 16 «Зиусхьаным къеӀо: А мафэхэм ауж зэзэгъыныгъэу сэррэ ахэмрэ тазыфагу дэслъхьащтыр мыры: Сиунашъохэр ахэмэ агухэм арыслъхьащтых, ашъхьэхэми арыстхэщтых». 17 ЕтӀанэ къеӀо: «ЯпсэкӀодхэри бзэджагъэу ашӀагъэхэри сыгу изгъэлъыжьыщтхэп». 18 Тхьэм цӀыфмэ япсэкӀодхэр зэрафигъэгъугъэхэм пае, ахэр апщыныжьынхэм фэшӀ, къурмэн ашӀынэу щыкӀагъэ яӀэжьэп.
Тхьэм пэблагъэ тыжъугъэхъу
19 Арышъ, тшыхэр, Исус ылъэу къащым щыкӀэкӀыгъэм пае, чӀыпӀэ лъапӀэу Тхьэр зыдэщыӀэм гушхоныгъэкӀэ тихьан тлъэкӀыщт. 20 Сыда пӀомэ Исус ыпкъ къурмэныпхъэу зэришӀыгъэмкӀэ щыӀэныгъэ тиӀэ зыгъэхъурэ гъогукӀэу пэӀухъом блэкӀырэр къытфыӀуихыгъ. 21 Тхьэм иунагъо зыӀэ илъ дин пэщэшхо тиӀ. 22 Арышъ, Исус ылъ тыгухэм атриутхэзэ, тыгухэмкӀэ зи мьгхъун зыдэтымышӀэжьынэу зэригъэкъэбзэжьыгъэхэм паий, тпкъыхэр псы къабзэкӀэ зэрэттхьакӀыгъэхэм паий, тыгухэм шъыпкъагъэрэ шӀошъхъуныгъэшхорэ арылъхэу, Тхьэм пэгъунэгъу тыжъугъэхъу. 23 Арышъ, тызщыгугъыхэу, тызпаплъэрэ ӀофышӀухэу цӀыфхэм зигугъу афэтшӀыхэрэм тыкъызэкӀэмыкӀожьэу татетэу тарыжъугъакӀу, сыда пӀомэ а ӀофышӀухэмкӀэ тыкъэзыгъэгугъэгъэ Тхьэм шъыпкъагъэ иӀэшъ ары. 24 ӀПӀулъэгъуныгъэ тыгухэм арылъынэуи, шӀушӀэныгъэхэм тапылъынэуи тызэрэгъэгушхоу тызэкӀэлъыжъугъэплъыжь. 25 ЦӀыф заулэмэ зэряхабзэ фэдэу тызэӀукӀэныр хэтэшъумыгъан, ау тызэрэжъугъэгушху. Зиусхьаным имафэ нахь къэблэгъагъэу зэрэшъулъэгъурэм пае, нахьи нахьыбэу шъузэрэгъэгушхон фае. 26 Шъыпкъагъэр зэдгъэшӀагъэу, тыфаеу псэкӀодшӀэным тыпылъмэ, типсэкӀодхэр ттезыхын къурмэныпхъэ щыӀэжьэп, 27 ау щынэгъо унашъоу Тхьэм къыттыришӀыхьащтымрэ Тхьэм пэуцухэрэр зыгъэстыщт мэшӀошхомрэ къытпэплъэх. 28 Пегъымбар Мусэ и Тэурат хабзэ едэӀунэу зымыдэрэм шыхьатитӀум е шыхьатищым къаӀорэмкӀэ гукӀэгъу фамышӀэу укӀ тыралъхьэщтыгъ. 29 Ау цӀыфэу Тхьэм Ыкъо зыгъэпыутырэм Тхьэм ащ нахьи бэкӀэ нахь къин ригъэпщыныжьыщт. Сыда пӀомэ а цӀыфым Христос ылъэу Тхьэм изэзэгъыныгъэ зыгъэшъыпкъэжьыгъэу, а цӀыфым ыгу зыгъэкъэбзэжьыгъэм пкӀэ имыӀэу елъытэ, Тхьэм Ыпсэ ЛъапӀэу зынэшӀу тэ къытщызыфэрэми ыгу хегъэкӀы. 30 Сыда пӀомэ Зиусхьанэу мырэущтэу зыӀуагъэр тэшӀэ: «ЦӀыфхэм ябзэджагъэ языгъэпщыныжьыщтыр сэры, яфэшъуашэ язгъэгъотыжьыщт». ЕтӀани къыӀуагъ: «Зиусхьаным ежь ицӀыфхэм хьыкум атыришӀыхьащт». 31 МыхъомышӀагъэ зэрэпшӀагъэм пае, щыӀэныгъэ зиӀэ Тхьэм ыӀэмычӀэ уифэныр сыдэу щынэгъошхуа! 32 БлэкӀыгъэ мафэхэу Тхьэм икъэбар къыжъугурыӀонэу инэфынэ къызышъутепсагъэхэр шъугу къэжъугъэ кӀыжьых. Игъогу шъукъызэкӀэмыкӀожьэу шъурыкӀоу, а мафэхэм къинышхуабэхэр шъущэчыщтыгъэх. 33 Загъорэ цӀыфмэ апашъхьэ къыщышъохъоныщтыгъэх, гузэжъогъуми шъухадзэщтыгъ, загъори арэущтэу зыдэзекӀуагъэхэм гъусэ шъуафэхъущтыгъ. 34 ХьапсчӀэсхэми къин адэшъущэчыщтыгъ. ЦӀыфмэ шъуимылъку зэрэшъутырахыгъэр шъуигуапэу шъудэщтыгъ, сыда пӀомэ ащ нахьи нахь мылъкушхоу мыкӀодыжьыщтыр уашъом зэрэщышъуиӀэр шъушӀагъэшъ ары. 35 Арышъ, гушхоныгъэу шъуиӀэр хэшъумынэжь, сыда пӀомэ гушхоныгъэ зиӀэхэм яӀэхьышӀу иныщт. 36 Тхьэр зыфаер зыжъугъэцакӀэ ужым, шъукъызэригъэгутъэгъэ ӀэхьышӀур жъугъотыным пае, теубытэныгъэ шъуиӀэн фае. 37 Сыда пӀомэ Тхьэм игущыӀэ тхыгъэхэм зэрарытым фэДэу, «Бэ дэдэ темышӀэу, къэкӀощтыр мыгужъоу къэсыщт. 38 ШӀошъхъуныгъэ зэриӀэм пае, садэжькӀэ шъыпкъагъэ зиӀэр псэущт. Ау а цӀыфыр къызэкӀэкӀожьмэ, ащ сыгу еӀущтэп». 39 Ау зызыгъэкӀодхэу къызэкӀэкӀожьхэрэм тащыщэп, шӀошъхъуныгъэм игъогу тырэкӀо, арэущтэуи зэрэщытым пае, тымыкӀодэу Тхьэм тыкъегъэнэжьы.
Пасэм цӀыфхэр Тхьэм щыгугъыхэу зэрэщытыгъэхэр
1 ШӀошъхъуныгъэр зыфэдэр Ӏофхэу тызщыгугъыхэу, тызпаплъэхэрэр зэрэдгъотыщтхэр тшӀэныр ары, тымылъэгъурэ Ӏофхэм тицыхьэ ателъынри ары. 2 Пасэм дунаем щыпсэущтыгъэ цӀыфхэм шӀошъхъуныгъэ яӀэу зэрэщытыгъэм пае, Тхьэр шыхьатышӀу афэхъугъ. 3 ШӀошъхъуныгъэ зэрэтиӀэм пае, Тхьэм дунаер игущыӀэкӀэ къызэригъэхъугъэр зэхэтэшӀыкӀы. Арэущтэу цӀыфым ынэкӀэ ылъэгъурэр ынэкӀэ ымылъэгъурэм къыхэкӀыгъ. 4 Авел шӀошъхъуныгъэ иӀэу зэрэщытыгъэм пае, Каин къурмэнэу ышӀыгъэм нахьи нахь къурмэнышӀу ышӀыгъ. Тхьэм Авел итынхэр зедэхэм, Авел шӀошъхъуныгъэ иӀэу зэрэщытыгъэм пае, шъыпкъагъэ иӀэу зэрэщытыгъэмкӀэ Тхьэр ащ шыхьат фэхъугъ. Авел дунаем ехыжьыгъ, ау шӀошъхъуныгъэ иӀэу зэрэщытыгъэм пае, джыри къэбар къытфехьы. 5 Енох шӀошъхъуныгъэ иӀэу зэрэщытыгъэм пае, Тхьэм ащ лӀэныгъэр римыгъэлъэгъоу уашъом дихьыежьыгъ. Тхьэм ар уашъом зэрэдихьыежьыгъэм пае, цӀыфхэм ар агъотыжьын алъэкӀыгъэп. Енох уашъом дихьыеным ыпэкӀэ, Тхьэм ыгу ащ зэреӀугъэмкӀэ Тхьэм игущыӀэ тхыгъэхэр шыхьат фэхъух. 6 ЦӀыфым шӀошъхъуныгъэ имыӀэмэ, Тхьэм ыгу ащ къеӀущтэп; сыда пӀомэ хэти Тхьэм пэблагъэ хъунэу фаем Тхьэр зэрэщыӀэмкӀи, Тхьэм игъогу лъыхъухэрэм яӀэхьышӀу зэраритырэмкӀи шӀошъхъуныгъэ иӀэн фае. 7 КъэкӀощт Ӏофхэу цӀыфхэм амылъэгъугъэхэм яхьылӀагъэу Тхьэм Нухьэ зызэхырегъэшӀыкӀым, Нухьэ шӀошъхъуныгъэ иӀэу зэрэщытыгъэм пае, Тхьэм щыщыни, иунагъо мыкӀодэу къыгъэнэжьыным пае, къухьэр ышӀыгъ. Нухьэ шӀошъхъуныгъэу иӀэу щытыгъэмкӀэ дунаем ицӀыфхэм ямысагъэ нафэу ышӀыгъ. ШӀошъхъуныгъэ иӀэу зэрэщытыгъэм паий, Тхьэм ежьым ыдэжькӀэ ащ шъыпкъагъэ иӀэу зэрилъытагъэр иӀэхьышӀоу хъугъэ. 8 Тхьэр Ибрахьимэ иӀэхьышӀу къылъысыщт хэгъэгум кӀонэу къызеджэм, Ибрахьимэ шӀошъхъуныгъэ иӀэу зэрэщытыгъэм пае, Тхьэм едэӀуи, зыдэкӀощтыр ымышӀэу щытыгъэ пэтми, гъогум техьагъ. 9 ШӀошъхъуныгъэ иӀэу зэрэщытыгъэм пае, Тхьэм къыритынэу къызэригъэгугъэгъэ хэгъэгум хымэм фэдэу щыпсэущтыгъ. А хэгъэгум хымэм фэдэу Ибрахьимэ чэтэнгъэӀагъэхэм ачӀэсэу щыпсэущтыгъ. Исхьакъи Якъуби чэтэнгъэӀагъэхэм ачӀэсыгъэх. Тхьэм Ибрахьимэ къызэригъэгугъэгъэ ӀэхьышӀур ащ игъусэхэу ахэми къалъысынэу щытыгъ. 10 Арэущтэу Ибрахьимэ чэтэнгъэӀагъэхэм ачӀэсыгъ. Сыда пӀомэ къэ лэшхоу Тхьэм ыгъэпсыгъэу, ыгъэуцугъэу мыкӀодыжьын лъапсэхэр зиӀэм паплъэщтыгъ. 11 Сарэ сабый хэмыкӀэу ыкӀи ыныбжь блэкӀыгъэу щытыгъэ пэтми, шӀошъхъуныгъэ иӀэу зэрэщытыгъэм пае, сабый къыхэкӀынэу Тхьэм кӀуачӀэ къыритыгъ, сыда пӀомэ Тхьэу зигущыӀэ езытыгъэр зэрэшъыпкъэр Сарэ ышӀэщтыгъ. 12 Арэущтэу лӀэныгъэм пэгъунэгъу хъугъэ пэтми, а лӀы закъом бынхэу къытехъукӀыгъэхэр уашъом ит жъуагъохэм япчъэгъабэ фэдизэу бэ хъущтыгъэх, хыӀушъом Ӏулъэу, умылъытэшъунэу щыт пшахъоми фэдизэу бэ хъущтыгъэх. 13 Мы цӀыфхэр зэкӀэ шӀошъхъуныгъэ яӀэу лӀагъэх. Тхьэм Ӏофхэу къызэригъэгугъагъэхэр агъотыгъэхэп, ау чыжьэкӀэ ахэр алъэгъухи, ащыгушӀукӀыгъэх. «Мы дунаем тыхымэхэу ыкӀи тыхымэхэсхэу тытет», къаӀуагъ. 14 Арэущтэу зыӀохэрэм яхэгъэгу шъыпкъэ ыуж зэритхэрэр къагъэнафэ. 15 Хэгъэгоу зэрыкӀыжьыгъэхэр арыгъэмэ агу илъыгъэр агъэзэжьынэу игъо фифэщтыгъэх. 16 Ау хэгъэгу нахьышӀу горэм кӀэхъопсыщтыгъэх ар уашъом щыӀэ хэгъэгур ары. Арышъ, ежьхэм я ТхьэкӀэ зеджэхэкӀэ, Тхьэр атеукӀытыхьажьырэп, сыда пӀомэ ахэмэ зы къалэ афигъэпсыгъ. 17 Тхьэм Ибрахьимэ ишъыпкъагъэ зегъэунэфым, Ибрахьимэ шӀошъхъуныгъэ иӀэу зэрэщытыгъэм пае, Исхьакъ къурмэныпхъэу къыхьыгъ. 18 «Исхьакъ къытехъукӀынэу цӀыфхэр ары о уибын шъыпкъэхэкӀэ зэджэщтхэр», ыӀозэ, Тхьэм Ибрахьимэ къыгъэгугъагъэ пэтми, Ибрахьимэ ыкъо закъор къурмэн ышӀынэу хьазырэу щытыгъ. 19 Сыда пӀомэ Тхьэм Исхьакъ лӀагъэхэм къахигъэтэджыкӀыжьын зэрилъэкӀыщтым Ибрахьимэ щыгугъыщтыгъ, Исхьакъи лӀагъэхэм къахэтэджыкӀыжьыгъэу Ибрахьимэ зэригъотыжьыгъэр пӀоми хъун. 20 Исхьакъ шӀошъхъуныгъэ иӀэу зэрэщытыгъэм пае, Тхьэм къэкӀощт уахътэм Якъубэрэ Исаврэ ынэшӀу къызэращифэщтыр ариӀуагъ. 21 Якъуби шӀошъхъуныгъэ иӀэу зэрэщытыгъэм пае, лӀэн зэхъум, Юсыф ыкъохэм ащыщэу хэти Тхьэм ынэшӀу къызэрэщифэщтыр риӀуагъ, ибэщи зытыригъакӀэзэ, Тхьэм щытхъу фишӀыгъ. 22 Юсыфи шӀошъхъуныгъэ иӀэу зэрэщытыгъэм пае, илӀэгъу къызэсым, Израил цӀыфхэр Мысырым къызэрикӀыжьыщтхэм игугъу къышӀыгъ, ихьэдэкъупшъхьэхэри зычӀалъхьажьын фаемкӀэ унашъо къышӀыгъ. 23 Пегъымбар Мусэ ятэянэхэм шӀошъхъуныгъэ яӀэу зэрэщытыгъэм пае, Мусэ къызэхъум, мэзищым агъэбылъыгъ, сыда пӀомэ сабыир зэрэдахэр алъэгъугъ, пачъыхьэ Фырауным иунашъуи щыщынэщтыгъэхэп. 24 Муси шӀошъхъуныгъэ иӀэу зэрэщытыгъэм пае, ины зэхъум, пачъыхьэ Фыраун ипхъурэлъфкӀэ къеджэнхэу ыдэщтыгъэп. 25 ПсэкӀодшӀэнымкӀэ зы охътэ кӀакокӀэ зигъэтхъэжьыным нахьи, Тхьэм ицӀыфхэм къин адищэчыныр нахь къыштагъ. 26 Мысырым имылъку пстэуми анахьи Христос пае ежьыр агъэпыутыныр нахь баиныгъэу ылъытэщтыгъ, сыда пӀомэ ӀэхьышӀоу къылъысыщтым еплъыщтыгъ. 27 ШӀошъхъуныгъэ иӀэу зэрэщытыгъэм пае, пачъыхьэм игубжыныгъэ щымыщынэу Мысырым икӀыжьыгъ. ЦӀыфхэм амылъэгъурэ Тхьэр ылъэгъоу зэрэщытыгъэм фэдэу, теубытэныгъэ ыгу илъыгъ. 28 Мусэ шӀошъхъуныгъэ иӀэу зэрэщытыгъэм пае, Израил цӀыфмэ Пасхъэ мэфэкӀ мэфэшхор апэ дэдэу аригъэгъэлъэпӀагъ, япчъэхэми лъы атыраутхэнэу унашъо афишӀыгъ, зыгъэкӀодырэ мэлэӀичым ящыпэрылъфхэр ымыгъэкӀодынхэм пае. 29 Израил цӀыфхэм шӀошъхъуныгъэ яӀэу зэрэщыты гъэм пае, чӀыгу гъушъэм рыкӀохэрэм фэдэу, Хы Плъыжьым зэпырыкӀыгъэх, ау Мысыр цӀыфхэри зэпырыкӀынхэу зыфежьэхэм, зэкӀэри ытхьалагъэх. 30 Израил цӀыфхэм шӀошъхъуныгъэ яӀэу зэрэщытыгъэм пае, Ерихон къалэр мэфиблым къызакӀухьэ ужым, къалэм идэпкъ къызэхэуагъ. 31 Бзылъфыгъэ хэтакӀоу Раав шӀошъхъуныгъэ иӀэу зэрэщытыгъэм пае, шӀошъхъуныгъэ зимыӀэхэм адэкӀодыгъэп, сыда пӀомэ пый плъакӀохэр игуапэу ригъэблэгъагъэх (нэмыкӀ гъогукӀи къалэм дищыжьыгъэх). 32 Джыри сыд сӀона? Гедеон, Варак, Самсон, Иеффэ, Даутэ, Самуел, адрэ пегъымбархэм якъэбар къэсӀонэу игъо сыфифэрэп. 33 Ахэмэ шӀошъхъуныгъэ яӀэу зэрэщытыгъэм пае, нэмыкӀ пачъыхьагъухэм атекӀуагъэх, зэфагъэри агъэпсыгъ, Тхьэм къызэригъэгугъэгъэ Ӏофхэри яӀэ хъугъэх. Аслъанхэм ажэхэр агъэпытагъэх, 34 мэшӀошхохэри агъэкӀосагъэх, сэшхохэми къаӀэпыкӀыжьыгъэх. КӀуачӀэ ямыӀэу щытыгъэ пэтми, кӀуачӀэ яӀэ хъугъэ. ЗаомкӀэ лъэкӀыныгъэ яӀэ хъугъэ, хымэхэм ядзэхэри рафыжьыгъэх. 35 Бзылъфыгъэхэм ялӀагъэхэр къэхъужьыгъэхэу агъотыжьыгъэх. Тхьэм къызигъэтэджыжьхэкӀэ, щыӀэныгъэ нахьышӀур агъотыным пае, нэмыкӀхэм (Тхьэр агъэпцӀынэу зэрамыдагъэм пае), япыихэм атӀупщыжьыгъэхэп. Арэущтэу зэхъум, япыйхэм ахэмэ къин арагъэщэчызэ аукӀыгъэх. 36 ЦӀыфхэр ахэмэ ащыщхэм яхъонхэзэ, къамыщкӀи яохэзэ къин арагъэщэчыгъ, етӀанэ Ӏэхъулъэхъу атыралъхьи, хьапсым чӀадзагъэх. 37 ЦӀыф заулэхэми мыжъокӀэ яохэзэ аукӀыгъэх, заули пхъэм фэдэу зэпахыгъэх, заули сэшхокӀэ аукӀыгъэх. ШӀошъхъуныгъэ зиӀэ цӀыфхэм мэлышъорэ пчэнышъорэ ащыгъхэу къакӀухьащтыгъ, щыкӀагъэ яӀэу щытыгъ, гузэжъогъум хэтыщтыгъэх, цӀыфхэм ахэмэ лые къарахыщтыгъ. 38 Ахэмэ яшӀугъэ мы дунаем ифэшъуашэу щытыгъэп. Шъоф нэкӀхэмрэ Ӏошъхьэхэмрэ къакӀухьащтыгъэх, гъочӀэгъхэмрэ Ӏошъхьэ тӀуакӀэхэмрэ ащыпсэущтыгъэх. 39 Ау шӀошъхъуныгъэ яӀэу зэрэщытыгъэм пае, Тхьэр шыхьатышӀу ахэмэ зэкӀэ афэхъугъэми, Тхьэм ежь ицӀыфхэр къызэригъэгугъэгъэ Ӏофхэр агъотыгъэхэп. 40 Сыда пӀомэ Тхьэм ыгу хэлъыгъэр тэркӀэ нахьышӀу ахэр тимыгъусэхэмэ, ежьым ыдэжькӀэ зишъыпкъагъэ зи щыкӀагъэ зимыӀэ цӀыф икъугъэхэу зэрэмыхъущтхэр ары.
