The New Testament of our Lord and Saviour Jesus Christ
1:1 Yesus Kristus beiyimek nang yila', Abraham bek ab uboka, Daud dubnya bek ab uboka, ulumek nimi si ara ban. Anasa Abraham bek aba' ara, Daud be ulumok salek enyek uboka Yesus beibek nimi yila' era ban: 1:2 Abraham bedya me nera Ishak, Ishak bedya me nera Yakub, Yakub bedya mab era Yehuda beb alja' hemyab eb, 1:3 Yehuda bedya mab era Peres beb Zerah beb (sikja' genong gera Tamar ge ulumok), dara Peres bedya me nera Hezron be ulumok, alja me nera Ram, 1:4 Ram bedya me nera Aminadab, Aminadab bedya me nera Nahason, Nahason bedya me nera Salmon, 1:5 Salmon bedya me nera Boas (Boas eiling gera Rahab), Boas bedya me nera Obed (Obed eiling gera Rut), Obed bedya me nera Isai, 1:6 Isai bedya dara, Daud be dubnya beibuk. Wera ono' Daud bek aba' ara, Yehuda sokok nimi henga gouboka Babel heikek beil bisik salek ulumek nimi si dara, ban: Daud bedya me nera Salomo (alja genong gera men dara Uria bedya domok), 1:7 Salomo bedya me nera Rehabeam, Rehabeam bedya me nera Abia, Abia bedya me nera Asa, 1:8 Asa bedya me nera Yosafat, Yosafat bedya me nera Yoram, Yoram bedya me nera Uzia, 1:9 Uzia bedya me nera Yotam, Yotam bedya me nera Ahas, Ahas bedya me nera Hizkia, 1:10 Hizkia bedya me nera Manasye, Manasye bedya me nera Amon, Amon bedya me nera Yosia, 1:11 Yosia bedya mab era Yekhonya beb al kabo nang eb beibsuk. 1:12 Wera ono' Yehuda sokok nimi Babel heikek henga gouboka bobogeisik salek eba' ara, Yesus beibeka' wenyek nimi yila' era ban: Yekhonya bedya me nera Sealtiel, Sealtiel bedya me nera Zerubabel, 1:13 Zerubabel bedya me nera Abihud, Abihud bedya me nera Elyakim, Elyakim bedya me nera Azur, 1:14 Azur bedya me nera Zadok, Zadok bedya me nera Akhim, Akhim bedya me nera Eliud, 1:15 Eliud bedya me nera Eleazar, Eleazar bedya me nera Matan, Matan bedya me nera Yakub, 1:16 Yakub bedya me nera Yusuf. Dara, Yusuf bedya gel gera Maria. Anya ban Maria gedya danyek, Yesus ara beibuk. Yesus ara ono' Kristus aboka si silimek. 1:17 Anasa wera Abraham bek ab uboka Daud bek hiboka likimek nang yila' era hiboka dara, meija' dubuka' badya nimi yila' likimek. Dara ono' Daud bek ab uboka, Yehuda sokok nimi Babel heikek henga gouboka bo bisik salek era, nimi yila' denga meija' dubuka' badya likimek. Anya Yehuda sokok nimi Babel heikek bo bilisik salek eb uboka, Kristus sokok beibek salek era, ono' nimi yila' denga meija' dubuka' badya likek. 1:18 Yesus Kristus beibuka' ara ban unuwoka beibuk. Yesus alja genong Maria gera, Yusuf bedya molob lomok. Sikda anam dobdanggurek salek, Maria gera Geisinya adya me bobok. 1:19 Yusuf bera Imik Neyung ak pelemoknya bek adya, alja molob lomok gel ge me boboka dara, Maria gera nimi hnoum laga lobnamna dara, alya dablyek senewoka, gelelenga lobnamna senewoka ganya lomok unu seinimok. 1:20 Yusuf bera wen senewoka anam unu seinibgiga balamok salek, alda lendara mabok. Wera lendara pik uboka, Imik Neyung lero adya alak, "Anda Yusuf Daud nang yila'anya o, Maria gedya' mon lomok sam mamla me nera Imik Neyung Geisinya adya me bomla' anasa, dobdanaruma' ak, lok ganya bonggom, mem. 1:21 Maria gera eimik nengma ak beibnamla. Ban me nenedya alja nimi sikja malya una' ak ab blebnesila' anasa, alja si nera Yesus ak aboka sibnelam," hyok. 1:22 Ban nidya' unuwoknya nera, Imik Neyung adya alja ununumna' len nang pik uboka lemoka' anyek gigiwolula' aboka nera uboka' ara, 1:23 "Nenya meka' dobnenggumeija' goubenya gel gedya me boboka beibnamla dara, me nenedya si nera Imanuel, aboka sibnemak," amok. (Imanuel ara Ibrani yub bok, nunja dara, Imik Neyung nub ulumab, alamak.) 1:24 Wera Yusuf bera alda maboka bukok dara, Imik Neyung lero adya alak lendar pik wenyamoknya nera nidya' gigiwoka unuwok. Dara Maria geb dobdarek. 1:25 Bok Maria gera Yesus anam beibnenggumok salek, Yusuf bera Maria gek ara meka' boka' denewanggumok. Anya wera Maria gera bomok me nera beibuk dara, Yusuf bedya me si ara Yesus aboka sibuk.
2:1 Herodes dubnya dangoka ulumok salek enyek, Yesus ara, Yudea sokok Betlehem heikek beibuk. Dara ban salek enyek, gura' bekna' ubna' damoka' ella ulumek nang era, yali sam aba' ara Yerusalem heikek yek. 2:2 Dara sikja, "Yahudi nimi dubnya danamla' ak beiyimla me nera, har sam beiyimla do? Nunda alja gura' lanawoka' ak eiyiboka, alak gibnemaba' anasa yeilimab bar," aboka nim ulumeka' ak heiru yabalesik. 2:3 Herodes dubnya bera alda ban wenyan yuba kebok dara, alab nimi nidya' Yerusalem heikek ulumek nim era, ganya sam-samab menegosuk. 2:4 Dara Herodes bera Yahudi nimi sokok sam Imik Neyung yuba wa gaka' dub nang eb, yuba neksin nang eb, ugunda nidya' mamagel yanalum aboka ebmamagosuk. Anya sikenek, "Imik Neyung adya bokol yanesin asuknya Kristus bera har sam beibnamla do?" aboka heibsuk. 2:5-6 Dara sikja Herodes bek ara, "Ununumna' lelemoknya bedya ban wenyaro momnya doboka' ara, Wei, anda Betlehem o, Yehuda sokok sam, Yehuda sokok nauba heik ulumak bok, anak ab dubnya ben hnon lanawanamla dara, benedya Israeli nimi bleboka bo diri ulumnesila' anasa, anak dara, gobdo mek heik gekneba' unggulumnelam, aro momnya doboka' anasa, wera me nera Yudea sokok Betlehem heikek sam beibnamla," aboka nekek. 2:7 Wera Herodes bera seleb wenyaboka lelewoka nekeka' kebok dara, gura' bekna' ubna' damoka kemelemek nang ek gelelenga yoululum husuk. Anya sikenek, "Gura' eibluma' ara, hek sum ek laga dangamok ak okoka eiblum do?" aboka heibsuk. 2:8 Seleb wenyaboka heibgogowosuk dara, "Ugunda or Betlehem heikek biniboka me nenyek pe keeboka ebnelum. Anya me nera okoka eibnelum dara, naba gibel binimna' anasa, nak men wenyal yananulum," hyok. 2:9-10 Dara, nang era Betlehem heikek sam byik. Pikek balamek dara, on gura' era eibek. Dara hyak ganya eiya dabsuk! Anya gura' era men mengewoka me nen ulumoka' dub nong ak sam bekna' sekemok. 2:11 Wera nang era, e lomok wekel biniboka, me nenyeb alja' genong Maria geb eiyisik. Dara sikda me nen dam oumuwoka koma lumugoka giboka, sikja bona' yokoka, rupiah damok ab, gin-gin song mekla' ab, perob senenggom dekna' ngikna' mek ab me soruka onomek. 2:12 Dara, Imik Neyung adya, Herodes bek saaboka binggunulum aboka lendar pik wenewosuk dara, sikda yok pik uboka sikja mok byik. 2:13 Gura' kemero yeilimek nang era, sikja mok seleb lanawoka balamek dara, Imik Neyung lero ara Yusuf bek lendar dib yeiniboka, "Herodes dubnya bera me nenyek obnuna' aboka elemnamla anasa, anda bukoka me ab eilinggeb doboka bobmenekanya, Mesir sokok sam berra bo bilom. Wera anyagono ulumuna' ara, nadya anak wera or yoululum henya dara, yanalum," hyok. 2:14 Dara Yusuf bera bukok dara, al sumen inimnek enyek, me ab eilinggeb doboka, Mesir sokok sam bo murugul busuk. 2:15 Wera sikda Mesir heikek ulumek salek enyek, Herodes bera somogok. Ban unuwoknya nera, youma' Imik Neyung adya ununumna' lelemoknya bedya, "Nadya me nera Mesir sokok ab youbnamna," amoknya nenesa gigiwolula' aboka ubok. 2:16 Wera Herodes bera gura' kemero yeilimek nang edya, alak sonda' lebeka' eibuk dara, alda hyak yu ganya bobok. Anya alda Betlehem heikek memabo gibna' penya uboka onu sam beibsik mab era nidya' obnelum aboka orugosuk. Ban unuwoknya nera gura' kemero yeilimek nang edya, ban salek eiyimoub aboka alak wenyameknya nenesa sunuwoka unuwok. 2:17 Ban unuwoknya nera youma' ununumna' lelemoknya Yeremia bedya lemoka' anyek gigiwok ara, 2:18 "Rama heikek ara, nim ara omoma leboka nauba engelemaka' ak kebna. Rahel gera ala' mabo nidya' dengaroweka' adya nauba engelamlakanya, yok ganya hekel elekna' ara lek senelamla," hyok. 2:19 Yusuf bera anam Mesir sokok ulumok salek enyek, Herodes bera seleb somogok dara, Wenelesilnya bedya lero era Yusuf bek lendar dib yok. 2:20 Lero adya leboka' ara, "Ban me nen obnoba' aboka umek nang era seleb somogeka' anasa, me nenyeb eilinggeb doboka bobmenekanya, onsok Israeli sokok sam bo binilam," hyok. 2:21 Dara Yusuf bera maboka bukok dara, me ab Maria geb doboka bobsuk dara, Israeli sokok sam bo yousuk. 2:22 Bok ono', Herodes bedya yando me Arkelaus bera eilibe lunuwoka Yudea sokok sam dubnya dangoka ulumla an yuba kebok enyek, alda lok ganya boboka, Yudea sam bana' ara lobok. Bok ono' Wenelesilnya bedya lero edya lendar pik ab anaso unuwanalam aboka lebok dara, alda Galilea sokok sam leiboka byuk. 2:23 Wera Galilea sokok ara, Nazaret alamek heikek sam ulumek. Ban unumoknya nera, Yesus amba leboka ununumna' lelemek nang edya, "Alda Nazaret mok ebnya," henemak ameknya nenyek gigiwolula' aboka umok.
3:1 Ban salek enyek, Yohanes Pembaptis ara Yudea sokok hwalek sam yeiniboka Imik Neyung yuba lelemok. 3:2 Alja lelemoka' ara, "Imik Neyung adya mek anam wenelemnesila' ara oka yal bok anasa, ugunja malya una' ak ab ganya dangawolulum," alamok. 3:3 Wera ban Yohanes enyek, nekoka Yesaya bedya ununumna' dib lemoka' ara, "Nimi ben hnon hwalek sam ab bii aboka, Wenelesilnya bemba ugunda pika yarawoka memelelulum, alsamba pika angawoka jaklelulum, aboka lelemla," hyok. 3:4 Yohanes bera alda unta pam honga akleng anyek ongolomok. Goukwa norona' ara boka' adya norolomok dara, dena' ara kweng ab bei lusa mek ab delemok. 3:5 Nimi nauba Yerusalem heikek ab hnon, Yudea moka nidya' nimi hnon, Yordan meka gemek sam soboka ulumek nimi nidya' ok berem mok nim era, Yohanes bek yalamek. 3:6 Anya, sikja malya una' eib kweboka laga lelemek dara, Yohanes bedya Yordan mek ek dalasuk. 3:7 Parisi nim eb, Saduki nim eb, nimi Yohanes bek meka dabsulula' aboka yalamek. Bok Yohanes bedya kemelemok enyek, nang enyek yeka' ak eibuk dara sikenek, "Ugunda hyak malya una' hwam nim ek ululum! Ugunuk ara heknedya Imik Neyung adya obnesila' ak sam ab dara, blebdanalum asuk do? 3:8 Ugunda malya una' seleb eib kweboka ganya dangawoka lobek an bekna' enyek, wera laga gigiwoka ulululum. 3:9 Ugunda Abraham bera nu nang yila' ak anasa, nunda obnesila' ak ab blebdanamab senenggom, mem. Ban girik danyeb danyek, Imik Neyung adya Abraham nimi yila' nenewanamso anyek, ugunda bekoka seiniwanalum! 3:10 Gal ara yarenga lelewoka weboka uka dabnamna senewoka orowek ya beibuk. Gala nidya' perob doka mounggulumla gal era, weboka uk ak boboganamla," hyok. 3:11 "Nak dara, malya una' ak ab seleb ganya dangawak ana' diba' amba, mek dem adya ok dalasin bok, nak berem eimik yanalanya bedya dara, alda ugunuk Imik Neyung Geisinya ab uk ab dadya, mek diba' dabnesil. Nak dara or mek so bok, alak dara, hyak senenggomnya bek yanamla. Alja yan ongona' anaba, nak dara doboka bobnenggunusinya. 3:12 Alja gandum hama' webna' anasa aboka seb yaramdena' ara alja soruk ok seleb ulumla. Gandum nong ak dara, dena' beilin ek mamagoka beibnamla bok, hama' ak dara, hyak meka' sarangna' orok uk ek sam dabnamla," hyok. 3:13 Ban salek enyek, Yesus ara Galilea mok eb ara, Yordan mek inik sam bilimok. Wera anyek onob dara, Yesus ara Yohanes bek meka dabnenelem aboka molol yeilimok. 3:14 Bok Yohanes bedya meka dabnenggununggen aboka Yesus ak, "Nak danyek, neyung, anja meka dabnenesom. Bok wenyek dara, neyung anak nak an yalem!" hyok. 3:15 Bok Yesus adya Yohanes bek ara, "Nunja ban unulumab adya, Imik Neyung adya unuwanok senelamla' ara an anasa, unulumab bok anasa, wera or meka dabnenelem," hyok dara, Yohanes bedya Yesus ak meka dabok. 3:16 Seleb meka dabok dara, Yesus ara mek lomok aba' ara goboka welok enyek, wene sab-sab im pika gaboka, Imik Neyung Geisinya ara, bek wining eneso' anyek alak bul yinggyuk ak eibuk. 3:17 Anya imik sam ab yub adya Yesus anasa, "Nadya' wana' me nera ban e, alja nadya ganya hekellilinel," hyok.
4:1 Wera Yesus ara bisa' dubnya Iblis adya sunuwolula' aboka, Imik Neyung Geisinya adya hwalek oblyek sam bo byuk. 4:2 Yesus ara gwaneng bunya yubyek inimnek moruwoka, lika denga hnonok uboka ebdobnya mekbadya (empat puluh hari) mabmorumok. Dara alda gwaneng ok nong ubok. 4:3 Dara Iblis adya Yesus ak yeiniboka, "Anda Imik Neyung me ulumen dara, banyan girik danyek gwanenga nenewanelam," hyok. 4:4 Anasa Yesus adya dara, "Imik Neyung yuba bukuk sam momnya doboka' ara, Nim ara gwaneng adya ok embenga' unggulumak bok, alda nidya' Imik Neyung adya lelemla yub edya hnon embenga' ulumak," hyok. 4:5 Seleb dara, ono' Iblis adya Yesus ak boboknya nera, Yerusalem geisa heikek, Imik Neyung gibna' e erema' dubuk sam bo beil byuk. 4:6 Dara Iblis adya Yesus ak, "Anda Imik Neyung me ulumen dara, wera sokok sam sakdo doblingdanalam. Ban nenesa Imik Neyung yuba bukuk sam momnya doboka' ara, Anda girika oluka dikgelyek aboka dara, Imik Neyung ara beiliwagenoka' aboka alja lero nang oruganamla," hyok. 4:7 Yesus adya Iblis ak ara, "Bok ono' Imik Neyung yuba bukuk sam anaba hnon momnya doboka' ara, Anda anja Wenelenggelnya Imik Neyung bek sunulyamana' ara mem, wenhyok," hyok. 4:8 Dara ono' Iblis adya Yesus ak eboka boboknya nera, senenggom mok soko meinik sam biniboka, yok-yok mok soko nidya' ab, sikja yoka'-yoka' peroba' ulumla' nidya' ak aawonuna' aboka bo bilimok. 4:9 Anya Iblis adya Yesus ak lebnemoka' ara, "Anda nak oumuwoka gibnenemen dara, ban mok soko nidya' ara anak leboka eleganenggen," hyok. 4:10 Yesus adya Iblis ak, "Satan o, anda hyak bilom! Imik Neyung yuba bukuk sam momnya doboka' ara, Anja' Wenelenggelnya, Imik Neyung bek giblemenekanya, alak ok arawoka welelom! wenhyok," hyok. 4:11 Anya wera, Iblis ara Yesus ak ara lo byuk dara, Yesus ara, lero nang gong edya yeiniboka alak aralemek. 4:12 Yesus ara, Yohanes Pembaptis bera seleb henga geregoka gasa ek beibek an yuba kebok dara, alda Galilea moka byuk. 4:13 Yesus ara Nazaret heikek ara loboka, alda Zebulon Naftali sokok sam Galilea mek gemek sam Kapernaum heikek bindiwoka ulumok. 4:14 Yesus adya ban unumoknya nera youma' ununumna' lelemoknya Yesaya bedya lemoka' anyek gigiwolula' aboka uboka' ara, 4:15 "Zebulon soko Naftali soko o! Yordan meka gemek sam senenggom gwan mek pik bana' ak sam, Yahudi gom nim ulumak sokok Galilea o! 4:16 Guna' lomok sam ulumak nim edya, perob dilina' yebla' ara eibak! Nimi somoklomaka' ak sokok sam ulumak nim era dilina' welera sekla' ak eibak!" amoknya nenyek gigiwok. 4:17 Wera ban sum enyek moruwoka, Yesus ara Imik Neyung yub ara lero lelemokja, "Imik Neyung adya, wera wenewanasil salek oka dala' anasa, ugunda malya una' ak ab loboka ganya dangawolulum!" aro lelemok. 4:18 Yesus ara Galilea meka gem pik dongora yabalamok dara, nimi penya hadya' dolorek nang eibsuk. Wera nang dara, ben hnonda Simon (yok si nera Petrus) beb, alja weis Andreas beb eibsuk. Sik penya nang era hadya' dolorek nang ulurek anasa, hadya' ouma' aklenga mek ak dorokloreka' ak eibsuk. 4:19 Dara Yesus adya sik penya nang ek, "Nara ugunuk nimi dona' nang nenewanesin anasa, ugunda nak diriga yoururum," aboka ebsuk. 4:20 Dara penya nang era, kerek sab-sab sikja' hadya' ouma' akleng era anyagan loboka, Yesus ak muna' gobdo diriga birik. 4:21 Wera neik mek gem era, Yesus ara anam yabalemookanya, ono' yok noungusuk penya nang hnon eibsuk. Nang dara, Zebedeus bedya mabo moumena' Yohanes beb Yakobus beb eibsuk. Ban penya nang dara, sikja' neyung beblaboka hadya' ouma' aklenga mek ekla buna' ak sam memelemek. Dara Yesus adya, ugunda nak yoururum aboka ebsuk dara, 4:22 wene sab-sab sikja' neyung beb, hadya' ouma' akleng ab, anyagan loboka, Yesus ak muna' diriga birik. 4:23 Galilea sokok ara Yesus nidya' heikek yibiniboka, Yahudi nim edya yuba don ek sam yuba nekoka ura yabalesuk. Yesus adya Imik Neyung adya eimik era wenewanesil an perob yub enyek nekdo yabalesuk. Dara ono' hnonda nimi malya ulusuk nim eb, neiklemek nim eb, nauba hwelesuk. 4:24 Yesus ara anaso uboka unulamla an yub era mok soko me nidya' oboka lelemok dara, nimi nauba alak yalamek. Nimi nidya' ara igina kweboka, yok-yok neikna' salalesuk nim era Yesus ak bo yalamek. Wera nimi nidya' koma bulumek nim eb, bisa' goloklesuk nim eb, nonga heilisuk nim era, Yesus adya meriyisuk. 4:25 Dara ban salek era, nimi nauba Yesus ak yalamek. Wera hnon nim era Galilea sokok ab nimi hnon, Sagobadya Nauba Heikek ab nimi hnon, Yerusalem heikek ab nimi hnon, Yudea mok eb nimi hnon, hnonda Yordan meka gemek nimi hnon yeiniboka neika' yabalamek.
5:1 Yesus ara nimi nauba alak sam yalameka' eibuk dara, alda mok soko meinik sam welewok. Wera Yesus ara seleb bukumok salek, alja yuba doro diriga ban nang era alak yek dara, 5:2 Yesus ara sikenek yuba nek einiwoka lebsuka' ara, 5:3 "Nimi hnon, nara ganya garan dena' nim enya' senewoka ulumak nim era, sikda Imik Neyung wenesin heikek ulumnemaka' anasa, pe ulumak! 5:4 Igin ganya bolomak nim era, Imik Neyung adya sikenek ganya sangab eleganesil bok anasa, pe ulumak! 5:5 Nimi ganya siklewoka namen ulumak nim era, Imik Neyung adya sikenek yoka unuwanasin amoknya nera gigiwoka unuwanasil bok anasa, pe ulumak! 5:6 Nimi gwaneng ok anaso uboka, Imik Neyung adya senelelanya nenyek hyak unulunob senelemak nim era, Imik Neyung adya sikenek gigiwoka eleganesil bok anasa, pe ulumak! 5:7 Nimi yok nim ek angoo yadyek senewoka aralasak nim era, Imik Neyung adya sikbabya lunuwoka angoo senewoka arawanasil bok anasa, pe ulumak! 5:8 Nimi geisa ganya boboka ulumak nim era, Imik Neyung bek eibnemak anasa, pe ulumak! 5:9 Nimi yuba sekoka hillilisak nim era, Imik Neyung adya ban ununanya nemba leboka pe laga nadya mabo henesila' anasa, pe ulumak! 5:10 Nimi Imik Neyung adya senelelanya nenyek pe unulumaka' amba igina kweboka gweklemak nim era, sikda Imik Neyung wenesin heikek ulumnamaka' anasa, pe ulumak!" hyok. 5:11 "Ugunda nasamba leboka yok nim edya ugunuk malya nenewoka, oboka, derewoka walasak dara, ugunda pe ululum. 5:12 Ugun oroka' wenyek, ununumna' lelemek nang eneba unu nauba olosik. Anasa, ugunuk neik so waboka obnesak dara, Wenelesilnya bedya ugunsamba dekna' beillilesila' ara nauba anasa, ei-ei ganya boboka glololulum," hyok. 5:13 "Ugun nong ak dara, sokok garam ululum! Garam ara angawom ana' anyek denghen dara, onsok saaboka angawom henemso de? Perob gom anasa, nim adya bobogoka yan ingib sabneseng." 5:14 "Ugunda sokok an dilina' ululum. Mok soko meinik sam soseng heik era, go' doknowamenggom ulumla. 5:15 Nimi hnon wesa' diniwoka mek gokna hmeiya lomok sam go' doknowoka beilinggulumak. Alda nim e lomok sam ulumeija nimi nidya' yeblesulula' aboka laga diniwoka beillilimak. 5:16 Anasonya neikek, ugunja dilina' era nimi yok nim edya' hogung ek sam laga yeblelulum. Dara ban adya, nimi yok nim era ugunja pe unulumuna' anyek, eiyiboka pelemak aboka, ugunja neyung be imik heikek ululanya bek gigilemnemak." 5:17 "Ugunja dara, alda Musa bedya unuwanalum an yub eb, ununumna' lelemek nang edya webek yub enyek, lubnuna' aboka yeilimok senewanggununulum. Anasa lubnuna' aboka yanggubsebok, alda damok anyek an leboka' anyek gigiwonuna' aboka yasa. 5:18 Ugunda banyek pe beknelum! Im ab soko ab anam denghenggumlya salek, momnya dona' hnonok gom, hngekom ana' sibin gom anaba, unuwanalum an yub ek ara meka' denghenggunumla! 5:19 Anasa wera, heknedya ban momnya dobok yuba danyek, hnonok meka' sibin bleklamla dara, anya yok nim ek ugumba anaso unuwolulum aboka wenelesil dara, bera Imik Neyung wenesin heikek ara hyak mek nongnya danamla. Bok alda heknedya yok nim ek anaso unuwanalum aboka nim ak neklesil dara, Imik Neyung wenesin heikek sam senenggomnya danamla. 5:20 Anasa ugunda banyek seiniwoka bekneluma' ara, ugunda Yahudi yuba neksin nang eb, Parisi nang eb danyek, Imik Neyung senelamla' ununa' ak sam ara, sikja dara mek so bok, ugunjinya nenyek nauba so danggunumla dara, wera aldib ugunda Imik Neyung wenesin heikek binggunulum!" hyok. 5:21 "Nunja' neyung yabo youma' nang ek ban yub enyek nekesika' ara, ugunda seleb ella ululum ara, Yok nim ona' ara mem; heknedya nim obnamla dara, albabya yana lelewanamak. 5:22 Bok wenyek dara, nara ugunuk ban lebnesin, Heknedya yok nim ek wabnesilnya bera, albabya yana lelewanamak; anya heknedya yok nim ek derewoka walamla dara, yana lelesina' Yahudi dub nang edya yana lelewanamak. Heknedya yok nim ek leleladya, Malya una' hwamnya, alamla dara, uka desin heikek doro bobogeisijek. 5:23 Anasa wera, nimi ben hnon, nara Imik Neyung amba gibna' bona' bo yalalabok, nimi ben hnonja alak yu ganya bomlya' anyek unuwanyok bok aboka seiniwanamla dara, 5:24 Imik Neyung ak gibna' bomlya' ara uka daboka gibna' oulyang ek yameb loboka, alak yu ganya bolenya beb neika' hibdeija' seleb danyek, wera saaboka Imik Neyung ak elekna' ara or elegel yanamla." 5:25 "Nimi ben hnon sonda' anasa anak yoka' aldib unuwok bar aboka yana lelesin ek ab yana lelewanalum aboka, yana kibnenggel dara, yana lelesin ek binggurumun salek enyek, pikek ab men ganya hekoka ek nim nenebdanarum. Ban nenyek unuwanggurumun dara, benedya an nong ara doboka yana lelesin nang ek eleganesil dara, ono' nang enedya doboka yin bona' nang ek elegeisija dara, yin bona' nang edya anak gasa ek henga geregoka beibnenjak. 5:26 Ugunda banyek pe seiniwanalum: Henga geregesija' amba dekna' anyek pe senenya loboka hekoka dobnenggumen bok, henga gerekna' ek ab men henga lobnenggunenggela' nong anyek, pe seiniwanalam," hyok. 5:27 "Ugumba ella ululum yub era, yok nang gela salya' salenggom mem hyoka' ak hnonok ella ululum. 5:28 Bok wenyek dara, nadya ugunuk banyek dib lebnesin, Nimi ben hnon yok gel salaweisinya senen ganya lomok bolomla dara, bera gel genyek seleb ganya lomok salalamla. 5:29 Anja' sirik heng enedya eiyiboka malya ul eleklenggelya dara, wera heng era kweboka boboganalam. Dara nong yoka' ak hnonok leboka deng an dara perob bok, ugunja nong gekman uka desin heikek goksilyek aboka lebna. 5:30 Dara alda anja' sirik soruk edya anak malya ul eleklenggelya dara, soruk era garabdangoka boboganalam. Nong gekman uka desin heikek gokgelyek anasa, soruk ak darasam leboka bobokdangoka ulumen dara, perob so ulumnesom," hyok. 5:31 "Yuba hnon ulumla' ara, nimi hnon alja gel ge lobnamla dara, lobgen an momnya dona' doboka eleganamla. 5:32 Bok wenyek dara, nara ugunuk dib lebnesin, Heknedya alja gel gera meknena' orok bok, lobna dara, gel gera ono' yoknya bedya dolomla dara, wera gel genyek malya una' dangallilimla. Anya heknedya yoknya bedya lobna gel genyek dolomla dara, beneba malya ulumla," hyok. 5:33 "Nunja neyung yabo youma' nim ek sam yuba hnon ulumoka' ara, Hyak unuwanenggen amunjok lona' mem an yuba hnon ulumla. Anda Imik Neyung saramek sam okoka hyak unuwanamna aboka lelelam dara, wera al gigiwoka unuwanalam. 5:34-35 Bok wenera nara ugunuk dib lebnesin, Hyak dib unuwanamna aboka yoka'-yoka' si sibuka migiba' nenena' ara mem. Wera im ara Imik Neyung ulumla' ak anasa, imi si sibuka hnon, sokok ak dara, Imik Neyung adya' yan dolokna' ak anasa, soko si sibuka hnon, Yerusalem heik ara senenggom dubnya bedya heik ek anasa, Yerusalem heika si sibuka hnon, anaso nidya' si sibuka lena' ara hyak mem. 5:36 Ugunda hong doka hnonok sibin anaba, ugunja dara, mirin gom, kul honga nenewanggunusoma' anasa, nadya huk edya anaso dib unuwanggunumna ana' ara mem. 5:37 Yoka'-yoka' nauba dara, bisa' ak ab yalamla anasa, Yo gom, Orok gom, ok leblulum," hyok. 5:38 "Ugunda yuba hnon ella ululuma' ara, henga soldowegeija dara, alba heng ak dirigolulum, si doluwegeija dara, alba si ak dirigolulum an yub ella ululum. 5:39 Bok wenyek dara, nara ugunuk ban dib lebnesin, Ugunuk malya ulusak nim ek lunuwoka sikbabya onggom, mem. Alda nim adya ugunuk sirik sum ak waboka obsija dara, waneng sum eneba or obsululum aboka elegolulum. 5:40 Nimi ben hnonja anja akleng enyek eleganeso' aboka, yana lelelesinya bek bo binenggel dara, ban akleng enyek doboka elegalom aboka lebnenggel dara, or yok akleng anaba eleganelam. 5:41 Nimi ben hnon adya ugunuk mek mok so boro beibnenulum henelabok, ugunja dara, mok so boro beibnelum. 5:42 Nim adya ugunuk yoka' ulumlya' anyek elegosululum aboka molowanasak dara, or eleganelum. Nimi hnon ugunja bona' se' dobnamna aboka molowanasak dara, ugunja lek numok ana' ara mem," hyok. 5:43 "Ugunda yuba hnon ulumla' ara, Ugun kabo nim ek ara wana' ulumunukanya, ugunja isa' nang ek ara lek ganya bololulum an yub ek ella ululum. 5:44 Bok wenera nadya ugunuk lebnesina' ara, Ugunja isa' nang ek wana' ulumunukanya, ugunuk lek senelesak nim emba heng uboka Imik Neyung ak mololelulum. 5:45 Anadya ugunda imik ululanya bedya mabo danalum. Anasa wera, Imik Neyung ara henga dingillilimla dara, hnonda pe ulumak nim emba hnon, ono' malya ulumak nim emba hnon, dingilamla. Dara moka yalamla dara, hnonda pe ulumak nim emba hnon, ono' malya ulumak nim emba hnon yalamla. 5:46 Anasa ugunda ugunuk an wana' ulusak nim ok numbabya wana' ulunob senelelum dara, hekasa Imik Neyung ara ugunja unululuma' sunuwoka peroba' eleganesuso do? Anaso ganya era mok soko amba rupiah molowoka dolomak nang eneba ganya en boboka unulumak. 5:47 Imik Neyung ak elgom ulumak nim eneba unulumak bok anasa, ugunda ugunja' hemyab ok perob aboka giboka ulumnelum dara, pelelum de? 5:48 Ugunja neyung be imik heikek ululanya bera, hyak perob ok unulamla anasa, ugumbabya pe ganya kaboka perob ok unulumnulum," hyok.
6:1 "Ugunda keeboka pe seiniwanalum, nimi yok nim eibsunuka' aboka, ugunja perob una' era, nimi hnoum ak ununggom, mem. Ugunda anaso unulumun dara, ugunja neyung imik heikek ululanya bedya dara, ugunuk lunuwoka dekna' eleganggunusil. 6:2 Anasa wera, ugunda bona' garan nim ek unuruwa' eleganemun dara, sene bol nenelemak nang edya, yok nim gigiweisinok senewoka, benggong leboka bona' laga boklomak sok, ugumba anaso ununggom, mem. Nimi sene bol nenelemak nang era, senenggom pik gwandanya' ak sam gom, Yahudi nim edya yuba don ek ab laga unulumaka' dara, yok nim edya eiyiboka pelemak senewoka gigiweisinok aboka unulumak. Wera sikenek gigilesak dara, wera dekna' ara alan seleb dolomaka' anyek, ugunuk dib lebsin. 6:3 Bok ugunuk dara, ugunda nimi bona' garan nim ek bona' unuruwa' arawanalum dara, nimi yok nim eibsijek senewoka hyak geleleng aboka boknelum. 6:4 Ugunja ban unuwanaluma' ara, yok nim era eibnenggunusak bok, alda Imik Neyung adya ok hnonok eibnamla. Dara, ugunja geleleng aboka doknowoka unulumuna' anyek eillilisilnya bera, ugunja' neyung imik heikek ululanya bedya' anya', ugumba dekna' eleganasil," hyok. 6:5 "Ugunda heng uboka molowanamun dara, sene bol nenelemak nang eneso uro molonggom. Sikda nimi yok nim edya perob seneweisinoka' aboka dekna' gasa' ak gom, Yahudi nim edya yuba don e pik sekoka moloro yabalamak. Dara ban unulumaka' adya, wera sikda dekna' seleb dolomaka' anyek, ugunuk dib lebsin. 6:6 Bok, ugunda heng uboka molowanamun dara, e lomok wekoka pika seregoka ugunja' neyung be laga unggululanya bek molowanalum. Dara, ugunja neyung bedya ugunja doknowoka unuwanaluma' eibnesilnya bedya, alda ugunuk peroba' eleganesil." 6:7 "Ugunda heng uboka molowanamun dara, Imik Neyung ak elgom ulumak nim edya warana' mololdibilloklemak sok, ugumba ununggom, mem. Ban unulumak nim edya dara, warana' mololomab dara, Imik Neyung adya kebnesila' anya' aboka unulumak. 6:8 Ugunda anam molowanggumna salek enyek, ugunja dobsibya seneleluma' ara, Imik Neyung ara anam danyek ella ulusila' anasa, sikja mololemak sok ugumba ununggom, mem. 6:9 Anasa molowanamun dara, ban nenyek leboka molowanalum: Nunja neyung imik heikek ululamnya o, anja si nera muna' gobdo geisa ululul. 6:10 Anda nunja' dubnya ululam. Anadya wera sokok an wenelemnesilim. Anja senelelama' ara, imik heikek sam gigiwoka unulamla sok, sokok anaba unululul. 6:11 Nunja sumen denemabnya nek sunuwoka, or doboka elegeisilom. 6:12 Yok nim eb malya ubdangamna nim eb memeldalamab sok, anda anaso uboka nunja malya una' eneba doboka bobogeisilom. 6:13 Nunda nauba sunulusil ak sam bo yangganggunesilim bok, alda hyak meilinya bek ab blebnesilem. Anda hyak senenggom migib dubnya uboka, anja si nera soba' imik ulmorulumnamla. Amin." 6:14 "Ugunda malya ubdangamun nim eb memeldalamnalum dara, wera ugunja neyung imik heikek ululanya beneba ugunja meknena' doboka boloklomnesil. 6:15 Bok ugunda malya ubdangamun nim eb memeldanggulumnalum dara, ugunja neyung imik heikek ululanya beneba ugunja meknena' doboka boloknenggulumnesil," hyok. 6:16 "Ugunda Imik Neyung amba gwanenga lobnelum dara, hogunga boluma yobuka sene bol nenelemak nang ulumak sok una' ara mem. Sikda hogunga yok uboka giblamna dara, yok nim edya sikda Imik Neyung amba gwaneng lomak aboka ella danoka' aboka unulumak. Dara, wera sikda alan seleb dekna' dolomak an, anera dib lebsin. 6:17 Bok ugunda Imik Neyung amba gwanenga loboka molowanalum dara, hogunga mek elegoka, hong ngikna' mek ngikdanalum. 6:18 Anadya yok nim edya dara, sikda Imik Neyung amba gwanenga lomak senewanggunusak bok, alda ugunja neyung laga eilinggulumaknya bedya ok hnonok ella ubnamla. Anya unu doboka unulumneluma' anyek, ugunja neyung be eillilesilnya bedya, alja dekna' ugunuk eleganesil," hyok. 6:19 "Sokok an nim adya hoka' doboka, mura gluboka gererema' delemla' ak an, perob bona' nauba ugun dam nang amba beilinggom, mem. 6:20 Alda imik heik anyek, nim adya hoka' dol yanggana' loboka, mura glubna' loboka, gererema' meka' denggulumla' ak sam anyek, perob bona' bolowoka beillilelulum. 6:21 Ugunja bona' ulumla' ak ara, ugunja ganya eneba anyagan malamla," hyok. 6:22 "Ugunja heng era, ugunja nong emba wesa' diba' ulumla. Ugunja heng enyek geisa perob dara, wera ugunja nonga nidya' ara, dilina' ok yebel loblamla. 6:23 Bok ugunja heng era malya dangalamla dara, ugunja nonga nidya' anaba guna' sene-monu al loblamla. Anasa wera, ugunuk an ulusil wesa' enyek guna' dangalasil dara, wera hyak senenggom guna' ek sene-monu al loblamla!" hyok. 6:24 "Hnonnya bek ara nauba wana' uboka yoknya bek ara lek senewanamso' anasa, goma hnonnya bek ara malya senewoka, yoknya bek ara pe bojam ubnamso' anasa, nimi ben hnon alda nimi penya nang emba aboka neikewenyek wa webnenggunumso. Anasonya neikik, ugunda Imik Neyung amba wa we, ono' bona' amba wa we, ubnenggunusom." 6:25 "Anasa wera ugunuk banyek lebsin, Ugun nong una' emba dara, ugunda ganya daldom-daldom ana' ara mem. Nera ugunda ongowanasoma' amba gom, ugun denesoma' amba leboka ganya daldom-daldom anggom, mem. Nimi nong una' ara mek so bok, dena' ak dara, nauba perob so de? Goma, ongon akleng enyek perob so bok, nong anyek dara, malya so de? 6:26 Ugunda im pik uru yabalamak wining enyek pe kendululum. Sikda wa weboka menggulumak, gwanenga yongonggulumak, dena' ulumla' ara neika' ak e soboka beilinggulumak. Wera ban ununggulumaka' anyek babya, ugunja neyung be imik heikek ululanya bedya sikenek dena' elegoka bo ulusil! Wining era or domdigum so bok, ugun nong ara peroba' nong ak unggululum de? 6:27 Ugun gangganek nimi ben hnon, ganya seinina' mandebna' adya, alda pe go' nauba ubwenewanamso de?" 6:28 "Ugunda hekasa boksom amba ganya eboka daldom-daldom alalum do? Ugunda beiyek sam moulumla perob sigil esa' enyek pe kendululum. Sigil esa' ara, alda hnon wa weboka, aklenga winggulumla' ak ulumla, 6:29 bok Salomo bera yoka'-yoka' dubnya ulumoka' anaba, perob sigil esa' anaso ulumla hyak perob so boksom boka' era hnon ongonggulumok! 6:30 Beiyek sam seklamla' nidya' ara, sumen pe urugana' ara, ampum dan dara, busa' dinilimak. Bok anyek babya Imik Neyung adya beiyek seklamla' ak perob hogunga kemena' meewoka beillilamla dara, ugunuk dara, wera ongiyiwanggunusil de? Bok ugunuk dara, dib senena' ara mek ok. 6:31 Nunda hek dena' denemab do? Goma, Nunda hek meka denemab do? Goma, Nunda heka' ak ongowanamab do? aboka ganya daldom-daldom aboka wenyanggom, mem. 6:32 Ban unuruwa' nidya' ara, nak yaso senewoka dulumak nim era, yok-yok mok soko nim Imik Neyung ak elgom ulumak nim edya danyek, hnonok unulumak. Ugunja' neyung be imik heikek ululanya bedya dara, ugunja nidya' doboka deisibya seneleluma' nidya' ara, alda ella ulumla. 6:33 Imik Neyung adya ugun nong ok anyek wenewoka usina' ab, alja perob senelamla' ab, nonoganob senen ulululum. Dara, yoka'-yoka' nidya' ara ugunuk makoka eleganesil. 6:34 Anasa wera, ampum amba dara, ganya daldom-daldom ana' ara yok ubnelabok anasa, ugunda ampum amba ganya daldom-daldom anggom, mem. Sumen ok malya nauba dangalalanya nera yok anasa, ono' ampum amba ganya hnon daldom-daldom anggulumnesibya," hyok.
7:1 "Ugumbabya Imik Neyung adya eimik yana leleweisilyek anasa, ugunda yok nim ek yana lelena' ara mem. 7:2 Ugunda heka' huboka yok nim ek yana lelelelum sok, Imik Neyung anaba ugumbabya unu yana lelewanasil. Ugunja yok nim ek sunuwoka unululum sok, Imik Neyung anaba ugumbabya unu sunuwoka unuwanasil. 7:3 Anja senenggom gal hyabdoba' heng ek ulunggela' ara eibdanggonggom, yok nim edya mek heng solokna' enesa hekasa anyek kemelelam do? 7:4 Anja nauba gal sikna' ulunggel anasa, an kabo nang ek, Hem o, anja heng solokna' dobnenggen, alalama' ara, hekasa do? 7:5 Anda sene bol nenelelamnya o! Anja nauba gal sikna' enyek men dobdamenekanya, anja henga pewagelya dara, wera an kabo edya alja heng solokna' pe eiyiboka doboka boboganalam." 7:6 "Gam adya anak saaboka saboka obgelyek anasa, yoka'-yoka' hyak peroba' ara, gam ak eleknenggom, mem. Pam adya meilik ara yan ingib saboka malya nenewalyek anasa, pam ak eleknenggom, mem," hyok. 7:7 "Mololemun dara, dorowanalum. Elemun dara, eiriwanalum. Pika glorum-glorum alamun dara, pika baknesil. 7:8 Anasa mololemeija nimi nidya' ara, dorowanamak, elemeija nimi nidya' ara, eiriwanamak. Dara, pika glorum-glorum alameija nimi nidya' ara, siksamba pika baknesil. 7:9 Ugun gangganek ara, nimi ben hnon alja me nedya neyung gwaneng eleganelom aboka, molowanamso dara, girik ak eleganamso de? 7:10 Goma, hadya' ak molowanamso dara, baga' ak eleganamso gom? 7:11 Ugun malya una' nim enyek babya, uguna' mab ak ara, hyak peroba' anyek keeboka eleklelum. Anasa ugunja neyung imik heikek ululanya bera wanok! Alak anyek elegeisilom aboka mololemak nim era alda peroba' anyek eleganesil." 7:12 "Ugunja yok nim edya nuk pe unuweisinok senelelum sok, ugunja yok nim ek pe unulululum. Musa bedya unuwanalum an yub eb, nidya' ununumna' lelemek nang edya unulululum aboka lebsik yuba damok nong ara an," hyok. 7:13 "Uka delesil e pik eb ban pik eb dara, saba' nauba adya, nimi nauba ara pik enyek an balamaka' anasa, ugunda dogob nong pikek ab uboka wekel yalalulum. 7:14 Nim embenga' nenelesil pik era, nimi wekna' ak dogob nonga' ulumlakanya, ban pik eneba meka' me ulumla. Anya nim ara mek ok eiyiboka weklemak," hyok. 7:15 "Sene sonda' anasa nunda ununumna' lelemab nang aboka leldalamak nang ek ugunda keeboka ulululum. Sik nong ak dara, yu bei gam anaso' ak ulumakjok, ugunuk an domba hogunga beiyi yalamak. 7:16 Ugunda sikda anaso ulumak senena' ara, sikja ununa' ak anyeb eibnelum. Sabala' gal adya dara, anggur dok gom, yok den gal doka hnon, moub eleganggunumso. 7:17 Pe mesa' bleblamla gal ak ab perob gal doka moulumla. Anya, malya uboka eka lerelamla gal ak ab malya galdoka moulumla. 7:18 Pe mesa' bleblamla gal edya dara, malya galdoka moubnenggunumso, ono' eka leremna gal edya dara, perob galdoka moubnenggunumso. 7:19 Perob galdoka mounggulumla gala nidya' ara, weboka uka dalamak. 7:20 Anasa, sene sonda' anasa ununumna' lelemak nang eneba, sikja nong una' edya, ugunda sikenek ella danalum," hyok. 7:21 "Nimi nak, Wenelesilimnya o, Wenelesilimnya o, alanyak nim era, nidya' Imik Neyung wenesin heikek weknenggunumak bok, alda nadya neyung be imik heikek ululanya bedya unuwanok senelamla' anyek unulumak nim ok weknemak. 7:22 Soko sidya' daknamla sum era, nimi nauba nak yeiniboka, Wenelesilimnya o, Wenelesilimnya o, neyung anja si sibuka ununumna' lenggulumouba de? Anya, Neyung o, Wenelesilimnya bedya si sibuka bisa' nauba yakoka, yoka'-yoka' lok so migib ununa' ara ununggulumouba de, wenyhenemak. 7:23 Bok nadya sikenek lebnesina' ara, Ugunda naba elgom ulusin nim. Ugunda malya una' ok ululum nim o, nak aba' ara men bululum! henemna," hyok. 7:24 "Wei anasa, nimi nadya yuba keboka pe unulumak nim era, sikda geremsengnya e pe girik dubuk sam somoknya beneso' ak ulumak. 7:25 Wera bera e girik dubuk sam pe gasa somoka' adya, mok ab, kabo' dorogoka, mek iliwoka bobok sum era, e nera luka mabnenggumok. 7:26 Bok, heknedya nadya' ban yub en keboka, pe ununggululanya bera, nimi ben hnon dongdangana' adya, alja e salya' mek weneng eilib somoknya beneso' ak ulumla. 7:27 Wera anadya moka yeiniboka, mek iliwoka, kabo' dorogoka e nenyek omok dara, e nera malya ura luka mamok. Anya hyak nauba soldowoka malya dangamok!" hyok. 7:28-29 Yesus ara Yahudi yuba neksin nang edya neklesik sok neknenggusuk. Alda senenggom nonga' ak nekesuka' anasa, wera Yesus ara seleb yuba leboka nekgogowousuk dara, anya alak kelemek nim era, hyak nauba loka dasuk.
8:1 Yesus ara meinik ab yanggalamok dara, longomek nimi nauba alak dobol yalamek. 8:2 Ban salek enyek, gororoma' adya hyak malya ura delemoknya benyek Yesus ak yeilimok. Bera Yesus saramek sam koma lumugoka lebokja, "Neklesilimnya o, anda or senemen dara, nak boka' dona' elegananelem," hyok. 8:3 Dara Yesus adya benyek salawoka leboka' ara, "Nara or senewan. Anasa boka' or dobgolul e!" hyok. Dara wene sab-sab gororoma' delemoka' ara dengaro lobok. 8:4 Dara ono' Yesus adya benyek an, "Wei, neyung o! Yok nim ek nara unuwanel aboka nekdo yabana' ara mem. Bok alda Imik Neyung yuba lena' gaknya bek amal dal bilom. Anya, anda aldib merewalama' amba dara, Musa bedya unulululum aboka momnya dobok sok sunuwoka, Imik Neyung amba giboka elegel binilam," hyok. 8:5 Wera Yesus ara Kapernaum heikek wekel yanggok bok, Roma yin bona' dubnya bedya Yesus ak yeiniboka, arawananelem aboka molowok. 8:6 Benedya lebnemoka' ara, "Wenelesilimnya o, nadya wa wenya bera ek sam neiklamla. Alda esona' heiboka denewoka' ak mana' ok mabmoruwoka, oka nauba delemla," hyok. 8:7 Dara Yesus adya, "Wera nara alak hwel binimna," hyok. 8:8 Bok yin bona' dubnya bedya dara, "Nara perobnya goma' anasa, anda nadya ek ara yanggununesoma' anasa, anda yanggana' ara mem. Alda anja yub adya ok merewolul hemen dara, wera nadya wa wenya bera merewanamla. 8:9 Anasa wera nababya nadya dubnya ulunel. Ono' na damumduk ara, mek yin bon nang ulumaka' ara, nadya yuba kelenyak. Nimi yin bonnya bek lebnadya, Bilom! wenyhen dara, alda balamla. Alda, Anyagan yalom! hen dara, yalamla. Anya nadya wa wena'anya bek lebnadya, Banyek unuwalom! hen dara, orugana' ara keboka unulamla," hyok. 8:10 Yin bona' dubnya bedya ban wenhyok yub enyek, Yesus ara kebok dara, hyak seilinya senewok. Anya alak diriga ban nang anyagan ulumeka' ak, "Ban benyek na lokja. Nimi nidya' Israeli nimi gangganek sam ara, ban dib senen ganya enera hnon meka' eibnenggumsa! 8:11 Hyak dib nonga' ara ban! Nimi nidya' yali sam ab hnon, kemban sam ab hnon, Abraham beb, Ishak beb, Yakub beb, neika' hiboka Imik Neyung bedya wenesin heikek sam dero weknemab aboka yanamak. 8:12 Bok, alda Yahudi yoka' nim ara, guna' senenggoma' ulumla heik sam doro boboganasil. Dara guna' heikek ab, nimi dara, nauba soloma daboka engewoka si glengdaralamnemak," hyok. 8:13 Dara Yesus adya yin bona' dubnya bek, "Anja dib senelama' adya, nidya' unuwaso senelamnya nera gigiwoka unuwanamla' anasa, or bilom," hyok. Dara al ban salek eneba, ek wanya bera merewok. 8:14 Yesus ara Petrus bedya' ek biniboka kemelemok enyek, Petrus aldogol gera poba neikna' salamoka' anasa mamoka' ak eibuk. 8:15 Yesus adya gel genedya soruka salamok salek enyek, wera alja poba neikna' ara dengaboka merewok. Dara gel gera bukoka Yesus amba dena' youboka ulumok. 8:16 Wera seleb sin dangal yabok dara, bisa' goloklesuk nimi nauba Yesus ak bo yeilimek. Dara Yesus adya yuba mousa hnonoknya nedya ok saboka, bisa' yakoka, neiklemek nimi nidya' merellilisuk. 8:17 Yesus adya ban nidya' unulumoknya nera, ununumna' lelemoknya Yesaya bedya, "Nunja hmeng usina' dob salawoka, nunja neiklemabnya nera bo bilisuk," amoknya nenyek gigiwolula' aboka umok. 8:18 Nimi hyak nauba Yesus ulumoka' ak ara ulumek. Wera Yesus adya nimi mandebna' enyek eibuk dara, alja yuba doro diriga ban nang ek mek gek eer sam binimab aboka orugosuk. 8:19 Dara Yahudi yuba neksinya ben hnon Yesus ak yeiniboka, "Neyung neklesilimnya o, or hekmok ok an binimena' ak ara, naba neika' yabalemnenam!" hyok. 8:20 Wenyek Yesus adya dara, "Bei gam ara selenga' e ulumlakanya, wining ara e' ululabok, nimi diba' me ak dara, huka beilina' amba ekla hnon unggulumla," hyok. 8:21 Dara ono' ben hnon, alja yuba doro diriga bannya bedya Yesus ak, "Neyung o, nara anak diriga yalamnenggenjok men dara, biniboka nadya neyung be soko lokol binimna anasa molowan," aboka lebok. 8:22 Bok Yesus adya alak lebnemoka' ara, "Somoklomak nim era, sik moumen soko lokoldalanok, alda anda nak diriga yanenelem," hyok. 8:23 Dara, Yesus ara mek ekla buna' ak bukoka bununa' ul yabok dara, alja yuba doro diriga ban nang eneba neika' buka balamek. 8:24 Buka balamek sab-sab, hyak senenggom kabo' dorogoka, mek ekla buna' ara mek lobsenja' adya waboka olomok. Bok, Yesus ara hogunga mamok. 8:25 Dara alja yuba doro diriga ban nang era, Yesus ak biniboka bukiyiwoka, "Neyung o! Blebsilom! Nunda hyak orowanabsil bar!" aboka lel yabek. 8:26 Wera anasa, Yesus adya sikenek ara, "Ugunda hekasa lok ganya bolum do? Ugunda meka' ok dib senelelum nang ululum!" hyok. Dara ono' Yesus ara sekoka, kabo' ab mek ab dara, namena' dolul aboka lebok enyek, wera mek gwan era hyak namena' dok. 8:27 Yesus yuba doro diriga ban nang era, hyak loka daboka, sik moumen leldalameka' ara, "Kabo' ab, mek yub ab dara, alja yuba kebla' anasa, har so ululanya do?" wenyaldalamek. 8:28 Yesus ara mek gek Gadara moka lanal byuk. Gadara sam ara nimi penya bisa' gologosuk nang era, nimi soko lokna' ak ab ara, Yesus ak yarek. Ban penya nang enera hyak yu lok anasa, nim ara sik ulurek pik ara meka' yabenggulumek. 8:29 Wera sik penya dara, lelerekja, "Imik Neyung bedya me o, nuk ara heka' hubnesilimjok yeililam do? Unuwanasusom salek era, anam boka' anaba, anda nuk loba' nenewoka malya gebsununa' yeililam de?" alarek. 8:30 Wera sik ulurek ak ab dara, mok so ara, pama nauba yu' delemek. 8:31 Dara ban bisa' dara, Yesus ak, "Anda nim ek ab goboka yibinelum aboka oruganasilim dara, wera pam ak weklulum aboka oruganasilim," hyek. 8:32 Dara Yesus adya bisa' danyek, "Bululum!" wenhyok dara, bisa' era goboka pam pik wekdo yibek. Wera pam gong dara, yeiriwoka mok soko abomok langa diniwoka mek gwanek sam malyingginiboka meka si deregoka somokdo yibek. 8:33 Danyek pama weilimek nim era, sikda heikek biniboka, nidya' ban unumoknya neb, penya nang ek Yesus adya unusuka' anyek anaso unuwal aboka nekek. 8:34 Dara nimi nauba heik enyekan nim era, Yesus ak eibnoba' aboka bilimek. Wera nimi nidya' ara Yesus ak eibek dara, alak nunja mok era lo binilam aboka lemek.
9:1 Yesus ara ono' mek ekla buna' ak welewoka bukoka dara, onsok alja heikek sam yok. 9:2 Heik enyek anara, nimi ben hnon esona' adya yangawoka bo yeilimek. Bo yeilimek nim edya dib senena' ara, Yesus adya eiyisuk dara, alda neikna'anya bek, "Najab o, or anja ganya hekgulul! Anja malya una' era seleb anak ab memenggen bar!" hyok. 9:3 Dara, Yahudi yuba neksin nang anyagan ulumek nim edya dara, "Ban benera Imik Neyung si malya nenelamla," hyek. 9:4 Yesus ara sikja ganya seinina' era seleb ella ubsuk dara sikenek, "Ugunda hekasa malya ganya ek seinilelum do? 9:5 Wera har nerek pe yongona lebnesom: Malya una' seleb memenggen, ana' ak gom, Sekoka balom, an danyek gom? 9:6 Bok wenyek dara, nimi diba' me aldib soko dubuk an ara, nim adya malya una' sikenek ab soba' memelesil ulumla gekneba' ara, wen laga unuwanamna," hyok. Dara ono' Yesus ara nonga heimoknya bek, "Anda sekoka, anja esona' doboka bobmenekanya, anja ek bilom!" hyok. 9:7 Dara nonga heimoka' anyek hweboknya bera, alda sekoka alja ek sam byuk. 9:8 Wera Imik Neyung adya' senenggom migib era, nim ek seleb elegosuka' anasa leboka, nimi nidya' ban unumoka' anyek eibek nim edya dara, ganya lok uboka Imik Neyung ak gigilemek. 9:9 Wera Yesus ara anyaganyeba' ara loboka byuk. Wera anam balamok salek, nimi ben hnon alda rupiah mok soko amba molowoka dolosuknya, alja si nera Matius, alja wa wen ek sam bulumoka' ak eibuk. Dara Yesus adya alak, "Anda nak diriga yalom!" hyok. Dara Matius bera sekoka, Yesus ak dobol byuk. 9:10 Wera Yesus ara Matius bedya' ek sam anam bukoka delemok salek, nimi nauba rupiah mok soko amba molowoka dolomek nang eb, nimi heik yoka' dam nang edya malya nang senelesik nang eb, Yesus alja yuba doro diriga ban nang eb, neika' bukoka delemek. 9:11 Dara Parisi nang edya ban unulumeka' ak eibsik. Anya sikja Yesus alja yuba doro diriga ban nang ek, "Hekasa ugunja' neklesilnya beb, mok soko amba leboka rupiah molowoka dosin nang eb, nim adya malya senelesak nang eb neika' bukoka delemak do?" wenyaboka heibsik. 9:12 Dara Yesus adya sikja heibsik yuba keboka, sikenek saaboka lebsuka' ara, "Nimi eika' ulumak nim ek dara, hwena' nanga hwebneseng senenggulumak bok, neikna' nim ek danyek, hwebneseng senelemak. 9:13 Ugunda ban yub enera hekasa lero momnya doboka' anyek seiniwoka einiwanalum: Nara pam unuruwa' oboka gibil yanggana' ak perob senenggulumna bok, alda angoo yadyek senen ganya ek perob senelamna. Anasa nara nimi seleb pe ulumab senelemak nim ek youbsununa' aboka yanggumsa bok, alda nimi nara malya nanga seneldalamak nang enyek, youbsununa' aboka yeilimsa," hyok. 9:14 Nen seleb dara, Yohanes Pembaptis bedya yuba dona' nang era Yesus ak yek. Dara sikja Yesus ak, "Nub Parisi nim eb dara, Imik Neyung amba gwaneng loboka giblemab bok, hekasa anja yuba doro diriga ban nang era lolomak do?" aboka heibek. 9:15 Anasa Yesus adya sikenek, "Ugunja dara, heka' senelum do? Nimi ben hnon gela dosonya benyek, or anam ulusobok dara, nimi masa delemnemab aboka yeiliseng nim era solom ganya bobneseng de? Hyak unuwanggunuseng! Bok gela dobnelanya bera sik gangganek loboka bo binimla sum ok, wera sikda Imik Neyung amba gwanenga lobnemak. 9:16 Nimi hnon youma' akleng ek sam wenyok akleng gweldekdoba' edya denewoka winggulumak. Unuwaneseng dara, wenyok gweldekdoba' edya youma' akleng ab nauba so gweldeganamso dara, malya so danamso. 9:17 Anasonya neikek, wenyok anggur mek era, youma' malya goub ak gweboka bonggulumak. Anaso unuwaneseng dara, goub era joboka anggur mek ara yek weiningganeseng. Anasa wenyok anggur mek era, ono' al wenyok goub ak sam gweboka bolomak, dara penya-penya pe ulurak," hyok. 9:18 Wera Yesus ara anam wenyaboka lelesuk salek, nimi ben hnon Imik Neyung e bo ulumoknya Yesus ak yok. Bera Yesus adya' saramek sam koma lumugoka leboka' ara, "Nadya gelma era wene salek hyak dib somogal. Bok neyung anda yeindeboka anja soruka salal yabamen enyek, merewanamla' bar," hyok. 9:19 Dara Yesus ara sekoka, alja yuba doro diriga ban nang eb, benyeb neika' byik. 9:20-21 Wera pikek anam balamek salek, gela hnon neik ek dangamok salek era, gibna' obadya lemok gel gek Yesus adya' weilik berem oka yookanya, alja akleng ak meka' salawok. Wera gel genedya dara, "Nara Yesus adya' akleng ek meka' ok bebeganamna' anaba merewanamna," senewoka seiniwok. 9:22 Dara ban salek enyek, Yesus ara gel genyek saaboka keeboka, "Najaba gel o, anda ganya siklewoka ublom! Anda dib senewanalema' adya, anda seleb merelam!" hyok. Dara wene sab-sab gel gera gobdo merewok. 9:23 Wera Yesus ara balamoka' ara, Imik Neyung e bo unya bedya' ek byuk. Wera benggong yub ab, nimi nauba yuba iriri alamek ak eibsuk dara, 9:24 sikenek lebsuka' ara, "Ugunda nidya' goboka yibilulum! Ban gelma enera somoganggumla bok, alda hogung dem ok mamla," hyok. Dara sikda Yesus ak nauba okseb goluwek. 9:25 Wera nimi nidya' ara seleb goboka beiyik yibek dara, Yesus ara e lomok wekoka, gelma enedya' soruka salawok. Dara gelma era embenga' bukok. 9:26 Dara unuwal an yub era mok soko me nidya' oboka lelewok. 9:27 Wera ono' Yesus ara anyaganyeba' goboka bok dara, nimi penya heng lum nang moumena' eimik dobdo birik. Dara penya nang enedya dara, "Wei, Daud mamnya o, nuk angoo yadyek senewoka araweisiya!" aboka lebdek. 9:28 Yesus ara ek wekel yabok salek, penya heng lum nang dara, ono' anyagan yarek. Dara Yesus adya sikenek, "Ugunja dara, aldib nunda alja dib hwebnesil senerum de?" aboka heibsuk. Wenyek sikja, "Nunda al alja dib hwebnesil senenam," herek. 9:29 Dara Yesus adya sik penya nang edya heng ek soruka diyiboka, "Ugunda nak dib senenuruma' sok, wera ugunuk anaso dosulul," hyok. 9:30 Wera sik penya nang dara, henga gwelegoka eibdek. Dara Yesus adya sikenek, nunda unu hwebsil aboka yok nim ek salya' nekdo yabana' ara hyak mem aboka yuba sekok. 9:31 Bok, sik penya nang edya dara, wera nunda unu hwebsil aboka mok soko me nidya' wenyab girigarek. 9:32 Wera ono' heng lum nang moumena' era seleb barek dara, lunuwoka bisa' gologoka yuba sanggulumoknya hnon Yesus ak bo yek. 9:33 Dara Yesus adya bisa' era yakoka hwebok dara, bera wene sab-sab merewoka yuba sabok. Dara nimi nauba loka daboka lelemeka' ara, "Nunda Israeli sokok ara, anasonya nera hnon meka' eibnenggumouba!" alamek. 9:34 Bok Parisi nim edya dara, "Bisa' ganya yama' dubnya bedya, bisa' gologoka yaklamla," aboka lelemek. 9:35 Wera Yesus ara nauba heikek bini, mek heikek bini, hnon heikek eba' ara, ono' yok heikek bini ura yabalamok. Alda Yahudi nim edya yuba don e pik Imik Neyung adya' perob yuba leb elegoka, hnonda Imik Neyung adya eimik wenewanasila' anyek perob yuba neklesuk. Dara ono' hnonda nonga malya ura balasuknya neb, yok-yok neikna' salalesuknya nera nauba hwelesuk. 9:36 Nimi ganya hmeng uboka, ganya eb menegoka, bo usin nang oroka' anaso' ak eibuk dara, alda angoo yadyek senewousuk. 9:37 Dara Yesus adya alja yuba doro diriga ban nang ek, "Gwaneng li' ara, nauba ululabok, nonga yongon nang ek dara, meka' ulumak. 9:38 Anasa wa damnya bek, gwaneng nonga yongon nanga bokol yousulula' aboka, mololelulum," hyok.
10:1 Dara ono' yok sum enyek, Yesus ara alja yuba doro diriga ban nang ek yoululum aboka ebmamagosuk. Anya sikenek bisa' yakoka, nimi nonga malya uboka neikna' salalesuknya hwen damba migib elegosuk. 10:2 Ban obadya yuba lena' gak nang dadya sikja si nera, mennya bera Simon (yok si nera Petrus alamek), hnonda alja weis Andreas, anya hnonda Yakobus, ono' alja weis era Yohanes, sikda penya dara, Zebedeus bedya mabo. 10:3 Dara ono' Pilipus beb Bartolomeus beb Tomas beb, mok soko amba rupiah molowoka dolomoknya Matius beb, Alfeus bedya me Yakobus beb, anya hnonda Tadeus. 10:4 Wera hnonda asa'anya alameknya Simon beb, eimik Yesus ak obnelum aboka yuba dil bilimoknya Yudas Iskariot beb, ulumek. 10:5 Wera ban obadya yuba len nang era Yesus adya wa webnelum aboka boksuukanya lebsukja, "Ugunda Yahudi gom nimi sokok sam ara binggunulum. Samaria nim edya' heik pik ara binggunulum. 10:6 Alda Israeli nim ek ok binilum, dib nong ara sikenek malya dangoka weiningdangamek nim ek anyek okoka binilum. 10:7 Sikenek ara, Imik Neyung adya eimik wenelemnesila' oka yal aboka nekdo yabalemnelum. 10:8 Anya neiklemeija nimi hwelemnelum, somogomeija nim embenga' suboka bukillilemnelum, nimi boka' malya ulusil neikna' delesilya nimi boka' dona' elegoka bisa' gologesilinya nera yaklemnelum. Ugunda ban unulumaka' damok amba dara, deknenggublum, or salya' dob loblum. Anasa ugumbabya dekna' loboka, or salya' eleganalum. 10:9 Anasa ugunda mekla' rupiah gom, girik rupiah gom, meilik yuba' gom bona' loboka or salya' binilum. 10:10 Nimi wa welemak nang era, dena' ara nim adya eleklemak bok anasa, ugun biniluma' amba, gwaneng lin akleng eb, boksoma penya so gom, yan ongona' gom, gama' dunguna' gom ara bobnenggunulum," hyok. 10:11 "Ugunda yok heikek bumun dara, pe ululanya bedya nub neika' ulumnemab henesilnya bek ebnalum. Dara wenyhesilinya benyeb ulmorulumuna' ara, ono' yok heikek binilum. 10:12 Ugunda ulumnemab hisilya ek an wekel bumunuk ab dara, e dam nim ek, Imik Neyung adya ugunuk perob elekna' elegosulul, wenyalamnelum. 10:13 Ugunuk neika' ulumnemab aboka, dobnesak nim ek ara, ugunja gibemuna' damok ara, sob e nenyek an ulumnamla. Bok neika' ulumnemab henggunusak ek nim edya' ek ara, gibemun gibna' damok era, ugun damnya saaboka dobnelum. 10:14 Alda heika hnon, yok e hnon ugunuk peroba' leboka dobnenggunusak dara, heik enyek gom, e nera loboka yibinelumukanya, ugunja yan hama' ara heika habengge yibinelum. 10:15 Ban dib lebsin, Soko sidya' daknamla sum era, Sodom heik nim eb, Gomora heik nim era, Imik Neyung adya dara, sikenek igina kwesina' ara mek so bok, ugunuk lek henesak nim ek dara, igina nauba danamla!" hyok. 10:16 "Ugunda banyek pe bekneluma' ara: Nara ugunuk bei gam hnoum domba pam anaso' ak boknesin. Anasa ugunda baga' adya geremsenga' ulumla sok hnon, yalma wining namen ulumla anaso' ak ulululum. 10:17 Ugunda henga geregoka dub nang e pik bo biniboka yana lelewoka, ono' hnonda Yahudi nim edya yuba don e pik ab nauba loba' nenewoka oboka ulumnesak anasa, ugunda pe keeboka ulumnelum. 10:18 Ugunda nadya yuba dona' nang ulumneluma' amba leboka, ugunuk heng geregoka senenggom soko dub nang ek hnon bo binisak. Wera ban unuwanasak salek, perob salek era anya anasa, ugunda nasamba hnon yuba sikenek nekoka, hnonda Imik Neyung ak elgom ulumak nim ek hnon neklemnelum. 10:19 Bok ugunuk henga geregoka yana lelewanasab aboka, nimi yana lelesina' ek sam bo binisak dara, ugunda heka' huboka yuba sekdanamna do, yuba harsonya pe sabnamna senen ganya bona' ak sam ara ugunda lok ganya bonggom, mem. Anasemba dara, ugunja yuba sabnemuna' damok ara, eleganesin senemlya' sum eleganesulula'. 10:20 Anasa ban unuwanasak salek enyek yuba sabnelumnya nera, ugunja sibama' adya sabnelum bok, neyung imik heikek ululanya alja Geisinya adya ugunuk uboka yuba sabnamla," hyok. 10:21 "Nimi nidya' nadya weis ek obnelum aboka, yok nim ek lebdangdo yibinemak salek hnon yanamla. Neiksonya nera hnonda eili bedya ala' me ak gom, alja me nedya eili bek gom unubdangdo yibinemak. Meneng mab edya, sikja' genong neyung ak yok nang ek obnelum aboka yuba dibdangdo yibinemak. 10:22 Ugunda nadya si nenesa leboka, nimi nidya' ara, ugunuk hyak lek senelemnesak, bok pe sekmouboka ulumlya' ara sidya' dagalongna' salek ubnelanya bera blebnamla. 10:23 Ugunda yok heikek ab, yana lelewoka obnesak dara, men yok heikek berra binilum. Nara ugunda ban dib lebnesin, Ugunda Israeli nim ulumak heikek nidya' ara, anam kemero yibinggumun salek, nimi diba' me nera men yanamla." 10:24 "Neklesak mab era nauba so uboka, neksinya benyek mek so' ak unggulumla; ek wanya bera nauba so uboka, alja wa welelanya bera mek so' ak unggulumla. 10:25 Neklamna me nera, eilibe neklenanya beneso dan dara, anya arawoka wa welenanya bera, alja wa welenanya beneso dan dara, nera al seleb perob dangalamla. Sikja' neyung benyek babya si Beelzebul aboka sibuk dara, wera nidya' alja' ek an ulumak nim era wanok," hyok. 10:26 "Ugunda nim ek lok ganya bona' ara mem. Eimik laga danalanya nera hnon lomok doknowoka unggulumlakanya, eimik laga golowanggunulanya hnon gunuwoka unggulumla. 10:27 Nadya ugunuk guna' lomok ab sam lel eleklesinya nera, ugunja dara, laga dilina' ak yubyek enyek, laga lero yabalemnelum. Anya ugunuk o lomok gelelenga lelonglosaknya nera, ugunja dara, laga senenggoma' nenewoka lero balamnelum! 10:28 Ganya nong anyek on nim era hnon unggulumaka' anasa, alda nong bola' dem anyek olomak nim ek, ugunda lok ganya bonggom, mem. Alda Imik Neyung ak hnonok, nong dem ab, ganya nong ab, nidya' hiboka, oboka somokna' dub heikek sam uka desin heikek dabnesilnya bek ok lok ganya bololulum. 10:29 Senero wininga penya anaba neik mek rupiah edya ok dekesoma' anaba, neyung bedya or unuwoulul senewanggusubok dara, sokok sam ara meka' malyingginggunumso. 10:30 Ugunja' hukuk sam ulumla hong mandebna' eneba, Imik Neyung ara alda seleb einilamla. 10:31 Wining ara or mek so bok, ugunuk dara, hyak senenggoma' peroba' ak ululuma' anasa, ugunda lok ganya bonggom, mem!" hyok. 10:32 "Heknedya nimi hnoum ab, nara Yesus yuba doboka diriga balananya aboka laga lelemla dara, nababya neyung imik ululanya saramek sam ab uboka albabya laga lebnamna. 10:33 Bok heknedya nimi hnoum ab, nara Yesus adya yuba donggulunanya aboka sonda' lelenel dara, nababya alak neyung be imik heikek ululanya bedya' saramek ab uboka sonda' amba bobnenewoka laga lebnamna," hyok. 10:34 "Ugunja dara nak ara, alda nim ek nim nenena' bo yok senenggom, mem. Nara nim ek nang nenena' ak bo yanggubsebok, alda nim isa' nang nenena' ak bo yasa. 10:35 Nak sokok an yasa' adya, wera me adya eilib eb mala weboka obdanarak, gelma adya eilinggeb mala weboka obdanarak, me adya gel gedya nenya eilinggeb mala weboka obdanarak. 10:36 Yo, anasa eimik senenggoma' isa' gebdangoka obdanamak nim era, meneng ek nim edya nauba unu obdanamak," hyok. 10:37 "Heknedya nak ara loboka, alja' neyung genong ak wana' nauba ululanya bera, nadya yuba dona'anya henggunuseng. Anasonya neikek, heknedya alja mabo gelmabo ek wana' nauba ululanya bera, nadya yuba dona'anya diba' henggunuseng. 10:38 Anya heknedya alja' igin yaka' doboka, nak diriga yangganana' oroknya bera, alda nadya yuba dona'anya henggunuseng. 10:39 Nadya ganya nonga namok senelelanya bera, alja nong era weiningganamla bok, alda nasamba leboka, alja nong era weininglelanya bera, eimik era alja ganya nong era eibnamla," hyok. 10:40 "Heknedya ugunuk peroba' leboka dolosinya bera, alda anara nak dolonel. Anya nak dolonelnya bera, alda nak sokok bokol yeilinyoknya bek dolomla. 10:41 Heknedya ununumna' lelenanya bek, alda ununumna' lelelanya bek bar aboka, peroba' leboka dololanya bera, albabya lunuwoka ununumna' lena' dekna' ak dobnamla. Ono' nimi ben hnon yoknya bek benyek pelelanya anasa aboka, peroba' leboka dololanya bera, albabya lunuwoka perobnya anasa dolomak dekna' dobnamla. 10:42 Heknedya alda nadya yuba doro diriga bannya ulumla' anasa leboka, ban mek nim ek or mek dem ak eleklamla dara, eimik era ban nenesa leboka dekna' nauba dobnamla' anyek, ugunuk dib lebsin!" hyok.
11:1 Wera Yesus ara alja obadya yuba doro diriga ban nang ek pe wenebgogowosuk dara, alda anyagan ara loboka yokok sam byuk. Anya Yesus ara al ulumoka' ok berem heik pik Imik Neyung adya unuwanalum wenyaboka lesuk yub enyek leb elekdo yabalesuk. 11:2 Ban Kristus adya unu wa welemok yub era, Yohanes Pembaptis bera alda henga geregoka beiyimek ek ab kebok dara, Yohanes bera alja yuba doro diriga ban nang ek Yesus ak banyek wenyaboka heil binilum aboka orugosuk. 11:3 Dara sikda, "Neyung o, al anak Imik Neyung adya nimi blebsina' dubnya yanamla amoknya bera anda alan goma, orok dara, nunda ono' yoknya bek anam diri ulumnemab gom?" wenyaboka heil binilum aboka lebok. 11:4 Dara Yesus adya sikenek, "Ugunda Yohanes bek on pik biniboka ugunja seleb heng eibluma' ab, o kebluma' ab danyek, nekdo biniluma' ara, 11:5 Henga luma yeilimna nang eillilemak, nonga yana heimna nim eika' yabalamak, nong boka' malya ulusil nimi hwebna dara, boka' dolomak, o ounugamna nim o bakoka kelemak, seleb somogamna nim embenga' suboka bulumak, Imik Neyung ak ab perob lero yanggan yub era nimi bona' garan ulumak nim ek lero yabalamla' anyek eiyiboka unulamla aboka nekdo binilum. 11:6 Nak an solom ganya boboka lek senenggulunyak nim era, or pe ulumak!" hyok. 11:7 Wera Yohanes Pembaptis bedya yuba dolomek nang era seleb Yohanes bek, Yesus ara anaso unulamla aboka nekdo byik dara, Yesus ara anyagan nimi nauba ulumek nimi gong ek Yohanes bemba geklewoka lebokja, "Ugunda hwalek sam balaluma' ara heka' ak eibnoba' aboka balalum do? Walenja anyek kabo' adya bo yabalya' ak eibnoba' aboka balalum de? 11:8 Orok dara, ugunda heka' ak eibnoba' aboka balalum do? Aklenga pe ongolenya bek eibnoba' aboka balalum de? Anaso akleng ongolomak nim era sikda senenggom dub nang ek ok ulumak! 11:9 Anasa wera, hekasa ugunda hwalek sam balalum do? Nim ununumna' lelelenya bek eibnoba' aboka balalum de? Aldib, alda ununumna' lenya ulumla. Anya alda ununumna' len nang era or mek so bok, Yohanes bek dara, senenggomnya ulumla. 11:10 Anasa ban Yohanes benyek Imik Neyung yuba bukuk sam men momnya lero dobokja, Nadya boksenya bera ban e, anda anam bok, alak men pika yarawolula' aboka bokol binimna, wenhyok ara momnya dobok," hyok. 11:11 "Ugunda pe beknelum! Nimi nidya' sokok anara hnon senenggomnya una' hyak orok bok, Yohanes bek alak ok hnonok senenggomnya ulumla. Alda anaso ulumla' anaba, Imik Neyung wenesina' ak meka' ululanya benyek senenggomnya ulumlakanya, Yohanes bera alda ono' mek so ak ulumla. 11:12 Yohanes bera alda anam yuba lelemok salek eba' moruwoka, nim Imik Neyung wenesina' ak ulumak nim era, yok senenggom nang dangoka ulunob senelemak nang edya malya nenewoka ol neblesak. 11:13 Anya Yohanes be yanggom salek era, Musa bedya unuwanalum an yub ab, ununumna' lelemek nang edya neksik yub eb dara, eimik yoka' unuwanamla yub ok leboka neklesik. 11:14 Anasa ugunda alak or dib senewanamna senewomun dara, Yohanes bera Elia be an lunuwoka ulumla an, al yanamoka' amba dara, ununumna' lelemek nang edya orowek lebgogomek. 11:15 Ugunda o yaka' ara, hyak pe kebnelum!" hyok. 11:16 "Nara nimi wen ululum nim emba dara, heka' ak sunuwoka lebnesin do? Nimi nidya' ara dekna' gasa' ak salya' yuba saro bulumak mab eneso' ak ulumak. Hnon mab edya yok mab ek lelemakja, 11:17 Nunda ugunsamba perob bera doboka seblesab bok, ugunda eiya hlaboka sunuknenggululum! Nunda ugunsamba ganya engewanasuso bera seblesab bok, ugunda ganya suguwoka engenggululum! aro bulumak. 11:18 Yohanes bera yeiniboka, alda gwanenga lobsiniwoka, anggur dok mek anaba denggulumok; dara nim adya dara, Alda bisa' wekemla, alamek. 11:19 Wenyek dara, nimi diba' me nera, alda yeiniboka gwanenga deregoka, meka deregoka ulumla dara, nim adya dara, Ugunda benyek kendululum! Dena' hwamnya, malya meka salya' denya, mok soko amba rupiah molowoka don nang eb, malya una' nim eb dadya sikja' hem benya', alamak. Ban wenyalamaka' anyek, peroba' uboka geremsenga' ara unulumaka' damokok onob laga geknel balamla," hyok. 11:20 Wera Yesus ara alja yuba nauba leboka, lok so' migib ununa' nauba unulumok heikek ara, nimi nauba malya una' ak ab loboka ganya dangawanggumeka' anasa, gorogoka nauba lelemok. 11:21 Dara, "Korazim heik o, anda hyak omom nonga' ak ululam! Ono' Betsaida heik amba hyak omom nonga' ak ululam! Ugun gangganek an unulamna senenggoma' lok so' ara Tirus mok eb Sidon mok eb seleb unusinya dara, anasa sikda nidya' sikja hukuk sam aso lob golubdangoka, seleb malya una' ak ab loboka ganya dangamnaseng. 11:22 Ugunda banyek pe seiniwoka beknelum! Soko sidya' daknamla sum era, Tirus mok nim eb, Sidon nim eb dara, or sikenek mek so obnesil bok, ugunuk dara, hyak nauba obnesil! 11:23 Anya Kapernaum heik o, anak imik nenewoka imik heikek sam nenewanenggel de? Hyak orok! Anda hyak somokna nim heikek ak sam boboganenggel! Anasa an ululama' gangganek an lok so' senenggom damok unulamna' ara, men Sodom heikek seleb unusinya dara, Sodom heik ara weneba or ubnamso! 11:24 Ugunda banyek seiniwanalum, soko sidya' daknamla sum era, Sodom nim ek dara, Imik Neyung adya sikja malya una' amba mek so obnesil bok, ugunuk dara, nauba so obnesil!" hyok. 11:25 Ban sum enyek, Yesus adya heng uboka molowanamoka' ara, "Neyung o, anda im ab soko ab dara, anja uyilum! Ban unuluma' damok ara geremseng nim eb, yok-yok ella dangana' dolomak nim ek sam ara, anda doknowoka gunulumukanya, alda yoka'-yoka' ella dangana' orok nimi mek nang ek sam amalesilima' anasa, nara anak perob aboka giblenggen. 11:26 Ban unusuluma' ara, an dam nang orowek perob seneluma' adya unulum," hyok. 11:27 Dara Yesus adya leboka' ara, "Yoka'-yoka' nidya' ara neyung bedya nak elegoka lobongganyok. Nimi nidya' ara me ak ara elgom ulumak bok, neyung bedya ok hnonok ella ulumla. Nimi nidya' anaba, neyung anak ara elgom ulunjak bok, me adya ok ella ulunggel, anya me adya nadya neyung bera ban aboka amalesin nim edya hnon anak ara ella ulunjak." 11:28 "Ugunda nidya' hmeng uboka, igina yaka' adya igina kwelesil nim era, nadya ugunuk jakmana gibiyiwanasina' anasa, nak an yanalum. 11:29 Nara namen uboka, ganya sokok gebdangoka ulunanya bek anasa, nadya bollilesin igin yaka' era dobnelum dara, nak anyeb yoka' nidya' einiwoka ella danalum dara, nara ugunuk ganya daklinggoka una' eleganesin. 11:30 Anasa, nadya lelesin yub era, yongona' ak ulumla, nadya ugunuk bollilesin igin yaka' era jakmana' ak ulumla," hyok.
12:1 Dara ono', Yahudi nim edya Sabat mem sum enyek, Yesus ara gandum weboka memek masa ak sam yabalamok dara, alja yuba doro diriga ban nang era, gwaneng ok ubsuka' anasa, gandum hnon dakoka delemek. 12:2 Parisi nim edya ban unulumeka' anyek eiyiboka, sikja Yesus ak, "Kendelom! Anja yuba doro diriga ban nang era, sikda nunja yub ek sam momnya doboka' yuba blekoka, Sabat mem sum ununggom mem hyoknya nenyek blekoka unulumak," hyek. 12:3 Dara, Yesus adya sikenek lebsuka' ara, "Ugunda Daud beb alab neika' ulumek nang eb, sikda gwaneng ok usuka' amba umeka' momnya doboka' ara ugunda seleb einiwanggulum de? 12:4 Daud bera Imik Neyung ek sam wekoka, Imik Neyung amba aboka beillilemek roti gwaneng era doboka delemok. Alda nunja yub ak sam momnya doboka' ara, Daud beneba, alab neika' ulumek nang eb dara, gwaneng era denggunuseng, alda Imik Neyung yuba lena' gak nang edya ok deneseng gwaneng enyeka', anyek delemek. 12:5 Goma, Musa bedya unuwanalum an yub ek sam momnya doboka' ara, Imik Neyung yuba wa gak nang era, sikda Imik Neyung gibna' ek sam Sabat mem sum wa welemna dara, Sabat mem sum yuba blekoka, Imik Neyung ek sam wa welemak bok, sikenek ara malya ululum anggulumaka' ara einiwanggulum de? 12:6 Ugunda nadya ban lebnesina' anyek, keeboka pe ella danalum: Anyagan ara nimi hnon alda Wenelesilnya bedya e nera mek so bok, alak danyek hyak senenggomnya bek ulumla. 12:7 Imik Neyung yuba bukuk sam momnya doboka' ara, Nara pam oboka gibil yanggana' ak perob senenggulunabok, alda angoo yadyek senen ganya ek perob senelamna, ara momnya dobok. Ugunda ban yuba damok enyek, damok ara anasa lebok senewoka dib ella ubsom dara, nimi yok nimi malya unggulumak nim ek ara malya nenewanggunusom. 12:8 Anasa nimi diba' me ara, Sabat mem sum emba dubnya ulumla," hyok. 12:9 Wera Yesus ara anyagan ara loboka, yok Yahudi nim edya yuba don ek sam byuk. 12:10 Wera ban bilimok Imik Neyung ek ara, nimi soruka darasam heimoknya hnon ulumok. Dara nimi wene nim, Yesus ara meknemla aboka malya gebnok senen ganya bomek nang edya sene Yesus ak, "Sabat mem sum era nim ara, or hwebnesom gom, mem gom?" aboka heibek. 12:11 Anasa Yesus adya dara, "Nimi ben hnon ugun gangganek ara, alja domba pama Sabat mem sum bok, selenga' lomok sam malyingginimso dara, pam damnya bedya dara, salawoka dobnenggunumso de? 12:12 Yo, anasa wera, domba ara domdigum so' bok, nim ak dara, hyak dib perob nonga' ak ulumak! Anasa wera, Sabat mem sum boka' anaba, or perob una' unuwaneseng," hyok. 12:13 Dara ono' Yesus ara soruka darasam heimoknya bek, "Anja soruk nginigalom," hyok. Wera bera soruk nginigok dara, darasam eik soruk eneso' anyek eika' dok. 12:14 Bok Parisi nim ek dara, Yesus ak obnemab aboka, yuba sabnoba' aboka, Imik Neyung ek ara loboka yokok mamagel bilimek. 12:15 Yesus ara Parisi nim edya obnenyak hogunga seleb ella ubok. Anasa alda anyagan anyeba' ara loboka bok dara, nimi nauba alab neika' balamek. Dara nimi neiklemeknya nera nidya' hwebsuk. 12:16 Bok Yesus adya dara, alak yeilimek nim ek, Yesus an ulumla aboka yok nim ek nekna' ara mem, hyok. 12:17 Nera ununumna' lelemoknya Yesaya bedya Yesus unuwanamla aboka orowek geklewoka momnya domoka' anyek gigiwolula' aboka umok. 12:18 Momnya doboka' ara, "Nadya weboka doboka bokol bilimsa me nera an. Nadya alak wana' ulumnakanya, alja nadya ganya hekel eleklenel. Nadya' ganya era alak gologanamlakanya, jong una' damok ara, alja yok-yok mok soko nim ek lero binimla. 12:19 Alda yuba yalab hwiboka, nim ab obdangoka ubnenggunumak; salya' pik hnoum sekoka yuba saro yabenggulumnamla. 12:20 Gokoka eleklamla leiya eneba leboka dobnenggunumla, dara saranggonuna' aboka delemlya uk eneba sarangganggunumla. Bok, jong uboka pe ununa' anyek oblamaganggunumla salek era, alda anaso ulumnamla. 12:21 Dara, mok soko me nidya' ara, alja si nek perob amba leboka ganya welemnemak," ara momnya dobok. 12:22 Wera Yesus ak heng lum uboka bisa' wekoka yuba gomnya dangamoknya bek bo yek. Wera Yesus adya hwebok dara, bera yuba saboka heng gwelegoka eibuk. 12:23 Nimi nidya' eiyimek nim era, ganya loka daboka, "Ban benera Daud nang yila' an goma?" aboka lelemek. 12:24 Wera wenyan yub enyek, Parisi nim edya keboka sikja dara, "Ban benera bisa' dubnya Beelzebul bedya unulumnelam aboka alja migib elegoka' adya, bisa' aroba' yakoka ulusil," aboka lelemek. 12:25 Yesus adya Parisi nimi ganya dukduk ara seleb eiyisuk. Anasa alja sikenek lebsuka' ara, "Mok soko hnon nimi dub nang ulumaka' gigiro isa' nang gebdanaseng dara, mok era go' pe senenya loboka ubnenggunumso. Anya nauba heika hnon gom, nim e hnon dolubdangoka, yok-yok isa' neneldalaseng dara, sikda hyak gobdo dengheneseng. 12:26 Anasonya neikek, bisa' dubnya Satan adya alja aran mabo yaknamso dara, wera bisa' dub heik era dolubdangoka, eimik gobdo denghenemso. 12:27 Ugunja dara, nara Beelzebul bisa' dubnya migib adya bisa' yaklamla hunulum. Wera danyek dara, hek migib edya ugunja mab era, sikda bisa' yaklamak do? Anasa, sikja ugunuk yana lelewanasak. 12:28 Bok nak dara, Imik Neyung Geisinya migib adya, bisa' ara yaklamna dara, wera anara Imik Neyung adya seleb ugun gangganek wenelesila' ara an seleb yal an," hyok. 12:29 "Ono' nimi ben hnon hyak migib nongnya bedya' ek wekoka bona' dobnuna' senewoka, migibnya bek men bera henga goubna' orok bok dara, ek or salya' weknamso de? Seleb al nong anyek men henga goubsodyok, wera eimik era bona' or hoka' dobnamso." 12:30 "Nak peroba' leboka mala donena' orok nim era, nak lek senewoka lolonyak. Nak aranena' orok nim era, sikda nadyinya nenyek bolomak! 12:31 Anasa wera, ugunda pe ella danalum, nimi ben hnon yok-yok malya unulamlakanya, yok nimi si ak malya' nenewanamla dara, alja malya una' era or alja soba' meewanamla bok, alda Imik Neyung Geisinya bek malya nenewanamla malya una' era alak ab diba' meewanggunumla! 12:32 Nimi ben hnon nimi diba' me nek malya leboka walamla dara, wenyamso malya una' era, or alja soba' memelamla bok, alda Imik Neyung Geisinya ak walamla dara, wene salek gom, soko sidya' daknamla sum eneba, benedya malya una' era alak ab diba' meewanggunumla!" hyok. 12:33 "Perob gal doka moubnamla aboka dara, gal nong ara mesa' pe bleblamla. Gal nong anyek pe mesa' dena' orok dara, gal dok anaba malya ura moulumla. Gal nonga pe mesa' ulumla gom, orok gom ara, gal dok adya ella dangalamak. 12:34 Ugunda malya una' hwam nim ek ululuma' anasa, ugunda malya una' nim ululum bok dara, perob yuba goboka sabnesom de? Sibama' ak ab laga salamaka' ara, ganya lomok sam seleb ulumla' ara an. 12:35 Nimi nidya' perob yub ok saro ulumak nim era, sikda perobnya nok deknewoka ulumak adya pe saro ulumak. Dara ono' malya una' adya ok deknewoka ulumak nim era, sikja' sibama' ak aba' anaba malya yub ok saro ulumak an. 12:36 Anasa ugunda pe seiniwoka beknelum: Soko sidya' daknamla sum era, nimi wen salya' yuba saro ulumaknya nidya' amba, Imik Neyung adya, anaso lelemek aboka, laga yana lelewanasil. 12:37 Anasa ugunja yuba sana' enedya, anda pe unulum gom, malya unulum gom ara, laga danamla," hyok. 12:38 Dara ono' hnonda Yahudi yuba neklesik nang eb, Parisi nim eb dadya, Yesus ak, "Neklesilimnya o, neyung lok so bekna' hnon meewalom, wenyek nunda eibnemab bar," aboka molowek. 12:39 Anasa Yesus adya dara, "Wenyek ulumak nim era, hyak malya una' hwam nim uboka, ganya uka oboka jok nim ek ulumak!" hyok. Ono', "Ugunda nak yok senenggom damoka hnon meewalom aboka molowounulum de? Ugunuk ara yok damok era hnon eleganggunusin bok, alda ununumna' lelemoknya Yunus bek unumoka' anyek hnonok eleganesin. 12:40 Yunus bera senenggom hadya' mon lomok sam inimnek yubyek lika winilya mabmorumok. Anasonya neikek, eimik era ono' nimi diba' me neneba soko lomok sam inimnek yubyek lika winilya mabmoruwanamla. 12:41 Soko sidya' daknamla sum era, Niniwe heikek ulumek nim era, wene salek an ulumak nim eblaboka neika' suboka buknemaakanya, Niniwe nim edya wen ulumak nim ek malya ululum aboka yana kibnemak. Nera Niniwe nim era, Yunus be sikenek Imik Neyung yuba leb elegosuk sum era, sikda ganya dangawoka domeka' anasa ubnesak. Bok anyaganera Yunus bek alda mek so bok, wera nauba sonya ben hnon ulumla! 12:42 Soko sidya' daknamla sum era, woru sam ab soko dub gel gera sekoka, wenyek an ulumak nimi nidya' ak malya ublum aboka yana kibnesil. Ban soko dub gel gera, alda Salomo bek ab perob el dangana' dobnamna aboka dara, gel gera mok sam ab yanggan pika jakgiga yeilimok. Bok wenyek dara, anyagan Salomo bera mek so bok, ben hnon naubenya hnon ulumla!" hyok. 12:43 "Bisa' ganya yama' ara, nim ek ab loboka balamla dara, gelelom aroba' ak sam dek-deka sobnamna aboka ero yabalamla bok, oulyanga eilinggulumla. 12:44 Anasa, wera bisa' adya dara, Nadya youma' lo yeilimsa ek sam onsok saaboka binimna. Wenyaboka lanawoka e nenyek an yalamna enyek, e nera e dem uboka, sembeja' oroka' anyek peroba' ak ulumna' ak eillilamla. 12:45 Anya ono' eimik era, yok sekbadya bisa' era alda mek so bok, hyak yu nong bisa' enyek el balamla. Anya wera sikda benedya lomok an wekna dara, sikda anyagan ulumak. Dara bisa' dan weknanya bedya nong una' era, youma' dara, or mek so bok, wenyek dara, hyak gobdo malya dangalamla. Ban nenyeka' anyek, wene salek an ulumak nim era unuwanasil," hyok. 12:46 Wera Yesus ara wenyaboka anyagan ulumek nimi mandebna' eb anam yuba salamek sab-sab, alja genong geb, alja weisab eb yeilimek. Sikda beiyik sam sekoka, Yesus ab eibdangoka yuba sabsibya senewoka ulumek. 12:47 Dara, nimi ben hnonja Yesus ak, "Neyung o, neyung anja genong geb, anja weisab eb dara, beiyik sam anak diri seklenjak," hyok. 12:48 Dara Yesus adya lebnemoka' ara, "Nadya genong gera heknya do? Nadya weisab era hek nang ek do?" hyok. 12:49 Dara Yesus ara alja yuba doro diriga ban nang ek, soruka okoka, "Nadya' genong geb nadya weisab eb dara, ban. 12:50 Nadya neyung be imik heikek ululanya bedya alja unuwanok senelamla' anyek, unulumak nim era, nadya weisabo, nadya hmal gelewa, nadya' genong yab ulumaka' ara an," hyok.
13:1 Dara al neik sum enyek, Yesus ara e nenyek ara loboka, mek gwan gemek sam bul bilimok. 13:2 Yesus bulumoka' ak ara, nimi hyak nauba yeiniboka longol ganaklemeka' anasa, nimi nauba ara mek dala' ak weklam lobek bok, Yesus ak dara, alda mek gwan nong ok sam, mek ekla buna' eilib bukok. 13:3 Dara Yesus ara yok-yok yuba nauba yoka' ak sunuwoka lelesuk. Dara, "Nimi ben hnon yina' bo yamal bilimok," Yesus adya wenyaro leb einiwok. 13:4 "Wera yina' bo biniboka yamalamok enyek, yina' hnonda pikek sam yama yinggyuk. Dara wining adya yeiniboka ban yina' era nidya' dengaboka demok. 13:5 Yina' hnonda girik lumuk sokok sam yama yinggyuk. Dara soko ilil adya, yina' era men berra aboka bongowok. 13:6 Bok henga welok dara, yarenga sokok pe elekna' orok adya bongowok bok, yalawoka somogok. 13:7 Alda yina' hnonda girikna' hnoum yama yinggyuk. Wera girikna' anaba bongowoka welelemoka' adya, yina' ara neika' bongowok bok, bong adya somogok. 13:8 Bok yina' perob sokok sam yama yingginiboka bongowoka welewoka doka moulumok dara, hnonda denga dombadya moulumok, hnonda denga penya moulumok, hnonda denga yuba' hnonok anaso moulumok!" aboka lelemok. 13:9 Yesus ara wenyaboka seleb sunuwoka lebgogowok dara, ono' leboka' ara, "Ugunda o yaka' ara, hyak pe kebnelum!" hyok. 13:10 Dara wenyek Yesus alja yuba doro diriga ban nang edya dara, Yesus ak yeiniboka, "Nimi nauba yok nim ek sam yuba sabnamna dara, hekasa yoka' ak sunuwoka yuba salalam do?" aboka heibek. 13:11 Anasa Yesus adya sikenek ara, "Ugunuk dara, Imik Neyung adya wenelemnesila' damok ara, gunuwoka elegosuka' adya ella ululum bok, sikenek dara, eleganggom anasa lelemna. 13:12 Nimi nidya' orowek nauba bolomak nim era, sikenek nauba elek maknesil dara, hyak nauba bolomnemak. Bok yoka'-yoka' hnonda boldona' orok nim era, sikenek an wen meka' ulusilnya nera, sikenek ab dobnamla. 13:13 Ban nenesa leboka, nara nimi nauba sik gangganek sam yuba sal yaban dara, yoka' ak sunuwoka yuba salamna. Nera sikda heng eilin dara, eillilemak bok, heng eibnenggumna' anaso ak ulumak; hnonda o ken dara, kelemak bok, kebnenggumnekanya, ella ubneng 13:14 Ban unulumaka' adya wera, ununumna' lelemoknya Yesaya bedya lemoka' gigilamla ara, Ugunda soba' o kelemnelum bok, ella dangana' ara ella danggunulum; ugunda eiyiboka keboka kemero bulumnelum bok, damok unuwanamla' ara eibnenggunulum. 13:15 Anasa ban nim enedya, ganya era seleb yugoma dangoka pika lebok, sikja o nera seleb ounugosuk, anya sikja heng bam ara seleb siklebdangamek. Unuwangguseng dara, sikja heng eiyiboka, sikja o nedya yuba keboka, anya sikja ganya edya ella dangoka, nak 13:16 Anya Yesus adya alja yuba doro diriga ban nang ek, "Bok ugunuk dara, ugunja heng adya eillililumakanya, ugunja o nedya kelelum anasa, gobdo pelelum. 13:17 Ugunda banyek dib senewoka bekneluma' ara, youma' ununumna' lelemek nang eb, yok Imik Neyung ak dib senemek nim eb dara, wen an ugun eillilelumnya nenyek eibnob senen ulumek bok, sikda eiriwanggubek. Sikja dara, ugun wen kelelumnya nenyek kebnob sen 13:18 "Yina' bo yamal bilimok aboka sunumna' damok ara, ban keblulum. 13:19 Yina' pikek sam yama yinggilimoknya nera, damok ara nim Imik Neyung adya wenelemnesil yub era kelemak bok, pe ella danganggulumak. Sikja' ganya ak doklomak yub era malya una' damoknya bisa' adya yeiniboka gwenelamla. 13:20 Alda girik lumuk sokok sam yama yinggilimoknya nera, damok ara nim Imik Neyung yuba keboka men perob senewoka dolomak nim ek sununa' ara an ulumla. 13:21 Bok, sikja dolomak Imik Neyung yub ara yarenga eleknenggulumla' adya, sikda pe bobmoruwoka unggulumak. Sikda Imik Neyung yuba dobna' amba leboka, ganya okna dabel yaban gom, yok nim edya ol yabasin gom dara, gobdo malya dangalamak. 13:22 Alda yina' girikna' hnoum yama yinggilimoknya nera, damok ara, nim Imik Neyung yuba kelemak bok, dena' unuruwa' amba leboka, bona' garana dena' garan amba ganggana' gokoldal yabanakanya, sikda bona' dub nang ulusibya senen ganya edya, Imik Neyung yu 13:23 Alda perob sokok sam yama yinggilimoknya nera damok ara, nim Imik Neyung yuba keboka ella dangalamaka' ara an. Dara sikda doka nauba molumla, hnonda denga dombadya molumla, hnonda denga penya molumla, hnonda denga yuba' hnonok anaso molusil, " hyok. 13:24 Wera ono' Yesus adya yok sununa' hnon nimi nauba longol yeilimek nim ek nekoka lebsuka' ara, "Imik Neyung adya wenelemnesila' ara, hogung ara banaso ulumla' ara, nimi ben hnon alja wak sam perob yina' yamamok. 13:25 Wera yok sum inimnek enyek, nimi nidya' seleb hogunga maro lobek enyek, yok isa'anya bedya yeiniboka, gandum doka yamamoka' ak sam walenja yina' hnon yamawok dara, byuk. 13:26 Wera gandum dokomoka' bongowoka urubya lanal yabok dara, walenja anaba laga dok. 13:27 Dara ono' wa damnya bedya' dekna' amba wa wena' nang edya wa damnya bek yeiniboka, Neyung o, neyung anda perob yina' ok anja' wak sam ara yaawanggublum de? Heka' adya wera walenja ara hnon neika' hiboka ulumla do? al yek. 13:28 Wa damnya bedya sikenek lebnesuka' ara, Ara isa' nang edya umok, hyok. Dara dekna' amba wa welemek nang edya, wa damnya bek, Neyung o, nunda walenja ara gwenewoka bologol binimab dara, perob senelam de, aboka heibek. 13:29 Wa damnya bedya dara, Wera walenja anyek gwenel yabumunuk ab dara, gandum anaba gwenewomunuk anasa, orok, mem. 13:30 Gandum ab walenja ab neika' hiboka lomuna' ara, gandum nonga daknemeija sum ok meewanamab. Nara nong dakal yabija nim ek ara, Walenja anyek men gweneb mamagoka gouboka uka dabnelum. Seleb dara, gandum nonga dakoka, masa beilin ek sam beibnelum henem 13:31 Wera ono' Yesus sununa' hnon nimi nauba longomek nim ek sunuwoka lebsuka' ara, "Imik Neyung adya wenelemnesila' ara, hogung ara ban anaso ak ulumla: Ben hnon ara geibya yina' doboka, alja' wak sam doka dokol bilimok. 13:32 Geibya dok ara hyak mek nong dok ek ulumla. Bok alda seleb bongowoka welelamla dara, yok masa era mek sok bok, alak danyek senenggom masa dangalamla. Alda senenggoma' anyek sekna dara, wining ara geibya enyek yeiniboka, bul yalamak," hyok. 13:33 Anya ono' Yesus ara yok sununa' yuba hnon lebsuka' ara, "Imik Neyung adya wenelemnesila' ara, gela hnon roti gwanenga werewanamna aboka, roti aso ara oulyanga winilya beiyiboka, roti welena' doronggoka, nauba dangalamla anaso ulumla," hyok. 13:34 Yesus ara yok nim ek Imik Neyung yuba lel eleklesuk dara, yuba nidya' sununa' adya ok sunuwoka lel eleklesuk. 13:35 Ban unumoknya nera, youma' ununumna' lelemoknya bedya, "Nara sikenek yuba lelemnesin dara, sununa' adya sunuwoka yuba lelemnamna; soko anam uyimok salek eb moruwoka, laga dangana' loboka doknelelanya nenyek, nara lero yabalamnamna," amoknya nenyek 13:36 Ban nen seleb lebgogowok dara, Yesus ara alda ek sam wekok. Dara alja yuba doro diriga ban nang edya Yesus ak, "Neyung o, gandum hnoum walenja bongomoknya nenyek, sununa' damok anaso aboka nuk lelewoka neksilom," hyek. 13:37 Anasa Yesus adya sikenek ara, "Nimi perob yina' bo yamal bilimoknya bera, nimi diba' me ara an. 13:38 Wa ara soko ara an. Perob yina' ara, nimi nidya' Imik Neyung mabo dangalamak nim era an. Walenja ak dara, bisa' ak sam maklemak nim era an. 13:39 Walenja yina' yamal yeilimoknya isa'anya bera Iblis ara an. Nonga dakne sum era, soko sidya' daknamla sum; alda nonga daknamak nang era, imik ab lero nang era an. 13:40 Anasa walenja ak gwenewoka, neika' henga gouboka uka damek sonya nera, soko sidya' daknamla sum era neik so unuwanasil. 13:41 Nimi diba' me seknamlakanya, nimi yok nim ek malya ul eleklesak nimi nidya' ara wera henga goubuka bob mamaganalum aboka, lero nang ek oruganesil, anya nimi nidya' malya una' ok unuro ulumak nimi nidya' ara bob mamaganasil. 13:42 Wera sikda nidya' henga gouboka uk boka' ok delmorulamla ukuk sam sikinek uka dabnesil dara, sikda nidya' ara engewoka si glengdarreb aboka gweklemnemak. 13:43 Dara, alda Imik Neyung ak pelemak nim era, al sikja' neyung bedya wenelemnesil heikek sam henga dingib lomna' anaso ak ulumnemak. Anasa wera, heknya o yaka' ara pe keblul!" hyok. 13:44 "Imik Neyung adya wenelemnesila' ara, hogung ara banaso ulumla' ara, perob bona' enyek, soko lomok weremna' anyek, nimi ben hnonjok eibna dara, onsok soko lomok sam seiklamla. Wera bera hyak nauba eiya dabna dara, alja youma' bona' e nidya' ara yok 13:45 "Imik Neyung adya wenelemnesila' ara, hogung ara banaso' ak ulumla' ara: Bona' nauba deklelanya bera, hyak perob meilika deknamna senewoka elemla. 13:46 Dara, elemna' ara, wera hyak perob nong meilik enyek eib lobna dara, bera alja ek biniboka, alja bona' nidya' e gekman dekna dara, dekna rupiah enedya eiblomna meilik era deklamla," hyok. 13:47 "Imik Neyung adya wenelemnesila' ak dara, hogung ara, mek gwanek sam hadya' ouma' akleng bobogoka yok-yok hadya' nidya' dolomak sok ulumla. 13:48 Wera hadya' ouma' akleng deknewoka lobna dara, hadya' ouma' akleng ara, hadya' don nang edya mek doubuk sam gliboka beillilemak. Wera sikda hadya' nidya' ara, webde bulumna' ara, den hadya' era solowak lomok sam beillilemak dara, denggomnya nera bol 13:49 Anasonya neikek, soko sidya' daknamla sum era unuwanamla. Lero nang edya, nimi malya una' unulumak nim eb, Imik Neyung ak pelemak nim eb, bokoka unuwanasak. 13:50 Dara, malya ulumak nim era, sarangna' orok uk hinek sam doboka boboganasak. Dara anyagan malya ulumak nim era, nauba engewoka si glengdarreb aboka gweklemnemak," hyok. 13:51 Wera Yesus adya, "Nadya nidya' lebnanya nera seleb ella ublum de?" aboka heibsuk. Dara sikja, "Neyung, nunda nidya' ella umab!" hyek. 13:52 Dara ono' Yesus adya hnon leboka' ara, "Al nenesa aboka, nimi nidya' yuba neksin nimi bok, Imik Neyung adya wenelemnesila' ak ella dangamek nim era, e damnya benyek alja wenyok bona' ab, youma' bona' ab, beilina' ek ab doboka beiyik sam laga bo yala 13:53 Yesus ara nim ek ban sununa' yuba nidya' nekoka leb elekgogowosuk dara, anyagan ara lobok. 13:54 Dara alja' heikek sam byuk. Alja' heikek sam uboka, Yesus ara Yahudi nim edya yuba dona' ek sam biniboka, Imik Neyung yuba lel eleklesuk dara, alak kelemek nim era hyak ganya loka dasuk. Anya sikja dara, "Ban benera hekmok ab banaso ella dangana' do 13:55 "Alda e sona'anya bedya me gom de? Alja' genong gera Maria ge uboka, alja weisab era Yakobus, Yusuf, Simon beb, Yudas beb, unggulumak de? 13:56 Alja hmal gelewa dara, anyagan nidya' unggulumak de? Alja ban nidya' unulamla' ara har sam ab dobok do?" aboka lelemek. 13:57 Wenyaboka sikda Yesus ak anda nu lek aboka seinimek. Bok, Yesus adya sikenek, "Ununumna' lelelanya bera mok soko nidya' ara alak peroba' lelemak bok, alda alja' meneng heikek ab, alja e yoka' ak ab dara, perob senenggulumak," hyok. 13:58 Dara Yesus ara, anyagan nimi nidya' dib senewanggumeka' anasa leboka, senenggoma' lok so' ara hnon unuwanggumok.
14:1 Ban salek enyek, Galilea sokok dubnya Herodes bedya Yesus adya unulamla an yuba kebok. 14:2 Anasa leboka, Herodes bedya alja wa wena' dub nang ek, "Ban benera Yohanes Pembaptis bek seleb embenga' suboka ulumla! Anadya wera alda yoka'-yoka' senenggoma' migib ununa' unuro yabalamla," hyok. 14:3 Nera men dara, Herodes bedya Yohanes bera henga gouboka gasa ek sam beiblulum aboka orugosuk. Herodes bedya Yohanes bek unumoka' damok ara, alja weis Pilipus dubnya bedya gel Herodias gemba leboka henga goumok. 14:4 Wera Yohanes bedya Herodes bek men danyek lemoka' ara, "Anda Herodias gera dobnenggunulam, mem!" hyok. 14:5 Herodes bedya dara, Yohanes bera dib obnamna senemok bok, nimi nidya' adya dara, Yohanes bera Imik Neyung adya ununumna' lenya senelemeka' ak lok ganya bomoka' anasa, loboka heng ok goumok. 14:6 Wera ono' yok sum enyek, Herodes bera al beiyimek sum bekoka masa youmok dara, Herodias gedya gelma edya nimi longol yeilimeka' hnoum, bera sunugoka seblemok. Gelma enedya bera pero seblemoka' anasa, Herodes bedya ganya era hyak eiya dabok. 14:7 Anasa wera, Herodes bedya ban gelma enyek an, laga okoka, "Wera, bera pero seblelama' anasa, anja bona' enyek eleganeso senemena' ara, nidya' hyak gigiwoka eleganenggen," hyok. 14:8 Wera gelma en alja' genong gedya wenemoka' adya Herodes bek ara, "Nara Yohanes Pembaptis bedya huk enyek, gwanenga yangawoka beilina' ak beiyiboka wen eleganenelema' anasa molowan," hyok. 14:9 Gelma enedya wenyaboka molowok yub enyek, Herodes be kebok dara, alja ganya angoo senewoka soloma dabok. Bok nimi hnoum ab laga yoka' nidya' molowamena' ara hyak eleganenggen amoknya nenesa leboka, wera Yohanes bedya huk era or dakoka bo yanok aboka orugosuk. 14:10 Wera nimi henga gouboka gasa beillisin ek sam biniboka Yohanes bedya huka garamek. 14:11 Wera Yohanes bedya huk era garawoka, gwanenga yangawoka beilina' ak beiyiboka bo byik dara, bera seblemok gelma ak elegel byik dara, gelma enedya eilinggek bo elegel byuk. 14:12 Seleb dara, Yohanes bedya yuba doro diriga ban nang era, Yohanes be nonga dol yeiniboka soko lokek. Dara ono' sikda Yesus ak Yohanes bera Herodes bedya seleb ya nganga dako aboka nekel byik. 14:13 Wera Yesus ara Yohanes be seleb obong an yuba kebok dara, al ulumoka' ak ara loboka, albeyok mek ekla buna' bukoka salya' gakdena' ak sam byuk. Bok nimi nauba ulumek nim edya, Yesus unuwal an yuba kebek dara, sikja heikek ulumeka' ak sam ara loboka, Yesus bilimoka' ak sam dobol byik. 14:14 Wera Yesus ara mek ekla buna' ak ab uboka, sokok yingginiboka nimi mandebna' enyek an kemelemok dara, angoo hyak yadyek senewousuk. Dara ono', sik ganggan pik hnon neikdo balameknya nera hwebsuk. 14:15 Sin dangal yabok dara, alja yuba doro diriga ban nang edya Yesus ak yeiniboka, "Neyung o, seleb sin dangoka ono' anyagan ara salya' gakdena' ak anasa, nimi danara biniboka dena' eboka dekdowanoka' aboka, binilum aboka orugesilom," hyek. 14:16 Yesus adya sikenek ara, "Sikda binggunumak bok, alda ugunja sikenek dena' eboka eleganesulum," hyok. 14:17 Wenyek Yesus alja yuba doro diriga ban nang edya alak, "Nuk anyagan ara roti gwanenga lambadya uboka hadya' penya ok ulumla!" hyek. 14:18 Dara Yesus adya, "Wera an nera nak an bo yoululum" hyok. 14:19 Wera Yesus adya nimi nauba ulumek nim ek, "Hola' eilib buklulum," hyok. Dara Yesus adya lambadya roti gwaneng eb, penya hadya' eb dara, imik keeboka, Imik Neyung ak perob aboka giboka molowok. Seleb molobgogowok dara, roti gwaneng era Yesus adya soboka alja yuba doro diriga ban nang ek, nimi nidya' ak boknelum aboka elegosuk. 14:20 Wera nimi nidya' ara, hyak muna bukoka jek. Seleb deregoka boklomeknya nera, gwaneng oulyang obadya boklomeka' ak neika' mamagemek. 14:21 Anyagan bukoka delemek nimi mandebna' era, gelewa ab mek mab eb dara, einina' orok bok, alda nauba nang oka' anyek, denga yuba' lambadya nang delemek. 14:22 Seleb debgogowek sab-sab, Yesus ara alja yuba doro diriga ban nang ek, ugunda mek ekla buna' welewoka men balalulum aboka orugosuk dara, alda gwaneng deb elegosuk nimi mandebna' era, ugunja heikek sam balalulum aboka orugosuk. 14:23 Wera nimi nidya' ara, sikja heikek sam seleb byik dara, Yesus ara albeyok, heng uboka molowoununa' aboka, meinik sam welewok. Wera inil yabok bok anyek, Yesus ara meinik sam alak ok ulumok. 14:24 Bok, mek ekla buna' anyek hyak mek hnoumung balamok. Dara mek ekla buna' ara, kabo' yalamla' ak sam uruma beiyimoka' adya' wera kabo' adya luknobom-erebom abgiga balamok. 14:25 Gweleknek yangman salek enyek, Yesus ara alja yuba doro diriga ban nang ek, mek dub pik yan ingibgiga yalamok. 14:26 Wera Yesus ara mek dub pik yan ingibgiga yalamoka' ak eibek dara, alja yuba doro diriga ban nang era lok anasa, "Bisa' anya'!" aboka ngoluklemek. 14:27 Bok Yesus adya danyek, "Nara Yesus ak anasa, ugunda ganya gwelelek hululum. Ugunda lok ganya bonenggom, mem!" hyok. 14:28 Dara ono' Petrus bedya Yesus ak, "Wei, anda aldib Yesus ak yalamen dara, nababya anak an mek eilib pik yan ingibgiga younuna' aboka, or oruganelom," hyok. 14:29 Wenyek Yesus adya Petrus bek, "Wera, or yalom," hyok. Dara Petrus bera mek ekla buna' ak ab mek dubuk sekel yingginiboka Yesus ak sam yan ingi byuk. 14:30 Bok Petrus bera mek eilib pik bokjok, kabo' ak kemelemok enyek, alda loka dabookanya, al nonga meka si dununa' aboka ul yabok dara, "Wenelesilimnya o, men arawanelom!" aboka lel yabok. 14:31 Dara Yesus adya men soruka dorogoka Petrus bek dobsalawoka, lebokja, "Petrus o, anda mek dib senelelamnya bek ululam. Anda hekasa dib senena' loboka ganya daldom-daldom alam do?" hyok. 14:32 Wera ono' sik penya dara, mek ekla buna' dubuk sam onsok welewoka bukdek dara, mek ara namena' dok. 14:33 Dara Yesus adya yuba doro diriga ban nang edya, Yesus ak giblemek. Anya lebeka' ara, "Wenelesilimnya o, anda aldib Imik Neyung bedya me ululam!" hyek. 14:34 Wera mek ekla buna' dub pik buka balameknya nera, mek gek sam Genesaret sokok sam bul byik. 14:35 Wera mok enyek an nim era, Yesus nong ak yoka' eibek dara, ono' yok nim ek wera Yesus nunja' sokok sam yal aboka yuba beibik dara, nimi neiklemek nimi nidya' ara, Yesus ak bo yek. 14:36 Anya sikja, neyung o, nun dam nang anja akleng ek sam meka' bebegananjab dara, merewanamab aboka Yesus ak molowek. Dara, nimi neiklemek nimi nidya' ara, Yesus adya akleng ek bebegemek dara, sikda merewek.
15:1 Wera Parisi nimi hnon uboka, ono' yuba neksin nanga hnon Yerusalem heikek ab uboka Yesus ak yek. Sikda Yesus ak heibnemeka' ara, 15:2 "Hekasa anja yuba doro diriga ban nang era, sikda nunja' youma' nim edya ununa' era blekoka ulumak do? Sikda denemna dara, soruk mek eleganggonggom delemak!" hyek. 15:3 Anasa Yesus adya sikenek ara, "Ugumbabya ugunja' neyung yab edya unulumek ununa' enyek unululumukanya, hekasa Imik Neyung yub ara bleklelum do? 15:4 Imik Neyung adya dara, Ugunja' genong neyung ak pe gibel dololulum, anya, Alda heknedya alja' genong neyung ak malya leboka walamla dara, bera hyaka' obnelum, hyok bok anasa, ugunda hekasa bleklelum do? 15:5 Bok ugunja nimi yok nim ek yuba neklelum dara, nimi ben hnon alja' genong neyung ak, Heka' ak nadya genong neyung ugunuk eleganesisinya' ara, Imik Neyung amba seleb beiyimna, helya dara, 15:6 bera alja neyung ak, Or eleganggunumla, alalum. Anasa wera, ugunja' neyung yab edya youma' unulumek ununa' emba leboka, Imik Neyung yub ara dolbaleka' geblelum. 15:7 Ugunda hyak sonda' hwam nim o! Ununumna' lelemoknya Yesaya bedya ugunsamba leboka momnya doboka' ara, 15:8 Nimi ban nim enera, sikda yuba dem adya ok Imik Neyung ak giblemab aro giblenyak bok, sikja ganya era hyak mok beiyik gebdangoka ulumak. 15:9 Nak ara salya' giblenyak, sikja neklesak yub era nim adya yub ek neklesakjok, nadya yub ek lero neknenggulusak, aro momnya doboka' ara dib lebok," hyok. 15:10 Dara ono' Yesus adya nimi nauba ak yoululum aboka sikenek lebnesuka' ara, "Ugunda pe ella danalum aboka kebnelum! 15:11 Sibama' ak sam weklelanya nedya nim ara sembeja' gebnenggulusil bok, alda sibama' ak ab ara goboka beiyik yabalelanya nedya danyek hnonok, nim ara sembeja' geblesil," hyok. 15:12 Dara Yesus adya yuba doro diriga ban nang edya, Yesus ak yeiniboka, "Neyung o, anja ban wenyaro lelelam yub era, Parisi nimi kelemak dara, sikja ganya malya ulusila' ara, ella ululam de?" aboka heimek. 15:13 Yesus adya sikenek lebsuka' ara, "Nadya neyung be imik heikek sam ululanya bedya mebnenggumlya yina' era, eimik nidya' yarenga lelewoka gwenewanamla. 15:14 Ugunda Parisi nim enesa nauba seiniwoka lenggom. Sikenek seleb henga luma yousuk nang ek anara ulumak, anya henga lumnya bedya henga lumnya bek pik ablamla. Dara sikda neika' selenga' lomok malyingginirak," hyok. 15:15 Danyek Petrus bedya Yesus ak, "Neyung o, ban sunuwoka leblam damok enyek, anyek lebna aboka nuk lelewoka neksilom!" hyok. 15:16 Dara Yesus adya sikenek lebsuka' ara, "Ugumbabya anam ella danggulum de? 15:17 Damok ara yoka' hnon sibama' ak sam wekoka mon lomok sam yingginiboka, ono' goboka yabalamla ara eilinggululum de? 15:18 Bok heka' ok sibama' ak ab goblelanya nera, ganya lomok ab ak goblamla; anya ana nong adya nim ara sembeja' nenelesil. 15:19 Anasa nimi ganya lomok ab malya una' ganya ara lanalamla, anadya wera nim olomak, gela salalemak, gel ganya ok deknewoka ulumak, hoka' dolomak, nimi derewoka waboka sonda' amba besa leboka nimi malya nenelemak. 15:20 Banyan ulumla damok edya, nimi nidya' ara sembeja' nenelesil, alda nimi soruka mek elekdanggonggom dena' delemaka' adya nimi ganya ara malya nenenggulusil," hyok. 15:21 Wera ono' Yesus anyagan ara loboka, alda Tirus Sidon heik berem moka byuk. 15:22 Kanaan mok eb gel ge hnon, Yesus ak bii aboka lebgiga yalamokja, "Daud bedya me o, nak angoo yadyek ubneya e! Nadya gelma era bisa' wekdoboka, hyak nauba gweklamla bar," aboka lelemok. 15:23 Yesus adya dara, gel genyek ara yuba meka' saaboka sab eleganggumok. Anasa Yesus yuba doro diriga ban nang edya Yesus ak, "Wenelesilimnya o, ban gel gera nuk yuba mandebna' amba lero yabalamla' anasa, bilom helom," aboka molol yek. 15:24 Yesus adya sikenek lebsuka' ara, "Nara Israeli nim enyek, malya dangoka weiningdangamek nim emba ok bokol yeilinyok," hyok. 15:25 Dara ono' gel genedya' anaba Yesus adya' saramek sam kom lumugoka bul yeiniboka, "Neyung o, nak arayiwananelem e," hyok. 15:26 Yesus adya gel genyek leboka' ara, "Mekmabo dena' anyek doboka gam ak sam elekna dara, perob gom," hyok. 15:27 Dara gel genedya Yesus ak, "Neyung o, aldib nonga leblam. Bok gam anababya alja' neyung bedya yangana' gal ak sam bukoka delemna enyek, dena' sikna' yanggalamla' ara gam adya boboka delemla," hyok. 15:28 Anasa Yesus adya gel genyek an, "Genong o, anja dib senelelama' ara hyak senenggom nong! Anasa anja unuwanaso senelam sok unuwanenggel!" hyok. Dara al wene sab-sab gel genedya gelma era gobdo merewok. 15:29 Yesus ara al ulumok ak aba' ara loboka, Galilea mek gwan gem pik dobgiga balamok. Anya alda yok mok soko yemek bindiwoka bukumok. 15:30 Dara nimi nauba Yesus ak, koma bulumek nim hnon, nonga heilisuk nim hnon, yuba goma dangalamek nimi hnon, henga luma yalasuk nimi hnon, anya yok-yok neikna' salalesuk nimi nauba bo yalamek. Neiklemek nimi nidya' ara Yesus adya' saramek sam bo beil yalamek dara, Yesus adya merellilisuk. 15:31 Nimi nauba dem nim anyagan ulumek nim era, anyek eiyiboka hyak nauba loka dasuk. Dara, yuba gom nim era yuba saro yabalamek, koma bulumek nim era mereboka yabalamek, nonga heilisuk nim era pe yan ingi yabalamek, henga luma ulusuk nim era pe henga gwelegoka eillilemek. Nimi nidya' ara anyek eiyiboka, Israeli nim era Imik Neyung bek giblemek. 15:32 Wera ono' Yesus ara alja yuba doro diriga ban nang ek anyagan yoululum aboka, "Nara nimi mandebna' danyek, angoo yadyek ubnel. Sikda nablaboka gobdo lika winilya gwaneng bunya anyek mabsiniwab, anya wenera sikda dena' ara dengaramla. Sikda pikek ab gwaneng mesa dakoka somogeijek anasa, nadya dara, or bindowoululum henggunusinya," hyok. 15:33 Dara alja yuba doro diriga ban nang edya alak, "Nimi mandebna' naubakanya, dena' garan mok ek bok anasa, dena' ara har sam ab doboka eleganesibya do?" aboka lebek. 15:34 Dara Yesus adya sikenek, "Ugunuk ara roti gwanenga hekbadya ulumla do?" wenyaboka heibsuk dara, sikja Yesus ak, "Roti gwanenga sekbadya uboka, mek hadya' era or wen ulumla," hyek. 15:35 Dara Yesus adya nimi nidya' anyagan ulumek nim ek, ugunda sokok sam buklulum aboka orugosuk. 15:36 Anya Yesus ara roti gwaneng sekbadya' anyeb, hadya' danyeb doboka, Imik Neyung perob aboka giboka molowok. Seleb dara, roti gwaneng ab hadya' ab dara, soruk adya soboka, alja yuba doro diriga ban nang ek elegosuk. Dara nang enedya nimi nidya' bukumek nim ek boksik. 15:37 Nimi nidya' ara gigiwoka delemeka' loboka mona bukoka jek. Dara ono', Yesus adya yuba doro diriga ban nang edya deregoka bok lobeknya nera neika' ak mamaklemeka' ara, oulyanga sekbadya deknemoka' anyek mamak lobek. 15:38 Dara anyagan bukoka delemek nim era, gelewa ab mekmab eb dara, einina' orok bok, alda nengmab oka' anyek hiboka nimi denga yuba' dombadya nang (empat ribu orang) delemek. 15:39 Wera Yesus adya nimi nidya' ara ugunja ek sam binilum aboka orugosuukanya, alak dara, mek ekla buna' bukoka, Magadan mok ek sam byuk.
16:1 Wera Parisi nim eb Saduki nim eb Yesus ak sene sunuwanoba' aboka yeilimek. Sikda Yesus ak, alda aldib Imik Neyung ak ab yeilimok aboka ella danoba' aboka, lok so bekna' hnon meewalom aboka molowek. 16:2 Wenyek Yesus adya sikenek ara, "Heng anyek pe wekel balamla dara, ugunja dara, Im ara goron ubla' anasa, mok soko hogunga pewanamla, alalum. 16:3 Alda luguna' ek dara, ugunda wenyalaluma' ara, Arana' im uboka, gunugala' anasa, wera moka yanamla, alalum. Anasa wera, ugunda imik sam keeboka, sum era unuwanamla aboka bekna' eillilelum bok, alda eimik yoka' unuwanamla' ara ugunda bekna' damoka hnon eilinggululum!" hyok. 16:4 "Bojam una' loboka, malya una' hwam nim edya, yok damoka hnon meewalom aboka oruklemak bok, nadya dara, hnonok sibin anaba meewanggununabok, alda ununumna' lelemoknya Yunus bek unumoknya nek hnonok eibnemak," hyok. Yesus ara wenyabgogowok dara, anyagan ara loboka byuk. Ulululum Aboka Lebok Yuba 16:5 Wera Yesus adya yuba doro diriga ban nang era, balameka' ara, mek gek sam seleb byik dara, kemelemek enyek, wera sikda roti gwaneng bobnenggumeka' ak eibek. 16:6 Yesus adya sikenek, "Ugunda Parisi nim eb, Saduki nim eb dadya, roti welena' ak anyek, hyak pe keeboka ulululum," hyok. 16:7 Alja yuba doro diriga ban nang edya ban wenhyok yub enyek, kebek dara, sik moumen leldalamekja, "Alda ban wenyasila' ara nuk roti gwanenga bobnenggumaba' anasa lebsil," aldal yabek. 16:8 Danyek Yesus ara sikja leldalamek yuba damok era seleb ella ubsuk. Anasa alja sikenek ara, "Ugunda hekasa nunda roti gwaneng orok bar aboka leldalalum do? Ugunja dib senena' era meka' me ulusil. 16:9 Ugunda anam elgom ululum de? Nimi denga yuba' lambadya nim emba aboka roti gwanenga lambadyakanya, ugunda eimik era roti gwaneng aklenga hekbadya bolob mamagaluma' ara beknenggululum de? 16:10 Ono' nimi denga yuba' dombadya nim emba aboka, roti gwanenga sekbadya bok, ugunda eimik era roti gwaneng aklenga hekbadya bolob mamagaluma' ara beknenggululum de? 16:11 Nara ugunub neika' yuba salamab dara, gwaneng sirika' ak lenggulumna, damok ara heka' adya elgom ululum do? Ugunda Parisi nim eb Saduki nim eb dadya, sikja roti welena' enyek, pe keeboka ulululum!" hyok. 16:12 Wera danyek, Yesus adya yuba doro diriga ban nang era, roti gwanenga werelemak welena' ek lenggulumok bok, alda Parisi nim eb, Saduki nim eb dadya sikja nekna' enesa lelemla' ak senewoka ella dek. 16:13 Yesus ara Kaisarea Pilipi heikek sokok sam byuk. Anyaganyeb dara, Yesus ara alja yuba doro diriga ban nang ek lebsuka' ara, "Nimi yok nim edya dara, nimi diba' me nera heknya alamak do?" aboka heibsuk. 16:14 Dara Yesus alja yuba doro diriga ban nang edya alak, "Hnon nim edya dara, Yohanes Pembaptis alamak. Ono' hnon nim edya dara, Elia alamak. Ono' yok nim edya dara, Yeremia ben gom, yok ununumna' lelemoknya gom, alanjak," hyek. 16:15 Bok Yesus adya sikenek, "Bok ugun nong adya dara, nara heknya senelenulum do?" hyok. 16:16 Dara Simon Petrus bedya, "Neyung, anda Kristus, nimi blebsina' dubnya ululam. Anda Imik Neyung embenga' ululanya bedya me ululam," hyok. 16:17 Danyek Yesus adya ono' alak, "Anda Yunus mamnya Simon, anda hyak dib lerowalem. Nera nim adya anak neknenggubjak bok, alda nadya neyung be imik heikek eini ululanya bedya nekgela' ak leblam. 16:18 Anasa wera, anda banyek ella danalam, anda wera Petrus ulumnelam, migib girik alamnenjak. Dara ban girik dub enyek an, somokna' nimi heik sibin adya' anaba oblamagoka malya nenewanggunumla anyek, nadya yuba dona' nim diba' sobnamna! 16:19 Nara Imik Neyung bedya wenesin heik pik bakna' era anak eleganenggen. Anja sokok anyeb nera memnya alamnalamnya nera, imik heikek anaba mem alamnamla. Ono' anja sokok anyeb nera or perob alamnalamnya nera, imik heikek anaba nera or perob alamnamla," hyok. 16:20 Seleb wenyabgogowok dara, Yesus ara ono' alja yuba doro diriga ban nang ek, benera Kristus, nimi blebsina' dubnya benya' aboka, nimi ben hnonok sibin anaba nekdo yabana' ara, mem aboka wenewosuk. 16:21 Ban sum enyek moruwoka, Yesus ara alja yuba doro diriga ban nang ek, nara Yerusalem heikek binimnekanya, Yahudi dub nang eb, Imik Neyung yuba wa gaka' dub nang eb, yuba neksin nang edya nauba igin kweiyiwoka, oboka dibnenyak dara, winilinya sum era, embenga' suboka buknamna aboka laga poboka leb einiwousuk. 16:22 Wenyek Petrus bedya Yesus anyek, al dam gliri beildil yeiniboka leboka' ara, "Wenelesilimnya o, ban era hyak unuwanggunununjak, orok!" hyok. 16:23 Dara Yesus ara Petrus bek uruma dangawoka, alak leboka' ara, "Nimi sunulyamana' hwamnya Satan o! Anyaganyeba' ara bilom! Anda nak salya' pika garalenelem an. Anja ganya seinina' era, Imik Neyung adyinya nek seininggululam bok, nim adyinya nek seinililam!" hyok. 16:24 Dara ono' Yesus adya, alja yuba doro diriga ban nang ek, "Nimi nak diriga yanenyak aboka dara, alak perob danasonya nera hibigalyekanya, alja' igin yaka' doboka, nak diriga yalanulul. 16:25 Anasa nimi nidya' nunja nonga denghelyek senewoka blebeldalamak nim era, sikda weiningdanamak. Bok nasamba leboka, sik weiningdanamak nim era, sikja nong eibnamak. 16:26 Nimi ben hnon sokok ulumla' nidya' ara, nadya' aboka dobnamso bok, alja' nonga weiningganamso dara, alak ara heka' perob danamso do? Goma, nim alja nong una' amba heka' ak amama' ubnamso do? 16:27 Duboka mandena' loboka, nimi diba' me neb, alja lero nang eb, alja neyung bedya nong senedya' pik uboka yanamak. Ban sum enyek, nimi nidya' sikja unulumeka' sunuwoka yok-yok deknesil. 16:28 Ugunuk hyak dib lebsina' anyek ella danalum: Ugun an ublum nim enera, nimi diba' me yeiniboka, wenelemnesila' ara eibnenggumun salek somoganggunulum nimi hnon ululum," hyok.
17:1 Wera lika hnabbadya sum seleb ubek dara, Yesus ara Petrus beb, Yakobus beb, Yakobus bedya weis Yohanes eb, neika' senenggoma' imik welemok meinik sam welewek. Anyagan ara sikbeyok ulumek. 17:2 Anyaganyeb dara, Yesus ara sikja kemena' edya dara, yoka' dok. Alja hogung era heng senedya' anaso uboka, alja ongomok akleng era dilina' anaso' ok dangamok. 17:3 Wera unumok sab-sab, Musa beb Elia beb laga dangarek dara, Yesus ab, sikda penya nang eb neika' yuba salamek. 17:4 Dara, Petrus bedya Yesus ak, "Wenelesilimnya o, nunda anyagan ulumaba' ara hyak perob nonga' ak ulumab. Wera anda or perob senemen dara, nara anyagan lubna e winilya sobnamna, hnonda ansamba, hnonda Musa bemba, ono' hnonda Elia bemba," hyok. 17:5 Petrus bera anam wenyaboka yuba salamok sab-sab, deba' buma hnon sikenek so siklel yinggisuk dara, deba' lomok sam ab yuba hnon, "Nadya wana' nong ulumna me nera ban. Alja nadya ganya hekel eleklenel. Alak pe keblulum e!" hyok. 17:6 Wera Yesus adya yuba doro diriga ban nang era, Imik Neyung adya Yesus ak wenyal yabok yub enyek kel yabeekanya, hyak loka daboka sik nonga gololong aboka sokok sam malyinggyik. 17:7 Bok Yesus adya yeiniboka, sik nonga gaaboka lebokja, "Ugunda lok ganya bona' ara mem. Ugunda buklulum!" hyok. 17:8 Sikda bukoka kemel yabek dara, yoka'-yoka' ara eilina' orok bok, alda Yesus ok eibek. 17:9 Wera sikda meinik aba' ara yanggek dara, Yesus adya sikenek, "Nimi diba' me nera somokna' damokok anam suboka bukiyiwanggulyebok dara, men ugunja eiyiluma' ara, yok nim ek salya' nekdo yabana' ara mem," aboka wenewosuk. 17:10 Wera alja yuba doro diriga ban nang edya Yesus ak, "Yuba neklesak nang edya dara, hekasa Elia bera men yanamla alamak do?" aboka heibek. 17:11 Dara Yesus adya sikenek ara, "Aldib, Elia bera yanamlakanya, yoka'-yoka' nidya' pe meewanamla. 17:12 Bok, nara ugunuk dib lebsin, Elia bera seleb yok bok, nim adya alak elgom ulumek, anya alak obneboka, sikja dara sanga' geblemek. Anasonya neikek, nimi diba' me nek anaba unuwanamak," hyok. 17:13 Danyek Yesus adya yuba doro diriga ban nang edya dara, Yesus ban wenyalamla' ara, Yohanes Pembaptis bek lelemla senewoka ella umek. 17:14 Wera Yesus ab alja yuba dona' nanga winilya nang eb dara, nimi nauba longomeka' ak sam yek dara, nimi ben hnon Yesus ak yeiniboka oumuwoka giboka, leboka' ara, 17:15 "Neyung o, nadya me nek hyak angoo yadyek senewalom e. Alda hyak senenggom digidoka ana' neikna' salawoka, uk ak sam soowoka dorongdangoka, hnon sum era meka yourulamla. 17:16 Nara seleb anja yuba doro diriga ban nang ek sam bo bisebok, sikja dara pe hwebnamenggom anasa lorob," hyok. 17:17 Dara, Yesus adya, "Ugunda hyak hek nim ek ululum! Ugunda hyak meknewoka dib senenggululum nim ek gobdo ululum. Nara ugunub dara, li hekbadya ok go' siklewoka uldablemnemab do? Ban me nera anyagan bo yoululum!" hyok. 17:18 Dara Yesus adya me nenedya' ganya lomok sam ulumok bisa' era goboka yibilom hyok. Wera bisa' era goboka yibuk dara, me nera al wene sab-sab enyek merewok. 17:19 Dara ono' Yesus adya yuba doro diriga ban nang era, Yesus ak sikbeyok gelelenga yeiniboka, "Neyung o, heka' adya nunja dara, bisa' ara yaknenggubmab do?" aboka heibek. 17:20 Wenyek Yesus adya, "Ugunja dib senena' ara mek ok adya. Ugunda pe beknelum! Ugunja Imik Neyung ak dib seneleluma' anyek, geibya dok anaso' ulumso' anaba, ban mein enyek lebnesomja, Ono sam gokoka bilom! wenyhenesom dara, mein era gokoka bul binimso. Yoka'-yoka' nidya' ugunja unuwanggunusomnya hnon unggulumnamla!" hyok. 17:21 "Bok ban bisa' eneso' ara, Imik Neyung ak gwaneng loboka, molobsiniwanasoma' adya ok yaknesom," hyok. 17:22 Wera Yesus adya yuba doro diriga ban nang era, sikda Galilea moka ulumek sum enyek, Yesus adya sikenek, "Nimi diba' me doboka nimi soruk ak eleganamak sum era, wera mabdabnenggunumla. 17:23 Alda oboka dibnemak bok, winilinya sum era, onsok embenga' suboka buknamla," hyok. Danyek alja yuba doro diriga ban nang era, ganya suguwoka, engena' ganya beibsuk. 17:24 Wera Yesus ab alja yuba doro diriga ban nang eb dara, sikda Kapernaum heikek yek dara, Imik Neyung e amba rupiah molowoka dolomek nang edya, Petrus bek, "Ugunja neyung neklesilnya bera, alda Imik Neyung ek weknamna' amba dara, rupiah beillilamla gom, orok gom?" aboka heibek. 17:25 Wenyek Petrus bedya sikenek, "Beillilamla' aja!" hyok. Wera Petrus bera ek balamok enyek, Yesus adya alak, "Simon, anja dara, heka' senelam do? Sokok an dub nang edya dara, rupiah bona' amba garana' gom, mok soko amba dekna' gom ara, hek nim ek ab dub nang era dolomak do? Heik yoka' nim edya gom, sekel yanggan nim edya gom?" aboka heibok. 17:26 Petrus bedya dara, "Sekel yanggan nim edya ok deklemak," hyok. Wenyek Yesus adya, "Wera anaso unulumak bok dara, heik yoka' nim era deknenggulumneseng. 17:27 Bok nuk dara, rupiah dolomak nang ganya angwei seneweijek aboka, lobnenggunumab. Anda mek gwanek sam hadya' dol binilam. Men dobmen hadya' enyek doboka beibnelam. Dara, nunja beibnenam rupiah era, hadya' en sibama' ak an bomlya' ak eibnelam. Dara rupiah enyek, dobmenekanya, nunda Imik Neyung ek weknemeibya' amba, rupiah dobnoba' aboka welemak nim ek eleganesilim," hyok.
18:1 Ban sum enyek, Yesus alja yuba doro diriga ban nang edya Yesus ak yeiniboka, "Imik Neyung wenesin heikek sam ara, heknyek naubenya ubnamla do?" aboka heibek. 18:2 Wenyek Yesus adya mek me hnon nak an yalom aboka, sik gangganek sam laga sekiyiwok. 18:3 Anya Yesus adya dara, "Ugunda hyak dib senewanalum! Ugun nong ara dangawoka, saaboka mekmab anasa danggubmun dara, wera aldib Imik Neyung alja wenesin heikek binggunulum. 18:4 Nimi ben hnon alda ganya daklinggoka sokok gebdangoka ban mek me neneso' anyek ulumla dara, benyek Imik Neyung wenesin heikek sam alak senenggomnya ubnamla. 18:5 Anasa nimi ben hnon nadya si nemba leboka, ban unurub so mab enyek, peroba' leboka doro dililamla dara, alda nak doro dillilinel," hyok. 18:6 "Heknedya ban unurub so mekmab enyek, Yesus ak dib seneweijek senewoka pika garawoka malya nenelamla dara, unululanya bera, dabom girik adya alja' ngang ak geregoka senenggom mek gwanek sam dal biniseng dara, perob so. 18:7 Ban sokok an ara nimi malya ubnoka' aboka, malya nenelesila' damok anyek, hyak omom nonga' ak ulumla. Ban unulusila' damok ara sob ulumnelabok, alda unul eleklamla nim enyek, hyak omom nonga' ak ulumak! 18:8 Anja meneng soruk edya gom, anja yan edya gom, anak malya ul eleklenggelya dara, unulunggelenya nera garawoka boboganalam. Imik Neyung ab unuruwa' oroka' anyek un dara perob so anasa, men malya ul eleklenggelya' digum ara men garawoka bobogalom. Orok dara, anja yan soruk gekman nidya' uk ak gokgelyek bar. 18:9 Alda heng adya an nong ak malya ul eleklenggelya dara, heng era men gurugoka bobogalom. Anadya henga darasam oroka' anyek, Imik Neyung ab un dara perob, alda eimik an nong anyek heng ab neika' uk desin heikek gokgelyek anasa, gurugoka boboganalam," hyok. 18:10 "Ban unurub mekmab enyek, malye dolbalek senewoka una' ara hyak mem nong! Anasa ugunda banyek beknelum, sikja lero era nadya' neyung be imik heikek ululanya bedya alja' saramek sam soba' ulumak. 18:11 Anasa nimi diba' me ara weiningdangamek nim ek blebnuna' aboka yeilimok!" 18:12 "Ugunja dara, heka' senelum do? Nimi ben hnon alda pama denga winilya ebdobnya soubna dara' badya beiyimso bok, hnonok weiningdaso dara, pam damnya bera, heka' hubnamso do? Bera alda denga winilya ebdobnya lindara' badya dara, mok meinik sam gerek loboka, hnonok weiningdangamso pam enyek el binimso. 18:13 Pam damnya bera elemso' ara, pam en eibso dara, ugunda nak dib lebla senewananulum, yok pam dara, or malya bok, ban weiningdangamso pam enyek, eibnamso dara, hyak ganya nauba eiya dabnamso. 18:14 Anasonya neikek, nadya neyung be imik heikek ululanya bedya dara, nimi nidya' nak an wenyek dib senelenyak nim era mek nim bok, hnon weiningdeijek senelamla," hyok. 18:15 "An kabo edya anak malya ubgelya dara, anda malya ubgelenya bek an biniboka, ban nak malya ubnelem aboka laga neknelam. Ban nenera geleleng aboka ugun penya ok unubdanarum. Anja lebnelam yub enyek, an kabo edya dib senewanenggel dara, wera anda an kabo ek pe doboka peroba' ak bo yalalam. 18:16 Bok nenyek kebnenggubla dara, Imik Neyung yub ek ara, hnon momnya dobokja, Nimi penya nang gom, winilya nang edya, benera aldib malya ubok aboka, laga neknemak dara, bera aldib alda malya umoka' ara laga dangalamla, hyoka' anasa, nimi yok nanga penya nang gom, winilya nang eboka bo yanalamakanya, heiboka wenewanalam. 18:17 Wera ban nang enedya anda aldib malya ublum aboka lebnemak bok, bera kebnenggunusil dara, alja malya umlya' ara, Imik Neyung yuba dona' nim ek laga lebnelum. Wera ono' Imik Neyung yuba dona' nim edya, wenewanamak bok, kebnenggunusil dara, alda Imik Neyung ak elgomnya gom, mok soko amba rupiah molowoka doro unya gom, anaso ak ulumla senelemnelum," hyok. 18:18 "Ugunda banyek ella danalum: Ugunja sokok anyeb, nera memnya wenyalalumnya nera, imik heikek anaba memnya danamla. Alda sokok anyeb, ugunja nera or wenyalalumnya nera, imik heikek anaba nera or danamla." 18:19 "Anya hnonda ban nenyek ella danaluma' ara, Sokok anyeb ugun gangganek sam nimi penya nanga, yoka' neiknya nemba leboka, Imik Neyung ak heng uboka molowananam aboka ganya hnonok ganya boboka adya mololerak dara, sikja molona' era, nadya neyung be imik heikek ululanya bedya kebnesil. 18:20 Anasa or hekmok ok, nadya si nemba leboka nimi penya nang gom, winilya nang gom, longolomak dara, nara sikeneblaboka ulumab," hyok. 18:21 Wera ono' Petrus bera Yesus ak yeiniboka, "Wenelesilimnya o, nadya hem bedya nak malya umnenel dara, nara lika hekbadya anaso meebdananam do? Lika sekbadya anaso meebdananam de?" hyok. 18:22 Dara Yesus adya Petrus bek ara, "Lika sekbadya gom, alda lika denga sekbadya sum doboka boboganalam!" 18:23 "Anasa Imik Neyung adya wenelemnesila' ara, hogung ara ban sununa' eneso' ak ubnamla ara, Nimi soko dubnya ben hnon, alja wa wen nang edya deblomek bona' amba meewanamna sum eneso ubnamla. 18:24 Wera dubnya bera alja wa wen nang ek anda hekbadya rupiah anaso doboka deb loblum aboka yana lelelesuk sum era, hyak senenggom einiwamenggom rupiah gobdo deblomoknya bek bo yek. 18:25 Anasa saaboka lunuwamenggom so ulumok anasa, dubnya bedya dara, benyeb ala' gela mab ab, nidya' alja bona' gekman hiboka rupiah deknamnakanya, alja deb lobok rupiah emba lunuwanamna aboka orugomok. 18:26 Dara ban wa wenya bedya dara, dubnya bek, Neyung o, anda or diri umnelam, dara nadya deb lobsa' ara, onsok lunuwoka deknenabok anasa, or diri unelom, aboka molowok. 18:27 Dara dubnya bedya, yub enyek keboka, angoo yadyek senewookanya, lunuwanggununelem, or salya' deb lobnenelem, hyok. 18:28 Wera ban wa wena'anya alda goboka yabok dara, ono' yok wa wena'anya bek alak an rupiah hnon deblomoknya bek eibuk. Wera benyek nganga weneb salawoka ol yabookanya, lebokja, Nadya rupiah deb lobnuluma' ara men deknenelem! hyok. 18:29 Bok al kab edya dara, alak gibookanya, perob-peroba' lebok ara, Hem o, nidya' lunuwanenggena' anasa, or diri ululom! hyok. 18:30 Bok benedya dara, anjinya nera kebnenggunenggen aboka lek hyok. Dara, alja rupiah deblomoka' ara, hyak nidya' senenya loboka deklul aboka, bera henga gereksin ek sam doronggok. 18:31 Wera ban nidya' unuwoka' anyek eiyiboka, yok wa wen nim edya hyak angoo senewoka soloma dabsuukanya, soko dubnya bek unuwal aboka nekel byik. 18:32 Dara dubnya bedya, ban malya umoknya bek yalom aboka, Anda hyak malya una' hwam wa wenya bek ululam! Anja nadya rupiah deb lobnuluma' ara, eimik lunuwanenggena' anasa, diri ululom wenyalaluma' amba dara, nadya deknenggununelem hegesa. 18:33 Anasa, nadya anak angoo yadyek senewagesa sok, ono' anja dara, an kab ek ara, unu angoo yadyek senewanasom gom? hyok. 18:34 Dara, dubnya bera hyak yu ganya bobookanya, alja nidya' deblomoknya nera gigiwoka lunuwolul aboka, henga gubsin nim ek saboka obnoka' aboka doboka elegok," aboka Yesus adya lebok. 18:35 Dara Yesus ara alja neklemok nekna' era ban yub enedya saboka nekdakdoboka' ara, "Ugun kabo nim edya malya una' anyek, pe meebdanggunulum dara, nadya neyung be imik ululanya beneba, ugumbabya yok-yok sunuwoka unuwoka, malya nenewanasil," hyok.
19:1 Yesus ara seleb wenyaboka nekgogowousuk dara, alda Galilea moka loboka, Yudea sam Yordan meka gema eer sam byuk. 19:2 Nimi nauba Yesus ak diriga balamek dara, neiklemeknya nera anyaganyeb hwebsuk. 19:3 Dara Parisi nim era, Yesus ak sene sunuwanoba' aboka yek. Anya, sikja Yesus ak, "Nunja yub edya dara, nimi ben hnon gela lobnamla aboka dara, yok-yok damok orok bok, salya' lobnamso de?" aboka heibek. 19:4 Wenyek Yesus ara sikenek, "Men soko uyimoknya bera, men sum era, nengma ab gel ab uyisuk aro momnya doboka' ara, ugunda anam einiwanggom de? 19:5 Wenhyookanya leboka' ara, Anasa nengma ara, alja genong neyung ak loboka, alda gela dolomla dara, wera sikda penya bok, hnonok nong dangoka ulurak, hyok. 19:6 Anasa wera sik penya danera, penya unggulurak bok, alda hnonok nong dangoka ulurak. Ban era Imik Neyung adya hnonok nenelelabok anasa, nim adya bokoka penya nenena' ara hyak mem," aboka Yesus adya wenyhusuk. 19:7 Dara Parisi nim edya Yesus ak, "Wera anaso bok dara, Musa bera hekasa gela lobnamla dara, lobgen an momnya dona' enyek weboka eleganalam aboka orugosuk do?" wenyaboka heibek. 19:8 Dara Yesus adya sikenek, "Men ununggulumek bok, ugun nong ak unuwanalum aboka wenesina' anyek hyak ganya gasa nong anasa, wera momnya doboka eleganalum asuk. 19:9 Anasa ugunda banyek pe keblulum: Alja gel gera meknewoka malya una' orok bok, nimi ben hnon alja gel gek loboka, ono' eimik yok gel ge dolomla dara, bera malya una' unulamla," husuk. 19:10 Dara Yesus alja yuba doro diriga ban nang edya alak, "Gela ab nenya ab doldana' anyek, anaso' ak ululabok dara, wera nim ara gela doldana' loboka salya' ulunok," hyek. 19:11 Wenyek Yesus adya dara, "Nimi nidya' ara, ban yub era keboka dobnamenggom bok, alda alba Imik Neyung adya unuwanamla senemna nim ok keboka dolomak. 19:12 Anasa nim ara unu ulumnamla aboka beillilemaka' adya, hnonda gela donggulumak. Hnonda nim adya unumeka' adya gela donggulumak. Hnonda nimi ganya adya ok, Imik Neyung amba pe welenob senewan dara, gela don ganya bonggulumak. Anasa nimi nidya' ban yub enyek keboka dobnamna seneweija nim era or dobnemak," hyok. 19:13 Nimi sikja mabo Yesus adya soruk diyiboka, heng uboka Imik Neyung ak molowosulula' aboka bo yeilimek. Bok Yesus adya yuba doro diriga ban nim edya, memabo bo yeilimek nim ek wabsik. 19:14 Dara Yesus adya, alja yuba doro diriga ban nang ek, "Banaso mab enyek, Imik Neyung wenesin heikek weknemak nim era anaso ulumnemaka' anasa, ugunja sikenek nak yanggana' mem aboka yuba seknenggom, mem. Alda or nak yalanok," husuk. 19:15 Dara Yesus adya mabo danyek an sikja hukuk sam alja soruka diyiboka, peroba' leboka onobgogowosuk dara, alda anyaganyeba' ara loboka yokok sam byuk. 19:16 Dara ono' yok sum enyek, nimi ben hnon Yesus ak yok. Anya alja dara, "Neklesilimnya o, nara dib embeng ulmoubna' dobnamna aboka dara, hek perob una' ak ubnya' adya dobnamna do?" aboka heibok. 19:17 Wenyek Yesus ara benyek an, "Hekasa anda nak hek perob una' ak heibnelem do? Ben hnonok ok perob nonga' ak ulumla. Anda embenga' ulumnamna senelam dara, Imik Neyung yub ak pe keboka unulumnalam," hyok. 19:18 Dara benedya, "Har yub ek leblam do?" aboka heibuk. Dara Yesus adya, "Nimi onggom, mem, gela hoka' salenggom, mem, hoka' donggom, mem, sonda' lenggom, mem, 19:19 anja' genong neyung ak pe gibeldololom, an damnya wana' uldalalam sok, ono' an kabo nim ek wana' ululom," hyok. 19:20 Dara goubenenya benedya Yesus ak, "Ban yub en nidya' ara, seleb gigiwoka unulamna' anasa, har nerek hnon lolomna do?" aboka heibuk. 19:21 Danyek Yesus adya alak, "Anda muna' pe ulumnamna aboka dara, anja' ek biniboka, anja' bona' nidya' ara rupiah amba beibnelam. Dara, anedya imik heikek perob bona' dobnelama' anasa, anja' unu dobmen rupiah era bona' garan ulumak nim ek eleganesilim. Unubgogowamen dara, anda nak or diriga yananelem!" hyok. 19:22 Wenyek goubenenya bera, alda bona' dubnya ulumok bok adya, Yesus adya alak an wenyaboka lebok anyek kebok dara, ganya igina daboka ek byuk. 19:23 Dara ono' Yesus ara alja yuba doro diriga ban nang ek, "Nara ugunuk dib lebnesin, Bona' dub nang enyek, Imik Neyung wenesin heikek sam wekna' ara okna ulumla. 19:24 Anya ono' hnon lebnesin, Nim abaksin pam unta ara, imir lom pik wekna dara, or weknamso bok, alda bona' dub nang enyek, Imik Neyung wenesin heikek sam wekna' ara hyak okna nong ak ulumla," hyok. 19:25 Yesus adya yuba doro diriga ban nang edya Yesus adya ban wenyaro lelemok yub enyek, keboka sikda hyak loka dabsuka' anasa, sikja dara, "Wera anaso dara, heknyek blebnamla do?" hyek. 19:26 Anasa Yesus adya sikenek keeboka leboka' ara, "Nimi ak dara, nera okna nong! Bok Imik Neyung ak dara, nidya' ara or unuwanamso ok," hyok. 19:27 Anasa ono' Petrus bedya, "Neyung o, nunda yoka'-yoka' loboka, anak diriga yeilinjuba. Dara nunda eimik era, heka' ak dobnemab do?" aboka heibuk. 19:28 Wenyek Yesus adya sikenek, "Ugunda hyak dib senewanalum: Imik Neyung bedya heikek ara, nimi diba' me nera, alak imik nenemlya' adya hyak perob nang ekla buna' ak buknamla. Ban sum enyek, ugunda nadya yuba' dona' diba' ululum nim era, senenggom obadya nang yila' bun ekla buna' ak sam bukoka, obadya Israeli nang yila' ak yana lelelemnelum. 19:29 Nimi nidya' nasamba leboka, alja e gom, al nang yila' nengmabo gom, gelewa gom, genong neyung gom, memabo gom, wa masa gom, nasamba leboka loboka nak yalalanya bera, lunuwoka denga' yuba' dombadya anaso dobnamla. Anya hyak sidya' nong ara, eimik era embenga' ulmoubna' damoka dobnamla. 19:30 Bok, nimi nauba wenyek men mengewoka ulumak nim era, eimik dangoka, ono' wenyek eimik ulumak nim era, men danamak," hyok.
20:1 "Imik Neyung adya wenelemnesila' ara, hogung ara banaso' ak ubnamla: Nim anggur dok wa damnya ben hnon, alja wak sam webnenyak aboka, luguna' nong enyek goboka el yibilemok. 20:2 Wera lika hnonok webnumuna' amba dara, denarius rupiah hnonok-hnonok deknesin aboka lebgogowok dara, wera nadya wak sam or welenululum aboka orugosuk. 20:3 Dara ono' wa damnya bera, gwelek sirigoka dukduk henemok sab-sab, dekna' gasa' pik nimi hnon salya' pelemek ak eibsuk. 20:4 Dara eibsuukanya sikenek, Nadya wa webnumun dara, dekna' sunuwoka pe eleganesina' anasa, wera nadya wa wel bininulum, hyok. 20:5 Dara nim era, wak sam byik." "Wera ono' wa damnya bera hyak dukdukanek salek hnon, henga dalebnenewoka, sin dangalamla salek hnon, neik sonya nenyek unuwok. 20:6 Dara ono', bles henemok salek benera yibiniboka kemelemok enyek, nimi hnon wa wena' oroka' anyek, salya' pelemek nim hnon eibsuk. Anya sikenek, ugunda yoka'-yoka' ununa' oroka' anyek, hekasa anyagan anyek ok pelelum do, aboka heibsuk. 20:7 Wenyek nim enedya benyek an, Nimi adya nadya wa webnenulum aboka oruksina' orok anasa ulumab, hyek. Dara anggur wa damnya bedya sikenek, Wera salya' ululuma' anasa, ugumba nadya anggur dok wak sam wel bininulum, aboka orugosuk." 20:8 "Wera hyak sin dangoka inibok dara, wa damnya bedya' alja wa keeboka unya bek, Anda nadya wa welenyak nimi nidya' yoululum aboka, sikja dekna' era, eimik wel yeilimak nim ek ab dekgiga yeilimena' ara, men wel yeilimak nim ek dekdaknesilim, aboka orugok. 20:9 Dara hyak eimik salek enyek, salawoka wemek nanga yek dara, wera denarius rupiah hnonok-hnonok doro yibek. 20:10 Wera ono' hyak luguna' so orugosuk nanga yek. Sikja dara, nauba dobnemab senemek bok, men elegosuk nang elegosuk sok, neik so hnonok-hnonok elegosuk. 20:11 Wera nang era sikda rupiah en seleb dobek dara, wa damnya bek yo yaboka leb yaboka, 20:12 Nunda luguna' ek moruwoka welmab bok, eimik yak nang era sikda mek so' wemak. Nuk dara, henga yu omom boka' anyek babya goluwoka welmab bok, sikda elegeisilim sok, numbabya anaso elegeisilim! hyek." 20:13 "Dara wa damnya bedya, wenyaboka lebek nang ek ben hnonoknya bek, Hem o, nara anak malya ubnenggunggen. Anja nara lika hnonok wa webnya' amba rupiah hnonok henggubmalem de? 20:14 Anasa wera, anja welamnya nemba dekna' doboka bobmenekanya, bilom. Nadya unuwanamna senemna' ara, eimik wel yeilinyak nang eneba, amba elegenggen so rupiah enyek eleganesin senebman bar, hyok. 20:15 Nadya bona' ek gom anaba unuwanamna senewanasinya' ok unuwanasinya goma? Nak hekna' nong anasa, anda solom ganya bobnesom gom, wenyamok," hyok. 20:16 Dara ono' Yesus adya, "Anasonya neikek, eimik ulumak nim era mengewoka, ono' mengewoka ulumak nim era, eimik dangoka ubnemak," hyok. 20:17 Wera Yesus ara anam Yerusalem heikek bununa' aboka pikek balamok dara, alja yuba doro diriga ban nang eb sikbeyok yuba sabek. Dara sikenek, 20:18 "Ugunda keblulum! Nunda wenera Yerusalem heikek balamab. Wera Yerusalem heikek ab dara, nimi diba' me nera Imik Neyung yuba wa gaka' dub nang ek hnon, yuba neksin nang ek hnon, doboka eleganamak. Dara alak obnok aboka yuba sabnemak. 20:19 Hnon ara, Yahudi gom nim ek doboka eleganamak. Dara, sikja alak derewoka waboka, saboka oboka, gal ak sam glabnemak. Bok winilinya sum era, alda embenga' suboka bukiyiwanamla," hyok. 20:20 Wera Zebedeus ala' gel ara alja mab eblaboka Yesus ak yek. Yesus adya' saramek sam oumuwoka giboka yoka' hnon molowanamna hyok. 20:21 Wenyek Yesus adya, "Genong o, anda heka' ak senelam do?" aboka heibuk. Dara, gel genedya Yesus ak, "Neyung o, anda dubnya dangoka wenewanasilim sum era, nadya' penya mabo danara, ben hnonda anja' sirikek sam hnon, ben hnonda anja' waneng ek sam hnon, buknurum aboka lebnesilim," hyok. 20:22 Dara Yesus adya sikenek lebsuka' ara, "Ugunja molowoluma' ara, anyek molowaba' ara ugunda elgom ululum. Nadya igina kweboka gweknamna mek hmeiya era, ugumbabya or denesom de?" hyok. "Numbabya or unuwanesibya," hyek. 20:23 Dara Yesus adya sikenek, "Aldib, ugunda den dara, denelum. Bok alda ban benera sirikek sam gom, waneng ek sam gom, buknamla ana' ara nadya or wenyhenggunusin. Bok ban anyagan buknemak nim era, nadya' neyung bedya albeyok buknemak senelamla nim ok lebnesil," hyok. 20:24 Wenyek, yok yuba doro diriga ban nang sagobadya nang edya anyek kebek dara, sikda Yohanes Yakobus ak malya lerak senewoka yu ganya bobek. 20:25 Anasa leboka, Yesus adya sikenek nidya' yoululum aboka, "Imik Neyung ak elgom ulumak nimi sikja bo usina' dub ulumak nang era, sikja heik yoka' nim ek malya nenewoka igina kwellilisak. Heik yoka' nimi sikja yok-yok wa amba dub ulumak nang era, sikenek sokok nenellilisak. 20:26 Bok ugunuk dara, anaso ununa' ara hyak mem. Alda saaboka, ugun gangganek sam senenggomnya ulumnamna senewanalanya bera, alda orukna' wa wenya dolul. 20:27-28 Nimi diba' me anaba, alda arawanenoka' aboka yanggumok bok, alda alja araweisinyakanya, nimi nauba amba blebsununa' aboka al nonga doboka elekdonuna' aboka yeilimok. Anasa neik so, nimi hnon ugun gangganek sam, nara mennya danamna senewanalanya bera, men orukna'anya dolul," hyok. 20:29 Wera sikda Yerikho heikek aba' ara, lanawoka bek dara, nimi nauba Yesus ak dobol yalamek. 20:30 Dara heng lum nang penya pikek sam bulurek. Sik penya nang edya wera Yesus ara pik enyek an uboka yabalamla an yuba kerek dara, sikja, "Daud bedya me o, nuk angoo yadyek senewoka araweisiya e!" aboka yeiriwoka lelerek. 20:31 Anasa, nimi nauba anyagan longomek nim edya dara, sikenek yuba gelegorurum aboka ebngaleklesik bok, sikda, "Neyung o, Daud bedya me o, nuk angoo yadyek senewoka araweisiya e!" aboka hyak yeiriwoka lelerek. 20:32 Dara Yesus ara balamoka' ara sek loboka, sikenek ok an, "Yoururum," husuukanya, "Ugunja dara, heka' ak hubsulul senerum do?" wenyaboka heibsuk. 20:33 Dara sikja, "Neyung, nunda henga gwelegoka eiriweisinim senenam!" herek. 20:34 Anasa, Yesus ara sikenek angoo yadyek senewoka, sikja heng era soruka salawosuk enyek, al wene salek enyek, sikja heng era eika' darek. Dara sikda Yesus ak diriga birik.
21:1 Wera Yesus ab alja yuba doro diriga ban nang eb dara, seleb Yerusalem heik berem byik dara, sikda Zaitun meinik Betfage moka lanal byik. Heik enyek anyeb dara, Yesus adya alja yuba don nang penya nang ek ugunda men binirum aboka orugosuk. 21:2 Dara ban nang enyek an, "Ugunda heikek burumun dara, nim abaksin pama hnon, me moma delemlya pama hnon geregemeija' anyek eibnerum. Dara, nidya' penya pam sodya' loboka nak bo yananurum. 21:3 Bok yoknya bedya hnon ugunuk heibnesil dara, Wenelesilnya bedya orugesila' anasa unam, henerum. Dara, eibdumunya bedya, Or sodya' loboka bo binirum, henemla," hyok. 21:4 Ban wenyaboka leboknya nera, youma' enyek ununumna' lelemoknya bedya ban lemokja, 21:5 "Anda Sion heikek sam, anja' dubnya bera wera yanggal, henelam. Alda ganya sokok nenebdangoka, nimi meka' abakna' oroka' abaksin pam ek buka yalamla, henelam," amoknya nenyek gigiwolula' aboka ubok. 21:6 Wera penya nang dara, Yesus adya sikenek anaso-anaso unuwanarum wenyasuk sok unuwarek. 21:7 Wera sik penya nang era, abaksin pam era, me ab neika' bo birik. Dara pam gwadya ara, sikja akleng edya yangiyiwek dara, Yesus ara an eilib welewoka bukok. 21:8 Dara, nimi nauba Yesus abaksin pam ak buka balamok pik era, sikja akleng edya gwiriwoka yangoro beiri balamek. Anya nimi yok nim era, gal mekla' leboka pik ak sokdo yangoro balamek. 21:9 Nimi nauba Yesus balamok pik ek, hnon nim era eimik dobdo balamek bok, hnon nim era men mengewoka balameekanya, sikja lelemek ara, "Daud bedya me nek gibnok! Wenelesilnya bedya si sibuka yeilimoknya bera alak hyak peroba' dangalalul! Imik Neyung hyak imik sam ululanya bek giblenok!" wenyaboka lelemek. 21:10 Anya wera, Yesus ara Yerusalem heik hnoumung nong ok sam wekel yanggok dara, heik era doluwoka lan-lan al yibok. Wenyek heik enyek an nim edya dara, "Ban benera heknyek yalamla do?" wenyaboka heildal yabek. 21:11 Dara, Yesus balamoka' amba nimi nauba neika' balamek nim edya, "Alda ununumna' lelelanya, Yesus ara an, alda Galilea sokok Nazaret heikek abnya bera an," wenyalamek. 21:12 Wera Yesus ara, Imik Neyung e eremek sam wekoka, anyagan bona' beiyiboka dekoka rupiah amoma' elekdangoka ulumek nim ek yakal yabasuk. Anya, Yesus ara rupiah amoma' ubdangoka deklemek yangana' gal ab, yalma wininga gouboka beiyiboka deklemek yangana' gal eb dara, dolub menegok. 21:13 Anya unulumek nim ek an, "Imik Neyung yuba bukuk sam momnya doboka' ara, Nadya e nera henga uboka Imik Neyung ak molon e alamnamak. Bok ugunja dara, hoga don nim e nenelelum!" hyok. 21:14 Wera henga luma nang eb, nonga heilisuk nang eb dara, Yesus ak Imik Neyung ek sam ulumoka' ak yek dara, hwebsuk. 21:15 Bok Imik Neyung yuba wa gaka' dub nang eb, yuba neksin nang eb dara, Yesus adya ban lok so unulumoka' anyek eiyiboka, mek-mek mab edya, "Daud bedya me hyak pe ulumla!" alameka' anyek keboka, hyak yu ganya bobek. 21:16 Dara sikja Yesus ak, "Sikda an wenyalamaka' ara, anda kelam de?" hyek. Wenyek Yesus adya, "Yo, naba kenadyok umna," hyookanya, "Mab ab, momden mab eb dara, perob senewoka giblenoka' aboka, anda unusulum, an momnya doboka' ara, ugunda eininggululum de?" hyok. 21:17 Dara Yesus ara sikenek loboka, heik enyek anyeba' ara, Betania heikek bindiwoka anyagan mabok. 21:18 Wera hyak luguna' nong enyek, Yesus ara ono' saaboka, Yerusalem heikek yalamok dara, hyak gwaneng ok nong ubok. 21:19 Dara, hnon ara gala hnon pikek sam sekemoka' ak eibuk. Wera Yesus ara, ara galdok enyek daknamna senewoka kemel byuk bok, gal era doka mouna' orokokanya, mekla' dem ok bolomok. Anasa Yesus adya gal enyek an, "Anda eimik era doka hyak meka' hnon moubnenggunulam!" hyok. Dara gal era al wene sab-sab yalagok. 21:20 Dara, Yesus adya alja yuba doro diriga ban nang edya, ban unuwoka' anyek eibeekanya, sikda hyak loka dabsuk. Anya Yesus ak, "Ban gal era heka' adya hyak berra aboka yalegal do?" aboka heibek. 21:21 Anasa Yesus adya sikenek, "Aldib, ugunda ganya daldom-daldom ana' loboka, dib senelemnelum dara, nadya ara gal ek wema dabne sok, ugumbabya anasonya nera unuwanasom. Dara nenyek ok gom, alda ban mein enyek an lebnelumja: Somokdangoka senenggom mek gwanek sam bologoldal bilom, henelum dara al gigiwoka unuwanamla. 21:22 Anya ugunda al unuwanamla' anya' dib senewoka, ugunja heng uboka mololemneluma' nidya' ara, anera gigiwoka dobnelum," hyok. 21:23 Wera Yesus ara, Wenelesilnya bedya' e eremek sam wekoka anyagan yuba anam neklesuk salek bok, Imik Neyung yuba wa gaka' dub nang eb, Yahudi dub nang eb dara yeiniboka, "Ban nidya' unululama' ara, hek migib damok edya ululam do? Goma heknedya anaso unululom aboka wa nen elegajok do?" aboka heibek. 21:24 Wenyek Yesus adya sikenek, "Nababya ugunuk heibnesin. Ugunda nadya heibnesinya nenyek pe lebnumun dara, wera nababya ugunja heinulum damok era, anadya nara yoka'-yoka' ara unulamna aboka neknesin. 21:25 Yohanes bera heknedya migib edya meka dalasuk do? Imik Neyung migib adya gom, nim adya migib edya gom?" aboka heibsuk. Wenyek Imik Neyung yuba wa gak nang eb, Yahudi dub nang eb dara, sik gangganek sam hek damok edya unulumok aboka saldalameka' ara, "Nunda Imik Neyung migib adya henemab dara, alja nuk, Wera dara hekasa ugunda dib senenggululum do, henesil. 21:26 Bok, Nimi migib adya, henemab dara, Yohanes bera nimi nidya' adya dara, senenggom ununumna' lenya senelemaka' anasa, nimek lok ulumab," aboka sabdek. 21:27 Wenyaboka, "Nunda elgoma," hyek. Wenyek Yesus adya sikenek, "Wera anasa nababya, damok enedya nara yoka'-yoka' unulamna' ara, anedya unulamna aboka neknenggunusin," hyok. 21:28 Dara ono' Yesus adya hnon leboka' ara, "Ban yub enesa dara, ugunja dara heka' senewolum do? Wera nimi ben hnon memabo penya beiyimok. Dara, sikja' neyung bedya yando me nek biniboka, Najabo, anda sumen anggur wak sam wel bininelem, hyok. 21:29 Bok me nera, Neyung, na lek, hyok. Bok ono' eimik era, angoo senewoka ganya dangawoka or wel byuk. 21:30 Dara, sikja neyung bera ono' weibsa me nek biniboka, al onsok orugok. Wenyek me nera, Neyung, perob, wera or wel binimna, hyokjok, eimik era lek aboka lobok. 21:31 Anasa ban penya mabo dara, hek me nek sikja' neyung bedya senemoka' ara gigiwoka unuwok do?" wenyaboka heibsuk. Dara, Imik Neyung yuba wa gak nang eb, Yahudi dub nang eb, sikja dara, "Yando me nek," hyek. Anasa Yesus adya sikenek, "Ugunda banyek dib senewanaluma' ara: Mok soko amba rupiah molowoka dolomak nang eb, salya' malya ura yabalamak gelewa enyek, Imik Neyung wenesin heikek men weknemaakanya, ugunuk dara, orok. 21:32 Dara, Yohanes bera Wenelesilnya bedya unu ulunok senelelanya nenyek nekel yousuk bok, alja neklesuk yub era ugunda dib senewanggulum. Bok mok soko amba rupiah molowoka dolomak nang eb, salya' malya ura yabalamak gelewa eb danyek, sikenek dib senemek. Wera ugunja dara, sikda dib senemeka' ara hnon seleb henga eiyilum bok anaba, ugunda eib kwebnenggulumukanya, Imik Neyung ak dib senewanggulum," hyok. 21:33 Dara Yesus ara, "Ugunda ban sununa' enyek hnon kebnalum. Nimi ben hnon anggur wa soko meboka ninimok. Dara nidya' leka' dob ganagoka, dok meka londena' amba, soko mek si pika weiliwoka, diri bun damba e im nong ok somok. Anya alda yok nim ek, ugunja weboka meewoka ulumnenulum abgogowok dara, alda yok heikek byuk. 21:34 Wera doka dakna salek seleb oka dok dara, wa damnya bera galdoka dakoka beibnok aboka, alja orukna' nang ek bo bokol yousuk. 21:35 Bok wa weboka melemek nang edya, doka do yananulum aboka orugosuk nang enyek, ben hnonda embenga' saboka obeekanya, hnonnya bera diba' obek, anya yoknya bera girik adya saboka beibik. 21:36 Dara ono' wa damnya bera, men dara nimi mek so' bokol yeilisuk bok, wenyek dara, nimi nauba bokol yousuk. Bok al nang danaba neik so unu saboka obsik. 21:37 Wenyek wa damnya bedya ganya era, Nadya me yoka' ak dara, peroba' leboka, obnenggunumak, senewoka alja me nek bokol yok. 21:38 Wera wa damnya bedya me yalamoka' ak eibek dara, wa weboka meewoka ulumek nang era, wenyabdek, Wera wa dama' lunuwanamla me nera an. Alja wa nera nuk wa dama' danamaba' anasa, me nera obnemab! wenyabdek. 21:39 Dara me nera somowoka wa lega' weilik sam bobogeekanya, saboka diba' obek." 21:40 Wenyaboka Yesus ara sikenek heibsuk, "Wei, wera wa damnya benyek yanasobok dara, wa welemek nang ek ara, heka' hubnesuso do?" aboka heibsuk. 21:41 Wenyek sikja Yesus ak, "Sikenek obnesisookanya, wa ara yok nim ek pe weboka doka dakoka, al damnya bek eleganeseng nim enyek, welemnenulum aboka, lebnamso," hyek. 21:42 Danyek Yesus adya sikenek, "Ugunda Imik Neyung yuba momnya doboka' ara hnon meka' eininggululum de? E sona' nang edya, loboka e songgulumak girik era, men perob girika dangamok. Anera Imik Neyung adya unusuka' ara an, perob nonga' senelemab e! aro momnya dobok," hyok. 21:43 Dara Yesus adya, "Anasa ugunda pe beknelum, ugunuk ab Imik Neyung wenesina' damok ara, gwenewoka, Imik Neyung yuba doboka pe unulumnamak nim ek eleganamla. 21:44 Nimi nidya' girik enyek an malyingginimak nim era, soldowoka denghenemaakanya, girik enedya obnesil nim era, ono' on girik enedya youboka aso danamak," hyok. 21:45 Danyek Imik Neyung yuba wa gaka' dub nang eb, Yahudi dub nang eb dadya, nidya' Yesus adya sunuwoka lebok yuba kebek dara, wera ban nidya' ara nunsamba geklewoka lebsil senewoka ella ubek. 21:46 Anasa sikda Yesus ak, salawoka henga goubnoba' aboka ubek bok, nimi nidya' ara, Yesus ak senenggom ununumna' lelelanya ulumla senelemeknya nenesa, unuwanamab senemek ganya era, nuk obsijek senewoka, lok anasa lomek.
22:1 Yesus ara nimi nauba longomek nim ek, ono' sununa' adya sunuwoka lebsuka' ara ban: 22:2 "Imik Neyung adya wenelemnesil salek era, hogung ara banaso ak ubnamla, Mok soko dubnya alja me gela dobnamla bar aboka masa youmok. 22:3 Anasa dubnya bedya alja wa wena' nang ek, nimi masa del yanalum amna nim era yanoka' aboka el binisulum aboka boksuk. Bok yuba beiyimok nim era nunda yanggunumab aboka lobek. 22:4 Anasemba, dubnya bera ono' yok wa wena' nang ek nim el binilum aboka orugosuk. Anya, yanalum amna nim ek ara banyek wenyheneluma' ara, Dena' youmna' ara wera seleb dengewonuna' aboka ubna. Yem sapi ab, mesa' nauba gobenya sapi ab, pam danyek seleb oboka youmna. Anasa or yanamak ok amla henelum, hyok. 22:5 Bok yub en beiyisuk nim edya danyek, yanamab senewanggumek. Sikda nidya' ara sikja wa ganya dokol bilimek. Hnon nim era sikja wak sam bilimek, hnon nim era sikja' bona' memelamla ak sam wel bilimek. 22:6 Alda yok hnon nim edya dara, ban yuba bo bilimek nim ek saboka oboka hyak diba' obek. 22:7 Wera dubnya bera anja' wa wen nang ek unuwasak an yuba kebok dara, dubnya bera hyak yu ganya bobok. Anasa dubnya bedya yin bona' nang ek unuwak aboka nekoka orugosuk dara, nang en nonga oboka, sikja heika nidya' uka dabsik. 22:8 Seleb dara, dubnya bera, alja wa wena' nang ek anyagan yoululum aboka sikenek, Masa ak seleb youboka beiyimna bok, del yanalum amna nim ek dara, delyamenggom, orok. 22:9 Wera anasa, ugunda senenggom pik gwandanyek sam biniboka, nim or salya' nim ek nauba eboka bo yanalum. 22:10 Dara wa wen nim era, dubnya bedya lemok sok sunuwoka, senenggom pikek sam byiikanya, nim or salya' malya nim perob nim demen nim era nidya' ebmamagek. Dara gela doboka denemak aboka, meemok e nera nim adya ok dibemok." 22:11 "Wera dubnya bera yeilimek nim ek hogunga kemero yabalesuk ara, yeilimek nim gangganek sam ara, nimi ben hnon gela dobnamna' amba ongolomak akleng ongowanggumoka' ak eibuk. 22:12 Dara dubnya bedya benyek an, Hem o, anda hekasa perob akleng ek, ongowal henggonggom wekel yeililam do, aboka heibuk. Bok yeilimoknya bedya dara, yuba meka' sab eleganggubuk. 22:13 Dara dubnya bedya alja wa wena' nang ek, Wera ugunda ban benyek alja yana soruka henga gouboka hyak guna' nong ulumla ak sam bologol binilum. Dara alda anyaganyeb nauba engewoka si glengdarreb aboka gweklemnamla," ara Yesus adya wenyhusuk. 22:14 Anasa Yesus ara wenyaboka sunuwoka lebgogowoka' ara, "Nimi nauba yoululum alalabok, meka' ok weboka dolosil," hyok. 22:15 Wera Parisi nim era, Yesus ak heka' huboka sunuwoka henga weboka youbnoba' aboka, sene yana benel byik. 22:16 Anasa Parisi nim era, sikja yuba doro diriga ban nang hnon, Herodes bek sam ab nim hnon, Yesus ak sam bokek. Dara nim enedya Yesus ak, "Neyung neklesilimnya o, neyung aldib ok unululama' ara numba ella ulenjab. Neyung anda yuba neklesilim dara, nimi hogung ak keeboka neknenggulusilimikanya, yok nim edya perob seinilimaknya nera loboka, alda Imik Neyung adya senelamla' anyek ok neklesilima' anasa, pelelam. 22:17 Anasa neyung, anda nuk banyek neknesilim: Nunja dolomab yub edya dara, mok soko dubnya Kaisar bek ara, mok soko amba dara, or rupiah deknemab gom, orok gom?" hyek. 22:18 Bok Yesus ara sikda malya ganya boboka sene heimeka' anyek ella uboka, alja dara, "Wei, ugunda hyak malya una' hwam nim ek ululum! Ugunda hekasa nak heng diba' weboka youbnenoba' aboka ulunulum do? 22:19 Wera anasa ugunja dubnya bek deklelum rupiah hogung enyek, nak aabyandeneso!" hyok. Dara sikja Yesus ak rupiah hnonok elegek. 22:20 Wenyek Yesus adya, "Banera heknedya si neb sununa' ab ulumla do?" aboka heibsuk. 22:21 Wenyek sikja, "Dubnya Kaisar benya'," hyek. Dara Yesus adya sikenek, "Anasa wera ugunda dubnya bedyinya nera dubnya bek eleganalum bok, Imik Neyung adyinya nera Imik Neyung ak eleganalum," hyok. 22:22 Wera Yesus ara wenyaboka leboknya nenyek kebek dara, sikda loka dabsuk. Anya sikda Yesus ak ara loboka byik. 22:23 Dara al on sum enyek, Saduki nim era, sikja dara, nimi seleb somoklomaknya nera embenga' suboka buknenggunuseng senewoka ulumek nim ek Yesus ak yek. 22:24 Anya Yesus ak, "Neklesilimnya o, Musa bedya momnya dobok yub era, Nimi ben hnon gela domnelabok, alda me beibnenggonggom somoganamla dara, me beiblunuwolula' aboka, alja weis edya lo bilya gel gera dobnamla aro momnya dobok. 22:25 Benedya alja hemyab era sekbadya nanga nemek. Yandonya bera gela dobok bok, me beilina' loboka somogok. Dara, alja gel gera alja weis ana beremnya bedya dobok. 22:26 Bok beneba me beibnenggonggom somogok. Anasa sikda nidya' winilinya bek aba' ara, nidya' sekbadya neik so unubgiga byik. 22:27 Dara, sidya' nong ara, gel geneba somogok. 22:28 Anasa sik sekbadya nang dara, neik gel gera seleb nidya' nang domek bok anasa, nimi nidya' eimik embenga' subnemak sum era, gel gera heknedya gel yoka' danamla do?" aboka heibek. 22:29 Wera anasa Yesus adya sikenek, "Ugunda Imik Neyung yuba momnya doboka' ab, Imik Neyung migib ab, elgom ululuma' adya, wera meknewoka leblum. 22:30 Dara, nim embenga' subnemak sum era, sikda nidya' gela dona' loboka, imik heikek sam ulumak lero nang eneso' anyek salya' ulumnemak. 22:31 Bok nimi somoklomak nimi nidya' embenga' suboka buknemak an yub era, bukuk sam momnya doboka' ara eininggululum de? Imik Neyung adya leboka' ara: 22:32 Nara Abraham bedya Imik Neyung ulumna, Ishak bedya Imik Neyung ulumna, Yakub bedya Imik Neyung ulumna. Wera, Imik Neyung ak dara, somoklomak nim edya Imik Neyung unggulumla. Alda nim embenga' ulumak nim edya Imik Neyung ulumla! wenyaro momnya dobok," hyok. 22:33 Dara, nimi nidya' longomek nim era, Yesus adya an wenyaboka neklesuk yub enyek keboka, sikda loka dasuk. 22:34 Wera Parisi nim edya, Saduki nim era, Yesus adya yuba doro sabnamenggom neneweisil an yuba kebek dara, sikda ebdanga mamagek. 22:35 Dara, sik gangganek yuba neksinya geremsengnya ben hnon, alja Yesus ak sene sunuwonuna' aboka heibok, 22:36 "Neklesilimnya o, unuwanalum an yuba momnya dobok ak sam ara, har yub erek senenggom damok yub ulumla do?" wenyaboka heibuk. 22:37 Anasa Yesus adya benyek an, "Anda Imik Neyung ak anja ganya gebman adya hnon, anja nong una' gebman adya hnon, anja ganya seinina' adya hnon, hyak wana' nong ululom. 22:38 Ban yub enyek, hyak senenggom damok yub uboka dib nongnya nera an ulumla! 22:39 Dara ono' penenya bok al neik so' ara: Andam nang wana' uldalalam sok, an kabo nim ek unuwoka wana' ulusilom. 22:40 Dara, Musa bedya unuwanalum an yub eb, ununumna' lelemek nang edya neklesik yuba nidya' ara, ban penya yuba damok danyek, geklewoka lelemek," hyok. 22:41 Wera Parisi nim era anyagan anam longomek dara, Yesus adya sikenek heibsuka' ara, 22:42 "Ugunda Kristus, nimi blebsina' dubnya bemba dara, hek huru seinilelum do? Alak dara, hek nang yila' senelelum do?" aboka heibsuk. Anasa sikja dara, "Nimi blebsina' dubnya bera Daud nang yila'," hyek. 22:43 Wenyek Yesus adya, "Wera anaso dara, Imik Neyung Geisinya pik uboka, Daud bera, hekasa nimi blebsina' dubnya bek Wenelesilnya aboka lemok do? Wera Daud bedya leboka' ara, 22:44 Wenelesilnya bedya nadya' wenenanya bek lebokja: Anda nadya' sirik soruk ak sam bulumen sok moruwoka, anja' isa' nang era nadya anja yan damumduk sam bo bolol yanenggel, hyok. 22:45 Dara wera, Daud bedya blebsina' dubnya benyek, Wenelesilnya hyok bok dara, alda hek pik uboka Daud nang yila' ulumnamso do?" hyok. 22:46 Dara, nimi hnonok sibin anaba, Yesus ak yuba saaboka doro sabnenggubek. Anasa ban sum enyek ab moruwoka, Yesus ak ara, yoka'-yoka' hnon asa' ganya boboka heinggulumek.
23:1 Dara ono' Yesus adya alja yuba doro diriga ban nang ek hnon, yok longomek nimi nauba ak hnon leboka' ara, 23:2 "Imik Neyung yuba lesina' gak nang eb Parisi nang eb dara, momnya domok yuba damok enesa unuwok aboka yana lelen damba Musa bek lunuwek. 23:3 Anasa wera sikja yuba lelemaka' ara pe keboka nidya' unulumnulum bok, sikja unulumak ununa' nong era, sikja yuba lelemaka' sunuwoka ununggulumaka' anasa, ugunda sikja diliga' dona' ara mem. 23:4 Sikda iginnya nenyek, nimi yok nim ek bol dilimak bok, sikja dara, uruma anaba meka' dona' orok. 23:5 Sikja unulumaknya nera, nimi yok nim edya pelemak senenanya nenyek laga unulumak. Sikda Imik Neyung ak giblenuna' aboka gweidya' sobnedama' ab warana ongolmorun akleng eb dara, nimi kemen danasa ongolomak! 23:6 Sikda masa senenggoma' youboka delemna' ak ara, eibsinok senena' ak ok bukoka, Yahudi nim edya yuba don ek ara, men nonokdob ekla buna' ak ok wekoka bulumak. 23:7 Hnonda, senenggom dekna' gasa' ak ara, Neyung neklesilimnya, perob aboka giblesinok senewoka, nim hogung dibnelewoka sekdo yabalamak." 23:8 "Anasa ugunuk dara, ugunja' neksinya bera hnonok ok ulusilekanya, ugunda nidya' hiboka, hemyab ok ululuma' anasa, neksin nang aldana' ara mem. 23:9 Wera, ugunja' neyung bera hnonok ok, al imik heikek ululanya bek hnonok ulumla' anasa, nimi hnonok sibin anaba sokok anara neyung ana' ara mem. 23:10 Ugun bo usinya bera hnonok ok, Kristus, Imik Neyung adya soko nim blebnamla amoknya bek hnonok bo usinya ulumla' anasa, ugunja dara, nuk bo usin nang aldana' ara mem. 23:11 Ugun gangganek an senenggoma' ulumak nim era, wera ugunuk arawoka welemnemak nim ara an. 23:12 Wenyek ganya imik nenebdangoka ulumak nim era, eimik era sokok nenewanasilikanya, ono' wenyek ganya sokok nenebdangoka ulumak nim enyek, eimik era sikenek imik nenewanasil," hyok. 23:13 "Ugunda yuba neksin nang eb Parisi nang eb dara, hyak omom nonga' ak ululum! Ugun hyak sene bol nenena' hwam nim ek ululum. Ugunda nimi yok nang era, Imik Neyung wenesin heikek pika garalelum. Ugun nong anaba Imik Neyung mabo danganggululumukanya, yok nim Imik Neyung wenesin heikek pika garalelum. 23:14 Ugunda yuba neksin nang eb Parisi nim eb dara, hyak omom nonga' ak uboka sene bol nenesina' hwam nim ululum. Ugunda nenya orok gelewa ek sonda' leboka, sikja ek ulumla' doluwoka dololumukanya, yok nim eibsinoka' aboka, ugunda heng uboka warana' mololelum. Ban unululuma' adya ugun nong anyek hyak nauba obnesil. 23:15 Ugun yuba neksin nang eb, Parisi nim eb dara, hyak omoma' ak ululum! Ugunda hyak sene bol nenena' hwam nim ek ululum! Ugunda nimi hnonoknya bemba, nunja dolomab yub ek nimi hnonok makesilya' anaba aboka, senenggom mek gwan pik biniboka, hnonda hyak mok sam biniboka yeiriwoka elelum. Wera bera seleb ugunja dololum yub ek sam maksin dara, alda uka desin heik delemnalanya uboka, alja yu hwam era lika penya sounuwoka dangalamla." 23:16 "Ugunda hyak heng lum dub nang uboka hyak omoma' ak ululum! Ugunja yok nim ek sam yuba neknamna dara, nim Imik Neyung saramek ak dib unuwanamna alamla dara, wenyananya bera Imik Neyung gibna' e sibuka yuba garalamla dara, dib danganggulumla, bok alda Imik Neyung ek ulumla bona' ek si sibuka dib unuwanamna alamla dara, dib dangalamla, alalum. 23:17 Ugunda heng luma hyak dongdang ana' nang ek ululum! Ugunja dara, har nerek perob senelelum, perob bona' enyek goma, Imik Neyung e adya perob bona' en muna' geblamla' anyek perob senelelum gom? 23:18 Ono' ugunja yok nim ek yuba lebnamna dara, nimi ben hnon alja Imik Neyung amba uka daboka gibna' oulyang ak si sibuka dib unuwanamna alamla dara, dib danganggululabok, alda bo beil bilimna bona' ek si sibuka dib unuwanamna alamla dara, dib dangalamla, alalum. 23:19 Ugunda hyak heng lum nang ululum. Ugunja dara, har nerek perob dib senelelum do? Imik Neyung amba bo beil balamak bona' enyek perob gom, alda uka daboka gibna' oulyang edya muna' geblamla' anyek perob gom? 23:20 Anasa wera, nimi ben hnon Imik Neyung amba uka daboka gibna' oulyang ak si sibuka dib unuwanamna alamla dara, wera bera alda uka daboka gibna' oulyang ab an eilib beillilemak bona' ab hiboka amba si sibuka diba' wenyalamla. 23:21 Ono' nimi ben hnon yuba don e ak si sibuka dib unuwanamna alamla dara, wera yuba don e nenesa hnon lelemlakanya, ono' e nenyek an ululanya bek hnon si sibuka diba' wenyalamla. 23:22 Anya ono' nimi ben hnon imik heikek si sibuka diba' unuwanamna alamla dara, wera nera Imik Neyung bulumla ekla ak hnon, Imik Neyung bululanya bek hnon, si sibuka diba' wenyalamla." 23:23 "Ugun unuwanalum an yuba neksin nang eb Parisi nim eb dara, hyaka' omom nonga' ak ululum! Ugunda hyak or-or una' hwam nim ek ululum. Masa dokoka youlumaka' diguma' song mekla', gourumna', dokna' mekla' ara, sagenya nera Wenelesilnya bek bo beil balalumjok, Imik Neyung yub ek sam momnya doboka' ara, pe seiniwoka una' ab, angoo yadyek senena' ab, bojam una' ab, dara dib nong bok, ugunja dara dolbaleka geblelum. Ban dibnya unulumnesomokanya, yoknya neneba lobnenggunusom. 23:24 Ugunda hyak heng luma' bo usin nang ek ululum! Poma ugunja' den mekek sam weklelanya nera ugunda gwadya' yaboka dololum bok, ugunja' abaksin pam edya dara doboka meneklelum! 23:25 Ugunda yuba neksin nang eb Parisi nim eb dara, hyak omom nonga' ak ululum! Ugunda hyak sene bol nenena' hwam nim ek ululum! Ugunja dena' yangana' ab mek hmeiya ab dara, or eilibek ok mek eleklelum bok, lomok sam ara hoka' dona' ab, yu ganya unuruwa' ab dadya deknewoka ulumla. 23:26 Ugunda Parisi heng lum nim o! Ugunja dena' yangana' ab mek hmeiya ab dara, lomok sam anyek pe mek elegomuna' anadya, wera eilibik sam anaba pe geisa ubnamla!" 23:27 "Ugunda yuba neksin nang eb Parisi nim eb dara, hyak omoma' ak ululum! Ugunda hyak sene bol nenena' nim ek ululum! Ugunda geisa' adya ngikimna nimi be' anaso' ak ululum. Eilibek sam ara geisa ngiklemak bok, lomok sam ara blolomla song eb, yoka'-yoka' malya' adya ok deknewoka ulumla soka' ak ululum. 23:28 Anasa ugunda anaso nim ek ululum. Ugunda hogung adya dara, yok nim ek pe ulumak nim senen bok, ugunja ganya lomok ara sonda' hwam ab blekna' mandebna' ab dadya deknena' hwam nim ek ululum," ara Yesus adya wenyhusuk. 23:29 "Ugunda yuba neksin nang eb, Parisi nim eb dara, hyak omom nonga' ak ululum! Ugunda hyak sene bol nenesina' hwam nim ek ululum! Ugunda ununumna' len nanga dilina' ak sam pe meewoka, nimi pe ulumek nang dilina' sam pe memelelum. 23:30 Anya ugunja dara, Nunda youma' nunja' neyung yabo ulumek nim eb, neika' ulusibya dara, ununumna' len nang era nunja dara, hyak meka' obnenggunusibya, alalum. 23:31 Bok ugun dam nang adya, ununumna' len nang obek nang yila' era nunda an ulumab aboka, laga leldalalum! 23:32 Wera anasa, ugunja neyung yab edya unulumek malya una' era, ugunja unubgiga sidya' daknalum!" 23:33 "Ugun nong ara baga' anaso malya una' nim ululumukanya, ono' ugunja neyung yab eneba anaso nim ulumek! Uka delesil heikek oboka uka desin heikek ab hekadya nunda blebdanamab senelelum do? 23:34 Anasa pe keblulum. Nara eimik era ugunuk sam ununumna' len nang eb, geremseng un nang eb, yuba neksin nang eb bokol yanasin dara, hnon nim era ugun nong adya obnelum, dara ono' hnon nim era oboka gal ak glabnelum. Hnon darasam nim era ugun Yahudi nim edya yuba don ek sam ab malya nenewoka saboka olomnelum, ono' yok nim era ugunja hnon heikek aba' ara doboka obgiga yok heikek sam doboka ora doblemnelum. 23:35 Anasa wera, nimi nidya' malya una' orok bok salya' obluma' ara, pe ulumoknya Habel bek aba' obdongora youluma' ara moruwoka Berekhya bedya me Zakharia bera Imik Neyung e lomok uka daboka gibna' oulyang berem obluma' amba leboka, Imik Neyung adya ugumba lunuwoka nauba obnesil. 23:36 Ugunda banyek dib senewanalum. Ban nidya' lebnanya nera, wen an ugun liklum nim ek danasil," hyok. 23:37 "Yerusalem o, Yerusalem o! Ununumna' len nanga nidya' ara anja oblum. Imik Neyung adya anak bokol yalanjok nim era, anja nidya' girik adya seikoka saboka oblum. Anak an ulunjak nim era, wining adya ala' me ak ol lomok sam doronggoka bolomla sok ubnuna' aboka ulunabok, anja lek alalama' anasa lobna! 23:38 Ban nenesa leboka, Imik Neyung ara anja e nek ara lobnamlakanya, ganya gwe henemla. 23:39 Ugunda dib senewanaluma' ara, ugunda wene salek enyek moruwoka diba' gobdo eibnenggununulumukanya, ban lebnelum sum enyek, alda Wenelesilnya be si sibuka yalalanya bera peroba' dangalalul, hemun sum ek eibnenulum," hyok.
