The New Testament of our Lord and Saviour Jesus Christ
1:1 Yesus Neno Anan Nai Daud sufan, Nai Abraham in monin, in pe'an esle' i: 1:2 Nai Abraham nahoni Nai Ishak, Nai Ishak nahoni Nai Yakub, Nai Yakub nahoni Nai Yehuda nok in olif tataf sin. 1:3 Nai Yehuda nok bi Tamar nahoni Nai Peres ma Nai Zerah, Nai Peres nahoni Nai Hezron, Nai Hezron nahoni Nai Ram, 1:4 Nai Ram nahoni Aminadab, Nai Aminadab nahoni Nai Nahason, Nai Nahason nahoni Nai Salmon, 1:5 Nai Salmon nok bi Rahab nahoni Nai Boas, Nai Boas nok bi Rut nahoni Nai Obed, Nai Obed nahoni Nai Isai, 1:6 Nai Isai nahoni Kesel Nai Daud. Nai Daud nok Nai Uria fel nahoni Nai Salomo. 1:7 Nai Salomo nahoni Nai Rehabeam, Nai Rehabeam nahoni Nai Abia, Nai Abia nahoni Nai Asa, 1:8 Nai Asa nahoni Nai Yosafat, Nai Yosafat nahoni Nai Yoram, Nai Yoram nahoni Nai Uzia, 1:9 Nai Uzia nahoni Nai Yotam, Nai Yotam nahoni Nai Ahas, Nai Ahas nahoni Nai Hizkia, 1:10 Nai Hizkia nahoni Nai Manasye, Nai Manasye nahoni Nai Amon, Nai Amon nahoni Nai Yosia, 1:11 Nai Yosia nahoni Nai Yekhonya nok in oilfin bi batan anpolin to Israel neu pah Babel. 1:12 Ma namuni na'ko anpolin to Israel neu pah Babel, Nai Yekhonya nahoni Nai Sealtiel, Nai Sealtiel nahoni Nai Zerubabel, 1:13 Nai Zerubabel nahoni Nai Abihud, Nai Abihud nahoni Nai Elyakim, Nai Elyakim nahoni Nai Azor, 1:14 Nai Azor nahoni Nai Zadok, Nai Zadok nahoni Nai Akhim, Nai Akhim nahoni Nai Eliud, 1:15 Nai Eliud nahoni Nai Eleazar, Nai Eleazar nahoni Nai Matan, Nai Matan nahoni Nai Yakub, 1:16 Nai Yakub nahoni Nai Yusuf bi Maria in mone, le nahoni Yesus ma antek In Neno Anan. 1:17 Fun eke batan ok-oke: Na'ko Nai Abraham talan te Nai Daud, eke bo'es amha. Na'ko Nai Daud talan te anpolin to Israel neu pah Babel, eke bo'es am ha. Ma na'ko anpolin to Israel neu pah Babel, talan te nahoni Neno Anan, eke bo'es am ha. 1:18 Lasi nahonis Yesus Neno Anan an etu ma naton nani nak on i: Yesus in ainaf bi Maria anmafut nek nok Nai Yusuf. Mes leka sin fe ka nabuan fa te, bi Maria in na'apu, natuin kuasat Smanan Uisneno. 1:19 Nai Yusuf le bi Maria anmafut nek nokan in atoni alekot. In kan lomif he namaeba bi Maria anbi mat-mat. Es nane in natenab hen bation nok bi Maria amnes-amnes. 1:20 Mes leka Nai Yusuf fe natenab onane te Ahake Uisneno nalilon neune anbi nunmait ma nak, "Yusuf Nai Daud sufan, kais mumtau he mafe mok bi Maria, fun anah le anbi in apun nane na'ko Smanan Uisneno kun. 1:21 In of nahonis anmone mese ma ho mes mukanab In Yesus, fun In of namonib In to na'ko sin sanat." 1:22 Lasi nane anbol he nati' Uisneno In a'an natiabon natuin Mafefa knino le na'uab nak: 1:23 "Kiso, bife aotemef nane of na'apu ma nahonis an mone mese, ma sin nakanab nani In Imanuel" -- a'at Ibrani le in oten nak, "Uisneno nok kit." 1:24 Oke te Nai Yusuf anfen ma anmo'e natuin sa' le Ahake Uisneno nak neune, esle' in he naiti bi Maria anfani in fenai. 1:25 Mes in ka nabua fa nokan talan te bi Maria nahonis in anmone ma Nai Yusuf nakanab In Yesus.
2:1 Leka nahonis nalali Yesus anbi Betlehem pah Yudea bi batan Kesel Nai Herodes naplenat, anmu'i ahin afkun sin neman na'ko neno Saen neu Yerusalem. 2:2 Ma sin natan nak, "Kesel to Yahudi le fe nahonis nane In esme ka? Fun hai mit milali In afkun bi neno Saen es nane hai aim he mibes neu In." 2:3 Leka Kesel Nai Herodes in nen lasi nane te in naskek, nok ale to anbi Yerusalem. 2:4 Ma in nabua ale Ana' lasi fuat ma Ahin Sulat to Yahudi sin ma antoti sin nak, "He nahonis Neno Anan esme?" 2:5 Ma sin natae nak, "Bi Betlehem, pah Yudea, fun Mafefa knino antui nani bi sulat nak: 2:6 Ma ho Betlehem, pah Yehuda, ho ka mubau mis fa mu'ko kot bian bi pah Yehuda, fun of anpoi na'ko ko atopus mese le he natuku Au to Israel." 2:7 Onane te Nai Herodes in no'en ahin afkun sin nok tol-tolo ma antoti sin, nak leka es afkun nane nalilon. 2:8 Oke te in anlelu sin neu Betlehem ma nak, "Him nao nai ma ampe'o miknutu antom Anah nane ma leka hi mie'ku mokin, hi miton kau he nati' au amsa nao he ubes neu In." 2:9 Ma leka sin nen nalali kesel in molok nane te sin anfen ma an naon. Ma leka sin an naon, afkun le afi sin nit anbi neno Saen, nao nahunun talan te sin nem ante bale le Anah nane anbine, afkun nane nasnas bi in fafon. 2:10 Leka sin nit afkun nane, te sin malinan maten. 2:11 Ma sin antam neu ume nane ma sin nit Anah nane nok In ainaf bi Maria, sin anli'tu ma nabes neu In. Ma sin anfei sin bale nok maus mau'pa, oke te sin neki tulu neu In, esle' mnatu, atu fomeni ma klali. 2:12 Ma Uisneno naton neu sin anbi nunmait, he nati' kais sin anfani neu Nai Herodes, mes sin anfani neu sin pah natuin lanan bian. 2:13 Leka ahin afkun sin an naon te, Ahake Uisneno nalilon neu Nai Yusuf anbi nunmait ma nak, "Hom fennai ma meki Anah nane nok In ainaf, maen nai meu pah Mesir ma mimaika ambin talan te Au uton ko. Fun Nai Herodes natenab he nami Anah nane ma he namate In." 2:14 Ma Nai Yusuf anfen ma neki Anah nane nok In ainaf, bi fai nane amsa nao neu pah Mesir. 2:15 Ma sin namaika anbi pah nane talan te Nai Herodes nasaebon. Lasi nane anbol he nati' Uisneno In a'an natision onle afi Mafefa knino sin na'uab nak: "Au boin Au Anah na'ko pah Mesir." 2:16 Leka Nai Herodes nahin, nak ahin afkun sin nalosib nani te, in nato' nae le'uf. Oke te in anlelu he namate ale an atoni bi Betlehem funam natef. Ale anah le uan ton nua nekin sanu, namnes nok leku le in nahim nani na'ko ahin afkun sin. 2:17 Onane te natis kun a'at le natonon natuin Mafefa Knino Nai Yeremia, nak: 2:18 "Hanaf manena bi Rama, kaet ma kulut mataen le'uf; fun bi Rahel ankae neu in anhin ma in kan lomif hen halin nani, fun katitaf sin." 2:19 Leka Nai Herodes nasaebon nalali te, Ahake Uisneno nalil on neu Nai Yusuf anbi nunmait bi pah Mesir ma nak: 2:20 "Hom fennai, ma meki Anah nane nok In ainaf amfani meu pah Israel, fun atoni le he namate Anah nane anmate nalali." 2:21 Ma Nai Yusuf anfen, ma neki Anah nane nok In ainaf ma an naon neu pah Mesir. 2:22 Mes leka in nen, nak Nai Arkhelaus anfani kesel bi pah Yudea anseka in amaf Nai Herodes, in namtau he nao neu bale nane. Ma Uisneno anfainek nani anbi nunmait he nati' Nai Yusuf nao neu pah Galilea. 2:23 Ma leka ante bi bale nane, in namaika anbi kuan es kanan Nazaret. Lasi nane anbol he nati' natis a'at le afi Mafefa knino sin na'uab nani ma nak: "Of antek In Atoni Nazaret."
3:1 Fun bi neno nane Nai Yohanes Aslanit anhake bi mnela paha snaen pah Yudea ma an etun nak: 3:2 "Mite'un hi nekam nai fun Plenat Neno Tunan anhaumaken!" 3:3 Fun Nai Yohanes le i esle' afi Mafefa Knino Nai Yesaya antek nani nak: "Anmu'i ahunun anbi mnela paha snaen nak: 'Miloitan lanan neu Uisneno, ma mi neo In lanan sin.' " 3:4 Nai Yohanes in bael pake anmo'e na'ko bikase paha snaen in funun ma in nafutu na'ko pasu, ma in mnahat nane es siboi ma oni hau. 3:5 Onane te ale to na'ko Yerusalem, na'ko pah Yudea ok-oke ma na'ko ale pah funam natef Noe Yordan sin nem neu in. 3:6 Ma sin nahoeb sin sanat oke te Nai Yohanes natam sin neu oe anbi Noe Yordan. 3:7 Mes leka in nit atoni Farisi ma atoni Saduki le neman he naslani sin, in nak neu sin: "Hi atoni abulalut ki natuin kauna sufan ki. Sekau es naton ki he maen misaitan to'as Uisneno le nem neu ki ka? 3:8 Milile nai hi mo'et alekot le natai nok lasi te'un nekaf. 3:9 Ma kais hi mitenab bi nekam mak: Hai ama, es Nai Abraham! Mimnau, Uisneno nabe'i hen mo'e ale fatu i anfani Nai Abraham in sufan! 3:10 Fun fani nabelkon hen ote hau talan te ba'an ma ale hau le ka nafuaf fuan alekot of anote nisan ma anpolin neu ai. 3:11 Fun au uslani ki bi oe on taka te'un nekaf. Mes In le nem namunin kau anmu'i kuasat nesin kau ma au ka tamaf ota he sefi In tani penhae. Of In naslani ki neki Smanan Knino ma ai. 3:12 Tupa es In niaman. Of In nakmeu In bale teil ane ma nabua In aen kase neu lopo ma aen ta'uf nane In notu nani anbi ai le kan mate nitaf." 3:13 Oke te Yesus nem na'ko pah Galilea neu Noe Yordan. In nem neu Nai Yohanes ma antoti he naslani. 3:14 Mes Nai Yohanes antite ma nak, "Usif, Ho es he muslani kau, leka me Hom koenom aum meu kau?" 3:15 Mes Yesus natae ma nak, "Mautu hen bol onane, fun he tatisi Uisneno In lomin kun." Oke te Nai Yohanes naslani Yesus. 3:16 Leka naslani nalali te, Yesus anpoi na'ko oe. Naskek onane te neno tunan natfai ma Yesus nit Smanan Uisneno on kol ot kase ansanu nem neu In. 3:17 Nalali te hanfes na'ko neno tunan na'uab nak, "I, Au Anmone neka, le Au lomi ani."
4:1 Oke te Smanan Uisneno antopu Yesus neu paha snaen he nati' Nitu ansu' nani. 4:2 Ma leka Yesus nanahon neno bo'ha ma fai bo'ha, nalali te In namnah. 4:3 Oke te Nitu nane nem ma nak, "Kalu Uisneno Anah es Ho, muplenat nai ale fatun i hen fani utunu'." 4:4 Mes Yesus natae ma nak, "Antui nani bi sulat knino nak: Mansian anmoni ka al fa nok utunu' mes nok ale a'at le anpoi na'ko Uisneno In fefan." 4:5 Nalali te Nitu neki Yesus neu Yerusalem ma nahakeb nani anbi Ume Uisneno in penen. 4:6 Ma nak neu Yesus, "Kalu Uisneno Anah es Ho, tokleit nai meu pinan nane, fun antui nani bi sulat knino nak on i, 'Uisneno of anlelu In Ahake neno tunan neu Ko, he nat-nat Ko neki sin niman, he nati' Ho haem kais nastun neu fatu.' " 4:7 Mes Yesus natae ma nak, "Mes antui nani amsa bi Sulat Knino nak: Kais hom su' Ho Uisneno!" 4:8 Ma Nitu neki anteni Yesus neu nu'af mnanu es ma anlekan plenat pah pinan nok in masan neu Yesus. 4:9 Oke te Nitu nak neu Yesus, "Of au fe Ko ale i ok-oke, kalu Hom li'tu ma mubes neu kau." 4:10 Mes Yesus nak neune, "Muskot nai Nitu! Fun antui nani anbi sulat knino nak: Ho mes amli'tu ma mubes neu Ho Uisneno, ma antuthae In." 4:11 Oke te Nitu nao nasaitan Yesus ma ahake neno tunan sin neman ma antuthae Yesus. 4:12 Leka Yesus an nen nak anheke Nai Yohanes ma natam nani bi o'of, Yesus naskotu neu pah Galilea. 4:13 Ma In nao nasaitan kuan Nazaret ma namaika anbi Kapernaum anbi nifu ninen bi pah Zebulon ma Naftali, 4:14 he nati' natisi a'at le Mafefa Knino Nai Yesaya antui nani nak, 4:15 "Pah Zebulon ma pah Naftali, lalan neu tasi, Noe Yordan panin, Galilea, uf bian le kan tamaf nonot Yahudi sin ini, -- 4:16 uf le antoko bi mesokan, sin nit Meusine a'naek ma le atokos anbi mafo maten, Meusine nane an tana sin." 4:17 Bi neno nane Yesus na'uba In mepu ma an etun nak, "Mite'un nai hi nekam, fun Plenat Neno Tunan an haumaken!" 4:18 Ma leka Yesus fe nao natuin Nifu Galilea in ninen, In nit atifkai sin nua, esle' Nai Simon le antek nak Nai Petrus ma in olif Nai Andreas. Ma sin fe hen heken ika bi nifu nane, fun sin atoni atifkai ika. 4:19 Ma Yesus nak neu sin, "Aim nai ma mituin Kau, ma of Au unoina ki hem kifkai atoni." 4:20 Bi leku nane amsa sin nao nasaitan sin kifkai ma natuin Yesus. 4:21 Leka Yesus nao anfin, In nit anteni atoni nua ma oil tatan esle' Nai Yakobus nok in olif Nai Yohanes, Nai Zebedeus in anhin. Ma sin nok sin amaf Nai Zebedeus fe naleko kifkai anbi belo'. Mak Yesus no'en sin 4:22 bi leku nane amsa sin nasaitan belo' nok sin amaf ma natuin Yesus. 4:23 Ma Yesus In nao anfun pah Galilea ok-oke, fun nanoina sin anbi sin ume buat ma an etun sin lasi Knino Plenat Uisneno ma naleko ale a'menas ma a'lima'et anbi to nane. 4:24 Fun beno antom Yesus nasitbon neu pah Siria tal atoni namfau nem neun. Ma sin neki ale amenat le a'naben menas huma-huma. Le bian sin niut sae, bian an auma ma bian men ole, mes Yesus naleko sin. 4:25 Ma atoni namfau natuin Yesus, neman na'ko Galilea, ma na'ko Dekapolis, na'ko Yerusalem ma na'ko Yudea ma Noe Yordan panin.
5:1 Leka Yesus nit atoni namfau, In ansae neu tubu tunan ma antok. Oke te In asimo lasi sin nem neu In. 5:2 Ma Yesus nanoina sin nak: 5:3 "Ua alekot neu atoni le sin nahin nak sin ma'nuk ma al nafnek neu Uisneno, fun sin anbi Plenat Neno Tunan. 5:4 Ua alekot neu atoni le nekan ansusal, fun Uisneno of anhalin sin. 5:5 Ua alekot neu atoni nek baun, fun Uisneno of anfe neu sin sa' le In anba'an nani. 5:6 Ua alekot neu atoni le ansinmak hen mo'e natuin Uisneno In lomin, fun Uisneno of nahoeb neu sin. 5:7 Ua alekot neu atoni le nek ma namnau sin aon bian, fun Uisneno of a'nek ma namnau sin amsa. 5:8 Ua alekot neu atoni le nekan knino, fun of sin nahin Uisneno. 5:9 Ua alekot neu atoni le neki halan, fun antek sin nak anah-anah Uisneno. 5:10 Ua alekot neu atoni le ansutai mane'at natuin nanaoba Uisneno In lomin, fun sin anbi Plenat Neno Tunan. 5:11 Ua alekot neu ki leka sin nakle'at ki, anli'u ki, ma na'uab amle'ut neu ki natuin Au kanak. 5:12 Fun afi sin anli'u mafefa knino sin le nem nahunun ki onane amsa. Mimlil ma mimoek nai fun Uisneno naloitan baen anaek neu ki bi neno tunan." 5:13 "Hi masi ki neu pah pinan. Leka masi nane in min mali namneku he tamalib tafani teki sa' ka? In ka ma ota anteni fa so mak atpolin ma ateli taklati. 5:14 Hi meusine ki neu pah pinan. Kot le anhake anbi tubu tunan ka nabe'i fa he naninbon. 5:15 Fun katit fa atoni le notu paku oke te nabela anbi mako nupun, so mes antao nani neu tet paku he nati' antana sin abit ume nanan. 5:16 Onane amsa hi meusine so anpin anbi atoni sin matan, he nati' sin nit hi mo'et alekot ma naliatas hi Ama abit neno tunan." 5:17 "Kais hi mitenab mak: Au aum he uneku Nai Musa in Plenat Knino ma ale Mafefa knino sin lasi noina. Fun Au ka aum fa he uneku ani mes Au aum he utisi ani. 5:18 Mes Au ak ki: Leka neno tunan ma pah pinan i fe ka namnekuf, of tuises ai taka an es, na'ko Plenat Knino ka nabe'i fa he namneku leka ale sa' nane fe ka namtisif. 5:19 Es nane kalu sekau antanhai Plenat Knino nane maski lasi an-ana, ma nanoina nani neu atoni bian, of in nabau bi Plenat Neno Tunan. Mes kalu sekau in natis Plenat Knino nane ma nanoina nani neu atoni bian of in nanae bi Plenat Neno Tunan. 5:20 Mes Au ak ki: Hi of kam tamaf meu Plenat Neno Tunan, leka hi ka mitis fa Uisneno In lomin amnesin ale ahin Plenat Knino ma atoni Farisi sin. 5:21 Him nen milali a'at le aneut nani neu hit mnais unu sin nak: Kais hi mimate; sekau le namate of napeni hukum. 5:22 Mes Au ak ki: Sekau le nato'an in bian mes napeni sesu; ma sekau na'akan in bian; mes'okan of nokan neu Tolas Alef Lasi sin matan; ma sekau nak neu atoni bian: Amonot, of anpolin natam anbi ai maputu in balan. 5:23 Es nane, leka ho meki ho fua tulu neu baki tulu ma ho mumnau mit ho mui lasi sa' mok ho bae, 5:24 mubela nai ho fua tulu nane bi baki tulu matan ma amnao hem halan nekaf mokan, oke te hom fani he mutulu ho fua tulu nane. 5:25 Ma amhalan nekaf nai mok ho musu leka fe hom nao mokan bi lanan atnanan, he nati' ho musu nane kais nana'at ko neu alef lasi ma alef lasi nana'at ko neu apao o'of ma apao o'of natam ko neu o'of. 5:26 Au ak ki: Mumnau nai, of ho kam poif, leka ho kam baen fa ho tusa tal natflek. 5:27 Him nen milali a'an le nak: Kais hi mapaisa. 5:28 Mes Au ak ki: Sekau le ankiso nit bife ma ansinmakan bife nane, in mapaisa nalali nokan bi in nekan. 5:29 Leka ho matam ne'u neki sanat neu ko, amloit mupoitan ma ampolin mani, fun leko nesi ho aom ta'un mese namle'u, na'ko anpolin natam ho aom noba temen neu ai maputu in balan. 5:30 Leka ho nimam ne'u neki sanat neu ko, amketu mfekan ma ampolin mani, fun leko nesi ho aom lokif mese namle'u, na'ko anpolin natam ho aom noba teme neu ai maputu in balan. 5:31 Ma antui nalali a'an nak: Sekau hen baken in fel so anfen sul baken neun. 5:32 Mes Au ak ki: Sekau hen baken in fel so al natuin mapaisa ai lasi kake, in nafani in fel neu lasi kake; ma kalu sekau in mafe nok bife baken nane, in mapaisa amsa. 5:33 Ma him nen milali amsa a'at neu hit mnais unu sin nak: Kais mitotan lasi supat, mes mitiab mani hi lasi manta'en bi Uisneno In matan. 5:34 Mes Au ak ki: Kais him sup meki neno tunan, fun nane Uisneno In mau toko kun, 5:35 meki pah pinan amsa kaisa, fun nane Uisneno In mau haen telin kun, ma neki Yerusalem amsa kaisa, fun Yerusalem nane Kesel Amnanut In kot; 5:36 ma kais hom sup meki nakam amsa, fun ho ka mu'if kuasat he mo'e ho nakfunu mese hen muti ai metan. 5:37 Mes kalu hi uab namneo, mak: namneo, mes kalu kahaf mak: kahaf, fun uab le nesi na'ko nane, nitu ini. 5:38 Ma him nen milali a'at nak: Mataf anseka mataf, nisif anseka nisif. 5:39 Mes Au ak ki: Kais him tobe amle'ut neu atoni le anmo'e amle'ut neu ki, so mak es anpas ko neu su'im ne'u, muklelo su'im li'neu hen pasan teni. 5:40 Kalu sekau natam lasi neu alef lasi natuin anlomi ho sobalu, leko amfem teni ho tainusat fafon. 5:41 Ma kalu es naseke ko hem nao mokan kilo mese, leko hom nao mokan kilo nua. 5:42 Hom fe nai neu sekau le antoti sa' neu ko, ma kais hom tite sekau le hen totin lapat sa neu ko. 5:43 Fun him nen milali a'at le nak: Him nek hi aom bian ma mimusu mok hi musu sin. 5:44 Mes Au ak ki: Him nek hi musu nai ma amonen toti neu sin le anhamu'i ki. 5:45 He nati' him fani anah-anah na'ko hi Ama abit neno tunan. Fun In es nasaeb manas neu atoni amle'ut ma atoni alekot ma nasanut ulan neu atoni alekot ma atoni amaufinut. 5:46 Fun leka him nek atoni le a'nek ki of hi mipeni sa' na'ko Uisneno? Fun ale atoni asimo noni poni amsa anmo'e onane? 5:47 Ma leka him hosen al hi bae sin, hi mo'e anesit sa'na'ko ale atoni bian ka? Fun atoni le ka nahin Uisneno sin amsa anmo'e onane? 5:48 Fun onle hi Ama abit neno tunan In nek ale atoni ok-oke ma kan betif humaf, hi amsa mes amo'e onane."
6:1 "Mimnau nai, kais hi mo'e Plenat Knino bi amfaut sin matan he nati' sin nit ki, fun kalu onane hi ka mipeni fa baen na'ko hi Ama abit neno tunan. 6:2 Es nane leka ho mo'e amnaut neu amamu'it sin, kais hom etun lasi nane neu es am es, onle asafanut sin anmo'e nani bi sin ume buat ma anbi lalan he nati' anpules sin. Mes Au ak ki: Nane sin ansimo nalali baen. 6:3 Mes leka ho mo'e lasi amnaut, ho nimam a'li kais nahin ho nimam a'ne'u anmo'e sa. 6:4 Mes hom fe mani nok a'tol-tolo' ai kol-kolo he nati' ho Ama le In nit anbi tolo' ai kolo of antoeb nani neu ko." 6:5 "Ma leka him onen toti, kais him onen onle a'asafanut sin. Fun sin anlomi hen onen toti so anhake anbi ume buat ma anbi lal seki sin he nati' ale atoni nit sin. 6:6 Mes leka hi hem onen toti, amtam nai meu hi ke'an ma am ek eno ma amonen toti neu hi Ama abit bale tolo' ai kolo. Ma hi Ama le In nit lasi tolo' ai kolo nane of antoeb nani neu ki. 6:7 Ma leka him onen toti kais him noni uab he namnanu onle atoni le ka nahin Uisneno. Fun sin natenab nak natuin sin uab namfau anbi onen totis, of ansimo sin. 6:8 Es nane kais hi mo'e onane, fun hi Ama nahin nak him nukan lasi sa', nahun na'ko le hi hem toti neu In. 6:9 Onane te him onen toti nai mak on i: Hai Ama abit neno tunan, Uisneno Anesit Afinit. Hai mimtausan Ho kanam knino. 6:10 Fun Ho, nai Kesel So Ho muplenat anbi pahpinan, ma hai mituin Ho lomim onle anbi neno tunan. 6:11 Mutis ma muno'u hai mnahat anbi neno i 6:12 ma amsako kai hai sanat, onle hai amsako milali hai aom bian sin sanat; 6:13 ma kais mutam kai neu lasi su'at, mes mufetin kai na'ko amle'ut in tuaf. Fun Ho ana' Plenat, akuasat, apinat talan te nabal-bal. Amin. 6:14 Fun leka him sako atoni sin sanat, hi Ama abit neno tunan of ansako ki hi sanat amsa. 6:15 Mes leka hi kam sako fa atoni sin sanat, hi Ama amsa of kan sako fa hi sanat." 6:16 "Ma leka hi minahom-milelnom kais mimofu hi human onle a'asafanut sin. Fun sin namle'u sin human he nati' ale atoni nit sin nak sin nanahok. Mes Au ak ki, sin ansimo nalali sin baen. 6:17 Mes leka ho he munahom, amkili nakam ma mumeu humam; 6:18 he nati' kais es nit ko nak ho munahom, mes al ho Ama abit bale tolo' ai bale kolo. Mes ho Ama le nit ko bi bale tolo' ai bale kolo of antoeb ko." 6:19 "Kais hi mibuaba maus bi pah pinan, le ap-apu ma nutus nale'un nani ma abakat anpukai ume ma nabak neki. 6:20 Mes mibuaba nai hi maus bi neno tunan, le naem ma nutus ka nale'un nani fa ma abakat kan pukai nani fa. 6:21 Fun hi maus anbi me, hi nekam amsa anbi nane. 6:22 Ho matam anfani paku neu ho aom. Kalu ho matam anpin, ansinek ho aom. 6:23 Mes kalu ho matam namle'u ho aom nane anmesok. Es nane leka paku le anbi ho aom anmesok of ale sa'mesokan oke. 6:24 Katit fa atoni mese le hen tuthae tuan nua. Fun kalu kahat of in kan lomif es ma in nek es, ai in anfutun nekan neu es ma kan sian fa es. Hi ka mibe'i fa hem tuthae Uisneno ma maus pah pinan." 6:25 "Es nane Au ak ki: Kais mi'unu neu hi monim, he hi miah sa ai he minu sa', ma kais mi'unu neu hi aom of hem pake sa'. Ati hi monim nane ka nesin fa mnahat ma hi aom nane ka nesin fa bael pake ka? 6:26 Kius mit ale kolo aplelet neno tnanan sin kan senan fa ma ka nonun fa ma ka nabua fa sa' neu sin lopo mes hi Ama abit neno tunan naloitan sini mnanat. Ati hi kam nesin fa ale kolo nane sin ka? 6:27 Sekau anbi ki le natuin lasi a'unu neu monit nabe'i hen lut in uan maski onle niman atli'an ka? 6:28 Ma nansa hi mi'unu neu bael pake ka? Mail mit uk-uki le anmoni bi lele, sin kan mepun fa ma ka nasunan fa abas, 6:29 mes Au ak ki: Nai Salomo nok in masan apinat kan pakef alekot onle uk-uki nane in masan. 6:30 Kalu Uisneno namasab nani ma'u anbi lele le neno i anmoni ma noka of anpolin natam neu ai, onane of in namasab nesin ki. Meski natuin hi nekam ka nateb knino fa. 6:31 Es nane kais hi nekam na'unu ma hi mak: Hai he miah sa' ka? Ma he minu sa' ka? Ma hai hem pake sa' ka? 6:32 Fun ale atoni le ka nahin Uisneno sin nami ale lasi nane. Mes hi Ama abit neno tunan In nahin, nak him nukan ale lasi nane sin. 6:33 Es nane hi maim mihunun plenat neno tunan ma anmo'e In lomin of In anfe ki ale lasi bian amsa. 6:34 Onane te kais hi mi'unu hi nekam neu neno noka, fun neno nane nok kun in susal. Ma kais amsato amteni susal neno i, fun susal neno i noba."
7:1 "Kais him fain alef lasi neu es, he nati' kais Uisneno anfain alef lasi neu ki. 7:2 Fun onle him lefi bian sin lasi, onane amsa Uisneno of anlefi ki hi lasi. Ma atnais le him tai mekin neu atoni bian, of Uisneno antai ki nekin amsa. 7:3 Nansa ho mit hau lapu' anbi ho bae in matan, mes hau pisa anbi ho matam ho ka muhinef ka? 7:4 Leka me ho mak neu ho bae: Maut fe upoitan ko hau lapu' es ho matam mes hau pisa es ho matam kun. 7:5 Hoi asafanut, mupoitan muhunun hau pisa na'ko ho matam, oke te ho mit nok alekot he mupoitan hau lapu' na'ko ho bae in matan." 7:6 "Kais him fe bale knino neu asu he nati' kais asu naklelon nem ma ansau ki. Ma kais him polin baun kael usaf neu fafi, he nati' kais fafi anteli nale'un. 7:7 "Ma him toti nai, of anfe ki; hi mami nai, of hi mipeni; him leku eno nai of nasoitan nani neu ki. 7:8 Fun atoni le antoti of ansimo, ma atoni le in naim sa' of napeni ma atoni le anleuk eno of nasoitan eno neun. 7:9 Ai anmu'i atoni anbi ki le in anah antoti utunu' oke te in anfen fatu, 7:10 ai in antoti ika oke te anfene kauna ka? 7:11 Es nane kalu hi on atoni asanat le hi mihin ma amfe lasi alekot neu hi anhin, sa' anteni hi Ama abit neno tunan! Of In anfe lasi alekot neu sin le antoti neu In." 7:12 "Ma ale lasi sa' le him lomi he nati' atoni anmo'e nani neu ki, hi mo'e mani amsa onane neu sin. Fun nane Plenat Knino ma Mafefa knino sin sulat in nesan kun. 7:13 So amtam nai mutuin eno malenat nane, fun eno le anaek ma lalan le anmainua an ali neu amle'ut, ma atoni namfau le sin tam natuin, 7:14 mes eno le an-ana ma lalan le anmalen an ali neu honis, ma atoni ka namfau fa le napeni nan." 7:15 "Him panat nai hi aom na'ko ale mafefa mo'el sin le nem neu ki on bibi kase, mes sin nekan nane on aus fui abulalut. 7:16 Mes of hi mihin sin natuin sin mo'et. Nabe'i ka atoni anseu tanu'an sena in fuan na'ko kisan, ai anseu bubuk fuan na'ko put-puta ka? 7:17 Onane amsa ale hau alekot nafua fuan alekot ma hau ka alekot nafua fuan ka alekot. 7:18 Leka me hau alekot he nafua fuan amle'ut, ai hau ka alekot he nafua fuan alekot. 7:19 Ma ale hau le ka nafuaf fuan alekot, of anote nisan ma anpolin neu ai. 7:20 Onane, ale mafefa mo'el sin, of hi mihin sin na'ko sin mo'et. 7:21 Ka ale atoni le no'en Kau ma nak: Uisneno, Uisneno! Of sin antam neu Plenat Neno Tunan, mes in kun le anmo'e natuin Au Ama abit neno tunan In lomin. 7:22 Fun bi neno amsoput, of atoni namfau le nak neu Kau nak: Uisneno, Uisneno, ait hai ka mibeno fa Ho kanam ma amli'u ale nitu anbi Ho kanam ma anmo'e lasi amkakat namfau anbi Ho kanam ka? 7:23 Ma anbi neno nane of Au utonan sin muti ma nak: Au ka uhin Kif! Miskot nai mi'ko Kau, ale hi anmo'e lasi amle'ut!" 7:24 "Ale atoni le amnen Au a'ak ma anmo'e natuin, in onle atoni ahinet le nahakeb in ume bi faut putun. 7:25 Oke te ulan ansanu ma noel ansae nalali te anin anfu ume nane, mes ume nane ka natselaf fun nahakeb anbi faut putun. 7:26 Mes ale atoni le amnen Au a'ak ma kan mo'e natuinef, in onle atoni amonot le nahakeb in ume anbi snaen. 7:27 Ma leka ulan ansanu ma noel ansae oke te anin anfu ume nane, of ume nane natsel kun ma namle'u naek." 7:28 Ma leka Yesus nasopu In a'at i, ale atoni amfaun sin namkakan natuin Yesus In lasi noina nane, 7:29 fun In nanoina sin neki kuasat ma ka on fa Ahin Sulat sin.
8:1 Leka Yesus ansanu na'ko tubu nane, atoni namfau nem natuin In. 8:2 Oke te atoni men poko mese nem neu Yesus, ma nabes neun ma nak, "Usif, kalu Hom lomi, muleko kau au menas i." 8:3 Ma Yesus nenu In niman ma anpoho atoni nane ma nak "Au lomi, ho muleok nai." Ma bi leku nane amsa atoni nane naleko na'ko in men poko. 8:4 Oke te Yesus nak neune, "Mumnau nai, kais hom etun lasi i neu es, mes hom nao nai, mulile ho aom neu ana' lasi fuat ma mutulu ho fua tulu le Nai Musa anlek nani, on saksi mese neu sin." 8:5 Leka Yesus antam neu Kapernaum, solalus nakaf mese nem neun ma antoti nak, 8:6 "Usif, au ate antup es ume, fun in aon ano'le ma in sutai menas ka nabe'if." 8:7 Ma Yesus nak neune, "Of Au et he uleko." 8:8 Ma solalus nakaf natae ma nak, "Usif, au ka tamaf ota he simo Ko bi au ume, so mukua Ho a'am fefa mese of au ate nane naleko kun. 8:9 Fun au amsa au sutai plenat ma au solalus amsa ansutai au plenat. Leka au ak neu solalus nane ak: Hom nao nai! Oke te in nao, ma au aka teni neu es: Aum meu i! Oke te in nem, ai au ak neu au ate ak: Hom mepu i!, oket in anmepu." 8:10 Leka Yesus In nen lasi nane te, In namkak ma nak neu sin le nao nokan, "Au ak ki, tebes nek ateb knino ba'u i, Au fe ka upeni fa anbi atoni mese na'ko to Israel sin. 8:11 Mes Au ak ki: Anmu'i atoni namfau of neman na'ko neno Saen ma neno Tesan ma antokon hen bukae nok Nai Abraham, Nai Ishak ma Nai Yakub anbi Plenat Neno Tunan. 8:12 Mes ale atoni le hen fani Uisneno In to of anpolin napoitan sin neu mesokan. Ma anbi bale nane sin ankae ma neku nisin." 8:13 Oket Yesus nak neu solalus nakaf nane ma nak: "Hom nao nai, fun of anbol neu ko onle ho nekam nateb nalali." Ma bi leku nane amsa in ate naleko kun. 8:14 Ma Yesus antam neu Nai Petrus in ume ma In nit Nai Petrus ain babaf antup fun anmainin. 8:15 Oke te Yesus In na' bife nane ma in naleko kun. Oke te in anfen ma antuthae Yesus. 8:16 Fun leka neno hen faien, sin neki atoni aniut saes sin nem neu Yesus ma In anli'u napoitan ale smanan nitu sin neki In a'an ma naleko ale amenat bian amsa. 8:17 Fun Yesus anmo'e ale lasi nane he nati' natisi a'at le Mafefa Knino Nai Yesaya an etun nani nak, "Of In es anloi hit mane'at ma ansutai hit menas." 8:18 Leka Yesus nit atoni namfaun funam natef In, oke te In anlelu sin hen lakan neu nifu panin. 8:19 Oke te atoni Ahin Sulat mese nem neu Yesus ma nak, "Am kulu, au he utuin Ko neu me-me le Ho hem nao meun." 8:20 Mes Yesus nak neu in nak, "Asu fui anmu'i boia, ma kolo anmu'i kuna, mes Anmone Pah To kan anmu'i fa bale hen tup." 8:21 Ma In asimo lasi mese nak neun, "Mufetin kau he au nao fe he sub au ama." 8:22 Mes Yesus nak neune, "Mutuin Kau nai, ma maut he atoni amates ansub sin atoni amates." 8:23 Ma Yesus ansae neu belo'; ma In asimo lasi sin nao nokan. 8:24 Ma naskek onane te anin slutuf anbol anbi nifu nane talan te okin antepo belo' nane, mes Yesus antup. 8:25 Oke te Yesus In asimo lasi sin neman ma anpo' nafena Yesus ma nak, "Usif, ambab kai, hit tamle'uen." 8:26 Ma Yesus nak neu sin, "Nansa hi mimtau, hi nekam ka nateb knino fa ka?" Onane te Yesus anfen ma nakain anin ma nifu nane, tal nifu nane namne nunfin. 8:27 Ma ale atoni nane sin namkakan ma nak, "In atoni sa'an ka tal anin ma nifu natuin In plenat?" 8:28 Leka sin nem ante nifu panin bi pah Gadara, atoni aniut saes nua neman na'ko naukel ne nae'ku nok Yesus. Sin nua sin nek maunun matane tal katit fa atoni le he natuin lalan nane. 8:29 Ma sin anhunun ma nak, "Ho mu'i lasi sa' mok kai, hoi Uisneno Anmone? Ait Ho aum meu i he mule'un kai, nahunu na'ko in leku ka?" 8:30 Fun ka na'lo fa bale nane anmu'i fafi pukan naek esle' namin mnahat. 8:31 Ma ale nitu nane sin antoti neu Yesus ma nak, "Bait Ho hem li'u kai, so Hom lelu kai hem tam meu ale fafi nane sin." 8:32 Ma Yesus nak neu sin, "Him nao nai!" Oket ale nitu sin anpoi ma antam neu ale fafi nane sin. Ma ale fafi nane sin anmofun na'ko kefan antaman neu nifu nanan ma anleman maten ok-oke. 8:33 Ma atuku fafi nane sin naenan nao neu kot, ma an etun lasi nane, ma an etun amsa antom atoni aniut saes sin nane. 8:34 Oke te ale atoni abit kot nane sin anpoi ma ansenu Yesus. Ma leka sin nae'ku nokan, sin antoti he nati' In nao nasaitan sin pah nane.
9:1 Nalali te Yesus ansae neu belo' ma anlak neu nifu panin. Ma In nem ante In kuan. 9:2 Ma atoni sin neki atoni men ole mese nem neu Yesus le antup bi In hala. Leka Yesus nit sin nekan ateb knino, In nak neu atoni men ole nane nak, "Mutetu ho nekam, Au anah, ansako nalali ho sanat sin." 9:3 Mes atoni Ahin Sulat sin fauk natenab bi sin nekan nak, "In na'uab nale'un Uisneno." 9:4 Mes Yesus nahin nak sin natenab sa'bi sin nekan es nane In nak, "Nansa' hi mitenab lasi amle'ut bi hi nekam? 9:5 Lasi me es anmanafa nesi, tak: Ansako nalali ho sanat, ai tak: Hom fen nai ma amnao nai ka? 9:6 Me he nati' hi mihin, nak Anmone Pah To anmu'i kuasat bi pah pinan i hen sako sanat" -- ma In nak neu atoni men ole nane --, "Hom fen nai, maiti ho hala tupa ma amfani nai meu ho ume!" 9:7 Ma atoni nane in anfen ma in anfani. 9:8 Leka ale atoni sin nit lasi nane, sin namtaun ma naliatas Uisneno le In anfe kuasat onane neu mansian. 9:9 Leka Yesus nao na'ko bale nane, In nit atoni mese kanan Nai Matius antoko bi ume noni poni. Oke te In nak neune nak, "Mutuin Kau nai." Ma Nai Matius anfen ma natuin Yesus. 9:10 Ma leka Yesus anbukae bi Nai Matius in ume, ale atoni asimo noni poni ma atoni asanat sin neman ma anbukae nok Yesus ma In asimo lasi sin. 9:11 Ma leka atoni Farisi sin nit lasi nane te, sin nak neu Yesus asimo lasi sin nak, "Nansa' es hi kulu anbukae nok atoni asimo noni poni sin ma atoni asanat sin?" 9:12 Ma Yesus In nen uab nane ma In nak, "Atoni aomina sin ka nami fa apalolit, so al atoni amenat." 9:13 Him nao nai ma minoina a'at le atui nani nak, "An lomi lasi amnaut ma ka lomi fa fuat. Fun Au aum he ka o'en fa amneot sin mes he o'en asanat sin." 9:14 Nalali te nai Yohanes in asimo lasi sin nem neu Yesus ma nak, "Nansa', es hai mok atoni Farisi sin minahom, mes Ho asimo lasi sin kahaf?" 9:15 Mes Yesus natae sin nak, "Nabe'i ka atoni amafe fe'u in ini sin ansusal, leka amafe fe'u nane fe nabua nok sin? Leka in neno ante ma naiti amafe fe'u nane na'ko sin, bi leku nane amsa of sin nanahok. 9:16 Katit fa atoni mese le anlape in sobalu mna'neki pilu fe'u, kalu kahat pilu fe'u nane anpisu sobalu mna'nane ma natpius nunfin. 9:17 Onane amsa ka tesi fa tua mina amtasa fe'u neu aul pasu mna', kalu kahat aul pasu nane natpisu ma tua mina amtasa nane natop. Ma so amtesi tua mina amtasa fe'u neu aul pasu fe'u amsa he nati' nuasin naleko nabala." 9:18 Leka Yesus fe namolok nok sin onane te, nakaf ume buat nem ma nabes nue Yesus nak, "Au anfeto fe anmate, mes Hom koenom aum ma ampoho meki Ho nimam, of in anmoni." 9:19 Oket Yesus anfen ma nok In asimo lasi sin nao natuin atoni nane. 9:20 Ma bi leku nane amsa anmu'i bife mese le napeni men sopol ton bo'es am nua, anfonat nu anhaumak Yesus na'ko kotin ma anpoho Yesus In sobalu betkone in fukan. 9:21 Fun in natenab anbi in nekan nak, "Lamu au poho In sobalu betkone, of au uleko kuk." 9:22 Mes Yesus naklelon ma ankiso in ma nak nuene, "Hatane ho nekam nai, Au anah, fun no nekam ateb knino es naleko ko." Ma bi leku nane bife nane naleko kun. 9:23 Leka Yesus ante nakaf ume buat in ume ma In nit atoni afu' feku sin ma atoni namfau le naslutu, 9:24 Yesus nak neu sin, "Him poi nai, fun anah i kan matef mes antup." Mes sin alsin anmanis Yesus. 9:25 Leka ale atoni sin anpoin, Yesus antam ma ana' anah nane niman, oke te anah nane anfen. 9:26 Ma beno nane nasitbon neu pah nane funam natef. 9:27 Leka Yesus nao anfin bale nane, atoni matfolo nua nem natuin ma anhunun nak, "Mumnau kai fe, Nai Daud sufan." 9:28 Leka Yesus antam neu ume mese, atoni matfolo nane sin nua sin nem neu In ma Yesus nak neu sin, "Hi nekam nateb knino ka, nak Au ube'i he uleko ki ka?" Ma sin natae nak, "Koi Usi, hai nekam nateb." 9:29 Oke te Yesus anpoho sin matan ma nak, "Anbol neu ki natuin hi miteb mani." 9:30 Ma sin matan nit anfan. Ma Yesus anba'an matane neu sin nak, "Panat nai, kais es nahin lasi i." 9:31 Mes sin anpoi ma an etun lasi nane neu pah nane funam natef. 9:32 Leka atoni afolot sin nua sin fe anpoin, sin neki atoni amonot mese le aniut sae nem neu Yesus. 9:33 Ma leka Yesus anli'u nitu nane, atoni amonot nane in na'uab kun. Mes atoni amfaut nane sin namkakan ma nak, "Hai fe ka mitaf lasi i anbi Israel." 9:34 Mes atoni Farisi sin nak, "In anli'u nitu neki kuasat nitu sin anakaf." 9:35 Ma Yesus In nao anfun ale kot ma kuan. In nanoina anbi ale ume buat ma an etun lasi knino Plenat Neno Tunan fun naleko ale menas ma naneku ale manane. 9:36 Ma leka In nit ale atoni amfaut nane, Yesus nekan anmof ma namnau sin fun sin anhaen ma nanukbok onle bibi kase le kan mu'if atukus. 9:37 Mes Yesus nak neu In asimo lasi sin, "Abut nane naek kun, mes atoni ameput ka namfauf. 9:38 Es nane amtoti nai neu abut nane in usin, he nati' In ansonu ameput neu abut nane."
10:1 Ma Yesus no'en In asimo lasi bo'es am nua ma anfen sin kuasat hen li'u smanan nitu ma naneku ale menas ma manane. 10:2 Fun asimo lasi sin bo'es am nua sin kankenu esle': Ahunut Nai Simon le antek in nak Nai Petrus ma in olif Nai Andreas, ma Nai Yakobus, Nai Zebedeus in anmone ma in olif Nai Yohanes. 10:3 Nai Filipus ma Nai Bartolomeus, Nai Tomas ma Nai Matius asimo noni poni, Nai Yakobus, Nai Alfeus in anmone ma Nai Tadeus. 10:4 Nai Simon atoni Zelot ma Nai Yudas Iskariot le an aneb neu Yesus. 10:5 Ma Yesus ansonu In asimo lasi sin bo'es am nua ma anba'an neu sin nak, "Kais him nao neu pah uf bian le kan tamaf nonot Yahudi ai amtam neu kot atoni Samaria sin kuan. 10:6 Mes him nao nai meu ale bibi kase amnekut na'ko to Israel. 10:7 Him nao nai ma ametun nai mak: Plenat Neno Tunan anhaumaken. 10:8 Mileko amenat sin; mifena amates sin; miknino men poko sin; amli'u ale nitu sin. Fun him simo ka nok fa baen, es nane him fe amsa kaisa nok baen. 10:9 Kais hi meki noni mnatu ai noin muti ai noin molo anbi hi pasu futu. 10:10 Kais hi meki bukael anbi lalan, kais hi meki sobalu nua, penhae ai tes, fun atoni ameput mes napeni in baen. 10:11 Leka him tam neu kot ai kuan, hi mami atoni le anloim hen sium ki ma mimaika ambin tal him nao amten. 10:12 Leka him tam meu atoni in ume, him hosen sin meki tetus. 10:13 Leka sin an simo, of tetus nane an sanu neu sin, kalu kahaf tetus nane anfani nem neu ki. 10:14 Ma leka katif fa atoni mese hen simo ki ma ka nenaf hi uab, him poi nai, mai misaitan ume ai kot nane ma amtekal afu na'ko hi haem. 10:15 Mes Au ak ki: Of bi neno lef lasi, pah Sodom ma Gomora sin sutais nane anmakafa nesin kot nane." 10:16 "Him kiso, Au sonu ki on bibi kase neu aus fui sin atnanan, es nane so hi manoe on kauna ma nek muti on kol ot kase. 10:17 Mes him panat nai neu ale atoni; fun bian of nana'at ki neu tolas alef lasi ma anhamu'i ki anbi sin ume buat. 10:18 Ma natuin Au kanak of sin antopu ki neu amu'i kuasat sin ma neu kesel sin matan on saksi mese neu sin ma neu ale atoni le ka nahin Uisneno. 10:19 Leka sin nana'at ki kais hi mi'unu neu he mi'uab onme ma he mak sa', fun ale lasi nane of anfe nani neu ki bi leku nane amsa. 10:20 Fun hi es ka mi uab fa, mes hi Ama in Smanan Knino es na uab anbi ki. 10:21 Ma of atoni nana'at in es he namate, onane amsa amfes neu in anah. ma anah-anah of anbulalun neu sin amaf ma sin ainaf ma namate sin. 10:22 Ma ale atoni of kan lomi ki fa natuin Au kanak. Mes atoni le nalan tal namsopun of napeni honis. 10:23 Leka anhamu'i ki bi kot es, hi maen meu kot bian, fun Au ak ki: Nahunu na'ko hi ka misopu fa ale kot Israel nane, Anmone Pah To ankoenon nemen. 10:24 Asimo lasi mese in ka nesin fa in kulu ai ate mese in ka nesin fa in tuan. 10:25 So mak asimo lasi mese anfani on in kulu ma ate mese anfani on in tuan noba nai. Kalu ume tuaf nane sin antek nak Beelzebul, sa' anteni neu in ume nanan sin. 10:26 Es nane kais hi mimtausan sin, fun katit fa lasi sa' es le matobe le of ka natfaif ma katit fa lasi sa' es le natolo le of ka mahine fa. 10:27 Sa' le Au uton ki, anbi mesokan, hi miton nai anbi meusine; ma sa' le naseo nani neu hi lukem, him kakan nai na'ko ume penen. 10:28 Ma kais hi mimtausan sin le he namate hi aom, mes kan mu'in fa kuasat he namate hi smanam; so mimtausan amnesin In le anmu'i kuasat he nale'un hi aom ma hi smanam anbi ai maputu balan. 10:29 Ati ka nasosa fa kol ane nua loit mese ka? Mes katit fa kolo mese na'ko sin le anmofu neu nain ankoit hi Ama In lomin. 10:30 Ma hi nakam funun amsa ansoi nani sin ok-oke. 10:31 Es nane kais hi mimtau, fun hi upam nesin ale kolo ane nane sin. 10:32 Ale atoni le nahin Kau bi mansian sin matan, Au amsa of uhin sin bi Au Ama abit neno tunan In matan. 10:33 Mes sekau le natotan Kau bi mansian sin matan, Au amsa of utotan sin bi Au Ama abit neno tunan In matan." 10:34 "Kais hi mitenab, mak Au aum he eki halan nekaf bi pah pinan; Au aum ka eki fa halan nekaf mes Au eki suni. 10:35 Fun Au aum he bati atoni na'ko in amaf, anbife na'ko in ainaf, nanef na'ko in beif, 10:36 ma le hen fani musu es le ale atoni anbi ume nanan sin. 10:37 Sekau le a nekan nesin in amaf ma in ainaf na'ko Kau, in kan tamaf ota neu Kau; ma sekau le a'nekan nesin in anmone ai in anfeto na'ko Kau, in kan tamaf ota neu Kau. 10:38 Sekau in kan loif in hau nehe ma natuin Kau, in kan tamaf ota neu Kau. 10:39 Sekau le natau in monin, of in naneku in monin, ma sekau le naneku in monin natuin Au kanak, of in napeni nani. 10:40 Atoni le ansimo Ki, in ansimo Kau. Ma atoni le ansimo Kau, in ansimo In le ansonu Kau. 10:41 Atoni le ansimo mafefa knino natuin in mafefa knino, of in ansimo mafefa knino in baen, ma sekau le ansimo atoni alekot natuin in atoni alekot, of in ansimo atoni alekot in baen. 10:42 Sekau le anfe oe manikin maski kui mese neu atoni ka makana i sin es, natuin in Au asium lasi, Au ak neu ki: Tebes in baen nane of ka namneku nitaf."
11:1 Leka Yesus anba'an nalali In asimo lasi sin bo'es am nua, In nao na'ko bale nane he nanoina ma an etun Lasi Knino anbi ale sin kot. 11:2 Leka Nai Yohanes Aslanit anbi o'of amnen antom Yesus Neno Anan In mepu, 11:3 oke te anlelu in asimo lasi sin he natan Yesus nak, "Ho es amnemat nane ka, ai hai hem pao amteni atoni bian ka?" 11:4 Mes Yesus natae sin ma nak, "Him nao nai ma mitonan Nai Yohanes sa' le him nen ma hi mit: 11:5 mat folo sin nit anfani, hae hela sin anfen ma anaon, men poko sin naknino anfani, luke tono sin an nenan, amates anfen anfani ma an etun Lasi Knino neu amamu'it sin. 11:6 Ma ua alekot neu atoni le nekan ka nao'ni fa ma antite Kua." 11:7 Leka Nai Yohanes in asimo lasi sin anaon, Yesus na'uab neu atoni amfaut nane antom Nai Yohanes nak, "Hi hem nao meu mnela paha snaen neu sa' ka? Hem kiso petu le anin anfu neum nema ka? 11:8 Ai hi hem nao neu sa' ka? He kiso atoni le anpake bael amasat ka? Atoni le anpake bael amasat in balan es usif in sonaf. 11:9 Es nane him nao neu sa' ka? He kiso mafefa knino ka? Namneo, mes Au ak ki, nesi na'ko mafefa knino. 11:10 Fun antui nani antom in nak: Kiso nai, Au lelu Au haef he nao nahunun Ko, in of naloitan Ho lanan bi Ho matam. 11:11 Au ak ki: Fun sin le bife nahoni sin katit fa atoni mese le nanae nesin Nai Yohanes Aslanit, mes atoni abaut bi Plenat Neno Tunan nanae nesin Nai Yohanes Aslanit. 11:12 Na'ko Nai Yohanes in nenon talan te tomas i, sin nabeoba Plenat Neno Tunan ma atoni le nabeoba nani in nami he nasik nan. 11:13 Fun ale mafefa knino ma Nai Musa in sulat nabeno nani tal Nai Yohanes 11:14 ma -- kalu him lomi hem simo mani -- esle' Nai Elia le of he nem. 11:15 Atoni le maluke, so in natnin nai! 11:16 Au he uleta batan i eki sa' ka? Sin maleta onle anhin le antokon bi masa ma na'uab neu sin bian ma nak: 11:17 Haim fu feku neu ki, mes hi ka mibso' of, haim si sikoli mes hi kam kuluf. 11:18 Fun Nai Yohanes nem, in ka nah ma ka ninuf ma sin nak: In niut sae. 11:19 Namuni te Anmone Pah To nem, In bukae ma ninu ma sin nak: In atoni apalu ma amninut, masoba nok atoni asimo noni poni sin ma atoni asanat sin. Mes Uisneno In hinen namneob nani na'ko In mepu. 11:20 Nalali te Yesus nabokan ale kot, le In mo'e lasi amkakat namfau anbin mes sin ka nate'un fa sin nekan ma nak, 11:21 "Amle'ut neu ko Khorazim! Amle'ut neu ko Betsaida! Fun bait afi lasi amkakat sin anbol bi Tirus ma Sidon onle anbol bi hi atnanam oni sin nate'un nalali sin nekan ma ankulun. 11:22 Mes Au ak ki: Bi neno lef lasi of Tirus ma Sidon sin sutais anmanafa nesin hi sutais. 11:23 Ma ho Kapernaum, he na'aiti ko ante neno tunan ka? Kahaf, of nasanut ko ante amates sin balan. Fun bait afi ale lasi amkakat anbol bi Sodom onle anbol bi hi atnanam, kot nane oni anhake nabala tal neno i. 11:24 Mes Au ak ki: Bi neno lef lasi pah Sodom in sutais of an manafa nesin ho sutais." 11:25 Bi leku nane Yesus nakua a'an ma nak: "Au u'tulu nekak neu Ko, Ama, Uisneno tunan ma pah pinan, fun ale lasi nane Ho mutolo sin neu atoni maneka ma atoni ahinet, mes Ho mulile neu atoni abaut sin. 11:26 Koi Ama, Ho lomim onane kun. 11:27 Ale lasi nana'at nani neu Kau na'ko Au Ama ma katit fa atoni mese le nahin Anmone al Amaf, ma katit fa atoni mese le nahin Amaf nane al Anmone ma atoni le Anmone nane anlomi he nalile nani neun. 11:28 Aim nai meu Kau, ale hi ahaet ma aloi mafena, of Au fe ki snasat. 11:29 Mituin nai Au plenat sin ma minoina na'ko Kau, fun Au nek manone ma nek baun Kau ma hi monim of napeni snasat. 11:30 Fun plenat le Au fe nane neki halinat ma Au baut nane anmanaf."
12:1 Bi neno nane, Neno Snasat, Yesus nao natuin lele aen kase atnanan. Fun In asimo lasi sin namnahan, sin anhetun aen kase ma anbukae. 12:2 Mes leka atoni Farisi sin nit lasi nane te sin nak neu Yesus ma nak, "Kiso mit Ho asimo lasi sin anmo'e sa' le ka nabe'i fa hen mo'e nani bi Neno Snasat." 12:3 Mes Yesus natae sin nak, "Ait hi kam soi mitaf sa' le Nai Daud anmo'e, leka in ma in amnokat sin namnahan. 12:4 Ma sin antam neu Ume Uisneno ma sin anbukae utunu' atnatas le ka nabe'i fa he sin anbukae nani, fun in ma amnokat sin amsa kahaf, so mak al ana' lasi fuat sin? 12:5 Ait him kam soi mitaf Nai Musa in sulat, nak bi ale Neno Snasat, ale ana' lasi fuat le anmepu bi Ume Uisneno sin antanhai plenat Neno Snasat mes sin ka nasanab fa? 12:6 Au ak ki: Anbi i anmu'i le a'nesin Ume Uisneno. 12:7 Bait hi mihin a'at in lomin nak: Lasi le Au lomi nane es lasi amnaut ma ka fua tulu fa, of hi ka misanab fa atoni le ka nasanab fa. 12:8 Anmone Pah To nane Uisneno neu Neno Snasat." 12:9 Ma Yesus In nao nasaitan bale nane ma antam neu sin ume buat. 12:10 Anbi nane anmu'i atoni mese le niman bian anole. Ale atoni le he nasanab Yesus natan ma nak, "Nabe'i ka he taleko amenat bi Neno Snasat?" Sin natan onane he nati' nasanab Yesus. 12:11 Mes Yesus nak sin, "Kalu atoni mese le anmu'i bibi kase mese ma anmofu neu bola bi Neno Snasat, of in hel napoitan ai kahaf? 12:12 Mansian ma'upa nesin bibi kase? Es nane nabe'i het mo'e alekot bi Neno Snasat." 12:13 Oket Yesus nak neu atoni nane, "Menu ho nimam nai!" Ma in nenu nani, oket in niman naleko anfani onle niman bian. 12:14 Mes atoni Farisi sin anpoi ma anmalekan he namate Yesus. 12:15a Mes Yesus nahin nalali sin nek salit nane. Es nane Yesus naskotu na'ko bale nane. 12:15b Atoni namfaun natuin Yesus ma In naleko sin alsin. 12:16 Ma In antal sin matane he kais an etun antom In, 12:17 he nati' natisi a'at le Mafefa Knino Nai Yesaya an etun nalali: 12:18 "I, Au Ate le Au beti ani, le Au nek ani, le Au monik anlomi nan; of Au tao Au Smanak neu In, ma In of an etun lef lasi neu ale uf. 12:19 Of In kan matoef ma kan hunun fa, ma of atoni ka nenaf In hanan bi lanan-lanan. 12:20 Petu atli'as of In kan ipu nani fa, ma paku in fukat amasut, of In ka namate fa, talan te In anbe'u lef lasi nane. 12:21 Ma ale pah of nafnekan neu In." 12:22 Nalali te sin neki atoni aniut saes mese nem neu Yesus. Atoni nane matan anfol ma anmon. Ma Yesus naleko atoni nane, tal in na'uab ma nit anfan. 12:23 Ma ale to amfaun nane sin namkak ma nak: Ba'is i onle Nai Daud in sufan." 12:24 Mes leka atoni Farisi sin nen lasi nane te sin nak, "In onli'u nitu neki Beelzebul, nitu sin nakaf In kuasat." 12:25 Mes Yesus nahin sin nek tenab nane es nane In nak sin, "Ale plenat le anmamusun of namle'u. Ma kot ai ume le nasulin of kan hakef nok alekot. 12:26 Onane amsa kalu nitu anli'u nitu, of anbatiok ma sin ma musun nafaniok. Onane sin plenat hen hake onme ka? 12:27 Es nane kalu Au li'u nitu eki kuasat Beelzebul, hi amnoktin anli'u nitu neki sekau in kuasat ka? Ho atuin sin le'nane es naton nak him san milali. 12:28 Mes Au li'u nitu eki Smanan Uisneno. Nane nak plenat Uisneno ankoenon nem nalali neu ki. 12:29 Ai onme bait atoni hen tam neu atoni abe'it in ume he nasik in a'maus. So anfutu nahunun atoni abe'it nane fe, nalali te nabe'i hen tam ma nasik in a'maus. 12:30 Sekau le ka nok Kau, in namusu nok Kau. Ma sekau le ka nabuab fa nok Kau in nasitab ale sa'. 12:31 Es nane Au ak ki: Ale sanat ma uab amle'ut mansian of masako. Mes uab amle'ut neu Smanan Knino ka masako fa. 12:32 Atoni le na'uab amle'ut neu Anmone Pah To, of ansako in sanat. Mes leka in na'uab amle'ut neu Smanan Knino, of kan sakof in sanat, bi pah pinan i ma bi neno amnemat. 12:33 Kalu hau alekot in fuan amsa naleko. Kalu hau ka nalekof in fuan amsa ka nalekof. Fun hau nane mahine na'ko in fuan. 12:34 Hi atoni abulalut ki. Leka me hi he mi'uab alekot, kalu hi abulalut ki. Fun sa' le hi mi'uab nane anpoi na'ko hi nekam. 12:35 Atoni alekot napoitan lasi alekot na'ko in nekan alekot. Ma atoni abulalut napoitan lasi amle'ut na'ko hi nekan abulalut. 12:36 Mes Au ak ki: Atoni le na'uab a'at ka ma'ota of in natae nani bi neno lef lasi. 12:37 Fun natuin ho uab of namneob ko. Mes natuin ho uab amsa of nasanab ko." 12:38 Nalali te Ahin Sulat sin fauk ma atoni Farisi sin nak neu Yesus, "Anoni, haim lomi he mit taka mese na'ko Ko." 12:39 Mes Yesus natae sin, "Batan amle'ut ma amaufinut i hen totin lasi taka. Mes of kan fen sinif taka al taka Mafefa Knino Nai Yunus. 12:40 Nai Yunus namaika anbi ika in tein neno tenu ma fai tenu. Onane amsa Anmone Pah To of namaika anbi pah pinan in nupun neno tenu ma fai tenu. 12:41 Bi neno lef lasi, atoni Niniwe of anfen nok batan i ma anlefi sin lasi. Fun atoni Niniwe nate'un sin nekan natuin Nai Yunus an etun sin lasi. Mes anbi i anmu'i le a'nesin Nai Yunus. 12:42 Bi neno lef lasi uisneno bife na'ko Neno Li' of anfen na'ko batan i ma in natam lasi neu sin. Fun uisneno bife nane nem na'ko pah pinan tu'an he nen Nai Salomo in lasi hine. Ma anbi i anmu'i le a nesin Nai Salomo!" 12:43 "Leka sman amle'ut nane anpoi na'ko mansian in naoinson neu bale ametos he nami snasat. Mes in ka napenif. 12:44 Oke te in nak: Au he fain eu ume le usaitan ani. Oke te in nao ma napeni ume nane luman, ume nane naknino ma namas. 12:45 Nalali te in nao ma anhone sman amle'ut bian sin hitu le anbulalu nesin. Ma sin antam ma namaika anbi bale nane. Ma atoni nane in monin namle'u nesin na'ko neno ahunut. Onane amsa of anbol neu batan amle'ut i." 12:46 Leka Yesus fa na'uab nok atoni amfaut nane, In ainaf ma In olif sin neman. Sin anhake anbi mone ma nami he nae'ku nokan In. 12:47 Atoni es nak neu Yesus, "Kiso mit Ho ina ma Ho oli sin anhaken es mone. Sin nami he nae'ku nok Ko, Usi!" 12:48 Mes Yesus natae, "Au aina es sekau? Ma Au oli sin es sekau ka?" 12:49 Ma In anlul neu asimo lasi sin ma nak, "I nu Au aina ma Au oli sin! 12:50 Atoni le anmo'e natuin Au Ama abit neno tunan, in lomin nane Au oli, Au feto ma Au aina."
13:1 Bi neno nane Yesus anpoi na'ko ume nane ma antoko bi nifu ninen. 13:2 Ma atoni namfau neman ma antol nan Yesus. Es nane In ansae neu belo' ma antok anbin. Mes atoni amfaut nane sin anhake anbi nifu ninen. 13:3 Ma In na'uab lasi leta namfau neu sin nak, "Anmu'i atoni mese anpoi hen kifun fini. 13:4 Leka in ankifun, fini bian anmofu anbi lanan ninen. Oke te kolo nem ma anlot nan sin. 13:5 Fini bian anmofu anbi faut putun le in nain an-ana es ha. Fini nane anmoni laba natuin in nain nane manihis. 13:6 Leka manas ansae, fini nane in tolon anuknene ma anmeto. Natuin in a'ba'an kan tamaf neu nain. 13:7 Fini bian anmofu neu kisan atnanan. Ma kisan nane anmoni ma a'neo nisan tal anmate. 13:8 Mes fini bian anmofu anbi nain alekot oke te nafua: Bian natun mese, bian bo'ne ma bian bo'tenu. 13:9 Atoni le maluke, so natnin nai!" 13:10 Oke te Yesus In asimo lasi sin neman ma antoti nak, "Usi, nansa Ho mu'uab neu sin meki lasi leta ka?" 13:11 Yesus natae nak, "Anfe ki lasi hine he mihin Plenat Neno Tunan in lasi tolo, mes sin kahaf. 13:12 Fun sekau le anmu'i, of anfe nani neu in, tal in nathoe. Mes sekau le kan mu'if, of ansimo nafani sa'le in anmu'i. 13:13 Es nane Au u'uab neu sin eki lasi leta. Fun sin nitan, mes on ka nitan fa. Ma sin nenan mes on ka nenan fa. 13:14 Ma of natis neu sin Mafefa Knino Nai Yesaya in beno, le hanan nak: Of him nen ma mitnin, mes hi ka mihinef, of him kiso ma mail, mes hi ka mitaf. 13:15 Fun to in nekan anmafaub, ma luken antono, ma matan nabil; he nati' kais sin nit neki sin matan, ma amnen neki sin luken, ma nahin neki sin nekan, oke te nali'on anfani nem, he nati' Au uleko sin. 13:16 Mes alekot neu ho matam fun sin nitan ma neu hi lukem fun sin nenan. 13:17 Fun Au ak ki: Anmu'i Mafefa knino ma atoni amneot namfaun, le anlomi he nit sa' le hi mit mes sin ka nit nani fa. Ma sin anlomi he nen sa' le him nen mes sin ka nen nani fa. 13:18 Es nane him nen nai lasi leta nane in oten. 13:19 Fini le anmofu anbi lanan ninen nane maleta neu atoni le an nen Plenat Neno Tunan, mes ka nahin nani fa. Oke te amle'ut in tuaf nem ma nasik nani fini le ankifun anbi in nekan. 13:20 Fini le anmofu anbi faut putun nane maleta neu atoni le an nen a'at nane, ma ansimo nani nok amlilit. 13:21 Mes a'at nane ka naba'af anbi sin nekan ma anmoni ka lob fa. Leka susal ai hamu'it nem neu sin natuin a'an knino, sin nekan ateb knino nane namneku. 13:22 Fini le anmofu anbi kisan nane maleta neu atoni le in nen a'at nane. Mes lasi a'unu ma maus pah pinan a'neo nis a'at nane anbi sin nekan talan te ka nafuaf. 13:23 Ma fini le anmofu anbi nain alekot nane maleta neu atoni le in nen a'at nane ma nahin nani. Oke te sin nafuan, bian natun mese, bian bo'ne ma bian bo'tenu." 13:24 Usif Yesus na'uab anteni lasi leta mese neu sin ma nak, "Plenat Neno Tunan maleta onle atoni le ankifun fini alekot anbi in lele. 13:25 Mes leka ale atoni sin antup, in musu nem ma ankifun fini humusu anbi aen kase nane atnanan, oke te in nao kun. 13:26 Leka aen kase nane anmoni ma napune, sin nit humusu nane amsa. 13:27 Oke te ale ate sin nem neu tuan nane ma nak: Tuan, ati afi ho kam kifun fa fini alekot anbi ho lele ka? Humusu nane nem na'ko me ka? 13:28 Tuan nane natae sin: Nane musu es anmo'e. Oket ale ate sin nak neun: Neu hom lomi ka he nati' haim nao he maunu mis humusu nane ka? 13:29 Mes in nak: Kaisa! Fun kalu hi' maunu humusu nane of him maunu meik aen kase nane amsa. 13:30 Maut he nua sin monin nabuan talan te neno abut. Of au ak neu atoni a'abut sin: Hi mibua humusu nane ma amfutu he motu. Nalali te hi mibua aen kase nane ma mitam mani anbi au lopo." 13:31 Usif Yesus na'uab anteni lasi leta mese neu sin nak, "Plenat Neno Tunan maleta onle atoni mese in naiti bonak fuan ma ankifu anbi in lele. 13:32 Bonak nane in fuan mnut-nutu nesin ale fini. Mes leka in anmoni in nesin ale utan bian ma anfani hau. Oke te ale kolo anbi neno atnanan nem ma nakun anbi in atlaen." 13:33 Ma Yesus nua'ab anteni lasi leta mese nak, "Plenat Neno Tunan maleta onle bife mese in naiti lalu haef ma anselo nani nok ut su'at tenu talan te ansae." 13:34 Ale lasi nane Yesus na'uab nani neu atoni namfau ma katit fa sa' esle' In ka na'uab nani fa neki lasi leta. 13:35 He nati' natis ale Mafefa knino sin molok nak: "Au he fai Au fefak ma u'uab lasi leta, Au he uton lasi tolo na'ko afi fe nahakeb paha pinan." 13:36 Oke te Yesus nasaitan atoni amfaut nane ma In anfani. In asimo lasi sin nem neu In ma nak, "Muketi kai fe lasi leta antom humusu anbi lele nane." 13:37 Usif Yesus natae ma nak, "Atoni le ankifun fini alekot nane, esle' Anmone Pah To. 13:38 Lele nane esle' pah pinan i. Fini alekot nane esle' atoni le anfani Uisneno In to. Humusu nane esle' atoni le anaetnon neu Nitu. 13:39 Musu le ankifun humusu nane esle' Nitu. Neno abut nane esle' neno hatas amsoput, ma atoni a'abut nane esle' ahake neno tunan sin. 13:40 Ma onle nabua humusu nane ma notu anbi ai, onane amsa bi neno hatas amsoput. 13:41 Anmone Pah To of anlelu In ahake neno tunan sin he nabua alsin le anmo'e fulit ma alsin le anmo'e lasi amle'ut, na'ko In Plenat. 13:42 Of anpolin natam sin alsin neu ai maputu in balan; bi nane of sin ankae ma neku nisin. 13:43 Bi leku nane ale atoni le natuin Uisneno lomin of anpin onle manas anbi sin Amaf In Aplenat. Es nane te, atoni le anmu'i luken so in natnin nai!" 13:44 "Plenat Neno Tunan maleta onle maus le natolo anbi lele. Leka atoni napeni maus nane in natolo anteni. Natuin in namlil, in nao ma nasosa ale in mu'in oke te ansos nan lele nane." 13:45 "Onane amsa Plenat Neno Tunan maleta onle atoni a'sosa le in nami baun kael usaf maupa'. 13:46 Leka in napeni baun kael le upan matane, in nao ma nasosa ale in mu'in oke te in ansos nan baun kael usaf mau'pa nane." 13:47 "Onane amsa Plenat Neno Tunan maleta onle kifkai le anpolin natam anbi tasi, oke te nabuab ika huma-huma. 13:48 Leka kifkai nane nahenu, atoni sin anhel neu tasi ninen. Oke te sin antoko ma anbeti ale ika nane, ika alekot sin antao nani neu aba ma ika ka alekot nane sin anpolin. 13:49 Onane amsa bi neno hatas amsoput: Ale ahake neno tunan of sin nao ma anbeti atoni anmo'e amle'ut na'ko atoni le anmo'e lomin Uisneno. 13:50 Nalali te anpolin natam ale anmo'e amle'ut sin neu ai maputu in balan; anbi nane of sin ankae ma neku nisin. 13:51 Hi mihin ale lasi nane ka?" Sin natae nak, "Hai mihin Uisneno." 13:52 Usif Yesus nak neu sin, "Es nane Ahin Sulat le ansimo noina na'ko Plenat Neno Tunan maleta on ume tuaf le napoitan maus fe'u ma maus amna' na'ko in bale maus." 13:53 Leka Usif Yesus naketi nalali ale lasi leta nane, In nao na'ko bale nane. 13:54 Ma ante kuan le nahonis In anbin, Yesus nanoina ale atoni sin bi sin ume buat. Leka sin nen ale lasi noina nane sin namkakan ma nak, "In napeni lasi hine ma kuasat na'ko me hen mo'e ale lasi amkakat nane ka? 13:55 Ati In ka tukan hau in Anmone fa? Ait In ainaf ka es fa bi Maria ma In oilfin es le Nai Yakobus, Nai Yusuf, Nai Simon ma Nai Yudas ka? 13:56 Ma ait In ka feotfin fa le nabua nok kit? Neu ale lasi nane In napeni na'ko me ka?" 13:57 Es nane sin kan lomif fa ma antite Usif Yesus. Ma Usif Yesus nak neu sin, "Mafefa knino mese napeni kanaf anbi me-me, mes ka napenif kanaf anbi in kuan ma in ume." 13:58 Ma fun sin nekan ka nateb knino fa, Yesus kan mo'ef lasi amkakat namfau anbi kuan nane.
14:1 Anbi leku nane Nai Herodes kesel pah Galilea in nen beno antom Yesus. 14:2 Oket in nak neu in ameput sin nak, "I Nai Yohanes Aslanit. In anfen anfani na'ko amates. Es nane in napeni kuasat hen mo'e ale lasi amkakat." 14:3 Fun Nai Herodes anlelu ma anheke nalali Nai Yohanes Aslanit ma anfutu ma natam nani anbi o'of. Nai Herodes anmo'e onane natuin lasi bi Herodias, le in olif Nai Filipus in fel. 14:4 Fun Nai Yohanes nakain Nai Herodes nak, "Kais ho mafe mok bi Herodias!" 14:5 Nai Herodes anlomi he namate Nai Yohanes mes in namtausan atoni amfaun le sin kiso Nai Yohanes on Mafefa knino. 14:6 Mes bi neno Nai Herodes neno mahonim, bi Herodias in anfeto nabso bi to amfaut sin atnanan. Ma anhalin Nai Herodes in nekan, 14:7 talan te Nai Herodes anmanta'en neki supat hen fe ne sa' le in antoti. 14:8 Natuin in ainaf anfuli, anbife nane nak, "Amfe kau nai anbi i, Nai Yohanes Aslanit in nakan bi tupa mese." 14:9 Lasi i nasusab kesel nekan; mes natuin in mantaen neki supat ma natuin ale atoni le in anhok sin neman neu tolas nane; in anlelu hen fe nani neun. 14:10 In anlelu atoni nao neu o'of hen ote nafek Nai Yohanes in nakan 14:11 ma sin neki Nai Yohanes in nakan bi tupa mese ma anfe nani neu anbife nane ma in neki nao neu in ainaf. 14:12 Oke te Nai Yohanes Aslanit in asimo lasi sin neman ma naiti in aon nitu ma ansub. Oke te sin nao ma an etun lasi nane neu Yesus. 14:13 Leka Usif Yesus nen lasi nane te, In ansae belo' ma nao nasaitan bale nane. In he nao neu bale le katit fa atoni anbin. Mes leka to amfaut sin nen nani te, sin nasaitan sin kuan ma nao natuin Yesus natuin lal meto. 14:14 Leka Yesus ansanu na'ko belo' neu meto ma In nit to amfaun nane, In namnau nis sin oke te In naleko ale amenat sin. 14:15 Leka neno hen faien, Yesus asimo lasi sin nem neun ma nak, "Bale i hufui kun ma neno hen faien. Hom lelu ale to amfaun i he naon ma ansoan mnahat bi kuan-kuan." 14:16 Mes Yesus nak neu sin, "Kais sin naon, mes him fen sin hen bukaen." 14:17 Sin natae Yesus nak, "Hai mu'i al utunu' pisa nim ma ika koe nua." 14:18 Yesus nak, "Meki sin neman neu Kau." 14:19 Yesus anlelu to amfaun nane hen tokon anbi ma'u. Ma Yesus In naiti utunu' pisa nim ma ika koe nua nene. In anbaisenu neu neno tunan ma antek alekot neun. Oke te In anebi utunu' nane neki In niman ma anfe nani neu In asimo lasi sin ma In asimo lasi sin anbati neu ale to amfaun nane. 14:20 Sin ala sin anbukae tal namsenan. Nalali te atoni nabuab ale utunu' pisa nesif nane nahenu aba bo'es am nua. 14:21 Neu alsin le anbukae nane oni atoni nifun nim, kan so'i fa bifel ma liana sin. 14:22 Oke te Yesus anlelu In asimo lasi sin ansae belo' hen lak nahunun neu nifu panin. Fun Yesus fe hen lelu ale to amfaun nane hen fanin. 14:23 Ma leka In anlelu ale to amfaun anfani, Yesus ansae neu tubu hen mes kun anonen toti. 14:24 In asimo lasi sin belo' suk a'lo na'ko nifu ninen. Ma oe pesen antepo belo' nane fun anin anfu na'ko belo' matan. 14:25 Oni leku tenu neis hen meu, Yesus nao natuin oe tunan nem neu sin. 14:26 Leka asimo lasi sin nit Yesus nao natuin oe tunan, sin naskek ma anan'bai nak, "Nitu smanaf!" 14:27 Mes Yesus nak neu sin, "Tainine hi nekam! Au es Kau i, kais mimtau!" 14:28 Oke te Nai Petrus anan'bai ma natan Yesus, "Usi, bait Ho kum es nane, amlelu kau he au et eu Ko utuin oe tunan." 14:29 Ma Yesus nak, "Aum nai." Nai Petrus ansanu na'ko belo' ma nao natuin oe tunan he nem neu Yesus. 14:30 Mes leka Nai Petrus nit anin, in namtau ma hen lem. Es nane in anbai ma nak, "Usi, amtulun kau!" 14:31 Yesus nenu niman laba ma antopu nan in ma nak, "Hoi atoni, nek tebes an-ana, nansa es ho nekam na'unu?" 14:32 Oke te sin ansae neu belo' ma anin nane namne. 14:33 Ma ale atoni le anbi belo' nane sin naluli ma nabes neu In ma nak, "Namneo Ho Uisneno Anmone Ko." 14:34 Leka sin anlak nalali sin ansanu bi Genesaret. 14:35 Ma leka ale atoni anbi bale nane nahin Yesus, sin ansonu hanaf neu ale bale funam natef pah nane. Ma sin neki ale amenat nem neu In. 14:36 Ma sin antoti neu Yesus, he nati' sin na' In sobalu betkone In fukan. Ma ale atoni le sin na' nani, sin naleko na'ko sin menas.
15:1 Oke te atoni Farisi ma Ahin Sulat sin fauk neman na'ko Yerusalem neu Yesus ma natan In nak, 15:2 "Nanso es Ho asimo lasi sin antanhai hit mnasi unu sin halat ka? Leka sin hen bukae sin ka nafanu fa sin niman." 15:3 Mes Yesus natae sin nak, "Nansa es him tanhai plenat Uisneno natuin hi mnasi unu sin halat ka? 15:4 Fun Uisneno nakua a'an nak: Minaeb hi ama ma hi aina; ma: Sekau anle'at in amaf ai in ainaf, of in anmate. 15:5 Mes hi minoina mak: Ale atoni le na'uab neu in amaf ai in ainaf nak: Sa' le anbi kau le au he fe ani neu ki, nane au utulu ulali neu Uisneno. 15:6 Atoni nane kais nanaeb anteni in amaf. Onane te hi minebet a'an Uisneno natuin hi babfini sin halat. 15:7 Hi atoni asafanut! Namneo Mafefa Knino Nai Yesaya in beno antom ki: 15:8 To i nanaeb Kau neki sin lulun, mes sin nekan na'lo na'ko Kau. 15:9 Sin nabes neu Kau son-sona, fun noina le sin nanoina nane plenat mansian kun." 15:10 Oke te Yesus anboin atoni amfaun nane ma nak neu sin, 15:11 "Mitnin lekleko he nati mihin! Sa' le antam neu fefak ka nekif hainisit, mes sa' le anpoi na'ko fefak nane neki hainisit neu atoni." 15:12 Oket In asimo lasi sin nem ma natan neun, "Usi, Ho muhin ka nak Ho a'at nane neki fatu astunas neu atoni Farisi sin?" 15:13 Yesus natae nak, "Ale luel le Au Ama abit neno tunan kan sen nani fa of anbok nani nok in aba'an. 15:14 Kais moki sin. Fun sin atoni matfolo antopu atoni matfolo. Leka atoni matfolo antopu atoni matfolo, of sin nua sin anmofu neu bola." 15:15 Oke te Nai Petrus nak neu Yesus, "Muton kai lasi leta nane fe, Usif." 15:16 Yesus natae, "Hi amsa fe ka mihin mani fa ka? 15:17 Ait hi ka mihin fa nak sa' le antam neu fefak ansanu neu teik oket anpolin neu kotif? 15:18 Mes sa' le anpoi na'ko fefak, nane na'ko nekak ma lasi nane es neki hainisit neu atoni. 15:19 Fun ale tenab amle'ut anpoi na'ko nekak esle' lasi mamaten, lasi mapaisa, lasi kalu, lasi bakan, saksi moel ma antek nale'un es in kanan. 15:20 Ale lasi nane es neki hainisit neu atoni. Mes leka anbukae ma ka nafanu fan niman nane ka neki fa hainisit neu atoni." 15:21 Oke te Usif Yesus nao na'ko bale nane ma naskotu neu pah Tirus ma Sidon. 15:22 Bife Kanaan mese na'ko pah nane nem neu Yesus ma ananbai nak, "Mumnau kau fe, koi, Usif, Nai Daud sufan. Au anfeto a'niut sae ma namen anaek." 15:23 Mes Yesus ka nataef fefa mese. Oke te In asimo lasi sin neman ma antoti nak, "Usif, amlelu bife nane hen nao kun. Fun in anbai piut bi hit kotik." 15:24 Usif Yesus natae bife nane nak, "Ansonu Kau neu al bibi kase amnekut sin na'ko to Israel." 15:25 Mes bife nane nem anhaumak ma nabes neu In ma nak, "Usi, mumnau kau." 15:26 Mes Yesus natae, "Ka nalekof, kalu taiti utunu' neu anhin ma atpolin neu asu." 15:27 Bife nane nak, "Namneo, Usif, mes asu amsa sin nah mnah nesif le anmofu na'ko in tuan in mei." 15:28 Yesus natae ma nak neune, "Aina, ho nek ateb knino nane naek! Maut nai ale sa' anbol neu ko onle hom lomi." Bi leku nane amsa in anfeto naleko. 15:29 Ma Yesus nao nasaitan pah nane, ma In nao natuin Nifu Galilea ninen. Oke te In ansae neu tubu mese ma antok anbin. 15:30 Atoni namfaun sin neki atoni men ole, hae hela, matfolo, amonot, ma amenat bian nem neu Yesus. Ma sin nabela sin anbi Yesus matan ma Yesus naleko sin ok-oke. 15:31 Ale atoni le sin nit sin namkakan, fun amonot sin na'uab, men ole sin anaon, hae hela sin naleko, matfolo sin nitan. Oke te sin naliatas to Israel sin Uisneno. 15:32 Oke te Yesus In anboin In asimo lasi sin ma nak, "Au nekak namnau nis atoni amfaun i. Sin nok Kau neno tenuen ma sin ka mu'in fa mnahat. Au ka loim fa he lelu sin anfani nok tai luman, of sin anmanan bi lanan." 15:33 In asimo lasi sin nak, "Hit he tapeni utunu' onme bi bale luman i, he nati tamsenab atoni amfaun i." 15:34 Yesus nak neu sin, "Hi mu'i utunu' pisa fauk es nane ka?" Sin natae nak, "Pisa hitu, ma ik ana koe fauk." 15:35 Oke te Yesus anlelu atoni amfaun nane antokon neu nain. 15:36 Nalali te Yesus naiti utunu' pisa hitu ma ika nane sin, oke te natulu nani neu Uisneno. Ma In anebi sin ma anfe nani neu In asimo lasi sin. Ma sin anbati neu atoni amfaun nane. 15:37 Ma sin alsin anbukae tal namsenan. Oke te ale atoni sin nabuab utunu' pisa nesif nane, nahenu aba hitu. 15:38 Neu alsin le anbukae nane oni atoni nifun ha, kan so'i fa bifel ma li'ana sin. 15:39 Oke te Yesus anlelu atoni amfaun nane hen fanin. In ansae neu belo' ma nao neu pah Magadan.
16:1 Oke te atoni Farisi ma Saduki sin fauk neman hen su' nit Yesus. Sin antoti he nati' In nalile neu sin taka mese na'ko neno tunan. 16:2 Mes Yesus natae: "Leka manas hen tes, hi mak: Neno ansinek, fun neno amtasa, 16:3 ma anbi nok-noka, natuin neno amtasa ma anmetak, hi mak: Neno i of na'ul, fun neno anmetak. Hi mitaka mihin neno in masan, mes ale taka neno le'at hi ka mihinef. 16:4 Batan amle'ut ma abulalut i hen toti taka. Mes of kan fen sin fa taka bian al taka Mafefa Knino Nai Yunus." Oke te Yesus nasaitan sin ma nao kun. 16:5 Leka Yesus asimo lasi sin anlak ante nifu panin, sin nahinen nak sin nikan he neki utunu'. 16:6 Usif Yesus nak neu sin, "Panat ma ampao nai atoni Farisi ma Saduki sin lalu haef." 16:7 Leka sin nen Yesus na'uab onane, sin natenab ma na'uaben es nok es nak, "In na'uab onane natuin hit ka tekif utunu'." 16:8 Ma leka Yesus nahin sa' le sin na'uab nane, In nak, "Nansa hi mimolok neu lasi hi ka mu'if utunu'? Hi nekam ateb knino an-ana! 16:9 Hi fe ka mihin fa ka? Hi ka mimnau fa afi utunu' pisa nim le Au ebi ani neu atoni nifun nim. Oke te hi mibuab mani nesin aba fauk ka? 16:10 Ai neu utunu' pisa hitu le Au ebi ani neu atoni nifun ha. Ma hi mibuab nesin nane aba fauk ka? 16:11 Leka me hi ka mihinef, nak Au ka u'uab fa antom utunu' nane. Him panat nai antom atoni Farisi ma Saduki sin lalu haef." 16:12 Bi leku nane fe sin nahinen nak Yesus In lomin kan tomaf neu lalu haef le hen mo'e utunu'. Mes antom neu atoni Farisi ma Saduki sin lasi noina. 16:13 Leka Yesus neman te pah Kaisarea Filipi, In natan In asimo lasi sin nak, "Atoni sin nak, Anmone Pah To nane sekau kun ka?" 16:14 Sin natae nak, "Bian sin nak: Nai Yohanes Aslanit. Bian anteni sin nak: Nai Elia. Ma bian sin nak: Nai Yeremia ai mafefa knino mese." 16:15 Oke te Yesus natan, "Mes natuin hi, Au le i sekau Kau ka?" 16:16 Nai Simon Petrus natae nak, "Ho Kesel Afetin, Uisneno Anmone le anmoni." 16:17 Ma Yesus nak neune, "Ua alekot neu ko, Simon, Nai Yunus anmone. Fun ka mansian fa es naton ko lasi nane mes Au Ama abit neno tunan. 16:18 Ma Au ak ko: Ho Nai Petrus ma anbi faut putun i of Au uhakeb Au tolas knino. Ma plenat nitu of kan be'u nani fa. 16:19 Of Au fe ko letu Plenat Neno Tunan. Sa' le hom futun bi pah pinan i of mafutun bi neno tunan. Ma sa' le hom sefi bi pah pinan i of masefi bi neno tunan." 16:20 Oke te Yesus antal In asimo lasi sin he nati' kais sin an etun neu es nak In Kesel Afetin kun. 16:21 Na'ko tomas nane Yesus na'uab neu In asimo lasi sin nak In mes he nao neu Yerusalem. Ma of In ansutai mane'at naek na'ko amnasit sin ma ana' lasi fuat nakaf sin ma Ahin Sulat sin. Of namate In, mes bi neno tenu of In anfen anfan. 16:22 Mes Nai Petrus anhel Yesus nem neu In aon bian ma nakain nak, "Uisneno, so mak Uisneno naskotun lasi nane! Lasi nane kais anbol neu Ko, Uisneno." 16:23 Mes Yesus naklelon ma nak neu Nai Petrus, "Muskot mu'ko i Nitu. Kaisa musenip Kau. Fun ho ka mutenab fa sa' le Uisneno natenab, mes sa' le mansian natenab." 16:24 Oke te Yesus nak neu In asimo lasi sin, "Atoni le he natuin Kau, in mes natotan in aon. Oket anloi in hau nehe ma natuin Kau. 16:25 Fun atoni le anlomi he nahoni in monin, of naneku in monin. Mes atoni le naneku in monin natuin Au kanak of napeni in monin. 16:26 Alekot sa' neu atoni le he napeni pah pinan ok-oke mes in naneku in monin? Ai nabe'i hen seka in monin neki sa' es ka? 16:27 Fun Anmone Pah To nok ahake neno tunan sin of neman anbi In Amaf In apinat. Bi leku nane of In antoeb ale atoni natuin sin mo'et. 16:28 Au ak ki: Na'ko ala ki le him hake ambi i anmu'i atoni le of ka naben fa maten, nahunun sin nit Anmone Pah To ankoenon nem on Kesel anbi In Plenat."
17:1 Fun neno ne namsopun te, Yesus nok Nai Petrus, Nai Yakobus ma in olif Nai Yohanes sin ansae neu nu'af amnanut mese. Bi nane sin anmesen. 17:2 Oke te Yesus human nabaina anbi sin matan. In human anpin onle manas ma In bael pake muti nalim onle meusine. 17:3 Naskek onane sin nit Nai Musa ma Nai Elia namolok nok Yesus. 17:4 Nai Petrus nak neu Yesus, "Uisneno, alekot neu kai bi bale i. Bait Hom lomi, mautu he au uhakeb um-ume tenu anbi i; es neu Uisneno, es neu Nai Musa, ma es neu Nai Elia." 17:5 Ma Nai Petrus fe namolok onane te, nipu apinat nane an amu sin ma sin nen hanaf na'ko nipu nane nak, "I Au Anmone neka, le Au lomi ani, mituin nai neu In." 17:6 Leka In asimo lasi sin nen hanaf nane te, sin ansukbok neu nain ma sin namtaun. 17:7 Mes Yesus nem neu sin ma anpo' sin ma nak, "Him fen nai, kais mimtau!" 17:8 Ma leka sin naiti sin nakan, sin kan nitaf es al Usif Yesus anmes. 17:9 Leka sin ansanu na'ko nu'af nane, Yesus anba'an sin, "Kais him etun mnitas i neu es, nahunun nafena Anmone Pah To na'ko amates." 17:10 Oke te In asimo lasi sin natan neu Yesus nak, "Kalu onane nansa Ahin Sulat sin nak Nai Elia mes he nem nahunu ka?" 17:11 Yesus natae, "Namneo Nai Elia of nem ma naleko nafani ale sa'. 17:12 Mes Au ak ki: Nai Elia nem nalalien mes sin ka nahinef, ma sin anmo'e neun sa' le sin anlomi. Onane amsa Anmone Pah To of ansutai mane'at natuin sin." 17:13 Tomas nane Yesus asimo lasi sin nahinen nak In na'uab nane antom neu Nai Yohanes Aslanit. 17:14 Leka Yesus ma asimo lasi sin anfanin neu to amfaun nane, atoni mese nem neu Yesus ma nabes anbi Yesus matan, 17:15 ma nak, "Uisneno, mumnau fa au anah. In men auma, ma in menas nane matani. Fe-fe'at anmof neu ai, ma fe-fe'at anmof neu oe nok. 17:16 Afi Au eki neu Ho asimo lasi sin, mes sin ka naleko nani fa." 17:17 Oket Yesus nak, "Hi batan ka apalsait ma aseket ki. Au he umaika ok ki talan te leka ka? Au he seusaban ki talan te leka ka? Meki anah nane nem neu i." 17:18 Yesus anmahek ai nabinan Nitu nane ma anlelu hen poi na'ko anah nane. Ma anah nane naleko bi leku nane amsa. 17:19 Nalali te Yesus asimo lasi sin nem neun ma leka sin anmesen nokan sin natan Yesus nak: "Nansa es hai ka mibe'i fa hem li'u Nitu nane?" 17:20 Mes Yesus nak neu sin, "Fun hi kam palsaif. Es nane Au ak ki: So hi mu'i nek ateb knino on bonak fuan, of hi mak neu nu'af i, mu'oni nai mu'ko bale i meu nae, -- nuaf nane of in na'oni. Katit fa sa' esle' hi ka mibe'i fa he mo'e. 17:21 Mes nitu humaf i ka nabe'i fa het li'u, so nok onen totis ma minahom." 17:22 Leka Yesus ma In asimo lasi sin nabuan anbi Galilea, In nak neu sin, "Of nana'at Anmone Pah To neu mansian sin niman. 17:23 Ma sin of namate In ma bi neno tenu In of anfen anfan." Oke te In asimo lasi sin nekan antu'. 17:24 Leka Yesus nok In asimo lasi sin nem ante Kapernaum, asimo noni poni Ume Uisneno nem neu Nai Petrus ma nak, "Hi kulu anbaen noni poni dirham nua ai kahaf?" 17:25 Nai Petrus natae nak, "Anbaen!" Ma leka Nai Petrus antam neu ume, Yesus natan nahunun nak, "Simon, ho mutenab onme ka?" Kesel pah pinan i sin ansimo noni poni na'ko sekau ka? Na'ko sin to ai atoni anao amnemat?" 17:26 Nai Petrus natae nak, "Na'ko atoni anao amnemat!" Yesus nak neune, "Kalu onane sin to kan baen fa. 17:27 Mes he nati' kais hit atfani fatu astunas neu sin, hom nao nai hem lolu ai hem tanu neu nifu. Ma ika le hom lolu muhunun, hom heke ma amfei in fefan. Ma of ho mupeni noni dirham ha anbi in fefan. Ho maiti noni nane sin ma ambaen hit nua kit noni poni neu sin."
18:1 Bi leku nane asimo lasi sin nem neu Yesus ma antoti nak, "Sekau es nanae nesi bi Plenat Neno Tunan ka?" 18:2 Yesus anboin li'ana mese ma nahakeb anbi sin atnanan, 18:3 oke te nak, "Au ak ki, bait hi ka mite'un fa hi nekam ma amfani on li'ana i, of hi kam tamaf meu Plenat Neno Tunan. 18:4 Fun atoni le nabaunon ma anfani on li'ana i, in es anaet anbi Plenat Neno Tunan. 18:5 Ma atoni le ansimo liana onle i anbi Au kanak, in ansimo Kau." 18:6 "Mes atoni le neki lasi keku neu li'ana i sin le anpalsai neu Kau, leko nesi atfutun fatu fole neu in to'an ma talema neu tasi. 18:7 Amle'ut neu pah pinan nok ale in lasi keku. Namneo, mes hen mu'i lasi keku, mes amle'ut neu atoni le anmo'e nani. 18:8 Leka ho nimam ai ho haem neki keku neu ko, amketu ma ampolin mani. Fun leko nesi hom tam meu honis nok nim tuka ai hae hela, na'ko anpolin natam ko neu ai maputu nok nimaf nua ma haef nua. 18:9 Ma leka ho matam neki keku neu ko, amloit mupoitan ma ampolin mani. Fun leko nesi hom tam meu honis nok mataf mese, na'ko anpolin natam ko neu ai maputu nok mataf nua. 18:10 Panat nai, kais miu'ab mile'un es na'ko li'ana i sin. Fun Au ak ki: Sin ahake abit neno tunan anbaisenu piut Au Ama abit neno tunan In human. 18:11 Fun Anmone Pah To ankoenon nem he nahoni amnekut sin." 18:12 "Hi mitenab onme ka? Bait anmu'i atoni mese le anmu'i bibi kase natun mese. Oket es namneku, of atoni nane anmo'e onme ka? Of in masaitan bibi kase bo'sio am sio anbi neten ma in nao he nami amnekut nane. 18:13 Ma Au ak ki, leka in napeni, tebes in amlilat neu bibi kase mese nane, nesi na'ko bo'sio am sio le ka namnekun fa. 18:14 Onane amsa hi Ama abit neno tunan kan lomif he nati' es na'ko li'ana i sin namnekun." 18:15 "Leka ho bae anmo'e sanat, hom nao meun ma amfainek fun al hi nuana ki. Leka in nen ho fainekat nane ho mupeni mufani. 18:16 Mes kalu in ka nenaf ho fainekat, ho mokam teni atoni mese ai atoni nua. Fun sulat aknino an etun nak: Leka atoni nua ai tenu anfe saksi, lasi nane of namneo. 18:17 Kalu in ka nenaf atoni nane sin, mitam in lasi neu tolas knino. Ma kalu in ka nenaf tolas knino sin fainekat amsa, nane in onle atoni le ka nahin Uisneno ai on atoni asimo noni poni. 18:18 Au ak ki: Tebes sa' le him futun bi pah pinan of mafutun bi neno tunan ma sa' le hi mifetin bi pah pinan of mafetin bi neno tunan. 18:19 Ma Au ak a'teni ki: Kalu atoni nua anbi ki anbi pah pinan i nekaf mese hen toti sa', of sin totis nane Au Ama abit neno tunan amnen nani. 18:20 Fun bi bale me le atoni nua ai tenu sin nabuan anbi Au kanak, Au ok sin bi sin atnanan." 18:21 Nalali te Nai Petrus nem neu Yesus ma nak, "Usi, tal hae fauk au he sako au bae le in nasanab neu kau ka? Tal hae hitu ka?" 18:22 Yesus natae neune nak, "Kahaf! Au ak ki: Ka tal hae hitu, mes hae bo' hitu no hitu. 18:23 Fun Plenat Neno Tunan maleta onle kesel mese le hen so'i tusa nok in ate sin. 18:24 Leka in fe anso'i onane te sin neki atoni mese nem neun le natus noni talenta nifun bo'es. 18:25 Mes natuin atoni nane kan baen nabe'if in tusa, kesel nane anlelu he nasosa ate nane nok in fel in anah ma ale in mu'in hen baen in tusa. 18:26 Oke te ate nane nabes neu usif ma nak, Usi, seusaban kau fe, of au baen au tusa tal natfek. 18:27 Kesel nane nek mamun ate nane ma ansako ale in tusa sin. 18:28 Mes leka ate nane anpoi, in nae'ku nok in aon bian ate mese le natus nokan noni dinar natun mese. In anheke in aon bian nane ma ankil in to'an ma nak, 'Baen kau ho tusa.' 18:29 Ate nane nabes ma nak neun: Bae, seusaban kau fe, of au baen au tusa tal natfek. 18:30 Mes in kan lomif ma in nana'at in aon bian nane neu o'of tal anbaen nafek in tusa nane. 18:31 Leka in aon bian sin nit lasi nane te, sin nekan ansusal oke te sin an etun lasi nane neu sin kesel. 18:32 Kesel anlelu no'en atoni nane ma nak neune: Ho ate abulalut, au sako ale ho tusa natuin hom toti kau. 18:33 Nansa ho ka mumnau fa ho bae onle au umnau ko? 18:34 Oke te usif nato' ma nana'at ate nane neu ahakamu'it sin, tal in nafek in tusa. 18:35 Onane amsa of Au Ama abit neno tunan anmo'e neu ki, leka hi kam sakof hi bae in sanat meki hi nekam oke."
19:1 Leka Yesus nasopu In lasi noina nane te In nasaitan pah Galilea ma naoina neu pah Yudea bi Noe Yordan panin. 19:2 Ma to namfaun natuin Yesus ma In naleko sin anbi bale nane. 19:3 Ma atoni Farisi sin neman hen su' Yesus. Ma sin natan nak, "Nabe'i ka atoni anbation nok in fe natuin lasi sa' am sa' ka?" 19:4 Yesus natae nak, "Ati hi kam soi fa le antui nak: In es anmo'e mansian nakakoba? In anmo'e sin atoni ma bife. 19:5 Ma In nakua a'an nak: Es nane atoni of nasaitan amaf ma ainaf ma namesbon nok in fe, tal sin nua sin anfani nesaf mese. 19:6 Onane te sin ka nua fa mes mese. Fun sa' le Uisneno nameseb nalali, mansian ka nabe'i fa hen bati nani." 19:7 Ma sin nak neu Yesus: "Kalu onane nansa Nai Musa anlelu hen fe sul batis, leka atoni hen bation nok in fel?" 19:8 Yesus nak neu sin, "Natuin hi nekam manu', Nai Musa anfe ki mainuan he nati' him batiom mok hi fe. Mes nakakoba ka onfa nane. 19:9 Mes Au ak ki: Atoni le anbation nok in fe, so al lasi mapaisa, oke te in mafe nok bife bian, atoni nane in mapaisa." 19:10 Asimo lasi sin nak neu Yesus, "Kalu lasi malutas atoni ma bife onane leko nesi kais atmafe." 19:11 Mes Yesus nak neu sin, "Ka ale atoni sin nahin a'at nane, al neusin le Uisneno anlek nani. 19:12 Fun anmu'i atoni le kan mafe, natuin nahonis sin onane. Bian anteni kan mafe fa, fun atoni bian anmo'e sin. Ma atoni bian anteni kan mafe he nati' nabe'i antuthae Plenat Neno Tunan. Atoni le nabe'i ansimo noina i, maut he in simo nani." 19:13 Oke te atoni sin neki li'ana neu Yesus he nati' In na'aiti niman neu sin, ma anonen toti neu sin. Mes In asimo lasi sin nato'an atoni nane sin. 19:14 Mes Yesus nak, "Mifetin li'ana nane sin, kais mikain sin he nem neu Kau. Fun ale atoni le human onane sin es anfani to Plenat Neno Tunan." 19:15 Oke te Yesus na'aiti niman neu sin. Nalali te In nao na'ko bale nane. 19:16 Anmu'i atoni mese nem neu Yesus ma nak, "Kulu, au he mo'e alekot sa' ka he upeni honis nabal-bal?" 19:17 Yesus natae, "Nansa hom toti neu Kau antom sa' le naleko ka? Al mese es naleko. Mes bait hom lomi he moni, so mutuin plenat Uisneno." 19:18 Ma atoni nane natan neu Yesus, "Plenat le me ka?" Yesus nak, "Kais ho mumate atoni, kais ho mapaisa, kais mubak, kais mupoibom; 19:19 munaeb ho ama ma ho aina ma hom nek ho aom bian onle hom nek ho aom." 19:20 Atoni munif nane nak neu Yesus, "Ale plenat nane au utuin ulali sin. Ma he lasi sa' anteni ka?" 19:21 Yesus nak neune, "Kalu hom lomi he munokbom bi ale sa', hom nao nai ma musosa ale ho maus. Ma ambait mani neu amamu'it sin, of ho mupeni maus bi neno tunan. Oke te ho aum ma mutuin Kau nai." 19:22 Leka atoni munif nane in an nen a'at nane te, in nao nok nek tu'as, fun in a'maus anaek. 19:23 Usif Yesus nak neu In asimo lasi sin, "Au ak ki, tebes mafen le'uf neu atoni amu'it mese hen tam neu Plenat Neno Tunan. 19:24 Au ak ateni neu ki, leko nesi bikase paha snaen mese antam natuin anet in luken, na'ko atoni amu'it mese hen tam neu Plenat Uisneno." 19:25 Leka asimo lasi sin nen uab nane te sin namkakan ma nak, "Kalu onane, of sekau es napeni honis ka?" 19:26 Usif Yesus nail sin ma nak, "Neu mansian lasi nane ka nabe'if, mes neu Uisneno ale sa'-sa' nabe'i." 19:27 Oke te Nai Petrus natae ma nak neu Yesus, "Uisneno, hai misaitan ale sa'-sa' ma mituin Ko. Ma of hai mipeni sa' ka?" 19:28 Yesus nak neu sin, "Tebes, bi neno le nafe'un neno tunan ma pah pinan Anmone Pah To of antoko anbi In toko apinat. Bi neno nane, hi le mituin Kau of him toko amsa bi toko bo'es am nua hem lefi uf Israel bo'es am nua sin lasi. 19:29 Ma ale atoni le nasaitan in ume, in olif tataf, ai in fetof, amaf in ainaf, anhin ai in lele natuin Au kanak, of in ansimo nafani kuni peni natun mese ma of napeni honis nabal-bal. 19:30 Mes atoni namfaun le nahunun of anfani amunit, ma amunit of anfani ahunut."
20:1 "Fun Plenat Neno Tunan onle uim tuaf mese, le in anpoi nok-noka he naim atoni ameput neu in lele tanu'an sena. 20:2 Leka in malomis nalali nok atoni ameput sin neu baen neno mese dinar mese, in anleul sin he nao neu in lele tanu'an sena. 20:3 Oni leku sio onane in anpoi anteni ma in nitan teni atoni bian le anhake luman bi masa. 20:4 Ma in nak neu sin: Him nao nai he mepu bi au lele tanu'an sena, of au seb ki nok alekot. Oke te sin naon. 20:5 Oni leku bo'es am nua ma leku tenu neno anmabe in poin ten me anmo'e onle lelo. 20:6 Oni leku nima neno anmabe in poin teni ma napeni atoni bian oket in nak sin: Nansa' es neno mnanu i hi mioinsom lum-luman ka? 20:7 Ma sin nak neune: Fun kan mu'if atoni le hen seb kai. Ma in nak neu sin: Him nao nai amsa meu au lele tanu'an sena. 20:8 Leka neno hen faien, lele tuaf nane nak neu in manlol: Mo'en ameput sin ma ambaen sin, na'ko atoni le antam namuni talan te atoni le antam nahunu. 20:9 Oke te ale atoni le sin anmepu oni bi leku nima sin neman. Ma sin ansimo esat dinar mese. 20:10 Oke te le atam ahunut sin neman. Sin natenab nak of sin ansimo nesin. Mes sin amsa esat ansimo dinar mese. 20:11 Leka sin ansimo nalali te, sin namunu neu lele tuaf nane nak: 20:12 Ameput le antam namunin sin mepun leku mese ah. Mes ho munesa sin nok kai le hai mepu mafena neno mnanu es ma amsutai manas maputu. 20:13 Mes lele tuaf nane natae sin es nak: Bae, au ka usanab fa neu ko. Hit malomi talali tak neno mese dinar mese ai? 20:14 Amsimo ho ini ma amnao nai. Au lomi he fe neu atoni le antam namuni i papmese onle ho. 20:15 Ait au ka mu'if mainuan ka he mo'e au maus natuin au lomik ka? Ai ho nekam namen neu kau, natuin au mo'e alekot ka? 20:16 Onane atoni le namuni of anfani ahunut ma le ahunut of anfani amunit." 20:17 Leka Yesus he nao neu Yerusalem, bi lanan atnanan In boin In asimo lasi sin anmes ma nak neu sin: 20:18 "Tomas i hit het nao neu Yerusalem. Ma of nana'at Anmone Pah To neu ana' lasi fuat nakaf sin ma Ahin Sulat sin, he namate. 20:19 Ma of sin nana'at In neu atoni le ka nahin Uisneno, he nati' sin na'akan, anhamu'i ma napeti In. Mes bi neno tenu In of anfen anfani." 20:20 Oke te Nai Zebedeus in fel nok in anhin nem neu Yesus. Oke te nabes bi Yesus matan hen toti sa' es na'ko Yesus. 20:21 Yesus nak, "Hom lomi sa' ka?" In natae nak, "Au lomi he nati' au anhin nuasin antokon bi Ho plenat leka Hom sae Usif. Es anbi Ho nukum ne'u es anbi Ho nukum ali'." 20:22 Mes Yesus natae nak, "Hi ka mihinef sa' le him toti. Nabe'i ka hi minu klas mninut le Au inu?" Ma sin nak, "Hai mibe'i." 20:23 Usif Yesus nak neu sin, "Au klas mninut of hi minu. Mes lasi hem toko bi Au aok bian ne'u ai Au aok bian ali', nane Au ka ube'i fa he fe. Bale nane of anfe nani neu ale atoni le Au Ama naloitan nalali neu sin." 20:24 Leka asimo lasi bo'es sin nen lasi nane te, sin nato'an asimo lasi nua in nane. 20:25 Mes Yesus anboin sin ma nak: "Hi mihin mak, ale ana' plenat naplenat sin to nok to'as ma maunu ma ale anaet sin nanaoba sin kuasat nok matane neu sin. 20:26 Mes anbi ki ka on fa nane. Atoni le hen fani anaet anbi ki, so in anfani hi atuthaes, 20:27 ma atoni le hen fani ahunut anbi ki so in anfani hi ate. 20:28 Onle Anmone Pah To amsa; In koenon nem ka neu he napeni tuthaes mes In koenon nem hen fani atuthaes. Ma nana'at In monin he nafetin atoni amfaut sin." 20:29 Ma leka Yesus nok In asimo lasi sin anpoi na'ko Yerikho to amfaun nem natuin In. 20:30 Anmu'i atoni matfolo nua sin antok anbi lanan ninen. Leka sin nen Yesus nao anfin sin anbai nak, "Usif, Nai Daud sufan, mumnau kai fe!" 20:31 Mes to amfaun nane nakain sin he nati' sin natena. Mes sin anbai nahelnok, nak, "Usif, Nai Daud sufan, mumnau kai fe!" 20:32 Oke te Yesus anhake ma no'en sin nak, "Him lomi he Au mo'e sa' neu ki ka?" 20:33 Ma sin natae nak, "Usif, haim lomi he mit." 20:34 Fun Yesus namnau sin oke te In anpoh sin matan. Ma bi leku nane amsa sin nit oke te sin natuin Yesus.
21:1 Leka Yesus ma In asimo lasi sin anhaumak Yerusalem sin nem ante Betfage bi Tubu Zaitun. Nalali te Yesus anlelu In asimo lasi nua 21:2 ma nak, "Him nao nai meu kuan le anbi hi matam nane. Ma of hi mipeni bikase luke mnanu ainaf mese mafutun nok in tipun. Him sefi sin ma meki sin nua sin nem neu Kau. 21:3 Ma kalu anmu'i atoni le anhosen ki, hi mak neune: Uisneno hen pake. Of naskek In anfe nani neu ki." 21:4 Lasi nane anbol he nati' natisi a'an le Mafefa knino an etun nani nak, 21:5 "Him etun nai neu feotnai Sion: Kiso, ho Kesel nem neu ko, In nek amahoet ma antunon neu bikase luke mnanu mese, bikase luke mnanu saeba mese le fe tipu." 21:6 Oke te asimo lasi nane sin naon ma anmo'e sa' le Yesus anba'an neu sin. 21:7 Ma sin neki bikase luke mnanu ainaf nok in tipun. Oke te sin ankap nani neki sin bael pake. Ma Yesus antunon neun. 21:8 Atoni namfaun le ka maso'ik fa, sin na'ben sin bael pake bi lalan, atoni bian sin an ote hau no' ma anlasak bi lalan. 21:9 Ma to amfaun le nahunun Yesus ma le natuin In sin naba', nak, "Moni Nai Daud Anmone, antek alekot neu In le ankoenon nem nok Uisneno tunan In kanan, pules Uisneno Amnanut Afin-finit bi bale alatan!" 21:10 Ma leka In antam neu Yerusalem, ale to anbi kot nane nabeko ma sin natan nak, "Sekau ka es atoni i?" 21:11 Ma atoni amfaun nane sin natae nak, "I Mafefa Knino Nai Yesus na'ko Nazaret bi pah Galilea." 21:12 Oke te Yesus antam neu Ume Uisneno, ma anmli'u napoitan ale atoni le nasosa anbi po'an Ume Uisneno. Yesus aneusbai ale mei le antukal noni anbin ma ale atoni sini toko le nasosa kol ot kase anbin 21:13 ma nak neu sin, "Antui nani anbi Sulat Knino nak: Uisneno nakua a'an nak, 'Au ume of antek nani ume onen totis.' Mes hi mo'e mani anfani nuat asikat." 21:14 Ale atoni matfolo ma hae hela sin nem neu Yesus bi Ume Uisneno ma In naleko sin na'ko sin menas. 21:15 Mes leka Ana' lasi fuat nakaf sin ma Ahin Sulat sin nit ale lasi amkakat le Yesus anmo'e, ma ale li'ana le naba' bi Ume Uisneno nak, "Moni Nai Daud Anmone!" Sin alsin nato' 21:16 ma nak neu Yesus, "Hom nen li'ana sin nak sa' ka?" Yesus nak neu sin, "Au nen. Hi fe kam soi fa Sulat Knino le hanan nak, Na'ko ale ana' me ma li'ana le fe ansusu, sin fefan Ho muloitan han pules amneot?" 21:17 Oke te Yesus nao nasaitan sin ma anpoi na'ko kot nane neu Bethania ma antup anbi nane. 21:18 Leka fe nok-nok ana' Yesus anfani nem neu kot, In namnah. 21:19 Ma Yesus nit bubuk u'mese anhaumak lalan, oke te In nao neun mes ka napenif sa' anbine al non anmes. Oke te Yesus nak neu hau nane: "Of ho ka mufua amtenif talan te nabal-bal." Ma bi leku nane amsa bubuk nane anmate. 21:20 Leka sin nit lasi nane te sin namkakan ma nak: "Bubuk nane naskeket anmeot onme ka?" 21:21 Usif Yesus natae nak: "Au ak ki, kalu him palsai ma hi nekam ka naoni fa, nabe'i hi mo'e sa' le Au mo'e ulali neu bubuk nane. Ma ka al fa lasi nane; mes nabe'i hi mak neu nu'af i naoni ma mumoftom nai meu tasi," lasi nane of anbol. 21:22 Ma sa' le him toti bi onen totis nok palsait, of him simo mani." 21:23 Nalali te Yesus antam neu Ume Uisneno ma nanoina anbi nane. Oket Ana' lasi fuat nakaf sin nok ale amnasit to Yahudi sin nem ma natan neu Yesus nak, "Ho mo'e ale lasi nane meki kuasat sa' ka? Ma sekau es anfe Ko kuasat nane ka?" 21:24 Yesus natae sin nak, "Au amsa he utan ki. Ma kalu hi mitae, of Au uton ki, Au mo'e ale lasi nane eki kuasat sa'. 21:25 Nai Yohanes Aslanit le naslani ki na'ko me ka? Na'ko Uisneno ka ai na'ko mansian?" Oket sin na'uaben nak, "Kalu hit tak na'ko Uisneno, of In nak neu kit, kalu onane nansa' hi kam palsai fa neune ka? 21:26 Mes kalu hit tak: Na'ko mansian, hit tamtau neu atoni amfaun, fun ale atoni sin nak Nai Yohanes in Mafefa knino kun." 21:27 Es nane sin natae Yesus nak, "Hai ka mihinef." Ma Yesus nak neu sin nak, "Onane Au amsa ka uton ki fa, Au mo'e ale lasi i eki kuasat sa'." 21:28 "Mes hi mitenab onme antom lasi i: Atoni mese anmu'i anmone nua. In nao neu anmone anaet ma nak: Anah, neno i hom nao he mepu bi lele tanu'an sena. 21:29 Anah nane natae nak: Leko, am. Mes in ka naof. 21:30 Oke te atoni nane nao neu in anmone kliko ma nak neune onane amsa. Ma anah nane natae nak: Au ka lomif. Mes namuni te in natofon ma in nao. 21:31 Sekau na'ko sin nua sin ka le anmo'e in amaf in lomin ka?" Sin natae nak, "Anah amunit." Yesus nak neu sin: "Au ak ki, namneo asimo noni poni sin ma bife a'paisa sin of antam nahunun ki neu Plenat Uisneno. 21:32 Fun Nai Yohanes Aslanit nem hen lekan ki lanan amneot mes hi kam palsai fa neun. Mes asimo noni poni sin ma bife a'paisa sin anpalsai neun. Ma maski hi mit milali lasi nane, hi ka mitofom fa ma kam palsaif." 21:33 "Him nen amteni lasi leta bian le nak: Anmu'i pah tuaf mese le anmepu lele tua min kase. In anbah lele nane funam natef. Oke te in anhani nopu neu he naes tanu'an sena in oen ma nahakeb pana' ai haklelo pao moa anbi lele nane. Oke te in nana'at lele nane neu ameput sin ma in nao neu pah bian. 21:34 Leka neno abut anhaumak in lelu in ate sin nao neu ameup lele nane hen simo in lele afan. 21:35 Mes ameup lele nane sin anheke in ate sin ma anbiso bian, namate, bian ma anpoli bian neki fatu. 21:36 Nalali te pah tuaf nane anlelu ate bian namfau nesin le ahunut sin mes sin anmo'e sin papmese onle sin bian amsa. 21:37 Oke te in anlelu in anmone nao neu sin ma nak: Of sin namtausan au anmone. 21:38 Leka ameup lele sin nit pah tuaf nane in anmone te sin ma'uaben es nok es nak: Ba'is i asimo bale mnasi, aim he tamate, he nati' hit atpal kuk in bale mnasi nane. 21:39 Oke te sin anheke ma anpolin napoitan neu kotif, ma namate in. 21:40 Leka lele tuaf nane in nem, of in anmo'e sa' ka neu ameup lele nane sin ka?" 21:41 Sin natae neu Yesus nak, "Of in namate ale atoni abulalut nane sin ma in nana'at lele nane neu ameup lele bian; le of nana'at in lele afan neun bi neno abut." 21:42 Usif Yesus nak neu sin, "Hi fe kam soi fa ka Sulat Knino le naton nak: 'Fatu le ameup ume anpolin nani, anfani neu fatu sukit, lasi nane anbol na'ko Uisneno, mo'et sanmakat mese bi hit matak.' " 21:43 "Es nane, Au ak ki, nak of naiti Plenat Uisneno na'ko ki ma of anfe nani neu uf mese le nalile Plenat nane in fuan. 21:44 Ma atoni le anmofu neu fatu nane, of in naklati ma fatu nane antutu antoman atoni me of naskuku nfin." 21:45 Leka ana' lasi fuat nakaf sin ma atoni Farisi sin nen Usif Yesus In lasi leta nane, sin nahin nak Yesus na'uab antom sin. 21:46 Ma sin nami hen heke Yesus, mes sin namtausan atoni amfaun; fun atoni amfaun nane sin nak Yesus Mafefa knino kun.
22:1 Oke te Yesus na'uab anteni neu sin neki lasi leta nak: 22:2 "Plenat Neno Tunan maleta onle kesel mese le hen mo'e tolas mafet mamonet neu in anmone. 22:3 Kesel nane anlelu in ate sin hen hone ale atoni le anhok nani sin he neman neu tolas mafet mamonet nane. Mes ale atoni nane sin kan lomi fa he neman. 22:4 In anlelu anteni ate bian ma nak: Hi mak neu ale atoni le afi anhok sin nak: Au ubalab ulali tolas nane, Au lolo ulali au bia keso ma au mu'it apokat sin. Ale sa'-sa' namtis, aim nai meu tolas mafet mamonet i. 22:5 Mes ale atoni nane sin kan lae nani fa. Bian sin nao neu sin lele, bian neu sin bale sosa; 22:6 ma bian anheke ate nane sin, oke te anhamu'i sin ma namate sin. 22:7 Kesel nane nato', oket anlelu in solalus sin he namate ale abulalut nane sin ma not nain sin kot. 22:8 Nalali te in nak neu in ate sin: Tolas mafet mamonet naloitan nalali, mes atoni le afi anhok sin, kan tam fa ota neu tolas nane. 22:9 Es nane him nao nai meu ale lalan tefkin ma amhok ale atoni le hi mieku mokan he neman neu tolas nane. 22:10 Ma ate sin anao ma nabuab ale atoni le sin nae'ku nokan bi lalan, amolemut ma alekot; talan te ke'an tolas mafet mamonet nane nahenu nok amnemat sin. 22:11 Oke te Kesel nane ankoenon antam he na'eku nok ale amnemat sin. In kius nit atoni mese le kan pakef bael tolas. 22:12 Kesel nak neune: Bae, leka me hom tam aum meu i ho kam pakef bael tolas neu sa' ka? Mes atoni nane in ela. 22:13 Oke te Kesel nak neu in ate sin: Him futu nai in haen ma in niman ma anpolin neu bale mesokan. Bi nane of kaet ma nisi kilof. 22:14 Fun no'en namfaun, mes anbeti sin fua fauk." 22:15 Nalali te atoni Farisi sin naon ma anmalomis hen su' Yesus neki tanas mese onme. 22:16 Ma sin anlelu sin asimo lasi nok atoni Herodian natan Yesus nak, "Kulu, hai mihin Ho atoni amneot Ko. Ho munoina lalan Uisneno nok amneot. Ma Ho ka mumtausan fa sekau amsa, fun Ho kam betif humaf. 22:17 Ho muton kai fe Ho mutenab onme: Het baen noni poni neu Kesel ka ai kahaf?" 22:18 Mes Yesus nahin sin tenab amle'ut nane oket In nak neu sin, "Nansa' es hi hem su' Kau ka, hi atoni asafanut ki? 22:19 Milile Kau noni le him pake neu hem baen noni poni." Oke te sin neki noni dinar mese neu Yesus. 22:20 Yesus natan sin nak, "Sekau in human ma in tuis es i ka?" 22:21 Sin natae nak, "Kesel in human ma in tuis." Oke te Yesus nak neu sin, "Him fe nai neu Kesel sa' le hi hem fe neu Kesel, ma neu Uisneno sa' le hi hem fe neu Uisneno." 22:22 Leka sin nen lasi nane te sin namkakan ma sin nao nasaitan Yesus. 22:23 Bi neno nane atoni Saduki sin fauk, le sin nak katit fa amates anfen anfan sin neman neu Yesus. Sin antoti Yesus nak, 22:24 "Kulu, Nai Musa nak: Leka atoni mese anmate mes kan mu'if anah, in olif mes anmafe nok in fel nane hen talu sufan neu in tataf. 22:25 Mes anbi kai hai atoni hitu maoil tatan. Le anaet anmafe, oke te anmate. Ma natuin in kan mu'if anah, in nasaitan in fel neu in olif. 22:26 Onane amsa in olif le natuine ma es anteni talan te sin hitu sin. 22:27 Ma namuni te, bifel nane anmate. 22:28 Neu, leka bi neno amates anfen anfan, na'ko atoni hitu nane of sekau es anfani bife nane in mone ka? Fun afi sin alsin anmafe nok bife nane." 22:29 Usif Yesus natae sin nak, "Hi mitenbam san, fun hi ka mihinef Sulat Knino ma Uisneno In kuasat! 22:30 Fun bi neno amates anfen anfan of sin kan mafe ma kan mamone anteni fa mes sin monin on ahake abit neno tunan. 22:31 Mes hi kam soi fa sa' le Uisneno nakua a'an antom atoni amates anfen anfan ka? Uisneno nakua a'an nak: 22:32 'Au le i Nai Abraham in Uisneno, Nai Ishak in Uisneno ma Nai Yakub in Uisneno.' In ka Uisneno atoni amates, mes Uisneno atoni amonit!" 22:33 Ale atoni le sin natnin lasi nane sin nekan ansanmak neu In lasi noina nane. 22:34 Leka atoni Farisi sin nen nak Yesus an ek nan atoni Saduki sin, oke te sin nabuan. 22:35 Ma atoni mese na'ko sin, atoni Ahin Sulat, antoti hen su' Usif Yesus nak, 22:36 "Kulu, plenat me es abainesit bi Plenat Knino ka?" 22:37 Yesus natae nak, "Hom nek Uisneno, meki ho nekam oke, ho smanam oke, ma ho hinem oke. 22:38 Nane plenat abainesit ma ahunut kun. 22:39 Ma plenat nono nua le namnes nokan esle': Hom nek ho aom bian onle hom nek ho aom. 22:40 Bi plenat nono nua in nane, Plenat Knino ma Mafefa knino sin sulat nau'bon anbin." 22:41 Leka atoni Farisi sin fe nabuan, Yesus natan sin nak, 22:42 "Hi mitenab antom Kesel Afetin onme ka? Sekau In sufan ka?" Sin nak neu Yesus, "Nai Daud sufan." 22:43 Yesus nak neu sin, "Kalu onane, nansa' es natuin Smanan Knino in mepu Nai Daud antek In nak: In Kesel Afetin, leka in nak: 22:44 Uisneno nakua a'an neu au Usif: Hom tunom nai ambi Au aok bian ne'u talan te Au tao ho musu sin bi Ho haem nupun. 22:45 Es nane kalau Nai Daud antek In, nak In Kesel Afetin, leka me In anfani Nai Daud sufan ka?" 22:46 Katita tenif atoni mese he natae Yesus. Ma na'ko neno nane katita tenif atoni mese amsa' he natan sa' neu Yesus.
23:1 Oke te Yesus na'uab neu atoni amfaun ma neu In asimo lasi sin nak, 23:2 "Ahin Sulat sin ma atoni Farisi sin antok anbi Nai Musa ini toko. 23:3 Es nane hi mitun ma anmo'e sa' le sin nanoina nani neu ki. Mes kais mituin sa' le sin anmo'e fun sin kan mo'ef sa' le sin nanoina. 23:4 Sin anfutu baut mafena, oket nasaeba neu atoni sin hanun, mes sin kan loi nitef. 23:5 Ale mepu le' sin anmo'e he nati' atoni sin nit, sin anpake tani onen totis mainuab ma namnanub sin sobalu betkone in fukan. 23:6 Sin anlomi hen tokon bi bale makana bi tolas ma antokon bi toko makana bi ume buat. 23:7 Sin anlomi he atoni anhosen sin bi ume masa' ma antek sin nak, 'Anoni.' 23:8 Mes hi, kais antek ki nak 'Anoni,' fun hi Anoni mese ma hi ale ki mabae es nok es. 23:9 Ma kais him tek atoni mese bi pah pinan i mak 'Amaf,' fun hi Ama mese esle' In abit neno tunan. 23:10 Kais antek ki amsa nak 'Nakaf,' fun hi Nakaf mese esle' Kesel Afetin. 23:11 Atoni le hen fani anaet anbi ki mes anfani hi atuthaes. 23:12 Ma atoni le nanaeb in aon of nabaun nani ma atoni le nabaun in aon of nanaeb nanai. 23:13 Amle'ut neu ki, Ahin Sulat ma atoni Farisi. Hi atoni asafanut, fun him es mis eno Plenat Neno Tunan bi atoni sin matan. Hi kam lomif hem tam mes hi misenip atoni le anlomi hen tam. 23:14 Amle'ut neu ki, Ahin Sulat ma atoni Farisi, hi atoni asafanut, fun hi misik bife banu sin ume; ma him tobe hi mo'et amle'ut meki onen totis amnanut. Es nane of hi mipeni kasat mafena. 23:15 Amle'ut neu ki, Ahin Sulat ma atoni Farisi, hi atoni asafanut, fun him lak tasi ma misopu pah meto; he mite'un atoni mese neu he natuin ki. Mes leka in na'teunon hi mo'e mani neu atoni le hen tam neu ai maputu in balan; le in bulalun kuni nua anesin ki. 23:16 Amle'ut neu ki, ale nakaf afolot le na'uab nak: Ansup neki Ume Knino, supat nane ka namneof. Mes amsup neki Ume Knino in noni mnatu supat nane namneo. 23:17 Hi atoni amonot ma atoni matfolo, sa'es anbainesi, mnatu ka, ai Ume Knino le naknino mnatu nane? 23:18 Ansup neki baki fuat, supat nane ka namneof. Mes ansup neki fuat le nabelkon anbi baki fuat, supat nane namneo. 23:19 Hi atoni afolot, sa' es anbainesi, fuat ka ai baki fuat le naknino fuat nane? 23:20 Es nane atoni le ansup neki baki fuat, in ansup neki baki fuat ma ale sa le anbine amsa. 23:21 Ma atoni le ansup neki Ume Knino, in ansup neki Ume Knino ma neki Uisneno amsa le namaika anbine. 23:22 Ma atoni le ansup neki neno tunan, in ansup neki Uisneno In mau toko ma neki Uisneno amsa le antunon anbine. 23:23 Amle'ut neu ki, ale Ahin Sulat ma atoni Farisi, hi atoni asafanut, fun hi neki tonene, sip ayo ma onatlao in aobia bo'es. Mes lasi abainesit bi Plenat Knino hi kam lae mani fa, es le amneot, amnaut ma aki'at. Hi minaoba tukan mes ka moki fa tukan bian. 23:24 Hi atopus afolot, him tai basin le anbi hi bale mninut mes him olo bikase paha snaen le anbin. 23:25 Amle'ut neu ki, Ahin Sulat ma atoni Farisi, hi atoni asafanut, fun him fase klas ma pika sin kotin mes in nanan nahenu nok asikat ma apalu'. 23:26 Hoi atoni Farisi afolot, amfase muhunun klas in nanan, in kotin amsa of naknino. 23:27 Amle'ut neu ki, Ahin Sulat ma atoni Farisi, hi atoni asafanut, fun hi onle naukel malape muti. In kotin nane namas mes in nanan nahenu nok nuif ma punu. 23:28 Onane amsa hi kotim nane amneot neu atoni sin matan; mes hi nanam nahenu nok asafanut ma tanhais. 23:29 Amle'ut neu ki, Ahin Sulat ma atoni Farisi, hi atoni asafanut, fun hi mihakeb Mafefa knino sin naukel ma mimasab atoni anmo'e alekot sin fatu taka. 23:30 Ma hi mak: Bait afi hai moni bi hai babfin sin batan, of hai ka mimesbom fa mok sin he mimate Mafefa knino sin. 23:31 Nok lasi nane him saksi kim hi aom mak afi le namate Mafefa knino sin sufan esle' hi. 23:32 Ma hi es mitis hi babfin sin mo'et asanat nane amsa. 23:33 Hi kauna ki, hi kauna sufan ki. Hi he mifetin hi aom na'ko ai maputu in balan onme ka? 23:34 Es nane, kiso, Au sonu ki Mafefa knino sin, atoni ahinet sin ma Ahin Sulat sin. Of hi mimate bian ma hi mipeti bian ma him hamu'i bian bi ume buat ma him li'u bian na'ko kot es neu kot bian. 23:35 Es nane of him sutai atoni le ka nasanab sin na' na'ko Nai Habel atoni anmo'e alekot nane talan te Nai Berekhya in anah Nai Zakaria, le hi mimate mani anbi Ume Knino ma baki fuat sin atnanan. 23:36 Au ak ki: Ale atoni batan i of ansutai ale lasi nane." 23:37 "Yerusalem, Yerusalem, le ho es mumate Mafefa knino sin ma anpoli ale atoni le ansonu sin neu ko neki fatu. Hae fauk au lomi he ubuab ho anhin onle maun ainaf anu'bul in an ini bi in ninen aspokon mes ho kam lomif. 23:38 Mail, of nasaitan ume i he luman kun. 23:39 Ma Au ak ki: Na'ko tomas i of hi ka mitam teni Kau talan te hi mak: Alekot neu In le nakoenon nem anbi Uisneno In kanan."
24:1 Oke te Yesus anpoi na'ko Ume Uisneno ma In nao kun. Ma In asimo lasi sin neman ma anlul neu Ume Uisneno nane. 24:2 Yesus nak neu sin, "Hi mit ale nane sin ka? Au ak ki, of katit fa fatu mese anbi i le nabelon nabala anbi fatu bian. Of anpukai nani." 24:3 Leka Yesus antok bi Tubu Zaitun, In asimo lasi sin neman neun he na'uab nokan anmes. Sin nak, "Muton kai fe, leka lasi nane of anbol. Ma neno Ho hem munoebom aum ini takan sa' ka ma neno hatas amsoput ini takan sa' ka?" 24:4 Yesus natae sin nak, "Panat nai, he nati' kais anmu'i atoni le nasekeb ki. 24:5 Fun of anmu'i atoni namfaun neki Au kanak ma nak: Au Kesel Afetin Kau ma of sin nasekeb atoni namfaun. 24:6 Of him nen slutuf ma beno makenat mes kais mimtau. Fun ale lasi nane mes anbol mes nane fe ka neno amsoput fa. 24:7 Fun uf es of anmaken nok uf bian ma pah es of anma'aut nok pah bian. Amnahas ma nainunus of anbol bi me-me. 24:8 Mes lasi nane al mane'at nau'bon neu batan fe'u le he nem. 24:9 Bi tomas nane of nana'at ki neu hamu'it ma of namate ki. Ma ale to of na'akan ki natuin Au kanak. 24:10 Bi tomas nane of atoni namfaun natotan Uisneno ma es of nana'at es ma es ansunan es. 24:11 Mafefa moel namfaun of anbol ma nasekeb atoni namfaun. 24:12 Ma natuin lasi maufinu ansato, atoni namfaun sin lasi manekat namneku. 24:13 Mes atoni le nalan tal namsopun of namonib nani. 24:14 Ma Plenat Neno Tunan in lasi knino i, of an etun nani neu paha pinan on saksi neu ale to. Oke te neno hatas amsoput." 24:15 "Leka hi mit Amle'ut le he nale'un anhake anbi bale knino natuin Nai Daniel in sulat -- ale atae sulat hen panat nani -- 24:16 ale atoni abit pah Yudea sin mes naen neu neten. 24:17 Atoni le anbi ume penen kais ansanu he naiti bale na'ko in ume. 24:18 Ma atoni le anbi lele kais anfani he naiti in bael pake. 24:19 Amle'ut neu bife le na'apu ai le nasusu anah bi neno nane. 24:20 Amonen toti nai, he nati' bi neno le hi maen kais antom nok neno mainikin ai nok Neno Snasat. 24:21 Fun bi neno nane of hamu'it anaek anbol onle fe kan bol nitaf na'ko neno le anmo'e pah pinan tal neno i ma le of kan bolan tenif. 24:22 Ma kalu Uisneno ka na'palan fa in neno of katit fa atoni mese hen moni. Mes natuin In to mabeti Uisneno of na'palan neno nane. 24:23 Bi tomas nane kalu atoni nak neu ki: Kiso, Kesel Afetin es i, ai Neno Anan es nane, kais him palsai. 24:24 Fun Neno Anan moel ma mafefa knino moel of anbol. Of sin anmo'e taka ma lisan matane ma lasi amkakat namfau, talan te sin nasekeb ale atoni mabeti sin amsa. 24:25 Mimnau, fun Au uton ulali neu ki. 24:26 Es nane, leka atoni nak neu ki: Kiso In anbi mnela hufui, kais him nao meu nane. Ai mak: Kiso In anbi ke'an nanan, kais him palsai. 24:27 Fun onle limat anpin na'ko neno saet ma in pinan talan te neno Tes, onane amsa Anmone Pah To in neno he nanoebon nem. 24:28 Fun punu anbi me te, kol ka' sin nabuan anbi nane." 24:29 "Namuni na'ko neno hamu'it naek nane, manas namesok ma funan kan sinek fa. Ale afkun of anmofu na'ko neno tunan ma ale kuasat bi neno tunan of nabeko. 24:30 Bi tomas nane of sin nit Anmone Pah To In taka anbi neno tunan. Ma ale to pah pinan of sin ankae. Of sin nit Anmone Pah To nanoebon nem anbi nope in fafon nok In kuasat ma In apinat naek. 24:31 Ma of In anlelu ahake neno tunan sin anpu' knit ma to'is ma sin nabuab ale to mabeti na'ko anin mata' ha', na'ko neno tukan bian neu tukan bian. 24:32 Minoina nai na'ko lasi leta antom bubuk. Leka in atlaen nane makuke ma non anbutu, hi mihin mak faoknais anhaumaken. 24:33 Onane amsa leka hi mit ale taka i sin, mihin nai, ma In neno anhaumaken bi ume enon. 24:34 Au ak ki: Batan i of kan finif, nahunu na'ko ale lasi i hen bol. 24:35 Neno tunan ma pah pinan of anfin, mes Au a'ak of kan finif. 24:36 Mes neu neno ma tabu nane, katit fa atoni mese he nahin, ahake neno tunan amsa kahaf, Uisneno Anmone amsa kahaf, al Ama anmes es nahine." 24:37 "Fun on afi batan Nai Nuh onane te papmese bi neno, le Anmone Pah To he nanoebon nem. 24:38 Fun on afi sin bi batan nane nahunun noe sako, sin nah ma ninun, anmafe ma anmamonen talan te Nai Nuh antam neu bnao. 24:39 Ma sin ka nahin fa sa', nahunun noe sako ansae ma naneku sin alsin onane te papmese bi neno Anmone Pah To he nanoebon nem. 24:40 Bi neno nane kalu anmu'i atoni nua anbi lele, of neki es ma es of nabala. 24:41 Kalu anmu'i bife nua le fe anfole aen kase anbi fatu, of neki es ma es of nabala. 24:42 Es nane, him be' nai, fun hi ka mihinef neno leka hi Usif nanoebon nem. 24:43 Mes mihin nai: Leka uim tuaf nahin leku fauka anbi fai abakat he nem, of in anbe' ma kan paleob sin hen pukai in ume. 24:44 Onane te hi amsa miloitan nai, fun leku Anmone Pah To he nanoebon nem hi ka mitenab mani fa." 24:45 "Yesus nak anteni, sekau ka es le ate aki'at ma ate amanoet? Le in tuan naiti hen fani nakaf neu ate bian, he nabalab mnahat neu sin bi leku le'at. 24:46 Alekot neu ate nane leka in tuan anfani nem ma napeni nan anmo'e onane. 24:47 Au ak ki: Of in tuan nasaeb nani hen panat ale in mu'in. 24:48 Mes leka ate nane abulalut ma natenab bi in nekan ma nak: 24:49 Au tuan fe ka nemaf, oke te in anbiso ale ate bian, ma nah ninu nok atoni amafut sin. 24:50 Nalali te in tuan nem bi leku le in ka nahinef, 24:51 ma of namate ate nane ma anmo'e nani papmese nok atoni asafanut sin. Bi bale nane of sin ankae ma neku nisin."
25:1 "Bi leku nane Plenat Neno Tunan maleta onle li'feto bo'es, le neki sin paku ma anpoi hen senu atoni fe'u. 25:2 Li'feto nim amonot ma li'feto nim ahinet. 25:3 Li'feto amonot sin neki sin paku, mes ka nekin fa mina. 25:4 Mes li'feto ahinet sin neki sin paku ma neki mina anbi botil. 25:5 Fun atoni fe'u nane ka nem fa suk a'lo, sin alsin ansesa ma antupan. 25:6 Leka fai nanesab onane te sin nen ahunun nak: Atoni fe'u nemen! Him poi nai hem senu! 25:7 Li'feto bo'es nane sin anfenan ma naloitan sin paku. 25:8 Li'feto amonot sin nak neu li'feto ahinet sin nak: Amfe kai fa hi mina akle'o fun hai paku hen mate. 25:9 Mes li'feto ahinet sin nak: Kahaf, mina of kan tiaf neu kai ma neu ki. Him nao hem sos neu asosa mina nane. 25:10 Oke te li'feto nim amonot sin nao hen sosan mina. Leka sin fe naon onane te atoni fe'u nem. Li'feto nim ahinet sin naloitan ma nokan antam neu ke'an tolas mafet mamonet ma sin an ek eno nane. 25:11 Nalali te li' feto nim amonot nane sin neman, ma anhaman nak: Usi, Usi, musoiton kai eno! 25:12 Mes in natae nak: Au ka uhin kif. 25:13 Es nane him be' nai, fun hi ka mihin fa neno ai leku." 25:14 "Fun Plenat Neno Tunan onle atoni mese he nao neu paha lo. In anboin in ate sin ma nana'at ini maus neu sin. 25:15 In anfe neu atoni es talenta nim. Es anten talenta nua ma neu atoni es talenta mese. In anfe neu sin es-es nok in be'in oke te in nao. 25:16 Oke te ate le ansimo talenta nim nane in nao. In nanaob in talenta nane ma nasuf talenta nim. 25:17 Ate le ansimo talenta nua nane in amsa anmo'e onane ma nasuf talenta nua. 25:18 Mes ate le ansimo talenta mese nane in nao ma anhani nopu bi nain ma natolo in usin noni anbin. 25:19 Ka lo fa onane te ate sin usin anfani nem ma anso'i nok in ate sin. 25:20 Ate le ansimo talenta nim in nem ma neki sufan talenta nim ma nak: Usif, talenta nim le muna'at kau sin kiso, au upeni sufan talenta nim. 25:21 Ma usif nane nak neune: Ho mo'et nane leok le'uf, ho ate alekot ma aki'at ko; ho mu'ki bi lasi an-ana, of au una'at ko lasi anaek. Hom tam nai bi ho usi in amlilat. 25:22 Oke te ate le ansimo talenta nua in nem ma nak: Usif, talenta nua le afi ho muna'at neu kau; kiso upeni sufan talenta nua. 25:23 Ma usif nane nak: Ho mo'et nane leok le'uf, ho ate alekot ma aki'at ko. Ho mu'ki bi lasi an-ana, of au una'at ko lasi anaek. Hom tam nai bi ho usif in amlilat. 25:24 Oke te ate le ansimo talenta mese in nem ma nak: Usif, au uhin ak ho atoni amaunu ko. Hom abut bi bale le ho kam kifu fa fini ma amseki bi bale le ho kam senaf. 25:25 Es nane te au umtau ma au utolo usif ho talenta anbi nain. Neu, usif amsimo nai ho ini! 25:26 Ma usif nane natae nak: Ho ate abulalut ma apehet ko, ho muhin mak au abut bi bale le au ka kifun fa fini ma au seki bi bale le au ka senaf abine ka? 25:27 Onane te so ho meki au noni nane neu atoni le nanaoba noni, he nati' bi neno au fain aum au simo ufani au noni nok in sufan. 25:28 Es nane maiti talenta nane na'ko in ma amfe mani neu atoni le anmu'i talenta bo'es. 25:29 Fun atoni le anmu'i nok athoes. Mes atoni le kan muif, sa'am sa' le in anmu'i of naiti nan na'ko in. 25:30 Ma anpolin mitam ate ka ma'upa nane bi bale mesokan. Bi nane of in ankae ma neku nisin." 25:31 "Leka Anmone Pah To nanoebon nem bi In apinat ma ale ahake neno tunan nok In, of In antunon bi In mau toko apinat. 25:32 Oke te of In nabuab ale atoni bi In matan ma anbati sin es nok es, onle atukus anbeti bibi kase na'ko bibi. 25:33 Ma of In nahakeb bibi kase sin bi In aon bian ne'u ma bibi sin bi In aon bian ali'. 25:34 Ma Kesel nane of nakua a'an neu sin abit In aon bian ne'u nak: Aim nai, hi le amsimo alekot na'ko Au Ama. Amtam nai meu Plenat le naloitan nalali neu ki na'ko neno le fe anmo'e pah pinan. 25:35 Fun leka Au umnah, him fe Kau he bukae; leka Au meno oe, him fe Kau he inu; leka Au on atoni anaot, hi mitam Kau neu hi ume. 25:36 Leka Au monas, him fe Kau tainusat; leka Au umen, hi mail Kau; leka Au bi o'of, hi aim ma amkiso Kau. 25:37 Oke te ale atoni nane of sin natae nak: Uisneno, leka es hai mit Ho mumnah, ma haim fe Ko hem bukae ai a meno oe, ma haim fe Ko he minu ka? 25:38 Leka es hai mit Ho on atoni anaot, ma hai mitam Ho anbi hai ume, ai monas ma haim fen Ho tainusat ka? 25:39 Leka es hai mit Usi mumen, ai ambi o'of ma haim kiso Usi ka?" 25:40 Ma Kesel natae sin nak: Au ak ki, sa' le hi mo'e mani neu Au bae olof sin, nane hi mo'e mani neu Kau. 25:41 Ma of In nak amsa neu sin le anbi In aon bian ali' Miskot mi'ko Au matak, hi atoni masukat, amtam nai meu ai maputu in balan le naloitan nalali neu Nitu ma in ahake sin. 25:42 Fun leka Au umnah, hi kam fe Kau fa he bukae; leka Au meno oe, hi kam fe Kau fa he inu. 25:43 Leka Au on atoni anaot, hi kam fe Kau fe bale; leka Au monas, hi kam fe Kau fa tainusat; leka Au umen ai bi o'of, hi kam kiso Kau. 25:44 Ma sin natae neu In nak: Uisneno leka hai mit Ho mumnah ai ameno oe, ai onle atoni anaot, ai monas, ai mumen, ai ambi o'of, ma hai kam kiso fa Ho ka? 25:45 Oket In natae sin nak: Sa' le hi ka mo'e mani neu Au bae olof sin, nane hi ka mo'e mani amsa neu Kau. 25:46 Ma ale atoni i of sin antam neu bale hamu'it nabal-bal, mes atoni amneot of sin antam neu honis nabal-bal."
26:1 Leka Yesus nasopu In noina te, In nak neu In asimo lasi sin, 26:2 "Hi mihin nak al neno nua of atmoe Tolas Paskah, ma of nana'at Anmone Pah To he napeti." 26:3 Bi neno nane Ana' lasi fuat nakaf ma amnasit to Yahudi nem nabuan anbi Nai Kayafas Ana' lasi fuat Amnanut in sonaf. 26:4 Ma sin manlekan salit mese hen anheke Yesus nok lasi ak'elo he namate. 26:5 Mes sin nak, "Kais nok neno tolas, he nati' kais taisibu anbol anbi to." 26:6 Leka Yesus anbi Betania, bi Nai Simon atoni men poko in ume, 26:7 bife mese nem neu Yesus. In neki botil mese nok min fomeni le upan matani. Leka Yesus fe antoko ma anbukae, bife nane anop min fomeni neu Yesus nakan. 26:8 Leka asimo lasi sin nit lasi nane te sin nato'an ma nak, "Nahoeb nale'un mina nane neu sa' ka? 26:9 Mina nane nabe'i hit tasosa nok upan anaek ma hit atbati noni nane neu amamu'it sin." 26:10 Mes Yesus nahin sin nek tenab nane ma nak, "Nansa hi misusab bife nane ka? Fun in mo'e alekot neu Kau. 26:11 Atoni amamu'it sin nok ki piut, mes Au of ka ok ki fa. 26:12 Fun anop mina nane neu Au aok, in nabalab neu hen sub Kau. 26:13 Au ak ki: An etun Lasi Knino i bi me-me anbi pah pinan, sa'le bife nane anmo'e of antek nani amsa he namneu In." 26:14 Oke te atoni mese na'ko asimo lasi sin bo'es am nua nane, kanan Nai Yudas Iskariot, in nao neu Ana' lasi fuat nakaf sin. 26:15 In nak, "Him fe kau sa', he nati' au una'at Yesus neu ki ka?" Oket sin anbaen noin muti bo' tenu neu Nai Yudas. 26:16 Ma na'ko leku nane in nami mainuan alekot he nana'at Yesus. 26:17 Bi neno ahunut na'ko Neno Naek Utunu' Kan Pake fa Lalu haef Yesus In asimo lasi sin nem neun ma nak, "Hom lomi he miloitan mei tolas Paskah neu Ko anbi me ka?" 26:18 Yesus natae nak, "Him nao nai meu kot, meu Nai Sa'af ma mak neune: Kulu anba'an nak: Au leku anhaumak; Au he mo'e Paskah ok Au asimo lasi sin bi ho ume." 26:19 Oke te In asimo lasi sin anmo'e sa' le Yesus anlelu sin ma sin nabalab tolas Paskah. 26:20 Leka neno anfai, Yesus antok ma anbukae nok In asimo lasi sin bo'es am nua. 26:21 Ma leka sin fe anbukae onane te Yesus nak neu sin, "Au ak ki, of es anbi ki nana'at Kau." 26:22 Ma sin nekan ansusal oke te sin mese-mese na'uab neu Yesus nak, "Ai au ka, koi Usi?" 26:23 Yesus natae nak, "Atoni le anlep utunu' bi pika nok Kau, in of es nana'at Kau. 26:24 Namneo Anmone Pah To of anao onle antui nalali bi Sulat Knino antom In. Mes amle'ut neu atoni le nana'at Anmone Pah To! Leko nesi afi kais nahonis atoni nane." 26:25 Nai Yudas le nana'at In natae ma nak, "Tuan, ai au ka?" Yesus nak neune: "Namneo onle ho mak nane." 26:26 Ma leka sin fe anbukae, Usif Yesus naiti utunu' ma antek alekot neun. Nalali te In anebi ma anfe neu In asimo lasi sin ma nak, "Maiti, miah, i Au aok." 26:27 Oke te In naiti klas mninut ma antek alekot neun, oke te anfe neu sin ma nak, "Minu nai aleki na'ko klas i. 26:28 Fun i Au na', na' fefbela knino, le nat'op neu atoni amfaun hen sako sin sanat. 26:29 Mes Au ak ki: na'ko tomas i of Au ka inu tenif tanu'an sena i talan te neno Au iun ani fe'u nok ki bi Au Ama Ini Plenat." 26:30 Leka sin ansi nalali sit pules, Yesus nok In asimo lasi sin naon neu Tubu Zaitun. 26:31 Oke te Yesus nak neu sin, "Fai i of hi nek palsait nabeko natuin Au. Fun antui nalali nak: Of Au tepo atukus ma bibi pukan nane of nasitbok. 26:32 Mes leka Au fen anfani, of Au uhunun ki meu pah Galilea." 26:33 Nai Petrus natae nak, "Maski sin alsin palsait nabeko natuin Usif, mes au kahaf." 26:34 Yesus nak neune, "Au ak ko, bi fai i, nahunu na'ko manu ankokle'o, of ho mutotan Kau haef tenu." 26:35 Nai Petrus nak neune, "Ai mes he namate kau nok Usif, lof au ka utotan fa Usif." Ale asimo lasi bian amsa sin na'uab onane. 26:36 Oke te Yesus nok In asimo lasi sin nem ante bale mese kanan Getsemani. Nalali te In nak neu In asimo lasi sin, "Him tok fe anbi i, Au nao eu paina he onen toti." 26:37 In nok Nai Petrus ma Nai Zebedeus in anmone nua sin. Ma Yesus nekan antu' ma natai. 26:38 Oke te In nak neu asimo lasi sin, "Au nekak antu' a'nae le'uf, onle Au he mate. Mibala ambi i ma ambe' mok Kau." 26:39 Ma Yesus nao na'lo kle'o, oke te In anli'tu nabes ma anonen toti nak, "Koi Au Ama, kalu nabe'i maut he klas mnunit i anfin na'ko Kau. Mes kais natuin Au lomik, mes natuin Ama Ho lomim." 26:40 Nalali te In anfani neu In asimo lasi sin ma napeni sin fe antupan. Ma In nak neu Nai Petrus, "Hi ka mibe'i fa ka hem be' mok Kau leku mese? 26:41 Ambe' nai ma amonen toti, he nati' kais him tam meu lasi su'at. Hi smanam anlomi hem mo'e alekot mes hi aom ta'um naklati." 26:42 Nalali te In naon teni hae nua ma anonen nak, "Koi Au Ama, kalu klas mninut i kan nabe'i fa hen fin, maut he Au inu, Ama Ho lomim anbol nai!" 26:43 Ma leka In anfani nem, In napeni asimo lasi sin fe antupan fun sin matan anmafen. 26:44 Yesus ka noki sin fa mes In nao ma anonen hae tenu antek onen le nane amsa. 26:45 Oke te In anfain nem neu In asimo lasi sin ma nak, "Him tup man fe. Kiso, in leku ante, nak he nana'at Anmone Pah To neu atoni asanat sin niman. 26:46 Amfen nai, aim nait het nao. Atoni le he nana'at Kau neman haumaken." 26:47 Leka Usif Yesus fe namolok onane te, Nai Yudas le asimo lasi bo'es am nua sin es in nem. Ma atoni namfaun sin nokan le nekin suni ma hau tuka. Ana' lasi fuat nakaf sin ma amnasit to Yahudi sin es anlelu sin. 26:48 Atoni le he nana'at Yesus anfen sin taka ma nak, "Atoni le of au nek, In esle' nane, amheke nai In." 26:49 Naskek Nai Yudas anfonat nem neu Yesus ma nak, "Saomina neu Ko Kulu," oke te in nek Yesus. 26:50 Mes Yesus nak neune, "Bae, ho aum meu i natuin lasi sa' ka?" Oket atoni amfaun nane sin fonat nem ma anheke Yesus. 26:51 Mes atoni anbi sin le nok Yesus in nenu niman, ma anfaik suni ma ansaip neki Ana' lasi fuat Anaet in ate luken tal natfek. 26:52 Ma Yesus nak neune, "Mutap mufani ho suni neu in tapan, fun ale atoni le nait suni, of in namle'u natuin suni. 26:53 Ai ho mutenab, mak Au ka ube'i fa he toti Au Ama, he nati' In ansonu Kau Pukan ahake neno tunan nesin nifun bo'es am nua hen bab Kau ka? 26:54 Kalu onane, he natisi nan sa' le antui nalali anbi Sulat Knino nane onme ka?" 26:55 Oke te Yesus nak neu atoni amfaun nane, "Hi mitenab mak Au le i atoni asikat Kau, es nane hi aim meki suni ma hau tuka hem hek Kau? Neno-neno Au toko ma unoina bi Ume Uisneno, ma hi kam anheke Kau. 26:56 Mes maut he ale lasi i anbol he natisi sa'le antui nani bi mafefa knino sin sulat." Oke te ale asimo lasi sin naen nasaitan Yesus. 26:57 Leka sin anheke nalali Yesus te, sin nokan neu Ana' lasi fuat Anaet Nai Kayafas in sonaf; le Ahin Sulat sin ma amnasit to Yahudi sin nabuan anbin. 26:58 Ma Nai Petrus natuin Yesus na'ko lo talan te Ana' lasi fuat Anaet in sonaf. Ma leka in antam, in antok anbi ale apaot sin atnanan he nit lasi in amsopun. 26:59 Ana' lasi fuat nakaf sin, ma Tolas Alef lasi ok-oke sin nami saksi moel neu Yesus he nati' sin namate Yesus, 26:60 mes sin ka napeni fa, maski atoni namfau le neman on saksi moel. Mes namuni te atoni nua sin neman, 26:61 ma nak, "Atoni i es na'uab nak: Au ube'i he pukai Ume Uisneno ma uhakeb ufani neno tenu." 26:62 Oke te Ana' lasi fuat Anaet nak neu Yesus, "Ho ka mutae fa sa' ka le sin ansaksi neu Ko ka?" 26:63 Mes Yesus an ela ai anta'ah kun. Oke te Ana' lasi fuat Anaet nak neu Yesus, "Anbi Uisneno honis In kanan, muton kai fe, Ho Kesel Afetin, Uisneno Anmone Ko ka ai kahaf." 26:64 Yesus natae nak: "Namneo onle ho mak. Mes Au ak ko, na'ko tomas i of hi mit Anmone Pah To antunon bi Uisneno Akuasat Afin-finit ale sa' aon bian ne'u ma nanoebon nem bi nope anbi neno tunan in fafon." 26:65 Onane te Ana' lasi fuat Anaet anpisu in bael pake ma nak, "In na'uab nale'un Uisneno. Hit he tami teni saksi neu sa' ka? Him nen milali le In nale'un Uisneno. 26:66 Neu hi mitenab onme ka?" Sin natae ma nak, "In mes hen mate!" 26:67 Oke te sin nalon ai nakinu In human ma In antufu; ma atoni bian In anbiso, 26:68 ma nak: Ati muton mit kai, hoi Kesel Afetin, sekau es antepo Ko ka? 26:69 Nai Petrus fe antok anbi sonaf anbi mone. Ate bife mese nem neun ma nak, "Ho amsa mok Yesus atoni Galilea nane." 26:70 Mes in natotan anbi ale atoni sin matan nak, "Au ka uhin fa sa' le ho mu'uab nane." 26:71 Leka in anpoi neu eno naek, ate bife bian nit ma nak neu ale atoni le anbi nane, "Atoni i afi nok Yesus atoni Nazaret nane." 26:72 Ma in natotan teni neki supat: "Au ka uhin fa atoni nane." 26:73 Ka lo fa onane te ale atoni le anbi nane sin neman neu Nai Petrus ma nak, "Namneo ho amsa mok sin. Fun ho a'at papmese nok sin." 26:74 Onane te Nai Petrus ansukat ma ansup nak, "Au ka uhin fa atoni nane." Ma bi leku nane manu ankokle'o. 26:75 Ma Nai Petrus namnau nit sa' le afi Yesus na'uab neune nak, "Nahunu na'ko manu ankokle'o, ho mutotan mulali Kau hae tenu." Oke te in anpoi neu mone ma ankae nok nek tu'as.
27:1 Leka fe nok-noka onane te, ale Ana' lasi fuat nakaf ma amnasit to Yahudi sin nabuan ma nafek he namate Yesus. 27:2 Sin anfutu Yesus ma nokan ma nana'at neu Nai Pilatus le anfani Kumlol bi pah nane. 27:3 Leka Nai Yudas le nana'at Yesus, nit nak sin nafek nalali he namate Yesus in antofon. Oke te in fe nafani noin muti pisa bo'tenu nane neu Ana' lasi fuat nakaf sin ma amnasit sin, 27:4 ma nak, "Au usanab ulali fun una'at atoni le kan mu'if sanat in na'." Mes sin natae ma nak, "Hai ka mihin fa mok lasi nane? Fun nane ho lasi kum!" 27:5 Oke te Nai Yudas anpolin natam noni nane sin neu Ume Knino, ma in nao ma naponi nison kun. 27:6 Ana' lasi fuat nakaf sin naiti noni nane ma nak: "Ka nabe'i he tao noni i neu peti tulu, fun noni i noni up na' kun." 27:7 Leka sin anmalomis nalali te sin ansos najan le antek nak Najan Abana Nai neki noni nane. Najan nane sin anpake neu naukel ale atoni anao amnemat sin. 27:8 Es nane tal neno i najan nane antek nak: Najan Na'. 27:9 Onane te natisi nani a'at le afi Mafefa Knino Nai Yeremia naton nak, "Sin ansimo noin muti bo' tenu, on upaf le to Israel anlomi hen baen neu In. 27:10 Ma sin anfe noni nane hen baen Najan Abana Nai, onle Uisneno anba'an neu kau." 27:11 Oke te sin nahakeb Yesus bi ama Kumlol pah nane matan ma natan In nak, "Ho Kesel atoni Yahudi Ko ka?" Yesus natae nak, "Namneo, onle ama ho mak nane." 27:12 Mes ale lasi le Ana' lasi fuat nakaf ma amnasit to Yahudi sin nasaeb nani neu Yesus, In ka natae fa sin. 27:13 Es nane Nai Pilatus nak neune, "Ati Ho kam nenaf ka ale lasi amfaun le sin ansaksi neu Ko ka?" 27:14 Mes In ka natae fa fefa mese, tal ama Kumlol pah nane in namkak. 27:15 Natuin anlek nani neu ama Kumlol he nafetin atoni hukum mese bi neno tolas nane le to anbeti nani. 27:16 Ma bi leku nane anmu'i atoni mese anbi o'of le makana natuin maufinu. In kanan Nai Yesus Barabas. 27:17 Fun sin nabua nanin anbi nane, Nai Pilatus nak neu sin, "Him lomi he ufetin ki sekau ka? Nai Yesus Barabas kai ai Nai Yesus le antek nak Kristus ka?" 27:18 Fun in nahin nak sin nana'at Yesus natuin nek a'unu. 27:19 Leka Nai Pilatus fe antunon bi in toko lef lasi, in fenai ansonu hanaf neun nak, "Kais ho mok amselo lasi atoni amneot nane, fun natuin In fai i au hamu'iok naek bi nunmait." 27:20 Mes Ana' lasi fuat nakaf sin ma amnasit sin nakoke, oke te atoni amfaun nane sin antoti he nafetin Nai Barabas ma namate Usif Yesus. 27:21 Ama Kumlol natae ma nak neu sin, "Him lomi he ufetin ki sekau bi atoni nua in i ka?" Sin nak, "Nai Barabas." 27:22 Nai Pilatus nak neu sin, "Kalu onane au mo'e sa' ka nok Yesus le antek nak Kristus ka?" Sin alsin nak, "Mipeti misan." 27:23 Nai Pilatus nak, "Mes In mo'e amle'ut sa' ka?" Mes sin hunun nahel-helok nak, "Mipeti misan." 27:24 Leka Nai Pilatus ankisot nak in tenab of son-sona ma of sin taisibun. Es nane te in naiti oe ma nafanu niman bi atoni amfaun sin matan ma nak, "Au ka usanab fa neu atoni i in na'. Nane hi lasi kim." 27:25 Ma to ok-oke sin natae nak, "Mautu he hai ma hai anhin amsutai In na'." 27:26 Oke te in nafetin Nai Barabas neu sin, mes sin antepo Yesus ma mana'at In he napeti anbi hau nehe. 27:27 Nalali te ama Kumlol in solalus sin neki Yesus antam neu bale lef lasi, oke te anboin pukan solalus ok-oke neman hen hake antol nan Yesus. 27:28 Sin nauf nani In bael pake ma napakeb In neki sobalu betkone amtasa. 27:29 Sin nakano sobe mese na'ko kisan ma antao nani neu Yesus nakan, oke te nana'at neun akmeo nono mese bi In niman ne'u. Nalali te sin anli'tu bi In matan ma namaeb In nak, "Selamat, Kesel Atoni Yahudi!" 27:30 Sin nalon Yesus ma ansimo akmeo nane ma anbiso Yesus In nakan. 27:31 Leka sin namaeb nalali Yesus te sin nauf nafani sobalu betkone nane ma napakeb nafani Yesus neki In bael pake. Oke te sin nok Yesus anpoi he napeti anbi hau nehe. 27:32 Leka sin anpoi na'ko kot ma naon, sin na'eku nok atoni mese na'ko Kirene kanan Nai Simon. Sin naseke atoni nane hen loi Usif Yesus hau nehe. 27:33 Ma sin ante' bale mese le kanan Golgota, in oten: Bale Nui Nakaf. 27:34 Oke te sin fen Yesus tua mina amtasa le anselo nok eun oef. Mes leka Yesus antamis nit, In kan lomi fa he ninu. 27:35 Leka sin napeti nalali Yesus te sin helan sulat hen bati In bael pake. 27:36 Oke te sin antoko bi nane hen pao Yesus. 27:37 Ma sin antao tuis mese bi In nakan fafon le antui In lasi matan nak, "I Yesus Kesel Atoni Yahudi." 27:38 Sin napeti atoni abulalut nua nok Yesus, es anbi In aon bian ne'u ma es anbi In aon bian li. 27:39 Ale atoni le naon natuin nane sin na'uab naufbanan In ma anki'un nakan, 27:40 ma nak, "Ho es hem pukai Ume Knino ma muhakeb mufani anbi neno tenu. Muhoni Ho aom, kalu Ho Uisneno Anmone Ko, amsanu mu'ko hau nehe nane." 27:41 Onane amsa Ana' lasi fuat nakaf sin nok Ahin Sulat sin ma amnasit sin namaeb Yesus ma nak, 27:42 "In nahoni atoni bian mes In ka nabe'i fa he nahoni In aon. In Kesel to Israel ka? Leko In sanu nai na'ko hau nehe nane ma of hai nekam nateb neu In. 27:43 In nafnekan neu Uisneno. Maut he Uisneno nafetin In, kalu Uisneno anlomi In. Fun afi In na'uab nak: Au lo Uisneno Anmone Kau." 27:44 Ma atoni abulalut le napeti sin nok Yesus sin amsa na'uab nale'un Yesus Onane. 27:45 Na'ko leku bo'es am nua pah nane namesok talan te leku tenu. 27:46 Oni leku tenu onane te Yesus an anbai nok hanan anaek nak, "Eli, Eli, lama sabakhtani?" In oten nak, "Au Uisneno, Au Uisneno, nansa es Ho musaitan Kau ka?" 27:47 Leka atoni fauk le anhake bi nane sin nen nani te sin nak, "In no'en Nai Elia." 27:48 Ma atoni mese anbi sin; naen laba ma naiti hau suf putun ma anlep neu tua mahai. Oke te anposun neu akmeo panan, ma anfe neu Yesus he ninu. 27:49 Mes atoni bian sin nak, "Kaisa, maut fe hit kiso, ai Nai Elia he nem he nahoni In." 27:50 Oke te Yesus an anbai anteni nok hanan anaek ma nanaat In monin. 27:51 Ma kiso, pilu eka Ume Knino anbation no nua na'ko fafon ante pinan. Ma nainunus anbol ma ale tubu fatu sin anpe'en. 27:52 Ma ale nuat naukel sin natfei ma to knino namfaun le anmate sin anfen anfani. 27:53 Ma leka Yesus anfen anfani, sin amsa anpoi na'ko nate, oke te antam neu kot knino ma nalile sin aon neu atoni amfaun. 27:54 Solalus nakaf ma ale solalus le anpao Yesus, sin namtau leka sin nit nainunus, ma ale lasi le anbol. Ma sin nak, "Namneo, In lo Uisneno Anmone kun." 27:55 Ma bi nane anmu'i bife namfaun le ankiso na'ko lo. Esle' ale bife le natuin Yesus na'ko pah Galilea hen tuthae In. 27:56 Ma anbi sin nane bi Maria Magdalena, ma bi Maria Nai Yakobus ma Nai Yusuf sin ainaf ma Nai Zebedeus in anhin sin ainaf. 27:57 Leka neno hen fai onane atoni amu'it mese nem na'ko Arimatea kanan Nai Yusuf. In amsa natuin Yesus. 27:58 In nao neu Nai Pilatus ma antoti Yesus aon nitu. Nai Pilatus anlelu he nana'at nani neun. 27:59 Ma Nai Yusuf naiti Yesus aon nitu nane an amu neki pilu muti fe'u. 27:60 Oke te in natupab anbi in nuat naukel fe'u, le anhani bi tubu fatu. Oke te in antuil fatu naek mese ma antobe nuat naukel nane fefan, nalali te in nao. 27:61 Mes bi Maria Magdalena ma bi Maria bian sin antok nabala anbi nane anbi nuat naukel matan. 27:62 Ma nokfa onane te Neno Snasat, Ana' lasi fuat nakaf sin nok atoni Farisi sin neman neu Nai Pilatus, 27:63 ma sin nak, "Usi, hai fe mimnau afi ba'is afuil to nane fe In anmoni, In nak: Neno tenu namuni te of Au fen anfani. 27:64 Es nane amlelu hen pao naukel nane tal neno tenu; he nati' kais In asimo lasi sin neman ma nabak neki In aon nitu. Oke te sin an etun neu to nak: In anfen anfani na'ko amates. Ma fulit amunit nane of namle'u nesin na'ko fulit ahunut nane." 27:65 Nai Pilatus nak neu sin, "Hi mu'i solalus apaot, nao nai ma ampao naukel nane lek-leko." 27:66 Oke te sin nao nok ale solalus apaot sin ma sin antao malak neu naukel nane ma anpao naukel nane nok alekot.
28:1 Leka Neno Snasat anfin, fe nok-noka manas hen sae bi neno ahunut klei nane, bi Maria Magdalena ma bi Maria bian sin nao hen kiso naukel nane. 28:2 Naskek onane te nainunus anaek anbol. Fun ahake Usif tunan ansanu na'ko neno tunan ma antuil fatu tobes nane ma antok bi fatu fafon. 28:3 In human on limat ma In bael pake muti on sen-sene. 28:4 Ma ale solalus apaot sin namtau, ma anfani onle amates. 28:5 Mes ahake neno tunan nua'ab neu ale bife nane sin nak, "Kais hi mimtau, fun Au uhin nak hi mami Yesus le napeti nane. 28:6 In ka es fa i, fun In anfen anfani, onle afi In nak neu ki. Aim, amkiso nai bale le natupab In anbine. 28:7 Ma him mnao nai lab-lab ma am etun In asimo lasi sin mak: In an fen anfani na'ko amates. In au nao nahunnu ki neu Galilea. Bi nane of hi mit In. Mimnau nane sa' le au uton ulali neu ki." 28:8 Ma bife nane sin nao nasaitan naukel nane. Nok amtaus ma amlilat naek sin naen lab-lab hen etun neu Yesus In asimo lasi sin. 28:9 Naskek onane te Yesus nae'ku nok sin ma nak, "Tetus neu ki." Sin anhaumak Yesus ma anho In haen ma nabes neu In. 28:10 Mes Yesus nak neu sin, "Kais mimtau. Him nao nai ma ametun lasi i neu Au bae sin, he nati sin nao neu pah Galilea ma of sin nit Kau anbi nane." 28:11 Leka sin fe anbi lalan atnanan, solalus apaot sin fauk neman neu kot ma an etun ale lasi nane neu ana' lasi fuat nakaf sin. 28:12 Ma sin manlekan nalali nok amnasit sin, oket sin nafekan hen fen solalus sin noni naek, 28:13 ma nak, "Hi mes miton mak, In asimo lasi sin neman nok fai ma nabak nan In, leka hai fe amtup. 28:14 Ma leka ama Kumlol nen lasi i of hai miu'ab mokan talan te hi ka mipeni fa susal sa'." 28:15 Sin ansimo noni nane ma sin anmo'e onle anba'an nalali neu sin. Ma lasi i nasitbon kun bi atoni Yahudi sin atnanan tal neno i. 28:16 Ma asimo lasi bo'es am mese nane sin naon neu pah Galilea, neu tubu le Yesus anba'an neu sin. 28:17 Leka sin nit Yesus, sin nabes neu Yesus mes bian nekan fe nao'ni. 28:18 Yesus anhaumak sin ma nak, "Anfe neu Kau ale kuasat, bi neno tunan ma bi pah pinan. 28:19 Es nane him nao nai ma amo'e ale pah-pah hen fani Au asimo lasi. Ma mislani sin anbi Amaf ma Anmone ma Smanan Knino In kanan. 28:20 Minoina sin hen panat ale lasi le Au ba'an neu ki. Mimnau nai Au ok ki piut talan te batan amsoput."
