The Old Testament of the Holy Bible
Nai Maromak halo lalehan, rai ho buat hotu-hotu iha nia laran
1 Hahuu foufoun, Nai Maromak halo lalehan ho rai. 2 Iha tempu nebaa, mundu seidauk iha forma i buat ida seidauk iha. Bee deit mak iha. I nakukun taka metin bee nee. Maromak nia Espíritu semo baa-mai iha bee nia leten. 3 I Nai Maromak hatete, “Tenki iha naroman.” Koalia tiha nunee, naroman moos iha. 4 Nia laran haksolok, tanba Nia haree naroman nee diak duni. I Nia haketak naroman nee hosi nakukun, para ida-idak ho nia oras rasik. 5 Nia foo naran ba naroman nee dehan, ‘loron’, i nakukun nee, ‘kalan’. Nee mak loron ida. 6-7 I Nai Maromak hatete, “Tenki iha fatin mamuk hodi haketak bee. Nee para iha bee iha parte leten, ho bee iha parte kraik.” Koalia tiha nunee, bee nee moos fahe ba rua. 8 I Nia foo naran ba fatin mamuk nee ‘loro leten’. Nee mak loron rua. 9 I Nai Maromak hatete, “Bee iha parte okos nee, tenki hamutuk iha fatin ida, para bele iha rai maran.” Koalia tiha nunee, rai maran moos iha. 10 Parte maran nee, Nia bolu ‘rai’, i bee nebee halibur hamutuk nee, Nia tau naran ‘tasi’. Nai Maromak nia laran haksolok, tanba haree buat sira nee hotu, diak duni. 11 I Nai Maromak hatete, “Rai tenki foo moris duut ho ai. Tenki iha ai nebee foo fuan, duut nebee foo musan, tuir ida-idak nia modelu.” Koalia tiha nunee, duut oi-oin ho ai oi-oin moos iha. 12 Iha rai maran, duut ho ai sira foo musan ho fuan tuir ida-idak nia modelu. Nai Maromak nia laran haksolok, tanba haree buat sira nee hotu, diak duni. 13 Nee mak loron tolu. 14-15 I Nai Maromak hatete, “Iha parte leten, tenki iha buat oi-oin para foo naroman ba rai. Tenki iha buat nebee foo naroman ba loron, ho buat nebee foo naroman ba kalan. Nee hanesan sinál hodi sura tempu, loron, ho tinan.” Koalia tiha nunee, buat naroman sira nee hotu moos iha. 16 Nunee Nai Maromak halo buat naroman boot oin rua. Ida boot liu foo naroman ba loron; ida kiik liu foo naroman ba kalan. I Nia moos halo fitun-fitun. 17 Nia tau buat sira nee iha lalehan, hodi foo naroman mai rai, 18 iha tempu loron, i iha tempu kalan. Nunee, buat sira nee haketak naroman hosi nakukun. Nai Maromak nia laran haksolok, tanba haree buat sira nee hotu, diak duni. 19 Nee mak loron haat. 20 I Nai Maromak hatete, “Tenki iha ikan bara-barak ho buat oi-oin tan nebee moris iha bee laran. I tenki iha manu fuik bara-barak semo iha loro leten.” 21 I Nia halo ikan oi-oin, animál bo-boot nebee moris iha tasi laran, ho buat oi-oin tan nebee moris iha bee laran. Nia moos halo manu fuik oi-oin. Nai Maromak nia laran haksolok, tanba haree buat sira nee hotu, diak duni. 22 I Nai Maromak foo bensaun ba animál sira nee hotu dehan, “Ikan sira tenki aumenta barak para halo nakonu bee iha nebee-nebee. I manu fuik sira moos tenki aumenta barak.” 23 Nee mak loron lima. 24-25 I Nai Maromak hatete, “Tenki iha animál oi-oin moris iha rai maran. Hanesan animál hakiak, animál fuik, i animál nebee dolar iha rai, ida-idak hahoris tuir nia modelu.” Koalia tiha nunee, animál sira nee moos iha. Nai Maromak nia laran haksolok, tanba haree buat sira nee hotu, diak duni. 26 I Nai Maromak hatete, “Mai Ita halo ema hanesan Ita nia Aan. Para sira domina ikan hotu-hotu iha tasi, manu fuik hotu-hotu iha loro leten, animál hakiak hotu, ho animál sira seluk nebee moris iha rai.” 27 Nunee Nai Maromak halo ema hanesan Nia Aan. Nia halo sira mane ho feto. 28 I Nia foo bensaun ba sira dehan, “Imi tenki iha oan barak baa, hodi halo nakonu mundu, i tau matan ba. Imi moos tenki domina ikan, manu fuik, ho animál hotu nebee moris iha rai. 29 Rona di-diak mai! Hau foo ba imi ai-haan oi-oin iha rai nee, hanesan ai nebee foo fuan, ai nebee foo musan, ho modo tahan. 30 Hau moos foo ai tahan ho duut oi-oin, ba animál sira nia hahaan. Hahaan ba animál hakiak sira, animál fuik sira, animál sira dolar iha rai, ho manu fuik sira.” Koalia tiha nunee, hahaan oi-oin moos iha. 31 Nai Maromak haree buat sira hotu nebee nia halo ona nee, i Nia laran haksolok, tanba buat sira nee diak teb-tebes. Nee mak loron neen.
21 Nunee mak Nai Maromak halo hotu ona lalehan ho rai, ho buat hotu-hotu iha nia laran. 2 Nia servisu hotu ona, Nia para. Nee mak loron hitu. 3 Nunee, Nia halo loron hitu sai loron boot hosi loron sira seluk nee. Nia halo nunee, tanba Nia halo ramata ona Nia servisu, i iha loron hitu Nia deskansa. 4 Nai Maromak halo lalehan ho rai nia istória hanesan nee.
Nai Maromak halo mane ho feto
Tempu Nai Maromak foin halo lalehan ho rai nee, 5 seidauk iha ai ho duut oi-oin, tanba Nia seidauk foo udan. I seidauk iha ema hodi halo toos. 6 Iha tempu nee, abu-abu mak sae hosi rai hodi habokon rai. 7 I Nai Maromak foti rai uitoan, kumu halo ema mane ida. I Nia huu iis tama ba nia inus, ema nee moos moris kedas. 8 Liu tiha nee, Nai Maromak loke toos ida iha rai Eden, iha loro-sae nia sorin ba. I Nia tau ema nee hela iha toos nee. 9 Iha toos nia laran, Nia halo moris ona ai huun ho fuan oi-oin mesak di-diak deit, para ema bele haan. Nia moos halo moris ai fuan oin rua iha toos nee nia klaran. Se ema haan ai fuan hosi ai nee ida, nia bele moris nafatin. I se ema haan ai fuan hosi ai ida seluk nee, nia bele hatene saida mak diak i saida mak aat. 10 Iha mota ida suli hosi toos nee. Mota nee fahe ba kadalak haat. 11 Nia kadalak ida naran Pizón. Kadalak ida nee haleu rai Avila, nebee iha osan mean barak. 12 Osan mean iha fatin nee, kualidade diak liu. Iha moos ai been morin, ho fatuk nabilan nebee folin karu. 13 Mota boot nee nia kadalak rua, naran Gióm. Kadalak nee haleu rai Kuxe. 14 Mota kadalak tolu, naran Tigre. Kadalak ida nee baliza ho rai Asíria iha loro-sae nia sorin ba. Mota kadalak haat, naran Eufrates. 15 NAI Maromak tau ema nee hela iha Eden, hodi tau matan ba toos nee. 16 Nia foo orden ba ema nee dehan, “O bele haan ai fuan saida deit, hosi ai fuan hotu-hotu iha toos nee. 17 Maibee iha ai huun ida nia fuan mak o la bele haan. Tanba ai fuan nee mak foo hatene kona ba saida mak diak i saida mak aat. Se o haan, o mate kedas.” 18 I NAI Maromak hatete tan, “Ema nee moris mesak deit la diak. Nunee Hau atu halo maluk ida foo ba nia.” 19-20 Iha tempu nee, NAI Maromak raut rai, kumu halo animál oi-oin ho manu fuik hotu-hotu. I Nia lori animál ho manu fuik sira nee ba iha ema mane nee, para tau naran ba sira. Depois ema nee tau naran ba animál sira nee ho manu fuik hotu-hotu, ida-idak ho nia naran. Maibee nia rasik seidauk iha maluk atu ajuda nia. 21 Entaun, NAI Maromak halo ema nee toba dukur tiha. Momentu nia toba, Maromak hasai nia ruin knosen ida, depois taka fila fali kanek. 22 Hosi ruin nee, Nia halo feto. I Nia lori feto nee baa entrega ba mane. 23 Haree feto nee, mane moos dehan, “Nee mak foin pár ho hau! Nia ruin hasai hosi hau nia ruin. Nia isin moos hasai hosi hau nia isin. Tanba nia sai hosi mane, nee mak hau tau nia naran ‘feto’.” 24 Tanba nee mak ema mane husik nia aman ho nia inan, hodi baa moris neon ida laran ida ho nia kaben. 25 Momentu nee, sira nain rua isin molik, maibee sira la senti moe.
Ema lakohi rona ba Nai Maromak
1 Hosi animál sira hotu nebee NAI Maromak halo ona iha mundu, samea mak fila lia tuun-sae. Iha loron ida, samea husu ba feto dehan, “Nai Maromak bandu dehan, ‘Imi la bele haan ai fuan sira iha toos nee’, loos ka lae?” 2-3 Feto nee hataan, “Lae! Ami bele haan! Maibee iha ai huun ida deit iha toos nia klaran, nia fuan mak Nai Maromak bandu ami la bele haan, i la bele book nia fuan, se lae ami mate.” 4 Maibee samea hataan fali dehan, “Nee la loos! Imi la mate! 5 Nai Maromak bandu nunee, tanba Nia hatene ona, se imi haan ai fuan nee, imi sei sai matenek hanesan Nia. Nunee imi hatene saida mak diak, i saida mak aat.” 6 I feto haree ai huun nee diak, i nia fuan moos furak para haan, nia hanoin dehan, “Se hau haan ai fuan nee, hau sei sai matenek.” Entaun nia kuu ai fuan nee, nia haan. I nia moos lori baa foo nia lain, i nia lain moos haan. 7 Haan tiha, derepenti deit sira nain rua hatene katak sira isin molik hela. Nee mak sira baa suku hamutuk ai tahan hodi taka sira nia isin molik. 8 Iha lokraik, sira rona NAI Maromak lao iha toos. Nunee sira baa subar tiha iha ai laran. 9 Maibee NAI Maromak bolu mane nee dehan, “Adão, o iha nebee?” 10 Mane nee hataan, “Hau rona Maromak nia lian iha toos. Maibee hau moe, tanba hau isin molik hela. Nee mak hau halai baa subar.” 11 I NAI Maromak hatete, “See mak foo hatene ba o dehan o molik? O haan tiha ona ai fuan nebee Hau bandu nee ka?” 12 Adão hataan, “Feto ida nebee Nai Maromak foo mai hau nee, nia mak foo ai fuan nee mai hau haan.” 13 I NAI Maromak husu ba feto, “Nusaa mak o halo nunee?” Feto nee hataan, “Samea mak bosok hau. Nee mak hau haan tiha ona ai fuan nee.”
Nai Maromak foo malisan ba sira
14 Nunee NAI Maromak foo malisan ba samea nee dehan, “Tanba o halo ona nunee, Hau kastigu o todan liu animál sira seluk. Komesa agora, o dolar iha rai deit. 15 Hau halo o ho feto nee inimigu beibeik. I imi nain rua nia bei oan sira moos nunee. O nia jerasaun sei tata ema nia ain tuban. Maibee feto nee nia jerasaun ida, sei sama rahun o nia ulun.” 16 I Nai Maromak foo hatene ba feto nee dehan, “Hau sei aumenta o nia terus bainhira o isin rua, i aumenta moras kuandu o tuur ahi. Maibee bele nunee moos, o sei hakarak nafatin o nia lain. I nia mak sei domina o.” 17 I Nai Maromak foo hatene ba mane nee dehan, “O la tuir Hau nia orden, maibee o tuir fali o nia kaben nia hakarak, too o haan ai fuan ida nebee Hau bandu nee. Nee duni, o moos hetan kastigu. I rai moos hetan kastigu. Komesa agora too o mate, o tenki servisu mate-an, foin o bele hetan hahaan. Ho servisu nunee, foin o bele moris. 18 Rai sei foo duut aat ho ai tarak; maski nunee o sei hetan ai-haan hosi toos. 19 O tenki servisu too kosar metan sai nunee too mate. Hau halo o hosi rai. Nunee, bainhira o mate, o fila fali ba rai.” 20 Adão tau naran ba nia kaben ‘Eva’ (nee dehan katak ‘moris’), tanba nia ema hotu-hotu nia inan. 21 Depois NAI Maromak halo hena hosi animál nia kulit, foo ba sira nain rua hatais.
Nai Maromak duni sai Adão ho Eva hosi toos Eden
22 I NAI Maromak hatete, “Agora nee ema hatene ona buat nebee mak diak, i nebee mak aat, hanesan ona Ita. Keta halo be sira haan tan ai fuan hosi ai huun nebee foo moris, i sira bele moris nafatin.” 23 Entaun Nai Maromak duni sai tiha sira hosi toos Eden, ba iha fatin seluk, atu fila rai. Ema mai hosi rai, i tenki moos moris hosi rai. 24 Duni sai tiha sira, Nai Maromak haruka Nia anju nebee iha liras baa hein toos nee iha loro-sae nia sorin ba. Maromak tau surik kroat nebee dulas baa-mai, i lakan hanesan ahi. Maromak haruka sira taka tiha dalan tama ba toos nee, tan Nia lakohi ema baa kuu ai fuan nebee bele foo moris nafatin.
Kaín oho nia alin Abel
1 Liu tiha nee, Adão hola malu ho nia kaben Eva. Depois feto nee isin rua, i tuur ahi, oan mane ida. Nia dehan, “Hau hetan oan mane ida, tanba NAI Maromak tulun ona hau.” I nia tau naran ba labarik nee, Kaín (nee dehan katak ‘hetan’). 2 Depois Eva tuur ahi tan, labarik mane ida, i nia tau naran Abel. Bainhira sira nain rua boot ona, Abel sai bibi atan, i Kaín sai toos nain. 3 Iha loron ida, Kaín lori ai-haan balu hosi nia toos, baa foo ba NAI Maromak. 4 Abel moos lori nia bibi inan nia oan primeiru, nebee bokur. Bibi oan sira nee nia oho tiha, i nia lori naan nebee diak liu hodi foo ba Maromak. Haree nunee, NAI Maromak nia laran haksolok ho Abel i ho nia oferta nee. 5 Maibee Maromak la gosta Kaín ho nia oferta. Kaín hirus atu-mate, too nia hanoin atu oho. 6 NAI Maromak husu ba Kaín dehan, “Kaín! Nusaa mak o hirus nunee? Tansaa mak o hanoin atu oho o nia alin? 7 Se o halo buat diak, Hau moos simu o ho diak. Maibee kuidadu! Buat aat hanesan animál siak nebee estraga. Nunee, se o hanoin atu halo buat aat, keta halo!” Kaín atu oho Abel 8 Iha loron ida, Kaín koalia ba Abel dehan, “Alin! Mai ita nain rua baa lai toos.” Sira foin too iha nebaa, derepenti deit Kaín baku mate tiha nia alin. 9 I NAI Maromak husu ba Kaín, “Kaín! O nia alin iha nebee?” Kaín hataan, “Hau la hatene! Hau mak hein nia ka?” 10 Nai Maromak dehan, “Nusaa mak o halo buat aat nee? O keta hanoin o bele subar o nia alin nia raan iha rai, tan nia raan nee reklama mai Hau. 11 Agora malisan kona ona o. Tanba bainhira o oho o nia alin, rai susu tiha nia raan. Nunee agora, o tenki sai hosi nee. 12 Se o halo toos, rai la foo rezultadu ida ba o. Komesa agora, o sei la hela hakmatek, i sei lao tuun-sae buka moris iha mundu nee.” 13 Maibee Kaín protesta ba NAI Maromak dehan, “Nusaa mak Maromak foo malisan todan demais nee, too hau moos la aguenta? 14 Tanba Maromak duni sai ona hau hosi rai nee, mak hau sei dook hosi Maromak. Hau sei lao tuun lao sae, i see deit mak hasoru hau, sei oho hau.” 15 Maibee NAI Maromak hataan fali dehan, “Laos nunee! See mak oho o, Hau sei kastigu nia todan liu dala hitu.” Depois NAI Maromak tau sinál ida ba Kaín, para ema bele hatene katak sira la bele oho nia. 16 Depois nia sai hosi Maromak nia oin, i lao too iha fatin ida iha toos Eden nia sorin loro-sae. Fatin nee naran Node, nee dehan katak ‘lao rai’. I nia hela iha nebaa.
Kaín nia jerasaun
17 Liu tiha nee, Kaín kaben. Nia kaben isin rua, i tuur ahi, oan mane ida, nebee sira tau naran Enoke. I Kaín harii aldeia ida. Nia tau aldeia nee, naran Enoke, tuir nia oan nia naran. 18 Enoke nia oan, Irade. Irade nia oan, Meujael. Meujael nia oan, Metusael. I Metusael nia oan, Lameke. 19 Lameke kaben ho feto nain rua. Ida naran Ada, ho ida tan naran Zila. 20 Ada nia oan ida, naran Jabál. Nia jerasaun sira hakiak animál. Sira sempre muda fatin, i hela iha tenda. 21 Nia alin naran Jubál. Jubál nia jerasaun sira sai tokadór múzika, sira toka arpa i huu flauta. Instrumentu múzika 22 Lameke nia kaben Zila tuur ahi, Tubal-Kaín. Nia jerasaun sai badaen besi, sira halo sasaan oi-oin hosi besi ho riti. Tubal-Kaín nia alin feto, naran Naama. 23 Loron ida, Lameke gava nia aan iha nia kaben rua nee nia oin, dehan, “Imi rona mai! Ohin mane klosan ida atu baku hau, maibee hau baku mate tiha nia. 24 Ema nebee mak oho Kaín, sei hetan kastigu dala hitu. Maibee see mak vinga hau, sira hetan kastigu dala 77.”
Adão nia oan Sete
25 Adão nia kaben Eva iha oan mane ida tan. Sira tau naran ba labarik nee, Sete, tanba Eva dehan, “Nai Maromak foo oan nee mai hau iha Abel nia fatin, nebee Kaín oho tiha nee.” 26 Kleur-kleur Sete iha oan mane ida, naran Enos. Iha tempu nee, ema komesa adora ona NAI Maromak.
Adão nia jerasaun too Noé
1-2 Momentu Nai Maromak halo ema, Nia halo sira nia imajen, hanesan Nia Aan rasik. Nia halo sira, mane ho feto. I Nia bolu sira ‘ema’, i Nia foo bensaun ba sira. Ema primeiru nee naran Adão. Adão nia jerasaun sira nia naran hanesan tuir mai nee: 3 Bainhira Adão tinan 130, nia hetan oan mane ida, oin hanesan nia aman. Nia tau naran ba labarik nee, Sete. 4 Nee liu tiha, Adão sei moris tan tinan 800, i nia hetan tan oan mane ho oan feto. 5 Adão mate ho tinan 930. 6 Bainhira Sete tinan 105, nia hetan oan mane ida, naran Enos. 7 Sete sei moris tan tinan 807, i nia hetan tan oan mane ho oan feto. 8 Sete mate ho tinan 912. 9 Bainhira Enos tinan 90, nia hetan oan mane ida, naran Kenán. 10 Nee liu tiha, Enos sei moris tan tinan 815, i nia hetan tan oan mane ho oan feto. 11 Enos mate ho tinan 905. 12 Bainhira Kenán tinan 70, nia hetan oan mane ida, naran Maalalel. 13 Liu tiha nee, Kenán sei moris tan tinan 840, i nia hetan tan oan mane ho oan feto. 14 Kenán mate ho tinan 910. 15 Bainhira Maalalel tinan 65, nia hetan oan mane ida, naran Jarede. 16 Liu tiha nee, Maalalel sei moris tan tinan 830, i nia hetan tan oan mane ho oan feto. 17 Maalalel mate ho tinan 895. 18 Bainhira Jarede tinan 162, nia hetan oan mane ida, naran Enoke. 19 Liu tiha nee, Jarede sei moris tan tinan 800, i nia sei hetan tan oan mane ho oan feto. 20 Jarede mate ho tinan 962. 21 Bainhira Enoke tinan 65, nia hetan oan mane ida, naran Metuselá. 22 Tuir mai, Enoke moris neon ida ho Nai Maromak too tinan 300 tan. Nia moos hetan tan oan mane ho oan feto. 23-24 Enoke moris laran ida nafatin ho Nai Maromak. I kuandu nia tinan 365, nia la iha tiha, tanba Nai Maromak lori tiha nia. 25 Bainhira Metuselá tinan 187, nia hetan oan mane ida, naran Lameke. 26 Liu tiha nee, Metuselá sei moris tan tinan 782, i nia hetan tan oan mane ho oan feto. 27 Metuselá mate ho tinan 969. 28 Bainhira Lameke tinan 182, nia hetan oan mane ida. 29 Lameke tau labarik nee nia naran Noé, tanba nia dehan, “Labarik nee sei halo haksolok ita nia laran maski ita nia servisu todan iha rai nee, nebee Nai Naromak foo tiha ona malisan.” 30 Lameke sei moris tan tinan 595, i nia hetan tan oan mane ho oan feto. 31 Lameke mate ho tinan 777. 32 Bainhira Noé tinan 500, nia hetan oan mane nain tolu, mak nee: Sem, Jafé ho Kam.
Ema nia hahalok aat
61 Iha tempu nee, ema aumenta barak ona. I sira moris namkari lemo rai iha mundu. Sira moos hetan oan feto. 2 Nai Maromak nia oan mane sira haree ema nia oan feto sira nee oin mesak bonita-bonita deit. Nunee sira baa kaben ho feto raan sira nebee mak sira hakarak. 3 NAI Maromak hatete, “Hau baruk ona ho ema sira nee nia moris arbiru nunee. Hau nia Espíritu lakohi tu-tuir sira beibeik. Nunee, komesa agora, sira so bele moris too deit tinan l20.” 4 Iha tempu nee, iha ona ema rasa boot iha mundu. Kuandu Maromak nia oan mane sira kaben ho ema nia oan feto sira, sira hetan oan, nebee asuwain iha istória uluk nian. 5 Iha tempu nee, NAI Maromak haree ema iha mundu nia hahalok aat demais ona. Sira nia laran hanoin deit mak buat aat. 6 NAI Maromak moos arepende halo ona ema hodi hela iha mundu. Nee halo Nia laran susar teb-tebes. 7 Nee mak Maromak hatete, “Hau sei halo rahun ema, nebee Hau halo ona iha mundu. Manu fuik ho animál sira moos, Hau sei halo rahun tiha hotu. Tanba Hau arepende halo tiha ona sira.” 8 So Noé deit mak halo haksolok NAI Maromak nia laran.
Noé nia istória
9-10 Noé nia istória nunee. Nia iha oan mane nain tolu, naran: Sem, Jafé ho Kam. Noé nee moris loos, i la halo buat aat. Iha tempu nee, nia mesak deit mak ema diak. Nia moris besik ba Nai Maromak. 11-12 Maibee Nai Maromak haree ema sira seluk mesak ema aat hotu. Iha nebee-nebee deit, sira halo mak violénsia. Nai Maromak haree ema iha mundu, so halo buat aat deit. 13 I Nai Maromak foo hatene ba Noé dehan, “Iha nebee-nebee Hau so haree ema nia hahalok aat deit. Nunee, Hau desidi ona katak Hau atu halo rahun tiha hotu mundu nee ho buat hotu-hotu iha nia laran. 14 Noé! Agora o halo roo boot ida hodi ai diak. Roo nia laran, o fahe kuartu-kuartu. I roo nia laran ho liur, o taka ho alkatraun. 15 Roo nee, o halo nia naruk metru 133 ; nia luan metru 22 ; nia aas metru 13. 16 Roo nee halo ho nia kakuluk. Maibee halo janela haleu iha kakuluk nia okos. Janela nee nia aas metru sorin balu. Fahe roo nee halo andár tolu. I halo odamatan ida iha roo nia sorin. 17 Hanoin di-diak! Tanba Hau sei halo rai nabeen para halo mate buat hotu-hotu nebee moris iha mundu, too restu ida moos la iha. 18 Maibee Hau sei halo promesa ho o, nunee o sei tama iha roo nee nia laran, hamutuk ho o nia kaben, ho o nia oan sira, ho o nia feto foun sira. 19-20 Hosi animál sira hotu, o tenki lori pár ida-ida, aman ida ho inan ida, hodi baa hatama ba iha roo nee nia laran, para sira bele moris hamutuk ho o. Hanesan animál hakiak ho animál fuik, ho moos manu fuik, para sira hotu bele moris. 21 O tenki lori tama ba roo nee, hahaan oi-oin ba imi, ho moos ba animál sira.” Noé komesa halo roo boot 22 I Noé moos halo tuir buat hotu nebee mak Nai Maromak haruka.
Rai nabeen
1 Tuir mai, NAI Maromak hatete ba Noé, “Hau haree baa iha nebee-nebee, maibee so o mesak deit mak moris loos. Tanba nee, o ho o nia kaben ho o nia oan sira tama ona ba roo laran nee. 2-3 Hosi animál hotu-hotu nebee imi bele haan, ho animál hotu-hotu nebee bele lori mai foo Hau, o lori pár hitu-hitu tama ba roo laran. Hosi manu fuik hotu-hotu moos lori pár hitu-hitu. Maibee animál sira seluk, lori deit pár ida-ida, aman ida, inan ida. Nunee animál ho manu fuik sira nee sai fini, para bele iha nafatin. 4 Hanoin di-diak! Tanba loron hitu tan, Hau haruka udan boot mai la para, too loron haat-nulu kalan haat-nulu. Ho nunee, Hau halo mate buat hotu-hotu nebee moris iha rai maran, nebee Hau halo ona.” 5 I Noé moos halo tuir buat hotu-hotu nebee mak Nai Maromak haruka. 6 Bainhira udan boot nee mai, Noé tinan 600 ona. 7 Noé ho nia kaben, ho nia oan sira, ho nia feto foun sira tama ba roo laran, para bele salva-an hosi bee boot nee. 8-9 Tuir NAI Maromak nia orden nee, Noé lori tama ba roo manu fuik oi-oin ho animál sira seluk, ida-idak ho nia pár. Nia lori animál nebee ema bele haan, ho moos animál nebee bandu la bele haan. 10 Liu tiha loron hitu, udan boot moos fakar mai, too mundu bee nakonu. 11 Natoon Noé tinan 600, liu fulan rua loron l7, rai moos nabeen. Iha tempu nee, hanesan odamatan lalehan nakloke, udan boot moos fakar mai. I bee matan hotu-hotu iha rai okos nakfera too bee fakar sai. 12 Udan moos mai loron-kalan la para, too loron haat-nulu. 13 Maibee iha loron nee, Noé nia kaben, nia oan nain tolu nee mak, Sem, Jafé ho Kam, ho nia feto foun sira hotu tama ba roo laran. 14 Sira tama hamutuk ho animál sira, hanesan animál hakiak ho animál fuik, manu fuik ho buat sira seluk nebee mak iha liras. 15-16 Pár ida-ida hosi buat hotu-hotu nebee iha moris, tama ba roo laran hamutuk ho Noé, tuir Nai Maromak nia orden. Kuandu sira tama tiha hotu ona, NAI Maromak taka tiha odamatan. 17-19 Udan boot mai nafatin, too loron haat-nulu. Bee sae aumenta aas too roo namlele iha bee leten. Bee sae beibeik too taka tiha foho aas sira. 20 Bee nee sae nafatin, too liu tiha foho tutun sira nee metru hitu. 21-23 Nunee buat hotu-hotu nebee moris iha rai maran mate mohu. Hanesan ema, animál hakiak ho animál fuik- kiik ho boot- ho manu fuik sira. So Noé ho sira nebee iha roo laran mak moris. 24 Bee nee la tuun durante fulan lima.
Rai komesa maran
1 Maibee Nai Maromak la haluha Noé sira ho animál hotu-hotu nebee hamutuk ho nia iha roo laran nee. Entaun Nia haruka anin boot mai huu halo tuun tiha bee nee. 2 Nia taka bee matan hotu-hotu iha rai, i halo para udan. 3 Entaun bee moos menus daudaun. Liu tiha fulan lima, bee laduun aas ona. 4 Natoon iha loron l7, fulan hitu, roo nee para iha foho aas ida, naran arat. 5 Bee tuun beibeik, too iha loron primeiru, fulan sanulu, foho-foho nia tutun komesa sai.
Noé husik manu pombu
6 Liu tiha loron haat-nulu tan, Noé loke roo nia janela. 7 Nia husik manu metan ida. Manu nee la fila mai roo, maibee semo baa-mai, too bee nee maran. 8 Nia husik tan manu pombu ida, para atu hatene bee nee tuun ona ka seidauk. 9 Maibee tanba bee sei nakonu hela iha mundu tomak, manu nee la hetan fatin hodi tuur. Entaun nia fila fali ba roo. Noé lolo nia liman, hodi simu manu nee ba roo laran. 10 Noé hein loron hitu tan, depois nia husik fali manu nee. 11 Iha lokraik, manu pombu nee fila fali ba Noé, lori oliveira tahan ida iha nia ibun. Entaun Noé hatene katak bee tuun tebes ona. 12 Nia hein loron hitu tan, depois nia husik fali manu pombu nee. Maibee dala ida nee, manu pombu nee la fila ona. 13 Kuandu Noé tinan 601, natoon iha loron ida fulan ida, bee tuun tiha ona. Nia loke roo nia janela, hodi haree baa-mai, rai maran ona! 14 Too iha loron l7, fulan rua, rai maran tebes ona. 15 Entaun Nai Maromak hatete ba nia, 16 “Noé! Agora imi hotu tuun hosi roo ona. 17 Hasai animál ho manu sira nee hotu! Husik tiha sira para aumenta barak hodi halo nakonu mundu.” 18-19 Nunee Noé ho nia kaben, nia oan sira, ho nia feto foun sira sai hosi roo. Animál hotu-hotu moos sai, ida-idak tuir nia grupu.
Noé halo sakrifísiu ba Nai Maromak Sira hada fatuk hodi halo altár
20 Tuir mai Noé hada fatuk hodi halo altár ida ba NAI Maromak. Hosi animál hotu-hotu nebee bele uza hodi halo sakrifísiu, nia hasai balu, i nia oho para tunu iha altár nee, hodi agradese ba NAI Maromak. 21 Kuandu NAI Maromak horon sakrifísiu nee nia morin, Nia laran haksolok. Nia hanoin dehan, “Hau la foo tan malisan ba mundu. Maski ema hanoin deit buat aat dezde sira kiik, maibee Hau sei la halo rahun tan buat hotu nebee moris, hanesan Hau halo tiha ona. 22 Durante mundu nee sei iha, iha tempu kuda ho tempu kuu, tempu malirin ho tempu manas, tempu bailoro ho tempu udan, loron ho kalan.”
Nai Maromak halo promesa ho Noé
1 Nai Maromak foo bensaun ba Noé ho ba nia oan sira, hodi hatete, “Imi oan halo barak baa, hodi halo nakonu mundu. 2 I animál fuik, manu ho ikan sira sei tauk ba imi. Imi mak tenki manda sira. 3 Imi bele haan animál sira nee hotu nia naan, hanesan imi haan ai-haan hosi toos. Buat hirak nee hotu Hau foo ba imi. 4 So imi la bele haan naan nebee mak raan sei iha, tanba animál nia moris iha nia raan. 5-6 Hau halo ema tuir Hau nia imajen. Tanba nee, keta oho ema. Se iha ema ka animál mak halo mate ema, imi moos tenki oho tiha nia. 7 Imi tenki iha oan halo barak, hodi halo nakonu fali mundu.” 8 Nai Maromak hatutan tan nia liafuan dehan, 9 “Agora Hau halo Hau nia promesa ho imi, ho moos imi nia jerasaun sira. 10 Promesa nee kona moos ba buat hotu nebee mak moris, hanesan animál hakiak, animál fuik, ho manu fuik sira, buat hotu nebee sai hamutuk ho imi hosi roo nee. 11 Hau nia promesa nee, nunee: Hau sei la halo tan rai nabeen, para halo mate buat hotu nebee iha moris, i halo rahun buat hotu iha mundu. 12-l3 Hau tau arkuiris iha loro leten hanesan sinál hodi foo hanoin mai Hau, kona ba Hau nia promesa nebee nunka kotu ho imi ho buat hotu nebee mak moris iha mundu. 14-17 Bainhira arkuiris mosu iha kalohan, entaun Hau sei hanoin Hau nia promesa nee, katak, bee boot sei la halo rahun tan buat hotu-hotu nebee iha vida. Nunee Hau nia promesa nee kesi metin ho imi ho buat hotu-hotu nebee moris. Promesa nee la iha rohan.”
Noé foo malisan ba nia oan Kam
18 Noé nia oan sira nebee sai hosi roo, mak nee: Sem, Jafé ho Kam. (Kam nee Kanaán nia aman.) 19 Ema hotu-hotu iha mundu nia jerasaun mai hosi Noé nia oan nain tolu nee. Ai uvas 20 Noé nee ema toos nain. Nia mak hahuu fo-foun kuda uvas. 21 Iha loron ida, nia hemu tua uvas too lanu todan. Nia hasai tiha nia hena hodi toba molik deit iha nia tenda laran. 22 Kuandu Kam haree nia aman isin molik, nia halai sai ba liur, konta ba nia maun Sem ho Jafé. 23 Depois sira nain rua foti manta ida, kahe iha sira nia kabaas, i hakiduk tama ba tenda laran, hodi taka sira nia aman nia isin molik. Nunee sira la haree sira nia aman nia molik. Depois sira sai ba liur. 24 Bainhira Noé nia oin komesa moos ona, nia hatene saida mak nia oan ikun halo ba nia. 25 Entaun nia hatete, “Kanaán nia aman! Hau foo malisan ba o! O sei sai atan ba o nia maun sira. 26 Hahii ba NAI Maromak tanba Sem! Kanaán nia aman sei sai Sem nia atan. 27 Nai Maromak sei aumenta Jafé nia rain halo luan; i nia jerasaun moris dame ho Sem nia jerasaun. Maibee Kanaán nia aman sei sai Jafé nia atan.” 28 Komesa hosi bee boot nee hotu, Noé sei moris tan tinan 350. 29 Nia mate ho tinan 950.
Noé ho Jafé nia jerasaun
1 Rai nabeen hotu tiha, Noé nia oan sira moos hetan oan. Nee mak jerasaun hosi Sem, Jafé ho Kam. 2-5 Jafé nia oan mak nee: Gomer, Magoge, Madai, Javán, Tubal, Mezeke ho Tiras. Sira ida-idak nia jerasaun ho sira nia lian, sira nia suku, ho sira nia rain rasik. Gomer nia jerasaun mak nee: Askenás, Rifate ho Togarma. Javán nia jerasaun mak Elisá, Tarsis, ema Kitim sira, ho Dodanim nebee hela iha tasi ibun.
Kam nia jerasaun
6 Kam nia oan mak nee: Kuse, Misraim, Pute ho Kanaán. 7 Kuse nia oan mak nee: Sebá, Avilá, Sabtá, Raamá, ho Sabteká. Raamá nia oan mak nee: Sabá ho Dedán. 8 Kuse nia oan mane ida, naran Nimrode. Nia funu nain primeiru iha mundu. 9 Nia forsa nee mai hosi NAI Maromak, too nia sai kasadór diak ida. Nee mak ema baibain dehan, “O nee kasadór diak ida hanesan Nimrode, ida nebee hetan forsa hosi NAI Maromak.” 10 Fo-foun nia rain komesa hosi Babel, Ereke, Akade, ho Kalné, sidade sira hotu iha Sinear. 11 Depois nia ukun tan too Asíria. Iha nebaa nia harii sidade Nínive, Reobote-Ir, Kalá, l2 ho Resén mak iha Nínive ho Kalá nia klaran. Nee hotu mesak sidade boot. 13 Misraim nia jerasaun mak nee: ema Ludim, Anamim, Leabim, Naftuim, 14 Patrusim, Kasluim, i Kaftorim. Ema Kasluim nee mak ema Filistin sira nia bei-ala. 15 Kanaán nia oan boot, mak Sidon. Kanaán moos bei-ala hosi ema Hit, 16 Jebusi, Amori, Girgasi, 17 Evi, Arki, Sini, 18 Arvadi, Zemari, ho Amati. Kanaán nia jerasaun sira namkari baa dook, 19 too sira nia rai baliza komesa hosi Sidon ba iha Gerar, too iha Gaza. Hosi nee, ba iha Sodoma, Gomora, Admá, ho Zeboím, too iha Lasa. 20 Sira hotu nee Kam nia jerasaun. Ida-idak ho nia lian, nia suku, ho nia rain rasik.
Sem nia jerasaun
21 Jafé nia maun Sem, ema Eber sira nia bei-ala. 22 Sem nia oan, mak Elam, Asúr, Arpaxad, Lude ho Aram. 23 Aram, nia jerasaun mak ema Us, Hul, Geter ho Mas. 24 Arpaxad nia oan, Xela. Xela nia oan Eber. 25 Eber iha oan mane nain rua. Ida boot, naran Peleg (nee dehan katak ‘fahe’), tanba iha tempu nee, ema sira fahe malu iha mundu. Nia alin, naran Jotán. 26 Jotán nia jerasaun mak Almodá, Selefe, Azár-Mavé, Jerá, 27 Adoraun, Uzál, Dikla, 28 Obal, Abimael, Sabá, 29 Ofir, Avilá, ho Jobabe. Sira hotu nee Jotán nia jerasaun. 30 Sira nia hela fatin nee, komesa hosi Mesá, too iha Sefar, nee mak iha foho sira iha loro-sae. 31 Sira nee hotu, Sem nia jerasaun. Ida-idak ho nia lian, nia suku, ho nia rain rasik. 32 Sira nee hotu, Noé nia jerasaun, ida-idak ho nia suku rasik. Tempu rai nabeen hotu ona, sira nee mak fahe namkari halo nakonu mundu.
Uma aas Babél
1 Hori uluk, ema hotu iha mundu nee koalia lian ida deit. 2 Sira balu muda fatin ba iha loro-sae. Too iha rai tetuk ida iha Sinear, sira hela iha nebaa. 3-4 Sira hotu koalia ba malu dehan, “Maun-alin sira! Mai ita harii sidade boot ida. Ita tenki halo tijolu, i sunu halo forti. Ita hada tijolu sira nee, halo metin ho alkatraun. Depois ita harii uma aas ida, nia tutun too iha lalehan, para ita bele hetan naran boot. Nunee ita sei sai nasaun boot ida, para ita la bele namkari.” 5 Depois NAI Maromak tuun mai haree sidade ho uma aas nebee sira halo nee. 6 I Nia hatete, “Ema sira nee hotu rai ida, i uza lian ida. Saida mak sira halo agora nee, foin komesa hakat ida. Aban-bainrua, se sira hotu hamutuk hanesan agora nee, sira hakarak halo buat saida deit, bele. 7 Diak liu Ita tuun baa halo sira nia lian sai keta-ketak tiha, para sira la bele kompriende malu tan.” 8 Entaun Nai Maromak tuun para halo rungu-ranga sira nia lian. Ho nunee, Nia halo ema sira nee namkari ba iha fatin hotu-hotu iha mundu nee. I sira la halo tan sidade nee ona. 9 Nee mak sira tau naran ba sidade nee, Babél. (Iha lian Ebreu, nee rona atu hanesan liafuan ida nebee dehan ‘konfuzaun’). Tanba NAI Maromak halo konfuzaun tiha sira nia lian, i halo sira namkari ba iha fatin-fatin iha mundu nee.
Hosi Sem too Abrão
10 Nee Sem nia jerasaun. Bainhira rai nabeen liu tiha ona tinan rua, natoon Sem tinan 100, nia hetan oan mane ida, naran Arpaxad. 11 Depois nia sei moris tan tinan 500, i nia hetan tan oan mane ho oan feto. 12 Kuandu Arpaxad tinan 35, nia hetan oan mane ida, naran Xela. 13 Tuir mai, Arpaxad sei moris tan tinan 403, i nia hetan tan oan mane ho oan feto. 14 Kuandu Xela tinan 30, nia hetan oan mane ida naran Eber. 15 Tuir mai, Xela sei moris tan tinan 403, i nia hetan tan oan mane ho oan feto. 16 Kuandu Eber tinan 34, nia hetan oan mane ida, naran Peleg. 17 Tuir mai, Eber sei moris tan tinan 430, i nia hetan tan oan mane ho oan feto. 18 Kuandu Peleg tinan 30, nia hetan oan mane ida, naran Reú. 19 Tuir mai, Peleg sei moris tan tinan 209, i nia hetan tan oan mane ho oan feto. 20 Kuandu Reú tinan 32, nia hetan oan mane ida, naran Seruge. 21 Tuir mai, Reú sei moris tan tinan 207, i nia hetan tan oan mane ho oan feto. 22 Kuandu Seruge tinan 30, nia hetan oan mane ida, naran Naor. 23 Tuir mai, Seruge sei moris tan tinan 200, i nia hetan tan oan mane ho oan feto. 24 Kuandu Naor tinan 29, nia hetan oan mane ida, naran Tera. 25 Tuir mai, Naor sei moris tan tinan 119, i nia hetan tan oan mane ho oan feto. 26 Komesa Tera tinan 70, nia hetan oan mane nain tolu mak, Abrão, Naor ho Haran.
Tera nia jerasaun
27 Nee Tera nia jerasaun sira. Tera nia oan mak Abrão, Naor ho Haran. Haran hetan oan mane ida, naran Lo. 28 Haran mate iha nia moris fatin, naran Ur, iha ema Kasdim sira nia rain. Bainhira nia mate, nia aman Tera sei moris. 29 Abrão kaben ho Sarai. Naor kaben ho Haran nia oan feto, naran Milka. Haran moos hetan oan mane ida, naran Iská. 30 Maibee Sarai oan la iha. 31 Iha loron ida, Tera lori nia oan Abrão, nia feto foun Sarai, ho nia bei oan Lo, sira sai husik hela rai Ur. Sira atu baa rai Kanaán. Maibee too iha rai Haran sira hela deit iha nebaa. 32 Iha fatin nee, Tera mate, ho tinan 205.
Nai Maromak haruka Abrão sai hosi nia rain
1 Depois NAI Maromak dehan ba Abrão, “O sai tiha hosi o nia família, o nia aman nia uma, ho o nia aldeia. Baa iha fatin ida nebee Hau sei hatudu ba o. 2 Hau sei foo bensaun ba o, i halo o nia naran sai boot. O nia jerasaun sei aumenta barak, i sai nasaun boot ho konyesidu. Liu hosi o, ema seluk sei hetan bensaun. 3 Hau sei foo bensaun ba ema nebee foo bensaun ba o. Maibee Hau sei foo malisan ba ema nebee foo malisan ba o. Rona di-diak mai! Nasaun hotu-hotu iha mundu sei hetan bensaun tanba o.” 4-5 Iha tempu nee, Abrão tinan 75. Nia lori nia kaben Sarai, ho nia alin nia oan Lo, ho nia rikusoin hotu, ho nia atan sira nebee nia hetan iha sidade Haran. Depois sira husik tiha Haran, tuir NAI Maromak nia orden. Nunee sira lao nafatin, too iha fatin ida naran Kanaán. 6 Too iha nebaa, Abrão lao haleu tiha rai nee, too besik fatin ida naran Sikem. I sira hela la kleur besik ai huun boot ida iha Moré. Iha tempu nee, ema Kanaán sira sei hela iha rai nee. 7 Iha nee, NAI Maromak hatudu-An ba Abrão. Nia dehan, “Hau sei foo rai nee ba o nia jerasaun.” Tuir mai, Abrão hada fatuk hanesan altár ida, hodi halo sakrifísiu ba NAI Maromak, ida nebee hatudu ona An ba nia. Abrão halo sakrifísiu hodi adora Nai Maromak 8 Liu tiha nee, Abrão sira muda ba foho iha sul, i sira hela la kleur iha aldeia Betél ho aldeia Ai nia klaran. Iha fatin nee nia halo altár ida hodi adora NAI Maromak. 9 Nee liu tiha, nia muda hosi fatin ida ba fatin ida, too iha rai Negebe iha Kanaán sul.
Abrão baa iha rai Ejiptu
10 Iha tempu ida, rai Kanaán hamlaha boot. Nee mak Abrão sira lao dook tiha ba iha sul, too iha rai Ejiptu, i sira hela lai iha nebaa. 11 Bainhira sira atu tama ba rai Ejiptu, nia foo hatene ba nia kaben Sarai, dehan, “O nee oin kapaas teb-tebes. 12 Se ema Ejiptu haree o bonita nunee, sira sei oho hau, tanba hau o nia lain. Nunee sira bele hadau tiha o. 13 Entaun, diak liu, o foo hatene ba sira dehan, hau o nia maun. Nunee sira la oho hau, maibee sira sei haree hau diak, tanba o.” Sarai iha liurai Ejiptu nia palásiu 14 Kuandu Abrão sira too ona iha Ejiptu, ema sira haree feto nee bonita la-halimar. 15 Bainhira liurai nia funsionáriu sira haree nia, sira baa gaba feto nee iha liurai nia oin. I sira lori feto nee ba iha liurai nia uma. 16 Nunee liurai moos diak ho Abrão, tanba Sarai. Nia foo ba Abrão bibi, bibi malae, karau vaka, kuda buru ho kuda kamelu. I moos foo atan mane ho atan feto. 17 Maibee tanba liurai hola fali ema nia kaben hodi baa iha nia uma, nee mak NAI Maromak kastigu nia ho nia uma kain hotu. 18 Entaun liurai bolu Abrão hodi husu ba nia, “Nusaa mak o halo hanesan nee mai hau? Nusaa mak o la foo hatene mai hau katak feto nee o nia kaben?! 19 Tan saida mak o dehan, nia o nia alin? Hela uitoan deit hau hola nia sai hau nia kaben. O nia kaben mak nee. Lori nia baa ona!” 20 Tuir mai, liurai foo orden ba nia ema sira, para lori Abrão ho nia kaben, ho sira nia sasaan hotu, sai hosi rai nee.
Abrão ho Lo fahe malu
1 Depois Abrão sai tiha hosi Ejiptu, hodi fila fali ba iha rai Negebe. Nia baa ho nia kaben ho nia rikusoin hotu. Nia alin nia oan Lo moos tuir sira. 2 Abrão nee riku teb-tebes. Nia animál, ho osan mean ho osan mutin moos barak teb-tebes. 3 Hosi Negebe nia muda beibeik too fila fali ba nia hela fatin uluk, iha aldeia Betél ho aldeia Ai nia klaran. 4 Iha fatin nee, uluk nia halo ona altár ida. Agora moos nia adora fali NAI Maromak iha nee. 5 Lo, nebee tuir Abrão nee moos iha animál barak ho ema moos barak. 6-7 Maibee rai nee laduun luan, i la too ba Abrão ho Lo sira nia animál hotu, atu moris hamutuk. Nunee Abrão nia bibi atan ho Lo nia bibi atan sira komesa istori malu, tanba duut la too hodi foo haan sira nia animál barak nee. (Iha tempu nee, ema Kanaán ho ema Feris sei hela iha rai nee.) Abrão ho Lo hili fatin 8 Entaun Abrão hatete ba nia sobrinyu dehan, “Lo! Ita mesak maluk deit. Keta halo be ita ho ita haree malu la diak, i halo ita nia ema sira istori malu beibeik. 9 Diak liu ita nain rua fahe malu deit. Rai nee luan. Nunee, se o hili fatin hosi parte liman karuk, hau baa iha parte liman loos. Maibee se o hili fatin hosi parte liman loos, hau baa iha parte liman karuk.” 10 Entaun Lo haree baa-mai, nia moos haree ba rai tetuk iha mota Jordaun nia sorin, too iha aldeia Zoar. Rai nee, bee barak. Rai nee moos bokur hanesan toos NAI Maromak nian, i diak hanesan rai Ejiptu. (Iha tempu nee, NAI Maromak seidauk halo rahun sidade Sodoma ho Gomora.) 11 Nee mak Lo hili hotu rai tetuk iha mota Jordaun. Depois sira nain rua fahe malu. Lo baa iha loro-sae. 12 Nunee Abrão hela nafatin iha Kanaán. I Lo hela besik sidade Sodoma iha rai tetuk mota Jordaun nian. 13 Maibee ema Sodoma sira, hahalok aat para-mate. Sira lakohi rona ba NAI Maromak. 14 Bainhira Lo ho Abrão fahe malu tiha ona, NAI Maromak hatete ba Abrão, “Foti tok o nia matan hodi haree di-diak ba fatin hotu-hotu. Hateke ba oin, ba kotuk, ba liman karuk, ba liman loos. 15 Rai hotu-hotu nebee o haree nee, Hau sei foo ba o, ho ba o nia bei oan sira, para sai imi nia rikusoin nafatin too tinan ba tinan. 16 Hau sei halo o nia jerasaun barak hanesan rai henek iha tasi ibun, too sura la bele. 17 Agora o lao haleu rai nee tuir nia naruk ho nia luan. Rai nee hotu, Hau sei foo ba o.” 18 Liu tiha nee, Abrão sira muda baa hela fali besik ai huun boot sira iha Manre, besik aldeia Hebrón. I nia harii altár ida iha fatin nee, hodi adora NAI Maromak.
Abrão baa salva Lo
1 Iha tempu nee, funu mosu. Iha liurai nain haat halibur hamutuk. Sira nee mak: Anrafel, liurai rai Sinear. Arioke, liurai rai Elazar. Kedorlaomer, liurai rai Elam. Ho Tidal, liurai rai Goim. 2 Iha moos liurai seluk nain lima halibur malu. Sira nee mak: Bera, liurai sidade Sodoma. Birza, liurai sidade Gomora. Sinabe, liurai sidade Admá. Semeber, liurai rai Zeboím. Ho Bela, liurai aldeia Zoar. I liurai nain haat nee baa halo funu hasoru liurai nain lima nee. 3 Liurai nain lima nee halibur hamutuk ho sira nia tropas iha rai tetuk Sidim (nebee agora ema bolu Tasi Mate). 4 Funu nee nia huun nunee: uluk liurai Kedorlaomer ukun liurai nain lima nee durante tinan 12. Maibee iha tinan 13, sira hamriik hasoru nia. 5 Too tama iha tinan 14, liurai Kedorlaomer ho nia belun liurai nain tolu nee too mai ho sira nia tropas. Sira halo funu manaan rai balu. Sira manaan mak nee: ema Refaim iha rai Asterote-Karnaim, ema Zuzim iha rai Han, ema Emim iha rai Savé-Kiriataim, 6 ho ema Hori iha foho Seir too iha rai fuik maran El-Parán nia sorin. 7 Depois sira fila fali ba iha En-Mispate (nebee agora naran Kades). Liu tiha nee, sira halo rahun tiha ema Amalek nia rain, ho moos ema Amori nebee hela iha rai Hazazon-Tamar. 8-9 Depois liurai nain lima nee prepara sira nia tropas iha rai tetuk Sidim, hodi funu hasoru liurai nain haat nee ho sira nia tropas. 10 Iha rai nee, iha kolan barak nakonu ho alkatraun been. Funu nee, liurai Sodoma ho liurai Gomora ho sira nia tropas, halai deit. Sira balu monu mout ba alkatraun laran, i balu halai ba foho. 11 I liurai nain haat nebee manaan funu nee, baa hadau ema Sodoma ho ema Gomora nia sasaan ho hahaan hotu. Depois sira fila. 12 Abrão nia sobrinyu Lo hela iha Sodoma. Nunee liurai nain haat nee moos kaer ho lori tiha Lo sira, i hadau tiha sira nia sasaan hotu. 13 Maibee iha ema ida mak halai liu baa foo hatene ba Abrão, ema Ebreu nee. Tempu nee Abrão hela besik iha Manre nia ai huun boot sira. (Manre nee ema Amori. Manre ho nia alin Eskol ho Aner, halo belun ho Abrão atu ajuda malu bainhira iha funu.) 14 Bainhira Abrão rona dehan ema kaer tiha ona nia sobrinyu Lo, nia halibur nia ema sira nebee hatene halo funu. Sira hamutuk ema 318. I sira duni tuir liurai nain haat nee too iha aldeia Dan. 15 Depois Abrão fahe nia ema sira ba grupu-grupu hodi asalta inimigu sira nee iha kalan. Maibee inimigu balu halai. I Abrão sira duni tuir nafatin sira, too iha aldeia Hoba besik sidade Damasku. 16 Nunee Abrão hadau fali Lo, ho nia ema sira ho sira nia sasaan hotu, ho moos ema seluk.
Liurai Melkizedek foo bensaun ba Abrão
17 Kuandu Abrão fila hosi manaan funu hasoru liurai nain haat nee, liurai Sodoma mai simu nia iha rai tetuk Savé (nebee baibain ema bolu dehan, rai tetuk Liurai). 18 Depois liurai Melkizedek lori paun ho tua ba Abrão. Melkizedek nee liurai sidade Salém nian, ho moos nai-lulik ba Nai Maromak Aas Liu. 19-20 I nia foo bensaun ba Abrão dehan, “Nai Maromak Aas Liu, nebee halo lalehan ho rai, foo bensaun ba o. Grasa ba Nai Maromak, ida nebee halo o manaan ona o nia inimigu.” Depois Abrão fahe sasaan nebee nia hadau tiha ona ba parte sanulu; parte ida nia foo ba Melkizedek. 21 Tuir mai, liurai sidade Sodoma hakruuk ba Abrão, hodi dehan, “Senyór. Sasaan sira nebee senyór hadau ona hosi ita boot nia inimigu sira nee, biar senyór nian hotu ba. Maibee hau so husu fali hau nia ema sira.” 22 Maibee Abrão hataan dehan, “Hau jura iha Nai Maromak Aas Liu nia oin, Maromak nebee halo lalehan ho rai, 23 katak, sasaan sira nee hau lakohi. Bele kabas lahan ida moos, hau lakohi. Para o la bele dehan, ‘Abrão sai riku tanba hau.’ 24 Hau la presiza buat ida. So buat nebee mak hau nia ema sira uza ona, nee hanesan buat ida ke liu ona. I husik hau nia belun nain tolu nee, Aner, Eskol ho Manre foti parte sira nian.”
Nai Maromak promete ba Abrão
1 Nee liu tiha, Nai Maromak hatudu-An ba Abrão. Nia hatete, “Abrão! O keta tauk. Hau mak o nia defeza, ba o nia inimigu. I Hau foo ba o prémiu boot.” 2-3 Maibee Abrão hataan, “Nai Maromak. Bele Ita Boot foo mai hau sasaan barak moos, la iha folin ida. Tan hau la iha oan para bele foo jerasaun mai hau. Nunee, iha rikusoin bara-barak hodi halo saida? Riku sira nee hotu hau nia atan Eliezer hosi Damasku mak sei hetan.” 4 Maibee Nai Maromak hataan, “Laos nunee! O nia oan rasik mak sei hetan rikusoin nee, laos atan nee.” 5 Nia lori Abrão sai ba liur, i Nia dehan, “Agora o haree ba lalehan, o haree tok fitun sira nee, bele sura ka lae? O nia jerasaun sei sai barak hanesan fitun sira nee.” 6 Abrão moos fiar NAI Maromak nia liafuan nee. Tanba nee mak NAI Maromak konsidera nia nudar ema loos. 7 NAI Maromak hatutan tan, dehan, “Hau nee Nai Maromak. Hau mak lori o sai hosi sidade Ur iha ema Kasdim sira nia rain, hodi foo rai nee ba o, sai o nia rikusoin.” 8 Abrão husu, “Maibee, Nai, halo nusaa mak hau bele hatene lo-loos katak rai nee sei sai hau nia rikusoin?” 9 Nia hataan dehan, “Nunee! Mai ita halo serimónia ida, hodi hametin Hau nia promesa. Agora o baa lori animál sira nee mai Hau: karau inan ida, bibi inan ida, ho bibi malae aman ida. Animál sira nee tenki tinan tolu. Lori tan manu lakateu ida, ho manu pombu ida mai.” 10 Entaun Abrão baa lori animál sira nee hotu mai. I nia fera fahe ba rua karau, bibi, ho bibi malae nee. Nia fahe naan sira nee ba rua tau iha rai, iha linya rua, hateke ba malu. Maibee manu sira nee nia la fera fahe ba rua. 11 Depois manu fuik sira nebee baibain haan naan dodok sira semo tuun mai atu haan naan nee, maibee Abrão duni tiha sira. 12 Kuandu loro monu daudaun, Abrão toba dukur tiha. Nia mehi dehan, nakukun mai falun metin tiha nia, halo nia tauk atu-mate. 13-15 I Nai Maromak foo hatene ba nia dehan, “Abrão! O sei moris too katuas liu, i mate ho hakmatek, foin sira hakoi o ho diak. Maibee o nia jerasaun sira sei baa hela iha ema nia rain. Ema rai nain sei halo sira hanesan atan i hanehan sira too tinan atus haat. Maibee ikus mai, Hau sei kastigu nasaun nee. I Hau sei lori o nia jerasaun sira ho sira nia rikusoin bara-barak sai hosi nebaa. 16 Too iha jerasaun lima foin sira fila fali mai iha fatin nee. Agora, ema Amori sira hela iha rai nee. Sira nee hahalok aat, maibee sira nia aat nee seidauk todan liu. Aban-bainrua, bainhira ema Amori sira nia hahalok nee aat demais liu ona, mak foin Hau uza o nia bei oan sira hodi halo rahun sira.” 17 Kuandu kalan ona, derepenti mosu fornu ida nebee suar hela, ho ahi lakan, liu hosi naan linya rua nee nia klaran. 18 Momentu nee, NAI Maromak moos hametin Nia promesa ho Abrão. Nia foo hatene dehan, “Hau promete, Hau sei foo rai nee ba o nia jerasaun sira, komesa hosi mota Ejiptu too iha mota Eufrates, 19 ho ema Kene sira nia rain, ho Kenas, Kadmon, 20 Hit, Feris, Refaim, 21 Amori, Kanaán, Girgasi, ho Jebus.”
Agar ho nia oan Ismael
1-3 Bainhira Abrão fila fali ona hosi Ejiptu, i hela iha Kanaán tinan sanulu ona, nia kaben Sarai seidauk iha oan. Nunee, iha loron ida Sarai dehan ba Abrão, “NAI Maromak la foo oan mai hau. Diak liu ita hola hau nia atan Agar, para nia bele foo oan mai hau.” Agar nee ema Ejiptu. Entaun Abrão halo tuir nia kaben nia liafuan. I Sarai foo Agar para sai Abrão nia kaben kiik. 4 Abrão moos baa toba hamutuk ho Agar, depois feto nee isin rua. Maibee kuandu Agar hatene ona nia isin rua, nia komesa foti-an, i la respeita ona Sarai. 5 Entaun Sarai dehan ba Abrão, “Hau mak foo atan nee ba o, para sai o nia kaben kiik. Maibee kuandu nia hatene nia isin rua ona, nia foti-an i la respeita fali hau. Nee hotu o nia sala! Husik NAI Maromak mak tesi ita nain rua nia lia!” 6 Abrão hataan, “O mak kaben boot. Nia o nia atan, o mak manda nia. O hakarak halo saida deit ba nia, konformi o.” Entaun Sarai komesa halo aat ona ba Agar, too nia halai tiha. 7 Nia halai too iha rai fuik maran. I NAI Maromak nia anju ida hetan nia besik bee matan ida iha dalan ba Sur. 8 Anju nee hatete, “Agar, Sarai nia atan. Nusaa mak o iha nee? O mai hosi nebee, i o atu baa nebee?” Agar hataan, “Hau halai sai hosi hau nia senyora.” 9 Depois NAI Maromak nia anju hamaus nia hodi hatete, “Diak liu o fila fali ba o nia senyora. I saida mak nia halo ba o, o simu deit. 10 O lalikan tauk. Hau sei halo o nia jerasaun sai barak teb-tebes, too ema sura la hatene. 11 Agora o isin rua. La kleur tan o sei hetan oan mane ida. O tenki tau nia naran Ismael, tanba NAI Maromak rona ona o nia tanis. 12 Maibee bainhira labarik nee boot ona, nia sei hela dook hosi nia maun-alin sira. Tanba nia hanesan kuda buru fuik, nebee lakohi rona ema nia orden. Nia sei kontra ema hotu-hotu, i ema hotu-hotu moos sei kontra nia.” 13 Rona tiha hotu nunee, Agar dehan ba nia aan, “Hau haree ona NAI Maromak, ida nebee haree ho kuidadu hau.” Nunee nia komesa bolu NAI Maromak nia naran “Maromak nebee mak tau matan mai hau.” 14 Nee mak ema tau naran ba bee matan nee, Beer-Laai-Roi, nee dehan katak, ‘Bee matan hosi Maromak moris, nebee tau matan mai hau.’ Nia fatin iha aldeia Kades ho aldeia Berede nia klaran. Bee matan nee sei iha too agora. 15 Entaun Agar fila. Nia tuur ahi, oan mane ida. Abrão tau nia naran Ismael. 16 Tempu Agar hetan Ismael, Abrão iha ona tinan 86.
Maromak halo akordu ho Abrão
1 Bainhira Abrão tinan 99, NAI Maromak mai hatudu-An ba nia. Nia hatete, “Hau nee Nai Maromak Boot Liu. O tenki tuir nafatin Hau nia hakarak, i moris lo-loos. 2 Hau atu halo akordu ho o, i halo o nia jerasaun sai barak teb-tebes.” 3 Abrão moos hakniak ho hakruuk too rai. Nai Maromak koalia tan dehan, 4-5 “Hau halo akordu ho o, nunee: o sei sai nasaun barak nia bei-ala. Tanba nee, o nia naran laos Abrão tan ona (nee dehan katak ‘aman nebee konyesidu’), maibee Abraão (nee dehan katak ‘nasaun barak nia bei-ala’). 6 Hau sei halo o nia jerasaun barak teb-tebes. Hau sei harii nasaun barak liu hosi o, ho sei foti liurai barak hosi o nia jerasaun. 7 Hau kaer nafatin Hau nia akordu ho o, ho moos o nia jerasaun sira. Akordu nee rohan la iha, tan Hau nee o nia Nai Maromak ho tan o nia jerasaun sira nia Nai Maromak. 8 Rai Kanaán nee hotu, Hau sei foo ba o, ho o nia jerasaun sira. Agora, o hela iha nee lai. Maibee aban-bainrua rai Kanaán nee tomak sei sai o nia jerasaun sira nian, too tinan ba tinan. I Hau rasik mak sira nia Maromak. 9-10 Maibee o, ho o nia jerasaun sira moos tenki tuir nafatin akordu nee. Mane hotu-hotu tenki sunat. 11-13 Komesa agora, mane hotu-hotu nebee iha ona loron walu, tenki sunat. O nia família, ho o nia ema sira hotu, ho o nia atan sira nebee o hola ona hosi nasaun seluk, sira hotu tenki sunat. Sunat nee hanesan sinál akordu entre Hau ho imi. 14 Mane nebee mak la sunat, la tama iha Hau nia akordu, i la pertense Hau nia povu.” 15 I Nai Maromak dehan tan, “Komesa agora ba oin, o la bele bolu tan o nia kaben, Sarai, maibee bolu fali Sara. 16 Hau sei foo bensaun barak ba Sara, para nia bele hetan oan mane ida foo ba o. Tebes! Sara sei sai nasaun barak nia bei-ala. I Hau sei foti liurai barak hosi nia jerasaun.” 17 Entaun, Abraão hakniak i hakruuk too rai hodi adora Maromak. Maibee iha nia laran nia hamnasa. Nia hanoin dehan, “Mane katuas tinan atus ida hanesan hau nee, sei hetan tan oan? I Sara moos ferik liu ona ho tinan 90, oinsaa sei bele hetan oan?” 18 Nia moos dehan ba Maromak, “Maromak, biar Ismael deit mak hetan hau nia rikusoin moos, la buat ida.” 19 Maibee Nai Maromak hataan, “Lae! O nia kaben Sara mak sei hetan oan mane ida. O tau nia naran Isac. Hau nia akordu sei tuun ba nia, ho nia jerasaun too tinan ba tinan. 20 Hau moos rona ona saida mak o husu atu foo ba Ismael. Tanba nee, Hau moos foo bensaun ba Ismael, i Hau sei aumenta nia jerasaun halo barak. Sei iha liurai suku l2 hosi nia jerasaun. I nia jerasaun sei sai nasaun boot ida. 21 Bele nunee, maibee Hau nia akordu nee ho deit Isac. Iha tinan oin mai, maizoumenus tempu hanesan nee, Sara sei tuur ahi.” 22 Koalia hotu nunee, Nai Maromak moos baa, husik hela Abraão. 23-27 Iha loron nee kedas, Abraão halo tuir Nai Maromak nia orden. Nia moos sunat. Depois nia sunat Ismael, ho mane hotu-hotu iha nia família, ho moos nia atan mane sira hotu. Iha loron sira sunat nee, Abraão tinan 99 ona, i Ismael tinan 13.
Bainaka nain tolu mai hasoru Abraão
1 Iha loron ida, NAI Maromak hatudu-An ba Abraão besik ai huun boot sira iha Manre. Loro manas, Abraão tuur hela iha tenda oin. 2 Bainhira nia foti oin, nia haree ema nain tolu hamriik hela iha nebaa. Nia halai lalais baa simu sira. Nia hakruuk too rai, 3 hodi dehan, “Senyór sira! Se bele karik, senyór sira mai tuur lai. Para hau serbii lai senyór sira. 4 Senyór sira mai deskansa lai iha ai mahon nee. Orsida hau nia atan sira lori bee mai fasi senyór sira nia ain. 5 Hau baa prepara hahaan ba senyór sira haan, para bele foo forsa, foin senyór sira lao baa. Hau kontente tanba hau bele serbii senyór sira.” I sira hataan, “Diak. Obrigadu.” 6 I Abraão halai ba tenda laran, hatete ba Sara dehan, “Lalais! Foti trigu uut saka ida mai, hodi halo paun.” 7 I nia halai baa haree tan nia karau vaka sira. Nia hili karau oan bokur ida, i nia haruka nia atan oho karau oan nee baa tein. 8 Tuir mai, Abraão baa foti susubeen, keiju, ho naan nebee foin tein nee, i nia lori baa foo ba bainaka sira nee. Kuandu sira haan, nia hamriik iha ai huun hodi serbii sira. 9 I bainaka sira husu ba nia, “Abraão! O nia kaben Sara iha nebee?” Nia hataan, “Iha tenda laran.”
Sara rona hosi odamatan nia kotuk
10 Depois ema ida hosi sira nain tolu nee, dehan, “Tinan oin mai, Hau sei mai fali. Iha tempu nee, o nia kaben Sara iha ona oan mane ida.” Momentu sira koalia nunee, Sara rona hela hosi odamatan nia kotuk. 11 Tempu nee Abraão ho Sara katuas ho ferik liu ona, i Sara nia fulan moos para tiha ona. 12 Rona sira koalia nunee, Sara hamnasa iha nia laran. I nia hanoin dehan, “Hau ferik namkurut nunee, i hau nia lain moos katuas tiha ona. Halo oinsaa mak ami bele hetan fali oan?” 13 I NAI Maromak husu ba Abraão, “Nusaa mak Sara hamnasa? Nia hanoin katak buat nebee Hau koalia nee, la bele sai, tanba nia ferik ona? 14 Hau nee NAI Maromak! La iha buat ida mak Hau la bele halo. Hanoin di-diak. Tinan oin Hau mai fali iha nee, Sara iha ona oan mane ida.” 15 Rona nunee, Sara tauk. I nia nega dehan, “Hau la hamnasa ida!” Maibee Maromak hataan, “Ohin o hamnasa duni.”
Abraão husu boot ba Maromak atu salva Sodoma
16 Depois bainaka nain tolu nee lao liu ba sidade Sodoma. Abraão akompanya sira too iha dalan klaran. Iha fatin nee, sira bele haree sidade Sodoma. 17 I NAI Maromak koalia iha laran dehan, “Diak liu Hau foo hatene ba Abraão katak, Hau sei halo rahun sidade Sodoma. 18 Tan Abraão nia jerasaun sei aumenta barak, i sai nasaun boot ho forti. Hosi nia, nasaun hotu-hotu iha mundu sei hetan bensaun. 19 Hau hili ona nia, hodi hanorin nia oan sira ho ema seluk atu tuir nafatin NAI Maromak nia dalan, para sira bele moris loos. Se sira tuir nunee, maka Hau sei kumpri Hau nia promesa ho Abraão.” 20 Entaun NAI Maromak foo hatene ba Abraão dehan nunee, “Hau rona ona ema barak reklama kona ba ema iha sidade Sodoma ho Gomora, tamba ema sira nee aat demais liu ona. 21 Nee mak Hau tuun baa revista rasik, atu hatene buat hotu Hau rona ona nee, loos ka lae.” 22 NAI Maromak sei koalia hela ho Abraão, bainaka nain rua seluk nee kontinua lao ba sidade Sodoma. 23 Abraão besik ba Nai Maromak, hodi hatete, “Senyór! Ita Boot atu halo rahun ema nebee moris loos ho ema aat hamutuk ka? 24 Se iha ema nain 50 nebee moris loos iha sidade nee, Ita Boot sei halo rahun sira hotu ka? Ita Boot sei la salva sidade nee ka? 25 Ita Boot keta halo nunee! Keta halo be ema nebee moris loos moos mate, tanba Senyór atu harahun ema aat sira. Ita Boot mak juíz iha mundu ho iha lalehan. Ita Boot rasik hatene katak nee la loos.” 26 NAI Maromak hataan, “Se Hau hetan ema nain 50 nebee moris loos iha sidade Sodoma, Hau la kastigu sidade nee, tanba sira.” 27 Abraão husu tan, “Nai, hau husu deskulpa, hau bele koalia tan uitoan, maski hau ema beik, la hatene buat ida. 28 Se la iha ema nain 50 mak moris loos, maibee iha deit 45, oinsaa? Se menus ema nain lima deit, Ita Boot sei hakarak halo rahun sidade nee ka lae?” Maromak hataan, “Se Hau hetan nain 45, Hau la halo rahun sidade nee.” 29 I Abraão hamaus tan, “Se iha deit ema nain 40 mak moris loos, oinsaa, Nai?” Nai Maromak hataan, “Se Hau hetan deit nain 40, Hau la kastigu sira.” 30 Abraão hamaus nafatin, “Ita Boot keta hirus, maibee se iha deit ema nain 30 mak moris loos, oinsaa?” Nia hataan, “Se Hau hetan deit nain 30, Hau la kastigu sira.” 31 I Abraão husu tan, “Ita Boot keta hirus, hau husu tan uitoan. Se iha deit ema nain 20 mak moris loos, oinsaa?” Nia hataan, “Se Hau hetan deit nain 20, Hau sei la halo rahun sidade nee.” 32 Abraão hataan, “Senyór! Hau koalia dala ida tan, maibee Ita Boot keta hirus. Oinsaa se hetan deit ema nain sanulu mak moris loos?” Nai Maromak hataan, “Se iha deit ema nain sanulu mak moris loos moos, Hau la kastigu sidade nee.” 33 Koalia hotu ona nunee, NAI Maromak lao baa liu, i Abraão moos fila ba nia hela fatin.
Ema Sodoma sira hakarak hola malu ho bainaka mane nain rua
1 Loro besik atu monu ona, Maromak nia anju nain rua nee too baa iha sidade Sodoma. Momentu nee, Lo sei tuur hela iha portaun sidade nian. Nia haree ema nain rua nee, nia baa kedas simu sira. Depois nia hakniak i hakruuk iha sira nain rua nia oin. 2 I nia koalia dehan, “Senyór sira! Mai tuur lai iha hau ata nia uma. Para senyór sira fasi ain, i toba iha nebaa. Aban dadeer-saan, mak senyór sira kontinua senyór sira nia viajen.” Maibee sira hataan, “Obrigadu. Lalikan fadigadu! Ami baa toba iha kampu deit.” 3 Maibee Lo husu beibeik, too sira moos baa tama duni iha nia uma. Lo haruka ema tunu paun ho prepara meza, depois sira haan rame-rame. 4 Bainaka sira seidauk baa toba, mane Sodoma sira, kiik-boot hotu, mai haleu Lo nia uma. 5 Sira hakilar ba Lo, dehan, “Lo! Mane nain rua ohin nee iha nebee? Hasai sira mai, ami atu hola malu ho sira.”
Lo protesta ba ema Sodoma sira
6 Depois Lo sai baa hasoru sira, i taka tiha odamatan. 7 Nia dehan, “Maluk sira! Imi la bele halo aat ba hau nia bainaka sira. 8 Imi rona lai. Hau iha oan feto nain rua, sira sei feto raan. Hau bele foo sira nain rua ba imi. Imi atu halo saida deit ba sira, konformi imi. Maibee imi keta halo buat ida ba hau nia bainaka, tanba tuir ita nia lisan, hau tenki haree sira halo di-diak.” 9 Maibee ema Sodoma sira hakilar dehan, “O keta tama iha klaran! O nee ema lao rai. Nee duni o la iha direitu atu manda ami. Diak liu o sai hosi nee! Se lae, ami halo o aat liu ema nain rua nee.” I sira dada sai tiha Lo, sira moos nadodon baa dudu odamatan atu halo rahun. 10 Maibee bainaka rua nee lolo liman hodi dada tama tiha Lo ba uma laran, i sira taka metin tiha odamatan. 11 I sira nain rua halo ema Sodoma sira nee matan delek hotu, too sira lamas buka odamatan, la hetan.
Nai Maromak hasai Lo sira hosi Sodoma
12-13 Entaun bainaka nain rua nee hatete, “Lo! NAI Maromak hatene ona sidade nee nia aat. Nee duni, Nia haruka ami mai halo rahun tiha hotu sidade nee. Nunee, o sei iha maluk ruma iha sidade nee ka lae? Se o iha oan mane ka oan feto, ka mane foun, ka see deit, baa hola sira hodi sai ona hosi sidade nee.” 14 Entaun Lo baa foo hatene ba nia mane foun nain rua, dehan, “Rona di-diak mai! Agora imi sai lalais hosi nee ona, tanba NAI Maromak atu halo rahun sidade nee.” Maibee sira hanoin nia koalia halimar ho sira. 15 Iha aban dadeer-saan, Maromak nia anju nain rua nee, obriga Lo sira para sai lalais. Sira dehan, “Lo! Lao ona! Lori o nia kaben ho o nia oan sira, halai sai ona. Husik hela sidade nee. Keta halo be imi mate saugati.” 16 Maibee Lo sei demora. Nunee mak bainaka nain rua nee kaer sira nia liman hodi rasta Lo, nia kaben, ho nia oan feto rua nee, hodi lori sira sai hosi sidade. Tanba NAI Maromak hakarak duni atu salva sira. 17 Depois bainaka nee ida foo orden dehan, “Halai lalais, para bele moris, la bele haree ba kotuk. Keta para iha rai tetuk. Halai nafatin ba iha foho nebaa, para imi keta mate.” 18 Maibee Lo hataan fali dehan, “Senyór, keta nunee! 19 Senyór tulun ho foo moris ona ba ami. Maibee foho nee dook liu. Keta halo be ami seidauk too iha nebaa, susar kona ona ami iha dalan klaran. 20 Senyór haree lai. Iha aldeia kiik ida besik iha nee. Nunee se senyór hakarak, husik ami baa salva-an iha nebaa. Senyór rasik haree aldeia nee kiik oan ida!” 21 Nia hataan, “Baa deit ba! Hau sei la halo rahun aldeia nee. 22 Halai lalais ona! Tanba imi too iha nebaa mak foin hau bele halo rahun sidade nee.” (Komesa iha tempu nee, aldeia nee ema tau naran Zoar, nee dehan katak ‘kiik’.)
Nai Maromak sunu motuk sidade Sodoma ho Gomora
23 Oras loro matan komesa sae, Lo sira too iha Zoar. 24 Derepenti deit NAI Maromak fakar ahi ho ahi klaak hosi lalehan tuun ba Sodoma ho Gomora. 25 NAI Maromak sunu motuk hotu sidade ho aldeia iha área nee, ho buat hotu-hotu nebee moris, hanesan ema, animál, duut ho ai sira. 26 Tempu sira halai nee, Lo nia kaben hateke fali ba kotuk, derepenti deit nia sai tiha masin riin ida. 27 Aban dadeer-saan, Abraão baa fali iha fatin ida nebee horiseik nia hamriik hodi hamaus NAI Maromak. 28 I nia hateke tuun ba Sodoma ho Gomora, ho rai tetuk nee hotu. Nia haree iha nebee-nebee deit, iha ahi suar sae. I ahi haan tiha buat hotu-hotu. 29 Hanesan nee, bainhira Nai Maromak halo rahun sidade sira nee, Nia hanoin fali Nia promesa ho Abraão. Nunee mak Maromak hasai Lo hosi fatin nebee hetan kastigu nee.
Lo ho nia oan feto sira
30 Lo tauk atu hela nafatin iha Zoar. Nee mak nia ho nia oan feto rua nee muda tiha ba foho. I sira hela iha fatuk kuak ida. 31 Iha loron ida, oan feto boot dehan ba nia alin, “Iha fatin nee, la iha mane ida atu kaben ho ita. I apaa moos la kleur tan katuas ona, i la iha oan tan. 32 Nunee diak liu, ita foo tua ba apaa hemu lanu, depois ita toba hamutuk ho apaa hanesan feen ho lain, para ita bele foo jerasaun ba apaa.” 33 Kalan nee duni, sira foo tua ba sira nia aman hemu too lanu. I nia oan feto boot baa toba halo sala ho nia aman. Tanba nia aman lanu todan, nia la hatene saida mak nia halo ho nia oan feto. 34 Aban fali, biin foo hatene ba nia alin dehan, “Alin! Hori-kalan hau toba ona ho apaa, hanesan feen ho lain. Kalan nee, o fali. Orsida ita foo hemu apaa lanu tan, i alin tama ba toba ho apaa hanesan feen ho lain. Ho nunee, ita nain rua bele hetan oan, para hatutan apaa nia jerasaun.” 35 Iha kalan nee duni, sira foo tan tua ba sira nia aman. I oan kiik tama baa toba ho nia aman. Tanba katuas lanu todan, nee duni nia la hatene saida mak nia halo ho nia oan feto. 36 Nunee sira nain rua isin rua, hosi sira nia aman rasik. 37 Depois oan feto boot tuur ahi, oan mane ida, naran Moab (nee rona atu hanesan ho liafuan ida nebee dehan katak ‘mai hosi aman’). Nia mak sai ema Moab sira agora nia bei-ala. 38 I oan kiik moos tuur ahi oan mane ida, naran Ben-Ami (nee dehan katak ‘hosi hau nia ema’). Nia mak sai ema Amon sira agora nia bei-ala.