24:1 Wera Yesus ara Imik Neyung ek ab goboka bok dara, alja yuba doro diriga ban nang era yeiniboka, "Imik Neyung e someka' anyek, anaso uru sobek aboka pe kendelom," hyek. 24:2 Anasa leboka Yesus adya sikenek leboka' ara, "Wei, ugunda ban nidya' ara seleb eillililum de? Ban e nenyek denewoka ikoka sobek girik era hnon meka' go' ubdabnenggunumla', nidya' ara golob menegoka mabnamla' anyek ulumla, ugunda an nadya lebna' anyek dib senewanalum," hyok. 24:3 Wera Yesus ara Zaitun meinik biniboka bulumok dara, alja yuba doro diriga ban nang era alab neika' sikbeyoka' yuba sabnoba' aboka yek. Dara sikda alak, "Neyung o, nidya' ban lelelamnya nera hek sum ek unuwanamla' ak aboka neksilom," hyek. Anya, "Neyung, an yanalama' bekna' diba' ab, sidya' daknamla' bekna' ab dara, hek lok so bekna' ak lanawanamla do?" hyek. 24:4 Wenyek Yesus adya sikenek, "Ugunuk sonda' anasa bobnenewoka lebsijek anasa, pe keeboka ulululum. 24:5 Dara eimik era, nimi nauba nadya si nek sibuka, Nara nimi blebsina' dubnya bera an! wenyaboka, nimi nauba sonda' leboka malya nenewanasak. 24:6 Dara ugunda eimik era, senenggom mal yuba hnon, wen mala lanawoka oldalamak an yuba kebnelum bok, ugunda lok ganya bobnenggunulum, mem. Wera yoka'-yoka' nidya' ara unuru yabalemnelabok, an nidya' sidya' daknamlya' sum era, anam ulumnamla. 24:7 Wera yok mok soko nim edya, yok mok soko nim ek mala lanawoka oldalamnemak. Dara yok mok soko dub nang edya yok mok soko dub nang ek doluwoka olomnemak. Anya, yok-yok mok soko era, senenggom gwaneng oka' li lanawoka, senenggom sogouma' nauba doroganamla. 24:8 Ban nidya' ara unuwanalabok, nera men einina' diba', gela me bomna' ak me juga gweklamla sok ak, unub einiwanamla." 24:9 "Anasa ugunuk dara, henga gouboka malya nenewoka diba' obsinoka' aboka yok nim ek eleganesak. Ugunda nadya yuba dona' nim uboka nasamba ululuma' anasa, nidya' soko nim edya ugunuk lek senewanesak. 24:10 Dara ban salek era, nimi nauba yuba domeija bok dib senena' ara dengaboka, waboka malya nenebdangoka obnelum aboka yuba dibdangdo yibinemak. 24:11 Nimi nauba sonda' anasa, nunda Imik Neyung adya ununumna' len nang wenyabdangoka lanawanamaakanya, yok nim ek nauba malya nenewanamak. 24:12 Malya una' nauba danggiga balamlya' adya, mok soko me oboka lelewanamla' adya, nimi nauba ara wana' uldan ganya era heibnamla. 24:13 Bok ban unulamlya' anaba sidya' unuru daknamla sum eneba, ganya siklewoka ululenya benyek blebnamla. 24:14 Dara, Imik Neyung adya wenelemnesila' perob lero yanggan yub era, yok-yok mok soko nimi nidya' kebnoka' aboka, sokok me nidya' men leb elegeijebok, wera sidya' dagalongna' ara, eimik daknamla," hyok. 24:15 "Ugunda nimi ununumna' lelemoknya Daniel bedya lemok sok, Malya nenelesil malya una' era geisa peroba' ak seklamla eibmun dara, (Ugunda damok ara heka' ak lebok ara pe seiniwoka ella danalum!) 24:16 ban salek era, nimi Yudea moka ulumeija nim era mok soko meinik sam bik-bik al balanok. 24:17 Nim erema' dubuk sam ulumeija nim era, e lomok sam bona' beiyimeija' dobnoba' aboka wekna' mem. 24:18 Nimi wak sam wa welemeija nim era, akleng aroba' beiyimeija' dobnoba' aboka ek sam saaboka yanggana' mem. 24:19 Ban unuwanamla salek enera, gelewa me anam bomeija nim eb, me anam mouma dinilemeija nim eb dara, sikda hyak okna danamla! 24:20 Ugunda moka denewanamla sum gom, Sabat mem sum gom, enyek banera lanawalyek anasa, ugunda heng uboka mololdalalulum. 24:21 Ban yoka'-yoka' unuwanamla' okna danamla sum era, hyak yoka'-yoka' nauba danasila' damoka lanawanamla' ara, soko uyimok salek eba' ara wen hnon lanana' oroknya nek lanawanamla. Dara ono' eimik era, nenesonya nera hnon sounuwoka lanawanggunumla. 24:22 Imik Neyung ara unun salek enyek buruma' gebna' orok dara, nimi ben hnon anaba gobdo blebnenggunumso. Bok Imik Neyung ara, alja nim emba leboka unuwanamna senemok salek era meka' buruma' gebnamla." 24:23 "Ban salek enyek, nimi ben hnonja ugunuk lebneladya, Nimi blebsina' dubnya bera anyagan ulumla' anyek kemel yoululum gom, Alda anyagono ulumla henesak dara, ugunda wenyhenesak nim ek ara, sikenek dib senena' ara mem. 24:24 Dara eimik era, sonda' nimi blebsina' dub nang eb, sonda' ununumna' len nang eb nauba lanawanamak. Sikda nimi nauba malya nenewoka sonda' lebnoba' aboka, yoka'-yoka' senenggom bekna' eb, hyak lok so' ab, hogung ak laga nauba unura yibinemaka' adya, Imik Neyung ara hnon or senewanamso dara, nim Imik Neyung mab anaba sikenek dib senewanasiseng. 24:25 Ban yoka'-yoka' nidya' ara lanan salek era anam bok, nara ugunuk men wenyhesina' anyek, ugunda kebluma' anasa, pe ulululum. 24:26 Anasa nim adya ugunuk, Nimi blebsina' dubnya bera wera hwalek sam ono ulumla' bar kemel bululum henesak dara, ugunda dib senewoka kemel bana' ara mem. Gom, sikja ugunuk, Alda ban e lomok an ulumla henesaka' anaba, ugunda dib senena' ara mem. 24:27 Dara, nimi diba' me yanamla' ara, ebna' ak yali sam ab langam aboka kemban sam yebel yabalamla' anaso' ak ubnamla. 24:28 Blol mana ulumna digum ara, nimi be' dakna wining, sam wining era, anyagan ourulumak," hyok. 24:29 "Dara yoka'-yoka' nidya' igin kwesina' ara, seleb unubgogowanamla dara, eimik nong ara, Henga ara guna' danamlakanya, wala' ara dilina' yebnenggunumla. Gura' ara imik ab uboka sokok sam daka yingginimlakanya, imik sam ulumla' migiba yaka' nidya' ara dolubdangoka malya nenewanamla. 24:30 Ban unubgogowalyek ab danyek, nimi diba' me yanggan bekna' era imik laga danamla. Wera ban sum enyek, nimi nidya' sokok an ulumaknya nera, nauba engewanamak. Sikda nidya' nimi diba' me nera imik sam deba' ak senenggoma' anyek alja migib gebman ab yanggalya' ak eibnemak. 24:31 Dara nimi diba' me nedya alja lero bedya poo ana' benggong yuba edya senenggoma' lebnamla dara, nim Imik Neyung mab ulumak nim era, im gokgoba nidya' eboka bob mamaganalum aboka oruganesil," hyok. 24:32 "Ugunda ara gal ek ab ban sununa' hnon ella danalum. Gal era hmoka siliwoka ul yaban dara, ugunja dara, wera doub salek oka danamla senelelum. 24:33 Anasonya neikek, yoka'-yoka' unuwanamla' anyek eibnelum dara, wera nimi diba' me yanggan salek era, seleb yenewal senewoka ella danalum. 24:34 Ban wen an likoka ulumak nim enera, nidya' anam dengaboka somoganggumeija bok, unuwanamla' nidya' ara lanawanamla' anyek, an wenyhena' anyek, ugunda ella ulumnalum! 24:35 Anya, im ab soko ab dara, dengaro lobnalabok, nadya yub ek dara, dengaro lobnenggunumla," hyok. 24:36 "Hek sum ek, hek jam ek Yesus yanggan sum era, imik heikek ulumak lero nang eneba elgom, Imik Neyung bedya me neneba elgom, alda Imik Neyung ok hnonok albeyoka' ella ulumla. 24:37 Nimi diba' me yanggan sum mok soko hogung ara, Nuh be ulumok salek nimi nidya' ulumeka' anaso ubnamla. 24:38 Nimi nidya' meka si denggusuk salek era, nimi nidya' meka dero gwanenga dero gela dobdangdo balamek. Unubdibigemeka' moruwoka, Nuh bera mek ekla buna' ak wekok. 24:39 Dara nimi nidya' ara, salya' ulumek bok, meka si del yabasuka' nong ak eiyiboka, wera mek si del yabasil senewoka ella dek sok, anasonya neikek nimi diba' me yanggan sum era anaso unuwanamla. 24:40 Ban sum era, nimi penya nang neika' ak wa welerija dara, ben hnonda doboka, ben hnonda lobnamla. 24:41 Ono' gelewa penya neika' ak gandum soldererija dara, gela hnonda doboka, gela hnonda lobnamla. 24:42 Wenelesilnya be yanggan sum era, ugunda elgom ululuma' anasa, hyak pe keeboka diri ulululum. 24:43 Nimi ben hnon e damnya bedya, hoka' dona' nim era, ban salek enyek, nadya bona' hoka' dol yanamak senewoka, welemnamso dara, bona' dobnenggunusenga' anyek, ugunda ella dangoka beklemnelum. 24:44 Dara ugumbabya neikek, nimi diba' me yanggan salek era, ugunda ban salek yanamla' ara elgom anasa, ugunda pe keeboka diri ulululum," hyok. 24:45 Dara Yesus ara ono' hnon leboka' ara, "Wera anaso dara, wa arawoka wenya bera, heknyek geremseng uboka pe bojam ulumnamla do? Anedya perob sum dalya dara, wa damnya bedya nim ek dena' deb elegosulula' aboka, dubnya bera anasonya bek sekiyiwanamla. 24:46 Dara, alja' neyung be yanamla sum, ban wa oruga bililenya bera, wa pe welemlya' anasa, dubnya bedya eiblya dara, wa welelenya bera peroba' dolul. 24:47 Wera anyek eiyiboka, wa damnya bedya dara, bojam uboka wa welelenya bek ara, alja yok-yok bona' nidya' bo ublula' aboka benyek an eleganemla' anyek, ugunda beklemnelum. 24:48 Bok wa wenya bera, yu hwam ok uboka, alja' ganya lomok ab lebnesodya, 24:49 Maly, nadya neyung bera eimik ek yanamla' anya', aboka, wa wen nang yok nang ek salya' obyaboka, yu meka deregoka ganya uu alasil nim eb dena' neika' deregoka ulumnemak dara, 24:50 wene salek, alja neyung ban salek enyek yanamla' senewanggumlya salek enyek, yanamla. 24:51 Yanamlakanya, wera ban malya uboka wa welelenya bera, malya uboka saboka obnamlakanya, sene bol nenena' hwam nim hnoum boboganamla. Dara, malya una' nim eb neika' engewoka si glengdarreb aboka nauba gweklemnemak," aboka Yesus adya wenyhusuk.
25:1 "Imik Neyung wenesin heikek wekna' ara, mok soko hogung ara ban sununa' eneso ubnamla' ara, nimi gobenya gelewa sagobadya, nenya dobnenggumek nim, wesa' diniwoka boboka gela dobnamoknya yanggalya' ak pika dibnemab aboka bilimek. 25:2 Ban gelewa gong danara, gelewa lambadya dara, geremseng bok, ono' yok lambadya dara, dongdang ana' gelewa. 25:3 Lambadya dongdang ana' gelewa dara, uka wesa' ara bomek bok, uk mek ara bobnenggumek. 25:4 Bok yok lambadya geremseng gelewa dara, uka wesa' bomeekanya, uk mek anaba bomek. 25:5 Uka wesa' diniwoka bo diri ulumek bok, gela dobnamoknya bera mandewoka, men yanggana' orok adya, gelewa dara hogung ok uboka diba' mabek." 25:6 "Dara, inimnek dukdukanek hnoum yuba kelemek enyek, neyung bera wera yanggal. Alak pika dil bululum al yabeka' ak kebek. 25:7 Wenyan yuba keboka, gelewa dara, sikja wesa' beiyimeka' ara diniwek. 25:8 Bok dongdang ana' so gelewa dara, geremseng gelewa ek lebekja, Nunja uk era saranggousununa' ul yabala' anasa, ugunja uk mek enyek, nuk hnon elegosululum, aboka molowek. 25:9 Bok geremseng gelewa edya dongdang ana' gelewa ek ara, Ousa era nunjinya nidya' denghesilyek anasa, ugunuk eleganggunusab, orok! Alda ugumba dekna' ak eboka yok dekel bululum! hyek." 25:10 "Wera dongdang ana' so gelewa dara, dekna' ak sam eboka anam dekel balamek salek, gela dobnamoknya bera seleb yok. Dara geremseng gelewa orowek wesa' diniwoka diri ulumeka' ara, bera yanggok dara, neika' benyeb ablaboka ek wekoka pik ara hyak gasa' seregok." 25:11 "Wene salek era, dongdang ana' gelewa dara yek. Dara pik ara, seleb gasa' seregoka' anasa leboka, gelewa danadya, Neyung o, neyung o, pika nunsamba baksiya, aboka lelemek. 25:12 Bok gela seleb do wekemoknya bedya gelewa enyek an lebokja, Ugunda nara elgom ulusin nim ek yalalum!" husuk. 25:13 Anasa, Yesus ara wenyaboka sununa' en lebdakoka' ara, "Dara, Imik Neyung yanggan sum era, heksum, hek jam ek yanamla' ara elgom ululuma' anasa, soba' pe diri ulululum," hyok. 25:14 "Nimi diba' me yanggan sum era, mok soko hogung ara, ban sununa' eneso ubnamla. Nimi ben hnon binimookanya, alja bona' unuruwa' beiyi balamoka' ara, alja wa wen nang ek yoululum hyookanya, sikenek kemero bo ulumnelum aboka lebgogowok dara, alda mok byuk. 25:15 Dara, wa wen nang ek ara, sikja migib uboka webnesenga' sunuwoka wa elegosuk. Nimi ben hnon rupiah lambadya anaso bo ulumnenelem aboka lebok. Ono' penenya bek ara, alda penya' rupiah bo ulumnenelem aboka lebok. Ono' ben hnonda hnonok rupiah anaso bo ulumnenelem aboka lebok. Wenyabgogowoka, rupiah damnya bera alda yokok sam byuk. 25:16 Wera lambadya rupiah lemoknya bedya dara, alda biniboka, ono' yok lambadya rupiah dek sounuwoka dobok. 25:17 Dara ono' penenya rupiah doboknya beneba, neik so sounuwoka ono' yok penya rupiah dobok. 25:18 Bok ban hnonok rupiah domoknya bera, alja' neyung bedya rupiah era, soko lokoka lomok doronggoka doknomok." 25:19 "Unumek salek era, eimik mande-mande aba balamok dara, sikja neyung wa damnya bera yeiniboka, alja wa wen nang eb neika' huru welemak do senewoka einib einiwok. 25:20 Dara lambadya rupiah domoknya bedya yeiniboka, Neyung o, anja dara, lambadya rupiah ok elegenulum bok, nadya dara, ono' sounuwoka lambadya' rupiah dob maksa, hyok. 25:21 Dara wa damnya bera, an unumoknya wa pe bojam welemoknya bek an leboka' ara, Anda hyak pewolum! Anda meknya neneba pe bojam welelama' anasa, wera naubenya neneba or anak welemnelam aboka lebnenggen. Anya, nadya' ek sam yamenekanya, nab neika' dena' pe dero ulumnenam! hyok." 25:22 "Dara ono' penenya' rupiah elegemoknya ben yeiniboka, Neyung o, anja dara, nak ara rupiah penya ok elegonulum bok, nadya wera ono' penya dob sounuwasa' anyek, kendelom, hyok. 25:23 Dara wa damnya bedya benyek an, Anda hyak pewolum. Anda nadya wa pe bojam uboka wenya bek ululam. Anda meknya nek bojam welelama' anasa, wera nadya anak senenggomnya nek welemnelam aboka lebnenggen. Anya, nadya' ek sam yamenekanya, nab neika' dena' pe dero ulumnenam! hyok. 25:24 Dara sidya' nong ara, rupiah hnonok dema domoknya bedya yeiniboka leboka' ara, Neyung o, anda hyak gasenya bek ululama' ara ella ulunggen. Neyung, nadya anak eillilenggen dara, anja yoka' doka doknenggumna ak ab doka daklelama' hnon, anja yoka' weboka mebnenggumna' ak ab nonga dololama' ak hnon eillilamna. 25:25 Anasamba leboka, nara lok anasa, anja rupiah era soko lomok sam doknel bisekanya, wera an bo yan anasa dobnelam, wenyaboka elegok. 25:26 Dara rupiah en damnya bedya rupiah doknomoknya bek an leboka' ara, Anda hyak sulmalya' hwam uboka, yu nongnya bek ululam! Anda nak ara, nadya yina' doknenggumna' ak ab daklamna' hnon, hnonda nadya yoka' weboka, mebnenggumna' ak ab nong dolomna' ak okoka eillilenelem de? 25:27 Wera anda nak benesonya benya' senenesom dara, nadya rupiah era, rupiah beilin ek sam beiyinesom dara, maknanya neb beiyinesenga' anyek dobnasinya. 25:28 Anasa wera benedyinya nera nidya' alak an ululanya nera dobmunukanya, sagobadya rupiah ululanya bek an elek maklulum. 25:29 Anasa, yoka'-yoka' seleb yak ulumlya nim era, nauba sounuwoka eleganamla' adya, nauba dangoka ulumnamla. Bok yoka'-yoka' orowek meka' me ulumlya nim era, sikenek an ululenya nera dobnamla. 25:30 Anya ban meilinya bera guna' ak sam doboka bobogolulum. Dara an unu boboganamla' ak ara, nauba engewoka si glengdarreb aboka gweklemnamla! wenyamok," hyok. 25:31 "Nimi diba' me alja nong senedya' gebman yanggalya sum era, alja lero nanga nidya' ara akneb ganagoka yanamlakanya, alja' perob ekla buna' ak sam dubnya senenggomnya gekneba' dangoka bulumnamla. 25:32 Dara yok-yok soko nimi nidya' ara, al dam mamagal binimak. Dara alja, nim edya kambing domba pam ak boklemak sok unuwoka boknesil. 25:33 Wera domba pama nidya' ara, sirikek sam bo mamaganamlakanya, kambing pam era waneng ek sam bob mamaganamla. 25:34 Dara dubnya bedya sirik ek sam nim ek lebnamla' ara, Nadya neyung bedya peroba' nenewousuk nim ek anasa, youlululum. Ban soko en uyiwanggom salek enyek, ugunsamba orowek leboka beibsuk heik enyegan or weklulum. 25:35 Nara gwaneng ok unyok dara, ugunja dena' elegenulum. Nara mek ok ubnyok sum era, mek elegenulum. Nara sekel yangganya ulumsa sum era, ugunja peroba' leboka nak ugunja ek sam doro diyinulum. 25:36 Nara ongon aklenga garan ulumsa sum era, akleng elegenulum. Nara neiklamsa sum era, ugunja kemel yeiniboka ulunulum. Nara henga geregoka gasa ek sam beiyinyek dara, ugunja kemel biniboka aralanulum, wenyaboka lebnamla." 25:37 "Wenyek pe ulumak nim edya dubnya bek lebnemaka' ara, Wenelesilimnya o, hek sum ek anda gwaneng ok unjok enyek, nunja eiyiboka dena' elegenjuba, goma, mek ok unjoka' enyek eiyiboka den meka elegenjuba do? 25:38 Hek sum ek Wenelesilimnya anda sekel yangganya ululuma' ak eiyiboka, ek sam doro diyinjuba do? Ono' hek sum ek Wenelesilimnya anda ongon aklenga garan ululuma' ak eiyiboka, ongon akleng elegenjuba do? 25:39 Hek sum ek Wenelesilimnya anda neikna' salanjok gom, gasa ek sam henga geregoka beiyinjeka' ak eiyiboka, aranjuba do, wenyhenemak. 25:40 Bok, Wenelesilnya bedya sikenek lebnamla' ara, Ugunda ban nidya' ara, ugunja nimi malya nim ek, sikda nadya' hemyab ek, unusulum dara, wera nera nasamba unululuma', anasa lebna, henesil." 25:41 "Dara ono' alja waneng ek sam nim ek lebnamla' ara, Ugunda hyak malya una' hwam nim o, anyaganyeba' ara men bindowoululum! Hyak meka' sarangganggunumla uk ek sam, Iblis ab alja lero nang emba aboka orowek beibuk ak bululum! 25:42 Nara gwaneng ok unyok sum era, ugunja nak dena' eleganggunulum. Ono' nara mek ok ubnyok sum era, mek eleganggunuluma' anasa, or uk ek sam binilum. 25:43 Nara sekel yangganya ulumsa sum era, ugunja' ek sam doro dibnenggunulum. Nara ongon aklenga garan umsa salek era, ongon akleng ongowalom aboka eleganggunulum. Nara henga geregenyek suma hnon, neikna' salanyok sum eneba, nak keeboka unggulunulum, wenyhenesil." 25:44 " Dara ban malya una' nim edya Wenelesilnya bek, Wenelesilimnya o, anda hek sum ek gwaneng ok, mek ok unjok do? Goma, sekel yangganya dangoka ululum gom, ongon aklenga oroka' ululum gom, neikna' salanjok gom, henga geregoka gasa ek beiyinjeka' ara, hek sum ek eiyinjuba do? 25:45 Wenyhenemak enyek, dubnya bedya sikenek lebnamla' ara, Ugunuk dib lebsin, Ugunda ban unu hyak bona' garan nim ek aranggululuma' ara, wera nera nak aranggululuma' ara an, wenyhenesil. 25:46 Dara ban malya unulumek nim era, soba' oka deregoka gwekna' ulmoubna' heik ak weknamak bok, alda Imik Neyung ak pelemak nim era, embenga' ulmoublemnemak heikek wekel binimak," aboka Yesus adya wenyhusuk.
26:1 Wera Yesus ara wenyaboka nidya' nekgogowousuk dara, ono' alja yuba doro diriga ban nang ek, 26:2 "Li penya sum ublya dara, welena' orok roti gwanenga den sum danamla' ara, ella ululum. Anya nimi diba' me nera oboka gal ak glabnoka' aboka doboka eleganemak!" hyok. 26:3 Dara neik salek era, Yahudi Imik Neyung yuba wa gaka' dub nang eb, Yahudi dub nang eb dara, Imik Neyung yuba wa gaknya dubnya, Kayafas be ulumoka' ak, dub nang un ek longomek. 26:4 Sikda longomeknya nera Yesus anyek geleleng henga gouboka obnemab an yub emba longomek. 26:5 Bok sikda, "Welena' orok roti gwanenga den sum enyek, henga gouboka obnemab dara, yok salya' nimi nauba ulumaka' ara, doulub menegeibyek anasa, sum era unuwanggunumab," wenyaboka sabek. 26:6 Yesus ara, gororoma' delemoknya, Simon bedya' ek sam, Betania heikek ulumok salek, 26:7 gela hnon Yesus ak yok. Gel gera perob song ngikna' meka senenggom rupiah lanalamok mek enyek, mek hmeiya hnonok bo yok. Wera Yesus ara anam bukoka delemok salek, gel gera mek en pika bak salawoka Yesus adya' hukuk sam yek goluwok. 26:8 Wenyek Yesus adya yuba doro diriga ban nang era, unuwoka' anyek eiyiboka, hogunga gorogoka lebeka' ara, "Ban nidya' ara hek damok enesa salya' lelem heboka boloklamla do? 26:9 Ban perob song ngikna' mek enera senenggom rupiah doboka, bona' garan nim ek eleganeseng bok, salya' heboka yeklamla!" senewoka wenyabdek. 26:10 Bok Yesus ara, ban sikja wen senewek ganya era ella ubsuukanya, "Ugunda hekasa ban gel genyek an loba' nenelelum do? Gel genera nasamba peroba' anyek, nadya unuwaneseng senelenanya nenyek ubnel. 26:11 Nimi bona' garan nim era ugun gangganek ara soba' ulumnamak bok, nak dara, ugunub soba' neika' go' ulwenenggulumnemab. 26:12 Ban perob song ngikna' mek, nadya' nong ak pika bakoka yeknela' anera, wera na soko loknenyaknya nenesa kabnulula' aboka ubnel. 26:13 Nara ugunuk dib lebsin, Yok-yok mok soko me nidya', nim Imik Neyung adya' perob lero yanggan yuba leb elekdo yabalamnemak dara, ban gel genedya nak perob song meka ngiknela' ara, alak seiniwoka, anyaganyeb unumok aboka nekdo yabalemnemak," hyok. 26:14 Dara ono' Yesus adya' obadya' alja yuba doro diriga ban nanga, ben hnon alja si Yudas Iskariot bera, Yahudi nim edya' Imik Neyung yuba wa gaka' dub nang ek byuk. 26:15 Wera Yudas bera, nang enyek an, "Yesus anyek, nadya ugunuk doboka eleganesin dara, ugunja nak ara, heka' ak eleganenulum do?" wenyaboka heibok. Wenyek dub nang era, rupiah einiwoka perak rupiah denga hnonok, Yudas bek elegek. 26:16 Dara ban sum enyek moruwoka, Yudas bera hek sum ek Yesus ara or obnemak aboka yuba dil binimna senewoka pik elemok. 26:17 Dara, welena' orok roti gwanenga den sum yenewok. Dara, men sum era, Yesus alja yuba doro diriga ban nang era Yesus ak yek. Yeiniboka, "Neyung o, anja dara, ansamba dena' youboka beibnenjaba' ak ara, hanyagarak perob senelam do?" aboka heibek. 26:18 Wenyek Yesus adya, "Ugunda nauba heikek biniboka, nimi ben hnon eibmunya bek an, Nunja' neksinya bedya leladya, yoka' dananel salek era oka dal. Anasa nara anja ek sam nasamba dena' youboka yuba doro diriga ban nang eb neika' denemab, wenyamla, henelum," aboka orugosuk. 26:19 Dara Yesus alja yuba doro diriga ban nang era, alja sikenek orugosuk sok, unuwek. Anya sikda perob sum amba denemab aboka dena' youbek. 26:20 Wera seleb iniwok dara, Yesus ab alja' obadya yuba doro diriga ban nang eb neika' bukoka delemeekanya, 26:21 anam delemek salek, Yesus adya, "Nimi ben hnon ugun gangganek ab, nak or oblulum aboka yuba dil bininel," hyok. 26:22 Dara, sikda wenyan yub en kebek dara, hyak solom nong uboka engena' ganya beibsuk. Anya sikda, be hnonok-hnonok Yesus ak, "Neyung, anja wenyhelemnya nera naka' goma' senewan," aro balamek. 26:23 Anasa Yesus adya sikenek, "Nablaboka neika' roti gwanenga meka hwiboka denenamnya bedya or oblulum aboka yuba dil bininel. 26:24 Nimi diba' me nera Imik Neyung yuba bukuk sam momnya dobok sok sunuwoka somoganamla. Bok or obnelum aboka yuba dil binilanya ben nong anyek, hyak omom nonga' ak ubla! Ben nong ak dara, sokok an ara gobdo hyak beilina' loseng dara, pemneseng bok!" hyok. 26:25 Dara yuba dil binimoka' nongnya Yudas bedya, "Neyung neklesilimnya o, anja wenyhelemnya nera naka' goma' senewan," hyok. Wenyek Yesus adya, "Anda alan seleb leblam an," hyok. 26:26 Wera an delemek salek, Yesus ara gwanenga doboka Imik Neyung ak perob aboka gibok. Seleb dara, gwanenga soboka alja yuba doro diriga ban nang ek elegesuukanya lebokja, "Nadya nong era ban, or doboka denelum," hyok. 26:27 Nen seleb dara, alda mek hmeiya doboka Imik Neyung ak perob aboka molowok. Dara mek hmeiya era alja yuba doro diriga ban nang ek elegesuukanya lebokja, "Ugunda nidya' or doboka dululum. 26:28 Ban eneng enera, Imik Neyung adya nimi nauba blebnamlakanya, sikja malya una' era sikenek ab soba' memelemnesil amoka' ara an. 26:29 Ugunda banyek dib senelemnulum: Ban mek enera, nablaboka dara, hnon neika' denggulumeibya' moruwoka, ugunub neika' neyung bedya' imik heikek wekeibya sum enyek, hnonok neika' denemab," hyok. 26:30 Seleb unu debgogowek dara, sikda Imik Neyung bera hnonok sebeekanya, sikda Zaitun meinik sam byik. 26:31 Dara ono' Yesus adya alja yuba doro diriga ban nang ek, "Imik Neyung yuba bukuk sam ara, Imik Neyung adya lebokja, Nara sikja' bo usinya benyek obnamna dara, ala' mab ara doluwoka bokgokdanamak, wenyaboka leboka' anasa, ugunda sumen inimnek enera, nanokok loboka, yok-yok sen-senem henelum. 26:32 Bok nara embenga' suboka buknya dara, nara men Galilea sokok sam bilimnamna," hyok. 26:33 Wenyek Petrus bedya Yesus ak, "Neyung, yok nang era nidya' lo bininjak bok, nak hnonok meka' unuwanggunumna!" hyok. 26:34 Anasa Yesus adya alak, "Anda banyek pe beknelam! Al sumen inimnek enyek, wining yuba anam sabnenggumlya salek, anda nak sonda' anasa bobnenewoka, lika winilya sonda' lebnenelem," hyok. 26:35 Wenyek Petrus bedya Yesus ak, "Neyung, nara anab neika' somoganasinima' anaba, nadya anak dara, bera nara elgomnya benya' aboka meka' wenyhenggununggen!" hyok. Anya anyagan yuba doro diriga ban nanga nidya' anaba al neik so leb ligiwek. 26:36 Nen seleb dara, Yesus ab alja yuba doro diriga ban nang eb dara, yokok sam, si ara Getsemani alamek wak sam byik. Wera byikek ab dara, Yesus adya alja yuba dona' nang ek, "Nara heng uboka Imik Neyung ak molol bilimna' anasa, ugunda anyagan bukululum," hyok. 26:37 Dara Petrus beb, Zebedeus bedya mabo moumena' penya uboka bo busuk. Anya Yesus ara ganya igina berewoka, engena' ganya beibuk. 26:38 Dara Yesus adya alja yuba doro diriga ban nang ek, "Nara ganya igina berewoka, engena' ganya beibnelekanya, dib somoganamna' anaso' anyek ubnel. Anasa, ugunda anyagan diri ulumunukanya, ono' nab neika' diri ubnemab," hyok. 26:39 Dara alda mek mok so gogonggoka byuukanya, dunuwoka lero molowoka' ara, "Wei, neyung Imik Neyung o, or senemen bok dara, igina kweboka gwekna' damok ara nak ab mok sam gebnelam. Bok neyung, nadya senenanya nek gom, alda anja senelamnya nenyek ok, or unuwolul," hyok. 26:40 Seleb unu molobgogowok dara, Yesus ara on pik samal yeiniboka kemelemok enyek, alja winilya yuba doro diriga ban nang era, seleb hogunga mameka' ak eibsuk. Anasa Yesus adya Petrus bek, "Ugunda jama hnonok sibin anaba nab neika' diri buknenggunusibya de? 26:41 Ugunda nimi sunulusila' lomok sam malyinggumunuk aboka, diri bukoka soba' mololelulum. Nimi ganya ak dara, unuwanesinya senen bok, nong ak dara, hmeng ulumla," hyok. 26:42 Dara ono' Yesus ara saaboka hnon molol byuukanya leboka' ara, "Wei neyung, ban igin yaka' enyek mok nenena' loboka, or kwebnenel bok dara, wera neyung, or anja senemenya nok or unuwolul," hyok. 26:43 Yesus ara an wenyaboka seleb molobgogowok dara, onok sam yeiniboka kemelemok enyek, alja yuba doro diriga ban nang era, hogung ok anasa seleb salya' mameka' ak eibuk. 26:44 Wera ono' Yesus ara sik eib loboka li winilinya nera, Imik Neyung ak al neik yub enyek saaboka molowok. 26:45 Seleb molobgogowok dara, Yesus ara ono' alja yuba doro diriga ban nang ek yeiniboka leboka' ara, "Ugunda dek-deka soboka or anam malum de? Nimi diba' me nera malya una' nim ek doboka eleganamak salek era, wera seleb oka dala' anyek, kendululum. 26:46 Wera, binimaba' anasa, buklulum. Nak oblulum aboka yuba dil bilinelnya bera, seleb oka yanggala' anyek, kendululum," hyok. 26:47 Yesus anam wenyaboka yuba salamok salek, alja obadya yuba doro diriga ban nang ben hnon, alja si Yudas beb, nimi yok nim nauba hnon, oldan gab eb dolukna' gal mal ab bomek nang edya, neika' alablaboka yek. Wera nang dara, Imik Neyung yuba wa gaka' dub nang eb, mok soko dub nang eb dadya, orugeisik nang. 26:48 Dara, Yudas bera ban bekna' diba' enyek lemoka' ara, "Nadya songa diniwoka gibnenya bera alan anasa, salawoka henga goubnelum!" hyok. 26:49 Wera nang dara yalameka' ara, Yesus ulumoka' ak yek dara, Yudas bera Yesus ak biniboka lebokja, "Neyung neklesilimnya o, perob aboka gibgen," wenyaboka uruma meka hmoboka gibok. 26:50 Wenyek Yesus adya Yudas bek, "Hem o, anja unuwonun senemennya nenesa yeilimem dara, or unuwalom," hyok. Dara nim alab yeilimek nang era, ok berem bindiwoka, salawoka heng gobek. 26:51 Bok nimi ben hnon, Yesus ab neika' anyagan seklemeknya bedya, gaba dob dakdowoka, yuba wa gaka' dubnya bedya wa nang ben hnon, o mekla' ak lebok. 26:52 Dara Yesus adya unuwoknya bek an, "Nimi nidya' gab adya nim olomak nim era, sikba gab adya unu obnesaka' anasa, anja gab era keboka bona' ak doronggalom. 26:53 Anja dara, alda alja neyung bek lero nanga denga yuba' obadya nang anaso berra aral yananoka' aboka molowanggunumso senelam de? 26:54 Bok ban unumso' anaba, Imik Neyung yuba orowek unuwanamla aboka momnya doboknya nenyek, weneba ubla sok gigiwolula' aboka unuwanggunumso," hyok. 26:55 Dara Yesus adya nimi nauba anyagan alak obnoba' aboka yek nang ek, "Ugunja dara, nara nim ona'anya senewoka oldan gab ab dolukna' mal gal eb bo bo yeililum de? Dara, lika soba' nara Imik Neyung e eremek sam neklesino bok, nak ara henga goubnenggulunulum! 26:56 Bok, youma' ununumna' lelemek nang edya ban nenyek unuwanamla aboka orowek momnya dobeknya nenyek gigiwolula' aboka nera ublum," hyok. Dara, Yesus adya yuba doro diriga ban nang era alak ok loboka, sen-senem abgokek. 26:57 Yesus henga goubul yeilimek nang era, seleb goubek dara, bo balameknya nera, Imik Neyung yuba wa gaka' dubnya Kayafas bek, Yahudi yuba neksin nang eb, Yahudi dub nang eb dara, seleb orowek longomeka' ak bo byik. 26:58 Wera Petrus bera, mok pik uboka keebgiga bilimoka' ara, yuba wa gaka' dubnya bedya' eremek sam byuk. Alda erem enyek an wekoka, yin bona' nang eb neika' bura yabalamek. Alda heka' danamla' anyek ella donuna' aboka kemero bulumok. 26:59 Imik Neyung yuba wa gaka' dub nang eb, nimi yana lelesin nanga nidya' ara, sonda' anyek diba' nenewoka Yesus ak oboka dibnoba' aboka yub eboka salamek. 26:60 Dara nimi nauba sonda' anasa, yoka'-yoka' unulamla aboka miniwoka bo sal balamek bok, Yesus ara anyek okoka damok enyek dib malya uboka' ara eibnenggubek. Bok, nimi penya nang eimik enyek, nimi hnoum sekel yarek. 26:61 Wera nim danadya, "Ban benera leleladya, Nara Imik Neyung e ara golowoka beiyiboka, onsok li winilya ok sobnamna, alalanya bera an," wenyherek. 26:62 Dara Imik Neyung yuba wa gaka' dubnya bedya sekoka Yesus ak, "Anda hekasa anak yana kiboka lelenjaknya nemba dara, yuba hnon doro sanggululam do? Ban wenyalenjak dara, anda heka' senelelam do?" wenyaboka heibuk. 26:63 Bok Yesus ara yuba hnon doro sabnenggubok. Wenyek Imik Neyung yuba wa gaka' dubnya bedya, "Imik Neyung embenga' ululanya bemba leboka, anda Kristus, nimi blebsina' dubnya, Imik Neyung bedya me ululam gom, orok gom aboka wenyhesilom," hyok. 26:64 Anasa Yesus adya sikenek, "Ugunja yub edya alan seleb wenyhelum an. Nara ugunuk dib lebnesin, Ban sum enyek moruwoka, nimi diba' me nera Imik Neyung migibnya bedya' sirikek sam bukla, anya alda imik sam deba' hnoum pik yanamla ak, eibnelum!" hyok. 26:65 Wenyek Imik Neyung yuba wa gaka' dubnya bera, alja boksom gweldekdangoka, "Bera Imik Neyung si ak malya nenelamla! Anasa yoknya bedya dib malya unulamla hulula' aboka ebnenggunumab. Alja Imik Neyung si malya geblamla' ara, ugunja okoka seleb keblum. 26:66 Ugunja dara, benyek anara heka' hubnemab senelum do?" wenyaboka heibsuk. Dara sikja, "Alda malya ulumla' anasa, al somoganamla ok," hyek. 26:67 Dara, sikda Yesus adya' hogung ak gamala' solob goluwoka, soruk winin adya saboka olomek. Hnonda nong pik hogung pik wabom-waboma olomeekanya, 26:68 lelemekja, "Wei, nimi blebsina' dubnya o, wera benedya olonel aboka ununumna' leblom!" wenyalamek. 26:69 Al ban salek enyek, Petrus bera e weilik sam diri bulumok dara, ek wa gel ge hnon yeiniboka Petrus bek, "Galilea mok ebnya Yesus alamaknya beblaboka neika' ululumnya ben gom?" aboka heibuk. 26:70 Bok Petrus bedya dara, Benera nara elgomnya bek lelelam aboka, sonda' amba bobnenewoka nimi hnoum ak, "Anja' lelelama' ara, heka' ak leblam, naba elgom bar," hyok. 26:71 Wenyaboka alda pik sindamak sam sekel byuk. Wene salek, yok ek wa gel ge hnon, yeiniboka Petrus bek eibuukanya, anyagan seklemek nim ek, "Ban benera, Nazaret mok ebnya Yesus alamaknya beb neika' ulumaknya benya'," hyok. 26:72 Wenyek Petrus bera sonda' amba bobnenewoka, "Hyak aldib nong, benera nara hyak elgomnya!" hyok. 26:73 Dara mandewanggonggom, nimi nauba anyagan longomek nim edya Petrus be eiyiboka, "Aldib, anda sikeneb neika' ululumnya, anja yuba sana' ak ella ubjab," hyek. 26:74 Dara Petrus bera hyak besa leboka leboka' ara, "Nara benera naba meka' elgom nong ulunanya!" wenhyok. Wera ban salek era, ayam yuba ngoubuk. 26:75 Danyek Petrus bera Yesus adya alak men, "Anda ayam yuba ngoubnenggumlya salek, nak sonda' amba li winilya bobnenewoka lebnenelem," wenyamok ak gigiwal senewok. Dara alda goboka yibuukanya, nauba soloma daboka hyak goukduk-goukduka engewok.
27:1 Hyak luguna' nonga gwelegel yabok dara, nidya' Imik Neyung yuba wa gaka' dub nang eb, Yahudi soko dub nang eb dara, Yesus oboka dibnemab aboka seleb yuba sabdakoka garawek. 27:2 Wera sikda Yesus ak gel heng adya goubeekanya, Roma nim dubnya Pilatus bek bo elegel byik. 27:3 Wera Yesus amba yuba dil bilimoknya Yudas bera, Yesus ara seleb oboka dibnemak an yuba kebok dara, alda angoo salya ubsa senewok. Dara yuba dil bilimoka' amba aboka perak rupiah denga' hnonok elegemeka' ara, Imik Neyung yuba wa gaka' dub nang eb, Yahudi soko dub nang ek sik dam nang lolonggol busuk. 27:4 Dara Yudas bera, "Nara malya una' oroknya bek salya' oblulum aboka yuba dibsa' ak, nara malya ubsa," hyok. Bok sikda alak lebekja, "Nera nunja de? Amba anjinya!" hyek. 27:5 Anasa Yudas bera dengna' domok rupiah era Imik Neyung e lomok sam salya' bobok loboka, byuukanya, al nong ara henga ngangak geregoka galek elekdok. 27:6 Dara, Imik Neyung yuba wa gaka' dub nang edya, ban rupiah era sik dam nang dobeekanya, lebnemeka' ara, "Ban rupiah enera nim olumna' rupiah. Nunja yub ek sam lelemla' ara, Imik Neyung ek sam ara nenesonya nera beilina' mem hyok," hyek. 27:7 Wenhyek dara, rupiah era, solowaka unuruwa' memen damba si silimak soko ek dekek. Dara, "Ban soko era sekel yanggan nang ek somogan enyek soko lokna danasa lebab," hyek. 27:8 Ban unumeka' amba leboka, ban soko era wenebabya, "Eneng dekna' soko," alamak. 27:9 Ban unuweknya nera, youma' ununumna' lelemoknya Yeremia bedya lebokja, "Israeli nim edya alsamba aboka perak rupiah denga hnonok domek. 27:10 Wenelesilnya bedya nak orugenyok sok sunuwoka, sikja ban rupiah enedya hein soko dekemek," amoknya nera an gigiwok. 27:11 Wera Yesus ara bo balameka' ara, Yudea mok soko dubnya Pilatus bek bo byik. Dara, Pilatus bedya Yesus ak, "Anak Yahudi nang dubnya ululam de?" wenyaboka heibok. Wenyek Yesus ara, "Alan anja seleb lelam an," hyok. 27:12 Bok Imik Neyung yuba wa gaka' dub nang eb, Yahudi sokok dub nang eb dadya, Yesus ak yok-yok damoka yana kiboka lelemek dara, alda yuba hnon meka' doro sabnenggumok. 27:13 Wera anasa, Pilatus bera Yesus ak, "Anda yoka'-yoka' ara anak sam yana kilinjaka' ara eiyilam gom?" wenyaboka lebok. 27:14 Bok Yesus ara yuba hyak meka' doro sabnenggubuk enyek, Pilatus bedya dara seilinya senewok. 27:15 Wera Israeli nim edya, hnon perob sum oka dan dara, gibna' gigiro mok soko dubnya bera, nim adya lebna' sunuwoka, henga geregamna nim era hnon henga lob lomok. 27:16 Anasa ban salek era, nimi ben hnon alja si nera Barabas, alja ununa' edya nimi nidya' ella ulumeknya bek, henga geregoka beiyimek. 27:17 Wera anasa, nimi longowek dara, Pilatus bedya sikenek, "Ugunja dara, heknyek nunsamba henga lob lobsulul senelum do? Barabas bek lob lobnesin gom, Yesus, Kristus alamaknya benyek lob lobnesin gom?" wenyaboka heibsuk. 27:18 Pilatus bedya, ban wenyaboka leboknya nera, Yahudi dub nang edya Yesus ara sikja hman ganya boboka alak oboka dibnemab aboka doboka elegemeka' anasa, ella umoka' adya lebok. 27:19 Wera Pilatus bera nimi yana lelesin ek anam bulumok salek, alja gel gedya momnya dona' beibuka' ara, "Nara alsamba hnon omom so lendara enyek manabok anasa, anda malya una' oroknya bemba yub enyek, neika' denewoka sana' ara mem loblom," hyok. 27:20 Bok Imik Neyung yuba wa gaka' dub nang eb, Yahudi soko dub nang eb dadya, yok nim ek duka' lolowoka, Barabas bek dara nunsamba henga lob lobnesilem, alda Yesus ak dara, diba' oboka gal ak glabnemak henelum aboka yeiriwoka lelemek. 27:21 Anasa, mok soko dubnya Pilatus bera sikenek, "Ban penya nang danara, ugunja dara, heknyek nunsamba henga lob lobnesil senelum do?" wenyaboka heibsuk. Wenyek sikda, "Barabas benyek nunsamba henga lob lobsilom," hyek. 27:22 Dara ono' Pilatus bera, "Wera Yesus, Kristus alamaknya bera, nadya dara, heka' hubnamna do?" wenyaboka heibsuk. Anasa sikda, "Alak dara, oboka gal ak glabnok," hyek. 27:23 "Bok alak okoka oboka dibneseng malya una' era heka' ak ubok do?" wenyaboka lebok. Bok sikda hyak yeiriwoka, "Alda oboka gal ak glabnok!" wenyaboka lelemek. 27:24 Anedya Pilatus bera albeyok dookanya, yok nim era nauba adya, mem aboka yuba seknamen danggubuk. Anasa alda nimi hnoum laga meka doboka, alja soruka meka elekdangoka leboka' ara, "Ban somoganamla' ara nadya huka bobnenggunumna! Nera ugunja huka borowolum!" hyok. 27:25 Dara nimi nidya' anyagan wekemek nim edya, "Yo, Yesus somoganamla' ara, nun an wen umab nim eb, nunja mab eimik liknemak nim eb dadya, huka bobab!" hyek. 27:26 Dara Pilatus bera, Barabas bera henga lob lobookanya, nimi nauba wekemeka' ak Yesus ara saboka ololulum aboka orugookanya, oboka gal ak glabnelum aboka doboka elegosuk. 27:27 Dara yin bona' nang edya Yesus ara doboka, mok soko amba yuba san e senenggom e eremek bo yek dara, yok yin bona' nang nidya' hiboka Yesus ak akneb ganagoka longowek. 27:28 Dara sikda Yesus adya akleng era gwiriwoka, mouk dok boka' akleng ongiyiwek. 27:29 Anya si heng adya Yesus adya' huk ak gweboka gwaragiyiwek. Dara ono' gama' dunguna' adya, Yesus adya' sirik soruk ak sam beiyiboka, alja' saramek sam kom lumugoka derewoka walamek. Anya lelemekja, "Yahudi nim dubnya o, perob aboka gibjab!" aboka sene wenyalamek. 27:30 Dara Yesus ak gamala' solob goluwoka, ikimek gama' edya wisa golowom-golowom aro olomek. 27:31 Anya Yesus ak hyak nauba malya geboka saboka obgogowek dara, mouk dok akleng ongiyimeka' ara gwiriwoka, ono' alja akleng yoka' ongiyiwek. Dara oboka glabnoba' aboka bo byik. 27:32 Dara Yesus oboka dibnoba' bo bek salek, Kirene mok ebnya alja si Simon bek eibek. Dara sikda benyek an duka' lolom-lolom aboka, Yesus adya oboka glabnemek gal era, alak boblom aboka boyiwek. 27:33 Dara bo balameknya nera, mok soko si Golgota meinik sam, nunja yub edya dara, "Nimi huk yanggol meinik," alamek meinik sam bo byik. 27:34 Dara anyagan era, linggum mek adya powegemek mek enyek, Yesus ak delom aboka sik diniyiwek. Bok alda debyaawoka lobok. 27:35 Nen seleb dara, oboka glameekanya, yina bomdewoka, alja boksom dobnoba' aboka yina akleng bomdewek. 27:36 Unubgogowoka, yin bona' nang era Yesus adya be' dakoka dobijek aboka diri ulumek. 27:37 Dara Yesus oboka glamek gal dubuk alja huk dameijek ara, sikja sonda' amba yana kiboka omek minina' yuba, "Yahudi nim dubnya Yesus ara an e," an momnya dona' enyek weboka elegemek. 27:38 Dara ono' Yesus ab nimi hoka' dona' nanga penya neika', ben hnonda sirikek sam, ben hnonda waneng ek sam, oboka glabsik. 27:39 Dara Yesus oboka gal ak glameka' pik an yaban nim edya dara, nganga gwakdewoka, Yesus ak derewoka walamek. 27:40 Sikja wenyalameka' ara, "Imik Neyung e golowoka beibnyekanya, nadya dara, lika winilya ok sobnamna alalamnya benya'! Anya, anda aldib Imik Neyung me ulumen dara, wera oboka glanjaka' al ab, buru beiya yinggimenekanya, saaboka blebdalom!" wenyaboka walamek. 27:41 Anasonya neneba, Imik Neyung yuba wa gaka' dub nang eb, yuba neksin nang eb, Yahudi dub nang eb dadya' anaba, alak wenyaboka walameka' ara, 27:42 "Nimi yok nim ek dara, merellilisil bok anasa, wera al damnya saaboka blebdamenggom! Alda aldib Israeli nim dubnya ululyebok dara, wera oboka glamak galak ab mereboka yinggilya enyek, nunda alak dib senewanamab. 27:43 Alda Imik Neyung dib senelamlakanya, nara Imik Neyung bedya me aldalamla. Wera anasa, Imik Neyung alja senemlya' dara, laga blebel yabalya' ak eibnob," wenyaboka derelemek. 27:44 Hnonda Yesus ab neika' oboka glasik nang edya' anaba, neik so unu derewoka walarek. 27:45 Dara hyak yubyek dukdukanek nong enyek, mok soko nidya' ara iniwoka guna' ok dok. 27:46 Dara ono' sin dangoka henga wekel bununa' aboka dalaloblamla wenyek, Yesus ara yuba nauba bii aboka, "Eli, Eli, lama sabakhtani?" Nunja yub era, "Nadya' Imik Neyung o, nadya' Imik Neyung o, hekasa nak gwab lobnelem do?" aboka bii alamok. 27:47 Wenyek nimi wene nim anyagan seklemek nim era, unu gwekel yaboka' ak kebek nim edya dara, "Alda Elia bek youblamla!" wenyabdek. 27:48 Ono' nimi ben hnon sik gangganek ab, berra aboka esa' anyek yu mekek sam hwiboka bo yookanya, gal benggena' ak lomowoka Yesus adya' sibama' ak diniyiwok. 27:49 Bok yok nang edya danyek, "Nera men ununggom, Elia bedya yeiniboka blebel yabelya' anyek, eibnemab bar!" hyek. 27:50 Dara ono' Yesus ara hyak nauba ebngalogoka ngeboka ganya diba' dubhina dakoka somogok. 27:51 Ban salek era, Imik Neyung ek sam wiknelemek boksom akleng peroba' ara, imik aba' ara sokok gweldek dakok. Anya senenggom souguma' dorogoka, girika nidya' ara salya' joboka lekdo yibuk. 27:52 Hnonda nimi somogomeka', seleb soko lokomek nim be' nidya' ara, pika bakdo yibuukanya, nim Imik Neyung geisa mabo bok somogomek nimi nauba era embenga' suboka bura yibek. 27:53 Wera Yesus ara seleb somogoka embenga' suboka bukok dara, ban nim Imik Neyung mab ulumek bok men somogomek nim era, sikba embenga' suboka Yerusalem geisa heikek wekel yalameka' ak, nimi nauba eibik. 27:54 Dara yin bona' nang dubnya beb, alja mab eb dara, sogouma' warawoka' nidya' unuru yiboka' ak eibek dara, hyak loka dabsuk. Anasa yin bona' dubnya bedya, "Aldib ban benera Imik Neyung bedya me ulumo e!" hyok. 27:55 Wera neikek ara, gelewa nauba mok so ab uboka Yesus ak kemero seklemek. Ban gelewa danara, hnonda Yesus ak Galilea mok eba' ara arawoka neika' yabalamek gelewa. 27:56 Gelewa dara, Maria Magdalena ge hnon, Yakobus beb Yusuf beb sikja' genong Maria ge hnon, Zebedeus bedya mabo sikja' genong geb, gelewa danyek seklemek. 27:57 Iniwonuna' aboka guna' dakal yabok salek era, Yusuf be Arematea moka perobnya bera mok enyek an yeilimok. Albabya Yesus ak diriga bannya ulumoknya. 27:58 Dara alda Pilatus bek biniboka, Yesus adya be' dakoka dibnamna aboka molowok. Dara Pilatus bera, Yesus adya' be' era, "Benedya or dakoka dibnamla," hyok. 27:59 Dara Yusuf bera, Yesus adya be' era dakoka, wenyek nekesa geisa boksom akleng edya nong ara wamiyiwok. 27:60 Anya Yusuf bera, alja orowek hoklomok girik lomok meinik sam doronggok. An unu doronggoka, senenggom girik edya pik ara gasa dangawoka serek loboka byuk. 27:61 Bok Maria Magdalena geb, yok Maria geb dara, an diboka' ak an mok so ab kemero bulurek. 27:62 Wera sek sum yeiniboka, ampum maboka gwelegok dara, Imik Neyung yuba wa gaka' dub nang eb Parisi nang eb dara, Pilatus bek biniboka, 27:63 lebekja, "Neyung o, youma' sonda' hwamnya bera anam embenga' ulumok salek era, hnon seleb wenyalamoka' ara, Liga winilya seleb mablye dara, embenga' suboka buknamna, alamok. 27:64 Anya, alja yuba doro diriga ban nang edya dobijekanya, sonda' anasa wera seleb embenga' suboka bukiyiwal hijek aboka, nimi yok nang ek lika winilya websiniwanalum aboka oruganesilim. Dara, youma' sonda' lelemoknya nera, dolbalek so bok, eimik sonda' lebnesaknya nek dara, hyak okna deisilyek anasa," aboka lebek. 27:65 Anasa Pilatus bera sikenek, "Ugun dam nang or anyagan nimi yin bona' nanga hnon boboka, hyak pero-pero keeboka welenoka' aboka meewoululum," hyok. 27:66 Dara sikda Yesus diyimeka' ak sam biniboka, pika seregemek girik era gasa darawoka seregeekanya, Yesus be' nongok meka' galana' lobnoka' aboka, yin bona' nanga weboka sekiyiwek.
28:1 Wera sikja Sabat mem sum era dengaboka, minggu en men sum luguna' nong dara, Maria Magdalena geb yok Maria geb dara, Yesus dilina' ak sam kemel birik. 28:2 Dara al wene sab-sab enyek, senenggom sogouma' dorogok. Wera Wenelesilnya bedya lero ben hnon imik heikek aba' ara yingginiboka pika seregemek girik era demegoka, alda girik dub eilib enyek an bukumok. 28:3 Dara, lero enedya hogung senedya' ara ebna' anaso uboka, alja ongomok akleng era im duk-duka' geisa anaso ak ublomok. 28:4 Dara anyagan Yesus be' dakijek aboka diri welemek nang era lok anasa, ber-berana' beiyiboka, anya sik nong ara somogamna nong eneso ubsuk. 28:5 Dara lero enedya gelewa danyek an, "Ugunda lok ganya bona' ara mem! Ugunda Yesus gal ak oboka glarobnya benyek eleluma' ara nara ella usin. 28:6 Alda ugunuk youma' wenyasuk sok seleb embenga' suboka bukumlakanya, anyagan unggulumla. Wera al diyimong oulyang era, an ekla dema mamla' anyek kendululum. 28:7 Ugunda wenera alja yuba doro diriga ban nang ek berra wenyal binirum, Alda seleb embenga' suboka buklekanya, alak men Galilea moka bilimnamla. Anasa ono sam ab alda eibnelum! Wera, seleb lebsin," hyok. 28:8 Dara gelewa era, nimi dilina' ak ara men berra lo birik. Anya lok gar-gadya' uboka, eiyasa nang penya, Yesus alja yuba doro diriga ban nanga ulumeka' ak nekdo birik. 28:9 Anam balarek sab-sab, Yesus ara gelewa enyek an yeiniboka, "Ugunuk perob aboka gibsin!" hyok. Danyek gelewa dara, Yesus berem yeiniboka, alja yan ak salawoka oumuwoka gibek. 28:10 Wenyek Yesus ara sikenek, "Ugunda lok ganya bona' mem. Sikda nak eibnenyaka' anasa, na kabo nang era Galilea sokok binoka' aboka, wenyal bulululum," hyok. 28:11 Dara gelewa era, nimi dilina' ak aba' ara, ono' anam balarek salek, yin bona' nanga welemek nang era, Imik Neyung yuba wa gaka' dub nang ek, an nidya' unuwoknya nera unuwal aboka nekdo yek. 28:12 Wenyek Imik Neyung yuba wa gak nang eb, Yahudi soko dub nang eb neika' yuba saboka, yina bona' nang ek nauba rupiah elegesiikanya, 28:13 lebekja, "Yesus alja yuba doro diriga ban nang edya nunda salya' loba' hogunga mabmab salek enyek, be' dakoka hoka' domak, henelum. 28:14 Dara, mok soko dubnya bera unuwak an yuba keblya dara, ugunuk yoka' ubsilyek aboka, nunja alak ara or-or uboka yuba seknesab," hyek. 28:15 Dara yin bona' nang era rupiah en doboka, sikenek anaso unuwanalum amek sok unuwek. Dara ban yub era, Yahudi sokok an sum enyek ab moruwoka weneba or anam nekdo yabalamak. 28:16 Dara, Yesus adya' goklombadya yuba doro diriga ban nang era, Yesus adya sikenek Galilea mok soko meinik bilimnelum amok sok byik. 28:17 Dara anyagonob sikda eibdangoka, alak oumuwoka gibek. Bok sik gangganek ara nimi hnon anam elgom uboka ganya eb menegesuk. 28:18 Dara Yesus ara sik berem yeiniboka, "Nidya' imik heikek ulumla migib eb, sokok sam ulumla migib era, nak Neyung bedya seleb eleganyok. 28:19 Anasa wera, ugunda nidya' sokok biniboka, nidya' yok-yok mok soko nim era, nadya yuba doboka diriga ban nanga dangiyiwanalum. Anya Neyung bek si sibuka, alja me nek si sibuka, Geisinya bek si sibuka, sikda meka dalamnalum. 28:20 Dara, nadya ugunuk wenyaboka neksisa yuba nidya' ara, sikbabya boboka unulunoka' aboka neklemnelum. Anya, nara ugunuk soba' arawoka ulusinya' moruwoka, soko sidya' daknamla ak dangal binimla," wenyaboka nekgogowousuk.
1:1 Imik Neyung bedya me Yesus Kristus amba perob lero yanggan yuba men leb einiwok yub era ban. 1:2 Ban peroba' lero yanggan yub era, ununumna' lenya Yesaya bedya, Imik Neyung adya lemoka' anyek momnya doboka' ara, "Nadya wa wenya bera, anda loboka men anja pik yarawogulula' aboka, alak bokol binimna. 1:3 Nimi ben hnon hwalek sam bii aboka lelemnamla' ara, Wenelesilnya bemba pik orowek yarawoka meeb loblulum. Al yibinamlya pika nidya' sangawoka jonga' yarawanalum, wenyalamnamla aboka lemok," hyok. 1:4 Ban eini wenyaboka orowek momnya domok sok, gigiwoka Yohanes bera hwalek sam yeindeboka, Imik Neyung yuba leb elegoka nimi meka dalasuk. Anya, wenyalamoka' ara, "Imik Neyung adya ugunja malya una' soba' meewosulula' aboka dara, malya una' ak ab ganya dangawoka lobmun dara, meka dabnesin," aboka lelemok. 1:5 Nimi nauba Yudea moka pik eb nimi hnon, Yerusalem heikek nimi nidya' hnon Yohanes bedya lelemok yub ek kel balamek. Anya sikja malya una' laga lelemek dara, Yohanes bedya Yordan mek ek meka dalasuk. 1:6 Wera Yohanes bera, alda akleng ak dara, unta pam hong akleng ek ongolomok. Goukwa norona' ara boka' adya norolomok. Dena' ak dara, ged-gedya kweng eb bei lusa mek ab delemok. 1:7 Yuba lelemok dara, ban wenyaro lelemok, "Nara men yasenya bera mek so bok, eimik yanalanya bera hyak senenggomnya bek yanamla. Alja yan ongona' gwiriwanasinya' anaba, nadya dara, unuwamenggomnya bek yanamla. 1:8 Nadya dara, mek dem adya dalasin bok, alja dara, Imik Neyung Geisinya ab mek diba' dabnesil," aro lelemok. 1:9 Ban salek enyek, Yesus ara Galilea moka sokok Nazaret heikek aba' ara, Yohanes meka dalasuka' ak sam yeilimok dara, Yesus anaba Yordan mek ek meka damok. 1:10 Wera Yesus ara mek lomok aba' goboka welok dara, kemelemok enyek, Imik Neyung Geisinya ara im pika gaboka, bek wining eneso' anyek, Yesus adya' nong dubuk bul yeilimok. 1:11 Danyek, imik heik ab yub era, "Anak danyek nadya' wana' nong me ululam. An nong adya nadya ganya heklenel," hyok. 1:12 Dara wera, al neik salek enyek, Geisinya adya Yesus ara hwalek sam arawoka bo byuk. 1:13 Wera Yesus ara lika denga hnonok uboka ebdobnya mek badya mabok sum era, bisa' dubnya Satan bedya sunubyaawok. Beiyik ulumla' hnoum ulumok dara, lero nang edya' Yesus ak arawoka bo ulumek. 1:14 Wera Yohanes bera seleb henga gerekoka gasa ek sam beiyimek dara, Yesus ara Galilea sokok sam biniboka, Imik Neyung adya' perob yuba neklesuk. 1:15 Dara Yesus adya, "Imik Neyung adya wenelemnesil salek era gigiwoka seleb oka dal. Ugunja malya una' ak ab ganya dangawomunukanya, Imik Neyung adya' perob yub enyek dib senewanalum," aro lelemok. 1:16 Wera Yesus ara Galilea mek gwan gem pik yabalamok salek, nimi penya nanga Simon beb alja weisa Andreas beb anyagan ulurek. Ban sik penya nang dara, sikda hadya' don nang ulureka' anasa, hadya' ouma' doloklereka' ak eibsuk. 1:17 Wera Yesus adya yeiniboka, "Nak dobol yananurum, dara ugunda nimi don nang dangiyiwanasin" hyok. 1:18 Dara sik penya nang era men hadya' ouma' aklenga loboka berra aboka Yesus ak dobol birik. 1:19 Wera Yesus ara neik mok era anam dongora yabalamok dara, ono' yok noungusuk penya nang Zebedeus bedya mabo Yakobus beb Yohanes beb eibsuk. Sikda mek ekla buna' lomok bukoka hadya' ouma' henga weknelereka' ak eibsuk. 1:20 Dara Yesus adya ugunda nak yoururum aboka, berra aboka men ebsuk. Dara sikja' neyung Zebedeus beb alja wa welemek nang eb mek ekla buna' ak an gobdo loboka, Yesus ak dobol birik. 1:21 Wera sikda balameka' ara, Kapernaum heikek lanal byik. Wera Sabat mem sum dok dara, Yesus ara Yahudi nim edya yuba don ek sam wekoka yuba nek einiwousuk. 1:22 Dara Yesus adya yuba neklesuka' anyek, sikja yuba neksin nang edya neklesik sok neknenggusuk, alda hyak migiba' gebman anyek ura neklesuka' anasa, sikda salya uru lelelanya senemek. 1:23 Wene salek enyek, nimi ben hnon bisa' gologomoknya benyek, Yahudi nim edya yuba dona' ek sam ab lanawoka, ebngalagoka lelemokja, 1:24 "Wei, Yesus Nazaretnya o, nuk heka' hubdanamaba' anasa yeililam do? Anda nuk obsununa' aboka yeililam de? Anda heknya ululama' ara, nara ella ulunggen; anda Imik Neyung bek ab geisa nonga' ak bokol yeilinjoknya bek ululam!" aboka lelemok. 1:25 Bok Yesus adya bisa' ak, "Anda yuba sana' ara hyak gelegalom! Anda ban benyek anyeba' ara goboka bilom," hyok. 1:26 Dara bisa' era, gologomoknya bek ab hyak nauba yeiriwoka eiliwoka gweklemoka' ara, hyak senenggom yub edya goboka sabdongora ngeboka gobok. 1:27 Wenyek nimi nidya' ara hyak lok ganya boboka sik moumen wenyaldalameka' ara, "Wei, ban era hek damok yuba do? Wenyek bo lanawak yub! Hyak senenggom lok so uboka migib edya bisa' goboka yabalom hen enyek, alja yuba keboka unulumak bar!" aboka lelemek. 1:28 Dara Yesus adya ban lok so' unulamla an yub era, Galilea moka nidya' neika' ok ob lelewok. 1:29 Wera Yesus ab alja yuba doro diriga ban nang eb dara, Yahudi nim edya yuba don ek ab gobek dara, Yakobus beb, Yohanes beb, sikda neika' Simon Andreas, sikja ek sam byik. 1:30 Dara Simon aldogol gera poba neikna' salamoka' ak alja eklek sam mamok. Anasa, gel gera anaso unu neikna' salamla aboka, sikda Yesus ak nekek. 1:31 Dara Yesus ara, Petrus aldogol gedya' ekla ak sam biniboka, soruka gliboka bukiyiwok. Dara al wene salek enyek, alak salamok poba neikna' era denghyok dara, gera bukoka bilimek nang emba arawoka ubsuk. 1:32 Wera henga wekel biniboka inil yabok dara, nimi nidya' neikna' salawoka, bisa' doboka weklesuk nim era, Yesus ak bo yeilimek. 1:33 Heik enyek an nimi nidya' ara, Yesus bilimok ek esindamok an kiboka mamagal yeilimek. 1:34 Dara Yesus ara nimi nauba neikoka malya dangalasuk nim era hweboka, bisa' mandebna' era, yakoka hwebsuk. Bisa' ganya yama' dara, Yesus ara heknya ulumla' ara, sikda ella ulumeka' anasa, yuba sana' ara mem aboka yuba seksuk. 1:35 Ampum maboka gwelekok dara, guna' dakoka anam beregel yabok sab-sab, Yesus ara bukoka ek ara loboka, beiyik sam heik gokgobok gakdena' ak biniboka molol bilimok. 1:36 Simon beb alja' hemyab eb dara, Yesus ak ebdongora bilimek. 1:37 Wera sikda Yesus ak eibek dara, "Neyung o, nimi nidya' ara anak elenjak," hyek. 1:38 Bok Yesus adya lebnesuk dara, "Nara ban unuwonuna' aboka yeilinabok anasa, anyagan heik ok berem heik pik an Imik Neyung yuba hnon leb elegousununa' aboka, nunda anyan heik pik an dongoro yabalanob," hyok. 1:39 Dara, Yesus ara Galilea mok soko heik me nidya' eb girigoka, Yahudi nim edya yuba don e pik wekoka Imik Neyung yuba leb elekgiga, bisa' goleklesuk nim, yakoka hwelesuk. 1:40 Nimi ben hnon gororoma' adya alja boka' malya ura delemoknya benyek, Yesus ak yeiniboka, koma lumugoka leboka' ara, "Neyung o, anda nak hwebnamna senemen dara, wera neyung or hweiyiwanelom," hyok. 1:41 Dara Yesus ara benyek an hyak angoo yadyek senewookanya, alda benyek an soruka diyiboka leboka' ara, "Nadya dara, merewolul senemna' anasa, or boka' doblom," hyok. 1:42 Dara al wene sab-sab enyek, alja gororoma' delemoka' ara dengaboka gobdo merewok. 1:43 Dara Yesus adya anda or bilom hyookanya, alak wenewanamoka' ara, 1:44 "Anda yok nim ek nara merewan aboka nekdo yabana' ara hyak mem. Alda Imik Neyung yuba wa gak nim ek, anyaganyek hnonok or bo amaldal bilom. Dara anda merewalama' nong amba ok hnonok, aldib an merewal ana' diba' Musa bedya unululum aboka lebok sok, Imik Neyung ak sam pam oboka gibil binilam," hyok. 1:45 Bok ban hwemoknya bedya dara, hyak nauba yeiriwoka yokok-yokok sam hwebnel aboka nekdo yabalamoka' adya, Yesus ara nauba heikek ara laga lanal yanggumok. Alda doknowoka gakdena' gokgobok sam uro yabalamok. Bok anyek babya nimi nauba yok-yok mok eba' ara alak yaldibilloklomek.
2:1 Wera lika wen uboka' ara, Yesus ara saaboka onsok Kapernaum heikek yok dara, Yesus ara anyagan ulumla an yub era oboka lelemok. 2:2 Anasa nimi nauba gong-gong longol yeilimek dara, esindamak aba' ara, nim ok deknewoka hnon glo' orok. Dara, Yesus ara Imik Neyung yuba sikinek leb elegosuk. 2:3 Wera Yesus ara, anam Imik Neyung yuba lel eleklesuk salek, nimi heimoknya be hnon, dombadya nang edya jaboka alak bo yek. 2:4 Bo yanggan dara, bo yek bok, nimi longol yeilimeka' mandebna' anyek, nauba adya Yesus seklemoka' nong ok ara bo bimenggom anasa, sikda erema' gaboka, heimoknya bera ekla mana' eb Yesus seklemoka' ak doblinggemek. 2:5 Yesus adya kemelemok enyek, hwebnamla' anya' senewoka, dib senen ganya enyek eiyisuk dara, Yesus adya nonga heimoka' bo yeilimeknya bek, "Najabo, anja malya una' ara, anak ab seleb meewagen," hyok. 2:6 Danyek Yahudi yuba neksin nang anyagan wene nimi yuba kero bulumek nimi edya anyek eiyiboka, sik moumen nidya' ganya lomok leldalamekja, 2:7 "Hekasa ban anaso wenyaro lelemla do? Ban benera Imik Neyung si malya nenelamla," senewoka seiniwek. Ono', "Imik Neyung ak hnonok, nim adya malya una' era sikenek ab soba memelesilnya anasa, nim adya dara, unuwanggunuseng," senemek. 2:8 Wera ban salek era, Yesus ara sikja anaso senemeka' anyek, alja ganya lomok ella ubsuk dara, alja sikenek, "Ugunda hekasa ugunja ganya lomok ara anaso uro seinilelum do? 2:9 Har nerek okna so, Anja malya una' era anak ab seleb meewagen, anya nenyek gom, alda, Anda sekoka anja esona' doboka bobmenekanya balalom, anya nenyek okna so gom? 2:10 Bok wene nong anyek, nimi diba' me nera mok soko me nidya' amba malya una' ugunuk ab memesin migib dubnya ulumna' ara, ugunda ella ubnesom," hyok. 2:11 Dara, Yesus ara heimoknya bek, "Anda bukoka anja esona' doboka bobmenekanya, anja ek bilom hegen!" hyok. 2:12 Wera Yesus adya hweboknya bera, nimi nauba kemelemeka' hnoum, esona' doboka bobookanya byuk. Dara, nimi nauba ara anyek eiyiboka lok ganya boboka Imik Neyung ak giblemek. Anya sikja dara, "Nunda senenggom damok era anaso' ara hnon meka' eibnenggumouba!" aboka lelemek. 2:13 Yesus ara ono' saaboka Galilea mek gwan gemek sam byuk dara, nimi nauba alak yalamek dara, Yesus ara sikenek Imik Neyung yuba neklesuk. 2:14 Wera Yesus ara kemero yabalamok enyek, mok soko amba leboka rupiah molowoka dolosuknya, Alfeus bedya me Lewi bera, rupiah deklemeka' ak bulumoka' ak eibuk. Dara Yesus adya benyek, "Anda nak an dobol yanelom," hyok dara, Lewi bera sekoka Yesus ak dobol byuk. 2:15 Wera Yesus ara Lewi bedya ek sam bukoka dena' neika' delemek dara, nimi nauba rupiah molowoka dolosik nang eb, heik yoka' nim edya malya nimi senelesik nim eb, nimi nauba Yesus ak hnonda diriga ban nang ulumeka' anasa, Yesus ab, alja yuba doro diriga ban nang eb, sikeneblaboka delemek. 2:16 Wera anasa, Parisi nim edya Yesus ara rupiah mok soko amba leboka molowoka dolosik nang eb, heik yoka' nim edya malya nimi senelesik nim eb, neika' bukoka delemeka' ak eiyimek dara, sikja Yesus adya yuba doro diriga ban nang ek, "Hekasa ugunja' yuba neksinya bera, mok soko amba rupiah molowoka dosin nang eb, malya nang eb neika' bukoka delemak do?" aboka heibsik. 2:17 Wera Yesus adya sikja heibsika' anyek keboka, alja sikenek lebnesuka' ara, "Nim eika' ulumak nim edya hwesin nang ek hwebneso senenggulumak bok, alda nimi neiklemak nang edya ok hwena' nang hwebneseng senelemak. Nara sokok sam yeilimsa' ara, pe ulumak nim ek nak yanoka' aboka yanggumsa, alda malya un nim enyek, nak yanoka' aboka yeilimsa," hyok. 2:18 Dara hnon sum enyek, Yohanes Pembaptis bedya yuba doro diriga ban nang eb, Parisi nim eb dara, Imik Neyung amba gwanenga loboka ulumek. Anya yok nim edya Yesus ak yeiniboka, "Neyung o, Yohanes Pembaptis bedya yuba doro diriga ban nang eb, Parisi nang eb dara, Imik Neyung amba gwanenga loboka ulumak bok, anja yuba doro diriga ban nang era, ununa' orok ara hek amba do?" aboka heibek. 2:19 Anasa Yesus ara sikinek, "Nimi gela dobdanamna' amba masa youlumaka' ak ara, delemnemab aboka yeilimna nim era, youmna masa era denggunuseng de? Nimi gela dobnesonya benyek, yeiliseng nim eb neika' or anam uluseng bok dara, yeiliseng nim edya dara, dena' ara lobnenggunuseng. 2:20 Bok gela dololanya bera al nonga sikenek ab dobnamla sum enyek, wera ban sum era, sikda gwaneng ara denggulumnemak." 2:21 "Youma' orowek men denewoka malya dangamso akleng ek ara, eimik perob akleng gweldekdoba' edya neika' denewoka wibneseng dara, hyak malya ura nauba denewanamso' anasa, nimi hnon youma' akleng ek wenyok akleng gweldekdoba' eb darawoka wibnenggunuseng. 2:22 Anasonya neikek, nimi hnon wenyok anggur mek era, mek enedya mek hmeiya golowanamso' anasa, youma' mek hmeiya ak gweboka libnenggunuseng. Unuwanaseng dara, mek ara yek weininggoka, mek hmeiya eneba golowanamso' anasa, boboganeseng. Wenyek gwebseng anggur mek era, al wenyek mek hmeiya ak gweboka libneseng!" hyok. 2:23 Wera ono' yok Sabat mem sum enyek, Yesus ab, alja yuba doro diriga ban nang eb dara, gandum wa pik yabalamek salek, alak diriga ban nang edya gandum hnon dakek. 2:24 Dara Parisi nim edya Yesus ak, "Anja yuba doro diriga ban nang era, nunja yuba momnya doboka' Sabat mem sum bok, hekasa sikda blekoka gandum daklamak do?" aboka heibek. 2:25-26 Anasa Yesus adya sikenek saaboka lebnesuka' ara, "Abyatar bera Imik Neyung yuba wa gaka' dubnya ulumok salek, Daud bedya unumoka' ara, ugunda anam eininggululum de? Daud beb alab neika' ulumek nang era, sikda gwaneng dengaboka, gwaneng ok ubsuk salek era, alda Imik Neyung bedya' ek wekoka, Imik Neyung amba beillilemek roti gwaneng enyek delemok. Nunja yub ek sam momnya doboka' ara, Imik Neyung bedya' ek sam beil balamak gwaneng era, yuba wa gak nang ok delenok alalabok, Daud bera doboka deregoka, ono' hnon alab neika' ulumek nang ek elekdangoka neika' delemek," hyok. 2:27 Dara ono' Yesus adya sikenek, "Sabat mem sum alalum sum era, nim amba uyimok, dara nim ara, Sabat mem sum amba uyiwanggumok. 2:28 Anasa nimi diba' me ara, ban Sabat mem sum amba anaba dubnya ulumna," hyok.
3:1 Wera yok sum enyek Yesus ara saaboka, Yahudi nim edya yuba don ek wekel balamok. Dara, anyaganara, soruka darasam somogomoknya be hnon ulumok. 3:2 Dara nimi hnonda, Yesus adya meknewoka Sabat mem sum bok, nimi hweblya dara, alak malya nenewoka uniyiwanamab aboka, nang era dibnelemek. 3:3 Wenyek Yesus adya soruka darasam somogomoknya bek, "Hnoumung an sekel yalom," hyok. 3:4 Dara ono' anyagan ulumek nim ek Yesus adya, "Nunja dolomab yub edya dara, Sabat mem sum era heka' ak or unulululum hyok do? Perobnya nek ok unulululum hyok gom, malyinya nek unulululum hyok gom? Nimi nonga bleblelulum hyok gom, ololulum hyok gom?" aboka heibsuk. Bok sikda dogom ab ligiwek. 3:5 Dara Yesus ara yu ganya boboka gokgoba nidya' keeb ganagoka ubok bok, Parisi nanga nong anyek, hyak gasa ganya bolomeka' anasa, alda angoo senewoka ganya sugumok. Dara Yesus adya soruka somogomoknya bek leboka' ara, "Anja soruka nginigalom," hyok. Wera bera, soruka nginigok dara, al wene salek enyek merewok. 3:6 Dara Parisi nim era, goboka yibiikanya, Herodes nang eb neika' hiboka, Yesus ak heka' huboka obnemab do aboka yuba salamek. 3:7-8 Wera Yesus ab, alja yuba doro diriga ban nang eb dara, lanaboka Galilea mek gwan gemek sam byik. Dara, Galilea mok sam ulumek nimi nauba, Yesus ak dobol yalamek. Sikda nidya' Yesus ak yalameka' ara, alja nidya' unulamla an yuba kemeka' anasa, eibnoba' aboka alak yalamek. Dara, Yudea sokok ab, Yerusalem heikek ab, Idumea mok eb, Yordan meka gemek yali sam ab, Tirus heikek mok ab, Sidon heik mok ab, yalamek. 3:9 Nimi nauba longol yalameka' anasa, Yesus adya, nimi mandebna' danedya nak goknena' anasa, mek ekla buna' hnon bo yananulum aboka alja yuba don nim ek orugusuk. 3:10 Yesus ara nimi nauba merellilisuka' anasa, yok neiklemek nang edya dara, alak bebeganob senewoka, ol gogoldalamek. 3:11 Dara bisa' gong era, Yesus ak eibna' gigiro, al saramek oumuwoka gibnekanya, "Anda Imik Neyung bedya me ululam e!" alamek. 3:12 Bok Yesus ara, bisa' gong ek an, alda benyek ulumla ana' ara mem aboka nauba wenyalasuk. 3:13 Yesus ara, alda meinik sam welewoka bukumok dara, alja nak yanaseng senemok nang era, yoululum husuk dara, wera nang dara, alak yek. 3:14 Dara, Yesus adya obadya nang ek sekiyiwookanya, yuba lena' gak nang aboka si sibuk. Ban unuwoka' ara, alablaboka neika' ulunoka' aboka hnon, perob yuba lelenoka' aboka hnon, 3:15 anya bisa' yakna' migib bo ulunok senewoka, oruklenuna' aboka sekiyisuk. 3:16 Wera ban obadya nang sikja si nera ban, Ben hnon alja si nera Simon, bok Petrus aboka si sibuk, 3:17 hnonda Zebedeus bedya mabo penya, Yakobus beb, alja weis Yohanes beb (ban mabo danara sikja si nera, liming bedya mabo aboka, Boanerges aboka si sibsuk), 3:18 hnonda Andreas, hnonda Pilipus, hnonda Bartolomeus, hnonda Matius, hnonda Tomas, hnonda Alfeus bedya me Yakobus, hnonda Tadeus, hnonda Asa'anya Simon, 3:19 hnonda Yesus ak yuba dil bilimoknya, Yudas beb sekiyisuk. 3:20 Seleb dara, Yesus ara nim un ek yeilimok. Dara onsok, nimi nauba Yesus ulumoka' ak sam longol yalameka' adya, Yesus ab alja yuba doro diriga ban nang eb dara, dena' demenggom dangamok. 3:21 Wera nimi hnonja, "Alda golokna' gologamla," alamek yub enyek, alab neikek ulumek nim edya kebek dara, Yesus ak ganagoka bo yanoba' aboka bilimek. 3:22 Dara nimi yuba neksin nang Yerusalem heikek ab yeilimek nang edya dara, "Ban benera Beelzebul bek gologamla! Anya bisa' dubnya bedya bisa' aroba' yaklamla," alamek. 3:23 Danyek Yesus ara sikenek nak yoululum hyookanya, sununa' yub enyek sikenek neksuka' ara, "Satan bedya al damnya bek har so yakdanamso do? 3:24 Senenggom mok soko nimi neik meneng mok soko nimi moumen mala weboka obdanaseng dara, wera sikja mok soko era pe ubdabnenggunumso. 3:25 Anya nim e lom anaba, neik ek nim edya sik moumen isa' nenebdangoka oldana' hwam ok mabnamso dara, wera sikja ek nim eneba pe ubdabnenggunuseng. 3:26 Dara neikso, bisa' dubnya Satan beneba, alja meneng digum ab, isa' nenebdangoka doluwoka oldana' ok maro lobnamso dara, wera alda ubdabnenggunumso, bok alja dengana' damok lanawanamso. 3:27 Ono' nimi be hnon hyak migib nongnya bedya' ek sam wekoka bona' hoka' dobnamso dara, e damnya migib nonga' anyek, men henga goubnenggusodyok dara, alda weknenggunumso. Bok, e damnya benyek men henga gouboka beibso' adya, alda e lalawoka dobnamso." 3:28 "Nara ugunuk hyak dib lebnesin, nim ara malya uboka, yok-yok yuba edya derewoka wabnemak malya una' anaba, ban nidya' ara sikenek ab soba' meewanasil. 3:29 Bok nimi hnon Imik Neyung Geisinya bek derewoka walamla dara, alja anaso malya una' era, soba' ulmoublamla malya una' anasa, alja ban unuwanamla malya una' era alak ab meewanggunumla," hyok. 3:30 Yesus adya ban wenyaboka leboka' ara, hnon nim edya alak, alda bisa' gologamla alameka' anasa, lebsuk. 3:31 Nen seleb dara, Yesus eilinggeb, alja weisab eb, sikda yek. Dara sikda beiyik sam sekel yeiniboka, Yesus ak sikenek youlula' aboka yuba beibek. 3:32 Ban salek era, nimi nauba Yesus berem nauba denewoka buk ganakdo yabalamek. Anya sikja Yesus ak, "Wera neyung o, anja genong geb, anja weisab eb dara, anak elenjaakanya, beiyik sam diri seklenjak," wenyaboka lebek. 3:33 Anasa Yesus ara sikenek, "Nadya genong gera hek nimi do? Nadya weisab era hek nang do?" wenyaboka heibsuk. 3:34 Dara ono' Yesus alak aknewoka buk ganagamek nang ek keeb ganakdo lebsuka' ara, "Wera nadya genong, nadya weisab era ban! 3:35 Imik Neyung bedya unuwanok senelamla' anyek unulumak nim enyek, sikenek danyek, nadya' hemyabo, nadya hmal gelewa, nadya genong yab ulumaka' ara an," wenhyok.
4:1 Wera ono' Yesus ara Galilea mek gwan gemek sam yuba hnon neklesuk. Dara nimi nauba aknewoka longol ganagal yeilimek. Anasa Yesus ara, mek gwan eilib ulumok mek ekla buna' ak bukumok, bok nimi yok nimi nauba ara mek gemek sam longomek. 4:2 Dara Yesus ara sikenek yok-yok yuba damoka nauba neklesuk dara, alda yoka' ak sunuwoka lelesuk. Hnon anaso aboka neksuknya nera an, 4:3 "Ugunda pe kebnelum! Nimi be hnon yina' yamawonuna' aboka wak bilimok. 4:4 Wera anam yamalamok salek enyek, yina' hnonda pikek sam yama yinggyuk dara, wining adya yeiniboka dengaboka demek. 4:5 Yina' hnonda girik lumuk, soko meka' ulumoka' ak sam yama yinggyuk dara, yina' era soko mek adya bongon dara, berra bongowok. 4:6 Bok, henga welok dara, pe yarenga elekna' orok adya, bongowoka welok ondok era yalawoka olu' obok. 4:7 Yina' hnonda girikna' hnoum malyinggyuk. Wera yina' era bongon dara bongowok bok, girikna' bong adya seklama darawoka objoka' adya, alda doka moubnenggubuk. 4:8 Bok yina' hnonda hyak pero mesa' delemok sokok sam malyinggyuk dara, yina' era bongowoka nauba dangoka, doka moulumok. Dara hnonda denga hnonok so moulumok, hnonda denga penya so moulumok, hnonda denga dombadya so moulumok," wenhyok. 4:9 Seleb sunuwoka wenyaboka yuba lebgogowok dara, ono' Yesus ara hnon lebokja, "Heknyek ken damba o ulumla dara, alda pe keblul," hyok. 4:10 Wera ono' Yesus albeyok ulumok salek enyek, nimi Yesus ablaboka ulumek nim eb, alja o badya nang yuba doro diriga ban nang eb dadya, anja sunuwoka yuba lebsilima' damok anyek, anaso' ak lemna aboka neksilom hyek. 4:11 Dara Yesus adya sikenek lebsuka' ara, "Ugunuk dara, Imik Neyung adya heka' huboka wenelemnesila' damok ara, seleb elegousuk. Bok beiyik ulumak nim ek dara, yoka'-yoka' ara yoka' adya sunuwoka neksin danyek, perob. 4:12 Anadya, Sikda eillilimak bok, damok ara anyek unulamla' senewoka donggulumak. Sikda o ken dara kelemak bok, pe ella danganggulumak. Dara damok ara sikda eibijikanya, ella dangoka, anya sikda Imik Neyung ak yeija enyek, Imik Neyung ara sikja malya una' sikenek ab meeweisilyek aboka ubok," hyok. 4:13 Dara ono' Yesus ara sikenek wenhyok, "Ugunda ban sunuwoka lebnanya nenyek, damok ara anyek lebla' senena' orok de? Dara heka' adya nidya' yok sunuwoka lebnesengnya nera ella danasom do? 4:14 Yina' bo yamal bilimoknya bera, nim Imik Neyung yuba bo lel balamaknya nera an. 4:15 Alda yina' pikek sam yama yinggyuk aboka sununa' era, nimi hnonda, yub ara kelemak, bok Satan men yeiniboka yuba sikenek ab dololanya nera an. 4:16 Alda yina' girik lumuk sokok sam yama yinggyuknya nera, nim ara anam salek era yuba keboka ganya gwelelek aboka dolomaknya nera an. 4:17 Bok yub ara nimi ganya lomok sam yarenga elekna' orokokanya, or wene salek ok ulumla. Imik Neyung yuba dobna' anasa, eimik dara oboka yoka'-yoka' unul yabasin dara, sikda berra aboka malya dangalamaknya nera an. 4:18 Girikna' hnoum malyinggilimok aboka sunuwoknya nera, nimi hnon yuba kebnabok, 4:19 sokok anyebnya nenyek heka' huwanamna ganya boboka, bona' mandebna' adya pe ulusinya senen ganya ab, hnon yoka'-yoka' ak ganya oka dena' adya, sikja ganya lomok sam wekel yaban dara, yuba dobna' ara, seklama denewoka bonga oldelemla' adya, pe doka mounggulusil nim era an. 4:20 Perob sokok sam malyinggilimoknya nera, nimi yuba pe keboka dib dolomaakanya, yina' meboka, doka moulumla nim era an. Dara, dok ara hnonda denga hnonok anaso, hnonda denga penya anaso, hnonda denga dombadya anaso moulumla," wenyaboka neksuk. 4:21 Dara ono' Yesus ara hnon leboka' ara, "Nim ara wesa' yeboka mek hmei lomok sam gom, ekla mana' damumduk sam hnon unu beillilimak de? Orok, wesa' diniwoka beillilimak oulyang ak sam beillilimak. 4:22 Doknololanya nera eimik era laga danamla. Dara ono' gunuwoka doknololanya neneba, nidya' pobongganamla. 4:23 Anasa, heknedya ken damba o ulumla dara, alda pe keblul!" hyok. 4:24 Anya ono' Yesus ara hnon lebokja, "Ugunda ban kebneluma' anyek, pe seiniwanalum! Ugunja yok nim ek unululumnya nera, Imik Neyung adya dara, ugumbabya onsok lunuwoka anaso unuwanasil. Anya nene hnon bok, ono' nauba makoka unuwanasil. 4:25 Anasa heknyek hnon ululanya bera, ono' alak hnon eleganamla. Bok heknyek hnon unggulumla dara, alak hnon meka' ululanya neneba, dorowanamla," hyok. 4:26 Dara Yesus ara lebokja, "Imik Neyung adya wenelemnesila' ara, nimi be hnon wak sam doka mel balamla' anaso' ak ulumla. 4:27 Yina' memna dara, menanya bera inimnek era hogunga malamla, anya yubyek dara alda bulumla. Dara yina' memna' ara, bongowoka imik danggiga welelamla' ara, ban unulamla' damok ara, ban benera elgom ulumla. 4:28 Men dara eilya nelemla, ana berem ara nonga salalamla, dara ono' hyak sidya' nong ara an salawana' ara nonga moulumla' ara, soko adya albeyok nonga eleklamla. 4:29 Wera yina' weboka memna' ara seleb nong uboka, hwiboka enga obna dara, menanya bera dakna salek dala' anasa senewoka, daklamla," hyok. 4:30 Dara, hnon heibsuka' ara, "Imik Neyung adya wenelemnesila' ara, heka' ak neik digum sunuwanesibya do?" Anya, "Hek sununa' ek sunuwoka neknesibya do? 4:31 Imik Neyung ara dubnya dangoka wenewanasil sum emba sunun dara: Geibya yina' ak nim adya doboka sokok sam doklomaka' anaso' ak ubnamla. Geibya yina' dok ara, soko lomok doklemaknya nidya' ara, alak hnonok hyak meka' nong ak ulumla. 4:32 Bok seleb doka dokna dara, bongowoka welelamla dara, yok-yok masa ek ab dara, alak hyak senenggoma' dangalamla. Anya, soruka gekoka yangalamla dara, wining ara anyagan yeindiboka ngoklemak," hyok. 4:33 Yesus adya nimi yuba leb eleganesin dara, sikda ella ulumeka' ak sunuwoka, anaso nauba sunuwoka yuba lelesuk. 4:34 Yesus ara yok-yok nim ek yuba leb eleganesin dara, sununa' adyok sunuwoka yuba lel eleklesuk. Bok alda alja yuba doro diriga ban nang ek ara, sikbeyok dara, yuba yoka' nong adyok, nidya' laga poboka neklesuk. 4:35 Dara ono' ban neik sum sinik enyek, Yesus ara alja yuba doro diriga ban nang ek, "Nunda lanawoka mek gem err sam binimab," hyok. 4:36 Dara, alja yuba doro diriga ban nang era, nimi yok nang anyagan longomek nim era loboka, Yesus ara eboka mek ekla buna' pik bo bilimek. Ono' yok mek ekla buna' danaba alak dobol bilimek. 4:37 Wera mek hnoumunga anam balamek bok, senenggom kabo' dorogok. Dara kabo' adya mek yakna' ara yeiriwoka, buka balamek mek ekla buna' era, meka wekoka joboka obsununa' aboka, mek ekla buna' ara mek adyok deknero lol yabok. 4:38 Ban salek era, Yesus ara mek ekla buna' gokgobok berem, huk beilina' adya eiriyiboka mamok. Alja yuba doro diriga ban nang edya Yesus ak gaawoka lebnemeka' ara, "Neyung neklesilimnya o, nunda meka si denesiso dara, anda dolbalek senelam de?" wenyalamek. 4:39 Wenyek Yesus ara bukoka, kabo' unul yaboka' ak loblom aboka orugookanya, mek yakna' yeiriwoka yabalamoka' ak leboka' ara, "Anda wera, gelegalom, namena' danalam!" hyok. Danyek kabo' senenggoma' dolomoka' ara dengaboka, mek yakna' anaba gobdo namena' dok. 4:40 Dara Yesus ara alja yuba doro diriga ban nang ek, "Ugunda hekasa lok ganya bololum do? Ugunda anam dib senewanggublum de?" wenyhesuk. 4:41 Wenyek sikda hyak lok ganya boboka, sik moumen leldalamekja, "Ban benera okoka dara heknyek ulumla do? Anedya wera kabo' ab, mek anaba alja yuba kelemla bar," wenyaldalamek.
5:1 Wera Yesus ab alja yuba doro diriga ban nang eb dara, Galilea mek gemek, Gerasa nimi mok sokok lanal byik. 5:2 Dara Yesus ara, mek ekla buna' ak aba' ara, goboka gek sam yanggok sab-sab, nimi be hnon, bisa' gologomoknya, nimi dilina' ak sam aba' ara goboka alak yok. 5:3 Ban bera nimi dilina' pik ok ura yabalamok. Gel heng adya goublumeka' anyek babya, hyak buluk-buluka doloklomok enyek, sounuwoka geregamenggom anasa, or lolomek. 5:4 Li soba' gel heng adya yana soruka ouruwoka gereklamna' anyek babya, buluk-buluka dorogoka, yan moumena' darawoka goumna' anyek, somlegoka lobdo diyiboka yabalamok. Anya alda hyak migib nong adya, nim adya alak namena' gebnamenggom dangalamok. 5:5 Ban bisa' gologomoknya bera, yubyek inimnek pik moruwoka, nimi dilina' pik uboka, mok soko mein pik anaba, ngebdongora yabalamnakanya, girik adya al dam nang seikoka oldalamok. 5:6 Dara alda mok aba' Yesus yanggoka' eibuk dara, bera bik-bikal yeiniboka, Yesus ak koma lumugoka gibuk. 5:7 Wera hyak nauba bii aboka, "Hyak imik ululanya Imik Neyung bedya me Yesus o! Anab nab dara, heka' hnon ulusil do? Imik Neyung si sibuka, nak ol yangganena' ara lobnenelem, hen!" alamok. 5:8 Ban bisa' gologomoknya bera wenyal yaboka' ara, Yesus adya, "Anda bisa' o, anda ban benyek anyeb, goboka yibilom!" men wenyal yaboka' anasa, an yub era lebok. 5:9 Dara Yesus adya, "Anda si ara heknya do?" aboka heibuk. Wenyek benedya dara, "Nunda gong ulumab bok anasa, nadya si nera Legion," hyok. 5:10 Anya bisa' gologomoknya bedya, Yesus ak, bisa' gong dara, mok enyek anyeba' ara loboka, goboka yibilulum hisilyek senewoka saam-saama molowok. 5:11 Wera ban mok enyek, mok soko en abom pik anara, pama nauba yu' dero yabalamek. 5:12 Dara ban bisa' gong danedya, Yesus ak, "Nuk ban pam danyek an gologol binilum aboka orugeisilom," wenyaboka molowek. 5:13 Wera Yesus adya or unuwanalum hyok dara, bisa' gong dara, gologomeknya bek ab goboka, pam mandebna' lom enyek an wekel byik. Pam gong dara, hiboka nidya' ara dua ribu anaso pam, mok soko abomek ab langa diniwoka, meka youruwoka si deb menegoka somogek. 5:14 Pama weilemek nim era yeiriwoka, nauba heikek aba' ara, mek heik pik, pam ara anaso unuwal aboka nekdo yibik. Dara nimi nidya' ara, heka' huwala' ak lebak do senewoka, eibnoba' aboka kemel bilimek. 5:15 Dara sikda, Yesus ak yeiniboka kemelemek enyek, bisa' gologomoknya bera, anyagan bulumoka' ak eibek. Bera alda hyak ganya kaboka, boksom ongowoka peroba' nong anyek bulumoka' ak eibik dara, sikda loka dabsuk. 5:16 Nimi sikja okoka eibek nim era, bisa' gologomoka' anyek, Yesus adya hweboknya beb, pama mekek youruwoka meka si demoka' anyek, sikja yok nim ek anaso unuwal aboka nekdo yibik. 5:17 Dara, mok soko en dam nimi, sikda Yesus ak nunja mok soko ek ab men lo binilam aboka molob einiwek. 5:18 Wera Yesus ara bununa' aboka, mek ekla buna' lomok sam welewoka bul yanggok dara, bisa' gologomoka' anyek, hwemoknya bedya Yesus ak, nara neika' bininam aboka molowok. 5:19 Bok Yesus adya dara, orok senewoka benyek an, "Anja heikek biniboka, sikenek Wenelesilnya bedya anak heka' nidya' ununggela' anyek hnon, alja anak angoo yadyek senewoka arawagelnya nenyek, anaso unuwanel aboka nekdo binilam!" hyok. 5:20 Dara Yesus adya hwemoknya bera, Dekapolis sokok sam heik pik biniboka, nara anaso unuwoka hwebnel aboka, neklemok. Dara, nimi nidya' alja wenyal yabok yuba keboka, sikda ganya loka dabsuk. 5:21 Dara ono' Yesus ara, saaboka bilimok pik mek gemek sam yok dara, wera anyagan ara, al dam nimi nauba longowoka, aknel ganagal yeilimek. Dara, alda mek gemek ubok salek, 5:22 heik enyek an Imik Neyung e damnya, alja si Yairus bera yeindeboka, Yesus ak okoka eibuk dara, koma lumugoka oumuwoka gibuk. 5:23 Anya alja Yesus ak, "Neyung o, nadya' mek gelma era, hyak dubhin daknuna' aboka ulumla' anasa, nadya' ek yeiniboka, anya soruk al eilib dibmen enyek merewoka eika' ululula' aboka yalom," wenyaboka yeiriwoka molowok. 5:24 Dara Yesus ara yo aboka, Yairus beblaboka neika' ek byik. Dara ono' nimi yok nanga nauba neik pik biniboka, nimi gong adya alak lelim-lelim al waraklemek. 5:25 Dara anyaganara, gela hnon neik ek dangamookanya, gibna' obadya lemok gel gek hnon ulumok. 5:26 Wera ban gel genera, unulumoknya nenesa hwebnenoka' aboka, alja bona' nidya' hwena' nang ek elegoka ulumok bok, alak ara hyak okoka hnon hwebnenggumek. Alda hwebnenyaka' aboka ulumna enyek, gel genyek an ulumok neikna' era, sounuwoka nauba danggiga balamok. 5:27 Alda Yesus ara, yoka'-yoka' nauba anaso unulamla an yuba kelemoka' adya, nimi hnoum ab weilik pik yeindiboka, Yesus adya boksom ek bebegel dal yok. 5:28 Gel genedya ganya edya dara, "Nara alja akleng ek meka' soruk dem adya ok bebeganya' anaba merewananuna'!" senewoka unuwok. 5:29 Wera gel gera, wene sab-sab enyek, neik ek dangamoka' ara gobdo merewok. Dara gel genedya' anaba, "Nara an neiklamna' anera, seleb gobdo mererowan," senewok. 5:30 Dara al neik salek enyek, Yesus adya alja migiba hnon goboka yaboka' ak eibdok. Dara, alda sam saaboka nimi hnoum, "Heknedya nadya akleng ek ara, soruka bebeganel do?" aboka heibsuk. 5:31 Dara alja yuba doro diriga ban nang edya Yesus ak, "Neyung, nimi nauba duka' lolom-lolom alasaka' eiyilamjok, ono' anja dara, nadya' akleng ek ara, heknedya bebegenel do aboka heilisilim," wenhyek. 5:32 Bok Yesus adya alja aklenga bebegemoknya benyek, okoka eibnuna' aboka, anam kemero yabok. 5:33 Dara gel gera, alak an unuwoka' ara ella ubdangoka, lok ganya boboka, ber-ber ana' nang penya, Yesus ak yeiniboka koma lumugoka hogung oumuwoka, alak nidya' unumoka' ara laga nekok. 5:34 Dara, Yesus adya gel genyek an, "Nadya gelma o, anda nak dib senewanelema' adya, wera hyak diba' merewalem! Anda ganya daboka bimenekanya, or eika' ululom!" hyok. 5:35 Wera Yesus ara, anam yuba salamok sab-sab, Yairus bedya' wa wel aran nang era yeiniboka, "Neyung, anja gelma era seleb somogamla' anasa, neksinya bek hnon loba' nenenggom, mem," hyek. 5:36 Bok Yesus ara, nang danedya wenyal yabek yuba eiwaawom aboka, "Yairus bek, lok ganya bonggom, mem. Anda dib senewanalama' ok," hyok. 5:37 Dara Yesus ara, alda pikek bookanya, Petrus beb sik noungusuk Yakobus Yohanes nang danyek, nak ara yanamak bok, yok nanga salya' dobol yangganena' ara mem, hyok. 5:38 Wera sikda Imik Neyung e damnya bedya ek lanal byik dara, Yesus ara, nimi nauba ngeboka engena' glolomoka' ak eibuk. 5:39 Dara Yesus ara ek wekoka anyagan nim ek, "Ugunda hekasa yuba mandebna' saboka, ngeboka engelelum do? Ban gelma enera, alda diba' somoganggumla bok, alda hogung dem ok mamla," hyok. 5:40 Bok sikda Yesus ak loba'anya senewoka, alak okselemek. Dara, Yesus ara nimi danyek bululum aboka yaksuukanya, alda gelma en alja' neyung genong ab, alab neika' bilimek nim eb, gelma enedya man ek wekek. 5:41 Wera Yesus adya gelma enedya soruka glib salawoka, "Talita kum," hyok. Nunja yub edya dara, "Gelma enya o, nara anak buklom, hegen!" hyok. 5:42 Dara gelma era, al wene sab-sab enyek, sekdo dorogoka yabok. Alja gibna' ara seleb obadya lemok. Wera ban unuwoka' eibek nim era, hyak nauba loka daboka ingmuna bere bukek. 5:43 Dara Yesus adya nim ek ban unu hwebna' ara, ugunja dara, nimi yok nim ek ara, anaso unuwal aboka, nekdo yabana' ara, hyak mem aboka yuba garawok. Anya lebokja, "Ban gelma enera, dena' men elegolulum," hyok.
6:1 Anyek anyeb dara, Yesus ab alja yuba doro diriga ban nang eb dara, balameka' ara, al beiyiboka nemok heikek byik. 6:2 Wera Sabat mem sum era, Yesus ara Yahudi nim edya yuba don ek wekoka yuba lel eleklesuk. Dara, nimi nauba longol yeilimek dara, Imik Neyung yuba lel eleklesuka' anyek keboka, sik moumen, "Ban nidya' ara, hanyagarab dobok do? Hek geremseng ek alak elegok do? Dara, alda lok so migib ununa' ara, heka' huru unulamla do? 6:3 Ban benera alda Maria gedya me e sona'anya gom de? Alja weisab era, Yakobus beb, Yoses beb, Yudas beb, Simon benya arob nang unggulumak de? Yo anasa, al hmal gelewa eneba, anyagan neika' unggulumab de?" Wenyaboka, sikda Yesus ak soloma daboka lek senemek. 6:4 Anasa Yesus adya sikenek lebsuka' ara, "Nim ununumna' lelenanya bera nidya' yok heikek ara, gigilemak bok, alda alja heik yoka' ak ab hnon, alja nimi yila' edya hnon, alja ek nim edya danyek hnonok, alak giginggulumak," hyok. 6:5 Wera ban heik enyek anara, Yesus ara, yoka' senenggoma' lok so' migib ununa' ara hnon unuwanggubuk bok, alda neikna' nimi wene nim ok, alja soruka sikenek salawoka hwebsuk. 6:6 Sikda dib senena' orok anasa, Yesus ara angoo salyek mok nim senewok. Dara Yesus ara, mek-mek heik pik dongoro Imik Neyung yuba lero yabalamok. 6:7 Wera Yesus adya alja yuba doro diriga ban nang obadya nang ek yoululum hyookanya, nimi penya-penya darawoka boksuk. Dara, bisa' yakna' amba migiba' hnon sikenek elegosuk. 6:8 Wera obadya nang ek leboka' ara, "Ugunda gama' dunguna' ak danyek hnonok, or bobnelum bok, yoka'-yoka' pika yabana' amba, dena' ab, dena' lin akleng eb, rupiah gol bona' lomok anaba bobnenggunulum, mem. 6:9 Yan ongona' ak dara, or ongowoka binilum bok, ongon akleng ek dara, penya bona' ara mem," hyok. 6:10 Anya hnon leboka' ara, "Ugunda yok mok bumun dara, wera al hnonok ek ok ulumuna' ara, yokok binilum sum ok, ulumun ek ab lo yibinelum. 6:11 Bok ugunda yok mok biniluma' anyek, bumun mok enyegan nim edya, ugunuk peroba' leboka dosina' loboka, ugunja lebnelum yub eneba kebnenggunusak dara, heik enyek ara, lo yabamunukanya, sikda ella danoka' aboka, ugunja yan sembeja' habonggoka yibinilum!" wenhyok. 6:12 Wera an wenyaboka boksuk dara, sikda biniboka malya una' ak ab ganya dangawolulum aboka yuba lero yabalamek. 6:13 Dara, bisa' nauba yakoka, neiklenanya ngikna' mek adya ngikoka, nim era merelilisik. 6:14 Yesus adya unulamla an yub eb, alja si neb dara, mok soko me nidya' oboka lelemoka' adya, Herodes beneba anaso unulamla an yuba kebok. Dara hnon nim edya anaba, "Yohanes Pembaptis bera seleb embenga' suboka bukoka' adya, anadya alda hyak senenggoma' lok so' ara unura yabalamla," alamek. 6:15 Bok yok hnon nang edya dara, "Alda Elia benya'," alamek. Dara ono' hnon nang edya dara, "Alda ununumna' lenya, youma' ununumna' lelemek nang eneso ak ulumla," alamek. 6:16 Wera danyek, Herodes bera Yesus ara anaso unulamla an yuba kebok dara, "Wera aldib anara Yohanes Pembaptis, youma' nadya ya nganga daklulum hesenya bek, wera seleb embenga' suboka bukoknya benya'!" hyok. 6:17-18 Men dara, Herodes bedya, alja' hem Pilipus bedya gel Herodias genyek, domok. Anasa leboka, Yohanes bedya, Herodes bek, anja hem bedya gel gek doblum dara, mouna gweblum aboka lelemok. Dara, Herodes bedya Yohanes bek henga geregoka gasa ek beiblulum aboka orugomok. 6:19 Ban wenyan yub enesa, Herodias gedya dara, Yohanes bek obnamna senewoka yu ganya bomok bok, Herodes bedya unuwalyek senewoka bo ulumoka' adya, unu seinimoknya nera gigiwanggumok. 6:20 Herodes bera Yohanes bek ara, senenggomnya benya' senelemoka' ara, Yohanes bera dib nongnyakanya, Geisinya benya' senewoka ella ulumoka' anasa, alda lok ganya boboka bo diri ulumok. Bok Yohanes bek kelemna dara, alja ganya bol nenelemoka' anaba, alda eiya ganya boboka alak kelemok. 6:21 Wera yok sum enyek Herodias gedya seinilimoknya nera gigiwok. Ban sum era, Herodes be beiyimek sum dangamoka' anasa, masa senenggoma' youmookanya, senenggom dub nang eb, yina' bona' dub nang eb, Galilea sokok dub nang eb, del yanalum aboka lebok. 6:22 Sum enera, masa deregoka bera seblemeka' ak ara, Herodias gedya gelma hnon wekoka seblemoknya nenesa, Herodes beb, alja yanalum amok nim eneba, hyak ganya heklesuk. Anasa, Herodes bedya gelma enyek an, "Bera pe seblelama' anasa, anyek elegonulul senemena' ara eleganenggen," hyok. 6:23 Anasa, laga poboka leboka' ara, "Anja' heka' ak molowanalama' ara, nidya' gigiwoka eleganenggen. Nadya welemna mok soko darasam molowanasoma' anaba, anak darasam bokoka lebnenggisinya, anera hyak dib lebna," hyok. 6:24 Dara Herodias gedya gelma era, alja' genong gek biniboka, "Genong o, nara heka' ak molowanamna do?" aboka heibuk. Danyek, alja genong gedya, "Yohanes Pembaptis bedya huk enyek, henelam," hyok. 6:25 Wera gelma era Herodes bek yeiri yeiniboka, "Nara Yohanes Pembaptis bedya huk enyek, wenebabya gwaneng yangana' ak beiyiboka eleganenelem!" hyok. 6:26 Dara, alda dubnya bedya ganya era, hyak angoo senewok. Bok, alja nimi hnoum ab heka' ok nidya' molowanalama' ara, eleganenggena' ok amoka' adya, alda nenegom henggubuk. 6:27 Anasa Herodes bera yin bona'anya alak diri bo ulumoknya bek, Yohanes bedya huk enyek bo yalom aboka orugok dara, gasa ek biniboka ya nganga dakoka bo yok. 6:28 Dara alda, Yohanes bedya huk era, gwaneng yangawoka beilina' ak beiyiboka, bera seblemok gelma ek an elegok dara, ono' gelma enedya doboka alja' genong gek elegok. 6:29 Wera Yohanes bedya yuba doro diriga ban nang edya, Yohanes bera dib obak an yuba kebek dara, sikda biniboka, Yohanes bedya be' doboka, bo dilil byik. 6:30 Dara Yesus alja yuba doro diriga ban nanga bokosuka' ara, ono' saaboka mamagel yek dara, nidya' sikja yuba leboka, unulumeknya nera, Yesus ak unuwouwa aboka nekek. 6:31 Nimi mandebna' nauba bini yeini ulumeka' adya, Yesus ab alja yuba doro diriga ban nang eb dara, dena' den salek era orok. Anasa, Yesus adya sikenek leboka' ara, "Numba yok uboka, pe dek-deka sobnemeibya' ak gakdena' ak sam don binimab," hyok. 6:32 Dara, sikda lanawoka mek ekla buna' buka balameka' ara, nim orok ok gakdena' ak sam byik. 6:33 Wera sik byik salek era, nimi yok nim edya' anaba sikda anyagan balamak senewoka ella ubsik bok adya, wera mok enyek an nimi gong era mek ge pik uboka, Yesus ab alja mab eb dara, anam balamek bok, sikenek men yeiri biniboka diri ulumek. 6:34 Wera Yesus ara mek ekla buna' ak ab yingginiboka kemelemok enyek, nimi nauba ara seleb longomeka' ak eibok. Sikda domba pam yakoka bo usinya oroka' anaso' ak ulumeka' eibok dara, alja ganya era sikenek angoo hyak yadyek senewok. Dara, Yesus ara sikenek yoka'-yoka' nauba neklesuk. 6:35 Seleb sin dangoka inil yabok dara, Yesus adya yuba doro diriga ban nang edya Yesus ak yeiniboka, "Mok enera gakdena' uboka, seleb iniwal. 6:36 Anasa sikda ok heik pik an, dena' eboka dekdowanoka' aboka sikinek bululum, helom," hyek. 6:37 Bok Yesus adya sikenek, "Ugunja danyek, sikenek dena' eleganelum!" hyok. Bok alja yuba don nang edya alak, "Wei, wala' sekbadya anaso dobneseng rupiah edya, ban nimi deng mandebna' danyek, dena' denoka' aboka nidya' sunuwoka dekoka elekna dak leblam de?" hyek. 6:38 Dara Yesus adya sikenek, "Ugunuk ara, roti gwanenga hekbadya anaso ulumla do? Kemel biso," hyok. Wera sikda seleb keeboka eiyi yek dara, Yesus ak, "Roti gwanenga lambadya uboka, hadya' ara penya ulumla," hyek. 6:39 Dara Yesus adya nimi nidya' hola' eilib pik bokoka bokoka yok-yok buru yibilulum hululum aboka, alja yuba don nang ak orugosuk. 6:40 Wera nimi mandebna' dara, yok-yok bokoka, neika' ak ara, hnonda denga dombadya anaso, hnonda denga penya anaso uboka buru yibek. 6:41 Seleb dara, Yesus ara gwaneng ab penya hadya' danyeb dob salawoka, imik keebweininggoka, Imik Neyung ak perob aboka gibuk. Seleb dara, gwaneng soboka alja yuba doro diriga ban nang ek, nimi nidya' ak bokdo yibinelum aboka elegosuk. Dara ono' penya hadya' danaba gwaneng elegeisik sok, anaso bokdo yibek. 6:42 Dara sikda nidya' nang delemeka' ara, mona buksuk. 6:43 Anya seleb deregoka bok lobeknya nera, Yesus adya yuba doro diriga ban nang edya, neika' ak bolowoka mamageknya nera, hiboka akleng obadya mamagek. 6:44 Dara anyagan jek nimi mandebna' era, nengmab ok anyek, hiboka denga salya' anyek lambadya nang (lima ribu orang) demek. 6:45 Dara Yesus, alja yuba doro diriga ban nang ek, giliwoka bolong sok, ugunda men meka garawoka Betsaida heikek balalulum wenyaboka orugosuk. Ono' nimi nauba longol yeilimek nim ek, ugumba or balamnelum aboka lebok. 6:46 Wera nimi nauba ak, or pe binilum aboka lebok dara, Yesus ara Imik Neyung ak heng uboka molowonuna' aboka mok soko meinik sam byuk. 6:47 Wera mok soko en seleb iniwoka dukdukanek enyek, alja yuba doro diriga ban nang era, hyak mek hnoumung nong ok buka balamek bok, Yesus ara albeyok or anam mek gemek ulumok. 6:48 Wera Yesus adya kemelemok enyek, alja yuba doro diriga ban nang era anam mek hnoumung buka balamek bok, kabo' doroklomok digum pik balameka' adya yeiriwoka pukdibigimeka' ak eibuk. Dara, gweleknek yangman wining yub ololomla salek enyek, Yesus ara, mek dub pik yan ingibgiga sikenek yalamok. Dara, alda sikenek loboka, alak men mengeb hwibnamna anaso' anyek yanggok. 6:49 Wera alja yuba doro diriga ban nang edya, Yesus ara mek dub pik yan ingibgiga yanggoka' ak eibik dara, sikda nimi ganya yama' an gom senewoka ngouluklemek. 6:50 Dara sikda nidya' alak eiyiboka, lok anasa, nauba ngoulugoka serek-serek alamek. Bok Yesus ara sikinek, "Na anasa, malye, ngouluknenggom. Lok ganya bona' ara mem," hyok. 6:51 Dara Yesus ara mek ekla buna' ak welewoka bukok dara, kabo' anaba dengaro lobok. Dara, sikda anyek eiyiboka hyak loka dabsuk. 6:52 Sik hogung ak Yesus adya lambadya gwaneng enyek, senenggoma' lok so', nauba nenemoka' anaba, sikda ganya su' keboka soro-wara ab menegoka, sikda ganya pe olowanggusuk. 6:53 Wera Yesus ab, alja yuba doro diriga ban nang eb dara, balameka' ara, Genesaret nimi sokok biniboka, anyagan weklomek. 6:54 Weklomeka' ara, mek ekla buna' ak ab goboka sokok yanggek dara, nimi yok nim era, Yesus nong ak okoka eiyiboka, men ella ubek. 6:55 Dara mok soko enyek an nim era, neiklemek nimi mok soko me nidya' yeiriwoka eboka, Yesus ak bo yanggek. Wera ono' kebna enyek, Yesus ara wera anyagan ul yabel hen dara, wene salek neikna' nim era, esona' adya yangawoka Yesus ak bo yalamek. 6:56 Wera Yesus ulumna' ak ara, or nauba heikek gom, mek heikek gom, nimi nauba soba' neiklamna nanga be' gologoka, jaboka heik gasa' ak bo beillil yalamek. Anya, sikda Yesus adya akleng ek meka' soruk dem adya bebeganoba' aboka dublemek. Dara, nimi Yesus adya akleng ek soruka bebegan nim era, nidya' gobdo merelemek.
7:1 Parisi nim eb, Yahudi yuba neksin nang eb, Yerusalem heikek aba' ara, Yesus ak longol yeilimek. 7:2 Sikda Yesus adya yuba doro diriga ban nang, hnon nang era soruka mek elekna' loboka, sembeja' gebman delemeka' ak eiyisik. 7:3 Parisi nim eb, Yahudi nanga nidya' ara, sikja nim uguma' lelemla' ak an sunuwoka yoka' unuwoka soruka mek elekna' orok bok dara, dena' denggulumek. 7:4 Sikja ununa' era, dekna' gasa' ak ab yana' anaba, anam mek elekna' orok bok dara, men denggulumek. Anya ono', yok ununa' eneba gong, hnonda mek hmeiya mek elekna' gom, hnonda solowak unuruwa' mek elekna' gom, youma' nim uguma' enyek, geklewoka unulumek. 7:5 Anasa leboka, Parisi nim eb, Yahudi yuba neksin nang eb dara, Yesus ak, "Nunja neyung yab edya youma' diliga' dona' loboka, hekasa anja yuba doro diriga ban nang era, sembeja' gebman dena' delemak do?" wenyaboka heibek. 7:6 Dara Yesus adya sikenek lebsuka' ara, "Ugunda hyak or-or uboka sonda' hwam nang husuka' ara Yesaya bedya aldib lebsuk. Wenyhesuka' ara, an wenyaro momnya dobok, Ban nim era, yuba sibama' adyok giblenyaakanya, sikja ganya era, nak ab mok nenebdangoka ulumak. 7:7 Sikda nim adya ununa' enyek, nadya yub eneso' anyek, nekeldalamaka' anasa, nak ara salya' lelem giblenyak an, wenyhesuk," wenyaboka lebok. 7:8 Ono' Yesus adya sikenek, "Ugunda nim adya ununa' enyek, gasa salabmoubnekanya, Imik Neyung adya unuwolulum alalanya nera lololum," aboka lebok. 7:9 Dara ono' hnon sikenek leboka' ara, "Ugunja nim uguma' enyek, pe salalmoublenoba' aboka, Imik Neyung adya orukna' yub era, lunuwoka yoknya nenyek unululumnya nera, geremsenga lokja. 7:10 Musa bedya unulululum aboka leboka' ara, Ugunja' genong neyung ak pe gibeldololulum; heknedya alja genonga neyung ak waboka derelesil dara, somogiyiwanok, husuk. 7:11 Wenhyok bok, ugunja dara, nimi hnon alja genonga neyung ak, Ugunuk eleganesisinenya nera, Imik Neyung ak seleb elegamna, wenyalamla dara, nera pelemla wenyaboka neklelum dara, 7:12 wera nim adya sikja genonga neyung ak eleganesengnya nera, ugunja mem aboka yuba garalelum. 7:13 Anasa, ugunja yok nim ek wenyaboka neklelum dara, wera anedya Imik Neyung adya unuwolulum alasil yub era oroka' nenelelum. Anya ban neiksonya nera, ugunda hyak nauba meknewoka unululum," aboka lebsuk. 7:14 Dara Yesus ara, nimi nauba longolomeka' ak sikenek saaboka leboka' ara, "Ugunda nidya' ella danamab aboka dara, nak pe keblulum! 7:15 Nimi malya nenelesila' ara, sembeja' gebman dena' delemak adya malya nenenggulusil. Alda nimi ganya lomok sam ab goblelanya nedya, ganya malya nenelesil. 7:16 Anasa ugunda o yaka' ara pe kebnelum," wenyaboka lebok. 7:17 Wera Yesus ara nimi gong danyek loboka ek byuk dara, alja yuba doro diriga ban nang edya, "Ban sunuwoka lesilima' ara hek damok ek lebmeisilim do?" aboka heibek. 7:18 Dara Yesus adya sikenek, "Ugumbabya damok ara, anam elgom ululum de? Nimi nong weilik ab uboka nongok weknanya nedya, weknanya bek ara malya nenenggulumla, senewoka elgom ululum de? 7:19 Anasa nimi lomok weklesilnya nera, ganya seinina' pik weknenggululabok, alda mon lom pik weknekanya, ono' goblamla," hyok. Yesus adya ban wenyaboka leboka' ara, dena' nidya' ara or dena' ok hyookanya lebok. 7:20 Ono' hnon leboka' ara, "Nimi ganya lomok ab goblelanya nedya, gobnanya bek ara malya ullilimla. 7:21 Anasa, nimi ganya lomok ab goblamla' ara, yok-yok malya ganya lanalamla. Ban malya lanalamla' ara, gela salya' salalamak, hoka' dolomak, nim olomak, yok nimi gel salalamak, 7:22 yok-yok bona' uluneso ganya bolomak, yok-yok malya una' ganya bolomak, nimi bobnenewoka sonda' lelemak, yok-yok malyinya nok unulumak, yok nim edya' amba solom ganya bolomak, nimi derelemak, dengdang ganya bolomak, dongdang ana' ganya bolomak; ban malya una' danyek lanalamla. 7:23 Nidya' ban malya una' danyek, nimi ganya lomok ab lanalamlakanya, anedya malya nenelesil," wenhyok. 7:24 Wera Yesus ara anyaganara loboka, Tirus heik moka byuk. Dara Yesus ara e lomok wekoka, e nenyek an wekemla senewoka nim ella deijik senemok bok, alda doknewamenggoma dangamok. 7:25 Dara gela hnon alja gelma bisa' gologomok gel gedya, Yesus ara yeilimla an yuba kebookanya, alda Yesus ak yeiniboka koma lumugoka gibuk. 7:26 Anya bisa' alja gelma ek ab yaklula' senewoka molowok. Ban gel gera, alda Yahudi gel gom, alda Fenesia, Siro sokok ab beiyimeekanya, Yunani yuba salamok gel. Dara, bisa' alja gelma ek ab yaklula' aboka, Yesus ak molowok. 7:27 Yesus ara gel genyek an, "Mek mabo dena' ara doboka gam ak eleklemak dara, penggulumak. Anasa memab ara men orowek dena' elegoka delgogolomak dara, pelemak," hyok. 7:28 Wenyek gel genedya Yesus ak, "Neyung o, aldib e. Bok, mek mab edya del yaben enyek, dena' yangawoka beilina' damumduk dena' sikna' yanggalamla' anaba, gam eneba doboka delemla," hyok. 7:29 Dara Yesus adya alak, "Wera anja wenyhelem yub enedya, bisa' ara, anja gelma ek ab gobla' anasa, wera or ek bilom!" hyok. 7:30 Wera gel gera ek balamok enyek, alja gelma era or ekla mana' ak mamok, bok alda bisa' ara seleb goboka dengamoka' ak eibuk. 7:31 Wera Yesus ara Tirus heik mok era loboka, Sidon pik uboka, Galilea mek gemek sokok heik berem, Dekapolis mok sokok yok. 7:32 Dara anyaganera, nimi be hnon o ounugoka yuba pe sanggulumoknya bek bo yeekanya, soruka diyiboka hweblula' aboka, molowek. 7:33 Dara Yesus ara benyek eboka yokok bo biniboka, o lom moumena' ak sam soruka doronggoka, ono' Yesus adya gamala' solowoka, benedya silyum ak soruka dibuk. 7:34 Anya, Yesus ara imik sam keeb weininggoka, hina doboka, o ounugumoknya bek an leboka' ara, "Efata," nunja yub edya dara, "Wera, pika baklul," andanasa lebok. 7:35 Wera o pika bakoka, alja silyum domdigum dangoka yuba pe sab einiwok. 7:36 Dara Yesus adya yok nanga nauba ulumaka' ak anaso unuwanel aboka, nekbo-nekbo aro yabana' ara mem aboka, yuba sekok. Bok Yesus adya nekna' mem alamoka' anaba, sikda eiwaawom aboka, sounuwoka nekdo yabalamek. 7:37 Anya nimi nidya' unuwal an yuba kebek dara, sikda ganya nauba lokja senewek. Anya, lelemekja, "Nidya' alja unululanya nera, perob ok dangalamla! O ounugunanya beneba, yuba kenya dangallilimla, yuba gom dangananya beneba, yuba sanya dangallilimla," alamek.
8:1 Dara ban salek danyek, nimi nauba onsok longol yeilimek. Wera sikda dena' hnon bobnenggumeka' anasa, Yesus ara alja yuba doro diriga ban nang ek wenhyok. 8:2 "Ban nimi mandebna' danara, nak li winilya doblenyaakanya, sikda gwaneng hnon boldona' orok anasa, nara sikenek angoo yadyeka dabnel. 8:3 Wera sikda hnon nang era, mok ab yek bok anasa, gwanenga dena' orok bok, or balalulum henya dara, pikek anyeb somok lobijek," hyok. 8:4 Dara alja yuba doro diriga ban nang era Yesus ak, "Ban unu gakdena' mok enera, nimi mandebna' danasa dara, gwanenga pe denoka' aboka, siksamba har sam ab doboka deneseng do?" hyek. 8:5 Dara Yesus adya sikenek, "Ugunuk ara roti gwaneng ara hekbadya bolum do?" aboka heibsuk. Dara sikja, "Sekbadya ulumla," hyek. 8:6 Dara Yesus ara nimi nidya' ak, sokok buklulum aboka, alda sekbadya gwaneng dara doboka, Imik Neyung ak perob aboka gibuk. Seleb dara, gwaneng ara soboka, alja yuba doro diriga ban nang ek boknoka' aboka elegosuk dara, wera sikja doboka bokdo yibik. 8:7 Dara sikda hadya' anaba wenebadya bomeka' ara, Yesus adya Imik Neyung ak peroba' dolul aboka molowok dara, boklulum aboka orugosuk. 8:8 Wera sikda mona bukuka jek. Anya, deregoka bok lobeknya nera, alja diriga ban nang edya serrema sekbadya mamagek. 8:9 Sikda anyegan jek nang era, nengmab ok anyek, denga yuba' dombadya nanga jek. Debgogowek dara, Yesus ara nimi danyek, ugunja ek balalulum, hyok. 8:10 Bok alab, alja yuba doro diriga ban nang eb dara, men mek ekla buna' pik uboka Dalmanuta sokok sam buku byik. 8:11 Wera Parisi nang hnon Yesus ak yeiniboka, alab yuba sal yabeekanya, sene bobnenewoka gogoba' dibnoba' aboka, yok lok so bekna' hnon, imik heikek abnya nenyek, unuwalom aboka, sikda alak molowek. 8:12 Anasa Yesus ara ganya hina doboka, sikenek lebsuka' ara, "Nimi wenyek nang enera, hekasa yok damoka hnon meewalom alamak do? Anasa, nara ugunuk hyak dib lebsin, Wenyek nang ek ara, damoka meka' hnon meeb eleganggunusak!" hyok. 8:13 Dara alda sikda anyagan loboka, mek ekla buna' bukoka, yok gek sam byuk. 8:14 Yesus adya alja yuba doro diriga ban nang era, gwanenga bona' hibigoka, mek ekla buna' ak ara, roti gwanenga sirik hnonok bomek. 8:15 Dara Yesus adya sikenek, "Ugunda Parisi nang eb, Herodes beb, sikja roti gwaneng welena' enyek ab, hyak pe keeboka ulululum," hyok. 8:16 Dara Yesus adya alja yuba doro diriga ban nang era sik moumen, alja ban wenyhesila' ara, "Nuk roti gwanenga hnon bobnenggumabnya nenesa lebsil aboka," leldalamek. 8:17 Yesus ara sikja an wenyaldalameka' anyek ella ubsuka' anasa, alja sikenek lebsuka' ara, "Ugunda hekasa roti gwaneng bobnenggumab an yub enyek saldalalum do? Ugunda anam eilinggululumukanya, ono' damok ara anam ella unggululum de? Ugunda ganya su' kebsuk de? 8:18 Ugunda henga yak bok, eilinggululum de? Ono' o yak bok, kenggululum de? Ugunda beknenggululum de? 8:19 Nadya nimi denga salya' lambadya nang emba, roti gwaneng lambadya soboka elegeisisa' dara, deregoka bok lobeknya nera, serrema hekbadya ugunja liboka bobmamagolum do?" Wenhyok dara, alja yuba doro diriga ban nang edya Yesus ak, "Serrema o badya liboka bobmamagamouba," hyek. 8:20 "Dara ono' nimi denga salya' hiboka dombadya nang emba, gwanenga sekbadya soboka elegeisisa dara, seleb deregoka bok lobeknya nera, serrema hekbadya liboka mamagolum do?" Wenyaboka heibsuk dara, sikda Yesus ak, "Serrema sekbadya liboka mamagamouba," hyek. 8:21 Dara Yesus adya ono' hnon, "Anasa wenebabya damok ara, ugunda anam ella unggululum de?" aboka heibsuk. 8:22 Wera Yesus ab, alja yuba doro diriga ban nang eb dara, Betsaida moka byik. Dara anyeganara, nimi heng umoknya ben hnon bo yeindeboka, sikda Yesus ak alja soruka diyiboka hweblula' aboka, molowek. 8:23 Dara, Yesus ara heng lumnya bedya soruka gliboka, heik gokgobok bo biniboka, lum umok heng ek sam gamala' adya ngikookanya, alak soruk diyiboka, "Wera yoka'-yoka' hnon eiblam gom?" aboka heibuk. 8:24 Dara heng lumnya bedya, "Yo, nimi yabalamaka' eibna' ara, gal anaso' ak eibna," hyok. 8:25 Anasa ono' Yesus adya soruka lum heng ak an dibuk dara, wera sum era lum henga dengaboka gobdo merewookanya, okoka hyak nidya' laga eibuk. 8:26 Dara ono' Yesus adya benyek an, "Anja ek or binilam, bok heik enyek an yanggana' ara mem," hyok. 8:27 Wera Yesus ab, alja yuba doro diriga ban nang eb dara, Kaisarea Pilipi sokok sam, yok-yok mek heikek sam byik. Dara pik hnoumung anam balameekanya, Yesus ara alja yuba dona' nang ek, "Nimi yok nang edya dara, nak dara, heknya alanyak do?" aboka heibsuk. 8:28 Dara sikda Yesus ak, "Anda hnonda Yohanes Pembaptis alanjak, hnonda Elia benya' alanjak, ono' hnonda ununumna' lelemek nang, be hnonnya benya' alanjak," hyek. 8:29 Dara Yesus adya, "Ugunja dara, nara heknya senelenulum do?" aboka heibsuk. Wenyek Petrus bedya, "Neyung, anda bokol yajoknya Kristus bek ululam!" hyok. 8:30 Dara Yesus adya sikenek, "Alda benya' aboka, yok nang ek nekna' ara mem," aboka yuba sekok. 8:31 Nen seleb dara, Yesus ara alja yuba doro diriga ban nang ek, "Nimi diba' me nera hyak nauba oka deregoka gweknamla. Anya Yahudi dub nang eb, yuba wa gaka' dub nang eb, yuba neksin nang eb dadya, alak malya gebija dara, diba' obnemak, bok winilinya sum era embenga' suboka buknamla," aboka neksuk. 8:32 Yesus ara hyak laga poboka alja yuba doro diriga ban nang ek, anaso unuwanamla aboka neksuk. Wenyek Petrus bedya, Yesus nonga glib salawoka, "Neyung, nera wenyana' ara loblom," hyok. 8:33 Bok Yesus ara sam-samawoka, alja yuba doro diriga ban nanga nidya' kemero yibisuukanya, Petrus bek, "Satan o, men weilik sam yibilom! Anja seiniwalam ganya era, Imik Neyung adyinya nek seiniwanggublam, alda nim adya ganya ek seiniwalam!" wenyaboka wabok. 8:34 Dara Yesus ara anyagan nauba longomek nim eb, alja yuba doro diriga ban nang eb, "Wei, keblulum!" hyookanya sikenek, "Nimi be hnon nak diriga yananel aboka dara, alak perob danamlya' diguma' ara, hyak gobdo loboka, alja' igin yaka' doboka, nak diriga yalalul. 8:35 Anasa nadya nong anyek weiningdanyek senen ganya bololanya bera, alda denghenelabok, Imik Neyung adya' perob lero yanggan yub eb, nasamba hnon leboka, al weininggeldalamla dara, wera alja nong era, eimik blebnamla. 8:36 Nimi be hnonda sokok ulumla' nidya' ara, alja' ok dangamso bok, benyek alja nong una' ara denghenemso dara, nera perob de? 8:37 Anasa, alja nong una' amba dara, heka' ak lunuwanamso do? 8:38 Yu hwam uboka malya una' lomok an unulumak salek wen, na nong ab, nadya neklesin yub eb danyek, ugunda alya amba nim ak laga lel eleknenggulumun dara, alda alja neyung bedya nong una' lomok senenggoma' ab, geisa ulumak lero nang eblaboka yanamla sum era, sik hogung ak nimi diba' me ara naba alya anasa, albabya lobnamla," hyok.
9:1 Dara ono' Yesus adya hnon sikenek, "Nara ugunuk dib lebsin! Ugun anyagan weklum nang era, Imik Neyung adya wenelemnesilnya nera, hnon anam somoganggumun bok, eibnelum nang ek hnon seklum," hyok. 9:2 Wera lika hnabbadya maboka gwelegok dara, Yesus ara Petrus beb, Yakobus beb, Yohanes beb, sik eboka bobsuukanya, senenggom meinik sam welewek. Dara, sikbeyok ulumek salek, Yesus ara sik hogunguk ab yok so dok. 9:3 Dara, Yesus adya boksom era, hyak geisa nonga' anyek dangamok. Nimi sokok an boksom mek eleklemak nang edya anaba, anaso geisa boksom hnon unu mek eleknenggulumaknya nek dok. 9:4 Wera sikja kemelemek enyek, Elia beb, Musa beb, laga nenebdangoka, sikda Yesus ab neika' yuba saldalamek. 9:5 Wenyek Petrus bedya Yesus ak, "Neklesilimnya o, nunda anyagan ulumaba' ara, hyak perob nong e. Anasa perob, nunda anyagan e lubna winilya, hnonda ansamba, hnonda Musa bemba, hnonda Elia bemba sobnemab," hyok. 9:6 Alda ban wenhyoka' ara, sikda hyak loka dabsuka' anasa, heka' hununa' goma' aboka, wenyaro lebok. 9:7 Wera deba' yalamoka' ara siklewosuukanya, ana lomok anyeb, yuba hnon sal yaboka' kebeka' ara, "Nadya' wana' nong ulumna me nera ban. Alak pe kelelulum!" hyok. 9:8 Al wen salek enyek, ok anyan-anyan kemel ganagal yabek dara, sikda yok nang dara, eibnenggubek, bok Yesus ok eibik. 9:9 Wera sikda mok soko meinik aba' ara yanggek ek ab dara, Yesus adya sikenek lebsuka' ara, "Nimi diba' me nera somokna' ak ab anam suboka embenga' bukiyiwanggumlya salek era, ugunja ban eibluma' ara, anaso' ak eibab aboka, nimi yok nang ek salya' nekdo yabana' ara hyak mem," hyok. 9:10 Anasa, sikda Yesus adya an wenyaboka leboka' ara, ganya lomok bobekjok, sik moumen, "Somokna' ak ab embenga' suboka bukiyiwanamla, hela' anyek, damok ara, heka' ak lemla do?" aboka heibdangdo yabalamek. 9:11 Anya sikda Yesus ak, "Hekasa Yahudi yuba neksin nang edya dara, Elia benyek men yanamla alamak do?" aboka heibek. 9:12 Dara, Yesus adya sikenek leboka' ara, "Elia bera aldib men yanamlakanya, yoka'-yoka' memewanamla. Bok nimi diba' me nera, nim adya alak nauba igina kweboka derewoka wabnamak aro momnya doboknya neneno? 9:13 Bok nara ugunuk dib lebsin, Elia bera sokok seleb yok bok, nim adya alak sikja unuweisibya senelemeknya nera nidya' unumek. Ban unumeka' ara, alsamba momnya domoka' sunuwoka unumek," hyok. 9:14 Wera Yesus ab, Petrus beb, Yakobus beb, Yohanes beb dara, yok yuba doro diriga ban nang ek sam meinik aba' ara yanggek dara, sikda nimi nauba longolomeka' ak eibek. Sikda Yahudi yuba neksin nang eb, yok diriga ban nang eb dara, yoka' ak leboka leleldalameka' ak eibek. 9:15 Wera nimi dara, Yesus nong ak eibik dara, sikda senenggomnya be yanggal bar aboka, alak pika dil yek. 9:16 Dara, Yesus ara sikenek, "Ugunda hek yuba damok ek, sikeneblaboka leleldalalum do?" wenyaboka heibsuk. 9:17 Dara nimi hnoumung anyeb ben hnonja Yesus ak, "Neyung neklesilimnya o, nadya me nera bisa' wekdoboka, yuba sanggulumla' anasa, nara anak bo yeilimna. 9:18 Wera bisa' anyek, alja nong lomok gologol yan dara, alja nong era sokok eiying-eiyinga gwekoka, sibama' gamala' youlul-youlul aboka, si glengdarab-glengdarab aboka, alja nong era, heiboka gasa daralamla. Nara anja yuba doro diriga ban nang ek, bisa' yakoka hweblulum aboka, sikenek molosin bok, sikja dara, hwebnamenggom," hyok. 9:19 Anasa, Yesus ara sikenek, "Wei, ugunda dib senena' orok nang ek liklum nang o, nara ugunub dara, liga hekbadya neika' uldablemnamna do? Li hekbadya uweibya ek, ganya hwibnelum do? Wera me nera nak an bo yoululum!" hyok. 9:20 Dara, sikda me nera doboka Yesus ak bo yek. Wenyek bisa' ara, Yesus ak okoka eilil yabok dara, me nenedya nong era, serema salamna' yenewok. Dara, me nera sokok malyinggyuukanya, sibama' ara, bolgamala' youl-youl aboka, sokok bonggeiling-bonggeiling al yabok. 9:21 Dara Yesus ara me nen eili bek, "Me nenera hwer salek ek an neikna' era salamok do?" aboka heibuk. Dara, me nen eili bera Yesus ak, "Anam beiyimsa salek ek moruwoka unubmoruwok!" hyok. 9:22 "Anya bisa' ara, li soba', ukuk gom, mek inik gom, doronggoka obnuna' ulumla. Anasa wera, anda unuwanesom migib ulunggel dara, nuk angoo yadyek senewoka arayiwanasilim," wenyaboka molowok. 9:23 Wenyek Yesus adya dara, "Anda hekasa unuwanesom migib ulunggelya dara alam do? Anasa, al dib senelelenya nemba dara, yoka' nidya' ara unuwanamso' ok," hyok. 9:24 Dara me damnya benedya bii al yaboka' ara, "Nara dib senewan! Bok alda dib senewoka ganya olokna' anyek mek anasa, nauba dib senewoka ganya ologonuna' aboka, nak arawanenelem!" hyok. 9:25 Wera Yesus ara, nimi nauba yeiniboka, alak aknelganagel yanggeka' eibuk dara, alda bisa' ak, ooma leboka waboka' ara, "Wei, anda o ounugoka yuba gom geblesilim bisa' o, nara anak lebnenggen, Anda me nenyek anyeba' gobnelam. Anya, onsok saaboka wekel yanggunulam!" aboka yakok. 9:26 Dara ban bisa' era, ngolukdo me nenyek nauba eiying-eiying eiyiboka gwekdo gobok. Wera gologomok me nong era, seleb somogamna nim eneso ura maboka' anasa, yok nim edya, "Alda hyak dib seleb somogamla," aboka lelemek. 9:27 Bok Yesus ara, me nenyek eiriyiboka bukiyibok dara, wera me nera albeyok sekok. 9:28 Wera Yesus ara ek wekok salek, alja yuba doro diriga ban nang eblaboka sikbeyok dara, sikda alak, "Heka' adya nunda bisa' ara, yaknenggumab do?" aboka heibek. 9:29 Anasa Yesus adya sikenek, "Ban nenesonya nera, alda heng uboka molona' adya ok, or yakneseng," hyok. 9:30-31 Wera Yesus ab, alja yuba doro diriga ban nang eb dara, anyaganyeba' ara, Galilea sokok sam pik uboka balamek. Ban unu pika leiboka balameknya nera, Yesus ara alja yuba dona' nang ek neklemoka' anasa, yok nang ella deijik senewoka, unumek. Dara alda sikenek, "Nimi diba' me nera, eimik yok nang soruk lomok sam doboka eleganamak dara, sikda alak obnemak bok, omeija salek li winilinya sum era, alda embenga' subnamla," wenyaboka neksuk. 9:32 Bok sikda alda anyek lelemla senena' ara, elgom umek bok, lok anasa, alak heibnenggumek. 9:33 Wera sikda Kapernaum heikek lanal byik. Anya, ek byik dara, Yesus ara sikenek, "Ousa pikek ara, ugunda hek yub ek gangawoka leldalmolum do?" wenyaboka heibsuk. 9:34 Bok sikda heknyek sikja' naubenya dangoka ulumla do aboka gangawoka lebdangamek bok anasa, sikja dara, yuba meka' hnon doro sabnenggubek. 9:35 Dara Yesus ara bukoka, alja yuba doro diriga ban nang obadya nang ek keblululum hyookanya, sikenek, "Nara men dubnya dangoka ulumnamna senewanalenya bera, wera alda sidya' lobnamlakanya, nidya' amba arawoka wa wenya dolul," hyok. 9:36 Anya wenyaboka, Yesus ara mek me nek na saramek sekel yalom aboka, soruk gliboka dil byuukanya, sikenek wenyhesuk, 9:37 "Anasa heknedya nasamba leboka, ban eneso me nenyek peroba' leboka dolomla dara, wera alda nak dolonel. Anya ono' heknedya nak dolonel dara, alda nak donggulunel bok, alda nak bokol yeilinyoknya bek dolomla," hyok. 9:38 Dara ono' Yohanes bedya Yesus ak, "Neyung neklesilimnya o, nub neika' unggulumabnya bedya, anja si sibuka bisa' yaklamla' ak eiyiboka, anda nubnya goma' aboka, ununa' ara mem aboka yuba sekemab," hyok. 9:39 Bok Yesus ara Yohanes bek, "Nimi ben hnon nadya si sibuka lok so migib ununa' unulamla dara, wera ono' nadya si nek malya nenewanggununela' anasa, mem aboka yuba seknenggom. 9:40 Anasa wera, nimi heknedya nuk isa' gebnenggulusilnya bera, alda nuk sam dangalalanya bera an. 9:41 Nara ugunuk aldib lebnesin, Ugunda Kristus bedya yuba dona' nang uboka nadya si amba leboka, ben hnonja ugunuk meka gweboka eleganesil dara, alba deknamla' ok," hyok. 9:42 "Heknedya banyan mek nang danyek, nak dib senelenyak mabo danyek, me hnon ak meknewolula' aboka bobnenewanemso dara, igin girik alja nganga ak geregoka, alda mek gwanek boboganeseng dara, alda nenesonya nenyek pewaneseng. 9:43 Anja' meneng soruk edya malya ul eleklenggelya dara, unulunggelya soruk era garawoka bobogalom! Wera sarangganggunumla uka desin heikek sam, nidya' penya soruk gekman bobonggagelyek anasa, darasam soruk mumuruwa' anyek, embenga' una' ak weknelam dara, pewanalam. 9:44 Wera uka singilimnamla heik era, uk ara meka' sarangganggunumlakanya, nimi delemnesil ek era somoganggunumla. 9:45 Wera anja' meneng yan edya bo eboka malya ul eleklenggel dara, ununggelya yan era garawoka bobogalom. Nera anda yan moumena' nidya' senenggom uka desin heikek sam bobogalyek anasa, yana darasam mumuruwa' anyek geimda embeng una' ak weknelam dara, pewanalam. 9:46 Wera uka singilimnamla heik era, uk ara meka' sarangganggunumlakanya, nimi delemnesil ek era somoganggunumla. 9:47 Anja' meneng heng edya an nonga malya ul eleklenggelya dara, unulunggelya heng era gurugoka bobogalom! Wera anda heng gebman nidya' an nong ab uka desin heikek sam doro bobogalyek anasa, henga hnonok darasam ok uboka, Imik Neyung wenesin heikek weknelam dara, pewanalam. 9:48 Wera uka singilimnamla heik era, uk ara meka' sarangganggunumlakanya, nimi delemnesil ek era somoganggunumla." 9:49 "Nim oboka beillilimak soub era, garam adya daklemak sok, nimi nidya' uk adya unu sunuwanasil. 9:50 Garam ara perob bok, angawom ana' denghenemso dara, ugunda heka' adya saaboka angawom ana' gebnesom do? Anasa ugunda yok nang eb neika' pe kwebdangoka ulumnamab aboka dara, garam angawom ana' anyek ugunja ganya lomok ululul," wenyaboka lebok.
10:1 Dara Yesus ara anyaganyeb lanawoka, Yudea mok sokok aba' ara, Yordan meka gemek err sam mok sokok bilimok dara, al anyeganaba' nimi nauba alak longowoka aknel ganagal yeilimek. Dara Yesus ara on neklemok sok, alda sikenek yuba neklesuk. 10:2 Dara, Parisi nang era Yesus ak sene sunuwanoba' aboka hnon yeilimek. Anya sikda Yesus ak, "Nunja dolomab yub edya dara, nimi hnon ala' gel ak or lobnamso de?" wenyaboka heibek. 10:3 Bok Yesus ara sikenek lebsuka' ara, "Musa bedya dara, ugunuk ara heka' aboka lebsuk do?" aboka saaboka heibsuk. 10:4 Wenyek Parisi nang edya dara, "Ugunda gela lobnamna senewanalum dara, lobnamna senewanalum gel gek an, gela lon momnya dona' enyek, weboka eleganalumukanya lobnelum, wenyasuk," hyek. 10:5 Dara Yesus ara sikenek lebsuka' ara, "Ugun nong anyek, ganya hyak gasa anasa, Musa bera anera wenyasuk. 10:6 Bok men ullilisuk sum ek aba' moruwoka, nengma ab, gelma ab dara, Imik Neyung adya uyiwosuka' ak ulurak. 10:7 Anasa wera nengmab ara, alda gela dobna dara, alja' genonga neyung ak loboka, ala' gel ab neika' hiliraakanya, 10:8 anadya sikda nimi penya bok, hnonok nonga dangalarak. Dara, sikda nimi penya anam unggulurak bok, alda hnonok nonga dangoka ulumnerak. 10:9 Anasa wera, Imik Neyung adya hnonok nonga nenelelanya nera, nim adya dara, loboka bokol dongona' ara mem!" aboka lebok. 10:10 Wera sikda seleb e lomok ulumek dara, Yesus adya yuba doro diriga ban nang edya, Yesus ak gela lon yub enyek, ono' heibek. 10:11 Dara Yesus adya sikenek lebnesuka' ara, "Heknedya men domna gel ge loboka, eimik yok gel ge dolomla dara, wera bera alda men gel gek malya ullilimla. 10:12 Anasonya neikek, gelewa anaba, men donanya bek loboka, yoknya bek dolomla dara, wera gel gera, men donanya bek malya ullilimla," hyok. 10:13 Wera Yesus adya soruka diyiboka peroba' ak lebsulula' aboka, nimi nauba Yesus ak sikja mabo bo yek. Bok Yesus adya yuba doro diriga ban nang edya, nimi danyek yuba garalamek. 10:14 Wera anyek eiyiboka, Yesus ara alja yuba doro diriga ban nang ek yu ganya boboka lebokja, "Imik Neyung wenesin heik era, banaso nang amba ulumla. Anasa sikenek ara mem anggom, nak or yanok. 10:15 Anasa ugunuk dib lebsin! Heknedya mek mab edya ganya boboka, Imik Neyung adya wenesin heik era, yeng asa' donggulumla dara, alda Imik Neyung adya' wenesin heik ara weknenggunumla," hyok. 10:16 Ban nen wenhyok dara, Yesus ara memabo nidya' somowoka eiriwosuukanya, sikja huk dubuk yok-yok soruka diyiboka, alda sikenek peroba' leb elegosuk. 10:17 Wera Yesus ara pikek balamok sab-sab, nimi be hnon bik-bikal yeiniboka, Yesus ak oumuwoka giboka alak, "Neyung neksinya hyak perobnya o, nara heka' hubnya' adya, dib embenga' una' ara dorowanamna do?" wenyaboka heibuk. 10:18 Dara Yesus ara alak, "Anda hekasa nak ara perobnya henelem do? Nim ara perob nanga hnon una' orok bok, alda Imik Neyung ok, alak ok hnonok perobnya ulumla. 10:19 Anda Imik Neyung adya leleladya, Nimi salya' onggom, yok gel ge salya' salenggom, yok nang bona' salya' hoka' donggom, sonda'anya salya' saro yabanggom, sonda' lenggom, yok nang edya unuwamenya meka' nenenggom, anja genonga neyung ak pe giblelom hyoka' ara, anda seleb ella ululam," hyok. 10:20 Dara benedya Yesus ak, "Neyung neklesilimnya o, ban nidya' leblam yuba dara, nara anam goubenya wenyek moruwoka nidya' pe unulamna," wenhyok. 10:21 Wenyek Yesus adya dubnya bek an kemeboka yadyek senewoka leboka' ara, "Nidya' ara pe unululam bok, hnonok lololam. Anasa anda wera bimenekanya, anja bona' nidya' ulumla' ara yok nang ek dekoka, dekna' dobmenekanya, bona' garan nim ek eleganalam. Dara nenesemba lunuwoka, imik heikek beillilisil bona' enyek dobnelam. An unuwamenek ab danyek, wera anda nak yamenekanya, diriga yalamnanelem," hyok. 10:22 Wera ban dubnya bera alda hyak bona' dubnya ulumoka' anasa, Yesus adya alak banaso wenhyok dara, angoo senewoka hyak ganya obdangoka ek byuk. 10:23 Anasa Yesus ara alja yuba doro diriga ban nang ek, sikenek keeboka lebsuka' ara, "Nimi bona' dub ulumak nang era, Imik Neyung wenesin heikek wekna' ara hyak nauba okna nong!" hyok. 10:24 Wenyek Yesus alja yuba doro diriga ban nang era, Yesus adya wenyaboka lelemoka' anyek keboka, sibama' igina berewosuk. Bok ono' Yesus adya hnon saaboka leboka' ara, "Najabo yab o, aldib, nim Imik Neyung wenesin heikek wekna' ara, hyak nauba okna' ak ulumla! 10:25 Nim abaksin pam era, imir lom pik ara or weknesobok, nimi bona' dub nang era, Imik Neyung wenesin heikek wekna dara, hyak okna," hyok. 10:26 Yesus adya ban wenyaboka lelemok yub edya, alja yuba doro diriga ban nang era, ganya hyak nauba loka daboka, sik moumen, "Ban wenyaboka lelesil dara, wera heknyek dib embenga' blebnamla' do?" aboka leldalamek. 10:27 Anasa leboka Yesus ara sikenek keeboka lebsuka' ara, "Nim adya dara, unuwamenggomnya ululabok, Imik Neyung ak dara, unuwamenggomnya hnon unggulumla. Imik Neyung ak dara, nidya' unulamla ok ulumla," hyok. 10:28 Wera danyek Petrus bedya Yesus ak, "Nunda yoka'-yoka' nidya' lomobukanya, anak an diriga yalanjab," hyok. 10:29 Anasa leboka Yesus adya sikenek lebsuka' ara, "Ugunuk dib lebsin, Nimi be hnon nasamba hnon, Imik Neyung ak ab perob lero yanggan yub amba leboka, alja ek nimi gom, alja weisabo gom, alja hmal gelewa gom, alja' genong gom, alja' neyung gom, alja mabo gom, alja gwaneng wa gom, lo yabalamla dara, 10:30 benera ban wene salek eneba onsok lunuwoka, Imik Neyung adya eleklamla' ara, denga sal-salya' anyek, denga yuba' dombadya anaso, ek nimi gom, weisabo gom, alja hmal gelewa gom, alja genong gom, alja mabo gom, alja gwaneng wa gom, anya igin kwena' anaba, dolomla. Anya ono' eimik sidya' daknamla sum eneba, bera hyak dib embenga' ulmoubna' dobnamla. 10:31 Bok nimi nauba eimik era, wenyek mengewoka ulumak nim era, eimik dangoka, wenyek eimik ulumak nim era, men mengewanamak," hyok. 10:32 Wera Yesus ab, alja yuba doro diriga ban nang eb dara, sikda Yerusalem heikek balamek dara, Yesus ara men mengelemok. Alja yuba don nang era, yoka' ublyek senen ganya bomek bok, ono' sik eimik nimi nauba balamek nang eneba lok ganya bomek. Wenyek Yesus ara alja yuba doro diriga ban nang ek sikbeyok yoululum aboka, e biniboka eimik alak heka' huwanamoka' anyek neksuk. 10:33 An alja neksuka' ara, "Ugunda pe kebnelum. Nunda wenera Yerusalem heikek balamab. Dara Yerusalem heikek ab dara, nimi diba' me nera doboka, Imik Neyung yuba wa gaka' dub nang ek hnon, yuba neksin nang ek hnon, elegeija dara, wera sikda yuba saboka obnok aboka, Yahudi gom nim ek doboka eleganamak. 10:34 Dara nimi diba' me nek nauba derewoka waboka, gamala' solobgouluwoka, loba' nenewoka saboka obnemak. Bok li winilya seleb mablya dara, alda embenga' suboka buknamla," hyok. 10:35 Dara Zebedeus bedya mabo moumena' Yakobus, Yohanes ara, Yesus ak yeindeboka alak wenyherek, "Neyung neklesilimnya o, nunja yoka' don anak molowanenggenema' ara, or kebnesilim aboka, molowagenem," herek. 10:36 Dara Yesus adya sikenek ara, "Alja dara, nuk ara heka' ak hubsulul senenurum do?" wenyaboka heibsuk. 10:37 Anasa sikda lebdekja, "Neyung o, anda imik senenggom migib dubnya dangoka wenel yabasimen sum era, nunda be hnon anja' sirikek sam hnon, be hnon anja' waneng ek sam hnon, buknerum henesilim," wenyaboka molowarek. 10:38 Dara Yesus ara sikenek, "Ugunja moloworumnya nera, anyek senewoka ugumba elgom ulurumjok moloworum. Ugunda na denesinya mek hmeiya era denesorom de? Anya nadya dobnesinya mek dana' enyek, ono' ugun dabnesiseng de?" 10:39 Dara sikja Yesus ak, "Numba or unuwanasinim," herek. Anasa alda sikenek, "Ugunda na denemna mek hmeiya denerumukanya, na dobnamna mek dana' era dobneruma' ara, aldib. 10:40 Bok, heknyek nadya sirikek sam gom, waneng ek sam gom buknamla ana' ara, nadya wenyhenggunusinya. Bok heknyek buknamla' ara, benyek or buknamla senewoka, siksamba beillilisil nang enyek eleganasil," hyok. 10:41 Wera yok sagobadya nang edya, an wenhyoka' anyek kebek dara, sikda Yakobus Yohanes ak yu ganya bobek. 10:42 Bok Yesus ara alja yuba doro diriga ban nang ek, nidya' nang yoululum hyookanya, sikenek, "Imik Neyung ak elgom ulumak soko dub nang edya dara, sikja sokok heik yoka' nim ek gasa soruk edya malya nenelemaakanya, sikja dub nang edya migib edya, yeiriwoka orugoka unulusak. 10:43 Bok ugunuk dara, anasonya nera ununggom, mem! Alda saaboka ugun gangganek be hnon senenggomnya danamna senewalenya bera, alda men dara, ugunja orukna'anya dolul. 10:44 Anya, ugun gangganek sam, nara men si sina'anya danamna senewalenya bera, alda nimi nidya' amba wa wenya dolul. 10:45 Anasa nimi diba' me nera, nak aralenenoka' aboka yanggumok. Alda nim ek aralesinyekanya, alja nong era, nimi nidya' amba bleboka dobnuna' aboka elekdok," hyok. 10:46 Wera sikda balameka' ara, Yerikho heikek byik. Ono' Yesus ab, alja yuba doro diriga ban nang eb, anyeganeb loboka byik dara, nimi yok nang eb nauba balamek. Dara nimi heng lumnya be hnon, Timeus mamnya, Bartimeus bek, pik gek sam moloro bulumok. 10:47 Dara benedya kebok enyek, Nazaret mok ebnya, Yesus ara yabalamla ana' kebok dara, alda yuba nauba bii aboka, "Daud mamnya Yesus o, nak angoo yadyek senewane!" wenyaboka lel yabok. 10:48 Wenyek nimi nauba alak loblom aboka el ngaleklemek. Bok alda ngalenga' gouluwoka nauba bii aboka, "Daud mamnya o, nak angoo yadyek senewane!" aboka lelemok. 10:49 Anasa Yesus ara balamoka' ara sek loboka lebokja, "Wera alak yalom hululum!" hyok. Dara yok nang edya heng lumnya bek yalom aboka alak, "Anja ganya daboka seklom, alda anak yalom alamla," hyek. 10:50 Dara heng lumnya bera, alja aklenga gwirib loboka, alda sekdo dorogoka, Yesus berem byuk. 10:51 Dara Yesus ara heng lumnya bek, "Anja dara, heka' hubnulul senelam do?" wenyaboka heibuk. Wenyek alda Yesus ak, "Neyung neklesilimnya o, nara henga gwelegoka eibsinya senemna!" hyok. 10:52 Wenyek Yesus ara alak, "Anda nak ganya dib senewanelema' adya, seleb merewalema' anasa, or balalom," hyok. Wera al wene sab-sab eneba, heng lumnya bera heng gwelegoka pe eibuukanya, alda Yesus balamok pik dobdo byuk.
11:1 Wera sikda balameka' ara, Yerusalem heik berem Zaitun mein damak sam Betfage, Betania heikek lanal byik dara, Yesus ara alja yuba doro diriga ban nanga penya nang men binirum aboka boksuk. 11:2 Anya sikenek leboka' ara, "Ugunda men laga eer heikek enyek binirum. Wera ugunda men heik nong ok wekel borumun dara, nim abaksin pam anam gobenya anyek, nimi hnon meka' abakyaawanggumeija' pama geregemeija' anyek eibnerum. Dara, pam enyek soudya' loboka anyagan bo yanarum. 11:3 Bok yok nang edya hekasa ban unulurum do aboka heibsija dara, Wenelesilnya bedya nara anyek amla anasa dolonam henerum. Dara alda ono' berra onok bo bululum henemla anya'," hyok. 11:4 Dara sik penya nang era heikek biniboka, nim abaksin pam era pik gek e sindamak geregemeka' ak eibdek. Dara, soudya' lobel yabarek sab-sab, 11:5 nimi wene nim anyagan seklemeka' ara, sik penya nang ek, "Wei, ugunda heka' senewoka ban abaksin pam era soudya' loblerum do?" aboka heibsik. 11:6 Wenyek sik penya nang era, Yesus adya wenyhenerum amoka' sunuwoka wenyherek. Dara anyagan seklemek nim era, or bo bururuk senewoka dogom hyek. 11:7 Wera sikda ban pam era Yesus ak bo yeiniboka, pam gwadyek ara, boksom gouluna' adya yangiyiwek dara, Yesus ara an eilib welewoka bukuk. 11:8 Dara Yesus ara, pam dubuk buku balamok dara, nimi hnonda sikja akleng enyek, pikek esona' diba' yangero balamek, hnon nim era embeng gal mekla' wak ab diboka bo yeindeboka pika yangaro balamek. 11:9 Dara nimi men mengewoka balamek nim eb, ono' eimik dobdo balamek nim eb dadya, eiya hlaboka giboka lelemeka' ara, "Perobe! Imik Neyung ak giblenok e! Imik Neyung be si amba yoknya benera, peroba' dangalalul. 11:10 Nunja' neyung Daud alja wenewoka bo usina' yanalanya nera, peroba' ak ulumnamla. Anasa, im nongok anaba, alak giblenok e!" aboka lelemek. 11:11 Wera Yesus ara balamoknya nera, Yerusalem heik nong ok byuk dara, alda Imik Neyung gibna' ek wekok. Anya e lomok ara, alda oka pe nidya' kemero yabok bok, seleb iniwoka' anasa, alab, alja' obadya yuba doro diriga ban nang eb, neika' Betania heik sam byik. 11:12 Ampum maboka gwelegek dara, Yesus ab, alja mab ab, seleb Betania heikek ab lanawoka pikek balamek salek, Yesus ara gwaneng ok ubuk. 11:13 Wera Yesus ara mok so ab, ara gal mekla' hnon bolomoka' ak eibuk. Dara, alda gal doka hnon ulumlyek aboka, gal dam enyek an, oka biniboka kemelemok enyek, alda gal doka hnon eibnenggubok. Bok ban salek era, gal dok li lanawanggom adya, mekla' ok bolomoka' ak eibok. 11:14 Dara Yesus adya ban gal enyek an, "Wenyok moruwoka eimik eneba, anak ab doka hnon nim adya denggununjak," aboka lebok. Dara, alja ban wenyal yaboka' ara, alja yuba doro diriga ban nang eneba kebek. 11:15 Wera Yesus ab, alja yub dona' nang eb dara, Yerusalem heikek byik dara, Yesus ara seleb Imik Neyung ek bindiwoka, alda nimi rupiah amoma' ubdangoka, bona' dekoka ulumek nang ek yakal yabasuk. Amoma' uldan yangana' gal eb, yalma wining beiyiboka bukoka deklemek oulyang eb dara, alja dolub menegok. 11:16 Anya alda nim ara, Imik Neyung e erem pik, bona' bo dongoro yabana' ara mem hyok. 11:17 Dara ono' Yesus ara anyagan longomek nim ek nekel yabookanya, wenhyoka' ara, "Bukuk momnya doboka' ara, Nadya e nera nidya' mok nim emba heng uboka molona' e henemak aboka momnya dobnenggubuk de? Bok ugunja danyek, malya nang edya murukna' oulyanga seleb geblum," hyok. 11:18 Dara, Imik Neyung yuba wa gaka' dub nang eb, yuba neksin nang eb dara, ban yub enyek seleb kebek dara, sikda Yesus ak heka' huboka obnemab do aboka pik elemek. Nimi nauba alja neklesuka' anyek, salya uru lelelanya senelemeka' anasa, sikda alak loka daboka, pik elemek. 11:19 Wera sin dangoka inil yabok dara, Yesus ab alja yuba doro diriga ban nang eb dara, nauba heikek ab lanawoka gobek. 11:20 Wera ampum ara, maboka gwelegeekanya, Yesus ab, alja yub dona' nang eb dara, luguna' nong enyek, wamok gal dam pik an yabek dara, gal era mekla' ak aba' ara moruwoka yarang anaba yalamoka' ak eibik. 11:21 Wera danyek Petrus bera ampum so anyek seleb lemoka', anyek seiniwoka, alda Yesus ak, "Neyung neklesilimnya o, wera kendelom! Ampum anyek anja malya dalom amom gal era seleb yalawo!" hyok. 11:22 Anasa Yesus ara sikinek, "Ugunda Imik Neyung ak hyak dib senelelulum! 11:23 Hnon ban ugunuk dib lebsin, Nimi hnon ban mein enyek an, Anda lokoka senenggom mek gwan lomok bul bilom! henemso dara, alda ganya eb menegoka, una' loboka, ban wenyhena' ara, aldib unuwanamla' ak senewoka ganya dib senewanamla dara, alsamba unuwanamla. 11:24 Ban nenesa, nara ugunuk wenyhenesin, Ugunda yoka'-yoka' amba heng uboka mololelum dara, nunda ban era seleb dib dobab senewolulum. Dara, anera ugunuk aldib unuwanesil. 11:25 Anya, ugunda heng uboka molowanamun dara, yok nim ek meknewanyok senemun dara, ugunja neyung be imik heikek ululanya bera, ugunja meknena' eneba doboka bobogosulula' aboka, unu seinibdangamunya nera, men meebdanalum, hyok. 11:26 Bok, ugunda yok nim eb malya uldalalumnya nera, meewanggunulum dara, wera ugunja neyung Imik Neyung beneba, ugunja malya una' doboka boboganggunusil," hyok. 11:27 Wera Yesus ab, alja yuba doro diriga ban nang eb dara, Yerusalem heikek yek. Dara, Yesus ara Imik Neyung e erem pik kemero yabok enyek, yuba wa gaka' dub nang eb, yuba neksin nang eb, Yahudi dub nang eb, alak yek. 11:28 Yeiniboka Yesus ak, "Anda hek damok migib edya ban nidya' ara unululam do? Anya, heknedya ban migib enera anak elegajok, enyek ban yoka'-yoka' ara unululam do?" wenyaboka heibek. 11:29 Anasa Yesus ara sikenek lebnesuka' ara, "Nababya saaboka ugunuk hnonok heibnesin dara, ugunda saaboka anya' aboka lebnumun dara, wera nababya damok enedya yoka'-yoka' ara unulamna aboka, ugunuk neknesin. 11:30 Dara, Yohanes be nimi meka dalasuka' ara, nim ek ab gom, imik heik ab unuwanalam amoka' ak ulumok gom? Wera anyeganyeba' aboka neknenulum," hyok. 11:31 Wera anasa, sikda yuba saldalameka' ara, lebdekja, "Nunda imik heik ab henemab dara, wera alja nuk, dara hekasa ugunda Yohanes bek ara dib senenggululum do, henesil. 11:32 Bok nim ek ab hibyek!" aboka wenyabdek. Dara, nimi nauba ara, Yohanes bera aldib ununumna' lenya ulumla senelemeka' adya, sikda lok anasa, saaboka alak wenyhenggubek. 11:33 Anya sikda Yesus ak, "Nunda elgom," hyek. Danyek Yesus adya sikenek lebsuka' ara, "Wera ugumbabya lobluma' anasa, nababya hek migib edya ban nidya' ara unulamna aboka, laga neknenggunusin," hyok.
12:1 Dara ono' Yesus ara, sununa' adya sikenek nek einiwosuka' ara, "Nimi ben hnon anggur wa weboka mebgogowok dara, wa gokgobok nidya' leka' dob ganagamok. Dara, gal dok meka londelemnamna aboka, soko lokookanya, we sekna' e hnon imik moruwoka sobok. Ban seleb dara, nimi wa wen nang eboka welemnelum aboka, lebgogowok dara, alda yok mok sokok byuk. 12:2 Wera gal dok li yenewok dara, alda alja wa wenya be hnon gal doka wa wen nang ek ab, sikenek ab bo yananelem bar aboka orugok. 12:3 Bok an orugoknya bera yalamok enyek, wa weboka memelemek nang edya, saboka olomeka' ara, or nong baneng binilam aboka ob yakek. 12:4 Dara ono' anggur wa damnya bera, ono' yoknya bek sikenek bilom aboka orugok. Wera benebabya, wisa golom-golom aboka saboka olomeka' ara, derewoka wabek. 12:5 Dara wa damnya bera, yoknya bek ono' binilam aboka orugok. Wera benera hyak diba' owek. Dara yoknya yalamna nang era, hnon nang era embenga' saboka olosik bok, hnon nang era hyak diba' obek. 12:6 Wera wa damnya bedya alja yoka' nong me, wana' ulumok me nek hnonok lobonggok. Anya wera alja dara, nadya me yoka' nong ak anasa, mem senewanamak senewoka, sidya' nong ara, me nenyek sikenek binilam, hyok. 12:7 Bok wa meewoka ulumek nang era, sik moumen wenyabdek, me ara alja misa' dobnelanya. Anasa nunda alak obibya' adya, benedya misa' era nuk dobnemab, wenyaboka lebdek. 12:8 Dara sikda me nen saboka olomeka' ara, somogok dara, anggur wa leka' beiyik sam doboka bobogek," hyok. 12:9 Wenyabgogowok dara, Yesus ara Yahudi nang ek heibnesuka' ara, "Wera wa damnya bera, heka' hubnamla senelum do? Wa damnya bedya unuwanalanya nera ban: Alda yeiniboka men wa weboka memelemek nang era, nidya' obnamlakanya, wa ara yok nang ek ugunja welelulum aboka lebnamla. 12:10 Ugunda ban yub en Imik Neyung yuba momnya doboka' ara, hnon eininggululum de? Nim e son nang edya lorob girik era, men beiyiboka sunun girika dangoka ulumla. 12:11 Ban ununa' ara, Imik Neyung ak sam ab unulamla, wera nu hogung ak yok lok so' unulamla' nong ara, al an! wenyaboka momnya dobok," hyok. 12:12 Wenyek Yahudi dub nang edya dara, Yesus adya ban sunuwoka lebok yub era, nuk lelesil senewoka ella deka' anasa, Yesus ak salawoka heng goubnoba' senewoka ulumek. Bok, nimi nauba ulumeka' anyek lok anasa, sikda alak or lobeekanya, yokok sam byik. 12:13 Bok ono' dub nang edya, Parisi nang eb, Herodes bedya wa welemek nang eb, Yesus ak sene benewanoba' aboka alak bululum aboka orugeisik. 12:14 Dara sikda Yesus ak yeiniboka heibeka' ara, "Neyung neklesilimnya o, anda malya nimi nidya' hiboka pe neklesilim, hnon nang edya yub era malya senewoka jakman ganya bonggululama' anasa, wera anda Imik Neyung adya soko nim unuwanok senelamla' damok ara pe neklesilim. Anasa neyung, dubnya Kaisar bek soko amba rupiah eleganesibya dara, perob gom, orok gom? Anasa nunda deklemnesibya gom, orok gom?" wenyaboka heibek. 12:15 Wera Yesus ara, sikja sene heibeknya nera seleb ella ubsuukanya, alja sikenek lebnesuka' ara, "Ugunda hekasa nak ara sene sunulunulum do? Wera ugunda rupiah hnon, na kendenemna' anasa, bo yoululum," hyok. 12:16 Dara sikda bo yek. Dara, Yesus ara, "Anyeganara heknedya sununa' eb, momnya dona' eb ulumla do?" aboka heibsuk. Dara, "Kaisar dubnya wenesinya benya'," hyek. 12:17 Anasa, Yesus ara sikenek lebsuka' ara, "Wera anasa, Kaisar dubnya wenesinya bedyinya nera, dubnya Kaisar bek elegolulum. Anya, Imik Neyung adyinya nera, Imik Neyung ak elegolulum," hyok. Dara sikda alja wenyaboka neksuka' anyek, sikda hyak loka dabsuk. 12:18 Wera ono' Saduki nanga hnon Yesus ak heil yeilimek. Ban nang enedya dara, seleb somogamna nim era eimik ono' suboka buknenggunumak alamek nang. 12:19 Dara sikja Yesus ak, "Neyung neklesilimnya o, Musa bedya nuk an momnya doboka elegosuka' ara, Nimi be hnon gela doledyok me beilina' loboka somoganamla dara, alja weis edya lo somogalya gel gen doboka, somogelenya benesa me beib lunuwanamla', wenhyok," hyek. 12:20 "Wera, al kabo nang era nimi sekbadya nang ulumek. Yandonya bera gela doboka, me beilina' orok bok, somogok. 12:21 Dara ono', ana beremnya bedya gel genyek dobok bok, beneba me beilina' orok bok, somogok. Dara ono' ana winilinya bedya dobok. Wera ono' beneba me beibla henggonggom somogok. 12:22 Dara al sik nang yila' nidya' unubdibigemeka' ara, sekbadya nanga nidya' ara me beibnenggonggom somogeekanya, gel geneba sidya' dakoka somogok. 12:23 Anasa wera, nimi sekbadya nang dara, seleb nidya' nang neik gel genyek domek bok anasa, nimi suboka buknemak sum era, gel genyek dara, heknedya gel yoka' danamla do?" wenyaboka heibek. 12:24 Wenyek Yesus adya sikenek, "Ugunda Imik Neyung migib ab, Imik Neyung yuba momnya doboknya nera elgom ululuma' adya, wera ugunda ganya ongo ibsuk nang ek ululum. 12:25 Anasa wera, embenga' suboka buknemak sum era, nim ara gela nenya doldanggulumnemak bok, imik heikek lero nang eneso' anyek, ulumnemak. 12:26 Alda nimi somogamna nim embenga' suboka buna' ak sam amba dara, ugunda Musa bedya gal ek uk boka' ok singilimoka' amba leboka, momnya doboka' ara hnon eininggululum de? Dara ban momnya doboka' ara, Nara Abraham bedya Imik Neyung, Ishak bedya Imik Neyung, Yakub bedya Imik Neyung ulumna, aboka lebok. 12:27 Anasa Imik Neyung ara seleb somokdob nim edya' Imik Neyung unggulumla. Alda nim embenga' ulumak nim edya' Imik Neyung ulumla. Ugunuk danyek hyak ganya ongo ibdoba' nong ak ululum!" wenyhesuk. 12:28 Dara nimi be hnon Yahudi yuba neksinya bek yeindeboka, sik Yesus ab, Saduki nang eb, yuba saldalameka' ak kebok enyek, Yesus ara Yahudi nang edya alak heibeknya nera pe leboka' ak eibuk. Dara alda Yesus ak, "Neyung o, wenena' yub ara nidya' perob bok, har yub erek hyak dib nongnya nek ulumla do?" wenyaboka heibuk. 12:29 Anasa Yesus adya benyek an leboka' ara, "Hyak men nonogoka dib nongnya ulumla yub era, Wei, ugunda Israeli nim o, keblulum e! Nunja' wenelesilnya Imik Neyung ara, hnonok ok ulumla. 12:30 Anja' neyung Imik Neyung ak ganya gebman wana' ululom, anja nong una' gebman wana' ululom, anja ganya seinina' gebman wana' ululom, anja migib gebman wana' ululom, hyok. 12:31 Penenya nera, Andam nang an nong ak wana' uldalalam sok, anja' yok nim ek unu wana' ululom. Ban penya yuba damok danyek, hyak dib nongokanya, yoknya nera or soba' so ak ulumla," hyok. 12:32 Dara ono' yuba neksinya bedya Yesus ak, "Neyung neklesilimnya o, anda aldib bekna' nong leblam! Imik Neyung ak alak hnonok ok ulumlakanya, yoknya nera orok, al alak ok. 12:33 Wera, Imik Neyung ak ganya gebman wana' uboka, ella una' gebman adya hnon wana' uboka, ono' migib gebman adya hnon wana' uboka, ono' anja yok nim ek an damnya wana' uldalalam sok, unu wana' ulumnelam dara, perob nongnya nera an; alda Imik Neyung amba pam oboka beiyiboka, yoka'-yoka' nidya' giboka eleknanya nenegom," hyok. 12:34 Dara ono', Yahudi yuba neksinya bera pe leboka' ak eibuk dara, Yesus adya benyek an, "Anda Imik Neyung me dang meknewalam," hyok. Ban nen seleb dara, eimik era yok nim era ganya igin anasa, Yesus ak yoka'-yoka' hnon heibnenggubek. 12:35 Wera ono' Yesus ara anam Imik Neyung e erem pik yuba lelesuukanya, lero heibnesuka' ara, "Yahudi yuba neksin nang edya, Kristus ara Daud bedya me alamaknya nera, harsonya nek lelemak do? 12:36 Nenesa dara, Daud bera Imik Neyung Geisinya gologomoka' adya lebokja, Wenelesilnya bedya, nadya' wenelenelnya bek leboka' ara, Anda nadya' sirik soruk sam bulumena' moruwoka, anja isa' nang era, nadya anja' yan damumduk sam bo yanenggen, wenhyok," hyok. 12:37 "Dara, Daud beneba alak wenenanya hyok bok anasa, Daud bedya me heneseng dara, harso danamso do?" hyok. Dara nimi nauba longomeka' ara, Yesus adya neklesuka' anyek, ganya goluwoka kelemek. 12:38 Wera Yesus ara yuba neklesuukanya leboka' ara, "Nimi Yahudi yuba neksin nang enyek, waren akleng ongowoka, dekna' gasa' pik sekdo yabalameibya enyek giblisinok senelemak nang ek ara, pe keebdaboka ulululum. 12:39 Anya hnonda, Yahudi nim edya yub dona' ek ara, sikda men nonogoka bukoka, masa senenggoma' delemna' ak ara, men laga eibsinok senena' ak bulumak. 12:40 Sikda you gelewa edya e nenyek si hnoum aboka, Imik Neyung ak yuba warena' leboka heng uboka mololomak. Dara ban nenesa leboka, Imik Neyung adya igina kwena' ara, sikenek hyak nauba' dobnemak," hyok. 12:41 Dara yok sum enyek, Yesus ara nim Imik Neyung amba rupiah doronglomeka' ak mokso bukoka, huru doronglomak do aboka, kemelemok. Dara, nimi bona' dub nimi gong era rupiah nauba doronglemek. 12:42 Bok neikek anara, gela hnon yougel gek yeiniboka, hyak mek rupiah enyek penya makoka doronggok. 12:43 Anyek eiyiboka, Yesus adya alja yuba doro diriga ban nang ek anyagan yoululum aboka, sikenek, "Nara ugunuk dib lebsin, yok nimi gong dara, or mek so doronggak bok, ban yougel genyek, hyak nauba ak doronggamla. 12:44 Nimi gong dara, nauba ulumla' ak ab bok loboka doronggak bok, ban gel genyek dara, alba dena' amba boka' anyek, alak an ululanya nera nidya' gobdo doronggamla," wenyaboka lebok.
13:1 Wera Yesus ara Imik Neyung ek ab goboka yabok dara, alja yuba doro diriga bannya be hnonja Yesus ak, "Neyung neklesilimnya o, ban weiboka sorob girik mel-mel ana' eb, an sorob e danyek, hyak perob nong anyek kendelom," hyok. 13:2 Anasa Yesus ara alak, "Wera anda ban senenggoma' pero sorob e danara eiyilam goma? Wera ban denewoka sorob girik danera, hnon girik era go' yok girikek denewanggunumla, nidya' ara golowoka denghenemla' ak umla," hyok. 13:3 Yesus ara ono' Zaitun meinik sam biniboka, Imik Neyung ek sam kemero bulumok salek, Petrus beb, Yakobus beb, Yohanes beb, Andreas beb dara, sikbeyoka' Yesus ak heibek, 13:4 "Dara nuk wenyhenesilim, hek sum ek anera unuwanamlekanya, ban nidya' dengabdaknamla' amba dara, bekna' diba' ara hek damok ek lanawanamla do?" wenyaboka heibek. 13:5 Anasa Yesus ara sikenek, "Ugunuk hnon nim edya sonda' amba bobnenewoka lebsijek anasa, keeboka ulululum! 13:6 Eimik dara, nimi gong nadya si nek sibdangoka yanamaakanya lebnemakja, Alda na an, wenyaboka nimi gong sonda' leboka bobnenewanamak. 13:7 Anasa ugunda mal irr ana' gom, nimi nauba malya ura obdangdo yabalamak an yuba kebnelum dara, ganya oldanggom, mem. Ban yoka'-yoka' nidya' ara men unuru yabalemnamla, bok nera anam sidya'anya goma'. 13:8 Dara yok mok soko nim edya, yok mok soko nim ek mala boboka, nauba obdangdo yabalemnemak. Mok soko me sogouma' dorogoka, gwaneng oka' lanawanamla. Dara ban yoka'-yoka' unulumnamla' nidya' ara, wenyok yok un salek dorowonuna' aboka, anam ganya okna dabna' lanab einiwanamla' ara an." 13:9 "Bok ban ugun nong ara, pe keebdaboka ulumnelum! Eimik era ugunda yub amba yana lelesin nang ek dob elegoka, ugunda Yahudi nim edya yuba don e pik saboka olomnesak. Ugunda nasamba leboka, mok soko dub nang ek hnon, wenesin dub nang ek hnon, sik hougunguk laga nasamba yub enyek sikenek lelenoka' aboka, unulumnesak. 13:10 Bok Imik Neyung adya' perob lero yanggan yub ek dara, mok soko me nidya' men leb elekdo yibinimak. 13:11 Dara ugun nong ara henga geregoka, giliwoka bo biniboka, yok nang soruk ak dob eleganasak dara, nunda heka' huru yuba sabnemab senewoka ganya daldom-daldom ana' ara mem. Ugunja ganya doboka sabnenggunulum, alda Imik Neyung Geisinya adya sabnelabok anasa, wera ban salek enyek anak eleganenggela' sunuwoka, yub enyek or wenyhenelum. 13:12 Nimi be hnon alja' meneng hem benyek, yok nang ek or obnelum aboka dob eleganamla. Dara neikik, be hnonja ala' me ak unuwanamla. Hnonda meneng mab edya, sikja genonga neyung ak obdangoka yuba dil balameija dara, hnon diba' olomnemak. 13:13 Ugunda nadya si nenesa leboka, nimi nidya' ara ugunuk lek senelemnesak. Bok ban nidya' unuldalameija hnoum an siklewoka bulumlya' ara sidya' daknamla dara, benyek eimik era blebnamla," wenyaboka neksuk. 13:14 "Ugunda eimik era, yu una' hwam malya' ara unuwanggunumso senemeija' ak seknamla' eibnelum dara, nimi Yudea sokok ulumeija nim era mok soko meinik sam men doknol balanok. Anya ugun einiwanemun nim era, pe seiniwanalum. 13:15 Nim e dub pik buru yabalameija nim era, yoka'-yoka' e lomok ulumlya' anyek hnon dobnuna' aboka, e lomok wekna' ara mem. 13:16 Anya wak beiyik sam ulumeija nim era, ek aklenga dol yanggana' ara mem. 13:17 Ban unuwanamla sum nong enyek, nimi gela me bomeija gelewa eb, me anam moma dinilemeija gelewa eb dara, hyak okna dabnamla! 13:18 Ban nidya' lebnanya danera, moka yanggan li nenyek unuwalyek aboka, ugunda heng uboka mololelulum. 13:19 Wera ban yoka'-yoka' okna dabnesil salek yanamla sum era, Imik Neyung adya anam soko ullilimok sum enyek moruwoka, wen an ulumab salek, anya ono' eimik hnon sounuwoka unuwanggunumla igina kwelisina' enyek, hnon meka' unuwanggubuka' anyek lanawanamla. 13:20 Anasa Imik Neyung ara buruma' nenewanggunumso dara, wera soko nim era, go' hnon ubnenggunuseng. Bok Imik Neyung adya, alja weboka dobsuk nim emba leboka, mek buruma' nenewanamla." 13:21 "Ban unu malya nenewanesil sum era, yok nim edya ugunuk yeiniboka, kendululum, nimi blebsina' dubnya bera anyagan ulumla goma, kendululum, alda ono sam ulumla henesak dara, dib lebsak senenggom mem. 13:22 Anasa wera, eimik era sonda' anasa nara nimi blebsina' dubnya, nara ununumna' lenya ulumna henemak nang era, nauba lanawoka, sikja dara, nimi hnon weboka dobsuk nim ek bobnenewoka sonda' lebnemeibya' ak men aboka, yoka'-yoka' nauba bekna' eneba unuro yabalemnemak. 13:23 Ban yoka'-yoka' nidya' anam unuwanggumlya salek, nadya men orowek nidya' neksina' anasa, pe keeboka ulumnelum," hyok. 13:24 "Wera igin yaka' damok unubgogowanamla' seleb dara, eimik era heng ara guna' danamlakanya, wala' ara dilina' yebnenggunumla. 13:25 Dara ono' gura' nidya' imik ara sokok sam malyingginiboka, imik sam migib ulumla' nidya' ara borom-borom henemla. 13:26 Ban ane sum enyek, nimi diba' me nera im pik uboka, alja' senenggom migib senedya' gebman si imik nenena' ab, yanggalya' ak eibnemak. 13:27 Dara ban salek era, alda alja lero nang ek binilum aboka oruganesilikanya, alja weboka dobsuk nim era sokok an pika dombadya, soko dakalongna' ak ab ara, im dakalongna' ak ab eboka bo yanalum aboka oruganesil." 13:28 "Ara gal ek sunuwoka lebnamna' damok enyek pe kebnelum! Ugunda ara gal era soruka peboka ondoka buruwoka sangal yaban dara, wera gal dok li' ara seleb oka dal senewoka, ugunda ella ululum. 13:29 Anasonya neikek, yoka'-yoka' nidya' gigiwoka unuro yabalya dara, wera yanamla salek era seleb pik sindamak senewoka ella ubnelum. 13:30 Nara dib lebsin! Ban nidya' gigiwoka unuwanamla' ara, anam unuwanggumlya dara, wen an ulumak nim era nidya' denghenggunumak. 13:31 Im ab soko ab dara denghenelabok, nadya yub ek dara, denghenggunumla," hyok. 13:32 "Ban nidya' unuwanamla' anaba, nimi hnon hek sum ek, hek jam ek unuwanamla' ara, hyak elgom ulumak. Imik heikek sam ulumak lero nang eneba elgom ulumak, alja me neneba elgom ulumla, alda Imik Neyung ok albeyoka' ella ulumla. 13:33 Hek sum unnuwanamla' ara, ugunda elgom ululum bok anasa, ugunda pe keeboka diri ulumnulum. 13:34 Sununa' ara, nimi be hnon yok heik binibnekanya, alja wa wen nim ek nadya' ara pe diri bo ulululum aboka, anda wa nenyek welemnelam aboka wa yok-yok elege balasil. Dara pik sindamak sam welelanya bek, anda pe welsinilelom aboka oruga balamla sok, ubnamla. 13:35 Wera anasa, e damnya bera hek sum yanamla' ara, ugunda elgom ululum bok anasa, wera e damnya bera, alda sinik sam gom, inimnek dukdukanek gom, gweleknek yangman gom, henga doroklamla salek yanamla gom anasa, pe diri ulululum. 13:36 Alda yanggalya salek, ugunda hogunga malamuna' ak eibsilyek aboka, pe diri ulululum. 13:37 Nadya ugunuk an pe diri ulululum hesinya nenera, ono' nimi nidya' yok nim ek anaba, pe diri ulululum wenyalamna," hyok.