1:1 Lasi Knino na'ubon neu Yesus Neno Anan, Uisneno Anmone. 1:2 Onle antui nani anbi Mafefa Knino Nai Yesaya in sulat nak, "Kiso, Au lelu Au haef nahunun Ko, in of naloitan lalan neu Ko; 1:3 anmu'i atoni le anhunun bi mnela paha snaen nak: Miloitan lalan nai neu Uisneno, minono lalan neu In." 1:4 Onle matui anbi Mafefa Knino Nai Yesaya in sulat, onane te Nai Yohanes Aslanit anbol bi mnela paha snaen ma anhunun nak, "Mite'un hi nekam nai ma amfe hi aom he naslani ki ma Uisneno of ansako hi sanat." 1:5 Oke te ale atoni pah Yudea ma kot Yerusalem sin anpoi nem neu Nai Yohanes. Ma sin nahoeb sin sanat oket naslani sin bi Noe Yordan. 1:6 Nai Yohanes anpake sobalu betkone le anmo'e na'ko bikase paha snaen in funun. Ini futu na'ko pasu ma ini mnahat nane siboi ma oni hau. 1:7 In naton hanaf nak, "Amnemat mese of nem namunin kau ma In mu'i kuasat nesin kau. Au ka tamaf ota he ubes ma sefi In penhae tanin. 1:8 Au uslani ki eki oe mes In of naslani ki neki Smanan Knino." 1:9 Bi neno nane Usif Yesus nem na'ko Nazaret pah Galilea ma Nai Yohanes naslani In anbi Noe Yordan. 1:10 Bi leku Yesus anpoi na'ko oe, In nit neno tunan natfei, ma Smanan Knino ansanu nem neun onle kol ot kase. 1:11 Namuni te In nen hanaf mese na'ko neno tunan nak, "Ho, Au Anmone bi'an Ko, Au nek lomik anbi Ko." 1:12 Nalali te Smanan Knino antopu Yesus neu mnela paha snaen. 1:13 In namaika anbi mnela paha snaen neno bo'ha, he nitu ansu' nitu. In nabala anbi nane bi ale mu'i fui sin atnanan ma ahake neno sin antuthae In. 1:14 Leka anheke nalali Nai Yohanes, Yesus nem neu pah Galilea ma anetun Lasi Knino na'ko Uisneno, 1:15 nak, "Leku namtisien; Plenat Uisneno neman haumaken. Mite'un hi nekam nai ma ampalsai nai neu Lasi Knino!" 1:16 Leka Yesus fe a'nao natuin Nifu Galilea ninen, In nit Nai Simon ma in olif Nai Andreas. Sin fe ano'kal sin kifkai neu nifu nane fun sin atoni akifkai ika. 1:17 Yesus nak neu sin, "Aim nai mituin Kau. Au of unoni ki hem fani akifkai atoni." 1:18 Oke te sin nasaitan sin kifkai ma natuin Yesus. 1:19 Ma leka Yesus In naon fini kle'o, In nit Nai Zebedeus in anhin Nai Yakobus ma in olif Nai Yohanes. Sin amsa fe naleko' sin kifkai anbi belo' tunan. 1:20 Oke te Yesus anboin sin ma sin nasaitan sin amaf Nai Zebedeus anbi belo' nok in atoni ameput sin. Ma sin natuin Yesus. 1:21 Ma sin nem ante anbi Kapernaum. Leka ante Neno Snasat, Yesus antam neu ume buat ma nanoni. 1:22 Sin namkakan antom In noina, fun In nanoni sin onle atoni amu'i kuasat ma ka onle fa ahin Sulat sin. 1:23 Bi leku nane anmu'i atoni a'niut saes mese anbi ume buat. Atoni nane anhunun nak, 1:24 "Ho mu'i lasi sa' mok kai koi Yesus atoni Nazaret? Ho aum he mule'un kai ka? Au uhin Ko, Ho sekau Ko: Ho aknino Ko mu'ko Uisneno." 1:25 Mes Yesus ankatal in ma nak, "Mutena, ampoi nai mu'ko atoni!" 1:26 Ma sman nitu nane anheko atoni nane ma anpoi, fun an'anbai nok hanan anaek. 1:27 Sin alsin namkak tal sin nau'abin es nok es nak, "I lasi sa'ka? Noina fe'u mese! In na'uab neki kuasat. In naplenat ale sman nitu ma sin natnin neu In." 1:28 Ma beno antom Yesus nasitbon laba neu pah Galilea funam natef. 1:29 Leka sin anpoi na'ko ume buat nane Yesus nok Nai Yakobus ma Nai Yohanes sin nao neu Nai Simon ma Nai Andreas sin ume. 1:30 Nai Simon baif antup fun anmainin. Sin naton lasi nane neu Yesus. 1:31 Yesus a'nao neu bife nane ma antopu in niman oke te In nafena bife nane. Nalali te bife nane in maininit nane naleko kun. Oke te bife nane antuthae sin. 1:32 Leka neno hen faien, ma manas antes, sin neki ale atoni le naben menas ma ale niut saes sin neu Yesus. 1:33 Ma ale to anbi kuan nane sin nem nabuan anbi ume enon. 1:34 In naleko' atoni namfaun le naben menas huma-huma ma anli'u napoitan nitu namfaun. In ka namautu fa nitu sin he na'uab, fun sin nahin In. 1:35 Anbi nok-nok ana, leka neno fe anmesok, Yesus anfen ma anpoi. In nao neu bale teta' ma anonen toti anbi nane. 1:36 Mes Nai Simon nok in biakin natuin Yesus. 1:37 Leka sin napeni Yesus, sin nak, "Ale to ok-oke sin nami Usi." 1:38 Yesus natae nak, "Aim nai hit nao teu bale bian. Hit nao teu ale kot le anmahaumakan. Au he etun lasi knino anbi bale nane sin amsa, fun neu lasi nane es Au aum." 1:39 Oke te Yesus a'nao neu pah Galilea funam natef, ma anetun lasi knino anbi sin ume buat ma anli'u ale nitu sin. 1:40 Atoni men poko mese nem neu Yesus. Atoni nane anli'tu anbi Yesus matan ma nak, "Kalu Usi amlomi, Usi muleko kau." 1:41 Usif Yesus namnau atoni nane. Es nane In nenu niman ma anpoe atoni nane ma nak, "Au lomi muleko nai." 1:42 Anbi leku nane amsa atoni nane in men poko namneku ma in naleko kun. 1:43 Oke te Yesus anlelu atoni nane he nao nok talas matane, 1:44 "Mumnau, kais hom etun sa' neu es, mes hom nao nai he mulile ho aom meu ana' lasi fuat. Ma meki fua tulu neu ho muleko, natuin lekat Nai Musa, on saksi neu sin." 1:45 Mes atoni nane in nao, ma anetun lasi nane neu me-me, talan te Yesus ka nabe'i fa hen tam neu kot mat-mat. In namaika anbi mnefu le katit fa tuaf anbin. Mes atoni nem piut neu In na'ko ale bale-bale.
2:1 Neno fauk namuni te, Yesus neman teni neu Kapernaum. Beno nasitbon nak In es ume. 2:2 Oke te to namfau sin neman talan te katita tenif bale. Bi ume enon amsa nahenu nok atoni. Leka In fe anetun a'an Uisneno neu sin, 2:3 anmu'i atoni ha le sin anloi neki atoni men ole mese nem neu In. 2:4 Mes natuin atoni namfaun sin ka nabe'i fa he neki anhaumak Yesus. Es nane sin pukai ume penen le antom In fafon. Oke te sin nasanut nahe' nok atoni men ole le antup anbine. 2:5 Leka Yesus nit sin palsait, In nak neu atoni men ole nane, "Hoi Au anah, ansako nalali ho sanat sin." 2:6 Mes anbi nane amsa anmu'i ahin sulat sin fauk antoko, le sin natenab bi sin nekan, 2:7 "Nansa es atoni i na'uab onane ka? In na'uab nale'un Uisneno. Sekau es nabe'i hen sako sanat so al Uisneno anmes kun ka?" 2:8 Mes Yesus nahin nalali bi In nekan, nak sin natenab onane. Oke te In nak neu sin, "Nansa' es hi mitenab bi hi nekam onane ka? 2:9 Lasi me es anmakafa nesi: He tak neu atoni men ole i: Ansako nalali ho sanat, ai he tak: Hom fen nai, maiti ho nahe' ma amnao nai! 2:10 Mes he nati' hi mihin, nak bi pah pinan i Anmone Pah To anmu'i kuasat hen sako sanat" -- In nak neu atoni men ole nane --, 2:11 "Au ak ko, hom fen nai, maiti ho nahe' ma amnao nai meu ho ume." 2:12 Ma atoni nane in anfen ma naiti in nahe' ma anpoi anbi atoni namfaun sin matan. Ale atoni sin ok-oke namkakan, oke te anpules Uisneno nak, "Lasi humaf i hai fe ka mit." 2:13 Nalali te Yesus naon teni neu Nifu Galilea ninen. Ma atoni anmfaun nem neun, ma In nanoina sin. 2:14 Leka Yesus nao natuin nane te In nit Nai Lewi, Nai Alfeus anmone antoko anbi ume noni poni. Oke te In nak neune, "Mutuin Kau nai." Oke te Nai Lewi anfen ma natuin Yesus. 2:15 Nalali te Yesus anbukae bi atoni nane in ume, atoni asimo noni poni namfaun ma atoni asanat sin anbukae nok Yesus ma In asimo lasi sin. Fun atoni namfaun le natuin Yesus. 2:16 Leka ahin sulat sin na'ko nonot Farisi sin nit, nak Yesus anbukae nok atoni asimo noni poni ma atoni asanat,, sin nak neu In asimo lasi sin, "Nansa' ka es In anbukae nok atoni asimo noni poni ma atoni asanat?" 2:17 Yesus a nen sin han tanas nane ma In natae sin nak, "Ka atoni aomina fa es he nem neu mnane, mes so atoni amenat. Au ka aum fa he boin atoni amneot mes atoni asanat." 2:18 Bi haefes onane Nai Yohanes in asimo lasi sin ma atoni Farisi sin nanahok. Oke te anmu'i atoni le nem ma natan Yesus nak, "Nansa' ka es Nai Yohanes in asimo lasi sin ma atoni Farisi sin asimo lasi sin nanahok, mes Usi asimo lasi sin kahaf?" 2:19 Yesus natae sin nak, "Nabe'i ka atoni fe'u nane in ini nanahok leka atoni fe'u nane fe antoko nok sin ka? Leka atoni fe'u nane antoko nok, sin ka nabe'i fa he nanahok. 2:20 Mes of neno ante le naiti atoni fe'u nane na'ko sin, ma bi leku nane of sin nanahok. 2:21 Katit fa atoni mese le anlape sobalu mna' neki muti fe'u. Kalu kahat muti fe'u nane anhel napisu sobalu nane talan te in natpisu naek. 2:22 Onane amsa katit fa atoni mese le antesi tua mina amtasa fe'u neu alu pasu mna'. Oni kahat tua mina amtasa fe'u nane anpeti napisu aul pasu nane. Oke te anpolin sin nua sin. Mes tua mina amtasa fe'u so antao nani anbi aul pasu fe'u amsa." 2:23 Bi haefes bi neno Snasat, leka Yesus nao natuin lele aen kase, In asimo lasi sin anhetun aen kase. 2:24 Oke te atoni Farisi sin nak neu Yesus, "Mail, nansa' es sin anmo'e sa' le ka nabe'i fa bi neno Snasat ka?" 2:25 Yesus natae sin, "Hi fe kam soi fa ka sa' le Nai Daud anmo'e, leka in ma sin le natuine nalalin bukael ma sin namnahan. 2:26 Leka In antam neu Ume Uisneno, bi neno Nai Abyatar on ana' lasi fuat anaet. Oke te sin bukae u tunu atnatas - le ka nabe'i fa hen bukae so al ana' lasi fuat sin - ma anfe nani amsa neu in atuina sin ka?" 2:27 Oke te Yesus nak anteni neu sin, "Anmo'e Neno Snasat neu mansian ma ka mansian neu neno Snasat. 2:28 Es onane te Anmone Pah To nane amsa Usif neu Neno Snasat."
3:1 Oke te Yesus antaman teni neu ume buat. Bi nane anmu'i atoni mese le niman ano'le. Bi nane amsa anmu'i atoni le he nami Yesus In sanat. 3:2 Sin ankiso Yesus, kalu In he naleko atoni nane bi Neno Snasat. Oke te sin nabe'i he nasanab Yesus. 3:3 Yesus nak neu atoni le niman bian anole nak, "Aum, amhake bi tnanan i!" 3:4 Oke te In nak neu ale atoni le anbi nane, "Lasi me esle' het mo'e bi Neno Snasat ka? Moe alekot ka ai mo'e amle'ut? Tamonib atoni ka ai tamate atoni?" Mes sin anta'nah. 3:5 Yesus nekan antu' fun sin nekan manu'kun. Mes nok to'as Yesus ankiso sin funam natef ma nak neu atoni nane, "Menu ho nimam nai!" Ma in nenu nani, oke te in niman nane naleko kun. 3:6 Oke te atoni Farisi sin anpoi ma sin manlekan laba nok atoni Herodian sin he namate Yesus. 3:7 Oke te Yesus nok In asimo lasi sin naskotun neu Nifu Galilea. Ma atoni namfaun nem na'ko Galilea natuin Yesus. Ma atoni namfaun amsa neman na'ko Yudea, 3:8 na'ko Yerusalem, na'ko Idumea, na'ko Noe Yordan panin, na'ko pah Tirus ma Sidon. Sin alsin nem neu Yesus, fun sin nen ale lasi le In anmo'e. 3:9 Natuin atoni namfaun, Yesus anlelu In asimo lasi sin he naloitan belo' mese neun, he nati' atoni mfaun nane kais anhapnesa In. 3:10 Fun In naleko' atoni namfaun, talan te ale amenat sin anmabe'un nem neu In hen na' nan In. 3:11 Leka nitu sin nit In, sin anmofu bi In matan ma anan'bai nak, "Ho Uisneno In Anmone Ko." 3:12 Mes Yesus antal sman nitu sin matane he kais naton nak In sekau. 3:13 Nalali te Yesus ansae neu tubu mese in tunan, ma In no'en ale atoni le In anlomi ma sin neman neu In. 3:14 Oke te In anbeti atoni bo'es am nua he nati' nok In. Ma In ansonu sin hen etun lasi knino. 3:15 Ma In anfen sin kuasat he nati' sin anli'u ale nitu. 3:16 Atoni bo'es am nua le In anbeti sin nane esle': Nai Simon le In nakanab nak Nai Petrus. 3:17 Nai Yakobus ma in olif Nai Yohanes, Nai Zebedeus in anhin, le In nakanab sin nua sin Boanerges, in oten nak lotos anhenu, 3:18 Nai Andreas, Nai Filipus, Nai Bartolomeus, Nai Matius, Nai Tomas, Nai Yakobus, Nai Alfeus anmone, Nai Simon atone Zelot, 3:19 Nai Yudas Iskariot le na naat neu Yesus. 3:20 Oke te Yesus antam neu ume mese. Ma atoni namfaun sin neman teni ma antol nan sin talan te sin ka napeni fa mainuan hen bukaen. 3:21 Leka In ini sin nen lasi nane te, sin he nem nan In fun sin nak In namaun. 3:22 Ma ahin sulat sin neman na'ko Yerusalem nak, "Beelzebul ansae neu In," ma "In anli'u nitu neki nitu ini nakaf in kuasat." 3:23 Yesus anboin sin ma na'uab neu sin neki lasi leta nak, "Leka me nitu nabe'i hen li'u nitu ka? 3:24 Kalu plenat mese anbation, plenat nane of kan haek nabe'if. 3:25 Ma kalu ume mese anbation, ume nane of kan haek nabe'if. 3:26 Onane amsa kalu nitu anmatoe in aon ma anbation in kan haek nabe'if, mes in lasi namsopuen. 3:27 Katit fa atoni mese hen tam neu atoni abe'it in ume he nasik in bale kalu in kan futu nahunun fa atoni abe'it nane. Nalali te in nabe'i he nasik ume nane. 3:28 Mes Au ak ki: Tebes of ansako ale atoni sin sanat ma sin amle'ut, ale sa' le sin antek nale'un. 3:29 Mes kalu atoni le antek nale'un Smanan Knino, of kan mu'if sako sanat neu in sanat talan te nabal-bal." 3:30 In na'uab onane fun sin nak In aniut sae. 3:31 Oke te Yesus In ainaf ma In oilfin neman. Sin fe anhake bi mone, sin anlelu atoni hen boin Yesus. 3:32 Atoni namfaun le antoko natef nan In sin nak neun, "Mail Usi, Ho aina ma Ho oli sin anhake eskin mone. Ma sin nami Ko, Usi." 3:33 Yesus natae sin nak, "Au aina es sekau ka? Au oli sin es sekau ka?" 3:34 In ankiso neu ale atoni le antoko natef nan In ma nak, "Au aina ma Au oli sin esle' hi! 3:35 Atoni le anmo'e natuin Uisneno In lomin, nane Au oli, nane Au feto, nane Au aina."
4:1 Usif Yesus nanoina anteni bi nifu Galilea ninen. Atoni namfaun nem antol nan Yesus. Es nane In ansae ma antoko bi belo' mese anbi nifu, ma atoni mfaun nane sin anhake bi nifu ninen. 4:2 Ma In nanoina sin lasi namfaun neki leta. Bi lasi noina nane In nak neu sin, 4:3 "Mitnin nai! Anmu'i atoni akifu fini mese anpoi hen kifu fini. 4:4 Leka In ankifu, fini bian anmofu bi lalan ninen. Oke te kolo nem ma anlot nani. 4:5 Fini bian anmofu bi faut putun le in nain kan mafaubaf. Fini nane anmoni laba fun in nain manihis. 4:6 Mes leka manas ansae, in uknene ma anmeto fun ini ba'an kan tamaf neu nain. 4:7 Fini bian anteni anmofu bi kisan. Kisan anmoni ma neo nisan talan te in ka nafuaf. 4:8 Ma bian anmofu bi nain alekot. Fini nane anmoni ma nanae oke te nafua. Bian kuni bo'tenu, kuni bo'ne ma bian kuni natun mese." 4:9 Ma Yesus nak, "Atoni le anmu'i luken he natnin, so in natnin nai." 4:10 Leka Yesus anmes, In amnoktin ma asimo lasi sin bo'es am nua natan In neu lasi leta nane. 4:11 In natae nak: "Anfe neu ki he mihin lasi tolo' plenat Uisneno. Mes neu atoni abit mone nanoina sin neki lasi leta, 4:12 he nati, 'Sin ankiso mes ka nitan fa, sin nenan mes ka nahinen fa, he kais sin neman neu Uisneno ma Uisneno ansako sin sanat.' " 4:13 Oke te In nak neu sin, "Hi ka mihin fa lasi leta i ka? Kalu onane leka me hi he mihin lasi leta bian ka? 4:14 Atoni akifu nane esle' atoni le anetun a'at Uisneno. 4:15 Fini le anmofu anbi lalan ninen nane, esle' atoni le sin nen a'at Uisneno mes ka nahin nani fa. Oke te nitu nem ma nait nan a'at le fe ankifu bi sin nekan. 4:16 Onane amsa fini le ankifu bi faut putun esle' atoni le sin nen a'at Uisneno ma sin ansimo laba nok nek amlilat. 4:17 Mes a'at nane ka na'ba'af bi sin nekan talan te in kan monif a lo. Leka susal ai hamu'it nem natuin a'at nane, sin fani kotin. 4:18 Ma bian le ankifu bi kisan, esle' atoni le sin natnin lasi nane, 4:19 mes lasi a'unu neu sin monin ma sin lomi hen moni nok alekot. Ma lasi keku bian antam neu sin nekan. Oke te a neo nis a'at nane ma ka nafuaf. 4:20 Ma fini le ankifu bi nain alekot nane, esle' atoni le natnin ma ansimo a'at nane, oke te nafua, bian kuni bo'tenu, bian kuni bo'ne ma bian kuni natun mese." 4:21 Oke te Yesus nak neu sin, "Atoni ka neki fa paku hen toeb nani neki mako' ai nabela bi hala nupun, mes so in nabela anbi tet paku. 4:22 Fun katit fa sa' esle' na'kolo le kan poi natonon fa, ma katit fa sa' esle' naninbon le ka mahine fa. 4:23 Atoni le anmu'i luken he natnin, so in natnin nai!" 4:24 Oke te In na'uab anteni nak, "Mitnin lek-leko sa' le him nen. Luku le him luku es mekin, of Uisneno anluku ki nekin ma of ansato anteni neu ki. 4:25 Fun atoni le anmu'i of anfene nes, ma atoni le kan mu'if, sa' le in anmu'i of naiti nan." 4:26 Oke te Yesus na'uab anteni nak, "Plenat Uisneno nane maleta onle atoni le ankifu fini bi nain. 4:27 Neno anfai in antup ma nok-noka in anfen. Fini nane natol ma namnanu mes atoni nane in ka nahinef. 4:28 Pah pinan in mes kun napoitan fuan. Ta'un nahun, oket punen, nalali te fuan le nahenu anbi punen nane. 4:29 Leka in fuan nane namnatu, atoni nane anlefi fun neno abut antelen." 4:30 Yesus nak anteni, "Hit he tanesa plenat Uisneno teki sa ka? Ai hit te tanaoba teki lasi leta me ka? 4:31 Plenat neno tunan maleta onle ankifu bonak fuan bi nain. Bonak in fuan nane mnut-nutu nesin ale fini bian bi pah pinan. 4:32 Mes leka ankifu nalali, in anmoni ma nanae nesin ale utan bian. In napoitan tlaen a anek, talan te kolo anbi neno tnanan anmoe kuna bi in aslubun." 4:33 Ma nok lasi leta namfaun onane, In anetun a'an Uisneno neu sin, natai nok sin hinen. 4:34 In nanoina ale atoni sin neki lasi leta. Mes kalu In asimo lasi sin anmes In naketi ale lasi nane neu sin. 4:35 Bi neno nane, leka neno anmabe, Yesus nak neu sin, "Aim nai hit lak teu nifu panin." 4:36 Oke te sin nao nasaitan atoni mfaun nane. Ma sin ansae neu belo' le Yesus antoko nalali anbi belo' nane oke te sin naon. Ma belo' bian amsa sin nao nok Yesus. 4:37 Naskek onane te anin slutuf nae le'uf anbol. Oe pesen antam neu belo' nane talan te belo' nane nahenu nok oe. 4:38 Bi leku nane Yesus antup bi nahe' bi belo' kotin. In asimo lasi sin anpo' Yesus ma nak neun, "Pak, ati Ho kam lae fa, he hit tamle'u ka?" 4:39 Yesus anfen ma nakain anin nane ma nak neu nifu nane: "Mutena! Tainine nai!" Oke te anin namne ma nifu nane antainine kun. 4:40 Oke te In nak neu sin, "Nansa' es hi mimtau ka? Nansa' es hi kam palsai fa ka?" 4:41 Sin alsin namtau ma na'uaben es neu es nak: "Atoni i sekau kun ka, talan te anin ma nifu natnin neu In ka?"
5:1 Nalali te sin ante Nifu Galilea Panin, bi pah Gerasa. 5:2 Yesus fe ansanu na'ko belo' onane te, atoni a niut saes mese anpoi na'ko nuat naukel nem nae'ku nok In. 5:3 Atoni nane namaika bi bale nane. Katit fa atoni mese nabe'i hen futu neki kolen besi. 5:4 Sin anfutu neki kolen besi mes in fek nis ale kolen besi ma nale'un nis kolen besi anbi haen. Ma katit fa antoni mese le hen manat nan. 5:5 Fai manas in na'oni piut bi nuat naukel ma bi ale tubu sin ma ankoa ma antutu in aon neki fatu. 5:6 Leka in kius nit Yesus na'ko lo in naen nem ma nabes neu Yesus. 5:7 Oke te ankoa nok hanan a naek nak, "Ho mu'i lasi sa' mok kau, hoi Yesus, Uisneno Alatan Anmone Ko ka? Nok Uisneno In kanan, kais Hom hamu'i kau!" 5:8 Fun nahunu na'ko nane Yesus nak neu in, "Sman nitu, ampoi nai mu'ko atoni i!" 5:9 Nalali te Yesus natan atoni nane nak, "Ho kanam sekau ka?" In natae nak, "Au kanak Legion, fun hai mimfau." 5:10 In toti matani he nati' Yesus kais anli'u ale smanaf nane sin anpoi na'ko pah nane. 5:11 Anhaumak bale nane anmu'i fafi puknes le nami mnahat anbi panaf, 5:12 oke te ale smanaf nane sin antoti neu Yesus nak, "Amlelu kai he haim tam meu fafi nane sin." 5:13 Yesus ansimo sin totis nane. Oke te ala sman nitu sin antam neu ale fafi nane sin. Fafi pukan nane oni nifun nua, sin an oklok na'ko bnapaf neu nifu nane ma sin leman mate anbin. 5:14 Ma ale atuku fafi nane sin naen ma anetun lasi nane bi kot ma bi ale kuan funam natef. Oke te ale atoni sin anpoi hen kiso lasi sa' le anbol. 5:15 Sin nem neu Yesus ma sin nit atoni aniut saes nane antok anbin. In anpake lek-leko ma in nekan naleko kun. Oke te sin namtau. 5:16 Ale atoni le sin nit lasi nane sin anetun neu sin antom sa' le anbol neu atoni a'niut saes nane ma neu ale fafi nane sin. 5:17 Oke te sin antoti matane he nati' Yesus nao nasaitan sin pah. 5:18 Leka Yesus ansae anfani neu belo', atoni aniut saes nane antoti he nok Yesus. 5:19 Mes Yesus kan lomif, ma In nak neu atoni nane, "Hom fani nai meu ho ume, ma ho ini sin. Oke te ametun sin lasi, le Usif tunan anmo'e nalali neu ko ma In namnau ko onme." 5:20 Atoni nane in nao ma anetun bi pah Dekapolis ale lasi le Yesus anmo'e nalali neu in. Oke te sin alsin namkak natuin lasi nane. 5:21 Yesus anlak anfani nok a belo' neu nifu panin. In fe anbi nifu ninen te, atoni namfaun sin neman ma antol nan. 5:22 Atoni mese kanan Nai Yairus in nem. Atoni nane nakaf neu ume buat bi pah nane. Leka in nit Yesus te, in anli'tu ma nabes bi Yesus haen, 5:23 ma antoti nok matane neu Yesus nak, "Pak, au anfeto namen ma hen maten. Hom koenom aum nai ma ampoho meki Ho nimam, he nati' in naleko ma anmoni." 5:24 Oke te Yesus In nao nok atoni nane. Atoni mfaun nane ansai ma natuin Yesus ma anmabe'un hen haumak In. 5:25 Anmu'i bife mese le in opan na' ton bo'es am nua. 5:26 In nalali ini maus hen baen ale mnane. Mes in menas nane ka nalekof so mak menas nane anfoe. 5:27 In nen nalali antom Yesus. Es nane te in antam nok atoni mfaun sin atnanan ma anhaumak Yesus kotin ma a'na' Yesus In sobalu betkone. 5:28 Fun in nak, "Lamu au na' In sobalu betkone of au uleko." 5:29 Bi leku nane amsa in na' anhetu. In natnin bi aon nak in menas naleko. 5:30 Bi leku nane amsa Yesus nahin nak anmu'i matane anpoi na'ko In aon. Oke te In nik koti neu atoni mfaun ma natan nak, "Sekau es a'na' Au sobalu betkone ka?" 5:31 In asimo lasi sin natae nak, "Usi, Hom kiso mit atoni mfaun le anmabe'un haumak Ko ma Usi Hom toti mak: Sekau es a'na' Kau ka?" 5:32 Oke te In kiso sin funam natef he nami atoni le anmo'e lasi nane. 5:33 Bife nane nahin nak lasi sa' anbol neun, oke te in namtau ma natai fun nabes bi Yesus ma naton ale lasi nane neu Yesus. 5:34 Ma In nak neu bife nane, "Au anah, ho palsait nane es nahoni ko. Hom nao nai mok tetus ma muleko nai mu'ko ho menas!" 5:35 Leka Yesus fe namolok onane te, atoni fauk sin neman na'ko Nai Yairus in ume ma nak, "Ho anfeto anmaten, ho mususab Pak neu sa' anteni ka?" 5:36 Mes Yesus kan lae nok fa sin uab nane. In nak neu Nai Yairus, "Kais mumtau, so ampalsai nai!" 5:37 Oket Yesus kan lomif he atoni mese nok, al Nai Petrus, Nai Yakobus ma in olif Nai Yohanes. 5:38 Ma sin nem ante Nai Yairus in ume, Yesus nit atoni sin naslutu, ankae ma anse'ul nok hanan a naek. 5:39 Oke te Yesus antam ma nak neu sin, "Hi mislutu ma amkae neu sa' ka? Anah nane kan matef mes in antup kun." 5:40 Mes sin anmanis Yesus. Ma Yesus anli'u ale atoni nane sin hen poi. Oke te In nok anah nane in amaf ma in ainaf ma In asimo lasi tenu sin antaman neu anah nane in ke'an. 5:41 Yesus ana' anah nane niman, ma In nak, "Talita kum" le in oten, "Hoi anfeto, Au ak neu ko, amfen nai!" 5:42 Bi leku nane amsa anah nane anfen ma in nao, fun in uan oni ton bo'es am nua. Ale atoni le sin nit lasi nane sin namkakan. 5:43 Usif Yesus anba'an matane neu sin, he nati' kais atoni mese amsa nahin lasi nane. Oke te In nak, amfene he nah.
6:1 Usif Yesus nok In asimo lasi sin naon na'ko bale nane neu In kuan. 6:2 Bi Neno Snasat In nanoina anbi ume buat. Anmu'i atoni namfaun bi bale nane. Leka sin nen Yesus In nanoina, sin namkakan, ma sin nak, "In napeni ale lasi nane na'ko me ka? Lasi hine sa' ka anfe nani neune ka? In hen mo'e ale lasi amkakat nane neki In niman onme ka? 6:3 Ait In ka apakae hau fa, bi Maria anmone ma Nai Yakobus, Nai Yoses, Nai Yudas ma Nai Simon, sin tataf es In ka? Ma In feotfin amsa namaika nok kit?" Natuin lasi nane te sin antite Usif Yesus. 6:4 Oke te Yesus nak neu sin, "Mafefa knino mese in napeni kanaf bi me-me; al anbi in kuan, anbi in ini sin ma anbi in ume ka napenif kan tola." 6:5 Bi kuan nane Yesus kan mo'ef lasi amkakat mese. Al In naleko atoni amenat fauk ma naiti In niman neu sin. 6:6a In namkak fun sin kan palsai fa. 6:6b Oke te Yesus In nao neu kuan-kuan funam natef ma nanoina sin. 6:7 In no'en asimo lasi sin bo'es am nua ma ansonu sin nua-nua. In anfen sin kuasat hen li'u ale smanan nitu. 6:8 In anba'an sin he nati' kais sin neki bael sa' bi sin lalan, al tes anmes. Kais nekin utunu', kais nekin bukael, kais nekin noni bi sin pasu futu amsa. 6:9 Ampake penhae mes kais ampake sobalu nua. 6:10 Ma In nak anteni neu sin, "Kalu anbi bale me ansimo ki hem tam meu ume nane, mimaik ambine talan te him nao mi'ko bale nane. 6:11 Ma kalu ambi bale me sin kan simo ki ma ka natnin ki him poi mi'ko bale nane. Ma amtekal afu bi hi haem hen fani saksi neu sin." 6:12 Oke te sin naon ma anetun, nak ale atoni mes nate'unon na'ko sin sanat. 6:13 Ma sin anli'u napoitan nitu namfaun, ma antao mina neu atoni amenat namfaun ma naleko' sin. 6:14 Usif Nai Herodes amsa amnen antom Yesus, fun In kanan mateka bi me-me. Ma anmu'i atoni le na'uab nak, "Nai Yohanes Aslanit anfen anfain na'ko amates. Es nane In napeni kuasat hen mo'e ale lasi amkakat nane." 6:15 Mes atoni bian sin nak, "In Nai Elia!" Ma bian anteni sin nak, "In mafefa knino onle mafefa knino ahunut sin." 6:16 Leka Nai Herodes in nen lasi nane in nak, "Kahaf, in Nai Yohanes Aslanit le afi au ote ufek ini nakan ma in fen anfain." 6:17 Fun afi Nai Herodes es anlelu hen heke Nai Yohanes ma natam nani neu o'of. Natuin bi Herodias, le in olif Nai Filipus in fel. Mes Nai Herodes anmafe nokan. 6:18 Nai Yohanes nakain Nai Herodes nak, "Ka nalekof kalu ho maiti ho oli in fel!" 6:19 Es nane bi Herodias nabela nekaf neu Nai Yohanes ma in lomi he namate Nai Yohanes, mes ka nabe'if. 6:20 Nai Herodes namtausan Nai Yohanes fun in nahin nak, Nai Yohanes nane atoni alekot le Uisneno ansonu, es nane te in nanini nani. Mes leka in nen Nai Yohanes in nekan ansae ma ansanu, mes in lomi amsa he natnin Nai Yohanes. 6:21 Namuni te bi Herodias napeni mainuan bi neno Nai Herodes hen mo'e in neno mahonin. Leka Nai Herodes anmo'e tolas neu in anaet sin ma in solalus nakaf sin ma ale atoni makana bi pah Galilea. 6:22 Bi leku nane bi Herodias anfeto antam nem ma nabso ma in anhalin Nai Herodes nekan ma ale amnemat sin amsa. Usif nakua a'an neu feotnai nane nak, "Hom lomi sa', amtoti nai, of au fe neu ko." 6:23 Ma Nai Herodes naiti supat neu feotnai nane nak, "Sa' le hom toti of au fe neu ko, tal au plenat in aon bian amsa!" 6:24 Feotnai nane anpoi ma natan in ainaf, "Aina, au he toti sa' ka?" In ainaf natae nak, "Amtoti Nai Yohanes Aslanit ini nakan!" 6:25 Oke te in antam laba neu Nai Herodes ma nak, "Au lomi he nati' bi leku i amsa hom fe kau Nai Yohanes Aslanit ini nakan bi topa mese." 6:26 Leka Nai Herodes amnen lasi nane te in nekan ansusal. Mes in kan tite fa totis nane fun in naiti nalali supat bi in amnemat sin matan. 6:27 Usif napoitan plenat he nati' solalus apaot sin nao he naiti Nai Yohanes ini nakan. Solalus nane in nao neu o'of ma ano'te nafek Nai Yohanes ini nakan. 6:28 Oke te in neki nakaf nane bi topa mese ma anfe nani neu feotnai. Ma feotnai anfe nani neu in ainaf. 6:29 Leka Nai Yohanes in asimo lasi sin nen lasi nane te sin neman ma naiti in aon nitu ma natupab nani anbi nuat naukel. 6:30 Oke te asimo lasi sin anfani neman ma nabua nok Usif Yesus. Ma sin anetun neu Yesus ale lasi le sin anmo'e ma nanoina nalali. 6:31 Oke te Yesus nak neu sin, "Aim nai hit nao teu bale teta', he nati' hit atmes, ma tasnas akle'o!" Fun atoni namfaun le neman ma anfanin talan te sin ka napeni fa mainuan hen bukae. 6:32 Oke te sin ansae neu belo' ma nao na'tetok neu bale teta'. 6:33 Mes leka sin naon, atoni namfaun nit sin ma nahin bale le sin he nao neun. Es nane te ale atoni na'ko ale kuan bi pah nane sin a'nao haen ma ante nahunun sin. 6:34 Leka Yesus ansanu na'ko belo' In nit atoni mfaun matane anbi bale nane. Oke te Yesus nekan anmof fun In namnau sin, fun sin onle bibi kase le kan mu'if atukus. Nalali te In nanoina lasi namfau neu sin. 6:35 Leka neno hen faien, In asimo lasi sin nem neun ma nak, "Usi, bale i hufui ma neno hen faien. 6:36 Hom lelu sin he nao, he nati' sin ansosan mnahat bi ale kot ma kuan apaumakat i." 6:37 Mes Yesus natae nak, "Him fen sin hen bukae!" Sin nak neu Yesus, "Hai hem nao ka, hem sos utunu' meki noni dinar natun nua hem fen sin hen bukaen ka?" 6:38 Mes Yesus nak neu sin, "Hi mu'i utunu' pisa fauk ka?" Ati him tae mit!" Leka sin tae nalali te sin nak, "U'tunu pisa nim ma ika koe nua, Usi!" 6:39 Oke te Yesus anlelu atoni mfaun nane hen toko anpuknok bi hu mate fafon. 6:40 Ma sin antoko puknok, bian natun mese, ma bian atoni bo' nim. 6:41 Oke te Yesus naiti utunu' pisa nim ma ika koe nua nane. In anbaisenu neu neno tunan ma anonen toti neu Uisneno. Nalali te In anebi utunu' nane neki In niman ma anfe nani neu In asimo lasi sin hen bati neu atoni mfaun nane. Onane amsa ika koe nua nane In anbati neu sin alsin. 6:42 Ma sin alsin anbukae tal namsenan. 6:43 Oke te sin nabua ale utunu' pisa anesit, nahenu aba' bo'es am nua. Ika le a'nesi ka maso'it fa. 6:44 Atoni le anbukae utunu' nane oni' nifun nim. 6:45 Nalali te Yesus anlelu In asimo lasi sin hen sae neu belo' ma nao nahunun neu Betsaida, anbi nifu panin. Fun In fe hen lelu atoni mfaun nane hen fanin. 6:46 Leka In naseon nalali sin, In ansae neu tubu hen onen toti. 6:47 Leka neno anfaien, belo' nane ante nifu atnanan, mes Yesus fe anmes anbi meto. 6:48 In nit sin anhae natuin ansepo oe, fun anin slutuf na'ko mat. Es nane, oni' leku tenu nesi hen meu, Yesus nao natuin oe fafon nem neu sin. In asafanu he naon finin sin. 6:49 Leka sin nit Yesus nao natuin oe fafon sin natenab nak nane smanaf oke te sin an'anbai. 6:50 Fun sin alsin nit Yesus ma sin naskeken. Mes In nak neu sin, "Tainine nekam! Au es Kau i, kais mimtau!" 6:51 Oke te In ansae neu belo' nok sin, ma anin namne kun. Sin alsin namkak ma nekan namneku. 6:52 Fun lasi amkakat neu utunu' nane sin fe ka nahin nani fa. Ma sin nekan fe manu' kun. 6:53 Leka Yesus nok In asimo lasi sin ante nifu panin, sini belo' anhake anbi Genesaret ninen. 6:54 Leka sin ansanu na'ko belo' atoni mfaun nane nahin nak, amnemat nane Yesus kun. 6:55 Oke te sin naen laba neu pah nane ma anloi neki ale amenat nok sin a'nahe' nem neu Yesus. Kalu sin nen Yesus anbi me te sin neki amenat neu bale nane. 6:56 Yesus In nao neu me, neu kuan ka, neu kot ka ai neu bale me. Ale atoni sin neki amenat ma nabela sin anbi masa. Oke te sin antoti neu Yesus, he nati' sin a'na' In sobalu betkone fukan. Ma ale atoni le sin na' nani sin naleko kun.
7:1 Atoni Farisi puknes ma ahin sulat sin fauk neman na'ko Yerusalem he nae'ku nok Yesus. 7:2 Sin nit nalali Yesus asimo lasi bian sin nah nok niman fun sin ka nafanu fa. 7:3 Ale atoni Farisi, onane amsa atoni Yahudi sin panat matane sin mnais unu sin halat. Sin ka nah fa kalu sin fe ka nafanu fa sini niman. 7:4 Ma kalu sin anfain neman na'ko masa sin ka nah fa, so sin anboe sin aon fe, lasi namfau anteni le sin anpanat matani, esle' lasi anfase klas, bo'i ma ale bale le anmo'e na'ko nit molo. 7:5 Es nane atoni Farisi sin ma ahin sulat sin natan neu Yesus nak, "Nansa' ka es Ho asimo lasi sin kan mo'e natuin fa hit mnais unu sin halat ka? Mes sin nah nok niman lahi ka?" 7:6 Yesus natae sin nak: "Hi atoni asafanut ki! Namneo onle Nai Yesaya nabeno nani antom ki esle' antui nani nak, "To i na'usi Kau neki sin lulun, mes sin nekan na'lo na'ko Kau. 7:7 Sin namtausan Kau son-sona, fun lasi noina le sin nanoina nane lekat mansian kun.' 7:8 Hi maikoti plenat Uisneno ma him na' neu mansian in halat." 7:9 Yesus na'uab neu sin, "Namneo hi atoni ahinet ki amtite plenat Uisneno, he nati' hi mitau hi halat. 7:10 Fun Nai Musa nak: Mimtausan hi ama ma hi aina, ma sekau le na'uab nale'un in amaf ma in ainaf mes anmate. 7:11 Mes hi minoina mak: Kalu atoni na'uab neu in amaf ma in ainaf nak: Sa' le au he fe neu ki, anfe nani neu tulu knino -- esle' fua tulu neu Uisneno --. 7:12 Ma hi ka mifetin fa atoni nane he nati' in anmo'e sa' neu in amaf ma in ainaf. 7:13 Natuin lasi nane him sab mineku Uisneno In a'an ma hi mituin kim hi lasi halat. Ma anmu'i lasi namfaun le hi mo'e mani onane." 7:14 Oke te Yesus no'en atoni namfaun teni ma nak neu sin, "Hi ala ki, amnen nai neu Kau ma mitnin lek-leko. 7:15 Katit fa sa' esle' na'ko kotin antam neu atoni he neki hainisit. So sa' le anpoi na'ko atoni nane es neki hainisit neun." 7:16 Atoni le anmu'i luken he natnin, so in natnin nai! 7:17 Leka Yesus nasaitan atoni mfaun nane ma antam neu ume, In asimo lasi sin natan neu In antom lasi leta nane in oten. 7:18 Yesus natae sin nak, "Ati hi amsa ka mihinef lasi nane ka? Hi ka mihin fa nak ale sa' na'ko kotin le antam neu atoni nane ka neki fa hainisit. 7:19 Fun kan tamaf neu in nekan mes antam neu in tein, oke te anpolin neu kotif ka?" Nok uab nane, Yesus ka naton nak ale mnahat nane ok-oke knino kun. 7:20 Yesus na'uab anteni nak, "Sa' le anpoi na'ko atoni nane es neki hainisit neu in. 7:21 Fun anpoi na'ko nanan, na'ko atoni nekan le natenab lasi amle'ut esle', lasi kake, lasi bakan, mamaten, 7:22 mapaisa, sinmakat, lasi loep, lasi ak'elo, lasi folu, nek a'unu, uab naufbanan, lasi moko' ma lasi amonot. 7:23 Ale lasi amle'ut nane anpoi na'ko nanan ma neki hainisit neu atoni." 7:24 Oke te Usif Yesus nasaitan bale nane ma nao neu pah Tirus. In antam neu ume mese ma kan lomif he atoni mese nahin. Mes In ka nabe'i fa he natolo' In aon. 7:25 Bife mese le in anfeto a'niut sae, in nen antom Yesus. In nem neu Yesus ma nabes bi In matan. 7:26 Bife nane bife Yunani uf Siro-Fenisia. In antoti he Yesus anli'u nitu nane na'ko in anfeto. 7:27 Oket Yesus nak neu bife nane, "Maut he liana sin namsenan fe, fun ka nalekof kalu hit taiti utunu' le taloitan neu liana sin ma atpolin neu asu." 7:28 Mes bife nane natae nak, "Namneo, Usi. Mes asu le anbi mei nupun amsa in nah mnah lapuf le liana sin namofu." 7:29 Yesus nak neu bife nane, "Natuin ho uab nane, hom nao nai. Nitu nane anpoi nalali na'ko ho anfeto." 7:30 Bife nane anfani neu in ume. Ma napeni in anfeto antup bi hala, ma nitu nane anpoi nalali na'ko in anfeto. 7:31 Nalali te Yesus nasaitan pah Tirus ma nao natuin pah Sidon neu Nifu Galilea bi pah Dekapolis atnanan. 7:32 Binane, atoni sin neki neu Yesus, atoni mese le luken antono ma na'uab ka nahinef. Sin antoti Yesus he nati' In na'aiti niman neu atoni nane. 7:33 Ma Yesus anhel nan atoni nane na'ko paha mfaun tal sin anmesen. Oke te Yesus natam in aklulun neu atoni nane luken. Yesus nalon nakinu ma In na' atoni nane in man. 7:34 Nalali te Yesus anbaisenu neu neno tunan oke te anhel In asnasan ma nak neu atoni nane, "Efata!" in oten nak, "Mutsoi nai!" 7:35 Naskek onane te atoni nane luken natsoi ma in man anmalule ma in na'uab kun nok alekot. 7:36 Oke te Yesus antal matane neu ale atoni le anbi nane he nati' kais sin anetun lasi nane neu atono bian. Maski antal onane, sin anetun piut lasi nane. 7:37 Sin alsin nekan namneku ma namkakan ma na'uab nak, "In mo'e ale sa'-sa' nok alekot. In anmo'e atoni atono he nen, ma atoni amonot he na'uab."
8:1 Bi neno nane anmu'i atoni namfaun anbi nane ma sin kan mu'in fa mnahat. Es nane Yesus anboin In asimo lasi sin ma nak, 8:2 "Au antu'fun umnau is atoni mfaun le i. Sen natuin kau neno tenuen ma sin kan mu'in fa mnahat. 8:3 Au he lelu sin hen fani nok tei luman, of sin natselan anbi lalan. Fun sin bian neman na'ko bale lo." 8:4 In asimo lasi sin natae nak, "Leka me bi bale luman i atoni nabe'i hen fen sin utunu' tal namsenan ka?" 8:5 Yesus natan sin nak, "Hi mu'i utunu' pisa fauk ka?" Sin natae nak, "Pisa hitu." 8:6 Oke te Yesus anlelu atoni mfaun nane antoko anbi nain. Oke te In naiti utunu' pisa hitu nane ma anonen toti neu Uisneno. Oke te In anebi utunu' nane neki In niman ma anfe nani neu In asimo lasi sin hen bati neu atoni mfaun nane. 8:7 Ma sin anmu'i ika koe fauk amsa. Yesus anonen toti neu ika nane. Oke te in anlelu hen bati ika nane amsa neu atoni mfaun nane. 8:8 Ma sin alsin anbukae tal namsenan. Nalali te atoni sin nabua utunu' pisa anesit nane, tal nahenu aba' hitu. 8:9 Ale atoni le anbukae nane oni sin nifun ha. Oke te Yesus anlelu sin hen fanin. 8:10 Ma In nok asimo lasi sin ansae neu belo' ma anaon neu pah Dalmanuta. 8:11 Oke te atoni Farisi sin fauk neman hen su' nit Usif Yesus. Sin antoti Yesus hen mo'e taka mese na'ko neno tunan. 8:12 Yesus na'unu bi In nekan nak, "Nansa ka es batan i hen toti taka ka? Au ak ki, tebes of kan fe fa taka neu batan i." 8:13 Yesus nasaitan sin. In ansae neu belo' ma anlak neu nifu panin. 8:14 Yesus asimo lasi sin anikan u tunu, al sin neki pisa mese anbi belo'. 8:15 Oke te Yesus anba'an sin nak, "Him panat nai neu atoni Farisi ma Nai Herodes sin lalu haef." 8:16 Ma leka Yesus nahin sin tenab nane, In nak neu sin, "Nansa ka es hi mi'uab neu hi ka mu'if u tunu? Hi fe ka mihin fa ka? Hi nekam fe manu' ka?" 8:17 Ma leka Yesus nahin sin tenab nane, In nak neu sin, "Nansa ka es hi mi'uab neu hi ka mu'if u tunu? Hi fe ka mihin fa ka? Hi nekam fe manu' ka? 8:18 Hi mu'i mataf, mes hi ka mitaf, hi mu'i lukef mes hi kam nenaf neu sa ka? Ma hi ka mimnau fa, 8:19 bi neno le Au ebi u tunu pisa nim neu atoni nifun nim ka? Hi mibua u tunu pisa anesit aba' fauk ka?" Sin natae nak, "Aba' bo'es am nua Usi!" 8:20 "Ma bi neno u tunu pisa hitu neo atoni nifun ha nane, hi mibua utunu' pisa anesit fauk ka?" Sin natae nak, "Aba' hitu, Usi!" 8:21 Oke te Yesus nak neu sin, "Ati hi fe ka mihin fa ka?" 8:22 Yesus nok In asimo lasi sin nem ante Betsaida. Sin neki atoni matfolo mese nem neu Yesus anbi nane ma sin antoti Yesus he nati' In anpoh in matan. 8:23 Yesus antopu atoni matfolo nane in niman ma nokan anpoi na'ko kuan nane. Oke te Yesus nalon atoni nane in matan ma antao In niman neu atoni nane ma natan nak, "Hom kiso mit sa ka?" 8:24 Atoni nane na'aiti matan ma nak, "Au it atoni, mes sin naon onle haunu es a'naon." 8:25 Yesus antao anteni In niman neu atoni nane. Atoni nane ankiso nok alekot fun matan nalekoen, ma ankiso nit ale sa'. 8:26 Oke te Yesus anlelu hen fani neu in ume ma nak nenune, "Kais hom tam meu kuan!" 8:27 Nalali te Yesus nok In asimo lasi sin naon neu ale kuan bi pah Kaisarea Filipi. Leka sin ante lalan atnanan Yesus natan neu In asimo lasi sin nak, "Atoni sin na'uaben, Au le i sekau ka?" 8:28 Sin natae nak, "Bian sin nak: Nai Yohanes Aslanit, bian sin nak Nai Elia ma bian anteni sin nak: Mafefa knino sin es." 8:29 In natan anteni neu sin, "Mes natuin hi, Au le i sekau ka?" Nai Petrus natae nak, "Ho lo Neno Anan!" 8:30 Oke te Yesus antal matane, he nati' kais sin anetun es antom In. 8:31 Nalali te Yesus nanoina sin, nak Anmone Pah To mes ansutai mane'at namfau ma ale amnasit sin, ma ale ana' lasi fuat nakaf ma ale ahin sulat sin of antite In ma namate In, ma neno tenu namuni te anfen anfain. 8:32 In na'uab lasi muti monas. Mes Nai Petrus anhel Yesus neu in aon bian ma nakain In. 8:33 Mes Yesus naklelon ma ankiso In asimo lasi sin, oke te anmahek Nai Petrus nak, "Muskot nitu, fun ho ka mutenab fa sa' le Uisneno natenab, mes sa' le mansian natenab nani." 8:34 Oke te Yesus anboin ale atoni mfaun ma In asimo lasi sin ma nak neu sin, "Atoni le anlomi he natuin Kau, mes natotan in aon, oke te anloi in hau nehe ma natuin Kau. 8:35 Fun atoni le anlomi he namonib ini smanan natuin Au mepu ma lasi knino, in of namonib nani. 8:36 Fun alekot sa' ka atoni le napeni pah pinan ok-oke mes naneku nis ini smanan ka? 8:37 Ai nabe'i anfene sa' ka hen seka ini smanan? 8:38 Fun atoni le anmaen Kau ma anmaen Au a'ak bi batan amle'ut ma asanat i, Anmone Pah To of anmaen nani amsa leka In ankoenon nem bi In Amaf In apinat nok ale ahake knino sin."
9:1 Yesus nak anteni neu sin, "Au ak ki, tebes anmu'i atoni na'ko ale ahaket i sin of ka naben fa maten nahunun sin nit Plenat Uisneno nem nalali nok matane." 9:2 Neno ne namuni te, Yesus anhel neki Nai Petrus, Nai Yakobus ma Nai Yohanes sin ansae anmes neu nu'af amnanut mese. Oke te Yesus human nabaina bi sin matan. 9:3 Ma In bael pake muti nalim-lim. Katit fa atoni mese bi pah pinan i le nabe'i namutib bael pake onane. 9:4 Oke te sin nit Nai Elia nok Nai Musa, sin nua sin namolok nok Yesus. 9:5 Nai Petrus nak neu Yesus, "Anoni, naleko haim bi bale i. Leko nesi hai mo'e la'at tenu, es neu Ko, es neu Nai Musa ma es neu Nai Elia." 9:6 In nak onane, fun ka nahin fa sa' le mes in na'uab fun sin namtau nasekeok. 9:7 Oke te nope mese nem ankub nan sin ma na'ko nope nane sin nen hanaf nak, "I Au Anah le Au nek ani, mitnin nai neu In." 9:8 Ma leka sin ankiso laba funam natef, sin ka nitaf atoni mese anten nok sin al Yesus anmes kun. 9:9 Leka sin ansanu na'ko nu'af nane, Yesus anba'an sin, he nati' kais anetun neu es sa' le sin nit nalali, nahunu Anmone Pah To anfen anfain na'ko amates. 9:10 Sin anpanat lasi ba'an nane, mes sin anmatotin antom sa' le In nak, "Anfen anfain na'ko amates." 9:11 Oket sin natan neu In, "Nansa ka, ahin sulat sin nak: Nai Elia mes nem nahunu ka?" 9:12 Yesus natae nak, "Namneo, Nai Elia of nem nahun ma naloitan ale sa'. Mes onme ka neu sa' le antui nalali antom Anmone Pah To ka? Nak In mes ansutai mane'at namfau ma na'akan In. 9:13 Mes Au ak ki, Nai Elia nem nalali ma atoni anmo'e in natuin sin lomin; namnes nok le antui nalali antom in." 9:14 Leka Yesus, Nai Petrus, Nai Yakobus ma Nai Yohanes anfani neu asimo lasi bian, sin nit atoni mfaun anbi nane. Ma ahin sulat fauk anmatoe nok sin. 9:15 Leka atoni mfaun nane nit Yesus, sin namkakan ma naen nu ansenu In. 9:16 Oke te Yesus natan sin, "Hi matoe lasi sa' mok sin ka?" 9:17 Ma atoni mese na'ko atoni mfaun nane natae nak, "Pak, au eki au anah i neu Ko, fun in aniut sae ma anmono. 9:18 Kalu smanaf nane ansae neun, anbison neu nain; oke te in fefan nafule, neku nisin ma in aon nakbet. Au toti neu Ho asimo lasi sin hen li'u nitu nane mes sin ka nabe'i fa." 9:19 Yesus nak neu sin, "Hi batan ka apalsait, Au he ubala ok ki tal leka ka? Au he seusaban ki tal leka ka? Meki li'ana nane nem neu i!" 9:20 Oke te sin nokan nem neu In. Leka smanaf nane nit Yesus, in antetak liana nane, ma li'ana nane anteopnon neu nain ma antihoelnon ma fefan nafule. 9:21 Oke te Yesus natan li'ana in amaf ma nak, "In naben menas nane es leka ka?" In natae nak, "Na'ko fe aktia nabau. 9:22 Fe fe'at smanaf nane anpolin neu ai, ma neu oe he nale'un li'ana nane. Mes so Ho mube'i he mo'e onme ka, ambab kai ma mumnau kai fa." 9:23 Yesus natae nak, "Ho mak so Ho mube'i? Ale sa' nabe'i neu atoni apalsait." 9:24 Onane te li'ana nane in amaf ananbai nak, "Au palsai. Ambab kau le ka apalsait i!" 9:25 Leka Yesus nit atoni mfaun nane neman, In anli'u smanaf nane anpoi ma nak, "Hoi smanaf le anmo'e atoni hen mono ma antono, Au uplenat ko, hem poi nai mu'ko li'ana i ma kais amtam amteni meu in!" 9:26 Oke te smanaf nane anpoi ma an'anbai fun antetak li'ana nane. Li'ana nane human on amates, tal atoni mfaun sin nak, "In anmaten." 9:27 Oke te Yesus na' li'ana nane niman ma anfiti. Oke te in anfen kun. 9:28 Leka Yesus ante ume, ma In asimo lasi sin anmesen nokan, sin natan In nak, "Nansa ka es hai ka mibe'i fa hem li'u nitu nane?" 9:29 Yesus natae sin nak, "Smanaf humaf i ka nabe'i fa het li'u, al nok onen totis." 9:30 Usif Yesus nok In asimo lasi sin nasaitan bale nane ma sin anfin pah Galilea ma Yesus kan lomif he atoni nahin lasi nane. 9:31 Fun In fe nanoina In asimo lasi sin. In nak neu sin, "Of nana'at Anmone Pah To neu mansian sin niman, ma sin namate In, ma neno tenu namuni te of In anfen anfain." 9:32 Sin ka nahin fa a'at nane, mes sin ka nabe'i fa he natan In. 9:33 Nalali te Yesus ma In asimo lasi sin ante bi Kapernaum. Leka Yesus ante ume, In natan neu In asimo lasi sin nak, "Lelo hi mimolok sa' ka bi lalan atnanan?" 9:34 Mes sin ka nataen fa, fun lelo anbi lalan atnanan sin matoe neu sekau le nanae nesi anbi sin. 9:35 Oke te Yesus antok ma anboin asimo lasi sin bo'es am nua nane. In nak neu sin, "Atoni le anlomi hen fani ahunut, so in anfani amunit ma antuthae ale atoni." 9:36 Oke te Yesus anhel nan li'ana mese ma nahakeb anbi sin atnanan. Nalali te In anho li'ana nane ma nak neu sin, 9:37 "Atoni le ansimo li'ana mese onle i anbi Au kanak, in ansimo Kau. Ma atoni le ansimo Kau, nane in kan simo Kau fa, mes ansimo In le ansonu Kau." 9:38 Nai Yohanes nak neu Yesus, "Pak, hai mit atoni mese le ka natuin kit fa anli'u nitu neki Ho kanam. Oket hai mikain atoni nane fun in ka natuin kit fa." 9:39 Mes Yesus nak, "Kais mikain! Fun katit fa atoni mese le anmo'e lasi amkakat neki Au kanak, nabe'i bi leku nane amsa in na'uab nale'un Kau. 9:40 Atoni le kan laban kit, in haek nok kit. 9:41 Au ak ki mimnau, atoni le na'inut ki oe kui mese fun hi atuin Kesel Afetin, of in ansimo baen." 9:42 "Sekau le nasekeb es na'ko li'ana abaut apalsait i sin, leko nesi anfutun fatu fole mese neu in to'an ma atpolin tatam in neu tasi. 9:43 Ma kalu ho nimam nasekeb ko amketu mani. Fun leko nesi hom tam meu honis nok nim tuka na'ko anpolin natam ko nok nimaf nua neu bale maputu, neu ai le ka masifo fa. 9:44 Bi bale nane in kaun sibe of kan mate nitaf, ma in ai of ka masifo fa. 9:45 Ma kalu ho haem nasekeb ko, amkeut mani. Fun leko nesi hom tam meu honis nok hae hela, na'ko anpolin natam ko nok haef nua neu bale maputu. 9:46 Bi bale nane in kaun sibe of kan mate nitaf ma in ai of ka masifo fa. 9:47 Ma kalu ho matam nasekeb ko, amloit mupoitan. Fun leko hom tam meu plenat Uisneno nok mataf mese, na'ko anpolin natam ko nok mataf nua neu bale maputu. 9:48 Bi nane sin kaun sibe of kan mate nitaf ma ai ka masifo fa. 9:49 Fun ale atoni of anmasi nani neki ai. 9:50 Masi nane leko kun, mes kalu masi nane in min mali namneku, hi mimalib mifani meki sa' ka? Es nane, so hi mu'i masi bi hi aom ma a'moni nok halan nekaf es nok es."
10:1 Yesus nasaitan bale nane, ma a'nao neu pah Yudea ma neu pah Noe Yordan panin. Atoni namfaun nem antol nan In. Oke te In nanoina sin. 10:2 Atoni Farisi sin neman hen su' nit Yesus ma sin natan nak, "Nabe'i ka atoni anbation nok in fel?" 10:3 Mes In natae sin nak, "Nai Musa anba'an sa' neu ki ka?" 10:4 Sin natae nak, "Nai Musa anfe mainuan hen batiok lamu anmo'e sulat mabatis." 10:5 Oke te Yesus nak neu sin, "Natuin hi nekam manu' kun es, nane Nai Musa antui plenat nane neu ki. 10:6 Fun na'ko pah pinan anfatnon, Uisneno anmo'e mansian. Uisneno anmo'e sin atoni ma bife. 10:7 Es nane atoni of nasaitan in amaf ma in ainaf ma namesbon nok in fel. 10:8 Talan te sin nua sin anfani nesaf mese. Onane te sin ka nua antenif, mes mese. 10:9 Fun sa' le Uisneno nameseb nalali, mansian ka nabe'i fa hen bati." 10:10 Leka sin ante ume, asimo lasi sin natan lasi nane neu Yesus. 10:11 Yesus nak neu sin: "Atoni le anbation nok in fel oket anmafe nok bife bian, in mo'e mapaisa nok in fel nane. 10:12 Ma kalu bife anbation nok in mone ma anmamone nok atoni bian, in mo'e mapaisa." 10:13 Oket atoni sin neki li'ana sin nem neu Yesus, he nati' In anpoh sin. Mes In asimo lasi sin nato'an atoni nane sin. 10:14 Leka Yesus nit lasi nane te In nato' ma nak neu sin, "Mifetin li'ana nane sin he nem neu Kau. Kais misenip sin, fun ale atoni onle nane sin es napeni plenat Uisneno. 10:15 Au ak ki, atoni le kan simof plenat Uisneno on li'ana mese, in of kan tamaf neun." 10:16 Oke te In anho li'ana nane sin ma naiti Ini niman neu sin fun antek alekot neu sin. 10:17 Leka Yesus he nao anfini onane te, atoni mese naen laba ma napeni In. Atoni nane anli'tu bi In matan ma natan nak, "Anoni alekot, au mo'e sa' ka he upeni honis nabal-bal?" 10:18 Yesus natae nak, "Hom tek Kau alekot neu sa' ka? Katit fa atoni mese le naleko al Uisneno anmes. 10:19 Ho muhin ale plenat Uisneno: Kais ho mumate atoni, kais ho mapaisa, kais ho mubak, kais hom saksi moel, kais ho musik, munaeb ho ama ma ho aina!" 10:20 Oke te atoni nane nak neu Yesus, "Pak, ale lasi nane sin, au utuin ulali sin na'ko fe au munif kau." 10:21 Mes Yesus ankiso atoni nane nok manekat ma nak neune, "Al hom nuk lasi mese anteni. Hom nao nai, musosa ale ho maus. Oke te hom fe in upan neu atoni amamu'it sin ma of ho mupeni maus bi neno tunan. Nalali te aum nai ma mutuin Kau." 10:22 Leka in nen lasi nane te, in nekan na'unu, oke te in nekan ansusal, fun ini maus anaek kun. 10:23 Oke te Yesus ankiso In asimo lasi sin funam natef ma nak neu sin, "Susal anaek atoni amu'it antam neu Plenat Uisneno." 10:24 In asimo lasi sin namkak leka sin nen In a'at nane. Mes Yesus anlut anteni nak: "Au anhenu ki, susal anaek he tam teu Plenat Uisneno. 10:25 Leko nesi bikase paha snaen antam natuin anet luken na'ko atoni amu'it mese hen tam neu Plenat Uisneno." 10:26 Sin alsin ansanmak ma na'uaben es neu es nak, "Kalu onane, sekau ka es napeni honis?" 10:27 Yesus ankiso sin ma nak, "Neu mansian lasi nane ka nabe'i, mes neu Uisneno ka on fa nane. Fun ale lasi nabe'i neu Uisneno." 10:28 Nai Petrus nak neu Yesus, "Hai misaitan ale sa' ma mituin Usi!" 10:29 Yesus natae nak, "Tebes, atoni le nasaitan in ume, in olif tataf sin, ai in feotfin, in ainaf ai in amaf, in anhin ai in lele, natuin Au mepu ma lasi knino, 10:30 tomas i amsa atoni nane of ansimo nafani kuni natun mese: ume, olif, tataf, feotfin, ainaf, anah ma lele nok mane'at namfaun. Ma bi batan amnemat of in napeni honis nabal-bal. 10:31 Mes atoni namfaun le ahunut of anfani amunit ma le amunit of anfani ahunut." 10:32 Yesus ma In asimo lasi sin fe anbi lalan he nao neu Yerusalem. Yesus ankoenon nahun ma In asimo lasi sin nekan na'unu. Ma ale atoni le natuin sin amsa sin namtau. Yesus no'en In asimo lasi sin bo'es am nua anmesen ma anetun sin lasi le hen bol neu In. 10:33 Yesus nak, "Mitnin, hit het nao teu Yerusalem. Ma Anmone Pah To of nana'at nani neu ana' lasi fuat nakaf ma ahin sulat sin. Ma sin of anlef lasi he namate In. Oke te sin nana'at In neu ale atoni le ka nahin Uisneno. 10:34 Of sin nasi'u In, nakinu, antepo ma namate In, mes neno tenu namuni te of In anfen anfain." 10:35 Oke te Nai Zebedeus in anhin Nai Yakobus ma Nai Yohanes sin anhaumak Yesus ma nak neune, "Pak, hai mifnekan he nati' Hom lut hai totis!" 10:36 In natae sin nak, "Him lomi he Au mo'e ki sa' ka?" 10:37 Oke te sin nak, "Haim lomi hem toko anbi Ho apinat, es anbi Ho aom bian ne'u ma es anbi Ho aom bian a'li." 10:38 Mes Yesus nak neu sin, "Hi ka mihin fa sa' le him toti. Hi mibe'i ka he minu klas mninut le Au he inu ma naslani ki neki oe le Au he simo ka?" 10:39 Sin natae nak, "Hai mibe'i." Yesus nak neu sin, "Namneo, of hi minu klas mninut le Au he inu, ma of naslani ki neki oe le Au he simo. 10:40 Mes lasi hem toko anbi Au aok bian ne'u ai Au aok bian a'li, Au ka mu'if hak he fe ki. Nane of anfe nani neu atoni sekau le naloitan nalali neune." 10:41 Leka asimo lasi bo'es sin nen lasi nane te sin nato'an Nai Yakobus ma Nai Yohanes. 10:42 Mes Yesus anboin sin ma nak neu sin, "Hi mihin, nak sin le antek sin ana' aplenat, naplenat sin to nok matani. Ma anaet sin nanaoba sin kuasat nok matani neu sin. 10:43 Mes anbi ki ka on fa nane. Atoni le anlomi hen fani anaet anbi ki, so in fani atuthaes neu ki. 10:44 Ma atoni le anlomi hen fani ahunut, so in anfani ate neu sin ok-oke. 10:45 Fun Anmone Pah To amsa kan koenon nem fa he nati' antuthae nani, mes In hen tuthae kun. Ma anfe In monin hen fani asoit neu atoni amfaut sin." 10:46 Oke te Yesus ma In asimo lasi sin nem ante kot Yerikho. Ma leka Yesus nok In asimo lasi sin ma atoni mfaun nasaitan kot nane, anmu'i atoni afolot mese antoko bi lalan ninen. In kanan Nai Bartimeus, Nai Timeus in anmone. 10:47 Leka in nen nak nane Yesus atoni Nazaret, in an'anbai nak, "Koi Yesus, Nai Daud sufan, mumnau kau fe!" 10:48 Atoni namfau nakain in he natena ai nameka. Mes in anbai nahelon nak, "Nai Daud sufan mumnau kau fe!" 10:49 Oke te Yesus anhake ma nak, "Mo'en he nem!" Sin no'en atoni afolot nane ma nak neune, "Hatani ho nekam nai, hom fen nai, fun In no'en ko." 10:50 Oke te in nauf nani in sobalu, anfen laba ma nao neu Yesus. 10:51 Yesus natan in nak, "Hom lomi he Au mo'e ko sa' ka?" Atoni afolot nane natae nak, "Pak, au lomi he it!" 10:52 Oke te Yesus nak neune, "Hom nao nai, ho palsait nane es namonib ko!" Bi leku nane amsa, in nit anfani oket in natuin Yesus bi In lalan nane.
11:1 Leka Yesus ma In asimo lasi sin nem anhaumak Yerusalem, sin ante kuan Betfage ma Betania bi Tubu Zaitun. Bi nane Yesus anlelu In asimo lasi nua 11:2 le anba'an sin nak, "Him nao nai meu kuan le anbi hi matan nane. Leka him tam meu kuan nane, of hi mipeni bikase tipu luke mnanu mese mafutu le fe ka masaen fa. Him sefi bikase nane ma meki nem neu i. 11:3 Ma kalu anmu'i atoni nak neu ki: Nansa him sefi bikase nane, hi mitae mak: Uisneno hen pake. Of In ansonu nafani nem laba neu i." 11:4 Oke te sin naon, ma napeni bikase tipu luke mnanu nane mafutu bi ume enon, bi lalan ninen. Oke te sin ansefi bikase nane. 11:5 Ma atoni fauk le anbi nane sin nak neu sin, "Bae, him sefi bikase nane neu sa' ka?" 11:6 Oke te sin natae onle Yesus anba'an sin. Ma atoni nane sin ka nokif sin. 11:7 Nalali te sin neki bikase nane neu Yesus. Ma ankap nani neki sin bael pake, oke te Yesus antunon neun. 11:8 Atoni mfaun sin na'ben sin bael pake bi lalan, bian sin antao hau tlaef le sin an ipu bi lele. 11:9 Ale atoni le sin nahunun ma sin le namuni sin anhunun nak, "Ampules Uisneno! Antek alekot neu In le ankoenon nem bi Abal-balat In kanan! 11:10 Antek alekot neu plenat le he nem, hit ama Nai Daud ini plenat, ampules Uisneno bi bale alatan!" 11:11 Leka sin ante bi Yerusalem, In antam neu Ume Uisneno. Bi nane In nail ale sa' ok-oke. Mes natuin neno hen faien, In anpoi neu Betania nok In asimo lasi sin bo'es am nua. 11:12 Nok fa onane, leka Yesus ma In asimo lasi sin bo'es am nua anpoi na'ko Betania, Yesus natnin te namnah. 11:13 Ma na'ko lo In nit bubuk u'mese le anmu'i nof. In nao anhaumak hen kiso nit kalu In napeni sa' anbi hau nane. Mes leka In nun te bale nane, In ka napeni fa sa' al hau no, fun neno bubuk he nafua fe kan tiaf. 11:14 Oke te In nak neu hau nane, "Kais atoni mese neku anteni ho fuam tal nabal-bal!" Ma In asimo lasi sin amnen nani. 11:15 Oke te Yesus ma In asimo lasi sin ante Yerusalem. Leka Yesus antam neu Ume Uisneno, In anli'u ale atoni le anmakasosa bi Ume Uisneno. In aneusbai nis ale mei le antukal noni anbin ma ale toko le nasosa kol ot kase anbin. 11:16 Ma In kan fe fa mainuan neu atoni he neki bale nao natuin po'an Ume Uisneno. 11:17 Oke te In nanoina sin nak: "Ati kan tui nani fa nak: Au ume of antek nani nak ume onen totis neu ale to ka? Mes hi mo'e mani anfani nuat asikat!" 11:18 Ana' lasi fuat nakaf sin ma ahin Sulat sin nen lasi nane. Es nane te sin nami lalan he namate In. Mes sin namtausan In, fun ale to mfaun sin nekan ansanmak neu In noina nane. 11:19 Ma leka neno anfai sin anpoi na'ko kot nane. 11:20 Leka fe nok-nok ana' te Yesus ma In asimo lasi sin nao natuin lalan, sin nit hau bubuk nane anmeto talan te ini ba'an. 11:21 Nai Petrus namnau nit sa' le anbol nalali te, in nak neu Yesus, "Pak, kiso bubuk le afi Hom le'at nane anmeto kun!" 11:22 Yesus natae sin nak, "Palsai neu Uisneno! 11:23 Au ak ki tebes, sekau nak neu nu'af i: Mua'ition ma ampoilnom neu tasi nai! Lamu nekan kais na'oni, mes ampalsai mak, sa' le mi'uab mes anbol. Lasi nane of anbol neu ki. 11:24 Es nane Au ak ki: Leka him onen ma amtoti sa' so ampalsai nai mak him simo milali, lasi nane of anfe nani neu ki. 11:25 Ma leka him hake hem onen totis, him sako mihunun sa' le him mitenab bi nekam neu es, he nati' hi Ama abit neno tunan amsa ansako hi sanat sin." 11:26 Mes kalu hi kam sako fa hi bia sin sanat, hi Ama abit neno tunan amsa of kan sako fa hi sanat sin. 11:27 Yesus ma In asimo lasi sin anfani nem anteni neu Yerusalem. Leka Yesus fe a'nao bi Ume Uisneno in po'an, ana' lasi fuat nakaf, ma ahin Sulat sin ma amnasit sin nem neu Yesus. 11:28 Ma sin natan neu In nak, "Ho mo'e ale lasi nane meki kuasat sa' ka? Ma sekau ka es anfe Ko kuasat nane he nati' Ho mo'e lasi nane ka?" 11:29 Yesus natae sin nak, "Au he utan ki lasi mese. Mitae Kau nai, of Au uton ki Au mo'e ale lasi nane eki kuasat sa'. 11:30 Nai Yohanes in mepu le naslani atoni nane, na'ko neno tunan ka ai na'ko mansian? Mitae Kau nai!" 11:31 Ma sin malomis nak, "Kalu hit tak: Na'ko neno tunan of In nak kit: Nansa hi kam palsai fa neune ka? 11:32 Mes leka me hit he tak: Na'ko mansian!" Fun sin namtausan atoni mfaun nane, le sin alsin antebes nak: Nai Yohanes nane mafefa knino kun. 11:33 Oke te sin natae neu Yesus nak, "Hai ka mihinef." Yesus nak neu sin, "Onane amsa Au ka uton ki fa, Au mo'e ale lasi nane eki kuasat sa'."
12:1 Oke te Yesus na'uab neu sin neki lasi leta nak: "Anmu'i atoni mese le anmepu lele tanu'an sena ma in anmo'e bahan funam natef. In anhani nopu neu he naes tanu'an sena in oen. Oke te in anmo'e haklelo pana, hen pao lele nane. Nalali te in nana'at lele nane neu atoni ameput sin fun in he nao neu pah bian. 12:2 Leka ante neno hen seu tanu'an sena in fuan, in lelu in ate mese neu atoni ameput sin hen simo in lele afan na'ko sin. 12:3 Mes sin anheke ate nane ma antepo, oke te anlelu hen fani nok nim luman. 12:4 Oke te in lelu anteni ate bian neu sin. Mes atoni ameput sin antepo ate nane ini nakan tal napap ma sin namaeb in nok. 12:5 Oke te lele tuaf nane anlelu anteni ate mese, mes namate ate nane. Ma bian namfau anteni, mes sin antepo bian ma namate bian. 12:6 Al in anmone anmes le in nek nisan. Nalali te in anlelu nani neu sin fun in nak: I au anah, of sin namtausan. 12:7 Mes apao lele nane sin na'uaben es nok es nak: Ba'is i apao bale mnasi. Aim het tamate, he nati' bale mnasi i anfani hit ini. 12:8 Ma sin anheke anah nane ma namate, oke te anpolin napoitan na'ko lele tanu'an sena nane. 12:9 Nalali te lele tuaf nane of anmo'e sa' ka? In of nem ma nale'un apao lele nane sin, oke te nana'at lele nane neu atoni bian. 12:10 Ait hi kam soi mit fa sa' le antui nani nak: Fatu le amo'e ume sin anpolin nani anfani fatu sukit: 12:11 Lasi nane anbol na'ko Uisneno, Sanmakat mese bi hit matak." 12:12 Oke te sin nami hen heke Yesus, fun sin nahinen, nak In nua'ab lasi leta nane antom neu sin. Mes sin namtausan atoni mfaun, es nane te sin naon ma ka noki fa In. 12:13 Nalali te anlelu atoni Farisi sin fauk ma atoni Herodian, neu Yesus hen su' nit In neki lasi tanas mese. 12:14 Atoni nane sin neman ma nak neu In, "Pak, hai mihin, Ho atoni amneot Ko, ma Ho kam sian fa es amsa. Fun Ho kam beti fa humaf, mes munoina lalan Uisneno nok amnenot. Nabe'i ka het baen noni poni neu Uiskesel ai kahaf? Hai mes hen baen ka ai kahaf?" 12:15 Mes Yesus nahin nalali sin asafanut nane, oke te In nak neu sin, "Nansa es him su' Kau ka? Meki noni dinar nane nem he Au kiso it!" 12:16 Oke te sin neki nem. Yesus natan sin nak, "Sekau in human ma in tuis es i ka?" Sin natae nak, "Uiskesel in human ma in tuis." 12:17 Oke te Yesus natae sin nak, "Him fe nai neu Uiskesel sa' le hi hem fe neu Uiskesel. Ma him fe nai neu Uisneno sa' le hi hem fe neu Uisneno!" Leka sin nen lasi nane te sin namkakan neu In. 12:18 Atoni Saduki sin fauk neman neu Yesus, le sin nak kan mu'if amates anfen anfain. Sin natan neu Yesus nak, 12:19 "Pak, Nai Musa antui plenat i neu kai nak: Leka atoni mese anmate, ma kan mu'if anah, in olif mese anmafe nok in fel nane he nati' nahoni anah neu in tataf amates nane. 12:20 Anmu'i atoni hitu le anmaoil tatan. Le anaet anmafe nok bife mese ma anmate mes ka nahonif anah. 12:21 Oke te olif le natuin neune anmafe nok bife nane mes anmate ma ka nahonif anah amsa. Onane amsa in olif es anteni. 12:22 Ma onane talan te sin hitu sin ka nahonin fa anah. Namuni te bife nane amsa anmate. 12:23 Bi neno amates anfen anfain, leka sin anfen anfain, bife nane anfani sekau in fel ka? Fun sin hitu sin anmafe nokan." 12:24 Yesus natae sin nak, "Hi mitenab amsan, fun hi ka mihin fa Sulat Knino ma Uisneno In kuasat. 12:25 Fun leka atoni anfen anfain na'ko amates sin kan mafe antenin fa, mes sin anmoni on ahake abit neno tunan. 12:26 Ma neu lasi amates anfen anfain, hi kam soi fa Nai Musa in sulat, antom lasi nu'un kis lubu le anpin? Le Uisneno nakua a'an neu in nak: Au le i Nai Abraham in Uisneno, Nai Ishak in Uisneno, ma Nai Yakub in Uisneno. 12:27 In ka Uisneno fa neu atoni amates, mes Uisneno neu atoni amonit. Namneu-namneo him sek ma ambeo!" 12:28 Oke te ahin sulat mese le in nen Yesus ma atoni Saduki sin matoen, nahin nak Yesus natae sin nok alekot, in nem ma natan Yesus nak, "Plenat Knino me es abainesit kun?" 12:29 Yesus natae nak, "Plenat Knino abainesit esle': Mitnin nai hoi to Israel, hit Abal-balat Uisneno, Uisneno mese kun. 12:30 Him nek Abal-balat, hi Uisneno, meki hi nekam oke, ma hi smanam oke, ma hi hinem oke ma hi matanem oke. 12:31 Ma plenat nua le nak: Him nek hi bia onle him nek hi aom. Katit fa plenat bian le a'nesi na'ko plenat nono nua i." 12:32 Oke te ahin sulat nane nak neu Yesus: "Namneo Pak, namneo onle Ho mu'uab nane, nak In mese kun, ma katit fa bian, al In mes. 12:33 Es nane te him nek In meki nekam oke, ma amnek hi bia onle hi aom. Nane leko nesi na'ko ale fua mnotu ma fua lolo." 12:34 Ma Yesus nit, nak atoni nane natae nok nek ahinet, In nak neune, "Ho ka mu'lo fa mu'ko plenat Uisneno!" Ma katit fa atoni mese he natan anteni Yesus. 12:35 Leka Yesus nanoina bi Ume Uisneno, In nak, "Leka me ahin sulat sin nak Neno Anan nane Nai Daud in sufan ka? 12:36 Fun natuin Smanan Knino in mepu, Nai Daud nak: Uisneno tunan nakua a'an neu au Usif nak: Hom tok nai bi Au aok bian ne'u, talan te Au tao Ho musu sin bi Ho haem nupun. 12:37 Kalu Nai Daud antek In nak in Usif, leka me In hen fani In anah ka?" Atoni mfaun nane sin lomi hen nen In nok amlilat. 12:38 Bi In lasi noina Yesus nak, "Him pantom mi'ko Ahin Sulat sin. Sin anlomi he nao nok sobalu betkone mnanu ma anlomi he napeni kan tola bi masa. 12:39 Sin anlomi hen toko antom mat bi ume buat ma bale makana bi tolas. 12:40 Le nasik nan bife banu sin ume ma an a'safanu neki onen toti amnanu. Sin le nane of napeni kasat mafena nes." 12:41 Leka Yesus antoko mabaina nok peti fua tulu bi Ume Uisneno, In ankiso ale atoni mfaun le natam sin loi tulu neu peti nane. Atoni amu'it namfau sin natam noni anaek. 12:42 Oke te bife banu mamu'it mese nem ma natam kisi nua, nane loit mese kun. 12:43 Yesus no'en In asimo lasi sin ma nak neu sin, "Him kiso mit bife banu amamu'it i, in fe nesi na'ko ale atoni le natam loit neu peti fua tulu nane. 12:44 Fun sin alsin anfe na'ko sin athoes, mes bife banu'i anfe na'ko in mamu'it. In anfe sa' le in anmu'i, le he nah neu in monin."
13:1 Leka Yesus anpoi na'ko Ume Uisneno, In asimo lasi mese nak neune, "Pak, amkiso mit ale fatu nane ma ale ume amasat nane!" 13:2 Oke te Yesus nak neune, "Ho mit ale ume amasat i ka? Of kan paleob fa fatu mese he naktuton bi fatu bian of anpukai nani oke." 13:3 Oke te Yesus antoko bi Tubu Zaitun tunan mabaina nok Ume Uisneno, Nai Petrus, Nai Yakobus, Nai Yohanes ma Nai Andreas natan neu In anmes nak, 13:4 "Muton kai fe, lasi nane of anbol onme. Ma ini takan nane sa', kalu ale lasi nane ante neu in amsopun." 13:5 Oke te Yesus na'uab neu sin nak, "Him panat nai he nati' kais anmu'i atoni le nasekeb ki! 13:6 Of anmu'i atoni namfau neman neki Au kanak ma nak: Au es kau i, ma of sin nasekeb atoni namfau. 13:7 Ma leka him nen lasi makenat ai beno antom makenat kais hi mi'unu. Ale lasi nane mes hen bol, mes neno amsoput fe kahaf. 13:8 Fun uf es of anfen ma an laban nok uf es. Ma plenat nok aplenat an maken es nok es. Nainunus of anbol bi ale bale ma of anmu'i amnahas naek. Ale lasi nane fe mane'at na'ubon neu neno fe'u, onle' bife mese namen neu he nahoni. 13:9 Mes hi le i him panat nai. Of nana'at ki neu tolas alef lasi. Of antepo ki bi ume buat. Of neki ki neu anaet ma kesel sin matan natuin Au kanak, on saksi neu sin. 13:10 Mes am'etun mihunun Lasi Knino neu ale uf-uf. 13:11 Ma leka sin neki ki amnao ma nana'at ki neu alef lasi, kais hi mimtau neu sa' le he mi'uab. Mes mi'uab sa' le anfe neu ki bi leku nane. Fun hi es ka mi'uab mes Smanan Knino kun. 13:12 Atoni of nana'at in bia neu he namate. Onane amsa amaf nok in anah. Ma liana sin of anlaban sin amaf ma sin ainaf ma of namate sin. 13:13 Of ale atoni sin kan lomi ki fa natuin Au kanak. Mes atoni le nalan tal namsopun of in napeni honis." 13:14 "Leka hi mit Ahainisit amle'ut anhake bi bale le ka nabe'i hen hake anbin -- atae sulat so him panat mani -- atoni le anbi pah Yudea mes naenan neu neten. 13:15 Atoni le anbi ume penen kais ansanu ma antam he naiti sa' na'ko in ume. 13:16 Ma atoni le anbi lele kais anfani he naiti in bael pake. 13:17 Amle'ut neu nonot ainaf le fe na'apu ai le fe nasusu anah bi leku nane. 13:18 Onen toti nai he nati' ale lasi nane kais anbol bi neno manikin. 13:19 Fun bi neno nane of hamu'it anaek anbol. Hamu'it onane fe kan bol nit fa na'ko neno Uisneno anmo'e pah pinan tal neno i ma of kan bol anteni fa. 13:20 Ma leka Uisneno ka napalan fa In neno, of katit fa atoni mese hen anmoni. Mes natuin ale atoni mabeti le In anbeti nain sin, Uisneno napalan In neno. 13:21 Bi neno nane leka anmu'i atoni le nak neu ki: Kiso, Neno Anan es i, ai: Kiso Neno Anan es nane, kais him palsai. 13:22 Fun Neno Anan moel ma mafefa knino moel of sin neman. Ma sin anmo'e ale taka ma ale lasi amkakat he nati' nasekeb ale atoni mabeti sin. 13:23 Es nane te him panat nai! Au uton uhunun ki ale lasi i neu ki." 13:24 "Mes bi neno nane, leka hamu'it anfini te, manas of namesok ma funan of kan sinek fa. 13:25 Ma afkun of anmofu na'ko neno tunan ma neno in matanen of nabeko kun. 13:26 Bi leku nane of sin nit Anmone Pah To ankoenon nem bi nope nok In kuasat ma In apinat. 13:27 Bi leku nane amsa of In anlelu In ahake neno tunan sin anpoi he nabuab ale atoni mabeti na'ko pah pinan mata' ha, na'ko pah pinan tukan talan te neno tunan tukan. 13:28 Hi minoina na'ko lasi leta antom hau bubuk. Leka in tlaen makuke ma ambutu, hi mihin mak faoknais anhaumaken. 13:29 Onane amsa leka hi mit ale lasi nane anbol, hi mihin mak in leku anhaumaken es ume enon. 13:30 Au ak ki: Batan i of kan finif, nahunu ale lasi nane anbol. 13:31 Neno tunan nok pah pinan of anfini, mes Au a'ak of kan finif. 13:32 Mes neu neno ai leku nane, katit fa atoni mese le nahin, ale ahake abit neno tunan amsa kahaf, ma Anmone amsa kahaf, al Amaf anmes es nahin." 13:33 "Him panat nai ma ambe' nai! Fun hi ka mihin fa leku le'at nane leka he nem ante. 13:34 Ma ini letan onle atoni mese le in nao neu paha lo. Le in nasaitan in ume ma nana'at nani neu in ate sin, es-es nok in mepu kun ma anlelu apao eno he nati' in anbe'. 13:35 Es nane him be' nai, fun hi ka mihin fa, ume tuaf nane of leka te in anfani nem. He nok fai ka, ai fai nanesab ka, ai nesi hen meu ka, ai fe ansapal ka. 13:36 He nati' kalu ankoenon nem te kais napeni ki fe amtup. 13:37 Sa' le Au u'uab neu ki. Au u'uab neu ale atoni: Him be' nai!"
14:1 Al neno nua te Tolas Paskah ma neno naek utunu' ka malalu haef nanaobon. Ana' lasi fuat nakaf ma ahin sulat sin nami lalan hen heke ma namate Yesus neki ela sa'. 14:2 Fun sin nak, "Kais nok neno naek, he nati' kais anmu'i taisibu anbi to." 14:3 Leka Yesus anbi Betania, bi Nai Simon men poko in ume fe antoko hen bukae, bife mese nem neu In. In neki min fomeni botil mese le upan matane. Oke te in nape' botil nane ma an op mina nane neu Yesus Ini nakan. 14:4 Anmu'i atoni le nato' ma na'uaben es neu es nak: "An opan nale'un min fomeni i neu sa' ka? 14:5 Fun mina nane nabe'i hit tasosa teki upan dinar natun tenu ma nesi ma in upan nane hit atfe neu atoni amamu'it sin." Oke te sin nato'an bife nane. 14:6 Mes Yesus nak, "Kais moki. Nansa' es hi misusab in ka? In mo'e lasi alekot mese neu Kau. 14:7 Atoni amamu'it sin, hi mok sin piut, ma nabe'i him tulun sin leka him lomi. Mes Au of ka ok ki fa piut. 14:8 In anmo'e nalali sa' le nabe'i in hen mo'e. In an op min fomeni neu Au aok on naloitan neu hen bebin Kau. 14:9 Au ak ki: Leka anetun Lasi Knino bi me anbi pah pinan, sa' le in anmo'e i of antek nani amsa he namnau in." 14:10 Oke te Nai Yudas Iskariot, atoni mese na'ko asimo lasi sin bo'es am nua nao neu ana' lasi fuat nakaf nok salit he nana'at Yesus neu sin. 14:11 Leka sin nen onane te sin namlil ma anba'an hen fene noni. Namuni te in nami leku mainuan he nana'at Yesus. 14:12 Bi neno ahunut na'ko Neno Naek U'tunu Kan Pake fa Lalu, bi leku atoni hen lolo bibi kase Paskah, Yesus asimo lasi sin nak neu In, "Usi amlomi he haim nao miloitan tolas Paskah neu Ko bi bale me ka?" 14:13 Oke te In anlelu In asimo lasi nua ma anba'an sin nak, "Him nao nai meu kot, bi nane of hi mi'eku mok atoni mese le neki nai oe. Hi mituina 14:14 ma mak neu ume tuaf le in hen tam neune: Pak nak: Hi miloitan ke'an me neu Kau ka he nati' Au bukae Paskah ok Au asimo lasi sin ka? 14:15 Atoni nane of anlekan ki ke'an fafon le naek, le naloitan nani ale sa'-sa'. Hi miloitan ke'an nane neu kit het mo'e tolas Paskah." 14:16 Oke te asimo lasi nua nane sin naon. Leka sin nun te kot nane, sin napeni ale sa' onle Yesus nak neu sin. Oke te sin naloitan tolas Paskah. 14:17 Leka neno anfai, Yesus nem nok asimo lasi sin bo'es am nua. 14:18 Leka sin antoko ma anbukaen, Yesus nak, "Au ak ki, atoni mese anbi ki of nana'at Kau, esle' in le anbukae nok Kau." 14:19 Leka sin nen lasi nane te sin nekan antu' ma sin mes-mese nak neu Yesus, "Usi, ai au ka?" 14:20 In nak, "Atoni nane, es anbi ki bo'es am nua le i, le anlep u tunu bi pika mese nok Kau. 14:21 Anmone pah to of a nao, namnes nok sa' le antui nani antom In. Mes amle'ut neu atoni le nana'at Anmone pah to nane. Leko nesi kais nahonis atoni nane." 14:22 Leka Yesus ma In asimo lasi sin anbukae, Yesus naiti u tunu ma antek alekot neun. Nalali te In anebi utunu' nane ma anfe neu sin ma nak, "Maiti ma ambukae, i Au aok." 14:23 Oke te In naiti klas mninut ma antek alekot neun. Oke te anfe neu sin ma sin alsin ninu na'ko klas mninut nane. 14:24 Ma In nak neu sin, "I Au na', na' fefbela, le an op nani neu to mfaun. 14:25 Au ak ki, of Au ka inu teni fa tanu'an sena in oen talan te Au iun ani fe'u, bi plenat Uisneno." 14:26 Leka sin ansi nalali sit pules, sin naon neu Tubu Zaitun. 14:27 Oke te Yesus nak neu sin, "Hi palsait of na'oni, fun antui nalali nak: Of Au tepo atukus ma bibi nane sin of naen nasitbok. 14:28 Mes leka Au fena fani, of Au uhunun ki bi pah Galilea." 14:29 Nai Petrus nak neu In, "Maski sin nekan na'oni, mes au kahaf." 14:30 Oke te Yesus nak neune, "Au ak ko, bi neno i, fai i amsa, nahunun na'ko manu ankokle'o hae nua, ho mutotan mulali Kau hae tenu." 14:31 Mes Nai Petrus namep anteni nak, "Maski nak au he mate ok Ko, of au ka utotan fa Usi." Asimo lasi bian amsa na'uab onane. 14:32 Oke te Yesus ma In asimo lasi sin nem ante bale mese kanan Getsemani. Yesus nak neu In asimo lasi sin, "Him tok nai ambi i, Au nao fe he onen toti." 14:33 Ma In nok Nai Petrus, Nai Yakobus ma Nai Yohanes, In namtau ma natai, 14:34 oke te In nak neu sin, "Au nekak antu' utninet on he mate. Hi mibala ambi i ma ambe." 14:35 In anfonat nao kle'o, ma ansukbon neu nain ma anonen toti. He nati' bait nabe'i leku mane'at nane anfin na'ko In. 14:36 Ma In nak, "Koi Ama, koi Ama, katit fa lasi sa' esle' ka nabe'i neu Ko. Ho maiti mani hamu'it i na'ko Kau. Mes kais natuin Au lomik, so natuin Ho lomim." 14:37 Nalali te In anfani nem, ma napeni sin tenu sin antupan. Ma In nak neu nai Petrus, "Simon, ho fe amtup ka? Ho ka mube'i fa hem be' leku mese ka? 14:38 Ambe' nai ma amonen toti, he nati' kais him tam meu lasi su'at. Hi smanam anlomi, mes hi aom nane naklati kun." 14:39 Oke te In nao anteni ma antek onen totis le nane amsa. 14:40 Ma leka In anfani nem, In napeni sin fe antupan, fun sin matan anmafen. Ma sin ka nahin fa sa' le sin mes he natae neu Yesus. 14:41 Nalali te In anfani nem hae tenu ma nak neu sin, "Him tup nai ma misnas. Noba nai. Kiso leku antelen he nana'at Anmone pah to neu atoni asanat sin niman. 14:42 Him fen nai, aim nai het nao. In le he nana'at Kau anhaumaken." 14:43 Leka Usif Yesus fe namolok te, Nai Yudas, le asimo lasi sin bo'es am nua sin ese natbol. Ma in nok atoni puka naek esle' nekin suni ma hau tuka. Fun ana' lasi fuat nakaf, ahin sulat sin ma amnasit sin es anlelu sin. 14:44 Atoni le he nana'at In anetun nain sin taka i neu sin, "Atoni le Au nek ani, In esle' nane. Him heke nai ma mokan hem nao nok alekot." 14:45 Ma leka in nem ante bale nane in anfonat nu neu Yesus ma nak, "Pak," oke te in nek Yesus. 14:46 Ma sin anheke Yesus ma anfutu In. 14:47 Mes atoni mese le anbi nane in anfaki suni, oke te ansapi ana' lasi fuat anaet in ate luken tal natfek. 14:48 Mes Yesus nak neu sin, "Oni hi mitenab mak, Au atoni asikat Kau, es hi aim meki suni ma hau tuka hem heke Kau ka? 14:49 Neno-neno Au ubua ok ki ma unoina bi Ume Uisneno, mes hi kam heke Kau. Mes mautu he natisi sa' le antui nalali bi Sulat Knino." 14:50 Oke te asimo lasi sin alsin naen nasaitan Yesus. 14:51 Bi leku nane anmu'i atoni munif mese, le antainus neki mau muti kase natuin Yesus. Sin hen heke In, 14:52 mes in nafetin in tainusat nane ma in naen nok monas. 14:53 Nalali te sin neki Yesus nao neu ana' lasi fuat anaet in sonaf. Oke te ale ana' lasi fuat nakaf, amnasit sin ma ahin sulat sin nabuan anbi bale nane. 14:54 Nai Petrus natuin Yesus na'ko lo talan te ana' lasi fuat anaet in sonaf haen. In antoko anlal ai nok apaot sin bi bale nane. 14:55 Ana' lasi fuat nakaf ma ale Tolas Alef Lasi sin nami saksi he napeni Yesus In sanat, oke te nafek lasi he namate In. Mes sin ka napenin fa saksi. 14:56 Fun atoni namfaun le sin ansaksi moel neu Yesus, mes sin saksi nane nasulin es nok es. 14:57 Oke te atoni saksi sin fauk sin neki saksi moel hen be'u Yesus nak, 14:58 "Haim nen milali atoni i afi na'uab nak: Of Au pukai ani Ume Knino le anmo'e neki niman mansian i, ma bi neno tenu of Au uhakeb ufani ume bian, le kan mo'e nani fa neki niman mansian." 14:59 Bi lasi i amsa sin saksi nane kan matom fa es nok es. 14:60 Oke te ana' lasi fuat anaet anfen bi sin matan ma natan Yesus nak: "Ho ka mutae fa ale saksi le sin antek nani neu Ko ka?" 14:61 Mes Yesus ane'la, ma ka natae fa fefa mese. Ana' lasi fuat anaet natan anteni Yesus hae mese nak, "Ai Ho Kesel Afetin, Uisneno Knino An mone Ko ka?" 14:62 Usif Yesus natae nak, "In kun esle' Au. Ma of hi mit Anmone pah to le antunon bi Uisneno Ama Akuasat Afin-finit aon bian ne'u ma ankoenon nem bi nope anbi neno tunan." 14:63 Oke te ana' lasi fuat anaet anpisu In bael pake ma nak, "Hit he tami teni saksi neu sa' ka? 14:64 Him nen milali In na'uab nale'un Uisneno. Neu hi mitenab onme ka?" Oke te sin nafek hanaf mese nak, In mes hen mate. 14:65 Oke te bian nakinu (nalon) Yesus ma anpoho In matan ma bian anfutu In ma nak neune, "Hoi mafefa knino, amtek mit, sekau es antepo Ko!" Ma apaot sin amsa antepo Yesus. 14:66 Bi leku nane Nai Petrus fe anbi sonaf haen. Oke te ana' lasi fuat anaet in ate bife mese nem. 14:67 Leka bife nane nit Nai Petrus fe anlal ai, in kiso nalek-leko ma nak, "Hoi soba, ho amsa mok Yesus atoni Nazaret nane." 14:68 Mes in natotan ma nak, "Au ka uhin fa sa' le ho mu'uab nane." Oke te in anpoi neu eno (ma manu ankokle'o.) 14:69 Leka ate bife nane nitan teni Nai Petrus, in na'uab neu ale atoni le anbi nane nak, "Sin atoni amsa es atoni i." 14:70 Mes Nai Petrus natot anteni. Ka lo fa onane te, atoni le anbi nane sin nak anteni Nai Petrus nak, "Namneo, ho amsa sin ese ko, fun ho atoni Galilea ko." 14:71 Mes Nai Petrus anle'at ma ansup nak, "Au ka uhin fa atoni le him tek nane." 14:72 Ma bi leku nane, manu ankokle'o hae nua. Oke te Nai Petrus namnau nit, nak lelo Usif Yesus nak neune, "Nahunun manu ankokle'o hae nua, ho mutotan mulali Kai hae tenu." Oke te Nai Petrus ankae ma anseul.
15:1 Fe nok-nok ana te, ana'-ana' lasi nakaf sin nok ale amnasit sin ma ahin Sulat sin nekaf mese. Sin anfutu Yesus oke te neki In ma nana'at neu Nai Pilatus. 15:2 Nai Pilatus natan Yesus nak: "Namneo ka, Ho Usif atoni Yahudi Ko ka?" Yesus natae nak, "Onle ho mu'uab nane tuan." 15:3 Oke te ana' lasi fuat nakaf sin nasub lasi namfau neu In. 15:4 Nai Pilatus natan anteni Yesus nak, "Ho ka mutae fa ka? Kiso mit sin nasub Ko lasi namfau le'uf." 15:5 Mes Yesus ka natae fa sa' anten, talan te Nai Pilatus in namkak. 15:6 Ma natuin lekat atoni Yahudi, kalu neno naek onane, sin antoti he nafetin atoni o'of mese neu sin. 15:7 Bi leku nane anmu'i atoni mese kanan Nai Barabas le anbi o'of nok atoni abulalut bian. Sin anmo'e taisibu ma namate atoni. 15:8 Atoni namfau sin nem neu Nai Pilatus ma antoti, he nati' nafetin atoni o'of mese neu sin. 15:9 Nai Pilatus natan sin nak, "Him lomi ka he nati' au ufetin Usif atoni Yahudi i ka?" 15:10 In nahin nalali, nak ana' lasi fuat nakaf sin nana'at Yesus natuin nek a'unu. 15:11 Mes ana' lasi fuat nakaf sin na'koke atoni mfaun, he nati' nafetin Nai Barabas neu sin. 15:12 Nai Pilatus natan anteni neu sin nak, "Kalu onane au he mo'e sa' ka neu atoni le him tek mak Usif atoni Yahudi ka?" 15:13 Oke te sin antekal baf nak, "Mipeti In neu hau nehe!" 15:14 Oke te Nai Pilatus nak neu sin, "In mo'e amle'ut sa' ka?" Mes sin naiti baf anteni nak, "Mipeti In neu hau nehe!" 15:15 Ma natuin Nai Pilatus he neka mina atoni mfaun nane, in nafetin Nai Barabas neu sin. Mes in anlelu hen tepo Yesus ma nana'at nani he napeti In. 15:16 Nalali te solalus sin neki Yesus neu bale lef lasi bi sonaf. Ma anboin ale pukan solalus he nabua. 15:17 Oke te sin napakeb Yesus sobalu betkone amtasa ma nakano sobe kisan mese ma antao nani bi Ini nakan. 15:18 Nalali te sin nateb neu In fef tola, Nak, "Selamat, Usif atoni Yahudi!" 15:19 Sin anbiso Ini nakan neki kmeo ma nakinu Yesus ma anli'tu nabes neu In. 15:20a Leka sin namaeb nalali In, sin nauf nani sobalu amtasa nane na'ko In ma napakeb nafani Ini bael pake neune. 15:20b Oke te sin neki Yesus anpoi he napeti bi hau nehe. 15:21 Bi lalan atnanan sin naseke atoni mese hen loi Yesus hau nehe. Atoni nane fe anfani nem na'ko kuan hen tam neu kot. In kanan Nai Simon, atoni Kirene, Nai Aleksander ma Nai Rufus sin amaf. 15:22 Sin neki Yesus neu bale mese le kanan Golgota, in oten nak, "Bale Nui nakaf." 15:23 Oke te sin anfe neu In tua mina amtasa le anselo nok lalu haef mes In kan simo fa. 15:24 Nalali te sin napeti In, ma sin nosun sulat hen bati Ini bael pake, hen lekan mes-mese sini. 15:25 Leka sin napeti In bi hau nehe te leku sio nok-noka. 15:26 Ma sin antui tuis mese bi hau nehe antom fafon antom In mo'et nak, "Usif atoni Yahudi." 15:27 Ma sin napeti atoni asikat nua nok In bi hau nehe. Atoni es anbi In aon bian a ne'u ma atoni es anbi In aon bian a li. 15:28 Onane te Sulat Knino hanan natiabon kun nak: "Of In maso'it anbi atoni amaufinut sin." 15:29 Ale atoni le sin naon natuin nane, sin na'uab nale'un In ma anki'un sini nakan ma nak, "Hoi, Ho es hem pukai Ume Knino ma he muhakeb mufani bi neno tenu. 15:30 Hom sanu nai mu'ko hau nehe nane ma muhoni kum Ho aom!" 15:31 Onane amsa ana' lasi fuat nakaf sin ma ahin sulat sin namaeb In. Ma sin na'uaben es neu es nak: "In nahoni atoni bian, mes In ka nabe'i fa he nahoni In aon. 15:32 Kalu In usif Israel, Kesel Afetin, leko In sanu na'ko hau nehe nane, he nati' hit tit ma atpalsai!" Ma atoni nua in le napeti sin nok In, sin asma na'uab nale'un Yesus. 15:33 Leka leku bo'es am nua onane te, mesokan ankub nan pah nane talan te leku tenu. 15:34 Ma bi leku tenu, Yesus anan'bai nok hanan a naek nak, "Eloi, Eloi, lama sabakhtani?" Le in oten nak, "Au Uisneno, Au Uisneno, nansa' Ho musaitan Kau ka?" 15:35 Ma leka atoni fauk le anhake bi nane sin nen te sin nak, "Kiso, In no'en Nai Elia." 15:36 Oke te atoni es in nem ma anlep hau suf putun neu tua mahai; ma anposun neu kmeo panan ma anfe neu Yesus he ninu ma nak, "Maut fe hit kiso tit kalu Nai Elia nem he nasanut In na'ko hau nehe." 15:37 Oke te Yesus anan'bai nok hanan a naek ma nana'at In monin. 15:38 Bi leku nane beti eka Ume Knino anpisun bation na'ko fafon talan te pinan. 15:39 Leka solalus nakaf le anhake mabaina nok In nit nak Yesus anmate onane te in nak, "Namneo, atoni i lo Uisneno In Anmone kun!" 15:40 Ma anmu'i bife fauk anbi nane le sin kiso na'ko lo. Bife nane sin esle', bi Maria Magdalena, bi Maria Nai Yakobus kliko ma Nai Yoses sin ainaf ma bi Salome. 15:41 Sin alsin afi natuin Yesus ma antuthae In bi pah Galilea. Ma anmu'i bife bian namfau anteni le neman neu Yerusalem nok Yesus. 15:42 Neno hen faien, ma neno nane amsa neno loitan neu Neno Snasat. 15:43 Es nane te Nai Yusuf atoni Arimatea nem. In amsa aof na'ko Tolas Alef lasi ma atoni makana. Fun anpao plenat Uisneno nok. In nem neu Nai Pilatus ma antoti Usif Yesus In aon nitu. 15:44 Nai Pilatus namkak leka in nen nak Yesus anmate. Ma in no'en solalus nakaf ma natan neune nak Yesus anmaten ka ai fe kahaf. 15:45 Leka in nen nalali solalus nakaf nane te in anlomi hen fe Yesus aon nitu neu Nai Yusuf. 15:46 Nai Yusuf ansos pilu muti ma leka nasanut nalali Yesus aon nitu na'ko hau nehe in an amu neki pilu muti nane. Nalali te natupab nani In bi nuat naukel le anhani bi fatu. Oke te anfolek fatu naek es neu nuat naukel nane enon. 15:47 Bi Maria Magdalena ma bi Maria Nai Yoses ainaf sin nit bale le natupab Yesus anbin.
16:1 Leka Neno Snasat anfin, bi Maria Magdalena ma bi Maria Nai Yakobus ainaf nok bi Salome ansosan min fomeni he naon neu naukel he nose neu Yesus aon nitu. 16:2 Fe nok-nok ana' bi neno ahunut klei nane, fe manas hen sae, sin naon neu naukel. 16:3 Sin na'uaben es neu es nak, "Sekau es of anfoel kit fatu nane na'ko naukel in enon ka?" 16:4 Mes leka sin neman haumakan te, sin nit fatu naek nane antihoel nalalien. 16:5 Oke te sin antam neu naukel nane ma sin nit atoni munif mese anpake sobalu muti mnanu antoko bi aon bian a'ne'u. Sin naskeken, 16:6 mes atoni munif nane nak neu sin, "Kais mimtau! Hi mami Yesus atoni Nazaret le napeti nane. In anfen anfanien. In ka es fa i. Kiso, bale le sin natupab In anbin. 16:7 Mes him nao nai, ametun In asimo lasi sin ma ametun Nai Petrus mak: In nahunun ki bi pah Galilea. Of hi mit In bi nane, onle In nak nalali neu ki." 16:8 Oke te sin poin ma naen nasaitan naukel nane, fun sin na'tai ma namtau nok. Sin kan etun fa lasi nane neu es am es amsa fun sin namtau. Sin anetun lasi nane tuk-tuka neu Nai Petrus ma in ini sin. Nalali te Yesus anmes kun natuin In asimo lasi sin anetun lasi knino le ka namle'u nitaf antom lasi honis nabal-bal na'ko neno Saet ante neno Tes. 16:9 Leka Yesus anfen anfain nok-noka bi neno ahunut klei nane, In nalilon neu bi Maria Magdalena. Le afi Yesus anli'u nitu hitu na'kon. 16:10 Oke te bife nane in nao ma anetun lasi nane neu sin le afi natuin Yesus le sin fe ankul ma ankae. 16:11 Leka sin nen nak Yesus anmoni ma bi Maria in nit nalali, sin kan palsain fa. 16:12 Nalali te In nalilon anteni nok humaf bian neu atoni nua na'ko sin, leka sin nua sin fe a'nao natuin lalan neu kuan es. 16:13 Oke te sin fani neman ma anetun lasi nane neu sin bian, mes sin kan palsain fa amsa. 16:14 Namuni te Yesus nalile In aon neu asimo lasi sin bo'es am mese leka sin fe anbukae. In nabokan sin, fun sin kan palsai fa ale atoni le sin nit nalali In, leka In anfen anfain. 16:15 Oke te In nak neu sin, "Him nao nai meu pah pinan funan natef ma ametun lasi knino neu ale to mansian. 16:16 Atoni le anpalsai ma naslani of napeni honis. Mes atoni le kan palsai fa of napeni le'at. 16:17 Lasi le hen fani taka neu atoni apalsait sin esle': Of sin anli'u nitu neki Au kanak, 16:18 ma leka sin ninu laso maten, of sin ka napeni fa amle'ut. Of sin na'ati niman neu atoni amenat ma amenat nane naleko kun." 16:19 Leka Usif Yesus na'ati nalali onane neu sin, In na'aition neu neno tunan, oke te antunon bi Uisneno In aon bian a'ne'u. 16:20 Ma asimo lasi sin anpoi ma anetun lasi knino bi me-me fun Usif tunan anmepu nok sin ma anhatane a'at nane neki ale lasi taka le sin anmo'e nani.
1:1 Neu Nai Teofilus atoni makana. Atoni namfaun afi nami lanan he naketin lasi le antom mo'et-mo'et le anbol bi hit atnanak, 1:2 sin nana'at neu kit, natuin afi sin anfani amnitas neki matan ma amneki lasi. 1:3 Onane, lek-leka au peo ufani ale mo'et nane nok amneot na'ko lasi in un, au utenab he nati' tui ani neu ko, 1:4 he nati' ho muhin, mak ale a'at le afi nanoni nani neu ko tebes namneo. 1:5 Bi batan Nai Herodes anfani Kesel to Yudea, anmui ana' lasi fuat mese kanan Nai Zakaria, na'ko uf Abia. In fel nane na'ko Nai Harun in sufan, kanan bi Elisabet. 1:6 Sin nua sin amneot bi Uisneno In human ma sin nua sin anmoni ma nao natuin Uisneno Ini plenat ma In lekat nok alekot. 1:7 Mes sin kan mu'in fa anah, natuin bi Elisabet in ankiu ma sin nua sin namnasin finin. 1:8 Bi neno Nai Zakaria he natis in mepu on ana' lasi fuat bi Uisneno In human bi tomas nane uf Abia napeni lekat. 1:9 Natuin lasi fuat in lekat, Nai Zakaria es napeni, hen tam neu Ume Knino ma notu fomeni. 1:10 To ok-oke sin nabuan anbi mone ma anonen toti fun tabu nane notu fua fomeni. 1:11 Oke te ahake Uisneno mese nalilon neu Nai Zakaria anhake bi baki fua fomeni aon bian ne'u. 1:12 Leka in nit ahake neno tunan nane in naskek ma in namtau nok. 1:13 Mes ahake neno tunan nane nakua a'an nak, "Kais mumtau Nai Zakaria, fun ho onen totis nane masimo nalali, ma ho fel bi Elisabet of nahonis ko an atoni mese ma of ho mukanab in Nai Yohanes. 1:14 Lof ho mumlil ma mumoek, ma atoni namfau of namlil amsa natuin nahonis anah nane. 1:15 Of in anfani atoni anaet bi Uisneno In matan ma of in ka ninu fa tua min kase ai tua amafut. Ma of nahenu nani neki Smanan Knino, na'ko in ainaf in apun; 1:16 ma of in hel to Israel namfau nali'ok anfani neman neu sin Uisneno. 1:17 Fun of in nao nahunun Uisneno neki Nai Elia in kuasat ma in matanin hen hel nafani amfini sin nekan neu anhenu. Ma antopu atoni amaufinut sin neu lanan amneot ma naloitan to atam ota neu Uisneno." 1:18 Nai Zakaria na'uab neu ahake nane nak, "Leka me au he uhin ak lasi nane of anbol neu kau? Au umnasien ma au fel amsa namnasien." 1:19 Ma ahake nane natae neu in nak, "Au Nai Gabriel kau le au hake piut bi Uisneno In human In es anlelu kau he u'uab ok ko ma he uton ko lasi alekot i. 1:20 Of ho mono ma ka mu'uab muhinef talan te neno lasi nane anbol, fun ho nekam ka nateb fa neu au a'ak le of natision nok amneot bi in neno lekat." 1:21 Onane te atoni namfaun le sin anpao Nai Zakaria, sin namkakan fun in lo le'uf bi Ume Knino. 1:22 Leka in anpoi nem, in ka na'uab fa nok sin, ma sin nahin nak in nit amnitas bi Ume Knino. In anlaleka neki ini niman neu sin fun in anmono nabala. 1:23 Leka in neno tuthaes namsopun in anfani neu in ume. 1:24 Namuni neno fauk onane in fel bi Elisabet na'apu, ma in natolo funan nim, fun in nak: 1:25 "Uisneno anmo'e lasi i neu kau, ma In anlomi he naiti naskotun au nek mae anbi to sin matan." 1:26 Leka bi Elisabet na'apu funan ne onane te Uisneno anlelu ahake neno tunan Nai Gabriel neu kuan es bi pah Galilea kanan Nazaret. 1:27 Nai Gabriel nem neu bifel ao temef mese le anmafut nekaf nok atoni mese kanan Nai Yusuf na'ko uf Nai Daud kanan bi Maria. 1:28 Ahake nane antam neu bi Maria in ume ma nak, "Mumlil nai, fun anhalin nalali ko, Uisneno nokan ko." 1:29 Bi Maria in na'unu neu a'at nane ma in antai bi nekan uab senut nane in laisne he sa' ka? 1:30 Ahake neno tunan nak neu in nak, "Kais mumtau Maria, fun ho mupeni halinat na'ko Uisneno. 1:31 Ho mes amtu' ma mu'apu fun of muhonis anmone mese ma of ho mukanab in mak Yesus. 1:32 Of In naek kun ma antek In Anmone Uisneno Amnanut Afinit. Ma Uisneno of anfe neu In toko, le In am uf Kesel Nai Daud ini. 1:33 Ma of In ansae Usif ma naplenat ume mnasi Nai Yakub talan te nabal-bal, ma In aplenat ka namsopu nitaf." 1:34 Bi Maria na'uab neu ahake neno tunan nane nak, "Lasi nane hen bol onme, natuin au fe ka uhin fa atoni." 1:35 Ahake neno tunan natae bi Maria nak, "Smanan Knino of ansanu nem neu ko; ma kuasat Uisneno Afin-finit of naneo ma namafo ko; anah le ho muhonis nane antek nani knino, Uisneno In Anmone. 1:36 Kiso mit Ho ini bi Elisabet in amsa na'apus anmone mese bi neno namnasi ma in na'apu funan ne, le afi antek in ankiu kun. 1:37 Fun neu Uisneno katit fa lasi le ka nok fa in matanin." 1:38 Bi Maria na'uab nak, "Uisneno In ate kau; mautu In a'an anbol neu kau natuin ho a'am nane." Nalali te ahake neno tunan in nao nasaitan bi Maria. 1:39 Neno fauk onane te bi Maria anfen ma nao neu pah neten kuan mese anbi pah Yehuda. 1:40 Bi nane in antam neu Nai Zakaria in ume ma anfe han seon neu bi Elisabet. 1:41 Ma leka bi Elisabet in nen bi Maria in han seon nane, li'ana an ok'lon anbi in apun, ma bi Elisabet nahenu nok Smanan Knino. 1:42 In anhunun nok hanan naek nak, "Ua alekot neu ko anbi ale bifenu ma ua alekot neu ho apum in fuan. 1:43 Au sekau kau ka, talan te au Usi in ainaf nem neu kau? 1:44 Leka ho han seon ante au lukek, liana bi au apuk anoklon nok amlilat. 1:45 Amtetus neu in, le nateb knino nak, Uisneno In a'an of nateabon neu in." 1:46 Bi Maria nak, "Au smanak nanaeb Uisneno, 1:47 ma au nekak namlil neu Uisneno, au Afetin, 1:48 fun In nit In ate nabaunon kun. Na'ko tomas i ale batan antek au amtetus. 1:49 Fun Uisneno Akuasat Afin-finit anmo'e lasi naek neu kau, ma In kanan lo knino kun. 1:50 In manekan na'ko batan tea batan neu atoni le namtausan In. 1:51 In nalile In matanin neki niman matua kuasat ma In nasitab ale atoni neka moko; 1:52 In nasanut ale Usif na'ko toko usif ma nasaeb a'baut sin; 1:53 In namsenab atoni amnahas neki lasi alekot, ma atoni amu'it sin In anlelu sin anfani luman; 1:54 In anfiti ma anbab to Israel, In tob, fun In namnau In manekan. 1:55 Onle In anba'an nalali neu hit babfini, neu Nai Abraham ma in sufan talan te nabal-bal." 1:56 Bi Maria namaika nok bi Elisabet oni funan tenu, nalali te in anfani neu in ume. 1:57 Bi Elisabet in leku in tabu ante he nahoni ma in nahonis an atoni mese. 1:58 Ma ale ume apaumakat ma in aonbian sin nen nak Uisneno nanaeb kun In manekan neu in, sin namlil nokan. 1:59 Fun neno fanu ante, sin neman hen heli liana ma nakanab in Nai Zakaria natuin in amaf kanan, 1:60 mes in ainaf natae sin nak, "Kahaf, mes takanab in Nai Yohanes." 1:61 Ma sin nak neu in nak, "Katif fa es anbi ho ini sin le in kanan on." 1:62 Ma sin anlekan neu in amaf ai anlomi he nakanab anah nane sekau. 1:63 Ma in antoti bena ninik ma in antui nak, "In kanan Nai Yohanes." Ma sin alsin namkak. 1:64 Naskek onane in fefan natfei ma in man natsefi oke te in na'uab ma anpules Uisneno. 1:65 Lasi amtaus nem neu in-ini sin funam natef ma lasi nane anfani uab ma molok bi ale pah neten Yudea. 1:66 Ma ale atoni le sin nen lasi nane sin natenab bi sin nekan nak, "Liana i of namuni anfani sa' ka?" Fun Uisneno In nukun lo nokan. 1:67 Ma in amaf Nai Zakaria, nahenu nok Smanan Knino ma in na'uab mat-mat nak, 1:68 "So anpules Uisneno, to Israel sin Uisneno, fun In nem nail In to ma he neki lasi fetis neu sin. 1:69 In nahakeb sun tetus aomina neu kit bi In ate Nai Daud in ume. 1:70 Onle In nakua nalali In a'an nakakoba neki In mafefa knino sin fefan 1:71 he nafetin kit na'ko ale hit musu ma na'ko ale atoni le na'un to'an neu kit sin niman, 1:72 He nalile In manekan neu hai nai enu ma namnau In fefba'an knino. 1:73 Supat le afi In ansup neu hit ama, mnasi Nai Abraham nak, 1:74 In nek ma namnau kit he nafetin kit, na'ko hit musu sin niman, 1:75 nok aknino ma amneot bi In human anbi hit monik nabelkon. 1:76 Ma ho Au anah ko, of antek ko nak mafefa Uisneno amnanut afinit; fun of hom nao muhunun Uisneno he muloitan In lalan, 1:77 hen fe neu In to lasi hine antom tetus, leka ansako nalali sin sanat. 1:78 Natuin hit Uisneno amnaut ma amanekat le In nail kit na'ko fafon, on manas pinan ansae nok-noka bi bale alatan; 1:79 hen tana abit mesokan sin ma atokos abit mafo maten He nanon hit haek neu lalan halan pah." 1:80 Liana nane nanae ma anmaspeti bi in monin. Ma in natua bi mnela paha snaen talan te neno in nem nalilon neu to Israel.
2:1 Bi neno nane Kesel Agustus napoitan plenat he nati' ale atoni bi ini Plenat Roma natam kanan neu sul so'it smanaf. 2:2 I so'it smanaf pal melu ai so'it ahun-hunut bi neno Nai Kirenius ansae kumlol bi pah Siria. 2:3 Onane te ale atoni es-esat anao neu in kuan mnasi he natam kanan bi sulat. 2:4 Nai Yusuf amsa ansae na'ko kot Nazaret pah Galilea nem neu pah Yudea, Nai Daud in kot le antek nak Betlehem, -- natuin in na'ko uf Nai Daud --. 2:5 He natam in kanan neu sulat nok bi Maria le in fe anmafut nekan nokan, ma in fe na'apu. 2:6 Leka sin ante Betlehem neno antelen bi Maria he nahoni, 2:7 ma in nahonis in Anmone ale'u ta'uf; oke te sin ana'mu neki tainusat ma natupab anbi ba'i fun sin ka napeni fa bale bi ume lalan. 2:8 Bi kuan nane anmu'i atuku bibi le natuku sini bibi bi mnesat nok fai. 2:9 Ahake Uisneno mese nalilon neu sin ma Uisneno In pinan neno antana sin ma sin namtau. 2:10 Mes ahake nane nak sin nak, "Kais mimtau au uton beno amlilat naek neu ki ma neu ale to ok-oke. 2:11 Neno i nahonis Kesel Afetin, Kristus hit Uisneno, anbi Nai Daud in kuan, 2:12 I taka neu ki, of hi mipeni liana nane matainusat ma natupab anbi ba'i." 2:13 Ma naskek sin nit ahake nane nok to meo neno tunan pukan mese sin ansi ma ampules Uisneno nak, 2:14 "Apinat neu Uisneno abit pano latan, ma halan nekaf bi pah pinan neu atoni le In anlomi nan." 2:15 Leka ahake neno tunan nao nasaitan sin ma anfani neu neno tunan, atukus sin na'uaben es nok es, "Aim het nao nai teu Betlehem het kiso tit sa' le anbol anbi nane onle Uisneno naton neu kit." 2:16 Sin nao lab-lab ma sin napeni bi Maria ma Nai Yusuf ma liana antup anbi mu'it aba'i. 2:17 Leka sin nit nalali te, sin anetun antom a'an le nakua nani neu sin antom Liana nane. 2:18 Ma alsin le sin nen, sin namkak antom lasi le atukus sin na'uab neu sin. 2:19 Mes bi Maria in napan ale lasi ma nahik nani bi in nekan nanan. 2:20 Ma atukus sin anfani fun anpules ma nanaeb Uisneno natuin ale lasi le sin nen ma nit nalali, namnes nok a'at le natkua nem neu sin. 2:21 Ma leka neno fanu namsopun onane hen hapi ma hen heli liana nane ma antek In kanan Yesus; kanaf le afi ahake neno tunan antek nani nahunu na'ko In ainaf na'apus. 2:22 Ma leka neno nuni namsopun, natuin plenat Nai Musa, sin neki In nao neu Yerusalem he natulu nani neu Uisneno, 2:23 onle matui anbi plenat Uisneno nak, "Ale an atoni le nahonis nahunun mes naknino nani neu Uisneno." 2:24 Ma hen fe fuat natuin a'an anbi plenat Uisneno, kol otos pasnes ai kol ot kase ana nua. 2:25 Anmu'i atoni mese bi Yerusalem kanan Nai Simeon. Atoni i amneot ma nek muti, le anpao lasi he nafetin to Israel. Smanan Knino natua anbi in nekan, 2:26 ma afi Smanan Knino naton nani nak: Of in kan mate fe nahun na'ko in nit Kristus Neno Anan Usif tunan ini. 2:27 In nem neu Ume Uisneno natuin mepu Smanan Knino. Leka Nai Yusuf nok bi Maria sin neki liana Nai Yesus antam, hen mo'e halat plenat antom In, 2:28 Nai Simeon ansimo liana nane ma nasnono nani fun anpules Uisneno nak, 2:29 "Tomas i Usi, mufetin Ho ate kau he nao nok halan nekaf, natuin Ho a'am, 2:30 fun au matak nit nalali Ho tetus, 2:31 le Ho muloitan bi ale uf-uf sin matan, 2:32 pina le hen tana ale uf-uf bian, ma anfani apinat neu Ho to Israel." 2:33 In amaf ma In ainaf sin namkakan neu ale a'at le na'uab nani antom In. 2:34 Oket Nai Simeon antek alekot neu sin ma na'uab neu bi Maria liana nane in ainaf nak, "Anah i Uisneno anlek nani he namofu ma he nafena atoni namfau bi to Israel ma anfani taka le he neki matoes. 2:35 Ma on suni le napau nbol ho nopam, he nati' amfaut sin lasi le natenab bi nekan nanan natonon." 2:36 Anbi nane anmu'i bife mese kanan bi Hana, Nai Fanuel in anfeto na'ko uf Aser. In amsa namnasin fin-fin. In mamoen nalali ma in moni nok in mone ton hitu, 2:37 nalali te in banu ma in uan ton bo' fanum ha. In ka nasaitan nitaf Ume Uisneno ma fai manas in lelnon ma anonen toti neu Uisneno. 2:38 Bi leku nane in amsa nem neu bale nane ma natulu nekan neu Uisneno ma na'uab antom anah nane neu ale atoni le anpao lasi he nafetin Yerusalem. 2:39 Leka ale lasi namsopun natuin plenat Usif tunan, sin anfani neu sin kuan, esle' kuan Nazaret pah Galilea. 2:40 Anah nane nanae ma anmaspeti nahenu nok lasi hine, ma halinat Uisneno nokan. 2:41 Bi ton-ton, Usif Yesus in amaf ma in ainaf anao neu Yerusalem anbi Neno Tolas Paskah. 2:42 Ma leka In uan ante ton bo'es am nua, sin nao neu Yerusalem anbi neno tolas nane onle antak nani. 2:43 Nasopu neon tolas onane, sin naon fanin; Usif Yesus nabalah anbi Yerusalem ma In amaf In ainaf ka nahinen fa. 2:44 Sin natenab nak In anbi atoni amfaut sin atnanan, natuin lalan le sin nao natuin. Sin nao neno mnanu mese onane, sin nami Usif Yesus bi sin aok biakenu. 2:45 Fun sin ka napeni fa In, sin nali'ok anfani neu Yerusalem he nami piut. 2:46 Neno tenu namuni onane te sin napeni In bi Ume Uisneno; In antok bi anoni sin atnanan ma In natnin ma In natan sin nok. 2:47 Ma ale atoni le sin amnen In, sin sanmak neu In hinen ma In lasi taes neu sin. 2:48 Ma leka In amaf ma In ainaf nit In te sin namkak. In ainaf nak neu In, "Anah, nansa' Ho mo'e kai onane? Ho ama ma au amsa, hai mami Ko nok nek a'unu." 2:49 In natae neu sin nak, "Nansa' hi mami Kau? Ai hi ka mihinef nak Au mes he bi Au Ama In Ume?" 2:50 Mes Nai Yusuf ma bi Maria sin ka nahin fa sa' le Usif Yesus na'uab neu sin. 2:51 Oket Usif Yesus anfani nok sin neu Nazaret; ma In moni nok sin fun natnin neu sin. Ma In ainaf napan ale lasi anbi in nekan nanan. 2:52 Ma Usif Yesus natbo ma nanae ma In hinen amsa ansaton ma Uisneno ma mansian anlomi nani.
3:1 Bi ton bo'es am nim le Kesel Nai Tiberius in aplenat, Nai Pontius Pilatus ansae kumlol bi pah Yudea, ma Nai Herodes usif bi pah Galilea, ma in olif Nai Pilipus usif bi Iturea, ma Trakhonitis ma Nai Lisanias usif anbi Abilene. 3:2 Fun Nai Hanas ma Nai Kayafas sin Ana' Lasi Fuat Nakaf, Uisneno a'an anpoi nem neu Nai Yohanes, Nai Zakaria in anmone anbi mnela hufui. 3:3 Nai Yohanes nem neu Noe Yordan bian am bian funam natef ma anhunun, "Mipis nai ma meki hi aom he naslani ki ma Uisneno of ansako hi sanat; 3:4 on antui anbi Sulat Knino, Mafefa Knino Nai Yesaya nak: Han ahunun bi mnela hufui: Miloitan lanan neu Uisneno, mimneoba lanan neu In. 3:5 Amnae ale nonof le naklopu ma minel mani ale nu'af ma tubu, ma mimneoba ale lanan apenut, amkek ma amili ale lan aklopu, 3:6 ma ale atoni of sin nit Uisneno In tetus." 3:7 Oket Nai Yohanes in na'uab neu to amfaut le anpoi nem, he in naslani sin nak, "Kaun laso alosib in sufan ki! Sekau es naton ki nak he maen mi'ko to'as Uisneno le he nem neu ki? 3:8 Mipoitan nai mo'et alekot le natai nok lasi apisat. Ma kais hi mitenab bi hi nekam mak: Hai Ama es Nai Abraham! Fun au uton ki ak: Uisneno nabe'i anmo'e sufan neu Nai Abraham na'ko fatu-fatu i! 3:9 Fani nabelon bi ale hau ini ba'an ma ale hau le ka nafuaf fuan alekot, of ano'te nisan ma anpolin natam anbi ai." 3:10 To mfaun nane sin natan neu in nak, "Kalu onane hai he mo'e sa'ka?" 3:11 Nai Yohanes natae sin nak, "Sekau anmui sobalu nua, in anbati neu atoni le kan mu'if, ma sekau anmu'i amnahat anmo'e onane amsa." 3:12 Asimo noni poni sinit neman he naslani sin ma sin natan Nai Yohanes nak, "Kulu, hai he mo'e sa' ka?" In natae sin nak, 3:13 "Kais him toti nesi na'ko le anlek nain ki." 3:14 Fun solalus sin amsa natan neu in nak, "Ma hai amsa he mo'e sa' ka?" Nai Yohanes natae sin nak, "Kais miseke es ma kais misik es in sa' ma minokbom meki hi noni funan." 3:15 Fun to mfaun nane sin anpao ma nafnekan, ma natenab bi sin nekan antom Nai Yohanes, oni in Neno Anan, kun ka? 3:16 Nai Yohanes natae neu sin alsin nak, "Au uslani eki oe, mes In le anmu'i kuasat nesin kau of nem ma au ka tamaf ota he sefi In tani penhae. Of In naslani ki neki Smanan Knino ma ai. 3:17 Tupa es In niman he nakmeu In bale teli ane ma he nabua In ane bi In lopo, mes aen ta'u of notu nani anbi ai le kamasifo fa." 3:18 Nai Yohanes anetun lasi knino neu to ma neki fainekat bian amsa. 3:19 Mes leka In anfainek Nai Herodes usif pah Galilea antom bi Herodias in olif in fel, ma antom mo'et amle'ut bian le Nai Herodes anmo'e nalali sin, 3:20 usif nane anlolu in mo'et amle'ut ma natam Nai Yohanes anbi o'of. 3:21 Leka naslani nalali ale atoni, ma Usif Yesus amsa naslani nani ma In fe anonen toti, neno tunan natfai, 3:22 ma Smanan Knino ansanu nem neu In namasbon on kol otos. Ma hanaf nem na'ko neno tunan nak, "Ho Au Anmone le Au nek ani, fun Au lomi Ko." 3:23 Bi neno leka Usif Yesus In na'uba In mepu, In uan oni ton bo'tenu fun sin natenab nak: In Nai Yusuf anah, Nai Elia anah, 3:24 Nai Matat anah, Nai Lewi anah, Nai Malkhi anah, Nai Yanai anah, Nai Yusuf anah, 3:25 Nai Matica anah, Nai Amos anah, Nai Nahum anah, Nai Hesli anah, Nai Nagai anah, 3:26 Nai Maat anah, Nai Matica anah, Nai Simei anah, Nai Yosekh anah, Nai Yoda anah, 3:27 Nai Yohanan anah, Nai Resa anah, Nai Zerubabel anah, Nai Sealtiel anah, Nai Neri anah, 3:28 Nai Malkhi anah, Nai Adi anah, Nai Kosam anah, Nai Elmadam anah, Nai Er anah, 3:29 Nai Yesua anah, Nai Elieser anah, Nai Yorim anah, Nai Matat anah, Nai Lewi anah, 3:30 Nai Simeon anah, Nai Yehuda anah, Nai Yusuf anah, Nai Yonam anah, Nai Elyakim anah, 3:31 Nai Melea anah, Nai Mina anah, Nai Matata anah, Nai Daud anah, 3:32 Nai Isai anah, Nai Obed anah, Nai Boas anah, Nai Salmon anah, Nai Nahason anah, 3:33 Nai Aminadab anah, Nai Admin anah, Nai Arni anah, Nai Hezron anah, Nai Peres anah, Nai Yehuda anah, 3:34 Nai Yakub anah, Nai Ishak anah, Nai Abraham anah, Nai Terah anah, Nai Nahor anah, 3:35 Nai Serug anah, Nai Rehu anah, Nai Peleg anah, Nai Eber anah, Nai Salmon anah, 3:36 Nai Kenan anah, Nai Arpakhsad anah, Nai Sem anah, Nai Nuh anah, Nai Lamekh anah, 3:37 Nai Metusalah anah, Nai Henokh anah, Nai Yared anah, Nai Mahalaleel anah, Nai Kenan anah, 3:38 Nai Enos anah, Nai Set anah, Nai Adam anah, Uisneno anah.
4:1 Usif Yesus, le nahenu nok Smanan Knino, anfani nem na'ko Noe Yordan, ma Smanan Knino anhel neki neu mnela hufui. 4:2 In namaika anbi nane neno bo' ha ma Nitu ansu' nani. In kan bukae nit fa sa' es bi neno-neno le nane ma leka neno namsopun onane te In namnah. 4:3 Nitu nak neu In nak, "Kalu Ho Uisneno In anah Ko, Ho mak fatu i hen fani utunu'." 4:4 Usif Yesus natae neu in nak: "Mansian anmoni ka al fa nok utunu' anmes." 4:5 Nitu neki Usif Yesus neu tubu mese ma onle tasmela matak, Nitu nalile neu Usif Yesus ale plenat pah pinan. 4:6 Nitu nak neu In: "Of au fe Ko ale kuasat nok apinat fun ale sa' nane nana'at nalali neu kau ma au fe neu sekau le au lomi. 4:7 Kalu Ho mofhae meu kau, Hom pal kum ale i ok-oke." 4:8 Nai Yesus natae in nak: "Antui nalali nak: Ho es mofhae neu Uisneno, ma amonen neu In anmes!" 4:9 Namuni te in neki Usif Yesus neu Yerusalem ma nahakeb nan In bi Ume Uisneno penen, oket nak neu In, "Kalu Ho Uisneno Anmone Ko, mumofut Ho aom mu'ko i, 4:10 fun antui nani nak: Of anlelu In ahake neno tunan neu Ko, hen pao Ko, 4:11 ma of sin nat-nat Ko bi sin niman he nati' Ho haem kais antom neu fatu." 4:12 Usif Yesus natae neu in nak, "A'an nabel'on nak: Kais hom su' ho Uisneno!" 4:13 Nitu nasopu ale in lasi su'at, in naskot na'ko Usif Yesus ma anpao leku le'at. 4:14 Anbi kuasat Smanan Knino Usif Yesus anfani neu Galilea. Ma In kanan nasitbon bi pah nane funam natef. 4:15 In nanoina sin anbi sin ume buat ma sin alsin naliatas In kanan. 4:16 Ma Usif Yesus nem neu Nazaret bale le In nanae anbine, ma natuin In antak nalali bi Neno Snasat antam neu ume buat, ma In anfen hen soi Sulat Knino. 4:17 Ma anfe neu In Mafefa Knino Nai Yesaya in sulat ma In anfei sulat ma In napeni lasi le matui nak, 4:18 "Uisneno Smanan anbi Kau, natuin In anop nalali min fomeni neu Kau, he etun beno alekot neu amamu'it sin. Ma In ansonu Kau, 4:19 he kakan lasi fetis neu atoni mafutu sin, ma etun lasi mnitas neu afolot sin, he ufetin ale atoni le anbi hamu'it, he uton leku Usif tunan le ankoenon nemen." 4:20 Usif Yesus anunu nafani sulat nane ma anfe nafani neu ameput, oket In antok. Ale atoni abit ume buat nane sin matkenu nake' neu In. 4:21 Oket In nanoina sin nak, "Neno i tuis i natiabon bi hi lukem." 4:22 Ma sin alsin antebes ma namkakan antom a'at ma uab le anpoi na'ko In fefan ma sin nak, "Ai i ka Nai Yusuf in anmone ka?" 4:23 Oket Usif Yesus nak neu sin, "Of hi miton Kau leta i mak, Mnane, muleko kum ho aom! Ho moe nai amsa bi Ho kuan ale lasi le haim nen nak Ho moe mani anbi Kapernaum!" 4:24 In nak anteni neu sin, "Au eut ki namneo, katit fa Mafefa knino le ansium nani anbi in kuan. 4:25 Au u'umo neu ki, ma Au a'at nane namneo. Bi batan Nai Elia anmu'i bife banu namfau bi Israel. Afi neno tunan anekon ton tenu ma funan ne, leka amnahas naek bi pah nane. 4:26 Ma kan sonu fa Nai Elia neu bife mese na'ko sin, mes neu bife banu mese anbi kuan Sarfat pah Sidon. 4:27 Bi batan Mafefa Knino Nai Elisa anmu'i atoni men poko namfau bi Israel mes katit fa es na'ko sin he naleok al Nai Naaman, atoni Siria nane." 4:28 Leka sin nen lasi onane sin alsin abit ume buat nane nato'an. 4:29 Sin anfen, ma antite napoitan Usif Yesus neu kuan kotin ma neki neu tubu tunan le nahakeb kuan nane anbin, hen polin nasanut In na'ko panaf ninen. 4:30 Mes Usif Yesus anpoi natuin sin atnankenu ma nao kun. 4:31 Nalali te Usif Yesus nao neu Kapernaum, kot es anbi pah Galilea, ma In nanoina sin bi Neno Snasat. 4:32 Sin nekan namnekun neu In noina, fun In a'an nahenu nok kuasat. 4:33 Anbi ume buat nane anmu'i atoni mese le niut sae ma in an'anbai nok hanan naek, 4:34 "Hoi Yesus atoni Nazaret, ai Ho mu'i lasi sa' mok kai ka? Ho aum he mule'un kai ka? Au uhin Ko, Ho sekau Ko: Le'u Knino mu'ko Uisneno." 4:35 Usif Yesus ankas in ma nak, "Mutena, ampoi nai mu'ko in!" Ma nitu nane antepon atoni nane neu atoni mfaun sin atnanan, oket in anpoi ma ka namenab fa atoni nane. 4:36 Sin namkak nain oke, ma anmau'aben es nok es nak, "A'at i matain le'uf, nok In kuasat ma In matanen In naplenat ale kuasat nitu ma sin anpoi." 4:37 Ma beno antom In anpoi funam natef bale-bale. 4:38 Usif Yesus nao nasaitan ume buat nane ma nao neu Nai Simon in ume. Nai Simon in baif anmainin naek ma sin antoti Usif Yesus hen tulun nan. 4:39 Usif Yesus anhake bi bife nane aon bian, ma anli'u maininit nane, ma menas nane anpoi. Bife nane anfen oket nabiku sin. 4:40 Manas anmof ai antes onane te atoni namfau sin neki neu Usif Yesus ale atoni amenat le anmu'i menas huma-huma. In anpoh sin mes-mese neki In niman ma naleko' sin. 4:41 Nitu anpoi na'ko ale amenat sin ma an'anbai nak, "Ho Uisneno Anmone Ko." In tal sin matani ma ka nabe'i sin na'uab fun sin nahin nak In Neno Anan kun. 4:42 Neno nok-noka onane te Usif Yesus anpoi na'ko kot nane ma nao neu bale teta es. Ma atoni namfau sin nami In oket nae'ku nokan ma sin natau In he kais nao nasaitan sin. 4:43 Mes In nak neu sin, "Bi kuan-kuan bian amsa, Au mes he etun Plenat Uisneno, fun ansonu Kau neu lasi i." 4:44 Ma In anetun Lasi Knino bi ume-ume buat pah Yudea.
5:1 Anbi neno mese onane leka Usif Yesus anhake bi Nifu Genesaret ninen, to namfau nem antol nan In he nen a'an Uisneno. 5:2 In nit belo' nua bi nifu ninen. Atifkai ika sin ansanu na'ko belo' ma anfase sin tifkai. 5:3 In antam bi belo' esle' Nai Simon ini ma anlelu hen tite naskotun kle'o na'ko tasi ninen. Ma In antok bi belo' tunan ma In nanoni to namfau. 5:4 Leka In nasopu molok te, In nak neu Nai Simon, "Tite mutam belo' neu oe amnanut ma musanut ho kifkai hem hek ika." 5:5 Nai Simon natae nak, "Anoni, fai mnanu es haim hae mate mes hai kam hek man fa sa' es! Mes natuin Ho es amlelu of au usanut tifkai." 5:6 Leka sin anmo'e natuin, sin anhek nan ika pukan naek es ma tifkai natpisu. 5:7 Ma sin an aunapen sin biakenu bi belo' es he nem anbab sin. Ma sin neman oket sin natua sin belo' nua sin neki ika, ala kle'o anlem. 5:8 Leka Nai Simon Petrus in nit lasi onane in anmof li'tu bi Yesus matan ma nak, "Uisneno, kais ampaumak kau fun au atoni asanat kau." 5:9 Nai Simon ma ale atoni le sin nok In namkakan natuin sin hek ika namfau. 5:10 Onane amsa Nai Yakobus ma Nai Yohanes, Nai Zebedeus in anmone sin le anmase'u nok Nai Simon. Usif Yesus na'uab neu Nai Simon nak, "Kais mumtau, na'ko tomas i of hom kifkai mansian." 5:11 Ma sin anhel belo' sin neu tasi ninen oke te sin nasaitan ale sa' ma natuin Usif Yesus. 5:12 Bi neno es Usif Yesus anbi kuan es. Bi kuan nane anmu'i atoni mese napeni men poko. Leka in nit Usif Yesus, in anmof li'tu ma antoti In nak, "Usi, kalu Hom lomi, Ho muleko' kau." 5:13 Usif Yesus nenu In niman, ma anpoho atoni nane ma nak, "Au lomi, ho muleko' nai." Bi leku nane amsa in men poko nane namneku. 5:14 Usif Yesus anba'an atoni nane he kais anetun es ma In nak, "Hom nao nai, mulile ho aom neu ana' lasi fuat ma meki fuat natuin ho muleko', on afi Nai Musa anlek nani, on saksi neu sin." 5:15 Beno neu Usif Yesus nasitbon piut ma to namfau ansai nem neu In he nen In a'an ma he naleko' sin na'ko sin menas. 5:16 Mes In naskotun sin ma nao neu bale teta ma anonen toti. 5:17 Ante neno mese leka Usif Yesus fe nanoni, anmu'i atoni Farisi ma ahin Sulat sin fauk antok he natnin In. Sin neman na'ko ale kuan-kuan bi pah Galilea ma Yudea ma na'ko Yerusalem. Kuasat Uisneno tunan nok In he naleko' atoni amenat. 5:18 Ma atoni fauk sin neman ma anloi atoni men ole bi in hala tupa, ma sin nami he neki antam fun nabela bi Usif Yesus human. 5:19 Fun sin ka napeni fa lanan he neki amenat nane antam, fun atoni namfau anbi nane, sin ansae neu ume penen, anpukai nani ma nasanut atoni nane nok in hala bi to mfaun sin atnanan bi Usif Yesus In matan. 5:20 Leka Usif Yesus nit sin nek palsait, In nak, "Bae, ho sanat masako nalali." 5:21 Ma ahin sulat ma Farisi sin natenab bi sin nekan, "Atoni i sekau kun ka, in na'uab nale'un Uisneno In kanan? Sekau nabe'i ansako sanat so Uisneno In meskun ai ka?" 5:22 Ma Usif Yesus In nahin sin natenab sa', ma In na'uab neu sin nak, "Hi mitenab sa' anbi hi nekam? 5:23 Sa' es anmakaf nesi kalu hit ta'uab: Ansako ho sanat, ai so tak: Hom fen nai ma amnao nai! 5:24 He nati hi mihin, bi pah pinan i Anmone Pah To anmu'i kuasat hen sako sanat." In na'uab neu atoni men ole nane, "Au ak ko, hom fen nai maiti ho hala tupa, ma hom nao meu ho ume!" 5:25 Ma leku nane amsa in anfen bi sin matan, in naiti hala tupa ma anfani neu in ume, fun anpules Uisneno. 5:26 Ma ale atoni nane sin nekan namnekun ma naliatas Uisneno, ma sin namtaun fun sin na'uab nak, "Neno i hai mit lasi le namkakab nis kai." 5:27 Namuni Usif Yesus anpoi, In nit atoni asimo noni poni mese kanan Nai Lewi le antok bi ume noni poni. Yesus na'uab neu in nak, "Mutuin Kau nai!" 5:28 Ma Nai Lewi anfen oket nasaitan ale sa'-sa' ma natuin In. 5:29 Ma Nai Lewi anmo'e tolas naek neu Yesus bi In ume ma asium noni poni namfau ma atoni bian amsa nem antol nabua nok Yesus bi mei. 5:30 Atoni Farisi sin ma ale ahin Sulat sin na'munu neu Yesus in asium lasi sin nak, "Nansa hi miah ma minu mibua mok atoni asimo noni poni ma atoni asanat?" 5:31 Usif Yesus natae sin nak, "Atoni aomina kan palufa mnane, so atoni amenat; 5:32 Au ka aum fa he boin atoni amneot, mes asanat, neu he nate'un sin nekan." 5:33 Atoni Farisi sin nak anteni neu Usif Yesus, "Nai Yohanes in asium lasi sin nalenok piut ma anonen toti, onane amsa atoni Farisi sin ini, mes Ho ini sin nah ma ninu." 5:34 Usif Yesus natae sin nak, "Nabe'i atoni amafe fe'u in-ini sin nalenok leka atoni fe'u nane fe nabua nok sin? 5:35 Mes leka in neno ante, of naiti atoni fe'u nane na'ko sin, bi neno nane of sin nalenok." 5:36 In nak neu sin amsa lasi leta' mese, "Katit fa es, hen pisu muti pisa mese na'ko sobalu fe'u hen lape neu sobalu mna'. Of onane, le fe'u natpisu amsa ma le mna' nane kan matomaf nok pisa' le anpisu na'ko fe'u nane. 5:37 Onane amsa katit fa es in an op tua min kase fe'u bi alu pasu amna' oni kahat tua min fe'u nane anpisu ale pasu ma tua mina nane nat'op ma alu pasu nane namle'u. 5:38 Mes tua min kase fe'u mes antao nani bi pasu fe'u. 5:39 Ma katit fa esle' in ninu tua min kase mna' anlomi he ninu tua min kase fe'u, fun of in nak, 'Tua mna' nane leko le'uf kun.' "
6:1 Fun ante Neno Snasat mese, Usif Yesus nao natuin lene ane kase, ma In asium lasi sin anhetu ane kase punen. Ma anu'sa neki nimkenu ma sin nekun. 6:2 Mes atoni Farisi sin nak, "Nansa' hi mo'e lasi le ka nabe'i amoe mani nok Neno Snasat ka?" 6:3 Oket Usif Yesus natae sin nak, "Ai hi kam soi fa sulat, le Nai Daud anmo'e, leka in ma in atoin enu namnahan, 6:4 le in antam neu Ume Uisneno ma in naiti utunu' atnatas ma in nah ma anfe nani neu in atoin amnoktenu. Le ka nabe'i sin nahan so mak ana' lasi fuat?" 6:5 Usif Yesus nak anteni sin, "Anmone Pah To, Usif neu Neno Snasat." 6:6 Ante Neno Snasat bian, Yesus antam bi ume buat ma nanoina. Bi nane anmu'i atoni mese le in niman ne'u anmate. 6:7 Ahin sulat sin ma atoni Farisi sin natnu Yesus, kalu In he naleko' atoni bi Neno Sansat, nati' sin napeni he nasanab In. 6:8 Mes Yesus nahin sin nek tenab nane, ma In nak neu atoni nima maten nak: "Hom fen nai ma amhake bi atnanan!" Atoni nane anfen ma anhake. 6:9 Yesus nak neu sin, "Au utan ki: Nabe'i bi Neno Snasat, atmoe alekot ai atmoe amle'ut ka? Tamonib atoni ka ai tamate atoni?" 6:10 Ma In ankiso sin funam natef, ma na'uab neu atoni amenat nane, "Menu ho niman nai!" Atoni nane in anmo'e onane ma in niman naleko' kun. 6:11 Ahin sulat sin ma atoni Farisi sin nato'an anaek ma sin na'uaben es nok es hen mo'e sa' neu Yesus ka? 6:12 Anbi neno nane Usif Yesus nao neu nu'af hen onen toti ma In anonen fai mnanu mese neu Uisneno. 6:13 Leka nok-noka In no'en In asimo lasi sin nem neu In, ma anbeti na'ko sin bo'es am nua le In antek sin nak amnek lasi: 6:14 Simon, le nakanab in Petrus amsa, ma Andreas Nai Simon in olif, Yakobus ma Yohanes, Filipus ma Bartolomeus, 6:15 Matius ma tomas, Nai Alfeus anmone, ma Simon le antek in atoni Zelot, 6:16 Yudas Nai Yakobus anmone, ma Yudas atoni kuan Kariot le namuni anfani a'aneb. 6:17 Ma Yesus ansanu nok sin nalali anhake bi mnela es, bi nane In asimo lasi sin namfau nabuan ma atoni amfaut bian neman na'ko Yudea ma Yerusalem ma tasi ninen pah Tirus ma Sidon. 6:18 Sin neman he nen In ma he naleko' sin na'ko sin menas; fun naleko' nani ale aniut sae sin amsa. 6:19 Ma atoni namfau sin nami hen poe Yesus, fun anmu'i kuasat le anpoi na'ko In ma In naleko' sin alsin. 6:20 Yesus ankiso In asimo lasi sin ma nak, "Alekot, hi amamu'it, fun plenat Uisneno hi ini kim. 6:21 Alekot, hi le mimnah ambi neot i, fun of namsenab ki. Alekot, hi le amkae ambi neot i, fun of hi mani. 6:22 Alekot, hi le mituin Anmone Pah To, atoni na'akan ki, ma sin anli'u napoitan ki, ma nasiu ki ma antite hi kanam on lasi amle'ut. 6:23 Mimlil nai bi neno nane ma amokaleti nai, fun hi baene naek bi neno tunan; fun afi sin amfini anmo'e onane amsa neu mafefa knino sin. 6:24 Mes amle'ut neu ki atoni amu'it, fun hi mipeni milali hi amlilat. 6:25 Amle'ut neu ki le hi mimsen ambi neot i, fun of hi mimnah. Amle'ut neu ki le hi mani ambi neot i, fun of him kul ma amkae. 6:26 Amle'ut neu ki leka ale atoni anpules ki; fun afi sin amfini anmo'e lasi nane neu mafefa moel sin." 6:27 "Mes Au ak neu ki le him nen Kau, amnek hi musu nai, mo'e alekot neu atoni le nato'an ki. 6:28 Mi'uab alekot neu atoni le ansukat ki; onen toti neu atoni le na'akan ki. 6:29 Atoni le anpas ho su'im bian, amtulu su'im bian anten. Ma atoni le naiti ho sobalu kotif, kais mutau he in naiti ho sobalu nanaf amsa. 6:30 Fe nai, neu sekau le antoti ko, ma naik ai kais amtoti mufani in le in naiti ho sa'an. 6:31 Ma onle him lomi he atoni anmo'e sa' neu ki, onane amsa hi mo'e mani neu sin. 6:32 Ma kalu him nek atoni le sin nek ki, alekot sa' neu ki ka? Fun atoni asanat sin amsa nek atoni le nek sin. 6:33 Fun kalu hi mo'e alekot neu atoni le anmo'e alekot neu ki, alekot sa' neu ki ka? Atoni asanat amsa sin anmo'e onane. 6:34 Ma kalu him fe mlapat sin sa'es, le mifneka hem simo mifani sa' na'ko in, hi mipeni halinat sa'? Asanat sin amsa anfe nlapat neu asanat, he nati' sin simo nafani papmese. 6:35 Mes hi, amnek hi musu nai, ma mo'e alekot ma amfe mlapat ma kais mifneka seunbanit; fun hi baen nane naek ma of him fani anah-anah Uisneno Amnanut. Fun Uisneno namnau ale atoni le kan tek nahin fa lasi alekot ma atoni apenut sin. 6:36 So hi mu'i manekat, onle hi Ama amsa' anmu'i manekat." 6:37 "Kais him lefi lasi, of onane es kan lefi lasi neu ki. Ma kais hi mifek lasi, of onane es ka nafek fa hi lasi; so him sako ma hi amsa of masako. 6:38 Fe nai ma of onane anfe ki; su'at alekot, le manene ma anheko nani ma nat'op of nahoeb nani neu hi aifam. Fun him su' meki su'at sa', of ansu' ki nekin." 6:39 Usif Yesus na'uab anteni neu sin lasi leta mese nak, "Nabe'i ka atoni matfolo antopu atoni matfolo? Kalu kahat nua sin anmofun bi bola. 6:40 Asimo lasi ka nesin fa in kulu, mes sekau le nasopu in lasi noina of namnes nok in kulu. 6:41 Nansa' ho mit hau lapu', bi ho bia' in matan, ma hau kbat bi ho matam kum ho ka mit mani fa ka? 6:42 Leka me ho mube'i mak ho bae: Bae, maut fe he upoitan hau lapu' bi ho matam, ma ho ka mit fa hau kbat bi ho matam? Atoni asafanut, mupoitan hau kbat bi ho matam fe, he ho mit nok alekot ma mupoitan hau lapu' nane na'ko ho bae in matan." 6:43 "Fun hau alekot ka nafuan fa fuan amle'ut, ma hau amle'ut ka nafuan fa fuan alekot. 6:44 Fun ale hau, mahine bi in fuan. Fun hit kat seu fa bubuk fuan na'ko kisan ma tanu'an sena fuan na'ko kasunat. 6:45 Atoni alekot napoitan lasi alekot na'ko nekan nanan alekot ma atoni amle'ut napoitan lasi amle'ut na'ko nekan amle'ut. Fun in uab anpoi na'ko in nekan." 6:46 "Nansa' him tek Kau mak: Usi, Usi, ma hi ka mo'e fa sa' le Au u'uab neu ki ka? 6:47 Sekau le in nem neu Kau ma in amnen Au a'ak ma anmo'e natuin -- of Au ulile ki, in onle sekau --, 6:48 in onle atoni le he nahakeb ume: Atoni nane in anhani namnanu nalali te in ansuki nani bi fatu. Ul sako ansanu ma noe sako ansae antom ume le nane ma ume nane ka nabeko fa, fun nahakeb nani matani. 6:49 Mes neu sekau le in nen nalali Au a'ak ma ka natuin nani fa, in onle atoni le nahakeb ume anbi naijan ka nok fa sukin. Leka noe sako antom nani te, ume nane natsel ma namle'u naek."
7:1 Fun Yesus natis nalali In a'an neu to mfaun, oket In antam neu kuan Kapernaum. 7:2 Bi nane to meo nakaf mese in anmu'i ate mese le in nek nani. Ate nane namen mafena nak hen mate. 7:3 Ma leka nakaf nane in nen uab antom Yesus, in anlelu amnasit atoni Yahudi sin fauk neu Yesus ma antoti, he In nem ma naleko' in ate. 7:4 Sin nem ante Yesus sin antoti In nok nek atebes nak, "In antam ota he Ho mo'e mani neu in, 7:5 fun in nek hit to ma in es nahakeb ume buat neu kai." 7:6 Ma Yesus nao nok sin. Leka In ka nalo' fa to meo nakaf in ume nane, to meo nakaf ansonu in aon bian sin he nak neu In, "Usi, kais muhaebom, fun au ka tam fa ota he simo Ko bi au ume; 7:7 es nane au amsa, utenab, au ka tamaf ota he ue'ku nok Ko. Mes mu'uab nai fefa mese, of au ate in naleko'. 7:8 Fun au amsa atoni asutai kuasat, ma anmu'i to meo ansutai au plenat. Kalu au plenat es ak: Hom nao nai!, ma in nao, ma neu es anteni: Aum fa nai!, ma in nem, ma au ak au ate: Mepu i nai!, ma in anmepu." 7:9 Ma leka Yesus nen uab nane, In namkak ma In naklelon neu to mfaun le natuin In, ma nak, "Au ak ki, nek ateb knino humaf i Au ka upeni fa, anbi to Israel!" 7:10 Ma atoni le ansonu sin nane anfani neu ume sin napeni ate nane naleko kun. 7:11 Namuni te Yesus nao neu kuan es kanan Nain. Ma In asium lasi nao nokan ma to pukan naek nok In. 7:12 Ma leka In nem anhaumak kot in eno, anloi atoin amates mese anpoi, an atoni fua mese na'ko in ainaf le bife banu kun, ma atoni namfau na'ko kot nane sin nok bife banu nane. 7:13 Ma leka Usif Yesus nit bife banu nane, In nekan namnau nis in ma nak, "Kais hom kae!" 7:14 In fonat nu anpaumak ma anpoho hau loi ma aloit sin hake; In nak, "Atoni munif, Au ak ko, hom fen nai!" 7:15 Ma atoni amates nane anfen ma antok ma na'uab, oket Yesus nana'at in neu ainaf. 7:16 To mfaun le nane sin namtau ma sin nanaeb Uisneno ma nak, "Mafefa knino naek mese anbol bi hit atnanak" ma "Uisneno nail kun In to." 7:17 Ma beno antom Yesus anpoi bi ale pah Yudea ma bi ale pah funam natef. 7:18 Leka Nai Yohanes napeni hanaf antom ale lasi nane na'ko in asium lasi sin, 7:19 in no'en asium lasi nua ma anlelu sin nao neu Usif Yesus ma nak, "Ati Ho es he aum ka ai hai hem pau meu es anteni ka?" 7:20 Leka sin nua sin nem ante Yesus, sin nak, "Nai Yohanes Aslanit anlelu kai hem toti Ko mak, Ho es of amnemat nane ai hai hem pao atoni bian ka?" 7:21 Bi tabu nane Yesus naleko' atoni namfau na'ko ale menas ma na'ko ale niut sae sin, ma In anfe mnitas neu ale atoni afolot namfau. 7:22 Ma Yesus natae sin nak, "Him nao nai, ma miton neu Nai Yohanes sa' le hi mit ma him nen milali: Atoni afolot nit anfani, atoni hae ole in nao, men poko sin nakninon, atoni atoni sin nen, nafena nafani atoni amates ma anetun lasi alekot neu amamu'it sin. 7:23 Ma ua alekot neu atoni le nekan ka na'unu fa ma antite Kau." 7:24 Leka Nai Yohanes in haefenu sin nao, Yesus namolok neu to mfaun nane antom Nai Yohanes nak, "Him nao meu mnela hufui hem kiso sa' ka? Atfob le anin anfu noebanin ka? 7:25 Ai him nao hem kiso sa' ka? Kiso atoni le anpake amasat ka? Atoni le anpaek alimat ma anmoni nok aminat namaika anbi sonaf. 7:26 Mes him nao neu sa' ka? Kiso Mafefa knino ka? Namneo, Au ak ki, nesin na'ko Mafefa knino. 7:27 Fun antom Nai Yohanes antui nani nak: Kiso, Au sonu Au haef nahunun Ko, in of naloitan Ho lalan bi Ho matam. 7:28 Au uton neu ki: Anbi sin le nahonis sin na'ko bife katit fa esle' naek nesin Nai Yohanes, mes atoni abaut afinit bi plenat Uisneno naek nesin in kun." 7:29 Ale to le sin nen nalali In a'an, ma ale asimo noni poni, sin tebes Uisneno In amneot, fun Nai Yohanes naslani nalali sin. 7:30 Mes atoni Farisi sin ma ahinet plenat knino sin antite Uisneno In lekat neu sin aon, fun sin kan lomif he Nai Yohanes naslani sin. 7:31 Usif Yesus nak, "Au he uleta atoni bat muni i eki sa' ma sin onle sa'an ka? 7:32 Sin maleta on liana-liana le antok anbi masa' ma anmaboinen es nok es nak: Haim fu feku neu ki, mes hi ka mibso fa, haim si kulut, mes hi kam kae fa. 7:33 Fun Nai Yohanes Aslanit nem, ka nah fa utunu' ma ka ninu fa tua mina amtasa ma hi mak: In niut sae. 7:34 Namuni Anmone Pah To nem, In nah ma ninu, ma hi mak: Kiso, In atoni apalu ma amninut, masoba nok asimo noni poni ma atoni asanat sin. 7:35 Mes lasi hine neno tunan namneob nani natuin ale atoni le ansimo nani." 7:36 Atoni Farisi mese anhone Yesus he nati' anbukae anbi in ume. Yesus nem neu atoni Farisi nane in ume ma antoko hen bukae. 7:37 Bi kuan nane anmu'i bife mese lo mahine on bife asanat. Leka bife nane in nen nak Yesus anbukae bi atoni Farisi in ume, nalali te in nem neki min fomeni botil mese. 7:38 Le in ankae ma nao anhake anbi Yesus In kotin antot In haen nane oket napet Yesus haen neki in matnu ma nose nameto neki in nakan funun. Nalali te in nek Yesus haen ma nose neki min fomeni nane. 7:39 Mes leka atoni Farisi le anhone Yesus nit lasi nane, in natenab bi in nekan nak, "Kalu In Mafefa knino, of In nahin, sekau ka, ma bife sa' ka le anpoh In; of In nahin nak bife nane asanat kun." 7:40 Oket Yesus na'uab neu in nak, "Simon, anmu'i sa' es le Au he uton neu ko." Nai Simon natae, "Mukua a'am Ama Anoni." 7:41 "Anmu'i atoni atusat nua le natus neu atoni abait noni. Le es natus noni dinar natun nim, in bian nane bo'nim. 7:42 Fun sin kan mu'in fa sa' hen baen, in nose atoni nua in nane sin tusa. Sekau bi sin nua sin le namnau nesin noni tuaf nane?" 7:43 Nai Simon nak, "Au utenab ak, in le anose in tusa naek." Yesus nak neu in, "Ho tenab nane namneo." 7:44 Ma In nik neu bife nane ma In na'uab neu Nai Simon nak, "Ho mit bife i ka? Au tam eu ho ume, mes ho kam fe Kau fa oe he Au boe Au haek. Mes bife i napet Au haek neki in matnu ma nose nameto neki in nakfunu. 7:45 Ho kam nek Kau fa, mes na'ko Au tam om, bife i ka nas-nas nitaf anek Au haek. 7:46 Ho kam nosef mina neu Au nakak, mes in nose min fomeni neu Au haek. 7:47 Es nane Au ak ko: Ansako nalali in sanat namfau fun in nalile manekan naek. Mes atoni le in sanat masako an-ana, in nalile manekat an-ana amsa." 7:48 Oke te in nak neu bife nane, "Ho sanat masako nalali." 7:49 Ma alsin le antokon bukae nokan, sin natenab bi sin nekan, "In sekau kun ka es In ansako sanat?" 7:50 Mes Yesus na'uab neu bife nane nak, "Ho nekam ateb knino nane nahoin ko. Hom nao mok tetus!"
8:1 Ma kalob fa onane te Yesus nao fun ma natef kot-kot ma na'ko kuan es neu kuan es fun anetun beno knino plenat Uisneno. In asimo lasi bo'es am nua sin nok In', 8:2 ma bife bian amsa, le naleko' sin na'ko niut sae ma menas bian, esle' bi Maria le antek nani bi Magdalena le napoitan nitu hitu na'ko in, 8:3 ma bi Yohana Nai Khuza le Nai Herodes in apao noni in fel, ma bi Susana ma bife-bife bian. Bife-bife nane sin tuthae Yesus nok In amnoktin neki sin mu'in kun. 8:4 Leka atoni namfau anpoi nem, na'ko kot-kot ma namesbok neu Yesus, nalali te In namolok neki lasi leta mese nak, 8:5 "Anmu'i atoni akifu' fini mese anpoi hen kifu' in fini. Bi neno in ankifu', onane te fini bian anmofu bi lalan ninen, ma atoni anteli nani, ma kolo-kolo bi neno atnanan nem ma anlot nani. 8:6 Bian anmofu bi faut putun, ma anmoni nalali te anmaknene, fun ka napeni fa oe. 8:7 Ma bian anmofu bi katila atnanan, ma katila nane anmoni nokan ma aneo nisan. 8:8 Ma bian anmofu bi nain alekot, nalali te anmoni ma nafua ante peni natun mese." Leka Yesus na'uab nalali te In nak, "Sekau le anmu'i luken he natnin, so in natnin nai." 8:9 In asium lasi antoti In, lasi leta nane in oten sa' ka. 8:10 Ma In natae nak, "Anfe nalali ki he mihin lasi tolo' plenat neno tunan, mes neu atoni bian anfe nani neki lasi leta, he nati' sin kiso mes ka nitan, fun sin nenan mes ka nahinen fa. 8:11 Lasi leta i in oten nak: Fini nane a'an Uisneno kun. 8:12 Amofut bi lalan ninen nane esle' atoni anenat; nalali te nitu in nem naiti a'an nane na'ko sin nekan he nati' kais sin nekan nateb knino ma napeni honis. 8:13 Ma amofut bi fatu nane esle' sin le nen a'an nane ma ansimo nani nok nek amlilat. Mes a'at nane kan mu'if ba'at anbi sin nekan. Sin nateb leku tuka, ma kalu su'at nem neu sin oke te sin naskotun. 8:14 Le amofut anbi katila nane esle' atoni le sin nen a'an nane, ma anbi a'at nane in monin, sin hapnesok nok lasi a'unu, ma lasi amu'it, ma monit amlilat, talan te sin ka napoitan fa fuaf amnatus. 8:15 Ma amofut bi nain alekot nane, esle' atoni le sin nen a'an nane, ma napan bi sin nekan alekot oket napoitan fuan nok nek asutais." 8:16 Katit fa esle' in not nalali paku oke te antoeb nani neki kusi, ai antao nani bi hala nupun, mes in antao nani bi tet paku, he nati' atamas sin nit nani in pinan. 8:17 Fun katit fa sa' esle' nakolo, le kan poi natonon, ma katit fa sa' esle' naninbon, le ka mahine fa bi mat-mat. 8:18 Es nane him kiso ma him nen onane. Fun atoni le anmu'i, of anfe nes neu in, mes atoni le kan mu'if of naiti amsa na'ko in, sa' le in natenab in ini kun. 8:19 Yesus In ainaf ma In oilfenu nem neu In, mes sin ka nem ante fa In fun atoni namfau. 8:20 Atonas nem naton neu In nak, "Ho aina ma Ho oilenu anhake es mone ma anlomi hen nae'ku nok Ko." 8:21 Mes In natae sin nak, "Au aina ma Au olif sin, esle' sin nen a'an Uisneno ma anmo'e natuin." 8:22 Anbi neno es Yesus nok In asium lasi sin ansae neu belo' es ma In na'uab neu sin nak, "Hit atlak teu nifu bian." Oke te sin anlak. 8:23 Ma leka sin fe hen lakan Yesus antup. Naskek onane te anin nautus ansanu nem neu nifu, ma oe antam neu belo' ma sin nekan nahenu nok amtaus. 8:24 Asium lasi sin nem anpo' nafena In ma nak, "Am Kulu, Am Kulu, hit tamle'u!" Yesus anfen, nalali te In nabin anin ma oe apesen nane. Ma anin ma oe nane namne ma nifu nane antainine nunfin. 8:25 Ma In nak sin nak, "Hi nek ateb knino nane es me ka?" Mes sin namtau ma namkak, fun anma'uaben es nok es nak, "In sekau kun ka, le In naplenat anin ma oe ma sin natuin In?" 8:26 Yesus nok In asium lasi sin anlak ante pah Gerasa le anmatot nok pah Nifu Galilea. 8:27 Leka Yesus ansae neu meto, atoni mese na'ko kot nane nem nae'ku nokan; atoni nane nekmaun ma in kan abtai fa suk a'lo' ma in ka namaika fa anbi ume, mes anbi nuat naukel. 8:28 Leka in nit Yesus, in anhunun ma anmof bi Yesus In haen ma na'uab nok hanan naek nak, "Ho mu'i lasi sa' mok kau ka, Yesus Uisneno Amnanut Anmone Ko? Au toti Ko, kais Hom hamu'i kau." 8:29 In na'uab onane fun Yesus anlelu maunu tuaf nane hen poi na'ko atoni nane. Fun fe fe'at maunu tuaf nane anhel in, ma hen pao in, sin anfutu ma ankolen, mes in nafek nain ale tain futus ma maunu tuaf anli'u nani neu bale hufui. 8:30 Ma Yesus natan in nak, "Ho kanam sekau ka?" In natae nak, "Au kanak Legion," fun maunu tuaf namfau antam anbi in. 8:31 Ma nitu sin antoti neu Yesus, he kais anli'u natam sin neu kefan maten. 8:32 Anbi nane anmu'i fafi pukan naek le nami mnahat anbi nu'af, nitu sin antoti neu Yesus he namautu sin antam bi fafi-fafi nane. Yesus anlut sin totis nane. 8:33 Ma nitu sin anpoi na'ko atoni nane ma antam neu fafi pukan nane. Ma fafi pukan nane anoklok na'ko ki'af antam neu nifu ma anleman mate ok-oke. 8:34 Leka atukus sin nit lasi nane, sin naen ma anetun lasi nane bi kot ma kuan-kuan funam natef. 8:35 Ma ale atoni sin anpoi he nit lasi sa' le anbol. Sin nem neu Yesus ma sin nit atoni le nitu nasaitan in antok bi Yesus In haen; in anpake abtais ma nekan naleko kun. Oke te sin namtaun. 8:36 Fun alsin le sin nit, sin anetun neu sin, nak atoni le nitu antam neune in naleko kun. 8:37 Ma ale atoni pah Gerasa antoti Yesus, he nati' In nao nasaitan sin, fun sin namtau ka nabe'if. Oke te Yesus ansae neu belo' ma In anfani. 8:38 Fun atoni le nitu sin nafetin nani antoti he nok Yesus. Mes Yesus anlelu in nao ma In nak, 8:39 "Hom fani meu ho ume ma muton ale lasi le Uisneno anmo'e nani neu ko." Ma in nao napun kot ok-oke ma anetun ale sa' le Yesus anmo'e nani neu in. 8:40 Leka Yesus anfani neu nifu bian, atoni namfau nem ansenu In fun sin alsin anpao In. 8:41 Ma atoni mese kanan Nai Yairus nem. In nakaf neu ume buat. In anmof bi Yesus haen ma antoti In he nati' Yesus nem neu in ume, 8:42 fun in anfeto fua mese in uan ton bo'es am nua hen mate. Fun Yesus fe he nao neu ume nane, to namfau anhaip nan In. 8:43 Anmu'i bife mese le in namen sopol opan na' ton bo'es am nua ma es ka nabe'i fa he naleko nan in. 8:44 In fonat nu anpaumak Yesus In kotin ma in na' Yesus In tainusat betan, ma bi leku nane amsa in men sopol nane anhetu. 8:45 Yesus na'uab nak, "Sekau in na' Kau ka?" Fun sin alsin natotan, Nai Petrus nak, "Usif, to namfau natnana Ko ma anbe'u Ko." 8:46 Mes Yesus nak, "Anmu'i tuaf mese le na' Kau, fun Au uhin anmu'i matani anpoi na'ko Kau." 8:47 Leka bife nane in nit, nak in moet nane mahine, in na'tai ma nem anmof bi Yesus In matan ma anetun neu to amfaut, nansa es in na' Yesus ma bi leku nane amsa in naleko' kun. 8:48 Ma Yesus nak neu bife nane, "Anah, ho nek ateb knino es naleko' ko, hom nao nai mok tetus." 8:49 Yesus fe na'uab onane, atoni es nem na'ko ume buat nakaf in ini sin ma nak, "Ho anfeto anmaten, kais Ho mususab Ama Anoni!" 8:50 Mes Yesus In nen ma na'uab neu Nai Yairus nak, "Kais mumtau so ho nekam nateb knino nai, ma ho anah of anmoni." 8:51 Ma leka in nem ante Nai Yairus ume, In kan lomi he es antam nok In, al Nai Petrus, Nai Yohanes ma Yakobus ma anah nane in ainaf ma in amaf. 8:52 Sin ankae ma ankul neu anah nane. Mes Yesus nak, "Kais amkae; in kan mate, mes in tup." 8:53 Sin anmanis Yesus fun sin nahin nak anah nane anmate. 8:54 Mes Yesus ana' li'ana nane in niman ma In nak, "Anah hom fen nai!" 8:55 Ma oke te anah nane in asmanan anfani nem ma naskek in anfen ma anhake. Yesus anlelu hen fene he nah. 8:56 Ma anah nane in amaf ainaf sin nekan namnekun, mes Yesus anbanu sin ka nabe'i natonan es neu lasi sa' le anbol nalali.