Тхьэм ибынхэр зэригъэдаӀохэрэр
1 Арышъ, ащ фэдэ шыхьат купышхо тапэ итэу зэрэтиӀэм пае, сыд фэдэрэ хьылъэу ттелъымрэ псэкӀодэу тызышӀуанэрэмрэ зытетэжъугъэдзыхи, теубытэныгъэ тиӀэу, зэпэчъэныгъэу тапэ илъым тырыжъугъачъ. 2 Исус тынэхэр тетэжъугъэгъэтых. Ежьыр ары шӀошъхъуныгъэм игъогу тытезыгъахьэу, пащэ къытфэхъоу, тишӀошъхъуныгъэ зи щыкӀагъэ имыӀэу, икъугъэу зыгъэхъурэр. ГушӀуагъоу ыпашъхьэ илъыгъэм пае, цӀыфхэм къащым зэрэтыраӀулӀагъэм икъин ащ ыщэчыгъ, къащым иемыкӀуми еплъэу щытыгъэп, Тхьэм итӀысыпӀэ лъапӀи иджабгъукӀэ щыготӀысхьагъ. 3 Шъуемызэщыным ыкӀи шъугу шъумыгъэкӀодыным пае, Исус шъуегупшыс. ПсэкӀодышӀэ цӀыфхэу ежьым ыуджэгъущтыгъэхэм сыдэу къинышхуа рагъэщэчыгъэр! 4 ПсэкӀодым шъуебэнызэ, лъы къышъукӀэкӀыфэ, шъупэуцужьыгъэгоп. 5 Тхьэм ибынхэкӀэ къышъуаджэу шъузэригъэгушхорэр шъущыгъупшагъ: «Сибын, Зиусхьаным узигъэдаӀокӀэ, пхъэтэпэмыхь умышӀы, ежьыр къызыогыекӀи угу умыгъэкӀоды, 6 сыда пӀомэ Зиусхьаным шӀу ылъэгъурэр егъэдаӀо, хэти ибын фэдэу ыдэрэми къин регъэщэчы». 7 Арышъ, Тхьэм шъузигъэдаӀокӀэ, теубытэныгъэ зижъугъаӀ. Ибынхэу шъузэрэщытым пае, Тхьэр арэущтэу къыжъудэзекӀо. Сыда пӀомэ тым ымыгъэдаӀорэ бын щыӀа? 8 Тхьэм ибын пстэури зэригъэдаӀохэрэм фэдэу шъуимыгъэдаӀомэ, ибынхэм шъуащыщэп, бзэджэрылъфмэ шъуафэдэ нахь. 9 Ащ нэмыкӀэу, мы дунаемкӀэ тятэхэм тагъэдаӀомэ, лъытэныгъэ афытиӀ. ТыщыӀэным пае, Тятэ лъапӀэу уашъом щыӀэм ащ нахьи нахьыбэу тыфэӀорышӀэн фае. 10 Ахэмэ охътэ кӀаком пае, игъоу зэралъытагъэм фэдэу, тагъэдаӀощтыгъ. Ау Тхьэм, ежь илъэпӀагъэкӀэ Ӏахьэ тиӀэным пае, ишӀуагъэ къытигъэкӀынэу тегъэдаӀо. 11 Зыгорэм тызигъэдаӀокӀэ, тигуапэ хъурэп, тигуаоу мэхъу нахь. Ау ыужкӀэ Тхьэм зэригъэдаӀохэрэмкӀэ ыгъэсэгъэ цӀыфхэм шӀоу ащ къафыхэкӀырэр шъыпкъагъэмрэ гупсэфыныгъэмрэ ары. 12 Арышъ, шъо шъуӀэхэу къелэлэхыхэрэмрэ лъэкӀыныгъэ зыхэмылъыжь лъэгуанджэхэмрэ кӀуачӀэ ахэжъугъэлъ. 13 ЦӀыф лъащэр нахь Ӏае шъумыгъэхъоу, хъужьыным пае, гъогу занкӀэм шъурыкӀу.
Тхьэм ынэшӀу щыфэныгъэр пхъэтэпэмыхь шъумышӀы
14 ЦӀыф пстэуми шъузэрагурыӀонми, гукъэбзагъэри зэрэшъуиӀэными ыуж шъуит; сыда пӀомэ гукъэбзагъэ имыӀэу зыми Зиусхьаныр ылъэгъущтэп. 15 Шъуащыщэу зыми Тхьэм ынэшӀу щыфэныгъэ зэрэзыхимыгъэныным шъуфэсакъ. Зиягъэ къакӀорэ лъэпсэ дыджэу цӀыфыбэхэр зыгъэушӀоирэр къышъухэкӀынэу орэмыхъу. 16 ПӀъуащыщэу зи зинэ зышӀэрэ цӀыфхэм ащыщэу орэмыхъу, е Исав фэдэу, Тхьэм ищынагъо зыгу имылъ цӀыфхэм ащыщэу орэмыхъу. Исав къо нахьыжъым фитыныгъэу иӀэу щытыгъэхэр пгхын закъом пае ыщагъэх. 17 ЕтӀани зэрэшъушӀэрэм фэдэу, Тхьэм ынэшӀу къыщифэнэу Исав ятэ Тхьэм ригъэлъэӀунэу фэягъ, ау ятэ фидагъэп. Исав гъызэ ятэ елъэӀугъэми, ащ ыӀогъагъэм тыригъэкӀышъугъэп. 18 ШӀъузынэсын шъулъэкӀынэу, машӀом ыстырэ къушхьэм ыдэжь шъукъэкӀуагъэп. ШӀункӀым, мэзахэм, жьыбгъэ шхом, 19 бжъэмыешхом ымакъэ, гущыӀэ макъэм адэжьи шъукъэкӀуагъэп. Тхьэм ымакъэ зэхэзыхыгъэхэр джыри къадэмыгущыӀэжьынэу елъэӀугъэх, 20 сыда пӀомэ а макъэм къыӀогъэ унашъор ащэчын алъэкӀыгъэп: «ХьакӀэкъуакӀэри къушъхьэм нэсымэ, мыжъокӀэ е щэбзащэкӀэ шъуукӀын фае». 21 Къафэлъэгъуагъэр щынэгъошхуагъэти, пегъымбар Муси, «Сэщынэ ыкӀи сэкӀэзэзы», къыӀуагъ. 22 Ау шъо шъукъыздэкӀуагъэр Сион Ӏуашъхьэр ары, щыӀэныгъэ зиӀэ Тхьэм икъэлэшхоу, уашъом щыӀэ Ерусалимэу, мин пчъагъэу мэлэӀичхэр зыдэщыӀэри ары. 23 Тхьэм иапэрэ бынхэу уашъом щыӀэ тхылъым зыцӀэ итхэм ямэфэшхо зэӀукӀэ шъукъэкӀуагъ. Тхьэу цӀыф пстэуми хьыкум атезышӀыхьэрэм шъукъэкӀуагъ, Тхьэм ыдэжькӀэ зишъыпкъагъэ зи щыкӀагъэ зимыӀэ цӀыф икъугъэу хъугъэхэм апсэхэм адэжьи шъукъэкӀуагъ. 24 Исусэу зэзэгъыныгъакӀэр Тхьэмрэ цӀыфхэмрэ азыфагу дэлъэу зыгъэхъугъэмрэ ащ ылъэу къыкӀэкӀыгъэмрэ адэжь шъукъэкӀуагъ. Авел ылъ нахьи Исус ылъ Ӏоф нахьышӀум тыщегъэгугъы. 25 Шъусакъ, къэгущыӀэрэм шъуакӀыб фэшъумыгъаз. Тхьэм ыдэжь къикӀыгъэ къэбарыр чӀылъэм къыщызыӀогъагъэм зыкӀыб фэзыгъэзагъэхэм къинэу яфэшъуашэр амыгъотэу къэнэжьыгъэхэп. Арышъ, уашъом къикӀэу къыддэгущыӀэрэм тэри такӀыб фэдгъазэмэ, ащ нахьи нахь къинэу тфэшъуашэр дгъотыщтба? 26 Джащыгъум Тхьэм ымакъэ чӀылъэр ыгъэсысыгъ, ау джы Тхьэм гущыӀэ пытэ ытыгъ: «Джыри зэ чӀылъэм имызакъоу уашъори згъэсысыжьыщт», ыӀоу. 27 «Джыри зэ» зыфиӀорэ гущыӀэхэм къагъэнафэ Тхьэм ыгъэсысырэ пстэури Тхьэм къыгъэхъугъэхэр ары ячӀыпӀэ зэрэригъэкӀыжьыщтхэр. Арэущтэу зыхъукӀэ, Тхьэм ымыгъэсысырэ Ӏофхэр ары къэнэжьыщтхэр. 28 Арэущтэу тетыгъоу зыми ымыгъэсысышъущтыр Тхьэм къызэрэтитырэм пае, щытхъу фэтэжъугъэшӀ. ДгъэлъапӀэу, щынагъо фытиӀэу ыгу къызэдгъэӀоу, ежьым тыфэжъугъэлажь, 29 сыда пӀомэ ти Тхьэ зэкӀэри зыгъэстырэ машӀом фэд.
Тхьэм ыгу къызэрэзэдгъэӀун фаер
1 Зэкъошхэм афэдэу шӀу шъузэрэлъэгъу зэпыт. 2 ХьакӀэр жъугъэлъэпӀэныр зыщышъумыгъэгъупш; сыда пӀомэ арэущтэу цӀыф заулэмэ амышӀахэу мэлэӀичхэр агъэхьэкӀагъэх. 3 ХьапсчӀэсхэм хьапсым шъузэрадычӀэсым фэдэу, къин зыщэчыхэрэми къин зэрадэшъущэчырэм фэдэу, зыщышъумыгъэгъупшэх. Шъори мы дунаем тет цӀыфхэм шъуащыщ. 4 ЗэлӀзэшъузыныр зэкӀэми арэгъэлъапӀ, лӀымрэ шъузымрэ япӀэ къабзэу щэрэт. Тхьэм зинэ зышӀэхэрэр ыгъэмысэщтых. 5 Ахъщэм шъукӀэмыхъопсэу шъущыт, шъуиӀэми разэ шъурыхъу. Сыда пӀомэ ежь Тхьэм къыӀуагъ: «Ныбжьи ухэсынэжьыщтэп, уизакъоуи укъэзгъэ нэжьыщтэп». 6 Арышъ, гушхоныгъэкӀэ тэӀо: «Зиусхьаныр сиӀэпыӀэгъушъ, зыми сыщыщынэ щтэп. ЦӀыфхэм сыда къысашӀэшъущтыр?» 7 Шъуитхьаматэхэу Тхьэм игущыӀэхэр къышъозыӀуагъэхэр зыщышъумыгъэгъупшэх. Дунаем зэрехыжьыгъэхэм шъуеплъызэ, яшӀошъхъуныгъэ илъэужхэм шъуарыкӀу. 8 Исус Христос тыгъуасэ зэрэщытыгъэм фэдэу, зызэблимыхъоу непи щыт, егъашӀэми щытыщт. 9 Ӏоф гъэшӀэгъон зэфэшъхьафхэу цӀыфхэм адрэ цӀыфхэм арагъашӀэхэрэм зыдяшъумыгъэхьых. Тхьэм ынэшӀу щыфэныгъэкӀэ шъугухэр жъугъэпытэхэмэ дэгъу, ау шхынхэм яхьылӀэгъэ унашъохэм пкӀэ яӀэп. А унашъохэм ахэмэ атетэу рыкӀорэ цӀыфхэм яшӀуагъэ зи арагъэкӀырэп. 10 Тэ тикъурмэн шӀыпӀэ тиӀ. ЧэтэнгъэӀагъэм щылажьэщтыгъэхэм а шӀыпӀэм икъурмэныпхъэ щыщ ашхынэу фитхэу щытыгъэхэп. 11 Дин пэщэшхом цӀыфхэм япсэкӀодхэр ыпщыныжьынхэм пае, былымхэм алъ зыдихьызэ, Унэу КӀоцӀэу анахь ЛъапӀэу зыфаӀорэм ихьэщтыгъ, ау былымхэм апкъыхэр къэлэ кӀыбым щагъэстыщтыгъэх. 12 Ащ пае Исуси ылъыкӀэ цӀыфхэм агухэр ыгъэкъэбзэжьынхэм пае, къэлэпчъэ кӀыбым къин щищэчыгъ. 13 Арэущтэу емыкӀоу къырахыгъэм тиӀахьэ хэлъыным пае, Исус ыдэжь къэлэ кӀыбым тыжъутъакӀу. 14 Сыда пӀомэ мыщ дэжьым мыкӀодыжьын къалэ щытиӀэу щытэп, къэкӀощт къалэм тыпэплъэ нахь. 15 Арышъ, Исус ыцӀэкӀэ Тхьэм щытхъу фэтэжъугъэшӀ зэпыт а щытхъур ары тэ тикъурмэныпхъэ ыцӀэ зыгъэлъапӀэрэ Ӏупэхэм къадэкӀырэр ары тикъурмэныпхъэр. 16 ШӀу шъушӀэнри зыщышъумыгъэгъупш, шъуиӀэри нэмыкӀ цӀыфхэм адэжъугощынри зыщышъумыгъэгъупш, сыда пӀомэ ащ фэдэ къурмэныпхъэхэр Тхьэм игуапэх. 17 Шъуитхьаматэхэм аӀохэрэм шъуядэӀу ыкӀи шъуафэӀорышӀ, сыда пӀомэ Тхьэм пэгъокӀ ратыжьын фаехэу, шъупсэхэм афэсакъхэу алъэплъэх. ЯӀоф хэщэтыкӀыныгъэкӀэ мыхъоу, гушӀохэу ашӀэным пае, шъуядэӀу. ЯӀоф хэщэтыкӀыныгъэкӀэ ашӀэмэ, ащ ишӀуагъэ къышъокӀырэп. 18 Тхьэм шъукъытфелъэӀу. Мыхъун зи тыгухэм арылъэу зыдэтшӀэжьырэп, сыда пӀомэ Ӏоф пстэумкӀи шъыпкъагъэ тиӀэу, тызекӀонэу тыфай. 19 ЗэкӀэмэ апэу сышъолъэӀу, шӀэхэу шъуадэжь Тхьэм къысигъэгъэзэжьынэу шъуелъэӀу.
ТхьэлъэӀу ыкӀи аужырэ шӀуфэс гущыӀэхэр
20 Гупсэфыныгъэ къытэзытырэ Тхьэм ти Зиусхьан Исус Христосэу мэлхэм ямэлэхъошхор лӀагъэхэм къахигъэ тэджыкӀыжьыгъ. Исус ылъ ары мыкӀодыжьын зэзэгъыныгъэу Тхьэм ежьыррэ тэррэ тазыфагу къыдилъхьагъэр мыхъурым фэдэу къэзыгъэшъыпкъэжьыгъэр. 21 Тхьэр зыфаер жъугъэцэкӀэным пае, шӀоу шъуищыкӀагъэр зэкӀэ шъугухэм къарерэлъхь. Исус Христос илъэкӀыныгъэкӀэ Тхьэм игъоу ылъытэрэ Ӏофхэр шъуерэгъэгъэцакӀэх. МыкӀодыжьын щытхъупгхор ий. Амин. 22 Сшыхэр, къызэрыжъугурызгъаӀорэ гущыӀэхэр шъудэнхэкӀэ сышъолъэӀу. Бэ къышъуфэстхыгъэп. 23 Тшы Тимофей шъхьафитэу къызэратӀупщыжьыгъэр шъушӀэнэу сыфай. Мыгужъоу къакӀомэ, ащ сыригъусэу шъуслъэгьунэу сыкъэкӀощт. 24 ӀПъуитхьамэтэ пстэухэмрэ Тхьэм ицӀыф лъэпӀэ пстэухэмрэ аӀапэ сфэшъуубытыжь. Италием щыщ тшыхэм шӀуфэс къышъуахыжьы. 25 Шъо пстэуми Тхьэм ынэшӀу къышъущерэф. Амин.
ГущыӀапэмрэ шӀуфэс ехынымрэ
1 Мы тхылъым итхэр Тхьэм Исус Христос къыфигъэнэфэгъэ Ӏофхэр ары. Тхьэм ахэр къызфигъэнэфагъэр Исус Христос цӀыфхэу Тхьэм фэлажьэхэрэм бэ темышӀэу къэхъущт Ӏофхэр аригъэшӀэнхэр ары. Арэущтэу Исус имэлэӀич ежьым фэлажьэрэ Иуан ыдэжь ыгъакӀуи, къэхъущт Ӏофхэр гуригъэӀуагъэх. 2 Арэущтэу Иуан ылъэгъугъэ пстэури ыӀуатэзэ, Тхьэм игущыӀэхэми Исус Христос ишыхьатныгъи шыхьат афэхъу. 3 Мы гущыӀэхэу Тхьэм ыдэжь къикӀыгъэхэу къэхъущт Ӏофхэм яхьылӀагъэхэм яджэрэр сыхьатмафэ ежьагъ. Мы гущыӀэхэр зэхэзыххэу, зыгъэцакӀэхэрэри сыхьатмафэ ежьагъэх, сыда пӀомэ уахътэу мы Ӏофхэр къызщыхъущтыр къэблэгъагъ. 4 Сэ, Иуан, шъо, Асие хэкум щыӀэ чылыс зэӀукӀиблым, шӀуфэс шъосэхыжьы. Тхьэу щыӀагъэу, щыӀэу, къэ кӀощт мафэхэми щыӀэщтым ынэшӀу къышъущерэфи, гупсэфыныгъэ къышъуерэт. Тхьэм ипсиблэу итӀысыпӀэ лъапӀэ ыпашъхьэ щытхэми Исус Христосми анэшӀу къышъущарэфи, гупсэфыныгъэ къышъуарэт. 5 Исус Христос ары шыхьат шъыпкъэр, апэу лӀагъэхэм къахэтэджыкӀыжьыгъэр ежьыр ары, чӀылъэм тет пачъыхьэмэ япащэр ежьыри ары. Ащ тэ шӀу телъэгъу, лъэу къащым щыкӀэкӀыгъэмкӀэ типсэкӀодхэм ялъэкӀыныгъэ тыкъыӀэкӀихыжьыгъ. 6 Ежьым игъусэхэу тетыгъо зиӀэхэу, Тхьэу ежь Ятэ фэлажьэрэ дин пащэхэу тыхъунэу тигъэнэфагъ. МыкӀодыжьын щытхъушхомрэ лъэкӀыныгъэшхомрэ иех! Амин. 7 ШъукъэдаӀу, ошъуапщэхэм ахэтэу ар къэкӀожьыщт, нэ пстэуми ар алъэгъущт, пчыкӀэ зыугъоныгъэхэми ар алъэгъущт. Дунаем тет лъэпкъ пстэури ежьым пае гъыхэу абгъэгу еожьыщтых. Джары зэрэхъущтыр. Амин. 8 ЛъэкӀыныгъэшхор зэкӀэ зиӀэ Зиусхьан Тхьэу щыӀагъэу, щыӀэу, къэкӀощт мафэхэми щыӀэщтым къеӀо: «Алфэрэ Омегэрэ, апэрэри аужырэри сэры».
Исус Христос Иуан зыкъызэрэригъэлъэгъугъэр
9 Сэ, Иуанэу шъушыр, Исус тыгухэм зэрарылъым пае, гузэжъогъоу шъузыхэтым сышъуигъус, сышъуигъусэуи Тхьэм и Тетыгъошхо ыӀэчӀэгъ сычӀэт, сышъуигъусэуи теубытэныгъэ сиӀэу сэзекӀо. Тхьэм игущыӀэхэмрэ Исус Христос ишыхьатныгъэрэ цӀыфхэм зэрязгъэӀугъэхэм пае, саубытыгъэу хыгъэхъунэу Патмос сагъэкӀуагъэу сыщыӀагъ. 10 Зиусхьаным имафэ дэжь Тхьэм Ыпсэ ЛъапӀэ къысфехыгъ. СаужкӀэ бжъэмыешхом ымакъэ фэдэ мэкъэшхо горэм къыӀоу зэхэсхыгъ: «Алфэрэ Омегэрэ, апэ рэри аужырэри сэры. 11 Плъэгъурэр тхылъ горэм итхи, чылыс зэӀукӀиблымэ афегъэхь: Къалэхэу Ефес, Смирнэ, Пергам, Фиатирэ, Сардис, Филаделфие, Лаодикие щыӀэ чылыс зэӀукӀэхэр ары». 12 КъыздэгущыӀэрэ макъэр зымакъэр слъэгъунэу зыфэзгъэзагъ. Зызыфэсэтъазэм, дышъэм хэшӀыкӀыгъэхэу, остыгъэ тетыпӀибл слъэгъугъэ, 13 остыгъэ тетыпӀиблыми ахэтэу, ЦӀыф Лъэпкъым ЬӀкъо фэдэу зыгорэ слъэгъугъэ. Ылъакъомэ анэсэу шъошэ кӀыхьэ щыгъыгъ, дышъэм хэшӀыкӀыгъэ бгъэрылъи илъыгъ. 14 Ышъхьэ шъхьацэу телъыгъэр цы фыжьым е осым фэдэу фыжьыбзагъ. ЬӀнэхэри мэшӀотхъуабзэм фэдагъэх. 15 Ылъакъохэри хьакум щагъэплъыгъэ гъуаплъэм фэдэу, лыдхэу щытыгъэх, ымакъи псы къиугъабэмэ амэкъэшхо фэдагъ. 16 ЫӀэ джабгъукӀэ жъогъуибл ыӀыгъыгъ, бгъуитӀуцэ зиӀэ сэшхо чан горэ ыжэ къыдэкӀыгъ. ЫнэкӀуи лъэшэу къепсырэ тыгъэм фэдагъ. 17 Ар зысэлъэгъум, ылъакъохэм адэжь лӀагъэм фэдэу сыщытефагъ. Джащыгъум ыӀэ джабгъу къыстрилъхьи къысиӀуагъ: «Умыщын, апэрэри аужырэри сэры. 18 ЩыӀэныгъэ зиӀэр сэры. СылӀагъ, ау джы сыщыӀ, егъашӀэми сыщыӀэщт. Амин. ЛӀэныгъэми лӀагъэхэм ядунаий яӀункӀыбзэхэр сӀыгъых. 19 Арышъ, Ӏофхэу плъэгъугъэхэри, Ӏофхэу джы щыӀэхэри, къэхъущтхэри тхых. 20 СӀэ джабгъукӀэ сӀыгъыгъэ жъогъуиблымрэ дышъэм хэшӀыкӀыгъэ остыгъэ тетыпӀиблымрэ къарыкӀырэр мары: Жъогъуиблымэ къарыкӀырэр чылыс зэӀукӀиблымэ ямэлэӀичхэр ары. Остыгъэ тетыпӀиблымэ къарыкӀырэр чылыс зэӀукӀиблыр ары».