14:1 Israeli nim edya' eillosina' amba bekna' sum, Paskah sum eb, welena' orok roti gwanenga den suma yenewanamoka' ara, anam lika penya ok lobonggok. Ban salek era, yuba wa gaka' dub nang eb, yuba neksin nang eb dara, Yesus ak gelelenga heka' uboka heng geregoka obnemab do senewoka pik elemek. 14:2 Bok sikja lebeka' ara, "Senenggom malya damoka gliboka beibibyek anasa, senenggom sum emba yoka'-yoka' meewanamak salek era, unuwanggunumab," abdek. 14:3 Wera Yesus ara, Betania heikek sam gororoma' adya malya uro delemoknya Simon bedya' ek sam dena' dero bukek bok, gela hnon yok. Dara, gel gera alda peroba' gen-gen song mek, nauba rupiah deklemek anyek, gokno hmeiyek bo yeiniboka, joboka, Yesus adya' huk dubuk sam yekel golulumok. 14:4 Nimi wene nim anyagan ulumek nim era, anyek unulumoka' ak eibik dara, sikda yu ganya boboka lebeka' ara, "Heka' hublula' aboka peroba' ngikna' mek ara, bolol meneklamla do? 14:5 Ban mek enera gibna' hnonok amba dekna' dolomak rupiah anaso dekoka, ban rupiah era bona' garan ulumak nim ek eleganeseng!" hyeekanya, sikda gel genyek an nauba wabek. 14:6 Bok Yesus adya, "Alda or unululul! Alda nak perobnya nenyek unululabok, ugunda hekasa alak ganya igina nenelelum do? 14:7 Bona' garan uboka araweisiseng senen nim era, ugun gangganek sam soba' ulumak. Anasa ugunda arawanob senewanesom dara, sikenek arawanasusum. Bok nak dara, ugunub soba' neika' unggulumnemab. 14:8 Ban gel genedya unuwalnya nera, alja unuweisinya senelanya nera an unuwal. Ban gel genera nak soko loknenyaka' amba perob song mek enera, men orowek nadya nongok yek goluwanel. 14:9 Anasa, nara ugunuk hyak dib lebnesin, Mok soko me nidya' Imik Neyung adya' perob lero yanggan yuba lero yabalameija heikek ara, ban gel genedya nak an unuwanela' anyek, alak bekoka alja si silimnemak," hyok. 14:10 Dara, Yesus adya yuba doro diriga ban nang, obadya nang ek ab, be hnon alja si nera Yudas Iskariot bera, yuba wa gaka' dub nang ek, Yesus amba, sikenek yuba diringgel byuk. 14:11 Nimi wa gak nang era, Yudas Iskariot bedya unuwanasin an yuba kebek dara, perob aboka, nauba rupiah deknenjab aboka lebek. Dara, alda pewalya sum donok, Yesus ak oblulum hununa' aboka, pik elemok. 14:12 Wera welenggom roti gwanenga den sum, men nong sum era, nim ara giboka domba pam oro yabalamek salek, Yesus adya yuba doro diriga ban nang era alak, "Anja dara, har sam ak Paskah sum ansamba meewoka beibneseng senelam do?" aboka heibek. 14:13 Dara, Yesus ara alja yuba doro ban penya nang ek orugoka sikenek, "Ugunda nauba heikek sam burumun dara, nimi be hnon meka gweboka bo yabalenya bek eibnerum. Dara, benyek an dobol binirumukanya, 14:14 wekel yabelya e, e damnya bek an, Neklesilnya bedya wenyamla, nadya yuba doro diriga ban nang eb, nab dara, har ek sam Paskah sum amba neika' denemab do, wenyamla, henerum. 14:15 Dara benedya imik sam peroba' senenggom e nenyek, orowek pero-pero meeb loboka, yoka'-yoka' nidya' ulumlya' anyek lebnesil. Anasa, ugunda anyagan nunda Paskah amba denemaba' ara, meewanasurum," aboka orugosuk. 14:16 Dara, ban penya yuba doro diriga ban nang era nauba heikek biniboka, Yesus adya sikenek anaso unuwanarum amoka' ara, gigiwok ak eibdeekanya, Paskah sum amba sikda meewoka unuwarek. 14:17 Wera inimnek era, Yesus ab, alja obadya yuba doro diriga ban nang eb, anyagan yek. 14:18 Sikda anyagan bukoka dero balamek salek, Yesus ara sikenek, "Nara ugunuk wenyhenesina' ara, dib lebnesin, Ugun gangganek be hnon, nab neika' delenamnya bedya, alda nak obnenoka' aboka yuba dil binimla," hyok. 14:19 Ban wenhyoka' kebek dara, sikja ganya hyak suguwosuukanya, sikda be hnonok-hnonok Yesus ak, "Neyung o, ban nera nak danagom, goma?" wenyaboka heiru balamek. 14:20 Dara, alda sikenek, "Ugun obadya nang danyek, be hnon nab neik piringik delenamnya bedya, yuba dil bininel. 14:21 Anasa, aldib nimi diba' me nera, bukuk sam alsamba momnya dobok sok sunuwoka unuwanamla, bok yuba dil binilanya be nong anyek, alak hyak omom nonga danamla! Anasa, alda sokok an beilina' loseng dara, pemneseng!" hyok. 14:22 Wera sikda delemek dara, Yesus ara roti gwanenga dobookanya, perob aboka giboka, roti gwaneng en sob menegok dara, alja yuba doro diriga ban nang ek elegousuukanya, leboka' ara, "Wera nadya nong era ban, or doboka delelulum," hyok. 14:23 Nen seleb dara, alda mek hmeiya doboka, perob aboka gibuk dara, sikinek elegosuk. Dara sikda nidya' ara mek hmeiya enedyok doboka dero byik. 14:24 Anya alda sikenek, "Nadya eneng era ban, Imik Neyung adya unubdanamab aboka wenyamok eneng era, nimi nauba amba yeksin. 14:25 Nara ugunuk dib lebsin, Nak dara, ban anggur mek enera, denggulumnya' moruwoka, wenyoknya, Imik Neyung bedya' wenesin heikek sam ab, nara denemna," hyok. 14:26 Dara, sikda gibna bera hnon sebek dara, sikda Zaitun meinik sam byik. 14:27 Dara ono' Yesus ara hnon sikinek leboka' ara, "Yuba bukuk sam lero momnya dobokja, Nara sik bo ulumnesilnya benyek obnamna dara, alja bo ulusilya domba era, doluwoka bokdanamak, hyoka' anasa, ugumbabya nak dib senen ganya era doboka gilib meneganamla. 14:28 Bok, nara seleb suboka embenga' buknya dara, nak men Galilea sam bilimnamna," hyok. 14:29 Wenyek Petrus bedya Yesus ak, "Yok nang ek dara, aldib ganya gilib meneganalabok, nak dara, meka' unuwanggunumna," hyok. 14:30 Anasa Yesus adya Petrus bek, "Nara anak dib wenyhenenggen. Sumen inimnek era, ayam yub anam li penya ngoubnenggumlye salek, anda nak sonda' amba li winilya bobnenewoka, benera naba elnya goma' henelam," hyok. 14:31 Bok Petrus bera hyak yeiriwoka, "Nara anab neika' somogananama' anaba, nara anak elgom ulumna henggunumna," hyok. Dara ono' yok nang eneba neikso al wenyab ligiwek. 14:32 Wera Yesus ab alja yuba doro diriga ban nang eb dara, balameknya nera, Getsemani alamek sokok sam byik. Dara, Yesus ara alja yuba dona' nang ek, "Nara heng uboka molol bilimnya salek era, ugunda anyagan or diri bulunululum," hyok. 14:33 Dara Yesus ara, Petrus beb, Yohanes beb, Yakobus beb, neika' binimab aboka eboka bobsuk. Dara, alda ganya loka daboka ingmuna bere-bere balamok. 14:34 Anasa Yesus ara sikinek, "Nara hyak ganya angoo senewanakanya, somogamen ganya beibnela' anasa, ugunda anyagan uboka, kemero diri ulunululum!" hyok. 14:35 Dara Yesus ara mek mok so biniboka, sokok eilib maboka, heng uboka mololomok. "Wera or dara, ban salek era nak ab gomowolul," aboka mololemok. 14:36 Alja mololomoka' ara, "Neyung o, wei, neyung o, anda yoka'-yoka' ak dara, unuwanasoma' ok. Ban mek hmeiya ara, nak anyeb dobnelam bok, nadya ganya edya anaso unuwanaso senenenya nek unuwalyek, alda anja senemenya nenyek or unuwonulul," aboka mololomok. 14:37 Seleb dara, alda yuba doro diriga ban nang ek samawoka onok yalamok enyek, sik winilya dara, hogunga mameka' ak eibsuk. Anasa Yesus ara Petrus bek, "Simon o, anda hogung malalam de? Diri bun dara, jama hnonoka' anaba, okna de? 14:38 Ugunda nimi sunulyamasina' lomok sam malyinggumunuk aboka, diri ubdangoka, heng uboka mololdalalulum. Ganya ak dara, pe unuwanamso bok, nong ak dara, hmeng ulumla," hyok. 14:39 Dara ono' Yesus ara loboka, men molomok molona' enyek, onsok saaboka molol byuk. 14:40 Wera ono', alda onsok yalamok enyek, sikda heng igina berewosuka' anasa, hogung seleb mameka' adya, alak heka' henoba' goma' aboka yuba sab eleganggubek. 14:41 Wera Yesus ara, ono' saaboka li winilinya yeiniboka' sikinek, "Or malye, hogung maboka dek-deka soblulum. Or seleb e. Kendululum! Nimi diba' me nera doboka malya una' nang soruk eleganamak salek era, wera seleb oka dal. 14:42 Wera binimaba' anasa, lanawolulum. Nak obnelum aboka yuba dil bililanya bera, seleb oka yanggala' anasa, binimab!" wenyaboka eboka bobsuk. 14:43 Yesus ara anam yuba salamok sab-sab, alja obadya yuba doro diriga ban nang ek ab, ben hnon Yudas alameknya bera lanawok. Dara parang ab, dolukna' gama' ab, bomek nang enera, sikda yuba wa gaka' dub nang eb, yuba neksin nang eb, Yahudi soko dub nang eb dadya, henga goubnelum aboka orugeisik nang eb, Yudas beb neika' yek. 14:44 Wera yuba dil bilimoknya bera, orowek sikinek banyek wenyasuk, "Nadya songa diniwoka gibnennya bera, wera alda an. Anasa, ugunda benyek henga goubnelumukanya, alda pe bo yanalum," wenyabgogomok. 14:45 Anasa alda anyagan seleb yok dara, alda men Yesus ak biniboka, "Neyung neklesilimnya o!" hyookanya, uruma meka hmobok. 14:46 Dara neika' yeilimek nang era, Yesus ak soruka salawoka, henga goubek. 14:47 Bok be hnon anyagan yuba dona' nang olowoknya bedya, yuba wa gaka' dubnya alja wa wenya bek, gabo doboka o mekla' anyek garawok. 14:48 Anasa Yesus ara sikenek, "Ugunja dara, nara yu hwam dubnya senenulumukanya, parang ab dolukna' gama' ab, nak henga goubnenoba' aboka bo bo yeililum de? 14:49 Li soba' nara ugunja' hogung ak, Imik Neyung e eremek sam yuba neklesin dara, ugunda nak henga goubnenggulunulum. Bok, Imik Neyung yuba momnya doboka' anyek, gigiwanamla' anasa, or malye," hyok. 14:50 Dara, alja yuba doro diriga ban nanga nidya' ara, alak loboka, yok-yok sen-senem abgokek. 14:51 Alda nimi goubenenya ben hnon, wameldana' adyok nonga lilibdangamoknya bek, Yesus ak dobgiga balamok. Dara sik yok nang edya, alak henga goubnoba' ul yabek, 14:52 bok alda lilibdangamoka' ara gwirib loboka, nong baneng yeiri byuk. 14:53 Dara Yesus ara yuba wa gaknya senenggomnya bek sam bo byik. Dara, yuba wa gaka' dub nang eb, yuba neksin nang eb, Yahudi soko dub nang eb dara, nidya' anyagan longomek. 14:54 Bok, Petrus bera mok ab keebgiga balamoka' ara, yuba wa gaka' dubnya bedya' eremek sam biniboka, yin bona' nang eblaboka neika' uka beiyimeka' ak sam lekeldalamok. 14:55 Wera yuba wa gaka' dub nang gong eb, nimi yan lelesina' dub nang eb dara, Yesus adya malya uboka' bekna' diba' anyek elemek bok, unuwanasengnya hnon meka' eibnenggubek. 14:56 Nimi nauba e yeiniboka, aldib malya ulumla aboka sonda anasa wenyalamek bok, sikja lelemeknya nidya' ara, salya' ourubdangoka leldalamek. 14:57 Dara, nimi wene nang sekoka, sonda' anasa bobnenewoka aldib malya ulumla aboka ban unu miniwek, 14:58 "Nunja kemouba' ara, ban benedya wenyalamokja, Nara Imik Neyung e, ban nim adya solomeknya nera, golowanamnakanya, nimi soruk adya songgulumaknya nenyek, lika winilya ok sobnamna," wenyalamok aboka miniwek. 14:59 Bok nang nenedya wenyaboka lebeknya neneba, bekna' dangal binggubuk. 14:60 Wenyek Imik Neyung yuba wa gaka' dubnya bedya, nimi nidya' gangganek sam sekoka Yesus ak, "Anak an nidya' unulamla aboka yana kiboka lelenjaknya nera, har so do? Anda orok aboka yuba doro sanggululam de?" aboka heibuk. 14:61 Bok alda gobdo gelegoka, yuba meka' doro sabnenggumok. Wenyek Imik Neyung yuba wa gaka' dubnya bedya Yesus ak saaboka, "Anda nimi blebsina' dubnya, Kristus, peroba' ak ululul senelemaknya bedya me de?" aboka heibuk. 14:62 Wenyek Yesus adya leboka' ara, "Benera na an! Nimi diba' me nera imik migiba' ululanya bedya' sirikek sam buknamlakanya, deba' ganggan pik uboka yanggalya dara, anda eibnelam," hyok. 14:63 Dara, Imik Neyung yuba wa gaka' dubnya bera, alja boksom gweldek menegoka leboka' ara, "Yok laga aldib unuwok an nang era, heka' amba hnon ebnamab? 14:64 Aldamnya Imik Neyung si malya nenelamla' damok ara, ugumba yok okoka keblum. Anasa, ugunja dara, heka' senewolum do?" hyok. Dara sikda nidya', "Or obnok," hyek. 14:65 Dara nimi wene nim era, Yesus ak gamala' solob goluwoka, alja heng ara, akleng adya norowoka soruk adya olomeekanya, lelemeka' ara, "Wei, ununumna' lenya o, anara heknedya olonggel do?" aboka lelemek. Anya, yin bona' nang edya' anaba, soruk wabna' adya olomek. 14:66 Ban salek era, Petrus bera anam erem damumduk sam seklemok. Dara, Imik Neyung yuba wa gaka' dubnya bedya, alja ek wa gel ge hnon anyagan yok. 14:67 Yeiniboka, Petrus bera anam uka lekeldalamoka' ak eibuk dara, hogunga pe keeboka lebokja, "Ambabya Nazaret mok ebnya Yesus beb, neika' ulurumnya benya'," hyok. 14:68 Bok alda sonda' amba leboka' ara, "Nara ella unggulumnakanya, anja leblamnya nera, anyek lebla' senewanggubna," wenhyok. Dara, Petrus bera anyaganera loboka, e sindamak pikek sam byuk. Ban salek enyek, ayam yuba ngoubuk. 14:69 Dara, on gel gera Petrus bek ono' eibuk dara, alda anyagan longomek nim ek an, "Ban benera, sikinek abnya hnon an," hyok. 14:70 Bok Petrus bera, sonda' amba hnon gunuwoka orok hyok. Ono' mandewanggonggom anyagan seklemek nim edya, Petrus bek, "Anda Galilea mok ebnya bek anasa, al ambabya sikeneb neika' ululumnya benya'!" hyek. 14:71 Dara, Petrus bera mema' si sibuka wenhyok, "Ugunja lelelumnya bera, nara elgom ulunanya bek lelenulum!" hyok. 14:72 Dara al wene sab-sab, ayam yuba penenya ngoubuk. Wenyek Petrus bera, Yesus adya alak men danyek, "Anda ayam yuba li penya ngoubnenggulyebok, anda nak sonda' amba lika winilya bobnenewoka sonda' lebnenelem," amoknya nek seiniwok. Anasa, alda anyek seiniwoka, goukdik-goukdik aboka nauba engewok.
15:1 Hyak luguna' nong dara, yuba wa gaka' dub nang eb, Yahudi dub nang eb, yuba neksin nang eb, yuba yana lelesin nanga nidya', ban nang dara, unuwanamab aboka yuba seleb sabek. Dara, sikda Yesus ak henga geregoka bo balameknya nera, Pilatus bek bo elegel byik. 15:2 Dara Pilatus bera Yesus ak, "Anda Yahudi nimi dubnya ululam de?" wenyaboka heibuk. Wenyek Yesus ara, "Alan, anja leblam an," hyok. 15:3 Wenyek yuba wa gaka' dub nang era, alak sonda' amba malya unulamla aboka, yoka'-yoka' nauba yana kiboka lelemek. 15:4 Anasa Pilatus bera Yesus ak hnon, "Anak yoka'-yoka' nauba yana kiboka lelenjaknya nera eiyilam de? Anasa anda, nera aldib, nera orok, aro lebnenggunusom de?" aboka heibuk. 15:5 Bok Yesus ara, anam hyak meka' yuba doro sana' orok anasa, Pilatus beneba alda hekasa do senewok. 15:6 Wera Yahudi nim edya perob sum yenewana dara, nimi nauba yok nim edya yuba saboka, benyek henga lobnesilim aboka molowan dara, henga geregoka beiyimna nang era lobol lolosuk. Dara ban anaso ununanya nera, soba' unulusuk. 15:7 Wera ban salek era, nimi heika doluwoka oldalamek sum enyek, nim omeka' anasa, be hnonda Barabas beb, ono' yok nang eb henga geregoka beiyimek. 15:8 Anasa nimi nauba longol yeiniboka, unulusilima' sunuwoka, be hnon nunsamba henga lob lobsilom aboka molowek. 15:9-10 Yuba wa gaka' dub nang danera, hman ganya boboka, Yesus ara doboka elegel bilimeka' ella umoka' anasa, Pilatus bedya nimi nauba longomek nim ek, "Wera Yahudi dubnya benyek, ugunsamba henga lob lobnesin de?" wenyaboka heibsuk. 15:11 Bok yuba wa gaka' dub nang era, yok nim ek wenewoka Pilatus bek nunsamba dara, Barabas benyek henga lob lobnelam henelum aboka orugeisik. 15:12 Wenyek Pilatus bera nimi nauba longomek nim ek, "Ugunja Barabas benyek, nunsamba henga lob lobsilom hulum dara, Yahudi nimi dubnya alalumnya bek dara, heka' hubnamna do?" aboka heibsuk. 15:13 Dara sikda, "Alda bera, oboka gal ak glabnok," aboka yeiriwoka lelemek. 15:14 Wenyek Pilatus bera sikenek, "Bok alda heka' ak meknewok do?" aboka heibsuk. Bok nimi nauba longomek nim era, "Alda bera, oboka gal ak glabnok," aboka ono' nauba yeiriwoka lelemek. 15:15 Anasa, Pilatus bera nimi ganya hekiyiwosunun senewoka, alda Barabas benyek siksamba henga lob lobsuk. Bok Yesus bek dara, legebna' adya legeb-legeba obeekanya, oboka gal ak glabnelum aboka doboka elegousuk. 15:16 Dara Yesus ara yin bona' nang edya doboka bo balameknya nera, mok soko dubnya bedya' ek bo byik. Anya, yin bona' nanga nidya' ara, mamaganalum aboka wenyabdangamek. 15:17 Dara, sikja Yesus ak mouk dok boka' akleng ongoyiwoka, gal si henga gwanewoka Yesus adya huk ak gwaragiyiwek. 15:18 Anya, sikda Yesus ak nauba sonda' amba giboka lelemeka' ara, "Yahudi nimi dubnya o, perob aboka gibjab," alamek. 15:19 Sikda Yesus adya' huk ak gama' adya saboka oboka, gamala' nauba solob gouluwoka, ono' sene alak nauba oumuwoka giblemek. 15:20 Wera nauba sene seleb wenyabgogowek dara, mouk dok boka' akleng ongiyimeka' ara gwiriwoka, alja' yoka' akleng ongiyiwek. Dara wera, oboka glabnoba' aboka, doboka bo gobek. 15:21 Wera obnoba' aboka pikek bo bek dara, nimi be hnon, Aleksander beb, Ufus beb dadya sikja' neyung, Kirene mokek abnya, Simon benyek, mek heikek aba' ara nauba heikek yanggoka' anyek, duka' lolowoka, Yesus ak oboka glabnemek gal ek bobnelam aboka orugek. 15:22 Dara, Yesus ara bo balameknya nera, mok soko meina, si ara Golgota, nunja yub edya dara, "Huk yanggol mein," alameka' ak sam bo byik. 15:23 Wera anyagan bo byikek ab dara, anggur mek ab, sik mek ab meemeka' anyek, Yesus ak elegek bok, dogom hyok. 15:24 Anya Yesus ara oboka gal ak seleb glabek. Dara, alja aklenga gwiriwoka domeka' anyek, heknyek dobnamla do aboka, yina bomdewoka ulumek. 15:25 Yesus ara luguna' henga ikil yalamla jam sembilan anyek, oboka gal ak glabek. 15:26 Dara, anasa omab ana' diba' ara, "Yahudi dubnya an e," aboka momnya doboka elegek. 15:27 Wera Yesus oboka glabeka' ak ara, yu hwam nang, nimi penya oboka neika' glabsik. Dara, be hnonda sirikek sam, ono' yoknya bera waneng ek sam uboka glabek. 15:28 Ban unuweknya nera, yuba bukuk sam men lero momnya doboka' ara, "Alda hiboka malya una' nim aboka einiwanamak," hyoknya nenyek gigiwolula' aboka ubek. 15:29 Dara Yesus oboka glabamek pik an yaban nim edya, huka gwakdewoka, derewoka walameka' ara, "Anda Imik Neyung e golowoka beibnyekanya, nadya dara, lika winilyok sobnamna alalumnya o, 15:30 anda oboka glabanjak gal ak anyeb, merero beiyiboka sokok yinggimenekanya blebdalom!" wenyaboka walamek. 15:31 Anasonya nera, ono' yuba wa gaka' dub nang eb, yuba neksin nang eb danaba, Yesus ak nauba derewoka walamek. Anya sik moumen, "Nimi yok nim era nauba merellilisuk bok, al damnya dara, merebdamenggom! 15:32 Alda Israeli nimi dubnya, nimi blebsina' dubnya bera, nunda alak eiyiboka dib senewanamab anasa, glabna' gal ak aba' ara, sokok yinggulul," aboka derelemek. Anya ono' ban penya oboka glasik nang edya' anaba, alak derewoka walerek. 15:33 Dara yubyek dukdukanek jam duabelas so' enyek, mok soko nidya' ara inibmorumoka' ara, jam tiga anaso sinik dok. 15:34 Wera ban salek era, Yesus ara nauba' bii aboka, "Eloi, Eloi, lama sabakhtani?" wenyaboka bii alamok. Nunja yub edya dara, "Nadya' Imik Neyung o, nadya' Imik Neyung o, anda hekasa nak lo yibinelem do?" alamok. 15:35 Dara anyagan hnon seklemek nim edya, Yesus adya an wenyaboka lel yaboka' anyek kebek dara, "Wera alda Elia be youblamla' anyek keblulum!" hyek. 15:36 Wenyek nimi be hnon yeiriwoka, gal esa' do yeindeboka, yu anggur mek ek hwiboka, gal benggena' ak lomowoka, Yesus adya' sik enegel yabookanya, "Elia bedya yeiniboka blebnamla gom, oroka' ara eibnemab anasa, or loboka diri ubnemab," aboka lebok. 15:37 Dara, Yesus ara ebngalagoka lelemoka' ara, dubhina dakoka somogok. 15:38 Ban salek era, Imik Neyung e lomok sam wiknelemek boksom akleng era, imik ab ara, sokok sam nidya' gweldegok. 15:39 Dara, yin bona' dubnya anyagan we seklemoka' ara, Yesus ara an unura somogoka' ak okoka eibuk dara, alja leboka' ara, "Aldib, ban benera alda Imik Neyung bedya me ulumo!" wenyaboka lebok. 15:40 Dara ono al neikek ara, gelewa wene nim mok ab sekoka, nidya' an unulumoka' ara kemelemek. Wera gelewa gong dara, hnonda Maria Magdalena, hnonda mek Yakobus, Yoses eilin Maria, hnonda Salome ge hnon ulumek. 15:41 Yesus ara Galilea sokok anam ulumok dara, sikda Yesus ab neika' ulumeekanya, aralamek gelewa. Dara ono' anyaganara, Yesus ab neika' Yerusalem heikek ab yeilimek gelewa gong, yok nimi hnoum ulumek. 15:42 Dara mok soko ara, seleb sin dangoka iniwonuna' ubuk salek, anya ban sum era, mem sum gibnemab senewoka memero ulumek sum. 15:43 Wera anasa, Arematea mok ebnya, Yusuf bera, alda yuba yana lelesin nang wa wenya perobnya ulumookanya, Imik Neyung adya wenelemnesila' ara, eibnuna' aboka diri ulumok. Dara, alda asa' ganya boboka Pilatus bek, Yesus adya be' dakoka dibnamna aboka molol byuk. 15:44 Wera Pilatus bera Yesus ara seleb somogamla an yuba kebok dara, loka dabok. Anasa, Pilatus bera yin bona' dubnya bek yalom aboka, Yesus ara seleb somogamla gom aboka heibuk. 15:45 Dara, Pilatus bera yin bona' dubnya bedya Yesus ara aldib seleb somogamla hyoka' ak kebok dara, Yusuf bek, "Yesus adya be' era, or dakoka dibnelam," hyok. 15:46 Dara, Yusuf bera nimi keboka dilin boksoma peroba' anyek dekok dara, Yesus adya be' dakoka nimi ken akleng edya kebok. Dara, Yesus nong ara keboka mok soko mein lomok girika hokomeka' ak sam doronggoka dibuk. Seleb dibuk dara, girik adya demegoka pika leboka seregok. 15:47 Ban unu dililemek salek era, Maria Magdalena geb, Yoses eilin Maria geb dara, anyagan dibuka' ak ara eibdek.
16:1 Wera sikja Sabat mem sum era seleb iniwok dara, Maria Magdalena geb, Yakobus eilin ge Maria geb, Salome geb dara, Yesus be' ngikil binimab aboka, perob song ngikna' mek dekek. 16:2 Wera minggu en men sum yenewok dara, luguna' nonga henga dorogol yabok dara, gelewa dara, Yesus diyimeka' ak sam balamek. 16:3 Wera gelewa dara, pikek anam balameekanya, "Yesus diyiboka pika seregerob girik era, heknedya arawoka demeganesil do?" aboka lebdanggiga balameka' ara, 16:4 dilina' ak sam biniboka kemelemek enyek, pik serekna' girik ara, hyak senenggom bok, seleb demegemeka' ak eibek. 16:5 Wera gelewa dara, Yesus diyimeka' lomok sam wekoka kemelemek enyek, nimi goubenenya be hnon, geisa akleng ongomoknya benyek, sirik sam bulumoka' ak eibek. Dara, sikda anyek eiyiboka loka dabsuk. 16:6 Bok goubenenya benedya sikenek, "Ugunda lok ganya bona' ara mem! Ugunda Yesus ban Nazaret mok ebnya, seleb oboka galak glarobnya benyek, elelum. Alda seleb embenga' suboka bukumla. Alda anyagan ara unggulumla. Wera al beiyimounga' ak ara, anyek kendululum. 16:7 Bok ugunda wera biniboka, alja yuba doro diriga ban nang eb, Petrus beb, ban yub enyek, sikenek wenyhenelum, Alda men Galilea sokok sam bilimla. Ugunuk men orowek seleb wenyhusuk sok, ugunda anyagonob eibnelum, wenyhenelum," hyok. 16:8 Wera gelewa dara, lok adya ber-ber aboka dilina' ak ab gobek dara, yeiri byik. Dara, sikda lok anasa, yok nim ek wenyana' ara wenyhenggubek. 16:9 Yesus ara, minggu en men sum luguna' danyek, seleb embenga' subok dara, men dara, alda Maria Magdalena gek aabdok. Ban Maria gera, Yesus adya sekbadya bisa' yakamok gel. 16:10 Dara gel gera, Yesus alja hemyab era, solom amba engero pelemek nang ek, unuwal aro nekdo byuk. 16:11 Bok, sikda Yesus ara seleb suboka embenga' bukumla' anyek, alja eiyimla an yuba kebek dara, sikda sonda' lelemla senewek. 16:12 Nen seleb dara, alda ono' yok penya yuba dona' nang ek, yok mek heikek balarek salek, alda yoknya gebdangoka aabdok. 16:13 Dara, ban penya nang era, nunja' Yesus subla' ak eibnam aboka, yok yuba dona' nang ek nekdo yarek bok, sikja' anaba, sonda lelerak senewek. 16:14 Unubgiga balamoka' ara, Yesus ara alja yuba doro diriga ban nanga goklombadya nanga delemeka' hnoum aabdok. Dara, nimi yok nim edya Yesus ara seleb embenga' suboka bukumla' eiyimab alameka' kelemekjok, ganya gasa uboka, okoka dib senewanggumeka' anasa leboka, Yesus adya sikenek wabsuk. 16:15 Ono', alda sikenek wenhyok, "Ugunda yok mok soko me nidya' biniboka, perob lero yanggan yub era, nimi nidya' ak leb elekdo yabalemnelum. 16:16 Nimi nidya' yuba dib senenggulumeija nim era, igina kweiyiwanesil bok, yuba dib senewoka meka dalesija nim era, blebnesil. 16:17 Ban nim enera, yuba dib dobek bekna' diba' ara, ban migib enyek ulumnesil, yuba dib senewoka domeija nim edya, nadya si sibuka bisa' yaklemnemak, sikda sikba elgom yuba, wenyok yok yuba, saro yabalemnemak, 16:18 sikda baga' soruka salawoka, nimi somokna' meka delemeija' anaba, somokna' damoka sikenek meka' yanggunumla. Sikda nimi neiklemeija' ak, soruka dililemeija enyek, neiklemeija nim era, gobdo merelemnemak," wenyaboka lebsuk. 16:19 Wera Yesus ara, alja yuba doro diriga ban nang ek seleb wenyabgogowok dara, alda imik heikek sam welewookanya, Imik Neyung adya sirik sam bukok. 16:20 Dara, alja yuba doro diriga ban nang era, yok-yok moka biniboka, Imik Neyung ak ab perob yub era, lero yabalemek. Dara, sikja yuba lelemeka' ak, dib lelemak aboka, Wenelesilnya beneba neika' aralasuka' adya, sikja' yoka'-yoka' unulumeka' ara, bekna' diba' ara laga dangalamok.
1:1 Teofilus, perob senenggomnya o! Nimi nauba adya nu gangganek an yoka'-yoka' nidya' unulumoka' ara, pe yana lelewoka bolowoka momnya dobnob senewoka dulumak. 1:2 Ban nidya' yoka'-yoka' unulumoka' anyek, men ek ab okoka eiyiboka kemek nang edya, anya ono' sikja dara, yok nim ek leb elekdo yabalamak nang edya, nuk lero yeilisik sok, sikda anara lelewoka momnya dolomak. 1:3 Wera anasa, unulumoknya nidya' ara, nadya anam men unub einimoka' aba' ara seleb pe lelewoka einiro yasakanya, nara neyung anak ban nidya' ara pe yana lelewoka momnya doboka, beibgunun senewoka ulumna. 1:4 Wera anedya, neyung anak an neklenjek yuba dara, aldib unumoka' ak senewoka ella ululoma' aboka unuwanamna. 1:5 Wera Herodes bera Yudea sokok sam wenesin dubnya dangoka ulumok sum enyek, Imik Neyung yuba wa gaknya hnon alja si Zakharia, Abia nang yila' ak abnya bek ulumok. Alja gel gedya si nera Elisabet, albabya Harun nimi yila' ak ab gel gek ulumok. 1:6 Dara sik nang penya era, Imik Neyung ganya ak pe hekel eleklereekanya, Imik Neyung adya oruksin yub eb, soba' amba meemen yub eb dara, meknena' oroka' anyek, pe unulurek. 1:7 Bok, Elisabet gera seleb me you gel dangamookanya, sik nang penya era seleb yamen dangarek adya, sikda me hnon beibnenggurek. 1:8 Dara yok sum enyek, al nang yila' adya Imik Neyung ak pama oboka beilin sum dangamok dara, Zakharia bera Imik Neyung saramek ban wa nenyek webe balamok. 1:9 Nenera sik wa nen welemek nanga nidya' hiboka, or soba' unulumek sok, ban sum era heknyek wekoka gibnemak do aboka aklenga bomdemek dara, wera Zakharia bedya Imik Neyung e lomok wekoka, unuruwa' ara alja uka daboka gibnamla aboka sekiyimek. 1:10 Wera ban anam Imik Neyung adya mem ek sam uka daboka gibna' salek dok dara, beiyek sam ara nimi nauba longowoka diri uboka, heng uboka mololemek. 1:11 Dara ban unulumok salek, Wenelesilnya bedya lero era uka daboka gibna' oulyanga sirik ek sam alak lanawoka sekok. 1:12 Alda anyek eillilimok dara, alja ganya eb menegoka loka dabok. 1:13 Bok lero enedya alak, "Zakharia o, anda lok ganya bonggom mem! Imik Neyung ara anja molona' seleb kenggel. Anja gel Elisabet gera me bobnamlakanya, nengma ak beibnamla. Dara, me si ara Yohanes aboka sibnelam. 1:14 Dara, anda perob senewoka ganya eiya dabnenggel. Anya ono' yok nimi nauba adya' anaba, ban al beiblya' amba leboka hyak perob anasa, eiya dabnesil. 1:15 Anasa alda, Wenelesilnya bedya' saramek ab senenggomnya danamlakanya, yu mek gom, anggur dok mek ab dara, denggulumnamla. Anya alda anam beiblya salek eba' ara moruwoka, Imik Neyung Geisinya adyok deknewoka ulumnamla. 1:16 Dara al adya, nim Israeli nimi nauba sikja' Wenelesilnya Imik Neyung bek sam saaboka doboka bo yanasil. 1:17 Anya alda Wenelesilnya bek ab dara, alak men yuba lero bokol yangganya danamla. Dara alda Elia be ulumok sok, eili bera ala' me ak ganya dangawoka, ganya malya nim era pelemak nimi ganya ak dangawoka unuwanoka' aboka, hyak migibnya senenggomnya ulumnamla. Ban unuwanamla' adya, Wenelesilnya bemba nimi nauba orowek meewoka beibnamla," hyok. 1:18 Wenyek Zakharia bera lero ak, "Ban leblam yub era, nara aldib dib danamla' anya' aboka dara, heka' huboka ella danamna do? Nera nara seleb yamen dasakanya, ono' nadya gel geneba nonga kaboka, seleb yamen anasa lebna," hyok. 1:19 Dara ono' on lero enedya Zakharia bek, "Na anera Gabriel, Imik Neyung al dam uboka arana'anya ulumna. Dara Imik Neyung adya Zakharia bek wenyal bilom aboka bokdo dorogonela' ak, ban perob yub enera wenyal yeilinggen. 1:20 Wera heka' ak nadya nidya' lebna' ara, anda dib senewanggublam anasa, anda yuba goma dangamena' ara, ban nidya' lebnanya nen pe gigiwalya sum era, anda ono' yuba sab einiwanelam," hyok. 1:21 Dara ban salek era, nimi nauba Zakharia bek diri ubdibigemek. Dara Zakharia bera Imik Neyung e lomok ara, hekasa mandemla do senewoka ganya lokja senemek. 1:22 Bok Zakharia bera seleb beiyek goboka yibok dara, anyagan alak diri ulumek nim ek sam yuba hnon sab eleganggubsuk dara, alda Wenelesilnya bedya e lomok ara yoka' hnon eiyimla senewoka ella ubek. Anya alda seleb yuba sibama' leboka, yuba goma dangamoka' anasa, soruk adya ok gwakdewoka lelemok. 1:23 Dara Wenelesilnya bedya' ek sam alja webnesonya wa nera seleb webdakok dara, alda ek sam byuk. 1:24 Wera ubdabla henggonggom, ala' gel Elisabet gera me bobok. Dara, ek ab gobna' orok anyek, wala' lambadya mabok. 1:25 Anya lebokja, "Wera Wenelesilnya bedya nasamba yoka' unuwanela' ara an. Anya wera, ono' alja nak eiyiba darawanyoknya nera, nimi hougung ak ab dara gebdebnenel anya'," wenhyok. 1:26 Wera seleb hnab wala' yenewok dara, Imik Neyung lero si Gabriel ak, anda Galilea sokok, hnon heik si ara Nazaret heikek, binilam aboka orugok. 1:27 Dara nenya meka' salana' orok gel, goubenenya be hnon, Yusuf alameknya, alda Daud nang yila' ak abnya bedya molob lomok gel, alja si nera Maria gek, alak binilam aboka orugok. 1:28 Wera lero era Maria gedya' ek sam wekel yeiniboka, "Wei perob, anak perob senelenggel gel o! Wenelesilnya bera anab neika' ulurum," hyok. 1:29 Dara Maria gera ban wenhyoka' anyek kebookanya, alda hyak lok ganya boboka, ganya lomok, wera ban unuro gibnela' ara, damok ara heka' amba lebla do senewoka seiniwok. 1:30 Bok an lero enedya saaboka Maria gek, "Wei Maria o, Imik Neyung hogung ak ara anak perob senenggela' anasa, anda lok ganya bona' ara mem. 1:31 Aldib, anda me bobnelamakanya, nengma hnon beibnelam. Dara alja si nera Yesus aboka sibnelam. 1:32 Alda hyak imiknya danamlakanya, Imik Neyung imik ululanya bedya me aboka si silimnemak. Anya Wenelesilnya Imik Neyung adya, aljabo Daud bek dubnya bulumok ekla buna' enyek, alak eleganamla. 1:33 Anya alda Yakub nang yila' ak wenesin dubnya dangoka, hyak sob-soba' ulumnamlakanya, alja wenelemnesila' ara hyak denghenggunumla," hyok. 1:34 Bok Maria gedya lero enyek an, "Nara nenya adya hnon meka' salanena' orok bok anasa, ban leblamnya nera har so huboka nak ara dib danamla do?" hyok. 1:35 Wenyek lero enedya saaboka, "Imik Neyung Geisinya ara an nong ak yanamlakanya, Imik Neyung hyak imik migiba' ululanya bedya migib era anak golul yanenggel. Anesemba, anja eimik beibnelam me nera, alda Imik Neyung bedya' geisa me alamnemak. 1:36 Anya hnonda an dogol Elisabet gera, albabya yamen dib me bobnamlakanya, nengma ak beibnamla. Anya me you gel aboka silimaknya nera, wera alsamba dara, seleb wala' hnabnya mabla. 1:37 Anasa wera, Imik Neyung ak dara, yoka' hnon unuwanggunusonya nera meka' hnon unggulumla," hyok. 1:38 Danyek Maria gedya, "Nara aldib Imik Neyung adya wa wenya ulumna; anasa or anja leblama' sunuwoka or nak an unuwonulul," hyok. Dara lero era, Maria gek lobonggookanya byuk. 1:39 Li wen maboka ubok dara, Maria gera lanawoka balamoka' ara, Yudea sokok mek meinik sam heikek byuk. 1:40 Wera lanel byuk dara, alda Zakharia bedya' ek wekel byuukanya, Elisabet gek perob aboka men gibok. 1:41 Dara Elisabet gera, Maria gedya gibel yaboka' anyek kel yabok sab-sab, alja mon lomok bomok me nera nauba ebegookanya, Elisabet gera Imik Neyung Geisinya adyok deknero lobok. 1:42 Anasa alda yuba nauba yeiriwoka leboka' ara, "Nimi gelewa nauba ulumaka' gangganek ara, anak danyek Imik Neyung adya peroba' lebnenggelekanya, anja me bolama' anaba pewanamla," hyok. 1:43 "Wera nara hurub so gel gek anasa, Wenelesilnya eilinggera nak an kemel yanel do? 1:44 Nera anja nak gibel yabenelem sab-sab, nadya ok an kel yaban dara, nadya monok an me nera, perob anasa nonggo aboka eiya hlabla. 1:45 Dara Wenelesilnya bek ab alak wenyalenya nera dib dangalamla' anasa, seleb unuwanamla' anya' dib senemeija nim era pe ulumak," hyok. 1:46 Dara Maria gedya leboka' ara, "Nadya nong una' era Wenelesilnya bek giblamla. 1:47 Anya nadya ganya era Imik Neyung ara nadya bleblenelnya ulumla anasa, hyak eiya dablenel. 1:48 Nera nara alja arana' gel gedya, nadya dolbalek seneldinina' anyek, alda keeboka pewanel anasa, aldib wenyok ab mouruwoka, nimi nidya' soko dubuk an ulumak nim edya dara, gel gera alak or pebok wenyalamnenyak. 1:49 Nera hyak imik migiba' senenggom ululanya bedya, yoka'-yoka' senenggom damok era, nak an unuwanela' anasa, alja si nera, hyak geisa nong ak ulumla. 1:50 Anya alja angoo yadyek senena' ara nimi nidya' lunu-lunu nebgiga balamnamak nim, Imik Neyung ak alak lok ulumak nim ek ulumnamla. 1:51 Imik Neyung alja migib era alja soruk pik ab laga amalamlakanya, senenggom nong soruk goukwa edya, ganya lomok dengdang ganya boboka imik neneldalamak nang era doluwoka bokol goklamla. 1:52 Sokok an senenggoma' dub nang era, sikja bulumak ekla buna' ak sam boulenglesilikanya, sokok so nim ek danyek, imik nenelesil. 1:53 Alda dena' garan ulumak nim ek, perob ok salya' goklaboka eleklesilikanya, bona' dub ulumak nim ek dara, malya nenewoka soruk dem bululum aboka yaklesil. 1:54 Alda alja ganya angoo yadyek senena' anyek seiniwoka, alda alja wa wenya Israel bek aralamla. 1:55 Nenera alda nunja' youma' nauba nim, Abraham bemba hnon, alja mengerob nang yila' amba hyak diba' unulumnesin wenyamoka' sunuwoka unulamla," wenyaboka gibok. 1:56 Dara Maria gera, Elisabet geb wala' winilya ubdeekanya, wera ono' alja ek byuk. 1:57 Wera Elisabet gera me bomoka' ara, me beilin salek era oka dok. Dara Elisabet gera nengma ak beibok. 1:58 Dara, alja' neik heikek nim eb, al nimi yila' ab dara, Wenelesilnya bedya alak angoo yadyek senewoka arawal an yuba kemek dara, alab sikeneb neika' hyak perob aboka eiya hlaboka lelemek. 1:59 Wera me nera seleb li linbadya mabok dara, me nera boka' garawanoka' aboka sikda yeiniboka, me nera alja' neyung bedya si hema Zakharia aboka si sibnemab senemek. 1:60 Bok, alja genong gedya danyek, "Mem! Alda Yohanes aboka sibnemab," aboka lebok. 1:61 Dara sikja alak, "An si nera an nimi yila' gangganek ara Yohanes aboka si sina' orok bok anasa lemab," hyek. 1:62 Dara ono', sikja soruk adya gwakdewoka Zakharia bek, alja ala' me ak ara hek si nek sib eleganemla do aboka heilimek. 1:63 Danyek Zakharia bera girik lagasa adya momnya don go nenyek molowookanya, ban wenyaro webok, "Alja si nera Yohanes," aboka momnya dobok dara, nimi nidya' banasa salyeknya senemek. 1:64 Dara al ban sab-sab eneba, alja si bakookanya, silyuma daramoka' ara glogokanya, alda yuba goboka saboka, Imik Neyung ak perob aboka gibel yabok. 1:65 Anasa, sik ok berem ulumek heik nimi nidya' ab, anya ban anaso unuwal an yub era, Yudea moka meina nidya' ara oboka lelewok. 1:66 Dara nimi nidya' ban unuwal an yuba kemek nim edya dara, "Wenelesilnya bedya alja soruk alak aralemoka' anasa, eimik era heka' danamla me do?" aboka unu seiniwoka heibdangdo balamek. 1:67 Dara Zakharia, Yohanes eili bera, Imik Neyung Geisinya adya deknewoka ubookanya, anaso unuwanamla aboka ununumna' leboka' ara, 1:68 "Alda alja nim ek yeiniboka, siksamba heng lobna' dekna' bo yal anasa, Israeli nim edya Imik Neyung sikja Wenelesilnya bek ara giblenok e. 1:69 Alja wa wenya Daud be pik nang yila' ak ab uboka, alda nusamba blebsina' bonga hnon sekiyiwal. 1:70 Wenelesilnya bedya youma' enyek moruwoka, alja geisa ununumna' lelemek nang edya si bama' pik uboka orowek wenyasuk sok, sunuwoka wera unuweisil. 1:71 Nera nunja malya nenelesak nang ek ab hnon, nunja isa' nang ek ab hnon, blebsil. 1:72 Hnonda angoo yadyek senewoka arasina' alja geisa unuwanasin aboka lemoknya nera, hyak muna' dib unuwanamna amoka' anasa, bekoka unuwal. 1:73 Nunja' neyung youma'anya Abraham bek, alja perob elekna' nuk eleganesin amoka' ara, bekoka unuwal. 1:74 Anedya nunda lok ganya bona' oroka' anyek, Imik Neyung ak arawoka webnoka' aboka, nunja' isa' nang ek ab blebnesil amok anasa, unuwal. 1:75 Nera alja' saramek ara nunda geisa uboka, pe ulunoka' aboka, unuweisil. 1:76 Anya anda najab o, anak dara, Wenelesilnya bedya pika meewoka yarawalom aboka, anda men mengewanelam anasa, Imik Neyung hyak imik ululanya bedya ununumna' lenya aboka si silimnenjak. 1:77 Imik Neyung ara alja nim ek, sikja malya una' era sikenek ab meewoka, anara blebnesila' ak ulusil aboka, an ganya enyek mablula' aboka ubla. 1:78 Nunja' Imik Neyung bek ab ganya sangana' ab, angoo yadyek senena' ab dadya, alda nuk kemel yeisilikanya, alja heng era luguna' nonga dorogal. 1:79 Nera sik lok ganya hwam uboka, guna' hnoum ulumak nimi gong enyek yeblesilyekanya, nunja yan era hyak perob pik, ganya pe namena' un heklesil pik eboka bo binisil amba," wenyaboka lebok. 1:80 Dara me nera, nauba nebgiga balamookanya, ganya lomok anaba nauba kaboka nebgiga balamok. Anya alda hwalek ok ulwenelemoka' ara, nim ak laga danamok sum era geknewok dara, ban sum ok wera laga nenebdok.
2:1 Wera Kaisar Agustus dubnya, alda Roma mok soko dubnya ulumok salek, nimi mok soko nidya' sik nonga einiwanasak aboka orugosuk. 2:2 Wera Kirenius bera Siria mok sokok emba dubnya ulumok salek, ban nim einisina' ara, men youboka si momnya dob einiweisiknya nera ban. 2:3 Dara, nimi nidya' yok-yok beiyisika' heik ela' gigiro si momnya doboka einiwosunuka' aboka, si doronggol dal bilimek. 2:4 Dara Yusuf beneba, Nazaret heikek Galilea sokok aba' ara, Yudea sokok bilimok. Nera albabya Daud nang yila' ulumoka' anasa, Daud dubnya be beiyimek heikek Betlehem aboka silimek heikek bilimok. 2:5 Wera anedya, alja molob lomoka' me bomok gel, Maria geblaboka, si momnya neika' dobsinoka' aboka, bobdanga bilirek. 2:6 Wera sikda heik enyek an lanel birik sum enyek, Maria gera me beilin salek oka dok. 2:7 Sikja man e nera glo' orok anasa, Maria gera alja yando me nengma ak beibuk. Wera me nera seleb beiyiboka boksom adya waabok dara, pam amba dena' eleklemeka' ak sam meiyimok. 2:8 Dara an inimnek era, mok enyek anara salya' mab loroba' ak, domba pama beiyiboka yakna nanga hnon, sikja pama bo ulumek. 2:9 Dara al wene sab-sab, Wenelesilnya bedya lero, sikenek yookanya, Wenelesilnya bedya hyak senenggom dilina' era sikenek yeb goluwosuk dara, sikda hyak loka dabsuk. 2:10 Bok lero era sikenek, "Nara nimi soko nimi nidya' amba ganya hekoka eiya dabnesil yub ek ugunuk wenyhenesina' anasa, ugunda lok ganya bonggom mem. 2:11 Sumen era ugunsamba, nimi blebsina' dubnya, Wenelesilnya Kristus benyek, Daud bedya heikek beibla. 2:12 Dara ugunsamba bekna' diba' ara, anam wenyek ok beiyimeija me nenyek, wamena' adya waaboka pam amba dena' elekna golonga' ak mamlya' ak eibnelum," hyok. 2:13 Dara ono' al wene sab-sab enyek, lero enyeb, yok imik heik yin bona' nang lero gong-gong eb yingginiboka, neika' Imik Neyung ak ban wenyaro giblemeka' ara, 2:14 "Senenggoma' peroba' ara, Imik Neyung hyak imik ululanya bembakanya, ganya hekoka namena' pe una' ara, sik sokok an alak urumuk dangalamlya nim emba ulumnamla," wenyaro giblemek. 2:15 Wera lero gong dara sikenek loboka imik heikek saaboka byik dara, pam beilin nang era sik moumen, "Wenelesilnya bedya Betlehem heikek heka' humla' anyek, nuk wenyasila' anyek kemel binimab," wenyabdek. 2:16 Dara sikda Betlehem heikek berra aboka biniboka, Maria geb, Yusuf beb, beiyimok me nera golonga' lomok mamoka' ak eibek. 2:17 Wera pama beilina' nang era, me nen seleb eibek dara, me nenesa leboka, sikenek lero adya wenyaboka nekesuka' anyek, wenyaro yibik. 2:18 Dara nimi nidya' ara, pam beilina' nang edya sikenek wenyaro yabalameka' anyek kemek dara, hyak salyek nang senemek. 2:19 Bok Maria gek dara, ban nidya' wenyameka' anyek, ganya lomok boboka, seiniro ulumok. 2:20 Dara pam beilina' nang era, o keboka, heng eibeka' nidya' ara, lero adya sikenek lesuk sok, dib bekna' nong anasa, perob aboka giboka, bera seboka Imik Neyung gigibgiga, sik ulumeka' ak sam saaboka byik. 2:21 Wera seleb li linbadya maboka dara, me nera bola' garawareekanya, ono' me nen mon lomok anam bobnenggom enyek, lero adya si nenyek sibnelum amok si, Yesus aboka sibdek. 2:22 Dara, oruksin yuba Musa bedya momnya domok sok, me galasa' don salek oka dok dara, alda sikja Imik Neyung ak Yerusalem heikek bo elegel bilirek. 2:23 Wera Imik Neyung adya unuwanalum an yuba momnya dobok sok, "Ugunda yando me beibmuna' ara, Imik Neyung amba muna' eleklelulum," wenyaboka momnya doboka' anasa, unuwanoma' aboka bilirek. 2:24 Anya ono', Wenelesilnya bedya unuwanalum an yuba momnya dobok soka' ara, yalma wining moumena' gom, makwa wining gakma penya gom giboka elegolulum, wenyamoka' sunuwoka, ban gibnoma' aboka bilirek. 2:25 Dara Yerusalem heikek ara, nimi ben hnon Simeon alameknya bek ulumok. Dara alda Imik Neyung hogung ak ara peboka, geisa ganya boboka ulumookanya, Israeli nim emba ganya gwelelek ana' anyek eibnuna' aboka, diri ulumok. Anya Imik Neyung Geisinya ara alak arawoka bo ulumok. 2:26 Dara alda Imik Neyung Geisinya adya orowek alak men, anda Imik Neyung adya nimi blebsina' dubnya, Wenelesilnya bedya sekiyiwoknya Mesias benyek, anam eibnenggumem bok dara, anda men somoganggunulam. 2:27 Dara alda Geisinya be pik uboka, Imik Neyung e eremek sam yeilimok. Dara me nen Yesus ara, alja nauba nim edya, unuwanalum an yub adya unuwanamak aboka momnya domoka' sunuwoka unu meewanoka' aboka, Imik Neyung ek bo yeilirek. 2:28 Dara, me nera Simeon bedya doboka gwelib salawoka, alda Imik Neyung ak giboka lebnemoka' ara, 2:29 "Anasa wera Wenelesilimnya Imik Neyung o, anja wa wenanya bera, anja yuba lelemla' sunuwoka, or pe ganya senenya loboka bindiwoulula' aboka or senewanalam. 2:30 Dara nimi blebsina' anak aba' ara, nadya heng yoka' edya bekoka seleb eibna' anasa, 2:31 an blebsina' damok ara, nimi yok-yok soko nimi nidya' sik hogung ak seleb anja memewoluma' ara, 2:32 wera, yok-yok mok soko nim emba dara, laga aamana' geknena' danamla dilina' era yalakanya, anja nim Israeli nim emba dara, imik gigina' damok danamla," hyok. 2:33 Wenyek Simeon bedya alsamba wenyaboka nidya' geklewoka leboka' anyek, alja neyung beb, genong geb dara, hyak salya lebla senewoka ganya loka dabsuk. 2:34 Dara Simeon bera sikenek peroba' leb elegousuukanya, dara me nen alja' genong Maria gek wenhyoka' ara, "Hyak dib nong ara ban me nera, nimi gong Israel sam ara hnon golugiyiwoka, hnon sekiyiwoka ubsulula' aboka orowek memewookanya, nimi nauba ara alak malya aboka walamnemak aboka, alda yoka' nong lok so bekna' danamla. 2:35 Dara nimi nauba ganya lomok laga doulula' aboka, ono' anak dara, yok mal edya anja ganya nong ak doluganenggel," hyok. 2:36 Dara ono' al anyeganera, Asyer nang yila' Fanuel manggel, alja si nera Hana, ununumna' lelemok gel gek hnon ulumok. Alda neboka, seleb yamen dangamok. Anasa nenya dobok salek era, gibna' sekbadyok ala' nenya ab neika' ubdek. 2:37 Anya, alda danera seleb you gel ulumookanya, wene salek era gibna' denga winilya ebdobnya winilya lemok. Dara Wenelesilnya Imik Neyung bedya ek ara, inimnek yubyek pik moruwoka, Imik Neyung amba gwanenga meka dena' loboka molobsiniwoka ulumok. 2:38 Dara neik salek enyek, albabya anyegan yeiniboka, Imik Neyung ak perob aboka gibookanya, me nenyek geklewoka, Yerusalem heik henga lobna' amba bo yanamok sum amba diri ulumek nim ek, nauba wenyhusuk. 2:39 Wera Yusuf Maria ara, Wenelesilnya bedya unuwanalum aboka unuwanalum an yub ak sam lemoknya nera sunuwoka seleb unubgogowarek dara, sik ulumeka' ak, Nazaret heikek Galilea sokok sam birik. 2:40 Dara ban me nera nonga nauba neboka hyak migiba' kabgiga balamookanya, anya ono' geremseng nonga' anyek ubgiga balamookanya, Imik Neyung adya' wana' uboka eleksina' ara, alak ulumok. 2:41 Wera gibna' lelemna ella' gigiro Yesus alja nauba nim era Paskah perob sum era Yerusalem heikek balamek. 2:42 Anedya Yesus ara alda gibna' o badya lebok dara, sikda ban perob nauba sum amba soba' unu balamek sok, sikda bilimek. 2:43 Wera perob nauba sum emba seleb longobgogowoka binoba' aboka lanelemek dara, Yesus ara alja neyung beb, genong geb, ella danggonggom, alda Yerusalem heikek loboka ulumok. 2:44 Dara alja nauba nim edya dara, yok balamak nim eblaboka, nimi hnoum salya' hiboka balamla senerek. Bok seleb liga hnon pikek maboka gwelegok ab danyek eibnenggurek dara, sikja ella uldalamek nimi pik hnon, nim ebun pik heibdangoka ero yibirek. 2:45 Bok sikda eibnenggubdek dara, ono' losaaboka Yerusalem heikek, on pik ebgiga birik. 2:46 Wera elerek salek era liga winilya seleb maboka gwelegok danyek, alda Yahudi nim edya Imik Neyung yuba neklesik nang eb, yuba wa gak nang eb, sik gangganek sam sikenek heiboka, alja ono' saaboka leboka, Wenelesilnya Imik Neyung bedya ek sam bulumok ak eiyirek. 2:47 Dara, nidya' alak kelemek nim edya dara, alja yuba dam nang heiboka lelemok ab, alak heibnanya neneba pe lelemok geremseng enesa, salya lelemla me senewoka hyak loka dasuk. 2:48 Wera alja' neyung genong ara, Yesus adya ban unulumok anyek eiyirek dara, hyak ganya lok dasuk. Dara alja genong gedya Yesus ak, "Anda hekasa nuk ara anaso unulusilim do? Anja neyung beb, nab dara, nunda anak ilil ganya boboka elenggenem bar," hyok. 2:49 Yesus adya sikenek lebsuka' ara, "Ugunda hekasa nak elenurum do? Nara nadya' neyung bedya' e lomok sam ulumnesinya ara, ugunda elgom ulurum de?" hyok. 2:50 Bok sikda alja wenhyok yub era, damok ara anasa lebla' senewoka pe ella danggurek. 2:51 Wera alda, alja neyung genong ab neika' Nazaret heikek byik. Dara Yesus ara sikja' gangganek ab pe ulumok. Bok ban nidya' unulumoknya nera, alja genong gera ganya lomok sam pe seiniwoka bo ulumok. 2:52 Dara Yesus ara, nauba dangoka nebgiga balamookanya, ono' nauba ella danggiga ulumookanya, nim ab, ono' Imik Neyung adya' anababya alak perob senelemek.
3:1 Wera Tiberius bera senenggom wenesin dubnya ulumok salek, gibna' meija dubuka' badya lebok. Ban salek danaba, Pontius Pilatus bera Yudea soko amba dubnya ulumok. Dara Herodes bera, Galilea soko emba wenesin dubnya ulumok. Anya Herodes alja hem Pilipus bek dara, Iturea mok eb, Trakhonitis mok eb damba, wenesin dubnya ulumok. Anya ono' Lisanias bek dara, Abilene mok emba wenesin dubnya ulumok. 3:2 Dara Hanas beb, Kayafas beb dara, Imik Neyung yuba wa gaka' dub nang dangarek salek, Imik Neyung yub ara Zakharia mamnya, Yohanes bek hwalek sam mok yok. 3:3 Anasa Yohanes Pembaptis bera Yordan meka gemek mok sokok sam nidya' heikek yeiniboka yuba doroklomoka' ara, "Ganya dangawomunukanya, ugun nong elekdangoka meka dabdanalum dara, Imik Neyung ara ugunja malya una' ugunuk ab meewanasil." 3:4 Wera ununumna' lenya Yesaya buku lomok sam momnya doboka' ulumla sok, "Hwalek mok yuba hnon bii aro yabalamla' ara, Wenelesilnya bemba pika memewoka, alsamba pika haboka jonga' gebnelum. 3:5 Dokloma guruklamla' yok-yok ara sangawolul aboka soko beibnelumukanya, mein yema yok-yok bululanya nera, sangab lobnelum. Dara, gongolya' yengem kweilim alalanya nera, jonga' nenewanalumukanya, gurung elim alalanya nera, pe sangawanelum. 3:6 Dara, nimi nidya' ara Imik Neyung adya blebsina' ara eimik era, henga boro beiyiboka eibnemak," wenyaro momnya doboka' ak, wenyalamok. 3:7 Dara, alda nimi nauba alja meka dabsulula' aboka yalamek nim ek wenyaboka lelemoka' ara, "Wei, ugunda waba' keeblo nimi osin baga' edya mengerob nang yila' o! Heknedya ugunuk Imik Neyung adya yu ganya yanamla ak ab merebdanga beiyi binilum alasil do? 3:8 Wera anasa, nunda seleb malya una' ak ab ganya dangana' geknewolul aboka, anyek sunuwoka bekna' okoka unulululum. Anya ugunja ganya lomok ara, Abraham bera nunja neyung ulumla' anya' seneldanggom mem! Anasa nara ugunuk wenyhenesin, Imik Neyung ara ban girik danaba nimi geboka, Abraham nang yila' dangiyiwanemso! 3:9 Dara ya ara gal yarengek sam seleb orowek dibok. Anera gala nidya' yok-yok doka pe mounggulumnelanya nera, eimik era weboka uk lomok dobdabnamla," wenyaboka lelemok. 3:10 Wenyek nimi nauba alak heilimeka' ara, "Wera anaso dara, nunda heka' ak hubnamab do?" wenyaboka heilemek. 3:11 Danyek alja sikenek leboka' ara, "Anasa heknedya ongon akleng penya ululanya bera, yoknya ongon aklenga oroknya bek bokoka, hnonda eleklelul. Anya ono' heknyek dena' yak ululanya bera, yoknya oroknya bek al neikso unululul," hyok. 3:12 Dara mok sok amba leboka rupiah molowoka dosin nanga hnon, meka dabsulula' aboka yeilimeekanya sikda Yohanes Pembaptis bek, "Neyung neklesilimnya o, nuk dara, heka' ak huwanesibya do?" wenyaboka heimek. 3:13 Dara, Yohanes Pembaptis bera sikenek lebsuka' ara, "Ugunuk dara, unu dolomnelum aboka lerobnya nera sikleb loboka, ono' ugunja nauba so gokoka donggom mem," hyok. 3:14 Dara ono' yin bona' nang eneba alak heimeka' ara, "Dara numbabya, heka' hubnesibya do?" wenyaboka heimek. Wenyek, Yohanes Pembaptis bera sikenek lebsuka' ara, "Ugunda salya' bolowoka bleboka donggom, mem. Anya dangab eiliwoka yok nim ek sonda' anasa, duka' lolowoka salya' donggom mem. Alda ugunuk ugunjinya aboka eleklesak rupiah enyek, pe sunuwoka bo deregoka ululum," hyok. 3:15 Wera ban sum enyek nimi nidya' ara, Yohanes Pembaptis benesa leboka youma' enyek ununumna' lelemek nang edya nimi blebsina' dubnya yanamla aboka diri ulumabnya bera an gom aboka, ganya lomok heibdangdo yabalemek. 3:16 Anasa wera, Yohanes Pembaptis bedya sikda nidya' ak lebsuk ara, "Nadya dara, wenera mek dem adya dalasin bok, eimik era hyak senenggomnya yanamla. Alja yan ongona' eneba na meknya bedya dara, henga loboka gwiriwamenggom. Alja danyek, wera eimik era, ugunuk Imik Neyung Geisinya adya hnon, uk adya hnon, mek diba' dabnesil. 3:17 Pe weboka yabna' ara, alja gandum weboka memelamla ak sam meewoka, gandum dok ak dara, dakoka alja beilina' ek doronggoka beibnuna' aboka, alja' seleb sorukuk ulumla. Bok, gandum glaka' ak dara, hyak sarangna' orok ukuk dabnamla," hyok. 3:18 Dara, Yohanes Pembaptis bera yok-yok yuba nauba adya sikenek weneboka, perob wenyaro yanggan yub era, sikenek lelesuk. 3:19 Bok, alda Herodes Galilea mok soko dubnya bera, alja hem bedya gel, Herodias gek bleboka domok amba hnon, ono' yok malya una' nidya' unulumoknya nemba hnon, nera malya ululam aboka wabok. 3:20 Dara, Herodes bera alda yok-yok malya una' ek seleb nauba unulumokjok, ono' hnon sounuwoka meknewoknya nera, Yohanes Pembaptis benyek henga geregoka gasa henga gereksin ek sam doronggomok. 3:21 Wera nimi nidya' meka dabsuukanya, ono' Yesus anaba meka dabookanya, heng uboka molol yabok salek, im pik ara gabdebok. 3:22 Dara, Imik Neyung Geisinya ara yalma wining uruma anaso' anyek, lak-lak aboka, Yesus eilib ak bul yinggyuk. Anya, imik ab yuba hnon kebeka' ara, "Anda nadya hyak wana' nong ulunggen me, an nong adya nadya ganya heklenel," hyok. 3:23 Yesus ara sokok an alja wa web einiwok salek era, alda gibna' ara denga hnonok ebdobnya winilya lebok bok, web einiwok. Dara, nimi yok nim edya senelemeka' ara, Yesus ak dara, Yusuf bedya me ulumla senelemek. Yusuf bera alda Eli bedya me ulumok. 3:24 Dara, Eli bera Matat bedya me, Matat bera Lewi bedya me, Lewi bera Malkhi bedya me, Malkhi bera Yanai bedya me, Yanai bera, Yusuf bedya me. 3:25 Yusuf bera Matica bedya me, Matica bera Amos bedya me, Amos bera Nahum bedya me, Nahum bera Hesli bedya me, Hesli bera Nagai bedya me, 3:26 Nagai bera Maat bedya me, Maat bera Matica bedya me, Matica bera Simei bedya me, Simei bera Yosekh bedya me, Yosekh bera Yodah bedya me, 3:27 Yodah bera Yohanan bedya me, Yohanan bera Resa bedya me, Resa bera Zerubabel bedya me, Zerubabel bera Sealtiel bedya me, Sealtiel bera Neri bedya me, 3:28 Neri bera Malkhi bedya me, Malkhi bera Adi bedya me, Adi bera Kosam bedya me, Kosam bera Elmadam bedya me, Elmadam bera Er bedya me, 3:29 Er bera Yosua bedya me, Yosua bera Eliezer bedya me, Eliezer bera Yorim bedya me, Yorim bera yok Matat bedya me, Matat bera Lewi bedya me, 3:30 Lewi bera Simeon bedya me, Simeon bera Yehuda bedya me, Yehuda bera Yusuf bedya me, Yusuf bera Yonam bedya me, Yonam bera Elyakim bedya me, 3:31 Elyakim bera Melea bedya me, Melea bera Mina bedya me, Mina bera Matata bedya me, Matata bera Natan bedya me, Natan bera Daud bedya me, 3:32 Daud bera Isai bedya me, Isai bera Obed bedya me, Obed bera Boas bedya me, Boas bera Salmon bedya me, Salmon bera Nahason bedya me, 3:33 Nahason bera, Aminadab bedya me, Aminadab bera Admin bedya me, Admin bera Arni bedya me, Arni bera Hezron bedya me, Hezron bera Peres bedya me, Peres bera Yehuda bedya me, Yehuda bera Yakub bedya me, Yakub bera, alda Ishak bedya me, 3:34 Ishak bera Abraham bedya me, Abraham bera Terah bedya me, Terah bera Nahor bedya me, Nahor bera Serug bedya me, 3:35 Serug bera Rehu bedya me, Rehu bera Peleg bedya me, Peleg bera Eber bedya me, Eber bera Salmon bedya me, 3:36 Salmon bera Kenan bedya me, Kenan bera Arpakhsad bedya me, Arpakhsad bera Sem bedya me, Sem bera Nuh bedya me, Nuh bera Lamekh bedya me, 3:37 Lamekh bera Metusalah bedya me, Metusalah bera Henokh bedya me, Henokh bera Yared bedya me, Yared bera Mahalaleel bedya me, Mahalaleel bera Kenan bedya me, 3:38 Kenan bera Enos bedya me, Enos bera Set bedya me, Set bera Adam bedya me, Adam bek dara, alda Imik Neyung adya me.
4:1 Wera Yesus ara, Imik Neyung Geisinya adya boro loboknya bera, alda Yordan mekek aba' ara yanggok dara, Imik Neyung Geisinya adya hwalek sam mok bo byuk. 4:2 Dara, alda anyegeinira liga empat puluh sum anaso ulumok dara, Iblis adya sunubyaawok. Alda anyagan ulumok salek era, yoka'-yoka' dena' ara hyak gobdo orokokanya, ban salek seleb danggiga balamok dara, alda gwaneng ok ubok. 4:3 Wera danyek Iblis adya alak lebokja, "Anda Imik Neyung me ulumen dara, wera ban girik enyek roti gwanenga dalom helom," hyok. 4:4 Bok, Yesus adya Iblis ak leboka' ara, "Momnya doboka' ara, Nim embenga' ulumaka' ara, roti gwaneng adyok embenga' unggulumak," hyok. 4:5 Dara, alda Yesus ak bobookanya, yok senenggom imik olok bo welebookanya, hyak wene sab-sab enyek, mandewal henggonggom, alak yok-yok mok soko an nidya' ara amawok. 4:6 Anya Iblis ara Yesus ak, "Nidya' migib una' ab, senenggoma' dub una' gebman ab dara, nidya' ara seleb nak lenyok. Dara ban nidya' ululanya nenera, nadya benyek eleganamna senewanenya bek eleganamna anasa, anak eleganenggen. 4:7 Anasa, anda nak koma lumugoka gibnemen dara, ban nidya' ara anja' yoka' danamla," hyok. 4:8 Bok, Yesus adya Iblis ak saaboka leboka' ara, "Momnya doboka' ulumla' ara, Anja Wenelesilnya Imik Neyung bek ok giblemenekanya, alsamba ok unululom, wenyaboka momnya dobok," hyok. 4:9 Dara ono' alda Yesus ak eboka boboknya nera, Yerusalem heikek bo byuukanya, Imik Neyung gibna' e eruma' dubuk, hyak imik bo sekel dil biniboka, alak lebokja, "Anda aldib Imik Neyung me dara, an nong anyek, anyaganyeba' ara sakdo boublingdalom. 4:10 Nera an momnya doboka' ulumla sok, Ansamba dara, Imik Neyung ara alja lero nang ek, anak arawagenoka' aboka oruganesil. 4:11 Dara, anja yan era girik ek ob lumugagelyek aboka dara, lero nang edya soruk yangab salawanenjak," hyok. 4:12 Wenyek Yesus adya alak leboka' ara, "Imik Neyung yub ulumla' ara, Anda anja' Wenelesilnya Imik Neyung bek ara sunulyamenggom, hyak mem, alamla," hyok. 4:13 Wera Iblis ara alja ban nidya' sunulyamana' ara seleb unubdakok dara, alda Yesus ak ab gokoka byuukanya, pewalya sum donok senewoka diri ubok. 4:14 Wera Geisinya bedya migib gebman, Yesus ara Galilea sokok sam saaboka yok. Dara alsamba leboka lelemek yub era, ban mok soko heik era nidya' oboka lelewok. 4:15 Dara ban salek era, Yesus ara Yahudi nim edya yuba don ek sam nim ek yuba lero yabalesuk dara, nimi nidya' alak gigilemek. 4:16 Dara, alda al beiyiboka nemok heikek, Nazaret heik biniboka, alda sob ulumok sok, Sabat mem sum era, Yahudi nim edya yuba don ek wekoka, yub einiwoununa' aboka sekemok. 4:17 Dara, ununumna' lenya Yesaya buku ek doboka alak elegemek dara, alda buku gelebookanya, alda ban yub en wenyaro momnya doboka' digum anyek ara, 4:18 "Wenelesilnya bedya' Geisinya ara nak ulunel. Wera anasa, alda nak seleb sekiyiwanyoka' ara, perob lero yanggan yub era, bona' garan nim ek alja lelelula' aboka, alda nak seleb orowek doboka sekiyinyok. 4:19 Nara igin yaka' kwellilisak nim ek siksamba yuba irigoka sablula' aboka hnon, heng lum nim ek henga gwelegiyiwosulula' aboka hnon, igina ulumna nim ek, jakmana' gebsununa' aboka hnon, anya Wenelesilnya bedya alja nimi blebnesil sum enyek, sumen unuwanesil aboka wenyalasulula' aboka hnon, nara an bokol yeilinyoka'," ara Yesaya yub ek eiyiboka einiwok. 4:20 Wera seleb dara, buku siklewoka Imik Neyung e wa wena' amba wa bomoknya bek saaboka elegok dara, alda bukuk. Dara, nimi nidya' Imik Neyung ek an bukumek nim edya heng mandebna' era alak keeboka ngeklumek. 4:21 Dara Yesus ara sikenek an wenyaboka nek einiwousuk, "An Yesaya yuba momnya doboka' damok ara, sumen ugunuk an keblum dara, wera seleb gigiwal," hyok. 4:22 Anya nimi nidya' ara alak pe lelemla senemeekanya, alja lero balamok yub enyek hyak perobja senewoka, ganya salya ura lelelanya senemek. Anasa sikja lelemeka' ara, "Benera Yusuf bedya me bok lelelaba," abdangdo yabalamek. 4:23 Dara, alda sikenek, "Ugunda nak ban bol nenena' yub enyek wenyhenenuluma' ara, 'Wei, hwelesilimnya o, an damnya hweldalalom. Nidya' yoka'-yoka' hyak lok so' anyek, Kapernaum heikek seleb unululuma' kelemouba' ara, wera anyek anja' meneng mok ok an, anyeganyeba' unululom henenuluma' anya'," hyok. 4:24 Anya ono' hnon wenhyoka' ara, "Nara ugunuk hyak dib lebnesin, Nimi ben hnon ununumna' lelelanya bera, alja' meneng heik nim edya dara, nunja moknya benya' senenggulumak. 4:25 Anya ono' nara ugunuk hnon wenyhenesin, dara ban wenyhenenanya nera hyak aldib. Ununumna' lelemoknya Elia ulumok salek era, gibna' winilya uboka wala' hnabbadya moka yanggana' lomok dara, mok enyeganera senenggom gwaneng oka' enyek lanamookanya, ban salek era nenyabo somogomek geleb era, Israeli sokok ara nauba ulumek. 4:26 Bok, Elia bek dara, sik ulumek gelewa en, gela hnon amba oruganggumok bok, alda Sidon sokok Sarfat heikek ulumok gel gek hnonok, alsamba bilom aboka orugomok. 4:27 Anya ono' ununumna' lenya Elisa ulumok salek eneba, Israel sam ara nimi nauba boka' ak gororoma' delesuk nimi hnon bok, sikda hnonok sibin anaba boka' dona' orok bok, alda Siria nanga Naaman bek hnonok boka' domok," wenyaboka neksuk. 4:28 Ban wenyaboka leboka' anyek, Yahudi nim edya yuba don ek an yuba longomek nim era kebek dara, hyak yu ganya bobek. 4:29 Dara sikda sekoka, Yesus ak walawoka heik gokgobok sam bo yakal byiikanya, mok soko dinibmana' ak gweren sam yakdo boublingganob senewoka, yakdo dorogol byik. 4:30 Bok Yesus ara sik hnoum walawoka gabdo beiyiboka byuk. 4:31 Dara, ono' Yesus ara Galilea sokok Kapernaum heikek biniboka, Sabat mem sum era, yuba nekoka lelemok. 4:32 Wera alja lero neklesuka' ara, hyak migiba' gebman pe lelemoka' anasa, sikda alja neklesuka' anyek hyak salye ura lelelanya senewoka kero bulumek. 4:33 Dara, ban Yahudi nim edya yuba don ek ara, nimi ben hnon bisa' wekemoknya bek hnon ulumok. Dara, benera alda hyak nauba ebngalogoka lemok, 4:34 Wei, anda Yesus Nazaretnya o, anab nub dara, heka' ak ulumla do? Anda nuk orok nenewoka dengeiyiwosununa' aboka yeililam de? Nara anda benya' senewoka ella ulunggena' ara, "Anda Imik Neyung bedya' geisa ululamnya bek eiyinggen," hyok. 4:35 Bok Yesus ara alak waboka leboka' ara, "Yuba sana' gelegamenekanya, alak ab lo yibilom!" Wera danyek, ban bisa' era, gologomoknya bek soob salawoka yok nimi saramek an boboka' seleb dara, wekemoknya bek ab gobookanya, hnon ol nebna' lomok. 4:36 Dara, nimi nidya' ara ganya loka daboka, sik moumen lebdangdo balameka' ara, "Alja salamla yub era hyak lokja! Dara alda senenggoma' uboka, migiba' gebman ab dadya, yu bisa' gong ek, goboka bululum aboka oruklesil dara, goboka yabalemak anasa, hyak lokja," aboka lelemek. 4:37 Wenyek, alja an unulamla an yub era mok soko enyek an heik me nera nidya' oboka lelewok. 4:38 Ban seleb dara, Yesus ara Yahudi nim edya yuba don ek lobok dara, Simon bedya ek bilimok. Wera, Simon al soumun gera poba neikna' neiklamla aboka, yok nim edya Yesus ak nek elegemek. 4:39 Wera Yesus ara gen malamok ekla ak biniboka, poba neikna' ara yakoka hwemok. Wera wene salek poba neikna' ara denghyok dara, Simon alja' soumun gera bukoka siksamba dena' youb einimok. 4:40 Wera sin dangoka henga wekel bok salek era, nimi yok-yok neikna' salalemoknya nera, alak bo yalamek. Dara alja soruka sik eilib yok-yok diyiboka, sikenek hwelesuk. 4:41 Dara bisa' gong dara, nimi weklesik nimek ab goboka balameekanya lero goblemekja, "Anda Imik Neyung bedya me ululam," wenyabgiga goblemek. Anya ban bisa gong era, sikda Yesus ara Kristus, nimi blebsina' dubnya ulumoka' ella ulumeka' anasa, Yesus adya sikenek hyak gorogoka mem aboka lebookanya, yuba hnon sana' lobganoka' aboka, yuba garawok. 4:42 Wera yubyek so dok dara, Yesus ara muna' ak olok, or pe gakdena' ak byuk. Bok, nimi nauba alak elemeekanya, alda seleb eiyimek dara, alda sikenek lo bisilyek aboka, lo binggunusilim aboka lebek. 4:43 Bok alda sikenek lebokja, "Nara Imik Neyung adya ban nenesa unuwolul aboka sokok sam bokol yeilinyok anasa, Imik Neyung wenesin heik yub, perob lero yanggan yub era, yok heik pik anaba nidya' lero yabalamnamna bar," hyok. 4:44 Dara, alda Yudea sokok Yahudi nim edya yuba don e pik nidya' ara Imik Neyung yuba leb elekdo yabalesuk.
5:1 Dara ono' yok sum enyek, Yesus ara Genesaret mek gwan gek sam biniboka sekemok. Dara, nimi nauba Imik Neyung yuba kebnoba' aboka al nong ok sam obgokdangoka yalamek. 5:2 Wera Yesus ara hadya' don mek ekla buna' me penya eiyimok bok, mek ekla buna' dam nang era seleb mek inik yingginiboka, hadya' ouma' aklenga mek eleklemek. 5:3 Wera Yesus ara mek ekla buna' ak welewoka Simon bek, "Anja mek ekla buna' era se' bukna anasa, mek gek ab mek ek wekdo doroganelom," aboka molomok. Dara Yesus ara, mek ekla buna' lom enyegan bukoka, nim ek Imik Neyung yuba neksuk. 5:4 Wera Yesus ara seleb Imik Neyung yuba leboka nekgogowousuk dara, Simon bek, "Anda hyak dom burukna' nong ok pukoka biniboka, hadya' dobnelam anasa, hadya' ouma' akleng ara bobogalom," hyok. 5:5 Danyek Simon bedya Yesus ak, "Neyung neklesilimnya o, nunda inimnek pik hyak yeiriwoka hadya' dobnob sene elmab bok, meka' sibin anaba hnon doldona' orok bok, wera neyung anja oruganelem anasa, naba hadya' ouma' akleng doroganamna," hyok. 5:6 Wera sikda hadya' akleng ara seleb dorogomek dara, hadya' ara hyak nauba domeka' adya wera, hadya' ouma' ara deknewoka deneb einimok. 5:7 Anasa wera, sikda sik kabo nang ek ugunda nuk aral yousululum aboka, soruk adya langam aboka youbdangamek. Wera sikda yok sik kabo nang era oka yeilimek dara, hadya' era doboka limek bok, hadya' mandebna' nauba adya penya mek ekla buna' dara, mek lomok sonom henoma' aboka ulurek. 5:8 Simon bera, anyek unumoka' ak eiyiboka, Yesus adya' saramek koma lumugoka giboka, "Wenelesilimnya o, nara malya una'anya ulumna' anasa, nak anyeb lo bilom," hyok. 5:9 Simon beb, alab neika' ulumek nang eb dara, hadya' nong anyek hyak nauba domeka' anyek, hyak loka dasuk. 5:10 Wera ono' Simon bedya alja hemyabo neikek welemak nimi Zebedeus bedya mabo Yakobus beb Yohanes beb dara, neikso loka dasuk. Danyek Yesus adya Simon bek, "Anda lok ganya bonggom, mem. Al wene salek eba' ara moruwoka, anda hadya' dololam sok, nimi dol yabalemnelam," hyok. 5:11 Dara Simon beb, alja hemyabo yok nang eb dara, sikja mek ekla buna' mek dubuk ab ara, mek gek beib lobek dara, yoka'-yoka' nidya' loboka, Yesus ak diriga bilimek. 5:12 Dara ono' yok sum enyek, Yesus ara, yok nauba heikek don ulumok. Dara, an Yesus ulumok heik ara, nimi ben hnon gororoma' delemoknya bek ulumok. Wera gororoma' delemoknya bedya Yesus ak eiyimok dara, Yesus ak hogung dib malyingginiboka molowoka' ara, "Neyung o, neyung anda nak or hwebnun senenemen dara, or hwebnenesom," aboka lelemok. 5:13 Dara, Yesus adya gororoma' delemoknya bek soruka diyiboka lemokja, "Nadya dara, or merewolul senemna' anasa, or merewalom," hyok. Dara al wene salek enyek, gororoma' ara dengamok. 5:14 Dara, Yesus adya alja gororoma' delemoka' anyek hweboknya bek an, "Nara seleb merewan aboka, nimi yok nim ek salya' lero yabenggom, mem. Alda ugunja Imik Neyung yuba lenya bek, anda aldib merewalem henenggela' anasa, anda alak amaldal bilom. Dara ono', Musa bedya momnya dobok yuba sunuwoka, anda yok nim edya alda seleb merewal senewoka eibnoka' aboka, Imik Neyung ak pam oboka giboka beil bilom," hyok. 5:15 Bok Yesus amba yub era, mok soko nidya' nauba so oboka lelero yabalamok dara, nimi nauba alja yuba keboka dobgiga, hnonda neikna' hwebsulula' aboka yalamek. 5:16 Bok, li hnonda Yesus ara albeyok gakdena' ak sam heng uboka molowonuna' aboka balamok. 5:17 Ono' yok sum enyek, Yesus ara anam neklesuk salek enyek, anyagan ara Parisi nanga hnon, Yahudi Imik Neyung yuba neklesik nanga hnon bulumek. Sikda Yerusalem ab hnon, Galilea sokok ab, Yudea sokok nimi heikek ab, nimi nidya' yeilimek. Wenelesilnya bedya migib era, neiklemek nim ek hwebsulula' aboka, Yesus ak ulumok. 5:18 Ban sum enyek, nimi ben hnon heimoknya bek esona' adya yangawoka, nimi wene nang jaboka bo yeilimek. Bo yeilimek nang edya dara, Yesus ulumlya' saram nong ok beibnoba' aboka dulumek. 5:19 Ban anyagan ara, nimi nauba ulumeka' adya, pik yoka' pik bo wekna dara, hyak okna nonga dangamok. Anasa leboka sikja dara, eruma' dubuk bo welewoka, eruma' joboka Yesus ulumoka' nong ok, nimi hnoum esona' ak meiyiwoka doblinggemek. 5:20 Bo yeilimek nang edya, Yesus adya hwebnamla' anya' dib senen ganya bomeka' ak eibsuk dara, heimoknya bek an, "Hem o, anja malya una' era seleb doboka bobogagen," hyok. 5:21 Dara wenyek, Yahudi nang eb, sikja Imik Neyung yuba neksin nang eb dara, sik moumen seiniwoka leldalamekja, "Ban benera alda Imik Neyung si ak malya nenelamla' anasa, alda heknya do? Imik Neyung ak hnonok malya una' doboka boboganasuso bok anasa, nim ak dara, sikenek ab meewanggunuseng bok bar," alamek. 5:22 Wenyaboka Yesus adya sikja seinimeka' ara, seleb ella ubsuk dara, "Ugunda hekasa ugunja ganya lomok an heildalalum do? 5:23 Har sonya nek lebneseng, Seleb anja malya una' anak ab meewagen, heneseng gom, alda Sekoka balom, heneseng gom? 5:24 Bok wenyek dara, nimi diba' me nera sokok ara, malya una' amba memesin migib ulunel ununa' ella danalum." Anya ono' Yesus ara nonga heimoknya bek, "Sekoka anja esona' doboka bobmenekanya, or balalom!" hyok. 5:25 Dara, bera an wene salek nimi gangganek bukoka sekoka, alja esona' doboka bobok dara, Imik Neyung ak perob aboka gibgiga ek byuk. 5:26 Nimi nidya' ganya loka daboka, Imik Neyung ak nauba giblemek. Nimi nauba lok ganya boboka, "Nunja sumen eibaba' ara hyak senenggom nonga' ak eibab," aboka lelemek. 5:27 Dara ono', Yesus ara goboka yibiniboka kemelemok enyek, mok soko amba rupiah molowoka dolomoknya, alja si Lewi bek, alja' wa wen ek ab eiyimok. Dara Yesus adya alak, "Anda nak an yalom," hyok. 5:28 Wenyek Lewi bera sekoka nidya' yoka'-yoka' loboka, Yesus ak neika' makal bilimok. 5:29 Dara alda Yesus ab neika' denenam aboka, alja ek dena' youlomok. Rupiah molowoka dolosik nang gong eb, nimi nauba yok nim eb neika' bukoka delemek. 5:30 Parisi nanga hnon, Yahudi Imik Neyung yuba neksin nanga hnon wene nang edya, sikda lek ganya bomeekanya, Yesus adya alja yuba doro diriga ban nang ek, "Ugunda hekasa rupiah molowoka dosin nang ab, malya nang eb, neika' delelum do?" aboka heibsik. 5:31 Ban wenyana' anasa, Yesus adya sikinek saaboka leboka' ara, "Nim eik nim edya hwebneseng senenggulumak bok, alda neiklamna nim edya ok hwebneseng senelemak. 5:32 Nara nunda pe ulumab senelemak nim emba yanggumsa, alda malya una' nim enyek, sikja malya unulumaka' ak ab, ganya dangawoka lobnoka' aboka yeilimsa," hyok. 5:33 Nimi hnon Yesus ak lelemeka' ara, "Parisi nang eb, Yohanes bedya yuba dona' nang era, gwaneng dena' loboka mololamna dara, dena' orok bok anyek, anak diriga yalanjak nim danara, salya' gwaneng deblaboka ulumak," hyek. 5:34 Anasa Yesus sikinek saaboka lebsuka' ara, "Nimi ben hnon gela domso' ak ara, gela domso' amba nimi kemel yeiliseng nim era, or anam uluseng bok dara, ugunja dara, wera gwaneng meka dena' loboka mololsinililulum aboka oruganasom de? 5:35 Orok. Hyak wenyhenggunusom, bok gela doblenya bera sik gangganek sam ab dobnamla sum era eimik yanamla. Wera sik ban sum enyek, gwaneng meka loboka mololsinilimnemak," hyok. 5:36 Dara, Yesus adya ban sununa' enyek sunuwoka sikinek lebsuka' ara, "Nimi hnon youma' denemso akleng ek, wenyok akleng gweldekdoba' edya denewoka wibnenggunuseng. Ban unuwanaseng dara, wenyok akleng eneba salya' hiboka gweldek lobnesenga' anasa, wenyok gweldekoka losengnya nedya, youma'anya nek denewoka wil binisenga' anaba, neik digum danggunumso. 5:37 Anasonya nera, nimi hnon youma' mek akleng ek, anggur meka gweb libnenggunuseng. Unuwanaseng dara, mek era gweboka liseng akleng ek ara denewanamso. Anasa, akleng denewanamso dara, mek era yek weininggoka, akleng ak dara, dib malya ubnamso. 5:38 Wenyoka' peroba' anyek gwebseng anggur mek era, wenyek akleng ek libneseng. 5:39 Nenesonya nera, wel anggur meka desonya bedya dara, ono' wenyok anggur meka denggunumso. Youma' wel mek enyek hyak pe lelemla henemso," hyok.
6:1 Dara ono' yok Sabat mem sum enyek, Yesus ara nim adya gandum dokomek wa pik yabalemok salek, alja yuba doro diriga ban nang edya gandum doka hnon denoba' aboka dakeekanya, sikja soruk adya gorogoka delemek. 6:2 Bok Parisi wene nang edya lebeka' ara, "Ugunda hekasa Sabat mem sum ununa' ara mem hyoknya nek blekoka unulum do?" wenyaboka heibsik. 6:3 Wenyek Yesus adya sikenek leboka' ara, "Ugunda Daud bedya unumoka' ara, alab neika' balamek nang eb dara, gwaneng ok ubsuk dara, alja unumoka' anyek, Imik Neyung yuba bukuk momnya doboka' ara, ugunda einiwanggublum de? 6:4 Dara alda Imik Neyung ek wekoka, Imik Neyung amba beillilemek roti gwanenga dobok dara, al hnon deregoka, ono' alab neika' balamek nang ek hnon elegosuk. Dara ban roti gwaneng era, salya' nang hyak dena' memekanya, alda Imik Neyung e wa gak nang ok deneseng bok anyeka'," hyok. 6:5 Dara ono' Yesus ara sikenek hnon lebokja, "Nimi diba' me ara Sabat mem sum amba Wenelesilnya ulumla," hyok. 6:6 Dara ono' hnon yok Sabat mem sum enyek, Yesus ara Yahudi nim edya yuba don ek wekoka, yuba lel eleklesuk. Dara anyaganera, soruka darasam heimoknya bek hnon ulumok. 6:7 Dara, Yahudi Imik Neyung yuba neksin nang eb, Parisi nang eb dara, Yesus ak sonda' anasa miniwoka heka' huboka lebnob senewoka yuba gak ebnoba' aboka, sikda Yesus ara, Sabat mem sum bok nimi hnon hwebnamla do senewoka diri keeblomek. 6:8 Bok alda sikja seinimeknya nera seleb ella ubsuukanya, soruka heimoknya bek lebokja, "Anda bukmenekanya hnoumunga seklom!" hyok. Dara benera bukoka sekel yibuk. 6:9 Dara Yesus ara sikenek, "Nara ugunuk heibnesin, Sabat mem sum era heka' ak or unulunok hyok do? Perobnya nek ununa' ak gom, malyinya ununa' ak gom? Nim nong ak blebna' ak gom, nim orok nenewoka ona' ak gom?" wenyaboka heibsuk. 6:10 Wenyabgogowoka' seleb dara, alda nimi gokgob pik nidya' keeb ganagoka' seleb dara, neikna'anya bek lebokja, "Anja soruka nginigalom," hyok. Dara heimoknya bera, alja lebok sok, soruka nginigoka okdo doroklomok enyek, alja soruk era seleb merewok. 6:11 Bok, Parisi nang eb, Yahudi Imik Neyung yuba neksin nang eb dara, yu heiboka, "Heka' huboka Yesus ak malya ubnemab do?" senewoka yuba sab einimek. 6:12 Dara ban salek era, Yesus ara hnon meinik don heng uboka molowoununa' aboka welemok. Dara Yesus ara inimnek pik moruwoka, alda Imik Neyung ak molob gwelegemok. 6:13 Wera dilina' uboka gwelegel yabok dara, alda alja yuba doro diriga ban nang ek, mamagel youlululum aboka ebmamagosuk. Dara bokoka, obadya nang ok Imik Neyung yuba lena' gak nanga danalum bar aboka weboka dobsuk. Wera weboka dobsuka' nang enyek, sikenek yuba lena' gak nang aboka si silisak an, 6:14 Simon, bok Petrus aboka si sibuk. Dara Simon alja weisa Andreas, Yakobus hnon, Yohanes hnon, Pilipus be hnon, Bartolomeus be hnon, 6:15 Matius be hnon, Thomas be hnon, Alfeus bedya me Yakobus be hnon, Simon bek bok yok si Patriot alameknya be hnon, 6:16 Yakobus bedya me Yudas be hnon, alja eimik era Yesus ak oblulum aboka yuba dil binimoknya Yudas Iskariot be hnon, doboka sekiyiwousuk. 6:17 Dara Yesus ara meinik aba' ara, alja yuba doro diriga ban nang eb, yanggalamek ara bluk sokloroba' ak sam yinggyik. Dara anyeganera, ono' yok yuba dolomek nang eb, ono' yokmok-yokmok, hnonda Yudea sokok sam ab hnon, Yerusalem heikek ab hnon, yali sam penya mek gemek sam Tirus mok eb, Sidon mok eb yeindeboka longomek. 6:18 Dara sikda yalameknya nera, hnonda Yesus adya Imik Neyung yuba lelemoka' anyek kelenoba' aboka yalamek, hnon nim era, sik neikna' neiklemeka' anyek hwebsulula' aboka yalamek. Dara ono' sik bisa' goloklesuk nim eneba bisa' yakoka merellilisuk. 6:19 Wera nimi nidya' ara, Yesus ara nimi hwesin migib alak ab goblomoka' adya, nimi nidya' merellilisuka' anasa, sikda Yesus adya' akleng ek soruka dibibya dara, merewananoba' anya' senewoka dulumek. 6:20 Dara Yesus ara, alja yuba doro diriga ban nang ek keebdaboka lebokja, "Ugunda bona' garana ululum nang o, Imik Neyung wenesin heik ulumla' ara, ugunja' ak ulusila' anasa, ugunda pe ululum. 6:21 Ugunda wen gwaneng ok ulusil nim era, eimik era, mona buknesila' anasa, pe ululum. Ugunda wen engelelum nim era, eimik era, oksewanaluma' anasa, wera pe ululum. 6:22 Nimi diba' me nemba leboka, sikda ugunuk walamnesak, hnonda bisa' si ak geklewoka derelemnesak, hnonda malya nenewoka di songa leboka walasija dara, wera pe ululum. 6:23 Youma' ununumna' lelemek nang ek anaba neikso anaso nauba unulusik. Dara onnya nenyek ugun hnon unul yabasija dara, ugunsamba dekna' ara nauba imik heikek ulumla' anasa, ugunda pelesak aboka, sunugoka eiya hlalalulum. 6:24 Bok ugun wen dub ululum nang era, ugunda seleb senenya loboka boro deleluma' anasa, eimik era ugunuk omoma' ak okna dabnesil. 6:25 Ono' ugunda wen gwanenga dena' mona bukoka delelum nim era, eimik era gwaneng oka nauba kwebnesila' anasa, omom nong ak ululum. Ono' ugunda wen okselelum nim era, eimik era ganya suguwoka engewanaluma' anasa, omoma' ak ululum. 6:26 Youma' dara, sonda' anasa nunda ununumna' lelemab nang alamek nang ek, nimi nidya' peroba' lelesik sok, wera ugunuk yok nimi nidya' adya, peroba' lelesija nim era hyak nauba omoma' ak ululum," hyok. 6:27 "Bok wen ugunda nak an kelelum nim era, nara an wenyhenemna, Ugunda ugunja isa' nang ek wana' uboka, ugunuk lek senelesija nim ek pe unulululum. 6:28 Ugunuk malya leboka wema dalasija nang emba, ugunja dara, peroba' lelelulum; ugunuk malya nenewoka derelesija nim enesa, aralasulula' aboka Imik Neyung ak henga uboka molololulum. 6:29 Ugunuk hnon nang edya ugunja darasam sum ek sam waboka obnesak dara, darasamnya neneba or obnelom henelum. Dara, ono' yok nang edya ugunja golun akleng ek dobija dara, wera ongon akleng eneba or dobnok senewolulum. 6:30 Ono' yok nang edya, bona' ugunuk moloweisija dara, or elegolulum. Ugunja bona' hoka' dobsija dara, ono' saaboka numok aboka, bleboka donggom, mem. 6:31 Anya, ugunuk yok nim edya anaso unuweisiseng senewanalum dara, ugumbabya anasonya nenyek yok nim ek unuwolulum." 6:32 "Anya ugunda ugunuk wana' ulusak nim ok wana' ulumun dara, hek dekna' ek ugunsamba lanawanasuso do? Nenera sik malya ulumak nim eneba, sikenek wana' ulusak nim ek wana' ulusak bok anasa lebna. 6:33 Dara, malya una' nim eneba sikba unulumak bok anasa, ugunda ugunuk pe unulusak nim ok weboka wana' ulumun dara, hek dekna' ek saaboka dobnesom do? 6:34 Anya ugunda yoka' hnon yok nim ek se' naba eimik onsok lunuwoka eleganenoka' senewoka eleganalum dara, hek dekna' ek dobnesom do? Dara nenera malya una' nim eneba eimik dara, gong lunuwanenyak senewoka unu elegel lolomak bok anasa, lebna. 6:35 Bok ugunuk dara, ugunja isa' nim ek wana' ulumunukanya, sikenek pe unulumnulum. Ugunja bona' yok nim ek se' elek lobmun dara, naba lunuwoka men elegonulul senen ganya bonggom. Ugunda nenesonya nenyek unulumun dara, ugunja dekna' imik heikek nauba uboka, ugunda Imik Neyung imik ululanya bedya mabo diba' ulumnelum ara an. Al Imik Neyung ara, alda perob una' elgom ulumak nim ek hnon, ono' perob aboka gibnenggulumak nim ek anaba, pe unulusila' anasa, ugumbabya unulumnulum. 6:36 Wera anasa, ugunja Imik Neyung ara angoo yadyek senewoka aralesilnya ulumla' anasa, neikek ugumbabya angoo yadyek ganya adya unuldalalulum," hyok. 6:37 "Imik Neyung adya ugunuk yana leleweisilyek anasa, ugunda yok nim ek yana lelenggom, mem. Imik Neyung adya ugunuk igin yaka' kweiyiweisilyek anasa, ono' ugunja yok nim ek ganya adya henga goubnenggom, mem. Nadya malya una' Imik Neyung adya blebiyiwananel senewoka, anda yok nim ek suguna' ganya ara, meebdanalum dara, Imik Neyung anaba, anja malya una' era meewananggel. 6:38 Anja men yok nim ek arawamen dara, wera Imik Neyung ara ambabya lunuwoka eleganenggel. Wera anja yok nim ek unuro eleganemna senewoka pe sunuwoka keebdaboka eleklelamnya nera, ambabya Imik Neyung adya anak seleb al unuro eleganemna senewoka beillililanya nenyek, ambabya eleganenggel," hyok. 6:39 Dara Yesus ara sikinek hnon yok sununa' enyek sunuwoka lebokja, "Wera ben hnon heng lumnya bedya, yok heng lumnya bek arawoka neika' binisereng de? Anaso dara, sikda penya neika' gwerenek langa diniwanggunusereng de? 6:40 Sekolah me hnon ara anam dolomna salek era, neklesilnya be hwiboka geremseng so unggululabok, heknyek dobgiga balamna' ara dobdakna danyek, wera neikek neklesilnya beneso dangalamla." 6:41 "Anda anja' hengek senenggom gal booma ulunggelnya nera, pe eibdanggulamjok, hekasa anda anja' hem bedya heng ek mek heng solokna' enyek kemelelam do? 6:42 Dara anda anja' hem bek lelelamja, Hem o, wera or anja' heng solokna' dobnenggen e, wenyalelam bok, anja' heng ek senenggom gal booma era eibdanggunadyok dara, nera har sonya nek lelelam do? Anasa bol nenena'anya o, anja heng ek gal booma senenggoma' anyek men dobdamena' adya, wera anja' hem bedyinya mek heng solokna' era anedya pe eiyiboka dobnelam" hyok. 6:43 "Dara pe mesa' uboka welelamla gal era, dok ara malyinya nek mounggulumlakanya, ono' eka lerelamla gal era perob gal dok ek mounggulumla. 6:44 Anasa gala nidya' ara dokok ab ella dangalamak. Anya sabala' gal ak ab, anggur doka daknenggulumak. Ono' girikna' si gal pikik ab dara, bira daknenggulumak. 6:45 Dara nimi pe ulumak nim era, ganya lomok ara perobnya nok ulumla' adya yuba salamaka' ara, sikja ganya ak ab dara, perobnya nok lanalamla. Bok malya ulumak nim era, ganya lomok ara malyinya nok ulumla' adya, sikja ganya ak ab dara, malyinya nok lanalamla. An nenera alja yuba salamla' ara, ganya ak ab lanalamla anasa, unulamla. 6:46 Ugunda nadya wenyalasina' ara keboka unuwanggunadyok, hekasa nak, Wenelesilimnya o, Wenelesilimnya o, alanulum do? 6:47 Dara heknedya nak yeindeboka, nadya lelemna' anyek pe kebnekanya unululanya bera, benera an nadya ugunuk wenyhenesinya beneso' ak ulumla. 6:48 Alja una' era, nimi hnon e girik eilibek gasa darawoka somna' anaso' ak ulumla. Benera alda soko lomok lok-lok aboka girik eilib yangawoka solomla. Dara moka bliboka mek ililamla dara, wera alda girik eilibek somna' adya, e nera mel-mel ana' adya golol meneknenggulumla anaso' ak ulumla. 6:49 Bok heknyek nadya yuba kelenadyok, anyek lelemla senewoka ununggululanya bera, alja una' era, soko eilibek gasa' sobnenggumna somna e neneso' ak ulumla. Anedya moka bliboka, meka iliwan sum era, golol meneklamla sok, neikso alja una' era anaso ak ulumla," hyok.
7:1 Yesus ara nimi nidya' ak seleb wenyaboka lebgogowosuk dara, alda Kapernaum heikek sam byuk. 7:2 Dara Kapernaum heikek ara yin bona'anya bedya alja wana' nong ulumok wa wenya benyek hyak neikna' salamookanya somogoununa' ulumok. 7:3 Wera yin bona'anya bera, Yesus ara nimi hweboka unulusilnya bera ulumla an yuba kemok dara, Yahudi dub nim ek nadya wa wenya hwebnamla' anasa, alak e yanalum aboka orugosuk. 7:4 Dara sikda Yesus ak yeindeboka, "Neyung o, yin bona'anya bera alda anja arawanalam. 7:5 Alda nunja sokok an nim ek wana' uboka, Yahudi nim edya yuba don e sona' hnon alja arawoka ulusil anasa," aboka okoka lebek. 7:6 Dara Yesus ara Yahudi nim eb neika' yin bona'anya bedya ek byik. Wera Yesus ara e berem ok so yanggok dara, "Neyung o, nara anak ara or pe yalem aboka wenyhenggunusinya anasa, salya' kweldal yamenek aboka wenyaboka, nim ek Yesus ak wenyal bululum aboka orugosuk dara, wenyal byik. 7:7 Hnonda leladya, ban nenesa leboka, na nong anaba anak ara yamenggom. Anasa or yub adyok wa wenya bera merewolul aboka yuba beibmen dara, alda merewanemla. 7:8 Anasa wera, nara nadya imik eini dub nang yuba kelemna dara, ono' na damumduk onu ulumak nang era nadya yuba kelenyak. Nadya nimi yina bona'anya bek, Anyagan yalom, hen dara, yalamla. Ono' yoknya bek, Anda bilom, hen dara, alda balamla. Anya nadya wa wenya bek, Ban nenyek unuwalom, hen dara, alda keboka unulamla, wenyamla," hyek. 7:9 Dara Yesus ara ban wenyan yub enyek kebok dara, hyak loka dabok. Anasa Yesus ara alak diriga yalamek nang ek keeboka wenyhusuk, "Nara ban benyek na lokja, Israeli nimi gangganek ara, ban unuwoka dib senenanya nera hnon meka' eilinggulumna," hyok. 7:10 Wera Yesus ak el yeilimek nang era ek saaboka yanggek dara, wa wenya bera seleb meremoka' ak eibek. 7:11 Dara ono' Yesus ara hnon heik, Nain heikek sam byuk. Wera alja yuba doro diriga ban nang eb, nimi salya' gong alak arawoka dobdo yabalamek nim eb nauba neika' bilimek. 7:12 Dara Yesus ara Nain heikek nauba pik sindamak sam nongok oka wekel bok dara, anyagan heik nim era, nimi be' gal ara an jaboka bo gobol yabek. Dara ban somogomok me nera yougel gedya hnonok yando me nek somogomok. Wera heik enyek an nim era nauba gel genyek an neika' arawoka bo dil balamek. 7:13 Wera Yesus ara me dam gel genyek eibuk dara, hyak angoo yadyek senewookanya alak lebokja, Genong o, anda engena' ara mem! 7:14 Wenyaboka somogomok me be' dam biniboka soruka salal yabok dara, nimi be' jaboka bo balamek nang era sek lobek. Dara Yesus ara, Wei, goubenya me o, nara anak wenyhenenggen, anda buklom, hyok. 7:15 Wera somogomoka' anyek hweboka' goubenenya bera, alda bukoka yuba sab einiwok. Dara Yesus ara me nen eiling gek, elegok. 7:16 Dara nimi nidya' lok ganya boboka Imik Neyung ak gigilemek. Anya sikja dara, "Senenggom ununumna' lesinya bera nu gangganek sam seleb lanawal. Imik Neyung ara alja mabo siliba' ak blebnuna' aboka, wera seleb yok!" alamek. 7:17 Anedya Yesus ara anaso uboka unulamla an yub era, Yudea mok soko nidya' heik gokgobok sam anaba oboka lelewok. 7:18 Dara Yohanes Pembaptis bera alja yuba doro diriga ban nang edya, Yesus adya nidya' unulumoknya nera, Yohanes bek nekdo byik. 7:19 Dara Yohanes Pembaptis bera alja mabo penya nang ek yoururum aboka, sikda Yesus ak heil binirum aboka lebsukja, "Neyung o, anda eimik yanamla hyoknya ben gom, nunda yoknya bek diri ulumnemab gom?" aboka hei yanarum aboka orugosuk. 7:20 Wera ban nang era Yesus ak birik dara, "Yohanes Pembaptis bedya, alak heil binirum aboka orugeisila' anasa heibnenggenem. Neyung o, al anak Imik Neyung yuba leboka' sunuwoka yanamla alamaknya bera anak gom, nunda yok eimik yanalanya bek diri ulumnemab gom?" aboka heibdek. 7:21 Yesus ara ban salek nong era, nimi nauba yok-yok neikna' damok ek ab, igina kweboka okna ulusuknya nek ab, bisa' gong goloklesuka' hnon yakoka, hwelesuukanya, henga lum nimi nauba mereldilisuk. 7:22 Anasa Yesus adya sikenek, "Ugunda Yohanes Pembaptis bek saaboka biniboka, heka' ak ugunja eiyiboka keleluma' anyek, heng lum nim era gwelegoka eillilemak, yana heilimla nimi pe sekoka yabalamak, gororoma' adya malya uro delemla nim eneba pe boka' dolomak, o ounugamna nim era kelemak, seleb somogamna nim era embenga' bukillilisil, Imik Neyung adya' perob lero yanggan yub era bona' garan nim ek leb elekdo yabalamna' anyek nekdo binirum. 7:23 Nak yoka'-yoka' amba geregoka lek senewoka longgulunelnya bera, pe ulumla," hyok. 7:24 Wera Yohanes Pembaptis bedya Yesus ak heil binirum aboka bokosuk nang era seleb birik dara, Yesus ara anyagan nimi nauba longomek nim ek, "Ugunda heknyek eibnoba' aboka hwalek sam ara bililum do? Leiya ak kabo' adya bo geklamlya' anyek eibnoba' aboka bililum de? 7:25 Ugunda heka' ak eibnoba' aboka bililum do? Nimi ben hnon boksoma pe ongolenya benyek eibnoba' aboka bililum de? Perob boksom enyek ongowoka, dena' pero-pero deregoka ulumak nimi, perob dub nang ulumak heikek ok ulumak. 7:26 Anasa dara, ugunda hekasa bililum do? Ununumna' lelemoknya bek eibnoba' aboka bililum de? Aldib, alda hyak ono' nauba' imik ununumna' lenya bek ulumla. 7:27 Anasa ban alsamba dara, Imik Neyung yuba bukuk sam momnya doboka' ara, " Imik Neyung adya dara, nadya' boknanya bera an e. Ansamba pika yarawogulula' aboka, anda anam bok, alak men mengewoka bokol binimna!" wenyaboka dobok. 7:28 Nara ugunuk wenyhenesin anyek beknelum, Nimi gelewa adya nidya' sokok an beillilimaka' ulumak nim era, Yohanes bek senenggomnya ulumla soka' ara, hnon meka' alsonya bera hnon unggulumek. Bok, alda nim Imik Neyung wenesin heikek ara, hyak meka' anyek ululanya benyek ara, Yohanes bera mek so bok, alak danyek senenggomnya bek ulumla," hyok. 7:29 Nimi nidya' nim, mok soko amba rupiah molowoka dolomek nang eb danaba, Yesus adya ban wenyaro lelemok yuba kemek nim era, Imik Neyung adya unulululum hyok yuba perob senemek nim era sik nong anyek, anya Yohanes bedya meka dasuk nim era Imik Neyung adya peldisina' anyek dib senewek. 7:30 Bok Parisi nang eb, Imik Neyung yuba neksin nang eb dara, Imik Neyung adya unu webnesin senemoka' damok ara, dobnenggunumab aboka lek senemek. Dara ono' sikda hnon Yohanes bedya dara, meka dabsilyek senemek. 7:31 Dara ono' Yesus ara lebokja, "Nimi wene salek ulumak nim era, nadya dara, heka' anaso' ak sunuwoka lebnamna do? Sik nong ak dara, heka' anaso' ak ulumak do? 7:32 Sik nong ak dara, dekna' gasa' ak memabo buma hnon bukoka, ono' yok mab ek lelemakja, Nunda ugunsamba eiya hlabnesom bera seblesab bok, ugunda perob senewoka sunuknenggululum! Anya, nunda ugunsamba ganya engen bera seblesab bok, ugunja dara, ganya suguwoka engenggululum! aboka wenyaldalamak mab eneso' ak ulumak. 7:33 Dara Yohanes bera seleb yeiniboka, alda gwanenga meka lobsiniwoka ulumok dara, ugunja dara lelelumja, Alda bisa' wekok, wenyalalum! 7:34 Dara ono, nimi diba' me nera yeiniboka, alda gwanenga meka deregoka ulumla enyek, ugunja dara, Ugunda benyek kendululum! Dena' hwamnya, yu meka deregoka ganya uu ana' hwamnya, rupiah dona' nang eb, malya una' hwam nang edya' sikja' hem benya, alalum. 7:35 Bok, geremseng una' damok ak dara, alak dib dolomak nim edya danyek, diba' pelemak bekna' ulumla," hyok. 7:36 Dara Parisi nang ben hnon alja Yesus ak nadya' ek neika' denenam aboka yalom amok dara, alda biniboka bukoka delemok. 7:37 Wera heik enyek ara, gela malya una' hnoum ulumok gel ge hnon, nidya' ella ulumek gel gek ulumok. Dara gel gera kebok enyek, Yesus ara Parisinya bedya' ek sam delemla an yuba kebok dara, alda perob song ngikna' mek eb boboka Yesus delemoka' ek sam yok. 7:38 Wera gel gera Yesus delemok ak sam alda weilik sekoka, engena' gadya' eboka, alja heng meka' era Yesus adya' yan sangak sam niniwoka, Yesus adya yan ak ara, alja hong edya heng meka' luboka, giboka, perob ngikna' mek era an yanek an yek golumok. 7:39 Wenyek Parisinya bera Yesus ak nadya ek sam denenam aboka e bilimoknya bedya an unuwoka' anyek eibuk dara, alja ganya lomok seiniwokja, "Alda ununumna' lenya bek dara, ban unulamla gel genera alda heknya, alda genya' senewoka ella danamso," senemok. 7:40 Dara Yesus adya Simon bek, "Simon o, nadya yoka' don anak hnon wenyhenenggen," hyok. Danyek Simon bedya Yesus ak, "Yo, neyung o, or wenyhenelom e," hyok. 7:41 Dara, "Nimi penya nang edya yoknya bedya rupiah enyek deblorek. Nimi ben hnonda denga yuba' lambadya rupiah ak deblomok dara, ben hnonda denga yuba' hnonok rupiah ak deblomok. 7:42 Bok rupiah deblorek nang era, lunuwamenggom anasa, wera rupiah damnya bedya sikja deblorek rupiah era deknenggununurum, or deb lobnerum hyok. Anasa ban rupiah deblorek penya nang dara, heknyek pewanel aboka nauba so wana' ulumnamso do?" wenyaboka heibok. 7:43 Wenyek Simon bedya dara, "Nadya dara, nauba rupiah deb losonya benyek pewanel aboka nauba so wana' ubnamso," hyok. Dara Yesus adya Simon bek, "Anja seinilamnya nera aldib seinilam," hyok. 7:44 Dara ono' Yesus ara gel genyek an keeboka Simon bek leboka' ara, "Anda ban gel genera seleb eiyilam de? Nara anja' ek anam yanggan dara, anda nadya yana mek eleganamna senewoka meka hnon gweboka orowek beibnenggubmanelem bok, ban gel genera alja heng meka' edya nadya yana mek elegoka, ono' alja hong edya lubnel. 7:45 Anda nak pe gibnenenggonggom anja' ek doro dibnelem bok, ban gel genera anam wekel yanggan salek eba' moruwoka, nadya' yan ak meka hmobdibigenel sok dangamla. 7:46 Anja dara, nadya' huk dubuk ara, hong ngikna' mek hnon ngiknenggunelem bok, ban gel genera, alda nadya' yan ak sam perob song meka ngikenel. 7:47 Anasa nara anak wenyhenenggen, alja wana' nauba unululanya nenesa, wera alja' senenggom malya una' unululanya nera nidya' doboka bobogamla! Bok, malya una' meka' doboka boloklelanya bera, wana' una' anaba mek ok ulumla," hyok. 7:48 Dara ono' Yesus ara gel genyek an, "Anja malya una' dara, anak ab seleb memenggen," hyok. 7:49 Wenyek nimi yok nim, Yesus ab neika' bukoka delemek nim edya sik moumen ganya lomok, "Ban benera heknyek ulumla' adya, nim adya malya una' era sikenek ab memelesil do?" aboka seinimek. 7:50 Bok Yesus ara ban gel genyek an, "Anda nak dib senenelema' adya, anak seleb blebgela' anasa, anda ei-ei ganya boboka, or binilam!" hyok.
8:1 Nen seleb dara, mandewal henggonggom Yesus ara nauba heikek aba' ara hnon nauba heikek uboka, ono' mek heikek aba' ara hnon mek heikek sam, Imik Neyung adya wera seleb wenelemnesil aboka, perob lero yanggan yuba leb elekgiga yabalamok. Dara alja' obadya yuba doro diriga ban nang eneba alab neika' yabalamek. 8:2 Dara bisa' gologosuka' hnon, yok-yok neikna' salalesuka' ak hwesuk anyek, hwesuk gelewa eb neika' yabalamek. Ban gelewa dara, gela hnonda Maria yok si nera Magdalena alamek gel ge hnon (alda bisa' sekbadya ban gel genyek anyeb yakoka hwemok gel), 8:3 hnonda Herodes dubnya bedya' ek sam rupiah beilina' wa welemoknya, Khuza bedya gel Yohana geb, Susana geb uboka, ono' yok gelewa nauba neika' yabalamek. Dara gelewa danedya, sikja' yok-yok bona' edya Yesus ab, alja yuba doro diriga ban nang eb aralesik. 8:4 Wera nimi nauba Yesus ak yok-yok heikek aba' ara alak bolol yal dibilloklomek dara, alda sikenek ban sununa' enyek sunuwoka lebsuka' ara, 8:5 "Nimi wa wena'anya ben hnon yina' bo bolol bununa' aboka bilimok. Wera bera yina' bo bolol bilimok dara, yina' hnonda pikek sam yama yinggyuk. Dara nera hnonda nim adya yan ingib saboka, hnonda wining adya yeindeboka nidya' doboka jek. 8:6 Yina' hnonda girik lumok sam yama yinggyuk. Wera yina' era seleb bongowok bok, soko ara gelelom arob adya bongowokjok sesewok. 8:7 Yina' hnonda girikna' hnoum yama yinggyuk. Wera yina' era girikna' ab neika' pe bongowarekjok, girikna' adya aragoka' adya somogok. 8:8 Bok yina' hnonda perob sokok malyingginiboka, pe bongowoka doka nauba moulumok dara, hnonda denga dombadya anaso moru balamok," hyok. Yesus ara seleb wenyaboka sunuwoka lebgogowok dara, ono' lebokja, "Heknyek kendamba o yaka' ara, pe keblul!" hyok. 8:9 Wera alja yuba doro diriga ban nang edya alak, "Ban sunuwoka lelelama' ara, damok ara heka' ak lelelam?" aboka heibek. 8:10 Dara alda sikenek saaboka wenhyok, "Imik Neyung adya wenelemnesila' damoka ella dangan damba dara, alja migiba' era ugunuk ara seleb elegosuk. Bok yok nim ek dara, sikda eilin damba uruma dililimak bok, eilinggulumak, ken dara kelemak bok, anyek senewoka pe ella danganggulumak aboka, yoka' ak sunuwoka lelesin," hyok. 8:11 "Wera yina' bo bolol bilimoka' sununa' damok ara ban: Yina' ara Imik Neyung yuba. 8:12 Yina' pikek sam yama yinggilimoknya nera, nim ara Imik Neyung yuba kelemak bok, Imik Neyung yub ak dib seneweija enyek, blebsilyek aboka, Iblis adya Imik Neyung yub ara sikja ganya ak ab hoka' dololanya nera an. 8:13 Alda yina' girik lumok sokok sam yama yinggilimoknya nera, nim anam salek era ganya goluwoka yuba dolomak bok, yub ara diba' sikja' ganya lomok sam yina' menggulusil. Sikda anam salek se' ok dib senewana' ara, yoka' sunulyamasina' yanggan dara, wona' dangalamaknya nera an. 8:14 Alda girikna' hnoum yama yinggilimok aboka sunuwoknya nera, nim Imik Neyung yuba kelemak bok, sokok un ganya eb, bona' dubnya dangoka ulusinya ganya ab, ganya daldom-daldom ana' ganya eb dadya, yuba dolomla' ara, seklama darab eleganakanya, perob doka mounggulusilnya nera an. 8:15 Alda perob sokok sam yama yinggilimok aboka sunuwoknya nera, nim Imik Neyung yuba pe keboka, ono' ganya lomok beiyiboka pe uboka, bojam ulumak nim ek lebok. Dara ban nim era pe siklewoka ulumnekanya, yub ara pe yina' meboka doka molulanya nera an," hyok. 8:16 "Nimi hnon wesa' ara diniwoka mek hmei lomok gom, ekla mana' damumduk sam beibnenggunuseng. Alda ek wekel yanggeija nim era, dilina' anyek, eibnoka' aboka, wesa' ara diniwoka, laga beilin oulyang ak sam beibnamso. 8:17 Doknowoka ululanya nidya' ara, eimik laga danamla. Dara ono', wenera gunuwoka ululanya nidya' ara, eimik olowoka laga dangoka ella ulumnamak. 8:18 Wera anasa, ugunda seleb kebluma' anyek pe keeboka seiniwanalum. Anasa heknyek nauba ululanya bera, makoka elek sounuwanalabok, heknyek meka' ulumlakanya, hnon ulunel senelelanya neneba, nidya' alak ab dorowanamla," hyok. 8:19 Dara Yesus eilinggeb, alja weisab eb, Yesus ak yeilimek bok, nimi nauba adya al nong ok okoka oka yanggumek. 8:20 Dara nim adya alak, "Neyung o, anja' genong geb, anja weisab eb dara, sikda anab eibdanoba' aboka yeilimaakanya, beiyik ono seklemak," hyek. 8:21 Bok Yesus ara sikenek, "Nimi nidya' Imik Neyung yuba kelemaakanya, wenyalamla' anyek unulumak nim enyek, sikenek wera nadya' genong yabo, nadya weisab ulumak nim era al an," hyok. 8:22 Dara ono' yok sum enyek, Yesus ab alja yuba doro diriga ban nang eb dara, mek ekla buna' ak bukumek dara, Yesus adya sikenek, "Nunda meka gouboka eer sam gemek binimaba' anasa, yoululum," husuk. Dara sikda lanawoka buku balamek. 8:23 Wera sikda anam mek hnoumunga buka balameekanya, Yesus ara se' hogunga mamok. Dara mek dubuk sam senenggom kabo' dorogookanya, wera sik bukumek mek ekla buna' era meka wekoka sikda hyak nidya' obsununa' aboka ul yabasuk. 8:24 Anasa yuba doro diriga ban nang era lok anasa, sikda Yesus ak biniboka, "Neyung o, neyung o, nunda wera meka si dereganabsil!" aboka gamayibek. Dara Yesus ara bukoka, mek era yakna nee yeiniboka eillilemoka' ak loblom aboka waboka lebok. Wenyek kabo' ab mek eiliwoka poweklemoka' ara loboka, mek ara namena' mab lobok. 8:25 Dara alda alja yuba doro diriga ban nang ek, "Ugunja ganya dib senena' ara hanyagar do?" husuk. Dara sikda hyak nauba lok ganya bomeekanya, sik moumen leldalamekja, "Kabo ab, mek uu aboka eillilamna' anaba, alja loblom al yaban enyek, alja yuba diba' kelemaka' anasa, ban benera heknyek ulumla do?" aboka lelemek. 8:26 Dara Yesus ab alja yuba doro diriga ban nang era, mek ekla buna' buku balameka' ara, Galilea mek gwana geme ener sam gouboka, Gerasa nang edya moka lanel byik. 8:27 Wera Yesus ara mek ekla buna' ak ab gouboka gasa' ak sekel bok dara, nengmabo ben hnon bisa' gologomoknya bek Yesus ak yok. Bera alda youma' ek moruwoka, akleng ongona' oroka' anyek, e diba' ak una' loboka, beiyik nimi dilina' pik ok mal giriklemok. 8:28 Bera alda Yesus ak eibuk dara, alda Yesus adya' saramek oumuwoka giboka yuba bii aboka lebokja, "Imik ululanya, Imik Neyung bedya me, Yesus o! Anda nak ara heka' ak ulumla do? Nak malya nenewoka loba' nenena' ara mem aboka molowagen!" hyok. 8:29 Alda wenyaboka lelemoka' ara, Yesus adya alak an gologomok bisa' danyek gouboka bululum al yaboka' anasa lel yabok. Bera alda soba' bisa' adya gologol yan dara, alja yan eb, soruk ab dara, gasa heng edya gouboka ono' pe diri bo ulumna' anaba, heng era bisa' ganya yama' adya bolok-bolok ab menegoka, hwalek gasa' ak sam glo' ak bo balamok. 8:30 Dara Yesus ara benyek an, "Anda si ara heknya do?" aboka heibok. Wenyek benedya dara, alda bisa' ara nauba gologomek bok anasa lebokja, "Nadya si nera Legion," hyok. 8:31 Dara benyek an wekemek bisa' mandebna' danadya, Yesus ak nunda salya' somokna' gweren selenga' ak sam yaksina' ara mem aboka molowek. 8:32 Dara mok enyek anera, pama nauba mein pik mola dero yabalamek. Anasa benyek an gologomek bisa' danadya, Yesus ak nunda ban pam mandebna' lom enyek an weknoba' aboka, or hesilom aboka molowek. 8:33 Dara wera bisa' gong era, gologomeknya bek ab gouboka, pam pik wekel byik. Dara pam dara, yeiriwoka mok soko abom pik aba' ara langa diniwoka, mek gwanek sam youruwoka somokdo byik. 8:34 Wera pama lob geregoka bo ulumek nang edya ban nidya' unuwoka' ara okoka eibek. Dara nang enedya nauba heikek hnon, mek-mek heik pik sik ulumeka' gokgobok heik me nidya' ara unuwal aro nekdo byik. 8:35 Dara nimi nidya' heikek ab unumoka' nidya' eibnoba' aboka gobek. Dara sikda Yesus ulumoka' ak sam yeiniboka kemelemek enyek, bisa' gologomoka' anyek alja hwemoknya bera, Yesus adya' yan berem bulumoka' anyek eibek. Dara bera alda ganya sirika' beiyiboka, aklenga seleb ongowoka bulumok. Wenyek eiyimek nim era, hyak lok ganya bobek. 8:36 Dara hweboka' eibek nim edya, Yesus ara ban bisa' gologoknya bera heka' huboka hwemla' ara, unu hwemla enyek meremla aboka nekdangamek. 8:37 Dara Gerasa mok sokok nimi nidya' ara, hyak lok ganya bobeka' anasa, Yesus ak, wera anda nunja mok una' ara lo binilam aboka wenyal byik. Anasa Yesus ara mek ekla buna' ak bukoka saaboka yek. 8:38 Bok men dara, bisa' gologomoka' anyek, hwemoknya bedya Yesus ak nara neika' anab bininam gom aboka molowok. Bok Yesus adya anja' ek binilam aboka orugoka lebokja, 8:39 "Imik Neyung adya nidya' anak sam unuwagela' anyek, anda biniboka nekdo yibinelam," hyok. Dara bera, Yesus adya alak nidya' unumoka' anyek, alja mok heik nimi nidya' ak biniboka nekdo yabalamok. 8:40 Wera Yesus ara, seleb onok yok dara, nimi nauba orowek alsamba diri ulumeka' adya, ganya eiyasa' alak pika dibek. 8:41 Dara heik enyek an, Yahudi nim edya yuba don e damnya bera Yesus ak yok. Bera alja si nera Yairus. Alda Yesus adya' saram nong ok yeiniboka komo lumugoka giboka, nadya ek yanalam aboka molol yok. 8:42 Nera alja gelma gibna' ara obadya lemok gelma enyek, somogonuna' aboka ul yaboka' anasa el yok. Dara Yesus ara ek sam bununa' aboka, anam pikek balamok dara, nimi nauba darasam-darasam aba' ara, Yesus nong ak ol goklemek. 8:43 Dara, neik ek dangamok gela hnon, gibna' obadya lemok gel ge hnon ulumok. Gel gera nimi hwesina' nim ek hwebnenoka' aboka, bona' yoka'-yoka' ara gobdo dengaromok bok, hyak alak gobdo pika garawoka hwebnenggumek. 8:44 Wera gel gera Yesus balamok pik eimik dib dobol yeiniboka, Yesus adya ongomok akleng mousa ek meka' soruka bebegemok. Dara al wene sab-sab enyek, neik ek dangamoka' ara, gobdo dengaro lobok. 8:45 Wenyek Yesus ara, "Heknedya nak bebegenel do?" aboka heibsuk. Dara nimi nidya' ara hnon laga lebnenggubek. Anasa Petrus bedya Yesus ak, "Neyung o, an ululama' ak ara, nimi mandebna' hyak nauba ulumaakanya, sikda anak duka' eboka ol gokoldalamak ara eiyilam," hyok. 8:46 Bok Yesus adya dara, "Nimi hnon nak an sene soruka bebeganyak. Nak ab senenggom migiba hnon gobnela' eibna' anasa," hyok. 8:47 Danyek bebegemok gel gedya dara, nadya unumna' ara, ella uboka wera eibnel senewoka ella dookanya, alda ber-ber ana' dib yeiniboka, Yesus adya' saramek sam yeiniboka oumuwoka gibok. Dara ono' gel gera nimi hnoum anyeb, hekasa alda Yesus ak bebegamlakanya, alja neik ek dangamoka' ara, wene salek denghyoka' ara, anesemba aboka unuwanel aboka laga nekok. 8:48 Dara Yesus adya gel genyek an, "Nadya gelma o, anda nak dib senenelema' adya, wera anda merewalem. Anasa anda wera or ganya hekoka ek bindowalom," hyok. 8:49 Wera Yesus ara anam yuba salamok sab-sab, Yairus bedya' ek ab orukna'anya ben hnon yeiniboka, Yairus bek, "Neyung o, anja gelma era, seleb somogal. Anasa neyung, neklesilnya bek loba' nenenggom, mem," hyok. 8:50 Bok Yesus ara ban yub en kebok dara, Yairus bek, "Anda lok ganya bonggom, mem. Anja me nera eimik merewanamla' anasa, anda dib senewanalam," hyok. 8:51 Wera sikda Yairus bedya' ek sam seleb byik dara, Yesus ara yok nim era, ugunda e lomok wekel yanggana' mem aboka, alda Petrus beb, Yohanes beb, Yakobus beb me nen alja genonga neyung ok or bo weksuk. 8:52 Wera nimi nidya' ara gelma enesa engewoka nimi saleka bulumek. Bok Yesus adya engelemek nim ek an, Gelma enera somoganggumla, alda hogung dema mamla' anasa, engena' ara mem loblulum! husuk. 8:53 Wera sikja dara, gelma era seleb somogomoka' ella umek bok adya, Yesus ak oksiyiwek. 8:54 Dara Yesus ara gelma enedya soruka glibsalawoka, lebokja, "Najabo gelma o, buklom!" aboka lebok. 8:55 Dara gelma enedya ganya era onsok yookanya, gelma era wene sab-sab eneba, bukoka sekok. Dara, Yesus adya gelma ara dena' elegolulum aboka orugosuk. 8:56 Gelma enedya ala' genonga neyung ara, hyak loka dabdowosuk. Bok Yesus ara ban unu hweboka' ara, yok nim ek salya' nekdo yabana' ara mem aboka lebsuk.
9:1 Dara Yesus ara, alja obadya yuba lena' gak nang ek yoululum aboka, sikenek bisa' doro bobogoka, bisa' ak obleboka, neikna' nimi hwesin danasa, migib elegosuk. 9:2 Dara, Yesus ara sikenek, Ugunda nimi hweboka, hnonda Imik Neyung adya heka' huboka wenelemnesila' anyek lero yabalamnelum, aboka lebsuk. 9:3 Ono' sikenek lebsuka' ara, "Ugunda pikek biniluma' amba dara, yoka'-yoka' bona' ara mem. Ugunda gama' dunguna' bobnenggunulum, dem glo' aklenga salya' bona' ab, dena' gom, rupiah gom, ongon aklenga penya so bona' ara mem. 9:4 Dara anyagan nublaboka neika' ulumnemab henesak ek an ulumuna' ara, wera ono' e nenyek anyeba' ara binilum. 9:5 Nublaboka neika' ulumnemab aboka dobnenggunusak heik era, heik enyek ara lo yabamunukanya, yan blesa anyek heik enyek an habdeboka biniluma' adya, siksamba bekna' diba' danamla," aboka wenewosuk. 9:6 Dara sikda bilimeekanya, mek-mek heikek sam biniboka, Imik Neyung yuba leb elegoka, yokok-yokok sam nimi nauba hwero yabalesik. 9:7 Galilea sokok wenesin dubnya Herodes bera, Yesus ban eini nidya' unulumok yub enyek kebok dara, heka' hubnamna ak lelemak do senewoka ganya emok. Hnonda lelemekja, 'Yohanes Pembaptis bera seleb suboka lanawok,' alameka' anasa, ganya eb menegegoka okna damok. 9:8 Hnonda lelemekja, 'Eli bera ono' wera seleb subuka lanawok,' alamek. Hnon nim edya lelemeka' ara, 'Youma' ununumna' lelemek nanga ben hnon, wera seleb embenga' suboka lanawok,' alamek. 9:9 Ban nenesa leboka, Herodes bedya lebnemoka' ara, "Nara Yohanes Pembaptis bera seleb ya nganga daksa. Bok ban wenyalamaknya bera heknyek lelemak do? Alja yoka'-yoka' unulamla an yuba nauba kelenaba," aboka, Herodes bera Yesus ak okoka eibsinya senewoka pik elemok. 9:10 Yesus adya yuba lena' gak nang bokosuk nang era yeekanya, Yesus ak nunda ban unu welemab aboka nekdo yek. Wera dara, Yesus adya ugunda yoululum aboka eboka bobsuk dara, sikbeyoka' Betsaida heikek byik. Anedya alda sikeneblaboka sikbeyoka' anyegan ulumek. 9:11 Bok nimi nauba ara byika' anyek ella uboka, sikbabya Yesus ak dobdo byik. Dara Yesus adya sikenek pe youlum aboka, Imik Neyung adya heka' huboka wenelemnesila' anyek neklesuk. Dara ono' hnonda sik gangganek sam nimi nauba neikna' anasa hwebnamen ubnanya nera hweboka meiriyisuk. 9:12 Wera sin dangoka inin salek oka dok dara, Yesus adya yuba doro diriga ban nang era, alak yeiniboka lebekja, "Neyung o, anyaganera gakdena' sokok anasa, sikda ok anyan mek-mek heik pik biniboka e dena' eboka mabnoka' aboka orugeisilom," hyek. 9:13 Bok Yesus adya lebok ara, "Ugunja sikenek dena' eleganalum," hyok. Anasa alja yuba doro diriga ban nang edya dara, "Nuk ara gwanenga lambadya ok uboka, hadya' ara penyok ulumla. Nunda ban nimi mandebna' danasa gwanenga heikek dekel binisibya danyek goma?" hyek. 9:14 (Anyaganera nengmab ok anyek denga yuba' lambadya nang (lima ribu orang) ulumek.) Yesus adya alja yuba diriga ban nang ek, "Ban nimi danara nimi buma yok-yok sunuwoka buklulum aboka orugosululum. Hnonok oulyang era denga penya uboka buknelum aboka orugosululum," hyok. 9:15 Dara alja yuba doro diriga ban nang era, Yesus adya sikenek wenyalasuk dara, nidya' sunuwoka unuwek. 9:16 Dara Yesus ara gwaneng ab hadya' danyeb dara doboka, imik keeboka Imik Neyung ak perob aboka molowok. Seleb molobgogowok dara, gwaneng ab hadya' ab dara, Yesus adya seleb sob menegemok dara, alja yuba doro diriga ban nang ek, nimi bukumek nimi nidya' ak boknesulum aboka elegosuk. 9:17 Wera nimi mandebna' dara delemeka' ara, mona bukusuk. Dara Yesus adya yuba doro diriga ban nang era, deregoka bok lobeknya nera sor serrem obadya mamagoka kiblomek. 9:18 Wera ono' yok sum enyek, Yesus ara albeyoka' heng uboka mololemok dara, alja yuba doro diriga ban nang era alak yeilimek. Danyek Yesus adya sikenek, "Nim adya dara, nara heknya alanyak do?" wenyaboka heibsuk. 9:19 Danyek sikja lebnemeka' ara, "Hnonda lelenjakja, Yohanes Pembaptis, alanjak. Hnonda, Elia benya', alanjak. Anya hnon nim edya dara, youma' ununumna' lelemek nang danyek ben hnon seleb embenga' suboka bukok alanjak," hyek. 9:20 Bok Yesus ara sikenek, "Ugun nong adya dara, nara heknya senelenulum do?" aboka heibsuk. Danyek Petrus bedya dara, "Neyung, anda Kristus, Imik Neyung adya' nimi blebsina' dubnya, ululam," hyok. 9:21 Dara Yesus adya alja yuba doro diriga ban nang ek lebsuka' ara, "Ban yub era yok nim ek salya' nekdo bana' ara mem," husuk. 9:22 Anya Yesus ara lebokja, "Nimi diba' me ara, nauba gweknamla' ara, Yahudi dub nang eb, Imik Neyung yuba wa gaka' dub nang eb, yuba neksin nang eb dadya, malya nenewanamak. Alda hyaka' obnemak bok, winilinya sum yenewalya dara, ono' embenga' subnamla," hyok. 9:23 Dara alda sik nidya' ak, "Nak diriga yanalenya bera, alak perob danamso' digum ara loboka, li soba' alja' igin yaka' doboka, nak diriga yalanulul. 9:24 Anasa wera, alja nong enyek, blebdanamna senelelanya bera, alda nong era weiningganamla. Bok, wenyek alja nong era, nasamba leboka bologoldalalanya bera, eimik era blebdanamla. 9:25 Nimi ben hnon sokok ulumla' nidya' ara alja' ok dangasobok, al nong anyek malya' nenewoka denghenemso dara, alak peroba' digum ara heka' ak dangal binimso do? 9:26 Nimi ben hnon nadya lelemna yub eb, nasamba danyek laga lena' ara alya anasa lolonelnya bera, nimi diba' me yanamla sum era, Imik Neyung Wenelesilnya bedya migib eb, geisa ulumak lero nang eb senenggoma' yanamak sum era, nababya alya anasa, benyek albabya alja si laga lena' lobnamna. 9:27 Nara ugunuk lebnesin, Ugun ban ublum nang enera, hnonda Imik Neyung adya wenelemnesila' eibnenggumeija bok dara, somoganggunulum nanga hnon ululum," hyok. 9:28 Yesus ara ban yuba dan wenyaboka neksuk salek era, minggu hnonok so seleb mabok dara, ono' alda Petrus beb Yohanes beb Yakobus beb yok meinik sam heng uboka molowanoba' aboka bo welesuk. 9:29 Wera Yesus ara mein enyek an heng uboka mololomok dara, alja hogung era yoka dangoka, alja boksom era hyak geisa nonga' anyek dangamok. 9:30-31 Wene sab-sab enyek, nimi penya nang ara Musa beb, Eli beb, imik heikek ab dilina' yeboka, warak loboka, sikda laga goboka sekdek. Dara sikda Yesus anyek mek anam Yerusalem heikek ab ura somoganamok yub enyek, neika' salamek. 9:32 Ban salek era, Petrus beb alja hemyabo penya nang eb dara, hogunga mamek bok, ono' wene salek gaawoka bukumek dara, sikda Yesus ara senenggom migib senedya' edya warak loboka, alda nimi penya nang eb seklemeka' ak eibek. 9:33 Wera penya nang dara, Yesus ak loboka sikda barek dara, Petrus bedya Yesus ak, "Neklesilimnya o, nunda anyagan ulumaba' ara hyak pemab. Nunda anyagan ara lubna e winilya, hnonda neyung ansamba, hnonda Musa bemba, hnonnya nera Eli bemba sobnemab," hyok. (Petrus bera ban wenhyoknya nera alja lelemoka' ara damok ara anyek lebnamna' elgom bok salya' lebok.) 9:34 Petrus bera wenyaro anam yuba salamok salek enyek, deba' buma hnon lo yingginiboka, sikenek siklewosuk dara, sikda hyak loka dabsuk. 9:35 Wera ban deba' enyek anyeb yuba sabnemoka' ara, "Nadya weboka domsa me nera ban e. Alak ok pe keblulum," hyok. 9:36 Wera yub era seleb saro dakdowok dara, sikja dara, anyagan ara Yesus ok albeyok ulumoka' ak eiyimek. Yesus alja' winilya yuba lena' gak nang era, sikda yuba sana' loboka, gelegemek, dara ono' ban salek enyek, sikja eiyimeka' ara, yok nim ek unu eiyimab aboka, nekdo yibinggumek. 9:37 Ampum so' gwelegok dara, Yesus ab alja' winilya yuba lena' gak nang eb dara, meinik aba' ara yanggalamek enyek, nimi nauba Yesus ak yalamek. 9:38 Nimi hnoum ab nengmabo ben hnonja Yesus ak bii aboka lelemoka' ara, "Neklesilimnya o, nadya me nenyek arawoka kendenelom e. Alda nadya' hnonok me nong ek bar! 9:39 Wera bisa' anyek gologol yanggan dara, ngolukna' yuba leboka, alja nong era bonggeiling-bonggeiling aboka gwekoka, sibama' ara bol gamala' youlul-youlul alamla. Bisa' ganya ara alak saboka oboka, goboka bana' ara lek senelamla. 9:40 Nara anja yuba doro diriga yalanjak nang ek, na me hwebnenulum aboka molowasa bok, sikda hwebnamenggom anasa lorob," hyok. 9:41 Yesus adya sikenek lebnesuka' ara, "Ugunda hyak dong dang ana' nong anyek, dib senena' loboka salya' ululum ba! Ugunda nauba meknewoka, ono' dib senenggululum nang ek ululum. Nara hwer salek ek ugunub go' ganya daklinggoka ulumnamab do? Me damnya bek, me nera nak an bo yalom," hyok. 9:42 Me nera Yesus ak bo yanggok enyek, bisa' gologomoka' ganya era, alak somora bobogoka nong ara bonggeiling-bonggeiling aboka gweklemok. Bok Yesus adya bisa' era goboka bilom aboka orugookanya, wera me nera merewok. Dara me nera Yesus adya eili bek saaboka lebok. 9:43 Nimi nidya' ara, Imik Neyung adya senenggom migib unulamla' anyek eiyimek dara, hyak lok ganya bomek. Nimi nauba ara, Yesus adya lok so unulumoka' anyek eiyiboka, anam lok ganya boboka ulumek salek, Yesus adya alja yuba doro diriga ban nang ek leboka' ara, 9:44 "Ban nadya lebnamna yub enyek, ugunda hilikna' loboka pe bekmoubnelum, Nimi diba' me ara eimik doboka nimi migib lomok eleganamak," hyok. 9:45 Bok Yesus yuba doro diriga ban nang edya dara, Yesus adya wenhyok yuba damok era, anasa lebla senewoka ella danggumek. Sikenek dara, ganya onga lesuk. Bok ono' sikja' anaba Yesus ak heka' ak leblam aboka heina' ara lok anasa, lobek. 9:46 Yesus alja yuba lena' gak nang edya dara, heknya ek nu gangganek ara senenggom so ulumla do aboka waldana' lanawek. 9:47 Yesus adya sikja ban wen senen ganya bomeka' ak eibsuk dara, alda me hnon doboka alja' saramek sam sekiyiwok. 9:48 Anya ono' sikenek, "Heknedya nadya si, nasamba leboka banaso me nenyek dolomla dara, alda nak dolonel. Wera nak dolonelnya bera, alda na bokol yeilinyoknya bek dolomla. Anasa wera, ugun gangganek anyek hyak mek sonya ululanya benyek alda senenggom so ulumla," hyok. 9:49 Yohanes bedya Yesus ak, "Neyung o, nimi ben hnon alda nuk makoka unggulumabjok, alda anja si sibuka bisa' yaklamla' anasa, Mem loblom, amna," hyok. 9:50 Danyek Yesus adya Yohanes bek hnon yok alja yuba doro diriga ban nang ek ara, "Ugunda alak mem ana' ara mem." Alda anasa wera, "Ugunuk lek anggulusak nim era, sikda ugunuk mala dolosak nim era an," hyok. 9:51 Yesus ara imik do welewanamok salek oka doka' eibuk dara, nara wera Yerusalem heikek hyak binimna aboka gegewok. 9:52 Dara wera, alja nimi hnon ugunda men bililulum aboka orugosuk. Wera orugosuk nang era sikda men biniboka, Samaria sokok sam yok heikek biniboka, Yesus amba yoka'-yoka' meewoka beibnemab aboka ubek. 9:53 Bok Yesus ara laga Yerusalem heikek balamoka' anyek eiyiboka, heik enyegan nim edya dara, Yesus ak nunja' heikek yalom aboka dobnenggumek. 9:54 Dara Yesus alja yuba doro diriga balarek nang, Yohanes beb Petrus beb dadya, ban ganya en bomeka' eibdek nang edya dara, "Wenelesilimnya o, Wenelesilimnya anda perob senemen dara, imik ab nim enyek nidya' uk adya doblinggoka oblula' aboka molowananam goma?" herek. 9:55 Danyek Yesus adya sikenek sam saaboka wabsuk. 9:56 Ban nen seleb dara, sikda yok heikek don byik. 9:57 Wera Yesus ab alja yuba doro diriga ban nang era pikek anam balamek dara, nimi ben hnon Yesus ak yeiniboka, "Neyung o, anda hek mok ok binimena' nidya' ara, nara al anab neika' ok yabalemnenam," hyok. 9:58 Yesus adya alak saaboka lebnemok dara, "Wining ara e solomla, soko mana' ara oulyanga yak bok, nimi diba' me nera man ekla era unggulumla," hyok. 9:59 Dara ono' Yesus ara yoknya bek hnon leboka' ara, "Anda nak diriga yanelom," hyok. Bok benedya Yesus ak lebokja, "Neyung o, nadya neyung be somogamla' anyek soko lokol binimna' anasa, men or henemen bok," hyok. 9:60 Danyek Yesus adya lebnemoka' ara, "Nimi somoklomak nim era, sik dam nang soko lokol dalanok, alda anda Imik Neyung ara heka' huboka wenelemnesila' anyek, yok-yok moka bo lel elegel binilam," hyok. 9:61 Nimi ben hnon ono' Yesus ak yeiniboka leboka' ara, "Neyung o, nara anak diriga yalamnenggen bok, men nadya nauba nim ek molol binimna' anasa, or henenelem," hyok. 9:62 Danyek Yesus adya benyek an lebnemoka' ara, "Nimi ben hnon wa wel einileladyok, youma' wenanya nek soba' saaboka kemel samalamla dara, bera Imik Neyung wa pe wenya danggunumla," hyok.
10:1 Ono' yok sum era, Wenelesilnya Yesus ara, nimi yok yuba len nang denga penya uboka ebdobnya goklomdara' badya nang era penya-penya yandara nang uboka, yok-yok heikek al yibinemok heik me nidya' heikek binilum aboka boksuk. 10:2 Anya Yesus adya sikenek lebsuka' ara, "Nonga daknemak ara nauba ululabok, alda nonga dakne nang enyek mek ok ulumak. Anasa wera, ugunda wa damnya bek, masa nonga daknemeija nang era, bokol yousulula' aboka molowolulum. 10:3 Wera ugunda or bululum! Nara ugunuk domba pam eneso ak bei gam hnoum boksin. 10:4 Ugunda dem akleng eb, rupiah bona' ab, yan ongona' bona' ara mem. Ugunda yok nim ek gibnoba' aboka pikek anya dek-deka sona' ara mem. 10:5 Ugunda yok nim edya ek weknelum dara, Ban e nenyek an peroba' dalom, henelum. 10:6 E nenyek anara, e damnya bedya ugunub ganya hekoka ulumnemab senewanamla dara, ugunja perob aboka gibnelumnya nera alak soba' ulumnamla, bok orok dara, ugunja hekoka gibmunya nera onsok ugun damnya yanesil. 10:7 Ugunda ban hnonok ek ok ulumnelum. Wa welemna nim era dekna' doboka delemaka' anasa, ugun ulumun ek anya dena' beibnesak dara, doboka delelulum. Yok-yok e pik salya' welem-welem aro yabana' ara mem. 10:8 Ugunda yok senenggom heikek gom yanalum danyek, youmuna' anasa peroba' lebsijekanya, dena' ugunsamba aboka beibnesak dara, or doboka denelum. 10:9 Dara heik enyek an, nimi neikna' nimi or hwebnelum, hnonda Imik Neyung adya eimik ugun gangganek sam wenelemnesila' ara oka yal aro leb eleganesulum. 10:10 Bok ugunda yok heikek yanalum enyek, heik en nim edya ugunuk peroba' leboka dobnenggunusak dara, ugunda pikek sam sekel yibiniboka lebnelumja, 10:11 Ugunja heikek ab nunja' yan ak sam oumesilya blesa era ugunuk bekna' diba' hab lobsab. Bok ugunuk dara, wera Imik Neyung adya ugun gangganek sam wenelemnesila' anyek oka yalamla anyek ella danalum, henelum. 10:12 Wera, ugunuk lebsin. Soko sidya' daknamla sum era, Sodom nim ek dara, malya una' amba mek so obnesil bok, ban sikja unuwanamak heik nim malya una' amba nauba so obnesil," hyok. 10:13 "Korazim heik o, anak dara hyak omoma' ak ululam! Betsaida heik o, anak dara hyak omoma' ak ululam! Ugun gangganek an unulamla migib ununa' enyek, Sidon heikek hnon Tirus heikek seleb unusobok dara, wera heik enyek an nim era seleb nidya' malya una' 10:14 Soko denghenemla sum era, Sidon nim eb, Tirus nim eb dadya, malya una' amba mek so obnesil bok, ugunuk dara, nauba obnesil. 10:15 Alda Kapernaum heik o, anak dara, im nongok eini nenewananel senelelam de? Orok! Alda anda gobdo somokna' nim heikek boboganenggel!" hyok. 10:16 Anya Yesus ara alja yuba doro diriga ban nang ek, "Nim ugunja yuba kelesak nim era, sikda nadya yub ek kelenyak. Alda ugunuk lek alasak nim era, sikda nak lek alanyak. Anya wera, nak lek alanyak nim era, sikda nadya' neyung be na bokol yeilinyoknya 10:17 Nimi denga penya uboka eb loboka bokosuk yuba len nang era, ganya hyak eiya daboka ono' yek. Anya sikja dara, "Wenelesilimnya o, wera bisa' anaba nunja anja si sibuka goboka bilom wenyal yaban dara, nunja yub era pe kelesak!" hyek. 10:18 Danyek Yesus adya sikenek lebnesuka' ara, "Bisa' dubnya Satan ara ebna' langam-langam aboka, imik aba' ara malyinggyuka' ak eibsa. 10:19 Ugunda banyek pe kebnalum! Ugunda baga' ab, siribna' ab, yok isa' nang migib ab, ugunuk sam hnon malya nenesina' oroka' anyek, yan ingib saboka hmenga neneleluluma' aboka nadya migib era ugunuk elegeisisa. 10:20 Ban seleb bisa' ara ugunja yuba keboka goboka balamla' amba leboka perob senewoka ei-ei ganya bona' ara mem. Alda ugunja si nenyek imik heikek sam momnya dolosila' anasa leboka ei-ei ganya bololulum," hyok. 10:21 Dara ban neik salek Yesus anaba, alda ei-ei ganya bomoka' ara, Imik Neyung Geisinya adya deknemoka' adya umok. Anasa Yesus adya dara, "Neyung, Wenelesilimnya o, anda soko ab im ab dubnya ululam! Nara anak perob aboka gibgena' ara, ban nidya' unulusi 10:22 "Yoka'-yoka' nidya' ara neyung bedya nak lebnyok. Nimi nidya' ara me ak ara elgom ulumak bok, neyung anak ok hnonok ella ulunelem. Nim adya dara, anak elgom ulunjak bok, anja me nedya danyek, hnonok ella ulunggen. Anya hek nim ek, me nenedya neyung 10:23 Dara Yesus ara alja yuba doro diriga ban nang ek keeboka, ono' sikba youkowek lebsuka' ara, "Ugunda wen an eiblumnya nenyek, yok nim anaba eillilimak nim era pe ulumak. 10:24 Anasa ban nenyek lebsin, Youma' ununumna' lelemek nang eb, dub nang eb dara, ugun an wen eiblumnya nenyek eibnob senewoka diri ulumek bok, hyak meka' eruwanggubek. Sikda ugun wen an kelelumnya nenyek, kebnob senen diri ulumek bok, kebnenggubek," hyo 10:25 Dara ono' Yahudi yuba neksinya ben hnon Yesus ak sene sunuwonuna' aboka goboka sekel yeilimok. Benedya Yesus ak, "Neyung neklesilimnya o, nara heka' ak hubnya' adya embeng una' ara dobnamna do?" aboka heibuk. 10:26 Danyek Yesus adya benyek an leboka' ara, "Imik Neyung adya unuwanalum an yuba bukuk sam ara, heka' aro momnya dobok do? Anja dara, nera heka' ak lebok senelelam do?" aboka saaboka heibok. 10:27 Wenyek benedya leboka' ara, "Anda Imik Neyung bek ganya gebman adya wana' ululom, anja nong una' gebman adya wana' ululom, anja nong migib gebman adya wana' ululom, anja ganya seinina' gebman adya hnon wana' ululom. An dam nang wana' uldalalam sok, 10:28 Danyek Yesus adya, "Anja leblama' dara, dib leblam. Ban nenyek nidya' unulumen dara, wera anda embeng una' dib dobnelam," hyok. 10:29 Bok Yahudi yuba neksinya bedya perobnya benya' bekna' donulul senewok. Anasa, "Na kabo nim era hek nim ek lelam do?" aboka heibuk. 10:30 Dara, Yesus adya benyek an leboka' ara, "Nimi ben hnon alda Yerusalem heikek aba' ara Yerikho heikek yanggalamok. Pikek anam yanggalamok bok, beiyek nim edya pika weboka, alja bona' nidya' dorowoka, al nonga hyaka' oboka, anya wera pik ganggan ob lo 10:31 Wera ono' neik pikek ara, yuba wa gaknya ben hnon yanggalamok. Dara benyek oboka pikek meiyimeka' eibuk dara, bera pika leiboka byuk. 10:32 Anasonya neikek, Lewi nang ben hnon al on pik enyek an yanggalamoka' anaba, ben mamoka' eibuk dara, wera neikso mok so geboka byuk. 10:33 Bok, ono' neik pik era, Samaria nanga ben hnon balamok. Wera ban ben oboka beiyimeka' eibuk dara, alja ganya hyak angoo aboka yadyeka wana' dabok. 10:34 Dara ok berem biniboka, alja omek menenga' mek elegoka, ngikna' mek adya ngikoka, kena' adya keboka hwemok. Ban nen seleb unubgogowok dara, alja abaksin pam ek bukiyiwok dara, dekoka man ek bo biniboka, meewoka hwero bo mabok. 10:35 Ampum maboka gwelegok dara, hweboka bo mamoknya bedya e damnya bek rupiah penya doboka elegoka lebokja, Anyagan hweboka bo ululom. Dara, rupiah nauba so dalya dara, yok sum yanggannya dara, eleganenggen," hyok. 10:36 Dara Yesus ara ban sununa' enera ban nenyek sidya' heiboka leboka' ara, "Ban winilya nang danara, har berek oboka beiyimeknya alkabo dangamok senelam do?" hyok. 10:37 Dara, Yesus ak sene heil yeilimoknya bedya dara, "Oblomeka' anyek angoo yadyek senewoka arawoknya benyek alkabo dangamok, senewan," hyok. Yesus adya benyek leboka' ara, "Wei, wera anasa, ambabya biniboka anaso unulumnulam!" hyok. 10:38 Wera ono' Yesus ab alja yuba doro diriga ban nang era, pikek balameka' ara, yok mek heikek wekel byik. Heik enyek anyeb gela hnon alja si nera Marta gedya, Yesus ak nadya ek yalom aboka e byuk. 10:39 Marta gera alja weisa yak gel, anya gel genedya si nera Maria. Ban Maria genera Yesus dam oka bukoka, Yesus adya lelemok yub enyek, pe kero bulumok. 10:40 Bok Marta gek dara, gelewa ek welemak wa nenyek yeiriwoka webdibigemok. Danyek Marta gedya Yesus ak biniboka leboka' ara, "Wenelesilimnya o, anja Marta gera albeyok unulula' aboka, Maria gera alda or eiblolam de? Alda nak arawonulula' aboka orugalom 10:41 Danyek Wenelesilnya bedya leboka' ara, "Marta, Marta o. Anak dara, yoka'-yoka' ganya ok dokoka seiniro balalam. 10:42 Bok alda dib nonga' ara hnonok ulumla. Anya Maria gek dara, alak ab yoka' adya salya' dobnenggunumla' peroba' anyek, weboka dobla," hyok.
11:1 Wera ono' yok sum enyek, Yesus ara gakdena' ak albeyok heng uboka mololemok. Seleb heng uboka molobgogowok dara, alja yuba doro diriga ban nanga ben hnonja Yesus ak, "Wenelesilimnya o, Yohanes Pembaptis bedya alja yuba dona' nang ek, heka' huboka heng uboka molowanoka' aboka neksuk sok, ambabya nuk neksilom," hyok. 11:2 Dara Yesus adya sikenek lebsuka' ara, "Ugunda heng uboka molowanamun dara, ban nenyek wenyaboka molowanaluma' ara, Imik Neyung o, anja si nok muna' giblenggenok. Anja wenelemnesila' ara diba' dolul. 11:3 Lika sob-soba' nunja dena' denemeibya' ara eleklesilom. 11:4 Dara, nunda malya ubdangamna nim eb dara, memeldalamaba' anasa, ambabya nunja' malya una' era doboka bobogeisilom. Nuk sunulyamalesil pik sam boro dibnenggunusilim, aboka mololelulum," hyok. 11:5 Ono' Yesus adya sikenek lebsuka' ara, "Banyek seiniyiwanalum, ben hnon ugun an nang enyek, anja' hem bedya' ek sam inimnek dukdukanek enyek biniboka, 11:6 nadya' hem be pikek mal yalaladyok, wene sab-sab wenyok nadya ek yal bok, gwanenga hnon dilina' orok anasa, gwanenga winilya diyimen dara, se' dob eleganelom, wenyhenesom dara, 11:7 anja hem bedya, alja' e lomok sam ab, nak loba' nenel yangganana ara orok! Pik ara seleb gasa seregoka, nadya mab eb seleb mamab bar. Nadya bukoka dena' yoka'-yoka' ara eleganggununggisinya, henemso dara, heka' senewanesom do?" hyok. 11:8 Dara ono' hnon lebokja, "Wera heka' do? Ban lebsin. Alda anja' hem be yoka' nonga ulumso' anasa, inimnek bok dara, bukoka yoka'-yoka' ara eleganggununggesobok, anda nadya hem benya' senewoka alya ganya bona' oroka' anyek, soba' molobdibigesom dara, or bukoka eleganeso senesoma' ara eleganenggeso. 11:9 Anasa wera, nara ugunuk banyek dib lebsin, mololomun dara, eleganesil; elemun dara, eiriwanalum; pika glorum-glorum alamun dara, ugunsamba pika baknesil. 11:10 Anasa wera, mololemeija nimi nidya' ara, dorowanamak, elemeija nimi nidya' ara, eiriwanamak, pika baksilom aboka glorum-glorum alameija nimi nidya' ara, siksamba pika baknesil. 11:11 Ugun gangganek ara, nimi ben hnon alja me nedya hadya' ak molowaso dara, baga' ak eleganamso de? 11:12 Goma wining dok ak molowanamso dara, siribna' ak eleganamso de? 11:13 Anasa wera, ugun malya una' nang enyek babya, ugunja mab ek ara peroba' anyek eleklelum. Wera ugunja Imik Neyung imik heikek ululanya bera, wanok! Alda Geisinya elegeisilom aboka molowanamak nim ek ara eleganesil," hyok. 11:14 Wera ono' yok sum enyek Yesus ara, yuba goma dangamoknya bek ab bisa' ganya hnon yakoka hwemok. Bisa' ganya ara seleb goboka byuk dara, gologomoknya bera alda yuba salamoka' anasa, nimi nauba hyak loka dasuk. 11:15 Bok nimi hnon nim edya dara, "Yesus adya bisa' yaklamla dara, wera bisa' dubnya Beelzebul bedya ganya edya unulumla," alamek. 11:16 Alda ono' yok nim edya dara, Yesus unulumoknya nenesa sene sunuwanoba' aboka, anda aldib Imik Neyung ak ab yeilimen dara, laga bekna' dolula' aboka, imik ab yok lok sonya nenyek hnon unuwalom aboka molomek. 11:17 Bok Yesus ara sikja bomek ganya ella usuka' anasa, alja sikenek lebsuka' ara, "Yok mok soko nim edya yok-yok dub nang edya bokoka isa' neneldalaseng dara, sikda go' pe ubeinewanggunuseng. Hnonda nim e hnon gobdo isa' nenebdangoka mala weboka oldalaseng dara, e nera malya dangoka soldowoka orok danamso. 11:18 Anasa neikek, bisa' dubnya Satan beneba unuwanamla. Hnon ulumeija nim eb, yok nim eb oldalamnemak dara, heik era hyak malya dangoka ubnamla. Ugunja dara nak ara, Beelzebul bedya ganya migib adya bisa' ara yaklamla alanuluma' anasa, lebsin. 11:19 Wera nenyek aldib dara, ugunja yuba dona' nim era, hek migib edya sikda bisa' yaklamek do? Anasa, ugunja yuba don nim edya unulumeknya nenedya wera, ugunda meknewoka leleluma' ara, an laga dangalamla! 11:20 Bok nak dara, bisa' yaklamna' ara, Imik Neyung migib adya yaklamna, anya anyek unulamna dara, wera Imik Neyung adya ugun gangganek seleb wenelesila' ara ulusil an. 11:21 Nimi ben hnon hyak migibnya benyek, alda hyak mala yaka' anyek, alja e pe welmorulamla dara, alja bona' nidya' ulumla' ara or pe ulumnamla. 11:22 Bok ban migibnya beneba, ono' yok hyak senenggom migibnya bedya, alja pe mobuka welemna senewoka ulumla' anaba yeindeboka, doluwoka doboka, hyak migibnya bedya dara, alja mal yina doboka, yok bona' anaba doboka alja hem yabek nidya' haboka boknesuso. 11:23 Nak sam mala doboka neika' denenggulumab nim era, sikda nak lek aboka lolonyak. Dara nak aranena' orok nim era, nadya welemna wa nek soldol meneklemak nim era an," hyok. 11:24 "Bisa' ganya era, nim ek ab goboka bilimna dara, elema' pik dek-deka soboka ulununa' aboka ero yabalamnelabok, al un e nera eilinggulumla. Anasa wera alja lebneladya, nadya youma' lo yeilimsa ek saaboka binimna! alamla. 11:25 Wera youma' ek balamna enyek, e nera sembeja' oroka' anyek pe bona' beiyiboka ulumna' ak eillilamla. 11:26 Dara alda yu ara mek so bok, alda hyak yu nong ara yok so bisa' enyek sekbadya el balasil. Dara sikda bisa' dara, benyek an yeiniboka ulumak. Dara sik wekoka ulumnemaknya bedya nong una' era youma' dara or mek so bok, wenyek dara, hyak gobdo malya dangalamla!" hyok. 11:27 Yesus ara seleb wenyabgogowok dara, gela hnon nimi hnoum anyeb Yesus ak, "An beiyiboka moma diniwajok gel gera alda pe ulumla!" hyok. 11:28 Bok Yesus adya dara, "Nauba so ara, nim Imik Neyung yuba keboka pe unulumak nim enyek, hyak nauba pe ulumak!" hyok. 11:29 Wera nim era anam Yesus ak aknel yalamek bok, alda anam yuba sabdibigemok, dara alja leboka' ara, "Wen an ulumak nim era yu hwama lok nang ek ulumak. Sikda nak dib senewanenoba' aboka lok so' anyek unuwalom aboka mololenyak. Bok sikenek lok sonya nera eleganggunusin bok, alda Yunus ununumna' lelemoknya bek unumok bekna' ek hnonok eleganesin. 11:30 Ununumna' lenya Yunus bek umok lok so una' enedya, Niniwe nim enyek sikja lok so bekna' ara an. Anasonya neikek, nimi diba' me ara wen ulumak nim sikja lok so bekna' diba' danamla. 11:31 Soko sidya' daknamla sum era, oblya sam dub gel gera, wene salek an ulumak nim eb neika' sekoka bukija dara, sikenek yana kibnesil. Salomo bedya' perob neksin yuba ken damba' anaba, dub gel gedya dara, hyak mok sam ab anaba yeilimookanya, Salomo bedya geremsenga' lemok yuba kebok. Bok wen anyagan ara, Salomo bera or mek so bok, senenggomnya ben hnon ulumla! 11:32 Soko sidya' daknamla sum era, Niniwe heik nim era, wen an ulumak nim eb neika' suboka bukija dara, sikenek neika' yana kibnesak. Anasa wera, Niniwe nim era, ununumna' lenya Yunus bedya sikenek yuba leb elegosuk sum ganya dangawoka domeka' anaba, Yunus bera mek so bok, wen an ululanya bera senenggomnya bek ulumla!" hyok. 11:33 "Nimi ben hnon wesa' diniwoka beiyisodyok dara, ono' mek hmei lomok doronggoka pik ibnenggunumso. Alda laga diniwoka beibnya' adya, nimi yanggeija nim era eibnoka' aboka, laga diniwoka beiyimnamso. 11:34 Nimi heng ak dara, nong amba wesa' diba' ulumla. Ugunja heng enyek peroba' ok ulusil dara, nonga nidya' ara dilina' ok pe yeblesil. Bok ugunja heng enyek sologan dara, ugunja nonga nidya' ara guna' ok sene-monu al loblamla. 11:35 Anasa wera, ugun an ulusil dilina' era, guna' deisilyek anasa, keeboka ulululum. 11:36 Ugunja nonga nidya' ara dilina' ok yeblesil dara, anya nong ganggana hnon guna' una' orok dara, wera ugunja nonga nidya' ara, wesa' dilina' yeblamla anaso' ak yeblesil," hyok. 11:37 Wera Yesus ara seleb yuba sabgogowok dara, Parisinya ben hnonja nadya' ek neika' denenam aboka e byuk. Dara Yesus ara e nenyek an del bilimok. 11:38 Danyek Yesus ara Yahudi yuba don nim ulumek sok, soruka mek elegoka denggulumoka' anasa, Parisinya bera hyak loka dabok. 11:39 Anasa wera, Wenelesilnya bedya benyek an, "Ugun Parisi nang era sob unululuma' ara, yangawoka dena' ab, bela' ab dara, or eilibek ok mek eleklelum bok, ugunja' nong lomok ak dara, nauba dobsinya ganya ab, malya una' ab dadya ok deknewoka ulusil. 11:40 Ugunda hyak dongdang ana' ak ululum! Imik Neyung adya eilibek sam uyimoknya bedya, ono' lomok sam anaba uyiwanggumok de? 11:41 Ugunja' lomok sam ululanya nenyek, bona' garan nim ek elegosululum. Ban unuwomuna' adya, wera ugunsamba yoka'-yoka' nidya' geisa danasil. 11:42 Ugun Parisi nang ek dara, hyak omom nonga' ak ululum! Ugunja masa meleluma' so mekla' ab, dokna' ab, gadya' masa ab dara, ugunda Imik Neyung ak sagonya nera eleklelum bok, Imik Neyung ak wana' una' ab, jong una' ab dara, ununa' lololum. Mennya nera unun dara, lobnenggunusom bok, Imik Neyung jong uboka wana' una' anaba unulumnesom. 11:43 Ugunda Parisi nang era hyak omom nonga' ak ululum! Ugunda Yahudi nim edya yuba don ek ara hyak peroba' nonokdowa' ak ok bulunob senelelum, anya dekna gasa' ak ab giblesinok senen ganya bololum. 11:44 Ugunda hyak omom nong nang ek ululum! Ugunda nimi soko lokomna oulyang ek bekna' beibnenggumna ek, yok nim eibnenggonggom yan ingiwoka yabalemak oulyang anaso ak ululum," hyok. 11:45 Danyek Yahudi yuba neklesuknya ben hnon Yesus ak, "Neklesilimnya o, ban yub edya, neyung nuk malya uboka derewoka walasilema' ara an," hyok. 11:46 Yesus adya benyek leboka' ara, "Ugun yuba sunuwoka yana lelelelum nim anaba, hyak omom nong nim ek ululum! Ugunja dara, iginya nek hnon, okna nongnya nenyek, yok nim ek eleklelum bok, ugunja dara, hnon meka' aranggulusulum. 11:47 Ugunda hyak omom nong nim ek ululum! Ugunda ununumna' lelemek nang edya be' gala meewoka beillilelum bok, nera ugunja neyung yab edya omek nim ek anara ululum. 11:48 Wera anara ugunja' neyung yaba youma' nim edya umeknya nenyek ugumba perob alalumukanya, anara unululum; anasa ugunja neyung yabo youma' nim edya sik nong ara omek dara, ugunja dara, sikja' be' gala memelelum. 11:49 Anasa Imik Neyung geremseng adya lelemla' ara, nara eimik ununumna' len nang eb, yuba lena' gak nang eb sikenek bokol binisin dara, darasam obnesak dara, darasam nim era loba' nenewoka malya nenewanasak! hyok. 11:50 Anasa, Imik Neyung adya wen an ulumak nim enyek, men soko uyimok salek eba' ara, ununumna' lelemak nang olomeknya nenesa malya nenewoka obnesil. 11:51 Dara Habel be omeka' aba' ara, Zakharia be obeka' ak anasa, obnesil. (Zakharia bera Imik Neyung amba uka daboka gibna' oulyang ak ganggan, Imik Neyung ek gangganek sam ab alak obek.) Ugunda banyek dib senewanalum: Wene salek ulumak nim era, ban unulumeknya nenesa leboka nidya' obnesil. 11:52 Ugun yuba sunuwoka yana lelelelum nang era, hyak omom nong nim ek ululum! Yoka'-yoka' ella dangan damba pik bakna' era, ugun an beibsuk bok, ugunja dara ella dangana' enyek eibnob senewoka e lomok wekna' ara lololum. Alda ugunja dara, yok nimi ella dangana' enyek dobnoba' dulumak nim anaba, pika garal meneklelum!" hyok. 11:53 Wera Yesus ara yuba salamoka' ak ara loboka bok dara, yuba neksin nang eb, Parisi nang eb dara, borowoka yok-yoknya bo doronggoka heilemek. Sikda sene yoka'-yoka' anyek nauba lelelula' aboka benewoka lelemek. 11:54 Ban wenyalamek ek ab dara, Yesus adya malya uboka meknewoka leblya enyek, alak yana kibnoba' aboka kemero yabalamek.
12:1 Nimi denga sal-salya' anyek dokol dalameekanya, yan ingib sabdangda balamek. Wera nimi dara mamagal yalamek dara, Yesus ara alja yuba doro diriga ban nang ek, "Ugunda Parisi nang edya roti welena' enyek keeboka diri uldalalulum. Nadya lebnanya nera, sikja sene or-or lelesaknya nenyek lebna. 12:2 Yoka'-yoka' wen doknolomaknya nera, eimik laga geleboka beibnenggunulanya hnon unggulumla. Anya ono', wen gunulumaknya nera, eimik ella danggunumaknya hnon unggulumla. 12:3 Ugunja guna' ak sam lelelumnya nera, laga yubyek ek kebnemak; ugunja o lomok gelelenga e lomok ab lelelumnya nera, eimik era meinik ab laga bii aro yibinemak," hyok. 12:4 "Nadya' hemyab o, ugunda banyek beknelum! Ugunda nong dem ak olomak nim ek ara, ono' mok so senenggomnya nek ara unuwanggunusenga' anasa, ugunda sikenek lok ganya bonggom, mem. 12:5 Alda ugunja loka ulumnelumnya benyek nadya ugunuk aawanasin. Imik Neyung ak ok lok ganya bolomnelum. Al adya, seleb olosil nim era, seleb obgogowan dara, al adya danyek ok uka desin heikek boloklesila' anasa lemna. Aldib unululanya benyek alak ok lok ganya bololulum, hen. 12:6 Senero wininga lambadya dara, rupiah sirik penya ok dolomak. Ban unulumaka' anaba, Imik Neyung ara wining dara hnon hiliknenggulumla. 12:7 Ono' Imik Neyung ara hong anyek babya einilamla' anasa, wining ara mek so bok, ugunuk dara hyak perob nonga' ak ululuma' anasa, lok ganya bona' ara mem," hyok. 12:8 "Ugunuk dib lebsin, nimi ben hnon ara, nimi hnoum nara Yesus ak diriga bannya ulumna aboka laga lebnamla dara, albabya nimi diba' me nedya Imik Neyung lero nang hogung ak sam laga lebnamla. 12:9 Bok alda nimi hnoum, nara Yesus ak diriga banggulunanya aboka bobnenewoka lelelanya bera, albabya nimi diba' me nedya Imik Neyung lero nang saramek sam ab, or-or lebnamla. 12:10 Nimi diba' me nek nim adya si malya nenewanamaknya nera or malye aboka, malya una' era sikenek ab memewanasil bok, Imik Neyung Geisinya bek malya lebnemak dara, malya una' era peroba' leboka sikenek ab meewanggunusil. 12:11 Ugun nong anyek, Yahudi nim edya yuba don ek sam gom, wenewoka bo usin nang saramek gom, senenggom dub nang hogung ak laga yana leleweisinoba' aboka bo binisak dara, ugunja dara, nunda heka' huru yuba garabdanamab gom, heka' lebnemab gom, aboka ganya daldom-daldom ana' ara mem. 12:12 Anasa alda ugunja heka' ak lebneluma' ara, Imik Neyung Geisinya adya lebnelum salek ok neknesil," hyok. 12:13 Nimi hnoum ulumeka' ak ab ben hnonja Yesus ak, "Neklesilimnya o, nunja' neyung bedya somogoka lo byuk bona' enyek, nadya' hem bedya na hnon bokoka eleganela' anasa, anja orugalom," hyok. 12:14 Yesus adya benyek an leboka' ara, "Hem o, heknedya nak ara yana lelesinya sekiyiwanyok goma, ugunja' neyung bedya misa' boksina' amba sekiyiwanyek gom?" hyok. 12:15 Dara ono' Yesus ara nimi nauba ulumek nim ek an, "Nim ara bona' dubnya ulumna' anaba, embeng una' ara anyagan anyek ganya kweboka unggulumaka' anasa, hmaba' ganya ab yoka'-yoka' sunulusila' ak ab keeboka pe diri uldalalulum," hyok. 12:16 Anya Yesus ara ban sununa' enyek sunuwoka leboka' ara, "Nimi ben hnon bona' dubnya bek ulumok. Alda dub nongnya uboka, wa soko masa naubanya bek ulumok. 12:17 Ban bona' dubnya bedya seiniwok dara, Nadya masa ak ab dena' doboka beilin e nera orok dal. Nara heka' hubuka beibnamna do senewoka seiniwanamna do? aboka seiniwok. 12:18 Dara ono' alda ganya seiniwoka al damnya ganya ek lebdokja, Wera ban nenyek seiniwan, nadya masa beilin e nera ono' golowoka nauba sobgoknamna senewok. Unu sobnya ek an nadya gandum ab, nadya' yok-yok bona' eb dara anyagan beibnamna. 12:19 Dara ono' nadya nong ek na damnya lebdananadya, Anak dara, pelelam! Yoka'-yoka' nidya' ara anda deregoka bololama' anja' ulumla' anasa, gibna' gong-gong lelemlya' anaba denghenggunumla. Anda dek-deka soldibilloklolom! Gwaneng meka deblaboka eiya hlaboka pero nonggo aro ululom! aboka lebdok. 12:20 Bok Imik Neyung adya benyek leboka' ara, Wei, dongdang ana' anya ululam! An nong ara sumen inimnek somoganalam dara, anja nidya' bolowoka beillilelam bona' era heknedya an lunuwoka danamla do? hyok. 12:21 Anasa, Imik Neyung adya perob senelamla' duboka unuwonun senena' loboka, nimi ganya adya ok seiniwoka duboka nanokok bona' dubnya donun senewoka yeirilemak nim era, sikenek anaso unuwanasil," hyok. 12:22 Dara ono' Yesus ara alja yuba doro diriga ban nang ek, "Ban nenesa nadya lelesina' ara, Ugunja nong una' enesa leboka ganya daldom-daldom aboka youmbura' debna' ara, mem. Nunda heka' denemab gom, hek akleng ongowanamab do aboka youmbura' debnenggom, mem. 12:23 Nim nong una' anyek hyak nauba perob nonga' ak ulumlakanya, dena' ak dara, domdigum so' ak ulumla. Dara nimi nong ak peroba' ak ulumlakanya, akleng ara or domdigum so' ak ulumla. 12:24 Ugunda sam wining anyek pe seiniwolulum! Sikda yina' menggulumak, nong yongonggulumak, masa hnon beilin e soboka beilenggulumak. Bok Imik Neyung adya sik nong pe beiyiboka bo ulusil! Wining ak dara, or domdigum so bok, ugun nong ak dara, hyak senenggom nonga' ak ululum! 12:25 Ugun gangganek nimi ben hnon alja ganya daldom-daldom aboka youmbura debna' adya, al nong un salek era, go' warena' ub einewanamso de? 12:26 Ugunda or mek siriknya nenyek babya ugumba yok ganya doboka una' orok bok dara, hekasa naubenya nemba leboka ganya daldom-daldom ana' ganya bololum do? 12:27 Ugunda hwalek sam esa' molumla' anyek pe keebdablulum. Ban esa' dara, sikda wa wena' orok uboka, ono' aklenga wina' anaba winggulumak. Anya, Salomo beneba yoka'-yoka' dubnyakanya hyak senenggomnya benyek babya, ban esa' hogung hyak perob nonga' ulumla' anaso akleng boka' era hnon ongonggulumok. 12:28 Hola' ara sumen eneso' ara, youruwana' ara, ampum dan dara, dengaboka uka dalamak. Ban unulumaka' anaba, Imik Neyung adya anaso hyak perob esa' era, ongon akleng eneso eleklesil. Ugunuk dara, hyak wanok! Bok ugunda mek ok dib senelelum! 12:29 Ono', ugun gwaneng meka denemuna' anyek orok amba leboka, ganya daldom-daldom ana' ab, ganya soro-wara ana' ab dara ununggom, mem. 12:30 Ban ganya en boboka yeiriwoka elemak nim era, yok-yok mok soko nim Imik Neyung ak elgom ulumak nim edya anara unulumak. Alda Imik Neyung ara ugunja nidya' dobsibya bobsibya seneleluma' ara, alda pe ella ulusil. 12:31 Bok ugunda Imik Neyung adya unuwanok senelamla' anyek eboka nonogomun dara, yoknya nera, Imik Neyung adya ugunuk ganya doboka elek maknesil," hyok. 12:32 "Ugun ululum nim era dumunga meka' me bok anasa, ugunda lok ganya bona' ara mem! Imik Neyung ara alja wenelemnesilnya nenyek, ugunjinya danasil. 12:33 Ugunja bona' rupiah dekoka doboka, dobmun rupiah era, bona' garan ulumak nim ek elegolulum. Ban unulumun dara, ugunja songa leboka blobnenggunumla rupiah beilina' memelelum, nera imik heikek beillilesil bona' diba' ara an. Ban bona' era hoka' dona' orok uboka, gererema' denggunumla. 12:34 Anasa wera, ugunja bona' ulumla' ak ara, anyagan anaba ugunja ganya seinina' ulumla," hyok. 12:35 "Yoka'-yoka' unuwanamuna' ara, keebdangoka pe diri ubdangoka unulululum. Ugunda soba' akleng ongobmoruwoka, ugunja wesa' era soba' yebeldalalulum. 12:36 Wa welemna nim ek, sikja neyung be mok sam gela dol bilimna' ara yanamna sum ek diri yuba kero ulumak sok ugumba unulululum. Sikja' neyung bera yeiniboka pika baknenoka' aboka glorum-glorum al yaban dara, sikda keboka pika berra baklemak. 12:37 Wa wen nang enyek, sikja' neyung be ek yanamna' amba diri ulunabok, wera yalamla dara berra eillilemak nim era, hyak pelemaka' nong ara an. Ban lebnesina' ara, wera ban wa dubnya bera meebgogowoka, alja wa wen nim ek buklulum aboka oruganasil dara, alda sikenek dena' youboka beiyiboka deb eleganesil. 12:38 Wera wa wen nim era, sikja' neyung bedya sikda yuba kero diri ulumaka' ara, or inimnek dukdukanek gom, mandewoka yanamso' gom anaba, sikda pe diri ulumak dara, sikda pelemaka' ara an. 12:39 Ugunda ban nenyek beknelum! Nimi ben hnon hoka' dolomak nang alja ek wekel yalamla salek ella ululanya bera, nadya ek yeijek aboka, hyak pe welemla dara, hoka' donggulumak. 12:40 Wera nimi diba' me anaba sumen yanamla senenggululum salek enyek yanamla' anasa, ugumbabya pe diri ulululum," hyok. 12:41 Wenyek Petrus bedya Yesus ak, "Wenelesilimnya o, anja lel eleklesilim sununa' yuba danara, nimi nidya' nim ak lelesilim gom, nun ok lelesilim gom?" aboka heimok. 12:42 Danyek Wenelesilnya bedya dara, "Heknyek wa bojam uboka geremsenga' welelanya benyek, wa damnya bedya yok wa wen nang sikenek den salek dena' eleklesulula' aboka, sikja dubnya sekiyiwanamla do? 12:43 Wa damnya bera yokok bilimso' ara, yalamso enyek, wa unu webnelam aboka oruga bilimso' ara pe welemnamso' eibnamso' dara, pelemso' ara an. 12:44 Wera anasa wa damnya bedya dara, alja bona' nidya' ara benyek nidya' bo ulululom aboka eleganamla. Anyek dib lebsin," hyok. 12:45 "Bok wa pe welemnelam asonya benyek, alja ganya edya seiniwanasodya, Nadya' neyung bera or eimik ek mandemlya' ara yanamla' anya', aboka yok wa wena' nanga nidya' oboka, dena' deregoka, yu meka deregoka serema salab menegoka ubnamso dara, 12:46 alja wa dubnya bera yanggunumla senelamla salek enyek goboka seknamla. Dara wa wenya benyek olomlya' ara, Imik Neyung ak dib senewoka ganya oloknenggulumak nim ura osin ono' enyek, neik digum obnamla," hyok. 12:47 "Alja wa dubnya bedya ganya seinina' ara ella ululadyok, pe diri una' loboka, alja lelemla sok pe sunuwoka wa wenggululanya bek hyak nauba legebna' deboka obnamla. 12:48 Bok alja wa dubnya bedya seinilamla ganya era elgom ululadyok, legebna' deboka obnamso una' enyek, welemla wa wenya bek ara, or mek domdigum so' obnamla. Anasa anam nauba unulumnenelem alenya bek ara, alja nauba lunuwoka molowanamla," hyok. 12:49 "Nara sokok anyek uka singina' damoka bo yeilimsa. Uk anyek seleb singiwoka denemso dara, perob senewanasinya. 12:50 Yoka' unuwanenela' ak dorongganenel. Ban nidya' unubdaknenggunelya salek era, nadya ganya era hyak ingmuna berelenel. 12:51 Ugunja dara, nara sokok an hekna' damoka bo yok senelenulum de? Orok, nara hekna' ak bo yanggubsebok, alda mala weldana' ak bo yasa. 12:52 Anasa wenyek ab moruwoka, nim e hnon lambadya ulumak nim era, sik moumen doluwoka oldalamnemak, winilya nang edya penya nang ek gom, ono' penya nang edya winilya nang ek gom unu oldalamnemak. 12:53 Neyung bedya alja me neb mala webdanarak dara, ono' alja me nedya eili beb mala lanabdanarak. Dara gel adya alja gelma ek mala lanawanamla dara, ono' gelma adya eiling gek mala lanawanamla. Anya alja soumun gedya alja gelma edya gelma eb mala lanawanamla dara, ono' saaboka gelma adya gelma enedya alja' soumun gek mala lanawanamla," hyok. 12:54 Yesus adya nimi nauba wekemek nim ek, "Ugunda deba' anyek kemban sam welewoka lebel yabana' anyek eibnek ab dara, lelelumja, Ousa era moka yanamla, alalum dara, al nera gigiwoka yalamla. 12:55 Alda ugunda woru kabo' doroganamla senewan dara lebnadya, Sum era douba danamla, alalum. Dara aldib douba dangalamla. 12:56 Ugunda hyak sene or-or uboka gununa' hwam nang o! Ugunda mok soko ima hogung ak keeboka sum era anaso unuwanamla aro lelelum. Alda wen an ulumab salek ululanya nera, ugunda hekasa anaso' unuwanamla anggululum do?" hyok. 12:57 "Ugumba yok dara, hekasa perobnya nek unuwanamab aboka yuba gekenggululum do? 12:58 Nimi ben hnonja anak, anja hoka' donulum aboka henga gouboka, yana lelelesak ek bo bininggel dara, anam pikek balarumun salek enyek, hyak ganya pe seiniwoka anaso-anaso meebdananam aboka, wenyaboka meebyamadenesom. Ban nenyek unuwanggunulam dara, bo bigelenya bedya yana lelesina' dubnya bek dib unuwoka' aboka, doboka elegagelya dara, anya ono' yana lelesina' dubnya bedya, an nong doboka yin bona' dubnya bek elegagelya dara, yin bona'anya bedya, anak doboka gasa ek doronggoka beibnenggel. 12:59 Anda henga geregoka beiyinggija' anyek, dekna' dobdaknenggumen bok dara, hyak goboka yibinggunulama' nong anyek, danamla' anasa lebsin," hyok.
13:1 Ban neik sum enyek, yok nim edya Yesus ak Galilea nim ek Imik Neyung amba pam oboka giboka uka dalamek enyek, Pilatus bedya obsuk aboka nekek. 13:2 Ban yub en keboka' ak dara, Yesus adya dara, "Galilea nim enyek ban obsika' amba dara ugunja ganya era, yok Galilea nimi dara malya una' orok bok, sikenek malya una' nauba adya damok era obsik senelelum de? 13:3 Nera hyak orok! Bok ugumbabya ugunda malya una' ak ab ganya dangawanggunulum dara, ugumbabya Galilea nim ubek sok somoganaluma' anyek, ugunda pe beknelum. 13:4 Siloam aboka si simek e goumulumuna' dakoka, nimi sago dara' badya nang obsuk nim era heka' hubek do? Ugunja dara, Yerusalem heikek ulumek nimi nauba bok, sikenek obsuk nimi dara, sikja malya una' enyek nauba so adya obsuk senelelum de? 13:5 Anadya goma', orok! Ugumba malya una' ak ab ganya dangawanggunulum dara, sikba somogek sok, ugumba unu somoganalum amna' anyek, ugunda pe beknelum," hyok. 13:6 Ban wenyabgogowok dara, Yesus ara ban sununa' enyek sunuwoka leboka' ara, "Nimi ben hnon den gal alja wak sam memok. Yok sum enyek, gal doka eboka daknamna senewoka bilimok bok, hnonok sibin anaba eibnenggumok. 13:7 Anasa alja wa wenya gal dok en hola' gerewoka memelemoknya bek, Wei, anda kendelom, ban gal enera doka moumnamla gom aboka, eboka daknuna' aboka, gibna' winilya kemel yan bok, wera gal doka hnonok sibin anaba mouna' eibnenggubna. Gal era, sokok mesa' salya' orok nenewoka delemla' anasa, wera webnelam! hyok. 13:8 Bok anyagan wa welemoknya bedya dara, Neyung o, moubnamlya' ak men aboka gibna' danara or lobnenam. Nara gal dama nidya' hola' hleboka lulunga' beibnamna. 13:9 Gibna' enyek leblya dara, doka moubnelula'. Bok alda hyak gobdo mouna' orok danyek, wera neyung webnelum aboka oruganasilim, hyok," aboka Yesus adya lebok. 13:10 Yok Sabat mem sum enyek, Yesus ara yok Yahudi nim edya yuba don ek sam yuba lel eleklesuk. 13:11 Dara e nenyek ara, gela hnon bisa' gologomoka' adya, alda gibna' sago dara' badya neiklemok. Gel gera alda bulum-bulum adya amnya' dumoka' adya, domdigum sekna' diba' sekna dara, seknamenggom. 13:12 Yesus adya gel genyek eiyimok dara, alja yalom aboka leboka' ara, "Genong o, anda wera neiklelam neikna' ek ab seleb merewalam!" hyok. 13:13 Dara Yesus adya gel genyek soruka dibok dara, wene salek enyek, gel gera jonga' sekoka, Imik Neyung ak giblemok. 13:14 Dara Imik Neyung e damnya bedya dara, Yesus ara Sabat mem sum nimi hwemoka' anasa, alja dara hyak nauba waboka yok nim ek, "Lika hnabbadya dara wa wen sum era an, nimi hwebnenyak aboka dara sum enyek yanalum. Minggu sum era hyak mem!" hyok. 13:15 Anasa Wenelesilnya bedya dara, "Ugunda hyak bol nenena' nim o! Sabat mem sum enyek, ugumbabya ugunja pam era loboka beiyek yu' ak bo yabalelum. 13:16 Yo, anasa anyagan ara gela hnon Abraham nimi yila' ak neikna' salawoka Satan bedya goubmoruwok salek era, gibna' sago dara' badya leboka' ak ulumla. Al nong ara, Sabat mem sum era bleboka loboka hwebnenggunuseng de?" hyok. 13:17 Yesus adya ban wenhyoknya nedya alak lek senen ganya bolomek nim era sikda hyak alya dabsuk, bok yok nimi nauba ara, Yesus adya lok so' unulumoka' anyek hyak perob senelemek. 13:18 Yesus adya heibsuka' ara, "Imik Neyung adya wenelesila' ara, heka' anasonya ulumla do? Nadya dara, heka' anaso ulumla' seiniwoka sunuwanamna do? 13:19 Wera ban sununa' eneso ulumla. Nimi ben hnon geibya yina' doboka alja wak sam doklamla' anaso ulumla. Yina' bongowoka welewoka gala dangalamla dara, wininga bul yalamak," hyok. 13:20 Yesus adya ono' saaboka heibsuka' ara, "Imik Neyung adya wenelemnesila' ara, nara heka' ak sunuwanamna do? 13:21 Ban sum hogung ara nimi gela bikna' doboka roti gwaneng ab neika' hiboka werelamla' dara, neika' ok dangoka imi hwilimla' anaso' ak ubnamla," hyok. 13:22 Yesus ara Yerusalem heikek bununa' aboka anam pik balamok ok ab dara, alda nauba heikek hnon mek-mek heik pik yuba leb elekgiga balamok. 13:23 Danyek nimi ben hnon Yesus ak, "Neyung o, nim ara meka' blebnesila' ak lelelam goma?" aboka heibuk. 13:24 Yesus adya saaboka leboka' ara, "Nimi nauba weknemab senewoka dubnemak bok, weknenggunumaka' anasa, ugunda mek pik weknemab senewoka yeiriwoka dulululum. 13:25 Wera e damnya bedya sekoka pika seregalya sum era, ugunda beiyek sam sekoka pika baksilom aboka glorum-glorum henenuluma' ara, Neyung o, nunsamba pika baksilom! Wenyhenelum bok, ban benedya lebledya, Ugunda hekmok nim, nara elgom ulusin bok bar! 13:26 Dara ugunja lebneluma' ara, Neyung, nunda anab gwanenga meka neika' delemouba, dara neyung, anda nunja heik pik yuba leboka nekdo yabalesulum! henelum. 13:27 Bok e damnya bedya lebnamla' ara, Nara elgom nim ek anasa, ugunda hekmok nang? Ugunda malya una' hwam ok ululuma' anasa, anyagan aba' men berra bululum! henesil," hyok. 13:28 "Wera ugunda Abraham beb, Ishak beb, Yakub beb, nidya' ununumna' lelemek nang eb, neika' hiboka Imik Neyung wenesin heikek sam eiya hlaboka dena' delemnemaka' ak eibnelum bok, ugunuk dara, seleb yakasilya' anasa, ugunda engewoka nauba glengdaralemnelum! 13:29 Eimik era nimi nauba yali sam ab hnon, kemban sam ab hnon, dabo sam ab hnon, woru sam ab hnon yanamaakanya, sikda nidya' ara Imik Neyung wenesin heikek sam ara, neika' delemnemab aboka eiya hlaboka glolomnemak. 13:30 Dib unuwanamaka' ara, wenyek mengewoka ulumak nim era, hnonda eimik dangoka, ono' wen eimik dangoka ulumak nim era, hnonda mengewanamak nimi danamak," hyok. 13:31 Ban neik sum enyek, Parisi nim wene nang Yesus ak yeiniboka lebekja, "Anda anyagan una' ara hyak mem! Herodes bedya anak obgununa' aboka ubgel bar," hyek. 13:32 Wenyek Yesus adya dara, "Ugunda ban meilinya bek an wenyal bululum, Sum enyeb ampum ab dara, nara nimi neikna' nimi hweboka, bisa' yakoka ubnesin bok, amja sum ek dara, nadya wa nera seleb webdaknamna, amla, hululum. 13:33 Ban obnamna hel bok, youma' ununumna' lelemek nang era, Yerusalem heikek beiyek ab hnon osina' orok bok anasa, nara sum enyeb, ampum ab, amja sum eb dara pika yabalemnamna," hyok. 13:34 "Yerusalem, Yerusalem o! Ununumna' lelemek nanga nidya' ara anja ok oblum! Imik Neyung adya bokol yalasuk nanga nidya' ara, anja ok girik adya ok seikoka obsulum dara, somogek! Bok nadya dara, wining adya alja' ol lomok sam ala' mab ak doronggoka eirilamla sok, anja mab era, soowoka saramek sam gweiliwanamna senewoka lika wen dubseba, ugunda hyak lek anasa lobna! 13:35 Ban nenesa leboka, Imik Neyung anak arawoka bo unggulumnenggel. Dara dib lebgen, al sumen moruwoka anda nak eibnenggununelemekanya, anja lebnelama' ara, Wenelesilnya si pik moruwoka yeilimoknya bera, or peroba' ak ululul, henelam sum enyek ok eibnenelem," hyok.
14:1 Yok Sabat mem sum enyek, Yesus ara Parisinya bedya ek del bilimok. Anyagan anyeb dara, sikda Yesus ak pe maka meiboka kemelemek. 14:2 Dara nimi ben hnon yan ak oklouba neboka, soruka bokoka meilemoknya bek Yesus ak yeilimok. 14:3 Danyek Yesus adya Yahudi yuba neksin nang eb, Parisi nim anyagan bukoka delemek nang ek, "Nunja dolomab yub edya dara, nim ara Sabat mem sum era or hwelenok hyok gom, orok gom?" aboka heibsuk. 14:4 Yahudi yuba neksin nang eb, Parisi nim eb dara, yuba sana' loboka gelegek. Dara ono' neiklemoknya bek Yesus adya salawoka hwebok dara, ek bilom aboka orugok. 14:5 Seleb unubgogowok dara, Yesus ara anyagan nim ek, "Nimi ben hnon ugun gangganek ara, alja me gom, pam gom, selenga' lomok malyingginimso dara, al unuwaso sum Sabat mem sum nong enyek, wekoka doboka bo gobnamso gom, orok gom?" aboka heibsuk. 14:6 Bok nim danadya hnon Yesus ak, anyek leblam aboka yuba doro sab eleganggubek. 14:7 Yesus adya kemelesuk enyek, nimi yeilimek nang dara, hnonda hyak peroba' ak gaboka buru balameka' ak eibsuka' anasa, ban yub enyek sikenek sunuwoka leb elegosuk. 14:8 "Gela dobdanameija' ak sam ugunuk dena' denemab aboka ebsija dara, peroba' ak gibnesija' ak senena' ak ara bunggom, mem. Ban yok perobnya ben hnon anyagan yanalam amnemaka' don, 14:9 anadya benyek yalya dara, e damnya bedya ugun penya yanarum alenya bedya, anak yeiniboka, Wei ban ekla era ban benesa yangabman, hekelyek. Danyek anda alya nong anasa, hyak doub nong eklek bimenek anasa, peroba' ak men enggom. 14:10 Anasa wera, ugunuk nim adya neika' denemab aboka ebsija dara, orowek gokgobok sam bukumuna' adya, wera e damnya bedya yanamlakanya, Hem o, anda peroba' ak an bul yalom, henenggel. Ban unulusak danyek, nimi nauba weklemaka' hnoum ab ugunuk gigilesaka' ara an. 14:11 Anasa, nim adya imik neneldalalanya bera, eimik sokok nenewanamla, bok sokok neneldalalanya bera, alak eimik era imik nenewanamla," hyok. 14:12 Dara ono' Yesus ara e damnya bek, "Anda nim yok nanga yubyek gom, inimnek gom nadya ek denemab aboka e yanalam dara, anja' hem be yoka' ak gom, an nang yila' ak gom, anja weisab ek gom, e ok nim ek gom, e yanggeiseng gom, mem. Nera sikba unusimina' anasa ambabya unuwanenjak dara, wera nera dekna' seleb dobnelam. 14:13 Bok anda dena' masa youb lobnelam dara, dena' garan nimi hnon, henga lum nimi hnon, nonga heilimla nimi hnon, yana soruka mumdelemla nim enyek, denemab aboka e yanalam. 14:14 Ban nang danadya dara, anak ara lunuwoka deknenggununjaka' anasa, anda pelelam. Anja sikenek pe unulusilimnya nera, nimi pe ulumak nim Imik Neyung adya embenga' suboka bukiyiwanasil sum enyek amba lunuwoka deknenggel," hyok. 14:15 Ban salek neika' delemeknya bedya Yesus adya wenyaro lelemok yuba keboka, lebokja, "Imik Neyung adya wenelemnesila' ak ara, neika' bukoka denelanya benyek, pe ulumla," hyok. 14:16 Bok Yesus adya benyek, "Ono' yok sum enyek, nimi ben hnon masa nauba youb lobookanya, nimi nauba denemak aboka ebmamagosuk. 14:17 Masa youblomlya' ara dengewoka denemeija salek era oka dok dara, masa youlenya bedya alja wa wenya bek, Wera nidya' seleb youboka beibna' anasa, del yanamak aboka wenyal bisilom, aboka orugumok dara, wenyab girigemok. 14:18 Bok sik del yanalum amok nim edya dara, Neyung o, anja masa youlama' ara del yanggunumab ab ligiwek. Menya bedya orukna'anya bek, Nara soko dekemnekanya, maka meibel binimna' anasa, anak lobna aboka molowan. 14:19 Yoknya bedya' anaba, nara pam huka lambadya dekemnekanya, sunul binimna' anasa, del yanggununanya nemba molowan. 14:20 Ono' yoknya bedya dara, Nara nei wenyok gela domna' anasa, del yanggunumna' amba molowan, hyok. 14:21 Wera orukna'anya bera alja neyung bek nidya' nang wenhyak aro yok. Dara alja' neyung bedya hyak yu ganya boboka, orukna'anya bek leboka' ara, Anda hyak berra aboka pik gwandanya' pik, nauba heik erem pik biniboka, bona' garan nang eb, yana soruka mum delelanya neb, nong heiboka henga luma yalamla nang enyek e yanasilim, hyok. 14:22 Dara orukna'anya bedya eili bek ara, Neyung anja lelamnya nera seleb unuwan bok, ekla ara glo' or ulumla, hyok. 14:23 Dara ono' masa dena' damnya bedya, Anda nauba pik gwandanya' ak gokgobok sam biniboka, nadya ek an nimi diblula' aboka hyak anja yub edya duka' lolowoka e yanasilim. 14:24 Anasa ugunuk lebsin, nadya masa denelum aboka el bisisa bok, del yanggana' lek hyak nang era, nadya masa ak ara, hyak meka' del yanggunumaka' ak! hyok," aboka Yesus adya lebok. 14:25 Nimi nauba Yesus ab neika' yabalemek. Dara Yesus adya sikenek keeboka lebsuka' ara, 14:26 "Nimi ben hnon ara nak yalanel bok, bera alja' genong gek gom, alja' neyung bek gom, alja gel gek gom, alja me nek gom, alja weisab ek gom, goma al nong una' ak gom, hyak wana' nong ulumla dara, alda nadya diriga bannya danggunumla. 14:27 Heknedya alja' igin yaka' loboka, nak yangganana' oroknya bera, alda nadya diriga bannya danggunumla. 14:28 Nimi ben hnon ugun gangganek ara, imik e sobnamna aboka dara, sobnesonya bera, rupiah ara hekbadya daso dara, or sobnesinya gom, sobnenggunusinya gom aboka, orowek gegewoka einiwanamso. 14:29 Egomna' ara seleb ikisodyok, e nong anyek pe sobdaknenggunumso dara, nimi nidya' eibneseng nang edya dara, alak oksiyiwaneseng. 14:30 Eibseng nang edya dara, Mabo, ban benera e son dara, sololabok, alda gokgoba loboka soldaknenggulumla! heneseng," hyok. 14:31 "Nimi soko dubnya, ben hnon alda yin bona' nanga denga yuba sagobadyinya bedya, ono' yin bona' nanga denga yuba lindigin badyinya soko dubnya beb, mal weboka obdananam senewaso dara, bera alda orowek bukoka nara migib gom orok gom, heka' huboka obdananama' ara, men seinibgogowanamso. 14:32 Benera nara nimi mek anasa, ela' obdanggunusinema ara orowek ella daso dara, mala bobdangaserengnya bera anam pikek yalasobok, wera mala yuba seknenama' anasa, wenyaro bululum aboka orukna'anya bek oruganamso," hyok. 14:33 Anya ono' Yesus adya dara, "Anasonya neikek ugumba unuwanalum. Nimi ben hnon ugun gangganek ara, alda yoka'-yoka' nidya' aljinya nek ara, loboka ubnenggunumla dara, alda nadya yuba doro diriga bannya danggunumla," hyok. 14:34 "Garam ara perob bok, angawom ana' anyek seleb denghesobok dara, saaboka angawom henemso de? 14:35 Dara masa weboka men damba lulunga' anaba hnon, masa mesa' pen damba anaba, perob danggunumla. Alda unuwal bar aboka bolokna' ok boloklemak. Ugunda o yaka' ara, pe keblulum!" hyok.