Abraão bosok liurai Abimelek
1 Liu tiha nee, Abraão muda hosi Manre, baa iha rai Negebe sul, i nia hela iha aldeia Kades ho aldeia Sur nia klaran. La kleur, nia muda fali baa hela iha aldeia Gerar. 2 Nia foo hatene ba ema sira iha nebaa nee dehan, Sara nee nia alin. Nunee mak Abimelek, liurai Gerar, haruka nia ema baa lori Sara ba iha liurai nia palásiu. 3 Iha kalan ida, Nai Maromak hatudu-An ba liurai liu hosi mehi. Nia hatete, “O buka mate mak nee! Tanba o baa hadau ema nia kaben.” 4-5 Maibee Abimelek hataan, “Nai Maromak! Hau seidauk book feto nee. I hau moos la sala. Tamba Abraão rasik mak dehan, feto nee nia feton. I feto nee moos rekonyese nunee. Tanba nee, hau haruka ema baa lori nia mai, ho laran moos. Nee duni, Maromak keta foo sala mai hau.” 6 Nai Maromak hataan, “Loos duni, Hau hatene o nia laran moos. Nee mak Hau halo o la bele book feto nee, i o la halo sala mai Hau. 7 Agora, o haruka feto nee fila ona ba nia lain. Nia lain nee Hau nia profeta. Nunee o husu ba nia halo orasaun ba o, para o keta mate. Maibee se o la foo fila fali feto nee, o kuidadu! Tanba, se lae, o ho o nia ema hotu, bele mate.” 8 Aban dadeer, liurai bolu nia funsionáriu sira hotu, hodi konta nia mehi nee, i sira hotu tauk atu-mate. 9 Depois liurai Abimelek bolu Abraão hodi husu, “Hau halo sala saida ba ita, mak ita halo susar hau ho hau nia reinu nunee? Tuir loos ita la bele halo buat nee. 10 Ita hanoin saida, too ita halo nunee?” 11 Abraão hataan, “Senyór liurai! Hau hanoin imi sira nee hotu la tauk Nai Maromak. Nunee ema bele oho hau, i hadau hau nia kaben. 12 Hau dehan katak nia hau nia alin, loos duni. Tanba ami nain rua aman ida, maibee inan mak keta-ketak. Nee mak ami kaben. 13 Nunee, kuandu Nai Maromak haruka ami baa iha ema nia rain, hau hatete ba hau nia kaben dehan, ‘Ita baa iha nebee-nebee, kuandu ema husu kona ba ita nain rua, i se o hadomi hau, o hataan dehan ita nain rua feton ho naan.’” 14-16 Entaun liurai Abimelek haruka Sara fila. Nia dehan, “Agora hau selu ba o nia kaben osan mutin rihun ida, hanesan prova katak, hau la halo sala ida ho o. Para ema hotu hatene.” I liurai dehan ba Abraão, “Hau nia rai nee nakloke ba ita. Ita hakarak baa hela iha nebee deit, konformi ita.” I nia moos foo ba Abraão karau ho bibi malae, ho atan mane ho atan feto. 17-18 Tempu Abimelek hadau tiha Abraão nia kaben, NAI Maromak la foo oan ba feto sira nebee hela iha liurai Abimelek nia palásiu. Maibee kuandu liurai foo fila fali Sara ba nia lain, Abraão halo orasaun, i Maromak halo feto sira nee bele hetan fali oan.
Sara nia oan Isac moris
1-7 Bainhira Abraão tinan atus ida ona, NAI Maromak foo bensaun ba Sara, tuir Nia promete tiha ona. Nunee Sara isin rua. Too loron nia tuur ahi, oan mane ida. I Abraão tau naran ba labarik nee, Isac. (Nee dehan katak ‘nia hamnasa’.) Sara hatete, “Nai Maromak halo hau hamnasa, i kontente loos. Ema hanoin, hau ferik ona nunee, la bele hetan oan. Maski hau nia lain katuas liu ona, maibee hau sei foo oan ba nia. Nunee, see deit mak rona buat ida nee, sira sei hamnasa hamutuk ho hau.” Bainhira Isac halo loron walu, Abraão sunat nia, tuir Nai Maromak nia orden.
Abraão duni sai Agar ho Ismael
8 Isac boot baa daudaun. Too loron haketak nia hosi susu, Abraão halo festa boot. 9-10 Iha loron ida, Sara haree Abraão nia kaben kiik Agar nia oan Ismael, goza fali Isac. Haree nunee, Sara hatete ba nia lain, “Duni sai tiha atan Ejiptu nee ho nia oan. Hau lakohi labarik atan nee hetan rikusoin ida. So hau nia oan Isac deit, mak tenki hetan hotu.” 11 Rona Sara nia koalia nee, Abraão laran susar teb-tebes, tanba Ismael moos nia oan hotu. 12 Maibee Nai Maromak hatete, “Abraão! O lalikan laran susar ba o nia kaben kiik ho nia oan nee. Tuir deit Sara nia hakarak baa, tanba liu hosi Isac mak o sei hetan jerasaun nebee Hau promete ona. 13 Maibee Hau moos foo bensaun ba o nia kaben kiik nia oan, tanba nia o nia oan hotu. Nia jerasaun moos sei sai nasaun ida.” 14 Aban dadeer-saan, Abraão halo bukae foo ba Agar, ho bee botir ida ba nia lori. I nia haruka feto nee ho nia oan Ismael baa ona. Sira lao baa-mai iha rai fuik maran besik Berseba. Agar ho Ismael 15 Kuandu sira nia bee hotu ona, Agar husik hela Ismael iha ai huun kiik-oan ida nia mahon. 16 Nia hanoin dehan, “Hau la aguenta tan, haree hau nia oan mate.” Entaun nia baa tuur tiha kala metru lima-nulu hosi labarik nee, komesa tanis. 17 Nai Maromak rona Ismael tanis, i Nia anju bolu ba Agar dehan, “Nusaa mak o nia laran susar nunee? Keta tauk, tanba Maromak rona ona labarik nee nia tanis. 18 Agora o hamriik baa haree labarik nee. Foo aten barani ba nia, tanba Hau sei halo nia jerasaun sai nasaun boot ida.” 19 Depois Nai Maromak halo nia matan moos, too nia bele haree bee matan ida iha nebaa. I nia baa kuru bee iha botir, lori baa foo labarik nee hemu. 20-21 Nee liu tiha, Ismael ho nia inan hela iha rai fuik maran Paran. Too nia klosan ona, nia sai ema hanadór. Depois nia inan foo kaben nia ho feto raan Ejiptu ida. Buat sira nee hotu sai nunee, tanba Nai Maromak hamutuk ho Ismael.
Abraão ho Abimelek halo akordu
22 Iha tempu nee, liurai Abimelek, ho nia komandante funu, naran Fikól, mai hasoru Abraão. Liurai hatete, “Abraão! Ami hatene ona katak Nai Maromak hamutuk ho ita. Nee mak ita halo saida deit, sempre iha rezultadu. 23 Nee duni agora, hau husu ita jura hodi Nai Maromak nia naran katak, ita sei la bosok hau, ho hau nia oan ho bei oan sira. Hanesan hau halo diak ba ita, ita moos tenki diak ba hau ho rai nee.” 24 Abraão hataan, “Diak! Hau jura.” 25 Depois Abraão kesar ba liurai dehan, “Amu liurai nia ema sira hadau tiha hau nia bee posu ida.” 26 Liurai hataan, “Hau foin rona buat ida nee. Nusaa mak ita la foo hatene antes? Hau la hatene see mak halo.” 27-28 Tuir mai, Abraão ho Abimelek halo akordu. Abraão lori karau ho bibi malae foo ba liurai. Depois nia tau ketak bibi malae oan hitu. 29 Liurai husu ba Abraão, “Nusaa mak o haketak bibi oan hitu nee?” 30 Depois Abraão foo hatene, “Amu liurai simu bibi oan hitu nee baa, hodi hatudu katak amu liurai rekonyese katak hau mak kee bee posu nee.” 31 Tanba sira nain rua halo ona juramentu iha nebaa, maka fatin nee ema tau naran, Berseba. Nee dehan katak, ‘bee posu juramentu’. 32 Sira halo tiha juramentu hotu, liurai Abimelek ho nia komandante fila ba sira nia rain Filistin. 33 Liu tiha nee, Abraão kuda ai tamaresta huun ida iha Berseba. I nia adora NAI Maromak Moris Rohan La Iha. 34 Nia hela kleur iha ema Filistin sira nia rain.
Maromak haruka Abraão halo Isac sai sakrifísiu
1 Liu tiha nee, Maromak koko Abraão nia fiar, hodi haree nia rona ba Maromak ka lae. Maromak bolu nia hodi dehan, “Abraão!” Nia simu, “Nai Maromak.” 2 I Nai Maromak haruka nia dehan, “Rona di-diak! O lori o nia oan mane mesak ida, nebee o hadomi liu nee, lori nia ba iha rai Moriá, halo nia sai sakrifísiu tunu foo mai Hau. Too ona iha nebaa, foin Hau hatudu fatin ba o, iha foho ida.” 3 Aban dadeer-saan rai huun mutin, Abraão tesi ai, i kesi ai nee tula ba kuda buru ida. Tuir mai, nia ho Isac, ho nia atan nain rua, baa iha fatin nebee Maromak foo hatene ona ba nia. 4 Sira lao iha loron tolu nia laran, Abraão haree fatin nee hosi dook. 5 Nunee nia dehan ba nia atan nain rua, “Imi nain rua hein lai iha nee, ho kuda buru nee. Hau ho hau nia oan atu sae ba nebaa, para adora Maromak. Depois mak ami fila fali mai iha nee.” 6 Depois Abraão foti ai hodi tunu sakrifísiu, tau ba Isac nia kabaas. Nia rasik lori tudik ho kaer ahi. Sira sei lao hela, 7 Isac husu ba nia aman, “Apaa!” Abraão hataan, “Nusaa?” Isac husu, “Apaa. Ita atu tunu sakrifísiu, ai ho ahi iha ona, maibee bibi oan para hodi halo sakrifísiu iha nebee?” 8 Abraão hataan, “Nai Maromak rasik mak sei foo Nia bibi oan hodi halo sakrifísiu.”
Abraão prontu atu oho nia oan Isac halo sakrifísiu
Sira nain rua lao sae baa nafatin. 9 Bainhira sira too ona iha fatin nebee Maromak hatete nee, Abraão hada fatuk hanesan altár para tunu sakrifísiu. Nia tau ai iha altár leten. Depois nia kesi tiha nia oan Isac, hatoba iha ai leten. 10 I nia foti tudik atu oho nia oan. 11 Maibee derepenti deit, NAI Maromak nia anju hakilar hosi lalehan dehan, “Abraão! Hein lai!” Nia hataan, “Saida, Nai!” 12 Depois anju nee dehan, “O la bele oho labarik nee! La bele halo buat ida ba nia! Agora Hau hatene ona katak o teb-tebes tuir Hau nia hakarak, tanba o prontu foo ba Maromak o nia oan mane mesak nee, para sai hanesan sakrifísiu.” 13 Abraão foti matan, derepenti nia haree bibi malae aman ida nia dikur kait hela iha ai huun kiik ida nia sanak. I nia baa foti kedan bibi nee hodi tunu halo sakrifísiu foo ba Nai Maromak, troka nia oan. 14 Nunee nia foo naran ba fatin nee, ‘Maromak sei foo buat saida mak presiza’. Nee mak too agora ema dehan, “Iha Maromak nia foho leten nee, Nia sei prepara saida mak ema presiza.” 15 I Maromak nia anju bolu dala ida tan hosi lalehan dehan, 16 “NAI Maromak rasik hatete, ‘Hau jura hodi Hau nia naran rasik, nunee: o prontu ona foo o nia oan mesak mai Hau, sai hanesan sakrifísiu. Nee mak 17 Hau sei foo bensaun barak teb-tebes ba o, ho o nia jerasaun. Sira sei aumenta barak too ema sura la hatene, hanesan fitun iha lalehan, ho rai henek iha tasi ibun. I o nia bei oan sira sei manaan funu hasoru sira nia inimigu. 18 Liu hosi o nia jerasaun, nasaun hotu iha mundu sei hetan bensaun, tanba o tuir ona Hau nia orden.’” 19 Nee liu tiha, Abraão sira tuun fali ba nia atan nain rua. Sira fila hamutuk ba Berseba, i hela iha nebaa.
Naor nia jerasaun
20 La kleur, Abraão rona dehan nia alin Naor nia kaben Milka iha ona oan mane nain walu. 21 Oan mane boot, naran Us. Nia alin naran Bus. Tuir mai, Kemuél (mak Aram nia aman). 22 Iha moos Késede, Azo, Pildas, Jidlafe, ho Betuél. 23 Betuél nee Rebeca nia aman. 24 Naor hetan tan oan hosi nia kaben kiik, naran Reumá. Reumá nia oan mak Teba, Gaan, Taas, ho Maaka.
Sara mate, i Abraão hakoi nia
1-2 Sara mate ho tinan 127. Tempu nia mate nee, Abraão sira hela iha aldeia Kiriate-Arba (mak Hebrón), iha rai Kanaán. Abraão tanis hakilar ho hadeer hein nia kaben mate nee. 3 I nia baa hasoru ema Hit sira, hodi dehan, 4 “Hau ema lao rai iha imi nia leet. Hau la iha rai hodi hakoi hau nia kaben. Nunee favór ida, foo rai rohan ida mai hau hola, hodi hakoi nia.” 5 Sira hataan, 6 “Senyór! Kleur ona, ami respeita teb-tebes ita hanesan ema boot ida. Nee duni, senyór hili deit rai nebee mak diak liu para hakoi nia. Hili tuir senyór nia hakarak. Ami simu deit, la iha ema ida ke lakohi.” 7 Depois Abraão hakruuk hodi foo respeitu ba ema rai nain, ema Hit sira. 8 Nia hatete, “Se imi simu hau nia koalia ohin nee, hau husu tulun, imi baa koalia ho senyór Zoar nia oan mane Efron. 9 Husu tok, se bele, nia faan mai hau, nia fatuk kuak Makpela, nebee iha nia toos sorin nee. Nia husu folin hira deit, hau hola. Hau hakarak selu iha imi nia oin, para rai nee sai ona hau nian. Hau hakarak hola fatin nee para sai ami nia rate fatin.” 10 Momentu nee, Efron tuur hela ho ema Ete sira nee iha portaun sidade nian, nia rona Abraão nia koalia. I nia hataan ba Abraão iha ema katuas sira hotu nia oin, dehan, 11 “Keta halo nunee, senyór! Hau foo toos nee, ho fatuk kuak Makpela, ba ita saugati deit. Senyór hakoi deit ita nia kaben iha nebaa. Hau entrega rai nee ba senyór iha hau nia ema sira nia oin, para sira hotu sai sasin.” 12 Depois Abraão hakruuk tan iha ema Ete sira nia oin, 13 i dehan ba Efron, “Imi hotu rona hau lai. Hau hakarak sosa kotu rai nee, para hau hodi hakoi ami nia mate.” 14-15 I Efron hataan, “Rai nee nia folin osan mutin atus haat deit! Ita nain rua kontratu osan uitoan nee hodi halo saida? Senyór baa hakoi ita nia kaben iha nebaa ona.” 16 Abraão moos konkorda. Nunee Abraão sura osan mutin moeda atus haat, i selu ba Efron iha ema Ete hotu nia oin, para sira sai sasin. 17-19 Nunee Efron nia rai nee sai ona Abraão nian rasik. Nee mak rai iha Makpela besik Manre (mak Hebrón). Nia hola kotu rai nee ho nia toos, nia fatuk kuak, ho nia ai huun sira hotu. Ema katuas Ete sira hotu mak sai sasin katak rai nee ho buat hotu iha laran, Abraão nian ona. Liu tiha nee, Abraão baa hakoi Sara iha fatuk kuak nee, iha rai Kanaán. 20 Nunee ema Ete sira faan toos ho fatuk kuak nee ba Abraão, hodi halo rate.
Abraão nia atan buka noiva ba Isac
1 Abraão katuas liu ona. NAI Maromak sempre kuidadu nia, i foo bensaun ba nia. 2-3 Abraão iha atan ida hodi toma konta nia rikusoin hotu. Katuas nee mak boot liu nia atan sira seluk. Iha loron ida, Abraão bolu nia, hodi dehan, “Rona di-diak! Hau husu o jura hodi NAI Maromak nia naran. Nai Maromak ida nebee halo lalehan ho rai. O jura dehan, o keta buka feto raan hosi ema Kanaán sira, foo mai hau nia oan kaben. 4 Maibee o tenki baa iha hau nia rain, iha hau nia maluk sira. O buka iha nebaa, feto raan ida para kaben ho hau nia oan Isac.” 5 I katuas nee hataan, “Diak, amu! Maibee halo nusaa se labarik feto nee lakohi mai iha nee? Hau tenki lori amu nia oan baa kaben iha nebaa ka, oinsaa?” 6 Abraão hataan dehan, “Bele halo nusaa moos, o la bele lori hau nia oan ba iha nebaa. 7 Tan NAI Maromak nebee kaer ukun iha lalehan mak lori hau sai ona hosi hau nia rain, i lori hau too iha fatin ida nee. I Nia halo ona promesa ho hau dehan, ‘Hau sei foo rai nee hotu ba o nia jerasaun.’ Nee duni o lalikan laran ru-rua! O baa deit. Tanba Maromak sei haruka Nia anju hosi lalehan mai loke dalan ba o, atu o hetan feto raan ida, para sai hau nia oan nia kaben. 8 Maibee se labarik feto nee lakohi tuir o mai iha nee, o livre hosi juramentu nee. Biar halo nusaa moos, o la bele lori hau nia oan ba iha nebaa.” 9 Entaun, katuas nee jura ba Abraão katak, nia sei kumpri Abraão nia hakarak hotu. 10 Tuir mai, katuas nee hili kuda kamelu sanulu, i tula sasaan diak oi-oin ba kuda kamelu sira nee. Nia moos baa ona Naor nia sidade iha rai Mezopotámia. 11 Ikus mai, katuas nee too iha sidade nee. Nia hatuun naha hodi deskansa iha sidade ninin besik bee posu ida. Momentu nee, lokraik ona, feto raan sira mai kuru bee iha posu nee. 12 I katuas nee halo orasaun dehan, “NAI Maromak, nebee hau nia patraun Abraão adora. Hatudu Ita nia laran diak mai hau nia patraun Abraão, i hanoin Ita nia promesa ho nia. Nunee tulun loke dalan, para hau nia viajen nee bele hetan rezultadu diak. 13 Maromak, hau hamriik besik posu nee. I labarik feto sira mai hosi sidade atu kuru bee iha nee. 14 Nee duni hau husu nunee: Se hau koalia ho labarik feto ida, dehan, ‘Anoi! Halo favór hatuun o nia sana rai ho bee, para hau hemu uitoan lai.’ Se nia hataan, ‘Senyór hemu deit ba! I hau sei foo hemu moos senyór nia kuda kamelu sira.’ Nee sinál katak, labarik feto nee Maromak hili ona sai Isac nia kaben. Ho sinál hanesan nee, hau hatene katak, Maromak hatudu ona Maromak nia diak ba hau nia patraun Abraão.”
Abraão nia atan hasoru Rebeca
15-16 Katuas seidauk ramata halo orasaun, labarik feto ida mai, naran Rebeca. Nia Abraão nia alin Naor ho nia kaben Milka nia bei oan. Nia aman naran Betuél. Nia oin kapaas teb-tebes i sei virjen hela. Nia tuun ba posu hodi kuru bee tau ba nia sana rai, depois sae fila fali. 17 Entaun, Abraão nia atan halai ba nia, hodi husu, “Anoi, favór ida foo bee uitoan hau hemu lai.” 18 I nia hataan, “Tiu, hemu deit ba!” Nia hatuun lalais nia sana hodi foo hemu katuas nee. 19 Hemu tiha hotu, labarik feto nee dehan, “Husik hau kuru bee foo ba tiu nia kuda kamelu sira hemu too la hamrook ona.” 20 Depois nia baa lalais fui bee restu iha animál sira nia hemu fatin. I nia halai baa-mai kuru bee iha posu nee, hodi foo hemu ba kuda kamelu sira hotu, too la hamrook ona. 21 Katuas nee hamriik nonook, hodi haree nia servisu. Nia hanoin dehan, “Labarik feto nee mak Maromak hili ka?” 22 Kuda kamelu sira hotu hemu too la hamrook ona. Depois katuas nee foti brinkus mean tau ba labarik feto nia inus, ho kelu mean rua, tau ba nia liman rua. 23 I katuas nee husu, “Anoi nia aman naran saa? Se bele karik, ami baa toba lai iha anoi nia aman nia uma.” 24 Anoi hataan, “Hau nia aman naran Betuél, Naor ho Milka nia oan. 25 Iha ami nia uma iha fatin ba tiu sira. Iha moos duut barak foo ba tiu nia animál sira.” 26 I katuas nee hakruuk hodi adora NAI Maromak. 27 Nia dehan, “Grasa ba Maromak! Maromak hatudu ona Ita nia laran diak mai hau nia patraun Abraão, i hanoin ona Ita nia promesa ho nia. Nunee, Maromak loke ona dalan ba hau hetan kedas patraun Abraão nia maluk iha nee.” 28 I labarik feto nee halai fila lalais, hodi konta ba sira iha uma laran tomak, saida mak akontese. 29-30 Rebeca nia maun, naran Labão. Kuandu nia haree brinkus mean nee, ho kelu mean nee iha nia alin nia liman, i rona Rebeca konta novidade nee, Labão sai kedas ba liur, hodi baa lalais hasoru katuas, nebee sei hamriik hela ho nia kuda kamelu besik bee posu. 31 Labão dehan, “Tiu! NAI Maromak lori ona tiu ho diak too iha nee. Keta hamriik iha liur! Mai ita baa iha ami nia uma. Ami prepara tiha ona fatin. Hahaan ba tiu nia kuda kamelu sira moos iha.”
Abraão nia atan tama baa husu Rebeca
32 Nee liu tiha, Abraão nia atan tuir Labão baa tama iha Betuél nia uma. Depois Labão sira ajuda hatuun naha hosi kuda kamelu sira. I sira foo duut ba kuda kamelu sira haan. Sira moos lori bee ba katuas nee ho nia ema sira fasi ain. 33 Kuandu sira tau hahaan iha meza, katuas nee hatete, “Molok ita atu haan, hau husu lisensa atu foo sai lai liafuan ruma.” Labão hataan, “Tiu, koalia deit ba.” 34 Entaun katuas dehan, “Hau Abraão nia atan. 35 NAI Maromak foo ona bensaun barak teb-tebes ba hau nia patraun, too nia sai ema riku boot. Maromak foo ona ba nia osan mean, osan mutin, atan mane, atan feto, ho animál barak, hanesan karau vaka, kuda kamelu, kuda buru, ho bibi. 36 Bainhira hau nia patraun sira katuas ho ferik liu ona, senyora Sara tuur ahi oan mane ida. Nia mak sei hetan patraun Abraão nia rikusoin hotu. 37 Nee mak patraun Abraão haruka hau jura dehan, ‘O la bele lori feto Kanaán, para foo kaben ho hau nia oan Isac. 38 Maibee o tenki buka feto hosi hau nia maluk rasik, para sai nia kaben.’ 39 I hau husu ba patraun, ‘Oinsaa se feto nee lakohi tuir hau?’ 40 Nia hataan, ‘NAI Maromak nebee hau sempre tuir, sei haruka Nia anju mai loke dalan ba o, para o bele hetan feto ida hosi hau nia maluk rasik para kaben ho hau nia oan. 41 Maibee se hau nia maluk sira lakohi husik labarik feto nee mai iha nee, foin o livre hosi juramentu nee.’ 42 Nunee, ohin too iha bee posu, hau harohan nunee: ‘NAI Maromak, nebee hau nia patraun Abraão adora. Tulun loke dalan atu hau nia viajen nee hetan rezultadu diak, para hau bele hasoru Isac nia noiva. 43 Maromak, hau hamriik besik bee posu nee, i labarik feto sira mai hosi sidade atu kuru bee iha nee. Hau husu nunee: se hau koalia ho labarik feto ida, dehan, “Anoi! Favór ida foo bee uitoan mai hau hemu lai.” 44 Se nia hataan, “Senyór hemu deit ba! I hau moos sei foo hemu ba senyór nia kuda kamelu sira.” Nee sinál katak, feto nee mak Maromak hili ona atu kaben ho senyór Isac.’ 45 Hau halo orasaun seidauk hotu, menina Rebeca lori ona sana mai kuru bee iha posu. Kuandu nia sae mai leten, hau moos husu ‘Anoi, foo bee uitoan hau hemu lai.’ 46 Nia hatuun lalais nia sana, hodi dehan, ‘Tiu, hemu ba! I hau sei foo hemu moos tiu nia kuda kamelu sira.’ Nunee hau hemu, ho moos hau nia kuda kamelu sira. 47 Entaun hau husu, ‘Anoi nia aman, naran saa?’ Nia hataan, ‘Hau nia aman, naran Betuél. Hau nia avoo mane, Naor, i hau nia avoo feto, Milka.’ Nunee hau tau brinkus ba nia inus, i tau moos kelu rua ba nia liman. 48 Depois hau hakruuk adora Maromak hodi dehan, ‘Obrigadu Nai Maromak! Ita Boot loke ona dalan mai hau, too hau hasoru rasik ho patraun Abraão nia maluk sira iha nee. I hau moos bele hasoru ho senyór Isac nia noiva.’ 49 Nunee agora, se senyór sira atu hatudu domin ba hau nia patraun Abraão, dehan mo-moos deit mai hau. I se lae, foo sai lo-loos deit, para hau bele hatene saida mak hau tenki halo.”
Rebeca nia família simu prenda
50 Katuas nee koalia hotu ona, Labão ho Betuél hataan, “Se NAI Maromak desidi ona nunee, ami atu dehan tan saida? 51 Rebeca mak nee. Bele lori nia baa ona, para nia sai avoo Abraão nia feto foun, tuir buat nebee mak NAI Maromak desidi ona.” 52 Rona nunee, katuas nee hakruuk too rai hodi agradese ba NAI Maromak. 53 Tuir mai, nia hasai sasaan mean ho sasaan mutin, ho hena di-diak foo ba Rebeca. Nia moos foo ba nia maun ho nia inan, prezenti mesak karu deit. 54 Liu tiha nee, katuas nee ho nia ema sira tuur, hodi haan rame-rame. I sira moos toba iha nee. Aban dadeer-saan, sira hadeer ona, katuas nee foo hatene ba uma nain, dehan, “Hau husu lisensa, se bele karik, ami fila agora ba hau nia patraun.” 55 Maibee Rebeca nia maun ho nia inan hataan, “Fila lalais hodi halo saida? Husik Rebeca hela lai ho ami loron sanulu tan. Depois foin lori nia baa.” 56 Maibee katuas nee hataan, “Keta halo demora hau! Tanba NAI Maromak tulun ona hau, too hau hasoru ona ho senyór Isac nia noiva. Nee duni, senyora sira husik ona ami, para ami fila ona baa aprezenta anoi ba ami nia patraun.” 57 Sira hataan nunee, “Mai ita husu rasik ba Rebeca deit. Nia hakarak halo oinsaa?” 58 Entaun sira bolu nia, hodi husu dehan, “Rebeca! Agora konformi deit o. O hakarak baa ona ho ema sira nee ka, oinsaa?” Rebeca hataan, “Hau hakarak baa ona.”
Isac ho Rebeca kaben
59-60 Depois sira husik Rebeca ho nia atan feto nebee hein nia dezde kiik nee, baa ho Abraão nia atan sira. Sira moos foo bensaun ba Rebeca dehan, “Alin! Ami hein katak Maromak sei foo ba o, oan barak teb-tebes, i o nia jerasaun sei sai tokon ba tokon. I ami moos hein katak o nia jerasaun sira sei manaan funu hasoru sira nia inimigu sira hotu.” 61 Liu tiha nee, Rebeca ho nia atan feto sira haloot sira nia sasaan, i sira sae kuda kamelu, hodi baa kedas ho Abraão nia atan. 62 Iha tempu nebaa, Isac foin fila hosi bee posu iha Beer-Laai-Roi ba nia hela fatin iha rai Negebe. 63 Iha lokraik ida, nia sai hosi tenda hodi hola anin. Nia lao-lao, nia foti oin, haree kuda kamelu sira mai. 64 Kuandu Rebeca haree Isac, nia tuun hosi nia kuda kamelu. 65 Nia husu ba Abraão nia atan, “Tiu! Senyór ida lao mai nebaa nee, see?” Katuas nee hataan, “Nee mak hau nia patraun kiik.” Rebeca foti nia veo hodi taka tiha nia oin. 66 I katuas nee konta ba Isac buat hotu-hotu nebee akontese. 67 Depois Isac lori Rebeca tama ba nia inan nia tenda, i sira nain rua kaben. Nia hadomi Rebeca atu-mate, nee mak nia la tristi tan ho nia inan nia mate.
Abraão kaben fali
1 Abraão kaben fali ho feto ida, naran Ketura. 2 Ketura foo oan ba nia, mak Zinran, Joksán, Medán, Midián, Isbake, ho Suá. 3 Joksán nia oan Seba, ho Dedán. Dedán nia jerasaun mak ema Asúr, ema Letus, ho ema Leum. 4 Midián nia oan mak nee: Efá, Efer, Enoke, Abida ho Elda. Sira nee hotu Ketura nia jerasaun. 5-6 Kuandu Abraão sei moris, nia foo prezenti ba Agar ho Ketura nia oan sira. Depois nia haruka sira baa hela iha rai Kanaán iha loro-sae sorin baa, dook hosi nia oan Isac. Maibee nia rikusoin hotu, nia entrega ba Isac.
Abraão mate
7-8 Abraão mate ho tinan 175. 9-10 I nia oan Isac ho Ismael hakoi nia iha fatuk kuak Makpela, besik Manre. Uluk Abraão hola rai nee hosi ema Ete, Zoar nia oan Efron. Sara moos hakoi tiha ona iha fatuk kuak nee. 11 Abraão mate tiha, Nai Maromak foo bensaun ba Isac. Iha momentu nee, Isac hela besik bee posu, naran ‘Bee matan hosi Maromak Moris, nebee tau matan mai hau’.
Ismael nia jerasaun
12 Nee Ismael nia istória. Nia Abraão nia kaben kiik Agar nia oan. Agar nee Sara nia atan hosi Ejiptu. 13-16 Ismael iha oan mane nain sanulu resin rua. Sira nia naran tu-tuir malu hosi oan boot too oan ikun, mak nee: Nebayote, Kedar, Adbeel, Mibsaun, Misma, Dumá, Masá, Adade, Tema, Jetur, Nafis, ho Kedemá. Oan sira nee sai suku sanulu resin rua nia bei-ala, suku ida-idak ho nia rain rasik. Sira tau naran ba rai nee, ida-idak tuir sira nia bei-ala nia naran. 17 Ismael mate ho tinan 137. 18 Ismael nia jerasaun hela iha Avilá ho Sur nia leet, iha dalan hosi Ejiptu ba Asúr. Sira la hela ho Abraão nia jerasaun sira seluk.
Esaú ho Jacó
19 Abraão nia oan Isac nia istória, hanesan tuir mai nee. 20 Kuandu Isac kaben ho Rebeca, Isac tinan 40. Rebeca nia aman mak Betuél, nia maun mak Labão. Sira nee ema Aram hosi Mezopotámia. 21 Rebeca oan la iha. Nee mak Isac harohan ba NAI Maromak, husu ba Nia foo oan ba Rebeca. NAI Maromak rona nia orasaun. Tuir mai, Rebeca isin rua, oan kaduak. 22 Maibee labarik sira nee dudu malu beibeik iha nia inan nia kabun laran. Rebeca hanoin, “Tanba saa mak labarik rua nee nunee?” I nia husu ba NAI Maromak. 23 NAI Maromak hataan, “Oan nain rua iha o nia kabun laran nee sei sai nasaun rua nia bei-ala. Nasaun sira nee sei funu malu beibeik. Oan ida ikun sei forti liu ida boot. I maun sei serbi ba nia alin.” 24 Kuandu too ona nia loron, Rebeca moos tuur ahi, oan mane kaduak. 25 Oan boot nia isin kor mean, i nia isin fulun hotu. Nee mak sira tau naran, Esaú (nee rona atu hanesan liafuan ida nebee dehan katak ‘isin fulun barak’). 26 Depois nia alin moris mai, kaer hela nia maun nia ain tuban. Nee mak sira tau naran ba nia, Jacó (nee rona atu hanesan liafuan ida nebee dehan katak ‘ain tuban’). Bainhira sira moris mai, Isac tinan 60 ona.
Jacó hadau Esaú nia direitu hanesan oan boot
27 Kuandu labarik rua nee boot ona, Esaú sai kasadór diak ida. Nia sempre sai ba foho. Maibee Jacó ema hakmatek, i gosta hela iha uma deit. 28 Isac hadomi liu Esaú tanba nia gosta haan naan hosi animál fuik. Maibee Rebeca hadomi liu Jacó. Esaú husu koto mean hosi Jacó 29 Iha loron ida, Jacó daan hela koto, Esaú foin fila hosi kasa mai. Nia kole i hamlaha loos. 30 Nia dehan ba Jacó, “Alin! Hau hamlaha para-mate! Foo koto nee mai hau haan lai!” (Nee mak sira bolu nia Edom. Nee rona atu hanesan liafuan ida nebee dehan katak ‘mean’.) 31 Jacó hataan, “Diak, maun. Maibee foo lai maun nia direitu hanesan oan boot mai hau.” 32 Esaú hataan dehan, “Hau la interese ho direitu oan boot nian! O nian deit ba. Hau hamlaha atu-mate ona nee.” 33 Maibee Jacó dehan, “Maun jura uluk lai katak, ita foo ona ita nia direitu nee mai hau.” Esaú moos jura nunee. 34 I Jacó foo koto mean ho paun ba nia. Esaú haan-hemu tiha hotu, nia hamriik baa ona. Nunee Esaú despreza tiha nia direitu hanesan oan boot.
Isac bosok liurai Abimelek kona ba nia kaben
1 Iha tempu ida, rai hamlaha boot, hanesan rai hamlaha iha Abraão nia tempu. Nee duni, Isac baa husu lisensa ba Abimelek, ema Filistin sira nia liurai, atu nia hela iha aldeia Gerar. 2 Nia halo nunee, tanba NAI Maromak hatudu-An ona ba nia, dehan, “O la bele baa iha Ejiptu. Hela iha rai nebee Hau sei hatudu ba o. 3-4 Se o hela iha rai nee, Hau sei hamutuk ho o, i foo bensaun oi-oin ba o. Hau sei aumenta o nia jerasaun halo barak teb-tebes, hanesan fitun iha lalehan. I Hau moos sei foo ba o ho o nia jerasaun sira rai nee hotu. Liu hosi o nia jerasaun, nasaun hotu iha mundu sei hetan bensaun. I nunee Hau kumpri ona Hau nia promesa ho o nia aman Abraão. 5 Hau halo buat sira nee hotu, tanba o nia aman tuir ona Hau nia hakarak, Hau nia orden, Hau nia lei.” 6 Nunee Isac hela lai iha Gerar. 7 Rebeca nee oin kapaas teb-tebes. Kuandu ema iha fatin nee haree nia, sira husu kona ba nia. Maibee Isac hataan, “Rebeca hau nia alin.” Nia tauk se nia dehan, nia kaben, ema bele oho tiha nia, hodi hadau tiha Rebeca. 8 Isac hela kleur ona iha nebaa, iha loron ida liurai hateke hosi janela, nia haree Isac ho Rebeca hakuak malu ho rei malu hela. 9 Entaun nia haruka ema baa bolu Isac mai. Nia hatete, “Hau hatene lo-loos tiha ona katak, feto nee o nia kaben. Nusaa mak o dehan, nia o nia alin?” Isac hataan, “Amu liurai! Hau tauk, se hau dehan nia hau nia kaben, keta halo be ema oho tiha hau.” 10 Liurai hataan, “Se ema ruma iha nee mak toba hamutuk ho o nia kaben karik, o bele foo sala mai ami. Nusaa mak o halo fali nunee mai ami?” 11 I liurai Abimelek hatete ba nia reinu tomak dehan, “Imi hotu rona di-diak! See mak barani book ema nee ka nia kaben, hau kastigu mate nia.”
Ema Filistin istori malu ho Isac kona ba bee posu
12 Iha tempu nee, Isac halo toos. I nia hetan fali nia rezultadu dala atus ida, tanba NAI Maromak foo bensaun ba nia. 13 Nia riku aumenta barak ba beibeik, too nia sai riku boot. 14 Nia karau, bibi ho bibi malae aumenta barak, i nia ema moos barak. Too ema Filistin sira laran moras nia. 15 Uluk, Isac nia aman Abraão sira kee bee posu barak. Maibee agora ema Filistin sira enxe tiha bee posu sira nee hotu ho rai. 16 I liurai Abimelek hatete ba Isac dehan, “Diak liu o husik tiha rai nee ona. Tan o iha ona podér liu ami.” 17 Nunee Isac sai hosi fatin nee, i baa hela iha rai tetuk Gerar. 18 Tuir mai, nia kee fila fali bee posu sira nebee ema enxe tiha ho rai. I nia foo naran ba bee posu sira nee, tuir naran nebee mak nia aman tau ona. 19 Isac nia ema sira kee bee posu ida iha rai tetuk Gerar nee, kona loos bee moris ida, too bee fakar sai mai. 20 Maibee bibi atan Gerar sira istori malu ho Isac nia bibi atan sira, tanba bee nee. Sira dehan, “Nee ami nia bee!” Nee mak Isac tau posu nee naran Esek, nee dehan katak ‘istori malu’. 21 Depois Isac nia ema sira kee tan posu ida. Maibee sira diskuti malu fali, tanba bee posu nee. Nee mak Isac tau posu nee naran Sitna, nee dehan katak ‘diskuti malu’. 22 Tuir mai, nia husik tiha fatin nee, baa kee fali iha fatin seluk. Iha posu nee sira la istori malu ona. Nee mak Isac tau posu nee naran Reobote, nee dehan katak ‘fatin luan’. I nia hatete, “Agora, Maromak foo ona rai luan mai ita. Iha nee, ita foin bele aumenta barak.” 23 Hosi fatin nee, Isac sira sai baa hela fali iha rai Berseba. 24 Iha kalan nee, NAI Maromak hatudu-An ba nia, hodi dehan, “Isac! Hau nee o nia aman Abraão nia Maromak. O keta tauk, tanba Hau mak kuidadu o. Hau sei foo bensaun ba o, i o nia jerasaun sei aumenta barak. Hau halo nunee, tanba Hau nia promesa ho o nia aman.” 25 Depois Isac hada fatuk halo altár ida iha fatin nee, hodi foo obrigadu ba NAI Maromak. Nia hela iha fatin nee, i nia ema sira moos kee tan bee posu ida.
Isac ho Abimelek halo akordu
26 Iha tempu nee, liurai Abimelek mai hosi Gerar hamutuk ho nia belun Auzate, ho nia komandante funu Fikól, atu hasoru Isac. 27 Isac husu, “Nai liurai! Uluk, ita boot sira haruka ami sai tiha ona. Agora, imi mai halo saida tan?” 28 I sira hataan, “Agora ami hatene ona katak Nai Maromak hamutuk ho senyór. Tanba nee, ami hanoin, diak liu ita halo akordu ba malu hodi jura dehan, 29 imi sei la halo aat mai ami, nunee ami moos la halo aat ba imi. Ami halo diak duni ba imi, nee mak uluk imi sai ho dame hosi ami nia rain. Agora ami hatene, NAI Maromak foo bensaun ba imi.” 30 Tuir mai, Isac halo festa ba sira, i sira hotu haan-hemu rame-rame. 31 Iha aban dadeer-saan fali, sira halo juramentu. Depois Isac husik sira baa ho dame. 32 Iha loron nee duni, Isac nia ema sira mai foo hatene ba nia, dehan, “Senyór! Ami kee bee posu, hetan ona bee.” 33 Depois Isac foo naran ba posu nee Seba, nee dehan katak ‘juramentu’. Depois ema bolu sidade nee Berseba, too agora.
Esaú kaben ho feto nain rua hosi suku seluk
34 Kuandu Esaú tinan 40, nia kaben ho feto nain rua hosi suku Ete. Ida mak Beeri nia oan, naran Judite, i ida tan Elon nia oan, naran Bazemate. 35 Feto nain rua nee halo Isac ho Rebeca laran susar.
Rebeca haruka Jacó bosok nia aman hodi simu bensaun
1 Kuandu Isac katuas ona, nia matan moos malahuk liu ona, nia bolu nia oan mane boot, ida nebee nia hadomi liu, hodi dehan, “Esaú, mai lai iha nee!” Esaú hataan, “Saida, apaa?” 2 Isac foo hatene dehan, “Hau katuas ona. Hau la hatene bainhira mak hau mate. 3 Nee duni, baa foti o nia rama, baa kasa lai animál fuik ruma mai hau. 4 I o tein halo di-diak tuir hau nia hakarak, hodi mai hau haan. Haan tiha hotu, hau foo bensaun ba o. Depois hau mate moos, diak.” 5 Entaun Esaú sai ona baa kasa. Maibee Rebeca rona hela Isac nia koalia nee. 6 Nunee nia baa foo hatene ba Jacó dehan, “Hau nia oan! Ohin hau rona o nia aman koalia ho o nia maun dehan, 7 ‘O baa kasa animál fuik ida, tein halo di-diak, lori mai hau haan. Hau haan hotu ona, mak hau foo bensaun ba o, iha NAI Maromak nia oin, molok hau mate.’ 8 Nee duni, o rona di-diak! I tuir deit buat nebee mak hau haruka. 9 O baa kaer bibi malae bokur oan rua, lori mai hau tein tuir o nia aman nia hakarak. 10 Depois o lori baa foo o nia aman haan. I nia sei foo bensaun ba o, antes nia mate. Nunee o mak hetan bensaun, laos o nia maun.” 11 Maibee Jacó hataan, “Amaa! Maibee hau nia maun nia isin fulun, hau nia isin kabeer. 12 Keta halo be apaa lamas kona hau nia isin, nia hatene kedan katak hau bosok nia. Nunee nia bele foo fali malisan mai hau.” 13 Nia inan hatete, “Jacó! O keta laran ru-rua. Se o nia aman foo malisan ba o, kona mak amaa. Agora o baa kaer ona bibi nee foo mai hau tein ona.” 14 Jacó baa kaer bibi sira nee, oho tiha, lori baa foo nia inan. Depois Rebeca tein halo di-diak tuir Isac nia hakarak. 15 I nia baa foti Esaú nia hena diak ida foo ba Jacó hatais. 16 Nia moos falun Jacó nia liman ho nia kakorok, ho bibi nee nia kulit. 17 Depois nia foo hahaan furak nee ho paun nebee nia foin tunu ba Jacó.
Isac foo bensaun ba Jacó
18 I Jacó lori hahaan nee baa foo nia aman, hodi dehan, “Apaa! Hau mai ona.” Isac husu, “O nee see?” 19 Jacó hataan, “Hau apaa nia oan mane boot, Esaú! Hau halo tuir tiha ona saida mak apaa haruka nee. Hadeer, haan ona. Hau tein tiha ona naan nebee hau baa kasa nee. Haan ona ba, para foo ona bensaun mai hau.” 20 I Isac dehan, “O nee la-halimar. Halo nusaa mak o bele hetan naan lalais nunee?” Jacó hataan dehan, “Tanba NAI Maromak ida nebee apaa adora nee, mak tulun hau.” 21 Depois Isac dehan, “O bes-besik mai hau lamas tok. O nee Esaú tebes ka lae?” 22 I Jacó baa besik nia aman, katuas komesa lamas nia, i hatete, “Lian nee hanesan Jacó nia lian. Maibee liman nee Esaú nia liman.” 23 I nia la konyese Jacó, tanba nia liman fulun hanesan Esaú. Bainhira nia atu foo bensaun, 24 nia husu fali tan, “O nee Esaú tebes ka?” Jacó hataan, “Tebes apaa!” 25 Isac hatete, “O foo naan nee mai hau haan. Depois hau foo bensaun ba o.” Nunee Jacó foo hahaan nee ba nia haan, ho tua ba nia hemu. 26 I nia aman dehan, “Hau nia oan! Mai besik iha nee, hodi rei hau.” 27 Kuandu nia baa besik hodi rei nia aman, Isac horon Esaú nia hena iis. I nia foo bensaun ba Jacó dehan nunee, “Hau nia oan nia iis hanesan iis toos nian, nebee NAI Maromak foo bensaun ona. 28 Nunee Nai Maromak sei hatuun mahobeen hosi lalehan, para halo bokur o nia toos. I Nia foo hare ho uvas barak ba o. 29 Nasaun barak sei sai o nia atan. I povu sira sei hakruuk ba o. O nia família moos, o mak manda, i sira hakniak iha o nia oin. See mak foo malisan ba o, sira sei hetan malisan. I see mak foo bensaun ba o, sira sei hetan bensaun.” 30 aNunee Isac foo bensaun tiha ona ba Jacó. Esaú husu Isac foo bensaun ba nia 30 bKuandu Jacó foin sai husik nia aman, nia maun Esaú fila mai hosi kasa, lori naan. 31 Nia baa tein naan nee, lori ba nia aman. Nia hatete, “Apaa! Hadeer, haan ona naan nee, para foo bensaun mai hau.” 32 Isac moos hakfodak, i husu, “O nee see tan?” Esaú hataan, “Hau Esaú! Apaa nia oan boot.” 33 Isac komesa nakdedar, i nia husu, “Se nunee, ohin see mak lori naan mai hau haan nee? Hau moos foo bensaun tiha ona ba nia. I bensaun nee la bele hasai fali.” 34 Rona nunee, Esaú laran moras, i tanis hakilar, “Apaa! Foo bensaun moos mai hau!” 35 Isac hataan, “O nia alin mai bosok tiha hau, hodi hadau tiha ona o nia bensaun.” 36 Esaú hatete, “Nia bosok hau dala rua ona. Fo-foun nia bosok hau kona ba hau nia direitu hanesan oan boot. Agora nia bosok tan hau hodi hadau hau nia bensaun. Nia naran Jacó nee loos duni. Apaa, sei iha tan bensaun seluk foo mai hau ka?” (Naran Jacó dehan katak ‘kaer ain tuban’. Maibee dehan moos ‘bosok-teen’.) 37 Isac hataan, “Hau nia oan! Hau foti tiha ona nia sai o nia xefi. I nia maun-alin sira hotu, sai ona nia atan. Hau foo ona ba nia, hare barak loos, ho tua nakonu res-resin. Agora bensaun saida tan mak hau atu foo ba o?” 38 Esaú dehan, “Apaa nia bensaun ida deit ka? Apaa foo moos bensaun mai hau, bele bensaun kiik deit moos, la iha buat ida.” I nia tanis hakilar. 39 Isac hataan, “O sei moris dook hosi rai bokur, i mahobeen la tuun hosi lalehan hodi habokon o nia rai. 40 O nia surik mak sei foo moris ba o. Maibee bele halo oinsaa moos, o sai ona atan ba o nia alin. So kuandu o kontra nia, foin o bele sai hosi nia liman.”
Rebeca haruka Jacó halai
41 Esaú odi Jacó atu-mate, tanba nia alin hadau tiha ona nia bensaun. Maibee nia hanoin dehan, “La kleur tan, apaa mate. Nunee hein deit. Tempu hadeer mate hotu ona, hau oho tiha nia!” 42-43 Kuandu Rebeca rona kona ba Esaú nia planu nee, nia bolu Jacó hodi dehan, “O rona di-diak! O nia maun rai odi ba o, i hakarak oho o. Halai lalais ba o nia tiun iha Haran. 44 Baa hela lai iha nebaa, too o nia maun laran malirin ona. 45 Bainhira nia haluha ona buat nebee o halo ba nia, hau sei haruka ema baa bolu o. Tanba hau lakohi hau nia oan rua lakon hotu iha loron ida.” 46 I Rebeca hatete ba Isac, “Esaú nia kaben ema Ete sira nee halo hau nia ulun fatuk moras ona. Se Jacó mak kaben tan ho feto Ete, diak liu hau mate deit.”
1 Entaun Isac halo tuir Rebeca nia hakarak. Nia bolu Jacó, i foo bensaun ho konselyu dehan, “Rona di-diak! O la bele kaben ho feto Kanaán. 2 Maibee o baa iha Mezopotámia, iha avoo Betuél nia uma. O baa kaben ho tiu Labão nia oan feto ida. 3 Nai Maromak ida nebee forsa teb-tebes, sei foo bensaun ba o, i aumenta o nia oan halo barak, para nia jerasaun moos sai nasaun boot barak. 4 I Nai Maromak nia promesa ho avoo Abraão tuun ba o, ho o nia jerasaun. Rai nee o nian, tuir Nai Maromak promete ona ba Abraão.” 5 Koalia hotu nunee, Isac haruka Jacó ba Mezopotámia, iha nia tiun Labão ho avoo Betuél nia uma.
Esaú kaben ho Ismael nia oan feto
6 Esaú rona dehan Isac foo tiha ona bensaun ba Jacó, i bandu nia keta kaben ho feto Kanaán. I Isac haruka nia baa kaben ho nia tiun nia oan feto ida iha Mezopotámia. 7 Esaú moos hatene katak Jacó halo tuir nia inan-aman nia haruka, i baa ona Mezopotámia. 8 Depois nia hatene katak nia aman despreza nia kaben, ema Kanaán sira. 9 Nunee nia baa iha nia aman boot Ismael, Abraão nia oan, i nia kaben tan ho Ismael nia oan, naran Maalate. Maalate nee Nabaiote nia alin feto.
Jacó mehi iha Betél
10 Nunee Jacó sai hosi Berseba, baa iha Haran. 11 Kuandu loro tuun ona, nia too iha fatin ida, nia foti fatuk ida hodi tau ulun hanesan sumasu. Depois nia toba. 12 Nia mehi, nia haree eskada ida aas too iha lalehan. I Nai Maromak nia anju sira hosi lalehan tuun-sae eskada nee. 13 Iha mehi nee, Jacó haree NAI Maromak hamriik iha nia sorin, hodi hatete, “Hau nee NAI Maromak, o nia avoo Abraão ho o nia aman Isac nia Maromak. Hau sei foo rai ida nee ba o, ho o nia jerasaun sira. 14 O nia jerasaun sei barak hanesan rai uut, i sira sei namkari ba iha loro-sae too loro-monu, rai ulun too rai ikun. Liu hosi o nia jerasaun, nasaun hotu-hotu iha mundu sei hetan bensaun. 15 O baa iha nebee deit, Hau hamutuk ho o, i tau matan ba o. I Hau sei lori fila fali o mai iha rai nee. Hau la husik o mesak. Hau sei halo sai duni buat nebee mak Hau promete ona.” 16 Jacó hadeer, i dehan, “Afinál, NAI Maromak iha fatin ida nee. Agora mak hau foin hatene!” 17 Nia tauk i nia hanoin dehan, “Fatin ida nee halo hau nia isin fulun hamriik. Tebes duni Nai Maromak nia uma iha nee! I nee odamatan ba lalehan.”
Jacó adora Maromak iha Betél
18 Iha aban dadeer-saan, Jacó hadeer, nia foti fatuk ida hodi tau nia ulun nee, nia tidin tiha fatuk nee halo hamriik. Depois nia fui mina azeiti ba fatuk nee, hodi adora Maromak. 19 Nia foo naran ba fatin nee, Betél, nee dehan katak ‘Maromak nia uma’. (Uluk fatin nee naran Lus.) 20 Depois Jacó jura dehan, “Se Nai Maromak hamutuk ho hau, i tau matan mai hau iha hau nia viajen, i foo hahaan ho hena mai hau, 21 too hau fila ho diak, NAI Maromak sei sai hau nia Maromak. 22 Fatuk nebee hau harii nee, sai fatin hodi adora Nai Maromak. I buat hotu-hotu nebee Maromak foo mai hau, hau sei fahe ba parte sanulu; parte ida hau sei foo fila fali ba Maromak.”
Jacó too iha nia tiun Labão nia uma
1 Jacó lao nafatin ba iha loro-sae. 2 Iha loron ida nia haree bee posu ida besik iha aldeia ida. Bes-besik iha fatin nee, iha bibi grupu tolu, hein hela atu hemu bee. Maibee bee posu nee sei taka hela fatuk boot ida. 3 Hanesan baibain, bibi sira hamutuk ona, foin bibi atan sira muda fatuk nee hodi kuru bee foo ba bibi sira hemu. Hemu tiha hotu, sira taka fali posu nee. 4 Tuir mai, Jacó baa husu bibi atan sira, “Maluk sira! Imi mai hosi nebee?” Sira hataan, “Ami mai hosi aldeia Haran.” 5 Jacó husu, “Imi konyese tiu Labão ka? Nia Naor nia oan.” Sira hataan, “Ami konyese.” 6 Jacó husu fali, “Nia diak ka lae?” Sira hataan, “Katuas diak hela. Haree tok, nia oan feto mak lori bibi mai nee, naran Rakél.” 7 Jacó dehan, “Loro sei manas. Nunee diak liu foo hemu ona ba animál sira nee. Depois lori fali sira baa haan duut.” 8 Maibee sira protesta dehan, “La bele nunee! Ami tenki hein bibi atan sira halibur sira nia bibi hotu lai, foin ami muda fatuk nee, hodi foo hemu animál sira.” 9 Jacó sei koalia hela, Rakél moos too ho nia aman nia bibi. Tanba nia mak hein bibi sira nee.
Jacó loke bee posu nia matan ba Rakél
10 Kuandu Jacó haree Rakél mai, nia baa muda tiha fatuk iha posu nee, hodi foo hemu nia bibi. 11 I nia moos baa hakuak ho rei Rakél, hodi tanis. 12 Nia konta, “Alin! Hau, o nia aman nia feton Rebeca nia oan.” Maka Rakél moos halai baa foo hatene ba nia aman. 13 Bainhira Labão rona dehan nia feton nia oan mai ona, nia halai baa hasoru, hodi hakuak ho rei nia. Depois nia lori Jacó ba uma. Jacó konta buat hotu-hotu. 14 aI Labão dehan, “Loos duni! Ita nain rua sei maluk!”
Jacó kaben ho Lea ho moos Rakél
14 bJacó hela iha nebaa durante fulan ida nia laran. 15 Depois Labão dehan, “Jacó! Hau lakohi o servisu saugati deit mai hau, tanba ita nain rua sei maluk. O hakarak hau selu hira?” 16 Labão nee iha oan feto nain rua. Biin naran Lea, alin naran Rakél. 17 Lea nia matan kapaas. Maibee Rakél bonita liu, nia oin kapaas teb-tebes. 18 I Jacó hadomi mak Rakél. Nunee nia hataan ba Labão, “Hau servisu ba tiu tinan hitu, naran katak tiu foo kaben hau ho Rakél.” 19 Labão hataan, “Hau simu! Duké hau foo kaben Rakél ho ema seluk, diak liu ho o, hau nia maluk rasik. Nunee o hela iha nee deit, servisu mai hau.” 20 Nunee Jacó servisu tinan hitu nia laran, para bele kaben ho Rakél. Tanba nia gosta teb-tebes Rakél, maka tinan hitu nee, hanesan loron hira deit. 21 Liu tiha tinan hitu nee, Jacó foo hanoin ba Labão dehan, “Tiu! Hau servisu ba tiu tinan hitu ona, nunee agora tiu foo kaben ona Rakél ho hau.” 22 Entaun Labão halo festa kazamentu ida, i konvida ema hotu iha rai nee. 23 Iha kalan nee, Labão la foo Rakél, maibee nia foo mak Lea tama ba iha Jacó nia tenda. Nunee Jacó toba ho Lea. 24 (Labão moos foo nia atan feto Zilpa, para sai Lea nia atan.) 25 Aban dadeer fali Jacó foin hatene katak nia kaben ho Lea. Entaun Jacó baa protesta ba Labão dehan, “Nusaa mak tiu bosok fali hau nunee? Hau servisu mate-an iha tinan hitu nia laran, para hodi hetan Rakél. Nusaa mak tiu troka fali ho Lea?” 26 Labão hataan, “O keta hirus! Tuir ami nia lisan iha nee, alin la bele kaben uluk biin. 27 Nee duni, diak liu nunee deit! O hein too festa kazamentu loron hitu nee hotu lai. Depois foin o hetan Rakél, naran katak o servisu mai hau tinan hitu tan.” 28 Jacó simu. Festa loron hitu nee hotu, Labão foo kaben Rakél ho Jacó. 29 I Labão foo nia atan feto ida tan, naran Bila, para sai Rakél nia atan. 30 I Jacó toba hamutuk ho Rakél. Nia hadomi liu Rakél duké Lea. Nunee nia servisu tinan hitu tan ba nia banin mane.
Jacó nia oan sira
31 NAI Maromak hatene Jacó hadomi liu Rakél duké Lea. I Nia foo oan ba Lea, maibee Rakél oan la iha. 32 Nunee Lea isin rua, i tuur ahi, oan mane ida. Labarik nee nia tau naran Ruben (nee dehan katak ‘Haree! Iha oan’). Tanba nia dehan, “NAI Maromak haree ona hau nia terus. Agora, hau nia lain sei hadomi hau.” 33 Nee liu tiha, Lea isin rua tan, i tuur ahi, oan mane ida. Nia tau naran Simeão. Tanba nia dehan, “NAI Maromak rona ona katak hau nia lain la interese hau. Nee mak Nia foo tan oan mane ida nee mai hau.” (Simeão rona atu hanesan liafuan Ebreu ida, nebee dehan ‘ema rona ona’.) 34 Depois Lea isin rua tan, i tuur ahi, oan mane ida. Nia tau naran Levi. Tanba nia dehan, “Agora hau nia lain sei la husik hau, tanba hau foo ona oan mane nain tolu ba nia.” (Levi dehan ‘kesi’ ou ‘hakuak metin’.) 35 Lea isin rua tan, i tuur ahi, oan mane ida. Labarik nee nia tau naran Judá (nee dehan ‘hahii’). Tanba nia dehan, “Dala ida nee, hau atu hahii NAI Maromak!” Nee liu tiha, Lea la hetan tan oan.
1 Maibee Rakél seidauk hetan oan. Nee mak nia laran moras nia biin. Nia moos dehan ba nia lain, “Senyór! Foo ona oan mai hau! Se lae, diak liu hau mate deit.” 2 Jacó hirus nia hodi dehan, “O hanoin hau nee Maromak, para bele foo oan ba o?!” 3 Rakél hataan, “Diak liu senyór hola hau nia atan Bila, para nia foo oan mai hau.” 4 Maka nia foo Bila ba nia lain, i Jacó toba hamutuk ho nia. 5 Depois Bila isin rua, i nia tuur ahi, oan mane ida. 6 Rakél dehan, “Nai Maromak rona ona hau nia orasaun. Nee mak Nia foo mai hau oan mane ida. Nai Maromak tesi ona hau nia lia ho lo-loos.” I labarik nee nia tau naran Dan (nee dehan katak ‘tesi lia’). 7 Depois Bila isin rua fali, i nia tuur ahi tan, oan mane ida. 8 Maka Rakél hatete, “Hau hadau malu ho hau nia biin, i hau mak manaan.” Nee mak nia tau naran ba labarik nee, Naftali. (Nee dehan katak ‘hadau malu’.) 9 Lea haree katak nia la hetan tan oan, entaun nia foo nia atan Zilpa ba nia lain, para kaben ho nia. 10 I Zilpa tuur ahi, oan mane ida. 11 Lea hatete, “Hau sorti.” I nia tau naran ba labarik nee, Gade. (Nee dehan katak ‘destinu diak’.) 12 Depois Zilpa tuur ahi oan mane ida tan. 13 I Lea hatete, “Agora foin hau kontenti! Feto sira sei koalia ba malu dehan, hau sorti teb-tebes ona.” Nee mak nia tau naran ba labarik nee, Asér. (Nee dehan katak ‘haksolok’.) 14 Too tempu koa hare, Ruben baa iha ai laran, nia hetan ai-moruk ida para bele halo ema hetan oan. I nia lori mai foo ba nia inan Lea. Rakél moos haree, i husu ba Lea dehan, “Mana! Foo ai-moruk nee uitoan mai hau.” 15 Maibee Lea hataan, “O nee demais ona! O hadau tiha ona Jacó nia domin, agora o hakarak hadau tan ai-moruk nebee hau nia oan lori mai nee?” Maibee Rakél hatete, “Entaun mana. Foo ai-moruk nee mai hau, depois orsida kalan, mana mak toba hamutuk ho Jacó.” I Lea moos hataan. 16 Iha lokraik Jacó fila hosi toos. Lea baa hasoru nia hodi dehan, “Jacó! Kalan nee o tenki toba ho hau! Tanba hau aluga ona o hodi hau nia oan nia ai-moruk.” Iha kalan nee, Jacó moos toba ho Lea. 17 I Nai Maromak rona Lea nia orasaun. Nee mak nia isin rua, i nia tuur ahi, oan mane númeru lima. 18 Lea tau naran ba labarik nee, Isakar (nee dehan katak ‘selu kole’). Tanba nia dehan, “Nai Maromak selu ona hau nia kole, tan hau foo ona Zilpa kaben ho hau nia lain.” 19 Tuir mai, Lea isin rua tan, i nia tuur ahi, oan mane neen ona. 20 Nia hatete, “Nai Maromak foo ona prezenti diak mai hau. Nunee agora, hau nia lain tenki respeita hau, tanba hau foo ona oan mane nain neen ba nia.” Nee mak nia tau labarik nee naran, Zebulón. (Nee dehan katak ‘foo respeitu’.) 21 Nee liu tiha, Lea tuur ahi oan feto ida, i nia tau naran, Diná. 22 Depois maka Nai Maromak hanoin Rakél, i Nia rona nia orasaun. Nee mak Nia foo oan ba Rakél. 23 Nia isin rua, i tuur ahi oan mane ida. Nia hatete, “Nai Maromak hasai ona hau nia moe.” 24 Nia tau naran ba labarik nee, José (nee dehan katak ‘husik nia aumenta baa’). Tanba nia dehan, “Hau husu ba Nai Maromak para foo tan oan mane ida mai hau.”
Jacó buka meius hodi aumenta nia bibi
25 Bainhira José moris mai ona, Jacó dehan ba Labão, “Tiu! Se bele, hau fila ona ba hau nia rain. 26 Husik hau lori fila hau nia kaben ho labarik sira. Tiu hatene ona, hau servisu mate-an ba ita, hodi selu kotu ona sira. Nunee, agora sira hau nian ona.” 27 Maibee nia tiun hataan, “O rona lai. Hau baa husu matan-dook. Nia dehan, NAI Maromak foo bensaun mai hau, tanba o. 28 Agora o husu hira deit moos, hau selu. Naran katak o hela iha nee, hodi servisu nafatin ba hau.” 29 Jacó hataan, “Tiu rasik haree ona, hau servisu mate-an. I tiu nia animál sira moos aumenta barak baa beibeik. 30 Uluk hau seidauk mai iha nee, tiu nia riku seidauk barak nunee. Maibee agora, tiu sai riku tiha ona. NAI Maromak foo bensaun ona ba tiu, tanba hau nia servisu. Agora too ona tempu, para hau servisu ba hau nia kaben ho hau nia oan sira.” 31 Labão husu tan, “Hau tenki selu o, oinsaa?” Jacó hataan, “Tiu lalikan selu buat ida, hau sei hein nafatin tiu nia animál sira, naran katak hau bele halo buat ida. 32 Foo lisensa mai hau, atu loron nee duni hau baa haketak tiu nia bibi ho bibi malae sira. Bibi nebee makerek, bibi malae nebee makerek, ho bibi malae nebee metan, hau nian, hodi selu hau nia kole. Sira seluk hotu tiu nian. 33 Ikus mai, tiu sei hatene hau ema loos ka lae. Loron saida deit, tiu bele baa revista hau nia animál sira. Se ita haree bibi nebee mak la makerek, ka bibi malae mutin, tiu hatene kedan katak hau naok tiu nia animál.” 34 Labão hataan, “Diak liu nunee deit ona.” 35 Iha loron nee, Labão haketak tiha animál sira nebee makerek, ho bibi malae nebee metan. I nia haruka nia oan sira hein animál sira nee. 36 Depois sira lori animál sira nee ba iha fatin ida dook hosi Jacó. Lao ain loron tolu nia laran. Maibee Jacó sei hein nafatin nia banin mane nia bibi ho bibi malae. 37 Liu tiha nee, Jacó tesi ai sanak hosi ai huun oin tolu, i nia taa ai nia kulit halo riska makerek. 38 Nia tau ai sanak makerek sira nee iha animál sira nia hemu fatin, tanba animál sira gosta hola malu iha nebaa. 39 Nunee, bainhira sira hola malu iha ai sanak makerek nia oin, kuandu sira hahoris, bibi oan sira moos isin makerek. 40 Kuandu Labão nia animál sira atu hola malu, Jacó halo see oin ba animál sira makerek nee. Nunee oan sira moos makerek. I nunee Jacó nia animál aumenta barak. I nia haketak tiha sira hosi Labão nian, tau hamutuk ho ninian rasik. 41 Bainhira animál bokur sira hola malu, Jacó baa tau ai makerek nee iha hemu fatin iha animál sira nia oin. 42 Maibee kuandu nia haree animál krekas mak hola malu, nia la tau ai makerek nee ba. Nunee Labão nian mak bibi krekas sira. I Jacó nian mak bibi bokur. 43 Ho hanesan nee, Jacó sai riku boot. Nia bibi, bibi malae, kuda kamelu, kuda buru, ho atan moos barak.
Jacó sira halai husik hela Labão
1 Iha loron ida, Jacó rona Labão nia oan sira koalia nunee, “Jacó sai riku boot tiha ona, tanba nia hadau ita nia aman nia riku hotu.” 2 Jacó moos haree nia banin mane oin toos hela deit, i la diak ho nia hanesan uluk. 3 Tuir mai NAI Maromak hatete ba Jacó nunee, “O tenki fila ona ba o nia inan-aman sira, ho o nia família sira nia rain. I Hau sei hamutuk ho o.” Jacó hasoru ho nia kaben nain rua 4 Entaun Jacó haruka bolu Rakél ho Lea, atu hasoru malu ho nia iha kampu nebee bibi sira haan hela. 5 I nia hatete ba sira, “Ikus nee, hau haree imi nia aman nia oin to-toos deit mai hau. I nia la diak ona ho hau hanesan uluk. Maibee Nai Maromak ida nebee hau nia aman adora nee, hamutuk ho hau. 6 Imi nain rua hatene, durante nee hau servisu mate-an ba imi nia aman. 7 Maibee bele nunee, nia ha-matak hau beibeik, i hau nia saláriu nia muda dala sanulu ona. Biar nunee moos, Nai Maromak tau matan nafatin mai hau. 8 Kuandu imi nia aman koalia dehan, ‘Animál makerek funan-funan sira hodi selu o nia kole,’ maka animál sira nee moos hahoris oan funan-funan hotu. Loron seluk nia dehan fali, ‘Animál makerek riska-riska sira hodi selu o nia kole,’ maka animál sira nee hahoris fali oan riska-riska hotu. 9 Nunee Nai Maromak hasai imi nia aman nia animál sira, hodi foo mai hau. 10 Dala ida, tempu bibi aman ho bibi inan tuir malu, hau mehi, haree bibi aman sira nebee hola bibi inan sira nee, makerek hotu. 11 I Nai Maromak nia anju hatete mai hau liu hosi mehi dehan, ‘Jacó!’ I hau hataan, ‘Saida, Nai?’ 12 Anju nee hatete, ‘Haree tok! Bibi aman sira nebee hola malu ho o nia bibi inan sira nee, so iha deit makerek. Hau mak halo nunee, tanba Hau haree ona saida mak Labão halo ba o. 13 Hau, Nai Maromak ida nebee hatudu-An ba o iha Betél. Iha nebaa o hada fatuk, i o fui mina azeiti baa, hodi adora Hau. Iha fatin nee moos o halo promesa ho Hau. Agora o tenki husik tiha rai ida nee, hodi fila ba o nia inan-aman sira nia rain iha nebaa.’” 14 Entaun Rakél ho Lea hataan, “Diak! Ami tuir deit! Tanba ami la hetan ona rikusoin hosi ami nia aman. 15 Kleur ona nia konsidera ami hanesan ema fuik, nia faan kotu tiha ona ami. I sasaan nebee nia simu hanesan barlake, nia haan tiha hotu ona. 16 Riku hotu nebee Nai Maromak hasai hosi apaa, agora ami nian, ho ami nia oan sira nian. Nunee saida mak Maromak hatete ona, halo tuir deit.” 17-18 Liu tiha nee, Jacó haloot nia sasaan hotu. Nia moos hasae nia kaben sira ho nia oan sira ba kuda kamelu. I nia lori nia animál hotu, ho nia riku hotu nebee mak nia hetan iha Mezopotámia, hodi fila ba Kanaán. 19 Momentu nee Labão sai tiha baa tesi nia bibi malae nia fulun. I Rakél naok tiha nia aman nia estátua lulik sira. 20 Jacó sira sai baa nonook deit, la foo hatene ba nia banin mane. 21 Nia lori nia riku sira nee hotu, i sira halai deit, hakur mota Eufrates, hodi lao ba iha foho Gileade.
Labão duni tuir Jacó
22 Liu tiha loron tolu, mak foin Labão rona dehan, Jacó sira halai tiha ona. 23 Entaun nia halibur nia ema sira, hodi duni tuir nia mane foun. Sira duni tuir durante loron hitu nia laran, foin hetan sira iha foho Gileade. 24 Kalan nee, Maromak hatudu-An ba Labão iha mehi, hodi hatete, “Orsida se o koalia ho Jacó, o kuidadu ho o nia ibun.” 25 Momentu nee, Jacó halo tenda iha foho Gileade. Labão sira moos halo tenda la dook hosi sira. 26 I Labão baa hasoru Jacó. Nia hatete, “Nusaa mak o lori hau nia oan feto sira halai nonook nunee? Hanesan o kaer sira iha funu laran! 27 Nusaa mak o halai nonook, la despede hau tan! Se o foo hatene di-diak mai hau, maka hau halo festa, akompanya imi ho múzika, foin husik imi baa. 28 O nia sala ida tan, mak nee, o la foo tempu mai hau rei hau nia bei oan sira lai, mak husik sira baa. Hanesan nee, o beik-teen liu. 29 La susar buat ida hau halo aat ba o! Maibee hori-kalan, Nai Maromak, ida nebee o nia aman adora nee, foo hatene mai hau dehan, kuandu hau koalia ho o, hau tenki kuidadu di-diak ho hau nia ibun. 30 Hau kompriende katak o hadomi o nia aman, nee mak o hakarak fila lalais. Maibee nusaa mak o sei naok fali hau nia estátua lulik sira?”
Labão diskuti ho Jacó
31 I Jacó hataan nunee, “Tiu keta hirus hau! Hau sai nonook deit, tanba hau tauk, keta halo be tiu hadau fali tiu nia oan feto sira.” 32 Jacó la hatene katak nia kaben Rakél naok tiha estátua lulik sira nee. Nunee nia dehan, “Tiu! Kona ba lulik sira, tiu buka deit ba! Se hetan iha see, kastigu mate nia. Sobu sasaan hotu deit ba. Se tiu hetan tiu nia riku seluk, foti fila fali. Bele ema sira nee hotu sai sasin.” 33 Entaun Labão baa revista sira ida-idak nia tenda. Primeiru nia baa revista iha Jacó nia tenda. Tuir mai nia baa iha Lea nia tenda. Depois baa iha atan feto rua nee nia tenda. Maibee nia la hetan lulik sira nee. Ikus mai, nia baa iha Rakél nia tenda. 34 Maibee Rakél subar tiha lulik sira nee iha kuda kamelu nia sela okos. I nia tuur iha sela leten. Labão revista di-diak iha Rakél nia tenda, maibee la hetan. 35 Rakél hatete ba nia aman, “Apaa keta hirus. Hau la bele hamriik, tan hau nia fulan mai.” I Labão buka maibee nia la hetan lulik sira nee. 36 Entaun Jacó komesa hirus. Nia protesta ho lian makaas dehan, “Hau halo aat saida ba tiu? Too tiu duni hau, hanesan ema aat ida. 37 Tiu sobu tiha ona hau nia sasaan hotu. I tiu hetan saida? Tau tok iha oin nee, para ita hotu haree. Nunee ema sira nee hotu mak tesi, sasaan sira nee see nian. 38 Tinan rua-nulu ona, hau servisu ba tiu. Uluk hau sei hein tiu nia animál, hotu-hotu moris mai ho diak. Bibi ida moos hau la haan. 39 Se iha animál siak mak tata mate tiu nia bibi ida, hau la foo hatene ba tiu, maibee hau mak selu fali. I se ema naok tiu nia animál, tiu haruka hau mak troka fali, mezmu ke hau la sala. 40 Loro-loron, loro manas sunu hau. Kalan-kalan, hau malirin nakdedar. Hau la toba, tanba hein tiu nia animál. 41 Durante tinan rua-nulu nia laran sempre nunee! Hau servisu tinan 14, hodi hetan tiu nia oan feto sira. Liu tiha nee, hau servisu aumenta tan tinan neen, hodi hetan hau nia animál sira. Servisu kleur teb-tebes, maibee tiu muda hau nia saláriu dala sanulu. 42 Sorti Nai Maromak iha! Ida nebee avoo Abraão ho apaa Isac adora. Se Nia la tau matan ba hau, maka tiu duni tiha ona hau fila ho liman mamuk. Maibee Nai Maromak la taka matan ba hau nia terus, i Nia moos haree hau nia servisu hotu. Nee mak hori-kalan, Nia mai foo hatete dehan tiu mak sala.”
Jacó ho Labão halo akordu
43 Rona hotu tiha Jacó nia koalia, Labão hataan, “Feto rua nee hau nia oan. Labarik sira nebee imi hetan nee, hau nia bei oan hotu. Animál sira nee hotu hau nian. Buat hotu-hotu nebee o haree iha nee, mesak hau nian. Maibee hau atu halo saida? Atu haruka fila moos, la bele. 44 Nunee diak liu, ita nain rua halo akordu. I ita tenki halo tuir akordu nee.” 45 Depois Jacó foti fatuk boot ida, harii iha fatin nee, hanesan sinál. 46 I nia haruka nia ema sira, baa hili fatuk halo bou. Depois sira hotu tuur hodi haan besik fatuk bou nee. 47 I Labão tau naran ba fatuk bou nee, Jegar-Saaduta. Maibee Jacó tau naran, Galeede. 48 I Labão hatete, “Fatuk bou nee sai testemunya ba ita nain rua.” Nee mak fatin nee naran, Galeede. 49 Labão tau naran ba fatin nee, Mispa, tanba nia dehan, “NAI Maromak mak sei tau matan ba ita nain rua, bele ita nain rua dook malu moos, ita la bele kontra akordu nee. 50 Se o halo aat ba hau nia oan sira nee, ou kaben ho feto seluk, mezmu ke hau la hatene, maibee, Nai Maromak mak sai testemunya entre o ho hau. 51-52 Haree tok fatuk nebee hamriik nee, ho fatuk bou nee. Fatuk sira nee, sai hanesan baliza. O la bele sai liu fatuk sira nee, atu halo aat ba hau. I hau moos la bele sai liu fatuk sira nee, atu halo aat ba o. 53 Ita jura hodi Nai Maromak nebee ita nia bei-ala sira adora. Maromak nee mak o nia avoo Abraão, ho hau nia avoo Naor adora. Nia mak sai ita nia juíz hodi tesi ita nia lia. Ita jura katak ita sei kumpri ita nia akordu nee.” Rona tiha nunee, Jacó jura hodi Nai Maromak nia naran, ida nebee nia aman Isac adora. 54 Nee liu tiha, Jacó oho animál ida, nia lori baa halo sakrifísiu ba Maromak iha foho nee nia tutun. Depois nia bolu nia ema sira nee hotu hodi haan rame-rame, i sira hadeer too dadeer-saan iha fatin nee. 55 Iha dadeer-saan nakukun, Labão baa hakuak hodi rei nia oan sira ho nia bei oan sira hotu. Nia foo bensaun ba sira, i fila fali ba nia rain.
Jacó tauk hasoru malu ho nia maun Esaú
1 Liu tiha nee, Jacó kontinua nia viajen. I Maromak nia anju sira mai hasoru nia. 2 Kuandu Jacó haree sira, nia hatete, “Nee Maromak nia para fatin.” Nee mak nia tau fatin nee naran, Maanaim (nee dehan katak ‘para fatin rua’). 3 Liu tiha nee, Jacó haruka nia ema balu, baa uluk iha rai Edom (mak Seir), para foo hatene ba nia maun Esaú katak, Jacó atu mai. 4 Jacó hatete ba nia ema sira, “Imi baa foo hatene ba hau nia maun Esaú nunee: ‘Amu Esaú! Amu nia atan, alin Jacó, foo kumprimentus ba ita boot. Dezde hau sai hosi nee too agora, hau hela iha tiu Labão nia uma. 5 Agora, ita boot nia atan iha ona karau, kuda, bibi, bibi malae, ho atan mane ho atan feto. Hau haruka ema sira nee baa uluk, foo hatene ba ita boot katak, hau atu mai. Hau hein katak, amu hakarak simu ami ho liman rua.’” Entaun ema sira nee baa ona. 6 Bainhira sira fila fali ba Jacó, sira foo hatene dehan, “Ami hasoru malu ona ho senyór nia maun Esaú. Agora, nia mai ho mane atus haat, atu hasoru malu ho ita.” 7 Rona nunee, Jacó nia laran tuk-tuku, i nia tauk atu-mate. Nunee nia fahe nia ema sira ho nia animál sira ba grupu rua. 8 Nia hanoin dehan, “Se Esaú mai asalta grupu ida, grupu ida seluk sei bele salva-an.” 9 Depois Jacó halo orasaun dehan, “Nai Maromak! Ita Boot mak hau nia avoo Abraão ho hau nia aman Isac adora. Rona hau lai! Uluk Maromak mak haruka hau fila ba hau nia família sira iha rai nee. Maromak mak promete dehan, Ita Boot mak sei prepara buat hotu halo diak mai hau. 10 Ita Boot sempre hatudu Ita nia laran diak mai hau, i hanoin Ita nia promesa ho hau. Hau la serve atu simu nee. Uluk kuandu hau hakur liu hosi mota Jordaun, hau lori ai-tonka deit. Maibee agora, hau mai fali lori ema barak ho animál barak fahe ba grupu rua. 11 Hau tauk, keta halo be maun Esaú mai oho ami hotu. Nee duni hau husu, Maromak salva hau, ho hau nia kaben ho hau nia oan sira, hosi maun Esaú. 12 Maromak mak promete atu foo bensaun barak mai hau i halo hau nia jerasaun aumenta barak, hanesan rai-henek iha tasi ibun, nebee ema sura la hatene.” 13 Iha kalan, Jacó toba iha fatin nee. Aban fali, nia prepara nia animál balu atu foo ba nia maun. 14 Nia hili bibi inan 200, bibi aman 20, bibi malae inan 200, bibi malae aman 20, 15 kuda kamelu inan 30 ho sira nia oan, karau inan 40, karau aman 10, kuda buru inan 20, ho kuda buru aman 10. 16 I nia fahe animál sira nee, ida-idak ho nia grupu. Nia hili atan ida hodi lori grupu ida-idak. Nia foo hatene ba sira, “Imi lao uluk, hau tuir hosi kotuk. Maibee imi tenki haree atu grupu ida dook uitoan hosi grupu seluk.” 17 I Jacó foo orden ba bibi atan hosi grupu primeiru dehan, “Se hau nia maun Esaú hasoru o, i nia husu, ‘O atu baa nebee? O see nia atan? Animál sira nee see nian?’ 18 Maka, imi tenki hataan dehan, ‘Animál sira nee amu nia atan Jacó nian. Nia haruka foo ba nia maun, amu Esaú. I nia rasik sei tuir.’” 19-20 Nia moos foo orden ba bibi atan hotu hosi grupu sira seluk dehan, “Se imi hasoru maun Esaú, imi foo animál sira nee ba nia. Depois imi foo hatene katak hau sei tuir iha kotuk.” Jacó hanoin, se nia foo animál sira nee hotu ba Esaú, maka Esaú nia laran sei malirin ba nia. 21 Nunee nia haruka animál sira nee baa uluk. Maibee iha kalan nee, nia sei hela iha nia akampamentu.
