Jisas se yóm bnoluy le Udél hlowil tau
1 Gu laanen là deng wen benwu he, deng sana kem yó ne yóm Udél. Ne yóm Udél yó nô bè Dwata, ne du se yóm Dwata. 2 Lemwót bè hol kbuten, són Dwata gónóhen nô. 3 Ne hlan Dwata béléen yóm kedlimunen yóm kdéen. Tódô kentihen deng dlimun Dwata, gotu hlanen tahen. 4 Lemwót bè yóm Udél yó, yó se gónón mowil yóm kdéen mowil. Yóm klowil yó, hol lómón ke layag mò hlayag yóm kdéen tau te tonok. 5 Yóm layag yó, tódô senflósen lemayag lem gónón kmifu, ne là kô na a gbek kifu hemseng du. 6 Wen sotu tau hógów Dwata boluyen Jan, yóm Jan gel mabtays. 7 Yó gónó Dwata hógów du anì nan e hetngón bè yó kem tau yóm layag yó koni anì kdéen tau hmungol du yóm tulónen ne hemtahu du. 8 Sundu Jan du yóm layag. Okóm yó gónón sut mò na a hetngón du bè yó kem tau yóm layag yó. 9 Yóm layag tulónen yó, yó se yóm hol tahu layag gdek lem benwu mò hlayag kdéen tau te tonok. 10 Yóm Udél yó koni, deng nô lem benwu. Balù bè yóm tehe kehedlimun Dwata du yóm klamangen benwu, ewenem là kô dog dilô le du yó kem tau nô lemen. 11 Deng tódô kól bè yóm hol kun benwu, okóm mom là dog henmóyô le du yó kem kun tau. 12 Okóm kdê yó kem tau hemmóyô du, ne hemtahu béléen tódô benlayen lu kwalis baling ngà Dwata. 13 Yóm kbaling le ngà Dwata yó, là mlanen bè yó dum kngà tau te tonok, duhen ke lemwót bè knóyô lówó tau. Okóm tódô lemwót bè yóm kun kmò du Dwata yóm kehbalingen kul kun ngà. 14 Yóm Udél yó koni, deng baling tau, ne mnô bélê tekuy. Laen kô dù sónen yóm klinggel nawahen ebè tau, ne hono tahu yóm gel tulónen kul. Deng hyu na me ton se yóm kegeta deng blay Maen du, yóm kegeta hol knóón bè yóm Ngaen tek sotu. 15 Nim Jan ni, wen tulónen gbak ebè yóm bnoluy le Udél yó, hgelen udélen, monen, “Ni se yóm tau tehe monu sut huli dou, okóm du he yóm geta sentahu, abay se gu laanu là deng sut, deng sana kem yó ne kun.” 16 Deng tekuy gotu gomong lemen ne yóm tey klinggel nawahen ebè tau. Yóm któbóngen tekuy, tódô seflós, là kóen skó. 17 Bè yóm tehe keblay Dwata yóm hlau ekni, hlanen bè Musis. Okóm bè yóm kehegfanen du yóm hol klinggel nawahen ne yóm hol ktahuhen, hlanen bè Jisas Krays. 18 Yóm Dwata, laen kô tau deng mton du he. Okóm tek són yóm kun Ngà yó deng hetngón du tekuy yóm kmò Maen, abay se hol le senged Maen yóm Ngaen, ne senflósen nô béléen yóm Ngaen yó.
Ktolok yóm Jan gel mabtays
19 Sotu kdaw bè yó, dók yó kem Ju wen glalen bè Jirusalim yó kem tau gel demsù ebè Dwata dalang se yó kem dumu tau semfu gu bè Libay anì wen snólók le bè Jan. Yó snólók le béléen, mon le, “Tmau kóm de?” 20 Là kóen hadà malà kul Jan, bà udì ke wen bnosen bélê le, monen, “Là kô ou du yóm Misaya, yóm deng nélék Dwata mò hkamalen yóm klamangen.” 21 Bud mon le se, “Tmau kóm de? Ilaydyahi kô?” Bud mon Jan, “Sundu ou du.” Bud mon le se, “Uu kô yóm sotu tugod Dwata tendo hendón me?” Bud mon Jan, “Sundu ou du.” 22 Bud mon le. “Tmau kóm de? Hol tulónem kum anì wen tulón me bè tu kem tau mdók kum edini. Mò kmonem du de yóm kóm knô?” 23 Yó balà Jan kul, hlanen bè yóm tehe snulat yóm sotu gna tugod Dwata ekni boluyen Isaya, yóm monen, “Ou se ‘yóm tmaba gu bè yóm benwu laen dù tau menwu du. Yó utóm yóm tabahen, monen, Eles hentedeng ye yóm lan mò angat lolò yóm gónó tekuy mogot.’ ” 24 Yó kem tau smólók ke Jan yó koni, hono kem tau dók yó kem Farisi. 25 Bud mon le mò ke Jan, “Ke là se uu du yóm Misaya, ne ke là se uu du Ilaydya, duhen ke là uu du yóm sotu tugod Dwata tendo nangat me, moen se ke geli mabtays?” 26 Bnalà Jan lu, monen, “Él yóm gel babtaysu yó kem tau. Okóm wen deng sut lem blóng ye là dilô ye du. 27 Du se yóm monu sut huli do, okóm tey mfasang sentahu he kun. Baluen ke olohu hesek béléen, là kóe na a knóón.” 28 Yóm gónó le stulón yó koni, ditu bè yóm sotu Bitani seblà fi dmata kdaw él Jurdan, bè yóm gónó Jan gel mabtays.
Yóm Ngà Ubiha dsù Dwata
29 Timbow hayahen bè yó, ton Jan Jisas mógów ebéléen. Bè yóm ktonen du, monen mò yó kem tau, “Ngem yó dé yóm Ngà Ubiha Dwata mò angat dsù Dwata mò mkó salà kdéen tau. 30 Du se yóm deng monu sut huli dou, okóm tey mfasang sentahu, abay se gu laanu là deng sut, deng kem sana yó ne kun. 31 Là kô tehe tngónu du snéen dou yóm tau huli dou ni. Okóm yó gónóhu sut dou mò fen mabtays kem tau bè él anì eles hetngónu bè kem dumuhu tau Israél yóm tau yó.” 32 Ne yó bud udél Jan, monen, “Tódô tonu Tulus Dwata gu tta bè longit hol lómón ke obun, htuntun ebè Jisas, ne tódô hlós nô béléen. 33 Là kô tehe dilóu du se dou ke du yóm deng nélék Dwata ke là yóm deng eles ktulón Dwata du dou bè yóm tehe khógówen dou mò na a mabtays kuy bè él. Eles monen mò dou, ‘Sok tonem yóm dou Tulus htuntun gu tta ebè yóm sotu tau, ne angat tódô hlós nô béléen, deng duhen yó se yóm tau angat mabtays kuy yóm dou Tulus.’ 34 Ne tahu se,” mon Jan, “deng tonu. Tódô tulónu kuy, deng duhen Jisas se yóm hol Ngà Dwata.”
Yó kem tau tanay lemolò ke Jisas
35 Timbow deng hayahen bè yó, bud nô bè yó Jan, mung du lewu bè yó kem gel lemolò du. 36 Bè yóm ktonen ke Jisas mius bè yó, bud monen, “Yó sii yóm Ngà Ubiha angat dsù Dwata.” 37 Bè yóm kungol le du yó kem lewu gel lemolò ke Jan yóm monen yó koni, tódô le kendel mung huli ke Jisas. 38 Timbow binguy semfulék Jisas, tódô tonen lu, monen mò kul, “Mò ye de?” Mon le se, “Tô snólók me yóm gónóm gel nô, Rabi?” (Yó lanen yóm Rabi mon le yó, “Tau Tmolok.”) 39 Mon Jisas se, “Mung ye do sen, na ye e hnénég.” Tahu se, mung le du. Deng móyón kimel ne yóm kmung le du yó. Ton le se yóm gónóhen nô, ngang le nô béléen bè yó efet kifu. 40 Yó boluyen yóm sotu tau mung ke Jisas yó, Andru. Hol le setwoli Simun Pitér. 41 Kewót Andru bè yó, nan e kendel tódô hnebel twoguhen Simun, ne tulónen du, monen, “Ó Wog, deng ton me ne yóm Misaya.” (Yó lanen yóm boluy Misaya yó, duhen “Krays.”) 42 Ne omin Andru mit ke Simun ebè Jisas. Uni Jisas mton ke Simun, henmung monen mò du, “Uu se Simun, ngà yóm sotu Jan. Okóm yó bud tles boluyem, Sifas.” (Yóm boluy Sifas yó, senged lanen bè yóm boluy Pitér. Yó lanen, “botu.”)
Ktaba Jisas ke Filip lewu le Natanyél
43 Timbow hayahen bè yó, mógów ebè prubinsya Galili Jisas. Tonen Filip, ne tódô monen mò du, “Loloem ou dé.” Tahu se, tódô mung du Filip. 44 (Nim Filip ni, tau lemwót bè yóm benwu boluyen Bitsayda, yóm benwu gónó le nô le Andru ne Pitér.) 45 Bud kewót Filip bè yó, nan e hnebel Natanyél. Tikóng le ston, monen mò du, “Deng ton me ne yóm tau gónón e gbak yóm tehe snulat Musis ekni bè yóm hlau gnan, dalang se yóm tehe gel snulat yó kem gna tugod Dwata, duhen du se yóm Jisas lemwót bè Nasarit, yóm ngà Jusif.” 46 Ne mon Natanyél se mò ke Filip, monen, “Ê. Wen kô tau hyu kmoen lemwót bè Nasarit?” Ne mon Filip se mò du, “Mungi do dé, nam e hnénég.” Tahu se, mung ke Filip Natanyél. 47 Timbow ton Jisas Natanyél mógów ebéléen, wen tulónen gbak ebéléen, yó monen, “Ni sii yóm hol tahu tau Israél abay se laen kô dù kéngen.” 48 Mon Natanyél se mò ke Jisas, “Na. Kmò ketngónem do du?” Mon Jisas se, “Deng tonu uu laan yóm koyu fig, yóm gu laan Filip là deng tmaba kóm he.” 49 Mon Natanyél se, “Tahu, Sér, uu se yóm Ngà Dwata. Uu se yóm tau hol geta bè yó kem tau Israél.” 50 Bud mon Jisas se, “Yó kô olo gónóm hemtahu lemwót bè yóm kmonu du deng tonu uu laan yóm koyu fig? Angat wen he bud tonem mkay senta nim ni. 51 Tódô tulónu kuy ktahuhen,” mon Jisas, “angat ton ye hnas longit, ne yó kem hógów Dwata gu bè longit htuntun ebè yóm Ngà Tau, lel le bud haway eta.”
Yóm kwen mulu bè Kana
1 Tikóng deng lewu butengen bè yó, hto yóm nulu bè Kana, yóm sotu benwu udì snakuf Galili. Deng eles nô ditu ne ke Yê Jisas kun. 2 Tinok le Jisas snéen dalang se yó kem gel lemolò du ebè yóm nulu yó. 3 Tikóng deng gotu yóm tifas gel ninum le, mon yéen mò ke Jisas, “Laen dù bud tifas le ne.” 4 Mon Jisas se mò ke yéen, “Omin he ke tulónem dou yóm nmou, Yê. Là dengen kól du he yóm dou kdaw.” 5 Omin Yê Jisas lemwót, stulón bè yó kem tau smagid ken, monen, “Kihu hmò Jisas kuy, tódô nimón ye.” 6 Wen kul gel lolò yó kem Ju bè khólós le, yó gónóm mon wen nem lebwón botu eles hyón le bè yó mò gónó le hemsù él mò gel olob yó kem tau. Ni kem lebwón ni, wen na lewu folò duhen ke tlu folò galun lem le. 7 Ne mon Jisas mò yó kem tau gel smagid ken, monen, “Nlem ye kut él dé yó kem lebwón yóó.” Tahu se, gotu hennok le. 8 Omin Jisas bud mon du mò kul, monen, “Smakub ye du dé, ne benlay ye yóm tau fen hogot le du nim mò ken ni.” Tahu se, benlay le. 9 Ne tilówen yóm él deng henbaling Jisas tifas yó koni. Là kô tngónen du kun gónón gu lemwót yóm ninumen yó (okóm yó kem tau smakub du, deng tngón le se kul). Bè yóm ktilówen du, botong htabahen yóm logi myehen, 10 monen, “Ó Tò, bè yóm sana kut adat, sal gel hegna hinum te yó kem tau mulu yóm tifas alì hyu nómen, ne ke deng bong ninum le, omin te hfuli hinum du kul yóm geblà nómen. Okóm yóm kóm, deng mom hfuli hinumem kum yóm alì mnóm.” 11 Ni se yóm hol tanay hentaw ton nmò Jisas. Nmoen bè yóm sotu benwu snakuf Galili boluyen Kana. Ne bè yó gónóhen hegfan du yóm kfasangen, ne hemtahu le béléen yó kem gel lemolò du. 12 Timbow kogolen bè yó, gotu le mógów emool le Jisas ebè yóm benwu boluyen Kapérnaum, mung du yéen ne kem twolihen, dalang se yó kem gel lemolò du, okóm là legen le ditu.
Kógów Jisas bè Gónô Dwata
13 Móyónen hto ne yóm kmò le ken bong bè Kdaw Khius. Yó gónó Jisas bud lemwót bè yó subô ebè Jirusalim. 14 Bè yóm kkólen bè yó, tódô hlós ebè yóm Gónô Dwata. Tódô glohen yó kem tau deng mom hembalù safì ne ubiha ne kfati bè yó lemen. Nô le bè yó snéen yó kem tau fen gel lemuluk filak, myón le klohok lemisa le. 15 Na a lemwót Jisas mò fes tébéd, tódô gotu lohen lu yó kem safì ne yó kem ubiha hbalù le. Ne gotu lugoden yó kem lemisa yó kem tau gel lemuluk filak, ne gotu senbuléten yó kem filak le. 16 Gotu dóken yó kem tau hembalù kfati, monen mò kul, “Gotu kó ye bè ni ni kem hbalù ye ni. Bê ye henbaling fedyan yóm Gónô Mà.” 17 Bè yóm kton le du yó kem gel lemolò ke Jisas yóm nmoen yó, tódô gtulón bè nawa le yóm deng monen bè Sulat Dwata, yóm monen, “Ó Dwata, lemwót bè yóm alì kngalihu yóm gónóem, yó angat duón le hmatay do.” 18 Snólók le bè Jisas yó kem Ju wen glalen bè yó, mon le mò du, “Hentaw ton du tô nmoem mò ilô me du yóm kwen kwalisem mò du nim nmoem ni?” 19 Yó balà Jisas kul, monen, “Genbà ye dé nim Gónô Dwata ni, bè tlu kdaw sana bud hdau.” 20 Mon le se kul yó kem tau wen glalen yó koni, mon le, “Fat folò nem halay tehe kegen le hemdà du nim Gónô Dwata ni. Fen tô gbek hdaem kô bè tlu kdaw?” 21 Okóm yóm gónó Dwata mon Jisas yó, hnigaden yóm kun lówó. 22 Bè yóm kogol kehlowil Dwata ke Jisas gu lem hatay, gtulón bè nawa yó kem gel lemolò du yóm tehe kmonen du yóm yó. Ne hentahu le se yóm tehe snulat bè Sulat Dwata, dalang se yóm deng mon Jisas.
Eles ketngón Jisas yóm kehedem tau
23 Bè yóm igò Jisas nô bè yóm mò ken bong bè Jirusalim, tey dê tau hemtahu béléen lan le mton yó kem hentaw ton nmoen. 24 Okóm ke Jisas, là kô snaligen kul, abay se deng gotu tngónen kun yóm kmò kehedem tau. 25 Laen dù bud muhen tmulón du béléen yóm kmò le, abay se deng eles tngónen yóm nô lem hendem le.
Kestulón le Jisas Nikudimus
1 Wen sotu tau boluyen Nikudimus, sotu bè yó kem Farisi. Du se sotu tau gónó le galak yó kem Ju. 2 Sotu kifu, mógów ebè Jisas nim Nikudimus ni, monen mò du, “Ó Sér, tódô tngón me uu se sotu tau tmolok hógów Dwata. Laen kô tau gembek mò du yó kem hentaw ton gel nmoem ke là nóen béléen Dwata.” 3 Bnalà Jisas se, monen, “Tódô tulónu kóm ktahuhen, là kóen gmung bè yó kem tau nogot Dwata yóm tau ke là nan ne bud hlomi sut.” 4 Mon Nikudimus se kun, “Tô kmò bud kehlomihen sut se yóm tau ke deng tuha? Là kô gbeken bud husek elem blutut yéen ke tô sut bè gewuhen dulék.” 5 Bud bnalà Jisas se, monen, “Tódô tulónu kóm ktahuhen, là kóen gmung bè yó kem tau nogot Dwata ke là nan na mlan bè él ne bè yóm Tulus Dwata. 6 Yóm ngà sut bè tau, tau se yó. Okóm bè yóm bud kehlomihen sut yóm tau, deng baling ngà Dwata ne, lemwót bè yóm deng nmoen béléen yóm Tulus Dwata. 7 Béem mom hentaw yóm kmonu du mò kóm, na ye bud hlomi sut yóm kdê ye. 8 Yóm kun nmò yóm Tulus Dwata,” mon Jisas, “hol lómón ke lenos. Kihu gónón e mbel, olom mungol du luken, okóm là kô tngónem du gónón gu mbel, ne là se tngónem du gónón e mbel. Lómón yó se kmò kehbaling Tulus Dwata du ngà Dwata yóm tau, là kô tngónem du kmoen du béléen.” 9 Bud mon Nikudimus se, “Tedu tô mò kmoen de nim ni?” 10 Bnalà Jisas se, monen, “Igoem sem tau hulung tmolok yó kem dumum tau Israél du, moem là temngón du ni kem monu mò kóm ni? 11 Tódô tulónu kóm ktahuhen,” mon Jisas, “són olo tulón me yóm deng tngón me, ne yóm deng ton me, okóm laen dù bélê ye hemmóyô du. 12 Ke là hentahu ye du yóm tulónu kuy yóm mò kmoen bè ni te tonok, sélét mom tô hentahu ye ne ke wen tulónu kuy yóm mò kmoen ditu bè longit? 13 Laen kô dù tau ke deng mógów ebè longit, tek són yóm Ngà Tau, ne ditu se kun gónó gu lemwót. 14 Bè yóm tehe kun kdaw Musis ekni,” mon Jisas, “bè yóm tehe knô le bè yóm benwu laen dù tau menwu du, wen ulal tembaga sù Musis bè tfod yem hehek htegen eta. Bud lómón yó se angat ktayal le du eta yóm Ngà Tau, 15 anì yó, kihu tau hemtahu béléen, gutahen yóm klowil laen dù sónen. 16 Tey alì kbong nawa Dwata kul yó kem tau bè klamangen benwu, gloken tódô hamà klowil yóm Ngaen tek sotu, anì yó, kihu tau hemtahu béléen là gógówen elem hatay, okóm gutahen yóm klowil laen dù sónen. 17 Là kô yó du gónó Dwata hógów yóm Ngaen elem benwu ke nan e tnuled kem tau. Okóm yó gónón hógów du mò lemwà kul gu lem hatay. 18 Yó gónóm mon, yó se tau hemtahu bè yóm Ngà Dwata, là kóen megtuled. Okóm yóm tau là hemtahuhen, deng megtuled ne, lemwót bè yóm là kehtahuhen du yóm tek són Ngà Dwata. 19 Ni se hol gónó tau megtuled. Deng kól lem benwu ne yóm layag. Okóm mom yó nóyô tau yóm gónón kmifu senta yóm layag lemwót bè yóm gel kmò le sidek. 20 Yóm tau gel mò sidek, tey kenbéen yóm layag, là kóen móyô hloni edu, abay se là móyóen ke gfan yóm ksidek nmoen. 21 Bede yóm tau móyô mimón du yóm ktahuhen, móyô hloni ebè yóm layag anì gfan bè yóm gel nmoen yóm kimónen ke Dwata.”
Yóm kun tulón yóm Jan gel mabtays gbak ebè Jisas
22 Kogolen bè yó, lemwót Jisas mógów ebè prubinsya Judiya, mung du yó kem gel lemolò du. Malù le na legen ditu, gel bnabtays le yó kem tau. 23 Dalang se ke Jan, mabtays se kun bè yóm benwu boluyen Inun, lemoni bè Salim. Yó gónón mabtays ditu, abay se bong yóm élen. Tódô seflós tau tendo gel mógów ebéléen na le e hbabtays du. 24 (Bè yóm kdaw yó, là dengen geblanggù Jan he.) 25 Wen bè yó kem tau gel lemolò ke Jan, skuya le mon bè yóm sotu dumu le Ju. Senkuya le yóm kul sana adat bè kmò khólós le. 26 Ne mógów le ebè Jan yó kem gel lemolò du, mon le, “Ó Sér, yóm tau tehe mung kóm sentu Jurdan, yóm tau tehe tulónem kum, ngem, deng mom mabtays se kun, ne ni tódô kdéen tau gotu mógów ebéléen.” 27 Bnalà Jan lu, monen, “Là kô wen tódô nmò yóm tau ke là lemwóten bè Dwata. 28 Yu se deng gemtanud du yóm tehe kmonu du, ‘Là kô ou du yóm Misaya, okóm ou se yóm deng hógów Dwata mò tukô gna du.’ 29 Duhen yó,” mon Jan, “hol lómón ke yóm logi myehen, deng du funen yóm libun yehenen. Okóm yóm wè yóm logi myehen yó, tódô mdà bè yó, ne tey kehyu nawahen kungolen udél yóm ween myehen. Hol lómón yó se kligalu ni kmoen ni. 30 Tey hyu ke sónmoen temnù yóm kun któtól Jisas, ne fene genef yó dum dou.”