15:1 Yok sum enyek, rupiah molowoka dolosik nang eb, heik yoka' nang edya dara, malya nang senelesik nang eb dara, Yesus yuba lelesuka' ak sam dol yeilimek. 15:2 Wenyek Parisi nang eb, Yahudi yuba neksin nang eb dara, omoma lelemek. "Wei, ban benera malya nang enyek, yoululum aboka leboka, dena' anaba sikeneb neika' delemak!" aboka lelemek. 15:3 Anasa leboka Yesus ara ban sununa' enyek sunuwoka lebsuka' ara, 15:4 "Nimi ben hnon, alja domba pama denga winilya so beiyimso bok, hnonok weiningganamso dara, pam damnya bera heka' hubnamso do? Al pam damnya bedya dara, yok pam dara, or yu' ak loboka, weininggamso pam enyek eibnuna' aboka el binimso goma? 15:5 Wera weininggamso domba pam era eibso dara, pam damnya bera eiya anasa, pam nong soowoka sagonya' ak beiyiboka, 15:6 ek bo yanamso. Dara ono' bera, alja' hemyab eb, alja' heik ok nim eb dak, 'Nadya pama weiningdoka' ara wera seleb eibna' anasa, ugunda nab neika' eiya hlaboka ubnemaba' anasa, yoululum!' henemso. 15:7 Yo, anasonya neikek, nimi ben hnon malya una'anya bek ganya dangalamla dara, imik heikek anaba alsamba hyak eiya hlaboka glona' salalamak, yok denga winilya pe ulumak nang enyek, nauba so ununggulumak," hyok. 15:8 "Goma, gela hnon sagobadya rupiah beiyisobok, hnon gaboka weiningganamso dara, gela gera na rupiah aboka heka' hubnamso do? Wera gera alja e sembeja' bokoka, wesa' yeboka yok pik nidya' ero yabalamso' ara eibnamso. 15:9 Wera gel gera weininggamso rupiah elemso' ara onsok eibso dara, alja' hemyabo nim ek hnon, e ok nim ek hnon lebsodya, nadya rupiah weininggasa' ara, wera saaboka onsok eibna' anasa, hyak eiya dabnel. Anasa nunda hnonoka' perob aboka eiya hlaboka glolomnemab! henemso. 15:10 Ugunda hyak dib senewanalum! Anasonya neikek, nimi malya una'anya ben hnon ganya dangalamla dara, Imik Neyung lero nang eneba unu eiya hlaboka glolomak!" hyok. 15:11 Yesus adya hnon leboka' ara, "Nimi ben hnon alda memabo penya beiyimoknya bek ulumok. 15:12 Naba me nedya eili bek, neyung o, nunja bona' era, nasamba anya nera, al wenyek bokoka eleganenelem, hyok. Dara, sikja' neyung bedya, bona' nidya' ara, ala' mab ak haboka boksuk. 15:13 Lika wen mabok dara, naba me nera, alja bona' dara dobgogowok dara, mok heikek byuk. Wera mok bilimok heikek ab dara, bo bilimok rupiah era, malya una' uboka, dek menegemok. 15:14 Wera unulumoka' ara, alja rupiah nidya' denghyok sum era, al ulumok mok soko era senenggom gwaneng oka' lanawok dara, bera hyak nonga mel-mela garagoka malya dok. 15:15 Dara, bera mok enyek an heik nang ek, nadya wa beiyek sam pama weiboka bo ulumnenelem aboka orugumoknya bek biniboka wa welemok. 15:16 Bera gwaneng ok nong adya e buknamenggom ulumoka' anasa, pam amba beil bin dena' sikna' enyek, desinya senen ulumok. Bera gwaneng ok nong ara yoka' anaso ol neblemok bok, yok nang edya dara, alak gwanenga hnon eleknenggulumek." 15:17 "Dara anyek eibkweboka seinibdokokanya, nadya neyung bedya ek uboka wa welemak nang era, dena' nauba bok loboka delemak bok, nak dara anyagan gwaneng oka' adya somoganamna! 15:18 Nara lanawoka nadya neyung bek onok binimna, dara alak, neyung o, nara Imik Neyung ak hnon, neyung anak hnon, malya ubsisa. 15:19 Neyung, nak ara nadya me anenggom. Alda nadya wa orukna'anya nenewananelem henemna, senewoka seiniwok. 15:20 Dara, alja neyung bek lanawoka byuk." "Wera mok so e berem yanggok bok, alja' neyung bedya ek ab uboka eibuk. Dara alja' neyung bedya, na me eiriwan aboka, hyak angoo yadyek senewoka' anasa, bik-bika alja me dam biniboka, soob salawoka meka hmobuka eiriwoka gibuk. 15:21 Me nenedya lebnemoka' ara, neyung o, Imik Neyung ak hnon, neyung anak hnon, nara malya ubsisa. Nak ara nadya me henggununelem, hyok. 15:22 Bok alja neyung bedya alja wa wena' nang ek yoululum aboka sikenek ara, hyak berra! Perob aklenga hnon doboka, alak ongiyiwanalum. Perob soubna dama' doronggiyiwoka, perob yan ongona' ongiyiwanalum. 15:23 Seleb unubgogowoumun dara, mesa' nong sapi pam me nenyek doboka oboka youbmun dara, nunda eiya hlaboka neika' dero weknemab. 15:24 Nadya me nera seleb somokdowoka' ara, wera onsok embenga' dangoka yal. Alda dengarowok bok, wera ono' saaboka onsok eibna' anasa, dena' neika' hiboka denemab, aboka, wera sikda hyak nauba masa youboka deregoka eiya hlalamek." 15:25 "Ban unulumek salek era, yandonya bera alda beiyek sam wa anam welemok. Wera sinik enyek e berem yalamok enyek, benggong yub ab, nimi yan dildilib ana' ak kebok. 15:26 Dara yandonya bera, ek wa welemek nang ek ben hnonok yalom aboka alak, e lomok onora heka' hulum do? aboka heibuk. 15:27 Wenyek ek wanya bedya dara, neyung, anja weisa yeilimla! Neyung anja neyung bedya me nera weiningdoka ara, pe onsok saaboka merewoka yala' anasa, neyung bedya mesa' nong pam enyek oboka youmla, hyok." 15:28 "Dara, yandonya bera hyak yu ganya bobookanya, e lomok ara wekna' lobok. Dara, alja neyung bedya goboka yibiniboka onowoka e lomok yalom hyok. 15:29 Yando me nedya dara, nak danyek gibna' gong-gong neyung ansamba wa yeiriwoka welemna. Nak dara, neyung anja yuba hnon blekgena' ara hyak orok. Dara, neyung anja dara, heka' ak nak ara elegenulum do? Nadya hemyab enya eiya hlaboka oboka youboka delenoba' aboka, anja dara, kambing sirik anyek babya hnon eleganggunulum! 15:30 Bok, anja me nera anja bona' era malya ulumak gelewa pik bokoka orok nenewok me nenyek anam yanggal sab-sab, neyung anda na me eibna bar aboka, mesa' nong pam enyek oboka youblam! aboka lebok." 15:31 "Danyek eili bedya dara, najab o, anda anyagan nab soba' neikek ulunam. Nadya' anyek, nidya' ura yabalamla' danara, anja' ak ulumla. 15:32 Bok nunda perob senewoka eiya daboka, pam oboka youbaba' ara, anja weis era seleb somogok bok, wera embenga' bukoka yal, seleb weiningdokjok, ono' saaboka eibaba' anasa, ubab! hyok," wenyaboka lebok.
16:1 Yesus ara alja yuba doro diriga ban nang ek lebsuka' ara, "Nimi ben hnon dubnya ulumok. Ban dubnya bera alja bona' amba rupiah wa meewoka welemoknya hnon ulumok. Yok sum enyek, ban dubnya bek, anja rupiah salawoka bo uboka memelenggelnya bera, alda anja rupiah dengaboka delenggel aboka nekek. 16:2 Anasa dubnya bera rupiah beiyiboka memelemoknya bek e yeiniboka lebokja, heka' ak nara ansamba yub era kemna do? Wenera nadya wa welenelema' anyek, nara unu pe welemna aboka nidya' lelewoka neknenelem. Anda sum enyek moruwoka eimik era, nadya rupiah salawoka bo unya unggulumnunelem, hyok." 16:3 "Dara ban bona' dubnya bedya rupiah sala ulumoknya bedya seiniwok dara, nara wa wenena' gwab lobnelom henela' anasa, heka' hubnamna do? Nadya neyung bera nak hyak gobdo lobnuna' aboka ubnel. Gwaneng wa welemnesinya bok, nara hmengnya bek ulumna; molona'anya danesinya bok, alya anasa lek. 16:4 Wera ella dan! Nadya wa wenena' loblom aboka gobdo gwab lobnenel dara, wen seininanya nenyek ubnya dara, nim edya' e pik dero yabalemnamna. 16:5 Wenyaboka ban benera, alja neyung bedya wa welemok salek enyek, rupiah del lolomek nanga nidya' ebmamagosuk. Dara mennya bek, anda nadya neyung bedya' ara hekbadya deb loblum do? aboka heibuk. 16:6 Benedya dara, perob ngikna' mek anyek senenggom gokna denga dombadya anaso deb lobsa. Dara wa wena'anya benedya, wera rupiah deb loblum momnya dona' era ban, anda bukoka, gokna denga penya aboka momnya doblom. 16:7 Dara ono' benedya, hnon yoknya bek an, anya hem o, anda hekbadya deb loblum do? hyok enyek, benedya dara, gandum doka aklenga denga sagobadya danamso rupiah eneso' ak deb lobsa, hyok. Dara wa wena'anya bedya deblomoknya bek, wera anja deb loblum momnya dona' era ban anasa, denga linbadya aboka momnya doblom, hyok." 16:8 "Dara rupiah wa sala ulumoknya ben alja dubnya bedya dara, geremseng nonga' anyek hyak pebdangalam aboka gigiwok. Dilina' ak ulumak nim era, anaso ununggulumak bok, sokok an salya' lelem ulumak nim era, sik moumen ak, yoka' ubna' ara, hyak geremsenga' anyek unuldalamak," hyok. 16:9 Dara ono' Yesus adya hnon leboka' ara, "Ugunda pe keblulum! Sokok an bona' era malya dalya sum era, ugunda pe embenga' ulumak heikek doro beibsulula' aboka, wera nadya hemyabo nauba donulul senewoka, sokok bona' enyek doboka bololulum," hyok. 16:10 "Meknya nek bojam welemak nang era, naubenya nek anaba bojam uboka welemnemak. Bok meknya nek anyek, bojam uboka wena' orok nang era, naubenya nek anaba bojam wenggulumnemak. 16:11 Anasa wera, sokok an bona' enyek, ugunda pe bojam uboka wena' orok dara, heknedya dib nong wak sam or weboka bo ulumnelum henesuso do? 16:12 Wera bekna' diba' ara, yok nim edya bolomak bona' enyek babya, ugunda pe bo una' oroka' ak eibnesiseng dara, heknedya ugunja bona' danasusonya nera eleganesuso do?" hyok. 16:13 "Neiknya bedya nimi penya nang emba hiboka dara, wa pe webnenggunususo. Dara, alda hnonnya bek ara lek ganya boboka, ono' yoknya bek ara wana' ubnamso. Goma, mennya bek ganya goluwoka, yoknya bek ara, dolbalek ganya bobnamso. Anasa, ugunda Imik Neyung wa we, rupiah wa we, ubnenggunusom," hyok. 16:14 Parisi nang era, sikda Yesus adya ban nidya' lelemoka' ara kelemek. Dara sikda rupiah ak wana' hwam ulumeka' adya, Yesus ak okseb goluwek. 16:15 Bok Yesus adya sikenek lebsuka' ara, "Ugunda nimi hnoum ara, pe ulumak nang de senen dangalalum bok, ugunja ganya lomok ara, Imik Neyung adya ok ella ulusil. Nim adya hnon perob senelemaknya nera, Imik Neyung adya dara, hyak lek senelamla. 16:16 Musa bedya pe ulumnelum aboka unuwanalum an yuba elegesuka' ab, ununumna' lelemek nang edya elegesik yub era, or lelemeka' ara, Yohanes Pembaptis be ulumok salek sidya' ubdakok. Ban lebna salek eba' moruwoka, Imik Neyung ara dubnya uboka wenelemnesil aro perob lero yanggan yub era, soba' leldibilloklomak. Dara nim ara, Imik Neyung adya wenelemnesila' ak weknob senewoka nauba dulumak. 16:17 Im ab soko ab dara, or denghenemla bok, Imik Neyung adya' unuwanalum an yub ek momnya doboka' ara, meka' hnonok sibin anaba denghenggunumla," hyok. 16:18 "Heknedya alja gel gek lolomlakanya, ono' yok gel ge dolomla dara, alda yok nang gel gek hoka' dololanya ulumla. Anya seleb lomna gel genyek dololanya beb dara, albabya yok gel hoka' salalanya ulumla," hyok. 16:19 "Nimi ben hnon bona' dubnya ulumok. Boksom ara hyak perob nong boksom ok ongowoka, dena' ara hyak soba' perob dena' ok delsinilemok. 16:20 Ban dubnya bedya' pik sindamak sam ara, bona' garanya gororoma' adya malya uboka delemoknya alja si nera Lazarus bek beil yalamek. Alja nong era gororoma' adya deknewoka delemok. 16:21 Lazarus bera dubnya be delemlya enyek, dena' sikna' yanggalamlya' anyek, eboka delenuna' aboka ulumok. Gam adya' anaba Lazarus bedya gororoma' era meka hmouboka delemek." 16:22 "Yok eimik sum enyek, bona' garanya bera somogok dara, lero nang edya bobmekja, imik heikek Abraham bedya' eibukuk sam bo beil byik. Dubnya beneba somogok dara, alda soko lokek. 16:23 Dubnya bera nimi somokna' nang heikek sam hyak nauba gweklemok. Banyagan anyeb imik sam kemel weininglemok enyek, Abraham bera hyak mok sam ulumok dara, Lazarus bera Abraham bedya' eibukuk sam bulumoka' ak eiyimok. 16:24 Anasa dubnya bedya lelemokja, neyung Abraham o! Nak angoo yadyek senewanelom e. Lazarus benyek, alja soruk enyek mek ek doronggalyekanya, nadya' silyum ak an dil younulula' aboka orugalom. Nara uk lomok an hyak nauba gweklamna bar! alamok." 16:25 "Bok Abraham bedya benyek leboka' ara, najabo banyek seiniwanalam: anda or anam embenga' ululum dara, peroba' ok doboka boboka delelum, alda Lazarus bek dara malya' ok doboka dereklemok. Amba wenyek dara, Lazarus bera peroba' ak bukla bok, anak dara, nauba gweklelam. 16:26 Ban oroka' anaba, an ululama' ak aba' ara, nuk an ara nuk anyeba' ara nimi hnon anak sam an yeijek, ono' anak anyeb nang era nuk yeijek aboka, senenggom gwerena boblebok! aro lebok." 16:27 "Wenyek dubnya bedya dara, neyung anaso una' enyek leblam dara, Lazarus benyek nadya' ek bokol biloma' aboka anyek hnonok molowagen, aro lebok. 16:28 Nadya weisabo lambadya nang ulumaka' anyek, sikbabya igina kweboka gwekna' ak an yeijek anasa, Lazarus bedya wenel busulula' aboka orugalom, hyok. 16:29 Danyek Abraham bedya dara, sikda Musa bedya momnya dobok yuba hnon, ununumna' lelemek nang edya webek yuba hnon seleb yaka' ak ulumak. Sikda yuba lom enyek an momnya doboka' nidya' anyek sunuwoka ulunok! 16:30 Bok dubnya bedya dara saaboka, neyung Abraham o, nenyek ok dara, seleb gom senewan. Bok somogelenya benyek, sikenek suboka yanamla' nong ak eibnemak dara, wera sikja malya una' ak ab ganya dangawoka yuba dib senewanamak, aro lebok. 16:31 Bok Abraham bedya dara, sikda Musa bedya yub eb, ununumna' lelemek nang yub enyek, dib senena' loboka eib lobneseng dara, nimi somogoka suboka bukesonya bedya wenyaro biso' anaba dib senewanggunuseng, hyok," wenyaboka lebok.
17:1 Yesus adya alja yuba doro diriga ban nang ek, "Nim ek malya ul eleksina' ara sob ulumnamla. Bok malya ub eleganesilnya be nong anyek, hyak omoma' ak ulumla! 17:2 Yoka' gwablemak girik edya ngang ak geregoka mek ek al nonga boboganeseng dara perob. Hnon yok me nenyek benedya malya una' ub elegalya' anyek, omom nonga dalyek. 17:3 Anasa ugunda pe keeboka diri uldalalulum!" "Anja hembe malya ublya dara, alak omoma leblom. Wenyek alda ganya dangawalya dara, danyek or meebdanarum. 17:4 Alda neik sum enyek, lika sekbadya so anak malya ubgelyekanya, alja anak soba' yeiniboka nara aldib malya ubgen aboka laga lebgelya dara, wera anda alak soba' meebdanarum," hyok. 17:5 Yuba lena' gak nang edya Wenelesilnya Yesus ak, "Wenelesilimnya o, nunja dib senena' anyek, gasa nenewoka migiba' gebsilom," hyek. 17:6 Danyek Wenelesilnya bedya sikenek lebsuka' ara, "Ugunja dib senewoka ganya olokna' anyek geibya dok anaso dara, nginya gal ak lebnesomja, dama deleboka mek gwan dubuk sam meldal bilom, henesom dara, wera gal eneba ugunja yuba keboka unuwanamso," hyok. 17:7 "Ugun gangganek sam nimi ben hnon wa dubnya uboka, alja wa wenya gom, pam beilinanya yaknya bek ulumso dara, bera wa welemso' ara, anam wak aba' sekel yanggaso enyek, wa dubnya bedya, del yanggalom, henemso de? 17:8 Orok wenyhenggunumso! Alda wa dubnya bedya wa wenya bek ara, nadya dena' meewoka beibnenelem. Yok akleng ongowoka, na anam gwaneng ab mek ab delemnya salek era, diri seklenemna' ara debgogowanya dara, wera anda or denelam, henemso. 17:9 Wa dubnya bedya dara, alja orugamso' anyek keboka unumso' anasa, perob aboka nauba gibnamso de? Orok. 17:10 Ugumba anaso neikek. Ugunuk nidya' unulululum aboka orugosuknya nenyek unulumun dara, ban nenyek lebnelum, nunda wa oruksin nang enya', nunda nunja webnesibya wa nok wero ulumab, henelum," hyok. 17:11 Yesus ara Yerusalem heikek anam balamokok ab dara, alda Galilea mok eb uboka Samaria moka wikneba' pik uboka balamok. 17:12 Wera yok heikek byuk enyek, nimi sagobadya nanga gororoma' adya malya uro delesuka' anyek, Yesus ak yek. Sikda mok ab sekoka, 17:13 lelemekja, "Neyung, Yesus o! Nuk angoo yadyek seneweisilom e!" alamek. 17:14 Wera Yesus adya sikenek eibsuk dara, "Ugunda Yahudi yuba gak nang ek, ugunja nong enyek amaldal binilum!" hyok. Wera anam pikek balamek salek enyek, sikenek delesuk gororoma' era seleb denghusuk. 17:15 Dara nimi ben hnonjok, alda seleb merewan senewoka ella ubdok dara, bera saaboka Imik Neyung nauba gibgiga Yesus ak nekel yeilimok. 17:16 Dara Yesus saram nong ok hogung dib malyingginiboka, Yesus ak perob aboka gimok. (Ban unuwoknya bera Samarianya bedya unumok.) 17:17 Danyek Yesus adya, "Nimi sagobadya nang hwebnenggumna de? Soubnabadya nang era hanyagar ulumak do? 17:18 Hekasa ban sekel yangganya benyek ok, lo saaboka nak perob aboka gibel yanel do?" hyok. 17:19 Dara ono' Yesus adya gibel yoknya bek an, "Anda sekmenekanya bilom. Anda nak dib senewanelema' adya, anda seleb merelam," hyok. 17:20 Parisi nang wene nang Yesus ak Imik Neyung adya hwer salek yeiniboka, wenelemnesil aboka heibek. Wenyek Yesus adya dara, "Imik Neyung adya wenelemnesila' ara, bekna' ulumla' damok ara, nim adya laga bekna' eilinggulumak. 17:21 Imik Neyung adya seleb ugun lomok an wenelesil bok anasa, nim adya dara, alda ban ulumla' anyek kemel yoululum! Goma, alda ono sam ulumla! aboka alja wenelesila' ak lebnenggunumak," hyok. 17:22 Ban wenyabgogowok dara, Yesus ara alja yuba doro diriga ban nang ek, "Eimik era, nimi diba' me nedya' perob sum lika hnonok ok yanamso henelum bok, ugunda heng eibnenggunulum. 17:23 Eimik era nim adya ugunuk wenyhenesak, kendululum, alda anyagan ulumla! Goma, alda ono sam ulumla! henesak. Bok ugunda kendenoba' aboka goboka el yabana' ara hyak mem. 17:24 Nimi diba' me yanamla sum era, ebna' ara imik ab langam henekanya, mok soko gokgobok nidya' yeblamla sok, unuwanamla. 17:25 Bok men dara, wen ulumak nim edya nimi diba' me dona' loboka, alda igina kweboka nauba gweknamla. 17:26 Nimi diba' me yanamla sum era, Nuh ulumok salek ek ulumek sok diliga' danamla. 17:27 Ban salek era, nimi nidya' ara gwanenga meka deregoka, gela dobdangoka, al nenyek ok unuro ulumeka' ara, Nuh bera mek ekla buna' ak wekel yabok sum era, sikda nidya' ara mek adya dengaboka obsuk. 17:28 Ono' Lod be ulumok salek era, neik so unulumek. Nimi nidya' ara gwanenga meka deregoka, dekna' dekoka bobdangdo, masa meewoka, e soboka ulumek. 17:29 Bok Lod bera Sodom heikek aba' ara goboka bok dara, ban sum enyek nimi nidya' ak uk ab poba girik ab dadya doublinggoka obsuk. 17:30 Nimi diba' me yanamla sum era, neik so unuwanamla. 17:31 Ban unuwanamla sum era, nim e weilik sam buru yabalemeija nang era, e lomok sam bona' beiyimeija' ulumlya' anyek, dobnamna bar aboka weknenggunumak. Anasonya beiyek wak sam ulumeija nim era ek sam saaboka yanggunumak. 17:32 Lod ala' gel ak umoka' anyek ugunda pe beknelum! 17:33 Nadya nonga hyak pe blebdonun senelemak nim era, sikda weiningdanamak. Bok sik weiningdanamak nim era, sik nonga blebdanamak. 17:34 Ban sum era, inimnek nimi penya nimi neika' ak marija bok, ben hnonda dobnamla dara, ben hnonda lobnamla' anyek, ugunuk dib lebsin. 17:35 Gelewa penya gandum gwablerija bok, gela hnonda dobnamla dara, gela hnonda lobnamla. 17:36 Nengmabo penya nang neika' wa welerija dara, ben hnonda dobnamla dara, ben hnonda lobnamla," hyok. 17:37 Yesus alja yuba doro diriga ban nang edya, "Wenelesilimnya o, ban ara hanyagareb unuwanamla do?" hyek. Dara Yesus adya leboka' ara, "Hanyagarek blona' yaka' ulumla dara, anyagan ara songa' den wining ulumla," hyok.
18:1 Ban nen wenyaboka lebgogowok dara, Yesus ara alja yuba doro diriga ban nang ek, sikda ganya mounduk-mounduk ana' loboka soba' heng uboka mololenoka' aboka, yoka' ak sunuwoka neksuk. 18:2 Anya Yesus adya dara, "Nauba heikek hnon, nimi yana lelesina' dubnya ben hnon alda Imik Neyung ak lok ganya bona' oroknya bek ulumookanya, nim ek anaba peroba' leboka unggulusuk. 18:3 Dara ono' al neik heikek ara, yougel ge hnon ulumookanya, nimi yana lelesina' dubnya bek an soba' balamok. Yougel gedya dara, nadya isa' nang eb yuba garabdananama' anasa, anda nak arawananelom, hyok. 18:4 Men salek yana lelesina' dubnya bedya dara, arawanggunumna senewoka lomok. Bok eimik era, alda seiniwoka' ara, Imik Neyung ak lok unggulumna, nim ek anaba peroba' lenggulusin bok, 18:5 ban yougel genera nak an loba' nenel yalanela' anasa, wera yuba garana' diba' alak igina kweiyiroba' ara meewoka lelewanamna. Anyek unuwanggunumna dara, gel gera nak yeindibigamlyakanya, nak loba' nenewanelyek senewok," hyok. 18:6 Dara ono' Wenelesilnya bedya leboka' ara, "Pe ununa' oroka' yana lelesinya bedya leboka' anyek ugunda pe kendululum! 18:7 Anasa wera, Imik Neyung ara alja mabo siliba' edya inimnek yubyek pik arawoka mala dobnesilim alamaknya nek ara, mala dobnenggunususo de? Imik Neyung adya sikenek sum enyek arawanasin aboka, gokgiga binimso de? 18:8 Imik Neyung ara sikenek mala doboka arawanasila' anyek ugunda dib senewanalum! Bok nimi diba' me yanggalya sum era, alak dib senemeija nim era, anyagan sokok anam ulumeija' ak eibnesil gom, orok gom," hyok. 18:9 Ono' hnon, nimi ganya adya dara, yok nang era malya so nang senen bok, sik dam nang dara, alan seleb pe ulumab senelemek nang emba sunuwoka lebsuka' ara, 18:10 "Nimi penya nang heng uboka molowanoma' aboka Imik Neyung ek sam bilirek. Nimi ben hnonda Parisi nang dara, ben hnonda mok soko amba rupiah molowoka dolosuknya bek bilirek. 18:11 Dara Parisinya bera albeyok sekoka lero mololemokja, Wei Imik Neyung o, nara yok nang ulumak soka' ak unggulumna, nara hoka' donggulunanya, nara gununggulunanya, nara gela salya' salenggulunanya, anasa anak perob aboka gibgen. Nara ban rupiah mok soko amba mololanya beneso' ak unggulumna' anasemba, perob aboka gibgen. 18:12 Nara minggu hnonok ansamba lika penya gwanenga lobsiniwoka giblenggen, nadya nidya' dolomna' ulumla' ara, bokoka darasam sagonya nera ansamba bo beil yalenggen, alamok. 18:13 Bok mok soko amba rupiah molowoka dolomoknya bera, alda mok sam sekoka, imik sam kemel weiningna' anaba loboka, sara' sibuka obdangoka lero mololemokja, Wei Imik Neyung o, nak malya una'anya bek an angoo yadyek senewoka arawanelom e, aboka mololemok," hyok. 18:14 Ono' Yesus adya leboka' ara, "Anasa ban lebsin, Ban penya nang dara, sikja' ek seleb birik dara, Parisinya bera loboka, alda mok soko amba rupiah molonanya benyek, Imik Neyung adya pemna' gebok. Anasa nimi nidya' imik neneldalamak nang era, sokok nenewanasilikanya, ganya sokok nenebdangoka ulumak nang enyek, imik nenewanasil," hyok. 18:15 Nimi nauba sikja moum den mab eneba, soruka salawoka peroba' onowosulula' aboka, memabo Yesus ak bo yeilimek. Dara, Yesus alja yuba doro diriga ban nang edya anyek eibek dara, memabo bo yeilimek nang ek wabsik. 18:16 Bok Yesus adya dara, mabo danyek nak an yoululum aboka, alja yuba doro diriga ban nang ek, "Malye, mabo danara, nak an or yanok! Ban unurub so nang enyek, Imik Neyung wenesin heikek weknemak nim era an anasa, sikenek ara nak yanggana' mem asinggom, mem. 18:17 Mek sirik mabo yoka'-yoka' dolomak sok, Imik Neyung wenesin heik era dobnenggunumak nim era, eimik era Imik Neyung wenesin heikek weknenggunumak, ugunda pe beknelum," hyok. 18:18 Yahudi nang dubnya ben hnonja Yesus ak, "Neyung, perob neklesilimnya o, nara heka' ak hubnya' adya dib embenga' una' ara dobnamna do?" aboka heibuk. 18:19 Dara ono' Yesus adya benyek saaboka, "Anda hekasa nak ara perobnya henelem do? Nimi hnon peroba' ak una' ara orok bok, Imik Neyung ak hnonok alak ok perobnya bek ulumla. 18:20 Anda Imik Neyung adya orukna' yuba momnya doboka' ara seleb ella ululama' ara, gela salya' salenggom, nimi salya' onggom, hoka' donggom mem, sonda' yuba salya' lenggom, anya anja' genonga neyung ak pe gibel dololom," hyok. 18:21 Danyek benedya, "Ban yuba danara, nara mekewek moruwoka unulamna," hyok. 18:22 Yesus ara ban nenyek kebok dara, alja lebnemoka' ara, "Hyak hnonok anam or anaso unuwanalama' ara, anja bona' nidya' ara dekoka rupiah dobmen dara, rupiah era bona' garan ulumak nim ek boknesilim. Dara anda imik heikek ulumla bona' enyek dobnelam. Ban unubgogowamen dara, anda nak diriga yananelem," hyok. 18:23 Dubnya bera ban yub en kebok dara, alda hyak bona' dubnya ulumoka' anasa, nauba igin ganya bobok. 18:24 Dara, Yesus ara ban bera bona' dub adya hyak igin ganya boboka' ak eibuk dara, alja leboka' ara, "Bona' dub nim era, Imik Neyung wenesin heikek wekna' ara, hyak okna! 18:25 Nim abaksin pam era, imir lomok pik ara or weknamso bok, bona' dub nim enyek, Imik Neyung bedya heikek sam wekna dara, hyak okna nong," hyok. 18:26 Wera Yesus adya wenyalamoka' anyek, anyagan ulumek nim edya kebek dara, sikja, "Ban anaso wenyalalam dara, wera hek nim ek blebnamla do?" aboka heibek. 18:27 Danyek Yesus adya dara, "Nim adya ununa' oknanya neneba, Imik Neyung alak ok hnonok or unulamla!" hyok. 18:28 Danyek wera Petrus bedya Yesus ak, "Neyung o, kendelom! Nunda nauba nimi gelewa mabo loboka anak diriga yeilinjuba," hyok. 18:29 Anasa Yesus adya dara, "Ugunda ban nong anyek dib senewanalum! Nimi hnon alja e nek gom, alja gel gek gom, alja weisab ek gom, alja genong gek gom, alja mab ek gom, Imik Neyung wenesina' amba leboka, lo yalamla dara, 18:30 ban unuwalenya bek ara, wene salek ek dara, yoka'-yoka' nauba lunuwoka doboka eleganemlakanya, eimik era dib embenga' ulmoubna' damok eleganamla," hyok. 18:31 Yesus ara alja yuba doro diriga ban nang ek sikbeyoka' ak mamagiyiwoka lebsuka' ara, "Ugunda pe keblulum! Nunda wenera Yerusalem heikek balamab. Dara, Yerusalem heikek ab dara, ununumna' lelemek nang edya nimi diba' me nemba leboka momnya doroba' nidya' ara, gigiwoka unuwanamla. 18:32 Nimi diba' me nera alda doboka Yahudi gom nim ek eleganamak dara, wera alak loba' nenewoka derewoka waboka, gamala' solol golulumnemak. Dara ban nang edya alak nauba malya uboka oboka dibnemak dara, 18:33 lika winilinya sum era, alda embenga' suboka buknamla," hyok. 18:34 Ban nidya' wenyalamoka' ara, Yesus alja yuba doro diriga ban nang edya dara, meka' sibin anaba hnon damok ara anyek lelemla senewoka ella danggumek. Ban lelemok yuba damok era, doknonanya nenesoka' ak ulusuk. Anadya sikda alja lelemok yuba damok era, anyek lelemla ara elgom ulumek. 18:35 Yesus ara Yerikho heikek wekel bununa' aboka ok berem bok dara, anyagan ara nimi ben hnon heng umoknya pik gek sam mololdo bulumok. 18:36 Benedya al bulumok pik era nimi nauba yabalameka' ak kemok dara, "Heka' ak ulumla' anasa do?" aboka heilisuk. 18:37 Dara yok nim edya benyek an, "Nazaret mok ebnya, Yesus anyek pik enyegan yabalamla," hyek. 18:38 Dara heng lumnya bedya dara bii aboka, "Wei, Yesus o, Daud bedya me. Angoo nak yadyek senewanelom e!" aboka lelemok. 18:39 Men mengemek nim edya dara, benyek nauba waboka yuba sana' gelegalom aboka lelemek. Bok henga lumnya bedya dara, hyak nauba bii aboka, "Daud bedya me o! Angoo nak yadyek senewanelom e!" aboka lelemok. 18:40 Wera dara, Yesus ara balamoka' ara, sek loboka nim ek heng lumnya bera oka bo yoululum aboka orugosuk. Bera Yesus berem bo yek dara, Yesus adya alak heibuk, 18:41 "Anda heka' ak nadya ansamba unuwonulul senelam do?" aboka heibuk. Benedya dara, "Neyung o, nara heng gwelegoka eibsinya senemna," hyok. 18:42 Dara Yesus adya dara, "Anaso senelam dara, wera kendelom! Anda nak dib senenelema' nong adya, wera anda seleb merewalam an," hyok. 18:43 Al wene salek enyek, bera seleb heng gwelegoka eibuk dara, alda Yesus ak diriga biniboka Imik Neyung ak hwebnelema' perob aboka, giblemok. Nimi nidya' ban unumoka' anyek eibek dara, sikda lok ganya boboka Imik Neyung ak perob aboka nauba giblemek.
19:1 Yesus ara wera Yerikho heikek lanal biniboka, bununa' aboka balamok. 19:2 Yerikho heikek ara, mok soko amba rupiah molowoka dona'anya bona' dubnya ben hnon, alja si nera Zakheus bek ulumok. 19:3 Alja dara, Yesus ara hurub sonya bek lelemak do senewoka eibnamna senen dulumok bok, nimi mandebna' ab, alab dara nonga burum ab dadya, Yesus nong ok ara pe eibnenggumok. 19:4 Anasemba Zakheus bera berra aboka nimi mengeb hwiboka Yesus yibinamla senen pikek yabalya dara, eibnuna' aboka, gal ak welewoka bukumok. 19:5 Yesus ara yalamoka' ara, anyagan yok dara, keeb weininggoka, "Zakheus o, sum enera nara anja' ek sam yanamna' anasa, wera anda berra yinggilom," hyok. 19:6 Dara Zakheus bera berra aboka sokok yingginiboka, Yesus ak pika dibok. 19:7 Nimi nidya' ara anyek eibek dara, hyak nauba dogom eleng alamek. Anya sikja lelemeka' ara, "Wei, hyak malya nongnya bedya ek nim e bul bilimla bar!" aboka lelemek. 19:8 Wera ek ab dara, Zakheus bera sekoka Yesus ak, "Wenelesilimnya o, diba' unuwanamna' ara nadya bona' nidya' ara hnoumunga gaboka, bona' orok nang rupiah deknyekanya, bokoka eleganesin, dara ono' nimi nidya' nadya sonda' leboka usisa nang era, sikba on 19:9 Dara ono' Yesus adya alak, "Beneba Abraham nang yila' ak anasa, sumen nong ak, e nenyek an Imik Neyung adya blebsilikanya, wenyek dib embenga' una' elegeisil. 19:10 Nimi diba' me ara, weiningdangamoknya nenyek eboka blebnuna' aboka yeilimok," hyok. 19:11 Yesus ara anam yuba salamoka' anasa kelemek salek, nim adya dara, Yesus ara Yerusalem heikek berem ulumoka' anasa, Imik Neyung adya wenyok nong sokok sam wenelemnesil senemeka' anasa, wera ono' ban sununa' enyek hnon sunuwoka lebsuka' ara, 19:12 "Nimi dubnya bedya me hnon, mok soko dubnya sekiyiweinija dara, yanamna senewoka yok sokok bilimok. 19:13 Wera bera anam binggumok salek, alda nimi sagobadya alak arawoka wa welemek nang ek yoululum aboka, rupiah yuba' damoka yok-yok elegosuk. Alja dara, Na bilimnya salek enyek, ugunda ban rupiah enedya, nauba dolula' aboka, bona' nauba dekoka deklemnel 19:14 "Bok alja meneng mok nim edya, alda lek senemek. Anasa wera, bera dubnya sekiyiwanameka' ak seleb byuk bok, Nunja mok ara ban benyek, dubnya una' lek amak, wenyaro byik. 19:15 Bok ban dubnya bedya me nera seleb dubnya ulumnelam aboka sekiyiwek dara, alja mok sokok saaboka yok. Seleb yok dara, alja wa wena' nang ek, Rupiah deklelulum aboka elegesisa' ara, wera hekbadya doka' anyek nekel yananulum, hyok." 19:16 "Men elegemoknya bedya yeiniboka, Neyung o, anja rupiah elegenuluma' ara, nadya dara deklamsa' ara, lunuwoka dek sounuwasa dara, sagobadya dok, aboka lebok. 19:17 Dara dubnya bedya unumoknya benyek an, Anda pewolum, anda hyak wa pe wenya ululam! Anda meknya nek pe bojam weboka unululama' anasa, wera heika sagobadya hiboka dubnya sekiyiwanenggen, hyok. 19:18 Dara ono' yoknya bedya yeiniboka, Neyung o, anja rupiah damoka hnonok elegenuluma' ara, nadya dara, lambadya dek sounuwasa, hyok. 19:19 Dubnya bedya unumoknya bek an, Wera anda pewoluma' anasa, heika lambadya heikek dubnya sekiyiwanenggen, hyok." 19:20 "Dara yoknya ben hnon yeiniboka, Neyung o, anja rupiah yuba' elegenuluma' ara, nadya hwin lubuldana' lomok doronggoka beibsa' ara, wera onsok an dam nang bo elegel yagen. 19:21 Neyung, anda ganya gasa nongnya uboka, anda anja' goma' anyek lolowoka dololama' hnon, hnonda anja soruk yoka' adya weboka mebnenggumna masa ek anyeb doka daklelamnya bek anasa, nara lok amba ubsa, hyok. 19:22 Dara dubnya bedya ban unumoknya bek an, Anda hyak malya una' hwam wa wenya bek ululam! Anja lebdalam yuba nong enedyok wera nadya yana lelewanenggen. Anja dara nak ara, nadya gom bok, salya' lolowoka dolomna' hnon, nadya soruk adya weboka mebnenggum 19:23 Anyek ella ubnulum bok dara, al dam nang yeiniboka beillilamna' amba maklesaknya neb doblula' aboka, nadya elegenggesa rupiah era hekasa senenggom rupiah beilina' ek sam dorongganggunulum do? wenyaboka heibok," hyok. 19:24 "Dara ono' dubnya bera anyagan yok ulumek nang ek, Alja bomla rupiah era doboka, sagobadya rupiah yaknya bek an elegolulum, hyok. 19:25 Bok anyagan ulumek nang edya dara, Neyung o, bera seleb alda sagobadya rupiah ulumla bar, hyek. 19:26 Danyek dubnya bedya lebnemoka' ara, Ugunda hyak pe beknelum, Heknyek nauba ululanya bek anyek, eimik nauba sounuwoka eleganamla. Bok yoka'-yoka' oroknya bera, alak an meka' ululanya neneba nidya' dobnamla. 19:27 Anya wenera, nak an alda nunja mok sokok dubnya deisilyek senewoka isa' gebnyek nim era, nidya' nimi bo yeiniboka, nadya' saramek anyeb hyaka' obnelum, hyok," wenyaboka lebok. 19:28 Wera Yesus ara banyek nidya' laga wenyaboka lebgogowok dara, alda Yerusalem heikek sam mengewoka balamok. 19:29 Wera Zaitun mein berem Betfage moka, Betania heik berem bokok ab dara, alja yuba doro diriga ban nanga penya nang ek, ugunda men bururum aboka boksuk. 19:30 Yesus adya dara, "Ugunda men okan heikek enyek an burumun dara, nim abaksin pam goubenya' anyek, soudya' gereklomeija' ak eibnerum. Pam enera nimi hyak meka' hnon abageiniwanggumeija pam ek ulumla. Anyek ugunda soudya' lobdumunekanya, bo yanarum. 19:31 Nimi yok nim edya, ugunda pam ara hekasa soudya' loblerum aboka heibsija dara, Wenelesilnya bedya do yoururum, amla' anasa ulunam, henerum," hyok. 19:32 Yesus adya' yuba doro diriga ban nang penya nang era, biniboka nidya' Yesus adya lemok sok sunuwoka unu gigiwoka eiyirek. 19:33 Wera sikda biniboka pam soudya' lobol yabarek sab-sab, pam damnya bedya yeiniboka, "Ugunda hekasa pam era soudya' loblerum do?" hyok. 19:34 Dara sikja lebdekja, "Wenelesilnya bedya na dobnamna amla' anasa ulunam," herek. 19:35 Dara soudya' loboka, pam era Yesus ak bo yarek. Wera seleb pam gwadyek sam boksom adya yangiyiwek dara, Yesus ara pam en gwadyek bukiyiwek. 19:36 Dara Yesus ara pam en eilib bukoka balamok dara, nimi nauba sikja boksom edya Yesus binimok pikek yangaro balamek. 19:37 Wera Yerusalem heik berem, Zaitun meinik aba' ara yanggalamek pikek yanggok dara, nimi nauba Yesus ak diriga balamek nang edya nidya' Imik Neyung adya hyak senenggom damoka lok so migib ununa' unulumoka' anyek, sikda Imik Neyung ak perob aboka nauba 19:38 Dara sikja lelemekja, "Wenelesilnya bedya si pik moruboka yok dubnya bera alja' senedya migiba' ara hyak pe ululul! Imik heikek ara, peroba' anyek uboka, Imik Neyung ak soba' giblenok e!" alamek. 19:39 Wenyek Parisi nanga sik gangganek an ulumek nang edya Yesus ak, "Neklesilimnya o, anja yuba doro diriga yalanjak nang ek yuba gelegolulum, helom," hyek. 19:40 Bok Yesus adya dara, "Wei, ugunuk hyak dib lebnesin, Sikenek yuba sana' geleganamak dara, wera ban girik danyek yuba sabnemak," hyok. 19:41 Yesus ara Yerusalem heikek lanal binibmookanya, heik era oka danggiga balamok dara, kemelemookanya, alda engena' sala bukok. 19:42 Yesus adya, "Angoo, anda sumen enyek, heka' adya anak namena' eleganenggeso' ara, orowek ella ubnesom dara, wera pewanasom! Bok, anda hyak meka' eibnenggublam. 19:43 Anda eimik era, an ululama' gokgobok nidya' ob yeilim-yeilim aboka doluwananjak dara, ono' anak duka' lolowoka malya nenewananjak. 19:44 Imik Neyung adya anak blebgununa' aboka yanggal salek enyek, anda eibnenggublama' anasa, anak songgija ebelengna' era go' gasa denewanggunumla, anya yok nim edya an nonga golob menegoka anak ulunjak nimi nidya' ara ob meneganamak!" aboka engewok. 19:45 Yesus ara Yerusalem Imik Neyung e eremek wekoka, nimi nauba bona' e lomok dekdo bulumek nimi nidya' doluwoka yakal yabasuk. 19:46 Yesus adya sikenek lebsuka' ara, "Imik Neyung yuba bukuk sam momnya doboka' ara, Imik Neyung adya dara, Nadya e nera nak heng uboka molonen e danamla, hyok bok, ugunja hoga' nang e nenelum!" hyok. 19:47 Lika soba' Yesus ara Imik Neyung ek sam yuba lel eleklesuk. Bok Imik Neyung yuba wa gaka' dub nang eb, Imik Neyung yuba neksin nang eb, Yahudi sokok dub nang eb dadya, Yesus ak obnemab senewoka dulumek. 19:48 Bok obnemab senen pik era eibnenggumek. Nimi nidya' ara Yesus adya lelemok yub enyek, perob senewoka ganya goluwoka, alja yub enyek pe kelemeka' anasa, pika eibnenggumek.
20:1 Yok sum enyek, Yesus ara Imik Neyung e eremek wekoka, Imik Neyung adya' perob lero yanggan yuba nim ek lel eleklesuk enyek, Imik Neyung yuba wa gaka' dub nang eb, yuba neksin nang eb, Yahudi sokok dub nang eb dadya, Yesus ak yeiniboka, 20:2 lebekja, "Wera anda hek damok edya yoka'-yoka' lok so' unululama' anyek neksilom! Heknedya anak ban unulumnelam aboka migib en elegajok do?" aboka heibek. 20:3-4 Anasa Yesus adya dara, "Nababya ugunuk heibnesin. Yohanes Pembaptis be meka dalasuka' ara, hek damok edya do? Imik Neyung migib adya gom, nimi migib adya unulumok gom? Anadya aboka nak neknululum," aboka heibsuk. 20:5 Dara sikda nidya' ara ganya sunuwoka lebdanamekja, "Nunda lebnemabja, Imik Neyung migib adya, henemab dara, alja dara, Wera ugunda hekasa dib senenggululum do? henesil. 20:6 Bok ono' nunda, Nimi migib damok adya, henemab dara, Yohanes bera nimi nidya' adya dara, ununumna' lenya senelemak bok anasa, girik adya obsijek bar," wenyabdek. 20:7 Anya sikja dara, "Nunda elgom," hyek. 20:8 Anasa, Yesus adya sikenek lebsuka' ara, "Wera anasa nababya, hek migib damok edya, lok so' unulamna' ara, anadya unulamna aboka neknenggunusin," hyok. 20:9 Dara ono', Yesus ara nim ek ban yub enyek sunuwoka lebsuka' ara, "Nimi ben hnon gal dok wa weboka memelemoknya ulumok. Dara wa damnya bera, ugunja meewoka welemnenulum aboka, yok nim ek rupiah dekoka, alda yok sokok biniboka uldablemok. 20:10 Wera gal doka dakne salek era, oka dok dara, wa damnya bera, yok orukna'anya ben hnon seleb moulenya daka yanalam bar aboka bokdo dorogok. Bok men wa welemnelum aboka oruga bilisuk nang edya, ben yalamok enyek, saboka oboka or nong baneng bindowalom hyek. 20:11 Dara ono' wa damnya bera yoknya bek gal doka dakoka beiyimeija dara, bo yananelem aboka bokdo dorogok, bok anyagan men wa welelulum aboka orugosuk nang edya, ben yalamok enyek, al saboka oboka malya nenewoka nong baneng bindowalom hyek. 20:12 Dara ono' wa damnya bera saaboka, winilinya ben hnon bokol yok. Bok beneba ono' neik nang edya saboka oboka, wak sam aba' ara yakdo bobogek." 20:13 "Wera anasa wa damnya bedya dara, Nara heka' ak hubnamna do? Nara saaboka nadya' me yoka' wana' nong me nenyek, sikda alak peroba' lebnemeija me nenyek gal doka dakoka beiyimeija dara, do yananelem aboka boknamna! hyok. 20:14 Bok sikda wa damnya bedya me nong enyek okoka eibek dara, sik moumen leldalamekja, Wa dam me nera an yanggal an. Alja wa nera nu danamaba' anasa, nunda al nong ak obnemab, aboka lelemek. 20:15 Wera me nenyek saboka oboka bo goboka, diba' obek," hyok. Dara ono' Yesus adya dara, "Wei, damnya benyek yasok ab dara, wa welenululum aboka oruga bilisuso nang ek ara heka' hubnesuso do? 20:16 Wa damnya yeiniboka, wa welenululum aboka oruga bilisuso nang era nidya' obsusookanya, wa ara yok nang ek ugunja welemnenulum aboka lebnamso," hyok. Ban wenyan yuba kemek dara, nimi nauba adya Yesus ak, "Hyak mem o!" hyek. 20:17 Dara Yesus ara sikenek keebdaboka lebsuka' ara, "Anasa yuba ban hnon ulumla' ara, E sona' nang edya e denewoka sobnenggumeka' lobek girik era, men youboka perobnya dal, aboka Imik Neyung yuba bukuk sam momnya doboka' ara, damok ara heka' ak lebok do? 20:18 Nimi nidya' girik enyek an malyingginimak nim era, malya uboka soldob meneganasil; anya heknyek girik enedya obnamla dara, alda soldowoka aso huka' danamla," hyok. 20:19 Yahudi Imik Neyung yuba wa gaka' dub nang eb, yuba neksin nang eb dara, Yesus adya ban yoka' ak sunuwoka leboknya nera, sikja dara, nunsamba lebsil senemek. Anasa Yesus ak wene salek heng goubnemab senewek bok, nimi nauba anyek lok anasa lomek. 20:20 Anasa sikja dara, pewalya sum donok senewoka pik elemek. Wera anasa sikja dara, nimi pe unulamna nang eneso anyek dekna' deknesaba' anasa, ugunja Yesus ak sene hek hulul do aboka sunuru yabalelulum, henemab. Anadya bekna' danamla sum era, mok soko dub nang edya sikja migib lomok doboka eleganamab, senemek. 20:21 Wenyaboka dekna' dekesik nang edya Yesus ak, "Neklesilimnya o, neyung anja lelesilima' ab, neklesilima' ab dara, hyak dib nonga' ak lelelam. Anda nimi nidya' lek senesina' loboka, peroba' lelesilima' anasa, Imik Neyung adya nim ek anaso unuwaseng senelamla' anyek laga poboka neklesilima' ara, ella ulumab. 20:22 Anasa nunja yuba dona' ak sam lelemla' sunuwoka unuwanalum wenyhenesilim, soko dubnya Kaisar bek ara, mok soko amba dara rupiah or deknesibya gom, orok gom?" aboka heibek. 20:23 Bok Yesus ara sikja sene heimeka' ara eiyisuka' anasa, alja sikenek lebsuka' ara, 20:24 "Rupiah hnon nak aawonululum. Heknedya sununa' eb, si neb ulumla do?" aboka heibsuk. "Sokok dubnya bek ulumla!" hyek. 20:25 Yesus adya sikenek lebnesuka' ara, "Anaso ulumla' ak eiblum dara, dubnya bedyinya nera, dub nang elegolulum, Imik Neyung adyinya nera, Imik Neyung ak elegolulum," hyok. 20:26 Wera Yesus adya wenyaboka leboka' nong adya, anyagan wekemek nang edya dara, Yesus ara ban malya una' enyek okoka dib unuwoka' damok ara eibnenggumek. Sikda Yesus adya pe lelemok yub enyek dib lelemoka' anasa loka daboka yuba sana' lomek. 20:27 Nimi Saduki nang, wene nang Yesus ak yeilimek. (Saduki nang edya dara, somoklemak nim era eimik hnon embenga' subnenggunumak senelemek nang.) Sikda Yesus ak heiboka, 20:28 "Neklesilimnya o, nimi ben hnon somoganamlakanya, alja gel gera lo binimla dara, wera gel ara weibsanya bedya doboka, somogalenya benesa me beib lunuwanamla aboka, Musa bedya nunja yub ek momnya dobok. 20:29 Wera, nimi seleb sekbadya nang nemek bok, yandonya bera gela domok bok, me beilina' loboka somogok. 20:30 Dara ono' anam beremnya bera alja somogoknya bedya gel gen dobok bok, beneba me beilina' loboka somogok. 20:31 Winilinya beneba neik so ok unubgiga bilimoka' ara, sidya' seknya beneba neik so unu somogok. 20:32 Dara ono' dolomek gel geneba eimik sidya' dakoka somogok. 20:33 Wera anasa, nimi sekbadya sik nang yila' era, neik gel gek nidya' domek bok anasa, soko sidya' daknamla sum era, heknedya gel ge yoka' danamla do?" aboka heibek. 20:34 Anasa Yesus adya sikenek lebsuka' ara, "Nimi nidya' wenyek ulumak nang era, sikda gela doldalamak bok, 20:35 eimik diba' ulumnemaka' amba embenga' suboka bukiyiwanasil nang, eimik yenewanamla salek ulumnemak nang era, gela meka' dobnenggunumak. 20:36 Sikja nong somokna' ara oroka' anyek, lero anaso ulumnemak. Sikda somokna' ak ab sam seleb suboka embenga' bukiyiwanasila' anasa, sikda Imik Neyung alja yoka' mab ek ulumnemak. 20:37 Musa bedya' anaba alda seleb nimi somoklemeija nim era, embenga' suboka bulumnemak aboka lebok. Alda seleb momnya doboka' ara, gal donggalek sam uk boka' delemoka' ak sam ab dara, Musa bedya Wenelesilnya bek ara, Abraham bedya Imik Neyung, Ishak bedya Imik Neyung, Yakub bedya Imik Neyung,' aboka lebok. 20:38 Wei, anasa Imik Neyung ara somoklemak nang Imik Neyung unggulumla! Nimi nidya' ara, Imik Neyung ak dara, embenga' ulumaka' anasa, Imik Neyung ara embenga' ulumak nim edya' Imik Neyung ek ulumla," hyok. 20:39 Hnon yuba neksin nang edya Yesus ak, "Neklesilimnya o, anja leblama' ara hyak dib nonga leblam," hyek. 20:40 Anasa sikda ono' hnon saaboka Yesus ak yoka'-yoka' heina' ara lomek. 20:41 Dara Yesus adya sikenek, "Kristus, nimi blebsina' dubnya bera, Daud nang yila' ak ab lanawanamla amoka' ara hurub so ak lemok do? 20:42 Wera ono' Daud bedya' anaba Mazmur yub ek alja dara lebokja, Wenelesilnya bedya nadya' wenelenelnya bek leboka' ara, anda nadya' sirikek ok buklom, 20:43 anya anja' isa' nang era, nadya anak an anyek ok bo elegel dal yanamak, wenyamok. 20:44 Anasa Daud benyek babya blebsina' dubnya bek ara, nadya Wenelenelemnya, amok bok dara, wera heka' adya blebsina' dubnya bera Daud nang yila' senewanasibya do?" hyok. 20:45 Nimi nauba ara, Yesus adya wenyaro lelemok yuba anam kelemek salek, Yesus ara alja yuba doro diriga ban nang ek, 20:46 "Ugunda Yahudi yuba neksin nang ek ara, pe keeboka ulululum. Sikda waren-waren akleng enyek ongo-ongo bilimnekanya, dekna' gasa' pik ab salya' seklemeibya enyek, yok nim edya giblesinok senelemak. Hnonda Yahudi nim edya yuba don ek gom, dena' senenggoma' youboka delemna' ak ara, hyak laga peroba' nong ok bulunob senen ganya bolomak nang ek, anara ulumak. 20:47 Sikda you gelewa ek sonda' leiyiboka, bona' nidya' ara doldolosak, anya sikda pika irigildana' diba' ara, Imik Neyung ak mololdalamak dara, hyak waren nonga' anyek mololdalamak! Ban nang era hyak nauba igina kweboka gweklemnemak!" hyok.
21:1 Dara, Yesus hogung eiriyiboka keemok enyek, Imik Neyung ek ab dub nang edya, rupiah Imik Neyung amba aboka doronglemeka' ak eibsuk. 21:2 Dara ono' bona' garan yougel gek hnon, mek girik rupiah penya ok doronggomoka' ak eibuk. 21:3 Anasa Yesus adya leboka' ara, "Ugunuk dib lebsin. Nimi yok nanga nidya' ara, mek so doronggomak bok, ban gel genyek danyek hyak nauba doronggamla. 21:4 Anasa nimi nauba, sikjinya nauba ulumla' ak ab bok loboka darasam doronggak bok, ban gel genera alda bona' garan gel bok, al dena' denesonya nenyek babya, hyak nidya' gobdo elegamla," hyok. 21:5 Hnon nang era, Imik Neyung e anyek perob lagasa girik edya denewoka son damba hnon, Imik Neyung amba beillilemek bona' edya denewoka son danyek pewek aboka, sikda yuba salamek. Danyek Yesus adya sikenek lebsuka' ara, 21:6 "Ugunda banyan eibluma' denewoka sorob girik danara, eimik era hnonok sibin anaba anyagan go' denewoka ubdabnenggunumla salek hnon yanamla," hyok. 21:7 Dara anyagan nang edya Yesus ak, "Neklesilimnya o, ban nidya' wenyalalama' ara hwer salek ek unuwanamla do? Ban unuwanamlya' amba dara, hek bekna' ek men unuwanamla salek aboka laga ubnamla do?" aboka heibek. 21:8 Anasa Yesus adya dara, "Ugunuk bobnenewoka sonda' amba nauba malya ubsijek anasa, keeboka ulululum. Nimi nauba eimik era, nadya si sibuka yeijikanya, Alda nara an yan! anya, Wera soko dengan salek era seleb oka dal, henesak bok, ugunda dib senewoka dilina' ara hyak mem. 21:9 Ugunja nimi doluwoka nauba oldalamak an yuba kebnelum dara, ugunda lok ganya bona' ara mem. Ban nidya' ara men unuwanamla. Bok wera nera soko sidya' daknamla salek era anyek unuwanamla bok, nenyek sidya'anya goma'," hyok. 21:10 Dara ono' Yesus ara lebokja, "Yok mok soko nim edya, ono' yok soko nim eb, mala weboka obdanamak dara, yok senenggom dubnya bedya, ono' yok senenggom dubnya beb, mala boboka obdanarak. 21:11 Mok soko me nidya' senenggom sogouma' dorogoka, senenggom gwaneng oka' lanawoka, senenggom neikna' damok lanawanamla. Imik sam ara hyak malya' nonga' lok so ab okna maka dangalamla' ab laga danamla." 21:12 "Bok ban nidya' anam unuwanggumlya salek era, yok nang edya ugunuk heng gouboka saboka obnesak. Ugunda Yahudi nim edya yuba don e pik ab hnon, henga gouboka yana lelewanasaakanya, henga gouboka gasa ek hnon doronggoka beibnesak. Ugunda nadya yuba dona' nimi diba' ululuma' anasa leboka, ugunuk mok soko dub nang eb yok-yok senenggom nang edya' saramek henga geregoka bol giriklemnesak. 21:13 Ban unuwanamla salek enyek, ugunda Imik Neyung adya' perob lero yanggan yuba sikenek leb eleganaluma wera an danamla an. 21:14 Ugunda mala dobdangoka blebdanamna amba dara, anyek-anyek yuba sabnamna senewoka ganya daldom-daldom henggunumna senewoka orowek ganya hwiblulum. 21:15 Ugunja' isa' nang edya, ugunuk malya nenewoka obneboka, ugunja lebnemun yub era sonda' amba lebak senen dalyek aboka, nadya ugunuk sabnemun yub eb, ella dangan geremseng eb eleganesin. 21:16 Ugunuk ara, ugunja' genonga neyung adya hnon, ugunja weisab edya hnon, ugunja' meneng ek nim edya hnon, ugunja' hem yab edya hnon, obsululum aboka yuba dil binisak. Ugun nong ara hnonda sikja obnesak. 21:17 Ugunda nadya yuba dona' nang diba' ulumuna' anasa leboka, nimi nidya' ugunuk lek senelemnesak. 21:18 Bok ban unuwanasaka' anaba, ugunja hong doka hnonok sibin anaba meka' gwenewoka denghenggunumla. 21:19 Ugunda ganya kaboka siklewoka ulumuna' adya, wera ugunja nong una' blebdanalum," hyok. 21:20 "Yerusalem heik anyek, yin bona' nang we waraganamaka' eibnelum dara, wera heik era doluwoka obnemeija' adya ubnamla. 21:21-22 Imik Neyung yuba bukuk sam momnya doboka' nidya' ara, gigiwolula' aboka, ban salek dara, malya una' dekna' lunuwoka obnesil sum ek anasa, ban unuwanamak sum era, Yudea mok ulumeija nim era, meinik doknel binok. Nauba heikek sam ulumeija nim era, heik enyek an ara loboka yok ak binok. Alda beiyek ulumnemak nim era, ek sam saaboka yanggana' ara mem. 21:23 Ban sum era, nimi gela me bomlya gel geb, me moma dinilyamlya gel geb dara, hyak nauba igina ubnesil. Imik Neyung adya yu ganya bolomlakanya, ban soko enera nauba obnesila' anasa, yoka'-yoka' malya danamlakanya, hyak lok so danamla. 21:24 Nim ara hnonda yin adya hyaka' obnesak, hnon nim era, henga geregoka yok sokok sam bo binisak. Yahudi gom nim edya Yerusalem heik ara, yan ingib sabdibigimeija ara, Imik Neyung adya unubdaknamak amlya sum era, gigiwanamla," hyok. 21:25 "Eimik era, heng ek, wala' ak, gura' ak dara, yok so ubnamla. Sokok anara, nimi soko nimi nidya' soko eilim-eilim aboka mek una uu aboka obnebnesil. 21:26 Imik sam ulumla' duka nidya' migib ara soro-warab abmenegoka ubnamla' anasa, nimi hnon sokok anyagan unuwanamla' nidya' ak hyak lok anasa somok lobnemak. 21:27 Ban unuwanamla sum enyek, nimi diba' me ara imik sam deba' gangganek pik, alja migib eb, senenggom nong senedya' ab dadya, uboka yanamla. 21:28 Ban nenyek nidya' unul yabalya' eibmun dara, ugunda mek anam blebnesil ak anasa, ugunda sekoka hogunga eiriyiwanalum," hyok. 21:29 Dara ono' Yesus ara ban sununa' enyek sikenek sunuwoka lebsuka' ara, "Ugunda ara gal ab yok gal nidya' ab danyek, pe kendululum. 21:30 Mekla' urubya anyek burul yabana' eibna dara, lelelumja, wera doka moubnamla li yenewanamla alalum. 21:31 Anasonya neikek, yoka'-yoka' nidya' anyek lanawanamla' eibnelum dara, wera Imik Neyung adya wenelemnesil salek era, wera yanabla senewanalum. 21:32 Ugunda pe ella danalum! Ban wene salek nimi nidya' ara, somoganggumeija salek ara unuwanamla. 21:33 Im ab soko ab dara, denghenelabok, nadya yub era sob-soba' or ulmoublemnamla," hyok. 21:34 "Ugunda nimi diba' me yanamla sum era, ugunda masa nauba youboka deregoka, serema salalesil meka salya' deregoka, sumen yanamla' ara ugunda elgom anasa, ugunuk nong una' enesa ganya seiniro ulumunukanya, wene salek yalyek anasa, pe kemero uldalalulum. 21:35 Ban sum era, nimi soko nanga nidya' ak henga weboka youbnesina' anaso' ak gelelenga yanamla. 21:36 Ugunda yoka'-yoka' eimik nimi diba' me yanamla sum unuwanamla' ak ab goboka binoba' aboka hnon, nimi dibna' me saramek seknoba' aboka hnon, wenyek heng uboka molowoka pe diri uldalalulum," hyok. 21:37 Yesus ara yubyek era, Imik Neyung ek sam yuba lel eleklesina' ara, inimnek era, Zaitun meinik heikek sam anyagan mabnuna' aboka balamok. 21:38 Dara lika nidya' sum seleb gwelegan dara, nimi nauba Yesus adya neklesuk yub enyek kelenoba' aboka yalamek.
22:1 Bikna' orok roti gwanenga meewoka den sum, anya memab on sum alamek sum era seleb oka dok. 22:2 Yahudi yuba wa gaka' dub nang eb, yuba neksin nang eb dara, nimi yok nang enyek lok anasa, sikda Yesus ak geleleng aboka obnemab senewoka pik elemek. 22:3 Wera Satan ara Yudas yok si nera Iskariot alameknya, Yesus adya alja yuba doro diriga bannya bek wekel yok. 22:4 Anasa wera Yudas bera alda biniboka yuba wa gaka' dub nang eb, Imik Neyung e bo diri ulumek nang eb, Yesus ara heka' huboka obnelum aboka yuba dil binimok yuba saboka sunuwanoba' aboka byuk. 22:5 Dara sikda nidya' ara hyak ganya eiya daboka, wera rupiah nauba eleganenjab aboka lebgogowek. 22:6 Wera Yudas beneba or yo aboka, nimi yok nang nauba unggulumeija wenyek, doboka elegonuna' aboka maka meibdo yabalamok. 22:7 Memab ona' amba bekoka bikna' orok roti gwanenga den sum, anya domba pama hnon oboka delemek sum era seleb yenewok. 22:8 Anasa Yesus ara, "Dena' meewoka youboka beil binisurum," aboka Petrus beb Yohanes beb dak orugosuk. 22:9 Wenyek sikja dara, "Neyung anja dara, hanyagar sam meewoka ubnerak senelam do?" aboka heibdek. 22:10 Dara Yesus adya sikenek, "Ugunda nauba heikek burumun dara, nengmabo ben hnon meka gweboka bo yabelenya benyek eibdanalum. Anya ben wekel balya ek an benyeb ugumba neika' weknelum. 22:11 Dara e damnya bek ara lebnerumja, Neklesilnya bedya dara, Hanyagarek nab, nadya yuba doro diriga ban nang eb dara, memab ona' sum bekna' bekoka denemab do? amla, henerum. 22:12 Danyek e damnya bedya ugunuk imik ekla ek sam yoka'-yoka' bona' beilina' orowek sunuwoka beiyemeija' nauba ekla enyek lebnesil. Dara anyagan dena' nidya' ara meewoka beibnesurum," hyok. 22:13 Wera Petrus beb Yohanes beb dara, balarek enyek nidya' Yesus adya sikenek lesuk soka' ak eibdek. Dara memab ona' bekna' dena' era nidya' ekla enyek an meewoka beibdek. 22:14 Wera den salek oka dok dara, Yesus ara alja yuba doro diriga ban nang eb neika' denoba' aboka, ekla ek buk ganagek. 22:15 Dara Yesus adya sikenek, "Nara anam igin yaka' kweboka gweknenggumna salek, ugunub neika' memab ona' amba bekna' dena' neika' denemab senemna' anasa, perob. 22:16 Anasa ugunuk banyek dib lebsin. Nara ban dena' enera denggulumnya' ara moruwoka, Imik Neyung adya wenesin heikek sam gigiwanamla sum ek," hyok. 22:17 Ban nen wenyabgogowok dara, Yesus ara alda mek hmeiya doboka Imik Neyung ak perob aboka giboka molowok dara, delemek nang ek lebokja, "Ugunda banyek dobmunukanya, bokdangoka denelum e. 22:18 Anasa ugumba ella danalum, ban mek enera nara ugunub neika' denggulumeibya' moruwoka Imik Neyung adya wenesina' sum danamla," hyok. 22:19 Seleb dara Yesus ara roti gwaneng doboka, Imik Neyung ak perob aboka giboka molobgogowok dara, roti gwaneng neika' delemek nang ek soboka elekgogowosuk dara, lebokja, "Nadya nong ugunsamba doboka elegeisina' ara an. Ugumba ban unu delemneluma' adya nak beklemnenulum." 22:20 Anaso neikek seleb debgogowek dara, meka gweboka beiyimoka' ara neika' delemek nang sikenek lebokja, "Ban mek enedya wenyok unuwanamna ana' era pik mouruna' diba' yarawal. Nadya eneng edya, mek eneng enera ugunsamba leboka yeksin," hyok. 22:21 "Bok ugunda kendululum! Nak obnelum aboka yuba dil bilinelnya bera nab neika' ulunam! 22:22 Nimi diba' me nera, Imik Neyung adya orowek lebok sok gigiwoka somoganamla bok, yuba dil bililenya be nong ak hnonok hyak omom nonga' ak ulumnamla!" hyok. 22:23 Dara anyagan Yesus ab neika' delemek nang edya sik moumen heknedya unuwanamla' ak lelemla do senewoka heibdangdo balamek. 22:24 Yesus adya alja yuba doro diriga ban nang edya dara, sik gangganek ara heknyek eimik era, nunja dubnya ulumnesil aboka waldana' lanawok. 22:25 Danyek Yesus adya sikenek, "Nimi mok soko dub nang era, Imik Neyung elgom ulumak dara, sikja mok soko nim ek malya' nenelemak; alda sikja unuwolulum alamna yuba keboka unulumak nang era, Nimi Bo Usin Nang alamak. 22:26 Bok ugunuk dara, anaso ununa' ara hyak mem. Alda ugunda ban nenyek unulululum, alda wenyek ugun gangganek sam senenggom nanga dangoka ulumak nang era, mek sirika' anaso dangoka ulunok; alda wen nauba dangoka ulumak nang era, wa orukna' nang eneso ulunok. 22:27 Ban penya nang danara, har berek senenggomnya ulumla do? Yangamna gal ak sam bukoka delelanya benyek gom, alda alak denemla bar aboka masa beib arawoka ululanya benyek naubenya ulumla gom? Yangamna gal ak sam bukoka delelanya benyek senelemak bok, nak dara, masa beib arawoka ululanya beneso ulumna," hyok. 22:28 "Nak yoka'-yoka' igina kwelenela' hnoum ara, ugunuk danyek soba' nab neika' ulumab. 22:29 Nadya' neyung bedya nak yok nang ek orugoka wenesin migib eleganyok sok, ono' nadya dara, migib era ugunuk elegeisin. 22:30 Anedya wera, nara mok soko dubnya danamna sum era, ugunda nablaboka neika' ganya eiya daboka ulumnemab. Anya ugunda obadya senenggom nang ekla buna' ak bukoka, ono' obadya nang nimi yila' yana lelemnesulum," hyok. 22:31 "Simon o, Simon o, anda nak kebnelom! Gandum glaka' gwereklemak dara, anadya perobnya nera laga nenewoka malyinya nera lobnoba' aboka ulumak sok, Satan bedya ugunuk sene sunuwosununa' aboka galaweisil. 22:32 Simon o, anja dib senewoka ganya oloklelama' anyek, goowoka denghegelyek aboka, nara ansamba heng uboka mololenggen. Anya anda nak saaboka yanalama' seleb dara, anja weisab enyek sikja ganya migiba geb eleganesilim," hyok. 22:33 Danyek Petrus bedya Yesus ak, "Wenelesilimnya o, nara gasa ek henga geregoka doronggeinijekanya, anablaboka neika' obnesaka' anaba, or unuwanasak," hyok. 22:34 Anasa Yesus adya Petrus bek, "Petrus o, anda banyek dib senewanalam, sumen eneso' anyek wining yuba anam sabnenggumlya salek, anda nak lika winilya sonda' amba bobnenewoka nara bera elgomnya henenelem," hyok. 22:35 Wenyabgogowok dara, ono' hnon sikenek, "Nara yuba lel binilum aboka bokosisa sum era, nadya rupiah bona' ab, akleng gom, yan ongona' gom, bo banggom asisa dara, ugunuk ara yoka'-yoka' hnon, or bukulum de?" aboka heibsuk. Sikja dara, "Orok, neyung hnon unuwanggumouba," hyek. 22:36 Dara Yesus adya, "Bok wenyek dara, heknedya rupiah bona' gom, akleng gom ubnamla dara, bobnamla. Heknedya mala oroknya bera alja ongon akleng anyek mala deknuna' aboka rupiah dekoka dobnamla. 22:37 Anasa ugunuk dib lebsin, Imik Neyung yuba lero momnya dobokja, Alda malya una'anya beneso nenewek hyoknya nera, nak an nidya' gigiwoka unuwanamla. Anasa Imik Neyung yuba bukuk sam nasamba geklewoka momnya doboka' ara, wera an seleb gigiwoka unul yibel an," hyok. 22:38 Yesus adya yuba doro diriga ban nang edya alak, "Wenelesilimnya o, anyagan ara mala penya ulumla' banyek, kendelom," hyek. Bok Yesus adya dara, "Or maly e, seleb," hyok. 22:39 Yesus ara Yerusalem heikek ara, loboka yok sum Zaitun meinik balamok sok, alja yuba doro diriga ban nang eneba neika' byik. 22:40 Sikda Zaitun meinik sam seleb byik dara, Yesus adya sikenek, "Ugunuk sunuwanasilikanya, ugunda malya una' lomok malyinggumunuk aboka, mololdalalulum," hyok. 22:41 Dara ono' alda mok so girika nakna ek balamla sok so ak byuk. Anya koma lumugoka henga uboka mololemok. 22:42 Alja Imik Neyung ak ara, "Neyung o, or dara, nak an nauba igina kweboka gweklamna' anyek mok nenewalom. Bok nadya senenenya nek gom, alda anja unuwanamna senemenya nenyek or unuwanelom," aboka mololemok. 22:43 Dara, Imik Neyung lero ben hnon yeiniboka, alak ganya akwa' dimok. 22:44 Yesus ara alda ganya ak nauba igina berewoka gweklemoka' anasa, alda hyak ganya dib beiliwoka nauba Imik Neyung ak mololomok. Dara hwin ara eneng anaso' anyek sokok sam debom-deboma belega yanggalamok. 22:45 Seleb heng uboka molobgogowok dara, Yesus ara alja yuba doro diriga ban nang ek saaboka yok. Yeiniboka kemelesuk enyek, sikda ganya suguwoka angwei senen ganya bomeka' anasa, salya' hogunga mameka' ak eibsuk. 22:46 Anasa Yesus adya sikenek, "Wei ugunda hekasa malalum do? Ugunuk yoka' migib adya sunubyamadesilyek aboka, ugunda bukoka mololelulum," hyok. 22:47 Yesus ara wenyaboka anam yuba salamok sab-sab, nimi buma hnon lobmekja oka yek. Yesus yuba doro diriga bannya, Yudas bedya huka bosuk nang ek yek. Dara ono' Yudas bera Yesus ak oka biniboka u meka hmobnuna' aboka ul yabok. 22:48 Bok Yesus adya Yudas bek, "Yudas o, ban unu meka hmoubnelama' adya, wera anda nimi diba' me nek doboka elegalem de?" aboka heibuk. 22:49 Wera Yesus adya yuba doro diriga ban nang era, heka' hubnamla' anyek seleb ella ubek dara, sikja Yesus ak, "Wenelesilimnya o, nunda ban nang enyeb parang gab adya weboka obdanamab de?" hyek. 22:50 Wenyaboka ben hnonja Imik Neyung yuba wa gaka' dubnya bek arana'anya ben hnon yeilimoka' anyek, parang adya o mekla' garawoka obok enyek, benedya o mekla' era leboka denghyok. 22:51 Bok Yesus adya, "Seleb e," aboka ono' onsok soruka salawoka o mekla' era dirigoka hwebok. 22:52 Dara ono' Yesus ara, yuba wa gaka' dub nang eb, Imik Neyung gibna' e bo diri ulumek nang eb, Yahudi dub nang alak henga goubnoba' aboka yeilimek nang ek, "Ugunja dara, nara hoka' doboka nim ololanya senenulumukanya, henga goubnenoba' aboka, mal diba' gab ab, dolukna' gama' ab bo yeililum de? 22:53 Lika soba' nara ugunub neika' Imik Neyung ek sam ulumouba bok, ugunda nak ara henga goubnenggunulum. Bok, guna' migib anyek hyak peroba' dangoka yeiriwanamla sum geknewala' ara wera ugunda an unul yabalum," hyok. 25-27) 22:54 Wera sikda Yesus ak seleb henga gouboka bobek dara, Imik Neyung yuba wa gaka' dubnya bedya ek bo byik. Bok Petrus bera eimik dobgiga mok so balamok. 22:55 Dara e nenyek an heik gasa' ak sam ara, hnoumung nong uka daboka lomek dara, anyagan ara nimi nauba aknewoka bul ganaklemek dara, Petrus beneba nimi hnoum biniboka neika' bulumek. 22:56 Gela hnon orukna' wa welemok gel gedya kemelemok enyek, Petrus bera anyagan biniboka bulumoka' ak eibuk dara, gel genedya Petrus bek hyak pe keeboka, alja leboka' ara, "Ban beneba Yesus ab neika' ulumaknya bera an!" hyok. 22:57 Bok Petrus bera sonda' amba bobnenewoka, alja dara, "Nara orok, benera nab elgomnya bek lelenulum!" hyok. 22:58 Dara ono' mandena' loboka, yoknya bedya Petrus bek eiyiboka lebokja, "Anda sikenek neika' ululumnya ben goma!" hyok. Bok Petrus bedya dara, "Orok, nera na goma!" hyok. 22:59 Dara ono' ousa so dara, nimi ben hnon hyak laga poboka, Petrus bek, "Alda Galilea mok ebnya bek anasa, albabya Yesus adya yuba doro diriga balalanya bera an!" hyok. 22:60 Bok Petrus bedya dara sonda' amba bobnenewoka, "Ugunda hek yub ek lelelum, nara elgom bar!" hyok. Wenyaboka bobnenewoka anam yuba salamok salek enyek, wining yuba ngoubuk. 22:61 Yesus anaba dangawoka Petrus bek keebdabok. Danyek Petrus bera, Wenelesilnya bedya men danyek alak, "Sumen wining yub anam lebnenggumlya salek nak sonda' amba lika winilya bobnenewoka lebnenelem," amoka' anyek seiniwok. 22:62 Dara Petrus bera heikek goboka yibiniboka nauba goukdik-goukdika engel byuk. 22:63 Dara Yesus ak henga geregemek nang edya, alak nauba loba' nenewoka saboka olomek. 22:64 Sikda Yesus ak henga lebsalawoka, "Wera heknedya olonggel do? Benedya olonelem aboka laga leblom," aboka lelemek. 22:65 Dara yuba dem adya' anaba hyak nauba saboka derewoka waboka lelemek. 22:66 Ampum maboka gwelegok dara, Yahudi dub nang eb, Imik Neyung yuba wa gaka' dub nang eb, yuba neksin nang eb, longowoka yuba sabek dara, Yesus ak doboka bobek dara, yana lelesin ek sam bo byik. 22:67 Wera seleb bo byik dara, sikja Yesus ak, "Anda aldib nimi blebsina' dubnya ulumen dara, laga lebsilom," hyek. Danyek Yesus adya sikenek, "Nara ugunuk aldib ulumna aboka neksinya' anaba, ugunda dib senewounululuma' goma'. 22:68 Hnonda nadya ugunuk heibsinya' anaba, ugunja dara, nak saaboka yuba sab eleganggununululuma'. 22:69 Bok wenyek ab moruwoka, nimi diba' me nera Imik Neyung hyak migiba' imik sam ululanya bedya' sirikek sam buknamla," hyok. 22:70 Dara nimi nidya' wekemek nim edya, "Anda wenyhelema' anasa, wera anda aldib Imik Neyung bedya me ululam de?" hyek. Yesus adya sikenek, "Alan ugunja lelum an," hyok. 22:71 Dara sikja, "Wera alja sibama' nonga adya laga lebdala' kebab bok anasa, yok nim edya laga lebsija enyek senena' ara mem," hyek.
23:1 Yesus ak henga gouboka bo biniboka wekemek nang era, nidya' sekoka Yesus ak doboka sikda dubnya Pilatus bek bo byik. 23:2 Bo biniboka wera sonda' amba miniwoka Yesus ara unulamla-unulamla aboka yana kiboka lelemek. Anya sikja dara, "Ban benera nunda Yahudi nimi sokok an malya nenelesila' ak eillilemabnya bera an," alamek. Alak danyek, "Nara Kristus dubnya ulumna,' alamlakanya, Kaisar dubnya bek ara ugunja dara, rupiah elekna' ara mem, aboka yuba seklamla," aboka lelemek. 23:3 Dara Pilatus bedya Yesus ak, "Anda aldib Yahudi nim edya sikja dubnya ululam de?" aboka heibuk. Danyek Yesus adya, "Alan anja lelam an," hyok. 23:4 Dara Pilatus bedya yuba wa gaka' dub nang eb nimi nauba longol yeilimek nang ebdak, "Alak henga geregoka obnesenga' nong malya una' enyek dib unulamla' ara, nadya dara meka' eibnenggubna," hyok. 23:5 Bok nimi nauba hyak duka' lolowoka lelemekja, "Alja neklesil yub edya, nimi nauba Yudea sam malya nenero yousuk, men dara Galilea mok eb einimoka' ara, wera nunja' ak an lero unulusila' an," aboka lelemek. 23:6 Pilatus bedya ban wenyan yub enyek kebok dara, "Ban benera Galilea nang de?" aboka heibsuk. 23:7 Dara, Yesus ara aldib Herodes dubnya ulumla mok ebnya an yuba kebok dara, Pilatus bedya Yesus ara, Herodes bek ban salek era Yerusalem heikek ulumoka' ak bo bululum aboka orugosuk. 23:8 Herodes bera orowek Yesus adya yoka'-yoka' lok so bekna' nauba unululamnya aboka lelemeka' anyek keboka, hnonda al nong ak ok okoka eibsinya senelemok bok adya, wera Yesus anyek alak bo yek dara, hyak eiya dabok. Anya Herodes bedya dara, Yesus ara alda lok so' hnon laga unuwanamla senemok. 23:9 Anasa Herodes bedya Yesus ak ara, yoka'-yoka' nauba heilimok bok, Yesus ara hyaka' meka' yuba doro sabnenggumok. 23:10 Dara ono' yuba wa gaka' dub nang eb, yuba neksin nang eb dara, sikba anyagan yeiniboka Yesus ak malya unulamla aboka yana kiboka nauba lelemek. 23:11 Dara, Herodes beb, alja yin bona' dub nang eb dadya, Yesus ak hyak nauba eirigala nenewoka malya uboka saboka oboka, nauba derewoka walameka' ara, sene dub nang akleng ongiyiwok dara, ono' Pilatus dubnya bek onsok saaboka bo bulululum aboka orugusuk. 23:12 Dara al ban sum nong enyek, Herodes beb Pilatus beb, isa' nenebdangoka ulureka' ara, neika' ek nang dangoka hibdek. 23:13 Pilatus bera yuba wa gaka' dub nang eb, yuba neksin nang eb dem salya' nim eb mamagiyiwosuk. 23:14 Dara sikenek lebsuka' ara, "Ugunda ban benyek nak bo yeiniboka, alda hyak nimi nauba malya nenelesil hunulum. Wera nadya alja' hogung ab yana lelewan bok, ugunja alda anaso-anaso malya una' unulamla aboka yana kilumnya nera meka' eibnenggubna. 23:15 Anasonya neikek Herodes beneba anaso' hnon eibnenggubla' anasa, Yesus ara ono' nak an saaboka bo bululum aboka wenyhesil. Ban benera alak sang oboka dibneseng malya una' era hnon unuwanggubuk. 23:16 Anasa wera, nadya legebna' adya deboka obgogowanya dara, henga lob lobnamna," hyok. 23:17 (Pilatus bera alda soba' ban perob sum yenewan dara, nimi henga geregenanya bera hnon dem nim emba lobol lolosuk.) 23:18 Ban leboka' kebek dara, nimi nauba anyagan longol bilimek nim edya bii aboka lelemekja, "Bera hyaka' obnok! Alda Barabas benyek nunsamba henga lob lobsilom!" alamek. 23:19 (Barabas bera henga geregemeka' ara nauba heikek doluwoka malya uboka, nimi hnon omoka' anasa henga geregemek.) 23:20 Pilatus bera Yesus anyek henga lobsinya senen ganya bomoka' anasa, alda nimi nauba longomek nang ek saaboka yuba sal eleklesuk. 23:21 Bok nimi longomek nim edya, "Bera oboka gal ak glabnok! Bera oboka gal ak glabnok," alamek. 23:22 Dara ono' Pilatus bera winilinya sum sikenek bii aboka lebokja, "Bok alja dara, hek malya una' ek ubuk do? Alak okoka ban malya una' enesemba oboka dibnesengnya nera, nara kemenaba hyaka' meka' anaba eibnenggumna bar! Alda legebna' adya ok deboka obnya dara, henga lob lobnamna," aboka lelemok. 23:23 Bok nimi nauba longomek nim edya hyak yeiriwoka alda oboka gal ak glabnoka' aboka, nauba lelemeka' adya, wera sikja wenyalameknya nedya sikda migiba dok. 23:24 Wera nimi longomek nang edya lelemek yuba sunuwoka gigiwoka, Pilatus bera Yesus ak or oboka gal ak glabnelum aboka lebsuukanya, 23:25 sikja nunsamba henga lobnesilim alameknya, malya uboka nim omoka' anasa henga geregemeknya benyek, wera siksamba heng lobsuk. Anya wera, Yesus ak ugunja unuwanamab senemunya nera or unulululum aboka doboka elegosuk. 23:26 Dara anyagan longol yeilimek nang edya Yesus ara doboka bo gobek. Pikek anam bo beekanya, nimi ben hnon alja si Simon Kirene mok ebnya bek alda anam heikek yanggok bok, soruka salawoka Yesus oboka glabnemek gal era, anja Yesus balya pik bo binilam aboka orugoka boyiwek. 23:27 Nimi nauba Yesus bo balameka' weilik ara diriga ban dara, ana gangganek ara hnonda gelewa ak balamek. Gelewa dara, Yesus amba nauba ngeboka engebgiga balamek. 23:28 Bok Yesus adya sikenek keeboka lebsuka' ara, "Wei, ugunda Yerusalem gelewa o! Ugunda nasamba engenena' ara mem. Alda ugun nong ab ugunja mab emba danyek engeldalalulum. 23:29 Me bona' orok gelewa eb, me hnon yak dangana' orok gelewa eb, me hnon mouma dinina' orok gelewa eb danyek, pelemak, henemak salek hnon yanalabok anasa, ugunsamba engeldalalulum! 23:30 Ban salek nimi nauba ara, nauba mein ak lebnemakja, Wera anda dakoka lendeweisilom! Mek mein ak anaba, nuk joboka lendeweisilom! henemak. 23:31 Anasa wera, embenga' ulumla gal ak anyek babya nim adya anaso unuwanamak dara, wera orowek oula' olomla gal ek ara, eimik era heka' hubnemak do?" hyok. 23:32 Ono' nimi penya nang, sikda nidya' penya nang seik malya ureka' anasa, Yesus ab neika' oboka gal ak glabnemab aboka bo bilisik. 23:33 Wera, Nim Huk Yanggol Mein alamek meinik sam bo bisik dara, Yesus ab penya malya urek nang eb dara, ben hnonda sirik ek sam, ben hnonda waneng ek sam, Yesus ara hnoumung unuwoka oboka gal ak glabsik. 23:34 Dara Yesus ara lero mololomokja, "Neyung o, ban nang enedya unulumaka' ara, damok ara elgomjok ulumaka' anasa, sikja malya una' era sikenek ab memelesilom," hyok. Yesus adya ongolomok akleng era, heknedya dobnamla aboka, yina bomdewoka bokol dalamek. 23:35 Yahudi dub nang edya Yesus ak geklewoka derewoka walamek dara, anyagan seklemek nang era, ngolukdo seklemek. Walamek nang edya dara, "Alda Kristus, nimi bleblula' aboka, Imik Neyung adya aldib weboka domlya dara, yok nang ek seleb alja bleblesuk bok dara, wera al damnya saaboka blebdolul!" aboka lelemek. 23:36 Yin bona' nang edya' anaba Yesus ak geklewoka derewoka walamek. Dara yu mek enyek Yesus ak gweboka diniwoka lelemekja, 23:37 "Anda aldib Yahudi nang dubnya ulumen bok dara, wera an damnya saaboka blebdalom!" aboka lelemek. 23:38 Yesus oboka glamek gal dubuk ara, lero momnya domekja, "Yahudi nang mok soko dubnya bera an e!" aro domek. 23:39 Dara ono' dib malya umoka' anasa, Yesus ab neika' oboka glasiknya waneng ek samnya bedya Yesus ak, "Anda nimi blebsina' dubnya unggululam de? Wei, nun hnon an dam nang hnon blebsilom!" aboka lelemok. 23:40 Bok ono' sirik ek sam alja hem be neika' oboka glasiknya bedya wenyana' mem aboka, "Anda Imik Neyung ak ara, lok ubnenggunggel de? Amba nunda neika' seleb alab oboka gal ak glabasak. 23:41 Alda nuk dara, aldib nunja okoka malya ubnuma' amba sunuwoka usak. Bok alak dara, hyak malya una' orok bok, oboka gal ak glabamak!" hyok. 23:42 Dara ono' benedya Yesus ak, "Yesus o, anda eimik dubnya dangoka yanggamena dara, nak pe seiniwoka bekmoubnenelem!" hyok. 23:43 Danyek Yesus adya benyek, "Anak dib lebgen. Anda al sumen eneba, neika' nab anab Firdaus heikek ulunam," hyok. 23:44 Yubyek dukdukanek nonga wenyek henga dingina' loboka gunugomok. Soko heika nidya' ara guna' ok dangoka inimoka' moruwoka sinik anaso dok. 23:45 Yerusalem heikek Imik Neyung e lomok sam wekna' pikek goluwoka wiknelemek boksom era, gweldegoka penya nenewok. 23:46 Danyek Yesus ara senenggoma' ngeboka lebnemoka', "Neyung o! Anja' soruk lomok sam nadya' embenga' una' ganya era, elekdan!" hyok. Seleb wenyabgogowok dara, alda somogok. 23:47 Anyagan yin bona' dubnya bera ban nidya' unuwoka' anyek, okoka eibuukanya, alda Imik Neyung ak perob aboka giboka lebokja, "Aldib, alda hyak pelelanya bek ulumla!" hyok. 23:48 Nimi nauba Yesus oboka gal ak glablemeka' anasa, ngolugel yeilimek nim era, ban nidya' unulumoka' ara okoka eibek. Anasa sikda nidya' nonga boukoka obdangdo engebgiga e pik byik. 23:49 Nimi nidya' Yesus ak eiyiboka ella ulumek nim era, Galilea mok eba' Yesus ab neika' ulumek gelewa eb dara, mok so seklemeekanya, nidya' unulumoka' ara gobdo kemelemek. 23:50-51 Yudea sokok ab Arematea heikek abnya nimi si Yusuf be hnon ulumok. Alda perobnyekanya, Imik Neyung ak pe unuwoka, Imik Neyung dubnya uboka wenelemnesilya sum eibnuna' aboka diri ulumok dara, nimi nidya' adya' anaba alak perob senelemek. Al nong ak yana lelesin wa welemak nang dangoka ulumok bok, yana lelesin nang edya unuwanamab aboka, unulumeknya nera, alda lek senelemok. 23:52 Yusuf bera Pilatus bek biniboka, Yesus ara be' dakoka dibnamna' anasa nak lebnelom aboka molol byuk. 23:53 Dara alda Yesus diyimeka' ak ab be' dakdo boblenggoka, boksom adya Yesus nonga waaboka kebok. Unuwok dara, Yesus nong ara, girik lomok nimi hnon meka' angawoka dibnenggumek girik lomok dibuk. 23:54 Ban unuwok sum era, lam sum ek unuwok, anya Sabat mem sum alamek sum era oka dok. 23:55 Galilea mok eba' ara, Yesus ab neika' yeilimek gelewa dara, dilil yabok dara, neika' biniboka dibek girik lom eneba seleb eibek. Al gelewa dara, Yesus adya be' ara girik ek sam heka' huboka meiyiwoka dibaka' ara seleb okoka eibek. 23:56 Gelewa dara, sikda ek biniboka, Yesus adya' be' galak ngiknoba' aboka, gen-gen song mekla' ab, ngikna' mek ab meewoka beil byik. Sabat mem sum seleb lebek dara, sikja' yuba dolomeka' sunuwoka wa wena' ara or lo pemek.
24:1 Dara minggu en men sum era, hyak luguna' nong enyek, gelewa dara, gen-gen song mekla' ab, ngikna' meka meewoka beiyimeka' ab bobek dara, Yesus diyimek girik damek sam bo byik. 24:2 Yesus diyimeka' ak balamek enyek, diyimek girik era seleb dangawoka demegemoka' ak eibek. 24:3 Wera sikda Yesus diyimek girik dam nong ok sam byik bok, Wenelesilnya Yesus alja be' ara, eibnenggubek. 24:4 Gelewa dara, sikda ganya ebsuka' anasa, anam seiniro seklemek dara, wene salek enyek nimi penya nang geisa akleng ok ongo-ongo bilirek nang enyek sik berem sekdek. 24:5 Wera gelewa dara, hyak lok ganya boboka, hogunga sokok oumuwoka ulumek bok, penya nang danadya sikenek, " Nimi somoklomaka' ak sam ab embenga' suboka bukelanya benyek, ugunda hekasa an elelum do? 24:6 Alda seleb subumlakanya, anyagan unggulumla! Alda Galilea ulumok sum enyek, ugunuk lebsuka' anyek, ugunda pe bekoka seiniwanalum. 24:7 Ara, nimi diba' me nera malya una' nim ek doboka eleganamak dara, alda oboka gal ak glabnemaakanya, lika winilyaba' sum era embenga' suboka buknamla, hyok," herek. 24:8 Danyek wera gelewa dara, Yesus adya men sikenek lesuk yub era seiniwek. 24:9 Wera Yesus dilina' ak ab gelewa dara yeiniboka, Yesus adya' goklombadya yuba doro diriga ban nang eb, yok yuba dolomek nim ek hnon, nidya' sikja eibeka' ara nekdo yek. 24:10 Nidya' unumoka' anyek, Yesus adya yuba doro diriga ban nang ek nekdo yeilimek gelewa dara, Maria Magdalena geb, Yohana geb, Yakobus alja genong Maria geb, ono sikeneb neika' ulumek gelewa dadya, yok nim ek hnon nekdo yek. 24:11 Bok yuba lero ban nang edya dara, gelewa danadya lebek yuba dara, or salya' lelem sonda' amba miniwoka lebak gom senemek. Anya sikda gelewa danadya nekdo yek yub era dib senewanggumek. 24:12 Bok Petrus bera alda Yesus dilina' ak sam yeiriwoka bik-bika kemel byuk. Biniboka geiniwoka lomok sam kemelemok enyek, gouluwoka keboka diyimek boksom ok eibuk. Petrus bera nidya' unumoka' anyek seleb okoka eibuk dara, alda saaboka ganya gong seinibgiga ek sam yok. 24:13 Dara ono' al neik sum enyek, Yesus adya yuba doro diriga ban nanga penya mek heik, si ara Emaus heikek, Yerusalem heikek ab dara, Olsekla uboka Ngeregen heikek anaso, heikek balarek. 24:14 Sikda pikek anam balarek ek ab dara, yoka'-yoka' nidya' seleb unumoka' anyek sabgiga balarek. 24:15 Wera sikda anam wenyaboka ganya aama' ubdangoka unuwo aboka sabgiga balarek salek enyek, Yesus ara sik gangganek sam geleleng yeiniboka neika' balamek. 24:16 Sikda Yesus ak dara, okoka eilin dara eiyirek bok, okoka al nong ella dangan dara, yoka' adya gom ella danggurek. 24:17 Danyek Yesus adya sikenek, "Ugunda heka' yub ak pik enyek anara salarum do?" aboka heibsuk. Sikda hogunga sal-salya' uboka balareka' ara sek lobdek. 24:18 Dara ono' penya nang danara, ben hnonda alja si nera, Kleopas bedya Yesus ak, "Neyung o, anak hnonok wera Yerusalem heikek anara sekel yanggannya benya bek ululama' adya, wene salek yoka'-yoka' unulamla' ara, okoka eilinggululam de?" aboka heibuk. 24:19 Danyek Yesus adya sikenek, "Heka' ak unulamla' ak do?" aboka heibsuk. Wenyek penya nang edya, "Nazaret mok ebnya Yesus ak an unulamla' anyek," herek. "Alda ununumna' lelelanya bek ulumok. Alja yuba sana' gom, alja nong ununa' gom ara hyak senenggom migib edya unulumok. Nera or Imik Neyung adya gom, nim adya' anaba pelemla senelemek. 24:20 Imik Neyung yuba wa gaka' dub nang eb, nunja' Yahudi sokok sam dub nang eb dadya, bera oboka dibnelum aboka doboka elegeisik dara, wera seleb oboka galak glarob! 24:21 Alda nunja dara, alja Israeli sokok nidya' blebnesil senelemouba! Anya wera al orob salek era, sum winilinya sum era dal. 24:22 Anya hnonda, nu gangganek an ulumak gelewa dadya, nunja ganya loba' nenewoka loka dangiyisak. Hyak luguna' nong enyek gelewa dara, Yesus diyiroba' nong ok sam bilibmak. 24:23 Bok Yesus adya be' gal ara eibnenggumak. Dara ono' on pik yeiniboka, 'Nunda lero nanga hnon eiyimab, dara lero nang enedya Yesus ara seleb suboka embenga' bukumla arak,' aro yeilimak. 24:24 Anya nunja' hemyab edya hnon nang era biniboka seleb kemel bilimak bok, Yesus ak dara, aldib eibnenggumak," herek. 24:25 Dara Yesus adya sikenek lebnesuka' ara, "Ugunda hyak dongdang ana' nang ek ulurum! Ununumna' lelemek nang edya ugunuk nidya' lesika' ara, ugunda okoka berra ganya dib senenggulurum nang ek ulurum! 24:26 Kristus, nimi blebsina' dubnya bera, men dara, hyak nauba igina kweboka gweknamlakanya, eimik era alda imik senenggomnya dubnya nenewanamla henggubuk de?" hyok. 24:27 Dara ono' Yesus adya sikenek sam, men danyek Musa bedya hnon, nidya' ununumna' len nang edya alsamba leboka momnya dorob yub enyek lelewoka neksuk. 24:28 Wera balareka' ara heik berem lanal binoma' aboka ubdek. Alda Yesus ak dara or anam bindibiganamna' anaso uyiwosuk, 24:29 bok sikja danyek alak banggom aboka salaleng sok ubdek. Anya sikja alak, "Wera seleb iniwalaganya guna' dala' anasa, anda nunja ek an mabnelam," aboka lebdek. Dara Yesus ara sikja' ek mabnuna' aboka neika' wekek. 24:30 Wera neika' bukoka delemeekanya, Yesus ara gwanenga doboka, Imik Neyung ak perob aboka giboka molowok dara, gwaneng era alja soruk adya soboka, sikenek bokoka elegosuk. 24:31 Danyek sikja dara, anara Yesus ak senewoka ella dangarek. Bok al anam kemel yaberek sab-sab enyek dengaro lobok. 24:32 Dara sik moumen lel dalarekja, "Pikek anam yalmanam dara, nub neika' yuba salmab dara, Imik Neyung yuba bukuk sam ulumla yub enyek, nuk nidya' lelewoka nekelmeisil dara, nunja ganya weldo-weldo sekelmeisila' anano?" herek. 24:33 Dara wenyek sikda sekoka ono' Yerusalem heikek yarek. Wera Yerusalem heikek ara, Yesus yuba doro diriga bana' goklombadya nang era, yok nang eb neika' longomeka' ak eibsirek. 24:34 Dara nang danadya sikenek, "Alda Wenelesilnya bera aldib seleb embenga' suboka bukumla! Alda Simon bek seleb nara embenga' subna aboka laga aabdangamla!" herek. 24:35 Dara ono' wenyok anam yarek yuba dona' nang edya, sik pikek anam balarek salek enyek unusuka' hnon, hnonda sikeneb neika' gwaneng soboka demeka' anyek neksirik. 24:36 Sikda wenyaboka nekoka anam yuba saro balamek sab-sab, Yesus ara sik gangganek sekoka lebokja, "Ganya hekna' ara, ugunuk ulusulul!" hyok. 24:37 Sikja dara, bisa' ak eiyimaba' aboka lok dangoka, loka dabek. 24:38 Bok Yesus adya dara, "Ugunda hekasa ganya eb menegoka, ono' lok ganya bololum do? Hekasa ugunja ganya lomok wili-wale alalum do? 24:39 Na nong anyek an okoka ulumna' anasa ugunda ella dananulum! Ugunda nak an kendunululum. Bisa' ganya ara nong soub ab, yok ab dara unggulumla' anasa, wera na nong ak ulunabok anasa, nadya soruka yana soruka salabyaawoka ubnululum," hyok. 24:40 Yesus ara wenyaboka alja soruk eb yan ab sikenek aawosuk. 24:41 Wera sikda hnon ganya era, anam lok gar-gadya' uboka ei-ei ganya bobeka' adya, anam dib senewanggubek salek enyek, Yesus ara sikenek, "Ugunda dena' hnon beiyilum gom?" aboka heibsuk. 24:42 Dara sikja Yesus ak hadya' gararoba' penya dob elegek. 24:43 Wenyek Yesus ara sik hogung ak sam laga doboka jok. 24:44 Seleb dara Yesus adya sikenek, "Ban yub enyek ugunda nablaboka anam ulumouba dara, seleb ugunuk leb elegesisa ara, Imik Neyung yuba bukuk sam, Musa bedya unuwanalum an yuba webok bukuk sam hnon, ununumna' len nang edya webek bukuk sam hnon, Mazmur yub ek momnya doboka' nidya' ara gigiwoka unuwanamla amsa' ara an," hyok. 24:45 Dara ono' Yesus adya, Imik Neyung yuba momnya domoka' ara anasa aboka ella danoka' aboka, sikja ganya bakdebsuk. 24:46 Ono' hnon Yesus adya sikenek, "Imik Neyung yuba bukuk lomok sam ara lero momnya dobokja, Kristus, nimi blebsina' dubnya bera nauba igina kweboka gweknamlakanya, winilinya sum era somoklomaka' ak ab onsok embenga' suboka buknamla. 24:47 Anya ono' nimi blebsina' dubnya bedya si pik moruwoka, nidya' soko yuba lero yabalameija dara, sikda nidya' malya una' ak ab ganya dangawanamak dara, Imik Neyung adya sikja malya una' sikenek ab soba' meewanasil. Anasa, ban lero ban yub era Yerusalem heikek ab uboka einiwanamak. 24:48 Ugun nong anyek, ban damok en eiblum nang ulumnelum e. 24:49 Nadya' anaba, Imik Neyung adya ugunuk lebsuka' anyek, ugunuk bokol yanasin. Bok ugunda al heik enyek anyek ok ulumuna' ara, imik migib era ugunuk goulul yanasil," hyok. 24:50 Wera Yesus ara alja yuba doro diriga ban nanga nidya' heikek aba' ara bo gobsuukanya, Betania heikek bo busuk. Anyek anyeb dara, alja soruk lakoka, alja mab ek peroba' leb elegosuk. 24:51 Ban unul yabok sab-sab, alda sikenek ab bokdangoka, imik heikek doboka bo welewok. 24:52 Sikda nidya' Yesus ak gibgogoweekanya, hyak ei-eiya ganya boboka Yerusalem heikek yek. 24:53 Anya sikda Imik Neyung ek sam wekoka, Imik Neyung ak soba' perob aboka gibelsinilemek.
1:1 Hyak men youbuka, nidya' uyiwanggom bok, yub ara seleb ulumok. Yub ara, Imik Neyung ablaboka ulureekanya, yub ara Imik Neyung ulumok. 1:2 Hyak men youma' enyek ab moruwoka, yub ara Imik Neyung ablaboka ulurek. 1:3 Yoka'-yoka' nidya' ara al adya uyimok. Yoknya nedya, hnonok sibin anaba uyiwanggumok. 1:4 Al lomok ara embeng una' damok ulumlakanya, ban embeng una' ara nim ek dilina' yebellilisil. 1:5 Ban dilina' adya guna' ak sam yeblamlakanya, guna' adya dilina' ak sikleldinggulumla. 1:6 Nimi ben hnon alja si nera Yohanes, Imik Neyung adya wa weblula' aboka bokol yeilimok. 1:7 Al pik uboka nimi nidya' dib senewanoka' aboka, ban dilina' enyek, geklewoka neksununa' aboka yeilimok. 1:8 Al nong ak dara, ban dilina' nong unggulumok jok, ban dilina' enyek, anya aboka neksunun aboka yeilimok. 1:9 Ban dilina' ara dib nongnya ulumookanya, yeindeboka, nimi nidya' ak sokok an yebellilisil. 1:10 Alda sokok an ulumookanya, soko ara aladya uyimok bok, soko nim edya dara, alak elgom ulumek. 1:11 Aljinya nek yeilimok bok, alja meneng mok nim edya dara, alak peroba' leboka dobnenggumek. 1:12 Bok, alak dib domek nanga nidya' ara, alja si nek dib senemek nim era, Imik Neyung mabo dangalamak migiba elegosuk. 1:13 Dara, nimi lunuwoka beillilisaka' adya gom, soko nang ganya seinina' adya gom, nimi unuwanamna senelamla adya gom, Imik Neyung adya ok Imik Neyung mabo nenesuk. 1:14 Yub ara soko nimi nong dangamookanya, wana' uboka eleksina' hnon, dib yub hnon, alak deknewoka, nun gangganek ulumok. Dara, alak imik nenemok nong senedya' migib era, Imik Neyung alja hnonok me ulumoka' adya nong senedya' eiyimouba. 1:15 Yohanes bedya alsamba geklewoka nekesuk. Hnon wenyaro lelemoka' ara, "Nak dara eimik, alda orowek men ulumoka' anasa, al eimik yanalanya bera, alak dara senenggomnya, nak dara meknya, wenyamsa' ara, ban benyek lemsa," hyok. 1:16 Dara, alja deknewoka ulumla' ak ab, nunda nidya' domouba. Alja wana' uboka eleksina' elegel sounulusilekanya, soba' dolmorulumab. 1:17 Imik Neyung adya unuwanalum an yub ara Musa bedya elegesuk bok, wana' uboka eleksina' hnon, dib yub damoka hnon dara, Yesus Kristus adya bo yeilisuk. 1:18 Nimi hnonok adya, Imik Neyung bek heng eilina' sibin anaba orok bok, Imik Neyung alja me hnonok ara, alja neyung beb neika' lelewoka uluraakanya, nadya neyung bera ban anaso ulumla aboka nuk amasuk. 1:19 Yerusalem heikik ulumek Yahudi nang edya, yuba gak nang ab, Lewi nang ab, anda heknya do aboka Yohanes bek heil bululum aboka orugomek dara, Yohanes bedya ban wenyaboka laga lebok, 1:20 "Nara Kristus nimi blebsina' dubnya unggulumna," hyok. Alda gununa' loboka, laga poboka lebok. 1:21 Dara, alak heimek, "Ban wenyalam dara, heknya ululam do? Anda Elia de?" aboka heibek bok, "Nara Elia benya' goma'," hyok. Dara, anda eimik yanamla alanjaknya ununumna' lenya bera anda an de?" hyek. Bok, "Orok," hyok. 1:22 Dara ono' "Dara, anda heknya ululam do? Orugosak nang ak ban wenyamla henemaba' anasa, nara benya' aboka neksilom. An dam nang ak heka' aldalalam do? aboka heibek. 1:23 Alda wenhyok, "Ununumna' lelemoknya Yesaya wenyamok sok lebsin, Nara gasak sokok ulumnakanya, Wenelesilnya alja pik jong peiyiwolulum aboka lelenanya ulumna," hyok. 1:24 Heil bululum aboka orugosik nang danera, Parisi nang ulumek. 1:25 Dara, sikda Yohanes bek, "Anda Kristus unggululam, Elia unggululam, eimik yanamla alamek ununumna' lenya unggululam jok dara, hekasa meka dalasilim do?" aboka heibek. 1:26 Alda wenhyok, "Nara mek dem adya ok dalasin bok, ugun gangganek sam ara, ugumba elgom ululumnya ben hnon ulumla. 1:27 Alda eimik nak yanalanya bera, alda senenggomnya bek anasa, nara meksonya bedya dara, alja yan ongona' henga loboka gwiriwanggunusinya," hyok. 1:28 Ban nidya' unulumoknya nera, Yordan meka gobuka eer sam Betania heikek Yohanes bedya meka dalasuka' ak ab ulumok. 1:29 Ampum ara, Yohanes bedya Yesus ara alak yalamoka' eiyimok dara, "Soko nimi malya una' doboka boboganesilnya Imik Neyung domba pam ara kendululum. 1:30 Nak eimik yanalanya ara, alda men ulumok anasa, alda senenggomnya amsa' ara, ban benyek lemsa. 1:31 Nababya alak men ella unggulusebok, alda Israeli nim eibnoka' aboka meka dabgiga yeilimsa," hyok. 1:32 Dara, Yohanes bedya ban laga leboka' ara, "Geisinya ara yalma wining anaso' imik ab yingginiboka alak bul yeilimoka' eiyimsa. 1:33 Alak ella ubnenggusinya bok, mek adya dalalom aboka orugonyoknya bera nak wenyanyok, Geisinya yingginiboka bul yalya' eibnelamnya bera, wera alja ugunuk Geisinya adya mek diba' dalamnesilnya bera alan, henyok. 1:34 Dara, ban eiyimsakanya, ban benera, Imik Neyung alja me ulumla' ara alan aboka laga lelesin," hyok. 1:35 Ampum ara, ono' anyagan Yohanes beb, alak diriga balareka' penya nang eb, neika' ulumek. 1:36 Dara, Yesus ara ono sam yabalamoka' eiyimok dara, alda wenhyok, "Kendururum, Imik Neyung alja domba pam ara alan," hyok. 1:37 Alak diriga balarek nang penya alja leboka' kerek dara, sikda Yesus bek diriga balarek. 1:38 Yesus al kemel samalamookanya, al weilik sam yalareka' eibuk dara, wenyhusuk, "Ugunda heka' aboka do?" hyok. "Rabi o, anda har sam malalam do?" arek. (Rabi ara nunja yub era, neklesilimnya aboka lerek). 1:39 Alda wenyasuk, "Or yorurum. Eibnerum," hyok. Dara, sikda ono' yalareekanya, al ulumoka' eiyireekanya, ban sum neikik ulumek. Sinik jam empat so ulumok. 1:40 Ban kereekanya, Yesus bek diriga bilirek nang penya ak dara, ben hnon Simon Petrus alja weis Andreas be ulumok. 1:41 Alda men unumoka' ara, alja dong Simon be eboka alak wenhyok, "Nunda Mesias seleb eiyimab," hyok. (Kristus anasa lebok). 1:42 Dara, Simon benyek Yesus bek bo yeilimok dara, Yesus adya Simon bek henga keemookanya wenhyok, "Anda Yohanes bedya me Simon ululam. Wera Kefas aboka si silimnenjak," hyok. (Kefas si ara, Petrus andanasa lelemak). 1:43 Nenyek sum ara, Yesus ara Galilea sokok binimna senemok. Dara, Pilipus bek eibuk dara, "Anda nak diriga yananelem," hyok. 1:44 Pilipus bera, Andreas beb Simon beb, sikda neik Betsaida heik nang ulumek. 1:45 Pilipus bedya Natanael be eiyiboka alak, "Musa bedya unuwanalum an yub sam alak weboknya bera, ununumna' lelemek nang alak wemeknya bera, eiyimab. Nazaret heik nang Yusuf bedya me Yesus alak eiyimab," hyok. 1:46 Natanael wenhyoka' ara, "Nazaret alam de? Peroba' ara, Nazaret heik ab lanawanamso de?" hyok. Wenyek Pilipus bedya, "Kemel yalom," hyok. 1:47 Yesus adya Natanael oka yoka' eibuk dara, wenhyok, "Israeli nang yoka' ara alan. Sonda' ara al lomok hyak unggulumla," hyok. 1:48 Natanael bedya, "Anda hekadya nak ella ulunelem do?" hyok. Wenyek Yesus adya, "Pilipus bedya youbnenggubmagel bok, anda ara gal damak ulmalama wenyek eiyinggen," hyok. 1:49 Dara, Natanael bedya, "Rabi o, anda Imik Neyung me ululam, anda Israeli nang edya senenggom dubnya ululam," hyok. 1:50 Yesus alak, "Ara gal damak ulmalama eibgenekanya lebgena' adya, dib senelam de? Anda hyak senenggom so una' eillilemnelam," hyok. 1:51 Ono' Yesus alak, "Ugunuk dib lebsin, ugunda nidya' ara im pik bakoka, Imik Neyung lero nang adya nimi diba' me ak wele golugoka ulumnamaka' eibnelum," hyok.
2:1 Liga penya seleb yenemok dara, Galilea sokok Kanaan heikek ara, gela dobdangoka masa youmek dara, Yesus eiling geneba ono' neika' unumeka' ak ulumok. 2:2 Dara, Yesus ab, alja diriga ban nang ab, gel saboka' youmeka' ak del yanalum aboka sikbabya youbosik. 2:3 Wera delemeekanya, anggur meka seleb dengamok dara, Yesus eiling gedya Yesus ak, "Anggur mek ara seleb dengamla," hyok. 2:4 Dara, Yesus adya alja' genong gek, "Genong o, hekasa nak ban lelenelem do? Nak laga nenewanenel salek era, anam ulumla bar," hyok. 2:5 Yesus eiling gera ek wa nim ek, "Alja heka' ak oruganesil ara, ugunja ganya doboka unulululum," hyok. 2:6 Dara, anyagan ara, sik Yahudi nang uguma' mek elekna' amba, girik mek hmeiya hnabbadya ulumok. Ban mek hmeiya hnonok dara, gouba denga hnonok danyek or deknewaneseng. 2:7 Dara, Yesus adya ek wa nim ek, "Ban mek hmei enera, mek sirika' ok dekneb loblulum,"hyok. Dara, sikja nidya' mek hmeiya gweboka hyak deknemek. 2:8 Wera ono', Yesus adya ek wa nim ek, "Wenera mek enyek, meka' gweb bobmunukanya, masa youmaka' dubnya bek meka' debyamadulula' aboka bo bululum," wenyhusuk dara, gweboka alak bo byik. 2:9 Dara, masa youmeka' dubnya bera, ban mek sirika' bok anggur mek dangamoka' ak debyamamok. Alda ban mek enera hanyagarab sam senewoka elgom ubok bok, alja ek wa nimi ban mek gweboka yekemek nim ok ella ubek. Dara, ban masa youmek dubnya bera, gela domoknya bek, "Yalom," hyok. 2:10 Dara, gela domoknya bek, "Nimi gela domna' nidya' ara, gela donanya bedya dara, pero-pero meemna anggur mek enyek men beibnekanya, nimi yeilimna nimi nauba den dara, wera mek so memenanya nera, eimik beil yalamak. Bok, anak dara, perob anggur era beiblolama' ara, wenyok ok seleb ono' beiblam," hyok. 2:11 Yesus adya, alja senenggom migiba' bekna' sokok unura yabalamoka' hyak men youbuka unumoknya nera, Kanaan heikek ab unumok. Ban unumoka' adya, alja senenggom migiba' una' era laga dangamok. Dara, alja diriga ban nang era, alak dib senemek. 2:12 Ban seleb unubgogomok dara, Yesus ab, alja genong geb, al kabo nang ab, alja diriga ban nang eb, Kapernaum heikek bilimeekanya, liga wen ono sam ulumek. 2:13 Yahudi nang sikja perob sum oka dangamok dara, Yesus ara Yerusalem heikek bilimok. 2:14 Yesus ara Yerusalem heikek seleb byuk dara, hnon nim era, Imik Neyung eremek sam domba pam ab, sapi pam ab, yalma wining eb, deklemek dara, yok nimi hnon sikja yangana' gal ak bukoka, rupiah amoma' ubdangdo balameka' ak eiyisuk. 2:15 Ban unulumeka' eiyimookanya, Yesus adya henga doboka legebna' meewoka, domba pam ab, sapi pam ab, yoka'-yoka' nidya' deklemeka' ara, e weilik ab hyak nidya' doluwoka yaksuk. Dara, rupiah amoma' ubdangdo unulumek nang era, sikja rupiah nidya' dolub menegoka, yangana' gala yaawoka sen-senem ab menegemok. 2:16 Dara, Yesus adya yalma wining deklemek nim ek wenyhusuk, "Ugunda ban doboka bo bululum. Ugunda nadya' neyung bedya e nera, salya' dekna e nenenggom mem," hyok. 2:17 Dara, Yesus ak diriga ban nang era, yuba Imik Neyung bukuk momnya doboka' ak seinimek. "Anja e nek wana' kwelemna' amba nak uka lolok ganagananel," amoka' ak seinimek. 2:18 Yesus adya ban unusuka' seleb dara, Yahudi dub nang era Yesus ak , "Wera or anja nuk heka' hubmen anyek eibnoba' aboka, anasa ulumna aboka hyak yok so bekna' diba' enyek unuwalom," hyek. 2:19 Dara, Yesus adya sikenek, "Wera ugunda ban e nera goluwoka sokok beiblulum. Dara, nadya liga winilyok saaboka sobnamna bar," hyok. 2:20 Dara, sikda alak, "Gibna' denga penya sorob Imik Neyung e nenyek babya, anja liga winilya sobnamna helema' de?" hyek. 2:21 Bok, ban wenyamoknya nera, Yesus al nong anasa sene bobnenewoka lebdangamok. 2:22 Dara, Yesus suboka sekok dara, alja diriga ban nang era, wenyamoka' orowek kemek bok adya, anyek lebok aboka bekemek. Dara ono', alja diriga ban nang era, Imik Neyung yuba momnya doboka' hnon, Yesus adya sikenek wenyamoka' hnon, seiniwoka dib senemek. 2:23 Yahudi nim perob sum meemek sum enyek, Yesus ara Yerusalem heikek ulumookanya, nimi nauba al adya yoka'-yoka' nidya' lok so unulumoka' eiyimeekanya, anasemba leboka alak dib senemek. 2:24 Bok, Yesus ara nimi nidya' ganya ella ulusilnya bek anasa, sikenek dib senewanggumok. 2:25 Yesus ak dara, alda hyak nimi ganya ak orowek ella ulusilnya bek anasa, nim adya bera ban anaso ulumla aboka, nak neknenok senewanggumok.
3:1 Nimi Parisi nanga ben hnon alja si Nikodemus bera, Yahudi nang emba Imik Neyung yuba lena' dubnya ulumookanya, 3:2 inimnek enyek, Yesus ak sam yeiniboka, "Neyung neklesilimnya o, anja yoka'-yoka' migib unululama' anyek, Imik Neyung adya anak aragena' orok dara, wera unuwanggunusoma' anasa, anak dara Imik Neyung adya aldib sokok sam neksinya bokol yeilinjoknya bek ululama' ara, nunda ella ulumab," hyok. 3:3 Dara, Yesus adya Nikodemus bek, "Nara anak dib lebgen, Nimi ben hnon penya beilina' anam orok dara, alda Imik Neyung wenesin heikek sam ara meka' eibnenggunumla," hyok. 3:4 Dara, Nikodemus bedya Yesus ak, "Seleb nauba dangosonya benyek saaboka alja genong gedya mon lomok wekoka beibneseng de? Seleb nauba nesobok dara, unuwanggunuseng," hyok. 3:5 Dara ono' Yesus adya, "Nara hyak dib lebgen, nimi be hnon alda mek adya hnon, Geisinya adya hnon, beilina' orok dara, alda Imik Neyung bedya wenesin heikek weknenggunumla. 3:6 Nimi nong ak dara, nim adya beillilimak bok, ganya ak dara, Imik Neyung Geisinya adya beillilisil. 3:7 Nadya ugunuk saaboka beibnesil wenyalasina' ara, anda loka dabnenggununggeso. 3:8 Kabo' ara alja dorogunun senemna' ak ara nidya' doroklamla. Dara, alja uu alamla' ara kelelam bok, hanyagar ab sam yalamla, hekmok balamla' ara, anda elgom ululam sok, Imik Neyung Geisinya adya beillilisil nim ek dara, al anaso ulusil," hyok. 3:9 Dara, Nikodemus bedya Yesus ak, "Ban ara heka' anasonya ubnamso do?" aboka heibuk. 3:10 Yesus adya alak, "Anda Israeli nim emba yuba neksinya ululam bok, nera elgom ululam de? 3:11 Nara anak hyak dib lebgen, Nunja seleb ella unanya nenyek ugunuk neklesab hnon, nunda seleb heng eiyinanya nenyek ugunuk laga lelesab bok, ugunda nunja yuba dib senewoka donggululum. 3:12 Sokok sam an ululanya nenyek neksina' anaba dib senenggululuma' anasa, nenera imik heikek sam ululanya nenyek neknesisinya dara, heka' huboka dib senewanesom do?" hyok. 3:13 "Nimi hnonok sibin anaba imik heik sam embenga' welewanggubuk bok, nimi diba' me nek imik heik ab yeilimoknya bek hnonok unumok. 3:14-15 Musa bedya, hwalek gasa' ak sam, mesa baga' gal ak kweb weininggemok sok, nimi hnonok-hnonok nidya' alak dib senewanamak nim era, embenga' una' diba' dobnoka' aboka, nimi diba' me nenebabya neik so gal ak glab weiningganamak," hyok. 3:16 "Al Imik Neyung adya nimi soko nim ek, hyak wana' ulusuukanya, alja me hyak hnonok bok, nimi soko nim amba bokol yeilisuk. Nimi nidya' hnonok-hnonok alak dib senewoka dobnamak dara, somoganggunumak bok, embenga' una' diba' dorowanamak aboka, alja me bokol yeilisuk. 3:17 Imik Neyung alja yando me sokok sam bokol yeilimoka' ara, anyagan yana lelelesulula' aboka bokol yanggumok bok, alda alja me nedya soko nim ek blebsulula' aboka bokol yeilimok. 3:18 Alak dib senewoka dolomak nim era, Imik Neyung adya eimik yana lelewoka igina boyiwanggunesil. Bok, alak dib senenggulumak nim era, wera, Imik Neyung alja hnonok me nedya si nek dib senenggulumaka' anasa, seleb igina dobnemaka' lomok ulumak," hyok. 3:19 "Imik Neyung adya yana kilisila' damok ara ban: Dilina' ara sokok an seleb yok bok, nim ara sikja unulumaka' anyek malya nong anasa, guna' ak sam anyek perob so senelemak. 3:20 Nimi be hnon malya ululanya bera, dilina' ak lek senelamlakanya, alja unulamla anyek laga danalyek aboka, dilina' ak sam yangganggulumla. 3:21 Bok, heknedya dib nong ok pe unululanya bera, alja unulamla' ara, Imik Neyung senelamla sok unulamla' anyek, laga dolula' aboka dilina' ak yalamla," hyok. 3:22 Ban nen seleb dara, Yesus ara alja diriga ban nang eb, Yudea sokok bilimek. Dara, sikeneblaboka minggu penya so ulumeekanya, nimi hnon meka dalasuk. 3:23-24 Dara, Yohanes beneba alak anam henga geregoka gasa ek beibnenggumek salek enyek, Salim ok berem Ainon heik sam ulumookanya, meka nauba ulumoka' anasa, nimi hnon meka dalasuk. Nim ara meka dabsulula' aboka soba' banyagan yalamek dara, meka dalasuk. 3:25 Ban sum enyek, Yohanes Pembaptis bedya diriga ban nang eb, be hnon Yahudi nang eb, nimiguma' mek elekna' damba lololdalamek. 3:26 Dara, hnon nang ara Yohanes Pembaptis ak biniboka, "Neyung neklesilimnya o, anab neika' Yordan mek inik ulurumukanya, nuk amasulumnya bera, wera albabya nimi meka dalasilikanya, nimi nauba alak mamagal balamak," hyek. 3:27 Wera Yohanes Pembaptis bedya dara, "Nim ara Imik Neyung adya sikenek eleganggunususo dara, yoka'-yoka' dobnenggunuseng. 3:28 Nara nimi blebsina'anya goma', alda pika mengelelul aboka bokol yeilinyoknya nok ulumna, ugunuk seleb wenyamsa' anyek, damoka kelum nim ululum. 3:29 Dobnamna gel gera, dobnenanya bek aljinya ulumla. Dobnenanya alja' hem bera, sikda dobdanaraakanya, doblanya bedya yuba hnon kelemla dara, eiya dablamla. Anasonya neikik, wera nababya hyak nauba eiya dablenel. 3:30 Alak dara, hyak nauba danggiga balamnelabok, nak dara mek danggiga balamnenel," hyok. 3:31 "Imik heik ab yeilinanya bera, yoka'-yoka' nidya' amba dubnya ulumla. Sokok ab yeilinanya bera, nera alda sokok yoka'anya anasa, alda sokok sam ululanya nenyek seiniro lelelabok, imik ab yeilinanya bera, hyak imik dubnya ulumla. 3:32 Alda seleb heng eiyimoknya hnon, o kemoknya hnon, nenyek laga neklesil bok, nimi nidya' ara alja lelemla yuba pe keboka donggulumak. 3:33 Bok, alja lelemla yuba dib dololanya bedya dara, alda dolomla' adya, Imik Neyung ara alda dib nongnya ulumla aboka laga amalamla," hyok. 3:34 "Dara, Imik Neyung adya bokol yeilimoknya bedya, Imik Neyung bedya lelemla yub enyek lelemla. Alak ara Imik Neyung Geisinya elegelmorulamla. 3:35 Imik Neyung adya alja me nek nauba wana' uboka, yoka'-yoka' nidya' ara, al adya salawolula' aboka elemok. 3:36 Heknedya Imik Neyung bedya me nek dib senewalenya bera, dib ulmoubna' ganya seleb dolomla, bok heknedya alja me nek bleklelanya bera, dib ulmoubna' ganya hyak dobnenggunumlakanya, Imik Neyung adya yu ganya ara al nong ak sob-soba' ulumnamla," hyok.
4:1 Yahudi nang edya Yohanes Pembaptis bera mek so meka dalasil bok, Yesus ak dara, nauba meka daboka nimi doro dililamla an yuba kemek. 4:2 Ban wenyameknya nera, Yesus adya ununa' orok bok, alja diriga ban nang edya meka dalasik. 4:3 Ban yuba en kemok dara, Yesus ara Yudea sokok ab loboka Galilea sokok yeilimok. 4:4 Yesus balamok pik era Samaria soko hnoumunga garal bilimok. 4:5 Pika balamookanya, Yesus ara Samaria sokok heik si Sikar heikek bilimok. Ban heik ara, Yakub bedya alja me Yusuf bek elegemok soko berem ulumok. 4:6 Ban sokok sam ara, Yakub bedya oulyang aboka si simeka' den mek ulumok. Yesus alda balamookanya, hmeng umoka' anasa, ban mek dena' oulyang berem bul bilimok. Heng ara yubyek dukdukanek salek bul bilimok. 4:7-8 Alja diriga ban nang era heikek dena' dekel bilimek. Dara, Samaria gel gera meka gwel yeilimok dara, Yesus adya wenhyok, "Wei, genong o, mek ok anasa, meka gweb eleganenelem," aboka molowok. 4:9 Dara, ban gel genedya, "Anda Yahudi nang bok, na Samaria gel gek hekasa meka dunun aboka molonelem do?" hyok. Yahudi nim eb, Samaria nim eb, neika' olokdangoka unggulumek nim ek anasa lemok. 4:10 Gela ara ban wenhyok dara, Yesus adya alak, "Anda Imik Neyung adya eleklesila' ab, heknedya anak meka mololenggela' ab, ella ulusom dara, anja alak molowanasom dara, alja dib embenga' una' mek era eleganenggeso," hyok. 4:11 Dara, gel genedya Yesus ak, "Neyung o, anda mek gwena' orok, mek oulyang ara hyak lom nong ok onu anasa, heka' huboka dib embenga' una' mek ara gwebnelam do?. 4:12 Nunja neyung Yakub bedya, ban mek dena' oulyang enera nuk elegosuk. Yakub beneba alba anyagan meka delemookanya, alja mab eb, alja pama beillilimoka' nidya' ara, al anyagan delemek. Bok, anda Yakub bek sokok nenewanalamakanya, anak dubnya danalam de?" hyok. 4:13 Yesus adya alak, "Ban mek demeija nim era, eimik ono' saaboka mek ok ubnesil bok, 4:14 nadya elegeisinya mek enyek delenya bera, eimik saaboka mek ok ubnenggunumla. Bok saaboka, nadya elegeisinya mek ek dara, alja nong lomok sam ara sob-soba' yabalmorulamla mek anaso dangoka, dib embenga' ulmoubna' eleganamla," hyok. 4:15 Dara, ono' ban gel genedya, "Wei, neyung o, ono' mek ok ubnelyakanya saaboka anyagan mek soba' gwel yanyek aboka, wera ban mek enyek eleganenelem," hyok. 4:16 Yesus adya alak, "Anja nenya youbol bimenekanya, ono' anyagan yanarum," hyok. 4:17 Dara, ban gel genedya, "Nara nenya orok," hyok. Dara Yesus adya, "Anda hyak dib nong leblam. 4:18 Seleb liga lambadya nenya dolum bok, wen anablaboka ulurumnya bera, wera anja nenya unggulumla' anasa dib leblam," hyok. 4:19 Yesus adya ban wenyamoka' eiyimookanya, ban gel genedya alak, "Neyung o, anda hyak dib nong ununumna' lena'anya ululama' eiyinggen," hyok. 4:20 "Nunja neyung yab era, Imik Neyung bek ban mein enyek an giblemek bok, ugunda Yahudi nim era, Yerusalem heikek ok Imik Neyung gibnemab alalum," hyok. 4:21 Yesus adya alak, "Yok yanamla sum enyek, nim adya Imik Neyung ak ara, mein enyekan goma', Yerusalem heikek ok goma', giblemnemak ara dib senewalom. 4:22 Ugunda Samaria nim era, ugumba ella unggululumnya nek giblelum. Bok nunda Yahudi nimi numba ella ulumabnya nek, nimi blebsina' damok ara, Yahudi nim ek ab yalamla' anasa, numba ella ulumabnya nek giblemab," hyok. 4:23 "Bok eimik yanamla sum era, ono' al wen seleb ulumla sum eneba, Imik Neyung bek dib giblemak nim era, ganya adya gibnemak, Imik Neyung alba ulumla sok sunuwoka gibnemak. Ban anaso nimi ganya ara, Imik Neyung adya nak unu gibneneseng senelamla. 4:24 Imik Neyung ara, ganya ok ulumla' anasa, alak giblemak nim era, ganya lomok, Imik Neyung alba ulumla sok sunuwoka, unu giblemnamak," hyok. 4:25 Dara, ban gel genedya Yesus ak, "Nimi blebsina' dubnya, Kristus aboka si silimaknya bera, yanamla' ara ella ulumna. Alda yalya dara, yoka'-yoka' nidya' ara nuk neknesil," hyok. 4:26 Yesus adya, "Wenyhelemnya bera nara alan. Alan anab yuba neika' salanam," hyok. 4:27 Ban salek enyek, alja diriga ban nang era dena' dekel bilimeka' ara yek. Yesus ara gel ab yuba salareka' eiyimeekanya, sikda loka dasuk. Bok sikja dara, "Genong o, hekak senelelamakanya yeililam do?" aboka heibnenggumek. Ono' Yesus ak anaba, "Hekasa anda gel ab yuba salmorum do?" aboka heibnenggumek. 4:28 Dara, ban sum enyek ban gel gera mek hmeiya beib loboka, heikek byuukanya lebokja, 4:29 "Ugunda nak yoka'-yoka' nidya' nadya unulunanya nidya' laga nenelnya benyek kemel yoululum. Alda nimi blebsina' dubnya Kristus ulumla do?" hyok. 4:30 Dara, nimi nauba sikja heikek ab goboka Yesus ak kemel bilimek. 4:31 Wene salek enyek, alja diriga ban nang edya, "Neyung o, wera or dena' seleb ulumla' anasa, wera or del yabalom," aboka alak duka' lolom-lolom alamek. 4:32 Bok alda sikenek, "Ugumba elgom dena' don nak hnon ulumla' anya'," hyok. 4:33 Dara, alja diriga ban nang era, sik moumen heibdangdo balamek. "Nimi hnon alsamba dena' bo yeilimak de?" aboka heibdangdo balamek. 4:34 Dara Yesus sikenek, "Nadya dena' era, nadya' neyung, nak bokol yeilinyoknya bedya, alja senelamla anyek, unululul senelamla' hnon, nak welelula' aboka lenyok wa hnon, senenenya loboka welemna dara, wera nadya dena' era alan," hyok. 4:35 Dara Yesus sikenek, "Wala' dombadya mablya dara, gwaneng dena' lanawanamla ara ugunda wenyalalum. Bok, nara ugunuk saaboka lebnesin, wa webloroba' anyek doka daknenyak senewoka eng olomla' anyek, ugunda kendululum. 4:36 Doka daklamak nang ara, sikja dekna' seleb dolomak. Embenga' ulmoubna' amba dakoka mamaklemak. Dara, eimik era doka doklomak nim eb, doka daklamak nim eb, ei-ei ganya daboka ulumnemak. 4:37 Be hnon melemla dara, ono' yok nang daklamla, wenyalamak ara, dib nong. 4:38 Nara ugunja webnenggublum wak sam doka daknelum aboka orugusin. Yok nim edya orowek seleb nauba wemeka' anyek, ugunda dakluma' adya peroba' doblum," hyok. 4:39 Dara ban gel genedya, "Nadya nidya' ulusenya laga lenel," hyoka' adya nimi nauba Samaria nim era, Yesus ak dib senewoka domek. 4:40 Dara, Samaria nimi Yesus nong ak okoka eiyimek dara, alak yeiniboka nuk pe ulunoba' aboka alak molomek. Anasa, Yesus ara liga penya sikja heikek gobdo mamok. 4:41 Dara, nimi nauba ara Yesus adya neklesuka' anyek, sikja okoka eiyimeekanya, alak dib senewoka domek. 4:42 Dara, Samaria nim edya ban gel genyek an, "Anja nuk wenyasilima' adya ok dib senewanggumab. Wenyok alda nun dam nang okoka heng yoka' bekoka eiyimabakanya, alja lelemla yuba kemaba' adya, alak dib senewoka doboka, alda soko nimi bleblesilnya diba' ulusila' ara ella ubab," hyek. 4:43 Yesus ara Sikar heikek liga penya mamok dara, Galilea sokok bilimok. 4:44 ("Nimi be hnon ununumna' lena'anya bera, dam heikek nim adya gibnenggulumak," aboka Yesus adya yok men sum enyek wenhyok). 4:45 Yesus ara Galilea sokok bilimok sum enyek, nimi ganya eiya daboka alak doro diyimek. Sikda Yerusalem heikek Yahudi nang perob sum enyek ulumeekanya, Yesus adya yoka'-yoka' unulumoka' anyek eiyimeka' anasa, peroba' leboka Galilea yanggok dara, doro diyimek. 4:46 Dara, Yesus ara Kanaan heikek mek sirika' bok anggur meka nenemok heikek ono' yeilimok. Kapernaum heik ara, soko dubnya bedya me neikna' salamoka' ak malamok. 4:47 Dara, soko damnya bera Yesus ara Yudea sokok aba' ara, Galilea sokok yeilimla ana' kemok dara, Kapernaum heikek ab nadya somogonuna' ulumla me era hwebnulula' aboka Yesus ak el bilimok. 4:48 Dara, Yesus ara ban soko dubnya bek, "Ugunda yoka'-yoka' lok so bekna' senenggoma', lokol dana' eilinggululum dara, dib senenggululum," hyok. 4:49 Ban soko dubnya bedya Yesus ak, "Neyung, nadya me anam somoganggumlya salek enyek ban men yalom," hyok. 4:50 Yesus adya alak, "Anja me nera seleb meremla anasa or bilom," hyok. Dara, dubnya bedya Yesus lemoka' dib senewoka lo bilimok. 4:51 Dara, dib lebnel senewoka pikek balamok salek enyek, alja ek wa nang alak yeiniboka, "Neyung, anja me nera seleb merewo," hyek. 4:52 Dara, "Alja hwer salek ek me nera merewo do?" aboka heisuk dara, "Yubyek dukdukanek enyek pob ara denghyo," hyek. 4:53 Dara, ban me nen alja' neyung bedya, Yesus ara al wenyek wenyamo' anasa, nadya me merewo senemok. Dara, ala' mabo gel e gekman Yesus ak dib senewoka domek. 4:54 Yesus ara Yudea sokok aba' ara, Galilea sokok yeilimok dara, ban senenggom ununa' enyek penenya unumok.
5:1 Wera yok sum era, Yahudi nang perob sum yenemok dara, Yesus ara Yerusalem heikek bilimok. 5:2 Yerusalem heikek domba pam pik aboka si silimek serekna' berem, Ibrani yub adya, Betesda aboka silimek mek gwan ulumok. Anyagan ara, senenggoma' yangamek ekla lambadya gwaneb ganagamok. 5:3 Dara ban ekla ak ara, neikna' salalasuk nimi nauba maro balamek. Wera hnonda henga lum ulusuk nimi hnon, hnonda koma bulumek nimi hnon, hnonda nonga yana soruka heilisuk nimi hnon maro balamek. Dara, meka waral yabalya enyek, wene sab-sab hwibnoba' aboka diri malamek. 5:4 Hnon yok sum yok sum era, Imik Neyung lero adya mek gwan enyegan sekel yinggin dara, meka wareboka lolomok. Dara neikna' salananya bera, mek gwan en warel yaben sab-sab men berra yoruwoka hwibnanya bera, wera alak salamna neikna' era dengalamok. 5:5 Dara al onok ara, nimi be hnon neikna' salamoka' anasa, malamok salek era gibna' denga hnon goboka ebdobnya goklombadya dangamoknya be hnon malamok. 5:6 Wera, Yesus adya ben era ekla buna' ak malmoublemoka' ak eiyiboka, alda youma' ek moruwoka salabmoumoka' ella umok dara, Yesus adya benyekan, "Anda mereweisinya senelam de?" aboka heimok. 5:7 Dara, neikdo malamoknya bedya Yesus ak, "Neyung o, meka warel yaben salek dorong nen dara, nimi hnon anyagan aranggulunyaka' adya, okna ulunel. Wera ono' meka warel yaben dara, nababya hwibnuna' aboka balanabok, anam ban salek enyek, yok nang ek men hwildolomak," hyok. 5:8 Dara Yesus adya, "Anda sekoka anja esona' doboka bobmenekanya yabalom," hyok. 5:9 Wera al wene salek enyek bera merewok. Dara, alda esona' dobok dara, bobookanya yabok. Ban unumoka' ara Sabat mem sum ek umok. 5:10 Anasa wera, Yahudi nang edya, wenyok meremoknya bek, "Sumen era Sabat mem sum anasa, anda anja esona' doboka bo yabana' ara unuwanalum an yuba mem alamla," hyek. 5:11 Bok benedya sikenek ara, "Ousa nak hwenelnya bedya, Anda anja esona' doboka bobmenekanya, yabalom aboka orugenela' anasa umna," hyok. 5:12 Dara sikja, "Anak esona' doboka bobmenekanya, yabalom aboka orugenggelnya bera heknedya do?" aboka heibek. 5:13 Bok, Yesus ara seleb nimi hnoum dan dengamok bok adya, wera heknedya hwenel do aboka ganya emok. 5:14 Wera ono' eimik enyek, meremoknya bera Yesus ara Imik Neyung ek sam eibuk dara, Yesus adya benyek, "Wera anda seleb merewalama' anasa, ono' hnon sounuwoka malya unggom mem. Ono' malya ubmen dara, hyak nauba so malya dagelyek bar," hyok. 5:15 Dara meremoknya bedya, wera Imik Neyung ek ab goboka biniboka Yahudi dub nang ek sam, "Nara Yesus adya hwenel," aboka nekdo bilimok. 5:16 Anasa leboka, Yahudi nang edya dara, Yesus ara Sabat mem sum bok, nimi hwemoka' anasa, alak obnoba' aboka dub einimek. 5:17 Bok Yesus adya Yahudi nang ek, "Nadya neyung bedya weneba or wa weldibilloklamla' anasa, wera nababya welemna," hyok. 5:18 Wera Yesus adya ban wenyaboka lemok yub edya, Yahudi nang era, hyak Yesus ak obnoba' aboka nauba so yeiriwoka dulumek. Dara, nera Sabat mem sum bok, nimi bleboka hwelesuk amba ok gom. Ono' alda, Imik Neyung ara nadya neyung aboka lena adya, wera nera Yesus ara, Imik Neyung nonga gebeldalamla senewoka, dulumek. 5:19 Wera an ara Yesus adya Yahudi dub nang ek, "Wera ban lebnesina' ara dib lebnesin, Alja me nedya yoka'-yoka' unulamla' ara, alja migib edya ok ganya doboka wenggulumla. Alja unululanya nera alja' neyung bedya seleb unulamla' anyek eiyiboka unulamla. Anasa wera, neyung bedya unulamla' anyek, alja me neneba neikik unulamla. 5:20 Anasa, neyung bedya alja me nek wana' ulumlakanya, alja unulamla' nidya' ara, alja me nek amalamla. Wera ono' eimik era, neyung bedya hyak senenggom ununa' enyek elegoka aawalya dara, ugunda eiyiboka hyak loka dabnesil. 5:21 Anasa wera, neyung beneba somogamna nim embenga' bukiyiboka sikenek embenga' una' eleklesil sok, alja me neneba neikso, nadya embenga' elegonun senewan nim ek embenga' eleklesil. 5:22 Neyung bedya alja ok ganya doboka nimi yana lelenggulusil. Bok, nimi yana lelesina' damoka nidya' ara, seleb alja me nek gobdo lemok. 5:23 Neyung bedya ban unumoknya nera, nim adya neyung bek giblemak sok, ono' alja me nek giblenoka' aboka umok. Wera anasa, heknedya alja me nek gibnenggulumla dara, wera al bokol yeilimoknya bek gibnenggulumla. 5:24 Nadya ban lelemna' ara dib lebsin, heknedya nadya lelemna yub ek pe keboka neyung be na bokol yeilinyoknya bek dib senewalya dara, alda seleb embenga' una' ara, alak dib uboka, alda seleb somokna' damok ab ara, embenga' una' ak sam yibilimoka' anasa, eimik alak Imik Neyung adya igina yaka' boyiwanggunusil. 5:25 Ugunda ban nadya lebsina' anyek dib senewanalum, seleb somogorob nim era, Imik Neyung bedya alja me nedya yuba keboka embenga' buknemak salek era, eimik yanamla' hnon, weneba seleb yeiniboka ulumla amna ara, ugunda dib senewanalum. 5:26 Neyung bera nim embenga' una' damok gaknya ulumla sok, ono' al adya alja me nek nim embenga' una' gaknya dangiyimok. 5:27 Dara, alja me nera nimi diba' me ulumla' anasa, alja neyung bedya alak nimi yana lelesina' ara seleb elegemok. 5:28 Dara ban lelesin anyek, hyak lok ganya bobnenggunulum. Eimik yanamla sum enyek, seleb somogorob nimi nidya' ara Imik Neyung bedya me nedya yuba kebija dara, dibsik oulyang ak ab ara, embenga' suboka buknemak. 5:29 Dara, seleb somogorob nim era, sik dibsika' ak ab embenga' suboka buknemak dara, pe unulumek bok somogorob nim era, embenga' ulunoka' aboka subnemak. Bok, malya ulumeka' ara somogorob nim era, igina dobnoba' aboka subnemak," hyok. 5:30 "Nara yoka'-yoka' nidya' ara, nadya ok salya' ganya doboka ununggulumna. Nadya' neyung bedya anyek unuwalom alamla' anyek, sunuwoka yana lelelesin. Nabeyok ganya doboka ununggulumna' anasa, wera neyung be na bokol yeilinyoknya bedya unuwolul senelamla anyek unulamna anasa, nadya anyek yana lelewan alamna ara, muna' dib unulamla. 5:31 Nabeyok ganya doboka, nasamba geklewoka yuba leldalasinya dara, wera ugunda nak dib senewanggununesom. 5:32 Bok, ono' ben hnon jok nasamba hnon geklewoka yuba lelemla. Dara, alja lelemla yub era dib lelemla ara, nara ella ulumna. 5:33 Dara, ugunja seleb Yohanes Pembaptis bek, seleb nimi yuba kel bululum aboka bokol bililum dara, alja dib yuba seleb ugunuk leb elegesuk. 5:34 Bok, nara ban wenyhenya nera, nara nim adya yuba nasamba geklewoka lelenenok senenggulumna, alda ban wenyhenya' adya ugunuk blebsulula' aboka lelesin. 5:35 Yohanes Pembaptis bek, alda wesa' yebna' diba' ulumok. Dara alda yeblemok salek era, li hnonok perob senelum. 5:36 Bok nak geklewoka lelemla yub era, hnon senenggoma' ulumlakanya, Yohanes Pembaptis bera mek so lelenyok. Anasa wera, nadya wen heka' unulamna' ara, neyung be na bokol yeilinyoknya bedya unuwoka welelom aboka orugenyoka' anyek welemna' adya, wera nara aldib Imik Neyung bedya bokol yeilinyoka' anyek geklewoka lelenel. 5:37 Imik Neyung be na bokol yeilinyoknya beneba, alda nasamba geklewoka yuba lelemla. Bok, ugunda alja yuba kenggululumukanya, ono' alja nong hogung eneba meka' eilinggululum. 5:38 Ugunda alja bokol yeilimoknya bek dib senenggululuma' adya, alja yub era ugunja ganya lomok sam diba' yina' menggulusil. 5:39 Ugunja dara, Imik Neyung yuba momnya doboka' einiwoka ulumeibya adya embenga' una' dobnemab senewoka nauba einililum. Wera, ban bukuk sam anaba nasamba geklewoka yuba lelelabok, 5:40 ugunda embenga' una' dobnob senewoka nak yanggana' lek senelelum. 5:41 Nara nim adya gigiwanenok senewoka hogunga bo enggulumna. 5:42 Bok, ugunuk ella ulusin. Ugunda Imik Neyung ak ugunja ganya edya wana' unggululum ara, nara ella ulusin. 5:43 Nara neyung bedya si pik moruwoka yasa bok, ugunja nak peroba' leboka doro dibninggunulum. Bok, yoknya bera alja si pik yalya dara, peroba' leboka doro dibnelum. 5:44 Ugunda Imik Neyung be hnonok ok ululanya bedya gigiwousulula' aboka ena' loboka, alda ugunuk nimi yok nim edya nuk gigilesinok senewoka hogunga bo elelum dara, hekadya ugunda dib senewanasom do?. 5:45 Ugunja dara, nadya neyung bedya saramek sam, aladya malya gebiyiwanesil senen ganya bonenggom mem. Ugunja dibnya senelelumnya Musa bedya malya gebiyiwanesil. 5:46 Musa bera alda nasamba geklewoka momnya domoka' anasa, ugunda Musa bedya momnya domok yub ek dib senemun dara, wera nak anaba dib senewananulum. 5:47 Bok, ugunda Musa bedya momnya dobok yub enebabya dib senenggululuma' anasa, wera heka' adya nadya ugunuk lelesina' ara dib senewanasom do?" hyok.
6:1 Ban unumoka' seleb dara, Yesus ara ono' saaboka Galilea mek ara neik mek bok, Tiberias aboka si silimek mek gwanek sam eer bilimok. 6:2 Yesus adya yoka'-yoka' lok so' bekna' nauba unuwoka nimi hwelesuka' anyek, eiyiboka nimi nauba dirigoka dobdongoro balamek. 6:3 Dara, mok soko meinik sam alja yuba doboka diriga ban nang eblaboka welewoka bukumek. 6:4 Wera ban salek era, Yahudi nang welena' orok roti gwaneng den salek perob sum oka dangamok. 6:5 Ban sum enyek ara sekoka gokgobok sam nidya' keeb ganagok dara, nimi nauba alak sam yalameka' eiyimok. Dara Pilipus bek, "Ban nimi gong danara dena' denok aboka, nunda har sam dena' dekel binimab do?" aboka heibok. 6:6 (Yesus ban Pilipus bek wenhyoka' ara, gwaneng dekoka ununa'ara Yesus orowek ella ulumok bok anasa, Pilipus benyek sene heka' hublul do? aboka lebok.) 6:7 Dara, Pilipus bedya, "Roti gwaneng ara wala' linbadya rupiah wa weboka dekna' ara, ban nimi gong danera meka' dija' anaba ella' gigiwolula' goma'," aboka lebok. 6:8 Wera dara, ono' yok yuba doboka Yesus ak diriga balamoknya Simon Petrus alja wes Andreas bedya, 6:9 "Anyagan me hnon roti gwanenga lambadya, hadya' penya bomla bok, wera ban nimi gong mandebna' adya, nidya' gigiwolula' goma'," aboka lebok. 6:10 Dara, Yesus adya alja yuba doboka diriga ban nang ek, "Ban nimi nauba buknok aboka orugolulum," hyok. Dara, anyagan ara hola' nauba ulumoka' adya, nimi nidya' hola' dubuk bukumek bok, nengmab ok einimek ara denga salya' yuba' linbadya nang bukumek. 6:11 Nimi nidya' bukumeka' seleb dara, Yesus ara roti gwaneng doboka, Imik Neyung molowoka, nimi nidya' bukumek nang ak soboka bokoka elekdo yibilisuk. Anasonya neikik, hadya' anaba alja unu dena' nauba senemeka' sunuwoka elegesuk. 6:12 Seleb pe debgogomek dara, Yesus adya alja diriga ban nang ek, "Ban nidya' sikna' ara meka' me anaba salya' bobogeijik aboka, neika' ak pe mamagolulum," hyok. 6:13 Dara sikda, nimi nauba lambadya roti gwaneng deregoka dara, boklomeknya nera serrem obadya mamagol bindiwoka deknemek. 6:14 Nimi nauba Yesus adya unumok anyek, hyak lokso unumok eiyimek dara, "Lok so bekna' ununumna' lebnelanya sokok an yanamla, youma' wenyalameka' ara wera alan," hyek. 6:15 Wenyaboka, sikda nimi gong dara, Yesus ak duka' lolowoka sikja senenggom dubnya sekiyiwanoba' aboka yanamaka' eiyimok dara, Yesus ara anyagan loboka albeyok gokoka meinik sam bilimok. 6:16 Ban sum enyek sin dangoka inilyabok dara, Yesus yuba doboka diriga ban nang era, Galilea mek gemek yingginiboka, 6:17 mek ekla' buna' ak bukumek. Dara, sikda Kapernaum heik binoba' aboka garal balamek. Ban salek era seleb inimok bok, Yesus ara sik dam ak berra yanggumok. 6:18 Dara balamek bok, senenggom kabo' doroklomok bok adya, mek yakna' neboka eillilimok. 6:19 Sikda hyak mok mek hnoumunga ono' pukgiga balamek jok, saaboka keemek enyek, Yesus ara mek dub pik yan inibgiga mek ekla buna' berem yalamoka' eiyimek. Dara, sikda hyak ganya loka dasuk. 6:20 Bok, Yesus ara sikenek, "Nera na anasa, ugunda lok ganya bonggom mem," hyok. 6:21 Dara, alja yuba doboka diriga ban nang edya perob aboka Yesus ak mek ekla buna' ak yalom aboka unul yabek sab-sab, sikja mek ekla buna' era seleb mek gemek lanal bilimok. 6:22 Ampum so maboka gwelegok dara, or anyagan anam ulumek nim ara, mek ekla buna' ara hnonok ulumok bok, Yesus ara buknenggumookanya, alja yuba doboka diriga ban nang ok bukoka seleb bilimeka' eiyimek. 6:23 Bok, ono' yok mek ekla buna' hnon Tiberias heikek ab yeiniboka Yesus gwanenga soboka Imik Neyung ak molomok enyek demek oulyang berem mal yalamek. 6:24 Dara nera, Yesus ab alja yuba doboka diriga ban nang ab, anyagan una' eibnenggumek dara, nimi nauba ara mek ekla buna' bukoka, Yesus ak ebgiga Kapernaum heikek bilimek. 6:25 Dara sikda nimi gong dara, eer bindiwoka Yesus ara mek gemek ok an ulumoka' eiyimek dara alak, "Neklesilimnya o, anda hek sum ek anyagan yeilimom do?" aboka heibek. 6:26 Yesus adya sikenek, "Nara ugunuk dib lebsin, ugunda nak elenulumnya nenera, nadya yoka'-yoka' lok so' ak unulamna' anyek eiyiboka dib seneluma' adya goma'. Ugunda gwaneng deregoka pe demab senelumukanya, nak ebgiga yalanulum. 6:27 Anasa wera, ugunda blolomla songa lelemla gwaneng emba yeiriwoka wenggom mem. Nimi nonga ganya embenga' nenelesil gwaneng enesa, yeiriwoka welelulum. Ban gwaneng era nimi diba' me adya eleganesil. Alja neyung bedya pe unulamna aboka alak bekna' beiyimok anasa, alja ugunuk eleganesil," hyok. 6:28 Dara sikja Yesus ak, "Wera Imik Neyung adya senelelanya nenyek webnoba' aboka, heka' ak unuwanamab do?" hyek. 6:29 Dara, Yesus adya sikenek ara, "Imik Neyung adya ugunuk unuwaneseng senelamla' ara, alja bokol yeilimoknya bek dib senewoka doloseng senelamla," hyok. 6:30 Dara sikja, "Wera neyung o, nunda anak dib senewagenoba' aboka, hek lok so' una' nu hogung ek unuwanalam do? 6:31 Nunja neyung yabo Kanaan heik balamek sum era, mok dum-duma' gwanenga delemek, Nera Imik Neyung adya imik heikek ab, gwaneng eleklesuk aboka, momnya dobek sok, delemek," hyek. 6:32 Dara Yesus adya sikenek, "Nara ugunuk dib lebsin, Musa bedya imik heikek ab gwaneng eleganggusuk. Bok, nadya' neyung bedya embenga' un gwaneng diba' imik heikek ab eleklesil. 6:33 Imik Neyung adya eleklesil gwaneng diba' ara, imik heik ab yeiniboka soko nim ek embenga' una' eleklesilnya bera alan," hyok. 6:34 Dara, sikja Yesus ak, "Neyung o, ban roti gwaneng era, nuk soba' eleklesilom," hyek. 6:35 Yesus adya sikenek, "Na nong anyek nim embenga' ul eleksin gwaneng era alan. Heknedya nak yanamla dara, alda gwaneng oka soba' unggulumnamla. Ono' heknedya nak dib senewanenel dara, alda mek ok unggulumnamla. 6:36 Bok, nara ugunuk seleb wenyasisa sok, ugunda nak okoka nong eillilinuluma' anababya, ugunda nak dib senenggulunulum. 6:37 Nidya' Imik Neyung adya eleklenel nim era nak yanamak dara, bindowoululum aboka wekdo boboganggunusin. 6:38 Anasa, nara Imik Neyung heik ab yinggilimsa' ara, nadya ganya doboka yoka'-yoka' unulununa' aboka yanggumsa bok, na bokol yeilinyoknya unuwosulul senelamla' anyek, unulununa' aboka yeilimsa. 6:39 Na imik heikek ab bokol yeilinyoknya bedya dara, nak seinilenela ara, alja nak eleklenelnya nera, ben hnonok sirik anababya weininggoka dengana' ara mem. Anasa, alda nidya' gobdo sidya' daknamla sum era, embenga' bukiyiwosulul, senelenel. 6:40 Anasa wera, nadya' neyung bedya alja orowek senelamla' ara, nak heng eiyiboka dib senelemak nimi nidya' ara, dib ulmoubna' ganya dobnamak senelamla. Dara, sidya' daknamla sum era, nara sikenek embenga' bukoka sekiyiwanesin," hyok. 6:41 "Nara imik heikek ab yinggilimsa embenga' una' gwaneng era nara alan," hyok. Anasa, sikda Yahudi nang alak wab einimek. 6:42 Dara sikja, "Al nong ara Yesus, alja' neyung bera Yusuf. Alja' genonga neyung ara nunda seleb ella ulumab bok, hekasa nara imik heikek ab yeilimsa alamla do?" alamek. 6:43 Anasa, Yesus adya sikenek, "Ugunda nak waboka lenenggom mem. 6:44 Nimi ben hnonok anaba nak bokol yeilinyoknya bedya, glina' orok dara, nak yanggunumso bok, sidya' daknamla sum era, nak yanalanya bera embenga' bukoka sekiyiwanamna. 6:45 Ununumna' lelemek nang bukuk ara, sikda nimi nidya' ara, Imik Neyung adya eimik wenewanesil, aboka momnya domek. Anasa, heknedya Imik Neyung bek pe keboka, alak ab dolomla dara, alda nak or yanenel. 6:46 Ban wenyhenya nera, nim adya hnon Imik Neyung ara laga eiyirob ak lebnenggubna. Alja bokol yeilimoknya be hnonok seleb neyung bera heng adya okoka eibok. 6:47 Nara ugunuk dib lebsin, dib senewoka dololenya bera, seleb dib ulmoubna' ganya, alja ganya lomok ulumla," hyok. 6:48 "Nara nim embenga' una' eleklesin gwaneng era alan. 6:49 Ugunja neyung yab hola' seknenggulumok sokok, Kanaan heikek Mesir ab balamek sum enyek, mok dum-duma' gwaneng delemek bok, somogomek. 6:50 Bok, wen lelemna' ara, imik heikek ab yinggilimok gwaneng enyek, delemeija nim era, somoganggunumak. 6:51 Imik heikek ab embenga' una' gwaneng yinggyuka' ara, na nong ulumna. Anasa, heknedya ban gwanenga delenya bera, hyak sob-soba' or ulmoublumnamla. Ban gwaneng era nadya nong ek lemna. Nadya nong ek, ban soko nim emba, nim embenga' ulunoka' aboka, eleganamna' ak lemna," hyok. 6:52 Yahudi nang era, Yesus adya ban wenyalamok yuba kemek dara, sik moumen yu ganya boboka nauba wabdangoka lelemekja, "Ban benera alja nong soub enyek nuk denoka' aboka heka' huboka eleganesil do?" alamek. 6:53 Wenyek Yesus adya sikenek ara, "Ugunuk hyak dib lebsin, ugunda Imik Neyung adya bokol yeilimoknya bedya alja' nong soub ab, alja eneng eb, denggulumnulum dara, embenga' una' ugunja' nong lomok sam unggulumnesil. 6:54 Heknedya nadya nong soub ab, nadya eneng eb, delenya bera, embenga' una' seleb ulumlakanya, sidya' daknamla sum era alak nadya bukoka sekiyiwanamna. 6:55 Nadya nong soub ara, hyak gwaneng nong diba' ulumla, nadya eneng era, den mek diba' ulumla. 6:56 Heknedya nadya nong soub eb, nadya eneng eb, delemlya dara, alda nadya' nong lomok sam ulumnamlakanya, nababya alja nong lomok ulumnamna," hyok. 6:57 "Nadya' neyung be embenga' ululanya bedya nak bokol yeilinyok dara, nababya al adya ok ulumna. Anasonya neikik, heknedya nadya nong ak delenya bera, nadya nong adya ok ulumnamla. 6:58 Dara, imik heikek ab uboka sokok yinggilimok gwaneng ban e. Ban gwaneng ara ugunja neyung yab edya Kanaan heikek balamek sum delemek gwaneng anaso goma'. Sikda seleb demek dara, nidya' somogek bok, heknedya ban lemna gwaneng denelanya bera, alda hyak diba' ulmoublumnamla," hyok. 6:59 Yesus adya ban nidya' leboka' ara, Kapernaum heikek Yahudi nim edya yuba don ek ab yuba lelesuk sum enyek lebok. 6:60 Yesus adya, ban yuba nauba neklesuk sum enyek, alja lelemok yuba dobdongoro balamek nang era, "Ban lelesil yub enera hyak gasa nong anasa, heknedya keboka dobnamso' ak lelemla do?" wenyalamek. 6:61 Yesus ara, alak yuba doro diriga ban nang era waldalameka' ara ganya lomok eiyisuukanya, alja dara, "Ban yub enedya ugunja ganya dangawom-dangawom aldalalum de? 6:62 Wera nimi diba' me nera onsok saaboka youma' ulumsa' ak welewanya' eibmun bok dara, heka' hubnalum do? 6:63 Embenga' ulmoubna' diba' ara Imik Neyung Geisinya adya eleklesil. Nimi nonga migib ara nera salya' nong anasa, nadya ugunuk lelesin yub era, ganya ak anasa, sikda embenga' ulumak. 6:64 Bok ugun gangganek an, nimi hnon dib senenggululum," hyok. Ban wenhyoka' ara, hek nang dib senewanggunumaka' hnon, al nong ak obnelum aboka yuba dil binimoknya benyek hnon, orowek ella ulumoka' anasa, lebok. 6:65 Ono' Yesus adya moruwoka, "Nimi ben hnonok sirik anababya, nadya' neyung bedya unuwolula' aboka aranggululenya bera, nak sam yanggunumla, amsa' ara, hnon dib senenggululuma' anasa lemsa," hyok. 6:66 Ban wenhyok sum enyek moruwoka, alja lelemok yuba doro diriga ban nang nauba ara, losaaboka alak diriga banggulumek. 6:67 Dara, Yesus adya alja obadya diriga ban nang ek, "Ugumbabya hnon binimab senelelum de?" husuk. 6:68 Dara, Simon Petrus bedya Yesus ak, "Neyung o, nunda heknya ak binisibya do? Embenga' ulmoubna' yub ara anak danyek ulumla. 6:69 Anak danyek, Imik Neyung adya geisa' ak bokol yeilinjoknya ululama' ara, nunda dib senewoka ella ulunjab," hyok. 6:70 Danyek, Yesus sikenek, "Wei, ugunda obadya nang enera, nadya sekiyisisa' an anano? Bok, ugun gangganek ara, ben hnon bisa' me ulumla," hyok. 6:71 Ban wenhyoknya nera, Simon Iskariot bedya me Yudas bera, obadya nang ulumekjok, al hnonok yuba dil binimoknya benesa lemok.
7:1 Ban nidya' seleb unuwoka lebgogomok dara, Yahudi dub nang edya obnoba' aboka ulumeka' anasa, Yudea sokok yibinggunusinya senewoka, Galilea sokok sam uru yabalamok. 7:2 Ban salek enyek, Yahudi nang edya gal mekla' sangan sum perob sum oka dangamok. 7:3 Dara, Yesus ak alja weisa badya lebekja, "Anda yoka'-yoka' unulumen dara, anja yuba doboka diriga yalamak nang eillilinggenok bar aboka, anyagan Galilea sokok loboka, Yudea sokok binilam. 7:4 Nimi ben hnon alja lok so' unulamla' ara, laga senenggoma' nidya' oboka lelewolula' aboka dara, doknoboka gelelenga unuwanggunumso. Seleb unululama' anasa, nimi nidya' hogung ak amalesilom," wenhyek. 7:5 Alja weisab eneba, Yesus ak dib senewanggumekjok lemek. 7:6 Dara, Yesus adya sikenek, "Nasamba dara, unun salek anam bok, ugunsamba ununa' ara salya' ulumla. 7:7 Soko nim edya dara, ugunuk ara lek senenggulusak bok, nak dara, sikja unulumaka' anyek, malya' aboka pyaga' geblamna' anasa, sikda nak lek senelenyak. 7:8 Yahudi nang adya senenggoma' perob sum meewanamaka' ak ara, or ugumbeyok bululum e. Nak ban salek era anam unggulumla' anasa, binggunumna," hyok. 7:9 Ban wenyamookanya, alda Galilea sokok sam or ulwenelemok. 7:10 Bok, alja weisab era seleb perob sum meewanoba' aboka Yerusalem heikek bilimek dara, ono' albabya eimik gelelinga aboka dobgiga nim eilina' oroka' anyek bilimok. 7:11 Dara, Yahudi nang era, senenggoma' memelemeka' ak sam Yesus yalamla gom aboka kemelemeekanya, alda hanyagar ulumla do? aboka heilisik. 7:12 Dara, ban perob sum enyek, Yesus amba o lomok yuba nauba saro yabalameekanya, hnon nim edya dara, "Alda perobnya," alamek. Bok ono' hnon nim edya dara, "Orok, alda nimi malya nenewoka sonda' amba bobnenewoka lelesilnya," alamek. 7:13 Bok, Yahudi dub nang enyek lok anasa, nimi ben hnonok adya' anaba, laga lebnenggumek. 7:14 Yahudi nang perob sum anam mamagemeka' hnoumung bok, Yesus ara Imik Neyung ek wekoka anyagan yuba leb einiwousuk. 7:15 Dara, Yesus adya lero neklesuk anyek eiyiboka, Yahudi nang ganya loka daboka lelemekja, "Alda sekolah dona' ara orok bok anasa, heka' adya ban anaso lero neklesil do?" alamek. 7:16 Anasa, Yesus adya sikenek lebokja, "Nadya neklesinya nenera, nadya goma'. Alda Neyung be na bokol yeilinyoknya bedya lenyoka' ak neklesin. 7:17 Imik Neyung senelamla' anyek, dib unuwonun senelelanya bera, nadya neklesina' anara, nadya ok ganya doboka salya' neklesin gom, Imik Neyung ak aba' ak neklesin gom ara ella danamla. 7:18 Nimi be hnon alja neklesila' ara, alja ganya doboka sonda anasa, lelemla dara, alda yok nim edya nak gigilenenoka' aboka hogung bo amalamla bok, al bokol yeilinanya bek si imik dolula' aboka lelelanya bera, alda hyak dib ok ulumlakanya, alak ara sonda' yuba unuruwa' ara alak meka' unggulumla. 7:19 Musa bedya nim onggom, yoka' salya' ununggom aboka, Imik Neyung adya unuwanalum an yub era seleb ugunuk elegosuk. Bok, ugunuk dara, be hnon ban yub en keboka ununggulumla. Dara, hekasa nak obnenoba' aboka ulunulum do?" hyok. 7:20 Dara ban nimi nauba longomek nim edya alak, "Anda bisa' saleka lenggel de? Heknedya anak ara obgununa' ulunggela' anasa lelelam do?" hyek. 7:21 Dara, Yesus adya sikenek ara, "Nadya dara, lok so' ara seleb hnonok unuwasa dara, ugunda seleb eiyiboka ganya loka dabsuk. 7:22 Bola' garelelulum aboka, Musa bedya yuba weboka elegosuka' anasa, Sabat mem sum bok, merewoka bola' garelelum. Dara, ban yub era Musa bedya gom, alda nunja' neyung yabo Musa be anam salek men youma' enyek orowek bola' garelemek. 7:23 Ugunja ban unululumnya nedya, Musa bedya unuwanalum an yuba blekibyek aboka unululumjok, nak dara, nimi nong ak Sabat mem sum bok hwesinya nenyek, hekasa walanulum do? 7:24 Anasa, ugunda laga eillilumnya nenesa leboka, salya' yana lelena' ara loblulum. Alda domdigum pe yana lelelelulum," hyok. 7:25 Dara, Yesus adya nidya' ban wenyaboka neklesuk sum enyek, Yerusalem heik yoka' nim edya, "Yahudi dub nang edya obnoba' aboka elemaknya bera alan gom? 7:26 Wera kendululum, alda laga sekoka neklesil bok, nim yok nim edya yuba alak sal eleknenggulumak. Anasa, nunja Yahudi dub nang adya dara, Imik Neyung adya Kristus nimi blebsina' dubnya eleganesin amoknya bera alan, eiyimaka' anasa, lolomak gom? 7:27 Bok, Imik Neyung adya sokok nimi blebnamla aboka yanalanya Kristus ara, al yalya pik era, nim adya dara, ella danggunuseng bok, ban benyek dara, alja mok nunda seleb orowek ella ulumab." 7:28 Dara, Yesus ara Yerusalem Imik Neyung ek sam anam lelesuukanya, yuba senenggoma' bii aboka lelemokja, "Al dib, ugunja dara, nara ella ulunulum. Nara hekmok eba' ak yasa' ara ella ulunulum bok, nara yasa' ara nabeyok salya' ganya doboka yanggubsa. Bok, na bokol yanyoknya bera alda hyak dib nong ulumla. Ugunda alak elgom ululum bok, 7:29 nara alak ab bokol yanyoka' anasa, nara alak ella ulumna," hyok. 7:30 Ban sum enyek Yesus ak Yahudi nang edya salawoka henga gobnoba' aboka ulumek bok, alja unun salek anam danggumoka' anasa, nimi soruk hnonok sirik anaba alak salawanggumek. 7:31 Bok, nimi nauba longomek nim era Yesus ak dib senewoka lelemekja, "Kristus adya nimi blebnesil aboka eimik eleganesilnya yalya dara, ban ben unulamla sok, yoka'-yoka' lok so' anyek bekna' diba' unuwanamla de?" hyek. 7:32 Parisi nang edya, nimi nauba Yesus ak migiboka yuba ngorokna' dero balameka' kemek dara, sikeneb, yuba wa gaka' dub nang eb dadya, Imik Neyung ek keeboka bo ulumek nang ek, salawoka henga goubol bululum aboka orugumek. 7:33 Danyek, Yesus adya lebokja, "Nara sokok an ugunublaboka ulumnamab salek era, hyak mek ok ubla' anasa, ban nen seleb dara, na bokol yeilinyoknya bek saaboka binimna. 7:34 Nadya ulumnya' ak ara, ugunuk dara, yamenggom anasa, ugunda nak elemnelum bok, eibnenggununulum," hyok. 7:35 Dara, Yahudi nim sik moumen heibdangoka lelemekja, "Na binya' ak ara ugunda eiyiboka yanggunusom alasil dara, heka' huboka eibnenggunusibya' anasa lelemla do? Gom, Yahudi nim enyek, Yunani nim eblaboka mok sam soboka ulumak nim ek biniboka, Yunani nim ek neklesununa' aboka lelemla gom? 7:36 Ugunda nak elemnenulum bok, eibnenggununulum, ugunda na ulumnya' ak ara, yanggununulum alamla dara, hek damok enesa lelemla do?" aboka lelemek. 7:37 Yahudi nang edya perob sum sidya' longob dakamek sum enyek, Yesus ara sekoka bii aboka yuba nauba lelemokja, "Heknedya mek ok ublya dara, or nak an del youlul. 7:38 Imik Neyung yuba momnya doboka' ara, heknedya nak dib senewanenel dara, alja ganya lomok ab sam nim embenga' una' meka goblemnamla," hyok. 7:39 Yesus adya ban wenhyoknya nera, Imik Neyung adya' Geisinya benesa lemok. Ban salek era, Yesus si anam imik nenewanggumeka' anasa, Geisinya bera anam eleganggusukjok, Yesus alak dib senewanamak nim era Geisinya dobnamak aboka lelemok. 7:40 Ban wenyaboka Yesus adya yuba leboka neklesuk sum enyek, nimi darasam sik gangganek sam ab lelemekja, "Senenggom ununumna' lesinya eimik yanamla alameknya bera alan e," alamek. 7:41 Bok, ono' yok nim edya lelemekja, "Soko nimi blebsina' dubnya Kristus bera alan," alamek. Bok hnon yok nim edya dara, lelemekja, "Mab e, nimi blebsina' dubnya bera Galilea sokok aba' ara ura yalamso goma'. 7:42 Imik Neyung yuba momnya doboka' ara, soko nimi blebsina' dubnya Kristus bera, Daud nang yila' ak bok anasa, Daud ulumok heik Betlehem heik ab ara yanamla hyok," aboka lelemek. 7:43 Anya wenyaboka, nimi nauba Yesus amba ganggana' lolobdangoka obdanoba' ulumek. 7:44 Dara hnon nim edya, Yesus ak salawoka henga goubnoba' ulumekjok, ono' Yesus ak ara, soruka meka' bebeganggumek. 7:45 Ban sum enyek, nimi pika welesik nang edya, pik losaaboka yeilimek dara, Parisi dub nang eb, Yahudi yuba wa gaka' dub nang eb dadya, sikenek heibsika' ara, "Ugunda hekasa Yesus ak salawoka henga goubnenggulum do?" aboka heibsik. 7:46 Pikek welesik nang edya lelemekja, "Nimi soko nim era, ban benedya lelemla sok hyak lenggulumak," alamek. 7:47 Dara, Parisi nang edya pikek welemek nang ek ara, "Dara, ugumbabya hnon aladya gliboka bo balasil de? 7:48 Nimi hnon Yahudi dub nang ek ab hnon gom, Parisi dub nang ek ab hnon gom, Yesus ak dib senemek de? 7:49 Bok, nimi nauba Musa bedya unuwanalum an yub ek elgom ulumak anasa, wera sikenek malya ullisina' ak ulusil," aboka wabsik. 7:50 Dara, Nikodemus bera, neikek hiboka yuba salameknya bok, al men Yesus ak bilimoknya bek adya sikenek lebokja, 7:51 "Nunja unuwanalum an yub ek ulumla' ara, ben hnonnya bek alja unulam so' anyek keboka eibnenggusibya bok dara, yana lelewanesibya de?" hyok. 7:52 Sikda alak, "Wei, ambabya Galilea mok ebnya de? Nidya' Imik Neyung buku sam lelewoka einiwanalamakanya, ununumna' lelelanya bera, Galilea mok eba' ara, yanggunumla' eibnelam," hyek. 7:53 Dara, sikda nidya' sikja ek byik.
8:1 Bok, Yesus ak dara, Zaitun meinik sam bilimok. 8:2 Ono' Yesus maboka gwelegok dara, hyak luguna' nong enyek, Yerusalem heikek Imik Neyung ek yeilimok. Dara, nimi nauba al damak mamagal yeilimek dara, alda bukoka, ono' Imik Neyung yuba sikenek lelesuk. 8:3 Ban salek enyek, Yahudi yuba neksin nang eb, Parisi nang eb dara, malya umok gel gek bomeekanya, Yesus ak yeiniboka gel ak anda hnon laga seklom aboka orugomeekanya, 8:4 Yesus ak lelemekja, "Neklesilimnya o, ban gel gen era malya ul yabok enyek eiyimaka' anasa, bo yeilimab. 8:5 Dara, Musa bedya unuwanalum an yuba nuk lebsuka' ara, ono' ban anaso malya ubija geleb ara, girik adya salya' ololulum amok anasa, wenyek anja dara, heka' senelam do?" aboka heimek. 8:6 Ban nenera, Yesus adya dara hek hulul do aboka, alja wenyhelya' yub edya alak malya uyiwanoba' aboka sene heimek. Bok, Yesus sokok sam genib lobonggoka, soruk adya soko dubuk momnya dolomok. 8:7 Yahudi nang adya sene hek hulul do aboka Yesus ak saaboka heildibilloklemek dara, alda sekoka sikenek lebokja, "Wera or ugun gangganek sam ara, malya una' oroknya bedya, gel genyek, men girik adya doboka oblul," hyok. 8:8 Dara, Yesus ara onsok sokok genib lobonggoka soruk adya soko dubuk momnya dobok. 8:9 Yesus adya ban wenhyok yuba kemek dara, Yahudi nang era, nauba nang sok ab ara, mek nang ek moruwoka, hnonok-hnonok sen-senem aboka balameekanya, dengaboka, gel ab Yesus ab ok, anyagan lobsik. 8:10 Dara, Yesus ara sekoka gel genyek lebokja, "Genong o, sikda har sam byak do? Anak ben hnon ogena' orok de?" hyok. 8:11 Wera, gel genedya Yesus ak, "Neyung o, yo orok," hyok. Dara, Yesus adya malya umok gel gek lebokja, "Nababya obnenggununggena' anasa, amba or binilam bok, wenera malya una' pik ara hyak lobongganalam," hyok. 8:12 Dara ono', Yesus ara nim ek yuba lelesuk dara, lelesukja, "Nara sokok an dilina' ulumna e. Anasa, nak diriga yalanelnya bera, alda embenga' dilina' ak sam ulmorulumnamla," hyok. 8:13 Dara, Parisi nang adya Yesus ak lebekja, "Anja unululama' ak ara, an damnya bedya ok leldalalama' anasa, ban yuba dib senewanggunenjab," hyek. 8:14 Bok, Yesus adya Parisi nang ek lebokja, "Na yasa' ak ara, ono' saaboka binimna' ara, ella ulumna bok, ugunuk dara, hyak dib lelemna. 8:15 Ugunda nim adya unulumaknya nenesa sunuwoka yana lelelelum bok, nak dara, nimi hnonok sibin anaba yana kinggulusin. 8:16 Dara ono' hnon, nabeyok unggulumna, Neyung be nak sokok bokol yeilinyoknya bera, nablaboka ulunama' anasa, nadya yuba lelel yabasinya dara, hyak bekna' dangalamla. 8:17 Musa bedya unuwanalum an yuba momnya doboka' ara, Nimi penya yuba lelerak dara, nera pero balamla, alamla. 8:18 Anasa, nadya unulamna' ak dara, nak hnon leldalamna. Neyung be, na sokok sam bokol yeilinyoknya bedya hnon nak lelenel," hyok. 8:19 Parisi nang edya alak, "Anja' neyung bera hanyagar ulumla do?" aboka heimek. Dara alja dara, "Nunda penya nidya' ugunja dara, elgom ulusulum. Ugunda nak ella ubnesom dara, wera nadya' neyung anaba ella ubnesom," hyok. 8:20 Yesus adya ban nidya' wenyaboka leboka' ara, Yerusalem heik Imik Neyung ek sam rupiah beillilimeka' ok berem sekoka lemok. Bok ban salek era, alak obnemek salek anam danggumoka' anasa, nimi hnon alak salawanggumek. 8:21 Dara ono' Yesus adya, hnon saaboka leboka' ara, "Nara binya dara, ugunda nak elemnenulum bok, ugunuk dara, ugunda malya ubgiga balamnelumukanya, somoklomnelum. Ugunda na binya' ak ara, ugunda yamenggom dangalemnesil," hyok. 8:22 Dara, Yahudi dub nang adya heibdangoka lelemekja, "Na binya' ak ara ugunda yamenggom alamla' anasa, al damnya obdanamla' ak lelemla de?" aboka lelemek. 8:23 Dara, ono' Yesus adya sikenek ara, "Ugunda sokok ab yeililum, nara imik ab yeilimsa. Ugunuk dara, anyagan sokoknya nek ululum, bok nak dara, anyagan sokoknya bek unggulumna. 8:24 Ban damok enesa leboka, ousa era, ugunda ugunja malya una' ak sam somoganalum abmeisina' ara, ban nenesa lebmesin. Nera aldib, ugunda nak, bera alan senewoka, dib senewoka dobnenggununulum dara, ugunja meneng malya una' lomok sam somoganalum," hyok. 8:25 Dara Yahudi nang edya, "Wera anda ono' heknya do?" aboka heibek. Danyek Yesus adya sikenek lebsuka' ara, "Soba' lelesin sok ok ulumna. 8:26 Nadya ok ganya doboka yuba nauba ugunuk nekoka yana lelewanasisinya. Bok, nak bokol yeilinyoknya bera dib nong ulumlakanya, alja anyek leblul senewoka neklenelnya nok sokok lelemna bar," hyok. 8:27 Dara Yahudi nim edya dara, Yesus bedya ban wenyaboka lelemla' ara, Imik Neyung amba lelemla senewoka ella danggumek. 8:28 Anasa wera, Yesus adya ono' sikenek ara, "Ugunda Imik Neyung adya bokol yeilimoknya nimi diba' me, imik beibnelum sum enyek, nara heknya ulumna' ara, ella danalum. Dara, ono' nadya yoka'-yoka' unulamna' ara alja ganya doboka ununggulumok, alda al bokol yeilimoknya bedya lelemoka' ok sunuwoka lelemoka' ara, ella danalum. 8:29 Neyung be sokok sam bokol yeilinyoknya bera, nablaboka soba' neikik ulunam. Nara alja ganya perob senelamna' anyek, soba' unulamna' anasa, alda nak lo banggulunel," hyok. 8:30 Yesus adya ban nidya' wenyalamok sum enyek, nimi nauba alak dib senewoka domek. 8:31 Dara, ono' Yesus adya Yahudi nang alak dib senemek nang ek lebokja, "Ugunda nadya lelesin yub ek salabmoubmun dara, aldib, ugunda nak diriga yalalum nim ulumnulum. 8:32 Ban nenyek dib unulumun dara, aldib ugunda hekab-hekab dib ulumla' ara ella danalumukanya, ban dib una' enedya ugunuk gobdo lob lobnesil," hyok. 8:33 Sikda alak, "Nunda Abraham nang yila' ulumabakanya, nunda yok nimi wa wen nimi dangana' orok anasa, anda hekasa ugunda yok blebdangoka seknelum alasilim do?" hyek. 8:34 Anasa Yesus adya leboka' ara, "Nara ugunuk hyak dib lebnesin, Heknedya malya ululanya bera, alda malya una' amba wa wenya ulumla. 8:35 Wa welemna nang era, wa welenanya bedya ek ara soba' ulmorunggulumla bok, alja me yoka' ak dara, alja ek ulmorulamla. 8:36 Anasa wera, Imik Neyung me adya ugunuk bleboka sekiyiwesilya dara, wera danyek ugunda aldib seleb blebiyiwosuk nimi dangoka ulumnalum," hyok. 8:37 Dara, ono' Yesus hnon leboka' ara, "Ugunda Abraham nang yila' ululuma' ara eillilisin bok, nadya yub enyek ugunja ganya lomok sam doboka beilina' orok bok adya, ugunda nak obnenoba' aboka ulunuluma' ara, nara ella ulumna. 8:38 Bok ugunuk dara, ugunja' neyung be yoka' adya lebnanya nok unululum. Neyung benya neika' ulunuma sum enyek eiyimsa' anyek, nara lelemna," hyok. 8:39 Dara, Yahudi nang lebekja, "Nunda neyung be yoka' ara Abraham ulumla," hyek. Dara, ono' Yesus adya sikenek lebsukja, "Ugunda Abraham nang yila' dib ulusom dara, alja pe unulumoka' anyek unulumnosoma'. 8:40 Nara Imik Neyung ak ab, dib yuba keboka neklesin bok, ugunda nak obnenoba' aboka dulunulum. Abraham bek dara, ban anaso unuwanggumok. 8:41 Ugunda ugunja' neyung be yoka'-yoka' unulamla' anyek unululum," hyok. Dara, sikja alak, "Nunda beiyik ab beiyisin nimi goma'. Nunja' neyung be nong diba' ara al Imik Neyung hnonok ulumla," hyek. 8:42 Dara, Yesus adya Yahudi nang ek leboka' ara, "Imik Neyung ara ugunja neyung be yoka' ulumso dara, nara nabeyok ganya doboka salya' lelem sokok an yanggubsa bok, Imik Neyung adya bokol yeilinyok anasa, ugunda nak wana' ulumnesom. 8:43 Hekasa ugunja ganya lomok sam ara, nadya lelesin yub era ella unggululum do? Nadya lelesin yub ek dara, kebla henggonggom ululuma' adya ella unggululum. 8:44 Ugunda bisa' dubnya bedya mab ululum. Ugunja' neyung Iblis dubnya bera hyak youma' ek moruwoka dib osina'anya ulumlakanya, alda hyak dib una' alak meka' unggulumla. Dib yub ak sam meka' uruma doboka neika' una' ara hyak unggulurak. Alda sonda' lena' hwam dubnya ulumlakanya, sonda' lelemla' ara aljinya nenesa, doumdigum dangalamla. 8:45 Bok nak dara, dib yub ek lelesin bok, ugunda nak dib senenggulunulum. 8:46 Ugun gangganek ab nimi ben hnonja nak sam anda malya ulum aboka bekna' laga aawaneneso de? Orok bok dara, dib nong yuba lelemna dara, ugunda hekasa nak dib senenggulunulum do? 8:47 Imik Neyung ak, al yalamak nim era Imik Neyung yuba perob aboka ganya gwelelek aboka dolomak bok, ugunda Imik Neyung mabo diba' unggululuma' adya, kenggululum," hyok. 8:48 Yahudi nang edya Yesus ak lebekja, "Imik Neyung yuba dona' elgom nang Samaria nimi bisa' gologoknya anjuba' ara, dib lenjuba do?" hyek. 8:49 Bok, Yesus adya sikenek, "Nara bisa' gologanenggom. Nara Imik Neyung bek imik nenelamna bok, ugunja danyek, nak derewoka walenulum. 8:50 Nara nadya ok ganya doboka nimi giblenoka' aboka imik neneldanggulumna. Bok Neyung bedya alja ganya doboka nak gibnoka' aboka memelenel. Alda dib yana lelenanya ulumla. 8:51 Nara ugunuk dib lebsin, nadya yub ek dib senewoka unululanya bera, alda somokna' hyak loboka ulmoublumnamla," hyok. 8:52 Dara Yahudi nang edya, "Nunja' neyung Abraham beb, yok-yok senenggom ununumna' lelemek nang enebabya, seleb somogek bok anasa, anja dara, nadya yub ek dib senewoka unululanya bera hyak dib somoganggunumla alama' adya, wera aldib anda bisa' gologonjoknya ululama' ella ulunjab. 8:53 Nunja' neyung Abraham beb, nidya' ununumna' lelemek nang era nidya' seleb somogomek bok lelelama' anasa, anda heknya do? Anda hyak senenggomnya bek ululam, Abraham bera meknya bek, anasa lelelam de?" hyek. 8:54 Dara Yesus adya sikenek lebsuka' ara, "Nara nim adya nak giblenenoka' aboka hogunga bo eldalasinya dara, dib danganggulumneneso. Bok nadya' neyung, ugumba nunja' neyung alalumnya, Imik Neyung bedya imik nenelenel. 8:55 Dara nera, Imik Neyung bek ara, ugunda elgom ululumjok, salya' lelem lelelum. Bok nak dara, alak seleb ella ulumna. Nadya Imik Neyung bek, nara alak elgom ulumna henesinya dara, ugun ululum sok, senenggom sonda'anya ulumnesinya. Bok, nara Imik Neyung bek ella ulumnakanya, alja yub ek dib senewoka unulamna. 8:56 Ugunja' neyung Abraham bera, nadya sum eimik yenewanamla' eibnamna' anyeka' aboka, alda hyak ei-ei ganya bolomok. Wera anasa, eimik seleb eibuk dara, hyak eiya dabok," hyok. 8:57 Dara, Yahudi nang edya alak, "Bablong o, anda gibna' denga penya ubnenggulam bok, Abraham bek seleb heng eiyilum de?" hyek. 8:58 Dara, Yesus adya sikenek, "Ugunuk dib lebsin, Abraham bera anam unggulumok salek, nak men ulumsa," hyok. 8:59 Banyek kemek dara, alak obnoba' aboka girika dol yabek bok, Yesus ara dengaboka Imik Neyung ek sam ab loboka byuk.
9:1 Dara, Yesus ara pikek sam yabalemookanya, naubenya bok beiyimek salek eba' ara henga luma yeilimoknya bek hnon eiyimok. 9:2 Dara, Yesus yuba doro diriga ban nang edya Yesus ak, "Neyung neklesilimnya o, ban nenera hekasa anam beibek salek eba' moruwoka henga lum ubmoruwok do? Nera damok ara alja malya una' edya gom, alja' genonga neyung adya sikja malya una' edya ubok gom?" aboka heibek. 9:3 Dara Yesus adya, "Anam beiyimek salek eba' henga lum ubmoruwoka alja malya ulumoka' amba, alja' genong alja' neyung adya malya ulurek amba goma'. Alda Imik Neyung migib adya welemla' laga dalya enyek nim eibnoka' aboka ubok. 9:4 Guna' yanamla salek era wa webnamenggom anasa, yubyek dilina' ubla salek ok, na bokol yeilinyoknya bedya wa era yeiriwoka welemnemab. 9:5 Bok, nak anam sokok ulumna salek enera, nara soko amba dilina' ulumna," hyok. 9:6 Yesus adya wenyaboka lebgogomok dara, gamala' sokok solowoka, gamala' ak an soruk adya sokok ninim-ninim amoka' seleb dara, henga lumnya bek alja heng ek sam ngikikookanya, 9:7 alak lebokja, "Siloam mek gwanek anja hogung enyek mek elegeldal bilom," hyok. (Siloam ara nunja yub era orugomoknya ulumla alamla). Henga lumnya bera bilimookanya, seleb mek elekdok dara, on pik saaboka heng eibgiga yalamok. 9:8 Bok, henga lumnya bedya e ok berem nim eb, al bulumoka' soba' eillilimek nim eb dadya, "Pikek sam soba' yoka'-yoka' mololdo bulumla' eillilimabnya bera alan gom?" alamek. 9:9 Dara, hnon nim edya dara, "Bera alan," alamek. Bok, ono' hnon nim edya lelemekja, "Yok nang bok, henga luma yoknya bedya hogung eneso ulumla' adya," alamek bok, henga luma yeilimoknya bedya lebokja, "Nara mololdo bulusinya bera alan merewan an," hyok. 9:10 "Dara, heka' hunggela' adya anja heng era luma dengaboka onsok eika' merewalam do?" aboka heibek. 9:11 Dara alja lebokja, "Yesus aboka si silimaknya bedya, soko anyek bena meewoka, nadya' heng ek ngiknelekanya, Siloam mek gwanek hwildal bilom aboka orugunel dara, nara Siloam mek gwanek hwil bilibman dara, nadya henga lum ara dengaboka merewan," hyok. 9:12 "Dara, bera hanyagar do?" aboka heibek bok, alja dara, "Nab elgom," hyok. 9:13 Dara, bera doboka bobek dara, Yahudi dub nang ek bo byik. 9:14 Yesus adya sokok gamala' solowoka bena niniwoka henga lumnya bedya henga gwelegoka hwemok sum era, Yahudi nang Sabat mem sum ek hwemok. 9:15 Wera ono' Yahudi nang edya, "Anda heka' hulama' adya anja heng ara merewoka kemelelam do?" aboka heimek. Dara, alja lebokja, "Ben hnonja ben anyek gamala' ablaboka niniwoka nadya' heng ek an nininelekanya, mek elegeldal bilom aboka oruganel enyek, mek elekdan dara, merewoka eiyimna," hyok. 9:16 Dara, Parisi nang hnon nang edya lelemekja, "Sabat mem sum bok alda wa welemla' anasa, alda Imik Neyung ak ab yanggubok," alamek. Bok, hnon nang edya danyek, "Malya una'anya bedya anaso lokso' anyek bekna' diba' unuwanamso' goma'," aboka nauba lelemeekanya, sik moumen ganggana' lololdalemek. 9:17 Dara, ono' heng luma yeilimoknya bek saaboka lebekja, "Anja henga seleb hwebgela' anasa, anja dara, heka' alak lebnelam do?" hyek. Dara, alja leboka' ara, "Alda ununumna' lena'anya ulumla," hyok. 9:18 Bok henga luma yeilimoknya bek, alda men danyek aldib luma yeilimok bok, wen era henga gwelegal aboka dib senena' loboka, henga lumnya alja' genong neyung ak yorurum aboka lebekja, 9:19 "Ban ara aldib ugunja henga luma umoka' ak beibdum me nera alan de? Dara ono' Hekasa wenyek dara, henga gwelegal do?" aboka heibsik. 9:20 Dara, henga lumnya bedya alja genonga neyung adya lebdekja, "Aldib beiyinum sum enyek henga luma dookanya, alda nunja me yoka'," herek. 9:21-22 Bok Yahudi nang edya, nimi nidya' ak lebekja, "Kristus ara nimi blebsina' dubnya al yabija nim era yuba dona' lobnamak," hyeka' anyek, lok ganya boreka' anasa, sik nang penya edya lebdekja, "Heka' humla' adya henga gwelegala' ara numba elgom ono' heknedya umla ek meremla' ara nunda elgom anasa, alda seleb nauba neboka' anasa, nara ban adya henga luma denganel henelula' aboka alak heiblulum." 9:23 Yahudi nang edya malya nenewanasab aboka lebeka' anyek lok anasa, alja' genonga neyung adya, "Alda seleb nauba newoka' anasa, alak heiblulum," herek. 9:24 Dara, ono' henga luma yeilimoknya bek yalom aboka youbomek dara, "Ban ununggelnya benyek malya una'anya ulumla, ella ulumaba' anasa, henga luma denganggela' anyek, anadya unel aboka Imik Neyung si ok giblom," hyek. 9:25 Wera, henga lumnya bedya sikenek lebsuka' ara, "Nak hwenelnya bera, alda malya una'anya gom, perobnya gom ara, nara elgom. Hnonok ella ubna' ara, youma' dara henga luma ulunyok bok, sum enyek merewana' ok ella ubna," hyok. 9:26 Bok, ono' Yahudi nang edya saaboka heibeka' ara, "Heka' anak unuwagel do? Ono' anja dara, heka' huboka henga gwelegoka eiyilam do?" aboka heibek. 9:27 Dara, sikenek lebsuka', "Nara ugunuk seleb saaboka li penya neksin bok anasa, ugunda alja diriga ban nanga danoba' aboka lelelum gom? Hekasa soba' saaboka heilinulum do?" aboka lebok. 9:28 Dara, henga luma umok bok meremoknya bek waboka lebekja, "Anak danyek Yesus bedya yuba donya bok, nunda Musa bedya yuba don nang ulumab. 9:29 Nunda Musa benyek Imik Neyung yub adya alak yuba salamoka' ella ulumab bok, anja lelelamnya bera hanyagarab yoka' anaba numba elgom ulumab," hyek. 9:30 Alda wenhyoka' ara, "Wera loka dabnel! Nak seleb henga lum sirika' nong bok hwebnel enyek gwelegoka eibnabok, ugunda al yok pik elgom ululuma' anasa, loka dabnel. 9:31 Imik Neyung ara malya una' nim edya molona' kenggulusil bok, alda pe uboka alja senelamla' ok unulumak nim enyek sikja molona' kelesil. 9:32 Youma' ek moruwoka wene salek enera, me beillilamna sum ek ab henga luma unanya bera, nim adya heng gwelegiyimek ana' ara kenggulumak. 9:33 Nak hwebnelnya bera, Imik Neyung ak ab yanggumso dara, alda yoka'-yoka' unuwanggunumso," hyok. 9:34 Dara, Yahudi nang edya alak lebekja, "Anda hyak beiyik ab beibjeknya bok anasa, anja nuk neklesilima' de? bilom," aboka yakek. 9:35 Yesus ara alja henga lumnya bok hwemoknya bera, Yahudi nang edya alak yakeka' kebok dara, alak eiyiboka lebokja, "Anda nimi diba' me nek dib senelelam gom orok gom?" aboka heibok. 9:36 Bok ono' hwemoknya bedya Yesus ak lebokja, "Wenelesilimnya o, nera heknya ek lelam do? Nara alak dib senewonuna' aboka neknelom," hyok. 9:37 Dara Yesus adya lebokja, "Bera al anab neika' wen an yuba salarum an, seleb heng eiyilam an," hyok. 9:38 Dara, henga luma bok meremoknya bedya, "Wenelesilimnya o, nara dib senewan," wenyaboka Yesus ak koma lumugoka gimok. 9:39 Dara, Yesus adya, "Nara sokok an yeilimsa' ara, pe yana lelewoka unululanya nenyek, henga lumnya nenyek, henga gwelegoka eillilimnemak bok, heng eika'anya nera luma yalalula' aboka yeilimsa," hyok. 9:40 Hnon neika' ulumek Parisi nang edya ban leboka' kebek dara sikja, "Dara, ban wenyalalama' anasa, numbabya heng ubsuk de?" hyek. 9:41 Yesus ara sikenek, "Ugunda henga lum diba' ulusom dara, ugunuk ara malya una' nang henggunusisinya. Bok, heng larawoka eillilimab alaluma' adya, malya una' lomok anam ululum," hyok.