9:1 Usif Yesus no'en In asimo lasi bo'es am nua, ma anfe neu sin matani ma kuasat hen li'u ale nitu ma he naleko ale menas. 9:2 Ma In ansonu sin hen etun plenat Uisneno ma he naleko amenat, 9:3 Yesus nak sin, "Kais meki sa' bi lalan, he tes ka, ai bukael ka, utunu' ka ai noni ka, ai sobalu nua. 9:4 Ma leka ansimo ki ma amtam bi ume me, nati' mimaika ambin talan te him poi mi'ko. 9:5 Ma kalu sin kan simo ki fa, him poi mi'ko kot nane ma amtekal afu na'ko hi haem hen fani saksi neu sin." 9:6 Oke te sin anpoi ma sin nao neu kuan-kuan ma anetun Lasi Alekot ma naleko' amenat bi me-me. 9:7 Nai Herodes, usif pah Galilea in nen ale lasi nane ma in nekan na'oni, fun bian sin na'uab nak, Nai Yohanes anfen anfani na'ko amates. 9:8 Ma bian sin nak, Nai Elia nalilon, ma bian nak, mafefa knino na'ko ahunut sin anfen anfani. 9:9 Mes Nai Herodes nak, "Nai Yohanes in nakan au ote ufek ulali. I sekau kun ka, le au nen in lasi onane ka?" Ma in nami lalan he na'eku nok Yesus. 9:10 Ma haefin anfani nem, ma anetun neu Yesus ale lasi le sin anmo'e nalali. Oke te Yesus nok sin anhelok neu kuan esle' antek nani nak Betsaida. 9:11 Leka to mfaun nahin, nalali te sin nao natuin In. Yesus ansimo sin ma na'uab neu sin Plenat Uisneno ma In naleko' ale atoni amenat sin. 9:12 Leka neno hen faien In asimo lasi bo'es am nua nem neu In ma nak, "Amlelu to mfaun i he nao neu kuan-kuan ma kot-kot he naim bale ma mnahat fun hit bi i bale hufui." 9:13 Mes Usif Yesus nak neu sin, "Him fen sin hen bukaen!" Mes sin natae, "Le hai mu'i ka nesif na'ko utunu' pisa nim ma ika koe nua, so mak haim nao hem sos mnahat neu to pukan naek i." 9:14 Fun anbi nane oni atoni nifun nim. Mes In nak neu In asium lasi sin nak, "Amlelu sin hen tok pukan-pukan, oni pukan es atoni bo'nim." 9:15 Sin anmo'e onane ma anlelu sin antok. 9:16 Usif Yesus naiti utunu' pisa nim ma ika koe nua nane, nalali te In anbaisenu neu neno tunan, antek alekot neune, ma ane'bi utunu' ma ika ma anfe nani neu In asimo lasi sin hen bati nani neu ale atoni sin. 9:17 Ma sin anbukae talan te namsenan fin. Sin nabua nafani ale mnah nesif nane nahenu aba' bo'es am nua. 9:18 Anbi haef es leka Usif Yesus anmes kun hen onen toti, In asimo lasi sin nem neu In. Ma In antoti sin nak, "Paha mfaun sin antek Kau sekau ka?" 9:19 Sin natae nak, "Nai Yohanes Aslanit, bian nak Nai Elia, ma bian nak anteni nak mafefa knino es na'ko ahunut sin anfen anfani." 9:20 Mes Usif Yesus nak sin, "Mes hi, hi mak Au le i sekau ka?" Nai Petrus natae nak, "Neno Anan mu'ko Uisneno." 9:21 Ma Yesus antal matani, he nati' kais sin anetun lasi nane neu es. 9:22 Ma Yesus na'uab nak, "Anmone Pah To mes ansutai mane'at namfau ma ale amnasit sin, ma ale ana' lasi fuat nakaf sin ma ale ahin sulat sin of antite In ma namate In mes bi neno tenu nafena nafani." 9:23 Yesus nak sin alsin, "Sekau anlomi he natuin Kau, in mes natotan in aon, ma anloi in hau nehe neno-neno ma natuin Kau. 9:24 Fun sekau anlomi he nahoni ini smanan, of in naneku nani, mes sekau anlomi he naneku in smanan natuin Au mepu, of in nahoni nani. 9:25 Alekot sa' ka neu atoni le napeni pah pinan ok-oke, mes in nanukab ma nalukib in aon? 9:26 Fun sekau in anmaen Kau ma in anmaen Au a'ak, Anmone Pah To of anmaen nani amsa leka In koenon nem bi In apinat ma bi Amaf In apinat ma ahake knino sin. 9:27 Mes Au ak ki: Tebes anmu'i atoni anbi ki le anhake anbi i, of sin kan maten fa nahunun sin nit Plenat Uisneno." 9:28 Neno fanu namuni na'ko ale a'an i te, Yesus neki Nai Petrus, Yohanes ma Yakobus ansae neu nu'af tunan hen onen toti. 9:29 Ma In fe hen onen toti, In human nabaina ma In bale pake nane muti nalim-nalim. 9:30 Ma kiso te atoni nua namolok nok In, esle' Nai Musa ma Nai Elia. 9:31 Sin nuasin natonok bi apinat nane ma sin na'uab antom Yesus Ini maten le mes he natis nani bi Yerusalem. 9:32 Fun Nai Petrus nok in bia sin antup anfin, ma leka sin anbe' sin nit Yesus anbi apinat; ma atoni nua nane anhake nok In. 9:33 Ma leka atoni nua nane he nabatiok nok Yesus, Nai Petrus nak neu In, "Anoni, leko nesi haim bi bale i. So hai mihakeb la'at tenu, es neu Ko, es neu Nai Musa, ma es neu Nai Elia." Mes Nai Petrus in ka nahin fa sa' le in nauab. 9:34 Leka in fe na'uab onane te, nope anbol ma ankub nan sin. Ma leka sin antam bi nope nane te sin namtau. 9:35 Ma hanaf mese anbol na'ko nope nane ma nak, "I Au Anah le Au beti ani, him nen nai na'ko In." 9:36 Leka hanaf nane anbol, sin nit Yesus anmes kun. Ma asimo lasi sin anta' kun ma bi neno nane sin ka na'uab fa neu es am es antom lasi le sin nit nalali. 9:37 Fun nokfa onane leka sin ansanu na'ko nu'af nane atoni namfau ansai nem he nae'ku nok Yesus. 9:38 Ma kiso atoni mese na'ko atoni mfaun nane anan'bai nak, "Pak, au toti Ko he mail au anah, fun in au anmone fua mese. 9:39 Ma leka nitu smanaf anhek in, naskek in anan'bai ma nitu smanaf nane anbeko nani talan te in fefan nafule. Nitu smanaf nane nasusab in ma kan lomi fa he nasaitan anah nane. 9:40 Ma au toti Ho asimo lasi sin hen li'u napoitan nani, mes sin ka nabe'i fa." 9:41 Yesus natae nak, "Hoi batan le ka apalsait ma nakfatu, talan te leka Au he ubala ok ki ma he sutai ki ka? Mok ho anah nane nem neu i!" 9:42 Ma leka anah nane nem anpaumak Yesus, nitu nane antepon in neu nain ma antetak in. Mes Yesus nakain nitu smanaf nane ma naleko' anah nane ma anfe nafani neu in amaf. 9:43a Sin alsin nekan namnekun natuin Uisneno In kuasat matani. 9:43b Leka sin alsin fe namkak neu ale lasi le In anmo'e nalali, Yesus na'uab neu In asimo lasi sin nak, 9:44 "Mitnin nai ma ampanat ale Au a'at i: Fun Anmone Pah To of mana'at neu nimaf mansian." 9:45 Ma sin ka nahin fa a'at nane, fun a'at nane In oten fe nakolo'on neu sin, he kais sin nahin nani. Ma sin namtau he natan a'at nane neu Yesus. 9:46 Ma lasi matoes mese anbol neu Yesus asium lasi sin antom neu sekau es nanae nesi anbi sin. 9:47 Mes Yesus nahin sin nek tenab nane. Es nane te In antopu nan liana mese ma nahakeb bi In aon bian, 9:48 ma nak neu sin, "Sekau ansimo liana i bi Au kanak, in ansimo Kau; ma sekau in ansimo Kau, in ansimo In, le ansonu Kau. Fun sekau le nabau nis anbi hi alki, in es anaek." 9:49 Ma Nai Yohanes nak, "Tuan, hai mit atoni es anli'u napoitan nitu sin neki Ho kanam, oke te hai mikain mani, fun in ka nao natuin kit fa." 9:50 Ma Yesus nak neu in, "Kais hi mikain, fun sekau le kan laban ki fa, in anhaek nok ki." 9:51 Leka neno anpaumak he naiti Yesus neu neno tunan, In nafek he nao neu Yerusalem, 9:52 ma In ansonu tuaf fauk he nahunun In. Sin nao ma antam bi atoni Samaria sin kuan he naloitan ale sa' neu Usif Yesus. 9:53 Mes atoni Samaria sin kan simo fa In, fun In sali he nao neu Yerusalem. 9:54 Leka asimo lasi nua, esle' Nai Yakobus ma Nai Yohanes nit lasi nane sin nak, "Usif, bait Hom lomi, haim toti ai ansanu na'ko neno tunan he notu nis sin ka?" 9:55 Mes Yesus naklelo on ma nakain sin. 9:56 Oke te sin nao neu kuan bian. 9:57 Leka Yesus nok In asimo lasi fe nao natuin lalan, atoni mese na'uab neu Yesus nak, "Au he utuin Ko, neu lalan me le Ho hem nao." 9:58 Yesus nak neu In, "Asu fui anmu'i bola ma kolo anmu'i kuna, mes Anmone Pah To kan mu'if bale he natuta Ini nakan." 9:59 Ma In nak neu atoni bian, "Mutuin Kau nai!" Mes atoni nane nak, "Mufetin kau fe he au nao he sub au ama." 9:60 Mes Yesus nak neu in, "Mautu nai amates ansub sin amates; mes ho amnao nai he muton Plenat Uisneno." 9:61 Ma atoni es anteni nak, "Au he utuin Ko, Usif, mes mufetin kau fe, he useon au ume nanan sin." 9:62 Mes Yesus nak neu in nak, "Katit fa atoni le antao nalali niman neu besi foi afu, oke te in nike koti, in antam ota bi Plenat Uisneno."
10:1 Namuni na'ko nane te, Usif Yesus anlek asium lasi bian sin bo'hitu, ma ansonu sin nua-nua nao nahunun In neu ale kot ma bale le In he nao neune. 10:2 Yesus nak neu sin, "Hetus ma mnonut nae le'uf, mes ameput ka namfauf. Es nane him toti nai neu hetus ma mnonut in Usin, he In anfe ameput neu mnonut nane. 10:3 Him nao nai, kiso Au sonu ki on bibi kase bi asu fui sin atnanan. 10:4 Kais meki alu nok noni ai bukael ai penhae, ma kais hi mahosen bi lalan. 10:5 Kalu him tam meu ume me, nahunu te hi mak: Halan nekaf neu ume i. 10:6 Ma bait anmu'i atoni le ansimo halan nane, lof hi halan nane nabala bi in. Mes kalu kahaf halan nane of anfani nem neu ki. 10:7 Hi mimaika anbi ume nane, miah ma minu sa' le nabalab neu ki, fun ameput nane lo mes he napeni palseb. Kais mi'oni mi'ko ume es meu ume bian. 10:8 Ma leka him tam ambi kot me ma sin ansimo ki, miah nai sa' le sin nabalab ki neu ki. 10:9 Mileko' nai amenat le sin anbine ma ametun sin mak: Plenat Uisneno nem haumakan ki. 10:10 Mes leka him tam meu kot me ma sin kan simo ki fa, him poi nai meu ale lal uf ma hi mak: 10:11 Afu skuku bi hi kuan na'ki bi hai haem, of haim tekal mani neu ki; mes so hi mihin nai mak: Plenat Uisneno nem anhaumak. 10:12 Au ak ki: of kot Sodom in sutais anmakafa nesin kot nane." 10:13 "Amle'ut neu ko Khorazim! Amle'ut neu ko Betsaida! Fun bait afi bi kot Tirus ma Sidon mo'et amkakat anbol neu sin, le anbol bi hi atnanam, oni sin nate'un sin nekan ma antok nok kulut. 10:14 Bi neno kasat nateabon of kot Tirus ma Sidon sin lenat anmakaf nesin ki. 10:15 Ma ho Kapernaum, ati he nasaeb ko ante neno tunan ka? Kahaf, of nasanut ko talan te amates balan! 10:16 Sekau in nen ki, in nen Kau, ma atoni le antite ki, in antite Kau; ma sekau in antite Kau, in antite In kun le ansonu Kau." 10:17 Namuni te asium lasi bo'hitu nane sin anfani nem nok amlilat ma sin nak, "Usif, ale nitu, sin naluli neu kai kalu haim tek Ho kanam." 10:18 Yesus nak neu sin, "Au it Sanat in tuaf anmof on limat na'ko neno tunan. 10:19 Mimnau Au fe ulali ki kuasat hem teli bi kauna, kabiti ma ale musu sin kuasat, ma sa'es of kan hamu'i ki. 10:20 Mes kais hi mimlil natuin ale smanaf nane sin naluli neu ki, mes mimlil nai natuin hi kanam matui bi neno tunan." 10:21 Bi leku nane amsa' Usif Yesus In namlil bi Smanan Knino ma nak, "Au utulu nekak neu Ko, Ama, Usif neno tunan ma pah pinan, fun ale lasi nane Ho mutolo neu malole sin ma ahinet sin ma Hom muton mani neu ka ahinet sin. Koi Ama, onane Ho nek alomit anbol. 10:22 Fun ale lasi Au Ama nana'at nani neu Kau ma katit fa esle' nahin Anmone nane sekau, al Amaf, ma Amaf nane sekau kun, al Anmone, ma sekau le Anmone anlomi he naton nani neu in." 10:23 Nalali te Yesus naklelon neu asium lasi sin anmes ma nak, "Alekot neu ale mataf le sin nit sa' le hi mit. 10:24 Mes mimnau: Ale Mafefa knino ma kesel sin anlomi he nit sa' le hi mit, mes sin ka nit nani fa, ma he nen sa' le him nen, mes sin ka nen nani fa." 10:25 Bi neno es atoni ahin plenat mese anfen hen su' Yesus, nak, "Anoni, au mo'e onme ka he upeni honis nabal-bal?" 10:26 Yesus nak neu in, "Antui sa' bi plenat knino ka? Hom soi onme ka?" 10:27 Atoni nane natae nak, "Mes hom nek Abal-balat, Uisneno meki ho nekam oke ma meki ho smanam oke ma meki ho matanim oke ma meki ho lolem oke ma amnek ho bia ho benu onle amnek ho aom" 10:28 Yesus nak neu in, "Namneo onane; mo'e mani nai of ho mupeni honis." 10:29 Mes in lomi he namneob kun in aon, in nak neu Yesus, "Ma au bia benu nane sekau kun ka?" 10:30 Yesus natae nak, "Anmu'i atoni mese ansanu na'ko Yerusalem neu Yerikho; in anmof neu atoni abulalut sin niman, ma nasik nan ale ini bale, oket antepo nalali te anpaleob nani, ala kle'o in anmate. 10:31 Anbi leku nane ana' lasi fuat mese ansanu natuin lalan nane; in nit atoni nane mes in nao anfin kun natuin lalan aon bian. 10:32 Onane te atoni Lewi mese nem neu bale nane; leka in nit atoni nane, in nao anfin kun natuin lalan aonbian. 10:33 Mes atoni Samaria mese anao lalan nem neu bale nane; leka in nit atoni nane, in nekan anmof ma nekan namnoe. 10:34 In anfonat nu ma ana'mu in papa' ma antosi mina ma tua amtasa neune. Oke te in nasaeb neu in bikase ma nokan nao neu ume snasat ma anpaloli nani. 10:35 Nokfa onane, in anfe noni dinar nua neu apao ume snasat nane nak: Hom paloli in ma leka hom baen nes na'ko le i of au ufani ko sin, leka au fani aum. 10:36 Ma na'ko atoni teun in i, ho mutenab mani, sekau es anfani bia benu neu atoni le anmof bi abulalut sin niman?" 10:37 In natae nak, "In kun le anmo'e alekot neu atoni nane." Yesus nak neune, "Hom nao nai, ma ho mo'e onane!" 10:38 Leka Usif Yesus a'nao nok asium lasi sin, In antam bi kuan mese. Ma bife mese in kanan bi Marta ansimo In anbi in ume. 10:39 In anmu'i olif mese kanan bi Maria. Bi Maria antok paumak Usif Yesus In haen ma nen In a'an. 10:40 Bi Marta in nabiku anfin neu hen tuthae Usif Yesus. In nem anpaumak Yesus ma nak, "Usif, ait Ho kam laef, he au oli nane anpaleoba kau mes he ubiku? So Hom lelu in anbab kau fe." 10:41 Mes Usif natae in nak: "Marta, Marta, ho mu'unu ma ho muhaebom neu lasi namfau, 10:42 mes al lasi an-ana nono mese hom nuk mani: Bi Maria anbeti nalali lasi tukan alekot, le of ka nait nani fa na'ko in."
11:1 Bi neno nane Usif Yesus anonen totis bi bale mese. Leka In nasopu onen totis onane te In asimo lasi es nak neu In: "Usi, munoni kai onen totis, on Nai Yohanes nanoni in asimo lasi sin." 11:2 Yesus natae sin nak, "Leka him onen totis mak on i: Ama, hai mimtausan Ho kanam; Ho Plenat in nem. 11:3 Fe kai hai mnahat neno-neno bi neno i 11:4 ma amsako kai hai sanat, on hai amsa amsako atoni le nasanab neu kai; ma kais mutam kai neu su'at." 11:5 Nalali te In nak neu sin, "Sekau anbi ki le anmu'i baef, ma he nao neu in bi fai atnanas ma nak neu sin: Bae, amfe mlapat kau utunu' pisa tenu fe, 11:6 fun au bae na'ko lalan nem antam es au ume ma au ka mu'if sa' he ubalab ani. 11:7 Leka in le abit ume nanan natae ma nak: Kais mususab kau, fun eno mae'ka nalali, ma au nok au anhenu amtupen; au ka ube'i he fen he fe ko sa'. 11:8 Mes Au ak ki: Maski in kan fen fa hen fe neu in, natuin in baef, mes natuin atotis nane kan mae nahin fa, of in anfen ma anfe neu in fauk le in nuk nani. 11:9 Es nane Au ak ki: Toti nai, of anfe ki; mami nai of mipeni; leku eno of nasoitan ki. 11:10 Fun sekau le antoti, mes ansimo ma sekau le nami, mes napeni ma sekau le anleku eno of nasoitan nani. 11:11 Amaf me anbi ki, leka in anah antoti ika, oke te in amaf anfe kauna hen seka ika nane? 11:12 Ai hen toti teko, anfe neune kabiti ka? 11:13 Leka hi apenut ki hi mihin hem fe bale alekot neu hi anhenu, nes-nesi hi Ama abit neno tunan! Of In anfe Smanan Knino neu sin le antoti In." 11:14 Bi neno es Usif Yesus anli'u napoitan nitu na'ko atoni amonot mese. Leka nitu nane anpoi, te atoni amonot nane na'uab. Ma atoni namfau namkak. 11:15 Mes bian sin nak, "In napoitan nitu neki kuasat Beelzebul, sanat in tuaf." 11:16 Mes bian sin antoti taka na'ko neno tunan, fun hen su' Usif Yesus. 11:17 Ma Yesus nahin sin nek tenab nane ma nak, "Ale plenat le anmu'i han suli of namle'u kun, ma ume la anmu'i suli of natsel kun. 11:18 Onane amsa kalu santuaf masulin of ini plenat hen hake onme? Fun hi mak Au upoitan sanat in tuaf eki kuasat Beelzebul. 11:19 Bait Au upoitan sanat in tuaf eki kuasat Beelzebul, of hi atoni sin napoitan neki sa' ka? Natuin lasi i, sin of anfani alef lasi neu ki. 11:20 Mes kalu Au upoitan sanat in tuaf eki kuasat Uisneno, tebes Plenat Uisneno nem nalali neu ki. 11:21 Leka atoni abe'it neki suni ma anpao in ume of in sa'-sa' naleko. 11:22 Mes leka atoni nabe'i nesin nem ma anbe'u nani te, of nasik nan in suni auni, le in nafnekan, ma anbati nani ale in sa'-sa'. 11:23 Sekau le in ka nok Kau, mes in tumatan Kau, ma sekau le in kan tuntaku Kau, of in nale'un Au mepu." 11:24 "Leka smanan nitu anpoi na'ko atoni, in anfun natef bale-bale hufui ma nami snasat, ma ka napeni te in nak: Au he fani eu au ume le usaitan ani. 11:25 Fun in nao ma napeni ume nane manako, naleko ma namas. 11:26 Oke te in anpoi ma anhone smanaf hitu le anbulalun nesin in, ma sin antam ma namaika anbi nane. Atoni nane in monin namle'u nesin neno ahunut." 11:27 Leka Usif Yesus fe na'uab onane te, bife mese na'lo atoni mfaun sin atnanan naiti in hanan nak neu In, "Ua alekot neu ainaf le nahonis Ko, ma susu le nasusu Ko." 11:28 Mes In nak, "Le he napeni alekot amneot es le alsin le nen a'an Uisneno ma napan nani, oke te anmo'e natuin." 11:29 Leka to namfaun nem antol nan In, Yesus na'uab ma nak: "Batan i batan amle'ut kun. Sin antoti he nit taka, mes of kan fe fa taka, neu sin, al taka Mafefa Knino Nai Yunus. 11:30 Fun on Nai Yunus anfani taka neu atoni Niniwe, onane amsa Anmone Pah To anfani taka neu batan i. 11:31 Bi neno kasat, usif bife nem na'ko pah Li anfen nok atoni batan i ma of in nafek sin lasi. Fun usif bife in nem na'ko pah tukan he nen Nai Salomo in lasi hine. Mes kiso, anbi i anmu'i le a'nesin Nai Salomo! 11:32 Bi neno kasat, atoni Niniwe of anfen nok atoni batan i ma nafek sin lasi. Natuin atoni Niniwe sin nate'un sin nekan leka sin amnen Nai Yunus in han beno ma kiso le abit i, nesin Nai Yunus!" 11:33 "Fun katit fa esle' in not paku, nalali te in antao nani bi bale kolo, ai antobe neki mako su'at, so antao nani neu tet paku, he nati' atamas nit in pinan. 11:34 Ho matam anfani paku neu ho aom. Kalu ho matam anpin ho aom meusine, kalu ho matam nanipu ho aom anmesok. 11:35 Es nane panat nai he nati' meusine le anbi ko kais anfani mesokan. 11:36 Bait ho aom nane meusine ma kan mu'if mesokan, of meusine nunfin onle paku antana ko neki in pinan." 11:37 Leka Yesus nanoina nalali te, atoni Farisi mese anhone Yesus he nati' In bukae nokan bi in ume. Yesus antam neu ume nane ma antoko bi mei hen bukae. 11:38 Atoni Farisi nane in namkak fun Usif Yesus ka nafanu fa In niman nahunu na'ko hen bukae. 11:39 Mes Usif Yesus nak neu in, "Hi atoni Farisi him fase mako ma pika in kotin mes hi nekam nane nahenu nok asikat ma bulalu. 11:40 Hi amonot ki, ati hi ka mihin, nak In le anmepu kotin nane, In amsa of anmepu nanan! 11:41 Sa' le anbi mako ma pika nanan amfe mani neu amamu'it sin of ale sa' anfani knino neu ki. 11:42 Amle'ut neu ki, atoni Farisi, fun him fe ao bia bo'es na'ko sip ayo, tonene ma ale utan neu Uisneno mes hi ka mimnau fa amneot ma manekan Uisneno. Hi mitiaba nane ma kais amnikan bian. 11:43 Amle'ut neu ki, atoni Farisi, him lomi hem toko bi mat bi ume buat ma him lomi hem simo kan tola bi ume masa. 11:44 Amle'ut neu ki, fun hi on nate-naukel le ka mabaki fa; ale atoni anteli natuin in fafon mes ka nahin nani fa." 11:45 Ma ahin plenat mese nak neu Yesus, "Anoni, Ho mu'uab onane Ho mumenab hai nekam amsa." 11:46 In natae nak, "Amle'ut neu ki amsa, ale ahinet plenat, fun hi misaeb baut mafena neu atoni le anloi ka nabe'if, mes hi kam poe mani fa meki hi kalulu mese amsa. 11:47 Amle'ut neu ki, fun mihakeb fatu naukel amasat neu Mafefa knino sin, mes hi amfini afi es namate sin. 11:48 Neu hi miteb ma mimneob hi mnais unu sin moet nane, fun sin es namate Mafefa knino sin, ma mihakeb fatu naukel neu sin. 11:49 Es nane te lasi hine Uisneno nak: Au sonu neu sin Mafefa knino ma haef knino ma bian na'ko ale Mafefa knino ma haef knino nane of namate sin ma anhamu'i sin, 11:50 he nati' na'ko batan i atoni nafani na' ale Mafefa knino le nat op nalali na'ko nahakeb paha pinan, 11:51 na'ko afi Nai Habel in na' talan te Nai Zakaria ini le namate nani bi baki fuat ma anbi ume Uisneno. Tebes Au ak ki of nami nafani anbi batan i. 11:52 Amle'ut neu ki, ale ahinet plenat fun hi maiti letu ma fo'i ahinet; oke te hi kam tamaf meun, ma sin le hen tam neun hi misenib sin." 11:53 Ma Usif Yesus anpoi na'ko nane, ahinet plenat ma Farisi sin nato' ma na'koke In neki totis namfau. 11:54 Sin mo'e onane he nati' anheke Yesus natuin uab le In na'uab neu sin.
12:1 Fun pah namfau te nifun-nifun, sin anhake funam natef, talan te anmateli haen es nok es. Oket Yesus na'uab nahunu neu In asimo lasi sin nak, "Panat nai hi aom na'ko lalu haef atoni Farisi, esle' lasi asafanu. 12:2 Fun katit fa sa' esle' ankub nani le kan fei nani fa ma katit fa sa' le nakolo nani le ka natonon fa. 12:3 Es nane sa' le hi mi'uab bi mesokan of manena bi meusine, ma sa' le miseo bi lukem bi ke'an nanan of anetun nani na'ko ume in penen." 12:4 "Au ak ki, hoi Au bae, kais mimtausan sin le namate aof nane, mes namuni sin ka nabe'i fa hen mo'e sa' nesi anteni. 12:5 Mes Au he ulile ki sekau le hi he mimtausan. Mimtausan nai In le namate ki, In anmu'i kuasat hen polin natam ki bi ai. Namneo Au ak ki mimtausan nai In! 12:6 Ati ka nasosa fa kolo ane nim upan loit nua? Onane amsa kolo mese ka manikan fa bi Uisneno, 12:7 tebes hi nakfunu amsa ansoi nain sin. Es nane te kais mimtau, fun hi upam nesi ale kolo ane nane sin." 12:8 "Ma Au ak ki: Sekau in nateb Kau bi mansian in matan, Anmone Pah To of nateb nani amsa bi Ahake Uisneno sin matan. 12:9 Ma sekau natotan Kau bi mansian in matan of natotan in amsa bi ahake Uisneno sin matan. 12:10 Sekau le antek nale'un Anmone Pah To, in sanat masako; mes sekau le antek nale'un Smanan Knino, in sanat ka masako fa. 12:11 Ma leka sin neki neu ume buat ma neu nakaf-nakaf, ma ana' plenat ma akuasat sin, kais mi'unu hi nekam he mitae onme ai he mi'uab mak sa'. 12:12 Bi leku nane Smanan Knino of nanoina ki sa' le he mitae mani." 12:13 Ma atoni es na'ko atoni amfaut na'uab neu Yesus nak, "Anoni, mak au tata hen bati bale mnasi nok kau." 12:14 Mes Yesus nak neu in, "Bae, sekau es nait kau hen fani alef lasi ai atoni atnana neu ki ka?" 12:15 Ma In na'uab anteni neu sin, "Panat nai ma ampao hi aom na'ko lasi sinmakat, fun atoni le in maus nathoe, in monin ka na'bon'in fa neu in mu'in nane." 12:16 Nalali te In na'uab neu sin lasi leta mese nak, "Atoni amu'it mese le anmu'i nain ma'afa ma napoitan afan naek. 12:17 In natenab bi nekan nak: Au he mo'e sa' ka, fun au ka mu'if bale he upan au nain in afan. 12:18 Ma in nak: Au he mo'e on i; Au he pukai ale Au lopo sin ma uhakeb fe'u le naek nesin ma au upan ale ane ma ale au maus anbi nane. 12:19 Nalali te au ak neu au smanak: Smanaf, ho maus anaek, le natupu nani neu ton-ton amnemat. Musnas nai, muah ma minu nai ma mumlil nai! 12:20 Mes Uisneno nakua a'an neu in nak: Hoi amonot, bi fai i amsa mes naiti ho smanam le anbi ko, ma sa' le ho muloitan nane of neu sekau ka? 12:21 Lasi antom neu atoni le nabua maus neu in aon, mes in kan mu'if sa' bi Uisneno In human." 12:22 Yesus nak neu In asimo lasi sin, "Es nane Au ak ki, kais mi'unu neu hi monim, of hi he miah sa', ma kais mi'unu neu hi aom, of hi hem pake sa'. 12:23 Hi monim nesin mnahat ma hi aom nane nesin bael pake. 12:24 Him kiso mit ale kol ka'le kan sen ma kan seki fa ma kan mu'i fa ume ma lopo, mes Uisneno anhao nain sin. Fun hi monim nesin ale kolo nane sin! 12:25 Sekau le anbi ki le in nekan na'unu, nabe'i antalu in monin, mnanun niman li'an mese ka? 12:26 Ati hi ka mibe'i he mo'e lasi an-ana, nansa hi mi'unu neu lasi bian? 12:27 Kiso mit uk-uki in sufan, le ka nasun fa abas ma kan tenu fa, mes Au ak ki: Nai Salomo nok ale in mu'in in pake ka namas fa on tuna' nane in sufan. 12:28 Hun anbi mnela le neno i anmoni ma noka anpolin bi ai, Uisneno naloitan nani, nes-nesi neu ki, hoi atoni nek an-ana ki! 12:29 Kais hi mitenab ma mi'unu neu he miah sa' ma minu sa' ma kais hi nekam naklati. 12:30 Ale uf-uf pah pinan, le ka nahin Uisneno, sin es nami ale lasi nane. Mes hi Ama nahin, hi minuka ale lasi i. 12:31 Mami nai In plenat, ale sa' nane of In nabalab nani neu ki. 12:32 Kais mimtau, pukan an-ana ki, fun hi Ama natenab leko hen fe ki plenat neno tunan. 12:33 Misosa mani ale hi mu'im ma amfe mani neu amamu'it sin. Moe nai neu hi aom alu noni le ka namle'u nit, esle' maus bi neno tunan le ka oke nitaf, le abakat ka nem paumak ma ap-apu ka neku nani fa. 12:34 Fun hi maus anbi me te, hi nekam amsa anbi nane." 12:35 "So hi tnanam mafutu piut ma hi paku anpin piut. 12:36 Ma him fani on atoni le anpao in usi leka anfani nem na'ko tolas mafe fe'u, leka in nem ma anleku eno, nasoitan nani lab-lab neu in. 12:37 Alekot neu ate le sin usin nem napeni sin anpao. Au ak ki: Of in anfutu in atnanan ma natokob sin bi mei, nalali te in nem ma antuthae sin. 12:38 Ma leka in nem bi fai batis ka ai mes hen meu ka, ma napeni sin anmo'e onane, alekot neu sin. 12:39 Mes mihin nai: Leka ume tuaf nahin leku me abakat he nem, of in kan paleo fa in ume hen pukai nani. 12:40 Hi amsa ampao nai, fun Anmone Pah To of In koenon nem bi leku le hi ka mitenab mani fa." 12:41 Nai Petrus nak, "Usi, Hom tek lasi leta i neu kai ka, ai neu to ok-oke?" 12:42 Usi In natae nak, "Apao ume akiat ma ahinet es sekau le in usi of nahakeb nani hen fani nakaf neu ale ate sin hen fen sin mnahat bi leku le'at ka? 12:43 Alekot ate le napeni nan anmo'e onane leka in usi nem. 12:44 Au ak ki, tebes of usi nane naiti nani hen fani apao maus. 12:45 Mes leka ate nane atoni abulalut ma in natenab bi in nekan nak: Au usi oni ka nemaf, oke te in tepo ale ate atoni ma ale ate bife sin, ma nah ma ninu ma anmafu nok, 12:46 ate nane in usif of nem bi neno le in ka natenab nani ma bi leku le in ka nahin nani fa, of namate in ma anmo'e papmese on atoni ka akiat. 12:47 Fun ate le nahin in usi in lomin ma in kan pao fa ma kan mo'e natuin in lomin of ansimo tepos anaek. 12:48 Mes ate le ka nahin fa in usi lomin ma anmo'e sa' le mes he napeni tepos of napeni tepos an-ana. Fun anfe naek neu sekau, of antoti nafani naek amsa, ma nana'at naek neu sekau of antoti nafani bi in nesin teni." 12:49 "Au aum he polin ai neu pah pinan ma Au ufneka bait ai nane anpin nalali! 12:50 Au of sutai hamu'it naek ma Au nekak anmalel, leka lasi nane fe ka nateabon. 12:51 Ati hi mitenab mak Au aum he eki halan pah neu pah pinan ka? Kahaf, Au ak ki, ka lasi halan fa, mes lasi suli. 12:52 Fun na'ko tomas i, of anmu'i lasi suli na'ko atoni nim bi ume mese, tenu nok nua ma nua nok tenu. 12:53 Of sin nasulin amaf nok in anmone ma anmone nok in amaf, ainaf nok in anfeto ma anfeto nok in ainaf, babaf nok in nanef ma nanef nok in babaf." 12:54 Yesus nak anteni neu to mfaun, "Leka hi mit nope ansae bi neno tes, onane hi mak: Ulan he nem ma namneo onane. 12:55 Ma leka hi mit anin anfu na'ko neno tes hi mak: Manas of nakiti, ma anbol onane. 12:56 Hi asafanut pah pinan ma neno i hi mitenab mihin, nansa hi ka mitenab mihin fa batan i ka? 12:57 Ma nansa hi ka mifek mihin fa lasi amneot? 12:58 Leka hom nao mok atoni le anmatoe nok ko neu anaet sin so ho maim lalan he muleko mokan bi lalan atnanan, he nati' kais in hel neki ko neu alef lasi ma alef lasi nana'at ko neu in sukin ma in sukin nana'at nani ko neu apao pa'an. 12:59 Au ak ko: Of ho kam poi mitaf talan te hom baen mufek ho tusa sin."
13:1 Bi neno nane atoni fauk sin nem neu Yesus neki hanaf antom atoni Galilea sin, fun Nai Pilatus namate sin ma anselo sin na' nok na' na'ko mu'it le sin neki neu fua tulu. 13:2 Yesus natae sin nak, "Hi mitenab mak atoni Galilea i sin asanat nesin atoni Galilea bian, fun sin napeni mane'at onane ka? 13:3 Kahaf! Mes mimnau nai: Kalu hi ka mite'un fa hi nekam, hi mes mimle'u onane amsa. 13:4 Ai hi mitenab mak atoni bo'es am fanu le anmate bi Siloam natuin el fatu anmofu ma antutu sin, sin nasanab nesin ale atoni bi Yerusalem bian ka? 13:5 Kahaf! Au ak ateni: Kalu hi ka mite'un fa hi nekam, hi mes mimle'u onane." 13:6 Ma Yesus naton anteni lasi leta mese nak on i, "Atoni mese anmu'i hau bubuk u'mese anbi in lene tanu'an sena, ma in nem he nami in fuan, mes in ka napeni fa. 13:7 In nak neu apao lene tanu'an sena nane nak: Kiso, ton tenuen au aum he ami bubuk i in fuan mes au ka upeni fa; ote misan! In moni lum-luman ma anmusi nain in afan son-sona! 13:8 Mes apao lene natae nak: Tuan, mautu fe in moni bi ton i, au of foi nain funam natef ma au tao pupuk neun. 13:9 Oni ton amnemat in nafua, kalu kahaf, hom lek het ote tisan!" 13:10 Bi Neno Snasat Yesus fe nanoina anbi ume buat. 13:11 Bi neno nane anmu'i bife mese le ton bo'es am fanu smanan amle'ut antam neu in talan te in namen ma in akmunin ka natetu nani fa. 13:12 Leka Yesus nit bife nane, In no'en in ma nak, "Aina, ho menas nane naleko nai." 13:13 Oket In anpoh bife nane neki Ini niman ma bi leku nane amsa bife nane anhake ma ampules Uisneno. 13:14 Mes ume buat nakaf nane in nato' fun Yesus naleko amenat bi Neno Snasat, ma in nak neu atoni namfaun nak, "Anmu'i neno ne he mepu. Aim nai bi neno-neno le nane, he naleko' ki ma kais hi aim bi Neno Snasat." 13:15 Mes Uisneno natae in nak, "Hi atoni asafanut, ati anbi ki, hi ka mifetin fe hi bijae ma hi bikase luke mnanu na'ko o'of, bi Neno Snasat, he neki sin ma miinut sin ka? 13:16 Bife i Nai Abraham in sufan, Nitu anfutu in ton bo'es am fanu. Kais at sefi in tani futus bi Neno Snasat ka?" 13:17 Ma leka In na'uab onane, alsin le antumatan In sin anmae, mes atoni bian sin malinan fun ale mo'et apinat, le Yesus anmo'e nani. 13:18 Ma Yesus nak, "Plenat Uisneno nane in human onle sa' ma Au he uleta ani eki sa'? 13:19 In onle bonak fuan, atoni naiti ma ansenan bi in lele; in anmoni ma anfani hau uf ma kolo-kolo bi neno tnanan nem anmo'e kuna bi in tlaen sin." 13:20 Ma In na'uab anteni nak, "Au he uleta Plenat Neno Tunan eki sa' ka? 13:21 In maleta on lalu haef le bife es naiti ma anselo nok ut su'at tenu talan te ansae ma anbo." 13:22 Ma Yesus anfun kot-kot ma na'ko kuan es neu kuan es fun In nanoni sin ma In he nao anfin neu Yerusalem. 13:23 Ma atoni es nak neu In, "Uisneno, ait al atoni fauk le he nahoni nani sin ka?" 13:24 Mes Yesus nak neu sin, "Him hataneom nai hem tam mituin eno ma'lenta! Fun Au ak ki: Atoni namfau sin nami hen tam, mes sin ka nabe'i fa. 13:25 Leka ume tuaf anfen ma an ek nesu, of him hake bi mone ma hi mak: Usi, musoitan kai nesu fe! Of In natae ma nak neu ki: Au ka uhin ki fa, hi aim mi'ko me. 13:26 Ma hi of mitae mak: Hai miah ma minu bi Ho matam ma Ho es munoni kai bi hai lalan sin. 13:27 Ma of In na'uab neu ki nak: Au ka uhin ki fa hi mi'ko me, miskot mi'ko Kau hi atoin amo'e amle'ut! 13:28 Bi nane of hi mipeni kaet ma nisi kilof leka hi mit Nai Abraham ma Nai Ishak ma Nai Yakub ma ale mafefa knino sin bi Plenat Uisneno neno, mes hi of anpolin napoitan ki. 13:29 Ma of ale atoni nem na'ko neno Saet ma neno Tes na'ko neno A'li ma neno A'ne'u ma of sin tok ma nah bi Plenat Uisneno. 13:30 Tebes, atoni amunit anfani atoni ahunut ma atoni ahunut anfani atoni amunit." 13:31 Bi tabu nane amsa atoni Farisi sin fauk nem neu Yesus ma nak, "Kais mubala bi bale i, Hom nao nai, fun Nai Herodes he namate Ko." 13:32 Yesus nak neu sin, "Him nao ma mitonan asu fui nane mak: Neno i ma noka Au upoitan nitu ma uleko amenat mes bi neno tenu Au he ulail Au mepu. 13:33 Fun neno i ma noka ma anmeu Au mes he usopu Au lanan fe, fun ka naleko fa nak mafefa knino mese he namate nani bi Yerusalem kotin. 13:34 Yerusalem, Yerusalem, ho es mumate mafefa knino sin. Ho es ampoli haef Uisneno sin meki fatu. Hae fauk Au lomi he ubua ho anhenu, onle maun ainaf an u'bul in an enu bi in ninen, mes ho kam lomif! 13:35 Es nane Uisneno of ka nokan teni ki fa. Ma Au ak ki: Of hi ka mit amteni Kau fa talan te hi mak: Nahoeb alekot neu In le ankoenon nem anbi Uisneno In kanan."
14:1 Fun bi Neno Snasat es Usif Yesus antam bi Farisi sin nakaf in ume hen bukae. Sin abuat bi bale nane ankison kakoet In. 14:2 Onane atoni mese nem le in napeni men mu'an ma in anhake bi Usif Yesus matan. 14:3 Oket Yesus antoti neu ahinet plenat ma Farisi sin nak, "Hi mitenab onme, taleko' amenat bi Neno Snasat leko ka ai kahaf?" 14:4 Sin ok-oke mnesa mnes es ka natae fa. Yesus antopu atoni nane in niman ma naleko' nani na'ko in menas oket anlelu hen fani. 14:5 Oket Yesus nak neu sin, "Ait sekau anbi ki le in anah ai in bijae anmof neu oe hani nok Neno Snasat, of hi mipoitan ai kahaf?" 14:6 Katit fa es hen suli Usif Yesus. 14:7 Fun Yesus nit, atoni le anhone sin anbeti bale alekot hen toko bi matan, In na'uab neu sin lasi leta mese nak, 14:8 "Leka es anhone ko neu tolas mafe mamone fe'u, kais hom toko bi bale makana. Fun oni tol tuaf nane anhone atoni bian le makana nesin ko. 14:9 He nati' kais in nem neu ko ma nak: Bale i au uloitan neu atoni makana nane. Of nok nek maet hom fen, ma hom nao meu bale bi kotin nae. 14:10 Ma leka anhone ko, leko hom nao ma amtoko bi bale antom kotin. He tol tuaf nane nem ma nak neu ko: Bae, leko hom toko bi matan i. Onane te of ho mupeni kan alekot bi to amfaut sin matan. 14:11 Fun sekau nanaeb in aon, of napalan nani ma sekau napalan in aon, of nanaeb nani." 14:12 Ma Yesus na'uab neu atoni le anhone In: "Leka ho mo'e tolas he fai ka ai he manas ka, kais hom hone ho bae benu sin ai ho oli ma ho tata sin, ai ho ini amu'it le anpaumak nok ko. Fun of sin amsa anhone ko, onane te antobe ko ale sa'. 14:13 Mes leka ho mo'e tolas, anhone ale atoni amamu'it sin, ale atoni ao amle'ut sin, ale atoni hae hela ma ale atoni matfolo sin. 14:14 Ma alekot neu ko, fun sin kan mu'if sa' hen seunbanin neu ko. Mes Uisneno of anseunbanin ko leka amneot sin anfen anfani na'ko amates." 14:15 Leka atokos bi mei sin nen lasi nane te atoni mese na'ko sin nak neu Yesus, "Alekot neu atoni le he nah nok Uisneno bi Plenat Neno Tunan." 14:16 Mes Yesus nak neu in, "Atoni mese anmo'e tolas naek ma in anhone atoni namfau. 14:17 Leka tolas nane anhaumak in anlelu in ate sin hen etun le anhone sin nak, 'Koenom aim nai, fun ale sa' nabalab nalali!' 14:18 Mes sin alsin ok-oke neki mafena. Ahunut nane nak neu in: 'Au fe sos an po'an mese ma au nao he kiso ani. Kais muto'an kau.' 14:19 Ma bian nak, 'Au fe sos bijae pasan nim ma au poi he su' it sin. Kais muto'an kau.' 14:20 Ma es anten nak, 'Au fe mafe ulali es nane au ka etif.' 14:21 Ate nane anfani nem ma anetun ale lasi nane neu in usin. Uim tuaf nane nato' ma nak neu in ate, 'Hom poi nai lab bi lalan ma eno kot i. Mok sin nem ale amamu'it ma ao amle'ut ma afolot ma hae hela sin.' 14:22 Nalali te ate nane nak, 'Usi, ho plenat i au unaoba ulali, mes bale fe anmu'i esan.' 14:23 Mes Usif nane nak in ate, 'Hom poi nai bi ale lal uf ma lal seki sin ma museke ale atoni hen tam nem nahenu au ume. 14:24 Fun Au ak ki: Katit fa atoni mese na'ko alsin le anhone sin hen tamis mnahat bi Au tolas.' " 14:25 Atoni namfau nao natuin Yesus. Ma Yesus anik koti ma nak neu sin, 14:26 "Bait es nem neu Kau ma in ka na totan fa in amaf, in ainaf, in fel, in anhenu, in olif tataf ai in fetof sin ma in aon kun in ka nabe'i hen fani Au asimo lasi. 14:27 Sekau le in kan loi in hau nehe ma natuin Kau in ka nabe'i hen fani Au asimo lasi. 14:28 Sekau anbi ki le in he nahakeb el fatu, in kan toko nahunu fa hen so'i in baen, oni in noni hen tea ka, neu he nasop mepu nane ai kahaf? 14:29 Fun bait it anmo'e nalali in sukin ma ka nasopu nani fa, of alsin le nit nani, sin anmanis in 14:30 ma nak: 'Atoni i he nahakeb el fatu, mes in ka nabe'i he nalali nan.' 14:31 Ai, kesel me le in poi ma hen maken nok usif bian in antoko nahun hen so'i, in anpoi nok atoni nifun bo'es of nabe'i hen maken nok atoni nifun bo' nua ka? 14:32 Bati in ka nabe'if, of in anlelu haef leka in musu fe anbi lo hen toti halan pah. 14:33 Onane amsa hi, le ka nabela fa in mu'in, ka nabe'i hen fani Au asimo lasi. 14:34 Masi nane leko, mes bait in minan namneku, of naminab nafani neki sa' ka? 14:35 Ka naleko anten fa neu po'an ka, neu naet ka, so atpolin. Sekau anmu'i luken so mitnin nai!"
15:1 Ma ale asimo noni poni sin ma atoni asanat bian sin nem neu Yesus he amnen In a'an. 15:2 Ma Farisi sin ma ahin sulat sin, na'munu ma nak, "In ansimo atoni asanat sin ma nah nok sin." 15:3 Es nane Yesus na'uab neu sin lasi leta i, 15:4 "Bait anbi ki anmu'i bibi kase natun mese, ma in naneku mese, of in anmo'e sa' ka? In mes nasaitan bibi kase bo'sio am sio nane bi mnela ma in nao nami le amnekut nane tal napeni nafani. 15:5 Ma leka in napeni bibi kase nane, in malin ma nasae nani bi in hanun. 15:6 Ma in nem ante in ume, in no'en in ini sin ma apaumakat sin ma nak neu sin: Malin nai mok kau, fun au bibi kase amnekut nane au upeni ufani. 15:7 Au ak ki: Bi neno tunan anmu'i malinat naek neu atoni asanat mese le napis, nesin amneot sin bo'sio am sio le sin ka nate'un fa sin nekan." 15:8 "Ai bife me le anmu'i dirham bo'es, ma in naneku mese -- of in anmo'e sa' ka? In mes notu paku ma anpik ume ma naksani tal napeni nafani dirham nane. 15:9 Leka in napeni nafani dirham nane, in no'en in ini sin ma in apaumakat sin ma nak: Mimlil nai mok kau, fun au dirham amnekut nane au upeni ufani. 15:10 Onane amsa ahake Uisneno sin namlil fun atoni asanat mese napis na'ko in sanat sin." 15:11 Yesus na'uab anteni, "Anmu'i amaf mese anmu'i anmone nua. 15:12 Anmone kliko nak neu in amaf nak: Ama, Hom fe kau nai au ini na'ko hiti maus. Oke te sin amaf anbati maus nane neu sin. 15:13 Neno fauk namuni te anmone kliko nasosa ale sa' nane ma in nao kun neu paha lo. Bi nane in ansaken ale in maus ok-oke. 15:14 Leka in maus nane oke, amnahas mafena anbol bi pah nane ma oket in napeni mamu'it. 15:15 Nalali te in nao ma anmepu bi atoni mese bi pah nane. Atoni nane anlelu in hen pao in fafi sin bi lele. 15:16 In lomi he natua in tain neki fafi in mnahat mes katit fa es hen fe neu in. 15:17 Nalali te in nekan anbe' ma nak: Ale atoni le anmepu bi au ama, sin nahan nok athoes, mes au bi i he mate natuin amnahas. 15:18 Au he fen ma nao eu au ama ma au ak neu in: Ama, au usanab neu Uisneno ma neu ama nok, 15:19 au ka tamaf ota hem tek kau ho anmone; mo'e kau on ho atoni ameput mese. 15:20 Oket in anfen ma nao neu in amaf. Leka in fe bi lo onane te, in amaf nit in, ma nekan antu fun namnau nisan. In amaf naen nu ma anho nan ma nek in. 15:21 Anah nane nak neu in: Ama, au usanab neu Uisneno ma neu ama nok, au ka tamaf ota hem tek kau ho anmone. 15:22 Mes amaf nane no'en in atuthaes sin ma nak: Lab, meki kit blua pake alekot, he mipakeb in ma amtao kaleni neu in klulun ma penhae neu in haen. 15:23 Ma amhel man bia apokat nane, ma him lolo nai ma hit tol he tah ma atmalin. 15:24 Fun au anmone in anmate mes anmoni anfani, in namneku mes tapeni anfani. Ma sin anmo'e tolas amlilat. 15:25 Mes in anmone anaet bi lene ma leka in anfani nem ma anhaumak ume te, in nen tufu hanan, ma bonet hanan. 15:26 Oket in boin atuthaes mese ma natan in oni he lasi sa' bi ume. 15:27 Atuthaes nane nak: Ho oli anfani nem ma ho ama anlolo bia apokat, fun in napeni nafani in anmone nok aomina. 15:28 Anmone anaet nato'kun ma kan lomi fa hen tam. Onane te in amaf anpoi ma na'uab nok in. 15:29 Mes in natae amaf ma nak: Bi ton fauk-fauk au mepu mate fin he tuthae ama, ma au ka tanhai it fa ama ho plenat; mes ama ho kam fe mit kau fa bibi mese he au umlil ok au ini sin! 15:30 Mes leka ho anmone le ansaken nani ale ho maus nok bife a'paisa sin, in nem ante, ama hom lek hem lolo bia apokat neu in. 15:31 In amaf nak neu in: Anah, ho mok kau piut bi i, ma ale sa' nane ho ini kun. 15:32 So hit tamlil ma tam'oek nai, fun ho oli anmate mes anmoni anfani, in namneku ma mapeni anfani."
16:1 Ma Yesus nak neu In asimo lasi sin, "Anmu'i atoni amu'it mese le anmu'i apao maus mese. Atoni amu'it nane napeni hanaf nak in apao maus nane ansaken ini maus. 16:2 Oket in boin apao maus nane ma nak: Au nen sa' le antom ko ka? Ho mutae nai antom ho mepu pao maus, fun ho ka mube'i fa hem pao amteni maus. 16:3 Apao maus nane natenab bi in nekan: Au he mo'e sa'ka? Fun au tuan he napoitan kau u'ko au mepu. Foi afu au ka ube'if, he uktoti au mae kuk. 16:4 Au mu'i akal, leka napoitan kau na'ko au mepu, anmu'i atoni le ansimo kau bi sin ume. 16:5 Apao maus nane in boin ale atoni le natus neu in tuan. In nak neu ahunut nane nak: Ho mutus neu au tuan fauk ka? 16:6 Atoni nane natae nak: Mina kusi natun mese. In nak neu atoni nane: Ho sul tusa es i, hom toko nai ma amtui lab: Kusi bo'nim. 16:7 Nalali te in nak neu bian: Ma ho, ho mutus fauk ka? Atoni nane natae nak: Ane kase kalo natun mese. In nak neu atoni nane: Ho sul tusa es i, hom tui nai: Kalo bo'fanu. 16:8 Ma tuan nane nanaeb apao maus ak'elo nane, fun in mo'e ale sa' nok in manoen. Fun anah-anah pah pinan manoe nesin na'ko anah-anah meusine. 16:9 Ma au ak ki: Him pake nai maus pah pinan le ka namneo he mipeni hi nonot, he nati' leka maus pah pinan nane ka ma'upa fa, ansimo ki anbi um-ume Uisneno." 16:10 "Sekau na'ki anbi ale lasi an-ana, in na'ki amsa anbi ale lasi naek. Ma sekau apenut anbi ale lasi an-ana, in apenut amsa anbi ale lasi naek. 16:11 Bait hi ka mi'ki ambi maus pah pinan le ka namneo, sekau he nana'at neu ki maus le namneo ka? 16:12 Ma hi ka mi'ki neu es in maus, sekau he nana'at ki maus le hi ini kim? 16:13 Katit fa atuthaes le hen tuthae tuan nua; fun of in na'akan es ma in nek bian, ai in na'ki neu es ma kan lae fa bian. Onane hi ka mibe'i fa hem tuthae Uisneno ma maus pah pinan." 16:14 Farisi sin nen ale lasi nane, sin anmanis Yesus fun sin anlomi noni. 16:15 Ma In nak neu sin: "Hi mimneob hi aom bi pah pinan sin matan, mes Uisneno nahin hi nekam. Fun sa'le namnanu bi mansian, Uisneno anmainisin nani. 16:16 Plenat Knino ma mafefa knino sin noina ante batan Nai Yohanes Aslanit. Na'ko batan nane anetun Plenat Uisneno ini ma es-es anlomi he napeni nani. 16:17 Neno tunan ma pah pinan namneku, makafa nesin na'ko ale plenat Knino le Uisneno anfe nani fua mese anmofu luman. 16:18 Sekau le anpolin in fel ma anmafe nok bifel bian, nane in mo'e lasi kake; ma sekau anmafe nok bife mapolin, nane in mo'e kake amsa." 16:19 "Anmu'i atoni amu'it mese, antainus neki tainusat aklima ma pilu muti, neno-neno in malin piut. 16:20 Ma anmu'i atoni amamu'it mese kanan Nai Lazarus, in aon papa oke natupab nani anbi atoni amu'it sonaf nesun. 16:21 In lomi he natua in tain neki mnah lapuf le anmof na'ko amu'it nane in mei. Ma ale asu sin nem anlami in papa'. 16:22 Nalali te atoni amamu'it nane anmate, ahake neno tunan anloi neki neu Nai Abraham in aifan. 16:23 Atoni amu'it nane amsa anmate ma ansub nani. Ma in ansutai mane'at bi bale kasat. In anbaisenu ma na'ko lo in nit Nai Abraham, ma Nai Lazarus bi in aifan. 16:24 Ma in anbai ma nak: Ama Abraham, mumnau kau. Amlelu Nai Lazarus, hen lep in klulun tunan bi oe ma napet au mak, fun au upeni menas bi ai maputu i. 16:25 Mes Nai Abraham nak: Anah, mumnau fe, afi hom simo mulali alekot bi pah pinan mes Nai Lazarus ansimo amle'ut. Leku i in napeni halinat ma hom sutai amle'ut. 16:26 Ma nesi na'ko nane anbi hit atnanak anmu'i kefa mnanu le kat lak tani fa, he nati' sin le hen lak na'ko i net neu ki ai sin le hen lak na'ko nane nem neu kai ka nabe'i fa. 16:27 Ma atoni nane nak: Kalu onane, au toti ko, ama, he nati' hom lelu in neu au ama ume. 16:28 Au oilfenu sin nim fe esan, he nati' in na'uab sin lek-leko, he kais sin antam nem neu bale mane'at i. 16:29 Mes Nai Abraham nak: Sin anmu'i Nai Musa ma mafefa knino sin sulat; maut sin nen ma natuin sa' le antui nani bi sulat nane. 16:30 Mes atoni nane nak: Kahaf, ama Abraham, bait es anfen na'ko amates nao neu sin of sin nate'un sin nekan. 16:31 Mes Nai Abraham nak neu in: Bati sin ka nen fa Nai Musa ma mafefa knino sin hanan, onane amsa of sin ka nenaf atoni amates le anfen anfani sin hanan."
17:1 Usif Yesus na'uab neu In asimo lasi sin, "Lasi keku of anbol, mes amle'ut neu atoni le neki lasi keku nane. 17:2 Leko nesi anfutun fatu esu neu in neon, ma atpolin tatam in neu tasi, na'ko in nakeku atoni mese hen mo'e sanat. 17:3 Panat nai hi aom! Bati ho bia in anmo'e sanat, mukain mani ma bait in na'tofon amsako in sanat. 17:4 Bati in nasanab neu ko neno mese haef hitu ma in nem neu ko haef hitu ma nak: Au utofoken, ho mes amsako in sanat." 17:5 Oket asimo lasi sin nak neu Usif Yesus nak, "Usif, amhatani kai hai nek palsait!" 17:6 Ma Usif In nak: "Kalu hi nek palsait ini naen on bonak fuan, of hi mak neu hau bubuk i: Mutbok nai ma amsenom bi tasi, ma in of natuin hi plenat." 17:7 "Sekau anbi ki anmu'i atuthaes mese le anfoi nain ai natuku mu'it, le nak neu in atuthaes nane, leka in fani nem na'ko lele: Aum nai he muah! 17:8 Kahaf, of in nak neu atuthaes nane: Mubalab kau he au bukae. Hom futu ho tnanam ma amtuthae kau fe, tal au uah ma inu ulali. Oke te nabe'i ho muah ma minu kum. 17:9 Ai in antoti telima kasih neu atuthaes nane, fun in anmo'e nalali sa' le anlek nani neu in ka? 17:10 Onane te hi amsa. Leka hi mo'e milali sa' le anlek nalali neu ki, hi mes mak: Hai le i atuthaes ka ma'upa kai; al hai mo'e sa' le anlekan nani neu kai." 17:11 Anbi In lalan nao neu Yerusalem Yesus anfini pah Samaria ma Galilea atnanan. 17:12 Leka In antam bi kuan mese, atoni men poko bo'es nem naeku nokan. Sin anhake bi lo, 17:13 ma sin anbai nak, "Yesus, Anoni, mumnau kai fe!" 17:14 Yesus ankiso sin ma nak, "Him nao nai, milile hi aom neu Ana' fuat knino." Ma leka fe sin anbi lalan atnanan sin menas nane namneku. 17:15 Mes amenat mese leka in nit nak in naleko na'ko in menas, in fani nem, fun anpules Uisneno nok hanan naek; 17:16 ma anmof hae neu Yesus ma natulu nekan neu In. Atoni nane atoni Samaria. 17:17 Ma Yesus nak: "Ait sin ka atoni bo'es fa le nalekon ka? Sio enu es kin me ka? 17:18 Ma katit fa es na'ko sin anfani nem hen pules Uisneno al atoni mese i ka?" 17:19 Oke te Yesus nak neu atoni nane nak, "Hom fen nai, ma hom nao nai, ho nek ateb knino es naleko' ko." 17:20 Atoni Farisi sin natan Yesus, leka Plenat Uisneno he nem. Ma Yesus natae sin nak, "Plenat Uisneno nem ka nok fa taka le mamnita, 17:21 he atoni sin na'uab nak: Kiso, in es i, ai in es nae! Fun Plenat Uisneno es hi atnanam." 17:22 Ma In nak neu In asimo lasi sin: "Of In neno nem ma him lomi he mit neno mese na'ko Anmone Pah To in neno-neno nane, ma hi ka mit mani fa. 17:23 Ma of sin nak neu ki: Kiso, in es nae, kiso in es i! Kais him nao meu nane, ma kais hi mituin. 17:24 Fun on limat anpin na'ko neno tukan neu tukan bian, onane amsa anbi neno Anmone Pah To hen koenon nem. 17:25 Nahunun In mes ansutai mane'at naek, ma batan i of antite In. 17:26 Ma on afi bi batan Nai Nuh, onane amsa bi neno Anmone Pah To. 17:27 Sin nah ma sin ninu, sin mafe ma anmamonen talan te Nai Nuh antam bi bnao, ma oe sako nem ma nale'un sin ok-oke. 17:28 Onane amsa bi batan Nai Lot: Sin nah ma sin ninu, sin ansos ma nasosa, sin ansen ma nafena ume. 17:29 Mes bi neno Nai Lot anpoi na'ko Sodom, ul ai ma ul upat ansanu na'ko neno tunan ma nale'un nani sin alsin. 17:30 Onane amsa bi neno Anmone Pah To he naklile In aon. 17:31 Bi neno nane sekau nbi ume penen ma in bale bi ume nanan, kais in sanu he naiti nani, ma onane amsa sekau anbi lene, kais in anfani. 17:32 Mimnau Nai Lot in fel! 17:33 Sekau in nami he namonib in smanan of naneku nani, ma sekau naneku in smanan of namonib nani. 17:34 Au ak ki: Of bi fai nane anmu'i atoni nua antup bi hala mese, of neki es ma es nabalah. 17:35 Anmu'i bife nua anfole esu bi bale mese, of neki es ma in es nane nabala." 17:36 (Anmu'i atoni nua anbi lele of neki es ma in es nanenabalah.) 17:37 Sin nak neu Yesus, "Uisneno, lasi nane of anbol bi me." Yesus nak neu sin, "Punu' anbi me te, kol ka anbi nane amsa."
18:1 Ma Yesus na'uab neu sin lasi leta mese hen etun, nak sin an o'nen toti piut ma kais anlenan. 18:2 Yesus nak, "Bi kuan mese anmu'i alef lasi mese le ka namtausan fa Uisneno ma kan sian fa sekau amsa. 18:3 Ma bi kuan nane amsa anmu'i bife banu mese le in nem piut-piut neu alef lasi nane ma nak: Mumnau kau fe antom atoni le anmatoe nok kau. 18:4 Alef lasi nane kan lomif. Mes namuni te in natenab bi in nekan: Maski au ka umtausan fa Uisneno ma ka sian fa sekau, 18:5 mes natuin bife i nem piut, leko au lefi in lasi, he nati' kais in nasusab kau." 18:6 Ma Usi nak: "Him tai lek-leko sa' le alef lasi apenut nane na'uab nani! 18:7 Ait Uisneno of ka namneob fa In atoni mabeti sin le ananbai neu In fai manas ka? Ait In naniaon neu hen tulun sin ka? 18:8 Au ak ki: In of namneob sin laba. Mes leka Anmone Pah To nem, of In he napeni atoni apalsait bi pah pinan ka?" 18:9 Ma Yesus na'uab anteni lasi leta i neu atoni le in tek in aon amneot kun ma ankiso tanhai atoni bian. 18:10 Yesus nak, "Anmu'i atoni nua nao neu Ume Uisneno hen onen toti; le es atoni Farisi ma es atoni asimo noni poni. 18:11 Atoni Farisi anhake ma anonen bi in nekan nak: Koi Uisneno, au utulu nekak neu Ko, fun au ka on fa atoni bian, asikat, abulalut, amo'e lasi kake. Ma au ka on fa atoni asimo noni poni i. 18:12 Au unahok klei mese hae nua, au utulu bati bo'es na'ko ale au sa'-sa'. 18:13 Mes atoni asimo noni poni nane anhake bi lo, ma in kan lomi fa amsa hen baisenu neu neno tunan mes in anke basan ma nak: Koi Uisneno, mumnau kau, atoni asanat kau. 18:14 Au ak ki: Atoni asimo noni poni nane anfani neu in ume on atoni le Uisneno namneob nani ma atoni Farisi nane kahaf. Fun sekau nanaeb in aon, of nabaun nani; ma sekau nabaun in aon of nanaeb nani." 18:15 Anmu'i atoni le sin neki li'ana nem neu Yesus, he nati' In anpoh sin. Leka asimo lasi sin nit onane te sin nato'an ale atoni nane. 18:16 Mes Yesus no'en liana sin ma nem neu In ma nak, "Mifetin li'ana-li'ana nane he nem neu Kau. Kais mikain sin, fun atoni onle nane es napeni Plenat Uisneno. 18:17 Tebes Au ak neu ki: Atoni le kan simof Plenat Uisneno onle li'ana mese in of kan tamaf neun." 18:18 Atoni makana mese antoti Yesus nak, "Anoni alekot, au he mo'e sa' ka he upeni honis nabal-bal?" 18:19 Yesus natae ma nak, "Nansa hom tek Kau mak alekot ka? Kan mu'if atoni alekot al Uisneno In mes kun. 18:20 Ho muhin mulali ale plenat Uisneno: Kais mo'e lasi kake, kais matoe, kais mubak, kais mupoibom, mumtausan ho ama ma ho aina." 18:21 Atoni nane nak, "Ale plenat i au utuin ulali sin na'ko fe au munif kau." 18:22 Leka Yesus nen uab nane In nak neu atoni nane, "Al lasi nono mese le ho fe ka mo'e mani. Musosa mani ale ho maus ma ambait mani neu amamu'it sin, ma of ho mupeni maus bi neno tunan. Oket aum nai ma mituin Kau." 18:23 Leka atoni nane in nen a'at nane, in nekan na'unu, fun in atoni amu'it kun. 18:24 Leka Yesus nahin nak atoni nane nekan antu' In na'uab neu in nak, "Mafen le'uf neu atoni amu'it hen tam neu Plenat Uisneno. 18:25 Bikase paha snaen antam nan anet in a'bolan, makafa nesin atoni amu'it hen tam neu Plenat Uisneno." 18:26 Ale atoni le sin nen Yesus uab nane sin nak, "Kalu onane sekau es he napeni honis ka?" 18:27 Yesus nak, "Sa' le ka nabe'i fa neu mansian, nabe'i neu Uisneno." 18:28 Nai Petrus nak, "Kiso, hai misaitan ale hai ini ma mituin Ko." 18:29 Yesus nak neu sin, "Atoni le nasaitan in ume, in fel ai in olif tataf, in amaf ainaf ai in anhenu, natuin mepu Uisneno, 18:30 of napeni baen kuni peni batan i, ma bi batan amnemat of napeni honis nabal-bal." 18:31 Usif Yesus nabuab In asimo lasi bo'es am nua ma na'uab neu sin nak, "Mnen nai, hit het nao teu Yerusalem ma ale lasi antui nani bi mamfefa knino sin sulat antom Anmone Pah To, of natiabon. 18:32 Ma of nana'at nani In neu atoni le ka nahin Uisneno, oket sin nasi'u, na'akan ma nakinu In. 18:33 Of sin hamu'i ma namate In, mes bi neno tenu In fen anfain." 18:34 Mes asimo lasi sin ka nahin fa ale lasi i; a'at in oten naninbon neu sin, ma sin ka nahin fa Yesus In molok nane he sa' ka. 18:35 Bi neno Yesus anpaumak kot Yerikho anmu'i atoni afolot mese antok bi lalan ninen ma naktoti ai anlomati. 18:36 Leka in nen atoni namfau nao natuin nane te in natan ma nak, "Sa' es nane ka?" 18:37 Oket sin etun nak, "Yesus, atoni Nazaret anfin nok i." 18:38 Afolot nane anhunun ma nak, "Yesus Nai Daud sufan, mumnau kau fa!" 18:39 Ma atoni le anao ahunut sin nakain in he nati' natena. Mes in naiti hanan nesi anten nak, "Koi, Nai Daud sufan mumnau kau fe!" 18:40 Ma Yesus nasnas ma anlelu sin he neki afolot nane nem neu In. Ma leka in nem paumak, Yesus natan in nak, 18:41 "Hom lomi, Au mo'e sa' neu ko ka?" Atoni nane nak, "Uisneno, au lomi he it fani." 18:42 Oket Yesus nak, "Mu'et nai, ho nek ateb knino naleko' ko." 18:43 Bi leku nane amsa in nit anfani, ma natuin Yesus fun anpules Uisneno. Ma ale to sin nit lasi nane ma naliatas Uisneno.
19:1 Ma Yesus antam bi kot Yerikho ma In nao anfin kot nane. 19:2 Bi kot nane anmu'i atoni mese kanan Nai Zakheus, asimo noni poni sini nakaf ma Nai Zakheus nane atoni amu'it kun. 19:3 In lomi he nit Usif Yesus, mes in ka nit nani fa fun atoni namfau ma in kol-kole kun. 19:4 Es nane in naen nahunun atoni mfaun ma ansae neu bubuk tunan he nit Yesus le he naon fin natuin nane. 19:5 Leka Usif Yesus ante bale nane, In anbaisenu ma nak, "Zakheus, hom sanu nai, fun neno i Au he umaika bi ho ume." 19:6 Ma Nai Zakheus ansanu lab-lab ma ansimo Yesus nok amlilat. 19:7 Mes atoni le sin nit lasi nane sin na'munu ma nak, "In hen tam neu atoni asanat in ume." 19:8 Mes Nai Zakheus anhake ma nak neu Yesus, "Usif, au mu'ik in aon bian au he bati neu amamu'it sin ma kalu au ukliup es in sa' of au fe ufani no ha." 19:9 Yesus nak, "Neno i tetus ma mnit anbol neu ume i, fun atoni i amsa Nai Abraham in sufan. 19:10 Fun Anmone Pah To In nem he nami ma nahoni amnekut sin." 19:11 Ma sin fe natnin lasi le Yesus na'uab nani, In na'uab anteni lasi leta mese. Fun Yesus haumak kot Yerusalem ma sin natenab nak Uisneno he nanaob In plenat on Usif bi pah pinan. 19:12 Ma Yesus In nak, "Anmu'i atoni makana mese in nao neu pah mese le na'lo he naiti anfani kesel anbi nane ma namuni te in fani nem. 19:13 In boin in ate sin bo'es ma anfe sin noni mnatu bo'es, ma in nak: Him pake noni i he misosa talan te au fani aum. 19:14 Mes ale atoni le sin kuan mese nekan na'unu neu atoni nane, es sin ansonu haef nao natuin in he naton nak: Hai kam lomif he atoni nane ansae usif bi kai. 19:15 Leka naiti nalali atoni nane fani kesel, in fani nem neu in kuan. In lelu hen boin in ate sin, le afi in anfe noni neu sin, fun in he nahin sini sosa nane onme ka. 19:16 Ate ahunut in nem ma nak: Usi, noni mnatu mese le hom fe kau au usufab fani bo'mese. 19:17 In nak neu ate nane: Leko, ho ate alekot ko. Fun ho nek amneot ko bi lasi an-ana, au aiti ko hem fani akuasat bi kot bo'es. 19:18 Ma ate tnanan nem nak: Usi, ho noni mnatu nane au usufab fani nim. 19:19 In nak neu ate nane: Ho muplenat nai kot nim. 19:20 Ma ate amunit nane in nem ma nak: Usi, ho noni mnatu es i, au ubela ani bi pilu. 19:21 Fun au umtausan ko, ho atoni maspeti ko; ho maiti sa' le ho ka mubela mani fa, ma hom abut sa' bi bale le ho kam sen mani fa. 19:22 Usif nane nak neu in: Ho ate apenut ko, au lefi lasi natai nok ho fefam kum. Ho muhin mak au atoni amaspetis kau, au ait sa' le au ka ubela ani fa ma au abut sa' le au ka sen ani fa. 19:23 Nansa ho ka muna'at fa au noni neu atoni le nasufab noni ka? He nati' leka au fani aum te au simo ufani noni nane nok in sufan. 19:24 Ma usif nane nak neu sin le anhake bi nane: Maiti nai noni mnatu mese i na'ko in ma amfe mani neu atoni le anmu'i noni mnatu bo'mese nane. 19:25 Ma ale atoni nane sin nak neu in: Usi, in anmu'i kun noni bo'mese. 19:26 Usif nane natae: Mimnau, atoni le anmu'i of anfe neu in nesi, mes sekau le kan mu'if, naiti na'ko in sa' le in anmu'i. 19:27 Mes ale au musu sin, le sin kan lomi fa he au fani kesel neu sin, mok sin nem bi i ma mimate sin bi au matak." 19:28 Ma leka Usif Yesus na'uab nalali onane, In nao nahunun sin neu Yerusalem. 19:29 Leka sin nem anhaumak kuan Betfage ma Betania, bi Tubu Zaitun, Usif Yesus anlelu In asimo lasi nua 19:30 ma nak, "Him nao neu kuan le anbi hi matam nane: Leka him tam bi nane of hi mit bikase luke mnanu tipu mese mafutu ma fe ka nam nonon fa. Him sefi tani ma meki nem neu i. 19:31 Kalu es natan ki: Nansa es him sefi bikase nane? Hi mitae mak: Usif hen sae." 19:32 Sin nua sin nao, ma sin napeni sa' onle Usif Yesus anba'an sin. 19:33 Leka sin sefi bikase nane, te bikase tuaf nak, "Nansa him sefi bikase nane?" 19:34 Sin nak, "Usif hen sae." 19:35 Sin neki bikase nane neu Usif Yesus. Oket sin na'peni nani neki sin tainusat ma nasaeb Yesus neu bikase nane. 19:36 Ma leka In ansae ma nao, sin nauf sin tainusat ma na'ben bi lalan nane. 19:37 Leka Yesus anhaumak kot Yerusalem bi lalan le ansanu na'ko Tubu Zaitun, ale amnaubat sin namlil ma nanaeb Uisneno neki hanan naek fun ale lasi amkakat le sin nit nalali. 19:38 Ma sin nak: "Nahoeb alekot neu Usif Yesus le ankoenon nem on Kesel anbi Uisneno In kanan, halan nekaf bi neno tunan ma apinat bi tuna' latan!" 19:39 Atoni Farisi fauk na'ko to mfaun nane nak neu Yesus, "Anoni, mukaina Ho asimo lasi sin." 19:40 Yesus natae sin, "Bati sin natena, of ale fatu i sin tekal a'baf." 19:41 Ma leka Yesus nem haumak ma ankiso nit kot Yerusalem te In ankae ma nanof matnu neun. 19:42 Ma In nak, "E, kasian, bait neno i ho muhin lasi sa' le he neki neu hal nekaf! Mes tomas i lasi nane naninbon bi ho matam. 19:43 Fun of in neno nem, ho musu anmo'e nenu' funam natef ko ma anhake napun ko ma anhabnesa nan ko. 19:44 Ma sin of naskuku ko nok ale ho to ma anbi ho baki lape of sin ka na'oi fa fatu mese nabala bi in balan, fun ho kam panat fa leku tabu le Uisneno he namonib ko." 19:45 Ma Yesus antam neu Ume Uisneno ma anliu napoitan ale atoni a'sosa bi nane. 19:46 In nak neu sin, "Antui bi Sulat Knino nak on i: Uisneno nak: Au Ume nane Ume onen totis. Mes hi mo'e mani on nuat asikat." 19:47 Neno-neno Yesus nanoni bi Ume Uisneno. Ale Ana' fuat knino nakaf ma ahinet Sulat sin ma atopu to Yahudi sin nami he namate In. 19:48 Mes sin ka napeni fa lalan hen mo'e nani onme, fun to ok-oke futun nekan neu In ma anlomi he natnin In a'an.
20:1 Ma ante neno mese leka Yesus nanoni ma anetun Beno Alekot na'ko Uisneno neu to bi Ume Uisneno. Oke te Ana' fuat knino ma Ahin Sulat nok atopu to Yahudi sin nem bi bale nane. 20:2 Ma sin na'uab neu Yesus nak, "Muton kai fe. Ho mo'e ale lasi i meki kuasat me ma sekau es anfe Ko kuasat nane?" 20:3 Yesus natae sin, "Au amsa he utan ki lasi mese. Miton Kau nai: 20:4 Nai Yohanes le naslani atoni nane in napeni na'ko Uisneno ai na'ko mansian?" 20:5 Sin malomin ma nak: "Kalu hit tak: Na'ko Uisneno, lof In nak: Nansa' hi nekam ka nateb nani fa? 20:6 Mes kalu hit tak: Na'ko mansian, ale to ok-oke lof anpoli kit neki fatu, fun sin nateb nak Nai Yohanes nane mafefa knino kun." 20:7 Es nane te sin natae nak' hai ka mihin fa lasi nane na'ko me. 20:8 Ma Yesus natae sin nak: "Onane Au amsa ka uton ki fa Au mo'e ale lasi nane eki kuasat sa'." 20:9 Ma Yesus na'uab neu to mfaun neki lasi leta mese nak, "Atoni mese ansen lele tanu'an sena. In nana'at lele nane neu atoni ameup lele ma in nao kun neu pah bian ma namaika suk a'lo. 20:10 Ma leka etin ante, lele tuaf anlelu in ate nao neu ameup lele sin he nati' sin anfe neu sin tanu'an sena fuan bian. Mes ameup lele sin anbiso ate nane ma anlelu in fani nok nim luman. 20:11 Oke te lele tuaf ansonu anten ate bian, ma sin anbiso ate nane ma namaeb nisan oket ansonu in anfani nok nim liman. 20:12 Mes in ansonu anteni ate hae tenu, mes sin napapa' ate nane amsa ma anpolin napoitan neu lele kotin. 20:13 Oket lele tuaf nane nak: Au he mo'e sa' ka? Au he sonu au anmone le au nek ani of sin namtausan in. 20:14 Mes leka amepu lele sin nit anah nane sin makusab uab, nak: Amnemat i in of es ansimo bale mnasi, leko hit tamate; he nati' hit tapeni bale mnasi nane. 20:15 Ma sin anhel napoitan neu lele kotin ma namate in. Onane te lele tuaf of anmo'e sin onme ka? 20:16 Of in nem ma namate ale amepu lele nane sin, ma anfe lele nane neu atoni ameput bian." Leka sin nen a'an nane atoni sin nak neu Yesus, "Kaisa onane!" 20:17 Mes Yesus ankiso sin ma nak, "Kalu onane a'an bi Sulat Knino i in oten sa' ka? Fatu le amepu ume anpolin nani, anfani fatu sukit makana. 20:18 Sekau anmofu bi fatu nane, of in nakpete, ma fatu nane na'beku sekau of in naskuku." 20:19 Ma Ahin Sulat ma Ana' fuat knino nakaf sin sali hen heke Yesus bi leku nane amsa; fun sin nahin nak lasi nane antom neu sin. Mes sin namtausan to mfaun nane. 20:20 Ahinet Sulat ma ana' lasi fuat nakaf sin natnu' Yesus. Es nane sin lelu atoni le anmo'e son on atoni alekot he natnu' Yesus. Ma na'koke neki totis namfau he nati' napeni Yesus bi In uab oke te nana'at nani neu ana' kuasat ama kumlol ini. 20:21 Atoni-atoni nane sin neki tanas neu Yesus nak, "Anoni, hai mihin. Ho uab ma Ho noina nane namneo ma Ho kam beti fa humaf, fun Ho munoni lalan Uisneno nok amneot. 20:22 Mes hai mitan Ko, hai mes hem baen noni poni neu Kesel ka ai kahaf?" 20:23 Mes Yesus nahin sin ak'elon nane, ma nak neu sin, 20:24 "Ati milile Kau noni mese fe; sekau human ma sekau tuis anbi nane ka?" Sin natae nak, "Kesel ini." 20:25 Yesus nak neu sin, "Bati onane him fe nai neu Kesel sa' le Kesel ini ma neu Uisneno sa' le Uisneno ini." 20:26 Ma sin ka napeni fa Yesus In sanat bi uab fefa mese amsa anbi to sin matan. Mes sin namkakan neu In han taes nane ma sin natena. 20:27 Ma atoni Saduki bian le sin natotan lasi amates anfen anfani sin nem neu Yesus ma natan In nak, 20:28 "Anoni, Nai Musa antui neu kai: Kalu atoni mese anmate mes ka nahonif anah, onane te olif hen mafe nok in tataf fe banu, he nahonis anah neu in tataf amates nane. 20:29 Neu anmu'i atoni hitu le maoli tatan. Ma anaet nane in mafe nok bife es, mes in anmate ma ka nahonif. 20:30 Onane te olif le natuin in anmafe nok bifel nane. 20:31 Onane amsa olif hae tenu talan te sin hitu sin ma'akatuin, sin anmate oke ma ka nahonin fa anah. 20:32 Namuni te bife nane anmate amsa. 20:33 Neu, leka amates anfen anfani bifel nane in mone es sekau? Fun sin hitu alsin mafe nalali nokan." 20:34 Ma Yesus nak neu sin nak, "Bi pah pinan i mansian anmafe ma anmamone; 20:35 mes atoni le antam ota hen fen anfani, ma anmoni bi batan amnemat of sin ka mafe mamone fa. 20:36 Fun sin kan mate fa; mes sin namnes nok ahake neno tunan, ma on anah-anah Uisneno fun nafena nafani sin na'ko amates. 20:37 Lasi amates anfen anfani nane, Nai Musa anetun nalali anbi Sulat Knino antom kis lubu, le in antek Uisneno nane Uisneno Nai Abraham, Nai Ishak ma Nai Yakub. 20:38 Fun Uisneno nane ka Uisneno atoni amates, mes Uisneno atoni amonit, fun sin anmoni alsin neu Uisneno." 20:39 Ma Ahin Sulat bian nak, "Anoni, Ho han taes nane namneo." 20:40 Kiso, katit fa es he natan anten sa' neu Usif Yesus. 20:41 Ma Usif Yesus natan neu sin nak, "Leka me antek nak, Kesel Afetin amneki honis nane Nai Daud in anmone? 20:42 Nai Daud in neknon antui bi sulat Sit Pules nak: Uisneno nak neu au Usi nak: Hom tunom nai bi Au nimak ne'u, 20:43 talan te Au tao Ho musu anbi Ho haem nupun. 20:44 Es Nai Daud antek Kesel Afetin amneki honis nane in Usi, leka me In anfani Nai Daud sufan?" 20:45 Leka ale to sin nem ok-oke, Yesus na'uab neu In asimo lasi sin nak, 20:46 "Him panat nai hi aom neu Ahin Sulat sin, le naoinsok nok pake amasat ma he napeni kan tola bi masa; lomi hen tok bi bale makana anbi ume buat ma anbi tolas. 20:47 Sin nasik bife banu sin ume, ma antobe sin moet apenut neki onen totis mnanu. Of sin napeni kasat mafen le'uf."
21:1 Leka anbi Ume Uisneno, Yesus nit atoni amu'it natam sin fua tulu bi peti fua tulu. 21:2 Fun Yesus nit amsa bife banu amamu'it mese natam loi molo pisa nua neu peti nane. 21:3 Ma Yesus nak, "Mitnin nai, bife banu amamu'it i natam nesin na'ko ale atoni bian. 21:4 Fun ale atoni nane sin natam fua tulu na'ko sin athoes. Mes bife banu i anfe na'ko in manukat ma anfe in mu'in ok-oke." 21:5 Ma bian sin namolok antom Ume Uisneno le namasab nani neki fatu alekot ma ale bale le natulu neu Uisneno. Yesus nak: 21:6 "Leka in neno ante, ale sa' le hi mit nane of anpukai nani; katit fa fatu mese le naktut'on bi fatu bian." 21:7 Ma asimo lasi sin natan neu Yesus nak, "Anoni, ale lasi nane of leka anbol ka? Ma ini taka nane sa' leka ale lasi anbol?" 21:8 Yesus nak, "Panat nai, kais anhel ansan ki lanan. Fun atoni namfau of sin nem neki Au kanak ma nak: Au es kau i, leku anbolen. Kais hi mituin sin. 21:9 Ma leka him nen lasi makenat ma bulalu, kais hi mimtau. Fun ale lasi nane of anbol nahun, mes neno hatas amsoput nane fe ka nem ante." 21:10 Yesus na'uab neu sin nak, "Uf nok uf naiti makenat ma pah nok pah bian an ma'autun. 21:11 Ma nainunus naek, amnahas ma menas of anbol bi bale-bale. Fun hakataus ma taka na'ko neno tunan anbol ma naskekeb ki. 21:12 Mes nahunu na'ko ale lasi nane of anheke ki ma anhamu'i ki. Ma nana'at ki bi ume-ume buat ma pa'an-pa'an ma antopu neki ki bi kesel-kesel ma anaet-anaet sin matan natuin Au kanak. 21:13 Nane anfani leku mainuan he nati' him etun lasi knino. 21:14 Miloitan nai hi nekam, kais mitenab mak of hi mi'uab sa' antom hi aom. 21:15 Fun of Au fe ki hine ma keon talan te katit fa es le hem be'u ki. 21:16 Ma hi ama hi aina, ma hi olif hi tataf, ma hi bae ma hi benu sin of nana'at ki, ma of bian anbi ki sin namate nani. 21:17 Ma of sin anli'u ki natuin Au kanak. 21:18 Mes hi nakfunu nono mese of ka namneku nitaf. 21:19 Leka hi malan mibe'i of hi mipeni honis." 21:20 "Leka hi mit solalus hake natef kot Yerusalem, mihin nai mak kot nane haumak he namle'u. 21:21 Bi tomas nane ale atoni bi pah Yudea sin mes naen neu pah neten. Ale atoni bi kot Yerusalem sin poi nasaitan ma ale atoni bi kuan kais sin antam bi kot nanan. 21:22 Fun nane neno sesut anbol he nati' Sulat Knino in hanan nateabon kun. 21:23 Amle'ut neu bife le sin na'apu ai ainaf le fe nasusu anah bi neno nane. Fun of susal mafena nem neu pah nane ma to'as Uisneno nem neu to i. 21:24 Ma sin natsel natuin suni aikan ma neki bian neu pah-pah on ate ma ale to le ka nahin Uisneno anteli naklati kot Yerusalem talan te natiab lekat Uisneno neu batan nane." 21:25 "Ma of anmu'i taka bi manas, ma bi funan ma bi afkun-afkun. Bi pah pinan ale pah namtau ma nasu'nu natuin tasi in oki ma slutun. 21:26 Ale atoni sin anmate natuin amtaus ma nekan namneku natuin ale sa' le nem neu pah pinan, fun neno tunan nok in matanin nabeko nok. 21:27 Bi leku nane Anmone Pah To of nem bi nope nok kuasat ma apinat naek. 21:28 Leka ale lasi nane anbol, fen nai mutetu nekam nai, fun hi afetin haumaken." 21:29 Oket Yesus na'uab neu sin lasi leta mese nak, "Kiso nai hau bubuk ai ale hau bian. 21:30 Leka hi mit ale hau nane sin nasnuk nalali, hi mihin mak fauknais anhaumaken. 21:31 Onane amsa, leka hi mit ale lasi nane anbol te, hi mihin mak plenat Uisneno haumaken. 21:32 Au aki ki: Batan i of kan fini fa, talan te ale lasi anbol. 21:33 Neno tunan ma pah pinan of anfin, mes Au a'ak nane nabala talan te nabal-bal." 21:34 "Him panat nai hi aom he nati' kais hi nekam nasenipon neu fesat ma mafu tua ma ale paisa paha pinan, he nati' kais Uisneno leku le'at nem neu ki onle le'o le naskekeb ki. 21:35 Fun of In nem neu ale to bi pah pinan i. 21:36 Es nane him be' nai ma him panat nai fun him onen toti bi ale leku, he nati' hi mipeni matani ma miskotun ale sa' le hen bol nem ma hi ala ki amhake bi Anmone Pah To In matan." 21:37 Yesus nanoni bi Ume Uisneno nok manas ma fafai In nao neu Tubu Zaitun. 21:38 Ma nok-noka te ale to nem neu In bi Ume Uisneno he nen In noina.
22:1 Neno Naek Utunu' Kan Pake fa Lalu haef, le antek nak Paskah ai fuat afinit nem an haumak. 22:2 Ale Ana' fuat knino nakaf ma ahinet Sulat sin nami lalan, he namate Yesus onme fun sin namtausan to mfaun nane. 22:3 Oke te Nitu antam neu Nai Yudas, le antek nak Iskariot, asimo lasi mese na'ko Yesus In asimo lasi bo'es am nua. 22:4 Ma Nai Yudas anpoi ma nao neu ale Ana' fuat knino nakaf ma ale nakaf apao Ume Uisneno, ma na'uab nok sin, he nana'at Yesus neu sin onme. 22:5 Ma sin namlil ma malomin hen fe Nai Yudas noni. 22:6 Nai Yudas anlomi, ma in nami leku manuan he nana'at Yesus neu sin fun to mfaun nane kais nahinen. 22:7 Fun Neno Naek Utunu' Kan Pake fa Lalu haef ante nak hen lolo bibi kase ma naloitan mnahat neu Tolas Paskah. 22:8 Oket Yesus anlelu Nai Petrus ma Nai Yohanes nak, "Him nao nai, mibalab kit Tolas Paskah he hit bukae." 22:9 Ma sin nak neu Yesus, "Hom lomi hai mibalab bi me ka?" 22:10 Yesus nak, "Leka him tam bi kot nane of hi mie'ku mok atoni mese le neki nai oe. Mituin in neu ume le hen tam neun, 22:11 ma hi mak neu ume tuaf nane: Anoni natan ko nak: Bi ke'an me ka Au ok Au asimo lasi sin hem bukae Tolas Paskah? 22:12 Oket ume tuaf nane of anlekan ki ke'an naek mese bi fafon le naloitan nani; ma hi mibalab anbi nane." 22:13 Ma Nai Petrus nok Nai Yohanes sin nao ma sin napeni sa' onle Yesus naton nalali sin. Ma sin nabalab Tolas Paskah onane. 22:14 Leka leku ante, Yesus antok bi mei tolas ma anbukae nok In asimo lasi sin. 22:15 Ma Yesus nak neu sin, "Au lomi he bukae Tolas Paskah i ok ki nahunun Au he sutai mafena. 22:16 Fun Au ak ki: Of Au ka bukae teni fa ok ki talan te tolas in nateabon bi Plenat Uisneno." 22:17 Oket Yesus naiti klas nok tua mina amtasa ma natulu nani neu Uisneno ma nak, "Maiti nai ma ambati nai neu ki. 22:18 Ma mihin nai, na'ko leku i Au ka inu teni tanu'an sena in oen talan te plenat Uisneno nem." 22:19 Oket Yesus naiti utunu' ma natulu nani, oket anebi nani ma anfe neu sin, ma nak: "I Au aok (le anfe nani neu ki; mo'e nai lasi i anfani amnaut neu kau." 22:20 Onane amsa Yesus anmo'e neu klas mninu leka sin bukae nalali, nak, "Klas mninu i lasi mantaen fe'u bi Au na' le an op nani neu ki. 22:21 Mes him kiso, atoni le he nana'at Kau, antoko nabua nok Kau bi mei i. 22:22 Fun Anmone Pah To In nao onle Uisneno anlek nani, mes amle'ut neu atoni le ana'neb In." 22:23 Nalali te sin matoti es nok es nak, sekau es hen mo'e lasi nane. 22:24 Onane amsa lasi matoes anbi Yesus asimo lasi sin, sekau es nanae nesi anbi sin. 22:25 Ma Yesus nak neu sin, "Ale kesel pah naplenat sin to ma ale atoni le nanaeb kuasat neu sin nane, antek sin aneot amafot. 22:26 Mes hi kais onane, so anaet anfani on abaut ma nakaf nane anfani atuthaes. 22:27 Fun sekau es naek nesi, le antoko ma anbukae, ai le antuthae nane? So mak atokos nane ai? Mes Au bi hi atnanam on atuthaes. 22:28 Hi mibala mok Kau bi ale lasi su'at le Au he sutai ani. 22:29 Fun onle Au Ama anfe Kau he uplenat, onane amsa Au fe neu ki. 22:30 Onane te of hi miah ma minu mok Kau bi mei mese anbi Au plenat ma of him toko bi toko alef lasi he miplenat uf Israel bo'es am nau. 22:31 Simon, Simon, kiso, Nitu anto'i ki he nakpese ki onle aen kase. 22:32 Mes Au onen toti neu ko, he nati' ho palsait nane kais namneku. Ma leka ho nekam anbe' hom hatani ho ini sin." 22:33 Nai Petrus natae nak, "Uisneno, au uloitan uleli he tam o'of ma mate ok Ko!" 22:34 Mes Yesus nak, "Petrus, neno i of manu fe kan kokle'o fa, ho mutotan Kau hae tenu." 22:35 Ma Yesus nak neu sin, "Leka Au sonu ki, fun ka meki fa alu noni, bukael ma penhaef, ati him nukan sa' ka?" 22:36 Ma sin natae nak, "Kahaf." Ma Yesus nak neu sin, "Mes tomas i, sekau anmu'i alu noni so in neki, onane amsa anmu'i bukael; ma sekau le kan mu'if, so nasosa in bael pake ma ansos suni. 22:37 Fun Au ak ki, a'an Sulat Knino he namtis anbi Kau; le antui nani nak: In maso'it anbi amaufinut sin atnanan. *Fun lasi le antui antom Kau, natiabonen." 22:38 Oke te sin nak, "Uisneno, suni nua es i." Yesus nak, "Noba nai." 22:39 Oke te Yesus anpoi na'ko kuan ma nao neu Tubu Zaitun. In asimo lasi sin amsa natuin In. 22:40 Leka ante bale nane In nak neu sin, "Onen toti nai he nati' kais him tam bi lasi su'at." 22:41 Ma In nao naskot na'ko sin onle anpolin fatu mese ma In anlitu ma anonen toti 22:42 nak, "Koi Ama, bait Hom lomi, mufinib lasi mane'at i na'ko Kau, mes kais natuin Au lomik so Ho lomim anbol nai." 22:43 (Fun ahake na'ko neno tunan nalilon neu In ma anhatani In. 22:44 Yesus namtau nasekeon ma In anonen toti nok amneot. In puse onle na' anloli neu nain.) 22:45 Leka In anonen nalali In anfen ma anfani neu In asimo lasi sin, ma napeni sin antup fun sin nekan antu'. 22:46 Ma In nak neu sin, "Nansa es him tup? Fen nai ma amonen toti, he nati' kais him tam bi lasi su'at." 22:47 Leka Yesus fe na'uab onane te pah namfaun nem, Nai Yudas In asimo lasi na'ko bo'es am nua sin nao nahun bi sin matan. Nai Yudas nem haumak Yesus ma nekat In. 22:48 Ma Yesus nak neu in, "Yudas, ho muna'at Anmone Pah To meki nekat ka?" 22:49 Leka alsin, le nok Yesus nit lasi nane te, sin nak, "Usi, haim ote sin meki suni ka?" 22:50 Ma atoni mese anbi sin ano'te Ana' Lasi Fuat Naek in ate luken ne'u tal natfek. 22:51 Mes Yesus nak, "Maut nai." OKe te In anpoho atoni nane luken ma naleko nafani. 22:52 Ma Yesus nak neu ale nakaf Ana' fuat knino ma ale nakaf apao Ume Uisneno ma ale amnasit Yahudi le nem hen heke In, nak, "Ait hi mak Au atoni abulalut Kau, es hi aim meki suni ma hau tuka ka? 22:53 Neno-neno Au ok ki bi Ume Uisneno, ma him kam heke Kau. Mes i hi leku mainuan, ma kuasat mesokan in leku kun." 22:54 Ma sin anheke Yesus ma nokan nao neu Ana' Lasi Fuat Naek in ume. Mes Nai Petrus natuin na'ko lo. 22:55 Fun sin nahopi ai bi po'an atnanan ma Nai Petrus nao ma antoko nok ale atoni le sin toko antol ai nane. 22:56 Ma ate bife mese le nit Nai Petrus toko haumak ai; in kiso nalek-leko ma nak, "Atoni i amsa afi nok Yesus!" 22:57 Mes Nai Petrus natotan ma nak, "Kahaf, au ka uhin fa atoni nane." 22:58 Kalob fa onane te atoni es nit in ma nak, "Ho amsa sin ini ko!" Mes Nai Petrus natae nak, "Kahaf, ka au fa!" 22:59 Ma oni leku mese anfin onane te atoni es anten na'uab nok hana' kataf nak, "Namneo, atoni i amsa nok Yesus, fun in amsa atoni pah Galilea." 22:60 Mes Nai Petrus nak, "Kahaf, au ka uhin fa sa' le ho mu'uab nane." Leka in fe na'uab onane te manu ankokle'o. 22:61 Ma Usif Yesus anikotin ma ankiso Nai Petrus. Oke te Nai Petrus namnau nit nak Usif Yesus na'uab nalali neu in ma nak, "Of manu fe kan kokle'o fa bi neno i te, ho mutotan Kau hae tenu." 22:62 Ma oke te Nai Petrus anpoi neu mone ma ankae sese'ul. 22:63 Ma ale atoni le anpao Yesus, sin nasi'u ma anbiso In. 22:64 Ma sin amu Yesus matan ma natan nak, "Ati hom tek mit, sekau es anbiso Ko ka?" 22:65 Ma anmu'i uab si'ut bian le sin antek nani neu In. 22:66 Leka manas anpe ale amnasit to Yahudi ma ale nakaf Ana' fuat knino ma ale Ahin Sulat, sin nabua ma sin neki Yesus neu sin Alef Lasi ma nak, 22:67 "Bait Ho Kesel Afetin Ko, muton kau nai." Ma Yesus nak, "Au he uton ki, mes of hi ka miteb mani fa; 22:68 ma Au he utan ki lasi sa'es mes of hi ka mitae mani fa. 22:69 Mes na'ko tomas i Anmone Pah To antoko bi Uisneno Akuasat Afin-finit niman ne'u." 22:70 Onane te sin alsin nak, "Kalu onane, Ho le i, Uisneno Anmone Ko ka?" Ma Yesus nak neu sin, "Namneo, him tek milali, Au le i Uisneno Anah." 22:71 Onane te sin nak, "Hit het paek saksi neu sa' anteni ka? Hit nen talali na'ko In fefan kun."
23:1 Oke te tolas sin anfen ma neki Yesus neu Nai Pilatus. 23:2 Ma sin natam Yesus lasi nak, "Hai mipeni atoni i, nasekeb hai to, ma antal to he kais anbaen noni poni neu Kesel, ma antek In aon Nenu Anan, Usif kun." 23:3 Ma Nai Pilatus natan Yesus nak, "Ho Usif Yahudi Ko ka?" Ma Yesus nak, "Namneo onle ho mak." 23:4 Ma Nai Pilatus nak neu ale nakaf Ana' fuat knino ma neu to ok-oke, nak, "Au ka upeni fa sanat bi atoni i." 23:5 Mes sin naseke piut nak, "In fuli to neki In noina bi pah Yudea ok-oke, na'ko pah Galilea ma nem ante bale i." 23:6 Leka Nai Pilatus nen lasi nane in natan, ait atoni nane atoni Galilea? 23:7 Ma leka in nahin nak Yesus na'ko Nai Herodes in plenat, in ansonu Yesus nao neu Nai Herodes, le bi neno nane amsa bi kot Yerusalem. 23:8 Leka Nai Herodes nit Yesus, in nekan anmalin. Fun suk alo in lomi he nit Yesus, fun in fe fe'at amnen antom Yesus, oke te nafnekan he nit Yesus anmoe taka mese onme. 23:9 Es nane in natan lasi namfau neu Yesus, mes Yesus ka natae fa fefa mese. 23:10 Onane te ale nakaf Ana' fuat knino ma ale ahinet sulat, sin nasanab Yesus piut. 23:11 Ma Nai Herodes nok in to meo nakaf sin na' akan ma nakle'at Yesus, oke te napakab nani neki pake kesel ma ansonu nafani In neu Nai Pilatus. 23:12 Ma na'ko neno nane Nai Herodes ma Nai Pilatus fef leko anfani; fun nahunu te sin namusu es nok es. 23:13 Ma Nai Pilatus nabuab ale Ana' fuat knino nakaf ma ale atopu to Yahudi ma to, 23:14 nalali te in nak, "Hi mok atoni i nem neu kau on atoni le nasekeb to. Ma him kiso au tae ulali In lasi, mes au ka upeni fa sanat sa' le misanab mani neu In. 23:15 Ma Nai Herodes amsa kahaf, es nane In ansonu nafani nem neu kai. Ma atoni i ka nasanab fa sa' le he namate In. 23:16 Es nane au he biso In, nalali te ufetin ufani." 23:17 (Fun bi neno tolas, Nai Pilatus mes nafetin atoni mese neuto.) 23:18 Onane te sin ok-oke anhunun ma nak, "Muneku In, mufetin kai Nai Barabas!" 23:19 Nai Barabas antam o'of fun anmoe lasi bulalu bi kot ma namate atoni. 23:20 Fun Nai Pilatus anlomi he nafetin Yesus es nane in na'uab anteni neu to mfaun nane. 23:21 Mes sin anhunun nak, "Muboni In bi hau nehe! Muboni In bi hau nehe!" 23:22 Ma Nai Pilatus nak anteni sin hae tenu nak, "Atoni i anmoe nalali lasi amle'ut sa' ka? Au ka upeni fa sanat sa' bi In le he namate nani. Es nane au he biso In oke te ufetin ani." 23:23 Mes sin anhunun piut ma naseke he nati' naboni Yesus bi hau nehe; onane te sin hunun nane manesa. 23:24 Ma Nai Pilatus naiti fekat he namate Yesus natuin to in lomin. 23:25 Ma in nafetin atoni le sin antoti le natam bi o'of natuin bulalu ma namate atoni. Ma nana'at Yesus neu sin he sin moe natuin sin lomin kun. 23:26 Leka sin neki Yesus nao, sin nae'ku atoni mese kanan Nai Simon na'ko kuan Kirene le fe anfani nem neu kot. Ma sin naseke in hen loi hau nehe ma natuin Yesus. 23:27 Ma pah namfau natuin Yesus; fun bife-bife amsa nokan ma ankae ma ankul neu Yesus. 23:28 Mes Yesus naklelon neu sin ma nak: "Hi feotnai Yerusalem, kais him kae neu Kau, so him kae neu hi aom ma hi anah sin! 23:29 Fun leka in eti ante of ale atoni nak: Alekot neu bife akiu le ka nahoni nit, ma in susun le ka nasusu nit fa anah. 23:30 Bi leku nane of sin na'uab neu nu'af nak: Mithon nai meu kai! Ma neu ale tubu nak: Kub man kai nai! 23:31 Fun kalu sin moe nani neu hau honis onane, sa' anteni neu hau meto ka?" 23:32 Ma sin antopu neki amsa atoni abulalut nua he namate sin nok Yesus. 23:33 Leka sin nem ante bale le antek nani nak Nu'af Nui nakaf, sin ankus naboni Yesus bi hau nehe ma atoni abulalut nua amsa, es bi ne'u ma es bi li. 23:34 Ma Yesus anonen nak, "Ama, sako sin sanat, fun sin ka nahin fa sa' le sin anmo'e." Ma sin anhel sulat hen bati Ini bael pake. 23:35 Ale atoni le anhake bi nane sin nit ale lasi ok-oke. Ma atopu Yahudi sin na'uab naslaet, nak, "In nahoni atoni bian, so In nahoni kun In aon, kalu In Neno Anan le Uisneno anbeti nani." 23:36 Ma ale to meo amsa nasi'u In, ma nanona tua mahai neu in, 23:37 ma nak, "Kalu Ho Usif to Yahudi Ko, muhoni Ho aom." 23:38 Ma anmu'i tuis mese bi Yesus In hau nehe fafon le nahan nak, "I atoni Yahudi sin Usif." 23:39 Ma abulalut mese le naboinon na'uab nale'un Yesus nak, "Ait Ho ka Neno Anan Ko fa? Muhoni Ho aom ma muhoni kai nok." 23:40 Mes abulalut es nakain in, ma nak, "Ho ka mumtausan fa Uisneno ka? Fun he namate ko on In? 23:41 Neu hit nua kit simo hit mo'et in upan, mes atoni i kan mo'ef amle'ut sa'." 23:42 Oke te in nak neu Yesus, "Usif, mumnau kau leka Hom koenom aum on Kesel." 23:43 Ma Yesus nak neu in, "Namneo, Au ak ko, neno i of ho mok Kau bi Firdaus." 23:44 Ma oni leku bo'es am nua manas namtetu, pah nane mesokan oke talan te leku tenu, 23:45 fun manas kan sinek fa. Ma beti eka bi Ume Knino natpisu bati nua. 23:46 Ma Yesus anbai nok hanan naek nak, "Koi Ama, Au una'at Au smanak bi Ho niman nanan." Leka In na'uab nalali te, Ini snasan natfek. 23:47 Leka to meo nakaf nit ale lasi nane te in naliatas Uisneno nak, "Tebes atoni i alekot kun!" 23:48 Ma ale to le nem, hen tao mata neu ale lasi nane, sin anfani ma antofnok. 23:49 Ma Yesus In ini sin ma ale bife sin, le natuin Yesus na'ko Galilea, sin hake bi lo ma napene ale lasi nane. 23:50-51 Ma anmu'i atoni mese kanan Nai Yusuf na'ko kot Arimatea pah Yudea. In atoni alekot ma makana, ma anpao plenat Uisneno he nem. In aof na'ko Ale alef Lasi ma in kan simo fekat le antom Yesus. 23:52 Nai Yusuf nao neu Nai Pilatus ma antoti Yesus In aon nitu. 23:53 Leka in nasanu nalali na'ko hau nehe te, in ana'mu neki muti kase, oke te natupab nani bi nuat naukel le anhani bi fatu naek. Nuat naukel nane fe'u fe ka nabela fa es anbin. 23:54 Neno nane neno nima, fun neno ne, Neno Snasat anhaumak. 23:55 Ma bife-bife le nok Yesus na'ko Galilea sin natuin Nai Yusuf ma nit nuat naukel nane ma natupab Yesus In aon nitu nane. 23:56 Nalali te sin anfani ma naloitan fobona ma mina fomeni. Ma bi Neno Snasat sin nasnas natuin Plenat Knino.
24:1 Mes bi neno klei nok-noka, bife-bife sin nao neu nuat naukel neki fobona le sin naloitan nalali. 24:2 Ma sin ante naukel sin napeni fatu ekat nane antihoel na'ko nuat fefan. 24:3 Ma leka sin antam neu naukel nane sin ka napeni fa Yesus In aon nitu. 24:4 Leka sin fe anhake ma nekan namneku bi nane, sin nit atoni nua hake haumak sin nok pake nalim-nalim. 24:5 Sin namtaun ma nabes, mes atoni nua nane nak neu sin, "Nansa' hi mami In le anmoni bi amates balan? 24:6 In kan bi fa i, In fen anfani. Mimnau nai afi In nakua a'an onme neu ki bi pah Galilea, 24:7 nak of nana'at Anmone Pah To neu atoni asanat sin niman ma naboni bi hau nehe, ma neno tenu namuni te anfen anfani." 24:8 Ma bife-bife nane namnau nafani Yesus In a'an nane. 24:9 Leka sin anfani nem na'ko nate naukel nane sin anetun lasi nane neu asimo lasi bo'es am mese ma neu bae benu bian. 24:10 Ma bife-bife nane esle': Bi Maria na'ko Magdala, bi Yohana ma bi Maria Nai Yakobus in ainaf, ma bife bian le nao nok sin. 24:11 Ma asimo lasi sin nak oni ale bife nane sin uab namo'e es nane te sin kan palsai fa sin uab nane. 24:12 Mes Nai Petrus anfen, naen laba neu nate naukel nane. In nabes ma natnu' neu naukel, al in nit pilu muti nabala bi nane. Oket in anfani ma nateb bi in nekan antom ale lasi le anbol. 24:13 Ma bi neno nane amsa atoni nua na'ko Yesus In asimo lasi sin he nao neu kuan mese kanan Emaus, oni kilo bo'es am mese na'lo na'ko kot Yerusalem. 24:14 Ma sin nua sin namolok antom ale lasi le anbol. 24:15 Leka sin fe namolok ma matukal uab es nok es, Yesus nem ma nao nok sin. 24:16 Mes anmu'i sa'le nanini sin matan, talan te sin ka nahin fa Yesus. 24:17 Oket Yesus nak neu sin, "Him nao nokat mimolok sa' bi lalan atnanan?" Ma sin anhake ma sin human anmofu. 24:18 Oke te sin esle' kanan Nai Kleopas natae nak, "Ait Ho mes kum atoni anao mnemat bi kot Yerusalem le ka muhinef ale lasi le anbol bi neno fauk i?" 24:19 Ma Yesus nak neu sin, "Lasi sa' ka?" Ma sin nak, "Lasi le antom neu Yesus atoni Nazaret. In Mafefa knino kun, le anmu'i kuasat bi uab ma mepu nok, bi Uisneno In human ma bi ale to sin matan. 24:20 Mes ale Ana' fuat knino nakaf ma hai nakaf sin, nana'at In ma he namate ma naboni bi hau nehe. 24:21 Ma hai mifnekan mak In nem he nafetin to Israel. Ma neno i anfini neno tenu na'ko ale lasi nane anbol. 24:22 Mes bife bian na'ko kai naskekeb kai, fun fe noknoka sin nao neu naukel, 24:23 mes sin ka napeni fa In aon nitu. Onane te sin anfani nem ma naton, nak sin nit ahake neno tunan le naton, nak Yesus anmoni. 24:24 Ma hai bae bian sin nao neu naukel ma napeni amsa onle bife-bife naton nani mes sin ka nitaf Yesus." 24:25 Oket Yesus nak neu sin, "Hi atoni amonot, le hi nekam manu', talan te hi kam palsai fa ale sa', le afi Mafefa knino naton nani. 24:26 Nak Neno Anan mes ansutai mafena fe, nalali te antam neu In apinat!" 24:27 Oket Yesus na'uab neu sin ale lasi le antui bi Sulat Knino antom In, na'ko Nai Musa in sulat ma Mafefa knino sin sulat. 24:28 Leka sin haumak kuan le sin he nao neune, Yesus namo'e on In he nao anfin kun. 24:29 Mes sin natau Yesus ma nak, "Mubala mok kai, fun neno hen faien ma manas hen tesen." Ma Yesus antam he nabala nok sin. 24:30 Leka In toko hen bukae nok sin, In naiti utunu' ma natulu neu Uisneno oke te anebi ma anfe neu sin. 24:31 Bi leku nane sin matan natfei ma nahin Yesus, mes In namneku na'ko sin matan. 24:32 Ma sin na'uab es nok es ma nak, "Ait hit nekak kan maput fa ka, leka In na'uab nok kit bi lalan atnanan ma anfainek kit neki Sulat Knino ka?" 24:33 Bi leku nane amsa sin fen ma anfanin neu Yerusalem. Bi nane sin napeni asimo lasi bo'es am mese, le nabua nok sin ini bian. 24:34 Ma sin nak, "Namneo, Uisneno anfen anfani ma nalile In aon neu Nai Simon." 24:35 Ma sin nua sin anetun ale alsi le sin nit bi lanan atnanan ma sin nahin In onme bi leku In ane'bi utunu' nane. 24:36 Ma leka sin fe na'uab ale lasi nane te, Yesus nem ma anhake, bi sin atnanan ma nak neu sin, "Tetus ma aomina neu ki." 24:37 Ma sin naskek ma namtau fun sin natenab nak oni nit smanaf. 24:38 Mes Yesus nak neu sin, "Nansa' hi mimtau, ma hi nekam na'unu? 24:39 Kiso Au nimak ma Au haek: Mihin nai, Au es Kau i, poe Kau nai ma kiso fun smanaf kan mu'if nesan ma nuif onle hi mit anbi Kau." 24:40 Ma In fe na'uab onane te In nalile In niman ma In haen neu sin. 24:41 Ma leka sin nekan fe ka nateb nani fa, natuin amlinat ma sanmakat te Yesus nak neu sin, "Hi mu'i mnahat sa' ka?" 24:42 Oke te sin anfe neu In ika tunu koe mese 24:43 In ansimo ma anbukae nani bi sin matan. 24:44 Oke te Yesus nak neu sin, "I Au a'ak le Au ukua ani neu ki, leka Au fe ok ki, sa'le antui nani antom Kau bi Nai Musa in sulat ma bi Mafefa knino sin sulat ma bi sulat Sit Pules, of natiab nani." 24:45 Oke te Yesus anfei sin lolen he nahin Sulat Knino. 24:46 Ma Yesus nak neu sin, "Le antui nani nak: Neno Anan hen sutai mafena, ma neno tenu namuni te anfen anfani na'ko amates. 24:47 Ma anbi Neno Anan In kanan of anetun lasi te'un nekaf ma lasi sako sanat neu ale uf-uf na'ko kot Yerusalem. 24:48 Hi asaksit ki neu ale lasi i. 24:49 Ma of Au sonu ki sa' le Au Ama anba'an nalali. Mes hi mibala bi kot i talan te nahenu ki neki kuasat Uisneno na'ko neno tunan." 24:50 Oke te Yesus nok sin anpoi na'ko kot ma sin nao anhaumak kuan Betania. Bi nane In na'aiti Ini niman ma antek uab alekot neu sin. 24:51 Leka In fe antek alekot neu sin, onane te In na'aition ansae neu neno tunan ma nabation nok sin. 24:52 Ma sin nabes neu In, oke te sin anfani neu kot Yerusalem nok amlilat naek. 24:53 Ma sin nabala bi Ume Uisneno ma natulu nekan neu Uisneno.
1:1 Bi neno un-unu te A'an Knino esan. A'an Knino nane nok Uisneno, ma A'an Knino nane lo Uisneno kun. 1:2 In nok Uisneno bi neno un-unu. 1:3 Anmo'e ale sa' natuin In, ma na'ko ale sa' le anbol, katit fa sa' esle' anmo'e ankoit In. 1:4 A'an Knino nane neki honis, ma honis nane meusine neu mansian. 1:5 Meusine nane ansinek bi mesokan, ma mesokan kan kub nani fa. 1:6 Uisneno anlelu atoni es nem, kanan Nai Yohanes. 1:7 In nem on saksi hen etun ma naton meusine nane, he nati' ale atoni anpalsai natuin in. 1:8 Meusine nane ka es fa in, mes in nem hen saksi meusine nane. 1:9 Meusine amneot le hen tana ale atoni, nem nalali neu pah pinan. 1:10 In anbi pah pinan ma anmo'e pah pinan natuin In, mes pah pinan ka nahin fa in. 1:11 In nem neu In ini sin, mes sin kan simo fa In. 1:12 Mes ale atoni le ansimo In, In anfe kuasat neu sin he nati' sin anfain anah Uisneno, le sin anpalsai anbi In kanan. 1:13 Le ka nahoni sin fa na'ko nesaf ma na' ai na'ko aof ta'uf natuin mansian, mes natuin Uisneno kun. 1:14 A'an Knino nane anfain mansian, ma namaika bi hit atnanak. Hit tit talali In apinat, le anfe nalali neu In on Amaf In Anmone mes tilo. Anbi In hit tit Uisneno ma In manekan neu kit. 1:15 Nai Yohanes ansaksi neu In ma anhunun nak, "In kun esle' i, le au ak ulali ki, of In nem namunin kau, le In anaek nesin kau, fun In esan nahunun kau." 1:16 Fun na'ko In athoes hit ala kit atsimo halinat piut. 1:17 Nai Musa es anfe plenat knino, mes manekat ma aki'at nem na'ko Yesus Neno Anan. 1:18 Katit fa es le nit Uisneno, mes Uisneno Anmone mes tilo, le anbi Amaf aifan, In es nalile nani neu kit. 1:19 Ma Nai Yohanes ansaksi nak on i, leka atoni Yahudi na'ko Yerusalem ansonu Ana' fuat knino sin fauk ma atoni Lewi sin neu in he natan neune nak, "Ho sekau ko ka?" 1:20 Nai Yohanes naton muti ma ka namo'e fa nak, "Au ka Neno Anan kau fa." 1:21 Oke te sin natan neu in nak, "Kalu onane ho sekau ko ka? Nai Elia ka?" Ma in natae nak, "Kahaf!" "Ai ho mafefa knino ko ka?" In natae nak, "Kahaf!" 1:22 Onane te sin nak neu in, "Ho sekau ko ka? Fun hai he miton neu sin le ansonu kai. Neu hom tek ho aom mak sa' ka?" 1:23 Nai Yohanes natae nak, "Au hanaf kau, le anhunun bi mnela paha snaen nak: Minono nai lalan Usif tunan, onle Mafefa Knino Nai Yesaya in a'an." 1:24 Ma anbi ale atonin le ansonu sin nane anmu'i atoni Farisi sin fauk. 1:25 Sin natan neune nak, "Kalu ho ka Neno Anan ko fa, ma ka Nai Elia, ma ka mafefa knino le he nem, nansa ka es ho muslani atoni?" 1:26 Nai Yohanes natae sin, nak, "Au uslani ki eki oe, mes In kun anhake bi hi atnanam le hi ka mihinef. 1:27 In nem namunin kau, ma au ka tamaf ota he sefi Ini penhae tanin." 1:28 Ale lasi nane anbol bi Betania, le anbi Noe Yordan panin, bale Nai Yohanes naslani atoni. 1:29 Nokfa onane te Nai Yohanes nit Yesus nem neu in ma in nak, "Kiso Ana' Bibi Kase Uisneno, le ansako pah pinan sin sanat. 1:30 In kun le afi au ak neu ki: Atoni mese of nem namunin kau, mes In anaek nesin kau, fun In esan nahunun kau. 1:31 Ma au amsa afi ka uhin In; es nane au aum ma uslani eki oe, he nati' In nalilon neu to Israel." 1:32 Ma Nai Yohanes ansaksi nak, "Au it Smanan Knino ansanu nem na'ko neno tunan on kol ot kase ma nabala anbi In. 1:33 Ma au amsa ka uhinef, mes Uisneno le anlelu kau he uslani eki oe, nakua a'an neu kau nak: Leka ho mit Smanan Knino ansanu neu atoni es ma nabala anbi In, In kun es of naslani neki Smanan Knino. 1:34 Ma au it ulali In ma au saksi ak: Uisneno Anmone esle' i." 1:35 Nokfa onane te Nai Yohanes anhake anteni bi bale nane nok in asimo lasi sin nua. 1:36 Ma leka in kiso nit Nai Yesus nao natuin nane te in nak, "Kiso Ana' Bibi Kase Uisneno!" 1:37 Leka sin nua sin nen a'at nane te sin nao natuin Yesus. 1:38 Mes Yesus naklelon ma nit sin le sin natuin In, oke te In nak neu sin, "Hi mami sa' ka?" Sin natae nak, "Pak, Ho mutua esme ka?" 1:39 In nak neu sin, "Aim nai, ma of hi mit." Oke te sin neman ma nit In natua anbi me. Ma bi neno nane sin namaika nok In, oni leku ha neon mabe. 1:40 Es na'ko atoni nua in le amnen Nai Yohanes in uab oke te nao natuin Yesus esle' Nai Andreas, Nai Simon Petrus olif. 1:41 Nai Andreas nae'ku nahun nok in tataf Nai Simon ma in nak neune, "Hai mie'ku milali mok Mesias (le in oten nak: Neno Anan)." 1:42 Ma in nokan nem neu Yesus. Leka Yesus nit nalali te In nak, "Hoi Simon, Nai Yohanes anmone, of nakanab ko Nai Kefas (le in oten Nai Petrus)." 1:43 Nokfa onane te Yesus nafek he nao neu pah Galilea. In nae'ku nok Nai Filipus ma nak neu in, "Mutuin Kau nai!" 1:44 Nai Filipus na'ko Betsaida, le Nai Andreas ma Nai Petrus sin kuan. 1:45 Nai Filipus nae'ku nok Nai Natanael ma nak neu in, "Hai mie'ku milali In, le Nai Musa antek nani bi plenat knino ma mafefa knino sin antui nalali, esle' Yesus, Nai Yusuf anmone na'ko Nazaret?" 1:46 Mes Nai Natanael nak neu in, "Nabe'i ka lasi alekot hen poi na'ko Nazaret?" 1:47 Nai Filipus nak neune, "Aum nai ma mail kum." Yesus nit Nai Natanael nem neu In oke te nak neune, "Kiso, i lo atoni Israel namneo. Katit fa lasi moel anbi In." 1:48 Nai Natanael natae nak, "Ho muhin kau onme ka Usif?" Yesus nak, "Nahunun na'ko Nai Filipus anboin ko, Au tit ulali ko, ambi bubuk un." 1:49 Nai Natanael nak neu Yesus, "Pak, Ho Uisneno Anmone Ko, Ho Kesel to Israel Ko!" 1:50 Yesus natae nak, "Natuin Au eut ko ak: Au tit ko ambi hubuk un es hom palsai ka? Of ho mit lasi le nanae nesin na'ko nane." 1:51 Oke te Yesus nak neune, "Au ak ko, of ho mit neno tunan natfei ma ahake Uisneno sin ansae ma ansanu neu Anmone Pah To."
2:1 Bi neno tenu namuni te, anmu'i tolas mafe mamone bi kuan Kana, bi pah Galilea ma Yesus ainaf anbin. 2:2 Sin anhone Yesus nok In asimo lasi sin amsa nem neu tolas nane. 2:3 Leka sin tua mina amtasa oke, Yesus In ainaf nak neu In nak, "Sin tua mina amtasa oke." 2:4 Yesus natae nak, "Aina, hom lomi sa' na'ko Kau ka? Au leku fe kan tiaf." 2:5 Mes Yesus In ainaf nak neu atuthaes sin, "Hi mo'e mituin sa' le In na'uab neu ki." 2:6 Bi nane anmu'i kusi ne le naloitan sin neu hen fasen natuin halat atoni Yahudi. Kusi mese te oe nai nua ai nai tenu. 2:7 Yesus nak neu atuthaes sin nane, "Him soet kit oe neu kusi nane sin tal nahenun. Ma sin antao oe tal nahenu." 2:8 Oke te Yesus nak neu sin, "Him kui nai ma meki nao neu tol tuaf." Nalali te sin neki anao. 2:9 Leka tol tuaf nane antamis oe le nabaina anfani tua mina amtasa -- ma in ka nahin fa nane nem na'ko me, mes atuthaes sin le ankui oe nane sin nahinen -- oke te in boin atoin fe'u nane, 2:10 ma nak neune, "Ale atoni sin nabalab nahunun tua mina amtasa alekot, ma leka atoni sin ninu nalali lek-leko, oke te mubalab le ka alekot. Mes ho mupan kum tua mina amtasa alekot nane tal leku i." 2:11 Yesus anmo'e lasi nane on taka ahunut na'ko ale lasi taka sin anbi kuan Kana bi pah Galilea. Ma nok lasi nane te In nalile In apinat, ma In asimo lasi sin nekan nateb knino neu In. 2:12 Nalali te Yesus In nao neu Kapernaum nok In ainaf ma In oilfenu ma In asimo lasi sin. Oke te sin namaika anbi nane neno fauka. 2:13 Leka atoni Yahudi sin Neno Tolas Paskah anhaumak, Yesus anao neu Yerusalem. 2:14 Leka In antam neu Ume Uisneno, In napeni atoni asosa biabak bijae molo, bibi kase ma kol ot kase, ma atoni atukal noni sin antokon bi nane. 2:15 In anmo'e nan ue biso na'ko tani oke te anli'u napoitan sin na'ko Ume Uisneno nok ale sin bibi kase ma biabak. In opan ale noni le sin antukal neu nain ma aneusbai ale sin mei nane. 2:16 In nak neu ale asosa kol ot kase sin, "Maiti ale sa' na'ko i, kais hi mo'e Au Ama ume neu bale masa." 2:17 Ma In asimo lasi sin namnau nit, nak afi antui nalali nak, "Au he nek Ho ume koi Uisneno, onle ai he notu nis Kau." 2:18 Atoni Yahudi sin anmatoe Yesus nak, "Ho mulile kai taka sa' ka, nak Ho mu'i hak he mo'e onane ka?" 2:19 Yesus nak neu sin, "Pukai mani Ume Uisneno le i, ma of anbi neno tenu Au uhakeb ufani." 2:20 Oke te atoni Yahudi sin nak neu In, "Afi atoni sin nahakeb Ume Uisneno i, ton bo'ham ne ma Ho he muhakeb mufani bi neno tenu ka?" 2:21 Mes In antek Ume Uisneno nane antom In aon kun. 2:22 Namuni In anfen anfain na'ko amates, In asimo lasi sin namnau nit, nak In anetun nalali lasi nane. Oke te sin nekan nateb neu Sulat Knino ma neu a'at le Yesus nak neu sin. 2:23 Leka In fe anbi Yerusalem bi Neno Tolas Paskah, atoni namfaun anpalsai neu In kanan, natuin sin nit lasi taka le In anmo'e. 2:24 Mes Yesus ka nateb fa In aon neu sin, natuin In nahin sin alsin. 2:25 Ma In ka napane fa es, hen etun antom mansian, fun In nahin nalali sa' le anbi sin nekan.
3:1 Anmu'i atoni Farisi mese le atoni Yahudi sini nakaf kanan Nai Nikodemus. 3:2 In nem nok fai neu Yesus ma nak, "Pak, hai mihin, Uisneno anlelu Ko, hem koenom aum on anoni. Fun kan mu'if atoni mese hen mo'e taka, le Ho mo'e, kalu Uisneno ka nok fa in." 3:3 Usif Yesus natae nak, "Au ak ko, katit fa atoni mese he nit Plenat Uisneno, kalu ka nahonis nafani fa in." 3:4 Nai Nikodemus nak neu In, "Leka me he nahonis nafani atoni mese le in namnasien ka? Nabe'i ka in antam anfani neu in ainaf apun, ma nahonis anteni ka?" 3:5 Yesus natae nak, "Au ak ko, kalu ka nahonis fa atoni anbi oe ma Smanaf, in ka nabe'i hen tam neu Plenat Uisneno. 3:6 Sa' le nahonis na'ko aof lo in aof kun, ma sa' le nahonis na'ko Smanaf lo in smanaf kun. 3:7 Kais ho mumkak, natuin Au ak ko: Mes he nahonis nafani ki. 3:8 Anin anfu neu me natuin in lomin. Hom nen in amiun, mes ho ka muhin fa in nem na'ko me ma in nao neu me. Onane amsa ale atoni le nahonis na'ko Smanaf." 3:9 Nai Nikodemus natae nak, "Lasi nane hen bol onme ka?" 3:10 Yesus natae nak, "Ho anoni ko neu to Israel, mes ho ka muhin fa lasi nane ka? 3:11 Au ak ko, hai mi'uab neu lasi sa' le hai mihine, ma haim saksi meu lasi sa' le hai mit. Mes hi kam simo fa hai saksi nane. 3:12 Leka Au u'uab neu ki lasi pah pinan, hi kam palsai mani fa; leka me Au he u'uab neu ki lasi Neno Tunan, of him palsai mani onme ka? 3:13 Kan mu'if atoni mese le ansae neu Neno Tunan, al In kun le ansanu na'ko Neno Tunan, esle' Anmone Pah To. 3:14 Onle Nai Musa nasaeb kauna anbi mnela paha snaen, onane amsa nasaeb Anmone Pah To, 3:15 he nati' ale atoni le anpalsai neu In napeni honis nabal-bal. 3:16 Fun Uisneno nek pah pinan onane, talan te In anfe In Anmone mes tilo, he nati' ale atoni le anpalsai neu In, kais namle'u, mes napeni honis nabal-bal. 3:17 Fun Uisneno ansonu In Anmone neu pah pinan, ka neufa he nafek pah pinan in lasi, mes he nahoni nani natuin In. 3:18 Atoni le nateb knino neu In, ka napenif le'at. Mes atoni le nekan ka nateb fa knino, in napeni nalali le'at, fun in kan palsai fa neu Uisneno Anmone mes tilo. 3:19 Ma in le'at nane on i: Meusine nem nalali neu pah pinan, mes mansian anlomi nesin mesokan na'ko meusine, fun sin mo'et nane amle'ut kun. 3:20 Fun atoni le anmo'e amle'ut, in kan lomif meusine nane, he nati' in mo'et amle'ut nane kais natonon. 3:21 Mes atoni le anmo'e lomin Uisneno, in nem neu meusine, he nati' natonon, nak ale in mo'et sin anmo'e nani anbi Uisneno." 3:22 Nalali te Yesus nok In asimo lasi sin naon neu pah Yudea. In namaika nok sin anbi nane ma naslani atoni sin. 3:23 Mes Nai Yohanes amsa naslani atoni bi Ainon, anhaumak Salim, fun anbi bale nane oe naek. Atoni sin neman bi bale nane he naslani sin. 3:24 Bi neno nane fe ka natam fa Nai Yohanes neu o'of. 3:25 Nai Yohanes in asimo lasi sin anmatoen nok atoni Yahudi mese antom lasi he nakninok. 3:26 Oke te sin nem neu Nai Yohanes ma nak neune, "Pak, atoni le afi nok ko bi Yordan panin, le hom lekan mulali neu kai, In amsa naslani atoni ma atoni sin nao neu In." 3:27 Nai Yohanes natae sin nak, "Katit fa atoni mese le he naiti sa' es neu in aon, kalu kan fene fa na'ko Neno Tunan. 3:28 Fun hi mes kim amsaksi, mak au uton ulali ki: Au ka Neno Anan kau fa, mes ansonu kau uhunun In. 3:29 Atoni fe'u in es anmu'i bife fe'u, mes atoin fe'u in soba anhake anhaumak in ma natnin ma in nekan namlil natuin in nen atoin fe'u nane in hanan. Es nane te au umlil ma au amlilat nane namtisien. 3:30 In mes nanae, mes au ubaunok. 3:31 Atoni le nem na'ko fafon, in nesin kun ale sa'. Atoni le na'ko pah pinan in tam neu pah pinan ma nauab neki a'at pah pinan. Atoni le nem na'ko fafon in nesin ale sa'. 3:32 In ansaksi ale sa' le In nit nalali ma In nen nalali, mes katit fa atoni mese le ansimo In saksi nane. 3:33 Atoni le ansimo In saksi nane, in nateb, nak Uisneno nane lo amneot kun. 3:34 Fun atoni le Uisneno ansonu nani, In natiaba a'an Uisneno, fun Uisneno anfene Ini Smanan ka nok fa tu'as. 3:35 Amaf a'nek Anmone ma nana'at ale sa' neu In. 3:36 Atoni le anpalsai neu Anmone, in napeni honis nabal-bal. Mes atoni le ka natuin fa Anmone, of in ka nitaf honis, mes to'as Uisneno nabal-bal anbi in."
4:1 Leka Usif Yesus nahin, nak atoni Farisi sin nen nak In napeni ma naslani atoni namfau nesin nai Yohanes. 4:2 -- Mes Yesus ka naslani fa atoni, al In asimo lasi sin, -- 4:3 In nasaitan pah Yudea ma anfani neu pah Galilea. 4:4 In hen fini natuin pah Samaria. 4:5 Oke te In nem ante kuan mese anbi pah Samaria, kanan Sikhar anhaumak bale le afi Nai Yakub anfe nani neu in anah Nai Yusuf. 4:6 Nai Yakub in oehani anbi nane. Natuin Yesus anhae es nane te In toko anbi oehani ninen. Oni leuk bo'es am nua. 4:7-8 Yesus asimo lasi sin nao neu kot hen sosan bukael. Oke te bife Samaria mese nem hen sote oe. Yesus nak neune, "Hom fe Kau oe he inu." 4:9 Bife Samaria nane nak neu In, "Ho atoni Yahudi Ko, au bife Samaria kau. Leka me Hom toti oe na'ko kau he minu?" (Fun atoni Yahudi ka nabuan fa nok atoni Samaria.) 4:10 Yesus natae neune nak, "Kalu ho muhin halinat Uisneno ma In sekau kun le nak ko: Fe Kau oe he inu, of hom toti neu In ma In anfe ko oe honis." 4:11 Bife nane nak neu In, "Usif, Ho ka mu'if sote ma oehani i mnanu kun. Ho mupeni oe honis nane na'ko me ka? 4:12 Ai ho munae nesin mu'ko hai ama uf Nai Yakub le in es anfe kai oehani i. Fun in ninu anbin nok in anhin ma in mu'it sin ka?" 4:13 Yesus natae neune nak, "Atoni le in ninu na'ko oe i, of in anmeno anten. 4:14 Mes atoni le in ninu oe le Au he fene, of in kan menof talan te nabal-bal. Fun oe le Au he fene, of anfin oemata le ansai piut ma anfene honis nabal-bal." 4:15 Bife nane nak neu In, "Uisneno, amfe kau oe nane, he nati' kais au meno; ma kais au aum a'teni eu bale i he sote oe." 4:16 Yesus nak neune, "Hom nao nai, amboin ho mone, oke te mokan nem neu i." 4:17 Bife nane nak, "Au ka mu'if mone." Yesus nak neune, "Namneo, ho ka mu'if mone. 4:18 Fun ho mamone mulali mok atoni nim, ma le ho mokan muni i, nane ka ho mone fa. Bi lasi i ho mu'uab namneo." 4:19 Bife nane nak neu In, "Uisneno, au fe uhin, nak Ho mafefa knino Ko. 4:20 Hai babfini afi anli'tu ma nabes anbi nu'af i, mes hi mak bale onen totis al anbi Yerusalem." 4:21 Yesus nak neune, "Hoi bife, hom palsai Kau nai, of in leku ante, nak of hi mibes meu Amaf kan bi fa nu'af i ma kan bi fa Yerusalem amsa. 4:22 Hi mibes neu sa' le hi ka mihinef, mes hai mibes neu sa' le hai mihine, fun lasi honis nem na'ko atoni Yahudi. 4:23 Mes in leku of nem, ma leku i nem nalalien, nak ale ali'tus amneot of anli'tu neu Amaf anbi Smanaf ma amneot. Fun Amaf anlomi ale ali'tus onane. 4:24 Uisneno nane Smanaf, ma atoni le nabes neu In, so nabes anbi Smanaf ma amneot." 4:25 Bife nane nak neu In, "Au uhin nak Neno Anan of ankoenon nem le antek amsa nak Kesel Afetin. Leka In ankoenon nem of In naton kai ale sa'." 4:26 Yesus nak neune, "In kun esle' Au, le namolok nok ko." 4:27 Bi leku nane amsa In asimo lasi sin anfani neman. Sin namkakan fun in namolok nok bife nane. Mes katit fa atoni mese le he na'uab nok bife nane nak, "Hom lomi sa' ka? Ai he natan neu Yesus nak: Amaf, Ho mumolok mokan neu sa' ka?" 4:28 Oke te bife nane in nao nasaitan in kusi oe anbi bale nane ma nao neu kot hen etun ale atoni anbi nane. 4:29 "Aim nai, ma amkiso! Atoni le In naton kau ale sa' le au mo'e ulali. Ait In Kesel Afetin ka?" 4:30 Oke te sin anpoi na'ko kot ma neman neu Yesus. 4:31 Onane te In asimo lasi sin nak neu In, "Pak, ambukae nai." 4:32 Mes In nak neu sin, "Au mu'i mnahat le hi ka mihinef." 4:33 Asimo lasi sin na'uaben es neu es nak, "Ai anmu'i atoni le nekin sa' neu In hen bukae ka?" 4:34 Yesus nak neu sin, "Au mnahat nane esle' Au mo'e In le ansonu Kau In lomin, ma usopu mepu le In nana'at neu Kau. 4:35 Fun hi mak: Al funan ha te neno abut ante. Mes Au ak ki: Him kiso nai funam natef ma mipene mit ale lele le namnatu ma anmeto neu hen seki ma anlefi. 4:36 Fun a'abut nane ansimo nalali in baen ma in nabua abut neu honis nabal-bal. Talan te akifut ma a'abut sin alsin namlil. 4:37 Fun lasi i anmatom nok amnait uab nak: Atoni es ankifun ma bian es ana'but. 4:38 Au lelu ki hem abut sa' le hi kam hae fa neun. Atoni bian sin es anhaen ma hi aim hem abut sin haet nane." 4:39 Atoni Samaria namfaun le sin anbi kot nane sin anpalsai neu In, fun bife nane le ansaksi nak, "In naton neu kau ale sa' le au mo'e ulali." 4:40 Leka ale atoni Samaria nane sin nem ante Yesus sin antoti neu In he nati' In nabala nok sin; ma In nabala nok sin neno nua. 4:41 Ma atoni namfau anteni le anpalsai natuin In a'at. 4:42 Ma sin nak neu bife nane, "Haim palsai, mes ka natuin fa sa' le ho mu'uab, fun haim nen kim neu In, ma mihin mak, In kun namneo-namneo Kesel Afetin neu pah pinan." 4:43 Neno nua namuni te Yesus In nao na'ko bale nane neu pah Galilea. 4:44 Fun Yesus ansaksi kun nak, mafefa knino mese ka napenif kan tola bi in kuan. 4:45 Mes leka In nem ante Galilea, atoni Galilea ansimo In, fun sin nit nalali ale sa' le In anmo'e bi tolas anbi Yerusalem, fun sin amsa nokan anbi tolas nane. 4:46 Oke te Usif Yesus anfani anteni neu kuan Kana bi pah Galilea, bi bale le In anmo'e oe anfani tua mina amtasa. Ma anbi Kapernaum anmu'i atoni mese le anmepu bi sonaf, in anah namen. 4:47 Leka in nen nak Yesus nem na'ko Yudea neu Galilea, in nao neu Yesus ma antoti he nati' In nem ma naleko in anah, fun in anah nane hen maten. 4:48 Yesus nak neune, "Kalu hi ka mitaf lasi taka ma lasi amkakat hi kam palsaif." 4:49 Atoni nane nak neu In, "Uisneno, amkoenom aum fe nahunu na'ko au anah hen mate." 4:50 Yesus nak neune, "Hom nao nai, ho anah anmoni!" Atoni nane anpalsai neu a'at le Yesus na'uab neune oke te in nao. 4:51 Leka in fe anbi lanan atnanan te, in ate sin neki hanaf neune nak, in anah anmoni. 4:52 In natan neu sin nak, afi leuk fauka te anah nane naleko'. Sin natae nak, "Afi neno oni leuk mese te in men maininit naleko' kun." 4:53 Onane te amaf nane namnau nit, nak afi neno onane te Yesus na'uab neun nak, "Ho anah anmoni." Oke te in palsai, nok in ume nanan sin. 4:54 Ma nane lasi taka hae nua le Yesus anmo'e, leka In anfani nem na'ko Yudea neu Galilea.
5:1 Nalali te atoni Yahudi sin neno naek, es nane te Yesus In nao neu Yerusalem. 5:2 Anbi Yerusalem anhaumak Eno Bibi kase anmu'i nifu mese, le antek neki a'at Ibrani nak Betesda. Anmu'i ke'an nim anbi nifu nane ninen. 5:3 Anbi ale ke'an nane sin natupab atoni amenat namfaun. Atoni afolot, atoni hae hela, ma atoni men ole. Le sin anpao he oe nane nakebo. 5:4 Fun fe-fe'at ahake Uisneno ansanu nem neu nifu nane ma ankebo oe nane. Atoni le antam nahunu neu nifu le in oe nane nakebo, in naleko' kun na'ko in menas, he men sa' amsa. 5:5 Anbi bale nane anmu'i atoni mese le in namen ton bo'tenum fanu. 5:6 Leka Yesus nit atoni nane antup, ma nahin nak in namen a'lo, In nak neune, "Hom lomi he muleko ka?" 5:7 Atoni amenat nane natae neu In nak, "Uisneno, kan mu'if atoni le he nasanut kau neu nifu nane leka in oe nakebo. Fun leka au fe he nao eu nifu nane te, atoni bian ansanu nahunun kau." 5:8 Yesus nak neune, "Hom fen nai ma maiti ho nahe' ma amnao nai." 5:9 Ma bi leku nane amsa atoni nane naleko', oke te in naiti ini nahe' ma in nao kun. Mes neno nane Neno Snasat. 5:10 Es nane te atoni Yahudi sin nak neu atoni le fe naleko nane, "Neno i Neno Snasat. Ho kais amloi ho nahe'." 5:11 Mes atoni nane natae sin nak, "Atoni le naleko' kau, in es nak neu kau: Maiti ho nahe' ma amnao nai." 5:12 Sin natan neune nak, "Atoni nane sekau ka? Le nak neu ko: Maiti ho nahe', ma amnao nai?" 5:13 Mes atoni le naleko nane, in ka nahin fa atoni nane sekau, fun Yesus nanonbon neu atoni amfaun le sin anbi bale nane. 5:14 Nalali te Yesus nae'ku nokan bi Ume Uisneno, ma nak neune, "Ho muleko kum. Kais ho mo'e sanat anteni, he nati' kais lasi amle'ut nesin anbolan ko." 5:15 Atoni nane anpoi ma an etun neu atoni Yahudi sin, nak Yesus es naleko in. 5:16 Es nane te atoni Yahudi sin nami lanan hen li'u Yesus fun In naleko' amenat bi Neno Snasat. 5:17 Mes In nak neu sin, "Au Ama anmepu tal neno i, ma Au amsa mes he mepu." 5:18 Natuin lasi nane atoni Yahudi sin nami lanan nes-nesi he namate In. Fun ka al fa In tanhai Neno Snasat, mes natuin In nak Uisneno lo In Amaf kun ma onane te In nanesa In aon nok Uisneno. 5:19 Usif Yesus natae sin nak, "Au ak ki, Anmone ka nabe'i fa hen mo'e sa' natuin In kuasat kun. So In nit fe Amaf anmo'e nani. Fun sa' le Amaf anmo'e, Anmone anmo'e amsa. 5:20 Fun Amaf In nek Anmone ma nalile neu In ale sa' le In anmo'e nani. Ma of Amaf nalile neu In ale mepu le naek a'nesin ale mepu nane talan te hi mimkak. 5:21 Fun of Amaf nafena amates sin ma namonib sin, onane amsa Anmone of namonib atoni le In anlomi. 5:22 Amaf kan lefi fa lasi neu sekau, mes nana'at nani ale alef lasi neu Anmone In. 5:23 He nati' ale atoni sin nanaeb Anmone onle sin nanaeb Amaf. Atoni le ka nanaeb fa Anmone, in amsa kan nanaeb fa Amaf le anlelu Anmone. 5:24 Au ak ki: Atoni le natuin Au a'at ma anpalsai neu Amaf le anlelu Kau, in anmu'i honis nabal-bal. In ka napeni fa le'at, mes anpoi na'ko maten ma antam neu honis. 5:25 Au ak ki: In leku of nem ma ante es i, le amates sin nen Uisneno Anmone In hanan. Ma sin le amnen of anmonin. 5:26 Onle Amaf anmu'i honis anbi In aon, onane amsa In fe nani neu Anmone hen mu'i honis anbi In aon. 5:27 Ma In anfe kuasat neu Anmone he nafek lasi, fun In kun lo Anmone Pah To. 5:28 Kais hi mimkak natuin lasi nane, fun in leku of nem. Ale atoni le anbi nopu maten of amnen In hanan. 5:29 Oke te sin poin. Atoni le anmo'e alekot of anfen neu honis. Mes atoni le anmo'e amle'ut of anfen neu lasi fekat. 5:30 Au ka ube'i fa he mo'e sa na'ko Au kuasat: Au ufek lasi natuin sa' le Au nen ma Au fekat nane namneo. Fun Au ka utuin fa Au lomik, mes In kun le anlelu Kau In lomin. 5:31 Kalu Au saksi neu Au aok, saksi nane ka namneof. 5:32 Mes kalu atoni bian es ansaksi neu Kau, Au uhin nak saksi nane namneo. 5:33 Him sonu haef neu Nai Yohanes ma in saksi nane amneot kun. 5:34 Au u'uab lasi i, ka natuin fa Au lomi mansian in saksi, mes natuin he nati' nahoni ki. 5:35 Nai Yohanes nane onle paku le notu ma ansinek ma hi mit in pinan nane leku tuk es. 5:36 Mes Au mu'i saksi mese le a'nesin Nai Yohanes ini esle' mepu le Amaf nana'at nani neu Kau, he nati' Au unaob ani. Mepu nane esle' Au mepu i, ma anfani saksi neu Kau, nak Amaf es ansonu Kau. 5:37 Amaf le ansonu Kau, In kun es ansaksi neu Kau. Hi kam nenaf In hanan ma hi ka mitaf In human. 5:38 Ma In a'an ka nabala anbi ki, fun hi kam palsai fa neu In le In ansonu nani. 5:39 Him soi Sulat Knino, fun hi mitenab mak of hi mipeni honis anbin. Ma Sulat Knino nane ansaksi neu Kau. 5:40 Mes hi ka aim fa meu Kau he mipeni honis nane. 5:41 Au ka totif lasi naeba na'ko mansian. 5:42 Mes Au uhin ki, fun anbi hi nekam, hi ka mu'if manekat neu Uisneno. 5:43 Au aum eki Au Ama In kanan, mes hi kam simo Kau. Leka atoni bian nem neki in kanan kun of him simo in. 5:44 Leka me hi hem palsai kalu him simo pules es neu es, ma hi ka mami fa lasi pules le nem na'ko Uisneno mes tilo ka? 5:45 Kais hi mitenab mak of Au usanab ki bi Amaf In matan. Le he nasanab ki es Nai Musa, le hi mifnekan meune. 5:46 Fun leka him palsai neu Nai Musa, of him palsai neu Kau amsa fun in es antui nalali neu Kau. 5:47 Mes kalu hi kam palsai fa sa' le in antui nani, leka me hi hem palsai sa' le Au he u'uab ani ka?"
6:1 Nalali te Yesus anlak neu Nifu Galilea panin, le antek nak Nifu Tiberias. 6:2 Atoni namfaun natuin In, fun sin nit ale lasi amkakat sin le In anmo'e nani esle' naleko' amenat sin. 6:3 Oke te Yesus ansae neu nu'af ma antok anbi nane nok In asimo lasi sin. 6:4 Ma Neno Paskah, atoni Yahudi sin neno naek anhaumaken. 6:5 Leka Usif Yesus ankiso funam natef ma In nit atoni amfaun nem neu In. In nak neu Nai Filipus, "Hit sos utunu' na'ko me ka, he nati' atoni i sin anbukae ka?" 6:6 (In na'uab lasi i hen su' nit Nai Filipus, In nahin nalaliIn hen mo'e sa'.) 6:7 Nai Filipus natae neu In nak: "Utunu' le upan noni dinar natun nua of ka namno'uf neu sin. Maski atoni mes em napeni pis an es." 6:8 In asimo lasi mese, Nai Andreas, Nai Simon Petrus tataf nak neu In, 6:9 "Amaf, li'ana mese es i le anmu'i utunu' pisa nim ma ika koe nua. Mes nane in oten sa' ka neu atoni amfaun i?" 6:10 Yesus nak, "Amlelu atoni nane hen tokon. Bi bale nane anmu'i hun anaek. Ma atoni nane sin antokon oni sin nifun nim. 6:11 Oke te Yesus naiti utunu' nane ma an onen toti neu Uisneno ma anbati neu sin le antokon anbi nane. Onane amsa In anmo'e neu ika sin, fauk le sin anlomi. 6:12 Ma leka sin namsenan, in nak neu In asimo lasi sin, "Mibua kit le pis anesit sin, kais ampolin sin." 6:13 Oke te sin nabua nani pis anesit na'ko utunu' pisa nim nane ma nahenu aba' bo'es am nua leka atoni amfaun sin bukae nalali. 6:14 Leka atoni sin nit lasi amkakat le In anmo'e sin nak, "Namneo, In Mafefa knino, le he nem neu pah pinan." 6:15 Fun Yesus nahin, nak sin neman he naseke In hen fani Kesel. Onane te In naskotu anteni anmeskun neu nu'af. 6:16 Leka neno anfai te, In asimo lasi sin ansanu neu nifu. 6:17 Oke te sin sae neu belo' ma anlakan neu Kapernaum. Leka fai anmesok anfin Yesus fe ka nemaf neu sin amsa. 6:18 Oke te tasi nane anpesen fun anin anfoe. 6:19 Leka sin ansepo belo' ma anao oni kilo nim ai ne onane te, sin nit Yesus, In anao natuin oe fafon nem anhaumak belo' nane. Oke te sin namtaun. 6:20 Mes Yesus nak neu sin, "Kais mimtau, Au es Kau i." 6:21 Oke te sin nasaeb Yesus neu belo' ma leku nane amsa sini belo' ante nifu ninen le sin anali nao neune. 6:22 Nokfa onane te, atoni amfaun le sin nabala anbi nifu panin, sin nit, nak bi bale nane katit fa belo' bian al mese nane ma Yesus kan sae nok fa In asimo lasi sin neu belo' nane. Mes In asimo lasi sin anao anmesen. 6:23 Mes nalali te belo' bian neman na'ko Tiberias anhaumak bale le sin anbukae utunu', le Usif Yesus natulu nani nok onen totis. 6:24 Leka atoni amfaun nane sin nit, nak Yesus kanbine fa, ma In asimo lasi sin amsa kahaf, sin ansae neu belo' nane sin ma anao neu Kapernaum he nami Yesus. 6:25 Leka atoni amfaun nane sin nae'ku nok Yesus bi tasi panin sin nak neu In, "Pak, leka es Ho aum meu i ka?" 6:26 Yesus natae sin nak, "Au ak ki, hi maim Kau ka natuin fa hi mit lasi taka sin, mes natuin hi miah utunu' ma mimsen. 6:27 Kais hi mepu neu maka le of namle'u kun. Mes neu maka le naleko' nabala talan te honis nabal-bal. Le Anmone Pah To hen fe ki. Fun In kun le Ama, Uisneno antao In malak neu In." 6:28 Oke te sin nak neu In, "Hai he mo'e sa' ka, he nati' hai mepu Uisneno In mepu ka?" 6:29 Yesus natae sin nak, "Mepu le Uisneno anlomi, esle' him palsai neu In le Uisneno anlelu nani." 6:30 Sin natae neu In nak, "Ho mo'e taka sa' ka, he nati' hai mit ma ampalsai neu Ko? Ho mepu meup sa ka? 6:31 Hai babfin afi sin anbukaen mak muti anbi mnela paha snaen onle antui nalali nak: In anfen sin hen bukaen utunu' na'ko neno tunan." 6:32 Yesus nak neu sin, "Au ak ki, ka Nai Musa fa es anfe ki utunu' na'ko neno tunan, mes Au Ama es anfe ki utunu' amneot na'ko neno tunan 6:33 Fun utunu' le ansanu na'ko Uisneno nane lo utunu' le ansanu na'ko neno tunan ma anfe honis neu pah pinan." 6:34 Ma sin nak neu In, "Amaf, fe kai utunu' nane piut." 6:35 Yesus nak neu sin, "Au utunu' honis Kau. Atoni le in nem neu Kau, of in ka namnahan tenif, ma atoni le anpalsai neu Kau, of in kan menon tenif. 6:36 Mes Au ak ulali ki: Hi mit milali Kau mes hi kam palsaif. 6:37 Ale sa' le Ama anfe neu Kau, of nem neu Kau, ma atoni le nem neu Kau, of Au ka poilnef. 6:38 Fun Au sanu u'ko neno tunan ka natuin fa Au lomik, mes natuin In le ansonu Kau In lomin kun. 6:39 Ma ansonu le ansonu Kau In lomin esle' ale atoni le In anfe Kau sin kais anmu'i amnekut. Mes Au ufena ufani sin bi Neno Amsoput. 6:40 Fun i Au Ama lomin kun, he nati' ale atoni le nit Anmone ma anpalsai neu In napeni honis nabal-bal. Ma of Au ufena ufani sin bi Neno Amsoput. 6:41 Oke te atoni Yahudi sin na'munu In, fun In nak, "Au utunu' Kau le ansanu na'ko neno tunan kun." 6:42 Ma sin nak, "Ai In ka Yesus fa le Nai Yusuf anmone ka? Le hai mihin In amaf ma In ainaf? Leka me nabe'i In nak: Au sanu u'ko neno tunan?" 6:43 Yesus natae sin nak, "Kais hi mi'munu. 6:44 Katit fa atoni mese le he nem neu Kau, kalu Amaf le ansonu Kau ka nok fa in he nem neu Kau. Ma of Au ufena ufani anbi Neno Amsoput. 6:45 Fun antui nani anbi Mafefa knino sin sulat nak: Uisneno of nanoina ale atoni sin. Ma ale atoni le natnin ma ansimo noina na'ko Amaf, of nem neu Kau. 6:46 Lasi nane ka nak fa, anmu'i atoni le nit nalali Amaf. Al In kun le nem na'ko Uisneno, In es nit Amaf nane. 6:47 Au ak ki, Atoni le anpalsai, napeni honis nabal-bal. 6:48 Au utunu' honis Kau. 6:49 Hi babfin afi sin anbukae mak muti anbi mnela paha snaen ma sin anmate. 6:50 I utunu' le ansanu na'ko neno tunan kun: Atoni le anbukae u tunu nane of kan matef. 6:51 Au utunu' honis Kau le ansanu na'ko neno tunan. Atoni le anbukae utunu' i, of anmoni talan te nabal-bal. Ma utunu' le Au fe ki nane lo Au nesak, le Au fe ani neu pah pinan in monin." 6:52 Atoni Yahudi sin anmatoen es nok es nak: "Leka me atoni i hen fe kai In nesan he haim bukae ka." 6:53 Ma Yesus nak neu sin, "Au ak ki, kalu hi kam bukae fa Anmone In nesan ma ka minu fa In na' of hi ka mu'if honis bi hi aom. 6:54 Atoni le in bukae Au nesak ma ninu Au na' in anmu'i honis nabal-bal ma of Au ufena ufani bi Neno Amsoput. 6:55 Fun Au nesak nane mnahat namneo ma Au na' nane mninut namneo. 6:56 Atoni le in bukae Au nesak ma ninu Au na', in nabala anbi kau ma Au ubala a'bi in. 6:57 On Ama amonit le ansonu Kau ma Au moni utuin Ama, onane amsa atoni le anbukae Kau, of anmoni natuin Au. 6:58 Fun i utunu' le ansanu na'ko neno tunan, ka on fa utunu' le hi babfin sin anbukae ma anmate. Atoni le anbukae utunu' i of anmoni nabal-bal." 6:59 Usif Yesus na'uab ale lasi i sin anbi Kapernaum leka In nanoina sin anbi Ume unen totis. 6:60 Leka sin nen nalali lasi nane te, Yesus In asimo lasi sin namfaun nak, "A'at i matean le'uf kun, sekau he natnin nani ka?" 6:61 Yesus In nahin nak, In asimo lasi sin na'munu neu lasi nane, In nak neu sin, "Lasi i naktulib hi nek palsait ka? 6:62 Neu lasi onme ka, leka hi mit Anmone Pah To ansae neu bale le afi In anbine ka? 6:63 Smanaf Uisneno nane es anfe honis, nesaf nane ka ma'osa fa. Ale a'at le Au u'uab ulali neu ki nane Smanaf Uisneno ma honis. 6:64 Mes hi bian sin kan palsain fa." Fun Yesus nahin nalali, sekau es le kan palsai ma sekau es of nana'at In. 6:65 Oke te In nak, "Es nane Au ak ulali ki: Katit fa atoni mese he nem neu Kau, kalu Ama kan fene fa lasi nane neu in." 6:66 Na'ko leku nane, In asimo lasi sin namfau naskotun sin aon ma ka natuin anteni fa In. 6:67 Oke te Usif Yesus nak neu In asimo lasi sin bo'es am nau, "Ai hi amsa amlomi hem nao ka?" 6:68 Nai Simon Petrus natae neu In nak, "Uisneno, hai hem nao meu sekau ka? Ho a'at nane neki honis nabal-bal. 6:69 Haim palsai milali ma mihin mak, Ho le'u Knino Ko mu'ko Uisneno." 6:70 Yesus natae neu sin nak, "Ai Au es ka beti ki fa hi bo'es am nua ka?" Mes es anbi ki in anfani Nitu." 6:71 Yesus uab nane antom Nai Yudas le Nai Simon Iskariot in anmone. Fun in kun es of nana'at Yesus, le In asimo lasi mese na'ko sin bo'es am nua nane.
7:1 Nalali te Yesus In nao natef pah Galilea. In kan lomif he namaika anbi pah Yudea, fun atoni Yahudi sin nami lalan he namate In. 7:2 Bi leku nane atoni Yahudi sin neno naek anhaumak le antek nak Neno Naek La' Hau No'. 7:3 Oke te Yesus In oilfin nak neu In, "Hom fen nai mu'ko i ma Hom nao meu pah Yudea, he nati' Ho asimo lasi sin amsa sin nit Ho mepu le Ho mo'e mani. 7:4 Fun katitaf atoni mese le anmo'e sa' bi bale kolo, kalu in lomi he mahine bi mat-mat. Kalu Ho he mo'e lasi onane, mulile nai Ho aom neu pah pinan." 7:5 Fun In oilfin amsa nekan ka nateb fa knino neu In. 7:6 Yesus nak neu sin, "Au leku fe kan tiaf, mes neu hi, ale leku naloitnon kun. 7:7 Pah pinan kan sunatin ki fa, mes ansunatin Kau, fun Au saksi pah pinan in moet amle'ut. 7:8 Him nao nai meu tolas nane. Au fe ka naof fun Au leku fe kan tiaf." 7:9 In nak sin onane, ma In nabala fe anbi pah Galilea. 7:10 Leka Yesus oilfenu a'naon neu tolas nane, In amsa anao natuin mes atoni mese amsa ka nahinef. 7:11 Atoni Yahudi sin nami In anbi tolas nane ma nak, "In es me ka?" 7:12 Ma anmu'i seof namfau na'ko atoni amfaun neu In. Bian nak, "In atoni alekot." Mes bian anten sin nak, "Kahaf, In nasekeb to." 7:13 Mes katit fa atoni mese le na'uab mat-mat neu In fun sin namtausan atoni Yahudi. 7:14 Leka tolas nane fe nanaobon, Yesus antam neu Ume Uisneno oke te nanoina anbin. 7:15 Es nane te atoni Yahudi sin namkakan ma nak, "Leka me atoni i anmu'i hinef onane, mes in ka naskolaf!" 7:16 Usif Yesus natae sin nak, "Au noina nane ka na'ko fa Au, mes na'ko In le ansonu Kau. 7:17 Atoni le anmo'e natuin Uisneno lomin, of in nahin nak noina nane na'ko Uisneno ai na'ko Kau. 7:18 Atoni le na'uab neu in aon, in naim kanaf neu in aon kun. Mes atoni le naim kanaf neu In le ansonu nani, atoni nane amneot ma kan mu'if lasi poiba ai mo'e anbi in. 7:19 Ai Nai Musa kan fe nalali ki fa plenat knino? Mes katit fa es anbi ki le anmo'e natuin plenat knino nane. Hi he mimate Kau neu sa' ka?" 7:20 Atoni amfaun nane sin natae nak, "Hom nitu sae ka, sekau es he namate Ko ka?" 7:21 Yesus natae sin nak, "Al Au mo'e lasi mese ma hi ala ki mimkak. 7:22 Nai Musa anfe ki plenat neu lasi mahelit -- le namneo helit nane ka na'ko fa Nai Musa, mes na'ko hit am uf sin -- ma him heli atoni anbi Neno Snasat. 7:23 Kalu atoni mese ansimo helit anbi Neno Snasat he nati' kais nale'un plenat Nai Musa, nansa hi mito'an Kau, fun Au uleko atoni mese in aon bi Neno Snasat. 7:24 Kais him lef lasi natuin sa' le hi mit, mes amlef lasi nok amneot." 7:25 Oke te atoni Yerusalem sin fauk na'uab nak, "Ai ka In fa ka le sin nami he namate? 7:26 Kiso In na'uab nok alekot ma sin ka na'uab fa sa' neu In. Hai nakaf sin, oni nahinen nak In Kesel Afetin ka? 7:27 Mes hai mihin atoni i na'ko me, mes leka Kesel Afetin he nem katit fa atoni mese le nahin In na'ko me." 7:28 Leka Yesus nanoina bi Ume Uisneno, In nak, "Namneo hi mihin Kau ma hi mihin Au u'ko me. Mes Au aum ka natuin fa Au lomik, mes In le ansonu Kau nane amneot, ma hi ka mihinef. 7:29 Au uhin In, fun Au aum u'ko In ma In es ansonu Kau." 7:30 Sin nami hen heke In, mes katit fa atoni mese le antao niman neu In, fun In leku fe kan tiaf. 7:31 Mes anbi atoni amfaun nane anmu'i atoni namfaun le nekan nateb knino neu In, ma sin nak, "Leka Kesel Afetin ankoenon nem, of In anmo'e lasi amkakat nesin na'ko le In anmo'e i ka?" 7:32 Atoni Farisi sin nen atoni amfaun le sin naseo neu Yesus. Es nane te atoni Farisi sin nok ana' lasi fuat nakaf sin anlelu apao Ume Uisneno sin nao hen heke Yesus. 7:33 Mes Yesus nak, "Au umaika ok ki al leku tuk es ma oke te of Au nao eu In le ansonu Kau. 7:34 Of hi maim Kau, mes of hi ka mie'ku fa mok Kau. Fun hi ka mibe'i fa he aim meu bale le Au bine." 7:35 Atoni Yahudi sin na'uaben es neu es nak, "In he nao neu me ka, talan te hai of ka mie'ku fa mokan? Ai In he nao neu atoni Yahudi sin, le namaika anbi bale bian anbi atoni Yunani sin, he nanoina atoni Yunani sin ka? 7:36 In uab nane oten sa' ka le In nak: Of hi maim Kau, mes hi ka mie'ku mok Kau fa, ma: Hi ka mibe'i fa he aim meu bale le Au bine?" 7:37 Ma anbi Neno Amsoput na'ko tolas nane Yesus anhake ma na'uab nak, "Atoni le anmeno oe, leko in nem neu Kau ma in ninu nai! 7:38 Atoni le nekan nateb knino neu Kau, onle antui nani anbi Sulat Knino nak: Oe honis of ansai na'ko in nekan." 7:39 Yesus namolok neu Smanan Knino, le atoni hen palsai neu In, of hen simo. Fun Smanan Knino fe ka nemaf, natuin fe ka nanaeb fa Yesus bi In neno maten. 7:40 Atoni bian na'ko amfaut nane le sin nen a'at nane sin nak, "Namneo, In Mafefa knino kun." 7:41 Bian sin nak, "In Neno Anan kun." Mes bian anteni nak, "Kahaf, fun Neno Anan ka nem fa na'ko Galilea. 7:42 Fun Sulat Knino anetun nak: Neno Anan nane Nai Daud sufan ma na'ko kuan Betlehem, le afi Nai Daud namaika anbine." 7:43 Oke te atoni amfaun nane sin nasulin natuin In. 7:44 Atoni bian anbi sin hen heke In, mes katit fa atoni mese le hen tao niman neu In. 7:45 Oke te apaot sin nem neu ana' lasi fuat nakaf sin ma atoni Farisi sin le nak neu sin, "Hi ka meki fa In neu sa' ka?" 7:46 Atoni apaot sin natae nak, "Katit fa atoni mese in uab on atoni nane!" 7:47 Atoni Farisi nane nak neu sin, "Ai hi amsa nasekeb ki ka? 7:48 Ai anmu'i es na'ko hiti nakaf sin ai na'ko atoni Farisi sin le nekan nateb knino neu In ka? 7:49 Mes atoni amfaun i le sin ka nahin fa plenat knino Nai Musa, sin ansuktok kuk!" 7:50 Mes Nai Nikodemus, atoni mese na'ko sin le afi nem neu Yesus nak neu sin, 7:51 "Natuin plenat knino Nai Musa, ka nabe'i fa het hukum atoni mese, kalu fe kat nen ma ka tahinef sa' le In anmo'e?" 7:52 Sin natae nak, "Ho amsa atoni Galilea ko ka? Hom tae mit Sulat Knino ma of ho muhin mak katit fa Mafefa knino mese le he nem na'ko Galilea." 7:53 Oke te sin anfani mes-mese neu sin ume.