Yóm tau lemwót gu bè longit
31 Bud mon Jan, “Hol lemwót bè longit se ke Jisas, du se hol geta bè kdéen. Yóm tau te tonok, són olo tngónen yóm nô te tonok, ne són yó se yóm tendo gel tulónen. Okóm yóm lemwót gu bè longit, du se yóm hol geta bè kdéen. 32 Gotu tulónen yóm deng tonen ne yóm deng gungolen, okóm laen kô hol tau hemmóyô du yóm gel tulónen. 33 Okóm yó se tau hemmóyô du, bud du se hemblat du yóm hol ktahuhen yóm mon Dwata. 34 Yóm tau hógów Dwata yó, udél Dwata tulónen, abay se tódô sù Dwata béléen yóm kun Tulus. 35 Tey kbong nawa Dwata du yóm kun Ngà, deng gotu hogoten du yóm kentihen. 36 Yó se hemtahu bè yóm Ngà Dwata, gutahen yóm klowil laen dù tul sónen. Yó se là mimón du yóm Ngà Dwata, là se kô gutahen du yóm klowil yó, tódô hlós gbóen yóm tafak Dwata du.”
Kestulón le Jisas yóm libun lemwót bè Samarya
1 Gungol yó kem Farisi yóm deng ketnù yó kem tau lemolò ke Jisas ne yó kem tau hbabtays béléen, ne là holen bud wen ke Jan. 2 (Bè ktahuhen, là Jisas du dé yóm gel mabtays, són yó kem gel lemolò du.) 3 Timbow gungol Jisas nim tulón le ni, tódô lemwót bè yó bè prubinsya Judiya, ne bud mulék ebè prubinsya Galili. 4 Yóm kógówen yó, là gbeken du ke là nan mlan bè prubinsya Samarya. 5 Ngangen mógów efet kól bè Sikar, yóm sotu benwu udì snakuf Samarya. Nim Sikar ni, moni bè yóm tonok tehe blay Jakub yóm ngaen Jusif ekni. 6 Bè yó gónóhen nô yóm kokol tehe Jakub. Nan slob hegnô bè yó Jisas bè yóm kokol yó, abay se alì sidek klitegen bè yóm kógówen. Deng gtungu ne kdaw yóm kkólen bè yó. 7-8 Bè yóm igò Jisas hegnô bè yó, lemwót yó kem gel lemolò du na le e bemli ken. Kogol le lemwót, wen libun lemwót bè Samarya sut bè yó na a mangay él. Ne mon Jisas mò du, “Ó Lenibun, hinumem ou kun él.” 9 Ne mon yóm libun mò du, “Igoem sem Ju kóm, ne libune lemwót bè Samarya dou, moen ke mnihi él béléu?” Yó se yóm balaen ke Jisas yóm libun yó, abay se là kô glemeg kem Ju du yóm kul tegayan ne huyów yó kem tau Samarya. 10 Ne bnalà Jisas se yóm libun yó koni, monen, “Ke deng tngónem yóm tô blay Dwata kóm, ne ke tngónem yóm tau mni él béléem, dengi bud semwì mni él béléen ne anì benlayen uu yóm él hlowil tau.” 11 Bud mon yóm libun yó, “Laen sem dù timbà nitem du, Sér, lelen alì ngelem nim kokol ni. Gónóm tô ma du se yóm él monem yó koni? 12 Yóm tehe fù tekuy Jakub ekni, du se tehe tmebel du bélê me nim kokol ni. Tódô kdê le se tehe minum bè ni, le Jakub, ne kem ngaen, ne kem ógófen. Getahi senta Jakub kô kóm du?” 13 Bud bnalà Jisas se, monen, “Ket tau gel minum du nim él ni, sal bud gel meeng. 14 Okóm yóm tau minum yóm él dou blay, là kóen na a bud meeng. Yóm él blayu yó, baling sfut él mò gónó gmuta yóm klowil laen dù sónen.” 15 Bud monen se mò ke Jisas yóm libun yó, “Benlayem o sen, Sér, yóm él yó anì là bude gel meeng, ne anì là bude gel mangay él bè ni.” 16 Ne bud mon Jisas se mò du, “Nam e nangay yehenem dé.” 17 Mon yó sem libun yó, “Laen kô dù yehenu.” Bud mon Jisas, “Tahu se yóm monem laen dù yehenem. 18 Okóm bè ktahuhen, deng limu logi yehenem, ne yóm logi dumuhem smu ni, là kô tahu yehenem du. Bong tahu se yóm tulónem do yó.” 19 Bud mon yó sem libun yó mò ke Jisas, monen, “Tugodi Dwata dilóu, Sér. 20 Yó kem tehe fù me ekni, gel le tmaba Dwata bè nim bulul ni. Okóm yu kem Ju, gel mon ye són bè Jirusalim gónô tmaba Dwata.” 21 Ne bud mon Jisas mò du, “Hentahuhem nim tulónu kóm ni, Lenibun. Angat wen kdawen laen kô dù bud tmaba Dwata bè nim bulul ni duhen ke bè Jirusalim. 22 Yu kem tau lemwót bè Samarya, là kô hol tngón ye du yóm tnaba ye. Okóm bélê me kem Ju, tey mtukul ketngón me du yóm tnaba me, abay se bélê me gónóhen lemwót yóm tau mò lemwà kul gu lem hatay. 23 Angat wen kdawen,” mon Jisas, “ne deng duhen ni se kbuten, yó kem tau gel tmaba ebè Mà, sal gel hlan le bè kfasang yóm Tulus Dwata anì hol tngón le yóm kun kmò Mà. Ke ni se nmò le, hol tahu duhen yóm ktaba le ebéléen, yóm ktaba hol nóyô Dwata bélê le. 24 Yakà tulusen yóm Dwata. Duhen yó, hol hlan le bè tulus yóm ktaba le ebéléen yó kem tau ne hol hewót le bè nawa le.” 25 Ne yó bud monen mò ke Jisas yóm libun yó, monen, “Tngónu angat sut yóm Misaya. Sok sut, angat gotu tulónen tekuy yóm kdéen.” 26 Bud mon Jisas se mò du, “Yóm tau dumuhem stulón ni, du se yóm monem yó.” 27 Bè yóm igò le stulón, kól le se yó kem tau gel lemolò du. Tey ketnga le bè yóm kton le ke Jisas stulón bè yóm libun. Okóm là mlos le smólók du bè yóm libun yóm nóyóen, duhen ke mon le mò ke Jisas, “Moen ke stulóni du?” 28 Tódô lemwót mulék yóm libun yó, tebelen lebwónen, nan e tnulón tu kem tau bè benwuhen, ne monen mò kul, 29 “Mung ye do dé, na ye e hnénég yóm tau tódô tmulón du dou yóm kdê deng nmou. Déke du yóm Misaya.” 30 Tahu se, gotu le lemwót na le e mógów ebè Jisas. 31 Bè yóm igoen tolo mógów yóm libun yó koni, tô henken le Jisas yó kem gel lemolò du, mon le, “Ó Sér, mkeni dé.” 32 Okóm mom yó mon Jisas mò kul, “Wen dou ken là kô tngón ye du.” 33 Stulón le són lu yó kem gel lemolò ke Jisas, mon le, “Tmau du deng mit béléen ken du?” 34 Mon Jisas se mò kul, “Yó se henged dou ken, duhen yóm kimónu yóm kun kóyô yóm hógów dou, ne bè yóm kegdengu du yóm hmoen dou. 35 Sal gel mon ye, ket na fat bulón blóngen, ominen bud wen gel muta. Okóm ni dou mon mò kuy, deng duhen ni se yóm kdaw ye muta. Tenngel ye dé yó kem tau mógów ebéléu ni, hol lómón ke lu yóm halay hulô móyón nuta. 36 Yóm tau muta, wen ofol blay Dwata du. Ne yó kem nutahen, angat guta le se kul yóm klowil laen dù sónen. Yó gónóm mon, gotu le hligal yó kem tau mehek ne yó kem tau muta. 37 Tahu se yóm gel mon le, ‘Tólóng tau fen mehek, tólóng se tau fen muta.’ 38 Ni wen naw e huta kuy,” mon Jisas, “yóm tniba tehe là kuy leniteg du. Tólóng tau tehe mbut du, ne wen kuy ofol du yóm tehe kul leniteg.” 39 Tey dê tau bè yó bè Samarya, gotu le hemtahu bè Jisas lemwót bè yóm tulónen kul yóm libun yó koni, bè yóm lanen mon du, “Tódô gotu tulónen dou yóm kdê deng nmou.” 40 Timbow le kól bè Jisas yó kem tau bè Samarya yó, tey kngali le du anì nan na legen bélê le bè yó. Tahu se, lewu kdaw Jisas nô bélê le. 41 Bè yóm igoen nô bè yóm benwu yó, sónmoen se temnù tau hemtahu béléen lan le gel hmungol yóm ktoloken. 42 Ne mon le mò yóm libun yó, mon le, “Là kô són du bè yóm kóm tulón kum gónó me hemtahu, okóm ni deng na me bud gungol se kum, ne tngón me du se yóm lemwà kem tau lem salà le.”
Kkó Jisas des yóm ngà yóm sotu tau wen glalen
43 Timbow deng lewu kdaw Jisas nô bè yó, ominen hlós ebè prubinsya Galili. 44 Deng tehe mon Jisas, monen, “Yóm tugod Dwata, laen kô dù madat du bè hol kun benwu.” 45 Okóm bè yóm kegdeken bè Galili, tey khódó le du yó kem tau bè yó, abay se deng le gmung bè yóm mò ken bong bè Jirusalim bè yóm Kdaw Khius, ne deng ton le yóm kdê deng nmoen bè yó. 46 Bud lemwót bè yó Jisas hlós ebè Kana, yóm sotu benwu snakuf Galili gónón tehe hembaling du tifas yóm él. Wen sotu tau wen glalen bè gubérnor nô bè yóm benwu boluyen Kapérnaum. Tey sidek kleed des yóm ngaen logi. 47 Timbow gungolen yóm deng kkól Jisas gu bè Judiya ne yóm kegdeken bè Galili, tódô mógów ebéléen nan e hkodu béléen anì tô mung du mulék ebè Kapérnaum, wen tum ngaen deng móyónen matay anì bud hlowil Jisas. 48 Ne yó mom mon Jisas mò du, monen, “Ke là wen hentaw ton gel nmou, là kô hentahu ye dou.” 49 Bud mon yóm tau wen glalen yó, “Holi mung dou, Sér, gu laanen là deng matay tum ngau.” 50 Ne mon Jisas se mò du, “Muléki ne. Mowil he yó tum ngaem.” Tahu se, tódô hentahu yóm tau wen glalen yó koni yóm mon Jisas mò du, ne tódô mulék. 51 Bè yóm hanà tolo knóen bè lan, wen kem tau gel mò nmò béléen semlong du, tulón le du, mon le, “Deng bud hyu yóm ngaem.” 52 Snólóken bélê le yóm kmò kdaw kkó des yóm ngaen, ne mon le se, “Klé kdaw ekimel deng kkó yóm kkinien.” 53 Tódô gbel bè nawa maen, yó se yóm hol kmò kdaw tehe kmon Jisas du mò du, “Bud mowil he yó tum ngaem.” Tódô hentahuhen Jisas se yóm tau yó, dalang se yóm kdê fes lówóhen, gotu le hemtahu se kul. 54 Ni se yóm gewu dulék Jisas mò yóm hentaw ton bè Galili. Yóm kmoen du nim ni, kogol yóm kkólen gu bè prubinsya Judiya.
Kkó Jisas des yóm tau hlilil bè kilil busung
1 Kogolen bè yó, bud lemwót Jisas subô ebè Jirusalim, abay se móyô mung bè yóm sotu mò ken bong yó kem Ju. 2 Bè yó bè Jirusalim, wen sotu busung moni bè yóm bak tikeb gel bnoluy le, Bak Tikeb Ubiha. Yó boluyen bè udél Hibru yóm busung yó, Betsata. Wen limu gónô hgolung nmò le hilolen. 3 Tey dê tau gemnóm des hlilil bè yó laan yó kem gónô hgolung. Yó kem tau butô, yó kem tau kihod ne yó kem tau deng matay sfu lówó le, gotu le hlilil bè yó (abay se gel nangat le kewók yóm busung. 4 Gel wen kdawen kun mógów elaan yóm hógów Dwata gu bè longit nan e gel hewók yóm busung. Yó se tau gegna kmó elemen igoen tolo lemwók, tódô mkó yóm desen, balù kihu kay desen.) 5 Ne wen sotu tau gemnóm des hlilil bè yó, deng tlu folò wolu halayen gemnóm du yóm desen. 6 Ton Jisas yóm kehlililen bè yó, ne tngónen se yóm tey kegenen gemnóm du yóm desen. Yó snólóken béléen, monen, “Móyói kô ke mkó desem?” 7 Bnalaen se Jisas yóm tau yó, monen, “Laen kô dù tau gel tmóbóng dou, Sér, sok gel lemwók yóm él. Song imou kól ditu dou, deng sana wen tau gegna kól lemen.” 8 Tódô mon Jisas mò du, “Btiki, lenulunem igamem, ne mógówi.” 9 Tahu se, tódô sen-gengen se mkó desen yóm tau yó. Lenulunen igamen, ne ominen lemwót mógów. Bè yóm kdaw kkó Jisas des yóm tau yó, sengan bè yóm Kdaw Kehegnô yó kem Ju. 10 Timbow ton yó kem Ju genlal yóm tau deng mkó desen yó, deng mom sensudél le, mon le, “Kdaw Kehegnô nim ni. Là hyuhen bè hlau tekuy ke miti igam.” 11 Bnalaen se lu yóm tau yó koni, monen, “Abay se yóm tau hkó desu mdók dou, monen mò dou, ‘Lenulunem igamem, ne mógówi.’ ” 12 Ne bud mon le se mò du, “Tmau du de yóm mdók kóm?” 13 Okóm yóm tau deng mkó desen yó, là kô dog tngónen du ke Jisas, abay se tey tau wen bè yó, ne deng tódô hlana lem blóng le Jisas. 14 Tikóng kogolen bè yó, bud ton Jisas lem Gónô Dwata yóm tau tehe hkóhen desen yó koni, monen mò du, “Ngem, deng mkó ne yóm desem. Hol béi abay bud mò salà, déke wen bud gbunuem mkay senta yóm gnan.” 15 Bud kewóten bè yó yóm tau yó koni, tulónen yó kem Ju genlal Jisas se hkó du yóm desen. 16 Yó but yóm tô kehsidek le ke Jisas yó kem Ju genlal lanen hkó des bè Kdaw Kehegnô. 17 Okóm yó balà Jisas kul, monen, “Yóm Mà, senflósen mò nmò, là kóen hegnô. Senged se dou, tódô senflósu mò nmò.” 18 Lemwót bè yóm udél Jisas yó gónón temnù yóm kóló le hmatay du. Là són du bè yóm kegsalaen bè Kdaw Kehegnô duón le du, okóm yó hol duón le du, bè yóm kmonen du Dwata yóm Maen. Bè yóm kmon Jisas du yóm yó, deng hsengeden ne knóen bè Dwata.
Kun kwalis yóm Ngà Dwata
19 Bud mon Jisas mò kul, “Tódô tulónu kuy ktahuhen, laen kô gmoen yóm Ngà ke són du, ke là wen Maen. Yó se gel tonen nmò Maen, yó se kun nmò yóm Ngà. 20 Tey kbong nawa Mà yóm Ngaen, yó gónón gotu hegfan du béléen kdê yó kem nmoen. Okóm bud wen he hmoen du mkay senta nim ni, ne angat tey ketnga ye du. 21 Yóm Mà, gbeken hlowil yó kem tau deng matay. Senged se kun yóm Ngaen, benlayen klowil yó kem tau nóyô hlowilen. 22 Sotuhen, là kô Mà du yóm angat kmukum kem tau. Okóm deng sigangen ta yóm Ngaen ne yóm angat kkukumen kdéen tau, 23 anì kdéen tau gotu madat yóm Ngaen lómón se yóm kadat le ke Maen. Yó se tau là madat du yóm Ngà, là se kô nadaten du yóm Maen, yóm hógów du. 24 Tódô tulónu kuy ktahuhen,” mon Jisas, “yó se hmungol yóm dou udél, ne hemtahu bè yóm hógów do, deng wen ne kun klowil laen dù sónen. Là angaten megtuled, okóm deng gewà gu lem hatay, ne deng gutahen ne yóm klowil laen dù sónen. 25 Tódô tulónu kuy ktahuhen, angat wen kdawen, ne deng duhen ni se, angat gungol yó kem tau deng matay yóm udél yóm Ngà Dwata. Sok gungol le, tódô le se bud mowil. 26 Bè Mà se hol gónón tembul klowil tau. Ne senged snéen bè yóm Ngaen, deng nmò Maen mò gónón tembul klowil tau. 27 Ne deng benlayen kwalis yóm Ngaen mò kmukum kdéen tau lemwót bè yóm deng kbalingen Ngà Tau. 28 Bê ye tennga nim monu ni,” mon Jisas. “Angat wen kdawen gungol yó kem tau deng matay yóm udél yóm Ngà Tau. 29 Ne bè yóm khungol le du, gotu le bud hewà gu lem lebeng le. Yó se tau deng tehe mò du yóm hyu, gutahen yóm klowil laen dù sónen. Bud mowil snéen kun yóm tau tehe sidek nmoen, okóm hlós elem tafak.”
Yó kem gemtanud ke Jisas
30 Ne bud mon Jisas mò kul, “Ke tek són ou, laen kô gmou. Bè yóm angat kkukumu tau, tódô nmou yóm deng gungolu gu bè Mà, yó se gónón tedeng yóm kkukumu. Là kô tódô nmou du yóm dou kóyô, són olo nmou yóm kun kóyô yóm hógów do. 31 Ke són ou tô tmanud du yóm dou knô,” mon Jisas, “laen kô dù muhen. 32 Okóm wen sotu tendo gemtanud dou, duhen Mà, ne tngónu bè yóm kegtanuden dou, hono tahu. 33 Tehe wen se tau hógów ye ebè Jan, ne tódô tulón Jan kul se yóm hol ktahuhen lemwót béléu. 34 Anien he ke laen dù tau gemtanud dou, okóm yó gónóhu mon du nim ni anì wen lan ye gewà gu lem salà ye. 35 Yóm Jan, hol lómón ke solok, ne tey knóngen. Okóm tek likót ye tô hligal du yóm knóngen yó. 36 Okóm wen he gemtanud dou mkay senta yóm kun kegtanud dou Jan, duhen yóm gel nmou. Kdê yóm hmò Mà dou, yó se yóm gel nmou, ne hol lómón ke yó se mò gemtanud dou. Bè yó se gónó ye temngón du yóm khógów Mà dou. 37 Ne yó bud sotu gemtanud dou, duhen Mà, yóm deng hógów do. Là kô deng gungol ye du udélen, duhen ke deng ton ye lem uyóhen, 38 ne là kóen nô lem hendem ye yóm gel tulónen kuy, abay se là kô hentahu ye du yóm deng hógówen. 39 Tey gel kehnagì ye du yóm Sulat Dwata. Ofo kuy ke bè yóm alì kehnagì ye du gónó ye gmuta yóm klowil laen dù sónen. Igoen sem ou yóm tulónen yó. 40 Okóm là kô ye dog móyô lemolò do, igoen béléu gónó ye gmuta du yóm klowil laen dù sónen. 41 Là kô yó du hnebel nawahu,” mon Jisas, “ke dóyón le ou yó kem tau. 42 Okóm tódô tngónu yóm nô lem hendem ye, là kô kenbong nawa ye ke Dwata. 43 Bè nim kógówu edini ni, lemwót bè kun kwalis Mà, yóm hógów do, okóm là kô dog henmóyô ye dou. Bede ke wen yóm tódô lembù sut, tey mahil henmóyô ye. 44 Laen kô dù lan ye hemtahu béléu, abay se són sen-galu ye, són yóm kdóyón tau kuy. Okóm là kô dog sen-galu ye du yóm kegdóyón ye bè yóm hol tek sotu Dwata. 45 Bê ye abay hendem,” monen, “ke ou yóm angat kmamo kuy bè solu Mà. Kaem Musis angat kmamo kuy, yóm tô genléd nawa ye mò mfi kuy. 46 Ke deng hentahu ye yóm tehe snulat Musis, hentahu ye ou snéen, abay se ou yóm tulónen. 47 Okóm ke là hentahu ye du yóm tehe snulaten, là kô hentahu ye du ke wen tulónu kuy.”
Kehken Jisas yó kem limu libu logi
1 Kogolen bè yó, bud lemwót Jisas efatu yóm Lanaw Galili. Sotu gel boluy le du yóm lanaw yó, Lanaw Tibiryas. 2 Tey tau wen huli ke Jisas, abay se deng ton le yóm hentaw ton gel nmoen bè kehkóhen des. 3 Timbow kól fatu Jisas ne yó kem gel lemolò du, mneged le eta yóm bulul udì ne bè yó gónó le myón. 4 Bè yóm kdaw yó, móyónen hto ne yóm kmò le ken bong yó kem Ju bè yóm Kdaw Khius. 5 Timbow temngel Jisas gu bè yóm gónó le myón, tódô tonen yó kem tey tau muluk ebéléen, yó monen mò ke Filip, “Gónó tekuy bemli du mò ken le ni kem tau ni?” 6 (Yó gónón mon du yóm yó mò tilówen ke Filip. Okóm deng eles tngónen ne kun yóm angat nmoen.) 7 Bnalà Filip se, monen, “Sukéy sotu tau bè wolu bulón btes ken le ni kem tau ni, bede olon ket kul na udì.” 8 Mudél se ke Andru, yóm sotu tau lemolò ke Jisas, yóm twoli Simun Pitér, monen, 9 “Wen ngà mit bnotu bè ni, limu botù mambang ne lewu tedek utón él. Okóm tô kmò le kul du ni kem tey tau wen nii?” 10 Ne mon Jisas se mò kul, “Hyón ye lu dé yó kem tau.” Uma kóm wen gónón ukol bnes bè yóm gónó le nô yó. Ne tahu se, gotu le myón yóm le. Yó kwen kem logi, botong limu libu. 11 Ne omin Jisas ma yóm mambang yó koni, bede nan gna mni bè Dwata, ne ominen hsagid du ebè yó kem tau myón bè yó. Ne bud senged se kmoen du yóm utón él. Gotu le bsow yóm kdê le. 12 Timbow deng kken le, mon Jisas mò yó kem gel lemolò du, “Sentifun ye yó kem lukasen anì là gamaen.” 13 Tahu se, gotu sentifun le. Botong sfolò lewu abì henok lukasen yóm tehe tek limu botù mambang yó. 14 Bè yóm kton le du yó kem tau yóm hentaw ton nmò Jisas bélê le yó, botong mon le, “Deng duhen ni se yóm tugod Dwata hendón tekuy, yóm hógów Dwata elem benwu.” 15 Ne yó tô atul le, tódô tô nówóng le Jisas mò tau hol geta bélê le. Okóm tngón Jisas yóm tô nmò le, yó gónón tódô hlayuk bélê le, hetsik mógów elem bulul tek sotuhen.