10:1 "Nara ugunuk dib lebsin, Nimi ben hnon, domba pama pik yoka' ak wekna' loboka yok pik gelelenga meknewoka weklelanya bera, alda hoka' donanya ulumla. 10:2 Anasa wera, domba pam pik yoka' ak uboka weklelanya bera, pama beilinanya yoka' nongnya bera alan. 10:3 Pam leka' ak sam welelanya bedya dara, pama beiyek yibinoka' aboka pika bakna dara, pam ara damnya bedya yuba keboka, nidya' ella' gigiro si yok-yok silisin dara, beiyik goboka mengelesil pika balamak. 10:4 Domba pama gong dara, nidya' seleb beiyik sam bo goubsin dara, domba damnya bera mengewoka balamna dara, sikda alja yub orowek ella ulumaka' adya, keboka eimik diriga balamak. 10:5 Bok yok salya'anya bek dara, alja yuba sana' elgom adya, yoknya bedya youbol yabasuso dara, alak kena' loboka yeiri biniseng," hyok. 10:6 Dara, Yesus adya ban yuba sunuwoka lebsuk bok, sikja dara, damok ara anasa lemla senewoka ella danggumek. 10:7 Dara, ono' hnon saaboka leboka' ara, "Nara ugunuk dib lebsin, Na nong anyek domba pam amba pik diba' ulumna. 10:8 Na pam damnya anam yanggunabok, yok nim enyek men yalameknya nera, hoka' dona' nang ek yalameekanya, sikja yuba sana' yok anasa, domba adya sikja yuba kenggulumek. 10:9 Nara pik nong diba' ulumna e. Heknedya pik diba' ak uboka weklelanya bera alak blebnamla. Dara, pik diba' pik bini yeini uboka perob dena' deregoka ulumnamla. 10:10 Hoka' dona' nimi yalamak dara, hoka' dobnun, nim obnun, malya uboka soldob menegonuna' aboka yalamak bok, nak dara, embenga' una' diba' elegoka, hyak nauba pe ulunoka' aboka yeilimsa," hyok. 10:11 "Nara domba pama pe beilinanya diba' ulumna e. Domba pama pe beilinanya dibnya bera, alja nong enyek pam amba somogamnya' anaba senelamla. 10:12 Bok, salya'anya rupiah deknenjaba' anasa, pama geregoka bo ululom ananya bera bo ulunabok, bei gama yanggana' eibna dara, nadya pam goma' senewoka, lok anasa pama loboka yeiri balamla. Dara, bei gam adya domba pama nidya' ara doluwoka ob menegoka yaklamla. 10:13 Salya'anya bera alda dekna' amba ganya hwiboka welemlakanya, domba pam ak ganya goluwoka bo unggulumla' adya, bei gam adya domba obnuna' aboka yanggan dara, alda lok anasa yeiri balamla. 10:14-15 Nara pe domba pama beilina' yoka' nongnya ulumna e. Neyung bedya nak ella ulunelekanya, nababya alak ella ulumna sok, anasonya neikik nababya nadya domba ak ella ulusin dara, sikda nak ono' ella ulunyak. Anasa, nara siksamba somogonun senelamna. 10:16 Dara ono' nadya domba pam gong dara, yok leka' ak sam hnon ulumak. Sikbabya hnon anyagan bo yanasin. Dara, sikda hnon nadya yuba pe keboka, anyagan orowek men ulumak pam eb neika' ak hibnya dara, nadya yoka' pama hnonok, nak pama beilinanya hnonok danamla. 10:17 Nadya nong anyek, saaboka dobnanabok, nim amba somoganesin senelamna' anasa, nadya' neyung nak wana' nauba ulunel. 10:18 Na nong ak dara, nadya ganya doboka or obnulum ana' orok bok dara, wera obnenggununeseng bok, nadya ganya doboka or ubnulum henesinya. Anasa, nara ganya doboka eleklesinya uboka, ono' saaboka onsok dona'anya ulumna. Ban wa nera Neyung bedya nak unu welelula' aboka elegenyok," hyok. 10:19 Yesus adya ban wenyaboka lebgiga balamok dara, Yahudi nang edya ono' nauba ganya bokdangoka ulumek. 10:20 Nimi nauba wenyalameka' ara, "Ban wenyalalanya nera bisa' gologoka serema salalamla' anasa, hekasa ugunda alak kelelum do?" aboka lelemek. 10:21 Bok ono' yok nang edya hnon lelemeka' ara, "Bisa' gologanggumna nang era yuba salamla' anasa, bisa' gologosonya bera henga lum nang ek henga gwelegoka hwebnamso de?" aboka lelemek. 10:22 Ban salek enyek, Yerusalem heikek Imik Neyung e meewoka pika bakameka' bekna' sum dangamok. An salek era saragena' li ulumok. 10:23 Dara, Yesus ara Imik Neyung ek Salomo bedya makoka somok e sindamak wekoka kemero yabalamok. 10:24 Ban sum enyek, Yahudi nang era Yesus ak aknel ganagal yeiniboka, "Anda nuk loba' nenelesilima' ara hek sum lobnesilim do?" aboka heibek. "Anasa wera, anda aldib Kristus nimi blebsina' dubnya ulumen bok dara, nara alan aldib ulumna aboka or laga poboka leblom," hyek. 10:25 Dara, Yesus adya sikenek lebsuka' ara, "Nara ugunuk seleb lebsisa bok, nak dib senenggulunulum. Nadya' neyung be si sibuka yoka'-yoka' lok so' unulamna' anadya, nak okoka bekna' laga lelesil. 10:26 Ugunda nadya pam unggululuma' adya, nak dib senenggulunulum. 10:27 Nadya pama yoka' ak dara, nara sikenek ella ulusinekanya, sikda nadya yuba keboka nak diriga yalanyak. 10:28 Nara sikenek soba' ulmorulunoka' aboka embenga' una' eleganesin dara, sikda hyak somoganggunumak. Nimi yok nim edya nadya soruk ak ab hyak bleboka dobnenggunusak. 10:29 Nadya' neyung bedya, sik nonga nak doboka elegenyoknya bera, yoka'-yoka' nidya' ara mek so bok, alda hyak senenggoma' imiknya ulumla' anasa, alja bo ulusila' anasa, alja soruk ak ab yoknya bedya bleboka dobnenggunusil. 10:30 Nab Neyung beb dara, hnonok ok ulunam," hyok. 10:31 Dara ono' saaboka Yahudi nang edya, Yesus ak girik adya doboka obnoba' aboka ulumek. 10:32 Bok ono' Yesus adya sikenek lebsuka' ara, "Nadya' neyung bek ab lanalamla una' enyek ugun hogung ak nauba unulusina' anasa, har nenyek malya unulamna' anasa girik adya obnenoba' aboka ulunulum do?" hyok. 10:33 Dara, Yahudi nang edya Yesus ak, "Anja pe unululam wa nenesa gom, alda an nong anyek nimi sirika' bok, nara Imik Neyung me aboka Imik Neyung ak malya nenelelama' anasa, girik adya obgenoba' aboka ulunjab," hyek. 10:34 Dara, Yesus adya sikenek, "Ugunja unuwanalum an yuba momnya doboka' ara, Imik Neyung adya, ugunda im nang ululum amok, aboka momnya dobok. 10:35-36 Anasa, Imik Neyung yuba doboka unulumek nim ek, im nang aboka si sisuka' anasa, wera nadya Imik Neyung bedya me nera, nara an alamna dara, ugunda hekasa nak malya lelemla aboka, yana kilinulum do? Nera Imik Neyung adya orowek muna' geboka sokok an bokol yeilinyoknya ulunabok unulunulum. 10:37 Nadya' neyung bedya nak welelom aboka elegenyok wa nenyek unuwoka wena' orok dara, wera ugunda nak dib senenenggom mem. 10:38 Bok nadya dara, unuwoka welenabok, ugunja danyek nak dib senena' orok bok, nadya welemna wa nenyek keeboka dib senewolulum. Anadya wera, Neyung bera nadya nong lomok ulunelekanya, nara alja nong lomok ulumna' ara, ugunda ella danalum bar," hyok. 10:39 Dara, ono' saaboka Yahudi nang edya, Yesus ak salawoka heng goubnoba' aboka ul yabek bok, alda sikenek ab loboka yokok byuk. 10:40 Dara Yesus ara, Yohanes Pembaptis bedya nimi youma' meka dalasuka' ak, Yordan mek gemek eer sam biniboka ulumok. 10:41 Dara, nimi nauba Yesus ak yalamek. Wera ono' sikja dara, "Yohanes Pembaptis bera alja dara, yoka'-yoka' hnon lok so bekna' diba' ununa' orok bok, alda yub adya ok benesemba nekoka unuwanamla alamoka' ara aldib lelemok," alamek. 10:42 Dara, anyagan ara nimi nauba Yesus ak dib senewoka dolomek.
11:1 Betania heik nimi si Lazarus, alja weisabo si Maria geb, Marta geb, neika' ulumek. 11:2 Ban Maria gera, Wenelesilnya Yesus bek perob song meka yan ak ngikoka, alja hong adya lubumok gel ge ulumok. 11:3 Dara ban salek enyek, Lazarus bera seleb neikna' salawoka neiklemok. Dara, sik penya al hmal gelewa Maria Marta adya, Yesus ak anja nauba wana' ululamnya bera seleb neiklamla aboka yuba beiyirek. 11:4 Wera Yesus adya Lazarus be neiklamla an yuba kebok dara, "Ban neiklamla neikna' edya dara, somokna' damoka lanawanggunulabok, Imik Neyung si imik nenen damba ban unulamla' adya, al dam nang si imik nenewoka, ono' al neiknya Imik Neyung bedya alja me nedya si hnon imik nenewanoka' aboka ulumla," hyok. 11:5 Wera Yesus ara, Lazarus beb, alja hmal gelewa Maria geb, Marta geb danyek, sikenek hyak wana' nauba ulusuk. 11:6 Bok Yesus ara, Lazarus be neiklamla an yuba seleb kebokjok, sene mandewoka al ulumok heikek li penya mamok. 11:7 Li penya maboka gwelegoka' seleb dara, Yesus alak diriga ban nang ek, "Nunda wen Yudea sokok sam ono' binimab," aboka orugusuk. 11:8 Bok, alak diriga ban nang edya dara, "Neklesilimnya o, eijanok Yahudi nang edya girik adya obgenoba' aboka ulunjongok sam ak anasa, anja dara or mok enyek an binob senelam de?" hyek. 11:9 Wenhyek bok, Yesus adya saaboka lebokja, "Li hnonok dara, dilina' ara obadya jam ulumla do? Wera anasa, ben hnon ara sokok dan dilina' ulumla' anyek, yubyek pe keeboka yabalamla dara, wera girik oluka diknenggunumla. 11:10 Bok, nimi ben hnon salya' inimnek yabalamla dara, alak dilina' unggulumla' anasa, yana girik oluka diknamla. 11:11 Yesus adya alak diriga ban nang ek ban seleb wenyabgogosuk dara, Wera nunja hem Lazarus bera hogunga mamla bok, gaaboka bukiyiwanamna' anasa, al ulumla' ak sam binimab," hyok. 11:12 Bok alak diriga ban nang edya, "Wenelesilimnya o, Lazarus bera hogunga malamla dara, wera merewanamla," hyek. 11:13 Yesus adya lemoknya nera, Lazarus bera seleb somogomoknya nenesa lemok bok, alak diriga ban nang edya dara, or hogunga diba' mamla' ak lemla, senemek. 11:14 Anasa wera, Yesus adya sikenek laga poboka, "Lazarus bera seleb somogok. 11:15 Bok, nak Lazarus be ulumla' ak sam unggulumsa' adya, eiya dabnel. Wenyek dara, anadya ugunda dib senewanalum dara, pewanesila' anasa, eiya dabnel. Anasa, wen nunda alak binimab," hyok. 11:16 Dara, Thomas yok si nera Didimus bedya, al kabo nang ek, "Nunda alab neika' somoganamaba' anasa, or Betania sam neika' binimab," hyok. 11:17 Wera Yesus ara seleb Betania heikek byuk dara, Lazarus bera seleb li dombadya soko lomok mamoka' ak eiyimok. 11:18 Yerusalem heik ab ara, Betania heikek ban dara, mok gom, ok so hnonok jam anaso balamak. 11:19 Wera sikja dong be Lazarus seleb somogomoka' anasa, Yahudi nanga nauba, Maria geb, Marta geb dak, sikja ek sam nimi saleka bul yeilimeekanya, ganya hek elekgiga yeilimek. 11:20 Marta gera Yesus yanggal an yuba seleb kebok dara, Yesus ak men pika dil byuk. Bok Maria gera or ek ulumok. 11:21 Dara, Marta gedya Yesus ak, "Wenelesilimnya o, anda anyagan ulusom dara, nadya' dong Lazarus bera somoganggunusobok, anak anyagan una' orok adya seleb somogok. 11:22 Bok, wene salek enebabya, anja Imik Neyung ak anyek unuwalom aboka molowamen dara, ono' unuwananggela' ara, seleb ella ulumna," hyok. 11:23 Dara, Yesus adya Marta gek, "Anja dong bera embenga' subnamla anya'", hyok. 11:24 Dara, Marta gedya leboknya nera, "Sidya' daknamla sum, nim embenga' bukiyiwanasil sum, albabya embenga' suboka buknamla' ara, nara seleb ella ulumna," hyok. 11:25 Dara Yesus adya, "Nara nim embenga' bukullilisinya uboka, nim embenga' nenelesinya ulumna' anasa, heknedya nak dib senewoka dolonelnya bera, seleb somogamlya' anaba embenga' bukiyiwanamna. 11:26 Dara, heknedya embenga' uboka nak dib senelenelnya bera, eimik era hyak dib somoganggunumla. Nera anda ella uboka dib senelam de?" hyok. 11:27 Dara, Marta gedya Yesus ak, "Wenelesilimnya o, nera nara dib senelamna. Anda aldib Imik Neyung bedya me ululamakanya, nimi blebsina' dubnya Kristus eimik sokok yanamla wenyameknya bera alan dib nong ululam," hyok. 11:28 Marta gedya Yesus ak ban seleb wenyabgogomok dara, saaboka bindiwoka Maria gek gelelenga lebenggemok, "Nimi neklesilnya bera anyagan seleb yalakanya, anak youlul aboka youbonggel," hyok. 11:29 Anasa, Maria gera Yesus ara seleb nuk yal an yuba kebok dara, men sekoka Yesus ak berra byuk. 11:30 Ban salek era, Yesus ara Betania heik nongok ara, anam wekel yanggumok bok, heik berem Marta genya yuba salareka' ak sam anam ulumok. 11:31 Dara, Lazarus somogomoka' anasa, Yahudi nang nauba nimi saleka bukoka, engeb arawoka ul yeilimek nim edya dara, Maria genyek berra sekoka byuka' eiyimek dara, alda nimi dilina' ak engel balamla senewoka, sikda alak eimik dobol bilimek. 11:32 Maria gera seleb Yesus ulumoka' ak sam bilimok dara, Yesus yan damak koma lumugoka lebokja, "Wenelesilimnya o, anak anyagan ulusom dara, nadya' dong bera somoganggunusobok, wera anak orok adya seleb somogok," hyok. 11:33 Wera, Maria gera engel yabok dara, Yahudi nim eneba engel yabeka' anyek, Yesus ara eiyimok dara, Yesus anaba ganya gololong aboka umok. 11:34 Dara, Yesus adya ganya angwei senewoka sikenek lebsuka' ara, "Lazarus bera har sam diblum do?" aboka heibsuk. Dara sikja, "Wenelesilimnya o, banasam dibuba' anasa, anyagan uboka kemel yalom," hyek. 11:35 Dara, Yesus anaba engena' salamok. 11:36 Yahudi nang edya, "Kendululum, Lazarus bek alda wana' nauba ulumla' ara alan," hyek. 11:37 Bok ono' yok nim edya dara, "Henga lum ulumla nang era hweleledyok dara, Lazarus bek ara somokna' loblula' aboka yoka' unumso do?" hyek. 11:38 Dara, Yesus ara ono' angwei senewoka, ganya nonga obdangoka, Lazarus be diyimek oulyang ak bilimok. Lazarus bera selenga' ak girik adya denewoka diyimek. 11:39 Yesus adya, "Diblum girik era demegolulum," hyok. Dara, Lazarus somogomoknya alja weis Maria gedya, Yesus ak, "Wenelesilimnya o, dibub salek era li dombadya maboka' anasa, songa lelemla bar," hyok. 11:40 Wera, Yesus adya Maria gek, "Nara anak seleb wenyanggena' ara, anda nak dib senewananelem dara, Imik Neyung adya' lok so' senenggoma' unuwanamla' ara eibnelam, wenyamna do?" hyok. 11:41 Dara, Lazarus diyimek girika jaboka laga beiyimek dara, Yesus adya imik keeb weininggoka, "Imik Neyung ak, anda nadya molona' kebnelema' anasa, perob aboka gibgen. 11:42 Nadya molona' soba' kelenelema' ara, seleb ella ulunadyok, anyagan nimi nauba ulumaknya nenesa, anja anyagan yoka' unuwamena' anyek eiyiboka, nak alda aldib Imik Neyung adya sokok bokol yeilimoknya dib senewananoka' aboka, or mololenggen," hyok. 11:43 Ban nen seleb wenyabgogomok dara, Yesus adya Lazarus soko lokomeknya bek, "Lazarus o, wera anda goboka yabalom," aboka bii aboka lelemok. 11:44 Dara, seleb somogomoknya Lazarus bera embenga' suboka lanabok. Alja hogung ab, nonga nidya', somogamna nimi waaboka dililimek boksom edya wamamek bok, suboka lanabok. Dara, Yesus adya, "Boksoma nidya' gwiriwomun dara, alda or yabalul," hyok. 11:45 Dara, Yahudi nimi nauba Maria gek nimi saleka bukoka ul yeilimek nim edya, Yesus adya ban unuwoka Lazarus bek embenga' suboka bukiyiwoka' ak eibek dara, alak dib senewoka domek. 11:46 Bok ono' Yahudi nimi darasam nim edya dara, Parisi nang ek Yesus adya unuwal aboka bo nekel bilimek. 11:47 Dara, Parisi nang eb, sikja Imik Neyung yuba wa gaka' dub nang eb adya, yuba sabnoba' aboka, mok soko dam nang ak molowoka, sikda nidya' eb bolobdangoka longowoka Yesus ara yoka'-yoka' hyak nauba lok so' ara bekna' diba' unulamla' anasa, nunda heka' hubnemab do aboka yuba salamek. 11:48 Nunda alak or unululul senewoka eil lolomeibya dara, nimi nidya' alak dib senewoka, ono' eimik era, Roma nang edya, nunja un mok soko alawanasaka' ak, alak eil lolomab aboka yuba salamek. 11:49 Ban salek, Yahudi nang yuba wa gaka' dubnya si Kayafas bedya, Yahudi nang ek lebokja, "Ugunda hyak elgom nang ululum. 11:50 Nunja soko malya uboka soldowoka denghelyek anasa, nenesa leboka nimi hnonok ara nimi nidya' amba lunuwoka somokna dara, ugunja dara, perob dolul senenggululum de?" hyok. 11:51 Nera Kayafas bedya ok ganya seiniwoka lebnenggumok. Alda ban salek yuba wa gaka' dubnya ulumok bok adya, eimik Yesus ara sikja soko amba somoganamoka' anasa, orowek ununumna' diba' men lemok. 11:52 Ban somoganamoknya nera, sik Yahudi nim emba ok lebnenggumok bok, nidya' Imik Neyung mabo bokgogoka ulumek nim enyek, bolowoka neika' ak nenewosulula' aboka somoganamoknya nenesa, ununumna' diba' lemok. 11:53 Dara, sum enyek aba' moruwoka, eiyiboka Yahudi dub nang edya, Yesus ak obnoba' aboka dulumek. 11:54 Anasa, Yesus ara Yahudi nang gangganek nimi hnoum uru yabana' loboka, alda Yudea sokok loboka, hola' sekna' orok sokok berem Efraim heikek biniboka, alak diriga ban nang eb neika' ulumek. 11:55 Ban salek enyek, Yahudi nang edya perob sum era oka yenemoka' anasa, nimi nauba Yerusalem heikek biniboka, sikja nimiguma' mek elekdanoba' aboka, sikja heikek aba' ara balamek. 11:56 Dara, Yesus ara yalamla anya' senewoka, Imik Neyung e eremek sekoka, kemero yabalameekanya, sik moumen anaba, "Wei, ugunda heka' senelelum do? Nunja perob sum oka dal bok, Yesus anaba yanggunumla do?" aboka heibdangdo yabalamek. 11:57 Dara, al neik salek enyek, Parisi nang eb, yuba wa gaka' dub nang eb, yok nim ek ugunda Yesus ak eibmun dara, salawoka henga goubnemaba' anasa, wera an ulumla aboka nuk nekel yanasulum aboka, wenyab girigemek.
12:1 Yahudi nim edya perob sum era li lambadya anam gweleganamla aboka ubek bok, Lazarus embenga' suboka bukiyimoknya bedya heikek, Yesus ara yeilimok. 12:2 Dara, anyagan Yesus amba masa youmek. Marta gera dena' boklomookanya, Lazarus bera Yesus ab neikik bukoka delerek. 12:3 Ban salek enyek, Maria gedya hyak perob gen-gen songa ngikildan meka doboka, Yesus alja yan sang ak ngikemookanya, ono' alja hong adya lubumok dara, sikja e nera neik mek song ok gee alamok. 12:4 Bok, Yesus ab neika' yuba doro diriga bannya si Yudas Iskariot bera eimik era, Yesus ak oblulum aboka yuba dil binimoknya bedya lebokja, 12:5 "Hekasa ban perob song mek era, yok nim ek rupiah dekoka, dobsibya rupiah era bona' garan ulumak nim ek eleganggunusibya do? Gibna' hnonok wa weboka dolomak rupiah eneso danamso bok," hyok. 12:6 Yudas bedya wenhyoknya nera, alja bona' garan nim enyek, wana' uboka elegosununa' aboka lebnenggumok. Alda Yesus yuba doro diriga ban nanga rupiah beilina' ara alja bo uboka, hnon hoka' doboka delemoknya nenesa lemok. 12:7 Bok Yesus adya dara, "Nak oboka sokok loknenija sum enesa, bekna' diba' or nak unuwoulul bar, wenyanggom loblulum. 12:8 Wera, bona' garan nim ek dara, ugun gangganek soba' ulumnemak bok, nak dara, ugunub soba' neika' unggulumnemaba' anasa, or unululul," hyok. 12:9 Yahudi nang nauba adya, Yesus ara, wera Betania heik ulumla an yuba kemek dara, Yesus amba ok gom, aladya Lazarus embenga' suboka bukiyimoknya benesa hnon kendenoba' aboka bilimek. 12:10-11 Dara, alak embenga' sumoknya nenesa leboka, nimi nauba ara Yahudi nang yuba loboka, Yesus ak nauba dib senewoka yalameka' anasa, Yahudi Imik Neyung yuba wa gaka' dub nang edya, Yesus ab Lazarus beneba, nidya' neika' obnesab aboka, yuba salamek. Yuba 12:12 Yesus ara ampum so maboka gwelegok dara, nimi nauba Yahudi nim edya' perob sum anasa, yeilimek nim edya, Yesus ara heikek younuna' aboka wera pikek yanggal ana' kemek dara, 12:13 wera sikda nimi nauba yogul mekla' lebsalawoka Yesus ak eiya hlaboka pika dil biniboka alak giboka wenyalamek, "Hosana! Wenelesilnya si amba yoknya, alak peroba' dangalalul! Israeli nimi dubnya bek peroba' dangalalul!" wenyaboka lelemek. 12:14 Dara, youma' ununumna' lelemek nang edya, al yanamla aboka momnya dobek yub enyek, gigiwoulul aboka, Yesus ara nim abaklesil pam, mek goubenya pam enyek, eiyimok dara, bukoka balamok. 12:15 Momnya dobek yub era an: "Wei, Sion heik nim o, ugunda lok ganya bonggom mem. Wera kendululum, anja dubnya bera mek goubenya keledai pam dubuk bukoka yanggal," alamek. 12:16 Yesus adya alak diriga ban nang era, anam salek era, ella danggumek bok, Yesus anyek seleb imik nenewok danyek, Imik Neyung yuba youma' momnya domeka' ara alsamba leboka' ak an, wen unulumek senewoka seinimek. 12:17 Ono', Yesus adya Lazarus bek goboka yalom amookanya, suboka embenga' bukiyimoka' ak nauba longowoka eiyimek nim edya dara, Yerusalem heikek alsamba nekoka yuba lero yabalamek. 12:18 Yoka'-yoka' lok so' bekna' diba' unululanya bera yalamla an yuba kemek dara, nimi nauba Yesus ak pika dibgiga el bilimek. 12:19 Dara, Parisi nang edya sik moumen, "Wera ugunda yoka' unuldalaluma' ara kendululum. Nimi soko nimi nidya' ara alak wekel yalamaka' ara eillililum," aldalamek. 12:20 Dara, Yerusalem heik Yahudi nim edya perob sum anasa, yuba longowanamab aboka balamek sum enyek, Yunani nimi hnon neika' makoka bilimek. 12:21 Dara, sikda Betsaida heikek Galilea sokok abnya Pilipus bek biniboka, "Neyung o, or senemen dara, nunda Yesus ab eibdeisibya senemaba' anasa yeilimab," hyek. 12:22 Dara wera, Pilipus bedya Andreas bek yuba bo bilimok dara, sikda neika' Yesus ak wenyal bilirek. 12:23 Dara Yesus hnon lebok, "Wera, nimi diba' me nak imik nenewanamak salek ara seleb oka dal. 12:24 Nara ugunuk dib lebsin, gandum dok okoka sokok malyingginiboka blona' orok dara, wera doka hnon ulmoublumnamso bok, soko lomok bloblya dara, yok doka nauba mengewoka gong liklamla. 12:25 Heknedya alja nong una' ek wana' nauba uldalamla dara, eimik alja nong una' weiningdowanamla. Bok, heknedya meneng nong ek sokok an wana' uldanggulumla dara, eimik alak bo beiyiboka pe ulmoublemnamla. 12:26 Heknedya nak aralenelnya bera, or nak diriga yeiniboka, na ulumnya' ak anaba, alba anyagan ulumnamla. Nak arawoka welelanya bera, nadya' neyung bedya gigiwanamla. 12:27 Wenera nadya ganya soldob menegoka ubnela' anasa, wera heka' ak lebnamna do? Neyung o, nak wene salek or blebnelom henemna de? Orok, al nenesa unuwonuna' aboka yeilimsa," hyok. 12:28 Dara, Yesus ono' molowoka' ara, "Neyung, anja si nek imik nenelelom," hyok. Dara, imik ab yuba hnon doblinggoka lebokja, "Youma' hnon seleb imik nenewasebok, ono' hnon saaboka imik nenewanamna," hyok. 12:29 Yok nimi nauba anyagan seklemek nim edya dara, hnonda, "Liming gururu amla," alamek. Hnon yok nim edya dara, "Lero enedya yuba salamla," alamek. 12:30 Yesus adya sikenek, "Yala' keblumnya nera, nasamba ubnenggublabok, nera ugunsamba leboka ubla. 12:31 Wera, sokok an yana lelewanamla salek era, seleb yala' anasa, sikja dubnya bera eleboka boboganamla. 12:32 Bok nak dara, sokok anyek dara, imik nenewanelya dara, nimi nak gliboka eboka bo yanamna," hyok. 12:33 Nera Yesus anyek heka' huboka somoganamna ella ulumoknya nenesa, sene orowek lel gogolomok. 12:34 Dara nimi nauba longomek nim edya Yesus ak lebekja, "Nunda Musa bedya unuwanalum an yuba kemouba' ara, nimi blebsina' dubnya Kristus bera sob-soba' ulmoublemnamla wenhyoka' ella ulumab bok anasa, nimi diba' me nek eimik imik nenewanamla alamla dara, nimi diba' me nera heknyek lelelam do?" hyek. 12:35 Dara, Yesus adya sikenek, "Mek anam ok dilina' ara ugun gangganek ulumnamla. Anasa, guna' adya ugunuk anam siklewanggusil salek, dilina' or ulumla wenyek, or yabalalulum. Heknedya guna' ak or anam yabalelanya bera, pik okoka binimna' ara elgom ulumla. 12:36 Ugunda dilina' mabo danalum aboka, dilina' ugun gangganek anam ulumla salek enyek, dilina' ak dib senewoululum," hyok. Yesus ara wenyabgogomoka' seleb dara, sik gangganek loboka, yokok sam doknol bilimok. 12:37 Yesus adya nimi hogung ak yoka'-yoka' hyak lok so' unulumok bok, sikda alak dib senenggulumek. 12:38 Yahudi nim edya Yesus ak dib senenggulumeka' damok era, Imik Neyung yub orowek ununumna' lelemoknya Yesaya bedya momnya doboka' anyek gigiwolula' aboka, unumek. Momnya domok yub era, "Wenelesilimnya o, nunja lelemab yub era, heknedya dib senemla do? Hnon Imik Neyung migib ara heknyek laga amamla do?" aboka dobok. 12:39 Yesaya bedya ununumna' lelemok sok anasa, Yahudi nim edya Yesus ak dib senenggulumek. Yesaya yokok sam lemok ara ban: 12:40 "Dara, heng adya pe eibijek, ganya adya pe seiniweijek aboka, Imik Neyung adya sikja henga luma neneiyisuk, ono' ganya su kiyiwousuk. Sikda pe eiyiboka pe seiniwoka ganya dangaweijekanya, meiriyiweisinyek aboka umsa," alamla. 12:41 Yesus ak imik nenemoka' anyek eiyiboka, Yesaya ara Yesus amba yuba lelemookanya, ban nidya' ara men lelemok. 12:42 Bok, Yahudi dub nang edya, nimi nauba darasam Yesus ak dib senewoka dolomek. Bok, Parisi nang edya, Yahudi nang Imik Neyung gibna' ek wekna' mem hisijek aboka, lok anasa, Yesus ak dib senelemab ana' ara doknowoka lolomek. 12:43 Ban unulumeka' damok ara, Imik Neyung adya nuk perob senesin danagom, nim adya danyek nauba gigilesinok senewoka ulumek. 12:44 Dara, ono' Yesus adya laga sekoka bii aboka, "Heknedya nak dib senelenel dara, alda nak ok dib senenggulunel bok, nak sokok bokol yeilinyoknya bek dib senelamla. 12:45 Wera anasa, heknedya nak heng eilinel dara, alda seleb nak bokol yeilinyoknya bek eillilamla. 12:46 Nak dib senelenija nim era, guna' lomok ulumeijek aboka, nara imik aba' ara sokok an dilina'anya yeilimsa. 12:47 Nara sokok an yana lelelesununa' aboka yanggumsa, soko nimi blebsununa' aboka yeilimsa' anasa, nimi ben hnon heknedya nadya yuba keleladyok pe ununggulumla dara, nara alak yana lelewanggunumna. 12:48 Heknedya nak lek senewoka lolonelekanya, nadya yub ek dib dona' lolomla dara, alak yana lelewanalanya bera seleb orowek ulumla. Nera nadya lemsa yub edya sidya' daknamla sum eimik alak yana lelewanamla. 12:49 Yuba lelemna' ara, nadya ok ganya seiniwoka lenggulumna. Bok neyung be na sokok bokol yeilinyoknya bedya, anyek wenyhenelam aboka orugonyoka' anyek lelesin. 12:50 Imik Neyung bedya oruklesila' ara, embenga' una' eleklesila' ara, nara ella ulumna. Anasa, heka' ak nadya lelemna' ara, neyung bedya anyek leb elegeisilom alamla' anyek ok lelemna," hyok.
13:1 Paskah sum era ampum so dok dara, Yesus ban sokok anara loboka, alja' neyung bek binimok salek era oka doka' ara ella ubok. Sokok an alja yuba dolomek nim ek soba' wana' ulusuk sok, ono' sirika' daknamok sum eneba wana' ubsuk. 13:2 Yesus ab, alja yuba don nang eb, inimoka' anasa delemek. Iblis adya, Simon bedya me Yudas Iskariot bek, Yesus bek yuba dil bulula' aboka, ganyek seleb orugomok. 13:3 Yesus ara, neyung bedya nidya' yok-yok migib unulamla' ara, nak seleb elegenyookanya, Imik Neyung ak ab yeilimsa' ara, ono' saaboka Imik Neyung ak binimna senewoka ella umok. 13:4 Dara, Yesus debdakok dara, alda sekoka eilibik akleng gwiriwoka, mek lubna' akleng adya der pik wegebdangamok. 13:5 Ban seleb dara, solowak lomok meka yekoka alja yuba doro diriga ban nanga yana mek elek einisuukanya, derek norobdangamok mek lubna' edya alja yuba don nanga yana gebesuk. 13:6 Dara alda, Simon Petrus bek elekdo yabok dara, Petrus bedya alak, "Wenelesilimnya o, anda nadya yana mek eleganenelem do?" hyok. 13:7 Yesus adya, "Nara unulusina' ara, wen elgom ululam bok, eimik era amba ella danalam," hyok. 13:8 Petrus bedya dara, "Anda nadya yan era meka' mek eleganggununelem," hyok. Yesus adya alak ok, "Anak nadya mek eleganggununggisinya dara, nablaboka neika' unggulumnesinim," hyok. 13:9 Dara, Simon Petrus bedya, "Wenelesilimnya o, wera anaso dara, nadya yan ok gom bok, nadya huka nonga nidya' mek eleganenelem," hyok. 13:10 Yesus adya saaboka, "Seleb meka hwilenya bek dara, alja yan ok mek eleganamso, alja nong seleb pelemla. Dara, ugunda pesil bok, nidya' pewanggusil," hyok. 13:11 Yesus ara ban benedya yuba dil bininel senewoka ella ulumoka' anasa, ugunda nidya' ara pe unggululum, hyok. 13:12 Sikenek yana seleb mek elegesuk dara, Yesus akleng ongowoka bul yibilimookanya wenyhusuk, "Ugunuk ubsin ara anyek ubla senewoka damok ara ella ululum gom, orok gom? 13:13 Ugunda nak Neklesilimnya, Wenelesilimnya, alanuluma' ara, al unu ulumna' anasa, dib lelenulum. 13:14 Dara, nara ugunja neklesinya wenelesinya dangoka ulumnakanya, ugunuk yana mek elegeisin dara, wera ugumbabya yana mek elegeldalamnasom. 13:15 Nara ugunuk ubsin sok, ugumbabya unuldalamnalum aboka, bekna' diba' ara an elegeisin. 13:16 Wa welelanya bera, eili be diba' ak imik so danggunumso. Bokol bilimoknya bera, alak bokol bilimoknya bek imik so danggunumso, hena' ara, ugunuk dib lebsin. 13:17 Ban ella domunukanya, wera unulumnalum dara, pe ulumnalum. 13:18 Ugunuk nidya' lenggulusin. Nadya benyek aboka dosenya bera orowek ella ulumna. Bok, Imik Neyung yuba momnya doboka' ara, nablaboka neika' delenamnya bedya isa' gebnel, amok yub anyek, gigiwolula' aboka ubnamla. 13:19 Ban unuwalya dara, ugunda nak alda alan, dib senewoluluma' aboka, ban nen anam unuwanggom bok, wen orowek ugunuk neksin. 13:20 Ugunuk wenyhesinya nera dib nonga' lebsin, heknedya nadya boklenanya bek doboka dililamla dara, alda nak doro dililenel. Heknedya nak doro dililenel dara, alda nak bokol yeilinyoknya bek doro dililamla," hyok. 13:21 Yesus ban wenyabgogomoka' seleb dara, ganya ya weboka, sikenek wenyhusuk, "Nimi ben hnon ugun gangganek ab, nak yuba dil bininel wenyasinya nera, dib lemna," hyok. 13:22 Dara, alja yuba doro diriga ban nang era, keebdangdo balameekanya, heknyek lemla do senewoka ganya esuk. 13:23 Yuba domoknya Yesus adya wana' nauba ulumoknya hnon, Yesus berem buklingnemok. 13:24 Anasa, Simon Petrus bedya heknyemba lemla do senewoka heibya aboka alak soruk okomok. 13:25 Dara, alda Yesus ak lingnewoka, "Wenelesilimnya o, heknya emba lelam do?" aboka heibok. 13:26 Dara Yesus adya, "Gwaneng doboka mek hmeiya ek doronggoka soboka eleganenya bera alan," hyok. Dara, gwanenga mek hmeiya ek soboka, Simon Iskariot bedya me Yudas bek elegemok. 13:27 Dara, Yudas bera ban gwanenga dol yabok sab-sab enyek, Satan bisa' ara alja' ganya lomok wekel yeilimok. Dara, Yesus adya, "Or anja unuwonun senemennya nera, berra unul yabalom," hyok. 13:28 Yok nang nidya' bukoka delemek nang era, Yesus ara hekasa alak anaso lemla do senewoka ganya ella danggumek. 13:29 Yudas bera, sikja rupiah beilinanya ulumoka' anasa, hnon nang edya dara, Yesus adya sik delemeka' amba dena' hnon dekel bilom aboka orugamla gom, bona' orok nim ek rupiah hnon elegel bilom aboka orugamla gom, senemek. 13:30 Dara, Yudas bera, seleb gwanenga dobok sab-sab goboka byuk. Dara, seleb inimok. 13:31 Yudas be seleb bilimok dara, Yesus ara, "Wenyok nimi diba' me nek imik nenewanamlakanya, Imik Neyung ak, nimi diba' me pik moruwoka imik nenewanamla. 13:32 Dara, Imik Neyung ak Yesus pik moruwoka imik nenewanamla dara, Imik Neyung lomok al damnya ono' alja me nek imik nenewanamla. 13:33 Najabo yab o, nara ugunub anyagan sidya' neika' ura dakdowanamab. Ugunda nak elemnenulum bok, Yahudi nang ek lemsa sok, wen ugunuk wenyhesin, nak binya ak ara ugunda yamenggom. 13:34 Wenyok unulumnulum yub ugunuk elegeisin: Ugunuk nadya wana' ulusisa sok, ugumbabya wana' uldalamnalum. 13:35 Ugunda wana' uldalamun dara, nimi nidya' adya Yesus yuba doro diriga ban nang aboka, ella ubnesak," hyok. 13:36 Simon Petrus bedya, "Wenelesilimnya o, anda hekmok binilam do?" aboka heibok. Yesus alak leboka' ara, "Na binimna' ak ara wen anda dobol yanggununelem bok, eimik ek dobol yananelem," hyok. 13:37 Petrus hnon heibok, "Wenelesilimnya o, hekasa wen anak dobol yanggununggisinya do? Nara hyak ansamba leboka somoganesinya," hyok. 13:38 Dara, Yesus alak leboka' ara, "Aldib, anda nasamba leboka dib nong somoganesom de? Nara anak hyak dib lebgen, Wining yuba anam ngoubnenggulyebok, anda nak liga winilya bobnenewoka, naba elgomnya henenelem," hyok.
14:1 "Ugunda ganya mounduk-mounduk anggom. Imik Neyung ak dib senewomunukanya, ono' nak hnon dib senewonululum. 14:2 Nadya' neyung bedya' heikek ara, e nauba ulumla. Anaso unggulumso dara, ugunuk wenyhenggunusisinya. Ugunsamba e sobnesina' anasa, binimna. 14:3 Dara, nara biniboka ugunsamba e seleb sobgogoweisinya dara, na ulumna' ak sam ugumba ulululuma' aboka, nara saaboka el yeisinyekanya, na ulumna' ak bo binisin. 14:4 Na binimna pik era ugunda ella ululum," hyok. 14:5 Thomas bedya saaboka, "Wenelesilimnya o, an binilama' ak ara, nunda elgom ulumaba' anasa, heka' huboka pik era ella danasibya do?" hyok. 14:6 Yesus alak, "Nak dara, pik ab, dib yub ab, embenga' una' ab, ulumna. Nim ara nak pik orok dara, Neyung bek yangguneseng. 14:7 Ugunda nak ella ulunusom dara, wera, Neyung bek ella ulumnesom. Dara wera, ugunda alak ella ululumukanya, alak seleb eiyilum," hyok. 14:8 Pilipus bedya, "Wenelesilimnya o, ban Neyung bera nuk aaweisilom. Dara, anadya seleb senewanob bar," hyok. 14:9 Yesus adya alak, "Pilipus o, nara ugunub soba' neika' ulumab bok anasa, anda nak anam elgom ulunelem de? Heknedya nak eibnelya dara, wera Neyung bek seleb eiyiledya. Anasa, hekasa Neyung bek aaweisilom alalam do? 14:10 Nara Neyung bedya ganya lomok ulumnakanya, Neyung bera nadya' ganya lomok ulunela' ara dib senenggulunulum de? Nidya' ugunuk lelesina' ara nadya ok salya' lenggulunabok, Neyung bedya nadya ganya ak sekoka, alja wa welemla. 14:11 Nara Neyung bedya ganya ak ulumnakanya, Neyung bera nadya' ganya ak ulunel wenyalamna' ara, dib senewolulum. Oroka' anababya, nadya welemna wa nenyek sunuwoka dib senewolulum," hyok. 14:12 "Heknedya nak dib senewanenel dara, nadya welemsa wa nera, alba unuru welemnamla. Dara, nara Neyung bek binimna' anasa, alda nauba so welemnamla asina' ara, dib lemna. 14:13 Neyung bek, me adya imik nenewolula' aboka, ugunja or heka' ok do nadya si sibuka mololonumun dara, unulumnesin. 14:14 Ugunda yoka'-yoka' nidya' nadya si sibuka mololonumun dara, unulumnesin," hyok. 14:15 "Ugunda nak wana' ulunumun dara, nadya oruklesin yub ek sunuwoka unulumnulum," hyok. 14:16 "Nadya' neyung bek molowanya dara, ugunuk yok arasinya eleganesil. Ugunublaboka soba' ulululuma' aboka, ban aralemnesilnya bera dib yub ulumla Geisinya ek eleganesil. 14:17 Soko adya, alak eilinggulumlakanya, elgom ulumla' anasa, alak dobnenggunumso. Bok, alda ugunublaboka ululumukanya, ono' ugunja ganya lomok ulumnesila' anasa, ugunja alak ella ululum. 14:18 Nara ugunuk okna mabo gekneba' lobinggunusin. Ono' nara ugunuk samal yanasin. 14:19 Mek anam binimna' anasa, soko adya nak eibnenggununel bok, ugunda nak eillilimnenulum. Nab embenga' ulumna' anasa, ugumbabya embenga' ulumnulum. 14:20 Ban sum enyek, nara Neyung bedya' nong lomok uboka, ugunda nadya' nong lomok uboka, nara ugun lomok ulumnesina' ara, ban sum enyek ella danalum," hyok. 14:21 "Heknedya nadya oruklesin yub ek salawoka unululanya bera, nak wana' ulunelnya bera alan. Dara, nak wana' ulunelnya bek, nadya' neyung bedya alak wana' ulumnamlakanya, nababya alak wana' uboka nadya nong alak aawanamna," hyok. 14:22 Dara, Yudas Iskariot gom, yok Yudas bedya Yesus ak, "Wenelesilimnya o, hekasa an nong ak dara, nuk aawanesilimjok, sokok ak dara, hekasa aawanggunulam do?" aboka heibok. 14:23 Yesus adya dara, "Ben hnon nak wana' ulunelya dara, alda nadya neklesin yuba sunuwoka ulumnamla. Dara, nadya' neyung bedya alak wana' ulumnamlakanya, Neyung beb, nab alak yeinima dara, alab neika' ulumnamab. 14:24 Nak wana' unggulunelnya bera, nadya neklesin yuba sunuwoka unggulumla. Nadya neklesina' kelum yub era, narinya gom, na bokol yeilinyoknya bedya yub ek neklesin," hyok. 14:25 "Ban nidya' ara, nab neika' umab salek ok lebsin bok, 14:26 arasinya bera, Neyung bedya nadya si pik uboka bokol yanasil Geisinya edya, yoka'-yoka' nidya' ugunuk neklemnesilikanya, nara ugunuk lesisa yuba nidya' bekellilimnesil. 14:27 Ganya daboka una' ara ugunuk lobonggo binisin. Narinya nenyek ugunuk elegoka lo binisin. Sokok anyeb eleklesilnya neneso' ak eleganggunusin. Anasa, ugunda mounduk-mounduk aboka lok ganya bonggom," hyok. 14:28 "Nara binyekanya, ono' ugunuk saaboka yanasin amna' ara, seleb kelum. Dara, nak wana' ulunesom dara, nara meknya Neyung bera senenggomnya anasa, nara Neyung bek bininanya nenyek, ugunda eiya dabnesuso. 14:29 Unuwalya sum era, ugunda dib senewoluluma' aboka, anam unuwanggublabok, ugunuk orowek lebsin. 14:30 Sokok an dubnya bera, yanggan sum oka dala' anasa, nara ugunublaboka nauba sabdanggunumab. Alda nablabokonya goma'. 14:31 Bok, sokok an ara, Neyung bek wana' ulumnakanya, Neyung bedya orugunyoknya nok unulamna' ara, ella danaseng. Anasa wera, nunda anyaganyeba' ara binimab," hyok.
15:1 "Nara dib nong gal nong ulumnakanya, nadya' neyung bera pe yeboka memena'anya ulumla. 15:2 Nak doka mounggulumla soruka nidya' diblamlakanya, nidya' molulanya nera, nauba dangoka soba' moubgiga balalula' aboka, ono' gereboka lelekdeboka memelamla. 15:3 Nara ugunuk seleb elegeisisa yub edya, ugunda anaso seleb pewousuk. 15:4 Ugunda nablaboka kwebdangoka ulumnamab dara, nara ugunub kwebdangoka ulumnamab. Gal soruk ara albeyok doka moubnenggunumso bok, gal nong ok ulumso dara, moubnamso. Anasonya neikik, ugunda nablaboka kwebdangoka unggulumnesibya dara, doka mounggulumnusom. 15:5 Nara gal nong ulumna. Ugunda, gal soruk ululum. Heknedya nak ulumnenelekanya, nara alak ulumnamna dara, alda doka nauba moulumnamla. Bok, na orok dara, ugunda yoka'-yoka' pe unuwanggunusom. 15:6 Heknedya nablaboka kwebdangoka unggulunam dara, gal soruka diboka bobogamna ek mekemna' anaso ulumla. Ban anaso soruk ara, neika' ak mamagoka uka dalamak dara, uka delemla. 15:7 Ugunda nablaboka kwebdangoka ulumeibyekanya, nadya lelesin yub era, ugunja ganya lomok sam ulusilya dara, ugunda yoka'-yoka' dobsibya seneleluma' anyek, elegeisilom aboka mololomun dara, ugunuk eleganesil. 15:8 Ugunda doka nauba molumnesil dara, nadya' neyung bedya si imik nenewoka, ugunda nadya yuba doro diriga ban nang diba' ulumnulum," hyok. 15:9 " Neyung bedya nak wana' ulunyok sok, nadya ugunuk wana' ulusisa. Anasa, nadya wana' ulusisa nang gekneba' ulululum. 15:10 Nadya' neyung bedya orugenyok yub keboka unulamsakanya, alja wana' una' ak ulumna sok, ugumbabya nadya oruklesin yuba keboka unulumun dara, ugunda nadya wana' un ak ulumnulum. 15:11 Nadya ei-ei ganya ara ugunja ganya ek ulumnesilikanya, ugunja ei-ei ganya bololuma' ara deknelesulula' aboka, ban nidya' ara ugunuk lebsin. 15:12 Ban oruklesin: Nara ugunuk wana' ulusin sok, ugumba wana' uldalamnalum aboka orugeisin. 15:13 Nimi ben hnon ara, alja hem bemba alja nonga somogonun senelelanya bera, alja wana' una' ara hyak nauba so ulumla. 15:14 Ugunda nadya oruklesin yub enyek, keboka unulumnulum dara, ugunda nadya hemyab ulumnulum," hyok. 15:15 "Wa wenya bera alja neyung bedya unulamla' ara elgom ulumla' anasa, wene salek eba' ara, eimik ugunuk wa wen nang wenyhenggunusin. Bok, ono' saaboka nadya' neyung bek ab kemsa yub ugunuk nidya' laga lemsa' anasa, ugunuk nadya hemyab alamnesin. 15:16 Ugunda nak dobnenggunulum bok, nadya ugunuk weboka dosisa. Ugunda bindiwoka, soba' ulmorulumnamla doka moulusulula' aboka, dosisa. Dara, nadya si sibuka, neyung bek ab yoka'-yoka' nidya' elegesilom aboka mololomun dara, eleganesil. 15:17 Ugun dam nang wana' uldalalulum aboka orugeisin," hyok. 15:18 "Sokok an yoka' nang edya ugunuk lek senewanasil dara, nababya men lek senelenyeka' ara, seiniwoka beklemnelum. 15:19 Ugunda sokok anyeba' ak ulusom dara, aljinya nek anasa, wana' nauba ulumnesuso bok, ugunda sokok anyebnya unggululuma' anasa, nadya sokok ab ugunuk dosisa' anasa, ugunuk lek senelesil. 15:20 Wa wenanya bera, alja neyung bek ab imik so unggulumla seleb wenyamsa' ara, beklulum. Dara, sikda nak olonyek dara, ugumba olomnesak. Sikda nadya yuba kelenyek dara, ugumba ugunja yuba kelemnesak. 15:21 Bok, sikda nak bokol yeilinyoknya bek elgom ulumaka' anasa, nadya si nemba leboka, ban yoka'-yoka' ugunuk unulumnasak. 15:22 Nak yanggusinyekanya, ban sikenek wenyana' orok dara, malya una' sikenek unggulumnususo bok, wenyek dara, sikja malya una' orok senen lebnengguneseng. 15:23 Nak lek senelelanya bera, nadya' neyung bek anaba lek senelamla. 15:24 Yok nim edya hyak ununggulusengnya nek, sik gangganek ununggulusinya dara, sikja malya una' unggulususo bok, wenera, nadya unulamna' eillilimak bok, nak lek senelenyaakanya, neyung beneba lek senelemak. 15:25 Bok, unuwanalum an yuba sikja bukuk momnya doboka' ara, dib gigiwolula' aboka umoka' damok ara, anya' senewal henggonggom bok, nak lek senelenyek. 15:26 Bok, arasinya neyung bek ab, bokol yanasinya bera, neyung bek ab lanawoka dib yub lelelanya Geisinya bera, yeiniboka, alda nasamba leboka laga neklemnesil. 15:27 Dara, ugumbabya hnon, nara ugunublaboka youma' ek moruwoka neika' ulumouba' anasa, nasamba leboka laga neklemnenulum," hyok.
16:1 "Ban nidya' wenyalasin ara, ugunda solom ganya boboka lobmunuk aboka lelesin. 16:2 Ugunuk Imik Neyung ek sam aba' ara, yaklemnasak. Dara, ono' hnon, sik unulusija nim edya dara, Imik Neyung amba nunda pe giboka unulumab senelemeija salek era, yanamla. 16:3 Ban unuwanasaka' ara, sikda neyung beb nab elgom ulusaka' adya, ugunuk eimik unulumnasak. 16:4 Eimik ubnamla sum era, al orowek nekesuka' ara, seiniwanalum aboka, ban lebsin. Men salek era, nara ugunuk neika' ulumouba' anasa, ban yuba neknenggusisa. 16:5 Nara wen na sokok bilom aboka bokol yeilinyoknya bek binimna. Bok, ugun gangganek ab ben hnonja, Anda hekmok balalam do aboka heibnenggunulum. 16:6 Bok, ban nenyek ugunuk seleb lebsin adya, ugunja ganya engewoka soloma dabsil. 16:7 Anasa, ban nidya' nadya ugunuk, na imik heik binimna, ugunsamba perob dosulul amna' ara, dib lebsin. Nak bana' orok dara, arasinya bera ugunuk yanggunumso' anasa, nak binya dara, wera alda ugunuk bokol yanasin. 16:8 Wera, Geisinya ben yalya dara, soko nim edya malya una' ek hnon, pe una' ak hnon, yana lelesina' ak hnon, sikja seinilimaka' anyek, nenegom aboka, okoka neknesil. 16:9 Nak dib senenggulunyaka' anasa, malya una' ak meknewoka seinilimak. 16:10 Ugunda eimik nak eibnenggununuluma' ak sam, nadya' neyung bek binimna' anasa, peroba' nenena' ak meknewoka seinilimak. 16:11 Sokok an dubnya bek seleb yana lelewoka igin yaka' alsamba seleb ulumla' anasa, yana lelesina' ak meknewoka seinilimak. 16:12 Nara yok-yok yuba nauba ugunuk lebnesisinya bok, wenyek dara, ugunuk hyak igin ubnesuso. 16:13 Bok, Imik Neyung jong ganya una' ugunuk lebnesil Geisinya benyek yalya dara, alja dib yuba nidya' ella danalum aboka neknesil. Alja ok yok seiniwoka ganya doboka lebnenggunulabok, alja seleb kemlya' anyek, ugunuk neknesil. Nera yoka'-yoka' eimik unuwanalanya nenyek neklemnesil. 16:14 Alja nak ab doboka, ugunuk neklemnesil adya, nadya si imik nenewanenel. 16:15 Yoka'-yoka' nidya' Imik Neyung aljinya ulumla' ara, narinya nek ulumla. Ban anasa, Geisinya bedya nak ab doboka, ugunuk neklemnesila' ak wenyasin," hyok. Yuba 16:16 "Ugunja nak eibnenggununulum salek era, mek anam ubnamlakanya, ono' saaboka eibnenulum salek era, mek anam ubnamla," hyok. 16:17 Yesus adya ban wenhyoka' seleb kemek dara, alak diriga ban nang edya sik moumen, "Ugunja nak henga eibnenggununulum salek era, mek anam ubnamlakanya, ono' nak eibnenulum salek era mek anam ubnamla, helnya nera, hek damok nenesa lelemla do? Hnon, nadya neyung bek binimna anasa, alanya nera, hek damok emba lemla do? 16:18 Mek anam ubnamla alamla' anasa, heka' ak lelemla do? Alja lelelanya nera nunda elgom ulumab bar," aboka leldalamek. 16:19 Yesus adya alja yuba doro diriga ban nang edya alak heibnoba' senemeka' eiyisuk dara, sikenek, "Eibnenggununulum salek era anam ubnamlakanya, eibnenulum salek era mek anam ulumla, ananya nenesa leboka, damok eboka heiboka gangabdangdo balalum de? 16:20 Nara ugunuk dib lebsin, Ugunda engewoka bonggeliklimnelum bok, soko ak dara, eiya hlaboka glolomnamla. Ugunuk suguna' ganya bolomnulum bok, ugunja suguna' ganya era eimik ei-ei ganya danamla. 16:21 Gela hnon me bomna gel gera, beibnamla salek me juka gweklamla dara igin ululabok, seleb beibna dara, wera me ara seleb sokok an beibna senewoka, oka gwekemna' ara hiliklamla. 16:22 Wen an lebnanya nera, ugunuk neik so danamla. Wen ganya engelelum bok, nara ugunuk ono' eibdeibya sum era, ei-ei ganya bolomnulum. Dara, ugunja ei-ei ganya ara yok nim edya ugunja ganya ek ab salya' lolowoka dobnenggunusak," hyok. 16:23 "Ban sum enyek, ugunja yoka'-yoka' nak molowanggununulum bok, ugunja nadya si sibuka Neyung bek nunda anyek elegeisilom aboka molowanalumnya nera nidya' eleganasila' ara dib lebsin. 16:24 Ugunda wenera, nadya si sibuka yoka'-yoka' Neyung bek elegeisilom aboka molonggululum. Wenyok molowolulum. Dara, ugunuk eleganesilikanya, hyak ei-ei ganya bolomnulum," hyok. 16:25 "Wen ugunuk wenyalasinya nera okoka poboka, gak ara an aboka lenggulusin bok, eimik yanamla sum era, nadya' neyung bek ban men lelesinya loboka, poboka laga lebnesin. 16:26 Ban lebna sum era, ugumbeyok nadya si sibuka molowanalum. Nababya nadya' neyung bek ugunsamba molowanamna' ara wenyanggulumna. 16:27 Ugunda nak alda Imik Neyung ak ab yeilimok senewoka, wana' nauba ulunuluma' anasa, Imik Neyung adya ugunuk hnon wana' ulusilekanya, alja yoka'-yoka' ugunuk eleganasil. 16:28 Nara Imik Neyung bek aba' ara sokok yeilimsa. Dara, ono' wen saaboka sokok loboka Neyung bek binimna," hyok. 16:29 Dara, alja yuba doro diriga ban nang edya Yesus ak, "Wenelesilimnya o, yoka'-yoka' nidya' ara bob nenewoka lena' loboka, wera poboka lelam. 16:30 Anda yoka'-yoka' nidya' ella ululamakanya, yok nim edya anak yoka'-yoka' amba leboka salya' heibnenggununggeseng, ara wen ella ulenjab. Anasa, nunja dara, anda Imik Neyung ak ab yeililuma' ara, ban adya dib senelenjab," hyek. 16:31 Dara Yesus adya sikenek, "Wera, ugunda dib senelum de? 16:32 Ugun doluwoka bokgoknesak salek ara, eimik yanamla, hnonda al wen seleb yal. Ugunda ugunja e pik bokgokoka bindowanalumukanya, nara nabeyok lo bininulum bok, nabeyok unggulumnamna, nadya' neyung beb neika' alablaboka ulumnanam. 16:33 Nadya ban orowek men ugunuk nidya' laga lelesina' ara, ugunda nablaboka seleb hnonok dangoka, perob ok ulululum aboka lelesin. Ugunda sokok an anam ulumun salek, yoka'-yoka' damok oka kwelemnesil bok, sokok an yoka'-yoka' damok ara, nadya seleb yu gom nenewasa' anasa, ugunja ganya siklewoka kaboka ulululum," hyok.
17:1 Wera Yesus ara ban nen seleb wenyabgogomok dara, imik sam keeb weininggoka, Imik Neyung ak lebokja, "Neyung o, unun salek era wera seleb laga dal. Anasa, Neyung o, anja me nedya anak si imik nenewogulula' aboka, albabya alja si nenyek wen imik nenewalom. 17:2 Neyung o, anja me nek, neyung anja doboka alak elegolum nimi nidya' ak, dib embeng una' elegosulul aboka, migib una' era nimi nidya' ak unuwolula' aboka seleb elegelum. 17:3 Anda Imik Neyung ara hnonok ok dib nong ululamnya bek dib ella uboka, ono' anja sokok bokol yeililumnya Yesus Kristus bek hnon dib ella ulumak dara, embeng una' diba' ara alan. 17:4 Neyung o, nara anja elegenulum wa nenyek seleb webgogowana' adya, wera anja si nera sokok an imik nenewagesa. 17:5 Anasa, Neyung o, soko anam uyiwanggulum danyek, anablaboka ulunumukanya, si imik nenena' seleb dobsa sok, wenera anja saramek sam neik so imik nenewanenelem," hyok. 17:6 "Nara anja ululamnya nera, anja sokok an nimi bok doboka nak elegenulum nang ek, seleb laga nekemsa. Nera anja mabo yoka' ulumek bok, anja doboka nak elegenulum. Dara, sikda anja yuba pe doboka unulumeekanya, 17:7 wenyek dara, seleb nak elegenulumnya nidya' ara, anak ab lanalamla' ara, ella ulumak. 17:8 Anja yub enyek nak elegenuluma' ara seleb sikenek leb elegesisa, dara sikda seleb domek. Na nong ak dara, aldib Imik Neyung bek ab yeilimok senewoka, Imik Neyung adya bokol yeilimok nong ak sokok yok dib senemek. 17:9 Nara wen siksamba mololesin. Nara sokok an yoka' nim emba molonggulumna bok, alda Neyung o, anja nak elegenulum nang enyek, sikda anjinya nek ulumaka' anasa, mololesin. 17:10 Nidya' yoka'-yoka' narinya nera anjinya ulumlakanya, anjinya neneba narinya ulumla. Anasa leboka, sik nong adya nadya si imik dal. 17:11 Nara sokok an loboka anak yanamna' anasa, anyagan unggulumnamna bok, sikenek dara, sokok an or ulumnamak. Anasa, Neyung geisa ululamnya o, anab nab neika' denewoka ulunam sok, sikbabya hnonok nong ulunoka' aboka, anja nak elegenulum si migib edya, sikenek bleboka bo ulumnesilim. 17:12 Nara sikeneblaboka neika' ulumouba salek era, ban anja nak elegenulum si migib edya, nara sikenek bleboka pe bo ulusisa. Nadya pe beiyiboka bo ulusisa dara, Imik Neyung yuba momnya doboka' gigiwolula' aboka, weininggeldana' geknemoknya nok, hnonok seleb weiningdok," hyok. 17:13 "Wene salek anak yanamna bok, nara sokok an anam ulumna salek enyek, sikenek ei-ei ganya, nak ulunel sok, sikenek deknewosulula' aboka, mololesin. 17:14 Neyung o, anja yub enyek sikenek seleb leb elegesisaakanya, nara sokok anyebnya unggulumna sok, sikba sokok anyeb nang unggulumaka' anasa, wera sokok an yoka' nim edya sikenek lek senelesak. 17:15 Neyung o, sik nong anyek sokok anyeba' ara dobsiloma' aboka molonggulumna. Alda sikenek malya una'anya bedya obsilyek aboka, anja pe bleboka bo ulusiloma' aboka mololamna. 17:16 Naba sokok anyebnya unggulumna sok, sikbabya sokok anyeb nang unggulumak. 17:17 Neyung o, anja' dib yub edya, sikenek muna' nanga neneweisilom. Anja yub era, dib nong yub ara alan. 17:18 Neyung anja nak sokok an bokol yeilinulum sok, nadya ono' sikenek sokok an boksisa. 17:19 Neyung o, sik nong anyek, muna' mem nimi danoka' aboka, na damnya anaba muna'anya neneldalamna," hyok. 17:20 "Neyung o, nang en siksemba ok molonggulusin. Alda ono' eimik nim enebabya, yuba lelemnemaka' adya, nak dib senewanamak nim emba hnon mololamna. 17:21 Dara, nadya anak mololamna' ara, Neyung anda na lomok ulunelemekanya, nara an lomok ulunggen sok, sikbabya neika' hiboka hnonok ulunoka' aboka mololamna. Wera ono', soko nim adya, nak aldib Imik Neyung adya bokol yeilimok senewanoka' aboka, sikda hnonok uboka nu lomok ulunoka' aboka mololamna. 17:22 Neyung o, numba hnonok hiboka ulunam sok, sikbabya hnonok hiboka ulunoka' aboka, wera anja si imik dangana' nak elegenuluma' ara, ono' nadya sikenek seleb elegesisa. 17:23 Dara, nara sik lomok uboka, ono' anda na lomok uboka, sikda hyak ganya hnonok ulunoka' aboka mololamna. Anadya wera, soko nim edya, Yesus ara aldib Imik Neyung adya sokok sam bokol yeilimok senewoka, hnonda Neyung anja nak wana' ulunelem sok, ono' sikenek wana' ulusil senewoka ella danoka' aboka mololamna," hyok. 17:24 "Neyung o, anja nak elegenulum nang edya, soko anam uyiwanggom danyek, men orowek anja nak wana' ulunuluma' anasa, wera si imik nenena' elegenuluma' anyek, sikda na ulumnya' ak ulumeijekanya, nak si imik nenena' anyek, sikba eibnoka' aboka mololamna. 17:25 Neyung perob ok ululamnya o, sokok an yoka' ara anak elgom ulunjak bok, nak dara, anak ella ulunggen. Dara, elegenulum nang edya dara, anda sokok an bokol yeilinuluma' ara, dib senelemak. 17:26 Neyung, anja ululamnya nera, sikenek seleb leb elegoka amesisa. Dara eimik eneba, nera soba' unubdibiganamna. Wera anja wana' elegonuluma' ara, sikja ganya ek sam soba' ulumlyekanya, nara sikja ganya lomok ulumnesin aboka unulumnamna," hyok.
18:1 Yesus adya ban nidya' seleb wenyaboka molobgogomok dara, alak diriga ban nang eb, neika' Kidron mek gemek sam gobuka bilimek. Dara, bilimeka' ak sam ara, ara gal damok nauba ulumok. Dara, al anyagan neika' wekel biniboka ulumek. 18:2 Yesus ak obnelum aboka yuba dil binimoknya Yudas bera oro wenyek, Yesus ab, alak diriga ban nang eb, anyagan soba' longolomeka' anasa, ban soko ella ulumok. 18:3 Dara, Yudas bera orowek ella ulumok bok adya, Yahudi yuba wa gaka' dub nang eb, Parisi nang eb dadya, orugusik Imik Neyung e diri ulumek nang eb, Romawi yin bona' nang eb dara, yin ab, wesa' ab, dolukna' gama' ab, boboka Yudas be we mengelemok pik yeilimek. 18:4 Dara, Yesus ara alak yoka'-yoka' nidya' unuwanameka' ara nidya' orowek ella ulumok bok adya, alak obnoba' aboka we yanggek nang sik berem yeiniboka, "Ugunda heknya ek el yabalelum do?" husuk. 18:5 "Nunda Yesus Nazaretnya benyek elemab," hyek. Dara, Yesus adya dara, "Bera nara alan," hyok. Wera, Yudas bera Yesus ak yuba dil bilimoknya beneba neika' anyagan ulumek. 18:6 Yesus adya, "Nara bera alan," aldalamok enyek, obnoba' aboka we yeilimek nang era ban kemek dara, glaka sokok malyinggilimek. 18:7 Dara ono', Yesus adya saaboka hnon, "Ugunda heknya ek obnoba' aboka elelum do?" aboka heibsuk dara, "Nunda Nazaretnya Yesus benyek elemab," hyek dara, 18:8 "Nara alan seleb wenyasina' anasa, aldib nasamba elenumun bok dara, yok nang bululum hululum," hyok. 18:9 Yesus adya ban wenhyoknya nera, alja orowek lemok yub era, "Neyung o, anja nak doboka elegenulum nang era, hnon weiningdanggunumak," amoknya nenesa gigiwolula' aboka lebok. 18:10 Dara, Simon Petrus bedya parang gabo bomok ara doboka, Yahudi yuba wa gaka' dub nang edya oruknanya, si Malkhus bek alja o mekla' leboka emok. 18:11 Dara, Yesus adya Petrus bek, "Anja parang era men su' lomok onsok boblom. Anja dara, nara Neyung bedya oka gweknelam aboka elegenyok mek era denggunumso senenelem de?" hyok. 18:12 Dara, Romawi yin bona' nang eb sikja' dubnya beneba, Yahudi nim edya Imik Neyung yub ek pe keeboka bo ulumek nang eb, Yesus ak soruka salawoka henga goumek. 18:13 Henga goubeka' seleb dara, Kayafas bedya alja' yamal bek, ban salek era, Yahudi nim edya yuba wa gaka' dubnya Hanas ulumoka' ak bo byik. 18:14 Kayafas bedya orowek Yahudi nim ek, "Nunja soko malya dang-danga balamla' anasa, ben hnonok nidya' pelesulula' aboka somoganamso dara, perob," aboka wenelesuknya bera alan. 18:15 Simon Petrus beb, yoknya diriga balamoknya ben hnon, Yesus ak eimik dobgiga balarek. Ban salek Yesus ak diriga balameknya alja Yahudi yuba wa gaka' dubnya bedya ella ulumoka' anasa, wera alja eremek Yesus ab neika' wekerek. 18:16 Bok, Petrus bera beiyik e sindamak sekemok. Dara ono', yuba wa gaka' dubnya ella ulumoknya bera, saaboka yeilimookanya, beiyik goboka pikek diri seklemok ek wa gel geb yuba sabdeekanya, Petrus bek eboka e lomok bo wekemok. 18:17 Dara ono', pikek diri seklemok ek wa gel gedya Petrus bek, "Anda Yesus bedya alja yuba neklenggelnya ululam," aboka lel yabok dara, Petrus bedya, "Na goma', nara orok," hyok. 18:18 Ban sum era saragena' anasa, ek wa welemek nim eb, Imik Neyung ek pe keeboka bo diri ulumek nang ab, sikja uka lolomeka' ak sekoka lekeldalamek dara, Petrus beneba neika' lekeldalamek. 18:19 Dara wene salek, Yahudi yuba wa gaka' dubnya bera Yesus ak alja diriga ban nang emba hnon, alja neklesuka' amba hnon, heilimok. 18:20 Dara, Yesus adya alak leboka' ara, "Nara sokok an hyak nidya' lelewoka laga lelemsa. Nara Yahudi nim edya yuba don ek hnon, Imik Neyung ek sam Yahudi nimi nauba longomna' ak hnon, nara gunuwoka lena' ara orok, nidya' laga poboka lelemsa. 18:21 Wei, anda hekasa nak heinelem do? Nak heinena' ara loboka, alda nadya sikenek yoka'-yoka' nidya' leboka lelemna' ara, hyak dib pe ella ulumaka' anasa, nadya yuba kemek nim ek heibnesilim," hyok. 18:22 Yesus adya Yahudi yuba wa gaka' dubnya bek wenyaboka laga lelemok enyek, yin bona'anya hnon, ok berem seklemoka' ara, yuba wa gaka' dubnya bek anaso wenyana' ara mem aboka, Yesus ak waboka omok. 18:23 Dara, Yesus adya yin bona'anya bek, "Nara malya lemnya dara, nera malya lelam aboka laga leblom. Dib lemnya bok dara, wera hekasa nak waboka olenelem do?" hyok. 18:24 Wera Yahudi yuba wa gaka' dubnya Hanas bedya, Yesus ara gasa heng gebman, Yahudi Imik Neyung yuba wa gaka' dubnya Kayafas bek bo bululum aboka orugosuk. 18:25 Simon Petrus bera or anam ukuk lekdangdo seklemok. Dara, anyagan seklemek nim edya, Petrus bek, "Anda Yesus adya yuba dololamnya bera an hnon," aboka lelemek. Bok, Petrus bedya dara, bobnenewoka, "Nara orok," aboka lebok. 18:26 Yuba wa gaka' dubnya bek arawoka welemoknya o mekla' garamoknya benyek, al nang yila' adya, Petrus bek, "Nara anak Getsemani wak ono' Yesus ab neika' ulmouluma' ara eibnenggubmagen do?" hyok. 18:27 Dara, Petrus bedya bobnenewoka, "Nara orok," aboka lel yabok dara, al wene sab-sab ayam wining yuba ngobumok. 18:28 Wera hyak luguna' nong anam gwelegel yabok dara, Yesus ak doboka yuba dubnya bek ara mok soko damnya Pilatus bedya senenggom ek bo byik. Yahudi nim era, sikja perob sum dena' denemek bok anasa, nimiguma' blekibyek aboka, nimi henga gereksin dub ek ara Yesus al neika' weknenggumek. 18:29 Anasa, Pilatus bera beiyik goboka yibiniboka, "Ugunda hekasa benyek hek damok emba yana kiboka bo yeililum do?" aboka heibsuk. 18:30 Dara sikja, "Alda malya una' orok dara, alak unuwoka anda mok soko dubnya bek bo yanggunusibya," hyek. 18:31 Pilatus bedya Yahudi nim ek, "Wera doboka bobmunukanya, ugunja unuwanalum an yuba lelemla' sunuwoka yana lelel bululum," hyok. Bok, Yahudi nim edya, "Nuk dara, nim ona' anyek, mem alasak," hyek. 18:32 Ban unumoknya nera, Yesus adya alak somoganamoka' anasa, orowek al damnya unuwanenel aboka leldalamoka' anyek, gigiwolula' aboka lebek. 18:33 Dara, Pilatus bera saaboka senenggom ek wekoka, Yesus ak youboka, "Anda aldib Yahudi nimi dubnya ululam de?" aboka heibok. 18:34 Wera Yesus adya Pilatus bek, "Neyung o, ban leblamnya nera, anja ok ganya doboka seiniwoka leblam gom, yok nim edya anak wenyaboka Yesus ak heiblom amaka' anasa, heibnelem gom?" hyok. 18:35 Dara, Pilatus bedya Yesus ak, "Alda Yahudi nang ulumla senelenelem de? Anak doboka nak bo yeilinjak nang era, anja meneng sokok nang eb, Yahudi yuba wa gaka' dub nang eb dadya unjak. Dara, heka' men unuwoluma' anasa unjak goma?" aboka heibok. 18:36 Anasa, Yesus adya leboka' ara, "Nadya dub una' danenela' ara sokok anyebnya goma'. Nadya heik era dub una' danenel an ulumso dara, wera nadya mab edya Yahudi dub nang ek henga geregoka bo banggom aboka nak blebneneseng. Bok ununena' orok ara, nadya dub una' danenel era sokok an unggulumla adya umla," hyok. 18:37 Dara, Pilatus bedya Yesus ak, "Wera anasa, anda aldib dubnya ululam de?" aboka heibok. Dara, Yesus adya Pilatus bek, "Nara dubnya henelem ara dib lelam. Nara sokok an yeilimsa dara, beiyinyeka' ara, nimi yok nim ek dib yub ak laga lebsununa' aboka yeilimsa. Anasa, dib yub ak wana' ulumak nim era, nadya yuba kelemak," hyok. 18:38 Dara, Pilatus bedya Yesus ak, "Hek yub ek dib nong ulumla do?" aboka heibok. Dara, Pilatus bera ek gouboka beiyik yibiniboka Yahudi nim ek, "Nara Yesus ak alja malya una' hnon eibnenggumna. 18:39 Bok, ugunja sob unululuma' ara, nunja Yahudi nim edya perob sum yenewan dara, nimi ben hnon henga geregamna' ara, nunsamba loblamla' anasa, ugunja or ban Yahudi nimi dubnya benyek henga loblul senelelum de?" aboka heibsuk. 18:40 Dara, sikda yeiriwoka ebngalagoka, "Alak lobna' ara hyak mem loblom. Barabas benyek loboka elegeisilom," aboka lelemek. (Ban Barabas bera, hoka donanya ulumok.)
19:1 Wera Pilatus bera wekoka Yesus ak, an legeboka oblulum aboka orugusuk. 19:2 Dara, yin bona' nang edya, si henga gwanewoka Yesus adya hukuk sam goliyimek. Dara ono', mouk dok boka' boksom akleng hnon ongiyimek. 19:3 Wera sikda Yesus ak sam bini yeiniboka, "Anda hyak Yahudi nimi dubnya ululama' anasa, giblenjab," aboka nauba waboka olomek. 19:4 Dara ono', Pilatus bera ek aba' ara gouboka, Yahudi nim ek, "Kendululum, Yesus ak doboka ugunuk bo yeilisina' ara, damoka lelemna' anyek, alja anyek okoka malya ulumla' ara, eibnenggumna' anasa, ugumba eibluluma' aboka usin," hyok. 19:5 Wera, Yesus ara si heng adya huk ak goluwoka, mouk dok akleng ongiyimeka' ab, gobok dara, Pilatus bedya, "Wera anyek kendululum," hyok. 19:6 Wera, Yahudi yuba wa gaka' dub nang eb, yin bona' nang eb, Yesus ak eibik dara, "Oboka gal ak glabnok, oboka gal ak glabnok," wenyalamek bok, Pilatus bedya sikenek, "Nara alja malya una' uboka, damok anyek okoka eibsinya enyeka', nera or ugunja ganya doboka oboka dibnelum," aboka lebok. 19:7 Bok, Yahudi nim edya Pilatus bek, "Nunja Yahudi nang yuba momnya dobok sok, Yesus adya al damnya, Nara Imik Neyung bedya me, aldalamla' anasa, alda or somogolul," alamek. 19:8 Pilatus bedya ban wenyalameka' kebok dara, alda ono' lok so uboka, 19:9 saaboka senenggom ek wekok dara, "Anda damok ara hekmok abnya do?" aboka heibok bok, Yesus adya dara, alak meka' yuba sab eleganggubok. 19:10 Anasa wera, Pilatus bedya Yesus ak, "Anda nak yuba sal eleknena' orok ara lek senelam de? Nadya or oboka gal ak glablulum e, or henga loblulum e, henesininya bera nara an ulumna' ara, anda elgom ulunelem de?" hyok. 19:11 Dara, Yesus adya Pilatus bek, "Imik Neyung adya unun migiba', neyung anak elekgena' orok dara, wera, neyung anda yoka'-yoka' salya' ganya doboka unuwanggunusom. Anasa, neyung o, anak gom, alda nak oblulum aboka yuba diyinelnya benyek, alja malya una' era hyak senenggoma' ulumla," hyok. 19:12 Ban kemok dara, Pilatus bedya Yesus ak henga lob lobnuna' aboka dul yabok bok, Yahudi nim edya, "Ban benyek henga lobnelam dara, wera anda Kaisar bedya alja hemyab unggulumena' adya ubnelam. Nara dubnya aldalananya alda Kaisar bek isa'anya ulumla' adya lelelabok anasa," aboka ngeboka lelemek. 19:13 Pilatus bedya ban unurub yuba kebok dara, Yesus ak seleb doboka bo gomek dara, Pilatus bera henga geregoka yana lelelesika' ak, lagasa girik ekla buna' ak, Ibrani yub adya dara, Gabata alameka' ak bukumok. 19:14 Ban salek era yubyek dukdukanek dang-dang balamok. Al ono' neik sum era, Israeli nim edya sikja perob sum meewanoba' aboka ulumek. 19:15 Dara, Pilatus bedya Yahudi nim ek, "Ugunja' dubnya bera alan," hyok. Bok Yahudi nim edya, "Bo goblulum, bo goblulum! Oboka gal ak glablulum," aboka lelemek. Dara, Pilatus bedya Yahudi nim ek, "Nadya ugunja dubnya benyek oboka gal ak glabnun de?" aboka heibsuk dara, Yahudi yuba wa gaka' dub nang edya, "Kaisar benyek ok nunja dubnya bera alan ulumla' anasa, or oblulum," aboka lelemek. 19:16 Dara, Pilatus bedya Yesus ak doboka, wera an oboka gal ak glablulum aboka elegesuk dara, yin bona' nang edya doboka bo byik. 19:17 Wera, Yesus ara alak oboka glabnemek gala, al damnya doboka bobok dara, nimi huk yanggol meinik, Ibrani yub adya dara, Golgota mein aboka silimek meinik sam bo byik. 19:18 Dara wera, Yesus ara mein enyek an gal ak glamek. Wera neik sum enyek, Yesus ab, hoka' dorek nang penya uboka, ben hnon sirik ek sam, ben hnon waneng ek sam, Yesus ara hnoumung uboka, gal ak glabsik. 19:19 Wera Pilatus bedya, Yesus oboka glamek gal ak sam ara, Yesus ara Nazaret mok ebnya, Yahudi nimi dubnya an momnya dona' enyek doboka geregolulum aboka orugousuk. 19:20 Ban wenyaboka momnya domeka' ara, Yesus ara senenggom heik berem oboka gal ak glameka' adya, ban momnya dona' era Yahudi nimi nauba einilimek. Ban momnya domeka' ara, Ibrani yub adya hnon, Latin yub adya hnon, Yunani yub adya hnon, denewoka domek. 19:21 Dara, Yahudi yuba wa gaka' dub nang edya Pilatus bek, "Yahudi nimi dubnya aboka momnya donggom mem. Alda nara Yahudi nimi dubnya bera alan aldalalanya bera an aboka momnya doblom," hyek. 19:22 Bok, Pilatus bedya dara, "Al nadya seleb wenenya nok ulumnamla," hyok. 19:23 Wera, yin bona' nang edya, Yesus ak seleb oboka gal ak glamek dara, sikda Yesus adya ongolomok boksom gwiriwoka domek. Dara, boksom garawoka dombadya nenewoka, ben hnonok-hnonok domek dara, ono' Yesus adya wameldan akleng eneba domek. Yan akleng ara garawoka lelewoka wibnenggumek, alda salya' doblinggoka denewoka wimek. 19:24 Dara, yin bona' nang edya sik moumen, "Boksom enera garal menekna' ara lobnemab mem. Alda heknedya nidya' dobnamla do aboka sununa' sunuwanamab," alamek. Ban wenyameka' ara, ununumna' lelemek nang edya Imik Neyung yuba momnya domeka' anyek gigiwolula' aboka ulumeka' ara, "Sik gangganek sam nadya akleng bokoldalamek. Dara, nadya dolungna' akleng dobnoba' aboka maka meiboka sunumek," amoka' anasa, yin bona' nang edya ban orowek lemok sok gigiwoka unumek. 19:25 Dara, Yesus oboka glamek gal damak ara, Yesus alja genong geb, alja weisab eb, Klopas ala' gel Maria geb, yok Maria Magdalena geb, diri seklemek. 19:26 Yesus adya alja genong geb, alja wana' ulumoka' diriga bannya beb, neika' sekereka' eibok dara, alja genong gek, "Genong o, nera anja me nera an," hyok. 19:27 Dara, Yesus adya alja wana' ulumoknya bek, "Nera anja genong gera alan," hyok. Dara ban sum enyek, Yesus eilin gera, nab neika' ulumnenam aboka Yesus adya wana' ulumoknya bedya domok. 19:28 Wera, Yesus adya yoka'-yoka' nidya' ara hyak seleb unumoka' ella ulumookanya, Imik Neyung yuba ununumna' yuba momnya doboka' anyek gigiwolula' aboka lebokja, "Nara mek ok ubnel," hyok. 19:29 Dara, ok berem ara yu anggur mek ek, mek hmei yanggol hnonok ulumok. Dara, hnyoma' anyek anggur mek lomok hwiboka, goroka' go gondowoka, Yesus adya sibama' ak sam doro doronggomek. 19:30 Wera, Yesus adya seleb debgogowoka, "Wera seleb nidya' gigiwal," hyok dara, nganga gukoka ganya dubhin dakoka somogok. 19:31 Yesus ara Yahudi nim edya Sabat mem sum oka dangamok dara, nim oboka gal ak glabalona' mem senelemeka' anasa, Yahudi nang edya, Yesus ab neika' oboka glasik nang eb dara, sikja yana bologoka, nimi be' dakoka sokok sam dibnemak aboka, Pilatus bek or unuwanamak gom aboka molol yeilimek. 19:32 Dara, yin bona nang era men biniboka, Yesus ab, neika' penya nang gal ak glasik nang edya yan moumena' yoka nidya' bologosik. 19:33 Bok, Yesus bek oka bilimek enyek, seleb somogomoka' eiyimek dara, yana bolokna' lomek. 19:34 Bok, yin bona'anya ben hnonja, Yesus adya yaija' ak sam gama' dolugomok dara, eneng ab, mek ab, berra belega yanggalamok. 19:35 Dara, ban nidya' unulumoka' anyek okoka ok ab eiyimoknya bedya, aldib unumok aboka laga neksuukanya, alja eiyimoknya bedya unumok hyoka' ara aldib lebok. Alja lebok yub era dib nong yub anyek ella uboka, ugumbabya dib seneleluluma' aboka nekesuk. 19:36 Ban unuwoka Yesus adya alja yana bologanggumeka' ara, ununumna' lelemek nang orowek lero momnya domekja, "Alja yan yoka hnonok sibin anaba bologanggunumak," aboka momnya domeka' anyek, gigiwolula' aboka umek. 19:37 Dara ono' ununumna' yuba momnya hnon doboka' ara, "Nim adya sikja alja yaija' ak gama' dolugumeknya bek kemelemnemak," aboka momnya domok. 19:38 Ban eini nidya' unumoka' seleb dara, nimi Yusuf Arematea mok ebnya bedya, Pilatus bek, "Yesus ara be' dakoka dibnamna goma?" aboka molol bilimok. (Yusuf bera Imik Neyung yuba doboka Yesus adya diriga ban nang ulumok bok, Yahudi nang anyek lok anasa, laga lenggulumok.) Dara, Pilatus bedya, "Or unuwanalam," hyok dara, bindiwoka Yesus anyek be' gala dakoka domok. 19:39 Wera ono', youma' Nikodemus Yesus ak inimnek yeilimoknya benebabya, Yusuf beb Yesus doboka neika' dibnenam bar aboka yeilimok. Dara, Nikodemus bera benelya song gal ab, ngikildan gal yareng ab, nidya' hiboka igin ara tiga puluh kilo anaso' ak bo yeilimok. 19:40 Dara, Yusuf beb, Nikodemus beb, Yesus adya be' dakoka beibdek dara, somogan nim dibnamna danyek, song mek eb, kelemek boksom eb waaboka, Yahudi nang edya nimi somogan nim unulumek sok sunuwoka ubdek. 19:41 Dara, Yesus oboka gal ak glabnemeka' berem, nimi dilina' perob oulyang hnon ulumok. Dara, al onok ara, nimi hnon meka' dibnenggumeka' anyek, or anam loklomek oulyanga hnon ulumok. 19:42 Dara, ban oulyang enyek ok uboka, Yahudi nim edya perob sum era oka dok bok anasa, Yesus ara anyagan loklomek sokok beiyimek.
20:1 Dara, minggu en men sum hyak gwelekna' yangman enyek, Maria Magdalena gera Yesus diyimeka' ak bilimok. Wera Yesus diyimek girik era, seleb dangawoka demegemoka' ak eiyimok. 20:2 Dara, Maria gera berra aboka Simon Petrus beb, Yesus adya wana' nauba ulumoknya alja yuba doro diriga bannya beb, ulureka' ak biniboka, "Wenelesilnya bera nim adya hoka' be' gekman dakoka bo byaakanya, hanyagar gelelenga doknowoka beiyimaka' ara nunda elgom ulumab," wenyal byuk. 20:3 Dara, Petrus beb, ban yok diriga bannya beb, Yesus diyimek oulyang ek kemel bilirek. 20:4 Wera, sik penya nang era berra aboka yeiriwoka kemel balarek bok, yoknya benyek men Yesus diyimeka' ak ok berem bilimok, bok Petrus bera or nemen so balamok. 20:5 Dara, men byuknya bedya geniwoka Yesus diyimek girik lomok kemelemok enyek, waaboka diyimek boksom ok anyagan ulumoka' ak eibok. Bok alda girik lomok ara weknenggumok. 20:6 Dara ono', Simon Petrus bera eimik yeiniboka, alda Yesus diyimek girik lomok wekok. Dara, alda Yesus waaboka diyimek boksom hnon eibuukanya, 20:7 Yesus adya hukuk sam waaboka diyimek boksom ara pe winiwoka albeyok oka mamoka' ak hnon eibuk. 20:8 Dara ono', men bilimoknya beneba Petrus beb neika' wekoka, ban nidya' unumoka' anyek, alja heng adya kaboka okoka eiyimok dara, dib senemok. 20:9 (Sikda orowek Imik Neyung yuba momnya doboka' ak sam, Yesus ara somogalya dara, winilinya sum embenga' suboka buknamla aboka, momnya doboka' ara, anam elgom ulumek). 20:10 Dara, yuba doro diriga ban nang ek sam on pik bilirek. 20:11 Bok, Maria gera Yesus diyimek girik damak engero seklemok. Engelemok jok, ono' geniwoka girik damok dan kemok dara, 20:12 wera alda Imik Neyung lero nanga penya geisa boksom ongo-ongo bilirek nang ek eiyisuk. Penya lero nang era Yesus adya be' girik ek sam, ben hnonda huk sam ben hnonda yan ak sam, bulureka' ak, Maria gedya eiyisuk. 20:13 Dara, nang danadya Maria gek, "Genong o, anda hekasa engelelam do?" aboka heibdek dara, Maria gedya sikenek, "Nadya wenelesilnya benyek, nim adya hoka' doboka, hanyagar beil bilimak do aboka engelamna," hyok. 20:14 Seleb wenyabdangoka, ono' dangawoka weilik sam kemelemok enyek, Yesus ara lagono sekemoka' ak eibuk bok, Maria gedya dara, wera Yesus ara alan sekemla senewoka ella ubnenggumok. 20:15 Dara, Yesus adya Maria gek, "Genong o, anda hekasa engelelam do? Anda heknyek elelam do?" aboka heibuk. Wera, Yesus nong bok, Maria gedya dara, Yesus diyimek soko wenya benya' aboka, "Neyung o, anja Yesus be' dakoka doknemen dara, na damnya dobnamna' anasa, anyagan doknomna aboka neknelom," hyok. 20:16 Dara, Yesus adya Maria gek, "Maria o," hyok. Wera danyek, Maria gera dangawoka, Ibrani yub adya, "Rabboni o," hyok. Rabboni nunja yub era, neklesilimnya alamla. 20:17 Danyek Yesus adya, Maria gek, "Nadya' neyung bek anam binggumna' anasa, anda nak soruk salanenggom. Bok, anda berra aboka nadya hemyab ek bimenekanya, Yesus ara seleb nub alab, nunja neyung Imik Neyung bek, binimla aboka, wenyal bilom," hyok. 20:18 Wera, Maria Magdalena gera, Yesus yuba doro diriga ban nang ek biniboka, "Nara Wenelesilnya bek seleb eibna," wenyaboka, ono' alja ban hnon ban hnon aboka wenyhenel wenyaro nekdo bilimok. 20:19 Dara ono', al on minggu en men sum enyek seleb inimok dara, Yesus alja yuba doro diriga ban nang era, Yahudi nang enyek lok anasa, obsijek aboka pika gasa seregoka, hnonoka' ak longomek dara, Yesus ara albeyok sik gangganek sam gelelenga sekel yeilimok dara, sikenek, "Maly, lok ganya bonggom," aboka lebok. 20:20 Yesus adya ban seleb wenyaboka lebok dara, alja soruka paku bokomeka' ab, yaija' ak gama' dolugumeka' ab, wera an unuwanyeka' anyek, kendululum aboka sikenek amasuk. Dara, alja diriga ban nang era Wenelesilnya eiyimek dara, hyak nauba eiya dasuk. 20:21 Dara ono', Yesus adya saaboka lebsukja, "Maly, lok ganya bonggom. Neyung bedya nak sokok sam bokol yeilinyok sok, nadya ugunuk Imik Neyung yuba lero balalulum aboka boksin," hyok. 20:22 Dara, ban wenyabgogomoka' seleb dara, sikenek hiba' gob goluwoka, "Wera Imik Neyung Geisinya doblulum," asuk. 20:23 "Ugunda yok nang malya una' sikenek ab memewanggunulum dara, Imik Neyung anababya ugunja malya una' ugumbabya meewanggunusil. Bok, ugumbabya nimi malya una' sikenek ab memelemnalum dara, Imik Neyung anaba neikik, ugunja malya una' ugunuk ab soba' memelemnesil," hyok. 20:24 Bok, Yesus yeilimok dara, yuba doro diriga bannya ben hnon nimi si Thomas yok si nera Didimus alameknya bera, yok yuba dolomek nang eb, neikik unggulumek. 20:25 Dara ono', yok diriga ban nang, "Nunja Wenelesilnya Yesus bek aldib eiyimab," aboka lebek dara, Thomas bedya sikenek lebsuka' ara, "Nara Yesus adya soruk ak paku bokomeka' diliga' ab heng yoka' bekoka eibnenggumnya dara, ono' nadya soruk enyek, alja gama' yaija' dolugeka' diliga' ak soruka dolongna' orok dara, nara aldib senewanggunumna," hyok. 20:26 Dara, ono' nenyek minggu sum enyek, Yesus alja yuba doro diriga ban nang eb, neika' Thomas beblaboka neika' ak ulumek. Dara, e pika nidya' gasa seregoka longomek bok, Yesus ara gabdeboka sik hnoumunga sekoka, "Maly, lok ganya bonggom," hyok. 20:27 Dara, Yesus adya, Thomas bek, "Anja soruk era nak an dibmenekanya, nadya soruk ak an kendelom. Anda soruk okoka, nadya yaija' lomok sam soruka doronggoka, wera nak ganya penya-penya loboka, alda wera nak dib senewanenelem," hyok. 20:28 Dara, Thomas bedya Yesus ak lebokja, "Nadya' neyung Wenelenelemnya, nadya Imik Neyung alan ululam," hyok. 20:29 Dara ono', Yesus adya Thomas bek lebokja, Anak dara, nak ok okoka eibnelema' anasa dib senewanelem bok, nimi yok nimi nak heng eilinena' orokjok, nak dib senewanyak nim era, hyak pe ulumak," hyok. 20:30 Yesus adya hyak yoka'-yoka' damoka nauba, alja yuba doro diriga ban nang edya hogung ak yoka'-yoka' lok so' bekna' nauba unulumok bok, buku enyek an unulumoka' nidya' ele' gigiro momnya dobnenggurub. 20:31 Bok, ban nidya' anyagan momnya dorobnya nera, ugunja Yesus ara aldib Kristus nimi blebsina' dubnya uboka, Imik Neyung me diba' senewoka seiniwoluluma' aboka, dara alak dib senelemuna' adya, alja si nenesa leboka, ugunda embenga' una' diba' dobnelum aboka, ban yub era momnya dorob.
21:1 Wera ono', Yesus ara alak diriga ban nang ek sam, Tiberias mek gwan gemek sam sikenek saaboka aabdok. Alja unuwok yub era ban: 21:2 Simon Petrus beb, Thomas benesa yok si nera Didimus aboka silimeknya beb, Galilea sokok Kana heikek abnya Natanael beb, Zebedeus bedya mabo penya, ono' yok diriga ban nang yok penya nang eb, mamagoka ulumek. 21:3 Simon Petrus bedya yok nang ek, "Nara ikan el binimna," hyok dara, ono' yok nang edya, "Wera nunda neika' unuwanamab," hyek. Dara wera, sikda bindiwoka mek ekla buna' ak bukumek dara, inimnek pik moruwoka elemeka' anaba, hadya' hyak meka' sibin anaba yoka'-yoka' hnon dorowanggumek. 21:4 Dara, gwelek sirigoka henga dorogol yabok dara, Yesus ara mek gwan gem berem sekemok bok, alak diriga ban nang edya mek dubuk sam ab dara, nera Yesus ak sekemla senewoka ella ubnenggumek. 21:5 Dara, Yesus adya sikenek, "Najabo yab o, hadya' hnon dolum gom?" aboka heibsuk dara, sikja, "Hnon doldona' orok," hyek. 21:6 Wera, Yesus adya, "Ugunda hadya' dobnelum aboka, ugunja hadya' ouma' akleng anyek, mek ekla buna' sirik ek sam bobogolulum," hyok. Dara, unuwanalum amok sok unumek dara, hadya' ouma' akleng ara hadya' nauba adya deknewoka lang-lang alamok adya jabnamenggoma dangamok. 21:7 Wera danyek, Yesus adya hyak wana' nauba ulumoka' alja yuba doro diriga bannya bedya Petrus bek, "Ban ara Wenelesilnya benya'," hyok. Petrus bedya, "Ban ara Wenelesilnya bera an," yuba kemok dara, men gwirimok akleng era ono' ongobgogobok dara, mekek yoruwoka mek gemek bilimok. 21:8 Dara, yok diriga ban nang era, or ok gem berem wera ok berem ulumeka' anasa, hadya' deknemok aklenga gliboka mek ekla buna' pik eimik gokgiga bilimek. 21:9 Wera, sikda mek gemek sam seleb yeilimek dara, Yesus ara orowek uka sekoka hadya' hnon uk ak dab loboka, roti gwaneng uk dubuk weremoka' ak eiyimek. 21:10 Dara Yesus adya, "Wera ugunja wen doblum hadya' era hnon anyagan wen bo yoululum," hyok. 21:11 Wera, Simon Petrus bera mek ekla buna' eilib welewoka, ikan akleng gliboka gemek bo beil yok. Nidya' hadya' ok deknero lomoka' adya, hadya' nidya' hiboka dara, denga hnab badya anaso ulumok bok, hadya' ouma' akleng era hnon meka' denewanggumok. 21:12 Dara Yesus adya, "Wera yeiniboka del yabalelulum," hyok. Wera sikda nidya' ara al banara Yesus ulumla senemekjok, sikja hnon anda heknya do aboka asa' ganya boboka, ben hnonok anaba heibnenggumek. 21:13 Dara, Yesus ara yeindeboka roti gwanenga doboka soboka sikenek elegesuukanya, hadya' anaba neik so unusuk. 21:14 Wera Yesus seleb somogomokjok embenga' suboka bukok dara, nen unumoknya nera li winilinya, Yesus adya alak diriga ban nang ek al nonga laga amasuk. 21:15 Wera, sikda nidya' seleb debgogomek dara, Yesus adya Simon Petrus bek, "Wei, anda Yohanes mamnya Simon o, yok danara mek so bok, anak dara, nak hyak nauba wana' ulunelem do?" aboka heibuk. Dara, Petrus bedya Yesus ak, " Aldib e, Wenelesilimnya o, nara anak wana' ulunggena' ara anda ella ulunelem e," hyok dara, Yesus adya Petrus bek, "Wera anasa, nadya domba memab anyek, pe geregoka bo ulunelom," hyok. 21:16 Dara ono', hnon sounuwoka penenya sum Yesus adya Petrus bek, "Wei, anda Yohanes mamnya Simon o, anda nak wana' nauba ulunelem gom?" aboka heibuk dara, Petrus bedya Yesus ak, "Aldib e, Wenelesilimnya o, nara anak wana' ulunggena' ara anda ella ulunelem e," wenhyok dara, Yesus adya Petrus bek, "Wera anasa, nadya domba pama danyek pe geregoka bo ulumnenelem e," hyok. 21:17 Dara, Yesus adya Petrus bek, alja onsok saaboka neiknya nenyek li winilinya sum, "Anda Simon Yohanes mamnya, nak nauba wana' ulunelem de?" aboka heibuk dara, wera Petrus bedya ganya angoo senewoka, Yesus ak, "Wenelesilimnya o, anda yoka'-yoka' nidya' ella ululama' anasa, wera anasa, nadya anak nauba wana' ulunggena' ara anda ella ululam," hyok dara, Yesus adya ono' Petrus bek, "Wera anasa, nadya domba pam enyek pe geregoka bo ulunelom," hyok. 21:18 Dara, ban nidya' Yesus ab, Petrus beb wenyab danggogoreka' seleb dara, ono' Yesus adya Petrus bek, "Nara anak dib lebgen. Anda wen anam goubenya ululam danara, goukwa norona' ara an damnya norobdangoka, anja nara anyagan bisinya senemna' ak sam balalam bok, eimik anda nauba damen dara, anda soruk ok okmenekanya, yok nim edya anak noroyiboka, anya ban mok enyek an bana' lek senemen ak sam bo bininjak." 21:19 Yesus adya ban nidya' Petrus bek wenhyoka' damok ara, Imik Neyung si imik nenen danasa, Petrus benyek heka' huboka somoganamoka' damok anasa lemok. Ban nidya' wenyabgogomoka' seleb dara, Yesus adya Petrus bek, "Anda nak diriga yalanelom," hyok. 21:20 Wera, Petrus bera kemel samalemok dara, Yesus adya wana' nauba ulumoka' yuba doro diriga bannya bera, eimik dobol balasuka' eiyimok. Yesus obnemeka' anasa, neika' sidya' deldaklemek sum enyek, Yesus berem bukoka delemoknya bedya, Yesus ak, "Wenelesilimnya o, anak heknedya oblulum aboka yuba dil bilinggel do?" aboka heimoknya benyek okoka eiyimok. 21:21 Petrus bedya, bera eimik balamoka' eibuk dara, Yesus ak, "Wenelesilimnya o, ban benyek anara, heka' danamla do?" hyok. 21:22 Dara, Yesus adya Petrus bek, "Nadya alda or embenga' ululul senemnya dara, alda or moruwoka ulumlya' ara na eimik yanamna. Anasa nera, anjinya goma', loblom. Bok, anda nak diriga yalanelom," hyok. 21:23 Dara wera, ban diriga bannya bera, alda somoganggunumla an yub era, Yesus yuba don nang gangganek nidya' oboka lelemok. Yesus adya, alda eimik somoganggunumla ana' ara orok bok, alda Yesus adya dara, nadya embenga' ululul senesinya dara, alda or embenga' ulumnamso, nera ugunja goma', amoknya nenesa lelemek. 21:24 Dara ban benyek ara, Yesus adya unulumoka' nidya' ak laga lelemookanya, ban yuba domoka' momnya doboknya bera alan. Alja nidya' momnya doboka leboka' ara, dib nonga leboka' ara nunda nidya' ella ulumab. 21:25 Dara, Yesus adya unulumoka' ara yoka'-yoka' hyak nauba hnon unulumok. Ban nidya' pe yana lelewoka ella' gigiro momnya doseng dara, nadya dara, wera soko me nidya' lendeboka oulyang okna danamso' anasa, hnon darasam buluk loboka momnya dorob.
1:1 Nadya hem Teofilus o, anak perob aboka gibgen. Men youma' bukuk sam weboka beiyinggesa ara, Yesus adya al wa web einimok salek eb moruwoka imik heikek welemok salek, yoka'-yoka' nidya' unuwoka, alja neklesuka' ak momnya doboka beibsa. 1:2 Yesus ara alda anam imik heik sam binggumok salek, Imik Neyung Geisinya migib adya arawoka, nadya yuba lebnoka' aboka yuba lena' gak nang ek anyek pe unuwanalum aboka wenewoka neklesuk. 1:3 Yesus ara, alda seleb somogoka embenga' suboka bukumoka' seleb dara, nara aldib embenga' subna bar aboka, alak diriga ban nang ek laga aabdangoka, dib nong bekna' gong elegosuk. Alda li denga hnonok ebdobnya mekbadya sum (empat puluh hari) sikenek aabdangdo amalasuukanya, Imik Neyung adya wenelemnesil yuba neika' saboka ulumek. 1:4 Dara Yesus ara, alak diriga ban nang eb, neika' yuba salamek sum enyek, ban yub enyek sikenek lebsuk ara, "Ugunda Yerusalem heik men lobana' ara mem. Ugunda or anyagan ulumuna' ara, neyung bedya eleganesin amoka' anyek, nadya ugunuk unu eleganesil aboka lebsisa anyek, elegeisilya bok. 1:5 Dara, Yohanes Pembaptis bera, alda mek dem adya ok dalasuk bok, mek anam mandewal henggonggom ugunuk Geisinya adya mek diba' dabnesil," hyok. 1:6 Wera ono', Yesus ab, alak diriga ban nang eb, neika' longomek sum enyek, alja mab edya, "Neyung Wenelesilimnya o, wen gom, eimik ek gom, Israeli soko ara, dub soko dangiyiwanalam de?" aboka heimek. 1:7 Dara, Yesus adya alak diriga ban nang ek lebsuk ara, "Imik Neyung bedya ok, alja sum enyek unuwanamna senewoka ella ulumla. Anasa ban unun damba dara, ugunsamba gom, Imik Neyung bedya ok ella ulumla. 1:8 Bok, ugunda Imik Neyung Geisinya ugunuk sam seleb yeisilya dara, ugunda migiba' dobnelum. Dara, Yerusalem heik ab, nidya' Yudea sokok ab, Samaria sam ab ara, nidya' soko dagolongna' me nidya', nasamba yuba bo lero yabalemnelum," hyok. 1:9 Yesus ara ban seleb wenyaboka lebgogomok dara, ono' alda sikja hogunguk ak sam uboka, henga kemelemek bok, imik heikek welok dara, kemelemeka' gangganek deba' adya sereklemok. 1:10 Yesus imik heikek weloka' anasa, alak diriga ban nang era, anam kemero seklemek bok, wene sab-sab nimi penya nang geisa akleng ongo-ongo bilirek nang enyek, sik gokgobok sam sekerek. 1:11 Dara sik penya nang edya, Yesus alak diriga ban nang ek, "Wei, ugunda Galilea nang o, ugunda hekasa anyagan ok sekoka imik sam kemelelum do? Yesus imik welemla eiblum sok, ono' eimik era hyak onnya benyek neikso unuwoka yanamla' ak eibnelum," arek. 1:12 Dara, Imik Neyung yuba men domek nim era, Zaitun mein aba' ara Sabat mem sum era Yerusalem heik lo bilimek. (Zaitun mein ara Yerusalem berem ulumla, satu kilometer ok ulumla.) 1:13 Dara, sikda Yerusalem heik ara sik ulumek ek biniboka, hyak imik somek ek dub nong ok biniboka welewoka ulumek. Dara, ban ulumek nim era, hnonda, Petrus, Yohanes, Yakobus, Andreas, Pilipus, Thomas, Bartolomeus, Matius, Alfeus bedya me Yakobus, Simon Patriot, Yakobus bedya me Yudas beb, ulumek nim era an. 1:14 Sikda nidya' ganya hnonok hiboka, heng uboka Imik Neyung ak mololsinilimek. Dara, sikda gelewa nauba uboka, Yesus alja genong Maria geb, Yesus alja weisab eb, neika' longowoka heng uboka lelemek. 1:15 Dara ono' yok sum enyek, yuba dolomek nim era, hiboka denga dombadya ebdobnya lindigin badya (seratus dua puluh orang) longomek dara, Petrus bedya yuba lebnun aboka sekoka yuba lemokja, 1:16 "Hem yab o, Imik Neyung yuba momnya doboka' ara, gigiwoka unuwanamla. Geisinya bedya uboka Daud bedya lemoka' ara, Yesus henga goubuka obnemak aboka duba dangamoknya Yudas bemba lemoka' ara, gigiwoka unuwanamla. 1:17 Yudas bera nublaboka neika' wa welenob aboka gaboka domoknya anasa, alablaboka neikik ulumouba," hyok. 1:18 Yudas bera Yesus ak oblulum aboka yuba dil bilimok amba elegemek rupiah edya, soko dekemok. Dara, anyagan alda huk dib malyinggyuukanya, alja mon era, hnoum pik serewoka mabok dara, aso ab, boka nidya' laga lan-lan alamok. 1:19 Dara, nimi nidya' Yerusalem heikek ulumek nim era, Yudas bek alak an unumoka' anyek, ella dangamek. Anasa leboka, Yudas bek unumok soko era, sikja yub edya, Hakal-Dama aboka si simek. Nunja yuba dangawoka san dara, eneng sokok aboka si simek. 1:20 Ono' Petrus bedya dara, "Anasa orowek Mazmur yub ek momnya domok ara, Alda ulumlya ak ara yoka' yuba deso aboka nimi gakdena' ak danamla. Al ulumlya' ak ara, nimi lunuwoka una' ara lobnemak, hyok. Ono' hnon momnya doboka' ara, Alja wa weboka ununa' ella dangamlya' ara yok nim lunuwoka dorowanamak, wenyamok," hyok. 1:21-22 "Anasa wera, Wenelesilnya Yesus sokok an nublaboka yabalamouba salek enyek, neikik soba' yabalamoubnya benyek hnon, sekiyiwanamab," aboka Petrus bedya lemok. "Yohanes Pembaptis be nimi meka dalasuk wek ara moruwoka Yesus imik heik welewok sum neika' ulumabnya benyek, alab nublaboka Yesus embenga' suboka welemok anyek, laga lelenoba' aboka, lunuwoka sekiyiwanamab," hyok. 1:23 Dara anyagan longomek nim edya dara, wera penya sunuwanamab aboka, ben hnonda nimi si Yusuf, neiknya bok yok si nera Barsabas, ono' al onnya bera alja si nera Yustus aboka silimeknya hnon, Matias be hnon sunuwanamab aboka lemek. 1:24-25 Dara, sikda nidya' henga uboka Imik Neyung ak mololemeekanya, lelemekja, "Wenelesilimnya o, anda nimi nidya' ganya ak nidya' ella ulusilimnya. Yudas bera yuba lenya dangamokjok, ono' malyingginiboka wanok soudya al oulyang ak bindowoka' anasa, wera Imik Neyung o, anja benyek lunuwoka sekiyiwanalum aboka neksilom," aboka mololemek. 1:26 Seleb molomek dara, bekna' dangana' bobogomek enyek, Matias bek sam malyinggilimok. Dara, Matias bera goklombadya Yesus yuba lena' gak nang eblaboka neika' welenoka' aboka, Yudas be lunuwoka sekiyimek.
2:1 Wera, Yahudi nim perob sum Pentakosta seleb oka yenemok dara, nimi nidya' yuba dib senewoka men domek nim era neika' ak mamagomek. 2:2 Dara, al wene sab-sab enyek, nimi nidya' longomek nim era, sikenek imik ab sam uu aboka senenggom kabo' dorogol yabana' anaso' ak kemek. Dara, sik ulumek ek anaba, uu ana' yub ok kemek. 2:3 Dara, uk boka' lolong-lolong aboka nimi nidya' ella' gigiro singiro buru yabalesuka' ak, eiyimek. 2:4 Wera dara, sikda nidya' Imik Neyung ganya adya deknesuk dara, Imik Neyung Geisinya adya anyek sabnok senewoka elegesuka' adya, sikda yok-yok yuba nidya' saro yabalamek. 2:5 Ban sum era, Yahudi nimi nauba, nidya' yok-yok mok eb yeilimek nim era, Yerusalem heikek ulumek. Ban nimi dara, sikda Imik Neyung ak lok ganya bomek nim ulumek. 2:6 Wera kabo' uu ana' yuba kemek dara, nimi nauba longowoka aknel ganagal yeilimek. Wera ono' yuba salamek nim edya, nimi nidya' ara sikjinya yoka' yuba hnon kemek dara, loka dasuk. 2:7 Dara, nimi nidya' hyak loka daboka, "Sikda ban nidya' yok-yok yuba salamak nang era Galilea sokok nim gom de?" aboka lelemek. 2:8 "Ban dara, hek adya nunja yok-yok mok ab yub enebabya Galilea nim edya salamaka' kelemab do?" aboka lelemek. 2:9 "Nunda nidya' ara, hnonda Partia nang, Media nanga hnon, Elam nanga hnon, Mesopotamia nimi hnon, Yudea nimi hnon, Kapadokia nimi hnon, Pontus nimi hnon, Asia nimi hnon, 2:10 Frigia nimi hnon, Pamfilia nimi hnon, Mesir nimi hnon, Kirene berem Libia nimi hnon, hnonda Roma heik ab ara, 2:11 Yahudi nimi yoka' ab, hnonda Yahudi nimi gom bok, Yahudi nimi yuba domek nang eb, hnon Kreta nim ab, hnonda Arab nim ab bok, Imik Neyung adya alja senenggom migib unulamla anyek, nunja yuba yoka'-yoka' sunuwoka lelesak adya nunda pe kelemab," aboka lelemek. 2:12 Dara, sikda nimi nidya' hyak ganya loka daboka ganya eboka, sik moumen, "Hekasa ban anaso damok ulumla do?" aboka heibdangdo balamek. 2:13 Bok, hnon nang edya dara, "Sikda yu meka demaka' adya serema salalesil adya ganya uu aboka lelemak," aboka waboka oksel golulumek. 2:14 Dara Petrus beb, yok goklombadya Imik Neyung yuba len nang sekoka, Petrus bedya yuba nauba bii aboka nimi nauba longomek nim ak lesuk, "Hemyab o, ugunda Yahudi nim, ugun yok mok nimi Yerusalem heikek ululum nim eb, ban nidya' unulamla ara ugunuk anadya unulamla aboka lebnesin anasa, ugunda pe keblulum," aboka lelemok. 2:15 "Wera, luguna' jam sembilan ok anasa, ban nang era ugunja dara, sikda yu meka demaka' adya serema salasil senelum sok unuwanggusil. 2:16 Bok ban eiyiluma' unuwanamoka' amba dara, orowek ununumna' lelemoknya si Yoel bedya lebokja, 2:17 Imik Neyung adya lebok ara, Sidya' daknamla sum enyek, nadya geisa ganya ara nimi nidya' sik dubuk yeklingganamna. Ugunja mabo nengmab ab, ugunja gelmab ab, nadya sikenek ununumna' lelemnesak. Ugunja gobenya nim edya yoka' unuwanasin ara ken so eilimnemak. Ugunja nauba nang era, maboka lendara eilimnemak. 2:18 Nadya wa wen nim, nengmab ab, gelewa ab, ban sum enyek, nadya geisa ganya era sikenek yeklingganesin. Sikda ununumna' lelemnasak. 2:19 Nara yoka'-yoka' hyak lok so anyek imik eini sam unulumnamna. Ono' hyak lok so hnon ounu sokok sam an unulumnamna. Eneng ab, uk ab, senenggom solom ab, lanawanamla. 2:20 Imik Neyung adya senenggom hyak perob sum anam yanggumlya salek, heng ara guna' danamla. Wala' ara goron uboka eneng anaso danamla. 2:21 Ban salek enyek, nimi nidya' Imik Neyung si sibuka youblenya bera blebnamla, ara Yoel wenyamok," aboka Petrus bedya wenyasuk. 2:22 Ono' Petrus sikenek wenyasuk, "Nadya hemyab Israeli nim o, nadya ugunuk ban dib lebnesin anyek keblulum. Yesus Nazaret mok ebnya bera, Imik Neyung adya seleb ugunsamba wa weblul aboka wa doboka elegemok anyek, bekna' elegesuk. Bekna' ara, Imik Neyung adya Yesus ak ab uboka ugun gangganek sam yoka'-yoka' lok so migib ununa' ab, senenggom lok so ununa' ab, yok so bekna' ab, unumoka' ara seleb eiyilum. Anasa, ugumbeyok ban nidya' ara seleb ella ululum. 2:23 Imik Neyung adya al orowek ella unuboka unuwonun senewoka seinimok sok, alja me Yesus ara ugunuk seleb elek losuk. Dara, ugunda malya nang ak elegoka, sikda alak doboka galak glabeka' adya, ugunda alak olum. 2:24 Bok Imik Neyung migib adya Yesus ak nimi somoklomaka' gangganek ab, suboka embenga' bukiyimok. Alda somokna' lomok sam unggulumnamso anasa, somokna' damok adya doboka menegemok bok, Imik Neyung adya henga loboka blebiyimok," hyok. 2:25 Ono' hnon, "Yesus amba Daud bedya leboka' ara ban: Nadya Wenelenelnya bera, nadya hogunguk sam soba' eillilamna. Alda nab neika' ulunam adya, yoka'-yoka' adya daldom-daldom henggununel. 2:26-27 Anda nadya ganya ara, nimi somoklomak nimi heikek sam lobnenggununelem. Ono', nak anja perobnya bek nonga bloblula' aboka lobnenggununelem. Anasa leboka, nadya ganya eiya daboka, nadya sibama' adya eiya hlalamna. Dara, nara ganya weboka diri ulumnamna. 2:28 Anda nak nim embenga' una' pik seleb doboka amanulum. Anda nablaboka soba' neika' ulumnanam adya, nara nonggo aboka ganya imik weldo-weldo seklemnenel, ara Daud bedya wenyamok," hyok. 2:29 "Anasa, hemyab o, wenyek or nunja neyung Daud benesa geklewoka, yuba laga poboka sablul senewananulum. Alda seleb somogok dara, seleb soko lokorob bok, soko lokorob ak ara nun gangganek or ulumla. 2:30 Imik Neyung adya orowek seleb poboka, Daud be pik uboka an nang yila' gangganek ab, Imik Neyung adya dubnya hnon sekiyiwanamla aboka leb elegemok. Daud bera alda ununumna' lenya ulumok adya, Imik Neyung adya alak dib unuwanamna amoka' ara, eimik era dib unuwanamla senewoka ella uboka diri ulumok. 2:31 Daud bera Imik Neyung adya unuwanamla ara orowek eiyimok. Anasa, al lebok ara, alda nimi sokok nimi somoklomak sok dib somokna' nimi heikek ak lo binggunumla. Dara ono', alja nong soub era bloboka denghenggunumla ak lebok. Ban lebok ara, Kristus eimik somogoka embenga' suboka buknamla ak lemok. 2:32 Dara, al ban Yesus benyek, Imik Neyung adya somokna' ak ab suboka embenga' bukiyimok. Dara, ban unumok ara nunja okoka ok eiyimouba," hyok. 2:33 Ono' Petrus sikenek moruwoka lemok, "Wera, Imik Neyung sirik soruk sam Yesus ak seleb imik beiyiboka, Geisinya eleganesin amok ara, elegoka dobok dara, wera, neik geisa ganya anyek nuk eleklesil ara, wera an ugun seleb eillililum kelelum. 2:34-35 Daud be nong anaba imik heik welewanggumok bok, alda yub adya lebokja, Wenelesilnya bedya nadya Wenelenelnya bek, Nadya anja isa' nang ara an damak namena' gibiyiwanggumnya salek enyek, anda nadya sirik soruk sam bululom, aboka lebok. 2:36 Anasa wera, Yesus ugunja oboka gal ak glablumnya bera, aldib Imik Neyung adya or ban Yesus anyek, nimi wenesina' ab blebsina' ab, dubnya Kristus jaboka sekiyimok, ara Israeli nimi nidya' pe ella danasom," hyok. 2:37 Wera nimi nidya' Petrus bedya wenyaboka lelemok anyek kemek dara, nimi nidya' ganya soldowoka obdangamek. Dara, Petrus bek hnon, yok yuba lena' gak nang ek hnon, "Hemyab o, wera nunda heka' huwanamab do?" aboka heisik. 2:38 Dara, Petrus bedya sikenek, "Ugunda nidya' ara, ganya dangawoka malya una' meewanasil dara, ganya dangawoka, Yesus Kristus si sibuka mek dana' doblulum. Dara, ugunda Imik Neyung adya Geisinya eleganesila' ara dobnelum. 2:39 Anasa, Imik Neyung adya lebsuka' ara, ugun nong amba ugunja mab emba hnon, sik mok sam ulumak nim emba hnon, ulumla. Nunja Wenelesilnya Imik Neyung adya yoululum aboka youblesil nim nidya' amba ulumla," hyok. 2:40 Ono' Petrus bedya ban wenyaboka nauba wenewoka lelesuk, "Ugunda wera Imik Neyung adya eimik obsunun aboka ubsil sokok anyeb orowek blebdangoka ulululum," aboka sikenek lelesuk. 2:41 Dara, Petrus bedya lelemok yub ek keboka dib senewoka domek nim ak meka dasik. Dara, nimi nidya' ban sum Imik Neyung ak dib senewoka domek nim era hiboka denga salye' obadya nang anaso, dangamek. 2:42 Dara, hyak pe yeng uboka, nimi nauba yuba lena' gak nang ek ab, yuba nauba doboka, yoka'-yoka' ara neika' unuwoka, anya neikik deregoka, neikik molowoka ulumek. 2:43 Obadya nang Imik Neyung yuba lena' gak nang edya, yoka'-yoka' senenggom lok so ununa' ab, lok so bekna' ab danyek, nauba unulumek dara, nimi nidya' ganya loka daboka ulumek. 2:44 Nimi nidya' Imik Neyung ak men dib senewoka domek nim era, neika' ganya hnonok ganya boboka, sikja yoka'-yoka' bona' ulumok ara, neika' hiboka bolomek. 2:45 Sikja yok-yok bona' bolomek ara, rupiah dekoka dobna dara, nara anyek dobsinya senemna sok ella' gigiro pe lelewoka bokol dalamek. 2:46 Sikda hyak soba' Imik Neyung e eremek longowoka yuba soba' dolomek. Dara sikda ganya sokok nenebdangoka, ei-ei ganya boboka, sikja e pik dero yabalamek. 2:47 Sikda hyak soba' Imik Neyung ak giblemeekanya, nimi nidya' sikenek perob senelesik. Dara, Wenelesilnya bedya yuba don nim ek yok bleblesuk nimi sob-soba' sikenek bo maklesuk.
3:1 Dara, ono' yok sum enyek, sinik jam tiga anaso dara, nimi mololomek salek seleb dok anasa, Petrus beb, Yohanes beb, molowanoma' aboka Imik Neyung ek sam wele balarek. 3:2 Wera, Imik Neyung ek senenggom pik sindamak ara, perob nong pik aboka si silimeka' ak sam ara, nimi ben hnon anam beiyimek salek eb ara moruwoka nonga nidya' heimoknya bek bulumok. Dara, bera Imik Neyung yuba dol yanggeija nim ek rupiah mololamlya enyek, eleklenoka' aboka soba' jaboka pikik sam bo beil yalamek. 3:3 Wera Petrus beb Yohanes beb, Imik Neyung ek sam wekel barek ak eibsuk dara, sikenek rupiah hnon eleganenurum aboka molosuk. 3:4 Dara, Petrus beb, Yohanes beneba, benyek keebdarek dara, Petrus bedya, "Anda nuk kendesilom," hyok. 3:5 Dara, sikenek yoka' hnon eleganenerek ak dobnamna senewoka sikenek ngekluboka ganya wemok. 3:6 Bok, Petrus bedya heimoknya bek, "Rupiah yoka'-yoka' ara nak hnon una' orok anasa, wera alda nak dan yoka' don hnonok ulumla' anyek eleganenggen. Yesus Kristus Nazaretnya bedya si sibuka, anda sekoka yabalom," wenyaboka hwemok. 3:7 Dara ono', Petrus bedya hwemoknya bedya sirik soruk salawoka gliboka sekiyimok. Dara, wene sab-sab enyek, benedya alja yan heng gongolya' migib nong dangoka meremok. 3:8 Wera, heimoknya bera sakdo dorogoka sekoka, ono' yibeinimok. Dara ono', alda Petrus beb, Yohanes beblaboka sikeneb neika' Imik Neyung eremek wekoka, yana ingiwoka merewoka sakdo dorogoka seleb merewana' anasa perob aboka Imik Neyung ak giboka lero yabalemok. 3:9 Dara, heimok bok meremoknya bedya yana ingi yibiniboka, Imik Neyung gibdo yabalemok ak eiyimek dara, 3:10 wera sikda nimi nidya' Imik Neyung ek perob pik sindamak sam heimoka' anyek moldo bulumoka' eillilimeknya benyek okoka eiyimek. Dara, nimi nauba ara hekak alak unumok anyek, hyak loka nauba dasuk. 3:11 Dara, nonga heimoka' anyek meremoknya bera, Petrus Yohanes ak anam salabmosuk salek enyek, nimi nidya' loka daboka sik winilya ara Salomo pik serekna' ak ulumeka' ak sam, nimi nauba bik-bika yeiniboka longol yeilimek. 3:12 Wera, Petrus bera nimi nauba eiyimok dara, sikenek, "Wei ugunda Israeli nim o, ugunda hekasa ban unumla' ak loka dasil do? Ugunda hekasa nuk ngekellublesulum do? Ban nonga heiboknya bera nunja migib edya gom, nunda hyak pe ulunam adya gom, yan ingi yabalamla senelum de. 3:13 Orok, Abraham beb, Ishak beb, Yakub beb, nunja neyung yabo sikja giblemeknya Imik Neyung bedya, ban unumla adya alja me Yesus imik nenewal. Al Yesus anyek, ugunja dub nang ek oblulum aboka doboka elegel bililum. Pilatus bedya henga lobnuna' aboka ulumok bok, ugunja alja saramek ab wekdo dorogolum. 3:14 Ugunda alda geisa uboka hyak perob ok ululanya wekdo dorogoka, nim osuk anasa henga geregemeknya benyek lob loblom aboka, Pilatus bek duka' lolom-lolom alalum. 3:15 Alda nim embenga' una' dubnya bek, ugunja dara, seleb oblum bok, Imik Neyung adya seleb somokna' ak ab suboka bukiyimok. Unumoknya nera, nunja henga yoka' adya okoka kaboka eiyimoub nang nunda an. 3:16 Dara, ban eiyiboka seleb ella ululumnya benyek, Yesus si adya, Yesus si ak dib senena' adya merewal. Aldib, alda seleb migib uboka eika' nong dala' ara, Yesus ab alja migib ek dib senena' nong adya ok ubla. Yesus ak dib senena' adya, ban benera, hemyab o, ugunja hogung ak sam laga eika' merewal," hyok. 3:17 "Wei hemyab o, anasa wera, ugunub ugunja dub nang eb, Yesus ak unulum ara, elgom adya unulum anyek, wera nara ella ubsin. 3:18 Dara, ban unuwoka gigiwanamoka' anasa, Imik Neyung adya orowek ununumna' lelemek nang pik moruwoka, nimi blebsina' dubnya Kristus bera eimik oka nauba gweknamla aboka lemoka' ara, wera ban adya gigiwok. 3:19 Wera anasa, ugunja malya una' Imik Neyung adya lublul aboka, ugunja malya una' ak ab ganya dangawoka saaboka, Imik Neyung ak yoululum. 3:20 Dara, Wenelesilnya bedya, ugunja ganya angawoka peroba' nenewanasilekanya, ugunja blebsina' dubnya ak ugunuk bilom aboka orugolul aboka, ganya dangawanalum. Wenelesilnya bedya orowek, Kristus ara al ugunja blebsina' dubnya dolul aboka sekiyimok anasa, unuwanalum," hyok. 3:21 Petrus bedya ono' wenyasuk, "Ban Yesus ara, youma' Imik Neyung adya geisa ununumna' lelemek nang edya lelemek sok, yoka'-yoka' nidya' Imik Neyung adya meewanggumlya salek, imik heik ulumlya ara, meewanamlya salek ok laga danamla. 3:22 Anasa, Musa bedya men leboka' ara, Ugunja Wenelesilnya Imik Neyung ara, ugun gangganek ab, alda ugunja meneng mok nim ek, na anaso ununumna' lenya sekiyiwanamla. Dara ugunda heka' ak nidya' lelemlya ara, pe kelemnelum. 3:23 Wera anasa, ben hnon ban senenggom ununumna' lenya bedya yuba pe kebnenggunulanya bera, alja heik nimi hogunguk ab garawoka orok nenewanamla, wenyaboka Musa bedya lebok. 3:24 Youma' ununumna' lelemek nang era, Samuel bek ab moruwoka ara, yok nang gong ununumna' lelemek nanga nidya' ara, wen unulamla eillililuma' anyek, eimik unuwanamla aboka lelemek. 3:25 Ununumna' lelemek nang edya Imik Neyung adya unuwanamna aboka lemoka' anyek lelemeka' ara, ugunsamba hnon ulumla. Imik Neyung adya ugunja neyung yab ek leboka' ara ugunuk hnon lesuk. Abraham bek Imik Neyung adya lebokja, "An nang yila' pik moruwoka, yok-yok soko nimi nidya' ak binimla," wenyamoknya nera, hnonda al ugunsamba lesuk. 3:26 Wera anasa leboka, Imik Neyung adya alja me Yesus sekiyiwoka, binilam aboka, ugunuk men youlul aboka, orugomok. Ugunda nidya' malya una' ganya dangiyiwoka ugunuk peroba' neniyiwousulula' aboka, youlul aboka orugomok," wenyaboka Petrus bedya lebok.
4:1 Wera, Petrus beb Yohanes be, nimi yok nim ek anam yuba salarek salek, Yahudi Imik Neyung yuba dona' gak nang eb, Imik Neyung ek keeboka diri ulumek nang dubnya eb, Saduki nim eb, Petrus Yohanes ak yeilimek. 4:2 Sikda Petrus Yohanes adya, Yesus ara somokna' damok al seleb suboka embenga' welewok aboka lelerek adya, nimi seleb somogamna nimi suboka welewanamak ak nekerek anasa, hyak yu ganya bomek. 4:3 Dara, sikenek doboka henga geregoka, seleb sin dangoka iniwanamok anasa, Petrus Yohanes ara, gasa ek doronggoka, anyagan maboka gwelegemok. 4:4 Bok, nimi nauba, sikja lelesirek yuba kemek nang era, dib senemek. Dara, sik Imik Neyung yuba dib senemek nim era, hiboka denga salya' lambadya nang (lima ribu orang) dangamok. 4:5 Wera ampum so gwelegok dara, Yahudi dub nang eb, Imik Neyung yuba wa gaka' nang eb, sikja yuba neksin nang eb, Yerusalem heikek yuba sabnoba' aboka longomek. 4:6 Dara, sikda Yahudi nang Imik Neyung yuba wa gaka' dubnya Hanas beb, Kayafas beb, Yohanes be hnon, Aleksander beb, Hanas al nang yila' nidya' ara, mamagomek. 4:7 Dara, Petrus beb Yohanes beb, ban mamagomek ak beil yeilisik dara, dub nang adya sikenek heib einisik. "Ugunda hek migib ek gologoka, heknyek si sibuka unurum do?" aboka heisik. 4:8 Petrus Imik Neyung Geisinya adya deknewoka ulumoknya bedya sikenek, "Wei, ugunda Israeli dub nang uboka, Imik Neyung yuba dam nang o, 4:9 nuk sumen anyagan yana lelewanasulum ara yoka' embenga' alda nonga heimoknya bek pe ununumukanya, heka' adya meremoka' anyek, heilisulum dara, ban ella danalum. 4:10 Neyung yab dub nang ugumbabya hnon, ono' Israeli sokok nimi nidya' hnon, ella danalum. Ban heimoka' anyek embenga' seklelanya benera si ara, Yesus Kristus Nazaret mok ebnya bedya migib adya, ugunja hogunguk hyak eika' sekla. Ugunja seleb oboka gal ak glablum dara, somogok bok, Imik Neyung adya somokna' ak ab suboka bukiyimoknya bedya migib adya ubla ara, ella ubnalum. 4:11 Ono' hnon, Yesus adya eimik unuwanamla aboka, youma' Imik Neyung bukuk sam momnya dobok ara, E sona' nang edya malya girik aboka bobegek bok, alda hyak ono' perob men youbuka un girika dok, hyok. 4:12 Anasa, sokok anyagan ara, yok si nedya hnon embenga' blebsulul aboka Imik Neyung adya nim ek lebnenggusuk. Yesus si adya ok nimi blebnesil aboka lesuk," hyok. 4:13 Dara, nimi nauba henga gereksin ek yuba sabnoba' aboka longomek nim era, Petrus beb Yohanes beb, sikja asa' nong anyek yuba saboka, sikda sekolah hnon nauba dona' orok bok, nauba pe lelerek eiyimek dara, hyak loka nauba dasuk. Dara wera, sik penya dara, Yesus yuba doro diriga balarek nang era alan senewoka, bekoka ella dangamek. 4:14 Bok, Yahudi dub nang edya dara, nonga heimoka' anyek, eika' meremoknya bera, Petrus beb, Yohanes beb, neika' oka seklemok anasa, yuba goma' dangoka yuba sabnamenggom dangasuk. 4:15 Anasa, Petrus Yohanes ak, beiyek se' goboka bururuk aboka orugeisik dara, sikda beiyek birik. Wera danyek, Yahudi nang yuba sana' gak nang edya saldalamek. 4:16 Dara sikda wenyabdangamek, "Wera, penya nang ek an heka' hubnemab do? Nimi nidya' Yerusalem heik an ulumak nim edya dara, lokso ara bekna' diba' sik penya nang adya ok unurong ara, seleb ella ubak bar. Nera malya unurong aboka bobnenewoka sana' okna dabsil. 4:17 Sikja unulurak ara, nauba dangoka yok nim ek oboka lelewesilyek anasa, wera ugunda Yesus si sibuka hyak lebnenggunurum henemab," aboka samek. 4:18 Seleb dara, dub nang edya Petrus Yohanes wera ono' yorurum aboka heng gereksin ek bo wekoka, "Wera, ugunda Yesus si sibuka yoka'-yoka' unuwoka nimi yok nang ek neksin ara hyak lobnerum," aboka lesik. 4:19 Bok, Petrus Yohanes adya dara, lebdekja, "Har nerek perob so, ugun dub nang yuba kena' anyek perob gom, Imik Neyung yub ak kena' anyek perob gom, aboka seiniwanalum. 4:20 Nunda seleb eiyinum kenum anyek lelenam ara, hyak lobnenggunusinim," arek. 4:21 Dara, dub nang ara, Petrus Yohanes ak hnonok sibin anaba damok eboka eibnenggumeekanya, nimi nidya' ara heimoknya hwemok ak eiyiwoka Imik Neyung bek gigilemeka' anasa, dub nang edya dara, wera Yesus si sibuka unulurum ara wen lobnerum aboka, hyak webluwoka lobonggomek. 4:22 Dara, nonga heimoka' anyek Petrus Yohanes adya hwereknya bera gibna' ara denga hnonok uboka ebdobnya mek badya anaso dangamok bok, meremok. 4:23 Petrus beb, Yohanes beb, seleb henga lob lobsik dara, ek biniboka yok yuba domek nim ek, sikenek Yahudi yuba wa gaka' dub nang eb, yuba dam nang eb dadya, ugunda wen yoka'-yoka' unuwanggunurum mem aboka lemeka' nidya' ara, sikja hemyab ek nekdo bilirek. 4:24 Dara, sikja hemyab edya dub nang edya ban wenyameka' kemek dara, sikda nidya' hnonok ganya boboka Imik Neyung ak heng uboka molowoka lemekja, "Senenggom Wenelesilimnya o, anja adya im ab, soko ab, senenggoma' mek gwan eb, nidya' yoka'-yoka' anyagan ulumla ab dara, anja ok nidya' uyilum," aboka mololomek. 4:25 Ono' anya, "Imik Neyung anja Geisinya adya, nunja neyung Daud be, anja wa wenya bek ab seleb lelumja, Yok soko yok soko nim era hekasa yu sen-sen alamak do? Soko me nidya' ara salya' danalanya nek bok anasa, hekasa orowek gegewoka sunulumak do? 4:26 Wenelesilnya, alja nimi blebiyiwanesila' dubnya Kristus beb, sikenek sokok sam dub nang nidya' obdanob aboka gegelemak. Dub nang nidya' adya neika' hiboka, sikenek mala weboka obdanob aboka gegelemak, ara Daud bedya lemok adya lelum," aboka lelemek. 4:27 "Aldib, wen ara Herodes beb, Pontus Pilatus beb, Wenelesilimnya o, yok soko yok soko nim eb, heik enyegan ulumak Israeli nim eb, seleb mamagoka, sikda anja geisa me Yesus bek anja nimi blebsina' dubnya sekiyilumnya bemba, mala weboka obdanob aboka samek. 4:28 Imik Neyung o, sikda yoka'-yoka' unuwanamla aboka orowek men senelumnya nenyek ok unumek. Anja migib lomok uboka, anja ganya edya ok unuwanamna senelumnya nok unumek. 4:29 Anasa Wenelesilimnya o, wenyok sikda nuk wellublesak anyek kendesilom. Ono' nuk anja wa wen nang enyek, anja yub enyek lok orok anyek asa' ganya boboka leb giriganoba' aboka, or unuwanalum aboka nuk migiba' elegeisilom. 4:30 Anja geisa me Yesus si adya uboka, neikna' nimi hweboka, yoka'-yoka' lok so bekna' senenggoma' lok so anyek unuwanoba' aboka anja arasina' ara nuk elegeisilom," wenyaboka molomek. 4:31 Wenyaboka Imik Neyung ak seleb mololgogol yabek dara, sik longomek e nera warawoka lobok. Dara, sikda nidya' ara Imik Neyung Geisinya adya deknewoka, asa' nong anyek, Imik Neyung yuba nim ek lero yabalamek. 4:32 Nimi nidya' men Imik Neyung ak dib senemek nim era, ganya hnonok hiboka, neik nong una' ok ulumek. Nimi ben hnon bona' yoka'-yoka' nidya' bobna dara, nabeyok gelelenga borunun ganya bonggulumek. Yoka'-yoka' nidya', sikenek ulumoka' ara neika' bokoka pe bolomek. 4:33 Dara, Yesus yuba lena' gak nang era, hyak senenggom migiba' gologoka, Yesus ara seleb somogoka ono' embenga' suboka bukoka welewok aboka, yuba lero yabalemek. Dara, Wenelesilnya bedya wana' uboka eleksina' adya nauba aralasuk. 4:34 Ban unulumek adya sik gangganek sam ara, nimi ben hnon bona' garana' ara unggulumek. Dara, sikja soko gom, ulumna e gom, e ab, soko ab, rupiah dekoka, rupiah seleb dobna dara, 4:35 rupiah era bobnadya yuba lena' gak nang ek bo elegel yalamek. Dara rupiah era, benyek dobso senen geknewan nang ek bokoldalamek. 4:36-37 Dara, Yusuf beneba neikso unulumok. Alda alja yokok soko era, yok nang ek rupiah deklulum aboka, rupiah seleb dobna dara, rupiah era Imik Neyung yuba lena' gak nang ek bo elegel bilisuk. Ban unumoknya Yusuf bera Lewi nang yila' Siprus mok ebnya. Men Imik Neyung yuba lena' gak nang edya alak Barnabas aboka si silimek. Nunja yub edya dara, ganya heksina'anya alamab.
5:1 Bok ono' nimi ben hnon alja si nera Ananias alameknya bek ulumok. Alab, ala' gel Sapira geb dara, sikja soko bok, yok nang ek rupiah dekerek. 5:2 Ananias bera, alja gel geneba ella ubok bok, alja soko rupiah dekoka dobok dara, rupiah era bokoka darasam era, Imik Neyung yuba lena' gak nang ek bo elegel bilisuk. 5:3 Dara, Petrus bedya Ananias bek, "Anda ganya ek bisa' dubnya Satan weklul aboka, globol lolamakanya, anja soko dekelam rupiah era darasam era ansamba dolamaakanya, Geisinya bek sonda' lelelam ara hekasa ulam do? 5:4 Anja anam yok nim ek rupiah deknenggom dara, soko era anjinya unggulumo de? Anasa wera ono' seleb rupiah deklam dara, rupiah era anjinya nok anam unggulumla de? Anasa wera hekasa anda unuwoka sonda' lebnamna senewoka orowek ganya sunuwoka ulam do? Anasa wera, anda nim ak sonda lebnenggulam bok, Imik Neyung ak sonda lelam," hyok. 5:5 Dara, bera alak Petrus bedya wenyan yuba kel yabok sab-sab, sokok sam gololonga malyingginiboka, diba' somogok. Dara, nimi nidya' ban unuwal an yuba kemek dara, hyak ganya loka dasuk. 5:6 Dara, nimi gobenya wene nang yeiniboka, Ananias somogok ak be' gobuka boksom adya kemek dara, bo goboka dil bilimek. 5:7 Wera seleb ousa so winilya jam anaso dok dara, Ananias ala' gel Sapira gera, unuwal anya nera elgom umok jok, wekel yeilimok. 5:8 Dara, Petrus bedya Ananias ala' gel ak, "Anja nenya eb, anab, ugunja soko rupiah dekoka dorum dara, dorum rupiah era al nenyek ok de?" aboka heimok dara, "Yo, al donumnya nera alan bo yeilimla an," hyok. 5:9 Wera danyek, Petrus bedya Ananias ala' gel ak, "Ugunda hekasa anja nenya eb Imik Neyung Geisinya bek sunuwananam aboka gegerum do? Wera anasa kendelom, anja nenya somogamla anyek bo soko lokol bilimak nim era, seleb e pik sindamak yanggak anasa, ambabya neikik bo binenjak," hyok. 5:10 Wera al wene sab-sab, Ananias al gel gera malyingginiboka Petrus bedya yan damak sam somogok. Dara, gobenya nang era, ek wekel yek bok adya gel gera seleb somogoka' ak eibek dara, bo goboka alja nenya diyimek ak neik berem dil byik. 5:11 Dara, nimi nidya' Imik Neyung yuba dona' nim eb, salya' nim eb, ban unuwal an yuba kemek dara, hyak ganya loka dasuk. 5:12 Dara, yuba lena' gak nang adya nimi gangganek yoka'-yoka' lok so bekna' ab, senenggoma' lok so ununa' gong gong anyek, unura yabalamek. Wera Imik Neyung yuba dolomek nim era ganya hnonok uboka Salomo pik sindamak sam mamagoka yuba dolomek. 5:13 Dara, nimi nidya' ara Imik Neyung yuba dolomek nim ek, perob senewoka gigilimek bok, longolomek dara, salya' nim era, lok anasa makal yanggumek. 5:14 Bok, Imik Neyung ak dib senelemek nim era, soba' nauba danggiga balamok. Nera gelewa anaba, nengmab anaba, nauba danggiga balamok. 5:15 Dara, yoka'-yoka' hyak senenggoma' anaba dib dangalamok wek adya, nimi neiklamna nim era ekla mana' ak dubuk gom, esona' yangana' ak gom, mayiwoka pikik nimi yabalamna ak bo beil balamek. Wera, Petrus be yabelya dara, alja ganya yama' edya hnon nim ek dara, bebegeisilya dara, merewanok senewoka unulumek. 5:16 Dara, Yerusalem moka heik berem ulumok heik nim gong era, sikja neikna' nang boboka nauba mamaklemek. Dara, neiklamna nim eb, bisa' gologosin nim eb, hwebsinok aboka bo yalamek dara, nidya' meriyiwoka hwelesik. 5:17 Wera ban unubgiga balamek adya, Yahudi yuba wa gaka' dubnya beb, alak sikja aralamek nang nidya' eb, nera Saduki nim edya, men Imik Neyung yuba domek nim ek hmana leboka yok so unuwanob senemek. 5:18 Dara, yuba lena' gak nang era, henga geregoka, nauba gasa henga gereksin ek sam beiyisik. 5:19 Bok, inimnek enyek, Wenelesilnya bedya lero edya yeiniboka, henga gereksin e pik serekna' nidya' bakoka, yuba len nang nidya' eboka beiyek bo yibilisuukanya, sikenek lebsuk ara, 5:20 "Ugunda Imik Neyung e eremek sam biniboka, ban wen embenga' un pik yuba nidya' anyek, nimi yok nim ek lelelulum e," aboka orugosuk. 5:21 Wera Imik Neyung yuba domek nim era, Imik Neyung lero adya sikenek unuwanalum asuk anyek dib senewoka, sikda hyak luguna' nong enyek, Imik Neyung ek sam biniboka, nimi yok nang ek yuba lel eleklesik. Dara, Yahudi yuba wa gaka' dubnya beb, alak aralamek nang eb, yeilimek dara, Yahudi nang yuba sana' gak nang hyak nidya' sabnob aboka youmek. Dara, sikda Imik Neyung yuba len nang ek henga geregoba' anyek, henga loboka bo yoululum aboka, orugomek. 5:22 Bok, henga loboka bo yoululum aboka orugesik nang era, henga gereksin ek sam nimi henga lobnob aboka bilimek enyek, Imik Neyung yuba len nang era anyagan ara una' orok dengamek eiyimek dara, losaawoka yuba san nang ek bindiwoka wenyamek, 5:23 "Nunda heng gereksin ek bilimab dara, e weilik ara, nimi diri welemak nang era, pe diri uboka, pika nidya' ara gasa darawoka seregemak bok, pika baklemab enyek, oulyang demok ebyakab," hyek. 5:24 Dara, Imik Neyung ek keeboka diri ulumek nang dubnya beb, Yahudi yuba wa gaka' dub nang eb, unuwal aro bilimek enyek, seleb kemek dara, sikja ganya eboka, angoo heka' hnon danamla do senewoka loka dasuk. 5:25 Bok, ben hnon sikenek yeiniboka, "Wera kendululum e! Ugunja henga geregoka gasa ek beiblum nang era, wera Imik Neyung ek sam uboka, nim ak yuba lel eleklesak," al yeilimok. 5:26 Dara, diri ulumek nang dubnya beb, alak aralamek nang eb biniboka, Imik Neyung yuba doboka lelemek nim ek onsok bo yeilisik. Bok, sikda duka' lolom-lolom ana' loboka, or namena' bo yeilimek. Nera yeiriwoka henga goubuka ul yabibya dara, nimi nauba ulumak nim edya nuk girik adya obsijek aboka gelelenga namena' bo yeilimek. 5:27 Dara, yuba lena' gak nang era, Yahudi yuba sana' gak nang ek, yuba wa gaka' dubnya adya heiblul aboka bo yeilisik. 5:28 Dara, Yahudi dubnya bedya, Yesus adya yuba doboka lelemek nang ek, "Nunda seleb ugunuk Yesus adya si sibuka nimi yok nang ek nekna' ara hyak mem aboka nauba duka' lolosub anano? Bok wen nunja mem amoubnya nek blekoka nauba unululum. Ugunda Yerusalem heikek gokgobok nidya' Yesus alja si sibuka nimi yok nang ek neklelumukanya, wera ono' Yesus ara Yahudi dub nang edya obek aboka nuk gaka kilisulum," aboka lemok. 5:29 Bok Petrus beb, ono' yok yuba lena' gak nang eb dadya dara, "Nunda nuk dara, nim adya le, Imik Neyung adya le, lelemaknya nera, Imik Neyung aljinya nok kelemnamab. 5:30 Nunja neyung yabo youma' nang sikja Imik Neyung bedya, ugunja henga goubuka galak bokoka oblumnya bek, somokna' ak ab ara bukiyimok. 5:31 Dara, nimi Israeli nimi ganya dangawoka malya una' memelemnesila' dobnoka' aboka, Imik Neyung adya Yesus ak imik weliyiwoka, alja sirik soruk sam bukiyiwoka, ono' nimi diri bo usina' damok hnon, nimi blebsina' damok hnon alak elegemok. 5:32 Anasa nu hnon, Imik Neyung adya alja yuba pe keboka unulumak nang ak, Geisinya eleklesil Geisinya anyek hnon, ban unumok ak eillilimoub anyek, damok nang ulumab," hyek. 5:33 Dara Yahudi nang era, ban wenyaboka lemek anyek kemek dara, sikda hyak yu ganya boboka, yuba len nang ek obnemab aboka ulumek. 5:34 Bok, Yahudi nang yuba sana' gak nang gangganek ara, Parisinya, nimi si Gamaliel ulumok. Alda hyak Yahudi nang Imik Neyung yuba neksinya uboka, nimi nidya' ara alak pe keboka, alda dubnya so ulumok. Dara, benedya sekoka, na yuba sabnamna anasa, Yesus adya yuba len nang era se' beiyek bo bululum aboka orugusuk. 5:35 Dara, alda Yahudi Imik Neyung yuba dub nang ek, "Hem yab Israeli nang o, ugunja ban Yesus adya yuba doboka lelemak nang ek unululum anyek, ugunja pe seiniwanalum. 5:36 Anasa wera, youma' dara, nimi si Teudas bera, alda nara senenggomnya aboka gigibdangoka, nim alak diriga biniboka neika' ulumek nim era hiboka dara, denga yuba odara' badya nim ulumek. Bok, al nong ak obek dara, wera alja yuba dolomek nim era doluwoka, bokgokdangoka, alja yuba lelemok anaba gobdo dengaro lomok. 5:37 Ban nen seleb dara, ono' nimi si momnya dolosik salek, nimi si Yudas be Galilea mok ebnya bera, nara dubnya abdangoka ulumok. Dara, alja yoka'-yoka' unulumok adya perob senewoka nimi nauba alak mamagel balamek. Bok, al nong anaba obek sum era, alja yuba keboka alab neika' ulumek nim era doluwoka bokdangoka dengamek. 5:38 Anasa, wen ban unuwonumnya nenyek sunuwoka, ban nim enyek, sikenek yoka'-yoka' salya' ununggom, mem. Or sika' yok ulunok aboka weneweisin. Sikja leboka nim ek nekoka, unulumaka' anara, nim adya ganya doboka unulumeija dara, denghenemla. 5:39 Bok, sikja unulumak nidya' ara Imik Neyung ak ab lanalamlya dara, wera ugunja sikenek yoka'-yoka' ununa' okna ubnesil. Nauba so ara, ugunda Imik Neyung ak isa' nenebdangoka mala boboka oldana' danalum," hyok. 5:40 Gamaliel bedya ban wenyaboka wenewosuk dara, Yahudi nang edya henga gereksin dub nang era, dib aboka perob hyek. Dara, sikda Yesus adya yuba lena' gak nang ek, ek wekel yoululum aboka ebiniboka, legebna' deboka legewoka, "Wera ugunda Yesus si adya nimi yok nang ek nekdo yabana' ara lobnelum," aboka wenyaboka lebgogosik seleb dara, sikenek henga losik. 5:41 Dara, yuba doboka lelemek nang era, Yesus si amba leboka olosak, yoka' unulusak ara, perob aboka eiya daboka, yuba sana' gak nang ek ab goboka bilimek. 5:42 Dara li soba', Imik Neyung ek ab, nimi yuba dolomek nim ek ab, Yesus adya perob yuba lero, Kristus ara Imik Neyung adya nimi blebsina' dubnya eleganesin amok ara, wera an elegosuk aboka, yok nang ek yuba soba' nekdo yabalemek.
6:1 Dara, wene salek era, Yesus yuba doro diriga ban nang era, ono' nauba danggiga balamok salek enyek, Yahudi nang bok Yunani yuba salamek nang edya, ono' Yahudi nang yoka' ak walamek. Yunani yuba salamek nang edya, nunja you gelewa era, bona' yok nang ek ara nauba boklelum jok, ban you gelewa ek hnon donggulumak, aboka walamek. 6:2 Anasa wera, obadya yub lena' gak nang edya, yok yuba lena' gak nang nidya' neika' ak mamagiyiwoka, sikenek, "Nunda dena' anasa boklomeibyekanya, Imik Neyung yuba lena' lobnemab dara, malya nong. 6:3 Dara wera, unulum anasa leboka, ugun gangganek ab yuba saboka, ugunja lelum ara webnok aboka, sikja ganya geremseng uboka Imik Neyung Geisinya adya ok deknewoka ulumeija nang ek, sekbadya sekiyiwanamab. 6:4 Anasa nuk dara, heng uboka molowoka, Imik Neyung yuba leboka unulumnamab ok," hyek. 6:5 Dara, nimi nidya' obadya nang lebsik yub era perob senemek dara, nimi si Stefanus bek, Imik Neyung Geisinya adya ok alja ganya deknewoka, Yesus ak hyak dib senewoka, ganya ologoka domoknya bek sekiyimek. Dara ono', yok nang hnon sekiyisik nang era, hnonda Pilipus, hnonda Prokhorus, hnonda Nikanor, hnonda Timon, Parmenas, Nikolaus Antiokhia mok ebnya hnon, sekiyimek. Nikolaus bera alda Yahudi nang gom bok, Yahudi nang Imik Neyung yuba ak wekoka domok. 6:6 Dara, ban sekbadya nang era doboka obadya yuba lena' gak nang ek, wera sekiyiwanamab nang era an aboka lebek dara, obadya nang edya, soruka sikenek diyiwoka, heng uboka molosik. 6:7 Wera danyek, Imik Neyung yub ara, ono' mok soko oboka lelebgiga yabalamok. Dara, Yerusalem heikek ara, nim Imik Neyung yuba doro diriga ban nang era nauba danggiga balamookanya, ono' al Yahudi yuba wa gaka' dub nang nauba eneba, Yesus ak dib senewoka Imik Neyung yuba dib domek. 6:8 Stefanus bera Imik Neyung adya wana' uboka eleksina' ab migib una' ab dadya, deknewoka ulumok adya, alja hyak lok so' ab, senenggom bekna' anaba nimi hnoum nauba unuro yabalemok. 6:9 Bok yok nang edya, sikda Meebdanggogomek Nang e aboka silimek ek Yahudi nim edya yuba don ek dolomek nang edya alak walamek. Ban nang era Yahudi nang bok, si yok-yok, hnonda Kirene nang, dara ono' hnonda Aleksandria nang. Dara, hnonda Kilikia mok eb, Asia mok eb, sikda Stefanus beblaboka yuba gangawoka mala lanab dangamek. 6:10 Bok, Stefanus bedya yuba nidya' salamoknya nera, Imik Neyung Geisinya adya anyek-anyek sablul aboka geremseng ganya eleklemok adya salamok dara, sikda nidya' nang adya dara, nera malya lelemla aboka, alak saawoka lena' okna dangasuk. 6:11 Anasa wera Yahudi nang edya, Stefanus bera Musa bek hnon, Imik Neyung ak hnon, malya lelemla aboka, nimi wene nang edya sonda' anasa, miniwoka lebnok aboka, onowoka orugosik. 6:12 Dara ban unuwoka, Yahudi yuba dam nang ek hnon, sikja yuba neksin nang ek hnon, nimi salya' yok nim ek hnon, doblomek. Dara, sikda Stefanus bek henga goubuka, Yahudi yuba sana' gak nang ek bo bilimek. 6:13 Dara ono', Stefanus bek yana kimek nang, sonda bok, lelewoka neknok aboka bo yeilimek. Dara, sonda' anasa Stefanus bek minimek nang edya lelemekja, "Stefanus bera Imik Neyung adya geisa e nek malya e aboka lelemlakanya, Musa bedya unuwanalum an yub era malya yub aboka lelelanya bera an," aboka sonda' anasa wenyaboka yana kimek. 6:14 "Stefanus bedya dara, Nazaret mok ebnya Yesus adya Imik Neyung e nenyek golowoka beibnamlakanya, Musa bedya Israeli nang unulumnulum aboka elegosuka' nidya' ara yoknya dangawanamla alamla kemouba," aboka lelemek. 6:15 Nimi nidya' yuba sana' gak nang longomek nang edya, Stefanus bek kemelemek dara, Stefanus bedya hogung era lero hogung anaso dangamok eiyimek.
7:1 Yahudi yuba wa gaka' dubnya bedya Stefanus bek, "Ban nidya' alja wenyalamla aboka yana kinjak ara aldib gom?" aboka heimok. 7:2 Dara, Stefanus bedya sekoka, "Hem yab o, nadya neyung yab o, ugunda nak kebnenulum. Abraham bera Haran heik biniboka unggulumok salek anam Mesopotamia heik or anam ulumok salek hyak senenggoma' imiknya Imik Neyung bera Abraham bek yeiniboka, 7:3 lemokja, Anja mok soko ek, an kabo nim ek lobmenekanya, eimik nadya anak aawoka lebgenya sokok binilam, wenyaboka lemok. 7:4 Wera danyek, Abraham bera Kasdim sokok loboka, Haran moko e soboka ulumok. Wera Haran heik ab Abraham alja neyung be soboka danyek, Imik Neyung adya Abraham bek mok sokok enyegan neyung yabo wen ululum ak an beil bilimok. 7:5 Ban salek era, soko enera Imik Neyung adya Abraham bek nera anja yoka' soko danamla aboka Abraham bek anam eleganggumok. Dara, yan sang hnonok sibin anaba meka' nera ansamba muna' gobda lebgen aboka elegoka lebnenggumok. Bok Imik Neyung adya dara, soko enyek Abraham bemba hnon, al nang yila' eimik lunuwoka nelemeija nang amba hnon, eleganesin amok. Dara nera, Abraham bera me yak danggumok bok lemok. 7:6 Alda Imik Neyung adya Abraham bek okoka lemoknya nera, An nang yila' ara, eimik yok nang sokok sam sekel yanggan nang dangoka ulumnemak. Dara, sik an nang yila' sekel bilimeija sokok nang adya dara, sikenek igin yaka' kweiyiwoka, yeiriwoka bobnenewoka ulumeija salek era, gibna' denga odara' badya anaso lebnamla. 7:7 Bok, sikenek igin yaka' kweiyiwoka malya' seneleseija sokok nim era, nadya sikenek yana lelewoka igina boyiwanesin. Dara, Abraham an nang yila' ak dara, ban sokok loboka nadya anak lebnenggen sokok sam an yeiniboka nak giblemnenyak, hyok. 7:8 Imik Neyung adya ban wenyaboka Abraham bek seleb lebgogomok dara, wera dib unubdanamab bar aboka, bola' garana' bekna' elegemok. Wera an adya, Abraham bedya me Ishak beibok dara, linbadya sum mabok dara, alja me nek bola' garamok. Dara wera ono', Yakub bedya dara, alja mab obadya nang ek Israeli nang edya neyung yab uguma' nang beibok dara, bola' garasuk." 7:9 "Dara, nunja neyung Yusuf bera alja hemyab edya hmana leboka rupiah amba dekek dara, Mesir sokok sam ek wa wenya dangamok. Bok, Imik Neyung adya alak arawoka pe bo uboka, 7:10 ono' Imik Neyung adya Yusuf bek yoka'-yoka' igina kwelemok bok alak bleboka sekiyimok. Dara, Yusuf bek Imik Neyung adya geremseng una' ab, ganya pe seinina' ab, elegemok dara, wera anadya eimik Yusuf bera Firaun bek yuba sabnom aboka byuk sum era pe lebok dara, Firaun bedya perob senewoka alak Mesir soko dubnya sekiyiwoka, Firaun bedya senenggom e ab, yoka'-yoka' welemoka' nidya' ab ara Yusuf bek elegemok. 7:11 Dara wera, yok sum enyek Mesir sokok ak Kanaan sokok senenggom gwaneng oka' enyek bukumek dara, nimi nauba gwaneng ok adya gwekdo balamek. Dara, nunja neyung yab era gwaneng doboka demenggom dangamok. 7:12 Wera gwaneng oka' bukumek sum enyek, Yakub bedya Mesir sokok ara gandum nauba ulumla an yuba kemok dara, nunja neyung yabo youma' nang ek, Yakub bedya alja mab ek wera dekel busululum aboka orugumok. Dara, men youbuka dekel bilimeknya nera an. 7:13 Dara ono', li penenya sum dekel yeknya nenyek, Yusuf bera alja hemyab ek, nara Yusuf bera nara an aboka laga aabdangamok. Wera danyek Mesir sokok dubnya Firaun bedya dara, Yusuf bera ban ben alja mabo siliba' senewoka ella dangamok. 7:14 Wera danyek, Yusuf bedya alja neyung Yakub bek, neyung anja mab ek nidya' Mesir sokok yoululum aboka yuba beiyimok dara, wera Yakub mabo siliba' ara Kanaan sokok aba' ara Mesir sokok nimi denga penya ebdobnya sekdigin nang yibilimek. 7:15 Wera Yakub bera seleb Mesir sokok yibiniboka ulumoka' ara, al Yakub be nong ab, nunja neyung yabo youma' nang nidya' ab dara Mesir sokok ab somogomek. 7:16 Dara Israeli nang edya Mesir sokok ab ara, sikja be' nera, Abraham bedya Hemor nang yila' ak ab Sikhem sokok dekemok ak, ban soko lokoka dil bilisik." 7:17 "Dara, Imik Neyung adya Abraham bek unuwanamna amoka' ak gigiwanamla salek era oka danggiga balamok dara, wera Mesir sokok ara Israeli nim ok likoka nauba danggiga balamok. 7:18 Dara ban salek danyek, Mesir sokok ara, Yusuf bek elgom ulumok yok Firaun dubnya bedya sekoka wenelesuk. 7:19 Wera ban sum enyek, Firaun nunja nimi yila' ek igin yaka' kweiyiwoka malya nenellilisuk. Dara alja lelemok ara, nim edya wenyok beilina' me nera beiyik gwab loboka somoklenok aboka duka' lolowoka bologollilisuk. 7:20 Dara, unulumok salek Musa bera beibok. Dara alda ok adya kemen danaba, perob nong me an senemok. Wera Musa bera wala' winilya alja neyung bedya ek moma diniwoka bo ulurek. 7:21 Wera Musa bek okok byik dara, Firaun bedya gelma edya doboka, alja ek alja beiyimoka' yoka' anaso dangiyiwoka oklomok. 7:22 Dara, Musa bera alda hyak Mesir nang edya ella ulumeknya nera, nidya' ella danggiga balamok. Wera danyek Musa bera senenggom migibnya dangoka, alja unulumok ab yuba sana' ab dara, hyak pelemok." 7:23 "Wera Musa bera alja gibna' seleb denga hnonok ebdobnya mekbadya ubok dara, alja ganya ek nadya mok nim Israeli nang era heka' anaso uldolomak do senewoka kemel binisin senemok. 7:24 Wera kemel bilisuk dara, Mesirnya eb, Israelnya beb, penya oldalarek eibsuk dara, Israelnya bek mala doboka bleboka, Mesir heik yoka'anya bek diba' omok. 7:25 Musa bedya dara, alja mok nim edya nak Imik Neyung adya sik nong blebsulula' aboka arawananela' ara ella ubnemak senemok bok, Israeli nim edya dara, Musa bek blebsulula' aboka ulusil senewoka ella danggumek. 7:26 Dara, ampum so maboka gwelegok dara, Musa bedya Israeli nang penya nang sik moumen oldalarek eiyisuk. Dara, alja bleboka hiyiwosunun senen ulumok. Dara alja, Hemyab o, ugun moumen bok anasa hekasa oldalarum do, wenyaboka heibsuk. 7:27 Bok alja hem bek olomoknya bedya, Musa bek bleblesuk ara mok sam walda beiyiwoka lebok ara, Anda heknedya unu yana lelesinya ululul aboka jaboka sekiyinjok do? 7:28 Anda ampum ara Mesir nang omom sok sumen nak obnuna' aboka lelenelem do, hyok. 7:29 Ben nedya alak wenyal yaboka' kebok dara, Musa bera Mesir sokok ab yeiri bindiwoka ulumok. Dara, Midian sokok ab me penya beiyimok." 7:30 "Musa bera Midian sokok ulumok salek era, gibna' denga hnonok uboka ebdobnya mekbadya dok dara, Imik Neyung lero ara, Sinai mein berem hola seknenggulumok sokok sam ara, uk boka' lologoka singilimok gal gangganek sam sekemok ak, Musa bera eiyimok. 7:31 Dara Musa alda nera heka' do senewoka ganya loka daboka, nemen oka gelelinga biniboka keeboka borolomok enyek, Wenelesilnya Imik Neyung bedya yub era uk boka' lomok ab uboka lemokja, 7:32 Nara anja neyung yab youma' nang edya Imik Neyung ulumna e. Nara Abraham bedya, Ishak bedya, Yakub bedya, sikja Imik Neyung era nara alan ulumna e, hyok. Dara, Musa bera loka daboka ber-ber alamookanya, kemena' loboka hogung lilibdangamok. 7:33 Dara ono' Imik Neyung adya Musa bek saawoka, Musa an sekelam soko era perob geisa soko anasa, anja yan sang ongona' ara anyagan gwirib loblom. 7:34 Nadya nimi Mesir sokok sam igin yaka' kweboka nauba kwellilisil ara eibna. Dara, sikja molona' ara seleb kebnakanya, sikenek blebnesin anasa, nara wen yinggin. Anasa wera, nadya anak Mesir sokok sam nekdo bilom aboka sekiyiwagen, aboka lemok," hyok. 7:35 "Musa al ban Musa benyek Israeli nimi nong edya alak, Heknedya nuk bo uboka, yana lelesilom aboka sekiyinjok do aboka wekdo dorogomeka' onnya bedya al nenesa leboka unumek bok, ono' alja Imik Neyung lero adya gal donggalek sam yeiniboka, bo usinya uboka blebsinya nenewoka Imik Neyung adya Mesir sokok bokol bilimok. 7:36 Dara, al neik Musa ben edya Israeli nimi Mesir sokok ab bleboka bo uboka, ono' alja senenggom lok so ab, bekna' ab, unulumok ara, Mesir sokok hnon eneng mek gwan ek sam hnon, hola' seknenggulumok sokok sam hnon, unuwoka gibna' denga hnonok ebdobnya mekbadya meewoka bo diri balasuk. 7:37 Dara al neik Musa bedya, Israeli nim ek, Ugun gangganek ab nak gaboka donyok sok, eimik ununumna' lenya be hnon doboka sekiyiwanamla, amoknya bera alan. 7:38 Dara, al Musa hola' seknenggulumok mok hwalek sam Israeli nang ablaboka ulumek. Nunja neyung yabo youma' nang eb, Sinai meinik sam alak samok lero eb, alablaboka yabalamek. Dara, al Musa bedya nim embenga' una' yub era, Imik Neyung adya elegemok dara, ono' nuk eleklesuk." 7:39 "Bok, nun nang yila' edya Musa bek alja lelemok yuba hyak bleklemek. Alak lek senewoka, ganya lomok ara Mesir sam on pik binimab senelemek. 7:40 Dara, Israeli nang edya Harun bek, Nunda yoka' ak nunja dubnya nenewoka giblemnemab dara, alja bo binisil anasa, sunuwoka meeweisilom, hyek. Dara, Nunda Musa bedya Mesir sokok ab bo yalasilnya bek, wera heka' hubok ara elgom ulumab bar, aboka lelemek. 7:41 Dara ban salek enyek, Israeli nang era, sapi pam ak sunuwoka, nunja neyung ara al anye aboka, pama oboka masa ab giboka deregoka, sikja soruk adya meemek sununa' amba hnon beiyiwoka, giboka, bera seboka eiya hlaboka giblemek. 7:42 Dara, unulumek anyek Imik Neyung adya eiyiwoka imik ulumla gura' enyek giblenok aboka Imik Neyung ara sikenek soruka lobonggosuk. Ban unuwanamoknya nenesa geklewoka men ununumna' lelemek nang edya momnya dobek ara, Wei, ugunda Israeli nang o, ugunda hola' sekna' mok sam pama garawoka beiyiwoka giblelum gibna' hnonok ebdobnya mekbadya leboka ara, na Imik Neyung nong amba ununggululum. 7:43 Ugunda Molokh bedya gibna' e nek, Refan gura' anyek, ugunja nunja migibnya bera anya aboka giblenob aboka bo yabalalum. Anasa, ugunuk nadya doboka hyak mok Babel mok ek boboganesin, aboka momnya dobek." 7:44 "Imik Neyung sik gangganek ulumok an bekna' pam boka' e ara nunja neyung yab Israeli nang edya, hola' sekna' orok sokok sam bo yabalamek. Ban e nera, Musa bek Imik Neyung adya ban unuwoka sobnelum aboka nekemok sok sunuwoka somek. 7:45 Dara wera, al on Imik Neyung e nera, Musa seleb somogok dara, Yosua bedya Israeli nimi doboka bobok dara, Kanaan sokok bindiwoka, Imik Neyung adya yok nim men ulumek nimi yakasuk dara, sikja soko dangoka ulumek salek anaba, moruwoka bo yabalamek. Dara, Imik Neyung e nera or ulmoublemok ara Daud lunuwoka nebok dara, wera sidya' dakok. 7:46 Daud bedya Imik Neyung ganya ak yongona geboka, Yakob bedya giblemok Imik Neyung amba, e sobnun aboka Imik Neyung ak molomok. 7:47 Bok, Imik Neyung e sunuwoka son dara, Daud bedya me Salomo bedya somok. 7:48 Bok, Imik Neyung migiba' senenggoma' ululanya bera, alda nimi solomak ek sam unggulumla. Nenesa leboka, ununumna' lelemek nang bukuk sam momnya dobok an: 7:49 Imik Neyung wenyalamla ara, Im ara nadya ekla buna'. Soko ara nadya yan sang ligina'. Anasa wera, hek e nek nasamba sobnanulum do? Nasamba dek-deka son oulyang ara har sam ubnamla do? 7:50 Yoka'-yoka' nidya' ara nadya soruk adya uyiwanggumsa de? wenyaboka lelemla, ara momnya dobok." 7:51 "Hemyab o, ugunda hyak ganya gasa uboka Imik Neyung yub ak dib senenggululum anyek hyak lok nong. Ugunda Imik Neyung yub ak sene o onugamna anaso' ok ululum. Ugunja neyung yab edya Imik Neyung Geisinya ol yangalemek sok, ugumba unulum. 7:52 Ununumna' dib Imik Neyung yuba lelemek nang nidya' ugunja neyung yabo edya olomek. Imik Neyung me pelelanya bera eimik yanamla aboka, men yub lero yalamek nang anaba olomek. Bok wenera, Imik Neyung bedya jong ganya ulumla me nek ugunja yuba sonda adya miniwoka oblum. 7:53 Imik Neyung lero nang edya unuwanalum an yuba seleb elegesik bok, ugunda dib senewoka unuwanggulumukanya, nak an henga gouboka olonulum," wenyaboka ban nidya' ara, Stefanus bedya lebok. 7:54 Yahudi yuba san nang edya, Stefanus bedya lelemok yuba kemek dara, sikja ganya oblumugoka mona yeilib menegesuk dara, sikda Stefanus bek si gleng darawoka yu ganya bomek. 7:55 Bok Stefanus bera, Imik Neyung Geisinya adya deknewoka ulumoknya adya imik sam kemelemok enyek, Imik Neyung dilina' yeboka' eiyimok. Dara, Yesus ara Imik Neyung bedya sirikek sam sekemoka' ak eiyimok. 7:56 Dara Stefanus bedya, "Wei wera, ugunda kendelulum. Nara im pik gaboka ublakanya, nimi diba' me Yesus ara, Imik Neyung sirik soruk sam sekemla eibna," hyok. 7:57 Dara, ban mamagamek nang edya, Stefanus bedya wenyal yabok yuba kel yabek dara, o lebdangoka hema doboka Stefanus bek oka we denel biniboka, 7:58 alak mok beiyek bo yeiniboka girik adya oro yabek. Dara, Stefanus bek olomek nang edya dara, gobenenya si Saulus bek sikja boksom era alja nong eilib beiyimek. 7:59 Wera Stefanus bera girik adya anam saboka olomek salek, Imik Neyung ak molowoka lelemokja, "Wenelesilimnya Yesus o, nadya ganya an doboka beibnelom," al yabok. 7:60 Dara ono', hnon komo lumugoka Imik Neyung ak yuba bii aboka lemokja, "Wenelesilimnya Imik Neyung o, ban unulumak malya una' era sikenek lunuwoka gwirib lobsimenek lobnelam," aboka molobgogomoka' seleb dara, alda dib somogomok.
8:1 Saulus bera anyagan ulumok ara, Stefanus bek obek dara, perob senemok. Dara al neik sum enyek, men obadya nang Imik Neyung yuba lena' gak nang enyek orok bok, yok Yerusalem heikek sam ab yuba dona' nim ek, doluwoka yaklanawoka doboka olosik dara, doluwoka bokdangoka hnonda Yudea sam hnon, hnonda Samaria sam hnon, doknol balamek. 8:2 Dara ono', hyak pe Imik Neyung ak lok ganya bolomek nang adya Stefanus bek nauba engewoka soko lokoka diyimek. 8:3 Bok, Saulus bera yeiniboka Imik Neyung yuba dona' nim era, nauba deijik senewoka soldob menegonun aboka dulumok. Dara, alda hnon ek obgogowan dara, ono' hnon yok ek biniboka Imik Neyung yuba dib senemna nang, nengmab ab gelewa ab, doboka bobna dara, nimi henga gereksin ek sam henga geregel balasuk. 8:4 Wera, Imik Neyung yuba dib senewoka domek nang sikenek doluwoka olosika' anasa, doknol balamek ak sam nidya' ara, Imik Neyung yuba nauba leb elekdo yabalemek. 8:5 Dara, Pilipus bera Samaria senenggom heik biniboka, Imik Neyung adya nimi blebsina' dubnya eleganesin amoka' Kristus anyek, lel eleklesuk. 8:6 Dara, Pilipus bedya Imik Neyung yuba lelemookanya, yoka'-yoka' nauba lokso Imik Neyung ak ab bekna' diba' unuro yabalamoka' anyek, nim adya eiyimek dara, sikda loka daboka, ganya ologoka, pe kelemek. 8:7 Dara, Pilipus bedya, yana gwanalamok nanga hnon, hwelesuk. Yana soruka heimna nanga hnon, nauba hwelesuk. Hnonda bisa' wekemna nanga hnon era, bisa' yakoka nauba hwelesuk dara, bisa' ara ngeboka ngalagoka goblemek. 8:8 Dara, nimi nidya' Samaria heik ulumek heik nanga nidya' ara hyak eiya dablasuk. 8:9 Dara ono', Samaria heik ara, nimi si Simon alda nimi hwelesuk adya, Samaria nimi loba' nenelesuknya hnon ulumok. Dara, nimi nidya' alak lok ganya bolomek. Ono' al onnya bedya nara hyak senenggomnya abdangoka leldalamok. 8:10 Dara, al damnya nera senenggoma' aldalamok adya, Samaria nimi mek nanga nauba nanga nidya', alak keeboka dib senelemek. Dara, Samaria nimi lelemek ara, "Ban ben era alda hyak senenggomnya, hyak Imik Neyung migib ak gologoknya bek ulumla," aboka lelemek. 8:11 Ban Simon bera Samaria heik ara hyak youma' orowek alja hwelesuk migib edya, hyak nimi nauba loba' nenelesuk. Anadya alak alda perob senenggomnya senewoka nimi nauba alak kelemek. 8:12 Bok, Pilipus bedya sik Samaria nim ek, Imik Neyung yuba leboka, nimi blebsina' dubnya si Yesus Kristus adya, eimik wenelemnesil aboka lelemok dara, Samaria nim era Pilipus bedya lelemok yub ek dib senemek. Dara, sikda gelewa anaba, nengmab anaba, nidya' meka dalasuk. 8:13 Simon be nimi hwelesuknya beneba, dib senemok. Dara ono' alba meka dabgogomok seleb dara, Pilipus beblaboka neika' uro yabalerek. Wera Pilipus bedya, Imik Neyung adya hyak lokso migib anyek bekna' diba' unulumok dara, Simon bera hyak lok anasa, ngolukdo ulumok. 8:14 Dara, Yerusalem heik ab yuba lena' gak nang edya, Samaria nang era Imik Neyung yuba dib dobak an yuba kemek dara, anasa wera Petrus Yohanes ak kemel binirum aboka bokol bilisik. 8:15 Wera Petrus beb, Yohanes beb, Samaria heik seleb birik dara, Samaria nim ek Imik Neyung Geisinya sekel yinggisulul aboka heng uboka mololorek. 8:16 Samaria nim era, Pilipus bedya Wenelesilnya Yesus bedya si ok sibuka meka dab losuk dara, Geisinya ara sikenek anam dib sekel yanggom anasa, Imik Neyung Geisinya sekel youlul aboka heng uboka molorek. 8:17 Dara, Petrus beb, Yohanes beb dadya, Samaria nim ek sikja soruka salawoka heng uboka lelesirik dara, wera Imik Neyung adya Geisinya ara dib domek. 8:18 Dara, Simon bera, Samaria nim ek Petrus Yohanes adya soruka diyiwoka, heng uboka lelerek enyek, Samaria nim Imik Neyung Geisinya dobek anyek eiyimok dara, anasa wera, Simon bera Petrus Yohanes ak rupiah bo yeiniboka, 8:19 "Ugunja unuwosurum migib enyek nak hnon eleganerum adya, nababya nadya soruk yok nang ek diyiwoka heng uboka lebsinya dara, Imik Neyung adya Geisinya dib dobnemak bar," aboka molomok. 8:20 Bok Petrus bedya, Simon be hwelesuknya bek, "An nong ab, anja rupiah eb, bisa' heik bululum. Anja dara, Imik Neyung adya eleklesil migib era rupiah adya dekoka dolomak senelam de? Hyak orok nong! 8:21 Anda Imik Neyung ak jong ganya ara orok anasa, nunja welemab wa nek ara, neika arawoka wena' ara loblom. 8:22 Anasa wera, anja seinilam malya una' ek ab ganya dangawoka, Imik Neyung Wenelesilnya bek mololdalalom. Dara, anja malya una' meewanenggel gom aboka eibnemab. 8:23 Anda bisa' adya heng gobiyiwoka, sikirob ganya deknenggel, eiyimna," hyok. 8:24 Dara Simon bedya, Petrus Yohanes ak, "Wera ugun penya adya nidya' nak lebnurumnya nera nak una' lobnulul aboka, nasamba Wenelesilnya bek molowonurum," hyok. 8:25 Wera Petrus beb, Yohanes, beb, sikda Samaria nim ek seleb Imik Neyung yuba lebgogowoka, yoka'-yoka' nidya' laga leboka nekoka seleb ubdek dara, sik penya dara, on pik Yerusalem heikek birik. Dara, pikik balarek ab dara, Samaria heik gokgobok pik mek heik gong pik Imik Neyung yuba leb elekgiga balarek. 8:26 Dara, Wenelesilnya lero edya Pilipus bek yeiniboka, "Anda men oblyek sam Yerusalem heik ab ara, Gaza heik moruwoka jakarob pikik sam bilom. Dara, pik era albeyok gakdena' ak ulumla anyek, anda men balom," aboka orugumok. 8:27-28 Wera Pilipus bera keboka wenhyok pikik sam lanal byuk. Ban salek enyek, nimi ben hnon dub nang wa welemoknya bera Yerusalem heik ab ara, alja heikek bunun aboka, benebabya neik pik balamok. Ban bera Etiopia sokok mok soko dam gel, Kandake gedya bona' nidya' meewoka una' dubnya ulumok. Dara, Yerusalem heikek Imik Neyung gibel bilimok ara, seleb dara, ek Etiopia sam bunun aboka, pama glilimla e lomok bukoka pika balamok. Wera pik anam buka balamookanya, ono' ununumna' lenya Yesaya yub ak momnya doboka' anyek einibgiga balamok. 8:29 Dara ono' Imik Neyung Geisinya adya, Pilipus bek, "Anda alda yabalamla ak sam dol gonul bilom," hyok. 8:30 Wera Pilipus bera ok so biniboka kelemok enyek, bera ununumna' lenya Yesaya yub ak bukoka einibgiga balamoka' ak kemok. Dara, Pilipus bedya Yesaya yuba einilimoknya bek, "Wera neyung o, anja einililama' ara damok ara anyek lebok ak einilamna senewoka ella ulam gom?" aboka heibok. 8:31 Dara benedya, "Nimi yok nang edya, nera damok ara ban nenesa lebok aboka neknena' orok dara, heka' huboka ella danasinya do?" wenhyok dara, wera ono' Pilipus bek, "Nadya pam e dubuk an bul yalom," hyok. 8:32 Dara Etiopianya bedya, Imik Neyung yuba einilimoka' ara ban: "Alda domba pam ara pam olomak nang ek bo balamak sok, alak doboka bo bilimek. Dara, domba pama me ak honga garalamna ek yuba sanggulumla sok, albabya si akoka yuba sana' ara orok. 8:33 Alak derewoka malya nenewoka, ono' pe yana lelewanggonggom umek. Alja ganya nong era sokok ab ara seleb dolebok anasa, dara ben hnonok sibin adya anaba, alja mab era alan aboka, nim ek neknenggunusil." 8:34 Dara, Etiopianya bedya Pilipus bek, "Ununumna' lelemoknya bedya ban wenyaboka momnya doboka' ara, al nong amba lebdok gom, nimi yok nim emba geklewoka lebok gom?" aboka heimok. 8:35 Dara, Pilipus bedya Yesaya yuba momnya doboka' ak men einiwoka, nenyek dara, anasa lebok aboka, Wenelesilnya Yesus amba lebok aboka perob lero yaban yuba leb elegemok. 8:36 Wera sik penya dara, pikik anam balareekanya, wera meka ulumoka' ak sam yok sam birik. Dara, Etiopianya bedya, "Wera, mek ara an ulumla anyek kendelom. Anasa wera, nak ara heka' mekso ulunel anasa, meka danena' ara lobnenelem do?" hyok. 8:37 Dara Pilipus bedya Etiopianya bek, "Neyung o, anda hyak Yesus ak ganya gekman dib senewamen dara, wera meka dabnenggen," hyok. Dara Etiopianya bedya, "Nara Yesus Kristus ara Imik Neyung bedya me dib ulumla ara dib senelamna," hyok. 8:38 Dara onnya bedya, "Pam e nera anyagan dek-deka sobnanam," aboka orugumok dara, sikda anyagan balarek ara dek-deka sorek. Dara Pilipus beb, Etiopianya beb, mek inik yingginiboka, Pilipus bedya alak meka dabok. 8:39 Wera mekek ab ara goboka yabarek dara, Pilipus bera Imik Neyung Geisinya adya wene sab-sab doboka yokok bo bilimok. Dara, Etiopianya bedya dara, Pilipus bek meka' eil dona' ara hyak orok. Bok, ban Etiopia dub nang wa wena' dubnya bera ganya eiya daboka alja ek pik bilimok. 8:40 Bok wera ono', Pilipus bera biliga Asdod heikek sekok ok eibdok. Dara, alda ono' yabalamookanya, Yesus adya perob Imik Neyung yuba yok-yok heikek sam leb elekgiga balamok ara, Kaisarea heikek lanal bilimok.
9:1 Dara ono' al neik salek Saulus bera Wenelesilnya Yesus ak diriga ban nang ek yeiriwoka olosunun senen ganya boboka, yub adya loba' nenellilisuk. 9:2 Dara Saulus ganya enyek boboka, Yahudi yuba wa gaka' dubnya bek biniboka, Damsyik heikek Yahudi nim edya yuba don e dam nang amba, sikja nimi migiba geboka olosak momnya dona' anyek elegeinija enyek, Yesus ak dib senelemeija nang enyek, Damsyik heikek sam ulumeija' ak eibnya dara, henga gouboka Yerusalem heikek bo yanasin senewoka dubnya bek molomok. 9:3 Wera seleb or unuwanalam hyek dara, Saulus bera Damsyik heikek bununa' aboka, heik berem lanal bok enyek, yok senenggom dilina' era, imik ab sam ara, alja gokgobok nidya' yeb ganagamok. 9:4 Wera danyek, Saulus bera sokok sam malyingginiboka, ono' imik ab sam yuba hnon alak, "Saulus o, Saulus o, anda hekasa nak loba' nenewoka olonelem do?" hyok. 9:5 Wera Saulus bedya, "Neyung o, anda heknya do," aboka heimok. Dara ono' adya Saulus bek lebok ara, "Nara Yesus anja loba' nenewoka olonelemnya bera nara alan," hyok. 9:6 Dara on yub adya Saulus bek, "Wera anda bukmenekanya, heikek men berra wekel bilom. Seleb bimen danyek, anak eimik era yoka'-yoka' anja unuwanalam ara neknenjak," hyok. 9:7 Wera Saulus beblaboka neika' balamek nang era, Saulus bek lelemok yub era, nong ara eilina' orok bok, yuba dem adya ok lelemok anasa, loka daboka yuba meka' doro sabnenggumek. 9:8 Wera Saulus bera sekoka henga gwelek sunumok bok, heng ubsalamok adya hyak okna dangamok. Anasa wera, yok nang edya Saulus bek soruka glibsalawoka, pika nekoka Damsyik heikek bo wekemek. 9:9 Wera ono' al Saulus bera li winilya henga ubsalamok dara, malamookanya, dena' ab, mek anaba meka' dena' loboka mabmorumok. 9:10 Dara ono' Damsyik heikek ara Wenelesilnya Yesus yuba doro diriga balamoknya nimi si Ananias ben hnon ulumok. Dara, Ananias inimnek lendara mamok enyek, Wenelesilnya bedya alak lebokja, "Wei Ananias o," hyok dara, Ananias bedya, "Wenelesilimnya o, nara an e," hyok. 9:11 Dara, Wenelesilnya bedya ono' alak lemokja, "Anda al wene salek berra balom. Jong pikik, Yudas bedya ek ono bilom. Tarsus heikek ab Saulus alamaknya benyek anyagono ulumla gom aboka, nim ek heibnelam. Benera wera heng uboka Imik Neyung mololamla," hyok. 9:12 "Al Saulus bera ono' lendara mamlakanya, Ananias alameknya benyek, Saulus bek yeiniboka, merewolula' aboka alja heng ek soruka diyiwoka heng uboka Imik Neyung ak molomla' ak eibdangamla," hyok. 9:13 Bok Ananias bedya dara, "Wenelesilimnya, o nara ban benesa nimi nauba alsamba, alja nimi muna' Imik Neyung mab Yerusalem heikek ara nauba oboka unulusil alamaknya bek anasa," hyok. 9:14 "Wen era, alda Yahudi yuba wa gaka' dub nang ek molowoka, Damsyik heik anja yuba dolomak nang ek heng geregosunun aboka yeililabok anasa lebna," hyok. 9:15 Bok Wenelesilnya bedya Ananias bek, "Anda or bilom e," hyok. "Nadya Saulus bek, nak aralenulul aboka, nadya yub enyek Yahudi gom nim ek hnon, mok soko dub nang ek hnon, alja mok nim Israeli nim ek hnon, leb elekdo yibilul aboka, nadya gaboka domna anasa, anda or alak bilom. 9:16 Dara nadya eimik era, Saulus bek nasamba leboka alak yoka'-yoka' nidya' igina kwebnamla anyek elegoka aawanamna anasa, or bilom," hyok. 9:17 Dara Ananias bera, Yudas bedya ek biniboka, Saulus bek soruka diyiwoka umok. Ananias bedya Saulus bek leboka' ara, "Hem Saulus o, ampum pikik yalamom danyek eiyimomnya Wenelesilnya Yesus bedya, nara anyagan yanamna adya anda merewoka, Imik Neyung Geisinya adya deknewanenggel anasa, wenyaboka alak bilom amla anasa yeilimna," hyok. 9:18 Dara al wene sab-sab enyek, hadya' haya' anaso anyek, Saulus bedya hengek ab glob deboka yibiniboka, heng ara eika' nong anyek onsok umok. Dara, Saulus mamok ara bukuk dara, meka damek. 9:19 Wera Saulus bera dena' debgogowok dara, onsok migib umok. Dara, Saulus bera Yesus yuba doro diriga ban nang eblaboka neika' Damsyik heik ara li wen mabek. 9:20 Dara nenyek moruwoka, Yahudi nim edya yuba don e pik biniboka, nimi yok nang ek, Yesus ara aldib Imik Neyung bedya me diba' aboka lel eleklesuk. 9:21 Saulus bedya wenyaboka yuba lelemok anyek, nimi nidya' kemek dara, hyak loka dasuk. Dara sikda lelemek ara, "Benedya Yerusalem heik ara, Yesus si ak dib senelemek nang oboka unggulusuknya de?" aboka lelemek. Dara ono', "Anyagan yeilimo anaba, anyagan ulumak yuba dona' nang enyek, heng gobuka yuba wa gaka' dub nang ek Yerusalem heik bo busunun aboka yanggumo do?" aboka lelemek. 9:22 Bok Saulus bedya lel yabok yub enyek, migib danggiga bok. Dara Saulus bedya, Yesus ara Kristus aldib nimi blebsina' dubnya ulumla aboka Yesus adya yuba lel yabok dara Yahudi nang era, Damsyik heikek ulumek nang era, malya lelemla aboka yuba sana' ara okna dabdosuk. 9:23 Wera li gong wenebadya balamok dara, Yahudi nang edya, yuba saboka Saulus bek obnemab senewoka gegeb lobek bok, 9:24 Saulus bera, alak obnemab seneweka' ara seleb kesuk. Dara, Yahudi nang era, Saulus bera Damsyik heikek ulumok anasa, yabalya enyek obnob aboka, inimnek yubyek pika wekel balamek ak welsinilimek. 9:25 Bok, ono' yok inimnek mabok danyek, Saulus benya neika' ulumek yuba domek nang edya sor serrem lomok ongowoka, senenggom girik leka' wilimaka' lom pik olowoka weilik bilom aboka bokdo dorogomek. 9:26 Wera Damsyik heik ab uboka, Saulus bera Yerusalem heik byuk dara, anyagan ulumek Yesus yuba doro diriga ban nang eb, neika' heibnob aboka dulumok. Bok sikja dara, Saulus bera aldib Yesus yuba doro diriga bannya dok ara, dib senewanggumek anasa, sikda Saulus bek obnesiljok ulumla do senewoka hyak lok ganya bomek. 9:27 Wera ono' eimik Barnabas bedya Saulus bek yeiniboka, Saulus eboka bobok dara, Yesus yuba lena' gak nang ek bo biniboka amasuk. Dara Barnabas bedya Saulus bera heka' anaso uboka Wenelesilnya bek eibookanya, ono' heka' huboka Wenelesilnya bedya alak lemok ara sikenek nekesuk. Wera ono' Barnabas al Saulus hyak asa' nong anyek, Damsyik heikek Imik Neyung si nimi yok nang ek lel eleklesuk anyek sikenek nekesuk. 9:28 Anasa wera, Saulus bera Yerusalem heikek Yesus yuba doboka ulumek nang eb neika' uboka, Yerusalem heikek nidya' yabalamookanya, asa' ganya boboka, Wenelesilnya bedya si leb elekdo yabalasuk. 9:29 Dara Saulus bera, Yahudi nang bok, Yunani yuba salamek nang eb, neika' yuba heibdangoka, ono' sabdangdang balameekanya, sikda Saulus bek obnemab senen ganya boboka dulumek. 9:30 Wera Yesus yuba dolomek nang edya, Saulus bek Yahudi nang edya obnoba' aboka ubak an yuba kemek dara, sikda Saulus bek eboka bobeknya nera Kaisarea heikek bo mal byik ara, ono' Tarsus alba eilinya heikek bokol byik. 9:31 Dara wenyek, Imik Neyung yuba dona' nim anyek, Yudea sokok hnon, Galilea sokok hnon, Samaria moka hnon, ulumek nim era, kaboka pe ulumek. Imik Neyung Geisinya adya arawoka, sikda Wenelesilnya bek lok ganya boboka, yuba dolomek nimi nidya' ara, ganya gasa kaboka, sik nonga yuba dolomek, anaba nauba danggiga balamok. 9:32 Petrus bera yok-yok moka biniboka, Imik Neyung yuba doboka ulumek nim ek kemel giriklesuk. Dara ono yok sum enyek, Petrus bera Lida heik sam muna' Imik Neyung mab ek kemel bilisuk. 9:33 Wera Lida heikek ara, Petrus bera, nimi hnon alda nonga heimoka' anyek malamok salek era, seleb gibna' ara linbadya lemok ak, alja si nera Eneas alameknya beb neika' ehwibdangarek. 9:34 Petrus bedya Eneas bek lebokja, "Eneas, Yesus Kristus adya anak seleb hwebgel anasa, anda bukoka anja ekla malalama' nidya' pe winiwoka ul yabalom," hyok. Dara, wene sab-sab Eneas bera bukuka sekemok. 9:35 Wera danyek nimi nidya' Lida nim eb, Saron nim eb, Eneas bek unu hwemok ak eibek dara, sikda Yesus ak dib senewoka domek. 9:36 Dara ono' Yope heikek ara gel hnon, alja si nera Tabita gek ulumok. Dara, alda Yesus ak dib senewoka domok gel ulumok. (Alja si nera Yunani yub adya dara, Dorkas alamek, nera nunja yub era bei busa' pam alamab.) Dara, gel gera perobnya nok unuwoka, bona' garan ulumna nim ek arawoka ulusuk. 9:37 Ban sum enyek alda neikna' salawoka somogomok. Wera alja be' goumek ara, seleb meka hwiyimek dara, dil binob aboka, imik ek eini beiyimek. 9:38 Yope heikek ara, Lida heik ab dara, hyak oka, mok gom anasa, Yesus yuba doboka Lida heikek ulumek nang edya Petrus bera Yope heikek ulumla an yuba kemek dara, ban wenyaboka e yorurum aboka, "Men hyak berra aboka yalom," aboka el bururum aboka penya nang orugusik. 9:39 Dara, Petrus ben nong ak wenyaboka el byik dara, Petrus bera sekoka neika' balamek ara, Yope heikek Dorkas ge somogomok ak beiyimek ek byik dara, Petrus bera alda imik ek sam e byik. Dara anyagan nenya seleb somogomok anasa or youwek ulumek gelewa nidya' era, Petrus be sekel byuk enyek, aknel ganagal biniboka, Dorkas ge embenga' ulumok wenyek, sikenek wiboka elegesuk aklenga danyek aawoka, hyak nauba engewoka lelemek. 9:40 Petrus bedya anyagan engero bulumek nimi danyek, ugunda nidya' goboka beiyik bululum aboka, albeyok anyagan koma lumugoka Imik Neyung ak heng uboka molomok. Wera Petrus bera Dorkas gedya be' gala gouboka beiyimek ak keeboka lemokja, "Tabita o, anda buklom," hyok. Dara, Dorkas gera henga gwelegoka kemelemok enyek, Petrus bek eiyimok dara, alda bukumok. 9:41 Dara, Petrus bedya Dorkas gek soruk salawoka gliboka bukiyimok. Dara Petrus bera, anyagan ulumek muna' Imik Neyung mab eb, youwek salya' ulumek gelewa eb yoululum aboka, Dorkas ge embenga' hweboka bukiyimok gel gera, wera anya e aboka sikenek elegesuk. 9:42 Petrus bedya ban unuwoka hwemok yub era, Yope moka nidya' oboka lelemok dara, anadya nimi nauba Wenelesilnya bek dib senemek. 9:43 Wera Petrus bera anyagan mok gouluna' aklenga wilimoknya alja si nera Simon bedya ek li wenebadya neika' maboka ulumek.