Исус Христос Ефес къалэм щыӀэ чылыс зэӀукӀэм къэбарэу фаригъэхьыгъэр
1 Ефес къалэм щыӀэ чылыс зэӀукӀэм имэлэӀич мы къэбарыр фэтх: ЫӀэ джабгъукӀэ жъогъуибл зыӀыгъэу, дышъэм хэшӀыкӀыгъэхэу остыгъэ тетыпӀиблым ахэтэу къэзыкӀухьэрэм мы гущыӀэхэр къеӀох: 2 Ӏофхэу жъугъэцакӀэхэрэр сэшӀэх, лъэшэу шъузэрэлэжьагъэри, теубытэныгъэ шъуиӀэу шъузэрэзекӀуагъэри сэшӀэ. ЦӀыф бзаджэхэр зэрэшъуфэмыщэчхэрэри сэшӀэ. АпостолхэкӀэ зэджэжьхэрэ мыапостолхэр жъугъэунэфыгъэх, пцӀы зэраусырэри шъулъэгъугъэ. 3 Къиныбэ шъущэчыгъэ, теубытэныгъи шъуиӀэу шъозекӀо, сцӀэ пае лъэшэу шъулэжьагъ ыкӀи шъуезэщыгъэп. 4 Ау шъо зы мыхъун горэ къыжъудэсэлъэгъу: ЫпэкӀэ шӀулъэгъуныгъэу къысфышъуиӀагъэр зэрэхэшъунэжьыгъэр ары. 5 Шъукъызэфэхыгъэр зыфэдизыр зыщышъумыгъэгъугап. ШъуипсэкӀодхэм шъуафыкӀэгъожьи, ыпэкӀэ Ӏофхэр зэрэжъугъэцэкӀагъэхэм фэдэу, жъугъэцакӀэх. ПӀъуипсэкӀодхэм шъуафыкӀэмыгъожьмэ, сэ сыкъэкӀонышъ, шъуиостыгъэ тетыпӀэ ӀузгъэкӀотыщт. 6 Ау ӀофышӀу горэ къыжъудэсэлъэгъу: Николай игъогу рыкӀорэ цӀыф купым Ӏоф бзаджэхэу ашӀэхэрэр шъо шъоуджэгъух, сэ ахэмэ яӀофхэр зэрэсыуджэгъухэрэм фэдэу. 7 ТхьакӀумэ зиӀэм Тхьэм Ыпсэ ЛъапӀэ чылыс зэӀукӀэхэмэ къариӀорэр зэхерэх. ТекӀоныгъэр къэзыхьырэм Тхьэм иджэнэт ит чъыгэу щыӀэныгъэ къэзытырэм къыпыкӀэрэм щыщ ышхынэу фит сшӀыщт.
Исус Христос Смирнэ къалэм щыӀэ чылыс зэӀукӀэм къэбарэу фаригъэхьыгъэр
8 Смирнэ къалэм щыӀэ чылыс зэӀукӀэм имэлэӀич мы къэбарыр фэтх: Апэрэу ыкӀи Аужырэу, лӀагъэу щытыгъэу къэхъужьыгъэм мы гущыӀэхэр къеӀох: 9 Гузэжъогъоу шъузхэтымрэ шъуитхьамыкӀагъорэ сэшӀэх, ау щытми шъубай. ДжурткӀэ зэджэжьхэрэ мыджуртхэр ӀэягъэкӀэ къызэрэшъутегущыӀэхэрэр сэшӀэ. Ахэр джуртхэп, ау шэйтаным изэӀукӀэ щыщых. 10 Къинхэу шъущэчыщтхэм шъуа щымыщын. Мыр шъосэӀо, шъуигъэунэфыным пае, шэйтаным шъуащыщхэу заулэ хьапсым чӀидзэщт, мэфипшӀым гузэжъогъум шъухэтыщт. ЛӀэныгъэм нэсы шъукъысфэшъыпкъ. Шъукъысфэшъыпкъэмэ, танджэу мыкӀодыжьын щыӀэныгъэр къышъостыщт. 11 ТхьакГумэ зиӀэм Тхьэм Ыпсэ ЛъапӀэ чылыс зэӀукӀэхэм къариӀорэр зэхерэх. ЯтӀонэрэ лӀэныгъэм текӀоныгъэ къэзыхьырэм иягъэ ригъэкӀыщтэп.
Исус Христос Пергам къалэм щыӀэ чылыс зэӀукӀэм къэбарэу фаригъэхьыгъэр
12 Пергам къалэм щыӀэ чылыс зэӀукӀэм имэлэӀич мы къэбарыр фэтх: БгъуитӀуцэ зиӀэ сэшхо чаныр зиӀэм мы гущыӀэхэр къеӀох: 13 Ӏофхэу жъутъэцакӀэхэрэр сэшӀэх, шэйтаным итӀысыпӀэ зыдэщыӀэм шъузэрэщыпсэурэри сэшӀэ. Сэ сцӀэ шъукъыфэшъыпкъ. Шъо шъузыдэщыӀэ чӀыпӀэу шэйтаныр зыдэщыӀэм сишыхьат шъыпкъэу Антипэ зыцӀэр цӀыфхэм заукӀыгъэ мафэхэми сэркӀэ шӀошъхъуныгъэу шъуиӀэр хэшъунэжьынэу шъудагъэп. 14 Ау мыхъун Ӏоф горэхэр къыжъудэсэлъэгъух: Валаам Ӏофхэу цӀыфхэм аригъэшӀагъэхэм атет цӀыфхэр къышъухэтых. Валаам ары Валак зыцӀэм Израил цӀыфхэм псэкӀод аригъэшӀэнэу езыгъэшӀагъэр. Хымэ лъэпкъхэм ащыщхэм тхьэ нэпцӀхэм афашӀыгъэ къурмэныпхъэм ыл Валак Израил цӀыфхэм аригъэшхыгъ, зини аригъэшӀагъ. 15 Джащ фэдэу Николай Ӏофхэу цӀыфхэм аригъашӀэхэрэм атет цӀыфхэр къышъухэтых. 16 Арышъ, шъуипсэкӀодхэм шъуафыкӀэгъожь. Армырмэ, шӀэхэу шъуадэжь сыкъэкӀонышъ, сыжэ къыдэкӀырэ сэшхомкӀэ сязэощт. 17 ТхьакӀумэ зиӀэм Тхьэм Ыпсэ ЛъапӀэ чылыс зэӀукӀэхэм къариӀорэр зэхерэх. ТекӀоныгъэр къэзыхьырэм гъэбылъыгъэ мэнн шхыным щыщ естыщт. ЦӀакӀэ зы тетхэгъэ мыжъо фыжьри естыщт. А мыжъор зэстырэ цӀыфым нэмыкӀэу а цӀэр зыми ышӀэрэп.
Исус Христос Фиатирэ къалэм щыӀэ чылыс зэӀукӀэм къэбарэу фаригъэхьыгъэр
Ӏвфиатирэ къалэм щыӀэ чылыс зэӀукӀэм имэлэӀич мы къэбарыр фэтх: Тхьэм Ыкъоу зынэхэр мэшӀотхъуабзэм фэдэхэу, зылъакъохэри гъоплъэ плъыгъэм фэдэу лыдхэу щытхэм мы гущыӀэхэр къеӀох: 19 Ӏофхэу жъугъэцакӀэхэрэр сэшӀэх, шъуишӀулъэгъуныгъи, шъуишӀошъхъуныгъи, ӀэпыӀэгъу шъузэрэзэфэхъурэри, теубытэныгъэ шъуиӀэу шъузэрэзекӀорэри сэшӀэ. Ыпэм нахьи нахьыбэу шӀу зэрэшъушӀэрэри сэшӀэ. 20 Ау мыхъун горэ къыжъудэсэлъэгъу: ПегъымбаркӀэ зэджэжьырэ бзылъфыгъэу Иезавел шъупэуцурэп. Зинэ ашӀэнэуи, хымэ лъэпкъхэм ащыщхэм тхьэ нэпцӀхэм афашӀыгъэ къурмэныпхъэм ыл ашхынэуи къысфэлажьэрэ цӀыфхэм арегъашӀэх ыкӀи дехьыхых. 21 Зинэу ышӀагъэм фыкӀэгъожьынэу игъо физгъэфагъ, ау фыкӀэгъожьыгъэп. 22 Ащ пае, къин ыщэчынэу пӀэм хэзгъэлъыщт. Зинэ дэзышӀагъэхэри ашӀагъэхэм афыкӀэмыгъожьхэмэ, гузэжъогъушхо хэзгъэфэщтых. 23 Ащ ибынхэри згъэлӀэщтых. ЕтӀанэ цӀыфхэм агухэм арылъхэри ягупшысэхэри зыгъэунэфырэр сэрэу зэрэщытыр чылыс зэӀукӀэ пстэуми ашӀэщт. ПӀъуащыщэу хэти Ӏофхэу ышӀагъэхэм яфэшъуашэ езгъэгъотыжьыщт. 24 ПӀъуащыщхэу къэнэгъэ цӀыфхэу Фиатирэ къалэм дэсхэу, Иезавел Ӏофхэу цӀыфхэм аригъашӀэхэрэм атемытхэу, шэйтаным ишъэфышхохэр зэзымыгъэшӀагъэхэм, нэмыкӀ хьылъэ горэ къызэрэшъутесымылъхьащтыр шъосэӀо. 25 Сэ сыкъэкӀофэ, шӀошъхъуныгъэу шъуиӀэм шъутемыкӀ. 26 ТекӀоныгъэр къэзыхьэу, кӀэухым нэсыфэ сиӀофхэр зыгъэцакӀэрэм лъэпкъхэм тетыгъо афыриӀэнэу згъэхъущт, Сятэ тетыгъо сиӀэ зэригъэхъугъэм фэдэу. 27 «Ащ гъучӀ бэщкӀэ ыгъэӀорышӀэщтьгх, ятӀэм хэшӀыкӀыгъэ хьакъушыкъухэми афэдэу зэхикъутэщтых». 28 ТекӀоныгъэр къэзыхьырэм нэфшъэгъо жъуагъори естыщт. 29 ТхьакӀумэ зиӀэм Тхьэм ЬӀпсэ ЛъапӀэ чылыс зэӀукӀэхэм къариӀорэр зэхерэх.
Исус Христос Сардис къалэм щыӀэ чылыс зэӀукӀэм къэбарэу фаригъэхьыгъэр
1 Сардис къалэм щыӀэ чылыс зэӀукӀэм имэлэӀич мы къэбарыр фэтх: Тхьэм ипсиблырэ жъогъуиблырэ зыӀыгъырэм мы гущыӀэхэр къеӀох: Ӏофхэу жъугъэцакӀэхэрэр сэшӀэх. Шъупсау цӀыфхэм аӀо, ау шъулӀагъ. 2 Шъумычъыеу шъусакъ, къышъуфэнэжьыгъэ щыӀэныгъэу лӀэныгъэм нэсыгъэм кӀуачӀэ ежъугъэгъот; сыда пӀомэ Ӏофхэу жъугъэцакӀэхэрэр си Тхьэ ыдэжькӀэ икъугъэхэу слъытэхэрэп. 3 Арышъ, Ӏофхэу зэжъугъэшӀагъэхэри зэхэшъухыгъэхэри шъугу къэжъугъэкӀыжьых. Ахэр жъугъэцакӀэх, шъуипсэкӀодхэми шъуафыкӀэгъожь. Шъучъыеу шъумысакъмэ, шъумышӀахэу тыгъуакӀом фэдэу сыкъэкӀощт. Шъуадэжь сыкъызыкӀощт сыхьатри шъушӀэщтэп. 4 Ау зищыгъынхэр зымыгъэушӀоигъэхэу, цӀыф заулэ Сардис къалэм къышъухэтых. Ахэр щыгъын фыжьхэр ащыгъхэу къыздэкӀощтых, сыда пӀомэ ахэмэ яфэшъуашэшъ ары. 5 ТекӀоныгъэр къэзыхьырэм ахэмэ афэдэу щыгъын фыжьхэр щыгъыщтых. МыкӀодыжьын щыӀэныгъэ зыгъотыщтхэм ацӀэхэр зэрыт тхылъым ащ ыцӀэ егъашӀэм изгъэкӀыщтэп. Ащ ыцӀэ зэрэсшӀэрэр Сятэрэ имэлэӀичхэмрэ апашъхьэ къыщысӀощт. 6 ТхьакӀумэ зиӀэм Тхьэм Ыпсэ ЛъапӀэ чылыс зэӀукӀэхэмэ къариӀорэр зэхерэх.
Исус Христос Филаделфие къалэм щыӀэ чылыс зэӀукӀэм къэбарэу фаригъэхьыгъэр
7 Филаделфие къалэм щыӀэ чылыс зэӀукӀэм имэлэӀич мы къэбарыр фэтх: ЛъапӀэу ыкӀи шъыпкъэу щытэу, Даутэ иӀункӀыбзэ зыӀыгъырэм мы гущыӀэхэр къеӀох. Ащ зэӀуихырэр зыми ыгъэпытэжьышъурэп, ыгъэпытэрэри зыми Ӏуихыжьышъурэп. Чофхэу жъугъэцакӀэхэрэр сэшӀэх. Мары, пчъэу зыми ымыгъэпытэжьышъурэр шъуапашъхьэ щызэӀусхыгъ. ЛъэкӀыныгъэшхо шъуиӀэп, ау сигущыӀэхэр жъугъэцэкӀагъэх, сигъогу шъузэрэрыкӀорэри цӀыфмэ апашъхьэ щышъуушъэфыгъэп. 9 ПӀъукъэдаӀу, шэйтаным изэӀукӀэ щыщхэу, пцӀы зыусхэу, джурткӀэ зэджэжьхэрэ мыджуртхэр, ахэр сэ къэзгъэкӀонхэшъ, шъулъакъохэм адэжь лъэгонджэмышъхьэкӀэ щызгъэтӀысыщтых, шӀу шъузэрэслъэгъурэри ашӀэщт. 10 «Теубытэныгъэ зижъугъаӀ», зыфэсӀогъэ унашъор зэрэжъугъэцэкӀагъэм пае, дунаем зэкӀэ тетхэм алъэгъущт гузэжъогъу сыхьатым шъущысыухъумэщт. А гузэжъогъу сыхьатыр дунаем тет цӀыфхэм яшъыпкъагъэ ыгъэунэфыным пае къэкӀощт. 11 ШӀэхэу сыкъэкӀощт. Зыми шъуитандж къышъуӀимыхынэу шӀошъхъуныгъэу шъуиӀэм шъутемыкӀ. 12 ТекӀоныгъэр къэзыхьырэр си Тхьэ иунэшхо пкъэу фэзгъэуцущт, а унэпгхоми ныбжьи чӀэкӀыжьыщтэп. Си Тхьэ ыцӀэрэ, сиТхьэ икъэлэшхоу ЕрусалимыкӀэм ыцӀэрэ а цӀыфым ынатӀэ тестхэщтых. А къалэр си Тхьэу уашъом щыӀэм ыдэжь къикӀэу къехыщт. Сэ цӀакӀэу сиӀэри а цӀыфым ынатӀэ тестхэщт. 13 ТхьакӀумэ зиӀэм Тхьэм Ыпсэ ЛъапӀэ чылыс зэӀукӀэхэм къариӀорэр зэхерэх.
Исус Христос Лаодикие къалэм щыӀэ чылыс зэӀукӀэм къэбарэу фаригъэхьыгъэр
14 Лаодикие къалэм щыӀэ чылыс зэӀукӀэм имэлэӀич мы къэбарыр фэтх: АминкӀэ заджэхэрэ шыхьат шъыпкъэу ыкӀи узщыгугъышъун шыхьатэу Тхьэм къыгъэхъугъэ пстэури зыӀэ къикӀыгъэм мы гущыӀэхэр къеӀох: 15 Ӏофхэу жъугъэцакӀэхэрэр сэшӀэх. Шъугухэр фабэхэп ыкӀи чъыӀэхэп ыкӀи. Шъугухэр фэбэгъагъойт е чъыӀэгъагъойт! 16 МыфабэумычъыӀэу шъузэрэщытым пае, цӀыфым ыжэ псыр къызэрэдиутхыкӀырэм фэдэу, сыжэ шъукъыдэсыутхыкӀыжьыщт. 17 Шъо мырэущтэу шъоӀо: «Тыбай, бэ тиӀэ хъугъэ, зи тищыкӀагъэп». Ау сыхьатмыгъо шъуежьагъэу, шъутхьамыкӀэу, гукӀэгъу шъуифэшъуашэу, шъунэшъоу ыкӀи шъупцӀанэу шъузэрэщытыр шъушӀэрэп. 18 Арышъ, баи шъухъуным пае, машӀокӀэ гъэкъэбзэжьыгъэ дышъэ сщышъущэфынэу игъоу къышъуфэсэлъытэ. ШъузэрэпцӀанэм пае, шъумыукӀытэнэу щыгъын фыжьхэри къэшъущэфых. Шъунэхэми алъэгъуным пае, ащышъуфэнэу дагъэри къэшъущэф. 19 ШӀу слъэгъухэрэм агурысэгъаӀо ыкӀи сэгъэдаӀох. Арышъ, шъуипсэкӀодхэм шъуафыкӀэгъожьи, шъугу етыгъэу сигъогу шъурыкӀу. 20 Мары, пчъэм сыӀутэу сыкъытео. Зыгорэм сымакъэ зэхихэу, пчъэр къыӀуихымэ, сихьанышъ, сэ ащ сыдэшхэщт, ежьыри сэ къыздэшхэщт. 21 ТекӀоныгъэр къэзыхьырэр ситӀысыпӀэ лъапӀэ щысынэу къызготӀысхьанэу фит сшӀыщт, сэри текӀоныгъэр къэсхьи, Сяти итӀысыпӀэ лъапӀэ щысынэу ежьым сызэрэготӀысхьагъэм фэдэу. 22 ТхьакӀумэ зиӀэм Тхьэм Ыпсэ ЛъапӀэ чылыс зэӀукӀэхэм къариӀорэр зэхерэх.
Уашъом ӀЦыӀэ тӀысыпӀэ лъапӀэр
1 Ащ нэужым сызэплъэм, уашъом щыӀэ пчъэ горэ зэӀухыгъэу слъэгъугъэ. Бжъэмыешхом ымакъэ фэдэу, къыздэгущыӀэу зэхэсхыгъэгъэ макъэм къыӀуагъ: «Мо къыдэкӀуай, Ӏофхэу джырэ нэуж къэхъун фаехэр озгъэлъэгъущтых». 2 Ардэдэм Тхьэм Ыпсэ ЛъапӀэ къысфехыгъ ыкӀи сызэплъэм, уашъом тӀысыпӀэ лъапӀэ горэ щыслъэгъугъ, зыгори ащ тесыгъ. 3 Ащ тесым итеплъэ мыжъо лъэпӀэ фыжьэу яспис зыцӀэмрэ мыжъо лъэпӀэ плъыжьэу сардис зыцӀэмрэ ятеплъэ фэдагъ. ТӀысыпӀэ лъапӀэм ихъурэягъэкӀэ лэгъупкъопсэу зитеплъэ мыжъо лъэпӀэ уцышъоу смарагд зыцӀэм фэдэр щыӀагъ. 4 ТӀысыпӀэ лъапӀэм ихъурэягъэкӀэ къегъэуцокӀыгъэхэу нэмыкӀрэ тӀысыпӀэ лъэпӀэ тӀокӀырэ плӀырэ щыӀагъ. А тӀысыпӀэ лъапӀэхэм атесхэу тхьамэтэ нахьыжъхэу нэбгырэ тӀокӀырэ плӀырэмэ щыгъын фыжьхэр ащыгъхэу, ашъхьэхэми дышъэм хэшӀыкӀыгъэ танджэхэр ателъхэу слъэгъугъэх. 5 ТӀысыпӀэ лъапӀэм пчыкӀэхэр къикӀыгъэх, шыблэ гъогъо мэкъэшхохэри къыпыӀукӀыгъэх. ТӀысыпӀэ лъапӀэм ыпашъхьэ остыгъибл щытыгъэх ахэр Тхьэм ипсибл ары. 6 А тӀысыпӀэ лъапӀэм ыпашъхьэ апчым хэшӀыкӀыгъэу, кристаллым фэдэу нэфэу ыкӀи къабзэу, хым итеплъэ иӀэу зыгорэ слъэгъугъэ. Гузэгум, тӀысыпӀэ лъапӀэм ихъурэягъэкӀэ къеуцокӀыгъэхэу псэушъхьиплӀ итыгъэх. АгупэкӀи акӀыбкӀи нэхэр арызыбзагъэх. 7 Апэрэ псэушъхьэр аслъаным фэдагъ, ятӀонэрэр шкӀэм фэдагъ, ящэнэрэм ынэгу цӀыфым ынэгу фэдагъ, яплӀэнэр быбырэ бгъэжъым фэдагъ. 8 ПсэушъхьиплӀ пэпчъ тэмих иӀагъ, тыдэкӀи нэхэр арызыбзагъэх. Чэщи мафи зэпымыоу мырэущтэу аӀо: «ЛъэкӀыныгъэшхор зэкӀэ зиӀэ Зиусхьанэу Тхьэу, щыӀагъэу, щыӀэу, къэкӀощт мафэхэми щыӀэщтыр лъапӀэу, лъапӀэу, лъапӀэу щыт». 9 Псэушъхьэхэм щытхъушхуи, лъытэныгъэшхуи, шъхьэкӀэфэныгъэшхуи тӀысыпӀэ лъапӀэм тесэу, егъашӀэм щыӀэщтым 10 фашӀы къэс, тхьэмэтэ нахьыжъхэу нэбгырэ тӀокӀырэ плӀырэми тӀысыпӀэ лъапӀэм тесэу егъашӀэм щыӀэщтым ыпашъхьэ зыщырадзыхызэ агъэлъапӀэ. ТӀысыпӀэ лъапӀэм ыпашъхьэ ятанджэхэр агъэтӀылъхэзэ, мырэущтэу аӀо: 11 «О тиЗиусхьан, щытхъушхори, лъытэныгъэшхори, лъэкӀыныгъэшхори зифэшъуашэр оры, сыда пӀомэ пстэури къэзыгъэхъугъэр оры, о уфэягъэти, ахэри къэхъухи, щыӀэныгъэ яӀэ хъугъэ».