Kógów Jisas ta él
16 Timbow deng seklewet bè yó, lemwót yó kem gel lemolò ke Jisas, mógów le ebè kilil lanaw. 17 Omin le motun elem ówóng le, okóm là dengen bud mulék ebélê le he Jisas. Kewót le bè yó, na le e mówóng mifal efatu ebè syudad Kapérnaum. Bè yóm tolo kówóng le yó, deng tey kifu ne. 18 Bè yóm igò le mówóng, tódô mbel yóm tey lenos bong ne yóm tey lewók. 19 Ne bè yóm hanà tolo knô le talak yóm lanaw, wen dô limu duhen ke nem kilumitru klayuk le bè kilil, tódô ton le se Jisas mógów ta él, hloni ebè yóm ówóng. Ya tey sidek klikò le. 20 Okóm mudél ebélê le Jisas, monen, “Bê ye hlikò, ou se ni.” 21 Ominen yó he mgel nawa le, ne hotun le Jisas elem ówóng le. Bè yóm khotun le du elemen, tódô le se kendel gefet bè yóm benwu gónó le e solu.
Khebel le ke Jisas yó kem tau
22 Timbow hlafus bè yó, tolo le nô ditu fatu él yó kem tey tau wen tehe henken Jisas. Tngón le tek sotu ówóng tehe nô bè yó, yóm ówóng snakay yó kem gel lemolò ke Jisas. Ne bud tngón le snéen là dengen mung kul Jisas he, tolo tagak. 23 Ne wen kem dumu ówóng lemwót gu bè Tibiryas dmuung moni bè yóm gónó Jisas mni bè Dwata ne hemken yó kem tau. 24 Timbow là ton le ke Jisas bè yó dalang se yó kem gel lemolò du, yó gónó le gotu smakay bè yó kem ówóng yó, na le e hnebel Jisas bè Kapérnaum.
Jisas se yóm ken hlowil tau
25 Tikóng ton le Jisas sendifal yóm lanaw, mon le mò du, “Na, Sér, kilón de kkólem bè ni?” 26 Bnalà Jisas se lu, monen, “Tódô tulónu kuy ktahuhen, tek sotu gónó ye mebel do lanu deng hemken kuy efet ye bsow. Okóm là kô dog dilô ye du tennefen yó kem hentaw ton nmou yó. 27 Bê ye kat alì sen-galu yóm ken wen sónen. Yó dé hol sen-galu ye yóm ken gónó ye gmuta du yóm klowil laen dù sónen. Yóm ken monu ni, ni se yóm ken angat blayen kuy yóm Ngà Tau, abay se yóm Dwata, kun Mà, deng bemlay du béléen yóm kfasangen mò du.” 28 Ne mon le se mò ke Jisas, “Tedu se tô nmò me du anì gmò me yóm kun kóyô Dwata?” 29 Ne bnalà Jisas se lu, monen, “Ni hol kóyô Dwata bélê ye ke hentahu ye yóm deng hógówen elem blóng ye.” 30 Bud mon le se kul, “Hentaw ton du de tô nmoem mò gónó me hemtahu kóm? Tedu se tô nmoem? 31 Ngem yó kem tehe fù tekuy ekni, bè yóm knô le bè yóm benwu laen dù tau menwu du, tódô kdê le gotu mken yóm ken boluyen mana. Lómón yóm monen bè Sulat Dwata, monen, ‘Blay Musis kul yóm ken lemwót bè longit.’ ” 32 Bnalà Jisas lu, monen, “Tódô tulónu kuy ktahuhen, yóm ken blay Musis kuy, là kô yó du yóm hol tahu ken lemwót gu bè longit. Kaem Mà bemlay du kuy yóm hol tahu ken lemwót gu bè longit. 33 Yóm ken blay Dwata, duhen yóm tau hógówen lemwót gu bè longit mò gónó le mowil kem tau lem benwu.” 34 Ne mon le se mò ke Jisas, “Ó Sér, hol tendo gel benlayem mi sen yóm ken monem yó.” 35 Ne bud mon Jisas mò kul, bede hningónen, “Ou se yóm ken hlowil tau. Yó se tau mógów ebéléu, laen kô dù tul kbitilen. Yó se tau hemtahu béléu, laen se kô dù tul kleengen. 36 Okóm nim yu,” monen, “anien ke deng ton ye ou, là kô ye dog hemtahu béléu. Ni se yóm tehe tulónu kuy. 37 Kdê yó kem tau hemtahu béléu,” mon Jisas, “sal lemwót bè kun kehlan du Mà. Ne là kô naw e kenbê kul ke wen tau mógów ebéléu. 38 Là kô yó du lewótu gu bè longit ke naw e nmò yóm dou knóyô. Okóm yó hol dou nógów anì nmou yóm kun kóyô yóm hógów dou. 39 Yó hol kun kóyô yóm hógów dou yó, ke balù sotu laen dù lanahu du yóm kdê hogoten dou. Kóyóen ke angat gotu hlowilu lu sok kól yóm hol són kdaw. 40 Yó hol kóyô Mà ke benlayen klowil laen dù sónen yó kem tau dmilô yóm kun Ngà ne hemtahu béléen. Ne yó angat nmou bélê le, gotu hlowilu lu sok kól yóm hol són kdaw.” 41 Lemwót yó kem tau, deng mom gotu senlón le Jisas yóm kmonen du, “Ou se yóm ken lemwót gu bè longit.” 42 Yó mon le, “Igoen ngà Jusif nim Jisas ni. Tngón tekuy maen ne yéen. Moen ke tô monen lemwót gu bè longit?” 43 Bud mon Jisas mò kul, “Bê ye mom semlón dé. 44 Laen kô dù tau tódô mógów ebéléu ke là nan na lemwót bè Mà, yóm hógów do edini. Yóm tau mógów ebéléu, angat hlowilu sok kól yóm hol són kdaw. 45 Wen snulat yó kem tehe gna tugod Dwata ekni, yó mon le, ‘Angat tolok Dwata kdéen tau.’ Yó se tau hmungol ke Mà ne wen dnalangen béléen,” mon Jisas, “yó se yóm tau mógów ebéléu. 46 Sundu mon dé ke deng tonen Mà. Tek són mton du, són yóm deng lemwót gu béléen. 47 Tódô tulónu kuy ktahuhen,” mon Jisas, “yó se tau hemtahu béléu, deng wen ne kun klowil laen dù sónen. 48 Ou se yóm ken hlowil tau. 49 Yó kem tehe fù tekuy ekni bè yóm tehe knô le bè yóm benwu laen dù tauhen, gotu gken le se yóm ken boluyen mana, okóm senged nóm, gotu katay le. 50 Okóm yóm ken lemwót bè longit monu yó koni, ke wen tau mken du, là kóen na a matay. 51 Ou se yóm ken lemwót gu bè longit mò gónó ye mowil. Ke wen tau mken du nim ken monu ni, angat gutahen yóm klowil laen dù tul sónen. Yóm ken monu ni, duhen yóm dou lówó. Angat hamau mò gónó le mowil kdéen tau bè klamangen benwu.” 52 Bè yóm kudél Jisas ebélê le yó, deng le mom skaf mon du yó kem Ju, mon le, “Tedu tô kmò kehkenen du tekuy lówóhen tau ni?” 53 Ne bud mon Jisas mò kul, “Tódô tulónu kuy ktahuhen, ke là ken ye du lówóhen yóm Ngà Tau, ne ke là ninum ye du litóen, là kô guta ye du yóm klowil laen dù tul sónen. 54 Yó se mken yóm dou lówó, ne minum yóm dou litô, deng wen ne kun klowil laen dù sónen. Ne angat hlowilu bè yóm hol són kdaw. 55 Abay se yóm dou lówó, hol lómón ke tahu ken, ne yóm dou litô, hol lómón ke tahu ninum. 56 Yó se tau mken yóm dou lówó ne minum yóm dou litô, senflósen nô béléu, ne senflósu se nô béléen. 57 Yóm Mà hógów do, laen dù tul katayen, ne béléen gónón lemwót yóm dou klowil. Senged snéen yóm tau mken du yóm dou lówó, lemwót béléu yóm kun klowil. 58 Duhen ni, yóm ken tulónu kuy ni, ni se yóm ken lemwót gu bè longit. Bede là mkélen bè yóm ken tehe gel ken yó kem fù tekuy ekni. Balù yóm kken le du, senged gotu katay le snéen. Okóm yó se tau mken yóm ken monu ni, angat gutahen yóm klowil laen dù sónen.” 59 Ni se yóm tolok Jisas bè yóm gónó le gel stifun yó kem Ju bè Kapérnaum.
Udél gónón gmuta klowil laen dù sónen
60 Timbow gungol yó kem dumu tau gel lemolò ke Jisas yóm ktolok Jisas ni, tey dê bélê le mon du, “Tey mgel nim toloken ni. Tau du se gembek mimón du?” 61 Bede tódô tngón Jisas yóm keslón le, yó gónón mon du mò kul, “Sidek kegnóm ye du kô lemwót bè nim toloku ni? 62 Mò kmoen se ke ton ye khawayen ebè yóm tehe gónóhen gu lemwót yóm Ngà Tau? 63 Tek són yóm Tulus Dwata gembek hlowil tau. Bong yó dum lówó tau, bà udì ke wen gmoen. Kdê ni kem udélu ebélê ye ni koni, hlowilen tau abay se hono lemwót gu bè yóm Tulus Dwata. 64 Okóm wen se bélê ye là hemtahu du.” (Yó gónó Jisas mon du yóm yó, abay se deng eles tódô tngónen lemwót bè kbuten yó kem tau là hemtahuhen, ne eles tngónen se yóm tau angat matul du anì gekfô yó kem hmohon du.) 65 Bud mon Jisas, “Yó se gónóhu deng mon du mò kuy, laen dù tau tódô mógów ebéléu ke là lemwóten bè Mà.” 66 Lemwót bè yóm ktolok Jisas kul yó, tey dê bè yó kem tau gel lemolò du, gotu le mulék. Là bud le móyô mung du. 67 Snólók Jisas yó kem sfolò lewu gel lemolò du, monen mò kul, “Kmò kuy se? Tô tnagak ye o kô?” 68 Ne mon Simun Pitér se, monen, “Laen kô dù dumu tau lolò me, Sér, tek són sem uu. Lemwót bè udélem gónó me gmuta yóm klowil laen dù tul sónen. 69 Deng me hemtahu béléem se kum. Tódô tngón me uu se yóm laen dù belenen lemwót gu bè Dwata.” 70 Bnalà Jisas se lu, monen, “Deng néléku yu, yu kem sfolò lewu, okóm sotu bélê ye nalak Seitan.” 71 Duhen Judas, ngà Simun Iskariyut se, gónón e gbak yóm mon Jisas yó. Igoen du sotu bè yó kem sfolò lewu gel lemolò du, du se fen matul du anì gekfô le Jisas yó kem hmohon du.
Jisas ne yó kem twolihen
1 Kogolen bè yó, són bè yó kem benwu snakuf Galili gónó Jisas e gel mógów na a tmolok. Là móyóen mógów bè yó kem benwu snakuf Judiya abay se sónmò le móló hmatay du yó kem Ju wen glal le bè yó. 2 Deng móyónen hto ne yóm sotu mò ken bong bè yó kem Ju, yóm bnoluy le Mò Ken bè Slung. 3 Ne yó mon le mò ke Jisas yó kem twolihen, mon le, “Yake tebelem nim benwu ni. Hlósi ebè Judiya dé anì ton yó kem tau lemolò kóm bè yó yó kem gel nmoem. 4 Ke móyô yóm tau anì hol tótól boluyen, là kô bunihen du yóm gel nmoen. Yóm kdê gel nmoem ni, yake nmoem lem blóng kdéen tau anì kdê le gotu mton du.” 5 (Yó se udél le ebè Jisas, abay se balù yóm kessetwoli le, là kô hentahu le du.) 6 Bnalà Jisas lu, monen, “Là deng ni du yóm hol bantang dou kógów. Okóm kuy, balù kihu kdaw kewót ye. 7 Là kô knutó nawa le kuy yó kem tau lem benwu. Ou se yóm knutó nawa le, abay se tódô gel benkasu bélê le yóm sidek gel nmò le. 8 Lemwót ye ne kuy,” mon Jisas, “mógów ye ebè tum mò ken. Là he dou. Là dengen hto he yóm bantang dou kógów.” 9 Tahu se, tódô tagak bè yó bè Galili Jisas.
Kmung Jisas bè yóm Mò Ken bè Lowig
10 Timbow le lemwót yó kem twoli Jisas, omin Jisas bud lemwót se kun, bede tódô lifuten yóm kógówen, là hegboolen bè yó kem dumu tau mógów. 11 Bè yóm mò ken yó, sónmò le mebel ke Jisas yó kem Ju wen glal le, mon le, “Gónóhen nô se kun du?” 12 Tey kesboyong le gbak ebè Jisas yó kem tau bè yó. Wen se mon du, “Tey hyu tau yóm Jisas.” Ne wen se mon du, “Là gi, gel snukaten kem tau.” 13 Okóm yóm gel kestulón le, lifut le. Likò le yó kem Ju wen glalen. 14 Timbow deng gsóól le ne yóm buteng le mò du yóm ken bong yó, lemwót Jisas na a tmolok bè yóm Gónô Dwata. 15 Bè yóm ktoloken bè yó, tey ketnga yó kem Ju wen glalen, mon le, “Moen ke alì temngón nim tau ni? Là sem dengen mnagì.” 16 Bnalà Jisas lu, monen, “Yóm dou tolok ni, là kóen lemwót béléu. Tódô lemwót bè Dwata, yóm hógów do. 17 Yó se tau móyô mimón yóm kun kóyô Dwata,” monen, “dilóen ke lemwót bè Dwata nim toloku ni duhen ke tódô lenbuu. 18 Yóm tau tódô lembù tmolok, naluhen któtólen. Okóm yóm tau naluhen któtól yóm hógów du, laen kô dù kéng du yóm gel tulónen, hono tahu. 19 Igò Musis se deng bemlay du kuy yó kem hlau, là sem dog nimón ye du. Moen de ke sónmò ye móló hmatay dou?” 20 Ne yó udél yó kem tey tau wen bè yó, mon le, “Deng wen malak kóm. Laen kô dù tau tô hmatay kóm.” 21 Mon Jisas se mò kul, “Deng suléku tehe hkó des bè Kdaw Kehegnô, tódô kdê ye gotu temnga du. 22 Wen sotu tehe hlau Musis ekni bè ktulì ye kem ngà ye logi. (Okóm yóm hlau yó, là lemwóten bè Musis, hol lemwót bè yóm gónó tekuy gu semfu.) Anien he ke gbangà bè yóm Kdaw Kehegnô yóm ktulì ye yóm ngà ye, senged kmò ye du. 23 Ke gel tnulì ye yóm ngà bè yóm Kdaw Kehegnô anì là gulé ye du yóm hlau Musis, moen de ke lenbut ye ou bè yóm tehe kkóhu des bè Kdaw Kehegnô? 24 Bê ye tódô kendel hendeng kun kmò yóm sotu tau ke là deng hol hennagì ye du. Na ye hol hnénég dé yóm kmoen anì tedeng kmò kehedem ye du.”
Kegewu nawa le ke Jisas ke du yóm Misaya
25 Ne yó udél yó kem dumu tau bè yó bè Jirusalim, mon le, “Ni kô yóm tau tendo nóló hnatay yó kem tau genlal? 26 Ngem ni sii, deng tódô tmolok bè gónón wen, ne là sem wen udél le ebéléen du. Kô deng hentahu le ke du yóm Misaya. 27 Okóm ke deng sut se yóm Misaya, là kô tngón tau du yóm gónóhen gu lemwót. Okóm kun nim tau ni, gotu tngón tekuy gónón gu lemwót.” 28 Bè yóm ktolok Jisas bè Gónô Dwata, hgelen udélen, monen, “Ilóem ofo kuy kô ke tngón ye ou, duhen ke tngón ye yóm gónóhu gu lemwót? Là kô tódô lenbuu du yóm kógówu edini, wen hógów dou. Yóm hógów dou yó, laen kô dù kéng nô béléen. Là kô na ye e tngón du. 29 Okóm tngónu se dou, abay se lemwóte gu ditu, ne du se hol hógów dou edini.” 30 Bè yóm kmon Jisas du yóm yó, deng tódô tô senkfô le, okóm là gmò le du béléen abay se là dengen hto he yóm buteng Dwata hemlus du ebélê le. 31 Okóm tey wadag bè yó kem tau sbung bè yó hemtahu béléen, mon le, “Deng duhen ni se yóm Misaya. Laen kô dù tau gembek mò du yó kem hentaw ton mkay senta yóm gel nmoen.”
Tô kekfô le ke Jisas
32 Timbow gungol yó kem Farisi yóm kesboyong le gbak ebè Jisas yó kem tey tau wen, omin le stulón bè yó kem tau hol geta bè yó kem gel demsù ebè Dwata, ne hógów le yó kem tau gel mentey bè Gónô Dwata na le e hekfô kul Jisas. 33 Yó udél Jisas ebè yó kem tau sbung bè yó, monen, “Là buden legen ne yóm knóu lem blóng ye. Móyóne bud mulék ne ebè yóm hógów do. 34 Angat senfebel ye ou, okóm là kô ton ye dou, abay se là kô ye gógów edu tum gónóhu nô.” 35 Ne stulón le són lu yó kem tau wen glalen bè yó kem Ju, mon le, “Tedu gónón e tô solu tau ni du ke là bud tô ton tekuy du? Déke mógów elem blóng tu kem dumu tekuy Ju sekla menwu lem blóng tu kem Grik. Déke mom tmolok bè tu kem Grik. 36 Tedu gónón e temnef yóm monen angat senfebel tekuy, okóm là kô ton tekuy du? Ne là kô tekuy gógów edu tum gónóhen nô? Tedu lanen yóm monen yó?”
Yóm tbul él hlowil tau
37 Bè yóm kmò le ken yó, alì bong muhen bélê le yóm hol són kdaw. Bè yóm kdaw yó, mdà lem blóng le Jisas, hgelen udélen, monen, “Yóm tau meeng, mógów ebéléu dé nan e minum. 38 Lómón yóm monen bè Sulat Dwata, ‘Yó se tau hemtahu ebéléu, hol lómón ke wen tbul él gu béléen, yóm él hlowil tau.’ ” 39 Yóm él mon Jisas ni, hnigaden yóm Tulus Dwata angat blay Dwata bè yó kem tau hemtahu béléen. Bè yóm kmon Jisas du yóm yó, là deng blay Dwata du he, abay se là dengen mulék ebè longit Jisas.
Kesgólól nawa yó kem tau
40 Bè yóm kungol kem tau du yóm mon Jisas yó, wen se bélê le mon du, “Deng duhen ni se yóm tugod Dwata hendón tekuy.” 41 Bud mon kem dumu, “Deng duhen ni se yóm Misaya.” Okóm mon kem dumu tau, “Là kóen lemwót bè Galili yóm Misaya. 42 Deng monen bè Sulat Dwata, semfu gu bè yóm tehe Dabid ne bè Bitlihim gónón sut, bè yóm tehe kun benwu Dabid.” 43 Tey wen kesgólól nawa le yó kem tey tau wen bè yó, abay se là ssotu kehedem le ebè Jisas. 44 Wen se tô móyô kemfô du, okóm laen dù tau mlos mò du.
Kehda le ke Jisas yó kem Ju wen glalen
45 Tódô le gotu bud mulék yó kem tau tehe tô kemfô ke Jisas. Snólók le bélê le yó kem Farisi ne yó kem geta bè yó kem gel demsù ebè Dwata, mon le, “Mò ye là mit du du?” 46 Mon le se, “Laen kô dù tau gemsenged du udélen tum tau tu.” 47 Bud mon le se kul yó kem Farisi, “Deng ye gotu megtondo béléen kô kuy?” 48 “Bà sotu bélê me kem tau wen glalen ke deng wen hemtahu béléen yóm tau yó, duhen ke wen sotu bè kem Farisi. 49 Són olo hemtahu béléen, són yó kem tau laen dù tngón le bè yóm hlau Musis. Deng le gotu megtuled ne kul.” 50 Ominen bkó se ke Nikudimus, yóm sotu Farisi, yóm tau tehe le mógów ebè Jisas kifu, monen, 51 “Bè yóm hlau tekuy, là kô tódô kendel tnafak tekuy du yóm tau ke là na tekuy hlan du bè kukum anì hnungol tekuy udélen, ne anì tngón tekuy yóm deng nmoen.” 52 Yó balà le ke Nikudimus yó kem dumun Farisi, mon le, “Tauhi lemwót bè Galili kô kóm? Hennagiem dé yóm Sulat Dwata, nénégem ke wen tugod Dwata lemwót bè Galili.” 53 Omin le gotu mulék yóm kdê le.