10:1 Kaisarea heikek ara nimi si ben hnon Kornelius ulumok. Alda Italia nang aboka si simek yin bona' nang dubnya ulumok. 10:2 Alda Imik Neyung ak lok ganya boboka ulumookanya, alja mab eb nimi nidya' neik so lok ganya boboka pe ulumek. Alda Yahudi nimi bok bona' garan ulumek nim ek arawoka, ono' alda Imik Neyung ak hyak soba' molomok. 10:3 Dara yok sum enyek, hyak yubyek henga dalnenelamla wenyek, yok so ak amamookanya, Imik Neyung lero ara Kornelius bek yeiniboka alak, "Kornelius o, Kornelius o," aboka youblumok ak okoka kebok. 10:4 Kornelius bera lero enyek lok anasa keebdaboka lemokja, "Neyung o, heka' ak ulumla do?" hyok. Wera danyek lero adya Kornelius bek, "Anja molona' ab, anja eleklelam ab, Imik Neyung saramek uboka alda perob senelamlakanya, ono' anak beklenggel," hyok. 10:5 "Anasa, wene salek enyek, nimi si Simon, hiboka dara Simon Petrus alameknya benyek, Yope heikek e yanok aboka nimek orugalom. 10:6 Alda yok-yok goluna' akleng wililanya Simon bedya ek, senenggom mek gwan berem ulumla ak ulumla," hyok. 10:7 Wera Kornelius beblaboka yuba salarek lero era seleb bilimok dara, Kornelius bera, alja wa wen nang penya nang uboka, ono' yin bon nang ben hnon hyak pe uboka alak diri bo ulumoknya hnon ak, "Yoululum," hyok. 10:8 Wera Kornelius bedya alak heka' huboka lemok anyek nidya' nekoka lebgogomok dara, Yope heikek bululum aboka orugosuk. 10:9 Wera ampum maboka gwelegok dara, pikik anam balamek ara, Yope heik berem lanal binob aboka byik salek enyek, yubyek dukdukanek enyek, Petrus bera eruma' dubuk sam heng uboka Imik Neyung ak molowonun aboka welemok. 10:10 Dara, Petrus bera gwaneng ok uboka desinya senen ulumok. Dara, dena' alsamba anam beillilemek salek enyek, alja ganya era yoka' adya hnon alak bo amamok. 10:11 Im pik gaboka yoka' anyek akleng go dombadya al liboka boboka sokok sam elekdo okdo doblinggemoka' ak eibuk. 10:12 Dara, akleng lom enyek ara, yana soruka yaka' ab, mon dib belega yabalamla ab, bei wining ab, maro balamok ab danyek, eiyimok. 10:13 Dara, ono' yuba hnon Petrus bek lebokja, "Petrus o, wera anda sekoka, ban hnon oboka del yabalom," aboka orugumok. 10:14 Danyek Petrus bedya, "Orok e, Wenelesilimnya o, nara mem ananya neb, melinya sembeja'anya neb dara, hyak delyamanggulunanya bar," hyok. 10:15 Bok ono' Petrus bek hnon saawoka lebok ara, "Imik Neyung adya or seleb perob nenemoknya nera, anja dara, malya' aboka wenyanggom," hyok. 10:16 Dara wera, unumok ara, li winilya bo aabookanya, onsok imik heikek jaboka bo welemok. 10:17 Petrus bedya nera damok ara hekasa ubla do senewoka, anam ganya seiniro balamok salek enyek, Kornelius bedya Petrus bek e yoululum aboka orugusuk nang era, Simon bedya e eiyiwoka pik sindamak sam ulumek. 10:18 Dara, on nang edya e nenyek an yoka' ulumek nim ek bii amekja, "Ugunja ek an nimi si Simon Petrus alamaknya benyek ugunub neika' malalum gom?" aboka heimek. 10:19 Petrus bera, alak dena' bo amoro domok anasa leboka, damok ara hekasa umla do senewoka anam seinilimok salek enyek, Imik Neyung Geisinya adya Petrus bek, "Petrus o, nimi winilya nang edya anak elenjak bar. 10:20 Wera anasa, wei berra aboka yinggilom. Nadya sikenek el bululum aboka orugeisin anasa, anda ganya ebgelyek, or neikik bululum," hyok. 10:21 Dara, Petrus bera sokok ak yingginiboka el yeilimek nang ek, "Hem yab o, ugunda na elenulumnya bera, nara alan. Dara, ugunda hek ak seiniyiwoka yeililum do?" hyok. 10:22 Dara, sikja Petrus bek lebekja, "Nunja neyung bera Imik Neyung ak lok ganya boboka ulumla dara, Yahudi nimi nidya' ara alak dubnya senewoka alak perob aboka lelemaknya. Geisa Imik Neyung lero enedya, anja lelelamnya nenyek keblul aboka, Simon Petrus anja ek youlul aboka youblom aboka orugomok," hyek. 10:23 Wera, Petrus bedya, "E nenyek an neika' mabnemab anasa, or ek wekel yoululum," hyok. Dara, maboka gwelegok dara, Petrus beb neika' lanawoka balamek dara, Yope heikek ab Imik Neyung mab anababya neika' bilimek. 10:24 Balamek ara pikik li hnonok maboka, Kaisarea heikek lanal bilimek. Dara, Kaisarea heik ara Kornelius bera alja ek mabo nimi yila' eb, alja hemyabo pe ganya olokdangoka ulumek nang eb, nadya ek yoululum aboka e bilisuk nang anyek, diri ulusika' ak Petrus benya aroba' ara byik. 10:25 Dara Petrus bera seleb Kornelius bedya ek wekel yabok enyek, Kornelius bedya pika diboka, Petrus bedya yan damak dunuwoka gimok. 10:26 Bok Petrus bedya Kornelius bek, "Nara nim ak anasa, nak gibnenenggom, seklom," aboka orugomok. 10:27 Wera Petrus bera Kornelius beb neika' yuba sabgiga ek sam wekel bilimok. Dara, anyagan ara nimi nauba orowek seleb mamagoka longomeka' ak eiyimok. 10:28 Dara, Petrus bedya Kornelius bedya ek longomek nim ek, "Yahudi nimi yoka' nim ara, Yahudi gom nim eb neika' hiboka una' ara mem aboka, Yahudi Imik Neyung yub adya momnya dona' pik hyak mem nong hyok ara, ugunda ella ululum. Bok nak dara, Imik Neyung adya nera mema' aboka, lek malya' sembeja'anya senenggom henyok. 10:29 Anasa wera, an adya nak anyagan yalom aboka orugonyum dara, nara anyagan yanggana' amba dara, yoknya senewanggumno. Anasa wera neyung o, hekasa nara anyagan yana' anyek ella donun aboka damok ara anasemba aboka ella donun bar," hyok. 10:30 Dara, Kornelius bedya lebok ara, "Li winilinya sum, nara henga dalelnenelamla wenyek weneba ubla sok salek, nara heng uboka Imik Neyung ak mololamsa. Dara wene sab-sab, nimi ben hnon, alja akleng era geisa nong ak ongomoknya benyek na dam gaboka sekok. 10:31 Dara, benedya nak lebnyok ara, wei Kornelius o, Imik Neyung adya anja molona' ara kebgelekanya, wera anja yok nang ak eleklelam ara perob senewoka beklenggel. 10:32 Anasa wera, nimi si Simon Petrus alamaknya benyek, Yope heikek ulumla anyek, e yalom aboka nimek orugeisilom. Alda senenggom mek gwan gek sam yok-yok goluna' akleng wililanya nimi si Simon bedya ek sam malamla. 10:33 Wenyaboka oruganyok anasa, wera neyung anak e yagenok aboka nim orugesisa. Wera anda ganya perobnya bek adya wera seleb nak yalam. Anasa wera, nunda nidya' anyagan nadya ek longomab ara Imik Neyung saramek uboka neyung Wenelesilnya adya nuk lebsilom aboka orugagelya' anyek, nuk lebsimen enyek kebnob aboka longomab," hyok. 10:34 Wera Petrus bedya leb einiwokja, "Nara wenyok Imik Neyung adya nimi nidya' mok soko nang era neik nang nenelesil ara wenyok ella dan. 10:35 Nimi ben hnon Imik Neyung ak lok uboka, alja unulamla nidya' ara perob ok unulanya bera, Imik Neyung ara bera mok enyeganyebnya aboka webna' loboka peroba' leboka doro dililamla," hyok. 10:36 "Hem yab o, Israeli nim ek Imik Neyung adya lesuk yub era ugunda seleb ella ululum. Ban lesuk yub era, Yesus Kristus adya ganya hekdangoka un yub ek lebsuk. Ban Yesus ara nimi nidya' siksamba Wenelesilnya ulusil. 10:37 Ugunda Yudea sokok sam yoka'-yoka' nidya' unulumok ara, ella ululum. Anam Galilea sokok ab ara einiwoka, Yohanes Pembaptis bedya meka dab einimok weka' moruwoka unulumoka' ak lebna. 10:38 Imik Neyung adya Nazaret mok ebnya Yesus ak sekiyiwoka alak Geisinya ab, migib ununa' ab, alak elegemok ara ugunda seleb ella ululum. Dara ono', onya Yesus bera Imik Neyung migib alak gologomoka' adya, alda yokok sam yokok sam perob ok unuro yabalamok. Dara, al neiknya bera nimi nidya' bisa' gologesin nang merellilisuk ara, ugunda seleb ella ululum," hyok. 10:39 "Dara, nun nang enyek, Yesus adya Yahudi nang mok ab, Yerusalem heikek ab ara, yoka'-yoka' nidya' unulumok anyek, men youboka okoka eiyimouba nang era nunda an. Dara, sikda alak galak glaboka omek bok, 10:40 winilinya sum maboka gwelegok dara, Imik Neyung adya embenga' suboka bukiyiwoka, nimek ek bo kemero amoro yibilisuk. 10:41 Ban unumok ara, salya' nimi gong ek amoro yibinggusuk bok, alda nuk Imik Neyung adya ban unuwan anyek lero yibinok senewoka weboka dosuk nim ek, nuk amasuk. Yesus ara seleb somokna' ak ab, Imik Neyung adya embenga' suboka bukiyimok dara, nublaboka neika' mek ab, gwaneng ab neika' juba nang ak amasuk. 10:42 Yesus anyek, Imik Neyung adya aldib nimi nidya' embenga' ulumak nim eb, seleb somogomek nim eb, yana lelesina' anya sekiyiwok aboka, nimi yok nim ek perob lero yanggan yuba lero yabalemnelum aboka nuk orugosuk. 10:43 Men ununumna' lelemek nang eneba alsamba yuba geklewoka lelemek. Dara, sik lelemek yub era, ban wenyaboka lelemek ara, nimi nidya' Yesus si ak dib senewanamak dara, Yesus migib adya sikja malya una' memelemnesil, hyek," hyok. 10:44 Dara wera, Petrus bera anam yuba wenyaro lelemok salek enyek, longowoka kelemek nang era sikda nidya' Imik Neyung Geisinya adya yingginiboka deknesuk. 10:45 Wera danyek, Yahudi nimi yoka' bok, Yesus ak dib senewoka domek nim, Petrus beblaboka neika' yeilimek nim era, Imik Neyung adya alja Geisinya ara Yahudi nimi gom bok sikenek anaba elegesuk adya sikda hyak ganya loka dasuk. 10:46 Kornelius bedya ek longomek nim era sikba elgom yuba saboka, Imik Neyung ak alja unulamla ara perob aboka giboka lelemek anyek kemek anasa, loka dasuk. Dara, Petrus bedya lemokja, 10:47 "Wera ugunda kendululum! Nuk men youma' Imik Neyung adya Geisinya domoba sok, sikbabya dobaka' kendululum. Anasa wera, sikenek meka dabnesibya dara, yok nim edya, mem loblulum heneseng de?" hyok. 10:48 Dara, Petrus bedya sikenek wenyaboka, Yesus Kristus si sibuka meka dabnesak aboka orugousuk. Ban seleb unubgogosik dara, meka dasik nim edya Petrus bek nublaboka anyagan li wen mabibyakanya binilam aboka molomek.
11:1 Yok-yok Yudea sokok sam ara Imik Neyung yuba lena' gak nang eb, yok Imik Neyung yuba domek sik kabo nim eb, wera Yahudi nimi gom bok nim enebabya, wera Imik Neyung yuba dib senewoka dolomak an yub kemek. 11:2 Wera yok sum enyek Petrus bera Yerusalem heikek byuk dara, Yahudi nang yoka' bok Imik Neyung yub ak dib senewoka domek nang edya, Petrus bek meknewolum aboka waboka wenelemek. 11:3 "Anda bola' garanggulumak nang edya ek sam biniboka, ono' sikineblaboka neika' deregoka ululum," aboka waboka lelemek. 11:4 Anasa wera, nenesa leboka, Petrus bedya nidya' unulumoka' ara neik digom yana lelewoka, men unumoknya nek ab ara moruwoka, Petrus bedya lebsuk ara, 11:5 "Nara Yope heikek sam henga uboka mololamsa enyek, onona' dib bo aawanyok ak eibsa. Dara al ono' ara akleng yuba dombadya gonggaragoka hnonok hiboka boksom akleng eneso ak, nara ulumsa ak sam imik ab ara doblinggemoka' ak eiyimsa. 11:6 Wera nadya akleng en lomok sam kemelamsa dara, yoka'-yoka' ebeklamla yana soruka yaka' hnon, beiyek sam salya' ululanya hnon, mon dib lele balamla hnon, bei wining hnon, maro balamek ak eiyimsa. 11:7 An yuba hnon kebsa dara, Wei, Petrus o, anda sekmenekanya wera hnon oboka del yabalom aboka orugonyok. 11:8 Bok nadya alak lebsenya nera, Wenelesilimnya o, orok e, nara malya dena' eb, mem amna dena' eb dara, hyak denggulunanya anasa, orok, amsa. 11:9 Bok on yub era saawoka imik heik ab ara, nak, Imik Neyung adya or perob nenelelanya nera mem anggom, anyok. 11:10 Dara, ban nera li winilya unuwoka saawoka bo aaboka ubnyok dara, on pik imik heikek sam joboka bo welewok," hyok. 11:11 "Bok ono' al wene sab-sab enyek, Kaisarea heikek ab nak el bululum aboka orugeisik nang era, winilya nang na mamsa ek seleb bilimek. 11:12 Dara ono', nak Imik Neyung Geisinya adya, ganya yok senenggom, or sikeneblaboka neika' binilum aboka orugonyok. Dara ban nimi hnabbadya nablaboka neika' Kaisarea heik seleb bilimoub dara, Kornelius bedya ek sam wekel bilimouba. 11:13 Wera danyek, Kornelius bedya alak Imik Neyung bedya lero be hnonja alja ek sam sekoka alak sam lemok yub era nak anaso unuwanyok aboka, nimi ben hnon si ara Simon Petrus benyek Yope heikek ulumla anyek, e yanok aboka nim orugeisilom aboka nak wenyaboka lebnyok aboka nuk nekesuk. 11:14 Petrus bedya alja ugunuk, Kornelius anab, anja mabo siliba' e gekman blebnesuk yuba ugunuk neknesil henyok, aboka nuk neksuk," hyok. 11:15 "Dara, nara anam yuba saboka leb einimsa dara, Imik Neyung adya Geisinya era, nuk men youma' Imik Neyung adya elegesuk sok, ono' sikenek yinggilisuk. 11:16 Wera danyek, Yesus adya nuk lesuk anyek seiniwasa, Yohanes Pembaptis bera mek dem adya meka dalasuk bok, ugunuk dara, eimik era Imik Neyung Geisinya adya mek diba' dabnesil, amoknya nek seiniwasa. 11:17 Anasa, nunja Wenelesilnya Yesus Kristus bek dib senemoub sum enyek, elegesuk elekna' neiknya nenyek, ono' sikenek hnon elegesuk dara, nara heka' huboka Imik Neyung ak eleksina' mem loblom henesinya de?" hyok. 11:18 Wera Yerusalem heikek ulumek Imik Neyung mab era ban yuba kemek dara, Petrus bek anda meknelelam aboka yuba lolowanggumek. Dara sikda Imik Neyung ak perob aboka giboka lelemekja, "Yahudi nimi yuba dona' orok nim eneba Imik Neyung adya sikja malya una' pik ab ganya dangawoka embenga' una' dib dobnok aboka li eleklesil anasa, perob," wenyaboka Imik Neyung bek giboka lelemek. 11:19 Wera Stefanus bera seleb obek dara, Imik Neyung yuba dolomek nang era, doboka olosik. Dara yok heik yok heik bok sen-senem abgokoka ulumek. Dara, bokdangoka hnonda Fenesia sam yeiri balamek dara, hnonda Siprus sam balamek, hnonda Antiokhia sam balamek. Dara, sikda Imik Neyung adya perob lero yanggan yub era Yahudi nang yoka' nong ok leb elekdo yabalamek. 11:20 Bok ono' sik yub dib senewoka domek nang hnon era, Siprus mok eb nang hnon, Kirene mok eb nang edya dara, Wenelesilnya Yesus adya perob lero yanggan yuba enyek boboka, Yahudi nang gom nang ek sam Antiokhia heikek biniboka lel eleklemek. 11:21 Wenelesilnya migib era, yuba lelemek nang gologoka ulusuk adya, wera sikja nimi yok nim ek yuba lelemek dara, nimi gong dib senewoka, sikja nonga ganya gekman Wenelesilnya bek sam elegemek. 11:22 Ban unulumoka' danara, Yerusalem heikek sam ulumek yuba dona' nim ek oboka lelel bilimok. Dara, sikja Barnabas bek Antiokhia heikek bilom aboka bokol yeilimek. 11:23 Wera, Barnabas bera seleb Antiokhia heikek yeiniboka, Imik Neyung adya nimi ganya lomok yoka'-yoka' nidya' pe arawoka unulumoka' eiyimok dara, alda hyak eiya damok. Dara, Barnabas bedya Antiokhia nim ek, ugunda hyak Wenelesilnya bek pe ganya dib ologoka kweboka ululum aboka wenewoka lesuk. 11:24 Ban Barnabas benera, alda Imik Neyung Geisinya adya dib sekoka, alda dib senena' ganya deknewoka uboka, hyak perobnya ulumok. Dara, nimi nauba alsamba leboka Wenelesilnya bek dib senelemek. 11:25 Ban nen seleb dara, Barnabas bera Saulus bek ebgiga Tarsus heikek bilimookanya, 11:26 seleb eibdangerek dara, ono' Antiokhia heikek bobdanga yeiniboka, anyagan yuba dona' nim eb neika' uboka, nimi nauba ak yuba leb elegoka, sikba yuba doboka ulumek salek era gibna' hnonok gobdo lemok. Dara, ban Antiokhia heikek ab men youbuka, Yesus yuba doro diriga ban nang ek Kristen nang aboka si sib einimek. 11:27 Dara ban salek enyek, ununumna' lelemek nang era, Yerusalem heikek ab ara Antiokhia heikek wenebadya nang yeilimek. 11:28 Dara, ban yeilimek nang era ben hnon alja si nera Agabus. Alda sekoka Imik Neyung Geisinya migib adya aralemok adya ununumna' yub anyek, orowek mok soko me nidya' senenggom gwaneng oka' enesa leboka, 11:29 nimi nidya' Yesus yuba doro diriga ban nang edya yuba saboka, numba bolomaba' sunuwoka, nunja hemyabo Yudea sokok ulumak Imik Neyung mab enesa, elek arawanamab aboka yuba samek. 11:30 Dara, seleb bolowoka mamagoka beibek dara, yuba dolomeka' dam nang ek bo binirum aboka, Barnabas beb Saulus bebdak orugosik.
12:1 Ban neik salek enyek, Herodes dubnya bera, Imik Neyung yuba dona' nim ek igin yaka' kweboka ob einisuk. 12:2 Dara al ono' Herodes bedya orugosuk adya Yohanes bedya alja weis Yakobus bera waren gabo adya omek. 12:3 Wera ban Herodes bedya unumok anyek, nimi nidya' ganya adya pelemla senemek eiyimok dara, ono' Yahudi nang edya welena' orok roti gwaneng den salek Herodes bedya Petrus bek salawoka, henga gereganelum aboka orugusuk. 12:4 Wera, Petrus bek seleb salawoka henga goumek dara, nimi henga goubuka uka gasa beillilisik ek sam doronggoka beiyimek. Dara, Petrus be henga geregoka beiyimek ak ara yin bon nang yakna' dombadya jam bokoka, ono' nimi nonga yin bon nang eneba dombadya nang pikik leboka welemek. Wera Yahudi nang edya welena' orok roti gwaneng den sum era seleb debgogowoka ubije enyek, Herodes bedya dara, Petrus bek nimi hnoum yana lelewanamna senemok. 12:5 Anasa wera, Petrus bera anam nimi henga gereksin ek sam or ulumok bok, Imik Neyung yuba dona' nim era sob-soba' Petrus bemba leboka, Imik Neyung ak heng uboka molol dibolloklomek. 12:6 Wera, Herodes bedya Petrus bek ampum nimi hnoum yana lelewanamna aboka mabok sum enyek, Petrus bera gasa henga penya adya goboka, yin bon nang penya ulurek gangganek okan beiyimek. Dara ono', henga gereksin ek pik sindamak ara ono' yin bona' nang nimi penya nang welerek. 12:7 Dara, al wene sab-sab enyek, Wenelesilnya bedya lero be hnon, nimi henga gouboka beillilisik ek sekok dara, alja dilina' edya henga gouboka beillilisik e yeboka lomok. Dara, lero enedya Petrus be mamoka' ak warawoka gaawoka bukiyimok. Dara, lero enedya Petrus bek, "Wei Petrus o, men berra aboka buklom," aboka orugumok. Wera wene salek enyek, gasa heng edya Petrus bek gouboka beiyimek ara albeyok alja sorukuk ab loboka mamagemok. 12:8 Wera ono' lero adya Petrus bek, "Anja akleng ongowoka, yan ongona' norobdangoka ublom," hyok. Dara unumok dara, ono' lero adya Petrus bek, "Anja wameldana' akleng goluwoka, nak dobdo yanenelem," hyok. 12:9 Dara wenyek, Petrus bera nimi gasa gouboka beilisin ek ab ara lero ablaboka neika' goberek. Bok Petrus bedya dara, nera aldib kaboka okoka ulunam senena' loboka alja dara, onona' dib ulunam do, senemok. 12:10 Wera Petrus beb lero ab dara, seleb pik yakna' mennya neb, penenya'anya neb dara piboka, ono' senenggom gasa pikik hyak sidya' nongnya nek lanal birik. Wera, pik serekna' nidya' ara albeyok bakoka mamagemok dara, sikda goboka pik nong pik bilireekanya, pik gwandanya ak bilirek dara, lero era Petrus bok albeyok anyagan loboka dengaro lobok. 12:11 Wera ban nidya' seleb unubgogobok danyek, Petrus bera ella dangoka lebokja, "Wera wenyek Wenelesilnya bedya alja lero bokol yeiniboka Herodes bedya soruk migib ak ab hnon, Yahudi nim edya nak yoka'-yoka' unuwanamab senelenyaka' anyek, blebnela' ak ara ella dan," hyok. 12:12 Petrus bedya wenyaboka seleb seiniwoka ganya diba' seleb yok dara, alda Yohanes bok yok si nera Markus alameknya bedya alja genong Maria gedya ek bilimok. Dara, al on ek ara nimi nauba longowoka Imik Neyung ak heng uboka mololemek. 12:13 Petrus bera biniboka, beiyik pik serekna' ak glorum-glorum amok dara, ek wa welemok gel alja si nera Rode gedya pika baknuna' aboka bilimok. 12:14 Dara, Petrus bedya beiyik ab uboka, pika baknelom al yabok enyek, al okoka kebok. Dara, Rode gera, eiya anasa, pika baknenggonggom nimi longowoka heng uboka lelemek nang ek, "Petrus bera ono' beiyik sam seleb yal," al bilimok. 12:15 Dara, longowoka heng uboka lelemek nang edya, Rode gek, "Anda serema salenggel gom?" aboka lemek. Bok Rode gedya, hyak duka' lolom-lolom aboka, "Nara Petrus bedya yuba okoka kemna," aboka lelemok. Dara ono' longomek nang edya, "Nera Petrus bedya alja ganya yama' ak lemla," alamek. 12:16 Dara ono' neik salek era, Petrus bera soba' pika glorum-glorum abdibigemok. Dara, sikda pika bakoka Petrus be yoka' nong ak okoka eiyimek dara, sikja ganya loka dasuk. 12:17 Wera, Petrus bedya ugunda yuba iriri ana' ara mem loblulum aboka soruka moub-moub aboka lesuk dara, ono' alja sikenek Wenelesilnya Imik Neyung bedya nimi henga gereksin ek ab heka' huboka henga loboka bo gobonel anyek, longomek nang ek nekesuk. Dara, Petrus bedya, "Ban nak unuwanel anasa, hemyab o, yok nang ek hnon, Yakobus bek hnon, wenyaboka neknelum," aboka lebsuk. Seleb wenyaboka lebgogobok dara, Petrus bera anyagan ara loboka yokok sam lo bilimok. 12:18 Ampum maboka gwelegok dara, yin bon nang era, doluwoka yuba gangawoka leldalamek. Dara, sikda Petrus bek unumok anyek, heka' humla do senewoka ganya erosuk. 12:19 Dara, Herodes bedya Petrus bek onsok eboka dobnelum aboka orugusuk dara, elemek nang era eiriwanggumek. Wera dara, Herodes bedya nimi henga gereksin ek sam welemek nang era sikenek pe wenggulumak badya aboka, nidya' heiboka ono' obnelum aboka orugusuk. Ban unubgogowok dara, Herodes bera Yudea sokok ab ara Kaisarea heikek biniboka liga wen malamok. 12:20 Tirus nim eb, Sidon nim eb, Herodes bera sikenek yu ganya bosuk anasa, sikda hiboka Herodes bek hogunga bo amal yeilimek. Men dara, Herodes be ulumok heik damnya Blastus bedya sikenek mala dobsulul aboka, alak yuba sal yeilimek. Dara, alda keboka mala dosuk dara, sikda dena unuruwa' ara, Herodes bedya mokeb ok ganya welemek anasa, sikda Herodes bek biniboka ganya neika' hekoka hibnob aboka molol yeilimek. 12:21 Dara, ono' yok sum orowek sumen unuwanamna aboka Herodes bedya gegemok sum enyek, Herodes bera sik senenggom dub nang akleng ongowoka, perob mek alakdoba' dub nang bun ekla buna' ak bukoka, nimi nidya' mamagiyiwoka, nara anyek unuwanamna aboka wenewoka lelemok. 12:22 Dara, nimi nidya' longol yeiniboka kelemek nim edya, Herodes bemba geklewoka lelemekja, "Anara nimi sirika' yub adya lenggulumla, alda nunja dib gibna'anya bedya lelemla," aboka lelemek. 12:23 Dara, wene salek enyek, Herodes bera Imik Neyung si ak imik nenewoka gibnenggulumokjok anasa leboka, Wenelesilnya bedya lero adya Herodes bek obok dara, Herodes bera besa adya delemeekanya somogok. 12:24 Dara, Imik Neyung yub ara, mok soko neika' ok oboka lelebgiga balamok. 12:25 Wera Barnabas beb, Saulus beb dara, Yerusalem heik seleb biniboka, sikja sikenek orugesik wa seleb webgogorek dara, Yerusalem heik ab ara, Yohanes yok si Markus be hnon eboka bobdeekanya, ono' Antiokhia heikek yeilimek.
13:1 Antiokhia heikek Imik Neyung yuba dona' nim ek ara, ununumna' lelemek nang eb, nimi yuba neklesik nang eb, nauba ulumek ara nang era, Barnabas ben hnon, boka' mirinya aboka geklewoka silimeknya Simeon ben hnon, Kirene mok ebnya Lukius ben hnon, Herodes beblaboka neik salek nereknya Menahem ben hnon, Saulus be hnon, ulumek. 13:2 Dara sikda gwanenga dena' loboka, Wenelesilnya bek giboka ulsinilimek sum enyek, Imik Neyung Geisinya adya sikenek, "Barnabas beb, Saulus beb, nadya sikja webnerak senemsa wa webduruk aboka, nasamba gaboka sekiyiwanalum," hyok. 13:3 Wera sikda gwanenga denggonggom heng uboka molowoka ubgogomeka' seleb dara, Barnabas beb, Saulus beb sikenek soruka salawoka heng uboka lebsika' seleb dara, sikenek Imik Neyung yuba lero yibiruruk aboka bokosik. 13:4 Barnabas Saulus ara Imik Neyung Geisinya adya, wera binirum aboka bokosuk anasa, sikda penya dara, Seleukia heikek golugereekanya, ono' anyaganyeb uboka dara, mek ekla buna' pik bukoka Siprus mek gwan dubuk sokok sam birik. 13:5 Dara, sikda Siprus moka birik dara, Salamis heikek biniboka, Yahudi nim edya yuba don ek wekoka, Imik Neyung yuba leb elekdo yabalarek. Yohanes Markus bera arawoka yabalemek. 13:6 Dara, sikda Siprus mek dubuk soko era, yuba lero yabalamek ara, gokgobok ono Pafos heikek lanal bilimek. Dara, heik enyegan yek dara, Yahudi nang yoka' ak alja si nera Baryesus alameknya, alja sonda anasa nara ununumna' leboka nimi hwesinya ulumna aldalamoknya beblaboka ehwibdangamek. 13:7 Siprus mok soko damnya bera alja si nera Sergius Paulus bera, ban nimi hwesina'anya beb neika' ganya olokdangoka ulurek. Ban Sergius Paulus bera hyak geremseng hwamnya bek ulumok. Wera alda Imik Neyung yuba kebnun senewoka, Barnabas Saulus ak yorurum aboka e bilisuk. 13:8 Nimi hwesinya bera Yunani yub adya dara, Elimas aboka silimeknya bedya, Barnabas, Saulus ak walawoka lelesuukanya, dubnya bera Yesus yub ak dib senewalyek aboka, ganya bob geregiyimok. 13:9 Bok Saulus bedya, alja yok si nera Paulus alameknya bera, Imik Neyung Geisinya adya dib sekoka migiba gologomoknya bedya, nimi hwesina'anya bek okoka eiyiwoka lebokja, 13:10 "Wei, anda hyak sonda' hwamnya ululam. Anda bisa' me uboka, nimi peroba' nenesina' amba isa' nang dangallisinanya ululam. Anda hekasa Imik Neyung adya jonga' meemoknya nek soba' soldol meneklelam do?" aboka lemok. 13:11 "Anasa wera kendelom. Wenelesilnya bedya anak henga geregagel. Anda li wen henga luma yanenggel dara, henga senedya dilina' ara meka' eibnenggunulam," hyok. Dara, al wene sab-sab enyek, Elimas bera alja heng ek sam lum uboka, guna' dookanya, alda salab hwiboka, nimek henga luma yanel anasa pika nekoka bo mengewanenulum aboka ero yabok. 13:12 Wera, Siprus mok soko damnya bera an unuwok anyek eiyiwoka, alda Wenelesilnya bedya yub ek loka daboka kelemok bok adya, Elimas bek unuwoka' eibuk dara, Yesus ak dib senewoka domok. 13:13 Paulus beb alja hemyab eb dara, Pafos heikek ab ara, mek ekla buna' ak bukoka balamek ara, Pamfilia sokok sam Perga heikek byik. Wera anyaganyeb danyek, Yohanes Markus bera sikenek sikbeyok loboka, alda on pik losaawoka Yerusalem heikek yok. 13:14 Wera sikda penya Perga heik ab ara, soko pik Pisidia moka Antiokhia heikek birik. Dara, Sabat mem sum era heik enyegan nim eblaboka Yahudi nim edya yuba don ek yuba longol bilimek. 13:15 Dara, Imik Neyung e nenyek an yuba dona' dub nang edya, Musa bedya unuwanalum an yub eb, ununumna' lelemek nang edya lemek yub eb, einimeka' seleb dara, anyagan Imik Neyung e dam nang edya Paulus bek alja hemyab eb dak, "Wera ugunda ganya gwelelek an yuba hnon ulumlya dara, or an longowak nang ek an wenewanasurum," aboka molomek. 13:16 Wera Paulus bera sekoka, soruka moub-moub aboka lebokja, "Wei, hemyab Israeli nang sokok nang eb, ono' hemyabo yok nanga hnon Imik Neyung ak lok ganya boboka ululum nang o, ugunda nak or kebnenulum. 13:17 Israeli nimi nunja Imik Neyung adya, nun jabo yabo youma' nang ek gaboka weboka dosuk. Dara, sikda Mesir sokok sam sekel yanggan nimi dangoka ulumek sum enyek, sikenek Imik Neyung adya senenggom sokok nang nenesuk. Dara ono', Imik Neyung adya alja senenggom migib edya sikenek Mesir sokok ab ara bleboka bo gobosuk. 13:18 Dara, Kanaan heikek binob aboka pikik sam anam balamek dara, hwalek sam ulumek salek era, gibna' denga hnonok uboka ebdobnya mekbadya dangamok. Nera sikja gasa ganya boboka, Imik Neyung ak yoka'-yoka' unulumek anaba or siklewoka bo balasuk. 13:19 Dara, Imik Neyung adya Israeli nim enyek Kanaan sokok ara Israeli nim ek bokoka, sikja yoka' dolul aboka, Imik Neyung adya nimi soko sekbadya heika doluwoka bokoka somok bok, doluwoka oboka, soko ara Israeli nim emba misa' yoka' elegesuk. 13:20 Dara, ban nidya' Imik Neyung adya Israeli nim emba leboka unulumok salek era gibna' denga sagodara' badya lemok," hyok. "Wera seleb Kanaan sokok ara, Israeli nang ek bokoka elegesuk dara, ono' Imik Neyung adya sikenek yana lelewoka yuba lesina' nang elekdo bilisuk. Dara, unubgiga balamok ara, ununumna' lelemoknya Samuel berem dakal bilimok. 13:21 Dara ono', Israeli nang edya Imik Neyung ak nunja dubnya ben hnon sekiyiweisilom aboka molomek. Wera danyek Imik Neyung adya Benyamin nang yila' ak ab, Kisi bedya me Saul bek elegosuukanya, Israeli nang sikja dubnya gibna' denga hnonok ebdobnya mekbadya ulumok. 13:22 Dara ono' eimik enyek, Imik Neyung adya Saul bera doro bobogoka, Daud bek Israeli nang dubnya lunuwoka sekiyimok. Dara benesa leboka, Imik Neyung adya lebok ara, "Isai bedya me Daud bedya, alda hyak nadya ganya pe angawoka hekellilinelnya eiyimna. Daud bedya eimik nadya unuwaso senelamna nidya' ara pe unuwananel. 13:23 Dara eimik era, Imik Neyung adya Israeli nang ak, Daud nang yila' pik uboka, nimi blebsina' dubnya alja orowek eleganesin amok sok, eimik sekiyiwoka bo yok. Dara, Yesus anyek nimi blebsina' dubnya bera alan," hyok. 13:24 "Wera Yesus ara anam alja wa web einiwanggumok salek era, Yohanes Pembaptis bedya Israeli nimi nidya' ak, ugunja malya una' ak loboka ganya dangawoka meka dana' doblulum aboka lelesuk. 13:25 Wera ono' Yohanes bera alja wa seleb sidya' webdaknemok sum era lebokja, Ugunja dara, nara heknya senelenulum do? Nara ugunja bera hek salek yanamla do senewoka diri ululumnya goma'. Ugunja diri ululumnya bera na seleb uro dakdowanya danyek alda yanamla. Dara, nara alja yan ongona' ara gwirin danaba, nara okna so danamso, wenyaboka lemok," hyok. 13:26 "Wei, hemyab o, Abraham nang yila' hnon, ono' yok nang bok Imik Neyung ak lok ganya boboka anyagan longolum nang nidya' ak lebsin, Ban Imik Neyung adya nim embenga' blebsin yub ara, nuk bokol yeilisuk. 13:27 Anasa, Yerusalem heik ulumek nim eb, sikja dub nang eb dara, Yesus ara nimi blebsina' dubnya senen ganya bobnenggumek. Sikda ununumna' lelemek nang edya Sabat mem sum sikenek einilisik yub era, wera Yesus ak henga geregoka obek dara, ban unulumeka' nong adya, wera anadya ununumna' lelemek nang edya lelemek yub era dib gigimok. 13:28 Dara, Yesus ara anyek okoka malya ubuk anasa, wanok soudya obnemab ara elgom bok, Pilatus bek Yesus ara malya ulumla anasa obnok aboka molomek dara, obek. 13:29 Wera sikda nidya' seleb Imik Neyung bukuk Yesus amba geklewoka momnya doboka ara unubgogomek dara, Yesus nong ara gal dubuk ab ara, be' dakoka boblinggek dara, al nong ara girik lomok sokok sam diyimek. 13:30 Bok, Imik Neyung adya Yesus ak somokna' lomok ab sam embenga' suboka bukiyimok. 13:31 Wera, Yesus ara embenga' suboka bukumok dara, alda ono' nara embenga' subna aboka, alablaboka Galilea sokok ab ara, Yerusalem heikek neika' yeiniboka ulumek nang ek, liga gong amaldal giriklemok. Dara, sik amasuk nang enyek, wera Israeli nang ek sam unuwoka yuba bekna' len nang ulumak," hyok. 13:32 "Anasa wera, nunda Imik Neyung adya nunja neyung yab youma' nang ek eleganesin amok yub enyek, wera ugunuk an ban perob yuba lero yabalasab. 13:33 Dara, Imik Neyung adya unuwanasin amoka' ara, nera seleb Yesus somogoka embenga' suboka bukiyimok adya, nera an seleb unubok an. Nen unuwanamoknya nenesa leboka, Mazmur yub ek penenya nek momnya doboka ara, Anda nadya me yoka' ululam. Sumen nong ak, nara anja neyung be yoka' nonga dagen, aboka lebok. 13:34 Imik Neyung adya Yesus ak embenga' bukiyimookanya, ono' saawoka somoganggunumla ak orowek lebok ara an: Nara eimik anak hyak salya' so gom una' ek, anak gigiwoka sunuwoka unuwanenggel anyek eleganenggen. Men youma' Daud bek lemsa anyek anak eleganenggen, hyok. 13:35 Anasonya neiknya nenyek yok sam leboknya nera, Anja wa pe welelanya bera or bloblul aboka soko lokna' lomok sam gobdo eib lobnenggunulam, wenyaboka lemok," hyok. 13:36 "Dara, Daud bera Imik Neyung adya anyek senenanya loboka weblul senemok anyek, seleb senenya loboka webgogobok sum era, alda seleb somogok dara, alja neyung yab youma' nanga sik diyisik ak sam neika' ak dibik. Dara, Daud be nong diyimek ara, seleb nidya' bloboka yaabok bok, 13:37 Imik Neyung adya alja somokna' damok ab sam embenga' bukiyimok Yesus ak dara, nonga bloboka yaawanggumok. 13:38-39 Hem yab o, anasa wera Yesus pik uboka, nim adya malya una' memelesil yub era, ugunuk lero yabalasak. Nimi nidya' hnonok-hnonok nang ara, Yesus ak dib senelemak nang era, Imik Neyung adya bok, Musa bedya unuwanalum an yub edya dara, sikja malya una' doboka boboganggunususo bok, al Yesus pik uboka memelesil," hyok. 13:40 "Dara, ununumna' lelemek nang edya lebek yub anyek, ugunuk gigiweisilyek aboka, mem nong anasa, ugunda hyak pe keebdangoka ulumnalum. 13:41 Ben hnon lemoka' ara, Ugunda malya uboka geklewoka wasina' nang o, ugunda pe keblulum e. Nara ugunja eimik nimi yok nang adya neklesilya bok dib senewanggunulumnya nek, nenyek nara unuwanesin anasa, ugunda gobdo ngolugomunjok somoganalum, wenyaboka lemok," hyok. 13:42 Dara, Paulus bedya ban nidya' wenyabgogomok dara, wera Barnabas beb, Paulus beb dara, Imik Neyung ek ab ara, gobuka barek salek enyek, Imik Neyung ek an longomek nim edya, nenyek Sabat mem sum hnon neknesurum anasa, onsok yanarum aboka molomek. 13:43 Wera nimi nidya' Yahudi nim edya yuba don ek longomek nang era gobek dara, Barnabas beb, Paulus beb barek pik, Yahudi nang eb, Yahudi nanga yoka' gom bok Yahudi Imik Neyung yuba dolomek nang eb dara, sikenek dobgiga bilisik. Dara, Barnabas Paulus adya ugunda hyak Imik Neyung adya wana' uboka eleksina' lomok sam pe ulmorulumnalum aboka, wenyaboka wenewoka lesirik. 13:44 Dara ono' nenyek Sabat mem sum lebok dara, wera Antiokhia heik mok nim era, hyak nauba Imik Neyung Wenelesilnya bedya yuba dol yeilimek. 13:45 Dara, Yahudi nang yoka' nong adya kemelemek enyek, nimi nauba Barnabas beb, Paulus beb dadya, lelemek yub ek dolomeka' eiyimek dara, sikda hman ganya boboka ulumek. Dara, sikda Paulus bek anda malya nong aboka, alja lelemok yub ek sonda' anasa lelemla aboka blekoka derewoka lelemek. 13:46 Bok Barnabas beb, Paulus beb dara, danyek nauba so asa' ganya boboka yeiriwoka lelerek. Dara sikja lelerek ara, "Imik Neyung adya yub enera ugunuk men seleb leb eleganesiseng senelelabok, ugunda lek senewoka wekdo doroklolumukanya ugumba yok nunda dib embenga' ulmoubna' era dobnenggunusibya senen ululum anasa, wera nunda ugun Yahudi nim ek loboka, yok sokok nim ek Imik Neyung yuba lebnom aboka balanam. 13:47 Anasa wera, Imik Neyung yub adya nuk orugosuk ara ban: Nadya ugunuk Yahudi gom nim emba dilina' dolulum aboka orowek gaboka dosisa. Wera anadya ugunja nidya' mok soko me nidya' blebsina' damok elekdo yibilulum aboka usisa, wenyaboka lesuk," arek. 13:48 Yahudi gom nim era, Paulus bedya ban wenyaboka lelemok anyek kemek dara, eiya uboka, Imik Neyung yub ak gigiwoka eiya hlalamek. Wera ono', Imik Neyung adya embenga' una' dobnemak senewoka orowek seiniwoka gegemok nimi nidya' era, Imik Neyung yub ak dib senewoka domek. 13:49 Wera Imik Neyung yub ara, Antiokhia mok soko me nidya' neika' ok oboka lelemok. 13:50 Bok, anyagan heik yoka' senenggom dub nang eb, Imik Neyung ak lok ganya boboka ulumek dub gelewa eb dara, sikenek Yahudi nang edya wenyaro doblesik. Wera danyek, sikda Barnabas Paulus ak isa' nang geboka oboka, ugun penya dara, nunja ak sam ab lo binirum aboka waboka yakasik. 13:51 Bok Barnabas Paulus adya dara, yan sang sembeja' heik enyegan bekna' diba' bolom-bolom arek seleb dara, sikda Ikonium heikek birik. 13:52 Wera Antiokhia heikek ulumek yuba doro diriga ban nang era, hyak ei-ei ganya boboka, Imik Neyung Geisinya adya deknewoka ulumek.
14:1 Wera Paulus beb, Barnabas beb, Ikonium heikek anaba Antiokhia heikek ulumok sok neik diliga' domok. Paulus beb, Barnabas beb dara, Yahudi nim edya yuba don ek biniboka, hyak pe sunuwoka Imik Neyung yuba lerek adya, Yahudi nimi yoka' ab, Yahudi gom nim eb, Yesus ak dib senewoka doromek. 14:2 Bok ono' Yahudi nimi darasam hnon nim era bokoka, Yesus yuba dona' lek senewoka ulumek nim era, Yahudi gom nim ek wenewoka sonda' anasa lelerak aboka wenewoka lelesik adya, wera sikbabya Yesus ak dib senewoka dolomek nim ek malya senelemek. 14:3 Dara, Paulus beb, Barnabas beb dara, Ikonium heikek ara liga nauba so mandewoka ubdarek. Wera ulurek ab dara, hyak asa' ganya boboka, Wenelesilnya bedya yuba nauba lelerek. Wera Wenelesilnya bedya anaba, nadya wana' uboka eleksina' yub ara, dib ulumla ella danoka' aboka, lok so bekna' ab, senenggom lok so ununa' ab, elegesuk. 14:4 Bok, heik enyegan nimi sik moumen duka' lolowoka bokdangoka, hnonda Yahudi nang ek sam bokoka makal balamek dara, hnonda Imik Neyung yuba lena' gak nang ek sam mamagel bilimek. 14:5 Wera danyek, Yahudi gom nim eb, Yahudi nimi yoka' nim eb, sikja dub nang eb, Paulus beb, Barnabas beb danyek, girik adya gweboka saboka obnemab aboka yuba sal gegelemek. 14:6 Wera sik penya ban unuwoka ngorokna' delemeka' anyek eiyirek dara, Likaonia moka Listra heik sam hnon, Derbe heik sam hnon, doknol bilirek. 14:7 Dara mok heik enyegan biniboka, Imik Neyung perob lero yanggan yuba lero yabalerek. 14:8 Wera Listra heikek ara, nimi ben hnon anam beiyimeka' wek ara moruwoka, li hnonok sirik anaba yabanggulumoknya yana heimoknya hnon ulumok. 14:9 Dara alda bera, Paulus bedya Imik Neyung yuba lelemok dara, pe kero bulumok. Wera danyek, Paulus bedya alak ngekluboka, bera dib senemoka' eibookanya, Imik Neyung adya hwebnamso senemok dara, 14:10 yuba nauba yalawoka lemokja, "Anda jong nonga seklom," hyok. Dara, bera berra sekoka, sakdo dorogoka bini yeini ul yabok. 14:11 Wera nimi nauba Paulus bedya unulumok anyek eibek dara, Likaonia yub adya lelemekja, "Nunja giblemab im nang ara, nimi boka' nenebdangoka nun gangganek sokok sam seleb yarak," aboka lelemek. 14:12 Anasa wera, Paulus yuba salamok anasa, Hermes aboka si simek. Alda Barnabas bek dara, Zeus aboka si simek. 14:13 Wera Zeus bek giblemek gaknya bera, gibna' e nera heik berem weilik ubookanya, al ab, nimi nauba yeilimek nim eb, neika' Paulus Barnabas ak sikja dara, im nang anya' aboka pama oboka gibnoba' aboka ulumek anasa, yem pam eb, ngangak gwaragiyimek esa' eb, senenggom pik serekna' ak sam bo yeilimok. 14:14 Wera yuba lena' gak nang Barnabas beb, Paulus beb dara, nim adya sikenek im nang nenewoka pama oboka gibsinoba unulumek anyek kerek dara, sikja ongorek aklenga gweldekoka beiyiwoka gibsinoba ulumek nimi hnoum berra biniboka lerekja, 14:15 "Wei, ugunda hekasa ban nenera unulum do? Nunda im nang goma'. Ugumba ululum sok, nunda' nim anya'. Nunda anyagan younum ara, ban unuwoka yoka'-yoka' gibleluma' anyek loboka, Imik Neyung bek, im ab, soko ab, senenggom mek gwan eb, lomok sam ulumla nidya' ab, uyisuknya bek sam ganya angawoka yoululum aboka, perob lero yanggan yuba bo yeiniboka lel yosunum. 14:16 Youma' dara, Imik Neyung adya mok soko nim era ganya doboka sikja unuwanob senelemeijinya nek unulunok aboka soruka lobol lolosuk. 14:17 Bok anababya, alda sikenek ara na ulumna aboka bekna' soba' neklesuk. Alda mok li imik ab ara eleklesuukanya, ono' ugunuk gwanenga wa weboka nonga yongon salek eleklesuk adya, pe unulusuk. Alda ugunuk dena' elegoka, ugunja ganya sangellilisil," arek. 14:18 Barnabas beb, Paulus beb, ban wenyaboka loblulum aboka yuba sekoka lelerek anababya, blekdeboka pam oboka sikenek duka' lolowoka gibsinoba' senemek ara berra lobnenggumek. 14:19 Dara ono' danyek, Yahudi nang edya wene nang Pisidia moka Antiokhia heikek ab hnon, Ikonium heik ab hnon ara, Listra heik yeilimeekanya, wenewoka lelesik adya, nimi nauba ganya dangawoka Yahudi nang ek sam makal bilimek. Wera sikda heik enyegan nang era, Yahudi nang eblaboka neika' hiboka, Paulus bek girik adya saboka oboka, eremek weilik sam bologol bilimek. Sikja dara, Paulus bera seleb somogamla senemek. 14:20 Bok, yuba doro diriga ban nang era, Paulus omek ak akneb ganagoka diri seklemek dara, Paulus bera bukoka, on heikek sam wekel yeilimok. Wera ampum maboka gwelegok dara, heik era loboka, Barnabas beblaboka neika' Derbe heikek birik. 14:21 Derbe heik ara, Paulus beb, Barnabas beb dara, Imik Neyung adya perob lero yanggan yuba lelerek dara, nimi nauba Yesus ak dib senewoka domek. Ban nen seleb dara, sikda on pik Listra heikek yarek dara, ono' anyaganyeb uboka dara Ikonium heikek yarek, wera anyaganyeb dara, ono' Pisidia moka Antiokhia heikek birik. 14:22 Wera men balarek sum enyek, Imik Neyung yuba leb elekgiga bilirek heik dara, yanggan sam era on pik yanggarek dara, Imik Neyung yuba doro diriga ban nim ek, dib senena' ak mel-mela salabmoboka ulunoka' aboka wenebgiga yalarek. "Nim Imik Neyung bedya wenesin heikek weknemak ara, sokok an igin yaka' hnon sum kwellilimnesil bok," aboka wenebgiga sik yalarek heik pik era yeilirek. 14:23 Wera nim Imik Neyung yuba dib doboka, yuba sikba yok lebdangoka longolamna heik era, Imik Neyung yuba dam nanga doboka sekiyiwoka ubgiga yalarek. Dara, sikda gwanenga dena' loboka heng uboka, sekiyisirek nang ara sikja dib senemek Imik Neyung bek elegoka, ban nang enera anja wa welemnemak anasa, wenyaboka molowoka Imik Neyung yuba e dam nang sekillilisirek. 14:24 Dara, Paulus beb, Barnabas beb dara, Pisidia mok eb ara, uboka Pamfilia moka lanal birik. 14:25 Anyagan ara, Perga heikek Imik Neyung yuba seleb leb elekgogowarek dara, senenggom mek gwan berem Atalia heikek birik. 14:26 Anyaganyeb dara, mek ekla buna' ak bukoka, sikja Antiokhia heikek yarek. Antiokhia heikek ara, sikja wen webdakarek wa webduruk aboka Imik Neyung adya wana' uboka eleksina' lomok elegemek heikek an yeilirek. 14:27 Wera Paulus beb, Barnabas beb dara, seleb Antiokhia heikek yarek dara, anyagan Imik Neyung yuba dona' nim eb neika' ak mamagiyiwoka, Imik Neyung adya arawoka, sik pik uboka yok-yok heikek nidya' peroba' unulumok anyek nekesirik. Dara ono', Imik Neyung adya Yahudi gom nim eneba Imik Neyung ak dib senewoka dolomaka' ak heka' huboka pika bakamoka' anyek nekesirik. 14:28 Wera Barnabas Paulus ara, anyagan Imik Neyung yuba doro diriga ban nang eblaboka neika' nauba ulwenelemek.
15:1 Wera nimi wene nang Yudea sokok sam ab ara, Antiokhia heikek yeilimeekanya, Imik Neyung yuba domek nang ek wenewoka, "Ugunda Musa bedya momnya dobok yuba sunuwoka bola' garana' orok dara, dib embenga' blebnenggunusil," aboka lel eleklesik. 15:2 Bok Paulus beb, Barnabas beb dadya dara, nera sonda' lelelum aboka dogom aboka duka' lolom-lolom aboka lelemek. Wenyabdanggiga balameekanya, wera Paulus beb, Barnabas beb, Antiokhia heikek Imik Neyung yuba dib domek nang eb, Yerusalem heikek bindiwoka Imik Neyung yuba lena' gak nang eb, yuba dam nang eb, ban yub enyek sal binimab aboka, lebdangamek. 15:3 Wera dara, Antiokhia heikek Imik Neyung yuba dona' nim edya, sikenek bo heik gokgobok sam bo bisik dara, sikda Fenesia pik uboka, Samaria heik ab ara unuwoka byik. Dara, pikik balamek ab ara, Yahudi gom nim eneba, Imik Neyung ak ganya dangawoka yuba dolomak aboka wenyaboka nekgiga balamek. Dara, anyagan Imik Neyung yuba doboka ulumek nim era, ban yuba kemek dara, sikda hyak ganya eiya dasuk. 15:4 Wera sikda Yerusalem heik nong ok lanal byik dara, anyagan Imik Neyung yuba lena' gak nang eb, yuba dam nang eb, Imik Neyung yuba dona' nim eb dadya, pe leboka doro diyisik. Dara wera, Paulus Barnabas arob nang edya sikenek pik uboka, nimi Yahudi gom nang ek Imik Neyung adya yoka'-yoka' nidya' unulumok anyek nekesik. 15:5 Bok, Parisi nang ulumek nang bok, Imik Neyung yuba dib senemek nang hnon nang adya sekoka, "Yahudi yoka' gom nang bok Imik Neyung yuba dib senelemak nang era, Musa bedya bola' garaldalalulum unuwanalum an hyoka' sunuwoka unulumnamak," aboka lemek. 15:6 Dara, yuba lena' gak nang eb, yuba dam nang eb, ban yub enesa longowoka sabnob aboka longomek. 15:7 Wera sikda nauba seiniyimeekanya, yuba saldibilloklomek danyek, Petrus bedya sekoka lemokja, "Hem yab o, Imik Neyung adya men salek enyek, ugun gangganek ab nak gaboka doboka, perob lero yanggan yuba Yahudi gom nim ek lero balamlya adya sikda Imik Neyung ak dib senewanoka' aboka nak sekiyinyok ara, ella ululum. 15:8 Dara, Imik Neyung adya nimi nidya' ganya ella ulusilnya bedya, alja Yahudi gom nang ek doro dibnesuk amba dara, seleb laga amasuk. Unuwoka amalasuknya nera, Imik Neyung adya alja Geisinya benyek, nuk men youma' seleb elegesuk sok anyek, ono' sikenek hnon seleb elegesuk adya, amasuk. 15:9 Imik Neyung ara nub sikeneb weboka boknenggusuk. Alda Imik Neyung ak dib senemeka' adya sikja ganya mek elegeiyisuk. 15:10 Nun nong ab, nunja neyung yab eb dara, Imik Neyung adya eleklesuknya nenyek unuwamenggom ara, pe ununa' orok ulumouba bok anasa, ugunda hekasa ban Yesus yuba doro diriga ban nang ek, an hyak senenggoma' kweillililum do? 15:11 Nera hyak mem nong! Wera Wenelesilnya Yesus alja wana' uboka eleksina' pik uboka, numba hnon, sikda hnon, neik so bleblesil senelemab," hyok. 15:12 Wera danyek, anyagan longomek nimi nidya' yuba sana' loboka gelegemek. Anya yuba gelegoka, Paulus beb, Barnabas beb dadya, Imik Neyung ara sik pik uboka nimi yok soko nim Yahudi gom nim ek yoka'-yoka' lok so bekna' ab senenggoma' lok so' anyek sik gangganek unulumok anyek neklesirik dara, sikenek kero bulumek. 15:13 Wera Paulus beb, Barnabas beb, seleb lebgogorek dara, Yakobus bedya, "Wera hemyab o, nak kebnululum. 15:14 Simon bedya wen nuk lesila' ara, Imik Neyung adya men youboka Yahudi gom nim eneba nadya mabo siliba' danok aboka sik gangganek ab hnon seleb domok adya, sikenek diri ulusuk anyek laga amasuknya nenesa lesil. 15:15 Dara nera, hyak youma' ununumna' lelemek nang edya men orowek lemeknya nek gigiwal. 15:16 Dara momnya doboka ara, Wenelesilnya bedya ban nen unubgogowanya seleb dara, ono' nara saawoka yanamna. Daud bedya somok e bloboka lukok ara eimik sounuwoka sobnamna. Nara alja sorrom aboka blobok anyek lunuwoka onsok sobnamna. 15:17 Wera anadya bokoka mek ublanya nera, yok sokok nimi nidya' ara, nadya mab aboka si silimak Yahudi gom nimi nidya' anyek, Wenelesilnya bek eboka dobnok aboka unuwanamna. 15:18 Imik Neyung adya, men youma' enyek, ban orowek lemoknya bedya ban wenyalamla," hyok. 15:19 Ono' Yakobus bedya dara, "Nadya senelamna dara, nunja dara, Yahudi gom nim Imik Neyung ak sam seleb ganya dangal balamak nim ek nunja adya okna nenewoka ganya wili-wala ab menegeibyek senelamna. 15:20 Bok nunda wen sikenek, sikja nim uguma' ak sam hweboka beil balamak dena' dijik aboka hnon, gel salaldana' anyek lobongganok aboka hnon, enenga heiboka somogalya wininga mana' ak dijik aboka hnon, enenga dijek aboka hnon, momnya dona' pik, nera loblulum aboka beibnemab. 15:21 Hyak youma' enyek moruwoka, Musa bedya Imik Neyung yuba momnya domok anyek, heika nidya' sam nauba einiwoka lelemeekanya, ono' wenababya Sabat mem sum nidya' ara Yahudi nim edya yuba don ek sam einilimak anasa," hyok. 15:22 Dara, Imik Neyung yuba lena' gak nang eb, yuba dam nang eb, nidya' Imik Neyung yuba dona' nim eb, mamagoka yuba saboka nimi wenen nang Barnabas Paulus ab neika' Antiokhia heikek binok aboka bokol binimab aboka lemek. Dara, sikda yuba saboka, Silas beb, Yudas bok yok si nera Barsabas alameknya beblaboka, neika' bokol bilisik. Dara ban penya nang dara, Imik Neyung mab adya sikenek hyak perob senesik nang ek sekiyisik. 15:23 Dara, Antiokhia heikek sam bokol bilimek nang eb neika' momnya dona' hnon weboka beiyimeka' ara yub era ban: "Yuba lena' gak nang eb, yuba dona' nim bo un nang eb, ugunja' hemyabo nim edya, hemyabo nim ugun Antiokhia sam Siria sam Kilikia sam ululum nim ek perob aboka gibisab. 15:24 Nunja anyaganyeb kemab dara, anyagan nun gangganek ab ugunuk an yeiniboka, sikja lemek adya ugunuk sam malya nenewoka hnon ugunuk ganya soro-wara eiyiwoka, ugunuk unulusak ana' ara kemab. Nunja dara, sikenek unulululum aboka oruksina' ara orok bok, unulusak. 15:25 Anasa wera nenesa leboka, nunda anyagan ara yuba longowoka nauba saboka, wera perob or unuwanamab amabakanya, ugunuk sam nimi wenen nang bokol binimab aboka umab. Dara, ugunuk binilum hibya nang era, nunja wana' ulusab nang Paulus beb, Barnabas beb yanggeirija dara, neika' binok senewoka unumab. 15:26 Ban penya nang enyek dara, sikda nunja Wenelesilnya bedya si Yesus Kristus amba leboka, sikja nong ara senenya loboka ngalenga' goluwoka ulurek nang ek bokol yeilisab. 15:27 Anasa wera, nunda Silas beb Yudas beb, ugunuk bokol yasab. Dara ono', sik penya nang enedya anyagan momnya domab yub era, yuba sibama' adya ok ab pe lebnesirik. 15:28 Ugunuk sam nauba senenggom igin yaka' enyek kweiyiwoka ubsilyek aboka, Imik Neyung adya Geisinya beneba hnon, ono' nunja' anaba, nera ugunuk ubsilyek aboka, alda ban nenyek unuwanasengnya nera ban ulumla an: 15:29 Ugunda bisa' ak geklewoka hweboka beibija dena' masa era doboka denggom mem. Dara ono', yoka' eneng ara salya' denggom mem, nonga heiboka somogalya wininga mana' salya' denggom, mem. Dara ono', hnon gela salaldana' ak, ugunda mok sam geboka ulululum. Ugunda ban nidya' lebabnya danyek nidya' mok sam geboka ulumun dara, wera hyak pelemuna' ara an. Seleb lebab, perob e," wenyaboka momnya doboka beibek. 15:30 Wera seleb salawoka gibdanggogomek dara, sik bokosik nang era Antiokhia sam lanawoka balamek. Wera sikda Antiokhia heikek sam seleb byik dara, nim Imik Neyung yuba domek nimi neika' mamagoka Yerusalem heik ab beiyimek momnya domek surat era sik gangganek sam elegemek. 15:31 Dara wera, Antiokhia heikek Imik Neyung yuba doboka ulumek nim era momnya dona' beiyimek damok anyek einimek dara, sikja ganya angawoka hekoka perob senemek. 15:32 Wera Yudas beb Silas beb dara, Antiokhia heik ubdaboka, al sik nong ara ununumna' len nang ulurek adya wera, Antiokhia heik sikja hemyab ek ganya migib geboka, ono' pe wenewoka pe ululum aboka ganya kayiwoka lelesirik. 15:33 Wera ono' Silas beb, Yudas beb dara, Antiokhia heikek sam nauba ub wenerek anasa, on pik bokol yeilisik nang ek binirum aboka ganya hekoka lemek dara, nunja perob aboka ugun bokol yeilisik nang ek gibsab anyek nekdo binirum aboka saawoka bokol bilisik. 15:34 (Bok Silas bera, nara anyagan ulumnamna aboka, Antiokhiaheikek diba' lomok.) 15:35 Dara ono' Paulus beb, Barnabas beb danaba, Antiokhia heikek sam uldablerek. Dara, sikda Antiokhia heikek sam ulumek Imik Neyung mabo nauba ab, hiboka Wenelesilnya bedya yuba nauba wenewoka lel eleklemek. 15:36 Dara ono' yok sum enyek, Paulus bedya Barnabas bek, "Nunja men Yesus yuba lero yibilinum enyek, Yesus ak dib senewoka dorob nang ek, sik heka' anaso ulumak anyek, lenum heik nidya' kemero yibinanam anasa, wen bininam," aboka lemok. 15:37 Wera danyek Barnabas bedya Yohanes Markus neika' bobnanam senemok. 15:38 Bok Paulus bedya, sikeneblaboka neika' pe uboka wa wena' orok uboka, ono' men yuba lero yabalamek sum enyek, anam pikik balamekjok, Pamfilia heikek ab ara losaawoka Yerusalem heik yeilimoknya bek, Paulus bedya dara, bera neika' yabana' ara perob senewanggumok. 15:39 Dara danyek, Paulus beb Barnabas beb nauba lolowoka wabdangoka lelereekanya, wera doluwoka bokdangoka, Barnabas bera Markus beblaboka neika' Siprus moka' mek ekla buna' adya bukoka birik. 15:40 Bok, Paulus bera alda Silas bek doboka boboka dara, Antiokhia heik Imik Neyung mab adya Wenelesilnya bedya wana' uboka eleksina' ak sam lobonggesik dara, Imik Neyung yuba lebgiga birik. 15:41 Wera Paulus beb, Silas beb dara, Kilikia moka hnon, Siria moka hnon, Imik Neyung yuba aknewoka lel ganaklerek. Dara, sikja Imik Neyung yuba dona' nimi ganya kayiwoka ulurek.
16:1 Wera Paulus bera balamok ara Derbe heikek ab uboka dara, ono' Listra heikek byuk. Dara, anyagan ara Yesus ak yuba doro diriga balamoknya si Timotius ben hnon ulumok. Alja genong gera Yahudi nimi yoka' bok, Yesus ak dib senewoka domok gel. Bok alja neyung bek dara, Yunani nang ulumok. 16:2 Imik Neyung ak dib senewoka domek nang Listra heikek hnon, Ikonium heikek hnon, ulumek nang edya dara, Timotius bera alda hyak perobnya senewoka dib senelemek. 16:3 Wera anyek eiyiwoka, Paulus bedya dara, nab neikik bininam aboka, Timotius bedya bola' garamok. Ban unumoknya nera damok ara, anyagan Yahudi nang ulumeekanya, nidya' ara Timotius alja neyung bera Yunani nang ulumla senelemek anasa umok. 16:4 Paulus beb yok nim eb, sikda yok heik yok heik yabalameekanya, yuba lena' gak nang eb, yuba dam nang eb dadya, Yerusalem heikek ab lemeka' anyek, dib senewoka unuwanok aboka elekdo yabalamek. 16:5 Ban unulumek adya Imik Neyung yuba dona' nimi nidya' sikja Imik Neyung ak dib senena' ganya nauba danggiga balamookanya, nimi nong anaba li soba' nauba danggiga balamok. 16:6 Imik Neyung Geisinya adya Paulus beb, Silas beb dak, Asia mok era Imik Neyung yuba lel birijek aboka mem hyok dara, loboka sikda Frigia sam hnon, Galatia sam yuba lebgiga birik. 16:7 Dara Paulus Silas ara, Misia soko berem birik dara, wera ono' Bitinia moka bininam senen ubdek bok, Yesus ab Geisinya adya, "Mok enyegara bana' lobdurum mem," asuk. 16:8 Anasa Misia mok eb ara loboka, Troas moka lanal birik. 16:9 Troas heikek sam inimnek mabekek ab danyek, Paulus bedya lendara mabok enyek, nimi Makedonia nanga ben hnon sekoka Paulus bek sam lelemokja, "Anda anasam garal yamenekanya, nuk aral yeisilom," aboka molowoka bii alamok. 16:10 Wera Paulus bedya lendara wenyaboka maboka bukoka dara, nunja dara, anara Imik Neyung adya mok enyegan nang ek sam Imik Neyung yuba leb eleganok aboka lebla senewoka, men li pe mab lobla wenyek Makedonia sam binob aboka meebdangamoub. 16:11 Wera nunda Troas heikek ara loboka, mek ekla buna' adya Samotrake heikek almanagoka byuba. Dara anyaganyeb ara, ampum ara Neapolis moka byuba. 16:12 Neapolis heikek ab uboka dara, Makedonia mok bokoka hnonok ak sam heikek si ara Pilipi heikek lanal byuba. Dara, Pilipi heik ara Roma nang nadya aboka alawoka domok heik ulumok. Dara, nunda anyagan biniboka liga wen ulumouba. 16:13 Pilipi ulumoub salek Sabat mem sum dok dara, Yahudi nang edya anyagan Imik Neyung ak mololomak ak senemoub ak mek gwana longomoka' ak heik gokgobok sam bilimouba. Dara, nunda anyagan ulumek gelewa gong danyeb neika' yuba saro bulumouba. 16:14 Dara, sik hnoum an bulumok gel gera alja si nera Lidia, alda Tiatira mok eb gel gek ulumok. Alda mouk dok akleng ek dekna' dekoka dolomok gel ulumok. Dara, alda Imik Neyung ak giblemok gel ulumok. Dara ban sum enyek, Paulus bedya neklesuka' ak pe keboka doblula' aboka Wenelesilnya bedya alja ganya bakamok. 16:15 Wera dara, Lidia geb alja ek nimi nidya' meka dasik. Seleb Lidia gera meka dabgogomek dara, alda nuk nadya ek sam yanalum aboka e bilisuk. "Hem yab o, ugunja nak alda Imik Neyung pik uboka Yesus ak dib domla senemun dara, wera ugunda nadya ek sam mabnelum," aboka e bilisuk. Dara, alja nadya pe keboka unuwanok, lobijek senewoka duka' lolom-lolom asuka' adya, yo amouba. 16:16 Dara ono' yok sum enyek, nunda heng uboka mololomoub ak sam balamouba enyek, nunda arasina' gel gek hnon eiyimouba. Gel genera bisa' adya gologomookanya, alda yoka'-yoka' eimik unuwanananya nek men orowek unuwanamla aboka lero yabalamok gel hnon ulumok. Alda nimi yok nang ek sam, eimik era anda anyek dib unuwanenggel hen dara, rupiah eleklemek adya, alja ek wa weboka ulumok ek nim ek ara nauba duba dangamek. 16:17 Dara, al on gel nub Paulus beb yabalemouba pik dobdo yeiniboka bii aboka ebngalogoka lelesukja, "Ban nang danara, Imik Neyung senenggom ululanya bedya alja wa wena' nang era an. Sikda ugunuk heka' huboka eimik blebnesil anyek neklesirik," aboka lelemok. 16:18 Hyaka' li wen sob-soba' gel gera wenyal giriklemok. Dara, yok sum era, Paulus bera siklelona' loboka, alda gel genyek an keeboka lemokja, "Yesus Kristus si sibuka lebgen, Ban weklum bisa' era goboka yibilom," hyok. Dara, al wene salek enyek, bisa' era gel genyek aba' ara goboka bilimok. 16:19 Dara, gel dam nang edya, ek wa weboka ununumna' lelemla adya rupiah nauba dolomab bok denghela' senemek dara, sikda Paulus beb, Silas beb salawoka, dekna' gasa' ak sam gliboka bo biniboka henga geregoka dub nang ek sam bo bilimek. 16:20 Dara, ban nang edya Paulus beb, Silas beb, Roma dub nang ek sam bo amal bilisik dara, sikja lemekja, "Ban nang danara Yahudi nang yoka'. Sikda nunja heikek an malya' nenebgiga yabelesirik. 16:21 Sikda yoka'-yoka' Roma nang edya dara, nera memnya ununggomnya alamabnya nek, wera sikja unuwaneseng senewoka neklesak," hyek. 16:22 Dara nimi nauba Paulus beb, Silas bebdak, doluwoka olosik. Wera mok soko dub nang edya, sikja boksom gweldekoka, "Wera or olululum," aboka nim ek orugesik. 16:23 Wera hyak nauba saboka obgogosik seleb dara, nimi henga gasa gobuka beilisin ek sam bobonggosik. Dara, nimi henga gereksina' dubnya bek, "Anda hyak pe yeiriwoka welesilom," aboka orugumek. 16:24 Dub nang edya wenyaboka orugumek yuba keboka, wera henga gereksina' dubnya bedya dara, Paulus Silas beb dara, hyak lomok nong ok ek sam doronggoka, yan anaba gasa bona' edya gobuka beiyisuk. 16:25 Wera inimnek dukdukanek enyek, Paulus beb Silas beb dara, Imik Neyung ak heng uboka molowoka, bera seboka giboka lelerek. Dara ono' yok anyagan henga geregoka beiyisik nang era sikenek kero ulumek. 16:26 Dara wene sab-sab enyek, senenggom sogouma' enyek dorogomok dara, henga gereksin e yangana' girik egomna' eneba warawoka lomok. Dara, albeyok henga goubuka beilisin e pik era nidya' bakdo yibiniboka, nimi henga goubuka beiyisik nang era, heng ara albeyok lobdo yibilisuk. 16:27 Wera anyagan nimi henga gereksina' dubnya bera lok dangoka bukokok. Wera bukoka kemelemok enyek, nimi henga gereksin e pik era nidya' bakok eibuk dara, henga geregoka beillilimab nimi dara, nidya' byak senewoka al damnya gaba doboka dolukdonun aboka webekdok. 16:28 Bok, Paulus bedya yuba senenggoma' ebngalogoka, "Nunda nidya' an ulumaba' anasa, salya obdamenek mem," aboka lemok. 16:29 Dara wenyek nimi henga gereksin e damnya bera nimek wesa' bo yoululum aboka alda e lomok sam biniboka, ber-berana' dib Paulus Silas adya saramek sam biniboka oumuwoka gisuk. 16:30 Wera Paulus Silas ak henga gereksina' dubnya bedya bo goubuka, "Neyung yab o, nara heka' huboka nimi blebsina' damok ara dobnamna do?" aboka molomok. 16:31 Paulus beb, Silas beb dadya lebdekja, "Anda Wenelesilnya Yesus ak dib senewanalam dara, an nong ara blebnenggel. An nong ab, anja ek nimi nidya' blebnesil," arek. 16:32 Wera, Paulus beb Silas beb adya, Wenelesilnya yub enyek, nimi henga gereksina' dubnya bek hnon, nimi nidya' al alja ek ulumek nimek leb elegesirik. 16:33 Dara, al neik inimnek enyek, wera nimi henga gereksina' dubnya bera, Paulus Silas ak doboka bo biniboka sikja eneng menenga' mek elegoka ubsuk. Dara, al dubnya beb, alja ek nimi nidya' eb, wene salek enyek meka dabsik. 16:34 Wera nimi henga gereksina' dubnya bera Paulus beb, Silas beb, alja ek sam eboka bo biniboka dena' siksamba urusuk. Dara alab, alja ek nimi nidya' Imik Neyung ak wen dib senewab senewoka, sikja ganya ak eiya dasuk. 16:35 Ampum maboka gwelegok dara, Roma dub nang edya yin bona' nang ek, nimi henga gereksin ek sam Paulus beb Silas beb henga lobsinok aboka, wenyal bululum wenyamek dara, bokol yeilimek. 16:36 Wenyal bilimek seleb dara, nimi henga gereksina' dubnya bedya Paulus bek, "Neyung yab o, Roma dub nang edya ugunuk or henga loblulum amak anasa, wera henga lobsin anasa, or neyung yab o, bururum e, perob e," hyok. 16:37 Bok, Paulus bedya yin bona' nang ek lebsuk ara, " Nunda Roma yoka' nang bok, nuk heibuka yana lelesina' loboka nimi hnoum ab oboka gasa ek sam doronggusung. Bok ono' wenyek dara, salya' gelelinga bururum aboka orugasak de? Anasa, nunda lek. Anasa, men mok sokok dub nang edya sik damnya yeiniboka nuk henga lobsinok aboka orugul busululum," hyok. 16:38 Ban wenyasuk dara, yin bona' nang edya Roma mok soko dam nang ek, Paulus bera ban wenyhesil al bilimek. Wera mok soko dub nang era Paulus beb, Silas beb dara, nunda Roma nang yoka' herek an yuba kemek dara, sikda hyak loka dasuk. 16:39 Dara, Roma soko dub nang edya Paulus Silas ak biniboka, "Salya' elgom adya ubsab," aboka lelel bilimek. Ban unusik seleb dara, ono' sikenek neika' henga gereksin ek ab henga loboka bobsik dara, "Wera nunja heik ab ara lo binirum," aboka bo bokdo dorogol bilisik. 16:40 Paulus beb, Silas beb, sikda nimi henga lobsika' seleb gobdek dara, Lidia gedya ek bilirek. Wera e nenyek an Imik Neyung yuba domek nim ek sam, pe ululum aboka wenewoka ganya hekiyiwesirik seleb dara, Paulus Silas ara lanawoka birik.
17:1 Paulus beb Silas beb dara, pikik balarek ara, Amfipolis sam ab ara, Apolonia heikek ab uboka, Tesalonika heikek lanal birik. Dara, Tesalonika heikek ara Yahudi nim edya yuba don e hnon ulumok. 17:2 Wera Paulus bera on ulumok so wek adya, alda Yahudi nang edya Imik Neyung ek byuk. Dara, Imik Neyung yuba momnya doboka' anasa leboka, sikda neika' ganya amoma' ubdangoka ulumek. Dara, Paulus bera ban unulumok salek eba' moruwoka Sabat mem sum li winilya gobdo lemok. 17:3 Wera Imik Neyung yuba momnya doboka anyek sunuwoka, Paulus bedya Imik Neyung adya nimi blebsina' dubnya eleganesin amoknya Kristus bera somogalyekanya ono' li winilinya sum era embenga' suboka buknamla aboka nekesuk. "Imik Neyung adya nimi blebsina' dubnya eleganesin wenyamoknya bera, Yesus aboka nadya ugunuk lero yalasin an," hyok. 17:4 Wera, Yahudi nimi wene nang yuba dib senewoka, Paulus Silas ak sam makal balamek. Anasonya neikik, Imik Neyung bek lok ganya bolomek Yunani nimi nauba hnon unulumek. Dara wera, ono' mengewoka dub ulumek gelewa gong hnon makoka ulumek. 17:5 Bok Yahudi nanga nong ak dara, hman ganya nauba bolomek. Dara, Yahudi nang edya dekna gasa ak salya' maro ulumek nang ek mamagoka yoululum aboka e biniboka, denga bolowoka longowoka ulumeekanya, sik ulumek heikek sam nauba malya lel meneklemek. Paulus beb, Silas beb danasa, nimek amoro yibinob aboka, Yason alameknya bedya ek sam berra wamle biniboka, e deboka Paulus Silas ak elemek. 17:6 Wera sikda Paulus beb, Silas beb, elem lomek dara, nimi si Yason beb, yok nang Imik Neyung ak dib senemek nanga hnon, salawoka heik dam nang ek gliboka bo balamek. Dara, sikja lelemek yub era, "Ban nang danara mok soko me nidya' malya' nenero yabalamek nang era an. Wera nunja heikek an bobo yanggak an," aboka lelemek. 17:7 "Dara, Yason bedya sikenek alja ek eboka dibsuk. Dara, nang enedya lelemek ara, Roma soko dub nang edya unulumaknya nera malya aboka blekoka, sikja dara, yok dubnya hnon alja si nera Yesus alamaknya hnon ulumla alamak nang era an," aboka lelemek. 17:8 Ban wenyaboka lelemek yub enyek kemek dara, nimi nidya' anyagan heik nim eb, anyagan heik dam nang eb dara, sikja doluwoka bok menegosuk. 17:9 Dara, anyagan heik dam nang edya, Yason beb yok nang Imik Neyung dib domek nang ek, wera ugunda rupiah ak dengna' dibnelum wenyamek. Wera seleb dengna' dibek dara, sikenek salamek ara lobosik. 17:10 Dara al unuweisik sum inimnek enyek, Tesalonika heikek nim edya Paulus beb Silas bebdak, ugunda Berea heikek sam binirum aboka orugeisik. Wera Paulus Silas ara, seleb Berea heikek birik dara, Yahudi nim edya yuba don ek sam bilirek. 17:11 Dara, Berea heikek nim era, ganya hegom aboka perob so ulumek bok, Tesalonika nim ek dara, gasa ganya bolomek. Wera ono', sikda Berea nim era, Paulus bedya Imik Neyung yuba lelemok dara, sikda ganya eleleng aboka pe dolomeekanya, ono' Paulus bedya Yesus yuba lelesil ara, aldib gom aboka dara, Imik Neyung yuba bukuk sam soba' ella danob aboka eboka einilimek. 17:12 Dara, Berea Yahudi nim era hyak nauba Yesus ak dib senewoka domek dara, wera Yunani nanga nong ak dara, men mengewoka dub dangoka gelewa hnon, nengmab anababya, nauba Imik Neyung ak dib senemek. 17:13 Wera Yahudi nang edya Tesalonika heikek ab sam kelemek enyek, Paulus bera Berea heik Yesus yuba nim ek leboka unulamla an yuba kemek dara, sikbabya Berea heikek yeiniboka, nimi ganya soro-wara eiyiwoka, nimi nidya' ganya ara yu neniyisik. 17:14 Dara wene sab-sab enyek berra aboka, Berea heikek Imik Neyung mab adya, Paulus bek senenggom mek gwan gemek or bulul aboka orugomek. Bok alda Silas beb, Timotius beb danyek ok, heik enyegan or loboka ulurek. 17:15 Wera Berea heikek ab ara arawoka bobeknya nera Atena heikek sam bo bokdo dorogek dara, Paulus bo bokol bilimek nang edya, Paulus bedya Silas Timotius anyek men na yan sok yorurum aboka yuba beibuk dara, sikda wenyamok yuba boboka yeilimek. 17:16 Wera Paulus bera anam or Silas beb Timotius beb yalarija sok aboka, Atena heikek diri ulusuukanya, heik enyegan kemelemok dara, anyagan ara nimi bisa' molowoka hweldana' ok uru balamek ak eiyimok dara, hyak ganya angoo senemok. 17:17 Anasa wera, Paulus bera Yahudi nim edya yuba don ek sam Imik Neyung bek lok ganya bolomek Yahudi gom nang eb, anyagan Yahudi nang yoka' ulumek nang eb, ganya amoma' ubdangoka ulumek. Anasonya neikik ono' dekna' gasa' pik uro balamek nang eblaboka Paulus bera sob-soba' neika' pe ganya amoma' ubdangoka uro balamok. 17:18 Dara ono' neikik wenyek, Epikuros bedya men seinimok ganya seinina' enyek seiniwoka ulumek nanga hnon, ono' Stoa bedya men seinimoknya nek seiniro ulumek nanga hnon, alablaboka neikik ganya amoma' ub einimek. Dara, sik gangganek ab hnon nang edya lelemekja, "Benera ella dangana' ara mek bok, yuba sana' anyek nauba lelemla anasa, heka' anasonya ella dangoka lelemla do?" hyek. Bok ono' yok nang edya dara, lelemekja, "Alda yok soko nang edya molowoka giblemak bisa' yub ek lero yabalamla," alamek. Ban wenyameknya nera damok ara, Paulus bedya Yesus amba geklewoka Imik Neyung yuba lelemookanya, ono' somogamna seleb dara, embenga' suboka bulumak yuba lelemok anasa, wenyaro balamek. 17:19 Dara, sikda Paulus bek eboka bobek dara, Areopagus meinik sam longomeka' ak sam bo byik. Dara, anyaganyeb sikja Paulus bek lebek ara, "Nunda wen anja wenyok ella dangana' lero yabalelam anyek ella danamab anasa, or lebsilom," aboka molomek. 17:20 "Anja lelelamnya nera, nunja kelemab dara, nim okoka anyek lebla senena' ara orok bok lelelam anasa, damok anyek lelemna aboka lebmen anyek ella danamab bar," hyek. 17:21 Dara Atena nang enebabya, sekel yanggan nang bok anyagan ulumek nang era, sikja soba' unulumek ara, sikja anara wenyek lanawal senewana' digum ara hyak pe kelesibya senewoka soba' yuba kero sabdangdo balamek ok. 17:22 Wera wenyamek anasa leboka, Paulus bera Areopagus meinik sam sekel biniboka, "Wei ugunda Atena nang o, nadya kemelesin dara, ugunda hyak nauba giblelum eillilisin. 17:23 Nara ugunja heik gangganek sam yabalamsakanya, ugunja gibleluma' deng anyek kemero yabalamsa dara, ugunja yoka' ak uka daboka gibna' oulyang era hnonok ak eiyimsa dara, anyagan unulum ak ara lero momnya dorobja, Im nang ben hnon elgom ulumabnya nek giblemab, aro gibleluma' ak eiyimsa. Wei, anasa ugunja im nang elgom alalumnya nenyek wen neknesin. 17:24 Imik Neyung ban soko enyeb, nidya' sokok anyagan ulumla ab, uyimok Imik Neyung enyek ugunuk sam neksin. Dara al on Imik Neyung enyek alda nim adya wenelesak sokok ab, imik ab, dubnya ulumla. Alda nim adya yok mengewoka giblenob aboka solomak ek sam unggulumla. 17:25 Al Imik Neyung adya alja nimi ek sam embenga' una' ab, hiba' ab, yoka'-yoka' nidya' ara nim ek eleklesil anasa, nim adya hnon Imik Neyung ak hnon unggulumla senewoka arawanggunuseng. 17:26 Imik Neyung adya nimi hnonok uyimookanya, wera nimi nidya' soko me nidya' bokiyiwok, nidya' soko deknewoka ulumnamak aboka unusuk. Al Imik Neyung adya nim ek sam, hek sum, sumen hanyagar ulumneseng ara, alja ok orowek seneiyisuk. 17:27 Imik Neyung adya ban nidya' unusuk ara, sene nak ella dangoka el yanenok aboka, wera sikda nak elemeija sum era or eibnenok aboka usuk. Bok dib nong so ara, Imik Neyung ara nuk mok sam lo yiboka alda mok unggulumla. 17:28 Anasa nim adya hnon wenyalamak ara, Nunda embenga' uboka ebegoka, sokok an yabalamab ara alja migib edya ok ulumab, alamak. Anasonya neikik, youma' ugunja nang bok urumna' dolomek nang edya hnon lebek. Nunda nidya' ara alja mabo yoka' nong ulumab aboka lebek," hyok. 17:29 "Wei, wera nunda Imik Neyung bedya mabo yoka' nong ulumab dara, nunda Imik Neyung ak, emas girik anaso gom, perak girik nenena' gom, ono' nimi ganya geremseng adya sunuwoka unulumaknya nek, nera Imik Neyung yoka' nong ara an senena' ara mem. 17:30 Nunja youma' dongdang alamoubnya nera, Imik Neyung adya seleb hekiyiwosuk bok, wenyek dara, nimi nidya' mok soko me ulumak nim ek, ugunda ganya dangawoululum wenyalasil. 17:31 Anasa wera, Imik Neyung adya nimi nidya' soko ak ulumaknya nenera, pe jong yana lelewanesin senewoka seleb li orowek gegewoka dibuk. Ban unuwoka yana lelewoka ubnesilnya bera orowek Imik Neyung benedya unuwanamla aboka gegebok. Dara, nimi nidya' anara dib senewoka ella danoka' aboka dara, nimi somokna' ak ab sam, bera seleb embenga' suboka bukiyibok," hyok. 17:32 Atena nim edya Paulus bedya nimi somogoka embenga' subna' yuba lelemok enyek, nimi hnon adya sonda' anasa lelemla aboka Paulus bek oksellilimek. Anya ono' hnon lelemekja, "Nunda hnon kebnemab anasa, onnya nenyek hnon yok sum saawoka lebsilom," aboka lelemek. 17:33 Dara, Paulus bera nimi longomek ak ab loboka byuk. 17:34 Bok, sik gangganek ara nimi hnon nang era bokoka Paulus bek sam mala doboka, sikda Yesus ak dib senemek. Ara men unumek nang era hnonda, Dionisius bera alda Areopagus meinik sam longomeka' dubnya bera an, gel si hnon Damaris gen hnon uboka, ono' yok nanga hnon anaso unumek.
18:1 Ban nen seleb dara, Paulus bera Atena heikek ab ara Korintus heikek byuk. 18:2 Dara anyagan ara, Paulus bera nimi Yahudi nanga ben hnon alja si nera Akwila, Pontus mok ebnya beb, ehwibdangarek. Akwila bera anam wenyokok Italia mok eb ara, alja gel Priskila geblaboka yeilirek. Sik nang penya era Korintus heikek yeilirek ara, Roma heikek dubnya Klaudius alameknya bedya Yahudi nang yoka' nong ara, nadya sokok anara nidya' lo binimak aboka yaklesuk anasa yeilirek. 18:3 Dara wenyek, ono' Paulus bera sik nang penya ek biniboka yuba saboka, wera wa anaba neika' ak beiyik soboka malamak e mana' enyek, Paulus beneba sona' ella ulumok bok adya, wera anyagan neikik maboka weboka ulumek. 18:4 Bok Paulus Sabat mem sum hen dara, wa welemna ara loboka, Yahudi nim edya yuba don ek sam biniboka, sikenek hnon ono' Yunani nang ek hnon, nidya' Yesus ak dib senewoka dobnok aboka yuba duka' saawoka lel eleklesuk. 18:5 Wera Silas beb, Timotius beb dara, Makedonia mok eb ara, seleb Korintus moka yarek dara, Paulus bera yok wa loboka, Yahudi nang ek Kristus anyek, Imik Neyung adya nimi blebsina' dubnya eleganesin aboka orowek lemoknya bera, Yesus anasa lemok aboka yuba soba' lel eleklesuk. 18:6 Bok anyagan Yahudi nim edya soba' Imik Neyung yub era lobnok aboka derewoka malya nenewoka lelemek anasa leboka, Paulus bedya sikja malya una' era soba' ulusulul aboka alja boksom sam sembeja' enyek Korintus heikek malya una' damok ara an alanok aboka haboka yibinuna' aboka lemokja, "Ugunda yoka'-yoka' damok ugunuk sam malya nenewanasil dara, nera ugun damnya urumunja. Nara ugunuk ara perob, hnon meknena' ara orok. Anasa wenyek moruwoka Yahudi nim ek loboka Yahudi gom nim ek diba' bin," aboka lemok. 18:7 Dara wenyaboka lebsuk seleb dara, Paulus bera Yahudi nim edya yuba don ek ab goboka, ok berem ek biniboka ulumok. Ban e damnya bera Imik Neyung bek giblemoknya alja si nera Titius Yustus aboka silimek. 18:8 Dara, Imik Neyung e damnya Krispus bera, alja mabo gelewa nidya' ab, Wenelesilnya bek dib senewoka domek. Dara, nimi nauba Korintus nang eneba yuba keboka dib senewoka yuba dolomek dara, sikbabya meka dasik. 18:9 Dara yok sum enyek, Paulus bedya lendara mamok enyek, Imik Neyung adya alak yeiniboka lebokja, "Paulus o, anda lok ganya bonggom mem. Anda yuba gelekna' loboka soba' Imik Neyung yub anyek saboka lelmorululom. 18:10 Nara anablaboka ulunam anasa, heik enyegan nimi nauba ulumaknya nera, nadya nim anasa, yok nim edya anak yoka' unuwanggununjak," hyok. 18:11 Anasa wera, nenyek sunuwoka Paulus bera Korintus heikek ara gibna' hnonok wala' hnabbadya uboka, Imik Neyung yuba Korintus nim ek neklesuk. 18:12 Wera ono' Galio bera, Akhaya moka dubnya ulumok sum enyek, Paulus bek malya lelemla aboka Yahudi nang adya bleklemeekanya, Paulus be nong ak henga goubuka yana lelesina' ak sam bo bilimek. 18:13 Dara sikja lelemek ara, "Ban Paulus benera, Musa bedya momnya dobok yub era sunuwoka, Imik Neyung ak gibnenggom mem aboka wenelesilnya bera an," aboka lelemek. 18:14 Dara wenyek, Paulus bedya yuba sabnuna' ul yabok bok, Galio dubnya bedya leboka ara, "Wei, ugunda Yahudi nang o, ban ugunja lelelumnya nenera, nim oboka una' gom, yuba blekoka una' lelemun dara, wera ugunja lelelum ak dib lelemak senewoka kebnesisinyabok, 18:15 nenera ugunja si nemba hnon, ugunja unuwanalum an yuba sana' amba hnon, ugunja unululumnya nenesa leboka ululum anasa, nera ugumba yok unulululum. Nara unurubnya nera lek anasa, ugumba yok unulululum. Nara unurubnya nera lek anasa, ugumba yok dan meewoka uldalalulum," hyok. 18:16 Wenyaboka Galio bedya Yahudi nang ak anyagan ara bo bululum aboka okoka yakasuk. 18:17 Dara wenyek, sikja Imik Neyung e damnya Sostenes bek salawoka yana lelesina' saramek ab olomek. Bok Galio bedya, nera alba eibnenggumla de senen dogom aboka ulumok. 18:18 Ban nen seleb unumok bok, Paulus bera or nauba Korintus heikek ulwenelemok. Wera Paulus bera Korintus nang ek or pe ululum abgogosuk dara, alda Akwila beb Priskila geblaboka, Siria sokok sam mek ekla buna' adya bukoka bilimek. Men binggumok bok, Paulus bera Kengkrea heikek ab danyek Imik Neyung amba gwanga lomoka' ara, alja honga gomek. 18:19 Wera sikda Epesus heikek seleb byik dara, Paulus bera Akwila beb, Priskila geb dara, anyagan loboka, alda Yahudi nim edya yuba don ek biniboka, sikenek yuba saboka neklesuk. 18:20 Wera Epesus heikek ulumek nang edya Paulus bek, "Wera anda neika' nublaboka soba' ulunob," aboka molomek bok, alda yo henggumok. 18:21 Bok, ono' binimok sum era lebokja, "Imik Neyung adya or helya dara, eimik ono' ugunuk saawoka yanasin," hyok. Paulus bera seleb wenyabgogomok dara, mek ekla buna' pik Epesus heikek ab ara, Antiokhia moka bununa' aboka lanawok. 18:22 Wera Paulus bera Kaisarea heikek yinggyuk dara, Yerusalem heikek welewoka, Imik Neyung yuba doboka ulumek nang ek perob aboka gibgogowosuk dara, ono' alda Antiokhia heikek byuk. 18:23 Wera ono' Paulus bera Antiokhia heikek ara, or li wen ubuk dara, yok sum era lanawoka Galatia sam hnon, Frigia sam hnon, yuba doro diriga ban nang ek ganya migib elegoka kayiwoka ubgiga yabalamok. 18:24 Wera danyek, Aleksandria mok eb beiyimeknya Yahudi nanga ben hnon alja si nera Apolos alameknya benyek, alda Epesus heikek eimik yeilimok. Alda hyak yuba sana' ak sam geremseng nongnya uboka, Imik Neyung yuba momnya doboka' nidya' ara alda hyak gobdo ella ulumok. 18:25 Ono' hnon Wenelesilnya bedya nekna' lomok ab uboka domoknya. Anasa wera, alda hyak ganya yeiriwoka Imik Neyung yuba Yesus ak geklewoka nauba lelemok bok, wera Yohanes Pembaptis bedya dalasuka' ok ella ulumok. 18:26 Dara, Apolos bera hyak asa' nonga' anyek Yahudi nim edya yuba don ek sam wekoka nim ek yuba leb einisuk bok, Akwila Priskila sik nang penya edya kerek dara, Apolos bek yalom aboka sikja ek sam bo bilirek. Dara, sikja ek ab Apolos bek Imik Neyung pik ara alan aboka, pe wenewoka nekerek. 18:27 Wera danyek, Apolos bedya dara, Akhaya moka binimna senen ganya bobok. Wera anasa leboka, alja hemyab edya or binilam wenyaboka, Akhaya diriga ban nang ek sam, ugunda Apolos yanggalya dara, doro diblulum aboka momnya dona' beiyimek. Wera Apolos bera seleb Akhaya moka byuk dara, alja nimi nauba Imik Neyung adya wana' uboka arasuk adya yuba dib senewoka domek nang ek ara nauba arasuk. 18:28 Apolos bera hyak senenggomnya uboka migib adya, wera Yahudi nang ek nimi hnoum sikenek yugom nanga nenelesuknya nera yoka'-yoka' lanalemok ak unulumok. Dara, Imik Neyung yuba momnya doboka' anyek einiwoka, wera Yesus ara Kristus anyek, aldib Imik Neyung adya nimi blebsina' dubnya sekiyimok aboka bekna' dangallilimok.
19:1 Wera Apolos bera anam Korintus heikek ulumok salek enyek, Paulus bera oblyek pik uboka yabalamok ara, Epesus heikik lanal bilimok. Dara, Paulus bera Epesus heikek seleb byuk dara, anyagan Imik Neyung yuba doro diriga ban nang eb ehwibdangamek. 19:2 Wera Paulus bedya Epesus nang ek sam, "Ugunda dib senelum sum era, Geisinya ara seleb doblum gom?" aboka heisuk. Dara, Epesus nang edya Paulus bek lebek ara, "Nunda Geisinya hnon dona' ara orok. Numbabya Imik Neyung adya Geisinya ara, an okoka yoka' ara numba elgom ulumab," hyek. 19:3 Dara Paulus bedya, "Wera danyek dara, heknedya mek dana' edya dabsik do?" aboka heisuk. Dara sikja, "Yohanes bedya dalasuk diliga' enyek diliwoka dabsik," hyek. 19:4 Dara, Paulus bedya sikenek lebsuk ara, "Yohanes bedya meka dalasuknya nera, nimi meka dabsin nim enera, aldib malya una' ak ab loboka ganya dangawok an danasa ulumok. Bok Yohanes bera nimi meka dalasuk ab dara, Israeli nim ek lelemokja, Nimi si Yesus alamaknya benyek, eimik era yanamla anasa, alak dib senewolulum, wenyaboka dalasuk," hyok. 19:5 Wera sikda Epesus nim era, banyek seleb kemek dara, sikenek Wenelesilnya Yesus si sibuka meka dasik. 19:6 Wera Paulus sikenek soruka salawoka heng uboka lelesuk sum enyek, Imik Neyung Geisinya sikenek gologol yingginiboka, sikda yok-yok yuba saboka, Imik Neyung yuba lel yabek. 19:7 Dara, sik unusuk nang era hiboka dara, obadya nang anaso dangamok. 19:8 Paulus bera wala' winilya Epesus heikek uboka, anyagan Yahudi nim edya yuba don ek wekoka Imik Neyung adya eimik wenelemnesil yub enyek, nimi yok nang ek lolowoka anyek aboka bekellilisuk. 19:9 Bok sik gangganek ara, nimi hnon ganya gasa uboka, Imik Neyung yuba dib senewanggunusibya senemek. Dara, anyagan longolomek nang ek sam, ban nang edya Imik Neyung adya Yesus pik uboka nim embenga' blebnesin amok anyek, lek aboka sonda anasa lelemak aboka blekoka lelemek. Anasa wera, Paulus bera sikenek ab loboka, Yesus yuba doro diriga ban nang eblaboka neika' senenggom sekolah dolomek e si Tiranus ekla ak sam bilimek. Dara anyagan ara li sob-soba' Paulus bera yok nang eb heibdangoka unulumek. 19:10 Paulus bera ban unuwoka unulumok salek era, gibna' penya gobdo lemok dara, Yahudi nang yoka' babya, ono' Yahudi gom nang eneba, nidya' sikda Asia moka ulumeknya nera, gobdo Yesus yuba nidya' kemek. 19:11 Imik Neyung adya hyak lok so migib ununa' senenggoma' anyek, Paulus be pik uboka nauba unulumok. 19:12 Dara anedya, soruk lubuldana' gom, saramek noroldana' akleng gom, Paulus bedya ongolamna' beiblomna anyek doboka, neikna' salamna nang ek bo yeilimek dara, sikda meremeekanya, bisa' gologosina' ara goboka dengaboka baldolomek. 19:13 Hnon Yahudi nang bok nimi salya' hwelesik nang era, yok mok sokok biniboka, nimi bisa' gologosina' yakoka hwero yabalamek. Dara, ban hwelesik nang era, Yesus si sibuka nimi hwebsunuwanamab aboka ulumek. Dara, sikja nimi hwebnesin danyek lelemek ara, "Paulus bedya lero yalamla yub anyek, ban Yesus si sibuka bisa' anak dib yakgen anasa, goboka bilom," aboka lelemek. 19:14 Yahudi yuba wa gaka' dubnya alja si Skewa bedya, alja mab era sekbadya nang uboka, ban wenyaboka lero hwero yabalamek. 19:15 Bok yaklemek bisa' edya sikenek lebsuk, "Nara Yesus ara ella ulumnakanya, ono' Paulus beneba ella ulunabok, ugunuk dara, ugunda hek nang do?" hyok. 19:16 Dara, bisa' gologomeknya bedya hyak yu asa' anyek sakdo dorogoka si saboka sikenek hmenga nenellilisuk anyek, sikda bisa' adya si buluk duba' gebman, nong baneng akleng ara poboka sikja nong ok ab dengaboka desuka' adya nong baneng gobek. 19:17 Nimi nidya' Yahudi nimi yoka' ab, Yahudi gom nim eb, Epesus heikek ulumek nimi nidya' ara, ban unuweisil an yuba kemek dara, sikda hyak ganya loka dasuk. Wera danyek, Wenelesilnya Yesus si ara imik nenewoka gibgiga balamek. 19:18 Dara ono' nimi nauba Yesus ak men dib senemek nang era, nimi hnoum yeiniboka youma' sikja unulumek malya una' laga lero balamek. 19:19 Dara ono' neikso, hnon nang era, men ger dona' buku hnon, bisa' molowoka nimi guma guksin buku bolomek ara, nimi hnoum beiyiwoka laga uka dalamek. Dara wera, ban uka dalamek buku enyek, alja rupiah dekemek anyek, nidya' hiboka einiwaneseng dara, sikja nauba dekna' denga penya gobdo danasobok, nidya' uka damek. 19:20 Wera ban unulumek adya, Wenelesilnya bedya yub era hyak nauba neika' ok oboka lelewoka, ono' migib danggiga balamok. 19:21 Yoka'-yoka' nidya' seleb unuru dakdomok dara, Paulus bera Makedonia moka binyekanya, ono' Akhaya mok eb ara, Yerusalem heikek binimna senen ganya bobok. "Wera seleb ono sam byukuk ab dara, ono' nara wen Roma binimna," hyok. 19:22 Dara wenyek, Paulus bera alda anam Asia moka ulumookanya, Makedonia sam ara alak aralerek nang ek ara, Timotius beb Erastus beb danyek, ugunuk binirum aboka bokol bilisuk. 19:23 Wera ban salek enyek, Yesus pik amba leboka, Epesus heikek ara senenggom yuba damoka lanamok. 19:24 Epesus heikek ara, nimi si Demetrius bedya, Artemis bek gibna' e sunuwoka, perak adya mek e gong memelemok adya, nidya' welemek nang amba dekna' nauba lanalamok. 19:25 Anasa wera Demetrius bedya, alja wa welemek nang eb, rupiah dona' yoka' memelemek nang gong eb, neika' ak mamagoka, alja sikenek wenyasukja, "Hemyab o, nunda anyagan nunja welemab wa nedya rupiah pe dolomab ara ella ululum," hyok. 19:26 "Wera ugunja heng yoka' edya eiyiwoka, ono' okoka kelelum dara, Paulus benya' alamaknya bedya unulamla ara ugunda ella. Paulus bedya lelemla ara, nunja memelemaba' nimi perob senelemaka' anyek dara, nim adya ok ganya doboka sunuwoka memelemaknya nera, neyung aboka gibnesengnya diba' goma' alasil. Anasa alja dara, wera alja lelemla yub adya nera Epesus heikek ok gom, alda Asia mok soko nidya' anaba, nimi gong ganya gliboka bo balasil ara ugunda eiyilum. 19:27 Anasa hyak lok so ara, nunja weboka memelemab anyek, eimik era si malya danasil ak ulumla. Wera nenyek ok gom, Artemis bisa' dub gel gedya alja e nenyek, al nong ak anaba perob senelemaknya nenyek malya gebnamak ak ulusil. Dara, Artemis bek Asia soko nang nidya' alak giboka, ono' soko nang nidya' alak giblemak bok, lobijek anasa lemna," hyok. 19:28 Wera Demetrius bedya ban wenyaboka lelemok anyek kel yabek dara, sikda hyak yu nong anasa yeiriwoka ebngalogoka lelemekja, "Epesus nang edya Artemis bisa' dubnya bera hyak senenggomnya ulumla," aboka lelemek. 19:29 Ban unumok yuba Epesus heik ara, neika' ok oboka lelemok. Wera ban uboka unulumek adya sikda yeiriwoka, Gayus beb, Aristarkus beb, sikda Makedonia nim bok, Paulus beblaboka neika' pika yalamek nang ek, sikenek salawoka sununa' kemelemek e digum hnoum bo bilimek. 19:30 Dara ban unulumek sum enyek, Paulus beneba sikenek lebsunun senewoka bunun senemok enyek, Epesus heikek sam Imik Neyung yuba doro diriga ban nang adya, anda banggom aboka lelemek anasa lomok. 19:31 Dara ono' Asia moka soko dam nang edya anaba, sik neika' Paulus beb ganya hemyabo nenebdangoka ulumek nang edya anaba, sununa' kemelemak e dukduk nongok Paulus bera weklyek aboka, wenyaro bululum aboka nimi yok nang ak orugosik. 19:32 Dara ban unulumek salek enyek, longomek nim era, salya' doluwoka obdangdo balamek. Dara, sikda damok ara anasa longomaba' ara okoka elgom adya, hnonda anyek lero balamek dara, yok nim era nenyek lero balamek. 19:33 Nimi Yahudi nang edya Aleksander benyek hyak nimi hnoum nonogoka wekoka bo balamek anasa, nimi yok nang edya dara, alak mala gaka'anya senemek. Wera danyek Aleksander bedya na yuba sabnamna anasa, ugunda yuba sana' loboka gelegolulum aboka soruka moub-moub aboka usuk. 19:34 Bok, sikda Aleksander bera Yahudi nanga yoka' nong ak okoka eiyimek dara, penya jam anaso hyak yeiriwoka neikebok bii aboka lelemekja, "Epesus nang edya bisa' dubnya Artemis bera senenggomnya ulumla," aboka lelemek. 19:35 Bok, Epesus heik momnya dolomoknya bedya, "Mem, salya' iriri aboka lelelum ara mem," aboka eimik namena' nenemok. Dara al adya lelemok ara, "Ugunda Epesus nang o, Epesus heik nong anyek, hyak senenggom bisa' dubnya alja e ab, ono' alja imik ab sam yinggilimok sununa' girik ab, ugunda meewoka bo ululuma' ara, soko nang nidya' ella ulumak. 19:36 Wera ban nenyek yok nang adya nenegoma' henggunumak anasa, nera nauba lelelum ara loboka, ugunja ganya doboka meknewoka unuwomunuk, mem. 19:37 Dara, ugunja ban bo yeililum nang danara, ugunja bisa' dubnya bek malya aboka derewoka, alja ek wekoka hoga donggulumek bok, bo yeililum an. 19:38 Anasa Demetrius beb, alja wa weboka un nang eb, nimi yok nang adya, nuk malya ubsak senelemak dara, yana lelesin e nera al nidya' nang amba pika bak loboka, ono' mok soko dub nang enebabya, or yuba sal yeiniboka unulunok senelemak anasa, yuba bo yeiniboka unuwanamak. 19:39 Bok wenyek dara, ugun gangganek an yok-yok ganya hnon ulusilya dara, wera nera pe longowoka yuba pe saboka meewanesom. 19:40 Dara ono' hong lelemok ara, nunda sumen an Epesus heikek an senenggom yuba lanawal anyek, nimi yok nang edya salya' lelem mamagoka malya ub menegolum hesijek. Nuk heibsija dara anasa, ana' okna anasa, lobnob," hyok. 19:41 Ban wenyabgogomok dara, "Wera or balalulum," hyok.
20:1 Wera Epesus heikek ara yok-yok malya yub edya yeiriwoka, iriri aboka lelemok ara seleb dengamok dara, Paulus bera Imik Neyung yuba doro diriga ban nang mamagoka, wera anyagan ugunda pe ulululum aboka wenebgogowosuk dara, perob aboka gibgogowoka wenewoka ubsuk dara, Paulus bera alda Makedonia sam lanawoka balamok. 20:2 Paulus bera alda Makedonia moka nidya' yibiniboka, wera anyagan ulumek nim ek pe ululum aboka wenyaboka wenero yabalesuk. Bok nen unubgogowoka' seleb dara, Paulus bera Yunani moka byuk. 20:3 Wera Yunani mok era, Paulus bera alda wala' winilya ulumok. Dara ono' Yunani mok eb ara, Siria moka bununa' aboka bobgegewoka ulumok enyek, yok nang edya Paulus bek, "Yahudi nang edya anak obgenoba' aboka gegeb lobjakbok anasa, banggom mem," wenhyek anasa, Paulus bera alda Makedonia pik uboka saawoka on pik yanamna senemok. 20:4 Dara wera, Paulus beblaboka neika' yabalamek nang era, Pirus bedya me Sopater, Berea heik abnya bera an, Tesalonika heikek ab nanga penya ara, Aristarkus beb, Sekundus beb, Derbe heikek abnya Gayus beb, dara an. Ono' Timotius beb, Asia mok eb nang era Tikhikus beb, Trofimus beb, neika' Paulus beblaboka dongero yabalamek. 20:5 Dara ban nang danara, sikda men Troas heikek biniboka nuk diri ulusik. 20:6 Wera Yahudi nang edya welena' orok roti gwanenga den sum era, seleb meewoka dero dakdowek dara, nunda Pilipi heikek ulumoub ara loboka, mek ekla buna' pik lanawoka bilimouba. Wera ono' li dombadya maboka gwelegok dara, nunda nidya' men nang ulumek ak Troas heikek mamagouba. Wera Troas heikek yeiniboka ulumouba salek era, li sekbadya mamouba. 20:7 Troas heikek ara, ban minggu en men sum enyek, hemyab eb bolowoka neika' ak delemouba. Paulus bera ampum lanawoka binimna senemok anasa, anyagan ulumek nim emba yuba nauba lebdibigemok. Wera inimnek dukdukanek dangamok anaba Paulus bera anam yuba lelmorulomok. 20:8 Dara, nu yuba longowoka leldalamoub e nera, e deneba' imik moruwoka somek adya, nunda imik sam longomoub ak sam ara dilina' uk ara nauba yeb ganagamek. 20:9 Ban sum enyek, goubenenya ben hnon alja si nera Eutikhus bera, heng kemen pik pomek ak bulumok. Paulus bera yuba nauba lebdibigemok dara, goubenenya bera kero bulumok ara, hogung dun-dun aboka, imik ab ara sokok sam malyinggyuk. Wera nim adya jab salamek enyek, seleb somogok ak eibek. 20:10 Bok Paulus beneba sokok sam yingginiboka goubenenya bera seleb somogomoka' ak eirib salawoka somomok. Dara ono' Paulus bedya yok nang ek, "Ugunda lok ganya bonggom. Alda somoganggumla, or embenga' ulumla bar," hyok. 20:11 Seleb unumok dara, Paulus bera onsok imik sam welewoka bukumok. Dara, roti gwanenga nim ek bokosuk seleb dara, sikda nidya' demek. Wera ono' inimnek pik Paulus bera yok nang eb, ono' yuba saldalameka' seleb dara, gwelegel yabok dara, ban salek era lanawoka balamok. 20:12 Wera anyagan yuba longowoka ulumek nim edya, goubenenya meremoknya bera, alja ek bo bilimek. Ban unumok adya sikda perob senewoka, sikja ganya hekesuk. 20:13 Wera Paulus bera Asos heikek ab dara, mek ekla buna' pik bana' loboka, soko pik binimna senewoka orowek sunuwoka meemok. Dara, nunda mek ekla buna' mamok ak byuba dara, Paulus be yanggalya' anyek pika diboka ehwibdanob senewoka, nunda men Asos heikek byuba. 20:14 Wera nunda seleb Asos heikek ab neika' ehwibdouba dara, Paulus bera mek ekla buna' ak bul yinggyuk dara, nunda nidya' lanawoka Metilene heikek byuba. 20:15 Dara, Metilene heikek ab uboka dara balamoub ara, Khios mok eb neika' dibblubdarek sam byuba. Amja sum so' era lanawoka balamoub ara, Samos heikek byuba. Dara anyaganara, li hnonok maboka ono' balamoubnya nera, Miletus heikek lanal byuba. 20:16 Paulus bera Asia mok eb li salya' maboka yeneb loblyek aboka, orowek pika bannya dara, Epesus heik pik bukgiga binggunumna senewoka gegemok. Paulus bedya dara, or perob dara, Yahudi nang perob sum Pentakosta yenewanggumlya bok, Yerusalem heikek men bisinya senen ulumok. 20:17 Wera Paulus bera Miletus heikek ab uboka, Epesus heikek sam Imik Neyung yuba dam nang ek, nara Miletus heikek an ulumna' anasa, el yananulum aboka yuba beibok. 20:18 Wera Epesus nanga yek dara, Paulus bedya sikenek leboka' ara, "Hem yabo nang o, nara men Asia anam yeilimsa sum enyek, ugun gangganek nadya heka' huboka ulumsa ara, seleb ella ululum. 20:19 Nara ganya sokok nenebdangoka, heng meka' yabalenen anababya, Yahudi nang ununa' adya yoka'-yoka' igina kwellilinyek bok, oka kweboka gweklenadyok, Wenelesilnya bedya wa nera welemsa. 20:20 Nara ugunuk pebsulul senelamsa anyek, sene mandena' loboka welemsa. Nadya nidya' ugunuk wenewoka neklesisa ara, or nimi hnoum senenggoma' ak hnon, ono' ugunja ek anaba wenewoka leboka neklesisa ara ella ululum. 20:21 Nara Yahudi nang yoka' ak gom, or ono' yok soko nang ek anaba, nara sikja malya unulumak ak ab loboka ganya dangawoka Imik Neyung ak sam yeijikanya, Wenelesilnya Yesus bek dib senewanok aboka weneb elegoka ulusisa. 20:22 Anasa wenyek dara, Imik Neyung Geisinya adya nak onolonel anyek bleknyek aboka, Yerusalem heikek binimna. Binya dara, nak heka' unuwanenel ara, naba elgom bok binimna. 20:23 Bok Imik Neyung Geisinya adya, nara yabalamna heikek nidya' ara, wera anak henga goubsin ek beibnenjak sum hnon, nauba gweklemnalam sum hnon, yenewanenggel wenyalanela' ok, nara ella ulumna. 20:24 Nara Imik Neyung adya nuk wana uboka aralesil perob lero yanggan yub enyek, laga lelemnesilim aboka elegenyok wa anyek, pe senenya loboka webdaknun senelamna' adya, nadya nong ak dara, seininel danggulumna. 20:25 Nara ugunuk sam seleb yeiniboka, ono' ugunuk hnon, Imik Neyung adya wenelemnesil yub era, ugunuk seleb nekesisa. Anasa wera wenyek dara, ugunublaboka hnon meka' hogunga eibdanggunumaba' ara orowek ella ulumna. 20:26-27 Anasa, nara sumen enera ugunuk sam gununa' loboka laga poboka lebnesina' ara, Nara Imik Neyung adya alja orowek seinimoka' nidya' anyek, ugunuk ak hyak sene mandewoka longgulumsa' anasa, ugun gangganek an nimi be hnon yuba dobnenggunumla dara, nera nadya huka bonggulumna adya, wenyhesin. 20:28 Anasa wera ugun dam nang pe diri bo uldalamunukanya, ono' Imik Neyung Geisinya adya ugunuk diri bo ulusinok aboka elegesuk Imik Neyung yuba dona' nimi nidya' ak pe diri bo ulululum. Imik Neyung adya, alja me somogok pik uboka, yuba dolomak nang era, Imik Neyung adya alja domba pam diba' dangiyisuk nang anyek, ugunja bo uboka diri ulululum. 20:29 Nak anyaganyeb ara bannya dara, yu nong bei gam anyek ugun gangganek yanamak. Dara, ugunja bo ulumun nang era, bei gam danadya sikja digin diba' dena' danamak ara, ella ulumna. 20:30 Hnonda ugun gangganek an ululum nang enedya eimik era, boro dolokna' yub enyek lero yibinisak. Ban unuwanamaknya nera, anadya diriga ban nang enyek seklama dariyiwoka sikenek sam gliboka bo bisinob aboka ubnamak. 20:31 Anasa wera ugunda keebmoubuka diri ulululum. Nara gibna' winilya ulumsa ara, inimnek yubyek pik noruwoka heng meka' nauba yabalenen bok, ugunja mok nang ek dek-deka sona' loboka wenewoka nekeldibilloklosisa ara, beklelulum," hyok. 20:32 "Dara wenyok, nara ugunuk Imik Neyung bek hnon, alja wana' uboka eleksina' yub ek hnon, dib elek lobsin. Al ugunuk migiba' nenellilisilikanya, ono' alja mabo muna' gobdo dangalillisilnya bek elek lobsin. 20:33 Ugunja nak rupiah gom, ongon akleng gom, hnon eleganenok senewoka ganya wenggulumsa. 20:34 Nadya soruk enedya, wera na nong ak okna ubnena' hnon, nadya hemyab ak okna ubna' hnon welemsa' adya, dero ulumouba' ara, ella ululum. 20:35 Nara nidya' unulamsa anyek ugunja dilililulum aboka, ugunuk sam nimi hmeng ulumak nang ek wa weboka aralelulum aboka amasisa. Anasa wera, Wenelesilnya Yesus bedya, nimi yok nang elekna' anyek perob so, don danagom, wenyamok ara ban amba anasa, seiniwoka beklemnemab," hyok. 20:36 Paulus bedya wenyaboka seleb lebgogomok dara, sikda nidya' koma lumugoka bukumek dara, Paulus bedya heng uboka molomok. 20:37 Dara, Epesus nimi nidya' ara, Paulus bek salab gweiliwoka giboka nauba engelemek. 20:38 Paulus bedya, "Epesus nim ugunda hnon saawoka eibnenggununulum," amok adya, men nonogoka nauba so engelemekjok, binimok mek ekla buna' ak sam bo bokol bilimek.
21:1 Wera Epesus heikek Imik Neyung yuba dolomeka' dub nang enya, angoo aboka gibdanggogomouba' seleb dara, sikenek loboka almanagoka balamoubnya nera, Kos mek dubuk heikek bilimouba. Wera ampum ara, Rodos mek dubuk heikek byuba. Anyeganyeb dara mek dub pik buka balamoubnya nera, mek ekla buna' mal balamla ak Patara sam byuba. 21:2 Patara mok eb uboka dara, Fenesia moka bununa' aboka ul yabok mek ekla buna' enyegan an bukuka balamoubnya nera, 21:3 mek dubuk sokok Siprus mok era, nunja waneng ek gek sam eibuba bok, nunda nera piboka Siria moka byuba. Wera nu bukumouba mek ekla buna' era, alja bona' bomok ara heikek yokoka beibnemok anasa, Tirus heikek an yinggyuba. 21:4 Wera Tirus heikek ara nunda mek ekla buna' ak ab sokok sam yingginiboka anyagan yuba doro diriga ban nang eiyimouba dara, sikeneblaboka li sekbadya neika' ulumouba. Dara, Tirus heikek an yuba domek nang edya, sikenek Imik Neyung Geisinya adya lesuk anyek eiyiwoka Paulus bek, "Anda Yerusalem heikek ara mem banggom, lobnelam," aboka lelemek. 21:5 Bok anyagan ulumouba salek enyek, Yerusalem heikek ban salek era oka dok dara, Tirus nang era anyagan loboka, nunda lanawoka balamouba dara, sikja gelewa mab ab, nidya' nuk arawoka bobsiknya nera heik gokgobok sam bo bokol bisik. Wera mek gwan berem mek ekla buna' ak byuba dara, nunda nidya' sikeneb komo lumugoka heng uboka molomouba. 21:6 Wera nunda sikeneb soruka salawoka gibildalamoub ara, nunda mek ekla buna' ak welewoub dara, sikda ek lo byik. 21:7 Dara nunda Tirus heikek ab bindibigemouba' ara, Ptolemais heikek byuba. Wera nunda Ptolemais heikek ara yuba dib senewoka ulumek nang eb gibdangamouba dara, anyaganara li hnonok mabuba. 21:8 Wera ono' ampum ara lanawoka balamouba' ara, Kaisarea heikek lanal byuba. Kaisarea heikek ek ara, Kaisarea heikek lanal byuba. Kaisarea heikek ek ara, Imik Neyung yuba lennya Pilipus bedya ek biniboka neika' mamouba. Pilipus bera alda Yerusalem heik ab, Imik Neyung yuba lelemnelum aboka, sekbadya nang sekiyisuk sum enyek, al hnon sikiyemeknya. 21:9 Pilipus bedya ek alja dombadya gelmab dara, ununumna' lelemek. 21:10 Nunda Kaisarea heikek li wen ul yabuba salek enyek, Imik Neyung adya alja yuba ununumna' lelemoknya alja si nera Agabus bera, Yudea sokok ab ara, se' yeilimok. 21:11 Alda nuk sam yeiniboka, Paulus bedya gouka norona' ek domok. Dara, Paulus bek ab dobok gouka norona' adya, alja yan eb, soruk ab norobdangoka lebokja, "Imik Neyung Geisinya bedya nak wenyanel ara, Ban gouka norona' damnya bera, Yerusalem heikek ab, Yahudi nim edya henga goubijekanya, Yahudi gom nim edya sorukuk eleganamak," wenyaboka lemok. 21:12 Wera Agabus bedya wenyaboka lelemoka' anyek, nub Kaisarea nim eb kebuba dara, nunja ono' Paulus bek, alda Yerusalem heikek bana' loblulul aboka, alak duka' lolowoka lemouba. 21:13 Bok Paulus bedya lebok ara, "Ugunda nenera hekasa engelelum adya, nadya ganya soldol meneklenulum do? lemok. Nara Yerusalem heikek ab salawoka henga gereganenok aboka ok bununa' aboka unggulumna. Alda Wenelesilnya Yesus si amba leboka somogonun aboka ulumna," hyok. 21:14 Nunja mem aboka lelemoubnya nera, Paulus bera kesina' lobsuk dara, nunja Paulus bek Yerusalem heikek bana' loblom ana' ara lobuba. Alda nunja dara, or Imik Neyung adya alja senelenya donok Paulus bek unuwolul aboka lemouba. 21:15 Nunda Kaisarea heikek li wen uboka, nunja bona' pe liboka beibgogobuba dara, wera Yerusalem heikek binoba' aboka lanabuba. 21:16 Wera nunda Manason bedya ek biniboka, mabnemouba' anasa, Kaisarea heikek ab dara, nimi wene nang diriga ban nang nublaboka neika' lanawoka byuba. (Manason bera alda Siprus nang bok, alda seleb youma' ek Yesus yuba doboka diriga balamoknya ulumok). 21:17 Nunda wera Yerusalem heikek nongok byuba dara, anyagan Imik Neyung mab era, nuk perob senewoka sikja ek sam doro diyisik. 21:18 Ampum ara nunda Paulus beblaboka, Yakobus bedya ek eibdangoka ubnoba' aboka kemel byuba dara, wera Imik Neyung yuba dam nang era, nidya' Yakobus bedya ek ok gobdo ulumek. 21:19 Wera Paulus sikenek seleb gibsuk dara, alda sikenek Imik Neyung al Paulus be pik uboka, yok sokok Yahudi gom nim ek sam yoka'-yoka' peroba' unulusuka' anyek laga nekesuk. 21:20 Paulus bedya ban wenyaboka nekesuk anyek seleb kemek dara, perob aboka sikda nidya' Imik Neyung ak giblemek. Danyek ono' sikja Paulus bek, "Hem Paulus o, Yahudi nimi yoka' nong ara deng sal-salya' anyek Yesus ak dib senelemak. Sikda Musa bedya unuwanalum an yub ek perob senewoka ganya oloklemek nang bok, Yesus ak dib senemek. 21:21 Dara wenera, sik Yahudi nim edya kelemak dara, hem Paulus anja Yahudi nimi bok yok sokok ulumak nim ek, Musa bedya momnya domok yuba loblulum aboka neklesil alamak ara, sikda seleb kelemak. Anja adya sikja mabo boka' garana' loboka, yok Yahudi nim edya unulumaka' digum ara lobnok aboka neklesilima' ara, sikda kelemak," hyek. 21:22 "Anasa Yahudi nang bok, Imik Neyung yuba dib senerob nang era, wera anyagan yalam dara, sikda ella ubnenjak. Anasa wera heka' hubnemab do? 21:23 Anasa wera nunja lebnemabnya donok anda pe kebnelam. Anyagan ara wen nimi dombadya nang besa lemek nang ulumak. 21:24 Wenyek dara, Paulus o, anda dombadya nang danyeb neika' anja nong era mek elekdangoka geisa nenebdangoka sikja honga gobsinok aboka, anja siksamba rupiah deknelam. Anadya wera anak lelenjak yub era sonda' lelemak, Musa bedya momnya domok yub ek keboka unululadya ok senewagenok bar," hyek. 21:25 "Bok Yahudi nimi gom bok Yesus dib senemek nim era, nunja seleb yuba saboka, anyek unuwanamab aboka, sikenek sam momnya dona' pik lemobja, Ugunda nim uguma' ak beillilimeija' dena' denggom, pam enenga wining enenga salya' denggom, somogalya pam wining salya' denggom, gela salya' salawoka yoka' unggom mem, aboka momnya doboka beiyimouba," hyek. 21:26 Ampum so' ara wera danyek Paulus beb, dombadya yok nang ek dara, ganya geisa nenebdangoka ubek. Seleb dara, sik Imik Neyung ek wekoka, liga wene badya dara, geisa una' ek elekgogowanamabakanya, Imik Neyung ak pam oboka giboka uka daboka unuwanasak ak nekemek. 21:27 Wera ono' liga wen yenebok dara, Asia mok eb Yahudi nang adya, Paulus ben Imik Neyung ek ulumok ak eiyimek. Dara, Yahudi nang edya nimi hnoum doluboka, Paulus bek salawoka domeekanya, 21:28 wenyamek, "Wei Israeli nim o, aral yousululum o. Wera benedya nidya' yok-yok mok soko biniboka, nunja mok nang ek malya nenesina' damoka neklesilnya bera an. Hnonda Musa bedya unuwanalum an yub ek blekoka, ono' Wenelesilnya bedya ek malya e aboka bleklelanya bera alan. Anya ono' Yunani nang en Paulus bedya Imik Neyung adya geisa ek an aboka bo yalamla anasa, malya ullilimla hnon," aboka lelemek. 21:29 Yahudi nang edya Paulus bek wenyaboka lelemeknya nera, Trofimus benyek Epesus heik ab ara Paulus beblaboka neika' ulurek eiyimek anasa, Yahudi nang senemeknya nera, Paulus bedya wera Trofimus bera Imik Neyung e lomok bo yeilimla gom aboka lemek. 21:30 Wera Yerusalem heik ara doluwoka hyene mane ab menegoka, nimi nidya' bik-bika aknel yabalemek. Sikda Paulus bek soruka salawoka Imik Neyung ek ab gliboka bo gomek. Dara, al wene sab-sab enyek, Imik Neyung bedya e nera pika seregemok. 21:31 Yahudi nang adya Paulus bek obnoba' aboka dulumek dara, ono' wene salek enyek, Roma yin bona' dubnya bek Yerusalem heikek ara, wenera nimi doluwoka oldalamla aboka wenyal bilimok. 21:32 Wera senenggom yin bona' dubnya bedya hyak berra aboka yin wenebadya nang eboka bobsuk dara, doluwoka oldalamek oulyang ak sam byik. Wera yin bona' dubnya beb, yok oldan nang eb, seleb yaka' eibek dara, nimi nidya' Paulus bek olomeka' ara lomek. 21:33 Dara, senenggom yin bona' dubnya bera Paulus be berem biniboka ono' gasa henga penya adya, henga gouboka, ubgogowoka dara, Paulus bek sam, "Anda heknya do?" aboka heiboka, ono' "Anda hek malya una' ek unulum do?" aboka heimok. 21:34 Bok ban salek enyek anyagan ulumek nim edya dara, "Paulus ben an hnon unulamla," alamek dara, ono' hnon yok nim edya dara, "Anyek hnon unulamla," aboka lelemek. Wera sabsobuk-sabsobuk abdangoka lelemek adya, yin bona' dubnya bera damok ara anyek senewoka elgom anasa, al adya dara, Paulus bek doboka bobmunukanya, yina bona' nang ulumek ek bo bululum aboka orugosuk. 21:35 Wera sikda yin bona' nang edya Paulus bera doboka bobek dara, e pik moromna' ak bo welek bok, nimi nauba adya obnob aboka saboka olomek anasa, yin bona' nang edya al nong ak leiliwoka bo welemek. 21:36 Dara, nimi nauba Paulus bek obnoba' aboka longomek nang edya eimik dobgiga yeiniboka, Paulus bek "Oblulum, oblulum o," alsinil yalamek. 21:37 Dara wera, Paulus bera yin bona' nang adya sikja gasa ek bo weknuna' ul yabok salek, Paulus bedya senenggom yin bona' dubnya bek, "Or nara anablaboka mek yuba sabnenam gom?" aboka heimok. Dara yin bona' dubnya bedya, "Anda Yunani yub ara ella' salalam gom?" aboka heimok. 21:38 "Wera anda Mesir nang ak adya, eijanok so ban nimi denga yuba' linbadya nang malya damok lanalamak nang eboka, hwalek sam bolosulumukanya, dub lunulumnya de?" hyok. 21:39 Paulus bedya lebok ara, "Nara Yahudi nang yoka' nong ulumna. Nara Kilikia sokok perob heik Tarsus heik yoka'anya ulumna. Anasa, nimi nauba ulumak ak an nara yuba sabnun bar, or henelom," hyok. 21:40 Wera yin bona' dubnya bedya Paulus bek, "Or, yuba sabnelam," hyok dara, e moromna' ak sekoka, nimi yok nang ek yok nang ek yuba sana' mem aboka sorok moub-moub aboka usuk. Dara, nimi nidya' ara yuba sana' loboka gelegemek dara, Paulus bera sikenek Ibrani yub adya sab einimok.
22:1 Paulus wenhyok, "Neyung yabo hemyab o! Nadya wen ugunuk yuba garabdanamna. Anasa keblulum." 22:2 Wera Paulus bedya Ibrani yub adya salamoka' kemek dara, sikda yuba sana' orok anyek ganya adya ok Paulus bek kelemek. Dara ono' Paulus bera lebmorumok, 22:3 "Nara Yahudi nang yoka' nong ulumna. Nara Tarsus heikek Kilikia sokok ab beibnyek bok, nauba' nen dara, Yerusalem heikek anyaganyeb nebsa. Dara, nun neyung yabo domek yub anyek, momnya dona' neksina' senenggomnya Gamaliel bedya nak nidya' pe neknyok. Anasa, hemyab o, ugumbabya sumen an Imik Neyung amba yeng ganya boboka yeirililum sok, nababya neikik unulamsa. 22:4 Dara, nadya wenyok lanabok yuba dolomak nimek doluwoka loba' nenewoka olosisa. Nera sikda nidya' gelewa ab, nengmab ab, nadya henga geregoka, gasa ek beillilisisa. 22:5 Yahudi yuba wa gaka' dubnya beb, yuba sana' gak nang nidya' ab, Paulus bera alda nenera sonda' lenggulumla heneseng. Dara, lebna yuba wa gaka' dub nang enedya, Damsyik ulumek nang ek Paulus anyagan yanamla aboka momnya doboka beiyimek. Ban momnya dona' en weboka beiyimeknya nera, nara Damsyik heikek bo biniboka, wenyok lanawok yuba dolomak nang enyek, henga geregoka Yerusalem heikek sam bo biniboka gasa ek beibsunun aboka bilimsa," hyok. 22:6 "Yubyek dukdukanek enyek, nara Damsyik heikek lanal bununa' aboka basa enyek, wene sab-sab yok senenggom dilina' enyek imik ab uboka nak yeb ganaganyok. 22:7 Dara, nara sokok erewoka malyinggisik ab kebsa dara, nak si sibuka lebnyok ara, Saulus o, Saulus o, anda hekasa nak loba' nenewoka olonelem do, anyok. 22:8 Dara nadya, Neyung o, anda heknya do aboka heibsa. Dara alja lebnyok ara, Nara anja olonelemnya, Nazaret mok ebnya Yesus ulumna, hyok. 22:9 Wera nablaboka neika' dilina' eiyiwoka ulumouba nang era, dilina' ak dara, neika' eibuba bok, yuba goklom boka' ak dara, sikda kena' ara orok. 22:10 Dara, nadya hnon heibsa, Wenelesilimnya o, nara heka' ak hubnun do? aboka heibsa. Danyek Wenelesilnya bedya nak lebnyok ara, Anda bukoka Damsyik heikek bilom. Dara Damsyik heikek ab danyek, Imik Neyung adya anda unuwanalam senemlya' ara neknenjak, anyok. 22:11 Bok nak dara, heng omom dilina' yeb goluwanyok adya henga luma yanyok anasa, nadya hemyab edya nak soruka gliboka Damsyik heikek bo binyek," hyok. 22:12 "Wera Damsyik heikek ara nimi si Ananias bera hnon ulumok. Alda hyak perobnya uboka, Musa bedya unuwanalum an yub ek pe unuwoka ulumoknya ulumok. Nimi Yahudi nang nidya' Damsyik heikek ulumek nang era, Ananias bek hyak perobnya senewoka ulumek. 22:13 Alda na dam sekel yeiniboka lebokja, Hem Saulus o, anja heng era gwelegoka eiblom, anyok. Dara al nenyek, nadya asoka erewoka, henga gweleganyok dara, Ananias bek eibsa. 22:14 Wera Ananias bedya nak lebnyok ara, Nunja neyung yabo sikja Imik Neyung adya, anda alja senelamla anyek ella dalom aboka dara, alja pelelanya eiyiwoka, alja yuba nong ak ab kebnelam anasa, gaboka donggel. 22:15 Anja kebmena' ab, henga eibmena' danyek, nimi yok nang ek lero yabana' anya danalam. 22:16 Anasa wenera anyagan ul mandena' ara mem. Anda bukoka sekmenekanya, Wenelesilnya si ak molowoka, anja malya una' ara gebgulula' aboka, mek dana' doblom, anyok," hyok. 22:17 "Dara, ono' Damsyik heikek aba' ara Yerusalem heik bisa dara, Imik Neyung bedya yuba don ek heng uboka mololamsa enyek, Imik Neyung adya nak deknero lonyok. 22:18 Dara ono' Wenelesilnya bedya, anyagan ulumak nang era, anja lel yabasimen yuba keboka dobnenggumaka' eibna anasa, anda Yerusalem heik loboka, yokok berra bilom, anyok," hyok. 22:19 "Dara nadya, Wenelesilimnya o, anja Yahudi nim edya yuba don ek pik wekoka nadya anak dib senelenjek nang ek henga gouboka olosisa ara, sikda seleb ella ulunyak bar, amsa. 22:20 Dara ono' neikik, anja yuba lenya Stefanus bek olomek sum eneba, naba oka sekoka or obnok senemsa. Dara, nadya Stefanus olomek nang boksom ara, nadya bo diri seklamsa, amsa. 22:21 Bok Wenelesilnya bedya nak saawoka lebnyok ara, Nadya anak hyak mok Yahudi gom nim ek bilom aboka orugenggen anasa, or bilom, anyok," hyok. 22:22 Wera nimi nidya' ara Paulus bedya lelemok yuba pe kelemek bok, ban sidya' nonga lebok yub edya dara, sikda Paulus bek ebngalogoka, "Ban benesonya bera ob lobnok. Alda ul mandena' lek bar," aboka lelemek. 22:23 Dara nimi nidya' boksoma gwayeb-gwayeb aboka, aso bona' ara imik lo weininggoka, yeiriwoka lelemek. 22:24 Wera danyek yin bona' dubnya bedya, "Paulus bera ek bo binilumukanya, alak legebna' adya oboka heibnelumukanya, hekasa Yahudi nang era alak anaso ebngalagoka lelemak do aboka ella danamab," hyok. 22:25 Bok Paulus bek legebna' deboka obnoba' aboka ul yabek salek enyek, Paulus bedya oka sekemok yin bona' anya bek, "Roma heik yoka'anya bok dara, alak yana lelena' orok bok, legebna' deboka obneseng de?" hyok. 22:26 Paulus bedya ban wenhyoka' kemok dara, yin bona'anya bera, senenggom yin bona' dubnya bek biniboka, "Ban benera Roma nang anasa, neyung anda alak heka' hubnelam do?" hyok. 22:27 Dara wera ono' yin bona' dubnya bera Paulus bek biniboka, "Wei Paulus o, anda Roma nang aldib ulumen bok dara, or nak neknelom," hyok. Danyek Paulus bedya, "Yo aldib, nara Roma nang ulumna," hyok. 22:28 Dara, senenggom yin bona' dubnya bedya, Paulus bek leboka' ara, "Nara Roma nang dasa' ara, dekna' ara hyak nauba deksa adya," hyok. Paulus bedya leboka' ara, "Bok nak dara, Roma nang yoka' nong adya beibnyek," hyok. 22:29 Dara, wene sab-sab enyek, Paulus bek heibnoba' umek nang era, mok so gokdongoro bek. Dara, dubnya beneba Paulus bera Roma nang bok, henga gouboka ulumab senewoka, lok ganya bobok. 22:30 Wera Roma yin bona' dubnya bera, hekasa Yahudi nang era, Paulus bek malya nenelemak do, senewoka damoka ella donuna' aboka ulumok. Anasa wera, ampum maboka gwelegoka dara, Paulus bek gasa heng ak ab lob loboka, Yahudi yuba wa gaka' dub nang eb, yuba sana' gak nang eb, nidya' mamagoka longowanamab aboka orugosuk. Dara, Paulus beneba longomeka' ak sam bo bilimookanya, sik saramek sekiyimok.
23:1 Wera Paulus bera Yahudi nang yuba sana' gak nang anyagan ulumek nang ek pe keebdaboka lebokja, "Nadya hemyab o, na embenga' ulunenya nenesa dara, nadya mek ganya edya dara, Imik Neyung ak malya una' ara orok senelamna," hyok. 23:2 Paulus bedya ban wenyaboka lel yabok enyek, Yahudi Imik Neyung yuba wa gaka' dubnya Ananias bedya, al gokgobok sam seklemek nang ek, Paulus bek sibama' mouboka oblulum aboka orugusuk. 23:3 Dara Paulus bedya, yuba lena' dubnya Ananias bek lebokja, "Sonda' anasa bobnenewoka geisa ulumna seneldalalamnya o, Imik Neyung adya ambabya waboka obnenggel. Anda anyagan bukoka Musa bedya unuwanalum an yuba sunuwoka nak yana lelenelem bok, ono' anda yub en blekoka, nak oblulum aboka nimek oruklelam," hyok. 23:4 Wera danyek, Paulus ben berem seklemek nang edya Paulus bek lebekja, "Anda Imik Neyung bedya yuba dona' gaknya bek malya geblelam de?" hyek. 23:5 Wera Paulus bedya leboka dara, "Al wenyeka' e hemyab o, alda Imik Neyung yuba wa gaka' dubnya ulumla ara nara elgom ubman adya salya' lebna. Dara, Imik Neyung yuba bukuk sam momnya dobok ara, Anja sokok yangawoka bo ulusilya nang ek salya' malya nenewoka malya yuba lena' ara mem hyok bok, lebna," hyok. 23:6 Dara ono' Paulus bedya kemelemok enyek, anyagan ara yuba sana' gak nang era, hnonda Saduki nang, hnonda Parisi nang hnon bulumeka' eiyisuk dara, Paulus bedya yana lelewanob aboka longomek nang ek lebok ara, "Nadya hemyab o, nara Parisi nang yoka' uboka, Parisi nang edya beibnyek ak ulumna. Nak anyagan yana lelelenyak ara somoklomak nang era embenga' subnemak aboka dib senelenanya nenesa ulenyak," aboka lelemok. 23:7 Ban wenyaboka Paulus bedya lelemok sum enyek, Parisi nang eb, Saduki nang eb, keboka mala webdangoka, iriri aboka lelemeekanya, wera yuba longowoka sana' ara bokoka yok-yok buma penya dok. 23:8 Ban unuweknya nera, Saduki nang edya dara, somoklemak nang era eimik subnemak an yub era orok senelemek. Imik Neyung lero ara una' orok, yok-yok ganya sununa' aroba' una' anaba orok alamek bok, alda Parisi nang edya dara, ban nera nidya' ulumla aboka dib senelemek adya umek. 23:9 Dara, sikda mala weboka doluwoka nauba obdangdo balamek. Dara, Parisi Imik Neyung yuba neksina' ulumek nang edya yeiriwoka lelemekja, "Nunja dara, Paulus benera hnon malya uboka meknena' orok," aboka lelemek. "Alja yuba lelemla ara yok ganya edya gom, lero edya golulumoka' adya gom, lelemla gom anasa, mem," hyek. 23:10 Wera hyak senenggoma' mala diba' lanabdangoka oldal yibik dara, anyagan yin bona' dubnya bedya dara, unuldeijekanya, Paulus bek giliwoka gal wabna' geboka obijek aboka, yin bona' nang hnon ak, Paulus be doboka bo bimunukanya, e lomok bo bululum aboka orugusuk. 23:11 Dara ono' nenyek mabok sum enyek, Wenelesilnya Yesus bera, lendara dib Paulus berem sekoka, "Anda ganya dabogalom," hyok. "Anyagan Yerusalem heikek nasamba laga lelelum sok, Roma heikek anaba neik so unulumnalam," hyok. 23:12 Ampum so maboka gwelegoka dara, Yahudi nang era, Paulus bek obnoba' aboka gegelemek. Sikja lelgogolomeka' ara, "Nunda Paulus anam obnenggumeibya salek ara, gwaneng ab mek ab meka' denggunumab," aboka lelemek. 23:13 Paulus bek obnoba' aboka gegelemek nang era hiboka dara, denga yuba hnonok ebdobnya mekbadya piboka nauba so ulumek. 23:14 Dara, sikja Yahudi yuba wa gaka' dub nang ek hnon, yuba dam nang ek biniboka, "Nunda orowek seleb laga leboka lemabja, Nunda anam Paulus bek obnenggumeibya salek era, yoka'-yoka' deregoka, meka dena' ara unuwanggunumab aboka lemab," hyek. 23:15 "Wei anasa hemyab o, wenera ugunda hnon, yuba sana' gak nang nidya' hnon, Roma nang senenggom yin bona' dubnya bek, Paulus bek, bera ono' pe yana lelewoka ubnamab anaso anyek bo yanalam aboka momnya dona' doboka wenyaboka beibnelum. Anadya wera Paulus bera anyagan anam yanggumlya salek enyek obnamab," aboka lelemek. 23:16 Bok Paulus bek unuro obnemab aboka gegel yabek anyek, Paulus ben eilibsal gedya me nedya kebok. Dara, al mam Paulus bera, al ulumok ek wekoka, "Wera mam o, obnemab senelenjak," wenyaboka nekdo bilimok. 23:17 Dara ono' Paulus bedya yin bona` dubnya bek ben hnon yalom aboka lebokja, "Senenggom yin bona' dubnya bek ban me nenedya yoka' don neknamla anasa, eboka bo abal bilom," aboka orugumok. 23:18 Yin bona' dubnya bera, goubenya me nen eboka senenggom yin bona' dubnya bek bo biniboka lemokja, "Henga geregoubnya Paulus bedya, ban goubenya me nenedya, neyung anak yoka' don neknamla anasa, eboka bo bilom aboka nak orugenel anasa, nara bo yeilimna," hyok. 23:19 Dara yin bona' dubnya bedya nekdo bilimok me nek soruka glib salawoka sikbeyok muna' ak wekerek dara, "Wera anda nak ara heka' ak neknenelem do?" aboka heimok. 23:20 Wera gobenya me nedya yin bona' dubnya bek lebok ara, "Yahudi nang edya yuba sabak ara, neyung anja Paulus be doboka yuba sana' gak nang ak ono' saawoka pe yana lelewanamak anasa bo youlul senen lemak," hyok. 23:21 "Bok neyung o, Yahudi nang Paulus bera yana lelesina' ak bo binimab anasa, molol yabeija dara, kenggom mem. Dara, nimi denga hnonok uboka, ebdobnya mekbadya anaso nanga pikik Paulus bobeija enyek obnob aboka webak bar. Dara, sikda Paulus anam obnenggumeibya salek era, gwaneng meka dena' denggunumab seleb memewoka lebgogomak. Wenebabya seleb weboka, neyung or anja lebmen yuba donok aboka umak," hyok. 23:22 Dara, yin bona' dubnya bedya nekdo bilimok me nek, "Wera ban nak an nekel yalem yub enera, nara seleb yin bona' dubnya bek nekemna ana' ara hyak mem," wenyaboka, "Or bilom," hyok. 23:23 Wera ono' senenggom yin bona' dubnya bera, yin bona' dub nang ek penya nang yoururum asuukanya, sikenek lebsukja, "Yin bona' oldan nang denga yuba sekbadya hnon gegeb loboka, abaksina' pam ak bukoka oldan nang denga winilya, dolukna' mal bolomak nang era denga yuba' sekbadya doboka gegeworurum. Al wen inimnek jam sembilan anyek Paulus be eboka Kaisarea heikek bo binilum aboka gegeworurum hyok. 23:24 Dara ono' Paulus buknamlya abaksin pam era, hnon yok alsamba doboka beiblulum. Dara, Paulus bera pe bo bilimuna' ara mok sokok dubnya Feliks dubnya bek pe bo aba yanalum," aboka orugusuk. 23:25 Wera senenggom yin bona' dubnya bedya mok soko damnya bemba momnya doboka beibok ara ban: 23:26 "Neyung hyak senenggom mak soko damnya Feliks o, Klaudius Lisias bedya perob aboka gibgen. 23:27 Ban benera Paulus, Yahudi nang edya henga gourob ak, nadya yin bona' nang eb alak yanggana' orok dara, wera Yahudi nang edya obseng bok, alda Roma nang yoka' eiyimsa anasa, blebemno. 23:28 Nara benera aldib hek malya una' ek unumok adya Yahudi nang edya obnoba' ulumak anyek ella donun aboka, sikja yuba sana' gak nang ak bo bilimno. 23:29 Wera yuba doboka yana lelewoka ulumoung enyek, alak gasa ek henga geregoka beibneseng gom, obneseng gom malya una' era, alja hnon ununa' ara orok. Yahudi nim edya yana kilimong ara, sikja Imik Neyung yub anyek beklesil aboka yana kiboka miniwoka lelemong. 23:30 Dara ono' nak Yahudi nang edya Paulus bek obnob aboka welemak aboka nekdo yeilinyak dara, nadya doboka neyung mok soko dubnya, anak doboka bo bululum aboka orugeisin. Dara, alak yana kiboka miniwoka lelemak nang ek ara, ugunja wenyalalumnya nera, or neyung mok soko dubnya bek bo bululum aboka orugeisin," aboka yin bona' dubnya bedya wenyaro webok. 23:31 Yin bona' dubnya bedya wenyaboka momnya doboka elegoka orugusuk dara, yin bona' nang era alja lemok sok unumek. Dara, neik inimnek enyek, sikda Paulus bek doboka bobeknya nera mouruwoka bo balameka' ara Antipatris moka heik bo abal bilimek. 23:32 Wera ampum maboka gwelegek dara, abaksin pam ak abagoka yina bolomek nang enyek, wera ugunjok Kaisarea heikek abal binilum aboka boksik dara, dem yin bona' nang era, sikda on pik sik ulumek heikek yek. 23:33 Wera abaksin pam ak abagoka yina bolomek nang era, Kaisarea heik nong ok byik dara, yin bona' dubnya bedya mok soko dubnya bek bo binilum aboka, weboka elegesuk momnya dona' era, Feliks bek elegek dara, ono' Paulus beneba ono' alak abonggemek. 23:34 Wera mok soko damnya Feliks bera momnya dona' einilimok ara, eibgogowoka Paulus bek, "Anda hekmokebnya do?" aboka heimok. Wera ono' Paulus bera Kilikia mok ebnya ella umok dara, 23:35 "Wera, or perob," hyok. "Anyek malya ulumla aboka yana kilinjak nang enyek, anyagan yeija dara, aldib malya ululam gom aboka heibuka ubnenggen," hyok. Dara mok soko damnya bedya, "Paulus bera or nadya ek an henga geregoka beiyilulum," aboka orugosuk.
24:1 Wera lambadya sum seleb maboka gwelegok dara, Yahudi yuba wa gaka' dubnya Ananias beb, Yahudi yuba dam nang eb, bera unuwanamla anya, bedya alja si nera Tertulus beb neika' yeilimek. Sikda Feliks mok soko damnya bek hogung ak yeiniboka, Paulus bek yanamek damok ara alak nekel yeilimek. 24:2 Dara, Tertulus bek anda unuwanalum alamnesilim aboka youbomeekanya, nimi longomek ak yeilimok dara, Tertulus bedya Paulus bek yana kiboka mok soko dubnya Feliks bek lebokja, "Neyung, anda mok soko damnya o, anda perobnya ululam! Anda nunja moka bo ulusilim adya, nunja heikek soko era namena pe ulumab. Ono' hnon anja pe unululam adya nunja sokok yoka'-yoka' nidya' ara pe memelemak. 24:3 Ban nidya' anja unulusilim amba leboka, nunda nidya' yokok sam anaba perob aboka imik nenewoka, ono' pe welesilim aboka doro dililinjab. 24:4 Wera anja ok unulusilim bok, sum enyek dara, anja pe unuwonun senemen sum enyek, salya' dengaro loblyek aboka, nunja anyek neyung unuweisilom aboka, ban mek molowajab anyek kebnesilim. 24:5 Nunja laga gaboka eillilimab ara Paulus bek dara, alda hyak soko me yok-yok soko nidya' alja adya malya nenewoka dolul meneklamla. Ono' alda Nazaret mok eb lanabok mal gaknya ulumla. 24:6 Ban nen ununa' oroka' anababya, alda Imik Neyung ek ab malya gebnun aboka ulumok bok, nunja alak salawoka henga goumoba. Nunja unumoubnya nera, Yahudi Imik Neyung yuba lelemla' sunuwoka yana lelewoka unuwanob aboka henga goumoba bok, 24:7 yin bona' dubnya Lisias alameknya bedya nunja sorukuk ab hyak migib adya bleboka doboka' anasa lomouba. 24:8 Dara ono Lisias bedya dara, nuk ugunda mok soko damnya bek hogung ak laga bululum aboka orugusuk. Anasa neyung o, anja Paulus bek heibmenekanya, an aldib aboka anda malya unululam aboka yana kimab anyek damok ara an senewoka ella danalam," hyok. 24:9 Dara ono' anyagan ulumek Yahudi nang era, Paulus bek sam ara anda malya unululamnya aboka yana kiboka, alda Tertulus bedya lelemoknya nenyek aldib lelemla aboka alak hmalamek. 24:10 Dara mok soko dubnya Feliks bedya Paulus bek soruka gwakdewoka, "Wera or anda yuba sablom," hyok dara, Paulus bedya lebok ara, "Neyung dubnya o, anda mok soko enyegan dubnya dangoka ululam salek era, gibna' gong-gong lelemla ara, ella ulumna. Anasa wera nenesa leboka, nara sumen anja saramek sam ganya hekoka yuba garabdanamna. 24:11 Wera neyung dubnya o, nara Yerusalem heikek sam Imik Neyung gibnun aboka li obadya mana' sibin anaba loboka yasa anyek, yok nang ek heibyaawoka berra ella danalam. 24:12 Nak dara, Imik Neyung yuba gak ek gom, Yahudi nim edya yuba don ek gom, or salya' ak sam gom ara, malya ubnun senewoka nim eboka bo bolowoka una' ara, yana kilinyak nang adya, hyak eibnenggunyek. 24:13 Wera ono' sik Yahudi nang edya anaba, Paulus alja malya unulamla damok era ban aboka anak laga nekgena' ara orok. 24:14 Anasa nak dara, wen nadya unulamna ara anak laga lebnenggen. Nara aldib Yesus adya nekesuk anyek sunuwoka, Yahudi nim edya dara, malya alamak bok, nunja Wenelesilnya Imik Neyung bek giblamna. Anyek hnonok aldib unulamna. An unulamna anaba, ono' Musa bedya unuwanalum an yuba hnon, yok ununumna' lelemek nang edya momnya domek yuba hnon, or aldib senelamna. 24:15 Dara ono', sik Yahudi nang adya Imik Neyung unuwanamla senelemak sok, naba neikik eimik era nimi embenga' ulumek ara somogorob nim era suboka embenga' buknemak senelamna. Nenyek dara, or perob ok ulumak nanga hnon, malya una' unulumak nanga hnon, unuwanasil ara nara dib senelamna. 24:16 Wera nenesa leboka, nadya mek ganya enyek geisa ulunun senewoka, Imik Neyung ak anaba, ono' nimi sirik ak anaba, sikenek hyak pe unulunun senewoka sunulyamalamna," hyok. 24:17 "Nara gibna' wen Yerusalem heikek unggulumsa ara, ono' wenyok ara, nadya mok soko nim emba sikenek arasik bona' enyek, boboka ono' Imik Neyung ak gibgiga yoka'-yoka' beil bunun aboka anasa Yerusalem heikek yeilimsa. 24:18 Wera lebna bona' dara, bobsedya ono' Yerusalem heikek yasa dara, wera arasik bona' elegoka, ono' Imik Neyung amba beiyiwoka ulumsa sum enyek, Yahudi nang edya nak Imik Neyung ek sam, Imik Neyung ek wekoka seleb geisa nenebdangamsa bok, eibnyek. Dara, na unulamsa ak ara nimi nauba una' orok uboka, ono' nimi yuba saboka eirigal ganya hnon una' ara orok. 24:19 Alda Yahudi nang yoka' ak wenen nang Asia mok eb ara yeiniboka ulumek. Ban lebna nang nong enyek, nasamba leboka, sikda anyagan yeiniboka hnon yoka' ulumso dara leboka, anak wenyal yanenggeseng. 24:20 Gom, alda ono' ban nak yana kinyak nang danedya, wera na nong anyek, Imik Neyung yuba damnya bek bo yeilinyek sum meknewoka malya umsa malya una' enesa leboka, luluwananyak dara alan, perob. 24:21 Sikja dara, nak sam yoka'-yoka' lenena' loboka, alda sikja lelemaknya nera ban nenyek ok dara, nara sumen yana lelewoka ulunyaknya nera, seleb somogorob nim era eimik onsok embenga' suboka buknemak aboka dib senelenanya nenesa leboka unyak amsa anasa, nenyek ok nak or yana lelewaneneseng," hyok. 24:22 Wera danyek Feliks dubnya bera, Yesus adya neklesuk yub era, orowek pe ella ulumoknya bek adya, wera nera al anyagan seleb lero lobnob aboka, alja leboka ara, "Yin bona' dubnya Lisias be yalya danyek, nenera saawoka memero dakdowanamab aboka anasa," lobnamab aboka lemok. 24:23 Dara ono' Feliks dubnya bedya, Paulus henga goubuka bo ulumek yin bona' gaknya bek, pe diri bo ululum aboka orugosuk bok, Paulus bek ono' Paulus alja hemyab edya alak dena' bo aral yeiniboka unulunok aboka orugosuk. 24:24 Dara, ono' li wen maboka gwelegok dara, Feliks bera ala' gela Drusila geb neika' halya' alda Yahudi nang ulumok adya yeilirek. Dara ono' Feliks bedya, Paulus bek Yesus Kristus bedya yub enyek leblul aboka, anyagan do yoululum aboka orugosuk dara, yuba lelemoka' anyek dib senewoka kelemok. 24:25 Bok Paulus bedya jong una' yub ab, ganya siklewoka una' yub ab, eimik Imik Neyung adya nidya' yana lelewanasil yuba lel yabok dara, Feliks dubnya bera hyak loka daboka Paulus bek, "Wera nera anda seleb leblam anasa, anda or bimenekanya, ono' yok sum lebnesilim senewanamna salek enyek, el bululum henya dara, anak el yananjak," hyok. 24:26 Feliks bedya nen wenhyok ok ab dara, alja dara, Paulus bedya eimik rupiah hnon eleganenel senewoka diri ulumok. Wera wen senen ganya bomok adya, wera Paulus bek henga geregemek bok, Feliks bedya nab neika' yuba salamnanam anasa e yoululum aboka, liga gong oruklesuk. 24:27 Seleb gibna' penya lebgogomok dara, Perkius Festus benyek, Feliks be lunuwoka soko dubnya dangamok. Bok, Feliks bek dara, Yahudi nang perob senelemaknya nera unuwonun senewoka, alda Paulus bek heng goubna' lomok lolomok.
25:1 Wera Festus bera mok enyegan seleb yeiniboka, li winilya ok maboka gwelegok dara, alda Kaisarea mok eb ara, Yerusalem moka byuk. 25:2 Wera Yerusalem heikek ab dara, Yahudi yuba wa gaka' dub nang eb, yok Yahudi dub nang eb dadya, Festus bek yeiniboka, Paulus bek alda nunja mok soko loba' nenewoka malya nenelesil aboka lelemek. 25:3 Wera Yahudi nang edya dara, Paulus bera Yerusalem heikek bo yanamak salek enyek, obnamab senemek anasa, wera Festus benyek alda ganya perob senewesilya dara, or Paulus bo yanok aboka orugesilom aboka molomek. 25:4 Bok Festus bedya Yahudi nang ek lebok ara, "Paulus bera Kaisarea heikek sam or ulumla anasa, na nong anyek mek anam ono' saawoka ono bununa' aboka umna," hyok. 25:5 "Anasa wera, ugunja dub nang edya nablaboka Kaisarea heikek bindiwoka, nera Paulus bera aldib malya umlya dara, alak yana lelewoka unuwanamab," hyok. 25:6 Wera ono' Festus bera, Yerusalem heikek ara li linbadya gom, sagobadya gom anaba, maldabna' loboka, onsok Kaisarea heikek saawoka yeilimok. Wera ampum yenebok dara, Festus bera yuba longowoka sabnamab aboka umeka' seleb dara, Paulus bera anyagan doboka bo yoululum aboka orugosuk. 25:7 Wera Paulus bera seleb yok dara, Yahudi nang era Yerusalem heikek ab yeilimek nang edya, Paulus bek, wera alda nunja sokok malya ulusilnya aboka alja hogung ak sekoka nauba yana kiboka lelemek. Bok, sikja ban nenyek malya ubok anasa lelemab aboka, Paulus bek damoka yana lelena' ara orok. 25:8 Wenyalamek bok, Paulus bera al damnya yuba garabdangoka lebok ara, "Musa bedya momnya dobok yub ek gom, Imik Neyung bedya ek gom, nadya malya una' ara hyak gobdo orok," hyok. 25:9 Bok Festus bera, Yahudi nim edya nak perob senewanenoka' aboka, mala doboka Paulus bek heibuka' ara, "Anda Yerusalem heikek bindiwoka, nadya saramek sam ban nidya' yana kiboka lelenjaknya nenera yana lelewanenjab de?" hyok. 25:10 Bok Paulus bedya lebok ara, "Nara alan Roma dubnya bedya meemok ak an seleb sekemna anasa, wera al anyagan yana lelewaneneseng. Nara Yahudi nang ek malya una' usina' orok ara, anda seleb eiyilam. 25:11 Nara yoka' mema' ak blekoka malya umnya dara, wera naba henga goubuka or obnenulum senewanesinyebok, nak yana kiboka lelenyaknya nera dib gom bok anasa, wera, ono' yok nang edya or an oblulum aboka eleganggununeseng. Anasa, nara Roma dubnya bedya nimi yana lelesina' ak an yana lelewanenyak," hyok. 25:12 Wera ono` Festus beb, alja aralemek nang eb, seleb yuba sabdangemek dara, Festus bedya Paulus bek, "Anda Roma dubnya bedya yana lelesina' ak an yana lelewanenyak helem anasa, wera anda Kaisar dubnya bek bo amal binenjak," hyok. 25:13 Wera ono' liga wen maboka gwelegok dara, Agripa dubnya beb, alja gel Bernike geb, Festus bek perob aboka gibnom aboka Kaisarea heikek yeilirek. 25:14 Wera Kaisarea heikek liga wen maboka gwelegek dara, Festus bedya Agripa bek, Paulus bek henga geregoka unulumek yub era, nidya' nekemok. Dara Festus bedya nekoka ara, "Anyagan ara Feliks bedya henga geregoka beib loboknya ben hnon ulumla. 25:15 Men nara Yerusalem heikek ulumsa sum enyek, Yahudi yuba wa gaka' dub nang eb, Yahudi yuba dam nang eb dadya, Paulus bek henga geregoka oblom aboka lebek. 25:16 Bok nadya lebsa ara, Roma nang ek dara, salya' nadya ok ganya doboka henga gereganggunusinya. Sik unulumak ara, yuba damoka minimna nang eb, alak ununanya bek yuba saboka lelemna nang eb, al nonga yuba damoka yana kinanya beneba, darasam yuba sekeldalanabok bar anasa, nadyok ganya doboka unuwanggunusinya, amsa. 25:17 Wera sikda anyagan yek dara, ampum so maboka gwelegok dara, maldabna' loboka, men nimi mamagiyiwoka seleb longowek dara, Paulus bera men berra bo yanalum aboka orugeisisa. 25:18 Wera al Paulus bek sonda' anasa, miniyiwoka yana kimek nang edya, sikda sekoka Paulus bek malya ululanya bera an aboka yana kiboka lelemek dara, nadya anyek-anyek malya umok senesenya nenyek, sikda hyak neknenggumek. 25:19 Bok sikda lelemek ara, sik Yahudi nang yuba dona' damok amba hnon, ono' somogomoknya Yesus benyek, Paulus benen nong adya, embenga' ulumla alamoknya nenesa hnon, yana kiboka lelemek," hyok. 25:20 "Wera Yahudi nang edya Paulus bek yuba nauba miniwoka lelemek adya hnon, anyek-anyek lelemab aboka damoka pe lelena' orok adya hnon, nara ganya ebnyok anasa, wera nara Paulus bek, sik Yahudi nang edya miniwoka lelenjak yub enera, Yerusalem heikek ab yana lelewanenjak gom aboka heibsa. 25:21 Bok Paulus bera al damnya, nara hyak imik senenggoma' yana lelelesak ek welewoka sabnemab abdok dara, wera anasa nadya dara, Paulus bek or henga geregemun ara, eimik era Kaisar dubnya bek bo binimab aboka lemsa," hyok. 25:22 Dara Agripa bedya Festus bek, "Hem o, Paulus alamaknya bedya lelemla yub enyek, naba okoka kebsinya," hyok dara, Festus bedya Agripa bek, "Wera neyung, ampum ak alja yeiniboka lel yabalya yub ara kebnelam," hyok. 25:23 Wera ampum maboka gwelegok dara, Agripa beb, Bernike geb dara, yin bona' dub nang eb, heik dub nang eb, hyak nimi nauba wekoka, boksom glaboka giboka ulumeka' hnoum, Paulus bedya lel yabalya yub enyek kebnom aboka yeilirek. Dara, Festus bedya Paulus beneba or doboka bo yoululum aboka orugusuk dara, bo yek. 25:24 Dara unu wekemek sum enyek, Festus bedya, "Perobnya Agripa beb, ugunda anyagan wekel yeililum nang o, ban benyek eillililum. Nimi nidya' Yahudi nim edya, or nera Yerusalem heikek sam hnon, anyagan ab anaba, nak an or anja don alak yoka' ublom aboka oruganyek. Sikda nak yeiriwoka nak unuwolul senen lelemek ara, Paulus bera alda embenga' unggulumnamso, obnemak aboka yuba nauba lelenyek. 25:25 Bok nadya keeboka ubsa dara, hyak nimi somoklomak senenggom malya una' era hnon una' orok anasa lobsa. Bok, hnonda Paulus bedya al damnya, nara Kaisar dubnya bedya senenggoma' yana lelesina' ek ab yana lelewaneneseng aboka molomok anasa, wera Kaisar dubnya bek or bo binimak aboka garamsa," hyok. 25:26 "Bok, nara Paulus bek anyek yoka' enyek aboka, Kaisar dubnya bek ara, Paulus bemba pe nekoka momnya doboka beilisin ara orok. Wera an nenesa leboka, sum enera nimi nidya' wekluma' gangganek an, hyak dib nong so ara, anda hyak senenggom dubnya Agripa an nong ak anyek, nonogoka ubmen adya, wera yana lelena' damok ublya dara, momnya dobnun aboka bo yeilimna. 25:27 Nadya seininanya nera, nimi ben hnon henga geregenanya bera, damok ara anyek okoka malya uboka' ara elgom bok, salya' yok nang edya yana kiboka lelemaknya nenesa dub nang ek beilina' ara perob gom senelamna," hyok.
26:1 Wera danyek Agripa bedya Paulus bek, "Wenera anda yuba saboka sekdanalam anasa, or wenyaldal yabalom," hyok. Dara, wen Paulus bedya soruk eb weininggoka leb einimok. 26:2 Leboka' ara, "Neyung Agripa senenggom dubnya anja saram nongok an, Yahudi nim adya sonda' anasa miniwoka lelenyaknya nenyek, an nong ok an laga poboka yuba garabdanamna adya, nara hyak eiya dabnel. 26:3 Bok hyak dib nong so ara, Agripa dubnya anda Yahudi nang edya sikja yoka'-yoka' nidya' unulumak ara, anda nidya' ella ululam. Anasa wera, nara Paulus bedya lebnamna yub enyek, neyung anda pe siklewoka bukwenewoka kebnelam," hyok. 26:4 "Nara gobenya wenyek moruwoka, wera heka' huboka ulumsa an, sikda Yahudi nimi en nidya' ella ulunyak. Nara anam gobenya ulumsa dara, nadya soko yoka' ak uboka, ono' Yerusalem heik nong ek, heka' huboka ulumsa ara, sikda ella ulunyak. 26:5 Dara, sikda Yahudi nim en youma' eka' moruwoka ella ulunyek. Anasa, Yahudi nang perob senewaseng bok dara, wera nara youma' ek moruwoka Parisi nanga dangoka nunja Imik Neyung yuba pe doboka Imik Neyung yub adya yoka'-yoka' mem hyok ara, hyak pe keboka unulamsa anyek, sikda Yahudi nim edya anaba, aldib Paulus bera unulumok aboka laga lebneseng. 26:6 Wen nara anyagan yana lelewanenok aboka seknanya nera, nunja neyung yabo youma' nang ek, Imik Neyung adya sikenek eimik eleganesin amoknya nenyek, dib senemsa adya yana lelelenyak. 26:7 Wera al Imik Neyung adya peroba' eleganesin wenyamoknya nenyek dib senelamna amba, Yahudi nang era nak malya nenelenyak. 26:8 Ugunda Yahudi nang ak dara, Imik Neyung ara somogamna nim en embenga' bukullilisil bok anasa, hekasa ugunda unuwanggunumso senelelum do?" hyok. 26:9 "Nababya youma' dara, nadya' yoka'-yoka' unulamsa ara, Nazaret mok ebnya Yesus alameknya bek blekoka lololonun senewoka yeiriwoka unulamsa. 26:10 Dara al nenyek, nadya Yerusalem heik ab unulamsa. Yahudi yuba wa gaka' dub nang ek ab migib soruk doboka, nimi muna' Imik Neyung mab ek henga gouboka gasa ek beillilisisa. Dara ono', yuba dolomek nang ek or obnamab al yaben dara, nara moroma kwelemsa. 26:11 Dara ono', nadya Yahudi nim edya yuba don ek pik nauba li soba' doluwoka loba' gunuwanok aboka sunulusisa. Dara, nara hyak nauba yu ganya boboka, Yesus yuba dolomek nang ek obsunun senewoka doblesisa ara, hyak yok mok heikek anaba yeiriwoka doblesisa," hyok. 26:12 "Dara al onnya nenesa, hnon sum enyek obsunun senewoka Yerusalem heik ab uboka Yahudi yuba wa gaka' dub nang ek ab, nim on momnya dona' doboka bobsa dara, Damsyik heikek obsunun aboka bilimsa. 26:13 Dara, neyung hyak perob dubnya o, anam yubyek dukdukanek pik hnomunga balasebok, imik ab sam alak hyak senenggom dilina' enyek, henga sirik ara mek so alda hyak senenggom ak, nak yebnyok. Wera dilina' en era, nak ono' neika' balamoub nang eb nuk yebgolusuk. 26:14 Wera nunda nidya' balamoub nang en, dilina' lok amba sokok malyinggilimouba. Dara, nak Ibrani yub adya nak youbol yabonyok kebdasa ara, Saulus o, Saulus o, hekasa anda nak soba' loba' nenewoka olonelem do? Saulus o, anda nak loba' nenelenelem ara, wa wen sapi ek gama' adya hleboka yaklamak dara, pik gwabom aboka oldalamla sok, oldalalam, anyok. 26:15 Wera danyek nadya, Neyung, anda heknya do? aboka heibsa dara, Wenelesilnya nak lebnyok ara, Nara Yesus anja olonelemnya benya', anyok. 26:16 Anda bukoka seklom. Nadya' nong anyek abdanya nera, unuwanyaakanya an nong ak aabdangoka, nadya weblom aboka an nong ak sekiyiwagen. Anasa wera, anda sumen nak ab eiblama' hnon, eimik nadya eleganenggena' hnon, lero yabalamnalam. 26:17 An nong ak, nadya Yahudi nim ek ab hnon, yok soko nim ek ab hnon, bleblemnenggen. Dara, nadya yok soko nim ek bokol bininggen. 26:18 Anja adya nimi yok soko nang edya sikja henga baknesilimeekanya, ono' sikenek guna' ak ab ara doboka bo yeiniboka, dilina' ak sam bo weknesilim. Anja adya, Satan migib adya loba' nenelesila' ak ab ara doboka, Imik Neyung migib arasina' ak sam dangiyiwanesilim. Wera danyek, sikja malya una' an memelesil, ono' sikda nak dib senenyeka' adya, Imik Neyung amba muna' gobdo un nimi danamak, anyok," hyok. 26:19 "Anasa neyung dubnya o, nadya ban Imik Neyung ak ab heng eiyiwoka domsa anyek, dib senewoka bleknenggumsa. 26:20 Anasa wera, nara hyak yeiriwoka nimi yok nim ek, ugunja ganya dangawoka, ono' ugunja nong enyek, Imik Neyung ak dib ganya ologoka lebnalumukanya, ugunja ununa' adya, ganya dib dangamoub an bekna' era amalemnelum, aboka neklesisa. Wera lendara eibsa dara, Damsyik heik ab leb einiwoka, ono' eimik era Yerusalem heikek uboka, Yudea sokok ab ara, Yahudi nimi gom nim ulumak nim ek hnon, lero yabalamsa," hyok. 26:21 "Anasa wera nenesa leboka, Yahudi nang edya nak Imik Neyung e eremek ab henga gouboka, nak dib obnenob aboka dulunyek. 26:22 Bok Imik Neyung adya nak soba' arawoka, wera nara sumen anyagan mek nang ek hnon, hnonda nauba nang ek hnon, ugun gangganek an sekoka, wera laga lel yibin an. Nadya nidya' wenyaboka lelesinya nenera, yoknya nek lenggulusin. Alda ununumna' len nang edya, hnon Musa bedya unuwanamla ak alameknya nenyek gigimoknya nek ok lelemna. 26:23 Wenyaboka lelemeknya nera, Imik Neyung alda Kristus nimi blebsina' dubnya sokok sam eleganesin amoknya bera, seleb gwekoka somogok dara, alda men youboka embenga' dangeinimoknya dangoka, wera dilina' yuba laga nenewoka lelemok. Yahudi nimi yoka' ak hnon, Yahudi gom nim ek hnon, dilina' yuba laga nenewoka lelemok," hyok. 26:24 Paulus bedya anam wenyaboka yuba garawoka leldalamok salek enyek, Festus bedya Paulus bek dobmoruwoka lemok ara, "Paulus o, anda hyak serema salawajok an. Anja yoka'-yoka' nauba ella dangalalam an adya, anda serema salawajok an," aboka lemok. 26:25 Bok Paulus bedya Festus bek, "Neyung dubnya perobnya o, nera serema salanena' orok. Nadya leboka salamna yuba mousa' salamna era, ganya loba' gologoka lenggulumna. Alda hyak dib nong lelemna," hyok. 26:26 "Dara, Agripa dubnya beneba, nera aldib lelemla senewoka ella ulunel. Wera anasa, nara alja hogung ak ara asa' ganya boboka lelemna. Ban nidya' lelenanya nera, hyak doknowoka unuwanggumok anasa, hnonok meka' siriga' anaba, alda eibnenggumoknya nera unggulumla senelamna. 26:27 Wera neyung perob dubnya Agripa o, neyung o, anda youma' ununumna' lelemek nang edya men lelemek yub enyek dib senelelam de? Nadya dara, neyung anda dib senelelama' ara ella ulumna," hyok. 26:28 Danyek Agripa bedya Paulus bek lemok ara, "Anja nak wene sab-sab Imik Neyung yuba doboka ganya dangawanamla senelenelem de?" hyok. 26:29 Bok Paulus bedya leboka' ara, "Nara Imik Neyung ak heng uboka mololamnya dara, or wene salek gom, mandewanamso gom anaba, na ulumna sok ugumba danasom ara, alda wera henga gobenyek heng enyek hnonok unuwanggunumso bok, na ulumna sok danasom aboka mololamna," hyok. 26:30 Wera danyek, Festus dubnya bera sekemookanya, Agripa mok soko damnya bek, alja gel Bernike geb, anyagan nidya' longomek nang eb, sikda nidya' sekemek. 26:31 Wera sikda beiyik goboka yibilemek dara, sik moumen leldalamekja, "Benyek dara, henga geregoka oboka gasa ek beiyiwoka dibneseng malya una' hnon, meknewoka una' orok bar," alamek. 26:32 Dara Agripa bedya Festus bek, "Paulus benyek dara, alja Kaisar dubnya bedya saramek sam yana lelewanenulum ana' orok dara, alak henga lobneseng bok ulumla," hyok.
27:1 Wera nunda mek ekla buna' adya Italia sokok binimab aboka seleb wenyabgegemek dara, yok henga goubuka beiyisik nang eb, Paulus beb dara, Kaisar bedya yin bona' nang dubnya si Yulius bek, anja bo binilam aboka alak elegemek. 27:2 Dara, nunda Adramitium heik ab yok mek ekla buna' ek, Asia sokok mek gemek ulumek heikek bununa' aboka umok mek ekla buna' ek bukuka lanawoka bilimouba. 27:3 Ampum maboka gwelegob seleb dara, ono' Sidon heikek byuba. Sidon heikek ara, Yulius bedya Paulus bek ara pe unuwoka, Paulus bera alja hemyab ek, or kemero yibilom hyok dara, Paulus bek okna uboka garan ulumok bona' hnon aramek. 27:4 Wera ono' Sidon heik ab uboka, mek ekla buna' pik lanawoka mek dubuk bukoka balamouba dara, kabo' adya nu balamouba pika garawoka ulusuk dara, Siprus mek dubuk soko eilibik pik ge moboka balamouba. 27:5 Wera anyaganyeb uboka senenggoma' anyek longowoka lobok mek dub pik, nera Kilikia moka hnon, Pamfilia moka hnon, neik berem ngeklubdarek ak mok eb uboka, Likia moka Mira heikek byuba. 27:6 Wera Mira heikek byubuk ab danyek, yok mek ekla buna' hnon Aleksandria mok eb ara, Italia moka heikek bununa' aboka ul yabok mek ekla buna' ek eiyiwoka, yin bona' dubnya Yulius bedya nuk mek ekla buna' enyegan doboka dibsuk. 27:7 Wera Italia moka balamoubuk ab dara, mek ekla buna' ara hyak mandewoka nemen balamouba. Wera hyak okna' ulusuk bok, mabgiga balamoub ara, Knidus mok era ok berem ubok bok, or hnomunga salya' ak byuba. Knidus moka heikek byubuk ab dara, kabo' anyek or soba' dolomoknya nenesa, men danyek anyan binimab senemouba pik era binggububa. Bok kabo' orok pik binob senebuba dara, Salmone moka yema amo' leboka Kreta mek dubuk soko pik byuba. 27:8 Wera hyak okna bok, hyak ganya igina kweboka, mek ekla buna' ak buka bilimoubnya nera, Lasea heik berem okan mek ekla buna' pe bulumla ak alamek ak sam byuba. 27:9 Ban unuwoka balamouba salek enyek, Yahudi nang edya sikja hekna' perob sum aboka memelemek sum era seleb unubgogomok. Anasa, salya' kabo' adya waboka obsununa' aboka ulumok adya, wera perob binisibya salek era seleb dengamok. Anasa wera, Paulus bedya sikinek wenewosuk ara, 27:10 "Hem yab o, nadya senenanya nera, nunda bindibiganamab dara, hyak nauba okna dabnesil. Nunda yoka'-yoka' heboka salya' lelem danamla. Nera nunja bomab bona' eb, nun buka yabalamab mek ekla buna' ok gom, alda nunja nong eneba nauba ob yangawanasil," hyok. 27:11 Bok yin bona' dubnya bedya dara, alda mek ekla buna' damnya beb, mek ekla buna' bolomek nang eb dadya, lelemek yub danyek dib senewoka, Paulus bedya lelemok yub ara, kebnenggumok. 27:12 Wera perob mek ekla buna' malamla ak ara perob gom adya, wera anyagan ara, saragena' li dara, kaboka mabdabnenggunumso anasa, wera mek ekla buna' gliboka bolomek nang nauba so edya dara, anyagan ara loboka saragena' li ubnalabok anasa, men Feniks moka binimab senemek. Feniks alamek heik era, Kreta mek dubuk sokok sam uboka, mek ekla buna' bul yalamok mek gemek ara, kemban dabo sam hnon, kemban woru sam hnon ulumok. 27:13 Dara ban salek era, woru sam ab kabo' enyek nemen dolomok dara, ono' danyek mek ekla buna' bolomek nang edya dara, or pe lanawoka balanob senemek. Wera igin yaka' dolinglemaka' ara glibsalawoka seleb gwanewoka doro beiyiwoka, Kreta moka gek sam ok dobgiga balamouba. 27:14 Bok ono' wene salek mandewanggonggom, yali sam dabo kabo' alamek kabo' enyek, mok soko doubuk sam ab ara dorogol yabok. 27:15 Dara nunja bukumouba mek ekla buna' ak kabo' wekoka olol yalamok. Dara, ngalenga' goluwoka bimenggom anasa, salya' lelem ok or bo balasulul aboka lomoubnya nera, kabo' mandebna' anyek nauba anasa sene ubdangamouba. 27:16 Wera nunda Kauda mek dubuk soko berem sekna gwanen ak so yabuba dara, mek mek ekla buna' enyek nauba mek ekla buna' ak bo yeiniboka pe geregemoba. 27:17 Mek mek ekla buna' seleb doro beiyimouba dara, wera nauba mek ekla buna' nidya' senenggom heng edya gasa norob ganagoka umek. Mek ekla buna' anyek Sirtus moka egenyak sam diboka malya ublyek aboka lok anasa, mek ekla buna' ak golulumek boksom enyek loboka doboka, kabo' doroklomoka' sunuwoka balamouba. 27:18 Bok senenggom kabo' ek dara, lobla henggonggom soba' obdibigosuk dara, ampum hnon maboka gwelegok dara, wera mek ekla buna' lomok sam bomouba bona' era, hnon doluwoka mek gwan dubuk bobok einimek. 27:19 Wera ono' ana gweleknek winilinya sum era, mek ekla buna' bolomek nang edya, sikja soruk adya mek ekla buna' alja bona' anaba mek gwanek sam bobogomek. 27:20 Wera nunda liga wen anam pikik balamoubuk ab dara, heng ab, gura' ab dara, meka' gobdo eilina' ara hyak eibnenggumouba dara, ono' kabo' nong anaba hyak soba' sounum-sounum aboka doldibilloklemok. Wera unulumok adya, wera nunja dara, embenga' merewanamab senena' era hyak gobdo dengarawosuk. 27:21 Wera liga wen mabek ara, gwaneng ara hyak gobdo denggumek. Dara Paulus bedya nimi hnoum gangganek sam sekoka lebok ara, "Hem yab o, ugunda men nadya lemsa yuba kesomokanya, Kreta sokok ab lanawoka yanggana' orok dara, unuwoka bona' yoka'-yoka' nidya' heboka bobogoka unuwanggunusibya bok," aboka lelemok. 27:22 "Bok ono' wenebabya ganya siklewoka ulululum aboka moloweisin. Wera nun nong ak dara, somokna' ara somoganggunumab bok, alda mek ekla buna' ak hnonok weiningganamab. Anasa, ganya siklewoka ulululum aboka nara ugunuk nauba leb wenewesin. 27:23 Anasa wera ousa inimnek enyek, nadya giblamna Imik Neyung alja lero edya nak yeiniboka lenelja, 27:24 Paulus o, anda lok ganya bona' ara mem. Anda Kaisar dubnya bek alja hogung ak binilam bok anasa, ono' Imik Neyung adya, alja anak perob ununa' edya anasa leboka anab neika' mek ekla buna' pik yabalelum nanga nidya' ara merewanalum, anel. 27:25 Anasa, hemyab o, ugunda hyak ganya siklewoka ulululum. Nara Imik Neyung adya nak seleb unuwanamna aboka wenyanel sok aldib unuwanamla senelamna. 27:26 Bok nunda eimik era, salya' yok mek dubuk sokok bo seingnel binisil," hyok. 27:27 Wera li meija dubuka' nong sum enyek, nunda Adria mek gwan dubuk sam anam bo gweblesuk. Wera hyak inimnek dukdukanek enyek, mek ekla buna' bolomek nang edya, seleb mek gek berem yanggab senemek. 27:28 Anasa wera, sikda girika henga geregoka sokok ara okan do aboka mek lomok sam sunuwanob aboka boro boblinggemek. Dara, mek lomok ara denga hnonok ebdobnya mekbadya meter so wareb ulumok eiyimek. Mek anam dara, ono' sunuwoka denga hnonok ebdobnya winilya meter so ulumok eiyimek. 27:29 Wera sikda mek ekla buna' ak sam welemek nang edya dara, mek ekla buna' ara girikek u dublyek senewoka, igin yaka' berelemak girik dombadya era, mek ekla buna' weilik sam boro boblinggemek seleb dara, wera ono' sikja dara, men berra aboka gwelegalya senemek. 27:30 Dara, mek ekla buna' glilimek nang era, men berra mek ekla buna' ak ab ara lo binob senewoka, sikda igin yaka' girik mek ekla buna' saramek sam boro boblingganamab aboka sene umeekanya, mek mek ekla buna' era mek sam doro doblinggemek. 27:31 Bok Paulus bedya sekoka, mek ekla buna' lomok an ulumek yin bona' dubnya beb, yin bona' nang ebdak lebsuk ara, " Mek ekla buna' glilimak nang enyek, nidya' anyagan unggulumeija dara, ugunuk dara, hyak merewanggunulum," hyok. 27:32 Anasa wera, yin bon nang edya mek mek ekla buna' heng era, ya mobenggemek dara, meka bo bilimok. 27:33 Dara, henga welda seknun aboka ul yabok salek enyek, Paulus bedya, ugunda nidya' hnon denelum aboka, duka' lolom-lolom hesuukanya wenhyok, "Hem yab o, ugunda wana' doluwoka, dena' denggulum salek era, liga meija dubuka' badya mab gwelegolum dara, yoka' hnon dena' orok. 27:34 Anasa wene salek meka' hnon del yabalelulum aboka orugeisin. Wera anadya ugunda nonga migib uboka blebnesil. Anya wera, ugunja hong dok hnonok sibin anababya denghenggunusil," hyok. 27:35 Paulus bedya ban seleb wenyaboka lebgogomok dara, alda roti gwanenga doboka, sikja saramek sam Wenelesilnya bek molowoka, soboka deb einiwok. 27:36 Dara, sikda nidya' ara ganya saawoka hegom asuukanya, neika' demek. 27:37 Nunda nidya' neik mek ekla buna' ak ulumouba nang era hiboka dara, denga sagobadya uboka ebdobnya nera hnabbadya nim ulumouba. 27:38 Dara, sikda seleb debgogomab senemek dara, yok bomek gandum doka nidya' mekek doboka bobogomek adya, mek ekla buna' jakman dangiyimek. 27:39 Seleb gwelek sirigok dara, ban eibik soko ara hek soko do senemek. Bok, perob egenya' sokok lomon denek sam eiyimek dara, or dara, banyagan salya' mal lobol binimab, senemek. 27:40 Dara, ban igin yaka' geregemek heng era men moboka, girik ara mek lomok lobonggeekanya, neik salek era mek ekla buna' powegellilimek gal ak heng geregemek heng anababya lob lobek. Ono', saramek sam kabo' don akleng kabo' doblul aboka sunuwoka nobek dara, mek gemek sam lanal byik. 27:41 Bok, ekla buna' era men yok mek lomok egenya' ak ikil byuk. Dara, mek ekla buna' u ara gasa darawoka ebegamenggom dok. Dara, mek ekla buna' ama' ak sam senenggom mek yakna' adya job menegok. 27:42 Yin bona' nang dara, henga gouboka beiyimek nang ara, mek gekoka diba' bindoweijek anasa, men obnob senemek. 27:43 Bok, yin bona' dubnya bera, Paulus bek blebnun senemookanya, sikja obnamab senewoka gegemeknya nera, or-or uboka sikliyimok. Alda mek gekna' ella nang ara men sakdo dorogoka mek gemek gekoka binilum aboka orugosuk. 27:44 Yok nang ak dara, ebelengna' jobdoba' gom, yok jobdoba' gom, salawoka mek gemek binimak senewoka orugomok. Ban unumek adya, sikda nidya' mek gemek blebdangoka bilimek.
28:1 Wera seleb pe eika' anyek embenga' bul byubuk ab danyek, wera anara Malta mek dubuk sokok yab senewoka ella douba. 28:2 Malta sokok an ulumek nim era, nuk hyak perob senewoka pe arawoka ulusik. Wera moka nauba bliboka ono' saragena' ul yabasuk anasa, anyagan heik yoka' nim edya uka lolowoka ul yabasik. 28:3 Wera ono' Paulus bera, alda uka daboka lekdanob aboka, gal eboka mamagoka ul yabok. Dara, alda gala ukuk sam beil yabok salek enyek, uka poba anasa, baga' hnon gobuka Paulus bedya alja soruk ek si singiwoka bel-bel al yabok. 28:4 Wera sik ulumek nim era, Paulus bedya soruk ak sam baga' hnon doldol yabok ak eiyimek dara, sik moumen lebdangdobekja, "Ban benera alda mek ekla buna' ak ab si dena' orok uboka' lobok ab dara, nunja yana lelesina' bisa' dubnya bedya alda or ululul aboka yeboka lobnenggubla anasa, alda aldib nim olesilnya be nong ara alan," aboka lelemek. 28:5 Bok Paulus bedya dara, baga' anyek ukuk sam blebdo dorogok dara, al nong ak hnon meka' oka denggumok. 28:6 Wera ono' wekemek nim edya dara, ousa era Paulus bera al wene salek somoganamla gom, orok dara, soruk ara nebnamla gom, senewoka diri seklemek. Bok nauba so diri sekwenemek bok, Paulus bedya nongok sam hnon yoka' ununa' orok dara, sikda ganya ebdangoka lelemekja, "Paulus bera aldib bisa' dubnya benya'," aboka lelemek. 28:7 Dara Paulus bek baga' si samok soko berem era, Malta moko soko damnya Publius bedya soko ek ulumok. Wera soko damnya bedya nuk hyak peroba' leboka, nadya ek yanalum aboka doro diyiwoka li winilya unuwosuk. 28:8 Ban salek enyek, Malta mok soko damnya Publius alja neyung bera hyak nauba saragena' ber-ber ana' neikna' salawoka diasa ab nauba ulumok. Dara Paulus bera naubenya neikna' salamoknya bek kemel biniboka, alja nong eilibik soruka diyiwoka heng uboka mololomok enyek, naubenya bera seleb meremok. 28:9 Paulus bedya ban unuwoka hwemok anyek nim okoka eiyiwoka, mek dubuk sokok an neiklemek nim era, Paulus bek yalamek dara, Paulus bedya sikenek meriyisuk. 28:10 Dara, sikda nuk yok-yok bona' nauba elegesik. Wera ono', nunda lanawoka binob aboka ul yabuba dara, nunja pikik beibya dara, anyek-anyek yak dara, bobsibya senemouba' nidya' ara mek ekla buna' ak sam bo elegel bilisik. 28:11 Wera nunda Malta sokok ara seleb wala' winilya ububa seleb dara, Malta sokok ab dara, Aleksandria mok eb mek ekla buna' era, saragena' li wenyek anyagan ulumok mek ekla buna' ek bukoka lanabuba. Wera ban mek ekla buna' saramek sekiyimek gal ak ara, sikja bisa' dub nang Kastor beb, Polluks beb danyek, sunuwoka garamek. 28:12 Wera nunda Malta sokok ab uboka dara, Sirakusa moka heikek biniboka anyagan ara li winilya mabuba. 28:13 Wera Sirakusa heikek mok eb era, mek gek berem ok bilimouba ara, Regium heikek lanal bilimouba. Wera anyagan ara, seleb li hnonok maboka gwelegoba dara, woru sam kabo' dorogok dara, ono' li penenya sum maboka gwelegoba gab danyek, wera Putioli moka heikek byuba. 28:14 Wera ono' Putioli heikek ab dara, Yesus yuba dib senewoka domek nang edya, nublaboka neika' deregoka maboka ubnemab anasa, yoululum aboka ebsik dara, sikeneblaboka neika' uboka mem sum hnonok gobdo uboka neika' juba. Wera nen seleb dara, Roma heikek lanabuba. 28:15 Wera hemyabo nanga Roma heikek ab dara, Yesus yuba doboka dib senewoka ulumek nang era, wera Paulus benya aroba' ara, wera Roma heikek an yalamak an yub kemek dara, sikda pika dibsinob aboka, Apius dekna' gasa ak hnon, dekoka malamak e winilya aboka simek heik sam hnon, pika dil yeilisik. Wera Paulus bera sik dil yeilisik nang eibok dara, Paulus bera Imik Neyung ak perob aboka giboka ono' alja ganya era hekoka sangamok. 28:16 Wera nunda seleb Roma heikek byuba dara, Paulus bera or henga lob loboka ambeyok ululom aboka, yin bonnya ben hnonok uboka neika' bo diri ulumok. 28:17 Paulus bera Roma heikek ara seleb li winilya mabok dara, Yahudi nang bok Roma heikek ulumek Yahudi dub nang ek yanalum aboka ebmamagesuk. Wera sikda seleb mamagel yeilimek dara, sikenek Paulus bedya lebsukja, "Hem yab o! Nara nunja mok soko ek hnon, nunja neyung yabo youma' nang ek ab domobnya nenyek hnon, laga blekoka hnon ubnenggumsa bok, Yerusalem heikek ab nak henga gouboka Roma nang ak elegel yanyek. 28:18 Roma nang adya nak yana lelewoka, obnemab senen malya una' era meka' orok anasa, senelenyek bok, 28:19 Yahudi nim adya nauba lolom-lolom amek adya, nara Kaisar Roma dubnya bek or yana lelewanenel aboka molomsa. Nadya heik yoka' nim ek loba' nenelesunun aboka unggulumsa. 28:20 Anasa, nara ugunublaboka neikik eibdangoka mek yuba sabnemab senemsa. Anasa leboka, Israeli nang adya eimik yanamlakanya blebnesil anasa diri ulumabnya benesa, Yahudi nang adya dara, henga goubenyek," hyok. 28:21 Dara, sikda alak wenyamek, "Nunda Yudea sokok ab ansamba leboka dara, surat sirik anaba dobnenggumouba. Ono' onoba' ara, hemyab edya anaba anyagan yeiniboka anja malya una' nuk neksina' ara hyak orok," hyek. 28:22 "Bok, nidya' yok-yok sokok ara, anja dololam yub anyek malya nenelesak ella ulumab anasa, anja dib senewoka dololam anyek, kebnob aboka diri ulenjab," hyek. 28:23 Dara ono', sikja Paulus bek anda sumenyek ansamba yana lelewoka lebnesilim anasa yanamab aboka leiyimek. Wera Yahudi nang edya Paulus bek an ululam ak yanamab amek sum era seleb yenebok dara, wera nimi nauba so yeilimek. Wera seleb yeilimek dara, Paulus bedya yeilimek nim ek, Imik Neyung adya senenggom wenesina' yub amba geklewoka laga yana lelewoka leboka, Musa bedya unuwanalum an yub eb, ununumna' lelemek nang edya hnon, Yesus anasa eimik era unuwanamla aboka lemeknya okoka laga poboka gararob aboka leb elegesuk. Wenyaboka yuba en lebdibigemok salek era luguna' eba' ara sin dok. 28:24 Wera Yahudi nang edya dara, hnon darasam nang era sonda' lelemla senewoka dib senewanggumek dara, hnon nang era dib senewoka ganya ologomek. 28:25 Wera Paulus bemba yuba sabnob aboka longomek ara, Paulus bedya yuba seleb lebgogomok dara, sikda nauba lolobdangoka goboka lo balamek. Paulus bedya lo balamek anasa sidya' lebdakamok yub ara ban: "Ununumna' lelemoknya Yesaya bek pik uboka, Geisinya adya nunja neyung yabo youma' nang ek lesuk yub era pe lebok. 28:26 Geisinya adya lebokja, Ban nim ek biniboka, anaso lebnesilim: Ugunda eimik era Imik Neyung yuba ken dara, kelemnelum bok, anyek lebsil e senewoka dara, pe ella danggunulum. Ugunda heng eilin dara, heng eillilimnelum bok, anyek ubla senewoka dara, okoka eilinggulumnalum. 28:27 Anasa wera, Yahudi sokok nim era ganya buguma dok. Sikja o nera lebdangamek. Sikja heng ak dara, heng ubek. Bok, sikda unubdangguseng dara, sikja heng adya kemedeneseng, sikja o adya, or kebneseng, sikja ganya anababya pe ella daneseng. Ban adya, nak ganya dangawoka, nara sikenek meriyiwanesisinya bok, wenyamok," hyok. 28:28 Paulus ban lemookanya ono' lemok ara, "Anasa wera, ban ak ella danalum. Imik Neyung adya nimi blebsina' damok yub anyek, yok soko nang ek sikenek leb elegeisinok aboka seleb orugosuk. Dara, sikda ban yuba kebnamak," hyok. 28:29 Seleb Paulus bedya ban wenyaboka lebgogomok dara, Yahudi nang sik moumen nauba lolobdangoka lo balamek. 28:30 Wera Paulus bera Roma heikek ara alja rupiah se' dekemok ek, gobdo gibna' penya ulumokok ab dara, nimi nauba alak yalamek dara, nidya' perob aboka doro dililisuk. 28:31 Dara, yoka'-yoka' adya Paulus bek igina kwelina' oroka' anyek, al nong ara asa' ganya boboka, Imik Neyung adya senenggom wenesina' yub ab, Wenelesilnya Yesus Kristus amba yub ab, dara anya' aboka geklewoka lelesuk.