Тхылъымрэ Шъынэмрэ
1 ЕтӀанэ тӀысыпӀэ лъапӀэм тесым ыӀэ джабгъукӀэ тхылъ горэ ыӀыгъэу слъэгъугъэ. Ар ыкӀоцӀкӀи ыкӀыбкӀи тхыгъэу, зэкӀоцӀыщыхьагъэу, мыхъурибли тедзагъэу щытыгъ. 2 ЛъэкӀыныгъэ зиӀэ мэлэӀич гори слъэгъутъэ мэкъэшхокӀэ къыӀоу: «Мыхъурыр тезыхынэу, тхылъыр зэгозыхынэу хэта зифэшъуашэр?» 3 Ау уашъоми, чӀылъэми, чӀылъэм ычӀэгъыми а тхылъыр зэгозыхынэу, е ыкӀоцӀ еплъынэу зылъэкӀырэ цӀыф зи ащыӀагъэп. 4 Тхылъыр зэгозыхынэу е ыкӀоцӀ еплъынэу зифэшъошэ цӀыф горэ къызэрамыгъотыгъэм пае, лъэшэу сыгъыгъ. 5 Ау тхьамэтэ нахьыжъхэм ащыщ зыгорэм къысиӀуагъ: «Умыгъ, мо къэдаӀу! Иудэ унэгъо лъэпкъым щыщ аслъанкӀэ заджэхэу, пачъыхьэ Даутэ къытехъукӀыгъэ бын лъапӀэм текӀоныгъэр къыхьыгъ. Мыхъуриблыр тырихынышъ, тхылъыри зэгуихын ащ ылъэкӀыщт». 6 ЕтӀанэ Шъынэ горэ шӀуабзыгъэм фэдэу тӀысыпӀэ лъапӀэм ыгузэгу итэу, псэушъхьиплӀымрэ тхьамэтэ нахьыжъхэмрэ ихъурэягъэкӀэ къеуцокӀыгъэхэу слъэгъугъэ. Бжъэкъуибл тетыгъ, нибли иӀагъ. Ниблыр дунаем тыдэкӀи Тхьэм ыгъэкӀогъэ псиблыр ары. 7 А Шъынэр кӀуи, тӀысыпӀэ лъапӀэм тесым ыӀэ джэбгъукӀэ ыӀыгъырэ тхылъыр къыӀихыгъ. 8 Ар къызыӀехым, псэушъхьиплӀымрэ тхьэмэтэ нахьыжъхэу нэбгырэ тӀокӀырэ плӀырэмрэ Шъынэм ыпашъхьэ зыщырадзыхыгъ. Хэти шыкӀэпщынэм фэдэу пщынэ лъэпкъ горэ ыӀыгъыгъ, Ӏэгубжъхэу дышъэм хэшӀыкӀыгъэхэу, мэ ӀэшӀу зыпихырэ уцхэр зэрытхэри аӀыгъыгъэх. А уцхэм апихырэ мэ ӀэшӀур Тхьэм ицӀыф лъапӀэхэм ялъэӀухэр арыгъэ. 9 ОрэдыкӀэ къаӀуагъ: «Тхылъыр пштэнэу, имыхъурхэри тепхынхэу уифэшъуащ, сыда пӀомэ цӀыфхэм ушӀуабзыгъ, о плъыкӀи унэгъо лъэпкъ пстэуми, бзэ пстэуми, хэгъэгу пстэуми, лъэпкъ пстэуми ащыщхэу цӀыфхэм ашъхьэхэр Тхьэм пае къэпщэфыжьыгъэх. 10 О уигъусэхэу тетыгъо зиӀэхэу, ти Тхьэ фэлажьэрэ дин пащэхэу тыхъунэу о ты бгъэнэфагъ; дунаеми тетыгъо щытиӀэщт». 11 ЕтӀанэ сызэплъэм, тӀысыпӀэ лъапӀэм, псэушъхьиплӀым, тхьамэтэ нахьыжъхэм яхъурэягъэкӀэ къяуцокӀыгъэхэу мэлэӀич бэ дэдэхэм амакъэ зэхэсхыгъэ, япчъагъи мин бэ дэдэ хъущтыгъ. 12 Ахэмэ мэкъэшхокӀэ мырэущтэу аГуагъ: «ЛъэкӀыныгъэшхор, баиныгъэшхор, зэхэшӀыкӀыныгъэшхор, кӀочӀэшхор, лъытэныгъэшхор, щытхъушхор, шъхьэкӀэфэныгъэшхор Шъынэу цӀыфхэм шӀуабзыгъэм ифэшъуашэх». 13 ЕтӀанэ уашъом, чӀым, чӀы чӀэгъым, хым ахэми ащыпсэухэу, Тхьэм къыгъэхъугъэ псэ зыхэлъ пстэуми къаӀоу зэхэсхыгъ: «ШъхьэкӀэфыныгъэшхор, лъытэныгъэшхор, щытхъушхор, тетыгъошхор егъашӀэм тӀысыпӀэ лъапӀэм тесымрэ, Шъынэмрэ яй!» 14 ПсэушъхьиплӀыми, «Амин» къаӀуагъ. Тхьамэтэ нахьыыжъхэу нэбгырэ тӀокӀырэ плӀырэмрэ чӀыгум зырадзыхи, сыдигъуи ЩыӀэщтыр агъэлъэпӀагъ.
Мыхъурхэр
1 ЕтӀанэ Шъынэм мыхъуриблымэ ащыщэу апэрэр зэрэтырихырэр слъэгъугъэ. Джащыгъум псэушъхьиплӀым щыщэу зым шыблэ гъуагъом ымакъэ фэдэ макъэкӀэ, «КъакӀо!» ыӀоу зэхэсхыгъэ. 2 ЕтӀанэ сызэплъэм, шы фыжь слъэгъугъэ. Шым тесым щабзэ горэ ыӀыгъыгъ, мэлэӀич горэми тандж къыритыгъ. ТекӀоныгъэр къэзыхьырэм фэдэу текӀоныгъэр къыхьынэу ежьагъ. 3 ЕтӀанэ Шъынэм ятӀонэрэ мыхъурыр зытырехым, ятӀонэрэ псэушъхьэм, «КъакӀуи еплъ!» къыӀоу зэхэсхыгъ. 4 Джащыгъум нэмыкӀ шы горэ, шы цӀэгъоплъэу къыдэкӀыгъ. Ащ тесым дунаем мамырныгъэр тырихынэуи, цӀыфхэр зэригъэукӀынхэуи Тхьэм фитыныгъэ къыритыгъ. МэлэӀич горэм ащ сэпгхо къыритыгъ. 5 ЕтӀанэ Шъынэм ящэнэрэ мыхъурыр зытырехым, ящэнэрэ псэушъхьэм, «КъакӀуи еплъ!» къыӀоу зэхэсхыгъ. Сызэплъэм, шы шӀуцӀэ слъэгъугъэ. Ащ тесым щэчалъэ горэ ыӀыгъыгъ. 6 ЕтӀанэ псэушъхьиплӀымэ ахэтэу зы макъэ горэ къыдэӀукӀэу, мырэущтэу къыӀоу зэхэсхыгъ: «Коцэу лэгъищым арылъыр зы мэфапкӀэ мэхъу, хьэу лэгъибгъум арылъыри зы мэфапкӀэ мэхъу. Дагъэми сэнэпсми уиягъэ ямыгъэкӀ». 7 ЕтӀанэ Шъынэм яплӀэнэрэ мыхъурыр зытырехым, яплӀэнэрэ псэушъхьэм ымакъэ, «КъакӀуи еплъ!» къыӀоу зэхэсхыгъ. 8 Сызэплъэм, шы джэф слъэгъугъэ. Ащ тесым ыцӀагъэр ЛӀэныгъэр ары. ЛӀагъэхэм я Дунай зыцӀэр ащ лъыкӀоу щытыгъ. Ахэми сэшхокӀи, гъаблэкӀи, зэпахэрэ узхэмкӀи, чӀылъэм ихьакӀэкъуакӀэхэм яӀэпыӀэгъукӀи цӀыфхэр агъэлӀэнхэу чӀылъэм ыплӀанэ тетыгъо фыряӀэ хъугъэ. 9 ЕтӀанэ Шъынэм ятфэнэрэ мыхъурыр зытырехым, цӀыфхэу Тхьэм игущыӀэхэр къызэрагъэӀугъэхэм паий, а гущыӀэхэм шыхьатныгъэ зэрафэхъугъэхэм паий аукӀыгъэхэм апсэхэр къурмэншӀыпӀэм ычӀэгъ щыӀэхэу щыслъэгъугъэх. 10 Ахэр мэкъэшхокӀэ къэджагъэх: «О Зиусхьан лъапӀэ ыкӀи шъыпкъагъэр зиӀэу Зиусхьан, дунаем тет цӀыфхэу тэ тлъы зыгъэчъагъэхэм хьыкум атепшӀыхьанэуи, яфэшъуашэ ябгъэпщыныжьынэуи сыдигъо нэсы тыпэбгъэплъэщт?» 11 Арэущтэу мэлэӀич горэм ахэмэ ащыщэу хэти шъошэ кӀыхьэ къырити, тӀэкӀурэ загъэпсэфынэу ариӀуагъ, дунаем ицӀыфхэм ахэр зэраукӀыгъэхэм фэдэу, ахэмэ ягъусэхэу аукӀыщт цГыфхэу Тхьэм фэлажьэхэрэмрэ адрэ шыхэу аукӀыщтхэмрэ япчъагъэ екъуфэ. 12 ЕтӀанэ Шъынэм яхэнэрэ мыхъурыр зэрэтырихырэр слъэгъугъэ. Джащыгъум чӀылъэр лъэшэу къэсысыгъ, тыгъэри пчэныцым хэшӀыкӀыгъэ шэкӀ шӀуцӀэм фэдэу ушӀункӀыгъэ, мазэри лъым фэдэу плъыжьы хъугъэ. 13 Уашъом ижъуагъохэри чӀылъэм къефэхыгъэх, жьыбгъэшхо къызепщэкӀэ, ынджыр чъыгым пытхэр къызэрэпытэкъухэрэм фэдэу. 14 Тхъылъыр зэрэзэкӀоцӀащыхьэрэм фэдэу, уашъор кӀодыгъэ; къушъхьэ пстэури хыгъэхъунэ пстэури ячӀыпӀэхэм арыкӀыгъэх. 15 Дунаем ипачъыхьэхэми, тетыгъо зиӀэхэми, дзэм ипэщэшхохэми, байхэми, лъэкӀыныгъэшхо зиӀэхэми, пщылӀми, фитми, гъочӀэгъхэмрэ къушъхьэ мыжъошхохэм ачӀэгърэ защагъэбылъыжьыгъ. 16 Ахэмэ къушъхьэхэмрэ къушъхьэ мыжъошхохэмрэ араӀуагъ: «Шъукъыттефи, тӀысыпӀэ лъапӀэм тесым тешъумыгъэлъэгъу, Шъынэм игубжи тыщышъуухъум. 17 Сыда пӀомэ ахэр зыгубжырэ мэфэшхор къэсыгъ, ахэми хэта апэуцужьын зылъэкӀыщтыр?»
МэлэӀичхэм Тхьэм имыхъур цӀыф нэбгырэ минишъэрэ тӀокӀитӀурэ плӀырэм зэратырадзагъэхэр
1 Ащ нэужым чӀылъэм икъопиплӀмэ мэлэӀичиплӀ атетхэу слъэгъугъэ. Жьыбгъэр чӀыми хыми къыщемыпщэнэу, чъыгми къемыонэу чӀылъэм икъопиплӀ къикӀырэ жьыбгъэхэм апэуцужьыщтыгъэх. 2 ЕтӀанэ нэмыкӀ мэлэӀич горэм щыӀэныгъэ къыздикӀырэ Тхьэм имыхъур ыӀыгъэу, тыгъэ къыкъокӀыпӀэмкӀэ къикӀэу слъэгъугъэ. ЧӀымрэ хымрэ яягъэ арагъэкӀынэу фитыныгъэ зиӀэ мэлэӀичиплӀым мэкъэшхокӀэ ариӀуагъ: 3 «Ти Тхьэ фэлажьэрэ цӀыфхэм анатӀэ мыхъур тетэдзэфэ, чӀым, хым, чъыгхэм шъуиягъэ яжъугъэкӀыкъон!» 4 ЕтӀанэ цӀыфхэу мэлэӀичхэм мыхъурыр зытырадзагъэхэм япчъагъэ зэхэсхыгъ: Израил иунэгъо лъэпкъ пстэуми ащыщхэу мэлэӀичхэм мыхъурыр зытырадзагъэхэр нэбгырэ минишъэрэ тӀокӀитӀурэ плӀырэ хъущтыгъэх. 5 Иудэ унэгъо лъэпкъым щыщхэу нэбгырэ мин пшӀыкӀутӀум мыхъурыр атырадзагъ; Рувим унэгъо лъэпкъым щыщхэу нэбгырэ мин пшӀыкӀутӀум мыхъурыр атырадзагъ; Гад унэгъо лъэпкъым щыщхэу нэбгырэ мин пшӀыкӀу тӀум мыхъурыр атырадзагъ; 6 Асир унэгъо лъэпкъым щыщхэу нэбгырэ мин пшӀыкӀутӀум мыхъурыр атырадзагъ; Неффалим унэгъо лъэпкъым щыщхэу нэбгырэ мин пшГыкӀутӀум мыхъурыр атырадзагъ; Манассие унэгъо лъэпкъым щыщхэу нэбгырэ мин пшӀыкӀутӀум мыхъурыр атырадзагъ; 7 Симеон унэгъо лъэпкъым щыщхэу нэбгырэ мин пшӀыкӀутӀум мыхъурыр атырадзагъ; Левый унэгъо лъэпкъым щыщхэу нэбгырэ мин пшӀыкӀутӀум мыхъурыр атырадзагъ; Иссахар унэгъо лъэпкъым щыщхэу нэбгырэ мин пшӀыкӀутӀум мыхъурыр атырадзагъ; 8 Завулон унэгъо лъэпкъым щыщхэу нэбгырэ мин пшӀыкӀутӀум мыхъурыр атырадзагъ; Юсыф унэгъо лъэпкъым щыщхэу нэбгырэ мин пшӀыкӀутӀум мыхъурыр атырадзагъ; Вениамин унэгъо лъэпкъым щыщхэу нэбгырэ мин пшӀыкӀутӀум мыхъурыр атырадзагъ;
Пчъагъэ зимыӀэ цӀыф купышхом Тхьэр зэригъэлъапӀэрэр
9 Ащ нэужым сызэплъэм, лъэпкъ пстэуми, унэгъо лъэпкъ пстэуми, хэгъэгу пстэуми, бзэ пстэуми ащыщхэу умылъытэшъун цӀыф купышхо слъэгъугъэ. Шъошэ фыжь кӀыхьэхэр ащыгъхэу, палмэ зыцӀэ чъыгым икъутамэхэр аӀыгъхэу, тӀысыпӀэ лъапӀэмрэ Шъынэмрэ апашъхьэ щытыгъэх. 10 Ахэр мэкъэшхокӀэ къэджагъэх: «Ти Тхьэу тӀысыпӀэ лъапӀэм тесымрэ Шъынэмрэ ары тымыкӀодэу тыкъэзыгъэнэжьыгъэхэр». 11 ТӀысыпӀэ лъапӀэм, тхьамэтэ нахьыжъхэм, псэушъхьиплӀым къяуцокӀыгъэхэу мэлэӀич пстэури щытыгъэх. Ахэмэ тӀысыпӀэ лъапӀэм ыпашъхьэ абгъэгукӀэ зыщырадзыхи, Тхьэр агъэлъапӀэзэ аӀощтыгъ: 12 «Амин! ШъхьэкӀэфэныгъэшхор, щытхъушхор, зэхэ шӀы кӀыныгъэшхор, лъытэныгъэшхор, лъэкӀыныгъэшхор, кӀочӀэ шхор егъашӀэм тиТхьэ иех. Амин!» 13 ЕтӀанэ тхьамэтэ нахьыжъхэм ащыщэу зыгорэ къысэупчӀыгъ: Мы шъошэ фыжь кӀыхьэхэр зыщыгъхэр, хэт щыщха ыкӀи тыда къыздикӀыгъэхэр? 14 Тхьаматэ, ахэр о ошӀэх, сӀуи есӀожьыгъ. Мыхэр ары гузэжъогъушхом къыхэкӀыгъэхэр, къысиӀуагъ ащ. ПӀъынэм ылъыкӀэ яшъошэ кӀыхьэхэр агъэкъэбзэжьхи, фыжьыбзэу ашӀыжьыгъэх. 15 Ащ пае ахэр Тхьэм итӀысыпӀэ лъапӀэ ыпашъхьэ щытых, чэщи мафи Тхьэм иунэнгхо чӀэтхэу, Тхьэр агъэлъапӀэ. ТӀысыпӀэ лъапӀэм тесыри адэпсэущт. 16 ЕгъашӀэм мэлакӀэ лӀэжьыщтхэп, псыфалӀи лӀэжьыщтхэп. Тыгъэри фэбэгъэшхори ахэмэ къягоожьыщтхэп. 17 Сыда пӀомэ тӀысыпӀэ лъапӀэм ыгузэгу тес ПӀъынэр ахэмэ мэлахъо афэхъущт, щыӀэныгъэ къэзытырэ псынэхэм адэжьи ахэр ыщэщтых. Тхьэм ахэмэ анэхэм нэпс пстэури акӀилъэкӀыкӀыжьыщт.
Яблэнэрэ мыхъурымрэ дышъэм хэшӀыкӀыгъэ уц гъэстылъэмрэ
1 Шъынэм яблэнэрэ мыхъурыр зытырехым, сыхьатныкъо фэдизкӀэ уашъом кӀымсым щыхъугъ. 2 ЕтӀанэ Тхьэм ыпашъхьэ ит мэлэӀичиблыр слъэгъугъэх. МэлэӀич горэм бжъэмыешхуибл ахэмэ аритыгъэх. 3 НэмыкӀ мэлэӀич горэм мэ ӀэшӀу зыпихырэ уцхэм апае дышъэм хэшӀыкӀыгъэ уц гъэстылъэ ыӀыгъэу къакӀуи, къурмэншӀыпӀэм ыпашъхьэ къиуцуагъ. НэмыкӀ мэлэӀич горэм мэ ӀэшӀу зыпихырэ уцыбэ а мэлэӀичым къыритыгъ, Тхьэм ицӀыф лъапӀэхэм ятхьэлъэӀухэу тӀысыпӀэ лъапӀэм ыпашъхьэ щыт къурмэншӀыпӀэм телъхэм ахи гъэхъоным пае. 4 Мэ ӀэшӀу зыпихырэ уцхэм яӀугъо Тхьэм ицӀыф лъапӀэхэм ятхьэлъэӀухэм ягъусэу мэлэӀичым ыӀэ къикӀи, Тхьэм ыдэжь дэкӀоягъ. 5 Ащ нэужым мэлэӀичым уц гъэстылъэр къышти, къурмэншӀыпӀэм имашӀо щыщ из ышӀи, чӀылъэм къыридзыхыгъ. Джащыгъум шыблэ гъогъо мэкъэшхохэр къэӀугъэх, пчыкӀэхэри къэлъэгъуагъэх, чӀылъэри къэсысыгъ.
Бжъэмыешхохэр
6 ЕтӀанэ бжъэмыиешхуибл зыӀыгъырэ мэлэӀичиблым ахэмэ къяпщэнхэу загъэхьазырыгъ. 7 Апэрэ мэлэӀичыр ибжъэмыешхо къепщагъ. Джащыгъум ошъу, машӀо, лъы зэхэкӀухьагъэхэу чӀылъэм къехыгъэх. ЧӀылъэм ызыщанэ хэстыкӀыгъ, чъыгмэ азыщани хэстыкӀыгъэх, уц шхъонтӀэ пстэури стыгъэ. 8 ЯтӀонэрэ мэлэӀичыри ибжъэмыешхо къепщагъ. Ащ дэжьым машӀор зэкӀэнэгъэ къушъхьэшхом фэдэу, зыгорэ хым хэфагъ. Хым ызыщани лъым фэдэу хъугъэ. 9 Хым хэс псэушъхьэхэм азыщани лӀагъэх, къухьэхэм азыщани кӀодыгъэх. 10 ЕтӀанэ ящэнэрэ мэлэӀичыри ибжъэмыешхо къепщагъ. Джащыгъум мэшӀо пхъэцӀакӀэм фэдэу жъогъошхо горэ стэу уашъом къехи, псыхъохэмрэ псынэхэмрэ ащанэ къыхэфагъ. 11 Жъогъошхом ыцӀэ Уц Дыдж. Псыхэм азыщанэ дыджэу хъугъэх, а псы дыджым ешъуагъэхэу цӀыфыбэхэри лӀагъэх. 12 ЕтӀанэ яплӀэнэрэ мэлэӀичыри ибжъэмыешхо къепщагъ. Джащыгъум тыгъэм ызыщани, мазэм ызыщани, жъуагъохэм азыщани кӀосагъэ. Арэущтэу ахэмэ янэфынэ ызыщанэ шӀункӀы хъугъэ. Мафэм ызыщани, чэщым ызыщани нэфынагъэхэп. 13 ЕтӀанэ сызэплъэм, ошъогум щыбыбырэ мэлэӀич мэкъэшхокӀэ къаджэу зэхэсхыгъ: «Къэнагъэ мэлэӀичищым ябжъэмыешхохэм къызяпщэхэкӀэ, чӀылъэм тетхэр сыхьатмыгъо ежьэщтых, сыхьатмыгъо ежьэщтых, сыхьатмыгъо ежьэщтых!»