Yóm libun gafit le bè kdaen yehen
1 Lemwót ke Jisas kun, mógów ebè Bulul Ulib. 2 Timbow deng mwas bè yó, tódô bud mulék ebè Gónô Dwata. Tey tau wen stifun ebéléen, ominen myón nan na tmolok bélê le. 3 Bè yóm ktolok Jisas yó, wen libun gafit le mdà yehen nwit le ebè yó yó kem tau tmolok hlau ne yó kem Farisi. Hdà le bè yó lem blóng yó kem tey tau wen. 4 Mon le mò ke Jisas, mon le, “Ó Sér, nim libun ni, gafit me mdà yehen. 5 Bè yóm tehe hlau Musis,” mon le, “hnatay sentudà botu yóm libun ke lómón ni kmoen. Tedu se kóm kmon du du?” 6 Yóm snólók le bè Jisas ni, mò tô dalil le dmuón du. Okóm ke Jisas kun, lekohong ebè tonok, sulaten bè tonok tdoken. 7 Tódô henlel le se smólók ke Jisas yó kem tau mit klamo ebéléen yó koni. Omin Jisas bud hemtedeng du kyónen, monen mò kul, “Ke wen bélê ye laen dù salaen, yake du dé tanay tmudà du botu nim libun ni.” 8 Ominen bud lekohong ne bud sulaten bè tonok tdoken. 9 Bè yóm kungol le du yóm kbalà Jisas kul yó, tódô le gotu hlana lemwót ket kul na sotu, gna hlana yó kem tuha bélê le. Ngangen tek són Jisas tebel bè yó. Sana kdaen bè yó se yóm libun. 10 Omin Jisas bud hemtedeng du kyónen ne snólóken yóm libun, monen mò du, “Gónó le nô se yó kem tau mit kóm yó koni? Laen dù bélê le tmudà kóm kô?” 11 Monen se, “Laen duen, Sér.” Mon Jisas se, “Là se nmou du béléem snéen dou. Muléki ne, okóm béi abay bud mò salà.”
Jisas se yóm layag lem benwu
12 Ne yó bud udél Jisas ebè yó kem Farisi, monen, “Ou se yóm layag kól lem benwu. Yó se tau lemolò do, là kóen bud gógów elem kifu ne, okóm wen layag mò htonen lanen gmuta yóm klowil laen dù tul sónen.” 13 Deng mom yó udél le ebè Jisas yó kem Farisi, mon le, “Là hentahu me du yóm gel tulónem, abay se tódô són uu tmulón du yóm kóm knô.” 14 Bnalà Jisas lu, monen, “Balù yóm ktulónu du yóm dou knô, laen kô dù kéng du, hono tahu. Abay se tngónu gónóhu gu lemwót ne tngónu snéen yóm gónóhu e solu. Okóm kuy, là kô tngón ye du. 15 Bélê ye kuy,” mon Jisas, “bè yóm gel kehdeng ye kun kmò sotu tau, tódô nmung ye yóm kun kehedem tau tonok. Béléu dou, là kô hendengu du kun kmò yóm sotu tau. 16 Okóm ke nawahu se mò du, tódô hlanu bè yóm ktahuhen. Abay se là kô tek són du ou mò du, sal me gel lewu Mà, yóm deng hógów do edini. 17 Wen snulat bè yóm kuy hlau,” mon Jisas, “yó monen, ‘Ke lewu tau gemtanud yóm nmò, ne senged tulón le, tahu se yó.’ 18 Duhen yó,” mon Jisas, “ou gemtanud du yóm dou knô ne bud Mà snéen gemtanud dou, yóm deng hógów dou edini.” 19 Bud mon yó kem Farisi, “Nô se maem du?” Mon Jisas se, “Là kô tngón ye dou, sélét mom tô tngón ye Mà ne. Ke deng tngón ye ou, tngón ye se Mà.” 20 Ni se udél Jisas bè yóm ktoloken bè Gónô Dwata igoen myón bè yóm dfél gónóhen nô yó kem kahun gónó le gel hemsù filak mò blay le ebè Dwata. Laen kô dù tau kemfô du, abay se là dengen kól du he yóm kdaw Dwata hemlus du.
Là kô ye gógów ebè yóm gónóhu e solu
21 Ne bud mon Jisas mò kul, monen, “Móyóne lemwót ne ni. Angat tey khebel ye dou, okóm là kô ton ye dou. Ne sok ye matay, sana tolo kbô ye du he salà ye. Là kô ye gógów edu tum gónóhu e solu.” 22 Stulón le yó kem Ju wen glal le, mon le, “Yó mon yóm tau yó, ‘Là gógów ye edu tum gónóhu e solu.’ Gónón e tô solu du? Hnatayen knóen kô?” 23 Ne bud mon Jisas se mò kul, monen, “Tau ye lenokob longit kuy. Fene lemwót ta dou. Tau ye tonok kuy okóm là dou. 24 Yó gónóhu mon du mò kuy, sana tolo kbô ye du he salà ye ke sok ye matay. Ne tahu se yó, ke là hentahu ye du yóm deng tulónu kuy bè dou ktau, sana tolo kbô ye du he yóm salà ye bè yóm katay ye.” 25 Ne bud mon le mò ke Jisas, “Tmau kóm de?” Mon Jisas se, “Igou sem deng hónô tmulón du kuy lemwót bè kbut ktoloku efet nim kmoen ni. 26 Tey dê he tô nóyô tulónu kuy lemwót bè yóm kuy kmò, yóm bang gónó ye megtuled. Okóm són olo tulónu yó kem tau lem benwu yóm deng gungolu lemwót gu bè yóm deng hógów dou, ne hono ktahuhen yóm tulónen dou.” 27 Okóm yó kem tau hmungol du, là kô dog glileb le du yóm kegbaken ebè Dwata yóm tulón Jisas kul yó. 28 Bud mon Jisas mò kul, “Ke sok deng hteg ye kros yóm Ngà Tau, yó he angat kdilô ye do. Ne dilô ye snéen yóm klaen dù tódô genbeku ke tek són ou, ne yóm klaen dù lenbù tulónu, són olo tulónu yóm deng hlolò Mà do. 29 Yóm hógów dou,” mon Jisas, “là kô bayaen dou, abay se tendo nmou yóm kun knóyô.” 30 Bè yóm udél Jisas yó, tey dê tau hemtahu béléen.
Yóm tau hesek ne yóm tau là heseken
31 Ne yó udél Jisas ebè yó kem tau deng hemtahu béléen, monen mò kul, “Ke tendo nimón ye ni kem toloku, deng ye baling tau hol tahu lemolò dou ne. 32 Ne angat tngón ye se yóm ktahuhen. Ne yóm ktahuhen yó, yó se hewà kuy bè yóm gónó ye ghesek.” 33 Bnalà le Jisas yó kem dumu tau bè yó, mon le, “Semfu me gu bè Abraham se kum, là kô me kesfu hesek. Tedu se lanem mon du yó dum monem, ‘Angat ye gewà bè yóm gónó ye ghesek?’ ” 34 Mon Jisas mò kul, “Tódô tulónu kuy ktahuhen, yó se tau mò salà, deng ghesek ne lem yóm óyóen mò salà. 35 Yóm tau hesek, sal gel wen sónen yóm kegheseken bè yóm sotu tau. Okóm yóm ngà, laen kô tul sónen kngaen du yóm kun mà. 36 Ke lenwaen yu yóm Ngà Dwata, deng duhen yó se hol tahu kegewà ye. 37 Tngónu se yóm kesfu ye gu bè Abraham,” mon Jisas, “okóm sónmò ye tendo tô hmatay do, abay se là henmóyô ye du yóm toloku. 38 Gel tulónu kuy yóm deng gel gungolu gu bè Mà. Okóm kuy, mom nmò ye yóm deng gungol ye bè yóm kuy mà.” 39 Mon le se mò ke Jisas, “Abraham se yóm kum mà.” “Na,” mon Jisas, “ke semfu ye se gu bè Abraham, nmò ye sen yóm kun nmò Abraham. 40 Okóm kuy, sónmò ye móló hmatay do lanu tmulón du kuy yóm ktahuhen deng gel gungolu gu bè Dwata. Là kô na a yó du kun nmò tehe Abraham. 41 Yóm nmò ye béléu ni,” mon Jisas, “deng dnalang ye bè yóm kuy mà.” Bnalà le Jisas, mon le, “Bang tô dumu Mà me se kum du, tek són sem Dwata. Mi se hol tahu ngaen.” 42 Mon Jisas se, “Ke Dwata se hol Mà ye kaem bong nawa ye dou, abay se béléen gónóhu gu lemwót ne ni se denge kól dini. Là kô lenbuu du yóm kógówu edini, hol du se hógów do. 43 Moen de ke là glileb ye du lanen yóm tulónu kuy? Yó duónen,” mon Jisas, “là móyô ye mimón du. 44 Seitan yóm kuy mà ne tódô lolò ye yóm kun kóyô. Du se yóm hol sana monok lemwót bè hol kbuten. Là kóen tofi bè yóm ktahuhen. Hono kéng yóm kun, abay se yó se sana kun kmò, mò kéng. Hono kéng yóm gel tulónen. Du se hol gónón gu tembul kéng. 45 Okóm,” mon Jisas, “hono tahu yóm gel tulónu kuy, ne yó se gónó ye là hemtahu dou. 46 Wen kô salà ton ye béléu gónó ye là hemtahu dou? Laen duen. Ke tulónu kuy yóm ktahuhen, moen ke là hentahu ye dou? 47 Yóm kun tau Dwata, hol hnungolen yóm udél Dwata. Okóm kuy, là kô ye tau Dwata. Yó se gónó ye là móyô hmungol.”
Jisas ne Abraham
48 Deng mom yó bud balà le ke Jisas, mon le, “Tahu se yóm gel mon me, tauhi lemwót bè Samarya se kóm, lelen wen busawem.” 49 Bnalà Jisas se lu, monen, “Laen kô busaw malak do. Tey kadatu ke Mà, okóm bélê ye kuy, balù udì ke nadat ye ou. 50 Là kô yó du hnebel nawahu ke wen madat do. Okóm yó se hol kóyô Mà ke wen madat dou, ne du se mfi do. 51 Tódô tulónu kuy ktahuhen,” mon Jisas, “yó se tau mimón yóm dou tolok, là kóen na a matay.” 52 Bnalà le se, mon le mò du, “Ni deng tngón me wen busaw malak kóm. Igoen deng matay Abraham dalang se yó kem tehe gna tugod Dwata. Okóm yó monem, ke wen tau mimón du yóm tolokem, là kóen na a matay. 53 Getahi senta yóm tehe fù tekuy Abraham kô? Balù yóm tey kegetahen, senged katayen se kun. Dalang se yó kem gna tugod Dwata ekni, senged katay le se kul. Tmau kóm de?” 54 Ne bud bnalà Jisas lu, monen, “Ke tô hadatu knóu, laen kô dù gónón e kól. Kaem tódô Mà yóm madat dou. Ne hol du se yóm mon ye kuy Dwata. 55 Okóm là kô deng tngón ye du. Fen tngónu dou. Ke tô monu là tngónu du, denge mkél bè yóm kmò ye kéng. Hol tahu tngónu dou, ne tendo nimónu. 56 Yóm tehe fù ye Abraham,” mon Jisas, “tey kligalen, abay se deng eles tngónen yóm ksutu bè ni lem benwu. Tey kligalen yóm deng ktonen dou dini.” 57 Ne mon le se mò du yó kem Ju, “Là kóen deng gefet limu folò he halayem, moen ke monem deng ye ston Abraham?” 58 Ne mon Jisas se mò kul, “Tódô tulónu kuy ktahuhen, gu laan Abraham là deng sut, deng sana kem yó ne dou.” 59 Timbow gungol le yóm mon Jisas yó, omin le gotu mulut botu mò tô hatay tudà le du. Okóm tódô lana lem mata le Jisas, tnagaken yóm Gónô Dwata.
Kehton Jisas yóm tau butô 1 Bè yóm igò Jisas tolo mógów, wen tau butô tonen. Yóm kbutóen yó, tódô mung du bè ksuten. 2 Ne snólók le bè Jisas yó kem gel lemolò du, mon le, “Ó Sér, moen ke butô lemwót bè ksuten nim tau ni? Mahi du yóm wen salaen, du kô, duhen ke yó kem tuhahen?” 3 Mon Jisas se, “Là. Là kóen lemwót bè kun salà duhen ke bè salà kem tuhahen. Yó gónón butô nim tau ni anì gfan béléen yóm kfasang Dwata. 4 Yóm tolo knóu lem benwu,” mon Jisas, “lómón ke tolo mnóng kdaw. Tnana tekuy mò du yóm kun kóyô yóm hógów do, abay se ke sok deng kifu, laen kô dù tau bud mò nmò ne. 5 Bè nim tolo knóu lem benwu,” monen, “ou se yóm layag mò hlayag yó kem tau lem benwu.” 6 Timbow deng kudél Jisas, ominen dmulak bè tonok ne sninaen yóm dulaken, ne ominen lemumang du bè mata yóm tau butô 7 ne monen mò du, “Lemwóti ne, nam e mouf bè busung Silom.” (Yó lan nim Silom ni, “Hógów.”) Ne tahu se, lemwót yóm tau butô yó nan e mouf. Timbow deng koufen, tódô mton se ne tódô mulék ebè gónóen. 8 Timbow ton yó kem tau dumuhen sebét yóm deng ktonen, ya tey ketnga le du. Senged se kul yó kem tau tehe hónô gel mton du yóm gel ketfólólen bè kem dumun tau, botong mon le, “Là ni du kô yóm tau tehe butô tendo gel myón temfólól bè yó kem tau?” 9 Wen se mon du, “Duhen ni se.” Okóm mon kem dumu, “Sundu. Abay sem skél le.” Ne monen se kun yóm tau yó, “Ou se yóm tehe butô.” 10 Ne bud mon le mò du, “Tedu kmò ktonem du?” 11 Ne monen se mò kul, “Yó sem tau boluyen Jisas hton dou. Yó kmoen du, sninaen yóm tonok ne lumangen bè matahu, ne ominen mdók dou na a mouf bè Silom. Ne tahu se, naw e mouf ne tódóe se mton.” 12 Ne bud mon le mò du, “Gónón nô se yóm tau monem yó?” Ne monen se kun, “Là bud tngónu du.”
Ksólók kem Farisi yóm tau tehe butô
13 Ne omin le tódô mit du ebè yó kem Farisi yóm tau tehe butô yó koni. 14 Abay se bè yóm keslinà Jisas yóm tonok, ne kehtonen yóm tau tehe butô yó, nmoen bè Kdaw Kehegnô. 15 Omin le smólók du se kul yó kem Farisi, mon le, “Tedu kmò ktonem de?” Monen se kun yóm tau tehe butô yó, “Wen tau hemsù tonok minà bè matahu, ominu mouf ne tódóe mton.” 16 Wen se bè yó kem Farisi mon du, “Là lemwóten bè Dwata yóm tau hton kóm yó, abay se nmoen bè yóm Kdaw Kehegnô.” Okóm yó mon kem dumu tau, “Ke tau gemsalà yóm tau yó, là kô gbeken mò du yó kem tey dê hentaw ton nmoen.” Tey kesgólól nawa le yó kem tau bè yó. 17 Ne bud snólók yó kem Farisi yóm tau tehe butô yó, mon le mò du, “Tedu kmò kóm kehedem du yóm tau tu? Abay se u yóm deng htonen.” Monen se kun, “Hol tahu tugod Dwata tum tau tu.” 18 Okóm yó kem Ju wen glal le bè yó, là kô dog hentahu le du yóm tehe kbutô yóm tau yó koni, ne yóm deng bud ktonen. Yó he kehtahu le du yóm deng khangay le kem tuhahen, ne snólók le bélê le, mon le, 19 “Kuy ngà kô ni? Tahu butô lemwót bè ksuten kô? Tedu kmò ktonen ni du?” 20 Omin le malà du se kul yó kem tuhahen yóm tau tehe butô yó, mon le, “Tngón me ni se kum ngà, ne tngón me se butô lemwót bè ksuten. 21 Okóm là tngón me du kum yóm deng ktonen ni. Ne là tngón me du snéen yóm tau deng hton du. Tódô snólók ye béléen, yakà sem dengen malù tmuha, gbeken malà kuy ke wen snólók ye béléen.” 22 Yó gónó le mon du yóm mon le yó, abay se likò le yó kem Ju wen glal le. Yakà deng mon le du, ke wen tau hemtahu ke Jisas ke du yóm Misaya, là kô bud hmung le du lem gónó le gel stifun yó kem Ju yóm tau yó. 23 Yó se gónó kem tuhahen mon du, “Tódô snólók ye, yakà sem dengen malù tmuha.” 24 Ne bud tnaba yó kem Farisi bè gewuhen dulék yóm tau tehe butô yó koni, mon le mò du, “Hol tulónem ktahuhen dé, abay se wen Dwata. Tngón me tau gemsalà tum tau hton kóm tu.” 25 Okóm yó balaen kul yóm tau tehe butô yó, monen, “Là tngónu du dou ke tau gemsalà tum tau tu duhen ke là. Tek sotu olo tngónu, tehehe butô, okóm ni, denge mton.” 26 Ne bud mon le se mò du, “Tedu se nmoen béléem? Tedu kmò kehtonen kóm du?” 27 Ne bud monen se kun yóm tau yó, “Deng tulónu kuy se, mò ye là hmungol du du? Moen de ke alì nokol snólók ye béléu? Móyô ye kô kuy ke baling ye tau lemolò du?” 28 Ya tey sidek kesedekà le du yóm tau yó, mon le mò du, “Uu se sotu lemolò du tum tau tu. Lolò me tehe Musis kum. 29 Tngón me yóm tehe kudél Dwata ebè Musis ekni, okóm yóm tau yó, là kô tngón me du gónón gu lemwót.” 30 Ne bud mudél yóm tau yó, monen, “Tey moen ni du ke là tngón ye du gónón gu lemwót igoen sem deng hton dou. 31 Hónô tngón tekuy là kô hnungol Dwata du yóm tau gemsalà. Són olo hnungolen, són yóm tau madat du ne mimón du yóm kun kóyô. 32 Lemwót bè hol kbut benwu,” monen, “laen kô deng gungol tekuy he tau gembek hton du yóm tau butô lemwót bè ksuten. 33 Ke là lemwóten bè Dwata tum tau tu, là kô gbeken mò du béléu nim deng nmoen ni.” 34 Yó balà le du se kul, “Tmau kóm de tô hegled tmolok kum? Igoem tau gemsalà he kóm lemwót bè kbutem tau.” Ne là kô bud hmung le du bè yóm kul gónô gel stifun yóm tau tehe butô yó.
Yóm tau là hemtahuhen, lómón ke butô
35 Timbow gungol Jisas yóm là bud kehmung le du bè yóm kul gónô gel stifun yóm tau tehe butô yó, ominen mebel du. Timbow tonen, monen mò du, “Hentahuhem kô kóm yóm Ngà Tau?” 36 Mon yó sem tau tehe butô yó, “Tmau du de yóm tau yó, Sér, anì hemtahuhe béléen?” 37 Mon Jisas se, “Yó sem deng tonem, yóm mudél ebéléem ni.” 38 Ne tódô mtud bukol bè solu Jisas yóm tau tehe butô yó, ne monen mò du, “Hentahuhu uu, Sér.” 39 Ne yó bud mon Jisas, monen, “Ni se nógówu elem benwu anì sentólóngu kem tau. Htonu yó kem tau butô, ne hbutóu yó kem tau mton.” 40 Ne wen se kem Farisi nô bè yó, ne gungol le yóm kmon Jisas du nim ni, mon le se mò du, “Mi kô yóm monem butô yó?” 41 Bud mon Jisas mò kul, “Ke tahu ye butô, laen kô salà nbô ye. Okóm gel mon ye, ‘Là kô me butô’ yó se gónón wen salà nbô ye.”
Yóm hlingón Jisas bè yóm tau semgyok ubiha
1 Bud wen tolok Jisas kul bede hningónen, monen, “Tódô tulónu kuy ktahuhen, ke wen tau husek elem kukub ubiha, okóm là mlanen bè bak tikeben, mom mkaf doli beng mò lanen elemen, deng duhen du se yóm tau mnagaw. 2 Okóm yóm tau ke mlan bè bak tikeben, du se yóm tahu semgyok ubiha. 3 Yóm tau gel mentey bè bak tikeb, sal gel lenungkaen béléen yóm tikeb yó. Ne yó kem ubiha nô lemen, tódô dilô le kun udél. Gel tabahen kul yóm kul boluy, ket kul na sotu ne niten lu hewà. 4 Sok le deng hewà, tódô tukô gna kul yóm tau gel semgyok kul, ne tódô le se huli du, abay se dilô le udélen. 5 Ke tólóng tau tô malak kul, là kô na le e lolò du, mom henlóy le, abay se là kô dilô le du udélen.” 6 Ni se yóm hlingón tulón Jisas kul, okóm là kô glileb le du lanen.
Jisas yóm tau hyu kesegyoken ubiha
7 Bud mon Jisas mò kul, “Tódô tulónu kuy ktahuhen, hol lómón ke ou se bak tikeb kukub yó kem ubiha. 8 Yó kem tau tmolok sekban gu laanu là deng kól dini, hol lómón ke lu se yó kem tau mnagaw. Okóm yó kem dou ubiha, là kô hnungol le kul. 9 Ou se yóm henged bak tikeb,” mon Jisas. “Yó se mlan bè yóm bak tikeb yó, angat gewà gu lem hatay. Hol lómón ke du yóm ubiha gel hewà na a mótób ne bud gel husek elem kukuben. 10 Bong yó dum tau mnagaw, yó se kun gel nógów na a mnagaw, na a hmatay, ne na a gemlà. Okóm yó dou nógów, naw e benlay yu klowil, yóm klowil hol tahu gsengel nawa ye du. 11 Ou se yóm tau tilob kesegyoken ubiha, gloku tódô hamà klowilu bè yó kem ubihahu. 12 Okóm yóm tau olon semgyok ubiha lemwót bè yóm gel ksukéy le du, ke sok sut yóm ógóf lóbô gu lem bnes, tódô mlóy yóm tau yó, gtagaken yó kem ubiha sen-gyoken, abay se sundu kun ubiha du, ne là du du yóm tau hol semgyok kul. Yó nmò yóm ógóf lóbô sut yó, wen ubiha kenfóen, ne gotu senklahen lu yó kem dumu. 13 Yóm tau snukéy le yó, tódô mlóy, abay se són filak kun hnebel. Là kóen nô bè nawahen yó kem ubiha sen-gyoken. 14 Ou se,” mon Jisas, “yóm tau hyu kesegyoken ubiha. Gotu tngónu yó kem dou ubiha ne tngón le se ou kul, 15 hol lómón se yóm kum kesetngón Mà. Angat hamau klowilu bélê le yó kem dou ubiha. 16 Wen he yó kem dumu ubihahu là deng sentifunu kul ebè ni. Angat gotu nitu lu snéen ne angat hnungol le yóm dou udél. Tódô angat sensotuhu bung le yóm kdê ubihahu, ne tek sotuhu se yóm angat semgyok kul.” 17 Ne bud mon Jisas, “Tey kbong nawa Mà do, abay se tódô lemwót bè dou kóyô hamà du yóm dou klowil bè yó kem tau. Okóm angat bud gutahu snéen yóm hamau bélê le yó. 18 Laen kô dù tau gembek ma du yóm dou klowil. Tódô lemwót bè dou kóyô hamà du. Wen kwalisu hamà du ne wen se kwalisu bud ma du snéen. Ni se yóm deng hmò Mà dou.” 19 Timbow gungol yó kem tau nim udél Jisas ni koni, deng mom bud mesgólól nawa le. 20 Tey dê se bélê le mon du, “Wen busaw malak du” mò ke Jisas. “Lengel matahen. Moen de ke hnungol ye udélen?” 21 Okóm mon kem dumu, “Là kô ni du kudélen yóm tau nalak busaw. Ne yóm busaw, là kô gbeken hton du yóm tau butô.”