1:1 Paulus bek ab, Kristus Yesus wa wenya, yuba lena' gaknya dalyekanya, perob lero yanggan yuba lero yabalalula' aboka, yalom hyoknya. 1:2 Ban alja' perob lero yanggan yub era, alja ununumna' lelemek nang, men sik pik uboka geisa Imik Neyung yuba momnya doboka' lomok wenyalasuk. 1:3 Alja me nek dara, nim ek sam dara, Daud nang yila' ak ab beibek; 1:4 bok Geisinya bedya geisa migib enedya, alja somokna' gangganek ab suboka embenga' bukuk anyeb, alda Imik Neyung me hyak migibnya, nunja' neyung Wenelesilnya, Yesus Kristus ulumla' laga nenebdoka' ara an. 1:5 Dara al si pik ab uboka, nunda wana' uboka eleksina' ab, yuba lena' gak wa dara, nidya' yok-yok mok soko nim era yub ak ganya dib dona' pik uboka pe keboka, sikda alja si nek aldib senewanok aboka dobub. 1:6 Ugumbabya sik gangganek ululumukanya, ugunda Yesus Kristus adya seleb bii aboka yoululum hyok nim ululum. 1:7 Ugunda Roma heik ululum nimi nidya' ara, wera Imik Neyung ara seleb wana' ulusuukanya, ugunuk muna' Imik Neyung mabo danalum aboka youbosuk nim ek ara, wana' uboka eleksina' ab, perob dangoka pe namena' una' ab danyek, Imik Neyung bek ab hnon, nunja' neyung Wenelesilnya, Yesus Kristus bek ab hnon, ugunuk arawoka bo ulusulul. 1:8 Hyak men dara, nadya' Imik Neyung bek perob aboka giblamna' ara, Yesus Kristus pik uboka, ugunja ganya yuba dib dobek an yub enyek, mok soko nidya' ol lelelamla' amba giblamna. 1:9 Nadya' ugunuk seinilisina' bekna' aldib ana' diba' ara, Imik Neyung adya, alja me nedya perob lero yanggan yub wa pik uboka, nadya ganya gouluwoka laga welemna pik an ella ulumla. 1:10 Nara soba' heng uboka mololamna dara, ugunuk beklesin. Anya, Imik Neyung senemlya dara, wera pe yeiniboka ugunuk younuna' aboka mololamna. 1:11 Hnonda kemel yanggubsisa salek era nauba mandewok anasa, ugunuk yanakanya, Imik Neyung amba wa wen migib nenena' amba perob ganya elekna' enyek, hnon eleganasin senelamna. 1:12 Wera banedya, neika' uwibyikanya, ugun pik uboka, ugunja yub ak diba' dolum ganya eb, nadya diba' domsa ganya eb, ugunub, nab neika' ganya meebdanasibya. 1:13 An nenyek ok gom, nadya hemyabo nang, alda nadya ugunuk younuna' ulumna damok enyek, ugunda ella danalum senelamna. Bok al danyek mouruwoka sumeneba, yok mok soko nim ek doka moulumla' eillilamna sok, ugunuk doka ulumlya' anyek eiblyek senewoka, yoka' adya salalenel. 1:14 Dara, Yunani nim gom, Yunani gom nim gom, sekolah dorob nang gom, dobnenggom nang gom, sikinek bol lona' dangalanel bok ulumna. 1:15 Wera ban nenesa, ugun Roma heik ululum nim ek, nara perob lero yanggan yuba era leb elegesisinya senelamna. 1:16 Perob lero yanggan yub ek dara, nara alya dabnenggulunel. Ban yub era Imik Neyung migiba' nong ak ulumlakanya, nimi nidya' dib senelemak nim, men nong dara Yahudi nim, dara ono' Yunani nim eneba bleblesil anasa, alya dabnenggulunel. 1:17 Imik Neyung adya peldisina' ara perob lero yanggan yuba pik ab laga dangalamla. "Pellililanya bera ganya dib senena' nong adyok ulumnamla," an wenyaro momnya dobok sok, ban Imik Neyung adya peldisina' ara ganya dib senena' adya mengewoka sidya' daklamla. 1:18 Dara nim ara malya ganya boboka malya ulumaknya nera, ban dib yub enyek siklilimak, anasa Imik Neyung adya yu ganya bona' ara imik ab nimi malya ulumak nang ek laga dangalamla. 1:19 Sikja Imik Neyung ak ella ubnesengnya nera, Imik Neyung ara sikinek seleb laga nenebdangamok anasa, siksamba bekna' laga ulumla. 1:20 Alak ab laga danganggulumla' ara, alja' migiba' ulmorulamla' ab, alja' Imik Neyung una' diba' an hnon, bok alja soko uyiwok salek ab mouruwoka, an penya damok era, seleb eillilimak anasa, eilinggulumaknya nera, anyeganyeb ella dangalamak anasa, sikda sene bobnenewoka anasa-anasa henggunuseng. 1:21 Wera sikda Imik Neyung ak seleb pe ella ulumek anyek babya, sikda alak Imik Neyung anaso' aboka si imik nenenggulumeekanya, alak perob aboka gibnanya neneba orok. Alda saawoka sikja ganya seinina' era salya' hwam dangalamookanya, sikja dongdang ana' ganya era guna' dangalamok. 1:22 Sikda geremseng uboka, pe ulumna nang eneso' seneldalamek bok, sikda hyak dongdang ana' hwam nang dangamek. 1:23 Dara sikda Imik Neyung adya' peroba' denghenggunumla' ara, lowoka nim anaso' sunulumaka' denghenelanya nenyek lunuwoka, wining anaso' gom, yoka'-yoka' ganya oroka' yan dombadya ulumla' anaso' gom, soko pik belega yabalelanya neneso' gom, anyek lunuwoka memelemek. 1:24 Anasa leboka, Imik Neyung ara sikda sikja unulusibya senen ganya era malya unuru yabana' ak lobonggosuk, wera anedya sikda sikja nong era malya neneldalamek. 1:25 Sikda Imik Neyung adya' dib nonga' ara sonda' lena' ab, ganya oroka' ak bera seboka gibna' anyek lunuwoka unulumeekanya, uyiwosuknya bek hyak soba' giblemnesenga' ara hibigek anasa, unuwosuknya nera, aldib. 1:26 Wera ban unulumek anasa, sikja gelewa era, pe salaldanya nera, unuwamenggomnya nenyek lunuwoka unulumek anasa, Imik Neyung ara sikja ban unulusibya senen ganya ek, alya nenesina' ak gwab losuk. 1:27 Dara sikja nenyab enebabya, sikja gelewa ek pe salananya nera loboka, sikda nengmab moumen anyek salaldalasibya ganya enyek bolomek. Anedya sikda hyak malya' elel nongnya nenyek unulumek ara, sik nengmab moumen salabdangdo balamek. Wera anasa, sikda sik nong ara anasa leboka diriganasila' ak domek. 1:28 Hnonda, Imik Neyung ak nunja' neyung anya' aboka laga len ganya enyek bona' orok anasa, sikda Imik Neyung adya ganya eiyiba darana' ganya enyek elegousuk. Wera anedya, sikda unuwamenggomnya nenyek unuru yabalamek. 1:29 An unulumaka' ara, hyak malya ganya hogung ok deknewoka, yu hwam ganya ab, nauba' dero bolosinya ganya ab, song ganya ab, hyak lek senen ganya ab, oldan ganya ab, waldan ganya ab, sonda' miniwoka len ganya ab, malya una' nang eb neika' hiboka, an ganya danyek unuru yabalamak. 1:30 Anasa ban sik nong ara, sonda' minin nang, nimi deresin nang, Imik Neyung ak lek senena' nang, malya unun nang, ganya imik neneldan nang, kebom-keboma meren nang, yu ununa' ak ganya hwibmouboka unun nang, nauba nim ek blekna nang, 1:31 pe geremseng ganya orok nang, bojam ganya bonggom nang, wana' senen ganya bonggom nang, anya yadyek anasa or arawounun ganya unggulumla nang. 1:32 Sikda Imik Neyung yub ara, ban neneso' anyek unulumeija nang era, somoganeseng hyok yub era seleb ella ulumakjok, ban ununa' era unulmorulumeekanya, ono' sikda yok nang edya anaso unuwanya neneba perob senewoka pelum alamak.
2:1 Wera anasa nim o, or anda heknyeneba, anda yok nang ek yana lelelelam bok, ambabya meknena' ak ab go' unggululam. Anda yok nim ek yana lelelesilimnya beneba, al neiknya nenyek ambabya unululama' anasa, anda yok nim ek yana lelelesilim salek era, wera an dam nang ak yana leleldalalam. 2:2 Bok Imik Neyung adya' igina kwena' ara, sik ban unulumak nang ek ara, pe domdigum sunuwoka unulusila' ara, nunda ella ulumab. 2:3 Wera anda nim o, anda sikenek anaso unulumak nang ek yana lelelesilim bok, anaso ununa' era ambabya unululama' anasa, anja dara nara Imik Neyung adya igina eleklesila' ak ara, merewanesom de? 2:4 Anasa anda alja' hekna' ganya ab, alja' or malye senewoka diri usin ganya ab, alja' sangarob ganya ab danera, wera dolbalek so senelelam de? Dara ban Imik Neyung adya' hekna' ganya anera, anak ganya dangawoka yuba dona' ak bo balenggela' ara, anda elgom ululam de? 2:5 Bok ban anja ganya gasa nong enyek, ganya dangana' orok adya, wera Imik Neyung be eimik waboka pe sunubdaboka yana lelewanasila' geknewanamla sum era, alja wema dabsina' ara, an dam nang doboka nauba bolololam. 2:6 Anasa, Imik Neyung ara, nimi yok-yok, alja unulamla' sunuwoka, gigiwoka diriganesil. 2:7 Wera an unuwanesila' ara, sik pe ganya gouluwoka peroba' diguma' ak unulumaka' ara, peroba' senenggoma' ak elemaka' hnon, si imik nenena' ak hnon, gigina' elemak nim ek hnon somoganggunumla' diguma' ak elemaka' hnon, anasa sik an nim ek ara, embenga' una' ak eleganesil. 2:8 Bok sik na pewanenelya' anyek senewoka ane digum anyek eboka, dib nong ak blekoka, malya' ak pe keboka unulumak nang era, yu sen-sen aboka wema dabna' damok ak sikenek eleganesil. 2:9 Malya una' unuru ulumak nang era, nimi yok-yok malya damok gwekna' ab, okna dabsina' ab dara, men youboka dara, Yahudi nim ek, anya dara, ono' Yunani nim ek hnon, sikinek yameb goluwanesil. 2:10 Bok peroba' senenggoma' ab, si imik nenena' ab, pewoka namena' una' ab dara, nimi nidya' pe unulumak nang edya dobnemaka' ara, men youboka dara Yahudi nang hnon, anya dara, ono' Yunani nang eneba, sikenek yameb goluwanesil. 2:11 Wera anera, Imik Neyung ara, hogunga ak kemewoka ununggululanya anasa, unuwanesil. 2:12 Wera anasa, nimi nidya' Yahudi nim emba unuwanalum an yuba oroka' anyek, malya unulumak nim era, Yahudi nim emba unuwanalum an yuba gonggom somoganamak. Bok nimi nidya' Yahudi nim emba oruksin yub eb malya unulumak nim era, wera ban Yahudi nim emba unuwanalum an yub edya yana lelewanasil. 2:13 Dara, ban unuwanalum an yub ek kena' ok kelemak nang era, Imik Neyung ganya adya dara, pemna' gebnenggunesil bok, alda ban Yahudi nim emba oruksin yub anyek, an wenyalamla' sunuwoka unulumak nang enyek, eimik era pemna' gebnesil. 2:14 Dara yok mok soko nim era, Yahudi nim emba unuwanalum an yub ek dara, sikenek ara una' orok bok, sikja ganya doboka an unuwanalum an yub adya unulululum alamla' an sunuwoka unulumak dara, wera sikda ban unuwanalum an yuba oroka' anaba, siksamba sik nong ara unuwanalum an yuba diba' ulumak. 2:15 Wera anedya, ban Yahudi nim emba unuwanalum an yub ulumla' ara, sikja ganya lomok momnya dobsuka', sikda laga amal dalamaka' ara an. Dara, sikja ganya ak yuba laga lena' ab, sikja ganya era pelama', meknelama' alamla' ab, wera anyek bekna' diba' ulumla' ara an. 2:16 Nadya perob lero yanggan yub lelemna' sunuwoka, nimi ganya lomok yoka'-yoka' doknolomaka' ulusila' nidya' ara, Imik Neyung adya Kristus Yesus pik uboka yana lelewanesil sum era, banera unuwanamla. 2:17 Bok anda Yahudi nang abdangoka, Yahudi nim emba unuwanalum an yub ak kwebmouboka, Imik Neyung amba leboka habmerenga nonggo aldalalam. 2:18 Hnonda Yahudi nim emba unuwanalum an yub adya neklesak adya, anda alja ganya ella uboka, nenyek peroba' malya' ara, nidya' ella ululam. 2:19 Anya anda heng lum nang amba pik abnanya uboka, sik guna' lomok ulumak nim emba dilina' ululam. 2:20 Dara, anda Yahudi nim emba unuwanalum an yub ek ab, anda yok-yok geremsenga', dib nongnya neb doboka ella ululam anasa, anda sik elgom nim eb, ganya kabnenggom nim eb damba, wenewoka neksinya ululam. 2:21 Anasa, anda yok nang ek neklesilimnya bera har so do? An dam nang dara, nekeldanggululam de? Anja neklesilima' ara, hoka' dona' mem aboka neklesilimjok, ono' hekasa an nong ara hoka' dololam do? 2:22 Anja lelelam ara, "Gela salya' salana' mem," alalamjok, ono' hekasa an nong ara gela salya' salalalam do? Anda nim uguma' e nek ara, u nebom aboka gamala' solololamjok, ono' hekasa anda e nenyek lalawoka dololam do? 2:23 Anda ban Yahudi nim emba unuwanalum an yub emba leboka, nonggo alalam bok, hekasa anda ban oruksin yub ek meknewoka, Imik Neyung ak derelelam do? 2:24 Anasa an unulum dara, "Wera ugun pik uboka, yok-yok mok soko nim era, Imik Neyung si ak derelemak," wenyaboka momnya doboka' ak ulumla. 2:25 Anda Yahudi nim emba unuwanalum an yub ek pe keboka unululam dara, bola' garana' ara perob dangalamla, bok anda anyek bleklelam dara, anak garawajeknya nera salya' lelem ub lobjek. 2:26 Wera anasa, sik anam bola' garawanggom nang edya ban Yahudi nim emba unuwanalum an yuba lelemla' sok sunuwoka pe unulumak dara, alda seleb bola' garananya beneso senewanggunuseng de? 2:27 Wera anaso dara, nim anam bola' garawanggomnya bok, unuwanalum an yub ak pe unululanya bedya dara, eimik era, an wenena' yuba damnya uboka, bola' garananya bok, anda ban Yahudi nim emba oruksin yub ak bleklelam anasa, alja anak yana kibnenggel. 2:28 Anasa Yahudi nang enya' ana' ara, nimek sam ak ok gom, anya bola' garana' ana' anaba, nim adya unulumaknya nek ok gom. 2:29 Bok yuba dolomla adya ok Yahudi nang ulumla ara an. Anya bola' garasina' diba' ara momnya dona' ulumla' sunuwoka nim adya unulusaknya nek gom, alda yuba dobna' adya, ana pik uboka ganya garalasila' anyek dib. Anasa benyek gigiwoka perob ana' ara, nimek ab lananggulumla, bok Imik Neyung bek ab lanalamla.
3:1 Wera anaso dara, Yahudi nang edya nauba' perob so' ara heka' do? Anya bola' garasina' ara hekamba ulusak do? 3:2 Wera, sikja nauba' perob so' ara, yoka'-yoka' amba hyak gong ulumla. Dara men nong ara, Imik Neyung yub ara sikenek men lobonggosuk. 3:3 Anasa, har so do? Wera sik gangganek hnon dib senena' orok adya, wera ban ganya enedya Imik Neyung adya bojam usina' era, oroka' gebneseng de? 3:4 Anaso gom, hyak orok! Alda ban momnya dobok sok, "Yok-yok anja yub ek ara, anedya anda aldib lelemla' ara, laga bekna' danamla. Dara, anak yana lelewananjak dara, oblamaganalam," an wenhyoka' anasa, wera Imik Neyung ok dib nong ulumlakanya, nimi nidya' ak dara, sonda' nang ok ulumak. 3:5 Bok ban nunja meknena' edya Imik Neyung adya peldisina' enyek an e wenyaboka laga gebnamso dara, nunda hek henesibya do? Nara nim ak adya an wenyhenemna, Imik Neyung ara alja wema debna' anyek laga danamso dara, alda pe sunuwoka ununggulusil wenyhenesibya de? 3:6 Anasa nera unuwanggunumso, hyak orok nong! Bok anaso unuwanamso dara, wera Imik Neyung ara, soko ak ara, heka' huboka yana lelewanamso do? 3:7 Bok Imik Neyung adya aldib nongnya nera nadya' sonda' lena' adya, alja si senenggom si imik nenena' ara nauba dangalamla dara, wera nara or anam wenebabya anda malya una'anya aboka yana lelem-lelem alanel ara hekamba do? 3:8 Dara anaso senewanesibya dara, ban hnon wenyhenesibya, "Wera nunda malyinya nok unuldibilloklonob, anedya anyeganyeb peroba' ara lanalamnamla," wenyhenesibya. Aldib, hnon nang edya dara, sikda nuk anaso wenyalamak alamak bok, nera sonda lelesak. Anasa banaso ganya bolomak nang era, sikda al igina dona' ok. 3:9 Anasa har so do? Wera yok nang eb dara, nuk peroba' ak ulumab de? Hyak gobdo orok nong! Wera men dara lebmabja, or Yahudi nang gom, Yunani nang gom, sikda nidya' seleb malya una' migiba' damumduk ulumak, 3:10 an wenyaro momnya doboka' ulumla sok, seleb lulum-lulum abmab ara, "Nimi hnonok sibin anaba, hnon pelemak nim era orok. 3:11 Dara, nimi hnonok sibin anaba geremseng ganya bona' orok. Anya, Imik Neyung ak ena' anaba orok. 3:12 Nimi nidya' ara, ben hnonok sibin anaba, perobnya nera hnon ununa' orok uboka, meknewoka malya ub menegoka, sikda salya' hwam ok dangamek. 3:13 Sikja denggorokna' era, nimi soko loklomna selenga' eneso' anyek si aklowoka, sikja silyum era pe maka' lelewoka, sikja sibama' ak ara, malya' si sabsina' yu' anyek ulumla. 3:14 Sikja sik ara, solom ganya boboka wema dabna' ok deknero lolomla. 3:15 Anya, sikja yan era enenga yekna' amba dara, hyak habmasa' nong ak yabalamak. 3:16 Anya, golol menekna' damok ab, ganya okna dabna' damok ab dara, sikja pikik sam ulumlakanya, 3:17 pe namena' neika' hiboka un pik era, sikda elgom ulumak. 3:18 Dara, Imik Neyung ak loka dabna ganya era, ban nang digum enyek ara, unggulumla," wenyaro momnya dobok. 3:19 Bok nunda banyek ella ulumab ara, yoka'-yoka' Yahudi nim emba unuwanalum an yuba lomok ulumla' ara, nimi sik ban Yahudi nim emba oruksin yub damumduk ulumek nang ek senewoka beibuk, anedya nidya' sibama' leboka, sokok me nidya' ara Imik Neyung adya' igina kwesina' lomok ulunok aboka unuwok. 3:20 Anasa wera, Yahudi nim emba unuwanalum an yub pik ab uboka, nimi nidya' ara, Imik Neyung saramek ara, nimi hnonok sibin anaba, peroba' nenena' orok. Oruksin yub era, malya una' ak pe ella nonga danok aboka ok ulumla. 3:21 Bok wenyek dara, unuwanalum an yub oroka' anaba, Imik Neyung adya peldisina' ara, oruksin yuba lomok ab, ununumna' lelemek nang buku lomok ab, seleb laga neklesuk sok, wera seleb laga gebsuk. 3:22 An laga geboka' ara, Yesus Kristus ak nimi nidya' dib senelemak nim emba, Imik Neyung adya peldisina' ara, laga dok. Wera anasa, nera yok nang enya' senen ganya era, hnon unggulumla. 3:23 Anasa, nimi nidya' ara seleb malya umeekanya, Imik Neyung adya alja' senenggoma' si imik nenena' ara, seleb sokol lona' dangalamla, 3:24 bok wana' uboka eleksina' adya, Kristus Yesus pik uboka malya una' ak ab seleb muna' dekoka dobsuka' adya, or go' peroba' nenelesil. 3:25 Anera Imik Neyung adya men, ganya dib senena' anasa leboka, Yesus eneng pik enyek anyeb nimi malya una' amba deksulul aboka, Kristus Yesus ara nim amba elegosuk. Alja or unulunok senelemok salek, unulumek malya una' era anesemba hnon yoka' unuwanggubsuk anasa, wenera alja ban unuwoka' damok ara, alja' pe ununanya nera anaso abdok ara an. 3:26 Ban unuwok ganya era, wen ulumab salek enebabya, alja pe unusina' ara laga dolula' aboka unuwok. Anedya alda dib nongnya ulumlakanya, nimi Yesus ak dib senelemak nang era peroba' nenesina' ara laga dolul aboka ubuk. 3:27 Wera anaso dara, nunda nonggo abdanesibya' damok ara, heka' ak ulumla do? Hyak orok! Har damok ek nonggo abdanggunusibya do? Yoka' unuwanalum an yuba pe unun damok emba leboka de? Nene gom, alda nimi ganya dib senena' nong amba leboka dara, nonggo abdanggunusibya. 3:28 Nunja dib senelemaba' nong ara, nim ara Yahudi nim emba unuwanalum an yub ek sunuwoka unulamla' adya perob nenenggulusil, alda ganya dib senena' nong adyok peroba' nenelesil. 3:29 Goma, Imik Neyung ara hnon Yahudi nang emba Imik Neyung ok ulumla de? Alda yok mok nim amba Imik Neyung ulumla do? Wera al an, aldib. Alda yok mok nim amba hnon, sikja Imik Neyung ulumla! 3:30 Wera an lebna' ara, an nenyek lebna. Dara, al neik Imik Neyung edya sik seleb bola' garaweisik nang era, ganya dib senena' adyok peroba' nenewanasilikanya, bola' garawanggom nang eneba, al ganya dib senena' adyok, peroba' nenewanasil. 3:31 Wera an unuwanasil dara, nunda ban ganya dib senena' anasa leboka, Yahudi nim emba unuwanalum an yub ara orok nenelemab de? Hyak mem! Alda anyek, hyak pe migiba' geboka unulumab.
4:1 Wera anasa, nunja' neyung yabo sikja' neyung Abraham be hyak youma' ulumoknya bemba dara, hek henemab do? 4:2 Abraham bera alja perobnya unulumoka' amba leboka perob nenemso dara, alda ban damok enesa leboka, nimek ak dara, or hama' dakdo merewanasobok, Imik Neyung saramek ak ara, unuwanggunumso. 4:3 Anasa Imik Neyung yuba momnya doboka' ara, hek alamla do? "Abraham bera Imik Neyung ak dib nong senewok dara, ban unu bobok ganya enesa leboka, Imik Neyung ara alak peroba' nenewok," wenyalamla. 4:4 Nimi be hnon wa arawoka welemla dara, alda wa webna' amba dekna' ara, or salya' perob aboka eleknenggulumak, bok aljinya dangamla' anasa senewoka, sunuwoka eleklemak. 4:5 Bok nimi be hnon, peroba' nenebdonun senewoka wa wena' orok bok, alda nimi wona' dangamek nang peroba' geblesilnya bek, aldib senelamla dara, benera alja ganya dib senena' era, peroba' nenena' ak geblamla. 4:6 Dara, nim Imik Neyung adya alja unulamna' amba gom, alda ganya dib senena' amba peroba' nenelesil nang era, pe ulumaka' ara, neik so Daud bera an nenesemba leboka' ara, 4:7 "Nimi sikja blekdo balamaka' anyek meewoka, sikja yok-yok malya una' siklildilisil nang era, pe ulumak. 4:8 Nimi hnon alja malya una' era, Imik Neyung adya alak, malya ululam aboka yana lelenggululanya bera, pe ulumla," wenhyok. 4:9 Ban pe ulumak wenhyoknya nera, bola' seleb garaweisik nang emba ok lebok gom, ono' bola' garanggulusak nang eneba, hnon siksamba lebok gom? Dara, nunda seleb wenyabmaba' ara, Abraham bera ganya dib senemoka' nong adyok peroba' nenewok. 4:10 Nera har sam ak ban nera peroba' gebok do? Alda anam bola' garawanggumek bok gom, seleb danyek gom? Seleb garawek danyek unuwanggubuk, bok men anam danyek perob senewoka peroba' nenewok. 4:11 Dara, alda anam bola' garawanggumek bok, alja ganya dib senena' adya alak peroba' nenemoka' ara, seleb ulumoka' anasa, ban bola' garana' ara, bekna' diba' momnya dona' ak dib denena' anaso' ak ara, dobok. Wera anasa, alda nimi nidya' bola' garasina' orok dib senelemak nang edya sikja' neyung be dok, anedya ban peroba' nenesina' ara sikbabya dobnok aboka unuwok. 4:12 Anya, hnonda nimi bola' gararob nang, nunja' neyung youma'anya Abraham, alda anam bola' garawanggom danyek mouruwoka, alja dib senemok ganya so' enyek, dililda doboka dib senelemak nang emba hnon, sikja' neyung be dok. 4:13 Anasa Abraham beb al nang yila' ak, ban soko en alja' danamla amoka' ara, unuwanalum an yub amba leboka lebnenggusuk. Bok alda ganya dib senemoka' nong anasa leboka, peroba' nenewoka pik enyek anyeb uboka, ban mok soko amba lebsuk yub era, domok. 4:14 Dara nimi sik ban Yahudi nim emba unuwanalum an yub pik ek ab uboka, ganya welemak nang era, Imik Neyung adya unuwanesin hyok yuba hnon dolomak dara, wera ganya aldib senena' ara, salya' hwam dangalamlakanya, ban wenyhusuk yub era dib danganggulumla. 4:15 Wera nimek wema dabna' ara, oruksin yub edya lanaldilimla. Bok, hanyegarek unuwanalum an yuba unggulumla' ak ara, wera anyeganera, meknena' anaba unggulumla. 4:16 Wera anasa, unuwanesin aboka leboka' damok ara, ban ganya aldib senena' anyek sunuwoka unuwok. Anedya, ban unuwok ganya era, wana' uboka eleksina' anyek laga dangalalul aboka ubok. Anedya ban Imik Neyung adya unuwanalum an yub era, sik Yahudi nim ok gom, alda sik nim Abraham bedya dib senemok ganya enyek sunuwoka unulumak nang anaba, sikda nidya' ara, unuwanesin aboka leboka' dobnok aboka unuwok. Wera, anera Abraham bera nunda nidya' hiboka amba, nunja' neyung be ulusil. 4:17 Nera an momnya doboka' ak ulumla sok, "Nadya anda an nang yila' yok-yok mok soko ulumeija ara, nunja' neyung alamnenjak." Wera ban Abraham bera, Imik Neyung ak dib senemok. Dara, Imik Neyung adya ganya era, nuk ara, sikja neyung bera an senelamla. Wera ban Imik Neyung era, somogamna nang embenga' nenelesilnya, anya alja yub adyok unggulumla' ara ulumla' nenelelanya. 4:18 Dara Abraham bera ganya gologoka dib senewanamso' damok ara orok bok, Imik Neyung adya alak, "An nang yila' ara hyak gong danamak," wenyamok yub enyek ganya dib beiliwoka aldib senemok. Anedya alda yok-yok mok soko nimi gong amba, sikja neyung be dok. 4:19 Dara, al ulumok salek era gibna' ara denga dombadya berem lemoka' anasa, nong migib una' ak sam ara, hmeng dangoka, ala' gel Sara gera me wola' lebemoka' ara, nenera alda ella ulumok, bok alja ganya aldib senena' ara, hmeng danggumok. 4:20 Dara Imik Neyung adya an wenyamok yub ek sam ara, alda sonda' senen ganya ara, bo enggulumok, bok alda aldib senen ganya ek migiba' geboka Imik Neyung si imik nenelemok. 4:21 Imik Neyung si imik nenewoka, hyak aldib senelemoka' ara, Imik Neyung ara alja or heka' ok unuwanamna amna' ara, al migib adya gigiwoka unululanya senelemok. 4:22 Wera anasa leboka, peroba' nenena' ara, alak gebok. 4:23 Anasa ban "peroba' nenena' ara, alak gebok," wenhyoknya nera, Abraham bemba ok leboka momnya dobnenggubuk. 4:24 Bok numbabya, nunja' Wenelesilnya Yesus ara somokna' nang gangganek ab subuka bukiyiwoknya alak aldib senelemab anasa, wera nuk anaba Imik Neyung ara peroba' geblesil. Anasa ban yub era nusamba hnon momnya dobok. 4:25 Dara, Yesus ara nunja meknena' enesa leboka, doboka elegok bok, nuk perob nenewosununa' aboka embenga' subuka bukiyiwok.
5:1 Wera anasa, nunda ganya aldib senena' adya peroba' nenelesil nang era, nunja' Wenelesilnya Yesus Kristus pik uboka, nunda Imik Neyung ab neika' hiboka ganya namena' ulumab. 5:2 Dara ban ganya aldib senelemaba' adya, nunda al pik uboka, perob elekna' ban pik era seleb doboka ulumab. Anya, nunda ban perob eleksina' pikek ulumabakanya, Imik Neyung adya' peroba' senenggoma' ara, dobnemab senewoka, ganya weboka bolboloklemab. 5:3 Anya nenyek ok gom. Alda nunda ganya igina daboka una' ara, ganya gouluwoka una' damoka bo lanalamla' ara, seleb ella ulumaba' anasa, nunda nunja ganya okna dablesila' anaba bolboloklemab. 5:4 Dara ganya gouluna' ak ab dara, ganya siklebdaboka una' damoka lanalamla. Anya, ganya siklebdaboka una' ak ab dara, ganya wena' damok lanalamla. 5:5 Anya, Imik Neyung adya wana' usina' diba' ara, Geisinya ara, nunja ganya lomok seleb elegousuka' anasa, ban ganya we una' adya dara, soloma nenenggulusil. 5:6 Wera anasa, nunda anam hmeng ulusuk salek, Imik Neyung adya ban salek enyek senemoka' sunuwoka, Kristus ara nunda wona' dangamoub nang emba seleb somogosuk. 5:7 Anasa nimi be hnon pelelanya bemba dara, somokna' ara okna so, bok perobnya bemba danyek leboka, nimi hnonda li hnon, or somogonun senewanamso. 5:8 Anaso bok, nunda anam malya una' bo ulumoub salek, Kristus ara nusamba seleb somogok pik uboka, Imik Neyung adya alja yadyek ulusila' laga dangalamla' ara an. 5:9 Anya, nunda wera alja eneng edya seleb peroba' nenewosuka' anasa, hyak nauba so ara, nunda Imik Neyung bedya wema daboka osina' ak ab dara, blebnesil ok. 5:10 Wera, nunda anam isa' gebdangoka ulumoub salek eneba, Imik Neyung bera alja me somogok pik uboka neika' hiyiwosuka' anasa, dara wen nunda neika' hiyiwosuk nang era, nauba so ara, wera alja embenga' una' edya blebnesil ok. 5:11 Anya ono' nenyek ok gom! Hnonda ono', nunja Wenelesilnya Yesus Kristus al pik uboka, nunda ban neika' hina' dobuba' anasa, wera nunda Imik Neyung lomok uboka bolboloklemab. 5:12 Wera anasa, neikik malya una' ara sokok anara hnonoknya pik ab lanawookanya, an malya una' enedya somokna' damok lanawok. Wera an unuwoka nidya' nang ara seleb malya umek anasa, ban somokna' damok era nimi nidya' ak ob lelewok. 5:13 Anasa Yahudi nim emba unuwanalum an yub anam lanawanggom bok, malya una' ara men sokok an ulumok. Wera an bok, oruksin yub ak una' orok dara, malya una' ara, anya' senewangguneseng. 5:14 Wen senewangguneseng bok, somokna' damok ara, Adam be ulumok salek ek ab ara, mouruwoka Musa be ulumok salek era seleb ob lelewoka ulumok. Hnonda Adam bedya blekemok malya una' era, yok nang eneba, neiksonya nenyek malya unggulumek bok, sikinek hnon ob lelewoka ulusuk. Dara, Adam bera eimik yanamoknya be sununa' so ak ulumok. 5:15 Bok Imik Neyung bedya perob elekna' ara, Adam bedya meknemoka' anaso gom, yok so. Wera hnonoknya bedya meknena' enesa leboka, nimi gong ara somogomek bok, hyak nauba so ara, Imik Neyung adya wana' uboka eleksina' ab, Yesus Kristus be hnon pik uboka perob elekna' ab, nimi gong anasa leboka hmaboka elegousuk. 5:16 Dara ono', hnonok meknena' amba yana lelen dara, igina kweboka dona' an seleb lanawok. Bok meknena' gong amba leboka perob elekna' elegousuka' ara perob nenesina' an lanawoka' anasa, hnonoknya bedya meknena' adya dangamoknya nera, ban Imik Neyung adya perob elekna' eb dara, domdigum danganggulumla. 5:17 Anasa, hnonoknya bedya meknena' enesa leboka, wera ben pik ab uboka somokna' damok ara, ob lelewok dara, nauba so ara, nim Imik Neyung adya perob eleksina' doboka, hmaboka peroba' geblesil nang ek dara, ban hnonoknya Yesus Kristus adya, ob lelewoka embenga' ulmorulemnemak. 5:18 Anasa neikso, be hnonoknya bedya meknena' enesa, nimi nidya' ara igina dobek sok, be hnonoknya bedya pe unuwoknya nedya, nimi nidya' ara embenga' ulunob aboka peroba' nenena' ara, dolomak. 5:19 Anasa, be hnonoknya bedya blekna' edya, nimi gong ara malya una' nang dangamek sok, ono' be hnonoknya bedya pe keboka unuwoka' adya, neik so nimi gong ara peroba' nenelesil. 5:20 Bok meknena' hwam ok dangalalul aboka, unuwanalum an yuba hnon makok. Dara, hanyagarek meknena' hwam ok gong danggiga balamla' ak ara, wera wana' uboka eleksina' ara, sounum-sounum abgiga balamla. 5:21 Anedya, malya una' ara soko me nidya' ob lelewok sok, nunja' Wenelesilnya Yesus Kristus pik uboka, wana' uboka eleksina' anaba, perob nenesin pik uboka, embenga' ulmoubna' amba ob lelewanamla.
6:1 Wera anaso dara, nunda hek henemab do? Wera ban wana' uboka eleksina' ara nauba danggiga balalul aboka dara, malya una' ak unuldibilloklemnemab de? 6:2 Anaso dara hyak mem nong! Nunda malya una' amba seleb somoganggubub de? Anasa nunda malya una' ak unuldibilloklemnemab dara, nera hyak okna so. 6:3 Anya nunda nidya' Kristus Yesus lomok seleb diba' meka dabsik nang era, wera al somogoka' lomok seleb dabsika' ara, ugunda elgom de? 6:4 Wera anasa, al somogoka' lomok meka dabsik dara, nunda al ab neika' soko lokosik. Dara, Neyung bedya si senenggoma' adya Kristus ara somoklomak nang gangganek ab embenga' subuka bukiyiwok sok, eimik era numbabya wenyok embenga' una' lomok ulumnemab aboka, neika' soko lokosik. 6:5 Anasa nunda seleb al somogoka' ak neika' hnonok ok doub dara, wera ono' eimik era, al embenga' subuk ak neika' hnonok ok danamab. 6:6 Nunda ella ulumaba' ara, nunja malya una' nong migib era denghelyekanya, nunda malya una' ak kebijek aboka dara, nunja youma' ulumoub ganya nong era, seleb alab neika' gal dubuk glaboka bo somogosuk. 6:7 Anasa heknyek seleb somogok dara, alda malya una' ak ab seleb lob lobok. 6:8 Wera anasa, nunda Kristus ab neika' somogoub dara, nunda eimik era al ab neika' uru balamnemaba' ara, aldib senewoka nunda ella ulumab. 6:9 Nunda seleb ella ulumaba' ara, Kristus ara alda somokna' nimi gangganek ab seleb embenga' subuk anasa, somokna' damok ara hnon alak ol lelenggulumla' anasa, alda saawoka ono' hnon somoganggunumla. 6:10 Dara al malya' una' amba leboka al somogoka' ara, lika hnonok hyak muna' gobdo unubdakookanya, al embenga' ulumla' ara, hyak muna' gobdo Imik Neyung amba ulumla. 6:11 Wera anasa, nunda malya una' amba leboka seleb an unu somogomouba, bok Kristus Yesus lomok Imik Neyung amba leboka embenga' ulumaba' ara, ugunda nenyek hyak al dib senewoka, pe beklemnelum. 6:12 Anasa ugunda malya una' ganya anyek diliwoka unuwoumunuk aboka, ugunda malya una' ara, an somoganamla nong enyek an or welenulul senena' ara mem. 6:13 Ugunja nonga, yana, soruk ara, nim on mal yin eneso' ak, ugunda malya una' amba eleknenggom, mem. Bok ugun nong ara, nunda youma' dara seleb somokdomoub bok, wera embenga' ulumab senewoka, Imik Neyung ak eleklelulum. Anya ban ugunja nonga, yana, soruk ara, perob nenesin mal yin geblelul aboka, Imik Neyung ak eleklelulum. 6:14 Ugunda unuwanalum an yuba migib lomok unggululum, bok wana' uboka eleksina' migib lomok ululuma' anasa, ugunuk malya una' migiba' adya hnon gologanggunusil. 6:15 Anasa har so do? Nunda wana' uboka eleksina' lomok ulumabakanya, unuwanalum an yuba lomok unggulumab anasa, nunda malya una' ak unubgiga balamnamab de? Orok! Anaso ununggulumnemab, hyak mem nong! 6:16 Ugunda hnonnya bek biniboka, nara anja wa wenya danamna aboka bo elegeldal balalum dara, ugun nong ara ban benedya wa wenya dangoka, alja yuba pe keboka unululum ara, ugunda anam elgom ululum de? Anasa, ugunda malya una' ak elegel dalalum dara, somokna' ak bo balenggel. Bok pe keboka ununa' ak elegel dalalum dara, peroba' nenena' ak bo balenggel. 6:17 Ugunda youma' dara, malya una' adya wa wen nang ululum bok, wera ugunda ugunuk neklesika' ak ganya gouluwoka pe keboka unululuma' anasa, Imik Neyung ak pe giblenob. 6:18 Ugunda malya una' ak ab seleb lob lobsuukanya, pe una' adya wa wen nang dangalum. 6:19 Nara ban nim adya' lelong sok wenyhenya nera, ugunja hmeng enesa lebna. Anasa ugunja nonga, soruka, yan era, youma' dara, sembeja'anya beb, wona' una' nauba danggiga balamla' ak, sikja wa wen nang aboka bo elekdangalum sok, neikso wenebabya ugunda ugunja nonga, soruka, yan era, pena' adya ban pe muna' gobdo una' ak bo balanggela' anyek, alja wa wenya aboka bo elekdanalum. 6:20 Ugunda malya una' adya wa wenya dangoka ululum salek era, pe una' migib ak ab dara, seleb pika garabdangoka ululum. 6:21 Anasa an youma' unululumnya nera, wen banyek bekoka, dara alya ulusila' amba dara, anasemba perob so' digum ara, heka' ak dololum do? Ban anaso una' nidya' ara, sidya' nong ara, somokna' ak dangalamla. 6:22 Bok wenera, ugunda malya una' ak ab seleb lob lobsuukanya, ugunda Imik Neyung bedya wa wen nang doulum. Dara, banedya peroba' dolumnya nedya pe muna' gobdo una' ak bo balasilikanya, hyak sidya' nong ara embenga' ulmoubna' dangalamla. 6:23 Malya una' adya dekna' ara, somokna' damok ak ulumla, bok Imik Neyung adya perob elekna' era, nunja Wenelesilnya Kristus Yesus lomok ulumla embenga' ulmoubna' una' ak ulumla.
7:1 Hem yabo nang o, nimi hnon anam embenga' ulumna salek ok, unuwanalum an yub ara bo ulumla ara, nara ugunda unuwanalum an yuba ella ululum nang ek wenyalamla' anyek bok, ugunda anam ella unggululum de? 7:2 Anasa sununa' ara, gela hnon alja nenya anam umna salek ok, unuwanalum an yub adya ala' nenya ak ganya malamla. Bok alja nenya somoklamla dara, ban ganya era unggulumla. 7:3 Anasa alja nenya anam ulumla salek, alda yoknya bedya gel dangalamla dara, alak ara mouna kwelemla gel genya' alamnamak. Bok alja nenya seleb somogan enyek, alda yoknya bedya gel dangalamla dara, unuwanalum an yub ek ab go' dangalamla anasa, mouna kwelemla gel genya' wenyanggulumla. 7:4 Anasa, nadya' hemyabo nim o, ugunda yoknya, nimi be hnon somokna' nim gangganek ab embenga' subuka bukuknya Kristus aljinya dangoka, Imik Neyung amba doka moulunok aboka, ugunda Kristus nong pik uboka, unuwanalum an yub ak seleb somok irigoulum. 7:5 Anasa nunda malya una' ganya lomok anam ulumoub salek era, Yahudi nim emba unuwanalum an yub adya dara, malya una' ganya ek onowoka, nunja ganya nong lomok welemok adya, somokna' damok ak bo balasuk. 7:6 Bok wenera nuk ganagosuknya bemba, nunda alsamba seleb somogoka' anasa, nunda unuwanalum an yub ak seleb blebsuk. Wera anasa, nunda wenera wenyoknya nera Geisinya bek sunuwoka welemabakanya, youma'anya orukna' yuba momnya domoknya nek sunuwoka wenggulumab. 7:7 Anaso dara, wenera nunda hek henemab do? Dara, ban Yahudi nim emba unuwanalum an yub ara, malya' de? Anaso gom, hyak orok nong! Alda ban oruksin yuba pik uboka, nara malya una' anya' senena' ara, okoka bekna' ella ulumsa. Anasa an orukna' yub adya, "Nim adya' ara, dobsinya senenggom mem," wenyanggulumnamso dara, nababya nim adya' ak dobsinya ganya era, heka' ak do senewoka ella danggunusinya. 7:8 Bok ban unuwanalum an yuba lanawok dara, malya una' ara, nadya' ganya lomok ara yoka'-yoka' ak unun ganya lanalenyok. Malya una' ara, unuwanalum an yuba gonggom dara, debdoba' dangalamla. 7:9 Men dara, nara unuwanalum an yuba gomgom ulumsa. Bok ban wenesin yub seleb yok danyek, malya una' ara ebek einiwok adya, nara somogamsa. 7:10 Anasa, ban wenesin yub era embenga' ak bo binineso' anyek bok, nasamba dara, somokna' ak bo balanyok. 7:11 Anera ban orukna' yuba lanawok dara, malya una' ara, ban salek era, nak sonda leboka, an orukna' yub pik uboka alda nak onyok. 7:12 Anasa Yahudi nim emba unuwanalum an yub ek dara, geisa' ak ulumla. Anya, ban wenesin yub enebabya, geisa' ab, dib nong ab, peroba' ab, ulumla. 7:13 Wera anaso dara, yok peroba' digum adya nasamba hnon somogana' danamso de? Hyak orok nong! Bok alda malya una' ulumla' ara, laga doulul aboka dara, malya una' ara nak somokna damba, ban peroba' pik unulamla. Dara ban wenesin yub anedya malya una' ara al bekna' malya una' nong ulumla' ara laga geblamla. 7:14 Anasa, nunda seleb ella ulumab ara, ban Yahudi nim emba unuwanalum an yub era, ganya ak ulumla. Bok nara nimi nong ak ulumnakanya, malya una' migib lomok beilinel. 7:15 Anasa nadya unuwanamna senenanya nenyek dara, nara ununggulumna, bok nadya lek senenanya nenyek, nara unulamna. Dara, hekasa anaso unulamla' ara, nab okoka elgom ulumna. 7:16 Wera anasa nadya unuwanggunumna senenanya nenyek unulamna dara, anedya nara ban unuwanalum an yub ara peroba' anya' alamna. 7:17 Wera anaso dara, na nong adya ununggulunabok, alda na lomok ulumla malya una' edya unulamla. 7:18 Anasa nara ella ulumna' ara, na nimi nonga ulumna' ak ara, yoka' hnon perob so' diguma' ara unggulunel, orok. Na pe unuwanesinya bekna' era ulunel bok, peroba' amba ununanya nera, unggulumla. 7:19 Anedya nara perobnya unuwanamna senelenanya nenyek ununggulunabok, alda nadya lek senenanya malyinya yunya nenyek, unulamna. 7:20 Wera anasa, nadya lek senenanya nenyek unulamna dara, anera nadya ununggulunabok, alda na lomok ulumla malya una' enedya unulamla. 7:21 Wera an unulamla adya, pik enyek anyeb nara ban unuwanalum an yuba damok enyek ella ulumna' ara, Nara perobnya nenyek unuwonun senewan dara, wera ban malyinya nera nak an ul ganaklenel. 7:22 Anara nadya' ganya lomok ara, Imik Neyung adya unuwanalum an yub enyek hyak perob senelamna adya. 7:23 Bok nara eillilamna' ara, nadya nong lomok ara, yok unuwanalum an yuba damok edya nadya' perob ganya damok enyek olgoklamlakanya, nara nadya' nong pik nidya' ulumla malya una' damok edya henga geregoka beiyimna' geblenel. 7:24 Na anara, nimi si lebnenanya hyak omom nong ak ulumna! Anasa heknedya na an somoganamna nong, somokna' ak ab dara, blebnenel do? 7:25 Bok Imik Neyung adya nunja Wenelesilnya Yesus Kristus pik uboka blebnyok anasa, alak ok giblenob! Anasa nara nadya geremseng ganya ak sam ara, Imik Neyung adya unuwanalum an yub amba welenabok, nadya nong una' ak sam ganya era malya una' damok wa amba welemna.
8:1 Anasa wenyek dara, sikda Kristus Yesus lomok ulumak nim ek ara, igina kwena' ara unggulumla. 8:2 Dara Kristus Yesus pik uboka, unuwanalum an yub edya embenga' una' eleklesil Geisinya damok migib adya, ugunda malya una' damok ab, somokna' damok ab, seleb lob lobsuk. 8:3 Anera Yahudi nim emba unuwanalum an yub ara, nimi nonga hmeng adya, pe gigiwoka unuwamenggom anasa, Imik Neyung ara, ala' me yoka' anyek, malya ulumak nimi nonga nenewoka bokol yookanya memewoka' ara, malya una' ak nenesemba leboka igina kwena' elegok. 8:4 Nera, unuwanalum an yub adya anyek-anyek unulumnelum alamoka' anyek, nimi ganya ak sunuwoka unulumak nang ek gom, alda Geisinya bedya ganya ak sunuwoka unulumak nang ek gigiwolul aboka an unuwok. 8:5 Anasa sik nimi ganya ok sunuwoka ulumak nang era, nimi ganya adya seinilamla ganya ok seinilimak. Bok Geisinya bedya ganya ok sunuwoka ulumak nang era, Geisinya adya seinilamla ganya ok seinilamak. 8:6 Anasa nimi ganya adya seinililanya nera somokna' damok ak ulumla. Bok Geisinya adya seinililanya nera embenga' una' ak hnon, ganya pe namena' una' damok ak hnon, ulumla. 8:7 Dara nim adya ganya seinina' era, alda Imik Neyung adya unuwanalum an yub ak ganya beildanggulumla anasa, Imik Neyung adya isa'anya ulumla. Anasa aldib, ban yub enyek dara, alda hyak okna ak ulumla. 8:8 Anasa sik nimi ganya seinina' ok unuru ulumak nang era, Imik Neyung bek ganya hekel dinggulumak. 8:9 Bok Imik Neyung Geisinya ugun nong lomok seleb ulusil dara, ugunda nimi ganya adya bo unggulusil, bok Geisinya adya bo ulusil. Bok ono' nimi be hnon Kristus adya' Geisinya unggulumla dara, alda Kristus bedyinya unggulumla. 8:10 Dara Kristus ara ugun lomok seleb ulumla dara, wera nong anera malya una' adya somogok ak ululabok, anja ganya ak dara perob nenesina' adya embenga' ulumla. 8:11 Dara ono', Yesus ara somokna' nang gangganek ab subuka bukiyiwoknya bedya Geisinya ara, ugun lomok ulumla dara, wera ono' alja Kristus Yesus somokna' nang gangganek ab subuka bukiyiwoknya bera, alja ugun lomok ulusil Geisinya edya, eimik era ban ugunja somokna nong eneba subuka bukiyiwanasil. 8:12 Anasa hemyabo nim o, nunda nim ek del lona' nang ek ulumab, bok nimi ganya ok dena' sam ak gom, anedya nimi malya una' ganya ak sunuwoka unggulumnemab. 8:13 Dara, ugunda nimi malya una' ganya ak sunuwoka ulumnelum dara, ugunda eimik era somoganalum. Bok ban Geisinya pik uboka ugunja ganya nong adya unuwounun senelamla' anyek pika garawoka olomnelum dara, ugunda embenga' ulumnelum. 8:14 Dara, nimi nidya' Imik Neyung Geisinya adya arawoka bo ulusil nang era, wera Imik Neyung bedya mab era al an. 8:15 Anasa ugunda wa orugoka anyek welemnelam henemla' anya' senewoka loka dabsin ganya enyek dobnenggublum, bok ugunda ugunuk Imik Neyung me nenesin ganya enyek seleb doblum. Dara ban ganya pik uboka nunda, "Ai, na Neyung o, ai, na Neyung o!" wenyaro mololomab. 8:16 Dara ban Geisinya adya, nunja ganya ek, nunda Imik Neyung bedya mab ulumab aboka, laga neklesil. 8:17 Anasa nunda alja mab ulumab dara, wera nunda alja misa' don nang ulumab. An wenyhenya nera Imik Neyung adya dobnemak hyoka' anyek, nunda Kristus ablaboka imik nenewesinok aboka alja ganya igina berena' anyek dolomnemab dara, numbabya Kristus ablaboka neika' dobnemab. 8:18 Anasa nadya hyak okoka ella ulumna' ara, ban wene salek enyek ganya okna dablesilnya nera, eimik nuk si imik nenesina' anyek laga anyeb dara, neikik sunuwamenggoma' ak ulumla. 8:19 Wera anasa, embenga' ulumaka' nidya' ara, Imik Neyung mabo laga nenewanamla sum amba hyak ganya weboka diri ulumak. 8:20 Nidya' embenga' ulumaka' ara seleb salya' lelem ak sokol bana' gebok ara, alja ganya edya gom, bok ban salya' lelem ak sokol bana' geboknya bedya, alja ganya doboka unuwok. 8:21 Bok ban ganya wena' adyok, sikba embenga' ulumaka' ara eimik era, somokna wa wena' ak ab ara blebnesil anasa, Imik Neyung mab adya blebeldana' senenggoma' peroba' ak weknemak. 8:22 Anasa nunda ella ulumaba' ara, nidya' yoka'-yoka' embenga' ulumaka' ara al wenebabya neika' ganya oldalamlakanya, neika' me juga gwekleng sok ulumak. 8:23 Nera sikinok gom, bok numba Geisinya men perob elekna' seleb dowub nang eneba, me anaso' anyek somowanasil salek, nunja nonga blebnesil sum emba, numbabya nunja nong era ganya obdangdo diri ulumab. 8:24 Anasa nunda ban ganya wena' lomok uboka blebsuk. Bok eillilimaknya nera, ganya hnon wena' anggulumak. Anasa nim ara alja seleb eillilisonya nek ara, ganya webnamso dara, har so do? 8:25 Bok nunda eilinggulumabnya nenesa ganya welemab dara, wera nunda ganya gouluwoka diri ulumnemab. 8:26 Dara neikik, nunda heng uboka molona' ara, okoka pe elgom ulumab anasa, Geisinya bera ban nunja hmeng ulumaba' ak an, nuk arasil. Anya ono' Geisinya bera albeyoka' ganya doboka nunsamba Imik Neyung ak hyak lebnamenggomnya neneba, nekoka mololosil. 8:27 Wera Imik Neyung ara alda nunja ganya anyek lelewoka ella ulusilnya bera, ban Geisinya bedya mololamla' ganya era bekna' ella ulumla ara, alda Imik Neyung adya seinilamla' sunuwoka bekna', muna' Imik Neyung mab amba heng uboka mololosil. 8:28 Nunda wenera ella ulumaba' ara, Imik Neyung ara alak wana' ulumak nang ek, alja adya ganya seinimoka' sunuwoka weboka dobsuk nang ek, siksamba perob damok lanalalula' aboka dara, yoka'-yoka' nidya' ara, Imik Neyung adya arawoka welesil. 8:29 Anera hyak men danyek, alja nidya' webesuk nang era, al sikinek alja me nedya diliga' dobnok aboka, men danyek alja sunuwoka bokosuk. Anedya, alda alja me nera, alja' hemyabo gong ek ab uboka, yandonya dok. 8:30 Dara sik ban men danyek alja sunuwoka bokosuk nang enyek, alja al sikinek yoululum aboka lebok. Anya al sik alja yoululum aboka lemok nang enyek, alja al sikenek peroba' nenewousuk. Wera sikenek alja peroba' nenewousuk nang enyek, alja al sikenek imik senenggoma' nenewosuk. 8:31 Wera ban nidya' amba dara, nunda hek henemab do? Wera Imik Neyung ara, nuk sam dangalamla dara, heknedya nuk isa' nang nenewanasil do? 8:32 Alda, alja me yoka' ak wana' ubok bok, alda nidya' amba elegousuka' anasa, alda nuk yoka'-yoka' nidya' ara ganya doboka eleganggunusil de? 8:33 Imik Neyung adya weboka dobsuk nang era, heknedya yuba saawanamla? Imik Neyung adya sikenek peroba' nenewok nang ek heknedya sikenek igina eleganasil? 8:34 Kristus Yesus, seleb somogoka' ara, ono' imik so' dara, alda seleb embenga' subuk, dara ono' al alak Imik Neyung adya' sirik sam bulumla, wera ono' alja nusamba yuba ligiwoka sanya danamla ara heknya do? 8:35 Anasa heknedya nunda Kristus bedya wana' una' ak ab bok meneganasil do? Malya nenesina' adya gom, meka' nenesina' adya gom, doboka osina' adya gom, gwaneng oka' adya gom, nong baneng una' adya gom, lok ganya adya gom, mala adya gom? 8:36 An momnya dobok sok, "Wera ansamba nunda mabom bukuma somokna' damok lok ulumab, nunda obnamna domba pam eneso' senelesak," hyok. 8:37 Bok ban nidya' an lebna' ak ab dara, nuk wana' ulusilnya be pik ab uboka, nunda ol lamakna nang ek ulumab. 8:38 Anasa nadya dib senelamna' ara, or somokna' embenga', lero nang gong, bisa' wenesin dub nang, or wen ulumla' eimik lanawanamla', 8:39 or yok-yok migib damok, imik ulumla', damumduk ululanya gom, or yok embenga' ulumla digum, ban nidya' anedya, nunda Imik Neyung adya wana' usina' ak ab, nunja Wenelesilnya Yesus Kristus ak ulumla' an, ara ane digum adya douluwoka bok meneganggunusil.
9:1 Nara Kristus adya aldib nongnya nenyek lebnamna, nara sonda' lebnenggunumna. Geisinya adya nadya mek ganya hnon aldib lelenel. 9:2 Ara nara hyak ganya lomok soloma dablenelekanya, soba' ganya angoo senelamna. 9:3 Anya nara nim una' sam ak dara, nadya mok soko nimi nang yila' amba leboka, nara malya nenebdanakanya, nadya' hemyab amba, Kristus bek ab, yok gebdonun senelamna. 9:4 Wera sikda Israeli nim ulumaakanya, sikda seleb alja mabo nenesuukanya, sikda peroba' senenggoma' ab, unubdanamab an yub eb, unuwanalum an yub eb, yuba longona' amba yub eb, unu eleganasin hyok yub eb, dara sikda seleb domek. 9:5 Wera sikda youma' ulumek nang edya mengerob nang ulumaakanya, Mesias Kristus bera alda yoka'-yoka' nidya' alak hnonok imik ululabok, nim ek sam ak dara sik nang yila' ak ab beibek. Bok alda Imik Neyung soba' giblemnemabnya bek ulumla. Amin! 9:6 Anyek bok Imik Neyung yub ulumla' ara gigiwanggubok senewanggunusibya! Anasa nim ulumak Israeli nim era, nidya' Israeli nang unggulumak. 9:7 Anya Abraham nang yila' nidya' ara alja mabo diba' unggulumak. Bok, "Ishak bek abnya nenyek an nang yila' alamnamak," aboka lebok, hyok. 9:8 An wenhyoknya nera, nim ulumaakanya beillilimak mab enyek Imik Neyung mab unggulumak. Alda me eleganenggen amok me al nang yila' aboka si silemnamak aboka wenyasuk nang yila' enyek, Imik Neyung bedya mab ulumak. 9:9 Anasa ban yub era, an wenyasuk yub ulumla' ara an: "Ban salek eneso danyek, nara saawoka yanamna dara, Sara gera nengma hnonok beibnamla," wenyamok. 9:10 Bok ono' an nenyek ok gom. Hyak lak nongnya nera, Ribka gera alja mab era, be hnon nunja' youma'anya, Ishak bera sikja neyung ulumok. 9:11-12 Bok ban mab era anam beibnenggusuukanya, peroba' malya' gom anam unuwanggurek bok, Ribka gek an wenhyok, "Men karob so me nera goubenya so me nedya wa wenya danamla." Anedya Imik Neyung ara alja weboka dobsuk yub era migiba' kablul aboka, bok ununa' adya gom, alda Imik Neyung alja yoululum hyoknya nedya unuwok. 9:13 An momnya doboka' ulumla sok, "Nara Yakub bek wana' ulumsakanya, Esau bek ara lek senelamsa." 9:14 Wera anaso dara, nunda hek henemab do? Dara Imik Neyung ara pe sunuwoka unuwanggubuk de? Hyak unuwanggunumso, orok! 9:15 Anasa alda Musa bek wenhyok, "Nara heknyek angoo yadyek senewoka arawananya bek ok nara angoo senewoka, aralemnamna, nara heknyek angoo yadyek senewanenya bek ok nara angoo yadyek senelemnamna," hyok. 9:16 Dara Imik Neyung unulusil era, nim adya seinina' ak gom, yeiriwoka ena' ak gom ununggulusil. Bok Imik Neyung adya yadyek anasa ganya doboka unulusil. 9:17 Anasa Imik Neyung yuba momnya doboka' ara Firaun bek wenhyok, "Wera anasa nara anak sekiyiwagesa' ara, wera anedya, nara nadya' migiba' anak laga amab elegoka, anya anedya nadya si nera mok soko nidya' peroba' ob lelewolul aboka ununggesa," wenhyok, hyok. 9:18 Anasa Imik Neyung ara alda ganya doboka heknyek angoo yadyek ganya boboka arawanamna senenanya bek aralamla. Anya heknyek ganya gasa nenewanamna senenya bek ganya gasa una' benyek an beillilamla. 9:19 Wenera ugunda nak wenyhenenulum, "An anaso dara, hekasa alda nuk meknena' gebnamso do? Anasa heknedya alak isa'anya nenewanamla do?" 9:20 Wei, nim o, anda heknya do, anedya Imik Neyung ak sonda' anasa mel-mel alalam do? Wera uyiwoknya bedya al uyiwoknya bek, "Anda hekasa nak an uyiwonulum do?" wenyhenemso de? 9:21 Dara go soko adya yok-yok bona' memelanya bera, ban neik go soko winiroba' enedya peroba' ak senesonya nera nen memewoka, ono yoknya nera or sobnya memewanamna senesonya nera nen memelamla dara, anadya alda meknelemla heneseng de? 9:22 Anasa alja uruma dogoma ana' ab, alja migib ab, laga eleganamla' amba dara, Imik Neyung ara yoka'-yoka' alja uruma dogom henemla' somoganamla aboka orowek memewoka' ak ara, alda or eimik ek senewoka diri ulumla. 9:23 Ono' saawoka ban yoka'-yoka' ak alja angoo yadyek senena' elegousununa' ulumla ara alja' perob senenggom bona' enyek alja peroba' senenggoma' amba orowek memewoka ulumla. 9:24 Wera anera nunda an alja yoululum aboka ebsuk nang era Yahudi nang ok ek ab gom, alda ono yok-yok mok soko nim ek ab anaba weboka dobsuk. Anaso nunsamba unusuk dara, anano? 9:25 Neikso ununumna' lenya Hosea buku lomok alja leboka' ara, "Nadya nim gom bok, eimik era nadya nim henemna, anya nadya wana' anya gom bok, nadya wana'anya henemna." 9:26 Anya sikenek hanyagarab, "Ugunda nadya nim gom," amnya' ak ara, anyeganyeb sikenek, "Embenga' ulumla Imik Neyung bedya mab aboka henemak," hyok. 9:27 Dara Yesaya bera Israeli nang emba ban wenyalamok, "Israeli nang era nauba mek gwan gemek egenya' eneso ak ligilyebok, or meka' loblenya nok eimik era blebnamla. 9:28 Alja seleb an wenhyoknya nera, Imik Neyung ara eimik an soko eilibik anera hyak berra aboka nidya' gobdo unuwanamla ak lelemla," hyok. 9:29 Men dara, Yesaya bera banaso wenyalamok sok, "Imik Neyung imik sokok nidya' ulumla' dubnya bera, nuk nimi yila' hnon lobongganggumso dara, nunda seleb Sodom Gomora heik anaso dangdomnesibya, wenhyok," hyok. Yuba 9:30 Wera anaso dara, nunda heka' hnon henesibya do? Henesibnya nera ban: yok-yok mok soko nim era perob nenesina' ak we dobnenggulumek bok, ganya aldib senena' adyok, ban perob nenesina' ara seleb dorob. 9:31 Bok, Israeli nang ek dara, ban unuwanalum an yuba peldisina' damok anyek, we doblemeka' ara, doblamlobek. 9:32 Heka' adya doblamlobek do? Sik Israeli nang era ban ganya aldib senena' anasa we dobnenggulumek, bok laga ununa' adya we doblemek anasa sok lobek. Sikda ouluk dikna' girik ak ouluka dibek, 9:33 nera an momnya dobok sok, "Hyak aldib, nara Sion meinik sam ara soruka belekna' girik ab, yana ouluka dikna' girik ab beiyimnamna, dara heknedya alak an ganya aldib senewanamla dara, eimik era alya dabnenggunumla," wenhyoka' ak momnya doboka' ak ulumla.
10:1 Hem yabo nang o, nadya ganya era sikbabya blebsulul senewoka Imik Neyung ak heng uboka mololamna. 10:2 Anasa nara siksamba laga an wenyalamna' ara, sikda Imik Neyung amba hyak yeiriwoka welemak, bok dib nongnya elgomjok unulumak. 10:3 Dara sikda Imik Neyung bedya peldisina' ara pe ella unggulumeekanya, sikda peldisina' anyek sikja yok memewanoba' ulumek adya, wera sikda Imik Neyung bedya peldisina' ak ara ganya gologanggumek. 10:4 Unuwanalum an yub pik peldisina' damok elemeka' ara, Kristus yeilimok adya alak peldisina' damok dok. Wera anedya nimi nidya' ganya alak aldib senelemak nang era, peldisina' en dolomak. 10:5 Dara Musa bedya Yahudi nim emba unuwanalum an yub adya, peldisina' ak geklewoka momnya doboka' ara, "Nim oruksin yub ak unulumnelanya bera, wera anedya alda embenga' ulumnamla," wenyaboka momnya dobok. 10:6 Bok ganya aldib senena' adya dara, an wenyalamla, "Ugunja ganya lomok ara anaso wenyana' mem: Heknyek Kristus doboka bo gouluganamla anasa, imik heik welewanamla do? 10:7 Goma, heknyek Kristus ara somokna' nang gangganek ab doboka bo welewanamla' anasa, somokna' gweren selenga' era gouluganamla do?" 10:8 Bok alja dara, heka' alamla do? Ara ban: "Imik Neyung yub ara, ugunja si bama' ak hnon, ugunja ganya ak hnon, hyak ok nong ulumla," alamla. Wera ban ganya aldib senena' anyek, nunja lero yabalamab yub era an. 10:9 Anasa ugunda ugunja si bama' adya Yesus ara wenelesilnya bek ulumla aboka laga lelemunukanya, ugunja ganya ara alda Imik Neyung adya somokna' nang gangganek ab seleb subuka embenga' bukiyiwok aboka dib senelemun dara, blebnesil. 10:10 Dara nimi ganya anedya aldib senelemak dara, peroba' nenelesil. Anya sibama' adya laga lelemak dara, bleblesil. 10:11 Anasa geisa Imik Neyung yuba momnya doboka' ara an wenyalamla, "Heknedya alak ganya aldib senewanamla dara, eimik alya dabnenggunumla," alamla. 10:12 Wera dara, Yahudi nim ab, Yunani nim eb dara, yok-yok gebeldan damok era hnon unggulumla. Anasa ban hnonok Imik Neyung enedyok nidya' nim amba wenesinya ulumlakanya, alak bii alamak nim nidya' ak peroba' nenelesil. 10:13 Anasa heknedya Wenelesilnya si sibuka youblenya bera, alak blebnamla. 10:14 Bok sikda alak ganya aldib senenggulumak dara, sikda heka' uboka alak bii heneseng do? Sikda al benya' an yub enyek kenggulumak dara, sikda heka' uboka alak ganya aldib senewanaseng do? Al samba yub enyek hnon nekel banggulumak dara, sikda heka' uboka alsamba yub era kebneseng do? 10:15 Sikenek hnon yuba bo ban nang enyek orok dara, alsamba yub era heka' uboka leb eleganaseng do? Wera anesemba leboka momnya doboka' ara, "Sikda perob lero yanggan yuba bo yalamak nang enyek yalamak dara, hyak perob nongja!" wenyaro momnya webok. 10:16 Bok ban perob lero yanggan yub era nimi nidya' ara seleb dobnenggurub. Anasa Yesaya bera alja anaso wenyalamok, "Wenelesilimnya o, heknedya nunja an wenyalamab yub era ganya aldib senewanamla do?" 10:17 Wera anasa, Kristus yuba kena' adya, ganya aldib senena' damok ara an kelemak pik lanalamla. 10:18 Anasa nara ugunuk heibsunun: Wera sikda kenggulumek de? Sikda seleb kelemek bok, "Sikja salamek anyek koblemok yub era mok soko nidya' obdangoka, sikja salamek yub era mok soko dagalongna' nidya' ob lelemok." 10:19 Bok nara heibnesin: Dara Israeli nim era anyek lel yabel senewoka dobek de? Musa bera hyak men wenhyok, "Nunja nim gom bok, ugunda siksamba leboka ganya angoo senewoka oka dusulul aboka, nadya ugunuk ganya en gebnamnakanya, ugunda yok elgom mok soko nim ek wabluluma' aboka, yu ganya nenewanasin," hyok. 10:20 Dara Yesaya bera asa' ganya boboka an wenhyok, "Sikda nak enggulunyak nim enyek, nara or eibdanamab senewasa. Sikda nak heinggulunyek nim ek, nara seleb laga bo aamabdasa," wenyamok. 10:21 Bok Israeli nim emba dara alda wenhyok, "Li sob-soba' ara nak pe kenggulumaakanya, sonda' aboka oroka' geblemak mok soko nim ek, nara nadya soruk era bebegeldibilloklamna," hyok.
11:1 Dara nara heibnesin: Imik Neyung ara alja nim era seleb ugunda na lek hyok de? Hyak orok, wenyhenggubuk! Nababya Israeli nang, Abraham bek ab mengebgiga, Benyamin nang yila' ak abnya. 11:2 Imik Neyung ara alja weboka dosuk nim era lek aboka yaknenggubsuk. Goma, Elia bera alda Israeli nim emba leboka Imik Neyung ak anaso unulumak al bilimoka' Imik Neyung yuba momnya doboka' ak sam momnya doboka' ara, ugunda elgom ululum de? 11:3 Nekel bilimok yub era, "Wenelesilimnya o, sikda anja ununumna' len nang era seleb omak, anak uka daboka gibna' oulyang era sikja seleb golob menegerob; anya nanagok nabayoka' or unanya nera, sikda nadya embenga' una' era gwenewoka dobnoba' umak," aro yuba bo bilimok. 11:4 Wenhyok bok, Imik Neyung ara alak heka' hyok do? "Nara nasamba dara, Baal ak gibnenggulumak nang enyek, denga salya' anyek denga sekbadya or lomna," wenyaboka lebok. 11:5 Neikso wenebabya, or wana' uboka eleksina' adya sunuwoka denga hnonok so or ulumak. 11:6 Bok ban nera wana' uboka eleksina' adyakanya, yok ununa' adya gom. Wera anaso unuwanggunumso dara, ban wana' uboka eleksina' ara wana' uboka eleksina' wenyhenggunuseng. 11:7 Anasa dara har so do? Israeli nang edya we doblemoknya nera dobnenggubuk, bok nang enedya dobnamak aboka webok nang edya dobek. Dara yok nang era gasa ganya bobek, 11:8 nera an momnya dobok sok ulumla' ara, "Imik Neyung ara sikenek loba' hogung ganya mayiwosuukanya, eibijek aboka eilinggom heng eb, kenggom o neb danyek elegousuk." 11:9 Anya Daud bera wenhyok, "Sikja senenggoma' memewoka delemaknya nera, weboka youna' yina' heng ab, weininggeldana' ab, siksamba dirikna' ab dangalamnamla. 11:10 Dara sikda eibijek aboka, sikja heng era guna' nenewanalamakanya, sikja gwadya yok ara soba' geinildilimnesilim," wenyaboka lebok. Yuba 11:11 Dara nara heibnesin: Sikda ouluka dibek anasa malyingginimak de? Hyak orok nong! Bok sikja meknena' enesa, sikda soloma dabsulul aboka, blebsina' damok ara yok mok soko nim ek byuk. 11:12 Anasa sikja meknena' enedya, mok soko ara dub gebeyiweekanya, sikja mek ok una' era, yok mok soko nim emba dub dangana' ulumla, dara hyak nauba so ara sikenek pe muna' gobdo pewousuk. 11:13 Wei, Yahudi gom nim o, nara ugunuk wenyhenesin. Wera na nong ara, Yahudi gom mok soko nim emba yub lena' gaknya ulumna anasa, ban yub damok era nadya welemna wa senenggoma' peroba' ara wera an senelamna. 11:14 Wera anedya nara nim ek sam dara, nadya mok soko nim ek sikja ganya soloma gebnesisinya adya, sikenek nimi wene nimi hnon blebnesisinya. 11:15 Anasa sikja nunda lek hyek adya, yok mok soko nim enyek, Imik Neyung ab neika' hibek. Dara ganya or perob senewoka dobneseng dara, wera somokna' nang ek ab embenga' ulumak bok, yok damok hnon lanawanamso de? 11:16 Wera anasa, men nong roti gwaneng enyek peroba' ak ulumla dara, wera nidya' yoklomaknya neneba peroba' ak ulumla. Dara ono' yarenga damok anaba perob dara, wera nidya' soruk pik anaba perob. 11:17 Anasa gal soruka wen seleb dibookanya, ugunda nong salya' bongolamla gal eneso' anyek an seleb soboka makok dara, wera nidya' hiboka Zaitun siliga' ok ulumla gal ak an maklum. 11:18 Dara ban al soruk enesa leboka, ugunda hama' daknenggom, mem! Bok ugunda hama' daknelum dara, banyek seiniwanalum, anera ugunda an yareng enyek an maknenggublum, bok yareng enedya ugunuk an makal yousuk. 11:19 Ugunda ono', gal soruka wene bologoka' ara, nak anyegan yok hmoka anaso' siligoula' aboka unuwok, henesom. Bok, 11:20 dara perob! Sikda an unu bologoka' ara, sikja ganya dib senena' orok anasa unuwok. Anya ugunda jonga' ikoka mel-mel eiyiwosuk ara, ugunja ganya dib senewolum adya unuwok. Anasa ugunda ganya habmereng henggunulum, bok hyak lok ganya bolomnelum! 11:21 Nera Imik Neyung ara men gal soruk yoka' enyek wana' unggulumso dara, wera albabya ugunuk wana' ubnenggunusil. 11:22 Wera anasa, ugunda ban Imik Neyung alja pe yongon ganya eb, alja ganya gasa geboka unuwoka' ara, sik seleb malyinggek nang ek ara gasa so unubok, bok sikja ugunda ganya pe yongon uboka elegousuka' anyek pe seinilimnelum. Anera banaso, ugunda alja pe ganya yongona' ak ubmoubnelum dara, anera ugunuk ulumnesil, bok orok dara, ugumbabya soruka diboka boboganasil. 11:23 Bok ono' sikbabya, sikja ganya dib senena' orok ganya enyek lobnamak dara, Imik Neyung migibnya bek ululanya anasa, sikbabya eimik era soruka onsok diriganamla. 11:24 Dara ugunda salya' beiyik bongomna Zaitun gal eneso' anyek seleb garawousuk dara, ugunja una' ek keeboka dara, nera unuwanggunumso bok, ugunda Zaitun nim adya pe melemaknya neneso' anyek seleb garawoka dobsuk. Bok hyak nauba so ara sik ban sikja nimi yila' sunuwoka, sikja Zaitun gal yoka' nong ak an soboka mebnamla anyek hnon nauba so. 11:25 Hem yab nang, wera anedya ugunda nunugok hyak ella ulumab senewoumunuk anasa, ban damok enyek ugunda ella doululum aboka, nara wenyhenesin: Israeli nang era sikja ganya hyak gasa adya, yok mok soko nim enyek hyak nauba wekel yok. 11:26 Wera an pik uboka, Israeli nang era eimik era blebnamla. Nera an momnya doboka' ulumla sok, "Dek lunuwoka dosinya bera Sion ab yanamlakanya, alda Yakub bek ab nidya' malya ulumeija nang era walawoka boboganamla. 11:27 Nara sikja malya una' doboka boboganasin dara, nadya sikeneb diba' wenyabdouba' ara an." 11:28 Perob lero yanggan yuba dona' ak sam ak dara, ugunsamba leboka, sikda Imik Neyung ab isa' gebdangoka ulumak, bok weboka dobsuka' ak sam ak dara, sikda sikja youma' neyung yab danasa leboka, sikda Imik Neyung adya wana' ulusil nang ek ulumak. 11:29 Wera anasa Imik Neyung ara, alda perob eleksina' ab, alja yoululum hyoka' amba dara, angoo heka' amba lelemsa senewoka ganya oka denggulumla. 11:30 Anasa dara neikik, ugunda youma' dara Imik Neyung pe kenggululum, bok wenera sikja' pe kenggom enesa, ugunda angoo yadyek senewoka arasina ganya era dololum. 11:31 Wera neikik, sikda wenera pe kenggulumak, dara ban seleb doblum ganya enedya, sikbabya eimik era angoo yadyek senewoka arasina' dobnemak. 11:32 Anasa Imik Neyung ara, nimi nidya' ara ban pe kenggoma lomok doronggoka leka' wiblebsuk, wera anedya alda ban angoo yadyek anasa men arawounun senen ganya enyek, sikenek nidya' ban aboka arawosununa' aboka an unuwok. 11:33 Imik Neyung bedya bona' mandebna' ab, yok-yok ella dangan damok eb, yoka' ella una' ab, ai, hyak lomok sokok yangabok anyek lok bar! Wera anedya aldib, alja yuba saboka nenyek alamla' ara pe lelebdaknamenggomokanya, alja ban pik era pe lelebdaknamenggom e! 11:34 Anasa heknedya Wenelesilnya bedya ganya era ella ulumla do? Goma heknyek alak wenenanya seleb dangoka wenelemok do? 11:35 Goma heknedya alak yoka' hnon seleb elek loboka', alda anyek lunuwanamso' ara heka' do? 11:36 Dara yoka'-yoka' nidya' ara alak ab, al adya, anya alamba. Anasa alak ara si imik nenena' alsamba ok hyak sob-soba' giblemnemeija' anyek ulusulul!
12:1 Wera anasa hemyabo nim o, Imik Neyung adya angoo yadyek senewoka arasisina' amba leboka, anedya ugunda ugunja nong enyek embenga' gebman, hyak pe yok muna' elegoka, an nenyek Imik Neyung ara pewanel senewanamla' ara an anasa, nara ugunuk wenewanasin. Wera an nenyek ugunja elekna' hyak pe elekleluma' nong ara al an ulumla. 12:2 Anasa ugunda sokok anyeb ganya uruma neikso dangana' ara mem. Alda ugunda har nerek perobnya, malyinya senelemnelumukanya, Imik Neyung adya senelelanya, hyak perob nonga', Imik Neyung adya ganya heklamlakanya, hyak gobdo perobnya nenyek, wenyek perob seiniwoka ella una' edya samab meneganalum. 12:3 Nak wana' uboka eleksina' damok enyek sunuwoka, nara ugunuk nimi yok-yok wenyhenemna, Ugunda ugun seiniwoka unuwanasomnya nera hwiboka, hyak senenggom imik unuwanggunusomnya nenyek seininggom, mem. Bok ganya ono' yok so uboka pe seinililulum, wera anedya ugun nong ara, ban Imik Neyung adya nimi yok-yok eleklesila', ganya dib senena' pik uboka, yoka' ak ganya soba'anya senewanalum. 12:4 Dara, nunja ban hnonok nongok ara si yok-yok silimak, bok an si yok-yok silimaka' ara neik wa nek wenggulumak. 12:5 Dara numbabya neikik, hyak gong bok, Kristus lomok ara hnonok nong ok ulumab, bok nunda yok-yok si silisak ara be hnonja bedya nong era ono' yoknya bedya' amba ulumab. 12:6 Wera nunda nidya' ara yok-yok perobnya nenyek, wana' uboka eleksina' sunuwoka elegousuknya nera nunja' dangoka bo ulumab. Anasa ban yok perobnya ununumna' lena' amba elegesilya dara, wera nunda ganya dib senena' adya sunuwoka ununumna' pe lelemnemab. 12:7 Yok nang ak arana' amba elegesilya dara, wera nunda or pe aralemnemab; nekna' amba elegesilya dara, wera nunda or pe neklemnemab. 12:8 Wenewoka pe memena' amba elegesilya dara, wera nunda or pe weneldalamnemab. Anasa heknedya yok-yok bona' pe bogoka elekdo yabalamnesil dara, wera alda hyak perob ganya bomlyekanya unululul. Heknedya ban wa nen bo uboka webnelam henemla dara, alda yeng ganya boboka unululul. Heknedya angoo yadyek senewoka men arawounun uruma bobnelanya bera, alda ganya eiya daboka unululul. 12:9 Anasa wana' uldana' ak dara, malye senewoka or-ora una' ara hyak mem! Yu ganya boboka malya unya nera mok nenewoka, perobnya nenyek unulululum. 12:10 Ugunda nadya' hem senewoka wana' uldalamunukanya, perob aboka gibildana' ak dara, anja hem bek men nonokdangoka gibildalamnelum. 12:11 Anja' yeng ganya era hmenga dalyek, alda anja ganya era laga senedya' boloklamlyekanya, Imik Neyung ak welelom. 12:12 Ganya we una' ak ara eiyasa' we ululom, meka' gebsina' ak ara or malye soba'anya senelelom, anya heng uboka molona' ak dara, ganya ologoka soba' molololom! 12:13 Sik Imik Neyung mabo okna ubnesil dara, arawanalumukanya, an nong ak dara nara pik eboka, men arawounun senen ganya enyek soba' bolomnelum! 12:14 Heknedya anak loba' nenewoka olonggelnya bek ara peroba' lelelom, peroba' lelemenekanya, saawoka wona' dangoka si leblul ana' ara mem! 12:15 Eiya ganya bolomeija nang eb dara, neika' eiya hlalalulum, bok engelemeija nang eb dara, neika' engelelulum! 12:16 Ugunda hnonok ganya seinina' ok boboka ulululum; ugunda unuwanggunusomnya hyak imiknya nenyek seininggom, mem. Bok anja ganya era or sobnya domdigumnya nek an doro dilililom. Na nong ak hyak geremseng nong seneldana' ara hyak mem! 12:17 Yunya nera ono' yunya nedya dirigildanggom, mem. Alda nimi nidya' ak ara, perobnya nenyek unuldalalulum! 12:18 Ban unun ganya era ugunja ganya doboka unulumnelum dara, wera yok nang eb ganya kwebdangoka ulumnelum! 12:19 Hem yabo nadya wana' ulusin nang o, ugunda numbabya nunja diriganamab aboka mel-mel anggom, alda, dirikna' ak sam ara nadya' memelamna ak ulumla, aro momnya doboka' ulumla anasa, Imik Neyung adya waboka uruma dogom ana' ak eleganalum. Imik Neyung yub wenyalamla' ara, na adya ambabya lunuwanalam aboka yeiriwanamna alamla. 12:20 Bok anja isa'anya bera gwaneng ok ubnamla dara, gwaneng ak elegalom; alda mek ok ubnamla dara, mek ak elegalom. Ban unuwomun adya, uk dok ara alja hukuk beillililum. 12:21 Ugunda yu malya una' adya oblamageisilyek, bok yu malya una' ara perobnya ununa' adya oblamagoululum!
13:1 Imik Neyung bek ab gom mok soko dub nang era hnon unggulumak anasa, nimi yok-yok alja' imik uboka wa bolomak mok soko dub nang ek ara hyak pe kelelulum. Dara an wen ulumak mok soko dub nang era, Imik Neyung adya memewoka sekeldilisil. 13:2 Anasa heknedya mok soko dub nang ek walamla dara, alda Imik Neyung bedya unu memewoka unuwoka' ak walamla. Dara heknedya banaso unuwanamla dara, igin damok doboka al eilib bo dildal yanamla. 13:3 Wera anasa, be hnon alda pe unulamla dara, alda mok soko dub nang ek lok ganya boblyek, bok alda meknewanamla danyek hnonok. Anda pemerintah nang ek lok ganya bobnenggonggom ulunun senelelam de? Dara perobnya nenyek unululom, anedya anda alak ab gigina' dobnelam. 13:4 Anasa mok soko dub nang era ansamba perob dolula' aboka, Imik Neyung ak arawoka wa wen nang ulumak. Bok anda malyinya nenyek unuwanalam dara, mok soko dubnya bera alda oldan gawa era salya' hwam bonggulumla' anasa, alak lok ganya bobnelam. Mok soko dubnya bera Imik Neyung adya waboka dirikna' anyek, wa nen sik malya ubnemak nang ek sikbabya dirigoka welenok aboka ulumak. 13:5 Wera anasa, nunda ganya yok-yok sok lobdanamab, nenera Imik Neyung ara wabsilyek aboka gom, alda nunja ganya adya wenyalamlya' sunuwoka unulumnemab. 13:6 Dara an ganya en bololum adya ugunda sikja mok soko yok-yok amba deklemnelum alamaknya nera keboka deklelum. Wera anera sikda ban wa nen memewoka welemak nang era, Imik Neyung ak welemak adya unululum. 13:7 Anasa anda nidya' yok nang ek anja deklemnelamnya nera, yoka' amba leboka dololanya bek, wera yoka' amba leboka dekna' benyek an deklelom. Mok soko amba dara, mok soko amba dona' geknewanalanya bek an deklemnelam. Lok ganya bona' amba dara, lok ganya bona' geknewanalanya bek deklemnelam. Gibna' amba dara, gibna' amba dona' geknewanalanya bek eleklemnelam. 13:8 Ugunda yoka'-yoka' bol lona' ara hyak mem. Bok ugunda yok nang eb wana' uldalalulum. Wera anasa heknedya ala' nim ak wana' ulusil dara, alda Yahudi nim emba unuwanalum an yuba bekna' sunuwoka unulamla. 13:9 Anasa Imik Neyung yub ara anaso wenyalamla, Yok gel salanggom mem, nim onggom mem, hoka' dona' mem, yok nang edya' amba ganya oka denggom mem. An wenyalamla yub edya yok yub nidya' ara henga sangnewoka, neika' hnonok ban yub enyek an ulumla, anda nimi yok nang ek ara an nonga an dam nang wana' uldalalam sok, yok nang eneba unu wana' ululom! 13:10 Ban wana' una' ara nim ak ara malya nenewounun senenggulusil. Anasa, wana' una' ara unuwanalum an yub ak gigiwoka' ak ulumla. 13:11 Ugunda ban wene salek unulamla uruma era ella ululuma' ara, ugun mabluma' ara buknelum salek seleb danggiga balamla anasa, ban wenyalasil yub era al unulumnelum ok. Anasa blebsina' ara nunda men anam ganya dib senewoub salek ek ab dara, wenera hyak seleb ok berem nong ulumla. 13:12 Mok soko ara seleb inibdouluwoka, wera bereganamla salek. Wera anasa nunda wera guna' hnoum ab ununanya nera lobibyekanya, dilina' adya mal yin enyek enegoka ulumnemab! 13:13 Anasa nunda yubyek danyek ulumak diliga' ganya namena' anyek pe ulunob. Salya' eiya hlaboka bolowoka dero yabana' mem, yu mek dena' mem, malya una' ak molona' hogunga bobmoubuka, salya' salaldana' ak unggom mem, soloma daboka wabdangdo unggom mem. 13:14 Bok Wenelesilnya Yesus Kristus anyek dilina' yin mal nong geboka ongolomunukanya, ugunja nong era ganya ok dena' amba hmanggom mem.
14:1 Ganya dib senena' hmengnya bek ara, aljinya leblenya nera keb loboka doblom. 14:2 Dara hnon nang ara, ganya dib senelamlakanya, yok-yok dena' nidya' ara or delemnesinya senewanalabok, alja ganya hmengnya bera, or mekla' masa ok delemla. 14:3 Imik Neyung ara ban benyek seleb dolomla anasa, denelanya bedya, denggubija nang ek derena' mem. Anya ono' denggubija nang edya, dija nang ek yana lelena' ara mem. 14:4 Anda heknedya, wera nimi yoknya bedya wa wenya benyek yana lelelelam do? Alda malyingginimla' gom, alda or seklemnamla' gom ara, nera alja neyung bedya memewanamla. Bok Imik Neyung adya memewoka bo ulumnamla anasa, alda soba' seklemnamla ok. 14:5 Be hnonja dara hnon sum enyek dibsokanya, yoknya dara malya so senelelabok, ono' yok nang edya dara, nidya' ara perob ok senelamla. Anasa nimi yok-yok alja ganya adya anyek aldib perob senewalya dara, or senelemnamla. 14:6 Heknedya ban yok hnonoknya nok salabmoubnamla dara, alda Imik Neyung amba unulumnamla. Anya heknya dena' denemna dara, alda Imik Neyung ak perob aboka giblamla anasa, alda Imik Neyung amba unulamla. Dara ono' heknedya alda dena' denggunumnekanya, albabya Imik Neyung ak perob aboka giblamla anasa, albabya Imik Neyung amba unulamla. 14:7 Nenera banasa, nimi be hnon nu gangganek ara, al damnya amba ok ululanya bera hnon unggulumla. Dara ono' nimi be hnon al damnya amba ok somoklelanya bera hnon unggulumla. 14:8 Anasa nunda embenga' ulumab dara, Imik Neyung amba ulumab. Anya nunda somoganamab dara, ono' Imik Neyung amba somoganamab. Wera anasa, embenga' una' gom, somokna' gom, nidya' ara nunda Imik Neyung aljinya ulumab. 14:9 Wera nenesa leboka, Kristus ara seleb somogoka embenga' subuk. An unuwoknya nera, alda somoklemak nang ab, or embenga' ulumak nang ab, siksamba wenesinya dounun aboka unuwok. 14:10 Bok anak dara, anda heka' amba anja' hem bek yana lelelelam do? Anya anda hekasa anja' hem bek waboka derelelam do? Unululam bok, nunda nidya' ara Imik Neyung adya pe yana lelewoka ubnesil ekla berem neika' bo beildal binimab. 14:11 Nera an momnya dona' ulumla sok, "Imik Neyung yub ara anaso lelemla, na embenga' ulumna' anasa, nimi nidya' ara na saramek koma lumugoka bul yanamaakanya, nimi nidya' Imik Neyung ak giblemnemak." 14:12 Anasa, nunda yok-yok alja' saramek sekoka, nara anasa-anasa unulamsa aboka al hogung ak laga wenyhenemab. 14:13 Wera an unuwanasil anasa, nunda duka' lolowom aboka yana leleldana' ara mem! Bok ban ganya en boboka wenyalamak yub enyek bobnemab. Nunda nunja' hem bek boroboublingganyek, gom ouluk dikna' girik dangiyiwanyek mem, senelemnemab! 14:14 Nara Yesus pik ab uboka ella ulumnekanya hyak aldib senelamna' ara, yok-yok dena' ak dara, malya' ara hnon unggulumla. Bok ban yoka'-yoka' ara sembeja' ak ulumla senelemak nang enyek, sikenek danyek, sembeja' diba' ara an ulumla. 14:15 Anasa anda an yoka' hnon delelamakanya, anja' hem bek alja ganya soloma dabel dililam dara, wera anda wana' uldalalulum alamla yub ek sunuwoka ununggululam. Kristus ara alsamba seleb somogok anasa, anda dena' anasa leboka anja' hem bek somogoldina' ara mem. 14:16 Or peroba' anak an ulumla' ara, derelenok senewoka ganya ngogol lobnenggom, mem. 14:17 Anasa Imik Neyung adya wenesina' era, dena' mek araba' ak unggulumla, bok Geisinya adya pik uboka peroba' nenena' ab, ganya pe namena' una' ab, ganya eiya daboka una' ab, danyek ulumla. 14:18 Wera anasa heknedya ban nenyek sunuwoka Kristus ak welemla dara, Imik Neyung bek ganya hekeldilimlakanya, nim adya dara alak wa bobsuukanya welesilnya benya' senelemak. 14:19 Anasa nunda ganya pe namena' una' ab, wenebdangoka ganya pe una' ab, damok en lanawanamlya' anyek yeiriwoka doblemnemab. 14:20 Anda dena' anasa leboka Imik Neyung wa wena' malya nenenggom, mem! Yoka'-yoka' nidya' ara geisa' ak ululabok, dena' anasa leboka yok nang ek ouluk dikna' girik dangalalanya benyek hyak omom nong ak ulumla! 14:21 Anasa pam soub gom, anggur mek gom, or yoka' anyek, anja' hem bek ouluk dikna' girik danemlya ara anda dena' lobnesom dara, hyak perob. 14:22 Anda an nong anasa leboka, anja dib senelelam ganya enyek Imik Neyung saramek salabmouboka ululom. Be hnon ban nera perobnya nenya' or unuwounun senewoka al nonga yana leleldanggululanya bera, alda pe ulumla. 14:23 Bok heknedya alda yoka' ak delemlekanya, ganya elelanya bera, alda ganya dib senena' anyek sunuwoka ununggulumla' anasa, alda seleb henga goubuka' ak ulumla. Anasa yoka'-yoka' ara ganya aldib senena' anyek sunuwoka ununggulumak dara, malya una' ulumla.
15:1 Nunda migib ulumab nim era sik hmeng ulumak nim ek sikja hmeng enyek nunja dob salalemnemabakanya, nunja perob senelemabnya nok ganya dobom-dobom yok-yok ena' mem. 15:2 Nu gangganek ara nimi yok-yok nunja nim edya ganya eiya dabna' anyek, alak perob danggiga balamnamla' anyek yeiriwoka elemnemab. 15:3 Kristus anaba alda alak eiya dabnanya nenyek enggulumok anasa, bok alda an momnya doboka' ulumla sok, "Sikja yuba saboka derena', anak unu derelenjaka' ara, nasamba seleb wenyaboka unuwanyek." 15:4 Anasa nidya' yoka'-yoka' men danyek momnya doboknya nera, nuk anyeganyeb ella danamak senewoka seleb unu momnya dobok. Wera anedya nunda pe ganya gouluwoka salabmoubna' ab, geisa Imik Neyung yuba momnya doboka' ak ab ganya sangaldisina' ab dadya, ganya welemnamab aboka unuwok. 15:5 Dara al Imik Neyung ganya gouluna' damok ab, ganya sangallina' damok ab eleklesilnya bedya, ugunda Kristus Yesus senelamla' sunuwoka balalum sok, pe ganya kwebdangoka ugunuk eleklesulul. 15:6 Anedya ugunda nunja' Wenelesilnya, Yesus Kristus alja Imik Neyung, alja neyung bek hnon, hnonok ganya boboka, neikiwok leboka alja si imik nenelelulum, senelamna. 15:7 Anasa Kristus ara nuk Imik Neyung ak perob gigina' amba leboka seleb dobsuk sok, ugumbabya yok nang anaba pe keboka unuldalalulum. 15:8 Ban nadya lebnanya nera ban nenyek lebna, Imik Neyung adya perob nenesina' amba, Kristus ara nunja youma' nang ek wenyalasuka' anyek sunuwoka unuwoununa' aboka, alda bola' garan nang edya wa wenya seleb dok. 15:9 Anya yok mok soko nim era, sikda Imik Neyung ak alja angoo yadyek senewoka arasina' anasa leboka giblemneseng uruma geknewoulul aboka unuwok. Nera an momnya doboka' ulumla sok, "Anasa nara yok mok soko nimi gangganek ab anak giboka, anja si amba mazmur ber adya seboka giblemnenggen." 15:10 Ono' hnon leboknya nera, "Wei, yok mok soko nim o, alja nim eblaboka eiya hlalalulum." 15:11 Hnonda, "Wei, ugun yok mok soko nim o, Wenelesilnya bek giblelulum, or perob, nidya' yok-yok mok soko ulumak nimi yila' dumung era alak giblululum." 15:12 Dara Yesaya beneba wenyalamoka' ara, "Isai bedya damok ab be hnon lanawanamla, alda yok mok soko nim ek wenewousunun aboka lanawanamla, dara yok-yok mok soko nim era alak ok ganya dib beiliwanamak," wenyaboka lelemok. 15:13 Wera Imik Neyung al ganya wena' damoknya bera, ugunuk nidya' eiya bon ganya eb, pe namena' un ganya eb, ugunja ganya dib senena' pik uboka nidya' gigiwoka unulusulul. Anedya ugunda Geisinya migib pik uboka, ganya wena' ara hyak nauba danggiga balamnelum. 15:14 Nadya' hem yabo nang, ugunuk pe ununa' adya seleb deknewosuukanya, yok-yoka' ella dangana' damok eb, or pe ganya adyok wenebdanasom ara, nara seleb ella ulusin. 15:15 Bok Imik Neyung adya wana' uboka eleksina' anyek, nak seleb eleganyoknya nenesa, nara or ono sam gom, anasam gom, ugunuk hnon an wenyamsa' anyek ella ublulum aboka, asa' gebdangoka momnya doboka an seleb beibsisa. 15:16 Wera anera nara, sik Yahudi gom mok soko nim ek, Geisinya bedya muna' yok geisa nenewousuka' anyek, Imik Neyung adya alak pe giboka beibnyak senewoka doblul aboka, Yesus Kristus wa wenya dasakanya, Imik Neyung adya' perob lero yanggan yuba Yahudi gom nim ek lero yabalamna. 15:17 Anasa nara nadya Imik Neyung amba welemna wa nemba leboka, Kristus pik ab dara, nara or nonggo henesinya ok. 15:18 Dara nara yok yub emba dara, asa ganya boboka wenyaro yibinggunumna, bok Kristus ara yok mok soko nimi pe keboka ununa' ak bo balalul senewoka, yub sana' pik ab, laga ununa' pik ab, 15:19 yok lok so bekna' migib adya hnon, yok senenggom lok so ununa' adya hnon, Geisinya migib adya na pik uboka, welemla' anyek hnonok, nara asa' ganya boboka wenyaro yabalamnamna. Dara nara Yerusalem heik ab ara Ilirikum heik dongolamsa dara, nara Kristus bedya perob lero yanggan yub era hyak senenya loboka leb elekdo yibisa. 15:20 Anya ban yub en lero yabalamsa dara, nara nadya' peroba' anya' senelamsa' ara, Kristus si seleb ella unggulumeija nang mok soko era, yok nang edya seleb yangameija damok enyek, ono' nadya sounuwoka an eilib sob siklewanyek aboka, sikja mok heik era lelemsa. 15:21 Anera momnya doboka' ulumla' sunuwoka, "Sik anam alsamba yub enyek dobnenggumeija nang era, eimik alak eibnemaakanya, sik anam kenggulumeija nang era, eimik anyek senewoka pe ella ubnemak." 15:22 Wera anedya nara li gong ugunuk yanasinya senemsa bok, pik garalenyok. 15:23 Bok wenera, nara anyagan mok soko era hnon wa unggulumlakanya, nara ugunuk yanamna senemsa salek era, wene gibna' danyek wen senemsa' anasa, 15:24 nadya senelamna' ara, nara Spanyol sam bannya dara, ugun ululuma' ak dek-deka sobnyekanya, ugunub eibdanamab senelamna. Wera anedya, ugunublaboka una' anyek or meka' anya' senewanya dara, ugunda nak bokol bininulum senelamna. 15:25 Bok nara wenera Yerusalem heik sik bona' garan muna' Imik Neyung mab amba bona' arawoka bo balamna. 15:26 Dara Makedonia nang eb, Akhaya nang eb dara, nunda Yerusalem heikek yok muna' Imik Neyung mab gangganek bona' garan nang ulumak nang emba arawanamab arob. 15:27 Ban wenyan dara seleb unuwanamab aboka wenyarob dara, wera nera sikjinya nek ulumla. Dara yok mok soko nim era Yahudi nim edya peroba' ulusila' ak ab seleb dorob anasa, dara sikba yok mok soko nim eneba Yahudi nim ek sokok an ulumla bona' danedya arelemnemak ok. 15:28 Anasa nara ban wa nen seleb webdaknyakanya, yok mok soko nim edya sikja yeiriwoka eboka beiyiroba' anyek sikenek elekgogoweisinya dara, nara ugunuk pik ab uboka Spanyol moka binimna. 15:29 Anya nara ella ulumna' ara, wera nara ugunuk yanya dara, nara Kristus adya peroba' lelenel lomok, hyak senenya loboka unuwanasin senelamna. 15:30 Bok nunja wenesinya Yesus Kristus ab, Geisinya adya wana' usina' ab, danasa leboka, hemyabo nang, nara ugunuk wenewoka wenyhenemna' ara, ugunub nab Imik Neyung ak molona' anyek neika' hiboka, nasamba mololomnemab, 15:31 wera anedya, nara Yudea sam bleklemak nang ek ab pe arawoka bo ubnelekanya, ono' anedya Yerusalem amba webnamna wa nera, sik muna' Imik Neyung mab edya ganya hekoka or senewanok. 15:32 Dara na ban Imik Neyung adya wen senemlya' sunuwoka ugunuk ganya eiya daboka yanamnakanya, ganya hekna' ugunub neika' dobnemab. 15:33 Wera Imik Neyung al ganya pe namen una' damoknya bera, ugunuk soba' ulusulul! Amin.
16:1 Nara ugunuk molowoka wenyhenesina' ara, nunja' hem ge Febe, Kengkrea sam yuba dona' nim emba wa welemla gel genyek, ugunda pe arawoka ulumnelum. 16:2 An lebnanya nera, anedya ugunda alak Wenelesilnya pik ganya gwelelek aboka, neikso yok muna' Imik Neyung mab emba arawoka ulumak sok, alda yoka' hnon doroweisinya senewanamla dara, arawoka ubnelum. Wera alda yok nang ek hnon, na nong ak hnon, hyak nauba seleb arawousuk anasa. 16:3 Nadya perob aboka, nadya' hemyab Yesus Kristus pik neika' welemab nim, Priskila, Akwila ak, an sikenek gibsin yub enyek, unu wenyaboka gibisil henelum. 16:4 Sikda nak embenga' ululul aboka, sikja nong era seleb nuk obnesak aboka beibdarek. Anasa sikenek ara nanagok gibnenggubsin, alda Yahudi gom yuba dona' nimi nidya' anaba wenyamak. 16:5 Sikja ek yuba dona' nim eneba perob aboka gibisil wenyhenelum. Dara Asia mok soko, hyak men Kristus amba moubuk doka ulumla', nunja' hem hyak wana' ulumabnya, Epenetus bemba gibna. 16:6 Ugunsamba yeiriwoka welemla gel, Maria gek hnon gibna. 16:7 Na anam yuba dobnenggom enyek, Kristus lomok yub lena' gak nang gangganek ara si sina' nang uluraakanya, nadya' hemyabo neik mok soko nang, nablaboka neika henga gouboka doronggosika' Andronikus beb, Yunias beb, siksamba hnon gibsin. 16:8 Wenelesilnya pik uboka hyak wana' ulunanya, Ampliatus bek perob aboka gibna. 16:9 Kristus wa wenya nunja' hem be, Urbanus bek hnon gibna, nadya' wana' ulunanya, Stakhis bek hnon perob aboka gibna. 16:10 Yoka'-yoka' ak ab dara, Kristus lomok hyak siklebdaboka ululanya, Apeles bek hnon gibna. Sik Aristobulus bedya ek nim dangoka ulumak nim ek perob aboka gibsin. 16:11 Nadya' hembe, neik mok ebnya, Herodion bek perob aboka gibna. Sik Narkisus bedya ek dangoka, Wenelesilnya lomok ulumak nim ek, perob aboka gibsin. 16:12 Sik Imik Neyung amba hyak yongowoka welerak gelewa, Trifena geb, Trifosa geb, perob aboka gibsin. Al Imik Neyung amba hyak yongowoka welelanya, nadya' wana' ulunanya, Persis bek perob aboka alsamba gibna. 16:13 Wenelesilnya pik weboka doboknya, Rufus bek perob aboka gibna. Hnon alja' genong gek, nak danaba nadya' genong ulumla an perob aboka gibna. 16:14 Asinkritus beb, Flegon beb, Hermes beb, Patrobas beb, Hermes beb, hemyabo nang sikeneb neika' ulumak nang eb, perob aboka gibsin. 16:15 Filologus, Yulia geb, Nereus beb, al hmal gel geb, Olimpas beb, muna' Imik Neyung mabo nidya' sikeneblaboka ulumak nang eb, perob aboka gibsin. 16:16 Ugunda yuba dobub nang senewoka hyak pe ganya olokdangoka gibildalalulum. Anyagan Kristus yub dorob nim nidya' ara perob aboka gibisak. 16:17 Bok hem yab o, nara ugunuk wenewanesin, anedya ugun men neksika' doblum yub an, ono' yoksonya, nimi ganya bokdanok aboka, ganya sunuwoka doulub meneganasonya nenyek, sik ban unuwanasiseng nang ek pe keebdaboka ulululum. Wera anasa, sikenek pika leiboka ulululum! 16:18 Banaso nim era, nunja' wenesinya, Kristus amba wenggulumak anasa, bok sikja mon emba weldalamak nim. Sikja yub sana' edya hyak or senewanok aboka buguma' saboka, sikja yub era pero maka' lelewoka, ganya pe ulumak nim ek wenyaboka sonda' lelemak. 16:19 Ugunja pe keboka unululuma' anyek, an unu ulumak an yub era nimi nidya' ara kelemak. Wera anasa, nara ugunsamba leboka, hyak eiya dablenel. Bok nadya senelenanya nera, ugunda peroba' amba dara ganya pe ella uboka, malya' ak dara sembeja' oroka' anyek ulunok senelamna. 16:20 Ai, wera anasa, al Imik Neyung ganya nonga pe una' damoknya bedya, men berra aboka, bisa' dubnya Satan ara ugunja' yan damumduk soldob meneganamla e. Nunja Wenelesilnya Yesus adya wana' uboka eleksina' era ugunuk soba' ulusulul! 16:21 Nadya' hembe, neik wa welenamnya, Timotius bedya hnon, nadya' hemyabo, neikmok nang, Lukius bedya hnon, Yason bedya hnon, Sosipater bedya hnon, ugunuk perob aboka gibisak. 16:22 Nara ban momnya dona' dobnanya, Tertius bedya, ugunuk Wenelesilnya si sibuka perob aboka gibsin e. 16:23 Nak hnon, yuba dona' nim ak hnon, aralesilnya Gayus bedya, ugunuk perob aboka gibisil. Mok soko amba rupiah beillililanya, Erastus bedya hnon, nunja hembe, Kwartus bedya hnon, ugunuk perob aboka gibisirik. 16:24 Nunja Wenelesilnya, Yesus Kristus adya perob eleksina' era, ugunuk nidya' soba' ulusulul! Amin. 16:25 Ugunuk migiba' gebsuukanya, perob lero yanggan yub nadya senenggoma' lero yabalamna' ab, hyak gibna' gong gelek loboka, gunuwoknya nenyek sunuwoka, wera Yesus Kristus yub an lero yabalamna' ban nidya' ara, or alsamba ok. 16:26 Hnon gunuwok bok, wenera Imik Neyung ulmoubna'anya bedya orugosuka' sunuwoka, yok-yok mok soko nimi nidya' ara sikda ganya dib senewoka pe kena' ak bo binok aboka, ununumna' lelemek nang momnya doboka' pik uboka seleb wenyalasuka' ara, wera seleb laga dok. 16:27 Yesus Kristus pik uboka, Imik Neyung al alak ok hnonok, hyak geremseng nonga' si imik nenewoka gibna' ara, alsamba ok hyak sob-soba' ululul! Amin.
1:1-3 Nadya hemyab o, ugunda Imik Neyung yuba dona' nim, Korintus heikek ululum nim ek, ugunda Yesus Kristus lomok geisa nenesuk nim uboka, Imik Neyung amba muna' gobdo ulunoka' aboka youbusuk nim ek momnya doboka beibsin. Dara ono' Wenelesilnya si Yesus Kristus bek, sikja Wenelesilnya uboka, ono' nunja Wenelesilnya ulumla' anasa, yok mok nim eneba giblemak nim ek hnon, beibsin. Nara Paulus beb, nunja hem be Sostenes beb, nunja dara, nunja neyung Imik Neyung beb, Wenelesilnya Yesus Kristus ab dadya, ugunuk wana' uboka eleksina' ab, ganya siklewoka una' ugunuk ulusulul senelenam. Nara Imik Neyung adya alja seiniwoka, alja gaboka donyoknya bedya Wenelesilnya Yesus Kristus alja yuba lena' gaknya uboka, nara Paulus bedya ban momnya dona' en ugunuk beibsin e. 1:4 Ugunda Yesus Kristus pik uboka, Imik Neyung adya wana' uboka eleksina' seleb doluma' anasa, ugunsamba leboka Imik Neyung gibel yaban dara, Imik Neyung ak perob aboka mololamna. 1:5 Ugunda seleb Kristus lomok uboka, wera ugunuk dara, yoka'-yoka' nidya' ara, dub dangana' ak ululum. Ugunda yok-yok yuba salaluma' hnon, ella dangalaluma' hnon adya, dub nim ululum. 1:6 Wera Kristus ak laga dangana' anyek yarenga elegoka mel-mel asuk. 1:7 Anasa, nunja Wenelesilnya Yesus Kristus yanamla senewoka diri ululum salek era, ugunda yoka'-yoka' ganya elekna' ak dara, garan unggululum. 1:8 Dara, Wenelesilnya Yesus Kristus yanggalya sum era, ugunuk hnon gegena pona' oroka' anyek eibsununa' aboka, Kristus adya lobongganggonggom, ugunja ganya kallilimnesil. 1:9 Imik Neyung ara alja me nunja Wenelesilnya Yesus Kristus ab ganya kwebdangoka ulululuma' aboka, ugunuk youbosuknya bera, sob-soba bojam ulmorulelanya bek ulumla. 1:10 Nadya hemyab o, nara nunja' Wenelesilnya Yesus Kristus si sibuka, ugunda ganya bokoldana' hyak loboka, hnonok ganya boboka, hnonok seinina' seiniwoka, hnonoka' ak hiboka ulululuma' aboka, neik so ganya ok yo aldalaluluma' aboka, nara ugunuk wenelesin. 1:11 Hem yab o, ban wenyhenya nera, Kloe ek nim edya, nak Korintus nim era doluwoka bokdangoka ulumak aboka neknyeka' anasa, lebna. 1:12 Nadya wenyhenya nera damok ara, ugun gangganek ara hnon ara lelelumja, "Nara Paulus bek diriga balamna," hnon nang edya dara, "Nara Apolos bek diriga balamna," ono' yok hnon nang edya dara, "Nara Kristus ak diriga balamna," alaluma' anasa lebsin. 1:13 Kristus ara galawoka ululanya de? Paulus bera ugunsamba blebsulula' aboka oboka gal ak glabek de? Goma, ugun meka dasika' ara, Paulus bek si sibuka meka dasik de? 1:14 Anadya wera, nimi yok nim edya nak Paulus bera meka dasina' ara, Krispus beb Gayus beb danyek ok meka dasisa' anasa, nara perob senewoka eiya dabnel. 1:15 Anadya wera, nimi yok nim edya, nak Paulus bedya si sibuka meka dalasil ara, alja yuba don nimi danoka' aboka ulusil wenyhenggunenyak. 1:16 Yo, hnon ban, Stefanus beb alja ek nim eb danyek hnon, nadya okoka meka dabsisa. Bok yoknya nek dara, nadya hnon meka damsa' ara an senewoka beknenggulumna. 1:17 Kristus nak bokol yeilinyok era, nimi meka dalasulula' aboka ubnenggunyok, bok alda perob lero yanggana' yuba lelelula' aboka, bokol yeilinyok. Bok, Kristus gal dubuk somogok yuba migib era, salya' lelem dalyek aboka, nimi geremseng adya yuba lelelula' aboka, senewanggunyok. 1:18 Anasa, somoganoba' aboka uk hinik anam balamak nim edya dara, Kristus gal ak somogok yub era, salya' lelema' senelemak. Bok, nunda Imik Neyung adya blebsuk nim edya dara, Kristus somogok yub ara, Imik Neyung migib ara alan, senelemab. 1:19 Anasa wera, Imik Neyung adya yuba bukuk momnya doboka' ara, "Sokok amba geremseng nim edya sikja ella dangalamaka' ara, soldob meneganamna dara, yoka'-yoka' ella dangalamak nimi sikja ella una' era, orok nenewoka dengeiyiwanamna," aro dobok. 1:20 Geremseng nimi diba' ara hanyagar ulumak do? Sokok an yuba neksin nang diba' ara, har sam ulumak do? Imik Neyung adya sokok anyagan geremseng ulumaka' ara, orok nenemoka' anano? 1:21 Imik Neyung nidya' ella ulumla' adya, nimi soko nim era hyak yoka'-yoka' nauba ella' anaba, sikja ella una' edya dara, nak ella danggunuseng senemookanya, nunja lero yabalamab yub era, nim adya malya yuba senelemak bok, ban adya nak dib senelemak nim era, blebnesin senewoka perob senemok. 1:22 Yahudi nim era, lok so bekna' diba' ak eibsibya' aboka elemak. Yunani nim ek dara, nimi sokok an geremsenga' ella dangana' damok ak elemak. 1:23 Bok nuk dara, Kristus gal ak glaboka somogok yub ek lero yabalemab. Dara, Kristus gal dubuk somogok yub era, Yahudi nim ek dara, ganya suguwoka lek senelemak. Bok Yahudi gom nim ek dara, salya' so yuba senewoka dolbaleka dablesil. 1:24 Bok Imik Neyung adya nuk youbosuk nim edya dara, nera Yahudi nim eneba, Yahudi gom nim eneba, Kristus ara Imik Neyung adya alja migib eb, alja geremseng una' damok an, senelemab. 1:25 Anasa, Imik Neyung adya, nera dongdang ana' senelelanya nera ella nong bok, nim adya dara, nera hyak geremseng el dangana' senelemaknya nera dolbalek so. Ono' Imik Neyung adya, nera hmeng unululanya nera, migib nong ulumla. Nim adya migib era hmeng ulumla. 1:26 Wei, ugunda hemyab o, Imik Neyung adya ugunuk youbosuk sum era, ugunda heka' anasonya ululum anyek seiniwolulum. Nimi heng adya ugunuk kemesin dara, geremseng nang hnon, ganya goluwoka sikenek kelemak nimi hnon, yok-yok senenggom dub nanga hnon, nauba unggululum. 1:27 Anasa wera, sokok an geremseng ulumak nim era, sikba alya dabsulula' aboka, sokok anyeb nera dongdang alamaknya nenyek, gaboka dobsuk. Ono' sokok an senenggoma' anyek, migib ulumak nim enyek, sikba alya dabsulula' aboka, sokok anyeb nera hmenga senelemaknya nenyek, gaboka dobsuk. 1:28-29 Wera nimi nidya' ara, Imik Neyung hogung ak nonggo heijek aboka, Imik Neyung adya, wen sokok an ululanya nenyek orok nenewolula' aboka, nera sokok so, melinya, ono' hyak malya nong senelemaknya nenyek, gaboka dobsuk. 1:30 Imik Neyung adya ganya doboka albeyok unumoka' adya, wera ugunda Yesus Kristus ablaboka geisa nong gebeiyisuk. Dara, Imik Neyung adya, Kristus doboka, nunja geremsenga' alan aboka dangiyisuk. Dara ono', al Yesus ara nunja' ganya peldisina' ab, geisa una' ab, blebsina' ab danyek, ulusil. 1:31 Anasa wera, Imik Neyung yuba bukuk orowek momnya dobok sok, "Nara pelemna senewoka nonggo alalenya bera, Wenelesilnya lomok ulumna adya pelemna senewoka nonggo alalul e," aro dobok.
2:1 Hemyab o, Imik Neyung adya orowek seinibgegemok bok, soko adya dara, ella danggumoka' anyek, ugunuk lero yeilisisa sum era, nara meka lelewoka hobyang yuba saboka, ono' sokok an geremsenga' ulumaknya nedya ella dangoka ugunuk Imik Neyung yuba lel yanggusisa. 2:2 Anasa, nara orowek Korintus nimi gangganek ulumnya dara, yok-yok yuba salya' lebnenggunumna bok, alda Yesus Kristus yuba nong ok lelemnyekanya, okoka dara, Kristus gal dubuk somogoka' damok nong anyek ok, lelemnamna senemsa. 2:3 Nara ugunuk yeilimsa dara, nara hmenga' uboka lok gargadya' ber-ber ana' hwam ulumsa. 2:4 Yuba ugunuk leb elegeisisa' ara, nadya ganya geremseng edya, ganya sangasin yub ek lebnenggusisa bok, nadya ugunuk yuba leb elegeisisa dara, alda Imik Neyung Geisinya alja migib una' era laga dangamok. 2:5 Anasonya nera, ugunja Kristus ak dib seneleluma' ara, nim adya ella dangana' ek ganya kwebmunuk. Alda Imik Neyung migib ak ganya kweboka, dib seneleluluma' aboka, umsa. 2:6 Ban ulumsa' anaba, Imik Neyung yuba hyak ganya ologoka kaboka domek nim ek ara, naba hnon geremsenga' ella dangana' hnon lel eleklesin. Bok, ban lel eleklesin geremsengnya nenera, sokok an ella dangalamak geremsengnya nera unggulumla. Ono' sokok an dub dangoka ulumak nang sikja geremsengnya nera unggulumla. Eimik ban dub nang era, hyak denghenemak. 2:7 Geremseng una' ugunuk neklesina' ara, Imik Neyung adya soko uyiwanggom salek anyek, nuk si imik danoka' aboka, ban geremseng una' era, nuk ara gunuwoka doknowok ulumla' anyek, orowek seiniwoka beiyisuk. 2:8 Dara, wen sokok an dub nang ulumak nim edya dara, Imik Neyung adya geremseng una' nunsamba beiyisuka' ara, ella danggumek. Anasa wera, sikda hnon ella uluseng bok dara, Wenelesilnya hyak perobnya bera oboka gal ak glabnenggumneseng. 2:9 Alda saawoka, Imik Neyung yuba momnya dobok sok ara, "Yoka'-yoka' nim adya henga eiyiwoka o kenggulumaknya nera, ono' nimi ganya adya seinina' lanenggulumla' hnon nenyek, Imik Neyung adya, sik alak wana' ulumak nim emba memesuk." 2:10 Bok, Imik Neyung adya nuk seleb alja Geisinya pik uboka, nuk memesuknya nenesa laga amasuk. Imik Neyung Geisinya adya yoka'-yoka' nidya' ara, geklewoka ero yabalamla dara, ono' Imik Neyung adya anyek, unuwanamna senemna lomok doknomna anaba, laga gelewoka beillilamla. 2:11 Nimi ganya lomok sam yoka'-yoka' ella ulumla ara, yok soko nim era, ella uldanggulumak bok, al damnya bedya ok ella uldalamla. Anasonya neikik, Imik Neyung adya ganya yok-yok seinimna' ella ulumla' ara, al Imik Neyung alja Geisinya adya ok ella uldalamla. 2:12 Wera nuk ara, soko enyek anyeb ganya ek eleganggusuk bok, alda Imik Neyung adya, alja Geisa ganya ek elegousuk. Anadya wera, Imik Neyung adya nidya' yoka'-yoka' nuk elegousuknya nera, ella danoka' aboka Geisinya elegosuk. 2:13 Anasa wera, nunda yok-yok Imik Neyung yub era, Geisinya aralesila' adya sunuwoka lelemab. Dara, nim adya ella dangalamak ganya seinina' geremseng enyek lenggulumab bok, Imik Neyung Geisinya nuk neklesilnya nenyek lel eleklemab. 2:14 Dara, nim Imik Neyung Geisinya unggululanya bera, Geisinya adya eleklesila' ara, donggulumla. Alda eleklesila' anyek, dolbalek so senelamla. Dara, ban nenera Imik Neyung Geisinya adya ok damok ara ban senewoka ella dangalamak anasa, albeyok ella damenggom ulumla. 2:15 Geisa lomok ulumak nim era, yoka'-yoka' nidya' ara yana lelelabok, al nong ak dara, yok nim edya yana lelenggulumak. 2:16 Imik Neyung yuba bukuk momnya doboka' ara, "Heknyek Wenelesilnya bedya ganya ak ara ella ulumla do? Dara ono', heknedya Wenelesilnya bek wenewanamso do?" alamla. Bok al nun nong anyek, Kristus seinilamla sok, numbabya neikso seinilimab.
3:1 Ugunuk dara, nara Imik Neyung Geisa ganya seleb ulusil nim eneso' ak lebnenggusisa. Bok, nara ugunuk yuba lesisa' ara, sokok an seinilemak nim ek lelemak sok, ono' Kristus ak dib senelemak bok, anam moum den mab anaso' ulumak nim ek lelemak sok, ugunuk lesisa. 3:2 Men dara, gasa dena' demenggom ululuma' anasa, nauba nimi delemak dena' ek gom, alda moum den mabo delemak dena' ek elegeisisa. Bok, ugunda weneba okoka ganya kana' loboka anam salya' lelem ululum. 3:3 Ugunda solom ganya bobdangoka, ugun moumen anaba waldalalum, oldalalum dara, wera anara sokok an malya ganya bololuma' adya unululum. Imik Neyung ak elgom ulumak nim eneso' ak, ugunda ululum. 3:4 Dara, hnon nim era lelelumja, "Nara Paulus bek diriga balamna," hnon yok nim edya dara, lelelumja, "Nara Apolos bek diriga balamna," alalum. Ban wenyalalumnya nedya dara, ugunda sokok nimi ganya bolulum e. 3:5 Dib nong ara, Paulus bera heknya do? Ono' Apolos bera heknya do? Nunda welenamnya nenyek, ban adya dib senelum bok, nunda Imik Neyung adya alja wa arawoka, welenam nang ok ulunam. Nunda or Wenelesilnya bedya ban wa nenyek welerurum aboka, elegesuka' ok welenam. 3:6 Nadya dara, yina' ok memsa, Apolos bedya dara, alda mek ok yekemok bok, mekla' sangiyiwoka weliyimoknya bera, Imik Neyung adya ok unumok. 3:7 Anasa, yina' melelanya hnon, meka yeklelanya hnon ara, dib nong gom bok, Imik Neyung adya weliyiwoka, mekla' sangallililanya alak ok hnonok, dib nong ulumla. 3:8 Anasa sik penya dara, neik wa welerak nang ulurak. Dara, sikda wa ela' gigiro welerak sok, dekna' anaba sunuwoka dobnarak. 3:9 Nunda Imik Neyung amba neik wa welemab nang ulumab. Ugun nong ak dara, Imik Neyung adya alja wa soko yoka' anaso ululum. Dara ono', ugunda Imik Neyung alja e ululum. 3:10 Imik Neyung adya nak wana' uboka eleksina' edya wera, nara e sonya beneso uboka, nadya men e igimsa' ak ara, yok nanga makoka solomak. Bok, nimi nidya' ara, nadya egomna' igimsa ak, heka' huboka sobnamna do senewoka pe kendenemso. 3:11 Seleb ikimok egomna' diba ara Yesus Kristus. Yok nang era, yok egomna' diba' iknamenggom. 3:12 Bok, Imik Neyung adya ikimok egomna' ak ara, yok nang edya dara, hnonda emas girik adya solomak, hnonda perak girik adya solomak, hnonda yok-yok perob girik adya solomak. Bok, ono' hnonda or gal sirika' adya solomak, hnonda wira adya solomak, hnonda girik adya solomak. 3:13 Nimi nidya' ela' gigiro solomak e nera, Kristus yanamla sum era, nidya' damoka laga nenewanamla. Dara, nimi nidya' sikja wa nera, pe wemek gom, malya uboka wemek gom ara, Wenelesilnya Kristus yanamla sum enyek, ara uk adya sunuwanasil. 3:14 Nimi nidya' e soroba' anyek, uka diniwalyebok, uka denggublya dara, Imik Neyung adya perob dekna' dobnamla. 3:15 Bok, nim adya wa wemeija' anyek, uka delya dara, welenya bera angoo senewanamla. Al nong ak dara, blebnamla bok, uka delemna ak ab nongdem gobdakdo balamak sok ubnamla. 3:16 Ugunda Imik Neyung e ulumab senena' ara, ugun dam nang elgom uldalalum de? Imik Neyung Geisinya ara, ugunja ganya lomok ulusil ara, ugunda elgom de? 3:17 Imik Neyung e ara, aljinya yoka' nong uboka, ugun nong ak dara, ban e nong ululuma' anasa, nimi ben hnon Imik Neyung e ak golol meneklamla dara, alba Imik Neyung adya, alak golob meneganamla. 3:18 Nimi ben hnon, al damnya bol neneldanggom. Ono' nimi ben hnon ugun gangganek ara, nara yoka'-yoka' nauba el nong seneldalamla dara, Imik Neyung adya alak yok geremseng hwamnya nenewonulula' aboka, wenera dongdang ana' anya' dangoka ululul. 3:19 Nera sokok anyek geremseng nong senelemaknya nera, Imik Neyung adya dara, dongdang ana' anya senelamla. Imik Neyung bukuk momnya doboka' ara, "Yoka'-yoka' geremseng ulumak nim ek, Imik Neyung adya geremseng ulumaka' ak ab, henga weboka youlusil," aro dobok. 3:20 Ono' momnya dobok ara, "Yoka'-yoka' nauba ella ulumak nim era, sikja yoka'-yoka' seinilemaka' ara, Imik Neyung adya dara, nera salya' lelem seinilemaka' ara, ella ulumla," ara dobok. 3:21 Anasa wera, ugunja nim ek ara, hyak perob senewoka gigildanggom. Yoka'-yoka' nidya' ara, Imik Neyung adya ugunuk elegesuk ak ulumla. 3:22 Anasa Paulus gom, Petrus gom, sokok an gom, somoganaluma' gom, embenga' ulumnaluma' gom, wen ulumla salek gom, eimik yanamla salek gom, nidya' ara, ugunjinya yoka' nong ulumla. 3:23 Dara, ono' ugun nong ak dara, Kristus aljinya uboka, Kristus nong ak dara, Imik Neyung aljinya ulumla.
4:1 Anasa nuk dara, wera Imik Neyung adya gegemoka' anyek, nuk elegosuk nim uboka, kristus ak arawoka welemak nang ulumak alasinok. 4:2 Wera, ban unuwoka arawoka welemak nang ara, wa ara yoknya bedya welelulum aboka, oruklesil dara, or pe bojam unulunok. 4:3 Bok, na Paulus ben nong ak dara, or ugunja gom, yok nim eneba, nak yana lelelenulum dara, nera malya senewoka dolbaleka' dablenel. Na moumen seinildalamna anaba, dib yana leleldanggulumna. 4:4 Nara ban nenyek malya ubna senena' ara, orok bok, nenyek dara, wera nara pe ulumna gom, malya ulumna gom ara, nadya' goma', Wenelesilnya bedya ok sunuwoka yana lelelenel. 4:5 Anasa wera, ugunja men, bera malya ubla, bera pewal aboka, berra aboka yana leleldanggom. Alda diri ulumuna' ara Wenelelesilnya bedya yalyekanya, al adya yok-yok damoka nidya' guna' lomok sam doknolomla' ara, poboka laga nenewanamla. Imik Neyung adya, ono' nimi ganya lomok mouboka seinilemaknya nera, laga nenewanamla. Ban sum enyek, nimi nidya' ara, Imik Neyung adya sikenek unuro yana lelewoka gigiwanesil. 4:6 Anasa nadya hemyab o, ugun pesindamba dara, nadya Apolos bek hnon, nak hnon, sunuwoka seleb lebsin. Ban unusenya nera damok ara, anadya ugunda nuk keeboka, sik unulurak senewoka pe unuwolulum, anya wera, wen ulumla pe unulumaka' anyek salabmoubluluma' aboka ubsin. Anadya wera, ugun moumen ara, nunda perob nim aboka, gigibdangoka ono' yok nim era, malya nenewomunuk aboka ubsin. 4:7 Anasa wera anak dara, heknedya men perob so uyinyok senelelam do? Anda yoka'-yoka' bololama' ara, hnon eleganggunjoknya nek hnon bololam de? Wera dara, yoka'-yoka' nidya' anak elegenjok bok dara, hekasa nabeyok dolomna senewoka, nonggo alalam do? 4:8 Ugunda seleb dub nang ululum. Anadya wera yoka'-yoka' dobsinya ganya bonggululum. Ugunda seleb dub nanga dolum bok, nuk dara, orok! Nublaboka neika' nimi yok nim ek wenelenoba' aboka, ugunda seleb dub nanga dangasom dara, perob senewanesinya bok. 4:9 Nadya seinilamna dara, nu Imik Neyung yuba lena' gak nang dara, Imik Neyung adya nuk seleb, nim adya ngoluksin nanga hnon, lero nang edya ngoluksin nanga hnon dangiyisuk. Nuk dara, malya umna' anasa, obnamna nim eneso uboka, nimi hogung ok sam obnemab aboka, ono' sokok anyeb ebngalogoka glollisin nim eneso' ak ulumab. 4:10 Kristus nong anasa leboka, ugunuk dara yuba dona' geremseng nim uboka, nuk dara dongdang ana' nim ulumab. Nuk hmeng ulumab bok, ugunuk dara migib ululum. Nuk dara derelesak bok, ugunuk dara, perob senewoka gigilesak. 4:11 Dara wenebabya, nunda mek oka, gwaneng oka kwelesil. Nunda denerob akleng ok ongolomab. Nuk nim adya malya nenewoka olosak. Nunja diba' un e nera unggulumla. 4:12 Nunda yoka'-yoka' dobnoba' aboka dara, nunja soruk adya yeiriwoka welemab. Nuk nim adya weil malya' gloksin dara, unuwesin nang ek amba peroba'-peroba' lelemab. Nuk malya nenewoka obsin dara, obsin nang ek sam siklewoka lolomab. 4:13 Nim adya nuk derewoka wabsin dara, sikenek ara nunja dara, meka lelewoka perob ok lelesab. Dara wenebabya, nunda sokok an sembeja' eneso ak ulumab; nim adya lolomak sembeja' anaso ulumak senellilisak. 4:14 Nara ban wenyaboka ugunuk momnya dobsina' ara, ugunuk alya dabsulula' aboka ubnenggubsin bok, ugunda nadya mab eneso ululuma' anasa, wenesin danasa lebsin. 4:15 Kristus yuba dona' nim ululumukanya, ugunuk yuba neksin nang era, denga salya' ulusiseng bok, ugunja' neyung bera gong danggunuseng. Na Paulus ben nong anyek, Kristus Yesus adya' perob lero yanggan yub elegeisisa' adya, ugunja neyung be dangoka unya nok ulumna. 4:16 Anasa wera, nadya ulumna sok diliga' doboka ulululuma' aboka, ugunuk duka' lolom-lolom hesin. 4:17 An nenesa leboka, hem Timotius benyek na lunuwoka ugunuk bilom aboka bokol yeisin. Al Timotius bera, Wenelesilnya bemba ganya goluwoka pe welelanya bek, nadya' yoka' dam me neneso wana' ulumna me nek, bokol yeisin. Alda hyak pelemla senewoka, welelul senelamna me. Dara alja ugunuk, nadya Kristus ak dib senemsa danyek ulusenya nenyek an ara, nadya yuba dona' nimi wenero yabalasina' anyek, ugunuk saawoka bekellilimnesil. 4:18 Nimi wene nang ugun gangganek ara, nera Paulus bera anyagan yanggublul senewoka, sikda dengdang ganya bobak. 4:19 Wenelesilnya bedya, nak or Korintus nim ek bulul senewalya dara, mek anam ugunuk kemel yanasin. Na yanya danyek wera, dengdang ganya bolomak nim era, nera yuba dem ok salamak gom, aldib migib ulumak gom ara eibnamna. 4:20 Anasa Imik Neyung wenelemnesila' ak dara, yub dem adya gom, aldib senewoka alda migib adya hnon ulumnamla. 4:21 Anasa wenera, ugunja perob senemunya nenyek, nunda nenyek henelum. Ugunja dara, nara yeiriwoka yuba gasa einiwoka nekel yosulul senelelum gom, alda ugunuk wana' ganya uboka, namena' anyek pe nekel yosulul senelelum gom?
5:1 Nara hnon, ugun gangganek ara, hnon nang era gela salawoka malya uro balamak anaso aboka lelemaka' ak hnon kelemna. Wenyalameknya nera, Imik Neyung yuba dona' orok nim eneba ununa' oroknya nek, ben hnon alja' neyung bedya eimik gel gek dobdangarek, alamaka' ak kemsa. 5:2 Ban unululumjok, wera ono' ugunda dengdang aboka, imik nenebdangdo yabalalum. Ban unululumnya nera, dib nong ara, ono' angwei salya' ulumla senewoka engelemnesomokanya, malya unulumak nim era, ugun gangganek ab doboka yaknasom. 5:3 Na nong ak dara, ugunub unggulumab bok, ganya ak dara, nara ugunub neika' ulumab. Anasa wera, neikik ulumna' anaso uboka, ban unumoknya bek ara, ban unuwanamab senewoka seleb seinibgogomsa. 5:4 Ugunda Wenelesilnya si Yesus lomok uboka, yuba longowomun dara, nara ganya adya neikik uboka, ugunja nunja Wenelesilnya Yesus migib adya, ban malya unululanya benyek, Iblis bek elegolulum. 5:5 Al onnya benyek, wera alja nong ara, soldob menegoka denghulul senen bok, alja ganya ak dara, Wenelesilnya yanamla sum enyek bleblula' aboka, eleganalum. 5:6 Ugunja nonggo aldalaluma' ara malya nong. Roti gwaneng welena' ara mek bok, nonga nidya' eldaklamla' ara, ugunda elgom ululum de? 5:7 Dib nong ara, ugunda perob eldaknenggulumla roti anaso seleb ululum bok, wenera ugunda ban youma' malya una' anaso roti eldaklamla anyek boboganalumukanya, hyak perob wenyok eldaknenggulumla roti anaso ono' perob danalum. Anasa wera, Kristus nong anyek seleb blebsina' domba pama dangamoka' adya, wera nera malya una' amba seleb somogoka' ulumla' anasa lebna. 5:8 Nenesa leboka nunda wenera, youma' blebsuka' bekoka Paskah sum delemak sok, numbabya delemnemab. Youma' malya una' anaso welena' makoka denggulumnemab. Hyak eldaknenggulumla perob una' roti ok delemnemab. Anasa, sununa' ara an lebsin. 5:9 Nadya men beiyisisa momnya dona' lomok sam ara lesedya, "Ugunda gela salana' hwam ok ulumak nang eb dara, neika' hiboka una' ara mem," amsa. 5:10 Ban nadya wenyasenya nera, anyagan soko nim era, gela salana' hwam nang hnon, hmaba' ganya bolomak nimi hnon, sonda' anasa meka lelewoka lelemak nimi hnon, bisa' ak molowoka giblemak nimi hnon, nenyek gobdo bokdangoka ulumnalum aboka, lebnenggubsa. Nera orok! Ugunja nim enyek malya ululum nim aboka, gobdo mok nenewanasom dara, wera ugumbabya sokok an una' loboka yibinesom bok, 5:11 alda nadya lebsenya nera damok ara, ban nenesa lemsa. Alda sonda' anasa, nara Imik Neyung yuba donya aldalaladyok, ono' gela salana' ganya hnon, hmaba' un ganya hnon, bisa' ak giboka, yok nanga salya' miniwoka leboka, ganya uu alasil meka deregoka, meka lelewoka hoka' dona'anya ululadyok anasa, ugunublaboka ubmunuk aboka, yuba sekleng sok lemsa. Sikeneb neika' se' bukoka dena' anaba, hyak mem nong! 5:12-13 Imik Neyung yuba donggulumak nimi malya una' enesa dara, nadya yana lelen dara, narinya goma', unuwanggunusinya. Nenyek Imik Neyung adya sikba eimik enyek, yana lelewanesil. Bok, ugunub neika' yuba dololum nim era, ugunja dara, sikenek yana lelewanggunusom de? Alkitab bukuk sam seleb momnya doboka' ara, Malya una' hwam ok ulumak nim era, ugun gangganek sam ab yaklulum, ara doboka' anasa lebsin.
6:1 Nimi hnon ugun gangganek ara, yok nim eb gogoba' ganya bobdangaseng dara, yok muna' Imik Neyung mab ak memewananulum aboka, ena' ara loboka, alda yuba donggulumak nim ek, ugunja yana lelewanasulum aboka, bo binimso de? 6:2 Wera eimik era, muna' Imik Neyung mab adya sokok an yana lelewanesaka' ara, ugunda elgom ululum de? Dara ugunda soko nidya' yana lelewanalum bok anasa, hekasa mek siriknya neneba wen yana leleldanggululum do? 6:3 Nunja eimik era, lero nang ek yana lelewanamaba' ara, ugunda elgom ululum de? Anasa, hyak nauba so ara, nunja soba' ulumabakanya unulumabnya nera, yana lelelemnamab. 6:4 Dara wera, ugun yuba dololuma' gangganek an yoka'-yoka' lanawanamso dara, wera ugunub neika' yuba dona' orok nim ek, nunsamba yana lelewanesulum aboka molowanasom de? 6:5 Ban wenyhesinya nera, ugunuk alya dabsulula' aboka lebsin. Ugun gangganek ara, gogoba' ganya bobdangaseng dara, ella uboka ugun moumen yana lelewanasusonya hnon una' orok anasa ululum de? 6:6 Bok wen ugunja unululuma' ara, ugun moumen ara al kabo neika' yuba donanya bedya malya ubna dara, yuba dona' orok nang ek, nadya hem be malya ubla aboka, yana lelewanoka' aboka, yuba bo nekel balalum. 6:7 Ugun moumen yuba donggulumak nim ek, anaso malya ubsak aboka yuba bo balalum dara, al seleb hmeng dangdowolum. Ugun moumen malya ubsija dara, hekasa diriganggunumna seneldanggululum do? Ugunja bona' hoka' dobsija dara, hekasa or ununenok seneldanggululum do? 6:8 Bok saawoka, ugumbabya hnon hoka' dobdangoka malya ubdangoka unululum. Ugun kabo nim ek anaba, unuldalalulum. 6:9 Nimi malya ulwenelemak nim era, eimik era Imik Neyung wenesin heikek hyak weknenggunumaka' ara, ugunda elgom ululum de? Wei, bol neneldanggom. Salya' gela hoka' salalamak nang eb, yoka'-yoka' ak giblemak nim eb, yok nang gela salalamak nang eb, sik moumen bok dekeldalamak nang eb dara, imik heikek weknenggunumak. 6:10 Ono' hnon, hoka' dolomak nim eb, ganya oka delesil nim eb, yu meka deregoka ganya uu alamak nang eb, yok nimi si ak malya nenelemak nim eb, yoka' ak menenga' amba yaboka ol neblemak nim eb, ban nidya' anaso unulwenelemak nim era, Imik Neyung wenesin heikek ara weknenggunumak. 6:11 Ugumbabya hnon men dara, nenyek unululum. Bok wenyek dara, ugunda malya una' ak ab, seleb meka elegoka geisa nenewosuk. Ugunda Imik Neyung mabo seleb muna' gobdo dangiyisuk. Ugunda Wenelesilnya si Yesus Kristus ak dib senewoka, nunja' Imik Neyung Geisinya bedya migib edya, ugunda seleb peroba' neniyiwousuk. 6:12 Yok nim edya hnon lelemaka' ara, "Yoka'-yoka' nidya' ara, salya' ganya doboka unuwanesibya," alasak. Bok nak dara, "Ban nidya' ara perobnya noka' aboka ganya doboka unuwanamna," henesinya bok, na nong ak dara, "Yoka'-yoka' adya ologoka mabnelyek," senelamna. 6:13 Hnonda wenyalamakja, "Dena' ara mon amba ulumla. Mon ara dena' amba ulumla," wenyalamak bok, nidya' penya ara, Imik Neyung adya eimik orok nenewanamla. Nimi nong goukwa ara, gela salawoka uro yaban danasa goma'. Nimi nong ara, Wenelesilnya bemba ulumlakanya, Wenelesilnya bera, nimi nong amba ulusil. 6:14 Imik Neyung adya Wenelesilnya Yesus bera somokna' ak ab, embenga' dangiyimok. Anasonya neikik eimik era, numbabya alja migib edya, Imik Neyung adya nuk embenga' bukiyiwanasil. 6:15 Ugunja nonga yok-yok ara, hiboka Kristus nong ululuma' ara, ugunda elgom de? Dara, Kristus adya nong ululuma' anyek, nadya doboka gela salana' ak neika' hil binisinya de? Hyak unuwanggunusinya, mem. 6:16 Yok nang edya salya' salawoka bololomak gel gek, ben hnon eimik salalamla dara, unulanya bera gel genedya, hnonok nonga dangalamla' ara, ugunda anam elgom ululum de? Imik Neyung yuba bukuk momnya doboka' ara, "Gel ab nenya ab hnonok nong danerak," hyok bar. 6:17 Bok, Wenelesilnya Imik Neyung beblaboka neika' denewoka ululanya bera, Wenelesilnya beb alab, ganya ak dara, hnonok dangalarak. 6:18 Yok gela salawoka uldana' ara, hyak loboka mok yabalalulum. Yok-yok malya una' ak dara, nim adya unulumaka' ara, nimi nong weilik ab ulumla. Bok, gela salawoka malya ululanya bera, alda al damnya alja nong ek malya uldalamla. 6:19 Ugunja nong era, Imik Neyung Geisinya alja e ululuma' ara, ugunda elgom ululum de? Imik Neyung adya alja ok ganya doboka, Geisinya bera ugunuk elegesuukanya, Geisinya era ugunja nong lomok ulusil. Ugun nong ara, ugunja' ak unggululum. Ugun nong ara, Imik Neyung alja' yoka' nonga' ak ululum. 6:20 Imik Neyung adya ugunuk seleb dekna' doboka deksuk. Anasa wera, ugunja nong era pe ulumuna' adya, Imik Neyung si imik dangallilimnelum.
7:1 Wenera nara ugunja momnya dona' pik neknulum yub ek lebnamna. Nengmabo ben hnon ara, gela dobnenggunumla dara, nera perob. 7:2 Bok, doldana' orok adya, meknewoka salaldalamaka' anasa, nengmab ak dara, alba alja gel ge dobnamla. Dara, gel ak dara, albabya nenya dobnamla. 7:3 Dara nenya ara, alja gel ak pe nenya unulamla sok unululul. Dara neikso, gel adya, alja nenya ak anaba, hyak pe unululul. 7:4 Gel alja nong ara, ala' moka' ak unggulumla. Alda alja nenya amba hnon ulumla. Anasonya neikik, nenya anaba alja nong ak dara, ala' moka' ak unggulumla bok, alja gel gemba hnon ulumla. 7:5 Anasa, gela nenya dobdangoka ulumunjok dara, malya ganya boboka, loboka yok-yok una' ara mem. Se' amba dara, bokdangoka ulumnulum bok, nera men nenya ab gel ab unuwananam aboka, yuba sabdoumun dara, or unulumnulum. Bok, soba' anaso unulmorulumun dara, bisa' dubnya Satan adya ugunuk galal yeisilyek anasa, se' ok bilimuna' ara youmun dara, gela nenya ono' neika' ulumnulum. 7:6 Nadya ban wenyhesinnya nera, ugunda ganya pe seiniwoka unuwanaluma' ak lesin, gasa wekewoka lenggulusin. 7:7 Nadya ganya ak dara, nimi nidya' ara, nadya ulumna sok, sikba ulumneseng senelenabok, nimi yok-yok ara, Imik Neyung adya ela' girigo yok-yok eleklesil. Anasa, hnon nim era ban nenyek elegemoka' adya, alba unululabok, yok nim era yok elegemoka' adya, yok unulamla. 7:8 Gelewa, nengmabo, anam dobdanggom nim eb, youk gelewa ululum nim eb, nadya ban wenewanasin. Naba ulumna sok, ugumbabya ugumbeyok kaboka ulumnalum dara, nera perob. 7:9 Bok, gela nenya dobsinya ganya nauba seinilemun dara, wera men gela nenya dobnelum. Gela nenya dobsinya ganya adya, anja ganya nauba oka delesilya dara, or gela nenya dobnelum dara, perob so. 7:10 Gela nenya seleb dorob nim ek, anadya ban oruganesin. (Ban nenera nadya ok unuwoluluma' aboka lebnenggubsin bok, Wenelesilnya bedya ban ara ugunuk lelesil.) Nenya seleb domlya gel gera, alja nenya lona' ara, hyak mem. 7:11 Bok, gel ara nenya doledyok loblya dara, wera yok nenya ek saawoka dona' ara, hyak mem. Goma, saawoka men dosonya bek hil yanamso' ok ulumla. Dara, nengmab anababya neikik, domlya gel gera lona' ara mem. 7:12 Bok, yoknya nemba wenewanasina' ara ban (Nera Wenelesilnya bedya gom, alda nadyok weneweisin yub era an): Dolenya bedya Yesus ak dib senena' orok gel gek ulumlya gel gedya, nara anab pe ulumnenam helya dara, dolenya bera yuba dona' orok gel aboka, lona' ara mem. 7:13 Dara ono' saawoka, Imik Neyung yuba dolomlya gel genyek, Kristus ak dib senena' oroknya bedya nara anablaboka ulumnenam helya dara, lobnun aboka, lona' ara mem. 7:14 Anasa wera, yuba dona' oroknya benyek, alda Imik Neyung me dangamna gel gek dolomla dara yok so nenelamla. Anasonya neikik, ono' gel ara, yuba dona' orok bok, Imik Neyung me dangasonya bedya doboka' adya, wera yok so nenelamla. Dara, ban nenyek ununa' orok dara, sikja beibseng me neneba beiyik mab anaso' uluseng bok, ban ununa' adya yok so nenelesil. 7:15 Bok, Imik Neyung yuba dona' orok gel gom, nenya gom edya, alja gel gek gom, alja nenya ek gom loblya dara, or lo balalul. Ban unuwalya dara, al yuba dib senelelanya bera anam kwemna' anaso unggulumla. Imik Neyung adya dara, waldana' oldana' oroka' anyek, pe ulunok senelesil. 7:16 Ugun Imik Neyung yuba dololum gelewa edya dara, anja dara, nadya nenya era, Imik Neyung ak bleboka bo yanamna gom, orok gom ara, ugunda elgom ululum. Anasa ono', ugun Imik Neyung yuba dololum nengmab edya dara, neikik nadya gel gera bleboka bo yanamna gom, orok gom ara, ugunda elgom ululum. Yuba 7:17 Imik Neyung adya ugunuk youbsuka' ara, al adya migib elegoka ban unuwoka ulumnelum aboka, youbosuk sok, neik so unu ulumnalum. Dara, ban yub enyek, nimi nidya' Imik Neyung yuba dolomak nim ek unulululum aboka, wenero yabalasin. 7:18 Sununa' ara, nimi ben hnon, alak Imik Neyung adya youblya sum enyek, bola' garamoknya ulumlya dara, saawoka bola' garawanggomnya neneldanggom. Bok, ben hnon Imik Neyung adya youblya sum enyek, bola' garawanggomnya bek ulumlya dara ono' bola' garawanenok senen unggom, mem. 7:19 Anasa wera, bola' garalamaka' ab, bola' garanggulumaka' ab dara, dib nong goma'. Hyak peroba' dib nonga' ara, nim ara Imik Neyung yuba lelesila' ak keboka unulumaka' ak dib nong ulumla. 7:20 Imik Neyung adya ugun youbsuk sum ek ululum sok, weneba neikik so ulululum. 7:21 Imik Neyung adya an yalom aboka enjok sum era, anda oruknanya ululum bok, eboka donjok dara, nara benya' senewoka nenyek nauba seininggom. Bok, anda salya' pe ululoma' aboka, li elegagelya dara, or elegagelya' ak an dob salawoka ululom. 7:22 Nimi ben hnon, oruknanya bek bok, Wenelesilnya bedya youbomok bok dara, wenera alda Wenelesilnya bedya glo'anya dangalamla. Bok, youbomok sum enyek, glo'anya ulumok bok dara, alda Kristus adya wa wenya dangalamla. 7:23 Imik Neyung adya dekna' edya seleb deksuk. Anasa wera, nimi yoka' adya oruknanya dangoka ununggom, mem. 7:24 Anasa wera, hemyab o, Imik Neyung adya ugun eboka youbsuk sum enyek, ugunja ululum nong enyek, weneba al anaso uboka, Imik Neyung ab neika' ulululum. 7:25 Wera gela nenya dobdanggom nim emba lebnamna. Ban nenesemba dara, nara Wenelesilnya bek ab yuba hnon okoka neknenggunyok bok, Wenelesilnya bedya nak angoo yadyek senewoka eleklenelnya bedya, ban senelenanya nenyek neknesin. 7:26 Wenera yoka'-yoka' igina kwesina' lanalelabok anasa, nadya seinilamna' ara, sikba wen pe ulumak sok uluseng senelamna. 7:27 Anda gela seleb domen bok dara, gel genera lobsinya senewoka, yeiriwoka pika ena' ara mem. Anda gela anam dona' orok bok dara, gela dobnun senewoka ena' ara mem. 7:28 Bok, anda gela dobnelam dara, nera malya una' goma'. Anaso neikik, goubenya gel gera nenya dolomla dara, nera alda malya unggulumla. Bok, alda doldalamak nim era, yoka'-yoka' igina kwesina' damok ara, sikenek ulumnesil. Nadya dara, unurub igin yaka' danyek ugunuk kwebsilyek aboka lelemna. 7:29 Hemyab o, nadya lelenanya nera, damok ara banasa lelemna. Nu ulumab salek enera wera meka' me ubla. Anasa wenyek danyek moruwoka, gela yak nang era, gela dobnenggomnya beneso ak ulumnamso. 7:30 Ganya suguwoka engelelenya bera, unuwanggunanya beneso' ak, or-or uboka pe ululul. Okselelenya bera, ei-ei ganya bobnenggunanya beneso' ak ululul. Yok-yok bona' deklenya bera, alda or-or uboka, bona' garananya beneso ululul. 7:31 Sokok an wen ulumla' eillililum ara, mek anam denghenelabok anasa, sokok an yoka'-yoka' unululumnya nenyek, salya' so boboka lololumnya neneso ulululum. 7:32 Nadya senelamna' ara, ugunda okna ulusil ak ab loboka, pe ulululum senelesin. Gela oroknya bera, alda Wenelesilnya bek ganya hekellilinun senewoka, Wenelesilnya bedya perob senelelanya nenyek, ganya dib beiliwoka ulumla. 7:33 Bok gela yaknya bera, alja gel gedya perob senewonulul senewoka sokok an ulumla' digum ok soba' seiniro ulumla. 7:34 Wera anadya alja ganya era, bokgokoka ulumla. Nenya dona' orok gel gek dara, alja senelamla' ara, alja ganya nong ab dara, Wenelesilnya bedya dangoka ulunun senewoka, Wenelesilnya seinilamla ok geklewoka seiniro ulumla. Bok, nenya domna gel gera, nadya nenya edya perob senewonulula' aboka, ulumla' anasa, alja ganya seinilamla' ara, sokok anyebnya nok seiniro ulumla. 7:35 Ban nadya ugunuk momnya doboka beibsina' ara, ban men ununggom. Ban nenyek ununa' ara, mem aboka ubnenggubna. Alda ugunuk perob dosulula' aboka ubna. Nadya ugunja unuwanok senelamna' ara, ugunja unuwanamuna' geknewoka peblenya nenyek unuwoka, ono' ugunja ganya era, Wenelesilnya bek bekoka, dib beiliwoka ulululuma' aboka lebsin. 7:36 Wera nimi ben hnon, nadya molob lobsa gel genyek, goubenya yamen dangoka pe ulunamakanya, nunda kaboka siklewoka ubnenggunusinima' anasa, nadya molowasa gel gek or dobnamna senelamla dara, nera or alja senelamla sok unuwolul. Anasa wera, sik dobdanasereng dara, nera malya una' gom anasa, or perob. 7:37 Bok, ono' nimi ben hnon nadya molob lobsa gel gek ara, nadya dona' lobnamna senewanamla dara, ban seiniwalya' ara, yok nim edya gom, alja ok ganya anaso seiniwalya dara, nara pe ulumnamla senelamla' anasa, or lobnamla' ara pelemla. 7:38 Dara, gela domna nang ara pe unulamla. Bok, gela gobdo dona' orok nang era hyak nauba pe unulamla. 7:39 Nenya domna gel gera, alja nenya embenga' or ulumla salek era, alja nenya ek neika' ganya daklinggoka ulumla. Bok, alja nenya seleb somoganemso dara, wera gel gera alja nara ban benyek dobnun senewanamso dara, al Imik Neyung yuba dorobnya bek senelamla dara, or unuwolul. 7:40 Bok nenya somogamso gel gera, yok nenyek dona' orok dara, hyak nauba pe ulumnamla senelamna. Nera nadya ganya edyok seiniwoka lebnabok, Imik Neyung Geisinya migib adya lelemla' ak lelemna, senelamna.
8:1 Wenera meewoka giblemaknya nek, beil balamak dena' yub ek lebnesin. Nim adya, "Nunda nidya' ara, yoka'-yoka' ella ulumab," alamaka' ara ella ulumab. Bok, nimi geremseng ulumaka' nong adya, nauba dengdang ganya nenelesil, bok wana' una' adya danyek, nim ak bukullilisil. 8:2 Nimi ben hnon, nara yoka'-yoka' ara, nauba ella ulumna seneldalalanya bera, hyak dib nong ara, yoka'-yoka' ganya olowoka anam pe ella unggulumla. 8:3 Bok, Imik Neyung ak ganya ologoka wana' ululanya bera, Imik Neyung adya alak ella ulumla. 8:4 Dara, dena' ara meewoka giblemaknya nek beil balamak yub ek dara, nera meewoka giblemaka' ara nong ak dara, dib nong unggulumla' ara, nunda ella ulumab. Dara ono' nunda hnon sokok an yoka'-yoka' ulumla' adya ella ulumaba' ara, Imik Neyung ara hyak hnonok Imik Neyung ok ulumlakanya, yok Imik Neyung era, hnon meka' unggulumla. 8:5 Dara, nimi yok nang edya, Imik Neyung ara an, Wenelesilnya yoka' ara an, alamaknya nera, imik sam hnon, sokok sam hnon, nim uguma' nauba ululabok, 8:6 nun nong ak dara, Imik Neyung nunja neyung hnonok ok ulumla. Al adya dara, yoka'-yoka' nidya' uyimoknya bek ulumla. Nunda al nong amba ok ulumab. Nunja Wenelesilnya bera, nuk dara hnonok ok ulusila' ara, Yesus Kristus hnonok ulusil. Nidya' yoka'-yoka' ara, Yesus Kristus pik moruwoka uyimok. Dara, nunda al adya embenga' ulumab. 8:7 Bok, ban ella ulumaba' anaba, ban nera nimi nidya' ella ulumaka' goma! Hnonda youma' dara, bisa' giblemeka' adya, wenebabya soba' giblemaka' ak sam beil balamak dena' era, an senewoka bekelmoublemak. Anadya sikja mek ganya era dib kana' orok adya, doboka den dara, nera malya una' denewanel senelemak. 8:8 Hyak dib nong ara, dena' adya dara, nub Imik Neyung ab ganya kwebdangoka pe una' ara unggulumab. Wera hnon dena' loboka denggunesibya dara, anadya malya so danganggulumab. Dara ono' saawoka, hnon dena' doboka denesibya' anaba, perob so danganggulumab. 8:9 Bok, ugunda hyak pe keebmoublulum! An adya nidya' yoka'-yoka' ara, ella uboka unululama' adya, yub dib doboka ganya kana' orok nim enyek, oluk dikna' girik anaso neniyiwamenek anasa, keeboka ululom. 8:10 Nenera ban nenesa lemna, Anda yuba dib doboka ganya kasomnya benyek, bisa' amba beil balamak dena' dero bulusom dara, ono' dero bulusoma' ak hnon, ganya kana' oroknya bedya eibgeso dara, wera eibgesonya bera an delesom dena' era, albabya asa' ganya boboka denggunumso senelelam de? 8:11 Wera anadya, anja ganya olowoka ella ululamjok unululama' adya, yok nimi yuba dib senewoka ganya kana' orok nim era, nera Kristus ara al benesa seleb somogok bok, orok dangamna' anaso dangalamla. 8:12 Wera an yuba men doboka ululamnya bedya, ono' bisa' amba beil balamak dena' doboka deregoka ululama' adya, nimi yok yuba dib ganya kana' orok uboka, hmeng ulumak nim ek, malya geboka hmenga nenelelam dara, wera an unululama' adya, anda Kristus ak anaba malya unululam. 8:13 Anasa wera, nadya delemnya' adya, nadya hemyabo malya una' ubijek aboka anasa, dena' amba leboka, nadya hemyabo malya una' gaka malelebok dara, wera nara pam soub ara hyak meka' denggunumna e.
9:1 Nabeyok ganya doboka, unulunanya unggulumna de? Nara Imik Neyung yuba lena' gaknya unggulumna de? Nara nunja Wenelesilnya Yesus bera seleb eibnenggusinya bek ulumna de? Ugunuk dara, nadya Wenelesilnya bemba wa websa' adya, ugun Imik Neyung mabo dangalum nim unggululum de? 9:2 Nimi yok nang edya nak ara, Imik Neyung yuba lena' gaknya ulumla hengguneneseng bok, ugunja dara, alda Imik Neyung yuba lena' gaknya senewoka seiniyiwanenesom. Nera damok ara, alda ugunuk Imik Neyung yuba lebsisa' adya, ugunuk Imik Neyung mab ululum dara, wera nera nara aldib Imik Neyung yuba lena' gaknya ulumna bekna' edya ugumbabya ululum. 9:3 Wera, nimi yok nang edya, anda Imik Neyung yuba lena' gaknya goma' aboka lolonyak dara, nara ban nenyek sikenek lelesin. 9:4 Nara wa welemna' anasa, dena' meka' gwanenga eleganeneseng dara, nera doboka denggunusinya de? 9:5 Wenelesilnya Yesus alja weisab edya hnon, ono' yok yuba lena' gak nang edya hnon, Petrus benedya hnon, yuba dolomna gelewa bomnakanya, neika' yabalamek sok, nara yuba dolomla gel geneba doboka neika' yibinggunusinim de? 9:6 Goma, Barnabas beb nab danyek ok, dena' ara, sikbeyok ganya hwiboka eboka deleruruk senelemak de? 9:7 Heknedya yina' bonanya ululabok, albeyok doboka dekoka denemso de? Dara, ono' heknedya alja wak sam den gal yina' mesodyok, doka dakoka dena' lobnamso de? Dara, heknedya domba beillilesodyok, moum souba londowoka dena' ara, lobnamso de? 9:8 Ban nadya nidya' lebnanya nera, nim ulumab ak an sob unulumabnya nenyek ok lebnenggubna. Alda unuwanalum an yuba bukuk sam anaba, neikik wenyaboka momnya doboka' anasa lebna. 9:9 Musa bedya unuwanalum an yub ek sam yuba hnon ulumla' ara, "Sapi pam adya, doka dakoka beiyimeija' anyek, yan ingib saboka goroklelebok dara, ugunda alja sibama' ak sam henga gasa darawoka goubnenggom mem" alamla. Dara Imik Neyung ara, sapi pam anasa dib sunuwoka lemok de? 9:10 Goma, ban nera nunsamba lebsuk gom? Yo nera aldib nunsamba leboka momnya dobsuk. Anasa wera, beiyek wa welemna nang eb, doka daklamna nang eb dara, numbabya hnon dobnanam senewoka welerak bok anasa, nera nunsamba leboka momnya dobsuk. 9:11 Nunja dara, Imik Neyung yuba ugun gangganek leboka, ugunuk an dib yina' seleb mesuba. Wera anadya ugunja yoka'-yoka' eleklesuluma' dolomab dara, wera meknelemak senelesulum de? 9:12 Yok nim enyek babya, ugunuk an yoka'-yoka' eleganesak anya' aboka, ganya welesak dara, wera nunda nauba so ugunuk ganya webnenggunusibya de? Bok nak dara, ban unusinya nera, anam hnon unuwanggusisa. Bok, alda nara yoka'-yoka' ara, or siklewoka bolonuna', anadya Kristus amba perob lero yanggan yuba lero yabalamna' ara, pika garawoka ubdongowalyek senewoka anasa lolomsa. 9:13 Imik Neyung ek sam, Imik Neyung wa welemak nim era, sikja dena' dara, Imik Neyung ek ab doboka delemaka' ara, ugunda elgom ululum de? Imik Neyung amba uka daboka gibna' oulyang ak sam welemak nang era, beillilemak bona' era anyaganyeb darasam hnon bokoka doboka delemak. 9:14 Anasonya neikik, Wenelesilnya bedya orowek, seleb Imik Neyung perob lero yanggan yuba bo lero yabalamak nang era, yuba lelemaka' ak an ulumlya' anyek, or doboka deregoka ulunok, hyok. 9:15 Ban seleb wenhyok bok, nak dara wenera hnon ununa' ara orok. Ono' ban yuba wenyaboka momnya doboka beibsina' anaba, wen nak unuwonululuma' aboka ubnenggubna. Nadya ban unulamna senelamna' anyek, weininggoka denghelyek anasa, nak somogeisinya dara, perob senelamna. 9:16 Anasa wera, al Imik Neyung yuba lero yabana' nong amba ok dara, nara pelemna aboka nonggo abdanggunusinya. Bok, nenera Imik Neyung adya or unululom aboka leboknya nenesa unulamna. Wera Imik Neyung adya yuba lelelom aboka, orugunosobok nadya lolosinya dara, nara hyak omom nonga' ak ulumnesinya. 9:17 Imik Neyung yuba lelemna anyek, nabeyok ganya doboka welesinya dara, wera nara eimik era, dekna' dobnamna senewanesinya. Bok, nara Imik Neyung yuba lero yabalamna' ara, anjinya anasa unululom aboka lenyoka' anasa, Imik Neyung adya welelom aboka oruganyok senewoka welemna ok. 9:18 Wera dara, nara hek dekna' ek dobnamna do? Nadya dobnamna dekna' era banyek ok, nara Imik Neyung adya' perob lero yanggan yuba lero yabalamnak ab dara, nimi yok nang ek igina kweiyiweisinyek senen ulumna. Nera nara Imik Neyung yuba lelenanya benya' senewoka salya' men eleganulum aboka moloro yabanggulumna. 9:19 Na benyek dara, yok nim edya wa wenya unggulumna, dara nabeyok gobdo ulumna bok, ban unu ulumna' anaba, na nong anyek yok nimi wa wenya neneldalamna. Ban unulunanya nera, anadya nimi nauba Kristus amba doboka bo younuna' aboka ulumna. 9:20 Yahudi nim ek sam ulumna dara, nara sik Yahudi nim ulumaknya nenyek neika' uboka, anadya sik nong anyek Kristus amba doboka bo younuna' aboka ulumna. Ono' Musa bedya unuwanalum an yub ek sam sunuwoka ulumak nim ek anaba, nara sik ulumak sok diliga' doboka, sik nong anyek Kristus ak doboka bo younuna' aboka ulumna. Ban unulunanya nera nak dara, Musa bedya yub era hnon ununggulunadyok, sik hnoum ara, unulunanya beneso' ak ulumna. 9:21 Dara ono' Yahudi gom nim ek anaba, sikenek nara Yahudi gom nim eneso uro yabalamna. Al ban unulamna' anaba, sik nong anyek Musa bedya unuwanalum an yub era, loboka salya' beiyik ulumak bok, sikenek hnon Kristus ak diriga ban nimi danok senewoka, uro yabalamna. Ban unulunanya nera nak momnya dobok yub ek dib senena' orok adya ulumna goma'. Alda nara Kristus yub ak dara, anam ganya goluwoka unulamna. 9:22 Dara, ono' yuba doboka ganya kana' orok nimi sik gangganek anaba, na ulumna dara, nara yuba doboka ganya kabnenggunanya beneso' ak ulumna. Nera sik nong anyek, Kristus ak sam doboka bo younuna' aboka, sene uro yabalamna. Anasa al ban nadya nidya' unulunanya dara, yoka'-yoka' nidya' unulamnya pik anyeb uboka, sik nong anyek, Kristus ak hnon bleboka bo yousununa' aboka, nidya' ara uro yabalamna. 9:23 Ban nidya' nadya unulunanya nera, anadya Imik Neyung alja perob lero yanggan yub amba anasa, nababya peroba' donulula' aboka ulumna. 9:24 Nimi bik-bik al balamaka' ak ara, nimi nidya' neikebok bik-bik ab einimna bok, ben hnonok men binya bok dekna' dolomla' ara, ugunda ella ululum. Anasa wera, ugumbabya dekna' dobnemab senewoka, hyak pe yeiriwoka bik-bik al balalulum. 9:25 Nimi nidya' bik-bik henemab bar aboka, sunulsinilimaka' ak sam ara, yoka' nidya' ara ganya siklebdaboka ulumak. Ban siklewoka pe sunuwoka ulumaknya nera, pewanya dara, yalaklamla esa' kweb ganagameija' ak dobnamna senewoka, anara unulumak. Bok nuk dara, yalawanggunumla esa' enyek kweb ganaganesila' anasa, yoka'-yoka' nidya' ara, pe yeiriwoka siklewoka unulumab. 9:26 Anasa wera nak dara, banyek dobnamna senenadyok, nara pe sidya' ak bik-bik al balamna. Wera ono' soruk mal oldalamna ak anaba, nara salya' lelem oro yabanggulumna. 9:27 Nadya nong enera pe mel-mel aboka, nauba sunubdangoka diri uldalamna. Ban unulunanya nera, nadya yok nim ek nauba leboka glinyebok, eimik sum era, na nong anyek lobnelyek aboka, anara unulamna.
10:1 Nadya hem yabo nang o! Hemyab ugunda nunja neyung yabo youma' nang, Musa bek diriga balamek sum enyek, sikenek unulusuka' anyek, pe seinililuluma' aboka bekna' neksin. Sikda nidya' deba' adya siklewoka bo balasuukanya, ono' nidya' senenggoma' mek gwan pik goubuka balamek. 10:2 Sikda nidya' ara, meneng bo balasuk deba' lomok ab, ono' goubuka balamek mek gwan eb dadya, Musa bedya mabo dangoka bo balasuk nim ek, meka daleng sok ubsuk. 10:3 Dara, sikda nidya' neik ganya gwaneng enyek deregoka, 10:4 ono' al neik ganya mek enyek delemek. Sikeneb neika' bo balasuk Imik Neyung girik ek ab meka delemek. Ban girik era, Kristus nong yoka' ak ulumok. 10:5 Ban unulumek bok, Imik Neyung adya dara, nimi nauba ak dara, perob senewanggusuka' anasa, wera sikda hwalek sam nauba somokdo balameka' adya nimi be' ara, yoka' anaso yene mane ab menegemok. 10:6 Ban nidya' unuwoknya nera, nunsamba bekna' diba' ulusil. Sikja meilinya nek, unuwesibya senelemeka' anyek, numbabya neik ganya diliga' dobijek aboka ubsuk. 10:7 Ono' Hnonda Israeli nim edya sik gangganek ara, yoka'-yoka' ak giblemek sok numbabya unuweibyek aboka, bekna' ara ulusil. Imik Neyung yuba bukuk sam momnya doboka' ara, "Dara, Israeli nimi bukoka gwaneng meka deregoka, ono' sekoka eiya hlaboka unulumek," alamla. 10:8 Dara ono' sik gangganek nim edya, gela salabdangoka unulumek sok, nunda wenera neneso ununa' ara mem. Ban nauba unulumeka' anasa, Imik Neyung adya, Israeli nimi nauba denga salya' hiboka dombadya dagolongna' loboka (23.000 nim), li hnonok somogek. 10:9 Israeli nim edya Wenelesilnya ak nauba sunulumek sum era, sikda bokoka darasam baga' adya si sablesuk enyek somogeka' anasa, numbabya Imik Neyung ak sunulyamana' ara mem. 10:10 Hnon Israeli nim edya, mona yeilib menegoka byablemek dara, Imik Neyung adya nimi somogollilesil lero edya osuk. Anasa, numbabya mona yeiliwoka lena' ara mem. 10:11 Israeli nim ek, nidya' unulumoka' ara, nun yok nim enyek, anaso unuweibyek aboka, bekna' diba' ulusil. Ban Imik Neyung adya unumoknya nidya' momnya doboka' ara, nuk wenesina' diba' ubsuk. Nunda sidya' daknamla salek ulumab nim emba ubsuk. 10:12 Anasa, pe sekemna senelelam nim era, malyinggimenek aboka, pe keeboka seklom. 10:13 Ugunuk an sunulyamalesil sununa' ara, yok nimi nidya' anaba, sunulyamalesil soknya nek ulusil. Dara, Imik Neyung ara hyak bojam ululanya ulumlakanya, ugunuk yoka' adya senenggoma' sunulyamelesil dara, Imik Neyung adya ugunja migiba sunuwoka, uka nauba sunulwenenggom henemla. Dara, ugunuk sunulyamalesil sum era, ugunda pe siklewoka ululuma' aboka, Imik Neyung adya pika bak lobnesil. 10:14 Nadya wana' ulusin hemyabo nim o, bisa' amba hweboka giblemaka' anyek, hyak lek aboka lololulum. 10:15 Nadya ugunuk lelesina' ara, yoka'-yoka' pe geremsenga' ulumak so nim ek lelesin. Nadya ugunuk lelesin yub era, ugun damnya pe keboka sunuwoka seiniwanalum. 10:16 Nunda bekna' meka delemab sum enyek, Imik Neyung ak perob aboka giblemab dara, wera nunda Kristus alja eneng adya, hnonok nonga dangiyisuka' ak sunulumab de? Dara ono', gwanenga soboka elekdangoka delemabnya nera, Kristus ab neika' hnonok nong seleb danggumouba' ak sunulumab de? 10:17 Gwaneng ara hnonok bok, numbabya al hnonok gwanenga soboka delemaba' anasa, wera nun nong ara, nauba ulumab bok, hnonok nonga dangoka ulumab. 10:18 Ugunda Israeli nim enyek, pe seiniwolulum. Imik Neyung amba beil bilimna bona' enyek, doboka delemek nim era, al dena' beil balamna' ak ara arawoka neika' welemek. 10:19 Ban wenyhenya nera damok ara, har nesa lebna do? Giblemaka' ak beil balamak dena' gom, giblemaka' nong ak gom, nidya' ara dib nonga' hnon ulumla' anasa, lelemna de? Orok e! 10:20 Yoka'-yoka' giblemaka' ak bo beil biniboka giblemaka' ara, Imik Neyung ak beil banggulumak bok, yu ganya bisa' ak bo beil balamak. Nadya dara, ugunda bisa' giblemaka' ab neika' hiboka una' ara, mem senelemna. 10:21 Ugunda Wenelesilnya bedya meka mek hmeiyek demun dara, ono' bisa' meka deregoka una' ara mem. Ugunda Imik Neyung adya dena' de, bisa adya dena' de una' ara, hyak mem nong. 10:22 Goma, Imik Neyung adya nuk nadyinya senelamla' anasa, alda yu ganya nenewanesibya de? Imik Neyung ara hmeng bok, nuk danyek, migiba' senenggom nim ulumab de? 10:23 Nim adya hnon wenyalamaka' ara, "Nunja yoka'-yoka' unuwanob senemeibya' ara or unulunob ok," alamak. Nera aldib mem ana' orok bok, ban perob senelemabnya nera, nidya' pelesil goma'. "Nunja anyek-anyek unuwonun senemeibya' ara, unulumnumab," wenyalamak bok, ban ululanya nidya' ara, nunsamba peroba' nenelesil goma'. 10:24 Nimi ben hnon, na nong ok pewonulul senewoka alsamba ok yeiriwoka weldana' ara, mem. Nimi nidya' yok nim enyek, pewolul senewoka yeiriwoka welelulum. 10:25-26 Imik Neyung yuba bukuk sam momnya doboka' ara, "Soko ab, yoka' ab, yoka'-yoka' nidya' dubuk ulumla' ara, Wenelesilnya bedya' ak ulumla," hyok anasa, ugunda dekna' gasa' ak sam, yoka'-yoka' soba yaka' bo beil yalamaka' ara, or dekoka delelulum. Ugunja mek ganya ek ara, igina ubsilyek aboka, nauba heildanggom. 10:27 Imik Neyung yuba dona' oroknya bedya nablaboka neika' nadya ek denemab aboka e bilisilya dara, or binimna senewamen dara, alja denemab aboka youbuka beiblya dena' era, or dululum. Ugunja ganya lomok ara, dena' enera hanyagarab bo yeilimak do aboka, yana leleb yaboka una' ara mem. 10:28 Bok, alda ugunuk lebnesakja, "Ban dena' enera bisa' ak seleb hweboka beil bilimong dena'," henemak dara, alja mek ganya eb, al lelelanya bek pewolula' aboka, dena' beiyimeija' ara, doboka dena' ara mem. 10:29 Ban nadya lebnanya nera, ugunja mek ganya ek lebnenggubna. Alda lelelanya bedya mek ganya ek lebna. Bok, nadya ganya yakdewoka ulunanya nera, hekasa yok nim adya mek ganya edya sikliling sok ubnenyak do? 10:30 Ono', nara gwaneng denesinya' amba Imik Neyung ak molobgogowoka seleb molomna senewoka delesinya bok dara, hekasa yok nim edya malya ululam heneneseng de? 10:31 Ugunja yoka'-yoka' nidya' unululuma' ara, ugunda gwaneng deregoka meka deregoka, Imik Neyung si imik danalenya nenyek ok unulululum. 10:32 Anja unulumennya nedya, yok nimi malya una' lomok sam malyinggijek anasa, pe keeboka ululom. Nera Yahudi nim gom, Yahudi gom nim gom, Imik Neyung yuba dolomak nimi gom, nidya' ak lebsin. 10:33 Ugunda naba ulumna sok, ugumba unu ulululum. Nara nak pewonulula' aboka ununggulumna. Alda yok nim enyek, yoka'-yoka' nidya' ak ganya sangillilisununa' aboka ulumna. Ban nadya nidya' unulunanya nera, nimi nidya' blebsulula' aboka ulumna.
11:1 Nababya Kristus adya unulamla' anyek, diliwoka ulumna sok, ugumbabya nadya unulunanya nenyek dililenululum e. 11:2 Ugunda nak soba' beklenulumukanya, nadya neklesin yub ek pe sunuwoka unululuma' anasa, nara ugunuk perob aboka gigilesin. 11:3 Wera hnonok ella daseng senenanya donok pe ella danaluma' ara, nenya adya hukuk ara, Kristus hnonok dubnya ulumla, gel adya hukuk ara, nenya ulumla. Dara ono', Kristus adya huk dubuk ara, Imik Neyung ok hnonok ulumla. 11:4 Nimi ben hnon heng uboka mololamla salek gom, nimi gong weklemaka' ak Imik Neyung yuba lel eleklesilikanya, huk goluna' golunggulumla dara, wera bera Kristus ak malya nenelamla' ara an. 11:5 Bok ono' saawoka, gela hnon heng uboka mololamla gom, Imik Neyung yuba nim ek lel elekleladyok, alda huk gouluna' gouluna' orok dara, alja gel genedya huk dubuk ululanya, alja nenya ek malya nenelamla. Dara, gel genera seleb honga sirika' gugumna gel geneso' ak ulumla. 11:6 Anasa wera, gela hnon nara huka gouluna' ara, lek senewalya dara, wera alja hong era garab lobnamso. Bok, on gel era, nadya honga sirika' guknija gom, honga gobnija gom dara, wera nera na damnya malya neneldalamna senewalya dara, or alja huka goluwanamso. 11:7 Nengmab ak dara, sikda Imik Neyung adya alja nong eb, alja senenggoma' ab, heng kemeldana' diba' ulumaka' anasa, huka goluldana' ara mem. Bok gelewa ak dara, nengmab ak, imik nenen damba ulumak. 11:8 Nenyek dara, nengmab ara gel ek ab lanawanggumok bok, gelewa anyek nengmab ak ab lanamok. 11:9 Imik Neyung adya nengmab uyimoka' ara, gelewa anyek pewosulula' awoka uyiwanggumok. Alda gelewa anyek nengmab amba pewolula' aboka uyimok. 11:10 Anasa wera, Imik Neyung lero nang heng eillilisinoka' aboka, gelewa ara nenya adya huk damumduk ulumla gekneba', alja huk goluldalalul. 11:11 Ban nenesa ululabok, Wenelesilnya bedya seinilamla' ak dara, gelewa ara ganya doboka, nengmab ak ab loboka, sikbeyok go' ubnengguneseng. Dara ono' nengmab anaba, gel ek loboka albeyok ganya doboka salya' ubnenggunuseng. 11:12 Men youbuka gel gera nengmab ek ab lanamok sok, ono' nengmab ak dara, gelewa ak ab beillilimak. Bok nidya' yoka'-yoka' ara, Imik Neyung ak aba' ok ulumla. 11:13 Hem yabo nang o, ban nenyek ugumbeyok sunubyamadenelum: Gela hnon alja huk goluwanggonggom, Imik Neyung ak heng uboka molowanamso dara, ugunda perob senewanesom de? 11:14 Nimi hnoum ab, men ella ulumaka' ara, nengmab ara, honga warana' loldalamla dara, alak alya dangana' ulumla. 11:15 Bok gel ak dara, alja hong era waran dara, alak gigina' ulumla. Nera alja hong waran aboka elegemok. 11:16 Bok ban nenesa, nimi hnon ban blekel lololabok dara, nub yok Imik Neyung yuba dolomak nim eb dara, yok ununa' ara hyak unggulumla. 11:17 Bok, ban wen wenyhenesinya nenyek dara, nara ugunuk najabo yabo pelesulum aboka gigiwanggunusin. Ugunja Imik Neyung yuba doboka unululuma' ara, perob yina' nauba menggulusil bok, malya yina' ok nauba melesil. 11:18 Men youbuka ugunuk ab, yuba kesisa' ara, ugunda yuba dona' nim Imik Neyung yuba longowoka ululuma' ak sam ara, nimi ganya bokdangoka malya neneldalamak an yuba hnon kelemna. Nadya dara, nera aldib unulumak do senelamna. 11:19 Ugun gangganek ara, har berek Imik Neyung adya perob senelesil nanga hnon, har berek yuba dib dona' orok bok, ulumak nanga hnon, laga danoka' aboka unulusil. 11:20 Bok, Imik Neyung yuba longowoka beklelum dara, ugunja yuba longoleluma' ara, Wenelesilnya bek beknoba' aboka longonggululum. 11:21 Ugunda delelum dara, yok nim ek diri bukla henggonggom delelumukanya, hnonda lo deldalalum dara, hnon nim era, gwanenga doboka denggulumak, hnon nim era, mona bukoka deleluma' adya wera ganya uu alasil. 11:22 Ban unululuma' ara hekasa unululum do? Ugunja gwaneng den damba meka den damba, e diba' unggulusil de? Meka deregoka ululum de? Goma, ugunda Imik Neyung yuba dona' nim ek malya nenewoka, bona' garan ulumak nim ek alya nenewanoba' aboka, sene ululum de? Ban unululumnya nenesa, nara heka' ak ugunuk lebnesin do? Ban nenyek sikda pelemak aboka ugunuk gigiwanasisinya de? Hyak orok. Nadya dara, ugunuk hyak gibnenggunusisinya. 11:23 Nadya ugunuk nekesisa' ara, nara Wenelesilnya bek ab domsa' ak nekesisa' ara an. Nunja Wenelesilnya Yesus bek obnemab aboka, yuba dil bilimok sum enyek, inimnek enyek, Yesus ara gwanenga dobok dara, 11:24 Alda perob aboka, Imik Neyung ak molobgogomok dara, gwaneng soboka lebokja, "Nadya nonga ugunsamba elegeisina' ara an. Nak beklenumunukanya, or delelulum," hyok. 11:25 Neikso, seleb debgogomek dara, mek hmeiya doboka lebokja, "Ban mek hmeiya era, nadya eneng ek anasa, wenyek wenyaldan yuba bekna' era an. Ugunda ban bekna' meka delemun dara, nak beklenumunukanya, delemnelum." 11:26 Anasa, ugunda soba' gwaneng ab, bekna' mek ab delelum dara, Wenelesilnya be somogoka' anyek, nekoka unulumun sok moruwoka al yanamla. 11:27 Anasa wera, Wenelesilnya bedya gwaneng gom, alja bekna' mek gom, ugun nonga pe maka meibdanggonggom delelum dara, ban unulumak nim era, Wenelesilnya bedya alja nong eb, alja eneng eb danyek, malya ul eleklamla. 11:28 Wera anasa, nimi hnon denemla dara, al damnya men orowek pe maka meibdangoka ublyekanya, wera or gwaneng ab, bekna' mek ab or dulul. 11:29 Dara wera, nimi ben hnon gwaneng ab, bekna' mek ab delemla dara, Wenelesilnya bedya nong enyek pe seinina' loboka, or salya' lelem delemla dara, ban unululanya bera al damnya igin yaka' kwellildalamla. 11:30 Wera, ban unuwoka salya' lelem deleluma' adya, ugun gangganek ara, hnon neikna' salawoka, nonga hmeng uboka, ono' hnonda seleb somogolum. 11:31 Bok nunda beknenggumeibya salek enyek, nun damnya pe heibdeibya dara, nuk igina boyiwanggunesil. 11:32 Bok, Imik Neyung adya nuk malya geblesilnya nera eimik enyek, nuk sokok an yoka' nim eb, neika' dib obsilyek aboka, sene men orowek or legebna' dem ok deblesil. 11:33 Nadya hemyab o, anasa wera, Wenelesilnya bek bekoka denoba' aboka, yuba longololum dara, pe diri bukdangoka delelulum. 11:34 Denemun sum enyek, nimi hnon gwaneng ok ublya dara, orowek alja' ek ab pe delul. Ban lebnanya nenyek pe unulumun dara, Imik Neyung yuba longowoka bekoka delemuna' hmeinggin ara, Imik Neyung adya ugunuk malya uyiwanggunusil. Yok-yok yuba dara, nadya ugunuk yanya sum enyek, anaso-anaso aboka neknesin.
12:1 Wenyek dara, Imik Neyung Geisinya adya wa wena' migiba' yok-yok eleklesila' ak lebnamna. Hemyab o, ban yuba damok enyek dara, hyak pe diba' ella danasom senelamna. 12:2 Ugunda Wenelesilnya bek anam elgom ululum salek era, ugunda yuba gomnya giblemaka' ak gliboka bo balasuk. 12:3 Imik Neyung Geisinya adya bo ulusilya nim edya dara, "Yesus ak ara meilinya," hemenggom anasa, ugunda ella danalum aboka, neksin. Anasonya neikik, ono' Imik Neyung Geisinya adya diri bo usina' orok nim edya, "Yesus anyek Wenelesilnya ulumla," hemenggom anasa lebsin. 12:4 Imik Neyung Geisinya adya, wa wena' damok eleklesila' ara, yok-yok ululabok, ban nidya' ara, neik Geisinya bedya ok eleklesil. 12:5 Wenelesilnya bek arawoka wa wen danasa dara, yok-yok ululabok, ban arawoka welemaka' amba dara, Wenelesilnya Imik Neyung hnonok ok gobdo ulumla. 12:6 Imik Neyung wa welemaka' ara, yok-yok ululabok, wa welemaka' anasa migiba' eleklesil Imik Neyung era, hnonok ok ulumla. 12:7 Nuk nidya' hiboka pewosulula' aboka, Imik Neyung Geisinya ara, nimi hnonok-hnonok yok-yok eleklesil. 12:8 Dara nimi ben hnonda Geisinya bedya yuba geremsenga' salalula' aboka, wa wena' damok eleklamla. Nimi hnonda al neik Geisinya bedya, pe ella dangoka yuba lelelula' aboka, wa wena' en damok eleklamla. 12:9 Dara ono' al neik Geisinya bedya, dib senewolula' aboka migiba' eleklamla. Ono' neik Geisinya bedya hnon nim ek, nimi merellisin migiba' damok eleklamla. 12:10 Hnon nim ek ara, yoka'-yoka' senenggoma' migib ununa' anyek, unuro yaban danasa wa migib en damok eleklamla. Ono' yok nim ek ara, ununumna' lelelula' aboka, an wa nen migiba' eleklamla. Al ono' neik Geisinya bedya hnon nim ek ara, ban nenera Imik Neyung wa ara ban, alda ban nenyek dara, Imik Neyung adyinya goma' an wa migib eleklamla. Hnon nim ek ara, yok-yok sokok yuba ella dangana' damok migiba' eleklamla, hnon nim ek ara, yuba damok danyek nera damok ara, banyek lebok an danasa migib eleklamla. 12:11 Ban nidya' unulamla' ara al neik Geisinya bedya ok unulamla. Nimi yok-yok ela' gigiro Geisinya elegosunun senemna' ok sunuwoka yok-yok eleklesil. 12:12 Kristus ara, nimi nong anaso' ak hnonok ok ulumla. Nong ara hnonok bok, yana soruk ara yok-yok gong ulumla. Yana soruk ara, yok-yok bok nong dub ak dara, hnonoka' ak ulumla. 12:13 Anasonya neikik, numbabya Yahudi nimi yoka' gom, Yahudi gom nim gom, ek wa nang gom, seleb blebdangoka sikbeyok ganya doboka ulumak nimi gom, nunda nidya' hnonok nong ak denewoka ulunoka' aboka, hnonok neik Geisinya bedya seleb mek diba' dabsuk. Numbabya nidya' ak neik Geisinya elegosuk. 12:14 Wera nimi nong ara, yan moumena' ok unggulusil bok, alda nidya' yana soruka bokoka gong-gong ulusil. 12:15 Yan adya lebnesodya, "Nara soruk gom anasa, nara nong ak unggulumna," henemso dara, wera ban nenyek dara yan ak dara, nimi nong unggulumnamso de? Orok. 12:16 Dara ono' o adya lebnesodya, "Nara heng dok unggulumna' anasa, nara nong ak unggulumna," henemso dara, wera ban wenyhenemso' adya nong unggulumnamso de? Orok. 12:17 Nimi nonga nidya' ara, hiboka heng dok ok ulumso dara, nong ara heka' huboka yuba kebnamso do? Goma, nonga nidya' ara, hnonok hiboka o mekla' ok hnonok ulumso dara, songa dinin dara, heka' huboka songa diniwanamso do? 12:18 Imik Neyung adya ok yana soruka nidya' ara nunja nong ak sam beiri yibuk. Yana soruk ab, yoka'-yoka' nidya' ab, Imik Neyung adya alja unuwonun senemok sok sunuwoka, alja ok ganya doboka dirigoka beiri yibuk. 12:19 Nimi nong ara, yan dem ak gom hnonok ok ulumso dara, heka' uboka nonga danamso do? 12:20 Anasa yana soruk ara gong ululabok, nong ara hnonok ok ulumla. 12:21 Anasa wera heng adya dara, soruk ak, "Nara anak dolbalek senelenggen," wenyhenggunumso. Ono' huk adya yan ak, "Nara anak dolbalek senelenggen," henggunumso. 12:22 Alda saawoka ono' nunja dara, nong gararoba' hnonda hmeng senelemabnya nenyek ono' hyak dib nong ulumla. 12:23 Hnonda nunja nong era darasam anara, mek perob gom senelemabnya nenyek, nunja dara, perob aboka yoka'-yoka' pe unulumab. Ono' heng kemena' perob gom senelemabnya nenyek, nunja dara, pe keebdangoka bo uldalamab. 12:24 Bok nong yana soruka perobnya nera, alak yoka'-yoka' ununggulumab. Imik Neyung adya nunja nonga pe lelewoka beiyisuka' adya, wera nunja heng kemena' edya dara, perob senewamenggomnya nenyek, perob senewanoka' aboka umok. 12:25 Wera nong ara, doluwoka bokdeijek aboka, yana soruka nidya' hiboka pe diri ubdanoka' aboka umok. 12:26 Yan ak oka del yabasin dara, wera nonga nidya' ak oka dero lolosil. Soruk ak gom alda pelemla aboka gibel yaban dara, yok-yoknya neneba nidya' perob aboka eiya hlalamak. 12:27 Hemyab o, anasa ugunda Kristus nonga ululumukanya, ono' ugunda hnonok-hnonok Kristus adya nong yoka' ululum. 12:28 Anasonya neikik, Imik Neyung yuba dona' nim emba dara, Imik Neyung adya orowek men ella' gigiro gegewoka sekiyimok. Men Imik Neyung yuba lena' gak nang, penenya nera ununumna' len nang, winilinya nera neksin nang, dara sikda yoka'-yoka' migiba' unuro yabalemek nang, dara nimi merellisin damba hnon, yok aran damba hnon, yok nanga bo usin danasa hnon, ono' dagalongna' ara, yok-yok yuba san damba hnon, sekiyisuk. 12:29 Sikenek dara, nidya' yuba lena' gak nang ok gom, ununumna' len nang ok gom, neksin nang ok unggulumak. Sikda nidya' ara, yoka'-yoka' migiba' unuro yaban danasa unggulumak. 12:30 Nidya' nimi hwen damba, yok yub edya unuro san danasa, yuba dangawoka san danasa, nidya' ara neikik eleganggusuk. 12:31 Anasa wera, ugunda hyak perob wa wen damok enyek, dobnob senewoka hyak yeiriwoka dulululum. Bok ana damumduk anara, hyak pe unuwanalumnya nenyek neknesin.
13:1 Nara nim adya yuba nidya' ella dangoka salasinya bok, lero nang yub anaba ella dangoka salasinya bok, yok nim ek, wana' una' orok dara, wera nadya ella dangoka salasinya yuba danara, abya mekla' ak moka go-go alamla soka' ak, senenggom nyonyana' nyo-nyo alamla soka' ak, ulumnesinya. 13:2 Nara Imik Neyung yuba lena' migib elegenyoka' adya pe leb elegoka, yoka'-yoka' ara, hyak lomoknya neneba olowoka ella uboka, yoka'-yoka' nidya' ella uboka, Imik Neyung ak hyak dib senena' adya, mok soko mein anaba dama delewoka yokok sam bukillil yabalesinya bok, yok nim ek wana' usina' orok dara, wera nak dara, hyak salya' nongnya bek ulumnesinya. 13:3 Wera ono' nadya bolosinya bona' era, bona' garan nim ek nidya' salya' bokoka, na nong anaba or uka dabnululum aboka, bo elegeldal balasinya' anaba, nara yok nim ek wana' una' orok dara, nadya nidya' unulusinenya nera, gobdo salya' lelem dananeso. 13:4 Nimi ben hnon, yok nim ek wana' diba' ululanya bera, ganya siklewoka namen ganya adya perob ok unulamla. Wana' una' ara, alda solom ganya bonggulumla, imik neneldanggulumla, dengdang ganya bonggulumla. 13:5 Wana' una' ara, salya' ganya adya yoka'-yoka' ununggulumla, nadya yok nim edya bok, nadyinya nok dolula' aboka senewoka wegenggulumla. Wana' una' ara, yu ganya berra bonggulumla, alda gogoba' ganya bonggulumla, mona yeilirub ganya meka' bonggulumla. 13:6 Wana' una' ara, yana lelena' ara pe una' orok dara, perob senenggulumla. Bok, perob una' ak dara, perob senelamla. 13:7 Alda yoka'-yoka' nidya' ara, pe siklewoka unulamla. Alda yok nim edya perobnya nek dib senelamla. Ono', yoka'-yoka' adya sene galalamla' anaba, dara ono' yoka'-yoka' ak anaba, hyak ganya siklelmoubuldalamla. 13:8 Wana' una' diba' ara, hyak denghemenggoma' ulumla. Wenyek dara, nimi ganya geremseng uboka, Imik Neyung yuba lel eleklesak bok, eimik era unuwoka lebnenggunumak. Wenyek dara, nimi hnonda yok-yok yuba salamak bok, eimik era dengaro lobnamla. Wenera nimi yoka'-yoka' nidya' ella dangalamak bok, eimik era denghenemla. 13:9 Anasa nunja yoka'-yoka' ella ulumabnya neb, ununumna' lelemabnya neb, or wenera mek so ok unuro lelemab bok, 13:10 Imik Neyung adya yoka'-yoka' nidya' ara, peroba' ok nenewanamla sum yanamla dara, mek so meilinya nera hyak denghenemla. 13:11 Nara youma' anam mekmab ulumsa dara, nara mekmabo salamak yub ek salamsa, mekmabo seinilimak ganya ek seiniwoka, mek mabo senelemak sok, naba senelamsa. Bok nera seleb nauba dasa dara, mekmab anaso seiniwoka unulamsa' ara, seleb lobonggamsa. 13:12 Nunja wen yoka'-yoka' eillilimabnya nera, heng kemel dana' ak an yama' inib-inib ana' eillilimab sok anaso eillilimab. Bok eimik ek dara, hyak pe okoka eibnemab. Wenera nara yoka'-yoka' darasam ok ella ulunabok, eimik era, Imik Neyung adya nak an yoka'-yoka' ulunela' ella ulunel sok, yoka'-yoka' nidya' ella danamna. 13:13 Anasa wera, wenyek dara, ban winilya damok danyek ulumla' ara, dib senena' hnon, ganya nebem ana' hnon, wana' una' hnon, ulumla. Ban winilya ululabok, dib nongnya nera, wana' una' ak hnonok hyak dib nong.