1 ЕтӀанэ ятфэнэрэ мэлэӀичыр ибжъэмыешхо къепщагъ. Джащыгъум уашъом къикӀэу, чӀылъэм къехыгъэгъэ жъуагъор слъэгъугъэ. ЕтӀанэ чӀылъэм икуупӀэу чӀэ зимыӀэм ичӀэхьапӀэ иӀункӀыбзэ мэлэӀич горэм а жъуагъом ритыгъ. 2 Жъуагъом чӀылъэм икуупӀэу чӀэ зимыӀэм ичӀэхьапӀэ Ӏуихыгъ. ЗыӀуехым, хьакушхом иӀугъо фэдэ Ӏугъо къычӀэугъ. А чӀэхьапӀэм къычӀэугъэ Ӏугъом тыгъэри уашъори ыгъэушӀункӀыгъэх. 3 ЕтӀанэ мацӀэхэр Ӏугъом къыхэкӀыхи, чӀым къытехьагъэх. ЧӀым искорпионхэм акӀуачӀэ фэдэ кӀуачӀэ яӀэнэу мэлэӀич горэм а мацӀэхэм аритыгъ. 4 ЧӀым иуцхэм, ичъыгхэм, чӀым икъэкӀыгъэхэм яягъэ арамыгъэкӀынэу Тхьэм ариӀуагъ. Тхьэм имыхъур зынатӀэ темыдзэгъэ цӀыф закъохэр ары яягъэ зэрагъэкӀын фэягъэр. 5 МацӀэхэм а цӀыфхэр агъэлӀэнхэу фитхэу щытыгъэхэп, мэзитфыкӀэ къин арагъэщэчынэу фитхэу щытыгъэ ныӀэп. А къинэу арагъэщэчыгъэр скорпионыр цӀыфым зеокӀэ, къинэу ригъэщэчрэм фэд. 6 А мафэхэм цӀыфхэр лӀэныгъэм лъыхъущтых, ау агъотыщтэп. ЛӀэнхэуи фэещтых, ау лӀэныгъэр аӀэпыкӀыщт. 7 МацӀэхэм ятеплъэ цӀыфхэм заом фагъэхьазырыгъэ шыхэм ятеплъэ фэдагъ. Дышъэм хэшӀыкӀыгъэ танджхэм афэдэхэр ашъхьэхэм ателъыгъэх, анэгухэри цӀыфхэм анэгухэм афэдагъэх. 8 Ашъхьацхэр бзылъфыгъэ шъхьацхэм афэдагъэх, ацэхэри аслъаным ыцэхэм афэдагъэх. 9 Яашъоджанэхэр гъучӀым хэшӀыкӀыгъэ ашъоджанэхэм афэдагъэх. Атамэхэм макъэу апыӀукӀыщтыгъэр заом ежьэхэу шыкубэхэмрэ шыбэхэмрэ апыӀукӀырэ мэкъэшхом фэдагъ. 10 Скорпионхэми кӀэхэр зэряӀэм фэдэу, кӀэхэри яӀагъэх. КӀэхэми щэхэр апытыгъэх. А мацӀэхэм лъэкӀыныгъэ яӀагъ мэзитфыкӀэ цӀыфмэ къин арагъэщэчынэу. 11 Ахэмэ пачъыхьэу яӀагъэр чӀылъэм икуупӀэу чӀэ зимыӀэм имэлэӀич ары. Ащ ыцӀэ джуртыбзэкӀэ Аваддон, урымыбзэкГи Аполлион ары. 12 Арэущтэу апэрэ сыхьатмыгъор блэкӀыгъ. Джыри сыхьэтмыгъуитӀу къэкӀощт. 13 ЕтӀанэ яхэнэрэ мэлэӀичыр ибжъэмыешхо къепщагъ. Джащыгъум Тхьэм ыпашъхьэ щыт къурмэншӀыпӀэу дышъэм хэшӀыкӀыгъэм икъопӀиплӀымэ къарыкӀэу макъэ горэ зэхэсхыгъэ. 14 А макъэм бжъэмыешхор зыӀыгъырэ яхэнэрэ мэлэӀичым риӀуагъ: «Евфрат псыхъошхом дэжь щырапхыгъэ мэлэӀичиплӀыр шъхьафит шӀыжьхи, тӀупщыжьых». 15 Мы сыхьат дэдэм, мы мафэ дэдэм, мы мазэ дэдэм, мы илъэс дэдэм цӀыф пстэуми азыщанэ агъэлӀэнэу Тхьэм афигъэхьазырыгъэгъэ мэлэӀичиплӀыр атӀупщыжьыгъэх. 16 А шыудзэм хэтыгъэхэм япчъагъэ миллион шъитӀу хъущтыгъэх. Япчъагъэ зыфэдизыр зэхэсхыгъэ. 17 Шыхэри шыухэри мырэущтэу къысфэлъэгъуагъэх: ашъоджанэхэр машӀом фэдэу плъыжьхэу, шхъуантӀэхэу ыкӀи гъожьхэу ащыгъыгъэх. Яшыхэм ашъхьэхэр аслъанышъхьэхэм афэдагъэх. ПӀыхэм ажэхэми машӀо, Ӏугъо, тхъомзашхъо къадэкӀыгъэх. 18 МашӀоу, Ӏугъоу, тхъомзашхъоу, а къинышхуищэу а шыхэм ажэхэм къадэкӀыгъэхэмкӀэ цӀыф пстэуми азыщанэ лӀагъэ. 19 ПӀыхэм акӀуачӀэ ажэхэм адэлъыгъ, акӀэхэми ахэлъыгъ; сыда пӀомэ акӀэхэр блэхэм афэдагъэх; акӀэхэм шъхьэхэр апытхэу, ахэмкӀэ яягъэ цӀыфхэм арагъэкӀыгъ. 20 Ау къэнэгъэ цӀыфхэу а къинышхохэм ахэмылӀыхьагъэхэм аӀэкӀэ ашӀыгъэ тхьэ нэпцӀ шъо теплъэхэм акӀыб афагъэзэжьынэу адагъэп. ДжынапцӀэхэр агъэлъэпӀэнхэм ауж икӀыжьыгъэхэп, дышъэм, тыжьыным, гъуаплъэм, мыжъом, пхъэм ахэшӀыкӀыгъэ тхьэ нэпцӀхэу зылъэгъун, зэхэзыхын ыкӀи къэзыкӀухьан зымылъэкӀхэрэр агъэлъэпӀэнхэми ыуж икӀыжьыгъэхэп. 21 Джащ фэдэу, Ӏофхэу зыпылъхэу цӀыф укӀыным, ушхъухьаным, зинэ шӀэным, тыгъоным афыкӀэгъожьыгъэхэп.
МэлэӀичымрэ зэгохыгъэ тхылъ цӀыкӀумрэ
1 ЕтӀанэ лъэкӀыныгъэ зиӀэу, нэмыкӀ мэлэӀич горэ уашъом къехэу слъэгъугъэ; ошъуапщэ горэ шъуашэу щыгъыгъ; лэгъупкъопсыри шъхьэщытыгъ, ынэгуи тыгъэм фэдагъ, ылъакъохэри мэшӀо пкъэухэм афэдагъэх. 2 Тхылъ цӀыкӀу горэ зэгохыгъэу ыӀэкӀэ ыӀыгъыгъ. Лъэкъо джабгъур хым хигъэуцуагъ, лъэкъо сэмэгури чӀым тыригъэуцуагъ. 3 Аслъанхэр зэрэгъогхэрэм фэдэу, мэкъэшхокӀэ къэкууагъ. Ар къызэкуом, ошъо шыблэ гъогъуиблымэ амакъэхэр къэӀугъэх. 4 Ошъо шыблэ гъогъуиблымэ амакъэхэр къызэӀухэ ужым, стхынэу сыублэ пэтыгъ, ау уашъом къикӀэу макъэ горэм къыӀоу зэхэсхыгъ: Шыблэ гъогъуиблымэ къаГуагъэхэр умытхыхэу ушъэфых. 5 ЕтӀанэ мэлэӀичэу зылъэкъо лъэныкъор хым хэзыгъэуцуагъэу, адрэ лъэкъо лъэныкъори чӀым тезыгъэуцуагъэу слъэгъугъагъэм ыӀэ джабгъу уашъом къыдиӀэтэягъ. 6 Тхьэу егъашӀэм щыӀэу, уашъохэмрэ уашъохэм ащыӀэ пстэумрэ, чӀымрэ чӀым тет пстэумрэ, хымрэ хым хэс пстэумрэ къэзыгъэхъугъэм ыцӀэкӀэ а мэлэӀичым тхьарыӀо ышӀи, мырэущтэу ыӀуагъ: Уахътэу бэп къэнэжьыгъэр. 7 Ау яблэнэрэ мэлэӀичыр ибжъэмыешхо къызепщэщт мафэхэм Тхьэм ежьым фэлажьэрэ пегъымбархэм къызэраригъэӀугъэм фэдэу, игухэлъ шъэф ыгъэцэкӀэщт. 8 Уашъом къикӀэу зэхэсхыгъэгъэ макъэр джыри зэ къэгущыӀэу къысиӀуагъ: КӀуи, мэлэӀичэу зылъэкъо лъэныкъо хым хэзыгъэуцуагъэу, адрэ лъэкъо лъэныкъори чӀым тезыгъэуцуагъэм ыӀыгъырэ тхылъ цӀыкӀоу зэгохыгъэр къыӀых. 9 Арэущтэу мэлэӀичым ыдэжь сыкӀуи есӀуагъ: А тхылъ цӀыкӀур къысэт. Ма, къыосэты, пгхы, къысиӀуагъ ащ. УныбэкӀэ дыджыщт, ау ужэкӀэ шъоум фэдэу ӀэшӀоу хъущт. 10 Тхылъ цӀыкӀур мэлэӀичым къыӀысхи, сшхыгъэ. СыжэкӀэ шъоум фэдэу ӀашӀоу щытыгъ, ау зэсэшхым, сыныбэ дыджы щыхъугъ. 11 ЕтӀанэ мырэущтэу къысиӀуагъ: Хэгъэгу Ӏаджыхэми, лъэпкъ Ӏаджыхэми, бзэ Ӏаджыхэми, пачъыхьэ Ӏаджыхэми яхьылӀагъэу Тхьэм ежь игущыӀэхэу угу къырилъхьагъэхэу, къэхъущт Ӏофхэм яхьылӀагъэхэр цӀыфхэм ябгъэӀунхэ фае.
ШыхьатитӀур
1 ЕтӀанэ мэлэӀич горэм шапхъэм фэдэу къамыл бэщ къыситыгъ. «КӀуи, Тхьэм иунэшхорэ къурмэншӀыпӀэмрэ къэши, ащ дэжьым Тхьэр щызыгъэлъапӀэхэрэр зыфэдизыр къызэгъашӀ», къысиӀуагъ. 2 «Ау Тхьэм иунэшхо ыкӀыб щыт щагур къэпшынэу упымылъ, сыда пӀомэ Тхьэм а щагур хымэ лъэпкъхэм къафигъэнагъ. Ахэмэ мэзэ тӀокӀитӀурэ тӀурэм къэлэ лъапӀэр лъэгукӀэ аутэщт. 3 Сэ сишыхьатитӀу лъэкӀыныгъэ ястыщт, ахэми шъыгъо щыгъынхэр ащыгъхэу, мэфэ минрэ шъитӀурэ тӀокӀищырэ Тхьэм ежь игущыӀэхэу агухэм къарилъхьэхэу, къэхъущт Ӏофхэм яхьылӀагъэхэр агъэӀущтых». 4 Мы шыхьатитӀур чӀылъэм и Зиусхьан ыпашъхьэ ит зейтун чъыгитӀумрэ остыгъэ тетыпӀитӀумрэ ары. 5 Зыгорэм иягъэ а шыхьатитӀум аригъэкӀынэу фаемэ, ахэмэ ажэ машӀо къыдэкӀызэ, япыйхэр егъэкӀодых. Ахэмэ зиягъэ языгъэкӀынэу фаер джары зэрэлӀэн фаер. 6 А шыхьатитӀум уашъор агъэпытэжьынэу тетыгъо яӀ, Тхьэм ахэмэ агухэм къарилъхьэрэ гущыӀэхэр къызыщагъэӀурэ мафэхэм къыщемыщхынэу. Псыр лъы агъэхъунэу псыхэми тетыгъо афыряӀ, чӀылъэм сыд щыщырэ къиныр рагъэщэчынэуи сыдигъо фаехэми тетыгъо яӀ. 7 Ахэмэ яшыхьатныгъэ заухыкӀэ, чӀылъэм икуупӀэу чӀэ зимыӀэм къычӀэкӀырэ хьакӀэкъокӀэжъыр ахэмэ къа тебэнэнышъ, къатекӀонышъ, къыукӀыщтых. 8 Ахэмэ яхьадэхэр къэлэшхоу цӀыфхэм ти Зиусхьан къащым зыщытыраӀулӀагъэм иурам телъыщтых. А къэлэшхом Содом е Мысыр раӀо, нэмыкӀ мэхьанэ къырагъэкӀызэ. 9 Хэгъэгу пстэуми, унэгъо лъэпкъ пстэуми, бзэ пстэуми, лъэпкъ пстэуми ащыщхэу цӀыфыбэ мэфищырэ ныкъорэм а хьадэхэм яплъыщтых, ау чӀалъхьажьынхэу адэщтэп. 10 Дунаем тетхэр итӀур зэрэлӀагъэхэм пае, гушӀощтых ыкӀи тхъэжьыщтых. Тынхэр зэфарагъэхьыщтых, сыда пӀомэ а пегъымбэритӀумэ дунаем тет цӀыфхэм къин арагъэщэчыщтыгъэх. 11 Ау мэфищырэ ныкъорэм ыужым Тхьэм ахэмэ щыӀэныгъэм ыпсэ къахилъхьажьи, тӀури алъакъохэм къатеуцожьыгъэх. Ахэр зылъэгъугъэ пстэури щынэгъошхом хэфагъэх. 12 ЕтӀанэ а пегъымбэритӀум уашъом къиӀукӀырэ макъэ горэм къариӀоу зэхахыгъ: «Мо шъукъыдэкӀуай», ыӀоу. Япыйхэр яплъызэ, ошъуапщэм хэтхэу, ахэр уашъом дэкӀоягъэх. 13 А сыхьат дэдэм чӀылъэр лъэшэу къэсысыгъ, къалэм ызыпшӀани зэхэтэкъуагъ. Арэущтэу чӀылъэр зэсысым, цӀыф минибл лӀагъэх. МыкӀодхэу къэнэжьыгъэхэри щынэгъошхом хэфагъэх, уашъом щыӀэ Тхьэм щытхъушхуи фашӀыгъ. 14 Арэущтэу ятӀонэрэ сыхьатмыгъор блэкӀыгъ. Ящэнэрэ сыхьатмыгъори къэкӀонкӀэ бэп иӀэжьыр.
Яблэнэрэ бжъэмыешхор
15 ЕтӀанэ яблэнэрэ мэлэӀичыр ибжъэмыешхо къепщагъ. Джащыгъум мэкъэшхохэр уашъом къиӀукӀыхэзэ къаӀуагъ: «Ти Зиусхьанрэ ежьым и Христосрэ мы дунаем тетыгъошхо фыряӀэ хъугъэ. Тхьэр ары егъашӀэм тетыгъошхор зиӀэщтыр». 16 Тхьэмэтэ нахьыжъхэу нэбгырэ тӀокӀырэ плӀырэу Тхьэм ыпашъхьэ ятӀысыпӀэхэм атесхэм абгъэгукӀэ зырадзыхи, Тхьэр агъэлъапӀэзэ, мырэущтэу аӀуагъ: 17 «О лъэкӀыныгъэшхо зэкӀэ зиӀэ Зиусхьан Тхьэу, щыӀагъэу, джыри щыӀэм щытхъушхо пфэтэшӀы, сыда пӀомэ уилъэкӀыныгъэшхо къэпштагъэу, тетыгъошхо зэрэуиӀэр къэбгъэнэфагъ. 18 Хымэ лъэпкъхэр губжыгъэх; о уигубжи къэлъэгъуагъ. Джы лӀагъэхэм хьыкум затепшӀыхьащт уахътэр къэсыгъ. О къыпфэлажьэрэ пегъымбархэми, уицӀыф лъапӀэхэми, уищынагъо зыгу илъ цӀыфхэм, цӀыкӀуми инми, яфэшъошэ ӀэхьышӀур зябгъэгъотыщт уахътэри къэсыгъ. ЧӀылъэр зыгъэкӀодырэ цӀыфхэр о зыбгъэкӀодыщт уахътэри къэсыгъ». 19 Ащ нэужым Тхьэм иунэшхоу уашъом щыӀэр зэӀухыгъэ хъугъэ, Тхьэм ежьыррэ цӀыфхэмрэ азыфагу дилъхьэгъэ зэзэгъыныгъэр къэзыушыхьатырэ пхъуантэри къэлъэгъуагъ. ЕтӀанэ пчыкӀэхэр къэлъэгъуагъэх, мэкъэшхохэри, шыблэм игъогъо мэкъэшхохэри къэӀугъэх, чӀылъэри къэсысыгъ, ошъушхохэри къехыгъэх.
Бзылъфыгъэмрэ блэгъожъымрэ
1 ЕтӀанэ уашъом нэшэнэ гъэшӀэгъонышхо горэ къыщылъэгъуагъ: бзылъфыгъэ горэу тыгъэр шъуашэу зыщыгъэу, зылъакъохэр мазэм тетхэу, зышъхьэ телъ танджым жъогъо пшӀыкӀутӀур тетэу къэлъэгъуагъ. 2 Бзылъфыгъэр лъэрмыхьэу щытыгъ ыкӀи сабый къыфэхъу зэхъум, къинышхо хэфагъэти, куощтыгъ. 3 ЕтӀанэ нэмыкӀ нэшэнэ гъэшӀэгъон горэ уашъом къыщылъэгъуагъ: блэгъожъ ин плъыжьэу, шъхьибл зыпытэу, бжъэкъуипшӀыри зыте тыр къэлъэгъуагъ. Шъхьэ пэпчъ зы тандж телъыгъ. 4 ЫкӀэкӀэ жъуагъохэм азыщанэ уашъом къыщырилъэшъуажьи, чӀылъэм къыридзыхыгъэх. Блэгъожъыри бзылъфыгъэу сабый къызфэхъущтым ыпашъхьэ къиуцуагъ, сабыир къызэрэхъоу ыдырыным пае. 5 Зы кӀэлэхъу къыфэхъугъ. Ащ дунаем тет лъэпкъ пстэури гъучӀ бэщкӀэ ыгъэӀорышӀэнэу щытыгъ. А сабыир Тхьэмрэ Тхьэм итӀысыпӀэ лъапӀэрэ адэжь даӀэтэягъ. 6 Бзылъфыгъэм кӀитхъужьи, шъоф нэкӀым Тхьэм ащ щыфигъэхьазырыгъэ чӀыпӀэм кӀуагъэ. Ащ мэфэ минрэ шъитӀурэ тӀокӀищырэ щагъэшхэщт. 7 Уашъом зао щыхъугъ. Михаилрэ ащ имэлэӀичхэмрэ блъэгъожъым езэуагъэх, блэгъожъыри ащ имэлэӀичхэри ахэмэ къязэожьыгъэх. 8 Блэгъожъыр Михаил пырикъугъэп, уашъомкӀи блэгъожъымрэ имэлэӀичхэмрэ чӀыпӀэ къафэнэжьыгъэп. 9 Блэгъожъ иныр чӀылъэм къырадзыхыгъ иблысэу ыкӀи шэйтанэу зыфаӀорэ блэжъэу дунаем тет цӀыф пстэури дэзыхьыхырэр ары. Ари ащ имэлэӀичхэри чӀылъэм къырадзыхыгъэх. 10 ЕтӀанэ уашъом мэкъэшхо горэ къиӀукӀи, мырэущтэу къыӀоу зэхэсхыгъ: «Джы тымыкӀодэу ти Тхьэ тыкъигъэнэжьыгъ. Джы ти Тхьэ илъэкӀыныгъэшхорэ итетыгъошхорэ къэлъэгъуагъэх, Тхьэм и Христос ыкӀочӀэшхуи къэлъэгъуагъ. Сыда пӀомэ тшыхэр зыгъэмысэу, Тхьэм ыпашъхьэ чэщи мафи ахэр щызыгъэмысэрэр чӀылъэм къырадзыхыгъ. 11 Тшыхэр Шъынэм лъэу кӀэкӀыгъэмкӀи, Тхьэм игущыӀэхэм шыхьат зэрафэхъугъэхэмкӀи, шэйтаным текӀуагъэх. Ахэр лӀэныгъэм игъунэгъу хъугъэхэми, ежьхэм апсэхэм ашъхьасыгъэхэп. 12 Арышъ, шъо, уашъохэри, шъо, уашъохэм ащыпсэухэрэри, шъугушӀу! Ау шъо, чӀыри хыри, сыхьатмыгъо шъуежьагъэх, сыда пӀомэ иблысыр къышъуфехыгъ. Губжыныгъэшхо ыгу илъ, сыда пӀомэ ежь къыфэнэжьырэ уахътэр зэрэмакӀэр ешӀэшъ ары». 13 Блэгъожъым ежь чӀылъэм къызэрэрадзыхыгъэр зелъэгъум, кӀэлэхъур къызфэхъугъэ бзылъфыгъэм ыуж ихьагъ. 14 Бгъэшхом ытэмитӀу бзылъфыгъэм къыратыгъэх, блэжъым ыпашъхьэ икӀыжьынышъ, Тхьэм шъоф нэкӀым щыфигъэхьазырыгъэ чӀыпӀэм быбыным пае. Ащ илъэсищырэ ныкъорэм а бзылъфыгъэр щагъэшхэщт. 15 Ащ дэжьым бзылъфыгъэр псым ригъэхьыным пае, псыхъом фэдэу блэжъым ыжэ псыр къыдиутхыгъ. 16 Ау чӀыр бзылъфыгъэм дэӀэпыӀи, ыжэ зэӀуихи, блэгъожъым ыжэ къыдиутхыгъэ псыхъор ришъугъ. 17 Джащыгъум блэгъожъыр бзылъфыгъэм лъэшэу фэгубжи, бзылъфыгъэм къытехъукӀыгъэ нэмыкӀ бынхэу иӀэхэм язэонэу кӀуагъэ, Тхьэм иунашъохэр зыгъэцакӀэхэрэри Исус Христос шыхьат фэхъухэрэри ары.