Kekbê le ke Jisas
22 Deng bud hto se yóm sotu kmò le ken bong yó kem Ju bè Jirusalim, yóm gel mon le, Kdaw Kebwas le yóm Gónô Dwata. Bè yóm gel kmò le du yóm ken bong yó, sal gel geslaen yóm bulónen tnaw. 23 Yó nmò Jisas, bliwel bè yó bè Gónô Dwata bè yóm gel mon le, Gónô Hgolung tehe Selumun ekni. 24 Gotu le stifun hmilol du yó kem Ju, mon le mò du, “Hol béem abay hegewu nawa me. Tulónem kum ktahuhen. Uu kô yóm Misaya?” 25 Mon Jisas se mò kul, “Igou sem deng hónô tmulón du kuy, là sem dog hentahu ye du. Bè yóm hentaw ton hmò Mà dou, yó gónó ye dmilô du yóm khógówen do. 26 Okóm là kô hentahu ye dou, abay se là gomong ye bè yó kem dou ubiha sen-gyok. 27 Ke yu yóm dou ubiha, kaem hnungol ye udélu. Gotu tngónu lu ne gotu lolò le ou. 28 Angat benlayu lu klowil laen dù sónen, là kô le na a matay. Ne laen se kô dù gembek semkot kul lem hólólu. 29 Yó kem tau nogotu yó,” mon Jisas, “hono gotu blay Mà dou, ne du se hol gembek bè kdéen. Ne laen se kô dù gembek semkot kul lem hólól Mà yó kem deng hogoten dou. 30 Tódô me ssotu Mà.” 31 Bè yóm kungol le du yó kem tau yóm udél Jisas yó, tódô le gotu mulut botu mò tô hatay tudà le du. 32 Okóm mon Jisas mò kul, “Tey deng dê ne yóm hyu deng hmò Mà dou lem blóng ye. Mahi du de bè yó kem nmou yó gónó ye tô tmudà dou botu?” 33 Bnalà le se, mon le, “Là tnudà me kóm botu bè yó dum kehyu nmoem, okóm bè yóm kehsengedem knóem bè Dwata. Olohem tau hkawang he kóm, tói hbaling Dwata.” 34 Bud mon Jisas mò kul, “Wen tehe hsulat Dwata bè kuy hlau, yó monen, ‘Dwata ye snéen kuy.’ 35 Na,” mon Jisas, “hónô tngón tekuy yóm deng tehe hsulat Dwata, là kô gbek tekuy bud temles du. Ke deng bnoluy Dwata lu dwata yó kem tau tehe hogoten udélen, 36 milud he kehyuhen béléu, abay se ou yóm deng tehe nélék Dwata mò hógówen elem benwu. Moen de ke mon ye nuléhu Dwata bè yóm kmonu du, Ou se Ngà yóm Dwata? 37 Ke là nmou du yóm hmò Dwata dou, wen but ye là hemtahu do. 38 Okóm ke nmou, yake hentahu ye, baluen ke là hentahu ye du yóm dou udél. Ke hentahu ye yóm gel nmou, kaem dilô ye yóm knô Mà béléu ne yóm knóu bè Mà.” 39 Omin le gotu bud tô kemfô ke Jisas, okóm tódô lana lem blóng le. 40 Kewót Jisas bè yó, ne bud mógów efatu Jurdan bè yóm benwu gónó Jan tehe gel mabtays, ne bè yó gónón nô. 41 Tey dê tau mógów ebéléen, yó mon le, “Yóm tehe kun gel ktolok Jan, laen kô dù hentaw ton gel nmoen, okóm hono tahu yóm gel tulónen gbak ebè yóm tau ni.” 42 Ne tey dê tau hemtahu bè Jisas bè yó.
Katay Lasarus
1 Wen sotu tau gemnóm des, boluyen Lasarus, tau menwu bè Bitani. Ne wen lewu libunen, Midi ne Marta. Menwu le bè Bitani se kul. 2 (Nim Midi ni, du se yóm libun temwél te ti Jisas yóm boo alì tilob boohen, ne ominen bud mifu du weken. Yóm Lasarus wen desen yó, hol logi le Midi.) 3 Lemwót le Midi, tminok le ebè Jisas, mon le, “Ó Sér, yóm weem dumum sogot nawa, wen desen.” 4 Yóm kungol Jisas du yóm tinok le yó, mom monen, “Là hatay du he nefeten yóm des Lasarus yó, okóm yó gónón gemnóm des mò gónón megdóyón Dwata, ne mò gónón megdóyón yóm Ngà Dwata snéen.” 5 Tey kbong nawa Jisas kul le Marta ne Midi ne Lasarus. 6 Balù yóm kungol Jisas du yóm tey kwen des Lasarus, okóm deng mom nan bud lewu buteng nô bè yóm gónóhen nô yó. 7 Yó he kmonen du mò yó kem gel lemolò du, “Lemwót tekuy ne, mulék tekuy ebè Judiya.” 8 Okóm mon le se mò du yó kem gel lemolò du, mon le, “Ó Sér, là dengen legen he yóm tô kestudà le kóm botu bè yó, ne ni kendeli bud tô mógów etu kô?” 9 Ne bnalà Jisas lu, bede hningónen, monen, “Yóm sotu kdaw, sal sfolò lewu udasen lemayag. Ke mógów kemdaw yóm tau, là kóen na a glokob abay se wen layagen. 10 Song gónón glokob ke mógów kifu, abay se laen dù layagen.” 11 Ne omin Jisas bud mon du mò kul, “Yóm wè tekuy Lasarus, deng lemwót tungô ne. Ni nógówu etu naw e hlowil.” 12 Ne mon yó se kem gel lemolò du, “Hyu se ke deng tungô, Sér, anì bud hyu kegnómen du.” 13 Ofo kul mon du ke tahu tungô Lasarus, anì monem henléd Jisas yóm deng katayen. 14 Omin Jisas tódô hmakang tmulón du kul, monen, “Deng matay Lasarus. 15 Okóm wen gónón hyu bélê ye yóm là knóu ditu bè yóm katayen anì temnù yóm kehtahu ye béléu. Lemwót tekuy ne, mógów tekuy ebéléen.” 16 Ne mudél se ke Tumas, yóm niba le Héng, monen mò yó kem dumuhen, “Gotu tekuy mung du anì gotu tekuy gomong matay béléen.” Tahu se, lemwót le.
Jisas gónón mowil tau, ne du bemlay yóm klowil laen dù sónen
17 Timbow kól ditu Jisas, tulón le du deng fat kdawen ne yóm kebeng le ke Lasarus. 18 Nim Bitani gónó Lasarus nô ni, moni bè Jirusalim, wen dô tlu kilumitru keslayuk le. 19 Tey dê kem Ju lemwót bè Jirusalim deng gna kól bè yó mò na a hemyu nawa Marta ne Midi bè yóm katay logi le. 20 Timbow gungol Marta yóm kkól Jisas bè yó, ominen lemwót nan e senlong. Fen tebel bè gónô ke Midi. 21 Yó mon Marta mò ke Jisas, “Ó Sér, là kóen na a matay he yóm logi me ke tehehi nô dini. 22 Balù ni he, kaem tngónu balù kihu hnihem bè Dwata, blay Dwata kóm.” 23 Ne mon Jisas se mò du, “Angat bud mowil he yóm logi ye.” 24 “Tngónu se,” mon Marta, “angat bud mowil he bè yóm hol són kdaw.” 25 Bud mon Jisas mò du, “Ou se gónón mowil tau gu lem hatay, ne bud ou se bemlay kul klowil. Yó se hemtahu béléu, anien ke deng matay, kaem bud mowil. 26 Senged se yóm tau tolo mowil, ke hemtahu béléu, là kóen na a matay. Hentahuhem kô ni?” 27 Mon Marta, “El, Sér, hentahuhu se uu yóm Misaya, yóm Ngà Dwata. Uu se yóm tendo hendón me ksuten elem benwu.”
Kosok lewok Jisas
28 Timbow deng kmon Marta du yóm yó, ominen lemwót mógów ebè Midi ne lifut tulónen du yóm deng kkól Jisas bè yó, ne bud monen, “Tinoken uu koni.” 29 Tahu se, kendel lemwót Midi nan e senlong Jisas se kun. 30 (Tolo nô bè lan he Jisas, sana knóen bè yóm gónó Marta gemslong du.) 31 Bè yóm kewót Midi, gotu le kemtes huli du yó kem tey tau wen gel hemyu nawahen nô bè gónô le. Ofo kul ke nan e mkik ditu bè gónón lebeng Lasarus. 32 Timbow kól bè Jisas Midi, tódô hegluduk bè soluhen ne monen, “Ó Sér, là kóen matay he tum logi me ke tehehi nô dini.” 33 Tey kik Midi, botong gomong mkik béléen yó kem tau mung du. Bè yóm kton Jisas du, ya tey kegkoduhen kul, ne tey sidek kegnómen du, 34 monen, “Gónó ye deng lembeng du se?” Mon le se, “Mungi kum dé, Sér, anì tonem.” 35 Ne mosok lewok Jisas. 36 Tikóng ton yó kem tau yóm kosok lewoken, botong mon le, “Tey kbong nawahen du tum tau matay tu.” 37 Okóm mon yó se kem dumu, “Moen là tehe hkó du se yóm des Lasarus anì là matayen? Ke gbeken hton yóm tau butô, kaem gbeken snéen tum tehe des Lasarus.”
Klowil Lasarus
38 Timbow le lemwót bè yó, mógów le ebè yóm gónó le lembeng ke Lasarus. Ya tey sidek kegbeng lem Jisas se kun. Deng wen kilib nokol le bè but léhék ne bè yó gónó le lembeng du, ne wen botu seng le du yóm baken. 39 Yó mon Jisas mò kul, “Kó ye dé yóm botu sengen yóó.” Ne mon Marta se, yóm libun yóm tau matay, “Deng moo bolok ne ni, Sér, yakà deng fat kdawen du lebeng.” 40 Ne bnalà Jisas se, monen, “Hentulónem nawa yó dém deng monu mò kóm eginu, ke hemtahuhi béléu, tonem yóm kun kfasang Dwata.” 41 Tahu se, kó le yóm botu seng bè bak lebeng. Omin Jisas temngel eta bè longit, ne monen, “Koduhem, Mà, yóm gel khungolem do. 42 Tngónu sónmoem tendo gel hmungol dou. Yó gónóhu mon du nim ni, wen ni kem tau nô bè ni anì hentahu le yóm deng khógówem do.” 43 Timbow deng yóm kni Jisas yó koni, ominen tmaba, hgelen udélen, monen, “Ó Lasarus, hewai.” 44 Tahu se, tódô sen-gengen se hewà Lasarus gu lem lebengen, sana tolo klébéden bè lówóhen yó kem nes tehe baus le du, dalang se bè sigelen ne tihen, ne tólóng nes baus le bè kuluhen. Omin Jisas mon du mò kul, “Kó ye dé yóm nes bausen anì hyu kógówen.”
Katul khatay le ke Jisas
45 Tey dê bè yó kem tau mauy ke Midi baling hemtahu bè Jisas lan le mton du yóm klowilen ke Lasarus. 46 Okóm wen se bélê le tódô lemwót na le e tulón tu kem Farisi yóm deng nmò Jisas yó koni. 47 Lemwót yó kem Farisi ne yó kem geta gel demsù ebè Dwata, gotu tinok le yó kem tau hol geta mogot kukum anì gotu le stifun. Bè yóm deng kestifun le, mon le, “Tedu atul kuy ni du? Blaem tey dê hentaw ton nmoen tum tau tu. 48 Ke tódô bayà tekuy, kdéen tau angat hemtahu béléen, hnénég ye ke là angat lenbuten tekuy yóm tau hol geta bè Rom. Ngem kà angat genbà le yóm Gónô Dwata, ne angat gotu hensidek le tekuy kem Ju.” 49 Ne mudél se yóm hol geta bè yó kem gel demsù ebè Dwata bè yóm halay yó, boluyen Kyafas, monen, “Tey tau là hulung hedem nim yu. 50 Mom hyu bélê tekuy he ke sotu tau matay mò leyu lówó yóm kdéen tau anì là meglà tekuy.” 51 Okóm yóm kudél Kyafas yó, là lemwóten bè kun kehedem, eles tódô htugod Dwata du yóm angat katay Jisas bè yó kem Ju. Yó gónó Dwata hlan du bè Kyafas, abay se du yóm hol geta bè yó kem tau demsù ebè Dwata bè yóm halay yó. 52 Okóm là són du bè kem Ju yóm gónó Jisas matay. Bud angat gotu sensotuhen lu snéen yóm kdéen tau Dwata deng sekla. 53 Tódô lemwót bè yóm kdaw yó yóm katul khatay le ke Jisas yó kem Ju wen glal le. 54 Yó gónóm mon, là buden gel hegfan lem blóng yó kem tau bè Judiya Jisas. Tódô lemwót bè yó, mógów ebè Ifraim, yóm sotu benwu udì moni bè yóm benwu laen tauhen. Mung le du snéen yó kem gel lemolò du. 55 Deng bud moni ne yóm mò ken bong yó kem Ju bè yóm Kdaw Khius. Okóm gu laanen là deng hto, tey dê tau lemwót bè yó kem dumu benwu hmilol, gotu le subô ebè Jirusalim anì na le e nmò yóm sana kul hlolò bè khólós. 56 Bè yóm kkól le bè yó, sónmò le tendo gel mebel mata ke Jisas. Gotu le ssólók yóm igò le stifun bè Gónô Dwata, mon le, “Kmò kehedem ye du kuy? Déke là mógówen ebè nim ken ni Jisas?” 57 Yó gónó le mon du yóm yó, abay se deng ssotu ne atul yó kem geta bè yó kem gel demsù ebè Dwata ne yó kem Farisi. Eles heglalag le ke wen mton du mò ke Jisas, hol tulón le kul anì kenfô le.
Ketwél Midi te ti Jisas yóm hnolo alì mebtes
1 Tek nem kdaw ne duen kehto yóm mò ken bong bè yóm Kdaw Khius. Lemwót Jisas mógów ebè Bitani, yóm benwu Lasarus, yóm tehe tau hlowilen. 2 Yóm kkólen ditu, mò le ken béléen mò hódó le du. Lemwót Marta kun, fen tmóbóng smagid ken bélê le. Ne fen mung seyón ke Jisas mken ke Lasarus. 3 Bong ke Midi kun, wen sotu sobuy hboo nwahen, yóm boo boluyen nard, yóm laen dù boolen, alì mebtes, ne tey tilob boohen. Gotu koken te ti Jisas, ominen bud mifu du weken. Botong lengeben gu lem gónô gónón e mbel boohen. 4 Ne mudél se Judas Iskariyut, yóm sotu bè yó kem gel lemolò ke Jisas, yóm tau mlay du sumóng. 5 Yó monen, “Moem là tódô hembalù du yóm hnolo yó, ne blay bè tu kem tau élél yóm blihen? Sukéy sotu tau bè sfalay blihen yóm hnolo yó.” 6 Yóm udél Judas yó, là kóen lemwót bè kkoduhen yó kem tau élél, okóm du se tau mnagaw. Du se fen gel mogot yó kem filak gel gastu le, ne wen se tódô gel tensob nwahen. 7 Ne mon Jisas mò ke Judas, monen, “Tódô bayaem du yóm kun nmò yó. Kaem eles tgamahen yóm kebeng le dou yóm nmoen béléu ni. 8 Tendo gel wen tau élél nô lem blóng ye se kuy,” monen, “okóm là kô senflósu du nô lem blóng ye dou.”
Katul khatay le ke Lasarus
9 Timbow tngón yó kem tey tau wen yóm knô Jisas bè Bitani, omin le mógów ebéléen bè yó. Hlós lan le hménég ke Lasarus, yóm tau tehe hlowil Jisas gu lem lebengen. 10 Duhen yó, bud wen atul nmò yó kem tau hol geta gel demsù ebè Dwata anì gomong hnatay le Lasarus snéen kun, 11 abay se lemwót bè yóm deng kehlowil Jisas du, yó gónó le là bud lemolò kul yó kem tau. Deng mom són Jisas lolò le.
Khódó le ke Jisas bè Jirusalim
12 Timbow hayahen bè yó, gungol yó kem tey tau wen deng eles mung bè yóm mò ken bong bè Kdaw Khius bè Jirusalim yóm kógów Jisas etu, gotu na le e senlong. 13 Gotu le ma doun twok mò nit le semlong ke Jisas. Gotu le mensag, mon le, “Hol dóyón tekuy dé Dwata. Dwata he hol tmóbóng du yóm tau deng hógówen ni. Dwata he hol muyag du yóm tau hol geta bélê tekuy kem tau Israél.” 14 Ne wen ton Jisas yóm sotu kay kudà boluyen asnu, ne nyónen. Yó se deng gónón dohò yóm tehe mon Dwata bè Sulaten, yóm monen, 15 “Bê ye hlikò, kem tau bè Sayun. Ngem yó dém tau hol geta bélê ye. Deng sut, ne smakay ngà nati asnu.” 16 Bè yóm kógów Jisas ebè Jirusalim yó, là kô glileb le du yó kem gel lemolò du ke yó tendoken yóm udél tehe hsulat Dwata yó. Okóm kogol yóm kulék Jisas ebè longit, yó he kegbelen bè nawa le deng gotu dohò etahen yóm tehe hsulat Dwata ekni, duhen yó sem deng nmò le béléen. 17 Lemwót yó kem tau tehe mton yóm ktaba Jisas ke Lasarus gu lem lebengen, ne yóm kehlowilen du, gotu tulón le bè kem dumu le yóm kmò kton le du. 18 Yó se gónó le alì gduf semlong ke Jisas yó kem tey tau wen lan le mungol yóm tey hentaw ton deng nmoen yó. 19 Lemwót yó kem Farisi, stulón le, mon le, “Ngem, laen kô dù gmò tekuy. Tenngel ye dé, tódô kdéen tau gotu lemolò du.”
Khebel le ke Jisas yó kem tau Grik
20 Ne wen se kem tau Grik, subô le se kul ebè Jirusalim na le e gbót tmaba Dwata bè yóm mò ken bong yó. 21 Bè yóm kkól le bè Jirusalim, na le na mógów ebè Filip yóm tau lemwót bè Bitsayda, benwu snakuf Galili yó mon le mò du, “Ó Sér, móyô me ston ke Jisas.” 22 Lemwót Filip, tulónen ke Andru, ne tódô le se slomong tmulón du ke Jisas. 23 Ne mom yó balà Jisas kul, monen, “Móyónen hto ne yóm kehegfan Dwata du yóm tey kegetahen yóm Ngà Tau. 24 Tódô tulónu kuy ktahuhen,” mon Jisas, “lómón yóm sbotù bnék halay, ke là nan gebeng elem tonok ne lembóg, là kóen na a tmowok, ne là se wen bunguhen, tódô sana keblotuen. Okóm ke deng lembóg, yó he kwen towoken, ne angat tey kbunguhen. 25 Yóm tau, ke són ktesen yóm klowilen te tonok, angat lanahen yóm klowilen yó. Okóm yóm tau ke là ktesen du yóm klowilen te tonok, angat gutahen yóm klowil laen dù tul sónen. 26 Yóm tau móyô mimón do,” mon Jisas, “là kô gbeken du ke là loloen do. Balù kihu gónóhu nô, yó se bud kun gónó nô. Angat tey kadat Mà du yóm tau ke nimónen o.”
Eles ktulón Jisas yóm angat katayen
27 Bud mon Jisas, “Nim kmoen ni, tey sidek kegnómu du. Okóm là kô gbeku mon du mò ke Mà, ‘Ó Mà, kóhem tahu yóm angat tey gbunuu ni.’ Abay se ni se hol nógówu edini anì naw e heglayam. 28 Okóm ni dii mom monu, ‘Ó Mà, kóyóu ke holi megdóyón béléu.’ Ne tódô wen se mudél gu bè longit, monen, ‘Denge megdóyón béléem ne, ne angate bud megdóyón béléem he.’ ” 29 Yóm kungol le du yó kem tey tau wen yóm mudél gu bè longit yó koni, mom mon yó kem dumu, “Lugung.” Ne yó mon kem dumu, “Wen hógów Dwata gu bè longit mudél ebéléen.” 30 Okóm yó mon Jisas mò kul, monen, “Sundu yó du gónón mudél yóm mudél yó koni ke olon ebéléu. Okóm yó gónón mudél, abay se wen yu. 31 Deng hto ne yóm buteng kkukum Dwata kul yóm kdéen tau bè klamangen benwu, ne yóm kkóhen du bè Seitan yóm kfasangen mogot benwu. 32 Ke deng hdà le ou eta bè yóm kros,” mon Jisas, “yó se mò lanu mit kdéen tau mò lemolò do.” 33 (Bè yóm kmonen du yóm yó, yó se mò lanen eles tmulón du kul yóm angat kmò khatay le du.) 34 Bnalà le Jisas yó kem tau, mon le, “Yó monen bè Udél Dwata, yóm Misaya, kaem tódô hlós yóm kun klowil, là kóen na a matay. Okóm yóm monem yó, angat hdà le bè yóm kros yóm Ngà Tau. Tau du se yóm Ngà Tau monem yó?” 35 Bnalà Jisas lu, bede hningónen, monen, “Là buden legen ne knóen lem blóng ye yóm layag. Tnana ye hloni edu, kô gafiten yu kifu. Yóm tau mógów lem kifu, là kô tonen du gónón e solu. 36 Tnana ye hol hemtahu du dé yóm layag anì baling ye tau nô lem layag.”