8:1 Mes Yesus In nao neu Tubu Zaitun. 8:2 Ma nokfa onane fe nok-nok ana In nao anteni neu Ume Uisneno ma ale to sin nem neu In, In antok ma nanoina sin. 8:3 Oke te Ahin Sulat sin ma atoni Farisi sin neki nem neu In bife mese le napeni nan anmo'e lasi mapaisa. 8:4 Sin nahakeb bife nane bi sin atnanan ma nak neu Yesus, "Am, sin hek nan bife i le fe anmo'e lasi mapaisa. 8:5 Nai Musa antui bi Plenat Knino nak het poil tis ale bife le anmo'e lasi mapaisa onane. Am, mutenab onme ka neu lasi nane?" 8:6 Sin na'uab onane hen su' nit In, he nati' sin napeni sa' he nasanab In. Mes Yesus naluli ma antui nain neki Ini klulun. 8:7 Leka sin natan piut neu In, oke te In fen anhake ma nak neu sin, "Atoni le kan mu'if sanat anbi ki, so in poil nahunun bife nane neki fatu." 8:8 Oke te In naluli anteni ma antui neu nain. 8:9 Mes leka sin nen a'at nane te sin anpoi mes-mese mulai na'ko amnasit. Nalali te al Yesus anmes nok bife nane le anhake nabala anbi in balan. 8:10 Oke te Yesus anhake ma nak neune, "Hoi bife, sin esme ka? Katit fa atoni mese le nasanab ko ka?" 8:11 In natae nak, "Kan mu'if, Uisneno." Oke te Yesus nak, "Au Amsa ka lomif he usanab ko. Hom nao nai, ma na'ko leku i kais ho mo'e amteni sanat." 8:12 Ma Yesus na'uab anteni neu atoni amfaun nane nak, "Au le i meusine pah pinan Kau. Atoni le natuin Kau, of in ka naoinson fa anbi mesokan, mes of in anmu'i meusine honis." 8:13 Atoni Farisi sin nak neu In, "Hom saksi kum Ho aom, Ho saksit nane ka namneof." 8:14 Yesus natae neu sin nak: "Mautu Au saksi kuk Au aok, ma Au saksi nane namneo; fun Au uhin Au aum u'ko me ma Au he nao eu me. Mes hi ka mihin fa Au aum u'ko me ma Au he nao eu me. 8:15 Hi mifek lasi natuin lekat mansian, Au ka ufek fa atoni mese amsa. 8:16 Mes leka Au ufek lasi amsa, Au fekat nane namneo, fun Au ka mese fa mes Au ok In le ansonu Kau. 8:17 Ma antui nani anbi hi Plenat Knino nak, atoni nua sin saksi nane namneo. 8:18 Au saksi kuk neu Au aok ma Amaf amsa, le ansonu Kau, ansaksi neu Kau." 8:19 Ma sin nak neu In, "Ho Ama es me ka?" Yesus natae nak, "Hi ka mihin Kau fa ma Au Ama amsa kahaf. Kalu hi mihin Kau, hi mihin Au Ama amsa." 8:20 Yesus na'uab ale a'at i, leka In nanoina anbi Ume Uisneno anhaumak peti fua tulu. Mes katit fa atoni mese le hen hek In, fun In leku fe kan tiaf. 8:21 Oke te Yesus na'uab anteni neu atoni amfaun nane nak, "Au of anao, ma of hi mami Kau mes of hi mate bi hi sanat. Bale le Au he nao eune, hi ka mibe'i fa he aim meun." 8:22 Ma atoni Yahudi sin nak, "Ai In hen lol nison ka, es nane In nak: Bale le Au he nao eune, hi ka mibe'i fa he aim meune ka?" 8:23 Oke te In nak neu sin, "Hi mi'ko pinan i, Au u'ko fafon. Hi mi'ko pah pinan, Au ka u'ko fa pah pinan i. 8:24 Natuin lasi nane, lelo Au ak ki, fun kalu hi kam palsai, nak Au es le In, of hi mate ambi hi sanat." 8:25 Sin nak neu In, "Ho sekau Ko ka?" Yesus natae sin nak, "Au he u'uab sa' anteni neu ki ka? 8:26 Anmu'i lasi namfaun le Au he u'uab ma ufek neu ki; mes In, le ansonu Kau, lo amneot, ma sa' le Au nen na'ko In, Au u'uab ani neu pah pinan." 8:27 Sin ka nahin fa, fun In na'uab neu sin antom Amaf nane. 8:28 Ma Yesus nak, "Leka hi misaeb Anmone Pah To, of hi mihin mak Au esle' In ma Au ka mo'ef sa' na'ko Au aok. Mes Au u'uab ale lasi onle Ama nanoina neu Kau. 8:29 Ma In le ansonu Kau, In anhaek nok Kau. In kan paleob Kau fa he mes fun Au mo'e piut ale sa' le In anlomi." 8:30 Leka Yesus na'uab nalali ale lasi nane te, atoni namfaun anpalsai neu In. 8:31 Ma In nak neu atoni Yahudi sin le anpalsai neu In nak, "Kalu hi mibala bi Au a'ak, him fani Au asimo lasi namneo. 8:32 Ma of hi mihin lasi amneot, ma lasi amneot nane of nafetin ki." 8:33 Sin natae nak, "Nai Abraham sufan esle' hai, ma hai fe kam aetnom fa neu sekau. Leka me Ho mak: Of nafetin ki?" 8:34 Yesus nak neu sin: "Atoni le anmo'e sanat, nane sanat in ate. 8:35 Fun ate nane ka namaika fa piut anbi ume, mes anah nane namaika piut anbi ume. 8:36 Es nane leka Anmone nafetin ki, him fani atoni ao sona kun." 8:37 "Au uhin, nak Nai Abraham sufan ki, mes hi mami he mimate Kau, fun Au a'ak ka napenif bale anbi hi nekam. 8:38 Sa' le Au it anbi Amaf, nane Au uton ani. Onane amsa hi mo'e sa' le him nen na'ko hi Ama." 8:39 Sin natae neu In nak, "Hai Ama es Nai Abraham." Yesus nak neu sin, "Bati Nai Abraham sufan ki, onane te of hi mo'e sa' le Nai Abraham anmo'e. 8:40 Mes le hi mo'e esle' mami he mimate Kau; Au, atoni le uton ki lasi amneot le Au nen na'ko Uisneno; mepu onane Nai Abraham kan mo'e nani fa. 8:41 Hi mo'e sa' le hi ama anmo'e nani." Sin natae nak, "Ka nahonis kai fa natuin lasi mapaisa. Hai Ama mese, es Uisneno." 8:42 Usif Yesus nak neu sin: "Bati hi Ama es Uisneno, of him nek Kau, fun Au poi ma aum u'ko Uisneno. Ma Au ka aum fa natuin Au lomik, mes natuin In le anlelu Kau. 8:43 Hi ka mihin fa Au a'ak nane neu sa' ka? Natuin hi ka mibe'i fa hem nen Au a'ak. 8:44 Hi ama nane es Nitu ma him lomi he mituin hi ama in lomin. Na'ko un-unu Nitu nane namate atoni. In kan lomif lasi amneot, fun katitaf amneot anbi in. Leka in napoibon, nane in na'uab natuin in lomin kun. Fun in atoni apoiba, ma lasi moel in amaf es in. 8:45 Mes natuin Au etun ki lasi amneot, hi kam palsai fa neu Kau. 8:46 Sekau le anbi ki le nabe'i nalile nak Au mo'e sanat ka? Leka Au uton ki lasi amneot, nansa hi kam palsai Kau fa? 8:47 Atoni le na'ko Uisneno, in nen a'an Uisneno. Mes hi ka mi'ko fa Uisneno, es nane te hi kam lomif hem nen In a'an." 8:48 Atoni Yahudi sin natae Yesus nak, "Ai ka namneo fa ka le hai mak, Ho atoni Samaria ma amniut sae ka?" 8:49 Yesus natae nak, "Au ka nitu saef, mes Au unaeb Au Ama, ma hi ka minaeb Kau fa. 8:50 Au ka amif kanaf neu Au aok. Anmu'i Mese le In nami ma In amsa es nafek lasi. 8:51 Au ak ki, atoni le natuin Au a'ak of in ka naben nitaf lasi maten tal nabal-bal." 8:52 Atoni Yahudi sin nak neu In, "Hai mihinen, mak Hom nitu sae. Fun Nai Abraham anmaten, onane amsa Mafefa knino sin. Mes Ho mak: Atoni le natuin Au a'ak, of in ka naben nitaf lasi maten tal nabal-bal. 8:53 Ai hom nesin hit ama Nai Abraham ka le anmaet nalalien. Mafefa knino sin amsa anmaten. Ho munesa Ho aom mok sekau ka?" 8:54 Usif Yesus natae nak, "Bati Au unaeb Au kanak, lasi naeb nane ka maota fa. Au Ama es nanaeb Kau, le hi mak hai Uisneno es In. 8:55 Mes hi ka mihinef, so Au es uhine. Ma leka Au ak: Au ka uhin fa In, onane te Au atoni apoiba Kau onle hi amsa. Mes Au uhin In ma Au utuin In a'an. 8:56 Hi ama Nai Abraham namlil natuin in nit Au neno. In nit nalali ma in namlil kun." 8:57 Ma atoni Yahudi sin nak neu In, "Ho uam fe kan tiaf ton bo'nim, leka me Ho mit Nai Abraham ka?" 8:58 Usif Yesus nak neu sin, "Au ak ki, nahunu na'ko nahonis Nai Abraham, Au aum ulalien." 8:59 Oke te sin naitin fatu hen poli In, mes Yesus na'tolo ma anpoi nasaitan Ume Uisneno.
9:1 Leka Yesus anfini te, In nit atoni mese le matan anfolo na'ko neno le nahonis nani. 9:2 In asimo lasi sin natan neu In nak, "Am, nansa' ka es nahonis atoni i nok mat folo? Atoni i es nasanab ka, ai in amaf ma in ainaf ka?" 9:3 Yesus natae nak, "In ka nasanab fa, in amaf ma in ainaf amsa kahaf. Mes natuin Uisneno In mepu he nalilon anbi in. 9:4 Leka fe manas hit mes atmepu ansonu le ansonu Kau In mepu. Fun leka anfai, katit fa atoni mese le hen mepu. 9:5 Leka Au fe bi pah pinan te, Au meusine pah pinan Kau." 9:6 Leka Yesus na'uab nalali ale lasi nane te In nalon ai nakiun neu nain, ma anselo In hape nok nain. Oke te anlapes nani neu atoni afolot nane in matan, 9:7 ma nak neune, "Hom nao nai ma amboe ho aom bi Nifu Siloam." Siloam in oten nak, "Le ansonu." Atoni nane in nao ma anboe in aon. Leka in anfain nem te in kius nit kun. 9:8 In anhaumak sin ma ale atoni sin le afi nahin in on atotis, sin nak: "Ai ba'is i ka le atoni atatotis?" 9:9 Bian sin nak, "Ba'is i namneo." Mes bian sin nak, "Kahaf, mes human on in." Mes atoni nane in nak kun, "Namneo, au esle' i." 9:10 Sin nak neune, "Ho matam nit anfani onme ka?" 9:11 In natae nak, "Atoni le antek In nak Yesus, In es anselo nain ma anlapen neu au matak ma nak neu kau, Hom nao nai ma amboe ho aom neu Nifu Siloam. Oke te au nao ma au boe au aok, nalali te au kiso it." 9:12 Oke te sin nak neune, "In esme ka?" Atoni nane natae nak, "Au ka uhinef." 9:13 Oke te sin neki atoni afolot nane neu atoni Farisi sin. 9:14 Fun neno le Yesus anselo nain ma naleko atoni nane in matan, antom nok Neno Snasat. 9:15 Es nane te atoni Farisi sin natan neune nak: Hom kiso mit kum onme ka? In natae nak: "In lapen klofo homa neu au matak, oke te au boe au aok, ma leku i au kiso it." 9:16 Oke te atoni Farisi bian sin nak, "Atoni i ka nem fa na'ko Uisneno, fun In kan panat fa Neno Snasat." Bian na'uab anteni nak, "Leka me atoni asanat nabe'i hen moe lasi amkakat onane ka?" Oke te lasi matoes anbolan sin. 9:17 Nalali te sin nak anteni atoni afolot nane, "Ma ho mutenab sa' ka neu In, fun In naleko ho matam?" In natae nak, "In Mafefa knino kun." 9:18 Mes atoni Farisi sin kan palsaif, nak: Atoni nane afi matan anfol ma fe in kiso nit. Es nane te sin anboin in amaf ma in ainaf. 9:19 Ma natan neu sin nak, "Anah i, namneo hi anah ka? Le hi mak neno hi mihonis in matan anfolo ka? Ma leku i in kiso nit onme ka?" 9:20 Onane te in amaf ma in ainaf natae nak, "Hai mihin, mak hai anah, fun nahonis nok mat folo. 9:21 Mes leku i in kiso nit onme, hai ka mihinef. Ma sekau es naleko in matan, hai ka mihin fa amsa. Hi mitan neu in, fun ini naeken, ma in na'uab kun neu in aon." 9:22 In amaf ma in ainaf na'uab onane, fun sin namtausan atoni Yahudi sin. Fun sin nekaf mese, nak ale atoni le antebes Yesus on Neno Anan, of anli'u napoitan na'ko ume onen totis. 9:23 Es nane in amaf ma in ainaf nak, "In naeken, so hi mitan neu in." 9:24 Oke te sin anboin anteni atoni le lelo anfolo ma nak neune, "Ho mu'uab lasi amneot nai bi Uisneno matan. Hai mihin atoni nane asanat kun." 9:25 Atoni nane natae nak, "In asanat ai kahaf, au ka uhinef. Mes au uhin lasi mese, afi au matak anfolo, mes muni i au kiso it." 9:26 Ma sin nak neune, "In moe sa' neu ko ka? In naleko' ho matam onme ka?" 9:27 In natae sin nak, "Au eut ulali ki, ma hi kam nenaf. Hi he mitnin amteni neu sa' ka? Ai hi amsa amlomi hem fani In asimo lasi ka?" 9:28 Sin na'akan atoni nane ma nak neune, "Ho es amfani In asimo lasi. Hai kahaf, fun Nai Musa in asimo lasi es hai. 9:29 Hai mihin, Uisneno nakua a'an neu Nai Musa, mes atoni i, hai ka mihinef In nem na'ko me." 9:30 Atoni nane natae neu sin nak, "Amkakat mese neu hi ka mihin fa In nem na'ko me mes In naleko' au matak. 9:31 Hit tahin Uisneno ka nenaf atoni asanat, mes atoni amneot le anmoe In lomin. 9:32 Na'ko un-unu tal neno i, fe kat nenaf anmu'i atoni le naleko' matfolo na'ko fe nahonis nani. 9:33 Kalu atoni nane ka nem fa na'ko Uisneno, In ka nabe'i fa hen moe ale sa'." 9:34 Sin natae nak, "Ho le i nahonis ko anbi sanat, ma ho he munoina kai ka?" Oke te sin li'u napoitan in na'ko Ume onen totis. 9:35 Yesus In nen nak sin li'u napoitan atoni nane na'ko Ume onen totis. Oke te In nao ma nae'ku nok atoni nane ma nak neune, "Ho nekam nateb knino neu Anmone pah to ka?" 9:36 Atoni nane natae nak, "Uisneno, In sekau ka? He nati' au nekak nateb knino neu In?" 9:37 Yesus nak neune, "Ho mit mulali In, fun In es namolok nok ko, In kun esle' nane." 9:38 In natae nak, "Au palsai Uisneno!" Oke te in nabes neu In. 9:39 Usif Yesus nak, "Au aum eu pah pinan i he ufek lasi; he nati' atoni le sin ka nitaf, ankiso nit, ma atoni le ankiso nit sin anfani matfolo." 9:40 Atoni Farisi fauk le anbi nane, leka sin nen Yesus na'uab onane te, sin natan neu In nak, "Hai amsa amfolo ka?" 9:41 Yesus natae sin nak, "Bati hi matam anfolo, hi ka mu'if sanat. Mes natuin hi mak: Haim kiso mit, es nane te hi sanat nabalah."
10:1 "Au u'uab alekot neu ki: Atoni le antam neu bibi kase o'of ma ka natuin fa eno, mes ansae natuin bahan, in atoni abakat ma atoni asikat. 10:2 Mes atoni le antam natuin eno, in atukus bibi kase kun. 10:3 Apao eno nasoitan eno neu in, ma bibi kase sin amnen in hanan ma in anboin ini bibi kase sin mes-mese natuin sin kanan ma antopu napoitan sin. 10:4 Leka ini bibi kase sin anpoin, in nao nahun ma bibi kase nane sin natuin in, fun sin nahin in hanan. 10:5 Mes kalu atoni mata teme of sin ka natuinef, mes sin naen nasaitan atoni nane fun sin ka nahin fa in hanan." 10:6 Usif Yesus na'uab lasi leta i neu sin, mes sin ka nahin fa sa' le In na'uab nane neu sin. 10:7 Yesus nak anteni neu sin, "Au a'at i namneo, Au eno Kau neu ale bibi kase nane. 10:8 Ale atoni le nem nahun na'ko Kau, nane sin abakat ma asikat ma bibi kase nane sin ka nenaf sin hanan. 10:9 Au eno Kau, sekau le antam natuin Kau, in napeni honis, ma in of antam ma anpoi ma napeni mnahat. 10:10 Abakat in nem, al he nabak ma namate ma nale'un. Mes Au aum he nati' sin napeni honis, ma anmoni nok athoes. 10:11 Au atukus alekot Kau. Atukus alekot nana'at In monin neu ini bibi kase sin. 10:12 Mes atoni ma sebo' le ka atukus fa ma ka bibi tuaf fa, leka in nit asu fui nem, of in naen nasaitan ale bibi kase sin. Oke te asu fui nane anheke ma nasitab ale bibi kase sin. 10:13 In naen kun fun in atoin sebo' ma in kan lae nan fa ale bibi kase nane. 10:14 Au atukus alekot Kau ma Au uhin Au bibi kase sin ma Au bibi kase sin nahin Kau. 10:15 On Ama nahin Kau, ma Au uhin Ama, ma Au una'at Au monik neu Au bibi kase sin. 10:16 Ma anmu'i anteni bibi kase bian le ka na'ko fa o'of. Mes Au he Nibun sin amsa ma of sin nen Au hanak. Ma of sin anfani pukan mese ma atukus mese kun. 10:17 Ama a'nek Kau, fun Au una'at Au monik he simo ufani sin. 10:18 Katit fa atoni mese he nait sin na'ko Kau, mes Au fe ani natuin Au lomik, Au mu'i kuasat he fe ani, ma Au mu'i kuasat he aiti ufani. Mepu nane Au simo na'ko Au Ama." 10:19 Fun lasi matoes anbol anbi atoni-atoni Yahudi sin atnanan natuin a'at nane. 10:20 Atoni namfaun sin na'uab nak, "In nitu sae, ma namaun, nansa' him nen In ka?" 10:21 Mes bian na'uab nak, "Nane ka atoni aniut saes fa in uab. Nabe'i ka nitu naleko atoin mat folo in matan ka?" 10:22 Namuni te Neno Naek Anhainiki Ume Uisneno bi Yerusalem natiabon. Neno nane nae'ku nok olas mainikin. 10:23 Ma Yesus nanoina anbi Ume Uisneno bi Nai Salomo in ke'an. 10:24 Atoni Yahudi sin nem nabuan neu In ma nak, "Usif, tal leka ka Ho mumautu hai nekam he na'unu? Kalu Ho Neno Anan Ko, Hom eut kai muti." 10:25 Yesus natae sin nak, "Au eut ulali neu ki, mes hi kam palsaif. Ale mepu le Au mo'e ani anbi Au Ama In kanan, nane es neki saksi neu Kau. 10:26 Mes hi kam palsaif, natuin hi kam tamaf meu Au bibi sin. 10:27 Au bibi kase sin amnen Au hanak ma Au uhin sin ma sin natuin Kau. 10:28 Au fe honis nabal-bal neu sin ma of sin ka namle'un fa talan te nabal-bal. Ma katit fa atoni mese he nasik sin na'ko Au nimak. 10:29 Au Ama le anfe sin neu Kau nesi na'ko ale sa'. Ma katit fa atoni mese he nasik nan sin na'ko Au Ama niman. 10:30 Au ma Amaf nane lo mese kun." 10:31 Onane te atoni Yahudi sin naiti anteni fatu hen poli Yesus. 10:32 Mes Yesus nak neu sin, "Au ulile mepu alekot namfaun neu ki, le Au simo na'ko Au Ama. Na'ko ale mepu nane sin, mepu me ka es anmo'e ki he nati' him poil Kau meki fatu?" 10:33 Atoni Yahudi sin natae nak, "Haim poil Ko, ka natuin fa mepu alekot le Ho mo'e sin mes natuin Hom tek mule'un Uisneno. Ma natuin Ho mansian Ko, Ho munesa Ho aom mok Uisneno." 10:34 Usif Yesus nak neu sin, "Ai kan tui nani fa anbi hi Plenat Knino nak: Uisneno nakua a'an nak: 'Hi uisneno ki?' 10:35 Hit tahin nak sa' le matui bi Sulat Knino mes natiabon talan nabal. Es nane kalu Uisneno antek sin le ansimo In a'an nak 'uisneno', 10:36 nansa hi mak, Au tek ule'un Abal-balat In kanan, fun Au ak, Au le i Uisneno In Anah? Uisneno es anbati Kau ma ansonu Kau neu pah pinan. 10:37 Bati Au ka mepuf Au Ama In mepu, kais him palsai Kau. 10:38 Mes bati Au meup ani ma hi kam palsai Kau fa, ampalsai nai neu ale mepu nane, he nati' hi mihin mak Ama anbi Kau ma Au bi Ama amsa." 10:39 Sin nami anteni hen heke Yesus, mes In nafetnon na'ko sin niman. 10:40 Nalali te Yesus anfani neu Noe Yordan panin, neu bale le Nai Yohanes nasub oe anbin, oke te namaika anbi nane. 10:41 Ma atoni namfaun nem neu In ma nak, "Nai Yohanes kan mo'ef lasi taka mese amsa, mes ale lasi le Nai Yohanes na'uab nani antom atoni i lo namneo." 10:42 Oke te ale atoni amfaun le anbi nane sin anpalsai neu Yesus.
11:1 Anmu'i atoni mese le namen, kanan Nai Lazarus. In namaika anbi Betania, bi Maria ma in olif bi Marta sin kuan. 11:2 Bi Maria nane esle' afi anop min fomeni neu Usif Yesus In haen ma nose nameto neki ini nakfunu. 11:3 Ma sin naofe esle' Nai Lazarus amenat nane. Sin nua sin ansonu hanaf neu Yesus nak, "Uisneno, hai naof le Hom nek mani, in namen." 11:4 Leka Yesus In nen hanaf nane te In nak, "Menas nane ka neki fa neu maten, mes he nalile Uisneno In apinat. Ma natuin menas nane of nanaeb Uisneno In Anmone." 11:5 Fun Yesus In nek bi Marta ma in tataf ma Nai Lazarus. 11:6 Mes leka In nen hanaf nak Nai Lazarus namen, In namaika fe neno nua anbi bale le In anbin. 11:7 Nalali te In nak neu In asimo lasi sin, "Aim het fain teu pah Yudea." 11:8 Asimo lasi sin nak neu In, "Pak, aif neno i atoni Yahudi sin hen poil nis Ko neki fatu, mes Hom loim hem fani amteni meu nane ka?" 11:9 Mes Yesus natae nak, "Ai neno mese kan mu'if leku bo'es am nua ka? Atoni le na'oni fe manas, in kan tofu fa haen fun in nit meusine pah pinan. 11:10 Mes atoni na'oni nok fai, of antofu haen, fun kan mu'if meusine anbi in." 11:11 Yesus na'uab onane, oke te In nak neu sin, "Hit bae Nai Lazarus antup, mes Au nao he ufena ani na'ko tupas." 11:12 Ma asimo lasi sin nak neu In, "Uisneno, kalu in tup, of in naleok." 11:13 Usif Yesus na'uab neu Nai Lazarus anmaten. Mes sin natenab nak Nai Lazarus antup leko. 11:14 Es nane Yesus na'uab muti neu sin nak, "Nai Lazarus anmaten. 11:15 Mes Au malin natuin leku nane, Au ka binef. Fun lasi nane neki alekot neu ki, he nati' him palsai. Aim nai het nao es leku i." 11:16 Oke te Nai Tomas, le antek in kanan Nai Didimus, nak neu in bia in, asimo lasi bian, "Aim nai het nao het mate tokan." 11:17 Leka Yesus nem ante, In napeni ansub nalali Nai Lazarus neno ha anbi nuat naukel. 11:18 Kuan Betania anhaumak Yerusalem, oni kilo tenu. 11:19 Atoni Yahudi sin namfaun neman neu bi Marta ma bi Maria hen halin sin, fun sin naof anmate. 11:20 Leka bi Marta amnen, nak Yesus ankoenon nem, in nao nae'ku nokan. Mes bi Maria nabala anbi ume. 11:21 Bi Marta nak neu Yesus, "Uisneno, bati afi Hom bi i, oni au naof nane kan matef. 11:22 Mes leku i au uhin, nak Uisneno of anfe Ko sa' le Hom amtoti neu In." 11:23 Yesus nak neu bi Marta, "Ho naof nane of anfen anfani." 11:24 Bi Marta nak neu In, "Au uhin, ak Nai Lazarus of anfen anfani leka atoni amates sin anfen anfani bi neno hatas amsoput." 11:25 Yesus natae nak, "Lasi amates anfen anfani ma lasi honis esle' Au. Atoni le nekan nateb knino neu Kau, of anmoni, maski in maet nalali. 11:26 Ma atoni amonit le nekan nateb knino neu Kau, of kan maet nitaf talan te nabal-bal. Ho nekam nateb lasi i ka?" 11:27 Bi Marta natae nak, "Koi Uisneno, au nekak nateb, Ho Neno Anan Ko, Uisneno Anmone, In kun le of ankoenon nem neu pah pinan." 11:28 Leka in na'uab nalali onane te in nao ma anboin in tataf bi Maria ma naseo neune nak, "Ama Anoni es i ma In no'en ko." 11:29 Leka bi Maria in nen onane te, in fen ma nao neu Yesus. 11:30 Bi leku nane Usif Yesus fe kan tamaf neu kuan. In fe anbi bale le bi Marta nae'ku In anbin. 11:31 Leka atoni Yahudi sin le fe anhalin bi Marta anbi ume, nit bi Maria anfen laba ma anpoi. Sin amsa anpoi natuin in, fun sin natenab nak in he nao neu naukel ma hen kae anbi nane. 11:32 Leka bi Maria nem ante bale le Yesus anbin ma ankiso nit In, in anli'tu ma nabes anbi Yesus haen ma nak neu In, "Uisneno, bati afi Hom bi i, au naof nane kan matef." 11:33 Leka Yesus nit bi Maria ankae, ma atoni Yahudi sin le nem nokan sin amsa ankae, In nekan namle'u. In nekan antu' ma nak, 11:34 "Him sub es me ka?" Oke te sin natae nak, "Uisneno, aum nai ma amkiso." 11:35 Oke te Yesus ankae. 11:36 Ma atoni Yahudi sin nak, "Kiso In nek nisan." 11:37 Mes atoni fauk anbi sin nak, "In naleko atoni matfolo, leka me In ka nabe'i fa hen mo'e atoni i he kais anmate ka?" 11:38 Oke te Yesus nekan namle'u anteni, nalali te In nao neu naukel nane. Naukel nane, nuat mese le antobe neki fatu. 11:39 Ma Yesus nak, "Maiti fatu i." Mes amates nane in fetof bi Marta nak neu In, "Uisneno, in nafoben, fun in maet neno haen." 11:40 Usif Yesus natae nak, "Ai Au ka ak ulali fa neu ko: Kalu hom palsai teb-teb, of ho mit Uisneno In apinat." 11:41 Oke te sin naiti fatu nane. Ma Yesus anbaisenu neu neno tunan ma nak, "Syukur ma terima kasih neu Ko, Ama, fun Hom nen mulali Kau. 11:42 Au uhin, ak Hom nen Kau piut. Mes natuin atoni amfaun le anhake fun ma natef Kau, Au u'uab on i he nati' sin anpalsai, nak Ho es amlelu Kau." 11:43 Ma leka In na'uab nalali onane te anhunun nok hanan anaek nak, "Lazarus, anpoi aum nai!" 11:44 Oke te amates nane anpoi nem. In haen ma niman fe mafutu ma ankub in human neki pilu muti. Ma Yesus nak neu sin, "Him sefi ale piul muti nane ma maut he in nao." 11:45 Ma anmu'i atoni namfaun anbi atoni Yahudi sin le nem ankiso bi Maria ma sin nit ale sa' le Yesus anmo'e, oke te sin anpalsai neu In. 11:46 Mes bian sin nao neu atoni Farisi sin ma anetun sin neu sa' le Yesus anmo'e nalali. 11:47 Oke te Ana' fuat knino nakaf sin ma atoni Farisi sin anboin Alef Lasi sin he nabuan ma nak, "Hit het mo'e sa' ka? Fun atoni i anmo'e lasi amkakat namfau. 11:48 Leka hit paleob In, of ale atoni anpalsai In. Nalali te atoni Roma sin neman ma nasik nan hit bale knino nok hit to." 11:49 Mes atoni mese anbi nane kanan Nai Kayafas, le Ana' Lasi Fuat Amnanut bi ton nane, in nak neu sin, "Hi ka mihin fa sa'. 11:50 Ma hi ka mitenab mihin fa, mak leko nesi atoni mese anmate hen seka hit to na'ko hit to ok-oke he namle'u." 11:51 Nai Kayafas in na'uab lasi nane ka natuin fa in lomin, mes natuin in Ana' Lasi Fuat Amnanut bi ton nane in nabeno, nak Yesus hen mate anseka to. 11:52 Ma ka neu to Yahudi amnes, mes he nabuab ma nameseb anah-anah Uisneno le nasitbok kuk. 11:53 Ma na'ko neno nane sin malomin he namate Yesus. 11:54 Es nane Yesus ka nalilon fa anbi atoni Yahudi sin matan. In nao neu kuan mese kanan kuan Efraim anhaumak mnela paha snaen. In namaika anbi bale nane nok In asimo lasi sin. 11:55 Bi neno nane atoni Yahudi sin Neno Tolas Paskah anhaumaken. Ma atoni namfau na'ko pah nane sin nao neu Yerusalem he naknino sin aon nahunu na'ko Tolas Paskah nane. 11:56 Sin nami Yesus, leka sin fe anhake bi Ume Uisneno sin na'uaben es nok es nak, "Hi mitenab onme ka? In amsa of nem neu tolas ka?" 11:57 Onanae te Ana' fuat knino nakaf sin ma atoni Farisi sin napoitan plenat he nati' ale atoni le nahin Yesus namaika anbi me, sin naton he nati' sin anheke In.
12:1 Neno ne nahunun na'ko Neno Tolas Paskah, Yesus anao neu kuan Betania. Bale le afi Yesus nafena Nai Lazarus anbine. 12:2 Sin anmo'e tolas neu In anbi nane ma bi Marta es nabiku. Nai Lazarus amsa anbukae nok Yesus. 12:3 Bi Maria in naiti min fomeni ma'upa oni kati mese. Oke te in an'op neu Yesus In haen ma nose nameto neki in nakfunu. Ma ume nane nahenu nok mina in fon. 12:4 Mes Nai Yudas Iskariot, le Yesus asimo lasi sin esle' he nana'at Yesus, na'uab nak: 12:5 "Nansa ka es ka nasosa fa min fomeni i, upan dinar natun tenu ma anfe nani neu atoni amamu'it sin ka?" 12:6 In na'uab onane ka natuin fa in namnau amamu'it sin, mes natuin in abakat kun. Fe fe'at in nait noni na'ko kas le in anpao. 12:7 Usif Yesus nak, "Maut he in mo'e lasi i fun namnau neno hen panola Kau. 12:8 Fun atoni amamu'it sin nok ki piut, mes Au of ka ok ki fa piut." 12:9 Atoni Yahudi namfaun sin nen nak Yesus anbi nane, oke te sin nem neu In. Sin neman ka al fa natuin Yesus, mes natuin he nit Nai Lazarus le In nafena na'ko amates. 12:10 Oke te Ana' fuat knino nakaf sin anmalomin he namate Nai Lazarus amsa, 12:11 fun natuin in, atoni Yahudi namfaun nasaitan sin ma anpalsai neu Yesus. 12:12 Nokfa onane leka atoni amfaun le neman neu tolas nane sin nen, nak Yesus fe es lalan he nem neu Yerusalem. 12:13 Es nane te sin naitin bone no' ma anpoin hen senu In ma sin anhunun nak, "Ampules Uisneno! Nahoeb alekot neu In le ankoenon nem bi Uisneno tunan In kanan, Kesel to Israel!" 12:14 Yesus napeni bikase luke mnanu tipu mese oke te In antunon neun onle antui nalali nak, 12:15 "Kais mimtau, hoi feotnai Sion, mail, hi Kesel ankoenon nemen, antunon neu bikase tipu luke mnanu." 12:16 Asimo lasi sin ka nahinef lasi nane, mes leka nalatan nalali Yesus, sin namnau nit, nak tuis nane antom neu In. Ma sin anmo'e nalali amsa neu In. 12:17 Atoni amfaun le sin nok In, bi neno In no'en napoitan Nai Lazarus na'ko naukel ma nafena in na'ko amates, sin ansaksi nani antom In." 12:18 Es nane atoni amfaun nane sin nao hen senu In, fun sin nen, nak In es anmo'e lasi amkakat nane. 12:19 Ma atoni Farisi sin na'uaben es neu es nak, "Hi mit kim meki hi matam, nak hi ka mibe'i fa he mo'e sa', mail pah pinan ok-oke nao natuin In. 12:20 Anbi ale atoni le a'naon hen onen toti bi neno tolas nane anmu'i atoni Yunani sin fauk amsa. 12:21 Atoni nane sin neman neu Nai Filipus, le na'ko Betsaida pah Galilea ma natan neune nak, "Bae, haim lomi he mie'ku mok Yesus." 12:22 Nai Filipus in nao ma anetun Nai Andreas. Oke te sin nua sin nem ma anetun lasi nane neu Yesus. 12:23 Mes Yesus natae sin nak, "Leku antelen he nati' nalatan Anmone Pah To. 12:24 Au ak neu ki: Leka ane fua mese kan mofu fa neu nain ma anmate, in mese nabala. Mes leka in anmate of in napoitan fuan namfau. 12:25 Atoni le a'nek in monin, of in naneku in monin. Mes atoni le ka nekaf in monin bi pah pinan i, of in anpanat nani neu honis nabal-bal. 12:26 Atoni le anlomi hen tuthae Kau, in mes natuin Kau; he nati' Au bi me te Au atuthaes amsa anbi nane. Atoni le antuthae Kau, of Au Ama naliatas nani. 12:27 Le'ku i, Au monik nanu'on ma Au he ak sa' ka? Ama, mufetin Kau na'ko tabu i ka? Kahaf, fun natuin lasi nane Au aum eu leku i. 12:28 Ama, munaeb Ho kanam nai." Oke te sin nen hanaf na'ko neno tunan nak, "Au unaeb ulali In, ma of Au unaeb In anteni." 12:29 Atoni amfaun le anhake anbi nane, sin nen hanaf nane, sin nak nane lotos napunu. Mes bian sin nak, "Ahake neno tunan es na'uab nok In." 12:30 Usif Yesus natae sin nak, "Hanaf nane ka neu fa Au, mes neu ki. 12:31 Tomas i nanaob lef lasi neu pah pinan i. Tomas i amsa anpolin napoitan kuasat pah pinan. 12:32 Ma Au, leka na'aiti Kau na'ko pah pinan, of Au hel eki atoni sin nem neu Kau." 12:33 In na'uab onane, he nalile Ini maten onme ka? 12:34 Oke te atoni amfaun nane sin natae nak, "Haim nen milali Plenat Knino nak, Neno Anan anmoni nabala talan te nabal-bal. Leka me Ho mu'uab mak of na'ati Anmone Pah To ka? Anmone Pah To nane sekau kun ka?" 12:35 Yesus nak neu sin, "Meusine anbi hi atnanam al leku tuk es. Leka meusine nane fe anbi ki, ampalsai nai neu In, he nati' mesokan kais ankub ki. Atoni le na'oinson anbi mesokan in ka nahin fa he nao neu me. 12:36a Him palsai nai neu meusine, leka meusine anbi ki, he nati' him fani anah-anah meusine." 12:36b Leka namolok nalali onane, Yesus anpoi ma ka nalile fa In aon neu sin. 12:37 Usif Yesus anmo'e lasi amkakat namfau anbi sin matan, mes sin kan palsain fa neu In. 12:38 He nati' a'at le Mafefa Knino Nai Yesaya na'uab nani natiabon kun nak, "Uisneno, sekau es hen palsai neu hai a'at nane ka? Ma Uisneno tunan In nukun akuasat natonon neu sekau ka?" 12:39 Es nane te sin kan palsain fa fun Nai Yesaya na'uab nalali nak, 12:40 "In nafolob nalali sin matan, ma namanub sin nekan, he nati' kais sin nit neki sin matan, ma natenab neki nekan, oke te anfani neman, he nati' Au uleko' sin." 12:41 Nai Yesaya na'uab lasi, fun in nit nalali In apinat ma na'uab antom In. 12:42 Anmu'i atopu to Yahudi namfau le anpalsai neu In, mes natuin atoni Farisi sin, sin ka naton fa mat-mat, he nati' kais anpolin napoitan sin na'ko Ume onen totis. 12:43 Fun sin lomi he nanaeb mansian nesi na'ko nanaeb Uisneno. 12:44 Oke te Yesus anhunun nak, "Atoni le anpalsai neu Kau, nane in kan palsai fa neu Kau, mes neu In le ansonu Kau. 12:45 Ma atoni le in nit Kau, nane in nit In le ansonu Kau. 12:46 Au aum eu pah pinan on meusine, he nati' ale atoni le anpalsai neu Kau, kais nabala anbi mesokan. 12:47 Ma atoni le amnen Au a'ak ma ka natuinef, Au ka lefi fa in lasi. Fun Au aum ka neu fa hel lefi pah pinan in lasi mes he umonib ani. 12:48 Atoni le antite Kau ma kan simof Au a'ak, anmu'i alef lasi neu in. A'at le Au uton ulali, of anfani in alef lasi bi Neno Amsoput. 12:49 Fun Au uab nane ka na'ko fa Au, mes na'ko Ama le anlelu Kau. In kun es naplenat Kau sa' le Au he u'uab ani ma utiaba ani. 12:50 Ma Au uhin, ak Ini plenat nane lo honis nabal-bal. Es nane sa' le Au u'uab, Au utiaba onle Ama in nakua a'an neu Kau."
13:1 Nahunu na'ko Neno Tolas Paskah he nanaobon, Yesus nahin nak In leku antelen he nati' In nasaitan pah pinan i ma anfani neu In Amaf. Onle In nek In asimo lasi sin, onane amsa In nek sin tal namsopun. 13:2 Sin fe anbukae nabuan nok Yesus. Nitu antam neu Nai Yudas Iskariot le Nai Simon Iskariot anmone in nekan hen aneb Yesus. 13:3 Yesus nahin, nak In Amaf nana'at nalali ale sa' neu In. Ma In nahin amsa In nem na'ko Uisneno ma of anfain neu Uisneno. 13:4 Oke te Yesus anfen ma nauf napoitan In sobalu. In naiti piul muti ma anfutu nani neu In atnanan. 13:5 Nalali te In antesi oe neu topa, ma anboe In asimo lasi sin haekenu ma nose nameto neki piul muti le anfutnon bi In atnanan. 13:6 Leka In nem ante Nai Simon Petrus, Nai Simon Petrus nak neu In, "Uisneno, Ho hem boe au haek ka?" 13:7 Yesus natae neune nak, "Lasi le Au he mo'e, ho ka muhinef, mes namuni te of ho muhine." 13:8 Nai Petrus nak neu In, "Uisneno, of Ho kam boef au haek talan te nabal-bal." Usif Yesus natae nak, "Kalu Au ka boef Ho haem, of ho ka mupeni fa pa' anbi Kau." 13:9 Nai Simon Petrus nak neu In, "Kalu onane Uisneno, kais al au haek mes au nimak ma au nakak nok!" 13:10 Yesus natae neune nak, "Atoni le naniu nalali, in aone muti. Es nane kais in naniu anteni. So al atboe in haen. Ma hi amsa muti ki, mes ka ala ki fa." 13:11 Fun In nahin nalali, sekau of es nana'at In. Es nane te In nak, "Hi ka muti fa ala ki." 13:12 Leka In anboe nalali sin haekenu, In anpaek nafani In sobalu ma anfain neu In balan. Oke te In nak neu sin, "Hi mihin lasi le Au mo'e neu ki ka? 13:13 Him tek Kau mak, Anoni ma Usif. Namneo onane, fun Au Anoni Kau ma Au Usif Kau. 13:14 Kalu Au on hi Uisneno ma hi Anoni, Au boe hi haem, hi amsa mes a'maboe haem es nok es. 13:15 Fun Au fe ki leta mese, he nati' hi amsa amo'e onle Au mo'e ulali neu ki. 13:16 Au ak ki: Namneo atuthaes mese ka nesin fa in Usif, ai haef ka nesin fa in le ansonu nani. 13:17 Leka hi mihin lasi i, alekot neu ki kalu hi mo'e mani. 13:18 Au ka u'uab fa neu ki ala ki. Au uhin, sekau le Au beti ulali. Mes he natis a'at i: Atoni le anbukae Au utunu' nane, in naiti haen tikan neu Kau. 13:19 Au u'uab lasi i neu ki leku i, nahunu na'ko lasi nane anbol. He nati' leka lasi nane anbol, hi nekam nateb knino, nak: In kun esle' Au. 13:20 Au ak ki, namneo: Sekau ansimo atoni le Au sonu ani, in ansimo Kau. Ma sekau ansimo Kau, in ansimo In le ansonu Kau." 13:21 Leka Usif Yesus na'uab nalali onane te In nekan antu' ma ansaksi nak, "Au ak ki, tebes atoni mese anbi ki of nana'at Kau." 13:22 Oke te asimo lasi sin anmakison es neu es, fun sin natenab, In uab nane antom neu sekau ka? 13:23 In asimo lasi mese le In nek nisan, napesion neu In aon bian a'ne'u. 13:24 Nai Simon Petrus antian matan neune ma nak, "Ati Hom toti mit, In na'uab neu sekau ka?" 13:25 Asimo lasi nane naklelon ma nak neu In, "Uisneno, sekau kun ka?" 13:26 Yesus natae nak, "Atoni le Au he fene utunu' le Au lep ani bi mako', in esle' nane." Oke te in naiti utunu' ma anlep nani ma anfe neu Nai Yudas, Nai Simon Iskariot in anmone. 13:27 Leka Nai Yudas ansimo nalali utunu' nane, Nitu antam neu in nekan. Oke te Yesus nak neune, "Sa' le ho he mo'e, mo'e mani nai lab-lab." 13:28 Mes katit fa atoni mese anbi sin le antoko anbi nane nahin sa' le Yesus na'uab nani neu Nai Yudas. 13:29 Fun Nai Yudas in es anpao aul noni, es nane bian sin natenab, oni Yesus anlelu hen sos sa'-sa' neu tolas nane, ai hen fe sa' neu amamu'it sin. 13:30 Nai Yudas ansimo utunu' nane, oke te in anpoi. Ma neno anfaien. 13:31 Leka Nai Yudas anao, Yesus nak, "Tomas i nanaeb Anmone Pah To ma nanaeb Uisneno anbi In. 13:32 Kalu nanaeb Uisneno anbi In, of Uisneno nanaeb In amsa anbi In. Ma Uisneno of nanaeb In lab-lab. 13:33 Hoi Au anhin, Au ubua ok ki al leku tuk es. Of hi maim Kau, onle Au u'uab neu atoni Yahudi sin: Au nao bi me te, hi ka mibe'i fa he aim meune, es nane te Au uton ain ki esle' i. 13:34 Au fe ki plenat fe'u mese, he nati' hi manek es nok es. Onle Au nek ki, hi amsa amanek es nok es. 13:35 Leka hi manek es nok es, of ale atoni nahin, nak Au asimo lasi ki." 13:36 Nai Simon Petrus nak neu Yesus, "Uisneno, Ho hem nao meu me ka?" Yesus natae nak, "Au he nao eu me te, ho ka mube'i fa he mutuin Kau esle' i, mes namuni te of ho mutuin Kau." 13:37 Nai Petrus nak neu In, "Uisneno, nansa' ka es ka nabe'i fa au utuin Ko esle' i? Au he una'at au monik neu Ko." 13:38 Yesus natae nak, "Ho he muna'at ho monim neu Kau ka? Tebes Au ak ko: Nahunu na'ko manu ankokle'o, ho mutotan mulali Kau haef tenu."
14:1 "Kais hi mi'unu nekam, so ampalsai neu Uisneno ma ampalsai neu Kau nok. 14:2 Anbi Au Ama In ume anmu'i bale namfaun. Bati ka on fa nane, Au ka uton ki fa. Fun Au he nao eu bale nane he uloitan bale neu ki. 14:3 Leka Au nao eu bale nane ma uloitan ulali bale neu ki, of Au fain aum ma ok ki neu Au bale, he nati' Au bi bale me, hi amsa ambin. 14:4 Ma Au nao eu me te, hi mihin lanan nane." 14:5 Nai Tomas nak neu In, "Uisneno, hai ka mihin fa Hom nao meu me. Es nane hai he mihin lanan nane onme ka?" 14:6 Usif Yesus nak neune, "Lanan he mihin Uisneno ma mipeni honis esle' Au. Katit fa atoni mese le he nem neu Ama, kalu ka nao natuin Kau fa. 14:7 So hi mihin Kau, of hi mihin Au Ama amsa. Na'ko leku i hi mihin In ma hi mit milali In." 14:8 Nai Filipus nak neu In, "Uisneno, amlekan kai Ama nane he nati' hai malin." 14:9 Usif Yesus nak neune, "Filipus, Au umaika ok ki lalob, mes ho ka muhin Kau fa ka? Atoni le in nit Kau, in nit nalali Ama. Leka me ho mak: Amlekan kai Ama nane. 14:10 Ai ho kam palsai fa ka, mak Au bi Ama ma Ama anbi Kau ka? Sa' le Au uton ki, nane ka na'ko fa Au aok, mes Ama le anbi Kau, In es nanaoba kun In mepu. 14:11 Him palsai nai neu Kau, fun Au bi Ama ma Ama anbi Kau. Ai so him palsai nai, fun ale mepu nane sin. 14:12 Au ak ki: Tebes, atoni le anpalsai neu Kau, of in nanaoba ale Au mepu sin, ma ale mepu le a nesi na'ko nane. Fun Au he nao neu Ama. 14:13 Ma ale sa' le him toti ambi Au kanak, of Au mo'e ani, he nati' nanaeb Ama anbi An mone. 14:14 Leka him toit sa' neu Kau anbi Au kanak of Au mo'e ani." 14:15 "Kalu him nek Kau, of hi mituin Au plenat sin. 14:16 Of Au toti Ama ma of In anfe ki Atuntakus bian, he nati' In nok ki talan te nabal-bal, 14:17 esle' Smanaf Amneot. Pah pinan ka nabe'i fa hen simo In fun sin ka nitef ma ka nahinef. Mes hi mihine, fun In nok ki ma of nabala anbi ki. 14:18 Au of ka usaitan ki fa on anmanat ma anlaleb. Au fain aum eu ki. 14:19 Al neon tuk es, pah pinan ka nit anteni Kau fa, mes hi mit Kau, fun Au moni ma of hi moni. 14:20 Bi neno nane of hi mihin, mak Au bi Au Ama, ma him bi Kau ma Au bi ki. 14:21 Atoni le ansimo Au plenat ma anmo'e nani, in es a'nek Kau. Ma sekau nek Kau, Au Ama of a'nek in ma Au amsa of nek in ma of Au ulilok eune." 14:22 Nai Yudas, le ka Nai Yudas Iskariot nak neu Yesus, "Uisneno, nansa' es Ho he mulile Ho aom meu kai ma ka neu fa pah pinan?" 14:23 Yesus natae nak, "Atoni le in nek Kau, of in natuin Au a'at ma Au Ama of In nek nani, ma of Hai aim meu in ma mibua mok in. 14:24 Atoni le in ka nek Kau, in ka natuin fa Au a'at. Ma a'at le him nen nane ka na'ko Kau fa, mes na'ko Ama le ansonu Kau. 14:25 Ale lasi nane Au u'uab ani neu ki, leka Au fe ok ki. 14:26 Mes Smanan Knino Atuntakus le Ama of ansonu nani anbi Au kanak. Of In nanoina ki ale sa' ma namnauba ki ale sa' le Au u'uab ulali neu ki. 14:27 Au ubela ki tetus ma aomina. Au fe ki Au tetus aomina. Ma sa' le Au fe ki, ka on fa le pah pinan anfe ki. Hi nekam kais na'unu ma kais mimtau. 14:28 Him nen milali, le Au u'uab neu ki ak: Of Au nao, mes of Au fain aum eu ki. Bati him nek Kau, of hi mimlil, fun Au nao neu Au Ama, natuin Ama In nesin Kau. 14:29 Au eut ain ki esle' i, nahunu na'ko lasi nane anbol, he nati' leka lasi nane anbol, him palsai nai. 14:30 Au ka u'uab a'tenif namfau ok ki, fun akuasat pah pinan nemen. Mes in kan mu'if kuasat neu Au aok. 14:31 Maut he pah pinan nahin, Au nek Ama, ma Au mo'e ale sa' onle Au Ama naplenat nani neu Kau. Him fen nai ma hit nao nai ta'ko bale i."
15:1 Usif Yesus nak, "Au le i tanu'an sena amneot in un ma Au Ama In hau tuaf kun. 15:2 Ale tlaef le anbi Kau, ma ka nafuaf, In oet nisan, mes ale tlaef le nafua, In nakbala nani he nafua nes. 15:3 Hi muti ki, fun a'at le Au u'uab ulali neu ki. 15:4 Mibala nai ambi Kau ma Au bi ki. Onle hau tlaef le ka nafua anmes kun so nabala anbi tanu'an sena in un. Onane amsa hi ka mifuaf kalu hi ka mibala fa ambi Kau. 15:5 Au le i tanu'an sena in un, ma hi le i tlaef ki. Atoni le nabala anbi kau ma Au ubala anbi in of in fuan nane namfaun. Fun hi ka mibe'i fa he mo'e sa' amkoit Kau. 15:6 Atoni le ka nabala fa anbi Kau, anpolin napoitan onle hau tlaef ma anmate. Nalali te atoni nabuab nani ma anpolin natam nani neu ai, oke te anput. 15:7 Leka hi mibala ambi Kau ma Au a'ak nane nabala anbi ki, him loim sa' te amtoti nai, ma of anfe nani neu ki. 15:8 Leka hi mifua namfau, of nanaeb Au Ama, ma natuin lasi nane, him fani Au asimo lasi." 15:9 "Onle Ama In nek Kau, onane amsa Au nek ki. Mibala nai ambi Au manekat nane. 15:10 Kalu hi mituin Au plenat, of hi mibala ambi Au manekak. Onle Au utuin Au Ama Ini plenat ma ubala a bi In manekan. 15:11 Au uton ale lasi i neu ki, he nati' Au amlilat nane anbi ki ma hi amlilat nane nanokbon. 15:12 Au fe ki plenat i, he nati' hi manek es nok es. Onle Au nek ulali ki. 15:13 Katit fa lasi manekat le a nesin na'ko atoni le nana'at in monin neu in bae benu sin. 15:14 Au bae benu es le hi, kalu hi mo'e ale sa' le Au uplenat neu ki. 15:15 Au ka tek a teni ki fa ak ate, fun ate nane in ka nahin fa sa' le in tuan anmo'e. Mes Au tek ki ak bae, fun Au eut ulali neu ki, sa' le Au nen na'ko Au Ama. 15:16 Fun hi es kam beti Kau fa, mes Au es a beti ki. Ma Au uki'ab ki, he nati' him nao nai ma mifua nai ma hi fuam nane nabala. He nati' him toti sa' na'ko Ama anbi Au kanak, In anfe nani neu ki. 15:17 Au fe ki plenat i, he nati' hi manek es nok es." 15:18 "Kalu pah pinan na'unu nekan neu ki, mimnau nai, nak afi pah pinan na'unu nekan nahunu neu Kau. 15:19 Bati hi mi'ko pah pinan of a nek ki on in ini ki. Mes hi ka mi'ko fa pah pinan, fun Au beti ulali ki na'ko pah pinan es nane pah pinan na'unu nekan neu ki. 15:20 Mimnau nai, sa' le Au uton ulali ki. Ate nane ka nesin fa in tuan. Kalu sin anli'u Kau, of sin anli'u ki amsa. Kalu sin natuin Au a'at, of sin natuin hi a'at amsa. 15:21 Mes sin anmo'e lasi nane neu ki natuin Au kanak fun sin ka nahin fa In le ansonu Kau. 15:22 Bati Au ka aum fa ma ka u'uab fa neu sin, of sin kan mu'in fa sanat. Mes leku i sin kan mu'in fa uab he nabonat ai naputi sin sanat. 15:23 Atoni le na'unu nekan neu Kau, in na'unu nekan neu Au Ama amsa. 15:24 Bati Au ka mepuf sa' bi sin atnanan onle katit fa atoni bian anmo'e nani, of kan mu'in fa sanat. Mes leku i sin nit nalali ale sa', mes sin na'unu nekan neu Kau ma neu Au Ama amsa. 15:25 Mes lasi nane he natis nani a'at le antui nalali anbi sin Plenat Knino nak: Sin na'unu nekan neu Kau son-sona. 15:26 Of Au sonu neu ki Amela na'ko Ama, esle' Smanan Amneot, le anpoi na'ko Ama, of In saksi neu Kau. 15:27 Mes hi amsa mes amsaksi, fun afi unun hi mok Kau."
16:1 "Au eut ain ki ale lasi i, he nati' kais him tite Kau. 16:2 Of sin napoitan ki na'ko ume onen totis. Ma leka leku nane anbol, ale atoni le sin namate ki, sin natenab nak sin mo'e luli besa neu Uisneno. 16:3 Sin mo'en onane natuin sin ka nahin fa Ama nane ma Au amsa kahaf. 16:4a Mes Au eut ki ale lasi i, he nati' leka In leku anbol te hi mihin, mak Au eut ulali neu ki." 16:4b "Au ka eut ki fa lasi na'ko neno ahunut, fun leku i Au fe ubua ok ki. 16:5 Mes leku i Au he nao eu In, le ansonu Kau. Mes katit fa atoni mese anbi ki le natan Kau nak: Ho hem nao meu me ka? 16:6 Mes natuin Au eut ki lasi nane, es nane te hi nekam antu'. 16:7 Mes namneo le Au eut ki lasi: Leko nesi neu ki leka Au nao. Fun kalu Au ka nao, Atuntakus nane of ka nem fa neu ki. Mes leka Au nao of Au sonu In neu ki. 16:8 Ma leka In nem of In nabe'ab pah pinan neu sanat, amneot ma lef lasi; 16:9 antom sanat, fun sin kan palsai Kau fa; 16:10 neu amneot, fun Au nao eu Ama hi ka mit amteni Kau fa; 16:11 neu lef lasi, fun anlef nalali; akuasat pah pinan i in lasi. 16:12 Fe anmu'i lasi namfaun le Au he eut ki, mes leku i hi fe kam sutai mibe'if. 16:13 Mes leka Smanan Amneot nem, of In topu ki neu amneot, fun In of ka na'uab fa na'ko In aon, mes sa' le In nen of In na'uab nani ma In aneut ki neu ale lasi le of anbol. 16:14 Of In nanaeb Kau, fun In aneut ki sa' le In ansimo na'ko Kau. 16:15 Fun ale sa' le Au Ama ini, nane Au ini. Es nane Au tak ki: Of In aneut ki sa' le In ansimo na'ko Kau." 16:16 "Ala kle'o te hi ka mit amteni Kau fa, ma ala kle'o anteni of hi mit Kau." 16:17 Leka sin nen lasi nane te In asimo lasi sin na'uaben es nok es nak, "In na'uab neu kit on i neu sa' ka? Ala kle'o te hi ka mit amteni Kau fa, ma ala kle'o anteni of hi mit Kau. Ma Au nao neu Ama." 16:18 Sin nak anteni, "In nak sa' ka antom a'at ala kle'o? Hit ka tahin fa In lomin nane he sa'." 16:19 Yesus nahin, nak sin he natan In neu sa' es, es nane te In nak neu sin, "Ai hi mi'uab es nok es neu lasi le Au ak ki: Ala kle'o te hi ka mit amteni Kau fa, ma ala kle'o anteni of hi mit Kau? 16:20 Au ak ki: Tebes of hi amkae ma amkul, mes pah pinan of namlil. Of him susal mes hi susal nane anfani amlilat. 16:21 Leka bife mese he nahoni, in nekan ansusal, mes leka in nahoin nalali in anah, in ka namnaun tenif susal nane, fun in namlil neu nahonis mansian mese neu pah pinan. 16:22 Onane amsa neu ki. Leku i him susal, mes leka Au mit amteni ki, hi nekam of namlil, ma katit fa atoni mese he nasik nan hi amlilat nane. 16:23 Ma anbi neno nane of hi ka mitan fa sa' neu Kau. Au ak ki: Tebes sa' le him toti neu Ama anbi Au kanak of In anfe nani neu ki. 16:24 Talan te leku i hi kam totif sa' anbi Au kanak. Him toti nai, ma of him simo, he nati' hi amlilat nane nanokbon. 16:25 Au u'uab ale lasi i neu ki eki leta. Mes leka In leku ante, Au ka u'uab a tenif eki leta, mes of Au u'uab muti monas neu ki antom Ama. 16:26 Bi neno nane of him onen toti anbi Au kanak. Es nane mihin nai, of Au ka totif na'ko Ama neu ki. 16:27 Fun Ama In nek ki, natuin him nek Kau ma ampalsai, ma Au aum u'ko Uisneno. 16:28 Au aum mu'ko Ama, ma Au aum meu pah pinan. Es nane, Au usaitan pah pinan ma nao neu Ama." 16:29 In asimo lasi sin nak, "Kiso, leku i Uisneno mu'uab muti ma Ho ka mu'uab fa meki leta. 16:30 Ma hai mihin, mak Ho muhin kum ale sa'. Ma ka nabe'if atoni natan sa' neu Ko. Es nane te haim palsai, mak Ho aum mu'ko Uisneno." 16:31 Usif Yesus natae sin nak, "Hi nekam nateb knino ka? 16:32 Kiso In leku anbol, ma anbol nalalien, of nasitab ki mese-mese neu in balan ma hi misaitan Kau Au mes. Mes Au ka mesef, fun Ama nok Kau. 16:33 Au u'uab ale lasi i neu ki, he nati' hi mipeni tetus aomina anbi Kau. Of hi mipeni hamu'it bi pah pinan, mes mimepan hi nekam. Au is ulali pah pinan."
17:1 Leka Usif Yesus na'uab nalali onane te, In anbaisenu neu neno tunan ma nak, "Ama, leku antelen, munaeb nai Ho Anmone, he nati' Ho Anmone nanaeb Ko. 17:2 Onle Hom fe mulali neu In kuasat neu ale amonit, onane amsa of In fe honis nabal-bal neu sin le Hom fe mulali neu In. 17:3 Lasi honis nabal-bal esle' i, he nati' sin nahin Ko, Uisneno amneot lo mese, ma nahin Yesus Kesel Afetin le Hom sonu. 17:4 Au unaeb ulali Ko bi pah pinan, fun Au meup ulali ale mepu le Hom fe Kau sin. 17:5 Es nane koi Ama, munaeb Kau nai ambi Ko meki apinat le Au mu'i ani anbi Ho matam nahunun na'ko pah pinan anhake. 17:6 Au ulile ulali Ho kanam neu ale atoni, le Hom fe Kau sin na'ko pah pinan. Fun sin le nane Ho ini kum, ma Hom fe mulali sin neu Kau ma natuin nalali Ho a'am. 17:7 Tomas i sin nahinen, nak ale sa' le Hom fe Kau sin nane na'ko Ama. 17:8 Fun ale a'at le Ho mutiaba neu Kau, Au utiaba ulali neu sin ma sin ansimo nalali. Sin nahinen namneo, nak Au aum mu'ko Ama, ma sin anpalsai, nak Ho es amsonu Kau. 17:9 Au onen toti neu sin. Au ka onen toti fa neu pah pinan, mes Au onen toti neu sin le Ama Hom fe mulali sin neu Kau. Fun sin le nane Ho ini kun. 17:10 Ma ale sa' le Au ini, nane Ama ini, ma sa' le Ama ini, nane Au ini ma nanaeb Kau anbi sin. 17:11 Ma Au ka bi tenif pah pinan, mes sin bi pah pinan, ma Au et eu Ko. Koi Ama, le'u knino, ampanat sin bi Ho kanam, le Hom fe mulali neu Kau, he nati' sin fani mese onle Hit. 17:12 Leka Au fe ok sin, Au panat sin bi Ho kanam, le Hom fe mulali neu Kau. Au panat sin, ma katit fa atoni mese anbi sin le namle'u, al in le anlek nani neu amle'ut, he nati' natiaba nani tuis anbi Sulat Knino. 17:13 Mes leku i, Au et eu Ko ma uton ale lasi i, leka Au fe bi pah pinan, he nati' Au amlilat nanokbon kun anbi sin. 17:14 Au fe ulali Ho a'am neu sin ma pah pinan, onle Au amsa ka u'ko fa pah pinan. 17:15 Au ka totif he nati' Ho mait sin na'ko pah pinan mes he nati' Ho mumafo sin na'ko amle'ut in tuaf. 17:16 Sin ka na'ko fa pah pinan, onle Au amsa ka u'ko fa pah pinan. 17:17 Muknino sin bi Ho amneot, fun Ho a'am nane amneot kun. 17:18 Onle Hom sonu Kau neu pah pinan, onane amsa Au sonu sin neu pah pinan. 17:19 Ma Au uknino Au aok neu sin, he nati' naknino sin bi amneot. 17:20 Ma Au onen totis ka al fa neu sin, mes neu ale atoni le sin anpalsai neu Kau natuin sin saksit. 17:21 He nati' sin alsin anfani mese onle Ho, koi Ama, anbi Kau ma Au bi Ko, he nati' sin amsa anbi Hit. Oke te pah pinan anpalsai nak Ho es amsonu Kau. 17:22 Ma Au fen sin apinat le Hom fe Kau, he nati' sin anfani mese, onle Hit amsa mese. 17:23 Au bi sin ma Hom bi Kau, he nati' sin nanokbok anfani mese, he pah pinan nahin, nak Ho es ansonu Kau ma Hom nek sin onle Hom nek Kau. 17:24 Koi Ama, Au lomi he nati' sin, le Hom fe Kau sin, sin nabua nok Kau anbi bale le Au bine, he nati' sin nit Au apinat le Hom fe neu Kau. Fun Hom nek Kau nahunu na'ko pah pinan najalibon. 17:25 Koi Ama amneot! Pah pinan ka nahin Ko fa, mes Au uhin Ko. Ma sin le i nahin, nak Ho es ansonu Kau. 17:26 Au uton ulali Ho kanam neu sin ma of Au uton piut, he nati' manekat le Hom fe Kau nabala anbi sin ma Au amsa umesbok ok sin."
18:1 Leka Usif Yesus anonen toti nalali onane te, In anpoi na'ko bale nane ma nok In asimo lasi sin anlakan neu Noe Kidron panin. Bi nane anmu'i po'an mese, ma In nok In asimo lasi sin antaman neu po'an nane. 18:2 Nai Yudas le ana'neb Yesus, nahin bale nane amsa, fun fe-fe'at Usif Yesus nok In asimo lasi sin nabuan anbi bale nane. 18:3 Nai Yudas amsa nem neu bale nane nok solalus puknes ma ale atoni le anpao Ume Uisneno. Fun Ana' fuat knino nakaf sin ma atoni Farisi sin es anlelu sin, sin nekin paku, nopo ma suni. 18:4 Usif Yesus nahin ale sa' le hen bol neu In, es nane In fonat nu ma nak neu sin, "Hi maim sekau ka?" 18:5 Sin natae nak, "Yesus atoni Nazaret." In nak neu sin, "Au es Kau i." Nai Yudas le ananeb In, anhake nok sin anbi nane amsa. 18:6 Leka Yesus nak neu sin, "Au es Kau i," sin naskotun ma natselan neu najan. 18:7 Ma In natan anteni nak, "Hi maim sekau ka?" sin natae nak, "Yesus atoni Nazaret." 18:8 Yesus natae nak, "Au uton ulali ki ak, Au es Kau i. Kalu hi maim Kau, maut he ale i sin naon." 18:9 Yesus na'uab onane he natis a'at le In naton nani nak, "Katit fa atoni mese anbi sin le Ho muna'at sin neu Kau, Au umautu he namle'u." 18:10 Oke te Nai Simon Petrus, le neki suni, in nosu suni nane ma nanana' neu Ana' Lasi Fuat Anaet in ate ma ansaip nafek in luken a'ne'u. Ate nane in kanan Nai Malkhus. 18:11 Usif Yesus nak neu Nai Simon Petrus, "Mutap mufani ho suni nane! Ai ho mutenab mak, Au he ka inuf klas mninut le Au Ama anfe nani neu Kau ka?" 18:12 Oke te solalus sin nok sini nakaf ma atoni apaot sin le atoni Yahudi anlelu sin anheke Yesus ma anfutu In. 18:13 Oke te sin neki Yesus nao nahunu neu Nai Hanas fun Nai Hanas nane Nai Kayafas in babaf, le anfani Ana' Lasi Fuat Anaet bi ton nane. 18:14 Ma Nai Kayafas nane anfainek atoni Yahudi sin nak, "Leko nesi atoni mese anmate neu to ok-oke." 18:15 Nai Simon Petrus nok asimo lasi bian mese sin natuin Yesus. Asimo lasi nane nahin Ana' Lasi Fuat Anaet in sonaf po'an. 18:16 Mes Nai Petrus nabala anbi mone anhaumak eno. Asimo lasi bian nane, le nahin Ana' Lasi Fuat Amnanut anpoi neu mone ma namolok nok bife apao eno nane he nok Nai Petrus antam. 18:17 Ate bife apao eno nane nak neu Nai Petrus, "Ait ho amsa atoni nane in asimo lasi ka?" Nai Petrus natae nak, "Kahaf." 18:18 Fun bi leku nane mainikin, es nane te, ate sin ma apao Ume Uisneno sin nahopin ai ma anhaken hen lalan ai bi nane. Nai Petrus amsa anhake ma anlal ai nok sin. 18:19 Oke te Ana' Lasi Fuat Anaet natan Yesus antom In asimo lasi sin ma antom In lasi noina. 18:20 Yesus natae neune nak, "Au u'uab mat-mat neu pah pinan. Au unoina piut bi ume onen totis ma anbi Ume Uisneno, le atoni Yahudi sin nem nabuan anbin. Au ka u'uab fa sa' anbi bale tolo'. 18:21 Ho mutan Kau neu sa' ka? Mutan neu sin le sin nen nalali sa' le Au u'uab neu sin." 18:22 Leka In na'uab onane te, atoni apaot le anhake anbi nane, anpas Yesus human ma nak, "Ho mutae Ana' Lasi Fuat Anaet onane ka?" 18:23 Yesus natae neune nak, "Kalu Au u'uab san, ame'ut Kau in sanat. Mes kalu Au uab nane namneo, hom pas Kau neu sa' ka?" 18:24 Nai Hanas ansonu In nok mafutu neu Nai Kayafas, Ana' Lasi Fuat Anaet nane. 18:25 Nai Simon Petrus fe anhake anlal ai. Atoni le nane nak neune, "Bae, ho amsa In asimo lasi ka?" 18:26 In na'tot, ma nak, "Kahaf." Ana' lasi fuat anaet in ate mese le anmafamili nok ate le Nai Petrus ansaip nafek in luken nak, "Ait afi au ka it ko fa anbi po'an nane le ho mok In ka?" 18:27 Nai Petrus na'tot anteni, ma bi leku nane manu ankokle'o. 18:28 Oke te sin neki Yesus na'ko Nai Kayafas neu ume lef lasi. Tomas nane fe nok-noka. Sin kan taman fa neu ume lef lasi, he nati' kais neki hainisit neu sin aon, fun sin hen bukae Paskah. 18:29 Es nane Nai Pilatus anpoi neu sin ma nak, "Hi meki lasi sa' ka antom atoni i?" 18:30 Sin natae neu in nak, "Bati In ka atoni abulalut fa, hai ka mina'at fa In neu ama!" 18:31 Nai Pilatus nak neu sin, "Hi mokan hem nao ma mifek In lasi natuin hi plenat knino." Atoni Yahudi sin natae nak. "Hai ka mu'if mainuan he mimate atoni." 18:32 Lasi anbol onane he nati' natiaba Yesus In a'an le In nau'ab nani, neu he namate In onme. 18:33 Nai Pilatus antam anfani neu ume lef lasi oke te anboin Yesus ma natan neu In nak, "Ai Ho Usif Ko neu atoni Yahudi sin ka?" 18:34 Yesus natae nak, "Ho mu'uab lasi i na'ko ho nekam ka, ai atoni bian es naton ko antom Kau ka?" 18:35 Nai Pilatus nak, "Ai au atoni Yahudi kau ka? Ho to ma Ana' fuat knino nakaf sin es nana'at Ko neu kau. Ai Ho moe sa' ka?" 18:36 Yesus natae nak, "Au plenat ka na'ko fa pah pinan i. Fun kalu Au plenat na'ko pah pinan i, Au ini sin of natau Kau, he nati' kais nana'at Kau neu atoni Yahudi. Mes Au plenat ka na'ko fa pah pinan i." 18:37 Nai Pilatus nak neu In, "Kalu onane Ho Kesel Ko." Usif Yesus natae nak, "Ho mak, Au le i Kesel Kau. Natuin lasi nane, nahonis Kau ma Au aum eu pah pinan i, he nati' Au saksi antom lasi amneot. Atoni le na'ko amneot, in nen Au hanak." 18:38a Nai Pilatus nak neu In, "Lasi amneot nane esle' sa' ka?" 18:38b Leka na'uab nalali onane te, Nai Pilatus anpoi neu atoni Yahudi sin ma nak neu sin, "Au ka upeni fa sanat sa' anbi In. 18:39 Mes natuin hi halat, leka Neno Paskah, au mes ufetin atoni mese neu ki. Him lomi, he nati' au ufetin Kesel atoni Yahudi neu ki ka?" 18:40 Sin alsin na'ba ma nak, "Kais In, so Nai Barabas!" Nai Barabas nane atoin amaufinut.
19:1 Oke te Nai Pilatus neki Yesus anpoi ma anlelu atoni sin hen biso In. 19:2 Ma solalus sin nakano sobe kisan ma antao neu Ini nakan. Ma sin napakeb In sobalu amtasa, 19:3 oke te sin fonat nu neu In matan ma nak, "Selamat, Kesel atoni Yahudi!" Oke te sin anpas In human. 19:4 Nai Pilatus anpoi anteni ma nak neu sin, "Kiso, au eki In anpoi neu ki, he nati' hi mihin, mak au ka upeni fa sanat sa' es anbi In." 19:5 Nalali te Yesus anpoi, fun nasobe kisan ma masobalu amtasa. Nai Pilatus nak neu sin, "Kiso atoni nane!" 19:6 Leka ana' lasi fuat nakaf sin ma apaot sin ankiso nit In, sin alsin na'ba nak, "Mipeti In! Mipeti In!" Nai Pilatus nak neu sin, "Meki hem nao mipeti In, fun au ka upeni fa sanat sa' anbi In." 19:7 Atoni Yahudi sin natae neu in nak, "Hai mu'i fekat ma natuin fekat nane, In mes anmate, fun In tek In aon nak Uisneno Anmone." 19:8 Leka Nai Pilatus in nen uab nane te, in namtau. 19:9 Oke te in tam anteni neu ume lef lasi ma nak neu Yesus, "Ho mu'ko me ka?" Mes Yesus ka nataef neu in. 19:10 Oke te Nai Pilatus nak neu In, "Ho kam lomif he mu'uab mok kau ka? Ho ka muhin fa ka, nak au mu'i kuasat he ufetin Ko, au mu'i kuasat he upeti Ko ka?" 19:11 Usif Yesus natae nak, "Ho ka mu'if kuasat neu Kau, kalu Uisneno kan fe ko fa kuasat nane na'ko tunan. Es nane te, atoni, le nana'at Kau neu ko, in sanat nane a'nesin ko." 19:12 Na'ko leku nane Nai Pilatus nami he nafetin In, mes atoni Yahudi sin na'ba ma nak, "Kalu ho mufetin In, Kesel kan masoba fa nok ko. Atoni le antek in aon on Usif, in namusu nok Kesel!" 19:13 Leka Nai Pilatus in nen uab nane te, in lelu he neki Yesus anpoi ma in antoko anbi toko lef lasi, bi bale le kanan Litostrotos, a'at Ibrani nak Gabata. 19:14 Neno nane neno loitan neu Tolas Paskah, oni leuk bo'es am nua. Nai Pilatus nak neu atoni Yahudi sin, "I hi Kesel!" 19:15 Sin na'ba ma nak, "Mineku mis In! Mineku mis In! Mipeti In!" Nai Pilatus nak neu sin, "Au he upeti hi kesel fe ka?" Ana' fuat knino nakaf sin natae nak, "Hai ka mu'if usif bian na'ko Kesel." 19:16 Oke te Nai Pilatus nana'at Yesus neu sin he nati' sin napeti nani. Oke te sin ansimo Yesus. 19:17 Yesus anloi In hau nehe ma anao neu bale le nakanab nak Bale Nui Nakaf, a'at Ibrani nak Golgota. 19:18 Sin napeti In anbi bale nane. Sin napeti In nok atoni nua, le anbi aon bian ma bian ma Yesus anbi atnanan. 19:19 Ma Nai Pilatus anlelu amsa hen tao tuis mese anbi hau nehe nane fafon le in hanan nak, "Yesus atoni Nazaret, Kesel atoni Yahudi." 19:20 Atoni Yahudi namfaun anso'i tuis nane, fun bale le napeti Usif Yesus anbine anhaumak kot Yerusalem. Tuis nane neki a'at Ibrani, a'at Latin ma a'at Yunani. 19:21 Ana' lasi fuat nakaf sin ma atoni Yahudi sin nak neu Nai Pilatus, "Kais hom tui mak: Kesel atoni Yahudi, mes so onle In nak kun: Au Kesel atoni Yahudi Kau." 19:22 Nai Pilatus natae nak, "Sa' le au tui ulali, matui nabala onane." 19:23 Leka solalus sin napeti nalali Yesus, sin naiti Ini bael pake oke te sin anbati no ha, -- solalus puknes napeni pa'es -- ma sin naiti In sobalu betkone amsa. Sobalu nane ka maso' fa na'ko fafon antia pinan fun akne mese ah. 19:24 Es nane te sin na'uaben es neu es nak, "Kaisa hit ketu hen fani tuka fauk. Leko nesi hit hel sulat neun, he nati' sekau es napeni." Lasi nane anbol he nati' natiaba sa' le antui nani anbi Sulat Knino nak, "Sin mabatin Au bael pake es neu es ma sin helan sulat neu Au sobalu betkone." *Lasi nane solalus sin es anmo'e nani. 19:25 Yesus In ainaf, ma In ainaf tata, bi Maria, Nai Klopas in fel ma bi Maria Magdalena sin anhake anhaumak hau nehe. 19:26 Leka Yesus nit In ainaf, ma asimo lasi le In nek nani anhake nokan, In nak neu In ainaf, "Aina, i ho anah!" 19:27 Oke te In nak neu In asimo lasi, "I ho aina." Ma na'ko leku nane asimo lasi nane ansimo bi Maria bi in ume. 19:28 Nalali te, Yesus nahin, nak ale sa' namtisien. In na'uab -- nak -- he nati' natiaba ale sa' le antui nani anbi Sulat Knino nak: "Au meon oe." 19:29 Bi nane anmu'i bale mese le nahenu nok tua mahai. Sin posun hau suf putun, le anlep nani neu tua mahai neu kmeo panan, oke te nanona nani neu Yesus fefan. 19:30 Leka Yesus ninu tua mahai nane, In nak, "Lasi namtisien." Oke te In naluli ma nana'at Ini Smanan. 19:31 Natuin neno nane neno he naloitan ma he nati' atonin le napeti sin aon nitun kais naponiok nabala -- fun Neno Snasat nane neno naek kun -- es nane te atoni Yahudi sin neman neu Nai Pilatus ma antoti he nati' anipu atoni nane sin haekenu ma nasanut sin aon nitun na'ko hau nehe. 19:32 Oke te solalus sin neman ma anipu atoni nua in sin haekenu, le napeti sin nok Yesus. 19:33 Mes leka sin nem ante Yesus ma nit nak In anmaten sin kan ipuf In haen. 19:34 Mes solalus mese anbi sin napau Ini bnapan neki auni; ma naskek onane te na' ma oe ansai. 19:35 Ma atoni le nit lasi nane in es ansaksi lasi i ma in saksit nane namneo, ma in nahin, nak in na'uab amneot, he nati' hi amsa ampalsai. 19:36 Lasi nane anbol onane, he nati' natisi Sulat Knino hanan nak, "Of kan ipuf In nuif." 19:37 Ma anmu'i anteni a'at le nak, "Of sin kiso neu In le sin napau nalali." 19:38 Nalali te Nai Yusuf na'ko Arimatea -- Yesus In asimo lasi amsa, mes ka natonon fa fun namtausan atoni Yahudi sin -- in antoti neu Nai Pilatus he nati' in nasanut Yesus In aon nitu na'ko hau nehe. Ma Nai Pilatus ansimo in totis nane. Oke te in nem ma nasanut Yesus In aon nitu nane. 19:39 Nai Nikodemus amsa nem neu bale nane. In esle' afi nem neu Yesus nok fai. In neki klali ma hau oef fomeni, oni kati bo'nim. 19:40 Sin naiti Yesus In aon nitu, ma ana'mu neki pilu muti ma antao fobona, natuin atoni Yahudi sin halat, leka sin ansub nitu. 19:41 Anmu'i po'an mese anhaumak bale le napeti Yesus anbin. Anmu'i naukel fe'u mese anbi nane, le fe kan subaf atoni mese anbin. 19:42 Fun naukel nane anhaumak, ma neno nane atoni Yahudi sin neno he naloitan, es nane sin nabela Yesus aon nitu anbi naukel nane.
20:1 Bi neno klei nok-noka fe anmesok, bi Maria Magdalena in nao neu naukel nane. In nit, nak fatu le antobe naukel nane sin nait nani. 20:2 In naen laba neu Nai Simon Petrus ma asimo lasi bian le Yesus a'nek nani ma nak neu sin, "Atoni sin nait neki Usif na'ko naukel ma hai ka mihin fa he nabela esme." 20:3 Oke te Nai Petrus ma asimo lasi bian nane sin naon neu naukel. 20:4 Sin nua sin naen nabuan, mes asimo lasi bian nane in keo nesin Nai Petrus es nane in tia nahun neu naukel. 20:5 In natnu neu naukel ma in nit piul amut nane nabelkon bi najan, mes in kan tamaf neu naukel nane. 20:6 Nai Simon Petrus nem natuin in ma antam neu naukel nane. In nit piul amut nane nabelkon bi najan. 20:7 Mes pilu le ana'mu Yesus a'nakan, ka nabela nabuabef nok piul amut nane, mes anunu naikan bi bale bian. 20:8 Nalali te asimo lasi bian le antia nahunu bi naukel nane, in amsa antam. In nit ma anpalsai. 20:9 Fun sin fe ka nahin fa Sulat Knino in hanan le nak: In mes anfen anfani na'ko amates. 20:10 Oke te asimo lasi nane sin nua sin anfani neu ume. 20:11 Bi Maria anhake anhaumak naukel nane ma ankae. In ankae ma natnu neu naukel nane. 20:12 In nit ahake sin nua le anpake muti nalim. Sin antoko anbi bale le natupab Yesus anbin. Es antoko tom a'nakan ma es antoko tom haen. 20:13 Ahake neno tunan sin nak neune, "Aina, hom kae neu sa' ka?" Bi Maria natae neu sin nak, "Atoni sin nait neki au Uisneno, ma au ka uhin fa neu sin he nabela In esme ka?" 20:14 Leka in na'uab nalali onane te, in nik neu kotin ma in nit Yesus anhake anbi nane. Mes in ka nahin fa, nak nane Yesus. 20:15 Usif Yesus nak neune, "Aina hom kae neu sa' ka? Ho maim sekau ka?" Bi Maria natenab nak atoni nane apao po'an, es nane in nak neune, "Pak, kalu ho es maiti In, ame'ut kau, ho mubela In esme, he nati' au nao he aiti In." 20:16 Usif Yesus nak neune, "Maria!" Bi Maria a'nik ma nak neu In neki a'at Ibrani nak, "Rabuni!" in oten nak Anoni. 20:17 Yesus nak neune, "Kaisa hom na' Kau, fun Au fe ka naof eu Ama. Mes hom nao nai meu Au bae sin ma ametun sin, mak Au he nao eu Au Ama ma hi Ama, eu Au Uisneno ma hi Uisneno." 20:18 Bi Maria Magdalena in nao ma anetun asimo lasi sin nak, "Au it ulali Uisneno," ma nak Uisneno es anetun ale lasi nane neu in. 20:19 Bi neno klei nane amsa, leka neno anfai Yesus asimo lasi sin nabuan anbi ume mese ma eno sin mae'ka fun sin namtausan atoni Yahudi sin. Bi leku nane Yesus nem ma anhake anbi sin atnanan ma nak neu sin, "Tetus aomina neu ki!" 20:20 Ma leka In na'uab nalali onane te, In nalile In niman ma In abnapan neu sin. Asimo lasi sin namlil, fun sin nit Uisneno. 20:21 Ma Yesus nak anteni neu sin, "Tetus aomina neu ki. Onle Ama ansonu Kau, onane amsa tabu i Au sonu ki." 20:22 Ma leka In na'uab nalali onane te, In fu sin ma nak, "Amsimo nai Smanan Knino. 20:23 Kalu him sako atoni in sanat, in sanat masako. Ma kalu hi milile atoni in sanat nabalah, in sanat mes nabala." 20:24 Mes Nai Tomas, le asimo lasi sin bo'es am nua nane sin es, le antek in kanan Nai Didimus, in ka nabua fa nok sin, bi leku le Yesus nem neu sin. 20:25 Es nane asimo lasi bian anetun nak, "Hai mit milali Uisneno!" Mes Nai Tomas nak neu sin, "Leka au fe ka it fa kusat balan bi In niman, ma au fe ka utam fa au kluluk neu kusat nane balan ma utam au nimak neu In abnapan, au fe ka palsaif." 20:26 Neno fanu namuni te Yesus asimo lasi sin nabuan tenin bi ume nane ma Nai Tomas nabua nok sin amsa. Leka ale eno sin mae'ka, Yesus nem ma anhake anbi sin atnanan ma nak neu sin, "Tetus aomina neu ki!" 20:27 Nalali te In nak neu Nai Tomas, "Tao ho klulum nai anbi i, ma amkiso Au nimak, menu ho niman ma mutam nai neu Au bnapak ma kais hom fani ka apalsait mes ampalsai nai." 20:28 Nai Tomas natae neu In nak, "Koi au Usif, ma au Uisneno!" 20:29 Yesus nak neune, "Natuin ho mit Kau es hom palsai. Ua alekot neu atoni le ka nitaf mes anpalsai." 20:30 Fun anmu'i taka namfaun le Yesus anmo'e anbi asimo lasi sin matan le kan tui nani fa anbi sulat i. 20:31 Mes antui ale lasi i, he nati' him palsai, mak Yesus lo Neno Anan, Uisneno Anmone, ma natuin hi palsait hi mipeni honis bi In kanan.
21:1 Namuni te Usif Yesus nalilon anteni neu In asimo lasi sin bi Nifu Tiberias in ninen. Fun nalilon on i. 21:2 Nai Simon Petrus, Nai Tomas le nak hata in kanan Nai Didimus, Nai Natanael na'ko kuan Kana pah Galilea, Nai Zebedeus anmone sin ma In asimo lasi bian sin nua sin nabuan anbi nifu ninen. 21:3 Nai Simon Petrus nak neu sin, "Au he nao kifkai ika." Sin nak neune, "Hai amsa he mok ko." Oke te sin naon ma ansae neu belo'. Mes bi fai nane sin kan kifkai nan fa sa'. 21:4 Leka manas hen sae, Yesus anhake bi nifu ninen. Mes asimo lasi sin ka nahinef, nak nane Yesus. 21:5 Yesus nak neu sin, "Li'teun hi mui kit boe sa' ka?" Sin natae nak, "Kan mu'if." 21:6 Yesus nak neu sin, "Ampolin hi kifkai neu belo' aon bian a'ne'u, of hi mipeni." Oke te sin anpolin kifkai nane ma sin kan hel nabe'ifa, natuin ika amfau le'uf. 21:7 Asimo lasi le Yesus a'nek nani nak neu Nai Petrus, "Uisneno, es nane." Leka Nai Petrus amnen, nak nane Uisneno, in pake in sobalu, fun in kan sobaluf, oke te in oklon antam neu nifu. 21:8 Asimo lasi bian sin neman nok a'belo', fun sin ka na'lo fa na'ko meto, oni nehe natun mese, ma sin anhel kifkai le nahenu nok ika. 21:9 Leka sin neman tia meto onane, sin nit ai fla ma ika nabelon anbi ai fla tunan ma utunu' nok. 21:10 Yesus nak neu sin, "Meki kit ika fauk, esle' fe him kifkai man sin." 21:11 Nai Simon Petrus ansae neu belo' oke te anhel kifkai nane neu meto. Kifkai nane nahenu nok ika naek: Natun mese bo'nim am tenu. Ma maski ika namfau, mes kifkai nane ka natpisuf. 21:12 Yesus nak neu sin, "Aim nai ma miah nai." Katit fa es na'ko asimo lasi sin he natan neu in nak, "Ho sekau Ko Uisneno?" Fun sin nahinen, nak In lo Uisneno kun. 21:13 Yesus anfonat nem ma naiti utunu' ma anfe nani neu sin, ma ika amsa onane. 21:14 I hae tenu, le Yesus nalilon neu In asimo lasi sin, namuni na'ko In anfen anfani na'ko amates. 21:15 Leka sin nah nalali te, Yesus nak neu Nai Simon Petrus, "Simon, Nai Yohanes anmone, ai hom nek Kau nesin ale i sin ka?" Nai Petrus natae neu In nak, "Koi Uisneno, Ho muhin, nak au nek Ko." Yesus nak neune, "Mutuku nai Au bibi kase sin." 21:16 Yesus nak anteni neune hae nua, "Simon, Nai Yohanes anmone, hom nek Kau ka?" Nai Petrus natae neu In nak, "Koi Uisneno, Ho muhin, nak au nek Ko." Yesus nak neune, "Mutuku nai Au bibi kase sin." 21:17 Yesus nak anteni neune hae tenu, "Simon, Nai Yohanes anmone, hom nek Kau ka?" Nai Petrus nekan antu' fun Usif Yesus na'uab neune, hae tenu nak, "Ai hom nek Kau ka?" Ma in nak neu Yesus, "Uisneno, Ho muhin kum ale sa', Ho muhin, nak au nek Ko." Yesus nak neune, "Mutuku nai Au bibi kase Sin. 21:18 Au ak ko: Tebes leka ho fe munif ko, ho mufutu kum ho tnaman, ma hom nao meu me le hom lomi. Mes leka Ho mumnasi te, of ho menu ho nimam ma atoni bian es anfutu ko ma neki ko neu bale le ho kam lomif." 21:19 Yesus na'uab lasi i he nalile Nai Petrus of in anmate onme ma he nanaeb Uisneno. Leka na'uab nalali onane te, In nak neu Nai Petrus, "Mutuin Kau nai." 21:20 Leka Nai Petrus a nik neu kotin, in nit asimo lasi le Yesus a'nek nani natuin sin. Asimo lasi le afi sin nah nabuan ma antoko anhaumak Yesus ma natan neu Yesus nak, "Uisneno, sekau es he nana'at Ko ka?" 21:21 Leka Nai Petrus nit asimo lasi nane, in nak neu Yesus, "Uisneno, lasi sa' of anbol neu in ka?" 21:22 Yesus natae nak, "Kalu Au lomi, he nati' in nabala, talan te Au fain aum, ho kam tamaf meu lasi nane. Mes neu ho, mutuin Kau nai." 21:23 Onane te hanaf i nasitbon neu bae knino sin, nak asimo lasi nane of kan matef. Mes Yesus ka na'uab fa nak asimo lasi nane of kan matef, mes "Kalu Au lomi he nati' in nabala talan te Au fain aum, ho kam tamaf meu lasi nane." 21:24 Asimo lasi nane es ansaksi ale lasi i, ma antui nani he nati' hit tahin tak in saksit nane lo namneo. 21:25 Fun anmu'i anteni lasi namfaun le Usif Yesus anmo'e nani, mes kalu hen tui ale lasi nane mes-mese, pah pinan i kan mu'if bale he nabela ale sulat le hen tui nani.
1:1 Neu Nai Teofilus atoni makana, anbi au sulat ahunut au tui ale lasi le Usif Yesus anmo'e ma nanoni nani, 1:2 talan te In na'aition neu neno tunan. Nahunu na'ko nane natuin mepu Smanan Knino In anfe nalali uab neu haefin le In anbeti nain sin. 1:3 Leka In anfen anfani, In nalile In aon neu In haefin neki taka namfau, nak namneo In moni. Fun bi neno bo' ha, haefin nit In tenim teni ma In na'uab nok sin antom Plenat Uisneno. 1:4 Ma bi neno le In antoko ma anbukae nok sin, In ba'an sin he kais a nao nasaitan kot Yerusalem, mes hen pao Ama In manta'en, le -- In na'uab onane -- "him nen milali na'ko Kau. 1:5 Fun Nai Yohanes naslani ki neki oe, mes al anbi neno fauk of naslani ki neki Smanan Knino." 1:6 Ma alsin le nem nabua bi nane natan nak, "Usi, Hom lomi he muhakeb mufani plenat neu to Israel bi batan i ka?" 1:7 Yesus natae nak, "Hi ka mibe'i mihin leku ma tabu le Au Ama anlek nani bi In kuasat. 1:8 Mes of him simo kuasat, leka Smanan Knino sanu nem neu ki, ma of him fani Au saksi bi Yerusalem ma Yudea ma Samaria talan te pah pinan tukan." 1:9 Ma In na'uab namsopu onane te, In na'aition bi sin matan ma nope ana'mu nan In na'ko sin matan. 1:10 Leka sin anbaisenu neu neno tunan bi leku Yesus na'aition, naskek onane atoni nua le anpake muti nalim anhake haumak sin, 1:11 ma nak neu sin, "Hoi atoni Galilea, nansa him hake ma ambaisenu neu neno tunan ka? Yesus le na'aition sae bi neno tunan nasaitan ki, of ankoenon anfani nem onle hi mit In ansae neu neno tunan." 1:12 Oket haefin anfani neu Yerusalem na'ko nuaf le antek nak Nuaf Zaitun, le na'lo na'ko Yerusalem oni kilo mese. 1:13 Leka sin ante Yerusalem sin nao neu ume le sin namaika anbin ma ansae neu ke'an fafon. Haefin nane esle' Nai Petrus ma Yohanes, Nai Yakobus ma Andreas, Filipus ma Tomas, Bartolomeus ma Matius, Yakobus, Nai Alfeus in anmone ma Simon atoni Zelot ma Yudas, Nai Yakobus in anmone. 1:14 Sin alsin nabua nekaf mese nok onen totis piut, nok bife fauk ma nok bi Maria, Yesus In ainaf ma Yesus olif tataf sin. 1:15 Bi neno le sin nabua bi nane oni sin amfaun atoni natun mese bo'nua, oket Nai Petrus anfen anbi bae benu sin atnanan ma na'uab nak, 1:16 "Bae benu alki, sa' le antui nani bi Sulat Knino mese natiabon, fun Smanan Knino an etun neki Nai Daud in fefan antom Nai Yudas, le anfani atopus neu ale atoni le anheke Yesus. 1:17 Nai Yudas nane atoni mese nok hit, in mabeti amsa hen mepu nabua nok kit." 1:18 -- Ma Nai Yudas ansos nan nain pisa mese neki in mo'et amle'ut upan; oket in mof anbentom ma tein anpe talan te in taifenu natlolo poi oke. 1:19 Lasi nane mahine neu ale to bi kuan Yerusalem, es nane sin tek nani neki sin a'at nak, "Hakal-Dama," le in oten Najan Na'. 1:20 "Fun antui nani bi sulat Sit Pules: Maut nai in bale maika nane luman, ma katit fa es he natua anbin: ma: Maut nai es ansimo mepu na'ko in. 1:21-22 Es nane mes anmu'i atoni mese le nok kit hen fani saksi nak Usif Yesus anfen anfani na'ko amates. Atoni nane, atoni le afi nok kit tabua tok Usif Yesus, na'ko neno Nai Yohanes naslani atoni talan te Yesus na'aition nau neno tunan nasaitan kit." 1:23 Ma sin nahakeb atoni nua: Nai Yusuf le antek Barsabas fun nakhata in kanan Yustus ma Nai Matias. 1:24 Ma sin anonen toti nak, "Koi Uisneno, Ho es muhin ale nekaf, mulile kai na'ko atoni nua i, sekau le Hom beti mani, 1:25 hen simo mepu atuthaes le Nai Yudas nasaitan nani fun in nao neu bale le natai nokan." 1:26 Ma oket anfe neu sin sulat ma Nai Matias es anhel nan sulat nane. Onane te in anfani haef he nati' nabua nok haef bo'es am mese nane.
2:1 Leka Neno Pentakosta ante, ale atoni nek ateb knino nabua anbi bale mese. 2:2 Naskek onane te slutuf na'ko neno tunan on anin nautus ma nahenu ume le sin tok anbine. 2:3 Ma ale atoni nek ateb knino nit ale maf on ai pinan le ankauflon ma antok bi sin mes-mese. 2:4 Ma Smanan Knino nahenu sin, oke te sin na'uab neki a'at bian onle Smanan Knino anfe sin he na'uab. 2:5 Bi tomas nane atoni Yahudi le namtaus Uisneno na'ko ale pah-pah bi pah pinan i sin nabuan anbi Yerusalem. 2:6 Leka slutuf nane ansanu nem ale to nabua nem. Ma sin alsin naskek ma namkak fun sin nen atoni nek ateb knino na'uab neki sin a'at mes-mese. 2:7 Sin alsin nekan namneku ma ansanmak oket sin nak, "Ale atoni le na'uab nane sin atoni Galilea ai? 2:8 Leka me hit nen sin na'uab neki hit es-es hit a'at bi pah le hit atbine! 2:9 Ma anbi kit anmu'i atoni na'ko Partia, Media, Elam na'ko Mesopotamia, Yudea ma Kapadokia, Pontus ma Asia. 2:10 Frigia ma Pamfilia, Mesir ma pah Libia le anhaumak Kirene, ma anmu'i amnemat na'ko pah Roma, 2:11 anmu'i atoni Yahudi ma uf bian le antam lekat to Yahudi, atoni Kreta ma atoni Arab. Hit nen sin na'uab neki hit a'at antom lasi amkakat le Uisneno anmo'e nani." 2:12 Sin alsin namkak ma nekan namneku ma na'uaben es nok es nak, "I he lasi sa' ka?" 2:13 Mes bian atoni sin naslaet nak, "Sin anmafun tua min kase." 2:14 Mes Nai Petrus anfen nok haefin bo'es am mese nane, ma neki uab keti neu sin nak, "Hi atoni Yahudi ma ale to le natua bi kot Yerusalem, mitnin lek-leko ale a'at le au u'uab neu ki. 2:15 Ale atoni i sin kan mafu fa onle hi mitenab, fun manas fe leku sio. 2:16 Mes i Uisneno In a'an natuian mafefa knino Nai Yoel: 2:17 Uisneno nakua a'an, 'Nak of anbol bi Neno Amsoput -- nak of Au op Au Smanan Knino neu ale atoni. Hi anmone ma anfeto sin of neki beno, le Au uton neu sin. Hi anmunif sin of napeni mnitas, antom lasi le Au ulile neu sin, Ma ale mnasi-mnasi of napeni nunmait, le Au uton neu sin. 2:18 Ma neu Au ate -- atoni ma bife bi neno nane --, of Au op Au Smanak ma sin an etun ale lasi le Au uton neu sin. 2:19 Ma Au of mo'e ale lasi sanmakat bi fafon, bi neno tunan ma ale taka bi pinan, bi paha pinan: Na' ma ai ma ai masu. 2:20 Ma manas of nabaina anfani mesokan bola ma funan nabaina anfani na' nahunu na'ko Uisneno In neno naek ma apinat anbol. 2:21 Bi leku nane sekau le in anbai ma antek Abal-balat In kanan of napeni honis.' 2:22 Hi atoni Israel, him nen nai a'at i: Yesus atoni Nazaret nane atoni le Uisneno anlek nani ma nalile neu ki. Ale lasi sanmakat ma taka le Uisneno mo'e nani bi hi atnanam neki Yesus nane, onle hi mihin kim. 2:23 Natuin In lekat, Uisneno nana'at Yesus neu ki. Ma hi mina'at Yesus neu ale atoni abulalut hen kus bi hau nehe ma namate nani. 2:24 Mes Uisneno nafena In ma nafetin na'ko kuasat maten fun In ka nabe'i fa he nabala bi kuasat maten nane. 2:25 Fun Nai Daud na'uab antom Yesus nak; Au it Usi piut bi au matak, fun In hake bi au aok bian ne'u, au ka ubeko fa. 2:26 Es nane te au nekak namlil ma au smanak namoek, ma au aok i anpao nok atais bi nopu naukel, 2:27 fun Ho ka musaitan kau fa bi amates balan, ma Ho ka mumautu fa Ho atoni Knino he nit amle'ut. 2:28 Ho muton kau lalan neu honis; Ho muhoeb neu kau amlilat bi Ho matam. 2:29 Bae benu al ki, au uketi muti monas neu ki antom hit am uf Nai Daud. In anmate ma ansub In fun In nuat naukel anbi hit atnanak talan te neno i. 2:30 Mes Nai Daud atoni mafefa knino ma in nahin nak Uisneno anmanta'en nokan neki supat nak: Uisneno of naiti atoni mese na'ko Nai Daud in sufan hen toko bi Ini toko. 2:31 Es nane in nit nalali anbi matan ma ma'uab nalali antom Kesel Afetin anfen anfani, leka in na'uab nak: Of ka nasaitan fa In bi amates balan ma In nesan ka namle'u nitaf. 2:32 Le Yesus i, Uisneno nafena nani, ma hai le i es amfani saksi antom ale lasi nane. 2:33 Ma Uisneno nalatan In neki nukun ne'u, ma ansimo Smanan Knino le anba'an nani, oke te an op nani neu kai onle hi mit ma amnen anbi i. 2:34 Fun Nai Daud kan sae neu neno tunan mes Nai Daud nak: Abal-balat nak neu au Usi nak: 2:35 Hom tunom nai bi Au nimak ne'u, talan te Au tao Ho musu bi Ho haem nupun. 2:36 Es nane te ale to Israel hi mes mihin namneo, Uisneno es anmo'e Yesus le him miboni bi hau nehe nane, In es anfani Usif ma Kesel afe honis." 2:37 Leka sin nen lasi nane te sin nekan antu' ma sin antoti neu Nai Petrus ma neu haefin bian sin nak, "Bae, hai he mo'e lasi sa' ka?" 2:38 Ma Nai Petrus natae sin nak, "Mite'un hi nekam nai, ma him fe hi aom he naslani ki bi Yesus Neno Anan In kanan hen sako hi sanat. Onane te of him simo bael tulu Smanan Knino. 2:39 Fun lasi manta'en nane neu ki ma neu hi anhini ma neu alsin abit lo nok, esle' fauk-fauk le Uisneno no'en sin." 2:40 Ma nok uab bian namfau Nai Petrus anfainek sin ma antoti neu sin nak, "Mifetin nai hi aom na'ko batan apenut i." 2:41 Ma ale to le nem ma ansimo Nai Petrus in uab keti nane anfe sin aon he naslani sin ma bi neno nane smanaf le ansato sin oni atoni nifun tenu. 2:42 Fun sin anmakoe bi haefin sin noina ma bi nekaf mese. Ma sin nabua bi ebi utunu' ma onen totis nok. 2:43 Ma haefin anmo'e lasi sanmakat ma taka namfau talan te ale to nane sin namtau. 2:44 Ma ale to le nekan nateb nalali sin namesbok piut ma ale sa' le sin ini nane on sin ini ok-oke. 2:45 Ma anmu'i na'ko sin le nasosa sin maus ma anbait nani neu ale atoni natai nok sin nukat mese-mese. 2:46 Ma neno-neno sin nabua nekaf mese bi Ume Uisneno. Ma sin ebi utunu' bi sin ume mese-mese, fun sin bukae nok amlilat ma nek baun, 2:47 ma anpules Uisneno. Ma to ok-oke anlomi sin. Ma neno-neno Uisneno ansato sin neki ale atoni le napeni honis.
3:1 Bi neno mese onane te haumak leku onen totis, leku tenu neno mabe, Nai Petrus nok Nai Yohanes nao neu Ume Uisneno hen onen toti. 3:2 Bi nane anmu'i atoni mese napeni men ole na'ko in ainaf apun. Neno-neno sin anloi neki ma nabela haumak Ume Uisneno eno le antek nak Eno Amasat, hen toti amnaut na'ko ale atoni le hen tam neu Ume Uisneno. 3:3 Leka in nit Nai Petrus ma Nai Yohanes hen tam neu Ume Uisneno in toti sin hen fen sa'. 3:4 Ma sin kiso nake' in ma Nai Petrus nak, "Kiso neu kai fe." 3:5 Ma atoni nane ankiso sin fun nafnekan hen simo sa' na'ko sin. 3:6 Mes Nai Petrus nak, "Au ka mu'if muti ma mnatu he fe ko, ma sa' le au mu'i, of au fe ani neu ko. Anbi Yesus atoni Nazaret In kanan, hom nao nai." 3:7 Oke te Nai Petrus antopu atoni nane in niman ne'u hen tuntaku in ma anfen. Naskek onane te in haen anmatane kun. 3:8 In titbok anfen ma nao naonison ma natuin sin antam neu Ume Uisneno fun in nao nok ma anokaleti ma anpules Uisneno. 3:9 Ale to sin nit in le nao nok te anpules Uisneno, 3:10 nalali te sin nahin in, le antok anbi Eno Amasat Ume Uisneno, ma antoti amnaut talan te sin namkak natuin ale sa' le anbol neu sin. 3:11 Fun atoni nane in natuin piut Nai Petrus ma Nai Yohanes. Ma leka sin tenu sin ante bale mae'ka bi Ume Uisneno le antek nak, "Ke'an Salomo" to ok-oke nem neu sin fun ansanmak neu lasi nane. 3:12 Leka Nai Petrus nit ale atoni nane sin, in nait uab nak, "Hi atoni Israel, nansa hi mimkak neu lasi i ma nansa him kiso mi'ke kai. Ai hi mitenab mak atoni i nabe'i natuin hai matanim ma natuin hai atoni amtaus Uisneno ka? 3:13 Uisneno neu Nai Abraham, Nai Ishak ma Nai Yakub, Uisneno neu hit am uf sin, naliatas In ate esle' Yesus le hi mina'at ma mitotan bi Nai Pilatus matan, le in lomi he nafetin In. 3:14 Mes hi mitotan atoni Knino ma Amneot, ma him lomi nafetin ki atoni abulalut. 3:15 Onane te In, le Atopu honis hi mimate mani, mes Uisneno nafena In na'ko amates; ma hai le i amsaksi lasi nane. 3:16 Ma natuin matani anbi Yesus In kanan, atoni men ole nane nabe'i anfani onle hi mit ma mihine. Ma lasi nek teb nane es anfe atoni i naleko bi hi matam ok-oke. 3:17 Bae benu alki, au uhin afi hi ma ale hi nakaf sin hi mo'e sa' neu Yesus, ma hi ka mihin fa lasi. 3:18 Ma natuin lasi onane Uisneno he natis In a'an le afi In an etun nani neu Mafefa knino sin, nak: Kesel Afetin afe honis le In ansonu nani mes hen sutai mafena. 3:19 Es nane te mipis nai ma mite'un hi nekam nai he nati' ansako naneku hi sanat, 3:20 of Uisneno nabalab ki manikin ma ansonu Yesus neu ki on afi In ba'an nani hen fani Uisneno Afetin honis. 3:21 In namaika bi neno tunan talan te Uisneno nafe'un ale sa', onle In an etun nani neu Mafefa knino sin na'ko batan ahunut. 3:22 Fun Nai Musa nak: Uisneno of nahakeb ki Mafefa knino mese na'ko hi bae sin, on au. Him nen nai ale lasi le Mafefa knino nane he na'uab neu ki. 3:23 Ma ale atoni le ka natuin fa Mafefa knino nane in hanan, of antite napoitan na'ko to Uisneno ma nale'un nani. 3:24 Ma ale Mafefa knino sin na'uab lasi Uisneno, na'ko Nai Samuel ma ale Mafefa knino bian le nem namuni, sin alsin neki beno antom batan i. 3:25 Hi es amsimo fef bela nane ma ale lasi alekot le Uisneno nabela nani nok hit am uf sin, leka In nakua a'an neu Nai Abraham: Ma bi ho sufam ale uf bi pah pinan i of napeni alekot. 3:26 Ma Uisneno nahakeb In Ate fun ansonu nahunu neu ki, hen fe alekot neu ki, ma antopu napoitan ki mi'ko ale hi mo'et apenut."
4:1 Leka Nai Petrus ma Nai Yohanes fe na'uab nok to onane, naskek Ana' Lasi Fuat Nakaf ma apao Ume Uisneno nakaf ma atoni Saduki nem neu sin. 4:2 Sin nato' fun Nai Petrus ma Nai Yohanes nanoina to ma an etun nak Yesus anfen anfani na'ko amates ma nane anfani taka mese nak: Atoni amates of anfen anfani. 4:3 Ma sin anheke sin ma natam anlapat sin bi o'of talan te meu noka fun neno anfaien. 4:4 Ma ale atoni le sin nen a'at nane sin nekan nateb knino ma sin ansato smanaf oni atoni nifun nim. 4:5 Ma nokfa onane te ale atopu to Yahudi ma ale amnasit ma ale ahinet Sulat, sin anmo'e buat bi Yerusalem, 4:6 nok Ana' Lasi Fuat Nakaf Anaet Nai Hanas ma Nai Kayafas, Nai Yohanes ma Nai Aleksander ma ale bian le antam nonot Ana' Lasi Fuat Nakaf Anaet. 4:7 Ma nahakeb Nai Petrus ma Nai Yohanes anbi tolas sin matan ma antoti sin nak, "Hi mileko atoni men ole nane meki kuasat sa' ma meki sekau in kanan ka?" 4:8 Ma Nai Petrus le nahenu nok Smanan Knino natae nak, "Hi atopu to ma amnasit-amnasit, 4:9 kalu neno i hi mitan kai natuin mo'et alekot neu amenat ma he miton ki meki kuasat sa' atoni nane napeni aomina', 4:10 es nane mihin nai alki ma ale to Israel, natuin Yesus Neno Anan, na'ko Nazaret In kanan, le hi miboni bi hau nehe mes Uisneno nafena nafani na'ko amates. Bi In kanan kun atoni i anhake bi hi matam nok aomina. 4:11 Nai Yesus, fatu le ameup ume anpolin nani esle' hi, mes In anfani fatu makana. 4:12 Fun katit kanaf bian al anbi Yesus kanan, ma katit fa kanaf bian bi pah pinan i le anfe neu mansian he nahoni kit nekin." 4:13 Leka sin abuat nane nit Nai Petrus ma Nai Yohanes le ka namtau fa, ma sin nahin nak atoni nua nane atoni abaut ma ka ahinet fa, oke te sin namkak; ma sin nahin nak afi sin nua sin nok Yesus. 4:14 Fun sin nit atoni le naleko nane anhake nok haefin nane, sin ka na'uab fa sa' anteni. 4:15 Ma sin anlelu haefin nane anpoi na'ko ke'an buat nane, nalali te sin malomin, 4:16 ma nak, "Hit het mo'e sa' neu atoni i sin ka? Fun ale to bi kot Yerusalem nahin nalali lasi sanmakat le sin mo'e nani ma hit ka tatotan fa lasi nane. 4:17 Mes he kais nane nasitbon neu to amfaun, leko nesi hit hakatau sin ma tal sin, he kais namolok kanaf nane anten neu sekau amsa." 4:18 Ma sin boin sin antam, fun ankakan sin nak: Kais him saksi ma minoina amteni meki Yesus kanan. 4:19 Mes Nai Petrus ma Nai Yohanes natae nak, "Neu, hi mifek kim, me es namneo bi Uisneno matan: Hai mimtaus ki ka ai mimtau neu Uisneno. 4:20 Fun hai ka mibe'if he mitena mok lasi le hai mit ma amnen milali." 4:21 Fun sin abuat nane ka napeni fa lalan he nasanab haefin nane, oke te sin hakatau sin ma nafetin sin nao, fun sin namtausan ale to le naliatas Uisneno natuin lasi le anbol nalali. 4:22 Atoni le naleko natuin lasi amkakat nane in uan nesi na'ko ton bo'ha. 4:23 Nafetin nalali sin onane te, Nai Petrus ma Nai Yohanes nao neu sin ini sin ma an etun sin sa' le nakaf-nakaf ma amnasit-amnasit na'uab nani. 4:24 Leka sin ini sin nen lasi nane te, sin anonen nekaf mese neu Uisneno nak, "Koi Uisneno, Ho es muhakeb neno tunan ma pah pinan, tasi nok in nesan ok-oke. 4:25 Fun Ho mukua a'am meki Smanan Knino natuin Ho ate hai ama Nai Daud; Ho mukua a'am mak: Nansa' ale to le ka nahin Uisneno sin nato', nansa' ale uf-uf sin nami lasi luman kun? 4:26 Ale usif pah pinan nem anhake ma ale nakaf nem nabua hen matoe nok Uisneno ma Kesel Afetin. 4:27 Fun namneo Nai Herodes ma Nai Pilatus nabua nok to le ka nahin Uisneno ma to Israel bi kot i. Sin nabua hen tumatan Ho ate Knino Yesus le Ho maiti anfani Kesel Afetin. 4:28 Sin al sin nabua hen mo'e ale sa' le Hom lek mani nahunu meki Ho kuasat ma Ho lomim kun. 4:29 Ma leku i, koi Uisneno, Hom kiso sin an hakatau kai. Es nane amfe kai matani he Ho ate kai amsaksi Ho a'am nok amlilat. 4:30 Menu nai Ho nukum he muleko amenat sin ma mulile ale lasi sanmakat ma ale taka, meki Ho ate knino Yesus In kanan." 4:31 Ma leka sin fe anonen toti onane te, bale le sin nabua anbi nabeko, oke te sin alsin nahenu nok Smanan Knino, ma sin na'uab Uisneno a'an nok nek mainuan. 4:32 Ma ale atoni nekan nateb nalali, sin nekaf mese ma smanaf mese, ma katit fa es na'uab nak: Sa' le in ini nane ini kun, mes ale sa' nane sin ini ok-oke. 4:33 Ma nok kuasat matani haefin ansaksi antom lasi Usif Yesus fen anfani ma halinat neno nathoe anbi sin. 4:34 Ma katit fa es anbi sin le anma'nuk. Fun ale atoni le anmu'i najan ai ume, nasosa nani sin mu'in nane ma in upan sin neki nem, 4:35 ma nabela nani bi haefin sin matan; oke te anbati neu ale sekau le nuk nani. 4:36 Onane amsa Nai Yusuf, le haefin antek in kanan Nai Barnabas, in oten an amela, atoni Lewi na'ko pah Siprus. 4:37 In nasosa in lele, oket in neki upan ma nabela nani bi haefin sin matan.
5:1 Anmu'i atoni mese kanan Nai Ananias. In nok in fel bi Safira nasosa najan pisa mese. 5:2 Najan nane upan aon bian in nabela nani ma aon bian in neki ma nabela nani bi haefin sin matan. Lasi nane in fel bi Safira nahin amsa. 5:3 Mes Nai Petrus nak, "Ananias, nansa' Nitu natua ho nekam, he ho mumo'e Smanan Knino ma ho mubela najan nane in upan aon bian ka? 5:4 Afi najan nane fe ka musosa, ho ini kun leka ho musosa mulali, in upan nane ho ini amsa? Nansa' ho mutenab lasi i bi ho nekam? Ho ka mumo'e fa mansian mes ho mumo'e Uisneno." 5:5 Leka Nai Ananias in nen a'at nane in natsel ma snasan natfek. Ma ale atoni le sin nen lasi nane sin namtau. 5:6 Ma atoni munif sin nem ma ana'mu in nitu ma neki anpoi hen sub nani. 5:7 Leku tenu namuni onane te, in fel bi Safira antam nem, mes in ka nahin fa lasi sa' le anbol. 5:8 Ma Nai Petrus nak neu in, "Muton kau fe, najan le hi misosa' nane in upan esle' i ka?" Bifel nane natae nak, "Namneo in upan esle' nane." 5:9 Nai Petrus nak, "Nansa' hi nua ki malomin hem su' Smanan Knino? Kiso, ale atoni le ansub ho mone, anhaken es nesu ma sin es of anloi napoitan ko amsa." 5:10 Ma bi leku nane amsa bifel nane natsel bi Nai Petrus matan ma snasan natfek. Leka atoni munif sin antam te, bifel nane anmate, oke te sin loi neki anpoi, ma ansub bi in mone aon bian. 5:11 Ma tolas knino ok-oke ma ale atoni le sin nen lasi nane sin namtau. 5:12 Ma haefin sin anmepu ma anmo'e lasi taka ma sanmakat namfau anbi to sin matan. Fun ale tolas knino nabua nekaf mese bi Bale Mae'ka Nai Salomo ini anbi Ume Uisneno. 5:13 Ma atoni bian es ka nabe'i fa hen apson nok sin. Mes ale to nane nanaeb sin. 5:14 Ma to apalsait neu Uisneno ansato piut bife ma atoni. 5:15 Sin anloi neki ale amenat le natupab sin bi hala ma bi nahe', oket neki sin neu lal opa, he nati' Nai Petrus in mafon antom sin leka in nao natuin lalan nane. 5:16 Ma to namfau na'ko kuan-kuan fun ma natef kot Yerusalem anpoi nem, neki atoni amenat ma ale atoni le Nitu sae. Ma sin alsin naleko kun. 5:17 Nalali te Ana' Lasi Fuat Amnanut ma sin amnoktin, esle' nonot Saduki, sin nekan na'unu neu sin. 5:18 Es nane sin heke haefin ma natam sin bi o'of. 5:19 Mes fai onane ahake Uisneno nem ma nasoitan o'of ma napoitan haefin oket nak neu sin, 5:20 "Him poi nai ma amhake bi Ume Uisneno ma miton a'an honis nane neu to." 5:21 Ma haefin natuin hanaf nane, fe nok-noka onane sin antam bi Ume Uisneno ma nanoina bi nane. Onane te Ana' Lasi Fuat Amnanut ma in amnoktin anlelu nabua nok, nakaf-nakaf ma Tolas Alef lasi ma amnasit-amnasit to Yahudi; oket sin lelu he no'en haefin na'ko o'of. 5:22 Mes leka sin nem ante o'of, sin ka napeni fa haefin bi nane. Oket sin fani ma naton neu tolas abuat sin nane, 5:23 nak, "Hai mit o'of nane mae'ka lek-leko ma ale apaot sin anhake bi eno, mes leka hai misoitan, hai ka mipeni fa es bi o'of nanan." 5:24 Leka apao Ume Uisneno sin nakaf ma ale Nakaf Ana' Lasi Fuat sin nen hanaf nane te, sin nekan na'unu neu haefin ma namtau lof lasi sa' hen bol. 5:25 Mes atoni es nem ma neki hanaf nak, "Kiso mit, ale atoni le hi mitam sin bi o'of nane, sin nanoina to bi Ume Uisneno." 5:26 Onane te to meo nakaf nok in ini sin nao neu Ume Uisneno, ma nok haefin nane nem, mes ka nok fa sloto fun sin namtau; kal-kalu atoni amfaun nane poli sin neki fatu. 5:27 Ma sin nok haefin anhaek bi buat Tolas Alef lasi nakaf sin matan. Oket Ana' Lasi Fuat Amnanut natan, 5:28 ma nak, "Afi haim tal ki matani ma mikain ki he kais minoina bi Kanaf nane. Mes kiso, hi minoina piut bi kot Yerusalem ma him lomi he misuba Atoni nane In na' neu kai." 5:29 Mes Nai Petrus nok haefin bian natae nak, "Hit mes atnen neu Uisneno nesi na'ko atnen neu mansian. 5:30 Hit am uf sin Uisneno es nafena nafani Yesus, le hi miboni bi hau nehe ma mimate mani. 5:31 Uisneno nasaeb nan In neki In niman ne'u anfani Atopus ma Afetin honis, he nati' to Israel nate'un nekan ma napeni sako sanat. 5:32 Ma hai le i amfani saksi neu ale lasi nane, hai ma Smanan Knino, le Uisneno anfe neu ale sekau le nen neu In." 5:33 Leka tolas abuat nakaf sin nen lasi nane te sin nato' ma ansali he namate haefin nane. 5:34 Oke te atoni Farisi mese bi Tolas Alef Lasi Nakaf nane in kanan Nai Gamaliel. In anoni' plenat ma makana bi ale to. In fen anhaek ma anlelu haefin nane anpoi neu mone fe. 5:35 Oke te in na'uab neu tolas abuat nakaf nane nak, "Au bae ki to Israel, hi mitenab leko-leko sa' le hi he mo'e neu ale atoni nane sin. 5:36 Afi anmu'i atoni mese kanan Nai Teudas. In anfen ma nak in atoni malasi kun, oket anmu'i atoni natun ha natuin in. Mes namate in oket ale atoni le natuin in, nasitbok talan te katit fa sa' le hen bol. 5:37 Namuni te Nai Yudas atoni Galilea anfen bi neno so'i smanaf. In anfuli to namfau hen mo'e bulalu, mes in amsa anmate. Oket in atuina sin nasitbok. 5:38 Es nane te au ak ki: Kaisa hi mo'e sa' neu ale atoni i sin. Kais moki sin, fun kalu sin salit ma sin mo'et nane na'ko mansian of namneku kun. 5:39 Mes kalu na'ko Uisneno te, hi ka mibe'i mo'e sa' neu ale atoni i sin; fun nane on hi mabe'u mok Uisneno." Oke te sin simo fainekat nane. 5:40 Ma sin no'en haefin nane ma antepo sin ma antal sin he kais nanoni neki Yesus kanan. Oke te nafetin sin. 5:41 Ma haefin nane sin anpoi na'ko Tolas Alef Lasi Nakaf nok amlilat, fun sin tam ota hen sutai mafena natuin Yesus Kanan. 5:42 Ma bi neno-neno sin nanoina piut bi Ume Uisneno ma bi ale to sin ume ma an etun Lasi Knino antom Yesus esle' Kesel Afetin.
6:1 Bi neno-neno, asimo lasi Yesus ansato piut. Onane te ale to Yahudi le na'uab neki a'at Yunani sin namunu neu atoni Ibrani sin. Fun batis neu sin bife banu ka nanaobon fa nok alekot bi tuthaes neno-neno. 6:2 Es nane haefin bo'es am nua anboin ale asimo lasi sin ma nak, "Hai mitenab bi hai nekam, leka me hai he maikoti A'an Uisneno ma hem tuthae lasi mnahat. 6:3 Es nane him beti nai bae, atoni hitu bi hi atnanam, le naleko ma nahenu nok Smanan Knino ma ahinet. Oke te hai misaeb sin neu mepu nane, 6:4 he nati' mitupu hai nekam bi onen totis ma tuthaes bi A'an Uisneno." 6:5 Ma tolas knino ok-oke sin ansimo a'at nane, ma anbeti Nai Stefanus le nekan nateb knino ma nahenu nok Smanan Knino, ma Nai Filipus, Nai Prokhorus, Nai Nikanor, Nai Timon, Nai Parmenas ma Nai Nikolaus, le antam to Yahudi na'ko Antiokhia. 6:6 Fun nahakeb sin hitu sin bi haefin sin matan ma anonen tek alekot neu sin. 6:7 Nak A'an Uisneno nis piut ma asimo lasi bi Yerusalem ansato anteni namfau. Ma Ana' Lasi Fuat namfau nem ma nana'at sin aon ma nekan nateb neu Yesus. 6:8 Ma Nai Stefanus le nahenu nok halinat neno ma matani, anmo'e lasi sanmakat taka namfau bi ale to sin matan. 6:9 Mes atoni bian na'ko to Yahudi le antek sin nak tolas Libertini -- tolas knino nane esle' atoni na'ko Kirene ma na'ko Aleksandria -- ma to Yahudi bian na'ko Kilikia ma na'ko Asia. Atoni nane sin fen ma anmatoe nok Nai Stefanus. 6:10 Mes sin ka nabe'i fa sa' le Nai Stefanus na'uab nani fun nane lasi hine ma mepu Smanan Knino kun. 6:11 Oke te sin antite natam atoni fauk he na'uab nak, "Him nen atoni i na'uab amle'ut neu Nai Musa ma neu Uisneno." 6:12 Onane te sin nak'ola to ma amnasit-amnasit ma ahinet sulat, ma anheke Nai Stefanus, ma anhel neki nao neu Tolas Alef Lasi Nakaf sin matan. 6:13 Oke te sin nahakeb saksi moel le na'uab nak, "Atoni i antek uab amle'ut piut neu ume knino i ma Plenat Knino nok. 6:14 Fun haim nen in na'uab nak: Yesus, atoni Nazaret nane, he nale'un Ume Uisneno ma hen nabaina lekat le Nai Musa nana'at nani neu kit." 6:15 Ma ale atokos bi Tolas Alef Lasi Nakaf nane sin ankiso Nai Stefanus, ma sin nit Nai Stefanus human on ahake neno tunan human.
7:1 Ma Ana' Lasi Fuat Amnanut nak, "Ale lasi, le sin na'uab nane namneo ka?" 7:2 Nai Stefanus natae, "Bae benu ma sin au ama alki, hi mitnin fe! Afi hit am uf Nai Abraham fe ka na'oni fa neu Haran mes fe antok bi Mesopotamia, Uisneno apinat nem neu in ma nak: 7:3 Hom poi nai mu'ko ho pah ma hom nao meu pah le Au he lekan ko. 7:4 Oke te Nai Abraham anpoi na'ko pah Kasdim ma antok bi Haran. Leka in amaf anmate, Uisneno anlelu Nai Abraham nem neu pah i, le him mimaik ambine. 7:5 Bi bale nane Uisneno kan fe fa neu Nai Abraham, bale pis es maski lakat mese amsa kahaf, mes Uisneno anmantaen neu Nai Abraham nak of namuni te Uisneno anfe bale nane neu Nai Abraham ma neu in sufan ka'un. Bi tomas nane Nai Abraham fe kan mu'if anah. 7:6 Uisneno nakua a'an nak on i: 'Of hi sufam anfani atoni amnemat bi pah bian. Pah tuaf nane of anhamu'i sin on ate talan te ton natun ha. 7:7 Mes of Au hukum ale atoni le anhamu'i sin, Uisneno nakua a'an onane, ma nalali te sin poi na'ko pah nane ma nem neu bale i hen nabes neu Kau.' 7:8 Ma Uisneno nahakeb lasi mantaen antom lasi hapit ma helit nok Nai Abraham. Ma Nai Abraham nahonis Nai Ishak oket anheli bi neno fanu. Ma Nai Ishak nahonis Nai Yakub ma Nai Yakub nahonis in anhin bo'es am nua esle' hit am uf Yahudi. 7:9 Ma natuin lasi nek unu, hit am uf sin nasosa Nai Yusuf neu pah Mesir, mes Uisneno anhake nokan. 7:10 Ma nafetin in na'ko ale malenat ma anfe halinat ma hine neu in, leka anhake bi Nai Firaun usif pah Mesir matan, oke te Nai Firaun naiti anfani ana' aplenat bi pah Mesir ma neu in sonaf nok. 7:11 Ma oket amnahas anaek anbol bi pah Mesir ma pah Kanaan nok, talan te hit am uf sin ka napeni fa mnahat. 7:12 Leka Nai Yakub nen, nak anmu'i mnahat bi pah Mesir, in lelu hit am uf sin nao neu pah nane. Sin nao i on hae ahunut. 7:13 Ma leka sin nao hae nua onane, Nai Yusuf nalile in aon neu in tataf sin, ma Nai Firaun nahin Nai Yusuf in ini sin. 7:14 Nalali te Nai Yusuf lelu nunan in amaf, Nai Yakub, nok in sufan smanaf bo'hitu ma nim. 7:15 Ma Nai Yakub nao neu pah Mesir. Ma in nok hit am uf sin anmate bi pah Mesir. 7:16 Ma sin neki aon nitu neu Sikhem ma nabela sin bi nuat naukel le Nai Abraham ansos neki noni muti na'ko Nai Hemor in anhin bi Sikhem nane. 7:17 Mes neno mantaen le Uisneno anfe nani neu Nai Abraham haumaken, to nane ansato piut bi pah Mesir. 7:18 Ma usif bian le naplenat bi pah Mesir, le ka nahinef Nai Yusuf. 7:19 Usif nane naim ela neu hit to ma anhamu'i hit am uf sin, lelu hen polin sin anah le fe nahonis sin, he nati' hit to kais anpe' anteni. 7:20 Ma bi leku nane nahonis Nai Musa le namas bi Uisneno matan. Ma sin anpanat nani bi in amaf ume funan tenu. 7:21 Oke te sin anpolin Nai Musa mes Nai Firaum in feotnai naiti ma anpanat on in anah kun. 7:22 Ma sin nanoni Nai Musa neki lasi hine na'ko atoni Mesir ma in nabe'i bi in a'at ma in mepu nok. 7:23 Fun leka in uan ante ton bo'ha, in nekan anlomi he nao ankiso in ini sin, esle' to Israel. 7:24 Leka in nit atoni Mesir mese anhamu'i atoni Israel mese oke te in hake nok atoni Israel nane ma namate atoni Mesir nane. 7:25 Fun in natenab nak of in ini sin nahin, nak Uisneno anpake in he nafetin to Israel, mes sin ka nahinen fa. 7:26 Nokfa onane te in nem anteni ma nit atoni Israel nua sin mabanan es nok es, oke te in nami he naleko sin, nak: Bae, nansa es hi maban, ait hi ka meubaen fa ka? 7:27 Atoni le anmo'e amle'ut neu in aonbian nane antite Nai Musa ma nak: 7:28 Sekau es nasaeb ko hem fani nakaf ma alef lasi bi kai ka? Ait ho he mumate kau amsa on afi neno ho mumate atoni Mesir nane ka? 7:29 Leka Nai Musa nen a'at nane in naen na'ko pah Mesir neu pah Midian. Ma bi pah Midian in nahoni anmone nua. 7:30 Ma ton bo'ha namuni te, ahake neno tunan mese nem neu Nai Musa bi mnela snaen haumak Nu'af Sinai, Ahake nane nalileon bi ai pina le anpoi na'ko kis lubu. 7:31 Leka Nai Musa nit ai nane in namkak. Es nane te in nao anhaumak he nahin nani Uisneno hanan nak neu in: 7:32 Au le i hi am uf sin Uisneno, Nai Abraham, Ishak ma Yakub sin ini. Oke te Nai Musa nata'i ma ka nabe'i hen kiso anteni. 7:33 Ma Uisneno nakua a'an: Mupoitan penhae na'ko ho haem, fun bale hom hake nane bale knino kun. 7:34 Au it ma uhin ulali Au to sin sutais bi pah Mesir, ma Au nen ulali sin sakoit. Es nane Au sanu he nati' ufetin sin Aum nai, Au he sonu ko neu pah Mesir. 7:35 Nai Musa le i, afi sin antite ma nak: Sekau es nasaeb ko hem fani nakaf ma alef lasi ka? Musa le nane amsa Uisneno hen sonu on nakaf ma afetin nok ahake neno tunan le nalilon bi kis lubu nane. 7:36 In es neki to Israel na'ko pah Mesir fun anmo'e sanmakat ma taka namfau bi pah Mesir, bi Tasi Amtasa ma mnela paha snaen ton bo'ha in amnanun. 7:37 Musa le i afi in es nak neu to Israel: Of Uisneno he nahakeb neu ki Mafefa knino mese onle au. 7:38 In kun es anhake bi to atnanan bi mnela paha snaen nok ahake neno tunan le na'uab nokan bi Nu'af Sinai nok hit am uf sin -- Ma in es ansimo a'an honis hen fe nani neu ki. 7:39 Mes hit am uf sin kan lomi fa he nen in mes antite nani, fun sin lomi hen fani neu pah Mesir. 7:40 Ma sin nak neu Nai Harun: Moe kai nai, uisneno le hen topu kai, fun Nai Musa le antopu kai poi mi'ko pah Mesir -- hai ka mihin fa sa' le hen bol neu in. 7:41 Oke te sin mo'e nan bijae tipu mese ma sin neki fuat neu le'u mahuma nane ma sin namlil natuin sa' le sin anmo'e nani neki sin niman kun. 7:42 Ma Uisneno nasaitan sin ma namautu sin he nabes neu ale afkun bi neno tunan, onle antui nani bi Mafefa knino sin sulat nak: Hi to Israel ki, bi ton bo'ha hi kam lolo mit hi mu'it ma mitnat mani neu Kau bi mnela paha snaen! 7:43 So mak him loi meki le'u mahuma Molokh ma le'u mahuma afkun Refan, ma hi mibes meu le'u mahuma nane sin. Es nane of Au polin ki neu noel bian pah Babel. 7:44 Fun um-ume le Uisneno nem neu hit am uf sin bi mnela paha snaen, sin anmo'e nani natuin Uisneno anlek nani neu Nai Musa ma anmo'e natuin heta le sin nit nalali. 7:45 Sin am uf sin ansimo um-ume nane bi neno Nai Yosua antopu sin. Ma sin neki nem bi pah i, le nasik nani na'ko to le Uisneno anli'u sin na'ko hit am uf sin matan; talan te Nai Daud in batan. 7:46 Ma Nai Daud napeni halinat bi Uisneno In matan, ma in toti he nahakeb ume neu Uisneno. 7:47 Mes Nai Salomo es nahakeb ume neu Uisneno. 7:48 Mes Uisneno Amnanut ka namaika fa bi ume le anmepu neki mansian niman, on antui nani bi Mafefa knino sin sulat: 7:49 Neno tunan nane Au toko, ma pah pinan nane Au haek telin. Hi he mihakeb ume sa' neu Kau, Uisneno nakua In a'an onane, of Au usnas bi bale me ka? 7:50 Fun ale sa' nane Au mo'e kuk eki Au nimak! 7:51 Hi atoni nak fatu ki ma luke teme ki neu Uisneno ma amtite Smanan Knino onle hi am uf sin ma hi amsa. 7:52 Ai anmu'i Mafefa knino le hi am uf kan hamu'i sin ka? Fun sin namate ale atoni le nem nahunu ma an etun antom Atoni Amneot le he nem, le him aneb ma mimate mani. 7:53 Ale ahake neno tunan sin natiab nalali plenat knino neu ki, mes hi ka mituin mani fa." 7:54 Leka Tolas Alef abuat nakaf sin nen ale lasi nane te, sin nekan namen ma sin neku nisin neu Nai Stefanus. 7:55 Mes Nai Stefanus, le nahenu nok Smanan Knino, anbaisenu neu neno tunan. In nit Uisneno In pinan ma Yesus anhake bi In niman ne'u. 7:56 Ma in nak, "Kiso, au it neno tunan natfei ma Anmone Pah To anhake bi Uisneno niman ne'u." 7:57 Mes sin ansun sin luken ma anhunun nok hanan naek ma antumatan Nai Stefanus. 7:58 Ma sin anhel napoitan Nai Stefanus na'ko kot ma anpoli neki fatu. Ma ale saksi sin nabela sin tainusat anbi atoni munif mese kanan Nai Saulus in matan. 7:59 Ma sin fe anpoli Nai Stefanus, in an onen toti ma nak, "Koi Abal-balat, kais Ho musuba sanat neu sin!" Ma in na'uab nalali te in anmate.
8:1a Ma Nai Saulus amsa anlomi, he namate Nai Stefanus. 8:1b Ma bi neno nane hamu'it naek anbol neu tolas knino bi kot Yerusalem. Ma sin alsin nasitbok neu pah Yudea ma Samaria, al haefin sin kahaf. 8:2 Mes ale atoni le namtausan Uisneno sin ansub Nai Stefanus fun ankul ma ankae neun. 8:3 Mes Nai Saulus in nami lanan piut he nale'un tolas knino. In antam neu um-ume ma anhel napoitan ale atoni ma bife le anpalsai neu Yesus ma natam sin neu o'of. 8:4 Ma alsin le nasitbon neu pah nane sin an etun lasi knino bi me-me. 8:5 Ma Nai Filipus in nao neu kuan Samaria ma an etun neu sin antom Yesus Neno Anan. 8:6 Leka ale atoni sin nen Nai Filipus in na'uab ma nit ale taka le in anmo'e nani, sin alsin nekaf mese ansimo le in na'uab nani. 8:7 Fun ale sman nitu anpoi na'ko ale atoni le niut sae ma anbai nok hanan naek. Ma ale atoni me hae hela sin naleko kun. 8:8 Es nane te ale to bi kuan nane sin namlil ma namoek. 8:9 Ma anbi kuan nane anmu'i atoni mese kanan Nai Simon, le bi neno ahunut in mo'e ale taka le'u ma naneku to Samaria sin nekan, fun in tek in aon nak in atoni makana kun. 8:10 Ma sin alsin antao nekan oke neu in na'ko abaut talan te anaet ma sin nak, "Atoni i Uisneno matane naek kun le mateka on matane naek." 8:11 Ma sin natuin in fun suk a'lo in sanmakab sin neki in mo'et nane. 8:12 Mes leka sin nen ale Lasi Knino le Nai Filipus an etun sin, antom Plenat Uisneno ma Yesus Neno Anan In kanan, ale atoni ma bife sin nana'at sin aon he naslani sin. 8:13 Nai Simon amsa nekan nateb knino neu lasi nane, ma nit ale taka ma lasi amkakat le Nai Filipus anmo'e nani. 8:14 Leka haefin bi kuan Yerusalem sin nen, nak to Samaria sin ansimo A'an Uisneno, sin anlelu Nai Petrus ma Nai Yohanes nao neu kuan nane. 8:15 Leka sin nua sin ante kuan nane sin anonen toti, he nati' to Samaria ansimo Smanan Knino. 8:16 Fun Smanan Knino fe kan sanu fa neu tuaf mese anbi sin, al naslani sin anbi Usif Yesus In kanan. 8:17 Oke te sin nua sin naiti niman neu to Samaria nane ma sin ansimo Smanan Knino. 8:18 Leka Nai Simon nit nak haefin na'aiti niman neu atoni nane sin, anfe Smanan Knino neu sin. Es nane te Nai Simon neki noni neu Nai Petrus ma Nai Yohanes, 8:19 ma nak, "Fe kau kuasat nane amsa, he nati' leku au u'aiti nimak neu sekau te in ansimo Smanan Knino." 8:20 Mes Nai Petrus nak neu in, "Mumle'u nai mok ho noni nane, fun ho mutenab mak hem sos halinat Uisneno meki noni. 8:21 Ho ka mu'if hak he mok kai bi mepu i, fun ho nekam ka namneo fa bi Uisneno matan. 8:22 So mute'unom nai mu'ko amle'ut i ma amonen toti neu Uisneno he nati' In sako ho nek salit i. 8:23 Fun au kiso ko on eun oef amenut ma lasi penu na ate ko." 8:24 Ma Nai Simon natae nak, "Him onen toti kau neu Uisneno, he nati' sa' le hi mi'uab milali kais antom neu kau." 8:25 Ma leka sin nua sin an etun nalali A'an Uisneno, anfani neu kot Yerusalem. Ma anbi lalan sin an etun Lasi Knino neu to anbi kuan-kuan Samaria. 8:26 Ma ahake Uisneno nak neu Nai Filipus nak, "Hom fen nai ma hom nao meu neno aon bian A'ne'u, mutuin lanan le ansanu na'ko Yerusalem neu Gaza." Lanan nane katit fa tuaf. 8:27 Oke te Nai Filipus in nao. Ma anmu'i atoni Etiopia mese, atoni makana ma nakaf neu apao maus Sri Kandake, usif bife pah Etiopia, le nao neu Yerusalem hen onen toti. 8:28 Atoni nane in fani nem ma antok bi in aklet tunan fun anso'i Mafefa Knino Nai Yesaya in sulat. 8:29 Ma Smanan Knino nak neu Nai Filipus, "Hom nao nai ma amhake haumak aklet nane!" 8:30 Ma Nai Filipus in nao neu bale nane ma in nen atoni nane in so'i mafefa knino Nai Yesaya in sulat. Ma Nai Filipus natan nak, "Ati ho muhin sa' le hom so'i mani ka?" 8:31 Ma in natae nak, "Leka me au he uhin, kalu es ka naton kau fa?" Oke te in antoti Nai Filipus hen sae ma antok nokan. 8:32 Fun lasi le in anso'i nani nahan nak on i: In onle bibi kase le antopu nao neu bale lolot; ma onle bibi kase ana le kan anbai bi akatelis sin matan, onane te In kan fei fa In fefan. 8:33 Bi le In nabaunon kun anlefi lasi neu In; sekau of anpeo nahin in naone-ka? Fun naiti In asmanan na'ko paha pinan. 8:34 Ma atoni makana nane nak neu Nai Filipus, "Au toti ko, mafefa knino na'uab antom sekau ka? Antom In aon ka, ai antom neu atoni bian ka?" 8:35 Ma Nai Filipus na'uab na'ko a'at nane ma an etun Lasi Knino Usif Yesus neu in. 8:36 Oke te sin nao piut ma ante bale mese le anmu'i oe. Ma atoni makana nane nak, "Kiso, oe es nane. Sa' he nakain, kalu naslani Kau?" 8:37 Nai Filipus nak, "Kalu ho mutenab meki nekam oke, nabe'i ho muslani." Ma in natae nak, "Au uteb namneo, nak Yesus Neno Anan Uisneno Anmone kun." 8:38 Oke te atoni Etiopia nane nahakeb in aklet ma sin nua sin ansanu bi oe, ma Nai Filipus naslani atoni makana nane. 8:39 Ma leka sin anpoi na'ko oe te Smanan Knino nait neki Nai Filipus. Ma atoni makana nane ka nit anteni fa in. Mes nao anfin nok nek amlilat. 8:40 Mes Nai Filipus anpoi bi Asdod. In nao natuin pah nane ma an etun lasi knino neu to bi kot talan te in nem ante Kaisarea.
9:1 Ma Nai Saulus in nekan fe anmaputu hen hakatau ma namate Usif Yesus in asimo lasi sin. In nao neu Ana' Lasi Fuat Amnanut, 9:2 ma antoti sul kuasat he nao neu atopu to Yahudi sin bi Damsyik. Leka in na'eku nok atoni ai bife le nekan nateb neu Usif Yesus in anheke sin ma neki sin neu Yerusalem. 9:3 Leka in fe nao neu Damsyik ma anhaumak kot nane te, naskek meusine ansinek na'ko neno tunan ana'mu nan. 9:4 In anmof neu najan ma in nen hanfes nak neune, "Saulus, Saulus, nansa hom hamu'i Kau ka?" 9:5 Nai Saulus natae nak, "Ho sekau Ko Usif?" Hanaf nane natae nak, "Au Yesus Kau, le hom hamu'i nane. 9:6 Mes amfen nai ma amnao nai meu kot nane, bi nane of naton lasi sa' le ho he mo'e." 9:7 Mes ale in atoni le nao nokan, sin namkak fun sin nen hanaf nane mes sin ka nitaf es amsa. 9:8 Ma Nai Saulus anfen ma anfai matan mes in ka nitaf. Es nane, sin antopu in antam neu Damsyik. 9:9 Ma neno tenu in alon Nai Saulus kan kiso nit fa ma ka nah ma ka ninu fa nok. 9:10 Ma bi kot Damsyik anmu'i Usif Yesus In asimo lasi mese kanan Nai Ananias. Usif nak neu in bi mnitas mese nak, "Ananias!" In natae nak, "Au es kau i, Usif!" 9:11 Ma Usif nak, "Hom nao nai meu Nai Yudas in ume bi Lanan Amneot ma amtoti fun anmu'i atoni mese na'ko Tarsus kanan Nai Saulus. Atoni nane anonen. 9:12 Ma anbi mnitas in nit atoni mese kanan Nai Ananias antam nem ma na'aiti niman neun, he nati' in nit anfani!" 9:13 Mes Nai Ananias natae nak, "Usi au nen na'ko atoni namfau antom atoni nane, le in anmo'e amle'ut neu Ho to aknino sin bi kot Yerusalem. 9:14 Ma in nem neu i neki kuasat na'ko ana' lasi fuat nakaf hen heke ale atoni le antek Ho kanam." 9:15 Mes Usif, nakua a'an neu Nai Ananias nak, "Hom nao nai, fun atoni i mabeti neu Kau he nati' an etun Au kanak neu ale to bian le ka nahin Uisneno ma neu uisfini ma neu to Israel. 9:16 Mes of Au ulile neun ale lasi mane'at le in hen sutai natuin Au kanak." 9:17 Oke te Nai Ananias nao ma antam neu ume nane. In na'aiti niman neu Nai Saulus ma nak, "Saulus, au bae ko, Usif Yesus le afi nalile In aon neu ko bi lanan le hom nao mutuin, anlelu kau he aum eu ko, he nati' ho mit amfani ma muhenu mok Smanan Knino." 9:18 Ma bi leku nane on aknufan le anmof na'ko Nai Saulus matan ma in nit anfani. Oke te in anfen ma naslani nan. 9:19a Ma leka in nah nalali te in napeni matani anfan. 9:19b Ma Nai Saulus namaika bi kot Damsyik nok asimo lasi sin neno fauk. 9:20 In nao neu ume buat ma an etun nak Yesus nane Uisneno In Anmone. 9:21 Ale atoni le sin nen lasi nane sin namkak ma nak, "Ati ka in fa, le nale'un ale atoni bi kot Yerusalem le antek Yesus kanan? Ma in nem neu i hen heke ma neki sin neu ana' lasi fuat nakaf sin matan!" 9:22 Mes Nai Saulus ansaksi nok matani ma naneku to Yahudi le namaika bi kot Damsyik sin nekan fun in nalile neu sin nak Yesus nane lo Neno Anan kun. 9:23 Neno fauk namuni te atoni Yahudi sin malomin he namate Nai Saulus. Mes sin nek salit amle'ut nane Nai Saulus nahin nani. 9:24 Fun atoni Yahudi sin anpao kot enon, nok fai ma nok manas he nati' namate in. 9:25 Onane te bi fai es Nai Saulus in asimo lasi sin natam nani neu aba' mese ma nasanut neu baik lape kotin. 9:26 Leka Nai Saulus ante kot Yerusalem in nami hen apson neu asimo lasi sin, mes sin alsin namtausan in, fun sin nekan fe ka nateb fa, nak in amsa asimo lasi. 9:27 Mes Nai Barnabas ansimo in ma nokan neu haefin ma an etun sin neu afi Nai Saulus nit Usif Yesus bi lanan atnanan ma Usif namolok nokan onme ma in nanoina mat-mat Usif Yesus kanan bi Damsyik. 9:28 Ma Nai Saulus nabua nok sin bi Yerusalem, ma sin nanoni bi Usif Yesus In kanan. 9:29 Ma in na'uab ma anmatoti nok atoni Yahudi sin le sin na'uab neki a'at Yunani, mes sin nami he namate in. 9:30 Mes leka bae knino sin nahin lasi nane sin nokan nao neu Kaisarea ma ansonu in nao neu Tarsus. 9:31 Ma bi neno-neno tolas knino bi pah Yudea, Galilea ma Samaria sin moni nok halan nekaf. Ma natuin matani ma halinat Smanan Knino, tolas knino nane napeni be'it ma ansato piut, fun anmoni nok amtaus neu Uisneno. 9:32 Ma Nai Petrus nao napun kuan-kuan ma bale-bale. Ma in nao amsa neu to knino bi kuan Lida. 9:33 Bi kuan nane in nae'ku nok atoni mese kanan Nai Eneas le in antup ton fanu bi hala tupa natuin in aon an ole. 9:34 Ma Nai Petrus nak neu in nak, "Eneas, Yesus Neno Anan naleko ko. Hom fen nai ma muloitan ho hala tupa!" Onane te in anfen kun. 9:35 Ma ale to kuan Lida ma Saron le nit Nai Eneas, sin nali'ok nem neu Uisneno. 9:36 Ma anbi kuan Yope anmu'i asimo lasi bife mese kanan bi Tabita -- kanan bi a'at Yunani Dorkas. Bife nane anmo'e lasi alekot namfau ma namnau ale amamu'it sin. 9:37 Mes bi neno nane in namen ma anmate. Oke te sin naniu in aon nitu ma natupa anbi ke'an fafon. 9:38 Kuan Lida anhaumak kuan Yope. Leka a'simo lasi sin nen, nak Nai Petrus anbi kuan Lida, sin anlelu atoni nua nao neune ma antoti nak, "Koenom aum laba fe meu hai kuan." 9:39 Ma Nai Petrus anfen ma nao nok sin. Leka sin ante kuan Yope, sin nok Nai Petrus neu ke'an fafon nane. Ma ale bife banu sin nem anhaumak Nai Petrus ma ankae ma nalile ale sobalu ma bael pake, le bi Dorkas anmo'e nani bi neno fe anmoni. 9:40 Mes Nai Petrus anlelu sin anpoi oke neu mone, oke te in li'tu ma anonen toti. Nalali te in naklelon neu bi Dorkas aon nitu ma nak, "Tabita, hom fen nai!" Oke te bi Tabita anfai in matan ma leka in nit Nai Petrus te, in fen ma antok. 9:41 Ma Nai Petrus na' in niman ma anfiti nahakeb. Oke te Nai Petrus boin ale to knino ma ale bife banu, ma nalile neu sin, nak bi Dorkas anmoni. 9:42 Ma lasi nane natonon neu kuan Yope funam natef ma to namfau sin nekan nateb knino neu Uisneno. 9:43 Nalali te Nai Petrus namaika neno fauk bi kuan Yope anbi Nai Simon apeu pasu in ume.
10:1 Fun anbi Kaisarea anmu'i atoni mese kanan Nai Kornelius, solalus nakaf neu Solalus Italia. 10:2 In namtaus Uisneno ma in ume nanan sin nabes neu Uisneno. Ma in anmo'e amnaut naek neu to Yahudi ma in anonen toti piut neu Uisneno. 10:3 Anbi neno mabe mese oni leku tenu onane te in nit mnitas mese le ahake neno tunan mese antam neu in ume ma nak, "Kornelius!" 10:4 In ankiso ahake nane nok amtaus ma nak, "Onme, Usif?" Ahake nane nak, "Ho onen totis ma ho mo'et amnaut, Uisneno ansimo ma Uisneno namnanu ko. 10:5 Ma tomas i hom lelu atoni fauk nao neu kuan Yope he nunan atoni mese kanan Nai Simon le antek nak Nai Petrus. 10:6 In namaika anbi Nai Simon apeu pasu in ume le anhaumak tasi." 10:7 Leka ahake neno tunan le na'uab nokan in nao, Nai Kornelis boin in ate sin nua nok solalus mese le namtaus Uisneno na'ko ale in Solalus le anpao in. 10:8 Ma leka in na'uab neu sin ale lasi te, in anlelu sin nao neu kuan Yope. 10:9 Ma nokfa onane te leka sin tenu sin fe anbi lanan ma anhaumak kuan Yope, oni leku bo'es am nua neno namtetu, Nai Petrus ansae neu ume penen hen onen toti. 10:10 Oket in namnah ma anlomi hen bukae. Fun sin fe nabalab onane te in napeni mnitas mese. 10:11 In nit neno tunan natfei ma sa' fes onle pilu muti naek le nabonion neu pankin ha sin nasaunton nem neu najan. 10:12 Ma anmu'i bi sa'af nane ale mu'it hae ha, kauna anonok ma kolo nok. 10:13 Ma in nen hanfes nak, "Petrus hom fen nai, lolo nai ma bukae nai!" 10:14 Mes Nai Petrus natae nak, "Kahaf, Usif, kahaf, fun au fe ka uah it fa sa' le le'u ma nuni kun." 10:15 Ma in nen hanaf anteni hae nua nak neune, "Sa' le Uisneno naknino, kais ho mak nuni." 10:16 Fun lasi nane anbol tal hae tenu, oke te sa' af nane na'aition anfani neu neno tunan. 10:17 Ma Nai Petrus nekan na'unu fun natenab nak mnitas nane in oten he sa' ka? Onane te, atoni le Nai Kornelius anlelu sin he nami Nai Petrus in ume es me, ante ume nane enon. 10:18 Ma sin anboin atoni mese ma natan, ai Nai Simon le antek nak Nai Petrus natua bi ume nane. 10:19 Leka Nai Petrus fe natenab antom mnitas nane te, Smanan Knino nak neune, "Atoni nua nem nami ko. 10:20 Hom fen nai ma amsanu nai ma amnao mok sin, kais maim nekam, fun Au es alelu sin neman." 10:21 Oket Nai Petrus ansanu ma na'uab nok atoni nane nak, "Le hi mami, esle' au; hi aim neu sa' ka?" 10:22 Ma sin natae nak, "Nai Kornelius, solalus nakaf, in atoni nek alekot ma amtaus Uisneno, ma atoni makana neu to Yahudi. Ahake neno tunan mese nalile lekat Uisneno neu in, anlelu kai hem hone ko meu in ume he in nen sa' le ho he mu'uab neun." 10:23 Ma Nai Petrus natau sin hen tupan. Nokfa onane te in fen ma nao nok sin, fun bae knino sin fauk na'ko kuan Yope sin amsa nokan. 10:24 Ma sin nao neno es anten sin ante kuan Kaisarea. Bi kuan nane, Nai Kornelius in ini sin ma in bae benu bian le in anhone sin nabua hen pao Nai Petrus. 10:25 Leka Nai Petrus antam, Nai Kornelius ansimo in ma anli'tu nabes bi in haen. 10:26 Mes Nai Petrus anfiti in ma nak, "Hom fen nai, au amsa mansian onle ho." 10:27 Ma fe na'uab nok Nai Kornelius, in antam ma nit atoni namfau le nabua anbi nane. 10:28 Ma in nak neu sin, "Hi mihin nak talas matani neu atoni Yahudi le he nabua ai hen tam neu atoni ufes in ume. Mes Uisneno nalile kau he kais au tek atoni le'u ai nuni. 10:29 Es nane te au ka mu'if mafena, leka hi mo'en kau he aum eu i. Ma tomas i au he uhin, hi mo'en kau neu lasi sa'." 10:30 Ma Nai Kornelius nak, "Afi neno ha afinit oni neno onle i amsa, leku tenu neon mabe, au fe onen toti bi ume. 10:31 Ma naskek onane te atoni mese anhake bi au matak, in pake muti nalim ma in nak: Kornelius, Uisneno nen nalali ho onen totis ma namnau ho mo'et amnaut. 10:32 Neu hom lelu atoni neu kuan Yope he nunan Nai Simon le antek nak Nai Petrus; in natua anbi Nai Simon, atoni apeu pasu in ume bi tasi ninen. 10:33 Es nane au lelu atoni neit neu ko, ma ho aumen mok nek amlilat. Neu tomas i hai mimtis es i bi Uisneno matan he mitnin ale sa' le Uisneno anlek nani neu ko." 10:34 Nalali te Nai Petrus naiti uab ma nak, "Au uhin nok amneot Uisneno kan betif humaf. 10:35 Fun ale atoni na'ko uf-uf mes kun le namtaus Uisneno ma anmo'e amneot, in malomi neu Uisneno kun. 10:36 A'at nane In anlelu he natiaba neu to Israel. Ma a'at nane an etun halan nekaf natuin Yesus Neno Anan lo In Usif kun neu ale to ok-oke. 10:37 Fun hi mihin ale lasi le anbol bi pah Yudea, na'ko pah Galilea, neu lasi su' oel le Nai Yohanes an etun nani 10:38 antom Yesus atoni Nazaret: Le Uisneno anbeti In neki Smanan Knino ma matani; talan te In nao funam natef ale pah fun anmo'e alekot ma naleko ale atoni le kuasat Nitu naplenat sin, fun Uisneno anhake nokan. 10:39 Ma hai saksi kai, neu ale lasi le In anmo'e nani bi pah Yudea ma kot Yerusalem; ma sin namate In ma ankus naboni bi hau nehe. 10:40 Mes Uisneno nafena nafani bi neno tenu, ma Uisneno anlomi he nati' In nalile In aon, 10:41 ka neu fa to ok-oke, mes neu saksi sin, le Uisneno anlek nani esle' hai, le hai miah ma minu mokan bi neno In anfen anfani na'ko amates. 10:42 Ma In es anlelu kai he haim etun neu ale to ma amsaksi mak: In kun le Uisneno anlek nani hen fani Alef Lasi neu amonit ma amates sin. 10:43 Fun ale mafefa knino sin saksi neu In ma nak; sekau nekan nateb knino neu In of ansimo sako sanat natuin In kanan." 10:44 Leka Nai Petrus fe na'uab onane te, Smanan Knino ansanu nem neu ale atoni le sin nen a'at nane. 10:45 Ma ale atoni Yahudi le sin nekan nateb knino neu Yesus le sin nok Nai Petrus, sin namkakan fun sin nit, Smanan Knino ansanu neu to bian le ka nahin Uisneno. 10:46 Fun sin na'uab neki a'at huma-huma ma nanaeb Uisneno nok. Oke te Nai Petrus nak, 10:47 "Fun sin ansimo nalali Smanan Knino onle hit, es nane leko nesi hit taslani ale atoni nane sin." 10:48 Oke te in anlelu naslani sin anbi Yesus Neno Anan In kanan. Ma sin antoti he Nai Petrus namaika nok sin neno fauk anbi nane.
11:1 Fun haefin ma bae knino sin abit pah Yudea sin nen nak: Ale to le ka nahin Uisneno sin amsa ansimo a'an Uisneno. 11:2 Leka Nai Petrus ante kot Yerusalem, atoni-atoni na'ko nonot maheli masulin a'at nok in. 11:3 Fun sin nak, "Hom tam meu atoni ka maheli sin ume ma ho muah mubua mok sin." 11:4 Mes Nai Petrus an etun sin ale lasi na'ko fe na'ubon, nak: 11:5 "Afi au fe onen bi kuan Yope au it mnitas mese, bale' es on pilu muti naek le nabonion bi pankin ha sin, nasaunton na'ko neno tunan nem neu au matak. 11:6 Ma leka au kiso bale' nane te au it ale mu'it mahae ha ma mu'it fui ma ale kauna anonok ma kolo-kolo nok anbin. 11:7 Ma au nen hanaf nak neu kau: Hom fen nai, Petrus, lolo nai ma ambukae nai! 11:8 Mes au ak: Kahaf, Usif, kahaf, fun ale mnah le'u ai nuni fe kan tam nitaf neu au fefak. 11:9 Mes hanaf hae nua nem anteni neu kau na'ko neno tunan nak: Sa' le Uisneno naknino nani kais ho mak nane nuni! 11:10 Lasi nane anbol hae tenu oke te anhel nafani neu neno tunan. 11:11 Fun bi leku nane amsa atoni tenu anhake bi ume nesun le au bine; fun anlelu sin nem neu kau na'ko kuan Kaisarea. 11:12 Oke te Smanan Knino nak neu kau: Ho mok sin amnao nai kais mami nekam! Ma au bae, sin ne sin amsa nok kau. Ma haim tam meu atoni nane in ume, 11:13 ma in anpeo kai nak, in nit ahake neno tunan mese nem neu in ume ma nak neune: Hom lelu nai atoni nao neu kuan Yope he nunan Nai Simon le antek nak Nai Petrus. 11:14 In of an etun ki lasi le he neki honis neu ko ma neu ho ume nanan alsin sin on afi le ansanu nem neu kit. 11:15 Ma leka au fe u'uab te, Smanan Knino sin namnes onle afi ansanu nem neu kit. 11:16 Fun au umnau it a'at Usif tunan le nak: Nai Yohanes naslani neki oe, mes hi of naslani ki neki Smanan Knino. 11:17 Fun kalu Uisneno anfe bael tulu neu sin onle anfe neu kit bi neno hit nekak nateb knino neu Usif Yesus Kristus, leka me au he ukain Uisneno ka?" 11:18 Leka sin nen lasi nane te sin nekan antais ma naliatas Uisneno nak, "Onane te Uisneno anfe lasi te'un neu to tafa bian le ka nahin Uisneno hen topu sin nem neu honis." 11:19 Leka namate nalali Nai Stefanus, onane te bae knino sin nasitbok neu bale-bale talan te Fenisia, Siprus ma Antiokhia, ma sin an etun Lasi Knino al neu atoni Yahudi sin. 11:20 Mes anbi sin anmu'i atoni Siprus ma atoni Kirene sin fauk le nem ante Antiokhia ma an etun Lasi Knino neu atoni Yunani amsa nak Yesus nane Usif kun. 11:21 Ma Uisneno In nukun nok sin talan te atoni namfau nekan nateb knino ma nali'ok fani nem neu Uisneno kun. 11:22 Ma lasi beno antom sin nem ante bae knino sin bi kuan Yerusalem, oke te sin sonu Nai Barnabas neu Antiokhia. 11:23 Leka Nai Barnabas nem ma nit halinat Uisneno te in namlil ma in anfainek sin he nati' sin na'ki nabala neu Uisneno. 11:24 Fun Nai Barnabas nane atoni alekot kun ma nahenu nok Smanan Knino ma nekan nateb knino. Ma in neki atoni namfau neu Uisneno. 11:25 Oke te Nai Barnabas in nao neu Tarsus he nami Nai Saulus ma leka in napeni te in nokan neu Antiokhia. 11:26 Ma sin namaika nabua nok tolas aknino nane ton mese. Ma ale asimo lasi sin bi Antiokhia nane antek sin palmelu ai nahunhunu nak: Atoni Slani. 11:27 Ma anbi neno nane anmu'i mafefa knino sin fauk neman na'ko Yerusalem neu Antiokhia. 11:28 Ma es anbi sin in kanan Nai Agabus, natuin mepu Smanan Knino in anfen ma na'uab nak: Of amnahas naek anbol nem neu paha pinan; on afi anbol bi batan Kesel Nai Klaudius. 11:29 Ma ale asimo lasi sin nafek bi sin nekan hen sonu manekat natai nok sin be'in neu bae knino sin le natua anbi pah Yudea. 11:30 Oke te sin nanaob nani fekat nane ma sin anlelu Nai Barnabas ma Nai Saulus he neki nani neu penatua-penatua sin.
12:1 Ma bi neno nane Kesel Nai Herodes in plenat anmatani neu tolas aknino sin. 12:2 Ma in anlek he namate Nai Yakobus, le Nai Yohanes in olif neki suni. 12:3 Leka Nai Herodes in nit nak to Yahudi namlil natuin in mo'et nane te in lek anteni hen heke Nai Petrus. Bi neno nane Neno Naek Utunu' Kan Pake fa Lalu haef. 12:4 Leka anheke nalali Nai Petrus, oke te Nai Herodes anlelu he natam nani neu o'of. Fun nana'at nani neu solalus apaot sin pukan ha. Ma puknes solalus ha. In lomin he nati' neno Tolas Paskah anfini te in nahakeb in anbi atoni amfaut sin matan. 12:5 Ma sin anpao Nai Petrus anbi o'of. Mes tolas aknino anonen piut neu Uisneno. 12:6 Leka Nai Herodes he nahakeb Nai Petrus anbi to amfaut sin matan te, bi fai nane Nai Petrus antup nok niman makolen besi anbi solalus nua sin atnanan. Ma solalus bian sin anpao eno nane. 12:7 Ma naskek onane te ahake neno tunan mese anhake haumak Nai Petrus ma meusine anpin bi ke'an nane. Ma ahake neno tunan anpo' nafen Nai Petrus ma nak, "Hom fen nai lab-lab!" Oke te kolen besi anmof na'ko Nai Petrus in niman. 12:8 Ma ahake nane nak neune nak, "Ho mu'futu ho tnanam nai ma ampake ho penhae nasi." Ma in anmo'e onane, oke te ahake neno tunan nak neune, "Hom pake ho tainusat ma mutuin kau nai!" 12:9 Oke te in natuin ahake nane neu mone ma in ka nahinef nak sa' le ahake anmo'e nani he namneo ka, fun in natenab nak in nit mnitas mese. 12:10 Ma leka sin anfini apao ahunut ma hae nua, nalali te sin ante eno besi naek le hen poi neu kot. Ma eno nane in natfei kun neu sin. Leka sin anpoi ante mone sin nao natuin lan tuk es, oke te ahake nane nao nasaitan Nai Petrus. 12:11 Ma leka Nai Petrus nekan nahin anfani te in nak, "Au fe uhin namneo nak Uisneno anlelu ahake neno tunan he nafetin kau na'ko Nai Herodes in niman ma na'ko ale sa' le to Yahudi sin nafnekan nani." 12:12 Ma leka Nai Petrus nekan anmiu, in nao neu bi Maria, Nai Yohanes le antek in kanan Nai Markus in ainaf ume. Bi ume nane to namfau nabua ma anonen toti. 12:13 Ma leka in anleku eno te, ate bife mese kanan bi Rode in nem he nahin neu sekau es anleku eno nane. 12:14 Ma leka in nen nahin Nai Petrus hanan in namlil. Natuin in namlil in ka nasoitan fa eno mes antam hen etun sin, nak Nai Petrus anhake es ume enon. 12:15 Mes sin nak neune, "Ho mulae ka!" Mes in nak, "Namneo, in Nai Petrus kun." 12:16 Mes Nai Petrus in leku piut eno nane ma leka sin nasoitan eno ma sin nit Nai Petrus te sin namkak. 12:17 Mes Nai Petrus anhosen sin neki niman, he namneb sin, ma in an etun sin neu Uisneno le antopu napoitan in na'ko o'of onme. Ma in nak, "Mitonan lasi i neu Nai Yakobus ma neu hit bae knino sin." Oke te in anpoi ma nao neu bale bian. 12:18 Ma nokfa onane te ale solalus apaot, sin nekan ankal ma natenab neu lasi sa' le anbol nok Nai Petrus. 12:19 Oke te Nai Herodes anlelu he nami Nai Petrus, mes ka napeni fa in. Es nane te Nai Herodes anlelu he natan solalus apaot sin, oke te namate sin. Ma Nai Herodes nao na'ko Yudea neu Kaisarea ma namaika anbin. 12:20 Nai Herodes nato'an atoni Tirus ma Sidon. Es nane te sin nekaf mese ma nao neun. Ma sin anfuli Nai Blastus le anfani nakaf anbi Nai Herodes sonaf hen hake nok sin. Oke te sin antoti hen halan sin fun sin napeni mnahat na'ko Kesel Nai Herodes in pah. 12:21 Ma bi neno le sin anlek nani te Nai Herodes anpake in pake uiskesel ma antoko bi mau toko in tunan ma nakua a'an neu sin. 12:22 Ma to ok-oke sin naba' ma nak, "I Uisneno in hanan ma ka atoni pah pinan in hanan!" 12:23 Ma bi leku nane amsa ahake neno tunan anpas Nai Herodes fun in ka namtaus fa Uisneno. Ma kaun sibe neku Nai Herodes ma anmate. 12:24 Ma Uisneno In a'an nasitbon piut ma atoni namfau nem he natnin. 12:25 Leka Nai Barnabas ma Nai Saulus nasopu sin mepu, sin anfani nem na'ko Yerusalem, ma nok Nai Yohanes le antek in kanan Nai Markus.
13:1 Ma anbi tolas aknino bi kot Antiokhia anmu'i Mafefa knino ma anoni sin, esle' Nai Barnabas ma Nai Simeon le nakhata in kanan Nai Metan, ma Nai Lukius atoni Kirene, ma Nai Menahen le anhao nanaeb nok Kesel Nai Herodes, ma Nai Saulus. 13:2 Leka sin fe anonen neu Uisneno ma nanahok onane te Smanan Knino nak, "Bet maikan Kau Nai Barnabas ma Nai Saulus neu mepu le Au he lekan sin." 13:3 Ma sin nanahok ma an onen toti oke te antek alekot neu Nai Barnabas ma Nai Saulus ma ansonu sin nao. 13:4 Natuin Smanan Knino es ansonu sin, onane te Nai Barnabas ma Nai Saulus sin anao neu Seleukia ma ansae bnao anao neu Siprus. 13:5 Leka sin ante bi Salamis, sin an etun a'an Uisneno bi ume buat atoni Yahudi. Ma Nai Yohanes nok sin hen bab sin mepu. 13:6 Ma sin nao natef pah nane talan te Pafos. Bi Pafos sin nae'ku nok atoni Yahudi mese kanan Baryesus. In atoni ahin ela ma Mafefa knino moel kun, 13:7 in nok kumlol Nai Sergius Paulus atoni ahinet bi pah nane. Ama kumlol anboin Nai Barnabas ma Nai Saulus he neman fun in lomi he nen a'an Uisneno. 13:8 Mes Nai Elimas -- in kanan natuin a'at Yunani --, amo'e ela nane, in nasenib sin ma anlomi he ama kumlol kais nekan nateb neu Yesus. 13:9 Mes Nai Saulus le antek amsa nak: Nai Paulus nahenu nok Smanan Knino ankiso atoni amo'e ela nane, 13:10 ma nak, "Hoi Nitu menu, ho nekam nahenu nok lasi ak'elo ma lasi amle'ut. Ho mumusu mok lasi alekot, musnas nai mu'ko mupenub Lanan Amneot le Uisneno ini kun! 13:11 Hom kius mit, Uisneno In niman neu ko, of ho matam anfolo ma ho ka mitaf manas in pinan tal neno fauk." Ma naskek onane te Nai Elimas in natnin onle nipu ma mesokan ana'mu nan ma in akapoe he nami atoni hen topu. 13:12 Leka ama kumlol nit lasi nane te in nekan nateb neu Usif Yesus; fun in nekan ansanmak neu Uisneno In lasi noina nane. 13:13 Oke te Nai Paulus nok in ini sin nao nasaitan Pafos ma ansae bnao nao neu Perga bi pah Pamfilia; mes Nai Yohanes nasaitan sin ma anfani neu kot Yerusalem. 13:14 Ma sin na'ko Perga sin naon finin ma ante bi Antiokhia pah Pisidia. Ma sin antam bi ume buat nok Neno Snasat ma antokon. 13:15 Leka anso'i nalali Nai Musa in sulat ma Mafefa knino sin sulat, ale nakaf ume buat nane anlelu natan Nai Paulus nok in ini sin ma nak, "Hai bae ki, kalu hi mu'i uab ai molok he meki fainekat ma halinat neu to i, haim fe ki leku mainuan!" 13:16 Ma Nai Paulus anfen ma anhosen sin neki niman ma nak, "Hoi atoni Israel ma hi ala ki le hi mimtausan Uisneno, him nen nai! 13:17 Uisneno neu to Israel i, anbeti hit am uf sin ma nanaeb sin, leka sin anbi pah Mesir on atoni anao amnemat. Ma nok In niman matua kuasat In antopu napoitan to Israel na'ko pah Mesir. 13:18 Ma In anseusaban sin mo'et ton bo'ha bi mnesat paha asnean. 13:19 Ma leka nale'un uf hitu bi pah Kanaan, In anbati pah nane neu sin hen fani sin ini kun, 13:20 oni ton natun ha ma bo'nim. Nalali te In anfe sin alef lasi talan te batan Mafefa Knino Nai Samuel. 13:21 Ma namuni te sin antoti kesel ma Uisneno anfe sin Nai Saul, Nai Kisy anmone na'ko uf Nai Benyamin hen fani kesel neu sin ton bo'ha. 13:22 Ma leka sin antite Nai Saul, Uisneno naiti Nai Daud hen fani kesel neu sin. Ma Uisneno nakua a'an antom Nai Daud, nak: Au upeni Nai Daud, Nai Isai anmone, atoni le anmatom nok Au nekak ma anmo'e natuin Au lomik. 13:23 Ma na'ko Nai Daud in sufan, namnes nok In lasi manta'en, Uisneno nahakeb Kesel Afetin neu to Israel, esle' Yesus. 13:24 Ma nahunu na'ko Yesus he nem, Nai Yohanes anhunun neu to Israel he nate'un sin nekan ma neki sin aon he naslani sin. 13:25 Ma leka Nai Yohanes haumak he nasopu in mepu onane te in nak: Hi mitenab mak oni In esle' Au, mes kahaf, fun of In nem namunin kau. Ma au ka tam fa ota he sefi In tani penhae. 13:26 Bae benu al ki, le Nai Abraham sufan ma alki le mimtaus Uisneno, lasi honis nane Uisneno anfe nalali neu kit. 13:27 Fun ale atoni le namaika bi kot Yerusalem ma atopu to Yahudi, sin kan simof Yesus. Mes sin naiti fekat he namate Yesus ma natiaba nani Mafefa knino sin sulat le anso'i nani anbi neno-neno Snasat. 13:28 Ma sin ka napeni fa lasi sa' le anfani lasi matan he namate In, mes sin antoti Nai Pilatus he nati' namate Yesus. 13:29 Ma leka sin natis ale sa' le antui nani antom Yesus te sin nasanut nani na'ko hau nehe ma natupa In aon nitu anbi nopu naukel. 13:30 Mes Uisneno nafena nafani na'ko amates sin balan. 13:31 Ma bi neno fauk-fauk In nalilon neu sin le nao nokan na'ko pah Galilea neu kot Yerusalem. Ma muni i sin es anfani saksi neu to Israel. 13:32 Ma haim etun lasi knino nane neu ki, sa' le Uisneno anmantaen neu hit am uf sin, 13:33 Uisneno natis nalali neu kit, neu sin sufan, fun nafena nafani Yesus onle antui nani anbi Sit Pules bata nua nak: Au Anmone Ko! Bi neno i Au uhonis ulali Ko. 13:34 Ma Uisneno nafena nafani In na'ko amates ma of ka nana'at nafani fa In neu nopu maten. Lasi nane Uisneno naton nani bi In a'an nak: Au he utisi neu lasi mataen knino le of natiabon, le Au fe ulali neu Nai Daud. 13:35 Es nane In naton nani anbi sulat Sit Pules bian nak: Of Ho ka mumautu fa Ho Atoni Knino nabala bi nopu maten. 13:36 Fun Nai Daud afi natisi nalali Uisneno In lomin, oke te in anmate ma ansub nani nok in am uf sin ma in namle'u bi nopu maten. 13:37 Mes Yesus le Uisneno nafena nafani ka on fa nane. 13:38 Ma mihin nai, bae benu alki fun natuin In es, an etun lasi sako sanat neu ki. 13:39 Ma anbi In amsa ale atoni le ampalsai of mipeni sako sanat le hi ka mipeni fa na'ko plenat Nai Musa. 13:40 Es nane te ampanat nai, he nati' kais hi mipeni sa' le antui nani bi Mafefa knino sin sulat nak: 13:41 Mimnau nai, ale hi asi'ut, mimkak nai ma mimneku nai, fun Au mo'e mepu mese bi hi batan, mepu le hi nekam ka nateb nani fa, leka es an etun nani neu ki." 13:42 Leka Nai Paulus ma Nai Barnabas anpoi na'ko ume buat nane te, sin antoti he nati' na'uab anteni lasi neno snasat amnemat. 13:43 Leka leku luli besa namsopu onane te ale atoni Yahudi ma atoni na'ko uf bian sin natuin Nai Paulus ma Nai Barnabas. Ma sin nua sin namolok nok sin ma anfainek sin he nati' sin nabala anbi halinat Uisneno. 13:44 Ma bi Neno Snasat amnemat ale to anbi kot nane nem ok-oke he natnin a'an Uisneno. 13:45 Mes leka atoni Yahudi sin nit to amfaun nane te sin nato' ma nasi'u ma antite sa' le Nai Paulus na'uab nani. 13:46 Mes Nai Paulus ma Nai Barnabas sin na'uab nok nek mainuan nak, "Namneo hen etun a'an Uisneno nahunu neu ki, mes natuin him tite ma hi mak hi kam tam fa ota he mipeni lasi honis. Es nane hai misaitan ki ma haim nao meu pah mesokan. 13:47 Fun lasi i Uisneno es anlek nani neu kaim nak: Au lek ko he nati' amfani meusine neu ale to le ka nahin Uisneno, he nati' meki lasi honis neu pah pinan." 13:48 Leka ale to le ka nahin Uisneno sin nen lasi nane te sin namlil ma naliatas a'an Uisneno. Ma ale to le Uisneno anlek he napeni honis, sin nekan nateb knino. 13:49 Oke te a'an Uisneno nasitbon kun neu pah nane funam natef. 13:50 Ma atoni Yahudi sin anfuli ale bife makana ma ale anaet-anaet le namtaus Uisneno bi kot nane he neki hamu'it neu Nai Paulus ma Nai Barnabas ma anli'u sin na'ko pah nane. 13:51 Mes Nai Paulus ma Nai Barnabas antekal afu na'ko sin haen, on amnaut neu sin, oke te sin nao neu Ikonium. 13:52 Ma asimo lasi bi Antiokhia sin nahenu nok Smanan Knino.