ХьакӀэкъокӀэжъитӀур
1 ХыӀушъом сыӀутэу, хьакӀэкъокӀэжъ горэ хым къыхэкӀэу слъэгъугъэ. Шъхьибл пытыгъ, бжъэкъуипшӀи тетыгъ. Ыбжъакъохэми танджипшӀ ателъыгъ. Ышъхьэхэми Тхьэм зэрехъонхэрэ цӀэхэр ателъыгъэх. 2 ХьакӀэкъокӀэжъэу слъэгъугъэр хьашыумышэм фэдагъ, ау ылъакъохэр мышъэ лъакъохэм афэдагъэх, ыжи аслъаным ыжэ фэдагъ. Блэгъожъым ежь илъэкӀыныгъэ, итӀысыпӀэ, итетыгъонгхо хьакӀэкъокӀэжъым ритыгъэх. 3 ХьакӀэкъокӀэжъым ышъхьэхэм язым ежьыр зыгъэлӀэн уӀагъэм фэдэу иӀагъ, ау а уӀагъэр хъужьыгъагъэ. ЧӀылъэм тет цӀыф пстэуми а хьакӀэкъокӀэжъыр агъэшӀагъоу лъыкӀощтыгъэх. ЦӀыфхэм блэгъожъыр агъэлъэпӀагъ, ащ хьакӀэкъокӀэжъым тетыгъо зэрэритыгъэм пае. 4 ХьакӀэкъокӀэжъыри агъэлъапӀэзэ аГуагъ: «ХьакӀэкъокӀэжъым хэта фэдэр? Хэта езэон зылъэкӀыщтыр?» 5 ХьакӀэкъокӀэжъым гущыӀэ пагэхэр къыӀонхэуи, Тхьэм ехъонынэуи фит хъугъэ, мэзэ тӀокӀитӀурэ тӀурэ тетыгъо иӀэнэуи фит хъугъэ. 6 Тхьэми, Тхьэм ыцӀи, чӀыпӀэу Тхьэр зыдэщыӀэми, уашъом щыӀэ пстэуми яхъонынэу ыжэ зэӀуихыгъ. 7 Тхьэм ицӀыф лъапӀэхэми язэонэу ыкӀи атекӀонэу фит хъугъэ. Унэгъо лъэпкъ пстэуми, хэгъэгу пстэуми, бзэ пстэуми, лъэпкъ пстэуми тетыгъо афыриӀэнэу фит хъугъэ. 8 Тхьэм дунаер къызигъэхъугъэм щегъэжьагъэу цӀыфхэу зыцӀэхэр шӀобзыгъэ ПӀъынэм итхылъ итхэу, мыкӀодыжьын щыӀэныгъэ зыгъотыщт пстэуми анэмыкӀэу дунаем тет цӀыф пстэуми хьакӀэкъокӀэжъыр агъэлъэпӀэщт. 9 ТхьакӀумэ зиӀэм зэхерэх. 10 ЦӀыфхэр хьапсым чӀэзыдзэрэр хьапсыми чӀадзэщт. СэшхокӀэ зыукӀырэри сэшхокӀэ аукӀыжьыщт. Арышъ, Тхьэм ицӀыф лъапӀэхэмэ теубытэныгъэрэ шъыпкъагъэрэ ярэӀ. 11 ЕтӀанэ нэмыкӀ хьакӀэкъокӀэжъ горэ чӀы чӀэгъым къычӀэкӀэу слъэгъугъэ. НӀъынэм ыбжъакъохэм афэдэу бжъэкъуитӀу тетыгъ, ау блэгъожъым фэдэу къэгущыӀагъ. 12 Мы ятӀонэрэ хьакӀэкъокӀэжъым апэрэ хьакӀэкъокӀэжъым итетыгъо зэкӀэ иӀэу, ащ ыпашъхьэ Ӏоф щишӀагъ, чӀылъэми чӀылъэм тет цӀыфхэми зэкӀэ апэрэ хьакӀэкъокӀэжъэу зиуӀагъэ хъужьыгъагъэр аригъэгъэлъэпӀагъ. 13 ЯтӀонэрэ хьакӀэкъокӀэжъым нэшэнэ гъэшӀэгъонышхохэри къыгъэлъэгъуагъэх. ЦӀыфмэ апашъхьэ уашъом къикӀэу машӀо чӀылъэм къыщыригъэхыгъ. 14 Апэрэ хьакӀэкъокӀэжъым ыпашъхьэ нэшэнэ гъэшӀэгъонышхохэр къыгъэлъэгъонхэу ятӀонэрэ хьакӀэкъокӀэжъыр фит зэрэхъугъэм пае, дунаем тет цӀыфхэр дихьыхыгъэх. Апэрэ хьакӀэкъокӀэжъэу сэшхо уӀагъэ зытелъэу, ау щытми псэугъэр агъэлъэпӀэным пае, ятӀонэрэ хьакӀэкъокӀэжъым дунаем тет цӀыфхэм шъо теплъэ фаригъэшӀыгъ. 15 Апэрэ хьакӀэкъокӀэжъым ышъо теплъэ псэ хилъхьанэу ятӀонэрэ хьакӀэкъокӀэжъыр фит хъугъэ. Арэущтэу а шъо теплъэр къэгущыӀагъ, ежь зыгъэлъэпӀэнэу зымыдэхэрэри аукӀынхэу а шъо теплъэм унашъо ышӀыгъ. 16 ЯтӀонэрэ хьакӀэкъокӀэжъым цӀыф пстэуми, цӀыкӀуми инми, байми тхьамы кӀэми, шъхьафитми пщылӀми аӀэ джабгъухэм е анатӀэхэм тамыгъэ атраригъэдзагъ. 17 А тамыгъэр темыдзагъэмэ, зыми ыщэнэу ыкӀи къыщэфынэу фитыгъэп. А тамыгъэм хьакӀэкъокӀэжъым ыцӀэ е ыцӀэ ипчъагъэ итыгъ. 18 ЦӀыфмэ зэхэшӀыкӀыныгъэ ярэӀ. Ӏушыныгъэ зиӀэм хьакӀэкъокӀэжъым ипчъагъэ ерэлъыт, сыда пӀомэ зы цӀыфым ипчъагъэ джары. А пчъагъэр шъихырэ тӀокӀищырэ хырэ мэхъу.
Нэбгырэ минишъэрэ тӀокӀитӀурэ плӀырэм орэдэу къаӀорэр
1 ЕтӀанэ сызэплъэм, Сион Ӏуашъхьэм ПӀъынэр тетэу слъэгъугъэ. Шъынэм ыцӀэрэ ащ Ятэ ыцӀэрэ зынатӀэ тетхагъэхэу нэбгырэ минишъэрэ тӀокӀитӀурэ плӀырэ игъусагъэх. 2 ЕтӀанэ псышхо къиугъабэмэ амэкъэшхорэ шыблэ гъогъошхом ымэкъэшхорэ афэдэу макъэ горэ уашъом къиӀукӀэу зэхэсхыгъэ. Мэкъэшхоу зэхэсхыгъэр шыкӀэпщынэ еуакӀохэм яорэдмакъэ фэдагъ. 3 ТӀысыпӀэ лъапӀэм, псэушъхьиплӀым, тхьамэтэ нахьыжъхэм апашъхьэ орэдыкӀэ къыщаӀуагъ. Нэбгырэ минишъэрэ тӀокӀитӀурэ плӀырэм анэмыкӀэу а орэдыр зыми зэригъэшӀэн ылъэкӀыгъэп. Мы дунаем ицӀыфхэм ащыщхэу ахэр ары Шъынэм зышъхьэ къыщэфыжьыгъэхэр. 4 Мыхэр ары бзылъфыгъэхэмкӀэ зызымыгъэушӀоигъэхэр, сыда пӀомэ ахэр къэзымыщагъэдэмыкӀуагъэхэм афэдэх. Шъынэр тыдэ кӀоми, лъэкӀох. Мыхэр ары апэрэхэу, Шъынэм цӀыфхэм къахищыхи, зышъхьэхэр къыщэфыжьыгъэхэу, Тхьэмрэ ежьыррэ апае ыгъэнэфагъэхэр. 5 Ахэмэ ажэ пцӀы зыхэлъ гущыӀэ зи къыдэкӀыгъэп. Лажьэ зи яӀэп.
МэлэӀичищым къэбархэу къаӀохэрэр
6 Ащ нэужым нэмыкӀ мэлэӀич горэ ошъогум щыбыбэу слъэгъугъэ. Дунаем тет цӀыф пстэуми, лъэпкъ пстэуми, унэгъо лъэпкъ пстэуми, бзэ пстэуми, хэгъэгу пстэуми аригъэӀунэу Тхьэм икъэбарышӀоу мыкӀодыжьыщтыр а мэлэӀичым къыхьыгъ. 7 МэкъэшхокӀэ къыӀуагъ: Тхьэм шъущыщын, щытхъушхуи фэшъушӀ, сыда пӀомэ Тхьэм цӀыф пстэуми хьыкум затыришӀыхьащт сыхьатыр къэсыгъ. Уашъори, чӀыри, хыри, псыхэм япсынэхэри къэзыгъэхъугъэр жъугъэлъапӀэ. 8 А мэлэӀичым нэмыкӀ мэлэӀич кӀэлъыкӀуи къыӀуагъ: Къэлэшхор зэхакъутагъ. Къэлэшхоу Вавилон зэхакъутагъ. А къэлэшхом ихъопсэныгъэ Ӏаехэмрэ изинэрэ ясэнэпскӀэ лъэпкъ пстэури ыгъэутэшъуагъэх. 9 Ящэнэрэ мэлэӀич горэ а мэлэӀичитӀумэ акӀэлъыкӀуи, мэкъэшхокӀэ мырэущтэу къыӀуагъ: ЦӀыф горэм хьакӀэкъокӀэжъымрэ ащ ышъо теплъэмрэ ыгъэлъапӀэхэу, хьакӀэкъокӀэжъым итамыгъэ ынатӀэ, е ыӀэ тедзагъэу щытмэ, 10 ари Тхьэм игубж исэнэпс дыджы ешъощт. А сэнэпсэу псы зыхэмытыр Тхьэм игубж ишъуалъэ хьазырэу ит. МэлэӀич лъапӀэхэмрэ Шъынэмрэ апашъхьэ машӀомрэ тхъомзашхъомрэ ахэтэу а цӀыфым къинышхо ыщэчыщт. 11 Къинышхо языгъэщэчырэ машӀом иӀугъо егъашӀэм къыпихэу, уашъом дэкӀоещт. ЦӀыфхэу хьакӀэкъокӀэжъри ащ ышъо теплъи зыгъэлъапӀэхэрэм чэщи мафи гъэпсэфыгъо агъотыщтэп. Ащ фэдэу, хэти хьакӀэкъокӀэжъым ыцӀэ зэрыт тамыгъэ зытедзагъэм чэщи мафи гъэпсэфыгъо ыгъотыщтэп. 12 Арышъ, Тхьэм ицӀыф лъапӀэхэу ежьым иунашъохэр зыгъэцакӀэхэу, Исуси шъыпкъагъэ фызиӀэхэм теубытэныгъэ ярэӀ. 13 ЕтӀанэ макъэ горэм мырэущтэу къыӀоу уашъом къиӀукӀэу зэхэсхыгъ: Тхы: Джы щегъэжьагъэу Зиусхьаныр зыгу илъхэу лӀэхэрэр сыхьатмафэ ежьагъэх. Ар шъыпкъэ, еӀо Тхьэм Ыпсэ ЛъапӀэ. ЯӀоф аухыгъэу загъэпсэфыщт, сыда пӀомэ яшӀушӀагъэхэр агъотыжьыщтых.
Хыныгъор къэсыгъэу, мэлэӀичхэм лэжьыгъэр къызэрахырэр
14 ЕтӀанэ сызэплъэм, ошъопщэ фыжь слъэгъугъэ. Ошъуапщэм хэсэу «ЦӀыф Лъэпкъым ЬӀкъо» фэдэу, зыгорэ слъэгъугъэ. Ышъхьэ дышъэм хэшӀыкӀыгъэ тандж телъыгъ, ыӀэкӀи гъупчъэ чан горэ ыӀыгъыгъ. 15 ЕтӀанэ нэмыкӀ мэлэӀич горэ Тхьэм иунэшхо къычӀэкӀи, ошъуапщэм хэсым мэкъэшхокӀэ риӀуагъ: «Гъупчъэр штэри, хы, сыда пӀомэ чӀылъэм илэжьыгъэ къэхъугъ, хыныгъори къэсыгъ». 16 ЕтӀанэ ошъуапщэм хэсым игъупчъэкӀэ чӀылъэм щыхи, чӀылъэм илэжьыгъэ ыугъоижьыгъ. 17 НэмыкӀ мэлэӀич горэ Тхьэм иунэшхоу уашъом щыӀэм къычӀэкӀыгъ. Ащи гъупчъэ чан горэ ыӀэкӀэ ыӀыгъыгъ. 18 ЕтӀанэ нэмыкӀ мэлэӀичэу машӀом тетыгъо фызиӀагъэр къурмэншӀыпӀэм къыӀукӀи, гъупчъэ чанэр зыӀыгъырэм мэкъэшхокӀэ риӀуагъ: «ЧӀылъэм исэнэ къулэхэм апыт сэнашъхьэхэр къэхъугъэшъ, уигъупчъэ чан штэри, къыпыупкӀых». 19 ЕтӀанэ мэлэӀичым игъупчъэкӀэ чӀылъэм щыӀэ сэнашъхьэхэр къыпиупкӀыхи, Тхьэм игубж исэнэ фызэлъэшхо ритэкъуагъэх. 20 Къэлэшхом ыкӀыб щыӀэ сэнэ фызалъэм сэнашъхэхэр щафызыгъэх. ПӀыхэм яшхоӀумэ анэсэу, стадие минрэ шъихырэ икӀыхьагъэу сэнэ фызалъэм лъы къыдэкӀыгъ.
МэлэӀичхэм аужырэ къинышхохэр къызэрахьыхэрэр Ащ нэужым нэмыкӀ нэшанэ ин ыкӀи гъэшӀэгъон уашъом щыслъэгъугъ: мэлэӀичиблымэ аужырэ къинышхуиблыр къахьыхэу слъэгъугъэ. АхэмкӀэ Тхьэм игубж ухыгъэ мэхъу. 2 ЕтӀанэ зэхэкӀухьэгъэ машӀомрэ апчымрэ ахэшӀыкӀыгъэу, хым итеплъэ иӀэу зыгорэ слъэгъугъэ. ХьакӀэкъокӀэжъым, ащ ышъо теплъэм, ащ ыцӀэ ипчъагъэм атекӀогъэгъэ цӀыфхэр апчым хэшӀыкӀыгъэ хым Ӏутыгъэх. Тхьэм аритыгъэ шыкӀэпщынэхэр аӀыгъхэу ежъыухэзэ, Зпегъымбар Мусэу Тхьэм фэлажьэрэмрэ Шъынэмрэ яорэд къаӀощтыгъ. «О лъэкӀыныгъэшхор зэкӀэ зиӀэ Зиусхьанэу Тхьэр, Ӏофхэу бгъэцакӀэхэрэр Ӏофышхох ыкӀи Ӏоф гъэшӀэгъоных. Уигъогухэри гъогу зафэх ыкӀи гъогу шъыпкъэх, о цӀыф лъапӀэхэм уряпачъыхь. 40 Зиусхьан, къыпщымыщынэрэ цӀыфи, щытхъушхо къыпфэзымышӀырэ цӀыфи зи щыӀэп. Сыда пӀомэ лъэпӀэ закъоу щыӀэр оры. ШъыпкъагъэкӀэ хьыкум зэрэпшӀырэр нафэ зэрэ хъугъэм пае, лъэпкъ пстэури уапашъхьэ ихьанхэшъ, уагъэлъэпӀэщт». 5 ЕтӀанэ сызэплъэм, Тхьэм иунэшхоу шыхьатныгъэм ичэтэнгъэӀагъэ Ӏухыгъэу уашъом щыслъэгъугъ. 6 МэлэӀичхэу къинышхуиблыр къэзыхьыхэрэр Тхьэм иунэшхо къычӀэкӀыгъэх. Щыгъын фыжьыбзэхэр лыдхэу ащыгъыгъэх, дышъэм хэшӀыкӀыгъэ бгъэрылъхэри абгъэхэм арылъыгъэх. 7 ЕтӀанэ Ӏэгубжъиблэу дышъэм хэшӀыкӀыгъэхэу, Тхьэу егъашӀэм щыӀэщтым игубж зэрытхэр псэушъхьиплӀымэ язырэм мэлэӀичиблымэ аритыгъэх. 8 Тхьэм ищытхъушхорэ илъэкӀыныгъэшхорэ яӀугъо Тхьэм иунэшхо чӀизы хъугъэ. МэлэӀичиблымэ къахьырэ къинышхуиблыр еухыфэ, цӀыф Тхьэм иунэшхо чӀэхьан ылъэкӀыгъэп.
Ӏэгубжъэхэу Тхьэм игубж зэрытхэр
1 ЕтӀанэ мэкъэшхо горэ Тхьэм иунэшхо къычӀэӀукӀэу мэлэӀичиблым къариӀоу зэхэсхыгъ: «ШъукӀуи, Тхьэм игубжэу Ӏэгубжъиблым арытыр чӀылъэм тешъукӀ». 2 Апэрэ мэлэӀичыр кӀуи, иӀэгубжъэ итыр чӀылъэм тырикӀагъ. Джащыгъум хьакӀэкъокӀэжъым итамыгъэ зынатӀэ тедзэгъэ цӀыфхэу ащ ышъо теплъэ зыгъэлъапӀэхэрэм гущыкӀыгъохэу щын зыхэлъ уӀагъэхэр ателъ хъугъэ. 3 ЯтӀонэрэ мэлэӀичыми иӀэгубжъэ итыр хым хикӀагъ. Ащ дэжьым хыр цӀыф лӀагъэм ылъ фэдэу хъуи, хым хэсхэу, псэ пыт пстэури лӀагъэ. 4 Ящэнэрэ мэлэӀичыми иӀэгубжъэ итыр псыхъохэмрэ псынэхэмрэ ахикӀагъ. Ахэри лъы хъугъэх. 5 ЕтӀанэ псыхэм тетыгъо афызиӀэ мэлэӀичым мырэущтэу къыӀоу зэхэсхыгъ: «О Зиусхьанэу щыӀагъэу ыкӀи щыӀэр, о узаф ыкӀи улъапӀ арэущтэу хьыкумхэр зэрэпшӀыгъэхэм пае, 6 сыда пӀомэ цӀыф бзаджэхэм уицӀыф лъапӀэхэмрэ уипегъымбархэмрэ алъ зэрагъэчъагъэм пае, лъы ебгъэшъуагъэх. Ар ахэмэ яфэшъуаш». 7 ЕтӀанэ къурмэншӀыпӀэм къиӀукӀэу макъэ горэм къыӀоу зэхэсхыгъэ: «Ары, о, лъэкыныгъэшхор зэкӀэ зиӀэ Зиусхьанэу Тхьэр, цӀыфхэм хьыкум зэратепшӀыхьэрэр шъыпкъэ ыкӀи зафэ». 8 ЯплӀэнэрэ мэлэӀичыми иӀэгубжъэ итыр тыгъэм тырикӀагъ. Тыгъэми машӀокӀэ цӀыфхэр ыгъэстынхэу фит хъугъэ. 9 Арэущтэу зэхъум, тыгъэм цӀыфхэр фэбэгъэшхокӀэ ыгъэстыгъэх. Ахэр мы къинышхомэ тетыгъо афызиӀэ Тхьэм ыцӀэ ехъоныгъэх, япсэкӀодшӀагъэхэм афыкӀэмыгъожьыгъэхэу, Тхьэм щытхъу фашӀынэуи адагъэп. 10 ЕтӀанэ ятфэнэрэ мэлэӀичым иӀэгубжъэ итыр хьакӀэкъокӀэжъым итӀысыпӀэ тырикӀагъ. Джащыгъум хьакӀэкъокӀэжъым итетыгъо ыӀэчӀэгъ чӀэт цӀыфхэм шӀункӀыгъэ къатехьагъ. Узышхо зэряӀэм пае, цӀыфхэр абзэгухэм яцэкъэжьыщтыгъэх. 11 Къинэу ащэчыгъэхэмрэ уӀагъэхэу ателъыгъэхэмрэ апае уашъом щыӀэ Тхьэм ехъоныгъэх, яӀофхэми афыкӀэгъожьыгъэхэп. 12 ЕтӀанэ яхэнэрэ мэлэӀичым иӀэгубжъэ итыр Евфрат псыхъошхом хикӀагъ. Джащыгъум тыгъэ къыкъокӀыпӀэмкӀэ къикӀырэ пачъыхьэхэм гъогу аритынэу псыхъошхор гъугъэ. 13 Ащ нэужым блэгъожъым ыжэ, хьакӀэкъокӀэжъым ыжэ, пегъымбар нэпцӀым ыжэ хьантӀаркъохэм афэдэхэу джынэпцӀищ Ӏае къажэдэкӀэу слъэгъугъэ. 14 Мыхэр нэшэнэ гъэшӀэгъонышхохэр къэзыгъэлъагъорэ джынапцӀэх. ЛъэкӀыныгъэшхор зэкӀэ зиӀэ Тхьэм имэфэшхо зэонхэу, тыдэкӀи дунаем ипачъыхьэхэм адэжь кӀохэзэ, аугъоих. 15 (Исус еӀо:) «Мары, амышӀахэу тыгъуакӀом фэдэу сыкъэкӀощт. ЦӀыфхэм алъэгъоу, пцӀанэу ыкӀи укӀытэжьэу къымыкӀухьаным пае, мычъыеу ыкӀи сакъэу зищыгъынхэр зыухъумэрэр сыхьатмафэ ежьагъ». 16 ЕтӀанэ джуртыбзэкӀэ Армагеддон зыцӀэ чӀыпӀэм а джынапцӀэхэм пачъыхьэхэр щаугъоигъэх. 17 ЕтӀанэ яблэнэрэ мэлэӀичым иӀэгубжъэ итыр жьыбгъэм хикӀагъ. Джащыгъум Тхьэм иунэшхо чӀэт тӀысыпӀэ лъапӀэм мэкъэшхо горэ къиӀукӀи къыӀуагъ: «Ӏофыр ухыгъэ». 18 ЕтӀанэ пчыкӀэхэр къэлъэгъуагъэх, шыблэ гъогъо мэкъэшхохэри къэӀугъэх, чӀылъэри лъэшэу къэсысыгъ. ЦӀыфхэр дунаем къызытехьагъэхэм щегъэжьагъэу чӀылъэр ащ фэдэу егъашӀэми сысыгъэп. 19 Арэущтэу къэлэшхор щэу зэхэкӀыгъ, хымэ лъэпкъхэм якъалэхэри зэхэкъутагъэх. Тхьэм къэлэшхоу Вавилон ицӀыфхэр ыгу римыгъэкӀыжьхэу ежь ишъуалъэ ит сэнэпсым ригъэшъуагъэх, Тхьэм игубжышхо исэнэпс дыдж ары зэригъэшъуагъэхэр. 20 Хыгъэхъунэ пстэури кӀодыгъэх, Ӏуашъхьэхэри агъотыжьыгъэхэп. 21 Ошъу цэпгхохэр уашъом къехыхи, цӀыфмэ къатефагъэх. Зы ошъу цэр килэ шъэныкъо фэдиз ионтэгъугъэу щытыгъ. Ошъухэм цӀыфмэ къин зэрарагъэщэчыгъэм пае, цӀыфхэр Тхьэм ехъоныгъэх, сыда пӀомэ а къиныр бэу къинышхуагъ.