Jacó deut malu ho Maromak
22 Iha kalan nee kedan, Jacó hadeer, haruka nia kaben rua, nia kaben kiik rua, ho nia oan nain 11, baa hakur liu mota Jaboke nia sorin ba. 23 Sira too hotu iha sorin balu ona, nia haruka nia rikusoin hotu ba iha nebaa. 24 Maibee Jacó hela mesak iha nebaa. Depois mane ida mai deut malu ho nia too rai huun mutin. 25 Kuandu mane nee senti nia atu lakon ona, nia baku iha Jacó nia kidan, too nia kidan ruin naksalak tiha. 26 Depois mane nee hatete, “Husik ona hau, tan rai huun mutin ona.” Maibee Jacó hataan, “O foo bensaun lai mai hau, foin hau husik o!” 27 Mane nee husu, “O naran saa?” Nia hataan, “Jacó.” 28 I mane nee koalia dehan, “O nia naran, laos Jacó tan ona. Maibee komesa agora, ema bolu o Israel. Tanba o hakaas-an ona kontra Nai Maromak, i kontra ema, i o manaan.” 29 Depois Jacó husu, “O nia naran saa?” Maibee mane nee hataan, “O husu hau nia naran, hodi halo saida?” Depois nia foo bensaun ba Jacó iha fatin nee. 30 Jacó koalia ba nia aan rasik, “Hau haree ona Nai Maromak oin ho oin, maibee hau sei moris.” Tanba nee, nia tau naran ba fatin nee, Peniel, nee dehan katak, ‘Maromak nia oin’. 31 Bainhira Jacó lao husik hela fatin nee, loro matan sae daudaun. Maibee nia lao kudeik tanba nia kidan naksalak. 32 Nee mak too agora, ema Israel sira la haan animál nia kidan uat, tanba Maromak baku halo naksalak tiha sira nia avoo Jacó nia kidan ruin.
Jacó hasoru malu ho nia maun Esaú
1 Iha loron nee, Jacó haree Esaú mai ho ema nain 400. I Jacó fahe nia oan sira, ida-idak ho nia inan. 2 Nia tau nia kaben kiik rua nee ho sira nia oan sira lao iha oin. Depois Lea ho nia oan sira, foin Rakél ho nia oan José iha kotuk liu. 3 Maibee Jacó lao iha sira hotu nia oin. Kuandu atu besik ona nia maun, nia hakniak ho hakruuk too rai, dala hitu. 4 Kuandu Esaú haree nia alin Jacó, nia halai baa hasoru, i nia hakuak ho rei nia. I sira nain rua tanis. 5 Kuandu Esaú haree feto sira ho labarik sira, nia husu, “Ema sira nee see?” Jacó hataan, “Sira nee mak Nai Maromak foo ona ba maun nia atan, hau.” 6 Depois nia kaben kiik sira, ho sira nia oan sira mai hakruuk ba Esaú. 7 Tuir mai, Lea ho nia oan sira, mai hakruuk ba Esaú. Ikus liu, José ho nia inan Rakél moos mai hakruuk ba Esaú. 8 I Esaú husu, “Animál sira nebee ohin o haruka mai nee, hodi halo saida?” Jacó hataan, “Nunee, senyór! Hau foo ba senyór, para senyór bele simu hau ho laran diak.” 9 Maibee Esaú simu fali dehan, “Alin Jacó! Hau nia riku moos barak. Nunee o lalikan foo buat ida mai hau.” 10 I Jacó hataan, “Maun keta halo nunee! Maun tenki simu, para hatudu katak maun simu hau ho liman rua. Tan ohin hau haree maun nia oin hamnasa, hanesan hau haree Nai Maromak. 11 Nunee, hau husu ho respeitu, atu maun simu hau nia prezenti nee. Tan Nai Maromak diak teb-tebes ba hau, nee mak Nia foo mai hau buat hotu mak hau presiza.” Jacó hamaus nafatin nia, too Esaú simu duni prezenti sira nee. 12 Depois Esaú hatete, “Entaun, ita lao ona! Hau akompanya imi.” 13 Maibee Jacó hataan, “Lalikan, maun! Maun haree rasik baa, labarik sira nee sei kiik, i seidauk bele lao lalais. I animál sira nebee foin oan moos barak. Se ita obriga sira lao lalais, iha loron ida deit, animál sira nee bele mate mohu. 14 Nunee diak liu maun sira baa uluk deit. Mak ami lao neineik hosi kotuk. Depois mak hau baa hasoru maun iha Seir.” 15 I Esaú hatete, “Se nunee, hau husik hela hau nia ema balu ho o, para sira hatudu dalan ba imi.” Maibee Jacó hataan, “Maun lalikan fadigadu! Naran katak, hau hatene, maun simu ona hau.” 16 Depois Esaú sira fila bali ba Seir. 17 I Jacó sira baa iha Sukot. Iha nee, nia halo uma, ho halo luhan hodi sulan nia animál sira. Nee mak fatin nee, sira tau naran Sukot. (Nee dehan katak ‘baraka’.) 18 Nunee Jacó sira fila tiha ho diak hosi Mezopotámia. Ikus mai, sira baa too iha aldeia Sikem iha rai Kanaán. I sira halo tenda hodi hela besik aldeia nee. 19 Rai nebee Jacó sira hodi halo tenda nee, nia hola kotu hosi Hamór, Sikem nia aman. Nia selu ho osan mutin atus ida. 20 Iha fatin nee, nia hada fatuk halo altár hodi halo sakrifísiu. I nia tau fatin nee naran El-Elohe-Israel, nee dehan katak, ‘Maromak nebee Israel adora’.
Sikem estraga Jacó nia oan feto Diná
1 Iha loron ida, Lea nia oan feto, Diná, baa vizita feto klosan sira nebee hela iha rai nee. 2 Rai nee nia liurai naran Hamór, hosi suku Eveu. Bainhira Hamór nia oan mane Sikem haree Diná, nia lori halai i estraga tiha nia. 3 Sikem matan monu ba Diná, nia gosta teb-tebes. Nunee nia hamaus Diná para feto nee moos bele gosta nia. 4 Sikem foo hatene ba nia aman, dehan, “Apaa! Baa husu Diná, para hau kaben ho nia.” 5 Jacó rona dehan ema estraga tiha nia oan feto. Maibee nia seidauk halo buat ida. Tanba nia oan mane sira sei hein hela bibi iha kampu. Nunee nia hein too sira hotu fila. 6 Momentu nee, Sikem nia aman Hamór mai hasoru Jacó, atu husu Diná. 7 Natoon sira nain rua koalia hela, Jacó nia oan mane sira too mai hosi kampu. Kuandu sira rona dehan Sikem estraga tiha ona sira nia alin feto, sira nia fuan moras, i hirus atu-mate. I sira dehan, “Buat ida nunee la bele akontese ba ita povu Israel. Ita la bele simu ema halo buat aat nunee.” 8 Hamór hamaus Jacó sira dehan, “Irmaun Jacó! Hau nia oan Sikem gosta teb-tebes irmaun nia oan feto. Nee duni, hau husu para foo lisensa ba hau nia oan kaben ho nia. 9 Se bele, ita nia oan sira kaben ba malu. Imi nia oan mane kaben ho ami nia oan feto. Nunee moos ami nia oan mane kaben ho imi nia oan feto. 10 Imi moos bele hela hamutuk ho ami iha nee. Imi bele hela iha nebee deit, konformi imi nia hakarak. Imi moos bele kontratu ho livre, i bele hetan riku iha nee.” 11-12 Depois Sikem koalia ho Diná nia aman, ho nia maun sira dehan, “Imi hakarak husu saida deit, hau foo. Imi hakarak husu hira hodi taka moe nian, ho barlake hira moos, hau foo. Naran katak imi foo lisensa para hau kaben ho imi nia alin feto.” 13 Maibee Jacó nia oan sira hatene ona katak Sikem estraga tiha ona sira nia alin Diná. Nee duni, sira finji hataan ba Sikem ho nia aman Hamór, 14 “Ami la foo kaben ami nia alin ho ema nebee la sunat. Nee halo moe ami! 15 Maibee imi tenki halo nunee: Imi mane sira hotu, kiik-boot, tenki sunat hanesan ami. 16 Imi halo nunee, foin ita bele kaben malu. I ami moos bele hela hamutuk ho imi iha nee, para ita sai nasaun ida. 17 Maibee se imi lakohi sunat, maka ami lori fali ami nia alin, i ami baa ona.” 18 Hamór ho Sikem simu ho diak sira nia liafuan. 19-20 Maibee Sikem lakohi hein tan, tanba nia gosta teb-tebes Diná. Ema hotu-hotu iha rai nee respeita Sikem. Nunee Hamór ho Sikem baa iha fatin tesi lia nian iha portaun tama ba aldeia, i koalia ho ema hotu iha rai nee dehan, 21 “Maun-alin sira hotu! Ema Israel sira nee hakarak moris dame ho ita, nunee husik sira hela hamutuk ho ita iha rai nee. Rai nee luan ba ita hotu. Nunee ita bele kaben ho sira nia oan feto, i sira moos bele kaben ho ita nia oan feto sira. 22 Sira husu buat kiik-oan ida deit hosi ita. Mak nee, ita mane hotu-hotu tenki sunat hanesan sira. 23 Se ita moris hamutuk ona, maka sira nia animál, ho sira nia riku hotu sai ita nia rikusoin. Nee duni, diak liu ita simu deit sira nia hakarak. Mai ita sunat hamutuk. Maun-alin sira hataan ka?” 24 I ema hotu nebee halibur iha fatin nee, konkorda ho Hamór ho Sikem nia koalia. Entaun mane hotu-hotu iha rai nee sunat rame-rame. 25 Liu tiha loron tolu, sira nebee sunat nee kanek sei moras, Diná nia maun Simeão ho Levi foti sira nia surik, sira baa tama nonook ba sidade, i sira oho tiha mane sira hotu. 26 Hamór ho Sikem moos sira oho. Depois sira hasai Diná hosi Sikem nia uma, i sira fila. 27 Nee liu tiha, Jacó nia oan sira seluk tama ba sidade nee, hadau sasaan hotu. Tanba ema estraga tiha ona sira nia alin iha nebaa. 28 Sira hadau ema nia sasaan uma laran hotu, i sira lori moos ema nia animál iha kampu hotu. 29 Sira lori hotu feto sira ho labarik sira, i hadau hotu sasaan sira folin karun iha sidade nee. 30 Kuandu Jacó hatene tiha buat nee, nia hatete ba Simeão ho Levi, “Imi halo saida mak nee? Imi halo susar hau deit! Orsida ema Kanaán, ema Peris, ho ema hotu iha rai nee, odi mate ita. Sira ema barak. Maibee ita ema uitoan deit. Se sira ataka ita, ita rahun kedas.” 31 Maibee sira hataan ho hirus dehan, “Apaa! Ami la bele husik sira halo ami nia alin hanesan feto aat!”
Jacó sira halai ba Betél
1 Nee liu tiha, Nai Maromak koalia ho Jacó, dehan, “Hau nee Maromak ida nebee hatudu-An ba o, momentu o halai hosi o nia maun Esaú. Agora, o muda ba Betél. Too iha nebaa, halo altár ida mai Hau. I hela ona iha nebaa.” 2-3 Depois Jacó hatete ba nia família uma laran tomak, dehan, “Agora, ita hotu atu muda ba aldeia Betél. Iha nebaa, hau atu halo altár ida hodi adora Nai Maromak. Nia mak tulun hau bainhira hau iha susar laran. I Nia sempre hamutuk ho hau iha nebee-nebee deit. Nee duni agora, imi hasai imi nia estátua lulik sira hotu. Imi hariis tiha, troka tiha imi nia hena, tanba ita atu baa adora Maromak.” 4 Depois sira entrega sira nia estátua lulik ho sira nia brinkus sira hotu. I Jacó hakoi sasaan sira nee hotu iha ai huun boot ida besik aldeia Sikem. 5 Kuandu Jacó sira sai hosi Sikem, Nai Maromak halo tauk ema sira nebee hela haleu sidade nee, too ema ida la barani halo aat ba sira. 6 Nunee Jacó sira hotu too ho diak iha aldeia Betél (uluk naran Lus), iha rai Kanaán. 7 Iha nebaa, Jacó halo altár ida hodi fatuk, i nia bolu fatin nee, El-Betél, (nee dehan katak ‘Betél nia Maromak’), tanba uluk Nai Maromak hatudu Nia Aan ba Jacó iha nebaa, momentu nebee nia halai hosi nia maun. 8 Iha ai huun boot ida besik iha aldeia Betél, nebee ema bolu Alon Bakute, nee dehan katak ‘ema tanis lelir iha ai huun nee’. Ema foo naran nee, tanba feto ida nebee hein Rebeca bainhira nia sei kiik, naran Debora, mate iha nebaa, i sira tanis lelir hodi hakoi nia iha ai huun boot nee. 9 Kuandu Jacó fila ona hosi Mezopotámia, Nai Maromak hatudu-An tan, hodi foo bensaun ba nia. 10 Maromak hatete, “Komesa agora, o nia naran, laos tan Jacó. Maibee Hau tau o nia naran foun, mak nee, Israel. 11 Hau, Maromak Boot Liu. O tenki iha oan ho bei oan bara-barak. Nasaun barak sei sai hosi o nia jerasaun, i liurai barak moos sei sai hosi o. 12 Rai nebee Hau foo ona ba o nia avoo Abraão ho o nia aman Isac, agora Hau foo ba o, ho o nia jerasaun sira.” 13 Koalia hotu nunee, Nai Maromak sae fali ba lalehan. 14 I Jacó harii fatuk ida hanesan sinál hodi hanoin Maromak nia promesa. I nia fui tua uvas ho mina azeiti ba fatuk leten, hodi adora Maromak. 15 Fatin nee nia tau naran Betél.
Rakél mate
16 Nee liu tiha, Jacó sira sai hosi Betél. Kuandu sira besik ona Efrata (mak Belém), Rakél nia loron tuur ahi moos too. Maibee nia tuur ahi susar. 17 Bainhira nia kanotak moras makaas, parteira dehan ba nia, “Senyora Rakél! Hakaas-an, tanba ita hetan oan mane tan.” 18 Kuandu nia iis atu kotu, nia tau naran ba labarik nee Benoni, (nee dehan katak ‘oan terus’). Depois nia mate. Maibee Jacó tau labarik nee naran Benjamim, (nee katak, ‘oan liman loos’). 19 I sira hakoi Rakél iha dalan ibun atu baa iha Efrata, (nebee agora naran Belém). 20 Jacó hada tiha rate nee. Too ohin loron, rate nee sei iha.
Jacó nia oan sira
21 Liu tiha nee, Jacó kontinua nia viajen. Dala ida, nia halo tenda iha uma aas Eder nia sorin ba. 22 Bainhira sira sei iha fatin nee, Ruben sala fali ho nia aman nia kaben kiik, Bila. Jacó rona buat nee, nia hirus teb-tebes. Jacó nia oan mane nain sanulu resin rua. 23 Lea nia oan mak nee: Ruben (Jacó nia oan mane boot), Simeão, Levi, Judá, Isakar, ho Zebulón. 24 Rakél nia oan mak nee: José ho Benjamim. 25 Rakél nia atan Bila nia oan mak nee: Dan ho Naftali. 26 I Lea nia atan Zilpa nia oan mak nee: Gade ho Asér. Jacó nia oan sira nee moris iha Mezopotámia.
Jacó nia aman Isac mate
27 Depois Jacó baa haree nia aman Isac iha Manre besik aldeia Kiriate-Arba (nee mak agora naran Hebrón). Uluk nia avoo Abraão moos hela iha fatin nee. 28-29 Isac moris too nia tinan 180, foin nia mate. I nia oan Esaú ho Jacó hakoi nia.
Esaú nia jerasaun
1 Nee Esaú nia jerasaun sira, nia moos naran Edom. 2 Esaú kaben ho feto Kanaán nain rua. Ida ema Ete, mak Elom nia oan feto, naran Ada. Ida segundu ema Eveu, naran Oolibama. Nia aman naran Aná, i nia avoo naran Zibeaun. 3 Esaú moos kaben ho Ismael nia oan feto, naran Bazemate, Nebaiote nia biin. 4 Esaú nia kaben boot, Ada, hetan oan ida naran Elifaz. Bazemate nia oan naran Reuel. 5 I Oolibama nia oan mak Jeús, Jalaun ho Korá. Nee mak Esaú nia oan sira nebee moris iha rai Kanaán. 6 Iha loron ida, Esaú muda fali ba fatin seluk, dook hosi Jacó. Nia lori nia kaben sira ho nia oan sira, nia ema servisu sira, animál sira, ho nia riku hotu. 7 Esaú fahe malu ho Jacó, tanba sira nia animál ho riku sira barak demais. Nunee rai nebee sira hela ba nee, hahaan la too ba sira nia animál sira haan. 8 Tanba nee mak Esaú (nebee moos naran Edom), baa hela iha foho iha Seir. 9 Tuir mai, Esaú nia jerasaun, nebee ema dehan ema Edom. Sira hela iha foho iha Seir. 10-13 Esaú nia kaben Ada, iha oan mane ida, naran Elifaz. Elifaz nia kaben boot nia oan mane nain lima. Nee mak: Teman, Omar, Zefó, Gaetán, ho Kenaz. Elifaz nia kaben kiik, naran Timna. Nia iha oan mane ida, naran Amaleke. Esaú nia kaben Bazemate, iha oan mane ida, naran Reuel. Reuel hetan oan mane nain haat. Mak nee, Naate, Zerá, Samá, ho Mizá. 14 Esaú nia kaben Oolibama, Aná nia oan, Zibeaun nia bei oan nee, iha oan mane nain tolu, mak nee, Jeús, Jalaun ho Korá. 15-16 Esaú nia bei oan sira fahe sai suku bara-barak. Suku ida-idak ho nia liurai. Esaú nia oan boot Elifaz nia oan sira, sai liurai suku Teman, liurai suku Omar, liurai suku Zefó, liurai suku Kenaz, liurai suku Korá, liurai suku Gaetán, ho liurai suku Amaleke. Sira nee hotu, Esaú ho nia kaben Ada nia jerasaun. 17 Esaú nia oan Reuel nia oan sira, sai liurai suku Naate, liurai suku Zerá, liurai suku Samá, ho liurai suku Mizá. Sira nee hotu, Esaú ho nia kaben Bazemate nia jerasaun. 18 Esaú ho nia kaben Oolibama nia oan sira, sai liurai suku Jeús, liurai suku Jalaun, ho liurai suku Korá. 19 Suku sira nee hotu, Esaú nia jerasaun.
Seir nia jerasaun
20-21 Iha rai nee, iha ema Hori ida, naran Seir. Nia oan sira fahe sai suku bara-barak. Ida-idak ho nia liurai. I nia oan sai liurai suku Lotan, liurai suku Sobal, liurai suku Zibeaun, liurai suku Aná, liurai suku Eser, ho liurai suku Disán. 22 Lotan nia oan mak, Hori ho Homán. (Lotan nia alin feto, Timna.) 23 Sobal nia oan mak, Alván, Manaate, Ebal, Sefó, ho Onan. 24 Zibeaun nia oan mak, Aiá ho Aná. Aná nee mak hetan bee matan manas iha rai fuik maran, bainhira nia hein nia aman nia kuda buru sira. 25-26 Aná nia oan feto mak, Oolibama, ho oan mane mak, Dizon. Dizon nia oan mak, Hendan, Esban, Itran, ho Keran. 27 Eser nia oan mak, Bilan, Zaavan, ho Akan. 28 Disán nia oan mak, Uz ho Aran. 29-30 Nunee liurai ema Hori sira mak, Lotan, Sobal, Zibeaun, Aná, Dizon, Eser, ho Disán. Sira hotu hela iha rai Seir.
Edom nia liurai sira
31 Bainhira Israel seidauk iha liurai, rai Edom iha tiha ona liurai. Sira nia naran mak tuir mai nee: 32 Beor nia oan, Belá, ukun iha sidade Dinabá. 33 Bainhira Belá mate, Jobabe mak troka nia sai liurai. Nia aman naran Zerá hosi aldeia Bozra. 34 Bainhira Jobabe mate, Husaun mak troka nia sai liurai. Husaun hosi ema Teman sira nia rai. 35 Bainhira Husaun mate, Adade mak troka nia sai liurai. Nia aman naran Bedade, hosi aldeia Avite. (Nia mak manaan funu hasoru ema Midián iha Moab.) 36 Bainhira Adade mate, Samlá mak troka nia sai liurai. Samlá hosi aldeia Masreka. 37 Bainhira Samlá mate, Saul mak troka nia sai liurai. Saul hosi aldeia Reobote iha mota ninin. 38 Bainhira Saul mate, Baal-Hanan mak troka nia sai liurai. Nia aman naran Akbor. 39 Bainhira Baal-Hanan mate, Hadar mak troka nia sai liurai. Hadar hosi aldeia Paú. Nia kaben naran Meetabel. Meetabel nia aman, naran Matrede. I nia avoo, Me-Zaabe. 40-43 Liurai sira nebee mai hosi Esaú sira mak nee: Timna, Alva, Jetete, Oolibama, Elá, Pinom, Kenas, Teman, Mibzar, Magdiel, ho Iran. Suku ida-idak foo naran ba fatin nebee sira hela, tuir sira nia naran rasik. Nee hotu, Esaú nia jerasaun, ema Edom sira nia istória.
Jacó hela iha rai Kanaán
1-2 Jacó sira nia istória too iha nee. Sira hela iha rai Kanaán, iha nia aman nia hela fatin uluk.
José ho nia maun-alin sira
Jacó nia oan ida naran José. Kuandu nia tinan sanulu resin hitu ona, nia ho nia maun sira loro-loron hein bibi ho bibi malae. José ho nia maun sira, aman ida, maibee inan keta-ketak. José nia inan Rakél, nia maun sira nia inan mak Bila ho Zilpa. José nee lori-liadór. Nia sempre kesar ba nia aman saida mak nia maun sira halo.
José simu ropa kapaas ida
3 Jacó hadomi liu José duké nia maun sira, tanba nia katuas ona mak foin hetan José. Iha loron ida nia haruka suku ropa furak ida foo ba José. 4 Bainhira nia maun sira haree sira nia aman hadomi liu José, sira odi nia, too sira moos la koalia diak tan ho nia. 5-7 Iha kalan ida, José mehi. I nia konta nia mehi nee ba nia maun sira dehan, “Maun sira, rona lai hau nia mehi. Hau mehi dehan ita hotu kesi hare halo futun. Ida hau kesi nee derepenti hamriik. Depois imi nian moos hamriik haleu, hodi hakruuk ba hau nian.” Rona nunee, nia maun sira hirus nia liu tan. 8 I sira siak José dehan, “O nee mak atu ukun fali ami ka?” Nunee sira odi nia liu tan, tanba nia foo sai mehi nee.
José konta nia mehi
9 Depois José mehi fali. Nia konta ba nia maun sira dehan, “Hau mehi tan hanesan nee. Hau haree loromatan, fulan, ho fitun sanulu resin ida. Hotu-hotu hakruuk hela mai hau.” 10 Depois nia konta ba nia aman. Maibee nia aman hirus nia hodi dehan, “Mehi saida mak nee? Hau, o nia inan, ho o nia maun-alin sira, ami atu baa rei o nia ain ka? Nee demais ona!” 11 Nunee José nia maun sira laran moras liu. Maibee nia aman hanoin hela deit mehi saida mak nee.
Sira faan José ba rai Ejiptu, nudar atan
12 Iha loron ida, José nia maun sira lori sira nia aman nia bibi ba besik aldeia ida naran Sikem. 13 La kleur, nia aman dehan, “Azé! O nia maun sira hein bibi besik iha Sikem. O tenki baa haree sira.” I José hataan, “Diak, apaa.” 14 Nia aman hatutan tan, “O baa lai, haree tok o nia maun sira ho hau nia bibi, diak ka lae? Depois o fila fali mai, foo hatene hau.” Entaun José lao hosi sira nia uma iha foho leet iha Hebron, baa too iha rai Sikem. 15 Too iha nebaa, José buka sira tuun-sae. Too ema ida haree nia lao baa-mai iha kampu laran, husu ba nia, “O buka saida?” 16 José hataan, “Tiu, hau buka hau nia maun sira. Sira lori bibi mai besik iha nee. Tiu keta haree sira karik?”
José nia maun sira haree nia mai
17 Ema nee hatete, “Sira sai tiha ona, dehan atu baa aldeia Dotan.” Rona nunee, José tuir nia maun sira baa, too nia haree hetan sira iha Dotan. 18 Maibee José sei dook, sira haree nia ona, i kombina atu oho nia. 19 I sira dehan ba malu, “Haree tok! Ida be mehidór mai ona! 20 Mai ita oho tiha nia! I soe tiha nia tama ba rai kuak nee. Depois ita foo hatene ba apaa dehan animál siak mak haan tiha nia. Depois mak ita haree nia mehi sira nee atu sai saida.” 21 Maibee nia maun Ruben lakohi, i buka atu salva José. Nia dehan ba nia alin sira, “Ita keta oho nia! 22 Diak liu ita soe tiha nia ba kuak laran nee deit. Iha nee rai fuik, la iha ema ida atu hatene. Naran katak la bele halo kanek nia.” Ruben koalia nunee, tanba nia hakarak husik José para haruka nia fila ba uma.
Sira dudu tama José ba rai kuak
23 Bainhira José too baa, nia maun sira kaer tiha nia, i rakut sai tiha nia ropa furak nee. 24 Depois sira rasta nia soe tama ba kuak laran. 25 I sira fila baa haan. Sira sei haan hela, derepenti haree grupu ida liu. Ema sira nee kontratu nain; sira tula sasaan ba kuda kamelu atu faan. Hanesan ai been morin, temperus, ho ai-moruk oi-oin. Afinál grupu nee ema Ismael, mai hosi aldeia Gileade halo viajen ba rai Ejiptu hodi faan sira nia sasaan. 26 Entaun, Judá foo hatene ba nia maun-alin sira dehan, “Diak liu nunee deit! Ita lalikan oho nia, ita oho nia hodi halo saida? Bele halo nusaa moos, ita subar nia raan la diak. 27 Nia ita nia alin. Diak liu ita baa faan nia ba ema Ismael sira, para nia todan la bele ba ita.” I sira hotu tuir Judá nia koalia nee.
Sira kombina atu faan José ba kontratu nain sira
28 Bainhira ema kontratu nain sira nee liu, José nia maun sira hasae nia hosi rai kuak. I sira faan José ba ema Ismael sira, ho folin osan mutin rua-nulu. Depois sira lori José ba Ejiptu. 29 Momentu sira faan José, Ruben la iha. Bainhira nia fila baa haree rai kuak nee, nia hakfodak tanba José la iha tiha ona. Nunee nia lees tiha nia ropa nebee nia hatais, tanba nia laran susar teb-tebes. 30 Nia fila ba nia alin sira hodi dehan, “Labarik nee la iha tiha ona! Agora hau susar ona. Hau atu halo saida?!” 31 Tuir mai sira oho bibi ida, i foti José nia ropa furak nee, reta ba bibi nia raan. 32 Depois sira foti ropa nee, lori baa foo sira nia aman, hodi dehan, “Apaa! Ami hili hena ida nee. Apaa haree tok. Keta Azé nia ropa karik.” 33 Haree hena nee, Jacó hatene kedas. Nia hataan, “Aii! Nee, hau nia oan nian duni! Animál siak lees tiha nia ona. Hau nia oan mate ona!” 34 Haree nunee, Jacó lees tiha nia ropa, i hatais fali hena aat ida, tanba nia tristi atu-mate. Nia moos tanis hakilar beibeik ba nia oan nee. 35 Nia oan mane ho oan feto sira hotu, mai hamaus nia, maibee nia lakohi rona. Nia dehan, “Lalika! Hau sei tristi too mate, tanba hau la bele haluha labarik nee.” Nunee Jacó laran tristi beibeik.
José sai atan iha Ejiptu
36 Iha tempu nee, ema kontratu nain sira too iha rai Ejiptu. Sira lori José baa faan ba ema boot ida, naran Potifar. Nia liurai Ejiptu nia xefi seguransa.
Judá ho nia feto foun Tamar
1 Nee hotu tiha, Judá lao husik hela nia maun-alin sira, baa hela ho nia kolega ida naran Hirah iha aldeia Adulam. 2 Iha fatin nee iha ema Kanaán ida naran Sua. Judá gosta Sua nia oan feto ida, i sira nain rua kaben. Liu tiha nee, sira hetan oan mane, moris tu-tuir malu. 3 Oan primeiru, sira tau naran Er. 4 Oan segundu, sira tau naran Onan. 5 Tuir fali terseiru, naran Sela. Bainhira Sela moris mai, sira muda tiha ona ba aldeia seluk, naran Kesibe. 6 Bainhira oan primeiru Er boot ona, Judá baa husu feto ida ba nia. Feto nee naran Tamar. I sira nain rua kaben. 7 Maibee Er nee ema hahalok aat teb-tebes. Tanba nee, Nai Maromak kastigu mate tiha nia. Nee mak Er mate la iha oan. 8 Entaun Judá dehan ba nia oan segundu, “Onan! O nia maun mate la iha oan. Tuir ita nia lisan, o tenki kaben fali ho o nia maun nia feen. Para o bele foo jerasaun ba o nia maun.” 9 Onan hatene ona lisan nee. Maibee nia lakohi foo jerasaun ba nia maun Er. Nunee kuandu nia toba hamutuk ho Tamar, nia soe sai nia fini, para Tamar la bele hetan oan. 10 Onan sempre halo nunee, halo Nai Maromak hirus teb-tebes. Nee mak Nai Maromak kastigu mate nia. 11 Kuandu Judá haree nia oan rua nebee kaben ho Tamar nee mate hotu, nia moos tauk ona. Nia hanoin, keta halo be nia oan ikun Sela kaben tan ho Tamar, nia moos bele mate tan. Nee mak Judá baa foo hatene ba nia feto foun dehan, “Tamar. Diak liu o fila ba o nia inan-aman deit. Bainhira hau nia oan Sela boot ona, foin o fila mai kaben ho nia.” I Tamar moos fila. 12 Depois Judá nia kaben moos mate. Bainhira tempu lutu liu tiha ona, nia bolu nia kolega Hirah, i sira nain rua baa iha aldeia ida naran Timna. Iha fatin nee, ema halibur malu hodi tesi Judá nia bibi malae nia fulun, hodi halo faru manas. 13 Iha ema foo hatene ba Tamar dehan, “O nia banin mane baa iha Timna hodi tesi bibi malae nia fulun.” 14 Iha tempu nee, Judá nia oan ikun Sela boot ona. Maibee Tamar hatene ona nia banin mane la hataan nia kaben ho Sela. Entaun Tamar buka dalan hodi reklama nia direitu. Nia hasai nia ropa faluk nian, i hatais fali ropa kapaas. Nia uza veo hodi taka nia oin. I nia baa tuur iha dalan Timna nian, iha portaun aldeia Enaim nian. 15 Bainhira Judá liu hosi portaun, nia haree Tamar. Maibee nia hanoin feto luroon, tanba Tamar hatais vestidu kapaas, i taka nia oin. 16 Judá la hatene katak, feto nee nia feto foun. Nunee nia baa besik hodi husu atu toba ho nia. Tamar husu, “Senyór sei foo saida?” 17 Judá dehan, “Oinsaa se hau foo bibi ida ba o?” Tamar hataan, “Diak senyór. Naran katak senyór pinoor netik buat ruma mai hau kaer, too ita haruka bibi nee mai.” 18-19 Judá husu tan, “O hakarak hau pinoor hela saida?” Tamar hataan, “Hau hakarak senyór nia karimbu nebee tara hela iha ita nia kakorok. Ho moos ai-tonka iha ita nia liman.” Rona nunee, Judá foo kedas sasaan sira nee ba nia. Depois sira nain rua baa toba hamutuk hanesan lain ho feen. Hotu tiha, Tamar fila ona. Depois nia hasai tiha nia vestidu kapaas ho veo, hodi hatais fali ropa faluk nian. Hakfodak mai, ema hatene katak Tamar isin rua ona. 20 Judá fila tiha, nia husu tulun ba nia kolega Hirah dehan, “O lori bibi nee foo ba feto luroon iha Enaim nebaa, hodi hola fali hau nia sasaan nebee pinoor hela iha nebaa.” Hirah too iha nebaa, nia husu baa-mai, maibee la hetan feto nee. 21 Nia husu ba ema sira iha nebaa dehan, “Imi haree feto luroon ida nebee sempre tuur iha portaun nee ka? Nia iha nebee?” Sira hataan, “Senyór, iha nee feto luroon la iha.” 22 Nunee Hirah fila fali ba Judá. Nia foo hatene dehan, “Hau la hetan feto nee. Hau buka baa-mai, maibee ema iha nebaa hatete mai hau dehan, iha fatin nee feto luroon la iha.” 23 Judá hataan, “Husik hela sasaan sira nee ba nia ba. Naran katak ema keta halo moe ita! Hau atu selu nia, maibee ita la hetan nia.” 24 Liu tiha fulan tolu, ema baa hatete ba Judá dehan, “O nia feto foun Tamar halo-an hanesan feto aat. Agora nia isin rua.” Rona nunee, Judá hirus atu-mate. I nia foo orden dehan, “Baa lori feto nee mai, para sunu mate nia!” 25 I sira baa atu lori Tamar mai. Maibee nia hasai karimbu ho ai-tonka. Nia haruka sira baa foo hatene ba nia banin mane dehan, “Senyór revista tok sasaan sira nee. Karimbu ho ai-tonka nee nia nain mak halo hau isin rua.” 26 Haree tiha sasaan sira nee, Judá hatene kedas katak, sasaan sira nee ninian. I nia foo sai dehan, “Loos duni! Feto nee la sala. Hau mak sala. Tuir loos, hau tenki foo kaben nia ho hau nia oan Sela. Maibee hau lakohi.” Depois nia la toba hamutuk tan ho Tamar ona. 27 Too tempu atu partu ona, Tamar tuur ahi, oan mane kaduak. 28 Momentu nia tuur ahi, oan ida nia liman sai uluk mai liur. Parteira kesi kabas mean ida ba nia liman, hodi dehan, “Nee mak oan primeiru.” 29 Maibee bebee nee dada fila fali nia liman. I ida seluk mak moris uluk fali. Parteira dehan ba bebee nee, “O nee forti duni! Tanba o sena malu too o sai uluk.” Nunee bebee nee hetan naran, Peres (nee katak, ‘sena malu sai ba liur’). 30 Nee foin nia alin ho kabas mean iha liman nee moris mai. Sira tau nia naran, Sera (nee katak ‘mean lakan’).
José ho Potifar nia kaben
1-2 Depois, José, ema Ismael sira lori tiha ona ba iha Ejiptu. Iha nebaa iha ema boot ida naran Potifar. Nia liurai nia xefi seguransa iha palásiu. Potifar nee mak sosa José hosi ema kontratu nain sira, para sai atan iha nia uma. NAI MAROMAK tulun José iha nebaa, too nia servisu hotu lao ho diak. 3 Nia xefi haree José nia servisu hotu-hotu lao ho diak, i nia hatene katak NAI MAROMAK mak tulun. 4 Nee mak nia xefi gosta José, i konfia ba nia. I nia moos foti José sai nia mandór hodi toma konta nia uma ho nia sasaan sira hotu. 5 Tanba José hela iha uma nee, mak Nai Maromak foo bensaun ba nia xefi ema Ejiptu nee. Nunee xefi nia uma laran, nia rikusoin, nia toos i nia servisu hotu-hotu lao ho diak. 6 Bainhira Potifar haree José halo servisu hotu ho diak, nia la hanoin tan buat ida, nia so hatene mak haan deit. José nee mane bonitu ida. 7 Nia hela iha nebaa seidauk kleur, Potifar nia kaben gosta fali nia. Nia sempre hamaus José atu toba hamutuk ho nia. 8 Maibee José lakohi. Nia hataan dehan, “Keta halo nunee, senyora! Tanba hau nia xefi Potifar foo ona responsabilidade mai hau hodi toma konta buat hotu-hotu iha nee. 9 Iha uma nee, la iha tan ema seluk boot liu hau. Tanba xefi konfia ona hau toma konta buat hotu-hotu. So senyora deit mak lae. Nusaa mak hau bele halo fali buat aat ida nunee! Nee kontra Nai Maromak nia hakarak!”
Potifar nia kaben hamaus José
10 Maibee bele nunee moos, xefi nia kaben nee loro-loron hamaus beibeik José, para atu toba hamutuk ho nia. Maibee José la interese ba nia. 11 Iha loron ida, José tama ba uma laran, atu halo nia servisu. Iha loron nee, la iha ema seluk iha uma. 12 Nia xefi nia kaben mai kaer José nia faru i dada nia hodi dehan, “Mai ona! Agora ita nain rua mesak deit. Mai ita baa toba ona.” Maibee José lakohi. Nia dada-an halai sai ba liur, husik feto nee kaer nafatin nia faru iha uma laran. 13 Bainhira Potifar nia kaben haree José halai sai tiha ba liur husik hela nia faru, 14-15 nia bolu ema nebee servisu ho sira, hodi foo hatene, “Imi mai haree lai! Ohin ema Ebreu nee tama iha hau nia kuartu. Nia obriga atu toba hamutuk ho hau, maibee hau hakilar makaas. Nunee maka nia halai sai ba liur, husik hela nia faru nee. Hau nia kaben lori ema malkriadu nee mai, para halo moe deit ita.”
Potifar nia kaben hatudu José nia faru
16 Potifar nia kaben moos kaer hela faru nee too nia lain fila. 17 Bainhira Potifar fila, nia kaben konta kedas, dehan “Ema Ebreu ita lori mai nee, ohin tama hau nia kuartu atu viola hau. 18 Hau hakilar makaas hodi bolu ema mai, mak nia foin halai sai ba liur, husik hela nia faru nee.” 19 Rona nia kaben konta nunee, Potifar hirus para-mate. 20 Nia haruka ema kaer José lori baa hatama iha kadeia, hamutuk ho liurai nia ema dadur sira seluk. 21 Maibee NAI MAROMAK la haluha José, i tulun nia nafatin, too xefi iha kadeia gosta teb-tebes José, 22 i konfia ba nia. Nee mak nia entrega ema hotu iha kadeia ba José nia liman, i foti nia hodi toma konta servisu tomak iha nebaa. 23 Tanba nee, xefi kadeia la ulun moras tan ho servisu iha kadeia. NAI MAROMAK tulun nafatin José, too servisu hotu-hotu iha kadeia lao diak.
José siik ema dadur nia mehi
1-3 Iha kadeia nee, iha ema nain rua mak uluk kaer servisu iha liurai Ejiptu nia palásiu. Ida toma konta liurai nia hemu, ida tan toma konta liurai nia paun. Sira nain rua halo sala hasoru liurai. Nee mak liurai hirus, too nia hatama sira nain rua ba kadeia. Nunee sira nain rua hamutuk ho José. 4 I xefi kadeia foo orden ba José para toma konta ema nain rua nee. Sira kleur iha kadeia nee. 5 Depois, iha kalan ida, ema nain rua nee mehi. Ida-idak ho nia mehi rasik. I mehi nee nia signifikadu keta-ketak. 6 Dadeer-saan fali, José haree sira nain rua oin muroon hela. 7 Nia moos husu ba sira, “Tanba saa mak ohin loron nee, imi nia oin tristi nunee?” 8 Sira hataan, “Hori-kalan ami mehi, maibee ami la hatene mehi nee dehan saida.” José hataan, “La iha ema ida mak bele hatene, so Nai Maromak deit. Imi konta tok. Depois mak hau husu Nai Maromak atu esplika imi nia mehi.” 9 Entaun, ema ida toma konta liurai nia hemu nee, komesa konta ona, “Nunee. Hau mehi, hau haree ai uvas huun ida, 10 sanak tolu. Ai huun nee komesa moris, nia tahan, nia funan, nia fuan tasak kedas. 11 I hau haree, hau kaer hela liurai nia kopu. Hau foti uvas hodi buti ba kopu nee. Depois hau foo ba liurai hemu.” 12 Rona nunee, José foo hatene, “Irmaun, mehi nee dehan nunee: sanak tolu nee katak loron tolu. 13 Iha loron tolu mai, liurai sei hasai irmaun hosi kadeia. Depois nia sei foti fali irmaun, para hodi toma konta fali nia hemu hanesan uluk. 14 Kuandu senyór moris diak ona, senyór keta haluha hau. Se ita hadomi duni hau, favór ida foo sai ba liurai, para nia hasai hau hosi kadeia nee. 15 Tanba ema obriga lori hau hosi Ebreu sira nia rain. Iha Ejiptu nee moos, hau la halo sala ida. Maski nunee derepenti ema hatama hau ba kadeia, hanesan ema aat.” 16 Rona mehi nia signifikadu diak nunee, ema ida toma konta liurai nia paun nee moos komesa konta ona nia mehi ba José, “Alin. Hau nia mehi nunee: iha lafatik tolu hada malu, hau tutur hela. 17 Lafatik ida iha leten liu, iha liurai nia dosi oi-oin. Maibee manu fuik sira mai haan tiha hotu dosi nee iha hau nia ulun.” 18 Rona nunee, José hataan, “Irmaun nia mehi nee dehan nunee: Lafatik tolu nee katak loron tolu. 19 Iha loron tolu mai nee, liurai sei haruka ema mai tesi tiha irmaun nia kakorok. Depois sira tara irmaun nia isin ba ai riin. I manu fuik sira sei mai haan hotu irmaun nia mate isin.” 20 Liu tiha loron tolu, liurai halo tinan, i nia halo festa boot ba nia funsionáriu sira. Nia foo orden atu hasai nia ema nain rua nee hosi kadeia. 21 Depois liurai foti fali nia ema ida toma konta nia hemu nee, ba fali iha nia servisu ida uluk. 22 Maibee ema ida toma konta liurai nia paun nee, sira tara mate tiha nia, tuir lo-loos José nia koalia. 23 Mais too ikus, ema ida toma konta liurai nia hemu nee, la hanoin tan José, nia haluha tiha.
José siik liurai Ejiptu nia mehi
1 Liu tiha tinan rua, liurai Ejiptu moos mehi. Nia mehi, nia hamriik hela iha mota Nil nia ibun. 2 Derepenti, nia haree karau vaka hitu. Karau nee bokur loos too isin nabilan. Sira sai hosi mota laran, baa haan duut iha mota ibun.
Karau vaka
3 Depois, iha tan karau vaka hitu sai hosi mota laran. Maibee sira nia isin krekas maran loos. Sira hamriik bes-besik karau sira bokur nee. 4 I karau krekas hitu nee, tolan tiha hotu karau bokur hitu nee. Liurai hakfodak hadeer tiha. 5 La kleur nia toba fali, nia mehi fali tan. Nia haree, hare fulin hitu sai hosi huun ida. Hare nee isin nakonu i fulin kapaas. 6 I nia haree tan hare fulin hitu, maibee isin la iha, i namlaik tiha ona tanba anin bailoro. 7 I fulin namlaik hitu nee tolan tiha hotu fulin isin nakonu hitu nee. Depois liurai hakfodak tiha, mak foin hatene katak buat nee mehi. 8 Iha dadeer-saan, liurai laran susar. Nunee nia haruka baa bolu ema matan dook sira ho matenek nain sira hotu iha rai Ejiptu. I nia konta nia mehi nee ba sira, maibee la iha ema ida mak bele siik.
Ema ida toma konta liurai nia hemu koalia ho liurai
9 Depois mak foin ema ida nebee toma konta liurai nia hemu nee, hanoin hetan José. Nia moos foo hatene ba liurai dehan, “Amu liurai, hau tenki foo sai hau nia sala. 10 Uluk, kuandu amu hirus hau ho hau nia kolega, amu hatama tiha ami ba kadeia, 11 iha kalan ida, ami nain rua mehi. Ida-idak nia mehi ho nia signifikadu keta-ketak. 12 Iha kadeia laran nee iha moos mane klosan Ebreu ida. Xefi kadeia foti nia hodi toma konta servisu hotu-hotu iha kadeia. Ami konta ami nia mehi ba nia. I nia mak siik kona. 13 Amu liurai foti fali hau ata, tau fali iha hau nia servisu ida uluk, maibee hau nia maluk nee, amu haruka tara mate tiha. Buat sira nee hotu sai tuir lo-loos ema Ebreu nee nia koalia.” 14 Rona nunee, liurai moos haruka ema baa lalais hasai José hosi kadeia. Depois José hadia-an, koi tiha nia hasarahun, troka tiha nia ropa, hodi baa hasoru liurai. 15 Nia too, liurai dehan, “José! Hau iha mehi ida. Maibee la iha ema ida mak bele siik. Mais ema hatete mai hau dehan o mak bele.” 16 José hataan, “Nai liurai, hau la hatene buat ida. So Nai Maromak deit mak bele foo sai lo-loos mehi nia signifikadu. I Nia sei hatudu duni buat diak ba amu.” 17 Entaun liurai komesa konta ona nia mehi nee dehan, “Hau hamriik hela iha mota Nil nia ibun. 18 Iha karau vaka hitu, sira nia isin bokur loos too nabilan. Sira sai hosi mota laran baa haan duut iha mota ibun. 19 Iha moos karau vaka hitu tan mak sai mai. Maibee karau sira nee mesak krekas maran deit. Hau nunka haree karau krekas hanesan nee iha rai Ejiptu. 20 Maibee hau admira teb-tebes! Tanba derepenti deit, karau krekas hitu nee, tolan tiha hotu karau bokur hitu nee. 21 Sira tolan tiha hotu, maibee karau sira nee isin krekas nafatin. Depois hau hakfodak hadeer tiha. 22 Depois hau toba fali, la kleur, hau mehi fali tan. Hau haree, hare fulin hitu ho isin nakonu sai hosi huun ida. 23 I hau haree tan hare fulin hitu maibee isin la iha i namlaik hela, tanba anin bailoro. 24 Hare fulin isin la iha sira nee tolan tiha hare fulin diak sira nee hotu. Depois hau hakfodak tiha. Hau konta tiha ona mehi nee ba ema matenek sira, maibee la iha ema ida mak bele siik.”
José siik liurai nia mehi
25 I José foo hatene dehan, “Nai liurai, mehi rua nee nia signifikadu ida deit. Nai Maromak foo sai ona ba amu liurai, saida mak Nia atu halo. 26 Mehi nee dehan nunee: karau bokur hitu nee, ho hare fulin hitu nebee isin nakonu nee, dehan katak rai sei bosu durante tinan hitu nia laran. Liu hosi mehi rua nee, Nai Maromak hatoo lia ida deit. 27 I karau krekas maran hitu nee, ho hare fulin hitu nebee isin la iha nee, dehan katak rai sei hamlaha iha tinan hitu nia laran. 28 Nunee Nai Maromak foo hatene kedas saida mak Nia atu halo, hanesan ohin hau dehan ona. 29 Ita sei hetan hahaan barak durante tinan hitu nia laran, iha rai Ejiptu tomak. 30-31 Nee liu tiha, ita hetan rai hamlaha durante tinan hitu nia laran. Rai sei hamlaha boot, too la iha tan hahaan iha rai nee. I ema hotu-hotu sei hamlaha atu-mate, too sira la hanoin tan tempu hahaan barak nee. 32 Entaun, amu liurai hetan mehi too dala rua nee, hodi hatudu katak Nai Maromak hakotu tiha ona i la kleur tan, buat nee sei sai duni. 33 Tanba nee, tuir hau nia hanoin, diak liu amu buka ema matenek ida, hodi foti nia para toma konta nasaun nee. 34 Iha tinan hitu nebee hahaan barak nee, diak liu amu moos foti funsionáriu balu tan, para aruma hahaan nee. Povu nia hahaan tenki fahe ba parte lima, parte haat bele haan, parte ida tenki entrega ba funsionáriu sira hodi rai. 35 Haruka sira halibur hahaan hosi Ejiptu tomak, rai hamutuk iha liurai nia armazén, i hein halo di-diak. 36 Nunee, bainhira rai hamlaha tinan hitu nee too, ita sei iha hahaan. Ita halo nunee, mak la iha ema ida mate hamlaha.”
Liurai foti José atu ukun rai Ejiptu
37 Rona José koalia nunee, liurai ho nia funsionáriu boot sira konkorda ho José nia ideia nee. 38 I liurai dehan, “José nee, Nai Maromak nia Espíritu mak foo podér ba nia. Nee mak la iha tan ema seluk mak matenek liu nia.” 39 Depois liurai hatete ba José dehan, “Nai Maromak foo hatene buat sira nee hotu ba o. Nunee mak o matenek, i o nia hanoin liu ema hotu-hotu. 40 Entaun, agora hau foti o sai hau nia visi. Hau nia reinu tomak sei kumpri o nia orden. So hau mesak deit mak boot liu o.” 41-42 Nunee liurai hasai nia kadeli nebee iha karimbu liurai nian, hatama ba José nia liman. I nia dehan, “Ho kadeli nee, hau foti o sai hau nia visi iha rai Ejiptu tomak.” Depois nia foo batina kapaas ida ba José hatais, ho tara korenti mean ida ba nia kakorok. 43 Nia foo moos nia kuda kareta segundu ba José sae. Iha ema halai iha kareta nia oin hodi hakilar fila-fila dehan, “Loke dalan! Foo respeitu! Iha ema boot atu liu!” Hanesan nee mak liurai foti José sai nia visi iha rai Ejiptu. 44 Liurai dehan ba José nunee, “Hau mak liurai. Maibee iha Ejiptu tomak, ema hotu-hotu la bele halo buat ida, so o foo lisensa lai.”
José ho nia kaben
45 I liurai foo naran foun ba José, Safnat-Panea, tuir ema Ejiptu nia naran. Nia moos foo kaben José ho feto ida, naran Asenat. José nia banin mane, naran Potifera. Nia mak toma konta relijiaun iha sidade On. Nunee José sai ema boot iha rai Ejiptu. 46 José komesa nia servisu nudar visi ho idadi tinan tolu-nulu. Depois nia baa haree fatin hotu-hotu iha rai Ejiptu. 47 Durante tinan hitu nia laran, toos iha rai nee tomak foo hahaan barak teb-tebes. 48 I José halibur hahaan resin nee, hodi haloot. Hahaan hosi toos besik sidade ida-idak, nia rai iha sidade nee. 49 Hahaan nebee nia haruka rai nee barak teb-tebes. Hanesan rai henek iha tasi ibun, too ema la sukat tan ona. 50 Tempu hamlaha seidauk too, José nia kaben Asenat hetan oan mane nain rua. 51 José hatete, “Nai Maromak halo hau haluha tiha terus uluk bainhira hau sai hosi hau nia aman nia uma.” Nee mak nia tau naran ba nia oan primeiru nee, naran Manases. 52 Bainhira nia hetan oan segundu, nia hatete tan, “Hau hetan terus barak ona iha fatin ida nee. Maibee Nai Maromak foo bensaun mai hau, nee duni hau hetan tan oan ida iha nee.” Nia moos tau naran ba labarik nee, Efraim. 53 Liu tiha nee, rai bosu tinan hitu nee ramata. 54 Depois rai komesa hamlaha ona, tuir lo-loos buat nebee mak uluk José koalia. Iha rai seluk ema hamlaha tiha ona, maibee iha rai Ejiptu laran tomak, hahaan sei iha. 55 Kleur-kleur, ema iha Ejiptu moos komesa hamlaha. I sira baa husu hahaan iha liurai. Liurai moos haruka sira baa iha José, para halo tuir José nia orden. 56 Tempu nee, hamlaha aumenta liu tan, too ema iha Ejiptu laran tomak hamlaha. Entaun José haruka loke armazén hotu-hotu hodi faan hahaan ba povu Ejiptu. 57 Depois ema hosi nasaun selu-seluk moos mai hola hahaan hosi José iha Ejiptu, tanba tempu nee, rai hamlaha boot.
José nia maun sira baa hola hahaan iha Ejiptu
1 Iha tempu nee, Jacó rona ema dehan, iha Ejiptu hahaan barak. Nia hatete ba nia oan sira, “Oan sira! Nusaa mak imi tuur bilaan deit nunee! 2 Hau rona dehan iha Ejiptu hahaan barak. Diak liu imi baa hola hahaan iha nebaa, para ita la bele mate hamlaha.” 3 Entaun, José nia maun nain sanulu nee hadia-an hodi baa hola hahaan iha Ejiptu. 4 Maibee Jacó la foo José nia alin Benjamim baa hamutuk ho sira. Nia tauk, keta halo be labarik nee hetan azár tan. 5 Entaun, tanba hamlaha too moos iha rai Kanaán, Jacó nia oan sira baa hola hahaan iha Ejiptu, hanesan moos ema hosi fatin selu-seluk.
José nia maun sira hakniak hodi respeita nia
6 Iha tempu nee, José sai tiha ona liurai Ejiptu nia visi. Kuandu ema mai hosi fatin-fatin atu hola hahaan, José mak faan ba sira. Nee mak bainhira José nia maun sira too, sira baa hakniak ho hakruuk too taka oin ba rai iha José nia oin. 7-8 Kuandu nia haree sira, nia konyese kedas. Maibee sira la konyese nia, tanba nia hanesan ema Ejiptu ona. José moos finji la hatene, i husu sira ho makaas dehan, “Imi mai hosi nebee?” Sira hataan, “Ami mai hosi rai Kanaán. Ami mai atu hola hahaan hosi senyór visi.” 9 I José hanoin fali nia mehi uluk. Nia moos halo tauk sira hodi dehan, “Hau la fiar! Imi nee espiaun. Imi mai buka dalan oinsaa mak bele ataka ami!” 10 Maibee sira hataan, “Lae, senyór! Ami senyór nia atan, mai atu hola hahaan deit. 11 Ami laos espiaun senyór! Ami hotu aman ida deit, i mesak ema diak.” 12 Maibee José koalia ho makaas liu tan dehan, “He! Bosok-teen! Keta lohi hau! Imi espiaun duni. Imi mai buka dalan oinsaa mak bele ataka ami!” 13 Sira defende-an dehan, “Laos, senyór! Ami senyór nia atan deit. Ami mai hosi rai Kanaán. Ami maun-alin sanulu resin rua, ami hotu aman ida. Alin ikun hela ho apaa. Alin ida tan la iha ona.”
José siak nia maun sira
14 José hataan fali, “Laos! Ohin hau dehan nee loos! Imi espiaun duni. 15 Nee duni, imi tenki hatudu prova uluk, para hau hatene imi nia koalia ohin nee, loos ka lae. Hau jura hodi liurai nia naran! Se imi nia alin ikun la mai iha nee, imi la bele sai hosi rai nee! 16 Hili ema ida atu baa bolu imi nia alin mai. Sira seluk nee hau hatama ba kadeia lai, para hau haree tok imi nia koalia nee loos ka lae. Se la loos, imi espiaun duni.” 17 I José haruka hatama sira ba kadeia loron tolu.
José nia maun sira iha kadeia
18 Too ona loron tolu, José baa koalia ho sira dehan, “Hau ema ida ke tauk Nai Maromak, i sempre moris tuir Nia hakarak. Nunee hau lakohi kastigu mate imi, maibee sei hasai imi hosi kadeia. Naran katak imi kumpri buat tuir mai nee, 19 hodi hatudu katak imi laran moos. Hau sei hatama ema ida iha kadeia. Sira seluk bele fila lori hahaan ba imi nia família. Tan sira iha hamlaha laran, i hein hela imi atu lori hahaan baa. 20 Depois imi lori imi nia alin ikun nee mai, hanesan prova katak imi hatete loos, i para hau la bele kastigu mate imi.” Rona nunee, sira moos simu. 21 Depois sira koalia ba malu dehan, “Agora ita hetan ona kastigu, tanba sala nebee ita uluk halo ba ita nia alin José. Ita haree nia terus teb-tebes, too nia husu tulun mai ita, maibee ita lakohi rona. Nee mak agora ita terus nunee.” 22 Ruben moos foo hanoin ba sira dehan, “Alin sira! Uluk hau dehan, la bele halo buat ida ba labarik nee. Maibee imi la rona. Nee mak agora José nia raan husu mai ita.” 23 Sira koalia nunee, maibee sira la hatene katak José kompriende sira nia lian. Tanba momentu José koalia ho sira, nia koalia ho lian Ejiptu i durbasa foo sai fali ho lian Ebreu. 24 Rona sira koalia nunee, José moos hamriik husik hela sira, i nia baa tanis iha fatin seluk. Bainhira nia tanis tiha hotu, nia baa fali sira. I nia haruka ema futu Simeão iha nia maun sira nia oin.
José nia maun sira fila ba Kanaán
25 Liu tiha nee, José foo orden ba nia funsionáriu sira, para tau foos ba nia maun sira nia karoon i hatama fali ida-idak nia osan ba iha nia karoon ibun. I nia haruka foo bukae ba sira haan iha dalan. Nia funsionáriu sira halo tuir. 26 Depois José nia maun sira tula foos ba sira nia kuda buru, i sira fila. 27 Kalan ona, sira deskansa. Hosi sira nee, ema ida kore nia karoon, atu foo haan nia kuda buru, derepenti nia haree nia osan iha hela karoon ibun. 28 Nia hakfodak atu-mate! Depois nia bolu nia maun sira dehan, “Imi mai haree lai nee. Ita susar ona. Sira tau fila fali hau nia osan iha hau nia karoon.”
José nia maun haree nia osan iha nia karoon
Haree nunee, sira nia fuan tuk-tuku i neon lakon tiha. Sira koalia ba malu dehan, “Nai Maromak halo saida ba ita nee?!” 29 Depois sira lao nafatin. Too iha Kanaán, sira konta ba sira nia aman buat hotu-hotu mak akontese ba sira. 30 Sira foo hatene dehan, “Apaa! Liurai Ejiptu nia visi halo demais liu. Nia koalia ho ami ho hirus deit. Nia duun ami dehan, ami baa hafuhu nia rain, nudar espiaun. 31 Maibee ami hataan dehan, ‘Lae! Ami koalia loos. Ami laos espiaun. 32 Ami mesak ema diak. Ami maun-alin sanulu resin rua. Ami hotu aman ida. Alin ida mate tiha ona, i alin ida ikun hela ho apaa iha Kanaán.’ 33 I senyór nee dehan, ‘Hau atu koko imi nia koalia nee, loos ka lae! Imi ida tenki hela iha nee. Seluk bele fila, lori hahaan baa foo ba imi nia família, para sira keta mate hamlaha. 34 Imi tenki lori lai imi nia alin ikun nee mai. So nunee, mak hau hatene katak imi laos espiaun, i imi nia koalia nee, loos duni. Depois mak foin hau hasai imi nia maun hosi kadeia. I foo lisensa ba imi bele baa nebee-nebee deit iha rai nee.’” 35 Konta tiha hotu, sira komesa kore ona sira nia karoon. I ida-idak hetan fali nia osan iha nia karoon laran! Haree osan nee, Jacó ho nia oan sira tauk atu-mate. 36 Jacó hatete ba sira, “Imi halo lakon tiha hau nia oan sira ona. José la iha tiha ona, Simeão moos hanesan. Agora imi atu lori tan Benjamim? Buat sira nee hotu halo terus deit hau.” 37 Ruben dehan, “Apaa! Entrega ona Benjamim mai hau. Hau mak toma konta nia. Hau promete, hau sei lori fila fali mai apaa. Maibee se la sai nunee, apaa bele oho hau nia oan mane rua nee.” 38 Maibee Jacó hataan, “La bele! Imi la bele lori Benjamim, tan nia maun José mate tiha ona. Agora hela nia mesak hosi nia inan nia oan sira. Se nia hetan azár iha dalan, imi sei halo hau terus liu tan, ho laran susar too mate.”
José nia maun sira fila fali ba Ejiptu, ho sira nia alin Benjamim
1 Iha tempu nee, rai hamlaha iha rai Kanaán aumenta liu tan. 2 Hahaan nebee Jacó nia oan sira hola hosi Ejiptu nee, sira haan hotu ona. Entaun Jacó hatete ba sira dehan, “Oan sira! Diak liu imi fila fali ba Ejiptu, hola hahaan ba ita.” 3 Maibee Judá hataan, “Apaa! Liurai Ejiptu nia visi foo hatene tiha ona ba ami dehan, ami la bele hatudu tan ami nia oin ba nia, se ami la lori ami nia alin ikun. 4 Nunee apaa tenki husik alin Benjamim baa ho ami, foin ami bele baa hola hahaan ba apaa. 5 Se apaa la foo Benjamim baa ho ami, ami lakohi baa. Tanba ema Ejiptu nee dehan tiha ona nunee.” 6 I Jacó hirus sira dehan, “Nusaa mak imi hatete ba ema nee katak, imi sei iha alin ida tan?! Imi halo susar deit hau.” 7 I sira hamaus nia dehan, “Apaa! Ema nee husu beibeik, atu hatene ita ho ita nia família sira hotu. Nia husu nunee, ‘Nusaa? Imi nia aman sei moris ka? Imi sei iha alin mane seluk tan ka?’ Hotu, ami atu dehan saida?! Ami tenki koalia lo-loos deit ona. See mak hatene dehan nia atu haruka ami lori ami nia alin baa iha nebaa?” 8-9 Judá moos hatutan tan dehan, “Apaa! Husik labarik nee baa ho ami. Se iha buat ruma ho nia, hau mak simu todan. Se hau la lori nia moris fila mai apaa, apaa bele foo sala nee mai hau too mate. Entaun, apaa foo labarik nee mai ona, tanba ami tenki baa lalais ona. Se lae, ita balu mate hamlaha. 10 Se ami la hein kleur hanesan nee, ami fila tiha dala rua ona.” 11 I sira nia aman hataan, “Se nunee, imi halo hanesan nee deit. Lori ita nia riku rai nian hanesan: bani been, temperus, ai been morin, ai-moruk pomada, kiar ho fore oi-oin. Hodi baa foo ba liurai nia visi nee, dehan, ‘Nee, hanesan ami nia prezenti ba ita boot.’ 12 Imi moos lori osan hodi hola hahaan, ho tan osan nebee uluk imi hetan iha imi nia karoon laran nee hodi baa foo fali. Karik sira tau sala. 13 Imi lori ho imi nia alin. Maibee tenki lori fila mai lalais! 14 Hau harohan ba Nai Maromak mak forsa teb-tebes, para halo liurai Ejiptu nia visi nee bele hadomi imi. Para nia bele foo fila Benjamim ho Simeão mai hamutuk ho imi. Maibee, se hau nia oan sira tenki lakon, biar hau lori nafatin terus nee.” 15 Depois sira lori prezenti ho osan, baa ona Ejiptu. Sira lori moos Benjamim. Too iha nebaa, sira aprezenta-an ba José. 16 Bainhira José haree Benjamim ho nia maun sira, nia hatete ba nia ema nebee toma konta nia uma dehan, “Lori sira ba iha hau nia uma! Oho animál ida, i tein halo di-diak, tanba orsida sira haan meiudia ho hau.” 17 I nia ema nee halo tuir, nia moos lori sira ba iha José nia uma. 18 Bainhira sira lao ba José nia uma, sira tauk atu-mate. Iha dalan klaran sira koalia ba malu dehan, “Tanba saa mak nia haruka lori ita mai iha nee? Keta halo nia atu halo terus ita, tanba uluk sira tau fali osan iha ita nia karoon laran. Sira finji lori ita mai iha nee, para hodi kaer ita, halo ita sai nia atan, i hadau hotu ita nia kuda buru sira nee.” 19 Nee mak sira besik ona José nia uma, sira koalia ba José nia ema nee dehan, 20 “Senyór! Ami husu deskulpa. Tanba uluk ami mai hola hahaan iha nee. 21-22 Bainhira ami fila ba ami nia rain, ami kalan deskansa iha dalan. Depois ami kore naha para hodi foo haan kuda. I ami haree fali ida-idak nia osan hodi hola hare nee, iha hela karoon laran. Ami la hatene see mak tau! Maibee agora ami lori fali osan nee mai hotu. Ami moos lori ho osan hodi hola tan hahaan. Tanba nee, senyór keta hirus.” 23 I José nia ema nee hataan, “Imi kalma tiha! Lalikan tauk! Karik imi nia Maromak mak foo bensaun ba imi iha imi nia karoon laran. Iha loron nebaa hau simu duni imi nia osan. Entaun imi la iha deve iha nee.” Nia moos hasai Simeão lori ba sira. 24 Depois sira hotu tama ba iha José nia uma. I José nia ema nee tau bee ba sira hodi fasi sira nia ain. Nia moos foo haan ba sira nia kuda buru. 25 I nia foo hatene dehan, “Orsida imi haan meiudia ho xefi.” Nunee sira moos prepara kedan sira nia prezenti. 26 José too iha uma, sira hotu tau ain tuur ba rai i hakruuk iha José nia oin. Depois sira moos foo sira nia prezenti ba nia. 27 I José husu ba sira, “Oinsaa? Imi hotu diak ka lae? Uluk imi dehan imi nia aman katuas ona. Nia oinsaa? Nia sei moris hela ka?” 28 Sira hataan, “Ita boot nia atan, ami nia aman, diak hela.” Sira moos hakruuk dala ida tan hodi hatudu respeitu ba nia. 29 Depois José foti matan, i haree nia alin Benjamim. Sira nain rua, aman ida, inan ida. Nia dehan, “Nee mak imi nia alin ikun uluk imi konta nee ka?” I nia hatete ba Benjamim, “Oan! Hau harohan ba Nai Maromak para Nia haraik bensaun barak ba o.” 30 Haree tiha Benjamim, José hanoin teb-tebes, too nia atu tanis deit ona. Nia moos sai lalais husik hela sira, baa iha nia kuartu. I nia tanis iha nebaa. 31 Tanis tiha hotu, nia baa fasi tiha nia oin. Nia halo kontenti nia laran, i nia sai baa hasoru fali sira. Nia haruka nia ema sira tau meza. 32 I sira tau meza ida ba José hodi haan mesak. Nia maun-alin sira haan iha meza seluk. Nia funsionáriu ema Ejiptu sira moos haan iha sira nia meza ketak, tanba ema Ejiptu hakribit haan hamutuk ho ema Ebreu. 33 José nia ema sira prepara ona meza ba José nia maun-alin sira tuur hateke oin ba José. Nia tau sira tuur tuir ida-idak nia tinan, komesa hosi maun boot too alin ikun. Haree nunee, sira moos admira. 34 I José haruka nia ema sira foti hahaan hosi nia meza rasik tau ba iha nia maun-alin sira nia meza. Sira hotu simu hahaan hanesan, maibee Benjamim simu barak liu dala lima. I sira hotu haan-hemu too bosu di-diak.
José nia kopu osan mutin lakon
1 Sira haan tiha hotu, José foo orden ba nia ema nebee toma konta iha uma nee dehan, “O enxe hare ba ema sira nee nia karoon halo nakonu. Tau fali sira nia osan ba ida-idak nia karoon ibun. 2 I o foti hau nia kopu osan mutin, tau iha sira nia alin ikun nia karoon.” Nia moos halo tuir José nia orden nee. 3 Iha aban dadeer-saan nakukun, José husik sira tula hahaan ba sira nia kuda buru, hodi fila ba sira nia rain. 4 Sira sai seidauk dook hosi sidade, José dehan ba nia ema nee, “O duni ema sira nee lalais. Kuandu o toman sira, o dehan nunee: ‘Nusaa mak imi nia laran aat ba senyór visi nunee? Nia halo diak ba imi, nusaa mak imi selu fali ho aat? 5 Nusaa mak imi bele naok fali hau nia xefi nia kopu osan mutin? Nee laos xefi nia kopu hodi hemu deit! Maibee nia uza moos hodi buka hatene ema nia destinu. Imi nia hahalok nee aat duni.’” Ema hetan kopu osan mutin iha Benjamim nia karoon 6 Entaun José nia ema nee baa duni tuir kedan sira too toman. Nia moos hatete ba sira tuir José nia liafuan ohin. 7 I sira hataan, “La iha, senyór! Ami nunka halo buat aat ida nee! Senyór koalia saida mak nee? 8 Ita boot rasik hatene, osan sira uluk iha ami nia karoon, ami foo fila fali ba ita ona. Nunee, halo nusaa mak ami bele naok fali xefi nia osan mean ho osan mutin iha nia uma?! 9 Senyór revista deit ba! Hetan iha see nia karoon, kastigu mate nia! I halo ami seluk sai xefi nia atan deit.” 10 Maibee José nia ema nee dehan, “Laos! Nunee deit. Se hetan kopu iha ema nebee, nia mak sai hau nia atan, sira seluk bele fila.” 11 Sira moos hatuun lalais sira nia karoon, hodi kore kedan. 12 I José nia ema nee revista di-diak sira nia karoon ida-idak, komesa hosi maun boot nia karoon too iha alin ikun. Nia hetan kopu osan mutin nee iha Benjamim nia karoon. 13 Haree nunee, Benjamim nia maun sira laran dodok tebes. I sira tula fali naha ba kuda, hodi fila fali ba sidade. 14 Kuandu sira too iha José nia uma, nia sei iha hela nebaa. Sira hakniak iha José nia oin. 15 I José hakilar sira, “He! Nusaa mak imi halo fali nunee mai hau?! Imi la hatene katak ema boot hanesan hau, iha kbiit bele siik see mak halo aat hau?” 16 I Judá hataan, “Agora Nai Maromak foo sai ona ami nia sala. Ami atu defende-an oinsaa tan? Se ita boot atu kaer ami nia alin nee, diak liu senyór kaer ami hotu. Halo ami hotu sai senyór nia atan deit.” 17 Maibee José hataan, “Laos nunee! Hetan kopu nee iha see, nia deit mak sai hau nia atan! Imi sira seluk bele fila ba imi nia aman deit!”
Judá husu atu troka Benjamim
18 Depois Judá baa besik José, hodi dehan, “Senyór visi! Hau hatene ita boot nia podér hanesan ho liurai. Nunee keta hirus lai hau. Hau husu lisensa atu koalia uitoan ho ita boot. 19 Uluk ita husu ba ami dehan, ‘Imi sei iha aman ho alin tan ka?’
Judá baa besik José
20 Ami hataan, ‘Ami nia aman katuas ona, i ami iha tan alin ikun ida. Apaa hetan nia, apaa katuas tiha ona. Alin ikun nee iha maun ida, maibee nia la iha tiha ona. Sira nain rua nia inan moos mate tiha ona. Agora, hela alin ikun nee deit. I ami nia aman hadomi loos nia.’ 21 Maibee senyór haruka ami lori nia mai, atu ita boot haree. 22 I ami hataan dehan, ‘Labarik nee nunka husik nia aman. Se nia sai hosi nia aman nia sorin, ami nia aman bele mate.’ 23 Depois senyór hataan dehan, ‘Se imi la lori imi nia alin nee mai, imi la bele haree tan hau nia oin!’ 24 Nunee ami moos fila. Too iha apaa, ami foo hatene hotu ita boot nia liafuan nee. 25 Kleur-kleur, ami nia hahaan moos hotu. I apaa haruka ami mai fali iha Ejiptu hola tan hahaan. 26 Maibee ami hataan nunee, ‘Apaa! Ami la bele baa tan nebaa. Tanba liurai nia visi hatete ona, se ami la lori ami nia alin ikun baa, ami la bele haree tan nia oin. Nunee ami nia alin ikun nee tenki akompanya ami, foin ami bele lao.’ 27 Ami nia aman dehan, ‘Imi hatene hau nia kaben Rakél, nia oan rua deit. 28 Oan primeiru la iha tiha ona. Animál siak haan tiha ona karik, tanba too agora hau la haree tan nia. 29 Se imi hasai tan labarik nee hosi hau, i depois nia hetan azár, imi aumenta tan susar mai hau katuas nee, too hau mate.’ 30-31 Nee mak senyór visi, se hau fila ba apaa i la lori alin ikun nee, apaa bele mate mak nee. Tan nia klamar iha deit labarik nee, i nia moos katuas liu ona. 32 Hau moos promete tiha ona ba apaa katak, hau mak foo garantia ba labarik nee. Hau dehan, se hau la lori fali labarik nee ba nia, hau mak sei lori sala nee too mate. 33 Nee duni, senyór, hau husu nunee deit: Biar hau mak hela fali iha labarik nee nia fatin, hau deit mak sai ita boot nia atan. Husik nia fila baa ho nia maun sira. 34 Se labarik nee la fila, hau moos la fila. Tanba hau la aguenta haree apaa nia terus too mate.”
José foo sai nia aan, i husu nia aman sira muda ba Ejiptu
1 Rona nunee, José nia laran dodok too nia la aguenta tan iha nia funsionáriu sira nia oin. Nee mak nia haruka sira sai tiha, para nia hela mesak ho nia maun-alin sira hodi foo sai nia nee, see. 2 Funsionáriu sira hotu sai tiha, José moos tanis hakilar. Too ema Ejiptu sira iha liur rona. I ema sira iha liurai nia uma moos rona. 3 I José foo sai ba nia maun-alin sira dehan, “Hau José, imi nia alin! Apaa sei moris ka?” Rona nunee, nia maun-alin sira tauk atu-mate too sira la koalia liafuan ida. 4 Depois José bolu sira mai besik. I sira moos baa besik nia. Nia koalia tan dehan, “Hau mak José, ida nebee uluk imi faan tiha ba ema Ejiptu. 5 Maibee imi keta tauk, i la bele foo sala ba imi nia aan. Tanba Nai Maromak mak lori hau uluk mai iha nee. Ho nunee, Nia uza hau para bele salva ema barak hosi hamlaha nia laran. 6 Agora rai hamlaha foin tinan rua, sei hela tinan lima tan. Iha tempu naruk nee, ema la fila rai, la kuda rai, i la hetan hahaan. 7 Nai Maromak lori hau mai uluk, para hau bele tau matan ba imi, i imi nia jerasaun sira bele hetan moris. 8 Hau mai too iha nee, laos tanba imi. Maibee nee Nai Maromak nia servisu. Nia mak foti hau sai liurai nia visi. Hau moos sai xefi iha liurai nia palásiu. La iha tan ida ke boot liu hau. 9 Agora, imi fila lalais ona, hodi foo sai ba apaa dehan nia oan José sei moris hela. I hatoo hau nia lia tatoli nunee: ‘Apaa nia oan sai ona ema boot iha rai Ejiptu, i nia husu apaa atu baa lalais iha nebaa. 10 Apaa bele hela iha rai Gosen besik ho José. Fatin nee diak i luan. Nunee apaa bele hakiak apaa nia bibi, bibi malae ho karau vaka hotu. I nia husu moos apaa baa ho apaa nia oan ho bei oan sira, ho família iha uma laran tomak, ho riku-soin hotu, atu hela metin iha nebaa. 11 Se apaa hela iha Gosen, nia bele tau matan ba apaa iha nebaa. Tanba rai hamlaha sei tinan lima tan, i José lakohi para apaa ho apaa nia família sira kiak too rabat rai.’” 12 José hatoo tiha nia lia menon, nia dehan tan, “Agora imi haree rasik ba. Alin Benjamim moos bele haree katak hau mak José duni. 13 Nunee imi baa foo hatene ba ita nia apaa dehan, hau nia knaar iha Ejiptu boot teb-tebes. Imi moos tenki konta buat hotu-hotu nebee mak imi haree ona. Depois imi lori apaa mai lalais ona iha nee!” 14 Depois nia hakuak nia alin Benjamim, i sira nain rua tanis. 15 Nia moos tanis hodi rei nia maun sira ida-idak. Liu tiha nee, foin sira komesa koalia ho nia.
Liurai Ejiptu simu José nia maun-alin sira
16 Kuandu liurai ho nia funsionáriu sira rona dehan José nia maun-alin sira mai, sira hotu kontenti. 17 Depois liurai hatete ba José dehan, “Foo hatene ba o nia maun-alin sira, para sira tula hahaan iha sira nia kuda buru, hodi fila ba Kanaán. 18 I hatete ba sira, para sira lori o nia aman ho o nia família hotu, muda ona mai iha nee. Depois hau foo rai diak liu iha Ejiptu ba sira, para sira bele moris iha nebaa i haan hahaan hosi rai nee. 19 Hatete moos ba sira, para sira lori kuda kareta boot balu hosi nee, hodi tula feto ho labarik oan sira ho moos o nia aman. 20 Keta hanoin riku-soin nebee mak lori la diak, tanba buat diak hotu iha Ejiptu, sei sai sira nian hotu.” 21 Rona nunee, sira moos halo tuir liurai nia orden. José foo kuda kareta boot ho bukae ba sira. 22 José moos foo ropa foun pár ida ba sira ida-idak. Maibee nia foo ba Benjamim osan mutin atus tolu, ho ropa foun pár lima. 23 José haruka moos sasaan nebee diak liu iha Ejiptu ba nia aman, tula iha kuda buru sanulu. Nia aumenta tan foos, paun, ho hahaan oi-oin, tula iha kuda buru sanulu tan, para sira nia bukae hodi fila mai Ejiptu. 24 Tuir mai nia haruka sira fila ona, i nia foo hanoin ba sira dehan, “Imi la bele istori malu iha dalan!”