14:1 Ma bi Ikonium sin nua sin antam neu atoni Yahudi sin ume buat ma nanoina sin onane, talan te atoni Yahudi ma atoni Yunani namfau nekan nateb knino neu Yesus. 14:2 Mes atoni Yahudi le nekan ka nateb, sin nakoke atoni le ka nahin Uisneno sin nekan talan te sin nato'an ale atoni le nekan nateb neu Yesus. 14:3 Ma Nai Paulus nok Nai Barnabas namaika nok sin neno fauk anbi nane. Mes sin nanoina nok nek mainuan, fun sin nekan nateb Uisneno. Ma Uisneno anhatan beno antom In halinat ma anfen sin kuasat hen moe taka ma lasi amkakat neu to. 14:4 Mes ale atoni bi kot nane anbatiok fani pukan nua. Bian anhake nok atoni Yahudi ma bian anhake nok Nai Paulus ma Nai Barnabas. 14:5 Oke te to mesokan ma to Yahudi nok sin nakaf-nakaf anmoe taisibu hen hamu'i ma anpoli haefin nane neki fatu. 14:6 Leka haefin nahin lasi nane te sin naskotun neu kot-kot bi Likaonia, esle' Listra ma Derbe bale bian funam natef. 14:7 Ma sin an etun Lasi Knino bi kot-kot nane. 14:8 Ma bi kot Listra anmu'i atoni mese le antoko ha natuin in haen an ole na'ko fe nahonis talan te in ka nao nitaf. 14:9 In antoko ma natnin Nai Paulus in uab nane. Oke te Nai Paulus ankiso in nak, in nekan nateb knino ma of naleko kun. 14:10 Nalali te Nai Paulus nak neune, "Hom fen nai ma menu ho haem!" Ma atoni nane anfen ma in nao. 14:11 Ma leka sin nit sa' le Nai Paulus anmoe nani te sin anbai neki a'an Likaonia nak, "Uisneno ansanu nem es hi atnanam nahumbon on mansian." 14:12 Ma sin antek Nai Barnabas nai Zeus ma sin antek Nai Paulus nak Hermes fun in es na'uab. 14:13 Oke te Zeus in ana' fuat le in ume fuat bi kot kotin nem ma neki bia keso ma tuna' neu kot enon he neki fuat nok ale to neu haefin nane. 14:14 Ma leka Nai Paulus ma Nai Barnabas sin nen lasi nane te sin anpisu sin bael pake ma naen antam neu to amfaun nane ma sin anbai nak, 14:15 "Atonin hi moe sa' ka? Hai amsa mansian onle hi. Hai aim meu i hem etun ki Lasi Knino he nati' hi misaitan hi mo'et amle'ut ma amfani aim meu Uisneno amonit le anmepu neno tunan ma pah pinan, tasi nok in nesan ok-oke. 14:16 Le bi batan afinit, In namautu ale uf he nao natuin sin lanan kun. 14:17 Mes In ka nikan fa he nalile In mo'et alekot, esle' nasanut ulan na'ko neno tunan he nabalub pah neu ki. In nahenu hi nekam neki haot ma amlilat." 14:18 Maski haefin sin na'uab onane, ka nakain nabe'i sin he neki fuat neu sin. 14:19 Mes atoni Yahudi sin nem na'ko Antiokhia ma Ikonium ma anfuli to nane hen hake nok sin. Oke te sin anpoli Nai Paulus neki fatu ma anhel napoitan neu kot kotin, fun sin natenab nak anmaten. 14:20 Mes leka asimo lasi anhake natef nan, in fen ma antam neu kot. Nokfa onane in nok Nai Barnabas nao neu kot Derbe. 14:21 Nai Paulus ma Nai Barnabas an etun Lasi Knino bi kot Derbe ma anmu'i atoni namfau le nekan nateb neu Yesus. Oke te sin anfani neu kot Listra ma kot Ikonium ma kot Antiokhia. 14:22 Ma bi kot-kot nane sin anhatane asimo lasi sin nekan ma anfainek sin he nati' sin nekan nateb nabala neu Yesus fun nak he tam teu Plenat Uisneno hit mes atsutai mafena namfau. 14:23 Ma bi pukan-pukan knino nane Nai Paulus ma Nai Barnabas anbeti penatua-penatua, nalali te sin anonen toti ma nalenok, sin natnat penatua-penatua neu Uisneno le sin nekan nateb knino neune. 14:24 Ma sin afini pah Pisidia ma ante Pamfilia. 14:25 Ma sin an etun a'an Uisneno bi Perga, sin nao neu Atalia bi tasi ninen. 14:26 Ma sin ansae bnao na'ko Atalia anfani neu kot Antiokhia le afi nana'at neu sin halinat Uisneno he naiti mepu le sin anmepu nalali. 14:27 Leka sin ante kot Antiokhia sin nabuab tolas aknino ma an etun ale sa' le Uisneno anmoe nani natuin sin, ma nak Uisneno nasoitan eno he nati' ale uf-uf bian amsa nekan nateb knino neu Yesus. 14:28 Ma Nai Paulus ma Nai Barnabas namaika nok asimo lasi sin bi kot nane suk a'lo.
15:1 Ma atoni bian neman na'ko pah Yudea neu kot Antiokhia ma nanoina bae knino sin bi nane nak, "Kalu hi kam heli fa natuin plenat Uisneno le Nai Musa nanoina nani of hi ka mipeni fa honis." 15:2 Mes Nai Paulus ma Nai Barnabas anmatoe matane ma antite sin molok nane. Nalali te sin manlekan, he nati' Nai Paulus ma Nai Barnabas nok atoni fauk na'ko tolas aknino sin nao neu haefin ma penatua sin bi kot Yerusalem he namolok lasi nane. 15:3 Oke te tolas aknino nok sin anpoi ma nasain sin. Ma sin nao natuin Finisia ma Samaria. Ma an etun neu sin antom ale atoni na'ko uf bian le ka nahin Uisneno sin nali'ok fani nem neu Uisneno. Beno nane neki amlilat naek neu bae knino sin bi ale kot nane. 15:4 Leka sin nem ante kot Yerusalem, tolas knino ma haefin ma penatua sin ansimo sin. Oke te sin an etun ale sa' le Uisneno anmepu natuin sin. 15:5 Mes atoni fauk na'ko nonot Farisi le sin nekan nateb knino neman ma na'uab nak, "Ale atoni le kan tam nonot Yahudi mes anheli sin ma he natuin plenat Uisneno." 15:6 Oke te haefin ma penatua sin nabuan he namolok lasi nane. 15:7 Leka sin na'uab ma anmatukal nekaf antom lasi nane te Nai Petrus anfen ma nak, "Bae knino ala ki hi mihin, nak afi Uisneno anbeti kau na'ko hi atnanam, he nati' au etun lasi knino neu ale to le kan tam nonot Yahudi he nekan nateb knino neu Yesus. 15:8 Ma Uisneno, es nahin ale nekaf mansian, nalile In lomin hen simo sin, fun In anfe Smanan Knino neu sin amsa onle anfe nani neu kit. 15:9 Ma In kan beti naikan sin nok kit, fun In naknino sin natuin sin nekan nateb knino. 15:10 Kalu onane te, nansa hi hem su' Uisneno ma misaeb baut mafena i neu asimo lasi sin, le anloi ka nabe'i fa, onle hit am uf sin amsa loi ka nabe'i fa? 15:11 Mes hit nekak nateb knino natuin Usif Yesus Neno Anan In halinat aknino of hit tapeni honis onle sin amsa." 15:12 Onane te ale to le nabua bi bale nane sin natena, ma natuin Nai Paulus ma Nai Barnabas le na'uab neu ale lasi taka ma lasi amkakat le Uisneno anmoe nani natuin sin bi ale to na'ko uf bian le kan tam fa nonot Yahudi. 15:13 Leka Nai Paulus ma Nai Barnabas na'uab nalali te, Nai Yakobus na'uab nak, "Bae knino ala ki, hi mitnin kau fe: 15:14 Nai Simon an etun nalali nak, na'ko palmelu ai na'ko un-unu Uisneno nalile In manekan neu uf bian le kan tamaf nonot Yahudi, nok salit hen beti na'ko sin ma anfani In to. 15:15 Lasi nane namnes nok sa' le mafefa knino sin na'uab nani onle antui nalali nak: 15:16 Of namuni te Au fain aum ma Au uhakeb ufani Nai Daud in ume le natsel, ma Au uloitan ufani atselas nane ma Au utetu ufani, 15:17 he nati' ale atoni bian sin nami Uisneno ma ale to le ka nahin Uisneno, Au boin sin hen fani Au ini, Uisneno ameput ale sa' In nakua a'an onane, 15:18 le natonon kun na'ko un-unu. 15:19 Es nane te Au lomi he nati' kais hi misusab to na'ko uf bian le sin anfani nem ma nana'at sin aon neu Uisneno. 15:20 Mes hit tui sulat ma atsonu neu sin he nati' kais sin nah na'ko mnah fuat, ma kais neku sisi na'ko mu'it le ankil nison ma kais nahan na' ma kais anmoe lasi kake ai mapaisa. 15:21 Fun na'ko batan ahunut, an etun nani plenat Nai Musa bi ale kot, ma talan te neno i, anso'i plenat nane bi ale ume buat bi Neno Snasat." 15:22 Onane te haefin ma penatua sin ma tolas aknino manlekan hen beti nan atoni fauk hen sonu sin neu kot Antiokhia nok Nai Paulus ma Nai Barnabas. Ma sin anbeti Nai Yudas le antek nak Nai Barsabas ma Nai Silas. Fun sin nua sin atoni makana bi bae knino bi kot Yerusalem. 15:23 Ma nana'at neu sin sulat le in hanan nak, "Neu bae knino bi Antiokhia, Siria ma Kilikia le na'ko uf bian, han alekot na'ko haefin ma penatua sin ma hi bae knino sin. 15:24 Haim nen milali nak anmu'i atoni bian na'ko kaim le hai kam ba'an fa sa' neu sin, le na'unu ma nale'un hi nekam neki sin lasi noina. 15:25 Es nane te hai manlekan ma mifek ma amsonu atoni fauk nok Nai Paulus ma Nai Barnabas le haim nek sin, 15:26 atoni nua le nana'at sin monin neu hit Usif Yesus Neno Anan In kanan. 15:27 Ma haim sonu Nai Yudas ma Nai Silas he nati' sin na'uab neki fefan antom lasi le haim tui mani bi sulat i neu ki. 15:28 Fun Smanan Knino anlomi ma hai amsa amlomi, he kais nasaeb mafena neu ki nesin na'ko fekat le i: 15:29 Kais hi miah mnahat le neki neu fuat, kais hi miah na', kais miah sisi na'ko mu'it le ankil nison ma kais amoe lasi kake ai mapaisa. Leka hi minaoba ale lasi i, onane te hi moe alekot. Lasi antu' bi i. Aomina neu ki." 15:30 Leka sin manseon nalali te Nai Yudas ma Nai Silas sin nao neu kot Antiokhia. Leka sin nem ante kot Antiokhia sin boin nabua tolas aknino ma nana'at sulat nane neu sin. 15:31 Leka sin anso'i nalali sulat nane, tolas aknino nekan namlil natuin sulat hanan neki halinat neu sin. 15:32 Fun Nai Yudas ma Nai Silas amsa mafefa knino, sin anfainek bae knino sin ma anhatane sin nek ateb knino. 15:33 Ma leka sin nua sin namaika suka' lo nok bae knino sin bi Antiokhia, oke te bae knino nafetin sin hen fani nok halan nekaf neu sin le afi ansonu sin. 15:34 Mes Nai Silas nafek he nabala bi kot nane. 15:35 Ma Nai Paulus ma Nai Barnabas nabala bi kot Antiokhia, ma sin nanoina ma an etun a'an Uisneno nok ale atoni bian. 15:36 Mes neno fauk namsopu te Nai Paulus nak neu Nai Barnabas, "Leko hit atfani teu bae knino sin bi ale kot le afi hit ate'tun a'an Uisneno neu sin, ma atkiso sin he sin onme." 15:37 Ma Nai Barnabas anlomi he nok Nai Yohanes le antek nak Nai Markus. 15:38 Mes Nai Paulus natenab nak kalu nok Nai Markus ka nalekof fun afi in nao nasaitan sin bi Pamfilia ma in kan lomi hen mepu nekaf mese nok sin. 15:39 Ma natuin lasi nane Nai Paulus ma Nai Barnabas anmatoe, oke te sin anbatiok. Ma Nai Barnabas nok Nai Markus saen neu bnao neu Siprus. 15:40 Mes Nai Paulus anbeti Nai Silas, leka bae knino sin bi Antiokhia nana'at sin neu halinat Usif tunan, 15:41 oke te sin nao anfini pah Siria ma Kilikia fun ahatani tolas knino sin.
16:1 Ma Nai Paulus nem amsa neu Derbe ma neu Listra. Ma anbi nane anmu'i atoni mese kanan Nai Timotius. In ainaf bife Yahudi le nekan nateb knino, ma in amaf nane atoni Yunani. 16:2 Ma ale bae knino sin bi Listra ma Ikonium nahin Nai Timotius on atoni alekot. 16:3 Ma Nai Paulus anlomi he Nai Timotius nokan neu mepu; es nane Nai Paulus anlelu hen heli in fun ale atoni bi pah nane, nahin nak in amaf nane atoni Yunani. 16:4 Leka sin nao anfin ale kot nane Nai Paulus ma Nai Silas natonan sin ale fekat le haefin ma penatua sin nafek nani bi kot Yerusalem he nati' tolas aknino moe natuin. 16:5 Ma ale tolas aknino napeni be'it anbi nek ateb knino talan te sin ain ansato piut. 16:6 Ma sin nao anfini neu pah Frigia ma pah Galatia, fun Smanan Knino nakain sin he kais an etun Lasi Knino bi pah Asia. 16:7 Leka sin ante Misia sin hen tam neu Bitinia mes Yesus Ini Smanan Knino kan lomif. 16:8 Ma sin anfin Misia neu Troas. 16:9 Ma bi fai nane Nai Paulus nit mnitas mese nak: Atoni Makedonia mese anhake bi bale nane ma nak neune, "Lak aum nai neu Makedonia ma amtulun kai nai!" 16:10 Leka Nai Paulus nit nalali mnitas nane, hai maim lanan hem lak laba neu Makedonia, fun hai mitenab mak mnitas nane Uisneno es no'en kai, he nati' haim etun lasi knino neu ale to bi pah nane. 16:11 Ma haim nao mi'ko Troas ma amlak neu Samotrake, ma nokfa haim tia Neapolis, 16:12 ma hai mi'ko Neapolis meu Filipi, kot ahunut le tukan Makedonia ini, le atoni Roma natua anbin. Ma hai mimaika neno fauk anbi kot nane. 16:13 Ma bi Neno Snasat haim poi mi'ko kot enon, ma haim nao meu noe ninen fun hai mitenab nane atoni Yahudi sin bale onen totis. Ma haim toko ambin, oke te mimolok mok bife-bife le nabuan bi bale nane. 16:14 Ma bife mese kanan bi Lidia asosa tais bauk ulu tasi, na'ko kuan Tiatira. In bife atulu nekaf neu Uisneno, es nane Uisneno anfai in nekan talan te in nen ma antao nekan neu sa' le Nai Paulus na'uab nani. 16:15 Leka naslani nalali in nok in ume nanan sin, in anhone kai nak, "Kalu hi mitenab au nekak nateb knino neu Yesus, aim he mimaika bi au ume." In naseke kai tal haim simo mani. 16:16 Anbi haefes leka haim nao meu bale onen totis nane, hai mieku mok ate bife mese le anmu'i sman nitu. Ma natuin kuasat nitu in napeni osa naek neu in tuanenu. 16:17 Ia nao natuin Nai Paulus ma hai, oke te in anbai nak, "Atonin i Uisneno Amnanut In ate sin. Ma sin neman hen etun neu ki lanan honis." 16:18 Bife nane anhunun piut onane tal neno fauk. Mes leka Nai Paulus ka nalan nabe'i te in nak neu smanan nitu nane, "Anbi Yesus Neno Anan In kanan, au lelu ko hem poi mu'ko bife i." Ma bi leku nane amsa smanan nitu anpoi. 16:19 Leka bife nane in tuanenu nit lasi nane, ma sin of ka na'os anteni fa, sin anheke Nai Paulus ma Nai Silas, ma anhel neki sin neu masa' he nahakeb sin bi nakaf sin matan. 16:20 Leka nok sin nua sin nao neu ale anaet matan nalali te sin nak, "Atonin i sin bakalan hit kot fun sin atoni Yahudi kun. 16:21 Ma sin nanoina halat, le hit on atoni Roma ka nabe'i het simo ma tatuin." 16:22 Oke te atoni amfaun nane antumatan sin. Ma ale anaet bi kot nane sin anlelu hen pisu sin bael pake ma antepo sin. 16:23 Leka antepo nalali sin te neki sin antam neu o'of. Ma sin lelu nakaf apao o'of hen pao sin leko-leko. 16:24 Fun nakaf apao o'of ansimo nalali plenat onane te in natam sin neu o'of, ke'an atnanan ma antao nake matane neu sin haen. 16:25 Ma leka fai natnan Nai Paulus ma Nai Silas anonen toti ma ansi ma naliatas Uisneno ma atoni hukum bian natnin sin. 16:26 Ma naskek onane te nainunus naek talan te o'of in sukin nabeko. Ma ale eno natfai ma ale nake bi sin haen natkasu kun. 16:27 Ma nakaf apao o'of nane naskek ma anfen na'ko tupas. Ma in nit ale eno natfei ok-oke in faki suni he napau nison fun in natenab nak ale atoni hukum nane naen kukun. 16:28 Mes Nai Paulus in anbai ma nak, "Kais mule'un ho aom fun hai ala kai es i!" 16:29 Ma nakaf apao o'of nane anlelu neki paku, in naen antam ma na'tai, oke te anmof hae bi Nai Paulus ma Nai Silas in matan. 16:30 In nok sin anpoi, ma nak neu sin, "Tuan-tuan, au moe onme he upeni honis?" 16:31 Nai Paulus ma Nai Silas natae nak, "So ampalsai nai neu Yesus Kesel Afetin of ho mupeni honis, mok ho ume nanan ale sin." 16:32 Oke te sin an etun a'an Uisneno neun ma neu in ume nanan ala sin. 16:33 Ma bi leku nane amsa nakaf apao o'of nok sin nao ma anboe sin papa. Ma bi leku nane amsa in nok in ume nanan nana'at sin aon he naslani sin. 16:34 Oke te in nok sin nao neu in ume ma nabalab sin hen bukaen. Ma in nekan namlil fun in nok in ume nanan sin anfani apalsait neu Uisneno. 16:35 Ma nokfa onane te ale anaet kot nane anlelu he natonan nakaf apao o'of nak, "Mifetin atoni nua le nane!" 16:36 Oke te nakaf apao o'of natiaba lasi nane neu Nai Paulus ma nak, "Anaet-anaet kot anlelu nem he nafetin ki; es nane him poi nai ma amnao nai nok aomina!" 16:37 Mes Nai Paulus nak neu sin, "Sin antepo kai bi to amfaun sin matan ka nok fa lef lasi, fun hai atoni Roma kai. Oke te sin natam kai neu o'of. Leka me tomas i sin he napoitan kai nok tol-tolo' ka? Lasi ka on fa nane! So sin neman he napoitan kai." 16:38 Ma ale nakaf nane sin natiaba a'at nane neu ale anaet kot sin. Leka sin nen nak Nai Paulus ma Nai Silas nane atoni Roma oke te sin namtau. 16:39 Ma sin neman fun na'uab leko-leko nok Nai Paulus ma Nai Silas. Oke te nok sin anpoi ma antoti he nati' sin nao nasaitan kot nane. 16:40 Fun sin anpoi na'ko o'of ma nao neu bi Lidia in ume. Ma leka sin nit bae knino anbi nane, sin anhalin sin oke te sin nua sin nao.
17:1 Ma Nai Paulus nok Nai Silas nao natuin lanan Amfipolis ma Apolonia ma nem ante Tesalonika. Ma anbi nane anmu'i ume buat atoni Yahudi. 17:2 Ma Nai Paulus antam neu ume buat nane. Neno Snasat tenu ma'katuin in namolok nok sin a'at na'ko Sulat Knino. 17:3 In anfainek sin ma naton neu sin, nak Neno Anan mes ansutai mafena ma anfen anfani na'ko amates balan ma in nak, "In kun Neno Anan Yesus le au eut ani neu ki." 17:4 Ma atoni bian na'ko sin nekan nateb ma namesbok nok Nai Paulus ma Nai Silas onane amsa atoni Yunani namfau le namtaus Uisneno ma bife makana sin namfau nekan nateb neu Yesus. 17:5 Mes atoni Yahudi sin nekan namen ma anhok ale atoni abulalut bi masa' ma anmoe slutuf bi kot nane. Ma sin nao neu Nai Yason in ume ma nami Nai Paulus ma Nai Silas he nok sin nao neu buat to sin matan. 17:6 Mes leka sin ka napeni fa Nai Paulus ma Nai Silas, sin anhel neki Nai Yason ma bae knino sin fauk nao neu ale anaet kot ma anhunun nak, "Atonin le anmoe taisibu bi me-me sin neman es i, 17:7 ma Nai Yason ansimo sin namaika es in ume. Sin antanhai ale plenat kesel pah Roma ma an etun nak anmu'i Kesel bian le kanan Yesus." 17:8 Leka ale atoni ma ale anaet sin nen lasi nane sin nekan na'unu. 17:9 Mes leka sin ansimo noni poh fefaf na'ko Nai Yason nok bae knino sin oke te nafetin sin. 17:10 Ma anbi fai nane amsa bae knino sin anlelu Nai Paulus nok Nai Silas nao neu Berea. Leka sin ante Berea sin antam neu atoni Yahudi sin ume buat. 17:11 Mes atoni Yahudi bi kot nane naleko' nesi atoni Yahudi bi Tesalonika, fun sin ansimo a'at nane nok nek sinmakat ma neno-neno sin antae Sulat Knino he n ahin nak ale lasi nane anmneo onan ka. 17:12 Ma anmu'i atoni namfau le nekan nateb neu Yesus. Ma to Yunani namfau ale bife ma atoni makana amsa nekan nateb neu Yesus. 17:13 Mes leka ale atoni Yahudi na'ko Tesalonika sin nahin, nak Nai Paulus an etun a'an Uisneno bi Berea amsa, sin neman ma anfuli fun nakoke ale atoni sin nekan. 17:14 Mes bae knino sin anlelu Nai Paulus he nao neu tasi ninen, mes Nai Silas ma Nai Timotius nabala bi Berea. 17:15 Ma leka sin nasain Nai Paulus ante Atena, sin anfani nem neu Berea ma neki Nai Paulus in han ba'an he nati' Nai Silas ma Nai Timotius naon laba neune. 17:16 Leka Nai Paulus fe anpao sin bi Atena, in nekan ansusal fun in nit kot nane nahenu nok le'u mahuma. 17:17 Es nane anbi ume buat Nai Paulus na'uab nok ale atoni Yahudi ma atoni bian le namtaus Uisneno, ma anbi masa', neno-neno in na'uab nok ale atoni le in nae'ku nok sin. 17:18 Ma ale atoni ahinet na'ko nonot Epikorus ma Stoa amsa anmasoal nokan ma bian nak, "Atoni fefa pakan nane na'uab nak sa' ka?" Mes bian sin nak, "Oni in an etun noina Uisneno teta kun." Sin na'uab onane fun Nai Paulus an etun Lasi Knino antom Yesus ma antom lasi amates anfen anfani. 17:19 Ma sin nok Nai Paulus neu buat anbi nu'af Areopagus ma nak, "Hai he mihin noina fe'u le ho munoina nane, nabe'i ka? 17:20 Fun ho munenab kai lasi fe'u, es nane haim lomi he mihin, ale lasi nane in oten he sa'." 17:21 Fun ale atoni Atena ma ale atoni anao amnemat le namaika anbi kot nane sin lomi hen pake sin leku mainuan he natnin ma namolok antom ale lasi fe'u nane. 17:22 Nai Paulus nao ma anhake bi Areopagus tunan ma nak, "Hi atoni Atena, au it nak anbi ale lasi hi mimtaus Uisneno teta. 17:23 Fun leka au' u on-oni bi kot i, au it hi bale onen ma anbi bale mese le hi meki fuat neun, au it tuis mese nak on i: Neu Uisneno le ka mahine fa. Nah, neu Uisneno le hi ka mihine nane, In kun esle' au etun neu ki. 17:24 Uisneno le anmepu neno tunan ma pah pinan nok in nesan, In, es Uisneno neu neno tunan ma pah pinan, le ka namaika fa anbi ume le'u le anmo'e neki niman mansian, 17:25 ma niman mansian kan tuthae nani fa, onle In na'nuka sa'. Fun In kun es anfe honis ma smanaf ma ale sa' neu to pah pinan. 17:26 Na'ko atoni mese In anmoe ale to pah pinan ma natua pah pinan. Fun In es anlek ale eti neu sin ma ale nakat neu sin bale maika. 17:27 He nati' sin nami In ma an ableo ma napeni nan In, fun In ka na'lo fa na'ko kit. 17:28 Fun anbi In hit atmoni, hit tabloti, hit esan onle hi atoni ahinet sin na'uab nani nak: Hit le i amsa Uisneno In sufan kit. 17:29 Fun Uisneno In sufan kit, kais hi tatenab, Uisneno namnes nok noni mnatu ai noni muti ai fatu mahuma le mansian anmoe nani neki in hinen. 17:30 Fun hit lasi mono nane Uisneno nikan nani, ma tomas i Uisneno an etun neu mansian, he nati' sin napis na'ko sin sanat. 17:31 Fun In anlek nani neno le hen lefi lasi pah pinan in nok amneot. Ma lasi nane nana'at nani neu atoni mese le Uisneno anbeti nani. Ma In anfe taka neu ale lasi nane esle' nafena nafani atoni nane na'ko amates balan." 17:32 Leka sin nen nak anfen anfani na'ko amates, bian naslaet ma bian sin nak, "Haefes anteni na' haim nen lasi nane." 17:33 Oke te Nai Paulus anpoi na'ko sin atnanan. 17:34 Mes anmu'i atoni fauk le namesbok nok Nai Paulus ma anfani atoni apalsait esle' Nai Dionisius, aof na'ko buat Areopagus, ma bife mese kanan bi Damaris ma atoni bian amsa nok sin.
18:1 Nalali te Nai Paulus nasaitan Atena ma nao neu kot Korintus. 18:2 Ma anbi kot Korintus in na'eku nok atoni Yahudi mese kanan Nai Akwila na'ko Pontus. In fe nem na'ko Italia nok in fel kanan bi Priskila, funuiskesel Nai Klaudius naplenat he nati' ale atoni Yahudi nasaitan pah Roma. Ma Nai Paulus nao nok sin ume. 18:3 Ma natuin sin mepu papmese in natua nabua nok sin. Sin mepu nabua fun mepu nane esle' anmoe um-ume. 18:4 Ma bi Neno Snasat Nai Paulus an etun lasi anbi ume buat ma in nami lanan he ale atoni Yahudi ma ale atoni Yunani nekan nateb knino. 18:5 Leka Nai Silas ma Nai Timotius neman na'ko Makedonia, Nai Paulus antao nekan oke hen etun lasi ma ansaksi neu ale atoni Yahudi nak Yesus nane lo Neno Anan kun. 18:6 Mes leka ale atoni nane sin namusu nokan ma na'uab nale'un, oke te in antekal afu na'ko in bael pake ma nak neu sin, "Him sutai kim hi sanat, au ufetin nimaf na'ko lasi nane. Ma tomas i au poi ma nao eu uf bian le kan tam nonot Yahudi." 18:7 Ma Nai Paulus anpoi na'ko bale nane ma nao neu atoni mese kanan Nai Titius Yustus le namtaus Uisneno, in ume le anmapaumakan nok ume buat. 18:8 Mes Nai Krispus nakaf ume buat nane in nekan nateb neu Uisneno nok in ume nanan alsin. Ma anmu'i atoni Korintus namfau le nen Nai Paulus in a'at ma sin nekan nateb ma neki sin aon he naslani sin. 18:9 Ma anbi faies onane te Uisneno nakua In a'an neu Nai Paulus nok mnitas mese nak, "Kais mumtau, mu'uab piut kais mutena! 18:10 Fun Au hake ok ko ma katit fa esle' hen ableo ko ma anhamu'i ko fun Au to namfau anbi kot i." 18:11 Ma Nai Paulus namaika anbi Korintus ton mese funan ne ma an etun A'an Uisneno neu sin. 18:12 Mes leka Nai Galio anfani kumlol bi Akhaya, ale atoni Yahudi sin anfen nekaf mese ma anmatoe nok Nai Paulus, oke te anhel neki neu toko alef lasi. 18:13 Ma sin nak, "Atoni i nami hen fuli to he namtaus Uisneno neki lasi le nasuli nok Plenat Knino Nai Musa." 18:14 Leka Nai Paulus he namolok te, Nai Galio nak neu atoni Yahudi sin, "Hoi atoni Yahudi, kalu lasi le mitam antom lasi tanhais ai lasi bulalu nabe'i au nen hi lasi nane. 18:15 Mes kalu lasi nane lasi matoes antom neu kanaf ka, ai uabe ka, ai hi Plenat Knino ka, hi mifek kim; au ka loim he fani alef lasi neu lasi humaf nane." 18:16 Oke te Nai Galio anli'u sin na'ko ke'an alef lasi nane. 18:17 Ma sin anheke Nai Sostenes nakaf ume buat ma anbiso bi alef lasi sin matan. Mes Nai Galio kan lae nok fa sin. 18:18 Nai Paulus namaika anteni neno fauk bi Korintus. Nalali te in naseon bae knino sin bi nane ma ansae bnao neu Siria nok bi Priskila ma Nai Akwila. Ma Nai Paulus an eu in nafuruan bi Kengkrea fun in moe nalali lasi manta'en. 18:19 Ma sin ante bi Efesus, Nai Paulus nasaitan bi Priskila ma Nai Akwila bi nane, ma in mes antam bi ume buat, ma na'uab nok atoni Yahudi sin. 18:20 Ma sin antoti he Nai Paulus namaika nok sin suk a'lo mes Nai Paulus kan lomif. 18:21 Mes in naseon sin ma nak, "Of au fain aum eu ki leka Uisneno anlomi." Oke te in nao na'ko Efesus. 18:22 Leka nem ante bi Kaisarea in ansanu ma nao neu Yerusalem ma anfe han alekot neu tolas knino bi nane ma in nao neu Antiokhia. 18:23 Leka namaika neno fauk anbi nane te in nao anteni natuin pah Galatia ma Frigia hen hatane atoni apalsait sin nekan. 18:24 Onane te anmu'i atoni Yahudi mese Nai Apolos nahonis bi Alexandria nem neu Efesus. In atoni malasi ma ahinet antom lasi Sulat Knino. 18:25 In ansimo noina neu Lanan Uisneno, fun in uab nane namnutun fin ma in nanoina antom Yesus, mes al in nahin Nai Yohanes in noina antom lasi naslani atoni. 18:26 Ma in na'uab bi ume buat, leka bi Priskila ma Akwila nen, oket sin nokan neu sin ume. Ma bi nane sin na'uab naknutu Lanan Uisneno le he neki honis natuin Yesus neu Nai Apolos. 18:27 Fun Nai Apolos anlomi hen lak neu Akhaya, onane te bae knino sin bi Efesus antui sulat neu atoni apalsait sin bi Akhaya he nati' nasimo Nai Apolos nok nek amlilat. Leka in nem ante Akhaya, natuin halinat Uisneno in anfani atoni alekot neu ale atoni apalsait sin. 18:28 Fun nok matane in na'eka ale atoni Yahudi sin bi mat-mat, ma nalile sin a'at le antui nani bi Sulat Knino nak Yesus nane lo Neno Anan kun.
19:1 Leka Nai Apolos fe anbi Korintus, Nai Paulus in nao neu ale kuan bi pah nane ma nem ante Efesus. Ma anbi nane in napeni asimo lasi sin fauk. 19:2 Ma in nak neu sin, "Ati him simo Smanan Knino ka, leka hi nekam nateb knino." Mes sin natae nak, "Fe kahaf, fun hai fe kam nenaf nak anmu'i Smanan Knino." 19:3 Oke te Nai Paulus nak neu sin, "Kalu onane naslani ki neki sa'ka?" Ma sin natae nak, "Neki Nai Yohanes Aslanit ini." 19:4 Ma Nai Paulus nak, "Nai Yohanes Aslanit nane in naslani atoni le napis na'ko sanat, ma Nai Yohanes nak neu sin nak: Sin mes nekan nateb neu In le nem namuni na'ko in esle' Yesus." 19:5 Leka sin nen lasi nane te sin nana'at sin aon he naslani sin bi Usif Yesus In kanan. 19:6 Ma leka Nai Paulus na'aiti niman neu sin, oke te Smanan Knino ansanu nem neu sin ma sin na'uab neki a'at Smanaf nane ma nabeno knino nok. 19:7 Ma sin ok-oke oni tuaf bo'es am nua. 19:8 Ma anbi funan tenu Nai Paulus antam neu ume buat bi bale nane ma nanoina nok nek mainuan. In an etun sin ma nami he nati' sin nekan nateb neu Plenat Uisneno. 19:9 Mes bian namanub sin nekan ma kan lomif he nateb knino, fun sin na'akan Lanan Uisneno bi to mfafaun sin matan. Es nane te Nai Paulus nao nasaitan sin ma anbeti naikan in asimo lasi sin ma neno-neno in na'uab anbi Nai Tiranus in ume skol. 19:10 In mepu onane ton nua tal ale to bi pah Asia, atoni Yahudi ma atoni Yunani sin alsin nen a'an Uisneno. 19:11 Ma Uisneno anmoe lasi amkakat matani natuin Nai Paulus. 19:12 Kalu sin neki lesu ai bale sa' le Nai Paulus anpake ma nabela nani neu ale amenat sin, oket sin naleko' na'ko menas ma ale smanan nitu anpoi nasaitan sin. 19:13 Ma anmu'i mnane Yahudi sin fauk le nao natef pah nane ma antek Yesus kanan he napoitan sman nitu na'ko ale atoni sin, fun sin anbai ma nak, "Au sukat ki eki Yesus kanan le Nai Paulus an etun." 19:14 Atoin amoetin nane esle' Nai Skewa ana' lasi fuat nakaf to Yahudi in anhin an atoni hitu. 19:15 Mes sman nitu nane nak sin nak, "Yesus au uhine, ma Nai Paulus au uhine, mes hi le i hi sekau ki ka?" 19:16 Ma atoni le niut sae nane naen nu ma anpisu sin blua pake ma antufu sin talan te sin naen monas nok papa' na'ko ume nane. 19:17 Ma ale atoni Yahudi ma atoni Yunani le namaika bi kot Efesus, sin nen lasi nane te sin namtau ma sin naliatas Usif Yesus In kanan. 19:18 Ma atoni namfau le sin nekan nateb neu Yesus, sin neman ma nahoeb sin sanat bi mat-mat, nak afi sin amsa anmoe onane. 19:19 Ma bian, le afi sin anmoe ela mesokan, sin nabua sin sulat ma notu sin bi to amfaun sin matan. Ma ale sulat nane sin upan oni noin muti nifun bo'nim. 19:20 Ma nok lasi nane te Uisneno In a'an nasitbon piut ma nahenu nok kuasat. 19:21 Leka ale lasi nane anbol nalali te, Nai Paulus nafek bi in nekan he nao neu Makedonia ma Akhaya oke te anfin neu Yerusalem. Ma Nai Paulus nak, "Leka au te bi Yerusalem, au he nao eu pah Roma amsa." 19:22 Onane te in anlelu in ababat sin nua, esle' Nai Timotius ma Nai Erastus nahunun neu Makedonia, mes in nabalah neno fauk bi Asia. 19:23 Ma oni anbi neno nane taisibu naek anbol neu Lanan Uisneno. 19:24 Fun anmu'i atoni mese kanan Nai Demetrius, atoni atois noni le antois uim le'u Artemis na'ko noin muti. Ma in napeni upaf naek neu in ameput sin. 19:25 Es nane te in nabua ale in ameput sin nok ameput bian le sin mepu papmese ma nak neu sin, "Atonin, hi mihin, nak hit mepu i neki alekot neu kit! 19:26 Neu, hi mit ma him nen kim, Nai Paulus le ka al fa bi kot Efesus, mes ala kle'o bi pah Asia ok-oke, in anfuli to ma nasekeb atoni namfau ma na'uab nak, ale sa' le anmepu neki niman mansian nane ka Uisneno fa. 19:27 Ka al fa hit mepu i namle'u, he na'uab nale'un kit, mes uim le'u naek Artemis of namle'u amsa ma in kanan namneku. Ma Artemis, le to pah Asia ma to pah pinan namtaus nani of namneku nfin nok in matanen." 19:28 Leka sin nen lasi nane te sin nekan anmaput ma nato'an ma sin anbai nak, "Artemis, atoni Efesus sin uisneno, ho moni kum!" 19:29 Ma kot nane nahenu nok taisibu naek. Ma sin anheke Nai Gayus ma Nai Aristarkhus, sin nua sin atoni Makedonia le anse'u Nai Paulus anbi lanan, ma anhel neki sin nao neu bale bae bi kot nane. 19:30 Nai Paulus hen tam bi to sin atnanan mes in asimo lasi sin kan lomif. 19:31 Fun ale anaet bi pah Asia le sin fef leko nok Nai Paulus, anlelu haef neune, he nati' kais in tam neu bale bae nane. 19:32 Ma leka abuat bi bale nane sin anbai, bian nak on i, bian nak onane, slutuf matane, ma bian sin ka nahin he nabuan neu lasi sa'. 19:33 Oke te atoni Yahudi sin antite atoni mese kanan Nai Aleksander neu matan. Fun in napeni uab na'ko atoni bian antom lasi nane. Es nane te in na'pasa niman he neki uab neu to he nasoni in aon. 19:34 Mes leka sin nahin nak in atoni Yahudi kun sin na'ba oni leku nua nak, "Artemis, atoni Efesus sin uisneno, ho moni kum!" 19:35 Nalali te lul tunis kot Efesus namneb sin ma nak, "Hoi atoni Efesus! Sekau bi pah pinan i le ka nahin fa kot Efesus nane apao ume le'u Artemis le naek kun, ma le'u mahuma le ansanu na'ko neno tunan ka? 19:36 Ma es ka nabe'i fa hen matoe lasi nane, es nane hi mitena nai, ma kais hi manap he moe lasi. 19:37 Fun him hel meki atoni i nem neu i, le sin ka nasik fa hit uim le'u ma ka nale'un fa in kanan. 19:38 Es nane kalu Nai Demetrius nok in ameput sin es natam lasi neu es, anmu'i alef lasi ma kumlol. So lasi panaf nua sin natam sin lasi anbin. 19:39 Ma kalu anmu'i lasi bian, le him lomi, leko hi meki neu tolas buat to ini. 19:40 Fun hit ala kit tam es lasi amle'ut, natuin lasi taisibu naek neno i. Ma hit kat mu'if lasi un le he tamneob to abuat neu taisibu i." Ma leka sin nen nalali ale lasi te, lultunis kot anlelu to ok-oke hen fanin.
20:1 Leka taisibu bi kot Efesus namne, Nai Paulus anboin asimo lasi sin ma anfainek sin. Ma leka in naseon nalali, in nao neu Makedonia. 20:2 Fun in nao natef pah nane ma anfainek bae knino sin, nalali te in nem neu pah Yunani. 20:3 In namaika bi pah nane funan tenu, in naloitan hen sae bnao neu pah Siria. Mes leka in fe naloitan he nao te atoni Yahudi sin malomin he namate. Es nane in nafek hen fani natuin Makedonia. 20:4 Ma Nai Sopater, Nai Pirus atoni Berea anah, ma Nai Aristarkhus ma Nai Sekundus atoni Tesalonika ma Nai Gayus atoni Derbe ma Nai Timotius ma Nai Tikhikus ma Nai Trofimus atoni pah Asia sin nao nabua nokan. 20:5 Fun atonin nane sin nao nahunun ma anpao kai bi Troas. 20:6 Mes leka neno naek U'tunu Kan pake fa ma Lalu haef anfini te haim sae bnao mi'ko Filipi ma neno ha namuni te hai aim meu sin bi Troas, ma mimaika neno hitu anbi kuan nane. 20:7 Leka hai mubua hem ebi u'tunu bi neno mese anbi klei nane, Nai Paulus na'uab nok bae knino sin anbi nane fun nokfa in natenab he nao. Es nane in na'uab talan te fai nanesab. 20:8 Ma anbi ke'an fafon, le hai mibua anbin, sin notu paku namfau. 20:9 Ma anmu'i atoni munif mese kanan Nai Eutikhus antoko bi eon ana'. Fun Nai Paulus na'uab suk a'lo, atoni munif nane ansesa ka nabe'if. Oke te antupan fin ma anmof na'ko ume aktutan tenu neu pinan. Leka sin naiti te, anmaten. 20:10 Mes Nai Paulus ansanu ma aneton neu atoni munif none in fafon, ma anho nan, ma nak, "Kais mimtau, fe anmoni." 20:11 Nalali te Nai Paulus ansae anfani neu ke'an fafon, ma an ebi u'tunu ma anbukae. Leka anbukae nalali te in na'uab piut talan manas anpe' oke te Nai Paulus nao. 20:12 Ma sin nok atoni munif nane anmoni neu in ume, ma sin ala sin malinan. 20:13 Ma haim nao ma amsae bnao meu Asos, fun hem senu Nai Paulus anbin. Natuin in anba'an nak in he nao hae nok lan meto. 20:14 Leka in na'eku kai bi Asos, hai mokan neu bnao ma amnaom fin meu Metilene. 20:15 Oke te haim nao piut ma nokfa onane te haim tia bale le anmabaina nok pah Khios. Ma anmeu te haim tia Samos ma haim nao nenbes anteni te haim tia bi Miletus. 20:16 Fun Nai Paulus nafek he kais nao nok Efesus, he nati' kais anbaken neno neu pah Asia. Fun in manap he nati' napeni neno naek Pentakosta ai neno naek nasanut Smanan Knino anbi kot Yerusalem. 20:17 Es nane te Nai Paulus anlelu atoni mese na'ko Miletus nao neu Efesus he natonan ale penatua tolas knino he neman neu Miletus. 20:18 Leka sin neman, Nai Paulus nak neu sin, "Hi mihin, le au ok ki na'ko neno fe au aum a'te pah Asia i: 20:19 Au tuthae Uisneno nok nek baun. Ma anbi mepu tuthaes au matak oen ansai ma lasi su'at namfau na'ko atoni Yahudi le he namate kau. 20:20 Ma maski onane amsa au ka utau fa sa' le he neki alekot neu ki. Fun au uton ma unoni ki bi mat-mat ma bi hi ume sin amsa. 20:21 Fun au saksi neu atoni Yahudi ma atoni Yunani, he nati' sin nate'un nekan neu Uisneno ma sin nekan nateb knino neu hit Usif Yesus Neno Anan kun. 20:22 Mes tomas i he utuin Smanan Knino in lomin, au nao eu kot Yerusalem, ma au ka uhinef neu lasi sa' le hen bol neu kau, 20:23 al au uhin Smanan Knino naton nalali kau na'ko kot neu kot nak o'of ma hamu'it anpao kau. 20:24 Mes au ka utenab fa au monik lamun au utiaba ma usopu au mepu tuthaes le Usif Yesus nasuba nani neu kau he saksi Lasi Knino halinat Uisneno ini. 20:25 Ma leku i au uhin, lof hi ala ki le afi au non ma kah ki he etun Plenat Uisneno, of hi ka mitam tenif au humak. 20:26 Es nane neno i au saksi neu ki, au knino kau ma ka usanab fa neu sekau le of in namle'u. 20:27 Fun au ka upehen ki mes au uton ki piut ale lekat Uisneno. 20:28 Es nane nati' him panat kim hi aom ma ampanat pukan knino ok-oke fun Smanan Knino es nasaeb ki hem fani apaot he mituku tolas Uisneno le In napeni nani neki In Anmone Ini maten. 20:29 Ma au uhin, leka au nao te of ale asu fui abulalut antaman ki ma ka nek fa pukan knino. 20:30 Ma lof anmu'i atoni anbi ki, le neki noina moel hen hel koti atoni apalsait sin na'ko lanan amneot ma nao natuin sin. 20:31 Es nane te him panat nai ma mimnau nai, fun bi ton tenu in nanan, fai manas au ka usnas it neu he fainek ki mese-mese nok matnu. 20:32 Ma leku i au utnat ki neu Uisneno ma In a'an halinat knino. Ma In anmu'i kuasat hen hatani ki ma anfe ki athoes le In naloitan nani neu ale atoni le In naknino nani sin. 20:33 Noin muti ai mnatu ai bael pake au ka totif na'ko es amsa. 20:34 Ma hi mihin mak au mepu kuk eki au nimak he unokab au monik ma au amnoktin sini. 20:35 Fun anbi ale lasi au fe ki leta, nak het mepu onane hit mes atuntaku ale alima'et sin fun he tamnau Usif Yesus In a'an, le In na'uab nak: Leko nesi atfe na'ko at simo." 20:36 Leka Nai Paulus na'uab nalali, in anli'tu ma anonen toti nok sin. 20:37 Oke te sin ankae ma anse'ul ma anho Nai Paulus ma a'nek in ten-teni. 20:38 Ma sin nekan antu' nes-nesi, le Nai Paulus na'uab, nak of hi ka mitam tenif au humak. Oke te sin nasain nani neu bnao.
21:1 Leka hai manseon milali te haim sae bnao ma amnao meu Kos. Ma nokfa onane te haim tia bi Rodos ma mi'ko nane nao meu Patara. 21:2 Leka hai mipeni bnao bi Patara, haim sae ma haim lak meu Fenisia. 21:3 Nalali te hai mipene mit Siprus bi aon bian li', mes haim nao amfin meu pah Siria. Ma haim sanu bi Tirus fun bnao he nasanut baut anbi nane. 21:4 Ma hai mimaika bi Tirus neno hitu oke te haim kiso ale atoni apalsait sin bi nane. Ma natuin Smanan Knino anmepu, asimo lasi sin anfainek Nai Paulus he kais anao neu kot Yerusalem. 21:5 Mes leka neno namsopun te haim poi ma amnao. Ma sin ala sin nok sin fel sin anah nasain kai neu kot kotin. Oke te haim li'tu ma amonen mok sin bi tasi ninen. 21:6 Leka hai manseon milali te haim sae meu bnao te sin anfani neu ume. 21:7 Ma hai mi'ko Tirus ma amte bi Ptolemais fun lal tasi antu' bi nane. Ma haim fe han senut neu bae knino sin bi bale nane ma mimaika mok sin neno mese. 21:8 Nokfa onane te haim nao amteni ma amte bi Kaisarea, ma haim tam bi Nai Filipus amnek Lasi Knino in ume, le afi anbeti nani bi kot Yerusalem. 21:9 In anmu'i anfeto ha le napeni halinat Uisneno he nabeno knino. 21:10 Leka mimaika neno fauk anbi nane te, mafefa knino mese nem na'ko pah Yudea kanan Nai Agabus. 21:11 In nem neu kai, oke te in naiti Nai Paulus in pasu futu ma anfutu in haen ma in niman ma nak, "Smanan Knino nak on i: Pasu futu i in tuan, of atoni Yahudi sin anfutu nani bi kot Yerusalem ma nana'at neu atoni bian le kan tamaf nonot Yahudi." 21:12 Leka haim nen lasi nane te hai mok atoni apalsait sin amtoti Nai Paulus he nati' kais in nao neu kot Yerusalem. 21:13 Mes Nai Paulus natae nak, "Nansa' him kae he nati' miklati au nekak? Fun au uloitan ulali hen futu kau ma namate kau bi kot Yerusalem natuin Usif Yesus In kanan." 21:14 Fun Nai Paulus kan lomif hai fainekat nane, haim ela ma mak, "Usif tunan In lomin maut hen bol!" 21:15 Leka hai mimaika neno fauk anbi kot Kaisarea, hai miikab ma amnao meu kot Yerusalem. 21:16 Ma atoni apalsait sin fauk nok kai na'ko Kaisarea. Ma sin nok kai neu atoni mese kanan Nai Manason, atoni Siprus le anfani atoni apalsait suk a'lo, fun hai mimaika anbi in ume. 21:17 Leka hai mimte kot Yerusalem, bae knino sin ansenu kai nok amlilat. 21:18 Nokfa onane Nai Paulus nok kai amnao hem kiso Nai Yakobus; ma ale penatua sin amsa anbi nane. 21:19 Ma Nai Paulus anfen sin ale lasi le Uisneno anmoe nani natuin in neu to le kan tamaf nonot Yahudi. 21:20 Ma leka sin nen lasi nane te sin naliatas Uisneno ma nak neu Nai Paulus, "Bae, hom kiso, atoni Yahudi nifun-nifun le nekan nateb neu Yesus sin alsin anpanat Plenat Uisneno le anfe nani neu Nai Musa. 21:21 Ma sin nen nak ho munoina ale to Yahudi le namaika nok atoni uf bian he nafetin plenat Nai Musa, fun ho mak kais anheli sin anhin ma kais natuin hi halat. 21:22 Het moe onme ka? Fun sin nahinen nak ho aumen. 21:23 Es nane leko ho moe on i. Anmu'i atoni ha es i, le anmoe lasi manta'en nok Uisneno. 21:24 Ho mok sin he miknino hi aom ma ambaen sin he nati' sin an eu sin nakan funun. Ma sin alsin of nahin nak sa' le sin nen nane ka namneof. Fun ho mutuin ale plenat Nai Musa. 21:25 Mes ale atoni uf bian le kan tamaf nonot Yahudi mes nekan nateb neu Yesus, haim tui milali sulat neu sin ma mifek he nati' sin naskotun sin aon na'ko mnah fuat, na'ko na', na'ko sisi mu'it le ankil nison ma na'ko lasi mapaisa." 21:26 Ma nokfa Nai Paulus in nao nok atoni ha in nane ma sin naknino'ok, oke te sin taman neu Ume Uisneno he naton nak: Leka neno he naknino'ok namsopun ma es-es he neki in fua tulu. 21:27 Leka neno hitu namsopun te, ale atoni Yahudi le neman na'ko pah Asia sin nit Nai Paulus anbi Ume Uisneno. Oke te sin na'koke to nekan hen heke Nai Paulus, 21:28 ma anhunun nak, "Hoi atoni Israel, maen aim! Atoni i, le nanoina to ok-oke bi me-me he neki lasi suli neu hit to ma neu plenat Nai Musa ma neu bale i! Ma in nok atoni Yunani sin hen tam neu Ume Uisneno hen hainisi bale knino i!" 21:29 Fun afi sin nit Nai Trofimus atoni Efesus le nok Nai Paulus anbi kot, ma sin natenab, nak Nai Paulus nokan antam bi Ume Uisneno. 21:30 Ma slutuf matane bi kot nane, ma ale to nane neman ma anheke Nai Paulus oke te anhel napoitan na'ko Ume Uisneno ma sin an ek ale eno ok-oke. 21:31 Leka sin nami he namate Nai Paulus, hanaf natiabon neu solalus nakaf, nak slutuf matane es kot Yerusalem. 21:32 Onane te solalus nakaf nok ale solalus ma ale nakaf sin nao neu bale slutuf nane. Leka sin nit solalus nakaf ma ale solalus nane te, sin nasnas ma kan bison tenif Nai Paulus. 21:33 Mes solalus nakaf nane anhaumak Nai Paulus ma anheke ma anlelu hen futu neki kolen besi nua. Fun antoti nak, atoni i sekau, ma in anmoe lasi sa' ka. 21:34 Mes natuin to namfau bian anhunun nak on i, bian anhunun nak onane. Ma natuin slutuf matani, solalus nakaf ka nahinef lasi panan he sa'. Es nane in anlelu he neki Nai Paulus neu kot. 21:35 Leka sin nem ante elak le hen sae neu kot, solalus sin anloi Nai Paulus, fun to namfau ansai nem, 21:36 ma natuin sin ma anhunun nak, "Mineku mani nai!" 21:37 Leka sin nok Nai Paulus hen tam neu kot, in nak neu solalus nakaf nane nak, "Au upeni mainuan kle'o, he u'uab ok ko tua!" Solalus nakaf nak neune nak, "Ho mu'uab muhin a'at Yunani ka? 21:38 Ho ka atoni Mesir ka, le afi ho moe taisibu ma maen meki atoni abulalut nifun he neki bale manuat neu mnela paha snaen?" 21:39 Ma Nai Paulus natae nak, "Au atoni Yahudi kau u'ko Tarsus, kot makana bi pah Kilikia; au upeni leku mainuan he umolok neu ale atonin i." 21:40 Leka Nai Paulus napeni mainuan na'ko solalus nakaf, in nao ma anhake anbi elak nane ma napasa niman neu to. Ma leka to nane natena, Nai Paulus na'uab neki a'at Ibrani nak:
22:1 "Bae benu ala ki, ma au ama sin ok-oke, him nen nai, sa' le he uton ki, on lasi au he soi au aok." 22:2 Leka ale to sin nen Nai Paulus na'uab neki a'at Ibrani te sin natena ok-oke. Ma Nai Paulus na'uab nak, 22:3 "Au atoni Yahudi kau, nahonis kau bi Tarsus pah Kilikia, mes au u'nae bi kot Yerusalem, ma Nai Gamaliel nanoni kau nok alekot neu hit am uf sin plenat, talan te au fani atoni amakoet neu mepu Uisneno onle hi ala ki amsa bi leku i. 22:4 Ma au hamu'i ale atoni le natuin Lanan Uisneno talan te umate sin; au heke ale atoni ma bife ma utam neu o'of. 22:5 Ma Ana' Lasi Fuat nakaf anaet ma tolas amnasit nabe'i hen saksi lasi nane. Au simo sulat na'ko sin ma eki neu atoni Yahudi le anbi Damsyik. Ma natuin sulat nane au heke ale atoni le natuin Lanan Uisneno ma ok sin neu Yerusalem hen hukum sin. 22:6 Mes anbi lanan, leka au haumak kuan Damsyik neno namtetu, naskek onane te meusine naek na'ko neno tunan anpin funam natef kau. 22:7 Ma au bel eu nain ma au nen hanfes nak neu kau, "Saulus, Saulus, nansa' hom hamu'i kau ka?" 22:8 Ma au utae ak: Ho sekau ko, Usi? In nak: Au Yesus atoni Nazaret, le hom hamu'i nane. 22:9 Ma ale atoni le sin nok kau, sin nit pina' nane mes sin ka nenaf hanaf le na'uab nok kau. 22:10 Oke te au ak: Usif au he moe sa' ka? Ma Usif nak neu kau: Hom fen nai ma amnao nai neu kuan Damsyik. Ma anbi nane of an etun ko ale lasi le anlekan nani neu ko. 22:11 Fun au matak ka nitaf, natuin meusine nane in pinan, oke te au ini sin le anao nok kau sin na' au nimak ma antopu kau nao meu Damsyik. 22:12 Anbi kuan nane anmu'i atoni mese kanan Nai Ananias, le natuin Plenat Knino ma makana bi ale to Yahudi sin. 22:13 In nem anhake haumak kau ma nak: Saulus, au bae, hom fei ho matam ma amkiso nai! Ma bi leku nane amsa au it anfani ma au kiso in. 22:14 Oke te in nak: Hit am uf sin Uisneno anlek nalali ko he nati' ho muhin In lomin, ma he mit In Amneot ma he mutnin a'at le anpoi In fefan. 22:15 Fun ho mes amfani In saksi neu ale atoni antom lasi le ho mit ma hom nen mulali. 22:16 Ma leku i ho fe maim nekam neu sa' ka? Hom fen nai ma hom fe ho aom he naslani ko, ma hom toti neu Uisneno hen sako ho sanat sin. 22:17 Ma leka au fani eu kot Yerusalem, ma fe onen toti bi Ume Uisneno, Smanan Knino anhatane kau 22:18 ma au it Usi, le nak neu kau: Ampoi nai lab, ma musaitan kot Yerusalem fun of sin kan simof ho saksi antom kau. 22:19 Ma au utae: Usif, sin nahinen nak afi au es atam eu ale ume buat ma aheke sin le nekan nateb knino neu Ko ma utam sin neu o'of ma hamu'i sin nok. 22:20 Ma leka sin namate Ho saksi Nai Stefanus, au amsa bin, ma au lomi sin mo'et nane, ma au es a'pao atoni le namate in, sin bael pake. 22:21 Mes Usif nak neu kau: Hom nao nai, fun Au he sonu ko neu bale lo neu atoni bian le kan tamaf to Yahudi." 22:22 Ale to sin nen Nai Paulus na'uab ante a'at nane te, sin ala sin na'ba ma nak, "Mineku main atoni i na'ko pah pinan! In kan tamaf ota hen moni!" 22:23 Ma ale atoni sin na'ba piut ma antekal sin blua pake ma antekal afu skuku. 22:24 Es nane te solalus nakaf anlelu he neki Nai Paulus neu kot he nati' anpalekas in lasi ma anbiso, he napeni lasi sa' le in moe talan te to sin na'ba neun. 22:25 Leka sin anfutu Nai Paulus hen biso te, in nak neu solalus nakaf nane. "Nabe'i ka hen biso atoni Roma ka nok fa lef lasi ka?" 22:26 Ma leka solalus nakaf nane in nen lasi nane, in an etun nani neu nakaf anaet, ma nak, "Ho he moe sa' ka, fun atoni nane atoni Roma!" 22:27 Ma solalus nakaf anaet nane nem neu Nai Paulus ma nak, "Muton kau nai, namneo ho atoni Roma ka? Ma Nai Paulus natae, "Namneo." 22:28 Ma solalus nakaf anaet nane nak, "Au sos kanaf i eki upaf matani." Ma Nai Paulus nak, "Mes au mu'i hak natuin nahonis kau bi pah Roma." 22:29 Ma ale solalus le hen palekas Nai Paulus in lasi, sin naskotun. Ma solalus nakaf nane namtau, fun in lelu hen futu Nai Paulus le atoni Roma kun. 22:30 Mes solalus nakaf nane he nahin nok amneot, nak atoni Yahudi sin natam lasi sa' antom Nai Paulus. Es nane te nokfa onane anlelu he nunan Nai Paulus na'ko o'of ma anlelu, he nati' ale ana' lasi fuat nakaf ma ale tolas amnasit Yahudi sin nabuan. Oke te in nok Nai Paulus na'ko kot ma nahakeb nani bi sin matan.
23:1 Ma Nai Paulus ankiso neu Tolas amnasit sin ma na'uab nak, "Bae benu ala ki, tal neno i au fe moni nok nek muti anbi Uisneno In matan." 23:2 Leka Nai Paulus na'uab onane te, Nai Ananias ana' lasi fuat nakaf anaet anlelu atoni le anhake haumak Nai Paulus hen pas Nai Paulus fefan. 23:3 Mes Nai Paulus nak neu ana' lasi fuat nakaf nak, "Uisneno of anpas ko, le nek asafanut nak nekan knino! Hom tok ambi i he mufek au lasi natuin Plenat Knino, mes hom tanhai Plenat Knino ma amlelu hen pas kau." 23:4 Mes ale atoni le antoko nane sin nak Nai Paulus, "Ho musi'u Uisneno In ana' lasi fuat ka?" 23:5 Ma Nai Paulus nak, "Bae benu ala ki, au ka uhinef, nak in Ana' Lasi Fuat Nakaf anaet. Namneo, antui bi Sulat Knino nak: Kais mu'uab amle'ut neu ho to in nakaf!" 23:6 Ma fun in nahin nak ale atokos nane sin bian nonot Saduki ma bian nonot Farisi, es nane in naiti hanan neu Tolas Alef nane nak, "Bae benu ala ki, au atoni Farisi kau ma Farisi sin sufan kau. Hi mihakeb kau bi Tolas Alef abuat i, natuin au nekak nateb nak amates of anfen anfani." 23:7 Leka in namolok onane te atoni Farisi ma atoni Saduki nasulin ma anbatiok neu pukan nua. 23:8 Fun atoni Saduki sin nak, katit fa amates anfen anfani, ma katit fa ahake neno tunan ma katit fa smanaf; mes atoni Farisi sin nekan nateb ale lasi nane. 23:9 Natuin lasi nane te sin anmatoen. Ma atoni Farisi sin fauk le nahin Plenat Knino sin anfen ma nak, "Hai ka mipeni fa sanat sa' bi atoni i! Oni anmu'i smanaf ai ahake neno tunan es na'uab neune." 23:10 Ma matoes naek, tal solalus nakaf namtau kalu-kalu sin hen pisu nis Nai Paulus. Es nane in anlelu solalus sin hen topu Nai Paulus na'ko sin atnanan ma nokan neu kot. 23:11 Ma anbi fai nane Usif Yesus nem ma anhake bi Nai Paulus aonbian ma nak neune, "Mumepan ho nekam nai, fun on afi hom saksi Au kanak anbi kot Yerusalem, onane amsa hom nao nai ma amsaksi mani bi pah Roma." 23:12 Ma nokfa onane te atoni Yahudi sin nabuan ma naiti supat neu sin aon, nak of sin ka nah ma ka ninun fa, kalu sin fe ka namate fa Nai Paulus. 23:13 Ma sin abuat nane oni nesi na'ko atoni bo'ha. 23:14 Ma sin nao neu ale ana' fuat nakaf sin ma ale amnasit to Yahudi sin ma nak, "Hai maiti milali supat neu hai aom, of hai ka miah ma ka minu fa leka hai fe ka mimate fa Nai Paulus. 23:15 Onane te hi mok tolas amnasit amnao meu solalus nakaf he neki Nai Paulus neu ki ma on hi he miknutu amteni in lasi; ma hai ampao mani he mimate, leka fe ka neman tian ki." 23:16 Mes Nai Paulus moen feuf le in fetof anah, nen lasi amle'ut nane. In nao neu kot, ma leka in napehi mainuan hen tam, oke te in natonan Nai Paulus. 23:17 Oke te Nai Paulus anboin solalus mese ma nak neune, "Ho mok anah i neu solalus nakaf fun in he naton lasi sa' es neun." 23:18 Ma solalus nane in nok anah nane neu solalus nakaf ma nak, "Nai Paulus atoni hukum nane, anboin kau ma antoti, he au ok anah i nem neu ko, fun in he naton ko lasi es." 23:19 Ma solalus nakaf antopu anah nane niman ma nao anhake na'tet ok ma natan anah nane nak, "Ho he muton kau lasi sa' ka?" 23:20 Ma anah nane nak, "Atoni Yahudi sin anmanlekan nalali, he nati' sin antoti ko, he nati' noka ho mok Nai Paulus neu tolas amnasit sin, he nati' anpalekas anteni in lasi. 23:21 Mes kais hom nen sin tua, fun sin atoni bo'ha ma nesi naloitan nalali he namate Nai Paulus. Fun sin naiti supat ma anle'at sin aon, of sin ka nah ma ka ninu fa talan te sin namate Nai Paulus. Ma tomas i sin pao nanin, al natnin neu ho fekat." 23:22 Ma solalus nakaf nane anlelu anah nane hen fani, ma anba'an nak, "Ka nabe'i hem etun lasi i neu es am es, mak hom eut mulali kau lasi nane." 23:23 Nalali te solalus nakaf anaet anboin solalus nakaf nua ma nak neu sin, "Milotan nai solalus natun nua ma asae bikase bo'hitu ma amneki auni natun nua he nati' leku sio fai i sin naon neu Kaisarea. 23:24 Ma miloitan amsa bikase sae neu Nai Paulus he nati' mokan nok aomina neu ama Kumlol Nai Feliks." 23:25 Ma in antui sulat le hanan nak on i, 23:26 "Neu ama Kumlol Nai Feliks makana. Nai Klaudius Lisias ansonu han senut alekot. 23:27 Atoni Yahudi sin anheke atoni i, ma leka sin he namate, au ok solalus sin aim misik ma mifetin mani, fun au nen, nak in atoni Roma. 23:28 Fun au lomi he uhin, sin nasanab in natuin lasi sa', es nane au eki neu sin Tolas Alef buat amnasit. 23:29 Mes au uhin, sin nasanab atoni i natuin sin Plenat Knino, ma kan mu'if lasi le he namate ai he natam neu o'of. 23:30 Au upeni hanaf, nak anmu'i atoni le anmalomis he namate atoni i. Es nane au lelu he nokan laba neu ama kumlol. Ma neu ale atoni le hen moe lasi nokan, au ak sin, he nati' sin natam lasi nane neu ama." 23:31 Oke te ale solalus sin natuin plenat ma sin nok Nai Paulus bi fai nane neu Antipatris. 23:32 Ma nokfa onane te sin namautu ale atoni asae bikase he nok Nai Paulus anaon finin ma sin anfani anmes, neu kot. 23:33 Leka sin nem ante Kaisarea, asae bikase nane sin nanona sulat neu ama kumlol ma nana'at Nai Paulus nok. 23:34 Ma leka ama kumlol anso'i nalali sulat nane, in natan Nai Paulus, neu in na'ko pah me. Ma leka in nen, nak Nai Paulus na'ko Kilikia, 23:35 in nak, "Of au palekas ho lasi, leka ale atoni le natam lasi neu ko sin neman." Oke te in lelu hen pao Nai Paulus anbi Nai Herodes in sonaf.
24:1 Fun neno nim anfini te, Ana' Lasi Fuat Anaet Nai Ananias nok ale amnasit to Yahudi sin ma atoni malasi mese kanan Nai Tertulus. Ma sin antam neu ama kumlol ma natiaba sin lasi antom Nai Paulus. 24:2 Leka anboin Nai Paulus ma anhake, Nai Tertulus natam lasi antom Nai Paulus ma nak, "Ama Feliks makana, natuin ho mo'et, hai mipeni alekot piut, ma natuin ho hinem, anmu'i lasi alekot namfau le natiabon neu hai to. 24:3 Ale lasi nane haim simo anbi me-me nok nek amlilat. 24:4 Mes he nati' kais atbaken ama ho leku mainuan, au toti he nati' ama hom nen hai uab tuk-tuka i nok nek asimot alekot. 24:5 Hai mipeni atoni i onle men le'u, le anmoe slutuf neu atoni Yahudi bi pah alekot, ma anfani ahel lanan neu atoni Nasrani. 24:6 Ma in anhainisi Ume Uisneno. Es nane haim heke he nati' mifek mani natuin hai Plenat Knino. 24:7 Mes Nai Lisias solalus nakaf anaet nem ma nasik nani nok aseke na'ko hai nimam, 24:8 ma anlelu ale atoni le natam lasi he nem neu ama kumlol. Ma leka ama kumlol anpalekas in lasi of muhin ale lasi le hai mitam mani antom in." 24:9 Ma ale atoni Yahudi sin lut lasi nane ma nak, namneo onane. 24:10 Ma ama kumlol anfe mainuan neu Nai Paulus he nati' in namolok. Ma Nai Paulus nak, "Fun au uhin, ama hom fani alef lasi bi pah i ton namfau. Es nane nok nek amlilat au eki lasi i neu ama matan. 24:11 Ma ama ho mutenab muhin, mak afi ai neno bo'es am nua afinit, au nao eu Yerusalem he onen toti. 24:12 Ma sin ka napeni kau fa he matoe ok es ai mo'e slutuf, bi Ume Uisneno ai bi ume buat, ai anbi bale bian anbi kot nane. 24:13 Ma sin ka neki fa lasi panan he sa' le antom neu kau. 24:14 Mes au uton neu ama, nak au tuthae hai am uf sin Uisneno ma utuin Lalan Uisneno le sin antek nak Lalan ka amneot. Au nekak nateb neu ale lasi le antui nani bi Nai Musa ma mafefa knino sin sulat. 24:15 Au mu'i afnekan neu Uisneno, onle sin amsa, nak ale amates of anfen anfani, atoni amneot ma atoni asanat. 24:16 Es nane au ami he nati' au moni nok nek aknino bi Uisneno ma mansian sin matan. 24:17 Ma anbi ton fauk-fauk leka au fain aum eu kot Yerusalem he eki amnaut neu au to ma eki fua tnatas nok. 24:18 Leka au fe unaob ale lasi nane sin, atoni Yahudi sin neman na'ko pah Asia napeni kau bi Ume Uisneno, leka au uknino ulali au aok; kan mu'if atoni namfau ma katit fa matoes bi bale nane. 24:19 Ma sin atoni Yahudi fauk le neman na'ko Asia sin mes he neman neu ama anbi i ma natam lasi sa' le sin napeni antom kau. 24:20 Ai sin alsin le antoko anbi i so sin naton lasi amle'ut sa' le sin napeni anbi kau, leka au hake bi Tolas Alif amnasit sin matan. 24:21 Ai al antom uab fefa mese le au u'uab ani, leka au hake bi sin atnanan ak: Natuin au uteb lasi ale atoni amates anfen anfani, neno i sin nahakeb kau anbi hi matam." 24:22 Mes Nai Feliks le nahin lek-leko antom Lalan Uisneno, in naboni lasi nane ma nak, "Leka solalus nakaf anaet Nai Lisias neman te, of au ufek ho lasi!" 24:23 Ma in anlelu solalus nakaf hen pao Nai Paulus, mes in napeni manuan, ma kais nakain in ini sin he neman kiso Nai Paulus. 24:24 Leka neno fauk onane te Nai Feliks nok in fenai bi Drusila, bife Yahudi, anlelu hen boin Nai Paulus, ma sin he nen antom lasi palsait neu Yesus Neno Anan. 24:25 Mes leka Nai Paulus na'uab antom lasi amneot ma lasi naplenat aon ma antom neno lef lasi amnemat, Nai Feliks namtau ma nak, "Namaut nai, ma hom nao nai, leka au mu'i sona, of au lelu hen boin ko." 24:26 Fun anbi nane Nai Feliks nafneka, he napeni noni na'ko Nai Paulus. Es nane te fe fe'at in anboin Nai Paulus he namolok nokan. 24:27 Mes leka ton nua namsopun, Nai Perkius Festus anseka Nai Feliks. Ma natuin Nai Feliks hen halin atoni Yahudi sin nekan, in namautu Nai Paulus nabala bi o'of.
25:1 Leka Nai Festus nem ante pah nane neno tenu, in nao na'ko Kaisarea neu Yerusalem. 25:2 Ma ale ana' lasi fuat nakaf ma ale atoni Yahudi makana sin nem neu Nai Festus he natam lasi antom Nai Paulus. 25:3 Ma sin antoti he nati' in moe alekot neu sin le neki amle'ut neu Nai Paulus; esle' hen lelu Nai Paulus nem neu Yerusalem. Fun sin malomis nalali he namate Nai Paulus bi lanan atnanan. 25:4 Fun Nai Festus natae nak: Sin anpao Nai Paulus es Kaisarea ma au amsa he fani laba eu Kaisarea. 25:5 Ma in nak, "Es nane ale atoni makana, hi mok kau meu Kaisarea ma mitam lasi neu in, kalu namneo in nasanab." 25:6 Leka Nai Festus namaika bi Yerusalem neno fanu ai neno bo'es oke te in anfani neu Kaisarea. Ma nokfa onane te in anmoe tolas lef lasi, ma anlelu Nai Paulus anhake bi in matan. 25:7 Leka Nai Paulus nem ante, ale atoni Yahudi le neman na'ko Yerusalem anhake natef nan, ma natam lasi namfau ma mafena mes ale lasi nane ka ma u'fa. 25:8 Mes Nai Paulus ansaksi in lasi amneot ma nak, "Au ka usanab fa neu atoni Yahudi sin Plenat Knino, ai neu Ume Uisneno, ai neu Kesel pah Roma." 25:9 Mes Nai Festus he neka mina atoni Yahudi sin, in natae Nai Paulus ma nak, "Hom lomi ka hem nao meu Yerusalem he nafek lasi i anbi au matak?" 25:10 Mes Nai Paulus natae nak, "Au hake es i bi toko alef lasi Kesel Roma in matan ma anbi bale nane mes nafek au lasi. Fun ama ho muhin namneo, au ka usanab fa neu atoni Yahudi. 25:11 Bait au usanab namneo ai au moe lasi amle'ut sa' le natai nok he namate kau, au lomi he mate. Mes, kalu lasi le sin natam nalali antom kau ka namneo fa, ka nabe'i es he nana'at kau on lasi he neka mina sin. Au toti he hake bi Kesel matan!" 25:12 Leka anmalomis nok ale aof alef lasi te Nai Festus natae nak, "Fun hom lomi hem hake bi Kesel matan, of hom nao nai neu Kesel!" 25:13 Ma neno fauk onane te Kesel Nai Agripa nok bi Bernike neman neu Kaisarea hen kiso Nai Festus. 25:14 Fun sin namaika neno fauk anbi nane, Nai Festus natiaba Nai Paulus in lasi neu usif nane nak: "Anmu'i atoni hukum mese es i le Nai Feliks nasaitan nani bi neno in a'nao. 25:15 Leka au fe bi kot Yerusalem, ale ana' lasi fuat nakaf ma ale amnasit to Yahudi sin natam lasi antom atoni nane ma antoti kau he ufek in lasi. 25:16 Mes au utae sin ak, atoni pah Roma ka nabe'i fa he nana'at atoni amoe sanat onle he neka mina sin. So in mabaina nok ale atoni le anmoe lasi nokan he nati' in napeni mainuan hen saksi in aon antom lasi nane. 25:17 Es nane sin nok kai mahai aim neu balek i. Ma nokfa onane au moe tolas lef lasi ma au boin atoni nane hem tam nem. 25:18 Mes leka ale atoni le natam lasi anhake natef nan in, sin ka natam fa antom mo'et amle'ut onle au utenab bi au nekak. 25:19 Mes al sin nasulin nokan antom sin lasi knino, ma antom atoni mese kanan Nai Yesus, le anmaten, mes Nai Paulus nak In anmoni. 25:20 Fun au nekak anmafen neu he ufek lasi humaf i onme. Ma au utan, ai hom lomi hem nao meu Yerusalem he nafek ho lasi anbin. 25:21 Mes Nai Paulus antoti he nabala bi o'of, talan te Kesel nafek in lasi. Es nane anlelu hen pao bi o'of tal au sonu neu Kesel." 25:22 Ma Nai Agripa natae Nai Festus nak, "Au amsa lomi he nen atoni nane." Mai Nai Festus natae nak, "Noka, of hom nen mani tua." 25:23 Nokfa onane Nai Agripa ma bi Bernike sin koenok neman nok bael pake amasat. Ma sin antam bi ke'an alef lasi nok ale solalus nakaf anaet ma ale atoni makana bi kot nane. Nai Festus naplenat he nati' Nai Paulus antam nem. 25:24 Ma Nai Festus na'uab nak, "Kesel Nai Agripa ma ale sin ama le him tok mibua mok kai ambi i. Hit mit atoni i, le atoni Yahudi sin, anbi Yerusalem ma anbi kot i sin natam lasi neun. Ma sin nem neu kau ma anhunun nak: Atoni i ka nabe'i fa hen moni. 25:25 Mes au upeni atoni i kan mo'ef lasi amle'ut sa' le he namate ma in anlomi hen hake bi Kesel matan. Es nane au ufek he nati' au sonu neu Kesel. 25:26 Mes au fe' ka upeni fa lasi sa' antom in le au he tui ani neu Kesel. Natuin lasi nane au uhakeb ani anbi i neu ki ala ki nes-nesi Kesel Nai Agripa, he nati' leka hit palekas talali, au upeni lasi he tui ani neu uiskesel. 25:27 Fun au utenab ak, ka nalekof, kalu hit sonu atoni o'of ma ka taton fa lasi amle'ut le in anmoe nani."
26:1 Ma Nai Agripa na'uab neu Nai Paulus nak, "Ho mupeni mainuan hem saksi ho lasi." Onane te Nai Paulus na'aiti in niman ma ansaksi in lasi nak, 26:2 "Kesel Nai Agripa, au upeni au uak fun neno i au upeni manuan he uhoeb au lasi anbi ho matam, neu ale lasi le atoni Yahudi sin nasub nani neu kau. 26:3 Nes-nesi natuin ho muhin namneo-namneo ale atoni Yahudi sin halat ma sin mo'et. Es nane au toti ko he nati hom nen kau nok nek seusabat. 26:4 Ale atoni Yahudi sin nahin au monik na'ko fe au munif kau, le afi au moni bi au to sin bi kot Yerusalem. 26:5 Ma sin nahin kau, ma kalu sin anlomi, leko sin ansaksi nak afi au moni on atoni Farisi le natuin hai Plenat Knino nok alekot. 26:6 Ma neno i au hake bi alef lasi sin matan natuin au uteb ani Uisneno In lasi manta'en, nok hai am uf sin. 26:7 Ma ale hai uf bo'es am nua ampao mani ma minaoba mani fai manas nok nek atahas. Ma natuin au uteb lasi nane, Kesel Nai Agripa, atoni Yahudi sin nasub kau sanat. 26:8 Nansa' hi ka miteb mak, Uisneno nafena amates? 26:9 Maski onme amsa, au utenab, ak he tite nok matani kanaf, Yesus na'ko Nazaret. 26:10 Lasi nane au moe amsa bi kot Yerusalem. Ma ka al fa utam atoni knino namfau bi o'of, leka au simo kuasat na'ko ana' lasi fuat, mes au lomi amsa leka he namate sin. 26:11 Ma au hamu'i sin anbi ume buat, ma useke sin he natotan nekan ateb knino. Fun au nekak anmaput ma u'to' talan te au li'u sin na'ko ale kot bian amsa." 26:12 Ma anbi lasi nane, leka au upeni kuasat ma mepu na'ko ana' lasi fuat sin anbi lanan nao neu Damsyik, 26:13 naskek onane, Kesel Agripa, oni manas namtetu au it meusine mese le in pinan nesi na'ko manas, ansanu nem na'ko neno tunan ma anaum nan kau ok au ini sin le anao nok kau. 26:14 Ma haim bel meu nain, oket au nen hanfes nak neu kau neki a'at Ibrani nak: Saulus, Saulus, nansa' hom hamu'i kau? Susal neu ko, leka ho mutik besi pan aikan. 26:15 Mes au utae ak: Ho sekau Ko, Usif? Ma Usif natae nak: Au Yesus Kau, le hom hamu'i. 26:16 Mes hom fen nai ma amhake nai. Fun Au ulilok eu ko, he lek ko, amfani atuthaes ma saksi neu ale lasi le ho mit na'ko Kau ma antom ale sa' le Au he ulile neu ko. 26:17 Of Au beti aikan ko mu'ko Yahudi ma mu'ko ale to le kan tam neu to Yahudi. Ma of Au sonu ko neu sin, 26:18 he nati' hom fei sin matan he nate'unok na'ko mesokan neu meusine ma na'ko kuasat Nitu neu Uisneno, he nati' nekan nateb neu Kau ma napeni sako sanat ma ansimo bael tulu le Uisneno naloitan nani neu ale atoni knino sin. 26:19 Es nane, Kesel Nai Agripa, au ka upehen itaf mnitas le na'ko neno tunan. 26:20 Mes au etun uhunun lasi nane neu atoni Yahudi bi kuan Damsyik bi kot Yerusalem ma neu pah Yudea ok-oke. Ma neu atoni bian amsa, he nati' sin nate'unok ma anfani neu Uisneno ma nanaob ale mepu namnono nok te'un nekaf nane. 26:21 Ma natuin lasi nane, atoni Yahudi sin anheke kau bi Ume Uisneno ma he namate kau. 26:22 Mes natuin Uisneno anbab kau talan te neno i, au fe moni ma ahake he saksi neu abaut ma anaet nok. Ma sa' le au saksi nane ka naik fa na'ko sa' le afi mafefa knino ma Nai Musa an etun nani, 26:23 esle', Neno Anan mes ansutai mane'at ma In anfani ahunut le anfen anfani na'ko amates, ma an etun meusine neu to Yahudi ma neu to bian amsa. 26:24 Leka Nai Paulus ansaksi lasi antom in mepu te Nai Festus na'uab nok hanan naek nak, "Hom nek maun, Paulus! Ho lasi hine nane anmoe ko tal mumaun." 26:25 Mes Nai Paulus nak, "Au ka nek maunu fa, Kesel Festus makana! Au u'uab nok amneot ma nok nek ahinet! 26:26 Kesel Nai Agripa amsa nahin ale lasi nane, es nane nabe'i au u'uab anbi Usif matan nok amneot. Fun katit fa lasi mese na'ko lasi nane le Usif ka nahinef, fun ale lasi nane kan bol fa tolo'-tolo'. 26:27 Ati Kesel Nai Agripa ho nekam nateb neu mafefa knino sin ka? Au uhin, nak ho nekam nateb neu sin." 26:28 Mes Nai Agripa natae nak, "Ala kle'o te hom fuli man kau he fani atoni Slani!" 26:29 Ma Nai Paulus nak, "Au he toti neu Uisneno, he nati' anbi leku tuka ai anbi neno suk a'lo, ka al fa am usif mes hi ala ki le amnen au molok i, amfani onle au, mes ka nok fa kolen besi i." 26:30 Oke te am uiskesel ma ama kumlol ma bi Bernike ma alsin abit nane, sin anfenan. 26:31 Leka sin ante mone, sin na'uaben es nok es nak, "Atoni i ka nasanab fa sa' le he namate in ai he natam neu o'of." 26:32 Ma Nai Agripa nak neu Nai Festus, "Nabe'i he nafetin atoni i, kalu in kan totif hen nao neu Kesel."
27:1 Leka nafek nalali nak hai hem sae bnao meu Italia, sin nana'at Nai Paulus nok atoni hukum bian neu solalus nakaf Nai Yulius le Kesel in solalus sin. 27:2 Ma haim sae bnao na'ko Adramitium le he nao neu bale-bale bi tasi ninen pah Asia, oke te haim nao. Ma Nai Aristarkhus atoni Makedonia na'ko Tesalonika in nao nok kai. 27:3 Ma nokfa onane te haim te Sidon. Ma Nai Yulius anmoe alekot neu Nai Paulus ma anfen mainuan he naon kiso in ini sin ma naloitan sin. 27:4 Fun anin anfu na'ko matan haim nao mitun tasi ninen Siprus. 27:5 Ma hai mituin tasi le anmabaina nok Kilikia ma Pamfilia, oke te hai mimte Mira pah Likia. 27:6 Ma anbi nane solalus nakaf napeni bnao na'ko Alesandria le he nao neu Italia. Oke te in natnanib kai neu bnao nane. 27:7 Ma anbi neno fauk hai bnao nane in nao an ana nok susal haim haumak Knidus. Fun anin ka nalekof, hai mituin tasi ninen Kreta ma Amfinin Salmone. 27:8 Ma hai bnao nok susal anfinin Tasi Si'uf nane oke te hai mimte bale mese kanan Bale Amasat, anhaumak kot Lasea. 27:9 Onane te neno namfau namneku luman ma neno nanahok amsa anfini ma hai bnao he nao piut amsa of misusbom. Es nane te Nai Paulus anfainek sin nak, 27:10 "Bae benu, ala ki, au kisot hit bnao of nalukib kit, ka al fa bale' ma bnao mes hit monik amsa." 27:11 Mes solalus nakaf nane in natnin nesi neu ana' bnao ma bnao tuaf na'ko Nai Paulus in fainekat. 27:12 Fun bale nane ka nalekof neu bnao hen hake bi neno mainikin ai bi oe tene, es nane atoni bian sin lomi he bnao nane nao anfin neu kot Feniks hen hake bi nane tal neno mainikin anfini. Fun kot Feniks nane bale alekot ma manuan neu pah Kreta le anmatom nok neno tesan he nua bian am bian. 27:13 Ma naskek onane ani fu' anfu na'ko neno Li', bnao tuaf sin natenab nak of sin salit nane natiabon. Ma sin anhel bnao in bonit he nao anhaumak tasi ninen pah Kreta. 27:14 Ma ka lo fa onane te anin slutuf ansanu na'ko pah nane le antek nak, "Anin Tasi Slutuf." 27:15 Le anfu bnao nane ma bnao ka nao mat antenif. Es nane hai mifetin ma ka moki fa bnao maut he anin anfu. 27:16 Nalali te hai bnao ante tasi ninen pul ana es kanan Kauda ma haim hel abelo' nok susal hen tam neu bnao. 27:17 Ma leka haim hel misaeb belo' neu bnao tunan sin naloitan ale sa' leko-leko ma anpun bnao nane neki tani hen hatane bnao. Ma natuin namtau neu bnao nane he natanbon neu snaen Sirtis, sin nasanut ale muti pes anin he nati' bnao nane natboe kun. 27:18 Fun anin slutuf anfoe piut, nokfa onane sin antokal ale bale' neu tasi nanan. 27:19 Ma neno tenu namuni te bnao tuafin sin anpolin natam ale bnao in besin neu tasi neki sin niman kun. 27:20 Ma bi neno fauk katit fa manas, katit fa afkun mese ma anin slutuf anfu kai piut, onane te hai nek tenab le he moni kan mu'if. 27:21 Fun neno fauk sin ka nahan fa, es nane Nai Paulus anhake ma na'uab neu sin nak, "Bae benu ala ki, bait afi hi mituin au fainekat ma hit bnao ka naof na'ko pah Kreta oni hit ka tapeni fa susal ma kat lukif ba'u i. 27:22 Mes anbi lasi i au fainek ki he nati' kais hi mi'unu hi nekam, fun es anbi ki of ka namle'u fa, so al bnao i of namle'u kun. 27:23 Fun fai i ahake neno tunan mese na'ko Uisneno le au tuthae on au Uisneno nem ma anhake anbi au aok bian, 27:24 ma nak: Paulus kais mumtau! Ho mes amnao neu uiskesel; ma natuin halinat Uisneno, ale atoni le nok ko anbi bnao i of napeni aomina natuin ho. 27:25 Es nane him hatane hi nekam nai! Fun au nekak nateb neu Uisneno, nak ale sa' lof anbol onle nalile neu kau. 27:26 Mes hit abnao of natanbon bi tasi ninen bi pah es." 27:27 Leka ante neno bo'es am ha, hai bnao fe natboe bi tasi Adria. Mes oni fai nanesab te ale ameput bi bnao sin natenab nak anhaumak pah meto. 27:28 Es nane sin anpolin fatu su' tasi ma sin napeni oe su' tasi nane in mnanun nehe bo'nua. Ma kle'o es anten sin ansu' ma napeni nehe bo'es am nim. 27:29 Ma natuin sin namtau, nak hai bnao he natanbon neu fatu putun, es nane sin nasanut bonit ha bi bnao kotin ma hai mifnekan hen meu laba. 27:30 Mes ale ameput sin bi bnao sin nami he naenan na'ko bnao. Ma sin nasanut belo' ma ana'safanu on he nasanut bonit antom bnao matan. 27:31 Es nane Nai Paulus na'uab neu solalus nakaf ma neu in solalus sin nak, "Kalu sin ka nabala fa anbi bnao, of hi ka monif." 27:32 Oke te solalus sin anlefi nafek belo' in tani ma namautu hen mofu neu tasi. 27:33 Ma leka neno hen meu te, Nai Paulus anhok sin hen bukae, ma nak, "Neno bo'es am ha him pao, kam bukae mitaf. 27:34 Es nane au toti, he nati' him bukae fe. Fun lasi nane hen hatane ki. Fun katitaf es anbi ki le nakfunu nono mese he namle'u." 27:35 Leka namolok onane te Nai Paulus naiti u'tunu ma natulu nekan neu Uisneno bi sin matan, oke te an ebi ma anbukae. 27:36 Ma sin alsin nekan anmalim ma sin amsa anbukae. 27:37 Ma hai abit bnao nane, smanaf natun nua bo'hitu am ne. 27:38 Ma leka sin anbukae ma namsen, sin anpolin aen kase neu tasi hen ha'naf bnao nane. 27:39 Ma leka neno anmeu anfin sin nit bale mese anbi tasi ninen, sin ka nahin fa bale nane mes sin natenab nak na'alib bnao neu bale nane. 27:40 Ma sin leif nafek ale tain bonit hen mofun neu tasi. Oke te sin nanone ale hau sepo sin tani ma nasaeb muti pes anin antom bnao matan he nati' anin anfu bnao nane neu tasi ninen. 27:41 Mes natuin bnao nane natanbon neu tutnae snaen, oke te bnao nane anhake. Ma bnao matan antam anfin neu snaen ma ka na'aunon fa, mes tasi oki antepo naklati bnao nane kotin. 27:42 Oke te ale solalus sin ansali he namate ale atoni o'of sin he nati' es kais anlo'e ma naen kun. 27:43 Mes solalus nakaf nane anlomi he nahoni Nai Paulus. Es nane in nakain sin salit nane ma anlelu sin he nati' sekau nalo'e nahin te, in antam nahun neu tasi ma ansae neu meto. 27:44 Ma bian sin ansae neu bena ai bnao in pisan, nalali te sin alsin ansae oke neu meto nok aomina.
28:1 Leka hai ala kai amte meto nok aomina, ma hai mihin, pah nane pah Malta. 28:2 Ma ale atoni le natua anbi pah nane sin ansimo kai nok nek athoes. Fun sin nahopi ai mata' naek es neu kai, natuin ulan ansanu ma mainikin nok. 28:3 Leka Nai Paulus naiti hau klibu hen tao neu ai te, natuin ai malala, kaun es anpoi ma ansau in niman. 28:4 Leka ale atoni sin nit kauna nane nakfilion bi Nai Paulus niman te, sin na'uaben es nok es nak, "Atoni i oni atoni abulalut, fun nahoni nani na'ko tasi, Uisneno Amneot kan paleob nani fa hen moni." 28:5 Mes Nai Paulus anlisin natam kauna nane neu ai, ma in ka naben fa menas. 28:6 Mes sin natenab nak, in niman of anfu'un ai anmu'an ma kle'o es of anmate. Leka sin anpao suk a'lo ma sin nit nak katit fa sa' anbol neun, sin natenab anfan nak Nai Paulus oni uisneno. 28:7 Fun anhaumak bale nane ama kumlol in afu esan. Kumlol nane kanan Nai Publius In ansimo kai on in ini nok nek atfeis neno tenu. 28:8 Ma bi neno nane Nai Publius in amaf antup, natuin mainin ma an hoenon na'. Es nane Nai Paulus antam neu in ke'an ma anonen toti ma na'aiti niman neun oke te in naleko'. 28:9 Ma natuin lasi nane ale amenat na'ko pah nane sin neman ma Nai Paulus naleko' sin amsa. 28:10 Ma sin alsin antola kai, ma leka hai hem nao te, sin naloitan ale sa' neu hai lanan. 28:11 Ma funan tenu namuni te haim sae meu bnao le na'ko Aleksandria ma anhake bi pah Malta bi neno mainikin anaek. Ma bnao nane anpake malak "Dioskuri", (le'u mahuma ankuan Nai Kastor ma Nai Poluks). 28:12 Ma haim nao mituin Sirakusa ma mimaika ambi nane neno tenu. 28:13 Oke te haim sae bnao ma amnao mituin tasi ninen ma amte Regium. Ma nokfa anin na'ko neno Li' anfu hai bnao oket neno nua hai mimte Putioli. 28:14 Ma anbi nane hai mi'eku mok bae knino sin, ma sin anhok kai oke te hai mimaika mok sin neno hitu. Nalali te haim nao amteni meu Roma. 28:15 Ma bae knino sin anbi Roma leka sin nen neu kai, sin nem ma ansenu kai bi Masa' Apius ma ume Snasat Tenu. Leka Nai Paulus nit sin, in anonen toti natulu nekan neu Uisneno hen hatane sin nekan. 28:16 Leka hai mimte Roma, Nai Paulus napeni manuan he namaika anbi in ume nok solalus mese hen pao. 28:17 Ma neno tenu namuni, Nai Paulus anboin ale atoni Yahudi makana bi bale nane. Ma leka sin nabuan, Nai Paulus namolok nok sin ma nak, "Bae benu ala ki, au ka mo'ef sanat sa' neu hit to ai neu hit am uf sin halat, sin anheke kau bi Yerusalem ma nana'at kau neu atoni Roma. 28:18 Mes leka sin antae au lasi, sin lomi he nafetin kau, fun sin ka napeni fa au sanat le he namate kau. 28:19 Mes natuin atoni Yahudi sin antite fekat nane, es nane au aum eu Uiskesel, mes ka nok fa salit he utam lasi neu au to. 28:20 Es nane au toti, he nati' au kiso ki ma umolok ok ki fun natuin to Israel in afnekat anfutu kau neki kolen besi i." 28:21 Mes sin nak neu Nai Paulus, "Hai kam simof sulat na'ko hit bae knino sin bi pah Yudea antom ko ma katit fa esle' he naton kai lasi amle'ut antom ko. 28:22 Es nane haim lomi hem nen na'ko ko, ho mutenab onane, fun hai mihin, mak nonot i sin antite ho lasi noina anbi me-me." 28:23 Oke te sin manlekan neno neu Nai Paulus, ma leka neno manlekan ante sin neman neu Nai Paulus in ume. Ma Nai Paulus namolok ansaksi Plenat Uisneno neu sin, na'ko nok-noka tal neno anmabe. In na'uab neki a'an Plenat Uisneno le matui anbi Nai Musa in sulat ma mafefa knino sin sulat. Ma in anlomi he nati' sin nekan nateb neu Yesus. 28:24 Ma bian sin nekan nateb neu ale sa' le Nai Paulus na'uab, mes bian sin nekan ka nateb nani fa. 28:25 Oke te sin nasano natuin sin uab nane ka nae'ku fa es nok es. Mes Nai Paulus na'uab anteni fefa mese nak, "Namneo, a'at le Smanan Knino natiab nani neu hit am uf sin neki Mafefa Knino Nai Yesaya natiabon kun le in hanan nak: 28:26 Hom nao nai neu to i, ma mu'uab mak: Of him nen ma nitnin, mes ka mihinef, of him kiso piut, mes ka mitaf. 28:27 Fun to i in nekan anmafaub, ma sin luken nen mes anmafen, ma sin matan nane nabil; he nati' kais sin nit neki sin matan ma nen neki sin luken ma nahin neki sin nekan, oket nali'on anfani he au uleko sin. 28:28 Es nane te hi mes mihin, nak tetus le na'ko Uisneno i anfe nani neu ale uf bian le kan tamaf nonot Yahudi ma of sin nen." 28:29 Ma leka Nai Paulus na'uab nalali te, ale atoni Yahudi sin naon mes nasulin es nok es. 28:30 Ma Nai Paulus namaika ton nua anbi ume le in anseb, ma in ansimo ale atoni le nem neun. 28:31 Ma an etun Plenat Uisneno ma nanoina sin antom Usif Yesus Neno Anan ka nok fa tu'as ekat sa'.
1:1 Neu bae knino alki anbi Roma, le Uisneno a'nek ki ma anboin ki hem fani In to knino. Na'ko Nai Paulus, Neno Anan Yesus, In ate, le anboin hen fani haef ma naknino nani neu hen etun Uisneno In Beno Alekot. 1:2 Beno Alekot nane Uisneno anba'an nani anbi neon unu natuin In Mafefa Knino sin anbi sulat knino. 1:3 Beno Alekot nane antom In Anmone, le natuin nesaf pah pinan nahonis In na'ko Nai Daud in sufan. 1:4 Mes natuin mepu Smanan Knino, anlek nan In on Uisneno Anmone. Lasi nane natonon nok kuasat matane natuin In fen anfani na'ko amates. 1:5 Natuin In, haim simo halinat ma mepu haef knino hem topu ale uf, he nati' nekan nateb knino ma natuin In kanan. 1:6 Fun anbi sin hi amsa le ambi pah Roma; anboin ki hem fani Yesus Neno Anan In ini. 1:7 Es nane te, au tui ki sulat i bae benu alki. So tetus ma halan nekaf na'ko Uisneno, hit Ama, ma na'ko Usif Yesus Neno Anan nok ki alki. 1:8 Nahun-hunu au utulu nekak neu Uisneno antom ki natuin Yesus Neno Anan; fun pah pinan funam natef sin nen, nak hi nekam nateb knino namneo neu Neno Anan. 1:9 Au umnau ki piut anbi onen totis. Uisneno anfani saksi, nak sa' le au u'uab i namneo. In kun Uisneno le au tuthae eki au nekak oke, he etun In Anmone In Beno Alekot. 1:10 Au onen toti, he nati' Uisneno anlomi, oke te au upeni manuan he eti kiso ki. 1:11 Au lomi he it ki, he nati' au bati sankolan Smanan Knino, hen hatain ki. 1:12 Au salit natuin hit alkit nekak nateb neu Yesus Neno Anan, oket him mahatanen tuk nam tuk. 1:13 Bae benu alki, au lomi he nati' hi mihin nak, au bekot teni-teni he eti eu ki -- mes tal neno i au useni piut -- Au lomi he nati' upeni mepu in nesan anbi ki, onle au upeni amsa anbi uf bian le kan tamaf nonot Yahudi anbi bale bian. 1:14 Au fe utus neu atoni Yunani ma neu atoni le kan tamaf nonot Yunani. Ma neu atoni ahinet ma neu atoni amonot. 1:15 Es nane au lomi he etun Beno Alekot neu ki amsa le namaika anbi Roma. 1:16 Au nekak nateb namneo neu Beno Alekot nane, fun Beno Alekot nane matanin Uisneno le namonib ale atoni le nekan nateb knino. Nahun-hunu neu atoni Yahudi, mes neu atoni Yunani amsa. 1:17 Fun anbi Beno Alekot nane, Uisneno an etun nak lasi mafutus mansian nok Uisneno naleko anfani; ini naon esle' nok palsait neu Uisneno, na'ko palmelu tal namsopu. Nane papmese onle antui anbi Sulat Knino, "Atoni le anpalsai neu Uisneno talan te in mafutus nok Uisneno naleko anfani, atoni nane of napeni honis." 1:18 Uisneno nalile In to'as na'ko neno tunan neu ale atoni asanat ma atoni amaufinut, fun maufinut nane nasenip mansian le he naleko anfani nok Uisneno. 1:19 Fun sa' le sin he nahine antom Uisneno, nalilon neu sin, fun Uisneno nalile nalali neu sin. 1:20 Na'ko neno le Uisneno anmo'e pah pinan, Uisneno In lasi ka mamnita fa, esle' In monin on Uisneno ma In kuasat nabal-bal, atoni pah pinan nit nalali natuin ale sa' le In anmo'e. Es nane atoni pah pinan kan mu'if uab he namneob sin aon. 1:21 Sin nahin Uisneno mes sin ka naliatas fa In on Uisneno ma ka natulu fa nekan neu In. Mes sin natenab lasi kahahine ma sin nekan amonot anfani mesokan. 1:22 Sin moesok on atoni ahinet, mes sin fani amonot kun. 1:23 Sin anseka Uisneno In apinat le ka namle'u nit neki humaf atoni pah pinan le namle'u kun, kolo-kolo, ale mu'it hae ha, ma ale mu'it le anonok. 1:24 Natuin lasi nane, Uisneno namautu sin anbi sinmakat nekaf pah pinan neu hen mo'e amle'ut, talan te sin anmo'e ale lasi alahit neu sin aon. 1:25 Uisneno amneot, sin anseka neki lasi poiba. Sin ka naluli ma nabes fa neu Apakaet, mes sin naluli ma nabes neu le anpakae nani. So mak anpules Apakaet nane talan te nabal-bal! Amin. 1:26 Es nane te Uisneno namautu sin neu nek sinmakat le namaeba sin. Bife-bife sin kan lomi fa hen tup nabua nok atoni, mes bife anmo'e amle'ut nok bife. 1:27 Onane amsa atoni kan lomi fa hen tup nabua nok bife, mes sin nek sinmakat nane ansae, talan te atoni anmo'e amle'ut nok atoni. Ma onane te sin ansimo seunbanit amle'ut neu sin aon natai nok sin mo'et nane. 1:28 Fun sin kan lomif he nahin Uisneno, es nane te Uisneno namautu sin neu tenab amle'ut, talan te sin anmo'e sa' le ka nabe'i he sin mo'e. 1:29 Sin nekan nahenu nok lasi maufinu, lasi amle'ut, lasi komat ai lasi palu, lasi bulalu, nahenu nok to'as, ma'otes ma matoes, lasi ak'elo ma lasi amle'ut bian. 1:30 Sin na'uab nale'un es in kanan, na'akan, antek nale'un Uisneno, ka nahin lasi noina, naliabok, namoko'ok, ahin ela amle'ut, nak fatu neu amaf ainaf. 1:31 Sin kan mu'if tenab alekot, kan mu'in fa nek aki'at, kan mu'in fa manekat ma ka nahinef lasi manekat. 1:32 Sin nahinen, nak natuin Plenat Uisneno, ale atoni le anmo'e lasi amle'ut onane, mes anlek he namate sin. Maski onane amsa, sin anmo'e lasi amle'ut nane. Ma sin anlomi amsa he nati' atoni bian anmo'e lasi amle'ut nane.
2:1 Es nane, koi bae, ho sekau ko ka, le hom fain alef lasi neu atoni bian, mes ho amsa atoin asanat ko. Fun leka ho musanab atoni bian, ho musanab kum ho aom, natuin ho mo'e kum lasi le ho musanab mani. 2:2 Mes hit tahin, nak kalu Uisneno nanaoba In kasat neu ale atoni le anmo'e onane, Uisneno fekat nane namneo. 2:3 Ma ho, koi bae, le ho musanab sin natuin sin mo'et, mes ho amsa amo'e lasi nane. Kais ho mutenab mak, of ho mufetnom mu'ko Uisneno In kasat. 2:4 Ai ho mutenab amsan Uisneno In nek mamun athoes, In nek manuan ma nek seusabat anaek ka? Ai ho ka muhin fa ka, nak Uisneno In nek mamun nane anhel ko neu te'un nekaf ka? 2:5 Natuin ho nekam manu' ma ho kam lomif he mute'un ho nekam. Es nane ho mutupu to'as Uisneno neu ho aom, bi neno Uisneno In to'as ma In neno lef lasi amneot le of nalilon. 2:6 Fun Uisneno of anseunbanin ale atoni natuin sin mo'et. 2:7 In anfe honis nabal-bal neu ale atoni le anmo'e lasi alekot, ma naim lasi apinat, lasi makana ma lasi le ka namle'u nitaf. 2:8 Mes ale atoni le natenab neu in aon, le ka natuin fa lasi amneot mes natuin lasi amle'ut, Uisneno In to'as ma In maunu of nem neu sin. 2:9 Ale atoni le anmo'e lasi amle'ut, of napeni hamu'it ma malenat; nahun-hunu atoni Yahudi ma atoni Yunani amsa. 2:10 Mes ale atoni le anmo'e alekot, of napeni kan apinat ma kan tola ma halan nekaf na'ko Uisneno; nahun-hunu atoni Yahudi ma atoni Yunani amsa. 2:11 Fun Uisneno kan betif humaf ma masaf. 2:12 Ale atoni anmo'e sanat fun ka nahine fa Plenat Knino, of sin napeni lenat amsa ka nok fa Plenat Knino. Mes ale atoni le nahine fa Plenat Knino mes anmo'e sanat, of anlef sin lasi amsa natuin Plenat Knino. 2:13 Fun atoni le naleko anfani nok Uisneno, ka natuin fa atoni nane nahin Plenat Knino, mes natuin in mo'e Plenat Knino nane. 2:14 Atoni le kan tamaf nonot Yahudi, sin ka nahin fa Plenat Knino unu. Mes kalu sin mo'e natuin Plenat Knino nane in lomin, natuin sin nekan kun, of sin anfani Plenat Knino neu sin aon; maski sin ka nahin fa Plenat Knino nane. 2:15 Fun nok lasi nane, sin nalile nak Plenat Knino matui anbi sin nekan. Sin nek amnonot ansaksi lasi nane, fun sin nek tenab nane nasanab sin nok ma namneob sin nok. 2:16 Lasi nane of anbol bi neno le Uisneno anlek nani. Fun natuin Beno Alekot le au eut ani neu ki, Uisneno of anlef ale lasi le natolo'on anbi atoni pah pinan sin nekan, natuin Neno Anan Yesus. 2:17 Mes neu hi, hi mitenab onme ka? Him tek hi aom, atoni Yahudi. Him sonlaitan meu Plenat Knino unu, hi miliabom ambi Uisneno. 2:18 Plenat Knino nanoni ki, he mihin Uisneno In lomin, oke te mihin lasi alekot ma lasi amle'ut. 2:19 Hom saksiom mak, hom fain atopus neu atoni matfolo ma meusine neu atoni le anbi mesokan. 2:20 Hom fain anoni neu amonot sin, ma kulu neu li ana sin. Fun ho muhin mak anbi ale Plenat Knino, ho mu'i ale lasi hine ma noina amneot. 2:21 Leka me ho he munoni atoni bian, mes ho ka munoni fa ho aom? Ho munoni mak, "Kais mubak," nansa' es ho mubak? 2:22 Ho mu'uab mak, "Kais mapaisa," nansa' es ho mapaisa ka? Ho mainisin ale le'u mahuma, nansa' ho musikan uim le'u ka? 2:23 Ho muliabom ambi Plenat Knino mes nansa' ho mumaeb Uisneno ma ka mutuin fa Ini plenat ka? 2:24 Fun antui nani anbi Sulat Knino nak, "Natuin hi, atoni Yahudi, namaeb Uisneno In kanan anbi ale uf-uf bian sin atnanan." 2:25 Kalu ho mutuin Plenat Knino, lasi helit nane ma'upa. Mes kalu hom tanhai Plenat Knino, lasi helit nane ka ma'upa fa. 2:26 Es nane, bati atoni le ka maheli in anpanat Plenat Knino in lekat, ai in ka namnesaf nok atoni maheli ka? 2:27 Kalu onane, atoni ka maheli, mes in mo'e natuin Plenat Knino, of anfani alef lasi neu ki le hi mu'i Plenat Knino ma maheli, mes him tanhai Plenat Knino. 2:28 Fun atoni Yahudi amneot, ka al fa antek in kanan nak Yahudi; ma atoni maheli namneo, ka al fa atoni le anmo'e lasi helit anbi in aon. 2:29 Mes atoni Yahudi namneo, esle' atoni Yahudi anbi nekan; ma lasi helit nane anbi nekan natuin mepu Smanan Knino, ka natuin fa tuis le mamnita. Atoni humaf nane ansimo pules na'ko Uisneno, kan simof pules na'ko mansian.
3:1 Kalu onane atoni Yahudi sin anesit es sa' ka? Ma lasi helit in neki leko sa' ka? 3:2 In lasi alekot nane naek. Nahun-hunu: fun nana'at Uisneno In a'an neu atoni Yahudi sin. 3:3 Leka sin kan mu'in fa nek aki'at onane te onme ka? Lasi nane naikoti Uisneno In lasi aki'at ka? 3:4 Ka nabe'i. Fun Uisneno nane amneot, ma ale atoni pah pinan apoiba, onle antui nani anbi Sulat Knino nak, "He nati' Ho mulile lasi amneot anbi Ho a'am, ma Ho mis, bi neno nafek Ho lasi." 3:5 Mes kalu hit lasi ma amneot nane nalile Uisneno In amneot, of hit tak sa' ka? Uisneno ka amneot fa ka - au u'uab on mansian -- leka in nalile In to'as ka? 3:6 Ka nabe'i. Kalu onane, Uisneno anlef pah pinan in lasi onme ka? 3:7 Mes kalu natuin au lasi ka amneot, Uisneno In lasi amneot nathoe neu In kanan apinat; anlef anteni au lasi on atoni asanat neu sa' ka? 3:8 Nansa' hit ka ta'uab fa ma tak, "Leko hit mo'e lasi amle'ut, he nati' lasi alekot anpoi." Atoni humaf nane sin napeni hukum namneo na'ko Uisneno. 3:9 Neu onme ka? Hit atoni Yahudi atmui lasi anesit sa' ka na'ko bian? Kan mu'if. Fun hai misanab milali atoni Yahudi ma atoni Yunani, mak sanat naplenat sin oke. 3:10 Onle antui nani anbi Sulat Knino nak, "Katit fa atoni mese le namneo. 3:11 Katit fa atoni mese le nahin, katit fa atoni mese le naim Uisneno. 3:12 Ale atoni sin ansek ma ka natuin fa Uisneno, katit fa atoni mese le anmo'e lasi alekot; atoni mese amsa kahaf! 3:13 Sin po'an namkak onle nopu, sin man nahenu nok lasi poiba, sin lulun matua nok kauna in laso. 3:14 Sin fefan nahenu nok kasat ma le'at, 3:15 sin haen anmanap he namate atoni. 3:16 Lasi atselas ma amle'ut sin nabela anbi sin lanan. 3:17 Sin ka nahinef lalan le he neki halan; 3:18 ma lasi amtaus neu Uisneno kan mu'if anbi atoni nane." 3:19 Mes hit tahin, nak ale lasi le antui nani anbi Nai Musa in sulat nane neu sin le anmoni natuin Plenat Knino. Nok lasi nane te, katit fa atoni mese le he na'uab, ma pah pinan ok-oke napeni kasat Uisneno. 3:20 Fun kan mu'if atoni mese le naleko anfani nok Uisneno fun in mo'e natuin Plenat Knino. So mak natuin Plenat Knino, ale atoni nahin in sanat. 3:21 Mes tomas i, Uisneno nalile nalali lanan neu mansian he naleko anfani nok Uisneno onme; ma lasi nane ka natuin fa Plenat Knino. Onle antui nalali anbi Nai Musa in sulat ma Mafefa knino sin sulat nak, 3:22 Uisneno anfe manuan he mansian naleko anfani nok Uisneno al natuin nek ateb knino anbi Neno Anan Yesus neu ale atoni le nekan nateb knino. Fun lasi nane ka nasulin fa. 3:23 Ale atoni le anmo'e sanat ma na'lo na'ko Uisneno le he namonib sin. 3:24 Ma al natuin halinat Uisneno le anfe neu sin lumluman, mansian naleko anfani nok Uisneno natuin Neno Anan Yesus. 3:25 Uisneno anlek nalali Neno Anan Yesus hen fani ahal nekaf natuin nek ateb knino anbi Neno Anan Ini maten. Uisneno anmo'e lasi i he nalile In amneot ma amnonot. Fun Uisneno anpaleoba sin sanat le sin anmo'e bi neno unu, le In anseusaban sin sanat. 3:26 Mes muni i, Uisneno antumatan sanat he nalile In amneot ma amnonot. Nok lasi nane In nalilon nak In amneot; ma ale atoni le anpalsai neu Yesus, natonon on atoni le naleko anfani nok Uisneno. 3:27 Kalu onane hit he taliabok neu sa' ka? Kan mu'if. Natuin lasi sa' ka? Natuin hit mo'et ka? Kahaf, al natuin nek ateb knino! 3:28 Hai mitenab mak, namneob atoni pah pinan natuin nek ateb knino, ka natuin fa Plenat Knino. 3:29 Ai Uisneno nane al neu atoni Yahudi ka? Ai In ka Uisneno fa neu uf-uf bian amsa? Namneo, In amsa Uisneno neu uf-uf bian. 3:30 Nane nak, anmu'i Uisneno mese ha. In es anfe manuan he atoni Yahudi naleko anfani nok Uisneno fun sin nek ateb knino. Ma In amsa anfe manuan neu ale uf bian he naleko anfani nok Uisneno; nane amsa natuin sin nekan ateb knino. 3:31 Kalu onane, hai mineku Plenat Knino unu natuin nek ateb knino ka? Ka nabe'i. Mes natuin nek ateb knino, haim hatani Plenat Knino nane.
4:1 Es nane te, hit he tak sa' ka neu hit am uf Nai Abraham? 4:2 Fun kalu ansimo Nai Abraham natuin in mo'et, of in naliabon kun mes ka nok fa Uisneno. 4:3 Fun antui anbi Sulat Knino nak, "Oke te Nai Abraham nekan nateb knino neu Uisneno, ma Uisneno ansimo in on atoni le anhalin Uisneno nekan." 4:4 Atoni le anmepu, in ansimo baen; ma baen nane ka on fa halinat mes natuin in haet ma ini puse. 4:5 Mes kalu anmu'i atoni le kan mepuf, mes in nekan nateb knino neu In le nafetin na'ko sanat. Nok lasi nane Uisneno ansimo in on atoni le anhalin Uisneno. 4:6 Onane amsa Nai Daud antek ua alekot neu atoni le Uisneno ansimo nani ka natuin in mo'et nak, Nai Daud na'uab nak on i, 4:7 "Ua alekot neu atoni le ansako sin tanhais, ma Uisneno ankub sin sanat! 4:8 Ua alekot neu atoni le Usif tunan kan so'i fa in sanat neu in." 4:9 Tekas ua alekot nane al neu atoni maheli ai neu atoni ka maheli amsa? Fun haim tek, mak Uisneno ansimo Nai Abraham natuin anpalsai Uisneno. 4:10 Ansimo in on atoni apalsait es leka ka? Natuin Nai Abraham maheli nani ai fe kahaf? Ka maheli nani fa, mes leka in fe ka maheli fa. 4:11 In ansimo helit nane on taka na'ko Uisneno natuin nek ateb knino le anlek nani nahunun in maheli. Onane te in anfani amaf neu atoni nek ateb knino le ka maheli fa; he nati' ansimo sin on atoni le anhalin Uisneno. 4:12 Ma anfani amaf amsa neu atoni maheli, le ka al fa sin maheli; mes sin nao natuin hit am uf Nai Abraham in nobin, bi neno in fe ka maheli fa. 4:13 Uisneno anba'an neu Nai Abraham nok in sufan ka'un, nak pah pinan i of anfani Nai Abraham in ini. Uisneno anba'an onane ka natuin fa nai Abraham anmo'e natuin Plenat Atoni Yahudi, mes natuin in nekan nateb knino neu es nane Uisneno anlomi ma ansimo in. 4:14 Fun kalu al atoni le natuin Plenat Knino unu, sin ansimo fef bela Uisneno, nek ateb knino nane luman kun. Ma fef ba'an knino nane ka ma'upa fa. 4:15 Fun Plenat Knino unu neki kasat Uisneno. Mes kalu kan mu'if Plenat Knino unu, lasi tanhais amsa kan mu'if. 4:16 Es nane te, Uisneno fef ba'an nane natuin nek ateb knino neu Uisneno. Lasi nane anfani fef ba'an neu Nai Abraham sufan ok-oke, nak Uisneno anfe neu sin lumluman; ka al fa neu sin le anmoni na'ko Plenat Knino unu, mes neu sin amsa le nekan nateb knino neu Uisneno onle Nai Abraham in nek ateb knino neu Uisneno. Fun Nai Abraham anfani amaf neu kit ok-oke. 4:17 Onle antui nani anbi Sulat Knino nak, "Au lek ulali ko he nati' hom fani amaf neu uf namfaun." Anbi Uisneno In human, le Nai Abraham nekan nateb knino neu In; Uisneno le namonib amates ma Uisneno le anmo'e ale sa' neki In a'an. In anmo'e kun sa' le kan mu'if, anfani kun sa' le anmu'i esan. 4:18 Nai Abraham nafnekan piut ma anpalsai piut maski kan mu'in tenif afnekat. Es nane te in anfani amaf neu uf namfaun, natuin a'at le antui nani nak, "Ho sufam ho ka'um of namfau onane." 4:19 Nai Abraham in nekan ateb knino kan lima'e ai kan ole nit, maski in nahin nak in aon anlimae; fun in uan oni ton natun mese. Ma in fel bi Sara in apun amsa anbitu'en. 4:20 In nekan nateb knino nabala ma in ka nu'anu fa neu Uisneno In fef ba'an. Mes in nekan ateb knino anhatani in talan te in naliatas Uisneno In kanan. 4:21 In nekan nateb namneo nak Uisneno anmu'i kuasat anhalin he natis lasi le anba'an nalali. 4:22 Es nane te Uisneno ansimo Nai Abraham on atoni le anhalin Uisneno. 4:23 A'at le nahan nak, "Ansimo on atoni le anhalin Uisneno" ka al fa neu Nai Abraham, 4:24 mes neu kit amsa. Fun Uisneno ansimo kit amsa on atoni le anhalin In nekan, natuin hit nekak nateb knino neu In, le nafena Yesus, hit Usi, na'ko amates. 4:25 Yesus le nana'at nani he namate natuin hit tanhais; oke te Uisneno nafena nafani In he naleko nafani kit nok Uisneno.
5:1 Muni i hit taleko atfani tok Uisneno natuin hit nek ateb knino. Ma hit moni atbi halan nekaf tok Uisneno natuin hit Usi, Yesus Neno Anan. 5:2 Natuin Yesus Neno Anan, hit tapeni manuan het simo Uisneno In manekan. Ma anbi lasi manekat i hit hake ma hit taliabok fun tafnekan het simo Uisneno In apinat. 5:3 Ma ka al fa lasi nane. Mes hit taliabok amsa atbi hit lasi hamu'it, fun hit tahin, nak lasi hamu'it nane neki atahas. 5:4 Ma nek atahas neki nek besi ma nek besi neki afnekat. 5:5 Ma afnekat nane ka namaeb kit fa, fun Uisneno natua hit nekak neki In manekan. Uisneno anmo'e lasi nane natuin In Smanan Knino le In anfe naleli neu kit. 5:6 Leka hit fe atlimae, Neno Anan anmate bi leku le Uisneno anlek nani, natuin hit atoni abulalut. 5:7 Fun mafen le'uf neu atoni le hen maten seka atoni amneot ma amnonot -- so neu atoin alekot oni anmu'i atoni le hen maten seka in -- 5:8 Mes Uisneno nalile In manekan neu kit, es nane Neno Anan anmaten seka kit, leka hit fe asanat kit. 5:9 Nes-nesi muni i, hit taleko atfani tok Uisneno natuin Neno Anan Ini maten; es nane of namonib kit amsa na'ko to'as Uisneno. 5:10 Fun leka hit fe tamusu tok Uisneno, In anhalan kit nok Uisneno, natuin In An mone anmate; nes-nesi hit, muni i le anhalan nalali kit, of namonib kit natuin Neno Anan In monin. 5:11 Ma ka al fa lasi nane. Mes hit taliabok anbi Uisneno, natuin Neno Anan, hit Usif, fun natuin In hit tapeni lasi halan nane. 5:12 Sanat antam neu pah pinan natuin atoni mese, ma lasi maten anbol na'ko sanat nane. Oke te lasi maten anbol neu ale atoni fun sin alsin anmo'e sanat. 5:13 Fun nahunun anmu'i Plenat Knino, sanat antam nalali neu pah pinan, mes sanat nane ka maso'ik fa, kalu Plenat Knino kan mu'if. 5:14 Maski onane na'ko batan Nai Adam talan te batan Nai Musa, lasi maten naplenat ale atoni pah pinan. Ma ale atoni le kan mo'ef sanat papmese nok Nai Adam sin amsa lasi maten naplenat sin. Fun Nai Adam anfani heta neu In le he nanoebon nem. 5:15 Fun Uisneno In sankolan kan namnes fa nok Nai Adam in tanhais. Fun natuin atoni mese in tanhais, atoni namfau anmate. Nes-nesi Uisneno In halinat knino le In nahoeb nani neu atoni namfau, natuin atoni mese, lo Yesus Neno Anan kun. 5:16 Ma halinat knino Uisneno nesin na'ko atoni mese nane in sanat. Fun leka atoni mese anmo'e nalali tanhais, fekat anpoi, nak "nasanab." Mes leka atoni amfaun anmo'e nalali sanat, halinat Uisneno nak, "Ka nasanab fa." 5:17 Fun natuin atoni mese in tanhais, lasi maten nem natuin atoni mese nane. Nes anteni na'ko sa' le atoni mese bian anmo'e esle' Yesus Neno Anan neu atoni amfaun. Uisneno of nahoeb In manekan neu sin lum-luman ma naleko nafani sin nok Uisneno; of sin naplenat anbi pah pinan i natuin Neno Anan. 5:18 Onane te, onle natuin atoni mese in tanhais, ale atoni napeni kasat, onane amsa natuin atoni mese in mo'et le natuin Uisneno In lomin, ale atoni napeni sako sanat ma napeni honis. 5:19 Es nane te, on atoni mese le ka natuin fa Uisneno In lomin, atoni namfau anfani atoni asanat; onane amsa, on atoni mese le natuin Uisneno In lomin, atoni namfau anfani atoni le natuin Uisneno In lomim. 5:20 Uisneno anfe Plenat Knino nane, he nati' lasi tanhais ansaton; ma sanat anbi me te, Uisneno In halinat knino nathoe anbi nane. 5:21 Onle sanat naplenat anbi maten, onane amsa Uisneno naleko' nafani kit natuin In nek kit. Ma natuin hit taleko atfani tok Uisneno, In fe kit honis nabal-bal; natuin Yesus Neno Anan, hit Usi.
6:1 Kalu onane hit he tak sa' ka? Hit moni tabala atbi sanat, he nati' Uisneno In halinat knino ansato piut neu kit ka? 6:2 Ka on fa nane. Leka me hit atmaet talali natuin sanat, hit het moni tabala atbine ka? 6:3 Ai hi ka mihin fa ka, nak hit alkit le atsu oe anbi Neno Anan, ansub kit anbi Ini maten ka? 6:4 Onane te ansub kit nok In natuin hit su oe atbi Ini maten, he nati' on nafena Neno Anan na'ko amates neki Amaf In apinat, onane amsa of hit moni atbi monit fe'u. 6:5 Fun kalu hit fani mese tok Neno Anan bi Ini maten, of hit fani mese amsa tok In anbi In anfen anfani. 6:6 Fun hit tahin, nak naponi nalali hit atoni mna nok In anbi hau nehe; he nati' hit aok asanat in kuasat namneku ma kais hit aetnok a'teni neu sanat. 6:7 Fun atoni le anmate nalali, in nafetnon na'ko sanat. 6:8 Kalu hit mate tok Neno Anan, hit nekak nateb knino nak of hit atmoni amsa tok In. 6:9 Fun hit tahin, nak Neno Anan anfen anfani na'ko amates, In kan maten tenif. Maten ka mu'in tenif kuasat neu In. 6:10 In anmate neu sanat, ma In maet no mese talan te nabal-bal. Ma In monin nane, anmoni neu Uisneno. 6:11 Onane amsa hi mihin, nak hi mate neu sanat, mes hi moni neu Uisneno anbi Neno Anan Yesus. 6:12 Onane te so kais sanat naplenat hit ta'um amle'ut anbi pah pinan i, he nati' kais hi mituin in sinmakat amle'ut. 6:13 Kais hi mina'at hi aom ta'um neu sanat hen mo'e lasi amle'ut. Mes hi mina'at hi aom neu Uisneno on atoni le afi anmate mes muni i anmoni. Ma mina'at hi aom ta'um neu Uisneno he nati' anpake hen mo'e lomin Uisneno. 6:14 Sanat ka naplenat anteni ki, fun hi ka monif ambi Plenat Knino unu, mes hi moni ambi Uisneno In halinat knino. 6:15 Es nane te lasi onme ka? Ai hit het mo'e sanat ka, fun Plenat Knino unu ka naplenat kit, mes Uisneno In halinat knino es naplenat kit? Ka nabe'i. 6:16 Ai hi ka mihin fa ka nak leka hi mina'at hi aom neu es on ate he mituin in lomin, him fani ate neu atoni nane, he mitnin neu in; he neu sanat le antopu ki neu maten ka ai he mituin Uisneno, ma nok lasi nane mileko amfani mok Uisneno. 6:17 Mes hit tatulu nekak neu Uisneno! Afi him fain ate neu sanat, mes muni i hi mituin lasi noina le anfe neu ki meik hi nekam oke. 6:18 Hi mifetnom mi'ko sanat ma him fani ate neu Uisneno In lomin. 6:19 Au u'uab lasi i on mansian fun hi nekam anlimae. Fun onle hi mina'at hi aom ta'um hen fani ate neu lasi amolemut ma lasi bulalu he nati' him bulalu. Onane amsa muni i hi mina'at hi aom ta'um hem fani ate neu Uisneno In lomin he mitiaba Uisneno In salit alekot. 6:20 Fun bi neno him aetnom neu sanat, Uisneno In lomin ka naplenat ki fa. 6:21 Ma hi mipeni lasi alekot sa' ka? Ale lasi nane namaeb ki, fun in amsopun nane maten. 6:22 Mes muni i, leka hi mifetnom mi'ko sanat, ma him aetnom neu Uisneno, hi mipeni alekot neu he miknino'om ma in amsopun honis nabal-bal. 6:23 Fun sanat in upan nane maten. Mes Uisneno In halinat knino nane honis nabal-bal, anbi Neno Anan Yesus, hit Usi, le Uisneno anfe nani lum-luman.
7:1 Ai hi ka mihin fa ka, bae benu alki, -- fun au u'uab neu sin le nahine plenat -- nak plenat nanaobon neu atoni talan te atoni nane in monin namsop? 7:2 Fun bife mamone anfutnon neu in mone natuin plenat talan te in mone monin namsop. Mes leka in mone anmate, in nafetnon na'ko plenat le anfut in nok in mone. 7:3 Kalu bife nane anmamone anteni nok atoni bian, leka in mone fe anmoni, bife nane in mo'e lasi kake. Mes kalu bife nane in mone anmate, in nafetnon na'ko plenat le anfut in nok in mone. Ma kalu in mamone anteni nok atoni bian, nane in kan mo'ef lasi kake. 7:4 Es nane bae benu alki! Hi amsa amaet milalien neu Plenat Knino unu, natuin Neno Anan In aon; he nati' him fani Neno Anan In ini le anfen anfani na'ko amates. Oke te hit fani atoni alekot neu Uisneno. 7:5 Fun leka hit fe atmoni natuin nekaf pah pinan, sanat in lasi sinmakat, le anbol natuin Plenat Knino unu, anmepu anbi hit aok ta'un. Oke te hit mo'e lasi amle'ut le neki kit neu maten. 7:6 Mes tomas i hit tafetnok ta'ko Plenat Knino unu. Fun hit atmaet talalien neu Plenat Knino unu le ane'ka kit. Muni i hit aetnok nok monit fe'u natuin Smanan Knino, ma ka nok fa monit mna' natuin plenat in tuis ai in lulat. 7:7 Kalau onane, hit he tak sa' ka? Plenat Knino unu nane sanat ka? Kahaf! Fun natuin Plenat Knino unu au uhin sanat. Fun au amsa ka uhinef lasi sinmakat nane sa'. Kalu Plenat Knino unu ka na'uab nani nak, "Kais hom sinmak." 7:8 Mes natuin plenat nane, sanat napeni manuan he nafena lasi sinmakat huma-huma anbi au nekak; fun kalu Plenat Knino kan mu'if, sanat nane anmate. 7:9 Afi au moni ka natuin fa Plenat Knino unu. Mes leka Plenat Knino nem, sanat anmoni, 7:10 ma au mate. Ma Plenat Knino le he neki kau neu honis, nalilon neu kau ma neki kau neu maten. 7:11 Fun natuin Plenat Knino nane, sanat napeni manuan hen nalosib kau ma namate kau. 7:12 Kalu onane Plenat Knino nem na'ko Uisneno, ma ale plenat le nem na'ko Uisneno, namneo ma leko. 7:13 Kalu onane, alekot nane anfani maten neu kau ka? Kahaf! Sanat anpaek alekot he neki maten neu kau, he nati' in mo'et nane nalilon on sanat. Ma natuin plenat nane sanat nalile anteni in mo'et on sanat. 7:14 Fun hit tahin, nak Plenat Knino nane Smanan Knino ini, mes au atoni alima'et kau. Nasosa kau neu sanat in kuasat. 7:15 Fun sa' le au mo'e, au ka uhinef. Au ka mo'ef sa' le au lomi, mes au mo'e sa' le au ka lomi. 7:16 Kalu au mo'e sa' le au ka lomi, au lomi, au ak Plenat Knino nane leko. 7:17 Kalu onane, au es ka mo'e, mes sanat le namaika anbi kau. 7:18 Fun au uhin, nak kan mu'if alekot sa' anbi kau, bi au aok taun pah pinan. Au mui nek lomif, mes au ka mo'ef lasi alekot. 7:19 Fun au ka mo'ef alekot le au lomi, mes au mo'e amle'ut le au ka lomi. 7:20 Kalu au mo'e sa' le au ka lomi, nane au es ka mo'e, mes sanat le namaika anbi kau. 7:21 Au upeni plenat i onane, leka au lomi he mo'e alekot, amle'ut nane anbol neu kau. 7:22 Fun anbi au nekak, au lomi Plenat Uisneno, 7:23 mes anbi au lokif taluf, au it plenat bian le anmabe'u nok plenat le au uhine eki au nekak ahinet. Es nane te anfut kau anbi ini plenat, le anbi lokif taluf nane. 7:24 Au atoni amle'ut kau! Sekau he nafetin kau na'ko aof maten i ka? 7:25 So tulu nekaf neu Uisneno, natuin Yesus Neno Anan, hit Usi. 7:26 Onane te au aetnok neu Plenat Uisneno eki au nek hine alekot, mes au aetnok neu sanat eki au aok ta'uk pah pinan.
8:1 Onane te kan mu'if alef lasi neu sin le anmoni anbi Neno Anan Yesus. 8:2 Smanan Knino le anfe honis, nafetin ki anbi Neno Anan na'ko sanat in kuasat ma maten in kuasat. 8:3 Fun sa' le Plenat Knino kan mo'e nani natuin nek ole pah pinan, Uisneno anmo'e nani. Uisneno ansonu In Anmone anbi ta'un pah pinan, le namnes nok ta'un pah pinan, hen be'u sanat in kuasat. In anlef lasi neu sanat anbi ta'un pah pinan, 8:4 he natisi Plenat Knino in lomin anbi kit, le kan monif natuin ta'un pah pinan, mes natuin Smanan Knino. 8:5 Fun sin le anmoni anbi ta'un pah pinan, sin natenab lasi natuin ta'un pah pinan. Mes sin le anmoni anbi Smanan Knino, sin natenab lasi le na'ko Smanan Knino. 8:6 Fun ta'un pah pinan in lomin nane maten. Mes Smanan Knino nane in lomin nane honis ma halan nekaf nok Uisneno. 8:7 Fun ta'un pah pinan in lomin namusu nok Uisneno, fun in ka natuin fa Uisneno In plenat. Ma in ka nabe'i fa he natuin Uisneno Ini plenat. 8:8 Atoni le anmoni anbi ta'un pah pinan, ka nabe'i fa hen halin Uisneno In nekan. 8:9 Mes hi ka monif ambi ta'un pah pinan mes anbi Smanan Knino, kalu onane Smanan Knino natua anbi he nekam. Mes atoni le kan mu'if Neno Anan Ini Smanan Knino, atoni nane ka Neno Anan Ini fa. 8:10 Mes kalu Neno Anan anmoni anbi hi nekam, hi aom anmate natuin sanat, mes Smanan Knino anfe honis neu ki, fun hi mileko amfani mok Uisneno. 8:11 Kalu Uisneno In Smanan Knino, le nafena Yesus na'ko amates, In natua anbi hi nekam, of In le nafena Neno Anan Yesus na'ko amates, of In nafena hi aom amle'ut nane amsa, neki Ini Smanan Knino le natua anbi hi nekam. 8:12 Es nane, bae benu alki, hit tatus, mes ka tatusaf neu ta'uf pah pinan, he nati' hit moni tatuin ta'uf pah pinan. 8:13 Fun kalu hi moni mituin ta'uf pah pinan, of hi mate. Mes kalu nok kuasat Smanan Knino, hi mimate hi aom in mo'et of hi moni. 8:14 Fun ale atoni le Smanan Knino antopu sin, sin le nane anah-anah Uisneno. 8:15 Fun hi kam simof sman ate le hen hakatau ki, mes him simo Smanan Knino le nafani ki on anah Uisneno. Ma natuin Smanan Knino nane hit anbai tak, "Koi Abba! Koi Ama!" 8:16 Smanan Knino nane ansaksi nabua nok hiti smanak, nak hit lo anah-anah Uisneno kit. 8:17 Kalu hit le i In anah kit, hit amsa apal bale bela mnasi kit, le het simo Uisneno In fef bela, tabua tok Neno Anan, fun kalu hit sutai mane'at tok In, of naliatas kit amsa nok In. 8:18 Fun au tebes, ak lasi mane'at batan i ka maleta fa nok kan apinat le of nalile neu kit. 8:19 Ale amonit anbi pah pinan anhat ma anpao nok nek sinmakat leku le Uisneno he nalile In kan apinat neu In anhenu. 8:20 Fun namautu ale amonit neu lasi ka ma'upa, ka natuin fa sin lomin, mes natuin Uisneno In lomin onane. 8:21 Maski onane amsa anmu'i afnekat, fun of nafetin ale amonit nane sin na'ko anaetnok neu lasi amle'ut ma natam sin ao sona apinat nok anah-anah Uisneno. 8:22 Fun hit tahin, talan te tomas i ale amonit ansaksi natuin mane'at onle bife ansutai men mahonit. 8:23 Ma ka al fa sin anmes es ansakoi, mes hit amsa atsakoi atbi hit nekak. Fun hit simo Smanan Knino, on manekan Uisneno le ahunut; ma hit fe atpao he nafetin hit aok ta'un ma nait kit het fani on anah. 8:24 Fun namonib kit anbi lasi afnekat. Mes kalu sa' le hit tafnekan hit tit talali, nane ka afnekat fa. Fun leka me atoni he nafnekan sa' le in nit nalali? 8:25 Mes leka' hit tafnek neu sa' le hit ka titefa, hit at pao in nok a'ki'at. 8:26 Onane te Smanan Knino anbab kit anbi hit lima'et; fun hit ka tahin fa het onen toti onme. Mes Smanan Knino anonen toti neu Uisneno anseka kit neki hit sananet le hit ka tek tani fa anbi hit onen totis. 8:27 Ma Uisneno nit hit nekak nanan, ma nahin Smanan Knino In lomin. Fun Smanan Knino antoti Uisneno neu ale to knino namnes nok Uisneno In lomin. 8:28 Tomas i hit tahin, nak Uisneno anmepu anbi ale sa' he neki alekot neu ale atoni le sin nek In ma le anboin neu In bekot. 8:29 Fun ale atoni le Uisneno anbeti nani sin na'ko afi unun, In anlek nani sin hen fani humaf mese nok In Anmone, lo Yesus Neno Anah kun. Onane te In Anmone nane, anfani Anan ahunut anbi bae knino namfau. 8:30 Fun sin le anlek nani sin na'ko afi unun, In anboin sin. Ma sin le In anboin sin, In naleko nafani sin nok Uisneno. Ma sin le In naleko nafani sin nok Uisneno, napeni honis anbi Uisneno. 8:31 Hit he tak sa' ka neu ale lasi nane? Kalu Uisneno anhake nok kit, sekau hen be'u kit ka? 8:32 Uisneno ka nekaf In Anmone, mes In nana'at neu kit alkit. Leka me In he kan fe kit ale sa' nok In ka? 8:33 Sekau es he nasanab kit on to mabeti Uisneno, kalu Uisneno nalile nak hit ka tasanab fa? Sekau es anlef hit lasi ka? 8:34 Neno Anan Yesus le anmate ka? Nesin teni na'ko nane, In le anfen anfani, le antunon anbi Uisneno In aon bian ne'u, In es of anhake he natau kit. 8:35 Sekau hen soel kit na'ko Neno Anan In manekan ka? Lasi hamu'it ka, ai lasi manukat ka, ai lasi amli'ut ka, ai amnahas ka, ai monas ka ai suni ka? 8:36 Fun antui anbi Sulat Knino nak, "Haim bi maten neno teme mese, natuin Ho, anmo'e kai onle bibi kase le hen lolo." 8:37 Mes kahaf! Anbi ale lasi nane hit nesin ale atoin abe'ut sin, natuin In le nalile In manekan neu kit. 8:38 Fun au uteb, ak he lasi maten ka, ai he lasi monit ka, he ahake neno tunan ka, he ana' aplenat ka, le anbi tomas i ai anbi neon amnemat ka, 8:39 ai ale kuasat abit neno tunan ma abit pah pinan ka, ai amonit bian, ka nabe'i hen sole kit na'ko Uisneno In manekan, le anbi Neno Anan Yesus hit Usi.
9:1 Au u'uab lasi amneot anbi Neno Anan. Au ka upoibok ai au ka umoe fa. Au nekak ansaksi kau anbi Smanan Knino nak au a'at i namneo. 9:2 Au nekak antu, ma au susal piut, 9:3 natuin au bae sin le uf mese nok kau natuin ta'uf pah pinan. Au lomi he Uisneno ansukat kau, ma ansole kau na'ko Neno Anan natuin sin. 9:4 Fun sin le nane to Israel, Uisneno nait sin on In anah sin ma anfe kan apinat neu sin. In nabela fef ba'an ma Plenat Knino ma luli besa knino ma lasi manta'en neu sin. 9:5 Sin le nane anpoi na'ko hit am uf sin. Neno Anan natuin ta'un pah pinan anpoi na'ko sin. In namnau nesin ale sa'. In kun, Uisneno le het pules In kanan talan te nabal-bal. Amin! 9:6 Mes Uisneno In a'an ka nabe'i fa he luman. Fun ale atoni ka na'ubok fa na'ko atoni Israel. 9:7 Ma ale atoni le maso'ik anbi Nai Abraham in sufan nane ka Nai Abraham in anah sin. Mes Uisneno nakua In a'an neu Nai Abraham nak, "Al Nai Ishak in sufan nane of antek sin nak ho sufam." 9:8 Nane in oten, nak Nai Abraham sufan le hen fani anah-anah Uisneno, al in sufan le nahonis sin natuin fef ba'an Uisneno; ma ka in sufan ok-oke fa. 9:9 Fun Uisneno In a'an matua fef ba'an nak, "Bi ton amnemat onle neno i, of Au unoebok aum ma bi Sara of napeni anmone mese." 9:10 Mes ka al fa lasi nane. Ma bi Ribka le na'apu natuin atoni mese, hit am uf Nai Ishak. 9:11 Fun leka in fe ka nahonis fa anhin nane, ma anhin nane fe kan mo'ef lasi amle'ut, -- he nati' Uisneno In bekot antom In betis nane nabala, fun ka natuin fa mo'et, mes natuin In han boin -- 9:12 In nakua a'an neu bi Ribka nak, "An anaet of anfani ate neu in olif." 9:13 Onle antui nani anbi Sulat Knino nak, "Au nek Nai Yakub, mes au ka nekaf Nai Esau." 9:14 Kalu onane hit he tak sa' ka? Uisneno ka amneot ma ka amnonot fa ka? Ka on fa nane! 9:15 Fun In nakua a'an neu Nai Musa nak, "Of Au ulile Au nek mamun neu atoni le Au lomi he ulile Au nek mamun, ma of Au ulile Au manekak neu atoni le Au lomi he ulile Au manekak." 9:16 Uisneno fekat nane kan futnon fa neu atoni in lomin ai atoni in lekat mes anfutnon neu Uisneno In lomin. 9:17 Fun Sulat Knino an etun nak, "Uisneno nakua a'an neu Nai Firaon nak, 'Au uhakeb ko neu lasi i, he nati' Au kuasat anbi ko, ma hen tek Au kanak anbi pah pinan funam natef.' " 9:18 Es nane te Uisneno nalile In manekan neu sekau le In anlomi, ma In namanub sekau in nekan natuin In lomin. 9:19 Onane te of hi mi'uab neu kau mak, "Kalu onane, Uisneno nasanab lasi sa' anteni ka? Fun sekau hen eka In lomin ka?" 9:20 Hoi atoni, hi sekau ki ka, he matoe mok Uisneno ka? Nabe'i ka bale le anmo'e, nak neu amo'e bale nane nak, "Nansa' es ho mo'e kau on in ka?" 9:21 Ai amo'e nai nane kan mu'if kuasat neu klofo ai tepaleob, hen mo'e na'ko bua mese le namnes es hen pake neu salit amasat es hen pake nani neu salit ka amasat? 9:22 Onane amsa neu lasi le Uisneno anmo'e nani. In lomi he nalile In to'as ma nalile In kuasat. Uisneno nalile In seusabat naek neu ale sa' le In nato'an, le naloitan nani neu amle'ut -- 9:23 Mes In nalile In apinat nok athoes neu ale sa' le In nek nani le In naloitan nani neu kan apinat. 9:24 Esle' hit, le In anboin kit ka al fa na'ko atoni Yahudi, mes na'ko uf bian amsa. 9:25 Onle In nakua In a'an amsa anbi Mafefa Knino Nai Hosea in sulat nak, "Atoni le Au ka to, of Au tek ani ak Au to. To le Au ka nek ani, of Au tek sin ak Au to bi'an." 9:26 Ma anbi bale le antek sin nak, "Hi le i Au ka to ki fa," anbi nane of antek sin nak, "Anah-anah Uisneno le an-moni." 9:27 Ma Nai Yesaya anhunun neu to Israel nak, "Maski Israel in anhin onle snaen anbi tasi, mes of sin faukah es napeni honis. 9:28 Fun Usif tunan nakua a'an onme te, of In natis nani laba anbi pah pinan." 9:29 Ma onle Nai Yesaya na'uab nani nahunu nak, "Kalu afi Usif tunan ka nabela kit fa sufa ma ka'uf, hit atfani on Sodom ma tamnes tok Gomora." 9:30 Kalu onane te hit he tak sa' ka? Lasi nak on i, ale uf bian le kan tamaf nonot Yahudi sin ka namif he nati' sin lasi mafutus naleko anfani nok Uisneno. Mes natuin sin palsait, Uisneno naleko anfani nok sin. 9:31 Mes to Israel le sin anpanat plenat knino, sin nami piut he nati' sin lasi mafutus naleko anfani nok Uisneno, mes sin ka napeni nani fa. 9:32 Sin ka napeni fa neu sa' ka? Fun sin nanaoba lasi nane ka natuin fa nek ateb knino neu Uisneno, mes natuin sin mo'et kun. Es nane sin nastun ai antofuok neu fatu astunas. 9:33 Onle antui nani anbi Sulat Knino nak, "Panat nai, Au ubela fatu aktulis ma faut astunas mese anbi Sion, atoni le nekan nateb knino neu In of ka namaeb nani fa."
10:1 Balebenu alki! Au nekak ansinmak ma au onen toti neu Uisneno he nati' namonib sin. 10:2 Fun au saksi neu sin, nak sin anlomi he natuin Uisneno, mes sin kan mu'if nek hine amneot neu Uisneno. 10:3 Fun sin ka nahin fa sa' le Uisneno anmo'e he mansian naleko anfani nok In. Ma fun sin lomi he natuin kun sin mo'et, es nane te sin ka natuin fa lasi le Uisneno anlek nani. 10:4 Plenat Knino nane Neno Anan natis nalalien. Es nane ale atoni le he naleko anfani nok Uisneno, so anpalsai neu In. 10:5 Nai Musa antui nak, atoni le naleko anfani nok Uisneno natuin Plenat Knino atoni nane of anmoni fun in natuin Plenat Knino nane. 10:6 Mes lasi atoni naleko anfani nok Uisneno natuin nek ateb knino neu Uisneno, nak on i, "Kais ho mutenab anbi ho nekam mak, Sekau hen sae neu neno tunan ka?", he nasanut Neno Anan, 10:7 ai, "Sekau hen sanu neu nopu maten ka?" he nasaeb Neno Anan na'ko amates. 10:8 Mes lasi nane in salin nak on i, "Uisneno In a'an anhaumak ki, anbi hi fefam ma anbi hi nekam." *Nane a'at antom nek ateb knino le haim etun milali neu ki. 10:9 Kalu hi miteb meki hi fefam mak, Yesus nane Usif tunan ma hi miteb knino ambi hi nekam mak, Uisneno nafena Neno Anan na'ko amates, of hi mipeni honis. 10:10 Fun atoni nekan nateb knino neki nekan, tal Uisneno ansimo on atoni le naleko anfani nok Uisneno. Ma atoni le ana'u neki fefan, Uisneno of namonib nani. 10:11 Antui anbi Sulat Knino nak, "Atoni le nekan nateb knino neu In, of ka namaeb nani fa." 10:12 Fun kan mu'if lasi mabetis neu atoni Yahudi ma atoni Yunani. Fun Uisneno mese, lo Usif tunan kun neu ale atoni. In nahoeb In manekan neu ale atoni le antoti neu In. 10:13 Atoni le antoti neu Usif tunan of napeni honis. 10:14 Mes leka me sin hen toti neu Usif tunan, kalu sin nekan ka nateb knino fa neu In ka? Leka me sin nekan he nateb knino neu In, kalu sin ka nenaf antom In ka? Leka me sin he nen antom In, kalu kan mu'if atoni le an etun antom In ka? 10:15 Ma leka me sin hen etun antom In, kalu kan sonu sin ka? Onle antui nani anbi Sulat Knino nak, "Alekot neu ale atoni le sin neman ma neki Beno Alekot na'ko Uisneno!" 10:16 Mes ka alsin ok-oke ansimo Beno Alekot nane. Nai Yesaya nak, "Usi, sekau es hen palsai hai lasi tonas nane ka?" 10:17 Es nane, atoni nekan nateb knino natuin sin nen lasi tonas, ma sin nen lasi tonas nane natuin anmu'i atoni le an etun antom Neno Anan. 10:18 Mes au utan ak: Ai sin fe ka nenaf lasi tonas nane ka? Namneo sin nen nalali. Fun antui anbi Sulat Knino nak, "Sin hanan ante pah pinan funam natef, ma sin a'an ante pah pinan tu'an." 10:19 Mes au utan a'teni ak: Ait atoni Israel sin fe ka nahin fa ka? Nahun-hunu Nai Musa na'uab nak, "Of Au mo'e ki he hi mituin uf bian le kan tamaf Au to, ma Au ufena hi to'as neu uf le anmono." 10:20 Ma Nai Yesaya anhatanion ma na'uab anteni nak, "Uisneno nakua In a'an nak on i, 'Atoni le ka nami Kau, sin napeni Kau, ma Au ulilok neu atoni le ka natanaf neu Kau.' " 10:21 Mes Nai Yesaya na'uab neu to Israel nak, "Uisneno nakua In a'an nak on i, Au enu Au nimak neno mnanu es, neu uf le nakfatu ma ka natuin fa plenat."
11:1 Oke te au toti ak: Ait Uisneno antite In to ka? Kahaf! Fun au amsa atoni Israel kau, Nai Abraham in sufan, u'ko uf Nai Benyamin. 11:2 Uisneno kan tite fa In to le In beti nalali. Ait hi ka mihin fa ka, sa' le antui anbi Sulat Knino antom Nai Elia, le afi in natam Israel sin lasi neu Uisneno nak, 11:3 "Usi, sin namate Ho Mafefa knino sin ma antite namofu Ho baik fuat. Al au mes a moni ma sin lomi he namate kau amsa." 11:4 Mes Uisneno nakua In a'an neu Nai Elia onme ka? Uisneno nakua a'an nak, "Au fe mu'i atoni nifun hitu neu Kau, le sin ka naluli ma nabes fa neu Ba'al." 11:5 Onane amsa bi tomas i, fe anmu'i to Israel le Uisneno anbeti sin natuin In halinat knino. 11:6 Uisneno anbeti sin ka natuin fa sin mo'et alekot, mes natuin Uisneno In nek mamun. Fun kalu Uisneno anbeti sin natuin sin mo'et alekot, halinat nane ka halinat Uisneno fa. 11:7 Es nane te lasi onme ka? To Israel sin nami mes ka napeni fa, so atoni le Uisneno anbeti sin, sin napeni nani. Ma atoni bian sin namanub sin nekan neu Uisneno. 11:8 Onle antui nani anbi Sulat Knino nak, "Uisneno anmo'e sin talan te sin tupan finin, sin matkenu ka nitan fa ma sin lukek ka nenan fa, talan te neno i." 11:9 Ma Nai Daud nak amsa, "Maut he sin fesat nane anfani leo ma beku' neu sin, lasi aseket ma lasi seunbanit neu sin. 11:10 Ma maut he sin matkenu anmesokan talan te sin ka nitan tenin fa, ma anmo'e sin koitkenu anluinen talan te nabal-bal." 11:11 Au utan a teni ak: Ai atoni Israel nastun-antofuok hen belan finin ka? Kahaf! Mes natuin sin mo'et tanhais, Uisneno anfe tetus neu uf bian le kan tamaf nonot Yahudi, he na'koke sin nek atinos. 11:12 Fun kalu atoni Israel sin mo'et tanhais nane on athoes neu pah pinan, sin lasi tanhais nane on athoes neu uf bian. Nes-nesi anteni kalu sin nanokbok neu Uisneno. 11:13 Au u'uab neu ki, hoi uf-uf le kan tamaf nonot Yahudi. Natuin au haef knino kau neu uf-uf le kan tamaf nonot Yahudi. Au ak lasi nane on lasi makana neu au mepu tuthaes. 11:14 Esle' kal-kalu au ufena lasi tinos anbi to le uf mese nok kau sin nekan natuin nesaf ma umonib atoni bian na'ko sin. 11:15 Fun kalu Uisneno antite sin, lasi mafutus pah pinan nok Uisneno naleko anfani. Ma kalu Uisneno ansimo sin, nane on amates anfen anfani. 11:16 Kalu utunu' pis ahunut nane sin anfe nalali neu Uisneno, nane nak sin utunu' ok-oke anfe neu Uisneno amsa. Ma kalu hau ba'at nane Uisneno Ini, nane nak ale atlaen ok-oke In ini amsa. 11:17 Bub fua mina nane in atlaen bian esle' atoni Yahudi, le anketu nani sin. Ma antapas ki neu tlaen nane in papan, on tol fui, esle' atoni le kan tamaf nonot Yahudi. Ma hi mipeni alekot na'ko bub fua mina nane ini ba'an. 11:18 Es nane te kais hi miliabom neu hau atlaef nane sin. Leka hi miliabom, mimnau nai, fun hi hau atlaef ki. Ma hau atlaef ka namonib fa hau ba'at, so mak hau ba'at es namonib hau atlaef. 11:19 Oni hi mi'uab mak: Anmu'i atlaef-atlaef le maketu he nati' antapas kau anbi sin on hau snuku. 11:20 Leko! So ankeut napoitan sin natuin sin kan palsain fa, mes hi mi'ki natuin him palsai. Kais hi mikmok'om natuin lasi nane, so hi mimtau! 11:21 Fun kalu Uisneno kan mu'if lasi manekat neu hau tlae uf nane, of In kan mu'if lasi manekat neu ki amsa. 11:22 Es nane te ampanat nai Uisneno In nek mamun ma In matanin amsa. In matanin neu sin le natselan, mes In nek mamun neu ki. Kalu kahaf of ankeut nain ki amsa. 11:23 Ma neu atoni Yahudi nane, kalu sin nasnasan anbi nekan ka nateb knino of antapas nafani sin. Fun Uisneno anmui kuasat hen tapas nafani sin. 11:24 Fun leka anketu ki on atlaef na'ko bub fua mina fui le nasuil nok hi mo'et nane te antapas ki neu bub fua amneot. Nesin teni neu sin, le natuin sin na'in of antapas nafani sin neu sin bub fua mina in un. 11:25 Bae benu alki! Au lomi he nati' kais hi mak, hi mihin ale sa'. Fun anmu'i lasi tolo' mese le es ka nahinef. Au lomi he nati' hi mihine, fun to Israel sin bian namanub sin nekan talan te uf bian antam nalalien. 11:26 Onane te of namonib to Israel ok-oke, onle antui nani anbi Sulat Knino nak, "Kesel Afetin of nanoebon nem na'ko Sion, of In nait naneku ale mo'et amle'ut na'ko Nai Yakub. 11:27 Ma au mo'e fef bela ok sin on i, leka au ait uneku sin sanat." 11:28 Atoni Yahudi namusu nok Uisneno ma kan lomif hen simo Beno Alekot na'ko Uisneno. Mes neu lasi betis, Uisneno nek sin fun natuin sin babfin. 11:29 Fun Uisneno ka natofon fa neu In nek mamun ma In han haman nane. 11:30 Afi hi ka mituin fa Uisneno, mes muni i hi mipeni Uisneno In nek mamun, fun atoni Yahudi sin ka natuin fa Uisneno. 11:31 Onane amsa tomas i, sin ka natuin fa Uisneno he nati' hi mipeni Uisneno In nek mamun. Oke te sin amsa of napeni Uisneno In nek mamun. 11:32 Fun Uisneno natau sin alsin anbi nek manu', he nati' Uisneno nalile In amnaut neu sin alsin. 11:33 Tebes Uisneno In athoen, In hinen ma In keon, matani le'uf kun! Sekau es nahin In lasi fekat ka? Sekau es ansu' nit In mepu ka? 11:34 Sekau es nahin Usif tunan In nek tenab ka? Ai sekau hen fani afainekat neu In ka? 11:35 Ai sekau anfe sa' ka neu Usif tunan, he nati' In anseka nani ka? 11:36 Fun ale sa' nane na'ko Uisneno, ma natuin Uisneno ma neu Uisneno kun. So tanaeb Uisneno talan te nabal-bal! Amin.
12:1 Es nane bae benu alki! Natuin Uisneno In nek mamun, au fainek ki, he nati' hi mitulu hi aom on tulu honis ma knino le Uisneno anlomi. Hi luli besa neu Uisneno so onane. 12:2 Kais hi mituin pah pinan in lomin. So hi mite'un hi nekam, he nati' hi mihin Uisneno In lomin esle' me. Sa' le alekot, le Uisneno anlomi ma teme kun. 12:3 Natuin halinat knino, le Uisneno anfe nalali neu kau, au fainek ki alki. Kais hi mitenab ale lasi namnanu nesin na'ko sa' le hi mitenab. So hi mitenab natuin luku nek ateb knino, le Uisneno anbait nani neu ki mes-mese. 12:4 Fun onle anbi aof mese, anmu'i lokif taluf namfau. Mes ale lokif taluf nane sin mepu ka papmese fa. 12:5 Onane amsa hit, maski hit tamfau, mes aof mese anbi Neno Anan. Mes hit mes-mese on lokif taluf es neu es. 12:6 Onane amsa hit atmu'i halinat knino le nasuli es nok es natuin halinat knino le Uisneno anfe nani neu kit. Kalu halinat knino nane he teki lasi beno, hit tanaoba tani natuin hit nek ateb knino. 12:7 Kalu halinat nane neu tuthaes, leko hit atuthae. Kalu halinat nane neu het fain anoni, leko hit fe lasi noina. 12:8 Kalu halinat nane neu het fainek, leko hit fe lasi fainekat. Sekau le anfani abatis, so in nanaoba nani nok nek muti. Sekau anfani atopus ai ahel lanan, so in nanaoba nani nok makoet. Sekau le nalile lasi amnaut, so in nanaoba nani nok nek malinat. 12:9 Lasi manekat nane kais nok asafanu. Miskotun lasi amle'ut ma hi mo'e lasi alekot. 12:10 So hi manek es nok es on bae manekat ma hi milile mihunun fef tola ma han tola. 12:11 Hi mepu nok makoet ma kais him peh. Hi mepu hem tuthae Usif tunan natuin Smanan Knino. 12:12 Mimlil nai ambi afnekat neu Usif tunan, malan ambi hamu'it ma amhataniom ambi onen totis! 12:13 Ambab to knino sin nukat ma miloitan bale neu anao amnemat sin! 12:14 Amtek alekot neu atoni le anhamu'i ki, amtek alekot neu sin ma kais amsukat sin! 12:15 Malin nai mok ale atoni le anmalin. Ma amkae nai mok ale atoni le ankae! 12:16 Hi moni nekaf mese ma ansaof mese. Kais hi mitenab lasi amnanut, mes hi mibaunom neu ale lasi an-ana. Kais hi mitenab mak hi ahinet ki! 12:17 Kais him seunbanin lasi amle'ut meki lasi amle'ut. So hi mo'e alekot neu ale atoni ok-oke! 12:18 So hi mami he nati' him halan nekaf mok ale atoni ok-oke. 12:19 Bae benu manekat! Kais him seunbanin lasi amle'ut neu es. Him fe mainuan neu kuasat Uisneno, fun antui nani anbi Sulat Knino nak, "Usif tunan nakua a'an nak: Aseunbanit nane es Au, of Au es seunbanin." 12:20 Mes kalu ho musu namnah, hom fen he nah. Kalu in meon oe, hom fen oe hen ninu! Fun leka hi mo'e onane te, hi mitupu ai fla anbi in fufun. Oke te of in anmae. 12:21 Kais him paleob lasi amle'ut hen be'u ki, mes him be'u lasi amle'ut meki lasi alekot!
13:1 So ale atoni mes natuin ana' aplenat. Fun katitaf ana' aplenat le ka na'ko fa Uisneno. Ma ale ana' aplenat nane Uisneno es anlek nani. 13:2 Es nane, atoni le anlaban ana' aplenat, in laban Uisneno In lekat. Ma atoni le anmo'e onane, of napeni kasat Uisneno. 13:3 Fun atoni le anmo'e lasi alekot, kais namtausan ana' aplenat, al atoni le anmo'e lasi amle'ut es namtausan ana' aplenat. Ai him lomi he nati' kais mituin ana' aplenat ka? So ho mo'e alekot nai of ho mupeni pules na'ko ana' aplenat. 13:4 Fun ana' aplenat nane, Uisneno In ate, le hen meup alekot neu ki. Mes kalu hi mo'e lasi amle'ut, mimtau nai. Fun ana' aplenat neki suni nane ka son-sona fa. Ana' aplenat nane Uisneno In ate, le he neki to'as Uisneno neu ale atoin amo'e amle'ut sin. 13:5 Es nane te hit mes tatuin ana' aplenat, ka al fa natuin kasat Uisneno, mes natuin hit nek amnono knino. 13:6 Ma natuin lasi nane amsa him baen noni poni. Fun ana' aplenat le nanaoba mepu nane, Uisneno ameput sin. 13:7 Es nane te him baen neu ana' aplenat sa' le mes hi hem baen noni poni neu atoni le ansimo noni poni. Ma him baen noni nakaf neu atoni le ansimo noni nakaf. Mimtausan atoni le hi mes mimtausan ma amtola atoni le hi mes amtola mani. 13:8 Kais hi mitus sa' am sa' neu sekau amsa, mes hi manek es nok es. Fun atoni le in nek in aon bian, in natisi Plenat Knino. 13:9 Fun plenat knino nane esle': Kais hi mapaisa, kais hi mamaten, kais hi mibak, kais him sinmak. Ma plenat bian amsa, nameseb nani anbi plenat i le in hanan nak:; So hom nek ho aom bian onle hom nek ho aom. 13:10 Atoni le a nek in aon bian, of kan mo'ef amle'ut neu atoni nane. Es nane atoni le a'nek in aon bian in natisi Plenat Knino. 13:11 Hi mes minaoba ale lasi i, fun hi mihin lasi muni i, nak leku antelen he nati' him fen mi'ko tupas. Fun tomas i lasi honis anhaumakan nesin kit na'ko afi hit fe atam teu nek ateb knino. 13:12 Fai hen finien ma neno hen meuen. Es nane te hit tabela hit mo'et mesokan ma atpake hit bale manuat meusine. 13:13 So hit moni nok alekot, onle hit mo'e tani anbi manas. Kais hit mo'e tolas malinat, kais hit mauf tua, kais hit mo'e lasi amolemut ma kais hit mo'e lasi kake, kais hit matoe ma kais hit manek nanan. 13:14 Mes so hit pake Usif Yesus Neno Anan on bale manuat meusine. Ma kais hit mo'e tatuin aof sanat in sinmakan he taminab in lomin.
14:1 Atoni le nekan nateb knino anlimoe, him simo in nok alekot. Kais hi mimolok in lasi. 14:2 Anmu'i atoni le nateb anbi in nekan he nah ale mnahat huma-huma. Mes anmu'i atoni bian le nekan nateb knino anlimae al in nah utan. 14:3 Atoni le in nah, kais musan atoni le in ka nah. Ma atoni le ka nah, kais amfain alef lasi neu atoni le in nah. Fun Uisneno ansimo atoni nane. 14:4 Hi sekau ki ka, talan te him fain alef lasi neu atoni bian in ate ka? Ate nane hen hake ka, ai hen bel, nane in tuan in lasi. Mes of in anhake nabala, fun Usif tunan anmu'i kuasat he nahakeb in. 14:5 Anmu'i atoni le in kius neno es naleko nesi na'ko neno bian. Mes atoni bian sin kius ale neno nane papmese. So ale atoni mes-mese namneo-namneo nateb kun anbi in nekan nanan. 14:6 Atoni le natenab antom neno me, in anmo'e nani neu Uisneno. Atoni le in nah ale sa'-sa', in mo'e onane he nanaeb Usif tunan,, fun in natulu nekan neu Uisneno natuin mnahat nane. Onane amsa atoni le in nah al mnahat me; atoni nane nanaeb Usif tunan ma natulu nekan neu Uisneno. 14:7 Fun kan mu'if atoni le anmoni neu in aon; ma kan mu'if atoni le anmate neu in aon. 14:8 Kalu hit moni, hit moni neu Uisneno. Ma kalu hit mate, hit mate neu Uisneno. Es nane te het moni ka ai het mate ka, Usif tunan ini kit. 14:9 Neno Anan anmate ma anfen anfani, he nati' In fain Usif neu ale atoin amates ma neu ale atoin amonit. 14:10 Mes ho, nansa hom fain alef lasi neu ho bae ka? Ai nansa' es ho mumaeb ho bae ka? Fun hit alkit of athake atbi Uisneno In atoko alef lasi. 14:11 Fun antui anbi Sulat Knino nak, "Usif tunan nakua a'an nak, Au moni, ale atoni of anli'tu anbi Au matak ma ale atoni of naliatas Uisneno." 14:12 Onane te ale atoni anbi kit of natae kun in lasi neu Uisneno. 14:13 Es nane te kais hit fani alef lasi es neu es! Mes leko nesi hi mituin lasi i: Kais him fani fatu astunas ai fatu aktulis neu hi bae. 14:14 Au uhin ma au uteb anbi Usif Yesus, nak katit fa sa' esle' nalahion kun. Al neu atoni le nak, sa'af nane lahi, of lahi neu atoni nane. 14:15 Fun kalu ho mumenab ho bae in nekan natuin sa' le ho muah nane, onane te ho ka monim tenif mutuin lasi manekat. Kais ho mule'un ho bae natuin ho mnahat, natuin Neno Anan anmate neu in. 14:16 Es nane sa' le hi mak naleko, kais mimautu he nati' atoni bian na'uab nale'un nani. 14:17 Fun Plenat Uisneno nane ka lasi mnahat fa ai lasi mninut; mes so mansian natuin Uisneno lomin, ma halan nekaf ma malinat natuin Smanan Knino. 14:18 Atoni le antuthae Neno Anan onane, atoni nane anhalin Uisneno ma napeni kan tola na'ko atoni bian. 14:19 Es nane te hit mo'e lasi alekot le neki halan nekaf ma antam ota neu he nafena es nok es. 14:20 Kais ho mule'un mepu Uisneno natuin lasi mnahat. Ale mnahat nane leko, mes amle'ut neu atoni le natuin ini mnahat, anfani aktulis neu atoni bian. 14:21 Leko nesi kais ho muah sisi, ai miun tua ai ho mo'e sa' le anfani aktulis neu ho bae. 14:22 Hom na' mumepan lasi ateb knino le ho mu'i, neu ho aom ambi Uisneno In human. Ua alekot neu atoni le ka nafekaf lasi neu in aon, bi lasi le in natenab nak leko. 14:23 Mes atoni le nekan na'oni, kalu in nah, in simo nalali lenat neu in aon; fun in kan mo'ef lasi nane natuin nek ateb knino. Fun ale sa' le ka natuin fa nek ateb knino, nane sanat.
15:1 Hit apalsait abe'it neu Uisneno mes atsutai atoni alima'et le ka nabe'if ma kais hit taim lasi alekot neu hit aok. 15:2 So hit es-es athalin hit aok bian sin nekan neu sin alekot, he nati' sin palsait neu Uisneno anmatane. 15:3 Fun Neno Anan amsa ka naim fa alekot neu In aon, mes on antui nani anbi Sulat Knino nak, "Ale u'uab amle'ut le sin antek nani neu ko, antom neu Kau." 15:4 Ale lasi le antui nani anbi Sulat Knino, nane he nanoina kit. Fun ale lasi noina le hit simo na'ko Sulat Knino anhatani kit neu lasi afnekat, ma halinat neu Uisneno. 15:5 So Uisneno le lasi asutais ma ahalinat in un, anfe ki nek mese natuin Neno Anan Yesus In lomin; 15:6 he nati' nok nekaf mese ma hanaf mese hi miliatas Uisneno, hit Usif Yesus Neno Anan In Amaf. 15:7 Es nane te hi masimo es nok es nok nek malinat, onle Neno Anan amsa ansimo ki neu he miliatas Uisneno. 15:8 Fun mimnau nai, nak Neno Anan antuthae atoni Yahudi he nalile nak Uisneno na'ki anbi In fef ba'an neu hit am ufenu. 15:9 Ma hen fe manuan neu ale uf-uf he naliatas Uisneno, natuin In manekan onle antui nani anbi Sulat Knino nak, "Onane te of Au uliatas Ko anbi uf-uf sin atnanan, of au sulat Sit Pules neu Ho kanam." 15:10 Ma in talun nak, "Mimlil nai hoi uf-uf mok In to tafa sin." 15:11 Ma anteni nak, "Muliatas Usif tunan, hoi ale uf-uf ma maut nai he ale mansian nanaeb In." 15:12 Ma Nai Yesaya nak anteni, "Atoni mese of anbol na'ko Nai Isai in sufan, le of naplenat uf-uf, uf-uf nane of nafnekan neu In." 15:13 So Uisneno lasi afnekat in un, nahenu ki nok malinat ma halan nekaf anbi hi nek ateb knino, he nati' hi mithoe ambi lasi afnekat natuin Smanan Knino In matanin. 15:14 Bae benu alki! Au uhin lek-leko antom ki, fun nahenu ki nok lasi alekot ma lasi hine ma hi mafainek es nok es. 15:15 Mes antom ale lasi, au umnauba ki nok amneot anbi sulat i, natuin Uisneno anfe kau mepu i. 15:16 Au hake on Neno Anan Yesus In ameput le ansonu kau neu uf-uf le kan tamaf nonot Yahudi. Ma au hake on Ana' Lasi Fuat, le an etun Beno Alekot na'ko Uisneno, he nati' ale atoni le kan tamaf nonot Yahudi, Uisneno ansimo sin on fua tulu le malomi neu In, le naknino ok neki Smanan Knino. 15:17 Es nane te au uliabok anbi Neno Anan natuin au mepu neu Uisneno. 15:18 Au u'uab onane, al natuin lasi le Neno Anan anmepu nalali natuin kau, he nati' ale uf bian, sin natuin Uisneno anbi uab ma mo'et, 15:19 ma natuin ale taka ma lasi amkakat ma natuin Smanan Knino in matanin. Beno Alekot antom Neno Anan au etun ulali nok alekot funam natef na'ko Yerusalem talan te Ilirikum. 15:20 Au lomi he etun Beno Alekot na'ko Uisneno anbi bale le atoni fe ka nenaf antom Neno Anan. Fun au ka lomif he ufena mepu anbi atoni bian in sukit. 15:21 Mes onle antui nalali anbi Sulat Knino nak, "Atoni le fe kan simof beno antom In, of sin nit In, ma atoni le fe ka nenaf, of sin nahinen." 15:22 Es nane te au useni piut he eti kius ki. 15:23 Mes tomas i au ka mu'i tenif bale he mepu bi pah i. Ma ton fauken au lomi he eti kiso ki. 15:24 Leka au he nao eu pah Spanyol, au ufnekan he eti ok nane ma he u'eku ok ki he nati' umlil ok ki kle'o. Oke te him tulun kau he mimat kau neu pah Spanyol. 15:25 Mes tomas i au he nao eu Yerusalem he eki tuntakus neu to Uisneno anbi nane. 15:26 Fun tolas knino Makedonia ma Akhaya sin malomin hen sonu tuntakus neu bae benu amamu'it anbi to Uisneno bi Yerusalem. 15:27 Sin malomin nok nek malinat hen mo'e lasi nane. Namneo sin mes hen tuntaku bae benu amamu'it anbi Yerusalem. Fun ale atoni le kan tamaf nonot Yahudi sin napeni manekan Uisneno na'ko atoni Yahudi. Es nane te ale atoni le kan tamaf nonot Yahudi sin mes hen tuntaku atoni Yahudi neki maus pah pinan. 15:28 Leka au usopu mepu i, ma una'at ulali tuntakus le sin nabuab nalali nane neu sin le anbi Yerusalem, of au nao eu Spanyol utuin hi kuan. 15:29 Ma au uhin, leka au eti eu ki, of au eti nok Neno Anan In athoes anaek neu ki. 15:30 Mes au fainek ki bae, natuin Neno Anan, hit Usi, ma natuin Smanan Knino, he nati' him bab kau anbi onen totis neu Uisneno. 15:31 Him onen toti he nati' Uisneno nafetin kau na'ko atoni ka apalsait sin anbi Yudea, oke te au tuthaes neu Yerusalem, to Uisneno anbi nane ansimo nok nek malinat. 15:32 Onane te kalu Uisneno anlomi, au et eu ki nok nek malinat, oke te au umlil ok ki. 15:33 So Uisneno, halan nekaf in un, nok ki alki! Amin.