Kehda le ke Jisas yó kem tau
Timbow deng kudél Jisas, ominen lemwót ne là kô tngón kem tau du gónón e nô. 37 Balù yóm tey kdê hentaw ton gel nmò Jisas lem blóng le, ewenem là kô dog hentahu le du. 38 Lemwót bè yóm là kehtahu le du, ni se gónón dohò yóm tehe hsulat Dwata yóm sotu tehe tugoden boluyen Isaya, yóm monen, “Ó Dwata, laen dù tau hemtahu du yóm gel tulón me. Ne yó kem tau gónóm deng hegfan du yóm kfasangem, là kô glileb le du.” 39 Yó gónó le là hemtahu, abay se lu gónón e gbak yóm sotu tehe mon Isaya, monen, 40 “Deng hbutô Dwata mata le anì là dilô le du yóm ton le. Deng hgel Dwata kulu le anì là glileb le du yóm gungol le. Là kô le móyô semfulék ebéléu,” mon Dwata, “anì hnifótu lu.” 41 Yó gónó Isaya mon du yóm yó, abay se deng tehe eles tonen ne ekni yóm tey kegeta Jisas, ne hol bè Jisas se gónón e gbak yóm tulónen yó. 42 Balù yóm deng kmon Isaya du yóm yó, tey dê se yó kem Ju wen glal le hemtahu bè Jisas. Okóm là móyô le hetngón du abay se likò le yó kem Farisi, kô là bud hmung le kul bè gónó le gel stifun yó kem Ju. 43 Yó gónó le là hegfan du yóm kehtahu le, abay se alì ktes le yóm kdóyón tau kul senta yóm kdóyón Dwata kul.
Kegtuled le lemwót bè yóm kehda le yóm udél Jisas
44 Ne omin Jisas bud mudél ebélê le, hgelen udélen, monen, “Yó se hemtahu béléu, là kô són du ou yóm hentahuhen, hentahuhen yóm hógów dou. 45 Yó se tau deng mton do, deng tonen snéen yóm hógów do. 46 Yóm kógówu elem benwu,” mon Jisas, “hol lómón ke layag sut bélê ye. Yó se tau hemtahu béléu, là kóen hlós knóen lem kifu. 47 Ke wen tau hmungol du yóm toloku, ne là nimónen du, là kô ou du angat tmuled du. Abay se sundu yó du nógówu elem benwu ke naw e tmuled kem tau. Okóm yó dé nógówu anì naw e lenwà lu gu lem hatay. 48 Yóm tau kembê do, ne là se kô henmóyóen du yóm toloku, angat wen fen tmuled du. Yó tmuled du bè yóm hol són kdaw, duhen yóm udélu là henmóyóen du yó. 49 Abay se là kô tódô lenbuu du yóm gel tulónu. Yóm Mà hógów dou fen hmau du do yóm gel toloku. 50 Bè yóm kdê deng tulónu kuy ni, hono deng gotu hlau Mà dou. Ne tódô tngónu, ke nimón ye yóm kun hlau Mà, angat guta ye yóm klowil laen dù tul sónen.”
Kolob Jisas ti yó kem gel lemolò du
1 Tek sendaw ne dù kehtohen yóm mò ken bè yóm Kdaw Khius. Tódô tngón Jisas yóm móyón ktebelen yóm benwu ni, ne bud mulék ebè Maen. Tey tendo gel kbong nawahen kul yó kem tau gel lemolò du, ne là kóen monol nawahen ebélê le efet kól bè yóm ktagaken kul. 2 Timbow kifu bè yó, gotu le seyón ke Jisas mken yó kem gel lemolò du. Deng sana hnô Seitan lem hendem Judas yóm angat keblayen ke Jisas sumóng ebè yó kem hmohon du. Nim Judas ni, du se ngà Simun Iskariyut, 3 Okóm ke Jisas kun, deng eles tngónen yóm kfasang deng blay Maen du mò mogot du yóm kdéen. Tngónen snéen yóm kewóten gu bè Dwata ne yóm bud kuléken etu béléen. 4 Ominen mdà, kóhen yóm lafin nesen, nan e ma kayab, ne beden bè ówóken. 5 Ominen ma lenggana ne nlemen él, ne nbuten molob ti yó kem gel lemolò du, ne bud gel ifuhen du yóm kayab beden bè ówóken. 6 Timbow kól bè Simun Pitér, yó udél Simun ebè Jisas, monen, “Tô nolobem tihu kô, Sér?” 7 Bnalà Jisas se, monen, “Là kô glileb ye du ni kem nmou bélê ye ni, okóm angat glileb ye he hulin kdaw.” 8 Bud mudél Pitér, monen, “Là kóe na a móyô holob du kóm yóm tihu, Sér.” Bud mon Jisas se, “Ke là nolobu du yóm tihem, là kô uu du yóm tau lemolò do.” 9 Bud mon Simun Pitér, “Ke lómón se yó, Sér, béen són ti nolobem, homong nolobem sigelu ne kuluhu snéen.” 10 Ne bud mon Jisas mò du, “Yóm tau deng dyo, deng mólós ne. Geblaen ke olohen bud molob tihen. Deng ye gotu mólós ne kuy, okóm tek sotu bélê ye là mólósen.” 11 (Yó gónó Jisas mon du yóm yó, abay se deng eles tódô tngónen ne yóm tau angat mlay du sumóng.) 12 Timbow deng gotu kolob Jisas ti le, ominen bud lemsek yóm lafin nesen, ne bud mulék ebè yóm sana gónón myón. Ne snólóken lu, monen, “Deng glileb ye lanen kô nim nmou bélê ye ni koni? 13 Gel mon ye, ou se yóm gónó ye gel htolok, ne ou se gónó ye mogot. Tahu se yóm gel mon ye yó. 14 Ke ou se yóm gónó ye mogot ne yóm gónó ye htolok, ne ke ou yóm molob ti ye koni, hol bud gel sendalang ye se kuy yóm nmou yó. 15 Nim deng nmou bélê ye ni mò gónó ye dmalang du yóm keheglaan ye bè kem dumu ye. 16 Tódô tulónu kuy ktahuhen,” mon Jisas. “Là kóen geta senta amohen yóm tau hesek. Ne yóm tau gel dók, là kóen geta senta yóm tau mdók du. 17 Deng tngón ye ne ktahuhen nim monu mò kuy ni, bong kehligal ye ke nmò ye. 18 Là kô kdê ye du gónón e gbak nim monu ni. Tódô tngónu yó kem tau deng néléku. Okóm angat dohò yóm tehe hsulat Dwata, yóm monen, ‘Yóm tau dumuhu seyón mken, deng baling hohonen o.’ 19 Eles tulónu kuy nim ni,” mon Jisas, “anì yó, ke sok dohò sut, hentahu ye ne yóm deng tulónu kuy gbak bè yóm dou ktau. 20 Tódô tulónu kuy ktahuhen,” monen, “yó se tau hmódó yóm tau hógówu, hol lómón ke ou se yóm hnódóhen yó. Ne yó se tau hmódó dou, deng hnódóhen snéen yóm hógów do.”
Eles ktulón Jisas yóm tau matul du bè yó kem hmohon du
21 Kogol yóm kudél Jisas yó koni, ya tey sidek kegbeng lemen, monen, “Tódô tulónu kuy ktahuhen, sotu bélê ye bè ni matul dou bè yó kem hmohon do.” 22 Olo le tódô setngel yó kem gel lemolò du, là kô tngón le du ke mahi du bélê le gónón e gbak yóm tau mon Jisas yó. 23 Uma kóm myón klohok Jisas yóm sotu tau gel lemolò du, yóm kenbong nawahen. 24 Kmotuk ebéléen Simun Pitér, ne monen, “Snólókem béléen kun tau du gónón e gbak yóm monen yó.” 25 Tahu se, hloni ebè Jisas yóm sotu gel lemolò du yó, monen, “Tmau du de, Sér, yóm monem yó koni?” 26 Mon Jisas se, “Yó sem tau gónóhu e mogu yóm mambang deng duu lem sóbów ni kedeng, yó se yóm tau monu yó koni.” Ne nwa Jisas se yóm mambang, ne duen elem sóbów, ominen mogu du ke Judas, yóm ngà Simun Iskariyut. 27 Bè yóm kwa Judas yóm mambang ogu Jisas du, sen-gengen se husek ebéléen Seitan. Ne mon Jisas mò du, “Géhél nmoem ne yóm nmoem.” 28 Okóm balù sotu bè yó kem tau seyón bè lemisa ke gmileb du lanen yóm mon Jisas mò ke Judas yó. 29 Ofo kul mon du ke wen ken na a hebli Jisas ke Judas mò kul ken bè yóm mò ken yó, duhen ke wen nan e heblay du bè yó kem élél, abay se Judas se yóm fen gel mogot filak bélê le. 30 Timbow ken Judas yóm mambang ogu Jisas du, ominen yó hewà. Bede deng tey mget ne kifu.
Yóm lomi hlau
31 Bè yóm deng kehewà Judas, yó udél Jisas, monen, “Deng duhen ni ne yóm kdaw kehegfan Dwata yóm kegeta yóm Ngà Tau, ne angat gfan snéen yóm kun kegeta Dwata mlan béléen. 32 Sok gfan yóm kegeta Dwata mlan bè yóm Ngà Tau, kendel bud hegfan Dwata snéen yóm kun kegeta yóm Ngà Tau. 33 Là buden legen ne, kem ngau,” mon Jisas, “yóm knóu lem blóng ye. Angat hnebel ye ou, okóm bud tulónu kuy yóm tehe tulónu yó kem Ju wen glalen, là gógów ye edu se kuy yóm gónóhu e solu. 34 Ne ni,” monen, “wen lomi hlauhu kuy. Yó hlauhu kuy, hol ye sbong nawa. Lómón yóm dou kbong nawa kuy, bud lómón yó se yóm kuy kesbong nawa. 35 Bè yóm kesbong ye nawa, yó se gónó kdéen tau dmilô du yóm klolò ye do.”
Eles ktulón Jisas yóm angat kehlalà Pitér du
36 Ne mudél se ke Pitér, monen, “Gónóm tô e solu kut ni du, Sér?” Mon Jisas se, “Là kói na a gmung dou bè nim gónóhu e solu ni. Hulin kdaw he kektes ye do.” 37 Ne bud mon Pitér se, “Moen du, Sér, ke là glolou kóm ni? Munge kóm anien he ke tódô hamau yóm dou klowil.” 38 Bud bnalà Jisas Pitér, monen, “Tahu kô tô hamaem béléu kóm klowil? Tódô tulónu kóm ktahuhen, Pitér, gu laanen là deng kmóót onuk kifu ni, deng sana tlu dulékem ne hmalà yóm ketngónem do.”
Jisas yóm lan ebè Dwata
1 Ne yó bud mon Jisas mò kul, monen, “Hol bê ye hesbeweg kehedem ye. Snalig ye Dwata, ne snalig ye ou snéen. 2 Bè benwu Mà, tey dê gónô nô. Yó nógówu etu naw e hemtifes bélê ye gónó ye angat nô. Là kô tulónu du kuy nim ni ke là tahuhen. 3 Ke sok deng kehetifesu bélê ye gónô nô,” monen, “bude semfulék edini naw e nangay yu. Yó se dou gónô nô, yó se kuy gónô nô. 4 Deng tngón ye se yóm lan ebè yóm gónóhu e solu.” 5 Ne mon Tumas se kun, “Là kô tngón me du, Sér, yóm gónóm e solu. Mò tô ketngón me du se yóm lan du?” 6 Bud mon Jisas se, “Ou se yóm lan, ne ou se yóm ktahuhen ne yóm klowil laen dù sónen. Laen kô dù tau gógów ebè Mà ke là mlanen béléu. 7 Lemwót bè yóm deng ketngón ye do,” monen, “angat tngón ye se Mà. Nbuten ni ne deng ketngón ye du ne deng ton ye.” 8 Mon Filip se mò du, “Tolokem kum Maem, Sér, anì gsengel kegnóm me du.” 9 Mon Jisas se mò du, “Deng tey kegenu nô lem blóng ye, Filip, là deng tngón ye do he kô? Yó se tau deng mton do, deng tonen se Mà. Moen de ke monem, ‘Tolokem kum Maem?’ 10 Là hentahuhem du dilóu, Filip, yóm knóu bè Mà ne yóm knô Mà béléu? Yóm gel tulónu kuy, là kô lenbuu du, hono kun tulón Mà. Abay se yóm Mà, senflósen nô béléu, ne tódô nmoen yóm kun nmò. 11 Hol hentahu ye dé yóm knóu bè Mà ne yóm knô Mà béléu. Ke megewu nawa ye du nim tulónu kuy ni, hol hentahu ye dé lemwót bè yóm gel nmou. 12 Tódô tulónu kuy ktahuhen,” mon Jisas, “yó se tau hemtahu béléu, du tles bud gel mò du yóm dou gel nmò. Angat mkay senta ni he kem dou nmò yóm kun angat nmò abay se muléke ebè Mà. 13 Balù kihu hni ye bè Dwata hlan ye bè dou boluy,” monen, “tódô blayu kuy mò gónón megdóyón béléu Mà. 14 Kihu hni ye bè Dwata mlan bè dou boluy, tódô blayu kuy.”
Kfasad Jisas kul yóm Tulus Dwata
15 “Ke kenbong nawa ye o,” mon Jisas, “nimón ye sen yó kem dou hlau. 16 Angat wen hnihu bè Mà mò tles bud tmóbóng kuy, ne laen dù sónen yóm knóen bélê ye. 17 Duhen yó sem kun Tulus Dwata. Angat toloken kuy yóm hol ktahuhen lemwót bè Dwata. Yóm tau là hemtahuhen, là kô henmóyóen du kun yóm Tulus Dwata, abay se là kô tonen du, ne là se tngónen du. Okóm tngón ye kuy, abay se bélê ye tendo gónón nô, ne là kóen na a skó bélê ye. 18 Bè yóm kógówu ni, là kô tódô bayau kuy. Angate bud semfulék ebélê ye. 19 Móyón là bud ton le do ne kul yó kem tau là hemtahuhen,” mon Jisas, “okóm angat bud ton ye o yó dum kuy. Lemwót bè yóm bud klowilu, yó se gónó ye angat gmuta yóm klowil laen dù sónen. 20 Bè yóm kdaw bud kton ye do yó, tódô tngón ye yóm kessotu me Mà, ne angat tngón ye snéen yóm kessotu tekuy. 21 Yó se tau hemmóyô du yóm dou hlau ne mimón du, yó se yóm tau kembong nawa do. Ne angat kenbong nawa Mà snéen kun yóm tau kembong nawa do yó. Tey kbong nawahu du snéen dou, ne angate hegfan béléen.” 22 Mudél se Judas (sundu yó dum Judas ngà Iskariyut), monen mò ke Jisas, “Moen de, Sér, ke són bélê me gónóhem angat hegfan, fen là bè yó kem tau là hemtahuhen?” 23 Bnalà Jisas, monen, “Yó se tau kembong nawa dou, nimónen yóm dou tolok. Tey angat kbong nawa Mà du snéen kun, ne angat me tódô setnù béléen lewu me Mà. 24 Yó se tau là kembong nawa do, là kô nimónen du yóm dou tolok. Ne yóm gel toloku kuy ni, là kóen lemwót béléu. Hono lemwót bè Mà, yóm hógów do. 25 Deng eles tulónu kuy kdê ni kem ni yóm igou tolo nô bélê ye. 26 Angat hógów Mà ebélê ye yóm kun Tulus mò tlesu. Du se mò angat tmóbóng kuy. Gotu toloken kuy kdéen, ne angat hegbelen bè nawa ye yóm deng gel tulónu kuy. 27 Wen kenek nawa tebelu bélê ye. Hol lómón yóm dou kenek nawa nim tebelu bélê ye ni. Là kóen mkél bè yóm kul kenek nawa yó kem tau là hemtahuhen. Hol bê ye hesbeweg kehedem ye, ne bê ye se abay hlikò. 28 Deng tulónu kuy se yóm kwen gónóhu e solu ne yóm bud kesfuléku edini lem blóng ye. Ke kenbong nawa ye ou, kaem hyu nawa ye du yóm kógówu ebè Mà, abay se yóm Mà, tey mfasang sentahu. 29 Eles tulónu kuy nim ni gu laanen là deng sut, anì là megewu nawa ye du sok sut. 30 Là buden hol legen ne yóm kestulón tekuy, abay se móyónen sut ne Seitan, yóm fen mogot klamangen. Laen kô dù kfasangen béléu kun. 31 Okóm nim nmou ni, tódô nmou yóm kóyô Mà béléu anì tngón kdéen tau lem benwu yóm kbong nawahu du. Yó ne,” monen, “lemwót tekuy ne.”
Jisas yóm hol tahu hulu lemfà mungu
1 Bud mon Jisas, “Lómón ke ou yóm hol tahu hulu, ne Mà yóm fen semgyok du. 2 Ket hangahu là munguhen, sal ntoken. Ne ket hangahu mungu, sal gel hen-gifaten anì hol temnù kbunguhen. 3 Deng ye mefgifat ne kuy mlan bè yóm deng toloku kuy. 4 Hol ye henek béléu, ne heneke se bélê ye. Yóm hanga, là kóen mungu ke són du, ke là mtegen bè lówóhen. Senged se kuy, là kô ye mungu ke là henek ye béléu. 5 Ou se yóm hulu lemfà ne yu hangahen. Yó se tau henek béléu, heneke se béléen do, ne angat tey kbunguhen. Okóm ke là henek ye béléu, laen kô dù gmò ye. 6 Yóm tau ke là heneken béléu, lómón ke hanga ntok tódô hgasà, hlós mékéng. Gotu sentifun le lu, omin le mbot kul elem ofi, ne gotu mlób. 7 Okóm ke henek ye béléu ne ke tendo nô bè nawa ye udélu, balù kihu hni ye bè Dwata guta ye. 8 Yó gónón megdóyón Mà ke hol ye mungu, ne yó se gónón gdilô yóm klolò ye do. 9 Yóm kbong nawahu kuy, hol lómón yóm kbong nawa Mà do. Hol ye henek bè yóm kbong nawahu kuy. 10 Ke nimón ye yóm dou hlau, yó se gónó ye henek bè yóm kbong nawahu kuy. Lómón yóm kimónu yóm hlau Mà, ne kheneku bè yóm kbong nawahen do. 11 Yó gónóhu eles tmulón du kuy nim ni,” mon Jisas, “anì gnóm ye yóm dou kligal, ne anì hol gsengel nawa ye du yóm kligal ye yó. 12 Ni hlauhu kuy, hol ye sbong nawa lómón yóm dou kbong nawa kuy. 13 Yóm tau ke hamaen klowilen bè kem ween, laen kô gemsenged du yóm kbong nawa yó. 14 Weu yu ke nimón ye yóm hlauhu kuy. 15 Là bud bnoluyu kuy tau dók, abay se yóm tau dók, là kô tngónen du kun yóm nmò yóm gónón mogot. Okóm bnoluyu yu wè, abay se deng gotu hetngónu kuy kdê yó kem deng gungolu gu bè Mà. 16 Là kô yu du mélék do, ou se fen mélék kuy. Yó gónóhu mélék kuy mò hógówu anì hol ye mungu, yóm kbungu laen kô dù tul sónen. Ke ni se nmò ye, balù kihu hni ye bè Mà mlan bè dou boluy, tódô blayen kuy. 17 Duhen ni, wen hlauhu kuy, hol ye sbong nawa.”
Kutó nawa le kul yó kem tau là hemtahuhen
18 Bud mon Jisas mò kul, “Bê ye tennga yóm kutó nawa le kuy yó kem tau là hemtahuhen. Tódô tngón ye se deng gegna yóm kutó nawa le do. 19 Ke nmung ye yóm kul kehedem, là kô knutó nawa le kuy. Okóm ni, tólóng ne kuy kehedem lemwót bè yóm deng kéléku kuy, là bud ye gmung bélê le ne. Yó se lewót gónó le kmutó nawa kuy. 20 Hol hentulón ye nawa yóm tehe monu mò kuy,” mon Jisas. “ ‘Yóm tau gel dók, là kóen geta senta yóm tau mdók du.’ Ke deng hensidek le o, angat hensidek le yu se kuy. Ke deng nimón le yóm toloku, angat nimón le se yóm kuy tolok. 21 Angat hensidek le yu lemwót bè yóm klolò ye do, abay se là tngón le du yóm hógów dou. 22 Ke là denge sut lem blóng le, ne tmolok bélê le, là kô na a duón Dwata du kul yóm salà le yó. Okóm ni, laen kô dù bud lasun le ne. 23 Yóm tau kmutó nawa dou, knutó nawahen Mà snéen. 24 Ke là se deng nmou du lem blóng le yó kem hentaw ton là deng hnikót gel nmò kem tau du, là kô duón Dwata du kul yóm salà le yó. Okóm ni deng gotu ton le, deng mom knutó nawa le o lewu me Mà. 25 Ni se deng kdohoen yóm tehe monen bè sulat Dwata, yóm monen, ‘Tódô knutó nawa le ou là duón.’ ” 26 Bud mon Jisas, “Wen angat hógówu ebélê ye lemwót bè Mà mò tmóbóng kuy, duhen yóm Tulus Dwata. Du se angat tmolok du kuy yóm ktahuhen lemwót bè Dwata. Ne angat wen tulónen bè yóm dou kmò. 27 Dalang se kuy, angat wen tulón ye lemwót bè dou kmò, abay se deng ye nô béléu lemwót bè yóm kbut ktoloku.”