Jacó rona José sei moris
25 Depois sira fila ona ba sira nia aman iha Kanaán. 26 Too iha nebaa, sira konta ba sira nia aman dehan, “Apaa! Apaa nia oan José sei moris hela. Nia sai ona ema boot, ukun rai Ejiptu tomak.” Jacó rona nunee, nia sai bilaan tiha, i nia la fiar sira nia koalia nee. 27 Sira foo sai tiha hotu José nia lia tatoli, i nia haree rasik kuda kareta nebee José haruka baa hodi tula sira, foin nia fiar. 28 Nia dehan, “Hau nia oan José sei moris duni! Hau tenki baa haree lai nia, foin hau bele mate ho hakmatek.”
Jacó ho nia família sira sai atu baa Ejiptu
1 Nunee Jacó haloot nia sasaan hotu, atu baa ona Ejiptu, i sira husik hela rai Kanaán. Too iha aldeia Berseba, nia oho animál hodi halo sakrifísiu ba Nai Maromak, ida nebee nia aman Isac adora hori uluk liu.
Sira sai husik hela Kanaán
2 Iha kalan nee, nia mehi, iha mehi nee nia rona Nai Maromak bolu dehan, “Jacó! Jacó! O hadeer lai hodi rona!” Nia hataan, “Nai!” 3 I Nai Maromak dehan, “Hau nee Nai Maromak, ida nebee o nia aman adora kedas hori uluk. O keta tauk baa iha Ejiptu. Tanba Hau sei halo o nia jerasaun sai nasaun boot ida iha nebaa. 4 Hau sei akompanya o ba iha Ejiptu. I Hau sei lori o nia jerasaun fila fali ba Kanaán. I kuandu o atu mate, o nia oan José sei hamriik iha o nia sorin.” 5 Jacó ho nia oan sira, husik hela aldeia Berseba nee. Sira tula Jacó, ho sira nia kaben ho oan sira, ba kuda kareta nebee liurai Ejiptu haruka baa nee. 6-7 I sira lori sira nia riku ho sira nia animál hotu, nebee sira hetan iha rai Kanaán. Jacó ho nia oan mane, ho nia oan feto, ho nia bei-oan sira hotu, lao ona ba Ejiptu.
Lista Jacó nia família nebee baa Ejiptu
8 Jacó nia família nebee baa iha Ejiptu mak nee: Ruben, oan primeiru. 9 Ruben nia oan sira mak nee: Henok, Palu, Hesron ho Karmi. 10 Simeão, ho nia oan sira mak nee: Jemuel, Jamin, Oad, Jakin, Soar. Iha moos oan ida naran Saul, hosi nia kaben ema Kanaán. 11 Levi, ho nia oan sira mak nee: Gerson, Keat, ho Merari. 12 Judá, ho nia oan sira mak nee: Sela, Peres ho Zera. Judá nia oan seluk naran Er ho Onan mate tiha ona iha Kanaán. Nia moos lori Peres nia oan sira, Hesron ho Hamul. 13 Isakar ho nia oan sira mak nee: Tola, Puva, Job ho Simeron. 14 Zebulón ho nia oan sira: Sered, Elon, ho Jaliel. 15 Sira hotu nee Jacó ho nia kaben Lea nia oan, nebee moris iha Mezopotámia. Sira nain rua moos iha oan feto ida naran Diná. Nunee Jacó ho Lea nia jerasaun hamutuk ema nain tolu-nulu resin tolu. 16 Depois Jacó sei iha moos oan hosi nia kaben seluk, mak nee: Gade ho nia oan sira: Sifion, Hagi, Suni, Esbon, Eri, Arodi ho Areli. 17 Asér, ho nia oan sira mak nee: Jimna, Jisva, Jisvi, Beria, ho nia alin feto Sera. Iha moos Beria nia oan: Heber ho Malkiel. 18 Sira nee hotu, ema sanulu resin neen. Nee mak Jacó ho nia kaben Zilpa nia oan ho bei-oan. Zilpa nee Jacó nia kaben boot Lea nia atan, nebee Lea nia aman Labão foo ba nia. 19 Depois Jacó iha tan kaben seluk, naran Rakél. Nia oan rua, José ho Benjamim. 20 Tempu nee, José kaben tiha ona ho Asenat iha Ejiptu. Nia banin mane, xefi relijiaun iha sidade On, nia naran Potifera. I José ho Asenat nia oan mak Efraim ho Manases. 21 Benjamim moos baa iha Ejiptu ho nia oan sira, mak nee: Bela, Beker, Asbel, Gera, Naaman, Ei, Ros, Mupim, Hupim, ho Arde. 22 Jacó ho nia kaben Rakél sira nia jerasaun, hamutuk ema sanulu resin haat. 23 Iha tan Jacó nia kaben seluk, naran Bila. Sira nia oan mak Dan ho Naftali. Dan nia oan, naran Husim. 24 Naftali nia oan sira mak Jasiel, Guni, Jeser ho Silem. 25 Jacó ho nia kaben Bila nia jerasaun, hamutuk ema nain hitu. Bila nee Rakél nia atan, nebee nia aman Labão foo ba nia. 26 Nunee, Jacó nia jerasaun hotu mak baa iha Ejiptu hamutuk ema neen-nulu resin neen. Seidauk sura nia mane foun ho feto foun sira. 27 Aumenta tan José nia oan rua nebee moris iha Ejiptu. Nunee Jacó ho nia família nebee hela iha Ejiptu, hamutuk ema nain hitu-nulu.
Jacó hasoru malu fali ho nia oan José
28 Bainhira sira besik too ona iha Ejiptu, Jacó haruka nia oan Judá baa uluk, foo hatene ba José, para José mai hasoru nia aman iha Gosen. Kuandu sira too iha Gosen, 29 José moos prepara nia kuda kareta, hodi baa hasoru nia aman iha nebaa. Bainhira sira hasoru malu, José hakuak nia aman hodi tanis kleur teb-tebes.
José hasoru nia aman Jacó
30 I Jacó dehan ba José, “Oan José! Agora hau rasik hetan ona o, i hau hatene o sei moris. Nee mak se hau mate agora moos, la buat ida.” 31 Depois José hatete ba nia maun-alin sira hotu dehan, “Hau tenki baa foo hatene ba liurai katak, hau nia família sira mai ona hosi Kanaán. 32 I hau sei foo hatene dehan imi nia moris mak hakiak bibi ho karau. I imi moos lori imi nia animál barak ho imi nia riku-soin hotu hosi Kanaán. 33 Se liurai bolu imi, i nia husu imi nia servisu saida, 34 imi hataan ba nia dehan, imi hotu hakiak animál dezde kiik, hanesan imi nia bei-ala sira. Nunee nia sei haruka imi hela iha rai Gosen.” José foo sai nunee, tanba ema Ejiptu habribit, atu moris hamutuk ho ema mak hakiak animál.
Liurai foo rai ba José nia família
1-2 Depois José ho nia maun nain lima baa hasoru liurai. José hateten dehan, “Amu liurai! Hau nia aman ho hau nia maun-alin sira mai ona hosi rai Kanaán. Sira mai ho sira nia bibi, sira nia bibi malae, sira nia karau vaka, ho sira nia sasaan hotu-hotu. Agora sira iha ona rai Gosen.”
José koalia ho liurai Ejiptu
3 I liurai husu, “Imi nia servisu saida?” Sira hataan ba liurai dehan, “Ami karau atan ho bibi atan, hanesan ami nia bei-ala sira. 4 Agora iha rai Kanaán hamlaha boot. Udan la iha, too duut moos la iha ba ami nia bibi ho karau haan. Nee mak ami mai atu hela iha rai Ejiptu. Ami moos lori ho ami nia animál sira. Agora ami husu lisensa ba amu liurai, para ami hela iha rai Gosen, hodi hakiak ami nia animál iha nebaa.” 5 I liurai foo sai nia hakarak ba José dehan, “Agora o nia aman ho o nia maun-alin sira iha nee. 6 Sira bele halo rai Ejiptu nee hanesan sira nia rain rasik. Rai Gosen mak rai diak liu iha Ejiptu tomak. Nunee diak liu sira hela iha nebaa deit ona. I se iha sira balu mak hein animál diak, sira moos bele hein ho hau nian iha nebaa.” 7 Tuir mai, José aprezenta nia aman ba liurai. Jacó moos harohan ba Nai Maromak para foo bensaun ba liurai nee. 8 I liurai husu ba Jacó, “Ita tinan hira ona?”
José ho nia aman koalia ho liurai
9 Jacó hataan, “Hau lao baa-mai iha mundu nee durante tinan atus ida tolu-nulu ona, i hau nia vida nakonu ho terus. Se kompara ho hau nia bei-ala sira, hau nia tinan badak liu.” 10 Jacó sei husu tan ba Nai Maromak para foo bensaun ba liurai, mak foin husu lisensa hodi sai. 11 Depois José halo tuir liurai nia koalia. I nia hutudu fatin diak teb-tebes ba sira iha rai Gosen. Iha fatin nee mak José nia aman ho nia maun-alin sira hela ba. (Fatin nee, ikus mai, ema tau naran “Rameses”.) 12 I José moos foo hahaan ba nia aman, ba nia maun-alin sira, ho sira nia kaben ho oan sira hotu.
Rai hamlaha iha Ejiptu
13 Iha tempu nee, rai hamlaha boot, too iha nebee-nebee la iha tan hahaan ona. Hosi Ejiptu too Kanaán ema isin krekas ho fraku hotu. Sira la bele halo tan buat ida, tanba sira hamlaha atu-mate. 14 Ema mai hosi fatin hotu-hotu iha Ejiptu ho fatin hotu-hotu hosi Kanaán, mai hola hahaan iha José. Osan nebee nia simu, hodi baa rai hotu iha liurai nia uma. 15 Too ema Ejiptu ho ema Kanaán sira nia osan moos hotu ona. Entaun sira baa hasoru José, hodi husu, “Senyór visi! Foo hahaan mai ami lai, para ami keta mate hamlaha. Tanba ami nia osan hotu ona.” 16 I José hataan, “Se imi nia osan la iha tan ona, entaun halo nunee deit: imi foo imi nia animál, hau troka ho hahaan.” 17 Entaun tinan nee sira lori sira nia animál ba José, hodi troka hahaan. Hanesan sira nia kuda, bibi malae, bibi, karau ho sira nia kuda buru. 18 Liu tiha tinan ida, sira baa hasoru tan José dehan, “Senyór visi! Ami koalia loos deit. Ami nia osan ho ami nia animál, ita boot troka tiha hotu ona. Agora ami la iha tan buat ida ona. Hela deit ami nia isin lolon ho ami nia rai deit. 19 Keta husik ami mate. Se ami mate, see mak haree rai sira nee? Diak liu senyór visi halo ami sai liurai nia atan. I senyór hola hotu ami nia rai ba liurai nian. Ita boot foo fini para ami kuda ba ita. Kona ba ami nia kole ho ami nia rai, senyór lalikan selu, foo mak hahaan deit. Naran katak ami keta mate hamlaha.” 20 Tanba rai hamlaha boot, maka ema Ejiptu sira faan hotu sira nia rai. Nunee José hola hotu rai iha Ejiptu, foo ba liurai. 21 Nunee moos ema hotu iha Ejiptu tomak sai liurai nia atan. 22 So xefi relijiaun sira nia rai deit mak José la hola, tanba liurai foo nafatin hahaan ba sira. Nee mak sira la presiza faan sira nia rai. 23 Tempu nee, José moos hatete ba povu, “Agora imi hotu sai ona liurai nia atan. I imi nia rai hau hola hotu ona, foo ba liurai. Nee duni imi lori fini nee baa kuda. 24 Kuandu foo ona isin, imi fahe ba parte lima. Parte ida foo ba liurai. Sei hela parte haat, balu imi uza ba fini, balu imi nia família haan.” 25 Sira hataan, “Ita boot foo moris ona ba ami, tanba nee ami foo obrigadu. Ami sai amu liurai nia atan deit.” 26 Depois José halo lei hanesan tuir mai. Hare nebee povu koa, sira tenki fahe ba parte lima. Parte ida sira tenki foo ba liurai. Parte haat sira bele uza ba sira nia aan rasik. Lei nee halao nafatin. So xefi relijiaun sira deit mak la tuir, tanba liurai la hola sira nia rai.
José promete atu hakoi Jacó iha nia bei-ala sira nia rate
27 Komesa iha tempu nee, ema Israel sira hela nafatin iha Ejiptu iha rai Gosen. Sira sai ema riku, i sira nia jerasaun moos aumenta barak. 28 Jacó sei moris tan tinan sanulu resin hitu iha Ejiptu, too nia tinan hamutuk atus ida haat-nulu resin hitu. 29 Kuandu nia besik atu mate, nia bolu José hodi hatete, “Oan Azé! Se o hadomi tebes hau, o jura para o la bele hakoi hau iha rai Ejiptu nee. 30 O tenki lori fila hau nia mate isin ba hakoi iha ita nia bei-ala sira nia rate. Ida nee mak apaa husu.” José hataan, “Diak, apaa! Se apaa hakarak nunee, hau sei halo tuir duni.” 31 I Jacó koalia tan, “Se nunee, agora o jura lai katak, o sei tuir apaa nia hakarak.” Entaun José moos jura. Depois Jacó hakniak tiha iha kama leten hodi halo orasaun foo obrigadu ba Nai Maromak.
Jacó husu Nai Maromak foo bensaun ba José nia oan sira
1 La kleur tan, ema mai foo hatene ba José katak nia aman moras todan. Nunee nia lori nia oan nain rua, Manases ho Efraim, baa haree sira nia avoo Jacó. 2 Bainhira Jacó rona José sira mai ona, nia hakaas-an tuur tiha. 3 Jacó hatete ba José dehan, “Oan Azé! Nai Maromak, ida forsa teb-tebes nee, uluk hatudu-An mai hau iha aldeia Lus iha rai Kanaán. Iha nebaa, Nia promete mai hau, 4 dehan, ‘Hau sei foo ba o, jerasaun bara-barak, i sira sei sai nasaun barak. Hau moos sei foo rai ida nee ba o nia jerasaun sira, para sai sira nian too mundu nee ramata.’” 5 I Jacó hatutan tan, “O nia oan Efraim ho Manases nee moris iha Ejiptu antes hau mai iha nee. Agora hau foti sira nain rua sai hau nia oan rasik. Nunee, bainhira hau mate, sira moos simu hau nia rai ho riku-soin, hanesan Ruben ho Simeão. 6 Maibee se o iha oan tan, nee o nian ona. Hau la foti tan sira hanesan hau nia oan. Nunee, kona ba sira nia riku-soin, sira simu deit hosi sira nia maun Efraim ho Manases. 7 Hau halo nunee, hodi hanoin o nia inan Rakél. Kuandu ita fila hosi Mezopotámia ba Kanaán, o nia inan mate iha dalan klaran besik aldeia Efrata iha rai Kanaán. Loron nee, hau nia laran tristi teb-tebes! Hau hakoi nia iha dalan ibun atu tama ba aldeia Efrata.” (Aldeia nee agora, sira tau naran Belém.) 8 Jacó koalia tiha hotu, nia foti oin, haree José nia oan sira. I nia husu ba José, “Sira nee see?” 9 José hataan, “Nee hau nia oan, nebee Nai Maromak foo mai hau iha Ejiptu nee.” I Jacó dehan, “O lori sira mai besik hau, para hau halo orasaun husu Nai Maromak foo bensaun ba sira.” 10 Jacó katuas ona, nia matan moos malahuk ona, i nia haree laduun moos ona. José lori nia oan sira baa besik Jacó, i Jacó hakuak ho rei sira. 11 Nia hatete ba José, “Durante nee, hau hanoin, hau la hasoru tan o ona. Maibee agora, Nai Maromak halo liu tan, too hau moos sei bele haree o nia oan sira.” 12 Depois José dada tiha nia oan rua nee hosi Jacó nia hiti, i nia moos hakniak i hakruuk too rai iha Jacó nia oin. 13 Nia hamriik fali, i nia tau nia oan sira hamriik besik ba nia aman. Nia tau nia oan boot, Manases, iha Jacó nia liman loos, i nia oan segundu, Efraim, iha Jacó nia liman karuk. 14 Maibee, bainhira Jacó atu tau liman hodi husu bensaun ba sira nain rua, Jacó muda tiha nia liman loos tau fali ba alin Efraim nia ulun, i nia tau nia liman karuk ba maun Manases nia ulun. 15 Depois nia halo orasaun ba Nai Maromak para foo bensaun ba José dehan, “Hau nia avoo Abraão, ho hau nia aman Isac sempre moris tuir Nai Maromak nia hakarak. Nai Maromak moos sempre kuidadu hau dezde kiik too agora. 16 I Nia hasai ona hau hosi perigu hotu. Agora hau moos husu ba Nai Maromak foo bensaun ba labarik sira nee. Nunee ema la bele haluha temi avoo Abraão, aman Isac ho hau nia naran. Hau moos husu para labarik sira nee nia jerasaun aumenta barak, too sai nasaun boot iha mundu.” 17 Maibee, kuandu José haree nia aman tau fali nia liman loos iha alin Efraim nia ulun, nia la gosta. Nunee José kaer tiha nia aman nia liman atu foti baa tau fali iha maun Manases nia ulun. 18 Nia hatete ba nia aman, “Apaa! Keta halo nunee, tanba nia mak alin. Nia laos oan primeiru. Apaa tenki tau liman loos ba Manases nia ulun, tanba nee oan primeiru nia direitu.” 19 Maibee nia aman Jacó lakohi. Nia dehan, “José, hau hatene! Manases sei iha podér boot duni, i nia jerasaun sei aumenta barak too sai nasaun boot ida. Maibee nia alin Efraim sei iha podér boot liu nia maun, i nia jerasaun moos sei barak liu too sai nasaun boot barak.” 20 Depois nia hatete ba oan rua nee dehan, “Kuandu ema Israel husu Nai Maromak foo bensaun ba ema, sira sei temi moos imi nain rua nia naran. Sira sei husu nunee: ‘Nai Maromak foo bensaun ba o, hanesan uluk Nia foo bensaun ba Efraim ho Manases.’” Nunee Jacó temi alin Efraim nia naran uluk, mak foin temi nia maun Manases. 21 Tuir mai, Jacó dehan ba José, “Oan! La kleur tan, hau mate ona. Maibee Nai Maromak sei tulun imi. Nia moos sei lori imi fila fali ba imi nia bei-ala sira nia rain. 22 Agora, hau foo ba o foho iha rai Kanaán nebee uluk hau hadau hosi ema Amori, bainhira hau funu ho sira. Rai nebee hau foo ba o nee, luan liu duké hau foo ba o nia maun sira.”
Jacó foo nia lia menon ba nia oan ida-idak
1 Tuir mai, Jacó haruka bolu nia oan sira hotu. Nia hatete nunee, “Oan sira! Imi hotu mai besik iha hau nia sorin. Hau atu foo hatene ba imi, ida-idak nia moris iha loron aban-bainrua.” 2 I Jacó komesa foo hatene kedas ba nia oan sira dehan, “Imi mai hamriik haleu hau. Rona imi nia aman Israel nia koalia. 3 Ruben! O mak hau nia oan mane boot! O hau nia ai tonka ho hau nia liman loos. Ema respeita liu mak o. 4 Maibee o nia laran fasil nakdoko, la hatene saida mak o hakarak, hanesan laloran tasi baku baa baku mai. Uluk o baa toba hamutuk halo sala fali ho hau nia kaben Bila. O halo foer o nia aman nia toba fatin. Nee mak o nia direitu hanesan oan boot lakon kedas. 5 Simeão ho Leví! Imi nain rua hanesan! Imi sempre kaer kroat, atu halo terus ema. 6 Imi gosta mak tesi karau nia ain uat halo kotu, too karau hoku hela iha fatin. I imi nia aat ida tan mak nee: kuandu imi hirus ema, imi tenki oho. Nee mak hau lakohi rona imi nia koalia. Hau moos lakohi mete ho imi nia problema. 7 Nee duni, agora, hau foo malisan ba imi nia hahalok aat sira nee, tan demais liu ona! Ho tan imi nia hirus, nebee la iha hadomi uitoan ba ema. Aban-bainrua imi sei lori rasik todan ida nee. Nai Maromak moos sei soe namkari imi nia jerasaun iha Israel laran tomak, too sira la hela hamutuk iha fatin ida ona.
Leaun aman ho leaun inan
8 Judá! O nia naran dehan ‘gaba’. O nia maun-alin sira sei gaba o i hakruuk ba o. I o nia liman sei hanehan o nia inimigu sira, too sira la foti ulun. 9 O nee hanesan leaun. O hanesan leaun forti foin sae, nebee buka rasik hahaan. O hanesan leaun aman nebee hafuhu animál hodi tata, haan bosu, depois toba. O hanesan leaun inan hein hela nia oan. La iha ema ida barani baa book. O moos nunee. Ema sei tauk o, i sira la barani halo buat ida ba o. 10 O nee sei kaer ukun. O nia jerasaun sira moos sei kaer ukun tu-tuir malu, too iha ida mak iha direitu liu hodi tuur kaer ukun nee. I nasaun sira hotu sei hakruuk i rona ba Nia. 11 O sei moris haksolok. O hakarak saida deit, iha! O atu halo saida deit, sai duni. I o nia animál, ho o nia toos-natar nia rezultadu, barak teb-tebes, too resin soe arbiru tiha deit. 12 O nia tua tintu ho o nia susubeen resin too fak-fakar. 13 Zebulón! O nia rai besik tasi, i sei aumenta boot too baliza ho sidade Sidon. Roo boot mai hosi fatin-fatin, hodi para ho hakmatek iha o nia pontikais. 14-15 Isakar! O forti hanesan kuda buru, maibee o nia ulun fatuk toos. O toba ona iha dalan klaran; see mak bele obriga fanu o, para lao nafatin? Bainhira o haree ona fatin diak ida, o prontu atu sai ema rai nain nia atan, para bele hela iha fatin nee. O mak nunee ona! 16 Dan! O nia naran nee dehan ‘juíz’. O ho o nia jerasaun, mak sei tesi o nia povu nia lia. Imi tesi, sei la todan hosi sorin, maibee tuir lia loos. 17 O nee moos matenek hanesan samea nebee toba hela iha dalan ibun. Kuandu inimigu ida sae kuda liu hosi fatin nee, antes hakfodak, o tata tiha ona kuda nia ain kotuk, too kuda nee soe tiha ema nee. 18 Oo NAI MAROMAK! Hau harohan atu Ita Boot salva ami hotu. 19 Gade! O nia naran rona atu hanesan ‘ataka’. Ema naok-teen sei ataka o, maibee o ataka fali sira hosi kotuk, too manaan. 20 Asér! O nia toos sei foo hahaan diak liu, too o bele halo dosi furak oi-oin, too liurai sira mai hola dosi iha o. Bibi rusa 21 Naftali! O hanesan bibi rusa nebee halai fuik, la iha ema ida bele manda o. O nia oan sira mesak oin kapaas-kapaas deit. 22 José! O hanesan ai buras ida, moris besik bee matan. O nia sanak nani sae too muru leten. 23 Uluk iha ema odi o, hanesan inimigu hana o ho rama. 24 Maibee Nai Maromak, ida nebee hau adora, tulun o. Nia halo forti o nia liman, para o hana fali sira, biar hosi dook. O mak manaan sira, tanba Nai Maromak ida forsa teb-tebes mak tulun o. Nee mak hau sadere ba Nia, tan Nia mak hein hau too agora. 25 Nia mak sei kuidadu o. I Nia foo bensaun ba o, bensaun hosi lalehan, bensaun hosi rai, ho bensaun foo oan barak mesak isin di-diak deit. 26 Hau nia bensaun nebee hau foo ba o, boot liu foho-foho sira hotu! Hau harohan para Nai Maromak fakar bensaun sira nee hotu ba o, tanba o mak liu o nia maun-alin sira hotu. Asu fuik iha rai Israel 27 Benjamim! O hanesan asu fuik siak nebee hamlaha. Sei dadeer-saan hela, nia baa tata tiha ona animál ba nia haan. Kuandu kalan ona, nia baa fahe hahaan restu ba nia oan sira. O nia jerasaun moos sei sai nunee.” 28 Too iha nee, Jacó foo hatene kona ba nia oan sira nia moris iha aban-bainrua, ida-idak ho nia jerasaun. Sira nee hotu mak forma suku sanulu resin rua iha Israel.
Jacó mate
29-30 Nee liu tiha, Jacó haruka nia oan sira dehan, “La kleur tan, hau mate ona. Bainhira hau mate, imi tenki lori hau baa hakoi iha avoo Abraão nia rate. Rate nee iha fatuk kuak, besik iha aldeia Makpela ho Manre, iha rai Kanaán. Uluk avoo Abraão hola rai ho fatuk kuak nee hodi halo sai rate. Nia hola kotu hosi ema Ete ida naran Efron. 31 Iha fatin nee mak sira hakoi avoo Abraão ho avoo feto Sara, ho moos hau nia aman Isac, ho hau nia inan Rebeka. Nee duni imi tenki hakoi hau iha nebaa, iha hau nia kaben Lea nia sorin. 32 Entaun, imi keta haluha hakoi hau iha fatuk kuak nebee avoo Abraão hola ona nee.” 33 Jacó hameno liafuan sira nee hotu ba nia oan sira, nia toba fali iha nia fatin, nia iis moos kotu.
1 I José hakuak nia aman, hodi tanis hakilar. I nia rei nia aman fila-fila. 2 Depois José foo orden ba ema sira nebee toma konta mate, para tau ai-moruk ba Jacó nia isin para bele rai kleur. 3 I sira tau beibeik ai-moruk too loron haat-nulu, tuir sira nia lisan. Ema Ejiptu sira moos tanis ba Jacó nia mate. Sira tanis too loron hitu-nulu, hanesan sira nia nai ulun boot ida mak mate. 4 Liu tiha loron hitu-nulu nee, José foo sai ba liurai nia funsionáriu sira dehan, “Favór ida, rona mai. Imi lori hau nia liafuan nee, baa foo hatene ba liurai: 5 ‘Tempu hau nia aman atu besik mate, nia husu hau promete atu lori nia mate isin baa hakoi iha rai Kanaán. Tanba nee, hau husu lisensa ba liurai para hau baa hakoi hau nia aman. Depois hau fila fali mai.’” 6 Rona nunee, liurai hataan dehan, “Se o promete ona ba o nia aman nunee, lori ona nia baa hakoi iha nebaa.” 7 Depois José lori ona nia aman baa hakoi. Ema barak mak akompanya José. Hanesan liurai nia funsionáriu sira, ho ema boot sira hotu iha Ejiptu. 8 José nia maun-alin, ho sira nia ema servisu hotu moos baa hakoi Jacó. So sira nia kaben ho oan nurak ho animál mak la baa. 9 Tropa barak moos tuir. Balu baa ho kuda kareta, i balu sae kuda. Ema sira akompanya mate nee barak teb-tebes, rohan la iha. 10 Sira hotu lao too fatin ida naran Atad, besik mota Jordaun. Iha fatin nee, ema sempre mai sama hare. José sira tanis hakilar nia aman nia mate iha nebaa, i hadeer mate nee durante kalan hitu tan. 11 Bainhira ema Kanaán sira iha fatin nee haree sira tristi nunee, sira moos dehan ba malu, “Imi haree tok. Ema Ejiptu sira nee tanis ho lelir, halo ita moos tristi!” Nee mak sira tau fatin nee naran Abel-Misraim. Nee katak ‘ema Ejiptu laran tristi’. 12 Depois Jacó nia oan sira halo tuir buat nebee mak sira promete tiha ona. 13 Sira lori Jacó nia mate isin baa hakoi iha fatuk kuak besik aldeia Makpela ho Manre. Abraão uluk hola fatin nee hosi ema Ete ida naran Efron, hodi halo sira nia rate. 14 José hakoi tiha nia aman hotu, nia ho nia maun-alin sira fila fali ba Ejiptu, hamutuk ho ema hotu nebee baa hakoi mate nee.
José halo hakmatek nia maun sira nia laran
15 Too iha Ejiptu, José nia maun sira komesa tauk ona. Tanba sira nia aman la iha tiha ona, sira moos koalia ba malu dehan, “Imi hanoin lai! Se José sei odi ita i hakarak selu ita nia aat nebee uluk ita halo ba nia, halo nusaa loos?” 16 Entaun sira lia ida haruka mensajen ba José dehan, “Senyór visi! Ami sei hanoin uluk ita nia aman sei moris, nia haruka ami 17 foo hatene ba senyór dehan, ‘Aze tenki foo perdaun ba nia maun sira nia sala, nebee uluk sira halo ba nia.’ Nee mak agora ami mai husu perdaun. Tanba ami Maromak nia atan, hanesan uluk ita nia aman.” Rona nunee José moos tanis. 18 Depois nia maun sira mai rasik hakniak iha José nia oin, hodi dehan, “Senyór, halo ami sai senyór nia atan deit.” 19 Maibee José dehan, “Maun sira! Imi lalikan tauk tan ona! So Nai Maromak deit mak iha direitu foo kastigu ba ema. Maibee hau, lae. 20 Uluk imi kombina hodi halo aat mai hau. Maibee Nai Maromak halo buat nee sai diak fali. Nia foti hau sai ema boot, para bele salva ema barak hosi rai hamlaha. 21 Nee duni, agora, keta tauk tan. Hau promete hau sei tau matan ba imi, ho imi nia oan sira hotu.” Ho liafuan sira nee, José halo hakmatek nia maun sira nia laran.
José mate
22 José hela nafatin iha Ejiptu ho nia maun-alin sira hotu. Nia moris too tinan atus ida sanulu. 23 Nia sei haree Efraim nia bei oan nia oan sira. I nia moos kous nia bei oan Makhir nia oan sira, hodi hatudu katak nia hakiak sira nudar nia oan rasik; Makhir nee Manases nia oan. 24 José foo hatene ba nia maun sira dehan, “Hau senti hau nia loron mate besik ona. Maibee hau fiar, Nai Maromak sei tulun imi. Nia sei lori imi nia jerasaun sai hosi rai ida nee, baa fali iha rai nebee Nia promete ona ba avoo Abraão, avoo Isac ho apaa Jacó.” 25 Depois José husu ba nia maun-alin sira halo juramentu dehan, “Imi tenki promete mai hau. Bainhira Nai Maromak lori fila fali imi imi nia jerasaun ba iha rai nee, sira tenki lori hau nia mate isin.” 26 Nunee José mate iha Ejiptu ho tinan atus ida sanulu. Depois sira tau ai-moruk ba nia mate isin, i tau nia ba kaixaun laran.
The New Testament of our Lord and Saviour Jesus Christ
João Sarani Nain loke dalan ba Nai Jesus
2 Antes Jesus atu halao Nia servisu, Nai Maromak haruka ema ida mai uluk tia ona. Ema nee naran João. João nee tenki mai uluk loke dalan hodi hein Nai Jesus. Maibee molok João mai, Nai Maromak haruka tia ona Manu-Ain ida, naran Isaias. Hori uluk liu, nia hakerek ona nunee: “Hotu-hotu rona mai! Hau sei haruka Hau nia ema ida baa uluk, hodi loke dalan ba O. 3 Ema nee sei baa iha rai ida nebee la iha ema. I nia koalia ho lian makaas dehan nunee: ‘Hotu-hotu tenki prepara, hamoos dalan hodi simu Nai. Hadia dalan halo kabeer hodi simu Nia.’” 4-6 João nee, ema sempre bolu, Sarani Nain. Nia hela iha rai fuik. Nia ropa halo hosi kuda kamelu nia fulun. I nia sintu halo hosi animál nia kulit. Nia hahaan mak gafanyotu ho bani been. Ema hosi sidade Jerusalém, ho provínsia Judeia, sira hotu mai hasoru João iha nia fatin. Sira hakarak haree nia i rona rasik nia lia fuan. Nia hatete dehan, “Imi tenki foo sai imi nia sala hotu, i la bele halo tan, atu Nai Maromak hamoos imi nia sala. Depois imi tenki sarani uluk, hanesan sinál ida katak imi diak malu fali ona ho Nai Maromak.” João, Sarani Nain Sira foo sai sira nia sala, depois João foo sarani sira iha mota Jordaun. 7 Nia hatete, “La kleur tan, iha ema ida sei mai, i Nia boot liu hau. Atu sai deit Nia atan moos, hau la serve. 8 Hau sarani imi hodi bee deit, maibee Nia sei halo liu fali hau. Nia sei foo Nai Maromak nia Espíritu Santu ba imi.”
João sarani Nai Jesus
9 Iha tempu nee, Jesus mai hosi aldeia Nazaré iha Galileia hodi hasoru malu ho João. Depois João sarani Nia iha mota Jordaun. 10 Sarani tia hotu, bainhira Jesus sai hosi bee laran nee mai, derepenti Nia haree lalehan nakloke. I Nai Maromak nia Espíritu tuun mai Jesus, hanesan manu pombu ida. 11 Depois Nai Maromak nia lian tuun hosi lalehan, hatete nunee, “O nee mak Hau nia Oan Doben; O sempre halo Hau nia laran kontenti.” João sarani tia ona Nai Jesus
Diabu sira nia boot koko Jesus iha rai fuik
12 Nee liu tia, Nai Maromak nia Espíritu obriga Jesus baa iha rai fuik maran ida. 13 Nia hela iha nebaa, duranti loron haat-nulu, kalan haat-nulu. Nia hela hamutuk ho animál fuik sira. Iha nebaa, diabu sira nia boot mai intenta Jesus para tuir nia hakarak, maibee Nia la tuir. Depois Nai Maromak nia anju sira hosi lalehan mai serbí Nia.
Nai Jesus baa iha Galileia para hatudu Nai Maromak nia dalan
14 Bainhira ema kaer tia João Sarani Nain hatama ba iha kadeia, Jesus moos baa iha provínsia Galileia hodi foo sai Nai Maromak nia Lia Fuan Diak. 15 Iha nebaa Nia hatete dehan, “Rona mai! Agora, Nai Maromak nia tempu too ona. Agora, ema hotu-hotu bele hatene katak Nai Maromak mak ukun. Tanba nee, imi tenki husik ona imi nia sala, i tuir deit Nai Maromak nia dalan.”
Nai Jesus bolu peskadór hodi tuir Nia
16 Iha loron ida, Jesus lao tuir lagoa Galileia nia ninin. Nia haree ema peskadór nain rua. Ida, naran Simão, ho nia alin, André. Sira nain rua soe hela dai hodi kaer ikan. 17 Jesus bolu sira, dehan, “Hei, rona mai! Mai tuir Hau! Imi uluk buka ikan, maibee agora Hau hanorin imi atu buka ema hodi tuir Nai Maromak.” 18 Rona Jesus dehan nunee, sira husik tia sira nia dai, i baa tuir kedas Jesus. 19 Liu tia nee, Jesus lao seidauk dook, Nia hetan tan Zebedeu nia oan sira. Maun, naran Tiago; nia alin, naran João. Sira nain rua hadia hela redi iha bero laran. 20 Jesus bolu sira nain rua tan, dehan, “Hei! Mai tuir Hau!” Nunee sira husik kedan sira nia aman, ho ema nebee servisu ho sira. I sira nain rua moos baa tuir Jesus.
Nai Jesus duni sai espíritu aat hosi ema ida iha sidade Kafarnaum
21 Depois Jesus ho sira nain haat nee, lao ba too iha sidade ida, naran Kafarnaum. Iha loron Sábadu, ema Judeu sira sempre baa harohan. I Jesus moos tama ba uma kreda laran, hodi hanorin sira. 22 Ema hotu admira, bainhira rona Nia koalia, tanba Nia hatene duni buat hotu nebee Nia hanorin. Nia hanorin oin seluk, la hanesan mestri Judeu sira. 23 Iha fatin nee, iha ema ida, espíritu aat tama iha nia laran. Kuandu Jesus hanorin hela, ema nee tama ba iha uma kreda laran. I nia hakilar, dehan, 24 “Hoi, Jesus, ema Nazaré! Nusaa? O hakarak saida?! O mai estraga ami ka? Ami konyese O! O nee Ema La Iha Sala. O nee, mak Nai Maromak promete ona hori uluk atu haruka mai.” 25 Maibee Jesus koalia makaas ba espíritu aat nee dehan, “No-nook! Taka o nia ibun! Sai ona hosi ema nee!” 26 I espíritu aat nee soe ema nee ba rai. Nia sai hosi ema nee, i hakilar makaas. 27 Liu tia nee, ema hotu iha uma kreda laran nee, hakfodak. I sira komesa husu ba malu, “Hei! Saida mak nee? Nee hanorin foun ka? Senyór nee, Nia lia fuan makaas duni! Nia haruka espíritu aat sira sai, i sira moos rona.” 28 Entaun ema hotu konta ona ba-mai, hosi uma ba uma, too iha aldeia hotu iha provínsia Galileia tomak.
Nai Jesus kura Simão nia banin feto ho ema barak nia moras
29 Bainhira sira foin sai hosi uma kreda nee mai, Jesus sira baa iha Simão ho André nia uma. 30 Simão nia banin feto isin manas, toba hela. Kuandu Jesus sira tama ba uma laran, ema foo hatene kedas, dehan, “Simão nia banin feto isin manas.” 31 Entaun Jesus baa haree ferik nee. I Nia kaer nia liman, hodi foti halo hadeer. Nunee nia moras lakon kedas. Depois ferik nee sai ba liur hodi serbí sira. 32 Loron atu besik monu ona, ema lori tan ema moras, ho ema nebee mak espíritu aat tama iha sira nia laran. Sira lori ba Jesus, hodi husu ajuda. 33 Ema hotu iha sidade laran mai hamutuk iha uma oin. 34 Sira iha moras oi-oin, i Jesus kura tia hotu. I Nia duni sai moos espíritu aat hosi ema barak. Maibee Jesus la foo lisensa ba espíritu aat sira koalia, tanba sira konyese see mak Nia.
Nai Jesus lao lemo sidade iha rai Galileia, hodi foo sai Nai Maromak nia Lia Fuan Diak
35 Dadeer-saan nakukun, Jesus hadeer ona. Nia sai tia hosi uma, baa iha fatin ida nebee ema la iha. Iha nebaa, Nia harohan ba Nai Maromak. 36 Kuandu Simão sira hadeer, sira la haree tan Jesus ona, i sira baa buka Nia. 37 Bainhira sira hetan ona Nia, sira dehan, “Senyór. Mai ita fila ona. Tanba ema barak mak buka Ita.” 38 Maibee Jesus hataan, “Diak liu ita baa iha aldeia-aldeia nebee besik. Para Hau bele foo sai moos Lia Fuan Diak ba sira. Tanba Hau nia servisu mak nee duni.” 39 Liu tia nee, Nia lao lemo iha provínsia Galileia tomak, hodi hatoo Nai Maromak nia Lia Fuan, hosi uma kreda ba uma kreda. I Nia moos duni sai espíritu aat hosi ema sira nia laran.
Nai Jesus kura ema moras lepra ida
40 Iha tempu nee, iha ema moras lepra ida, mai hasoru Jesus. Nia hakneak iha Jesus nia oin, hodi husu tulun ba Jesus, nunee, “Senyór! Ajuda hau lai! Se Senyór hakarak, bele kura lai hau nia moras nee. Atu ema la hakribit tan hau.” 41 Entaun Jesus hadomi ema nee, i Nia lolo liman ba kona ema nee, hodi dehan, “Hau hakarak. Agora, o diak ona!” 42 Derepenti deit, ema nee nia moras lakon tia. I nia diak kedan. 43 Depois Jesus foo hanoin ba nia, dehan, 44 “Hanoin di-diak! O diak ona. Maibee o keta konta ba ema seluk! O tenki tuir avoo Moisés nia lei hori uluk nian. Nunee o baa uluk nai-lulik Judeu sira, para nia bele haree lai o nia moras nee, lakon tebes ka lae. Depois o tenki foo oferta hanesan obrigadu ba Nai Maromak, para ema hotu hatene katak o diak tebes ona.” 45 Maibee ema nee sai, i nia baa konta iha fatin ba fatin. Depois ema barak baa buka Jesus, too Nia la hatudu oin tan iha sidade. Nunee Nia baa hela tia dook hosi sidade, iha fatin nebee hakmatek. Maibee ema hosi fatin hotu-hotu, nadodon mai nafatin atu hasoru Nia.
Nai Jesus kura ema ain aat ida
1 Liu tia loron ida-rua, Jesus fila fali ba Kafarnaum. Ema nebee haree Nia, baa foo hatene iha sidade laran katak, Jesus mai fali iha uma ona. 2 Nunee ema mai hosi sidade tomak. Sira nadodon mai hamutuk, too sena malu metin iha uma laran; too iha odamatan oin moos, ema nakonu. Depois Jesus hatoo ba sira, Nai Maromak nia Lia Fuan. 3 Nia sei koalia hela, ema nain haat hulan ema ain aat ida ba Jesus. 4 Maibee, tanba ema barak liu, sira la konsege lori ema nee tama ba Jesus. Nunee sira sae ba iha uma leten, i sira halo kuak ida. Depois sira hatuun ema nee hodi biti iha Jesus nia oin. 5 Bainhira Jesus haree sira, Nia hatene katak sira fiar tebes duni ba Nia. I Nia hatete ba ema ain aat nee, “Alin. O nia sala, hamoos tia ona!” 6 Maibee iha fatin nee, iha moos mestri relijiaun balu tuur hela. Bainhira sira rona Jesus koalia nunee, sira senti la diak, 7 tanba sira hanoin nunee, “Nusaa mak Nia koalia fali nunee? Nai Maromak mesak deit mak bele hamoos ema nia sala. Maibee Nia halo nia aan hanesan fali Nai Maromak! Nia lia fuan nee kontra ona Nai Maromak!” 8 Maibee Jesus hatene tia ona sira nia laran. I Nia dehan, “Imi keta hanoin hanesan nee! 9-10 Ida nebee mak fasil liu? Se Hau hatete ba ema ain aat nee dehan, ‘O nia sala hamoos tia ona,’ imi la hatene se sai nunee ka lae. Maibee, se Hau hatete dehan, ‘Hadeer ona! Foti o nia biti, hodi fila ona.’ Se nia hamriik duni, imi foin hatene katak Hau nee Ema Oan. I Hau moos iha direitu para bele hamoos ema nia sala.” Depois Jesus hatete ba ema ain aat nee dehan, 11 “Rona mai! Agora o diak ona! Hadeer ona! Foti o nia biti, hodi fila ona.” 12 Rona nunee, nia hadeer kedan, foti nia biti, hodi sai ba liur. Ema hotu-hotu iha fatin nee, haree ho matan rasik. Sira hotu admira, i dehan, “Ita foin mak haree buat hanesan nee! Nai Maromak nee boot tebe-tebes!”
Nai Jesus bolu Levi hodi tuir Nia
13 Nee hotu tia, Jesus fila ba iha lagoa Galileia. Ema barak mai hasoru Nia, i Nia foo sai Nai Maromak nia hakarak. Ema kobra osan impostu 14 Iha fatin nee, iha ema ida, naran Levi, Alfeu nia oan. Nia servisu, mak kobra osan impostu ba estadu Roma. Natoon Jesus liu hosi nebaa, Nia hetan Levi tuur hela, Nia hatete, “Mai tuir Hau!” Nia rona Jesus dehan nunee, nia hamriik, i tuir kedan Jesus. 15 Depois Jesus sira baa iha Levi nia uma. Iha uma nee, Levi nia kolega kobradór impostu sira, ho ema seluk tan nebee ema Judeu sira dehan, sira ema aat. Sira hotu haan hamutuk ho Jesus. Hosi sira nee, ema barak mak gosta rona Jesus nia lia fuan. 16 Iha tempu nee, iha mestri relijiaun balu hosi grupu Farizeu, haree Jesus tuur haan hamutuk hela ho ema kobradór impostu sira, ho ema hahalok aat sira. Depois sira husu ba Jesus nia eskolanti sira dehan, “Tanba saa, mak imi nia Mestri tuur haan hamutuk ho ema kobradór ho ema aat sira?” 17 Kuandu Jesus rona sira husu hanesan nee, Nia hataan kedan, dehan, “Rona mai! Ema moras mak presiza doutor, maibee ema isin diak la presiza. Hau mai atu halibur ema sala nain sira para tuir Hau. Laos ema nebee foti-an katak sira mak loos liu.”
Nai Jesus koalia kona ba jejuun, ho hanorin foun
18 Iha loron ida, ema hosi grupu Farizeu sira halo jejuun. João Sarani Nain nia eskolanti sira moos jejuun. Maibee ema la haree Jesus nia eskolanti sira jejuun. I sira mai husu ba Jesus, “Senyór! Ema grupu Farizeu sira halo jejuun. João nia eskolanti sira moos jejuun. Nusaa mak Ita Boot nia eskolanti sira la jejuun?” 19 Depois Jesus hataan, “Imi hatene ona, bainhira iha festa kazamentu ida, ema la jejuun, maibee ema tenki haan too bosu. Bainhira noivu sei iha, sira hotu-hotu haan ho rame-rame. 20 Maibee too iha loron ida, se ema seluk mai lori lakon tia noivu nee, foin nia kolega sira senti laran susar tebes. Nunee sira foin halo jejuun hodi harohan.” 21 Jesus foo tan komparasaun nunee, “Kuandu ropa kuak, ita la taka ho hena foun. Tanba kuandu fasi, hena foun nee sei dada ropa bosan nee, halo naklees liu tan. 22 Nunee moos, ema la uza au lahuk hodi tau tua foun, tanba tua bele turu sai hotu. Se tua nee foun, ita tenki uza au foun, para bele rai kleur.”
Nai Jesus nia eskolanti sira korut trigu iha loron nebee la bele servisu
23 Iha loron Sábadu, ema Judeu sira nia loron hodi harohan, i sira la bele servisu. Iha loron nee duni, Jesus ho Nia eskolanti sira lao liu hosi toos rohan. Nia eskolanti sira korut daudaun trigu.a 24 Depois ema hosi grupu Farizeu nian haree, i sira kesar ba Jesus, dehan, “Nusaa mak O nia eskolanti sira kontra ita nia relijiaun nia hanorin?! O nia eskolanti sira korut fali trigu iha loron nebee la bele servisu! Imi la bele halo nunee!” Trigu 25-26 Jesus hataan, “Imi la hanoin kona ba avoo David nia istória ka? Tempu nee, amu Abiatar hanesan nai-lulik nia boot. Avoo David ho nia ema sira hamlaha atu mate. Depois sira tama ba iha Nai Maromak nia Tenda Harohan Nian, i sira baa foti paun ida nebee nai-lulik sira foo tia ona ba Nai Maromak, i sira haan tia. Tuir lo-loos, nai-lulik sira mak bele haan; ema seluk la bele. Maibee avoo David sira haan tia, i la iha ema ida foo sala ba sira.” 27 I Jesus dehan tan nunee, “Imi la bele haluha katak Nai Maromak foo ona loron deskansa, atu halo diak ba ita ema. Nia halo ita ema laos para hodi tuir deit loron deskansa nia hanorin. 28 Hau nee Ema Oan. Hau mak iha direitu atu hatete ba ema, saida mak sira bele halo iha loron deskansa, i saida mak sira la bele halo.”
Nai Jesus kura ema ida, iha loron la bele servisu
1 Iha loron Sábadu ida, Jesus fila fali ba iha uma kreda laran. Iha nebaa, Nia haree ema ida, nia liman sorin mate tia. 2 Iha moos ema balu buka hela dalan atu foo sala ba Jesus. Sira sempre haree tu-tuir Nia, hodi buka hatene Nia atu kura ema iha loron la bele servisu, ka lae. 3 Nunee Jesus bolu ema liman sorin mate nee, dehan, “O mai hamriik iha nee.” 4 Nia husu ba ema sira hotu, dehan, “Tuir ita nia lei relijiaun nian, ita bele halo saida iha loron deskansa? Ita bele halo buat diak ka, buat aat? Ita bele ajuda ema ka, oho ema?” Maibee sira hotu no-nook hela. 5 I Jesus nia laran susar tebe-tebes, tanba sira interese mak sira nia lei deit, i la hanoin ema liman sorin mate nee. Depois Nia fihir sira ho hirus. I Nia haruka ema nee, “Lolo liman mai!” Ema nee foo nia liman ba, i derepenti deit nia liman nee moos diak kedan. 6 Liu tia nee, ema Farizeu sira sai hosi uma kreda laran. Depois sira baa kombina ho ema partidu Herodes sira, atu buka dalan hodi oho Jesus.
Nai Jesus kura ema barak iha lagoa nia ninin
7-8 Iha loron ida, Jesus ho Nia eskolanti sira, baa fali iha lagoa Galileia nia ninin. Ema barak rona ona buat nebee mak Nia halo. Tanba nee, sira hotu mai hosi aldeia-aldeia hodi tuir Nia. Sira mai hosi provínsia Galileia, Judeia, ho Idumeia. Balu mai hosi sidade Jerusalém, Sidon, ho Tiro. Ho moos hosi mota Jordaun nia sorin. 9 Tanba ema barak tebes, nunee Jesus haruka Nia eskolanti sira baa buka bero ida, atu Nia bele sae iha bero leten, para ema la bele sena malu ho Nia. 10 Tanba uluk Nia kura ema barak nia moras, nunee agora ema moras hotu hadau malu atu kona Nia. 11 Iha fatin nee moos, iha ema sira nebee espíritu aat tama iha sira nia laran. Momentu sira hetan Jesus, sira monu iha Nia oin. I sira hakilar, dehan, “O nee Nai Maromak nia Oan duni!” 12 Maibee Nia bandu makaas sira, dehan, “Imi keta foo hatene ba ema kona ba see mak Hau!”
Nai Jesus hili ema nain sanulu resin rua hodi tuir Nia
13 Depois Jesus sae ba iha foho leten ida. Nia bolu ema nebee Nia hakarak. I sira mai ba Nia. 14 Nunee Nia hili ema nain sanulu resin rua. I Nia dehan ba sira, “Hau hili ona imi atu imi tuir Hau. Hau sei haruka imi baa foo sai Nai Maromak nia Lia Fuan Diak ba ema hotu. 15 I Hau sei foo podér ba imi, para imi bele duni sai espíritu aat hosi ema nia laran.” 16-19 Ema nain sanulu resin rua nee, sira nia naran mak nee: Simão (nebee Jesus foo tan naran Pedro), Tiago, João (Tiago nia alin. Sira nain rua, Zebedeu nia oan. Jesus tau sira nia naran ‘Boanerges’, nee katak ‘hanesan rai tarutu’.) André, Filipe, Bartolomeu, Mateus, Tomé, Tiago (Alfeu nia oan), Tadeu, Simão (nia tuir partidu Zelote), ho Judas Iscariotes (nia mak traidór, i faan Jesus).
Mestri relijiaun sira foo sala ba Nai Jesus, dehan, diabu sira nia boot mak foo forsa ba Nia hodi duni sai diabu
20 Nee liu tia, Jesus ho Nia eskolanti sira tuun fila fali hosi foho mai, i sira tama ba uma laran. Ema barak mak mai hobur Nia, too Jesus sira moos la iha tempu atu haan. 21 Haree nunee, ema dehan, “Haree tok Jesus! Nia la interese tia Nia aan deit.” Nia família sira rona ema konta nunee. Nee duni, sira mai atu lori tia Nia. 22 Iha tempu nee, mestri relijiaun balu mai hosi sidade Jerusalém. Sira dehan ba ema nebee rona Jesus, “Hei, rona mai! Imi la bele tuir Jesus nee. Tanba diabu sira nia boot, nebee ema bolu Belzebu, tama ona iha Nia laran. I nia mak foo forsa ba Jesus para duni sai diabu sira.” 23 Jesus rona nunee, Nia bolu sira mai, dehan, “Nee la tama Hau nia laran! Halo nusaa diabu nia boot bele duni sai nia aan rasik?!” I Nia foo komparasaun nunee, 24 “Se iha estadu ida, ninia povu sira haan malu, estadu nee la bele dura. 25 I se iha família ida mak sobu malu, família nee la iha tan futuru. 26 Nunee moos diabu sira, kuandu sira kontra malu, sira namkari, i rahun! 27 Kuandu ema atu mai naok sasaan iha ema forti ida nia uma, nia tenki kesi metin ema nee uluk lai. Depois foin bele foti nia sasaan. 28 Tanba nee, mak Hau dehan kedan ba imi: Nai Maromak sempre prontu atu hamoos ema nia sala. Se ema koalia aat ema seluk, Nai Maromak bele hamoos nia sala. 29 Maibee kuandu ema koalia aat Espíritu Santu, Nai Maromak la hamoos tan nia sala nee ona, too tinan ba tinan!” 30 Jesus hatete nunee, tanba ema balu dehan, “Ema nee, espíritu aat tama ona iha Nia laran!”
See mak Nai Jesus nia família lo-loos?
31 Nee liu tia, Jesus nia inan ho alin sira mai iha uma nee, atu hasoru Nia. Too iha uma, sira hamriik deit iha liur, i haruka bolu Jesus atu sai mai. 32 Momentu nee, Jesus tuur koalia hela ho ema barak. Iha ema balu foo hatene ba Jesus, dehan, “Senyór! Ita nia inan ho alin sira hein hela iha liur. Sira hakarak atu hasoru Senyór.” 33 Maibee Jesus husu fali, “Hau nia família lo-loos, mak see?” 34 Depois Jesus haree ba ema lubuk boot tuur haleu Nia nee. I Nia hatete nunee, “Tuir lo-loos, imi sira nee Hau nia família hotu. 35 Tanba see mak halo tuir Nai Maromak nia hakarak, sira nee mak Hau nia família.”
Nai Jesus halo komparasaun kona ba fini iha rai oi-oin
1 Iha loron ida, Jesus baa fali tan iha lagoa Galileia. Ema barak mai hobur Nia. Iha fatin nee, bero ida para hela iha bee laran. Depois Jesus sae tia ba bero leten, i Nia tuur, hodi komesa hanorin. Ema iha bee ibun nee, rona hotu Nia koalia. 2 Jesus hanorin sira buat barak liu hosi komparasaun, dehan, 3 “Rona di-diak! Iha ema ida baa kari fini iha nia toos. 4 Momentu nia kari fini nee, iha fini balu monu iha dalan klaran. I manu fuik mai hili tia hotu. 5-6 Iha fini balu tan, monu iha rai fatuk. Fini nee tubun lailais. Maibee, tanba rai uitoan deit, abut la tama too laran. Kuandu loron manas ona, tubun nebee foin moris nee, namlaik too maran tia hotu. 7 Iha fini balu tan, monu iha duut tarak laran. Fini nee moris duni. Maibee duut tarak habit hela deit, too nia la foo isin. 8 Maibee iha fini balu tan, monu iha rai bokur. Fini nee moris diak, buras, too foo isin barak. Iha fini balu, bote ida bele foo fali too bote tolu nulu, i balu foo too bote neen nulu, i balu tan foo too bote atus ida. 9 See mak rona, hanoin di-diak ba.”
Tanba saa mak Nai Jesus hanorin uza komparasaun?
10 Bainhira Jesus mesak hela, Nia eskolanti nain sanulu resin rua, ho ema balu nebee rona ona Jesus nia hanorin nee, sira mai husu hatene kona ba saida mak komparasaun nee. 11 Depois Jesus hataan fali ba sira, “Tanba imi hakarak duni atu hatene Nai Maromak nia Dalan, Hau sei foo sai ba imi. Maibee, ba ema seluk, Hau hanorin deit hosi komparasaun. 12 Nai Maromak nia Manu-Ain ida hakerek ona hori uluk, kona ba ema hanesan sira nee, dehan, ‘Sira haree ona, maibee lakohi hatene. Sira rona ona, maibee lakohi komprende. Se sira lakohi nunee, diak liu sira lalikan fiar Nai Maromak! Para Nai Maromak moos lalikan hamoos sira nia sala.’”
Nai Jesus foo hatene komparasaun kona ba fini nee
13 Depois Jesus dehan, “Se imi la komprende komparasaun ida nee, halo nusaa mak imi bele komprende komparasaun sira seluk? 14 Komparasaun nee nunee: Ema ida nebee kari fini nee, hanesan ema nebee mak foo sai Nai Maromak nia Lia Fuan. 15 I fini nebee monu iha dalan klaran, too manu fuik mai hili tia hotu, hanesan ema nebee rona Nai Maromak nia Lia Fuan. Maibee diabu sira nia boot mai hadau tia Lia Fuan nee hosi ema nia laran. 16 I fini nebee monu iha rai fatuk, hanesan ema nebee rona ona Nai Maromak nia Lia Fuan, i simu Lia Fuan nee ho laran kontenti. 17 Maibee Lia Fuan nee la hela metin iha nia laran. Tanba nia simu Lia Fuan nee, ema seluk ameasa nia, i nia husik tia kedan. 18 I fini nebee monu iha duut tarak laran, hanesan moos ema nebee rona ona Nai Maromak nia Lia Fuan. 19 Maibee nia fadigadu demais ho nia servisu oi-oin, hanesan nia buka riku, nia buka sai ema boot, ho nia goza tuun-sae. Too nia la interese Nai Maromak. Nunee nia husik tia Nai Maromak nia Lia Fuan. 20 Maibee fini nebee monu iha rai bokur, hanesan ema nebee rona ona Nai Maromak nia Lia Fuan, i halo tuir Nai Maromak nia hakarak. Tanba nee, nia sempre halo buat diak deit, hanesan fini nebee foo isin barak.”
La bele doku ahi-oan ho bote
21 Jesus koalia nafatin iha bero leten. Nia aumenta tan komparasaun ida, nunee, “Nusaa? Kuandu ema sunu ahi-oan, sira doku tia ho bote ka? Ou sira tau iha kama okos ka? La ida! Se tau iha fatin hanesan nee, ahi-oan nee la foo tan naroman. Ema tenki tau ahi-oan nee iha fatin nebee aas, atu bele naroman ba hotu-hotu.c 22 Buat nebee mak agora subar hela, aban-bainrua sei bele hetan. Buat nebee mak agora ita la hatene, aban-bainrua sei bele hatene.d 23 See mak rona, hanoin di-diak ba.” 24 Depois Jesus kontinua hanorin, dehan, “Hanoin di-diak ba Hau nia Lia Fuan! Se imi la hanoin di-diak, imi sei laduun komprende. Maibee se imi hanoin di-diak, imi sei komprende barak, i Hau sei hanorin imi barak liu tan. 25 Ema nebee buka tebe-tebes Nai Maromak nia hakarak, nia sei hatene liu tan. Maibee ema nebee la interese Nai Maromak nia hakarak, nia sei beik liu tan.” Komparasaun kona ba fini nebee mesak moris 26 Depois Jesus dehan nunee, “Nai Maromak nia renu aumenta barak ba beibeik, hanesan moos fini nebee ema kari iha nia toos laran. 27 Bele ema nee fila tia ba uma, halo fali buat selu-seluk, i la hanoin tan nia toos. Maibee fini nee buras i boot ba beibeik. 28 Fini nee mesak tubun. Depois komesa iha sanak, funan, too nia iha isin. 29 Kuandu tasak ona, toos nain hatene mai koa deit. Nunee moos, Nai Maromak mak halo Nia renu aumenta barak liu tan.”
Komparasaun kona ba ai musan nebee kikoan liu
30 Liu tia nee, Jesus dehan tan, “Hau foo sai tan komparasaun ida. Imi bele hanoin Nai Maromak nia renu sira hanesan nee: Sira komesa hosi uitoan liu, maibee kleur-kleur tan, sira aumenta ba beibeik too barak tebe-tebes. 31 Nee hanesan ai musan ida kikoan liu. 32 Kuandu ai musan nee ita kuda ona, nia moris sai ai huun boot la halimar. Too manu fuik sira moos mai hamahon, i halo knuuk iha ai leten nee.” 33 Jesus nia hanorin hanesan nee, tuir buat nebee sira bele komprende. 34 Nia bai-bain hanorin ema barak ho komparasaun. Maibee ba Nia eskolanti sira, Nia foo hatene komparasaun sira nee nia signifikadu, para sira bele komprende di-diak.
Nai Jesus halo hakmatek anin boot
35 Too loro tuun ona, Jesus sei iha bero leten nafatin, hodi hanorin ema sira nee. Depois Nia hatete ba Nia eskolanti sira, “Mai ita baa lagoa nia sorin ba.” 36 Entaun sira moos sae tan baa hamutuk ho Jesus. I sira husik hela ema barak iha bee ninin nee. Maibee iha ema balu sae bero seluk hodi tuir Jesus sira. 37-38 Jesus tau ulun iha sumasu, i Nia toba dukur loos iha bero laran. La kleur, anin boot mosu. I laloran baku bero ba-mai, too bee tama bero laran nebee Jesus sira sae nee, i bee moos besik nakonu ona. Nunee Jesus nia eskolanti sira tauk atu mate. Depois sira mai fanu Nia, hodi dehan, “Senyór! Hadeer lai! Ita atu mate ona! Maibee Senyór la interese!” 39 Rona nunee, Jesus moos hadeer, hodi hatete ba anin ho laloran nee nunee, “Para ona!” Anin moos para, i bee moos hakmatek kedan. 40 Depois Jesus hatete makaas ba Nia eskolanti sira, “Nusaa mak imi tauk demais hanesan nee? Imi la fiar Hau ka?” 41 Sira hotu tauk ho admira. Depois sira koalia ba malu, dehan, “Ema nee see loos? Nia koalia deit moos, anin ho laloran rona ona!”
Nai Jesus duni sai espíritu aat barak hosi ema ida
1 Nee liu tia, Jesus ho Nia eskolanti sira too iha lagoa Galileia nia sorin ba, iha ema Gerasa nia rain. 2-6 Iha fatin nee, iha mane ida, espíritu aat domina nia hori uluk kedas. Nia hela iha rate laran. Loron-kalan nia lao tuun-sae foho, i hakilar beibeik. Loro-loron nia tuku nia aan rasik ho fatuk, too kanek tia hotu. Mane nee forti la halimar. Ema kesi beibeik nia liman-ain ho korenti. Maibee korenti besi moos, nia rasta kotu hotu kedan. I argola iha nia ain moos, rahun. Ema nee, espíritu aat tama iha nia laran Bainhira Jesus sira tuun hosi bero, ema espíritu aat hela iha nia laran nee, haree sira hosi dook. Depois nia sai kedan hosi rate laran, i nia baa iha Jesus nia oin, hodi hakneak i hahii ba Nia. 7-8 Kuandu Jesus haree ema nee, Nia hatete, “He! Espíritu aat! Sai hosi ema nee!” Depois ema nee hakilar, “O atu halo saida mai hau?! Hau hatene katak, Nai Maromak Mak Boot Tebes. I O nee Jesus, Nai Maromak nia Oan. Hau husu ba O atu la bele halo susar hau!” 9 Depois Jesus husu ba nia, “O naran saa?” Ema nee hataan, “Hau nia naran, Lejiaun. Tanba ami nee espíritu barak tebe-tebes, hanesan tropas sira nia lejiaun!” 10 I espíritu aat sira uza ema nee hodi husu ba Jesus, atu keta duni sira sai hosi rai nee. 11-13 Besik fatin nee, iha ema balu hein hela fahi rihun rua iha foho lolon. Nunee espíritu aat sira husu ba Jesus, “Haruka deit ami baa tama iha fahi sira nebaa.” Rona nunee, Jesus moos konkorda. I espíritu aat sira sai kedan hosi ema nee, baa tama fali iha fahi sira. Fahi sira halai saruntu malu too iha rai naruk ida, i monu hotu ba bee laran. Nunee fahi rihun rua nee mout too mate hotu. 14 Haree hanesan nee, fahi atan sira tauk atu mate. I sira halai baa foo hatene iha aldeia-aldeia. Too ema barak mai haree saida mak mosu. 15 Kuandu sira hetan Jesus, sira moos haree mane nebee uluk espíritu aat tama nee, tuur hakmatek hela, i hatais fali hena ona. Nia hanoin normál fali ona. Entaun ema sira tauk, tanba sira hatene ona, ema ida nebee duni sai espíritu aat nee, Nia forsa tebe-tebes. 16 Depois fahi atan sira konta ba ema nebee mai hosi aldeia-aldeia nee, dehan, sira haree rasik ho matan ema bulak nee diak tia ona, i fahi sira nee mout too mate tia hotu. 17 Depois ema iha rai nee husu ba Jesus atu sai tia hosi sira nia rain. 18 Bainhira Jesus atu sae fali ba bero nee, ema nebee espíritu aat sai ohin nee, mai husu ba Jesus para nia moos atu tuir. 19 Maibee Jesus lakohi. Nia dehan, “Diak liu, o fila baa konta ba o nia família sira hotu, saida mak Nai Maromak halo ona ba o. I foo hatene moos katak, Nai Maromak hadomi tebes o.” 20 Nunee ema nee lao lemo-lemo iha rai ida naran ‘Dekapolis’. (Nee katak, rai nee iha sidade sanulu.) I nia konta saida mak Jesus halo ba nia. Ema hotu nebee rona nia koalia nee, sira admira tebe-tebes, dehan, “Nai Jesus nee forsa duni!”
Nai Jesus halo moris fali Jairo nia oan. Ho moos iha feto ida nebee nia fulan mai la para. Nia mai kona kois Jesus nia hena
21 Nunee Jesus sira sae fali bero hodi baa iha lagoa sorin ba. Bainhira sira foin tuun hosi bero, ema barak mai hobur Nia. 22 Iha moos ema ida naran Jairo. Nia toma-konta uma kreda iha sidade nee. Bainhira nia haree Jesus, nia baa hakruuk to-rai iha Jesus nia oin, 23 hodi husu dehan, “Senyór! Tulun hau lai! Hau nia oan feto moras todan, besik mate ona. Nia foin tinan sanulu resin rua.” 24 Nunee Jesus tuir kedan Jairo ba iha nia uma. Maibee bainhira sira lao ba, ema barak moos tuir Nia, too sena malu. 25 Iha ema sira nee, iha feto ida, nia fulan mai la para, duranti tinan sanulu resin rua. 26 Nia gasta osan barak too nia faan nia sasaan hotu hodi selu deit doutor barak. Maibee la iha ema ida mak bele kura nia. Nia moras nee aumenta ba beibeik. 27-29 Feto nee rona ona buat barak kona ba Jesus. Nunee nia sena malu hosi ema barak nia leet, atu baa besik Jesus nia kotuk. Nia hanoin iha nia laran dehan, “Naran katak hau kona kois deit Nia hena moos, hau diak ona!” Nunee nia foin kona Jesus nia hena, derepenti nia raan moos para. Nia senti diak kedan. 30 Iha momentu nee, Jesus senti iha forsa ida sai hosi Nia laran. I Nia fila ba kotuk, hodi haree ema barak nee. Nia husu, “See mak kona Hau nia hena nee?” 31 Nia eskolanti sira hataan, “Senyór rasik haree deit ba! Ema iha nee barak la halimar! Halo nusaa mak Senyór husu fali, ‘See mak kona Hau nia hena nee?’!” 32 Maibee Jesus haree ba-mai, atu buka hatene see loos mak kona Nia hena. 33 Rona Jesus koalia hanesan nee, feto nee tauk atu mate. Depois nia baa hakruuk iha Jesus nia oin, hodi foo sai, “Senyór! Hau mak ohin kona Senyór nia hena.” 34 Depois Jesus dehan, “Tanba ita fiar tebe-tebes mai Hau, nee duni mak ita diak ona. Ita la hetan tan terus ida nee ona. Agora ita fila ona ho paz.” 35 Jesus sei koalia hela nunee, iha ema ida mai hosi Jairo nia uma, foo hatene, “Koitadu! Oan feto mate tia ona. Nee duni, lalikan halo kole tan mestri. Senyór lalikan baa tan uma ona.” 36 Maibee Jesus lakohi rona ema nee nia koalia. I Nia hatete ba Jairo, “La bele laran susar! Ita fiar deit.” 37 Nunee Jesus lao husik hela Nia eskolanti balu. I Nia lori deit Pedro, Tiago ho João. Sira mesak deit mak baa ho Jairo. 38 Bainhira sira too iha Jairo nia uma, sira haree ema barak rungu-ranga hela ho tanis hakilar. 39 Jesus tama ba iha uma laran. I Nia husu ba sira dehan, “Tanba saa mak imi hotu fadigadu i tanis loos hanesan nee? Labarik nee la mate ida. Nia toba deit.” 40 Rona Jesus dehan hanesan nee, sira hotu goza ho hamnasa fali Nia. Depois Nia haruka sira hotu sai. Nunee Nia bolu labarik nee nia inan-aman, ho Nia eskolanti nain tolu nee, para sira tama hamutuk ba iha labarik nee nia kuartu laran. 41 Depois Jesus kaer labarik nee nia liman, hodi dehan ho sira nia lian nunee, “Talita kum! ” Nee dehan katak, “Noi! Hadeer ona!” 42-43 Derepenti deit, anoi hadeer i lao kedan. Nunee Jesus hatete ba labarik nee nia inan dehan, “Foo hahaan ona ba labarik nee!” Ema hotu admira tebes. Maibee Jesus bandu makaas ba sira dehan, “Imi la bele konta sai ba ema seluk, dehan Hau mak halo moris fali labarik nee!”
Ema Nazaré sira la simu Nai Jesus
1 Hotu tia, Jesus ho Nia eskolanti sira fila fali ba iha Nia aldeia Nazaré. 2 Too ona loron Sábadu, ema Judeu sira nia loron hodi harohan. I Jesus tama ba iha uma kreda laran hodi hanorin. Iha loron nee, ema barak mak baa harohan. Bainhira sira rona Jesus nia hanorin, sira hotu admira loos, i dehan, “Ema nee matenek tebes. Nia moos iha forsa! Nusaa mak Nia bele hanesan nee? 3 Afinál Nia nee badaen ai ida. Ita hotu konyese Nia inan Maria ho Nia alin sira: Tiago, José, Judas ho Simão. Ita konyese moos Nia alin feto sira. Ita hotu hela iha aldeia nee!” Tanba nee, sira laran moras, too lakohi rona tan Nia. 4 Rona nunee, Jesus hatete, “Nee loos duni! Ema respeita liu Nai Maromak nia ema nebee mai hosi fatin seluk, duke sira rona ema hosi sira nia aldeia rasik.” 5-6 aMaibee ema sira nee ulun toos liu, too lakohi fiar tan Jesus. Tanba nee, Jesus hakfodak, i doko ulun. I Nia la uza tan Nia forsa iha aldeia nee, so kura ema uitoan deit.
Nai Jesus haruka Nia eskolanti nain sanulu resin rua
6 bLiu tia nee, Jesus lao tama-sai ba aldeia-aldeia nebee besik, hodi hanorin kona ba Nai Maromak nia hakarak. 7 Nia bolu Nia eskolanti nain sanulu resin rua nee, i haruka sira lao nain rua-rua baa foo sai Nai Maromak nia Lia Fuan Diak ba ema hotu. Nia moos foo forsa para bele duni sai espíritu aat. 8-9 Nia haruka sira nunee, “Imi la bele lori buat ida iha dalan. La bele lori bukae, osan, ou pasta. Tau deit xinelus iha ain, ho hena tahan ida iha isin. I kaer deit ai tonka ida. 10 Se iha ema ruma simu imi iha sira nia uma, imi tenki hela nafatin iha uma nee, too imi sai fali ba fatin seluk. 11 Maibee se ema lakohi simu imi, i lakohi rona buat nebee mak imi hanorin ba sira, imi tenki sai kedas hosi fatin nee. I baku rai rahun hosi imi nia ain okos, hanesan sinál ida katak, ‘Tamba imi lakohi rona Nai Maromak nia Lia Fuan, nee duni, imi rasik mak lori todan nee.’” 12 Nunee sira lao baa hatoo Nai Maromak nia Lia Fuan Diak, hodi hanorin, “Imi tenki husik imi nia sala ona, i tuir Nai Maromak nia dalan.” 13 I sira duni sai espíritu aat hosi ema. Sira moos tau mina ba ema moras sira nia ulun, hodi halo orasaun, i sira moos diak.
Ema tesi tia João Sarani Nain nia kakorok
14 Iha tempu nee, ema iha fatin hotu-hotu hatene ona kona ba Jesus. I liurai Herodes moos rona kona ba Jesus nia forsa. Iha ema balu dehan, “Jesus nee João Sarani Nain. Nia moris fali iha Jesus nia aan. Tanba nee, mak Nia bele halo milagre barak.” 15 Iha ema seluk hatete, “Laos! Jesus nee Manu-Ain Elias mak moris fali ona!” Iha ema balu tan dehan, “Jesus nee Manu-Ain ida, hanesan Nai Maromak nia Manu-Ain sira uluk.” 16 Bainhira liurai Herodes rona sira koalia hanesan nee, nia dehan, “Loos duni! Jesus nee João Sarani Nain. Foin daudauk nee, hau haruka tesi tia nia kakorok. Agora nia moris fali ona!” 17-18 Liurai Herodes hatete nunee, tanba iha problema boot ho João. Nia istória hanesan nee: Liurai Herodes kaben fali ho nia alin Filipe nia kaben, naran Herodias, maski Filipe ho Herodias seidauk soe malu. Nunee João kritika liurai Herodes dehan, “Liurai, tuir loos Ita boot la bele kaben fali ho Ita nia alin nia feen. Nee bandu makaas!” Maibee liurai Herodes la interese, i haruka ema baa kaer João baa hatama iha kadeia. 19 Tanba João kritika beibeik hanesan nee, feto nee odi João, i buka dalan atu oho nia. Maibee seidauk bele, tanba liurai Herodes lakohi. 20 Bainhira nia hatama João ba iha kadeia, nia haruka soldadu sira hein halo di-diak. Liurai Herodes sei laran susar hela ba João. Tanba nia hatene João nee, Nai Maromak mak haruka mai, i nia moos laran diak. Liurai Herodes gosta rona João nia koalia. Maibee dalaruma, kuandu nia rona João nia koalia, nia laran la hakmatek. 21 Too iha loron ida, feto Herodias hetan tempu diak hodi halo lakon João. Iha loron nee, ema halo liurai Herodes nia tinan. Sira konvida ema bo-boot mai iha festa nee. Konvidadu sira nee, balu hosi estadu nian, balu komandante tropas sira, ho moos nai ulun sira hosi rai Galileia. 22 Iha festa klaran, senyora Herodias nia oan feto tama baa dansa. I nia dansa kapaas tebe-tebes, halo liurai Herodes ho konvidadu sira laran haksolok. Depois liurai Herodes bolu menina nee, hodi promete ba nia, “O hakarak husu saida ba hau, husu deit! Hau sei foo duni. 23 Bele o husu hau nia riku balu moos, hau foo. Hau jura hodi Aman Maromak nia naran!” 24 Depois menina nee baa husu ba nia inan, “Amaa! Amaa hakarak hau husu saida mak diak liu?” Nia inan hataan, “Aaa! O baa husu deit João nia ulun fatuk.” 25 I menina nee baa iha liurai Herodes hodi husu, “Amu! Hau husu deit João nia ulun, tau iha bandeja ida ba hau. Agora kedas!” 26 Rona nunee, liurai Herodes laran lakon kedan. Maibee nia tenki halo tuir deit, tanba nia jura tia ona, i ema barak moos rona. 27 Depois nia foo orden ba komandante ida baa lori João nia ulun hosi kadeia mai. 28 Nunee sira tesi tia João nia kakorok, i depois tau nia ulun iha bandeja ida, hodi mai foo ba menina nee. Nia simu tia bandeja nee, nia kous hodi baa foo nia inan. 29 Kuandu João nia eskolanti sira rona dehan ema mai lori tia João nia ulun, sira moos baa foti tia João nia isin baa hakoi. Nunee mak João nia mate.
Nai Jesus foo hahaan ba ema rihun lima resin
30 Iha loron ida, Jesus nia eskolanti sira nebee Nia haruka baa nee, sira fila fali mai hamutuk ho Nia. I sira konta ba Jesus buat hotu-hotu nebee mak sira halo ona, ho moos buat nebee mak sira hanorin ona ba ema. 31 Maibee momentu nee, ema barak mai buka Jesus. Too Nia ho Nia eskolanti sira moos la konsege haan. Nee duni, Jesus hatete ba Nia eskolanti sira, “Mai ita baa buka fatin ida nebee dook hosi ema, para ita bele deskansa uitoan.” 32 Nunee sira hotu sae bero hodi baa dook tia hosi aldeia laran. 33 Maibee ema barak haree Jesus sira nia bero liu hosi lagoa ninin. Entaun ema hosi aldeia-aldeia halai liu hosi rai maran, i sira too uluk Jesus. 34 Jesus foin too ho bero, Nia haree ema barak nee hein hela ona Nia. Nunee Nia moos hadomi sira, tanba sira la hatene atu halo saida, hanesan bibi malae nebee la iha atan. I Jesus hanorin Nai Maromak nia Lia Fuan ba sira, 35-36 komesa meiu-dia too lokraik. Depois Nia eskolanti sira hatete ba Nia, “Senyór! Diak liu Senyór haruka ema sira nee baa sosa hahaan iha aldeia nebee bes-besik iha nee. Tanba lokraik ona, i la iha hahaan iha nee.” 37 Maibee Jesus hataan, “Lalikan! Imi deit mak foo hahaan ba sira.” Maibee sira hataan fali, “Se ita foo hahaan ba ema barak nunee, ita tenki hasai osan barak tebe-tebes, hanesan ema badaen simu osan iha tinan ida nian. Halo nusaa ita bele hetan osan barak ida nee?!” 38 Maibee Jesus hataan, “Imi baa husu tok, see mak lori bukae iha nee.” Nunee sira baa buka hatene, depois sira mai dehan fali, “Iha paun fuan lima ho ikan rua deit.” 39 Depois Jesus haruka ema sira tuur tia ba rai. 40 I sira tuur tia hotu tuir grupu-grupu. Grupu balu iha ema nain atus ida, i balu iha nain lima nulu. 41 Depois Jesus foti paun fuan lima ho ikan rua nee. I Nia hateke ba leten hodi foo agradese ba Nai Maromak. Tuir mai Nia silu fahe paun sira nee, halo rohan-rohan, i Nia foo ba Nia eskolanti sira, hodi fahe ba ema barak nee hotu. Sira lori moos ikan rua nee baa fahe. 42 I sira hotu haan too bosu. 43 Haan hotu tia, Nia eskolanti sira baa aruma paun restu nee, tau iha bote, too bote sanulu resin rua nakonu. 44 Ema sira nee mais ou menus rihun lima. Nee mane deit. Feto ho labarik seidauk sura.
Nai Jesus lao iha bee leten
45 Nee liu tia, Jesus haruka Nia eskolanti sira baa sae bero hodi baa uluk iha aldeia Betsaida, iha lagoa nia sorin balu ba. Maibee Nia sei hela iha fatin nee, hodi haruka ema barak nee fila ba ida-idak nia uma. 46 Ema sira fila hotu ona, Jesus sae ba foho ida hodi harohan ba Nai Maromak. 47-50 Rai atu besik kalan ona, Jesus haree Nia eskolanti sira ho bero too ona iha lagoa klaran. Sira hean bero nee ho forsa tebe-tebes, tanba anin boot. Atu besik loron ona, Jesus tuir ba sira, lao deit iha bee leten. Nia atu foin lao liu bero nee, sira moos haree Nia. Sira hakfodak, ho tauk atu mate. I sira husu ba malu, “He! Saida mak nee? Klamar ka, saida?” Maibee Jesus bolu ba sira, “Hei! Imi la bele tauk! Hau nee Jesus!” 51 Jesus foin sae ba bero laran, anin boot nee moos para kedas. Nia eskolanti sira admira tebe-tebes. 52 Sira foin haree Jesus uza Nia forsa hodi foo hahaan ba ema rihun lima resin. Maibee sira seidauk komprende di-diak Nia forsa, tanba sira nia ulun toos.