16:1 Au toit ki he nati' him kius kit hit feto bi Febe, le antuthae tolas knino anbi Kengkrea. 16:2 Him simo in ambi hit Usi, onle to knino ma amfe neune sa' le in anlabu nani. Fun in bab nalali atoni namfau ma in anbab kau amsa. 16:3 Hi mitiaba au tabe neu bi Priska ma neu Nai Akwila, au bae knino sin le anmeup nok kau anbi Neno Anan Yesus. 16:4 Ala kle'o te sin mate natuin he nahoni kau. Au tek alekot anaek neu sin. Ka al fa au, mes ale tolas knino na'ko uf bian le kan tamaf nonot Yahudi, sin amsa antek alekot neu sin. 16:5 Au sonu tabe amsa neu tolas knino le anbi sin ume. Au sonu tabe neu au bae manekat Nai Epenetus. In atoni ahunut le anpalsai neu Neno Anan anbi pah Asia. 16:6 Au sonu tabe neu bi Maria, le anmepu matani neu ki. 16:7 Au sonu tabe neu Nai Andronikus ma Nai Yunias. Sin nua sin uf mese nok kau ma sin antam o'of nok kau. Afi au fe ka palsai fa neu Neno Anan sin palsai nahunun kau. Sin nua sin amsa makana anbi ale haef knino sin. 16:8 Au sonu tabe neu Nai Ampliatus bae manekat anbi hit Usi. 16:9 Au sonu tabe neu Nai Urbanus, au bae manekat le anmeup nok kau anbi Neno Anan. Ma au tabe neu Nai Stakhis au bae manekat. 16:10 Au sonu tabe neu Nai Apeles, le nalan sutais anbi Neno Anan, Au sonu tabe neu sin le anbi Nai Aristobulus in ume. 16:11 Au sonu tabe neu Nai Herodion, au bae manekat le uf mese nok kau. Au sonu tabe neu sin anbi hit Usi, le namaika anbi Nai Narkisus in ume. 16:12 Au sonu tabe neu bi Trifena ma bi Trifosa, le nahaebok anbi hit Usi In mepu. Au sonu tabe neu Nai Persis, au bae manekat, le nahaebon anbi hit Usi in mepu. 16:13 Au sonu tabe neu Nai Rufus, atoni mabeti anbi hit Usi. Ma neu in ainaf amsa le anfani on au ain honi. 16:14 Au sonu tabe neu Nai Asinkritus, Nai Flegon, Nai Hermes, Nai Patrobas, Nai Hermas, ma au bae knino le nabua nok sin. 16:15 Au sonu tabe neu Nai Filologus ma Nai Yulia, Nai Nereus nok in fetof ma Nai Olimpas ma neu ale atoni apalsait le nabua nok sin. 16:16 Hi matabe es nok es nok manekat knino. Neno Anan In tolas knino ok-oke ansonu tabe neu ki. 16:17 Bae benu manekat! Au fainek ki, he nati' him pantom mi'ko ale atoni le neki suli ma koke antom lasi palsait neu Usif tunan. Lasi nane nasuli nok sa' le nanoina nalali neu ki. So leko hi mi'lo mi'ko ale atoni nane sin. 16:18 Fun ale atoni nane, sin kan mepun fa neu Neno Anan, hit Usi, mes sin anmepu neu sin taikenu. Ma sin fuil ale atoni nek muti, neki sin uab amasat ma sin a'at aminat. 16:19 Beno antom hi nek atahas, ale atoni ok-oke sin nen nalalien. Es nane te au malin neu ki. Mes au lomi he nati' hi nek ahinet ki neu ale lasi alekot ma hi nek muti neu ale lasi amle'ut. 16:20 So Uisneno, halan nekaf in un, naskuku ma nakpete santuaf ambi hi haem nupun. So hi ala ki amsimo tetus na'ko Yesus Neno Anan hit Usi! 16:21 Nai Timotius, au bae knino le anmeup nok kau ansonu tabe neu ki. Onane amsa Nai Lukius, Nai Yason ma Nai Sisopater, au bae knino sin le uf mese nok kau. 16:22 Au Nai Tertius kau, le au es a'tui sulat i. Au sonu tabe neu ki anbi hit Usi. 16:23 Nai Gayus ansonu tabe neu ki. Au umaika bi in ume ma au ok tolas knino amo'e klei anbi in ume. Nai Erastus, apanat noni kuan ma hit bae Nai Kwartus, ansonu tabe neu ki. 16:24 So hit Usif Yesus Neno Anan anfe tetus neu ki alki. Amin. 16:25 Neu In kun, le anmu'i kuasat hen hatani ki, natuin beno knino le au etun ki ma etus antom Yesus Neno Anan. Au etun ki beno nane natuin sa' le Uisneno, nalile nani ma ka nahine fa na'ko batan-batan. 16:26 Mes tomas i, natuin Uisneno, In lekat nalilon neu ale uf-uf natuin Mafefa knino sin sulat, antopu sin neu nek ateb knino -- 16:27 neu In, lo Uisneno mese, le nahenu nok lasi hine. Natuin Yesus Neno Anan, han aliatas neu In talan te nabal-bal! Amin. Na'ko, Nai Paulus, Neno Anan Yesus In ate.
1:1-3 Neu tolas Uisneno anbi Korintus le naknino sin anbi Neno Anan Yesus ma le anboin sin hen fain to knino ma ale atoni anbi me-me le antek Yesus Neno Anan, hit Usi, In kanan, fun sin Usif ma hit Usif amsa. Au, Nai Paulus ma hit bae Nai Sostenes, mifnekan he nati' Uisneno, hit Ama ma Usif Yesus Neno Anan anfe tetus ma aomina neu ki alki. Au tui ki sulat i on Neno Anan Yesus In haef knino, le anboin kau natuin Uisneno In lomin kun. 1:4 Au utulu nekak neu Uisneno piut-piut neu ki, fun hi mipeni halinat knino na'ko Uisneno natuin Neno Anan Yesus. 1:5 Fun anbi In, him fain atoin amu'it anbi ale sa'. Anbi ale a'at ma uab ma anbi ale lasi hine, 1:6 natuin saksit antom Neno Anan, le na'kiab nani anbi ki. 1:7 Onane te hi kam labu fa tetus neno le him pao Yesus Neno Anan, hit Usi nalilon kun. 1:8 In amsa of anhatani ki tal namsopun, talan te hi ka kobe ki fa bi neno Yesus Neno Anan hit Usif nanoebon anfain nem. 1:9 Uisneno, In aki'at kun, le anboin ki he mimesbom mok In Anmone Yesus Neno Anan, hit Usif. 1:10 Bae benu manekat! Au fainek ki anbi Neno Anan Yesus, hit Usif he nati' hi lomif mese ma hanaf mese; ma kais anmu'i lasi matoes anbi ki. So hi mafut lek-leko he nekaf mese ansaof mese. 1:11 Bae benu alki, au nen hanaf na'ko bi Klo'e in ume nanan sin nak anmu'i lasi matoes anbi ki. 1:12 A'uab on i, fun hi es-es mi'uab mak, "Au utuin Nai Paulus. Ai au utuin Nai Apolos. Ai au utuin Nai Kefas. Ai au utuin Neno Anan." 1:13 Leka me Neno Anan anbation ka? Naponi Nai Paulus anbi hau nehe neu ki ka? Ai nasub ki oe anbi Nai Paulus kanan ka? 1:14 Au utulu nekak neu Uisneno fun au ka usub fa oe neu atoni mese, al Nai Krispus ma Nai Gayus, 1:15 talan te kan mu'if atoni le he na'uab nak, nasub ki oe anbi au kanak. 1:16 Namneo, al au usub oe neu Nai Stefanus nok in ume nanan sin. Mes au ka uhine tenif he usub oe neu atoni bian. 1:17 Fun Neno Anan ansonu kau ka neu fa he usub oe mes ansonu kau he etun beno knino. Ma nane amsa ka nok fa a'an ahinet, he nati' kuasat na'ko Neno Anan Ini maten anbi hau nehe kais anfani son-sona. 1:18 Fun beno antom Neno Anan Ini maten anbi hau nehe nane anfain lasi amonot neu ale atoni le Uisneno of nale'un sin. Mes beno nane anfani Uisneno In matanin neu kit le namonib kit. 1:19 Fun antui nani anbi Sulat Knino nak, "Au of ule'un atoin ahinet sin lasi ahinet, ma atoin ahinet sin ak'elo of Au uneuk ani." 1:20 Ma'ota sa' ka ale atoin amui lasi hine nane? Ma'ota sa' ka neu sin ahinet nane? Ma'ota sa' kaale atenab ahinet batan i? Uisneno nalile nalali nak lasi hine mansian nane lasi amonot kun! 1:21 Fun maski mansian in hinen onme amsa, in ka nabe'i nahin Uisneno natuin in hinen kun. Mes natuin Uisneno anlomi In namonib ale atoni le nekan nateb knino neu In natuin etus beno knino le sin nak lasi amonot neu pah pinan. 1:22 Atoni Yahudi sin anlomi lasi taka ma atoni Yunani sin nami lasi ahinet. 1:23 Mes hai le i al haim etun antom Neno Anan Ini maten anbi hau nehe. Beno nane anfain faut aktulis neu atoni Yahudi; ma anfain lasi amonot neu atoni le kan tamaf nonot Yahudi. 1:24 Mes neu ale atoni le Uisneno anboin nalali sin, he atoni Yahudi ka, ai ka atoni Yahudi, Neno Anan nane Uisneno In matani ma Uisneno In lasi ahinet. 1:25 Fun lasi amonot neu Uisneno, nane lasi ahinet le nesin mansian in lasi ahinet. Ma lasi lima'et neu Uisneno, nane lasi abe'it le nesin mansian in lasi abe'it. 1:26 Bale benu alki! Hi mimnau, le afi anboin ki nane, hi onme. Atoin ahinet ka namfauf, atoin malasi ka namfauf, atoin makana ka namfauf natuin tenab mansian. 1:27 Mes Uisneno anbeti le amonot neu pah pinan, he namaeb atoin ahinet sin. Ma Uisneno anbeti le alima'et neu pah pinan, he namaeb atoin abe'it sin. 1:28 Uisneno anbeti le ka makana ma amle'ut neu pah pinan ma ka ma'ota sin, he naneku ale lasi ma'ota neu pah pinan. 1:29 Nok lasi nane kan mu'if atoni mese he nanaebon anbi Uisneno In human. 1:30 Mes natuin Uisneno hi mimesbom mok Neno Anan. Uisneno anfe Neno Anan neu kit, he nati' hit lasi hine nabel on anbi Neno Anan. Fun Neno Anan es naleko nafani kit nok Uisneno, ma nafani kit on to mabeti neu Uisneno. 1:31 Fun antui nani anbi Sulat Knino nak, "Atoni le naliabon, so naliabon anbi hit Usif."
2:1 Bae benu alki! Leka au aum eu ki, au ka ekif a'at amasat ai lasi ahinet he etun ki Uisneno In saksit. 2:2 Fun au ufek ulali he kais uhin sa'-sa' anbi ki, al Usif Yesus Neno Anan le anmate nalali anbi hau nehe. 2:3 Fun au amsa aum eu ki anbi lima'et ma amtaus ma lilitai nok. 2:4 Beno le utiaba neu ki, au ka ekif uab lasi ahinet he fuli ki, mes au eki Smanan Knino In matanin. 2:5 Au moe onane, he nati' kais him futun hi nek ateb knino neu lasi ahinet mansian, mes neu Uisneno In matanin kun. 2:6 Maski onane hai mi'uab lasi ahinet neu atoni le nahin. Mes lasi ahinet nane ka pah pinan ini fa ma ka na'ko fa ana' aplenat batan i, esle' amui kuasat le of namneku. 2:7 Mes lasi ahinet le hai mi'uab nane, lasi ahinet na'ko Uisneno, le natolo' ma ka mahine fa. Mes Uisneno naloitan nani neu hit alekot, nahunu na'ko afi nabela pah pinan. 2:8 Katit fa es na'ko ana' aplenat batan i le nahin lasi nane. Fun kalu sin nahine, sin ka napeti fa hit Usif Apinat nane. 2:9 Mes onle antui nani anbi Sulat Knino nak, "Uisneno naloitan ale sa' neu atoni le sin nek In. Sa' le atoni pah pinan ka nitaf neki matan ma ka nenaf neki luken ma ka natenab fa neki nekan." 2:10 Mes Uisneno nalile nani neu kit natuin Smanan Knino. Fun Smanan Knino nahin ale lasi le natolo' anbi Uisneno. 2:11 Sekau anbi atoni pah pinan le nahin atoni in nekan, so in asmanan le anbi in nopan kun. Onane amsa katit fa atoni le nahin sa' le anbi Uisneno In nekan, so Uisneno Ini Smanan Knino kun. 2:12 Fun hit ka simof pah pinan ini smanan, mes hit simo Uisneno Ini Smanan Knino; he nati' hit tahin lasi sa' le Uisneno anfe neu kit. 2:13 Es nane te leka hai mi'uab lasi antom Uisneno neu ale atoni le anmu'i Smanan Knino; hai ka mi'uab fa natuin lasi ahinet mansian mes natuin Smanan Knino. 2:14 Mes atoni pah pinan kan simof lasi le na'ko Uisneno In Smanan Knino, fun lasi nane amonot neu in. Atoni nane in ka nahin fa lasi nane, fun na'uab nani neki Smanan Knino. 2:15 Atoni le anmu'i Smanan Knino in nahin ale lasi, mes neu In atoni bian ka nahinef. 2:16 Fun antui nani anbi Sulat Knino nak, "Sekau es nahin Uisneno In nekan ka, he nati' anfainek In?" *Mes hit mu'i Neno Anan In nek tenab.
3:1 Ma au amsa bae benu alki! Afi au ka u'uab ok ki fa on atoni le anmu'i Smanan Knino. Mes au u'uab ok ki on atoni le anmoni anbi nekaf pah pinan, le fe ka nanae fa anbi Neno Anan. 3:2 Es nane te au uinut ki susu ma ka fe ki fa maka fun hi fe ka mibe'if hem simo mani. Ma tomas i amsa hi fe ka mibe'i fa hem simo mani. 3:3 Fun hi fe moni ambi nekaf mansian. Leka hi fe manek nanan ma matoe es nok es, lasi nane ansaksi nak hi fe moni ambi nekaf pah pinan. 3:4 Fun leka es na'uab nak, "Au haek ok Nai Paulus," ma bian na'uab nak, "Au haek ok Nai Apolos," lasi nane ansaksi nak hi fe moni ambi nekaf pah pinan. 3:5 Nai Apolos nane sekau? Nai Paulus nane sekau? Hai al amnek lasi Uisneno le minoina ki he nati' hi nekam nateb neu In. Hai al minaoba mepu le In anfe nani neu kai. 3:6 Au sen ma Nai Apolos anponi ai anpofi, mes Uisneno es namonib. 3:7 Es nane te lasi abainesit ka es fa asenat ai aponit, mes so Uisneno le In es namonib kun. 3:8 Asenat ma aponit sin papmese; ma of sin es-es ansimo baen natuin sin mepu kun. 3:9 Fun hai on atoni ameup mibua mok Uisneno; ma hi onle lele Uisneno. Hi onle ume le nafena neu Uisneno amsa. 3:10 Natuin Uisneno In manekan, le anfe nani neu kau, au on atoin ahinet anbi lasi fena, au ubela ume nane in sukin, ma atoni bian nafena anbi sukit nane. Atoni mes-mese so anpanat, in he nahakeb ai nafena anbin onme. 3:11 Fun katitaf atoni mese la nabe'i he nabela sukit bian, na'ko sukit le Uisneno nabela nani, esle' Yesus Neno Anan kun. 3:12 Atoni le nahakeb anbi sukit nane neki mnatu ka, noin muti ka, fatu ma'upa ka, hau ka, hu meto ka ai aen ta'u. 3:13 Es-es in mepu of nalilon anbi neno hit Usif nanoebon anfain nem. Fun ai anmoe es-es in mepu nalilon. Ai of nalilon ma ansu' sin mepu nane. 3:14 Kalu sin mepu le nafena nane kan putuf ma anhake nabala, of sin napeni baen. 3:15 Mes kalu in mepu anput, of in anluki, in of anmoni mes onle atoni le anfin na'ko ai. 3:16 Ati hi ka mihin fa nak Uisneno In ume knino es hi ma Uisneno In Smanan Knino natua anbi ki? 3:17 Leka anmu'i atoni le nale'un Uisneno In ume, Uisneno of nale'un in. Fun Uisneno In ume nane knino kun ma Uisneno In ume esle' hi. 3:18 Kais anmu'i atoni le naloeb in aon. Kalu anmu'i atoni anbi ki le in nak in ahinet natuin pah pinan i, so in fain amonot fe, he nati' in fain ahinet. 3:19 Fun lasi ahinet pah pinan i, nane lasi amonot neu Uisneno. Fun antui nani anbi Sulat Knino nak, "In hek atoin ahinet anbi in lasi ak'elo." 3:20 Ma antui nani anbi Sulat Knino nak, "In hek atoin ahinet sin nek tenab nane son-sona kun." 3:21 Es nane te kais anmu'i atoni pah pinan le naliabon, fun ale sa' nane anfe nani neu ki; 3:22 he Nai Paulus, Nai Apolos, Nai Kefas, pah pinan, lasi amonit, lasi maten, batan i ai batan amnemat. Ale sa' nane ok-oke hi ini kim. 3:23 Mes hi, Neno Anan Ini ki ma Neno Anan nane Uisneno Ini.
4:1 Onane te so him kius kai on Neno Anan In ate le nana'at neu kai Uisneno In mepu tolo' le es fe ka nahinef. 4:2 Of namuni te antoit na'ko amnek lasi sin, nak sin nalilok on atoin alekot. 4:3 Neu au, nane au ak lasi ana', hi es hem lef au lasi ai mansian es hen lef au lasi. Ma au amsa ka ufekaf au lasi. 4:4 Fun namneo au ka uhin fa sa', mes ka namneob kau fa natuin lasi nane. In kun es anlef au lasi esle' hit Usi. 4:5 Es nane kais him lef es in lasi kalu leku fe kan tiaf. Him pao fe talan te Usi nanoebon anfain nem. In of antana ale lasi le natolo' anbi mesokan. Ma In of nalile ale lasi le natenab anbi sin nekan. Bi leku nane atoni mes-mese ansimo aliatas na'ko Uisneno. 4:6 Bae benu alki! Fun natuin hi, au u'uab lasi i antom neu kau ma neu Nai Apolos. Au u'uab onane he nati' hi minoina lasi le nak, "Kais him lef atoni in lasi neis na'ko le antui nalali." Onane te kan mu'if atoni mese anbi ki he naliabon ma anpules atoni bian ma nabaun atoni bian. 4:7 Fun sekau es nak, hom nesin atoni bian ka? Ma sa' le hi mu'i, le hi kam simo fa na'ko Uisneno? Ma kalu him simo te, nansa es hi miliabom onle hi kam simo fa ka? 4:8 Him pet ma mimsen milalien, him fani atoni amu'it, him sae kesel. Mes hai kahaf. Alekot mese kalu namneo onane, nak him sae kesel he nati' hai amsa amsae kesel mok ki. 4:9 Fun natuin au nek tenab, Uisneno anfe neu kai, haef knino bale le ka makana onle atoni le napeni le'at neu maten ma haim fani lasi bae neu pah pinan, neu ahake neno tunan ma neu mansian. 4:10 Haim fain amonot natuin Neno Anan, mes him fain ahinet natuin Neno Anan. Haim fain alima'et, mes him fain abe'it. Him fain atoni makana, mes hai olof kai. 4:11 Talan te leku i, hai mimnah ma meno, hai ka mu'if tainusat, hai mipeni bisot ai tepos ma hai ka mu'if bale he mimaika. 4:12 Hai meup kim meki hai nimam he mipeni mnahat. Kalu na'akan kai, haim tek alekot neu sin. Kalu anhamu'i kai, haim seusaban sin. 4:13 Kalu sin tek nale'un hai kanam, haim simo nok nek alekot. Haim fain onle knuntu ai malafu pah pinan i; talan te leku i hai onle malafu na'ko ale sa'. 4:14 Au tui lasi i ka natuin fa he umaeb ki, mes he fainek ki onle au anhenu ki. 4:15 Fun maski hi mu'i anoni nifun bo'es anbi Neno Anan, mes kan mu'if le anfani amaf. Al au es anfain amaf neu ki anbi Neno Anan, natuin beno knino le au etun neu ki. 4:16 Es nane te au fainek ki, he nati' him kiso heta ambi kau! 4:17 Natuin lasi nane au sonu ki Nai Timotius onle au anah le au nek ani ma na'ki anbi hit Usif, In of namnauba ki neu au monik anbi Neno Anan Yesus, onle au unoina neu ale tolas knino anbi me-me. 4:18 Mes anmu'i atoni fauk anbi ki le namoko'ok fun sin natenab nak of au ka eti tenif eu ki. 4:19 Mes kalu Usif anlomi, of au et laba eu ki. Of au uhin, ka al fa atoin amoko nane sin uab, mes sin matani amsa. 4:20 Fun Plenat Uisneno nane ka al fa na'ko uab mes na'ko kuasat ma matani. 4:21 Neu, him loim sa' ka? Au et eu ki eki fainekat matani on ue, ai eki lasi manekat ma nek aklati ka?
5:1 Au upeni hanaf nak, anmui lasi kake anbi ki, ma lasi kake nane ka mapeni fa anbi uf-uf le ka nahinef Uisneno. Fun lasi amle'ut nane, nak anmui atoni le anmoe lasi kake nok in amaf in fel. 5:2 Maski onane amsa hi mimok'om. So leko nesi hi minu'om ma amli'u mipoitan atoni le anmoe lasi nane na'ko hi atnanam. 5:3 Fun natuin aof au ka ok ki fa, mes natuin smanaf -- onle au ok ki -- au ufek ulali atoni le anmoe lasi nane in lasi. 5:4 Leka hit tabua atbi Smanaf, hi mok kau ambi Yesus, hit Usif In kuasat, 5:5 atoni nane hit tana'at anbi Usif Yesus In kanan neu santuaf, he nati' in aon namle'u, mes namonib in smanan bi neno hit Usi nanoebon anfain nem. 5:6 Lasi le minaebom nane ka nalekof. Ati hi ka mihin fa uab le nak, laul haef kle'o anmahaib ut nane ok-oke ka? 5:7 Him polin laul haef mna nane, esle' laul haef sanat, he nati' him fain ut fe'u, le ka maselo fa nok laul haef sanat mna. Fun Neno Anan le anfani hit Bibi Paskah anlolo nalali. 5:8 Es nane te, aim nai hit moe tolas, ka nok fa laul haef a mna, ka nok fa laul haef ka alekot ma amle'ut, mes nok utunu' ka malaul haef le muti ma malomi neu Uisneno. 5:9 Au tui ulali ki anbi au sulat he nati' kais hi mimnono mok ale atoni le anmoe lasi kake nane. 5:10 Au uab i ka neu fa ale atoni amoe lasi kake anbi pah pinan i, ai ale atoin amaskini ai apakit, ai atoin aputal, ai atoni le naluli neu le'u. Fun kalu onane hi mes misaitan pah pinan i. 5:11 Mes lasi le au tui neu ki, he nati' kais hi mimnono mok atoni le antek in aon nak bae knino, mes amoe lasi kake, apakit, naluli neu le'u, antek nale'un es in kanan, amauf tua ai aputal. Kais hi miah mibua mok ale atoni nane sin. 5:12 Au ka mu'if kuasat he lef lasi neu atoni le kan tamaf tolas knino. Fun hi amsa al him lef lasi neu tolas knino. 5:13 Uisneno of anlef lasi neu atoni le kan tamaf neu tolas knino. Him li'u mipoitan ale atoni le anmoe lasi amle'ut nane na'ko hi atnanam.
6:1 Nansa' ka es anmu'i atoni le anbi ki, leka anmatoe nok atoni bian, in naim alef lasi anbi atoni ka apalsait ka? Nansa' in ka nao fa neu to knino sin ka? 6:2 Ai hi ka mihin fa ka, nak ale to knino of anfain alef lasi neu pah pinan ka? Ma kalu alef lasi pah pinan anbi hi nimam, hi ka mibe'i fa he mifek lasi an-ana ka? 6:3 Ai hi ka mihin fa ka, nak of hit fain alef lasi neu ahake neno tunan sin ka? Sa' anteni neu lasi le anbi hit monik neno-neno. 6:4 Leka anmu'i lasi onane anbol, ai hi he mina'at mani neu ale atoni le ka makana fa anbi tolas knino ka? 6:5 Au u'uab lasi i he umaeba ki. Kan mu'if atoni mese anbi ki, le nahin, he nafek bae knino sin lasi ka? 6:6 Mes bae knino es, in nao neu alef lasi ka apalsait he natam in bae knino bian in lasi ka? 6:7 Nok lasi le hi moe mani es nok es, nane namofu hi humam. Nansa es hi kam lomif hem sutai lasi ka amneot nane ka? Nansa' es hi kam lomif lasi le he nalukib ki ka? 6:8 Mes hi es amoe kim lasi ka amneot nane ma hi es milukib kim hi aom. Ma hi moe lasi nane neu hi bae knino sin. 6:9 Ai hi ka mihin fa, nak ale atoni le anmoe lasi ka amneot of ka napenif pa' ma nama anbi plenat Uisneno ka? Kais him sek ai am akman. Atoni le anmoe lasi kake, naluli neu le'u, atoni bife le anmapaisa, atoni le anmoeson, atoni le naseti, 6:10 abakat, apakit, amauf tua, le antek nale'un es in kanan ma atoin aputal of sin ka napeni fa pa', anbi Plenat Uisneno tunan. 6:11 Ma atoni fauk anbi ki afi sin moe onane. Mes muni i anmuti nalali ki na'ko sanat. Him fain on Uisneno In ini ki. Naleko nafani ki nok Uisneno, fun him palsai neu Usif Yesus Neno Anan ma natuin kuasat Smanan Knino na'ko hit Uisneno. 6:12 Fun atoni bian na'uab nak, "Ale sa' naleko neu kau." Mes neu kau ka ale lasi antam ota. Ale sa' nane leko neu kau, mes au ka umautu fa au aok hen fain ate neu ale sa'. 6:13 Fun atoni bian anteni nak, mnahat nane neu teik ma teik nane neu mnahat; mes Uisneno of nale'un sin nua sin. Mes aof nane ka neu fa lasi kake, mes hen mepu neu Uisneno. Ma Uisneno anpanat aof nane. 6:14 Uisneno, le nafena hit Usif na'ko amates, of nafena kit amsa neki In kuasat. 6:15 Ai hi ka mihin fa ka, nak hi aom nane lokif taluf na'ko Neno Anan? Of au aiti Neno Anan In lokif taluf he una'at neu lasi kake ka? Ka nabe'i! 6:16 Ai hi ka mihin fa ka, nak atoni le anmafut nok bife kake, anfain aof mese nok in ka? Fun antui anbi Sulat Knino nak, "Sin nua sin of anfain aof mese." 6:17 Mes atoni le anmafut nok hit Usi, of anfain smanaf mese nok In. 6:18 Miskotun hi aom na'ko lasi kake! Ale sanat bian le atoni anmoe, nane anbi in aon kotin. Mes atoni le anmoe lasi kake nane, in moe sanat neu in aon. 6:19 Ai hi ka mihin fa ka, nak hi aom nane Smanan Knino In ume, le namaika anbi ki; Smanan Knino le him simo na'ko Uisneno. Ma hi aom nane ka hi ini fa. 6:20 Uisneno ansos nalali hi aom, ma anbaen nafek in upan. Es nane te minaeb Uisneno meki hi aom.
7:1 Ma antom lasi le him tui neu kau, tomas i au he umolok neu ki. Leko nesi neu atoni, kalu in kan mafe. 7:2 Mes natuin lasi kake, leko nesi atoni mes-mese anmui kun in fe. Ma bife mes-mese anmui kun in mone. 7:3 So nai mone anmoe amnonot neu in fe, onane amsa fenai so anmoe amnonot neu in mone. 7:4 Fenai kan mu'if kuasat neu in aon, so in mone, onane amsa mone kan mu'if kuasat neu in aon, so in fe. 7:5 Kais hi maka'lon es nok es, so hi malomin neu neno tuk es, he nati' hi mipen manuan hem onen toti neu Uisneno. Oke te hi mibua amfani, he nati' santuaf kais ansu' ki fun hi ka malan mibe'if. 7:6 Au umolok lasi i neu ki on fainekat, ka on fa plenat. 7:7 Onane te, leko nesi ale atoni so onle au. Mes atoni mes-mese ansimo halinat na'ko Uisneno. Atoni es in halinat on i ma atoni bian in halinat onane. 7:8 Mes neu ale atoni le fe kan mafe ma neu ale bife banu sin, au fainek ki, leko nesi hi moni mes onle au. 7:9 Mes kalu hi ka malan mibe'i he miplenat hi aom, leko nesi hi mafe ma mamone. Fun leko nesi hi mafe ma mamone na'ko hi moe lasi seti. 7:10 Neu ale atoni le anmafe nalali au toti -- mes ka au fa, so Uisneno -- es naplenat, he nati' bife kais nasaitan in mone. 7:11 Ma kalu in nasaitan in mone, kais in mamone anteni, ai leko nesi anfani neu in mone. Ma atoni kais nasaitan in fe. 7:12 Neu atoni bian, au fainek, ka Usif tunan fa ak, leka anmu'i bae knino le anmafe nok bife le nekan ka nateb knino, mes bife nane anlomi hen moni nabua nokan, kais atoni nane anpolin in. 7:13 Ma kalu anmu'i bife mese le anmamone nok atoni le nekan ka nateb knino fa neu Neno Anan, mes atoni nane anlomi he nabua nokan kais in nasaitan atoni nane. 7:14 Fun atoni le nekan ka nateb knino nane, naknino nani natuin in fe, ma bife le in nekan ka nateb knino nane, naknino nani natuin in mone. Fun kalu ka onane, of hi anhin anfani an mesokan, mes tomas i sin anfani anah le naknino sin. 7:15 Mes kalu atoni le nekan ka nateb knino nane anlomi hen batiok maut he in bation. Anbi lasi onane bae mone ai bae feto ka mafutu' fa. Mes Uisnano anboin ki he nati' hi moni ambi halan nekaf. 7:16 Fun hoi fenai, leka me ho muhin, nak of ho ka mumonib fa ho mone ka? Ai hoi nai mone, leka me ho muhin, nak of ho ka mumonib fa ho fe ka? 7:17 Oke te so atoni mes-mese anmoni nabala onle Uisneno anlek nalali neune, ma anmoni anbi lasi onle neno Uisneno anboin sin. Lekat nane au fe ani neu ale tolas knino ok-oke. 7:18 Leka Uisneno anboin atoni mese anbi lasi helit, kais in naneku ini taka nane. Ma kalu anboin atoni mese le ka maheli fa, kais in antam neu lasi helit. 7:19 Fun lasi maheli ai ka maheli nane ka ma'ota fa. Lasi le antam ota esle' ampanat Uisneno Ini plenat sin. 7:20 Leko nesi atoni mes-mese anmoni nabala anbi lasi onle neno Uisneno anboin sin. 7:21 Kalu afi anboin ko on ate, kais ho mutenab lasi nane. Mes kalu ho mupeni manuan he nafetin ko, leko hom pake leku manuan nane. 7:22 Fun ate le anboin nani natuin hit Usif anbi In mepu tuthaes, nane atoin mafetin le hit Usi Ini kun. Onane amsa atoin mafetin le Neno Anan anboin nani, nane lo In ate kun. 7:23 Uisneno ansos nalali ki ma anbaen nafek nalali hi upam. Es nane te kais him fain ate neu mansian. 7:24 Bae benu alki! So atoni mes-mese nabala anbi Uisneno In human anbi lasi onle afi anboin in. 7:25 Tomas i antom neu ale bife ao temef. Neu sin au ka upeni fa plenat na'ko Uisneno. Mes au fainek ki on atoni le napeni amnaut na'ko Uisneno. 7:26 Fun tamnau ale susal ma malenat anbi batan i, au lomi, he nati' hit tabala onle hit monik. 7:27 Kalu ho mafe mulali, kais mami he mufetnom mu'ko bife nane. Kalu ho fe ka mafe kais ho mami he mafe. 7:28 Mes kalu ho mafe, ho ka mo'ef sanat. Ma kalu bife ao temef anmamone in kan mo'ef sanat. Mes atoni ma bife onane, of sin nasusbok, es nane au lomi he ufetin ki mi'ko susal nane. 7:29 Bae benu alki! Au umolok on i, natuin hit kat mu'i tenif manuan. Es nane na'ko leku i, atoni le anmafe so sin monin on sin fe kan mafe. 7:30 Ma ale atoni le sin ankae, sin moen on kan kaen fa. Ma ale atoni le anmalinan, sin mo'en on kan malinan fa. Ma atoni le ansos, sin mo'en on kan sosan fa sa'. 7:31 Ale atoni le anmoni anbi pah pinan, sin monin on ka nahinen fa sa'-sa'. Fun pah pinan le hit tahine i of anfin kun. 7:32 Au lomi, he nati' kais hi mi'unu nekam. Atoni le kan mafe, in natupu in nekan neu Usif In lasi, he nati' Usif anlomi in. 7:33 Atoni le anmafe, in natupu nekan neu lasi pah pinan, he nalomib in fe onme. 7:34 Onane te in nek nu'aon. Bife le kan mamone ma li'feto ao temef, sin natupu sin nekan neu Usif In lasi, he nati' Usif naknino sin aon ma sin smanan. Mes bife le anmamone, in natupu nekan neu lasi pah pinan, he nati' nalomib in mone onme. 7:35 Au umolok ale lasi i, natuin hi lasi alekot ma ka natuin fa au he ukain ki na'ko hi nek tenab. Au lomi he nati' hi moe lasi amneot ma alekot ma amtuthae hit Usif ka nok fa ekat. 7:36 Kalu atoni es natenab, nak in mo'et ka nalekof neu anfeto es, kalu in kan panat nabe'i in sinmakat, ma in lomi hen mafe nok an feto nane, maut he in moe sa' le in natenab nak lasi nane leko. Lasi nane in kan mo'ef sanat kalu sin mafe ma mamone. 7:37 Mes kalu anmu'i atoni le kan mu'if lasi seke hen moe onane, fun in natenab nok amneot anbi in nekan ma in nafek he kais in mafe nok anfeto nane, in mo'et nane leko. 7:38 Atoni le anmafe in mo'et nane leko, ma atoni le kan mafe in mo'et nane naleko nes. 7:39 Bife le anmamone nalali in futnon neu in mone leka in mone fe anmoni. Leka in mone anamte, in ao sona kun; ma nabe'i in mamone anten nok sekau le in anlomi lamu atoni nane atoni nek ateb knino. 7:40 Mes natuin au nek tenab, of in ma'ua a nesi kalu in kan mamone anteni fa. Ma au utenab, ak au amsa amu'i Uisneno In Smanan Knino.
8:1 Neu sisi le'u ai sisi fuat hit alkit tahin nak, "Hit mui nek ahinet." Nek ahinet onane anmoe kit he tamoko'ok, mes lasi manekat nane nafena kit. 8:2 Kalu anmu'i atoni esle' natenab nak, in mu'i "nek ahinet," nane in fe ka nahinef onle in anlomi. 8:3 Mes atoni le in nek Uisneno, Uisneno nahine. 8:4 Neu lasi tah sis le'u ai sis fuat hit tahine nak, "Kan mu'if le'u anbi pah pinan ma kan mu'if uisneno teta al Uisneno mese." 8:5 Namneo anmu'i sa' le antek nak, "uisneno," he abit neno tunan ai abit pah pinan -- ma namneo anmu'i "uisneno" namfau ma "usif tunan" namfau le onane -- 8:6 mes neu hit, al hit mu'i Uisneno mese, lo hit Ama; le In es anmoe ale sa' ma hit moni natuin In. Ma hit Uisneno amsa mese, lo Yesus Neno Anan, le anmoe ale sa' natuin In ma hit moni natuin In. 8:7 Mes ka ale atoni anmui nek ahinet nane. Anmu'i atoni le fe anfutnon neu lasi le'u, sin nah sisi nane on sis le'u. Ma natuin sin nek ateb knino fe anlimae, sin natenab nak lasi nane neik amle'ut neu sin. 8:8 "Mnahat nane ka neki kit het haumak Uisneno. Hit kat lukif, kalu hit ka tah, ma hit ka ta osaf kalu hit tah mnahat nane." 8:9 Mes him panat nai, he nati' kais hi mo'et nane anfain faut aktulis neu sin le sin nek palsait fe anlima'e. 8:10 Fun leka ho on atoin nek ahinet ko hom tok ma muah ambi uim le'u, oke te atoni le sin nek palsait anlima'e nit ko, of sin lomi amsa he nah sis le'u. 8:11 Onane te ho bae le in nek palsait anlima'e, le Neno Anan anmate neu in, of in namle'u natuin ho nek ahinet. 8:12 Fun kalu hi moe sanat onane neu hi bae sin ma hi mimenab sin nekan alima'et, nane ho moe sanat neu Neno Anan. 8:13 Es nane, leka mnahat anfain faut aktulis neu au bae, au ka uah a'tenif sisi talan te nabal-bal; he nati' kais au fain faut aktulis neu au bae.
9:1 Ait au ka atoni ao sona kau fa ka? Ait au ka haef knino kau fa ka? Ait au fe ka itaf Yesus, hit Usi ka? Ait hi le nane au ka mepu in nesan fa ka neu hit Usi? 9:2 Maski atoni bian ka nahin kau fa on haef knino, mes hi mihin kau on haef knino. Fun hi monim anbi hit Usi on malak na'ko au mepu on haef knino. 9:3 Kalu sin naim au sanat of au ak neu sin on i. 9:4 Ait au ka mu'if kuasat he simo mnahat ma mninut ka? 9:5 Ait hai ka mu'if kuasat he mok fenai Slani mese le nok kai anbi hai mepu ka? Onle haef knino bian anmoe ma Usif Yesus oilfenu ma Nai Kefas amsa? 9:6 Ai al au ma Nai Barnabas es he mepu he mipeni mnahat ka? 9:7 Katit fa solalus le anbaen kun in aon anbi makenat. Katit fa ameup lene le ansen tanu'an sena anbi in lene oke te ka nah fa in fuan. Katit fa atukus le natuku in bib kase oke te ka niun fa in susu. 9:8 Au umolok lasi i ka al fa natuin nek tenab mansian, mes antui nani anbi Sulat Knino amsa. 9:9 Fun antui nani anbi Nai Musa ini plenat nak, "Kais him pamfelo bijae in fefan le fe anteli ane." Uisneno ankiso bijae ka? 9:10 Ai Uisneno nakua a'an neu kit ka? Namneo, antui lasi nane natuin hit. Atoni afoi nain mes anfoi nok afnekat ma atoni anteli ane mes anteli nok afnekat he napeni in mepu afan. 9:11 Haim kifu milali fini knino neu ki. Ait ka nabe'i fa he haim abut pah pinan in afan nae le'uf na'ko ki ka? 9:12 Kalu atoni bian anmu'i kuasat he nafnekan lasi nane na'ko ki, ait hai ka mu'if kuasat le nesin na'ko sin ka? Mes hai kam pake fa kuasat nane. Haim sutai ale sa', he nati' kais amfain tu'as ekat neu Neno Anan In etus Beno Alekot. 9:13 Ait hi ka mihin fa ka, nak atoni le anmepu anbi Ume Uisneno sin napeni mnahat na'ko Ume Uisneno. Ma atoni le anmepu anbi baki knino sin napeni pa' ma nama na'ko baki knino nane ka? 9:14 Onane amsa Usif tunan anlek nalali nak, atoni le anetun Beno Alekot sin mes anmoni na'ko etus Beno Alekot nane. 9:15 Mes au ka unaoba fa sa' es na'ko ale kuasat nane sin. Au ka tui fa ale lasi nane ok-oke, he nati' hi moe kau onane. Fun leko nesi au mate na'ko au uneku lasi le au he uliabok nane. 9:16 Fun kalu au etun beno knino, au ka mu'if lasi tenab he uliabok, natuin nane au mepu. Amle'ut neu kau, leka au ka etun fa beno knino nane. 9:17 Fun kalu au unaoba mepu nane natuin au lomik, au mes upeni baen. Mes au etun beno knino nane natuin au lomik. 9:18 Onane te of au upeni baen sa' ka? Au baen nane on i, nak nabe'i au etun Beno Alekot ka nok fa baen, ma au ka unaoba fa au kuasat on amnek Beno Alekot. 9:19 Au ao sona kau na'ko ale atoni, mes au fani ate neu ale atoni. Au moe onane he nati' au is atoni namfau neu Neno Anan. 9:20 Neu atoni Yahudi, au fain on atoni Yahudi he nati' au is atoni Yahudi neu Neno Anan. Neu atoni le anmoni natuin Plenat Uisneno, au fain on atoni le anmoni natuin Plenat Uisneno nane maski au ka monif natuin plenat nane. Au moe onane he nati' au is ale atoni nane sin neu Neno Anan. 9:21 Neu atoni le ka natuin fa Plenat Knino, au fain on atoni le ka natuin fa plenat knino. Mes au ka aikotif Uisneno Ini plenat, fun au moni natuin Neno Anan Ini plenat. Au moe onane he nati' au is atoni le ka natuin fa plenat knino neu Neno Anan. 9:22 Neu ale atoni le sin nek palsait anlima'e, au fain on atoni le nekan palsait anlima'e, he nati' au is sin neu Neno Anan. Neu ale atoni, au fain ale sa'-sa', he nati' au umonib bian na'ko sin. 9:23 Au moe ale lasi neu beno knino na'ko Uisneno nane he nati' au amsa upeni tetus. 9:24 Hi amsa mihin, nak anbi lasi foti ale atoni sin naen mes atoni mese es napeni baen. Es nane te hi amsa maen onane, he nati' hi mipeni baen. 9:25 Ale atoni le sin natuin lasi foti nane, sin mes anpanat sin aon anbi ale lasi. Sin moe onane he nati' sin napeni sobe ai pilu le of namle'u. Mes hit le atmoni atpanat hit aok anbi ale lasi, of tapeni sobe ai pilu abal-balat. 9:26 Es nane te au aen antuin salit alekot. Ma on atoin amatufus, au ka tufuf bute-bute. 9:27 Mes au unoni au aok ma au panat au aok, he nati' leka au etun ulali beno knino neu atoni bian, kaisa au matite kau.
10:1 Bae benu alki! Au lomi he nati' hi mihin, nak afi hit mnais unu sin namaoftok anbi nope ma sin alsin anlak Tasi Me'. 10:2 Neu hen fani atuina Nai Musa, sin alsin ansu' oe anbi nope ma anbi tasi nane. 10:3 Sin alsin anbukae mnahat knino papmese, 10:4 ma sin alsin ninu oe knino papmese. Fun sin ninu na'ko faut putun knino le anhaek nok sin, ma faut putun nane lo Neno Anan kun. 10:5 Mes onane amsa, Uisneno kan lomif sin bian amfaut, talan te namate sin anbi mnela paha snaen. 10:6 Ale lasi nane anfain on lasi noina neu kit he namnauba kit; he nati' kais hit sinmakan ale lasi amle'ut onle sin anmoe nalali. 10:7 Onane amsa kais hit fain atuthae le'u onle sin atoni bian anmoe onane. Fun antui nani anbi Sulat Knino nak, "Fun to nane sin antok he nah ma ninu; oke te sin anfen ma anmalin neu atuthae le'u." 10:8 Kais hi moe lasi kake, onle sin atoni bian le anmoe nani. Fun atoni bian nifun bo'nuam tenu anmaet neno mese natuin mo'et nane. 10:9 Ma kais hit su' Uisneno, onle sin atoni bian anmoe, talan te sin anmate natuin kauna ansau sin. 10:10 Ma kais hi mimunu, onle sin atoni bian anmoe, talan te ahake neno tunan namate sin. 10:11 Ale lasi nane anbol neu sin hen fain lasi noina neu kit. Ma ale lasi nane amsa antui nani he namnauba kit. Fun tomas i hit moni atbi batan amsoput. 10:12 Es nane te atoni le natenab, nak in haek nabala, anpanat nai he nati' kais in natsel ai anbel! 10:13 Fun ale lasi su'at le anbol neu ki, nane lasi su'at neno-neno neu atoni pah pinan. Mes Uisneno In aki'at kun. In of kan paleob ki hen su'ki nesin hi be'im. Bi leku lasi su'at anbol neu ki, In of nasoitan ki lanan, he nati' him sutai mibe'i lasi su'at nane. 10:14 Es nane bae benu manekat, so leko hi misaitan luli besa neu le'u. 10:15 Au umolok neu ki on atoin ahinet. Onane te him tai mit lasi le au umolok neu ki. 10:16 Ai klas mninut tulu nekaf, le hit tatulu nekak neu Uisneno, nane ka nekaf mese nok Neno Anan Ini maten ka? Ai utunu' le hit ebi nane ka nekaf mese fa nok Neno Anan In aon ka? 10:17 Fun utunu' nane mese, onane amsa hit, maski hit tamfau, hit aof mese, fun hit tapeni pa' anbi utunu' mese nane. 10:18 Him kiso mit to Israel natuin nekaf pah pinan. Sin nah na'ko mnahat le neki neu baki fuat, sin namesbok nok baki fuat nane. 10:19 Au he u'uab sa' ka neu lasi nane? Baki fuat ai mnahat le neki neu baki fuat nane ka sa'-sa' fa? 10:20 Kahaf! Mes au ak, sin fuat nane neu nitu ma ka neu fa Uisneno. Ma au ka lomif he nati' hi mimesbom mok nitu. 10:21 Hi ka mibe'i fa he minu na'ko Uisneno Ini klas mninu, oke te minu amteni na'ko nitu ini klas mninu. Hi ka mibe'i fa hem tok mibua ambi hit Uisneno In mei tolas, oke te, amtoko amteni ambi nitu in mei. 10:22 Ait him lomi he mikoke Uisneno In to'as ka? Ait hi tabe'i atnesin Uisneno ka? 10:23 "Ale sa' nabe'i hit moe." Namneo, mes ale sa' le hit mo'e nane, ka neik fa alekot oke. "Ale sa' nabe'i hit mo'e." Namneo, mes ale sa' nane, ka neik fa lasi fena neu kit oke. 10:24 Kais atoni mes-mese naim alekot neu in aon. Mes so atoni mes-mese naim alekot neu in aon bian. 10:25 Ale sisi le nasosa anbi masa, leko hi miah, ka nok fa tenab ai mafena anbi hi nekam. 10:26 Fun antui nani anbi Sulat Knino nak, "Pah pinan nok in nesan ok-oke, Uisneno Ini kun." 10:27 Kalu atoin ka apalsait mese anhoen ko he muah, ma hom simo han honet nane, sa' le nabalab anbi mei, ho muah. Kais mutenab mafena anbi ho nekam. 10:28 Mes kalu es na'uab neu ko nak, "Mnahat nane mnah fuat!" Kais ho muah mnahat nane, fun natuin in le na'uab neu ko ma natuin tenab mafena anbi in nekan. 10:29 Au u'uab onane, ka natuin fa tenab mafena anbi ho nekam, mes natuin tenab mafena anbi atoni nane nekan. Oni atoni bian nak, "Nansa ka atoni bian in tenab mafena hen eka au lomi ka? 10:30 Kalu au utulu nekak neu sa' le au uah nane, nansa ka atoni bian in natenab amle'ut neu kau natuin mnahat le au utulu nekak neune ka?" 10:31 Au utae ak, "Leka ho muah ai leka ho minu, ai leka ho moe ale sa', so ho moe mani he muliatas Uisneno." 10:32 Kais him fain lasi aktulis neu atoni bian, he atoni Yahudi ka ai atoni Yunani ka ai Uisneno In tolas knino. 10:33 Onle au amsa, au uminab atoni amfaut sin nekan anbi ale lasi. Mes ka natuin fa au alekot mes natuin atoni amfaut sin alekot, he nati' sin napeni honis.
11:1 Mituin nai au leta, onle au amsa utuin Neno Anan Ini leta. 11:2 Au pules ki, fun hi mimnau kau ambi ale lasi ma him panat ale lasi noina le au fe neu ki. 11:3 Mes au lomi he nati' hi mihin lasi i. Atoni ini nakaf es Neno Anan; bife ini nakaf es atoni; ma Neno Anan Ini nakaf es Uisneno. 11:4 Ale atoni le anonen toti ai na'uab lasi beno, oke te ansaktenu nakan ai ankub ini nakan nane in namaeb ini nakaf. 11:5 Mes ale bife le anonen toti ai na'uab lasi beno, oke te kan saktenu fa ini nakan, in namaeb in nakaf. Natuin in papmese nok bife le ane'u ini nakfunu. 11:6 Leka bife nane in kan lomif hen saktenu nakan, so mes in ane'u ini nakfunu amsa. Mes kalu bife ane'u nakan ai ane'u ini nakfunu nane on lasi kle'at neu kit. Es nane te leko nesi in saktenu ini nakan. 11:7 Atoni kais ansaktenu nakan, fun in nalile Uisneno In human ma In apinat. Mes bife nalile atoni in apinat. 11:8 Fun atoni kan pe'ef na'ko bife, mes bife anpe' na'ko atoni. 11:9 Ma Uisneno kan mo'ef atoni natuin bife, mes anmoe bife natuin atoni. 11:10 Es nane te bife mes anpake taka anbi ini nakan natuin ahake neno tunan. 11:11 Maski onane amsa, anbi hit Uisneno kan mu'if bife kalu ka natuin atoni ma kan mu'if atoni kalu ka natuin bife. 11:12 Fun onle bife anpe' na'ko atoni, onane amsa bife nahonis atoni. Ma ale sa' na'ko atoni, onane amsa bife nahonis atoni. Ma ale sa' na'ko Uisneno kun. 11:13 Him tai kim ambi hi nekam: Leko ka leka bife anonen toti neu Uisneno, oke te kan saktenu fa nakan ka? 11:14 Pah pinan nalile neu ki nak, atoni le ini nakfunu namnanu, nane neki kle'at neu in. 11:15 Mes bife le ini nakfunu namnanu, nane neki lasi tola neu in? Fun anfe nakfunu neu bife hen fain saktenu. 11:16 Mes kalu anmu'i atoni le anlomi hen matoe neu lasi nane, hai ma ale tolas Uisneno bian hai ka mu'if lasi humaf nane. 11:17 Anbi fainekat amunit i au ka pules ki fa, fun hi buat nane ka neik fa lasi alekot mes neik lasi amle'ut. 11:18 Fun lasi nono mese le au nen, nak leka hi mibua on Tolas Knino, anmu'i matoes anbi ki. Ma au utenab oni lasi nane anmeo. 11:19 Fun mes anmu'i matoes anbi ki, he nati' nalilon sekau es anfani atoni Slani alekot. 11:20 Leka hi mibua, hi ka mibua fa neu hem bukae ambi hit Usi In mei tolas. 11:21 Fun anbi mei tolas nane atoni mes-mese anbukae kun ini mnahat, talan te atoni bian namnah ma atoni bian anmafu. 11:22 Ait hi ka mu'if ume he miah ma minu ka? Ai him lomi he mikle'at tolas Uisneno, ma he mimaeb ale atoni le kan mu'if sa' ka? Au he ak sa' neu ki ka? Au he pules ki ka? Au ka pules ki fa anbi lasi i. 11:23 Fun lasi le au unoina ki, nane au simo na'ko hit Uisneno nak: Bi fai nane leka ana'neb Usif Yesus te, In naiti utunu', 11:24 ma In toti syukur neu Uisneno antom utunu' nane; oke te In ane'bi utunu' nane ma nak, "I Au aok, le nana'at nani neu ki; hi moe lasi i neu he mimnau Kau!" 11:25 Onane amsa leka sin anbukae nalali, In naiti klas mninut ma nak, "Klas mninut i, Fef Bela Fe'u le anmalak nani natuin Au na'. Hi minu hae fauk, hi moe mani neu he mimnau Kau!" 11:26 Fun hi miah utunu' i ma minu na'ko klas mninut i hae fauk te, him etun hit Usi Ini maten talan te In nanoebon anfain nem. 11:27 Es nane te atoni le nah Uisneno In utunu' ma ninu Uisneno In klas mninut natuin lanan le kan tamaf ota, in anmoe sanat neu hit Uisneno In aon ma hit Uisneno In na'. 11:28 Es nane te so ale atoni antae in aon fe nalali te in nah utunu' ma ninu na'ko klas mninut nane. 11:29 Fun atoni le in nah ma ninu mes ka nateb fa Usi In aon, in anhel kasat neu in aon kun. 11:30 Natuin lasi nane anmu'i atoni namfau anbi ki le anlima'en ma namenan ma bian amsa anmate. 11:31 Kalu hit tae hit aok, Uisneno kan fe kit fa kasat. 11:32 Mes kalu Uisneno ankas kit, In nanoina kit, he nati' kais ankas kit nok pah pinan. 11:33 Es nane te, bae benu alki! Leka hi mibua hem bukae ambi hit Uisneno In mei tolas, so hi mapao es nok es. 11:34 Kalu anmu'i atoni le namnah, leko in anbukae fe anbi in ume; he nati' kais hi mibua neu hem simo kasat na'ko Uisneno. Ma neu lasi bian, leka au et eu ki, of au uketi ani neu ki.
12:1 Tomas i antom lasi halinat le Smanan Knino anfe ki. Bae benu alki! Au lomi he nati' hi mihin lasi ini maneon. 12:2 Mimnau, bi neno hi fe ka mihin fa Uisneno, anhel ki neu le'u le ka na'uab nahinef. 12:3 Hi mes mihin, nak atoni le Uisneno Ini Smanan Knino antopu, in ka nabe'i fa he na'uab nak, "Amsukat Yesus nai!" Onane amsa katit fa atoni mese le he na'uab nak, "Yesus lo hit Usi!" Kalu Smanan Uisneno kan topu fa atoni nane. 12:4 Lasi halinat huma-huma mes Smanan Knino mese. 12:5 Ma anmu'i tuthaes huma-huma mes hit Uisneno mese. 12:6 Ma anmu'i lasi amkakat huma-huma mes Uisneno lo mese le anmeup ale sa' anbi ale atoni alsin. 12:7 Mes nalile Smanan Knino neu atoni mese-mese natuin sin alekot ok-oke. 12:8 Fun Smanan Knino anfe neu atoni es lasi halinat he namolok neik nek ahinet. Ma Smanan Knino le nane amsa anfe lasi halinat neu atoni bian he namolok neik uab ahinet antom Uisneno. 12:9 Ma Smanan Knino le nane amsa anfe neu atoni es nek ateb knino. Ma In anfe neu atoni bian he naleko amenat. 12:10 Smanan Knino anfe kuasat neu atoni es hen moe lasi amkakat. Ma In anfe lasi halinat neu atoni bian he na'uab neki lasi beno antom Uisneno In mepu. Ma In anfe neu atoni bian lasi halinat hen beti nahin smanaf huma-huma. In anfe lasi halinat neu atoni es he na'uab neki a'at huma-huma. Ma In anfe lasi halinat neu atoni bian he naketi nahin ale a'at nane sin lasi. 12:11 Mes Smanan Knino mese es anmeup ale lasi nane. Ma In es anfe lasi halinat nane neu ale atoni mes-mese natuin In lomin kun. 12:12 Fun onle aof nane mese ma in lokif taluf namfaun, ma ale lokif taluf nane, maski namfaun, mes aof mese. Onane amsa Neno Anan. 12:13 Fun hit alkit atsu oe anbi Smanan Knino mes het fain aof mese. He atoni Yahudi, he atoni Yunani, he ate, ma atoni ao sona. Ma nainut kit alkit na'ko Smanan Knino mese. 12:14 Fun aof nane amsa ka lokif mese fa, mes lokif namfaun. 12:15 Kalu haen nak, "Natuin au ka nimaf kau, au ka tamaf neu aof." Namneo in kan tamaf neu aof ka? 12:16 Ma kalu luken nak, "Natuin au ka mataf kau, au ka tamaf neu aof." Namneo in kan tamaf neu aof ka? 12:17 Kalu aof nane anfain mataf oke, in he natnin neik sa' ka? Leka aof nane anfain lukef oke, in hen naskoko ai nafoi neik sa' ka? 12:18 Mes Uisneno anfe nalali neu lokif, mes-mese napeni bale anbi aof, onle In lomin kun. 12:19 Kalu sin alsin al lokif mese, aof nane esme ka? 12:20 Namneo anmu'i lokif namfaun, mes al aof mese. 12:21 Es nane te matan ka nabe'i fa he nak neu niman, "Au ka nukan ko fa." Ma nakan ka nabe'i fa he nak neu haen, "Au ka nukan ko fa." 12:22 Ma nes-nesi aof in lokin le anlima'e in nukan nes-nesi. 12:23 Ma aof in lokif le hit tatenab tak ka makana fa, hit atfe bale makana neun. Ma hit lokif le ka namasaf hit taloitan bale neu in. 12:24 Hit lokif amasat sin ka nukan fa lasi nane. Uisneno nalutab hit aok onane, he nati' lokif le ka namasaf in napeni bale makana. 12:25 Onane te hit aok of kan bation, mes ale lokif le nasulin sin mapanat es nok es. 12:26 Es nane te kalu aof mese ansutai mane'at, ale lokif ansutai oke. Leka lokif mese napen kan alekot, ale lokif anmalin oke. 12:27 Hi alki Neno Anan In aon, ma hi mese-mese lokif neu aof nane. 12:28 Ma Uisneno anlek atoni fauk anbi tolas knino anfani on haef knino, bian on Mafefa knino ma bian on anoni. Oke te bian napeni lasi halinat hen moe lasi amkakat, he naleko amenat, hen tuthae, hen fain atopus ma he na'uab neki a'at huma-huma. 12:29 Ait sin alsin haef knino, ai Mafefa knino, ai anoni ka? Ait sin alsin napeni lasi halinat hen moe lasi amkakat, 12:30 ai he naleko amenat, ai he na'uab neki a'at huma-huma, ai he naketi ale a'at nane in lasi ka? 12:31 Es nane te hi mami he mipeni lasi halinat anesit. Ma au ulile ki lanan le naleko nesi.
13:1 Maski au u'uab uhin ale a'at pah pinan ma a'at ahake neno tunan, mes kalu au ka mu'if lasi manekat, au onle sene han a'nupu ma onle to'is han besi. 13:2 Maski au mu'i lasi halinat he eki beno Uisneno ma au uhin ale lasi tolo' ma au mu'i ale lasi ahinet; ma maski au mu'i nek ateb knino he u'oni ale nu'af sin, mes kalu au ka mu'if lasi manekat, au onle atoni ka atam ota. 13:3 Ma maski au bati ale au maus ma au una'at au aok he notu neik ai, mes kalu au ka mu'if lasi manekat, au ka mu'if alekot sa' amsa. 13:4 Lasi manekat nane seusabat ma nek aklati; ma kan mu'if nek a'unu. Lasi manekat nane ka naliabon ma ka namok'on. 13:5 Lasi manekat nane ka nale'un fa es in nekan ma ka naim fa alekot neu in aon. Lasi manekat nane kan mu'if to'as ma kan nabela atoni in sanat. 13:6 Lasi manekat nane kan malin fa neu lasi apenut mes in malin neu lasi amneot. 13:7 Lasi manekat ankub ale sa', nekan nateb knino neu ale sa', nafnekan ale sa' ma ansutai ale sa'. 13:8 Lasi manekat kan mu'if in amsopun; lasi beno of namsop ma antu'; a'at huma-huma of nasnas; lasi ahinet of namneku. 13:9 Fun hit lasi ahinet tuk-tuka ma hit lasi beno nane ka namno'u. 13:10 Mes leka lasi amno'ut nane nem ante, lasi ka amno'ut nane of namneku. 13:11 Leka au fe li'ana kau, au umolok on li'ana kau, au utnin on li'ana ma au utenab on li'ana. Mes muni i au fain on atoni naek, au ubela au mo'et on li'ana. 13:12 Fun muni i hit tit ale sa' fe namsab ma nakao on anbi nino mes of neno amnemat hit tit humaf nok humaf. Muni i al au uhin lasi le fe ka namno'u, mes namuni of au uhin sa' le namno'u, onle Uisneno nahin kau. 13:13 Onane te al lasi nono tenu i, nek ateb knino, lasi afnekat, ma lasi manekat, ma lasi abainesit na'ko lasi nono tenu nane esle' lasi manekat.
14:1 Hi mami lasi manekat nane ma amhataniom hem simo lasi halinat na'ko Smanan Knino, nes-nesi lasi halinat he mibeno Uisneno In mepu. 14:2 Atoni le na'uab neki a'at le ka mahine, in ka na'uab fa neu mansian, mes in na'uab neu Uisneno. Fun kan mu'if atoni le nahin in uab nane; fun natuin Smanan Knino es anmepu he nati in na'uab ale lasi tolo' nane. 14:3 Mes atoni le neki lasi beno, in na'uab neu mansian, he naki'ab sin, anfainek sin ma anhalin sin. 14:4 Atoni le na'uab neki a'at ka mahine, in hatani kun in aon, mes atoni le neki lasi beno, in hatani Tolas Knino. 14:5 Au lomi he nati' hi alki mi'uab meki a'at ka mahine, mes au lomi nesi he nati' hi meki lasi beno neu Uisneno In mepu knino. Fun atoni le neki lasi beno leko nesi na'ko atoni le na'uab neki a'at le ka mahine. So leko in naketi nani he nati' anhatani Tolas Knino. 14:6 Onane te bae benu alki! Leka au et eu ki ma u'uab eki a'at ka mahine, neik alekot sa' neu ki ka? So mak au u'uab neu ki lasi le Uisneno nalile nani, ai lasi ahinet neu Uisneno, ai lasi noina neu Uisneno. 14:7 Nane papmese nok bale le kan mu'if snasaf, mes nahan, onle feku ai biol -- leka me atoni he nahin feku hanan ai biol in hanan --, kalu sin hankenu ka nasulin fa ka? 14:8 Ai, leka to'is nane ka nahanaf nok amneot, sekau es naloitan hen poi neu makenat ka? 14:9 Onane amsa leka hi mi'uab meki a'at ka mahine, ma hi ka miketi mani fa nok amneot, leka me atoni he nahin lasi le hi mi'uab nane ka? Hi a'at nane luman, papmese on hi mi'uab neu anin. 14:10 Bi pah pinan i anmu'i a'at namfaun; maski onane amsa katit fa a'at mese le kan mu'if in oten. 14:11 Leka au ka uhin fa a'at nane in oten, au on atoin mat bute kau neu atoni le na'uab neki a'at nane. Ma in on atoin mat bute neu kau. 14:12 Onane amsa neu ki. Him lomi he mipeni lasi halinat na'ko Smanan Knino mes nesi na'ko nane so hi minaoba mani hem hatani Tolas Knino. 14:13 Es nane te atoni le na'uab neki a'at ka mahine, in mes anonen toti neu Uisneno, he nati' anfe neune lasi halinat he naketi nahin a'at nane. 14:14 Fun leka au onen toti eki a'at le ka mahine, au onen toti eki au smanak mes au nekak kan onen toti fa. 14:15 Es nane te, au he moe sa' ka? Of au onen eki au smanak, mes of au onen eki au nekak amsa. Of au si ma uliatas eki au smanak, mes of au si ma uliatas eik au nekak amsa. 14:16 Fun leka ho mutulu nekam neu Uisneno meik ho smanam, leka me ale atoni le sin neman he natnin ko, sin he nak, "tebes" neu lasi le mutulu nane ka? Fun in ka nahin fa sa' le ho mu'uab nane. 14:17 Fun maski ho lasi tulu nekaf neu Uisneno nane namas, mes ka ma'ota fa neu atoni bian. 14:18 Au utulu nekak neu Uisneno, fun au u'uab eik a'at ka mahine nesin ki alki. 14:19 Mes anbi buat tolas knino, au lomi nesi he u'uab a'at nim le atoni nahin he nanoina atoni bian amsa, na'ko au u'uab a'at nifun-nifun eik a'at le ka mahine. 14:20 Bae benu alki! Kais hi mitenab on li'ana. So him fain on li'ana ambi lasi amle'ut, mes him fain atoni naek ambi nek tenab. 14:21 Fun antui nani anbi Nai Musa in Sulat Knino nak, "Abal balat nakua In a'an nak, of Au u'uab neu to i, eki atoni le anmu'i a'at bian ma eki atoni bian sin fefan, mes sin of ka nen Kau fa." 14:22 Es nane te, lasi halinat a'at ka mahine nane, anfani taka ka neu fa atoni apalsait. Mes lasi halinat neu beno nane, anfani taka ka neu fa atoni apalsait mes neu atoni apalsait. 14:23 Fun leka tolas knino nabua ma ale atoni na'uab neki a'at ka mahine, oke te atoni bian ai atoni ka apalsait antam neman, of sin nak, hi mimaun ok-oke. 14:24 Mes leka hi alki meki lasi beno na'ko Uisneno, oke te atoin ka apalsait ai atoin fe'u antam nem of in nekan nateb knino neu ale lasi nane. 14:25 Al lasi le natolo anbi in nekan of nalilon, oke te in nabes neu Uisneno ma ana'u nak, "Namneo, Uisneno anhaek nok ki anbi hi atnanam." 14:26 Neu bae benu alki, lasi onme ka? Leka hi mibua he miluli ma mibes neu Uisneno, so atoni mes-mese naloitan mepu. Bian neki sit, bian nanoina, bian nalile sa' le na'ko Uisneno, bian neki a'at ka mahine, bian neki lasi keti neu a'at nane. Mes ale lasi hi minaoba mani he mifena Tolas Knino. 14:27 Leka anmu'i atoni le na'uab neki a'at ka mahine, so atoni nua ai nes-nesi te atoni tenu; ma sin na'uab anmakatui es nok es. Ma mes anmu'i atoni le naketi a'at le sin na'uab nane. 14:28 Leka kan mu'if atoni le nabe'i he naketi nani a'at nane, so sin natena anbi Tolas Knino sin buat, ma alsin na'uab neu sin aon kun ma neu Uisneno. 14:29 Neu Mafefa knino sin, leko atoni nua ai tenu anbi sin na'uab ma atoni bian sin antai lasi le sin na'uab nane. 14:30 Mes kalu anmu'i atoni bian le antoko anbi nane napeni mnitas na'ko Uisneno, leko atoni ahunut nane natena kun. 14:31 Fun hi alki nabe'i meik lasi beno na'ko Uisneno es neu es, he nati' hi minoina ma mipen matani. 14:32 Lasi halinat Mafefa knino so natnin neu Mafefa knino sin. 14:33 Fun Uisneno kan lomif lasi matoes, mes In lomi halan nekaf. 14:34 Papmese onle anbi Tolas Knino, ale bife mes natena anbi buat tolas knino. Fun sin ka napeni fa manuan he namolok. Sin mes nabaun sin aon onle antui nani anbi Nai Musa in sulat. 14:35 Leka sin lomi he nahin lasi sa', leko sin natan neu sin mone anbi ume. Fun kalu bife na'uab anbi buat Tolas Knino nane ka nalekof. 14:36 Ai a'an Uisneno na'ubon na'ko ki ka? Ai a'an nane al nem neu ki ka? 14:37 Kalu anmu'i atoni le natenab nak in Mafefa knino, ai atoni le napeni lasi halinat na'ko Uisneno, so in nahin nak lasi le au u'uab neu ki nane Uisneno Ini plenat kun. 14:38 Mes kalu in kan simof lasi nane kais him simo in. 14:39 Onane te, bae benu alki, so hi mami he mipeni lasi halinat he mitiaba beno na'ko Uisneno ma kais mikain atoni le na'uab neki a'at ka mahine. 14:40 Mes ale lasi so nanaobon nok alekot ma amnonot.
15:1 Ma tomas i, bae benu alki! Au lomi he umnauba ki neu Beno Alekot na'ko Uisneno le au eut ain ki ma le him sium mani, fun him haek mi'ki ambine. 15:2 Leka him na' mimepan lasi le au eut ani ki, Beno Alekot nane of namonib ki; so kalu hi nekam ateb knino nane son-sona kun. 15:3 Lasi le au utiaba neu ki, nane amsa lasi le au simo. Lasi abainesit onle antui nani anbi Sulat Knino, au etun ki nak Neno Anan anmate natuin hit sanat. 15:4 Fun ansub nalali In, mes nalali te nafena nafani In anbi neno tenu. Lasi nane amsa antui nani anbi Sulat Knino. 15:5 Oke te In nalilon neu Nai Kefas ma namuni te neu In asium lasi sin bo'es am nua. 15:6 Oke te In nalilon neu bae knino nesin natun nim no mese; fun amfaut na'ko sin fe anmoni tal neno i, mes sin fauk anbi sin anmate. 15:7 Nalali te In nalilon neu Nai Yakobus, namuni te neu ale haef knino sin. 15:8 Ma namuni na'ko sin alsin In nalilon neu kau on li'ana le nahonis namunin. 15:9 Fun au ka makana kau fa anbi haef knino sin, natuin au hamu'i Tolas Knino Uisneno. 15:10 Mes natuin Uisneno In nek mamun, tomas i au fain onle lasi le anbi kau. Ma Uisneno In halinat le anfe kau ka luman fa. Au uhaebok nesin sin alsin, mes nane ka au fa, so mak Uisneno In halinat le anhaek nok kau. 15:11 Es nane te hi hem simo beno knino nane na'ko sekau amsa, he na'ko kau ai he na'ko haef knino bian, nane kan tamaf molok. Lasi abainesit, nak haim eut ki ma hi nekam nateb knino neu Beno Alekot le na'ko Uisneno. 15:12 Fun haim eut ki, mak nafena Neno Anan na'ko amates, nansa ka anmu'i atoni anbi ki le sin nak, katit fa atoni amates le anfen anfani? 15:13 Kalu kan mu'if atoin amates anfen anfani, onane amsa ka nafena fa Neno Anan na'ko amates. 15:14 Mes kalu ka nafena fa Neno Anan, onane te hai etus nane luman kun, ma hi nek ateb knino nane amsa son-sona. 15:15 Nesi na'ko nane hai mipoibom neu Uisneno, fun haim etun mak, Uisneno nafena Neno Anan na'ko amates -- mes Uisneno ka nafena fa In, kalu namneo, mak ka nafena fa amates. 15:16 Kalu namneo ka nafena fa amates, onane amsa ka nafena fa Neno Anan. 15:17 Ma kalu ka nafena fa Neno Anan, hi nek ateb knino nane luman ma hi fe moni ambi sanat. 15:18 Onane amsa ale atoni le anmate anbi Neno Anan of sin namle'u. 15:19 Kalu hit tafnekan neu Neno Anan al anbi hit monik bi pah pinan i, hit atoni asai lumat kit na'ko ale mansian ok-oke. 15:20 Mes ka on fa nane! Fun nafena nalali Neno Anan na'ko amates, on an ahunut na'ko amates sin. 15:21 Fun onle maten nane nem natuin atoni mese, onane amsa nafena amates natuin atoni mese. 15:22 Fun ale amates namesbok nok Nai Adam, onane amsa of nafena sin alsin namesbok nok Neno Anan. 15:23 Mes atoni mes-mese of namonib sin anmakatuin. Neno Anan on an ahunut, nalali te In ini sin bi neno In nanoebon anfain nem. 15:24 Oke te neno hatas amsoput natiabon. Bi leku nane Neno Anan of nale'un ale plenat, ale kuasat ma ale matani; oke te of In nana'at In kuasat on Usif neu Uisneno, hit Ama. 15:25 Neno Anan naplenat piut talan te Uisneno nabela ale musu sin anbi Neno Anan haen nupun. 15:26 Musu amsoput le he nale'un nani esle' lasi maten. 15:27 Fun Uisneno nabela nalali ale sa' anbi In haen nupun. Mes kalu nak, "nabela nalali ale sa'", nane ansaksi nak, "Uisneno le nabela ale sa' anbi Neno Anan In haen nupun..." nane ka nok antam anbi nane. 15:28 Mes kalu nabela nalali ale sa' anbi Neno Anan, onane te In on Anmone of nabaun In aon neu Uisneno, le nabaun ale sa' neu In, he nati' Uisneno naplenat ale sa' ok-oke. 15:29 Kalu ka nafena fa amates, nansa anmu'i atoni le ansu oe neu atoin amates ka? Sin nafnekan lasi sa' na'ko atoni nane ka? Kalu namneo ka nafena fa amates, nansa sin anlomi he naslani neu amates ka? 15:30 Ma hai amsa -- haim tam meu malenat anbi ale leku neu sa' ka? 15:31 Bae benu alki! Neno-neno au alan sutais fun au uliabok neu hi monim fun him palsai milali neu Neno Anan Yesus, hit Uisneno. 15:32 Kalu al hit tatenab on mansian, au he mabe'u ok mu'it alalu anbi Efesus, lasi nane neik alekot sa' neu kau ka? Kalu ka nafena fa amates, "leko hit tah ma tinu, fun noka of hit atmate." 15:33 Kais him sek ma ambeo, fun taos mo'et amle'ut of nale'un hi mo'et alekot. 15:34 Mihin nai ma kais hi mo'e amteni sanat. Fun anmu'i anbi ki atoni le fe ka nahin fa Uisneno. Au u'uab lasi i, he nati' him nek mae. 15:35 Mes oni anmu'i atoni le natan nak, "Nafena atoni amates nane onme ka? Ma of sin fain neman neki aof me ka?" 15:36 Hoi atoin amonot! Kalu hem sen fini anbi nain, fini nane of kan moni ma ka natol, kalu fini nane kan mate fe. 15:37 Leka hom sen fini nane, ho kam senaf in ta'un le of anmoni mes hom sen fini nane in fuan. He ane ka ai he fini bian. 15:38 Mes Uisneno anfe neune ta'uf onle In anlek nani: In anfe neu fini mes-mese in ta'un kun. 15:39 Ale amonit le masnasa sin aon ka papmese fa. Atoni pah pinan in aon nasuli nok mu'it in aon, nasuil nok kolo in aon, nasuil nok ika in aon. 15:40 Anmu'i ta'uf neno tunan ma anmu'i ta'uf pah pinan, mes ta'uf neno tunan in masan nasuil nok ta'uf pah pinan in masan. 15:41 Manas in pinan nasuil nok funan in pinan. Ma funan in pinan nasuil nok afkun-afkun sin pinan. Ma afkun es in pinan nasuil nok afkun bian in pinan. 15:42 Onane amsa lasi amates anfen anfan. Ansub ma anbebin anbi lasi amle'ut mes nafena nafani anbi lasi abal-balat. 15:43 Ansub ma anbebin anbi ka makana, mes anfen anfani anbi kan apinat. Ansub ma anbebin aof alima'et mes nafena nafani anbi aof amasat ma matani. 15:44 Ansub ma anbebin aof pah pinan, mes nafena nafani aof le Smanan Uisneno anfe nani. Kalu anmu'i aof na'ko pah pinan, anmu'i amsa aof le na'ko Uisneno. 15:45 Fun antui nani anbi Sulat Knino nak, "Nai Adam ahunut, anfain on amonit le anmoni," mes Nai Adam amunit nane Smanaf le anfe honis. 15:46 Amnemat le nem nahunu nane aof pah pinan, ka aof smanaf fa. Namuni te aof smanaf nane in nem. 15:47 Nai Adam ahunut nane anmo'e na'ko afu, mes Nai Adam amunit nane na'ko neno tunan. 15:48 Ale amonit abit pah pinan namnes nok in le anmo'e na'ko afu, mes ale amonit abit neno tunan namnes nok In le na'ko neno tunan. 15:49 Muni i hit onle Nai Adam le anmo'e na'ko afu, of hit atfani amsa onle In le na'ko neno tunan nane. 15:50 Bae benu alki! Au he eut ki lasi i, aof le na'ko nesaf ma na' in ka napen fa pa ma nama anbi plenat neno tunan. Onane amsa aof le anmate in ka napeni fa aof abal-balat. 15:51 Au he eut ki lasi tolo' mese nak: Of hit kat matef oke, mes of nabaina kit oke. 15:52 Lasi nane of anbol smel es, bi leku to'is amsoput nahan. Fun bi leku to'is nahan, of nafena ale amates neki aof abal-balat ma nabaina kit alkit. 15:53 Hit aok amates i mes anpake aof le kan matef, ma aof le na'ko pah pinan mes anpake aof le na'ko neno tunan. 15:54 Leka aof amates anpake nalali aof le kan matef ma aof le na'ko pah pinan anpake nalali aof na'ko neno tunan, of natis a'an Uisneno le antui nak, "Lasi maten namneku, fun anbe'u ma nis nalali. 15:55 Hoi lasi maten, ho kuasat abe'ut esme ka? Hoi lasi maten, ho laso esme ka?" 15:56 Lasi maten in laso es sanat ma plenat knino nalile sanat in kuasat. 15:57 Mes tulu nekaf neu Uisneno, le In anfe kit kuasat abe'ut natuin Yesus Neno Anan, hit Usi. 15:58 Es nane te au bae benu manekat, him hake mi'ki nai ma kais hi mibeko. Ma amakoe nai ambi hit Usi In mepu. Fun hi mihin kim, nak leka tamesbok tok hit Usi, hit haet hit puse ka son-sona fa.
16:1 Neu lasi he mibua noni neu Tolas Knino so leko hi moe mani papmese onle au lek ani neu Tolas Knino anbi Galatia. 16:2 So anbi neno klei hi atoni mes-mese ambeit -- maikan sa' na'ko le hi mipeni -- ma mibela ambi hi ume; he nati' kaisa bi neno au et eu ki te hi fe mibua loi tulu nane. 16:3 Leka au eti te of au sonu atoni le him lek mani. Of au tui sulat he nati' sin neik hi loi tulu manekat neu Yerusalem. 16:4 Kalu onme te, au amsa he nao ma of sin nao nabua nok kau. 16:5 Au of et eu ki, leka au fin u'ko Makedonia, fun au sali he nao ok Makedonia. 16:6 Ma of au umaika ok ki anbi Korintus neno fauk, ai oni ante neno manikin anfin. Oke te him bab kau he nati' au nao fin eu bale bian. 16:7 Fun haef i au ka lomif he kius ki al neon tuk es. Kalu Uisneno anlomi, au ufnekan he umaika ok ki suk a'lo. 16:8 Mes of au umaika a'bi Efesus i tal neno naek Pentakosta. 16:9 Fun anbi i au upeni manuan he mepu ale mepu alekot, maski tu'as ma ekat namfaun. 16:10 Leka Nai Timotius nem neu ki, him simo nok alekot he nati' kais in namtau. Fun in amsa anmeup neu hit Usi, papmese onle au. 16:11 Kais anmu'i atoni le kan lae nan fa in. Mes him tuntaku in, he nati' in nasopu in lanan nok aomina, oke te in fain nem neu kau. Fun au pao in anbi i he in nem nok bae knino bian sin. 16:12 Neu hit bae Nai Apolos, au toti piut-piut he nok bae knino bian sin he netin kius ki, mes in kan lomif he neit es i. Mes kalu anmu'i manuan, of in neit. 16:13 So him be' nai! Ma amhaek matani anbi nek ateb knino! Him hataniom piut on atoin abe'it. 16:14 Hi minaoba hi mepu nok lasi manekat. 16:15 Bae benu alki! Au he toti teni lasi nono mese neu ki. Hi mihin Nai Stefanus nok in ume nanan sin; sin es anfain atoni Slani ahunut anbi Akhaya. Sin nahaebok neu mepu hen tuthae to knino. 16:16 Es nane au toti he nati' hi mituin ale atoni onane ma ale atoni bian le anmepu ma nahaebok nok sin. 16:17 Au malin neu Nai Stefanus, Nai Fortunatus, ma Nai Akhaikus le sin neman neu i. Fun sin neman he natis ale sa' le fe anlabu anbi ki. 16:18 Fun sin anhalin au smanak ma hi smanam nok. Him simo nai ale atoni onane! 16:19 Tolas knino anbi pah Asia ansonu tabe neu ki. Nai Akwila, ma bi Priskila ma tolas knino le anbi sin ume ansonu tabe naek neu ki. 16:20 Bae knino alsin ansonu tabe neu ki. Hi mitiaba tabe es neu es nok manekat knino. 16:21 Au Nai Paulus au utiaba au tabe, le au tui kuk eik au nimak. 16:22 Atoni le ka nek hit Usi, so Uisneno ansukat in. Maranatha! -- Hit Usi nanoebon nem laba! -- 16:23 So Usif Yesus anfe tetus neu ki. 16:24 Au manekak neu ki alki le ampalsai milali neu Neno Anan Yesus. Na'ko hai nua kai, Nai Paulus ma Nai Sostenes.
1:1 Neu Uisneno In tolas knino abit Korintus ma to knino ok-oke abit Akhaya. Au Nai Paulus, haef knino Neno Anan Yesus, le anlek natuin Uisneno In lomin, ma hit bae Nai Timotius. 1:2 Haim toti he nati' tetus knino ma aomina na'ko Uisneno, hit Ama, ma na'ko Usif Yesus nok ki alki. 1:3 Au uliatas Uisneno, hit Usif Yesus In Amaf. Amaf le nek mamun ma Uisneno le anmu'i ale lasi halinat. 1:4 In kun es anhalin kai anbi ale hamu'it; talan te hai mibe'i hem halin sin le anbi hamu'it huma-huma meki halinat le haim simo na'ko Uisneno. 1:5 Fun papmese onle hai mipeni Neno Anan In hamu'it nok athoes, onane amsa haim simo Neno Anan In halinat nok athoes. 1:6 Leka hai mipeni hamu'it, lasi nane anfain halinat neu ki ma he namonib ki; kalu anhalin kai, lasi nane on halinat neu ki, he nati' him sutai mibe'i ale hamu'it onle haim sutai mani amsa. 1:7 Hai ka mitenab fa neu lasi le hai mifnekan na'ko ki, fun hai mihin nak him sutai hamu'it mok kai. Onane te of hi mipeni lasi malinat mok kai amsa. 1:8 Bae benu alki! Fun haim lomi he nati' hi mihin lasi hamu'it le afi haim sutai mani ambi pah Asia. Hamu'it le nasub nani neu kai naek ma mafena, talan te hai ka mitenab fa nekam neu he moni. 1:9 Ma hai mitnin onle anlef lasi maten neu kai. Mes lasi nane anbol, he nati' kais hai mifnekan neu hai aom, mes al hai mifnekan neu Uisneno le nafena amates. 1:10 In es namonib kai na'ko lasi maten malenat nane. Hai mifnekan neu In, fun In of es namonib kai anbi neno amnemat. 1:11 Fun hi amsa amtuntaku kai meki onen totis, he nati' atoni namfaun natulu nekan neu Uisneno natuin lasi halinat le hai mipeni na'ko Uisneno natuin sin onen totis neu kai. 1:12 Hai miliabom neu lasi i, fun hai nekam ansaksi neu kai nak hai monim anbi pah pinan i -- nes-nesi anbi hai lasi mafutus mok ki -- hai mo'e mani anbi knino ma nek muti na'ko Uisneno. Hai mo'e ale lasi nane ka natuin fa nek ahinet pah pinan, mes natuin Uisneno In halinat knino. 1:13 Fun al haim tui neu ki lasi le him soi mihine ma him tae mihine. Ma au ufnekan, he nati' hi mihin ale lasi nane ok-oke. 1:14 Onle hi mihin milali lasi bian na'ko kai. Onane te bi neno Usif Yesus nanoebon anfain nem, of hi miliabom neu kai onle hai amsa miliabom neu ki. 1:15 Natuin lasi afnekat i afi au ufek he eit eu ki, he nati' hi mipeni halinat kuni nua. 1:16 Oke te au he nao fin eu Makedonia, nalali te u'ko Makedonia au fain aum eu ki, he nati' him tuntaku kau ambi au lanan neu Pah Yudea. 1:17 Ait au utenab a san neu lasi fekat i ka? Ai au mo'e san lasi fekat i natuin au lomik ka? Talan te mapeni anbi kau nak, "Tebes" ma "Kahaf." 1:18 Nok Uisneno aki'at, hai lasi manba'an neu ki ka nak, "Tebes" ma "Kahaf". 1:19 Natuin Yesus Neno Anan, Uisneno In Anmone, le au ok Nai Silwanus ma Nai Timotius ameut milali neu ki, In es ka nak, "Tebes" ma "Kahaf". Mes anbi In al lo "Tebes". 1:20 Fun Neno Anan lo "Tebes" neu ale Uisneno In fefba'an. Es nane te natuin In hit tak, "Namneo" he taliatas Uisneno. 1:21 Fun Uisneno le anhatani kai nok ki anbi Neno Anan, lo Uisneno le anbeti kai. 1:22 In antao In malak neu kit ma anfe Ini Smanan Knino anbi hit nekak on lasi bela na'ko ale sa' le In naloitan nani neu kit. 1:23 Mes Uisneno ansaksi kau -- fun In nahin au nekak --, au ka etif eu Korintus natuin au nek ki. 1:24 Hai ka miplenat ki fa neu he miteb knino, fun him hake mi'ki ambi hi nek ateb knino. Al hai meup mibua mok ki he nati' hi malin.
2:1 Es nane au ufek ulali anbi au nekak nak au ka eti tenif eu ki nok nek susal. 2:2 Fun kalu au ususab ki, sekau hen halin au nekak so ale atoni le afi au ususab sin nekan? 2:3 Es nane te au tui ki sulat i, he nati' leka au eit kais au susal, natuin sin le hen halin kau. Fun au uhin ki alki, nak leka au malin, of hi amsa malin. 2:4 Au tui ki sulat i nok nek tu'as ma nek mafena ma nok matnu. Au tui onane he nati' kais hi nekam antu' mes hi mihin nak au nek ki alki. 2:5 Mes kalu anmu'i atoni le anmo'e lasi he nanukab, in ka nanukab fa au nekak, mes sin nanukab hi nekam -- ai he nati' kais au hafen -- na'nuka atoni faukan anbi ki sin nekan. 2:6 Neu atoni onane, noba nai, fun hi amfaut nakain nalali in. 2:7 So mes him saok in sanat ma amhalin in he nati' kais in namle'u natuin in nanukab nekan nae le'uf. 2:8 Es nane te au fainek ki he nati' him nek in. 2:9 Natuin lasi nane au tui ki sulat i, he su'it ki, nak hi mituin ale lasi le au fe neu ki ai kahaf. 2:10 Fun kalu him sako atoni nane in sanat, au amsa sako in sanat. Fun kalu au sako, -- so anmu'i sa' le au he saok ani --, au mo'e lasi nane anbi Neno Anan In human natuin hi alekot. 2:11 Ma au mo'e lasi nane he nati' santuaf kais in nis kit, fun hit tahin in ela ma in lisan sin. 2:12 Leka au te Troas he etun Neno Anan In beno knino, Uisneno nasoitan lanan neu kau he au mepu bi bale nane. 2:13 Mes au nekak fe na'unu fun au fe ka u'euk fa ok au bae Nai Titus. Onane te au manseon ok sin ma au nao neu Makedonia. 2:14 Mes au utulu nekak neu Uisneno, le antopu kai neu Neno Anan In lasi amnisat. Uisneno anpaek kai he nati' haim etun Neno Anan In beno knino on fomeni anbi me-me. 2:15-16 Fun haim fain on fomeni na'ko Neno Anan neu Uisneno. Ma neu ale atoni le namle'u hai fo' maten kai neu he mimate; mes neu atoni le namonib sin hai fomeni kai neu he mimonib. Onane te sekau antam ota he nanaoba mepu nane ka? 2:17 Mes hai ka on fa atoni bian, le he neki beno knino na'ko Uisneno on bale sosa. Hai mi'uab a'an nane nok nek muti, fun Uisneno es anlelu kai. Ma Uisneno nit kun nak hai minaoba beno nane on Neno Anan In ate kai.
3:1 Ati hai hem pules amteni hai aom ka? Ai on atoni bian he nalile sulat pules neu ki ai napeni sulat pules na'ko ki ka? 3:2 Hai sulat pules es hi, le haim tui mani anbi hai nekam, fun ale atoni nahin nani ma ansoi nani. 3:3 Fun sin nit nalali, nak hi on sulat le Neno Anan antui nani natuin hai mepu. Sulat nane kan tui nani fa neki oe metan, mes antui nani neki Uisneno In Smanan Knino amonit. Ma kan tui nani fa anbi faut bena, mes antui nani anbi mansian in nekan. 3:4 Hai mifnek onane neu Uisneno natuin Neno Anan. 3:5 Kan mu'if lasi sa' anbi hai aom, he nati' haim tam ota neu mepu i, mes Uisneno es anfe be'it neu ki. 3:6 In es anfe kai be'it he nati' haim fain ameput neu fefbela fe'u; fefbela le na'ponion neu Smanan Uisneno, ka neu fa plenat le matui nane. Fun plenat le matui nane namate, mes Smanan Uisneno nane namonib. 3:7 Bi leku fef bela le namate nane anmo'e ma anmalak neu fatu, apinat Uisneno antana nok matane. In pinan matane talan te uf Israel ka nabe'i fa hen kiso Nai Musa human, maski pina le anbi Nai Musa human namsab anbi leku nane. Nah, amo'e fef bela le namate nane nalil'on nok pinan a'naek, 3:8 lof amo'e fef bela le Smanan Uisneno anfe nani, nalil'on nok pinan le nesi anteni. 3:9 Kalu amo'e fef bela le nasanab mansian nane anpin onane, lof amo'e fef bela le naleko nafani mansian nok Uisneno in pinan nesi anteni. 3:10 Sa' le afi hit tak anpin, kan pinan tenif fun apinat muni i. 3:11 Kalu sa' esle nalan al leku tuk es, anpin onane, lof sa' esle nabal-bal lof anpin nesi anten. 3:12 Natuin hai mui lasi afnekat onane, hai mi'uab nok nek amaspeti, 3:13 ka on fa Nai Musa le ankub in human he nati' to Israel kais ankius nit Uisneno. In apinat le he namneku anbi in human. 3:14 Mes sin nekan nane an ek nabubu. Ma tal neno i sin nekan fe an ek nabubu neki kubat nane leka sin ansoi Sulat Knino unu. Al Neno Anan es nabe'i hen fei kubat nane. 3:15 Ma tal neno i amsa, kalu sin ansoi Nai Musa in sulat, kubat nane fe ankub sin nekan. 3:16 Mes leka es nali'on anfain nem neu hit Usif, of nait kubat nane na'ko in human. 3:17 Fun hit Usi, lo Smanan Knino; ma leka Uisneno Ini Smanan Knino anbi me te lasi ao sona anbi nane amsa. 3:18 Ma muni i hit kat kubaf hit humak, mes hit onle nino le tamasab Usif Yesus In apinat. Ma onane te In nabaina hit humak on In human; ma hit fain apinat natuin lasi apinat le na'ko Smanan Knino, hit Usi.
4:1 Haim sium mepu i natuin Uisneno In nek mamun. Es nane te hai ka mi'unu fa hai nekam. 4:2 Haim tite ale mo'et mesokan le namaeb kai. Hai ka mo'ef ela mesokan ma hai ka miklelo fa Uisneno In a'an. Haim etun Uisneno In lomin muti monas. Onane te hai mina'at hai aom neu ale atoni he nati' sin tai hai lasi anbi Uisneno In human. 4:3 Leka Beno Alekot le haim etun fe ka mahine fa, nane al neu atoni le he namle'u es fe ka nahinef. 4:4 Uisneno teta batan i, nafolob atoin ka apalsait sin nekan. In nafolob sin tal sin ka nitaf beno knino neu Neno Anan In apinat le namasab Uisneno In human. 4:5 Fun hai kam etun fa hai aom, mes haim etun Yesus Neno Anan hit Usif. Ma haim fain ate neu ki natuin Yesus In lomin. 4:6 Fun Uisneno es nakua a'an nak, "Meusine of anbol na'ko mesokan!" In amsa es antana hit nekak neik In meusine; he nati' hit tapeni nek ahinet neu Uisneno In apinat le nalilon anbi Neno Anan In human. 4:7 Mes maus i hai mibela ambi bale le anmo'e neki tepas ai klofo, he nati' nalilon, nak matani anesit nane na'ko Uisneno ma ka na'ko fa hai aom. 4:8 Anhamu'i kai anbi ale lasi, mes kan hapnesa kai fa. Hai nekam mamneku, mes hai ka mi'unu fa. 4:9 Anli'u kai, mes ka nasaitan kai fa, anbison kai ai antepon kai, mes hai ka mimle'u fa. 4:10 Hai meik Yesus Ini maten ambi hai aom, he nati' Yesus Ini honis nane nalilon anbi hai aom. 4:11 Fun nana'at hai monim piut-piut neu maten natuin Yesus, he nati' Yesus Ini honis nalilon anbi hai aom amle'ut i. 4:12 Onane te lasi maten naplenat anbi hai aom, mes lasi honis naplenat anbi hi aom. 4:13 Fun hai mipeni smanaf nek ateb knino papmese, onle antui nani anbi Sulat Knino nak, "Au nekak nateb knino, es nane au u'uab," onane te hai nekam nateb knino amsa, es nane te hai mi'uab amsa. 4:14 Fun hai mihin nak Uisneno le nafena Usif Yesus, of nafena kai amsa nok Yesus. Ma In of nok kai ma nok ki neu In human. 4:15 Fun ale lasi nane anbol neu hi. Fun leka atoni namfau napeni manekan Uisneno, onane amsa onen totis namfau le natiaba neu Uisneno; nok lasi nane te nanaeba Uisneno. 4:16 Es nane te hai ka mi'unu fa hai nekam. Maski hai ta'um pah pinan namle'u mes hai nekam nafe'un nani neno-neno. 4:17 Fun lasi hamu'it an-ana batan i naloitan kai lasi apinat nabal-bal le nesin ale sa'. Ma lasi apinat nane naleko nesin hamu'it le haim sutai mani. 4:18 Hai ka mitenab fa lasi le mamnita, mes lasi le ka mamnita. Fun lasi le mamnita nane al neon tuk es, mes lasi ka mamnita nane talan te nabal-bal.
5:1 Fun hai mihin mak kalu ume -- es le aof -- le hit tamaika atbin bi pah pinan i anpukai nani, Uisneno of naloitan neu kit ume mese bi neno tunan, le Uisneno es anmo'e nani ma le anhake talan nabal-bal. 5:2 Anbi ume le muni i, hit tanoi fun hit lomi he tamaika atbi hit ume le anbi neno tunan nane. 5:3 Fun anbi ume nane, hit tamaoftok. 5:4 Leka hit fe tamaika atbi ume pah pinan i, hit tanoi fun hit sutais nane mafena. Ka natuin fa hit tauf tani tainusat aof pah pinan i, mes hit lomi het tainus teki aof neno tunan, he nati' aof honis nane naneku nani aof maten. 5:5 Fun Uisneno es naloitan lasi nane neu kit ma anfe kit Ini Smanan Knino on lasi bela neu ale sa' le naloitan nalali neu kit. 5:6 Onane te hai nekam namep, maski hai mihin mak leka hai fe mimaika ambi aof i, hai fe mi'lo mi'ko Uisneno. 5:7 -- Hai moni natuin nek ateb knino, ka natuin lasi le hai mit meki hai matam -- 5:8 es nane te hai nekam ka na'unu fa. Haim lomi he misaitan aof i he mimaika mok hit Usi. 5:9 Es nane te hai mami he nati' amhalin In nekan, leka hai fe mimaika ambi aof i ai mimaika ambi neno tunan. 5:10 Fun hit alkit mes athake atbi Neno Anan Ini toko alef lasi, he nati' atoni mes-mese napeni seunbanit namnes nok lasi le in anmo'e nani anbi in monin -- he lasi leko ai lasi le'uf. 5:11 Hai mihin lasi amtaus neu Uisneno nane onme; es nane te hai mami he mok atoni sin neu ateb knino. Uisneno nahin hai nekam ma au ufnekan he hi amsa mihin kai ambi hi nekam. 5:12 Hai ka mami fa he nati' him pules kai, mes haim toti he nati' hi miliabom neu kai. Oke te him etun neu ale atoni le naliabok neu lasi aof ma ka neu fa lasi smanaf. 5:13 Fun kalu hai ka miplenat fa hai aom, lasi nane anbi Uisneno In mepu. Ma kalu hai miplenat hai aom lasi nane neu hi alekot. 5:14 Fun Neno Anan In manekan naplenat kai, natuin hai mihin nak atoni mese anmate neu atoni ok-oke, onane te sin anmaet oke. 5:15 Ma Neno Anan anmate neu atoni ok-oke, he nati' sin le anmoni, kais sin moni neu sin aon; mes neu In, le anmate ma nafena nafani neu sin. 5:16 Es nane te hai ka mitenab amteni fa atoni natuin tenab mansian. Ma kalu afi hai mitenab Neno Anan natuin tenab mansian, muni i ka mitenab amteni fa onane neu In. 5:17 Atoni le namesbon nok Neno Anan, in anfain atoni fe'u, fun lasi mna le anbi atoni nane anfin kun -- kiso lasi fe'u nem anbolen. 5:18 Ma ale lasi nane na'ko Uisneno kun. In anmo'e talan te natuin Neno Anan hit taleko tok In, oke te anlelu kit he tatiaba beno alekot he nati' atoni bian naleko amsa nok Uisneno. 5:19 Hai beno esle nak natuin Neno Anan, mansian naleko nok Uisneno. Uisneno ka namnau fa sanat-sanat le mansian anmo'e neu In. Ma Uisneno anlelu kai hem etun beno nane. 5:20 Es nane te hai le i Neno Anan In haef kai. Ma haim fainek ki on Uisneno es anfainek ki. Anbi Neno Anan In kanan haim toit ki, so mina'at hi aom he naleko ki nok Uisneno. 5:21 Neno Anan kan mo'ef sanat, mes Uisneno anmo'e In hen sutai hit sanat, he nati' hit taleko atfani tok Uisneno fun tamesbok tok Neno Anan.
6:1 On bae benu le hit mepu tabua tok Uisneno, haim fainek ki, he nati' kais hi mo'e Uisneno nek mamun le him simo milali nane son-sona. 6:2 Fun Uisneno nakua a'an nak, "Bi leku le Au lomi, of Au nen ko, ma bi neno Au umonib ko, of Au bab ko." *Mimnau nai, leku i lo leku alomit nane. Neno i lo neno tetus nane. 6:3 Kais hai mo'e lasi astunas anbi ale sa', he nati' kais sin na'akan hai mepu. 6:4 Mes hai milile anbi ale lasi, nak hai le i Uisneno In atuthaes kai. Haim sutai ale hamu'it nok nek seusabat. 6:5 Anbi bisot, anbi o'of, anbi matoes, anbi haet ma puse, anbi be'et ma anbi lasi milelnom. 6:6 Anbi nek muti, nek ahinet, ma nek aklati. Anbi Smanan Knino ma lasi manekat le ka nok fa asafanut, 6:7 ma ametun beno alekot ma kuasat Uisneno on Uisneno In atuthaes. Haim na' mimepan Uisneno In lomin on bale manuat he nati' ambe'u musu ma mitau hai aom. 6:8 Antola kai, mes antek nale'un kai amsa; na'akan kai ma anpules kai. Maski hai mi'uab nok amneot sin nak hai mipoibom. 6:9 On atoni ka mahine, mes sin nahin kai. On atoni le hen mate, mes hai fe moni. Anhamu'i kai mes hai ka matef. 6:10 Sin nasusab hai nekam, mes hai malin piut. Hai atoin manukat kai, mes hai mimu'ib atoni namfaun. Hai ka mu'if sa'-sa', mes hai mipeni ale sa'. 6:11 Bae benu manekat abit Korintus! Hai mi'uab muti neu ki ma hai nekam natfei neu ki. 6:12 Ma neu ki anmu'i bale manuan anbi hai nekam, mes neu kai al naloitan bale le malenat anbi hi nekam. 6:13 So mak tomas i he nati' namnes -- au u'uab neu ki on au anhenu -- So leko him fei hi nekam lek-leko! 6:14 Kais hi mimesbom mok atoni ka apalsait neu Neno Anan, fun nane ka nalekof. Leka me atoni le anmo'e Uisneno lomin he namesbon nok atoni le anlaban Uisneno! Ai leka me meusine he namesbon nok mesokan ka? 6:15 Leka me Neno Anan he namesbon nok Belial ka? Ai atoni apalsait namnes nok atoni ka apalsait ka? 6:16 Ai Ume Uisneno anmatalu nok uim le'u ka? Hit le i Uisneno amonit In ume kit, natuin Uisneno In a'an nak on i, "Of Au umaika ubua ok sin ma Au moni bi sin atnanan, ma of Au fain Uisneno neu sin, ma sin fain to neu Kau. 6:17 Es nane te, so him poi mi'ko sin atnanan ma him batiom mi'ko sin, natuin Uisneno In a'an, ma kais him poe sa' le neki hainisit, fun of Au simo ki. 6:18 Ma of Au fain Amaf neu ki, ma of him fain anmone ma anfeto neu Kau Usif tunan, Usif amui kuasat nakua a'an onane."
7:1 Bae benu manekat alki! Natuin hit tapeni talali ale lasi bela nane, es nane leko hi taknino hit aok ma hit smanak na'ko ale lasi amolemut. Ma onane te of naknino kit anbi lasi amtaus neu Uisneno. 7:2 Misona kai bale ambi hi nekam fe! Hai ka mo'ef sanat neu atoni mese ma hai ka milukib fa atoni mese ma hai ka mami fa osaf na'ko atoni mese. 7:3 Au umolok onane ka natuin fa he usanab ki. Fun afi au umolok ulali neu ki ak, hi mipeni bale ambi hai nekam talan te haim lomi he moin mok ki ma he maet mok ki. 7:4 Au nekak muti neu ki, mes au uliabok neu ki amsa. Anbi ale hai lasi hamu'it, au nekak anmalin ma au lasi malinat nane nathoe. 7:5 Leka hai mimte ambi Makedonia, hai aom ka napeni fa snasat. Hai mipeni hamu'it anbi me-me; lasi matoes na'ko atoni bian ma lasi amtaus anbi kai. 7:6 Mes Uisneno le anhalin atoni nek baun, In halin hai nekam natuin Nai Nai Titus anbol nemen. 7:7 Ka al fa natuin in nem ante, mes natuin lasi halinat le in napeni anbi ki. Fun in aneut kai nak him lomi he mi'euk mok kau; hi mitofa hi nekam ma him lomi he meis kau. Ale lasi nane neik malinat naek neu au nekak. 7:8 Es nane maski au ususab hi nekam eki au sulat nane, mes au ka utofa fa au nekak. Namneo afi au tofok, fun au it, nak sulat nane nasusab hi nekam -- maski al neon tuk es -- 7:9 Mes muni i au malin, ka natuin fa hi nekam ansusal, mes natuin hi susal nane nate'un hi nekam. Fun hi susal nane natuin Uisneno In lomin, talan te hai ka milukib ki fa. 7:10 Fun nek susal natuin Uisneno In lomin, nate'un hi nekam ma neki honis neu ki. Ma kan mu'if atoni le natofon natuin lasi nane. Mes susal le na'ko pah pinan i neki ki neu maten. 7:11 Fun him kiso mit susal le natuin Uisneno In lomin nane, neik alekot neu ki. Fun him panat hi aom, nek to'as, lasi amtaus, lasi makoet, ma fekat amneot. Anbi ale lasi nane, hi mililom nak hi ka misanab fa. 7:12 Es nane kalu au tui sulat neu ki, ka natuin fa atoni le nasanab. Ma ka natuin fa atoni le ansutai hamu'it natuin anmo'e sanat. Mes he nati' hi nek lomit nane nalilon neu kai anbi Uisneno In human. 7:13 Natuin lasi nane hai nekam anmalin. Ma ka al fa hai malin, mes hai malin nes-nesi neu Nai Nai Titus in nek malinat; fun hi alki amhalin in nekan. 7:14 Au uliaba ki neu in, ma hi ka mimaeb kau fa. Ale lasi le haim eut neu ki nane namneo. Onane amsa lasi le hai miliabom neu ki antom Nai Nai Titus lo namneo. 7:15 Ma in manekan naek neu ki fun in namnau nak hi alki amlomi he nituin in lekat ma him simo in nok amtaus ma lilitai onme. 7:16 Au malin, fun au ufnekan ki anbi ale lasi.
8:1 Bae benu alki! Hai hem eut ki neu Uisneno In nek mamun le anfe nani neu tolas knino abit Makedonia. 8:2 Fun ansu' sin neik hamu'it mafena huma-huma, mes sin malinat nane nathoe. Maski sin mamui le'uf, mes sin fain amu'it anbi lasi amnaut. 8:3 Au saksi neu ki, nak sin anfe natuin sin be'in, ma neis na'ko sin be'in amsa. 8:4 Natuin nek lomif, sin antoti ma naseke kai he nati' sin amsa napeni halinat he nanaoba mepu tuthaes neu ale atoni knino. 8:5 Sin anfe nesin na'ko le hai mifnekan. Sin nana'at nahunun sin aon neu Uisneno; nalali te neu kai amsa, natuin Uisneno In lomin onane. 8:6 Es nane hai miseke Nai Nai Titus le afi in es na'uba mepu tuthaes nane in net neu ki he nasopu mepu nane anbi ki. 8:7 Muni i hi mipen alekot anbi ale sa', -- anbi nek ateb knino, anbi a'at ma uab, anbi lasi hine, anbi makoet hem bab kai ma anbi hi lasi manekat neu kai --. Onane te so him nao mat ambi mepu tuthaes i. 8:8 Au u'uab lasi i ka on fa plenat neu ki. Mes au he ulile atoni bian sin makoet hen tuntaku atoni. Au lomi he su'it hi lasi manekat ini mneon. 8:9 Fun hi mihin nak Yesus Neno Anan hit Usi, lo In nek kit. In amu'it kun mes natuin hi, In anfain amamu'it, he nati' natuin In mamu'it nane, haim fain amu'it. 8:10 Au nek tenab neu lasi nane, neik alekot neu ki. Namneo na'ko afi ton afinit, hi es minaoba lasi nane; ma hi mifek he nati' hi misopu mani amsa. 8:11 Onane te so leko hi misop mepu nane es tomas i. So leko hi minaoba mani natuin hi lomim ma hi mo'e mani natuin hi be'im. 8:12 Fun kalu him lomi hem fe, of ansimo sa' le him fe mani, fun him fe natuin sa' le hi mu'i ma ka natuin fa sa' le hi ka mu'i. 8:13 Fun kan hafen ki fa he nati' atoni bian napeni makafa, mes he nati' natai ai namnes. 8:14 So leko, tomas i hi athoes nane nano'u sin nukat nane. Oke te sin athoes nane of nano'u hi nukat, he nati' natai. 8:15 Fun antui nani anbi Sulat Knino nak, "Atoni le napeni naek, kan mu'if nesif, ma atoni le napeni kle'o kan labu fa." 8:16 Hai mitulu nekam neu Uisneno,le anfe nek amakoet neu Nai Nai Titus onle hai amsa neu hen bab ki. 8:17 Namneo in simo hai fainekat, mes anbi in makoen in loim kun he neit neu ki. 8:18 Haim sonu in nok hit bae, le mabeti anbi tolas knino ok-oke natuin in mepu anbi etus Beno Alekot. 8:19 Ma ka al fa lasi nane! Mes Tolas Knino anlek nani he nati' nok kai anbi hai lalan. Fun hai hem nao ma mitiaba manekat nane, neu Usif tunan In apinat, oke te hi mihin mak haim loim kim neu mepu nane. 8:20 Haim panat matani he nati' kais anmu'i atoni le nasanab kai neu lasi le hai mitiaba manekat a'naek i. 8:21 Fun hai mitenab lasi alekot, ka al fa anbi Uisneno In human, mes anbi mansian sin matan amsa. 8:22 Haim sonu hai bae es anteni nok sin, le haim su' milali hae fauk ma namneo in lomi hen bab ki. Ma tomas i in lomi nes-nesi hen bab ki, fun in mu'i afnekat naek neu ki. 8:23 Nai Nai Titus nane au bae, le anmeup nok kau hen bab ki. Ma neu hit bae knino bian nane, tolas knino es ansonu sin on lasi aliatas mese neu Neno Anan. 8:24 Es nane so leko hi milile hi lasi manekat neu sin anbi tolas knino sin matan; he nati' sin nahin nak, lasi le hai miliabom neu ki nane lo namneo.
9:1 Nok amneot au ka tui tenif neu ki antom tuntakus le him sonu neu to Uisneno anbi Yudea. 9:2 Au uhin ulali ki, nak him loim hem tuntaku, ma au uliaba ulail ki neu ale atoni abit Makedonia. Au u'uab neu sin ak, "Bae knino sin abit Akhaya, sin naloitan nalali na'ko ton afinit." Ma hi makoet nane anfain lasi heta neu atoni namfaun. 9:3 Au sonu bae knino sin he nati' lasi le hai miliabom neu ki kais luman ai son-sona kun. Mes so namneo-namneo hi miloitan milali onle au umolok ulali neu ki. 9:4 Au umtau kal-kalu anmu'i atoni Makedonia le anlomi he nok kau leka au et eu ki. Ma kalu sin napeni ki, hi fe ka miloitan fa, of hai mae, fun hai mi'uab milali neu sin mak, hai mifnekan naek neu ki. Ma hi al-alki of am mae samsa. 9:5 Es nane au lomi he nati' bae knino sin net nahunun kau he naloitan sa' le him ba'an milali. Onane te of nalilon nak hi tulu nane him fe mani nok nek amlilat ma amnaut ma ka natuin fa seke. 9:6 Mimnau lek-leko lasi i: Atoni le ankifu an-ana of nonu te an-ana amsa ma atoni le ankifu naek of nonu te naek amsa. 9:7 So es-es anfe natuin in nek lomin. Kais nok nek a'unu ai natuin seke, fun Uisneno In nek atoni le anfe nok nek amlilat. 9:8 Ma Uisneno anmui kuasat hen fe ki tetus nok athoes, he nati' hi mimno'u anbi ale sa'. Oke te hi mo'e lasi alekot nesin teni. 9:9 Fun antui nani anbi Sulat Knino nak, "In ankifu nalali, In anfe neu atoin amamu'it, In alekot nabala talan te nabal-bal." 9:10 Uisneno es naloitan fini neu asenat, ma mnahat neu kit. In amsa of naloitan fini neu ki ma of ansato sa' le him sen ma namonib lasi amneot anbi hi nekam. 9:11 Onane te of namu'ib ki anbi mo'et manekat huma-huma oke te hi mitulu nekam neu Uisneno natuin hai. 9:12 Fun tuthaes manekat le hi mo'e nane, ka al fa he mino'u to knino sin nukat, mes of anmo'e atoni amfaut he natulu nekan neu Uisneno. 9:13 Ma natuin hi tuthaes manekat nane nalilon, sin naliatas Uisneno natuin sin nit hi lasi aki'at neu Neno Anan In beno knino. Ma natuin hi nek amnaut him bait ale sa' neu sin ma neu atoni bian amsa. 9:14 Of sin onen toti neu ki natuin sin nek ki, fun Uisneno In nek mamun nathoe neu ki. 9:15 So hit tatulu nekak neu Uisneno fun In manekan nae le'uf kun!
10:1 Au, Nai Paulus kau, au fainek ki natuin Neno Anan In nek leko ma fef mina. Fun leka au haumak ki au u'uab nok nek baun mes leka au u'lo ki au u'uab nok nek maputu. 10:2 Es nane au toti ki: he nati' kais au ulile nek maputu neu ale atoni le sin nak hai moni natuin mo'et pah pinan. 10:3 Namneo hai fe moni es pah pinan, mes hai ka mabe'u fa meki bale manuat pah pinan. 10:4 Fun hai bale manuat nane ka pah pinan ini fa. Mes hai bale manuat nane Uisneno es naloitan nani neki In kuasat he nati' hai mitselab ale kot-kot. 10:5 Haim iup mani ale atoni pah pinan sin lasi matoes ma mitselab main ale atoni pah pinan sin kot amoko le anmo'e nani he natik ma nasap lasi hine neu Uisneno. Haim ek ale sin nek tenab nane ma mina'at mani neu Neno Anan. 10:6 Leka hi nek atninas nane nanokbon, hai miloitan milali hem kas ale atoni le anmo'e lasi amle'ut. 10:7 Him kius mit lasi le nalilon anbi hi matam. Leka anmu'i atoni mese le nateb anbi in nekan nak, in lo Neno Anan Ini, so in natenab anbi in nekan nak, hai amsa Neno Anan Ini kai onle in. 10:8 Au ka mae fa, kalu au uliabok nes-nesi neu kuasat le hit Usi anfe neu kit. Fun anfe kuasat nane neu kai he nati' hai mifena ki ma ka mimofu ki fa. 10:9 Ma au ka lomif he nati' hi mitenab mak, au hakatau ki eki au sulat sin. 10:10 Fun anmu'i atoni le na'uab nak, "In sulat hanan mafena ma matani. Mes kalu in haumak kit in kan maspetif ma in uab nane ka ma'ota fa." 10:11 Mes so atoni le na'uab onane, in mes nahin nak leka hai met, of hai mo'et nane papmese onle sa' le haim tui anbi hai sulat sin. 10:12 Hai ka mitam fa hai aom ai minesa hai aom mok ale atoni le nanaeb sin aon. Sin anluku sin aon neki sin luku ma sin nanesa sin aon neki sin aon. Mo'et onane mo'et amonot kun! 10:13 Hai ka miliabom fa nesi batas, mes hai mepu ambi batas le Uisneno anlek nani neu kai, le neti antia ki amsa. 10:14 Leka hai met meu ki ma ametun Neno Anan In Beno Alekot hai kam poif mi'ko batas le hai mepu ambin; fun hi amsa ambi batas nane. 10:15 Hai ka miliabom fa neu mepu le atoni bian anmepu anbi bale le kan lek nani fa neu kai. Mes hai mifnekan, leka hi nek ateb knino nane ansato, of hai mipeni kan tola nesin teni anbi ki kalu hai minesa nok bale le anlek nani neu kai. 10:16 Natuin lasi nane te haim lomi hem etun beno knino neu pah-pah le na'lo na'ko hi pah. Ma hai ka miliabom fa neu atoni bian sin mepu anbi pah le anlek nani neu sin. 10:17 Fun antui nani anbi Sulat Knino nak, "Atoni le naliabon, so naliabon anbi hit Uisneno." 10:18 Fun atoni le anpules in aon in ka nalan nabe'if, so atoni le hit Usi anpules nani.
11:1 So leko him lomi, au mono kle'o! Him loim onane ka? 11:2 Au loim ki onle Uisneno anloim ki. Fun au mafutub ulali ki neu atoni mese he ok ki on bife ao temef le knino neu Neno Anan. 11:3 Mes au umtau, kalu hi nekam na'oni oke te hi ka mi'ki amtenif meu Neno Anan. Papmese on afi kauna anfui. Bi Hawa neik in manoen. 11:4 Fun him ta'ah kim kalu anmu'i atoni le anetun ki Yesus teta na'ko le haim eut ki. Ai anfe ki smanaf teta na'ko le him sium milali ai Beno Alekot teta na'ko le him sium milali. 11:5 Mes natuin au nek tenab, au ka labu fa kle'o u'ko haef makana bian sin. 11:6 Oni au atoin amonot kau bi uab, mes anbi lasi hine neu Uisneno, au ka atoin amonot kau fa. Fun hai milile milali neu ki anbi ale leku ma anbi ale lasi. 11:7 Ai au usanab neu ki ka? Fun au ubaun au aok he nati' nalatan ki, ma au etun Uisneno In beno knino neu ki ka nok fa baen mes lum-luman kun. 11:8 Leka au tuthae ki, tolas knino bian sin es anbaen kau. Au ulukib sin he nati' sin bab ki. 11:9 Leka au nukan sa'anbi ki, au ka ususab fa atoni mese. Fun sa' le au nukan nane, bae knino sin abit Makedonia sin natis nani neu kau. Au panat au aok anbi ale lasi, he nati' kais anfain sutais neu ki. Ma of au mo'e onane piut. 11:10 Nok Neno Anan In amneot anbi kau, au ak ki, katit fa atoni mese anbi pah Akhaya hen ek au nek liaba nane. 11:11 Nansa au u'uab onane ka? Ai natuin au ka nek ki fa ka? Uisneno es nahin lasi nane. 11:12 Lasi le au mo'e, of au mo'e piut he nati' haef knino bian sin ka napeni manuan he naliabok ma sin nak, sin mepu papmese onle hai mepu. 11:13 Fun atoni onane sin haef knino apoiba. Sin ameput le nalosib atoni ma anmo'e sok on Neno Anan In haef knino. 11:14 Kais hi mimkak neu lasi nane, fun Nitu amsa namasbon on ahake meusine! 11:15 Es nane te ka lasi amkakat fa, leka in ameuptenu anmo'e sok on ameput le anmo'e Uisneno lomin. Of namuni te sin napeni sin mo'et nane in seunbanit. 11:16 Au u'uab a'teni ak, so es kais ankius kau on amonot. Ma kalu hi mitenab onane, so him sium kau on atoin amonot, he nati' au uliabok kle'o. 11:17 Sa' le he au u'uab, au ka u'uab ani fa on atoni le na'uab natuin Uisneno In a'an. Mes au u'uab ani on atoni amonot le nateb, nak in mes naliabon. 11:18 Fun anmui atoni namfau le naliabok natuin nekaf pah pinan, es nane au lomi he uliabok amsa. 11:19 Him lomi hem sium atoni amonot fun hi atoin ahinet ki. 11:20 Fun him lomi, leka atoni na'aet ki, leka atoni nah maet hi sa', leka atoni naplenat ki, leka atoni namokon neu ki, leka atoni anpas ki. 11:21 Au nek mae kuk, fun haim limae neu he mo'e lasi onane. Mes kalu atoni bian nabe'i naliabok -- au amsa ube'i uliabok -- au u'uab on atoin amonot! 11:22 Sin atoni Ibrani ka? Au amsa atoin Ibrani kau! Sin atoni Israel ka? Au amsa atoin Israel kau! Nai Abraham in sufan esle sin ka? Au amsa Nai Abraham in sufan kau! 11:23 Neno Anan In atuthaes sin ka? -- au u'uab on atoin amaunu -- au amsa tuthae nesin sin! Au hae nesin sin, natam kau anbi o'of nesin sin, anbiso kau nesin sin ma ala kle'o te au he mate. 11:24 Atoni Yahudi sin anhamu'i kau hae nim, ma anbius kau papa bo'tenum sio. 11:25 Anbius kau hae tenu, anpoil kau neik fatu hae mese. Au lem ok bnao hae tenu, au utboe bi oe tasi neno teme mese ma fai teme mese. 11:26 Anbi au lanan le he unaoba mepu, au sutai susal namfaun, noe sako, atoin asikat, koke na'ko atoni Yahudi, koke na'ko atoni le kan tamaf nonot Yahudi. Au upeni susal anbi kot, susal anbi mnela paha snaen, susal anbi tasi atnanan, susal na'ko au bae sin le napoibok nak sin atoni Slani. 11:27 Au uhaebok naek ma mepu mafena; fe fe'at au ka tupaf, au ka uah ma ka inuf, fe fe'at au unahok, manikin ma kan mu'if tainusat. 11:28 Au ka teka tenif lasi bian; fun neno-neno au he ubiku ma tuthae Tolas Knino. 11:29 Leka anmu'i atoni le anlima'e, au amsa lima'e ok sin? Leka sin anmu'i atoni le anmofu anbi sanat au nekak naklati? 11:30 Leka au uliabok, of au uliabok anbi au lima'et. 11:31 Au ka upoibok fa. Uisneno, le hit Usif Yesus In Amaf anfain saksi neu kau. So atpules In kanan talan te nabal-bal. 11:32 Leka au bi Damsyik Kesel Aretas in kumlol naplenat atoni sin hen pao kot Damsyik hen heke kau. 11:33 Mes sin natam kau neu kola ma nasanut kau natuin baik lape in fafon. Onane te au ufetnok u'ko sin.
12:1 Au he uliabok, maski lasi nane ka ma'upa fa, mes au he eut ki mnitas le au simo na'ko hit Uisneno. 12:2 Au uhin neu atoni Slani mese, afi ton bo'es am ha afinit -- he aon ta'un ai he smanan ka, au ka uhinef, Uisneno es nahine -- na'aiti atoni nane neu neno tunan in kuni ai peni tenu. 12:3 Au amsa uhin atoni nane, -- he aon ta'un ka ai he smanan ka, au ka uhinef, Uisneno es nahine -- 12:4 nait atoni nane neu Firdaus ma in nen uab le ka mateka fa, le mansian ka nabe'i hen tek nani. 12:5 Au he uliabok neu atoni nane, mes au ka uliabok fa neu au aok, so al neu lasi lima'et sin. 12:6 Fun kalu au he uliabok amsa, au ka atoin amonot kau fa, fun au u'uab lasi amneot. Mes au utau au aok, he nati' kais anmu'i atoni le natenab neu kau nesin le sin nit anbi kau ai le sin nen na'ko kau. 12:7 Mes he nati' kais au umok'ok natuin ale mnitas matani nane, antao kau kasunat mese ai menas mese anbi au aok. Menas nane na'ko santuaf hen tufu kau he nati' kais au umok'ok. 12:8 Au onen toti hae tenu neu Uisneno antom santuaf nane, he nati' naskot ai na'lo na'ko kau. 12:9 Mes Uisneno natae neu kau nak, "Au halinat neu ko, noba nai, fun au matanik natision anbi ho lima'et." Es nane te au lomi he uliabok natuin au lima'et, he nati' Neno Anan In matanin namafo ai nahafo kau. 12:10 Natuin lasi nane au malin ma au lomi he bi lima'et. Au lomi he na'akan kau, anhamu'i kau, anli'u kau ma nasusab kau natuin Neno Anan. Fun leka au lima'e te au upeni matani. 12:11 Namneo au fain amonot, mes hi miseke kau. So hi mes ampules kau. Fun maski au olof kau, mes anbi ale lasi au ka ubaunok fa u'ko ale haef knino makana nane sin. 12:12 Ale lasi taka ma lasi amkakat ma ale kuasat ma matnai au mo'e ulali anbi ki nok seusabat he nati' hi mihin, mak au haef knino kau. 12:13 Au ka kius ki fa anbi lasi sa' ka, kalu tanesa nok tolas knino bian ka? So al anbi lasi i: Nak au ka ususab ki fa he nati' him baen kau. Au toit ma'af neu nek tenab ka amneot nane! 12:14 Kiso au uloitan ulali hae tenu he et eu ki. Mes au ka lomif he ususab ki, fun au ka amif hi mu'im mes au aim ki. Fun li'ana ana ka naim fa maus neu amaf ainaf, so amaf ainaf es nami maus neu sin anhenu. 12:15 Es nane te au lomi he una'at au maus, ma neis na'ko nane au lomi he una'at au aok natuin hi monim. Kalu au nek ki, nansa hi kam nek kau fa ka? 12:16 Neu, au ka lomif he ususab ki, mes -- hi mak -- au amkesit kau es au hel ki eki fulit. 12:17 Ai au upeni osaf sa' natuin atoni le au sonu neu ki ka? 12:18 Au toit Nai Nai Titus he net neu ki ma au sonu bae knino bian he nok Nai Titus. Ai Nai Nai Titus ansimo osaf sa' na'ko ki ka? Fun hai nua kai mepu nekaf mese ma hai mo'e natuin lekat mese. 12:19 Hi mitenab lalo, ma hai mimneobom ambi hi matam. Hai mi'uab ambi Uisneno In human ma nok Neno Anan In kanan, mak, hai mo'e ale lasi nane bae benu manekat, hem hatani hi nek ateb knino. 12:20 Au umtau leka au et, au upeni ki kan tomaf au lomik ma hi mipeni kau kan tomaf hi lomim. Au umtau kais-kais anmu'i matoes, manek nanan, lasi to'as, es-es naim kun alekot neu in aon, lasi ma'akan, lasi botu ai uab tutab, lasi mo'ko ma lasi taisibu. 12:21 Au umtau, leka au eti teni, au Uisneno of nabaun kau anbi hi matam. Ma of au nekak ansusal neu atoni namfau le afi anmo'en sanat ma sin ka nateunok fa na'ko sin mo'et amle'ut, sin mo'et amolemut ma sin mo'et amneot.
13:1 I hae tenu le au et eu ki. Sulat Knino anetun nak, "Leko atoni nua ai tenu anfain saksi, lasi nane namneo. 13:2 Neu ale atoni le afi anmo'e sanat ma atoni bian, au eut ulail ki ma haef i au etu ten ki. Tomas i leka au fe u'lo ki, papmese onle neno au et hae nua, of ka neka tenif sin kalu au eti teni. 13:3 Fun him loim he mita taka, nak Neno Anan nakua a'an anbi kau. Ma In of kan limae fa neu ki mes of nalile In matanin anbi ki. 13:4 Fun maski napeti In natuin lima'et, mes In anmoni natuin Uisneno In kausat. Namneo haim lima'e ambi In, mes of hai moni mok In natuin hi ma natuin Uisneno In kuasat. 13:5 So him au'hi aom, ai hi mibala ambi nek ateb knino ka? So him tae hi aom! Ai hi ka miteb fa anbi hi aom, nak Neno Anan Yesus nabala anbi ki ka? Fun kalu ka on fa nane, hi ka malan mibe'if. 13:6 Mes au ufnekan, ak hi mihin mak, ka hai es ka malan mibe'if su'at. 13:7 Haim onen toti neu Uisneno he nati' kais hi mo'e lasi amle'ut. Fun ka natuin fa hai malan mibe'i su'at mes he nati' hi mo'e lasi alekot. Maski ankius kai on atoni le ka nalan nabe'i fa su'at. 13:8 Fun hai ka mibe'i fa he mo'e sa' le nasuli nok Uisneno lomin; so mak hai mo'e mituim Uisneno lomin. 13:9 Fun hai malin, leka haim limae mes hi mibe'i kim. Haim onen toti neu lasi i he nati' hi knino ki. 13:10 Es nane te au tui ki sulat i leka au fe bi lo; he nati' leka au ok ki kais au umaunun ki eki kuasat le hit Usif anfe neu kau. Fun anfe kau kuasat nane he fiti ki ma ka utselab ki. 13:11 Lasi amsoput bae benu alki! Mimlil nai ma amhataniom he nati' hi aom nakninon. So him simo ale au fainekat sin. So hi nekaf mese ma ansaof mese ma hi moni nok halan nekaf. Ma Uisneno, lasi manekat ma halan nekaf in un of anhaek nok ki. 13:12 So hi masimo es nok es meik manekat knino. Ale to knino ansonu tabe neu ki. 13:13 Usif Yesus Neno Anan In tetus knino, ma Uisneno In manekan ma nekaf mese natuin Smanan Knino anhaek nok ki alki. Na'ko hai nua kai, Nai Paulus ma Nai Timotius.
1:1-3 Neu tolas knino anbi Galatia! Au Nai Paulus, ma bae knino sin anbi i, haim toti he nati' hit Ama Uisneno ma Yesus Neno Anan hit Usi, anfe tetus ma aomina neu ki. Au fani haef knino ka natuin fa mansian ma ka na'ko fa mansian, mes natuin Yesus Neno Anan ma hit Ama Uisneno le nafena In na'ko amates. 1:4 In natnin neu Uisneno ma nana'at In aon hen fain fua tulu natuin hit sanat, he nati' namonib kit na'ko batan amle'ut i. 1:5 So atpules Uisneno talan te nabal-bal! Amin. 1:6 Au umkak, fun fe ka sa'-sa' fa him nao amkoti Uisneno, le anboin ki neu Neno Anan In halinat knino ma hi mituin "Lasi Knino teta," 1:7 le ka Uisneno In Lasi Knino fa. Anmu'i atoni le nakalab hi nekam ma naklelo Neno Anan In Lasi Knino. 1:8 Atoni le anetun Lasi Knino teta na'ko Lasi Knino le haim etun ki, maut he Uisneno sukat, maski atoni nane esle' hai ka ai ahake neno le nem na'ko neno tunan. 1:9 Onle afi haim eut milali ki, tomas i au etun ateni ki. Kalu anmu'i atoni le anetun ki Lasi Knino teta le nasuli na'ko Lasi Knino le him simo milali na'ko kai, so Uisneno ansukat in. 1:10 Neu tomas i onme ka? Au he halin atoni pah pinan ka, ai he halin Uisneno ka? Ai au aum he atoni pah pinan anlomi kau ka? Kalu au fe mo'e onane, au ka Neno Anan In ate kau. 1:11 Bae benu alki, au eut ki, ak Lasi Knino le au eut ki ka na'ko fa mansian. 1:12 Au ka simof lasi nane na'ko mansian, ma katit fa atoni mese le nanoina kau. Mes natuin Yesus Neno Anan nalilon kun neu kau. 1:13 Him nen milalien antom au monik le afi au utuin atoni Yahudi sin lasi. Hi mihin, nak au li'u tolas Uisneno ma au aim lanan matani he ule'un ani. 1:14 Ma anbi lasi minaoba atoni Yahudi sin lasi noina, au finin au bae sin le nabat nok kau anbi nonot Yahudi. Ma au makoe nesi anbi lasi he panat au mnais enu sin lasi halat. 1:15 Mes natuin Uisneno nekan alekot In anbeti kau na'ko au aina in apun, In anboin kau he tuthae In. 1:16 Uisneno nalile In Anmone neu kau, he nati' au etun In Lasi Knino neu ale uf le kan tamaf nonot Yahudi. Bi leku nane au ka nao fa he toti fainekat na'ko atoni bian antom lasi i. 1:17 Au ka nao fa amsa neu sin le anfani haef knino nahunun kau anbi Yerusalem. Mes au nao eu pah Arab, oke te au fain eu kot Damsyik. 1:18 Ton tenu namuni te au nao eu Yerusalem he kiso Nai Kefas. Au umaika okan neno bo'es am nim. 1:19 Au ka itaf haef knino bian, al Usif Yesus In olif Nai Yakobus. 1:20 Lasi le au tui ki nane namneo. Uisneno nahin, nak au ka upoibok fa. 1:21 Namuni te au nao eu pah Siria ma Kilikia. 1:22 Mes tolas knino Neno Anan anbi pah Yudea sin ka nahin fa au humak. 1:23 Al sin nen nak, atoni le afi anli'u kai, muni i anetun lasi ateb knino, le afi in he nale'un nani. 1:24 Oke te sin nanaeb Uisneno natuin au.
2:1 Ton bo'es am ha namuni te, au nao eu Yerusalem ok Nai Barnabas ma ok Nai Nai Titus amsa. 2:2 Au nao eu Yerusalem, natuin Uisneno es nalile nani -- Au u'uab ok atoni makana sin anmes -- ma au uhoeb Lasi Knino le au etun ulali neu ale uf le kan tamaf nonot Yahudi. Fun au ka lomif he nati' au mepu nane son-sona ai luman. 2:3 Kiso, Nai Nai Titus le in nok kau, in atoni Yunani mes ka naseke fa in he natuin lasi helit ai lasi hapit, 2:4 maski anmu'i atoni le naseke lasi nane. Sin le nane atoni le an'ap nok kit on bae knino. Sin neman nok lasi tolo' he natnu hit lasi fetin ai ao sona le hit tapeni anbi Neno Anan Yesus. Sin mo'e onane he nati' sin nabe'i na'ate kit. 2:5 Mes hai ka maen kotif ma ka mituin fa sin, he nati' Lasi Knino in amneot nabala anbi ki. 2:6 Mes neu sin le on atoni makana -- le afi sin napeni nani onme, au ka uhinef, fun Uisneno kan betif humaf -- maski onane amsa sin le makana nane ka naseke fa lasi sa' neu kau. 2:7 Mes leka sin nit nalali, nak Uisneno nana'at nalali kau lasi he etun Lasi Knino neu atoni le kan tamaf nonot Yahudi onle Nai Petrus anetun Lasi Knino nani neu atoni Yahudi sin. 2:8 Fun Uisneno es anfe matani neu Nai Petrus hen fani haef knino neu atoni maheli sin. In amsa es anfe kau matani he fani haef knino neu atoni ka maheli sin. 2:9 Ma leka sin nit nalali nak Uisneno anfe kau mepu i, Nai Yakobus, Nai Kefas ma Nai Yohanes le anfani on ni neu tolas knino sin ansimo kai. Sin mana' nim nok kau ma nok Nai Barnabas on taka nek mese. Oke te hai malomis he nati' hai mepu ambi atoni le kan tamaf nonot Yahudi ma sin anmepu anbi nonot Yahudi. 2:10 Sin antoti he nati' hai mimnau atoni amamu'it sin. Ma au lomi nesi he unaoba lasi nane. 2:11 Leka Nai Kefas nem neu Antiokhia au usuil okan mat-mat fun in mo'et nane ansan. 2:12 Nahunu te in antoko ma anbukae nok in bae sin le kan tamaf nonot Yahudi. Mes leka Nai Yakobus in atoni sin neman in naskot na'ko sin fun in namtausan in bae le maheli sin. 2:13 Ma atoni Yahudi bian amsa an'asafanu nok in, talan te Nai Barnabas natuin sin mo'et asafanut nane. 2:14 Mes leka au it sin mo'et le ka natai fa nok Lasi Knino in lomin, au u'uab neu Nai Kefas anbi sin matan ok-oke, "Kalu ho atoni Yahudi, ho moni on atoni le kan tamaf nonot Yahudi, leka me ho museke atoni ka maheli hen moni on atoni Yahudi ka?" 2:15 Natuin likin ma pe'en hai atoni Yahudi kai ma ka atoni amo'e sanat na'ko uf bian. 2:16 Hai mihin, nak katit fa atoni mese le naleko anfani nok Uisneno natuin in nanaoba Plenat Knino, mes al natuin nek ateb knino neu Neno Anan Yesus. Es nane te haim palsai neu Neno Anan Yesus, he nati' hai mileko mok Uisneno natuin palsait neu Neno Anan ka natuin fa mo'et Plenat Knino. Fun, "katit fa atoni mese le naleko anfani nok Uisneno" natuin nanaoba Plenat Knino unu. 2:17 Ma kalu haim lomi he mileko amfani mok Uisneno anbi Neno Anan natuin hai atoni asanat, lasi nane, nak Neno Anan es anmo'e kai hem tam meu sanat ka? Kahaf. 2:18 Fun kalu au uhakeb ufani sa' le au pukai ulali, au on atoin atanhai Plenat Knino. 2:19 Mes au mate natuin Plenat Knino, ma neu Plenat Knino he nati' au moni neu Uisneno. Ma napeti nalali kau nok Neno Anan, 2:20 mes au moni. Nane ka au fa, mes Neno Anan anmoni anbi kau. Ma monit le au moni muni i, nane monit natuin nek palsait neu Uisneno In Anmone. In nek kau ma nana'at In aon anseka kau. 2:21 Au ka tite fa Uisneno In nek mamun. Fun kalu lasi mafutus nok Uisneno naleko anfani natuin Plenat Knino, Neno Anan In lasi maten nane ka ma'upa fa.
3:1 Koi atoni Galatia amonot, sekau es naleko ki ka? Yesus Neno Anan In lasi maten anbi hau nehe afi au eut ulali neu ki. 3:2 Au lomi he uhin lasi i na'ko ki. Him simo milali Smanan Knino natuin hi minaoba plenat knino unu, ai natuin hi nekam anpalsai neu Neno Anan natuin etus Lasi Knino ka? 3:3 Hi mono onane neu sa' ka? Hi mi'uba anbi Smanan Knino ma hi misopu meki hi matanim ka? 3:4 Him sutai lasi namfau onane son-sona ka? Leka me he luman. 3:5 Neu tomas i onme, Uisneno anfe In Smanan Knino neu ki nok athoes ma anmo'e lasi taka namfau anbi hi atnanam. Uisneno anmo'e lasi nane natuin hi minaoba Plenat Knino unu ai natuin hi nekam anpalsai neu Neno Anan natuin etus Lasi Knino ka? 3:6 Onane amsa Nai Abraham nekan nateb knino neu Uisneno, oke te Uisneno ansimo in on atoni le anhalin Uisneno nekan. 3:7 Es nane hi mihin nai, mak ale atoni apalsait nane namneo-namneo Nai Abraham in sufan sin. 3:8 Sulat Knino nahin nahunun lasi nane, nak Uisneno anfe manuan neu atoni le kan tamaf nonot Yahudi he naleko anfani nok Uisneno kalu sin palsai neu In. Fun anetun nahunun Lasi Knino neu Nai Abraham nak, "Of anbi ko Uisneno anfe tetus neu ale pah-pah." 3:9 Nai Abraham anpalsai, es nane in napeni tetus. Onane amsa ale atoni le anpalsai, of napeni tetus nok Nai Abraham. 3:10 Fun ale atoni le anmoni natuin Plenat Knino unu sin napeni sukat. Fun antui nani nak, "Atoni le ka nanaoba fa ale sa' le antui nalali anbi Sulat Plenat Knino unu, Uisneno of ansukat nani." 3:11 Ma katit fa atoni mese le naleko nok Uisneno natuin in nanaoba Plenat Knino unu. Fun antui nani nak, "Al atoni le anpalsai neu Uisneno tal in lasi mafutus naleko anfani nok Uisneno, of anmoni!" 3:12 Mes Plenat Knino unu nane in sukin ka es fa nek ateb knino. Mes atoni le nanaoba Plenat Knino of anmoni natuin plenat nane. 3:13 Neno Anan ansoi napoitan kit na'ko Plenat Knino unu in sukat. In nanaoba lasi nane natuin lanan nana'at In aon hen sutai sukat anseka kit. Fun antui nani nak, "Sukat neu atoni le anmate anbi hau nehe." 3:14 Yesus Neno Anan anmo'e lasi i he nati' tetus le Uisneno anba'an nani neu Nai Abraham anfe nani amsa neu uf bian le kan tamaf nonot Yahudi. Onane te of hit le atpalsai neu Uisneno, atsimo Smanan Knino le In anba'an nani. 3:15 Bae benu alki! Leko nesi au u'uab leta mese na'ko monit neno-neno. Fefbela le antao nalali, katit fa atoni mese le hen pukai nani ai hen sato anteni. 3:16 Uisneno nabela In fefbela nane neu Nai Abraham ma neu in sufan. Uisneno ka nak fa, "neu in sufan ka'un sin" le antom neu atoni mfaun, mes Uisneno nak, "neu ho sufam" nane antom neu atoni mese, esle' Neno Anan. 3:17 Au lomik on i, Uisneno nabela nalali In fefbela na'ko afi. Es nane Plenat Knino unu le anfe namuni anbi ton natun ha ma bo'tenu ka nabe'i fa he naneku Uisneno In fefbela nane. 3:18 Fun kalu sa' le Uisneno anlek nani na'uba na'ko plenat knino unu, in ka na'ko fa fef ba'an nane. Mes natuin fef ba'an, Uisneno anfe In halinat neu Nai Abraham. 3:19 Kalu onane, Plenat Knino unu in lomin he sa' ka? Antao plenat knino unu nane he nalile mansian in lasi tanhais. Plenat nane nanaobon talan te Nai Abraham sufan le Uisneno anba'an nani ankoenon nem. Plenat nane natiaba nani natuin ahake neno tunan sin neu atoni tnana mese. 3:20 Atoni tnana nane so anhake neu tuaf nua. Mes Uisneno ka nukan fa atoni tnana, fun In mes kun es anlek. 3:21 Kalu onane, Plenat Knino unu nasuli nok Uisneno In fefbela ba'an ka? Kahaf. Fun kalu anfe Plenat Knino unu on lasi le he namonib mansian, onane te mansian nabe'i naleko nok Uisneno natuin Plenat Knino unu. 3:22 Mes Sulat Knino anetun nak ale mansian ok-oke anbi sanat in kuasat. Es nane te, natuin nek ateb knino anbi Yesus Neno Anan, fefbela nane anfe nani neu atoni le nekan nateb knino. 3:23 Nahunun nek ateb knino nane anbol, Plenat Knino unu anpao kit matani; ma anek kit talan te nek ateb knino nane nalilon. 3:24 Onane te Plenat Knino anfani atopus neu kit talan te Neno Anan ankoenon nem, naleko nafani kit nok Uisneno natuin hit nek ateb knino neu Neno Anan. 3:25 Muni i, leku antelen he nati' mansian anpalsai neu Neno Anan es nane te atopus nane kan paon teni kit. 3:26 Hi alki Uisneno In anhin natuin nek ateb knino neu Yesus Neno Anan. 3:27 Fun hi alki le amsu oe ambi Neno Anan, him simo milali Neno Anan ma mimesbom mok In. 3:28 Anbi lasi i katit fa atoni Yahudi ai atoni Yunani, katit fa ate ai atoni ao sona, katit fa atoni ai bife fun hi alki mese ambi Neno Anan Yesus. 3:29 Ma kalu hi Neno Anan Ini ki, onane te Nai Abraham sufan ki. Ma him tam ota hem simo Uisneno In fefbela ba'an.
4:1-2 Mes au he eut ki ak, leka apal bael bela mnasi nane in fe li'ana, anmu'i atoni le anpanat in ma anlekan ale sa'-sa', talan te neno le in amaf anlek nani. Fun in papmese on ate, maski in apal bael bela mnasi kun. 4:3 Onane amsa hit, leka hit fe li'ana kit, hit aetnok teu ale smanaf pah pinan. 4:4 Mes leka in neno ante, Uisneno ansonu In Anmone nem neu pah pinan. Anah nane nahonis nani na'ko bife ma anmoni natuin Plenat Knino unu. 4:5 Ansonu In he nati' ansoi napoitan sin le anmoni natuin Plenat Knino unu, he nati' ansimo kit het fain anah-anah Uisneno. 4:6 Natuin hi anah-anah Uisneno, Uisneno ansonu In Anmone In Smanan Knino antam neu hit nekak le In anbai nak, "koi Abba, koi Ama!" 4:7 Es nane hi ka ate anteni, mes him fani anah. Kalu hi on anah, hi amsa apal bael bela mnasi natuin Uisneno. 4:8 Afi unun hi fe ka mihin fa Uisneno, es nane te him aetnom neu Uisneno teta le namneo ka Uisneno fa. 4:9 Mes muni i hi mihin Uisneno, nes-nesi Uisneno nahin ki. Leka me hi hem fani amteni meu smanaf pah pinan le anole ma anmamu'i ka? Nansa hi hem aetnom amteni neu ale smanaf nane ka? 4:10 Him panat ale neno naek, ale funan, ale leku ma ale ton. 4:11 Au umtau kal-kalu au haet ma au puse neu ki ka m'aupa fa. 4:12 Au toti ki bae benu alki, he nati' him fani onle au, fun au amsa anfani onle hi. Au fe ka upeni fa lasi amle'ut sa' na'ko ki. 4:13 Hi mihin, nak afi hae unu au etun Lasi Knino neu ki natuin menas anbi au aok. 4:14 Au menas nane anfani su'at neu ki, mes hi ka mitenab fa on lasi amolemut le neki hainisit, mes him simo kau onle ahake Uisneno ma onle Neno Anan Yesus. 4:15 Hi ua alekot ki anbi leku nane. Mes muni i, hi ua alekot nane esme ka? Au saksi neu ki, ak anbi leku nane kalu nabe'i him loi' mipoitan hi matam ma amfe mani neu kau. 4:16 Au fani hi musu ka, natuin au eut ki lasi amneot? 4:17 Sin naim lanan hen fuil ki mes sin nek tenab nane ka nalekof. Fun sin lomi he nale'un hi lasi mafutus mok kai oke te mituin sin. 4:18 Nane alekot kalu sin loim hen fuil atoni bian natuin lasi alekot, lamu anbi ale leku ka al fa bi leku au ok ki. 4:19 Anah sin! Au sutai ma'ne'at on fenai mese' an sutai menas anbi tobu he nahonis li'ana. Au mes a'sutai ma'ne'at piut leko Yesus Neno Anan In lomin nane fe' kan senonfa anbi hi monim. 4:20 Au lomi he haek ok ki anbi leku i, ma u'uab eki hanaf bian, fun au ka uhine tenif he u'uab sa' neu ki. 4:21 Him eut kau nai neu le hi moni ambi Plenat Knino unu; ai hi kam nenaf Plenat Knino unu ka? 4:22 Fun antui nani, nak Nai Abraham anmu'i anmone nua. Anhes nahonis na'ko bife le anfani ate ma anhes nahonis na'ko bife ao sona. 4:23 Anah le nahonis na'ko bife le anfani ate nane natuin nekaf pah pinan ma anah le nahonis na'ko bife ao sona nane natuin Uisneno In fefbela ba'an. 4:24 Lasi i anfani leta mese. Bife nuain nane antom Uisneno In fefbela ba'an nua. Es na'ko Nu'af Sinai ma nahonis in anhenu neu lasi ate, esle' bi Hagar -- 4:25 Bi Hagar nane, esle' Nu'af Sinai anbi pah Arab -- In maleta on kot Yerusalem muni i, le anmoni nok in anhenu anbi lasi ate. 4:26 Mes Yerusalem abit neno tunan nane bife ao sona, ma nane hit aina. 4:27 Fun antui nalali nak, "Malin nai, hoi bife akiut le ho ka muhoni mitaf! Mu'ba ma amkasul nai, le ho ka muhin fa men mahonit! Fun bife le in mone naen nasaitan of anmu'i anah namfau nes na'ko bife le anmamone." 4:28 Ma hi, bae benu, hi anah-anah Uisneno le nahonis ki natuin fefbela ba'an Uisneno on Nai Ishak. 4:29 Mes on afi, anah le nahonis natuin lomif mansian, anhamu'i anah le nahonis natuin Smanan Knino, onane amsa muni i. 4:30 Mes antui anbi Sulat Knino nak sa' ka? "Amli'u ate bife nane nok in anmone, fun ate bife nane in anmone of kan fanif apal bael bela mnasi nok bife ao sona nane in anmone." 4:31 Es nane bae, hit ka ate bife in anhin kit, mes bife ao sona nane in anhin kit.
5:1 Namneo Neno Anan nafetin kit neu ao sona. Es nane te him hake mi'ki ma kais him lomi hem aetnom amteni. 5:2 Tebes, au Nai Paulus, au ak ki, kalu him lomi hen heli ki ai hen hapi ki, Neno Anan ka ma'upa fa neu ki. 5:3 Au u'uab teni neu ale atoni le anlomi he natuin lasi helit so in natiaba ale Plenat Knino unu. 5:4 Kalu him lomi he mileko mok Uisneno natuin Plenat Knino unu, nane hi mitsefi mi'ko Neno Anan. Onane te hi ka monif ambi Uisneno In nek mamun. 5:5 Fun natuin Smanan Knino ma natuin nek ateb knino neu Neno Anan, Uisneno naleko nafani kit nok In. 5:6 Kalu hit tamesbok tok Neno Anan Yesus, lasi maheli ai ka maheli nane in kan tamaf molok. Al lasi ateb knino neu Neno Anan le natonon anbi lasi manekat neu atoni bian. 5:7 Afi hi mautnom mok alekot. Muni i hi ka mituin amteni fa Uisneno lomin neu sa' ka? Sekau es anfuli ki ka? 5:8 Lasi fulit nane ka na'ko fa Uisneno le anboin ki. 5:9 Laul haef le an-ana anmahaib u'kabu ok-oke. 5:10 Maski onane au fe apalsai nak of hi ka mituin fa lasi bian, fun hit tamesbok talali tok Neno anan. Mes atoni le nakalab ki, he sekau am sekau of ansutai sukat na'ko Uisneno. 5:11 Neu au, bae benu alki, kalu au fe etun lasi mahelit, nansa sin anli'u kau? Fun kalu onane Neno Anan In hau nehe ka neki fa lasi astunas. 5:12 Leko nesi atoni le nakalab ki anpoi na'ko Tolas Knino. 5:13 Bae benu alki, anboin nalali ki neu lasi ao sona. Mes kais him pake lasi ao sona nane on leku manuan he nati' hi moni mibala ambi sanat. So hi matuthaen es nok es natuin lasi manekat. 5:14 Fun plenat knino unu nane namesbon anbi plenat mese i le nak, "Hom nek ho aom bian onle hom nek ho aom." 5:15 Mes kalu hi mapisu es nok es ma ma'olo es nok es, ampanat, he nati' kais hi mimle'u oke. 5:16 Au lomik on i: So hi moni mituin Smanan Knino ma kais hi mituin nekaf mansian. 5:17 Fun nekaf mansian in sinmakat nane nasuli nok Smanan Knino, ma Smanan Knino in sinmakat nasuli nok nekaf mansian -- fun nua sin nasulin -- talan te hi ka mibe'i fa he mo'e sa' le him lomi. 5:18 Ma kalu Smanan Knino antopu ki, of hi ka mituin fa Plenat Knino unu. 5:19 Nekaf mansian in mo'et nane natonon anbi lasi mapaisa, lasi lahi, laif folu; 5:20 luli besa neu le'u, ote naus, matoes, manek nanan, to'as, natenab al in aon, lasi suli, es-es in hake kun; 5:21 na'un to'an, lasi mafu tua, tolas malinat huma-huma ma lasi bian anteni. Au umnauba ki ale lasi i ok-oke, -- onle afi au eut ulali ki -- nak ale atoni le anmo'e lasi nane, in of ka napeni fa pa ma nama' anbi Plenat Uisneno. 5:22 Mes kalu Smanan Knino antopu hit monik in fuan nane, lasi manekat, lasi amlilat, halan nekaf, lasi seusabat, mo'e alekot, nek leko, lasi aki'at; 5:23 nek aklati, naplenat aon. Katit fa plenat le nasuli nok ale lasi nane. 5:24 Atoni le anfani Neno Anan Yesus In ini, in namate nalali nekaf mansian, lasi folu ma in lasi sinmakat. 5:25 Kalu hit moni natuin Smanan Knino, so Smanan Knino antopu hit monik amsa. 5:26 Kais hit tamoko'ok, kais hit manto'an es nok es ma atmanek nanan es nok es.
6:1 Bae benu alki! Kalu hi mipeni atoni mese anmo'e sanat, so hi le a'moni ambi Smanan Knino, amtopu atoni nane anfani nem neu lanan amneot. Him topu meki nek aklati ma him panat hi aom he nati' kais hi amsa amtam meu lasi su'at. 6:2 Hi matulun es nok es hem sutai hi baut, onane te hi mitis Neno Anan In aplenat. 6:3 Fun kalu es in natenab nak in ahinet mes in ka nahinef, in atoni apoiba. 6:4 So atoni mes-mese ansu' kun in mepu he leko ai kahaf. Kalu in mepu nane leko, in malin neu lasi nane. Kais in nanesa in mepu nok atoni bian in mepu. 6:5 Fun atoni mes-mese of anloi kun in baut. 6:6 Atoni le ansimo Neno Anan In lasi noina, so anbati nok in anoni ale lasi alekot le in anmu'i. 6:7 Kais him sek ai ambeo. Kais hi mi'bae Uisneno In kanan. Fun atoni ansen sa' of in seu lasi nane amsa. 6:8 Kalu atoni ansen natuin nekaf mansian, in of anseu lasi amle'ut na'ko nekaf mansian nane. Mes atoni le ansen natuin Smanan Knino, in of anseu lasi honis nabal-bal na'ko Smanan Knino. 6:9 Kais hit athae neu mo'et alekot, fun leka in leku ante of hit atseu in fuan. 6:10 Es nane te, leka hit fe atmu'i leku manuan, hit atmo'e alekot neu ale atoni, nes-nesi neu hit bae benu nek ateb knino sin. 6:11 Him kiso mit, tuis a'naek le au tui ki eki au nimak. 6:12 Atoni le he natonon neki lasi mamnita, sin es anlomi he naseke ki he mituin lasi mahelit. Sin anmo'e onane he nati' atoni Yahudi kais anli'u sin natuin Neno Anan In hau peti. 6:13 Fun sin le natuin lasi mahelit, sin amsa kan panat fa Plenat Knino unu. Mes sin anlomi he nati' hi mituin lasi mahelit he nati' sin naliabok natuin hi mo'et le mamnita. 6:14 Mes au ka lomif he uliabok, so al anbi Neno Anan Yesus hit Usi le anmate anbi hau nehe. Fun natuin In anmaet nalali anbi hau nehe, pah pinan ka ma'ota anteni fa neu kau. Ma neu pah pinan i, au amsa on au maet ulalien. 6:15 Lasi mahelit ai ka mahelit nane kan tamaf ota. Lasi le antam ota es atfani atoni fe'u. 6:16 Mes atoni le anmoni natuin lasi i, halan nekaf ma amnaut ansanu neu sin ma neu Uisneno In to Israel. 6:17 Neis na'ko nane kais anmu'i atoni le he nasusab kau, fun anmu'i taka anbi au aok, nak Yesus In Ini kau. 6:18 So hit Usif Yesus Neno Anan anfe tetus piut neu ki oke. Amin. Na'ko, Nai Paulus,
1:1 Neu tolas knino anbi Efesus le nekan na'ki neu Neno Anan Yesus! 1:2 Au, Nai Paulus haef Neno Anan Yesus natuin Uisneno In lomin, au ufnekan he nati' Uisneno, hit Ama ma Usif Yesus Neno Anan anfe tetus ma aomina neu ki. 1:3 Minaeb Uisneno, Yesus Neno Anan hit Usi In Amaf! In anfe kit ale tetus alekot anbi neno tunan. 1:4 Uisneno anbeti kit anbi Neno Anan, nahunun le nabela pah pinan he nati' hit atfani atoni knino ma ka malahi fa anbi In human. 1:5 Natuin Uisneno In manekan, In anlek nain kit na'ko afi natuin Yesus Neno Anan, he nati' hit atfain anah neu In. Ma lasi nane namnes nok In lomin kun. 1:6 Minaeb Uisneno In halinat knino apinat, le In anfe nani neu kit anbi In Anmone le In nek nani. 1:7 Fun anbi Neno Anan ma natuin Ini maten, In ansoi kit na'ko hit sanat. Natuin Uisneno In manekan athoes, 1:8 In nahoeb kit nek ahinet ma lasi ahinet. 1:9 Uisneno an eut kit In bekot le natolon kun natuin In nek alekot; le In antao nani na'ko afi anbi Neno Anan. 1:10 In bekot he nati' ale sa' abit neno tunan ma abit pah pinan anfani mese nok Neno Anan on nakaf neu ale sa'. Ma lasi nane Uisneno of natiaba nani leka in leku ante. 1:11 Uisneno anmeup ale sa' natuin In lomin ma natuin In lasi fekat -- In anbeit kit na'ko afi unun -- he nati' hit tapeni pa' le In anba'an natuin Neno Anan. 1:12 Ma hai, le nahunu mifnekan Neno Anan, so miliatas Uisneno natuin In apinat. 1:13 Hi amsa amfani to Uisneno, leka him nen In a'an amneot, esle Lasi Knino le neki honis neu ki. Leka hi nekam nateb knino, Uisneno anfe ki taka neki Smanan Knino le In anba'an nalali neu ki. 1:14 Smanan Knino nane anfani bael bela nak of hit simo sa' le Uisneno anba'an nani neu In to. Lasi i naton kit nak Uisneno of nafetin In to. So taliatas Uisneno natuin In apinat! 1:15 Es nane, leka au nen neu hi nek ateb knino anbi Usif Yesus ma hi lasi manekat neu to knino, 1:16 au utulu nekak piut neu Uisneno antom ki. Ma au umnau ki piut anbi onen totis. 1:17 Au toti neu Yesus Neno Anan hit Usi In Uisneno, Amaf apinat, hen fe ki Smanan ahinet he nati' him fain ahinet, ma of nalile Uisneno neu ki he mihin In lek-leko. 1:18 Ma Uisneno antana hi nekam he nati' hi mihin lasi afnekat sa' le naloitan anbi Uisneno In han amno'en nane. Lasi athoes apinat le naloitan nani neu to knino, 1:19 ma Uisneno anmepu nok kuasat matani neu kit le hit nekak nateb knino. 1:20 Uisneno anmepu anbi Neno Anan ma nafena In na'ko amates ma natokob In anbi Uisneno aon bian ne'u anbi neno tunan. 1:21 Neno Anan In atoko nane namnanu nesin ale ana' aplenat, amui kuasat, kuasat ma plenat. Ma ale kanaf le In antek nani, ka al fa anbi pah pinan i mes anbi neno amnemat amsa. 1:22 Ma Uisneno nabela ale sa' anbi Neno Anan In haen nupun ma nana'at Neno Anan neu tolas knino hen fani nakaf neu ale sa' anbi tolas knino. 1:23 Tolas knino nane Neno Anan In aon kun, le In natisi nani, ma natis kun ale sa' ok-oke.
2:1 Afi hi maet milali natuin hi sanat ma amtanhai Uisneno Ini plenat sin. 2:2 Hi moni ambine, fun mituin pah pinan in mo'et. Hi mituin plenat neno tnanan in kuasat le anmepu anbi ale atoni le ka natuin Uisneno sin nekan. 2:3 Afi unun hit amsa atmoni tok sin, leka hit moni atbi mo'et amolemut ma hit mo'e tatuin hit tenab asanat. Le namneo hai mes mipeni to'as Uisneno onle atoni bian. 2:4 Mes Uisneno In nek mamun lo naek kun. In nek nis kit, 2:5 talan te bi neno hit atmate natuin hit tanhais, In namonib nafani kit nok Neno Anan. Es nane, al natuin Uisneno nek mamun In namonib ki. 2:6 Natuin hit tamesbok tok Neno Anan Yesus, Uisneno namonib nafani kit, he nati' hit na' aplenat tok In anbi neno tunan. 2:7 Uisneno anmo'e onane he nati' anbi neno amnemat, In nalile In mo'et alekot le nathoe neu kit anbi Neno Anan Yesus. 2:8 Uisneno In halinat knino namonib ki natuin nek ateb knino. Lasi nane ka natuin fa hi be'im, mes natuin Uisneno In amnaut. 2:9 Lasi nane ka natuin fa hi mepu, es nane kais anmu'i atoni le nanaebon antom lasi nane. 2:10 Fun hit le i Uisneno es anmo'e kit natuin Neno Anan Yesus neu mepu alekot, le afi Uisneno naloitan nani. Uisneno anlomi, he nati' hit atmoni atbi lasi nane. 2:11 Natuin lasi nane bae, mimnau nai, nak afi unun hi -- onle atoni le kan tamaf nonot Yahudi natuin nekaf pah pinan, le antek ki nak atoni ka maheli, natuin hi ka mituin fa lasi mahelit le anmo'e nani neki nimaf pah pinan -- 2:12 Bi leku nane hi ka mimesbom fa mok Neno Anan, hi kam tamaf to mabeti Uisneno. Hi ka mipeni fa pa' ma nama anbi fef ba'an le Uisneno anmo'e nani nok In to. Hi moni ambi pah pinan i ka nok fa afnekat ma ka nok fa Uisneno. 2:13 Mes muni i, anbi Neno Anan Yesus hi le afi "mi'lo", him fani "ahaumakat" natuin Neno Anan Ini maten. 2:14 Fun In ahal nekaf neu kit, In es nameseb atoni Yahudi ma atoni le kan tamaf nonot Yahudi hen fani uf mese. Baik lape le anbati sin, esle lasi musu, anpukai nalali natuin Neno Anan Ini maten. 2:15 Usif Yesus anmate ma anpukai nalali Plenat Knino unu nok ini plenat sin ma in lekat sin he nati' uf nua in nane anfani atoni fe'u le namesbok nok In. Natuin lasi nane Neno Anan naloitan halan nekaf. 2:16 Natuin Ini maten anbi hau nehe, Neno Anan nameseb nafani uf nua in nane, ma anhalan sin nok Uisneno, oke te Lasi Knino musu nane namneku. 2:17 Es nane Neno Anan nanoebon nem ma anetun lasi halan nekaf neu ki le afi hi "mi'lo" Uisneno ma halan nekaf neu sin le "anhaumak" Uisneno. 2:18 Natuin Neno Anan Yesus hit alkit, -- nonot Yahudi ma le kan tamaf nonot Yahudi -- natuin Smanan Knino mese, tapeni lalan he tam teu Ama. 2:19 Onane te ka matateme anteni ki fa ma ka anaomnemat ki fa. Mes him fani mese mok to knino sin ma amfani Uisneno In ini ki. 2:20 Ma nahakeb ki anbi sukit le haef knino sin ma mafefa knino sin nabela nani, mok Neno Anan Yesus on in fatu naif. 2:21 In es anlek mepu fena nane anfani Ume Uisneno le knino, ma naloitan neu hit Usi. 2:22 Natuin hi moni mimesbom mok Neno Anan, hi amsa nahakeb ki mok atoni bian amfain ume mese neu Uisneno; anbi nane Uisneno namaika nok In Smanan Knino.
3:1 Natuin lasi nane, au Nai Paulus, atoni atam o'of natuin Neno Anan Yesus, neu hi atoni le kam tamaf nonot Yahudi. 3:2 Namneo, him nen milali nak natuin Uisneno In nek mamun, anfe kau mepu i natuin hi. 3:3 Uisneno anfei In lasi tolo' ma ane'ut kau neki mnitas -- onle au tui ulali ki tuk-tuka. 3:4 Leka him so'i te of hi mihin Neno Anan In lasi tolo' onle au uhin ulali -- 3:5 afi unun lasi tolo' nane kan etun nani fa neu atoni pah pinan, mes muni i ane'ut nani natuin Smanan Knino neu In haef knino sin ma In mafefa knino sin. 3:6 Lasi tolo' nane nak, natuin Beno Alekot, atoni le kan tamaf nonot Yahudi sin napeni pa' ma nama nok atoni Yahudi sin anbi tetus ma aomina le Uisneno naloitan nani. Sin anfani lokif ma taluf na'ko aof mese ma ansimo sa' le Uisneno anba'an nani natuin Neno Anan Yesus. 3:7 Uisneno anfe kau In sankolan neno he nati' au etun Lasi Knino nane. Au simo sankolan nane natuin In kuasat le anmepu anbi kau. 3:8 Anbi ale to Uisneno, au le i atoni amolemut. Mes Uisneno anfe kau halinat i, he nati' au etun Lasi Knino neu ale atoni le kan tamaf nonot Yahudi antom Neno Anan In athoes le kan tu' nitaf. 3:9 Ma he nati' natuin au amsa ale atoni sin nahin nak Uisneno, Apakaet ale sa', nanaoba In lomin le nakakoba anfani lasi tolo' neu pah pinan. 3:10 Uisneno In lomin he nati' muni i, natuin tolas knino ane'tun Uisneno In lasi hine neu ale ana' aplenat ma amui kuasat abit neno tnanan. 3:11 Uisneno amo'e lasi nane namnes nok In bekot nabal-bal, le In anmo'e nani natuin Neno Anan Yesus hit Usi. 3:12 Natuin nek ateb knino neu Neno Anan, ma tamesbok tok In hit tapeni manuan het haumak Uisneno nok nek palsait. 3:13 Es nane te au toti ki he nati' kais hi mimtau neu lasi le au sutai ani natuin hi, fun ale lasi nane neki alekot neu ki. 3:14 Es nane te au li'tu anbi Ama In human. 3:15 Fun na'ko In ale uf abit neno tunan ma abit pah pinan sin ansimo sin kanan. 3:16 Au onen toti he nati' in le anmu'i apinat athoes, anhatani hi nekam neki In Smanan Knino. 3:17 Ma natuin hi nek ateb knino, Neno Anan namaika anbi hi nekam ma hi miba' ma mi'ki ambi lasi manekat. 3:18 Au onen toti he nati' hi mok ale to knino hi mibe'i mihin Neno Anan In lasi manekat In manuan ma Ini mnanun nekin sae ma ini mnanun nekin sanu. 3:19 Ma hi mihin lasi manekat nane le namnanu nesin hi lasi ahinet. Au onen toti he nati' nahenu hi nekam neki Uisneno In lasi ahenut. 3:20 Natuin Uisneno In kuasat le anmepu anbi kit, In anmo'e nesin na'ko le hit onen toti ma na'ko le hit tatenab. 3:21 Uisneno In kun apinat anbi tolas knino ma anbi Neno Anan Yesus eke ma batan talan te nabal-bal. Amin.
4:1 Es nane te au, atoni le natam kau neu o'of natuin hit Usi, au fainek ki he nati' hi monim onle atoni le Uisneno anboin nalali ki namnes nok In hanan amno'en nane. 4:2 Hi mibaun hi nekam, nek malule ma amseusab ambi ale lasi. Hi milile lasi manekat anbi lasi matuntakun es nok es. 4:3 Ma him panat lasi nek mese anbi Smanan Knino natuin lasi mafutus anbi halan nekaf. 4:4 Aof mese ma Smanaf mese. Onane amsa anboin ki neu lasi afnekat mese. 4:5 Usif mese, nek palsait mese, su' oe mese. 4:6 Uisneno mese, le anfani Amaf neu ale atoni. In Uisneno kun neu ale sa'-sa', le anmepu natuin ale sa' ma anmu'i kuasat anbi ale sa'. 4:7 Ma anfe neu kit mese-mese halinat knino natuin sa' le Neno Anan anfe neu kit. 4:8 Natuin lasi nane, antui anbi Sulat Knino nak, "Leka In ansae neu bale amnanut, In anhel neki ale atoni le napeni hukum; In anfe bael alekot neu mansian." 4:9 Kalu ansaksi nak, "In ansae" nane nak afi In ansanu nem neu pah pinan ini pinan? 4:10 In le ansanu nalali, In amsa es ansae anfani namnanu nesin ale neno tunan, neu he nahenu ale sa'. 4:11 Ma In es anlek he nati' bian anfani haef knino, bian anfani mafefa knino, bian anfani amnek lasi knino, bian anfani atukus ma anoni. 4:12 In mo'e onane he naikab to knino neu mepu tuthaes, he nahakeb Neno Anan In aon. 4:13 Nok lasi nane te, hit alkit atfani mese natuin nek palsait, ma atfani mese anbi lasi hine antom Uisneno In Anmone. Ma hit nekak natbo ma nanae onle Neno Anan. 4:14 Ma hit ka on fa li'ana anten, le anpes neki kit ma anfu neki kit neki atoin apoiba sin lasi noina huma-huma. Sin nasekeb atoni neki sin lasi ak'elo. 4:15 So hit atna' tamepan lasi amneot anbi lasi manekat; talan te hit atmaspeti anbi ale lasi neu Neno Anan, le anfani nakaf neu kit. 4:16 Fun na'ko In ale aof, -- anmatalu lek-leko ma anmalut anfani mese natuin kanuf-kanuf, matuntakun nok matani -- le kanuf mes-mese napeni kun. Onane te aof nane of anmoni ma nahaekbon anbi lasi manekat. 4:17 Es nane te, anbi Usi In kanan, au u'uab ma au fainek ki ak, kais hi moni amteni onle atoni le ka nahinef Uisneno ma sin natenab lasi bute-bute. 4:18 Sin nek tenab nane anmesok. Sin ka nahin fa monit le Uisneno anfe, ma sin ka nahin fa sa'-sa' antom Uisneno. Fun sin namanub sin nekan. 4:19 Sin kan mu'in fa nek mae, talan te sin nana'at sin aon neu sinmakat pah pinan ma anmo'e lasi amle'ut huma-huma. 4:20 Mes hi ka on fa nane, fun hi mihin Neno Anan. 4:21 Fun him nen milali antom In. Ma him simo noina anbi In natuin lasi amneot le natonon anbi Yesus. 4:22 Onane te hi mibela hi mo'et unu ma misaitan atoni mna' le namle'u natuin lasi sinmakat akiku. 4:23 So hi nekam ma hi tenab nafe'unon ok-oke. 4:24 Ma hi monim on atoni fe'u, le anmo'e natuin Uisneno In lomin, anbi lasi amneot ma amnonot knino. 4:25 Onane te kais hi mipoibom, mes mi'uab amneot es neu es. Fun hit le i taluf mese na'ko Neno Anan In aon. 4:26 Leka hi mito' kais hi mo'e sanat. Kais hi mito' talan te manas antes. 4:27 He kaisa nitu napeni sona'. 4:28 Atoni le nabak, kais in nabak anteni. Leko in anmepu matani ma anmo'e mepu alekot neki in niman. Onke te in napeni mnahat ma anbati neu amamu'it sin. 4:29 Kais hi mipoitan uab amle'ut na'ko hi fefam. Mes hi mi'uab meki a'at alekot, he nati' atoni le natnin, sin napeni lasi alekot. 4:30 Kais hi minukab Uisneno Ini Smanan Knino. Fun anmalak nalali ki neki Smanan Knino hem fani Uisneno Ini. Smanan Knino nane amsa anfain lasi bela nak neno fetis of nem neu ki. 4:31 So hi mibela lasi nek unu, nek matoes, nek to'as, lasi mabanat, lasi ma'akan ma ale lasi amle'ut bian. 4:32 Mes hi mahoe es nok es ambi lasi manekat, ma masako sanat es nok es, onle Uisneno ansako hi sanat natuin Neno Anan.