ХьакӀэкъокӀэжъым тес бзылъфыгъэр
1 ЕтӀанэ Ӏэгубжъиблыр зыӀыгъырэ мэлэӀичиблым язырэр къакӀуи, мырэущтэу къысиӀуагъ: Мо къакӀо, Тхьэм бзылъфыгъэ хэтэкӀошхоу псыбэмэ аӀутым къинэу тырилъхьащтыр озгъэлъэгъущт. 2 Дунаем ипачъыхьэхэм а бзылъфыгъэм зинэ дашӀагъ, ащ изинэ исэнэпсыкӀэ чӀылъэм тет цӀыфхэри утэшъуагъэх. 3 Ащ нэужым Тхьэм Ыпсэ ЛъапӀэ къысфехи, мэлэӀичым шъоф нэкӀым сищагъ. Ащ дэжьым хьакӀэкъокӀэжъ плъыжь чӀапцӀэм тесэу бзылъфыгъэ горэ щыслъэгъугъ. А хьакӀэкъокӀэжъым Тхьэм зэрехъонырэ цӀэхэр бэу темыфэжьхэу телъыгъэх, шъхьибли пытыгъ, бжъэкъуипшӀи тетыгъ. 4 Бзылъфыгъэм щыгъынхэу щыгъыгъэхэр плъыжьыбзэуи плъыжь чӀапцӀэуи щытыгъэх. ДышъэмкӀи, мыжъо лъапӀэхэмкӀи, налмэсналкъутэхэмкӀи зигъэкӀэрэкӀагъэу щытыгъ. ГущыкӀыгъохэмрэ изинэ шӀоигъэрэ изхэу, дышъэм хэшӀыкӀыгъэу шъуалъэ горэ ыӀыгъыгъ. 5 ЫнатӀи цӀэ горэ тетхагъ: Мыр шъэфы. Мыр Вавилонышхоу бзылъфыгъэ хэтэкӀо пстэухэмрэ чӀылъэм игущыкӀыгъохэмрэ ян. 6 А бзылъфыгъэр Тхьэм ицӀыф лъапӀэхэмрэ Исус шыхьат фэхъугъэхэмрэ алъыкӀэ утэшъуагъэу слъэгъугъэ. А бзылъфыгъэр зысэлъэгъум, лъэшэу згъэшӀэгъуагъэ. 7 Джащыгъум мэлэӀичым мырэущтэу къысиӀуагъ: Сыда зыкӀэбгъэшӀагъорэр? Бзылъфыгъэмрэ ар зытес хьакӀэкъокӀэжъэу шъхьибл зыпытэу, бжъэкъуипшӀи зытетымрэ къарыкӀырэр къыосӀон. 8 ХьакӀэкъокӀэжъэу плъэгъугъэр щыӀагъ, ау джы щыӀэжьэп. ЧӀылъэм икуупӀэу чӀэ зимыӀэм къычӀэкӀыщт икӀодыпӀэ кӀоным пае. Дунаем тет цӀыфхэу Тхьэм дунаер къызигъэхъугъэм къыщегъэжьагъэу мыкӀодыжьын щыӀэныгъэ зыгъотыщтхэм ацӀэхэр зэрыт тхылъым чӀылъэм тет цӀыфхэу зыцӀэхэр имытхэм а хьакӀэкъокӀэжъыр залъэгъукӀэ, агъэшӀэгъощт, сыда пӀомэ хьакӀэкъокӀэжъыр щыӀагъ, джы щыӀэжьэп, ау къэлъэгъожьыщт. 9 ЗэхэшӀыкӀыныгъэ зиӀэ акъыл цӀыфмэ ярэӀ. А шъхьиблымэ къарыкӀырэр бзылъфыгъэр зытес Ӏошъхьиблыр ары. 10 Ащ нэмыкӀэу а шъхьиблымэ къарыкӀырэр пачъыхьиблыр ары. А пачъыхьэхэм ащыщхэу тфыр къефэхыгъэх, зыр щыӀ, зыри джыри къэкӀуагъэгоп. Ари къызыкӀокӀэ, тӀэкӀурэ тетыгъо иӀэщт. 11 ХьакӀэкъокӀэжъэу щыӀагъэу, джы щымыӀэжьым къикӀырэр яенэрэ пачъыхьэр ары. Ар пачъыхьиблымэ ащыщ, икӀодыпӀи мэкӀожьы. 12 БжъэкъуипшӀэу плъэгъугъэхэм къарыкӀырэр джыри тетыгъо зымыгъотыгъэ пачъыхьипшӀыр ары. Ахэр хьакӀэкъокӀэжъым игъусэхэу зы сыхьат закъокӀэ пачъыхьэ тетыгъо агъотыщт. 13 Ахэмэ ягухэлъ зы, ялъэкӀыныгъи ятетыгъуи хьакӀэкъокӀэжъым ратыщт. 14 Ахэр ӀПъынэм къезэощтых, ау Шъынэр ахэмэ атекӀощт, сыда пӀомэ ар зиусхьанхэм я Зиусхьаныжь, пачъыхьэхэми я Пачъыхьэжь. Ежьыр къызэджагъэ цӀыфхэу, къыхихыгъэхэу, ежьым фэшъыпкъэхэр игъусэщтых. 15 ЕтӀанэ мэлэӀичым мырэущтэу къысиӀуагъ: Бзылъфыгъэ хэтакӀор зыдэщыӀэрэ псыбэу плъэгъугъэхэм къарыкӀырэр цӀыф купышхохэри, хэгъэгухэри, лъэпкъхэри, бзэхэри ары. 16 Плъэгъугъэ хьакӀэкъокӀэжъымрэ бжъэкъуипшӀымрэ бзылъфыгъэ хэтакӀор ауджэгъущт. Ащ иӀэ пстэури тырахынхэшъ, пцӀанэу къагъэнэщт. Ыпкъи ашхыщт, къэнагъэри машӀокӀэ агъэстыщт. 17 Сыда пӀомэ Тхьэм игухэлъ агъэцэкӀэнэу агухэм къарилъхьагъ. Арэущтэу Тхьэм игущыӀэхэр къэшъыпкъэжьыфэ, ахэмэ ягухэлъ зы зэдашӀэу ятетыгъо хьакӀэкъокӀэжъым ратыщт. 18 Бзылъфыгъэу плъэгъугъэм къикӀырэр къэлэшхоу дунаем ипачъыхьэхэм тетыгъо афызиӀэр ары.
Тхьэм Вавилон къэлэшхор зэрэзэхикъутэрэр
1 Ащ нэужым нэмыкӀ мэлэӀич горэ уашъом къехэу слъэгъугъэ. Тетыгъошхо иӀагъ, нэфынэшхоу къэзыуцухьагъэми дунаер къыгъэнэфыгъ. 2 ЛъэкӀыныгъэ зиӀэ макъэкӀэ мырэущтэу къыӀуагъ: «Къэлэшхор зэхакъутагъ. Къэлэшхоу Вавилон зэхакъутагъ. Джынэхэм яунэ хъугъэ, сыд щыщырэ джынэпцӀэ Ӏаехэми, гущыкӀыгъо бзыу шӀойхэми япсэупӀэу хъугъэ, сыда пӀомэ а къэлэшхом ихъопсэныгъэ Ӏаехэмрэ изинэрэ ясэнэпскӀэ лъэпкъ пстэури ыгъэутэшъуагъэх. 3 Дунаем ипачъыхьэхэми а къэлэшхом зинэ дашӀагъ. А къэлэшхор мы дунаем имылъкухэмкӀэ нэйпсеу зэрэщытыгъэм пае, дунаем ищэнщэфакӀохэр баи хъугъэх». 4 ЕтӀанэ уашъом къиӀукӀэу нэмыкӀ макъэ горэм мырэущтэу къыӀоу зэхэсхыгъэ: «ӀПъо сицӀыфхэр, а къэлэшхом ипсэкӀодхэмкӀэ Ӏахьэ шъуимыӀэным паий, къинышхоу ыщэчыщтхэр шъумыщэчынхэм паий, а къалэм шъукъыдэкӀ, 5 сыда пӀомэ а къалэм ипсэкӀодхэр зэтелъхьагъэхэу уашъом нэсыгъэх, бзэджагъэу ышӀагъэхэри Тхьэм ыгу икӀыжьыщтхэп. 6 А къалэр шъо къызэрэжъудэзекӀуагъэм фэдэу, шъори ащ шъудэзекӀожь. Ащ бзэджагъэу ышӀагъэхэр фэдитӀоу ешъушӀэжь. Сэнэпсэу шъуишъуалъэ къышъуфыригъэхъуа гъэм идыджыгъэ фэдитӀоу сэнэпс дыдж ишъуалъэ фижъугъэхъожь. 7 Щытхъушхорэ баиныгъэшхорэ ежь зэрэзыфигъэ шъошагъэм фэдэу, къин щэчыныгъэрэ гукъаорэ ежъугъэгъотыжь. Сыда пӀомэ ыгукӀэ мырэущтэу еӀо: 'Сэ сыпачъыхьэ бзылъфыгъэу мыщ дэжьым сыщыс. Сэ шъузабэу сыщытэп, шъыгъоныгъи ныбжьи слъэгъущтэп'. 8 Ащ пае зы мафэкӀэ къинышхохэм ахэфэщт: лӀэныгъи, шъыгъоныгъи, гъабли. МашӀомкӀи стыжьыщт, сыда пӀомэ Зиусхьан Тхьэу а къалэм хьыкум тезышӀыхьэрэм лъэкӀыныгъэшхо иӀ». 9 Дунаем ипачъыхьэхэу зинэ дэзышӀагъэхэу, ибаиныгъэпгхокӀэ дэпсэухэрэм а къэлэшхор зыгъэстырэ машӀом иӀугъо залъэгъукӀэ, гъыщтых ыкӀи пыхьащтых. 10 А къэлэшхом къинышхоу ыщэчырэм пае, а пачъыхьэхэр щынагъом хэфэщтых, чыжьэу щытхэу, мырэущтэу къаӀощт: «О Вавилон къэлэшхоу, лъэкӀыныгъэ зиӀэр, сыхьатмыгъо уежьагъ, сыхьатмыгъо уежьагъ, сыда пӀомэ зы сыхьаткӀэ уифэшъуашэ уагъэпщыныжьыгъ». 11 А къэшхор Тхьэм зэрэзэхикъутагъэм пае, дунаем ищэнщэфакӀохэр гъыщтых ыкӀи шъыгъощтых, сыда пӀомэ ахэмэ ащэхэрэр зыми ыщэфыжьхэрэп. 12 Ядышъи, ятыжьыни, ямыжъо лъапӀэхэри, яналмэсналкъутэхэри зыми ыщэфыжьхэрэп; чэтэнхэри, шэкӀ плъыжьыбзэхэри, шэкӀ плъыжь чӀапцӀэхэри, данэхэри зыми ыщэфыжьхэрэп; мэ ӀэшӀу зыпихырэ пхъэхэри, яӀэшӀагъэхэу пыл къупшъхьэм, пхъэ лъапӀэм, гъуаплъэм гъучӀым, мрамэрым ахашӀыкӀыгъэхэри зыми ыщэфыжьхэрэп; 13 мэ ӀэшӀузыпихырэ уцхэу синамон, смирнэ, ладан зыцӀэхэри, мэ ӀэшӀу зыпихырэ дагъэри, сэнэпсри, зейтун дагъэри, хьаджьыгъэ дэгъури, коцыри зыми ыщэфыжьхэрэп; былымхэри, мэлхэри, шыхэри, кухэри зыми ыщэфыжьхэрэп; пщылӀхэри зыми ыщэфыжьхэрэп. 14 ЕтӀанэ щэнщэфакӀохэм а къэлэшхом мырэущтэу раӀощт: «Пхъэшъхьэмышъхьэхэу узыкӀэхъопсыгъэхэр о пшӀокӀодыгъэх. Уимылъкушхорэ уищытхъушхорэ зэкӀэ пшӀокӀодыгъэх, ныбжьи бгъотыжьыщтхэп». 15 ЩэнщэфакӀохэу ахэр къэлэшхом щащэхэзэ, баи хъугъэхэр, къэлэшхом икъинышхоу ыщэчырэм пае, щынагъом хэфагъэхэу, чыжьэу щытыщтых. Гъыхэзэ, шъыгъохэзэ, мырэущтэу аӀощт: 16 «О къэлэшхор, бзылъфыгъэм уфэдэу, чэтэныр, шэкӀ плъыжьыбзэр, шэкӀ плъыжьэ чӀапцӀэр пщыгъыхэу, дышъэкӀэ, мыжъо лъапӀэхэкӀэ, ыкӀи налмасналкъутэхэмкӀэ зыбгъэкӀэрэкӀагъ, сыхьатмыгъо уежьагъ, сыхьатмыгъо уежьагъ. 17 Сыда пӀомэ а мылъкушхор зэкӀэ зы сыхьаткӀэ а къалэм шӀокӀодыгъ». Къухьэхэм ятхьамэтэ пстэухэри, къухьэмкӀэ зекӀорэ пстэухэри, къухьэмэ ащылажьэрэ пстэухэри чыжьэу щытыщтых. 18 А къэлэшхор зыстырэ машӀом иӀугъо залъэгъукӀэ аӀощт: «А къэлэшхом фэдэ къэлэшхо зи щыӀагъэп». 19 Гъыхэзэ, шъыгъохэзэ ягукъао пае, ашъхьэхэм сапэ атыратэкъощт ыкӀи куощтых: «О къэлэшхор, сыхьатмыгъо уежьагъ, сыхьатмыгъо уежьагъ. О уимылъкукӀэ хым къухьэ щызиӀэ пстэури баи хъугъэх. Зы сыхьаткӀэ зэкӀэ пшӀокӀодыгъ. 20 А къэлэшхор Тхьэм зэрэзэхикъутагъэм пае, шъо уашъори, апостолхэри, пегъымбархэри, Тхьэм ицӀыф лъапӀэхэри шъугушӀу, сыда пӀомэ бзэджагъэу къышъуишӀагъэр Тхьэм а къалэм ригъэпщыныжьыгъ». 21 ЕтӀанэ кӀуачӀэ зиӀэ мэлэӀич горэм шъхьал мыжъом фэдэу, мыжъошхо горэ къыӀэти, хым хидзи, мырэущтэу ыӀуагъ: «Вавилон къэлэшхор ащ фэдэ кӀочӀэшхокӀэ къырадзыхыщт, ныбжьи агъотыжьыщтэп. 22 ПӀыкӀэпщынэм, къамылым, бжъэмыем амакъэхэри, орэд макъэхэри а къэлэшхом щызэхахыжьыщтхэп. Сыд щыщырэ ӀэшӀагъэ зиӀэри а къэлэшхом щы лэжьэжьыщтэп. Шъхьал мыжъо макъэри а къэлэшхом щызэхахы жьыщтэп. 23 Остыгъэ нэфыни а къэлэшхом щыблэжьыщтэп. Шъаомрэ нысэмрэ амакъэхэри ащ щызэхахыжьыщтэп. А къэлэшхом ищэнщэфакӀохэр мы дунаем ицӀыф инхэм ащыщыгъэх. Иушхъухьаныгъэ лъэпкъ пстэури ыгъэгъуащэ щтыгъ. 24 Пегъымбархэм алъ, Тхьэм ицӀыф лъапӀэхэм алъ, цӀыфхэм чӀылъэм щаукӀыгъэ цӀыф пстэуми алъ а къэлэшхом щагъотыгъ».
1 Ащ нэужым уашъом щыӀэ купышхо горэм ымэкъэшхо фэдэ мэкъэшхо горэм къыӀоу зэхэсхыгъ: «Аллилуя! Тхьэр ары тымыкӀодэу тыкъэзыгъэнэжьырэр. Щытхъушхори лъэкӀыныгъэшхори ежьым ий. 2 ЦӀыфхэм хьыкум зэратришӀыхьарэр шъыпкъэ ыкӀи зафэ, сыда пӀомэ бзылъфыгъэ хэтэкӀошхоу зизинэ шӀэнымкӀэ дунаер зыгъэкӀодыщтыгъэр ащ ыгъэмысагъ. Тхьэм ежьым фэлажьэрэ цӀыфхэм алъэу а бзылъфыгъэ хэтэкӀошхом ыгъэчъагъэр ригъэ гацыныжьыгъ». 3 Джыри зэ а купышхор къэджагъ: «Аллилуя! А къэлэшхор зыстырэ машӀом иӀу гъо егъашӀэм къыпихэу уашъом дэкӀоещт». 4 ЕтӀанэ тхьамэтэ нахьыжъхэу тӀокӀырэ плӀырэмрэ псэушъхьиплӀымрэ чӀым зырадзыхи, тӀысыпӀэ лъапӀэм тес Тхьэр агъэлъапӀэзэ аӀуагъ: «Амин, Аллилуя!» 5 Джащыгъум тӀысыпӀэ лъапӀэм къиӀукӀэу макъэ горэм къыӀуагъ: «Шъо Тхьэм фэлэжьэрэ цӀыф пстэуми, шъо Тхьэм ищынагъо зыгу илъхэм, цӀыкӀуми инми, ти Тхьэ щытхъушхо фэшъушӀ!» 6 ЕтӀанэ цӀыф купышхом ымэкъэшхо псышхо къиутъабэмэ амэкъэшхо, шыблэм игъогъэ мэкъэшхомэ афэдэ мэкъэшхохэм мырэущтэу къаӀоу зэхэсхыгъ: «Аллиуя! ЛъэкӀыныгъэшхор зэкӀэ зиӀэу, ти Зиусхьанэу Тхьэм тетыгъошхо зэриӀэр къыгъэнэфагъ. 7 ТыжъугъэгушӀу ыкӀи тыжъугъэтхъэжь, шытхъушхуи фэтэжъугъэшӀ. Сыда пӀомэ Шъынэм икъэщэгъу къэсыгъ, шъхьэгъусэу хъущт пшъашъэм зигъэхьазырыгъ. 8 Чэтэн лыдэу ыкӀи къабзэу зыщилъэнэу мэлэӀич горэм Шъынэм шъхьэгъусэу хъущт пшъашъэм ритыгъ». (Чэтэным къикӀырэр Тхьэм ицӀыф лъапӀэхэм яшъыпкъагъ ары). 9 ЕтӀанэ мэлэӀичым къысиӀуагъ: Мыхэр тхых: «Шъынэм инысащэ къыригъэблэгъагъэхэр сыхьатмафэ ежьагъэх». ЕтӀани къысиӀуагъ: Мыхэр Тхьэм игущыӀэ шъыпкъэх. 10 Джащыгъум згъэлъэпӀэнэу мэлэӀичым ылъакъохэм адэжь зесыдзыхыгъ. Ау ащ къысиӀуагъ: Арэущтэу умышӀы. Оррэ пшыхэу Исус шыхьат фэхъухэрэмрэ сышъуигъусэу сэри Тхьэм сыфэлажьэ. Тхьэр ары бгъэлъэпӀэн фаер. Сыда пӀомэ Тхьэм игущыӀэхэр пегъымбармэ агухэм къарилъхьэхи, къызфаригъэӀуагъэхэр Исус ехьылӀэгъэ къэбарышӀур къаӀотэныр ары.
Шы фыжьым тесыгъэр
11 ЕтӀанэ уашъор зэӀухыгъэу слъэгъугъэ. Сызэплъэм, шы фыжь горэ къэлъэгъуагъ. Шым тесым «Шъыпкъагъэ зиӀэ цӀыфэу узщыгугъышъунэу щытымкӀэ» еджэхэу раӀо. ШъыпкъагъэкӀэ хьыкум ешӀы ыкӀи мэзао. 12 Ынэхэри мэшӀотхъуабзэм фэдагъэх. Ышъхьи пачъыхьэ тандж Ӏаджи телъыгъэх. Ежь нэмыкӀ зыми ымышӀэу цӀэ горэ ынатӀэ тетхагъэу щытыгъ. 13 Лъым хэгъэуагъэу джэнэ кӀыхьэ щыгъыгъ. Ащ ыцӀэр: Тхьэм и ГущыӀ. 14 Шы фыжьхэм атесхэу, чэтэн фыжь къабзэхэмкӀэ фэпагъэхэу уашъом идзэхэр ащ лъыкӀощтыгъэх. 15 Лъэпкъхэм зэряощт сэшхо чан ыжэ къыдэкӀэу щытыгъ. Лъэпкъхэр гъучӀ бэщкӀэ ыгъэӀорышӀэщтых. ЛъэкӀыныгъэшхор зэкӀэ зиӀэ Тхьэм игубжышхо исэнэ фызалъэм сэнашъхьэхэр рифызэщтых. 16 Пачъыхьэхэм я Пачъыхьэжь, зиус хьанхэми я Зиусхьаныжь зыфаӀорэ цӀэр ишъошэ кӀыхьи ыкохэми атетхагъэу щытыгъ. 17 ЕтӀанэ тыгъэм хэтэу зы мэлэӀич горэ слъэгъугъэ. Ошъогум щыбыбырэ бзыу пстэуми мэкъэшхокӀэ мырэущтэу ариӀуагъ: «Тхьэм иешхэешъошхо пае шъузэрэугъоий, шъукъеблагъ, 18 пачъыхьэхэм ал, дзэ пэщэшхохэм ал, лъэкӀыныгъэ зиӀэ цӀыфхэм ал, шыхэм ал, шыухэм ал, шъхьафитми, пщылӀми, цӀыкӀуми, инми, цӀыф пстэуми ал шъушхыным пае». 19 ЕтӀанэ хьакӀэкъокӀэжъыр, дунаем ипачъыхьэхэр ядзэхэр слъэгъугъэх. Ахэр шым тесымрэ идзэмрэ язэон хэу зэрэугъоигъэх. 20 Ау шым тесымрэ идзэрэ хьакӀэкъокӀэжъыри пегъымбар нэпцӀэу ащ ыпашъхьэ нэшэнэ гъэшӀэгъонхэр щызыгъэлъэгъогъагъэри аубытыгъэх. А нэшанэхэмкӀэ хьакӀэкъокӀэжъым цӀыфхэу ежь итамыгъэ зытедзагъэхэу, ышъо теплъи зыгъэлъапӀэхэрэр дихьыхыгъагъэх. Шым тесымрэ идзэрэ хьакӀэкъокӀэжъри пегъымбар нэпцӀри заубытыхэ ужым, а тӀури псаухэу тхъомзашхъом имашӀокӀэ стырэ хым хадзагъэх. 21 Къэнагъэхэри шым тесым ежьым ыжэ къыдэкӀырэ сэшхомкӀэ ыукӀыгъэх, бзыухэми зэкӀэ ахэмэ алкӀэ загъэшхэкӀыгъ.