Jesus kura ema moras sira iha Genesaré
53 Sira too iha lagoa nia sorin ba, sira para iha sidade ida naran Genesaré. 54 Sira foin tuun hosi bero, ema barak haree kedan sira. I ema hotu nee haklalak, “Hei! Jesus mai ona!” 55-56 Sira baa foo hatene ba ema hotu. I ema lori moras sira mai Jesus. Depois Jesus sira lao hosi fatin ba fatin. Kuandu ema hatene ona katak Jesus iha fatin ida, sira rame-rame hulan ema moras hodi baa hatoba iha nebaa. Tanba sira hanoin: “Naran katak ema moras nee kona kois Jesus nia hena, sira diak kedas.” Nee loos duni. See mak kona deit Nia hena, diak kedas.
Ema nia kostumi la bele halakon Nai Maromak nia hakarak
1 Iha ema hosi grupu relijiaun Farizeu, ho mestri relijiaun balu mai hosi Jerusalém atu hasoru Jesus. 2-5 Ema Farizeu sira halo tuir lo-loos kostumi Judeu nian. Sira hanorin nunee: Kuandu atu haan, tenki fasi liman uluk tuir kostumi. I kuandu fila hosi merkadu, tenki hariis lai. I kuandu atu uza sasaan dapur nian, tenki fasi uluk. Hanesan bikan, kopu, buli, ou sanan. Nee hotu tenki halo tuir kostumi. Se iha ema Judeu ruma mak la tuir kostumi nee, ema Farizeu sira hirus. Tanba nee, mak sira hirus kuandu sira haree Jesus nia eskolanti sira haan la fasi liman tuir kostumi nia hanorin. Nee duni, sira foo sala ba Jesus, dehan, “Nusaa mak O nia eskolanti sira haan la fasi liman uluk? Imi kontra ita nia kostumi hosi bei-ala sira!” 6-7 Maibee Jesus hataan, “Imi nee koalia oin seluk, halo oin seluk! Hori uluk Nai Maromak nia Manu-Ain Isaias hakerek ona dehan, ‘Ema sira nee adora Hau ho ibun deit, maibee la ho laran. Adora hanesan nee, la iha folin ida. Sira la interese Hau nia hakarak. Maibee sira hanorin deit mak ema nia lei.’ Imi moos nunee. 8-9 Imi husik tia ona Nai Maromak nia orden, i imi tuir deit ema nia kostumi. Para atu halo tuir ema nia hakarak, imi matenek la halimar! 10 Hori uluk kedas, Nai Maromak nia Manu-Ain Moisés foo sai Nai Maromak nia orden dehan, ‘Respeita imi nia inan-aman.’ I Moisés hatete tan, ‘See mak tolok nia inan-aman, ema nee tenki mate.’ 11-12 Nai Maromak hanorin nunee, maibee imi hanorin oin seluk fali. Kuandu ema promete atu foo nia sasaan ida ba Nai Maromak, maski nia inan-aman susar atu mate, imi dehan la bele foo nia sasaan nee ba sira, tanba nia promete tia ona atu foo ba Nai Maromak. 13 Tanba nee mak ohin Hau hatete ona, imi la moris tuir Nai Maromak nia hakarak. Maibee imi troka tia ona ho lei foun. Iha lei barak mak imi troka tia ona hanesan nee.”
Hanoin aat mak sai hosi ema nia laran
14 Liu tia nee, Jesus bolu tan ema barak hodi hatete, “See tilun mai, para imi bele komprende. 15 Buat nebee mak tama ba ema nia laran la halo foer nia. Maibee buat nebee mak sai hosi ema nia laran, nee mak halo foer nia. 16 See mak rona, hanoin di-diak ba!” 17 Depois Jesus ho Nia eskolanti sira husik hela ema barak nee. I sira baa tama iha uma ida. I Nia eskolanti sira husu ba Nia, “Komparasaun ohin nee dehan saida?” 18 Jesus hataan, “Imi beik ka? Komparasaun nee dehan nunee: Buat nebee mak ema haan, la halo foer ema. Maibee buat nebee sai hosi ema nia laran, nee mak halo foer nia. 19 Tanba buat saida mak ema haan, tama ba kabun, depois sai fila fali. (Nunee Nai Jesus hatete dehan ema bele haan hahaan hotu-hotu. La iha bandu.) 20 Buat nebee mak sai hosi ema nia laran, nee mak halo foer ema, too Nai Maromak moos hakribit i lakohi hamutuk ho nia. 21 Tanba buat aat barak mak sai hosi ema nia laran! Hanesan: hanoin aat; halo sala ho feto, halo sala ho mane; naok; oho ema; 22 halo sala ho ema nia kaben; kaan-teen, halo buat aat; hamatak ema; halo tuir deit nia hakarak rasik; laran moras ema; hatete aat Nai Maromak, hatete aat ema; foti-an; ukun la iha, i lakohi rona ema seluk. 23 Buat aat sira nee hotu sai hosi ema nia laran. Nee mak halo foer ema. I Nai Maromak moos hakribit.”
Jesus ajuda feto ida, maski nia laos ema Judeu
24 Liu tia nee, Jesus sira baa iha sidade ida, naran Tiro. Too iha nebaa, sira tama liu ba iha uma ida, tanba Jesus lakohi atu ema hatene katak Nia iha fatin nee. Maibee Nia subar-an la bele. 25-26 Iha fatin nee, iha feto ida, maibee nia laos ema Judeu. Nia moris iha rai Fenísia iha provínsia Síria nebaa. Kuandu nia rona dehan Jesus mai, nia baa hasoru kedas, i nia husu ba Jesus atu duni sai diabu hosi nia oan feto. 27 Maibee Jesus soe lia deit hodi dehan, “Oan sira tenki haan uluk, foin nia restu foo ba asu.” (Nee katak, Jesus tenki ajuda uluk Nia ema Judeu sira, mak foin bele ajuda ema seluk.) 28 Maibee feto nee hataan fali dehan, “Nee loos, Amu! Maibee asu nee iha hela meza okos. Nia moos haan hahaan restu nebee mak monu hosi oan nia bikan.” (Nee katak, kuandu oan sira haan, asu moos bele haan. Jesus bele ajuda Nia ema, maibee Nia moos tenki ajuda ema seluk.) 29 Rona nunee, Jesus hataan feto nee dehan, “Eii! O dehan nee, loos duni! Tanba o hataan nunee, diabu nee sai tia ona hosi o nia oan. O bele fila ona.” 30 I feto nee fila ona ba nia uma. Too iha uma, nia haree nia oan toba hela. Diabu nee sai tia ona.
Jesus kura ema ida nebee tilun diuk ho monok
31 Liu tia nee, Jesus sira husik tia sidade Tiru, i baa fali iha sidade Sidon. Depois sira lao too iha lagoa Galileia. Depois sira baa iha rai Dekapolis. 32 Iha fatin nee, iha ema ida monok ho tilun diuk. Nia maluk sira lori nia ba Jesus. I sira husu ba Nia, “Senyór! Favór ida, ajuda lai. Tau liman ba nia, hodi kura nia.” 33 Nunee Jesus husik hela ema barak nee, i Nia sai ho ema monok nee mesak deit. Depois Jesus hatama nia liman fuan ba iha ema nee nia tilun rua. I Nia moos tau kabeen iha Nia liman, i tau ba ema nee nia nanaal. 34 Depois Jesus hateke ba leten. Nia dada iis, hodi hatete, “Efata! ” (Nee katak, “Nakloke ona ba!”) 35 Nia hatete deit nunee, ema nee nia tilun moos rona. I nia nanaal toos nee moos sai mamar, i nia koalia diak kedan. 36 Nee tia hotu, sira nain rua fila fali ba ema lubuk ida ohin nee. Jesus bandu ba sira dehan, “Rona mai! Imi la bele konta ba ema, dehan Hau mak kura ema nee.” Bele Jesus bandu makaas, maibee sira baa konta iha fatin hotu-hotu. 37 I ema sira nebee rona novidadi nee, sira hakfodak tebe-tebes. Sira foo hatene ba malu dehan, “Ema nee laos halimar! Ema ida nee bele halo buat hotu-hotu sai diak. Ema tilun diuk bele rona. Ema monok moos bele koalia.”
Nai Jesus foo hahaan ba ema rihun haat
1-3 Iha loron ida, ema barak mai hamutuk hodi rona Nai Jesus nia koalia. Ema sira nee hamutuk ho Nia loron tolu kalan tolu ona, too sira nia bukae moos hotu ona. Tanba nee, Jesus bolu Nia eskolanti sira, dehan, “Hau hadomi ema sira nee. Sira iha nee loron tolu kalan tolu ona, too sira la iha hahaan tan ona. Sira la bele fila ho kabun mamuk, tanba balu mai hosi rai dook. Keta halo be sira oin nakukun iha dalan, tanba hamlaha.” 4 Jesus nia eskolanti sira hataan, “Senyór, fatin nee dook hosi aldeia. Halo nusaa mak ita bele foo hahaan ba ema barak ida nee?!” 5 Maibee Jesus husu ba sira, “Imi iha paun fuan hira?” Sira hataan, “Senyór, ami iha paun fuan hitu deit.” 6 Depois Jesus haruka ema barak nee tuur tia iha rai. Tuir mai Nia foti paun fuan hitu nee, foo agradese ba Nai Maromak. Nia silu fahe paun nee, depois Nia foo ba Nia eskolanti sira hodi baa fahe ba ema barak nee. 7 Sira moos iha ikan uitoan. Jesus foo tan agradese ba Nai Maromak ba ikan nee, depois Nia haruka Nia eskolanti sira fahe tan ikan ba ema barak nee. 8-9 Ema sira nee mais ou menus rihun haat. Sira hotu haan too bosu. Haan tia, Nia eskolanti sira baa aruma paun restu nee. Iha bote boot hitu kedan. Hotu tia, Jesus haruka sira fila ona. 10 Sira fila tia, Jesus ho Nia eskolanti sira, baa sae bero, liu hosi lagoa ba iha rai ida naran Dalmanuta.
Ema Farizeu sira husu ba Nai Jesus atu halo milagre, maibee sira husu ho intensaun aat
11 Jesus sira foin too iha Dalmanuta, iha ema balu hosi grupu Farizeu mai hasoru Jesus. Sira mai ho intensaun atu koko Nia. Sira husu ba Nia nunee, “Senyór, halo milagre ruma para hatudu katak O nee simu forsa hosi Nai Maromak.” 12 Jesus dada iis, hodi dehan, “Tanba saa mak imi husu milagre ba Hau?! Milagre iha duni, maibee Hau la halo ba imi.” 13 Hotu tia, Jesus husik hela sira. Nia ho Nia eskolanti sira sae fali bero, hodi baa iha lagoa sorin balu ba.
Nai Jesus dehan, “Kuidadu di-diak ho ema Farizeu sira”
14 Jesus sira too tia ona iha lagoa klaran, foin Nia eskolanti sira hanoin katak sira haluha tia lori bukae. Sira lori deit paun fuan ida. 15 Rona sira koalia kona ba paun, Jesus dehan, “Imi tenki kuidadu ho liurai Herodes ho ema Farizeu sira. Imi la bele fiar liu sira! Tanba sira bele domina imi i halo imi konfundi tia, hanesan moos fermentu domina halo trigu sae.” 16 Rona Nia koalia kona ba fermentu, Nia eskolanti sira moos laran rua-rua. Sira dehan ba malu, “Senyór dehan saida mak nee? Karik Nia dehan nunee, tanba ita la lori paun.” 17 Maibee Jesus hatene saida mak sira hanoin. Nia dehan, “Nusaa mak imi koalia deit kona ba paun?! Imi seidauk komprende ka? Imi nia laran toos tebe-tebes. 18 Imi haree ona ho imi nia matan rasik, maibee imi la komprende nee dehan saida! Imi rona ho imi nia tilun rasik, maibee imi la komprende buat ida. Imi haluha onad 19 paun fuan lima nebee Hau silu fahe hodi foo haan ema rihun lima nee, ka? Loron ida nee imi aruma paun restu bote hira?” Sira hataan, “Senyór, resin bote sanulu resin rua.” 20 Jesus dehan tan, “Hanesan moos foin daudauk, Hau silu fahe paun hodi foo haan ema rihun haat. Imi haluha ka? Imi aruma paun restu bote boot hira?” Sira hataan, “Senyór, resin bote boot hitu.” 21 Jesus dehan, “Nee loos duni! Imi haree ona ho matan rasik, maibee nusaa mak imi seidauk komprende Hau nia forsa nee?”
Nai Jesus kura mane matan aat ida iha Betsaida
22 Depois Jesus ho Nia eskolanti sira too iha aldeia Betsaida. Iha fatin nee ema lori ema matan aat ida, hodi baa aprezenta ba Jesus. Sira husu ba Jesus para bele kura nia. 23 Nunee Jesus kaer ema matan aat nee nia liman i lori sai hosi aldeia. Nia tafui kabeen ba ema nee nia matan, i tau liman ba. Depois Nia husu, “Nusaa? O bele haree ona buat ruma?” 24 Ema nee foti oin hodi haree ba karuk-loos, i nia hataan, “Wei! Hau haree ema lao! Maibee hanesan ai huun mak lao!” 25 Depois Jesus tau tan nia liman ba ema nee. Nunee nia matan moos diak, i bele haree kedas buat hotu-hotu ho moos. 26 Hotu tia, Jesus haruka ema nee fila ba nia uma, dehan, “O bele fila ona, maibee liu hosi dalan seluk! La bele baa fali Betsaida.”
Pedro foo sai dehan Jesus nee mak Kristu, nebee Nai Maromak hili kedan hori uluk ona
27 Jesus ho Nia eskolanti sira baa iha aldeia-aldeia iha Sezareia Filipe. Iha dalan klaran, Nia husu ba sira: “Tuir ema konta, Hau nee see?” 28 Sira hataan, “Ema balu dehan, ‘João Sarani Nain’. Balu tan dehan, ‘Manu-Ain Elias’. I seluk tan dehan, ‘Amu nee, hosi Nai Maromak nia Manu-Ain ida.’” 29 Depois Jesus husu tan ba sira, “Maibee tuir imi nia hanoin, see mak Hau?” Pedro simu hodi hatete, “Ita Boot nee Kristu, nebee Nai Maromak hili hori uluk kedan.” 30 Maibee Jesus bandu sira, “Imi la bele konta ba ema seluk!”
Jesus foo hatene kona ba Nia terus ho Nia mate
31 Nee liu tia, Jesus komesa foo hatene ba Nia eskolanti sira dehan, “Hau nee Ema Oan. La kleur tan, Hau tenki hetan terus tebe-tebes, hosi nai ulun sira, nai-lulik nia ulun sira, ho mestri relijiaun sira. Sira hotu sei lakohi simu Hau. Sira sei oho mate Hau, maibee iha loron tolu, Hau sei moris fali.” 32 Jesus hatete mo-moos deit, depois Pedro dada Jesus ba sorin hodi hirus, “Amu la bele koalia nunee! Hau la husik ema foti liman hasoru Amu.” 33 Jesus fila oin ba Nia eskolanti sira hodi hirus Pedro. Tanba nia koalia nee, la tuir Nai Maromak nia hakarak. I Nia hatete ba Pedro, “He! Nee, diabu nia boot mak koalia. Satanás! Sai hosi nee! O hanoin deit ema nia hakarak, laos Nai Maromak nia hakarak!” 34 Depois Jesus bolu Nia eskolanti sira ho tan ema seluk, hodi hatete ba sira, “See mak hakarak tuir Hau, nia tenki tuir nafatin! Nia tenki husik tia buat nebee mak nia hakarak, hodi tuir deit mak Nai Maromak nia hakarak. Bele ema atu oho nia, nia tenki tuir deit, hanesan ema nebee hasaan kruz too mate. 35 Ema nebee mak mate tanba tuir Hau ho foo sai Hau nia Lia Fuan, nia sei hetan moris nafatin ho Nai Maromak. Maibee ema nebee mak moris deit ba nia aan rasik, nia sei lakon nia moris. 36 Rona di-diak! Bele ema manaan buat hotu iha mundu nee, maibee se Nai Maromak soe nia, nia manaan saida loos? 37 La iha buat ida iha mundu nee, mak ema bele uza hodi troka nia klamar. 38 Agora nee, ema mesak aat deit. Sira la interese atu tuir Nai Maromak. Nee duni, see mak moe tanba Hau, i la brani foo sai Hau nia Lia Fuan, Hau moos sei la simu nia. Tanba Hau, Ema Oan, sei mai fali ho Nai Maromak nia anju sira hosi lalehan. Ami sei tuun mai ho Nai Maromak nia forsa. Foin ema hatene see mak Hau.
1 Imi keta haluha Hau nia lia fuan nee: Hosi imi nee hotu, balu sei moris too haree Nai Maromak tuur kaer hela ukun ho forsa.”
Nai Jesus fila-an tia iha foho ida, i Nia hena moos nabilan
2 Liu tia loron neen, Jesus lori Pedro, Tiago, ho João, sae ba iha foho aas ida. Iha nebaa la iha ema. Kuandu sira too iha foho, sira hakfodak, tanba sira haree Jesus fila-an tia. 3 Nia hena moos mutin nabilan tia. Iha mundu nee, la iha buat ida mak mutin nabilan liu Nia hena nee. 4 Derepenti deit sira haree Jesus koalia hela ho Elias ho Moisés, Nai Maromak nia Manu-Ain hori uluk nian. 5-6 Sira nain tolu tauk atu mate, too Pedro koalia arbiru deit nunee, “Amu! Sorti ami iha nee. Diak liu ami halo uma oan tolu. Ida foo ba Amu, ida ba avoo Moisés, ho ida tan foo ba avoo Elias.” 7 Depois kalohan tuun mai falun tia sira. I sira rona lian ida sai hosi kalohan nee dehan, “Rona mai! Jesus nee Hau nia Oan doben. Imi tenki rona di-diak ba Nia!” 8 Kuandu Pedro sira rona lia fuan nee, sira haree ba-mai, maibee la haree ema ida. Sira haree mak Jesus mesak deit. 9 Nee liu tia, Jesus ho Nia eskolanti sira tuun fila fali hosi foho nee mai. Jesus bandu sira hodi hatete, “Buat nebee ohin imi haree nee, imi la bele konta sai ba ema. Hau nee Ema Oan. Hau tenki mate. Kuandu Hau moris fali ona, foin imi bele foo hatene ba ema.” 10 Sira kaer metin lia fuan nebee Jesus hatete nee. Sira la konta ba ema. Maibee sira nain tolu husu ba malu dehan, “Nia dehan Nia sei mate i moris fali. Halo nusaa mak nee?” 11 Nunee sira husu ba Jesus, “Tuir mestri relijiaun sira dehan, ‘Avó Elias tenki mai uluk, foin Kristu mai.’ Maibee tuir Amu nia hanoin, oinsaa?” 12 Jesus hataan, “Loos duni. Avoo Elias tenki mai uluk hodi loke dalan ba Kristu. Kristu mak Nai Maromak hili hori uluk kedan. Nai Maromak nia Lia Fuan hakerek ona kona ba Ema Oan, dehan nunee: Kuandu Nia mai, ema sei halo terus i oho mate Nia. Nusaa mak imi seidauk komprende? 13 Imi tenki rona di-diak! Avoo Elias mai tia ona. Maibee ema halo susar nia, tuir sira nia hakarak. Buat sira nee hotu hodi kumpri saida mak Manu-Ain sira hakerek tia ona hori uluk.”
Nai Jesus duni sai espíritu aat hosi labarik monok ida
14 Kuandu Jesus ho Nia eskolanti nain tolu nee, hasoru malu fali ho Nia eskolanti sira seluk, sira haree ema barak mak halibur malu hela. I Jesus nia eskolanti balu diskuti hela ho mestri relijiaun sira. 15 Bainhira ema barak nee haree Jesus, sira hakfodak, tanba sira hanoin Nia sei iha hela foho leten. Nunee sira halai baa hasoru Nia. 16 Depois Jesus husu ba sira, “Imi diskuti saida nee?” 17 Maibee iha ema ida dehan, “Amu! Favór ida. Hau lori hau nia oan mane atu Amu kura. Nia monok, tanba espíritu aat tama iha nia. 18 Kuandu espíritu aat nee ataka ona, nia riba labarik nee ba rai. Nia kabeen mutin sai, i halo nia ruun nihan. Depois nia isin toos tia, hanesan ai. Hau husu ona ba Amu nia eskolanti sira, para duni sai tia espíritu aat nee. Maibee sira la bele halo buat ida.” 19 Rona nunee, Jesus koalia makaas ba Nia eskolanti sira, “He! Imi nee demais ona! Hau hanorin beibeik ba imi, maibee imi la komprende nafatin deit. Imi seidauk fiar deit Hau! Hau tenki pasiénsia ba imi too bainhira?! Lori labarik nee mai iha nee!” 20 Nunee sira lori labarik nee ba Jesus. Maibee espíritu aat nee foin hetan Jesus, nia riba kedan labarik nee ba rai, too nia duir ba duir mai, i kabeen mutin moos sai hosi ibun. 21 Haree nunee, Jesus husu ba labarik nia aman, “O nia oan moras nunee, kleur ona ka?” Nia aman hataan, “Komesa nia sei kiik. 22 Kleur ona espíritu aat nee atu oho labarik nee. Nia soe hau nia oan beibeik ba ahi ho ba bee laran. Nee duni Senyór, ajuda lai. Se bele, Senyór hadomi ami, kura labarik nee.” 23 Jesus hataan, “Nusaa mak o dehan ‘se bele’? Hau bele halo buat hotu-hotu, naran katak ema fiar!” 24 Nee hotu tia, katuas nee hataan ho laran susar, “Amu! Hau fiar ona. Maibee tulun hau para hau nia fiar nee bele makaas liu tan.” 25 Kuandu Jesus haree ema barak halai mai hamutuk iha fatin nee, Nia hatete ba espíritu aat nee, “He! Espíritu aat nebee halo labarik nee diuk ho monok! Sai ona hosi nia! I o la bele tama tan ba nia ona.” 26 Rona Jesus koalia nunee, espíritu aat nee hakilar makaas. Nia halo labarik nee monu ba rai, i tebe liman tebe ain. Depois nia sai kedan hosi labarik nee. I labarik moos dezmaia, sai hanesan tia ema mate ida. Too ema koalia ba malu dehan, “Nia mate tia ona!” 27 Maibee Jesus kaer labarik nia liman hodi foti nia. I nia hadeer kedan. 28 Depois Jesus ho Nia eskolanti sira husik hela tia fatin nee, i baa tama iha uma ida. Kuandu sira mesak ona, sira husu ba Jesus, “Amu! Tanba saa mak ami la bele duni sai espíritu aat nee?” 29 Jesus hataan, “Rona di-diak. Espíritu aat sira, aat duni. Tanba nee, se imi la harohan husu ajuda ba Nai Maromak, mak imi la iha forsa hodi duni sai espíritu hanesan nee.”
Nai Jesus foo hatene tan kona ba Nia mate
30 Hotu tia nee, Jesus ho Nia eskolanti sira husik hela tia uma nee, i sira baa iha provínsia Galileia. Jesus lakohi atu ema hatene katak Nia iha fatin nee, 31 tanba Nia atu hanorin deit Nia eskolanti sira. Nia hatete ba sira, “La kleur tan, ema sei faan Hau ba ema seluk. Depois sira sei oho mate Hau, Ema Oan nee. Hau mate duni. Maibee iha loron tolu, Hau moris fali.” 32 Jesus foo hatene nunee, maibee Nia eskolanti sira konfundi hela. Sira la brani husu tan Jesus kona ba Nia koalia nee.
Nai Jesus nia eskolanti sira diskuti malu kona ba see mak boot
33 Liu tia nee, Jesus sira too iha sidade Kafarnaum. Sira tama iha uma laran, i Jesus husu ba Nia eskolanti sira, “Ohin iha dalan, imi diskuti saida?” 34 Maibee la iha ema ida brani atu hataan. Sira moe, tanba iha dalan sira diskuti malu kona ba see mak boot. 35 Depois Jesus tuur tia hodi hanorin sira nunee, “See mak atu sai boot, nia tenki sai ema kiik, i serbí ema hotu-hotu.” 36 Depois Jesus baa kous tia labarik oan ida, hodi baa iha sira nia klaran. I Nia hatete, 37 “See mak tuir Hau, nia tenki simu ema kiik, hanesan labarik oan nee. Kuandu halo hanesan nee, nia moos simu Hau. I see mak simu Hau, nia simu moos Nai Maromak, ida nebee haruka Hau mai iha mundu nee.”
See mak bele sai ita nia ema
38 Depois Jesus nia eskolanti ida, naran João, hatete, “Amu! Iha loron ida, ami haree ema duni sai espíritu aat hodi Amu nia naran. Maibee ami bandu ema nee, tanba nia laos ita nia ema.” 39 Maibee Jesus hataan, “He! Imi la bele bandu nia! Tanba see mak uza Hau nia naran hodi halo milagre, nia sei la hatete aat Hau nia naran. 40 See mak la kontra ita, nia ita nia ema. 41 Nee duni, hanoin di-diak. Se ema hatene imi nee tuir Kristu, mak nia ajuda imi, Nai Maromak moos la haluha ema nee nia kole. Bele nia foo deit bee kopu ida, Nai Maromak la haluha nia.”
Keta halimar ho sala
42 Depois Jesus hatete tan ba sira, “Se ema ruma halo labarik oan ida tuir dalan sala, too labarik nee la fiar tan Hau, kuidadu, é! Diak liu ba ema nee, kesi foti fatuk boot ida ba nia kakorok, hodi baa soe tia ba tasi laran. 43 Se o halo sala ho o nia liman, tesi soe tia liman nee! Tanba diak liu o tama lalehan ho liman ida deit, duke o iha liman rua, maibee o tama ba infernu. 44 Infernu nee fatin terus nian. Iha nee, ular sira nunka mate. I ahi moos nunka mate. 45 Se o halo sala ho o nia ain, tesi soe tia ain nee! Tanba diak liu o tama lalehan ho ain ida deit, duke o iha ain rua, maibee o tama ba infernu. 46 Infernu nee fatin terus nian. Iha nee, ular sira nunka mate. I ahi moos nunka mate. 47 Se o halo sala ho o nia matan, sukit soe tia matan nee! Tanba diak liu o tama ba lalehan ho matan ida deit, duke o iha matan rua, maibee o tama ba infernu. 48 Infernu nee fatin terus nian. Iha nee, ular sira nunka mate. I ahi moos nunka mate. 49 Hau nia hanorin nee, todan tebes. Nee duni, see mak atu tuir Hau, nia tenki tuir nafatin. Hanesan ema tau masin ba naan, i tamun ba ahi, para naan nee bele rai kleur. 50 Masin nee diak duni, tanba halo hahaan furak. Maibee se masin nee, nia meer la iha tan ona, nia la folin ona! Soe tia deit! Imi moos tenki hanesan masin. Imi tenki moris paz ho ema hotu-hotu. Nee duni, para ona ho imi nia diskuti kona ba see mak boot, see mak kiik.”
Kona ba feen ho lain soe malu
1 Liu tia, Jesus sira baa iha provínsia Judeia, ho fatin-fatin iha mota Jordaun nia sorin balu ba. Ema barak mai haleu Nia, i Jesus hanorin sira hanesan bai-bain. 2 Iha moos ema Farizeu balu mai ho intensaun atu hamonu Nia. Sira husu nunee, “Tuir ita nia relijiaun nia hanorin, se mane ida kaben tia ona, nia bele soe nia kaben, ka lae?” 3 Jesus hataan, “Hanoin lai! Lei kona ba feto ho mane, nebee avoo Moisés foo ba ita, dehan halo nusaa?” 4 Sira hataan, “Lei Moisés nian dehan, ‘Ema bele fahe malu, naran katak foo uluk surat soe malu nian ba nia kaben.’” 5 Jesus hataan fila fali, “Tanba imi nia ulun toos, mak Moisés hakerek hanesan nee. 6 Imi keta haluha istória uluk liu kona ba Nai Maromak halo lalehan ho rai. Istória nee hatete katak, ‘Nai Maromak halo ema, mane ho feto. 7 Nee duni, mane sei husik hela nia inan-aman, i baa moris neon ida laran ida ho nia kaben, 8 i sira nain rua, hamutuk ida deit.’ 9 Tanba Nai Maromak hatete ona dehan, sira nain rua hamutuk ida deit, nee duni, ema la bele fahe sira.” 10 Liu tia nee, Jesus ho Nia eskolanti sira tama ba iha uma ida. Iha nee, sira husu ba Jesus kona ba nia lia fuan ohin nee. 11 Jesus hataan, “Se mane ida soe nia kaben, i kaben fali ho feto seluk, ema nee halo sala. 12 I feto moos hanesan! Se nia soe tia nia kaben, i kaben fali ho mane seluk, nia moos halo sala.”
Nai Jesus foo bensaun ba labarik oan sira
13 Iha loron ida, ema lori sira nia oan ba Jesus, i sira husu ba Nia atu tau liman hodi foo bensaun ba sira. Maibee Jesus nia eskolanti sira bandu netik. 14 Jesus haree nunee, Nia hirus Nia eskolanti sira hodi dehan, “Husik labarik sira mai Hau! Keta bandu! Tanba ema hanesan sira nee, mak Nai Maromak nia ema. 15 Imi hanoin di-diak! See mak atu sai Nai Maromak nia ema, nia tenki hanoin Nai Maromak hanesan labarik sira hanoin sira nia inan-aman. Se lae, sira la serve atu sai Nai Maromak nia ema.” 16 Nunee Jesus hakuak labarik oan sira nee, i tau liman ba ida-idak nia ulun, hodi foo bensaun ba sira.
Ema riku ida buka dalan hodi moris hamutuk ho Nai Maromak
17 Kuandu Jesus sira atu sai ona, ema riku ida halai mai hasoru Jesus. Nia hakruuk iha Jesus nia oin, hodi husu, “Mestri mak hau respeita! Ita Boot mak diak. Hau atu husu buat ida nunee: Hau atu halo saida, para hau bele hatene lo-loos katak, hau bele tama lalehan i moris hamutuk ho Nai Maromak?” 18 Jesus hataan, “Tanba saa mak o dehan, Hau ema diak? La iha ema ida mak diak, so Nai Maromak deit. 19 O hatene ona, Nai Maromak nia ukun fuan nebee dehan: ‘La bele oho ema. La bele halo sala ho ema nia feen ou lain. La bele naok. La bele foo testemunya falsu. La bele hamatak ema nia sasaan. I respeita o nia inan-aman.’” 20 Ema nee hataan, “Loos, mestri! Dezde hau sei kiik, ukun fuan sira nee, hau tuir hotu ona.” 21 Jesus hadomi ema nee, i dehan, “Nee loos! Maibee sei falta tan buat ida. Agora o fila ona, i baa faan tia o nia riku-soin hotu. Nia osan nee, o fahe ba ema kiak ho ema susar sira. Foin o mai tuir Hau. Depois Nai Maromak sei foo fali ba o, riku seluk iha lalehan.” 22 Ema nee rona Jesus dehan nunee, nia laran susar tebe-tebes. Nia fila ho laran tristi atu mate, tanba nia ema riku boot. 23 Entaun Jesus haree ba-mai, i hatete ba Nia eskolanti sira dehan, “Rona mai! Ema riku, susar tebe-tebes atu tama ba lalehan.”
Kuda kamelu
24 Rona nunee, Nia eskolanti sira moos hakfodak. Maibee Jesus hatete tan, “Rona mai! Atu sai Nai Maromak nia ema, susar tebe-tebes. Keta hanoin dehan ‘fasil’. 25 Kuda kamelu tama ba nia luhan liu hosi daun kuak, susar liu! Maibee susar liu tan, ema riku atu sai Nai Maromak nia ema, i tama ba lalehan.” 26 Jesus dehan nunee, halo sira bilaan liu tan. Depois sira husu ba malu, “Se nunee tebes, Nai Maromak salva see?” 27 Jesus haree ba sira ida-idak, hodi dehan, “Ba ema, la bele duni. Maibee, ba Nai Maromak, buat hotu-hotu bele!” 28 Depois Pedro hatete ba Jesus, “Amu, ami husik tia ami nia sasaan hotu-hotu ona, hodi tuir Amu. Maibee ami simu saida?” 29-30 Jesus hataan, “Hau hatete ba imi nunee: See mak tuir Hau, i husik hela nia inan-aman, nia maun-alin, nia oan sira, nia toos, nia servisu, i nia uma laran tomak, hodi foo sai Nai Maromak nia Lia Fuan Diak, Nai Maromak sei foo fali dala atus ida. Buat hotu-hotu nebee nia husik nee, nia sei simu fali barak liu tan. Nia moos sei hetan terus, tanba nia tuir Hau. Maibee kuandu mundu nee remata, nia sei moris hamutuk ho Nai Maromak tinan ba tinan. Ida nee mak nia simu. 31 Hanoin di-diak! See mak foti-an boot, tuir Nai Maromak nia hanoin, nia ema kiik liu. Maibee see mak haraik-an hanesan ema kiik, tuir Nai Maromak nia hanoin, nia ema boot.
Nai Jesus foo sai dala tolu ona kona ba Nia mate
32 Iha tempu nee, Jesus sira lao daudaun ba iha Jerusalém. Jesus lao iha oin. I Nia eskolanti sira ho ema seluk tuir Nia. Sira hanoin buat nebee Nia koalia tia ona uluk, i sira laran rua-rua i tauk. Nunee Jesus bolu deit Nia eskolanti sira mesak, hodi foo hatene tan ba sira, saida mak ema atu halo ba Nia iha Jerusalém. 33 Nia hatete, “Imi rona di-diak! Ita agora atu baa Jerusalém, tanba Hau nee Ema Oan. Maibee iha nebaa, ema sei faan Hau, foo ba mestri relijiaun ho nai-lulik nia ulun sira. Depois sira sei tesi lia dehan, Hau tenki mate. Depois sira entrega Hau ba ema sira nebee la konyese Nai Maromak. 34 I ema sira nee tarata Hau. Sira tafui kabeen ba Hau. Sira baku Hau nia isin hodi sikoti too kanek. Nee hotu tia, sira oho mate Hau. Hau mate duni. Maibee iha loron tolu, Hau sei moris fali.”
Tiago ho João husu atu sai ema boot
35 Iha tempu nee, Zebedeu nia oan, Tiago ho João, mai ba Jesus. Sira husu, “Amu! Ami presiza Ita Boot.” 36 Jesus husu, “Imi presiza saida?” 37 Sira hataan, “Nunee, Amu. Aban-bainrua, kuandu Amu tuur kaer ona ukun, ami husu atu Amu foo fatin ba ami: ida tuur iha Amu nia sorin loos, ida iha sorin karuk. Para ami moos bele kaer ukun.” 38 Jesus hataan ba sira, “Imi nain rua nee la komprende saida mak imi husu. La kleur tan, Hau hetan terus tebe-tebes. Nunee oinsaa? Imi hanoin katak imi bele terus hamutuk ho Hau too mate ka?” 39 Sira hataan, “Ami bele, Amu!” Jesus hatete tan ba sira, “Loos duni. La kleur tan, imi moos hetan terus hanesan Hau. 40 Maibee kona ba tuur iha Hau nia sorin loos ka sorin karuk, nee laos Hau nia direitu. Nee Nai Maromak nia direitu. Nia desidi tia ona, see mak bele tuur iha fatin nee.” 41 Kuandu Jesus nia eskolanti sira seluk rona dehan Tiago ho João husu nunee, sira hirus. 42 Depois Jesus bolu sira hotu, hodi dehan, “Ema boot sira iha mundu nee, ukun nunee: Sira sempre hanehan sira nia renu, too renu sira book-an la diak. Ulun sira hosi nasaun nebee la konyese Nai Maromak, sira moos foo orden todan liu, too sira nia renu la bele halo buat ida. 43 Maibee imi la bele halo nunee! See mak atu sai boot, nia tenki haraik-an, i serbí ema seluk. 44 I see mak atu sai nai ulun, nia tenki haraik-an, i sai atan ba ema hotu. 45 Tanba Hau nee Ema Oan. Hau mai iha mundu laos para ema serbí Hau; maibee Hau mai hodi serbí ema, i foo Hau nia aan hodi salva ema barak.”
Nai Jesus kura ema matan aat ida
46 Depois Jesus sira too iha sidade Jerikó. Kuandu sira lao sai hosi sidade nee, ema barak moos tuir. Iha dalan ninin, ema matan aat ida, tuur hela hodi husu ezmola. Nia naran Bartimeu, Senyór Timeu nia oan. 47 Kuandu Nia rona dehan, ema ida liu nee, Jesus hosi Nazaré, nia bolu kedas, “Senyór Jesus! Liurai David nia jerasaun! Hanoin lai hau!” 48 Rona nia bolu nunee, ema hirus nia hodi bandu, dehan, “He! No-nook!” Maibee nia bolu ho lian makaas liu tan, “Senyór Jesus! Liurai David nia jerasaun! Hadomi hau lai!” 49 Nunee Jesus moos para tia, hodi dehan, “Imi bolu nia mai!” I sira dehan ba ema matan aat nee, “Senyór Mestri rona o ona, i Nia bolu o! Hamriik ona!” 50 Rona nunee, Bartimeu soe tia nia manta, hamriik kedan, i baa hasoru Jesus. 51 Jesus husu, “O hakarak saida?” Ema matan aat nee hataan, “Senyór! Hau husu atu hau bele haree.” 52 Jesus hatete tan, “Tanba o fiar katak Hau bele kura o, agora o nia matan diak ona!” I nia matan moos diak kedan. Hotu tia, nia tuir kedan Jesus.
Nai Jesus sira tama ba Jerusalém, i ema hahii Nia hanesan ema boot ida
1 Kuandu sira besik ona sidade Jerusalém, sira too iha aldeia Betfage ho Betánia, iha Foho Oliveira nia lolon. Jesus haruka Nia eskolanti nain rua baa uluk, 2 dehan, “Imi nain rua baa uluk iha aldeia ida nebaa. Too iha nebaa, imi sei haree kuda buru oan ida kesi hela, nebee ema seidauk sae. Imi baa kore tia, i lori mai iha nee. 3 Maibee se ema husu karik, ‘Nusaa mak imi lori tia kuda buru nee?’ Imi hataan nunee, ‘Nai presiza nia. Hotu tia, Nai haruka fila fali kedan.’”
Kuda buru
4 Entaun, ema nain rua nee baa ona. Sira hetan kuda buru oan nee kesi hela iha uma oin, iha dalan ibun. Kuandu sira kore hela kuda oan nee, 5 ema husu, “Nusaa mak imi kore tia ema nia kuda buru oan nee?” 6 Sira hataan, “Nai presiza nia. Hotu tia, Nai haruka fila fali kedan.” Nunee ema husik sira baa. 7 Sira lori kuda buru nee ba Jesus. Sira kahe sira nia manta ba kuda nia kotuk, ba Jesus sae. Nai
Jesus tama ba iha Jerusalém
8 Kuandu sira tama iha sidade, ema barak hasai sira nia manta hodi nahe iha dalan. Balu moos baa taa ramus tahan hodi tau iha dalan. Sira halo nunee hatudu katak sira simu Nai Jesus ho respeita, hanesan sira simu ema boot ida. 9 I sira balu lao iha Jesus nia oin, balu iha Nia kotuk. Sira komesa haklalak, “Hosana! Ami hahii Nai Maromak! Nia foo bensaun ba Ema nebee mai hodi Nia naran! 10 Hosana! Ami hahii Nai Maromak! Nia atu harii fali liurai David nia ukun. Hosana! Ami hahii Nai Maromak iha fatin aas liu.” 11 Too iha sidade Jerusalém, Jesus sira tama ba iha Nai Maromak nia Uma Kreda Boot. Iha nebaa, Jesus haree fatin sira nee hotu. Maibee, tanba tempu la iha tan, maka Jesus ho Nia eskolanti sira fila fali ba aldeia Betánia.
Nai Maromak nia Uma Kreda Boot
Ai huun nebee la iha fuan
12 Aban fali, sira sai hosi Betánia, baa fali iha sidade Jerusalém. Iha dalan klaran, Jesus senti hamlaha. 13 Nia haree ai figeira ida. Ai figeira nee, ema sempre haan nia fuan. Nunee Jesus baa besik ai huun nee, hodi haree tok, iha fuan ka lae. Maibee Nia too iha ai huun nee, la haree ai fuan ida. Tanba laos tempu nia foo fuan. Ai nee foin dikin. 14 Jesus hatete ba ai nee, “Tanba o la foo fuan ba Hau haan, nee duni, komesa agora, o la foo tan fuan ona!” Nia eskolanti sira moos rona Jesus nia lia fuan nee.
Nai Jesus tama ba iha Uma Kreda Boot. I Nia sobu sasaan nebee ema faan iha nebaa
15 Sira too iha Jerusalém, Jesus baa tama iha Nai Maromak nia Uma Kreda Boot. Iha Uma oin, ema halo hanesan basar. Sira faan manu pombu, nebee ema hodi foo oferta ba Nai Maromak. Jesus haree nunee, Nia duni sai ema sira nee hotu. Meza sira nebee ema uza hodi troka osan, Nia halo baku-fila hotu. Banku hodi faan manu pombu moos, Nia halo baku-fila hotu. 16 Nia moos bandu ema hotu la bele lori sasaan tama-sai liu hosi Uma Kreda Boot nia oin. 17 Depois Nia hanorin sira nunee, “Nai Maromak nia ema uluk hakerek tia ona dehan ‘Hau halo Hau nia Uma nee, para ema hosi nasaun hotu-hotu bele mai harohan iha nee.’ Maibee imi halo tia Uma nee, hanesan ema naok-teen sira nia fatin.” 18 Bainhira mestri relijiaun ho nai-lulik nia ulun sira rona katak Jesus halo hanesan nee, sira hirus tebe-tebes. Nunee sira moos buka dalan hodi bele oho mate Nia. Maibee sira la brani, tanba ema barak mak sei gosta rona Nia lia fuan. 19 Rai komesa kalan ona, Jesus sira sai hosi Jerusalém, i fila baa toba iha Betánia.
Se imi fiar tebes katak Nai Maromak bele foo buat nebee mak imi husu, Nia sei foo duni ba imi
20-21 Aban dadeer-saan, sira fila ba Jerusalém. Iha dalan klaran sira haree ai figeira horiseik nee. Ai nee maran tia ona, komesa hosi tutun too abut. Pedro hanoin too Jesus nia lia fuan horiseik nee. Nia dehan, “Amu! Haree tok ai ida horiseik Amu foo malisan nee! Mate tia ona.” 22 Jesus hataan dehan, “Loos duni! Imi moos tenki fiar ba Nai Maromak nunee. 23 Se imi fiar tebe-tebes, imi bele haruka foho ida soe-an tia ba tasi laran. I Nai Maromak sei muda foho nee, naran katak imi fiar tebes. 24 Hanoin di-diak! Buat hotu nebee imi husu ba Nai Maromak, se imi fiar tebes katak Nia sei foo, Nia sei foo duni. 25 Maibee se imi harohan, i imi hirus hela ema ruma, imi tenki baa diak lai ho ema nee. Nunee foin Nai Maromak iha lalehan moos diak ho imi, i sei hamoos imi nia sala. 26 Se imi hirus hela ema ruma, i lakohi diak ho ema nee, Nai Maromak moos la diak ho imi, i la hamoos imi nia sala.”
Ema kritika Nai Jesus kona ba Nia direitu
27 Sira kontinua lao too iha Jerusalém, i tama fali ba Uma Kreda Boot. Iha nebaa, ema barak mak hein hela sira: nai-lulik nia ulun sira, mestri relijiaun sira, ho nai ulun sira. 28 Sira koko Jesus nunee, “See mak haruka O mai halo rungu-ranga horiseik iha nee? See mak foo direitu ba O?” 29 Maibee Jesus hataan, “Hau moos atu husu ba imi. Se imi hataan uluk Hau, mak Hau foin hataan ba imi. 30 Hau husu nunee: Imi hotu konyese João Sarani Nain. See mak haruka nia baa sarani ema? Nai Maromak ka, ema?” 31 Rona nunee, sira hanoin ba-mai, i koalia ba malu dehan, “Ita la bele koalia tan ona! Se ita hataan, ‘Aman Maromak mak haruka,’ mak Nia sei hataan fali, ‘Se nunee, nusaa mak imi la fiar ba João?’ 32 Ita moos la brani dehan, ‘Ema mak haruka,’ tanba ema hotu bele hirus. Tanba sira fiar katak João nee, Nai Maromak nia Manu-Ain.” 33 Entaun sira hataan deit ba Jesus nunee, “Ami la hatene!” Jesus hataan fali, “Se nunee, Hau moos lakohi foo hatene, see mak foo direitu nee ba Hau.”
Komparasaun kona ba ema servisu iha toos uvas nian
1 Jesus koalia nafatin ho nai-lulik nia ulun, ho mestri relijiaun, ho nai ulun sira. Nia dehan, “Hau konta istória ida nunee: Loron ida, iha ema ida baa lere nia rai hodi kuda ai uvas. I nia halo lutu haleu, ho tanki ida hodi sama uvas fuan para hasai nia been. I nia halo moos uma oan ida hodi hein. Depois nia foo toos nee ba ema aluga. Sira promete atu fahe uvas been ho toos nain. Depois toos nain nee baa tia rai dook. Toos uvas nian, uma oan hodi hein, ho tanki hodi sama uvas fuan 2 Kuandu too ona tempu kuu uvas, toos nain haruka nia ema ida baa husu ona nia uvas been. 3 Maibee nia foin too, ema aluga toos nee, kaer nia i baku nia. I sira haruka nia fila ho liman mamuk. 4 Tuir fali mai, toos nain nee haruka tan ema ida baa. Maibee ema aluga toos nee, kaer nia i baku nia ulun too kanek. Sira tarata nia, i duni sai hosi nebaa. 5 Tuir fali mai, toos nain haruka tan nia ema ida baa. Maibee sira oho tia nia. Bele sira halo nusaa deit moos, toos nain haruka nafatin nia ema baa. Maibee ema aluga toos nee, baku balu, i oho balu. 6 Agora hela ema ida deit, toos nain nia oan mane. Nia oan mesak ida deit, i nia hadomi tebe-tebes. Tanba la iha tan dalan seluk, nee duni nia haruka nia oan rasik mak baa. Nia hanoin katak, “Hau nia oan rasik nee, sira tenki simu ho diak, i tenki rona nia.” 7 Nunee nia haruka nia oan rasik baa. Maibee kuandu ema aluga toos nee, haree nia oan nee mai, sira koalia ba malu dehan, “He! Haree lai! Aman katuas haruka nia oan rasik mak mai. Se aban-bainrua, aman katuas mate, nia oan nee mak hetan nia riku hotu. Mai ita oho tia nia, para ita bele hetan nia riku nee!” 8 Nunee sira rame-rame kaer tia nia, i oho tia nia. Depois sira soe sai tia nia toos. Istória nee too iha nee deit.” 9 Depois Jesus husu ba ema boot sira, “Tuir imi nia hanoin, toos nain nee atu halo saida ba ema aluga toos nee? Tuir Hau nia hanoin, toos nain sei baa iha toos nee, i sei oho tia sira hotu. Depois nia foo fali nia toos nee ba ema seluk aluga. 10 Ita hotu lee tia ona iha Nai Maromak nia Lia Fuan dehan, “Iha fatuk ida mak badaen sira soe tia ona. Maibee agora, fatuk nee sai fali fatuk nebee prinsipál liu.” 11 Nai Maromak rasik mak hili fatuk nee. Tanba nee, mak ita admira, ‘Nee diak tebe-tebes!’” 12 Rona nunee, ema boot sira komprende ona katak, Jesus koalia kona ba sira liu hosi komparasaun. Sira nee hanesan ho ema aluga toos nee. Tanba nee, sira buka dalan hodi kaer Nia. Maibee sira la brani, tanba ema barak mak gosta rona Nia. Nunee sira baa ona, husik hela Nia.
Ema mai atu kasa Jesus kona ba selu osan impostu
13 Liu tia nee, nai-lulik ho ema boot sira haruka ema Farizeu balu ho liurai Herodes nia ema balu, ba Jesus ho intensaun aat atu koko Nia. 14 Too ba Jesus, sira hatete, “Senyór, ami hotu hatene katak Senyór nia lia fuan loos, i Senyór la fihir ba ema kiik ka boot, maibee haree deit ba ema nia laran. Ita la fila lia tuun-sae, maibee Ita hanorin Nai Maromak nia lia fuan ho lo-loos deit. Ami atu husu lia fuan ida. Tuir ita nia relijiaun, ita tenki selu osan impostu ba estadu Roma nia liurai boot, ka lae?” 15 Maibee Jesus hatene ona sira mai ho laran makerek, para halo Nia koalia kontra estadu Roma. Entaun Nia hataan ba sira, “Nusaa mak imi kasa Hau? Foo lai osan moeda ida mai Hau haree tok!” Estadu
Roma nia osan moeda
16 Depois sira foo osan moeda ida ba Jesus, i Nia husu ba sira, “Figura nee, see nia oin? Naran nee, see nian?” Sira hataan, “Nee Sesar, estadu Roma nia liurai boot.” 17 Entaun Jesus dehan tan ba sira, “Se nunee, imi foo ba estadu buat nebee mak estadu nian. I foo ba Nai Maromak buat nebee mak Nai Maromak nian.” Rona Nia hataan nunee, sira hotu admira, tanba Nia koalia nee loos. Nunee sira kasa Jesus moos, la hetan.
Ema mate bele moris fali? Iha lalehan, ema kaben ka lae?
18 Nee hotu tia, iha ema grupu relijiaun seluk baa koko tan Jesus. Sira nee hosi grupu Saduseu. Sira hanorin katak, ema mate la bele moris fali. 19 Sira koalia ho Jesus, dehan, “Senyór! Avoo Moisés hakerek hela lia fuan nee ba ita: ‘Se mane ida mate husik hela nia kaben feto, maibee la iha oan, mane nia alin tenki kaben fali ho feto faluk nee, para bele foo jerasaun ba nia maun.’ 20 Agora ami konta istória ida ba Senyór. Iha maun-alin mane nain hitu. Maun boot kaben uluk, depois nia mate, la iha oan. 21 Depois nia alin ida tuir nia nee, kaben fali ho feto faluk nee. La kleur nia moos mate, la iha oan. Nunee moos ho alin ida terseiru. Nia kaben ho feto faluk nee, maibee nia moos mate, la iha oan. 22 Nunee nafatin, too nain hitu nee mate hotu, la iha oan. Tuir mai feto nee moos mate tan. 23 Agora ami husu nunee: Feto nee kaben ho mane nain hitu. Kuandu Nai Maromak halo moris fali ema mate sira, feto nee kaben loos ho mane ida nebee?” 24 Jesus hataan, “Se imi husu nunee, nee hatudu katak imi la komprende Nai Maromak nia Lia Fuan. I imi moos la komprende Nia forsa. Nunee imi sala duni. 25 Rona di-diak! Nai Maromak nia anju sira iha lalehan la kaben. Bainhira Nai Maromak halo ema mate moris fali, sira moos la kaben ona. 26 Agora, Hau koalia fali kona ba ema mate bele moris fali ka lae. Iha avoo Moisés nia lia fuan, iha istória ida kona ba ahi lakan iha ai huun badak ida, maibee ahi la haan. Imi hatene ka? Tempu nee, Nai Maromak foo hatene ba avoo Moisés katak, ‘Hau nee Nai Maromak, nebee o nia bei-ala sira adora. Avoo Abraão, avoo Isac ho avoo Jacó. Sira hotu adora nafatin Hau too agora.’ 27 Se ita lee nunee, ita hatene avoo sira uluk nee moris hela. Tanba Nai Maromak hatete sira adora Nia too agora. Ema mate la bele adora Nai Maromak, maibee ema moris deit mak bele. Nunee, se imi fiar katak ema mate la bele moris fali, imi sala duni.”
Hadomi Nai Maromak ho ema seluk
28 Iha loron nee, mestri relijiaun ida rona Jesus diskuti hela ho ema grupu relijiaun Saduseu sira. Nia rona Jesus hataan loos duni sira nia lia fuan. Nunee nia husu ba Jesus, “Senyór! Hau atu husu lia fuan ida. Tuir ita nia relijiaun, iha orden barak tebe-tebes hosi avoo Moisés. Orden ida nebee mak prinsipál liu?” 29 Jesus hataan, “Orden prinsipál liu mak ida nee: ‘Ema hotu-hotu iha rai Israel! Imi rona di-diak! Nai Maromak nee, ita nia Maromak, i ita nia Liurai Boot! La iha tan seluk, Nia mesak deit! 30 Nunee ita tenki hadomi Nai Maromak ho neon ho laran tomak. Ita tenki hanoin nafatin Nia. Ita tenki rona nafatin Nia Lia Fuan, i hakaas-an hodi tuir Nia hakarak.’ 31 I orden segundu mak ida nee: ‘Ita tenki hadomi ema seluk, hanesan ita hadomi ita nia aan rasik!’ Orden rua nee mak boot liu orden hotu-hotu.” 32 Depois mestri relijiaun nee dehan tan ba Jesus, “Nee loos duni, Senyór! Nai Maromak nee ida deit. La iha tan Maromak seluk. 33 Tanba nee, ita tenki hadomi Nia liu buat hotu-hotu. Ita tenki hanoin nafatin Nia. Ita tenki rona nafatin Nia Lia Fuan, i hakaas-an hodi tuir Nia hakarak. I ita moos tenki hadomi ema seluk hanesan ita hadomi ita nia aan rasik. Nee mak Nai Maromak hakarak, duke ita tuir deit relijiaun nia hanorin. Hadomi nunee diak liu, duke ita oho animál hodi halo sakrifísiu i foo oferta ba Nia.” 34 Rona nia hataan nunee, Jesus hanoin katak, mestri relijiaun nee komprende duni Nai Maromak nia Lia Fuan. Nunee Nia dehan, “O besik ona atu sai Nai Maromak nia ema.” Hotu tia, la iha ema mak brani atu koko tan Jesus.
Kristu nee liurai David nia jerasaun, maibee Nia moos liurai David nia Liurai
35 Jesus sei hanorin hela ema sira iha Nai Maromak nia Uma Kreda Boot. Nia husu ba sira, “Oinsaa? Mestri relijiaun sira hanorin kona ba Kristu nebee Nai Maromak hili ona hori uluk kedan. Sira hanorin dehan, Kristu nee liurai David nia jerasaun deit. Maibee nee seidauk too! 36 Tanba hori uluk Nai Maromak nia Espíritu Santu uza liurai David hodi hakerek nunee: ‘Nai Maromak hatete ona ba hau nia Liurai dehan, “Mai tuur iha Hau nia sorin loos, fatin ema boot nian. Hau sei halo o nia inimigu sira, hakruuk ba o.’” 37 aNunee liurai David rasik bolu Kristu, ‘hau nia Liurai’. Nee duni, se ema dehan Kristu nee, liurai David nia jerasaun deit, nee seidauk too! Tanba Nia moos liurai David nia Liurai!”
Jesus dehan kuidadu ho mestri relijiaun sira, tanba sira gosta fila lia tuun-sae
Ema barak nebee rona Jesus nia hanorin nee, sira gosta loos. 38 Depois Jesus hatete tan ba sira nunee, “Imi tenki kuidadu di-diak ho mestri relijiaun sira. Sira gosta pasiar ho batina naruk, para ema haree sira, i komprimenta sira hanesan ema boot. 39 Kuandu sira baa iha uma kreda ka, baa iha festa, sira sempre buka tuur iha fatin ida diak liu, para ema hotu bele gaba sira, i hodi dehan sira, ema boot. 40 Maibee imi tenki kuidadu! Tanba sira fila lia hodi hamatak feto faluk sira, too hadau sira nia uma hotu. Maibee iha ema barak nia oin, sira finji harohan nar-naruk, hodi taka falta sira nia hahalok aat nee. Para ema bele dehan, sira ema moos. Maibee Nai Maromak sei foo kastigu todan liu ba sira.”
Feto faluk kiak ida foo oferta boot liu ema riku sira
41 Liu tia nee, Jesus tuur hela besik kaixa oferta iha Uma Kreda Boot laran, hodi haree ema baa tau osan oferta ba kaixa. Iha ema riku barak baa tau osan boot ba kaixa nee. 42 Iha moos feto faluk kiak ida mai harohan. Nia baa tau doit rua ba iha kaixa laran. Osan nee folin kiik liu. 43 Depois Jesus bolu Nia eskolanti sira hodi hatete, “Imi haree tok feto faluk kiak nee. Nia foo osan doit rua deit, maibee nia foo boot liu ema hotu-hotu. 44 Ema sira seluk foo oferta hosi sira nia osan resin. Maibee feto faluk kiak nee, foo tia nia osan hotu ba Nai Maromak. Hodi hola hahaan moos, la iha ona.”
Nai Jesus foo hatene antes kedan katak, Nai Maromak nia Uma Kreda Boot sei rahun
1 Liu tia nee, Jesus ho Nia eskolanti sira sai hosi Uma Kreda Boot. Sira foin sai nunee, Nia eskolanti ida hatudu ba Uma Kreda nee, hodi dehan, “Senyór! Haree tok ba! Uma Kreda nee kapaas loos. I fatuk boot ema hada nee, kapaas tebe-tebes.” 2 Maibee Jesus hataan, “Uma Kreda nee kapaas duni. Maibee la kleur tan, ema sei baku rahun tia hotu.”
Sinál kona ba fin du mundu
3 Liu tia nee, Jesus baa iha foho Oliveira. Nia tuur hodi hateke hela ba Nai Maromak nia Uma Kreda Boot. Depois Nia eskolanti nain haat baa koalia ho Nia. Ema nain haat nee, Pedro, Tiago, João ho André. 4 Sira husu, “Senyór! Halo favór, Senyór foo hatene fali kona ba Ita nia lia fuan ohin nee. Bainhira mak tempu nee too? Ho sinál-sinál saida mak sei mosu?” 5 Jesus hataan, “Imi tenki kuidadu di-diak, para ema la bele bosok imi. 6 Tanba ema barak sei mai dehan, ‘Hau nee Kristu, ida nebee Nai Maromak promete hori uluk ona.’ Nunee sira sei bosok ema barak. 7 Se imi haree ema funu, ou imi rona lia kontadu dehan ema funu iha fatin-fatin, imi keta tauk. Tanba buat sira nee tenki mosu uluk, molok mundu nee remata. 8 Suku sei funu hasoru suku. Nasaun sei funu hasoru nasaun. Rai sei nakdoko iha fatin-fatin. I rai sei hamlaha boot! Buat sira nee hotu sinál, hanesan feto ida foin komesa kanotak moras, atu besik tuur-ahi. 9 Nee duni, imi tenki atensaun di-diak! Tanba ema sei mai kaer imi, hodi baa iha tribunál relijiaun nian. Ema sei baku imi iha uma kreda laran, i sei kesi imi lori ba iha ukun nain sira, tanba imi tuir Hau. Maibee imi tenki foo sai Hau nia Lia Fuan Diak ba sira. 10 Tanba ema hosi suku hotu-hotu iha mundu tomak tenki rona uluk Hau nia Lia Fuan Diak, foin mundu nee remata. 11 Hanoin di-diak! Kuandu ema kesi i lori imi ba tribunál, imi lalikan hakfodak. La bele tauk kona ba saida mak imi atu koalia. Imi tenki koalia deit tuir saida mak Espíritu Santu foo hatene ba imi. 12 Iha uma laran ida, se iha ema balu fiar ba Hau, nia maun-alin rasik mak sei buka dalan hodi oho nia. I se oan mak fiar, nia aman rasik mak sei oho. Nunee moos, se inan-aman mak fiar ba Hau, nia oan mak sei oho. 13 Nunee ema sei odi makaas imi, tanba imi fiar ba Hau. Maibee see mak fiar nafatin ba Hau too mate, Nai Maromak sei salva nia.”
Atensaun di-diak, tanba mundu nee besik remata ona
14 Jesus koalia tan, “Iha Ema Aat Liu sei mai. Nia sei tama baa hamriik iha Nai Maromak nia Uma Kreda Boot laran, iha fatin ida nebee lulik liu. Tuir loos, nia la iha direitu atu tama iha fatin nee. Nee duni, tanba nia tama ona, ema hotu sei hakribit fatin nee, i Nai Maromak moos fila kotuk tia. Se imi haree nunee, kuidadu di-diak! (See mak lee ida nee, nia moos tenki komprende i kuidadu.) Sinál nee hatudu katak, loron terus besik ona. Se haree ona nunee, ema iha provínsia Judeia tenki halai ona ba foho. 15 Sira tenki halai lailais, para la bele hetan susar. Ema nebee sai ona hosi uma, la bele fila fali baa foti sasaan. 16 Nunee moos ema nebee mak iha toos, la bele fila fali baa foti tan nia hena. Nia tenki halai ba oin nafatin. 17 Tempu nee susar liu ba feto sira nebee mak sei isin-rua, ho sira nebee mak sei foo susu ba sira nia oan. Tanba sira halai la bele. 18 Nee duni, diak liu imi harohan hodi husu tempu aat nee, la bele monu iha tempu udan. 19 Tanba tempu terus nee, susar atu mate. Komesa Nai Maromak halo mundu nee too agora, ema seidauk hetan terus boot ida nunee. Nee liu tia, ema sei la haree tan terus boot ida hanesan nee. 20 Se Nai Maromak mak la halo badak tempu terus nee, la iha tan ema ida atu moris. Maibee tanba Nia hadomi Nia ema sira nebee Nia hili ona, nunee Nia habadak tempu terus nee. 21 Iha tempu nee, imi sei rona ema dehan, ‘Haree tok! Kristu iha nee!’ I ema seluk dehan, ‘Kristu iha nebaa!’ Maibee imi keta rona. 22 Tanba ema sei mai foti-an, dehan, ‘Hau nee mak Kristu!’ Iha seluk tan dehan, ‘Hau nee Nai Maromak nia Manu-Ain! Imi rona mai!’ Sira sei halo milagre oi-oin ho diabu nia forsa hodi bosok ema. Sira moos hakaas-an atu halo Nai Maromak nia ema sira monu. 23 Nee duni, imi tenki kuidadu di-diak! Tanba tempu terus nee seidauk too mai, maibee Hau foo hatene kedan ba imi ona.”
Ema Oan sei mai fali
24 Depois Jesus foo hatene tan ba Nia eskolanti sira nunee, “Kuandu tempu terus nee hotu tia ona, Loro matan sei nakukun, Fulan moos la naroman tan. 25 Fitun sira monu hosi lalehan, I forsa hotu-hotu iha lalehan sei nakdoko arbiru. 26 Nee liu tia, foin ema haree Hau, Ema Oan, tuun mai ho kalohan. Nunee ema sei haree Hau nia naroman nabilan, ho Hau nia forsa boot. 27 I Hau sei haruka Nai Maromak nia anju sira hosi lalehan baa halibur ema hotu-hotu nebee Hau hili tia ona, hosi mundu tomak. Hosi rai ulun too rai ikun, hosi loro-sae too loro-monu, hosi tasi feto too tasi mane.
Tempu terus boot nee, hatudu katak Jesus atu mai fali ona
28 Hau halo komparasaun hosi ai huun ida. Kuandu ai tahan kinur ona, nee hatudu katak besik ona bailoro. 29 Nunee moos, kuandu tempu terus nebee Hau hatete ba imi, too ona, nee hatudu katak Hau besik fila ona. 30 Agora, rona di-diak! Hosi ema hotu nebee moris agora, iha balu sei moris too tempu terus nee too mai. 31 Lalehan ho mundu nee sei remata, maibee Hau nia Lia Fuan sei la lakon.
Nai Jesus nia loron fila mai, segredu
32 Agora, Hau foo hatene kona ba tempu nebee Hau fila mai: la iha ema ida mak hatene loron ho oras nee. Nai Maromak nia anju sira iha lalehan moos la hatene. Hau rasik moos la hatene. So Hau nia Aman deit mak hatene. 33 Nee duni, imi tenki neon moris matan moris! Tanba imi la hatene loron nebee mak Hau sei fila mai. 34 La kleur tan, Hau husik hela imi ona, maibee Hau sei fila fali mai. Hanesan ema ida baa rai dook. I nia haruka nia ema uma laran tau matan ba nia uma nee. I nia fahe servisu ba ema ida-idak. I nia foo orden ba ema seguransa atu hein uma nee di-diak too nia fila. 35 Nunee moos, imi tenki hein loron-kalan, tanba imi la hatene bainhira mak uma nain fila. Fila lokraik ka, kalan boot ka, dadeer saan nakukun ka, meiu-dia ka, imi la hatene. 36 Keta halo be nia fila derepenti, imi toba nakoron hela. 37 Nunee, saida mak Hau hatete ba imi nee, Hau hatete moos ba ema hotu-hotu, ‘Imi tenki neon moris matan moris, hodi hein Hau mai.’” Too iha nee, Nai Jesus moos para ona koalia ho Nia eskolanti sira iha foho Oliveira.
Ema boot sira buka dalan atu kaer no-nook Nai Jesus
1-2 Nee liu tia, nai-lulik nia ulun sira ho mestri relijiaun sira buka tempu diak hodi kaer Jesus ho no-nook para oho. Maibee sira dehan, “Hein lai. Ita la bele kaer lai Nia, tanba loron boot besik ona. Keta halo be ema barak halo rungu-ranga.” Sira koalia nunee, tanba loron rua tan, ema Judeu sira nia loron boot, ida nebee sira bolu ‘Festa Páskua’, ho ‘Festa Paun la Tau Fermentu’. Iha loron festa nee, sira hanoin fali tempu uluk, nebee sira nia bei-ala sira sai hosi Rai Ejiptu.
Feto ida fui mina morin karu ba Nai Jesus
3 Iha aldeia Betánia, iha ema ida naran Simão. Uluk ema hotu hakribit nia, tanba nia hetan moras lepra. Maibee agora nia diak tia ona. Antes loron boot too, Jesus sira baa haan iha Simão nia uma. Momentu sira haan hela, iha feto ida mai hasoru Jesus. Nia lori mina morin botir ida. Mina morin nee folin karu tebe-tebes. Depois nia baku rahun tia botir nia ibun, i fui mina morin nee ba Jesus nia ulun. Nee hatudu katak nia respeita Jesus hanesan ema boot. 4 Maibee iha fatin nee, iha moos ema seluk. Kuandu sira haree nia halo nunee, sira hirus nia. I sira dehan ba malu, “See mak feto ida nee? Nusaa mak nia bele fui saugati tia mina morin ida karu tebe-tebes nee?! 5 Diak liu nia faan deit mina morin nee. I nia osan hodi baa foo ba ema kiak sira. Tanba mina morin nee folin karu, hanesan badaen ida manaan osan iha tinan ida nia laran.” 6 Maibee Jesus hataan, “Imi keta hirus feto nee. Husik ba. Hau kontenti, tanba nia tau ona mina morin nee ba Hau nia isin. 7 Ema kiak sira sempre hamutuk ho imi. Nunee imi bele ajuda sira iha loron nebee deit. Maibee la kleur tan, Hau la hamutuk ho imi ona. Tanba Hau nia mate besik ona. 8 Ema atu hakoi Hau. Maibee feto nee tau kedan ona mina morin ba Hau. Nunee, nia halo buat diak ida. 9 Hanoin di-diak! Bainhira ema foo sai Nai Maromak nia Lia Fuan iha mundu tomak, sira moos sei konta kona ba feto nee nia hahalok diak nee. Nunee, ema hotu bele hanoin kona ba nia.
Judas hanoin aat atu faan Jesus
10 Nee liu tia, Jesus nia eskolanti ida hosi sira nain sanulu resin rua nee, sai hosi Simão nia uma. Nia nee Judas Iscariotes. Nia baa buka nai-lulik nia ulun sira, atu faan Jesus ba sira. 11 Hasoru tia sira, nia kontratu atu entrega Jesus ba sira. Kuandu sira rona nia koalia nunee, sira gosta tebes. I sira promete dehan, “Se o halo nunee, ami sei foo osan.” Depois Judas sai baa buka dalan hodi foo Jesus ba sira.
Nai Jesus haan hamutuk ho Nia eskolanti sira iha festa Páskua
12 Depois ema Judeu sira nia loron boot komesa. Iha loron primeiru sira tunu paun, maibee la tau fermentu. I sira moos oho bibi malae hodi halo festa. Nunee Jesus nia eskolanti sira mai husu ba Nia, “Senyór, ita hakarak ami baa prepara festa Páskua iha nebee?” 13 Jesus haruka Nia eskolanti nain rua dehan, “Imi baa uluk iha sidade Jerusalém. Imi sei hetan mane ida hasaan bee iha sanan rai ida. Imi tuir deit nia. 14 Nia tama ba uma nebee, imi tuir deit nia. Depois imi hatete ba uma nain nunee, ‘Senyór! Ami nia Mestri husu fatin ida, para nia uza hodi halo festa Páskua ho Nia eskolanti sira.’ 15 Depois ema nee sei hatudu kuartu boot ida iha uma andár leten. Nia prepara kompletu tia fatin nee ona. Hela deit imi nain rua baa prepara hahaan.” 16 Nunee sira nain rua baa ona iha sidade. Iha nebaa sira hetan buat hotu-hotu tuir Jesus hatete ona ba sira. I sira prepara hahaan festa Páskua nian. Depois sira baa bolu Jesus sira. 17 Lokraik ona, Jesus ho Nia eskolanti nain sanulu resin rua baa iha nebaa. 18 Sira tuur hodi haan hamutuk. Sira sei haan hela, Jesus komesa koalia, “Imi rona mai! Iha ema ida hosi imi mak sei faan Hau ba ema seluk.” 19 Rona nunee, sira laran susar tebe-tebes. I sira ida-idak husu ba Jesus dehan, “Senyór, laos hau, to?” 20 Jesus hataan, “Ema nebee hoban nia paun hamutuk ho Hau iha manko nee, nia nee mak sei faan Hau. 21 Rona di-diak! Hau, Ema Oan. Hau tenki mate duni tuir saida mak sira hakerek ona iha Nai Maromak nia Lia Fuan. Maibee imi tenki kuidadu! Ema nebee faan Hau nee, nia rasik sei lori nia todan. Diak liu nia inan la bele hahoris nia iha mundu nee.”
Nai Jesus foo hatene katak paun ho tua hanesan sinál hodi hanoin Nia
22 Sira sei haan hela, Jesus foti paun fuan ida, hodi foo agradese ba Nai Maromak. Depois nia silu paun nee i fahe ba Nia eskolanti sira. Nia hatete, “Paun nee Hau nia isin. Simu hodi haan ba.” 23 Depois Nia foti fali tua kopu ida. Nia foo tan agradese ba Nai Maromak. Depois Nia foo tua kopu nee ba Nia eskolanti sira hemu. 24 I Nia hatete, “Tua nee Hau nia raan. Raan nee, sei fakar hodi salva ema barak. Raan nee hatudu katak buat nebee mak Nai Maromak promete ona, agora mosu tia ona. Simu hodi hemu ba. 25 Rona di-diak! Komesa kalan nee, Hau la hemu tan tua ona. Too Hau tuur hodi ukun ho Hau nia Aman iha lalehan, foin Hau hemu fali.” 26 Nee hotu tia, sira kanta hamutuk hodi hahii Nai Maromak. Depois sira sai, hodi baa iha foho Oliveira.
Nai Jesus foo sai uluk katak, Pedro sei nega Nia
27 Iha dalan klaran, Jesus hatete ba sira, “Orsida kalan, imi hotu-hotu sei halai husik hela Hau mesak. Nee tuir Nai Maromak nia Lia Fuan nebee ema hakerek tia ona: ‘Hau sei oho tia bibi atan. Nunee nia bibi sira sei halai namkari.’ 28 Hau sei mate duni. Maibee kuandu Hau moris fali, Hau baa uluk imi iha provínsia Galileia.” 29 Rona nunee, Pedro kontra kedas Jesus hodi dehan, “Amu! Bele ema hotu halai husik hela Amu, maibee hau mak lae duni. Hau sei la husik Amu hela mesak.” 30 Jesus hataan, “Apeu! Hanoin di-diak! Orsida kalan, molok manu kokoreek dala rua, o sei nega Hau dala tolu.” 31 Pedro simu tan, “Lae, Amu! Bele ema atu oho hau moos, hau sei la nega Amu!” Pedro nia kolega sira moos hatete nunee.
Nai Jesus harohan iha Getsemani
32 Nee liu tia, Jesus sira lao nafatin too iha plantasaun ida iha foho Oliveira. Fatin nee naran Getsemani. Jesus hatete ba Nia eskolanti sira, “Imi tuur lai iha nee. Hau sei baa harohan iha nebaa.” 33 Nia lori deit Pedro, Tiago ho João ba hamutuk ho Nia. Momentu nee, Nia laran komesa susar i tristi tebe-tebes. 34 Nia hatete ba sira, “Hau nia laran susar liu! Too Hau senti atu mate deit. Imi hein lai iha nee.” 35-36 Depois Jesus lao ba oin oituan. Nia monu ba rai, i harohan ho laran susar. Nia dehan nunee, “Apaa. Se Apaa hataan, Hau lalikan simu terus too mate hanesan nee. Apaa bele halo buat hotu-hotu. Nunee, se bele, Apaa hasai tia terus nee hosi Hau. Maibee la bele tuir Hau nia hakarak. Tuir deit Apaa nia hakarak.” 37 Liu tia, Nia fila ba Nia eskolanti nain tolu nee, maibee sira toba dukur hela. I Nia fanu sira, hodi dehan ba Pedro, “He! Apeu! O toba ka?! Hau iha nebaa la kleur ida. Nusaa mak imi la bele hein oituan?! 38 Hadeer ona! Imi nia laran hakarak duni halo buat diak, maibee imi nia isin mak fraku. Tanba nee, imi tenki harohan, para kuandu hetan tentasaun ruma, imi la monu.” 39 Depois Jesus baa harohan dala ida tan. Nia husu fali ba Nai Maromak para Nia la bele simu terus boot nee. 40 Depois Nia mai, haree Nia eskolanti nain tolu nee. Maibee sira toba hela tan, tanba sira matan dukur atu mate. I Nia fanu fali sira, maibee sira la hatene saida mak sira atu hataan ba Nia. 41 Nee liu tia, Jesus husik hela sira, hodi baa harohan tan. Nee dala tolu ona. Liu tia, Nia mai fanu sira. Nia dehan, “Imi sei toba tan ka?! Too ona! Hau nee Ema Oan. Agora, ema mai kaer Hau, hodi entrega ba ema aat sira nia liman. 42 Hadeer ona! Loke imi nia matan hodi haree tok. Ema ida atu faan Hau nee, mai ona. Mai ita baa hasoru sira.”
Ema kaer Nai Jesus
43 Jesus sei koalia hela, Judas moos mai ho ema barak. Sira lori ai dona ho punyaal hodi kaer Jesus. Sira tuir orden hosi nai-lulik nia ulun sira, mestri relijiaun sira, ho nai ulun sira. 44 Antes sira mai, Judas foo sinál kedas dehan, “Imi haree di-diak! Ema ida hau baa rei nee, Nia mak nee. Imi kaer kedan Nia i lori ba.” Judas rei Nai Jesus hodi foo sinál 45 Nunee, kuandu Judas too ba, nia baa kedas Jesus hodi hatete, “Mestri!” I nia moos rei Jesus. 46 Haree Judas nia sinál, ema barak mai kaer Jesus. 47 Maibee Jesus nia eskolanti ida losu espada, hodi tesi tia ema ida nia tilun. Ema kanek nee, nai-lulik nia boot nia atan. 48 Jesus moos hatete ba ema sira nebee kaer Nia nee, “Nusaa! Imi hanoin Hau ema naok-teen ka? Nee mak imi mai atu kaer Hau lori ai dona ho espada! 49 Loro-loron Hau hanorin hela imi iha Nai Maromak nia Uma Kreda Boot laran, maibee la iha ema ida atu kaer Hau. Agora, mai kaer Hau ona ba! Tanba nee, hakerek tia ona iha Nai Maromak nia Lia Fuan.” 50 Jesus nia eskolanti sira tauk atu mate. I sira hotu halai namkari soe hela Jesus mesak deit. 51 Iha nee moos, iha ema klosan ida tuir iha Jesus nia kotuk. Nia falun-an ho deit hena rohan ida. Ema sira nee atu kaer moos nia, 52 maibee sira kaer deit mak nia hena, i nia halai ho isin molik deit, tanba nia tauk atu mate.
Ema boot sira foo justisa ba Nai Jesus dehan Nia tenki mate
53 Liu tia nee, sira lori Jesus ba iha nai-lulik nia boot nia uma. Iha uma nee, ema Judeu nia ema boot sira halibur malu hodi foo justisa ba Jesus. Sira nee, nai-lulik nia ulun sira, mestri relijiaun sira, ho nai ulun sira. 54 Kuandu ema kaer ona Jesus hodi ba, Pedro moos tuir subar hosi kotuk, too iha nai-lulik nia boot nia uma. Nia moos tama ba iha kintál laran, i baa haneruk ahi hamutuk ho ema sira iha nebaa. 55 Iha uma laran, nai-lulik nia ulun sira koalia ho membru sira hosi Konselyu Relijiaun Judeu nian. Sira hotu buka Jesus nia sala atu hamonu Nia, para bele kastigu mate Nia. Maibee sira buka Jesus nia sala, la hetan. 56 Sira bolu ema barak mak mai foo testemunya. Maibee testemunya sira nee, lia fuan la haan malu. 57 Iha ema balu hamriik foo testemunya falsu, hodi hatete, 58 “Ami rona ema nee dehan, ‘Hau sei halo rahun tia Nai Maromak nia Uma Kreda Boot, nebee ema halo ho liman. Depois, iha loron tolu, Hau sei harii fila fali uma nee, maibee la uza ona ema nia liman.’” 59 Maibee sira nia lia fuan nee moos, la haan malu. 60 Depois nai-lulik nia boot hamriik iha ema barak sira nia oin, hodi husu ba Jesus, “Ema barak foo sala ba o. Nusaa mak o no-nook deit?” 61 Maibee Jesus la hataan lia fuan ida. Nai-lulik nia boot husu dala ida tan ba Nia, “O hatete lai! Nai Maromak promete ona hori uluk atu haruka Kristu mai. O mak Kristu, Nai Maromak nia Oan, ka lae?” 62 Jesus hataan, “Loos duni! Hau nee mak Kristu. Imi sei haree Hau, Ema Oan, tuur iha Nai Maromak nia liman loos hodi ukun hamutuk ho Nia, Ida nebee Forsa tebe-tebes. I imi sei haree Hau tuun ho kalohan hosi lalehan mai.” 63 Rona Jesus koalia nunee, nai-lulik nia boot hirus aat liu, too nia lees tia nia hena. Depois nia hatete ba ema barak nee, “Ita la presiza tan testemunya ona. 64 Imi rona ona ho tilun rasik, Nia rasik dehan, Nia mak Nai Maromak nia Oan rasik. Hanesan nee, Nia hatete aat Nai Maromak. Tuir ita nia lei relijiaun, see mak foti-an hanesan ho Nai Maromak, ema nee tenki oho mate. Agora, ita tesi halo nusaa?” Sira hotu-hotu tesi nunee, “Ema ida nee sala duni! Nia tenki mate.” 65 Depois ema balu tafui kabeen ba Jesus. Sira taka tia Nia matan, i tuku Nia hodi husu, “He! O siik tok. See mak tuku O nee?” Depois sira foo orden ba ema seguransa sira hosi Uma Kreda Boot atu mai lori Jesus. I ema seguransa sira moos baku Nia.