5:1 Hi le i anah-anah Uisneno le In nek ki, es nane hi mo'e mituin Uisneno Ini heta. 5:2 Hi moni nai ambi lasi manekat, onle Neno Anan Yesus amsa In nek kit, In na'tulu In aon on atnatas ma fuat le anfomeni ma anhalin Uisneno. 5:3 Hi to knino ki, es nane, kais anmu'i anbi ki lasi kake, lasi amolemut huma-huma ma lasi sinmakat, mateka amsa kaisa. 5:4 Onane amsa ale a'at ai uab poetelo, le luman ma ka ma'upa -- fun ale lasi i ka nalekof -- leko nesi uab tulu nekaf neu Uisneno. 5:5 Mumnau lek-leko lasi i, atoni anmo'e lasi kake ai mapaisa, atoni le anmo'e lasi amle'ut ai atoni sinmakat ma apalu' -- fun ale mo'et onane papmese amsa on luli besa neu le'u --, atoni nane ka napenif pa' ma nama anbi Neno Anan ma Uisneno Ini plenat. 5:6 Kais atoni anfuil ki neki a'at ma uab luman. Fun ale lasi nane neki to'as Uisneno neu atoni le ka natuin fa In. 5:7 Es nane te kais hi mimnono mok atonin masaf nane. 5:8 Namneo afi hi mesokan ki mes muni i hi meusine ki ambi hit Usi. Es nane hi moni nai on anah-anah meusine. 5:9 Fun meusine nane napoitan lasi alekot, lasi amneot ma amnonot neu Uisneno. 5:10 So hi mami mihin sa' le Usi anlomi. 5:11 Kais hi mituin atonin le anmo'en lasi mesokan le ka ma'upa fa. Mes him etun mo'et nane mat-mat. 5:12 Fun ale lasi le sin anmo'e nani anbi bale tolo', kalu he na'uab nani of namaebok. 5:13 Mes ale lasi le natonon mat-mat of mamnita, fun ale lasi nane natonon anbi meusine. 5:14 Es nane anetun nani nak, "Atupas him be' nai ma amfen nai mi'ko amates ma Neno Anan of antana ki." 5:15 Es nane him panat nai he hi moni onme. Kais hi moni on atoni amonot, mes hi moni on atoni ahinet. 5:16 Him panat nai ale leku manuan, fun batan i batan amle'ut. 5:17 Es nane kais hi mono, mes hi mami nai he mihin Uisneno In lomin. 5:18 Ma kais hi mauf tua, fun tua nane neki lasi amle'ut neu ki. So nahenu ki neki Smanan Knino. 5:19 Ma hi mi'uab es nok es meki sit knino unu ma sit pules ma sit knino. Him si ma mi'ba neu Uisneno meki hi nekam oke. 5:20 Mitulu hi nekam piut anbi ale lasi neu Uisneno, hit Ama, anbi Neno Anan hit Usi In kanan. 5:21 Hi mibaunom es neu es nok amtaus neu Neno Anan. 5:22 Hoi fenai, mubaunom neu ho mone onle mubaunom neu Uisneno. 5:23 Fun nai mone nane nakaf neu in fe on Neno Anan nakaf neu tolas knino. In kun es namonib aof. 5:24 Es nane onle tolas knino nabaunon neu Neno Anan, onane amsa fenai nabaunon neu in mone anbi ale lasi. 5:25 Hoi nai mone, hom nek ho fe onle Neno Anan In nek tolas knino ma natulu In aon neu tolas knino nane. 5:26 Neno Anan anmo'e onane he naknino tolas knino neki In noina, ma natuin su oe, he nati' namuni In nana'at sin neu Uisneno. 5:27 Onane te In nahakeb tolas knino anbi In matan nok apinat, ma ka nok fa kobe ai lasi amle'ut sa'. 5:28 Onane amsa nai mone mes in nek in fe onle in aon. Atoni le in nek in fe in nek in aon amsa. 5:29 Kan mu'if atoni le nato'an in aon. Mes in panat ma anpaloli onle Neno Anan anpaloli tolas knino. 5:30 Fun hit atfani lokif taluf na'ko Neno Anan In aon. 5:31 Fun antui nani anbi Sulat Knino nak, "Es nane te, atoni mes nasaitan in amaf ma in ainaf ma namesbon nok in fe ma sin nua sin anfani aof mese." 5:32 Lasi tolo' i naek kun, mes au u'uab nane antom neu lasi mafutus Neno Anan nok tolas knino. 5:33 Mes lasi i antom neu ki amsa, so ale nai mone a'nek in fe onle in aon ma so ale fenai antola in mone.
6:1 Hoi anah-anah, hi mitnin neu hi ama ma hi aina anbi Neno Anan, natuin lasi mes onane. 6:2 Hi miusi hi ama ma hi aina - nane plenat matani na'ko Uisneno, onle anba'an nani nak, 6:3 he nati' hi mipeni ua alekot ma ua mnanu anbi pah pinan. 6:4 Ma neu hi amaf-amaf, kaisa hi mi'koke hi anhenu neu lasi to'as, mes minoina sin mek Uisneno In lasi noina ma In fainekat. 6:5 Hoi ale ate, hi mitnin hi tuan nok amtaus ma lilitais ma nek muti onle hi mitnin Neno Anan. 6:6 Kais al anbi sin matan neu he miminab sin nekan. Mes on Neno Anan In ate ki, hi mitnin Uisneno In lomin meki hi nekam oke. 6:7 Hi minaoba hi tuthaes onle atoni le antuthae Usif tunan ma kan tuthae fa atoni pah pinan. 6:8 Hi mihin, nak ale atoni, he ate ka, ai he ao sona ka, kalu in anmo'e lasi alekot, in of ansimo seunbanit na'ko Usif tunan. 6:9 Mes neu hi tuan-tuan, hi mo'e onane amsa neu hi ate sin. Kais him sali sin meki salit amle'ut. Mimnau nak hi ma hi ate sin, anmu'i Usif mese, esle Usif tunan abit neno tunan. In kan betif humaf. 6:10 So him fani atoni abe'it meki matani le hi mipeni na'ko Usif tunan In kuasat. 6:11 Him pake bale manuat le Uisneno anfe ki he nati' him be'u Nitu in lisan apenut. 6:12 Hit kat mabe'u fa tok atoni pah pinan, mes hit mabe'u tok santuaf ini plenat ma in kuasat ma ana' plenat mesokan. Ma hit mabe'u tok ale smanan nitu abit neno tnanan ai abit aileti. 6:13 Es nane te hi maiti bael manuat Uisneno, he nati' hi mabe'u ambi neno amle'ut nane. Oke te him hake mibala, leka hi misopu lasi mabe'ut nane. 6:14 Onane te him haek nai! Hi mi'futu hi tnanam meki lasi amneot, him tainus sobalu besi lasi amneot. 6:15 Hi mipenhae meki nek lomif hem etun Beno Alekot ma halan nekaf. 6:16 Ambi ale lasi i hi maiti ben besi tika nek ateb knino. Fun hi meki nek ateb knino nane hem fu mimate ale santuaf sin asanef aklahat. 6:17 Ma amsimo lasi honis on soeb besi ma a'an Uisneno on suni Smanan Knino. 6:18 Hi mo'e ale lasi nane anbi onen totis ma amtoti tuntakus na'ko Uisneno. Him onen toti bi ale leku ambi Smanan Knino ma ambe' nai ambi hi onen totis nane. Him onen toti piut ma mitnat ale to Uisneno. 6:19 Him onen toti neu kau amsa he nati' bi leku le au umolok, Uisneno anfe kau a'at amneot. Ma he nati' au etun Beno Alekot in lasi tolo' ka nok fa amtaus. 6:20 Natuin Beno Alekot nane, au fani haef le tomas i anbi o'of. Him onen toti he nati' au umolok antom Beno Alekot nane ka nok fa amtaus, onle au mes he umolok. 6:21 Nai Tikhikus, hit bae manekat ma atuthaes aki'at anbi Usif tunan In mepu, of ane'ut ki ale lasi antom neu kau ma au mepu. 6:22 Es nane au sonu in net neu ki, he nati' hi mihin ale lasi le antom neu kai ma he nati' in halin hi nekam. 6:23 Halan nekaf ma manekat nok nek ateb knino na'ko Uisneno, Amaf ma na'ko Usif Yesus Neno Anan neu ki alki. 6:24 So Uisneno anfe tetus neu ki alki le him nek hit Usif Yesus Neno Anan meki lasi manekat le ka namle'u nitaf. Na'ko hai nua kai, Nai Paulus
1:1 Neu ale to knino anbi Neno Anan Yesus nok ale atopu tolas knino ma diaken ai syamas anbi Filipi. Na'ko hai nua kai Nai Paulus ma Nai Timotius, Neno Anan Yesus In ate. 1:2 Haim toti he nati' tetus ma aomina na'ko Uisneno, hit Ama, ma na'ko hit Usif Yesus Neno Anan neu ki alki. 1:3 Au utulu nekak neu au Uisneno hae fauk-fauk au umnau ki. 1:4 Ma anbi ale leku le au onen toti neu ki, au onen toti nok nek amlilat. 1:5 Au utulu nekak neu au Uisneno fun na'ko neno ahunut tal neno i, him tuntaku kau anbi etus Beno Alekot na'ko Uisneno. 1:6 Uisneno anfatan nalali mepu alekot nane anbi ki, ma au ufnekan of In namneob mepu nane tal namsopu bi leku Neno Anan Yesus nanoebon anfani nem. 1:7 Au utenab onane neu ki, fun hi alki anbi au nekak. Hi mipeni pa' ma nama anbi halinat knino le Uisneno anfe neu kau. Bi leku le au bi o'of ai bi leku le au fe bi mone ma au hake utau ma hatani Beno Alekot. 1:8 Au nekak antu' neu ki anbi Neno Anan Yesus In manekan. Uisneno anfani saksi neu kau, nak lasi le au umolok i namneo. 1:9 Au onen toti neu ki ak, so hi lasi manekat ansato nok athoes anbi lasi hine amneot ma anbi ale tenab alekot, 1:10 he nati' him beti mihin lasi alekot. Kalu onane hi monim of naknino ma ka kobe fa talan te Neno Anan nanoebon anfani nem. 1:11 Hi monim of nahenu nok lasi amneot le anbol natuin Neno Anan Yesus neu he nanaeb ma naliatas Uisneno. 1:12 Au lomi, bae benu, he nati' hi mihin, nak lasi le antom neu kau i, nane leko he nati' Beno Alekot in nao mat piut. 1:13 Lasi nane natonon neu ale atoni anbi sonaf ma neu atoni bian, nak au tam o'of natuin Neno Anan. 1:14 Ma lasi au tam o'of anmo'e bae knino amfaut nafnekan neu Usif tunan talan te sin maspetin anbi lasi anetun a'an Uisneno ka nok fa amtaus. 1:15 Anmu'i atoni le sin saksit Neno Anan nok nek a'unu ma matoes mes bian an saksi Neno Anan nok nek muti. 1:16 Sin le i anetun Neno Anan natuin sin nek Uisneno, fun sin nahin, nak Uisneno anlek kau he utau Beno Alekot nane. 1:17 Mes atoni bian sin anetun Neno Anan natuin he naim kanaf ma ka nok fa nek muti. Sin natenab nak sin mo'e onane hen hafen kau anbi o'of. 1:18 Mes nane ka sa'-sa' fa, fun maski onane amsa, of anetun Neno Anan, he nok tenab amle'ut ka ai he nok tenab amneot. Anbi lasi nane au malin, ma of au malin piut. 1:19 Fun au uhin, nak natuin hi onen totis ma natuin Yesus Neno Anan In Smanan Knino antuntaku kau, of au upeni tetus. 1:20 Fun au lomi ma au ufnek nae le'uf he kais namaeb kau anbi ale lasi. Mes au ufnekan he nati' anbi ale leku nes-nesi muni i, au upeni maspeti talan te nok au monik oke -- he moni ai he mate -- sin nanaeb Neno Anan. 1:21 Fun neu au, monit nane Neno Anan! Ma maten nane neki alekot. 1:22 Mes kalu au fe moni bi pah pinan i, nabe'i au mo'e mepu alekot. Au ka uhin fa he beit neu me. 1:23 Lasi nono nua anhapnesa kau; au lomi he nao he umaika ok Neno Anan, fun nane naleko neis. 1:24 Mes natuin hi, leko nesi au ubala bi pah pinan. 1:25 Ma anbi afnekat i, au uhin of au ubala ok ki. Au ubala ok ki anteni he nati' him nao mat ma mimlil anbi nek ateb knino. 1:26 Es nane, leka au fani et eu ki, of hi nek amlilat anbi Neno Anan Yesus nathoe natuin au. 1:27 Al lasi mese, so hi monim namnes nok Neno Anan In Lasi Knino; he nati' leka au et au it, ma leka au ka et au nen, nak him hake mi'ki anbi smanaf mese, nekaf mese ma mabe'u natuin nek ateb knino le anbol na'ko Beno Alekot. 1:28 Him hataniom ma kais hi mimtausan hi musu sin. Nane anfani taka amle'ut neu sin, mes taka honis neu ki, fun taka nane na'ko Uisneno. 1:29 Fun Uisneno anfe neu ki ka al fa hem mifnek neu Neno Anan, mes hem sutai mafena amsa neu In. 1:30 Hi amsa mok kau anbi au lasi mabe'ut onle afi hi mit anbi kau ma leku i him nen antom kau.
2:1 Fun anbi Neno Anan anmu'i fainekat, anmu'i halinat lasi manekat, anmu'i nekaf mese anbi Smanan Knino, anmu'i lasi manekat ma nek mamun. 2:2 So hi minokab au nek amlilat anbi ale lasi i: Hi nekaf mese ma ansaof mese anbi lasi manekat, smanaf mese ma lomif mese. 2:3 Kais hi mo'e ale lasi nane he maim kanaf neu hi aom ma mipeni pules le ka ma'upa fa. So nok nek baun es natenab neu in aon bian naleko neis na'ko in aon. 2:4 Kais es-es natenab kun neu in aon, mes natenab neu atoni bian amsa. 2:5 So hi mitenab anbi hi nekam onle Neno Anan Yesus natenab anbi In nekan: 2:6 In namnes nok Uisneno, mes In ka natau fa lasi nane nak in namnes nok Uisneno. 2:7 Mes In nafetin ale lasi ma anfani on ate ma namnes nok atoni pah pinan. 2:8 Ma anmoni on atoni pah pinan. In nabaun In aon ma natuin Uisneno talan te anmate anbi hau nehe. 2:9 Es nane Uisneno nalatan In ma anfe neu In kanaf, nesin ale kanaf bian. 2:10 Onane te anbi Yesus In kanan, ale amonit abit neno tunan ma abit pah pinan ma abit pah pinan in nupun sin anli'tu ma nanaeb In. 2:11 Ma ale maf an au ma anlomi nak, "Yesus Neno Anan, lo Usif kun," neu Uisneno Ama In kanan apinat! 2:12 Bae benu manekat, onle hi mituin kau piut bi neno fe au ok ki, ma leku i au u'lo ki. So hi maim kim hi aomina nok amtaus ma lilitais neu Uisneno. 2:13 Fun Uisneno es anmepu anbi ki, talan te him lomi ma mibe'i amhalin Uisneno In nekan. 2:14 Mepu nai ale sa' kais nok fef munu ma lasi matoes, 2:15 he nati' hi nek muti ma neka teme ki. On anah-anah Uisneno le nek muti anbi batan nek apenut ma akiku i sin atnanan, him tana sin on afkun-afkun anbi pah pinan. 2:16 Him na' mimepan a'an honis, he nati' au malin bi leku Neno Anan nanoebon anfani nem. Onane te au mepu nane ka luman fa ma au haet nane ka son-sona fa. 2:17 Oni au monik he natulu nani neu he naloitan fua tulu le natulu natuin hi nek ateb knino neu Uisneno. Kalu namneo onane, au utulu nekak neu lasi nane ma au umlil ma umoek ok ki alki. 2:18 Ma hi amsa mes mitulu nekam onane ma hi malin nai mok kau. 2:19 Au ufneka anbi Usif Yesus he sonu Nai Timotius net neu ki he nati' au nekak antainine leka au nen hanaf antom neu ki. 2:20 Fun katitaf atoni mese anbi kau, le nekaf mese ma tenab mese nok in ma natenab lasi alekot neu ki. 2:21 Fun sin alsin al naim alekot neu sin aon ma ka naim fa alekot neu Neno Anan Yesus. 2:22 Hi mihin Nai Timotius in nek aki'at ma in antuntaku kau bi mepu tuthaes Beno Alekot na'ko Uisneno. Hai nua kai on anah nok amaf. 2:23 Es nane leka au uhin ulali au lasi ini naon, au sonu in net neu ki laba. 2:24 Au ufneka anbi Usif nak, au amsa of et laba eu ki. 2:25 Onane amsa hit bae ma hit benu Nai Epafroditus le him sonu hen tuntaku kau anbi mepu. Au utenab he lelu anfani net neu ki. In anse'u ai namnono nok kau anbi mepu ma anbi au mabe'ut. 2:26 In namnau nis ki alki ma in nekan ansusal, fun him nen neu in namen. 2:27 Namneo afi in namen ma ala kle'o te anmate; mes Uisneno namnau in. Ma ka al fa in, mes Uisneno namnau kau amsa, he nati' kais ansato anteni au nek susal. 2:28 Es nane te au manap he sonu in, he nati' leka hi mit in, hi nekam anmalin ma au susal anma'kaf ai anma'naf. 2:29 Es nane him simo in nok nek amlilat anbi hit Usif ma him tola ale atoni onle in. 2:30 Fun natuin Neno Anan In mepu, ala kle'o te in anmate; in nana'at in monin he nanokab sa' le fe anlabu anbi hi tuthaes neu kau.
3:1a Oke te, au bae benu ki, malin nai anbi hit Usif. 3:1b Lasi le au he tui teni i neu ki ka mafena fa neu kau, fun lasi nane neki alekot neu ki. 3:2 Him panat hi aom na'ko ale asu, him panat hi aom na'ko ale atoni le anmo'e lasi amle'ut. Ma him panat hi aom na'ko ale atoni le nanaob lasi helit. 3:3 Hit le'i atoni maheli amneot, le taluli ma tabes neu Uisneno natuin In mepu Smanan Knino. Hit taliabok atbi Neno Anan Yesus ma hit ka tafnekan fa neu lekat pah pinan. 3:4 Maski au amsa mu'i afnekat neu lekat pah pinan. Kalu anmu'i atoni le natenab nak anmu'i afnekat neu alekot pah pinan, au nesi na'ko nane. 3:5 Afi anheli kau bi neno fanu. Nahonis kau on atoni Israel, na'ko uf Nai Benyamin, atoni Ibrani nesaf. Kalu anbi lasi tatuin Plenat Knino unu, au atoni Farisi. 3:6 Anbi lasi makoet, au hamu'i Tolas Knino. Kalu atkiso na'ko plenat knino unu, au atoni alekot le ka kobe fa. 3:7 Mes natuin Neno Anan, ale lasi le afi au utenab on lasi amnisat neu kau, anfani lasi amnekut neu kau. 3:8 Ale lasi le au utenab on lasi amnekut, natuin lasi hine neu Yesus, Au Usi, naleko nesin ale sa'. Natuin Neno Anan au ufetin ale sa'. Ma au kius ale sa' nane onle knutu ma ma'lafu, he nati' au upeni Neno Anan, 3:9 ma namneo-namneo umesbok ok In. Lasi mafutus alekot nok Uisneno, au ka ami fa natuin plenat knino unu. Muni i au mu'i mafutus alekot nok Uisneno natuin fnekat neu Neno Anan. Es nane, lasi mafutus alekot nane nem na'ko Uisneno, ma natuin fnekat neu Yesus Neno Anan. 3:10 Au lomi he uhin Neno Anan, ma uhin kuasat le nafena In na'ko amates. Au lomi he sutai ok In ma papmese onle In anbi lasi In anmate. 3:11 Ma au ufnekan ak of nafena nafani kau na'ko amates. 3:12 Anbi lasi i au ka u'uab fa ak, au upeni ulali ma au umneo; mes au li'u it, kal-kalu au upeni amsa. Fun Neno Anan Yesus anhek nalali kau neu lasi nane. 3:13 Bae benu alki, au ka utenab fa ak au upeni ulali lasi nane. Mes lasi mese le au mo'e ani, esle' nikan sa' le anbi au kotik ma au tumatan lasi le anbi au matak. 3:14 Es nane au aen matani eu lalan panan he upeni baen, esle' lasi honis abit neno tunan; neu lasi nane Uisneno anboin kit natuin Neno Anan Yesus. 3:15 Es nane, aim nai hit tatenab lasi nane on atoni neka teme. Ma kalu hi mitenab maikan antom lasi sa', Uisneno amsa of nalile nani neu ki. 3:16 Mes leko nesi lasi hine le hit tapeni talali, hit tanaoba piut natuin lalan le hit nao tatuin. 3:17 Bae benu alki, mituin nai au heta ma amkiso sin, le sin anmoni onle hai ma anfani heta neu ki. 3:18 Afi au eut ulali ki hae fauk ma leku i au etu teni ki nok matnu, nak anmu'i atoni namfaun le anmoni on musu nok Neno Anan In hau nehe. 3:19 Atoni le anmoni onane, sin amsopun lasi amle'ut. Sin Uisneno es sin taikenu ma sin kan apinat nane es sin mo'et le namaeba sin. Sin nek tenab nane natupuon neu lasi pah pinan. 3:20 Mes hit le'i plenat neno tunan in ini kit; ma anbi nane amsa hit atpao Usif Yesus Neno Anan on Uis kesel Afetin. 3:21 Neno Anan of nabaina hit aok amle'ut i, talan te namnes nok In ta'un apinat. In anmo'e onane natuin In anmu'i kuasat he naplenat ale sa' neu In.
4:1 Es nane te, au bae benu le au nek ki ma le au umnau ki, au amlilat ma au sobe aliatas. Him haek nai amsa nok matani anbi hit Usif, koi au bae benu manekat! 4:2 Au fainek bi Euodia, ma bi Sintikhe, he nati' sin nekaf mese ma tenab mese anbi hit Usif. 4:3 Onane amsa au bae aki'at, au toti ko he nati' hom tuntaku sin. Fun sin anhae nok kau anbi etus Beno Alekot, nok Nai Klemens ma au bae benu bian le anmepu nok kau. Sin kankenu matui anbi Sulat Honis. 4:4 Hi malin piut anbi hit Usif! Au ak a'teni ki, hi malin nai! 4:5 So hi nek alekot nane mahine neu ale atoni. Usif anhaumaken! 4:6 Kais hi mi'unu hi nekam neu ale sa'. Mes milile hi nek salit neu Uisneno nok onen totis, ma utulu nekaf. 4:7 Uisneno In halan nekaf le anfini ale hine, of anpanat hi nekam ma hi tenab anbi Neno Anan Yesus. 4:8 Oke te, bae benu alki, so him panat anbi hi nekam ale lasi alekot ma malomi, esle' lasi amneot, lasi amasat, lasi amnonot, lasi aknino, lasi aminat, lasi le tatnine nok alekot, mo'et alekot ma mapules. 4:9 Hi minaoba ale sa' le hi minoni ma amsimo ma sa' le him nen milali ma sa' le hi mit milali anbi kau. Uisneno halan nekaf in un of nok ki alki. 4:10 Au nekak anmalina naek anbi Usif, fun muni i hi nek amnaut anmoni anfani ma mitenab neu kau. Namneo hi mimnau kau piut mes hi fe ka mu'if leku manuan neu kau. 4:11 Au u'uab on i ka natuin fa au nukan sa', fun au unoni he unokab au monik anbi ale lasi. 4:12 Au uhin atmoni bi lasi manukat onme ma atmoni bi lasi athoes onme. Anbi ale lasi, katit fa lasi mese le natolo'on neu kau; he lasi amsenat ka, ai lasi amnahas ka, ai lasi athoes ka ai lasi manukat. 4:13 Ale lasi nane au sutai ube'i anbi Neno Anan le anfe matani neu kau. 4:14 Mes hi mo'et nane leko amsa, fun him tuntaku kau anbi au nukat. 4:15 Bae benu alki abit Filipi! Hi mihin, nak afi au poi u'ko Makedonia, bi neno au fe fatan Beno Alekot, katit fa Tolas Knino mese le antuntaku ma anbab kau al hi mes kim. 4:16 Fun anbi Tesalonika him sonu manekat neu kau hae fauk-fauk. 4:17 Lasi anesit ka es fa sa' le him sonu kau, mes au lomi he nati' au it lasi nane in fuan natonon anbi ki. 4:18 Au simo ulali ale sa' na'ko ki, fun a'neis ma nathoe. Au simo ulali hi sonu neu kau na'ko Nai Epafroditus. Leku i au mu'i ale sa' le au nukan ani. Hi sonu nane on fua fomeni mese, on fuat le Uisneno anlomi nani. 4:19 Au Uisneno of natis ma nano'u ale hi nukat natuin in mu'in ma In apinat anbi Neno Anan Yesus. 4:20 Minaeb Uisneno ma hit Ama talan te nabal-bal! Amin. 4:21 Mitiaba au tabe neu ale to knino anbi Neno Anan Yesus. Ale hit bae sin le nok kau anbi i ansonu tabe neu ki. 4:22 Ale to knino anbi i, nes-nesi sin abit Kesel in sonaf ansonu tabe neu ki. 4:23 So Usif Yesus Neno Anan anfe tetus neu ki alki. Na'ko hai nua kai, Nai Paulus ma Nai Timotius
1:1 Neu bae benu to knino anbi Kolose le nekan na'ki ma namesbok nok Neno Anan. Na'ko Neno Anan Yesus In haef Nai Paulus, le anlek nani natuin Uisneno In lomin ma hit bae Nai Timotius. 1:2 So tetus ma aomina na'ko Uisneno, hit Ama, neu ki ala ki. 1:3 Hai mitulu nekam neu Uisneno, hit Usif Yesus Neno Anan, In Amaf, anbi onen totis piut-piut neu ki. 1:4 Fun haim nen milali antom hi nek palsait anbi Neno Anan Yesus ma hi lasi manekat neu ale to knino. 1:5 Hi mo'e ale lasi nane, natuin lasi afnekat le Uisneno naloitan nani neu ki anbi neno tunan. Him nen milali lasi afnekat nane, leka Beno Alekot na'ko Uisneno natiaba nalali neu ki. 1:6 Beno knino nasitbon neu pah pinan funam natef, ma atoni anmoni natuin beno nane, onle hi moni nok tetus na'ko neno him nen Uisneno nek mamun ma minaoba mani nok amneot. 1:7 Hi mihin lasi nane na'ko Nai Epafras, hai bae manekat anbi mepu. In on Neno Anan athutaes aki'at le anmepu neu ki. 1:8 In es an' eut kai amsa neu lasi manekat le Uisneno anfe neu ki. 1:9 Es nane te, na'ko neno le haim nen lasi nane, haim onen toti piut neu ki. Haim toti neu Uisneno he nati' Smanan Knino anfe ki lasi hine, he nati' hi mihin lek-leko Uisneno In lomin. 1:10 Oke te him tam ota ambi Uisneno In human ma mituin In lomin anbi ale lasi. Ma hi milile in fuan anbi ale meup alekot ma of ansato ki amsa hi lasi hine neu Uisneno. 1:11 Kuasat na'ko Uisneno apinat anhatani ki anbi ale lasi he nati' him sutai ale sa' nok seusabat ma nek malinat, 1:12 ma tulu nekaf neu hit Ama. Fun Amaf nane es anmo'e ki hem fani to tafa plenat meusine he mibua mok to tafa Uisneno bian. 1:13 In nafetin kit na'ko kuasat mesokan ma natam kit anbi In Anmone bi'an Ini plenat. 1:14 Anbi In hit tapeni fetis ma sako sanat. 1:15 Neno Anan on humaf ma masaf mamnita na'ko Uisneno le ka mamnita; Neno Anan on Anmone naek, nesin ale sa' le Uisneno anmo'e nalali. 1:16 Fun natuin In, Uisneno anmo'e ale sa' abit neno tunan ma abit pah pinan, ale sa' le mamnita ma ka mamnita. Onane amsa ale smanaf le anmui kuasat ma le naplenat. Fun anmo'e ale sa' natuin Neno Anan ma neu Neno Anan. 1:17 Nahunu na'ko ale sa' anhake, Neno Anan anhake nalali. Ma natuin In amsa ale sa' anhake, anbi sin balan mes-mese. 1:18 In anfani nakaf neu aof esle tolas knino. In es An mone naek, le anfen nahun na'ko amates, talan te In ahunut kun anbi ale sa'. 1:19 Uisneno anlomi he nati' ale sa' le mapeni anbi Uisneno, mapeni amsa anbi In Anmone. 1:20 Ma natuin In Anmone Uisneno anmo'e ale sa' hen mafutu anfani nok In, ale sa' abit pah pinan, ma abit neno tunan. Uisneno anmo'e lasi nane natuin In Anmone anmate anbi hau nehe. 1:21 Hi amsa afi mi'lo Uisneno ma mimusu mok In ambi hi nekam ma hi tenab on nalilon anbi hi mo'et asanat. 1:22 Muni i Uisneno anhalan nafani ki anbi Neno Anan In ta'un pah pinan natuin lalan maten. Nok lasi nane In nahakeb ki knino anbi Uisneno In human ka nok fa kobe ma ka nok fa lahi. 1:23 Es nane te, hi mes amsutai ambi nek ateb knino, him hake mi'ki ma kais mibeko. Kais hi maen mi'ko lasi afnekat Beno Alekot, le him nen milali ma le anetun nalali anbi pah pinan. Ma natuin lasi nane, au Nai Paulus, au fani atuthaes neu Beno Alekot nane. 1:24 Muni i au malin fun au sutai mane'at natuin hi. Au sutai lasi mane'at eki au aok, he nati' utisi lasi mane'at le Neno Anan mes hen sutai nani neu In aon, esle tolas knino. 1:25 Au fani tolas knino in athutaes natuin mepu le Uisneno nana'at nani neu kau; he utiaba In a'an ok-oke neu ki. 1:26 Beno knino Uisneno le natolo'on na'ko eke neu eke ma na'ko batan neu batan, mes muni i nalilon neu In to knino. 1:27 Uisneno anlomi hen etun In lasi tolo' nane, In mu'in ma In kan apinat neu ale uf-uf bian. Lasi tolo' nane nak: Neno Anan anbi ki, nane nak of hi mipeni pa' ma nama anbi Uisneno apinat. 1:28 Haim etun Neno Anan neu ale atoni. Haim fainek ma minoni sin meki ale lasi hine ma amtopu sin neu Uisneno on atoni naek anbi mo'et knino le namesbon nalali nok Neno Anan. 1:29 Es nane te au uhaebok ma au autnok nok ale be'it natuin In matanin, le anmepu nok matani anbi kau.
2:1 Au lomi he nati' hi mihin, lasi le au autnok in mafena onme natuin hi ma natuin sin le abit Laodikia ma neu sin alsin le sin fe ka nahin kau fa. 2:2 So sin napeni lasi malinat ma sin anfani mese anbi lasi manekat. Onane te sin napeni ale mu'in ma lasi hine ma nahin Uisneno In lasi tolo' nane lo Neno Anan kun. 2:3 Fun Uisneno In lasi hine ma keon natolo'on anbi Neno Anan. 2:4 Au eut ki lasi i, he nati' kais anmu'i atoni le namonob ki neki a'at ma uab aminat. 2:5 Maski au ka haumak ki, mes au smanak nok ki piut; ma au it nok malinat hi monim ma hi nek ateb aki'at anbi Neno Anan. 2:6 Him simo milali Neno Anan Yesus, hit Usif. Es nane te hi moni mibala ambi In. 2:7 So hi mi'ba anbi In ma nafena ki anbi In. So him hataniom anbi nek ateb knino, le nanoni nalali neu ki ma so hi nekam nathoe nok utulu nekaf. 2:8 Him pantom nai, he nati' kais anmu'i atoni le nalosib ki neki nek hine pah pinan le in lasi luman ma neki lasi moel. Ale lasi hine nane ka natuin fa Neno Anan, mes natuin lasi noina nakakoba ma natuin ale smanaf pah pinan. 2:9 Fun Uisneno natua anbi Neno Anan, anbi In ta'un mansian. 2:10 Ma natuin anmoni namesbon nok Neno Anan, anfe ki amsa monit le nahenu. Fun Neno Anan nakaf neu ale smanaf le anmui kuasat ma le naplenat. 2:11 Fun namesbon nok Neno Anan, anheli nalali ki, ka neki fa helit le anmo'e natuin mansian, mes neki helit le anmo'e natuin Neno Anan, le nafetin ki na'ko kuasat sanat. 2:12 Fun ansub ki nok In anbi su oe ma nafena ki amsa ambi In. Fun hi nekam nateb knino neu Uisneno In kuasat, le nafena Neno Anan na'ko amates. 2:13 Afi hi mate natuin hi mo'et tanhais ma natuin kan heli ki fa. Mes Uisneno namonib ki nok Neno Anan, leka Uisneno ansako nalali hi mo'et tanhais. 2:14 Ma nose naneku hit sul tusa, le anmo'e nani neki plenat mafena. Natuin ankus hit sul tusa, anbi hau nehe, Uisneno nait naneku ale hit mo'et tanhais. 2:15 Neno Anan nafetin kit na'ko ale smanaf le naplenat ma anmu'i kuasat. Oke te nahakeb sin on atoni le napene ma ankiso In lasi mnisat neu sin. 2:16 Es nane te kais atoni nasanab ki antom lasi mnahat, ai lasi mninut, ai antom neno naek, ai funan le fe anbol ma kuke, ai antom Neno Snasat. 2:17 Fun ale lasi nane anfani lasi klile neu ale lasi le he natonon anbi neon amnemat, es Neno Anan kun. 2:18 Kais atoni nasanab ki anbi hi lasi mabe'ut, le in asafanu ma nabaun in aon ma naluli ma nabes neu ahake neno tunan. Atoni nane sin nanaebok natuin lasi mnitas. 2:19 Ma sin ka na' namepan fa Neno Anan le anfani nakaf neu aof; aof nane matuntakun ma anmafutun fani mese natuin kini ma keot ma kanuf-kanuf le anmoni natuin Uisneno In lomin. 2:20 Hi maet milali mok Neno Anan ma nafetin ki na'ko ale smanaf pah pinan. Nansa'es hi mina'at hi aom neu ale lekat huma-huma onle hi fe moni ambi pah pinan nak: 2:21 kais ampoe i, kais amtamis nane, kais amo'no i. 2:22 Ale lasi nane antom neu sa' le of namle'u le anmo'e nani neki lekat ma noina pah pinan. 2:23 Namneo, ale lekat nane nahenu nok nek hine, anlomi he naluli ma nabes neu ahake neno tunan, nabaun sin aon ma anhamu'i sin aon. Mes nane ka ma'upa fa, neu he naneku sin nek sinmakat pah pinan.
3:1 Es nane te, kalu nafena nalali ki nok Neno Anan, so hi maim lasi le anbi neno tunan, le Neno Anan esan, antunon anbi Uisneno aonbian ne'u. 3:2 Mitenab nai neu lasi le anbi neno tunan, kais mitenab neu lasi le anbi pah pinan. 3:3 Fun hi maet milalien ma hi monim na'tolo' nok Neno Anan anbi Uisneno. 3:4 Hi monim nane es Neno Anan, leka In nalilon, of hi amsa mililom mok In anbi apinat. 3:5 Mimate nai anbi hi aom taos ma mo'et pah pinan, esle lasi kake, lasi amolemut, nek maputu, nek lomif neu amle'ut, ma lasi sinmakat le papmese nok luli besa neu le'u. 3:6 Ale lasi nane nafena to'as Uisneno (neu ale atoin amo'e amle'ut sin). 3:7 Afi hi amsa mo'e mituin ale lasi nane leka hi fe moni ambin. 3:8 Mes muni i hi mes ampolin ale lasi i, esle to'as, maunu, nek amle'ut, si'ut ma akan. Ma ale uab amle'ut le anpoi na'ko hi fefam. 3:9 Kais hi mipoibom es neu es fun hi mibela milali atoni mna nok in taos in mo'et. 3:10 Ma him fani atoni fe'u le nafe'un ki piut-piut he mipeni lasi hine amneot natuin Apakaet ma Amo'et In human. 3:11 Anbi lasi i kan mu'in tenif atoni Yunani ai atoni Yahudi, atoni maheli ai atoni ka maheli, atoni Barbar ai atoni Skit, ate ai atoni ao sona. Fun Neno Anan In kun ale sa'-sa', Neno Anan namesbon nok sin ok-oke! 3:12 Hi on Uisneno In to mabeti. In nek ki ma naknino ki. Es nane te hi milile lasi manekat, lasi mahoen, nek baun, nek aklati ma seusabat. 3:13 Hi maseusaban es neu es, masakon sanat es neu es leka anmu'i atoni le nabela nek to'as neu es. Fun onle Usif ansako hi sanat, hi amsa mes mo'e onane. 3:14 Ma anbi lasi nane ok-oke lasi manekat anfani on tain futus le anfut nameseb ki ma nanokab ki anbi ale sa'. 3:15 So Neno Anan In halan nekaf naplenat hi nekam, fun natuin lasi nane Uisneno anboin ki hem fani aof mese. Es nane te hi mitulu hi nekam nai. 3:16 So Neno Anan In a'an nabala anbi hi nekam ma anfe ki tetus nok athoes. So hi moni ma mafainek es nok es meki lasi hine. Ma amsi nai meki sit knino unu ma sit pules ma sit knino, he mitulu hi nekam neu Uisneno. 3:17 Ma ale sa' le hi mo'e meki uab ai mo'et, hi mo'e nai anbi Usif Yesus kanan; ma mitulu nekam neu Uisneno, hit Ama natuin Yesus. 3:18 Hi fenai-fenai, so hi miusi neu hi mone onle hi mo'e mani anbi hit Usif. 3:19 Hi atoni amafet, so him nek hi fenai sin ma kais mimaunun sin. 3:20 Hi anah-anah, so mituin hi ama ma hi aina sini plenat anbi ale sa', fun nane lasi amasat anbi hit Usif. 3:21 Hi amaf-amaf, kaisa mimenab hi anhin sin nekan, he nati' kais sin nekan na'oni. 3:22 Hi ate-ate, so mituin hi tuan le anbi pah pinan i anbi ale lasi. Kais al anbi sin matan, neu he miminab sin nekan, mes nok nek muti fun hi mimtaus Usif tunan. 3:23 Ale sa' le hi mo'e, hi mo'e mani meik nekam oke, onle hi mo'e neu Usif tunan ma ka neu fa mansian. 3:24 Hi mihin, nak of him simo pa' ma nama' na'ko Usif tunan le naloitan nani on baen neu ki. Neno Anan nane tuan ma him fani ate neu In. 3:25 Sekau le anmo'e sanat, in of ansutai kun in sanat nane, fun Usif tunan kan betif humaf.
4:1 Hi tuan-tuan, so hi mo'e amneot neu hi ate sin. Mimnau, hi amsa a' mu'i tuan anbi neno tunan. 4:2 Hi malan ambi onen totis neu lasi nane, ambe' nai nok utulu nekaf neu Uisneno. 4:3 Him onen toti neu kai amsa, he nati' Uisneno nasoitan eno neu ki; he nati' hi mimolok antom Neno Anan In lasi tolo' knino. Natuin lasi nane natam kau anbi o'of. 4:4 Onane te au eut ani, onle anlek nani neu kau. 4:5 Hi moni nok nek hine neu ale atoni ka apalsait ma him panat ale leku nok alekot. 4:6 So ale hi uab nahenu nok manekat ma miminab ale nekaf. Ma hi mihin he mitae ale atoni onme. 4:7 Hit bae manekat, ate aki'at ma bae ameput anbi hit Usif, Nai Tikhikus, of aneut ki ale lasi le antom neu kau. 4:8 Au sonu in net neu ki, he nati' hi mihin ale lasi le antom neu kai ma he nati' in halin hi nekam. 4:9 Au sonu in nok hit bae aki'at ma manekat le hi es Nai Onesimus. Sin of aneut ki ale lasi le anbol neu kai anbi i. 4:10 Nai Aristarkhus le antam nok kau anbi o'of ma Nai Markus, le Nai Barnabas in, baef sin sonu tabe neu ki, -- him simo milali hanaf neu Nai Markus, le he net neu ki, nati' him simo in nok alekot -- 4:11 ma Nai Yesus le nakhata In kanan Nai Yustus, in amsa ansonu tabe neu ki. Na'ko ale atoni Yahudi le anpalsai neu Usif Yesus, al sin teun sin es anmeup nok kau neu Plenat Uisneno. Sin es anfani ahalinat neu kau. 4:12 Nai Eprafas ansonu tabe neu ki. In amsa na'ko hi. In anfani ate neu Neno Anan Yesus. In anonen toti neu ki, he nati' him haek mi'ki on atoni neka teme le anpalsai ale sa' le Uisneno anlomi. 4:13 Au saksi antom in, fun in nahaebon ma napusebon neu ki ma neu ale atoni anbi Laodikia ma Hierapolis. 4:14 Hit bae manekat Dokter Nai Lukas ma Nai Demas ansonu tabe neu ki. 4:15 Mitiaba hai tabe neu bae knino anbi Laodikia; ma neu bi Nimfa amsa nok tolas knino le anbi in ume. 4:16 Leka ansoi nalali sulat i neu ki, hi maim lanan he nati' ansoi nani amsa neu tolas knino anbi Laodikia. Ma sulat le ansonu neu Laodikia ansoi nani neu ki amsa. 4:17 Ma him etun Nai Arkhipus mak, "Mumnau, he nati' mepu le hom simo anbi Usif, he munaoba mani nok alekot." 4:18 Au Nai Paulus, au sonu tabe neu ki. Fef seon i au tui kuk eik au nimak. Mimnau kau, au fe bi o'of. So Usif anfe tetus knino neu ki alki. Na'ko hai nua kai, Nai Paulus ma Nai Timotius
1:1 Neu bae benu tolas knino anbi Tesalonika le anfani to Uisneno hit Ama ma hit Usif Yesus Neno Anan. Hai tenu kai, Nai Paulus, Nai Silwanus ma Nai Timotius mifnekan he nati' Uisneno anfe tetus ma aomina neu ki. 1:2 Hai mitulu hai nekam piut neu Uisneno natuin hi alki, ma hai mimnau ki anbi hai onen totis. 1:3 Leka haim onen neu Uisneno ma hit Ama, hai mimnau ki piut fun mepu le hi minaoba natuin palsait neu Neno Anan, hi manekam neu atoni bian talan te him tuthae sin, ma hi lasi afnekat le matani neu hit Usif Yesus Neno Anan. 1:4 Hai mihin nak Uisneno nek ki ma anbeti ki hem fani In ini. 1:5 Fun hai mitiaba Beno Knino neu ki ka al fa uab ma a'at mes nok kuasat ma nok Smanan Knino. Ma hai miteb lasi amneot na'ko Beno Knino nane. Hi mihin, hai moni onme neu hi alekot leka hai fe ambi hi atnanam. 1:6 Hi mituin milali hai heta ma heta Usif tunan. Maski him bi hamu'it, him simo nok malinat beno le haim etun neu ki. Lasi malinat nane Smanan Knino es anfe. 1:7 Oke te him fani heta neu ale atoni Slani anbi Makedonia ma Akhaya. 1:8 Fun nauba na'ko ko, beno antom Usif tunan nasitbon nalali ante Makedonia ma Akhaya. Ma ka al fa nane, mes beno antom hi palsait neu Uisneno antia me-me, talan te hai ka mi'uab amtenif sa' antom lasi nane. 1:9 Ale atoni na'uab antom le him simo kai bi neno hai met meu ki. Sin na'uab antom lasi hi misaitan faut le'u ma hau le'u ma aim meu Uisneno le anmoni ma amneot he miluli ma mibes meu In. 1:10 Sin na'uaben amsa antom lasi le hi mifnekan Uisneno Anmone nanoebon nem na'ko neno tunan onme, esle' Yesus, le Uisneno namonib nafani na'ko amates. Yesus nane amsa es namonib kit na'ko to'as Uisneno le of nem.
2:1 Bae benu alki! Hi mihin kim le hai aim meu ki ambi i ka luman fa. 2:2 Hi mihin nak afi hai fe ka aim meu ki fa anbi Tesalonika sin hamu'i ma nakle'at kai anbi Filipi. Mes maski antoni namfau anlaban kai, hit Uisneno anfe kai maspeti hem etun ki Beno Knino le na'ko Uisneno. 2:3 Fun hai fainekat nane ka natuin fulit ai ka natuin fa tenab amle'ut ma ka nok fa lasi losib amsa. 2:4 Mes Uisneno ankius kai on atam ota ma In nana'at Beno Knino nane neu kai. Es nane hai mimolok, ka natuin fa he miminab atoni pah pinan sin nekan; mes he miminab Uisneno In nekan. Fun Uisneno In es ansu' hai nekam. 2:5 Hi mihin kim nak hai ka mimolok fa mek fefmina ai uab losib he mitolo' salit-salit apalu' ai akomat. Uisneno ansaksi lasi nane! 2:6 Hai amsa ka maim fa pules na'ko atoni pah pinan -- he na'ko hi ai na'ko atoni bian. On Neno Anan haef hai mibe'i hem toit sa' na'ko ki. 2:7 Mes hai mo'e anbi hi atnanam onle ainaf mese le anfaf ma ampaloli in anah. 2:8 Onane amsa natuin haim nek ki' haim lomi hem fe ki ka al fa Beno Knino na'ko Uisneno mes hai monim amsa, fun haim nek ki. 2:9 Fun hi fe mimnau mit, bae benu alki, hai haet ma hai puse neu ki. Hai meup fai manas, he nati' kaisa anfani baut mafena neu sekau amsa le anbi ki, leka haim etun Uisneno In Beno Knino neu ki. 2:10 Him fain saksi neu kai, onane amsa Uisneno. Fun hai monim knino ma amneot ma ka nok fa akbunef sa' neu ki alki, le him palsai neu Neno Anan. 2:11 Hi mihin, nak hai mo'e neu ki mes-mese on amaf mese le anmo'e neu in anhenu. 2:12 Haim fainek ki, haim toti nok matani neu ki he nati' hi moni onane talan te anhalin Uisneno nekan. Fun Uisneno anboin nalali ki he mipeni pa' ambi Pah Pinan Fe'u Uisneno ma ambi In apinat. 2:13 Anmu'i anteni lasi mese bian le anmo'e kai he mitulu nekam neu Uisneno. Esle', bi leku hai mitiaba beno na'ko Uisneno neu ki, him simo beno nane ka on fa beno na'ko mansian, mes on beno na'ko Uisneno. Ma tebes nane beno na'ko Uisneno! Uisneno anmepu anbi ki le anpalsai neu Neno Anan. 2:14 Bae benu alki, lasi le him naben milali, tolas knino Uisneno abit Yudea le anfani Neno Anan Yesus ini sin amsa'a naben nani. Him naben hamu'it na'ko hi uf, onle tolas knino Uisneno abit Yudea sin naben nani na'ko atoni Yahudi sin. 2:15 Atoni Yahudi sin namate nalali Usif Yesus ma ale mafefa knino sin ma anhamu'i kai. Sin laban Uisneno piut ma anfani musu neu ale atoni ok-oke! 2:16 Sin nakain kai he nati' kais haim etun beno knino neu ale uf kan tamaf nonot Yahudi, le he neik amonit neu sin. Onane te atoni Yahudi ansato sin sanat piut tal nehenu anfin. Ma tomas i to'as Uisneno anbol neu sin ka natfek. 2:17 Mes bae benu alki, hai mibaitsom mok ki leku tuk es bi -- hai matam, mes hai nekam kahaf -- haim lomi he mi'eku amteni mok ki. 2:18 Haim lomi he met meu ki -- ma au, Nai Paulus, he et eu ki neis na'ko hae mese --, mes Nitu nakain kai. 2:19 Namneo hai afnekat ma amlilat es hi. Bi leku Yesus, hit Usif, nanoebon nem ma hit athake atbi In matan, of him fain amlilat neu kai. 2:20 Namneo, hai apinat ma hai amlilat esle' hi.
3:1 Hai kam un man fa hai lasi malinat. Es nane hai mifek he mimaika'a mes-mes anbi Atena. 3:2 Oke te haim sonu Nai Timotius, hit bae le anmeup nok kai neu Uisneno bi etus Neno Anan In Beno Knino. Haim sonu in he nati' anhatani ki ma anfainek ki he hi palsait ansato anteni neu Neno Anan. 3:3 Ma kaisa anmu'i es anbi ki le in nek ateb knino nabeko, natuin hamu'it i. Fun hi mihin, nak ale hamu'it i natam nalali neu lekat Uisneno neu kit. 3:4 Fun afi hai fe mok ki, haim eut main ki, mak of hit tapeni hamu'it. Ma lasi nane onle hi mihin, anbol nalalien. 3:5 Natuin lasi nane, au sonu Nai Timotius neit neu ki, he au uhin neu hi nek ateb knino. Fun au umtau kal-kalu santuaf ansu' ki, oke te hai haet nane luman. 3:6 Mes tomas i, Nai Timotius anfani nemen na'ko ki ma neki beno le anhalin kai neu on me hi nek palsait neu Neno Anan ma hi lasi manekat. In eut kai nak hi mimnau kai piut ambi hi nekam. Ma him lomi he mi'eku mok kai, onle hai amsa amlomi he mi'eku mok ki. 3:7 Es nane, bae benu alki, anbi ale hai sutais ma hai susal. Hi palsait neu Neno Anan namepan hai nekam hai malin natuin hi nek ateb knino. 3:8 Tomas i, hai nekam anmoni anfan, lamu him hake mi'ki mimesbom mok Usif. 3:9 Es nane hai mitulu hai nekam neu Uisneno natuin lasi malinat le hai mipeni anbi Uisneno In human natuin hi. 3:10 Fai manas haim onen toti piut, he nati' hit ta'eku humaf nok humaf; ma amsato ki lasi sa' le him labu mani anbi hi nek ateb knino. 3:11 So Uisneno hit Ama ma Yesus hit Usif, nasoitan lanan neu kai he mi'`eku mok ki. 3:12 Ma so hit Usif ansato ki ma namu'ib ki he nati' hi manek es nok es ma amnek ale atoni, onle hai amsa amnek ki. 3:13 So In hatani hi nekam, he nati' knino ki ma ka kobe ki fa anbi Uisneno hit Ama In matan, leka Yesus hit Usif, nanoebon nem nok ale atoni le anfani In ini.
4:1 Oke te, bae benu alki, so hi mituin hai heta antom lasi hi he moni onme hem halin Uisneno nekan. Namneo tomas i hi moni milali onle nane. Mes tomas i nok kuasat Usif Yesus, haim toit matani neu ki he nati' him hataniom amteni anbi lasi nane. 4:2 Fun hi mihin milali ale lekat le haim fe ki natuin kuasat Usif Yesus. 4:3 Uisneno In lomin on i, nati' hi mikniono'om, him panat hi aom na'ko lasi kake. 4:4 Atoni mes-mese napeni bife mese hen fani in fe ma anmoni nokan anbi knino ma amneot. 4:5 Ka natuin fa nek sinmakat pah pinan, onle atoni le ka nahinef Uisneno. 4:6 Anbi lasi i, kais atoni anmo'e sanat neu in baef neki mo'et amle'ut. Fun Uisneno of anseunbanin ale lasi nane, onle afi haim eut milali neu ki. 4:7 Uisneno anboin kit, ka neu fa het mo'e lasi amolemut mes het mo'e lasi aknino. 4:8 Es nane te, atoni le antite fainekat i in kan tite fa atoni pah pinan mes in tite Uisneno le In anfe Ini Smanan Knino neu ki. 4:9 Au ka tui ki fa antom lasi manekat es nok es, fun hi minoni milali lasi manekat es nok es na'ko Uisneno. 4:10 Lasi nane hi mo'e milali neu hi bae benu alsin, anbi Makedonia ok-oke. Mes haim fainek ki, bae benu alki, he nati' hi mo'e nesi anteni na'ko le nane. 4:11 Moni nok nek tainine neki kan tola neu ki, him pantom bi ale lasi. Ma hi meup meki hi niman, onle afi haim ba'an milali ki. 4:12 Kalu hi moni onane hi kam futnom neu sekau amsa, ma ale atoni le kan palsai fa neu Neno Anan, of antola ki. 4:13 Bae benu alki, haim lomi he nati' hi mihin namneo antom ale atoni le anmaet nalali, he nati' kais him kul on atoni le kan mu'if afnekat. 4:14 Kalu hit nekak nateb, nak Yesus anmate ma anfen anfani, hit nekak nateb amsa, nak ale atoni le anmate anbi Yesus, Uisneno of nabuab sin nok In. 4:15 Haim eut ki lasi i meki hit Usif In a'an; leka hit Usif nanoebon anfani nem, hit le fe atmoni, of ka tahunun fa ale atoni le anmaet nahunun kit. 4:16 Fun hit Usif of ansanu na'ko neno tunan neki taka. Ahake neno tunan sini nakaf of anhunun ma Uisneno In to'is nahan. Oke te ale atoni le anmate anbi Neno Anan of sin fen nahunun. 4:17 Nalali te, hit le fe atmoni of nait kit nok sin anbi nope het senu hit Usif anbi aileti ai neno tnanan. Onane te hit tamaika tok Usi talan te nabal-bal. 4:18 Es nane te so hi mafainekan es nok es meki ale a'at i.
5:1 Bae benu alki! Neu leku ma tabu leka ale lasi nane hen bol hai kam tui ki fa. 5:2 Fun hi mes mihin, nak neno le Usif he nanoebon nem of on abakat nem nok fai. 5:3 Leka atoni sin na'uab nak, Halan pah ma katit fa amale'ut" -- naskek onane te lasi amle'ut anbol neu sin. Lasi nane of naskekeb sin onle men mahonit anbol neu bife a'aput -- of sin ka naen nanan fa. 5:4 Mes hi, bae benu alki, hi ka monif anbi mesokan, talan te neno nane naskekeb ki on abakat. 5:5 Fun hi alki atoni le anmoni ambi meusine; him tam anbi manas le meusine. Hit kat monif anbi mesokan ai le atam anbi fai le mesokan. 5:6 Es nane kais him tup on atoni bian, mes hit be' ma nekak nahin. 5:7 Fun atoni atupas nane, antup nok fai ma atoni amafu tua nane, anmafu nok fai. 5:8 Mes hit le i atoni manas le atam anbi manas le meusine so hit nekak nahin. Hit mes atpake palsait ma manekat on sobalu besi het maken. Ma hit sobe besi nane afnekat honis neu kit. 5:9 Uisneno anbeti kit ka neu fa he tapeni In to'as mes he nati' hit tapeni honis natuin hit Usif Yesus Neno Anan. 5:10 Yesus anmate neu kit he nati' bi neno In nanoebon anfani nem -- oni hit fe atmoni, oni hit maet talali -- hit moni tabua tok In. 5:11 Es nane, so hi mafainek es neu es ma mahatanin es neu es onle hi mo'e mani. 5:12 Bae benu alki! Haim toit ki, he nati' him tola ale atoni le anmepu matani anbi ki; esle' atoni le Uisneno anbeti sin hen topu ma anfainek ki. 5:13 Him simo ma mitaim sin nok lasi manekat natuin sin mepu. Hi moni ambi halan nekaf es nok es. 5:14 Haim toti ki amsa, bae benu alki, he nati' hi mikain ale atoni le kan monif nok amneot. Amhalin ale atoni le nekan na'oni. Amtuntaku alima'et sin ma amseusab neu ale atoni. 5:15 Him panat, he nati' kais es anseunbanin lasi amle'ut neik lasi amle'ut. Mes hi mo'e lasi alekot piut es neu es ma neu ale atoni ok-oke. 5:16 Mimlil nai ambi ale leku. 5:17 Onen totis kais natfek. 5:18 Mitulu nekam neu Uisneno anbi ale lasi, fun Uisneno anlomi lasi nane anbi ki onle ale atoni le anmoni namesbon nok Neno Anan Yesus. 5:19 Kais him sifo mimate Smanan Knino. 5:20 Kais hi minebet ale lasi beno le Smanan Knino anfe nani. 5:21 Him tai ale lasi ma ampanat lasi alekot. 5:22 Hi mi'lo mi'ko ale lasi amle'ut. 5:23 So Uisneno le anfe ki halan nekaf, anmo'e ki on atoni le namneo-namneo anmoni al neu Uisneno. So Uisneno anpao hi aom ok-oke, smanan, monim ma hi aom, he nati' kais kobe anbi neno hit Usif Yesus Neno Anan nanoebon anfain nem. 5:24 Uisneno, le anboin nalali ki, of anmo'e lasi nane fun In aki'at kun. 5:25 Bae benu alki, him onen toti neu kai. 5:26 Mitiaba hai tabe neu ale bae knino ok-oke le palsait mese nok kit. 5:27 Nok kuasat Usif tunan, au toit ki he nati' him soi sulat i neu bae knino sin ok-oke le palsait mese nok kit. 5:28 So Yesus Neno Anan, hit Usif, anfe tetus ma aomina neu ki. Na'ko hai tenu kai, Nai Paulus, Nai Silwanus, Nai Timotius.
1:1 Bae benu tolas knino abit Tesalonika, le anfani to Uisneno hit Ama ma Usif Yesus Neno Anan! Hai teun kai, Nai Paulus, Nai Silwanus, ma Nai Timotius, 1:2 mifnekan he nati' Uisneno, hit Ama ma Usif Yesus Neno Anan anfe tetus ma aomina neu ki. 1:3 Bae benu alki, hai mes mitulu nekam piut neu Uisneno natuin hi. Ma namneo hai mes amoe onane, fun hi nek ateb knino neu Neno Anan ansato piut ma hi lasi manekat es neu es namepan fin. 1:4 Es nane nansa haim pules ki ambi tolas knino Uisneno sin atnanan. Nok malinat hai mi'uab neu hi nek atahas ma aki'at anbi palsait neu Neno Anan anbi hamu'it ma sutais atnanan le him naben. 1:5 Anbi i Uisneno In lasi lefit amneot nalilon. Him sutai milali Pah Pinan Fe'u Uisneno, ma of him tam otahem tam meun. 1:6 Uisneno of anmo'e sa' le amneot. In of anseunbanin hamu'it neu atoni le anhamu'i ki. 1:7 Ma neu ki le tomas i him sutai -- onane amsa neu kai -- Uisneno of anfe neu kai alekot bi neno Usif Yesus nalilon, ansanu na'ko neno tunan nok In ahake neno tunan sin le anmu'i kuasat, 1:8 ma nok ai le anpin In sanu nem hen hukum ale atoni le kan lomif he nahin Uisneno ma leka natuin fa beno knino antom Yesus hit Usif. 1:9 Ale atoni nane sin of ansimo plenat amle'ut nabal-bal ma anli'u napoitan na'ko Usif In matan ma na'ko apinat ma kuasat Usif tunan. 1:10 Leka In nanaoebon nem bi neno nane of ale to knino naliatas In ma ale atoni nek ateb knino namtausan In. Hi amsa of ambi to Uisneno nane sin atnanan, fun him palsai milali beno le hai mitiaba neu ki. 1:11 Es nane haim onen toti piut neu ki, he nati' Uisneno ankius ki on atam ota he mituin In han boin. So Uisneno nok In kuasat nahenu hi lomim neu mo'et alekot ma natis ale mepu le hi mo'e mani fun anpalsai neu Neno Anan. 1:12 Onane te hit Usif Yesus maliatas natuin hi, ma hi amsa maliatas natuin Yesus fun hit Uisneno nekan alekot ma Usif Yesus Neno Anan.
2:1 Neu hit Usif Yesus Neno Anan he nanoebon nem, ma neu lasi he nabuab kit he tamaika tok Usif, lasi i au toti matani neu ki. 2:2 Kais hi nekam ana'kman ma kais hi nekam na'unu neu beno le aneut ki nak Usif Yesus In neno he nanoebon anfani nem antelen. Beno nane he na'ko lasi mnitas ka, ai lasi noina ka ai natuin sin nak haim tui onane ambi sulat le haim sonu neu ki. 2:3 Maski onane amsa kais es anfuli ki. Fun nahunun Neno nane he nem: Of anmu'i atoni le anhel koti na'ko sin palsait neu Neno Anan. Mansian Amle'ut, le anlek nani hen tam neu ai maputu of nalile in aon. 2:4 Nok lasi moko of in laban ma namaeb in aon neu ale sa' le mansian nabes neun ai neu ale sa' le mansian nok Uisneno teta. In antoko anbi Ume Uisneno ma ane'tun nak in Uisneno. 2:5 Ai him nikan ale alsi afe au eut ulali ki bi neno au fe ok ki ka? 2:6 Ma tomas i fe anmu'i le natau in; ma hi mihin lasi sa' nane. Of bi leku le Uisneno anlek nani, Mansian Amle'ut nane of anbol. 2:7 Lasi abe'it le anmo'e amle'ut nane anmepu nalali nok a'tolo; mes fe natau nani. Of leka le natau nani nane naskotun, 2:8 Mansian Amle'ut nani nalilon. Leka Usif Yesus nanoebon nem, of In namate mansian amle'ut nane neki snasan le anpoi na'ko In fefan ma nale'un nane neki In apinat. 2:9 Amoe Mansian Amle'ut nane of in nem natuin nitu in mepu. Mansian Amle'ut nane anbol nok kuasat mese la naek. Of in mo'e lasi amkakat huma-huma, taka ma sanmakat le nahenu nok lasi penu. 2:10 Of in mo'e ale ela lisan amle'ut he nasekeb ale atoni le of namle'u. Of sin namle'un fun sin kan simof ma kan lomif beno amneot na'ko Uisneno le he neki honis neu sin. 2:11 Onane te Uisneno anfe neu sin kuasat mese le nasekab sin, talan te of sin palsai neu sa' le ka amneot. 2:12 Oke te ale atoni le anlomi sanat ma kan palsai fe neu amneot nane of anhukum sin. 2:13 Bae benu manekat anbi hit Usif! Hai mitulu nekam piut neu Uisneno natuin hi, fun afi Uisneno anbeti nalali ki he namonib ki. Lasi nane anjali natuin sa' le Smanan Knino anmepu anbi ki hem fani to Uisneno le knino ma natuin him palsai neu beno amneot na'ko Uisneno. 2:14 Natuin lasi nane Uisneno anboin ki natuin Beno Knino le haim etun neu ki he nati' hi mipeni pa' ma nama anbi Usif Yesus Neno Anan, In apinat. 2:15 Es nane him hake mi'ki nai, ma ampanat ale lasi noina le him simo na'ko kai, anbi a'at ma uab ai anbi sulat le haim tui neu ki. 2:16-17 So hit Usif Yesus Neno Anan, ma Uisneno hit Ama, anhalin ki ma anhatani hi nekam he nati' hi mepu ma ametun lasi alekot. Fun Uisneno nek kit, ma natuin In nekan alekot anfe kit amaspetis ma afnekat alekot.
3:1 Oke te, bae benu alki, him onen toti neu kai, he nati' beno na'ko Uisneno nasitbon laba ma masimo nok alekot, onle afi anbol nalali neu ki. 3:2 Him onen toti amsa he nati' Uisneno namonib kai na'ko atoni amaufinut ma atoni amoe lasi amle'ut. Fun ale atoni ok-oke kan palsai fa neu beno na'ko Uisneno nane. 3:3 Mes Uisneno aki'at kun. In of anhatani hi nekam ma anpao ki na'ko amle'ut in tuaf. 3:4 Ma haim palsai neu hit Usi, fun hi mo'e sa' le haim ba'an milali ki ma of hi mo'e piut. 3:5 So Usif tunan antopu hi nekam talan te hi mihin manekan Uisneno ma nek sutais le Neno Anan anfe ki. 3:6 Bae benu alki, nok kuasat Usif Yesus Neno Anan, hai miplenat ki he nati' hi mi'lo mi'ko ale atoni apehet, ma le ka natuin fa lasi noina le haim fe milali neu ki. 3:7 Fun hi mihin hi mes mituin hai heta onme, natuin hi beno hai mok ki hai kam pehef. 3:8 Ma hai ka miahaf es ini mnahat lum-luman. Hai meup fai manas nok haet ma puse he nati' kais amhafen es anbi ki. 3:9 Ka natuin fa hai ka mu'if hak hem toti he nati' him tuntaku kai; mes natuin haim lomi hem fani heta neu ki. 3:10 Fun afi fe hai mok ki, hai mimnauba ki lasi i mak, "Atoni le kan mepuf, kais amfene he nah." 3:11 Hai mimolok lasi i, fun haim nen nak anmu'i atoni anbi ki le anmoni nok pehe. Sin nahutbok nok atoni bian sin lasi, ma kan mu'if mepu mese le sin anmo'e. 3:12 Nok kuasat Usif Yesus Neno Anan, hai miplenat ale atoni nane ma mimnauba ki, he nati' sin mepu nok alekot ma nami mnahat neu sin aon. 3:13 Mes neu hi, bae benu alki, kais hi misnasan mo'et alekot. 3:14 Oni anmu'i atoni le kan lomif he natuin sa' le hai mi'uab mani anbi sulat i, hi mitaka in human, ma kais mimnono mokan, he nati' in anmae. 3:15 Kais him kiso in on musu, mes amfainek mani on hi bae. 3:16 Usif tunan nane uf neu hit lasi honis. So In anfe halan nekaf piut neu ki anbi ale lasi. So Usif tunan nok ki alki. 3:17 Han seon na'ko kau, Nai Paulus. Han seon i au tui kuk eik au nimak. I taka anbi ale au sulat sin. 3:18 So hit Usif Yesus Neno Anan anfe tetus neu ki alki. Na'ko hai teun kai, Nai Paulus, Nai Silwanus ma Nai Timotius
1:1-2 Neu au anah Nai Timotius! Ho au anah natuin palsait neu Neno Anan, Sulat i au tui on haef knino Neno Anan Yesus. Au fani haef knino natuin plenat Uisneno, hit Afetin ma natuin plenat Neno Anan Yesus hit afnekan. So Uisneno, hit Ama ma Neno Anan Yesus hit Usif anfe tetus, nek mamun ma halan nekaf neu ko. 1:3 Au lomi he nati' ho mumaika mubala ambi Efesus. Lasi nane au u'uab ulali bi neno au nao eu Makedonia. Au leul ko he mubala ambi Efesus, fun anbi nane amu'i atoni fauk le ane'tun noina ka amneot. Ma ho mes, musnasab sin. 1:4 Amfainek sin he nati' kais sin tao nekan neu lasi nu'un pah pinan ma lasi pe'ot likin pe'en le ka nafnek nitaf. Ale lasi nane al neki matoes ma ka nanaoba fa bekot Uisneno le al mahine natuin palsait. 1:5 Fainekat nane in lomin esle' nafena lasi manekat le anpoi na'ko nek muti, nek aknino ma palsait namneo. 1:6 Anmu'i atoni le kan monif onane anteni fun sin kiku anbi molok huma-huma le in lasi luman kun. 1:7 Sin anlomi hen fani anoni Plenat Knino unu, mes sin ka natenab nahin fa ale a'at le sin he na'uab ai ale lasi le sin he natiaba nani nok alekot. 1:8 Hit tahin, nak Plenat Knino unu nane leko ma namas, kalu tanoba nok alekot. 1:9 Hit mes tamnau nak Plenat Knino unu nane kan mo'e nani fa neu atoni amneot, mes neu atoni atanhai plenat sin, neu atoni abulalut, neu atoni le ka nahin Uisneno, neu atoni asanat, neu atoni pah pah pinan le kan mu'if Uisneno, neu atoni le namate in amaf ma in ainaf ma neu atoni ao'tes bian. 1:10 Neu atoni amoe lasi mapaisa, atoni le anbuion, abak atoni, apoiba, neu atoni le ansaksi poi ma neu atoni le in mo'et nasuli nok noina amneot. 1:11 Noina nane mapeni anbi Beno Knino na'ko Uisneno le apinat ma mapules, le nana'at nalali neu kau. 1:12 Au utulu nekak neu Neno Anan Yesus, hit Usif, le anfe kau matani he nati' au tuthae In, ma ankius kau on atoni atam ota neu mepu nane. 1:13 Afi au u'akan ulali, ma hamu'i ma ukle'at In. Mes Uisneno nek kau, fun bi leku nane au fe ka palsaif, es nane au ka uhin fa sa' le au mo'e. 1:14 Mes Usif tunan nek mamun nahoebon neu kau. In fe kau palsait ma manekat le anfani au ini leka au umesbok ok Neno Anan Yesus. 1:15 Tebes namneo a'at i -- es nane hit mes atsimo ma atpalsai nok alekot, "Neno Anan Yesus ankoenon nem neu pah pinan he namonib atoni asanat." Ma au le'i atoni asanat le anbulalu nesi. 1:16 Mes natuin lasi nane, Uisneno nek kau, he nati' Yesus Neno Anan nalile In seusabat neu kau on atona asanat anesit. Ma lasi i anfani leta mese neu ale atoni le of anpalsai neu In ma napeni honis nabal-bal. 1:17 Uisneno, Kesel ale batan, so matola ma mapules piut, fun In kun le nabal-bal, le ka mamnita, lo mese kun! Amin. 1:18 Au anah Nai Timotius! Au fe ko mepu i fun umnau plenat Uisneno le mafefa knino sin natiaba nani anbi tolas knino antom neu ko. So plenat nane anfain bukael neu ko anbi ho mepu alekot. 1:19 Ho mautnom nok palsit neu Neno Anan ma nok nek muti. Anmu'i atoni le kan lae nan fa sin nek tenab, telan te sin palsait namneku. 1:20 Fun anbi sin Nai Himeneus ma Nai Aleksander. Au una'at ulali sin nua sin neu Nitu, he nati' sin nanoina ma nas-nas na'ko nasi'u Uisneno.
2:1 Nahun-hunu, au fainek ko he nati' ho mutiaba onen totis ma tulu nekaf neu Uisneno antom ale atoni; 2:2 neu kesel ma neu ale anaet sin. Amtoti he nati' hit moni nok nek atais ma nek tainine neu Uisneno nok taos ma mo'et alekot. 2:3 Nane lasi alekot ma malomi neu Uisneno, hit Afetin. 2:4 In anlomi he nati' ale atoni napeni honis ma nahin lasi amneot. 2:5 Fun Uisneno nane mese, ma atoni tnana neu Uisneno ma mansian mese amsa, mansian nane Neno Anan Yesus. 2:6 In nana'at nalali In aon hen soi ale mansian na'ko sin sanat. Onane te Uisneno anlek nani anbi leku le'at, nak In lomi he nati' atoni ok-oke napeni honis. 2:7 Natuin lasi nane Usi anlelu kau neu atoni le kan tamaf nonot Yahudi he etun sin beno antom lasi palsait amneot -- Au u'uab lasi amneot, au ka upoibok -- 2:8 Bi me-me amsa so atoni anonen toti nok nekan muti, ka nok fa to'as ma matoes. 2:9 Au lomi amsa he nati' bife namasab in aon neki pake nek a'aka ma nek akesit. Kais in ane nakan funun, kais sin pake bale mnatu, ai baunkae usaf ai bale le upan matani. 2:10 Mes so neki mo'et alekot le antam ota neu bife le hen mo'e luli besa knino neu Uisneno. 2:11 Leko nesi bife in ta'ah ma ansimo lasi noina nok nek atahas. 2:12 Au ka pef mainuan neu bife he nanoina ai he naplenat atoni; so mes in anta' kun. 2:13 Fun afi anmo'e nahunun Nai Adam namuni te bi Hawa. 2:14 Ma santuaf kan fuli fa Nai Adam mes anfuli bife nane tal antanhai plenat Uisneno. 2:15 Maski onane bife of anmoni natuin nahoni anah, lamu in nok nek baun nabala anbi palsait neu Neno Anan ma a'nek atoni bian ma anmoni nabala neu Uisneno.
3:1 Tebes namneo a'at i, "Atoni le anlomi hen fani atopus tolas knino, in sinmakan mepu mese le ma'upa." 3:2 Es nane atopus tolas knino mes atoni le kan mo'ef amle'ut, mafe bife mese, anpanat in aon, nek manuan, fef leko; lomi hen simo anao amnenat anbi in ume ma nabe'i nenoina atoni bian; 3:3 kais atoni amauf tua ai amatoes. In mes amahoet, anlomi halan nekaf. In ka nabe'i sinmakan noni. 3:4 In mes anpainola nahin in ume nok alekot, nanoina in anhenu he natnin ma antola in. 3:5 Fun atoni le in kan painola nahin in ume nanan, leka me in hen painola Tolas Uisneno ka? 3:6 Kais atoni le fe naslani, he nati' kais in namoko'on oke te napeni kasat onle afi Nitu. 3:7 So in atoni makana anbi to; fun kalu ka onane, of atoni nakle'at in, talan te anmofu neu Nitu ini le'o. 3:8 Onane amsa neu diaken ai syamas, so atoni alekot le na'uab muti; kais atoni amniun tua ai atoni apalu noni. 3:9 Sin mes anpanat namepan lasi noina ma palsait atoni Slani le Uisneno nalile nani. Sin anmo'e nani nok nek muti. 3:10 Mes ansu' sin amsa, leka sin kan mo'en fa lasi amle'ut, nabe'i anlek sin hen mepu anbi tolas knino. 3:11 Onane amsa sin fenainu, so bife alekot kais na'uab nale'un es in kanan, anpanat sin aon ma na'uab muti anbi ale lasi. 3:12 Diaken ai syamas so atoni le anmafe bife mese ma anpainola in anhenu ma in ume nanan nok alekot. 3:13 Fun atoni le antuthae nok alekot anbi tolas knino of antola sin ma anmaspetin he namolok antom sin lasi palsait neu Neno Anan Yesus. 3:14 Au ufnekan he eti kius ko, maski onane au tui ko ale lasi i. 3:15 Kalu au ka eti tia lab, ho muhin mulali, nak atoni le hen moni on Uisneno In ini esle' tolas knino na'ko Uisneno amonit. Tolas knino nane anfani ni tula ma sukit lasi amneot na'ko Uisneno. 3:16 Tebes, lasi tolo neu hit luli besa knino lo naek kun: "In natonon anbi humaf mansian, namneob nani anbi Smanan Knino; nalile In aon neu ahake neno tunan sin. Anetun In beno neu uf-uf le ka nahin Uisneno, ma sin anpalsai In anbi pah pinan ma na'aiti neu neno tunan."
4:1 Smanan Knino anetun mat-mat, nak bi neno amnemat anmu'i atoni le naen koti sin palsait ma natotan Neno Anan. Of sin natnin neu smanaf ma akiku ma natuin noina sman amle'ut, 4:2 le natiaba nani natuin atoni asafanut le napoibon. Atoni nane sin nekan names'ok. 4:3 Sin nanoina atoni he kais anmafe ma anmamone ma kais nahan na'ko mnahat le Uisneno anmo'e nani. Mes Uisneno anmo'e mnahat nane he nati' ale atoni le anpalsai neu Neno Anan ma atoni le nahin lasi amneot na'ko Uisneno sin nah nani nok tulu nekaf neu Uisneno. 4:4 Fun ale sa' le Uisneno anmo'e nane leko, ma katit fa nuni ai kae kalu atsimo nok tulu nekaf neu Uisneno. 4:5 Fun tetus na'ko Uisneno ma onen totis anmo'e mnahat nane anfani alekot. 4:6 Kalu ho munoina ale lasi nane neu ho bae sin le anpalsai, of hom fani atuthaes neu Neno Anan Yesus, le anmepu nok alekot. Hom panat ho nekam nok a'an Uisneno le hit palsai ma lasi noina amneot le ho mutuin mulali. 4:7 Mes ho mu'lo mu'ko ale lasi nu'un kahahine le ka ma'ota fa. Mutakab ho aom neu monit luli besa knino. 4:8 Mutakab ho aom neu pah pinan in osan an-ana neu monim batan i ma monim batan amnemat. 4:9 Lasi i mes masimo ma mapalsai nok alekot. 4:10 Es nane hit tahaebok ma tapusebok ma atmepu matani, fun hit tafnekan neu Uisneno amonit; In Uis kesel Afetin neu ale mansian, nes-nesi ale atoni apalsait. 4:11 Munoina ale lasi nane ma amleu sin he natuin nani. 4:12 Kais es kan lae nan ko fa fun ho fe munif ko. Mes so hom fani heta mese neu ale atoni apalsait, anbi uab, anbi taos, mo'et, anbi lasi manekat, anbi lasi aki'at ma anbi ho monim aknino. 4:13 Anbi leku nane, tal au et ho mes namneo-namneo amsoi Sulat Knino neu ale atoni he mufena sin ma munoina sin. 4:14 Kais hom paleob halinat na'ko Smanan Knino le anfe nalali neu ko, bi leku penatua sin na'aiti niman neu ko, ma mafefa knino sin natiaba nalali han ba'an Uisneno antom ho aom. 4:15 Mepu nai ale lasi nane namneo-namneo he nati' lasi hom nao mat mamnita neu atoni ok-oke. 4:16 Hom panat ho aom ma ampanat amsa ho lasi noina. Malan ambi ale lasi nane, fun nok mo'et onane, of he mumonib ho aom ma ale atoni le sin natnin ko.
5:1 Kais mumaunun atoni le namnasi nesin ko mes mukain mani on amaf. Mukain atoin munif sin on olif, 5:2 bife mnasi sin on ainaf, ma bife munif sin on fetof nok nek muti. 5:3 So hom tola bife banu sin, le namneo-namneo sin bife banu. 5:4 Mes kalu bife banu mese anmu'i anah ai upuf, nahunu mes sin nanoina he naleko sin ume nanan ma anseunbanin amaf ainaf ma babfin sin mo'et alekot. Fun lasi nane anhalin Uisneno nekan. 5:5 Bife banu le namneo-namneo in mes-mes kun, ma kan mu'if atoni le anpafa nani, al nafnekan neu Uisneno. Fai manas in onen toti piut neu Uisneno hen toti In tuntakus. 5:6 Mes bife banu le anmoni nok malinat, anmate nalali maski in fe anmoni. 5:7 Hom etun ale lasi i amsa neu bife banu sin he nati' sin monin ka nok fa amle'ut. 5:8 Kalu anmu'i atoni le kan paloli fa in bia benu sin, nesnesi in ume nanan, atoni nane natotan in lasi palsait; in namle'u nesin na'ko atoni le ka apalsait. 5:9 Le maso'ik on bife banu, al bife banu le in uan kan labu fa na'ko ton bo'ne, le anmamone hae mese, 5:10 mahine on bife le anmo'e nalali ale lasi alekot, esle' anpaloli in anhenu nok alekot, ansimo anao amnemat anbi in ume, antuthae ale atoni apalsait, ma antulun atoni le anmoni anbi manukat - atlefiha nak, sin le anmo'e nalali ale mepu alekot. 5:11 Kais hom soi ale bife banu le fe munif. Fun leka nek sinmakat anbati sin na'ko Neno Anan, sin lomi hen mamone anteni. 5:12 Ma of sin nasanab fun natotan lasi manba'ab le anfe nalali neu Neno Anan. 5:13 Onane amsa of sin polin leku fun anpoi antam atoni sin ume. Ma lasi amle'ut le nesi anteni, esle' sin nanoni he na'uab nale'un atoni bian sin kanan ma anselo nok atoni bian sin lasi ma namolok ale lasi le ka nabe'i he namolok nani. 5:14 Es nane te, au lomi he nati' ale bife banu munif sinmamone anteni, ma napenin anah oke te naleko sin ume nanan, he nati' hit musu sin kais napeni manuan he nale'un hit kanak. 5:15 Fun anmu'i bife banu le ankiku oke te natuin Nitu. 5:16 Mes kalu atoni ai bife apalsait le anmu'i in ini le anbanu, in mes antuntaku sin he nati' kais anhafen tolas knino. Onane te tolas knino nabe'i antuntaku sin le namneo-namneo anbanu. 5:17 Ale penatua le anmepu nok alekot sin napeni kan tola kuni nua' nes-nesi sin le anmakoen neu lasi keti knino ma nanoina. 5:18 Fun antui anbi Sulat Knino nak, "Bia ai bijae le fe anteli ane hen beti nok ta'un, kais ampano in fefan", onane amsa, "Atoni le anmepu, in mu'i hak he napeni in baen". 5:19 Kais hom simo lasi aktuta neu penatua, so anmu'i saksi atoni nua ai atoni tenu. 5:20 Atoni le anmo'e sanat, ho mukain anbi tolas knino sin matan, he nati' atoni bian sin namtau. 5:21 Anbi Uisneno, ma Neno Anan Yesus, ma ahake neno tunan le mabeti sin matan, au toti matani he nati' ho mutuin ale lekat i ka nok fa tenab neu sekau amsa ma ka nabe'i hom hake mok es. 5:22 Kais ho manap he mu'uiti nimam neu atoni mese le hem hatani in on atuthaes Usif tunan. Kais amselo ambi atoni bian sin sanat. Ampanat ho aom na'ko ale lasi amle'ut. 5:23 Kais al minu oe anmes, so minu amsa tua mina amtasa kle'o hem tulun ho teim amenat fun fe'-fe'at ho mumen. 5:24 Atoni bian sin sanat, fe ka malefi, mamnita nalali nok alekot. Mes atoni bian sin sanat mahine namuni. 5:25 Onane amsa ale mo'et alekot mamnita laba. Ma mo'et le ka mamnita fa laba amsa, ka nabe'i natolo nabala.
6:1 Ale atoni Slani le anfani ate, sin mes nahin, nak sin tuan nane so napeni kan tola, he nati' atoni ka nabe'i antek nale'un Uisneno kanan ma hit lasi noina. 6:2a Kalu sin tuan le nane atoni apalsait, kais sin nanebet nani, fun sin mabae benu anbi Neno Anan. Sin mes antuthae sin tuan nane naleko nesi anteni, fun tuan le napeni tuthaes nok alekot nane in amsa atoni apalsait le he napeni manekat. 6:2b Munoina ma amfainek ale lasi i neu sin. 6:3 Anmu'i atoni le nanoina lasi noina bian na'ko nane ma ka natuin fa noina amneot na'ko hit Usif, Yesus Neno Anan. Sin ka natuin fa noina le namnes nok hit luli besa knino. 6:4 Ale atoni nane sin atoni le namoko'ok mes sin ka nahin fa sa'-sa'. In menas esle' anlomi uab suli ma matoes antom a'at huma-huma talan te napoitan lasi manek nanan, mabanat, ma'akan ma natenab lae lasi le ka alekot, 6:5 ma lasi matoes le ka oke nitaf. Ale atoni nane sin nek tenab antu'en ma ka namneof. Sin natenab nak of napenin osaf na'ko luli besa knino. 6:6 Namneo luli besa knino anfe kit osaf a'naek, kalu atoni natenab nak noba, neki sa' le in anmu'i. 6:7 Fun kan mu'if sa'es amsa le hit teki neu pah pinan i. Ma kan mu'if sa'es amsa le nabe'i hit teki anpoi na'ko pah pinan i. 6:8 Es nane, kalu anmu'i mnahat ma tainusat, nane lo noba. 6:9 Mes atoni le anlomi hen fani amu'it, antam neu lasi su'at, antam neu le'o natuin lasi sinmakat huma-huma le amonot ma nale'un. Ale lasi sinmakat nane anmo'e atoni anfain amnekut ma amle'ut. 6:10 Fun na'ko lasi atsinmakan noni, lasi amle'ut huma-huma anbol. Anmui atoni bian le sin nami noni masin ka natuin anteni fa noina atoni Slani, talan te sin sutai hamu'it namfau le naskuku sin nekan. 6:11 Mes ho atoni Uisneno, es nane ho mes mu'lo mu'ko ale lasi nane. Amhataniom hem fani atoni amneot anbi Uisneno human, le ama'etnom neu Uisneno ma ampalsai neu Neno Anan, ma le anmu'i manekat, seusabat ma nek aklati. 6:12 Mabe'u nai namneo-namneo neu sa' le hom palsai ma so hom musik honis nabal-bal. Fun neu lasi nane Uisneno anboin ko bi leku hom aun anbi atoni mfaun sin matan nak hom palsai neu Neno Anan. 6:13 Anbi Uisneno le namonib ale sa' In human, ma anbi Neno Anan Yesus In human, le anfe saksit amneot neu Nai Pontius Pilatus, au uplenat lasi i neu ko: 6:14 Ho mutuin plenat i nok nek muti ma ka kobe fa talan te neno hit Uisneno, Yesus Neno Anan ankoenon anfani nem. 6:15 Leka le hen koenon nem, Uisneno es anlek nani, In kun es anmu'i kuasat anbi ale sa'; In apinat, Usif neu ale Usif ma Tuan neu ale tuan. 6:16 In kun le kuasat maten ka neplenat; In anmoni anbi meusine le es ka nabe'i hen haumak. Katit fa mansian mese le nit In namneo mansian ka nabe'i he nit In. Tola ma kuasat neu In telan te nabal-bal! Amin. 6:17 Hon etun neu ale atoni amu'it ambi pah pinan i, he nati' kais sin nanaebok ma kais nafnekan neu nu'in le of namneku. Mes so sin nafnekan neu Uisneno le anfe kit ale sa' nok athoes he nati' hit malin. 6:18 Ametun sin he nati' sin mo'en alekot, anfani amu'it anbi mo'et alekot, amahoet ma anlomi hen bati neu sin biakin. 6:19 Natuin lasi nane sin nabua maus le anfani sukit alekot neu neno amnemat. Ma nok lasi nane, of sin napeni honis nabal-bal, es le honis namneo. 6:20 Koi Timotius, ampanat nai lek-leko sa' le anfe nalali neu ko. Ho mu'lo mu'ko ale uab ma molok le ka manesa fa ma uab suli le antek nani nak, "Lasi hine." 6:21 Fun anmu'i atoni le nanoina nani, talan te sin anbeo na'ko noina atoni Slani, le afi sin palsai nani. So Usif tunan anfe tetus neu ki. Na'ko, Nai Paulus
1:1-2 Au anah Nai Timotius le au nek ani! Au Nai Paulus, au tui sulat i neu ko, ma ufnekan he nati' Uisneno hit Ama ma hit Usif Neno Anan Yesus anfe tetus, amnaut ma halan nekaf neu ko. Natuin lomin Uisneno, naiti kau he fani haef knino Neno Anan Yesus ma ansonu kau he etun lasi amonit le Uisneno anba'an nani. Lasi amonit nane hit simo fun tamesbok tok Neno Anan Yesus. 1:3 Au utulu nekak neu Uisneno, le au tuthae nok nek amnono knino onle afi au babfini anmo'e. Au utulu nekak piut neu Uisneno ma umnau ko anbi onen toti fais manas. 1:4 Au umnau ho nek susal. Es nane au lomi he ue'ku ko he nati' namneo-namneo au nekak anmalin. 1:5 Au umnau ho nek palsait amneot neu Neno Anan, papmese onle ho bei bi Lois ma ho aina bi Eunike sin palsait. Ma au uteb ho amsa ampalsai onle nane. 1:6 Es nane au umnauba ko, he nati' ho mumonib sankolan knino le Uisneno anfe nalali neu ko anbi neno au aiti nimak neu ko. 1:7 Fun Smanaf le Uisneno anfe neu kit, ka Smanaf le anmo'e kit het fani amtaus. Mes Smanan Knino nane anmo'e kit het fani abe'it, nehenu nok manekat ma nabe'i atpanat aok. 1:8 Es nane te kais mumaebom neu lasi saksit antom hit Usif ma kais hom nek mae amsa neu kau, le au tam o'of natuin In. So ho mok matani na'ko Uisneno, amsutai mok kau neu Beno Knino nane. 1:9 Uisneno namonib kit ma anboin kit het fani In to. In anmo'e lasi nane ka natuin fa sa' le hit mepu, mes natuin In bekot ma In amnaut. In anfe nalali kit In amnaut natuin Neno Anan Yesus nahunun neno fe ka najalib fa pah pinan. 1:10 Ma muni i, Uisneno nalile In nek mamun neu kit natuin hit Kesel Afetin Neno Anan Yesus ankoenon nem. Natuin Beno Knino, Yesus anbe'u kuasat maten ma neki honis le ka namle'u nitaf. 1:11 Natuin etus Beno Knino nane Uisneno naiti kau he fani haef knino ma anoni ai kulu. 1:12 Es nane te au sutai ale lasi i, mes au ka nek mae, fun au uhin namneo sekau esle' au palsai. Ma au uhin, nak sa' le In anfe nalali neu kau, of In anpanat nani amsa talan te Neno Amsoput. 1:13 Mutuin namneo-namneo noina amneot le au fe ulali neu ko. Mes so hom na' mumepan neu palsait ma manekat le anfani hit ini fun tamesbok tok Yesus Neno Anan. 1:14 Natuin tuntakus Smanan Knino le anmoni anbi kit, so hom panat lek-leko lasi ma'upa le anfe nalali neu ko. 1:15 Ho muhin nak ale atoni anbi pah Asia, sin naen nasaitan kau, anbi sin amsa Nai Figelus ma Nai Hermogenes. 1:16 Mes Nai Onesiforus in ume nanan hae fauk-fauk anhalin au nekak. So Usif tunan nalile manekan neu sin. Maski au bi o'of Nai Onesiforus in kan mae fa neu au lasi nane. 1:17 Leka in nem ante pah Roma in naim kau tal na'eku nok kau. 1:18 Anbi Efesus in anbab kau anbi lasi namfaun. Ho muhin mulali ale lasi nane. So Uisneno nalile In nek mamun neune, bi neno Uisneno tunan nafek to pah pinan sin lasi.
2:1 Es nane te, koi au anah Nai Timotius! Hom hataniom natuin nek manuan le anfe nani neu kit, natuin hit tamesbok tok Neno Anan Yesus. 2:2 Lasi le hom nen mulali na'ko kau ambi saksi namfaun sin natan, ho muna'at mani neu ale atoni le hom palsai ma le sin mabe'i he nanoina atoni bian. 2:3 Ho mes amsutai on solalus Neno Anan Yesus le na'ki. 2:4 Solalus le fe nanaoba in mepu, in ka natenab fa lasi huma-huma neu in monin, fun in lomi hen halin in solalus nakaf. 2:5 Atoni le antam anbi lasi bae ai lasi foti, in ka nabe'i fa he napeni sobe makana on amnisat kalu in ka natuin fa lasi bae nane in lekat, 2:6 Atoni ameup lene le anmeup matani in mes antamis nahun in lene afan. 2:7 Hom panat nai lasi le au eut ulali i, fun Uisneno of anfe ko lasi hine he muhin ale lasi nane. 2:8 Ho mumnau lek-leko lasi i: Beno Knino le au etun nane, beno antom Yesus Neno Anan, Nai Daud in sufan; In kun Neno Anan le anfen anfan na'ko amates. 2:9 Natuin au etun Beno Knino nane, au sutai mane'at; ma sin anfutu kau on atoin abulalut. Mes Uisneno In a'an nane ka mafutu fa. 2:10 Es nane au sutai ale lasi nane natuin ale atoni le Uisneno anbeti nalali sin, he nati' sin amsa napeni honis natuin Neno Anan Yesus nok apinat nabal-bal. 2:11 Tebes namneo a'at i, "Kalu hit atmate tok In, hit of atmoni amsa tok In. 2:12 Kalu hit hataniok tabala, hit of taplenat amsa tok In, kalu hit tite In, In amsa of antite kit. 2:13 Kalu hit ka taki'af, In na'ki nabala, fun In ka nabe'i he natotan In aon." 2:14 So ho mumnauba ale atoni antom ale lasi i. Anbi Uisneno human, amfainek sin he nati' kais anmatoen antom uab huma-huma. Fun lasi nane kan tamaf ota mes al neki poetelo neu ale atoni le sin amnen ma natnin nani. 2:15 Hom hataniom he nati' Uisneno anlomi ko on atoni le antam ota hen mepu neu Uisneno. Ma kais hom nek mae, antom ho mepu, mes ho munoina mat-mat ale lasi noina na'ko Uisneno. 2:16 Mu'lob ale uab molok le kan tamaf ota ma ka knino fa. Uab molok onle nane neki atoni neu amle'ut. 2:17 Lasi noina ale atoni nane natlakbon on men le'u. Anbi sin nane Nai Himeneus ma Nai Filetus. 2:18 Sin anbeo na'ko sin noina amneot ma ampoetelo ai ankunkalan atoni bian sin nek palsait. Sin na'uab nak, lasi hit atfen atfan na'ko amates anbol nalalien. 2:19 Mes sukit matani le Uisneno anmo'e nani ka nabeko fa. Anbi in fafon matui nak, "Usif tunan nahin In ini sin," ma "Atoni le na'uab nak in Usif tunan Ini so in nasnasab in mo'et amle'ut." 2:20 Anbi ume naek mese hit tapeni bale huma-huma. Bale' bian anmo'e na'ko mnatu ai noin muti, mes bale bian anmo'e na'ko hau ai najan. Bale' bian anpake neu salit amasat, ma bale' bian anpake neu salit ka alekot. 2:21 Atoni le naknino in aon na'ko lasi amle'ut, atoni nane of mapake neu salit amasat. In anfani bale alekot le antam ota neu in tuan. Oke te naloitan nani neu mepu alekot. 2:22 Es nane te ho mu'lo mu'ko atoin munif sin lasi malinat. So ho moni mutuin Uisneno lomin, hem palsai neu In ma he mu'i manekat ma halan nekaf ambi nekam. Ho moni onane mok sin le ansakoi neu Uisneno nok nek muti. 2:23 Kais mok ambi matoes atoni amonot le ka nahinef sa'-sa'. Fun ho muhin, nak ale lasi nane neki matoes. 2:24 Atoni le anmepu neu Usif tunan in ka nebe'i hen matoe. So in fef leko neu ale atoni, ma nanoina atoni nok alekot ma seusabat. 2:25 In mes antopu ma anhel ale atoni nakfatu nok nek aklati. So Uisneno anfe mainuan neu ale atoni nane ha nati' nateunok na'ko sin sanat ma nahin lasi noina amneot. 2:26 Nok lasi nane te, sin nekan nahin anfan, ma nafetinok na'ko Nitu ini le'o le anfutu nalali sin ma naseke sin he natuin in lomin.
3:1 Mihin nai: Bi neno-neno amsoput of anmu'i susal namfau. 3:2 Atoni pah pinan of sin nek kun sin aon, anlomi hen fani atoni amu'it, nanaebok ma nalosibok. Sin na'uab nale'un atoni in kanan, naspitiok neu amaf ainaf, kan seunbanin nahinef alekot, kan lomif lasi Uisneno. 3:3 Sin kan lomif lasi manekat, kan lomif halan nekaf, anlomi hen tek nale'un atoni in kanan, kan panat nahin in aon, na'seke atoni bian, kan lomif lasi alekot. 3:4 Sin lomi hen aneb, ka natenab fa mnanu ma nanaebok, sin lomi he natuin sinmakat pah pinan ma ka natenab fa Uisneno. 3:5 Sin ana'safanu nanaoba luli besa knino mes sin tite luli besa nane in matanin. Hi mi'lo mi'ko atoni nane sin. 3:6 Bian anbi sin antam neu ume-ume, ma anfuli ale bife nek aklati le nahenu nok sanat, ma lasi sinmakat huma-huma naplenat sin aon. 3:7 Bife nane sin antoti he nanoina sin mes sin ka nahin nitaf noina amneot na'ko Uisneno. 3:8 Onle afi Nai Yanes ma Nai Yambres le anlaban Nai Musa, onane amsa sin anlaban lasi noina na'ko Usineno. Sin lolen namle'u nalalien ma sin palsait namnoe nalalien. 3:9 Mes sin of ka napeni fa sa' amsa, fun sin lasi mono nane mahine neu atoni ok-oke, onle Nai Yanes ma Nai Yambres amsa. 3:10 Mes ho mutuin mulali au noina, au taos au mo'et, ma au monit in salit. Ho mit mulali au palsait, au seusabat, ma au manekat ma au sutais. 3:11 Ho mit mulali le anhamu'i kau ma au sutai ulali. Ho muhin ale sa' le anbol neu kau anbi Antiokhia, ma anbi Ikonium, ma anbi Listra. Au sutai ale hamu'it nane mes Uisneno nafetin kau. 3:12 Namneo ale atoni le hen moni anbi luli besa knino ma anmoni namesbon nok Neno Anan Yesus of ansutai mane'at. 3:13 Atoni abulalut ma aputal of anmo'e amle'ut piut. Sin putal atoni bian mes atoni bian of anputal sin amsa. 3:14 Mes neu ho Timotius, so hom na' mumepan lasi noina amneot le hom sium mulali ma ho mumnau atoni le nanoina nalali neu ko. 3:15 Ho mumnau nak afi ho fe li ana ko ho muhin mulali Sulat Knino. Sulat Knino anfe ko nek hine he mupeni honis natuin palsait neu Neno Anan Yesus. 3:16 Ale tuis ambi Sulat Knino le Uisneno anetun nani, neki alekot neu he tanoina lasi amneot, he takain ma taleko le asanat, ma he tanoina mansian he nati' anmoni natuin Uisneno lomin. 3:17 Nok Sulat Knino nane atoni le antuthae Uisneno nabe'i taloitan sin neu ale mepu alekot huma-huma.
4:1 Neno Anan Yesus of ankoenon nem anteni neu pah pinan i he nafek ale atoni amonit ma amates sin lasi. Ma of In nanoebon nem on Kesel he naplenat. Es nane au toti neu ko anbi Uisneno ma Neno Anan Yesus In matan ak: 4:2 So hom etun beno knino na'ko Uisneno nane, so hom panat nai ambi leku leko ai leku le'uf. So ho munoina sin mulile sin sanat ma amfe fainekat neu sin. 4:3 Fun leka In leku ante of ale atoni kan lomif hen simo noina amneot. Mes sin nabuaba anoni ai kulu namfau natuin sin lomin he nanoina ale lasi le naminab sin luken neki lasi le sin natnin nani. 4:4 Of sin sun sin luken neu lasi amneot ma antahan sin luken neu lasi nu'un kahahine. 4:5 Maski onane ho mes ampanat ho aom ambi lasi onme amsa. Malan ambi sutais, munaoba ho mepu on amneki Beno Knino ma munaoba ho mepu nok alekot on atuthes Uisneno. 4:6 Neu au aok, leku antelen au mate on fua tulu neu Uisneno. Ala kle'o anten of au usaitan pah pinan i. 4:7 Au utuin foti nok alekot, ma au tia foti in amsopun neu au nek ateb knino. 4:8 Ma tomas i sobe amnisat anpao kau. Bi Neno Amsoput, Usif tunan, alef lasi amneot of anfe baen nane neu kau fun au moni uleko ok Uisneno. Mes ka al fa neu kau, mes neu ale atoni le anpao Usif tunan he nanoebon nem nok nek amlilat. 4:9 Ho mami lanan he aum meu kau laba, 4:10 fun Nai Demas nao nasaitan kau natuin in nek pah pinan. In nao kun neu Tesalonika. Nai Krekes in nao neu Galatia ma Nai Nai Titus in nao neu Dalmatia. 4:11 Al Nai Lukas es nabala nok kau. Ho muman Nai Markus ma mokan nem neu i, he nati' in bab kau anbi au mepu. 4:12 Au lelu ulali Nai Tikhikus neu Efesus. 4:13 Kalu ho aum, meik kau au sobalu mnanu le nabala anbi Troas anbi Nai Karpus in ume. Meik kau au sultenu amsa nes-nesi sulat le anmo'e na'ko pasu. 4:14 Nai Aleksander, atoni ateis nit molo nane anmo'e lasi amle'ut namfau neu kau. Usif tunan of anseunbanin in mo'et nane. 4:15 Ho amsa ampanat ho aom na'ko in, fun in kan simof hit lasi noina. 4:16 Bi neno au utae lasi ahunut nane, katit fa atoni mese le hen bab kau; sin alsin naen nasaitan kau. Nati' Uisneno kais nasanab sin anbi lasi nane! 4:17 Mes Usif tunan anhaek nok kau. In anfe kau matani talan te au etun beno knino nane, he nati' ale atoni le kan tamaf nonot Yahudi sin natnin nani. Natuin lasi nane te nafetin kau na'ko aus neno in fefan. 4:18 Ma Usif tunan of nafetin kau na'ko ale salit amle'ut. In of neki kau nok aomina neu Ini plenat anbi neno tunan. Apinat neu In talan te nabal-bal! Amin. 4:19 Au sonu tabe neu bi Priska ma Nai Akwila ma neu Nai Onesiforus nok in ume nanan sin. 4:20 Nai Erastus nabala anbi Korintus ma Nai Trofinus au usaitan anbi menas anbi Miletus. 4:21 Ho manap he aum meu kau nahunu na'ko neno oefat manikin. Nai Ebulus, Nai Pudes, Nai Linus, Nai Klaudia ansonu tabe neu ko; onane amsa bae benu bian. 4:22 So Usif tunan anhaek nok ko. So Usif tunan anfe ki tetus. Na'ko, Nai Paulus
1:1 Au anah Nai Titus! Au, Nai Paulus, au tui sulat i on Uisneno In ate ma on haef knino Yesus Neno Anan. In anbeti kau ma ansonu kau he tuntaku Uisneno atoin mabeti sin he nati' anhataniok anbi sin fnekat. Ma he topu sin he nati' nahin lasi amneot le nanoina nani natuin hit luli besa knino, 1:2 natuin afnekat neu lasi honis nabal-bal. Uisneno anba'an nalali honis nane na'ko neno fe kan fatan fa pah pinan -- ma Uisneno In ka napoibon. 1:3 Bi leku malomi, Uisneno nalile nani anbi In han ba'an neu pah pinan. Han ba'an nane nana'at nalali neu kau, ma au etun ulali natuin lekat Uisneno hit Afetin. 1:4 Nai Titus, ho namneo-namneo au anah ko, fun hit alkit atpalsai neu Neno Anan. Au ufnekan he nati' Uisneno hit Ama ma Yesus Neno Anan hit Kesel Afetin, anfe tetus, amnaut ma halan nekaf neu ko. 1:5 Au usaitan ko anbi Kreta he nati' ho musopu ale lasi le fe ho he mepu mani. Ma he nati' ho maiti penatua-penatua anbi kuan mes-mese. Ma mumnau ale au lekat i: 1:6 Atoni le hen fani penatua so atoni le kan mo'ef lasi amle'ut; in mes anmafe bife mese; in anhenu mes nafnek nalali neu Neno Anan ma ka anah-anah le mahine on anah-anah le anmo'en bute-bute ai le ka natuin fa fainekat alekot. 1:7 Fun atopu Tolas Knino nane so atoni le anpanat mepu Uisneno. In kan mo'ef lasi amle'ut, in ka nanaebon, ai ka ato'as, ai anmafu tua, ai amaunu ai ansinmakan noni. 1:8 In lomi hen simo atoni le nem neu in ume, in lomi lasi alekot, amakesit, amneot, nek muti ma naplenat in aon. 1:9 In mes na' namepan fef bela na'ko Uisneno, esle' beno alekot, onle nanoina nalali neu in. Natuin lasi nane, in nabe'i hen fainek atoni natuin lasi noina amneot ma nalile ale atoni sin sanat le he nasuli nokan. 1:10 Fun atoni namfau le ka natuin fa, nes-nesi nonot Yahudi; sin nasekeb atoni bian neki sin lasi poiba. 1:11 Atoni humaf nane sin, so ta'umut sin fefkenu, fun sin nale'un ume namfau neki lasi noina le kan tamaf ota. Sin mo'e ale lasi nane he nami osaf le ka nalekof. 1:12 Sin mafefa mese, le na'ko Kreta afi na'uab nak, "Atoni Kreta sin atoni apoiba, mu'it alalu, apalu ai akomat apehet." 1:13 Saksit nane namneo. Es nane te ho mukain sin matani, he nati' sin fnekat neu Uisneno nok amneot. 1:14 Ma kais natuin atoni Yahudi sin lasi nu'un ai ale lekat-lekat le atoni antite noina amneot anmo'e nani. 1:15 Fun ale sa', knino neu ale atoni knino. Mes neu ale atoni le sin natenab amle'ut ma kan mu'in fa fnekat, katit fa sa' esle' knino, fun sin tenab ma sin nekan namle'u nalali. 1:16 Sin na'uab nak nahin Uisneno, mes sin mo'et nane natotan Uisneno. Nekan anbulalu ma kan lomif he natuin; sin le nane atoni le ka nabe'i fa hen mo'e lasi alekot mese.
2:1 Mes ho, Nai Titus, so leko ho munoina lasi noina le neki aomina. 2:2 Hom fainek atoni mnasi sin, he nati' sin nanebet sin monin, anmu'i kan tola, amkesit, nafnek neu Uisneno nok amneot, anmoni nok manekat ma nok sutais. 2:3 Onane amsa hom fainek bife mnasi sin, so sin mo'et knino onle bife le naluli ma nabes neu Uisneno. Sin ka nabe'i antek nale'un es in kanan, sin ka nabe'i he ninun tua amafut. Sin mes nanoina lasi alekot, 2:4 ma nok lasi nane, sin nanoina bife munif sin he nati' sin nek sin mone ma sin anhenu, 2:5 monin nok nek hine ma knino, ma hen fani ainaf alekot anbi sin ume, ma nabaunok neu sin mone. Nok lasi nane of kan mu'if atoni le nabe'i na'uab nale'un beno na'ko Uisneno. 2:6 Onane amsa anfainek atoni munif sin, he nati' sin panat sin aon na'ko ale lasi. 2:7 Ma so anbi ale lasi ho mulile mo'et alekot on a'heta. So munoina sin nok nek muti ma namneo-namneo. 2:8 Ho munoina sin meki a'at amkesit, le kan mu'if atoni he naslaet nani, he nati' ho musu sin anmaen, fun kan mu'if lasi amle'ut le nabe'i sin na'uab nani antom kit. 2:9 Ale ate sin so nabaunok neu sin tuan ma anhalin sin nekan anbi ale lasi. Sin ka nabe'i hen sulin, 2:10 ai nabakan. So sin nalile nak sin mo'et leko ma aki'at; he nati' atoni anpules noina antom Uisneno, hit Kesel Afetin, fun ale sa' le sin anmo'e nane. 2:11 Fun Uisneno nalile nalali In amnaut neu he namonib ale mansian. 2:12 Amnaut Uisneno nane nanoina kit he nati' hit monik ka nasuli nok lomin Uisneno ma ka tatuin fa sinmakat pah pinan. Nanoina kit het moni atbi pah pinan i, atpanat hit aok, nek muti ma taluli tabes neu Uisneno. 2:13 Tomas i hit fe atpao neno hatas le hit tafnekan. Bi neno nane pah pinan of nit Uisneno Naek In apinat ma hit Afetin Yesus Neno Anan. 2:14 In natulu nalali In aon neu kit he namonib kit na'ko ale lasi amle'ut, ma anmo'e kit on to knino le anfani In ini, ma anmakoe hen mo'e alekot. 2:15 Munoina sin ale lasi nane, ma amfainek ma mukain sin meki ho uab ma ho mo'et alekot. Kais mumautu atoni mese amsa he nanebet ko.
3:1 Ho mumnaub sin he nati' sin nanebtok neu ana' aplenat ma ale atoni makana ma naloitnok he nanaob ale mepu alekot. 3:2 Am etun sin amsa he nati' kais sin na'uab nale'un es in kanan, kais sin matoen, so sin nalile nek baun neu ale atoni. 3:3 Fun afi hit amsa amonot, akiku ma ka tatuin fa plenat. Hit aetnok neu ale lasi sinmakat huma-huma ma ta'unu nekak ma kat malomif es nok es. 3:4 Mes Uisneno hit Afetin nalile manekan ma In nek mamun neu kit. 3:5 In namonib kit, ka natuin fa hit mo'et alekot, mes natuin In nek mamun neu kit. In namonib kit natuin Smanan Knino, le nahonis kit fe'u ma anfe kit monit fe'u nok lalan anboe kit. 3:6 Uisneno nasanut In Smanan Knino neu kit, natuin Yesus Neno Anan hit Kesel Afetin, 3:7 he nati' natuin Yesus manekan, hit taleko atfani tok Uisneno ma hit atsimo honis nabal-bal le hit tafnekan tani. 3:8 Tebes namneo a'at i. Au lomi he nati' ho mutesan ale lasi i, he nati' ale atoni le nafnek nalali neu Uisneno namneo-namneo sin naim lalan hen mo'e ale mepu alekot ma antam ota neu ale atoni. 3:9 Miskotun ale lasi ka mahine le kan tamaf ota ma lasi pe'ot huma-huma. Misaitan ale lasi matoes, lasi mabisot antom Plenat Knino unu. Ale lasi nane kan tamaf ota ma luman kun. 3:10 Atoni le neki lasi suli neu Tolas Knino hom fainek mani hae mese ai hae nua; oke te kais mumnono amteni mokan. 3:11 Ho muhin, nak atoni humaf nane atoni abulalut ma ale in sanat nane nalilon nak in nasanab. 3:12 Leka au lelu Nai Artemas ai Nai Tikhikus net neu ko, ho aum laba neu kau anbi Nikopolis, fun au sali he umaika anbi bale nane bi neno oefat manikin. 3:13 Amtuntaku lek-leko Nai Zenas, ahine plenat knino nane ma Nai Apolos, he nati' kais sin nuk sa' anbi lanan. 3:14 Hit atoni sin amsa, maut he nanoni hen mepu alekot he nano'u sin monin neno-neno. Kais sin monin nane kan tamaf ota. 3:15 Ale bae le sin nok kau anbi i sin sonu tabe neu ko. Mutiaba au tabe neu hit bae benu le sin nafnek neu Neno Anan. So Usif tunan anfe tetus neu ki alki. Na'ko, Nai Paulus
1:1 Bae Filemon le anmepu nek bua nok kai! Au Nai Paulus, atoni pa'an o'of natuin Yesus Neno Anan ma hit bae Nai Timotius, amtui sulat i neu ko 1:2 ma neu tolas knino le nabua anbi ho ume; me neu hit feto bi Apfia amsa, ma hit bae le anmepu matani nok kit, Nai Arkhipus. 1:3 Hai mifnekan so Uisneno hit Ama ma Usif Yesus Neno Anan anfe tetus ma halan nekaf neu ko. 1:4 Hae-hae au onen toti, au tek ho kanam ma au toti alekot neu Uisneno. 1:5 Fun au nen ulali nak hom nek ale to Uisneno, ma hom palsai neu Usif Yesus. 1:6 Au onen toti, he nati' hit lasi nek bua on atoni apalsait napoitan lasi hine le naek a'nesi neu ale tetus le hit mu'i natuin hit tamesbok tok Neno Anan. 1:7 Au bae Nai Filemon! Ho lasi manekat nane anhalin kau ma anhatani kau! Ale to Uisneno anmalinan natuin ho. 1:8 Es nane te, on bae benu le palsait mese, au ube'i uplenat ko he mo'e sa' le mes ho mo'e mani. 1:9 Mes natuin au nek ko, al au toti ko. Au le i atoni mnasi mese ma leku i fe natam kau anbi o'of natuin Neno Anan Yesus. 1:10 Au, Nai Paulus, utiaba totis mese neu ko antom Nai Onesimus, au anah antuin Neno Anan. 1:11 -- Afi unun in kan tamaf ota neu ko, mes muni i in tam ota neu ko ma neu kau amsa. 1:12 Au sonu in anfani neti neu ko leku i -- in, le au nek ma umnau ani. 1:13 Au he utau in anbi i hen seka ko ma an tuthae kau leka au fe bi o'of natuin Beno Alekot na'ko Uisneno. 1:14 Mes au ka lomif he mo'e sa' leka ho fe kam lomif, he nati' le alekot nane kais ho mo'e mani onle nok a'seke, mes so nok nek lomif. 1:15 Oni natuin lasi nane in mabaitson nok ko neno tuk es, he nati' ho mupeni mufani in talan te nabal-bal. 1:16 Muni i in ka on fa ate anteni, mes in nesi na'ko ate. In on bae manekat natuin Neno Anan. In antam ota neu kau nes-nesi neu ko; in tam ota on ate ma on hit bae natuin Usif. 1:17 Kalu hom kiso kau on bae knino anbi palsait, amsimo mufani Nai Onesimus onle hom simo kau. 1:18 Ma kalu in nalukib ko ai natus sa'neu ko, maut he au sutai. 1:19 Leko nesi au tui ani sin anbi i. Au, Nai Paulus, of au baen ufek ale tusa sin -- namneo ka nabe'i au umnaub ko ak ho es mutus neu kau, esle' ho aom -- 1:20 Es nane, bae, so hom tuntaku kau natuin Usif: Ma amhalin au nekak on bae manekat natuin Neno Anan! 1:21 Au tui ko sulat i nok afnekan, he nati' ho mo'e mutuin ale sa' le au toti neu ko. Au uhin, of ho mo'e nesin na'ko le au toti. 1:22 Onane amsa hi miloitan bale neu kau, fun au ufnekan he nati' Uisneno annen hi onen totis, oke te neki kau anfani neu ki. 1:23 Nai Epafras, le nok kau anbi o'of natuin Neno Anan Yesus, ansonu uab alekot neu ko. 1:24 Ma amsimo amsa uab alekot na'ko au bae sin: Nai Markus, Nai Aristarkhus, Nai Demas ma Nai Lukas. 1:25 So Usif Yesus Neno Anan anfe tetus neu ki. Na'ko, Nai Paulus
1:1 Bi batan ahunut hae-hae Uisneno nakua a'an neu hit am uf sin natuin mafefa knino sin nok lanan huma-huma. 1:2 Mes anbi batan amsoput i Uisneno nakua a'an neu kit natuin In Anmone. Uisneno anmo'e neno tunan ma pah pinan natuin In. Uisneno anlek nani he nati' In sium ale sa'-sa'. 1:3 In es ansinek Uisneno In apinat aklahat ma In huma ma In masan on Uisneno. In amsa es anpanat ale sa' neki In a'an ma In kuasat. Leka In naknino nalali atoni pah pinan sin sanat, oke te In antunon anbi Uisneno Amnanut aon bian ne'u anbi bale latan. 1:4 Ma In namnanu nesin ahake neno tunan sin. Ma In napeni kanaf le namas a'nesin ahake neno tunan sin kanan. 1:5 Fun Uisneno fe ka nakua nitaf a'an neu ahake neno tunan mese nak on i, "Au Anmone Ko! Au uhonis Ko anbi neno i." *Uisneno fe ka nakua nitaf a'an on i neu ahake neno tunan le me amsa nak, "Of Au fain Amaf neu In, ma In anfani Au anmone." 1:6 Ma leka In ausonu In Anmone naek antam neu pah pinan In nakua a'an nak, "Ale ahake Uisneno mes naluli ma nabes neu Anmone nane ." 1:7 Ma antom ahake neno tunan sin Uisneno nakua a'an nak, "Uisneno anmo'e In ahake neno tunan sin anfain on nautus ma In atuthaes sin anfain on ai pinan." 1:8 Mes neu Anmone nane Uisneno nakua a'an nak, "Ho toko plenat, koi Uisneno, of nabala talan te nabal-bal, ma Ho plenat in tias lo tias amneot kun. 1:9 Hom loim lasi amneot ma Ho kam lomif lasi ape nut: Es nane te Uisneno. Ho Uisneno antek alekot neu Ko, ma anpoin Ko neik mina, anfani taka lasi malinat le nesin Ho bae sin." 1:10 Ma Uisneno nakua a'an, "Na'ko un-unu, koi Usif, Ho es mubela pah pinan in sukin, ma Ho mo'e neno tunan meik Ho nimam. 1:11 Ale sa' nane of namle'u, mes Ho mubala, ma ale sa' nane of anfani mna' onle tainusat; 1:12 of Hom nunu sin onle sobalu mnanu, ma Hom seka meki bian. Mes Ho mubala, ma Ho monim ka namsopu nitaf." 1:13 Uisneno ka nakua nitaf In a'an neu ahake neno tunan mese na'ko sin nak, "Hom tunom nai ambi Au aok bian ne'u, talan te Au ubela Ho musu sin anbi Ho haem nupun." 1:14 Kalu onane, ale ahake neno tunan nane sin sa'an ka? Ahake neno tunan sin onle smanaf-smanaf le antuthae Uisneno, ma Uisneno ansonu sin hen tuthae ale atoni le he napeni honis.
2:1 Natuin lasi nane hit mes atpanat leko-leko sa' le hit nen he nati' kais anfu neki kit. 2:2 Fun kalu a'at le na'uab nani natuin ahake neno tunan nanaobon nabala, ale atoni atanhais ma ale atoni le kan mo'e natuin nani of napeni seunbanit namnes nok in mo'et. 2:3 Leka me hit he taikotiok ta'ko kasat nane, kalu hit kat sian fa lasi honis a'naek nane. Fun afi hit Uisneno es anetun nani ma ale atoni le sin nen nani sin nalile sin amneot neu kit. 2:4 Ma Uisneno anhatani sin saksit nane neki lasi taka ma lasi amkakat ma kuasat huma-huma natuin mepu Smanan Knino, le Uisneno anbait nani neu sin natuin In lomin kun. 2:5 Fun Uisneno ka nana'at fa pah pinan fe'u le hit tamolok i neu ahake neno tunan sin. 2:6 Anmu'i atoni le ansaksi nani anbi Sulat Knino nak, "Mansian nane sa'an ka, talan te Ho mumnau mani, ai mansian in anah nane sa'an ka, talan te Hom kius mani? 2:7 Mes Ho mo'e mani neu in leku tuk es he nabaunon akle'o na'ko ale ahake neno tunan sin, ma Hom fe mulali neu in sobe apinat ma makana, 2:8 ma Ho mubaun ale sa' anbi In haen nupun." Fun anbi lasi nabaun ale sa' neu In, katit fa sa' esle' In naikoti; le ka nabaunon fa neu In. Mes tomas i hit fe katit fa, nak ale sa' nabaunon neu In. 2:9 Mes In, le nabaun nani leku tuk es na'ko ahake neno tunan sin, esle' Yesus; le hit tit, natuin In sutai lasi maten. Mes anfe neu In sobe apinat ma makana, he nati' natuin Uisneno In halinat knino, Yesus ansutai lasi maten neu ale mansian. 2:10 Fun natai nok Uisneno In lomin -- In mo'e ale sa' neu In ma natuin In --, Uisneno naknino Yesus natuin mane'at. Onane te Yesus neki atoni namfau neu apinat ma antopu sin neu honis. 2:11 Yesus naknino sin ma sin le In naknino nani, sin alsin Amaf mese. Es nane In kan mae fa hen tek sin nak bae. 2:12 Yesus nak neu Uisneno, "Of Au etun Ho kanam neu Au bae sin, ma uliatas Ho kanam anbi tolas knino sin atnanan." 2:13 Ma In nau'ab anteni nak, "Au of ufneka neu Uisneno." Ma In nau'ab anteni nak, "Kiso, Au es Kau i, ok anah-anah le Uisneno anfe Kau sin." 2:14 Fun anah-anah nane, sin on mansian le of anmate, mes Yesus namnes nok sin ma napeni pa' ma nama anbi sin. In mo'e onane he nati' natuin Ini maten, In naneku Nitu le anmui kuasat neu lasi maten. 2:15 Ma nok lanan nane te In nafetin sin na'ko lasi ate le naplenat sin monin talan te anmaten natuin sin namtausan lasi maten nane. 2:16 Fun namneo, In ka namnau fa ahake neno tunan sin mes In namnau Nai Abraham In sufan sin. 2:17 Es nane te, In namnes nok In bae sin anbi ale lasi. Ma In anfain Ana' Lasi Fuat Anaet le anmui lasi manekat ma na'ki neu Uisneno hen sako to pah pinan sin sanat. 2:18 Onane te In hen bab ale atoni le napeni lasi su'at, fun afi In sutai hamu'it natuin lasi su'at amsa.
3:1 Es nane te, bae knino alki, le hi mipeni pa' ma nama anbi han ahaman neno tunan. So him kius neu Haef Knino ma Ana' Lasi Fuat Anaet le hit tateb tani esle' Usif Yesus. 3:2 Usif Yesus na'ki nabala neu Uisneno le anlek In neu mepu nane, onle Nai Musa amsa afi na'ki anbi in mepu neu Uisneno In ume. 3:3 Es nane te Yesus napeni kan apinat nesin Nai Musa. Fun atoni le nahakeb ume nane mes napeni kan tola nesin ume le in nahakeb nani. 3:4 Fun ameup ume es nahakeb ale ume, mes ameput anbi ale sa' lo Uisneno kun. 3:5 Nai Musa on atuthaes aki'at anbi Uisneno In ume, hen saksi lasi le Uisneno of nalile nani anbi neon amnemat. 3:6 Mes Neno Anan na'ki piut on Anmone le anfani nakaf neu Uisneno In ume. Ma Uisneno In ume nane esle' hit, leka hit panat lek-leko nek ateb knino ma lasi afnekat le hit tafnekan tal namsop. 3:7 Es nane te onle Smanan Knino nak, "Bi neno i, kalu him nen Uisneno In hanan, 3:8 kais hi mimanub hi nekam, onle hi am ufenu bi neno ansu' sin anbi mnela paha snaen, 3:9 hi am ufenu ansu' Kau anbin he nataka Kau, maski sin nit nalali Au mepu, ton bo' ha ini lon. 3:10 Natuin lasi nane Au uto'an batan nane, ma Au ak; Sin nekan anbeo piut, ma sin ka natuin fa Au lanan.' 3:11 Es nane te Au uto' ma Au sukat sin ak: Of sin kan taman fa neu Au bale snasat." 3:12 So him panat nai bae, he nati' kais napeni atoni mese anbi ki le nekan nateb lasi amle'ut, ma nekan ka nateb knino, oke te in na'lo na'ko Uisneno honis. 3:13 Mes so neno-neno hi mafainek es nok es, leka hit fe atmoni atbi batan le antek nak, "neno i," he nati' kais anmu'i anbi ki atoni le namanub nekan natuin sanat in fulit. 3:14 Fun hit tapeni talali pa' ma nama anbi Neno Anan, lamu hit na' tamepan hit nek ateb knino le hit tapen talali na'ko afi. 3:15 Fun antui nalali anbi Sulat Knino nak, "Bi neno i, leka him nen Uisneno In hanan, kais hi mimanub hi nekam, onle hi am ufenu." 3:16 Atoni sekau ka, le sin nato'ab Uisneno, maski sin nen nalail In hanan ka? Ai ka sin alsin fa, le Nai Musa antopu napoitan sin na'ko pah Mesir ka? 3:17 Ma sekau ka le Uisneno nato'an sin ton bo'ha ka? Ai ka sin fa ka le anmo'en sanat oke te anmaten anbi mnela paha snaen ka? 3:18 Ma In sukat sekau ka ma nak, of sin kan taman fa neu Au bale snasat. Ai ka sin fa ka le ka natuin fa Uisneno In lomin? 3:19 Onane te hit tit, nak sin ka nabe'i fa hen taman, natuin sin nekan ka nateb knino fa neu Uisneno.
4:1 Es nane te, leko hit panat, he nati' kais anmu'i atoni mese anbi ki le ka nok antam, maski in fefbe'la neu he tam teu In bale snasat nane fe nanaobon. 4:2 Fun beno knino nane aneut nalali neu kit, on aneut nalali sin amsa. Mes etus beno knino nane ka ma'ota fa neu sin. Fun leka sin nen nalali beno knino nane sin nekan ka nateb knino fa. 4:3 Mes hit le nekak nateb nani of hit tam teu bale snasat onle Uisneno nakua a'an nak, "Au uto' ma Au ait supat ak: 'Of sin kan taman fa neu Au bale snasat.' " *Uisneno nakua a'an onane, maski In mepu namsop na'ko afi In anmo'e pah pinan. 4:4 Fun antui nani anbi Sulat Knino antom neno hitu nak on i, "Ma anbi neno hitu, Uisneno nasnas na'ko ale In mepu." 4:5 Ma hit soi anbi Sulat Knino i nak, "Sin of kan taman fa neu Au bale snasat." 4:6 Es nane hit tahin talali, nak of anmu'i atoni namfau le of antam neu bale snasat nane. Mes sin le ansium nahunun beno amlilat nane, of sin kan taman fa natuin sin kan palsin fa. 4:7 Onane te Uisneno anlek anteni neno bian, le nak, "neno i," leka In nakua a'an lo le'uf natuin Nai Daud in hanan le hit soi talali nak, "Kalu neno i him nen In hanan, kais hi mimanub hi nekam!" 4:8 Fun kalu afi Nai Yosua nok sin antam nalali neu bale snasat, Uisneno of ka nakua a'an anteni antom neno bian nane. 4:9 Es nane te fe naloitan neno snasat mese neu to Uisneno, esle' neno hitu. 4:10 Fun atoni le antam nalali neu In bale snasat, in nasnas na'ko in mepu, onle Uisneno nasnas na'ko ale In mepu. 4:11 Onane te so leko hit tam teu bale snasat nane, he nati' kais anmu'i atoni mese le natsel natuin nekan ka nateb knino fa neu Uisneno. 4:12 Uisneno In a'an nane anmoni ma anmatani; na'aikan nesin suni le na'aik koti mat. A'an nane napau antam talan te anbati aof ma smanaf ma antam ante nuif ma lonef. A'an nane nabe'i hen beti ale fekat ma tenab anbi hit nekak. 4:13 Ma katit fa amonit sa' le he natolo anbi Uisneno In human. Fun ale sa' natfei ma mamnita anbi In matan, le hit mes tatae neu In kun. 4:14 Fun muni i hit mu'i Ana' Lasi Fuat Nakaf Anaet le anfini ale neno tunan, lo Yesus, Uisneno Anmone. So leko hit na' tamepan hit nek ateb knino. 4:15 Hit Ana' Lasi Fuat Nakaf Anaet nane ka on fa ana' lasi fuat nakaf le ka naben nahin fa hit lasi lima'et. In amsa napeni su'at anbi ale lasi onle hit, al In kan mo'ef sanat. 4:16 Es nane aim nai, nok nek besi hit haumak toko halinat knino. Uisneno of namnau kit ma anfe kit tetus, oke te anbab kit bi leku hatas.
5:1 Fun ale ana' lasi fuat anaet, anbeti na'ko mansian. Oke te anlek neu mansian hen hake anbi Uisneno In human he nati' In neki fua tulu ma fua tnatas natuin to pah pinan sin sanat. 5:2 In mes nahin ale atoin amoe amle'ut ma neu atoin aseket sin fun in amsa atoin alima'et. 5:3 In neik fua tnatas, ka al fa neu to, mes neu in aon amsa. 5:4 Ma kan mu'if atoni le nait in aon hen fain ana' lasi fuat anaet. So Uisneno anbeti neu mepu nane, onle anmo'e nani neu Nai Harun. 5:5 Onane amsa Neno Anan ka nanaeba fa In aon natuin In fain Ana' Lasi Fuat Anaet. Uisneno es nanaeb In. Uisneno es nakua a'an neu In ma nak, "Au Anmone es Ho, Au uhonis ulail Ko anbi neno i." 5:6 Uisneno nakua a'an anbi Sulat bian nak, "Ho of amfain Ana' Lasi Fuat Anaet talan te nabal-bal, natuin Nai Melkisedek in lekat." 5:7 Bi neno Yesus fe anmoni on mansian, In natulu onen totis ma antoti nok kulut ma han sakoit neu Uisneno, le anmu'i kuasat he namonib In na'ko amates. Ma natuin In namtaus Uisneno, oke te Uisneno nen In onen totis nane. 5:8 Ma maski Yesus on Uisneno Anmone, In nanoni he natuin anbi ale lasi le In ansutai nani. 5:9 Ma leka In natis nani ale sa', In anfain on lasi honis nabal-bal in un neu ale atoni le natuin In. 5:10 Ma Uisneno anboin In hen fain Ana' Lasi Fuat Anaet natuin Nai Melkisedek in lekat. 5:11 Neu lasi nane, fe anmu'i uab namfau le hai he mimolok neu ki. Mes lasi nane mafena, natuin hi nekam manu neu he mitnin mani. 5:12 Kalu hit tatenab neu leku manuan, nabe'i him fain anoni, mes hi mes minoni lasi namfau antom Uisneno In lasi noina. Fun hi fe ka mibe'i fa hem simo mnahat amanut so hi miun susu fe. 5:13 Atoni le fe ansusu, in ka nahin fa noina antom lasi amneot, fun in fe li'ana kun. 5:14 Mes mnahat amanut nane neu atoni naek, le nekan natenab nahin hen beti lasi alekot na'ko lasi amle'ut.
6:1 Onane te so leko hit tafetin lasi noina ahunut antom Neno Anan ma hit nao mat atbi lasi noina matani. Kais hit tanoni a'teni lasi he nateunok na'ko sin mo'et huma-huma ma lasi hen palsai neu Uisneno. 6:2 Lasi noina neu su' oe, na'aiti niman hen tek alekot neu atoni, nafena amates ma kasat abal-balat. 6:3 Ma of hit mo'e lasi nane kalu Uisneno anlomi. 6:4 Fun atoni le afi Uisneno antana nalali sin, le antamis nalali sankolan neno tunan ma le napeni pa' ma nama anbi Smanan Knino. 6:5 Ma atoni le antamis nalail Uisneno In a'an alekot ma sankolan pah pinan neon amnemat, 6:6 mes oket sin kan palsain tenin fa ma ankoit Uisneno leka me he nafe'un anteni sin onane he nati' sin nateu nok na'ko sin sanat. Fun sin naponi anteni Uisneno Anmone neu sin aon ma sin na'akan In anbi mat-mat. 6:7 Nain ai najan le anmuis oe ulan le ansaun neune, oke te namonib luel alekot neu sin le anmeup nain nane, ansium Uisneno In athoes. 6:8 Mes kalu nain nane namonib kisan ai hu musu, nain nane ka nalekof, Uisneno of ankas nani oke te nale'un nani neki ai. 6:9 Mes bae benu manekat, maski hai mi'uab onane neu ki, hai mihin, nak hi mu'i lasi le naleko nesi ma matua honis. 6:10 Fun Uisneno nane ka Uisneno le ka amneot fa, le In nikan hi mepu ma hi lasi manekat, le hi milile neu In kanan natuin him tuthae to knino le hi mo'e mani tal neno i. 6:11 Haim lomi he nati' hi mes-mese amhataniom tal namsop, oke te hi mipeni sa' le hi mifnekan. 6:12 Hai kam lomif he nati' him fain atoni apehet. Mes so hi moni onle atoni le nekan nateb knino ma anseusab tal napeni lasi le Uisneno anba'an nani. 6:13 Leka Uisneno anfe In fefbela neu Nai Abraham, In naiti supat neki In aon, fun kan mu'if atoni le namnanu nesin In. 6:14 Uisneno naiti supat ma nak, "Tebes namneo, of Au fe Ko tetus nok athoes, ma of Au mo'e Ho sufan namfaun." 6:15 Nai Abraham anpao nok nek aseusabat ma onane te in napeni sa' le Uisneno anba'an nalali neu in. 6:16 Fun mansian, ansup neki atoni le namnanu nesin, ma supat nane anfain sukit neu in he nafek ale lasi matoes. 6:17 Uisneno he nalile neu ale atoni le hen simo In fefbela nane, nak of In ka nabaina fa In fekat nane. Es nane Uisneno anhatani nani neki supat. 6:18 Lasi nono nua nane of ka nabaina fa; neki fefbela ma supat, Uisneno ka napoibon fa. Onane te hit le tamaoftok atbi Uisneno, anhatani kit he nati' hit tapeni lasi afnekat le naloitan nani neu kit anbi neon amnemat. 6:19 Lasi afnekat nane on lolu matani ma tetus neu hit smanak, le ansenon antam neu ke'an knino anbi Uisneno In sonaf bi neno tunan. 6:20 Usif Yesus anfain ahel lanan neu kit ma In tam nalali neu bale nane on Ana' Lasi Fuat Anaet tal nabal-bal natuin Nai Melkisedek in lekat.
7:1 Nai Melkisedek i, kesel na'ko Salem ma Uisneno Anesit Afinit In ana' lasi fuat. In es anao ma anseun Nai Abraham, leka Nai Abraham anfain nem na'ko anbe'u kesel-kesel ma anfe tetus neno neu in. 7:2 Nai Abraham anfe neune batis bo'es na'ko sa' le in napeni anbi manekat. Nai Melkisedek in kanan in oten ahunut "Usif Lasi amneot," ma natuin in na'ko Salem, in kanan amsa "Usif Halan Nekaf." 7:3 In kan mu'if amaf, kan mu'if ainaf, ma kan mu'if uf; in kan mu'if neon mahonit ma kan mu'if neno maten. Ma natuin nanesa nani nok Uisneno Anmone, in fain ana' lasi fuat talan te nabal-bal. 7:4 Kiso mit Nai Melkisedek in atoni naek kun, tal Nai Abraham anfe neune batis bo'es na'ko sa' le in napeni anbi makenat. 7:5 Ma Nai Lewi in sufan sin le ansimo mepu ana' lasi fuat, sin napeni lekat he nati' sin ansimo batis bo'es na'ko to Israel, le sin bia ma sin benu, maski sin amsa Nai Abraham in sufan sin. 7:6 Mes Nai Melkisedek, le sin ka sufan fa, in ansium batis bo'es na'ko Nai Abraham, ma in anfe tetus neno neune, maski Nai Abraham ansium fefbela na'ko Uisneno. 7:7 Namneo hit ka tatotan fa lasi, nak atoni abaut ansium tetus neno na'ko atoin anaet. 7:8 Ma anbi pah pinan, mansian amnekut es ansimo batis bo'es mes anbi neno tunan In, le ansaksi nani, nak in amonit kun. 7:9 Es nane hit tak, ansimo batis bo'es na'ko Nai Lewi natuin Nai Abraham, le in nabe'i hen simo batis bo'es. 7:10 Fun afi fe ka nahonis fa Nai Lewi na'ko in am uf, bi neno Nai Melkisedek na'eku ma natef nok in am uf Nai Abraham. 7:11 Natuin lasi nane, kalu ana' lasi fuat na'ko Nai Lewi namtis ma namnou -- fun natuin ana' lasi fuat to Israel ansimo Plenat Knino --. Nansa ka es anlek anteni atoni bian hen fain ana' lasi fuat anaet natuin Nai Melkisedek in lekat ma ka natuin fa Nai Harun in lekat ka? 7:12 Fun kalu ana' lasi fuat nabainon, Plenat Knino amsa of nabainon. 7:13 Fun le antek nani anbi i antom hit Usif, le antam neu uf bian. Kan mu'if atoni mese na'ko uf i le antuthae anbi baki fuat. 7:14 Fun ale atoni nahin, nak hit Usif na'ko uf Nai Yehuda ma Nai Musa ka na'uab fa sa' antom uf nane neu mepu ana' lasi fuat. 7:15 Ma lasi nane nalilon nesin teni, leka anlek ana' lasi fuat bian anteni natuin Nai Melkisedek in lekat. 7:16 Fun le anfain ana' lasi fuat nane ka natuin fa lekat mansian mes natuin lasi honis le ka namle'u nitaf. 7:17 Fun antui nani anbi Sulat Knino antom In nak, "Hom fain Ana' lasi fuat talan te nabal-bal, natuin Ana' Lasi Fuat Nai Melkisedek in lekat." 7:18 Namneo, plenat ahunut nane naikoti nani, kalu kan mu'if in matanin ma ka ma'ota fa. 7:19 -- Fun Plenat Knino unu nane ka namtis ma ka namnou -- mes muni i anlek anteni lasi afnekat le naleko nesi ma anhaumakab kit neu Uisneno. 7:20 Ma lasi i anmo'e nani nok supat na'ko Uisneno -- afi anlek sin hen fain ana' lasi fuat ka nok fa supat. 7:21 Mes Yesus napeni kanaf Ana lasi fuat nok supat, fun Uisneno nakua a'an neu In nak, "Usif tunan nait nalali supat ma In ka natofon fa, Hom fain ana' lasi fuat talan te nabal-bal." 7:22 Onane amsa Usif Yesus anfain lasi mantaen neu fefbela le naleko nesi. 7:23 Ma sin namfaun es anfani ana' lasi fuat, mes natuin lasi maten ane'ka sin, talan te sin ka nabala fa piut anbi mepu ana' lasi fuat. 7:24 Mes natuin Yesus anmoni nabala, In mepu ana' lasi fuat nane ka na'oni fa neu atoni bian. 7:25 Es nane In nabe'i namonib ale atoni nok alekot le sin neman neu Uisneno natuin In. Fun In moni nabal-bal ma anfain atoni tnana neu sin. 7:26 Fun hit lomi Ana' Lasi Fuat Anaet onane. In atoni knino, In kan mu'if sanat, In kan mu'if lahi, anbeti naikan na'ko atoni asanat sin. Oke te nasaeb nani neu bale latan le namnanu nesin ale neno tunan kuni peni. 7:27 In ka on fa ana' lasi fuat anaet bian, le neno-neno neki fua tnatas nahun neu in sanat, oke te neu to in sanat. Mes Yesus anmo'e nani hae mese tal nabal-bal, leka In nana'at In aon on fua tnatas. 7:28 Plenat Knino unu anlek atoni alima'et hen fain Ana' Lasi Fuat Anaet. Mes namuni na'ko plenat knino unu nane, Uisneno naiti supat, hen lek In Anmone anfain Ana' Lasi Fuat Anaet le namtis kun anbi ale sa' tal nabal-bal.
8:1 Ale lasi le hit tamolok nane in nesan nak on i: Hit mu'i Ana' Lasi Fuat Anaet le antok anbi Uisneno Anaet anesit Ini toko aon bian ne'u. 8:2 In antuthae mepu luli besa anbi bale knino, anbi um-ume amneot, le Usif tunan es nahakeb nani ma ka mansian fa. 8:3 Ale Ana' Lasi Fuat anaet anlek nani he nati' neki fua tulu ma fua tnatas. Ma onane amsa Yesus mes anmu'i sa' he nati' In neki nani on fua tulu ai fua tnatas. 8:4 Kalu In bi pah pinan i, of In kan hake fa on Ana' Lasi Fuat, fun anmu'i ana' lasi fuat anbi pah pinan le neki fua tulu natuin Plenat Knino unu. 8:5 Sin mepu tuthaes nane anfain lasi leta neu sa' le anbi neno tunan. Lasi nane anetun nalali neu Nai Musa, bi neno in nahakeb um-ume. Uisneno nakua a'an neu Nai Musa nak, "Mumnau lek-leko" nak "ho mo'e ale sa' nane onle afi nalile nalali neu ko anbi nu'af tunan." 8:6 Mes muni i, Yesus napeni tuthaes naleko nesi, fun In fain Atoni Tnana na'ko fefbela le namas a'nesi, natuin lasi ba'an le namnanu nesi. 8:7 Kalu fefbela ahunut nane kan labu fa sa', of ka nami anteni fa bale neu fefbela amunit. 8:8 Mes Uisneno nakain sin ma In nakua a'an nak, "Mimnau, of anbi neno amnemat, Uisneno nakua a'an on i, of Au mo'e fefbela fe'u ok to Israel, ma to Yehuda. 8:9 Ka on fa fefbela le Au mo'e ulali ok sin am ufenu, bi neno Au na' sin nimkenu ma he topu upoitan sin na'ko pah Mesir. Mes sin kan panat fa Au fefbela nane, onane te Au tite sin. 8:10 Mes muni i, Au he mo'e fefbela ok to Israel bi neno-neno amnemat, Uisneno nakua a'an on i, Au he ubela Au plenat anbi sin lolen ma Au he tui ani anbi sin nekan. Of Au fain Uisneno neu sin, ma sin fain to neu Kau. 8:11 Ma sin of ka nanoni anteni fa sin ini sin ai anetun anteni neu sin bae sin nak: 'Mihin Usif tunan nai!' Fun sin alsin anaet ma abaut, of nahin Kau. 8:12 Of Au ubela lasi manekat neu sin sanat, ma Au ka umnau tenif ale sin sanat." 8:13 Fun In na'uab antom fefbela fe'u, onane te In anetun, nak plenat ahunut nane namsab ma anhaumak he namneku ma namsab.
9:1 Fefbela ahunut nane anmu'i lekat neu luli besa ma neu bale knino le anmo'e neki niman mansian. 9:2 Ma nahakeb um-ume mese anbi matan, le antek nak, bale knino. Anbi bale nane anmu'i tet paku ma mei nok utunu' atnatas le he natulu neu Uisneno. 9:3 Anbi beti eka amunit anmu'i um-ume mese anteni le antek nak, Ke'an Knino Le'uf. 9:4 Anbi ke'an nane anmu'i baki fuat le anmo'e na'ko mnatu neu he notu atu fomeni. Ma peti fefbela le anmo'e na'ko mnatu. Ma anbi peti fefbela nane anmu'i botil mnatu nok manna, mak muti Nai Harun in tias le nasnuk ma faut bena nua le antui Uisneno Ini plenat bo'es. 9:5 Anbi peti nane in fafon, ahake neno tunan sin nua le human anpin ma nahafo peti in toben, bale sako sanat. Mes ale lasi i hai ka mibe'i fa he miknutu mani tomas i. 9:6 Fun nahakeb bale knino nane onane. Neno-neno Ana' lasi fuat sin antam neu um-ume le anhake anbi matan he nanaoba sin mepu luli besa. 9:7 Mes neu um-ume amunit nane al Ana' Lasi Fuat Anaet es antam neune ton mese hae mese. In nanaoba mepu nane neki na', le in anfua neu Uisneno natuin in aon ma natuin lasi tanhais, le to anmo'e nani natuin sin ka nahinen fa. 9:8 Nok lekat i, Smanan Knino nalile nani, nak lanan neu bale knino nane fe ka masoitan fa, leka um-ume ahunut nane fe anhake. 9:9 Nane on lasi leta neu batan i. Namnes nok lasi nane, ale fua tulu ma fua tnatas le sin natulu neu Uisneno, ka nabe'i fa he natisi ma nano'u amneik fua tulu nane sin nekan. 9:10 Fun ale lasi nane al anmatom nok mnahat ma mninut ma fua tulu huma-huma he naknino'ok. Sin anmo'e ale lasi nane neu monit aof, talan te leku ai tabu nafeunon. 9:11 Mes Neno Anan nanoebon nem on Ana' Lasi Fuat Anaet neu ale lasi alekot neon amnemat. In anfin um-ume le naek a'nesin ma naleko nesin, le ka nahakeb fa neki niman mansian -- nane nak In ka na'ko fa pah pinan i --. 9:12 Ma in antam neu bale knino nane hae mese talan te nabal-bal. In ka nekif bibi keso ai bia tipu in na', mes In neki In na' kun. Ma nok lasi nane te In nafetin kit tal nabal-bal. 9:13 Kalu bibi keso ma bia keso in na' ma bia tipu mnotu in afu le anlisin he naknino sin lahi na'ko sin aon. 9:14 Nes-nesi Neno Anan In na', le natuin Smanan Knino abal-balat, Neno Anan anfua In aon neu Uisneno on fuat amneot; he naknino hit nekak na'ko ale mo'et huma-huma he nati' hit tuthae Uisneno honis. 9:15 Natuin lasi nane Yesus anfain Atoni Tnana na'ko fefbela fe'u, he nati' sin le anboin nalali sin napeni lasi honis le anba'an nalali sin. Fun In anmate hen soi sin tanhais le sin anmo'e nalali anbi fefbela ahunut nane. 9:16 Kalu anmu'i fefbela anbi me, mes nalile amsa anbi nane, nak atoni amoe fefbela nane anmate. 9:17 Fun fefbela nane fe ka nanaobon fa leka amo'et nane fe anmoni. 9:18 Es nane fefbela ahunut nahakeb nani neki na'. 9:19 Leka Nai Musa anetun nalali Plenat Knino unu neu to ok-oke, in nait bia tipu in na' ma bibi keso in na' ma ansole nok oe. Oke te in nait bibi in funun amtasa ma kmeo ma anlisin neu sulat nane ma anlisin neu to nok. 9:20 Oke te na'uab nak, "I na' fefbela le Uisneno anlek nani neu ki." 9:21 Nalali te Nai Musa anlisin na' neu um-ume ma ale bale knino neu luli besa. 9:22 Ma ala kle'o naknino ale bale ok-oke neki na', fun kan mu'if sako sanat, kalu kan opan fa na'. 9:23 Es nane ale sa' le naleta sa' le anbi neno tunan mes naknino nani onane. Mes ale bale le anbi neno tunan mes naknino nani neki fuat le naleko nesi. 9:24 Fun Neno Anan kan tamaf neu bale knino le anmo'e neki nimaf mansian le al naleta bale knino amneot. Mes In tam neu neno tunan hen hake anbi Uisneno In human matuin hit lasi. 9:25 Ma In kan tamaf neu bale knino nane teni-teni ne natulu In aon, onle Ana' Lasi Fuat Anaet ton-ton in tam neu bale knino neki mu'it in na'. 9:26 Fun kalu onane In mes ansutai hamu'it teni-teni na'ko neno fe nahakeb pah pinan i. Mes muni i In nalile In aon hae mese neu batan amsoput, hen sako hit sanat neki In aon. 9:27 Onle Uisneno anlek nalali he nati' mansian anmaet hae mese oke te Uisneno anlef sin lasi. 9:28 Onane amsa Neno Anan nana'at In aon hae mese hen sutai atoni amfaut sin sanat. Namuni te of In nalile In aon hae mese anteni mes kan sutai fa sanat. So mak In anfe honis neu ale atoni le anpao In.
10:1 Plenat Knino unu al nalile lasi honis in mafon ai in olon neon amnemat, ma lasi honis amneot ka es fa nane. Es nane nok fua tulu papmese le ton-ton sin natulu nani Plenat Knino unu ka neik fa tetus neu ale atoni le ansimo fuat nane. 10:2 Fun kalu onane, of sin ka neki anteni fa fua tulu, fun sin le anmo'e luli besa ka nahinen tenif sanat; leka naknino sin sanat hae mese talan te nabal-bal. 10:3 Mes natuin ale fua tulu le sin anmo'e nani ton-ton namnauba sin neu sin sanat. 10:4 Fun bia keso ma bibi keso sin na' nane ka nabe'i fa hen sako sanat. 10:5 Es nane leka Neno Anan antam neu pah pinan In na'uab neu Uisneno nak, "Ho kam lomif fua tnatas ma fua tulu mes Ho muloitan aof neu kau. 10:6 Ho kam lomif fua tulu na'ko mu'it le mamnotu on fua tnatas ai fua tulu neu hen sako sanat. 10:7 Oke te Au u'uab ak: Kiso, Au es i, antui nalali anbi Sulat Knino antom Kau. Au unaoba Ho lomim, koi Au Uisneno.' " 10:8 Neno Anan na'uab nalali nak, "Ho kam lomif fua tnatas ma fua tulu. Ma Ho kam lomif fua mnotu ma fua sako sanat le natulu nani neu Ko." -- Maski natulu nani natuin plenat knino unu 10:9 Nalali te Neno Anan na'uab anteni nak, "Kiso, Au aum he unaoba Ho lomim." Uisneno nait naneku ahunut nane, he nahakeb amunit nane. 10:10 Ma natuin Uisneno In lomin, In naknino hit sanat hae mese tal nabal-bal, natuin Yesus Neno Anan natulu In aon. 10:11 Ale ana' lasi fuat nanaoba sin tuthaes neno-neno ma natulu fua tnatas teni-teni, mes ka nabe'i fa hen sako sanat. 10:12 Mes Neno Anan le natulu fua tnatas hae mese neu sako sanat, In antunon anbi Uisneno aon bian ne'u talan te nabal-bal. 10:13 Ma tomas i al In hat ma anpao leku le'at, le Uisneno he nabela In musu sin anbi In haen nupun. 10:14 Fun natuin fua tnatas hae mese In natis ma nano'u sin le naknino sin talan nabal-bal. 10:15 Smanan Knino amsa ansaksi lasi nane neu kit 10:16 Leka In nakua a'an nak, "I fefbela le of Au mo'e ani ok sin anbi neon amnemat," In nakua anteni a'an nak: "Au ubela Au plenat anbi sin nekan ma of Au tui ani anbi sin lolen ai sin hinen." 10:17 Ma of Au ka umnau tenif sin sanat ma sin penu. 10:18 Es nane te leka anmu'i sako sanat neu ale lasi, of ka neki anteni fua tnatas neu sako sanat. 10:19 Onane te bae benu alki, natuin Usif Yesus Ini maten muni i hit tapeni manuan he tam teu bale knino. 10:20 Fun In nasoitan lanan fe'u ma honis neu kit natuin beti eka, esle' In aon kun. 10:21 Ma hit mu'i Ana' Lasi Fuat Anaet mese le anfani nakaf neu Ume Uisneno. 10:22 Natuin lasi nane, aim nai hit haumak Uisneno nok nek amneot ma nek ateb knino. Fun naknino hit nekak na'ko lasi amle'ut ma anboe hit aok neki oe meuknino. 10:23 Aim nai hit na' tamepan hit nek ateb knino neu hit lasi afnekat, fun In le anba'an lasi nane aki'at kun. 10:24 So leko aim nai hit mapanat es nok es he nati' hit matuntakun atbi lasi manekat ma atbi meup alekot. 10:25 Kais hit talob hit aok na'ko tolas knino onle atoni bian anmo'e. So leko hit mafainekan es nok es ma tanaoba luli besa makoet, fun hit Usif In neno hatas anhaumaken. 10:26 Fun leka natiaba nalali beno na'ko Uisneno neu kit, mes hit asafanu het mo'e sanat, kan mu'in tenif fua tnatas hen sako sanat nane. 10:27 Mes al anmu'i lasi maten matani neu lef lasi ma ai maputu malala le he notu ale atoni abulalut sin. 10:28 Leka anmu'i atoni le nale'un plenat Nai Musa, in napeni fekat maten ka nok fa nek mamun, kalu anmu'i saksi atoni nua ai atoni tenu neu lasi nane. 10:29 Kasat mafen le'uf of natiaba neu atoni le nale'un Uisneno Anmone. Ma neu atoni le nanebet na' fefbela Uisneno, esle' lasi maten Neno Anan le naknino in na'ko sanat. Ma neu atoni le nakle'at ai na'akan Smanan Knino le anfe lasi halinat. 10:30 Fun hit tahin In le nakua a'an nak, "Aseunbanit nane es Au! Ma of Au es aseunbanin!" Man nakua anteni a'an nak, "Usif tunan of anlef lasi neu In to." 10:31 Mafen le'uf, kalu anmof neu Uisneno Amonit Ini niman! 10:32 So hi mimnau lek-leko neno ahunut, Afi him sium milali meusine, him sutai hamu'it naek, natuin hi malan ambi lasi mabe'ut mafena. 10:33 Bi leku naa'kan ki ma anhamu'i ki anbi mat-mat. Ma anbi leku le him sutai hamu'it mok atoni le anhamu'i sin onane. 10:34 Ma him sutai hamu'it mok ale atoni le antam o'of. Leka sin nasik hi maus, him sium lasi nane nok nek malinat, fun hi mihin, mak hi mu'i maus le naleko nesi ma nabal-bal kun. 10:35 Es nane te kais hi mifetin hi nek ateb knino, fun anmu'i baen a'naek neu lasi nane. 10:36 So him hataniom ambi lasi nane, he nati' leka hi mo'e milali Uisneno In lomin, hi mipeni lasi le anba'an nani neu ki. 10:37 Fun antui nani anbi Sulat Knino nak, "Ala kle'o, leku al tuk an esah, In le he nanoebon nem, anhaek esan, ma In ka naniaon fa. 10:38 Mes Au to amneot, of anmoni natuin nek ateb knino, ma leka sin na'lo na'ko Kau, of Au ka lomif sin." 10:39 Mes hit ka atoni le naskotun in aon ma namle'u, mes hit atoni nek ateb knino neu Uisneno ma napeni honis.
11:1 Nek ateb knino nane anfain sukit neu ale lasi le hit tafnekan; ma anfani taka neu lasi le hit katit teki hit matak. 11:2 Fun natuin nek ateb knino, Uisneno anlomi atoni batan ahinet sin. 11:3 Natuin nek ateb knino hit tahin, nak anmo'e neno tunan ma pah pinan natuin a'an Uisneno; talan te lasi mamnita anbol na'ko lasi le ka mamnita. 11:4 Natuin nek ateb knino Nai Habel natulu neu Uisneno fua tnatas le naleko nesi na'ko Nai Kain in fua tnatas. Natuin in nek ateb knino, Uisneno ansimo Nai Habel on atoni alekot, fun Uisneno anloim in fua tnatas nane. Ma natuin nek ateb knino in fe na'uab, leka in maet nalali. 11:5 Natuin nek ateb knino, Uisneno naiti Nai Henokh, he nati' kais in sutai lasi maten. Ma kan mu'if atoni le nit in, fun Uisneno es naiti in. Fun Sulat Knino ansaksi nak, leka in fe ka na'aition fa in napeni saksi, nak in malomi neu Uisneno. 11:6 Kan mu'if atoni le malomi neu Uisneno, kalu kan mu'if nek ateb knino. Fun atoni le nem neu Uisneno, in mes nateb nak Uisneno esan, ma nak Uisneno mes anbaen neu atoni le sin nami In. 11:7 Natuin nek ateb knino, Nai Nuh -- Uisneno nalile sa' le fe ka mamnita fa -- in naloitan bnao neu he namonib in ume nanan sin. Ma natuin nek ateb knino in nafek lasi neu pah pinan, ma anlek Nai Nuh on atoin alekot, natai ma namnes nok in nek ateb knino. 11:8 Natuin nek ateb knino, Nai Abraham in nen Uisneno, leka anboin in he nao neu bale le Uisneno anlek nani. Oke te Nai Abraham in nao neu bale le in ka nahinef. 11:9 Natuin nek ateb knino, in namaika anbi bale le Uisneno anba'an nani neu in on atoin anao amnemat. In namaika anbi nane anbi um-ume nok Nai Ishak ma Nai Yakub. Fun sin anfain on apal bael bela mnasi na'ko Uisneno. 11:10 Fun Nai Abraham anpao kot le anmu'i sukit, le Uisneno anlek ma nafena nani. 11:11 Natuin nek ateb knino, Nai Abraham ma bi Sara napenin matani he nasuf ma naka'un; maski in namnasi, fun in nahin nak Uisneno le anba'an nane lo aki'at kun anbi In fefbela. 11:12 Es nane, nak na'ko atoni mese, le in aon anmate, mes nahonis sufan namfaun le kat soi tabe'i fa, onle afkun anbi neno tunan ma onle snaen anbi tasi ninen. 11:13 Anbi nek ateb knino sin alsin anmate onle atoni le ka napenif fefbela na'ko Uisneno. Mes alsin nit nani na'ko lo ma sin nafnekan ma sin nateb nak sin on atoni anao amnemat anbi pah pinan i. 11:14 Fun atoni le na'uab onane, sin anetun nak sin lomi he nami bale le anfani sin pah ma sin nifu. 11:15 Anbi lasi i sin ka natenab fa pah le sin anpoi nasaitan. Fun kalu onane of sin napeni manuan hen fani neu pah nane. 11:16 Mes tomas i sin lomi bale le naleko nesi, esle' neno tunan. Natuin lasi nane, Uisneno kan mae fa, hen tek nak sin Uisneno, fun In naloitan bale mese neu sin. 11:17 Natuin nek ateb knino, Nai Abraham natulu Nai Ishak on fua tulu, leka Uisneno ansu' nani. Nai Abraham le ansimo fefbela nane anlomi he natulu in anmone mes tilo. 11:18 Maski afi Uisneno nakua a'an neu in nak, "Ho sufan ho ka'um of anpoi na'ko Nai Ishak." 11:19 Fun Nai Abraham natenab, nak Uisneno anmui kuasat he nafena Nai Ishak na'ko amates. Anbi lasi nane, on in sium nafani Nai Ishak na'ko amates. 11:20 Natuin nek ateb knino, Nai Ishak anfe tetus aomina neu Nai Yakub ma Nai Esau sin neon amnemat. 11:21 Natuin nek ateb knino, Nai Yakub leka anhaumak hen mate, in fe tetus aomina neu Nai Yusuf in anmone nua sin. Oke te in sonlaitan neu in tias ma nabes neu Uisneno. 11:22 Natuin nek ateb knino, Nai Yusuf leka anhaumak hen mate, in na'uab neu to Israel hen poi na'ko pah Mesir ma in anba'an neu in nuifenu. 11:23 Natuin nek ateb knino, leka nahonis nalali Nai Musa, in amaf ma in ainaf natolo nani funan tenu. Fun sin kius li'ana nane te human nama ma sin ka namtausan fa kesel in plenat. 11:24 Natuin nek ateb knino, leka Nai Musa nanae, in kan lomif hen tek in, nak Nai Firaun in feotnai anmone es in. 11:25 Fun in lomi nesi hen sutai hamu'it nok to Uisneno, na'ko in tamis alekot neon tuka anbi sanat. 11:26 In kius lasi hamu'it natuin Neno Anan on maus le naek nesin ale maus anbi pah Mesir, fun in nafnekan baen anbi neon amnemat. 11:27 Natuin nek ateb knino, Nai Musa nasaitan pah Mesir, ka nok fa lasi amtaus neu usif in to'as. In hatanion onle in nit Uisneno le ka mamnita. 11:28 Natuin nek ateb knino, Nai Musa anmo'e Paskah ai tolas afinit, ma anlelu hen lisin na' neu atoni Israel sin ume enon; he nati', Ahake Ale'un le he nale'un sin anmone naekenu kais antoman sin. 11:29 Natuin nek ateb knino, to Israel anlak Tasi Me onle nao natuin meto. Mes to Mesir anlem anmate anbi tasi nane, leka sin hen su' nit. 11:30 Natuin nek ateb knino, kot Yerikho in baik lape nathon, leka atoni Israel sin fun natef kot nane neno hitu. 11:31 Natuin nek ateb knino, Bi Rahab bife kake nane kan matef nok atoni abulalut sin, fun in simo atoni Israel sin atnu'us sin nok alekot. 11:32 Neu, au he tek a'teni sa' ka? Fun au leku manuan kan mu'if leka au he u'uab antom Nai Gideon, Nai Barak, Nai Simson, Nai Yefta, Nai Daud, Nai Samuel ma ale mafefa knino sin. 11:33 Natuin nek ateb knino, sin be'u ale plenat ma sin anmo'e lasi amneot ma napeni sa' le Uisneno anba'an nani. Sin an ek ale asu fui sin fefan. 11:34 Sin ansifo ai apinat ma nafetnok na'ko suni in aikan. Sin napeni matani anbi lima'et, ma sin napeni matani anbi makenat, oke te anliu na'aenab ale solalus anao amnemat sin. 11:35 Ale ainaf-ainaf ansium nafani sin atonin le anmate, fun anfen anfan. Mes atoni bian sin namautu sin aon hen hamu'i sin, fun sin kan lomi hen simo lasi fetis, mes sin lomi nafena nafani sin nok alekot. 11:36 Bian sin ansimo si'ut ma akan ma bisot ma kolen besi ma natam sin neu o'of nok. 11:37 Anpoil sin nok fatu, anheo sin neki heo ma namate sin neik suni. Sin antoebaken nok tainusat pasu bibi kase ma pasu bibi. Ma ansutai mamu'it, hamu'it ma bisot. 11:38 Pah pinan i ka ma'ota fe neu sin. Sin antoebaken anbi mnela hufui, anbi neten, anbi nuat ma anbi nonof. 11:39 Ma sin alsin ka napeni fa sa' le Uisneno anba'an neu sin; maski sin nek ateb knino nane anfe neu sin saksit alekot. 11:40 Fun Uisneno naloitan nalali lasi le naleko nesi neu kit. So al natuin hit, sin nabe'i he napeni lasi amno'ut nane.
12:1 Fun hit mui saksi namfau, onle nope anfun ma natef kit. So hit tabela ale baut ma sanat le an eka kit. Ma so hit taen matani anbi foti le anlek nani neu kit. 12:2 Aim nai het mo'e lasi nane ma ta'aiti hit matak neu Yesus, le antopu kit anbi nek ateb knino ma neki kit neu lasi alekot. In naikoti lasi akle'at ma anloi hau nehe nok nek amlilat le naloitan neu In. Oke te antunon anbi Uisneno Ini toko aon bian ne'u. 12:3 So hi mimnau In piut, le ansutai lasi matoes nae le'uf na'ko atoin asanat sin. Es nane te kais him limae ma kais hi nekam na'unu. 12:4 Anbi lasi mabe'ut, hi fe ka mabe'u fa mok sanat talan te hi na' anlomi. 12:5 Kais him nikan lasi fainekat le Uisneno nakua nani neu ki onle neu In anhenu nak, "Hoi Au anhenu, kais him nikan Usif tunan In lasi noina, ma kais hi mi'unu nekam, leka Uisneno nasesu ki. 12:6 Fun Usif tunan nanoni atoni le In nek nani, ma In nasesu atoni le In ansimo on anah." 12:7 Kalu him sutai sesut, Uisneno anmo'e ki on anah. Fun anah me, le in amaf ka nasesu nani fa ka? 12:8 Mes kalu hi kam simof sesu, onle anah le mes ansutai nani, hi ka anhoni ki fa mes hi anmanas ki. 12:9 Leka hit amhoni nasesu kit, hit tamtausan. Onane te mes hit tamtausan nesi Ama abit neno tunan, he nati' hit tapeni honis. 12:10 Hit ama ma hit aina nanoina kit leku tuk es natai nok sa' le sin nak leko. Mes Uisneno nanoina kit neu hit alekot, he nati' hit tapeni pa' ma nama anbi In le'u knino. 12:11 Namneo, bi leku le nanoina kit, hit nekak kan malinaf mes hit nekak ansusal. Mes namuni te napoitan lasi amneot le neki halan nekaf neu sin le ansimo noina nane. 12:12 Natuin lasi nane, amhatani nai hi nimam alima'et ma hi tum na'tai. 12:13 Him nao nai mituin lanan alekot, he nati' hi haem a'tai nane kais natloki mes naleko kun. 12:14 So him halan nekaf mok ale atoni ma hi moni nok aknino neu Usif tunan, fun kan mu'if atoni le he nit Usif tunan kalu in monin ka on fa nane. 12:15 So him panat he nati' kais anmu'i atoni mese amsa na'lo na'ko Uisneno In manekan. Oke te in anfain onle hau ba'at le menu' ma neki amle'ut ma nale'un atoni amfaut sin. 12:16 Kais anmu'i atoni le ansinmak huma-huma ma natenab tuk-tuka on Nai Esau; le in nasosa in kanan tataf natuin mnahat pika mese. 12:17 Fun hi mihin, nak namuni te in lomi hen simo tetus na'ko in amaf mes antite nani. Fun in ka napeni fa manuan he naleko in mo'et asanat, maski in nami nok matnu. 12:18 Hi kam nao fa meu nu'af le nabe'i him nefo ma ampoe meki niman ma ai le anpin ma naklah, meu bale le nanipu ma mesokan ma anin slutuf. 12:19 Ma hi kam nao fa meu to'is in hanan ma hanaf le matain le'uf; talan te atoni Israel le sin nen hanaf nane sin antoti, he nati' kais na'uab antenu neu sin. 12:20 Fun sin ka nabe'i fa he natuin plenat nane le nak, "Leka mu'it ano'no ai ansetul nu'af nane of anpoil nisan neki fatu." 12:21 Ma sa' le sin nit nane matain le'uf kun, tal Nai Musa nak, "Au umtau ma utai nok." 12:22 Mes hi aim meu Nu'af Sion, meu kot Uisneno amonit, esle' Yerusalem neno tunan nok ahake neno tunan nifun hotun ma tolas pukan amlilat. 12:23 Ma tolas knino anmone naek, le sin kankenu matui anbi neno tunan. Ma him hake ambi Uisneno In human, Alef lasi neu ale mansian, ma him haek ambi ale atoni amneot sin asmanan le namtis ma namnou. 12:24 Ma him haek ambi Usif Yesus, Atoni fuf hala fefbela fe'u; ma him haek ambi lisin na'le nau'ab namep nesin Nai Habel in na'. 12:25 So him panat he nati' kais him tite In le nakua a'an. Fun kalu atoni le antite In le anetun Uisneno In a'an anbi pah pinan, sin ka naen koti fa; sa' anteni hit taen koti na'ko In le nakua a'an na'ko neno tunan. 12:26 Bi batan nane In hanan nabeko pah pinan, mes muni i In anba'an nak, "Of Au heko ateni hae mese, ka al fa pah pinan mes neno tunan amsa." 12:27 A'at le nak, "Hae mese anteni" antom neu sa' le anmo'e nalali of anheko nani, he nati' sa' le nabala ka nabe'i fa hen heko nani. 12:28 Natuin hit simo plenat na'ko Uisneno le ka nabe'i fa hen heko nani; es nane te so hit alkit tatulu nekak ma taluli tabes teu Uisneno nok nek tola ma amtaus, natuin lekat le In anlomi. 12:29 Fun hit Uisneno nane onle ai le he notu kit.
13:1 So him panat lasi manekat es nok es bae manekat anbi Usif Yesus. 13:2 Kais him nikan hem fe bale neu atoni anao amnemat, fun nok mo'et onane, atoni bian sin ka nahinef nak sin anfe bale neu ahake neno tunan. 13:3 Mimnau ale atoni abit o'of, fun hi amsa on atoni o'of ki. Ma mimnau nai ale atoni le anmo'e neu sin huma-huma, fun hi amsa fe amoni bi pah pinan i. 13:4 So ale atoni anpanat lasi mafe ma mamone he nati' kais hi milahi hi hala tupa. Fun Uisneno of nasesu atoni amoe kake ma atoni bife amapaisa. 13:5 Kais him fain ate neu noni, mes hi minoka hi aom nok sa' le hi mu'i Fun Uisneno nakua a'an nak: "Au of ka umautu ki fa, ma Au of ka usaitan ki fa." 13:6 Es nane te nabe'i hit ta'uab tak, "Usif tunan ababat neu kau. Au of ka umtau. Atoni pah pinan hen mo'e sa' neu kau ka?" 13:7 Minau hi atopus sin, le natiaba a'an Uisneno neu ki. Him kiso sin monin amsoput ma mituin sin nek ateb knino nai. 13:8 Yesus Neno Anan ka nabaina fa, afi neno, neno i ma talan te nabal-bal. 13:9 Kais atoni nasekeb ki neik lasi noina bute-bute. Fun lasi alekot, nak anhatain hi nekam neki Uisneno In sankolan knino. Kais natuin lasi mnahat le ka neik fa alekot neu sin le sin natuin lekat onane. 13:10 Hi atmu'i baki fuat mese, ale atoni le anmepu anbi um-ume nane ka nabe'i fa he nah sa' anbin. 13:11 Fun Ana' Lasi Fuat Anaet neki mu'it In na' antom neu Bale Knino on fuat sako sanat. Mes ale mu'it nane sin tunu ai notu anbi mone. 13:12 Onane amsa Neno Anan ansutai mane'at anbi kot in kotin he naknino In to na'ko sin sanat neki In na'. 13:13 Es nane te hit nao nai teu In anbi kot in kotin het sutai kle'at tok In. 13:14 Fun anbi pah pinan kan mu'if bale abal-balat neu kit; es nane hit tami bale amnemat. 13:15 Es nane te so natuin Neno Anan, hit teik fua tulu neu Uisneno, teik hit fefak he taliatas In kanan. 13:16 Ma kais him nikan mo'et alekot, ma amfe tuntakus neu hi bae benu sin, fun Uisneno anlomi ale fuat onane. 13:17 Hi mituin hi atopu sin hi mibaunom meu sin nai. Fun sin anpanat hi smanam, on atoni le mes he natae neune. Nok lasi nane te of sin nanaoba nani nok nek amlilat ma ka nok fa nek a'unu. Fun lasi nane of ka neik fa alekot neu ki. 13:18 Him onen toti piut neu kai; fun hai mihin, mak hai nekam nanan leko, fun anbi ale lasi haim lomi he mipeni monit alekot. 13:19 Ma nes-nesi au toti ki, he him onen toti neu kau. Okete Uisneno nok kau he fain et laba eu ki. 13:20 Uisneno nafena nafani Yesus hit Usif na'ko amates. Natuin Ini maten muni i In fani Atukus Anaet neu Ini bibi sin. Ini maten nane amsa anhatani Fef Bela abal-balat na'ko Uisneno. 13:21 So Uisneno naloitan ki alekot, he nati' hi mo'e mituin In lomin. Ma Uisneno anmepu anbi kit sa' le In anlomi natuin Yesus Neno Anan. So atpules Neno Anan talan te nabal-bal! Amin. 13:22 Ma au fainek ki, bae benu, he nati' him sium au fainekat i nok nek amlilat, maski au sulat i tuk-tuka neu ki. 13:23 Hi mihin nai, nak hit bae Nai Timotius, nafetin nalali na'ko o'of. Leka in neman te kau laba, of au okan he met amkius ki. 13:24 Hi mitiaba tabe neu hi atopus sin ma neu ale to knino. Ma him simo tabe na'ko bae knino sin anbi Italia. 13:25 So Usif tunan anfe tetus neu ki alki.
1:1 Han seon na'ko Nai Yakobus, ate Uisneno ma Usif Yesus Neno Anan neu uf bo'es am nua le nasitbon anbi pah-pah. 1:2 Bae benu manekat! Leka him tam meu lasi su'at huma-huma, him simo mani on lasi malinat mese. 1:3 Hi mihin, mak lasi su'at neu hi palsait nane, anhatani hi nek sutais. 1:4 Mimautu hi nek sutais nane he mipeni fuaf amnatus, he nati' hi minokbom ma mipeni matani ma kam nukan fa sa'. 1:5 Kalu es anbi ki anlabu nek hine, so in toti neu Uisneno, fun Uisneno of anfe nani neu in. Fun Uisneno anfe nani neu ale atoni nok sankolan ma nok nek amnaut. 1:6 Mes atoni le antoti so anpalsai, kais in nekan na'oni. Fun atoni le in nekan nao'ni onle tasi in oki le anin anfu neki neu ma nem. 1:7 Fun atoni onane, kais natenab nak in of ansimo sa' na'ko Usif tunan. 1:8 Atoni le nek nuaon of kan tainine fa anbi in monin. 1:9 So leko bae knino le anbi bale le nabaunon anmalin fun Uisneno nalaitan nani. 1:10 Ma atoni amu'it so anmalin amsa leka Uisneno nabaun nani. Fun in of namneku onle hun in sufan. 1:11 Leka manas ansae maput le'uf, hun nane anmaknene oke te in sufan ankua ma in masan te namneku. Onane amsa atoni amu'it; in of namle'u leka fe in nanaoba in mepu. 1:12 Ua alekot neu atoni le anhatanion anbi lasi su'at. Fun leka in hatanion anbi lasi su'at nane, in of ansimo sobe honis le Uisneno anba'an nani neu atoni le sin nek In. 1:13 Leka anmu'i atoni le napeni lasi su'at onane kais in nak, "Lasi su'at nane na'ko Uisneno!" Fun ka nabe'i fa hen su' Uisneno neki alis amle'ut ma In amsa kan su' fa es. 1:14 Mes atoni le antam neu lasi su'at, nane natuin in sinmakat, talan te lasi amle'ut anfuil neki ma anhel neki. 1:15 Leka in natuin lasi amle'ut nane, in of nahonis sanat; leka sanat nane nanae, in nahonis maten. 1:16 Bae benu manekat, so kais him seken lalan. 1:17 Ale tulu alekot ma atnatas amneot nem na'ko neno tunan ma ansanu na'ko Ama Uisneno Apinat. In ka nabaina fa ma ka nate'un fa In mafon. 1:18 Natuin In lomin, In najalib kit natuin a'an amneot, he nati' hit atfani an anaet anbi ale sa' le In anmo'e nani. 1:19 Mimnau nai lasi i bae benu manekat! Ale atoni so anmanap he natnin, mes kais anmanap neu uab ma kais nato' labah. 1:20 Atoni le nato' in ka nabe'i fa hen mo'e alekot anbi Uisneno In matan. 1:21 Es nane te ampolin nai ale lasi amle'ut ma amsimo nai a'an knino le ansenon anbi hi nekam nok nek baun, le neki honis neu hi monim. 1:22 Mes so him fani atoni le anmo'e natuin a'an Uisneno ma ka al fa atoni le in nen, fun kalu onane te hi milosib hi aom. 1:23 Atoni le in nen a'an Uisneno ma kan mo'e natuin, in maleta on atoni le in kiso in human anbi nino. 1:24 Leka in kiso nalali in human, oke te in nao ma in nikan nani in human nane onme. 1:25 Mes atoni le anpanat plenat Uisneno nok amneot in napeni ao sona anbi plenat nane. Oke te in panat nani ma ka nikan nani fa, so anmo'e nani nok alekot, in of napeni alekot natuin in mo'et nane. 1:26 Leka anmu'i atoni le natenab nak in atoni amtaus Uisneno, mes in kan panat fa in man, in nalosib kun in aon; in lasi luli besa neu Uisneno luman kun. 1:27 Luli besa amneot amnonot anbi Uisneno In matan nane esle' hen kiso anmanat sin ma bife banu sin anbi sin susal, ma anpanat aon he nati' pah pinan kais nale'un nani.