Илъэс минхэр
1 ЕтӀанэ уашъом къехэу мэлэӀич горэ слъэгъугъэ. ЧӀылъэм икуупӀэу чӀэ зимыӀэм иӀункӀыбзи блэрыпс ин гори ыӀыгъыгъэх. 2 Блэгъожъыр, а блэжъэу иблыскӀэ е шэйтанкӀэ заджэхэрэр ыубыти, илъэс минкӀэ рипхыгъ. 3 ЧӀылъэм икуупӀэу чӀэ зимыӀэм чӀидзи, ыгъэпытэжьи, мы хъури тыридзагъ, илъэс миныр текӀыфэ, лъэпкъхэр ымыгъэпцӀэнхэм пае. А илъэс миным ыуж охътэ макӀэкӀэ шъхьафитныгъэ иӀэнэу атӀупщыжьын фае. 4 ЕтӀанэ тхьэмэтэ тӀысыпӀэхэри, а тӀысыпӀэхэм атес цӀыфхэу адрей цӀыфхэм хьыкум атезышӀыхьанхэу Тхьэм тетыгъо зэритыгъэхэри слъэгъугъэх. Исус шыхьат зэрэфэхъугъэхэм ыкӀи Тхьэм игущыӀэхэр цӀыфхэм зэрарагъэӀугъэхэм пае, зышъхьэ паупкӀыгъэхэм апсэхэри слъэгъугъэх. Ахэмэ хьакӀэкъокӀэжъымрэ ышъо теплъэрэ агъэлъэпӀэгъагъэхэп, анатӀэхэми аӀэхэми хьакӀэкъокӀэжъым итамыгъэ атрадзэнэу адэгъагъэп. Ахэр къэпсэужьхи, Христос игъусэхэу илъэс миным къыкӀоцӀ тетыгъо яӀэ хъугъэ. 5 А илъэс миныр зэтекӀыфэ, адрэ къэнэгъэ лӀагъэхэр къэпсэужьыгъэхэп. Мыхэр ары апэрэхэу лӀагъэхэм къахэтэджыкӀыжьыгъэхэр. 6 Апэрэхэу лӀагъэхэм къахэтэджыкӀыжьхэрэр лъапӀэх ыкӀи сыхьатмафэ ежьагъэх. ЯтӀонэрэ лӀэныгъэм иягъэ ахэмэ аригъэкӀынэу лъэкӀыныгъэ иӀэп. Ахэр Тхьэмрэ Христосрэ афэлажьэрэ дин пащэхэу щытыщтых, Христоси игъусэхэу илъэс миным къыкӀоцӀ тетыгъо яӀэщт.
Шэйтаным зэрэтекӀохэрэр
7 А илъэс миныр зытешӀэхэкӀэ, шэйтаныр хьапсым къычӀатӀупщыкӀыжьыщт. Ар кӀонышъ, чӀылъэм ылъэныкъуиплӀ щыӀэ лъэпкъхэу Гогрэ Магогрэ зыфаӀохэрэр ыгъэпцӀэщтых. Ахэр зэонхэм пае ыугъоищтых. Ахэмэ япчъагъэ хым ипшахъо фэдизыщт. 8 Арэущтэу чӀылъэм ишъомбгъуагъэ зэлъаубытызэ кӀохи, Тхьэм ицӀыф лъапӀэхэм яуцупӀэу Тхьэм шӀу ылъэгъурэ къэлэшхор къауцухьагъ. 9 Ау машӀор уашъом къехи, ахэр ыгъэкӀодыгъэх. 10 Шэйтанэу ахэр зыгъэпцӀагъэр машӀорэ тхъомзашхъорэкӀэ стырэ хым хадзагъ. А хым хьакӀэкъокӀэжъри пегъымбар нэпцӀри хадзэгъагъэх. А хым чэщи мафи егъашӀэм къинышхор щащэчыщт.
Тхьэм цӀыфхэм хьыкум зэратришӀыхьэрэр
11 ЕтӀанэ тӀысыпӀэ лъэпӀэ фыжь инымрэ ащ тесымрэ слъэгъугъэх. ТӀысыпӀэ лъапӀэм тесым ыпашъхьэ чӀылъэри уашъори зэдэкӀодыгъэх, чӀыпӀи къафэнэжьыгъэп. 12 ЦӀыф лӀагъэхэр, цӀыкГуи, ини, тӀысыпӀэ лъапӀэм ыпашъхьэ щытхэу слъэгъугъэх. МэлэӀичхэм тхылъ горэхэр зэгуахыгъэх. НэмыкӀ тхылъэу мыкӀодыжьын щыӀэныгъэ зыгъотыщтхэм ацӀэхэр зэрытыр зэгуахыгъ. ТӀысыпӀэ лъапӀэм тесым лӀагъэхэм Ӏофэу ашӀагъэхэу а тхьылъхэм арытхэм атетэу хьыкум атыришӀыхьагъ. 13 Хым цӀыф лӀагъэхэу хэлъыгъэхэр къытыжьыгъэх. ЛӀэныгъэми, лӀагъэхэм ядунаий цӀыф лӀагъэхэу яӀагъэхэр къатыжьыгъэх, тӀысыпӀэ лъапӀэм тесым хэти ышӀагъэхэм атетэу хьыкум тыришӀыхьагъ. 14 ЕтӀанэ мэлэӀичхэм лӀэныгъэри, лӀагъэхэм ядунаий машӀокӀэ стырэ хым хадзагъэх. А хэу машӀокӀэ стырэр ятӀонэрэ лӀэныгъэр ары. 15 МыкӀодыжьын щыӀэныгъэ зыгъотыщтхэм ацӀэхэр зэрыт тхылъым цӀыфхэу зыцӀэхэр рамыгъотагъэхэр машӀокӀэ стырэ хым хадзагъэх.
ОшъуакӀэмрэ чӀылъакӀэмрэ
1 ЕтӀанэ ошъуакӀэри чӀылъакӀэри слъэгъугъэх, сыда пӀомэ, апэрэ уашъори апэрэ чӀылъэри щыӀэжьыгъэхэп, хыри щыӀэжьыгъэп. 2 Ащ нэужым къэлэшхо лъапӀэу ЕрусалимыкӀэр, Тхьэм ыдэжь къикӀэу, уашъом къехэу слъэгъугъэ. ПӀъхьэгъусэу хъущт пшъашъэм кӀалэм зызэрэфигъэкӀэрэкӀагъэм фэдэу, зигъэхьазырыгъэу щытыгъ. 3 ТӀысыпӀэ лъапӀэм къиӀукӀэу мэкъэшхо горэ мырэущтэу къыӀоу зэхэсхыгъ: Мары Тхьэм ипсэупӀэ цӀыфмэ ахэт, ежьыри ахэсыщт. Ахэри ылъэпкъэу хъущтых. Ежь Тхьэри ахэмэ ягъусэщт, я Тхьэуи щытыщт. 4 Ахэмэ анэхэм нэпс пстэури акӀилъэкӀыкӀыжьыщт. ЛӀэныгъэри щыӀэжьыщтэп, шъыгъонри, гъынри, узри щыӀэжьыщтхэп, сыда пӀомэ ыпэрэ Ӏофхэр щыӀэжьхэп. 5 ЕтӀанэ тӀысыпӀэ лъапӀэм тесым къыӀуагъ: Мары, Ӏоф пстэури кӀэу сэшӀыжьых. Мыхэр тхых, къыпигъэхъожьыгъ етӀанэ, сыда пӀомэ мыхэр узщыгугъышъун гущыӀэ шъыпкъэх. 6 Ӏофыр ухыгъэ, къысиӀуагъ етӀанэ. Алфэрэ Омегэрэ, ублапӀэри кӀэухыри сэры. ПсыфалӀэ лӀэрэр щыӀэныгъэ къэзытырэ псынэм ипс щыщ уасэ хэмылъэу езгъэшъощт. 7 ТекӀоныгъэр къэзыхьырэм мы пстэури ӀэхьышӀоу къылъысыщт. Сэ ежьым и Тхьэу сыщытыщт, ежьыри сэ скъоу щытыщт. 8 Ау щынэ къэрабгъэхэм, шӀошъхъуныгъэ зимыӀэхэм, зызыгъэушӀоигъэхэм, цӀыф укӀакӀохэм, зинэ зышӀэхэрэм, ушхъухьаныгъэм пылъхэм, тхьэ нэпцӀ зыгъэлъапӀэхэрэм, пцӀыусхэм ахэмэ яӀахьэр машӀорэ тхъомзашхъорэкӀэ стырэ хыр ары. Ар ятӀонэрэ лӀэныгъэр ары.
ЕрусалимыкӀэр
9 Аужырэ къинышхуиблыр зэрыт Ӏэгубжъиблыр зыӀыгъырэ мэлэӀичиблымэ язырэр къакӀуи къысиӀуагъ: Мо къакӀуи, Шъынэм ишъхьагъусэу хъущт пшъашъэр озгъэлъэгъущт. 10 Тхьэм Ыпсэ ЛъапӀэ къысфехыгъэу, мэлэӀичым Ӏошъхьэ лъэгэшхо горэм сыдищэягъ. Тхьэм ыдэжь къикӀэу, уашъом къехэу, къэлэшхо лъапӀэу Ерусалим сигъэлъэгъугъэ. 11 А къэлэшхом Тхьэм ищытхъушхо иӀагъ. Кристаллым фэдэ къабзэу, яспис зыцӀэ мыжъо лъапӀэ фыжьым фэдэу лыдыщтыгъ. 12 Къалэм дэпкъ лъэгэшхоу къэлэпчъэ пшӀыкӀутӀу зыхэтыр иӀагъ. Къэлапчъэхэм мэлэӀич пшӀыкӀутӀу аӀутыгъэх. Къэлапчъэхэм Израил иунэгъо лъэпкъ пшӀыкӀутӀумэ ацӀэхэр атетхагъэхэу щытыгъэх. 13 Тыгъэ къыкъокӀыпӀэмкӀэ къэлэпчъищ, тыгъэ къохьапӀэмкӀи къэлэпчъищ, къыблэмкӀи къэлэпчъищ, темырымкӀи къэлэпчъищ хэтыгъэх. 14 А къалэм идэпкъ лъэпсэ пшӀыкӀутӀу иӀагъ. А лъапсэхэм Шъынэм иапостол пшӀыкӀутӀумэ ацӀэхэр атетхагъэхэу щытыгъэх. 15 МэлэӀичэу къыздэгущыӀагъэм къалэр, къалэм икъэлапчъэхэр, идэпкъ ышынхэм пае, дышъэм хэшӀыкӀыгъэ бэщ шапхъэ ыӀыгъыгъ. 16 Къалэм икӀыхьагъи ишъомбгъуагъи зэфэдизэу щытыгъ. МэлэӀичым ибэщкӀэ къалэр ышыгъ. Къалэм икӀыхьагъэ стадие минпшӀыкӀутӀум фэдизэу щытыгъ. Ишъомбгъуагъи илъэгагъи ащ фэдизэу щытыгъ. 17 МэлэӀичым дэпкъыри ышыгъ. ЦӀыфмэ зэрашырэм фэдэу, мэлэӀичым зешым, дэпкъым ишъомбгъуагъэ Ӏэнтэгъуишъэрэ тӀокӀитӀурэ плӀырэ хъугъэ. 18 Дэпкъыри яспис мыжъо лъэпӀэ фыжьым хэшӀыкӀыгъагъ. Къалэри апчым икъэбзагъэ фэдэ къэбзагъэ зиӀэ дышъэм хэшӀыкӀыгъагъ. 19 Къалэм идэпкъ лъапсэхэри зэфэшъхьаф мыжъо лъапӀэхэмкӀэ агъэкӀэрэкӀагъэхэу щытыгъэх. Апэрэ лъапсэр яслис зыцӀэ мыжъо лъэпӀэ фыжьым хэшӀыкӀыгъ; ятӀонэрэри сапфир мыжъо шхъуантӀэм хэшӀыкӀыгъ; ящэнэрэри халкидон мыжъо къолэным хэшӀыкӀыгъ; яплӀэнэрэри смарагд мыжъо уцышъуабзэм хэшӀыкӀыгъ; 20 ятфэнэрэри сардоникс мыжъо къолэн лыдым хэшӀыкӀыгъ; яхэнэрэри сердолик мыжъо плъыжь хьаплъым хэшӀыкӀыгъ; яблэнэрэри хризолиф мыжъо гъожьым хэшӀыкӀыгъ; яенэрэри вирил мыжъо уцышъуабзэм хэшӀыкӀыгъ; ябгъонэрэри топаз мыжъо гъожьыбзэм хэшӀыкӀыгъ; япшӀэнэрэри хрисопрас мыжъо уцышъом хэшӀыкӀыгъ; япшӀыкӀузэнэрэри гиацинт мыжъо шхъонтӀашъом хэшӀыкӀыгъ; япшӀыкӀутӀонэрэри аметист мыжъо плъыжь чӀапцӀэм хэшӀыкӀыгъ. 21 Къэлэпчъэ пшӀыкӀутӀур налмэсналкъут пшӀыкӀутӀоу щытыгъэх, къэлапчъэ пэпчъ зы налмэсналкъутэм хэшӀыкӀыгъ. Къалэм иурам дышъэ къабзэм хэшӀыкӀыгъ, апч узыпхырыплъырэм фэдэу. 22 А къэлэ лъапӀэм Тхьэм зыщелъэӀун унэшхо горэ щыслъэгъугъэп, сыда пӀомэ лъэкӀыныгъэшхор зэкӀэ зиӀэ Зиусхьанэу Тхьэмрэ ПӀъынэмрэ а къалэм зэрэщыӀэхэм пае, а къалэм Тхьэм узыщелъэӀун унэшхо горэ ищыкӀагъэу щытыгъэп. 23 А къалэр агъэнэфынэу тыгъэри мазэри ищыкӀагъэхэп, сыда пӀомэ Тхьэм ищытхъупгхо а къалэр егъэнэфы, ПӀъынэри а къалэм нэфынэ фэхъу. 24 Лъэпкъхэри ащ инэфынэ щызекӀощтых. Дунаем ипачъыхьэхэми ящытхъушхо а къалэм къыдахьыщт. 25 Мафэрэ ащ икъэлапчъэхэр агъэпытэщтхэп, сыда пӀомэ ащ чэщ щыхъущтэп. 26 Лъэпкъхэм ящытхъушхорэ ялъытэныгъэшхорэ а къалэм къыдахьыщт. 27 Къэбзэныгъэ зимыӀэр а къалэм дэхьащтэп. ЕмыкӀу зышӀэрэри пцӀыусыри зи дэхьащтэп. ЗыцӀэхэр ПӀъынэм итхылъ итхэу, мыкӀодыжьын щыӀэныгъэ зыгъотыщтхэм анэмыкӀэу, цӀыф зи а къалэм дэхьащтэп.
1 ЕтӀанэ мэлэӀичым щыӀэныгъэ къэзытырэ псым ипсыхъоу кристаллым фэдэу къабзэр къысигъэлъэгъугъ. Тхьэмрэ ӀПъынэмрэ ятӀысыпӀэ лъапӀэ къикӀэу, 2 а къалэм иурам гузэгу итэу ар блэкӀы. А псыхъом ыбгъуитӀукӀэ щыӀэныгъэ къэзытырэ чъыгхэри Ӏутых. Илъэсым пшӀыкӀутӀо къыпыкӀэу, мазэ къэси зэ къыпэкӀэ. А чъыгым ытхьапэхэм лъэпкъхэм яузхэр агъэхъужьых. 3 Тхьэм ынае зыщифэрэ гори а къалэм щыӀэщтэп. Тхьэмрэ Шъынэмрэ ятӀысыпӀэ лъапӀэ а къалэм щыӀэщт, Тхьэм фэлажьэхэрэми ежьыр агъэлъэпӀэщт. 4 Ахэмэ Тхьэм ынапэ алъэгъущт, ыцӀи анатӀэ тетхагъэу щытыщт. 5 Чэщ щыӀэжьыщтэп. Остыгъэм инэфыни ящыкӀэгъэжьыщтэп, тыгъэм инэфынэри ящыкӀэгъэжьыщтэп, сыда пӀомэ Зиусхьанэу Тхьэм нэфынэ аритыщт. ЕгъашӀэми тетыгъо яӀэщт.
Христос бэ темышӀэу къэкӀожьыщт
6 ЕтӀанэ мэлэӀичым мырэущтэу къысиӀуагъ: Мыхэр узщыгугъышъун гущыӀэ шъыпкъэх. Пегъымбар лъапӀэхэм я Зиусхьанэу Тхьэм бэ темышӀэу къэхъун фэе Ӏофхэр ежьым фэлажьэхэрэм аригъэлъэгъунхэм пае, имэлэӀич къыгъэкӀуагъ. 7 КъэдаӀу, къеӀо Исус, бэ темышӀэу сыкъэкӀожьыщт. Тхьэм ыдэжь къикӀыгъэхэу, мы тхылъым ит гущыӀэхэу къэхъущт Ӏофхэм яхьылӀагъэхэм ядэӀурэр сыхьатмафэ ежьагъ. 8 Сэ сы Иуан, мы Ӏофхэр зэхэзыхыгъэу ыкӀи зылъэгъугъэр сэры. Мы Ӏофхэр зэхэсхыхэу, зысэлъэгъухэрэ ужым, ахэр сэзыгъэлъэгъугъэ мэлэӀичыр згъэлъэпӀэнэу ылъакъомэ адэжь зыщесыдзыхыгъ. 9 Арэущтэу умышӀы, къысиӀуагъ ащ. Оррэ пшыхэу пегъымбархэмрэ мы тхылъым итхэр зыгъэцакӀэрэ цӀыф пстэухэмрэ шъуигъусэу сэри Тхьэм сыфэлажьэ. Тхьэр ары бгъэлъэпӀэн фаер. 10 Тхьэм ыдэжь къикӀыгъэхэу, мы тхылъым ит гущыӀэхэу къэхъущт Ӏофхэм яхьылӀагъэхэм мыхъур атемыдз,къыпигъэхъожьыгъ етӀанэ, сыда пӀомэ уахътэр къэблэгъагъ. 11 Бзэджагъэ зышӀэрэр бзэджэшӀэным джыри пэрэлъ. ШӀоигъэм пылъыри джыри пэрэлъ. Шъыпкъагъэр зыгъэцакӀэрэри шъыпкъагъэр ыгъэцэкӀэным джыри пэрэлъ. Зыгу къэбзэ цӀыфыми ыгу къэбзэ зэпытынэу орэхъу. 12 КъэдаГу, къеӀо Исус, бэ темышӀэу сыкъэкӀожьыщт! Хэти ифэшъошэ Ӏахьэ къыздэсэхьы, хэти ышӀагъэм фэшъуашэри естыжьыщт. 13 Алфэрэ Омегэрэ, апэрэри аужырэри, ублапӀэри кӀэухыри сэры. 14 Чъыгэу щыӀэныгъэ къэзытырэм къыпыкӀэрэм щыщ ашхынэуи, къэлапчъэхэмкӀэ къалэм дэхьанхэуи фит хъунхэм пае, Тхьэм иунашъохэр зыгъэцакӀэхэрэр сыхьатмафэ ежьагъэх. 15 Ау хьэхэри, ушхъухьаныгъэм пылъхэри, зинэ зышӀэхэрэри, цӀыф укӀакӀохэри, тхьэ нэпцӀхэр зыгъэлъапӀэхэрэри, хэти мышъыпкъагъэр шӀу зылъэгъоу ар зыгъэцакӀэрэри а къалэм ыкӀыб дэтых. 16 Сэ, Исус, шъуичылыс зэӀукӀэхэм апае мы Ӏофхэр къышъуфиушыхьатынхэу симэлэӀич къэзгъэкӀуагъ. Пачъыхьэ Даутэ иунэгъо лъэпкъ къытехъукӀыгъэ бын лъапӀэр сэры. Нэфшъэгъо жъогъо нэфыри сэры. 17 Тхьэм Ыпсэ ЛъапӀэрэ ишъхьэгъусэу хъугъэмрэ аӀо: «КъакӀо». Ар зэхэзыхырэми, «КъакӀо» ерэӀу. Хэтми псыфалӀэ лӀэрэр къэрэкӀу. Хэт фаеми, щыӀэныгъэ къэзытырэ псым щыщ уасэ хэмылъэу ерэшъу. 18 Тхьэм ыдэжь къикӀыгъэхэу, мы тхылъым ит гущыӀэхэу къэхъущт Ӏофхэм яхьылӀагъэхэр хэтми зэхэзыхырэр зыфэсакъыжьынэу есэӀо. Зы цӀыф горэм мы тхылъым ит гущыӀэхэм зыгорэ ахилъхьэмэ, Тхьэм мы тхылъым зикъэбар ит къинышхохэр ащ тырилъхьащтых. 19 Тхьэм ыдэжь къикӀыгъэхэу, мы тхылъым ит гущыӀэхэу къэхъущт Ӏофхэм яхьылӀагъэхэм зы цӀыф горэм зыгорэ ахихымэ, Тхьэм а цӀыфым иӀэхьышӀу къыӀихыщт. Сыда пӀомэ мыкӀодыжьын щыӀэныгъэ зыгъотыщтхэм ацӀэхэр зэрыт тхылъымкӀи, къэлэ лъапӀэмкӀи, мы тхылъым зикъэбар ит ӀофхэмкӀи Тхьэм а цӀыфым Ӏахьэу иӀэр къыӀихыщт. 20 Мы Ӏофхэм шыхьатэу афэхъурэм еӀо: «Шъыпкъэ, бэ темышӀэу сыкъэкӀожьыщт». Амин. КъэкӀожь, Зиусхьан Исус. 21 Ти Зиусхьанэу Исус Христос ынэшӀу шъо пстэуми къышъущерэф. Амин.