Pedro nega dala tolu katak, nia la konyese Nai Jesus
66-67 Iha momentu nee, Pedro sei tuur hela iha kintál laran hodi haneruk ahi. Nai-lulik nia boot nia kriada ida, baa fihir di-diak Pedro nia oin, hodi hatete, “Ohin o moos hamutuk ho Jesus, ema Nazaré nee. Loos ka lae?” 68 Pedro hataan, “Lae ida! Nusaa mak o husu nunee?! Hau la konyese Nia.” Depois Pedro hamriik, baa tia iha portaun. Iha momentu nee duni, manu moos kokoreek. 69 Depois kriada nee haree tan Pedro. Feto nee komesa hatete ba ema hotu-hotu iha kintál laran, “Nia nee hosi sira nia ema.” 70 Pedro hataan ho makaas, “O bulak karik! Ema ida nee, hau la konyese duni.” La kleur, ema ida tan hatete ba Pedro nunee, “He! Nusaa mak o sei fila lia tuun-sae, dehan o la konyese ema nee?! Hau hatene imi hotu ema Galileia.” 71 Maibee Pedro nega tan, dehan, “Hau jura! Hau la konyese ema nee.” 72 Nia foin koalia nunee, manu moos kokoreek dala ida tan. Pedro hanoin too Jesus nia lia fuan nebee dehan, “Molok manu kokoreek dala rua, o sei nega Hau dala tolu.” Nunee Pedro tanis.
Ema lori Nai Jesus ba Governadór Pilatus
1 Rai-huun mutin, ema boot sira tesi dehan Jesus tenki mate. Depois sira kesi tia Jesus, i lori ba governadór Pilatus. 2 Kuandu sira too iha Pilatus, nia husu ba Jesus, “Nusaa? O nee mak ema Judeu sira nia liurai duni ka?” Jesus hataan, “Loos. Ita Boot dehan nee, loos duni.” 3 Depois nai-lulik nia ulun sira koalia ho governadór Pilatus, dehan, “Ema ida nee halo sala barak ona.” I sira foo sai Nia sala ida-idak. 4 Depois governadór Pilatus husu dala ida tan ba Jesus, “O la rona sira nia koalia nee? Sira foo sala barak ba o. Nusaa mak o la defende-an?” 5 Maibee Jesus la hataan lia fuan ida, too halo governadór nee moos admira.
Governadór Pilatus foo kastigu mate ba Jesus
6 Kuandu ema Judeu sira halo festa Páskua, tuir sira nia kostumi, povu sira bele husu ba governadór atu hasai ema ida hosi kadeia. 7 Iha loron nee, iha ema kastigu ida iha kadeia, naran Barabas. Uluk ema kaer nia, tanba nia kontra estadu Roma, i nia moos oho ema. 8 Tanba festa Páskua besik ona, ema barak baa iha governadór Pilatus. Sira husu dehan, “Senyór governadór! Loron Páskua too ona. Se bele, senyór governadór hasai ema ida hosi kadeia hanesan baibain.” 9 Governadór hataan fali dehan, “Hau atu hasai see? Imi hakarak hau hasai mak ema Judeu sira nia liurai nee? Imi hataan ka lae?” 10 Governadór koalia nunee, tanba nia hatene ona katak nai-lulik nia ulun sira odi tebe-tebes Jesus. 11 Maibee nai-lulik nia ulun sira, tau lia ba ema barak nee, atu sira husu ba governadór, “Ami lakohi simu Nia. Hasai mak Barabas.” 12 Rona nunee, governadór husu tan fali, “Se nunee, hau tenki halo saida ba Jesus nee, ida nebee imi bolu liurai Judeu?” 13 Sira hotu-hotu hakilar hodi dehan, “Oho tia Nia! Prega tia Nia ba kruz!” 14 Depois governadór husu tan, “Maibee Nia sala saida? Tuir hau nia hanoin, Nia la iha sala ida.” Maibee sira hotu-hotu hakilar makaas liu tan dehan, “Oho tia Nia! Prega tia Nia ba kruz ona!” 15 Tanba governadór atu halo ema barak laran kontenti, nia hasai Barabas hosi kadeia, tuir sira nia hakarak. Depois nia foo orden ba soldadu sira baku Jesus ho sikoti. Baku tia hotu, sira lori Jesus atu prega iha kruz too mate.
Soldadu sira halo trosa ba Nai Jesus
16 Nee liu tia, soldadu sira lori Jesus ba iha sira nia akampamentu. Depois sira bolu soldadu hosi batalyaun tomak mai hamutuk. 17 Sira foo batina kor mean ida ba Jesus hatais. Batina hanesan nee, liurai sira mak hatais. I sira halo moos koroa ida hanesan liurai sira mak tau. Maibee koroa ida atu tau ba Jesus nee, sira halo hosi ai tarak. I sira hanehan koroa nee ba Nia ulun. Nunee, sira halo Jesus hodi halimar hanesan atu foti Nia sai liurai. 18 Tuir mai sira halo trosa ba Nia hodi hatete, “Ita Boot, mak ema Judeu sira nia liurai.” 19 Sira moos finji hakneak ho hakruuk iha Jesus nia oin. I sira tafui kabeen fila-fila ba Nia oin. I sira baku Nia ulun beibeik ho ai. 20 Sira tarata tia hotu Nia, sira hasai tia batina, i foo hatais fali ho Nia hena rasik. Tuir mai, sira lori Jesus sai hosi sidade Jerusalém atu baa prega iha kruz too mate.
Ema prega Nai Jesus iha kruz
21 Iha loron nee, iha ema ida hosi sidade Sirene, atu tama ba iha Jerusalém. Nia naran Simão, Alexandre ho Rufo sira nia aman. Kuandu soldadu sira lori Jesus sai hosi Jerusalém, sira hasoru Simão nee. Sira kaer tia nia, hodi obriga nia hasaan Jesus nia kruz. 22 Sira lori Jesus baa iha fatin ida naran Golgota. Nee katak, ‘fatin ulun ruin nian’. 23 Too iha fatin nee, sira atu foo tua siin ho ai moruk ba Jesus hemu, para Nia bele aguenta terus. Maibee Nia lakohi hemu. 24-25 Depois soldadu sira latan Jesus iha ai kruz hodi prega Nia. Depois sira harii tia ai kruz nee, iha tuku sia dadeer saan. I sira halo rifa para hatene see mak bele hetan Jesus nia hena. 26 Depois sira hakerek iha ai kabelak ida, dehan nunee, Ema ida nee Judeu sira nia liurai. I sira prega ai kabelak nee iha Jesus nia ulun leten. Sira hakerek nunee, hodi hatudu tan saa mak sira iha direitu atu oho Jesus. 27 Iha fatin nee, sira prega moos ema naok-teen boot nain rua. Ida iha kruz iha Jesus nia liman loos, ida iha Nia liman karuk. 28 Nunee tuir Nai Maromak nia Lia Fuan nebee hakerek ona: “Ema sei halo Nia hanesan ema aat ida.” 29 Iha moos ema nebee liu hosi fatin nee. Kuandu sira haree Jesus prega hela iha kruz, sira doko ulun, hodi hatete aat, atu halo moe Nia, “He! O mak dehan atu halo rahun tia Nai Maromak nia Uma Kreda Boot, i depois O atu harii fali iha loron tolu. 30 O tuun tok hosi kruz nee. Salva O nia aan rasik. Nunee ami bele fiar katak, O nee Nai Maromak nia Oan duni.” 31 Nai-lulik nia ulun sira ho mestri relijiaun sira moos hatete aat Jesus dehan, “Nia bele salva ema seluk. Maibee Nia la bele salva Nia aan rasik. 32 Uluk Nia hatete ona, Nia nee Kristu, ema ida nebee Nai Maromak promete ona hori uluk. Nia moos dehan, Nia ema Judeu sira nia liurai. Se loos nunee, husik Nia mesak tuun hosi kruz nee. Ita tenki haree rasik ho ita nia matan, foin ita fiar ba Nia.” Sira nain rua nebee prega hamutuk ho Nia moos, tarata Nia.
Nai Jesus mate
33 Nee liu tia, fatin nee hotu nakukun tia, komesa meiu-dia too tuku tolu lokraik. 34 Iha lokraik tuku tolu, Jesus hakilar ho Nia lian, “Eloi! Eloi! Lama sabaktani!” Nee katak, “Hau nia Nai! Hau nia Maromak! Nusaa mak O husik hela Hau nunee?” 35 Ema balu besik kruz nee, rona Jesus nia lian. I sira dehan ba malu, “Hei! Imi rona tok. Nia bolu Elias, Nai Maromak nia Manu-Ain uluk.” 36 I iha ema ida halai baa foti esponza, halo bokon ho tua siin. Depois nia tuu iha ai naruk ida, i halolo ba Jesus nia ibun, para Nia hemu. I ema nee dehan, “Mai ita haree tok! Elias keta mai hatuun Nia hosi kruz karik.” 37 Depois Jesus hakilar dala ida tan, i Nia mate. 38 Iha kortina ida iha Uma Kreda Boot hodi haketak Nai Maromak nia fatin santu. Natoon loos Jesus mate, kortina nee moos naklees ba rua, hosi leten too kraik. 39 Iha Golgota, iha komandante ida hamriik besik Jesus nia kruz. Bainhira nia haree Jesus nia mate, nia admira hodi hatete, “Wei! Tebes duni! Ema ida nee Nai Maromak nia Oan.” 40-41 Iha moos feto barak mak haree Jesus nia mate hosi dook deit. Sira nee moos tuir Jesus. Uluk sira serbí Jesus sira iha Galileia, depois sira mai iha Jerusalém hamutuk ho Nia. Entre feto sira nee, iha Salome, Maria hosi rai Madala, ho Maria ida tan (Tiago kiik ho José sira nia inan).
Ema hatama Nai Jesus iha rate
42-43 Liu tia nee, iha ema ida buka dalan atu hatuun Jesus nia isin hosi kruz. Ema nee naran José, hosi sidade Arimateia. Nia moos membru hosi Konselyu Relijiaun Judeu nian. Nia laran diak. I nia sempre hein Nai Maromak nia ukun atu mai. Jesus mate iha loron Sesta. Aban fali, ema Judeu sira nia loron hodi harohan. Loron nee, sira la bele halo buat ida. Tanba nee mak José atu tau kedan Jesus nia isin ba rate. Nia foo brani nia aan, hodi baa husu lisensa iha governadór Pilatus atu hatuun Jesus nia isin. 44 Kuandu governadór rona José husu nunee, nia hakfodak hodi dehan, “Nusaa mak ema nee mate lailais nunee?! Hau hanoin katak, Nia seidauk mate.” Nunee nia haruka ema baa bolu komandante mai, hodi husu, “Oinsaa? Jesus nee mate tia ona ka, seidauk?” 45 Komandante nee hataan, “Nia mate tia ona, senyór.” Governadór rona nunee, nia foo lisensa ba José para bele baa hatuun Jesus nia isin. Ema lori Nai Jesus nia isin ba iha rate 46 Nunee José sosa hena foun ida nebee karu tebes. Depois nia baa iha Golgota, i baa hatuun Jesus nia isin hosi kruz. Nia falun mate nee halo di-diak hodi hena foun nee. Iha rate ida, ema foin bahat hotu iha fatuk lolon. José sira lori Jesus nia isin baa hatama iha fatuk kuak nee. Depois sira duir fatuk boot ida, hodi taka netik fatuk kuak nee. Hotu tia, José sira fila ona. 47 Maria hosi rai Madala, ho Maria (José nia inan), sira nain rua haree José sira hatama Jesus nia isin ba fatuk kuak nee. I sira haree di-diak hodi hatene dalan ba fatin nee.
Nai Jesus moris fali
1 Aban fali, loron Sábadu, ema Judeu sira nia loron hodi deskansa. Kalan nee kedas, Salome, ho Maria hosi rai Madala, ho Maria ida tan (Tiago nia inan), sira baa hola mina morin. Tanba aban fali, sira atu baa hisik Jesus nia isin, tuir Judeu sira nia kostumi. 2 Iha loron Domingu, dadeer-saan nakukun, sira nain tolu baa iha rate. 3-4 Iha dalan klaran, sira hatete ba malu, “Orsida see mak atu duir fatuk hosi rate ibun ba ita? Ita nain tolu la iha forsa atu dudu fatuk nee, tanba todan tebe-tebes.” Maibee bainhira sira too iha fatin nee, sira haree fatuk boot nee muda sees tia ona. 5 Depois sira tama ba fatuk kuak laran. I sira hakfodak tebe-tebes, tanba sira haree mane klosan ida tuur hela iha sira nia liman loos. Nia hena, mutin loos. 6 I mane nee hatete ba sira nunee, “Hei! Imi keta tauk. Hau hatene imi mai buka Jesus hosi rai Nazaré, ida nebee ema oho iha kruz. Nia la iha nee tan ona. Tanba Nia moris fali ona. Mai imi haree rasik fatin nebee sira latan Nia isin. Mamuk tia ona. 7 Imi fila lailais ona! Imi baa foo hatene ba Pedro sira katak, Jesus moris fali ona. Nia baa uluk sira iha Galileia, i sira sei hasoru Nia iha nebaa. Tuir buat nebee uluk Nia promete ona ba sira. Agora, imi fila ona.” 8 Bainhira feto sira nee baa haree fatin nee mamuk duni, sira hakfodak! Sira halai sai kedas, i fila lailais. Iha dalan, sira la foo hatene ba ema ida, tanba sira tauk atu mate.
Nai Jesus hasoru Maria hosi Madala
9 Iha loron Domingu dadeer-saan, Jesus hatudu-an ba Maria hosi Madala. Feto nee, uluk Jesus hasai espíritu aat hitu hosi nia laran. 10 Nia haree tia Jesus, nia baa foo hatene kedas ba ema sira uluk tuir Jesus nee. Ema sira nee sei tristi ho tanis hela, hanoin Jesus nia mate. 11 I Maria foo sai ba sira dehan, “Lalikan tristi ona, tanba Jesus moris fali ona! Hau foin hasoru malu ho Nia!” Maibee sira hataan, “O bosok!”
Nai Jesus hatudu-an ba Nia eskolanti nain rua tan
12 Liu tia nee, Jesus nia eskolanti nain rua lao ba iha aldeia ida. Iha dalan klaran, Jesus hatudu-an ba sira. Maibee Jesus oin seluk tia ona. 13 Depois sira nain rua fila fali hodi foo hatene ba sira nia kolega sira, “Imi rona lai. Foin daudauk nee, ami hasoru Jesus iha dalan.” Maibee sira nia kolega hataan, “Bosok! Ami la fiar ida.”
Nai Jesus hatudu-an ba Nia eskolanti sira
14 Nee liu tia, Jesus hasoru malu ho Nia eskolanti nain sanulu resin ida, natoon sira haan hela. Nia hatete, “Imi nee ulun fatuk toos duni! Ema hatete ona ba imi katak, sira haree Hau ho sira nia matan rasik, maibee imi la fiar! Imi dehan, sira bosok. Agora, Hau rasik mak mai nee. Hau mate tia ona, maibee Hau moris fali ona. Imi haree rasik ba. 15 Nee duni, imi tenki baa iha mundu tomak, i foo sai Hau nia Lia Fuan Diak nee ba ema hotu-hotu. 16 See mak fiar ba Hau, i sarani, Nai Maromak sei salva nia, i nia sei moris hamutuk ho Nai Maromak iha lalehan. Maibee see mak la fiar, Nai Maromak sei kastigu nia, i sei la simu nia iha lalehan. 17 I ema sira nebee fiar ba Hau, sira sei halo milagre oi-oin, too ema hotu hatene katak, sira nia forsa nee mai hosi Nai Maromak. I sira sei duni sai espíritu aat, hodi Hau nia naran. I Nai Maromak sei halo sira koalia lia fuan foun, nebee sira seidauk hatene. 18 I se sira kaer samea nebee iha veneno, ou sira hemu sala veneno, sira la hetan susar. I kuandu sira tau liman ba ema moras, ema moras nee sei sai diak.”
Nai Jesus sae ba lalehan
19 Jesus koalia tia hotu, Nai Maromak hasae Nia ba lalehan. Nia tuur iha Nai Maromak nia liman loos hodi ukun hamutuk. 20 Nee liu tia, Nia ema sira halo tuir Nia orden. Sira baa iha mundu tomak, hodi foo hatene kona ba Jesus nia Lia Fuan Diak. I Nai Maromak foo podér ba sira, para sira bele halo milagre, tuir Jesus hatete ona. Nunee ema barak fiar ba Jesus, tanba sira hatene katak Lia Fuan Diak nee, loos duni.
Nai Maromak promete atu haruka Nia Espíritu Santu mai
1-3 Senyór Teófilo, mak diak. Kumprimentus hosi hau, Lucas. Iha hau nia livru ida uluk, hau hakerek ona kona ba buat hotu-hotu nebee Nai Jesus halo ona, ho buat hotu-hotu nebee mak Nai Jesus hanorin ona, komesa hosi Nia hahuu Nia servisu too Nia sae fila fali ba lalehan. Maski ema oho tiha Nia ona, maibee Nai Maromak halo moris fali. Depois Jesus hatudu-An ba Nia reprezentante sira fila-fila durante loron haat-nulu, hodi hatudu lo-loos katak Nia moris fali duni. Nia moos foo hatene ba sira kona ba Nai Maromak nia ukun. I sira nebee Nia hili ona nee, Nia foo instrusaun ba sira hodi podér Espíritu Santu nian. 4-5 Iha loron ida, Jesus hamutuk ho Nia reprezentante sira, Nia foo orden ba sira dehan, “Keta husik lai Jerusalém. Imi tenki hein iha nee too Hau nia Aman foo Nia Espíritu Santu ba imi, tuir Nia promete ona, i tuir imi moos rona ona hosi Hau. Uluk João foo sarani ema hodi bee, maibee iha loron hira tan, Nai Maromak sei foo Nia Espíritu Santu hodi domina imi.”
Nai Jesus sae ba lalehan
6 Bainhira Jesus hamutuk fali ho Nia reprezentante sira iha foho Oliveira, sira husu, “Nai, agora Ita Boot atu liberta Israel hosi governu Roma, hodi halo ita ukun-an hanesan uluk ka, ita atu hein loron seluk?”
Nai Jesus koalia ba Nia reprezentante sira
7 Jesus hataan, “Imi lalikan buka atu hatene nia loron. So Hau nia Aman deit mak iha direitu atu desidi nia loron. 8 Maibee kuandu Nai Maromak nia Espíritu Santu tuun ona ba imi, foin imi iha podér. I imi sei baa foo sai ba ema hotu-hotu kona ba Hau, iha sidade Jerusalém, provínsia Judeia, provínsia Samaria i too rai ulun rai ikun.” 9 Koalia tiha hotu nunee, Nai Maromak foti Nai Jesus sae ba lalehan iha sira nia oin. Too kalohan taka tiha Nia, i sira la haree tan Nia ona. 10 Bainhira sira sei hateke hela ba leten, derepenti ema nain rua hamriik hela iha sira nia sorin, hatais hena mutin. 11 Sira hatete, “Ema Galileia sira! Nusaa mak imi sei foti matan hateke ba lalehan? Ohin imi haree Jesus sae ba lalehan, too kalohan taka tiha Nia. Imi haree Nia sae ba lalehan oinsaa, Nia fila fali mai moos hanesan nee.”
Sira buka ema seluk hodi troka Judas
12 Liu tiha nee, Jesus nia reprezentante sira tuun fila fali hosi foho Oliveira fila ba sidade Jerusalém. Hosi foho nee ba sidade Jerusalém maizoumenus kilómetru ida. 13 Too iha sidade, sira baa tama iha uma ida nebee sira hela ba, i sira sae liu ba iha andár leten. Jesus nia reprezentante sira nia naran mak nee: Pedro, João, Tiago, André, Filipe, Tomé, Bartolomeu, Mateus, Tiago (Alfeu nia oan), Simão (membru partidu Zelot), ho Judas (Tiago nia oan). 14 Sira halibur hamutuk beibeik hodi halo orasaun ho neon ida laran ida. Sira halo orasaun nee hamutuk ho Jesus nia inan Maria, ho feto balu tan, ho moos Jesus nia alin sira. 15 Iha loron ida, sira halibur hamutuk, maizoumenus ema atus ida rua-nulu. I Pedro hamriik hodi hatete, 16 “Maun-alin sira hotu, ita hatene Judas uluk lori ema baa kaer Jesus. Buat nee hodi kumpri Nai Maromak nia Lia Fuan, nebee Nia Espíritu foo ba liurai David uluk kedas kona ba Judas. 17 Nia nee ita nia ema, i nia moos servisu hamutuk ho ita.” 18 (Bainhira Judas faan tiha Jesus, osan ida nebee nia simu nee, hodi baa hola rai pedasuk ida. Iha fatin nee nia monu riba ba rai, too nia kabun nakfera, i nia tee-oan fakar sai ba liur. 19 Novidade nee ema konta iha nebee ba nebee, too ema hotu iha sidade Jerusalém rona kona ba nia mate nee. Tanba nee mak sira tau naran ba fatin nee hodi sira nia lian Aram dehan Akeldama, nee katak ‘rai raan nian’.) 20 Pedro koalia tan, “Hori uluk liurai David hakerek ona iha livru Salmus kona ba Judas, dehan, ‘Nia hela fatin nee sei sai fuik; la iha ema ida hela tan iha nebaa.’ Nia moos hakerek dehan, ‘Nia knaar nee, sei foo ba ema seluk.’ 21-22 Nee duni ita tenki buka ema seluk hodi troka Judas. Ita presiza ema ida nebee tuir Nai Jesus ba iha nebee-nebee hamutuk ho ita, komesa kedas iha João sarani Jesus too Nia sae fila fali ba lalehan. Ema nee sei foo sasin hamutuk ho ita kona ba Jesus nia moris fali hosi mate.” 23 Bainhira Pedro koalia hotu ona, sira hatudu ema nain rua. Ida naran José. (Baibain ema bolu Barsabás, nia naran ida tan, mak Justu.) Ida tan naran Matias. 24-25 Tuir mai, sira halo orasaun, nunee, “Nai Maromak, Ita Boot hatene ema hotu-hotu nia laran. Judas mate tiha ona husik hela nia knaar. Nee duni, Nai Maromak hatudu mai ami hosi ema nain rua nee, see mak Nai hili hodi troka Judas, para sai Nai Jesus nia reprezentante.” 26 Depois sira dada rifa, i rifa monu kona iha Matias. Nunee sira foti nia sai Jesus nia reprezentante hamutuk ho sira nain sanulu resin ida.
Espíritu Santu tuun i domina Nai Jesus nia povu
1-2 Too iha ema Judeu sira nia loron boot nebee sira bolu ‘Loron Pentakosta’, ema sira nebee tuir Nai Jesus nee halibur hamutuk iha uma ida. Derepenti sira rona lian ida mai hosi lalehan hanesan anin boot. Lian nee makaas tebe-tebes, too sira hotu iha fatin nee la rona tan ema seluk nia lian. 3 I sira haree hanesan nanaal, hanesan ahi lakan namkari i fahe ba ida-idak nia ulun leten. 4 Nai Maromak nia Espíritu Santu domina sira hotu. I sira komesa koalia lian oi-oin nebee sira nunka aprende, tuir nebee mak Espíritu foo ba sira hodi koalia. Espíritu Santu tuun ba iha Jesus nia ema sira ida-idak 5 Iha tempu nee, iha ema Judeu barak nebee tuir duni Nai Maromak, mai ona iha Jerusalém hosi nasaun hotu-hotu. 6 Bainhira sira rona lian nee, ema barak halai baa haree. Sira ida-idak rona sira nia lian rasik hosi ema sarani sira nia ibun. Nee mak halo sira hotu admira 7 hodi dehan ba malu, “Sira nebee koalia nee, mesak ema Galileia! 8 Oinsaa, ita bele rona sira koalia ho ita ida-idak nia lian rasik? 9 Ita mai hosi provínsia Pártia, Média, Elam, Mezopotámia, Judeia, Kapadósia, Pontu, Ázia, 10 Frígia, Panfília, Ejiptu, hosi Líbia besik ho sidade Sirene, i ita balu mai hosi sidade Roma. 11 Iha tan balu mai hosi ilya Kreta, ho hosi rai Arabi. Ita balu ema Judeu, i balu moos ema hosi nasaun seluk nebee tama ona relijiaun Judeu. Maibee ita hotu bele rona ema sira nee koalia fali ho ita nia lian, kona ba milagre nebee Nai Maromak halo ona.” Ema hosi nasaun sira nee hamutuk iha Jerusalém iha loron Pentakosta 12 Sira hotu admira tebe-tebes i bilaan tiha, hodi husu ba malu dehan, “Saida mak nee?” 13 Maibee ema seluk goza sira dehan, “Lalikan rona sira! Sira tua lanu.”
Pedro koalia ba ema barak
14 Depois Pedro hamriik ho Jesus nia reprezentante nain sanulu resin ida. I nia hakat ba oin hodi koalia ho lian makaas ba ema barak nee dehan, “Maluk Judeu sira, ho imi sira nebee mak hela iha sidade Jerusalém. See tilun mai hodi rona di-diak buat nebee hau atu hatoo. 15 Keta hanoin ami nee tua lanu. Agora foin tuku sia! See mak hemu tua lanu iha dadeer-saan hanesan nee? La iha! 16 Imi rona ami koalia ho imi ida-idak nia lian. Nee kumpri lia fuan nebee uluk Nai Maromak nia profeta Joel hakerek ona dehan: 17 ‘Nai Maromak hatete, “Molok mundu remata, Hau sei hatuun Hau nia Espíritu ba ema hotu-hotu. Imi nia oan mane sira ho imi nia oan feto sira, sei foo sai buat nebee ke Hau foo hatene ba sira. Imi nia oan foin sae sira, sei haree buat nebee mak Hau hatudu ba sira. I ema katuas ho ferik sira, sei mehi buat nebee mak Hau foo ba sira. 18 Molok mundu remata, Hau sei hatuun Hau nia Espíritu ba ema hotu nebee halo tuir Hau nia orden. Hau sei foo ba mane, ho moos ba feto. I sira sei foo sai saida mak Hau hatete ona ba sira. 19-21 Molok Nai Maromak nia loron nee too mai, Hau sei halo uluk sinál oi-oin iha lalehan, ke halo ema admira. Loro matan sei sai nakukun; fulan sei sai mean hanesan raan. Hau moos sei halo sinál oi-oin iha mundu nee. Hanesan raan, ahi, ho suar sae ba leten. I see mak husu tulun ba Nai Maromak, sei hetan salvasaun.’”
Lia fuan sira nee mak uluk profeta Joel foo sai ona. Pedro esplika ba ema barak
22 Maun-alin ema Israel sira, see tilun mai. Nai Maromak hili ona Jesus, ema Nazaré. Imi rasik hatene buat nee, tanba imi haree ona Nai Maromak uza Jesus hodi halo milagre ho sinál iha imi nia leet. Sinál sira nee halo ema admira. 23 Maibee imi oho tiha Nia; imi tau lia ba ema aat sira hodi prega Nia ba krus too mate. Nee tenki sai nunee duni, hodi kumpri Nai Maromak nia planu hori uluk.c 24 Maibee mate la bele domina Nia. Nee mak Nai Maromak hasai Nia hosi ema mate nia leet, i halo Nia moris fali. 25 Hori uluk, liurai David hakerek ona kona ba Jesus dehan, ‘Hau hatene Maromak sempre hamutuk ho hau. Nee mak la iha ema ida bele halo tauk hau, tanba Nai Maromak sempre iha hau nia sorin. 26 Nee mak hau nia laran haksolok; hau moos adora beibeik Nia, i hau hein deit ba Nia ho hakmatek. 27 Tan Nai Maromak la husik hela hau iha ema mate sira nia fatin. I Nia la husik Nia Ema Santu nia isin dodok iha rate. 28 Nai Maromak hatudu ona mai hau Dalan Moris nian. Nia halo hau nia laran haksolok tebe-tebes, tanba Nai Maromak hamutuk ho hau.’ Ida nee mak liurai David hakerek uluk kedas. 29 Irmaun sira hotu, David koalia nee, la hatudu ba nia aan. Tanba nia mate ho hakoi tiha ona, i nia rate sei iha hela ita nia leet too ohin loron. 30 Maibee liurai David, Nai Maromak nia profeta. I nia hatene katak Nai Maromak promete ho jura ona dehan ema ida hosi David nia jerasaun sei kaer ukun. 31 David haree ba aban-bainrua nian. Nia foo hatene antes kedas dehan, Ema ida nebee Nai Maromak hili ona nee, sei moris fila fali hosi mate. I Nia sei la husik hela iha ema mate sira nia fatin, i Nia mate isin sei la dodok. 32 Ema nebee David dehan nee, mak Jesus! Nai Maromak halo Nia moris fali hosi mate, i ami nee hotu haree ho ami nia matan rasik. 33 Agora Nai Maromak foti ona Jesus hodi tuur iha Nai Maromak nia sorin loos, iha fatin aas. I Jesus simu Espíritu Santu hosi Nia Aman hodi foo fali mai ami, tuir Nai Maromak promete ona hori uluk. Saida mak imi rona ho haree agora nee, Maromak nia Espíritu. 34 David rasik la sae ba lalehan, maibee nia hakerek kona ba Jesus dehan, ‘Nai Maromak hatete ba hau nia Nai dehan, “Tuur iha Hau nia sorin loos iha fatin aas, 35 too Hau halo O nia inimigu sira hakruuk ba O.’” 36 Nunee imi ema Israel hotu-hotu tenki hatene katak, Jesus ida nebee imi prega mate iha krus nee, mak Ema ida nebee Nai Maromak hili ona. Nai Maromak moos foti ona Nia sai ita nia Nai.” 37 Rona nunee, halo sira nia laran susar. I sira husu ba Pedro ho Jesus nia reprezentante sira seluk dehan, “Irmaun sira! Ami tenki halo saida?” 38 Pedro hataan, “Imi ida-idak tenki husik ona imi nia sala, i tuir Nai Maromak nia hakarak. Imi moos tenki sarani ho Nai Jesus Kristu nia naran. Nee hanesan sinál katak imi tuir ona Jesus Kristu i Nai Maromak hamoos ona imi nia sala. Depois imi sei simu Nai Maromak nia Espíritu Santu. 39 Tan Nai Maromak promete ona atu foo Nia Espíritu nee ba ema hotu nebee Nia bolu tiha ona. Promesa nee Nia foo ba imi, ho imi nia jerasaun sira, ho moos ba ema sira seluk.” 40 Pedro koalia lia fuan barak tan hodi buka atu dada sira ba dalan loos. Nia dehan, “Agora daudaun ema barak mak lao sala dalan. Keta tuir sira! Tuir deit Nai Maromak nia Dalan Loos, para bele moris nafatin ho Nia.” 41 Ema nebee mak simu Pedro nia lia fuan nee, moos sarani. Sira maizoumenus ema rihun tolu. Sira tama tan ba ema sira seluk nebee fiar ona ba Jesus. 42 Sira badinas rona reprezentante sira nia hanorin kona ba Nai Jesus, i sira haree malu diak. Sira moos haan hamutuk, i badinas halo orasaun hamutuk.
Ema sarani sira adora Maromak i hadomi malu
43 Iha tempu nee, Nai Jesus nia reprezentante sira halo milagre ho sinál barak, halo ema hotu-hotu admira ho moos respeita sira. 44 Ema sira nebee fiar ba Nai Jesus sempre neon ida laran ida. Sasaan nebee mak sira iha, hotu-hotu bele uza.h 45 Iha balu faan sira nia sasaan ou sira nia riku ruma, i osan nee sira fahe ba ema sarani sira, tuir ida-idak nia presiza. 46 Loro-loron sira baa adora Nai Maromak hamutuk iha Uma Kreda Boot Judeu sira nian. Sira sempre haan hamutuk iha uma ba uma ho laran haksolok. Sira gosta ajuda malu, i la karak-teen. 47 Sira hahii Nai Maromak beibeik. Ema seluk gosta tebe-tebes sira, ho haree sira diak. Loro-loron Nai Maromak salva ema, i nunee Jesus nia ema sira aumenta barak ba beibeik.
Pedro kura ema ain aat ida
1 Iha loron ida, tuku tolu lokraik, Pedro ho João baa iha Nai Maromak nia Uma Kreda Boot, hodi halo orasaun. 2 Sira foin atu tama ba iha portaun naran ‘portaun kapaas’, sira haree mane ida ain aat, lao la diak, komesa nia moris. Loro-loron ema hulan nia baa hatuur iha nebaa, atu nia bele husu ezmola ba ema nebee mak tama ba iha Uma Kreda nee. 3 Bainhira nia haree Pedro ho João atu tama ba laran, nia lolo liman baa hodi husu, “Senyór sira, hanoin hau ba! Foo netik osan ruma mai hau.”
Pedro ho João fihir ema ain aat ida
4 Sira nain rua fihir nia, i Pedro hatete, “Irmaun! Haree mai ami!” 5 Ema nee foti oin, haree ba sira ho laran metin atu simu buat ruma. 6 Maibee Pedro hatete, “Irmaun, hau la iha osan doit ida atu foo ba o. Maibee saida mak hau iha, hau foo. Hodi Nai Jesus Kristu ema Nazaré nee nia naran, hau hatete ba o, ‘Hamriik i lao ona!’” 7 Pedro kaer nia liman loos, hodi foti nia hamriik, i nia ain diak i forti kedas. 8 Nia hamriik, haksoit i lao baa-mai. Nia lao, hodi haksoit-haksoit ho hahii Nai Maromak, tu-tuir sira nain rua tama ba kintál Uma Kreda Boot nian. 9 Bainhira ema hotu-hotu haree nia lao ho hahii Nai Maromak, 10 sira konyese nia, sira sai bilaan tiha dehan, “Ema nee sempre tuur iha Portaun Kapaas, hodi husu ezmola. Oinsaa mak nia bele lao tiha nee?!”
Pedro esplika iha Uma Kreda Boot laran
11 Ema ida nebee foin hetan kura nee tu-tuir Pedro ho João too iha Varanda Salomão. Nia kaer metin hela sira, i ema barak halai mai hobur sira ho admira. 12 Kuandu Pedro haree sira nunee, nia hatete, “Maluk Israel sira, tanba saa mak imi admira nunee? Nusaa mak imi haree beibeik mai ami hanesan nee? Imi hanoin ami halo ema nee lao hodi ami nia podér rasik ou tanba ami moris tuir Nai Maromak nia hakarak ka? 13 Lae! Ita nia bei-ala Abraão, Isac ho Jaco?, ho ita nia bei-ala sira hotu, adora Nai Maromak. Nia nee mak kura ema nee hodi foti aas Jesus, ida nebee sempre tuir Maromak nia hakarak. Jesus nee uluk imi entrega tiha ba governadór Pilatus. Tuir lo-loos governadór atu hasai Nia, maibee imi mak lakohi. 14 Imi kontra Jesus ida nebee moris loos, i la iha sala. Imi tau lia ba Pilatus hodi haruka hasai ema ohodór ida hosi kadeia. 15 Imi oho tiha Jesus, ida nebee foo moris ba ita. Nia mate duni, maibee Nai Maromak halo Nia moris fali. Ami haree rasik ho matan. 16 Nai Jesus nee Nia podér mak halo ema ain aat nee agora lao diak tiha ona. Imi rasik konyese nia i haree katak nia diak ona. Ema nee hetan kura, tanba ami fiar ba Nai Jesus. 17 Maun-alin sira, hau hatene katak bainhira imi ho imi nia boot sira halo aat ba Jesus, imi la hatene saida mak imi halo. 18 Maibee nunee Nai Maromak kumpri Nia lia fuan nebee Nia foo sai ona hori uluk, liu hosi Nia profeta sira, dehan Ema ida nebee Nia hili ona nee, tenki hetan terus barak. 19 Nunee imi tenki husik ona imi nia sala i fila ba Nai Maromak, atu Nia bele hamoos imi nia sala hotu. 20 Depois Nia sei halo imi nia laran hakmatek, i haruka ba imi, Ema ida nebee Nia hili ona, mak Jesus. 21 I Jesus nee sei hein iha lalehan too tempu para Nai Maromak halo buat hotu-hotu foun, tuir Nai Maromak promete ona liu hosi Nia profeta sira. 22 Uluk Avoo Moisés koalia kona ba Nai Jesus dehan, ‘Nai Maromak sei foti ema ida hosi imi para sai Nia profeta, hanesan hau. Imi tenki see tilun hodi rona buat nebee mak Nia atu foo sai ba imi. 23 Maibee see mak lakohi rona Ema nee nia koalia, Nai Maromak sei fila kotuk ba nia, i nia la pertense tan Nai Maromak nia ema.’ 24 Avoo Samuel ho profeta sira seluk moos, Nai Maromak uza hodi foo sai kona ba buat nebee mak ita haree agora. 25 Nai Maromak promete ona ba avoo Abraão dehan, ‘Liu hosi o nia jerasaun, Hau sei foo bensaun ba ema hotu-hotu iha mundu.’ Promesa nee agora tuun ona ba imi, povu Israel sira. 26 Nai Maromak haruka Nia Oan nee hodi foo bensaun ba imi, atu imi husik tiha hahalok aat. Nai Maromak haruka nia Oan nee ba uluk imi ema Israel, depois foin haruka ba nasaun sira seluk.”
Ulun relijiaun sira ameasa Pedro ho João iha tribunál
1 Bainhira Pedro ho João sei koalia hela ho ema sira nee, nai-lulik relijiaun Judeu sira, ho komandante seguransa Uma Kreda Boot, ho moos ema hosi grupu relijiaun Saduseu too mai. 2 Sira siak Pedro ho João, tanba sira nain rua sempre foo sai ba ema hotu dehan, Jesus moris fali ona hosi mate, i nunee Nia loke dalan ba ema mate sira moos bele moris fali. 3 Entaun sira foo orden para baa kaer sira nain rua. Maibee tanba kalan ona, maka sira hatama ba iha kadeia, para aban hodi tesi lia nee. 4 Maibee ema sira nebee rona reprezentante sira nia hanorin nee, barak fiar ba Nai Jesus. Nee mak ema sarani aumenta barak, too ema mane deit maizoumenus ema rihun lima. (Nee seidauk konta feto ho labarik.) Ema boot sira duu Pedro ho João 5 Iha aban fali, justisa nain relijiaun Judeu sira halibur hamutuk iha Jerusalém. Sira nee mak nai ulun relijiaun sira, katuas lia nain sira, ho mestri relijiaun Judeu sira, 6 ho nai-lulik sira nia boot, naran Anás. Iha ema boot seluk tan hanesan, Kaifás, João, Alexandre, ho nai-lulik nia boot nia família sira. 7 Bainhira sira hotu hamutuk ona, sira foo orden para lori Pedro ho João mai aprezenta ba sira. Kuandu sira nain rua too mai, ulun boot sira husu, “Oinsaa mak imi bele kura ema ain aat nee? Imi uza see nia podér? I see mak foo lisensa ba imi hodi halo nunee?” 8 Espíritu Santu domina Pedro, i nia hataan, “Nai ulun boot ho katuas lia nain nasaun Israel nian. 9 Senyór sira atu buka lia ho ami tanba deit ami ajuda ema ain aat ida. Senyór sira hakarak hatene, ami uza see nia podér hodi kura nia. 10 Hau hakarak hatete ba senyór sira ho povu Israel tomak katak, hodi Nai Jesus Kristu ema Nazaré nia naran mak ami kura ema ain aat nee. Imi prega Nia iha krus too mate. Maibee Nai Maromak halo moris fali Nia hosi mate. 11 Uluk ema hakerek kona ba fatuk ida, hodi hatudu ba Nai Jesus nunee, ‘Iha fatuk ida mak badaen sira foti soe tiha ona; maibee agora fatuk nee sai fali fatuk nebee prinsipál liu.’ 12 Iha mundu tomak, la iha dalan seluk mak Maromak foo ba ita hodi hetan salvasaun. So iha dalan ida deit, mak Jesus. Se laos Nia, la iha tan ema seluk mak bele salva ita.” 13 Justisa nain relijiaun sira hatene katak Pedro ho João ema baibain, nebee la eskola boot. Nunee sira admira tebe-tebes ho sira nain rua nia barani, i sira konyese katak ema nain rua nee, uluk hamutuk ho Jesus. 14 Sira la bele koalia buat ida hasoru Pedro ho João, tanba ema nebee hetan kura nee hamriik hela iha sira nia oin. 15 Entaun sira haruka sira nain rua sai ba liur, atu sira husu lia fuan ba malu. 16 Sira koalia ba malu dehan, “Ita tenki halo saida ba ema nain rua nee? Tan ema hotu-hotu iha Jerusalém hatene ona dehan sira mak halo milagre nee. Ita la bele nega. 17 Diak liu ita buka meius para lia nee la bele namkari ba iha nebee-nebee. Agora ita ameasa Pedro ho João, para sira la bele hanorin tan kona ba Jesus. Se sira lakohi rona, mak sira sei haree deit!” 18 Depois sira haruka bolu fali sira nain rua tama ba laran, hodi foo hatene dehan, “Kuidadu! Imi la bele hanorin tan ema ida kona ba Jesus!” 19 Maibee Pedro ho João hataan, “Senyór sira desidi rasik ba. Nebee mak diak liu? Halo tuir senyór sira nia orden ka halo tuir Nai Maromak nia orden? 20 Buat nebee mak ami rasik haree ho matan, i rona ho tilun, ami tenki foo sai nafatin!” 21 Depois justisa nain sira ameasa tan sira, i haruka sira sai. Tanba sira la iha razaun ida hodi kastigu sira, i sira moos tauk povu, tan ema hotu-hotu agradese hela ba Maromak, ba milagre nee. 22 Afinál ema nee ain aat durante tinan haat-nulu resin ona, foin nia hetan kura.
Sarani sira halo orasaun husu barani
23 Bainhira sira husik tiha Pedro ho João, sira nain rua fila ba sira nia kolega sira. I sira konta buat hotu-hotu nebee mak nai-lulik nia ulun sira ho katuas lia nain sira bandu ona ba sira. 24 Rona nunee, sira hotu halo orasaun hamutuk ho neon ida laran ida dehan, “Nai Maromak, mak halo lalehan ho rai, ho tasi ho buat hotu-hotu. 25 Uluk Espíritu Santu uza Ita Boot nia atan, ami nia avoo David, hanesan profeta hodi hakerek kona ba ema nebee kontra Jesus dehan, Pedro sira halo orasaun ‘Nasaun sira nebee la konyese Maromak, hirus nar-naran deit. Ema kombina malu arbiru deit, la iha huun ho tutun. 26 Liurai sira iha mundu prepara-an hamutuk, ho nai ulun sira kombina lia ida, hodi funu kontra Nai Maromak ho kontra Ema ida nebee Maromak hili ona.’ 27 Buat nebee avoo David hakerek agora sai loos duni. Iha sidade nee, liurai Herodes ho governadór Pónsiu Pilatus hamutuk ona ho nai ulun sira hosi Israel, ho nai ulun sira hosi nasaun seluk. Sira hotu kombina hodi kontra Jesus, Ita Boot nia Oan Santu, nebee Ita Boot hili ona. Nia sempre halo tuir Ita Boot nia hakarak.d 28 Maibee buat sira nee hotu, tuir Maromak nia planu, i tuir buat nebee mak Maromak desidi tiha ona hori uluk. 29 Agora, Nai Maromak haree ba sira nia ameasa nee. Ami husu Ita Boot foo aten barani mai ami, atu ami bele baa foo sai ba ema hotu-hotu, kona ba Jesus nia Novidade Diak. 30 Ami moos husu Nai Maromak foo podér mai ami, atu ami bele kura ema moras, i halo milagre, ho sinál oi-oin, para ema hatene katak, podér nee mai hosi Ita Boot nia Oan Santu Jesus.” 31 Sira sei halo hela orasaun, fatin nebee sira hodi halibur malu ba nee, nakdoko. I Espíritu Santu domina sira, i sira baa foo sai Nai Maromak nia Novidade Diak ho barani.
Sarani sira foo sasaan ba malu
32 Ema hotu nebee fiar ba Jesus, sira moris neon ida laran ida. La iha ema ida karak-teen, sira sempre foo sasaan ba malu. La iha ema ida mak dehan sasaan nebee nia iha, ninian mesak. Sasaan saida mak nia iha, hotu-hotu uza.e 33 I Maromak foo podér boot ba Jesus nia reprezentante sira, para sira foo sasin ba ema katak Nai Jesus moris fali ona hosi mate, hanesan sira rasik haree ho matan. I Nai Maromak moos foo bensaun boot ba sira hotu. 34-35 Sira balu faan tiha sira nia rai ho uma, i osan nee sira foo ba Jesus nia reprezentante sira, hodi fahe ba ema nebee presiza. Nee mak la iha ema ida ke iha falta. 36-37 Ezemplu hanesan José. Nia Levi nia jerasaun, hosi ilya Xipre. Jesus nia reprezentante sira bolu nia Barnabé. Naran nee dehan katak, ‘ema nebee hametin ema seluk nia laran’. Nia faan nia rai pedasuk ida, i nia lori osan rai nian nee, baa entrega ba reprezentante sira.
Ananias ho Safira mate tanba bosok Espíritu Santu
1 Iha moos mane ida naran Ananias, ho nia kaben Safira. Sira faan sira nia rai pedasuk ida. 2 Sira nain rua kombina, rai tiha osan rai nian nee sorin balu ba sira. Depois Ananias baa foo hatene ba Jesus nia reprezentante sira dehan, “Ami foin faan ami nia rai pedasuk ida. Osan rai nian nee tomak ami foo ba Nai Maromak.” Ananias entrega osan balu ba Pedro 3 Maibee Pedro hatete, “Ananias, nusaa mak o tuir fali Satanás nia hakarak, para o bosok Espíritu Santu?! Nusaa mak osan rai nian nee, o subar tiha balu? 4 Afinál o hakarak faan rai nee, ka lakohi, nee konformi o. Se o faan ona, o atu foo nia osan hotu ka, sorin balu deit, konformi o. Maibee nusaa mak o halo fali nunee? O laos bosok ema, maibee o bosok Nai Maromak!” 5 Rona Pedro koalia nunee, Ananias monu ba rai, i mate kedas. I ema nebee rona novidade nee, sira tauk tebe-tebes. 6 Depois labarik klosan sira tama baa falun Ananias nia mate isin, i hulan hodi baa hakoi. 7 Liu tiha oras tolu nunee, Ananias nia kaben moos tama, maibee nia la hatene saida mak mosu. 8 Pedro husu ba nia, “Oinsaa senyora? Senyora sira faan rai nee, nia folin mak nee deit ka?” Nia hataan, “Loos, senyór. Rai nia folin mak nee deit.” 9 I Pedro dehan, “Nusaa mak imi nain rua kombina malu koko Nai Maromak nia Espíritu? Mak o haree deit! Ema sira lori o nia lain baa hakoi, foin fila. Sira moos sei hulan o nia mate isin baa hakoi.” 10 Rona Pedro nia koalia nee, feto nee moos monu ba rai i mate kedas iha fatin. I labarik klosan sira tama ba laran, haree nia mate tiha ona. Sira moos hulan nia mate isin hodi baa hakoi iha nia lain nia sorin. Safira mate derepenti iha fatin 11 I ema sira nebee fiar ba Jesus, ho ema sira seluk nebee rona kona ba Ananias ho Safira nia mate, sira tauk tebe-tebes.
Pedro sira kura ema barak
12 Iha tempu nee, Jesus nia reprezentante sira halo milagre ho sinál barak iha povu nia oin, nebee halo sira admira tebe-tebes. I sarani sira sempre baa iha Nai Maromak nia Uma Kreda Boot. Sira halibur hamutuk ho neon ida laran ida iha Varanda Salomão. 13 Iha tempu nee, ema barak gaba ho respeita Jesus nia ema sira. Maibee see mak seidauk fiar ba Jesus, la barani baa hamutuk ho sira. 14 Ema sira nebee fiar ba Jesus, loron ba loron aumenta ba beibeik. Iha mane ho moos feto. 15 Tanba buat sira nee, ema hulan ema moras sira hodi baa hatoba iha biti iha dalan ibun. Sira hanoin dehan, “Se Pedro lao liu hosi nee, maski nia lalatak deit mak kona sira moos, moras sira sei diak.” 16 Ema nadodon mai la kotu fatin, hosi aldeia-aldeia besik sidade Jerusalém. Sira hulan moras sira, ho lori ema nebee iha espíritu aat tama iha sira nia laran, i Nai Jesus nia reprezentante sira kura tiha sira hotu, ho duni sai moos espíritu aat hosi sira.
Jesus nia reprezentante sira hetan terus
17 Iha tempu nee, nai-lulik Judeu sira nia boot ho nia kolega sira hosi partidu Saduseu, sira laran moras makaas. 18 Nee mak sira baa kaer Jesus nia reprezentante sira hodi baa hatama iha kadeia. 19 Maibee iha kalan nee kedas Nai Maromak nia anju ida baa loke kadeia nia odamatan, i lori sira sai ba liur. Nia hatete, 20 “Agora imi baa iha Nai Maromak nia Uma Kreda Boot. Baa foo sai mensajen kona ba moris foun, ba ema hotu-hotu iha nebaa.” 21 Nunee iha dadeer-saan nakukun sira baa ona iha Nai Maromak nia Uma Kreda Boot nia kintál laran hodi hanorin.
Jesus nia reprezentante sira sai hosi kadeia
Bainhira nai-lulik sira nia boot ho nia kolega sira hasoru malu fali, sira halibur justisa nain sira, mak Israel nia ulun boot relijiaun nian, hodi tesi lia kona ba Jesus nia reprezentante sira. Depois sira haruka ema seguransa baa hasai reprezentante sira hosi kadeia. 22 Maibee kuandu sira too iha kadeia, Pedro sira la iha tiha ona. Entaun sira fila ba tribunál, 23 hodi foo hatene dehan, “Senyór sira, bainhira ami too iha kadeia, ami haree odamatan kadeia nian xavi metin hela. Ema seguransa sira moos hamriik hela iha oin. Maibee kuandu ami haruka sira loke odamatan, ami la hetan ema ida.” 24 Rona nunee, nai-lulik boot sira ho komandante seguransa Uma Kreda Boot, sira hotu bilaan tiha, sira nia hanoin lakon. 25 Depois iha ema ida mai foo hatene dehan, “Senyór sira, ema nebee Ita Boot sira hatama iha kadeia nee, hanorin hela ema iha Uma Kreda Boot!” 26 Rona nunee, komandante seguransa Uma Kreda Boot bolu nia elementu sira, hodi baa kaer fali Jesus nia reprezentante sira. Sira kaer ho di-diak deit, sira tauk kaer ho brutu, tanba keta halo-be povu bele hirus i tuda sira ho fatuk. 27 Depois sira lori Jesus nia reprezentante sira ba iha tribunál. I nai-lulik nia boot husu ba sira, 28 dehan, “Imi nee ulun toos duni! Ami bandu ona imi para la bele hanorin ema kona ba Jesus nee. Maibee imi baa hanorin fali iha fatin hotu-hotu iha sidade Jerusalém, i imi duu ami dehan, ami mak haruka oho Jesus.” 29 Entaun Pedro hamriik hodi Jesus nia reprezentante sira nia fatin, hodi hataan, “Senyór sira, ami tenki tuir mak Nai Maromak nia orden. Se ema haruka ami kontra Nai Maromak nia orden, ami lakohi tuir. 30 Jesus nee, imi prega mate tiha ona iha krus. Maibee Nai Maromak ida nebee ita nia bei-ala sira adora nee, Nia mak halo moris fali Jesus hosi mate. 31 Agora Nai Maromak foti Jesus tuur iha Nia liman loos hodi kaer ukun hanesan Liurai i Salvadór. Nia foo tempu ba povu Israel para bele husik ona sira nia sala, atu sira bele hetan perdaun hosi Nai Maromak. 32 Ami sai sasin ba buat sira nee hotu, i nunee moos Espíritu Santu. Agora Nai Maromak foo ona Nia Espíritu Santu ba ema sira nebee halo tuir Nia.” 33 Rona tiha Pedro koalia nunee, justisa nain sira hirus tebe-tebes too sira hakarak oho Jesus nia reprezentante sira. 34 Maibee iha moos justisa nain ida hosi grupu relijiaun Farizeu, naran Gamaliel. Nia mestri relijiaun, i ema hotu respeita nia. Nia hamriik i haruka ema lori Pedro sira sai lai ba liur. 35 Depois Gamaliel koalia ba nia kolega justisa nain sira dehan, Gamaliel “Maluk Israel sira, imi tenki kuidadu! Tenki hanoin di-diak saida mak imi atu halo ba ema sira nee. 36 Imi sei hanoin ema ida naran Tadeus, tinan hira liu baa nia foti nia aan sai ema boot, i maizoumenus ema nain atus haat mak tuir nia. Iha ikus ema oho tiha nia, depois nia ema sira halai namkari too sai lakon tiha deit. 37 Depois too tempu ida governu haruka halo sensus, iha ema ida naran Judas, hosi provínsia Galileia. Ema barak mak tuir nia. Maibee iha ikus ema oho tiha nia. Depois nia ema sira moos halai namkari. 38 Nunee agora, irmaun sira, hau nia hanoin nunee deit: Husik tiha sira nain rua ba. Se sira nia hanorin ho sira nia hahalok hosi ema, mak ema nebee tuir sira sei namkari hanesan Tadeus ho Judas nia ema. 39 Maibee se sira nia hanorin nee mai hosi Nai Maromak, mak imi sei la bele taka dalan. Keta halo-be imi kontra fali Nai Maromak.” Rona nunee, sira hotu simu. 40 Depois sira bolu Jesus nia reprezentante sira tama fali ba laran, i sira haruka ema baku sira ho sikoti. Sira moos bandu reprezentante sira la bele koalia tan kona ba Jesus. Depois sira husik tiha sira baa. 41 Sira sai hosi tribunál relijiaun ho laran haksolok, tanba Nai Maromak konsidera sira serve atu terus tanba Jesus. 42 I loro-loron sira baa hanorin ema dehan, “Ema ida nebee Nai Maromak hili ona nee, mak Jesus.” Sira baa foo sai iha Uma Kreda Boot laran ho moos iha uma ba uma.
Sira hili ema nain hitu hodi toma konta ema kiak sira
1 Iha tempu nee, ema nebee tuir Jesus aumenta barak ba beibeik. Sira ema Judeu maibee hosi grupu rua, lian keta-ketak. Kleur-kleur grupu ida nebee koalia lian Gregu, haksesuk malu ho grupu ida nebee koalia lian Aram. Sira dehan, “Bainhira fahe hahaan loro-loron, ami nia feto faluk sira la simu sira nia parte.” 2 Tanba nee, Jesus nia reprezentante nain sanulu resin rua nee, halibur ema hotu nebee tuir Jesus hodi dehan, “Irmaun sira, se ami husik tiha foo sai Maromak nia Lia Fuan, hodi toma konta imi nia haan-hemu, nee la loos. 3 Nunee, diak liu, imi hili ema nain hitu hosi imi. Buka ema nebee naran diak, matenek i Espíritu Santu mak domina nia. Depois ami sei foti sira hodi toma konta kona ba haan-hemu. 4 Nunee ami bele foo tempu tomak hodi halo orasaun, i hodi foo sai ho hanorin Maromak nia Lia Fuan.” 5 I sira konkorda ho Pedro nia proposta nee. Entaun sira hili ema nain hitu, mak nee: Estevão, nia fiar tebe-tebes ba Nai Jesus, i Nai Maromak nia Espíritu Santu sempre domina nia, Filipe, Prócoro, Nikanor, Timão, Pármenas, ho Nicolau nebee laos ema Judeu maibee nia tama tiha ona relijiaun Judeu. Nia hosi sidade Antiokia. 6 Depois sira lori ema nain hitu nee, hodi baa aprezenta ba Jesus nia reprezentante sira, para tau liman ba sira nia ulun hodi halo orasaun, i foti sira hodi toma konta kona ba haan-hemu. 7 Nunee Maromak nia Lia Fuan namkari too iha nebee-nebee. I ema sira nebee fiar ba Jesus aumenta beibeik iha Jerusalém. Too nai-lulik Judeu barak moos tuir Jesus nia Dalan Loos.
Sira kaer tiha Estevão
8 Nai Maromak foo grasa ho podér boot ba Estevão hodi halo milagre ho sinál oi-oin iha povu nia klaran, nebee halo sira admira tebe-tebes. 9 Depois, loron ida, ema balu komesa kontra nia. Sira nee membru hosi uma kreda relijiaun Judeu ida nebee sira tau naran ‘Laos Atan Ona’. Sira mai hosi rai dook, hosi sidade Sirene, sidade Alexandria, provínsia Silísia, ho provínsia Ázia. Sira komesa diskuti malu ho nia. 10 Maibee Espíritu Santu foo matenek tebe-tebes ba Estevão hodi koalia. Nee mak sira la manaan nia. 11 Tanba nee sira komesa hanoin aat ba nia. I sira baa selu ema hodi foti lia falsu dehan, “Ami rona ema nee hatete aat avoo Moisés ho Nai Maromak!” 12 Sira tau lia ba povu, too katuas lia nain sira, ho mestri relijiaun sira moos rona. Entaun sira hirus. I sira baa kaer Estevão lori baa aprezenta iha justisa nain relijiaun sira. 13 Sira bolu moos ema nebee foo testemunya falsu kona ba Estevão dehan, “Ema nee sempre hatete aat Nai Maromak nia Uma Kreda Boot. I nia sempre koalia aat Nai Maromak nia lei nebee avoo Moisés rai hela ba ita. 14 Ami moos rona nia koalia dehan, Jesus ema Nazaré, atu harahun tiha Uma Kreda Boot nee. Nia moos atu muda tiha ita nia lisan nebee avoo Moisés rai hela ba ita.” 15 Ema hotu iha tribunál, hateke di-diak ba Estevão, sira haree nia oin hanesan tiha anju nia oin.
Estevão defende-an iha tribunál relijiaun nian
1 Depois nai-lulik Judeu nia boot husu ba Estevão, “Sala nebee sira foo ba o nee, loos ka lae?” Estevão responde iha tribunál relijiaun Judeu 2-3 Estevão hataan, “Irmaun sira, rona lai mai. Hori uluk molok ita nia bei-ala Abraão muda fatin ba Haran, bainhira sei hela iha Mezopotámia, Nai Maromak nebee boot tebe-tebes, hatudu ona An ba nia, ho foo orden dehan, ‘Husik tiha o nia rain ho o nia família sira. I o baa iha rai ida nebee Hau sei hatudu ba o.’ 4 Entaun avoo Abraão husik tiha ema Kaldeu sira nia rain nee, muda ba sidade Haran. Bainhira nia aman mate tiha, Nai Maromak haruka nia muda mai iha rai nee, nebee agora ita boot sira hela ba. 5 Iha tempu nebaa, Nai Maromak la foo rai pedasuk ida ba Abraão hanesan nia riku-soin. Maibee Nia promete atu foo rai nee tomak ba Abraão ho nia jerasaun sira. Momentu Nai Maromak promete nee, Abraão seidauk iha oan. 6 Maibee Nai Maromak dehan ba nia, ‘O nia jerasaun sei baa hela iha ema nia rain. I ema rai nain sei halo sira hanesan atan, i hanehan sira durante tinan atus haat. 7 Maibee liu tiha tinan atus haat nee, Hau sei kastigu nasaun nebee halo sira hanesan atan. Nee liu tiha, o nia jerasaun sei sai husik hela nasaun nee, i mai adora Hau iha fatin nee.’ 8 Depois Nai Maromak halo promesa ho Abrãao liu hosi sunat, nee hanesan sinál ida katak Abraão sira sai ona Nai Maromak nia ema. I kuandu Abraão nia oan Isac halo loron walu, Abraão sunat nia. Kleur-kleur Isac sunat nia oan Jaco??. Depois Jaco?? moos sunat nia oan mane sanulu resin rua. Sira nee mak ita ema Judeu nia bei-ala. 9 Ita nia bei-ala sira nee laran moras ba sira nia alin José, too sira faan tiha nia ba iha rai Ejiptu hanesan atan. Maibee Nai Maromak sempre hamutuk ho nia, 10 i hasai nia hosi susar ho terus laran. Nai Maromak moos foo matenek ba nia, too liurai Ejiptu haree nia diak, i foti nia sai governadór iha rai Ejiptu tomak, i xefi iha liurai nia palásiu. 11 Liu tiha nee, rai hamlaha boot iha rai Ejiptu ho rai Kanaán, too halo ema barak terus iha nebee-nebee. I ita nia bei-ala sira la iha hahaan atu haan. 12 Depois avoo Jaco?? rona dehan iha rai Ejiptu iha hahaan. Entaun nia haruka nia oan sira, baa hola hahaan iha nebaa. 13 Hola tiha hahaan, sira fila ona. Kuandu sira nia hahaan hotu ona, Jaco?? haruka sira baa hola tan iha rai Ejiptu. Nee mak foin José foo hatene dehan, nia nee sira nia alin rasik, i foo konyese nia família ba liurai Ejiptu. 14 Depois José husu ba nia aman ho nia família hotu muda ba Ejiptu. Sira nebee baa iha Ejiptu nee, iha ema hitu-nulu resin lima. 15 Nunee Jacó muda ba rai Ejiptu, i nia ho ita nia bei-ala sira seluk mate iha nebaa. 16 Sira nia jerasaun lori fila bei-ala sira nia ruin ba iha aldeia Sikém iha rai Kanaán. I sira hakoi mate ruin sira nee iha rate nebee uluk avoo Abraão sosa hosi Hamór nia jerasaun sira.”
Estevão koalia kona ba Moisés ho ema sira nebee lakohi rona ba nia
17 Estevão hatutan nia koalia, “Uluk Nai Maromak promete ona dehan, Nia sei foo rai nee ba Abraão. Kuandu nia loron besik ona atu Nai Maromak kumpri Nia promesa nee, ita nia povu Judeu iha rai Ejiptu aumenta barak tebe-tebes. 18 Depois iha liurai foun ida mak komesa ukun iha Ejiptu, nia la hatene kona ba José. 19 Liurai nee buka meius hodi halo terus ita nia povu i hanehan ita nia bei-ala sira. Nia obriga sira soe tiha sira nia oan nurak, para sira mate.
Liurai Ejiptu nia oan feto foti Moisés para hakiak
20 Iha tempu nee, avoo Moisés moris, nia isin diak i forti. Nia inan-aman sira la tuir liurai nia orden. Sira kuidadu labarik nee sub-subar iha sira nia uma, too nia fulan tolu. 21 Bainhira sira la bele subar tan labarik nee ona, sira lori nia baa husik tiha iha liur. Maibee liurai Ejiptu nia oan feto ida hetan labarik nee i nia foti hodi baa hakiak hanesan nia oan rasik. 22 Nunee ema Ejiptu sira hanorin sira nia matenek hotu ba Moisés, too nia sai ema boot, i nia matenek koalia, ho matenek iha nia servisu. 23 Bainhira avoo Moisés tinan haat-nulu ona, nia desidi baa vizita nia maluk Israel sira. 24 Too iha nebaa, nia haree ema Ejiptu ida baku hela ema Israel ida. Nia baa defende nia maluk, i baku mate tiha ema Ejiptu nee. 25 Moisés hanoin dehan nia povu hatene ona katak Nai Maromak mak haruka nia baa hasai sira hosi terus nia laran. Afinál sira seidauk kompriende. 26 Aban fali, nia haree ema Israel nain rua baku malu. Nia baa sori sira, hodi dehan, “Imi nain rua nee mesak maun-alin deit. Nusaa mak imi baku malu fali?” 27 Maibee ema ida baku dolar nia kolega nee, dudu tiha Moisés ba sorin, hodi dehan, ‘See mak foti o sai ami nia xefi?! I see mak foti o hodi tesi ami nia lia?! 28 O atu oho hau hanesan horiseik o oho tiha ema Ejiptu nee?’ 29 Rona nunee, Moisés halai sai hosi Ejiptu, baa hela iha rai Midian. Nia kaben iha nebaa, i sira hetan oan mane nain rua. Moisés haree ahi lakan iha ai huun kiik ida 30 Liu tiha tinan haat-nulu, avoo Moisés baa iha rai fuik maran besik Foho Sinai. Iha nebaa Nai Maromak nia anju mosu ba nia hosi ahi lakan iha ai huun kiik ida. 31 Haree nunee, Moisés sai bilaan tiha. Nia baa besik hodi hatene saida mak nee. Derepenti, nia rona Maromak koalia hosi ahi laran dehan, 32 ‘Hau nee o nia bei-ala sira nia Maromak; Abraão, Isac, ho Jaco?? sira nia Maromak.’ Rona nunee, Moisés tauk atu-mate, i nia la barani foti oin hodi haree. 33 Depois Maromak koalia tan, ‘Moisés, rai nebee o hamriik ba nee santu. Nee duni hasai tiha o nia sandalyas! 34 Hau hatene Hau nia povu Israel sira nia terus iha Ejiptu, i Hau rona ona sira hakilar husu tulun mai Hau. Nee duni Hau tuun agora hodi liberta sira. Prepara ona. Hau atu haruka o fila fali ba iha Ejiptu.’ 35 Nunee, liu hosi anju nebee hatudu-An iha ahi nee, Nai Maromak haruka Moisés fila ba Ejiptu. Moisés nee, mak uluk povu Israel lakohi simu. Sira dehan, ‘See mak foti o sai ami nia xefi ho ami nia juís?’ Agora Nai Maromak rasik mak foti nia hodi baa hasai povu sira hosi terus laran i hodi ukun sira! 36 Depois Moisés lori povu Israel sai hosi Ejiptu liu hosi Tasi Mean. I nia halo milagre ho sinál bo-boot iha Ejiptu, iha Tasi Mean, ho moos durante tinan haat-nulu nebee sira lao iha rai fuik maran. Sinál sira nee halo povu admira tebe-tebes. 37 Moisés nee mak foo hatene ba povu Israel dehan, ‘Nai Maromak sei foti ema ida hosi imi nia leet hodi sai Nia profeta, hanesan Nia foti ona hau.’ 38 I Moisés nee hamutuk ho povu Israel sira iha rai fuik maran. Anju nee hatoo Nai Maromak nia Lia Fuan ba nia iha Foho Sinai. I Moisés hatutan fali lia fuan sira nee ba povu Israel. Lia fuan sira nee hatudu dalan moris ba ita. 39 Maibee bele nunee moos, ita nia bei-ala sira lakohi rona ba Moisés. Sira la simu nia, i hakarak fila fali deit ba Ejiptu. 40 I sira baa hamaus Arão dehan, ‘Ami husu ba senyór halo estátua lulik ba ita atu lori ita ba oin. Tan Moisés nee lori ita hotu sai hosi rai Ejiptu, maibee agora ami la hatene ema nia aman nee iha nebee.’ 41 Entaun sira halo estátua ida, nia modelu hanesan karau vaka oan ida. Sira oho animál hodi halo sakrifísiu ba estátua lulik nee. Sira halo festa rame-rame, i haksolok ho buat nebee mak sira halo ho sira nia liman rasik. 42 Haree nunee, Nai Maromak fila kotuk i husik tiha liman. Entaun sira komesa adora loromatan, fulan, ho fitun. Nee tuir lo-loos ho Nai Maromak nia profeta hakerek ona hori uluk dehan, ‘Imi ema Israel sira, durante tinan haat-nulu imi lao haleu rai fuik maran, imi oho animál hodi adora Hau ka? Lae! 43 Imi laos adora Hau! Loro-loron imi adora mak imi nia lulik deit. Imi gosta tama-sai uma lulik Moloke nian. Imi moos adora estátua fitun ida, naran Renfan. Nunee, imi adora estátua nebee imi halo ho imi nia liman rasik! Nee duni Hau sei soe tiha imi ba dook iha rai Babilónia nia sorin nebaa.’” Lia fuan sira nee mak uluk Nai Maromak nia profeta foo sai.
Estevão koalia kona ba Nai Maromak nia Uma Kreda Boot
44 Estevão hatutan nia koalia dehan, “Iha rai fuik maran nee, ita nia bei-ala sira harii tenda harohan para hodi adora Maromak. Tenda nee sira halo tuir modelu nebee Nai Maromak hatudu ona ba avoo Moisés.
Tenda harohan
45 Kleur-kleur, bainhira Josue sira halo funu hadau rai hosi nasaun sira seluk nebee Maromak duni sai hosi rai Kanaán, sira lori moos tenda harohan. Sira harii fali tenda nee, i tenda nee hamriik nafatin iha nebaa too liurai David kaer ukun. 46 Liurai David nee sempre halo haksolok Nai Maromak nia laran. I nia husu ba Nai Maromak, atu nia bele harii Uma Kreda Boot ida ba Nai Maromak, ida nebee nia avoo Jaco?? sira uluk adora. 47 Afinál David nia oan Salomão mak harii Uma Kreda nee. 48 Maibee Nai Maromak la hela iha uma nebee ema mak halo. Hanesan uluk Nai Maromak nia profeta ida hakerek ona dehan, 49 ‘Lalehan mak Hau nia kadeira hodi tuur kaer ukun. I mundu nee fatin hodi tau Hau nia ain. Nunee oinsaa imi atu halo uma ida ke serve mai Hau?! Oinsaa imi atu halo fatin ida hodi Hau hela?! La bele duni! 50 Tanba buat hotu-hotu iha lalehan ho iha rai, Hau mak halo.’” Lia fuan sira nee mak uluk Nai Maromak nia profeta hakerek.
Estevão kritika nai ulun sira tanba sira kontra Maromak nia Ema Santu
51 I Estevão koalia tan ba sira ho siak dehan, “Imi nee ulun toos duni! Imi hanesan ema nebee la konyese Nai Maromak, i lakohi rona. Imi sempre kontra Nai Maromak nia Espíritu Santu, hanesan moos imi nia bei-ala sira.ad 52 Imi nia bei-ala sira sempre halo terus Nai Maromak nia profeta sira. Imi dehan tok, profeta ida nebee mak sira la halo terus? La iha! Sira oho tiha profeta sira nebee foo sai dehan Ema Moris Loos atu mai. Too Ema nee mai moos, imi rasik faan ho oho tiha nia. 53 Imi simu ona Nai Maromak nia lei liu hosi Nia anju. Maski nunee, imi la halo tuir.”
Sira tuda Estevão ho fatuk too mate
54 Bainhira justisa nain relijiaun sira rona Estevão nia koalia nee, sira hirus tebe-tebes too ruun nihan. 55 Maibee Espíritu Santu domina Estevão. I nia foti matan hateke ba lalehan, nia haree Nai Maromak nia naroman nabilan, i Nai Jesus hamriik hela iha Nai Maromak nia liman loos. 56 Nia dehan, “Rona lai! Hau haree lalehan nakloke, i Jesus, Ema Perfeitu, hamriik hela iha Nai Maromak nia liman loos.” 57 Rona nunee, sira taka tilun, hakilar, i halai rame-rame baa 58 rasta nia sai hosi sidade. I testemunya sira hasai sira nia faru foo ba ema foin sae ida mak hein. Nia naran Saul. I sira komesa tuda Estevão ho fatuk.
Sira tuda Estevão ho fatuk
59 Sira tuda nia dadaun, nia halo orasaun fila-fila dehan, “Nai Jesus! Simu ona Hau nia klamar ba!” 60 Nia hakneak, i hakilar ho lian makaas dehan, “Aman Maromak, la bele foo sala nee ba sira!” I nia mate. Saul konkorda ho Estevão nia mate.
Saul sira halo terus sarani sira, too sira namkari
1-2 Bainhira Estevão mate, iha ema balu ke tuir Nai Maromak, baa foti Estevão nia mate isin hodi baa hakoi, ho tanis lelir. Hahuu iha loron nee, ema komesa halo terus ba Nai Jesus nia povu iha sidade Jerusalém, too sira halai namkari ba iha provínsia Judeia ho provínsia Samaria. Sira hotu halai, so Nai Jesus nia reprezentante sira mak la halai, sira hela nafatin iha Jerusalém. 3 Saul moos buka dalan hodi halo rahun Jesus nia ema sira. Nia tama-sai uma hodi buka sarani sira. Bele feto ka mane, nia kaer hotu, rasta baa hatama iha kadeia.
Saul sira kaer ema sarani hodi baa hatama iha kadeia
Filipe foo sai Nai Jesus nia Novidade Diak iha provínsia Samaria
4 Maski sarani sira halai namkari tanba ema halo terus sira, maibee sira foo sai nafatin Nai Jesus nia Novidade Diak ba ema iha fatin-fatin. 5 Iha tempu nee, Filipe baa iha sidade ida iha provínsia Samaria hodi foo hatene ba ema sira iha nebaa kona ba Ema ida nebee Nai Maromak hili ona. 6 Bainhira ema barak haree milagre nebee nia halo, sira halibur hamutuk hodi rona ho atensaun saida mak nia koalia. 7 Filipe duni sai espíritu aat hosi ema barak, i espíritu sira nee moos sai ho hakilar makaas. Ema ain aat lao la diak, ho ema lao kudeik, barak moos diak. 8 Nee mak ema sira iha sidade nee haksolok tebe-tebes.
Pedro foo malisan ba matan-dook Simão
9 Iha ema matan-dook ida naran Simão. Kleur ona, ema Samaria sira hotu admira buat nebee mak nia halo. I nia sempre gaba nia aan dehan, “Hau ema makaas la halimar!” 10-11 Nunee iha sidade nee, ema kiik-boot, hotu-hotu koalia kona ba nia dehan, “Ema nee makaas tebe-tebes. Nia iha Maromak nia Podér!” Nia lulik nee halo ema admira kleur ona. Nunee ema barak tuir nia. 12 Maibee agora, sira rona Filipe hanorin kona ba Nai Maromak nia ukun i kona ba Jesus Kristu. Rona nunee, ema mane ho feto barak fiar ba Jesus, i sira moos sarani. 13 Simão moos fiar ba Jesus, i sira moos sarani nia. I nia tuir Filipe ba iha nebee-nebee. Bainhira nia haree Filipe halo milagre boot oi-oin, nia admira tebe-tebes. 14 Jesus nia reprezentante sira nebee hela iha Jerusalém rona dehan ema iha provínsia Samaria simu ona Maromak nia Novidade Diak. Entaun sira haruka Pedro ho João ba iha nebaa. 15-17 Kuandu sira nain rua too, sira halo orasaun husu atu ema sarani sira nee bele simu Espíritu Santu. Tanba sira seidauk simu Espíritu Santu, sira foin sarani ho Jesus nia naran deit. Nunee Pedro ho João tau liman ba ema sira nee nia ulun, i sira simu kedas Espíritu Santu. 18 Simão haree katak bainhira sira nain rua tau liman iha ema nia ulun, sira simu Espíritu Santu. Entaun nia atu foo osan ba Pedro ho João, i nia husu dehan, 19 “Senyór sira, imi foo moos podér nee mai hau, para hau tau liman iha ema see deit, sira moos simu Espíritu Santu nee.” 20 Maibee Pedro siak nia dehan, “Malisan ba o, ho o nia osan nee! Tanba o hanoin o bele selu osan atu simu podér nee. 21 O la iha direitu hola parte iha servisu nee, tanba o nia laran la loos iha Maromak nia oin. 22 O husik ona o nia sala, i harohan ba Maromak, para se bele karik, Nia foo perdaun ba o nia hanoin aat nee. 23 Tan hau hatene o laran moras ami, i sala mak domina o!” 24 I Simão husu ba sira nain rua dehan, “Senyór sira, imi harohan mai hau, para malisan nebee ohin imi koalia nee, keta kona hau.” 25 Pedro ho João foo testemunya kona ba Jesus, i foo sai Maromak nia Lia Fuan iha sidade nee. Depois sira fila ba Jerusalém. Tuir dala-dalan sira tama iha aldeia-aldeia iha provínsia Samaria, hodi foo sai Nai Jesus nia Novidade Diak.
Filipe sarani funsionáriu boot ida hosi rai Etiópia
26 Loron ida Nai Maromak nia anju mai hatete ba Filipe, “O lao ba sul too dalan ida nebee tuun hosi sidade Jerusalém ba iha Gaza. Dalan nee liu hosi rai fuik maran.” 27-28 Nunee Filipe baa kedas. Bainhira nia too iha dalan nee, nia haree funsionáriu boot ida hosi rai Etiópia. Nia mak toma konta liurai feto Kandase nia riku sira hotu. Nia foin baa harohan iha Jerusalém, agora nia fila fali. Nia tuur iha kuda kareta leten, lee hela profeta Isaias nia livru. 29 I Maromak nia Espíritu haruka Filipe baa besik kuda kareta nee. 30 Kuandu Filipe halai baa besik ona, nia rona ema nee lee hela profeta Isaias nia livru. Nia husu, “Senyór, ita kompriende saida mak ita lee ka lae?” 31 Ema nee hataan, “Lae. Tenki iha ema esplika lai mai hau, foin hau bele kompriende. Halo favór, ita sae mai tuur ho hau.” 32 Iha lia fuan nebee nia lee nee, Isaias hakerek kona ba bibi malae ida hodi hatudu ba Nai Jesus, nunee, “Sira dada nia, hanesan ema dada bibi malae baa oho. Nia hanesan bibi malae oan nebee ema tesi nia fulun, maibee nia nonook deit. Nunee moos, nia la loke ibun, i la hataan lia fuan ida. 33 Ema hatuun nia, ema tesi nia lia la loos. Nia jerasaun la iha, tanba ema halakon tiha nia vida hosi mundu.” Filipe hanorin Maromak nia Lia Fuan ba funsionáriu ida hosi rai Etiópia 34 Lee tiha hotu nunee, funsionáriu nee husu ba Filipe, “Oinsaa? Profeta Isaias koalia kona ba nia aan rasik ka, nia koalia kona ba ema seluk?” 35 Entaun Filipe esplika ba nia Nai Jesus nia Novidade Diak, hahuu hosi Isaias nia hakerek ohin nee. 36 Bainhira sira lao daudaun, ema Etiópia nee haree bee uitoan, i nia hatete ba Filipe, “Senyór, haree tok bee iha nebaa. Se bele, mai ita tuun para senyór sarani hau agora.” 37 I Filipe hataan, “Se ita fiar tebe-tebes ba Nai Jesus ho neon laran tomak, ita bele sarani.” I funsionáriu nee foo sai dehan, “Hau fiar tebe-tebes katak, Jesus Kristu, Nai Maromak nia Oan.” 38 I ema Etiópia nee haruka nia ema halo para tiha nia kuda kareta. Sira nain rua tuun tama ba bee laran, depois Filipe sarani nia. 39 Kuandu sira sai hosi bee, derepenti Nai Maromak nia Espíritu Santu lori tiha Filipe ba iha fatin seluk, i funsionáriu boot nee la haree tan nia ona. Nunee nia lao baa nafatin ho laran haksolok tebe-tebes. 40 Depois Filipe mosu fali iha aldeia ida naran Azotu. I nia tama-sai aldeia-aldeia hodi foo sai Jesus nia Novidade Diak, too iha sidade Sezareia.