2:1 Bae benu alki! On atoni le anpalsai neu Yesus Neno Anan, hit Usif Apinat, kais minaob mani lasi palsait nane anbi beti humaf. 2:2 Fun leka anmu'i atoni amu'it mese le anpake kleni mnatu ma anpake amasat nem neu hi tolas buat, oke te atoni amamu'it mese le anpake kloef nem neu ki, 2:3 ma him tola atoni amu'it nane ma mak neune, "Amtok nai tua, meu bael alekot i," ma hi mak neu amamu'it nane, "Amhake ambi nane," ai, "Amtoko meu nain, le au haek telin." 2:4 Mo'et nane anfani lasi beti humaf, le ho mo'e mani natuin tenab amle'ut. 2:5 Mitnin nai, bae benu manekat! Atoni le pah pinan ankiso on atoni mamu'it anbi lasi palsait, Uisneno anbeti nani on atoni amu'it anbi palsait. Atoni nane sin of napeni plenat neno tunan le Uisneno anba'an nani neu sin le sin nek Uisneno. 2:6 Mes hi kam lae fa atoni amamu'it sin. Atoni amu'it sin es anhamu'i ki ma anhel neki ki neu alef lasi sin matan. 2:7 Sin es na'akan kanaf apinat le him simo na'ko Uisneno. 2:8 Mes leka hi minaoba plenat abainesit le antui nani anbi Sulat Knino, "Him nek hi bia benu onle hi aom," nane hi mo'e lasi alekot. 2:9 Mes leka him beti humaf, nane hi mo'e sanat, ma plenat nane natonon, nak ho mo'e tanhais. 2:10 Atoni le antanhai plenat mese na'ko ale plenat Uisneno sin, nane in tanhai plenat ok-oke. 2:11 Fun In es nakua a'an nak, "Kais hi mapaisa", In amsa es nakua a'an, "Kais hi mamaten", Es nane leka hi ka mapaisa fa mes hi mamaten, him fani atanhai plenat amsa. 2:12 Mi'uab nai ma mo'e nai onle atoni le of anlefi in lasi natuin plenat Uisneno, le neki ao sona neu mansian. 2:13 Fun Uisneno of ka nalile fa lasi manekat neu atoni le kan mu'if lasi manekat. Mes lasi manekat of anbe'u lef lasi. 2:14 Bae benu manekat! Alekot sa' ka neu atoni le in nak, "Au mu'i palsait," mes in ka nalile fa mo'et alekot? Lasi palsait onane neki honis ka? 2:15 Leka bae mone ai bae feto le kan mu'if tainusat ai kan mu'if mnahat neno-neno, 2:16 ma atoni mese anbi ki nak, "Hom nao nai mok tetus, hom tainus nai meki tainusat manafu ma muah nai he mumsen hem pet." Alekot sa' ka neu atoni le in nak onane, mes in kan fe fa sa' neu in ka? 2:17 Onane amsa lasi palsait, kalu lasi palsait nane ka nok fa mo'et alekot, palsait nane ka ma'upa fa. 2:18 Oni anmu'i atoni le in nak, "Ho mu'i palsait ma au mu'i mo'et alekot", of au utae neu in ak, "Mulile kau ho palsait le ka nok fa mo'et alekot, ma of au ulile ko au palsait le nok mo'et alekot." 2:19 Hom palsai mak, Uisneno mese ah ai? Nane leko! Nitu-nitu amsa anpalsai lasi nane ma sin natai. 2:20 Hom palsai ka ambi tomas i, hoi mansian amonot, nak palsait le ka nok fa mo'et alekot, palsait nane luman kun? 2:21 Kiso mit, hit am uf Nai Abraham. Uisneno ansimo in mo'et alekot, leka in natulu in anah Nai Ishak anbi baki fuat. 2:22 Lasi i ansaksi nak, palsait mes nalilon nok mo'et alekot he nati' nanokbon kun. 2:23 Natuin lasi i Sulat Knino natision nak, "Oke te Nai Abraham anpalsai neu Uisneno ma Uisneno ansimo in on atoin alekot." Es nane te antek Nai Abraham nak, "Uisneno In soba." 2:24 Namneo, nak Uisneno ansimo atoni le anmo'e alekot, ka al fa natuin lasi palsait. 2:25 Onane amsa bi Rahab, bife amoe lasi kake nane. Uisneno ansimo in natuin in mo'et alekot, fun in natolo atonin le anlelu sin anbi in ume. Oke te in nafetin sin natuin lalan bian. 2:26 Fun on aof ta'uf le ka nok fa smanaf, in anmate. Onane amsa palsait le ka nok fa mo'et alekot, nane palsait amates.
3:1 Bae benu alki! Kais anmu'i atoni namfau anbi ki hen fani anoni. Fun hit tahin, nak hit le atfani anoni of anlef lasi mafena neu kit nesin atoni bian. 3:2 Hit mo'e sanat anbi lasi namfau. Atoni le ka nasanab fa in anbi in uab, in atoni nek muti, le anpanat in aon. 3:3 Hit tao fleu ai kalat neu bikase fefan he nati' in natuin hit lomik. Onane amsa hit mes atpanat hit aok noba temen. 3:4 Kiso mit ale bnao, maski naek ma anin matani nanaoba nani, mes nabei ana'i nani neki fenut an-ana' natuin ana' fenut in lomin. 3:5 Onane amsa hit mak, maski in an-ana', mes in nanaebon kun anbi ale lasi naek. Kiso mit ai nane in an-ana' kun, mes in notu nis ale nasi naek. 3:6 Maf nane amsa onle ai. In nahumbon onle pah amle'ut le napeni bale anbi hit aok ta'un. Maf nane nalahi hit aok ma anpin anbi hit monik, mes notu nisan neki ai maputu. 3:7 Ale mu'it fui, kolo-kolo, ale mu'it le anlaba ma ale mu'it le anbi tasi nabe'i anmanat ai namau sin ma atoni pah pinan namau nalali sin. 3:8 Mes katit fa atoni mese le nabe'i he namau nan maf nane. Maf nane neki amle'ut le ka taplenat tanef ma nahenu nok laso le neki kit neu lasi maten. 3:9 Hit pake hit mak he tanaeb Usi, hit Ama. Ma hit pake hit mak het sukat mansian le anmo'e nani natuin Uisneno In human. 3:10 Tetus ma sukat anpoi na'ko fefaf mese. Lasi i, kais anbol onane bae benu alki. 3:11 Ai anmu'i oe mata le anbobok napoitan oe leko ma oe menu' na'ko mata mese ka? 3:12 Bae benu alki! Ai anmu'i bubuk le nafua bub fua mina ka ma anmu'i tanu'an sena le nafua bubuk ka? Onane amsa oe masi ka napoitan fa oe leko. 3:13 Sekau anbi ki le ahinet ma amoe alekot ka? So leko in nalile monit alekot ma mo'et alekot nok lasi hine ma nek aklati. 3:14 Mes kalu hi mibela nek to'as ma mitenab neu hi aom anmes, kais hi miliabom ma kais hi mi'moe lasi amneot le na'ko Uisneno. 3:15 Lasi hine humaf nane ka nem fa na'ko neno tunan, mes na'ko pah pinan, nem na'ko nek tenab mansian ma na'ko sanat in tuaf. 3:16 Anbi bale le anmu'i nek to'as ma lasi tenab neu aof mes-mese, bi nane amsa anmu'i lasi matoes ma lasi amle'ut huma-huma. 3:17 Mes lasi hine le nem na'ko neno tunan nane abainesit kun oke te neki hal nekaf, nek bua ma nek atuina. In nahenu nok nek mamum ma nalile mo'et alekot, kan betif humaf ma kan asafanuf. 3:18 Ma lasi alekot nane in fuan ansenan nani anbi halan nekaf neu sin le anmo'e halan nekaf.
4:1 Lasi matoes ma mabanat anbi ki nem na'ko me ka? Nane nem na'ko hi nek lomif pah pinan le nataunon anbi hi aom. 4:2 Him sinmakan ale sa', mes ka mipeni fa, oke te mamaten. Hi mibela nekaf, mes hi ka mipeni fa sa' le him sali, oke te hi matoe ma hi maban ai mabiso. Hi ka mipeni fa sa' fun hi kam onen fa. 4:3 Ai him onen toti amsa, mes hi kam simof sa', fun hi onen totis nane ansan. Fun sa' le him toti nane, hi he mikloe mani he miminab hi lomim pah pinan. 4:4 Hi atoni ka nek aki'at ki! Hi ka mihin fa ka, nak kalu hi mimesbom mok pah pinan nane hi mimusu mok Uisneno ka? Es nane atoni le namesbon nok pah pinan i, in namusu nok Uisneno. 4:5 Kais hi mitenab mak Sulat Knino nane antui lum-luman nak, "Uisneno nabalab In Smanan anbi hit nekak, In anlomi nok nek atinos." 4:6 Mes halinat knino, le In anfe nani neu kit, naek nesin na'ko lasi nane. Es nane In nakua a'an nak, "Uisneno antumatan atoni le namok'on, mes In nek atoni le nabaun nekan." 4:7 Es nane te hi miusi nai neu Uisneno ma antumatan Santuaf, oke te santuaf of naen nasaitan ki! 4:8 Him haumak Uisneno ma Uisneno of anhaumak ki. Mifanu hi niman nai, hoi atoni asanat ma miknino hi nekam nai hoi atoni nek nua. 4:9 Mifetin hi mo'et amle'ut, amkul ma amkae nai. Amseka hi mani meki kulut kaet, ma amseka hi malinat meki lasi nu'ut. 4:10 Mibaun hi aom ambi Uisneno In human, ma In of nalatan ki. 4:11 Bae benu alki! Kais hi mi'uab hem tek mile'un es nok es in kanan. Atoni le antek nale'un in bae ma anlefi in lasi, nane on alef lasi neu plenat Uisneno. Ma kalu ho musanab plenat Uisneno, nane ho ka mutuin fa plenat mes hom fani alef Lasi neu In. 4:12 Amoe plenat ma alef lasi mese ah, esle' Uisneno le anmu'i kuasat he namonib ma he nale'un. Mes ho sekau ko, le hom fani alef lasi neu ho bia benu sin ka? 4:13 Neu nai bae, le hi mi'uab mak, "Neno i ai noka hit nao teu kuan nane ma hit tamaika atbin ton mese, he tasosa ma tasau, oke te tapeni noni." 4:14 Mes hi ka mihin fa sa' le hen bol neu ki anbi neno noka. Hi monim nane sa' ka? Hi monim nane onle masu' le mamnita leku tuk es oke te namneku. 4:15 So hi mi'uab mak, "Kalu Uisneno anlomi, of hit moni ma atmepu i ma atmepu nane." 4:16 Mes muni i hi miliabom anbi lasi moko' ma lasi nane ka namneof. 4:17 Es nane atoni le nahin, nak in mes hen mo'e alekot, mes in kan mo'e nani fa, nane in nasanab.
5:1 Bae benu atoni amu'it! So him kae ma amkul nai neu lasi nu'ut le he nem neu ki! 5:2 Hi mu'im nane anmau ma hi tainusat nane ap-apu neku nisan. 5:3 Hi mnatu ma noin muti nutus neki nani ma in nutus nane of anfani saksi neu ki ma of neku hi aom onle ai. Hi mibua milali maus bi neno-neno le he namsopu. 5:4 Hi kam baen fa atoni le anmepu ambi hi lele. Mitnin mit sin an anbai! Atoni le natam abut na'ko hi lele, sin an anbai, ma sin hanan ante Uisneno ameput ale sa' In luken. 5:5 Hi moni ambi athoes ma him tamis pah pinan in minan. Hi mipokab hi aom neu neno lolot. 5:6 Hi misanab ma mimate atoni le ka nasanab fa, mes in kan laban ki. 5:7 Es nane te him seusab nai, bae benu alki, talan te Usif ankoenon nem. Kiso, atoni ameup lele anpao pah in afan ma'upa ma anseusab talan te ul unu ma ul muni ansanu. 5:8 So hi amsa amseusab nai ma amhatani hi nekam, fun Usif in neno ankoenon nem anhaumaken. 5:9 Kais hi mimunu ma misanab es neu es, bae benu alki, he nati' kais Uisneno anlef lasi neu ki. Kiso, Alef lasi anhaumaken, naloitan he nem. 5:10 Bae benu alki, mimnau nai mafefa knino le sin anetun Usif In kanan. Sin anseusaban ma ansutain mafena, mituin sin nai on heta neu ki. 5:11 Hit tek sin on atoni ua leko, fun sin nalan ma ansutai. Him nen antom Nai Ayub in seusabat ma hi mihin nak namuni te Uisneno naloitan sa' neu in. Fun Uisneno nek mamun ma nahenu nok manekat. 5:12 Lasi abainesit bae benu alki; kais him sup meki neno tunan, ai pah pinan ai sa' anten. Kalu namneo, hi mak namneo, kalu kahaf hi mak kahaf he nati' Uisneno kais anlef lasi neu ki. 5:13 Leka anmu'i atoni anbi ki le ansutai mane'at so in onen toti. Leka anmu'i atoni le anmalin, so in ansi hen pules Uisneno. 5:14 Kalu anmu'i atoni anbi ki le namen, him boin ama penatua hen onen neu in. Oke te amtusi meki mina ambi Uisneno In kanan. 5:15 Ma onen totis le anpoi natuin palsait of naleko atoni amenat nane ma Uisneno of nafena in; ma ansako in sanat le in mo'e nalali. 5:16 Es nane te, so hi mihoeb hi sanat es nok es ma amonen toti es neu es he nati' hi mileko. Onen totis atoni le natuin Uisneno lomin, anmu'i kuasat matani. 5:17 Nai Elia nane in amsa mansian onle hit. In onen toti namneo-namneo he nati' kais na'ul, oke te ulan kan sanuf neu pah pinan ton tenu ma funan ne. 5:18 Oke te in onen toti anteni ma neno tunan nasanut ulan neu pah pinan ma napoitan in afan. 5:19 Bae benu alki! Bait atoni mese anbi ki le ka natuin fa noina na'ko Uisneno, anmu'i atoni le anhel nafani neu Uisneno, 5:20 mihin nai, atoni le anhel nafani asanat nako lalan asanat, in of namonib atoni nane in smanan na'ko maten ma ankub in sanat namfau. Na'ko, Nai Yakobus
1:1-2 Bae benu to mabeti Uisneno le nasitbon anbi paha lo anbi pah-pah Pontus, Galatia, Kapadokia, Asia ma Bitinia! Au Nai Petrus, haef knino Yesus Neno Anan, ufnekan he nati' Uisneno anfe ki tetus ma halan nekaf nok athoes. Uisneno anbeti ki hem fani In to namnes nok lekat Uisneno hit Ama. Ma Smanan Knino anmo'e nalali ki to knino, neu Uisneno, he nati' hi mituin neu Yesus Neno Anan ma naknino ki natuin In na'. 1:3 So hit tanaeb Uisneno, hit Usif Yesus Neno Anan In Amaf, In nek nis kit, es nane te In fe kit monit fe'u natuin nafena nafani Yesus Neno Anan na'ko amates. In anfe kit afnekan amonit. 1:4 Hit tafnekan he tapeni tetus le Uisneno naloitan nani neu In to, esle' tetus le nabela nani anbi neno tunan, le ka namle'uf ai anpun ai anmoes. 1:5 Ale lasi nane naloitan nani neu ki, fun him palsai neu Uisneno. Ma anpao ki neki Uisneno In kuasat, he nati' hi mipeni honis le of natonon anbi neno hatas amsoput. 1:6 Es nane te, so hi nekam anmalin, maski tomas i neu leku tuk es hi mes minu'om natuin him naben lasi su'at huma-huma. 1:7 Ale lasi nane sin he naton nani hi nek palsait ini mneon. Noni mnatu le namle'u amsa ansu' nani neki ai. Hi nek palsait le ma'upa nesin noni mnatu, of ansu' nani amsa he nati' namep. Ma nok lasi nane of anpules ki ma antola ki ma nalatan ki bi neno Yesus Neno Anan ankoenon anfani nem. 1:8 Hi fe ka mit fa In, mes him nek In, Hi fe ka mit fa In, mes tomas i him palsai neu In. Hi malin fun malinat nane naek ma kat soi tabe'ifa. 1:9 Fun hi mipeni hi nek palsait in salin, esle' lasi honis neu hi smanan. 1:10 Lasi honis nane afi mafefa knino sin anpe'o ma naknutu, le sin nabeno nalali antom tetus aknino le Uisneno anfe nani neu ki. 1:11 Sin anpe'o le onme ma leka lasi nane of anbol, le ansali natuin Neno Anan Smanan le natua anbi sin nekan. Bi leku nane Ini Smanan ansaksi neu sin antom ale lasi mane'at le Neno Anan mes ansutai nani ma antom In apinat le of nem namuni. 1:12 Uisneno naton neu mafefa knino sin, nak sa' le sin anmo'e ka neu fa sin, mes neu ki; esle' lasi le him nen milali na'ko ale amnek Lasi Knino antom Yesus Neno Anan. Sin natiaba ale lasi nane neu ki neki kuasat Smanan Uisneno le In ansonu na'ko neno tunan. Ma ahake neno tunan sin amsa anlomi he nahin Beno Knino le sin ane'ut nani. 1:13 Es nane, te so hi miloitan nai. Ampanat nai ma mifnekan tetus le of anfe nani neu ki, bi neno Yesus Neno Anan ankoenon nem. 1:14 Mituin nai neu Uisneno, ma kais hi moni mituin hi sinmakat ahunut, bi neno hi fe mono ma ka mihinef Uisneno. 1:15 So hi knino ki anbi ale sa' le hi mo'e, papmese onle Uisneno le anboin ki nane aknino. 1:16 Anbi Sulat Knino antui nani nak on i, "So hi knino ki, fun Au knino Kau." 1:17 Him tek Uisneno mak Ama bi leku him onen toti neu In. Uisneno nane es anlefi lasi neu mansian natai nok sin mo'et ma kan betif humaf ma masaf. Es nane leka hi fe moni ambi pah pinan i, so hi minaeb Uisneno ambi hi monim. 1:18 Fun hi mihin sa' le anbaen nalali he nafetin ki na'ko hi monim son-sona, le hi mipeni na'ko hi babfini. In baen nane ka neki fa noin muti ma noni mnatu, 1:19 mes neki sa' le ma'upa; esle' Neno Anan In aon, le anfani bibi kase le anlolo neu Uisneno ka nok fa sanat ma ka nok fa kobe. 1:20 Uisneno anbeti Neno Anan na'ko neno pah pinan fe ka nabelon. Ma anbi neno-neno pah pinan he namsopu, In koenon nem neu pah pinan he nati' namonib ki. 1:21 Him palsai neu Uisneno natuin In, le nafena nafani In na'ko amates ma nalatan In. Es nane, Uisneno le him palsai ma neu Uisneno nane amsa hi mibela hi afnekat. 1:22 Hi miknino milali hi monim natuin him panat lasi noina na'ko Uisneno talan te him nek hi bae knino sin nok amneot. Es nane te hi manek es nok es meki nekam oke. 1:23 Fun natuin a'an Uisneno le anmoni ma nabal-bal, anmo'e ki hem fani mansian fe'u le ka nahonis ki fa na'ko mansian, mes na'ko Ama abal-balat. 1:24 Fun antui nani anbi Sulat Knino nak, "Ale amonit nane onle hun ma ma'u, ma ale masan apinat onle hun in sufan. Hun nane anmeto ma in sufan ankua, 1:25 mes Uisneno In a'an nabala talan te nabal-bal." *A'at i natiaba nalali neu ki on Beno Knino.
2:1 Es nane, him polin nai ale mo'et amle'ut na'ko hi aom; kais mipoibom, ma kais ama'safanu. Kais mi'unu nekam, ma kais mikle'at atoni bian. 2:2 So him fani on li'ana le fe nahonis le anmeno susu mneo ma knino, he nati' hi minae ma mipeni honis. 2:3 Anbi Sulat Knino antui nak on i, "Him tamis milali Uisneno In alekot." 2:4 Es nane te, aim nai meu Usif. In on fatu amonit, es fatu le mansian anpolin fun sin nak ka ma'upa fa; mes Uisneno anbeti nani on fatu ma'upa. 2:5 Hi amsa onle fatu-fatu amonit. Es nane so him lomi hen pake ki neu he nafena ume Uisneno le knino. Nok lasi nane him fani ana' lasi fuat le anmoni neu Uisneno, ma natuin Yesus Neno Anan natulu nani neu Uisneno, fua tulu knino le malomi anbi Uisneno nekan. 2:6 Fun anbi Sulat Knino antui nani nak on i, "Au beti ulali fatu ma'upa mese, le ubela ani anbi Sion fatu naif; ma atoni le anpalsai neu In, of ka namaeb nani fa." 2:7 Fatu nane ma'upa neu hi le ampalsai. Mes neu atoni le kan palsai: a'an knino nak: "Fatu le amoe ume sin anpolin nani, anfani fatu naif, ma nane fatu le anmo'e atoni he nastun, fatu le anmo'e sin hen mofun." 2:8 Sin nastun neu fatu nane, fun sin kan palsaifa neu a'an Uisneno. Uisneno naloitan nani onane neu sin. 2:9 Mes hi le nane to mabeti, ana' fuat knino le antuthae usif, uf le knino neu Uisneno. Uisneno anbeti ki ma anboin ki hem poi mi'ko mesokan ma amtam meu In meusine sanmakat, nok salit he nati' him etun beno antom In mo'et amkakat sin. 2:10 Afi hi ka to Uisneno ki fa, mes muni i him fani In to. Afi In ka nek ki fa, mes muni i hi mipeni In manekan. 2:11 Bae benu manekat! Au fainek ki on anao amnemat ma matateme ambi pah pinan i. Au toti ma ufnekan he nati' kais hi mituin pah pinan in lomin le anmaken hen be'u hi smanam. 2:12 Hi mo'et alekot mes natonon anbi ale uf le kan tamaf nonot Yahudi sin atnanan, he nati' leka sin antek nale'un hi kanam on atoni amle'ut, sin kius nit hi mo'et alekot, oke te sin nanaeb Uisneno bi neno le In ankoenon nem. 2:13 Ambi Uisneno, so hi miluli neu ale mansian ana' kuasat, leko he nen Kesel le anfani ana' kuasat abainesit, 2:14 ma neu amaKumlol le Kesel anlek nani hen hukum atoni le anmo'e amle'ut ma hen tola atoni le anmo'e alekot. 2:15 Fun Uisneno anlomi, he nati' hi mo'et alekot nane anpoh ale atoni amonot sin fefan. 2:16 Hi moni on atoni ao sona, kais on atoni le anpake ansan lasi ao sona, hen amu sin mo'et amle'ut mes hi moni on ate Uisneno. 2:17 Hi milile lasi tola neu ale atoni, him nek hi bae sin, mimtausan Uisneno ma amtola kesel. 2:18 Neu ale ate, mibaunom mok amtaus neu hi tuanenu, ka al fa neu alekot ma amahoet mes neu abulalut amsa. 2:19 Uisneno of anfe tetus neu ki, kalu hi mihin Uisneno lomin, amsutai ale taos mo'et ka amnonot nok seusabat. 2:20 Fun hi mipeni alekot sa' ka leka him sutai mane'at natuin hi mo'e sanat? Mes kalu him sutai mane'at natuin hi mo'e alekot, Uisneno of anfe ki tetus. 2:21 Natuin lasi nane Uisneno anboin ki. Fun Neno Anan ansutai nalali mane'at neu ki ma nok lasi nane In anfe ki leta mese he nati' him nao mituin In nobin. 2:22 In kan mo'ef sanat ma katit fa moel anbi In fefan. 2:23 Leka sin na'akan In, In kan tobef neki akan. Leka In sutai mane'at, In ka na'unu fa; al In nana'at In lasi neu Uisneno, Alef lasi amneot. 2:24 Neno Anan anloi hit sanat anbi hau nehe, he nati' hit ao sona kit ta'ko kuasat sanat ma atmoni tatuin Uisneno lomin. Neno Anan In papa fokel sin es naleko ki. 2:25 Afi hi onle bibi kase le ansek, mes muni i In neik nafani ki he mituin Atukus ma Aneot hi smanam.
3:1 Onane amsa hi bife amamonet, hi mibaunom neu hi mone sin, he nati' kalu anmu'i anbi sin le kan palsai neu beno na'ko Uisneno, hi mo'et alekot nane anmo'e sin hen fani apalsait. Ma kais hi ma'uab sa'-sa' neu sin, 3:2 fun sin kius nit hi mo'et le muti ma naleko. 3:3 Kais hi mimasab hi humam al anbi kotin, onle ama'ne hi nakfunu, ampake bale mnatu ma ampake tainusat amasat. 3:4 So hi masam nane -- anpoi na'ko hi nekam, taos mo'et le neki fef mina ma han mina ma nok tainine; nane hi masam abal-balat le ma'upa natuin Uisneno lomin. 3:5 Nok mo'et i anbi batan ahunut ale bife knino le nafnek neu Uisneno namasab sin aon ma nabaunok neu sin mone. 3:6 Bi Sara amsa onane, in natnin neu Nai Abraham ma antek in nak tuan. Hi le nane Bi Sara in anhin, kalu hi mo'e alekot ma ka mimtauf neu ale sa'. 3:7 Onane amsa hi, atoni amafet, so hi moni nok nek ahinet neu hi fe, ma hi mihin mak sin le nane suf alima'et. Milile fef tola han tola neu sin, fun sin nabua nok ki, of him simo halinat amonit na'ko Uisneno. Hi mo'e onane he nati' kais anmu'i le he nasenib hi onen totis. 3:8 Ma lasi amsoput esle': So hi ala ki fefa mese ma hanaf mese. So hi manek es nok es onle atoni le anmaoil tatan. Ma so hi mu'i nek amnaut ma nek baun es nok es. 3:9 Ma kais him seunbanin lasi amle'ut meki lasi amle'ut, ai lasi akan nok lasi akan. So him tek alekot neu sin, fun Uisneno anboin ki he him simo tetus na'ko In. 3:10 Fun antui nani anbi Sulat Knino nak, "Atoni le anlomi hen tamis amonit ma anlomi he nit neno-neno alekot, so anpanat in fefan he nati' kais namolok ale lasi amle'ut, ka na'uab fa ale lasi moel. 3:11 In mes na'lob lasi amle'ut ma anmo'e lasi alekot; so in nautnon namneo-namneo he napeni halan nekaf. 3:12 Fun Usif tunan ankiso piut ale atoni le natuin In lomin, ma Usif tunan natnin piut sin onen totis; mes Usif tunan antumatan ale atoni le anmo'e amle'ut." 3:13 Sekau hen mo'e amle'ut neu ki ka, kalu him lomi he mo'e alekot ka? 3:14 Mes maski hi mes amsutai fun hi mo'e ale lasi alekot, hi ma'ua ki! Kais hi mimtau neu sekau amsa, ma kais hi mi'unu. 3:15 Mes anbi hi nekam nanan, so him fe lasi tola neu Neno Anan le natai nok In mepu on Usif tunan. Ma so hi miloitan piut he mitae neu ale atoni le natan ki antom lasi afnekat le hi mu'i. 3:16 Mes so hi mo'e mani nok fef mina ma han tola. Ma so hi nekam nane muti, he nati' kalu antek nale'un ki, natuin hi moni nok alekot on atuina Neno Anan, atoni le antek nale'un ki nane of sin anmae. 3:17 Leko nesi amsutai mane'at natuin mo'et alekot -- kalu lasi nane Uisneno anlomi -- na'ko him sutai mane'at natuin mo'et amle'ut. 3:18 Fun Neno Anan anmate no mese tal nabal-bal natuin sanat mansian -- atoni mese le ka nasanab, anmate neu atoni le nasanab. Neno Anan anmo'e he nati' In nok ki neu Uisneno. Sin namate In on ta'uf pah pinan, mes namonib nafani on ta'uf smanaf. 3:19 Mes anbi smanaf nane In nao ma anetun beno na'ko Uisneno neu ale smanaf anbi o'of, 3:20 esle' smanaf le afi sin ka natuin fa Uisneno bi batan Nai Nuh. Bi tabu nane Uisneno anpao nok seusabat, leka Nai Nuh anmo'e ini bnao. Al atoni-atoni le anbi bnao nane -- sin ok-oke atoni fanu -- le anmoni natuin oe sako nane. 3:21 Lasi nane on lasi leta na'ko su oe le muni i neki honis neu ki. Lasi su oe i ka lekat mese le he naknino hit aok na'ko ale lahi ai leke, mes on hit lasi manba'an neu Uisneno na'ko hit nekak alekot. Lasi su oe nane neki honis neu ki fun Neno Anan anfen anfani na'ko amates, 3:22 ma ansae anfani neu neno tunan. Muni i In na' kuasat, antunon anbi Uisneno aon bian ne'u ma naplenat ale ahake neno tunan sin, ale amui kuasat, ale matani abit neno tunan.
4:1 Natuin Neno Anan ansutai nalali mane'at on ta'uf pah pinan, hi amsa amhatani hi aom meki tenab onane. Fun atoni le ansutai mane'at on aof ta'uf, in kan mo'en tenif sanat. 4:2 Es nane hi monim in tukan, kais hi mo'e mituin pah pinan in lomin mes hi mo'e mituin Uisneno In lomin. 4:3 Bi batan afinit hi mo'e milali sa' le atoni ka nahin Uisneno anlomi hen mo'e nani. Hi monim ka nalekof. Hi moni mituin lasi sinmakat, lasi kake, mafu tua, amlilat pah pinan, tolas amninut ma mibes meu le'u mahuma le neki hainisit. 4:4 Muni i ale atoni le ka nahin Usif tunan, namkakan nak hi ka mituin fa monit onle sin, hem tamis sanat anbi nonof hamu'it. Natuin lasi nane sin na'akan ki. 4:5 Mes of sin natae neu Uisneno, le naloitan nalali hen lefi amonit ma amates sin lasi. 4:6 Es nane te anetun Beno Knino neu atoni amates sin amsa, he nati' sin, le anlefi sin lasi natuin aof, onle anlefi atoni bian sin lasi natuin aof, onle anlefi atoni bian sin lasi. Mes natuin smanaf sin monin natuin Uisneno In lomin. 4:7 Ale lasi anhaumak in amsoput. Es nane te him panat hi aom ma amtainine hi nekam he nati' him onen toti. 4:8 Nesi na'ko ale lasi nane, so hi manek es nok es, fun lasi manekat ankub sanat namfau. 4:9 So hi masimo es nok es anbi hi ume mes-mese ka nok fa sakoit. 4:10 Hi mese-mese amsimo milali halinat knino le nasuli na'ko Uisneno. Es nane te on anaoba alekot na'ko ale halinat Uisneno, so hi mese-mese ampake ale halinat nane neu hi ok-oke. 4:11 Atoni le natiaba beno, in mes natiaba beno na'ko Uisneno; atoni le antuthae atoni bian, in mes antuthae neki matani le na'ko Uisneno, he nati' anbi ale lasi, hit tanaeb Uisneno natuin Yesus Neno Anan. In kun es anmu'i kuasat ma hit mes tanaeb In talan te nabal-bal. Amin. 4:12 Bae benu manekat! Muni i him sutai matani fun fe ansu'ki. Mes kais hi mimkak, onle anmu'i sa' esle' matain le'uf neu ki. 4:13 So hi mimlil nai natuin him sutai oke mok Neno Anan. Leka Neno Anan In apinat nalilon, of hi malin. 4:14 Hi ma'ua ki, kalu anhamu'i ki natuin hi mituina Neno Anan. Nane nak Smanan apinat esle' Smanan Uisneno, nokan ki. 4:15 Kais atoni mese anbi ki ansutai mane'at, natuin in na'oten ai nabak ai anbulalu ai nabutab lasi. 4:16 Mes leka in sutai mane'at on atoni Slani, kais in mae natuin lasi nane. So antoti terima kasih neu Uisneno, fun in neki Neno Anan kanan. 4:17 Leku le'at antelen he nati' Uisneno anlefi lasi neu pah pinan. Uisneno anlefi nahunun In to sin lasi. Ma leka In na'uba lefi lasi anbi kit, of onme ka neu atoni le kan palsai fa neu Beno Knino na'ko Uisneno nane? 4:18 Anbi Sulat Knino antui nak on i, "Kalu ale atoni alekot amsa susal he napenin honis, of onme ka neu ale atoni asanat le ka nahin Uisneno?" 4:19 Es nane, kalu anmu'i atoni le ansutai natuin Uisneno anlomi onane, so ale atoni nane anmoni nok amneot ma nana'at sin aon neu sin Apakaet. Of In natiaba piut In han manta'en.
5:1 Au toti matani neu ale penatua le anbi hi tolas knino, on bae penatua ma asaksit Neno Anan In lasi mane'at, le of napeni apinat amsa, leka Neno Anan In apinat nane nalilon neu mansian. Au toti nok matani, 5:2 he nati' hi mituku ale bibi kase le Uisneno nana'at sin neu ki. Mituku sin nok nek malinat onle Uisneno anlomi, ma kais nok nek mafena. Ma kais hi mepu he mipeni osaf mes natuin namneo-namneo him lomi hem tuthae. 5:3 Kais hi mo'e on ana' aplenat neu sin le nana'at sin neu ki, mes him fani heta neu sin. 5:4 Leka Atukus Amnanut ankoenon nem, of hi mipeni sobe apinat le ka namle'u nitaf. 5:5 Onane amsa hi nonot munif, hi mibaunom meu nonot amnasit. Ma hi alki, mibaunom es neu es, fun antui nani nak, "Uisneno antumatan atoni le nanaebon, mes In nek atoni le nabaun in nekan." 5:6 Es nane te hi mibaun hi aom ambi Uisneno In niman matani, he nati' In na'aiti ki leka in leku ante. 5:7 Mina'at ale hi nek na'unu neu Uisneno, fun in es anpanat ki. 5:8 Him pao nai ma ambe' nai! Fun Nitu nane hi musu. In onle aus neno le naoinson neu ma nem ma nakunut nami ini mnahat. 5:9 Amtumatan in meki hi nek palsait, fun hi mihin, mak ale hi bae knino bian anbi pah pinan amsa ansutai mane'at onle hi. 5:10 Mes leka him sutai milali mane'at leku tuk es, Uisneno of nanokab ki. In of natetu ki ma anhatani ki ma namepan ki. Fun In lo Uisneno le nekan leok le'uf, le anboin nalali ki hem tamis In apinat nabal-bal natuin Neno Anan. 5:11 In kun es anmu'i kuasat talan te nabal-bal! Amin. 5:12 Au sulat tuk-tuka i au tui neu ki eki Nai Silwanus in niman, le au ak in on bae knino aki'at. Au lomi he eut ki, ma afainek ki ak i lo halinat Uisneno namneo so him na' mimepan neu halinat nane. 5:13 Hi bae knino tolas knino mese anbi Babilon le mabeti amsa natuin Uisneno. ansonu tabe neu ki; onane amsa au anah Nai Markus le au nek ani. 5:14 Hi matabe es nok es nok manekat on bae knino. So Usif tunan anfe halan nekaf neu ki alki le amfani Neno Anan ini. Amin. Na'ko, Nai Petrus
1:1 Bae knino le napeni nalali nek ateb knino le namas nok hai nek ateb knino. Yesus Neno Anan, le Uisneno ma hit Kesel Afetin le anfe nala i nek ateb knino nane neu kit fun In nanaoba sa' le namneo. Sulat i na'ko Nai Simon Petrus, ate ma haef knino Yesus Neno Anan. 1:2 So Uisneno anfe tetus ma aomina neu ki nok athoes, fun hi mihin Uisneno ma Yesus hit Usif. 1:3 Uisneno anpaek nalali In kuasat neno hen fe kit ale sa' le hit lomi he nati' hit moni nok luli besa. In nanaoba lasi i natuin hit tahin In le anboin nalali kit het naben In apinat ma In alekot. 1:4 Nok lasi nane Uisneno anfe kit ale tetus le matain le'uf ma ma'upa le In anba'an nalali. Nok ale tetus nane hi mifetnom mi'ko lasi sinmakat le nale'un pah pinan, ma hi mipeni pa' anbi taos neno. 1:5 Es nane te, him hataniom namneo-namneo he nati' hi nek ateb knino matuntaku natuin monit alekot. Bi monit alekot aon bian, hi mes amui lasi hine, 1:6 ma ambi lasi hine aonbian, hi amsa mes ampanat hi aom. Ma lasi ampanat hi aom in bian so hi amsa amhatani hi aom he malan mibei ambi ale sa'. Malan mibei ambi ale lasi in aonbian, hi amsa mes amoni mituin Uisneno lomin. 1:7 Ma moni mituin Uisneno lomin amsa mes naloitan nok manekat neu bae knino sin. Neis na'ko nane so him nek ale atoni ok-oke. 1:8 Ale lasi nane esle' taos mo'et le anbi ki. Kalu ale taos mo'et nane anbi ki nok athoes, of hi maspeti ma mipeni afan, ma of hi mihin Yesus Neno Anan hit Usif nok alekot. 1:9 Mes atoni le kan mu'if taos mo'et onane, in matan anfolo; in kan kius nitaf ma in nikan nak in sanat-sanat ahunut ansakso nalali sin. 1:10 Es nane bae benu alki, amhataniom he nati' han boin Uisneno ma In betis neu ki namep anfin. Leka hi mo'e onane of hi ka mitselam tenif. 1:11 Natuin lasi nane of anfe mainuan neu ki he nati' him tam meu plenat nabal-bal na'ko Usif tunan ma hit Kesel Afetin Yesus Neno Anan. 1:12 Es nane te au umnauba ki piut neu ale lasi nane, maski hi mihin milali ma ampalsai neu beno na'ko Uisneno le him simo milali. 1:13 Leka au fe moni, au utnine so umnauba ki neu ale lasi nane. 1:14 Fun au uhin nak ka lob antenif of au usaitan pah pinan i, fun hit Usif Yesus Neno Anan anetun nalali neu kau. 1:15 Mes of au ami lalan, he leka au usaitan pah pinan i, hi mimnau ale lasi nane piut. 1:16 Leka haim etun ki hit Usif, Yesus Neno Anan, In Apinat ma In neno le hen koenon nem on Usif, hai ka mituin fa uab tutab mansian. Neno Anan In Apinat nane hai mit milali meki hai matam. 1:17 Haim bi nane leka In ansimo kan tola ma Apinat na'ko Uisneno hit Ama. Bi leku nane hanaf manena na'ko Apinat anesit, le nak neu In, "I Au Anmone le Au nek ani In halin Au nekak!" 1:18 Haim nen hanaf nane nem na'ko neno tunan, leka hai mok In ambi nu'af knino tunan. 1:19 Es nane te haim palsai nesi anteni neu beno Uisneno le mafefa knino sin anetun nani. Leko nasi kalu him panat beno nane, fun beno nane on paku le anpin anbi bale mesokan talan te neno anpe ma faif nome ansae anbi hi nekam. 1:20 Mes nes-nesi so hi mimnau lasi i: Beno na'ko Uisneno antom ale lasi of of anbol, ka nabe'i hit taketi natuin hit hinek. 1:21 Fun kan mu'if atoni le natuin in lomin, nabe'i natiaba beno Uisneno antom ale lasi Le of anbol. Ale atoni nane Smanan Knino naplenat sin bi leku natiaba beno na'ko Uisneno.
2:1 Bi neno afinit mafefa-mafefa apoiba anbol anbi to Uisneno atnanan, onane amsa kulu-kulu apoiba of anbol anbi ki. Sin of natam ale lasi noina ka amneot, le nale'un to. Ma of sin natotan amui kuasat le natulu In aon hen soi sin. Nok lasi nane of sin neki amle'ut neu sin aon, le of anbol neu sin laba. 2:2 Maski onane atoni namfau of natuina kulu-kulu apoiba nane sin monin le mo'et nono-nono naplenat sin. Ma kulu-kulu nane sin mo'et of anmo'e atoni namfau hen tek nale'un Lanan Amneot le Uisneno anfe nani. 2:3 Fun sin koman ai anpalu, ale kulu apoiba nane of anpeo ki lasi nu'un le sin anmo'e kun he napeni osaf na'ko ki. Mes lefit le he natiaba kasat neu sin naloitan nalali, ma lasi amle'ut le anlek nalali neu sin anhat ma anpao sin. 2:4 Ale ahake neno tunan le anmo'e sanat amsa, Uisneno ka namautu sin he nafetinnok na'ko kasat, mes anpolin natam sin neu ai maputu in nanan. Ma natam sin neu bola mesokan he natau sin anbi nane talan te Neno Lef Lasi. 2:5 Onane amsa nok pah pinan batan ahunut, Uisneno ka nefetin nani fa na'ko kasat. Uisneno nasanut noe sako neu ale atoni le ka nahin Uisneno bi batan nane. Al namonib Nai Nuh nok atoni hitu bian, fun Nai Nuh ane'tun beno antom lasi honis le Uisneno anlomi nani. 2:6 Onane amsa Uisneno nale'un kot Sodom nok Gomora neki ai, he nati' anfani leta neu ale atoni le ka nahin Uisneno bi batan amunit. 2:7 Mes Nai Lot napeni honis, fun in natuin Uisneno lomin; in sutai mane'at natuin ale mo'et ka alekot na'ko ale atoni le ka namtaus fa plenat. 2:8 Nai Lot atoni alekot nane, neno-neno in namaika anbi sin atnanan, ma in loi mafena anbi in nekan, natuin in nit sin mo'et amle'ut. 2:9 Es nane te, Uisneno nahin, hen fe honis neu ale atoni le natuin In lomin leka sin napenin lasi su'at. Ma Uisneno nahin he natau ale atoin amle'ut hen hamu'i sin bi Neno Lef Lasi. 2:10 Nes-nesi neu ale atoni le anmo'e natuin sin nek sinmakat amle'ut ma antek nale'un kuasat Uisneno. Ale kulu apoiba nane sin namoko'ok ma anhaunaebok talan te sin kan ti'as fa na'akan ale amonit anbi neno tunan amsa. 2:11 Ale ahake neno tunan le anmatani nesi ma anmu'i kuasat na'ko ale kulu apoiba nane, sin ka na'uab fa amle'ut neu ale amonit apinat neki a'at kle'at anbi Uisneno human. 2:12 Mes ale kulu apoiba nane, sin onle mu'it ka maneka, le nahoni sin neu hen heke sin ma anlolo sin. Sin ka natenab fa al, sin mo'e natuin sin nek tenab, talan te sin na'akan lasi le sin ka nahinef neki ale uab akle'at. Es nane natuin sin mo'et, of sin namle'u on mu'it alalu. 2:13 On seunbanit neu sutais le sin anmo'e' nalali, of sin sutai mane'at. Neu sin, lasi le anhalin sin nekan esle' anmo'e sa' anbi manas neu he naminab sin aon. Leka sin antoko ma anbukae nok ki, sin le nane alahit ma amolemut fun sin mafun nok nek sinmakat. 2:14 Fun sin kan lenan fa mo'et asanat, ma sin nek malinat esle' hen kiso bife akaket. Ma atoni le in palsait anlimae sin anfuli. Sin nekan antak anbi lasi akomat. Sin le nane atoni masukat ma male'at. 2:15 Sin ka nao natuin fa lalan mneo, es nane sin anseken. Sin nao natuin Nai Bileam, Nai Beor anmone in lalan, le anlomi he napeni noni na'ko in mo'et amle'ut. 2:16 Mes Nai Bileam napeni fainekat matani, natuin in mo'et amle'ut nane, leka in bikase luke mnanu amonot na'uab neki han atoni. Ma na'seke mafefa knino nane he nasnasab in mo'et amaunu nane. 2:17 Ale kulu apoiba nane, sin onle oe mata le anmeti, onle nipu le anin anfu neki. Uisneno naloitan nalali bale mesokan neu sin. 2:18 Sin anmo'e lasi amasat le luman kun. Sin anpake lasi kake he namofu ale atoni le fe nafetnok na'ko monit aseket. 2:19 Ale kulu apoiba nane sin anba'an lasi ao sona neu ale atoni nane, mes sin ana'etnok neu taos mo'et le nale'un mansian fun atoni le kan be'uf sa'es, in anfani ate neu le anbe'u in. 2:20 Leka atoni nafetnon na'ko ale kuasat pah pinan le nahutab mansian fun in nahin Usif tunan ma hit Uis kesel Afetin Yesus Neno Anan namuni te naleo nan anteni tal ale kuasat nane anbe'u in, atoni nane in monin namle'u nesin na'ko in monit ahunut. 2:21 Leko nesi ale atoni humaf nane le ka nahin lalan amneot na'ko Uisneno, na'ko sin nahine, mes namuni te sin ka natuin fa ale plenat le Uisneno anfe nalali neu sin. 2:22 Sa' le sin anmo'e nane, namneob nani uab leta i le nak. "Asu of nah nafani sa' le in lo'an nalali," ma "Fafi le naniu nalali, of anfani ma ankuk anbi klofo."
3:1 Bae benu manekat! I sulat hae nua le au tui ani neu ki. Anbi au sulat nuasin, au ube'ab nek tenab muti le anbi ki. 3:2 Au toti he nati' hi mimnau ale a'at le afi mefafa Uisneno sin na'uab nani ma plenat na'ko Usif tunan, Kesel Afetin, le natiaba nani neu ki natuin haef knino sin. 3:3 Nahun-hunu hi mes mihin, nak anbi neno-neno hatas amsoput, of atoni le nek sinmakat naplenat sin monin anbol neman. Sin of nakle'at ki 3:4 ma na'uab nak on i, "Nak on Usif tunan hen koenon nem! Tomas i In es me ka? Hiti mnais enu anmatenen, mes ale sa' fe nabala onle neno anfatan pah pinan." 3:5 Sin asafanu ka nahinen fa, nak neno tunan ma pah pinan nabelon neki oe, 3:6 ma nak neki oe amsa -- , esle' oe na'ko oe sako -- , pah pinan un-unu nane nale'un nani. 3:7 Mes neno tunan ma pah pinan le muni i, mapanat natuin a'an Uisneno nane amsa he naneku nani neki ai. Tomas i neno tunan ma pah pinan fe mapanat talan te anbi neno ale atoni le ka nahin Uisneno mahukum ma malenat. 3:8 Mes bae benu manekat, lasi nono mese i, kais him nikan nak anbi Usif tunan matan, neno mese on ton nifun mese, ma ton nifun mese on neno mese. 3:9 Usif tunan ka nane'aon fa nok In fef ba'an, maski anmu'i atoni le natenab nak In nanea'on. Mes In seusaban ki, fun In kan lomif he atoni mese namle'u. In anlomi he nati' ale atoni nateunon na'ko sin sanat-sanat. 3:10 Mes Usif tunan In neno hatas of nem on abakat. Bi neno nane neno tunan of namneku nok alotos ini punun, ma ale sa' le anbi neno tunan of anput anbi ai ma pah pinan nok in nesan of namneku. 3:11 Fun ale sa' nane of naskuku nani onane, so hi monim nane naknino neu Uisneno, 3:12 leka him pao ma minapa Usif tunan In neno hatas amnemat. Bi neno nane neno tunan of anput nain oke, ma natuin in malalan, ale sa' abit neno tunan of namnoe. 3:13 Mes hit atpao sa' le Uisneno anba'an nani, esle' neno tunan fe'u ma pah pinan fe'u, le lasi amneot mapeni anbin. 3:14 Es nane, bae benu manekat, leka hi fe ampao neno nane, him hataniom he nati' hi monim naknino ma ka kobe fa ambi Uisneno human. Ma ampanat lasi mafutus alekot nok Uisneno. 3:15 Him kiso Usif tunan In seusabat neu ki, on leku manuan le anfe nani neu ki he nati' hi mipeni honis. Nai Paulus, hit bae menakat, antui nalali onane amsa neu ki. In antui nane neki hine le Uisneno anfe nalali neu in. 3:16 Anbi in sulat sin, Nai Paulus antui ale lasi nane. Namneo anbi in sulat-sulat nane anmu'i lasi nono fauk le susal he nahin nani. Ma atoni le sin ka nahin nani fa ma sin nek palsait nane ka namepaf, sin naklelo ma napenub sa' le Nai Paulus antui nani. Onane amsa sin anmo'e antom lasi bian na'ko Sulat Knino. Sa' le sin an moe nane neki naskuku sin monim. 3:17 Mes neu hi, bae benu manekat, hi mihin milali lasi i. Es nane him panat nai, he nati' kais anhel neki ki neu ale atoni le ka nahin plenat knino sin lalan asanat, tal hi mineku hi lasi aki'at. 3:18 So hi moni ambi nek mamun Usif tunan, hit Kesel Afetin Yesus Neno Anan, ma so hi amsa mihin In lek-leko. So atpules In, na'ko tomas i talan te nabal-bal! Amin. Na'ko, Nai Petrus
1:1 Sulat i nesan antom A'ar honis, esle' A'an le esan na'ko un-unu. Haim nen milali, ma hai mit milali meki hai matam. Hai mit milali, ma haim na'milali meki hai nimam. 1:2 Leka honis nane nalilon, hai mit mani, es nane haim fe saksi antom neun. Haim eut ki alki antom honis amneot le nabal-bal, le nabua nok Ama, ma le nalile nalali neu kai. 1:3 Sa' le hai mit milali ma amnen, nane amsa haim eut mani neu ki alki, he nati' hi mok kai atmoni nek mese, tamesbok tok Ama ma tok In Anmone Yesus Neno Anan. 1:4 Haim tui lasi i he nati' hit nekak namneo-namneo anmalin. 1:5 I beno le haim nen milali na'ko In Anmone ma le hai mitiaba neu ki. Uisneno lo meusine kun, ma katit fa mesokan anbi In. 1:6 Leka hit tak, hit moni tamesbok tok In, mes hit moni atbi mesokan, nane hit tapoibok ai ta'moe teki hit uab ma hit mo'et. 1:7 Mes leka hit moni atbi meusine onle Uisneno anbi meusine, hit moni nek mese es nok es, ma Yesus In Anmone, In na' naknino kit na'ko ale sanat. 1:8 Leka hit tak, hit kat mu'if sanat, nane hit tapoibok; hit ka tahin fa Uisneno anbi hit nekak. 1:9 Leka hit tahoeb hit sanat-sanat neu Uisneno, of In natiaba In manta'en ma anmo'e ale sa' nok amnonot. In of ansako hit sanat-sanat ma naknino kit na'ko ale amle'ut. 1:10 Leka hit tak, hit kat mo'ef sanat, onane te hit mo'e Uisneno anfani apoiba ma hit ka tabela fa Uisneno a'an anbi hit nekak.
2:1 Au anhenu ki! Au tui ale lasi i neu ki, he nati' kais hi mo'e sanat. Mes leka es anmo'e sanat, hit mui atoin ababat mese, esle' Yesus Neno Anan le amneot nane; In of antoti neu kit anbi Ama matan. 2:2 Nok Yesus Neno Anan nane hit sanat-sanat masako. Ma ka al fa hit sanat-sanat, mes to mansian ok-oke sin sanat amsa. 2:3 Kalu hit tatuin ale plenat Uisneno, nane on taka nak hit tahin Uisneno. 2:4 Atoni le nak: "Au uhin Uisneno," mes In ka natuin fa In plenat, atoni nane apoiba ma in ka nahin fa Uisneno anbi In nekan. 2:5 Mes atoni le natuin a'an Uisneno, atoni nane nek Uisneno nok alekot. Nok lasi nane hit tahin, nak hit moni tamesbok tok Uisneno. 2:6 Sekau le in nak in moni namesbon nok Uisneno, in mes anmoni onle Neno Anan. 2:7 Bae benu manekat! Au tui i ka plenat fe'u fa. I plenat amna le natiaba nalali neu ki na'ko un-unu; esle' beno na'ko Uisneno, le afi him nen milali. 2:8 Maski onane, plenat le au tui fe'u amsa; fun In amneot mamnita anbi Neno Anan ma anbi ki nok. Fun mesokan nane anfinien ma meusine amneot anpinen. 2:9 Atoni le in nak in anbi meusine, mes na'unu nekan neu in baef, in nabalah anbi mesokan talan te leku i. 2:10 Atoni le nek in baef, atoni nane anmoni anbi meusine, ma katit fa sa' es anbi in, le of anmo'e atoni bian hen mofu anbi sanat. 2:11 Mes atoni le na'unu nekan neu in baef, in nabalah anbi mesokan, In nao anbi mesokan, ma in ka nahin fa he nao neu me, fun mesokan nane anmo'e in tal in ka nitaf. 2:12 Au tui neu ki, Anah-anah, fun hi sanat masako natuin Neno Anan. 2:13 Au tui neu ki, Amaf-amaf, fun hi mihin milali In, le esan na'ko un-unu. Au tui neu ki, hoi Atoin munif, fun him be'u milali lasi Amle'ut. 2:14 Au tui neu ki, Anah-anah, fun hi mihin Amaf Uisneno. Au tui neu ki Amaf-amaf, fun hi mihin In, le esan na'ko un-unu. Au tui neu ki, hoi Atoin munif, natuin hi mibe'i. Ma Uisneno In a'an nabalah anbi hi nekam ok-oke ma him be'u milali lasi Amle'ut nane. 2:15 Kais him nek pah pinan ma sa' le anbi pah pinan i. Kalu him nek pah pinan, hi kam nekaf Ama. 2:16 Fun ale sa' le anbi pah pinan i -- esle' ale sa' le ansinmakan natuin ta'uf mansian le asanat, ale sa' le sin nit ma anlomi he napeni -- ma ale sa' le anbi pah pinan i le sin nanaebok ale lasi nane ka na'ko fa Ama mes na'ko pah pinan. 2:17 Pah pinan ma ale sa' anbine le mansian ansinmakan nani, of namneku. Mes atoni le natuin lomin Uisneno, anmoni nabala talan te nabal-bal. 2:18 Au anhenu, leku amsoput anhaumaken. Afi aneut nalali neu ki nak: Neno Anan In musu of nem; ma tomas i Neno Anan In musu namfau anbol nem. Nane on taka, nak neno amsoput anhaumaken. 2:19 Musu-musu Neno Anan nane esle' atoni-atoni le nao nasaitan kit, fun sin le nane hit ka atoni sin. Kalu sin le nane hit atonin, of sin nabalah nok kit. Mes sin anpoi na'ko kit, he nati' hit tahin nak katit fa atoni mese na'ko sin le namneo-namneo antam neu kit. 2:20 Mes hi mipeni milali Smanan Knino le anop nalali natuin Yesus Neno Anan. Es nane te hi ala ki mihin Uisneno le amneot. 2:21 Au tui i neu ki ka natuin fa hi ka mihin fa Uisneno le amneot, mes natuin hi mihin mani, ma hi amsa mihin, nak Uisneno amneot nane fe ka napoibon fa. 2:22 Apoiba nane esle' atoni le na'uab nak Yesus nane ka Kesel Afetin le Uisneno anba'an nani. Atoni nane Neno Anan In musu. In es natotan Ama ma Anmone. 2:23 Atoni le natotan Anmone, in amsa kan simof Ama. Atoni le ansimo Anmone, in ansimo Amaf amsa. 2:24 Es nane beno le him nen milali na'ko un-unu so him panat lek-leko anbi hi nekam. Kalu beno nane him panat lek-leko, of hi moni mimesbom piut mok Anmone ma mok Amaf. 2:25 I lasi manba'an le Neno Anan anba'an nani neu kit, esle' honis nabal-bal. 2:26 Au tui lasi i neu ki, antom ale atoni le nami he nasekeb ki. 2:27 Mes neu hi, Neno Anan an op nalali In Smanan neu ki. Ma leka In Smanan anbi ki atoni bian ka nabe'i he nanoina ki. Fun In Smanan nanoina ki antom ale sa'; ma sa' le In nanoina nane namneo, ka napoibon fa. Es nane, so hi mituin sa' le Smanan Knino nanoina nani, ma so hi moni mimesbom mok Neno Anan. 2:28 Es nane au anhenu, moni mibala mok Neno Anan, he nati' anbi leku In koenon nem, hit hake atbi In matan nok amaspetis, ma kais ta'tolo' natuin atmae. 2:29 Hi mihin milali mak Neno Anan anmoni natuin Uisneno lomin. Es nane hi mes mihin amsa mak ale atoni le anmoni natuin Uisneno lomin nane Anah Uisneno.
3:1 Kiso, Uisneno manekan nae le'uf neu kit, talan te antek kit nak anah-anah Uisneno; ma namneo onane hit lo anah-anah Uisneno. Natuin lasi nane pah pinan amle'ut i ka nahin kit fa, fun pah pinan ka nahinef Uisneno. 3:2 Bae benu manekat! Muni i hit lo anah-anah Uisneno kit, mes hen bol neu kit onme, nane fe ka mahine fa. Mes hit tahin nak kalu Neno Anan ankoenon nem, hit of atfani onle In, fun hit of tit In anbi In masan le namneo. 3:3 Ale atoni le anmu'i afnekat i neu Neno Anan, anpanat in aon he nati' namneo-namneo knino, muti na'ko sanat onle Neno Anan amsa knino. 3:4 Atoni le anmo'e sanat, atanhai plenat Uisneno amsa. Fun sanat nane lo atanhai plenat Uisneno. 3:5 Ma hi mihin, mak Neno Anan ankoenon nem he nati' ansako ale sanat mansian, ma kan mu'if sanat anbi In. 3:6 Ale atoni le anmoni namesbon nok Neno Anan kan mo'ef sanat piut-piut. Atoni le anmo'e sanat piut-piut, ka nit fa Neno Anan ma ka nahinef In. 3:7 Au anhenu kais mimautuom he nati' atoni bian nasekeb ki. Atoni le anmo'e natuin Uisneno lomin, nem na'ko Uisneno, onle Neno Anan amsa nem na'ko Uisneno. 3:8 Mes atoni le anmo'e sanat piut-piut, in na'ubon na'ko nitu, fun nitu nane anmo'e sanat na'ko un-unu. Natuin lasi i, Uisneno Anmone ankoenon nem he nati' naskuku nitu in mepu. 3:9 Atoni le anfani Anah Uisneno, kan mo'ef sanat piut-piut, fun Uisneno nabalah anbi in. Ma natuin Uisneno nane in Amaf, in ka nabe'i fa hen mo'e sanat piut-piut. 3:10 In on taka neu anah-anah Uisneno ma anah-anah na'ko Nitu. Atoni le kan mo'ef Uisneno lomin, ai ka nekaf in baef, in ka Anah Uisneno fa. 3:11 Na'ko un-unu him nen milali beno i: Nak hit mes atmanek es nok es. 3:12 Kais hit onle Nai Kain le na'ubon na'ko amoe Amle'ut ma namate in olif. Nansa ka es Nai Kain namate in olif? Fun ale sa' le in anmo'e nane ka namneof, ma ale sa' le in olif anmo'e nane namneo. 3:13 Bae benu manekat, kais hi mimkak, leka pah pinan na'unu nekan neu ki. 3:14 Hit tahin talali, nak hit poi ta'ko maten ma ta'oni teu honis nabal-bal. Hit tahin lasi nane fun hit nek hit bae benu sin. Atoni le kan mu'if manekat, in nabalah anbi maten. 3:15 Atoni le nekan na'unu neu in bae, nane in atoni a'otes, ma hi mihin, mak atoni a'otes kan mu'if honis nabal-bal. 3:16 Nok lanan i hit tahin manekan Uisneno. Neno Anan nana'at nalali In monin neu kit. Es nane hit amsa mes tana'at hit monik neu hit bae sin! 3:17 Kalu atoni mese anmu'i maus pah pinan, ma in nit in baef anbi manukat, mes in kan lomif hen tulun in baef nane, leka me atoni nane nabe'i na'uab nak in nek Uisneno? 3:18 Au anhenu, kais hit manek al anbi fefak ai al teki a'at. So hit manek teki manekat amneot, le talile teki hit mo'et. 3:19 Anbi lasi i hit tahin nak hit on atoni le na'ubon na'ko Uisneno, tal hit nekak antainine anbi Uisneno matan. 3:20 Kalu hit nekak nasanab kit hit tahin nak Uisneno naek nesin na'ko hit nekak nane ma In nahin ale sa'-sa'. 3:21 Bae benu manekat, leka hit nekak ka nasanab kit fa, nabe'i hit athake atbi Uisneno matan nok amaspetis. 3:22 Ma sa' na'ko In of hit tapeni, fun hit tatuin Ini plenat sin ma atmoe sa' le anhalin In nekan. 3:23 Lasi le In naplenat neu kit, esle': Hit mes atpalsai neu In Anmone, esle' Yesus Neno Anan; ma hit mes atmanek es nok es, onle Neno Anan naplenat nalali neu kit. 3:24 Ale atoni natuin neu ale plenat Uisneno, anmoni namesbok nok Uisneno, ma Uisneno namesbon nok sin. Mat hit tahin nak Uisneno anmoni namesbon nok kit, fun In anfe nalali Ini Smanan neu kit.
4:1 Bae benu manekat! Kais him palsai neu ale atoni le nak sin anmu'i Smanan Uisneno, mes amsu' mihunun sin he mihin mak smanaf le anbi sin nane na'ubon na'ko Uisneno ai kahaf. Fun mafefa apoiba namfau nasitbon nalali neu me-me. 4:2 Anbi lasi i hi mihin mak nane Smanaf Uisneno ai kahaf. Atoni le anmanaku nak Usif nane Kesel Afetin le ankoenon neu pah pinan on mansian, atoni nane anmu'i Smanaf le nem na'ko Uisneno. 4:3 Mes atoni le kan manaku fa lasi i antom Yesus, kan mu'if Smanaf Uisneno. Atoni nane anmu'i Smanaf na'ko musu Neno Anan. Him nen milali nak Smanaf nane of nem, ma tomas i in nem nalali anbi pah pinan i. 4:4 Mes au anhenu, hi mi'ubon mi'ko Uisneno. Him be'u milali ale mafefa apoiba, fun Smanaf le anbi ki anmu'i kuasat nesin na'ko smanaf le anbi ale atoni pah pinan ini. 4:5 Mafefa-mafefa apoiba nane na'uab lasi-lasi pah pinan, ma pah pinan natuin sin uab, fun sin na'ubok na'ko pah pinan. 4:6 Mes hit lo anah-anah Uisneno; ma atoni le nahin Uisneno natnin hit uab amsa. Atoni le ka Uisneno Ini, ka nenaf hit uab. Anbi lasi i hit tahin, lasi suli na'ko Smanaf le antopu atoni he nahin Uisneno ma smanaf le he nasekeb atoni. 4:7 Bae benu manekat! Aim nai hit manek es nok es, fun manekat nane na'ko Uisneno. Atoni le anmu'i manekat, nane anah Uisneno ma in nahin Uisneno. 4:8 Atoni le kan mu'if manekat, in ka nahin fa Uisneno, fun Uisneno nane manekat. 4:9 Uisneno nalile In manekan anbi hit nekak, es nane Uisneno ansonu In Anmone mes tilo nem neu pah pinan, he nati' hit tapeni honis natuin In Anmone. 4:10 Manekat nane esle' i: Hit es kat nek Uisneno, mes Uisneno In nek kit ma ansonu In Anmone he nati' nok In hit tapeni ampun neu hit sanat sin. 4:11 Bae benu manekat! Leka Uisneno nek kit onane, hit amsa so atmanek es nok es. 4:12 Katit fa atoni mese le nit Uisneno, mes kalu hit manek es nok es, Uisneno namesbon nok kit ma In manekan nanokbon anbi kit. 4:13 Fun Uisneno anfe nalali kit In Smanan, es nane hit tahin nak hit moni tamesbok tok Uisneno, ma Uisneno anmoni namesbon nok kit. 4:14 Hai mit milali Anah Uisneno ma amsaksi neu atoni bian nak Ama ansonu In Anmone neu pah pinan hen fain Kesel Afetin neu pah pinan i. 4:15 Atoni le nateb, nak Yesus nane Uisneno Anmone, Uisneno anmoni namesbon nok In, ma In namesbon nok Uisneno. 4:16 Hit tahin ma atpalsai manekan Uisneno neu kit. Uisneno nane manekat, ma atoni le nabala anbi manekat, in namesbon nok Uisneno ma Uisneno namesbon nok in. 4:17 Anbi lasi i, manekan Uisneno nanokbon anbi kit, he nati' hit atmu'i nek amaspetis bi neno lef lasi. Hit of atmu'i nek amaspetis, fun hit moni atbi pah pinan i onle Neno Anan anmoni. 4:18 Atoni le anmanek, ka nahinef tenab amtaus; fun manekat le nanokbon naneku ale tenab amtaus. Onane te, manekat fe ka nanokbon fa anbi atoni amtaus in aon, fun lasi amtaus anbol anmatom nok kasat. 4:19 Hit manek fun Uisneno nek nahunun kit. 4:20 Leka atoni es nak, "Au nek Uisneno," mes in nekan na'unu neu in bae, nane in atoni apoiba. Atoni le in ka nekaf in bae le in nit nani, leka me in he nek Uisneno le in ka nitef. 4:21 Plenat i hit simo na'ko Neno Anan. Atoni le in nek Uisneno, in mes he nek in bae amsa.
5:1 Atoni le nekan nateb knino, nak Yesus nane Kesel Afetin le Uisneno anba'an nani, atoni nane Anah Uisneno. Ma atoni le in nek Ama, in nek Anmone amsa. 5:2 Nok lanan i hit tahin tak hit nek anah-anah Uisneno: hit nek Uisneno ma tahin Ini plenat sin. 5:3 Fun kalu hit nek Uisneno, nane on hit tatnin neu Ini plenat sin. Ma Ini plenat sin ka mafena fa neu kit, 5:4 fun ale anah Uisneno mes anbe'u pah pinan amle'ut i. Ma hit be'u pah pinan teki hit nek ateb knino. 5:5 Sekau es hen be'u pah pinan amle'ut ka? So al atoni le nekan nateb nak Yesus nane Anah Uisneno. 5:6 Yesus Neno Anan le nem neu pah pinan neki In oe bobok tetus ma neki In na'. In nem ka al fa neki oe, mes neki oe ma na'. Ma Smanan Uisneno es anfe saksi nak nane namneo, fun Smanaf nane amneot. 5:7 Es nane anmu'i tenu le ansaksi anbi neno tunan esle': Ama, A'an Uisneno ma Smanan Knino ma sin tenu sin mese. 5:8 Ma sin tenu le ansaksi anbi pah pinan: Smanan Knino ma oe ma na', sin teun sin saksi papmese. 5:9 Hit palsai neu saksit mansian, mes saksit Uisneno anmatani nesi anten. Nane saksit le Uisneno anfe nalali antom In Anmone. 5:10 Es nane, atoni le anpalsai neu Anah Uisneno, in simo nalali saksit nane anbi in nekan; mes atoni le kan palsai fa neu Uisneno, in mo'e on Uisneno apoiba, fun in kan palsai fa sa' le Uisneno, nauab nani antom In Anmone. 5:11 Ma saksit nane on i: Uisneno anfe nalali neu kit honis nabal-bal ma In Anmone nane lasi honis un. 5:12 Atoni le anmu'i Uisneno Anmone, in anmu'i honis nane. Ma atoni le kan mu'if Uisneno Anmone, in kan mu'if honis. 5:13 Au tui ale lasi i, he nati' hi le ampalsai neu Uisneno Anmone, mihin mak hi mu'i milali honis nabal-bal. 5:14 Ma nabe'i hit athake atbi Uisneno In human, fun hit palsai nak In nen ma natnin hit onen totis, kalu hit toti sa' am sa' le natai nok In lomin. 5:15 Fun hit tahin nak In nen nalali kit kalu hit toti neu In, hit tahin amsa nak In fe nalali kit sa' le hit toti na'ko In. 5:16 Leka hi mit hi bae anmo'e sanat le ka neki fa neu maten, him onen toti neu Uisneno; ma Uisneno of anfe honis neu atoni nane. I natai nok sin, le sin sanat ka neki fa neu maten. Mes anmu'i sanat le neki neu maten, ma au ka u'uab fa he nati' him onen toti neu Uisneno antom lasi nane. 5:17 Ale mo'et amle'ut nane sanat, mes anmu'i sanat le ka neki fa neu maten. 5:18 Hit tahin, nak ale atoni le anfani anah-anah Uisneno kan mo'ef sanat piut-piut, fun Uisneno Anmone naneo ma namafo sin, ma Amle'ut ka nabe'i hen mo'e sa'-sa' neu sin. 5:19 Hit tahin, nak hit ta'ubok ta'ko Uisneno, maski pah pinan i ok-oke anbi Amle'ut in kuasat. 5:20 Hit tahin, nak Uisneno Anmone nem nalali ma anfe nalali nek hinef neu kit he nati' hit tahin Uisneno le amneot. Hit moni tamesbok tok Uisneno le amneot ma hit tamesbok tok In Anmone Yesus Neno Anan. In kun lo Uisneno amneot, ma In lo honis nabal-bal. 5:21 Au anhenu, mi'lob hi aom na'ko ale le'u mahuma.
1:1 Sulat i na'ko au, penatua, neu Aina le mabeti natuin Uisneno, ma neu Aina in anhenu le namneo-namneo au nek ki. Ka al fa au, mes ale atoni le nahin beno Uisneno le amneot, sin amsa nek ki. 1:2 Fun Uisneno le amneot nabalah anbi hit nekak, ma of nok kit piut talan te nabal-bal. 1:3 So anfe kit tetus, amnaut ma aomina natuin Uisneno hit Ama, ma Yesus Neno Anan, Ama Anmone. So ale sa' nane hit mui tani nok nek muti ma nok manekat. 1:4 Au malina nae le'uf fun au uhin nak Aina in anhenu monin nok alekot namnes nok plenat le hit simo na'ko Ama. 1:5 Es nane, Aina, au toti nok matani he nati' hit alkit manek es nok es. Sa' le au toti i ka plenat fe'u fa; plenat i anfe nalali neu kit na'ko un-unu. 1:6 Manekat nane esle' atmoni tatuin Uisneno Ini plenat sin. Ma plenat le him nen milali na'ko un-unu esle' nak hi mes amoni nok manekat es nok es. 1:7 Fun afulit namfau le antam nalali neu pah pinan. Sin le nane atoni le ka nateb fa nak Yesus Neno Anan nem neu pah pinan on mansian. Atoni humaf nane atoni afulit ma Neno Anan In musu. 1:8 Es nane te him panat nai, he nati' kais hi mineku sa' le haim mepu milali neu ki. Him hataniom he nati' him simo hi baen ok-oke. 1:9 Atoni le kan panat fa Neno Anan In lasi noina, mes in beo na'ko sa' le Neno Anan nanoina nani, atoni nane kan mu'if Uisneno. Atoni le nabalah anbi noina Neno Anan nane in anmu'i Uisneno Ama ma Anmone amsa. 1:10 Es nane, kalu anmu'i atoni le nem ma ane'tun neu ki noina le Neno Anan ka nanoina nane, kais him simo atoni nane ambi hi ume; kais him tek aomina neu in amsa. 1:11 Fun atoni le antek aomina neu atoni humaf nane, in amsa anmo'e amle'ut nok atoni nane. 1:12 Anmu'i lasi namfau le au he uton neu ki, mes leko nesi kais nok sulat ma oe metan. Au ufnek he et eu ki ma umolok ok ki he nati' hit nekak namneo-namneo anmalin. 1:13 Anah-anah na'ko Aina ho tata le hom nek sin anbi i ansonu tabe neu Aina.
1:1 Au bae Nai Gayus le au nek ani! Au, penatua, le namneo-namneo a'nek ko, 1:2 au onen toti he nati' hom aomin ma ale sa' lek-leko nok ko, papmese onle ho smanan lek-leko amsa. 1:3 Au malina nae le'uf leka bae knino sin fauk neman ma ansaksi ho nek aki'at neu beno Uisneno le amneot, fun ho moni piut nok nek muti mutuin beno nane lomin. 1:4 Katit fa sa' esle' anhalin au nekak, nesi na'ko le au nen nak au anhenu nok nek muti, natuin beno na'ko Uisneno. 1:5 Bae manekat, tebes ho mu'ki ambi mepu le ho mo'e mani neu ho bae manekat sin; fun ale atoni Slani le fe ho ka muhin fa sin amsa, hom tuthae sin. 1:6 Sin eut nalali neu tolas knino anbi i antom ho lasi manekat. So hom tulun sin he nati' sin nasopu sin lanan. So ho mo'e lasi nane meki mo'et le anhalin Uisneno nekan, 1:7 fun ho bae sin a'nao hen tuthae Neno Anan. Sin mepun mes kan simon fa sa' na'ko ale atoni le kan palsai fa neu Neno Anan. 1:8 Es nane, hit atoni Slani mes atulun hit bae benu le anmo'e onane, he nati' hit mepu tok sin he tanaoba beno le amneot na'ko Uisneno. 1:9 Au tui ulali sulat tuk-tuka neu tolas knino, mes Nai Diotrefes le anlomi hen fani atopus anbi tolas knino, kan lomif he natuin kau. 1:10 Kalu au et, of au u'uab antom sa' le in anmo'e nalali, es le antom ale lasi amle'ut ma lasi poiba le in namolok nalali antom kai. Mes ale lasi nane fe kan tiaf neu in. Leka bae knino atoni Slani nane neman, in kan lomif hen simo sin. Mes in nakain ale atoni le anlomi hen simo bae knino nane sin, ma in lelu ale atoni nane sin hen poi na'ko tolas knino. 1:11 Bae benu manekat, kais mituin mo'et amle'ut so mituin neu mo'et alekot. Atoni le anmo'e alekot, in na'ubon na'ko Uisneno. Mes atoni le anmo'e amle'ut, in fe ka na'eku fa nok Uisneno. 1:12 Ale atoni anpules Nai Demetrius. Ma ale Amneot amsa anpules in. Hai amsa ampules in, ma ho muhin nak hai pules nane namneo. 1:13 Anmu'i lasi namfau le au he eut neu ko, mes au utenab leko nesi kais natuin sulat. 1:14 Au ufnekan ka lob antenif of au ue'ku ok ko, ma of hit tamolok mat-mat. 1:15 Ao mina ma aoleko neu ko! Ho bae knino sin anbi i ansonu tabe neu ko. Mutiaba au tabe neu au bae knino sin mes-mese.
1:1 Bae benu le anboin nalali ki ma le anek ki natuin Uisneno hit Ama ma anpanat ki neu Yesus Neno Anan. On ate Yesus Neno Anan, au -- Nai Yudas -- Nai Yakobus in olif, 1:2 ufnekan he nati' Uisneno anfe tetus, amnaut ma aomina neu ki nok athoes. 1:3 Bae benu manekat! Au lomi namneo-namneo he tui sulat neu ki antom lasi honis le hit alkit tapeni talali. Mes tomas i au upeni manuan he fainek ki eki sulat i he nati' hi mautnom piut neu palsait le Uisneno anfe nalali hae mese tal nabal-bal neu to knino In. 1:4 Fun anmu'i atoni le antam nok alsi tolo' anbi hi atnanam. Sin le nane atoni abulalut le nate'un beno antom hit Uisneno In amnaut, he napeni manuan oke te natiaba sin nek sinmakat pah pinan. Sin natotan Yesus Neno Anan, anmu'i kuasat ma hit Usif. Na'ko neno unu naloitan nalali kasat neu sin, onle antui nalali anbi Sulat Knino. 1:5 Ale lasi nane hi mihin milali. Mes au lomi he umnauba teni ki, antom Usif tunan anfe honis neu to onme na'ko pah Mesir, mes namuni te nale'un anteni ka apalsait anbi sin. 1:6 Mimnau amsa ale ahake neno tunan le antanhai batas-batas na'ko sin kuasat, talan te nao nasaitan bale le sin namaika anbin. Uisneno anfutu ahake neno tunan nane sin neki kolen besi nabal-bal anbi bale mesokan. Sin nabalah piut anbi bale nane tal nafek lasi neu sin bi Neno hatas naek. 1:7 Mimnau amsa kot Sodom ma Gomora ma ale kot bian le anfun ma natef sin le anmo'e lasi papmese onle ahake neno tunan sin. Sin anmo'e lasi kake, ma bulalu, talan te sin napeni kasat neki ai maputu nabal-bal hen fani amnaut neu atoni ok-oke. 1:8 Onane amsa ale atoni nane nasmanan ma nunmain talan te sin mo'en sanat neu sin aon. Sin nabaun Uisneno In kuasat, oke te sin na'akan ale amonit apinat abit neno tunan. 1:9 Nai Mikhael, le anfani nakaf neu ale ahake neno tunan, in kan mo'ef onane, leka in matoe nok nitu anbi matoes antom sekau le of napeni Nai Musa in aon nitu, Nai Mikhael ka nabe'i fa hen lefi santuaf in lasi neki a'at akle'at. Nai Mikhael al na'uab nak, "Usif tunan of nakain ko neki matani!" 1:10 Mes atoni nane sin na'uab nakle'at ale sa' le sin ka nahinef. Sin onle mu'it le ka maneka, le nahin lasi nane neki sin nekan pah pinan. Mes natuin ale lasi nane neki sin neu amle'ut. 1:11 Amle'ut neu sin! Sin natuin nalali lanan le Nai Kain nao natuin. Fun he napenin baen ai noni, sin natam sin aon neu nonof aseket onle Nai Bileam. Ma sin amsa naskuku natuin sin mo'en lasi matoes onle Nai Korah. 1:12 Leka hi mo'e fesat, ale atoni nane sin es anfani lahi neu ki. Sin nahan nok palu', fun sin kan maen fa ma al sin namnau sin aon. Sin onle nope le anin anfu neki, mes ka nasanut fa ulan. Sin amsa onle hau le ka nafuaf maski anbi in etin; ale hau le anbok nalali sini ba'an ma anmaet nunfin. 1:13 Sin onle tasi le anpesen ma nafule, onane amsa sin mo'et nane nafule ma namaeb sin. Sin onle afkun le na'oni ma Uisneno naloitan nalali bale mesokan neu sin talan te nabal-bal. 1:14 Nai Henokh, atoni bat hitu na'ko Nai Adam, afi anbeno nalali neu ale atoni i. Nai Henokh nak, "Kiso, Usif tunan of ankoenon nem nok In ahake neno tunan nifun-nifun, 1:15 ma anlef lasi neu ale mo'et amle'ut na'ko ale atoni le ka nahin In. Ma In of anlef lasi amsa neu ale a'at akle'at le ale atoni asanat antek nani neu Uisneno." 1:16 Ale atoni nane sin es namunu ma an anbai piut. Sin monin natuin sin sinmakat asanat. Sin pules sin aon, ma anlomi atoni he nati' sin napenin osaf. 1:17 Mes neu hi, bae benu manekat! Mimnau nai ale lasi le afi hit Usif. Yesus Neno Anan In haef knino sin anetun nalali neu ki. 1:18 Fun sin anetun nalali neu ki nak, "Anbi neno hatas amsoput, of anmu'i atoni le naslaet ki, le sin moni natuin sin mo'et sinmakat amle'ut." 1:19 Sin le nane atoni le anpolo ma anbeti lasi nek mese na'ko to, natuin sinmakat ma nek tenab pah pinan. Sin le nane atoni le kan mu'in fa Smanan Knino. 1:20 Mes hi, bae benu manekat, so him panat nai hi nek ateb knino hi nek ateb nane knino le'uf. Oke te amonen toti nai meki kuasat Smanan Uisneno, 1:21 ma hi moni piut ambi Uisneno In mafon amanekat ma ampao hit Usif, Yesus Neno Anan In nek mamun le of anfe ki honis nabal-bal. 1:22 Milile lasi manekat neu sin le sin nekan na'oni. 1:23 Amhel mipoitan sin na'ko ai he mihoni sin. Mes milile lasi manekat neu atoni bian amsa nok nek amtaus. Mes hi mainisin sin tainusat le nalahi nani neki sin sinmakat asanat. 1:24 Uisneno, le anmu'i kuasat hen panat ki he nati' kais him bel ma mitsel, mes In nok ki neu In human apinat nok malinat ma ka kobe fa. 1:25 Uisneno mestilo, hit Afetin, natuin Yesus Neno Anan hit Usif, In kun Uisneno Apinat, anaet amatani ma akuasat na'ko un-unu talan te muni i ma talan te nabal-bal! Amin.
1:1 Sulat in nesan antom sa' le Yesus Neno Anan nalile nani antom ale lasi le of anbol. Uisneno ane'tun nani neu Neno Anan he nati' In nalile neu ate-ate Uisneno sa' le hen bol nem laba. Neno Anan ansonu In ahake neno tunan neu In ate Nai Yohanes, hen etun ale lasi nane neu in. 1:2 Oket Nai Yohanes anpeo ale lasi le in nit nalali; ma i on lasi etus antom han ba'an Uisneno le natiaba nani natuin Yesus Neno Anan. 1:3 Ua alekot neu atoni le ansoi nani ma atoni le natnin nani beno le matui anbi sulat i ma natuin nani sa' le matui anbine. Fun ka lob anteni ale lasi of anbol. 1:4 Bae benu le anbi Tolas Knino pukan hitu anbi pah Asia! Au, Nai Yohanes, ufnekan he nati' Uisneno anfe amnaut ma aomina neu ki -- esle' In le esan ma un-unu le esan ma of ankoenon nem -- ma na'ko smanaf hitu le anhake anbi In mau toko mnatu matan, 1:5 ma na'ko Yesus Neno Anan, saksi aki'at. In es anfen anfan nahunu na'ko amates, ma anmu'i kuasat neu ale uisfin bi pah pinan i. Neno Anan le a'nek kit ma nafetin kit na'ko hit sanat neki Ini maten. 1:6 Ma anmo'e kit het fani uf mese, neu ale ana' fuat knino neu Uisneno, In Amaf, Yesus Neno Anan apinat ma akuasat talan te nabal-bal. Amin! 1:7 Kiso, In koenon nem nok nope! Ale atoni of nit In, ma sin amsa es napau In. Ma ale uf bi pah pinan of ankae neu In. Koi, namneo, Amin! 1:8 "Uisneno tunan nakua a'an, Au ahunut ma amunit, le esan ma afi te esan ma le of ankoenon nem, le Akuasat Afinit." 1:9 Au Nai Yohanes, hi bae knino le nek bua nok ki anbi hamu'it, le atsutai tani on atoni le natuin Yesus. Anpolin kau neu Pulu Patmos natuin au etun beno na'ko Uisneno, le Usif Yesus natiaba nani. 1:10 Bi neno Usif tunan, Smanan Uisneno naplenat kau oket au nen hanaf mese le naek -- onle to'is hanan -- na'uab anbi au kotik. 1:11 Hanaf nane nak, "Amtui mani sa' le ho mit, ma amsonu sulat nane neu Tolas Knino pukan hitu esle': Efesus, Smirna, Pergamus, Tiatira, Sardis, Filadelfia, ma Laodikia." 1:12 Au ukle'ok he kiso sekau es na'uab neu kau. Oke te au it tet paku hitu le anmo'e na'ko mnatu. 1:13 Anbi ale tet paku nane sin atnanan, atoni mese anhake mamnita onle mansian. In anpake sobalu betkone le amnanun ante haen. Anbi Ini basan in pake futu basaf mnatu. 1:14 Ini nakfunu muti onle bibi kase funun, muti on aba'nasu In matan anpin onle ai; 1:15 In haen naklima onle nit molo le notu anbi ai fla. In hanan napunu onle oe satan. 1:16 In niman ane'u ana' afkun hitu ma suni mese le na'aik koti mat anpoi na'ko In fefan. In human anpin nalim onle manas leka in pinan namtetu. 1:17 Leka au kiso it In, au sukbok bi In matan onle atoni amates. Mes In poh kau neki In niman a'ne'u oke te nak, "Kais mumtau! Au ahunut ma es amunit. 1:18 Au lo In kun es amonit! Au mate mes hom kiso, Au moni talan te nabal-bal. Au mui kuasat neu lasi maten ma neu ale atoni amates sin bale. 1:19 Es nane amtui nai ale lasi le ho mit, le anbol bi batan i ma of anbol bi neon amnemat. 1:20 I lasi tolo' na'ko afkun hitu le ho mit sin bi Au nimak ne'u ma na'ko tet paku hitu mnatu nane: Afkun hitu nane esle' ahake neno tunan Tolas Knino pukan hitu, ma tet paku hitu nane esle' Tolas Knino pukan hitu."
2:1 "Amtui nai neu ahake neno tunan Tolas Knino anbi Efesus mak on i: I han ba'an na'ko In le ana' afkun hitu anbi In niman ne'u ma nao'inson anbi tet paku hitu mnatu sin atnanan. 2:2 Au uhin sa' le Ho mo'e: ho mepu matani ma ho malan matani. Au uhin, nak ho kam lomif hem fe nekam neu ale atoni amle'ut. Ma atonin le antek sin aon nak haef knino, mes kahaf, fun hom su' sin ma ho mupeni sin nak sin apoiba. 2:3 Hom seusab ma amsutai natuin Au, ma ho nekam ka namnekuf. 2:4 Mes i Au mafena neu ki: Ho kam nek amteni Kau fa on afi unun. 2:5 Mi te'un nom nai na'ko hi sanat-sanat sin, ma amo'e nai sa'le afi hi mo'e bi tabu ahunut. Kalu kahaf, of Au aum ma ait ufani ho tet paku nane na'ko in balan. 2:6 Mes anmu'i lasi alekot mese anbi ko, esle': Ho kam lomif Nai Nikolaus in atuina sin mo'et le Au amsa ka lomifa. 2:7 Sekau maluke, so in natnin nai sa' le Smanan Uisneno naton nani neu Tolas Knino sin. Sekau le in nis, of Au fe mainuan neu in he nah na'ko hau fua honis le anmoni anbi Po'an Uisneno." 2:8 "Ma amtui nai neu ahake neno tunan Tolas Knino anbi Smirna mak on i: I han ba'an na'ko In le ahunut ma le amunit -- le anmate ma anmoni anfani. 2:9 Au uhin ho susal ma ho mamu'it -- namneo ho amu'it ko! Au uhin sin na'le'uf ko, le antek sin aon nak atoni Yahudi mes kahaf; sin le nane Nitu in to! 2:10 Kais mumtausan mane'at le of hom sutai mani ka lob fa. Fun Nitu of natam hi bian neu o'of hen su' ki. Of him sutai mane'at neno bo'es. So ho mu'ki anbi Kau talan te ho mate, of Au fe ko honis nabal-bal on baen neu amnisat. 2:11 Sekau maluke, so in natnin nai sa' le Smanan Uisneno naton nani neu Tolas Knino sin! Sekau le in nis, of in kan sutai fa sa'-sa' natuin lasi maten hae nua." 2:12 "Ma amtui nai neu ahake neno tunan Tolas Knino anbi Pergamus mak on i: I han ba'an na'ko In, le ana' suni le na'aik koti mat. 2:13 Au uhin ho mumaika anbi me. Ho mumaika anbi bale le Nitu ini toko. Ho mu'ki anbi Kau. Leka Nai Antipas, Au saksi aki'at nane, namate anbi hi atnanam, anbi Nitu in balan, bi leku nane amsa ho ka mutotan fa ho fnekat neu Kau. 2:14 Maski onane amsa anmu'i lasi nono fauk le Au ka lomi fa na'ko ki. Anmu'i atoni fauk anbi ki le natuin Nai Bileam in lasi noina. Nai Bileam nanoni Nai Balak he namofu to Israel neu sanat. Ma anfuil sin he nahan mnah fuat ma hen mo'en lasi kake. 2:15 Onane amsa anmu'i atoni anbi ki atoni le natuin Nai Nikolaus in atuina sin lasi noina. 2:16 Es nane te, miteunom nai mi'ko hi sanat-sanat! Kalu kahaf, of Au aum eu ki laba ma Au maken ok sin eki suni le anbi Au fefak i. 2:17 Sekau maluke, so in natnin nai sa' le Smanan Uisneno naton nani neu Tolas Knino sin! Sekau le in nis, of Au fe mainuan he nah mak muti le natolo'on, ma sin mese-mese of ansimo na'ko Kau fatu muti mese. Ma anbi faut muti nane, antui kanaf fe'u mese, le ka mahine amsa al atoni le ansimo nani." 2:18 "Ma amtui nai neu ahake neno tunan Tolas Knino anbi Tiatira mak on i: I han ba'an na'ko Anah Uisneno, le In matan anpin on ai, in haen naklima onle nit molo mamnotu. 2:19 Au uhin ale sa' le ho mo'e mani -- Au uhin ho manek, ho mu'ki, ho mepu ma ho fnekat, ho malan anbi sutais. Au uhin nak ho mepu amunit i namfau nesin na'ko ahunut. 2:20 Mes i Au mafena neu ko: Hom fe mulali ho nekam neu bi Izebel, bife le antek in aon nak leluf Uisneno. In anfuli Au ate namfau ma nanoina sin hen mo'en lasi kake ma he nahan mnah fuat. 2:21 Ma Au fe neu In leku mainuan he nateunon na'ko in sanat sin, mes in kan lomif he nateunon na'ko in lasi kake nane. 2:22 Mumnau! Of Au bison in tal namen anbi hala tupa. Anbi nane in ma ale atoni le anmo'e lasi kake nokan of ansutain mafena. Ale nane of Au mo'e ani sin anbi leku i -- so mak sin nasanab ale lasi amle'ut nok in. 2:23 Ale in atuina sin of Au umate sin amsa he nati' Tolas Knino ok-oke nahin nak Au es uhin mansian sin tenab ma sin nekan Hi ok-oke of Au seunbanin natuin hi mo'et mes-mese. 2:24 Mes neu hi, le atoni bian anbi Tiatira, le ka natuin fa lasi noina amle'ut nane, ma ka nanoina fa sa' le Nitu na'uab nani neu sin' Au u'uab ak Au of ka usaeb fa neu ki baut le hen hafen ki. 2:25 Mes sa' le anbi ki, him panat lek-leko talan te Au koenok a fain aum. 2:26-27 Ma sekau le in nis, ma in anmo'e piut sa' le anhalin Au nekak, tal namsop of Au fe neune kuasat papmese onle Au simo na'ko Au Ama. Sin of ansimo kuasat na'ko Kau he naplenat uf-uf neki teas besi, ma he naskuku uf-uf nane onle nai tepas klofo. 2:28 Sin of ansimo faif nome na'ko Kau. 2:29 Sekau maluke, so in natnin nai sa' le Smanan Uisneno naton nani neu Tolas Knino sin!"
3:1 "Ma amtui nai neu ahake neno tunan Tolas Knino anbi Sardis mak on i: I han ba'an na'ko In le anmu'i Smanaf hitu na'ko Uisneno ma afkun hitu nane. Au uhin sa' le ho mo'e mani. Nak ho moni, mes namneo ho mate.! 3:2 Es nane, amfen nai, ma amhatane sa' le fe anbi ko nahunu na'ko anmate oke. Fun Au upeni nak sa' le ho mo'e mani, katit fa mese amsa le nanokbon anbi Uisneno matan. 3:3 Es nane, mumnau mufani sa' le afi nanoina nalali neu ko ma sa' le hom nen mulali. So munaoba mani ma muteunom nai mu'ko ho sanat sin. Kalu ho kam fenaf, Au of aum eu ko on abakat; ma of ho ka muhin fa leku le Au he aum. 3:4 Mes anbi ki alki abit Sardis fe anmu'i atoni fauk le anpanat he nati' sin blua pake muti nabalah. Sin le nane of a'nao nok Kau neki blua pake muti, fun sin antam ota neu lasi nane. 3:5 Sekau le in nis, of napakeb nani blua pake muti le nane. Ma of Au ka nosef in kanan na'ko Sulat Atoni Honis. Ma anbi Au Ama matan ma In ahake neno tunan sin of Au manaku ak sin le nane Au ini. 3:6 Sekau maluke, so in nen nai sa' le Smanan Uisneno naton nani neu Tolas Knino sin!" 3:7 "Ma amtui nai neu ahake neno tunan Tolas Knino anbi Filadelfia mak on i: I han ba'an na'ko In le Knino ma Amneot. In es ana' Nai Daud ini letu; kalu In nasoitan, katit fa atoni mese nabe'i hen ek, ma kalu In an ek, katit fa atoni mese nabe'i he nasoitan. 3:8 Au uhin sa' le ho mo'e mani. Au uhin ak ho matanim an-ana; ho mutuin mulali Au noina ma mu'ki neu Kau. Au usoitan ulali eno mese neu ko, le sekau amsa ka nabe'i hen ek nani. 3:9 Mumnau lasi i: Ale atoni le anfani to neu Nitu nane, sin atoni apoiba le anmanaku sin aon nak atoni Yahudi mes ka namneof onane, of Au mo'e sin tal sin neman ma nabes anbi ho matam. Ma sin of nahin nak Au nek ko. 3:10 Fun ho mutuin mulali Au plenat he nati' malan, Au amsa of uneo ma umafo ko na'ko neno susal le he nem neu pah pinan ok-oke. Lasi nane of anbol hen su' ale atoni ok-oke anbi pah pinan. 3:11 Au aum laba. Hom panat mulek-leko sa' le anbi ko, he nati' kais atoni mese amsa nasik nan ho baen amnisat nane. 3:12 Atoni le in nis, of Au uhakeb ani on ni anbi Au Uisneno In Ume Knino ma of In kan poin tenif na'ko bale nane. Au Uisneno kanan, ma Au Uisneno kot kanan -- esle' Yerusalem fe'u le of ansanu na'ko neno tunan, na'ko Au Uisneno -- of Au tui neu atoni nane. Au kanak fe'u of Au tui neu in amsa. 3:13 Sekau maluke, so in nen nai sa' le Smanan Uisneno naton nani neu Tolas Knino sin!" 3:14 "Ma amtui nai neu ahake neno tunan Tolas Knino anbi Laodikia mak on i: I han ba'an na'ko Amin, Saksi aki'at ma amneot, ahun-hunut na'ko ale sa' le Uisneno anmepu nani. 3:15 Au uhin sa' le ho mo'e mani. Au uhin ho ka manikif ma ka maputuf amsa. Leko nesi kalu ho manik ai maputu! 3:16 Natuin ho manababu; ka maput, ka manik amsa. Es nane of Au lo'an upoitan ko na'ko Au fefak. 3:17 Fun ho mak: 'Au amu'it kau ma au umu'ib kuk au aok ma au ka nukan fa sa'-sa'.' Mes ho ka muhinef, nak ho manukat a'naek ma ho susal a'naek! Ho mamu'i, ho monas, ma amfol. 3:18 Es nane Au fainek ko, he nati' hom sosa mnatu na'ko Au, esle' mnatu alekot, he nati' hom fain amu'it. Ma amsos blua pake muti amsa na'ko Au, he nati' hom pake ma amkub ho aom le monas ma namaeba ko. Ma amsos mina, hem nose neu ho matam, he nati' ho mit amfani. 3:19 Atoni le Au nek, Au ukain ma Au biso. Es nane te so hom hataniom ma muteu'nom mu'ko ho sanat sin. 3:20 Kiso! Au hake bi eno ma Au leuk eno. Kalu anmu'i atoni le amnen Au hanak ma nasoitan eno, of Au tam u'eku okan; of Au bukae ok in, ma in bukae nok Kau. 3:21 Sekau le in nis, of Au fe mainuan hen toko nok Kau bi Au toko, onle Au amsa is ulali, ma Au toko ok Au Ama bi In toko. 3:22 Sekau maluke, so in nen nai sa' le Smanan Uisneno naton nani neu Tolas Knino sin!"
4:1 Namuni na'ko nane au upeni mnitas anten. Au it eno mese masoitan anbi neno tunan. Namuni te au nena teni hanaf le afi na'uab nalali neu kau onle to'is hanan. Hanaf nane nak, "Aum amsae neu i. Au of ulile neu ko sa' le of anbol." 4:2 Naskek onane te Smanan Uisneno naplenat kau. Oke te au it, anbi neno tunan anmu'i toko mese, ma anmu'i atoni mese antoko anbi toko nane. 4:3 Atoni nane human anpin onle fatu klima Yaspis ma fatu klima Sardis. Ma enus mese funam natef atoko mnatu nane, anpin nalim human on Zamrud. 4:4 Ma anfun ma natef toko mnatu nane anmu'i toko bo'nuam ha. Amnasit bo'nuam ha antoko anbi toko nane le anpaken blua pake muti, ma anpaken sobe mnatu. 4:5 Toko nane napoitan limat pinan ma napoitan lotos hanan le napunu. Ma anbi toko nane matan anmu'i nopo hitu le anpinan; nane Smanaf hitu le na'ko Uisneno. 4:6 Ma anbi toko nane matan amsa anmu'i tasi nino, naklima on fatu lima'. Anbi toko nane atnanan ma anfun ma natef toko mnatu nane anmu'i amonit ha le sin matan anbi mat ma kotin nok. 4:7 Amonit ahunut nane onle aus neno; amonit nua'e nane onle bijae bia; amonit tenu'e anmu'i humaf on mansian human; ma amonit ha'e nane onle katasi panin le he nat el naplel. 4:8 Amonit ha in nane, mes-mese anmu'i ninef ne, anfun ma natef ma antom nanan nahenu nok mataf. Fai manas amonit-amonit nane sin ansi piut. "Knino, knino, knino Uisneno Akuasat Anesit; le esan, le afi te esan, ma le of ankoenon nem." 4:9 Amonit ha in nane sin ansi sit pules, tola ma nanaeb In le antoko anbi toko nane, esle' In le anmoni talan te nabal-bal. Ma anbi leku ale amonit nane ansi, 4:10 amnasit bo'nuam ha nane sin anbentok anbi le antoko anbi toko mnatu nane matan, oke te nabes neu In le anmoni talan te nabal-bal. Ma sin polin sini sobe neu toko mnatu nane matan oket sin nak, 4:11 "Koi Uisneno, hai Uisneno! Hom tam ota hem simo pules, tola ma kuasat. Fun Ho es amo'e ale sa', ma natuin Ho lomin amsa ale sa' nane mot ma anmoni."
5:1 Nalali te au it anbi In niman le antoko anbi toko mnatu nane, anmu'i sulat mese le manunu. Sulat nane nahenu nok tuis anbi bian am bian. Sulat nane anboto neki sulat taka' hitu. 5:2 Ma au it ahake neno tunan mese le nab'ei anhunun nok hanan a'naek nak, "Sekau antam ota hen ebi ale sulat taka' nane ma anfei sulat nane ka?" 5:3 Mes katit fa atoni mese amsa anbi neno tunan, ai anbi pah pinan, ai anbi pah pinan in nupun le nabe'i hen fei sulat nane ma antae nani. 5:4 Oke te au kae ma se'ul fun katit fa atoni mese amsa le nabe'i hen fei sulat nane, ma antae nani. 5:5 Oke te atoni mese na'ko ale amnasit nane nak neu kau, "Kais hom kae! Kiso meo asu na'ko uf Nai Yehuda, Nai Daud sufan le naek, nis nalalien. In nabe'i hen ebi sulat taka' hitu nane ma anfei sulat nane." 5:6 Nalali te au it Bibi Kase mese anhake anbi toko nane atnanan, ma amonit ha ma ale amnasit anfun natef In. Bibi Kase nane on anlolo nalali. In anmu'i sunaf hitu ma mataf hitu; esle' Smanaf hitu na'ko Uisneno le ansonu nalali neu pah pinan ok-oke. 5:7 Oke te Bibi Kase nane nem ma ansimo sul manunu nane na'ko atoni le antoko anbi toko mnatu nane niman ne'u. 5:8 Leka Bibi Kase nane fe ansimo sulat nane, amonit ha ma amnasit bo'nuan ha nane ansukbok anbi In matan. Ale amnasit nane es-es ana' heo mese ma mako' mnatu mese nahenu nok atu fomeni, le nane onen totis to Uisneno. 5:9 Ma sin ansi sit fe'u mese nak, "Hom tam ota he maiti sulat nane ma amebi in sulat taka' sin. Fun anlolo nalali Ko, ma nok Ho matem, mansian na'ko ale suku, a'at, pah ma uf hom sos mulali sin neu Uisneno. 5:10 Ho mo'e mulali sin uf mese neu ana' lasi fuat, he nati' sin antuthae hit Uisneno, ma naplenat anbi pah pinan." 5:11 Nalali te au it a'teni. Au nen ahake neno tunan le nifun-nifun ma hotun-hotun sin hanan! Sin anhake funam natef toko ma amonit ha nok ale amnasit nane. 5:12 Sin ansi nok hanan a'naek nak, "Bibi Kase le anlolo nalali nane, antam ota hen simo kuasat, mu'in, hinet ma be'it; In tam ota he matola, manaeb ma mapules!" 5:13 Ma au nen ale amonit abit neno tunan, abit pah pinan ma abit pah pinan nupun ma abit tasi -- atlefi ha tak ale amonit abit neno tunan ma pah pinan -- ansi, "In le antoko anbi toko mnatu, ma Bibi Kase nane lo mapules ma matola, apinat ma akuasat talan te nabal-bal." 5:14 Ma amonit ha nane natae nak, "Amin!" Ma ale amnasit nane amsa ansukbok ma nabes.
6:1 Nalali te au it Bibi Kase nane an pisu anpisu sulat taka' ahunut na'ko sulat taka' hitu nane. Oket au nen amonit ha in nane sin es na'uab nak, "Aum!" In hanan nane on lotos ini punun. 6:2 Au kiso, oket au it bikase muti mese. In asaet nane ana'klaot mese, ma anfe neune sobe mese. In nao mat onle atoni amnisat le nao he nasik mabe'ut. 6:3 Namuni te Bibi Kase nane an pisu sulat taka' nua'e, ma au nen amonit nua'e nak, "Aum!" 6:4 Oke te bikase mese anpoi nem anteni. Bikase nane ao me klima. In asaet nane anfe neune kuasat, he naneku lasi halan na'ko pah pinan, ha nati' mansian anmalolo es nok es. Anfe neu in suni naek mese. 6:5 Oke te Bibi Kase nane an pisu sulat taka' tenu'e. Au nen amonit tenu'e nak, "Aum!" Au kiso, ma au it bikase metan mese. In asaet nane ana' atnais mese anbi in niman. 6:6 Ma au nen sa' es onle hanaf le an anbai na'ko amonit ha in nane sin atnanan hanaf nane nak, "Aen kase su'at mese upan dinar mese, ma sain su'at tenu upan dinar mese. Mes kais mule'un hau bub fua mina ma lene tanu'an sena!" 6:7 Namuni te Bibi Kase nane an pisu sulat taka' ha'e ma au nen amonit ha'e nane nak, "Aum!" 6:8 Au kiso, oket au it bikase abu mese. In asaet kanan amates. Plenat maten nao natuin in kotin. Kuasat neu pah pinan ao bia ha nana'at neu sin, he nati' sin natuin manekat, amnahas, natuin men bono ma natuin mu'it a'lalu. 6:9 Nalali te Bibi Kase nane an pisu sulat taka' nime. Ma au it anbi baki fuat nupun anmu'i smanaf-smanaf na'ko ale atoni le nana'at sin natuin sin nanaoba beno na'ko Uisneno nok aki'at. 6:10 Ma sin an anbai nok hanan a'naek nak, "Koi Usif tunan Akuasat Anesit, ma amneot! Tal leka ka Hom lefi abit pah pinan ma amhukum sin fun namate nalali kai ka?" 6:11 Namuni te anfe neu sin es-es, sobalu muti mese. Oke te anlelu sin nasnasan akle'o, talan te sin bae atuthaes, ma sin bae bian namtisin, le of namate sin onle sin amsa. 6:12 Oke te au it Bibi Kase nane an pisu sulat taka' ne'e. Nainunus a'naek anbol. Manas anmetak on tai metan ma funan amtasa on na'. 6:13 Afkun-afkun ankua na'ko neno tunan neu pah pinan onle bubuk fuan makuke ankua na'ko ta'un, bi leku anin slutuf anheko nani. 6:14 Neno tunan namneku onle anunu sulat, ma ale nu'af ma ale pulu na'oni na'ko sin balan. 6:15 Oke te uisfin pah pinan, ale anaet, ale solalus nakaf, ale atoni amu'it, ma ale atoni amu'i kuasat, ma ale atoni bian, he ate ai atoni ao sona, sin natolo' anbi ale nuat ma anbi ale fatu bola nu'af nane. 6:16 Sin an anbai neu ale nu'af ma neu ale fatu nane, "Amkub kai nai! Mutolo' kai na'ko In le antoko anbi toko mnatu, ma na'ko to'as Bibi Kase nane. 6:17 Neno to'as a'naek anbolen ma katit fa atoni mese amsa le nabe'i hen hake anbi sin matan!"
7:1 Nalali te, au it ahake neno tunan ha, anhake anbi pah pinan si'un ha sin. Sin an eka anin mata ha sin bi pah pinan he nati' kais anin anfu anbi meto, ai anbi tasi ai anbi haunu. 7:2 Oket au it ahake neno tunan mese anteni anbol nem na'ko neno saet. In neki malak na'ko Uisneno amonit. Nok hanan a'naek ahake nane anboin ahake neno tunan ha in le napeni nalali kuasat na'ko Uisneno he nale'un meto ma tasi. 7:3 Ahake neno tunan nane nak, "Kais mile'un meto ai tasi ai haunu, kalu hai fe kam taof malak anbi hit Uisneno In ate sin ilan." 7:4 Oke te ane'ut kau nak anmu'i atoni nifun natun mese bo'ham ha le antao malak na'ko Uisneno neu sin ilan. Ale atoni nane naiti sin na'ko uf Israel bo'es am nua. 7:5 Na'ko uf Nai Yehuda anmalak atoni nifun bo'es am nua, na'ko uf Nai Ruben nifun bo'es am nua, na'ko uf Nai Gad nifun bo'es am nua. 7:6 na'ko uf Nai Asyer nifun bo'es am nua, na'ko uf Nai Naftali nifun bo'es am nua, na'ko uf Nai Manasye nifun bo'es am nua, 7:7 na'ko uf Nai Simeon nifun bo'es am nua, na'ko uf Nai Lewi nifun bo'es am nua, na'ko uf Nai Isakhar nifun bo'es am nua, 7:8 na'ko uf Nai Zebulon nifun bo'es am nua, na'ko uf Nai Yusuf nifun bo'es am nua, na'ko uf Nai Benyamin nifun bo'es am nua. 7:9 Nalali te au kiso teni, oke te au it mansian pukan naek esle' amfaun mataen le'uf -- katit fa atoni mese amsa le nabe'i hen soi nani! Sin le nane atoni-atoni na'ko ale uf, suku, pah ma a'at. Sin paken sobalu muti mnanu ma sin na'an pet no bi sin niman, ma anhake anbi toko nane matan ma nabesan neu Bibi Kase nane. 7:10 Oke te sin an anbai nok hanan anaek nak: "Hit aomina nem na'ko hit Uisneno le antoko anbi toko mnatu, ma na'ko Bibi Kase nane!" 7:11 Ale ahake neno tunan anhake funam natef a'toko mnatu nane ma ale amnasit ma amonit ha in nane. Ale ahake neno tunan nane anmof hae anbi toko mnatu nane matan ma nabes neu Uisneno. 7:12 Sin anbai nak, "Amin! Hit Uisneno lo Uisneno le mapules, Apinat ma Ahinet. In Uisneno le mes nathoe nok han pules ma fef tola. In Uisneno le anmu'i kuasat ma matani talan te nabal-bal! Amin." 7:13 Atoni mese na'ko ale amnasit nane natan neu kau, "Ale atoni le anpaken sobalu muti nane sin sekau ka ma sin neman na'ko me ka?" 7:14 Au utae in ak: "Au ka uhin fa tuan. Tuan ho es muhine." Oke te in nak neu kau: "Atoni le nane sin fe anpoin neman na'ko hamu'it a'naek. Sin fase nalali sin sobalu ma namutib nani neki Bibi Kase In na'. 7:15 Es nane sin anhake anbi Uisneno Ini toko mnatu matan ma antuthae In fai manas anbi In Ume Knino. Ma In le antoko anbi toko mnatu nane, of anhake nok sin he namafo sin. 7:16 Of sin ka namnahan ma kan menon tenin fa; manas ai malala of kan hoin tenif sin. 7:17 Fun Bibi Kase le antoko anbi toko mnatu nane atnanan of anfani sin atukus. In of antopu sin neu oe mata le anfe honis neu sin. Ma Uisneno of a'nose ale matnu na'ko sin matan."
8:1 Leka Bibi Kase nane an pisu sulat taka' hitu'e, neno tunan namne, oni leuk batis mese. 8:2 Oke te au it ahake neno tunan hitu le anhake anbi Uisneno matan ma anfe neu sin to'is hitu. 8:3 Ahake neno tunan mese bian, le neki topa mnatu mese, nem ma anhake anbi mei fuat matan. Anfe nalali neune atu fomeni namfaun hen tao nani neu ale onen totis to Uisneno ma he natulu nani anbi baki fuat mnatu bi toko mnatu nane matan. 8:4 Aut fomeni le fe anpin nane in masu ansae nok ale onen totis to Uisneno na'ko ahake neno tunan niman le anhake anbi Uisneno matan. 8:5 Namuni te ahake neno tunan nane naiti topa nane, ma antao ai neune na'ko baki fuat, oke te anpolin nani neu pah pinan. Ma lotos napunu, nok limat ma nainunus nok. 8:6 Nalali te ahake neno tunan hitu le ana' to'is hitu nane naloitan hen pu sin to'is. 8:7 Ahake neno tunan ahunut anpu in to'is, ma ulan sensene ma ai maselo nok na' anmofu nem neu pah pinan. Ao bia tenu na'ko pah pinan anput nain oke; onane amsa ao bia tenu na'ko haunu ma ale hun le fe namate. 8:8 Oke te ahake neno tunan le nua'e anpu in to'is, ma sa'fes onle nu'af a'naek le anpin on ai, anpolin neu tasi nanan. Ao bia tenu na'ko tasi nabaina anfani na', 8:9 ma ale amonit anbi tasi sin ao bia tenu anmate; onane amsa aobia tenu na'ko ale bnao sin namle'u. 8:10 Namuni te ahake neno tunan le tenu'e anpu in to'is, ma afkun a'naek mese, le anpin on nopo, anmofu na'ko neno tunan, antom ao bia tenu na'ko noenu ma oe mata sin. 8:11 (Afkun nane kanan "Apsintus" ai menu'.) Ma ao bia tenu na'ko oe anfani menu', ma atoni namfaun anmate natuin sin ninu oe le anfani menu nane. 8:12 Oke te ahake neno tunan le ha'e anpu in to'is. Ma anbiso ao bia tenu na'ko manas, ao bia tenu na'ko funan, ma ao bia tenu na'ko ale afkun talan te ao bia tenu na'ko sin anmesok. Onane amsa ao bia tenu na'ko manas kan sinek fa ma onane amsa ao bia tenu na'ko fai. 8:13 Oke te au it, ma au nen katasi mese le fe nat el namnanu anbi neno tnanan, an anbai nok hanan a'naek nak, "Amle'ut! Amle'ut! Amle'ut neu ale atoni le namaika anbi pah pinan, leka sin nen ahake neno tunan tenu bian le hen pu sin to'is."
9:1 Oke te ahake neno tunan le nima'e anpu in to'is, ma au it afkun mese anmofu na'ko neno tunan neu pah pinan. Ma anfe neu afkun nane letu nopu maten. 9:2 Ma afkun nasoitan nopu maten nane, oke te masu anpoi na'ko nopu nane on masu na'ko tunaf a naek. Manas ma saknenot anmesok natuin masu' na'ko nopu nane. 9:3 Oke te lamat-lamat anpoi na'ko masu' nane ma ansanu neu pah pinan. Ma anfe kuasat neu ale lamat nane onle anfe nani neu kabiti sin. 9:4 Ma nakain sin he kais nale'un hun, ai ale hau, ai ale luel bian. Sin al nabe'i nale'un ale atoni le kan mu'if malak na'ko Uisneno anbi sin ilan. 9:5 Ale lamat nane ka napenin fa mainuan he namate ale atoni nane, al anhamu'i sin funan nim. Hamu'it le lamat-lamat anmo'e nani papmese onle hamu'it le kabiti sin anmo'e nani. 9:6 Bi funan nim nane ale atoni sin nami hen maten, mes sin ka nabe'i fa hen maten; sin lomin hen maten, mes lasi maten na'lo na'ko sin. 9:7 Ale lamat nane sin humkenu onle bikase le naloitan sin hen maken. Anbi sini nakan anmu'i sa' es onle sobe mnatu. Sin human onle mansian human. 9:8 Sini nakfunu onle bife ini nakfunu ma sin nisin onle aus neno in nisin. 9:9 Ankub sin ansaon neki sa'es onle sobalu besi. Sin ninen aspepen onle aklet amfaun sin apunun le hen taman neu makenat. 9:10 Sin anmu'i ikon ma kmulu onle kabiti. Ma anbi sin ikon nane anmu'in matani he nale'un mansian funan nim ini mnanun. 9:11 Sin anmu'i usif le naplenat sin, ma usif nane esle' ahake le he natae neu nopu maten. In kanan anbi a'at Ibrani esle' Abadon; ma anbi a'at Yunani Apolion (le in oten "Ale'ut"). 9:12 Amle'ut ahunut anfinien. Nalali te anmu'i amle'ut nua anteni le mes nem. 9:13 Namuni te ahake neno tunan le ne'e anpu in to'is. Ma au nen hanaf mese nem na'ko baki fuat mnatu in sunan ha sin le anbi Uisneno matan. 9:14 Hanaf nane nak neu ahake neno tunan ne'e nane, "Mufetin nai ahake neno tunan ha in le mafutun anbi Noe Efrat nane!" 9:15 Oke te nafetin ahake neno tunan ha in nane; le naloitan nalali sin neu leku, neno, funan ma ton nane he namate ao bia tenu na'ko to mansian. 9:16 An eut kau nak ale solalus asae bikase nane sini mfaun hotun natun nua. 9:17 Ma anbi mnitas, au it ale bikase nane ma atoni le ansae neu ale bikase nane. Ale asaet nane sin paken sobalu besi, le amtasa aklima ma maet metan ma molo in balin. Ale bikase nane sini nakenu on meo asu ini nakan, ma ai, masu', ma balin anpoi na'ko sin fefan. 9:18 Ao bia tenu na'ko to mansian anmate natuin snama nono tenu, esle' ai, masu', ma balin le anpoi na'ko ale bikase sin fefan. 9:19 Ale bikase nane sin matanin mapeni anbi sin fefan ma anbi sin ikon. Sin ikon onle kauna ma'naka. Ale bikase nane nale'un mansian, neki sin ikon. 9:20 Mes atoni bian, le kan maten fa natuin ale snama nane, sin ka nateunok fa na'ko sa' le sin anmo'e nalali. Sin ka nasnasan fa na'ko luli besa neu ale sman amle'ut ma le'u mahuma le anmo'e na'ko mnatu, noin muti, noin molo, fatu ma hau le sin ka nitan fa, ka nenan fa ma ka naon fa. 9:21 Ma sin ka nateunok fa na'ko ma'otes, na'ko mo'et ela mesokan, na'ko mo'et kake ma na'ko lasi bakan.
10:1 Oke te au it ahake neno tunan abe'it mese anten, le ansanu na'ko neno tunan. In saklubon neki nope, ma enus mese anbi ini nakan. In human anpin onle manas, ma in haen onle ni ai. 10:2 Anbi ini niman anmu'i sulat manunu mese la natfei. In haen a'ne'u antelin bi tasi, ma in haen a'li antelin bi meto. 10:3 In anhunun nok hanan a'naek onle meo asu nakunut. Ma leka ahake neno tunan nane anhunun nalali te, lotos hitu nane natae neki sin apunun. 10:4 Ma leka lotos hitu nane sin napunu, au he tui ani, mes au nen hanaf mese na'ko neno tunan nak, "Ampanat nai sa' le alotos hitu nane sin na'uab ma kais hom tui mani!" 10:5 Oke te ahake neno tunan le au it anteli anbi tasi ma anbi meto nane na'aiti in niman a'ne'u neu neno tunan. 10:6 In ansup neik Uisneno kanan le anmoni talan te nabal-bal, le anmo'e neno tunan, pah pinan, ma tasi nok in nesan ok-oke. Ahake neno tunan nane nak, "In leku of ka taskotun a'teni fa! 10:7 Mes leka ahake neno tunan le hitu'e anpu in to'is, Uisneno of natisi in lasi tolo' nane, onle In naton nalali neu In ate sin, es le mafefa knino sin." 10:8 Namuni te hanaf le na'uab nalali neu kau na'ko neno tunan, na'uab anteni neu kau, nak, "Hom nao nai, he maiti sulat manunu le natfei anbi ahake neno tunan niman le anteli anbi tasi ma anbi meto nane." 10:9 Oke te au nao eu ahake neno tunan nane ma atoti hen fe kau sulat manunu nane. In na'uab: "Maiti nai ma muah nai. Of in namenun anbi ho teim, mes anbi ho fefam in min noni onle oni hau." 10:10 Au aiti sul manunu nane na'ko ini niman oke te uah ani. Anbi au fefak in min noni on oni hau, mes leka au olo ulali, in namenun anbi au teik. 10:11 Nalali te in naplenat kau, "Ho mubeno amteni beno Uisneno neu ale uf, ale pah, ale a'at ma ale kesel."
11:1 Nalali te anfe kau atfob mese, masan onle hau letis luku, nok a'an le nahan nak on i: "Hom nao nai ma amteli Ume Uisneno ma baki fuat. Amsoi sin nai atoni fauk le anonen toti anbine. 11:2 Mes kais amleti po'an le antom kotin Ume Uisneno nane, fun anfe nalali neu uf bian sin le ka nahinef Uisneno. Ma of sin anhali anteli Kot Knino nane funan bo'ham nua." 11:3 Ma of Au sonu Au saksi atoni nua le anpaken tainusat kulut, ma sin of ane'tun beno Uisneno neno nifun mese natun nua ma bo'ne. 11:4 Saksi nua in nane esle' bub fua mina u'nua ma tet paku nua le anhake anbi Usif tunan neu neno tunan ma pah pinan In matan. 11:5 Kalu anmu'i atoni le hen mo'e amle'ut neu sin, ai anpoi na'ko sin fefan ma nale'un ale sin musu nane. Ma kalu anmu'i atoni le he namenab sin, atoni nane mes anmate natuin lalan nane. 11:6 Sin anmu'in kuasat hen ek neno tunan, he nati' kais na'ul, leka sin fe naton beno na'ko Uisneno. Sin anmu'in kuasat amsa neu ale oe mata sin he nabaina nani anfani na'. Ma sin anmu'in kuasat amsa hen hukum pah pinan neki ale snama, leka sin anlomi hen mo'e nani. 11:7 Leka sin nasopu sin beno nane, mu'it le ansae na'ko nopu maten of anlaban sin. In of anbe'u sin ma namate sin. 11:8 Ma sin aon nitu of nabelon anbi lal uf kota naek, le napeti sin Usif anbin. Kot nane in letan esle' Sodom ai Mesir. 11:9 Ma ale atoni nako uf-uf, suku, a'at ma pah of sin nit sin ta'un aon nitu nane neno tenu ma batis, mes sin kan lomin fa hen sub sin ta'un aon nitu nane. 11:10 Ma sin alsin le namaika anbi pah pinan sin namlil ma namo'ek natuin saksi nua in nane sin anmaten. Es nane te sin anmo'en fesat, ma anmasonu sonu, natuin mafefa knino nua in nane le sin neki hamu'it neu ale atoni le namaika nabi pah pinan. 11:11 Neno tenu ma batis namuni te, snasaf honis nem na'ko Uisneno ma antam anteni neu mafefa knino nua in nane. Oke te sin anfen anfan talan te ale atoni le nit sin namtaun. 11:12 Namuni te mafefa knino nua in nane nen hanaf naek mese na'ko neno tunan nak, "Amsae aim nai neu i!" Oke te nope ankub sin, ma sin ansae neu neno tunan, ma sin musu ansaksi lasi nane. 11:13 Anbi leku nane nainunus a'naek anbol. Ao bia bo'es na'ko kot nane nathon, ma atoni nifun hitu anmaten natuin nainunus nane. Atoni bian sin namtaun, oke te sin nanaeb Uisneno anbi neno tunan. 11:14 Amle'ut hae nua'e anfinien. Kiso! Amle'ut hae tenu'e he neman tenien. 11:15 Oke te ahake neno tunan hitu'e anpu in to'is, ma hanaf nanae manena anbi neno tunan, "Kuasat he naplenat pah pinan muni'i es hit Usif In niman, ma Kesel Afetin le anba'an nani. In of naplenat talan te nabal-bal!" 11:16 Ma amnasit sin bo'nuam ha, le antokon anbi sini toko anbi Uisneno In matan, sin anmof hae ma nabes neu Uisneno. 11:17 Sin nak, "Koi Uisneno, Akuasat Anesit, le esan ma afi te esan! Haim toti terima kasih neu Ko, fun Hom pake mulali Ho kuasat a'naek, ma Ho muplenat mulali! 11:18 Ale atoni le ka nahin Usif tunan, namaunun fun leku antelen he Hom opan Ho to'as, ma leku antia he mufek lasi neu ale atoni amates. Ma leku antea en hem baen Ho ate sin, mafefa knino sin, ma neu ale Ho to, esle' ale atoni le naluli ma nabes neu Ko, anaet ma abaut. I leku neu he muskuku sin le sin naskuku pah pinan!" 11:19 Oke te Ume Uisneno anbi neno tunan natfei, ma In Peti Fef Bela nalilon anbi Ume Uisneno nane. Nalali te limat anpin ma lotos napo ma nainunus anheko ma ulan sensene ansanu nem.
12:1 Oke te au it anbi neno tunan sa' esle' amkakat ma mataen le'uf. Bife mese le anpake manas on ini blua pake ma anhake anbi funan. Ma sobe le anmo'e na'ko afkun bo'es am nua anbi ini nakan. 12:2 Bife nane in na'apu, fun in leku he nahonien, es nane in anbai natuin men mahonit. 12:3 Oke te au it a'teni anbi neno tunan sa' esle' amkakat. Anmu'i kaun koko mtasa mese le nae le'uf le anmu'i nakaf hitu ma sunaf bo'es. Ini nakan mese-mese anpake sobe mese. 12:4 Ma in ikon anhel neki ao bia na'ko ale afkun anbi neno tunan ma anpolin nani neu pah pinan. Kaun koko nane anhake anbi bife le he nahoni nane in matan, hen ol nan in anah, leka bife nane nahonis nalali. 12:5 Ma bife nane nahonis anmone mese le of naplenat ale uf-uf neki ue besi. Mes nasik nan anah nane na'ko bife nane, oke te neki neu Uisneno ma neu Ini toko matan. 12:6 Bife nane in naen neu mnela paha snaen, anbi bale le Uisneno naloitan nani neu in. Anbi bale nane of anpafa nani neno nifun mese natun nuam bo'ne. 12:7 Oke te makenat anbol anbi neno tunan. Nai Mikhael nok in ahake sin anmaken nok kaun koko nane. Ma kaun koko nane in ahake sin anbab in, hen laban Nai Mikhael. 12:8 Mes sin anbe'u kaun koko nane. In nok in ahake sin ka napeni fa mainuan anteni he namaika anbi neno tunan. 12:9 Kaun koko naek nane anpolin napoitan! In es kauna mnasi nane le antek nak Nitu ai Sman Amle'ut, le nasekeb pah pinan ok-oke. Anpolin in neu pah pinan nok in ahake sin. 12:10 Oke te au nen hanaf mese le naek anbi neno tunan nak, "Leku i in leku Uisneno namonib In to! Leku i Uisneno nalile nalali In kuasat on Usif! Leku i Kesel Afetin le anba'an nani nane amsa nalile In kuasat! Fun le natam lasi neu hit bae sin anbi Uisneno matan fai manas, napoitan nalali sin na'ko neno tunan. 12:11 Hit bae sin anbe'u nalali in neki Bibi Kase nane In na', ma neki beno amneot na'ko Uisneno le sin ansaksi nani. Sin lomi he nana'at sini smanan talan te anmaten. 12:12 Es nane te, so neno tunan ma alsin le namaika anbine, mimlil nai! Mes amle'ut neu pah pinan ma tasi, fun Nitu ansanu nalali neu ki nok to'as nae le'uf, fun in nahin nak in leku ala kle'o." 12:13 Leka kaun koko nane nahin, nak anpolin nalali in neu pah pinan, onane te in anli'u bife le nahonis nalali Anmone nane. 12:14 Mes anfe nalali neu bife nane katasi naek in ninen nua sin, he nati' in nat el neu in balan anbi mnela paha snaen, anbi nane of anpafa in ton tenu ma batis nafetnon na'ko kaun koko. 12:15 Oke te kaun koko nane anpulan na'ko in fefan oe nae le'uf neu bife nane, he nati' oe nane anloi neki. 12:16 Mes pah pinan antulun bife nane. Pah pinan anfei in fefan ma an'ol nan oe le anpoi na'ko kaun koko nane fefan. 12:17 Kaun koko nane nato'an bife nane, oke te in nao hen maken nok bife nane in sufan bian, esle' atoni le natuin neu plenat Uisneno, ma le na'ki neu beno amneot na'ko Uisneno le nalilon natuin Yesus. 12:18 Oke te kauna nane anhake anbi tasi ninen.
13:1 Namuni te au it mu'it mese anbol na'ko tasi nanan. In anmu'i sunaf bo'es ma nakaf hitu. Anbi in sunan mese-mese anmu'i sobe mese ma anbi ini nakan mese-mese anmu'i tuis mese le na'le'uf Uisneno. 13:2 Mu'it le au it nane human onle meo neno, ma in haen onle meo fui haen, ma in fefan onle aus neno fefan. Oke te kaun koko nane anfe neune in matanin ma ini toko ma in kuasat le a'naek. 13:3 Ma au it nakaf mese anbi nakaf hitu na'ko mu'it nane onle he napap matani, mes papa nane nalekoen. Pah pinan ok-oke natuina kauna nane nok tenab amkakat. 13:4 Ma sin nabes neu kaun koko nane, fun in anfe nalali in kuasat neu mu'it nane. Ma sin nabes neu mu'it nane amsa. Sin nak, "Katit fa es onle mu'it i! Ma katit fa esle' hen be'u in!" 13:5 Mu'it nane napeni mainuan he na'uab ale lasi nok neka moko ma na'le, na'le'uf Uisneno. In napeni mainuan he naplenat funan bo'ham nua ini lon. 13:6 Oke te in na'le'uf Uisneno, ma antek nale'un Uisneno kanan. Onane amsa in na'le'uf bale maika Uisneno, ma alsin le namaika anbi neno tunan. 13:7 Ma in napeni mainuan hen maken nok to Uisneno ma anbe'u sin. Ma kuasat neu ale suku, pah, a'at ma uf-uf anfe nani neu in. 13:8 Ale atoni le namaika anbi pah pinan of nabes neu mu'it nane, al atoni-atoni le sin kanan antui nalali nahunun anfatan pah pinan, anbi sulat atoni honis na'ko Bibi Kase le anlolo nalali. 13:9 Atoni le maluke, mutnin nai beno i, 13:10 "Atoni le mes hen tam neu o'of, in of antam neu o'of. Ma atoni le mes he namate neki suni, of namate nani neki suni. Es nane to Uisneno mes namepan nekan ma na'ki." 13:11 Oke te au it mu'it mese anteni anpoi na'ko pah pinan. In anmu'i sunaf nua onle bibi kase sunan. In hanan onle kaun koko hanan. 13:12 In anpake kuasat anaek na'ko mu'it ahunut nane anbi in matan. In naseke pah pinan ok-oke ma alsin le namaika anbine, he nabes neu mu'it ahunut nane, le in papa nalekoen. 13:13 Mu'it amunit i anmo'e lasi amkakat anaek. Anbi ale atoni sin matan in anmo'e ai ansanu na'ko neno tunan neu pah pinan. 13:14 Ma ale atoni le anmoni anbi pah pinan in fuil sin neki ale lasi amkakat le in anmo'e nani anbi mu'it ahunut nane matan. Ma in an lenu sin alsin hen mo'e nan fatu mahuma mese he na'usi mu'it ahunut le napap natuin suni, mes fe anmoni. 13:15 Mu'it amunit i napeni mainuan hen fe snasaf neu fatu mahuma nane, he nati' fatu mahuma nane na'uab nahin ma namate ale atoni le kan lomif he nabes neu in. 13:16 Mu'it nane na'seke ale atoni, abaut ma anaet, amu'it ma amamu'it, aosona ai ate hen simo taka anbi sin niman a ne'u ai anbi sin ilan. 13:17 Katit fa atoni mese le hen sos ai nasosa sa' es, kalu in kan mu'if taka nane, esle' mu'it nane in kanan, ai so'it le nalile kanaf nane. 13:18 Anbi i so anmu'i lasi hinef. Atoni le nahin nabe'i anso'i mu'it nane so'in in oten, fun so'it nane lo kanaf mansian. In so'in esle' natun ne bo'ne am ne.
14:1 Namuni te au kiso, oke te au it Bibi Kase nane anhake anbi Tubu Sion. In anhake nok atoni nifun natun mese bo'ham ha, le In kanan ma In Amaf kanan matui anbi sin ilan. 14:2 Oke te au nen hanaf mese na'ko neno tunan napunu on oe sako ini satan ma on lotos ini punun matani. Ma hanaf le au nen nane, onle biol in hanan na'ko ansapu biol le ansapu ini biol. 14:3 Sin ansi sit fe'u mese anbi toko matan ma anbi amonit ha ma amnasit-amnasit nane sin matan. Ma katit fa atoni mese le nanoni nahin sit nane so mak atoni nifun natun mese bo'ham ha le ansoi nalali sin na'ko pah pinan nane. 14:4 Sin le nane ale atoni le anpanat sin aon fun ka nahutab fa sin aon nok bife. Sin aon naknino on ao temef. Sin es natuin Bibi Kase nane le In nao neu me-me. Na'ko ale to mansian sin le nane ale atoni le nafetin nalali sin on fua tulu ahunut neu Uisneno ma neu Bibi Kase. 14:5 Sin ka napoibok fa; ma kan mu'if kobe an-ana' amsa anbi sin. 14:6 Oke te au it ahake neno tunan mese bian le nat el namnanu anbi neno tnanan. Ahake tunan nane neki beno antom Beno Alekot le nabal-bal he natiaba neu mansian anbi pah pinan; esle' neu ale uf, a'at ma pah. 14:7 Ahake tunan nane anhunun nok hanan a'naek nak, "Mimtausan Uisneno nai ma minaeb In Apinat! Fun leku antelen Uisneno hen lefi mansian in lasi. Mibes nai neu In le anmo'e neno tunan, pah pinan, tasi ma ale oe mata!" 14:8 Ahake neno tunan nua'e natuin ahake neno tunan ahunut ma nak, "Kota naek Babel nane natselen, natselen! In es namafu ale uf-uf neki in tua mafu kake nane." 14:9 Ma ahake neno tunan mese bian, ahake neno tunan tenu'e natuin ahake neno tunan nua in nane ma anhunun nok hanan a'naek nak, "Atoni le nabes neu mu'it nane ma in fatu mahuma ma anmu'i taka na'ko mu'it nane anbi ilan ma in niman, 14:10 atoni nane of ninu tua Uisneno esle' In tua to'as le antesi nalali neu in balan, kan kulan fa kle'o amsa! Ale atoni nane of anhamu'i sin anbi ai ma balin anbi ahake neno tunan sin matan ma anbi Bibi Kase In matan. 14:11 Masu' na'ko ai le anhamu'i ale atoni nane of ansae piut-piut talan te nabal-bal. Fai manas anhamu'i sin piut, esle' sin le nabes neu mu'it nane nok in fatu mahuma, ma ale atoni le anmu'i taka na'ko mu'it nane." 14:12 Anbi lasi i, to Uisneno le natuin ale plenat Uisneno ma na'ki neu Yesus, so anhataniok. 14:13 Oke te au nen hanaf mese na'ko neno tunan nak, "Amtui nai, ua alekot neu atoni le na'ko leku i anmaten mes fe antuthae Usif!" Smanan Knino nak, "Namneo! Sin of nasnasan na'ko mepu mafena, fun sin tuthaes in fuan of anhaek nok sin." 14:14 Oke te au kiso ma au it noep muti mese. Atoni mese antoko anbi nope nane in fafon, human on mansian. Sobe mnatu mese anbi Ini nakan, ma besi lefi mese le na'aik anbi Ini niman. 14:15 Namuni te ahake neno tunan mese bian anpoi na'ko Ume Uisneno. In haman nok hanan a'naek neu In le antoko anbi nope nane in fafon nak, "Muknoti Ho besi lefi nane ma amlefi nai, fun neno lefit antelen; pah pinan afan namnatuen!" 14:16 Oke te In le antoko anbi nope nane fafon naknoti In besi lefi neu pah pinan ma anlefi pah pinan. 14:17 Namuni te au it ahake neno tunan mese bian anteni anpoi na'ko Ume Uisneno anbi neno tunan. In amsa neki besi lefi mese le na'aik. 14:18 Nalali te ahake neno tunan mese bian, le anmu'i kuasat neu ai, anpoi na'ko baki fuat. Nok hanan a'naek in anhunun neu ahake neno tunan le ana' besi lefi a'aikat nane nak, "Muknoti ho besi lefi nane ma amlefi tua min kase bi pah pinan sin fuakin, fun sin fuan nane namnatuen." 14:19 Oke te ahake nane naknoti in besi lefi neu pah pinan ma anlefi tanu'an sena bi pah pinan sin fuakin, nalali te anpolin natam sin neu bale teli tanu'an sena to'as Uisneno le maput le'uf. 14:20 Ma anteli tanu'an sena fuakin nane anbi kot kotin, oke te na' ansai na'ko bale teli nane, ini lon kilo natun tenu, ma ini mnanun neki ansanu metel nua.
15:1 Nalali te au it anbi neno tunan sa' es le amkakat ma mataen le'uf Anmu'i ahake neno tunan hitu nok snama hitu le amsoput. I haef amsoput Uisneno ano'pan In to'as. 15:2 Nalali te au it sa'fes on tasi nino maselo nok ai. Au it amsa ale atoni le nis nalali neu mu'it ma in fatu mahuma ma nis neu atoni le in kanan mataka' nok so'it. Ale atoni le sin nis nalali nane anhaken anbi tasi nino ninen ma sin na' biol le Uisneno anfe neu sin. 15:3 Ma sin ansi sit Nai Musa, ate Uisneno ma sit Bibi Kase In hanan nak on i, "Koi Usif, Usineno, Akuasat Anesit, Ho mo'et sin lo naek ma amkakat kun! Koi Usif neu uf-uf, Ho lekat sin lo amneot ma amnonot kun! 15:4 Sekau es ka namtauf neu Ko, Usi? Sekau es kan lomif hen etun Ho apinat ka? Ho meskun es aknino. Ale uf-uf nem ma naluli nabes neu Ko, fun Ho fekat sin lo amneot ale atoni sin nit nalali." 15:5 Namuni na'ko nane te, au it Ume Uisneno bi neno tunan nasoitnon, ma Um-ume Bale Uisneno anbin. 15:6 Oke te ahake neno tunan hitu nok snama hitu nane anpoin na'ko Ume Uisneno. Sin blua pake na'ko muti amasat le muit leko ma anpin nalim. Ma sin pake futu basaf le anmo'e na'ko mnatu. 15:7 Oke te es na'ko amonit ha sin nane anfe neu ahake hitu nane, klas mnatu hitu le nahenu nok to'as Uisneno, -- Uisneno le anmoni talan te nabal-bal. 15:8 Ume Uisneno nane nahenu nok masu' na'ko apinat ma kuasat Uisneno. Leka snama hitu na'ko ahake neno tunan hitu nane fe ka namsopuf, atoni mese ka nabe'i fa hen tam neu Ume Uisneno nane.
16:1 Oke te au nen hanaf naek mese na'ko Ume Uisneno nak neu ahake neno tunan hitu nane, "Him nao nai ma amo'pan to'as Uisneno klas hitu nane sin nesan neu pah pinan!" 16:2 Ahake neno tunan ahunut in nao ma ano'pan ini klas nesan neu pah pinan. Oke te bisun amle'ut le neki maten anpoi neu ale atoni le anmu'i taka na'ko mu'it nane, ma neu ale atoni le nabes neu in fatu mahuma. 16:3 Ahake neno tunan le nua'e ano'pan ini klas nesan neu tasi. Oe tasi nane anfani onle atoni amates in na', talan te ale amonit anbi tasi anmaet nain oke. 16:4 Ahake neno tunan le tenu'e ano'pan ini klas nesan neu ale noe ma neu ale oe matan, talan te oe ok-oke anfani na'. 16:5 Au nen ahake neno tunan le anmu'i kuasat neu oe nane nak, "Kasat ma lenat le Ho mufek nane lo amnonot kun, koi Aknino Anesit, Uisneno le esan, ma afi te esan! 16:6 Sin opan nalali to Uisneno ma mafefa knino sin na', leku i Ho mo'e sin he ninun na'. Mo'et nane natai nok sin mo'et!" 16:7 Au nen hanaf mese na'ko baki fuat nak, "Koi Uisneno Akuasat anesit, Ho fekat sin lo amneot ma amnonot!" 16:8 Nalali te ahake neno tunan le ha'e ano'pan ini klas nesan neu manas, ma anfe kuasat neu manas he notu nis ale mansian neki in maputun. 16:9 Ma mansian anputun maet natuin manas in malalan, talan te sin tek nale'un Uisneno In kanan, le anmu'i kuasat neu ale snama nane. Maski onane, sin kan lomin fa he nateunok na'ko sin sanat ma kan lomin fa he nanaeb Uisneno apinat. 16:10 Oke te ahake neno tunan le nima'e ano'pan ini klas nesan neu mu'it nane ini toko. Ma mu'it nane ini plenat ok-oke anmesok, talan te mansian anlau sin man natuin menas matani. 16:11 Oke te sin tek nale'un Uisneno anbi neno tunan natuin sin menas ma natuin sin bisun. Mes sin ka nateunok fa na'ko sin mo'et amle'ut. 16:12 Oke te ahake neno tunan le ne'e ano'pan ini klas nesan neu noe Naek Efrat. Ma noe nane anmeti talan te usif-usif na'ko neno saet nabe'i nao natuin noe nane. 16:13 Oke te au it sman amle'ut tenu le sin human onle be'o. Es anpoi na'ko kaun koko in fefan, es anpoi na'ko mu'it nane in fefan, ma es anpoi na'ko mafefa moel nane in fefan. 16:14 Sin le nane sman amle'ut na'ko ale nitu le anmo'e ale lasi amkakat. Smanaf tenu nane sin nao neu ale uisfin anbi pah pinan ma nabuab sin neu makenat anbi Neno naek, es le Neno na'ko Uisneno Akuasat Anesit. 16:15 "Kiso! Au aum on abakat! Ua alekot neu atoni le anbe' ma anpanat ini blua pake, talan te in ka nao'inson fa nok monas ma ka namaebon fa anbi paha mfaun sin matan!" 16:16 Oke te ale smanaf nane nabuab ale uisfin nane anbi bale mese, le antek neki a'at Ibrani nak: Harmagedon. 16:17 Oke te ahake neno tunan le hitu'e ano'pan ini klas nesan neu neno tnanan. Ma au nen hanaf mese le naek na'ko toko anbi Ume Uisneno, le nak, "Oke nalalien!" 16:18 Nalali te limat anpin, ma lotos napunu ma nainunus a'naek. Nainunus humaf nane fe kan bol nitaf na'ko neno fe anmo'e mansian. Nainunus nane mataen le'uf kun. 16:19 Kot a'naek nane anpe' anfani pisa' tenu, ma ale kot ok-oke anbi pah pinan amsa naskuku. Oke te Uisneno namnau nit Babel a'naek nane. Es nane Uisneno nainut in tua na'ko Uisneno klas mninut -- esle' In tua kasat matani. 16:20 Ma ale pulu sin namnekun, ma ale nu'af katita tenif sin. 16:21 Ulan sen-sene naek, le mafenan oni kilo bo'nim anmofu na'ko neno tunan ma antutu ale atoni. Ma sin antek nale'un Uisneno natuin snama ulan sen-sene le mafen le'uf nane.
17:1 Oke te ahake neno tunan mese na'ko ahake neno tunan hitu le neki klas hitu nane nem neu kau ma nak, "Aum, Au of ulile neu ko he nafek amo'e lasi kake naek nane onme, esle' kot a'naek nane le nafena anhaumak noenu. 17:2 Kesel pah pinan anmo'e lasi kake nokan ma alsin le namaika anbi pah pinan sin anmafun natuin sin ninu in tua lasi kake nane." 17:3 Oke te Smanan Uisneno naplenat kau, ma ahake nane neki kau neu mnela paha snaen. Bi bale nane au it bife mese antok anbi mu'it mese le amtasa klima in tunan, le matui nahenu nok ale kanaf si'ut ma akan neu Uisneno. Mu'it nane anmu'i nakaf hitu ma sunaf bo'es. 17:4 Bife nane anpake lipa bauk ulu ma amtasa, ma namasab human neki mnatu, fatu klima ma'upa, ma baunkae usaf. Ma in na' klas mnatu mese anbi in niman le nahenu nok ale lasi amle'ut ma hainisit, in lasi kake upan. 17:5 Anbi in ilan antui kanaf mese le anmu'i lasi tolo. Kanaf nane esle' "Babel a'naek, ainaf neu ale amo'e lasi paisa ma ale atoni amle'ut anbi pah pinan." 17:6 Oke te au it bife nane anmafu natuin na' na'ko to Uisneno ma na' na'ko ale atoni le anmate fun sin na'ki neu Yesus. Leka au it bife nane au umkaka nae le'uf. 17:7 Oke te ahake neno tunan nane nak neu kau, "Ho mumkak neu sa' ka? Leko Au uton ko lasi tolo' na'ko bife nane, ma lasi tolo' na'ko mu'it le in ansae neune, esle' mu'it anmu'i nakaf hitu ma sunaf bo'es. 17:8 Mu'it nane afi anmoni, mes muni i anmaten. Ala kle'o te of in poi na'ko nopu maten ma of in nao neu bale amle'ut. Ale atoni le anmoni anbi pah pinan le sin kanan ka matui fa anbi Sulat Atoni Honis, na'ko afi anfatan pah pinan, ale atoni nane of namkakan leka sin nit mu'it nane. Fun mu'it nane afi anmoni. Muni i anmaten, mes of in anbol anten. 17:9 Anbi lasi i so anmu'i lonef le neki lasi ahinet. Nakaf hitu nane esle' nu'af hitu; esle' ale nu'af bale bife nane antoko. Ma nakaf hitu nane esle' kesel hitu. 17:10 Ma nakaf hitu nane amsa esle' usif hitu. Nim na'ko sin natselan, mese fe esan ma es anteni fe ka nemaf. Kalu in nem, in mes naplenat ka lo fa. 17:11 Ma mu'it le afi anmoni, mes muni i anmaten, nane usif le fanu'e. In le nane mese na'ko usif hitu nane amsa, le leku i fe a'nao neu amle'ut. 17:12 Sunaf bo'es le ho mit nane, es usif bo'es le sin fe ka naplenat fa. Mes of anfe neu sin kuasat he naplenat on usif nok mu'it nane leku mese ah. 17:13 Usif bo'es i sin alsin anmu'i salit papmese; sin alsin nana'at sin matanin ma sin kuasat neu mu'it nane. 17:14 Of sin maken hen laban Bibi Kase nane. Mes Bibi Kase nane nok In atuina sin le na'ki le In boin nalali sin ma In beti sin nane of anbe'u usif-usif nane, fun In kun lo Uisneno neu ale usif sin, ma Kesel neu ale kesel sin." 17:15 Ahake nane na'uab amsa, "Oe le ho mit nane, bale amo'e a'paisa nane antoko, esle' ale uf, ale to', ale pah ma ale a'at. 17:16 Ma sunaf bo'es le ho mit ma mu'it nane of sin kan lomif amo'e kake nane. Sin of nasik nani ale sa' le in anmu'i, ma anmo'e in anfani monas. Sin of neku in sisi ma nale'un nani neki ai. 17:17 Fun Uisneno nabeko nalali sin nekan he nanaoba lekat Uisneno. Uisneno anmo'e sin nekaf mese he nana'at sin kuasat neu mu'it nane, he nati' mu'it nane naplenat talan te Uisneno a'at natiabon kun. 17:18 Bife le ho mit nane, esle' kota naek, le naplenat ale uisfin anbi pah pinan."
18:1 Nalali te au it ahake neno tunan mese bian ansanu na'ko neno tunan. In mu'i kuasat a'naek ma in pinan nane antana pah pinan. 18:2 Ma in anhunun nok hanan a'naek nak, "Bife nane natselen! Babel a'naek natselen! Muni i in anfani bale neu nitu ma ale sman amle'ut. Ale kolo le'u huma-huma le atoni kan lomi fa anmoni anbine. 18:3 Ale uf ninu nalali in tua lasi kake. Ale uisfin pah pinan anmo'e lasi kake nokan, ma ale atoni asosa anbi pah pinan sin anfain atoni amu'it natuin in lasi kake athoen." 18:4 Oke te au nen hanaf bian na'ko neno tunan nak, "Him poi nai, hoi Au to! Him poi nai mi'ko in! Kais mituin ale in sanat sin, ma kais amsutai in kasat sin! 18:5 Fun sin sanat natupu'on ante neno tunan, ma Uisneno namnau ale in mo'et apenut sin. 18:6 Amo'e nai neu in onle in anmo'e nalali neu ki; amtobe nai neu in kuni nua neu ale sa' le in anmo'e nalali. Mitua ini klas meki mninut le in matanin nesi hae nua na'ko mninut le in naloitan nalali neu ki. 18:7 Amfe nai neu in hamu'it ma kulut, le in mafena papmese nok in lasi naeba ma in lasi naliabon le in anfe nani neu in aon kun. Fun in na'uab piut neu in aon nak, 'Au le i usif bife le uplenat! Au ka bife banu kau fa; ma of au ka naben fa nek tu'as!' 18:8 Natuin lasi nane, anbi neno mese ah in of napeni snama -- menas, nek tu'as ma amnahas. Ma of notu in neki ai, fun Uisneno, le nafek in lasi nane In kuasat matani!" 18:9 Kesel pah pinan, le anmo'e lasi kake ma anmonin nok bife nane of sin ankae ma ankul neu kot nane leka sin nit masu' le ansae na'ko ai le notu nani. 18:10 Sin of anhaken anbi lo' fun sin namtausan in hamu'it, ma of sin na'uab nak, "Ailo, kot makana i namleu naek -- kot Babel amatani! Anbi leku mese ah ho fekat nale'un nalali ko!" 18:11 Ale atoni asosa anbi pah pinan amsa ankae ma ankul natuin bife nane, fun kan mu'in tenif atoni mese amsa le hen sos sini bale. 18:12 Katit fa le hen sos noni mnatu, noin muti, fatu klima ma'upa ma baun kae usaf; ma pilu muti, lip bauk ulu, le anmo'e na'ko sutra ma lipa mtasa; ale hau huma-huma le susal na' tapeni, ale bale na'ko sikil ma na'ko hau ma'upa, na'ko nit molo, besi ma faut muti klima; 18:13 hau po' mina, hau fua fukal huma-huma, ale fomeni ma klali: ma atu fomeni, tua min kase, mina, ut ma aen kase; bijae ma bibi kase, bikase ma klet, ale ate ma atoni in monin amsa. 18:14 Ale atoni asosa na'uab neu bife nane, "Ale sa' le hom lomi he mu'i katita teni fa, ma ale lasi alekot ma ho amasat namneku nalalien. Ho of ka mupeni amteni fa!" 18:15 Ale atoni asosa le anfani amu'it natuin nasosa anbi kot nane of anhaken na'ko lo' natuin sin namtausan in hamu'it. Sin of ankae ma ankul, 18:16 oke te sin nak, "Ailo, kot makana i namle'u naek! Le in anpake blua pake muti, lip bauk ulu ma lipa mtasa; le anpake bale mnatu, fatu klima ma'upa ma baun kae usaf! 18:17 Mes anbi leku mese ah, in naneku nani ale in mu'in nane!" Ale ana' belo', ma ale atoni asae belo', ma ale atoni anbi bnao, ma ale atoni le sin mepu anbi tasi, sin haken na'ko lo'. 18:18 Ma sin anhunun leka sin nit masu' ansae na'ko ai le notu kot nane. Sin nak, "Kan mu'if kot bian onle kota naek i!" 18:19 Ma sin tao afu neu sini nakan on taka kulut, oke te ankaen ma anhunun nak, "Namneo, kot naek i namle'uen! In mu'in anmo'e ale atoni le anmu'i bnao anbi tasi anfani amu'it! Mes anbi leku mese ah, in naneku nani ale sa' ok-oke! 18:20 Hoi neno tunan, mumlil nai neu kot nane naskuku! Hoi to Uisneno, ale haef knino ma ale mafefa knino, mimlil nai! Fun Uisneno anhukum nalali in on seunbanit neu sa' le in anmo'e nalali neu ki! 18:21 Nalali te ahake neno tunan mese le matani naiti fatu mese -- naen onle fatu fole a'naek-oke te anpolin neu tasi nanan ma nak, "Onane amsa kot Babel le makana nane of anpolin nani talan te katita teni fa. 18:22 Hanaf na'ko abae heo, ma pukan asit, na'ko afekut ma na'ko apu to'is, of ka manena antenif anbi ko! Of katit fa atoni apakaet mese amsa' anbi ko, ma fatu fole in hanan amsa of ka manena antenif anbi ko. 18:23 Atoni of ka nit anteni fa paku pinan anbi ko; ma of kat nena tenif malinat fesat mafet mamonet anbi ko. Ale ho atoni asosa nane atoni-atoni le makana anbi pah pinan, ma nok ale ho lasi hine ho musekeb ale uf anbi pah pinan!" 18:24 Babel napeni hukum fun anbi kot nane napeni na' na'ko ale mafefa knino, na' na'ko to Uisneno atlefiha tak na' na'ko ale atoni le namate nalali sin anbi pah pinan.
19:1 Namuni na'ko ale lasi nane au nen sa' es onle hanaf a'naek na'ko atoni mfaun na'ko neno tunan le anhunun nak, "Ampules Uisneno! Hit Uisneno nane Uisneno le anfe honis; In Uisneno le apinat ma akuasat! 19:2 In lasi fekat nane amneot ma amnonot! In nafek nalali lasi neu amo'e a'paisa naek, le nale'un pah pinan neki in mo'et poetelo. Uisneno anhukum nalali amo'e kake nane, fun in namate ale ate Uisneno." 19:3 Oke te hanaf na'ko atoni mfaun nane anhunun anteni nak, "Ampules Uisneno! Masu' na'ko ai le notu kot nane of ansae ka nasnasaf!" 19:4 Oke te amnasit sin bo'nuam ha ma amonit ha le anfun ma natef toko nane ansukbok ma nabes neu Uisneno le antoko anbi toko mnatu nane. Sin nak, "Amin! Ampules Uisneno!" 19:5 Oke te au nen hanaf mese na'ko toko mnatu nane nak, "Ale ate-ate Uisneno, ma ale atoni -- anaet ma abaut -- le nabes neu Uisneno, ampules Uisneno!" 19:6 Oke te au nen sa' es onle hanaf na'ko atoni pukan naek; sin hanan onle oe in pesen ma onle lotos ini punun. Au nen sin nak, "Ampules Uisneno! Fun hit Uisneno le Akuasat Anesit nane muni i naplenat! 19:7 Aim nai hit tamlil ma tamo'ek, aim nai hit tanaeb In apinat! Fun neno mafet mamonet neu Bibi Kase nane antelen, ma In fenai naloitan nalalien, neu sin mafet mamonet. 19:8 "Bael pake muti le nalim anfe nalali neu in hen pake." *Blua pake muti nane esle' ale mo'et alekot le to Uisneno anmo'e nani. 19:9 Oke te ahake nane nak neu kau, "Amtui nai: Ua alekot neu ale atoni le anhone nalali sin neu fesat mafet mamonet Bibi Kase nane." Namuni te ahake nane nak: Ateni neu kau, "I beno amneot na'ko Uisneno." 19:10 Oke te au sukbok a'bi ahake nane matan he ubes neu in, mes in nak neu kau, "Kaisa! Kaisa ho mubes neu kau, mubes neu Uisneno! Fun au amsa ate papmese onle ho ma onle ho bae sin ok-oke le anpanat beno amneot le Yesus natiaba nani!" Fun le anbenon neu ale mafefa knino nane beno amneot le Yesus natiaba nani. 19:11 Namuni te au it neno tunan natfei, oke te au it bikase muti mese. In asaet kanan, "Aki'at ma Amneot." In amneot anbi fekat ma anbi lasi makenat le In anmo'e nani, 19:12 In matan on ai pinan ma anbi Ini nakan In anpake sobe namfau. Anbi In aon antui nalali kanaf mese; ma al In mes kun es nahin kanaf nane. 19:13 Sobalu le In anpake anlep anbi na'. Ma antek In kanan, "A'an Uisneno." 19:14 Ale solalus neno tunan natuin In, ma ansaen bikase muti ma anpaken blua pake muti le muit leko. 19:15 Suni mese le na'aik anpoi na'ko In fefan le hen be'u ale uf neki suni nane, ma of In naplenat sin neki tias besi. In naes tua min kase anbi bale tua kasat Uisneno Akuasat Anesit. 19:16 Anbi In sobalu ma anbi In pusun antui kanaf i nak, "Usif neu ale usif ma Tuan neu ale tuan." 19:17 Oke te au it ahake neno tunan mese anhake anbi manas. In anhunun nok hanan a'naek neu ale kolo le nat el anbi neno tnanan nak, "Aim nai mibua he mok neu fesat a'naek le Uisneno anmo'e nani! 19:18 Aim nai he miah ale uisfin sin sisi, solalus nakaf sin sisi, ma ale to meo nakaf sin sisi; aim nai he miah asae bikase sin sisi nok ale sin bikase sin sisi ma ale to mansian sin sisi, anaet ma abaut, ate ma atoni ao sona!" 19:19 Nalali te au it mu'it nane, ma uisfin pah pinan nok in solalus sin, nabuan hen maken nok Asae bikase muti nane ma In solalus sin. 19:20 Ma anheke mu'it nane nok in mafefa moel le anmo'e nalali lasi taka anbi mu'it nane matan. Nok ale lasi taka nane mu'it nane nasekeb ale atoni le anmu'i taka na'ko mu'it nane ma ale atoni le nabes neu fatu mahuma na'ko mu'it nane. Oke te anpolin natam mu'it nane ma mafefa moel nane noba honis neu tasi ai le anpin-pin nok balin. 19:21 Ma ale sin solalus namate sin neki suni le anpoi na'ko Asae bikase muti nane In fefan. Ma ale kolo abit neno tnanan nah sin sisi tal namsenan.
20:1 Nalali te au it ahake neno tunan mese ansanu na'ko neno tunan. In na' letu nopu maten ma kolen besi naek mese anbi in niman. 20:2 In heke kaun koko nane, kauna mnasi -- esle' Nitu ai Sman Amle'ut -- ma in anfutun nani tal ton nifun mese. 20:3 Oke te ahake nane natam kaun koko nane neu nopu maten, nalali te anek nopu maten nane ma antao sulat taka' neu fafon, he nati' kaun koko nane kaisa nasekeb anteni ale uf-uf, tal ton nifun mese nane namsopu. Namuni te of nafetin in anteni neu neno tuk es. 20:4 Oke te au it ale toko, ma ale atoni le antoko anbi ale toko nane sin ansimo kuasat he nafekan lasi. Au it ale atoni sini smanan, le ano'te sini nakan natuin sin ansaksi antom Yesus, ma ane'tun beno na'ko Uisneno. Ale atoni nane sin ka nabesan fa neu mu'it nane ai neu in fatu mahuma. Sin amsa fe kan simof mu'it nane ini taka anbi sin ilan ai anbi sin niman. Sin monin fanin ma naplenat on usif nok Neno Anan ton nifun mese. 20:5 Ale atoni amates le anfen anfani hae ahunut esle' i. Mes ale atoni amates bian sin kan monin fanin fa tal ton nifun mese nane namsopu. 20:6 Ua alekot ma tetus naek neu ale atoni le anfen anfani anbi hae ahunut nane. Maten hae nua kan mu'if kuasat neu sin. Sin of anfani ana' lasi fuat neu Uisneno ma neu Neno Anan; ma of sin naplenat nok In ton nifun mese. 20:7 Ma leka ton nifun mese nane namsopun, of nafetin Nitu na'ko in o'of. 20:8 Ma of in nao hen fuli ale uf le nasitbok anbi pah pinan ok-oke, esle' Gog ma Magog. Nitu nabuab sin hen maken, ma sini mfaun onle snaen anbi tasi. 20:9 Sin nasitbok neu pah pinan ok-oke, oke te anfun natef to Uisneno sin bale snasat ma kot le Uisneno nek nani. Mes ai ansanu na'ko neno tunan ma notu nis sin. 20:10 Oke te Nitu, le anfuli sin, anpolin neu tasi ai ma balin. Nane bale le afi mu'it ma mafefa moel anbine. Ma of anhamu'i sin piut-piut fai manas talan te nabal-bal. 20:11 Oke te au it toko muti mese le naek ma In es antunon neune. Neno tunan ma pah pinan namneku na'ko In matan, talan te ka nit anteni fa. 20:12 Ma au it ale atoni amates, anaet ma abaut, anhaken anbi toko nane matan. Oke te anfei ale sulat nane ok-oke. Namuni te anfei sulat mese anteni, esle' Sulat Honis. Ma anbi leku nane nafek lasi neu ale atoni amates natai nok sin mo'et le antui nani anbi sulat-sulat nane. 20:13 Oke te tasi nana'at ale atoni amates le anmate anbi tasi. Maten ma Plenat Maten nana'at ale atoni amates le anbi nopu maten. Ma nafek lasi neu sin ok-oke natai nok sa' le sin anmo'e nalali. 20:14 Oke te anpolin Natam Maten ma Plenat Maten neu tasi ai. (Tasi ai nane esle' maten hae nua'e.) 20:15 Ale atoni le sin kanan ka matui fa anbi Sulat Honis, ale atoni nane of anpolin sin neu tasi ai.
21:1 Oke te au it neno tunan fe'u ma pah pinan fe'u. Neno tunan ahunut ma pah pinan ahunut namneku ma tasi amsa namneku. 21:2 Ma au it kot aknino nane, esle' Yerusalem fe'u, ansanu na'ko neno tunan, na'ko Uisneno. Kot nane naloitan nalali onle namasab bife fe'u in human he nae'ku nok in mone. 21:3 Oke te au nen hanaf a'naek mese na'ko toko nane nak, "Muni i bale maika Uisneno nane nabua nok mansian! In of anmoni nok sin, ma sin of anfani In to. Uisneno of nabalah nok sin ma anfani Uisneno neu sin. 21:4 In of anose ale matnu na'ko sin matan. lasi maten of katita tenif; nek tu'as, kaet, ai menas amsa of kan mu'in tenif. Ale lasi mna namneku nalalien." 21:5 Oke te In le antoko anbi toko nane nak, "Kiso Au ufe'un ale sa' ok-oke!" In nak anteni neu kau, "Amtui nai, fun ale a'at i namneo ma so ampalsai." 21:6 Oke te In nak, "Oke nalalien! Au ahunut ma amunit; Au Usif tunan na'ko Un-unu tal Namsopu. Ale atoni le anmeno, of Au uinut na'ko oe mata le anfe honis; ma neu lasi nane kais in baen sa'-sa'. 21:7 Ale atoni amnisat of ansimo ale i ok-oke na'ko Kau. Of Au fani In Uisneno, ma of In fani Au anah. 21:8 Mes neu ale atoni amtaus, ale atoni le ka na'ki, ale atoni abulalut, ale atoni ama'otes, ale atoni amo'e kake, ale atoni le anpake hine mesokan, ale atoni le anbes neu le'u mahuma, ma ale atoni apoiba, sin bale esle' tasi ai ma balin le anpin, nane lasi maten hae nua." 21:9 Ma es na'ko ahake neno tunan sin hitu le sin na' klas hitu, le nahenu nok snama hitu amsoput nane, nem neu kau, oke te nak, "Aum neu i! Au he ulile ko bife fe'u, le Bibi Kase in fenai." 21:10 Oke te Smanan Uisneno naplenat kau, ma ahake nane neki kau neu nu'af amnanut. In nalile kau Yerusalem, kot aknino nane. Kot nane ansanu na'ko neno tunan, na'ko Uisneno, 21:11 neki amasat ma apinat Uisneno. Kot nane naklima onle fatu ma'upa amasat, onle fatu ma'upa Yaspis, naklima on nino. 21:12 In baik lape le anfun ma natef nane naek ma mnanu, ma in eno naek bo'es am nua, ma ahake neno tunan bo'es am nua anpao esan. Anbi ale eno naek nane antui uf Israel bo'es am nua sin kankenu. 21:13 Anmu'i eno naek tenu le anbaina neu anin mata ha sin; tenu antom neno Saet, tenu antom neno Li', tenu antom neno Ne'u, ma tenu antom neno Tes. 21:14 Baik lape kot nane anmu'i faut sukit bo'es am nua. Anbi ale fatu sukit nane antui Bibi Kase In haefin bo'es am nua sin kankenu. 21:15 Ahake neno tunan le na'uab nok kau nane, anmu'i teas mese na'ko mnatu hen leti kot nane, in eno naek sin ma in baik lape. 21:16 Kot nane masi'uf ha, ini mnanun ma ini kabenan namnes. Ma ahake nane anleti kot nane neki in teas nane. Ini mnanun kilo nifun nua ma natun ha; ini kabenan ma ini latan namnes nok ini mnanun. 21:17 Leka ahake nane anleti in baik lape nane, ini latan metel bo'ne. Leti le ahake nane anpake, namnes nok leti le mansian anpake. 21:18 Baik lape kot nane anmo'e na'ko fatu klima Yaspis ma in kot nane na'ko noni mnatu, naklima on nino. 21:19 Kot nane in fuat sukit sin namasab nani neki fatu klima ma'upa huma-huma. Fatu sukit ahunut anmo'e na'ko fatu Yaspis, fatu sukit nua'e, fatu nilam, fatu sukit tenu'e, fatu mirah, fatu sukit ha'e, fatu zamrud. 21:20 Fatu sukit nima'e, fatu unam, fatu sukit ne'e, fatu sardis, fatu sukit hitu'e, fatu ratna cempaka, fatu sukit fanu'e, fatu beril, fatu sukit sio'e, fatu krisolit, fatu sukit bo'es e, fatu krisopras, fatu sukit bo'es am mese'e, fatu lazuardi, ma fatu sukit bo'es am nua'e, fatu kom-kome. 21:21 Ma eno naek bo'es am nua nane, fatu klima ma upa' bo'es am nua; eno mese te fatu klima ma upa' mese. Lal opa kot nane anmo'e na'ko noni mnatu naklima onle nino. 21:22 Au ka itaf Ume Uisneno anbi kot nane, fun Ume Uisneno lo es Uisneno Akuasat Anesit, ma Bibi Kase nane. 21:23 Kot nane ka nukaf manas ai funan hen tana nani, fun Apinat Uisneno antana nani ma Bibi Kase nane anfani in paku. 21:24 Ale uf-uf anbi pah pinan of nao'nin anbi in pinan, ma ale usif amsa of neki sin mu'in neu kot nane. 21:25 Ale eno naek kot nane of natfei piut; of ka mae'ka fa, fun katit fa fai anbi nane. 21:26 Ale uf-uf of neki sin kan tola ma sin mu'in neu kot nane. 21:27 Mes ale atoni le anmo'e lasi hainisit ma ale atoni apoiba, ka napenin fa mainuan hen tam neu kot nane - atlefiha tak sa' le nalahi, ka nabe'i fa he teki antam neu kot nane. Le napeni mainuan hen tam neu kot nane al atoni-atoni le sin kanan matui anbi sulat Bibi Kase nane, esle' sulat honis.
22:1 Ahake nane amsa nalile kau noe le meuknino on nino klima; in oe nane anfe honis. Noe nane ansai na'ko toko Uisneno ma Bibi Kase nane, 22:2 neu lal opa atnanan anbi kot nane. Anbi noel nane ninen bian am bian, anmu'i hau honis le nafua hae bo'es am nua ton mese; funan mese te nafua hae mese. Hau nane non anpake on malo he naleko ale uf-uf. 22:3 Anbi kot nane kan mu'if sa'es le he napeni kasat Uisneno. Toko Uisneno ma Bibi Kase nane of anhake anbi kot nane. Ale ate Uisneno of naluli ma nabes neu Uisneno, 22:4 ma of nit In human. Uisneno kanan of matui anbi sin ilan. 22:5 Sin of ka nukan fa paku ai manas pinan, fun fai of kan mu'in tenif, ma fun Uisneno anmes kun of antana sin. Ma sin of naplenat on usif talan te nabal-bal. 22:6 Oke te ahake nane nak neu kau, "Ale a'at i amneot kun ma so tafnek neu Uisneno. Uisneno le anfe In Smanan neu ale mafefa knino, ansonu In ahake neno tunan he nalile neu In ate sin sa' le mes hen bol labah." 22:7 "Ampanat nai!" Yesus nak. "Of Au aum labah. Ua alekot neu ale atoni le anpanat ale a'at beno anbi sulat i!" 22:8 Au, Nai Yohanes, au nen ulali ma it ale lasi nane. Leka au nen ma it ulali ale lasi nane, au li'tua bi ahake neno tunan in haen, le nalile nalali kau ale lasi nane, ma au he ubes eu in, 22:9 mes in nak neu kau, "Kaisa! Kaisa mubes neu kau! So mubes neu Uisneno! Fun au amsa ate onle ho ma ho bae mafefa knino sin ma ale atoni le anpanat ale fainekat anbi sulat i!" 22:10 Oke te in nak anteni, "Kais mutolo' ale a'at beno anbi sulat i, fun in leku anhaumaken ale lasi i of anbol. 22:11 Atoni le anmo'e amle'ut, maut he in mo'e amle'ut piut; atoni le nalahi, maut he in nalahi in aon piut; atoni le natuin lomin Uisneno, maut he natuin lomin Uisneno piut, ma atoni le anmoni neu Uisneno, maut hen moni piut neu Uisneno." 22:12 "Ampanat nai!" Yesus nak, "Of Au aum labah ma eki baen he seunbanin atoni mes-mese natuin sa' le sin anmo'e nalali. 22:13 Au ahunut ma amunit; Au Usif tunan na'ko Un-unu talan te Namsopu." 22:14 Ua alekot neu ale atoni le anfase in sobalu betkone. Sin es napeni mainuan he neku hau fua honis ma antam neu kot nane natuin in eno naek. 22:15 Mes ale atoni le anmo'e ale lasi ahainisit, anpake lasi hine mesokan, le anmo'e lasi kake, le anmao'te, le nabes neu le'u mahuma, ma le napoibok, he neki a'at ai he neki mo'et, ale atoni nane sin bale es kot kotin, 22:16 "Au, Nai Yesus, le Au sonu ulali Au ahake neno tunan hen etun ale lasi i neu ale Tolas Knino. Au le'i hau snuku, le Nai Daud in sufan. Au le i faif nome apinat." 22:17 Smanan Uisneno ma bife fe'u nane nak, "Aum nai!" Atoni le in nen, so in nak, "Aum nai!" Ma sekau le in meno oe, so in nem! Sekau le in anlomi, so in naiti oe honis nane ka nok fa baen. 22:18 Neu ale atoni le amnen ale a'at beno anbi sulat i, au Nai Yohanes, umnauba ki, "Atoni le ansato anteni sa' neu ale a'at beno i, Uisneno of ansato atoni nane in kasat neki ale snama le antui nani anbi sulat i. 22:19 Ma atoni le napoitan sa' na'ko ale a'at beno i, Uisneno of napoitan atoni nane in pa'le antui nani anbi sulat i -- esle' nama' na'ko hau honis ma na'ko kot aknino nane." 22:20 In, le ansaksi ale beno i, nakua a'an nak, "Namneo, Au aum labah!" Amin. Namneo! Koenom aum nai, koi Usif Yesus! 22:21 So Usif Yesus anfe In tetus neu ale to Uisneno! Amin.