1 “Ni se gónóhu eles tmulón du kuy ni kem ni,” mon Jisas, “anì là gtebel ye du yóm kehtahu ye béléu. 2 Angat là bud hmung le kuy bè yó kem gónó ye gel stifun. Angat wen kdaw le hmatay kuy yó kem tau. Ofo kul mò du yóm yó, ke yó yóm hyu bè Dwata. 3 Yó gónó le angat mò du bélê ye ni kem ni, abay se là tngón le ke Mà, ne là tngón le do snéen. 4 Eles tulónu kuy ni kem ni anì yó, là hentaw ye du ke sok sut yóm kdaw kmò le du bélê ye.”
Kun nmò yóm Tulus Dwata
Bud mon Jisas, “Là kô deng tehe tulónu du kuy ni kem ni, abay se tolohe nô bélê ye. 5 Okóm ni ne, bude mulék ebè yóm tehe hógów do. Bede là kô deng wen bélê ye smólók du yóm gónóhu e solu. 6 Mo ye mom hebang nawa lemwót bè yóm ktulónu du kuy ni kem ni. 7 Okóm tódô tulónu kuy ktahuhen,” mon Jisas. “Tey hyu bélê ye nim kuléku ni. Ke là muléke, là kóen angat sut bélê ye yóm mò tmóbóng kuy. Okóm ke muléke, yó he khógówu du edini bélê ye. 8 Ke sok sut,” mon Jisas, “angat gotu hdilóen kem tau là hemtahuhen yóm kegsalà le. Ne angat hdilóen kul snéen yóm lan tedeng, ne bud hdilóen kul se yóm angat ktafak Dwata kul. 9 Yó salà hdilóen bélê le, duhen yóm là kehtahu le béléu. 10 Hdilóen kul snéen yóm lan tedeng, duhen ni sem kuléku ebè Mà, ne là bud ton ye do ne. 11 Angat hdilóen kul snéen yóm angat ktafak Dwata kul. Ngem yóm Seitan, yóm fen mogot klamangen, deng eles nô tahen ne tuled Dwata du. 12 Tey dê he tô nóyô tulónu kuy,” mon Jisas, “okóm là dog tulónu du ne, déke mom temnù yóm ksidek kegnóm ye du. 13 Ke sok sut yóm Tulus Dwata, gotu hetngónen kuy yóm ktahuhen lemwót gu bè Dwata. Laen kô dù là hetngónen du kuy. Ne laen kô dù lenbù tulónen. Són olo tulónen yóm deng gungolen gu bè Mà. Ne hetngónen kuy se yóm angat sut hulin kdaw. 14 Angate megdóyón bè yóm kun nmò yóm Tulus Dwata,” mon Jisas, “abay se sal gel lemwót béléu yóm gel tulónen kuy. 15 Yóm tulón lemwót bè Mà, bud yó se yóm tulón lemwót béléu. Yó se gónóhu mon du mò kuy, sal gel lemwót béléu yóm gel tulónen kuy yóm Tulus Dwata.”
Bud mulék kligal yóm klangag ye
16 “Là buden legen ne kton ye do,” mon Jisas. “Okóm là kóen legen bud ton ye o.” 17 Ne wen bè yó kem gel lemolò du stulón són lu, mon le, “Tedu de lanen yóm monen, ‘Là buden legen ne yóm kton ye do. Okóm là legenen bè yó, bud ton ye o’ ne yóm sotu gel monen, ‘Abay se muléke ebè Mà.’ 18 Ne tedu se lanen yóm monen, ‘là legenen’ là tngón tekuy du gónón e temnef yóm monen yó.” 19 Okóm tódô tngón Jisas yóm tô snólók le béléen, yó gónón mon du mò kul, “Yó kô sentulón ye yóm monu yó koni, ‘Là buden legen ne yóm kton ye do, okóm là legenen bud ton ye o’? 20 Tódô tulónu kuy ktahuhen,” monen, “angat tey sidek kedlumu ye mkik, okóm fen le hligal kul yó kem tau là hemtahuhen. Angat tey sidek klangag ye, okóm bud mulék kligal yóm klangag ye yó. 21 Hol lómón yóm libun sut blututen. Tey sidek kegnómen du yóm hanà lelen kmuleng yóm ngaen. Okóm ke deng sut yóm ngaen, klifóten ne yóm ksidek kegnómen du, ne bud hligal lemwót bè yóm ngà lomi sut lem benwu. 22 Senged se kuy, tolo ye langag ni kmoen ni. Okóm sok tekuy bud ston, bud wen tey kligal ye. Ne laen kô dù tau gembek mkó du bélê ye yóm kligal ye yó. 23 Bè yóm kdaw yó, là bud wen hni ye béléu ne. Tódô tulónu kuy ktahuhen,” mon Jisas, “balù kihu hni ye bè Mà hlan ye bè dou boluy, tódô blayen kuy. 24 Efet ni ne, laen deng hni ye bè Dwata he ke hlan ye bè dou boluy. Mni ye dé, kaem tódô blayen kuy anì hol gsengel yóm kligal ye.”
Katù Jisas bè yó kem tau là hemtahuhen
25 Ne yó bud mon Jisas mò yó kem gel lemolò du, monen, “Ni kem tulónu kuy ni, sal gel hningónu. Okóm angat wen kdawen, là kô bud hningónu du yó kem toloku kuy. Tódô benkasu bélê ye yóm tulón lemwót gu bè Mà. 26 Ke sok kól yóm kdaw monu yó, angat wen se kuy hni bè Mà hlan ye bè dou boluy. Là bud ou du ne blóng ye ebè Mà, 27 abay se yóm Mà kun, kenbong nawahen yu snéen lemwót bè yóm kbong nawa ye do, ne lemwót bè yóm kehtahu ye yóm kewótu gu béléen. 28 Tahu se, lemwóte gu bè Mà, ne mógówe edini lem benwu. Ne ni, naw tnagak yóm benwu ni, bude mulék ebè Mà.” 29 Ne mon yó se kem gel lemolò du, “Yó dé mdengen kestulónem kum, là bud hningónem du. 30 Ni ne,” mon le, “deng tngón me laen dù là tngónem du, abay se deng tódô eles tngónem yóm tô snólók me. Ni se gónó me hemtahu du yóm kewótem gu bè Dwata.” 31 Mon Jisas se, “Deng ye hemtahu ne kô? 32 Ngem, angat wen kdawen, ne kbuten du ni ne, gotu kesekla ye, ket tau mulék ebè kun gónô. Angat tódô sentagak ye o tek sotuhu. Okóm là tek sotuhu du, Mà se dumuhu. 33 Yó gónóhu eles tmulón du kuy ni kem ni anì lemwót bè yóm kessotu tekuy gónón wen kenek nawa ye. Angat tey wen gónó ye glayam lemwót bè yó kem tau là hemtahuhen,” mon Jisas, “okóm bê ye abay hlikò, abay se denge matù bélê le.”
Yóm kni Jisas bè Dwata bè yó kem tau gel lemolò du
1 Timbow deng kudél Jisas, ominen temngel ebè longit, monen, “Ó Mà, deng dohò ne yóm kdaw tehe oluhem etahu. Hol dóyónem yóm kóm Ngà anì bud dóyónen se uu kun. 2 Deng hkamalem yóm Ngaem yóm kdéen tau talak tonok anì wen klowil laen dù sónen blayen bè yóm kdéen tau deng blayem du. 3 Ni se hol lanen yóm klowil laen dù sónen monu yó, duhen yóm deng ketngón le kóm, yóm tahu Dwata, ne yóm deng ketngón le dou, Jisas Krays, yóm deng hógówem elem benwu. 4 Deng hegfanu bè ni ne talak tonok yóm tey kegetahem. Deng gotu deng ne yóm hmoem do. 5 Ne ni, Mà, bud hegetahem o bè soluhem, lómón yóm tehe kegetahu dyó ekni gu laanen là deng wen benwu he. 6 Deng hetngónu ne, Mà, yóm kóm kmò bè yó kem tau deng blayem do lem nim benwu ni. Hono kem kóm tau se yó kem tau yó, ne deng blayem do. Gotu nimón le se yóm kóm udél. 7 Ne ni, deng gotu tngón le ne kdê yó kem nmou lem blóng le, sal lemwót gu béléem. 8 Deng gotu tulónu kul yóm tulón lemwót gu béléem, ne deng gotu henmóyô le se. Tngón le yóm kewótu gu dyó béléem, deng hentahu le yóm khógówem dou. 9 Mnihe béléem, Mà, hol tnóbóngem lu. Là homong hnihu kul yó du kem dumu tau là hemtahuhen. Okóm són bè yó kem tau deng blayem do, abay se sal kem kóm tau yó kem yó. 10 Kdê yó kem dou tau, hono kóm. Ne kdê yó kem kóm tau, hono do snéen. Ne bélê le gónón gfan yóm kegetahu. 11 Ne ni, bude mulék ebéléem. Móyón tnagaku ne dou nim benwu ni, okóm yó kem tau deng blayem do yó, tolo le tebel bè ni lem benwu. Uu se, Mà, yóm laen dù belenen. Mnihe béléem anì hol kenlungem lu hlanem bè yóm kóm boluy alì mfasang, yóm boluy tehe blayem do. Tnóbóngem lu anì baling ssotu nawa le lómón yóm kut kessotu nawa. 12 Yóm klawihu nô lem blóng le, tey tendo keklungu kul lemwót bè yóm kóm boluy alì mfasang, yóm boluy tehe blayem do. Deng gel nofinu lu, ne laen kô dù lana bélê le, tek sotu hebkas bélê le, són yóm tau deng tehe eles golu elem tafak. Yó se deng gónón dohò yóm tehe hsulatem ekni. 13 Ni, Mà, móyóne mulék ebéléem. Ni se yóm hnihu béléem bè yóm tolo knóu dini ni anì hol gsengel kligal le ni kem dou tau, lómón yóm dou kligal. 14 Deng gotu toloku kul, Mà, yóm kóm udél. Ne deng mom knutó nawa le lu yó kem tau là hemtahuhen, abay se là bud nmung le du yóm kul kehedem, lómón yóm dou là kmung du. 15 Là hnihu du béléem, Mà, ke kóhem lu lem benwu. Okóm yó hol hnihu béléem anì kenlungem lu bè Seitan. 16 Là bud nmung le du ne yóm kul kehedem yó kem tau là hemtahuhen, lómón yóm dou là kmung du. 17 Hol hólósem lu mlan bè yóm ktahuhen. Yóm udélem se yóm hol ktahuhen. 18 Deng hógówem ou elem benwu. Bud lómón yó se khógówu kul bè yó kem tau elem benwu mò tmolok bélê le. 19 Hogotu kóm yóm do klowil mò lanu tmóbóng kul, anì hogot le kóm se yóm kul klowil. 20 Là olon du bè ni kem tau lemolò do ni gónóhu mni béléem, Mà, okóm utómu snéen yó kem tau angat hemtahu béléu lemwót bè yóm ktolok le. 21 Hol hnihu béléem anì sensotuhem kehedem le, Mà, yóm kdê le, lómón yóm kut kessotu nawa, ne anì tódô gotu ssotu kehedem tekuy. Duhe kóm, sok ton yó kem tau là hemtahuhen yóm kessotu nawa yó, hentahu le yóm khógówem dou elem benwu. 22 Deng blayu kul yóm kegeta tehe blayem dou. Yó se gónón wen kessotu nawa le lómón yóm kut kessotu nawa. 23 Tendohe gel nô bélê le se dou, ne tendohi gel nô béléu se kóm anì hol ssotu nawa le, ne anì dilô yó kem tau là hemtahuhen yóm khógówem dou, ne dilô le snéen yóm kbong nawahem kul yó kem tau hemtahu béléu lómón yóm kbong nawahem do. 24 Ni kem tau deng blayem dou ni, Mà, yó hol kóyóu ke nô le béléu bè yóm dou gónó angat nô. Kóyóu ke hol ton le yóm kegeta deng tehe blayem do lemwót bè yóm tey kbong nawahem do gu laanen là deng wen benwu he. 25 Tek sónen uu, Mà, yóm hol tedeng knawahen. Là deng tngón le kóm he yó kem tau là hemtahuhen, okóm tngónu uu dou. Ne ni kem tau deng blayem do ni, deng tngón le ne kul yóm khógówem do. 26 Deng hetngónu kul se yóm kóm kmò, ne henlelu he mò du anì hol le sbong nawa lómón yóm kut kesbong nawa, ne anì tendohe gel nô bélê le se dou.”
Kekfô le ke Jisas
1 Timbow deng kni Jisas bè Dwata, ominen lemwót, mung le du yó kem gel lemolò du. Nifal le yóm ngà él boluyen Kidron. Wen ngà hungul koyu bè yó gónó le e solu. 2 Okóm ke Judas, yóm tau mlay ke Jisas sumóng, deng eles tngónen yóm gónó le nô yó, abay se deng dê dulék Jisas gel semtifun yó kem gel lemolò du bè yó. 3 Ne tódô lemwót se Judas mógów ebè yó, nalaken yó kem tey sendalù wen, hono tau lemwót bè Rom. Mung kul yó kem tau gel mentey bè Gónô Dwata hógów yó kem tau hol geta bè yó kem gel demsù ebè Dwata ne yó kem Farisi. Gotu le mit ngom sfatay, ne bud le mit solok. 4 Deng eles tngón Jisas yóm angat nmò le béléen, yó gónón semlong kul, ne snólóken lu, monen, “Tau du hnebel ye ni?” 5 Mon le se, “Jisas lemwót bè Nasarit.” Mon Jisas se, “Ni se ou.” Mdà lem blóng le Judas, yóm tau mlay du sumóng. 6 Timbow gungol le yóm kmon Jisas du, “Ni se ou,” botong le gotu ghudul semfulék, ne gotu le tegyón. 7 Bud snólók Jisas lu, monen, “Tau du hnebel ye?” Bud mon le se, “Jisas lemwót bè Nasarit.” 8 Ne bud mon Jisas se, “Deng tulónu kuy, Ni se ou. Ke ou se hnebel ye, na ye hewót lu ni kem tau mung dou.” 9 (Yóm udél Jisas yó koni gónón dohò yóm tehe udélen ebè Maen, yóm kmonen du, “Laen kô dù lana bélê le, Mà, yó kem tau blayem dou, balù sotu.”) 10 Lemwót Simun Pitér, tódô dmilot sudeng, ne tódô nlaf tnibóhen klingu kwanan yóm sotu tau boluyen Malkus, sotu gel dók yóm hol geta bè yó kem gel demsù ebè Dwata. 11 Okóm mon Jisas mò ke Pitér, monen, “Tenesem lem lumaken sudengem. Ilóem kmonem ke là gbeku hembala du nim hlayam hlan Mà tahu ni?”
Kehdà le ke Jisas bè solu Anas
12 Omin le kemfô ke Jisas yó kem sendalù lemwót bè Rom, mung kul yóm kfitan le, ne yó kem Ju gel mentey bè Gónô Dwata. Nfét le Jisas. 13 Ne hegna nwit le ebè Anas, yóm tuón Kyafas. Yóm Kyafas ni, du se hol geta bè yó kem gel demsù ebè Dwata bè yóm halay yó. 14 Ni se yóm Kyafas tehe mon du bè yó kem dumuhen Ju wen glalen, monen, “Mom hyu nawa ye ke sotu matay bélê ye olo ke tô matay yóm kdéen tau.”
Kehlalà Pitér ke Jisas
15 Bè yóm kwit le ke Jisas ebè Anas yó koni, wen lewu bè yó kem gel lemolò du huli du, Simun Pitér ne yóm sotu gel lemolò ke Jisas. Yóm sotu gel lemolò ke Jisas yó, deng hónô tngón yóm tau hol geta bè yó kem gel demsù ebè Dwata. Yó gónón tódô mung ke Jisas elem labat yóm lósól yóm tau hol geta yó. 16 Okóm ke Pitér kun, tebel bè lewà yóm bak tikeb. Lemwót yóm sotu gel lemolò ke Jisas, bud mulék ebè yóm bak tikeb, mudél ebè yóm ngà libun mentey bè yó anì hfuseken elemen Pitér. 17 Tahu se, husek Pitér. Ne mon yóm ngà libun mò du, “Lómón tô uu sotu tau gel lemolò du yóm tau kenfô le yó koni?” Bnalà Pitér se, monen, “Là. Sundu ou du.” 18 Bè yóm kifu yó, tey tnaw. Yó nmò yó kem tau gel mò nmò bè yó dalang se yó kem tau gel mentey, ma le using mò snuk ofi, omin le hembong ofi mò gónó le mnalang. Gotu le mdà hilolen. Gbót mdà lem blóng le se ke Pitér na a mnalang. Ksólóken ke Jisas yóm tau hol geta bè yó kem tau gel demsù ebè Dwata 19 Bè yóm kdà Jisas bè solu Anas, gotu snólók Anas béléen yó kem tau gel lemolò du dalang se yóm gel toloken. 20 Bnalà Jisas se, monen, “Bè yóm gel ktoloku, sal gele tmolok bè gónón wen. Gele tmolok bè yó kem gónó le gel stifun yó kem tau, duhen bè yó kem gónó le gel stifun yó kem Ju ne bè yóm Gónô Dwata. Laen kô dù bnosu. 21 Moen ke snólókem béléu yóm gel toloku? Tódô snólókem yó kem tau gel hmungol dou. Snólókem lu ke tedu yóm gel tulónu kul. Kaem gotu tngón le.” 22 Bè yóm kbalà Jisas ke Anas yó koni, sotu bè yó kem tau gel mentey temfê ke Jisas bè hifihen, monen, “Yó kô kbalaem du yóm hol geta bè yó kem gel demsù ebè Dwata?” 23 Mon Jisas se, “Ke sidek balau du, tulónem bè kdéen tau bè ni yóm ksideken. Okóm ke tahu yóm benkóhu, boluy se duónem temfê do?” 24 Timbow deng ksólók Anas ke Jisas, ominen hemwit du igoen tolo nfét ebè Kyafas, yóm hol geta bè yó kem gel demsù ebè Dwata.
Bud kehlalà Pitér ke Jisas
25 Okóm ke Pitér tolo lelen mnalang. Wen bè yó kem dumu tau mdà bè yó smólók du, monen, “Lómón tô uu yóm sotu bè yó kem gel lemolò du yóm tau kenfô le yóó?” Mon Pitér se, “Là. Sundu ou du.” 26 Okóm mudél yóm sotu tau gel dók yóm hol geta bè yó kem gel demsù ebè Dwata. Du se sotu dumun setwoli Malkus, yóm tau le senfak Pitér klinguhen. Monen mò ke Pitér, monen, “Lómón tô tonu uu slomong du tum tau tuu ditu bè yóm ngà hungul koyu.” 27 Okóm bud hnalà Pitér, ne tódô sen-gengen se kmóót onuk.
Kehdà le ke Jisas bè solu yóm gubérnor lemwót bè Rom
28 Hol mwas bè yó se, nit le Jisas lemwót bè gónô Kyafas mógów le ebè gónô bong yóm gubérnor. Okóm kul yó kem Ju wen glalen yó, là hyuhen bè kul hlau ke husek le bè gónô yóm tau là Juhen. Ke yó tô nmò le, là bud le mólós kun, ne là kô le gemken bè yóm mò ken le bè Kdaw Khius. 29 Yó nmò Gubérnor Paylét, hewà ebélê le, ne snólóken bélê le, monen, “Tedu duón ye du tau ni?” 30 Ne mon le se, “Ke là sidek nmoen nim tau ni, là kô nit me du ebéléem.” 31 Ne mon Paylét se, “Tódô nwit ye ne, ne tódô yu kmukum du, hlan ye bè kuy hlau.” Bud mon le se, “Laen dù kwalis me hmatay tau kum.” 32 (Yóm udél le yó deng gónón dohò yóm tehe eles ktulón Jisas du yóm kmò angat katayen.) 33 Bud husek elem gónô bongen Paylét, htabahen Jisas, snólók Paylét béléen, monen, “Uu kô tau hol geta bè yó kem Ju?” 34 Wen se snólók Jisas, monen, “Lemwót bè kóm kehedem kô yó, duhen ke wen tau tmulón du kóm?” 35 Bnalà Paylét se, monen, “Tauhe Ju kô dou du? Hono kem kóm dumu Ju se yóm mit kóm edini ni, dalang se yó kem geta bè yó kem gel demsù ebè Dwata. Tedu de deng nmoem?” 36 Bnalà Jisas se, monen, “Yóm benwu dou nogot, sundu benwu te tonok du. Ke ni se yóm dou benwu nogot, nofin le o yó kem tau nogotu anì là kenfô le do yó kem Ju wen glal le yó. Là kô na a ni du yóm benwu dou nogot.” 37 Mon Paylét se, “Ke lómón se yó, tauhi hol geta kô?” Bud mon Jisas se, “Tahu se yóm monem yó, tauhe hol geta. Yó se gónóhu sut lem benwu ne hbaling tau anì naw e tulón yóm hol ktahuhen. Yó se tau móyô lemolò yóm ktahuhen, yó se yóm tau móyô hmungol yóm dou tulón.” 38 Mon Paylét se, “Tedu de yóm ktahuhen.”
Tódô hatay yóm kukum le ke Jisas
Omin Paylét bud hewà ebè yó kem Ju, monen mò kul, “Laen kô dù salà tonu béléen dou nim tau ni ke mò gónóhu hmatay du. 39 Bè sana kuy gel adat bè Kdaw Khius,” monen, “sal sotu tau bnanggù gel hewau bélê ye. Móyô ye kô ke hewau bélê ye yóm tau hol geta bélê ye yu kem Ju?” 40 Deng le mom gotu hetê yó kem tau, mon le, “Béem hewà yóm tau yó. Barabas dé hewaem.” (Nim Barabas ni, sotu tau gel mulé udin.)