Saul sai Nai Jesus nia ema
1 Iha tempu nee, Saul ameasa nafatin ema sira nebee tuir Jesus. Nia tuur la metin atu oho sira. Nunee nia baa iha nai-lulik Judeu nia boot, 2 hodi husu surat rekomendasaun atu foo iha responsavel uma kreda Judeu sira iha sidade Damasku nebaa. Ho surat nee nia husu lisensa, se nia hasoru ema nebee tuir Jesus nia Dalan, mane ka feto, nia bele kaer i futu sira, lori fila ba Jerusalém. 3 Simu tiha surat nee, Saul ho nia kolega sira baa ona Damasku. Besik ona sidade nee, derepenti naroman ida hosi lalehan leno ba Saul. 4 Nia monu kedas ba rai, i nia rona lian ida dehan, “Saul! Saul! Tansaa mak o halo terus Hau nunee?” 5 Saul husu, “Nai, Ita Boot nee see?” Lian nee hataan dehan, “Hau nee Jesus, ida nebee o halo terus tebe-tebes. 6 Agora, hadeer hodi baa sidade ona. Depois mak Hau foo hatene ba o saida mak o tenki halo.” Saul monu ba rai 7 Nia kolega sira moos rona lian nee, maibee sira la haree ema ida. Sira nia hanoin hotu lakon too sira la koalia buat ida. 8 I Saul hamriik, loke matan, maibee la haree buat ida. Entaun sira kaer nia liman hodi ajuda nia lao too iha Damasku. 9 Durante loron tolu nia matan delek, i nia moos la haan-hemu buat ida. 10 Iha Damasku nee, iha Nai Jesus nia ema ida naran Ananias. Nai Maromak hatudu hanesan mehi ida ba nia, hodi dehan, “Ananias!” Nia hataan, “Nai.” 11 Nai Jesus hatete, “O baa iha Judas nia uma, iha estrada naran Loos. O husu ema ida naran Saul, hosi sidade Tarsu. Agora nia halo hela orasaun. 12 Hau moos foo ona hanesan mehi ida ba nia dehan, ema ida naran Ananias sei baa hasoru nia hodi tau liman ba nia, atu nia bele haree fila fali.” 13 Ananias hataan dehan, “Maibee Nai, ami rona ona ema konta baa-mai dehan, ema nee sempre halo terus Ita Boot nia ema sira iha Jerusalém. 14 Agora ami rona tan dehan ulun relijiaun Judeu sira foo podér ba nia hodi kaer ema hotu nebee tuir Ita Boot.” 15 Maibee Nai Jesus koalia tan, “O baa deit! Tanba Hau hili ona nia hodi serbí Hau, i lori Hau nia Lia Fuan Diak baa foo ba ema sira nebee laos Judeu, foo ba liurai sira, ho moos ba ema Judeu sira. 16 Hau sei hatudu ba nia katak, nia sei terus barak tanba nia sei tuir Hau.” 17 Nunee Ananias baa. Nia tama liu ba uma laran, i tau liman ba Saul hodi dehan, “Irmaun Saul, Nai Jesus, ida nebee hatudu-An ba irmaun iha dalan klaran, Nia mak haruka hau mai halo orasaun ba ita, atu ita bele haree fila fali, i atu Espíritu Santu domina ita.” 18 Momentu nee kedas, buat ida hanesan ikan kulit monu sai hosi Saul nia matan, i nia haree fila fali. Nia hamriik, i sira sarani kedas nia. 19 aDepois nia foin haan ho hemu, i nia isin forti fila fali.
Saul foo sai Novidade Diak iha sidade Damasku
19 bSaul sei hela loron ida-rua ho Nai Jesus nia ema sira iha Damasku. 20 Nia baa kedas tama-sai ema Judeu sira nia uma kreda, hodi foo sai ba sira dehan, “Jesus nee tebe-tebes Nai Maromak nia Oan.”
Saul koalia iha ema Judeu sira nia uma kreda
21 Sira hotu admira, hodi koalia ba malu dehan, “Ema nee mak halo rahun Nai Jesus nia ema sira iha Jerusalém, loos ka lae?! Agora nia mai iha nee atu kaer sarani sira lori ba ita nia ulun relijiaun sira!” 22 Maibee Nai Maromak foo podér ba Saul atu nia bele hatudu lo-loos katak, Jesus mak Ema ida nebee Nai Maromak hili ona. Nunee la iha tan ema ida atu hataan. 23 Depois ema Judeu balu kombina malu atu oho Saul. 24 Maibee planu aat nee moos too iha Saul nia tilun. Ema hein loron-kalan iha portaun sidade nian, atu oho nia. 25 Maibee iha kalan ida, Saul nia kolega balu mai lori tiha nia, i sira hatuun nia ho bote ida, hosi moru sidade nian. Ho nunee, Saul halai sai hosi sidade Damasku. Sira hatuun Saul ho bote
Saul baa iha Jerusalém
26 Tuir mai, Saul baa iha Jerusalém. Too iha nebaa, nia hakarak tama hamutuk ho Nai Jesus nia ema sira. Maibee sira hotu tauk nia, tanba sira hanoin dehan nia halo finji hanesan ema sarani, para hodi kaer sira. 27 Maibee ema ida naran Barnabé lori Saul baa aprezenta ba Nai Jesus nia reprezentante sira. Barnabé konta ba sira dehan, Saul hasoru malu tiha ona ho Nai Jesus iha dalan, i Nai Jesus koalia rasik ho nia. Barnabé moos dehan, Saul barani hodi Nai Jesus nia Naran foo sai Novidade Diak ba ema iha Damasku. 28 Rona nunee, foin sira hotu simu Saul, i nia hela hamutuk ho sira iha sidade Jerusalém. Nia barani foo sai Nai Jesus nia Lia Fuan Diak ba see-see deit. 29 Nia koalia ho diskuti malu ho ema Judeu sira nebee koalia lian Gregu. Maibee sira la simu, i sira buka meius atu oho nia. 30 Bainhira sarani sira rona nunee, sira lori tiha nia ba iha sidade Sezareia. Depois sira haruka nia fila fali ba sidade Tarsu. 31 Liu tiha nee, Nai Jesus nia povu iha provínsia Judeia, iha provínsia Galileia ho provínsia Samaria moris ho hakmatek. Sira aumenta barak ba beibeik, i moris tauk ba Nai Maromak. Tanba Nai Maromak nia Espíritu Santu mak hametin sira nia laran.
Pedro kura mane ida iha aldeia Lida
32 Iha tempu nee, Pedro lao lemo rai hodi baa vizita sarani sira. Iha loron ida, nia baa vizita sira nebee hela iha aldeia Lida. 33 Iha nebaa nia hetan mane ida naran Eneias. Nia ain aat, lao la diak, toba deit iha biti tinan walu ona. 34 Pedro dehan ba nia, “Eneias, agora duni, Nai Jesus Kristu kura o. Hadeer ona! Aruma o nia kama!” I nia hamriik kedas. 35 Bainhira ema hotu iha aldeia Lida ho aldeia Sarona haree Eneias diak tiha ona, sira moos fiar ba Nai Jesus.
Pedro halo Tabita moris fali
36 Iha senyora ida naran Tabita hela iha sidade Jope. (Nia naran hodi lian Gregu bolu Dorkas, nee dehan katak, ‘bibi rusa’). Nia fiar ba Nai Jesus. I nia sempre halo buat diak ba ema hotu, i sempre foo ezmola ba ema kiak sira. 37 Iha tempu nee, Tabita moras, depois nia mate. Sira foo hariis tiha mate isin, i lori baa hatoba iha kuartu ida iha andár leten. 38 Sarani sira rona dehan Pedro iha Lida, laduun dook hosi Jope. Nunee sira haruka ema nain rua baa bolu nia dehan, “Senyór, favór baa lalais Jope.” 39 Pedro tuir kedas sira. Too iha nebaa, nia sae liu ba iha kuartu nebee Tabita nia mate isin rai ba. Iha kuartu nee, feto faluk barak tanis lelir, hodi hatudu ba Pedro sira nia vestidu ho sira nia ropa seluk tan nebee Dorkas suku foo ba sira bainhira nia sei moris.
Pedro halo Tabita moris fali
40 Pedro haruka sira hotu sai hosi kuartu nee, i nia hakneak hodi halo orasaun. Hotu tiha, nia see oin ba mate nee hodi hatete, “Tabita, hadeer ona!” Derepenti deit, senyora nee loke nia matan. Bainhira nia haree Pedro, nia hadeer tuur kedas. 41 I Pedro kaer nia liman hodi foti nia hamriik, depois bolu feto faluk sira ho tan sarani sira seluk hodi entrega Dorkas nebee moris fali ba sira. 42 Novidade nee namkari lemo-lemo iha sidade Jope laran tomak, too ema barak fiar ba Nai Jesus. 43 Pedro hela loron hira tan iha Jope, ho ema ida naran Simão. Simão nia servisu mak hamoos animál nia kulit.
Komandante tropas Roma ida naran Cornélio haruka bolu Pedro
1 Iha sidade Sezareia iha militár Roma ida naran Cornélio. Nia komandante kompanyia hosi Itália. 2 Nia adora ho tauk ba Maromak, i nia família uma laran tomak moos hanesan. Nia sempre foo ajuda ho laran luak ba ema Judeu sira nebee kiak, i sempre halo orasaun ba Nai Maromak.
Komandante Cornélio halo orasaun ba Nai Maromak
3 Iha loron ida, kala tuku tolu lokraik, hanesan mehi, nia haree mo-moos Nai Maromak nia anju ida, mai bolu nia dehan, “Cornélio!” 4 Nia hateke ba anju nee ho tauk tebe-tebes. Nia husu, “Iha saida, Senyór?” Anju nee hataan, “Nai Maromak rona ona o nia orasaun, i Nia haksolok ho ajuda nebee o foo ba ema kiak sira. 5 Nee duni, agora o haruka ema ba sidade Jope bolu ema ida naran Simão Pedro. 6 Nia hela iha Simão nia uma besik tasi ibun. Ema nee servisu hamoos anima?l nia kulit.” 7 Kuandu anju nee baa tiha ona, Cornélio bolu nia ema nain rua ho nia soldadu ida nebee tauk ba Maromak. 8 Cornélio hatete buat nee hotu ba sira, depois nia haruka sira ba Jope.
Pedro vizita Cornélio
9 Aban fali, iha meiu-dia, Cornélio nia ema sira besik too ona iha Jope. Momentu nee, Pedro sae ba uma leten hodi halo orasaun.
Pedro halo orasaun iha uma leten
10 Nia sei halo hela orasaun, nia senti hamlaha i hakarak haan. Maibee ema sei tein hela hahaan, Nai Maromak hatudu hanesan mehi ida ba nia. 11 Nia haree lalehan nakloke, i mosu buat ida hanesan lensól boot, nia rohan haat nee kesi hotu, tuun mai. 12 Iha lensól laran, nia haree animál oi-oin. Iha animál ain haat, animál dolar, ho manu fuik oi-oin. Pedro haree animál oi-oin iha lensól laran 13 Nia moos rona lian ida dehan, “Pedro, hamriik ona! Oho animál sira nee i haan ba!” 14 Maibee Pedro hataan, “La bele, Nai! Hau nunka haan animál foer hanesan nee, nebee ami Judeu nia lei bandu.” 15 Maibee lian nee simu fali dehan, “Buat nebee Nai Maromak dehan bele haan ona, o la bele bandu tan.” 16 Nee akontese dala tolu, depois lensól nee sae fali ba lalehan. 17 Pedro sei hanoin hela atu buka hatene mehi nee dehan saida, Cornélio nia ema sira too iha Simão nia uma oin. 18 Sira bolu hodi husu, “Ami buka bainaka ida naran Simão Pedro. Nia hela iha nee ka?” 19 Pedro sei hanoin hela mehi nee dehan saida, Espíritu Santu foo hatene ba nia dehan, “Pedro, ema mai buka o. 20 O tuun baa tuir sira ona. La bele laran ru-rua tan, maski sira laos ema Judeu. Tanba Hau mak haruka sira mai bolu o.” 21 Entaun Pedro tuun baa hasoru sira, hodi dehan, “Hau mak nee, ida nebee imi buka. Tanba saa imi buka hau?” 22 Sira hataan, “Komandante Cornélio mak haruka ami mai. Nia ema moris loos ho tauk ba Nai Maromak. Ema Judeu sira hotu respeita tebe-tebes nia. Horiseik Nai Maromak nia anju mai haruka nia bolu senyór ba iha nia uma, para nia bele rona senyór nia lia fuan.” 23 Depois Pedro husu ba sira atu toba lai kalan ida iha nebaa. Aban Pedro prepara-an hodi baa hamutuk ho sira. Sarani balu hosi Jope akompanya sira baa. 24 Sira toba kalan ida iha dalan, depois iha aban fali sira too iha sidade Sezareia. Cornélio moos hein hela sira. Nia halibur nia família ho nia belun diak sira iha nebaa ona. 25 Pedro too iha uma, Cornélio baa simu nia, i hakneak iha Pedro nia oin atu adora nia. 26 Maibee Pedro foti nia hamriik hodi dehan, “Irmaun, hamriik tiha! La bele adora fali hau. Tanba hau ema hanesan moos ita.” 27 Entaun Cornélio moos hamriik. I sira nain rua komesa koalia, hodi tama ba uma laran. Pedro haree ema barak hein hela nia. 28 Nia koalia dehan, “Maun-alin sira, imi hatene ona, tuir ami Judeu nia lisan, ami la bele ranxu ho ema sira nebee laos Judeu, saa tan baa tama iha sira nia uma. Maibee Nai Maromak hatudu ona mai hau katak, hau la bele dehan ema ida foer ka la serve. Nee duni, hau la bele hakribi tan ema nebee laos Judeu. 29 Nee mak momentu imi haruka bolu hau, hau mai kedas. Agora hatete, tanba saa mak imi bolu hau mai?” 30 Cornélio hataan, “Hori baintolu, tuku tolu lokraik, hau halo hela orasaun iha hau nia uma. Derepenti mane ida hamriik iha hau nia oin. Nia hena nabilan loos. 31 Nia dehan, ‘Nai Maromak rona ona o nia orasaun, i Nia haksolok ho ajuda nebee o foo ba ema kiak sira. 32 Nee duni, agora o haruka ema ba sidade Jope bolu ema ida naran Simão Pedro. Nia hela iha Simão nia uma besik tasi ibun. Ema nee servisu hamoos animál nia kulit.’ 33 Nee mak hau haruka kedas ema baa bolu ita. Ami agradese tebe-tebes tanba ita mai duni. Agora ami halibur hamutuk iha Nai Maromak nia oin hodi rona saida mak Nia haruka ita foo sai mai ami.”
Pedro foo sai Nai Jesus nia Dalan ba ema nebee laos Judeu
34 Pedro dehan, “Agora foin hau hatene katak Nai Maromak haree ema hotu-hotu hanesan. Nia la haree ema nee Judeu ka laos Judeu. 35 Ema hosi suku nebee deit, se nia adora ba Nai Maromak, i moris tuir Maromak nia hakarak, maka Nai Maromak simu nia. 36 Imi hatene novidade nebee mak Nai Maromak foo sai ona ba ami ema Israel. Lia Fuan Diak nee katak Nia haruka ona Jesus Kristu mai, hodi halo dame ema ho Nai Maromak. I Nia mak ema hotu-hotu nia Nai. 37 Imi moos hatene ona saida mak akontese iha provínsia Judeia tomak, komesa hosi João foo sai ba ema dehan, sira tenki husik ona sira nia sala. I sira moos tenki sarani, hanesan sinál katak sira diak malu fali ho Nai Maromak. 38 Imi moos hatene ona katak Nai Maromak foo Nia Espíritu Santu ho moos podér ba Jesus, ema Nazaré. Depois Jesus tama-sai aldeia-aldeia hodi halo diak ba ema, i kura hotu ema nebee Satanás halo terus, tanba Nai Maromak hamutuk ho Nia. 39 Ami haree ho ami nia matan rasik, saida mak Nia halo ona iha sidade Jerusalém ho iha Israel laran tomak. Maibee bele nunee moos, ema prega Nia iha krus too mate. 40 Nia mate duni, maibee iha loron tolu, Nai Maromak halo Nia moris fali, i halo Nia hatudu-An ba ema. 41 Laos ema hotu-hotu mak haree Nia. So ami deit. Ami nee, Nai Maromak hili antes tiha ona hodi sai sasin kona ba Jesus. Bainhira Nai Jesus moris fila fali, ami mak baibain haan-hemu hamutuk ho Nia. 42 Nunee Nai Maromak haruka ami baa foo sai Nai Jesus nia Lia Fuan Diak ba ema iha fatin-fatin. Nia haruka ami foo sasin katak, Nai Maromak foti ona Jesus nee sai tesi lia nain ba ema moris ho moos ba ema nebee mate ona, hodi hakotu see mak bele moris hamutuk ho Nai Maromak, i see mak lae. 43 Nai Maromak nia profeta sira uluk moos, hotu-hotu koalia kona ba Jesus nee katak, see mak fiar ba Nia, Nai Maromak sei hamoos nia sala.”
Ema nebee laos Judeu simu Nai Maromak nia Espíritu Santu
44 Pedro sei koalia hela nunee, derepenti Nai Maromak nia Espíritu Santu tuun ba ema hotu nebee rona nia lia fuan. 45 Bainhira sarani Judeu sira nebee ohin mai hamutuk ho Pedro, haree ema nebee laos Judeu nee simu Espíritu Santu, sira admira tebe-tebes. 46 Sira rona ema sira nee koalia lian oi-oin nebee sira nunka aprende, ho hahii Nai Maromak. Depois Pedro dehan, 47 “Imi haree rasik deit ba! Ema sira nee simu ona Espíritu Santu hanesan moos ita. Nee duni, mai ita foo sarani sira ona. La iha ema ida mak bandu tan.” 48 Entaun Pedro haruka Cornélio sira sarani hodi Jesus nia naran para sira bele sai Nai Jesus nia ema. I sira husu ba Pedro atu hela tan loron ida-rua ho sira.
Pedro defende nia aan tanba nia sarani ema nebee laos Judeu
1 Jesus nia reprezentante sira ho sarani sira seluk iha provínsia Judeia rona dehan, ema nebee laos Judeu moos simu ona Maromak nia Lia Fuan. 2 Bainhira Pedro baa too iha Jerusalém, iha ema sarani balu nebee sei kaer nafatin lisan Judeu nian, foo sala ba nia dehan, 3 “O bele barani baa tama iha ema nebee laos Judeu sira nia uma. O haan ho hemu tan ho sira! La bele nunee, tan sira la moris tuir ita nia lisan.” 4 Nunee Pedro konta buat nebee akontese ona, hosi huun too rohan dehan, 5 “Loron ida, hau halo hela orasaun iha sidade Jope, Nai Maromak hatudu hanesan mehi ida mai hau. Mosu buat ida hanesan lensól boot ida tuun hosi lalehan, nia rohan haat nee kesi hotu. 6 Bainhira hau fihir tama ba lensól laran, hau haree animál oi-oin. Iha animál ain haat, animál fuik, animál nebee dolar, ho manu fuik oi-oin. Sira nee hotu, ita ema Judeu la bele haan. 7 Hau moos rona lian ida haruka dehan, ‘Pedro, hamriik ona! Oho animál sira nee, i haan ba!’ 8 Maibee hau hataan, ‘La bele, Nai! Hau nunka haan animál foer hanesan nee, nebee ami Judeu nia lei bandu.’ 9 Maibee lian nee hatete fali, ‘Buat nebee Nai Maromak dehan bele haan ona, o la bele bandu tan.’ 10 Nee akontese dala tolu, mak foin lensól ho animál sira nee sae fali ba lalehan. 11 Momentu nee kedas, ema mane nain tolu too iha uma. Sira mai hosi Sezareia buka hau. 12 Nai Maromak nia Espíritu Santu foo hatene mai hau dehan, ‘O baa hamutuk ho sira. Keta laran ru-rua, maski sira nee laos ema Judheu.’ Depois ita nia irmaun nain neen nee moos akompanya hau ba Sezareia. I ami hotu baa tama iha Cornélio nia uma. 13 Nia konta ba ami dehan, nia haree Nai Maromak nia anju ida hamriik iha nia uma hodi hatete, ‘Haruka ema ba Jope bolu Simão Pedro. 14 Nia sei hatudu ba o, ho ema hotu iha o nia uma laran, oinsaa mak Nai Maromak bele salva imi.’ 15 Nee mak hau komesa foo hatene Maromak nia Lia Fuan Diak ba sira. Maibee hau foin hahuu nunee, Espíritu Santu tuun kedas ba sira, hanesan moos uluk Nia tuun mai ita. 16 Haree sira simu Espíritu Santu nunee, hau hanoin too Jesus nia Lia Fuan dehan, ‘Uluk João foo sarani ema hodi bee, maibee Nai Maromak sei foo Nia Espíritu Santu ba ema hodi domina sira.’ 17 Nai Maromak rasik mak foo Nia Espíritu Santu ba sira nebee laos ema Judeu, hanesan lo-loos uluk Nia foo mai ita bainhira ita fiar ba Nai Jesus Kristu. Nunee imi hakarak atu hau kontra Nai Maromak ka, oinsaa?!” 18 Rona Pedro defende-an nunee, sira la foo tan sala ba nia. Sira komesa hahii Nai Maromak dehan, “Afinál Nai Maromak loke ona dalan ba ema nebee laos Judeu, atu sira bele husik sira nia sala, i tuir Nai Maromak nia hakarak, hodi moris nafatin ho Nia.”
Ema barak nebee laos Judeu fiar ba Jesus iha sidade Antiokia
19 Uluk, bainhira ema oho tiha Estevão, ema moos komesa halo terus sarani sira too sira halai namkari. Agora sira balu too ona provínsia Fenísia, balu too iha ilya Xipre, ho sira balu tan halai baa dook too iha sidade Antiokia iha provínsia Síria. Sira foo sai nafatin Nai Jesus nia Lia Fuan iha fatin-fatin. Maibee sira so foo sai deit ba ema Judeu. 20 Maski nunee, iha moos ema sarani balu hosi ilya Xipre ho hosi sidade Sirene, nebee baa iha sidade Antiokia. Sira moos foo sai Nai Jesus nia Lia Fuan Diak ba ema nebee laos Judeu. 21 Nai Maromak foo Nia podér ba sira, too ema barak tebe-tebes fiar i tuir Nai Jesus. 22-24 Bainhira sarani sira iha Jerusalém rona dehan ema iha Antiokia moos fiar ona ba Jesus, sira haruka ema ida naran Barnabé baa haree sira iha nebaa. Nia laran diak, i fiar tebe-tebes ba Nai Maromak. Nai Maromak nia Espíritu Santu sempre domina nia. Too iha nebaa, nia haree Nai Maromak foo ona bensaun ba sira. Nunee nia laran haksolok. Nia moos husu boot para sira tuir nafatin Nai Jesus ho laran tomak. I ema barak tan komesa fiar ba Nai Jesus. 25 Liu tiha nee, Barnabé baa iha sidade Tarsu buka Saul. 26 Kuandu nia hetan tiha, nia lori Saul fila fali ba Antiokia. I sira nain rua hela hamutuk iha nebaa durante tinan ida tomak ho Nai Jesus nia povu. Loro-loron sira nain rua hanorin Nai Jesus nia Novidade Diak ba ema barak. (Iha sidade Antiokia, foin ema komesa foo naran ba sira nebee fiar ba Jesus, dehan ‘kristaun’.) 27 Momentu sira nain rua sei iha Antiokia, iha profeta balu mai hosi Jerusalém. 28 Ida naran Ágabu. Nai Maromak nia Espíritu foo hatene liu hosi nia dehan, “Rai sei hamlaha boot iha mundu tomak.” (Buat nee sai duni iha tempu liurai Cláudio ukun Roma.) 29 Rona nunee, ema sarani sira iha Antiokia koalia hamutuk atu haruka ajuda ba sarani sira iha provínsia Judeia. Sira ida-idak foo tuir buat nebee sira iha. 30 Depois sira entrega oferta nee ba Barnabé ho Saul hodi lori ba responsavel igreja sira iha Jerusalém.
Tiago mate i Pedro tama kadeia
1 Iha tempu nee, liurai Herodes komesa halo terus Nai Jesus nia povu balu. 2 Nia haruka ema oho Tiago (João nia maun) ho surik. 3 Bainhira Herodes haree katak Tiago nia mate nee halo ema boot Judeu sira haksolok, nia haruka kaer tan Pedro. Sira kaer nia natoon iha Festa Paun la Tau Fermentu. 4 Depois sira lori nia baa hatama iha kadeia, i entrega ba soldadu grupu haat hodi hein nia loron-kalan. Grupu ida iha ema nain haat. Liurai Herodes hakarak hein too festa nee hotu ona, mak foin nia tesi Pedro nia lia iha ema barak nia oin. 5 Durante Pedro sei iha kadeia, Nai Jesus nia povu halo orasaun beibeik ho laran tomak, husu ba Nai Maromak atu tau matan ba Pedro.
Nai Maromak nia anju hasai Pedro hosi kadeia
6 Iha kalan molok Herodes atu tesi Pedro nia lia, Pedro toba dukur hela iha soldadu rua nia leet. Sira kesi nia ho korenti rua, i soldadu balu hein iha kadeia nia odamatan oin. Maromak nia anju hasai
Pedro hosi kadeia
7 Derepenti deit, Nai Maromak nia anju ida mosu, i kuartu kadeia nee sai naroman nabilan tiha. Anju nee fanu Pedro hodi dehan, “Hadeer lalais!” Korenti moos namkore kedas hosi Pedro nia liman. 8 Depois anju hatete ba nia dehan, “Hatais o nia faru, i tau o nia sandalyas.” Pedro hatais tiha ona, anju nee haruka tan dehan, “Hatais o nia kazaku, hodi tuir hau ona!” 9 Pedro moos tuir anju nee sai hosi sela laran. Maibee nia hanoin dehan, nia mehi. Afinál tebes duni. 10 Sira lao liu hosi soldadu ida, depois liu soldadu ida tan, mak foin too iha odamatan besi nebee hodi baa sidade. Odamatan nee nakloke mesak i sira nain rua sai ba liur, lao tuir dalan ba sidade. Derepenti deit, anju nee lakon tiha, husik hela Pedro mesak. 11 Nee mak Pedro foin hatene saida mak akontese. Nia dehan, “Loos duni! Maromak mak haruka Nia anju mai hasai hau hosi Herodes nia liman laran, ho buat aat hotu nebee mak ema Judeu sira atu halo mai hau.” 12 Tuir mai, Pedro baa iha João Marcos nia inan Maria nia uma. Iha nebaa, ema barak halibur hamutuk halo hela orasaun, husu ba Nai Maromak tulun Pedro. 13 Pedro too iha uma nee, nia tuku portaun. Menina ida servisu iha uma nee, naran Rode, baa haree, see mak mai nee. 14 Rona Pedro nia lian, nia hatene kedas. Tanba nia kontenti demais, nia la hanoin atu loke odamatan, nia halai ba laran, hatete ba sira, “Pedro hamriik hela iha liur.” 15 Sira hataan, “O bulak karik!” Maibee Rode hatete nafatin, “Tebes! Nia iha liur nebaa.” I sira hataan fali, “Karik Pedro nia anju da guarda.” 16 Maibee Pedro tuku odamatan nafatin. Ikus mai, sira baa loke. Kuandu sira haree Pedro, sira hakfodak. 17 Pedro halo sinál ho liman para sira nonook. Depois nia konta oinsaa Nai Maromak hasai nia hosi kadeia. Nia haruka sira dehan, “Imi baa foo hatene buat hirak nee hotu ba Tiago ho irmaun sira seluk.” Depois Pedro sai baa fatin seluk. 18 Iha aban dadeer-saan, soldadu sira haree Pedro la iha tiha ona, sira moos laran susar ho tauk tebe-tebes. 19 Bainhira Herodes rona tiha buat nee, nia haruka ema baa buka Pedro tuun-sae, maibee sira la hetan. Entaun Herodes litik soldadu sira nebee hein Pedro nee. Hotu tiha, nia haruka oho tiha sira. Depois Herodes sai tiha hosi provínsia Judeia, baa hela iha sidade Sezareia.
Nai Maromak nia anju kastigu Herodes too mate
20 Liurai Herodes hirus loos ema sira hosi sidade Tiru ho Sidon. Maibee sira presiza hahaan hosi liurai Herodes nia rain. Entaun sira haruka delegasaun ba Herodes hodi buka dame ho nia. Too iha nebaa, sira hetan apoiu hosi liurai nia funsionáriu boot ida naran Blastu. 21 Sira marka loron ida para hasoru malu ho Herodes. Iha loron nee, Herodes hatais tiha hena liurai nian, i tuur iha nia kadeira ukun nian, hodi hatoo lia fuan ba sira. 22 Sira komesa hahii nia dehan, “Nee laos ema nia lian. Nee Maromak nia lian!” 23 Derepenti deit, Nai Maromak nia anju foo moras ida ba Herodes, tanba nia simu bainhira sira adora nia hanesan fali Nai Maromak. I ular haan nia isin too mate. 24 Maibee ema hatutan Nai Maromak nia Lia Fuan ba ema barak liu tan. I sira nebee fiar ba Jesus aumenta ba beibeik. 25 Kuandu Barnabé ho Saul lori tiha ona sarani Antiokia sira nia oferta ba Jerusalém, sira fila fali ba Antiokia, lori ho ema ida naran João, nebee ema bolu moos Marcos.
Sarani Antiokia haruka Barnabé ho Saul baa halao Maromak nia servisu
1 Iha sidade Antiokia, iha sarani balu Nai Maromak uza hanesan profeta, i balu moos hanesan mestri. Sira nee mak: Barnabé, Simeão, nebee baibain ema bolu ‘Metan’, Lúcio hosi sidade Sirene, Manaen, nebee hakiak dezde kiik hamutuk ho liurai Herodes, ho Saul. 2 Iha loron ida, sira adora hela Nai Maromak, ho jejuun, Espíritu Santu hatete ba sira dehan, “Hili Barnabé ho Saul hodi halo servisu nebee Hau prepara ona ba sira.” 3 Sira halo orasaun ho jejuun tan, depois sira tau liman ba Barnabé ho Saul, hodi haruka sira baa halao servisu nee.
Barnabé ho Saul baa iha rai Xipre
4-5 Espíritu Santu haruka Barnabé ho Saul baa. Nunee sira baa iha sidade ida besik tasi ibun, naran Seléusia. João Marcos moos akompanya hodi ajuda sira. Too iha nebaa, sira sae roo hodi baa rai kiik ida naran Xipre. I sira tuun iha sidade ida naran Salamina. Sira baa tama iha uma kreda Judeu nian balu hodi foo sai Nai Maromak nia Lia Fuan.
Roo halai hosi sidade Seléusia ba iha Xipre
6 Liu tiha nee, sira tama tu-tuir iha aldeia ba aldeia, hosi rai ulun Salamina too rai ikun Pafos. Iha sidade Pafos nee, sira hetan matan-dook ida naran Barjesus. Nia ema Judeu, i sempre lohi ema dehan nia Nai Maromak nia profeta. 7 Nia belun diak ho governadór rai nee, naran Sérgio Paulo. Governadór nee ema matenek. Nia haruka ema baa bolu Barnabé ho Saul, tanba nia hakarak rona Nai Maromak nia Lia Fuan. 8 Maibee Barjesus (ho lian Gregu bolu Elimas) baa tau lia ba governadór para la bele fiar ba Nai Jesus.
Paulo siak matan-dook
9 Maibee Espíritu Santu domina Saul, nebee ema moos bolu Paulo. Nia hateke di-diak ba matan-dook nee hodi dehan, 10 “Satanás nia oan! Bosok-teen! O nia laran nakonu ho buat aat. Buat hotu-hotu nebee diak, o kontra hotu. O sempre lohi kona ba Nai Maromak nia lia loos. 11 Tan nee, Nia sei kastigu o. Agora kedas o nia matan sei delek tiha, too Maromak kura fali o.” Derepenti nakukun ida taka tiha nia matan, too nia la haree buat ida. Nia lamas baa-mai buka ema para kaer nia liman hodi hatudu dalan ba nia. 12 Bainhira governadór haree nunee, i rona sira nia hanorin kona ba Nai Jesus, nia admira tebe-tebes, i nia moos fiar ba Nai Jesus.
Paulo sira baa iha sidade Antiokia iha provínsia Pisídia
13 Hosi sidade Pafos, Paulo ho nia kolega sira sae roo hodi baa iha Perge, iha provínsia Panfília. Too nebaa, sira tuun hosi roo, i João Marcos lao husik hela sira, hodi fila ba Jerusalém. 14 Hosi Perge sira lao ain ba iha sidade Antiokia iha provínsia Pisídia. Iha loron Sábadu, nebee ema Judeu sira nia loron hodi harohan hamutuk, sira baa iha ema Judeu sira nia uma kreda. 15 Hanesan baibain, ema lee lia fuan balu hosi profeta Moisés nia livru, ho profeta sira seluk nia hakerek. Depois sira nebee toma konta uma kreda nee haruka ema husu ba Paulo ho Barnabé dehan, “Irmaun sira. Se imi iha lia fuan ruma atu foo sai mai ami, para hametin ami nia laran, halo favór bele koalia.”
Paulo foo sai kona ba Jesus ba ema Antiokia
16 Entaun Paulo hamriik, nia halo sinál ho liman husu para sira nonook. Nia koalia dehan, “Maun-alin Israel sira ho maun-alin sira hosi nasaun seluk, nebee adora ba Nai Maromak. See tilun mai. 17 Nai Maromak hili ita ema Israel nia bei-ala sira hori uluk. Nia halo sira nia jerasaun aumenta barak durante sira hela iha rai Ejiptu, nebee laos sira nia rain. Tuir mai, Nai Maromak uza Nia forsa hodi hasai sira hosi rai nebaa. 18 Depois sira muda fatin baa-mai iha rai fuik maran durante tinan haat-nulu. Maski sira ulun toos, maibee Maromak lori sira ho pasiénsia. 19 Iha ikus, Maromak halo rahun tiha nasaun hitu iha rai Kanaán, hodi fahe rai sira nee foo ba ita nia bei-ala sira para sai sira nia riku-soin. 20 Nee hotu haan tinan atus haat lima-nulu. Nee liu tiha, Nai Maromak foti juís hodi ukun sira, too tempu profeta Samuel. 21 Bainhira Samuel ukun sira, ita nia bei-ala sira husu para bele iha liurai. Nunee Nai Maromak foti Kis nia oan Saul, hosi suku Benjamim, sai liurai. Saul ukun durante tinan haat-nulu. 22 Depois Nai Maromak hatuun tiha Saul, i foti fali David sai liurai. Nai Maromak dehan, ‘Jese nia oan David nee monu ba Hau nia laran. Nia sei halo tuir hotu Hau nia hakarak.’ 23 Maromak promete atu haruka David nia jerasaun ida mai, hodi salva povu Israel. Salvadór nee mak Jesus. 24 Molok Nai Jesus hahuu Nia servisu, iha ema ida naran João foo sai ba ema Israel hotu katak sira tenki husik ona sira nia sala, i tenki sarani hanesan sinál katak sira diak malu fali ona ho Maromak. 25 Maibee bainhira João nia servisu atu remata, nia hatete dehan, ‘Imi keta hanoin hau nee mak Ema ida nebee Maromak promete atu haruka mai. Lae! Ema nee atu mai ona. Nia boot liu hau. Atu hakruuk hodi kore Nia sapatu talin moos, hau la serve.’ 26 Maun-alin sira. Imi nebee Abraão nia jerasaun, ho moos imi hosi nasaun seluk nebee tauk ba Nai Maromak. Nai Maromak foo ona novidade diak ba ita, atu ita bele hetan salvasaun. 27 Nai ulun Judeu ho povu Jerusalém kastigu mate Jesus. Nunee sira halo tuir buat nebee profeta sira hakerek hori uluk ona. Sábadu-Sábadu sira baa iha ema Judeu sira nia uma kreda hodi rona profeta sira nia lia fuan. Maski nunee, sira la hatene katak Jesus nee mak Ema ida nebee Nai Maromak promete atu haruka mai nee. 28 Sira la hetan razaun ida para atu oho Jesus. Bele nunee moos, sira husu ba governadór Pilatus para oho Nia. 29 Governadór moos hataan, i sira prega Jesus iha krus, too mate. Buat sira nee hotu sai tuir lo-loos saida mak profeta sira hakerek tiha ona. Depois sira hatuun Nia mate isin hosi krus, i lori baa hakoi. 30 Maibee Nai Maromak halo Jesus moris fali hosi mate. 31 Bainhira Jesus moris fila fali, Nia hatudu-An fila-fila durante loron barak, ba ema sira nebee uluk lao hamutuk ho Nia hosi provínsia Galileia too Jerusalém. I sira nee mak agora sai sasin ba povu Israel.” 32 Paulo hatutan nia koalia dehan, “Ami nain rua lori Lia Fuan Diak nee foo ba imi katak, buat nebee mak Maromak promete ona ba ita nia bei-ala sira, agora kumpri ona. 33 Maromak halo Jesus moris fali hosi mate, nee tuir lia fuan iha livru Salmus nebee dehan, ‘O nee Hau nia oan. Ohin loron, Hau hatudu katak Hau O nia aman.’ 34 Hori uluk Nai Maromak promete ona dehan, Nia sei halo Jesus moris fali, i Nia sei la mate tan. Nunee Maromak halo tuir Nia Lia Fuan nebee dehan, ‘Hori uluk Hau promete ona ba liurai David atu foo bensaun ba nia. Agora Hau halo fali promesa nee ho imi.’ 35 Iha Salmus seluk moos hatete, ‘Maromak sei la husik Nia Ema Santu nia mate isin dodok iha rate.’ 36 Nee la koalia kona ba David. Ita hatene nunee, tanba liurai David serbí tiha ona nia povu tuir Nai Maromak nia hakarak, depois nia mate, i nia mate isin dodok tiha ona. 37 Nunee Salmus nee koalia kona ba ema seluk. Bainhira ema nee mate, Nai Maromak halo moris fali Nia. Nee mak Nia mate isin la dodok. 38-39 Maun-alin sira, rona di-diak mai. Ema nee mak Jesus! Se ita fiar ba Nia, mak Nai Maromak hamoos ita nia sala hotu, hodi simu ita hanesan ema nebee moris loos. Bele ita hakaas-an atu tuir lei hotu nebee avoo Moisés rai hela ba ita moos, nee la bele halo ita sai loos iha Nai Maromak nia oin hanesan nee. So ita fiar ba Nai Jesus, mak Nai Maromak hamoos ita nia sala. 40 Hanoin di-diak! Keta halo-be buat nebee mak uluk profeta sira foo sai nee, kona ba imi. Sira hakerek kona ba ema nebee kontra Jesus dehan, 41 ‘Imi nebee gosta hatete aat Hau, haree ba buat nebee mak Hau halo. Imi sei admira, i mate! Tanba Hau halo daudaun buat ruma iha imi nia leet, bele ema konta buat nee ba imi, maibee imi sei la fiar.’” 42 Bainhira Paulo ho Barnabé lao sai hosi uma kreda nee, ema sira iha nebaa husu ba sira para fila fali iha Sábadu oin hodi esplika buat sira nee diak liu tan. 43 Ema Judeu ho moos ema laos Judeu nebee adora Nai Maromak, barak akompanya Paulo ho Barnabé. I sira nain rua foo konselyu dehan, “Imi tenki laran metin nafatin ba Nai Maromak, tanba Nia hatudu ona laran diak mai ita.”
Nai ulun Judeu tau lia ba povu hodi kontra Paulo ho Barnabé
44 Sábadu tuir mai, kuaze ema hotu iha sidade nee mai rona Nai Maromak nia Lia Fuan kona ba Jesus. 45 Bainhira nai ulun Judeu sira haree ema barak mai rona Paulo ho Barnabé, sira laran moras. Nunee sira hatete aat Paulo i kontra kedas nia koalia. 46 Maibee Paulo ho Barnabé koalia ho aten barani tebe-tebes dehan, “Nai Maromak haruka ami foo uluk Nia Lia Fuan ba ema Judeu. Maibee imi lakohi simu. Nee hatudu katak imi la merese atu hetan moris rohan la iha hamutuk ho Nai Maromak. Nunee agora, ami sei lori Lia Fuan Diak nee ba foo ba nasaun sira seluk. 47 Tan Nai Maromak foo ona orden mai ami dehan, ‘Hau foti ona o sai hanesan ahi oan hodi lori naroman ba ema nebee laos Judeu, atu o lori Maromak nia salvasaun ba iha mundu tomak.’” 48 Bainhira ema sira nebee laos Judeu rona nunee, sira kontenti tebe-tebes. Sira hahii Nai Maromak dehan, “Maromak nia Lia Fuan diak tebe-tebes!” I ema sira nebee mak Nai Maromak desidi ona para hetan moris rohan la iha, sira hotu fiar ba Nai Jesus. 49 Nunee Nai Maromak nia Lia Fuan hatutan hosi ibun ba ibun iha rejiaun nee tomak. 50 Depois nai ulun Judeu balu mai tau lia ba senyora balu nebee riku i tauk ba Nai Maromak, ho moos ba ema boot sira iha sidade nee. I sira tuu lia ba povu para halo terus Paulo ho Barnabé, too duni sai sira hosi nebaa. 51 Molok sira sai hosi sidade nee, sira nain rua baku rai uut hosi sira nia ain hanesan sinál katak, ema iha sidade nee lakohi rona ba Nai Maromak. I sira baa fali iha sidade seluk ida naran Ikóniu. 52 Maibee, ema sira nebee tuir Nai Jesus iha Antiokia, sira nia laran haksolok, i Espíritu Santu domina sira nafatin.
Paulo ho Barnabé iha sidade Ikóniu
1 Bainhira Paulo ho Barnabé too iha sidade Ikóniu, sira baa foo sai Nai Maromak nia Novidade Diak iha ema Judeu sira nia uma kreda. Sira nia koalia nee halo ema Judeu barak ho moos ema barak nebee laos Judeu fiar ba Nai Jesus. 2 Maibee ema Judeu sira nebee lakohi fiar ba Jesus tau lia ba ema balu nebee laos Judeu para odi ema sarani sira. 3 Maski nunee, Paulo ho Barnabé hela kleur iha sidade nee hodi foo sai ho barani nafatin katak, Nai Jesus hatudu nia laran diak ba ema hotu-hotu. Nai Maromak moos foo podér ba sira nain rua hodi halo milagre ho sinál oi-oin nebee halo ema admira, para ema hotu hatene katak sira nia hanorin nee loos duni. 4 Maibee povu iha sidade nee fahe ba rua. Balu tuir ema Judeu sira nebee lakohi fiar ba Jesus; ema seluk tuir Nai Jesus nia reprezentante sira. 5 Iha ema Judeu balu ho ema balu nebee laos Judeu, hamutuk ho sira nia boot sira, kombina malu atu halo terus Jesus nia reprezentante sira, i moos atu tuda Paulo ho Barnabé ho fatuk. 6 Maibee Paulo sira rona kona ba planu nee. Entaun sira halai. Sira baa sidade Listra ho sidade Derbe iha provínsia Likaónia, ho rai sira nebee besik. 7 Iha nebaa sira foo sai nafatin Nai Jesus nia Lia Fuan Diak.
Dalan hosi Perge ba iha Derbe
Paulo ho Barnabé iha sidade Listra ho sidade Derbe
8 Iha sidade Listra, Paulo ho Barnabé hasoru ema ida ain aat, dezde nia moris, i nia nunka lao. 9 Ema nee rona Paulo nia koalia. Paulo hateke di-diak ba nia, i haree katak ema nee fiar dehan Nai Jesus bele kura nia. 10 Entaun nia bolu, “Irmaun, hamriik ona!” Rona nunee, ema nee haksoit i komesa lao kedas.
Paulo kura ema ain aat ida
11 Kuandu ema barak nee haree buat nebee Paulo halo, sira hotu bilaan tiha. Sira hakilar ho sira nia lian Likaónia dehan, “Nee maromak nain rua nebee nakfilak-an ba ema hodi tuun mai iha mundu.” 12 Sira hanoin Barnabé mak sira nia maromak ida naran Zeus. I Paulo, sira hanoin dehan, maromak Hermes, tanba baibain nia mak koalia. 13 Iha portaun atu tama ba sidade, iha uma lulik ida, hodi adora maromak Zeus. Ema nebee hein uma lulik nee, dada karau vaka aman ho ai funan. Nia hamutuk ho ema lubuk ida atu oho karau nee hodi halo sakrifísiu para adora Paulo ho Barnabé.
Ema hakarak adora Paulo ho Barnabé
14 Maibee kuandu Jesus nia reprezentante sira hatene katak ema atu adora sira, sira nain rua protesta kedas. Sira lees tiha sira nia ropa hanesan sinál katak sira la konkorda. I sira halai tama iha ema lubuk nee nia leet, hodi hakilar dehan, 15 “Maluk sira! Nusaa mak imi halo fali nunee? Ami laos maromak. Ami ema hanesan moos imi. Ami mai atu foo hatene ba imi Lia Fuan Diak katak, imi tenki husik ona imi nia lulik sira nebee la iha folin, hodi tuir Maromak ida nebee moris. Nia mak halo lalehan, rai, tasi, ho buat hotu-hotu. 16 Uluk, Nai Maromak husik nasaun sira moris tuir sira ida-idak nia hakarak. 17 Maibee Maromak hatudu sinál oi-oin atu nasaun hotu hatene katak, Maromak nee diak duni. Nia mak haruka udan mai imi. Nia mak halo imi nia toos foo ai-haan barak. Nia mak foo hahaan ba imi, i halo imi nia laran kontenti.” 18 Bele povu nia ulun toos hakarak duni adora Paulo ho Barnabé, ikus mai sira nain rua konsege bandu sira. 19 Liu tiha nee, ema Judeu balu too mai hosi sidade Antiokia ho sidade Ikóniu. Sira tau lia ba povu hodi kontra sira nain rua, too sira moos tuda Paulo ho fatuk. I sira rasta nia sai hosi sidade. Sira hanoin dehan nia mate tiha ona.
Sira hanoin dehan Paulo mate tiha ona
20 Maibee bainhira ema sarani sira mai hamriik haleu Paulo, nia moos hamriik, hodi tama fali ba sidade. Iha aban, nia ho Barnabé lao hamutuk ba sidade Derbe.
Paulo ho Barnabé fila fali ba sidade Antiokia iha provínsia Síria
21 Iha Derbe, Paulo ho Barnabé foo sai Nai Jesus nia Lia Fuan Diak. Ema barak moos komesa tuir Jesus. Depois sira nain rua fila fali ba Listra, ho Ikóniu. Hosi nebaa, sira lao nafatin ba iha Antiokia iha provínsia Pisídia. 22 Iha fatin hirak nee sira koalia ho sarani sira hodi hametin sira nia laran. Sira foo hanoin dehan, “Ita nebee fiar ba Nai Jesus sei hetan terus oi-oin, maibee ita tenki tuir nafatin Jesus, para ita bele moris hamutuk ho Nai Maromak bainhira Nia ukun.” 23 Paulo ho Barnabé foti ema balu sai responsavel ba sarani sira iha fatin ida-idak. Sira halo orasaun ho jejuun, hodi entrega responsavel sira ba Nai Jesus, nebee sira fiar. 24 Liu tiha nee, Paulo ho Barnabé lao liu hosi provínsia Pisídia baa too iha provínsia Panfília. 25 Iha nebaa, sira foo sai Maromak nia Lia Fuan iha sidade Perge. Depois sira baa too iha sidade Atália. 26 Sira sae roo hodi fila ba sidade Antiokia iha provínsia Síria. Iha sidade nee mak ema sarani sira uluk entrega sira nain rua ba Maromak nia liman hodi halao Nia servisu. Agora sira nia servisu nee remata ona.
Roo iha tempu Roma
27 Too iha Antiokia, Paulo ho Barnabé halibur sarani sira hodi konta buat hotu-hotu nebee Maromak halo ona liu hosi sira. Sira moos foo hatene dehan Maromak loke ona dalan ba ema sira nebee laos Judeu hodi fiar ba Jesus. 28 Paulo ho Barnabé sei hela kleur ho Nai Jesus nia ema sira iha nebaa.
Nai ulun kristaun sira halibur hamutuk iha Jerusalém
1 Bainhira Paulo ho Barnabé sei iha Antiokia, ema sarani Judeu balu too mai hosi Judeia. Sira hanorin sarani sira dehan, “Se imi hakarak hetan salvasaun, imi tenki sunat, tuir lisan nebee Nai Maromak foo ona ba avoo Moisés.” 2 Maibee Paulo ho Barnabé kontra makaas sira nia hanorin nee, i haksesuk malu makaas ho sira. Tanba sira kontra malu nunee, sarani sira desidi para haruka Paulo ho Barnabé ho sarani balu hosi Antiokia, lori problema nee ba Nai Jesus nia reprezentante sira ho responsavel sira iha Jerusalém. 3 Entaun sarani sira iha Antiokia haruka delegasaun nee ba Jerusalém. Sira lao liu hosi provínsia Fenísia ho provínsia Samaria. Iha dalan, sira tama tu-tuir sarani sira nia uma hodi konta dehan, “Ema nebee laos ema Judeu moos fiar ona ba Nai Jesus.” Rona nunee, sarani sira haksolok. 4 Bainhira sira too iha Jerusalém, Nai Jesus nia reprezentante sira ho responsavel sira ho sarani sira tomak, simu sira ho diak. Paulo ho Barnabé foo hatene buat hotu nebee Nai Maromak halo ona liu hosi sira, too ema barak nebee laos Judeu moos fiar ona ba Nai Jesus. 5 Maibee sarani Judeu balu hosi grupu relijiaun Farizeu hamriik hodi dehan, “Ema nebee laos Judeu, mak hakarak tuir Jesus, sira tenki sunat i moos tenki tuir ita nia lei nebee Nai Maromak foo liu hosi avoo Moisés.” Pedro 6 Entaun Nai Jesus nia reprezentante sira, ho responsavel sira, halibur hamutuk hodi rezolve problema ida nee. 7 Sira diskuti baa-mai, iha ikus, Pedro hamkrik hodi koalia dehan, “Maun-alin sira, imi rasik hatene katak, uluk Nai Maromak hili ona hau, hosi imi, atu lori Jesus nia Lia Fuan ba ema sira nebee laos Judeu. Tan Nia hakarak atu sira moos fiar ba Jesus.b 8 Nai Maromak hatene ita ida-idak nia laran. I Nia mak foo Nia Espíritu Santu ba sira, hanesan uluk Nia foo ona ba ita. Ho nunee, ita hatene katak Nai Maromak moos simu sira. 9 Tan Nia haree sira ho ita hanesan. Nia hamoos ona sira nia laran tanba sira fiar ba Jesus, hanesan moos Nia halo ona mai ita. 10 Agora, Nai Maromak simu ona sira, nusaa mak imi sei obriga tan sira tuir lei Moisés nian?! Ita ho ita nia bei-ala sira rasik la konsege halo tuir ita nia relijiaun nia lei hotu. Nee duni, ita keta obriga sira halo nunee. 11 Maromak foo salvasaun ba ita, laos tanba ita tuir lei relijiaun, maibee tanba Nai Jesus hatudu Nia laran diak ba ita.” 12 Rona nunee, la iha ema ida mak koalia tan. Tuir mai, Paulo ho Barnabé konta tan, oinsaa Maromak uza ona sira hodi halo milagre ho sinál oi-oin ba ema nebee laos Judeu. 13 Koalia tiha hotu, Tiago hamriik hodi dehan, “Maun-alin sira, imi rona hau lai! 14 Irmaun Simão Pedro konta ona mai ita katak, Nai Maromak foin hatudu Nia domin ba ema nebee laos Judeu, hodi foti sira balu sai Nia povu. 15 Nee kona ho buat nebee Nai Maromak nia profeta sira hakerek hori uluk dehan, 16 ‘Hau sei fila fali mai. Hau sei foti liurai David hodi ukun fila fali. Nia jerasaun moos, Hau sei foti fali hodi ukun. 17-18 Ho nunee, ema hosi nasaun seluk moos sei mai buka ho hasoru Hau. Tan Hau hili ona sira, sai Hau nia povu. Nai Maromak koalia nunee hori uluk kedas.’” 19 Tiago hatutan tan hanesan nee, “Tuir hau nia hanoin, se ema nebee laos Judeu hakarak tuir Nai Maromak, ita keta foo todan ba sira. 20 Ita tenki hakerek surat ida ba sira, para sira lalikan tuir ita nia lei hotu. Ita foo hanoin deit ba sira dehan, sira la bele haan naan nebee mak hamulak tiha ona ba lulik. Sira la bele halo sala ho mane ka ho feto. Sira la bele haan naan raan. I la bele haan naan animál nebee la koa kakorok halo raan sai lai. 21 Tan lei sira nee laos buat foun ida. I ema barak hatene ona katak, ita ema Judeu nia lisan nunee duni. Dezde uluk kedas lei sira nee, lee beibeik iha uma kreda Judeu nian hotu-hotu, iha Sábadu-Sábadu. Hau nia lia fuan mak nee deit. Obrigadu.”
Ema kristaun sira nebee laos Judeu simu surat hosi nai ulun sarani sira
22 Depois Nai Jesus nia reprezentante sira ho responsavel sira ho Jesus nia povu tomak iha Jerusalém konkorda haruka ema baa foo hatene kona ba sira nia desizaun ba sarani sira iha sidade Antiokia. Sira hili ema nain rua nebee sarani sira respeita hodi halao servisu nee. Ida naran Silas, ho ida tan naran Judas (nebee ema moos bolu Barsabás). I sira haruka sira nain rua baa hamutuk ho Paulo ho Barnabé. 23 Sira lori surat ida hakerek nunee: “Ba ema sarani nebee laos Judeu iha sidade Antiokia, iha provínsia Síria tomak, ho moos provínsia Silísia. Kumprimentus hosi ami, Nai Jesus nia reprezentante, ho responsavel sira iha Jerusalém. Ami hakerek surat nee foo ba imi, nebee ami hadomi hanesan ami nia maun-alin rasik. 24 Ami rona dehan, iha ema balu hosi Jerusalém baa hanorin imi la loos, halo imi nia laran susar ho laran ru-rua kona ba salvasaun. Laos ami mak haruka baa. 25-27 Nunee ami halibur malu hodi koalia kona ba problema nee. Depois ami ho laran ida hili Judas ho Silas baa hodi ami nia naran, atu hatoo rasik ba imi saida mak hakerek iha surat nee. Ami moos haruka irmaun doben Barnabé ho Paulo, nebee prontu atu mate tanba serbí Nai Jesus Kristu. 28 Maromak nia Espíritu Santu foo hatene ona ba ami, i ami moos konkorda katak, imi lalikan tuir ami nia lisan Judeu hotu. Tan lisan sira nee so foo todan deit ba imi. Maibee iha buat ida-rua, mak imi tenki halo tuir: 29 La bele haan naan nebee ema hamulak tiha ona ba lulik. La bele haan naan raan. La bele haan naan animál nebee la koa kakorok halo raan sai lai. I la bele halo sala ho mane ka ho feto. Se imi halo tuir buat hirak nee, diak ona. Ami nia lia fuan too iha nee deit. Adeus.” 30 Sira nain haat simu tiha surat nee, sira lori kedas ba sidade Antiokia. Too iha nebaa, sira halibur sarani sira hotu, hodi foo surat nee ba sira. 31 Bainhira lee tiha surat nee, sarani sira hotu haksolok, tanba lia fuan nee hametin sira nia laran. 32 Judas ho Silas moos profeta. Sira koalia buat barak ba ema sarani sira hodi hametin sira nia laran i halo forti sira nia fiar. 33 Sira nain rua hela laduun kleur. Depois sira fila fali, lori kumprimentus hosi sarani sira iha Antiokia ba sarani sira iha Jerusalém, nebee mak haruka sira mai. 34 Maibee Silas desidi hela nafatin iha nebaa. 35 Paulo ho Barnabé moos sei hela iha Antiokia. Hamutuk ho ema barak tan, sira hanorin ho foo sai Nai Maromak nia Lia Fuan kona ba Jesus.
Paulo ho Barnabé fahe malu
36 Liu tiha nee, Paulo hatete ba Barnabé, “Irmaun, mai ita fila fali baa vizita fatin sira nebee uluk ita foo sai Maromak nia Lia Fuan ba nee. Ita baa haree tok sarani sira nia moris oinsaa.” 37 Barnabé hataan. Maibee nia hakarak lori João baa ho sira. (João nee sira bolu moos Marcos.) 38 Maibee Paulo lakohi. Tanba uluk, iha provínsia Panfília, Marcos lao husik hela tiha sira.f 39 Paulo ho Barnabé diskuti malu makaas, too sira nain rua fahe malu. Barnabé lori Marcos, baa sae roo hodi baa tiha ilya Xipre. 40 Maibee Paulo lori Silas. Molok sira nain rua atu sai, sarani sira iha Antiokia halo orasaun ba Nai Maromak atu kuidadu sira i hatudu Nia laran diak ba sira. Depois sira nain rua baa ona. 41 Sira lao lemo provínsia Síria ho provínsia Silísia hodi hametin ema sarani sira nia laran.
Timóteo lao hamutuk ho Paulo no Silas
1 Liu tiha nee, Paulo ho Silas baa iha sidade Derbe. Depois sira kontinua lao ba iha sidade Listra. Iha nebaa, sira hasoru mane klosan ida naran Timóteo, nebee tuir Nai Jesus. Nia aman ema Gregu, i nia inan ema Judeu nebee fiar ona ba Jesus. 2 Ema sarani sira iha sidade Listra ho sidade Ikóniu, sira hotu dehan Timóteo ema laran diak. 3 Paulo hakarak Timóteo lao hamutuk ho sira nain rua. Maibee ema Judeu iha fatin nee hatene dehan Timóteo seidauk sunat tuir lisan Judeu, tanba nia aman ema Gregu. Nunee Paulo sunat nia. Timóteo ho Paulo 4 Depois sira lao hosi sidade ba sidade, hodi foo sai desizaun nebee Nai Jesus nia reprezentante sira ho responsavel sira foti ona iha sidade Jerusalém. 5 Ho nunee, sira hametin liu tan ema sarani sira nia fiar. Loron ba loron, ema sarani aumenta barak ba beibeik.
Maromak haruka Paulo sira ba Masedónia
6 Nee liu tiha, Paulo sira lao ba provínsia Frígia ho provínsia Galásia, tanba Maromak nia Espíritu Santu bandu sira la bele baa foo sai Maromak nia Novidade Diak iha provínsia Ázia. 7 Kuandu sira too iha fatin ida nebee baliza ho provínsia Mízia, sira buka atu tama ba iha provínsia Bitínia, maibee Nai Jesus nia Espíritu la foo lisensa. 8 Nunee sira lao liu hosi provínsia Mízia, too iha sidade Tróade. 9 Iha kalan nee, Nai Maromak hatudu ba Paulo hanesan mehi ida. Nia haree mane ida hosi provínsia Masedónia hamriik hela hodi husu makaas dehan, “Senyór, favór ida, mai iha nee hodi ajuda lai ami.” 10 Paulo haree tiha nunee, ami fiar katak Nai Maromak mak haruka ami baa foo sai Nia Lia Fuan ba ema iha Masedónia. Nunee ami prepara-an kedas atu baa iha tasi sorin nebaa.
Iha sidade Filipi, Lídia fiar ba Nai Jesus
11 Tuir mai, ami sae roo iha sidade Tróade, hodi baa rai kiik ida naran Samotrásia. Aban fali ami lao ho roo nafatin too ami tuun iha sidade ida naran Neápolis. 12 Hosi nebaa, ami lao ain deit ba iha sidade ida naran Filipi. (Sidade nee sidade prinsipál ida iha provínsia Masedónia, i governu Roma mak ukun.) Ami hela loron ida-rua iha nee.
Paulo sira hasoru senyora Lídia
13 Iha loron Sábadu, nebee ema Judeu sira nia loron hodi harohan hamutuk, ami lao sai uitoan hosi sidade hodi buka ema Judeu sira nia fatin orasaun. Tanba ami hanoin fatin orasaun nee iha mota ibun. Too iha nebaa, ami tuur koalia ho senyora balu nebee halibur malu hela. 14 Ida naran Lídia, hosi sidade Tiatira. Senyora nee kontratu hena mesak folin kar-karu deit. Nia adora ona ba Nai Maromak. Kuandu nia rona Paulo nia lia fuan, Maromak loke nia laran hodi simu kedas buat nebee Paulo koalia. 15 Depois ami sarani Lídia ho ema hotu-hotu nebee hela ho nia. I nia konvida ami dehan, “Senyór sira, se imi hanoin hau fiar tebes ba Nai Jesus, entaun imi baa hela lai iha hau nia uma.” Nia hamaus beibeik, too ikus mai ami moos simu.
Paulo ho Silas tama kadeia iha sidade Filipi
16 Iha loron ida, ami baa iha fatin orasaun nee, ami hasoru menina ida iha dalan. Nia ema nia atan. Espíritu aat tama iha nia, nunee nia bele foo hatene saida mak atu akontese aban-bainrua. Ema barak foo osan ba nia patraun, para menina nee bele siik sira nia destinu. 17 Bainhira ami lao daudaun, labarik feto nee hakilar tu-tuir ami dehan, “Ema sira nee serbí Nai Maromak Boot Liu. Sira mai hatudu dalan ba imi, oinsaa imi bele hetan salvasaun, i hetan perdaun ba imi nia sala.” 18 Nia hakilar nunee loron ba loron, too Paulo la aguenta ona. Entaun nia hateke ba feto nee, hodi foo orden dehan, “Espíritu aat! Hodi Nai Jesus nia naran, hau haruka o sai hosi feto nee!” I espíritu aat nee sai kedas.
Paulo duni sai espíritu aat hosi menina ida
19 Bainhira labarik feto nia patraun sira hatene ona dehan, sira nia atan nia podér lakon tiha ona, sira hirus tebe-tebes, tanba nia la bele manaan tan osan ba sira. Entaun sira kaer Paulo ho Silas, rasta hodi ba iha nai ulun sira nia oin, iha merkadu. 20 Iha nebaa, sira foo sala dehan, “Ema sira nee ema Judeu mai iha sidade nee atu sobu ita nia komunidade. 21 Sira moos hanorin lisan nebee kontra ita nia lei governu Roma nian. Nunee ita la bele simu ka halo tuir.” 22 Rona nunee, ema barak nee hirus tebe-tebes, i atu baku Paulo ho Silas. Ema tesi lia nain sira haruka ema baa lees sai tiha sira nain rua nia ropa, i baku sira ho sikoti. 23 Sira baku Paulo ho Silas too dolar, depois hodi baa soe tama ba kadeia. Tesi lia nain sira haruka komandante kadeia hein sira nain rua di-diak, para sira la bele halai. 24 Nunee komandante hatama sira ba iha kadeia segredu, i hatama moos sira nia ain ba iha ai kabelak kuak.
Paulo ho Silas nia ain tama iha ai kabelak kuak
25 Iha kalan boot, Paulo ho Silas halo orasaun ho kanta hodi hahii Nai Maromak. Ema dadur sira seluk iha kadeia, rona hela. 26 Derepenti deit rai nakdoko makaas, too uma kadeia tomak moos nakdoko. I odamatan kadeia nian nakloke hotu, korenti nebee hodi kesi ema dadur sira moos namkore tiha. 27 Iha momentu nee, komandante kadeia hadeer, nia haree odamatan kadeia nian nakloke hotu. Haree nunee, nia hanoin ema dadur sira halai tiha ona. Entaun nia losu nia surik, atu oho-an. 28 Maibee Paulo bolu ho lian makaas dehan, “Senyór, keta oho-an! Ami hotu sei iha nee.”
Sira hamoos Paulo ho Silas nia kanek
29 Komandante tauk atu-mate. Nia husu ahi oan, hodi halai tama ba kadeia laran, ho tauk i nakdedar, baa hakneak iha Paulo ho Silas nia ain. 30 Tuir mai, nia lori sira sai hosi kadeia laran, i nia husu dehan, “Senyór sira. Hau tenki halo saida atu hau hetan salvasaun?” 31 Paulo ho Silas hataan dehan, “Ita fiar ba Nai Jesus mak Nai Maromak sei salva ita. Nunee moos ho senyór nia família ho ema hotu nebee hela hamutuk ho ita.” 32 Depois Paulo ho Silas esplika kona ba Nai Jesus ba komandante kadeia nee, ho ema hotu nebee hela iha nia uma laran tomak. 33 Oras nee kedas, komandante nee lori Paulo ho Silas baa fasi sira nia kanek. I sira sarani nia ho ema hotu nebee hela iha nia uma laran tomak. 34 Depois nia lori sira ba iha nia uma, hodi foo hahaan ba sira. Nia ho ema hotu iha nia uma laran kontenti tebe-tebes, tanba sira fiar ona ba Nai Maromak. 35 Iha aban dadeer-saan, tesi lia nain sira haruka polísia hatoo orden ba komandante kadeia, para hasai ona Paulo ho Silas hosi kadeia. 36 Nunee komandante foo hatene ba Paulo dehan, “Senyór, ema boot sira desidi tiha ona, atu hasai imi. Tan nee, senyór sira bele baa ona ho diak.” 37 Maibee Paulo hatete ba polísia sira, “Ami ema sidadaun Roma. Nunee governu tenki tesi ami nia lia lai, mak foin bele kastigu ami. Maibee sira seidauk buka hatene ami nia sala saida, sira baku liu ami ho sikoti iha ema barak nia oin. Depois sira hatama ami ba kadeia. Ho nunee sira kontra ona lei governu Roma nian. Agora sira atu hasai nonook ami hosi kadeia?! Nee la bele! Haruka ema boot sira mai rasik hasai ami. Nunee foin ami simu.” 38 Polísia sira baa hatoo Paulo nia lia menon nee ba tesi lia nain sira, foin sira hatene katak sira nain rua sidadaun Roma, entaun sira tauk tebe-tebes. 39 Depois ema boot sira baa iha kadeia, hodi husu deskulpa ba Paulo ho Silas. Sira hasai sira nain rua hosi kadeia, i husu boot atu sira husik tiha sidade nee. 40 Sai tiha hosi kadeia, Paulo ho Silas baa fali iha Lídia nia uma. Sira koalia ho sarani sira dala ida tan hodi hametin sira nia laran, depois sira husik tiha sidade nee.
Paulo sira baa iha sidade Tesalónika
1 Liu tiha nee, Paulo ho Silas kontinua sira nia viajen liu hosi sidade Anfípolis ho Apolónia, too iha sidade Tesalónika. Iha sidade nee, iha uma kreda ema Judeu sira nian.
Dalan hosi Filipi ba iha Berea
2 Durante loron Sábadu tolu tu-tuir malu, Paulo baa tama iha uma kreda nee, hanesan baibain. Nia lee Nai Maromak nia Lia Fuan i diskuti ho ema sira iha nebaa, 3 hodi hatudu katak, Ema ida nebee Nai Maromak hili ona nee, sei hetan terus barak, i sei mate, depois sei moris fila fali. Nia hatete, “Ema nee mak Jesus.” 4 Ema barak fiar ba Nai Jesus, i tuir Paulo ho Silas. Sira nee mak ema Judeu balu, mane Gregu barak nebee tauk ona Nai Maromak, ho moos senyora boot barak. 5 Maibee ema Judeu nia boot sira laran moras Paulo ho Silas. Entaun sira tau lia ba ema nebee vadiu iha merkadu, hodi halo bronkas. Sira asalta Jason nia uma hodi buka Paulo ho Silas. Sira atu rasta sai sira nain rua ba povu hodi foo justisa. 6 Maibee sira buka la hetan. Nunee sira kaer fali Jason ho ema sarani balu hodi rasta ba iha tribunál. Sira hakilar dehan, “Ema sira nebee halo rungu-ranga iha mundu tomak, agora moos tama ona iha ita nia sidade. I Jason simu tiha ona sira iha nia uma. 7 Ema sira nee hotu kontra lei Roma nian, tanba sira lakohi rekonyese liurai boot, César. Sira so rekonyese deit sira nia Liurai Boot ida, naran Jesus.” 8 Rona nunee, tesi lia nain sira ho povu iha sidade nee konfuzaun boot. 9 I tesi lia nain sira haruka Jason ho ema sarani sira selu osan hodi foo garantia katak problema nee sei la mosu tan. Depois foin husik sira baa.
Paulo sira baa iha sidade Bereia
10 Iha kalan nee kedas, ema sarani sira iha sidade Tesalónika, haruka Paulo ho Silas baa iha sidade ida naran Bereia. Too iha nebaa, sira baa tama iha uma kreda ema Judeu sira nian hodi hanorin. 11 Ema Judeu sira iha Bereia la hanesan ho sira iha Tesalónika. Sira laran nakloke atu rona Novidade Diak kona ba Nai Jesus. Nee mak loro-loron sira lee Maromak nia Lia Fuan hodi buka hatene lia fuan sira nebee Paulo ho Silas foo sai nee loos ka lae. 12 Tanba nee, ema Judeu barak fiar ba Jesus. Nunee moos mane Gregu barak, ho senyora boot Gregu balu. 13 Maibee bainhira ema Judeu sira iha Tesalónika rona dehan Paulo sira hanorin Maromak nia Lia Fuan iha Bereia, sira baa tau lia ba ema sira iha nebaa hodi kontra Paulo sira. 14 Nee mak ema sarani sira iha Bereia lori kedas Paulo ba iha tasi ibun. Maibee Silas ho Timóteo hela nafatin iha Bereia. 15 Sarani sira akompanya Paulo too iha sidade ida naran Atenas, depois fila fali ba Bereia. Sira tatoli lia ida hosi Paulo atu Silas ho Timóteo baa lalais hasoru nia.
Paulo debate ho matenek nain sira iha sidade Atenas
16 Bainhira Paulo sei hein hela Silas ho Timóteo iha Atenas, nia laran susar tebe-tebes, tanba nia haree estátua lulik iha fatin hotu-hotu. Paulo haree ema Atenas sira nia estátua lulik 17 Maibee iha sidade nee, iha moos ema Judeu, ho ema laos Judeu balu mak tauk ba Nai Maromak. Paulo baa tama iha sira nia uma kreda, hodi diskuti ho sira. Loro-loron, nia moos baa iha merkadu hodi koalia ho ema see deit mak iha nebaa. 18 Paulo moos debate ho matenek nain sira hosi grupu rua, grupu ida naran Epikurus i ida naran Stoa. Kuandu nia koalia kona ba Jesus dehan Nia moris fali ona hosi mate, iha ema balu dehan, “Keta baa rona ema regadór nee!” Balu tan hatete, “Nia hakarak obriga ita adora ema rai seluk nia maromak.” 19-21 Ema Atenas sira, ho ema estranjeiru sira nebee hela iha sidade nee, kuandu rona hanorin foun ka ideia foun ruma, ema matenek sira baibain halibur hamutuk iha foho kiik ida naran Areopagus hodi troka ideia kona ba buat foun nee. Entaun sira lori Paulo ba iha nebaa, i sira husu ba nia, “Esplika lai mai ami hanorin foun nee, para ami bele kompriende lo-loos. Tanba buat nebee senyór koalia nee, ami foin rona.” 22 Entaun Paulo hamriik iha ema matenek nain sira nia oin hodi hataan nunee, “Ema Atenas sira, hau lao lemo ona imi nia sidade nee, hau haree imi badinas halo tuir relijiaun. 23 Tanba bainhira hau haree di-diak ba fatin bar-barak hodi imi adora lulik, hau moos haree imi nia altár ida hakerek dehan, ‘Fatin hamulak ba maromak ida nebee ita la hatene.’ Nee hatudu katak, imi adora ona ba Nai Maromak, maibee imi seidauk hatene Nia. I Nai Maromak nee mak agora hau atu foo hatene ba imi. 24 Nia mak halo lalehan ho rai, ho buat hotu-hotu. Nia mak Liurai nebee ukun lalehan ho rai. Nunee Nia la hela iha uma lulik nebee ema mak halo. 25 Nia mak foo iis, ho foo moris ba ita ema. Nia mak foo ba ita buat hotu-hotu nebee ita presiza. Maibee Nia rasik la presiza ajuda buat ida hosi ita ema. 26 Hosi ema ida, Nia halo nasaun hotu-hotu iha mundu tomak. Nia haketak nasaun sira, ida-idak ho nia rain. Nia desidi antes tiha ona, tempu nebee mak nasaun ida-idak atu sai boot, ou atu monu. 27 Nia halo nunee, tan Nia hakarak atu ema hotu buka hatene Nia. Se sira hakaas-an, karik sira bele hetan Nia. Afinál Nia la dook hosi ita. 28 Iha ema koalia ona dehan, ‘Ita moris iha mundu, tanba Nia. Ita iha, tanba Nia.’ Imi nia matenek nain ida moos hakerek poezia dehan, ‘Ita hotu-hotu nia oan.’ 29 Nee loos duni. Ita nee hotu Nai Maromak nia oan. Nee duni, keta hanoin dehan Nai Maromak nee hanesan estátua nebee ema badaen halo ho osan mean, ka osan mutin, ka fatuk, tuir sira nia hanoin. 30 Uluk ema halo buat sira nee tanba seidauk kompriende. Nee mak Nai Maromak foo perdaun ba sira. Maibee agora, Nia lakohi atu ita moris tan nunee. Nee mak Nia foo orden dehan, ema hotu-hotu tenki husik ona lulik, i tuir deit Nai Maromak. 31 Nia marka ona loron ida, hodi halo justisa ba ema hotu-hotu iha mundu tomak. I Nia hili ona Ema ida sai Juís, hodi tesi lia lo-loos. Ita hatene katak Juís nee mak Jesus. Tanba Nia mate tiha ona, maibee Nai Maromak halo Nia moris fali.” 32 Bainhira sira rona Paulo dehan, ema mate ida moris fila fali, balu goza nia. Maibee iha ema balu hatete ba Paulo, “Loron seluk ami sei hakarak rona tan kona ba buat nee.” 33 Depois Paulo sai hosi enkontru nee. 34 Sira balu tuir Paulo, i fiar ona Nai Jesus. Hosi sira nee iha matenek nain ida naran Dionísio, ho moos feto ida naran Dámaris, ho ema seluk tan.
Paulo servisu hamutuk ho Akuila ho Prisila
1 Nee liu tiha, Paulo husik tiha sidade Atenas hodi baa iha sidade Korintu. 2 Iha nebaa, nia hasoru malu ho ema Judeu ida naran Akuila hosi provínsia Pontu, ho nia kaben Prisila. Sira nain rua foin mai hosi provínsia Itália. Sira sai hosi nebaa tanba liurai boot Cláudio haruka ema Judeu sira hotu-hotu sai hosi sidade Roma. Paulo baa vizita sira, 3 depois hela ho sira, i servisu hamutuk ho sira, tanba sira nia servisu halo tenda hosi animál nia kulit, hanesan moos Paulo nian. 4 Sábadu-Sábadu, iha ema Judeu sira nia loron hodi adora Maromak hamutuk, Paulo baa tama iha sira nia uma kreda hodi koalia ho ema Judeu ho moos ema Gregu atu dada sira fiar ba Nai Jesus. 5 Bainhira Silas ho Timóteo mai hosi provínsia Masedónia, Paulo husik tiha nia servisu halo tenda. Loron-kalan nia fadigadu foo sai ba ema Judeu sira dehan, Ema ida nebee Nai Maromak hili ona nee mak Jesus.” 6 Maibee ema Judeu balu kontra beibeik ho hatete aat nia. Entaun Paulo baku rai uut hosi nia hena, hanesan sinál katak, nia la interese tan ho sira ona. Nia dehan, “Imi mak sei lori todan rasik. Hau la iha tan responsabilidade ona ba imi ema Judeu. Agora hau atu baa foo sai Novidade Diak ba ema sira nebee laos Judeu.” 7 Depois Paulo husik tiha sira, i baa tama iha ema ida naran Tísiu Justu nia uma. Nia laos ema Judeu, maibee nia tauk ba Nai Maromak. Nia hela iha uma kreda nia sorin. 8 La kleur, Krispu, nebee responsavel iha uma kreda nee, ho ema hotu iha nia uma laran tomak, fiar ba Nai Jesus. Nunee moos ema Korintu barak tan nebee rona Paulo nia koalia, komesa fiar ba Jesus. Depois sira hotu sarani. 9 Iha kalan ida, Nai Maromak hatete ba Paulo hanesan iha mehi dehan, “Paulo, o keta tauk! O tenki foo sai nafatin Hau nia Novidade Diak. La bele para! 10 Hau hamutuk ho o. La iha ema ida bele halo aat ba o, tan iha sidade nee, Hau nia ema barak.” 11 Nunee Paulo hela tinan ida ho balu iha sidade Korintu hodi hanorin Maromak nia Lia Fuan. 12 Momentu Gálio sai governadór iha provínsia Akaia, ema Judeu balu hamutuk kontra Paulo, i lori nia baa kesar ba governadór iha tribunál. 13 Sira foo sala ba Paulo dehan, “Ema ida nee dada povu baa tuir relijiaun foun, nebee governu Roma la rekonyese.” 14 Maibee kuandu Paulo foin atu hataan, governadór tesi kedas nia koalia. Nia hatete ba ema sira nebee halo lia ho Paulo dehan, “Imi ema Judeu, rona mai! Se imi lori ema nebee halo aat ruma ka kazu krime todan ruma, hau prontu rona imi nia lian. 15 Maibee problema nebee imi lori mai nee, imi nia problema uma laran. Imi so diskuti deit kona ba lei relijiaun Judeu nian, ho lia fuan, ho naran. Problema nee, imi mak tenki rezolve rasik.” 16 I governadór Gálio duni sira sai hosi tribunál. 17 Ema lubuk boot nebee halibur malu hela kaer tiha ema ida naran Sóstenes. Nia mak toma konta uma kreda ema Judeu sira nian. Sira lori nia tama ba tribunál i baku nia iha governadór nia oin. Maibee governadór la interese.
Paulo baa fali iha sidade Antiokia iha provínsia Síria
18-19 Liu tiha nee, Paulo sei hela kleur uitoan iha Korintu. Depois nia despede sarani sira hodi baa iha sidade ida naran Senkreia, hamutuk ho Prisila ho Akuila. Paulo koi tiha nia fuuk hanesan sinál katak, buat nebee uluk nia promete ba Maromak, agora nia kumpri ona. Hosi fatin nee sira sae roo nebee atu baa provínsia Síria, too iha sidade Éfezu. Sira tuun hosi roo, Paulo husik hela nia kolega nain rua nee. Nia baa tama iha ema Judeu sira nia uma kreda, hodi diskuti ho sira. 20 Sira husu ba Paulo atu hela kleur uitoan ho sira, maibee nia la hataan. 21 Depois nia despede sira hodi dehan, “Se Maromak hakarak, hau sei mai vizita fali imi.” I nia moos sae roo baa ona. 22 Depois nia ho roo too iha sidade Sezareia, nia moos tuun. I nia lao sae ba Jerusalém, vizita Nai Jesus nia povu iha nebaa. Depois nia fila fali ba iha sidade Antiokia. 23 Paulo hela lai iha nebaa, foin nia baa lao lemo provínsia Galásia ho provínsia Frígia, hodi hametin liu tan sarani sira nia fiar.
Apolo koalia kona ba Jesus iha sidade Éfezu ho sidade Korintu
24 Iha tempu nee, ema Judeu ida hosi sidade Alexandria iha rai Ejiptu foin too iha sidade Éfezu. Nia naran Apolo. Nia matenek koalia i hatene di-diak Maromak nia Lia Fuan. 25 Nia hatene ona kona ba Jesus nia Dalan, i nia badinas tebe-tebes konta fila fali ba ema seluk. Saida mak nia foo sai nee, loos duni. Maibee nia seidauk kompriende buat hotu-hotu kona ba Jesus. Nia so hatene deit dehan João sarani ema hanesan sinál katak sira husin ona sira nia sala. 26 Iha loron ida, nia koalia ho barani iha ema Judeu sira nia uma kreda. Prisila ho Akuila moos rona hela nia hanorin. Entaun sira konvida Apolo baa iha sira nia uma, hodi esplika di-diak ba nia kona ba Nai Jesus nia Dalan. 27 Tuir mai, Apolo desidi atu baa provínsia Akaia. Ema sarani sira iha Éfezu konkorda ho nia planu nee. Entaun sira hakerek karta ida, foo ba sarani sira iha nebaa, husu ba sira atu simu Apolo ho diak. Too iha Akaia, nia ajuda tebe-tebes sira nebee fiar ona ba Jesus. Tanba Nai Maromak hatudu Nia laran diak ba nia. 28 Apolo debate ho ema Judeu sira, iha ema barak nia oin, maibee la iha ema ida manaan nia. I nia lee Maromak nia Lia Fuan hodi hatudu ba sira katak, Ema ida nebee Maromak hili ona nee, mak Jesus.
Paulo fila fali ba sidade Éfezu
1 Kuandu Apolo sei iha Korintu, Paulo lao lemo aldeia-aldeia iha foho, depois nia too iha Éfezu. Iha nebaa, nia hasoru malu ho ema balu nebee fiar ona ba Nai Jesus. 2 Nia husu ba sira, “Maun-alin sira. Uluk imi fiar ba Jesus, imi simu Espíritu Santu ka lae?” Sira hataan, “Lae. Ami nunka rona dehan, iha Espíritu Santu.” 3 Paulo husu tan, “Se nunee, imi sarani tuir see nia hanorin?” Sira hataan, “Tuir João nian.” 4 Paulo hatete, “João sarani ema hanesan sinál katak sira husik ona sira nia sala. Maibee nia moos hanorin ema Israel, para sira tenki fiar ba Jesus, Ema nebee Maromak atu haruka mai nee.” 5 Depois Paulo sarani sira ho Nai Jesus nia naran. 6 Momentu Paulo tau liman ba sira nia ulun hodi halo orasaun, Espíritu Santu tuun kedas ba sira. Sira moos komesa koalia lian oi-oin nebee sira nunka aprende. I Maromak uza sira hodi foo sai Nia lia fuan. 7 Sira hamutuk mane nain sanulu resin rua.
Paulo foo sai Nai Maromak nia Lia Fuan iha Éfezu
8 Durante fulan tolu nia laran, Paulo baa tama beibeik iha ema Judeu sira nia uma kreda hodi hatoo Nai Maromak nia Lia Fuan. Nia koalia ho aten barani atu bele dada ema ba Nai Jesus. 9 Maibee iha ema balu ulun toos lakohi simu nia hanorin. Sira moos tau lia ba ema seluk, para la bele tuir Jesus nia Dalan. Nunee Paulo ho ema sarani sira husik tiha uma kreda nee, i sira loro-loron baa halibur hamutuk iha salaun Tiranu, hodi koalia kona ba Nai Maromak nia Lia Fuan. 10 Nia halo nunee durante tinan rua, too ema iha provínsia Ázia tomak rona Nai Jesus nia Lia Fuan. Ema sira nee ema Judeu ho ema nebee laos Judeu.
Espíritu aat baku Seva nia oan sira
11 Nai Maromak foo podér ba Paulo hodi halo milagre oi-oin. 12 Por ezemplu, se ema empresta Paulo nia lensu, ou hena ruma nebee nia uza ona, hodi baa tau ba ema moras, sira diak kedas. I ema sira nebee diabu tama iha sira, diabu moos sai kedas. 13 Iha matan-dook Judeu balu lao lemo rai hodi duni sai espíritu aat hosi ema. Sira koko temi Nai Jesus nia naran hodi haruka espíritu aat sira sai, ho lia fuan nunee, “Hau haruka o sai hosi ema nee, hodi Jesus nia naran, Jesus ida nebee Paulo foo sai nee.” 14 Iha maun-alin nain hitu moos halo nunee. Sira nia aman mak Seva, ulun relijiaun Judeu ida. 15 Maibee bainhira sira koko uza lia fuan nee hodi haruka espíritu aat nee sai, espíritu nee hataan, “Hau rona ba Jesus. Hau moos rona ba Paulo. Maibee imi nee see?” 16 Ema ida nebee iha espíritu aat nee, haksoit ba sira nia leten i baku sira too kanek, i lees sira nia ropa, too sira halai sai molik hosi uma nee. 17 Novidade nee ema konta iha fatin ba fatin iha sidade Éfezu tomak, too ema Judeu ho moos ema sira laos Judeu moos hatene. Sira nebee rona istória nee tauk ba Nai Maromak, i sira hahii ho respeita tebe-tebes Nai Jesus. 18 Hosi sira nebee foin fiar ba Jesus, barak mai foo sai sira nia sala iha ema sarani sira nia oin. 19 Hosi sira nee, iha balu kaer ai kulit aat. I sira halibur sira nia livru buan nian hodi sunu tiha hotu iha ema barak nia oin. Livru sira nee nia folin, osan mutin rihun lima-nulu. Ema Éfezu sunu sira nia livru buan nian 20 Nunee ema barak liu tan rona ho fiar Nai Maromak nia Lia Fuan Diak kona ba Nai Jesus. I ema sarani sira aumenta barak ba beibeik.
Ema halo rungu-ranga iha Éfezu
21 Nee liu tiha, Paulo desidi atu baa iha provínsia Masedónia ho provínsia Akaia, depois mak baa Jerusalém. Nia dehan, “Tuir mai, hau tenki baa Roma.” 22 Nia haruka nia ajudante nain rua Timóteo ho Erastu ba uluk iha Masedónia, i nia rasik sei hela iha provínsia Ázia. 23 Iha tempu nee, mosu rungu-ranga boot ida iha sidade Éfezu kona ba Jesus nia Dalan. 24 Problema nee nia huun nunee: iha fatin nee, iha badaen osan mutin ida naran Demétriu. Nia servisu mak halo uma lulik kiikoan-kiikoan ho osan mutin ba sira nia maromak ida, naran Ártemis. Nia kontratu nee manaan osan boot, i nia foo servisu ba badaen barak. 25 Iha loron ida, Demétriu halibur nia badaen sira ho badaen sira seluk, hodi hatete ba sira, “Maluk sira, imi hatene katak ita sai riku nunee, tanba servisu nee. 26 Maibee agora, ita haree ho ita rona rasik, ema nia aman Paulo nee, nia koalia. Tan nia halo ema barak fiar ona dehan, estátua maromak nebee ita ema halo ho liman, laos maromak. Agora, laos iha sidade Éfezu deit mak rona ba nia, maibee iha provínsia Ázia tomak. 27 Nunee ita nia servisu nee, ema sei la foo folin ona. Povu moos sei la respeita ona uma lulik Ártemis nian, i sei la fiar ona ba Ártemis, maski agora daudaun ema hotu adora nia iha provínsia Ázia tomak, too iha rai ulun rai ikun.” 28 Rona nunee, sira nia laran nakali kedas, i sira komesa hakilar dehan, “Viva Ártemis! Ártemis mak boot! Ita ema Éfezu adora nia!” 29 Rona ema hakilar-hakilar nunee, ema halai mai hosi fatin-fatin, too sidade nee konfuzaun boot. Ema hotu halai rame-rame baa too estádiun. Sira kaer tiha Paulo ho nia kolega nain rua hodi rasta ba iha nebaa. Sira nain rua naran Gaio ho Aristarku, nebee uluk akompanya Paulo hosi Masedónia. 30 Paulo hakarak baa koalia ho ema sira nebee halo konfuzaun nee, maibee ema sarani sira la foo. 31 Nai ulun balu hosi provínsia Ázia nian, Paulo nia belun. Sira haruka ema baa husu boot ba Paulo atu nia la bele tama ba iha nebaa, tanba nia bele hetan susar. 32 Iha estádiun laran, ema hotu konfuzaun. Iha balu hakilar oin ida. Iha balu tan hakilar oin seluk. Afinál ema barak la hatene tanba saa mak sira halibur malu iha nebaa. 33 Ema Judeu balu dudu ema ida naran Alexandre ba iha povu nia oin para koalia. Povu balu moos hatete ba nia saida mak nia tenki koalia. Depois Alexandre foti liman husu para sira nonook, i nia komesa esplika katak, laos sira Judeu mak hamosu problema nee. 34 Maibee kuandu povu hatene katak nia ema Judeu, sira hakilar makaas liu tan dehan, “Viva Ártemis! Ártemis mak boot! Ita ema Éfezu adora nia!” Sira hakilar-hakilar nunee too oras rua. 35-36 Tuir mai, funsionáriu boot ida iha sidade Éfezu konsege akalma povu. Nia hatete, “Maluk sira iha sidade Éfezu. Ema hotu hatene katak maromak boot Ártemis nia estátua monu tuun hosi lalehan mai iha ita ema Éfezu nia leet, i ita mak hein nia uma lulik. La iha ema ida bele nega buat sira nee. Nusaa mak imi hakilar nunee? Husik ema bosok-teen sira tuir sira nia hakarak ba, maibee imi keta halo nar-naran. 37 Imi lori ema nain rua nee mai, hanesan ke sira halo buat aat ruma. Afinál sira la naok buat ida hosi Ártemis nia uma lulik. Sira moos la koalia aat ita nia maromak Ártemis. Nunee imi atu foo sala saida ba sira? 38 Ita iha tribunál. Juís sira moos hein hela. Nunee, se Demétriu sira hakarak baa kesar, sira tenki tuir lei, para lori kazu nee ba tribunál. 39 I se iha problema seluk mak sira hakarak foti moos, husik sira baa rezolve ho tesi lia nain sira. 40 Keta halo-be governu Roma foo sala mai ita, tanba ita halo rungu-ranga nunee. Se sira hakarak buka hatene lia nee nia huun ho tutun, ita atu hataan oinsaa? Tanba problema nee nia huun ho tutun la iha.” 41 Koalia hotu nunee, ema boot nee haruka sira fahe malu tiha, i sira moos namkari.
Paulo sira fila fali ba provínsia Masedónia
1 Bainhira sidade Éfezu hakmatek fila fali, Paulo halibur ema nebee tuir Jesus hodi hametin sira nia laran. Depois nia despede sira hodi baa provínsia Masedónia. 2 Iha nebaa, nia lao lemo aldeia-aldeia hodi hametin ema sarani sira nia fiar, too nia tama iha provínsia Grésia. 3 Nia hela fulan tolu iha nebaa. Depois nia atu baa sae roo ba provínsia Síria, maibee nia rona dehan, ema Judeu balu kombina malu atu oho nia. Entaun nia desidi atu baa Síria liu hosi provínsia Masedónia. 4 Iha grupu kiik ida mak akompanya Paulo. Sira nee mak Sópatro hosi sidade Bereia, ema nain rua naran Aristarku ho Sekundu hosi sidade Tesalónika, ema ida naran Gaio hosi sidade Derbe, ho ema nain tolu hosi provínsia Ázia, mak Timóteo, Tíkiku ho Trófimu. 5 Nee liu tiha, sira sai baa uluk hein Paulo iha sidade Tróade iha tasi sorin ba. 6 Hau (Lucas mak hakerek surat ida nee) komesa akompanya Paulo. Tempu ema Judeu sira nia loron boot Páskua liu tiha, ami baa sae roo iha sidade Filipi iha provínsia Masedónia. Ami iha tasi laran loron lima ona, depois ami too iha Tróade. Ami hasoru malu fali ho kolega sira, i hela iha nebaa semana ida.
Éutiku monu mate i moris fali
7 Iha loron Domingu, ami halibur hodi haan hamutuk. Tanba aban Paulo atu baa ona, nia koalia too kalan boot. 8 Ami halibur malu iha uma andár leten. Iha kalan nee sira sunu ahi oan barak. 9 Iha mane foin sae ida naran Éutiku tuur iha janela hodi rona Paulo nia hanorin. Tanba Paulo koalia kleur tebe-tebes maka Éutiku matan dukur haluha rai, nia monu hosi janela, i mate kedas. 10 Paulo tuun baa hakruuk hodi hakuak nia dehan, “Lalikan tauk! Nia moris fali ona!” 11 Ami hotu sae fila fali ba andár leten hodi haan hamutuk. Depois Paulo hatutan nia koalia too loro matan sae, i nia baa ona. 12 Sira lori Éutiku fila ba nia uma. Sira hotu haksolok, tanba nia moris fali.
Paulo sira lao hosi sidade Tróade ba sidade Miletu
13 Depois ami fahe malu. Paulo lao ain deit ba sidade Asós, i ami baa sae roo.
Dalan hosi Korintu ba iha Pátara
14 Ami too iha Asós, Paulo moos sae roo hamutuk ho ami, hodi baa iha sidade Mitilene. 15 Aban fali, ami besik iha rai kiik ida naran Kios. Iha bainrua, ami haree rai kiik ida seluk naran Samos. Iha baintolu, ami too iha sidade Miletu. 16 Paulo hakarak too lalais iha Jerusalém, para se bele tuir loron Pentakosta iha nebaa. Nunee nia lakohi lakon tempu lao sae ba sidade Éfezu.
Paulo fahe malu ho responsavel kristaun sira hosi sidade Éfezu
17 Bainhira ami too iha Miletu, Paulo haruka lia menon ba responsavel sira iha igreja Éfezu, atu sira mai hasoru nia. 18 Kuandu sira too mai, Paulo foo hatene ba sira dehan, “Irmaun sira, imi hatene ona hau nia moris durante hau hamutuk ho imi, komesa loron primeiru hau tau ain iha provínsia Ázia, too oras nee. 19 Imi hatene hau servisu makaas ba Nai Maromak iha imi nia leet, i nunka foti-an. Iha hau nia servisu nee, hau nia matan-been fakar barak. Hau moos hetan terus barak tanba ema Judeu sira kombina malu atu halo aat mai hau. 20 Maski nunee, hau foo sai nafatin lia loos ba imi, ho moos ba ema barak. I hau nunka sees hosi knaar ida nee. 21 Hau foo hatene ona ba ema Judeu, ho moos ema nebee laos Judeu, atu sira husik ona sira nia sala, hodi tuir Nai Maromak i fiar ba Nai Jesus. 22 Agora Nai Maromak nia Espíritu Santu haruka hau baa Jerusalém. Hau tuir deit, hau la hatene saida mak atu mosu mai hau iha nebaa. 23 Maibee iha sidade ba sidade, Espíritu Santu foo hatene antes tiha ona mai hau dehan, hau sei tama kadeia i hetan terus barak. 24 Nai Jesus mak tau servisu nee iha hau nia kabaas, atu hau baa foo sai Nai Maromak nia Lian Fuan Diak kona ba Nia laran diak ho Nia domin mai ita. Se karik hau la tuir Nia hakarak, i la halo remata Nia servisu nee, hau senti hau nia moris nee la iha folin buat ida. 25 Agora hau hatene katak, imi nebee hau hanorin kona ba Nai Maromak nia ukun, sei la hasoru tan hau ona. 26 Tanba nee, rona di-diak mai. Hau halo remata ona hau nia servisu iha imi. Se iha ema ruma hosi imi mak la halo parte ba Nai Maromak, imi mak hatene! Laos hau mak sala. 27 Hau foo hatene ona Maromak nia hakarak hotu ba imi. La iha tan buat ida ke hau subar ba imi. 28 Nee duni imi tenki kuidadu di-diak ho imi nia moris, ho haree di-diak Maromak nia povu. Espíritu Santu haruka imi tau matan ba sira hanesan bibi atan ida hein nia bibi. La bele haluha katak, Nai Jesus mate ona hodi sosa kotu ema sira nee ho Nia raan. 29 Hau atu baa ona. Depois mestri falsu sei mai hanesan asu siak iha imi nia klaran hodi buka atu halo imi sees-an hosi Nai Jesus nia Dalan. 30 Iha moos balu hosi imi sei hanorin la loos, atu ema husik Jesus hodi tuir deit sira. 31 Tanba nee, imi tenki matan moris. Keta haluha, hau hela tinan tolu nia laran hamutuk ho imi, hodi hanorin imi loron-kalan. Hau nia matan been fakar barak, tanba imi. 32 Agora ita atu fahe malu ona. Nunee hau entrega imi hotu ba iha Maromak nia liman, atu Nia kuidadu imi. Imi tenki kaer metin lia fuan nebee mak hau foo sai ona ba imi kona ba Maromak nia laran diak. Liu hosi lia fuan nee, Nai Maromak bele halo forti imi nia fiar, i sei foo ba imi buat hotu-hotu nebee Nia promete ona atu foo ba Nia povu. 33 Kuandu hau sei servisu hamutuk ho imi, hau nunka hanoin atu husu imi nia osan mean, ka osan mutin, ka hena, ou buat saida deit. 34 Imi moos hatene, hau servisu makaas ho hau nia liman hodi foo haan hau nia aan rasik ho moos sira nebee tuir hau. 35 Nunee hau sempre hatudu ezemplu atu imi moos bele servisu makaas hodi ajuda ema kiak sira. Hanoin di-diak Nai Jesus nia Lia Fuan, ‘Diak liu ita foo, duké ita simu.’” 36 Paulo koalia hotu nunee, nia hakneak hodi halo orasaun hamutuk ho sira. 37-38 Sira hotu laran tristi, tanba Paulo hatete dehan sira sei la hasoru tan nia ona. Too ona oras sira atu fahe malu, sira hakuak Paulo i rei nia, ho tanis. Depois sira akompanya nia hodi baa too iha roo.
Paulo sira baa Jerusalém
1 Ho laran susar, ami despede malu tiha hotu ho responsavel igreja Éfezu, ami sae roo, hodi baa iha rai kiik ida naran Kos. Aban fali, ami too iha rai kiik ida seluk naran Rodes, depois lao nafatin ba iha sidade Pátara. 2 Ami tuun hosi roo, depois sae fali roo seluk nebee atu baa provínsia Fenísia besik ho Síria. 3 La kleur ami moos haree rai Xipre iha ami nia sorin karuk, maibee ami liu deit. Depois ami too iha sidade Tiru, iha provínsia Síria.
Iha fatin nee, roo para atu hatuun naha. Sira hatuun naha hosi roo
4 Nunee ami tuun baa buka sarani sira. Hasoru tiha sira, ami hela ho sira semana ida. Espíritu Santu foo hatene ba sira para hatete ba Paulo la bele liu ba Jerusalém. 5 Liu tiha semana ida, sarani sira hotu, mane-feto, kiik-boot, katuas-ferik ho foin sae, sira akompanya ami too iha tasi ibun. Iha nebaa, ami hotu hakneak hodi halo orasaun hamutuk. 6 Despede malu tiha hotu iha tasi ibun, ami sae roo, i sira moos fila.
Dalan hosi Pátara ba Jerusalém
7 Ami sai hosi Tiru, baa iha sidade Tolemais. Tuun tiha hosi roo, ami baa kumprimenta sarani sira, i hela ho sira loron ida. 8 Aban fali, ami sai hosi Tolemais, depois ami too iha sidade Sezareia. Iha nebaa, ami hela ho Filipe, ema ida nebee foo sai Nai Jesus nia Novidade Diak ba ema nebee seidauk rona. Nia moos ema ida hosi sira nain hitu nebee uluk ema sarani sira iha Jerusalém hili hodi toma konta haan-hemu. 9 Filipe iha oan feto-raan nain haat. Nai Maromak baibain uza sira hanesan profeta hodi foo sai Nia hakarak. 10 Bainhira ami hela ho sira loron ida-rua ona, iha ema ida naran Ágabu too mai hosi provínsia Judeia. Maromak moos uza nia hanesan profeta. 11 Nia lao mai ami, i nia foti Paulo nia sintu, hodi kesi nia liman-ain rasik ho sintu nee dehan, “Nai Maromak nia Espíritu Santu hatete nunee, ‘Sintu nee nia nain, ema Judeu sira iha Jerusalém sei futu nia nunee. Depois sira sei entrega nia ba ema nebee laos Judeu sira nia liman.’” 12 Rona nia koalia nunee, ami ho sarani sira iha nebaa husu boot ba Paulo atu nia la bele liu ba Jerusalém. 13 Maibee nia hataan, “Nusaa mak imi tanis? Imi halo hau nia laran dodok deit. Maski ema futu hau ka oho hau tanba hau tuir Nai Jesus, hau prontu atu simu.” 14 Bainhira ami hatene dehan Paulo la rona ona ami, ami moos husik deit, hodi dehan, “Tuir deit Nai Maromak nia hakarak ba.” 15 Liu tiha nee, ami haloot ami nia sasaan hodi baa Jerusalém. 16 Iha sarani balu hosi Sezareia akompanya ami, too iha ema ida naran Manason nia uma. Nia hosi ilya Xipre, i nia tuir Jesus kleur ona. 17 Kuandu ami too iha Jerusalém, sarani sira simu ami ho laran haksolok.
Paulo baa vizita Tiago
18 Aban fali, Paulo hamutuk ho ami baa hasoru Tiago ho responsavel igreja Jerusalém sira hotu. 19 Ami kumprimenta malu tiha, Paulo konta ba sira saida mak Nai Maromak halo ona iha fatin-fatin ba ema sira nebee laos Judeu, liu hosi Paulo nia servisu. 20 Rona nunee, sira hotu hahii Nai Maromak. Depois sira hatete ba Paulo dehan, “Irmaun, naran katak ita hatene, iha ona ema Judeu rihun ba rihun mak fiar ba Nai Jesus. Maibee sira hotu sei kaer nafatin lei nebee Nai Maromak rai hela ba avoo Moisés. 21 Ema balu moos lori lia mai iha nee dehan, irmaun hanorin ema Judeu sira iha rai liur, para sira lalikan tuir tan avoo Moisés nia lei nee. Sira dehan, irmaun bandu sira lalikan sunat sira nia oan mane, i lalikan tuir ita ema Judeu nia lisan seluk. 22 Orsida sira sei hatene dehan ita too ona iha nee. Entaun ita atu halo oinsaa? 23 Diak liu halo hanesan nee deit. Ami iha ema nain haat iha nee atu koi sira nia fuuk, hanesan sinál katak sira kumpri ona promesa nebee uluk sira halo ba Nai Maromak. 24 Baa ho sira hodi tuir serimónia hamoos-an hamutuk ho sira iha Nai Maromak nia Uma Kreda Boot. Bainhira koi sira nia fuuk, irmaun mak selu. Se irmaun halo nunee, ema hotu sei hatene katak, irmaun sei kaer nafatin lei relijiaun Judeu nian nebee avoo Moisés foo ba ita. I sira sei hatene katak lia anin nebee sira rona nee la loos. 25 Maibee ba ema nebee laos Judeu nebee fiar ona ba Nai Jesus, ami haruka ona surat ba sira, hodi foo hatene ami nia desizaun katak sira la presiza tuir ita nia lisan Judeu nian hotu. Sira tenki halo tuir mak nee: la bele halo sala ho mane ka halo sala ho feto. La bele haan naan nebee hamulak tiha ona ba lulik. La bele haan naan raan. La bele haan naan animál nebee la koa kakorok halo raan sai lai.” 26 Paulo simu sira nia opiniaun ho diak. Iha aban fali, nia ho ema nain haat nee baa hamutuk iha Nai Maromak nia Uma Kreda Boot, hodi hamoos sira nia aan tuir kostumi relijiaun Judeu nian. Nee hotu tiha, Paulo foo hatene ba nai-lulik dehan, sei hela loron hira tan, foin sira halo remata sira nia promesa. Tanba bainhira loron nee too ona, sira tenki foo oferta ba Nai Maromak.
Ema kaer Paulo iha Nai Maromak nia Uma Kreda Boot
27-29 Loron hitu nee besik hotu ona, iha ema Judeu balu hosi provínsia Ázia haree Paulo lao hela iha sidade Jerusalém, hamutuk ho nia kolega ida naran Trófimu. Nia hosi sidade Éfezu, i nia laos ema Judeu. Kuandu sira haree Paulo tama ba Nai Maromak nia Uma Kreda Boot, sira hanoin, nia lori nia kolega Trófimu tama ba iha Uma Kreda Boot laran. Tuir loos ema nebee laos Judeu la bele tama. Tan nee, sira tau lia ba ema barak iha fatin nee, i kaer Paulo, hodi hakilar daudauk, ‘Maluk Israel sira, ajuda ami lai! Ema ida nee mak hanorin ema iha fatin-fatin para soe tiha ita nia lisan Judeu. Nia moos hatete aat Nai Maromak nia Uma Kreda Boot nee. I agora tan, nia lori ema nebee laos Judeu tama ba laran halo foer Nai Maromak nia fatin santu.” 30 Rona nunee, ema iha sidade Jerusalém tomak, laran nakali. Ema barak halai baa butuk iha Uma Kreda Boot, i sira kaer Paulo, rasta sai ba liur. Depois ema taka tiha Uma Kreda nia odamatan boot.
Ema Judeu kaer Paulo
31 Bainhira sira komesa atu oho Paulo, ema baa foo hatene ba komandante batalyaun Roma nian katak, sidade Jerusalém tomak rungu-ranga. 32 Nia bolu kedas kapitaun sira ho sira nia soldadu, hodi halai ba iha ema barak nee. Bainhira povu haree komandante ho tropas mai, sira la baku tan Paulo ona. 33 Komandante kaer tiha Paulo, i haruka sira futu nia ho korenti rua. Nia husu ba ema barak nee, “Ema nee see? Nia halo sala saida?” 34 Maibee sira nia lia fuan la haan malu. Balu hakilar oin ida. Balu tan hakilar oin seluk. Nunee halo komandante la hatene lia nee nia huun ho tutun, tanba ema barak hakilar ida-idak nian. Tan nee, nia haruka sira lori tiha Paulo ba iha tropas sira nia akampamentu. 35-36 Ema barak nee sena malu tu-tuir. Kuandu sira too iha eskada, sira saruntu tuun-sae. Too soldadu sira hiit tiha Paulo tau ba sira nia kabaas, para ema la bele baku nia. I ema barak nee tuir hodi hakilar dehan, “Oho tiha nia! Oho tiha nia!”
Paulo komesa defende-an iha ema barak nia oin
37 Momentu sira atu tama ba iha akampamentu laran, Paulo husu ba komandante ho lian Gregu dehan, “Senyór, hau bele koalia uitoan?” Rona Paulo husu nunee, komandante hakfodak, i husu, “O hatene lian Gregu? 38 Hau hanoin o ema Ejiptu nebee uluk tau lia ba ema atu hatuun governu. Depois nia lori ema rihun haat ho kroat ba iha rai fuik maran.” 39 Paulo hataan fali, “Lae, senyór! Hau ema Judeu, hosi Tarsu, sidade prinsipál ida iha provínsia Silísia. Hau husu senyór foo lisensa mai hau, hodi koalia ba ema sira nee.” 40 Komandante moos simu. Entaun Paulo hamriik iha eskada leten, nia foti liman, husu para sira nonook. Bainhira sira hotu nonook ona, nia koalia ba sira ho sira nia lian Aram rasik.
1 Paulo komesa koalia dehan, “Aman sira, ho maun-alin sira hotu, hau husu imi rona lai, tan hau atu defende hau nia aan.” 2 Bainhira sira rona Paulo koalia ho sira nia lian rasik, sira nonook liu tan. Nia hatutan tan dehan, 3 “Hau ema Judeu, moris iha sidade Tarsu iha provínsia Silísia, maibee boot iha Jerusalém. Hau nia profesór naran Gamaliel. Nia hanorin hau ho di-diak lei nebee avoo Moisés rai hela ba ita nia bei-ala sira. Iha tempu nebaa hau moos serbí Nai Maromak ho laran tomak hanesan moos imi hotu. 4 Hau sempre halo terus ema sira nebee tuir Jesus nia Dalan. Hau kaer sira, mane ho feto, hodi hatama ba kadeia, too ema balu moos mate. 5 Ita nia nai-lulik sira nia boot ho ulun relijiaun sira hotu hatene katak buat nebee hau koalia nee, loos duni. Tan sira mak foo surat rekomendasaun mai hau, ba ema Judeu iha sidade Damasku. Ho surat nee hau hetan lisensa para baa kaer ema sarani sira iha nebaa, hodi lori mai kastigu iha Jerusalém.”
Paulo foo sasin dehan nia hasoru Nai Jesus
6 Paulo koalia nafatin, “Nunee hau baa iha Damasku. Iha meiu-dia ami atu besik too ona iha sidade, derepenti deit, naroman makaas ida hosi lalehan leno mai hau. 7 Hau monu ba rai, i rona lian ida koalia dehan, ‘Saul! Saul! Tansaa mak o halo terus Hau nunee?’ 8 Hau husu, ‘Nai, Ita Boot nee see?’ Lian nee hataan, ‘Hau Jesus, ema Nazaré, ida nebee o halo terus.’ 9 Ema sira nebee akompanya hau haree naroman nee, maibee sira la rona lian nebee koalia mai hau. 10 Depois hau husu fali, ‘Nai, se nunee, agora hau tenki halo saida?’ Nia hatete dehan, ‘Hamriik ona, hodi baa iha sidade Damasku. Iha nebaa, o sei rona saida mak o tenki halo.’ 11 Hau nia matan delek tiha, tanba naroman leno makaas liu. Nunee hau nia kolega sira kaer deit hau nia liman hodi ajuda hau lao tama ba iha Damasku. 12 Iha ema ida naran Ananias hela iha nebaa. Nia ema ida adora lo-loos Nai Maromak i badinas halo tuir lei nebee Nai Maromak foo ba avoo Moisés. Ema Judeu hotu-hotu iha sidade nee respeita nia. 13 Nia mai buka hau, i hamriik iha hau nia sorin hodi hatete, ‘Irmaun Saul, loke matan hodi haree fila fali!’ Momentu nee kedas, hau haree hetan nia. 14 Nia hatete mai hau dehan, ‘Nai Maromak, nebee ita nia bei-ala sira adora, hili ona irmaun hodi kompriende di-diak Nia hakarak, konyese Nia Ema Moris Loos, i rona Nia lian rasik. 15 Irmaun sei sai sasin hodi hatoo ba ema hotu-hotu saida mak ita haree, ho saida mak ita rona. 16 Ita hein tan saida?! Hamriik! Baa sarani ona! Nee hanesan sinál katak irmaun husu ba Nai Jesus hamoos ita nia sala hotu.’”
Nai Maromak haruka Paulo lori Nia Novidadi Diak ba ema nebee laos Judeu
17 Paulo konta nafatin, “Nee liu tiha, hau fila mai sidade Jerusalém. Iha loron ida, hau baa halo orasaun iha Uma Kreda Boot. Momentu hau halo hela orasaun, Nai Maromak hatudu mai hau, hanesan mehi ida. 18 Hau haree Nai Jesus foo orden mai hau dehan, ‘O husik lalais Jerusalém! Tan povu iha nee sei la fiar sasin nebee o foo kona ba Hau.’ 19 Hau hataan, ‘Maibee Nai! Sira hotu hatene katak, uluk hau tama-sai uma kreda Judeu nian iha fatin-fatin, hodi kaer ho baku ema sira nebee fiar ba Ita Boot. 20 Sira moos hatene, momentu ema halibur fatuk hodi tuda mate Ita Boot nia sasin Estevão, hau moos konkorda. Hau mak hein sira nia hena nebee sira rai hela bainhira sira tuda nia.’ 21 Maibee Nai Jesus hatete, ‘Baa ona! Tan Hau atu haruka o ba iha fatin dook, hodi foo sasin ba ema nebee laos Judeu.’” 22 Bainhira ema barak nee rona Paulo dehan Maromak haruka nia baa foo sasin ba ema nebee laos Judeu, sira lakohi rona tan nia. Sira hotu hakilar rame-rame dehan, “Oho tiha ema nee! Nia la serve atu moris tan.”
Paulo foo sai dehan nia ema sidadaun Roma
23 Sira hakilar nunee, sira moos hasai sira nia hena balu soe sae tiha, ho raut rai uut soe ba leten, tanba sira hirus tebe-tebes. 24 Nunee komandante haruka soldadu sira lori tiha Paulo tama ba akampamentu laran. I nia haruka sira baku nia ho sikoti, atu hatene tansaa mak ema Judeu atu oho nia. 25 Momentu sira kesi Paulo nia liman atu baku, nia husu ba kapitaun nebee hamriik besik dehan, “Tuir governu Roma nia lei, nebee mak loos? Se iha ema sidadaun Roma ida halo sala, imi tenki halo saida ba nia? Imi baku uluk nia ka, tesi nia lia uluk?” Sira kesi Paulo nia liman atu baku nia ho sikoti 26 Rona nunee, kapitaun baa foo hatene ba nia komandante dehan, “Senyór, ema nee sidadaun Roma. Ita boot halo saida mak nee?” 27 Entaun komandante baa husu rasik ba Paulo dehan, “Hatete mai hau, o sidadaun Roma ka?” Paulo hataan, “Loos duni. Hau sidadaun Roma.” 28 Komandante dehan, “Hau moos hanesan. Hau selu karu tebe-tebes hodi hetan direitu sidadaun nian.” Maibee Paulo hataan, “Hau sidadaun Roma kedas, dezde hau moris.” 29 Bainhira sira rona dehan Paulo sidadaun Roma, soldadu nebee prontu ona atu baku Paulo, hakiduk kedas. Komandante moos tauk, tanba nia haruka kesi tiha ona Paulo nia liman, ida nee kontra lei.
Paulo iha tribunál relijiaun Judeu nian
30 Iha aban fali, komandante sei hakarak buka hatene lo-loos lia nee nia huun oinsaa. Entaun nia haruka soldadu sira baa bolu ulun relijiaun Judeu sira ho ema boot sira seluk nebee baibain tesi lia, para tuur hamutuk iha tribunál. Nia moos haruka kore tiha korenti iha Paulo, i lori nia baa aprezenta iha sira nia oin.
1 Too iha nebaa, sira haruka Paulo defende nia aan. Nia hateke di-diak ba tesi lia nain sira hotu, hodi dehan, “Nai Maromak hatene katak komesa hosi kiik too agora, hau serbí Nia ho laran moos.” 2 Rona Paulo koalia nunee, nai-lulik Judeu nia boot Ananias foo orden kedas ba ema sira hamriik besik Paulo dehan, “Basa tiha nia ibun!” 3 Paulo hatete ba nia, “Orsida Nai Maromak sei basa fali ita. Tan ita hanesan ai-riin nebee foin pinta, maibee nia laran lahuk tiha ona. Ita tuur iha nee atu kastigu hau tuir Nai Maromak nia lei. Maibee ita rasik kontra lei nee momentu ita haruka ema basa hau.” 4 Ema sira nebee hamriik besik Paulo nee dehan, “O la bele hatete aat nai-lulik boot nebee serbí Nai Maromak!” 5 Paulo hataan, “Deskulpa, maun-alin sira, hau la hatene dehan, nia mak nai-lulik nia boot. Tanba ita lee iha Maromak nia Lia Fuan dehan, ‘Imi la bele hatete aat imi nia nai ulun sira.’” 6-8 Paulo haree ema sira tesi lia nee, fahe ba grupu rua. Balu tuir grupu Saduseu, nebee la fiar katak ema mate bele moris fali. Sira moos la fiar katak iha anju ka iha espíritu. Balu tuir grupu Farizeu nebee fiar buat hirak nee hotu. Nunee Paulo koalia ho lian makaas dehan, “Maun-alin sira, hau ema Farizeu. Hau nia aman ho hau nia avoo sira moos ema Farizeu. Agora imi atu kastigu hau, tanba hau fiar katak Nai Maromak bele halo ema mate moris fali.” Bainhira Paulo koalia nunee, ema Farizeu ho ema Saduseu sira komesa haksesuk malu, too sira la rona malu tan. 9 Sira haksesuk malu too buat hotu sai estrundu boot. Iha mestri relijiaun balu hosi grupu Farizeu hamriik hodi defende makaas Paulo dehan, “Ema nee la sala! See mak hatene, keta espíritu ida ou anju ida mak koalia ba nia.” 10 Sira haksesuk malu makaas liu tan, too komandante nee tauk. Nia hanoin, keta halo-be sira dada baa dada mai, nia bele mate. Entaun nia haruka nia soldadu sira baa lori tiha Paulo tama ba akampamentu. 11 Iha kalan nee, Nai Jesus hatudu-An ba Paulo. Nia hametin Paulo nia laran hodi hatete, “Paulo, o keta tauk! Agora o foo sasin ona ba ema iha Jerusalém kona ba Hau. Nunee moos, o tenki baa koalia kona ba Hau iha sidade Roma.”
Ema kombina atu oho Paulo
12-13 Iha aban dadeer-saan, ema Judeu haat-nulu resin kombina malu hodi jura dehan, “Ita sei la haan-hemu, bainhira ita seidauk oho Paulo.” 14 Entaun sira baa foo hatene ba nai-lulik nia ulun sira ho nai ulun Judeu sira seluk dehan, “Senyór sira, ami jura tiha ona dehan ami sei la haan-hemu, bainhira ami seidauk oho Paulo. 15 Ami nia hakarak hanesan nee: Senyór sira tenki baa foo hatene ba komandante, i husu ba nia lori fali Paulo ba iha tribunál relijiaun nian. Finji dehan senyór sira atu husu tan informasaun kona ba lia nee. Ami sei hein hodi oho nia iha dalan.” 16 Maibee Paulo nia sobrinyu ida rona sira nia planu nunee, nia halai ba akampamentu foo hatene ba Paulo. 17 Depois Paulo bolu kapitaun ida hodi hatete, “Ita lori mane klosan nee ba lalais ita nia komandante. Nia atu foo hatene buat ruma.”
Paulo nia sobrinyu foo hatene dehan ema atu oho Paulo
18 Entaun kapitaun lori joven nee ba nia komandante, hodi dehan, “Paulo, nebee ita dadur hela nee, husu para hau lori labarik nee mai ita, atu foo sai buat ruma.” 19 Komandante lori joven nee ba iha fatin ida, sira nain rua mesak. Nia husu, “O atu hatete saida mai hau?” 20 Nia dehan, “Iha ema Judeu balu kombina ona atu oho tiu Paulo. Sira atu mai husu ba senyór, aban lori nia ba tribunál relijiaun nian. Sira finji dehan atu husu tan informasaun. 21 Maibee senyór la bele halo tuir sira nia hakarak. Tan iha ema haat-nulu resin mak atu hein iha dalan, atu oho tiu Paulo. Sira hotu jura tiha ona dehan, sira sei la haan-hemu, bainhira sira seidauk oho nia. Agora sira hotu prepara tiha ona. Sira so hein deit senyór atu dehan saida.” 22 Komandante hatete ba nia, “O la bele konta ba ema ida dehan, o mai foo hatene lia nee mai hau.” Depois nia haruka mane klosan nee fila.
Sira lori Paulo baa entrega ba governadór Félix
23 Nee hotu tiha, komandante bolu nia kapitaun nain rua, hodi foo orden ba sira dehan, “Prepara soldadu atus rua, ho soldadu hitu-nulu nebee sae kuda, ho soldadu atus rua nebee lori dima. Imi baa sidade Sezareia orsida kalan tuku sia. 24 Imi prepara moos kuda ida ba Paulo sae, i lori nia ho di-diak too ba governadór Félix.” 25 Depois nia hakerek surat ba governadór Félix, dehan nunee: 26 “Senyór governadór Félix mak hau respeita. Kumprimentus hosi hau, Cláudio Lísias. 27 Ema Judeu sira kaer ema nee atu oho. Maibee hau rona dehan nia ema sidadaun Roma. Nunee hau baa ho hau nia soldadu sira hodi hasai nia hosi ema Judeu sira nia liman. 28 Hau buka hatene, tanba saa mak ema Judeu sira hakarak oho nia. Tan nee, mak hau lori nia ba iha ema Judeu sira nia tribunál relijiaun nian. 29 Maibee hau la haree nia sala ida. Nee duni ema nee la bele hatama ba kadeia, i la bele kastigu mate nia. Afinál sira haksesuk malu kona ba lei relijiaun. 30 Depois hau rona dehan iha ema Judeu balu kombina ona atu oho nia. Entaun hau foo orden kedas para lori ema nee ba iha senyór governadór. Hau moos hatete ba ema Judeu sira nebee halo lia ho nia, para sira baa foo hatene ba ita boot, sala saida mak sira foo ba nia. Hau nia lia fuan too iha nee deit. Obrigadu!” 31 Nunee iha kalan nee kedas, soldadu sira lori Paulo too iha sidade ida naran Antipátride. 32 Iha aban fali, soldadu sira nebee sae kuda lori Paulo too iha sidade Sezareia. I soldadu sira seluk fila ba Jerusalém. 33 Kuandu sira too iha Sezareia, sira foo surat nee ba governadór, i entrega Paulo ba iha nia liman. 34 Lee tiha surat nee, governadór husu ba Paulo, “O ema nebee?” Paulo hataan, “Hau hosi provínsia Silísia.” 35 Nia dehan, “Hau sei tesi o nia lia. Maibee ita tenki hein lai ema sira nebee halo lia ho o nee too mai.” Depois nia haruka soldadu sira hatama Paulo ba kadeia iha liurai Herodes nia palásiu.
Ema boot Judeu balu foo sala ba Paulo iha governadór Félix nia oin
1 Liu tiha loron lima, ema Judeu sira nebee hakarak halo lia ho Paulo nee too mai iha sidade Sezareia, atu foo sala ba nia iha governadór nia oin. Sira nee mak nai-lulik nia boot Ananias, nai ulun balu, ho ema ida naran Tértulu nebee matenek koalia kona ba lei. 2-3 Kuandu ema sira hotu halibur malu ona iha fatin tesi lia nian, governadór haruka lori Paulo tama. Depois Tértulu foo sala ba Paulo dehan, “Senyór governadór mak hau respeita. Senyór ukun ami kleur ona ho diak, i halo mudansa diak barak, halo ami ema Judeu moos bele moris hakmatek. Nee duni, iha oras ida nee ami hatoo obrigadu barak ba senyór governadór. See tan mak bele halo buat diak barak iha fatin-fatin hanesan ita boot. 4 Atu habadak tempu para senyór la bele kole, hau husu tempu uitoan atu foo sai lia nee nia huun. 5 Tuir ami haree, ema nee hanesan moras aat ida ke daet iha fatin ida ba fatin seluk. Iha nebee-nebee deit nia sempre tau lia ba ema Judeu sira para halo rungu-ranga. Nia moos ulun ida hosi grupu relijiaun ida nebee ema bolu ‘ema Nazaré’. Sira nia hanorin la haan malu ho ami nia relijiaun Judeu nian. 6 Ema ida nee atu halo foer Nai Maromak nia Uma Kreda Boot nebee santu. Nee mak ami kaer nia. Ami hakarak atu tesi nia lia tuir ami nia lei. 7 Maibee komandante Lísias mai hadau tiha nia hosi ami nia liman. 8 I nia haruka ema sira nebee halo lia ho ema nee, mai iha nee atu senyór governadór rezolve nia lia. Se senyór husu ba nia, senyór sei hatene rasik katak buat hotu nebee ami koalia ona nee, loos duni. Mak nee deit, senyór. Obrigadu.” 9 Tértulu koalia hotu nunee, ema Judeu sira seluk moos konkorda dehan, “Loos, senyór! Loos duni.”
Paulo defende-an iha governadór Félix nia oin
10 Governadór foo sinál ba Paulo para koalia. Paulo moos hataan, “Senyór governadór, hau hatene katak senyór ukun iha ami nia nasaun, kleur ona. I ita boot hatene ona ami ema Judeu nia kostumi. Nunee hau barani atu defende hau nia aan iha senyór governadór nia oin. 11 Senyór rasik bele hatene katak, foin loron sanulu resin rua liu ba kotuk, hau baa iha Jerusalém hodi halo orasaun iha Uma Kreda Boot. 12 Ema Judeu sira nunka hetan hau haksesuk malu ho ema ida iha Uma Kreda Boot. Hau moos nunka kria problema iha uma kreda seluk ka iha sidade laran. 13 Maski ema sira nee foo sala mai hau, maibee sira la hatudu katak, buat nebee sira dehan nee loos. 14 Senyór governadór, hau foo sai dehan hau tuir duni Nai Jesus nia Dalan. Hau adora ba Nai Maromak, hanesan ami nia bei-ala sira adora ba Nia. Hau moos fiar lei hotu-hotu nebee avoo Moisés hakerek, ho fiar tebe-tebes saida mak Nai Maromak nia profeta sira hakerek rai hela ba ami. 15 Hau laran metin ba Nai Maromak, hanesan moos ema sira nebee kontra hau nee. Ami hotu fiar katak, Nai Maromak sei halo ema mate hotu-hotu moris fali: ema diak, ho moos ema aat. 16 Nee mak hau sempre hakaas-an atu bele moris ho laran moos iha Nai Maromak nia oin ho moos iha ema nia oin. 17 Hau hela kleur ona iha rai liur, foin hau fila ba Jerusalém, lori oferta nebee ema foo hodi ajuda ema Judeu nebee susar. Depois hau baa iha Uma Kreda Boot para foo sakrifísiu ba Nai Maromak. 18 Bainhira hau tuir ona serimónia hamoos-an tuir ami nia lisan, ema sira nebee foo sala mai hau nee, hetan hau iha nebaa. Maibee iha momentu nee, ema la barak iha Uma Kreda Boot laran nee, i la iha ema ida halo rungu-ranga. 19 So iha, mak ema Judeu balu hosi provínsia Ázia. Nunee, se sira iha problema ho hau, tuir loos sira rasik tenki mai iha nee hodi hatete hau nia sala saida. Maibee sira la mai. 20 Tan nee, senyór husu tok ba ema sira iha nee, momentu sira tesi hau nia lia iha tribunál relijiaun nian, sira hetan hau nia sala saida? La hetan buat ida. 21 So karik iha buat ida deit, mak halo sira foo sala mai hau. Hau koalia ho lian makaas dehan, ‘Imi atu kastigu hau, tanba hau fiar katak Nai Maromak bele halo ema mate moris fali.’” 22 Governadór Félix hatene ona kona ba Nai Jesus nia Dalan. I nia marka fali ba loron seluk dehan, “Hau sei hein too komandante Lísias mai, foin hau hakotu lia nee.” 23 Depois nia haruka kapitaun ida lori Paulo baa hatama ba kadeia. Maibee nia foo orden para foo livre uitoan ba Paulo, i foo lisensa ba nia belun sira mai serbí nia.
Paulo koalia ba Félix ho nia kaben Drusila
24 Liu tiha loron ida-rua, governadór Félix mai ho nia kaben, ema Judeu, naran Drusila. Nia haruka ema lori Paulo baa hasoru sira nain rua. Paulo foo hatene ba sira kona ba fiar ba Jesus Kristu. 25 Nia moos foo hanoin, halo oinsaa ema bele moris loos, ho domina-an para la bele halo sala. I nia moos koalia kona ba Maromak halo justisa iha loron ikus. Bainhira Félix rona buat sira nee, nia tauk tebe-tebes hodi dehan, “Paulo, too iha nee deit ona! Kuandu iha tempu, mak hau sei bolu fali o.” 26 Nia hein atu Paulo foo osan para bele hasai nia hosi kadeia. Tan nee, nia haruka bolu Paulo baa koalia beibeik ho nia. 27 Liu tiha tinan rua, iha governadór foun ida mai troka nia, naran Pórsiu Festu. Félix atu halo kontenti ulun relijiaun Judeu sira, nunee mak nia kastigu nafatin Paulo iha kadeia.
Governadór Festu tesi Paulo nia lia
1 Tempu nee, governadór foun Festu muda ba Sezareia hodi komesa ukun. Liu tiha loron tolu, nia baa Jerusalém. 2 Iha nebaa, ulun relijiaun ho nai ulun Judeu sira baa hasoru nia hodi foo sala ba Paulo. 3 Sira husu favór, atu governadór haruka lori fila fali Paulo mai Jerusalém, tan sira kombina tiha ona atu oho Paulo iha dalan. 4 Maibee governadór hataan, “Senyór sira, Paulo sei kastigu hela iha Sezareia i hau moos atu fila lalais ba iha nebaa. 5 Tan nee, imi ulun boot sira balu tenki akompanya hau ba Sezareia hodi foo sala ba nia iha nebaa deit.” 6-7 Liu tiha nee, Festu hela maizoumenus loron sanulu iha Jerusalém, foin nia fila ba Sezareia. Ema Judeu balu tuir nia too iha nebaa. Aban fali, governadór komesa tesi Paulo nia lia. Paulo foin tama ba tribunál, ema boot Judeu balu hamriik haleu nia, hodi foo sala todan oi-oin ba nia. Maibee sira la hatudu lo-loos katak nia sala. 8 Paulo defende nia aan dehan, “Senyór governadór, hau nunka halo buat aat ida. Hau nunka kontra relijiaun Judeu nia lei. Hau la halo foer Nai Maromak nia Uma Kreda Boot. I hau moos la kontra governu Roma.” 9 Maibee governadór Festu hakarak buka oin ho halo kontenti ema Judeu sira. Nee mak nia husu ba Paulo, “Se hau rezolve o nia lia nee iha Jerusalém, o simu ka lae?” 10 Paulo hataan, “Senyór governadór, hau ema sidadaun Roma. Hau agora hamriik iha tribunál governu Roma nian. Ida nee mak iha direitu para tesi hau nia lia. Tan nee, hau lakohi baa iha nebaa. Senyór rasik hatene ona, hau la halo sala ida kontra ema Judeu sira. 11 Se hau halo duni sala ruma karik, para bele hetan kastigu mate, hau prontu atu mate. Maibee se sira foo sala mai hau nee, la loos, la iha ema ida iha direitu atu entrega hau ba sira nia liman para oho. Tan nee, hau husu atu baa iha liurai boot César, para nia rasik mak tesi lia nee.” 12 Rona Paulo husu nunee, governadór husu opiniaun ba matenek nain sira. Depois nia hatete ba Paulo, “O husu ona atu baa César, o sei baa duni.”
Festu konta Paulo nia kazu ba liurai Agripa
13 Nee hotu tiha, liurai Agripa ho nia feton Berenise, mai vizita governadór foun Festu iha Sezareia, hodi kumprimenta nia. 14 Sira hela loron barak iha nebaa. Loron ida, governadór Festu konta Paulo nia kazu ba liurai dehan, “Iha Sezareia nee, iha ema dadur ida nebee governadór Félix uluk husik hela iha kadeia. 15 Foin lalais nee, kuandu hau iha Jerusalém, ulun relijiaun Judeu sira ho nai ulun sira, mai hasoru hau hodi foo sala ba ema nee. I sira moos husu para hau tesi nia lia hodi foo kastigu todan ba nia. 16 Maibee hau hatete ba sira, ‘Tuir governu Roma nia lei, tenki tesi ema nia lia uluk, mak foin bele foo kastigu. Ema nebee halo lia ho nia tenki iha oin hodi foo sala ba nia, i ema nee moos iha direitu atu defende nia aan. Depois mak foin hau bele hakotu lia i foo kastigu ba nia.’ 17 Kuandu hau fila fali mai iha Sezareia, iha ema Judeu balu moos tuir. Aban fali, hau komesa kedas tesi lia nee. Hau haruka lori ema dadur nee mai iha tribunál. 18 Ema Judeu sira hamriik hodi hatudu nia sala. Hau hanoin sira atu dehan nia halo sala boot ruma. Maibee saida mak foo sai mai hau nee, afinál la iha lia todan ida. 19 Sira kontra nia tan deit sira nia opiniaun mak la hanesan kona ba sira nia relijiaun, ho moos tanba ema ida naran Jesus. Tuir ema Judeu sira, Jesus nee mate tiha ona. Maibee ema dadur nee sempre hatete dehan, Nia moris fila fali ona. 20 Hau la hatene atu hakotu lia nee, oinsaa. Nee mak hau husu ba nia, ‘Oinsaa se hau tesi o nia lia iha Jerusalém deit?’ 21 Maibee nia lakohi. Nia husu atu lori lia nee baa tesi iha liurai boot César. Nee mak hau husik nafatin nia iha kadeia, too hau hetan tempu diak ida atu haruka nia ba liurai boot iha Roma.” 22 Rona Festu konta nunee, liurai Agripa dehan, “Se bele, hau hakarak rona rasik hosi ema nee.” Festu hataan, “Bele! Aban mak liurai rona rasik hosi nia.”
Governadór aprezenta Paulo ba liurai Agripa
23 Iha aban fali, liurai Agripa ho Berenise too mai iha salaun governadór nian. Sira hatais hena liurai nian mesak kapaas-kapaas deit. Komandante tropas sira ho moos ema boot sira hosi sidade Sezareia, akompanya sira tama ba salaun. Bainhira sira hotu iha laran ona, governadór haruka ema bolu Paulo tama.
Paulo iha ema boot sira nia oin
24 I governadór komesa koalia dehan, “Liurai Agripa, senyór sira, ho bainaka sira hotu mak hau respeita. Ema ida nee mak ema Judeu sira foo sala dehan, nia la merese atu moris tan. Iha Jerusalém moos hanesan, iha nee moos hanesan. 25 Hau la hetan nia sala ida para nia bele hetan kastigu mate. Nia husu atu lori lia nee baa tesi iha liurai boot iha Roma, i hau moos hataan. 26 Hau tenki hakerek surat ida foo ba liurai boot, maibee agora hau atu hakerek saida? Nee mak hau lori nia mai, para senyór sira rona nia koalia. Depois liurai Agripa bele foo lia fuan ruma mai hau, para hau bele hakerek buat ruma ba liurai boot. 27 Hau senti la diak, se hau haruka kazu nee ba liurai boot, bainhira la foo sai lo-loos ema nee nia sala. Hau nia lia fuan mak nee deit. Obrigadu.”
Paulo komesa defende-an iha liurai Agripa nia oin
1 Depois liurai Agripa hatete ba Paulo, “Agora o bele defende o nia aan. Ami hotu prontu ona atu rona o.” Paulo foo sinál ho liman, i komesa koalia dehan, 2 “Liurai Agripa mak hau respeita, hau senti kontenti hau bele hamriik iha ita boot nia oin hodi defende hau nia aan, kona ba sala nebee mak ema Judeu sira foo mai hau. 3 Tanba hau hatene katak liurai hatene ona ema Judeu nia lisan hotu. Ita boot moos hatene problema sira nebee mak halo ami haksesuk malu. Nee duni, hau husu ita boot pasiénsia uitoan hodi rona lai hau. 4 Ema Judeu sira hotu-hotu hatene katak, komesa hosi kiik, hau moris loos tuir Judeu nia lisan, foufoun iha hau nia rain, depois iha Jerusalém. 5 Sira konyese hau kleur ona. Nunee, se sira hakarak atu foo sasin karik, sira bele hatete katak hau moris nudar ema grupu relijiaun Farizeu. Ema hotu hatene dehan, ami ema Farizeu fanátiku liu tuir ami nia lei relijiaun. 6 Agora ema foo sala mai hau iha tribunál nee tanba hau hein ho laran metin atu Nai Maromak kumpri Nia promesa, nebee Nia foo ba ami nia bei-ala sira hori uluk. 7 Ema Israel hosi suku sanulu resin rua nee hotu, moos fiar Nia promesa nee. Tanba nee mak sira adora Nia loron-kalan. Liurai Agripa mak hau respeita. Maski ema Judeu sira moos fiar nunee, sira foo sala mai hau tanba hau fiar ba Nai Maromak nia promesa atu halo ema mate moris fali. 8 Tansaa mak imi hanoin Nai Maromak la bele halo moris fali ema nebee mate tiha ona? 9 Uluk hau fiar katak, hau tenki halo buat saida deit, hodi kontra ema nebee tuir Jesus, ema Nazaré. 10 Iha tempu nee, ulun relijiaun Judeu sira foo podér mai hau, hodi baa kaer Jesus nia ema sira i hatama ba kadeia. Hau moos konkorda bainhira atu foo kastigu mate ba sira balu. 11 Hau baa tama-sai uma kreda Judeu nian hodi halo terus sira, atu obriga sira hatete aat Jesus. Hau nia laran nakali, too hau moos baa buka sarani sira iha sidade-sidade iha rai liur hodi halo terus sira.”
Paulo konta fila fali dehan nia hasoru Nai Jesus
12 Paulo hatutan tan dehan, “Iha loron ida, ulun relijiaun sira foo orden ho surat rekomendasaun mai hau hodi baa kaer Jesus nia ema sira iha sidade Damasku. 13 Liurai Agripa, bainhira ami sei iha dalan klaran, meiu-dia derepenti deit, iha naroman ida hosi lalehan leno kona hau ho hau nia kolega sira. Naroman nee makaas liu loro matan. 14 Ami hotu monu ba rai, i hau rona lian ida koalia mai hau ho lian Aram dehan, ‘Saul! Saul! Tansaa mak o halo Hau terus beibeik? Se o kontra beibeik Hau nia hakarak, o sei hetan terus barak.’ 15 Hau husu, ‘Nai, Ita Boot nee see?’ Lian nee hataan fali, ‘Hau Jesus, ida nebee o halo terus tebe-tebes. 16 Agora, o hamriik ona! Hau hatudu-An ba o nee, atu o serbí Hau iha o nia vida tomak. O tenki baa foo sasin ba ema seluk kona ba saida mak o haree ona hosi Hau iha loron nee. O moos tenki foo sai buat nebee Hau sei hatudu ba o aban-bainrua. 17 Hau sei kuidadu o bainhira ema atu halo aat ba o, bele ema Judeu ka ema nebee laos Judeu. Hau haruka o baa iha ema sira nebee laos Judeu, 18 atu loke sira nia matan, para sira bele sai hosi nakukun laran ho moris iha naroman. O atu hasai sira hosi Satanás nia podér, i lori sira ba iha Nai Maromak. Tanba sira fiar mai Hau, Nai Maromak sei hamoos sira nia sala, i sira moos sai Maromak nia ema, hamutuk ho ema sira nebee Maromak hili ona.’”
Paulo konta dehan nia foo sasin kona ba Jesus
19 Paulo koalia tan dehan, “Tan nee, liurai Agripa, servisu nebee hau simu rasik hosi Nai Maromak nee, hau halao duni too agora. 20 Primeiru hau foo sai Jesus nia Dalan ba ema Judeu sira iha Damasku, depois ba ema Judeu sira iha Jerusalém ho provínsia Judeia hotu, ho moos ba ema nebee laos Judeu. Hau koalia mo-moos ba sira hotu, para sira husik ona sira nia sala, ho fila ba Nai Maromak. Sira moos tenki hatudu hahalok diak, hanesan sinál katak sira tuir Nia duni. 21 Tanba hau halo servisu nunee, mak ema Judeu balu kaer hau iha Nai Maromak nia Uma Kreda Boot, i sira atu oho hau. 22 Maibee Nai Maromak tulun hau. Nee mak hau sei moris too agora. Tanba nee, hau bele hamriik iha nee, hodi foo sasin ba ema hotu-hotu, kiik-boot, kona ba Jesus. Saida mak hau koalia nee, haan malu ho saida mak avoo Moisés ho profeta sira uluk hanorin ona. 23 Sira foo sai kona ba Ema ida nebee Nai Maromak hili ona nee, dehan, Nia tenki terus, depois Nia mate, maibee liu tiha, Nia mak ema primeiru nebee Nai Maromak halo moris fali hosi mate. Nia mak sei foo naroman ba ema Judeu sira, ho moos ba ema sira nebee laos Judeu.” 24 Paulo sei koalia hela, Festu hakilar nia dehan, “Paulo! O bulak karik! O nia matenek nee halo o sai bulak.” 25 Maibee Paulo hataan, “Senyór governadór mak hau respeita. Hau laos bulak. Buat hotu nebee hau foo sai nee, loos duni. Hau la inventa. 26 Liurai Agripa rasik hatene ona buat sira nee, tanba laos akontese iha fatin subar. Tan nee, hau barani koalia iha liurai nia oin, mo-moos deit. 27 Hori uluk, Nai Maromak nia profeta sira foo sai ona kona ba buat sira nee. I hau fiar katak, liurai moos fiar ba profeta sira nia koalia.” 28 Liurai Agripa tesi kedas nia koalia dehan, “Paulo, o hanoin o bele halo hau sai sarani lalais deit nunee ka?” 29 Paulo hataan, “Hau harohan ba Nai Maromak, atu lalais ka kleur, laos liurai deit, maibee ema hotu nebee ohin loron rona hau nia koalia, bele sai Jesus nia ema, hanesan hau. Naran katak senyór sira keta hetan kastigu hanesan hau.” 30 Depois liurai Agripa ho governadór Festu ho Berenise, ho ema sira hotu, hamriik sai ba liur. 31 Bainhira sira lao sai tiha, sira koalia ba malu dehan, “Ema nee la halo sala ida. Nia la merese hetan kastigu mate ka tama kadeia.” 32 I liurai Agripa hatete ba governadór Festu, “Se ema nee la husu atu lori nia lia baa tesi iha Roma karik, ita hasai tiha nia ona.”
Paulo sae roo atu baa Roma
1 Nee liu tiha, governadór Festu haruka Paulo baa hasoru liurai boot César iha Roma, hodi tesi nia lia. Nia entrega Paulo ho ema dadur balu tan ba komandante kompanyia ida naran Júlio, hosi Batalyaun Liurai Boot Roma nian. 2 Tempu nee, hau (Lucas) akompanya hotu Paulo. Iha tan irmaun ida, ema Masedónia hosi sidade Tesalónika, naran Aristarku, moos tuir. Ami baa sae roo ida nebee mai hosi sidade Adramítiu. Tuir planu, roo nee sei tama tu-tuir iha pontikais iha provínsia Ázia. 3 Aban fali, ami too iha sidade Sidon. Komandante Júlio haree Paulo diak loos, i hatete ba nia para bele tuun baa haree nia kolega sira iha rai maran, atu sira bele foo buat nebee Paulo presiza.
Dalan hosi Sezareia ba iha ilya Kreta
4 Depois ami baa sae fali roo hodi lao tan. Maibee tanba anin boot hasoru ami, ami lao liu fali hosi rai kiik Xipre ho rai Síria nia klaran, para bele sees uitoan hosi anin. 5 Ami lao liu hosi tasi provínsia Silísia ho provínsia Panfília nian. Depois ami too iha sidade Mira, iha rai Lísia. Too iha nebaa, ami hotu tuun hosi roo. 6 Iha Mira, komandante Júlio buka roo seluk nebee atu baa Itália. Nia hetan roo ida, mai hosi sidade Alexandria. I nia haruka ami hotu baa sae roo nee. 7 Durante loron barak nia laran, roo nee halai neineik liu, tanba anin boot makaas hasoru ami. Ikus mai, too besik sidade Knidu, anin sei boot nafatin, halo ami la bele lao tan ba oin. Nunee ami lao ba iha rai kiik ida naran Kreta, para sees uitoan hosi anin. Too iha nebaa, ami liu hosi fatin ida naran Salmona. 8 Ho hakaas-an, ami liu hosi tasi ibun Kreta nian, foin ami too iha fatin ida naran Pontikais Diak, besik sidade Laseia. 9 Ami lakon tempu barak ona iha dalan. Tempu nee, ema Judeu sira nia loron boot hodi husu perdaun liu tiha ona. Nee katak, tempu anin boot ho laloran boot komesa ona. Paulo foo hanoin ba sira nebee servisu iha roo nee dehan, 10 “Maun-alin sira, hau husu koalia uitoan. Hau hanoin se ita lao nafatin, ita bele hetan azár. Roo bele mout, sasaan sira lakon, i ita moos bele mate.” 11 Maibee komandante nebee hein ema dadur sira la simu. Tanba ema ida kaer roo ho roo nia nain hakarak sai hosi fatin nee, i komandante fiar liu ba sira. 12 Problema mak Pontikais Diak nee laduun diak atu roo para iha tempu rai malirin ho laloran boot. Nee mak sira barak hakarak atu se bele, ami lao tan uitoan ba iha sidade Feniks, atu hela iha nebaa durante tempu laloran boot. Feniks nee pontikais diak ida, tanba bele taka netik anin hosi loro-sae, i livre hosi laloran boot.
Anin boot iha tasi
13 Bainhira anin komesa huu neineik hosi tasi mane, sira hanoin dehan tempu diak ona atu lao ba Feniks. Entaun sira dada sae hosi tasi kidun, besi ankor nebee halo roo para metin. Sira moos hasae laan iha roo riin hodi halo roo halai. Nunee roo lao tuir tasi ibun. 14 Maibee ami seidauk lao kleur, anin komesa huu makaas loos hosi rai nee. (Anin nee ema bolu ‘anin loro-sae’.) Anin huu roo nee baa tiha iha tasi klaran. 15 Sira hakaas-an dulas roo halo fila fali tuir dalan, maibee la bele. Entaun sira husik tiha roo tuir deit anin nia hakarak.
Tasi siak baku roo baa-mai
16 Ami ho roo namlele tuir laloran nunee, too besik rai kiik oan ida naran Kauda. Iha nee anin laduun makaas. Roo oan hodi salva vida sei kesi hela iha roo kotuk. I ami hakaas-an dada roo oan nee sae ba leten. 17 Kuandu salva vida nee iha ona roo leten, sira komesa bobar haleu roo ho tali para roo nia ai kabelak sira la bele nakloke. Sira tauk, keta halo-be anin huu roo baa metin tiha iha rai henek besik Sirte iha Áfrika nebaa. Nunee sira hatuun laan, atu roo halai neineik uitoan. 18 Tanba anin boot huu roo baa-mai, nunee aban fali, sira komesa foti naha soe ba tasi. 19 Bainrua fali, sira foti tan naha soe ba tasi. Roo nia materiál barak moos, sira foti soe ba tasi laran. 20 Loron-kalan anin la para too loron barak nia laran, i kalohan taka rai metin halo ami la hetan loro matan ho fitun. Too ikus ami hanoin ami la moris tan ona. 21 Kleur ona, ami hotu-hotu la haan buat ida. Paulo hamriik iha sira nia klaran hodi hatete, “Maun-alin sira, haree ka lae?! Uluk hau dehan ita la bele sai hosi rai Kreta. Se imi rona hau karik, ita la hetan azár hanesan nee. 22 Maibee agora, hau husu ba imi hotu aten barani. Lalikan tauk, tan la iha ema ida mak mate. So roo deit mak sei mout. 23 Hori kalan, Nai Maromak, ida nebee hau serbí nee, haruka Nia anju ida mai hamriik iha hau nia sorin, hodi hatete, 24 ‘Paulo, o lalikan tauk! O sei baa hamriik iha liurai César nia oin para tesi o nia lia. Nai Maromak hatudu Nia laran diak ba o. Nee mak Nia moos salva ema sira hotu nebee hamutuk ho o iha roo nee.’ 25 Tan nee, maun-alin sira hotu, imi aten barani ba. Hau fiar ba Nai Maromak katak, saida mak Nia foo hatene mai hau nee, sei sai duni. 26 Maibee roo nee sei baa xoke rahun tiha iha rai kiik ida.”
Roo bes-besik iha rai maran
27 Laloran ho anin baku roo nee baa-mai durante loron sanulu resin haat ona iha tasi Adriátiku. Depois, iha kalan boot, ema sira nebee servisu iha roo senti ami besik ona iha rai maran. 28 Entaun sira hatuun prumu hodi buka hatene tasi nia klean. I sira sukat hetan metru 37. Roo halai uitoan tan ba oin, sira sukat fali, hetan metru 27. 29 Sira hotu tauk, keta halo-be roo nee xoke fatuk. Entaun sira hatuun ankor haat hosi roo kotuk hodi halo roo para metin. I sira hotu hamulak atu rai naroman lalais. 30 Maibee sira nebee servisu iha roo kombina malu atu halai husik hela roo. Nunee sira hatuun roo oan, halo finji atu hatuun ankor hosi roo ulun. 31 Maibee Paulo foo hatene ba komandante ho soldadu sira dehan, “Se ema sira nee la hela iha roo laran, ita sei mate hotu.” 32 Entaun soldadu sira tesi kotu tiha roo oan nia talin, i husik tiha ba tasi. 33 Bainhira rai naroman ona, Paulo husu atu ema sira nee hotu-hotu haan. Nia hatete, “Semana rua ona, ita la haan buat ida. 34 Nunee hau husu ita haan uitoan lai, para ita bele iha forsa fali. Imi nia fuuk lahan ida moos sei la monu.” 35 Depois Paulo foti paun, halo orasaun agradese ba Nai Maromak iha ami hotu nia oin, i nia silu paun pedasuk ida ba haan. 36 Haree nunee, ami moos laran metin, i haan. 37-38 Depois ami foti trigu iha karoon-karoon soe ba tasi, para halo roo kamaan liu tan. (Ami hotu iha roo laran, ema nain 276.)
Roo xoke fatuk, i Paulo sira salva-an
39 Rai loron ona, sira haree rai maran ida. Maibee sira la hatene rai nebee mak nee. Sira haree tasi ibun ho rai henek iha rai inur rua nia klaran, i laloran iha nebaa laduun boot. Nunee sira hakarak, se bele, lori roo tama too rai maran nebaa. 40 Entaun sira tesi kotu tiha ankor nia talin, husik ba tasi. Sira hatuun kamudi atu bele fila roo para lao tuir dalan. I sira hasae laan ida iha roo ulun, atu anin bele huu roo ba tasi ibun. 41 Maibee roo nee halai sae tiha fatuk leten, i roo ulun metin tiha iha nebaa. Roo nia kotuk, laloran boot komesa baku rahun tiha. 42 Bainhira soldadu sira haree nunee, sira halo planu para oho tiha ema dadur sira hotu. Sira tauk, keta halo-be ema dadur sira nani ba rai maran, i halai tiha. 43 Maibee komandante la hataan, tanba nia hakarak salva Paulo. Nunee nia foo orden ba ema sira nebee hatene nani haksoit ba tasi laran, hodi nani ba rai maran. 44 I ema sira nebee la hatene nani, nia haruka atu sira kaer ai kabelak ka naran buat ida, hodi tuir laloran ba rai maran. Nunee ami hotu too iha rai maran ho diak.
Laloran baku rahun roo
Paulo sira iha rai Malta
1 Ami hotu too iha rai maran ho diak, foin ami hatene katak rai kiik nee naran Malta. 2 Ema rai nain sira simu ami ho diak. Tanba udan boot ho rai moos malirin tebe-tebes, nee mak sira tau ahi iha tasi ibun, ba ami haneruk. 3 Paulo moos baa hili ai, hodi tau ba ahi. Momentu nia bou ai nee ba ahi, derepenti deit, samodok ida sai hosi ai sira nee hodi halai hosi ahi, tata belit hela iha Paulo nia liman.
Samodok tata belit hela iha Paulo nia liman
4 Bainhira ema rai nain sira haree samodok nee tata belit hela iha Paulo nia liman, sira dehan ba malu, “Ema ida nee ohodór ema karik. Nee mak nia sai ona hosi tasi siak, maibee ita nia maromak Justisa la husik nia moris.” 5 Maibee Paulo hisik tiha samodok nee ba ahi laran. Nia la senti moras uitoan moos. 6 Ema sira nee hanoin katak la kleur tan, Paulo nia liman bubu i nia sei mate derepenti. Maibee Paulo la iha buat ida. Entaun sira hanoin fali dehan, “Ema nee maromak ida.” 7 Xefi rai Malta nian, naran Públiu, iha rai ida besik iha tasi ibun nee. Nia mai simu ami iha tasi ibun, i lori ami ba iha nia uma. Iha nebaa nia foo haan ami durante loron tolu. 8 Momentu nee, xefi nia aman isin manas ho kabun moras la para. Paulo tama baa haree nia, halo orasaun, i tau liman ba nia. I katuas nee diak kedas. 9 Bainhira sira rona nunee, ema moras sira seluk moos mai ba Paulo, i sira hotu hetan kura. 10 Depois sira lori prezenti hodi foo onra ho obrigadu mai ami, i bainhira ami atu sae roo, sira lori buat hotu-hotu nebee ami presiza.
Paulo sira too iha Itália
11 Ami hela iha Malta durante fulan tolu, depois ami baa sae roo ida ho estátua maromak oan kaduak. Roo nee mai hosi sidade Alexandria, maibee para hela iha Malta durante tempu malirin ho anin boot.
Dalan hosi ilya Kreta too iha sidade Roma
12 Ami lao too iha sidade Sirakuza, i para iha nebaa loron tolu. 13 Depois ami ho roo lao tu-tuir tasi ibun too iha sidade Régiu. Aban fali, anin huu makaas hosi tasi mane, tan nee roo halai lalais. Iha bainrua fali, ami too iha pontikais Poteoli. 14 Iha nee, ami tuun hosi roo. Ami hasoru malu ho sarani sira, i sira konvida ami hela ho sira semana ida. Depois ami lao ain liu ba Roma. 15 Kuandu sarani sira iha Roma rona dehan, ami atu too ona iha nebaa, sira mai hasoru ami iha dalan. Sira balu hasoru ami iha merkadu Ápiu, sira seluk hasoru ami iha fatin ida naran Loja Tolu. Bainhira Paulo haree sira, nia moos laran metin, i nia foo obrigadu ba Nai Maromak.
Paulo hasoru malu ho sarani sira iha Ápiu
Paulo iha Roma
16 Too iha Roma, komandante husik Paulo livre hodi aluga uma ida. I soldadu ida mak hein nia. 17 Liu tiha loron tolu, Paulo konvida ulun relijiaun Judeu sira mai hasoru malu ho nia, i nia hatete ba sira, “Maun-alin sira hotu, hau mai iha nee, tanba ema kaer hau iha Jerusalém, hodi entrega hau ba governu Roma nia liman, maski hau la halo sala ida. Hau la kontra ita nia nasaun, i hau moos la kontra lisan nebee ita nia bei-ala sira rai hela ba ita. 18 Governu Roma tesi tiha ona hau nia lia iha nebaa, maibee sira la hetan hau nia sala ida, para bele hetan kastigu mate. Nunee sira atu hasai hau. 19 Maibee ema Judeu nia boot sira la simu. Entaun pasiénsia, hau moos husu atu mai iha liurai boot César hodi tesi hau nia lia, maski hau lakohi foo sala ba hau nia nasaun rasik. 20 Tan lia nee mak hau halibur maun-alin sira iha nee, para ita koalia. Hau hakarak para ita boot sira hatene katak sira futu hau ho korenti nee, tanba hau serbí Ema ida nebee povu Israel hein ho laran metin atu Nai Maromak haruka mai.” 21 I sira hataan, “Ami seidauk simu surat ida hosi Judeia foo hatene kona ba ita nia kazu nee. Nunee moos, sira nebee mai hosi nebaa la koalia buat ida kontra irmaun. 22 Maibee ami hakarak rona saida mak irmaun fiar, tanba ami rona ona dehan, iha fatin hotu-hotu ema la simu saida mak irmaun nia grupu relijiaun nee hanorin.” 23 Entaun sira marka loron ida, atu sira hasoru malu fali. Too iha loron nee, ema barak tebe-tebes mai iha Paulo nia uma. Nia komesa esplika ba sira, Nai Maromak nia ukun. I nia uza lia fuan hosi avoo Moisés nia livru, ho moos hosi profeta sira seluk nia livru, atu halo sira fiar ba Jesus. Nia koalia hosi dadeer-saan too kalan. 24 Bainhira sira rona Paulo nia koalia, iha ema balu fiar, maibee balu lakohi fiar. 25 Sira haksesuk malu i atu fahe malu ona. Entaun Paulo hatete, “Imi nia ulun toos duni, hanesan ita nia bei-ala sira, tuir Nai Maromak nia Espíritu Santu foo hatene ba avoo Isaias, 26 dehan, ‘O baa hatete ba povu nee dehan, “Imi sei rona beibeik Hau nia Lia Fuan, maibee imi la kompriende buat ida. Imi sei haree beibeik saida mak Hau halo, maibee imi la hetan buat ida.” 27 Tanba povu nee nia ulun toos tebe-tebes. Sira sulan tiha sira nia tilun ona; sira taka metin tiha sira nia matan. Para sira nia tilun la bele rona tan, sira nia matan la bele haree tan, i sira nia laran nakukun nafatin. Too sira la hatene dalan atu fila mai Hau, para Hau bele kura sira.’” 28 Ikus liu Paulo moos dehan, “Maun-alin sira, imi tenki hatene katak, agora Nai Maromak haruka ona Nia Lia Fuan kona ba salvasaun ba ema sira nebee laos Judeu, i sira moos sei simu Nia.” 29 Paulo koalia nunee, sira moos fila hodi haksesuk malu iha dalan. 30 Nia hela iha nia uma nebee nia aluga nee durante tinan rua. Nia simu ho laran haksolok ema hotu-hotu nebee baa vizita nia. 31 I nia konta ba sira kona ba Nai Maromak nia ukun, ho hanorin kona ba Nai Jesus Kristu. Nia koalia ho barani, i la iha ema ida bandu. Senyór Teófilo mak diak. Hau nia lia fuan too iha nee deit. Obrigadu. Hosi hau, Lucas.