1 Omin Paylét na habid hfes ke Jisas. 2 Timbow deng kfes le du, omin yó kem sendalù lemikin yóm sotu kay tinu semnual mò nmò le kuruna suub le bè kulu Jisas. Ne hesek le du yóm nes ginggung, hningón nmò le tau hol geta. 3 Hloni le ebéléen, ne mon le, “Ni sii yóm tau hol geta bè yó kem Ju. Yake hol tahà klowilen.” Lel le temfê lem uyóhen. 4 Bud hewà bè yó Paylét, monen mò yó kem tey tau wen sbung bè yó, “Ngem bud nitu hewà ebélê ye tum tau tu koni anì tngón ye laen kô dù salà tonu béléen ke mò gónóhu hmatay du.” 5 Omin Jisas bud hewà, nô bè kuluhen yóm sual lenikin le yó, ne leseken se yóm nes ginggung. Mon Paylét mò kul, “Ngem, ni sii yóm tau yó.” 6 Timbow ton le Jisas yó kem tau hol geta bè yó kem gel demsù ebè Dwata ne yó kem tau gel mentey bè Gónô Dwata, gotu le hetê, mon le, “Htutukem bè kros dé. Htutukem bè kros.” Mon Paylét se, “Ke tnutuk ye bè kros, tódô yu mò du, laen dù dou du. Laen se dù salà tonu béléen ke mò gónóhu hmatay du.” 7 Bnalà yó kem tau, mon le, “Wen hlau bélê me deng nuléhen nim tau ni, bè yó se gónón matay. Abay se deng bnoluyen knóen Ngà Dwata.” 8 Deng mom temnù klikò Paylét deng nan e gungol yóm mon le yó. 9 Tódô bud husek elem gónóen, ne bud snólóken Jisas, monen, “Tedu de hol gónóm gu lemwót?” Okóm là dog bnalà Jisas du. 10 Mon Paylét, “Moen de ke là bnalaem do? Là tngónem du kô yóm kwen kwalisu hewà kóm, ne yóm kwen kwalisu htutuk kóm bè kros?” 11 Mon Jisas se, “Laen kô dù kwalisem béléu ke là deng blay Dwata du kóm. Yó gónóm mon, bong salaen sentahem yóm tau heted do ebéléem.” 12 Bè yóm kungol Paylét du yóm udél Jisas yó, tey bud tô óyóen hewà du. Okóm deng mom lenwê le hetê yó kem tau, mon le, “Ke hewaem nim tau ni, là kô ye bud swè Sisar, yóm tau hol geta bè Rom. Ke wen tau tô hbaling tau hol geta, natuen Sisar yóm tau yó.” 13 Timbow gungol Paylét yóm mon le yó koni, ominen bud mit ke Jisas hewà, ne myón bè yóm bangkù gónón gel hemdeng knukum, yóm bnoluy le “Sneel Botu.” (Yó boluyen bè udél Hibru, “Gabata.”) 14 Bè yóm kehdeng Paylét du yóm kkukumen ke Jisas, deng móyón gtungu kdaw ne bè suluk yóm Kdaw Khius. Omin Paylét bud mon du mò yó kem tau, “Ni se yóm tau hol geta bélê ye.” 15 Omin le gotu bud hetê, mon le, “Hfatayem. Hfatayem. Htutukem bè kros.” Mon Paylét se, “Htutuku bè kros kô yóm tau hol geta bélê ye?” Mon le se, “Laen kô dù tau hol geta bélê me són Sisar.” 16 Tahu se, tódô hlus Paylét ebélê le Jisas anì na le e htutuk bè kros.
Khatay le ke Jisas
17 Kewót le bè yó, nwit le Jisas, tódô htihang le du yóm kun kros. Nwit le ebè yóm benwu boluyen “Bangag Kulu.” (Yó boluyen bè udél Hibru, “Golgata.”) 18 Ne bè yó gónó le tmutuk ke Jisas bè yóm kros. Lewu tau homong tnutuk le, sotu hteg le fi bè iwóngen, sotu se fi bè kwananen. 19 Wen snulat Paylét dket le senta kulu Jisas bè yóm kros. Yó snulaten, monen, “Jisas lemwót bè Nasarit, Tau Hol Geta bè yó kem Ju.” 20 Tey dê tau semfala du yóm snulat Paylét yó abay se moni bè Jirusalim gónó le tmutuk ke Jisas. Snulaten bè udél Hibru, ne bè udél Latin, ne bè udél Grik. 21 Mon le mò ke Paylét yó kem tau hol geta bè yó kem gel demsù ebè Dwata, mon le, “Béem snulat, ‘Tau Hol Geta bè yó kem Ju.’ Monem dé, ‘Ni mon nim tau ni, Ou hol tau hol geta bè yó kem Ju.’ ” 22 Mon Paylét se, “Yóm deng snulatu, deng duhen yó.” 23 Timbow deng ktutuk le ke Jisas bè kros, lemwót yó kem sendalù, na le yóm nes Jisas, omin le semsólól du ket kul na sotu yóm fat le. Okóm là homong le du yóm nes tahà fi bè lówóhen. Yóm nes fi bè lówóhen yó, laen kô dù gónó semtbé du, abay se tódô mung bè tehe kewel du. 24 Stulón le, mon le, “Bê tekuy abay dnóló. Tódô sensatù tekuy dé anì tngón mahi du bélê tekuy gemwa du.” Bè yóm kessólól le nes Jisas yó deng gónón dohò yóm deng tehe eles snulat le bè Sulat Dwata, yóm monen, “Gotu sensólól le nesu, ne sensatù le nes tahau.” Ne tahu se, yó se nmò yó kem sendalù. 25 Ne bè yó klohok yóm kros Jisas gónó le mdà le yéen, ne yóm twoli yéen, ne Midi yehen Klupas, ne yóm sotu Midi lemwót bè Megdala. 26 Ton Jisas yéen, sedà le yóm sotu tau gel lemolò ke Jisas, yóm kenbong nawahen. Mon Jisas mò ke yéen, “Ó Yê, yó dé ngaem.” 27 Ne bud monen se mò yóm tau gel lemolò du yó koni, monen, “Yó dé yéem.” Tahu se, tódô nbuten bè yó ne knô Yê Jisas bè gónô yóm sotu tau gel lemolò ke Jisas yó.
Katay Jisas
28 Tódô tngón Jisas se deng gotu deng ne yóm kdéen, ne yó monen, “Meenge.” Yó gónón mon du yóm yó, mò gónón dohò yóm tehe hsulat Dwata. 29 Ne wen lebwón eles myón bè yó, nô lemen yóm kul gel ninum là mebtesen. Omin le ma yóm lómón tô gófós, ne leneb le lem yóm ninum le yó, ne sù le bè tfod yóm tinu hisop, omin le dmugol du ebè Jisas mò nsefen. 30 Timbow deng ksefen du, ominen mon du, “Deng gotu deng ne kdéen.” Ominen hetngù, ne milot se nawahen.
Kdek le ke Jisas buyus bè klabihen
31 Yóm kdaw yó, suluk yóm sotu Kdaw Kehegnô alì bong muhen bè yó kem Ju. Là móyô le du yó kem Ju wen glalen ke gafit yóm kdaw yó yóm ketléwéng lówó yó kem tau deng htutuk le bè kros. Yó gónó le na a smólók du bè Paylét ke hyu na a hetfok ti le yó kem tau tléwéng bè yó anì géhél nwa le lu elaan. 32 Tahu se, hlus Paylét lu. Lemwót yó kem sendalù na le e tenfok ti yóm sotu tau tléwéng bè yó klohok Jisas. Ne senged se yóm sotuhen homong hnatay le. 33 Okóm timbow le kól bè Jisas, ton le deng matay, ne là kô dog tenfok le du yóm kun ti. 34 Okóm wen sotu sendalù mdek buyus bè klabihen, tódô sen-gengen se msut litóen ne él. 35 (Yóm tau tmulón du nim ni, deng hol tógó matahen mton du, ne hono tahu yóm tulónen. Yó gónón tmulón du anì hemtahu ye se kuy.) 36 Bè yóm là ketfok le ti Jisas yó deng gónón dohò yóm tehe hsulat Dwata, yóm monen, “Laen kô dù angat tenfok le bè yó kem tiolen.” 37 Ne yóm sotu tehe snulat le, yóm monen, “Angat sentngel le yóm tau ndek le buyus.”
Kebeng le ke Jisas
38 Kogolen bè yó, wen sotu tau sut boluyen Jusif, lemwót bè Arimatiya. (Du se yóm sotu tau bunihen yóm kloloen ke Jisas, abay se likò bè yó kem dumuhen Ju wen glalen.) Yó nmoen, tódô mógów ebè Paylét ne snólóken béléen ke hyu nan e kekas lówó Jisas. Tahu se, hlus Paylét du. Ne lemwót etu Jusif nan e lenkas lówó Jisas. 39 Bè yóm kógów Jusif yó, mung du Nikudimus, yóm tau tehe mógów ebè Jisas kifu. Wen nwiten yó kem alì tilob boohen deng eles senboolen boluyen mira ne alus, wen dô limu folò kilu keblaten. 40 Omin le ma yóm lówó Jisas, ne baus le du yóm nes bukay, mung du yó kem alì tilob boohen yó koni. Yó se sana kul adat yó kem Ju bè kebeng le. 41 Wen ngà hungul koyu moni bè yóm gónó le hmatay ke Jisas yó, ne wen kilib lomi nokol le bè but yóm léhék mò gónó le gel lembeng, bede laen deng tau lebeng le bè yó he. 42 Ne tódô bè yó se gónó le lembeng ke Jisas, abay se moni, ne móyón nbut le yóm Kdaw Kehegnô.
Klowil Jisas
1 Timbow hanà minal mwas bè Akad, lemwót yóm sotu Midi lemwót bè Megdala na a mógów ebè lebeng Jisas. Bè yóm kkólen ditu, tódô tonen yóm bak lebeng deng mom sana hnas, là buden nô du yóm botu tehe seng le du. 2 Ominen bud mlóy mulék nan e tulón ke Simun Pitér ne bè yóm sotu gel lemolò ke Jisas, yóm kenbong nawahen, monen mò kul, “Deng wen tau ma du lem lebengen yóm gónó tekuy mogot ne là tngón me du gónó le e hemsù du.” 3 Omin le Pitér kendel lemwót mlóy etu, lewu le yóm sotu gel lemolò ke Jisas. 4 Tódô le sektes mlóy etu, botong galawen gna Pitér yóm sotu gel lemolò ke Jisas yó, ne du gna gefet bè yóm lebeng. 5 Ominen hkogò temngel elemen, tek són tonen masà bè yó, són yóm nes bukay tehe baus le du, okóm là huseken elemen. 6 Timbow kól bè yó se ke Simun Pitér, ominen tódô hlós husek elem yóm lebeng. Ne tonen masà bè yó yóm nes bukay tehe baus le du. 7 Ne bud tonen se yóm nes tehe baus le bè kulu Jisas, bede sana kefien ne deng mom tólóng klasà. 8 Ominen husek se kun yóm sotu gel lemolò ke Jisas, yóm tehe gna gefet bè yó. Bè yóm ktonen yó kem nes masà, deng tódô hentahuhen ne yóm klowil Jisas. 9 (Blaem là deng glileb le du he lanen yóm tehe hsulat Dwata gbak ebè yóm klowil Jisas.) 10 Tódô le mulék ebè gónô le yó kem tau lemolò ke Jisas yó koni.
Kehegfan Jisas bè Midi
11 Bede ke Midi kun, sana kdaen bè lewà yóm kilib ne mkik. Yóm igoen tolo mkik, hkogò smanil elem yóm kilib 12 ne tódô tonen se yó kem lewu hógów Dwata gu bè longit, mnes le bukay, myón le bè yóm tehe gónón masà Jisas. Sotu myón bè tehe seblà kuluhen, ne sotu se myón bè tehe seblà tihen. 13 Mon le, “Ó Lenibun, tedu nkikem yó du?” Mon Midi se kun, “Deng nwa le lówó yóm gónóhu mogot, ne là tngónu du gónó le e hemsù du.” 14 Timbow beklil Midi, tódô tonen se Jisas mdà bè yó, okóm là kô dilóen du. 15 Ne mon Jisas mò du, “Ó Lenibun, tedu nkikem yó du? Tau du de hnebelem?” Ofo ke Midi ke yóm tau fen gel lembud hulu yóm mdà bè yó ne monen mò du, “Ó Sér, ke uu deng ma du yóm lówó Jisas, tulónem dou gónóm e hemsù du anì bud nangayu.” 16 Omin Jisas mon du mò du, “Na Midi.” Omin Midi bud beklil ebéléen, ne monen mò du bè udél Hibru, “Rabuni.” (Yó lanen, “Tau Tmolok.”) 17 Ne mon Jisas mò du, “Béem tagad nogot ou he, abay se là denge mulék ebè Mà. Okóm mógówi dou ebè tu kem dumuhu setwoli, tulónem kul yóm naw kulék ebè Mà, yóm kul Mà snéen. Du se yóm dou Dwata, ne bud kul Dwata snéen.” 18 Tahu se, lemwót Midi mógów ebè yó kem gel lemolò ke Jisas, monen mò kul, “Deng tonu yóm gónó tekuy mogot.” Ne bud tulónen kul yóm deng mon Jisas mò du.
Kehegfan Jisas bè yó kem gel lemolò du
19 Timbow deng legen kifu bè yóm Akad yó, gotu le stifun yó kem gel lemolò ke Jisas. Ne gotu hen-get le bak tikeb le, abay se likò le yó kem Ju wen glal le. Okóm tódô hetnga mdà lem blóng le Jisas, monen mò kul, “Dwata he hol henek nawa ye.” 20 Ominen tmolok du kul yóm halì lem hólólen ne bè klabihen. Ya tey kehligal le bè yóm bud kton le yóm gónó le mogot. 21 Ne bud mon Jisas mò kul, “Dwata he hol henek nawa ye. Lómón yóm tehe khógów Mà do, hol lómón yó se bud khógówu kuy.” 22 Ominen myuf ebélê le, monen, “Yó ne, henmóyô ye ne yóm Tulus Dwata. 23 Ke hnifót ye salà yó kem tau, hnifót Dwata lu snéen. Okóm ke là hnifót ye salà le, là se hnifót Dwata du se kun.”
Jisas ne Tumas
24 Bè yóm ksut Jisas bélê le yó, là kóen nô bè yó ke Tumas, yóm sotu gel lemolò du, yóm gel niba le Héng. 25 Ne gotu tulón le du, mon le, “Deng ton me ne yóm gónó tekuy mogot.” Mon Tumas se kun, “Ke là naw na ton du yóm lan tutuk lem hólólen, ne ke là naw na ndù du tdok, ne ke là naw na sù du elem tum sol halì bè klabihen hólólu, là kô naw e hentahu du ke deng mowil.” 26 Tikóng deng gefet sotu fedyanen bè yó, gotu le bud stifun yó kem gel lemolò du, nô bélê le Tumas. Deng bud hen-get le bak tikeb le. Tódô bud hetnga sut lem blóng le Jisas, monen mò kul, “Dwata he hol henek nawa ye.” 27 Ominen mon du mò ke Tumas, “Ó Tumas, ni hnénégem hólólu, ne duem bè haliu tdokem. Ne bud duem bè sol halì bè klabihu yóm hólólem. Béem bud hegewu nawahem, hol hentahuhem ne yóm deng klowilu.” 28 Mon Tumas se, “Tahu se. Uu se hol gónóhu mogot. Uu se hol dou Dwata.” 29 Mon Jisas se mò du, “Yó kô olo gónóhem hemtahu béléu lanem deng mton do? Bong kligal le kul yó kem tau hemtahu béléu anien ke là ton le do.”
Yóm hol nóyô hetngón Jan lem sulaten
30 Tey dê he hentaw ton nmò Jisas lem blóng yó kem gel lemolò du là gsulatu du bè yóm bok ni. 31 Ni gónóhu smulat du ni kem ni anì hentahu ye se kuy yóm Jisas, du se yóm Misaya, yóm hol Ngà Dwata. Lemwót bè yóm kehtahu ye du, yó se gónó ye gmuta yóm klowil laen dù sónen.
Kehegfan Jisas bè yó kem hitu gel lemolò du
1 Sotu kdaw bè yó, bud hegfan Jisas bè yó kem gel lemolò du ditu bè Lanaw Tibiryas. Ni sii yóm kmò kehegfanen bélê le. 2 Lemwót le Simun Pitér slomong le Tumas (yóm gel niba le Héng) ne Natanyél yóm lemwót bè Kana, yóm benwu udì snakuf Galili ne yó kem lewu ngà Sibidi ne bud lewu bè yó kem dumu le gel lemolò ke Jisas. 3 Mon Simun Pitér mò kul, “Naw e hmuket he dou.” Ne mon le se mò du yó kem dumuhen, “Mung me kóm.” Tahu se, lemwót le, motun le elem yóm sotu ówóng. Suloy le buteng hmuket, laen kô dù guta le. 4 Timbow mwas bè yó, tódô mdà bè kilil lanaw Jisas, okóm là tngón le du ke Jisas yóm tau ton le mdà bè yó yó. 5 Ne tmaba ebélê le Jisas, monen, “Ó kem Wè, deng wen guta ye kô?” Mon le se, “Laen duen.” 6 Bud monen se mò kul, “Bot ye fi bè kwanan ye yóm huket ye anì wen tawan ye.” Tahu se, bot le, ne sana wen tawanen, botong là gbek le mkay du elem ówóng yóm huket le, bà mon tey tawanen. 7 Ominen mon du mò ke Pitér yóm sotu gel lemolò ke Jisas, yóm kenbong nawahen, monen, “Yó se gónó tekuy mogot.” Bè yóm kungol Pitér du yóm yó, tódô kendel leseken yóm lafin nesen fi ta abay se tehe kóhen, ne tódô kmó elem él ne mógów ebè Jisas. 8 Nô le lem ówóng yó kem dumuhen, kenwa le yóm ówóng igò le demyol yóm huket hnok utón él. Geblà se klayuk le bè kilil, tek dô limu folò difu. 9 Timbow le hotun ete kembu, tódô ton le yóm ofi sennuk using, ne wen utón él tnétê nô tahen, ne wen mambangen. 10 Ne mon Jisas mò kul, “Mit ye edini kun dumu yóm utón tawan huket ye yó.” 11 Omin Pitér motun elem ówóng, nwahen yóm huket, ominen demyol du ebè kilil. Hono utón lembang yóm tawan huket le, botong lematu bud limu folò tlu kwenen. Balù yóm tey kwadagen, là kóen dog ksê yóm huket le. 12 Mon Jisas se mò kul, “Géhél ye ne, ne ye e mken.” Laen dù bélê le mlos mon du mò du, “Tmau kóm de?” abay se tódô tngón le yóm gónó le mogot. 13 Omin Jisas ma yóm mambang, ne nólólen bélê le. Ne senged se kmoen yóm utón él. 14 Ni se deng getlu dulék Jisas hegfan bè yó kem gel lemolò du kogol yóm deng klowil Dwata du gu lem hatay.
Jisas ne Pitér
15 Timbow deng kken le, mon Jisas mò ke Simun Pitér, monen, “Ó Simun, ngà Jan, bong nawahem do kô senta kul kbong nawa dou ni kem dumuhem ni?” Mon Simun se, “El, Sér, tngónem se yóm kbong nawahu kóm.” Bud mon Jisas se, “Sen-gyokem dou sen yó kem ngà ubihahu.” 16 Bud mon Jisas mò ke Pitér, “Ó Simun, ngà Jan, bong nawahem dou kô?” Bud mon Pitér se, “El, Sér, tngónem se yóm kbong nawahu kóm.” Bud mon Jisas, “Sen-gyokem dou sen yó kem ubihahu.” 17 Bud mon Jisas mò ke Pitér bè getluhen dulék, monen, “Ó Simun, ngà Jan, bong nawahem dou kô?” Tô muni nawa Pitér abay se deng tlu dulék Jisas smólók du. Ne mon Simun se kun, “Tódô gotu tngónem se yóm kdéen, Sér. Tngónem se yóm kbong nawahu kóm.” Bud mon Jisas se, “Sen-gyokem dou sen ubihahu. 18 Tódô tulónu kóm ktahuhen,” mon Jisas, “yóm hanà tolo klomihem tau, sónmoem tendo gel hget lemsek nes, ne kihu kóm gónó móyô e mógów. Okóm ke dengi tuha tau, angat tódô sendololem sigelem, ne tólóng tau fen mfét kóm, ne nwiten uu ebè yóm gónóhem là móyô e mógów.” 19 Yó lanen yóm mon Jisas ni, tulónen yóm kmò angat katay Pitér, ne yóm kegdóyón Dwata béléen bè yóm katayen yó. Ne omin Jisas bud mon du mò du, “Loloem o.”
Jisas ne yóm sotu gel lemolò du
20 Timbow beklil Pitér, tódô tonen huli kul yóm sotu gel lemolò ke Jisas yóm kenbong nawahen, yóm tehe myón klohoken bè yóm hol són kkenen bélê le kifu, yóm tehe mon du mò ke Jisas, “Tau du mlay kóm sumóng, Sér?” 21 Bè yóm kton Pitér du yóm tau ni, monen mò ke Jisas, “Ó Sér, kmoen se kun tau ni duu?” 22 Bnalà Jisas se, monen, “Ke dou kóyô nan mowil kun efet bud kesfuléku, laen dù bud kóm du ne yó. Okóm yó dum kóm, loloem ou.” 23 Yóm kmon Jisas du yóm yó koni, tódô gotu mból ebè kdê yó kem lemolò ke Jisas yóm là katay yóm sotu tau lemolò du yó. Okóm là mon Jisas du dé là matayen, olon mon du, “Ke dou kóyô nan mowil efet bud kesfuléku, laen dù bud kóm du ne yó.” 24 Yóm sotu tau gel lemolò ke Jisas yó, du se tmulón du kdê ni kem ni, bud du se fen smulat du. Ne tngón me hono tahu yóm tulónen.
Yóm hol sónen
25 Duhen yó, tey dê he yó kem dumu tehe nmò Jisas. Ke gotu snulat ket sotu, déke là kóyówen bè klamangen benwu yó kem bok gónó smulat kul.