14:1 Ugunda yok nim ek, wana' ubnob senewoka pe yeiriwoka duboka unululum. Hnonda Imik Neyung Geisinya bedya eleklesil wa migib enyek, nauba so ara nimi yok nim ek Imik Neyung yuba lena' migib enyek, dobnob senewoka dulululum. 14:2 Nimi ben hnon, yok nimi yuba salalanya bera, alda nim ek yuba sal eleknenggululabok, alda Imik Neyung ak, yuba sal eleklamla. Anasa alja salamla yuba denga danara, Imik Neyung Geisinya adya lel eleklamla' anyek, Imik Neyung ok ella ulumla' digum ok lelemla' anasa, nimi sirika' ara, keboka ella danganggulumak. 14:3 Alda saawoka, Imik Neyung yuba lelemak nang ek dara, nim ak ganya migiba nenewanoba' aboka, Imik Neyung ak ab yuba lel eleklesak. Nera migiba nenewoka, ganya sangiyiwoka, ganya hekiyiwanoba' aboka, yuba lel eleklesak. 14:4 Yok-yok yub enyek salalanya bera, al damnya migiba gebeldalamla, bok Imik Neyung yuba lel eleklesak nang era, yuba lelemeibya enyek, yuba dona' nim ek migiba' gebellilimak. 14:5 Ugunda nidya' yok-yok yuba salamnasom dara, perob senewanesinya. Bok, hyak nauba perob nong ara, ugunda Imik Neyung adya unuwaseng senelamla' anyek, nim ek lel eleklemnesom dara, nauba perob senewanesinya. Imik Neyung yuba lelemak nang ek dara, hyak dib nong nang ulumak bok, yok-yok yuba salamak nim era, yuba dangana' orok dara, or mek so ulumak. Alda yok-yok yuba salamak nim era, yuba dolomak nim enyek migiba' dangiyiwanoba' aboka, yuba dangawanamla dara, pellilimnesil. 14:6 Wera, na kabo nim o, nak ugunuk yanasinyekanya, yok-yok yuba saro yabasinya dara, ugunsamba dara perob danasuso de? Nera ugunuk dara, meka' sibin anaba perob danggunususo. Alda yoknya perob danasonya nera, Imik Neyung yuba damok ak gom, yoka'-yoka' anyek Imik Neyung amba geklewoka lel eleklesisinya gom, Imik Neyung yuba nong ak lel eleklesisinya gom, neklesisinya dara, perob danesisonya nera an. 14:7 Ganya orok ulumla' ak ara, benggong ganya hiba' oroka' anaba, gal benggong gom, wir benggong gom ara, pe gong-gong ana' orok dara, nimi yok nim edya dara, hek ber yub ek diliwoka seblamla do senewanaseng. 14:8 Yok sununa' era, sibama' adya poo alamak benggong enyek, salya' so leleseng dara, heknedya pe anara mala obdanamaba' anasa, ken lel yabak aboka diri ubdaneseng do? 14:9 Ugunuk dara, neik so. Anja yok yuba sana' pe bekna' lena' orok dara, anja lero salasom yub era, ella danggunuseng. Dara anja saro lololam yub era, salya' im pik dengaro lobnamla. 14:10 Sokok anara, yok-yok yuba nauba ulumla bok, yuba mandebna' gong danara, hnon salya' lelem malobna' ara orok. 14:11 Bok, nimi ben hnon nak yuba sab onowananesobok, elgom ubnesinya dara, wera nera, mok soko nimi moumen ulusinim. 14:12 Ugunuk dara, Imik Neyung adya eleklesil wa wena' dobnob senen ganya ululuma' anasa, dib nong ara, Imik Neyung adya eleklesil wa wena' damoka dobmuna' ara, yuba dolomak nim enyek, pebgiga balalula' aboka migib una' ak dobnoba' aboka, duboka elelulum. 14:13 Ban nenesa, wera nimi yok-yok yuba salameija nim era, Imik Neyung adya migiba' elegesilya enyek, sikja salamak yuba damok enyek, anasa lelemab aboka neknemaka' anasa, Imik Neyung ak molowanok. 14:14 Anasa, yok-yok yub edya saboka mololesinya dara, nadya ganya edya dara, dib molosinyebok, nadya ganya lomok wekoka anyek senewoka molonggulusinya. 14:15 Anasa wera, nara heka' hubnesinya do? Dara nara ban nenyek eimik unuwananya nera, nadya ganya edya mololemnenabok, ono' pe seinin ganya anaba neika' mololemnamna. Dara ganya adya bera ara seblemnamna bok, pe seinin ganya edya' anaba, seblemnamna. 14:16 Dara, anja ganya adya Imik Neyung ak perob aboka mololemnelam bok, yok nim edya anja mololomena' ara, yok yuba saboka mololemen adya kebnenggublya adya, anja mololemen molona' ek heka' huboka perob henemso do? 14:17 Imik Neyung bek perob aboka, anja molololam molona' era perob bok, yok nim emba dara, anja molona' era, bakiyiwoka perob danganggulumla. 14:18 Nak dara, yok-yok yuba edya ugunda mek salalum bok, nara nauba salamna' anasa, Imik Neyung ak perob aboka giblamna bok, 14:19 nara nim Imik Neyung yuba dona' nim longowoka dolomaka' ak ara, yuba lebnesinya dara, yuba deng sal-salya' yok-yok yuba gong sana' loboka, yuba doka sirika lambadya ok, nim ella danameijinya nenyek aboka, lebnesisinya. 14:20 Nadya hemyabo nim o, ugunda mek mabo ganya seinina' anyek seininggom, mem. Yu ganya boboka malya una' ak sam ak dara, mek moum den mab eneso ulululum. Bok, ganya seinina' ak sam ara, ganya kamna nim eneso ulululum. 14:21 Unuwanalum an bukuk sam orowek men momnya doboka' ara, "Nara anyagan yok yuba salamek nim eb, sekel yanggan nim eb, sik pik uboka nadya mab Israeli nim ek, yuba lelemnesin bok, sikda ban unuwanya' adya' anaba, nadya yuba kebnenggununyak," ana' ara Wenelesilnya bedya wenyamok. 14:22 Anasa wera, yok-yok yub edya, bobgeregoka san dara, nera Imik Neyung yuba dolomak nim emba sanggulumak bok, alda yuba donggulumak nim emba bekna' diba' ella danoka' aboka ulumla. Dara ono', ununumna' yub anyek lero yabalamaka' ara, yuba dona' orok nim emba unggululabok, yuba dib senelemak nim emba ulumla. 14:23 Anasa wera, ugun yuba dona' nimi nidya' Imik Neyung yuba longowoka dolosoma' ak sam ara, ugun yuba dolosom nimi, yuba nidya' yok-yok yuba geregoka saro balasom dara, beiyek nimi gom, yuba donggulumak nimi gom edya dara, ugunuk yeiniboka, sikda serema salasil gom senewanasiseng. 14:24 Bok ugunda nidya' ara, Imik Neyung yuba lel elegeldalamnasom bok, beiyik dem nimi gom, yuba dona' orok nimi gom yalaseng bok, ugunja Imik Neyung yuba lelesoma' adya, wera nim era, sikja malya una' ak malya ulumaba' ak senewaneseng. Ono' lelesom adya, sikja malya una' yana lelewoka, 14:25 sikja ganya lomok sam yoka'-yoka' doknolomla' ara, nidya' laga danamla. Anadya nimi danara, dunuwoka omouwoka Imik Neyung bek giblemnemak. Dara nim enedya, Imik Neyung ara aldib ugun gangganek sam ulusil aboka laga lebnemak. 14:26 Hemyab o, anasa wera, ban nidya' lebnanya nera damok ara heka' ak lebna do? Ugunda mamagoka longolulum dara, hnonda bera seblemak, hnonda yuba neklesak, hnonda Imik Neyung ak ab, yok-yok ununa' neklesak, hnonda yok-yok yuba bobgeregoka salamak, hnonda yuba salamak ara, anasa-anasa lelemak aboka, yana lelewoka neklesak. Bok ban nera nidya' ara, Imik Neyung mab bukiyiwanoba' aboka unul dalalulum. 14:27 Ugunda yok-yok yuba bobgeregoka sabnemun bok dara, nimi penya gom, winilya gom ben hnon lebgogowalya dara, ono' yok be hnon leblul. Dara ben hnonda, damok ara banyek anara lebab aboka yana lelewolul. 14:28 Nimi hnonda damok ara, anasa-anasa lelemab aboka, damoka yana lelena' orok bok dara, wera yok-yok yuba bobgeregoka salameija nim era, yuba dona' nim longolomeija' hnoum anyeb, geleganok. Dara sikbeyok ganya adya ok lebdangoka, hnon Imik Neyung ak lelenok. 14:29 Imik Neyung yuba lesin nang ara, nimi penya gom winilya nimi gom, Imik Neyung yuba lelenok. Dara anyagan yuba longolomak nim era, heka' ak lelemak do aboka, seiniro ulunok. 14:30 Bok Imik Neyung yub ara, anyagan yuba longoseng ak an, nimi ben hnon yuba longosonya bek ella usin yuba yanamso dara, men lelelanya bera lobnamso. 14:31 Wera ban unuwanaluma' adya, nimi nidya' ela' gigiro hnonok-hnonok ok, Imik Neyung yuba leboka, nimi nidya' ella dangoka, ganya gwelelek ana' dobnelum. 14:32 Imik Neyung Geisinya bedya, Imik Neyung yuba lebnoka' aboka, eleklesil migib damok era, sik dam nang Imik Neyung yuba lelemak nim edya, siklewoka bo ulumnamak. 14:33 Imik Neyung ara, alda pe dob dakdowoka ulumla Imik Neyung ulumla. Alda salya' eirigal hwam Imik Neyung unggulumla. Muna' Imik Neyung mabo nidya' unulumak sok, 14:34 yuba dololum salek era, gelewa ara yuba sana' ara loboka geleganok. Gelewa ara yuba salalulum ana' ara mem. Unuwanalum an yuba bukuk sam momnya dobok sok sunuwoka, sikda dub dangana' ara, mem. 14:35 Gelewa ara yoka'-yoka' ella danamab aboka dara, sikja nenyab ek, ek ab heibneseng. Yuba dona' nim longolomaka' ak sam, gela hnon yuba salamla dara, alya yaka' ak ulumla. 14:36 Imik Neyung yub ara, ugunuk ab men lanamok de? Goma, Imik Neyung yub ugunuk ok lel elegel yeilisik de? 14:37 Hnon nim era, ununumna' lena' damok migiba' ulunel gom, Imik Neyung Geisinya adya yok elekna' elegenyok senemlya dara, wera nadya momnya doboka beillilamna' anara, Wenelesilnya bedya orukna' yub ara, an senewoka yo hulul. 14:38 Bok, ben hnon nadya ban lelemna yub enyek, walab loblya dara, unuwalenya bera neik so alba walab lobnelum. 14:39 Nadya hemyab o, anasa wera, ugunda Imik Neyung yub anyek, nim ek leb elegeisinya senewoka dulululum. Bok, nimi hnon yok-yok yub edya bobgeregoka lelemeija' ara, mem loblulum aboka yuba seknenggom. 14:40 Bok, yoka'-yoka' nidya' ara, ganya dibom ana' loboka, pe lelewoka unulumnulum.
15:1 Nadya hemyab o, wenera nadya youma' enyek ugunuk perob lero yanggan yuba leb elegeisisa' anyek, saawoka bekiyiwanesin. Ugunda ban elegeisisa' yub enyek doboka, ono' pe seklelum. 15:2 Ugunda yuba lebok ara, anyek senewoka dib senena' orok danyek hnonok. Ono' nadya pe men leb elegesisa Imik Neyung yub ek pe salabmowoka ulumun dara, Imik Neyung yub enedya ugun nonga blebnesil. 15:3 Hemyab o, nadya ugunuk yoka'-yoka' leb elegesisa' ara, nadya seleb dobsenya nek leb elegesisa. Imik Neyung yuba momnya dobok sok, hyak dib nong ara, Kristus somogok ara nunja malya una' enesa somogok aboka, seleb leb elegesisa. 15:4 Ono', alda seleb soko lokek dara, winilyaba' sum era, seleb suboka embenga' welewoka' ara, Imik Neyung yuba momnya dobok. 15:5 Dara, Kristus ara men dara, Petrus bek suboka laga aabdangamoka' ara, ono' saawoka eimik dara, alja obadya yuba dolomek nang ek, laga suboka aabdok. 15:6 Ban nen seleb dara, ono' yok nimi denga lindara' badya nim ek (500 nim) seleb subna aboka aabdangamok. Ban unusuk nim era, nauba so ara seleb somogorob bok, hnon nim era weneba or eika' ulumak. 15:7 Ban nen seleb aabdanggogobok dara, ono' Yakobus bek Kristus ara, nara seleb embenga' subna aboka aabdanggogobok dara, ono' yok-yok yuba lena' gak nanga nidya' ak hnon aabdok. 15:8 Sidya' nong ara nak an, nara okoka yok sum enyek beiyinyeknya bek an aabdok. 15:9 Wera nak dara, Imik Neyung yuba dona' nim ek nauba olosisa' anasa, nak dara, hyak soko nong ok an Wenelesilnya bedya yuba lena' gaknya ulumnakanya, wera Imik Neyung yuba lena' gaknya hengguneneseng senelamna. 15:10 Bok, Imik Neyung adya wana' uboka eleksina' nong edya, nara wera an seleb wen ulumna sok dasa. Imik Neyung adya nadya unulamsa malya una' doboka boboganyoka' ara, salya' lelem ub lobnenggubnyok. Nadya yok yuba lena' nang era, nauba so ununa' orok bok, nak danyek nauba yeiriwoka welemsa. Bok, nera nadya ok wenggulumsa. Alda nenera Imik Neyung adya nak wana' uboka eleksina' elegenyoka' adya unumsa. 15:11 Anasa wera ugumbabya or hek nim ek ab, Imik Neyung yuba dololuma' ara, nak ab gom, yok yuba lena' nang ek ab gom, nera yok lanawanggunumla. Dib nong ara, nunja ban yuba lero yalasab dara, ugun doboka dib seneluma' anyek, hnonok dib nong. 15:12 Nunja ugunuk leb elekgiga yalasabnya nera, Kristus anyek somogoka embenga' suboka bukok aboka lel eleklesab dara, ugun yok nim era, hekasa seleb somogorob nim era, embenga' suboka buknenggunuseng alalum do? 15:13 Seleb somoklomak nim enyek, aldib embenga' suboka buknenggunuseng bok dara, wera Kristus anaba alda embenga' subnenggumnamso. 15:14 Dara Kristus ara, dib suboka embenga' danggusubok dara, ugunja dib seneleluma' ara, yareng elekna' loboka malya dangoka, nunja Imik Neyung yuba lero yalasaba' anababya dib danggunumso. 15:15 Ono' nauba so ara, Imik Neyung adya Kristus ara, aldib embenga' suboka bukiyibok aboka lero yabalamouba' anasa, orok bok dara, nunja Imik Neyung ak sonda' lebnesibya' nonga hnonok hyak omom nong. Dara, wen somoklomak nim era, embenga' subna' ara, hyak orok dara, Imik Neyung adya Kristus bek embenga' bukiyiwanggunumso. 15:16 Somoklomak nim era, embenga' suboka buknenggunuseng dara, Kristus anaba embenga' suboka buknenggumnamso. 15:17 Anasa wera, Kristus anyek embenga' suboka bukillina' orok bok dara, wera ugunja yuba dib seneleluma' ara lendar anaso dangoka, ugunda malya una' ak sam or ulumnusom. 15:18 Wera nenera, yuba don nimi bok Kristus lomok seleb somogorob nim eneba, eimik era blebnenggunususo. 15:19 Kristus ak ganya wena' diba' ara, seleb gobdo sokok anyek ok unuro daknamla dara, nimi nidya' sokok an ulumak nimi danara loboka, nuk danyek malya nim ak ulumak senewanesiseng. 15:20 Bok, Kristus ara somokna' ak ab seleb bukiyimoka' ara, hyak dib unumok. Anan nong adya, wera seleb somogek nim era, embenga' suboka buknemaka' damok ara anadya dangamok. 15:21 Nimi somokna' damok ara, nim adya lanamoka' anasa, ono' somokna' ak ab ara embenga' suboka bukillina' damok ara, ono' nim ek ab lanalamla. 15:22 Nimi nidya' ara, Adam beblaboka neika' ak hiboka ulumek adya somoklemak sok, neik so weneba Kristus ablaboka neika' himeka' adya, embenga' bukiyiwanesil. 15:23 Bok, nimi nidya' muna' gobdo yok-yok ela' gigiro embenga' suboka bukiyiwanasil. Kristus ak men embenga' suboka bukiyibok. Dara, ono' eimik al Kristus yanggalya sum era, alja ak ulumak nim era, embenga' suboka bukiyiwanasil. 15:24 Dara, hyak dakalongna' nong sum yanamla. Ban sum enyek, Kristus adya wenewoka bo usina' eb, yok-yok senenggom dub una' ab, yok-yok migiba' ab dara, sokok nenewanamla. Dara nidya' migib gong danara, Kristus adya doblyekanya, nunja neyung Imik Neyung bek elegoka lebnamla. 15:25 Wene salek era, Kristus anyek dubnya dangoka wenelesilya' ara, Imik Neyung adya isa' nimi nidya' dob dakdowoka, Kristus ak wera anjinya aboka lebnamla. 15:26 Dara, hyak eimik nongnya nera, Imik Neyung adya hyak senenggoma' nunja isa' nimi somokna' damok dubnya nera orok nenewanamla. 15:27 Imik Neyung yuba bukuk sam momnya doboka' ara, "Imik Neyung adya yoka'-yoka' nidya' ara, al ulumla' damumduk sam buk siklewok." Ban nidya' yoka'-yoka' hyoka' ara, nera Imik Neyung nong ak lebnenggom, nera Kristus ak sam buk siklewoknya, Imik Neyung bek lebnenggom. 15:28 Imik Neyung nong anyek, nidya' yoka'-yoka' ara, aljinya nok dolula' aboka, Kristus ara albabya, Imik Neyung adya yoka'-yoka' nidya' ara, alja damumduk seleb nenewalya dara, wera Kristus adya al damnya ara Imik Neyung damumduk nenebdanamla. Dara Imik Neyung adya albeyok nidya' wenewoka bo ulumnesil. 15:29 Seleb somoklomak nim enyek, embenga' suboka bukillisina' orok bok dara, nimi hnon somoklomak nim emba meka dalasak nim era, heka' hubnamak do? Dara, hekasa nera sikda unulumak do? Dara eimik era, nim embenga' suboka bukiyiwanggunusil bok dara, hekasa siksamba meka daboka uldalamak do? 15:30 Numbabya hekasa yoka'-yoka' igina kwelesila' ak sam uboka unulusulul senelemab do? 15:31 Nadya hemyab o, ugunja nunja Wenelesilnya Yesus Kristus ak seleb dib seneluma' anasa, perob senelamna sok, li sob-soba somoganesinya bok, or yeiriwoka wero yabalamna. 15:32 Nara Epesus heikek anara, nara yeiriwoka bei gama yakoka okoka obnenggununadyok sab losinima' ara, nim amba bok salya' lelem unuro yabalesinya dara, heka' pewaneneso do? Dara seleb somoklomak nim enyek, suboka embenga' buknenggunuseng bok dara, wera ban lelemak yub enyek ubnesibya ara, "Nunda ampum somokdowanamaba' anasa, sumen era pe bera seboka eiya hlaboka dero ulunob," alamak. 15:33 Salya' malya nim eb halya' nenewoka un dara, perobnya bek anaba ganya malya dangalamla' anasa, ugunda sonda' leboka bol neneldanggom. 15:34 Ugunda wen eibkweblulum. Hnon sounuwoka malya ul soununa' ara hyak mem. Ugun gangganek sam ara, Imik Neyung yuba elgom nimi hnon ulumaka' anasa, ugunda alya ganya bobnesom. 15:35 "Somoklomak nim era, heka' huboka embenga' buknemak ak lebla do?" senewoka hnon lebnelumja'. Dara ono', "Hnonda somoklomak nim era, seleb embenga' suboka bukija dara, hek nong ek sikenek ongiyiwanasil do?" aboka heibnelumja'. 15:36 Anda gal dok yina' doklelam salek era, dok ara anam somokna' ara orok bok dara, embenga' bongonggulumla. Anasa, anaso heibnesom dara, dongdang alalum. 15:37 Dara, anda gandum yina' gom, yok gal dok yina' gom doklelama' ara, dok ok doklelam, eimik danamso nong ek doknenggululam. 15:38 Imik Neyung adya ok albeyok ganya doboka, perob dolul senewanya nenyek, nong ek an eleklamla. Imik Neyung adya gal dok yina' hogunga yok-yok ela' gigiro sunuwoka nong eleklamla. 15:39 Dara ono', embenga' ulumak mana' unuruwa' anaba, nidya' ara hnonok soub ara, loboka or yok-yok anyek uro balamak. Nim ak dara, nong ara hnonok digum ok ulumla, bok yok-yok diguma' ak dara, nonga yok-yok ul meneklemak, wining ara alja nong era, yok so ulumla, hadya' anaba nonga yok-yok ok ulumla. 15:40 Anasonya neikik, imik ulumla' ab, sokok sam ulumla' nidya' ara, nonga yok-yok ok ulumla. Imik sam nidya' ululanya nera, hogung anaba yok so' ak ulumla, dara ono' sokok sam ulumla' hogung neneba, yok so' ulumla. 15:41 Henga dingilamla senedya' era, ono' yok so bok, wala' ak dara, yok so yeblamla. Gura' ara gong-gong dilina' yeblamla' anaba, hogunga yok-yoka' ak ulumla. Dara, gura' anaba gong adya sik moumen anaba, senedya' yok-yok sikba ulumaka' gigiro yeblemak. 15:42 Anasonya neikik somogorob nimi nidya' embenga' bukiyiwanasil sum enyek unuwanasil. Somogek sum soko loksik nong era, songa leboka blololanya nek urob, bok sikenek eimik subija danyek ongiyiwanasil nong era, songa leboka blobnenggunusil nong ek eleganesil. 15:43 Somogek nim enyek, soko loksik nong era, hmeng uboka malya nong ek ulumek, bok sikenek onsok embenga' suboka bukiyiwanasil danyek ongiyiwanasil nong era, migiba' perob nonga' anyek ulumnamak. 15:44 Somogomeka' anasa lokesik nong era, sokok anyeb nong bok, seleb suboka embenga' bukija danyek nong era, ganya nong ulumla. Dara, nong ara hnonda sokok anyeb nong ulumso dara, hnonda ganya nong anaba ulumso. 15:45 Nenesa Imik Neyung yub ek momnya doboka' ara, "Men uyimoknya bera, nera Adam benyek, embenga' ul einina' men youbuka dangamok." Bok sidya' nong Adam bera, nim embenga' ganya eleklesilnya bek an ulumla. 15:46 Men lanamok nong era, ganya nong gom, dem somokna' nong ek elegesuk. Ganya nong era, eimik enyek an lanabok an. 15:47 Men uyimoknya Adam bera, soko yoka' ak doboka uyimok, bok eimik Adam bera, imik heikek aba' ara yeilimok. 15:48 Sokok an ulumak nimi nidya' ara, men soko adya uyimok Adam beneso' ak ulumak. Bok imik heikek ulumak so nim era, imik heikek aba' ara yeilimoknya beneso ak ulumak. 15:49 Nunda wenera, soko adya uyimoknya Adam bedya hogung eneso' ak ulumab sok, eimik era, nunda imik ab sam yeilimoknya bedya hogung eneso' ak ulumnemab. 15:50 Hemyab o, nadya ban wenyhenya nera damok ara banasa lebna. Nunja nong eneng ab ara, Imik Neyung wenesin heikek wekel binggunumab. Dara ono', nunja somokna' nonga ulumaba' anara, pe ulmoubna' damok nonga danggunumla. 15:51 Banara gununa' mema' bok, lebsina' banyek pe keblulum. Nunda nidya' ara somoganggunumab bok, alda nunda nonga nidya' yok nong dangiyiwanesil. 15:52 Ban nera sidya' nonga benggong yuba lebnamla sum enyek, al wene sab-sab henga ublabom alamab sok, nunja nong enera yok nong dangiyiwanesil. Anasa wera, benggong yuba lebnamla sum era, seleb somogorob nim era, perob nonga doronggoka embenga' bukiyiwanesil. Dara embenga' ulumab nang era, yok embenga' nonga lunuwoka eleganesil. 15:53 Nunja nonga wen an somokna' nonga bo ulumabnya nenera, loboka embenga' ulmoubna' nonga lunuwoka eleganesil. Dara, sokok anyeb nong enera loboka, imik heik ab nong enyek, lunuwoka eleganesil. 15:54 Somokna' nong era loboka, ulmoubna' nonga lunuwoka eleganesil dara, ono' sokok anyeb nong era loboka, imik heik ab nong enyek, lunuwoka eleganesil dara, wera ban unuwanasil sum enyek, Imik Neyung yuba bukuk sam momnya doboka' ara, danyek gigiwanamla ara, "Somokna' damok ara seleb orok nenewoka goowoka, bleboka usina' ok seleb gigiro lobla," hyok ara gigiwanamla. 15:55 Hnon momnya doboka' ara, "Wei somokna' damok o, anja pe ollamaklalam ara, hanyagar ulumla do? Wei somokna' damok o, anja si yu hwama' ara, har sam ulumla do?" hyok. 15:56 Somokna' damok alja si yu hwama' ara, malya una' ulumla. Dara malya una' ara, unuwanalum an yub adya laga dangoka migib ulumla. 15:57 Bok, Imik Neyung adya nunja Wenelesilnya Yesus Kristus bedya bleboka oblamagoka elegosuka' anasa, nunda Imik Neyung ak perob aboka giblenob. 15:58 Hemyabo nadya wana' ulusin nim o, anasa wera, ugunda ganya kaboka migiba' anyek ulululum. Ugunja Wenelesilnya bemba nidya' welelum wa nera, salya' lelem danggunusil anasa, ugunda Wenelesilnya bemba yeiriwoka welelulum.
16:1 Wera rupiah yub ak lebnesin. Ugunja rupiah yoka' muna' Imik Neyung mab emba mamagoka beillililum ara, Galatia moka yuba dolomak nim ek, nadya wenyasisa yub enyek, sunuwoka pe unuwolulum. 16:2 Dara minggu lelemlya ela' gigiro, ugunja dolomuna' anyek, sunuwoka men sum enyek pe orowek bokoka dililelulum. Men orowek bokoka beillilimuna' adya, na yanya dara, wera bolowanamab aldana' lobluluma' aboka lebsin. 16:3 Wera nak ugunuk seleb yanya sum era, ugunja or humun nang enyek, rupiah bolowoka beibeka' bo bululuma' aboka, orugoka bokol binisin. Dara, rupiah Yerusalem heikek bo binoka' aboka, bekna' dib bo yak an momnya dona' weboka eleganesin. 16:4 Naba neika' bana' perob dalya' eibnya dara, wera sikeneb neika' bo binimab. 16:5 Nara ugunuk kemel yanggeisinya dara, Makedonia pik uboka kemel binisin senelamna' anasa, pik enyek an uboka keebgiga ugunuk yanesin. 16:6 Or pewalya dara, saragena' li yenewanalabok anasa, unumlya salek era, ugunublaboka neika' ub einiwanamab. Ban nen seleb unuwanya dara, yok-yok heikek kemero yibinuna' aboka arawananulum. 16:7 Nara ugunuk ara, or yokok yabanakanya li hnonok kemel lobsina' ara, lek senelamna. Wenelesilnya bedya or senewalyebok dara, nara ugunuk li gong ubwenewanamna. 16:8-9 Nimi nauba Paulus bedya yuba lelemla' ara, malya aboka bleklemak bok, dib nonga dangalamla wa nauba ulumla' anasa, ban nen unulamnyek ab dara, nara Epesus heikek an ulumnya salek enyek, Geisinya yinggilimoka' beklemak sum era, go' yenewoka denghenemla. 16:10 Timotius bera ugunuk an yalya dara, alda nababya Wenelesilnya bedya wa welemna sok, albabya neik wa welemabnya bek anasa, ugunuk ganya goluwosulula' aboka peroba' leboka pe doro dibnelum. 16:11 Ugunja dara, Timotius bek ara, alda meksonya senena' ara hyak mem. Nara Timotius beb yok yuba len nang eb yanamaka' anya' senewoka diri ulusina' anasa, ugunja pe arawoka ubmuna' adya, alda men pe nak yoululul. 16:12 Nunja hem be Apolos bek dara, nunja hemyabo yok nang eb kemel yeisinoka' aboka, li wen pe weneb einiwasa. Bok alja dara, nara wen dib binimna senen ganya bona' ara orok. Bok ban salek enyek pewalya' eiblya dara, eimik era hyak dib kemel yanasila' ak ulumla. 16:13 Ugunda hyak yuba dib senelemak nimi gekneba' pe keebmouboka ganya kaboka pe ulululum. Asa' ganya boboka, migiba' anyek unulululum. 16:14 Ugunja yoka' nidya' unulumnuluma' ara, wana' ok goluwoka unulululum. 16:15 Hemyab o, Akhaya sokok men yuba domek nimi Stefanus ek nim era, ugunda seleb ella ululuma' anya'. Sikda muna' Imik Neyung mab amba aran wa ara nauba welemak. 16:16 Nara ugunuk ban men nang edya, unu pe welemaknya nenyek pe yeiriwoka welemak nang ek an, sikja yuba pe kelemnelum. Dara alak ok gom, alda nidya' sik neik wa pe welemak nang, sikja yuba pe kelemnelum. 16:17 Stefanus beb, Fortunatus beb, Akhaikus beb, ugun lunuwoka nak arawanenoba' aboka yeka' anasa, nara eiya dabnyok. 16:18 Sikda nadya ganya angawoka pel eleklesak sok, sikja unulumaknya nenedya naba eiya ulunel. Ban unuweisija nang era, men peroba' leboka ubluluma' aboka lebna. 16:19 Asia sokok sam yuba dolomak nimi dara, ugunuk perob aboka gibsak. Akwila beb, ala' gela Priskila geb, ono' sikja ek an Imik Neyung yuba longowoka dolomak nim eb dadya, ugunuk perob aboka nauba gibsak. 16:20 Nunja hemyabo anyagan nim edya nidya' ugunuk perob aboka gibsak. Ugun moumen anaba yuba dolomaka' geknewolula' aboka, pe salawoka gibeldalalulum. 16:21 Nara nabeyok ugunuk perob aboka, sounuwoka gibsin. Na dam nang soruk adya ban momnya doboka gibsin. 16:22 Heknedya Wenelesilnya bek nauba wana' una' orok dara, bera hyak malya dolul. Maranata. Nunja Wenelesilimnya o, yalom e. 16:23 Wera Wenelesilnya Yesus adya wana' uboka eleksina' ugunuk soba' ulusulul. 16:24 Nadya Yesus Kristus lomok ulumnek ab wana' una' ara, ugunuk ulusulul. Perob. Nara Paulus seleb lemna.
1:1 Nadya' hemyab, Imik Neyung yuba dona' nim Korintus heikek ululum nim eb, Akhaya sokok sam muna' Imik Neyung mabo nidya' ab, hemyab o! Nara Paulus bedya, Yesus Kristus adya yuba lena' gaknya, Imik Neyung adya senemoka' sunuwoka sekiyiwanyoknya bedya, nunja' hem be Timotius beblaboka, 1:2 nunja' neyung Imik Neyung ab Wenelesilnya Yesus Kristus adya ugunuk wana' uboka eleksina' ab namen una' ab ulusulul senelenam. 1:3 Nunja' Wenelesilnya Yesus Kristus alja neyung Imik Neyung ak soba' giblenob. Imik Neyung ara alda hyak angoo yadyek senewoka unulusilnya bek ulumlakanya, ono' alda nim ek hekna' ganya lanalamla' damoknya Imik Neyung ek ulumla. 1:4 Nunuk nidya' yoka'-yoka' igina kwelesila' ak ab, Imik Neyung adya ganya hekellilisila' adya, ban ganya hekna' enedya, nimi yok nim igina kwelesil nim ek, sikja igina kwelesila' nidya' ak, nunda ganya hekna' gebnoka' aboka nuk eleklesil. 1:5 Kristus adya yoka'-yoka' alak igina kwelemoknya nera nuk hnon nauba ulusil. Dara neikso Kristus adya, nunja ganya hekna' eneba nauba ulusil. 1:6 Nu nong anyek igina kwelesil dara, ugunuk blebsin damba hnon, ugunja ganya hekna' gebsin danasa ulusil. Ono' nuk ganya hekna' geblesil dara, nera ugunuk ganya heksinya nemba ulusil. Anadya wera, nunja yoka'-yoka' igina kwelesila' anyek, ugumbabya neik so yoka'-yoka' igina kwelesilya bok, ganya siklewoka heiboka ulumnulum. 1:7 Anasa, nuk igina kwelesilnya nenyek, ono' ugumba kwelesil sok, ono' nuk hekna' ganya eleklesila' ara ugumba eleklesila' ara ella ulumaba' anasa, ugunda pe ulumnulum senewoka ganya daboka ulumab. 1:8 Nadya hemyab o! Nunja' Asia mok eb igina kwesuka' anyek, hnon ugumba ella dolulum senelesab. Nuk an igina kwewoka ol yangelesila' damok ara, hyak lok so okna adya, embenga' ubnenggunumab bok, somoganamab ganya ok bomouba. 1:9 Somoganoka' aboka igina kweiyisik senena' mamok. Bok ban nidya' unuweisiknya nera, nunja geremseng ek ganya dib beiliweibyek, alda Imik Neyung nim embenga' bukullilisilnya bek ganya dib beiliwanoka' aboka igina boyiwousuk. 1:10 Dara, Imik Neyung migib enedya nu nong ara, somoganasibya' nong ok ab blebsuukanya, ono' wenebabya blebnesil. Nunda Imik Neyung ak ganya welemabakanya, eimik yanamla igin yaka' eneba alja blebnesila' anya' senelemab. 1:11 Ugunja nunsamba aboka, Imik Neyung ak mololesulum adya keboka, alda nuk blebnesila' anya' senelemab. Dara, nimi nauba Imik Neyung ak mololomak molona' adya aralesak dara, nuk peroba' nauba eleklesil dara, nimi nauba Imik Neyung nunja molona' keboka unulamla aboka, sikda Imik Neyung ak giblemnemak. 1:12 Nunja' mek ganya edya dara, nunda sokok an ulumouba' ara, ono' nauba so ara ugunuk ulusubnya nek dara, nunda perob ganya adya hnon, perob geisa ganya adya anara unulumouba' anasa, nunda eiya dablesil. Nunja ban unulumoubnya nera, nimi ganya geremseng adya unggulumoub bok, alda Imik Neyung adya wana' uboka eleksina' sunuwoka unulumouba. 1:13-14 Nunja ugunuk an momnya doboka beibsabnya nera einiwoka ella danamunya nenyek ok beibsab. Ugunda nuk olowoka darasam ella dangasulum sok, wera nidya' olowoka ella danasom dara, perob senelamna. Dara, Yesus yanggalya sum era, nunja ugun samba perob senewanesab sok, ugumbabya nusamba perob senewanesulum. 1:15 Ban unu dib senena' enedya, nara men ugunuk kemel yanasin senemsa' ara, anadya perob elekna' li penenya dobnelum senemsa bok, nara lanab lobsa. 1:16 Nadya seinib losenya nera, ugunja pik uboka Makedonia moka binimnekanya, samal yangganyakanya, ono' ugunuk se' kemedesinya dara, nara Yudea sam binimnya' anasa, ugunda arawonululuma' aboka seiniblomsa. 1:17 Bok ban nidya' unu seinisenya nera, nadya ganya kaboka seinina' orok adya ubsa de? Nara yoka'-yoka' unuwanamna senewoka sunulamna dara, nadya ok ganya doboka salya' seinilamnakanya, wera nabeyok "Or, or," henekanya, ono' "Orok, orok," alamna de? Orok e. 1:18 Imik Neyung ara hyak dib nong ok lelelanya bek si sibuka wenyalasin. Nadya ugunuk lesisa' ara, "Or", "Orok" ara, sene bobnenewoka lebnenggusisa. 1:19 Anasa Imik Neyung bedya me Yesus Kristus si anyek, Silas bedya gom, Timotius bedya gom, nadya gom, leb elegousubnya nenyek dara, or, oroka' ak sene bobnenewoka lebnenggusub. Al Yesus ak dara, "Or" ana' ok ulumla. 1:20 Anasa Yesus pik anyeb uboka, Imik Neyung ara, alja unuwanamna aboka lemoknya nera, nidya' "Or" ana' ok ulumla. Wera anadya Kristus pik uboka, nunda Imik Neyung si imik nenewanoba' aboka, "Aldib e," alamab. 1:21 Nunja ganya eb, ono' ugunja ganya eneba, Kristus lomok ulumabakanya, migiba' nenelesilikanya, nuk alsamba sekillilisilnya bera, Imik Neyung ulumla. 1:22 Ono' Imik Neyung adya, nuk ouma debsuukanya, alja Geisinya bera alja' nunja ganya lomok eleganesin amoka' anyek dib eleganesin an bekna' elegosuk. 1:23 Nara Korintus heik yanggubsa' ara, ugunja ganya soloma neneweisinyek aboka ubsa' ara, nadya unu seiniwasenya neneba, Imik Neyung ara ella ulunel. 1:24 Dara, ugunja dib senelelumnya nek, nuk dara, oruksin nang ulusinob senenggulusab. Ugumbeyok dib senelelumukanya, kaboka ululuma' anasa, nuk dara, ugunuk eiya ganya bon danasa, arasin nang ulumab.
2:1 Anasa wera, nadya dara, ugunja ganya soloma nenesina' dalyek aboka kemel beisina' era, lobnamna senemsa. 2:2 Nadya ganya hek elegananeseng nim enyek, nadya soloma nenesinya dara, wera hek nim edya nak ono' ganya hek eleganeneseng do senelamna. 2:3 Wera anasa nak ara, ganya hek elegananesom nim edya, nak soloma nenewonumunuk aboka, anaso seinimna yub era, an momnya doboka beibsisa. Nadya ganya eiya dabnenel dara, sikja ganya eneba eiya dabnesil senewoka ubsa. 2:4 Nara ugunuk momnya weboka beibsisa' ara, hyak igin ganya boboka ganya soldowoka obdasakanya, heng meka' gadya' beibsisa. Ban nadya unuwasa' damok ara, ugunuk solom ganya boboka angwei senewoululuma' aboka gom, alda nara ugunuk heka' huru wana' ulusina' anyek, ella ubluluma' aboka ubsa. 2:5 Nimi ben hnon soloma nenelamla dara, alda nanokok soloma nauba gobdo nenenggulunel bok, nera alda ugunuk nidya' ak hnon soloma nenelesil. (Bok, nadyok goboka nauba lebnyeka' anasa, ban nenyek ok lebna.) 2:6 Banaso unusuknya bek ara, ugunja alak igin elegeluma' ara, seleb nauba elekgogowoulum. 2:7 Wera alda nauba solom ganya boboka, ganya obdangoka dib malya dalyek anasa, wenyek dara, ugunda alak suguna' ganya meewoka, alak ono' ganya hekiyiwoululum. 2:8 Ugunja alak ara wana' ulunjab an bekna' enyek, laga amalaluluma' aboka, nara ugunuk weneweisin. 2:9 Wera ugunja dara, yoka'-yoka' nidya' pe keboka unulumaka' ara ella doununa' aboka, nara sene sunusina' diba' momnya doboka beibsisa. 2:10 Ugunuk an malya ubsilinya bek, ugunja meewanalum dara, nababya neikek unulamna. Wera heknyek unulamna' ara, ugunuk meewanalum danasa, Kristus saramek sam ab anara unulamna. 2:11 Nunda bisa' dubnya Satan bedya welemla wa pik era seleb ella ulumaba' anasa, nadya ban unulunanya nera, bisa' adya nuk lolowoka imik dalyek aboka unulamna. 2:12 Kristus adya' perob lero yanggan yuba lebnuna' aboka, Troas heikek bisa dara, Imik Neyung adya wa nen weblula' aboka seleb pika bak lobnyok salek, 2:13 Titus benyek eibnenggubsa' anasa, nadya ganya seinina' go' pe kaboka ubnenggubsa. Dara anyagan ulumek nim ek, nara binimna aboka lebgogowasa dara, Makedonia moka bisa. 2:14 Bok nunda Imik Neyung ak perob aboka soba' giblemab! Al Imik Neyung welemla' adya nuk sam ara, Kristus pik uboka yoka'-yoka' ak hmenga nenewoka ollamaklamab. Ono' alda nu pik uboka alak ella dangan gen-gen songa' anaso' ak, mok soko me nidya' olleleklamla. 2:15-16 Nuk dara, Kristus bedya gen-gen song mekla' Imik Neyung amba ulumab. Nim uk hinik binoba' aboka ulumak nim emba dara, nuk dara, somokna' damok song ulumab bok, alda embenga' ulunoba' aboka bleblesil nim emba dara, nunda mereldisina' song anaso' ak ulumab. Bok heknya ak ban damok era, unuwanesonya be hnon ulumla do? 2:17 Nimi nauba yok nim edya Imik Neyung yuba lero yabana' ara, dekna' dobnoba' aboka welemak so nang ek, nunda ununggulumab. Nunda Imik Neyung adya wa nera welemnelum aboka elegousuka' anasa, nunja lero yabalamaba' ara, geisa ganya adya welemab. Nunda Imik Neyung yuba lelemaba' ara, Kristus lomok uboka, Imik Neyung saramek uboka lelemab.
3:1 Nunda ono' hnon gigibdanoba' aboka leb einimab de? Nunja dara, yok nim unulumak sok, ugunuk gom, ugunuk ab gom, wa nen pe welelanya an momnya dona' bobnesibya de? 3:2 Ugun nong anyek, nunja' wa nen pe welelanya an momnya dona' diba' ululuma' ara, nunja' ganya lomok sam seleb momnya dobsuka' ara, nidya' yok nim edya seleb ella uboka einilemak. 3:3 Ugun nong ak dara, nunda ugunsamba welemoubukanya, ugunda Kristus bedya momnya dona' ululuma' ara, yok nim ek laga amalasulum. Bolpen adya momnya dobnenggubsuk bok, alda Imik Neyung embenga' ululanya alja Geisinya bedya momnya dobsuka' ara, girik lagasa' ak dobnenggubsuk bok, alda nimi ganya ek momnya dobsuk. 3:4 Nunja ban wenhyabnya nera, Kristus pik uboka Imik Neyung ak dib senelemaba' nong anasa, lebab. 3:5 Nunja unu welemab wa nemba dara, numbeyok dara, unuwamenggoma' ak ululabok, nunja unu migiba' welemaba' ara Imik Neyung adya ok eleklesil. 3:6 Imik Neyung adya nadya wenyok ugunub diba' wenyaldan yuba wa pe webnelum aboka migiba' nuk elegosuk. Ban wenyok yub era, momnya doboka' ak unggululabok, alda ganya ak ulumla. Dara momnya dorob yub era somogollilisil bok, ganya ak yub era embenga' eleklesil. 3:7 Sagobadya unuwanalum an yub era, nimi somokna' yuba bok, momnya dorob girik lagasa' ak doboka elegosuk sum era, Imik Neyung adya senenggom dilina' era, Musa bedya' hogung ak hyak senenggoma' anyek yebemok. Wera Israeli nim edya dara, Musa bedya' hogung ak an yebemok dilina' domenya edya, men heng kemena' lomek bok, ban dilina' era mek danggiga balamok. Dara, nimi somokna' damok unuwanalum an yub enyek, senenggom dilina' edya yeb goluwoka elegousuk bok, 3:8 Imik Neyung Geisinya adya dib embenga' eleklesil wa wena' era, wera hyak senenggom dilina' nong enyek yeb goluwoka elegousuka' ak ulumla. 3:9 Nimi somokna' bo lanalamla unuwanalum an yub enyek babya, senenggom dilina' yebemok dara, eimik nim ak peldisina' elegousuka' amba dara, hyak senenggom dilina' ak ulumla. 3:10 Anasa wera, youma' yeblemok dilina' era, wenyek senenggomnya yeblelanya neb sunuwanesibya dara, wenyeknya nera hyak senenggom adya, youma' anya nera hyak dolbaleka' dangalamla. 3:11 Or anam denghenemok yub enyek babya, dilina' nauba yeblamla senemek dara, hyak diba' ulumnamla yub era, hyak nauba senenggom dilina' yeblamla senewanemak. 3:12 Wera nunda nenyek unu dib senelemabnya nenedya, wera ban enera yuba asa' ganya boboka lelemab. 3:13 Nuk dara, Imik Neyung dilina' anyek Musa bedya hogung ak yeboka dengabgiga balamoka' anyek, Israeli nim eibijek aboka, Musa bedya hogung gouluna' lilibdangamok sok, nunda ununggulumab. 3:14 Israeli nim era, sikja ganya seleb ong ibsuk. Dara ono' wenebabya, sikda youma' wenyaldana' yuba anam einilimak salek eneba, hogung gouluna' anaso anam sikja ganya ak ulusil. Kristus pik uboka adya ok, ban gouluna' era gloklamla. 3:15 Anya, al weneba Musa bedya momnya domok yub enyek einilimak dara, sikja ganya era ong iboka su' kelesil. 3:16 Bok nimi hnon Imik Neyung ak ganya dangawoka yalamak dara, hogung ak goululesila' ara glokoka boloklesil. 3:17 Wera Wenelesilnya alamla' ara Geisinya ak lelemla. Dara, Imik Neyung Geisinya ulumla' ara, nimi henga lob losina' anaso' ara, anyagan ulumla. 3:18 Wenyek dara, nunja hogung goulusina' ara hnon unggulumlakanya, nunja Wenelesilnya bedya senenggom dilina' nim ek yeblemab. Yeblemabakanya, nunda sob-soba' also nenebgiga balasil. Dara, ban dilina' en yeblemab ara, Wenelesilnya bek ab yalamlakanya, Wenelesilnya bera Geisinya be an ulusil.
4:1 Imik Neyung adya nuk angoo yadyek senewoka namen ubsuka' adya, ban wa nenera doboka welemab. Nenesa leboka, nunda okna bar aboka hmeng ganya bonggulumab. 4:2 Nunda doknololanya, nimi malya dangoka alya dangananya nera, lek aboka lolomab. Nunda nim ak bob geregoka, Imik Neyung yub ak dangab menegoka unggulumab. Alda nuk dara, Imik Neyung wa welemaba' ara, dib nong yub enyek laga amawoka welemab. Ban adya, nimi nidya' ara nuk dara, Imik Neyung hogung ak ara, aldib anara welemak senewoka, sikja' mek ganya ek ab wensenewaneseng. 4:3 Nunja perob lero yanggan yuba lelemaba' ara, hnon nim ek dara, pe olowoka ella damenggom ulumeija dara, wera nera sikda somoganoba' aboka, ulumeija nim ek anyek pika seregeledya. 4:4 Sokok an malya una' gaka' ululanya bedya, yuba dib senenggulumak nimi ganya ibel leblesil. Wera an bisa' dubnya benedya, Kristus bera Imik Neyung sununa' anedya, Kristus si imik nenen yuba dilina' heng eibijek aboka, heng luma nenelesil. 4:5 Yuba lel eleklesaba' ara, nun nong anyek geklewoka lel eleknenggulusab. Alda yub enera, Yesus Kristus ara Wenelesilnya nong ara an, an yub enyek, lel eleklesab. Bok, nuk dara alsamba leboka, ugunuk arasin nang ulumab aboka lel eleklesab. 4:6 Imik Neyung adya leleladya, "Guna' lomok ab dilina' yeblul," alamla Imik Neyung enedya, nunja' ganya lomok dilina' yeblesil. Al Imik Neyung adya alja nong senedya' ella dangasin dilina' yeblula' aboka unulusil. Dara Kristus alja' asok pik uboka dilina' yeblesil. 4:7 Bok ban geisa peroba' ara, nu soko adya uyisuk nimi nong lomok bolomab. Wera an unulumabnya nera, senenggom migib era nuk an unggulumla, alda Imik Neyung ak ulumla' anyek laga dolula' aboka ulumab. 4:8 Nuk pika nidya' aknewoka seklama daralesil bok, soldowoka orok nenenggulusil. Nunda hyak ganya elesil bok, gobdo malya dab senena' ara unggulusil. 4:9 Nuk ol neblesak bok, hnon gwab losina' anaso' ak unggulumab. Hnon oboka manallilisak bok, hnon diba' soldenggulusil. 4:10 Yesus adya embenga' ulumla' anyek, nunja' nongok ak ab laga dolula' aboka, alja gwekoka somokok somokna' era, nunja nong ok anaba unulusil. 4:11 Yesus nong una' enyek, nunja' sokok anyeb nong ek an laga dolula' aboka, nunda wen embenga' ulumab nim enera, Yesus anasa leboka, somokna' lomok sam soba' doboka doroklesil. 4:12 Wera nera nunja nong ak ara, somokna' damok anyek maboka dulusil bok, ugunuk ara embenga' una' damok adya maboka dulusil. 4:13 Imik Neyung yuba bukuk sam ara, "Nara dib senemsa' anasa, nara yuba lemsa," alamla. Wera an unu neik ganya bolomaba' adya, nunda dib senelemaba' anasa, wenyaboka lelemab. 4:14 Wenelesilnya Yesus embenga' suboka bukiyiwok Imik Neyung enedya, Yesus pik uboka nub neika' embenga' bukiyiwanesilekanya, ono' ugunub nub neika' bo beil binisil. 4:15 Wera ban nidya' unulusila' ara, ugunuk perob dosulula' aboka ulusil. Anasa nimi nauba ara, Imik Neyung adya wana' uboka eleksina' eiyiwoka, wera sikja Imik Neyung ak perob aboka giblemnemaakanya, wera anadya Imik Neyung si ara imik beillilemnemak. 4:16 Ban anasa, nunda okna bar aboka hmeng ganya boboka unggulumab. Aldib nunja eilibik boka' ak dara, blobgiga balalabok, ganya lomok ak dara, li sob-soba migib nenebgiga balasil. 4:17 An wen meka' igin ulusila' anadya, nera wene salek se' ok ulusil bok anasa, eimik era hyak senenggom soba' ulmoublemnamla imik nenesina' danesil. Wen an ol neblesilnya nera or mek bok, eimik eleganesila' ara, hyak senenggoma' peroba' ak eleganesil. 4:18 Dara, nunda nonga laga ululanya nenyek kemero unggulumab bok, alda heng eilina' oroknya nenyek kemero ulumab. Henga laga eillilemabnya nera se' salek ok ululabok, heng eilenggulumabnya nera eimik era, hyak soba' ulmoublumnamla.
5:1 Nunda seleb ella ulumaba' ara, nunja e nera, nera nunja nong enyek, nu sokok an ulumab e nera golowanamla dara, nimi soruk adya songgulumak e nera, Imik Neyung adya solomla' soba' ulumnamla e nenyek, imik heikek Imik Neyung adya seleb sobsuk. 5:2 Nunda Imik Neyung adya solomla e nenyek, imik heikek bindiwoka ongowanesibya senelemaba' adya, nunja sokok an ulumab ek anyeb dara, angoo aboka lelemab. 5:3 Wera ban imik e ongowanemab dara, wera nunja ganya era, nong baneng unggulumnamab. 5:4 Nunda sokok ek an anam ulumab nim ek dara, yoka'-yoka' adya igina kwelesila' anasa leboka, angoo aboka lelemab. Nunja somokna' nong enyek dara, anyagan loboka, embenga' ulmoubna' nong enyek ongoweisibya' aboka, soko an nong enyek gwiriwanamab ganya ek lenggulumab bok, alda imik nong enyek ongoweisibya' senen lelemab. 5:5 Wera ban imik nong ongowanamak aboka meewoka beillilesilnya be Imik Neyung adya ok unulusil. Ono' alja dara, Geisinya anyek aldib unuwanesin an bekna' elegousuk. 5:6 Wera ban nenesa leboka, nunja ganya soba' ara, migiba dangalasil. Nunda sokok an nong ak ulumab salek era, Wenelesilnya beb imik heikek anam neika' unggulumab ara, ella ulumab. 5:7 Nunja nim adya heng eillilemaka' ak sunuwoka unggulumab bok, alda Kristus ak dib senewoka un nong enyek ulumab. 5:8 Wera anasa, nunda ganya migib ulumabakanya, nunda Wenelesilnya ab neika' ulunob senen ganya boboka, wen ulumab nong enera lobsibya senelemab. 5:9 Nunda sokok an ulumab salek gom, imik heikek ulumnemab salek gom, ara Imik Neyung ganya anyek peroba' nenel eleklenob senewoka dulumab. 5:10 Nunda nidya' ara aldib Kristus adya yana lelewanasila' ak sam bo beil binisil. Wera sokok an wen ulumab salek enyek, pe unulumaba' gom, malya unulumaba' gom ara, nunja unulumaba' sunuwoka deknesil. 5:11 Imik Neyung ak lok ulumak an damok era, nunda seleb ella ulumaba' anasa, yok nim ek ara duka' lolom-lolom aboka lelemab. Imik Neyung ara nunja' ganya lomok anaba hyak nidya' olowoka ella ulusil, ono' ugunja' anaba nunja ganya ek ara ella ubsinok senelamna. 5:12 Ban wenhyabnya nera, ugunja nuk gigiwousululuma' aboka lebnenggubab. Nimi ganya lomok ununa' anyek loboka, alda nimi hogung anyek perob senewoka kemelemak nim ek, ugunja yuba sabnemuna' ara, nuk perob senelesulumnya nek sabluluma' aboka, neklesab. 5:13 Dara, nunda serema salasina' anaso ulumak senewanesiseng bok, Imik Neyung amba leboka unulumab. Ono' nuk pe seinilimak seneweisisenga' anaba, anara ugunsamba pesin danasa unulumab. 5:14 Kristus alja wana usina' adya, nuk goluwoka bo ulusil. Dara, nimi ben hnon nimi nauba amba somogosuk dara, wera nimi nidya' ara seleb somogeka' ak ulumaka' anya' senelemab. 5:15 Nim embenga' ulumak nim ara, siksamba ok unggulumnemak bok, alda sikenek perob dosulula' aboka somogoka embenga' suboka bukiyiwok Kristus emba ulunoka' aboka, Kristus ara nimi nidya' amba somogosuk. 5:16 Ban nenesa leboka, nunda nim ek ella ubnesin aboka, nimi ganya seinilemak sok sununggulumab. Aldib men dara, Kristus amba nimi ganya seinina' ak pik uboka sunulumouba bok, wenyek dara, alak anaso sunuwoka seininggulumab. 5:17 Anasa, Kristus lomok ulumak nim era, gobdo wenyok nimi dangalamak. Youmanya nera dengaboka, wera wenyoknya nok dangalamla. 5:18 Wera nidya' ara, Imik Neyung ak ab lanalamla. Imik Neyung ara Kristus pik uboka, nuk ara peroba' nenewoka hibsuk dara, ono' nimi yok nim eneba Imik Neyung beb hiboka ubnoka' aboka, wa nera nuk an elegosuk. 5:19 Wera, Imik Neyung ara Kristus pik uboka soko nim ara sikja meknena' era eib loboka, al nong ab, sikeneb neika' hiyiwousuk. Dara nuk ara, ban Imik Neyung adya neika' hillisil yub enyek, lero yabalalulum aboka elegousuk. 5:20 Anasa nuk dara, Kristus adya nadya wa webnoka' aboka boklesil nang ulumab. Imik Neyung ara nu pik uboka, alja yub era lelemla. Nunda Kristus amba leboka, ugunda Imik Neyung ab, neika' hibluluma' aboka yeiriwoka molowasab. 5:21 Kristus pik uboka, nuk Imik Neyung alja peldisina' danoka' aboka, Kristus ara malya una' elgomnya benyek, Imik Neyung adya Kristus ara nunsamba leboka malya una'anya nenemok.
6:1 Nunda neika' welemab nang edya, Imik Neyung adya ugunuk wana' uboka elekna' dololuma' anyek, salya' lelem domunuk aboka duka' lololosab. 6:2 Imik Neyung yuba bukuk ara, Imik Neyung adya, "Nadya sumen arawanenggen senemsa sum era anja molona' era, seleb kebgesa, nadya blebnamna senemsa sum era, anak aranggesa," aro lebok. Ono' hnon leboka' ara, "Wera sumen era, arawanenggen senelamna sum dal. Wera sumen era, blebnesin senelamna sum ulumla," aro lebok. 6:3 Nunja welemab wa nera, yok nim edya malya uboka welelum hisijek aboka, nunja dara, yok nim ek oluk dikna' girik diba' nenenggulumab. 6:4 Yoka'-yoka' nidya' ak anaba, nunda Imik Neyung adya perob wa wen nang bekna' dangalasulula' aboka laga amalasab. Ganya nauba siklena' adya hnon, igina kwesina' adya hnon, gak dena' una' adya hnon, laga amalamab. 6:5 Legebna' debsina' adya hnon, gasa ek beilisina' adya hnon, nimi nauba irr aboka usina' adya hnon, igin wa wena' adya hnon, mabom bukom ana' adya hnon, dena' denggonggom ulsinina' adya hnon, laga amalamab. 6:6 Ono' geisa una' adya hnon, ella dangana' adya hnon, igina siklebmouboka una' adya hnon, perob una' adya hnon, Geisinya lomok una' adya hnon, muna' gobdo wana' una' adya hnon, laga amalamab. 6:7 Dib yuba lena' adya hnon, Imik Neyung migib adya hnon, Imik Neyung adya peroba' nenena' era, hnonda yin diba' oldan danasa hnon, blebeldan danasa hnon, nunda Imik Neyung adya perob wa wen nang ulumab bekna' era amalamab. 6:8 Nuk hnon gigilisak salek era, ono' hnon derewoka walasak. Hnonda pe wenggulumak alasakjok, ono' hnon pe welemak alasak. Sonda' hwam nanga hnon senelesakjok, ono' hnon dib unulumak senelesak. 6:9 Yok nim edya elgom ulusak nang anaso ulumabakanya, ono' nimi hyak nidya' ella ulusak nang ulumab. Nim adya dara, somogununa' aboka ulumak nang eneso senelesak bok, ono' embenga' ulumab. Nunda saboka olosak nang bok, nunda diba' somoknenggulumab nang ulumab. 6:10 Nunda igin ganya bolomab bok, ono' soba' ei-ei ganya bolomab. Nuk bona' garan ulumab bok, nunja yok nim ek ara bona' dub nimi nenelemab. Nuk dara, yoka'-yoka' garan ulumak senen bok, hyak yoka' nauba ulusil nang ek ulumab. Dara ban yoka'-yoka' nidya' ak, perob wa wen nang bekna' dangalasulula' aboka laga amalamab. 6:11 Ugunda Korintus heikek ululum nim o! Nunda ugunuk hyak nidya' lelewoka laga lebsab. Nunja ganya seiniwoka bolomabnya nera nidya' laga poboka lebsab. 6:12 Nunja ganya lomok ugunsamba wana' un ganya era nauba sangalasab bok, ugunja nuk wana' usina' ara areklesulum. 6:13 Nadya mabo yoka' mab eneso' anyek, ugunuk wenyalasin. Nunja ugunuk unulumab sok, ugumbabya ugunja ganya era ganya sangab loblulum. 6:14 Yesus ak dib senena' orok nim eb, ugunub neika' hina' ara mem. Perob una' ab malya una' ab heka' adya pe neika' ubnesereng do? Dilina' ab guna' ab neika' hiboka ubnesereng de? Orok e! 6:15 Kristus ab bisa' dubnya Belial beb neik ganya bobnesereng de? Yuba dolomak nim eb yuba dona' orok nim eb dara, neika' ara heka' ak ulumla do? 6:16 Imik Neyung e ab bisa' gibna' e neb dara, neika' ara hek so' ak ulumnamso do? Ugunda embenga' ululanya Imik Neyung bedya e ululum. Imik Neyung adya leboka' ara, "Nara sik hnoum ulumnesinikanya, sik gangganek yabalamnamna. Nara sikja' Imik Neyung ulumnamna dara, sikda nadya mabo siliba' ulumnemak. 6:17 Anasa wera, ugunda sik Imik Neyung ak elgom ulumak nimi gangganek ab bokdanalumukanya, ugunda malya' ak unulyamanggom. Dara, wera ugunuk peroba' leboka dobnesin," ara Wenelesilnya bedya lelemla. 6:18 Dara ono', Imik Neyung hyak senenggoma' imik ululanya bedya dara, "Nara ugunja' neyung danasin dara, ugunda nadya memabo gelmabo dangoka ulumnelum," alamla.
7:1 Nadya wana' ulusin nim o! Ban nidya' unuwanasin hyoka' ara nuk lebsuk. Anasemba nunda al Imik Neyung ak lok ganya boboka, nunda al Imik Neyung amba gobdo geisa' peroba' anyek ulunob. Nunja' ganya nonga malya nenelesil malya una' nidya' ara, diba' loboka geisa nenebdanamab. 7:2 Ugunja ganya edya nu nonga doboka beibsululum. Nunja dara, yok nim ek ara, hnon malya ubnenggumouba, dara ono' hnon malya danok senewoka malya nenewanggumouba. Nunda yok nim ek ab bobnenewoka peroba' dobnenggumouba. 7:3 Nadya ban wenyhena' ara, ugunuk igina nenewosununa' aboka lebnenggubna. Eini sam ugunuk lemna sok, nunda ugunuk wana' uboka, nunda hemyabo nang uboka, neika' embenga' ubnesibya gom, somoganasibya gom anaba seinilamna. 7:4 Nara ugunda pe unulumnemaka' anya' senelesin. Nara ugunuk nauba gigilesin. Nunda yok-yok igin edya kweboka ol neblesil bok, ugunja una' edya, ganya hekel eleklenulum. Anya nadya ganya era, anadya nauba eiya dablenel! 7:5 Nunda Makedonia moka byuba sum eneba, go' pe bukoka dek-deka sobnenggububa. Nunda yok-yok pik ab uboka igina nenewoka ol neblesika' ara, eilibek ara oldalamoubakanya, ono' meneng ganya lomok ab dara, lok ganya bolomouba. 7:6 Bok, Imik Neyung adya alda nimi malya dan nim ek ganya hekellilisilnya bedya, nuk dara, Titus benyek anyagan bo yoka' nong adya, nunja ganya hekom husuk. 7:7 Dara, nuk ganya heksuka' ara, Titus be anyagan yoka' adya ok gom, alda ugunja alak hek elegoluma' adya numba ganya heksuk. Alja dara, ugunja nab hyak eibdeisibya seneleluma' anyek, alda nak neknyok. Anya hnonda ugunja angoo seneleluma' ara, ono' nak mala dolonuluma' anasa, hyak nauba so eiya dabnyok. 7:8 Nadya momnya doboka beibsisa' adya, ugunja ganya soloma neneweisisa. Men dara, angoo salya umsa senemsa bok, wenera wensenenggulumna. Ban momnya doboka beibsisa' adya, ugunja ganya soloma neneweisisa' ara, or se' amba ok ubsisa' ak eibsa. 7:9 Dara, nara perob seneweisina' nong ara, ugunja ganya angoo senewouluma' amba ok gom, alda ugunja angoo senewoulum ganya enedya, ugunja ganya dangaluma' anasa, eiya dablenel. Ugunda Imik Neyung adya anaso unu bobnok senelamla solom ganya bobluma' adya, nunja unusubnya nera ugunuk malya nenewanggusuba. 7:10 Anasa, Imik Neyung adya perob senelamla' angoo senen ganya bolomaka' ara, nimi ganya dangana' nenewoka, ono' nimi blebsina' dangalamla. Dara, nim ara ganya en lanalamla' amba dara, solom ganya bonggulumak. Bok, alda nimi soko nimi ganya adya ok, angoo senelemak dara, wera nenedya nimi somokna' damoka lanalamla. 7:11 Wera ban neik ganya era, al Imik Neyung seinilamla sok, ugunja angoo senewoka soloma dasuknya nedya unusuka' anyek, ugunda pe kendenelum! Wera an ganya enyek boluma' adya, ganya gouluna' hnon luma' ganya enyek, peroba' nenena' hnon, malya una' lek senena' hnon, lok ganya hnon, nunda eibsibya senen ganya hnon, yeirina' ganya hnon, meknelemak nim ek igina nenesina' ganya hnon, ban bololum ganya adya, ugunuk nidya' laga dosuk. Dara unululuma' nidya' adya pe memelum bekna' ulumla. 7:12 Anasa, nara ugunuk momnya dona' beibsa bok, ban malya unulumoknya nenesa beibnenggubsa, ono' ban malya una' enedya igina kweboka gweklemek nim enesa beibnenggubsa. Nara momnya doboka beibsisa' ara, ugunja nuk wana' uboka aran ganya ugun dam nang ek laga dosulula' aboka beibsisa. 7:13 Wera anadya, nunja ganya anaba hek elegosulum. Ono' ugunja Titus bek ganya hek elegoluma' adya, nunja' anaba nauba eiya dabsuk. 7:14 Nadya' anaba Titus bek Korintus nim era hyak pe ulumak aboka gigilesisinya nera, yoka dangana' orok adya, alya ubnenggubnyok. Nunja nidya' ugunuk dib ok lelemouba sok, ono' nunja sikda anaso ulumak aboka Titus bek sibama' adya ok neklemouba bok, ok ab dara, dib gigiwal. 7:15 Dara, Titus bedya, alak e yeililumukanya, ugunda lok ganya boboka alja yuba pe keboka unuluma' anyek, alja anyek bekoka ugunuk hyak nauba wana' ulusil. 7:16 Ugunda yoka'-yoka' nidya' ara, pe unulumnamaka' anya' senelesinikanya, nara nauba eiya dablenel.
8:1 Hemyabo nim o, Imik Neyung adya Makedonia moka yuba dolomak nim ek wana' uboka pe arawoka unulusuka' anyek, hnon ugunda ella danalum senelesab. 8:2 Sikenek hyak yok-yok senenggom igina kwelesuka' anaba, sikda nauba ei-ei ganya boboka hekna' ganya uboka, sikda hyak bona' garan ulumekjok, yok nim ek nauba arawanamab senen ganya bolomek. 8:3 Sikda nim adya unu eleganelum ana' orok bok, sikja ganya doboka, sikenek ulumoknya nek sunuwoka eleganggumek bok, ono' nauba gokoka eleklemek. 8:4 Sikja nuk, muna' Imik Neyung mabo Yudea sokok ulumak nim ek, numba hnon arawanamab aboka duka' lolom-lolom aboka moloweisik. 8:5 Nunja dara, anaso' ak eleganemak senewanggumoubnya nenyek unumek. Sikda Imik Neyung adya seinilamla' sok, men dara, sik nong anyek Imik Neyung ak elegekjok, ono' nuk hnon sik nong elegeisik dara, yok arana' era elegemek. 8:6 Ban unumek anasa, ugun gangganek sam hnon, Imik Neyung adya pe arawoka unulusila' adya, neik una' unulumnulum aboka, Titus bedya nek einimoknya nenyek webdaknamla aboka orugomouba. 8:7 Anasa wenyek dara, ugunda yoka'-yoka' pe unululuma' yak nim ululum. Yuba dib senena' hnon, perob yuba sana' hnon, peroba' ella dangana' ak hnon, ganya gouluwoka arana' ak hnon, nuk sam wana' ulusuluma' hnon, ban nidya' peleluma' anasa, an yok nim ek arana' anaba hyak nauba perobnya nedya unulululum. 8:8 Nera nadya oruksin yuba anaso lebnenggubna, alda yok nim edya or nim arawanamab senelemaknya nenyek nauba unulumaka' anasa, ono' nadya dara, ugunda heka' huboka nimi yok nim ek wana' ululuma' anyek sunuwosununa' aboka lebsin. 8:9 Ugunda Yesus Kristus, nunja' Wenelesilnya ululanya bedya wana' uboka eleksina' ara, seleb gobdo ella ululum. Kristus ara ugunsamba bona' garannya danya' adya, ugunuk bona' dub nimi doluluma' aboka, alda dubnya bok bona' garannya dok. 8:10 Nenyek youma' gibna' enyek, ugunda men arawanamab aboka seinibgogolumukanya, ono' arab einilum nim ek, ugunuk peroba' dosulula' aboka, anaso unuwoluluma' aboka lebnesin. 8:11 Wera wenyek, ugunda arawanamab senelumnya nenyek, nera unubdaknalum. Youma' dara, nunda nenyek unuwoka arawanamab aboka nauba pe seinibgogolum sok, ono' wenyek ugunuk ulusilnya nek doboka pe arabdaknalum. 8:12 Imik Neyung adya dara, una' orok diguma' ak sununggulumla, alda seleb ululanya nok sunulamla' anasa, ben hnon ara ganya doboka hyak arawonun senewoka eleklamlya dara, Imik Neyung ara peroba' leboka dolomla. 8:13 Nera nadya dara, ugunuk ara igina nenewoka, yok nim ek ara, jakman nenewanesin senenggulumna. Bok ugumba sikba neik digum dolul, senelamna. 8:14 Alda ugunda bona' dena' pe deregoka ululum salek era, wera ugunja yok nimi garan ulumak nim ek, al ugunja or elek arawanalum. Ono' eimik era, ugumbabya garana buknelum sum era, sikbabya dena' bona' ubnamla dara, wera ugunuk arawanasak. Wera unu araldalamnaluma' adya, neik so so danamla. 8:15 Imik Neyung yuba bukuk ara, "Nauba bololomoknya bera go' hnon bok lobnenggumookanya, mek bololomoknya bek dara, mek danggumok," hyok. 8:16 Nara ugunuk senelesin sok, Imik Neyung adya Titus benyek ganya gouluwoka ugunuk aran ganya elegoka' anasa, Imik Neyung ak giblenob! 8:17 Wera Titus bera nunja anyek unuwanalam hyubnya nenyek kemok bok, alja ok orowek ugunuk arawanasin ganya nauba boboka, alja nara sikenek biniboka webnamna ganya boboka yalamla. 8:18 Wera Titus be yanggala' ak ara, Imik Neyung yuba dona' nimi nidya' adya, alda perob lero yanggan yuba lero yabana' ak ara pe welemla senelemaknya ben hnon, alab neika' bokol yeilisab. 8:19 Wera ono' hnonda, beneba yuba dolomak nim edya weboka, ugunda elegolum arasina' neika' bo binilum aboka sekiyiwek. Wera ugunja bololum bona' nimi pik elekdo yibinemab dara, Imik Neyung si imik nenewoka, nunja ganya doboka araweisinob senelemaba' ara laga dolula' aboka unuwanamab. 8:20 Nunja nimi yok nang ek, ugunja senenggoma' bololum bona' elekdo yibinimab dara, yok nim edya meknelelum heisijek aboka, keeboka unuwanemab. 8:21 Nunja hyak pe unuwanemabnya nera, Imik Neyung hogung ak ok gom, alda nim hogung ak anababya, meknena' oroka' ak ubak senewanoka' aboka unuwanamab. 8:22 Titus beb yoknya beb yanggerija' ak ara, ono' nunja' hembe yoknya be hnon makoka neika' bokol yasab. Nunda alak, li gong wa elegemouba dara, aldib yeng ganya boboka pe welemla' eillilimab. Alja dara, ugunuk ara pelemaka' eillilisila' adya, wenyek dara, nauba so yeng ganya bolosil. 8:23 Titus bek dara, nadya' hembe yoka' nong uboka, ugun arasin wa neika' welenamnya bek ulumla. Alda yok penya nang alab neika' yalamak nang dara, anyagan Imik Neyung yuba dona' nim edya wa nen welemnelum aboka bokosak nang. Ono' sikda Kristus si imik nenelerak nang ulurak. 8:24 Nunja ugunsamba sikda anaso pe unulumak aboka gigilisabnya nera hnon, ugunja dib wana' usina' hnon, yok-yok Imik Neyung yuba dona' nimi gangganek anaba, ban winilya nang ak amalemnelum.
9:1-2 Nimi muna' Imik Neyung mab ek arana' ara, ugunda arawanasibya ganya seleb nauba bololuma' anasa, unuwanalum aboka momnya dobnenggunusisinya. Makedonia nim ek anaba, sikda anaso ganya bolomak aboka, ugunuk gigileng sok lero yibisa. Makedonia nim ek ara, Akhaya mok ulumak Imik Neyung mab era seleb lemoub gibna' ek aba', sikda anaso arawanamab aboka seleb seinibgogomek aboka nekesisa. Dara, ugunja unululumnya nedya, nimi nauba yeng ganya neneiyilum. 9:3 Nunja sikda anaso pe unulumak aboka yok nim ek lelemabnya nenyek, sonda' dalyek aboka, Titus beb ono' alkabo penya nang ek ugunuk sam bokol yeilisin. Sikenek ara, nadya dara, seleb orowek memelemak hesa' anasa, ugunda aldib seleb meebdakluluma' aboka bokol yeilisin. 9:4 Nara hnonok lok ganya boboka seinilamna' ara, nara ugunuk yangganya sum enyek, Makedonia nimi hnon nub neika' binimab aboka yeijikanya, nadya lelenanya nera sonda' dalyek senelamna. Nunda ugunuk ara seleb aldib orowek seleb doboka beiyirob hyuba' anasa, anyek ununa' oroka' eibnemak dara, nak alya dabnenel. Orok dara, ugumbabya alya ubnesil. 9:5 Wera nenyek deisilyek aboka, ugunja arawanamab hulumnya nenyek, men orowek memewoka beillileluluma' aboka, Titus beb alkabo nang eb dara, bululum hisin. Wera anadya ugunja bolowanaluma' ara, duka' lolowoka ubek ara, orok bok, alda sikja ganya doboka araweka' danamla. 9:6 Ugunda banyek pe beknelum! Nimi wak yina' meka' melelanya bera, nong anaba meka' dolomla. Alda yina' nauba melelanya bera, alba nonga nauba dolomla. 9:7 Imik Neyung ara, eiya ganya boboka eleklemak nim enyek hyak perob senelesila' anasa, lobnesinya bok elegan senena' ab, duka' lolom-lolom alamak enyek elegana' senena' ab dara, mem. Nimi nidya' pe seiniwoka, anyek nara eleganamna senewalya' ok ganya doboka eleganamak. 9:8 Imik Neyung senemlya dara, ugunuk yok-yok perob elekna' lendewoka eleklemnesil. Wera ono' alda yok-yok nidya' pe eleganesila' adya, ugunda yok-yok perob wa nidya' wel dibilloklomnulum aboka hyak nauba ugunuk ulumnesil. 9:9 Imik Neyung amba alja yuba bukuk ara, "Alda bona' yene-mane alamlakanya, nimi bona' garan nang ek boklesil. Alja pe unulusil una' era, soba' ulmorulumnamla," alamla. 9:10 Imik Neyung adya yina' melelanya bemba yina' beiyiwoka, ono' den damba gwaneng eleklesilnya bedya, ugunsamba yina' nauba nenewoka, ugunja pe unulumnulumnya nenyek nauba moullilimnesil. 9:11 Wera anadya ugunda yoka'-yoka' ara, dena' bona' yak nim domunukanya, ono' ugunja dara, yoka'-yoka' nidya' ak hekna' ganya boboka nauba eleklemnelum. Dara, ugunja wen bolowoka beillileluma' anyek hnon, nunja bokdo yibinimab arana' enedya, yok nim era Imik Neyung ak nauba perob aboka giblimnemak. 9:12 Ugunja perob una' an unululuma' anadya, nimi muna' Imik Neyung mabo yok nimi dena' bona' yak nenena' ok ununggululum bok, alda an unululum ununa' enedya, nimi nauba Imik Neyung ak perob aboka giblemnemak. 9:13 Ugunja an laga pe unululumnya nenedya, ugunja yuba dobluma' anyek sunuwoka unululuma' anasa, ugunja an bojam unululuma' adya, Kristus adya' perob lero yanggan yub amba anasa, yok nim era, sikda Imik Neyung ak gigilemnemak. Ugunuk an heka' ulusila' anyek, hekna' ganya boboka, sikenek hnon, ono' nimi yok nang ek hnon bokoka eleklesuluma' anasa leboka, sikda Imik Neyung ak gigilemnemak. 9:14 Dara Imik Neyung adya ugunuk peroba' unulusilnya nenesa leboka, sikda ugunuk wana' uboka Imik Neyung ak mololomnasak. 9:15 Imik Neyung adya nuk hyak seinildakna' okna elekna' emba, nunda alak pe giblemnemab!
10:1-2 Wera na, Paulus bedya ugunuk yoka' unuwanalum gom aboka lebnamna. Ugunub neika' ok ubna dara, namena' ulumna bok, naba yok mok sam ubna dara, asa' ganya boboka wenyalasil alanyak. Hnon yok nim era, sokok an ununa' enyek perob senelemak nim era nuk wensenelesak. Anasa, ban nim enyek asa' ganya boboka alama' lebnesin bok, nara ugunuk yanya danyek, anaso wenyhesinyek aboka, wenyok nara Kristus adya namen ganya pik uboka lelesin. 10:3 Nunda sokok an anam ulumab bok, sokok nim oldalamaknya neneso' ak, oldanggulumab. 10:4 Nunja sokok an oldalamabakanya, bolomab yina mal era, sokok abnya nek bonggulumab bok, nunja yina mal era, Imik Neyung migiba' goululamla' ak bolomab. Wera an yina mal enedya, gasa mouboka welemak oulyang ek dolul meneklemab. 10:5 Imik Neyung ak ella dangana' anyek, malya nenewanoba' aboka imik neneldalalanya nidya' golol meneklemab. Nunda yok-yok seinina' lanalamla' nidya' ara, Kristus senelamla' ak bo beil balamab. 10:6 Ugunuk dara, yuba pe keboka unulumun dara, yok bleknemaka' nidya' ak ara, nunja igin eleklemnemab. 10:7 Ugunja hogung ak laga ululanya nenyek kemelelulum. Nimi ben hnon, nara Kristus adya' ak ulumna senebdalya dara, al damnya nara benyek Kristus aljinya ulumna senelamla sok, numbabya Kristus adya nim ek ulumak senewosulul. 10:8 Imik Neyung adya migib eleklesila' ara, ugunuk ganya nauba nelelula' aboka eleklesil, bok ganya malya nenewanoka' aboka eleknenggulusil. Anasa, nuk eleklesil migib ek ara, nara hnon nonggo henesinya dara, alya ubnenggununel. 10:9 Dara, nadya momnya doboka beillilesina' adya, ugunda hekasa ulusil aboka lok ganya bobmunuk senelamna. 10:10 Nim adya ok dara, Paulus bedya momnya doboka beillilesil yub era, pe gasa' migib nonga' lelemla. Bok al nong anyek, oka nu gangganek ulumla dara, alda hmeng so ulumlakanya, alja yub era, dolbalek so dangalamla, alanyak. 10:11 Ban anaso ganya bolomak nim era, nunda ugun gangganek ok ubna dara, unuwanamab ara momnya dona' ak beillilamna' anaso' ok sunuwoka unuwanamab, senewanok. 10:12 Nunda perob aboka nonggo aldalamak nim ek, neika' maknenggunusibya. Ono' sikja ununa' hnon, nunja ununa' hnon, anaso-anaso aboka webnenggunusibya. Sikda sik nong ara, anaso nang ek ulumab aboka sunubdangoka, sik nong anyek nunda heka' anaso' ak ulumab aboka makaldalamak. Dara sikda ban unuldalamaknya nenedya dongdang alamak. 10:13 Nunda anaso' ak ununggulumab. Nunda pelemab alamab dara, wera Imik Neyung adya unulumnulum aboka garasuka' ak ok sunuwoka pelemab alamab. Dara, ugun nong ara garamok mok ek an ululum. 10:14 Nunda pelemak alamab ara hwiboka lenggulumab. Ugunuk lero yanggusuba dara, hwiboka lelemak henesiseng bok, nunda Kristus perob lero yanggan yub era ugunuk lero yeilisuba' anasa, orok. 10:15 Imik Neyung adya ugunda anyagan welemnelum aboka gama' iknenggusuka' ak an, yok nim edya welemaknya nenesa nonggo anggulumab. Bok nunda hnonok senelemaba' ara, ugunja yuba dib senena' anyek nauba danggiga balamnamla dara, nunjinya nauba dolul, senelemab. 10:16 Dara, nimi yok nang edya welemaknya nenesa nonggo ana' loboka, ugunuk ara hwiboka perob lero yanggan yub era, mok gogoka webnemab senelemab. 10:17 Imik Neyung yuba bukuk ara, "Nimi yoka'-yoka' amba nonggo hunun senelelanya bera, Imik Neyung adya seleb welemla' anyek eiyiwoka nonggo alalul," aro momnya dobok. 10:18 Nim adya, gigildalalanya bera, aldib pe ulumla goma', bok Imik Neyung adya gigilamla nim ek hnonok aldib pe ulumla.
11:1 Nara hnon dongdang henemna bok, or keboka dogom hululum. Aldib, nadya yuba seleb dogom aboka kel lololum. 11:2 Neyung genong adya, nimi salawanggom gelma ara, nengma era hnonok ok eleklemak sok, nara ugunuk doboka Kristus ak lesisa. Anasa, nara ugunuk Imik Neyung perob senelamla hman ganya bolosin. 11:3 Hawa gek baga' geremseng adya bob geregemok sok, Kristus ak ganya gekman bojam ululuma' anyek, bob neneweisilyek senewoka lok ganya bolomna. 11:4 Nunja anaso leb elegesuba' Yesus yuba diba' ak gom, alda yok nim edya yok so Yesus yub enyek nekel yalasak enyek, peroba' aboka dololum. Dara, perob seinina' ganya eb, perob lero yanggan yuba dib nonga' nunja leb elegesubnya nera loboka, salya' dib gom seinina' eb, yok so perob lero yanggan yub eb danyek, dololum. 11:5 Bok nak dara, yok senenggom yuba lena' gak nang ulumak senelelum bok, nababya meknya bek senenggulumna. 11:6 Nara yuba sana' ara, pe hobyang sanggulumna bok, ella dangana' ak dara, nara dongdang ana' meka' oroknya bek ulumna. An una' era ugunuk yoka'-yoka' unusuba' ak anyeb, laga dangamoka' ara ella ululum. 11:7 Nara Imik Neyung adya perob lero yanggan yuba ugunuk lel elegel yeilisisa dara, nak rupiah eleklemnenulum aboka molowanggumsa. Wera anadya, nara ganya sokok nenebdangamsakanya, ugunuk imik neneweisisa dara, anya nadya ugunuk malya ubsisa de? 11:8 Nara ugunuk arawoka yuba lebsununa' aboka, yok Imik Neyung yuba dona' nim ek rupiah dolomsa. 11:9 Wera an wa welesisa sum enyek, nak unuruwa' okna ubnyoknya nemba leboka, ugunuk igina kweiyiwanggusisa. Nadya heka' ak doboka bobsinya senesenya nera, nunja' hemyabo Makedonia nimi yeindeboka, pe aralenyek. Nara ugunuk obnebsinyek senewoka pe siklewoka ulumsa sok, eimik eneba al nenyek soba' unulumnamna. 11:10 Kristus adya' dib jong yub era, nak an ulunel bok anasa, Akhaya mok ebnya ben hnonja, nadya an nonggo alamna senelenanya nera, yuba garawanggununel. 11:11 Hekasa nara anaso wenyhen do? Nara ugunuk wana' usina' orok adya anaso lebna de? Orok! Nara ugunuk wana' ulusina' ara, Imik Neyung anaba ella ulunel! 11:12 Nadya wen unulunanya nera, soba' unubgiga balamnamna' adya, sikda hnon senenggom yuba len nang aldalamak nang era, nunda Paulus benya arob nanga welemak sok, numba unulumab aboka nonggo hijek anasa, lobnoka' aboka pika leblemnamna. 11:13 Wera an unulumak nang era, sikda sonda' yuba lena' gak nang uboka, nimi bol gereklemak nang ulumak. Sikda sonda' bok, Kristus bedya yuba lena' gak nang ulumab seneweisinoka' aboka, samal meneklemak. 11:14 Bisa' dubnya Satan anaba, dilina' lero ulumla henoka' aboka samal meneklamla sok, sikba sonda' anasa yuba len nang abdangoka samal meneklemak dara, loka dabnenggunususo. 11:15 Anasa, bisa' dubnya bek arawoka welemak nang eneba, Imik Neyung wa welemak nang anaso' anyek sene sunulumak dara, loka dabnenggunususo. Anya eimik era, sikda nidya' meknewoka unulumak sok, sunuwoka dirigoka malya nenewanasil. 11:16 Nara ono' saawoka lebnamna, nimi hnon nak alda dongdang ana' anya senena' ara mem. Bok ugunuk dara, or anam alda dongdang ana' anya senewanenulum dara, nara mek nonggo henuna' aboka, or unuwolul senewolulum. 11:17 Wera nadya nonggo aboka sabnya dara, nera Imik Neyung adya perob senelelanya neneso' ak sanggulumna. Wera nera, nara dongdang ana' nang eneso uboka salamna. 11:18-19 Ugunja dara, nunda geremseng nang seneldalaluma' adya, nimi dongdang ana' nang ek ara, or namena' siklewoka ululuma' anasa, nimi nauba sokok an ulumla' ak sunuwoka nonggo alamaka' anasa, wera ono' naba nonggo henemna. 11:20 Ugunuk orukna' nang nenelesak gom, ugunuk loba' nenelesak gom, ugunuk ab duboka lolowoka bona' dolomak gom, ugunuk meka' neneiyiwoka, sikenek imik nenelemak gom, ugunuk hogunga wablasak gom dara, nuk or unulusinok senelelum. 11:21 Bok nuk dara, unurubnya nek ara, hmeng so uboka unuwanggumsa' adya, alya ulunel. Bok, yok nim edya yoka' ak nonggo heneseng dara, nababya or asa' ganya boboka unuwanasinya! (Nara dongdang ana' anya beneso bok lebna.) 11:22 Sikda Ibrani nang ulumak de? Naba Ibrani nang ulumna! Sikda Israeli nang de? Naba Israeli nang ulumna! Sikda Abraham nang yila' ulumak de? Naba Abraham nang yila' ulumna anya'! 11:23 Sikda Kristus adya wa wen nang ulumak de? (Nara loba' oronanya beneso' anyek lebnamna.) Nak danyek, Kristus adya wa wena' nongnya ulumna! Nara Kristus wa yeiriwoka hyak nauba so welemna, anasemba leboka liga gong henga gouboka beillilenyek, hnonda soba' saboka olonyek dara, liga gong somogeisinya' ak elelloblonyok. 11:24 Liga lambadya Yahudi nim edya henga gouboka, legebna' li denga hnonok uboka ebdobnya obadya deboka onyek. 11:25 Liga winilya Roma nang edya gama' adya waboka obnyek, liga hnonok girik adya saboka obnyek, liga winilya mek ekla buna' yabana' malya dok dara, salya' mam beragasa, hnon sum era mek dubuk salya' mab mouruwasa. 11:26 Hyak omom uboka okna pika, nauba yabalamsa. Meka gwenel lendelenyok, hoka' don nang ek loka kwelenyok, Yahudi nang ek hnon, ono' Yahudi gom nim ek hnon lok ubnen bok yabalamsa, senenggom heikek hnon, gak dena' ak hnon, loka kwebnenbok yabalamsa. Mek dubuk ab loka dabnen bok, ono' yuba dona' orokjok, nunda yuba don nang alamak nang ek ab hnon loka kwelenyok. 11:27 Nara wa nauba yeiriwoka welemsa dara, hmeng hwam ulunyok, hnon sum hogunga manggulumsa, hnon gwanenga meka bunya malamsa, hnonda gwanenga lol morulamsa, hnonda ongon akleng orok adya saragena' kwelenyok. 11:28 Wera eini lebnanya nenesonya nera nauba ulunyok bok, hnon ara nim Imik Neyung yuba dolomak nim enyek soba' seiniyiwoka, ingmun berelenel. 11:29 Nimi hmenga dangalamak dara, nera naba hmeng ganya nenelenel. Nimi hnon malyanggalamak dara, nak dara, angoo senewoka ganya oldalamna. 11:30 Nara yoka'-yoka' ak nonggo henesinya dara, wera nera nak hmenga ulunelnya nenyek nonggo henemna. 11:31 Imik Neyung, nunja' Wenelesilnya Yesus alja' neyung bera, soba' giblemnemaknya bera, nara sonda' lenggulumna' anara, ella ulunel. 11:32 Nara Damsyik heikek ulusebok, anyagan soko dubnya bera Aretas ono' alja senenggom dubnya be ulumookanya, nak henga goubnelum aboka orugosuk dara, yin bona' nang era, pika welenyek. 11:33 Bok heik lega' gegen pik sor serrema doronggoka, henga geregoka doblingganyek. Dara, anyagan welemoka' dubnya bedya soruk ak ab goboka beiya buksa.
12:1 Nonggo aldana' ara, peroba' lananggulumla' ak ululabok, wera, nara Imik Neyung adya lendar dib ab, alja yuba laga sal eleklenelnya nenyek, moruwoka lebnamna. 12:2 Nimi yuba donya ben hnon, Kristus adya imik heikek hyak imik sam do welewok salek era, wera gibna' meija dubuka' badya lemok danyeka' ak, ella ulumna. Alja nong gekman dobok gom, or lendara ak gom ara, diba' oroka' ara Imik Neyung ok ella ulumla. Do welewoknya bera imik heikek denewa' winilya' ak welewok. 12:3 Nara ono' hnon saawoka lebnamna' ara, bera aldib nong gekman dobok gom, lendara doka' ak gom ara elgom ulumna bok, Imik Neyung ok ella ulumla. Bok nim ak dara, ella ulumna. 12:4 Bera alda imik heikek bo byuk dara, nim ek ella dangoka salalulum henggoma', sabnamenggom yub enyek, kemok. 12:5 Wera benyek, nadya dara, nonggo henesinya bok, nasamba nonggo abdanggunusinya. Alda nak hmenga dangalanelnya nemba danyek ok, nonggo abdanasinya. 12:6 Nara yoka'-yoka' amba nonggo henesinya dara, dib yub amba ok lebnesinya' anasa, dongdang ana' anya wenyhenggununeseng. Nadya unulamna' ak eillilimaka' hnon, nadya yuba salamna' kelemaka' hnon, banyek ok sunuwoka nak anaso unulamla senewaneseng. Bok, alda dibnya nek loboka nauba so unulamla seneweinijek aboka, nara yok yuba hnon sabnuna' unadyok, siklewoka ulumna. 12:7 Imik Neyung adya' senenggoma' unu laga eiro yabalenanya nenyek, eillilamna' adya dengdang ganya bobnyek aboka, sabala' hnon nadya' nong lomok, meiyinyok. Nara dengdang ganya bobnyek aboka, ban sabala' manyoka' ara, bisa' mal diba' lebom alalula' aboka elegenyok. 12:8 Wera sabala' manyoka' ak, gwenewanelom aboka, Imik Neyung ak liga winilya molobsiniwasa. 12:9 Bok Imik Neyung adya dara, "Anda hmeng ululam danyek, nadya migib era, gobdo nauba dangalamla' anasa, nara anak wana' uboka elekgena' ara seleb nauba ulunggel," henyok. Nara hmeng ulumna ak an, Kristus adya migiba' nak gouluwoka bo ulumnenela' anasa, nara hmeng ulumnenel dara, nonggo alamnamna. 12:10 Anasa nak dara, hmenga dangalanel dara, perob senelamna. Nara hmeng ubnen salek enyek, ono' migib ulumna' anasa, Kristus amba leboka hmeng ulumna gom, igin kwelenel gom, okna ulunel gom, ol neblenyak gom, lebelmoublenel gom dara, pelenel senewoka eiya dablenel. 12:11 Nak dara, hyak salya' anya ulunabok, yoka'-yoka' pe ununa' ak sam amba dara, senenggom yuba lena' gak nang eneba sikda senenggoma' bok, nak dara meka' sirika' ak ara, hnon unggulumla. Ban neneso leboka, ugunja nak ara pelemla senewoka gigiwananesom bok, ugunda unuwanggunuluma' adya, nara dongdang ana' anya beneso dangalamna. 12:12 Nara aldib Kristus adya yuba lena' gaknya laga bekna' ulumla' ara, wa wena' gekneba' ak lok so' bekna' hnon, senenggom lok so ununa' hnon, yok-yok migib ununa' ab dadya, ugun gangganek ab, nara hyak ganya siklewoka laga okoka welemsa. 12:13 Anasa yok-yok mok soko yuba dona' nim ulumaka' ara, yok makoka ununa' orok, ugunuk neik so welesisa bok anasa, heka' ak go' weilik gesisa do? Alda banyek hnonok lobsisa' ara ban: nak rupiah arawananulum aboka molowanggusisa' ak hnonok meknewasa' anasa, suguna' ganya bonumun dara, wera laga lebnenulum. 12:14 Sum enera winilinya sum ugunuk kemel yousununa' aboka diri ubna. Anasa yanamna dara, ugunuk ara igina neneb eleganggunusin. Wera nadya perob senelamna' nong ara, ugunja boboka deleluma' ak gom, ugun nong anyek nak eleganenok senelamna. Wera mekmab edya nauba nim ek yok-yok bona' bolowoka beillinggulumak bok, alda nauba nim edya memab amba aboka yok-yok bona' bolowoka beillilemak, anasa lemna. 12:15 Nadya ganya doboka yoka'-yoka' ara, ugunsamba leboka, nadyinya orok nenewoka dolomnakanya, na nong anaba malya' neneldalamna. Nadya ugunuk nauba wana' ulusin bok dara, ugunja dara, nak ara mek wana' ubnenesom de? 12:16 Wera nara ugunuk ara, yoka'-yoka' amba ol nebnenggulusisa. Bok, nara geremseng ganya boboka, ugunuk sonda' amba bobnenewoka, henga weboka youbsisa senelelum de? 12:17 Nera hekasa unuwanasisinya! Nim ugunuk an wa webnelum aboka bokol yalasin nang pik anyeb uboka, ugunja dena' bona' doboka delesisa de? 12:18 Nara Titus benyek ugunuk an aralesulula' aboka bokol yeilimsa, dara ono' yok yuba donya be hnon alab neika' wel binilum aboka bokosisa. Titus bera, ugunuk ab bona' dena' hnon molowoka doboka desuk de? Bok nab Titus beb dara, neik ganya boboka, neik ununa' edya neika' welenama' ak, eiyilum do? 12:19 Ugunja dara, ban nidya' lelemaka' ara, meknenggulumab senewoka, mala doldalamak senelesulum. Bok, nunja nidya' ugunuk an lelemabnya nera, Kristus lomok uboka nenyek lelesaba' ara, Imik Neyung hogung ak lelemab. Nadya wana' ulusin nim o, ban nidya' unulumabnya nera, ugunja yuba dib senena' nong anyek, gobdo migib dosulula' aboka ulusab. 12:20 Nara kemel yeisinya sum enyek, ugunja una' era, nadya anaso ubneseng senemnya' una' oroka' ak eibnyek aboka hnon, ono' ugunja dara, nak alda anaso ubnamso senenumuna' anyek eibmunuk aboka hnon, lok ganya bolomna. Hnonda wabdoumunuk, hnonda hman ganya bobdangoka, yu ganya boboka, nanokok pewonulul yok nim era lek senewoka, derewoka wabdangoka, o lom-lom pik gelelenga lebdangoka, dengdang ganya boboka, doluwoka malya nenebdangoka ubdoumunuk aboka, lok ganya bolomna. 12:21 Nara ugunuk an kemel yeisinya sum era, Imik Neyung adya ugun gangganek sokok nenewanelyek aboka, lok ganya bolomna' ara, hnonda ugun gangganek youma' unulum malya una' enyek, gela salawoka, heng kemena' malya dangalamla malya una' unuwoka, meilinya unulumnya nenyek, eibkweboka ganya dangawanggumuna' anyek eiyiwoka, igin ganya bobnyek aboka, lok ganya bolomna.
13:1 Nera winilinya ugunuk an kemel yanesin. Imik Neyung yuba bukuk sam ara, "Yoka'-yoka' damoka lanalamla' ara, nimi penya gom, winilya gom nang edya, aldib nunja okoka eiyimouba hen enyek, aldib unumoka' ara bekna' dangalamla," aro lebok. 13:2 Wenera, ugunub nab dara, mok bokdangoka ulumab bok, penenya sum enyek neksisa sok, wen neknesin. Wera, nak ugunuk an yanamna sum era, men unu meknemek nim ek hnon, yok nim ek hnon igin eleklemnesina' ara dengana' orok ubnamla' anasa, orowek neksin. 13:3 Ugunda Kristus ara nak pik uboka yuba salamla' ara, ugunda bekna' enyek eibnoba' aboka ululuma' anasa, neksin. Kristus adya ugunuk unulusila' ara, alda hmeng unggulusil bok, ugun hnoum migib uboka welesil. 13:4 Kristus nong anyek, hmenga' lomok, oboka gal ak glabemek bok, wera Imik Neyung migib adya ulmorulamla. Numbabya Kristus lomok uboka hmeng ulumabjok, ugunuk an wa welemnesab anasa, Imik Neyung migib adya Kristus ablaboka ulumnamab. 13:5 Ugunda Kristus ak ganya ologoka dib senelum gom aboka, ugunda hnonok-hnonok sunuldalalulum. Ugunda dib senelemun bok dara, Kristus Yesus ara ugunja ganya lomok ulusila' ara, ugunda elgom de? Unggulusilya dara, sununa' ak sokol lololum. 13:6 Bok nuk dara, anaso sununa' ak ara sokol longgulumaba' ara, pe ella ublulum senelamna. 13:7 Ugunda meknewomunuk aboka, Imik Neyung adya aralesulula' aboka mololesab. Nuk dara, sununa' ak sokol lolomak senewanesisenga' anaba, alda ugunuk Imik Neyung adya unuwanok senelelanya nenyek, unuwanalum aboka mololesab. Nuk sokol longgulumak senewanoka' aboka ununggulumab. 13:8 Nunda perob jong una' anyek malya nenewamenggom anasa, nunda jong una' amba ok; welemab. 13:9 Nunda hmeng ulumeibya' anaba, ugunuk perob danggiga balamnelum dara, perob senelemab. Ugunuk gobdo peroba' anyek ulululum aboka, mololosab. 13:10 Imik Neyung adya nak an eleganyok migib era, nimi malya nenelelula' aboka eleganggubnyok bok, alda peroba' nenelelula' aboka eleganyoka' anasa, wera na yanamna sum era, Imik Neyung adya pe unuwolulula' aboka eleklenel migiba doboka, gasa' anyek duka' lolom-lolom hisinyek aboka, ban momnya dona' enera, nara ugun gangganek an una' orok salek men beibsin. 13:11 Anya wera, hemyabo nim o, ugunda soba' ei-ei ganya ok boboka, ganya kaboka pe ulunob ganya soba' bololulum. Hekna' ganya hnon bololulum. Ugunda neik ganya ok boboka, neika' kwebdangoka ulululum. Dara, Imik Neyung wana' hwam ok uboka, hekna' ok ululanya bedya ugunuk ok ulumnesil. 13:12 Yuba dolomak nimi gekneba' uboka, na kabo nim aboka pe gibdangoka ublulum. 13:13 Muna' Imik Neyung mab anyagan ulumak nim edya, ugunuk perob aboka gibsak. 13:14 Wenelesilnya Yesus Kristus adya ugunuk wana' uboka eleksina' hnon, Imik Neyung adya wana' ulusila' hnon, Imik Neyung Geisinya adya ganya kweldana' hnon, ugunuk ulusulul. Nara Paulus bedya gibsin e.
1:1 Nara Paulus, yuba lena' gaknya ulumna' ara, nim adya gom, ono' ben hnon perobnya bedya gaknya dangoka wa nen welelom henggubnyok bok, alda Yesus Kristus adya hnon, Imik Neyung nunja' neyung, Yesus nimi somokna' ak ab embenga' suboka bukiyiwoknya bedya hnon, sekiyiwanyok. 1:2 Dara nab, nunja' hemyab anyagan yuba dona' nim ulumak nim eb dadya dara, Galatia sokok yuba dona' nim ugunsamba momnya doboka beibsab. 1:3 Neyung Imik Neyung bek ab hnon, nunja Wenelesilnya Yesus Kristus bek ab hnon, wana' uboka eleksina' ab namen una' ab ugunuk bo ulusulul. 1:4 Nunja malya una' enesa leboka, wen malya una' sokok an ulumaba' ak anyeb, blebsununa' aboka, nunja Wenelesilnya Yesus Kristus, al nong elekdok. Ban unuwoka' ara, nunja neyung Imik Neyung bedya seinimoka' sunuwoka unuwok. 1:5 Anasa, Imik Neyung bek, soba' imik nenewoka gibelmorulenok! 1:6 Kristus adya' perob elekna' pik uboka youbsuknya, Imik Neyung bek ara ono' loboka, alja dib perob lero yanggan yub era weilik geboka, yok lero yanggan yub alamaknya nenyek doboka ululumnya nera, nara lok anasa ngoluklesin. 1:7 Dib nong ara, yok Imik Neyung yub era, hnon unggulumla. Bok nim adya ok perob yuba lelemab alamak nim edyok, ugunja ganya bobnenewoka, Kristus adya perob lero yanggan dib nong yub ek sam-samel meneklemak. 1:8 Nunja lelesub yub ek loboka, nera nu gom, im lero gom anaba, alda yok so yuba lebnesibya dara, or weil malya' gloknesiso. 1:9 Youma' hnon nunja lesuba' ara, wera ono' nadya hnon lebsina' ara, nunja leb elegesuba' dib nong yuba dolum yub anyek, ono' yok Imik Neyung yub enyek leb eleganesak dara, unuwanasak nang era, or weil malya' gloknesiso, hen. 1:10 Anasa wera heka' hulumla senenulum? Nim adya or perob senelenyaknya nek elemna gom, Imik Neyung adya or perob senelenelnya nek elemna gom? Goma, nim adya perob senewanenok senewoka pik elemna de? Wenyek nim adya hnon perob senewanenok senewoka pik elemnya dara, nara Kristus adya wa wenya unggulumna' laga danganena' ara an. 1:11 Nadya ugunuk an bo yeilisisa perob lero yanggan yub era, nim ek aba' ak unggulumla' anyek, ugunda ella danalum aboka dib lebsin. 1:12 Nadya ugunuk bo yeilimsa yub era, nim ek ab dobnenggumsa, dara ono' nim adya hnon neknenggunyek bok, Yesus Kristus adya albeyok, ganya lomok aawanyoka' ak domsa. 1:13 Nara youma' Yahudi yuba domsakanya unulamsa' ara, ugunda nidya' seleb kelelum. Nara Imik Neyung yuba dona' nim ek nauba malya nenewoka oboka, orok nenewoka obgiga balamsa. 1:14 Nadya' hemyabo neikibok nemouba nang era, mek so bok, nak dara, Yahudi yub ek sam ara nauba yeiriwoka doboka ono' unulamsa, anya nadya neyung yabo youma' nang edya unulumeka' ara, nara hyak yeng ganya boboka unulamsa. 1:15 Bok Imik Neyung alja wana' uboka eleksina' adya, alda men na beilina' oroka wenyek weboka donyookanya, alsamba welelula' aboka youbonyok. 1:16 Dara perob lero yanggan yuba alja' me nemba' ara, Yahudi gom nim ek leb elegolula' aboka, Imik Neyung alja me nera, nak an okoka amanyok. Wera an Imik Neyung adya perob senemookanya unuwanyok sum era, nim adya hnon makoka be hnon neknululum aboka molol binggumsa. 1:17 Anya na anam danyek, men yuba lena' gak dangamek nang ek hnon neknululum aboka, Yerusalem heikek binggumsa. Bok nara mouruwoka Arab sokok sam bilimsa' ara, ono' saawoka Damsyik heikek sam yasa. 1:18 Wera ono' eimik gibna' winilya lemok danyek, nara Yerusalem heikek Petrus benya eibdanoma' aboka bisa danyek, alja ek ara minggu penya malamsa. 1:19 Wera Yerusalem heikek ara, yok-yok yuba lena' gak nang era, hnon meka' eilina' orok bok, alda Wenelesilnya Yesus alja weis Yakobus bek hnonok eibsa. 1:20 Imik Neyung hogung ak aldib lebna, adya momnya dobna' banera dib ubna, sonda' ak ubnenggubna. 1:21 Wera Yerusalem heikek ab danyek, nara Siria sokok sam hnon, Kilikia sokok ara, eimik bisa. 1:22 Bok na nong ak dara, yuba dona' nim Kristus lomok uboka Yudea sokok ulumek nim era, okoka benyeka' senewoka ella danganggulunyek. 1:23 Bok, sikda ban yub enyek hnonok kelemeka' ara, youma' Imik Neyung mabo doluwoka oro yabalamoknya bera, wenera alja men orok nenewonun senelemok dib senena' yub enyek, lero yabalamla' ana' ak hnonok kelemek. 1:24 Dara sikda nasamba leboka, Imik Neyung ak perob aboka giblemek.
2:1 Wera ono' eimik gibna' meija' dubuka' badya seleb lebok danyek, nara Yerusalem heikek ono' bisa' ara, Barnabas be hnon neika' bunuma. Anya, Titus be hnon neika' byuba. 2:2 Imik Neyung adya or Yerusalem heikek binilam aboka aawoka nekenyoka' anasa, bilimsa. Wera Yerusalem heikek ara, hnonda si sina' nang eb neika' longowouba dara, nadya Yahudi gom nim ek perob lero yanggan yuba lel eleklamsa' anyek, neksisa. Nera youma' wesenya gom, eimik welemnenanya gom anyek, hnon nim era salya' lelem welemla seneweneijek aboka, si sina' nang ok gelelenga neksisa. 2:3 Titus be nab neika' bilinumnya bera, alda Yunani nang boka' anyek, sikja Yahudi nanga bola' garaldalamak sok, alba unuwoulul aboka duka' lolom-lolom henggumek. 2:4 Hnon nang edya dara, or unuwanamla aboka lelemek bok, unuwolul aboka yo henggumek. Wera an wenyalamek nang era, yuba dib doboka ununa' orokjok, nunja' Kristus Yesus ak dib senemouba' adya, gobdo ganya doboka una' ak gelelenga kemero yeilimek. Sikja dara, nu yuba dobnenggoma wenyek unulumouba' anyek, neik so unulunoka' aboka pik nekoka igina kweiyiwanoba' aboka yeilimek. 2:5 Bok nunda dib leblum aboka, sikja yuba meka' kena' anaba kebnenggumouba. Wera an unumouba' ara, perob lero yanggan yuba dib ulumla' ara, ugunuk soba' ululula' aboka umouba. 2:6 Si sina' nang edya dara, nak ara anda anyek yoka'-yoka' meka' hnon unuwanalam aboka lebnenggubnyek. (Imik Neyung ara nimi hogunga peroba' malya' anyek kemenggulusilnya bek anasa, sikda perob nang gom, malya nang gom ara, weboka seininanya nera, nak dara, dib nong gom.) 2:7 Petrus bek Yahudi nim ek perob lero yanggan yuba neklelula' aboka, wa elegemok sok, ono' nak dara, Yahudi gom nim ek perob lero yanggan yuba len wa lobongganyoka' ak eiyimek. 2:8 (Imik Neyung adya Petrus bek nimi bola' garalamak nim ek, yuba len wa arawoka migib elegemoknya bedya, neik so nababya bola' garana' orok nim ek neik wa welelula' aboka arawoka migib eleganyok.) 2:9 Wera Imik Neyung adya' wana' uboka eleksina' enera, nak eleganyoka' ak eibek dara, Yakobus beb, Petrus beb, Yohanes beb dadya dara, sikda yuba lena' gak dub nang ulumeka' anasa, nab Barnabas beb soruka salawoka gibdanggogowouba dara, wera anara nunda neika' kwebdangoka, ugunda Yahudi gom nim ek welemnerum bok, nuk dara, Yahudi nim ek welemnemab aboka ububa. 2:10 Sikja dara, nimi bona' dena' garan ulumak nim enyek, arawoka unulumnulum aboka, banyek ok moloweisik. Nadya' anaba wa nera dib nong wa senewoka, hyak unuwanamna senemsa. 2:11 Petrus bera alda Antiokhia heikek sam yok dara, aldib meknewoka' anasa, nadya laga hogung ak dalagoka wabsa. 2:12 Men dara, Petrus bera bola' garana' orok nang eb neika' delemekjok, wera nimi nidya' ara, bola' garalemnesak senelemek nanga Yakobus beb neika' yek dara, nang enyek lok anasa, Petrus bera neika' delemeknya nera globoka, mokso bul byuk. 2:13 Dara, yok Yahudi nim eneba Petrus bedya ulumok sok diliga' dolomeka' adya, dara ono' eimik era, Barnabas beneba benewoka sikja ununa' ak neik diliga' domok. 2:14 Nara sikja unulumeknya nera, Imik Neyung adya' perob lero yanggan yuba lelemla' sunuwoka ununggulumeka' anyek eiyimsa dara, Petrus bek nimi hnoum ab, "Anda Yahudi nang bok, anja una' era Yahudi gom nim eneso uboka, Yahudi nim eneso unggululam bok dara, Yahudi gom nim ek ara, hekasa Yahudi nang una' diliwoka ulululum aboka loloboka unululam do?" aboka lebsa. 2:15 Nimi beilina' adya dara, nunda aldib Yahudi nim ulumaba' ara, yok mok soko nimi malya una' nim eneso' ak unggulumab. 2:16 Anyek babya, nimi peroba' nenelamla' ara, unuwanalum an yub unulumaka' adya gom, Yesus Kristus ak dib senewoka ganya olokna' adya, peroba' nenewousulula' aboka dib senemouba. Nimi nidya' ara unuwanalum an yub ununa' adya dara, peroba' nenena' ara, okna dangalamla. 2:17 Nunda Kristus pik uboka, peroba' nenesina' elemabakanya, nera malya una' nim ek bok anaso eildalamab dara, ban adya Kristus ara, malya una' perob aboka liginanya gebnesibya de? Nenera hyak unuwanggunusibya! 2:18 Nara ono' youma' golob menegoka lomsa yub enyek, onsok sounuwoka meeb einiwanasinya dara, nara senenggom damok bleknanya neneldalamnesinya. 2:19 Unuwanalum an yub edya, ban unuwanalum an yub ek ara, seleb somogamsa. Wenyek dara, nara Imik Neyung amba embenga' ulumna. Nara Kristus ab neika' seleb gal ak oboka glabsik. 2:20 Dara, nadya' youma' ulusenya nek dara, anam embenga' unggulumna bok, Kristus anyek nadya' nong lomok wen ulunel. Wera nadya wen embenga' ulumna nong enera, Imik Neyung bedya me nek dib senena' adya embenga' ulumna. Alda nak wana' uboka, al nonga nasamba somoganyoknya bek dib senewoka embenga' ulumna. 2:21 Nim ara unuwanalum an yub edya Imik Neyung hogung ak peroba' nenena' dobnesibya bok dara, Kristus ara malya una' amba somogomoka' ara, salya' lelem danamso. Anasa, nara Imik Neyung adya wana' uboka eleksina' ak, lek aboka longgulumna.
3:1 Galatia nim o, ugunda dongdang ana' hwam nim ek ululum! Ugun din hengek Yesus Kristus gal dubuk oboka glameka' ara, ugunuk laga neksisa bok anasa, hek nang edya geregoka bobneneweisik do? 3:2 Nara ugunuk ab hnonok ella danamna' ara, ugunda Geisinya doluma' ara, unuwanalum an yub unululuma' adya gom, alda Kristus yub ak dib seneluma' adya dolum gom? 3:3 Ugunda neik digum dongdang alalum de? Ugunda Imik Neyung Geisinya adya unub einilumjok, ono' saawoka youma' nong una' pik uboka perob danoba' aboka unubdaknalum de? 3:4 Ugunuk yoka'-yoka' nauba igina kwelesuka' ara, salya' lelem ub lobsuk de? Aldib, salya' lelem ub lobsuk de? 3:5 Imik Neyung ara alja Geisinya ugunuk elegoka, alja' yoka' lok so' migib ununa' senenggoma' ara ugun gangganek unulusil. Ban unulusila' ara unuwanalum an yub ek pe unululuma' adya unulusil gom, Kristus amba yub enyek ugunda keboka dib seneluma' adya unulusil gom? 3:6 An unuwoka' ara Abraham bek umoka' Imik Neyung yuba bukuk ara, "Abraham bera Imik Neyung ak dib senewok dara, alja dib senemoka' anadya, Imik Neyung adya dara, peroba' nenewok." 3:7 Anasa ugunda ella uboka pe bekneluma' ara, nimi Kristus ak dib senewoka ulumak nim era, sikda nidya' ara Abraham bedya mab ulumak. 3:8 Imik Neyung yuba momnya doboka' adya dara, nimi Yahudi gom nim era sikda Imik Neyung ak dib senewanamak dara, ban adya peroba' nenewanasila' ara, orowek ella ulumookanya, wera ban perob lero yanggan yub era men danyek Abraham bek, "Imik Neyung ara an pik uboka, mok soko me nidya' ara peroba' nenewanamla," hyok. 3:9 Nim Imik Neyung ak dib senewoka ulumak nang era, Abraham bek dib senemoka' adya peroba' nenewoka elegemok elekna' enyek, neika' hiboka dolomak. 3:10 Nimi nidya' unuwanalum an yub ek sunuwoka unulumak nim era, seleb weil malya' gloksuka' ak ulumak. Imik Neyung yuba bukuk ara, "Wera hyak nidya' unuwanalum an yub ek momnya doboka' ununggulumak nimi nidya' ara, Imik Neyung adya seleb weil malya' gloksuk," alamla. 3:11 Momnya doboka' ara, "Nim ara peroba' diba' nenewoka ulumnamak nim ara, dib senena' adya ulumnamak," alamla' anasa, unuwanalum an yuba momnya doboka' unulumaka' adya dara, Imik Neyung hogung ak peroba' nenenggulusil. 3:12 Bok unuwanalum an yuba damok ara dib senena' ak unggulumla, alda anyek unulumak nim era, an unulumnamaka' adya ok ulumnemak. 3:13 Imik Neyung yub ek ara, "Gal ikoka oboka dibeknya bera, weil malya' glokeknya bek ulumla," aro momnya dobok. Bok wenyek dara, Kristus adya nunsamba weil malya' glokeknya dangasuka' adya, nunda unuwanalum an yub ek ab weil malya' gloksuka' ak ab, hweboka blebsuk. 3:14 Kristus adya hweboka blebsuknya nera, anadya wera Imik Neyung adya Abraham bek an peroba' eleganenggen amoknya nera, nimi Yahudi gom nimi hnon Kristus Yesus pik uboka, dobnoka' aboka ubsuk. Wera anadya hnon, nu Yahudi gom nimi bok, Imik Neyung adya eleganesin amok Geisinya era dib senena' adya dobnoka' aboka ubsuk. 3:15 Nadya hemyabo nim o, nara nunja sob unulumabnya nenyek sunuwoka lebnesin. Nimi hnon nunda anaso dib unuwanamab aboka seleb yuba sabgogoseng bok dara, wenyasenga' ak ara, nimi be hnonjok lobnemab henggunumso, ono' aljok yoknya hnon bo maknenggunumso. 3:16 Imik Neyung adya peroba' unuwanasin aboka orowek lebgogomoka' ara, Abraham bemba hnon dara, ono' hnonda Abraham nang yila' amba hnon lemok. Imik Neyung yub ek ara, "Abraham nang yila' amba" lemoknya nera, nimi nauba amba henggubuk. Alda, "An nang yila' amba" hyok aro momnya doboka' ara, nimi ben hnonok Kristus amba lebok. 3:17 Nadya wen ugunuk an wenyalasina' ara banyek, Imik Neyung adya unubdanamab amoka' ara hyak youma' nonga wenyek lemok. Alda unuwanalum an yub ek dara, eimik gibna' ara empat ratus tiga puluh gibna' lemok bok elegousuk. Anasa, ban eimik unuwanalum an yub edya dara, men Imik Neyung adya peroba' eleganesin amoka' ak ara, orok aboka lubnenggunumso. 3:18 Imik Neyung adya Abraham be nong ok peroba' eleganesin amoka' nong ara, wera Abraham bek wana' uboka elegok. Anasa, Imik Neyung adya peroba' eleganesin amoka' anyek, unuwanalum an yub unulumak adya dobneseng dara, wera nera Imik Neyung adya peroba' eleganesin amoknya nera lemok adya ok dobnenggunuseng. 3:19 Wera anaso ulumla dara, unuwanalum an yub era hekasa elegesuk do? Ban unuwanalum an yub era, nimi blekna' hwam anasa, se' elegosuk. Hnoumunga wiknenanya hnonok pik uboka lero nang edya elegeisik. Unuwanalum an yub era, gigiwoka unulamlya' ara, Abraham bek eleganenggen amoknya benyek yalya dara, wera unuwanalum an yub ek lobongganamak. 3:20 Wera anasa, nimi penya dara-dara ubna danyek, hnoumunga wiknenanya bera ulumla. Bok Imik Neyung ara hnonok ok ulumla anasa, alja ganya doboka yoka'-yoka' unulamla ara, yok nanga be hnon hnoumunga wiknenya danggunumso. 3:21 Wera anaso anasa, Imik Neyung adya eleganesin amoka' ara, yok so bok, unuwanalum an yub era, ono' yok so adya ol gokoldalarak de? Nera hyak unggulumla! Unuwanalum an yub era, nim embeng una' elegesuso dara, unuwanalum an yuba pik uboka, nim Imik Neyung hogung ak pewalam ana' diba' danamso. 3:22 Bok, Imik Neyung yuba momnya doboka' adya eleganesin amoka' ara, sikja Yesus Kristus ak dib senelemak nim ek elegosulula' aboka, Imik Neyung yub adya, nimi nidya' ara, malya una' lomok gobdo ulumak aboka, deneblebsuk. 3:23 Nunda Kristus ak dib senewanamouba' amba liga yenewanggumok salek era, nunda unuwanalum an yub edya leka' doboka bo ulusuk bok, eimik era dib senena' ara laga dok. 3:24 Nunda Kristus ak dib senena' adya, peroba' nenewousulula' aboka, unuwanalum an yub edya pika yarawoka Kristus ak bo balasil. 3:25 Bok wenera, nunda Kristus ak seleb dib senelemab dara, wera unuwanalum an yub edya dara, nuk anam beiliwoka bo unggulusil. 3:26 Ugunda Kristus Yesus ak dib seneluma' adya, wera ugunda nidya' Imik Neyung mabo diba' ululum. 3:27 Ugunuk ara Kristus lomok meka dasuk nimi nidya' ara, ugunda Kristus alja unun ganya boboka ululum. 3:28 Ugunda nidya' Yesus Kristus lomok hnonok dangoka ululuma' anasa, Yahudi nimi gom, Yahudi gom nimi gom, nimi sikbeyok dangoka ulumak nang gom, orukna' nang gom, gelewa gom, nengmabo gom ara, webna' oroka' ak ululum. 3:29 Dara, ugunda Kristus alja mab ulumun dara, Abraham nang yila' dangoka ululum. Anasa, ugunda Imik Neyung adya Abraham bek eleganesin amoka' ak dobnelum nang ek ululum.
4:1 Bok nadya hnonok lelemna' ara, nimi bona' damnya benyek, anam mek me ulusobok dara, alja neyung bedya anda anaso uboka nebmen sum era, an bona' anja' ulumla nidya' ara, anja meewoka ubnelam asobok dara, anam nena' orok dara, alda bona' oroknya orukna' nang anaso ulumla. 4:2 Me nera bona' dam me boka' anyek, alja neyung bedya hek gibna' ek na damnya dobnenggen amnya salek anam dara, yok nang edya al nonga bo ulumnamak. 4:3 Anasonya neikek numbabya, nunda anam neboka ganya kana' orok salek era, sokok an ulumla ganya gong edya gouluwoka bo ulusuk. 4:4 Bok Imik Neyung adya sumen senemoka' nong sum gigiwok dara, alja' yando me nera sokok sam bokol yeilisuk. Wera me nera, unuwanalum an yuba mamok salek era, sokok an gel gedya boboka beibuk. 4:5 Numbabya Imik Neyung bedya mabo yoka' danoka' aboka, me nera unuwanalum an yub ulumoka' gangganek ulumek nim ek dekoka blebsuk. 4:6 Dara, ugunda alja mab ululuma' anasa leboka, Imik Neyung adya alja me nedya Geisinya bera, ugunja ganya ek bokol yeilisuk. Dara alda, "Neyung o, nadya' neyung o," wenyalamla. 4:7 Anasa, ugunda orukna' wa nang ek anam unggululum bok, alda alja mabo yoka' ululum. Ugunda Imik Neyung bedya mab ululuma' anasa, Imik Neyung adya alja mab emba aboka beillilesil misa' nidya' ara, ugun hnon dobnelum. 4:8 Youma' ugunda Imik Neyung ak elgom ululum salek era, Imik Neyung be diba' ak gom, alda yoka' anyek nunja' neyung nenewoka, ugun nong ara anyagan ganya diboka ululum. 4:9 Bok wenyek dara, ugunda Imik Neyung ak seleb ella ululumukanya, dib nonga' ara, Imik Neyung adya ugunuk seleb ella ulusil bok anasa, dolbalek sonya uboka hmeng ganya dangoka, dil beilliluma' ara hekamba do? Hekasa ban dolbaleknya nek saawoka orukna' nang danob senelelum do? 4:10 Ugunda perob hen sum eb, wala' dakna' ab, perob gibna' sum hnon, liga gong-gong masa menegoka yoululum. 4:11 Nadya ugunsamba nauba duboka welenanya nera, nidya' salya' lelem dalyek senewoka, loka dablenel. 4:12 Nadya' hemyabo nim o, nara ugun so dangalamsa' sok, ugumbabya nadya diliga' diliwolulum. Nara ugunuk ab dara, anyek malya unyek ara meka' hnon elgom ulumna. 4:13 Nara ugunuk an Imik Neyung yuba bo yeilisisa sum era, anyek unulamsa enyek nak neikna' salanyoka' ara, ugunda seleb ella ululum. 4:14 Nadya nong enyek anaso ubnyok bok dara, ugunuk ara hubnemaba' ak ubla ana' dok bok, ugunja dara, heng kemena' malya dangana' danggubuk. Ugunja nak ara, Imik Neyung lero anaso' gom, Yesus Kristus diliga' anaso' doboka peroba' lebnulum. 4:15 Ugunda an lebna sum era, hyak eiya dabna' ganya bololum. Bok wenera an unu bolum ganya era hanyagar beib loblum do? Ban sum enera nadya kemen dara, or dara, ugunda nasamba leboka ugunja heng era, nak kweboka eleganamna' yenenulum. 4:16 Nadya dib yub ok lelesisa' adya, ugunuk hnon isa' nang neneweisisa de? 4:17 Nimi malya nenelesak nim edya dara, sikja yuba pe keboka perob pikek paja' seregoka, malya neneweisinoba' aboka, ugunja ganya benewoka gliboka soba' yeiriwoka dulusak. 4:18 Peroba' amba leboka, yok nimi yeiriwoka ganya glilimak dara, perob senen bok, nak ugun gangganek an ulumna salek enyek ok loboka, soba' unulumnemak dara, perob. 4:19 Nadya wana' ulusin mab o! Ugunsamba leboka, nara hyak nauba duboka, me bomna gel gek me juga gweklamla sok, neik so unulunel. Kristus adya unun ganya ugunuk an dib yina' mebnenggumnesil dara, soba' ara anaso ok ulumnenel. 4:20 Nara ugun gangganek ab yok so salanuna' aboka, nara ugunub wen neika' ulusibya senelamna. Nara ugunuk ara heka' hubnamna do senewoka ganya elenel. 4:21 Hemyabo nang o, ugun unuwanalum an yub ek ganya beiliwoka ulumnamab senelelum nang era, ban unuwanalum an yuba lelemla' ara ugunda ella ululum gom, orok gom, wera neknenulum! 4:22 Anasa, momnya dona' ulumla' ara, Abraham bera alda memabo penya beiyimok. Hnon me nera, alja' wa wena' gel gedya beiyimok, hnon me nera, alja' yoka' gel gedya beiyimok, alamla. 4:23 Bok ek wa wena' gel gedya me nera, nimi ganya adya beiyimok bok, hnon me nera, Imik Neyung adya eleganenggen amoka' gigiwoka beiyimok. 4:24 Wera wenyamoka' sununa' ara ban: ban penya gelewa danara, Imik Neyung adya penya unuwanasin aboka lemoknya nek sunuwoka ulumla' ara, hnonda Sinai meinik mok ebnya nek, gel gera orukna' amba wa wena' mab ok beillilemnamla amok gel gera, Hagar ge ulumok. 4:25 Ban Hagar gera, Arab sokok ab Sinai meinik ak sunumok. Alda alja mab eb yok nang edya wa wena' nang ulumnemeka' anasa, alda Yerusalem moka wen ulumla anaso' ak sununa' era an. 4:26 Bok imik heikek Yerusalem heik ara, albeyok sekok gel ulumlakanya, nunja' genong ge diba' an ulumla. 4:27 Wera anesemba momnya dona' hnon ulumla' ara, "Anda me beilina' loboka, me you ululam gel gera, eiya hlalalom! Anda me juga gwekna' orok ululam gel gera, ei-ei ganya boboka merelelom! Nenya dolomla gel gera, mabo mek bok, nenya adya lobonggomok gel genyek, mabo nauba dangalamla anasa, eiya daboka glololom," wenyaro momnya dobok. 4:28 Nadya' hemyabo nim o, ugunuk dara, Imik Neyung adya eleganenggen aboka lemok me Ishak beneso' ak ululum. 4:29 Youma' ulumek sok, nimi ganya seinina' adya beiyimek me nenedya, Geisinya migib adya beiyimok me nek loba' nenewoka lomok. Dara weneba, neik so unulamla. 4:30 Bok Imik Neyung yuba momnya doboka' adya dara, heka' alamla do? "Alja gel gedya yoka' me neb, ek wa gel gedya me neb dara, misa' bona' neika' dobnengguneserenga' anasa, arana' gel geb alja me neb dara, gwab loblom," hyok. 4:31 Anasa nadya' hemyabo nim o, nuk dara, arana' gel gedya mab unggulumab bok, alda e yoka' gel gedya mab ulumab.
5:1 Nuk ara seleb lobsuk nang gekneba' ulunoka' aboka, Kristus adya dara, unuwanalum an yub ek ab, seleb gobdo lobsuk. Ugunda orukna' wa wen nang saawoka domunuk aboka, pe keeboka seklelulum. 5:2 Nara Paulus bedya hyak dib lebsina' ara, ugunda bola' seleb garabdanalum dara, Kristus al nong ugunsamba' ara, salya' lelem danesil. 5:3 Nara ono' hnon ugunuk laga lebsina' ara, nimi bola' garaldalamak nang era, ban unuwanalum an yub hnonoknya nek sunuwoka unulumaka' anasa, hyak nidya' wenyalamla' sunuwoka unulunok. 5:4 Unuwanalum an yuba pik ab uboka, Imik Neyung hogung ak perob nenesina' elelum dara, wera Kristus ab neika' kweldana' ara seleb pika garaldalalum. Unu garaldalalum dara, Imik Neyung adya wana' uboka eleksina' ak ab loboka, mok neneldalalum. 5:5 Pewolum ana' diba' elegosuka' anasa, nunda dib senelemabakanya, Geisinya aralesila' adya, ganya wena' dobnoba' aboka diri ulumab. 5:6 Nimi Kristus Yesus lomok ulumak nim era, bola' garalamaka', oroka' ara, hnon dib nong ak unggulumla. Alda dib senena' ara, wana' una' adya welemla dara, nenyek dib nong ara an. 5:7 Ugunda youma' dara, pika pe yeiriwoka balalum bok, wenera heknedya ugunja pika garab menegosuka' anasa, dib nong yub ek ara, keboka ununggululum do? 5:8 Pe keboka unuwomunuk aboka pika garawousuka' ara, Imik Neyung ugun youbsuknya bek ab lananggulumla. 5:9 Roti gwanenga welena' ara meka' bok, neika' hilimak dara, nidya' ol lelelamla' ara ella ulumab. 5:10 Nunja Wenelesilnya bedya bo ulusila' anasa, nunja nekesuba yub ek ara, loboka yokok sam ganya beibnemaka' anya' senenggulusin. Bok, alda ugunuk anyek malya nenewousunun senewoka ululanya bera, alak an igina yanamla. 5:11 Hemyabo nang o, nak dara, bola' garawanalum an yub enyek anam lero yabalesinya bok dara, hekasa nak ara loba' nenewaneneseng do? Wera an unulusinya bok dara, Yesus oboka gal ak glamek yub era salya' ouluk dikna' girik anaso unggulumnamso. 5:12 Ugunja ganya bokgogoka malya nenelesak nang era, boka' garaldalalulum alamaka' anasa, sik moumen sikja nong garabdaneseng dara, perob senelamna. 5:13 Nadya' hemyabo nim o, ugunda henga lob lomna' anaso' ak ulululuma' aboka, Kristus ara ugunuk youbsuk. Ugunuk an lobsuka' ara, an unuwosuka' adya nunda yoka'-yoka' ak dara, ganya oka dena' adya salya' lelem unulunok senena' ara loboka, alda wana' ubdangoka ugun moumen araldalalulum. 5:14 Nidya' unuwanalum an yub ek momnya doboka' ara, ban yub enedya ok gaka dangalamla' ara, "Andamnya wana' uldalalam sok, nimi yok nang ek unu neikso wana' ulululum," aro lebok. Dara, ban hnonok ok unululam bok, nidya' gobdo unululam. 5:15 Bok ugunda si glekoka obdangoka, malya neneldalamun dara, ugun moumen soldowoka dengabdomunuk aboka, pe keeboka ulululum. 5:16 Nadya an wenyhenya nera, ugunja una' era Imik Neyung Geisinya adya bo ulusilya' dara, ugunja malya una' hwam ok unulusinya pika dilira dobnenggulumnulum. 5:17 Nim adya ganya era, Geisinya ab dara, ganggana' gogoldalarak. Dara, Geisinya adya unuwonun senelelanya neb, nimi ganya adya unuwonun senelemaknya neb dara, yok-yok ulumla. Sikja ganya seinina' ara yok-yok seiniliraka' adya, ugunja unuwanamna senenanya nera ununggululum. 5:18 Bok ugunuk dara, Imik Neyung Geisinya adya bo ulumnesil dara, wera unuwanalum an yub ek ara, ganya dib beiliwoka unggulumnelum. 5:19 Wera nimi ganya oka desina' adya ununa' laga eillilimaba' ara gela salya' salana' ab, sembeja' una' ab, ganya siriga' beilinggom ganya ab, 5:20 bisa' girik gala gibna' ab, nimi guma gukna' ab, lek seneldana' ab, waldana' ab, ganya oka deregoka solom ganya ab, dibum an ganya ab, nanokok pewounulul senena' ab, doluwoka malya neneldana' ab, mala doldana' ab, 5:21 hman ganya boldana' ab, yu meka deregoka ganya uu ana' ab, bera seboka eiya hlan malya una' ab, anasonya nidya' ara malya una' ak ulumla. Nimi ban malya una' enyek nauba unuru yabalamak nang era, Imik Neyung mab adya misa' hnon dobnenggunumak aboka, youma' hnon seleb nekesisa' ara, ono' saawoka sumen hnon neksin. 5:22 Imik Neyung Geisinya adya ganya dok ara, wana' ganya hnon, ei-ei ganya hnon, namen ganya hnon, siklena' ganya hnon, hekna' ganya hnon, pe ununa' ganya hnon, bojam un ganya hnon, 5:23 ganya sokok neneldana' ganya hnon, pe keeboka diri uldan ganya hnon, ulumla. Yok-yok unuwanalum an yub edya dara, ban ganya danyek boboka una' ara, hnon mem anggulumla. 5:24 Nim ara, Kristus Yesus adya' seleb dangarob nim era, sokok an nimi ganya era, yok-yok malya una' salya' doro unulusinya ganya ab, salya' meknewoka unulusinya ganya anyek, seleb oboka gal ak glabek. 5:25 Imik Neyung Geisinya adya nuk embenga' wenyek una' era elegosuk dara, wera nunja nong una' eneba Geisinya adya goluwoka bo ulusila' adya unulumnemab. 5:26 Nunja yok nang ek dengdang ganya boboka, ganya soloma nenebdangoka, hman ganya boldana' ara, hyak mem.
6:1 Hemyabo nang o! Ugun gangganek ara, ben hnon meknemla' ak eibmun dara, ugun Imik Neyung berem ululum nang edya, pe ganya namena' anyek, bera perob pik doro dibnelum. Unuwanalum bok, ugunuk hnon sikbabya malya ubnok senewoka sunuweisilyek anasa, ugumba diri uldalalulum. 6:2 Ugun moumen yok nim edya igin ulumla' anyek, arawoka bobdangoka unulululum. Dara, Kristus adya unuwanalum an yuba pe unululuma' bekna' dangalamla' ara an. 6:3 Anasa nimi ben hnon alda perob gomnya boka' anyek, nara perobnya seneldalamla dara, al dam nang sonda' leldalamla. 6:4 Nimi yok-yok ara, alja unulamla anyek pe kendulul. Dara, ban adya yok nang edya unulumeijinya nenesa pelemna seneboka gigildana' loboka, alda alja' yoka' pelelanya nenyek, or gigibdanamla. 6:5 Anasa nimi yok-yok, sikja' welemaka' igin ulusila' ara, ella' gigiro bolomnamak. 6:6 Nim Imik Neyung yuba dololanya bedya, alja yoka'-yoka' peroba' ulumla' nidya' ara, alak yuba neklelanya bek bokoka hnon eleklelul. 6:7 Nim ara yina' memna' sunuwoka nonga dolomak. Ono', Imik Neyung lelemla' ara sunuwoka gigilamla anasa, ugunda gigiwanggunumso senewoka, sonda leldanggom, mem. 6:8 Heknedya ganya oka den yina' doklamla dara, alda ganya oka den doka somokna' ak daklamla bok, heknedya Geisinya bedya senelamla' sunuwoka yina' doklamla dara, alda Geisinya bek ab embenga' ulmoubna' doka daklamla. 6:9 Nunda hmenga danggusilyebok dara, alja suma dalya dara, doka daknamaba' anasa, perob unulumab salek era, nauba unulamna senewoka sulmalya ganya boboka bulugul longgom, mem. 6:10 Anasa, pe unun salek ulumla dara, nunda yok nimi nidya' ak pe unulumnemab bok, nauba so ara, neik yub ek dib senelemab nim ek pe unulumnemab. 6:11 Nadya soruk yoka' edya nauba momnya dona' edya ok ugunuk beiyisina' anyek kendululum. 6:12 Nimi nuk perob seneweisinoka' aboka hogunga bo elemak nang edya, bola' garana' yub ara, unuwanaluma' aboka goklesak. Sikda ban unulumaknya nera, Yahudi nang edya Kristus oboka gal ak glamek yub emba leboka loba' neneweisijik aboka ulumak. 6:13 Nimi bola' garalasak nang eneba, Yahudi nim emba unuwanalum an yub ek momnya doboka' ara, nidya' pe sunuwoka ununggulumak. Bok sikja dara, ugunda sikja unulumaka' anyek gigiwalya dara, nunja yuba keboka unulumak senewoka nonggo henoba' aboka, ugunuk bola' garawanok senelesak. 6:14 Nak dara, yoka'-yoka' anyek pelemla aboka nonggo ana' ara, unuwanggunusinya bok, nunja' Wenelesilnya Yesus Kristus gal dubuk somogosuka' amba danyek ok unuwanasinya. Wera Kristus anyek gal dubuk somogoka' adya danyek, sokok an ululanya nedya nak benewoka glinggulunelekanya, nara soko amba seleb somogamna' anaso ulumna. 6:15 Nimi bola' garana' gom, orok gom ara, hnon dib nong unggulumla. Alda nimi wenyek nong una' dolomaka' ak, hnonok dib nong ulumla. 6:16 Wera anaso ganya boboka ulumak nim eb, ono' nidya' Imik Neyung alja Israeli nang diba' ara, Kristus yuba dib dolomak nim enyek, Imik Neyung adya namen una' ab, angoo yadyek senewoka arasina' ab, ugunuk ulusulul senelamna. 6:17 Nadya nong enera, nara Yesus adya yuba doboka diriga bannya diliga' laga ulunela' anasa, ono' hnonda nimi hnon loba' nenewoka ol nebnena' ara mem! 6:18 Wera nunja' Wenelesilnya Yesus Kristus adya wana' uboka eleksina' anyek, ugunja ganya eb bo ulusulul senelamna. Aldib or unulusulul. Nara Paulus bedya gibsin e.
1:1 Ugunda Epesus heikek muna' Imik Neyung mabo Kristus Yesus ak doboka bojam ululum nim ek perob aboka gibsin. Imik Neyung ganya adyok seiniwoka, Kristus Yesus adya yuba lena' gaknya nenewanyoknya, nara Paulus bedya, 1:2 nunja' neyung Imik Neyung adya Wenelesilnya Yesus Kristus adya wana' uboka eleksina' ab ganya hekel eleksina' ab, ugunuk eleklesulul senelamna. 1:3 Wei, nunja' Wenelesilnya Yesus Kristus alja' neyung Imik Neyung ak soba' perob aboka giblenob e! Nunda Kristus ab neika' kwebdouba' adya, Imik Neyung adya, imik heikek diguma' ganya elekna' peroba' nidya' ganya doboka elegousuknya bek giblenob. 1:4 Imik Neyung ara soko yoka'-yoka' anam ulina' orok bok, si gegena pona' oroka' anyek alsamba ok muna' gobdo ulunoka' aboka, Kristus pik uboka weboka dobsuk. Nuk wana' ulusuukanya, 1:5 anadya nu nong anyek, Yesus Kristus pik uboka hyak men youma' enyek orowek weboka doboka, alja mabo yoka' gebsuk. Wera alja men danyek perob senewoka unuwanamna senemoka' ara an unuwousuk. 1:6 Alja' wana' nong ulumok me Kristus pik uboka, nuk alja' senenggoma' wana' uboka elegousuka' anasa, Imik Neyung imik ululanya bek giblenob. 1:7 Kristus alja enenga yinggyuka' adya, nu nong ara Imik Neyung adya seleb dekoka lob lobsuk. Dara anadya, Imik Neyung ara nunja meknena' dara, seleb meewousuk. Alja' senenggom wana' uboka eleksina' sunuwoka, 1:8 nuk hyak gokoka elegousuk. Dara, Imik Neyung ara hyak geremseng una' ab, pe ganya seinina' adya ok, 1:9 alda soko nang blebnamna senemoka' doknomoka' ara, alja men ganya doboka Kristus pik uboka, wen nuk laga nenewok. 1:10 Unu seinimoka' ara, yoka'-yoka' wen ulumla' nidya' sidya' daknamla salek enyek, Imik Neyung adya dara, imik ulumla' sokok ulumla', nidya' hnonoka' ak nenewoka Kristus anyek dubnya ulumnamla aboka orowek seinimok. 1:11 Imik Neyung ara yok-yok wa nidya' welemla' ara, unuwanamna wenyananya nok sunuwoka unulamla. Dara wera, Imik Neyung adya, hyak youma' nong enyek nuk orowek weboka dobsuk. Anadya, Kristus pik uboka nunda Imik Neyung misa' seleb domouba. 1:12 Nunda Kristus ak men dib senewoka, ganya weboka ulumab nim era, Imik Neyung adya hyak senenggoma' lok so' unuwousuknya nenesa leboka, anya alja gibeldona' danoka' aboka weboka dobsuk. 1:13 Imik Neyung adya' perob lero yanggan yub ugunuk blebsulula' aboka leb elegeisik yuba kel yabalum sum enyek, ugumbabya Kristus ab neika' kwebdangoka un nimi dangalum. Dara, seleb dib senelum dara, Imik Neyung adya anasa leboka, alja eleganesin amok Geisinya era, alja mabo dangalamak bekna' diba' ugunuk seleb elegousuk. 1:14 Imik Neyung adya alja mab ek eleganasin amoka' dib dobnemak senen bekna' diba' ara ban Geisinya lomok ulusila' adya ulusil. Alda bekna' ulmorulusila' ara, eimik Imik Neyung adya muna' dekoka dobsuk. Ban nenesa, Imik Neyung bek giblenob. 1:15 Wera anasa, ugunda Wenelesilnya Yesus ak dib senewoka domeekanya, ono' nimi nidya' muna' Imik Neyung mab ulumak nim ek wana' ulumak an yuba kebsisa dara, 1:16 ugunsamba leboka, nara Imik Neyung ak soba' gibelmorulamna. Dara, heng uboka Imik Neyung ak gibel yaben salek era, ugunja si sibuka mololesin. 1:17 Hyak senenggoma' imik ululanya Imik Neyung ara, nunja' Wenelesilnya Yesus Kristus alja' Imik Neyung bedya, ugunuk yoka'-yoka' elegosulula' aboka mololesin. Imik Neyung ak olowoka pe ella doluluma' aboka, geremseng un ganya hnon, ella dangan ganya hnon, ugunuk elegousulula' aboka mololesin. 1:18 Ugunja ganya dilina' ubsilyikanya, Imik Neyung adya ugun youbsuk nang ek peroba' dobnemuna' anyek, pe ella dololuma' aboka mololesin. Imik Neyung adya alja muna' Imik Neyung mab amba perob elekna' nauba beillilesila' alja si imik nenena' anyek ella dololuma' aboka mololesin. 1:19 Hnonda ono' Imik Neyung adya nunda dib senelemab nang emba leboka migiba' hyak yok so ulusila' anyek, ella dololuma' aboka mololesin. Imik Neyung migib ak dara, hyak senenggoma' lok so migib edya unuwoka, 1:20 Kristus nonga nimi somokna' lomok ab embenga' suboka bukiyiwookanya, Kristus ara, Imik Neyung ab neika' ulumnerak aboka beibuk. Dara ban migib enyek, nunsamba ulusil migib era anaso' ak ulusila' anyek ella dololuma' aboka mololesin. 1:21 Wenewoka bo usina' gom, senenggom dub una' gom, yok-yok migiba' gom, wenewoka oruksina' gom, nidya' yok-yok si sina' dub una' gom, wene salek gom, eimik yanamla salek gom, nidya' migib era mek bok, Kristus ak Imik Neyung adya elegok migib era, hyak senenggoma' lok so' ak elegok. 1:22 Dara, yoka-'yoka' nidya' ara, Imik Neyung adya dara, Kristus adya dub dangoka bo ubnamla aboka doboka elegoka, yuba dona' nim ulumnemaka' ara, Kristus anyek, sikja dubnya ululula' aboka elegosuk. 1:23 Yok-yok mok soko nidya' yoka'-yoka' ulumla' ak deknewoka ululanya Yesus Kristus alja nong diba' ara, yuba don nimi hiboka ulumaakanya, sikba alja deknelesil nang ulumak.
2:1 Ugunda youma' dara, ugunja meknena' malya una' lomok ululuma' adya, ganya ak dara, seleb somogolum bok ululum. 2:2 Ugunda youma' era, ban malya una' pik balalum. Ugunda sokok an unulumak ununa' ok unura ululuma' hnon, anya ugunda im hnoumunga salawoka bo ulumla bisa' dubnya bedya yub enyek, dib senewoka ganya kweboka ululuma' hnon. Al bisa' dubnya bera, Imik Neyung ak dib bleklemak nang edya' ganya lomok wekoka malya nenelesilnya bera an. 2:3 Nunda nidya' anaba, youma' dara, bleklemak nimi gangganek uboka, malya una' hwam ok uboka, nunja ganya adya hnon, nong adya unuwonun senemna' ok perob daso senewoka nenyek ok unulumouba. Dara, ban unulumouba' adya, nunda yok nim ulumek sok, Imik Neyung adya yu ganya boboka obnesuso' ak sam ulumouba. 2:4 Bok Imik Neyung ara, alda angoo yadyek senewoka arasina' hwamnya bedya, nuk hyak wana' nauba ulusuka' anasa, 2:5 wera nunda meknelemouba salek era, ganya ara seleb somogouba ak sam anam ulumouba bok, Imik Neyung adya nub Kristus ab neika' embenga' suboka bukiyiwosuk. Dara, Imik Neyung ganya anyek hyak perob nong adya ok, alja wana' uboka eleksina' adya ugun nong ara seleb blebsuk. 2:6 Dara, Imik Neyung adya, nub Kristus anya, somokna' ak ab embenga' nenewoka suboka bukiyiwousuukanya, Kristus Yesus lomok imik heikek sam neika' beibsuk. 2:7 Ban unuwosuknya nera, eimik enyek, Imik Neyung ara alja wana' uboka eleksina' ara hyak senenggoma' ulumla bekna' eibnoka' aboka ubsuk. Alda Kristus Yesus pik uboka nuk wana' ubsuka' ak eibnoka' aboka ubsuk. 2:8-9 Imik Neyung ara ugunuk wana' uboka eleksina' anasa leboka, ugunda Yesus ak dib senewoka dobluma' adya, ugunuk dib blebsuk. An blebsuka' ara, ugunja ununa' edya dobnenggublum. Anara Imik Neyung adya ok elek loboka blebsuk. Anaso ubsuk bok dara, nimi hnon ara nabeyok dobsa aboka nonggo henggunumso. 2:10 Nu nong ak dara, Imik Neyung adya uyiwousuka' ara, Yesus Kristus pik uboka nu meewoka, alja orowek yoka'-yoka' perobnya nenyek unulumnemak senewoka gegewoka beibsuk nim ek ulumab. 2:11 Ugun Yahudi gom nim era, ugun nong ara, "bola' garawanggom nang" ana' ara, nim adya bola' garalesika' Yahudi nang edya dara, ugunuk wenyalasak. Dara, Yahudi gom nim o, anyek seiniwanalum. Nera nim adya ganya doboka nang era an wenyan bekna' beillilesik. 2:12 Youma' dara, ugunda Kristus ab neika' ganya kweldana' orok nim, ugunda Imik Neyung adya weboka dobnenggusuk nim, beiyik nim ululum. Ugun Imik Neyung adya wana' uboka peroba' eleganesin henggusuk nim ek ululum. Ugunda Israeli soko enyek anara, peroba' anyek dobnemab nimi senena' oroka' ak uboka, Imik Neyung ugunja' ganya lomok una' orok nim ek ululuma' anyek seiniwanalum. 2:13 "Ugunda youma' dara, mok ululum bok, wenyek dara, Kristus Yesus ab neika' kwebdangoka ululuma' ara, Kristus eneng adya oka doro dil yousuk." 2:14 Kristus ara alda ganya mourusina'anya ulumla. Wera alja Yahudi nang eb Yahudi gom nang eb, hnonok heik sokok nang nenewosuknya bek ulumla. Yahudi nang eb Yahudi gom nang eb isa' nenebdangoka wiknewoka bokoldalamek lega' era, Kristus gal dubuk somogoka' adya seleb joboka soldob menegoka hiyiwousuk. 2:15 Yahudi nim edya' unuwanalum an yub eb alja anaso unulumnulum yuba nidya' ara, Kristus alja nong elegoka' adya lubok. Dara, alda Yahudi nim eb Yahudi gom nim eb danyek, al lomok hnonok wenyok nimi nonga neniyiwoka ganya namena' gebsuk. 2:16 Dara, Kristus gal dubuk somogoka' adya, isa' ganya neneldalareknya nera denghyok. Ono' Yahudi nim eb Yahudi gom nim eb hnonok nonga nenewosuk dara, sik penya dara, Kristus somogoka' adya Imik Neyung ak sam hibsuukanya, isa' ganya neneldalarekanya nera denghyok. 2:17 Ban nenesa leboka, ugunda Imik Neyung al ara mok geboka ululum Yahudi gom nim ek hnon, Imik Neyung berem ulumak Yahudi nim ek hnon, Kristus adya perob lero yanggan hekna' yub era, ugunuk lel elegel yousuk." 2:18 Wera Kristus pik moruwoka, Yahudi nimi yoka' gom, Yahudi gom nimi gom, nunda nidya' ara hnonok neik Imik Neyung Geisinya edya pik uboka, Imik Neyung ak sam ban pik era seleb eiyiwoka balamab. 2:19 Anasa wera, ugunda sekel yanggan nim uboka beiyik nim anam unggululum. Alda ugunda nidya' ara, wera yok muna' Imik Neyung mab eb Imik Neyung adya heik yoka' nimi dangoka, ono' Imik Neyung alja mabo siliba' ululum. 2:20 Wera Yesus Kristus ara men ikimok egomna' uboka, yuba lena' gak nang eb, ununumna' lelemek nang edya ikimek egomna' ak, ugunda anyagan makoka sobsuk. 2:21 Wera Kristus nong pik ab moruwoka, ugunja nong era Imik Neyung alja denewoka solosilikanya, Wenelesilnya Imik Neyung amba ok muna' gobdo un e dangalamla. 2:22 Ugunda Kristus ab seleb neika' kwebdangaluma' adya, ugunuk ono' nimi yok nim eb, Imik Neyung alja un e nenewoka, Imik Neyung ara alja' Geisinya pik uboka, ugun lomok seleb ulusil.
3:1 Ban nenesa leboka, ugun Yahudi gom nim enyek, nara Paulus bera Kristus Yesus amba leboka gasa ek henga gouboka beibnyeknya bedya, ugunsamba mololesin. 3:2 Ugunuk perob dangasin danasa, Imik Neyung ara, alja yuba lero yaban wa nera nak eleganyoka' ara, ugunda seleb keleluma' anya' senelamna. 3:3 Imik Neyung adya' unuwanamna senewoka men doknomoka' ara, nak an seleb laga nenewoka eleganyok. Damok era, men eini sam meka' momnya doboka beiyisina' ara ella ublum. 3:4 Kristus adya blebsina' damoka nidya' doknomoka' ara, nadya ganya olowoka ella dasa' ara, ugumbabya anyek einiwanalum dara, ella danalum. 3:5 Imik Neyung adya' ban yub enera, youma' dara, doknomoka' adya, anyek unuwanasin aboka nim ek laga aawanggusuk bok, wenyek dara, Imik Neyung Geisinya adya dara, Imik Neyung alja yuba lena' gak nang ak hnon, ununumna' len nang ak hnon, laga aawousuk. 3:6 Ban men doknomoka' ara, Imik Neyung adya' perob lero yanggan yuba pik uboka, Imik Neyung adya' misa' era, perob elekna' youma' dara, Yahudi nim emba ok beillilemok bok, wenyek dara, nimi Yahudi gom nim emba hnon beillilesil. Wera nimi Yahudi gom nim eneba, Imik Neyung adya neik mabo siliba' nenewoka, Imik Neyung adya Yesus Kristus pik uboka, eleganesin amoka' peroba' era, neika' dobnemak aboka wen leb elegousuk. 3:7 Imik Neyung adya nak wana' uboka eleksina' eleganyoka' ara, perob lero yanggan yuba lel elekna wa nek hnonok eleganyok. Nara wa nen eleganyoka' dobsa' ara, Imik Neyung migiba nadya nong lomok ono welenel migib pik eleganyoka' ak, yuba len wa nera dobsa. 3:8 Nimi muna' Imik Neyung mab ulumaka' gangganek ara perob nim ek ulumak bok, nak dara, hyak meilinya bek ulumna. Bok anyek babya, Imik Neyung adya alja' peroba' eleksina' ara nak eleganyoka' ara, Kristus adya' nidya' olowoka ella damenggom ununa' yuba ugunda Yahudi gom nim ek lel elekna' wa nek hnonok eleganyok. 3:9 Yoka'-yoka' nidya' ulumla' uyimoknya Imik Neyung adya, alja unuwanamna senemoka' ara, youma' eka' mouruwoka doknomoka' ara, nak pik uboka eleganyoka' ara, nimi nidya' ara Imik Neyung ara heka' huboka alja wen unuwanamna senemoka' ara ella danamak aboka eleganyok. 3:10 Imik Neyung adya seinimoknya nera, wenera yuba dona' nimi pik uboka, imik sam wenewoka bo usin nang, senenggom dub nang ulumaka' ara, Imik Neyung adya' hyak senenggoma' yok-yok geremsenga boboka, wa welemla' anyek ella danoka' aboka seinimok. 3:11 Ban unumoknya nera, men orowek unuwanamna' senemoka' sunuwoka, nunja' Wenelesilnya Kristus Yesus pik uboka unusuk. 3:12 Nunda Kristus ak dib senewoka, alab ganya kwebdangoka ulumaba' adya, glob lobsuk pik biniboka, asa' ganya boboka Imik Neyung berem balamab. 3:13 Ugun nong anyek, na pik uboka peroba' nenewosuknya nenesa leboka, nak an igina kweboka malya nenelenela' anara, ugunuk si peroba' doluluma' aboka ulumna' anasa, ugunda angwei senewoka, ganya hmenga neneldana' hnon ara, mem aboka moloweisin. 3:14 Wera ban nenesa leboka, nara nunja' neyung Imik Neyung ak koma lumugoka mololesin. 3:15 Ban Imik Neyung enyek anyeb, alja mab imik ulumak nim eb, sokok sam ulumak nim eb dara, alja si nidya' muna' gobdo ella dangoka dolomak. 3:16-17 Ugunda Kristus ak dib seneleluma' adya, Kristus enyek ugunja' ganya lomok ulusulula' aboka, Imik Neyung ara senenggoma' ulumla' anyek sunuwoka, alja Geisinya bedya, ugunja ganya lomok migiba' nenewosulul senen ganya boboka mololesin. Ugunja nong una' era wana' una' adya ok oulyanga lokoka goluwoka bo uboka, 3:18 ugunda yok muna' Imik Neyung mab ab, nidya' hiboka Kristus adya wana' una' ara, har so waran ulumla, har so deneba' ulumla, har so imik ulumla, har so sokok ulumla' anyek, olowoka ella dolululuma' aboka mololesin. 3:19 Anya Kristus adya wana' ulusila' ara, nimi ganya sirika' adya dara, nidya' pe olowoka ella danggunusengnya nenyek, ugunda ella dolulum aboka mololesin. Dara, ugun nong ara, Kristus adya wana' una' pe olowoka ella ulumunukanya, Imik Neyung hnonok ok ulumla nong una' enyek, deknewousulula' aboka mololesin. 3:20 Imik Neyung migiba nunja' ganya lomok sam seleb welemlakanya, nunja ganya seiniwoka mololemabnya nera mek so bok, Imik Neyung adya dara, hyak nauba so sounuwoka yoka' peroba' nidya' unululanya bek, 3:21 Kristus Yesus pik uboka, nim Imik Neyung yuba dona' nimi pik uboka, sounuwoka likoka soba' gibgiga balanok. Amin!
4:1 Ban nenesa leboka, nara Paulus bedya, Imik Neyung amba leboka henga goubnyeknya bedya, ugunuk ara, Ugunja nong una' era, Imik Neyung adya youbuka dobsuk nimi geknewa' ulululuma' aboka weneweisin. 4:2 Ugunda soba' ganya sokok nenebdangoka, ganya siklewoka namena' ulululum. Ulumunukanya, meknelesaka' ak anaba wana' ubdangoka dogom aldalamnelum. 4:3 Imik Neyung Geisinya adya hnonok nonga nenesuknya nenyek, hekna' ganya boboka, soba' neiknya nok maro lololula' aboka, ugunda ganya enyek ok boboka ulunob senewoka duboka unulululum. 4:4 Imik Neyung adya' peroba' ak ganya welenoka' aboka youbsuka' ara hnonok ulumla sok, nong ara hnonok ok ulumla, Geisinya bera hnonok ok ulumla. 4:5 Wenelesilnya bera hnonok ok ulumla. Ono' dib senena' ab, mek dana' anaba hnonok ok ulumla. 4:6 Neik hnonok Imik Neyung enyek, nimi nidya' sikja' neyung ulumla. Wera Imik Neyung enyek mok soko me nidya' amba dubnya uboka, nidya' ara alja ok wa weboka, alda yoka'-yoka' nidya' lomok ulumla. 4:7 Bok, nunda nidya' ara, Kristus adya bera anaso wa wen arasina' eleganamna senewoka' anyek, sunuwoka eleklesila' ak dolomab. 4:8 Ban nenesa leboka, Imik Neyung yuba bukuk sam ara, "Alda hyak im nong ok sam welok sum era, henga goubdob nimi nauba bo welewoka, nim ek perob elekna' nauba elegousuk," aro momnya dobok. 4:9 Wei, alda welewok alamla dara, wera men dara alda hyak soko lom nong ok sam yinggilimoka' adya welewoka' ak lelemla. 4:10 Wera yinggilimoknya benyek, onnya bera ima piboka hyak mok eini welewok dara, anadya ima soko me nidya' ara, alja ulumla migib edya ok oulyanga dangoka deknero lobok. 4:11 Kristus adya' nim ek elegousuka' ara, hnonda yuba lena' gak nang elegousuk, hnonda ununumna' len nang elegousuk, hnon nang era Imik Neyung adya perob lero yanggan yuba len nang elegousuk, hnon nang era yuba nekoka gereja bo un nang elegousuk. 4:12 Ban unura elegousuka' ara, muna' Imik Neyung mab era, welenok aboka elegousuk. Pe welemeija' adya, Kristus adya nonga peroba' nenewoka nauba danggiga balalula' aboka elegousuk. 4:13 Wera anadya, nunda nidya' ara neik hnonok dib senena' dolula' aboka hnon, Imik Neyung alja me nek pe ella ulunoka' aboka hnon, ganya kabnoka' aboka hnon, ono' Kristus adya pe ulumla' anaso' anyek dangoka nebgiga balanoka' aboka hnon, elegousuk. 4:14 Anasa, mek mab edya ganya windong-wandong alamak sok, nunda yok-yok damoka neksin yub edya giliwoka bol goknenggulumnesil. Hnon nang era meknewoka bobnenewoka leboka, henga weboka youlosak bok, sikja yuba keboka ununggulumnemab. 4:15 Bok ono' saawoka, nuk dara, wana' ganya nauba uboka perobnya dib nongnya nenyek ok lelemnemabakanya, nunja dubnya Kristus ulumla ak sam, nidya' ak nebgiga balamnemab. 4:16 Dara alak ab, nonga nidya' ara, mel-mela mourumna' gong adya hyak pe meewoka sunuwoka beiri byuk. Wera anedya, nonga digum yok-yok ara, pe wero balamla' adya, wera nong ara wana' una' pik uboka migiba' danggiga nero balamla. 4:17 Anasa wera, ugunda nim Imik Neyung elgom nim edya ulumak sok, ununggom, mem aboka, Imik Neyung si sibuka duka' lolom-lolom aboka lelesin. Imik Neyung elgom nim edya, salya' dib gomnya nok, seiniro ulumaakanya, 4:18 sikja ganya era seleb guna' dousuk. Ono' sikja ganya era ongibsuka' anasa, sikda hyak elgom so uboka, Imik Neyung embenga' eleklesila' ak ab loboka, beiyik gebdangoka ulumak. 4:19 Sikja unulumak ununa' era meknelemab senewoka alya ganya bona' orok adya yok-yok malya una' era, salya' sikja ganya doboka, gela salya' salero yabalamaakanya, yeiriwoka yok-yok malya una' nidya' unura yabalamak. 4:20 Bok, Kristus ak dolum ara, hyak anaso ununa' ella dangoka dobnenggulum. 4:21 Ugunda aldib alja yuba kelumukanya, al lomok ara dib yub ok ulumla' sunuwoka nekesik dara, anaso' ununa' ella dangoka dobnenggulum. 4:22 Wera youma' nong una' eb, youma' ganya eb dara, wen alja malya una' hwam ok unulunun ganya adya seleb malya dangalamla' anasa, gwiriwoka lobnoba' aboka doblum. 4:23 Ugunja ganya eb, anyek unuwanamna senen ganya wenyoknya perobnya nok bobnoba' aboka doblum. 4:24 Anya, wenyok uldilisil nong una' era, Imik Neyung ara hyak perob ok uboka, geisa ulumla sok ulumla nong una' enyek, anaso' anyek unura ulunoba' aboka doblum. 4:25 Anasa ugunda nidya' ara sonda leldana' ara hyak mem. Nunda nidya' ara Kristus alja hnonok nong ak ulumab bok anasa, gunun ganya bona' loboka, dib yub ok saldalamnelum. 4:26 Ugunda yu ganya bobmun dara, yu ganya enedya, ugunuk malya una' deisilyek anasa, yu ganya bomuna' meewanggom bok, henga wekel bana' ara mem. 4:27 Anya Iblis adya ugunja ganya lomok wekoka websilyek aboka, pika mourunggom. 4:28 Nimi hoka' dololenya bera, hoga dona' ara wera loblul. Alda bera alja yoka' nong ok anyeb, bona' garan ulumak nim ek elegousulula' aboka, alja soruk yoka' edya perob wa welelul. 4:29 Ugunda yuba sabnemun dara, malya yub enyek geregoka salya' sana' ara mem. Nimi perob yuba ok salamaka' adya, nimi kelemak nim era, peroba' dousulula' aboka, nimi keboka perob danamlya yub ok sunuwoka saldalalulum. 4:30 Imik Neyung adya blebnesil sum emba, Geisinya bedya seleb ouma debsuka' anasa, Imik Neyung Geisinya bek ganya sugul elekna' ara mem. 4:31 Malya ganya bobdangoka, nidya' yu ganya ab gogoba' ganya boldana' ara mem. Ugunda senenggoma' iriri aboka derewoka waldana' ara mem. Benewa malya seneldana' gom, anaso yok malya ganya boldana' era hyak loblulum. 4:32 Alda ugunda perob ganya bobdangoka, nimi nidya' ugun moumen wana' uldalalulum. Hnonda Imik Neyung adya Kristus pik uboka, ugunja malya una' doro bobogousuk sok, ugun moumen malya una' doro bologoldalalulum.
5:1 Ugunda Imik Neyung adya wana' ulusil mab ek ululuma' anasa, Imik Neyung adya unulamla ununa' enyek, diliwoka numba anaso ulunob senen ganya bolomnemun nim ek ulululum. 5:2 Kristus nonga somogoka' ara so mekla' song anaso' ak, Imik Neyung ganya hek elegoka, al nong ara nusamba beibdangoka somogosuk sok, ugunda wana' ganya boboka unura yabalelulum. 5:3 Ugun nong ak dara, muna' Imik Neyung mab ululuma' anasa, nimi yok nim edya ugunuk sikba malya ulumak henesija' damoka giliwoka beibdoumunuk anasa, hmaba' ganya hnon, yok-yok malya una' emba youmbura' debna' hnon, gela salya' salawoka, anaso malya ura yabana' hnon ara, ugun gangganek sam ara meka' unggulumnamla. 5:4 Anya ono' ugunuk dara, Imik Neyung mab unuwanggunuseng anasa, nimi ganya malya nenelesil yub eb, salya' dolbalek yub eb, gela salana' yuba, yok-yok kena' perob danggunumso yub eb dara, meka' sanggulumnulum. Alda ugunuk dara, Imik Neyung ak anyek soba' perob aboka gibelmorulumnulum. 5:5 Ugunda ban nong anyek pe bekneluma' ara, Nimi gela salya' salalamak nang eb, malya una' hwam ok ulumak nang eb, hman ganya bona' ara, bisa' gibna' anaso dangalamla' anasa, ganya en bolomak nim eb dara Kristus ab Imik Neyung ab dadya wenewoka bo ulusirik sokok nimi meka' danggunumak. 5:6 Ban damok danasa, nauba bleklemak nim ek Imik Neyung adya yu ganya boboka igina eleklesila' anasa, ugunuk yok nim edya salya' yuba saboka gliboka bo bisijek. 5:7 Anasa ugun nong ara, anaso nang eb neika' yuba saboka una' ara hyak mem. 5:8 Ugunda men dara, guna' lomok ululum bok, wera Imik Neyung mabo dangalum dara, dilina' dangalum. Anasa wera, dilina' lomok sam uru yabalemnalum. 5:9 Anasa Imik Neyung dilina' ak ab lanalamla' ara, perob ganya bona' ab nimi yok nim ek pe ununa' ab, yok-yok dib yub era lanalamla. 5:10 Imik Neyung ganya adya anara peroba' ak unulumak senen ganya bobnamlya' anyek duboka elemnelum. 5:11 Nimi guna' lomok sam anam ulumak nim edya ulumak sok, perob goma' dib gomnya salya' neikso unura yabana' ara mem. Alda ugunja dara, sikja meknewoka unulumaknya nenyek, nim eibnoka' aboka laga nenelelulum. 5:12 Anasa malya ulumak nim edya doknowoka unulumak ununa' enyek, yok nim edya laga doboka yuba san dara, nauba alya dangalasil. 5:13 Dilina' yaka' adya, yoka'-yoka' nidya' ara, laga dangallilimla' anasa, yoka'-yoka' nidya' dilina' ak amal yalamla' diguma' ara, gobdo lak nonga dangalamla. 5:14 Nenesa leboka yuba hnon ulumla' ara, "Anda hogunga malalamnya bera buklom, nimi somokna' ak ab goboka buklom. Dara an nong ak Kristus adya dilina' era, yebdo yibinenggel," hyok. 5:15 Wera anasa, ugunja nong una' era pelemab gom, orok gom aboka pe diri uldalalulum. Nimi dongdang alamak nim edya una' loboka, alda geremseng nimi ganya boboka ulululum. 5:16 wera, ugunda malya dangalamla salek ek ululuma' anasa, ugunuk an pe un salek ulumla' ak ara, pe salawoka unulululum. 5:17 Ugunda dongdang ana' ara loboka, alda Imik Neyung adya unuwaneseng senelamla' anyek pe seiniwoka ella dolulum. 5:18 Nimi ganya uu aboka serema salalesil mek era nauba den dara, nimi malya nenewoka soldelesila' anasa, mek era ganya uu hesilyek aboka denggom, mem. Bok, ugunja ganya era, Imik Neyung Geisinya adya ok deknewoka bo ulusulul. 5:19 Alda ugun yuba saldalamuna' ak ara, Mazmur bera hnon, Imik Neyung ak gibna bera hnon, yok-yok Imik Neyung bera hnon, seblemnelum. Anya, ugun ganya lomok anaba, Wenelesilnya bemba seblemnelum. 5:20 Or yok-yok damoka nidya' ulumla' amba leboka, nunja' Wenelesilnya Yesus Kristus anasa leboka, neyung Imik Neyung ak hyak soba' perob aboka giblelulum. 5:21 Ugunda Kristus ak lok ganya boboka, ugun moumen anaba ganya sokok nenebdangoka pe keldalalulum. 5:22 Ugunda gelewa ak dara, Wenelesilnya bek ulumab sok, ganya sokok nenebdangoka, ugunja nenyab edya yuba pe kelelulum. 5:23 Kristus ara yuba dona' nim edya sikja' dubnya uboka, ono' sik yuba doboka alja nonga dangalamak nim emba blebsina' dubnya ulusil sok, nenya ara alja gel emba dubnya ulumla. 5:24 Nimi yuba dona' nim edya Kristus ak nunja' neyung dubnya senewoka kelemak sok, yoka'-yoka' ununa' ak anaba gel ara nenya ak, nadya' dubnya senewoka alja yuba pe kelelul. 5:25 Kristus adya alja yuba dona' nim emba leboka, wana' uboka al nonga siksamba elegousuk sok, ugun nenyab ara, ugunja gelewa ek anaso pe wana' ulululum. 5:26 Kristus adya alja yub ab dadya mek elegoka, sik yuba dona' nim era alja nong anyek doboka, geisa nenewoununa' aboka, al nong elegousuk. 5:27 Wera anadya, nim alja yuba dona' nim era, menenga' meiboka, si gegena pona' oroka' anyek, geisa ganya boboka, si imik dangoka ulumnemaakanya, eimik era alja saramek doro beibsununa' aboka, Kristus al nonga siksamba doboka elekdangoka somogousuk. 5:28 Anasonya neikek, nenya ara, sikja' meneng nong ok wana' uldalamak sok, ono' sikja gelewa ek or nauba wana' ulunok. Heknedya ala' gel ak wana' ulumla' dara, al nonga wana' uldalamla. 5:29 Nimi ben hnon alja' meneng nong ek, malya' anya' seneldanggulumla. Bera al nong ak weiboka meebdangoka bo uldalamla sok, alda Kristus adya alja yuba dona' nim ek weiboka bo ulusil. 5:30 Nunda Kristus adya nong ulumaba' anasa, unu diri bo ulusil. 5:31 Imik Neyung bukuk sam momnya doboka' ara, "Anasa wera, nengmab ara, alja' neyunga genong ak lo yibenewoka, ala' gel ab neika' hiboka, sik penya dara, hnonok nonga dangoka ulurak," alamla. 5:32 An wenyaro momnya doboka' ara, hyak senenggoma' doknowoka ulumla damok ek lebok, anyek nadya dara, Kristus ab alja yuba dona' nimi sununa' ak lemna. 5:33 Bok ono' Imik Neyung yuba wenyalamla' ara, ugunsamba hnon lelemla' ara ban: Nenya ara al damnya wana' uldalamla sok, ala' gel ak wana' ululul; dara ono' gel ara ala' nenya ak, nadya' dubnya senewoka giblelul.
6:1 Wei, memab o! Dib nongnya perobnya nera, ugunda Wenelesilnya bedya unuwanok senelesila' anyek, ugunja' neyunga genong adya yuba pe keboka unulululum. 6:2 Imik Neyung adya, ugunda unulumun dara, perob danasil aboka men orugoka, "Anja' neyunga genong ak lok ganya boboka giblelom," wenyaboka, 6:3 "Anyek unulumen dara, anda sokok anara senenya loboka pe ubwenewanalam," hyoka' anasa, ugunda nauba nimi yuba pe keboka unulululum. 6:4 Hemyab ugun neyung yabo dangoka ululum nang ek lebnesin! Ugunja mab era meknewoka unuwomuna' anyek, sikda soloma daboka yu ganya bo bijek anasa, sikja ganya malya nenena' ara mem. Alda Wenelesilnya bedya lelemla yub edya hnon, yok perob ununa' yub edya hnon, wenewoka nellililulum. 6:5 Hemyab ugun nim edya wa welelum nang ek lebnesin. Ugunja' neyung yabo dangalamla nang edya yuba pe kelelulum. Ugunda yuba keboka wa webnemun dara, Kristus amba welemna senen ganya boboka, ganya hyak dib goluwoka, lok ganya boboka bleknyek senewoka pe welelulum. 6:6 Nim adya heng eiyiwoka unu welemak aboka kemelesija salek ok perob seneweisinok senen ganya boboka wenggom, mem. Alda Imik Neyung adya senelamla' ak unulumak nang geknewa' Kristus yuba domek nang ek adya, alsamba ganya gouluwoka welelulum. 6:7 Ugunja welelum wa wel yabamun dara, nim amba ok wenggom, Imik Neyung ak arawoka welemna' anaso uboka, perob ganya boboka pe welelulum. 6:8 Yok nang edya wa orukna' nang gom, sikbeyok ulumak nang gom, sikja nidya' pe weboka ulumeija' amba dara, Imik Neyung adya sunuwoka deknesila' anyek beklelulum. 6:9 Dub nang dangoka ululum nang ek lebnesin! Ugunda neik so, ugunja wa orukna' nang edya ugunuk arawoka welesak sok, ono' sikenek anaba, pe sunuwoka unulusululum. Yu ganya boboka barala' seingim-seingim ana' ara, mem. Ugunub ugunja wa orukna' nang eb dara, hiboka senenggom dubnya, Imik Neyung bera imik heikek ulumla' ara, alak ok hnonok beklemnelum. Imik Neyung ara, nimi hogung ak kemenggululanya bek ulumla' anyek, ugunda pe beklemnelum. 6:10 Anya wera, ugunda Wenelesilnya lomok uboka, migiba' ak ulululum. Alja senenggoma' unulamla migiba' ak ab doboka ulululum. 6:11 Iblis adya yoka'-yoka' ak bobgeregoka dulusila' ak sam, ugunda pe mel-mela we sekleluluma' aboka, ugunda Imik Neyung adya yina mala senga nidya' boboka eneklelulum. 6:12 Nunda nimi sirika' ab mala weboka oldanggulumab bok, alda imik garan dena' ak sam wenewoka bo usina' ab, senenggom una' ab, wen guna' ulumla sokok an bisa' dub una' ab, gobdo malya ulumak yu bisa' una' ab, oldalamab. 6:13 Anasa, malya una' lanawanamla salek enyek, ugunda pe ganya migiba' anyek saawoka oldalamunukanya, yoka'-yoka' nidya' unubgogowoumun dara, bisa' ab obdangdibigemuna' ara, ugunda senenggom obsimenggom nanga dangoka sekmoubluluma' aboka, Imik Neyung eleklesil yina mala senga nidya' boboka eneklelulum. 6:14 Wera anasa, ugunda hyak pe diri uboka welsinilelulum. Ugunda peroba' nenesina' anyek goukwa norona' diba' norowoka, jong ununa' anyek girik seng anaso' anyek enegoka, we seklelulum. 6:15 Imik Neyung adya' perob lero yanggan yuba, ganya heklamla' anyek, lero yabalemnamna senena' anyek, ugunja ganya ak yan ongona' diba' ongowoka ulululum. 6:16 Ono' hnon, Imik Neyung ak dib senen ganya enyek, bisa' mala leilina' diba' bololulum. Wera an dib senena' enedya, bisa' adya uk sirika' mala naklesila' nidya' ara, saranggeldilimnelum. 6:17 Ugunda nimi blebsina' damok anyek, girik huk gouluna' diba' goulumunukanya, Imik Neyung yub ak dara, Imik Neyung Geisinya bedya yina mala diba' doboka bolomnelum. 6:18 Dara, Imik Neyung Geisinya adya, ugun nonga bo ulusila' adya, nidya' salek enyek, yoka'-yoka' amba mololelulum. Dara, soba' websiniwoka, muna' Imik Neyung mabo nidya' amba bulugul lona' loboka, mololsinilelulum. 6:19 Nara Imik Neyung yuba lel yabanya dara, Imik Neyung adya ban yub enyek sablom aboka neknulula' aboka, nasamba hnon mololenululum. Wera anadya nara Imik Neyung adya' perob lero yanggan yub era, yok nim ek asa' ganya boboka doknomok yub era pe leb eleganamnya yuba gak enyek neksununa' aboka hnon mololenululum. 6:20 Wera Imik Neyung adya perob lero yanggan yub enesa lelelula' aboka, bokol yanyoka' anasa welemna dara, alsamba yuba sana'anya dasa, wera anasa gasa ek henga gouboka beibnyek. Anasa, asa' ganya boboka, ono' pe lelenuna' aboka, ugunda nasamba mololenululum. 6:21 Imik Neyung wa bojam welelanya nunja' hembe Tikhikus bedya, nadya ulumnakanya welemna wa nera, ugunda ella doluluma' aboka, anaso aboka neknesil. 6:22 Anasa, nadya unulamna' ara neksulula' aboka hnon, ugunja ganya daklinggoka pewosulula' aboka hnon, Tikhikus bera ugunuk an bilom aboka orugamna. 6:23 Nunja neyung Imik Neyung bedya hnon, Wenelesilnya Yesus Kristus bedya, nimi nidya' yuba dololum nim ek, ganya hekna' hnon, dib senen ganya boboka, wana' una' hnon eleklesulul. 6:24 Nunja' Wenelesilnya Yesus Kristus ak orok dengaboka sarangganggunumla wana' una' edya, wana' ululum nang ek wana' uboka eleksina' adya bo ulusulul. Nara Paulus bedya gibsin, perob.
1:1-2 Na kabo nim ugunda nidya' Pilipi heikek ululum muna' Imik Neyung mab ek hnon, ono' Imik Neyung wa arawoka nimi bo usin nanga hnon, hnonda arawoka wa wen nang ek hnon, momnya doboka beibsin! Nara Paulus beb, Timotius beb, Yesus Kristus amba welenam nang edya dara, Imik Neyung nunja' neyung bedya hnon, Wenelesilnya Yesus Kristus adya wana' uboka eleksina' ab, nimi nonga pe una' ab, eleklesulul senelenam! 1:3 Nara ugunuk seiniweisin dara, Imik Neyung ak soba' perob aboka giblamna. 1:4 Nara ugun nidya' amba leboka, sob-soba' Imik Neyung ak molol yabasin dara, nara hyak eiya adya, perob ganya boboka mololesin. 1:5 Nara Imik Neyung ak perob aboka giblamna' damok nong ara, ugun nong anyek anam sum eka' ara moruwoka sumen eneba, ugunda nak arawoka Imik Neyung adya perob lero yanggan yuba wa era neika' welemaba' anasa, hyak eiya ganya boboka mololesin. 1:6 Wera Imik Neyung adya albeyok ganya doboka, alja' perob wa nong enera ugun gangganek an web einimoka' ara, ono' welmorulamlya' ara, Yesus Kristus yanamla sum ek loboka webdaknamla' anya' senewoka, an nong ak hnonok dib senelamna. 1:7 Ugun nong anyek, nong una' ak dara, mok-mok ulumab bok, ganya ak dara, na dam an soba' neika' ulumab senen ulumla' anasa, wera ban nadya ganya enera wanoksodya unu seiniwanasisinya' anaba gigiwoka ubnesinya. Anya hnonda Imik Neyung adya alja' wana' uboka eleksina' era wen an nara gasa ek sam ulumna wenesa gom, loboka Imik Neyung adya' perob lero yanggan yuba wa webnesinya danasa gom, alja wana' uboka eleksina' era ugun hnon, na hnon, neika' doro beillilemaba' anasa, perob senewanasinya. 1:8 Nara Yesus Kristus lomok uboka, wana' uboka, ugunuk hyak eibsisinya senewoka ulusinya nera, Imik Neyung anaba alda ella ulunel. 1:9 Wera nadya ugunsamba mololosina' ara ban: Ugunda perobnya nek ella dangana' ab geremseng una' ab dara, nauba danggiga balasilyekanya, Imik Neyung ak hnon, nim ak hnon, nauba wana' ubgiga balaluluma' aboka, mololesin. 1:10 Wera ban adya ugunda perobnya nenyek ella uboka welemuna' adya, Kristus yanamla sum era, ugunja nong una' era, gegena pona' loboka malya ulumak nim aboka yana kibsilyek anasa, mololesin. 1:11 Dara, ugunja nong una' enyek, perob una' adya ok, Yesus Kristus adya pe deknelesilya dara, wera Imik Neyung si ak imik nenewoka, alak soba' giblemnemak. 1:12 Hemyab o, nadya dara, nak yoka'-yoka' ununyoka' anadya nimi nauba Imik Neyung adya' perob lero yanggan yub ek keboka dib senelamaka' anyek, ugunda ella danasom senelamna. 1:13 Damok ara anadya wera, dub nang ek an pika wen nang eb, nimi yok nimi nidya' ab dara, nak henga geregoka beibnyeka' ara, Kristus amba aldib urob senewoka ella ulumak. 1:14 Nak henga gouboka beibnyeka' adya, wera yok Imik Neyung mab era, asa' ganya bob sounuwoka, lok ganya oroka' anyek, Imik Neyung adya yub era lero yabalamak. 1:15 Wera ban Kristus yuba lero yabalamak nang era, hnon nang era hman ganya boboka lolobdanob senen lero yabalamaka' ara aldib bok, hnon nang era Imik Neyung ak ganya gouluwoka perob ganya boboka lero yabalamak. 1:16 Ban eimik lebman nang era, nak alja perob lero yanggan yub enyek ligilamla' bar aboka, ella ulunyaakanya, wana' ulunyaknya nenesa yuba dib lero yabalamak. 1:17 Bok men lebman yok nang ek dara, Kristus yuba lero yabalamaka' ara, dib gomnya nenesa nunokok pewosulul senewoka lero yabalamak. Ban unulumaka' nong adya, wera na an henga geregoka beibnyeka' anyek ulunanya bek an nauba igina kweiyiwanamab senewoka unulumak. 1:18 Bok anaba or maly! Wera dib damok emba gom, sonda' amba bobnenewoka Imik Neyung yuba lero yabalamaka' anaba, Kristus si ak lero yabalamaka' anasa, nara eiya dablenel. Anya eimik eneba soba' eiya dablemnenel. 1:19 Ugunja nasamba heng uboka mololenuluma' ab, Yesus Kristus Geisinya adya aralenela' ab dadya, henga gouboka beibnyeka' anaba lobnenyaka' ella ulumna' anasa, eiya dablemnenel. 1:20 Nadya dara, nadya nong ok meknewanya danyek alya ubnelyek senewoka nauba seinilamna. Nadya seinilenanya nera, al wene salek eneba, nadya nonga ganya gekman asa' ganya boboka, nara embenga' ulumnya' gom, somogamnya' gom ara, Kristus si anyek imik dolul senelamna. 1:21 Anasa nak dara, embenga' ulumna' ak dara, Kristus amba ok ganya dib beiliwoka ulumna. Anya somoganamna dara, wera ono' hyak pewanasinya, senelamna. 1:22 Bok nara sokok anam ulumna' adya, nadya' perob wa nera ono' welemnamna, dara anadya nara har nerek nenyek aboka dobnesinya' ara elgom ulumna. 1:23 Nara penya nang edya giliwoka ganggana' goklenerek. Anasa hyak perob nongnya nera, sokok anara loboka, imik heikek biniboka Kristus ab neika' ulusinim senelamna. 1:24 Bok ugunuk sam anyek, perob dosulula' aboka, nara sokok an or ulumnesinya dara, nauba perob danamso. 1:25 Nara ban nenyek peroba' ara ella ulumna' anasa, ugun nong anyek Wenelesilnya bek dib senena' anyek eiya ganya boboka migiba danggiga balaluluma' aboka, ugunuk arasin danasa, nara ugunub neika' ulumnemab senewoka ella ulumna. 1:26 Ban nenesa leboka, ugunuk yanya dara, nasamba leboka Yesus Kristus bek bekoka hyak nauba eiya dablemnesil. 1:27 Yo, anasa wenyek dib nong ara, ugunda Kristus amba leboka' peroba' Imik Neyung adya' perob lero yanggan yub enyek, sunuwoka ugunda pe ulumnelum. Ban unu ulumuna' adya, yub ok kebnamna' anaba, Imik Neyung adya' perob lero yanggan yub ek ganya dib senewoka un danasa duboka hnonok nonga dangoka ulunoba' aboka, yeirilemak ana' hnonok ella ubnamna. 1:28 Ugunja isa' nang ek lok ganya bona' loboka, soba' asa' ganya ok bolomneluma' anyek hnon, ella ubnamna. Ban unulumuna' adya, wera sikenek orok nenewanasil bekna' laga danasilikanya, ugunuk dara, Imik Neyung adya blebnesil bekna' laga danasil. 1:29 Anasa Imik Neyung adya ugunuk perob elekna' elegosuka' ara, Kristus ak dib senelenoka' aboka ok eleganggubsuk, alda ono' Kristus amba igina kweboka gweklenoka' aboka hnon, elegosuk. 1:30 Anasa, ugunda wenera nab neika' perobnya nenyek dobnoba' aboka dulumab, nera nadya youma' dulumsa' seleb eiyilumnya hnon, anya ono' weneba soba' or dulumna' anyek, wen seleb kelelumnya nenyek lebna.
2:1 Ugunda Kristus ab neika' kwebdangoka ululuma' adya, migiba' eleklesil de? Kristus adya ugunuk wana' ulusila' adya ganya hekel eleklesil de? Ugunda Imik Neyung Geisinya ablaboka ganya kwebdangoka ulumaba' ella ululum de? Angoo yadyek ganya ugunuk ara nauba ulusil de? 2:2 Mab e, anasa ban nenyek ugunuk ulusilya dara, wera nadya ganya migiba geblemnenuluma' ara, neik wana' ubdangoka, neik ganya boboka, neiknya nek unuwanamab senen ganya boboka ulululum. 2:3 Ugunda yoka'-yoka' unuwanamuna' ara, nunokok perob dosulul senewanamunya nek gom, dengdang ganya bobnemunya nenyek unuwanamab senena' ara hyak mem. Alda saawoka, ugunda nidya' yok-yok ganya sokok nenebdangoka ulumunukanya, nak dara or malye bok, yok nim ek danyek, perob nang era, an senen ganya bobdangoka ulululum. 2:4 Nanokok pewonulul seneldana' loboka, alda yok nim enyek pewosulul senen ganya boboka ulululum. 2:5 Ugunda Yesus Kristus adya bobok ganya enyek boboka ulumnuluma' ara, 2:6 Kristus ara al ulumoka' ak dara, Imik Neyung diba' ulumok bok, Imik Neyung ulumna' anara soba' ulunun ganya ok bobnenggumok. 2:7 Bok alda, ban nidya' ara gwirib lobokokanya, ono' nimi sirika' anaso salya' dem nanga dangamok. Kristus ara nimi dokokanya, ono' nimi sirika' anaso ulumok. 2:8 Alda ganya sokok nenebdangoka ulumoka' moruwoka, Imik Neyung senemoknya nok unuwoka somogok. Somogoka' ara, gal dubuk somogok. 2:9 Wera ban nenesa leboka, Imik Neyung adya dara, alak hyak im nong ok nenewok, anya alak ara yok-yok migib una' era mek so bok, alak danyek hnonok hyak senenggom migib damok era elegok. Yok si nera mek so bok, alja si nenyek hyak imik nenewok. 2:10 Ban amba leboka Yesus si ak giblemnemaba' ara, imik heikek sam embenga' ulumla' ab, sokok sam ulumla' ab, soko lomok sam ulumla' ab, nidya' alak koma lumugoka giblimnemak. 2:11 Sikda nidya' adya dara lebnemakja, "Yesus Kristus anyek hnonok Wenelesilnya diba' ulumla," aboka laga lebnemak, dara wera anadya, neyung Imik Neyung ara alja si imik nenewanamak. 2:12 Nadya hyak wana' nong ulusin hemyabo nim o, anasa wera, nara ugun gangganek ulumsa salek enyek, ugunja nadya yuba pe keboka unulum sok, hyak nauba so ara wen mok bokdangoka ulumaba' wenyek unulumnunulum. Imik Neyung adya ugun nong ara seleb blebsuka' anasa, ugunja pe ululumnya nera nauba perob danggiga balasulul senen ganya boboka dulululum. Imik Neyung ak lok ganya boboka ban nen unulululum. 2:13 Nenesa leboka Imik Neyung adya, alja ganya ek hekel eleklenenoka' aboka ugunja ganya lomok sam weboka, unuweisinya ganya hnon, unuwanoka' aboka migiba hnon eleklesil. 2:14 Ugunda yok-yok wa welemun dara, wabdangoka oldana' loboka welelulum. 2:15-16 Ugunda ban nenyek unulumnelum dara, ugun nonga gegena meka' pona' orok uboka, perob ganya boboka, jong ganya ok deknewoka, yu hwam nim eb, malya ulumak nim ek, perob Imik Neyung mab ulumnelum. Ugunda sikenek embenga' eleklesil yuba leb eleganemun dara, ugun siksamba sokok an dilina' yebel eleklamla wesa' eneso dangoka ulumnulum. Ugunda anasonya nenyek sunuwoka ulumun dara, Yesus Kristus yanamla sum era, nadya ganya eiya dabnenela' gak ara an. Wera ban adya nadya duboka welemna wa nera salya' lelem danganena' loboka, doka yak dal senewanamna. 2:17 Nak dara, oboka dibnenyak dara, nadya eneng era ugunja Imik Neyung ak dib seneluma' adya, alak giboka perob elekna' elegoluma' ak maknamna dara, nenesemba leboka Imik Neyung ak perob aboka giblamnakanya, nab ugunub perob senewanamab. 2:18 Anasonya neikek ono' ugumbabya perob senewanalumukanya, ugunub nab perob senewanamab. 2:19 Ugunuk pe ulumak an yub kebnyekanya, nadya ganya eiya dabnulula' aboka, Wenelesilnya Yesus aralenela' adya, Timotius bera ugunuk an mek anam bokol yanesin. 2:20 Al Timotius bek hnonok alak ok nadya ganya seinina' eneso uboka, ugunuk perob senewanameija' anyek aboka seinilesilnya bera an. 2:21 Nimi yok nimi nidya' ara, Yesus Kristus amba dara seinina' loboka, alda nunokok pewanasilinya nenyek senewoka seiniro balamak. 2:22 Timotius bera ugun gangganek wa pe welesuka' ara seleb eillilelum. Alda nablaboka neika' Imik Neyung adya' perob lero yanggan yub era yeiriwoka lero yabalenamnya. Nab alab dara, nimi neyung eb ala' me neika' kwebdangoka ulumak sok ulunam. 2:23 Ban nenesa leboka, nak henga goubnyeka' ara eimik heka' dananela' ara okoka ella ubnya dara, alda nadya ugunsamba bokol yanasin. 2:24 Imik Neyung aralesila' lomok uboka ella ulumna' ara, naba men se' kemel yanasin senewoka ella ulunadyok lebna. 2:25 Nunja hem be Epafroditus bera nak anyagan aralenulula' aboka bokol yeililumnya bera, nadya saawoka ugunuk bokol yanamna senelamna. Albabya nadya welemna wa nek neika' arawoka, duboka yeiriwoka welenel. 2:26 Alda ugunuk nidya' berra eibsisinya ganya nauba bolomla, ono' alda hnon neikna' salawok an yuba keluma' anasa, igin ubsilyek aboka lok ganya bolomla. 2:27 Nera aldib alda neikna' nauba salamookanya somok lobok. Bok Imik Neyung adya alak angoo yadyek senewoka arawok, nera or alak ok gom, alda nak anaba nauba solom ganya boboka engewalyek aboka neika' angoo yadyek senewoka arawanyok. 2:28 Ban nenesa leboka, ugunda alab eibdomun dara, ugunja ganya heksilyekanya, nadya ganya eneba heiboka ubnuna' aboka, nadya dara nauba alda ugunuk sam bilom aboka oruganamna senewoka nauba seinilamna. 2:29 Anasa, ugunja dara, alak neik Imik Neyung mabo dangalamak nimi gekneba' uboka yanggeija dara, peroba' leboka doro dibsululum. Ono' hnonda anaso ganya bolomak nimi nidya' ak wana' ulululum. 2:30 Kristus wa nauba dangoka perob dolulula' aboka, alda hyaka' somok lobok bok, ugunsamba harok alda nauba yeiriwoka ganya nong gekman nadya welemna wak sam neika' welenam.
3:1 Nadya' hemyab o, anya ono' ugunda Wenelesilnya beb seleb kwebdangoka ululuma' anyek bekoka ei-ei ganya bololulum. Ugunuk perob dangasin damba' anya' aboka, ono' youma' hnon seleb momnya dona' pik uboka lebsisedyok, wen hnon sounuwoka lebsin. 3:2 Nimi hnon malya unulumak nim enyek, sikja si nera bei gama siliba' alasak nim una' enyek pe keebdaboka ulululum. Ban nim enedya dara, nimi nauba ara or bola' garalesinok senelesak. 3:3 Nera nuk danyek bola' garana' diba' ara seleb domouba, sikenek dara orok. Nunda Imik Neyung giblemaba' ara, Imik Neyung Geisinya adya bo ulusila' adya giblemab dara, ono' nunda Yesus Kristus ab seleb neika' kwebdangoka ulumaba' adya perob aboka giblemab. Nunda sokok an se' nim adya ok ganya doboka unulumaknya nek ganya dib beiliwoka unggulumab. 3:4 Nak dara anyek, anaso ganya dib beiliwoka ulumnesinya bok, yok nim era sokok se' nim adya memelemaknya nenyek ganya dib beiliwoka ulumnamso dara, wera nak hyak nauba so unuwanasinya. 3:5 Nara beibnyek salek era, lika linbadya sum mabsa dara, bola' garawanyek. Nara Israeli nanga yoka' Benyamin nang yila' ak ab beibnyek, anya Ibrani nanga yoka' nong ara na ulumna an. Yahudi nim emba unuwanalum an yub ak ganya olokna danasa dara, nak dara Parisi nang dangamsa. 3:6 Ban nenesa leboka, nauba yeirilamsakanya, Imik Neyung yuba dona' nimi nauba malya ura obsisa. Nak dara, unuwanalum an yuba dona' ak sam amba dara, nara hyak si gegena meka' pona' oroknya bek ulumsa. 3:7 Bok ban nidya' ara Kristus amba leboka, youma' nak sam perob dangalenyoknya nera gwirib loboka, wenyek dara, nara banyek dolbalek senelamna. 3:8 Dara ban nenyek ok gom, alda nadya nak malya dananel senelenanya neneba wera seleb unulunel. Wenyek danyek, nara hyak peroba' ak dobsa ara, Yesus Kristus, nadya Wenelenelnya bek hnonok dobsa. Nara Kristus amba leboka yoka'-yoka' nidya' ara dolbalek senewoka seleb gobdo gwirib lobsa. Nara Kristus anyek dib dobnuna' aboka, yoka'-yoka' nidya' ara sembeja' nenemsa ok. 3:9 Anya aldib nara Kristus lomok ulunun senewoka unumsa. Nara Imik Neyung ak ganya kwebdonuma' ara, nadya ganya doboka nim adya unuwanalum an yub eboka dobnenggubsa. Wera nara Imik Neyung ab peroba' lebdangoka ulunama' ara, nara Kristus ak dib senemsa' adya ulumna. Anasa ban unu Imik Neyung ab kwebdangoka jong ulumak una' era, Yesus Kristus ak dib senelemaka' nong adya ok dangalamla. 3:10 Nadya hnonok hyak perob unulusinya senelamna' nong ara, Kristus ak okoka ella ulumnyekanya, alja somokna' ak ab embenga' bukullilisil migib enyek, naba ella desinya senelamna. Nara Kristus ab neika' hiboka alja igina kweboka, ono' alja somokna' enyek naba neika' somogoka, also donun senelamna. 3:11 Nadya dara, nababya somokna' ak ab embenga' suboka bukiyiwonulul senelamna. 3:12 Nara seleb hyak pelemna, hnonda seleb peroba' ak ulumna senenggulumna. Alda Kristus Yesus beilesil dekna' enyek dobnun senewoka yeiriwoka dulumna. Ban nenesa alja unululula' aboka, nak alja bleboka dobnyookanya, aljinya nenewanyok. 3:13 Hemyabo nim o, hyak pe ululanya ulumso sok, nara seleb anaso ulumna senenggulumna. Bok alda nara hnonok unulamna' nong ara, nidya' yoka'-yoka' youma'anya nadya' weilik sam ululanya nera hibigoka, eimik eini unuwanalanya nadya' saramek sam ululanya nenyek dulumna. 3:14 Ban nenesa leboka, nak men sidya' eini ulumla' anyek, yeiriwoka dobnun senewoka dulumna. Dara, Imik Neyung adya Yesus Kristus lomok pik uboka nuk youbsuka' ara, imik heikek weknoka' aboka youbsuka' anasa, nara eleganesin senelesilnya nenyek dobnuna' aboka dulumna. 3:15 Nunda nidya' Imik Neyung yuba domoubukanya, seleb ganya kalasil nim era, neik ganya enyek unu bobnemab. Bok ugun gangganek sam ara, nimi hnon yoko seinilemun dara, Imik Neyung adya ugunuk nek arawanasila'. 3:16 Ban nong ara, ugunda pe beknelum: Nunja una' nong era, youma' unu ulumnemab amouba' wen ulumabnya nenyek sunuwoka ono' pe ulumnemab. 3:17 Ugunda nadya' hemyabo nim o! Ugunda nadya unulunanya nenyek dililenululum. Nunja' perob una' seleb elegesuba' anasa, nimi nidya' nunja' ununa' diliwoka unulumak nim enyek, ugunda pe kendululum. 3:18 Nara soba' hnon ugunuk wenyalasisedyok, ono' nimi nauba ara sikja nong una' era, Kristus gal dubuk somogoka' ara salya' senewoka malya nenelemak. Bok, wen hnon engelamnakanya, ugunuk ono' saawoka lebsin. 3:19 Ban malya ulumak nim era, sikja' ganya edya nunja nong emba pewosulul senen ganya boboka yeirilemaka' anasa, sik nong anaba malya uboka somoganamaka' ak ulumak. Sikda sokok an salya' lelem perob dangalalanya nok senewoka seinilimak. Sikenek alya danasusonya nek perob senelemak. 3:20 Bok nuk dara, imik heikek ab nim ek ulumab. Dara, al neik heikek ab nunja' nimi blebsina' dubnya Wenelesilnya Yesus Kristus ara eimik yanamla. Al nong anyek nunja dara, wera eibsibya senewoka diri ulumab. 3:21 Nunja' hmeng uboka songa leboka blolomla nong era, Kristus adya yoka nenewoka alja' perob nong eneso nenewanasil. Ban alja unuwanasilnya nera, alda yoka'-yoka' ara unun danasa, migib adya unuwanesil.
4:1 Nadya wana' ulusin hemyabo nim o, wera anasa ugunda Wenelesilnya bek hyak dib senewoka ganya ologoka ubmoublulum. Nara ugunuk hyak eibsisinya senen ulusin. Ugun nong anyek, nadya ganya hekoka nadya' dekna' diba' nim ululum. 4:2 Ugun penya gelewa Euodia, Sintike o! Ugun penya yuba dolomak nimi gekneba' neik ganya boboka pe uluruma' aboka moloweisin. 4:3 Nadya hem be an bojam ululamnya bek, ban penya lebna gelewa danyek pe aralesiloma' aboka molowagen. Klemens beb nimi yok nanga nab neika' nadya welemna wa yeiriwoka welemouba, ono' sik penya gelewa dara, Imik Neyung adya' perob lero yanggan yuba neika' lero yabalemouba gelewa ek anara ulurak. Sikja si nidya' ara Imik Neyung adya' nim embenga' un bukuk sam ulusil. Anasa, aralesilom. 4:4 Ugunda Wenelesilnya beb seleb neika' kwebdangoka ululuma' anasa leboka, ei-ei ganya soba' bololulum. Ono' saawoka hnon wenyhenesin: Ugunda ei-ei ganya bololulum e. 4:5 Wenelesilnya bera mek anam yanalabok anasa, ugun nong anyek perob ganya boboka namena' ulumuna' ara, nimi yok nang edya eillilesinoka' aboka lebsin. 4:6 Ugunda yoka'-yoka' heka' huwanamab do senewoka ganya daldom-daldom anggom, mem. Yoka'-yoka' dobnob senewanalum dara, anyek Imik Neyung ak elegeisilom aboka soba' mololelulum. Ugunja nunda anyek dobsibya seneleluma' anyek si sibuka, Imik Neyung ak perob aboka giblemunukanya, mololelulum. 4:7 Ban unulumun dara, Imik Neyung alja nim adya meka' ella unggulumak una' adya, Kristus Yesus pik uboka, ugunja ganya seinina' nidya' diri bo ulumnesil. 4:8 Wera, nadya' hemyabo nim o, ugunja ganya ek ara, nim una' perob dangalalanya nenyek, pelemak aboka gigiwanasijenya nenyek, nera pe una' ab, gibildana' ganya ab, perob ok ununa' ab, geisa ululanya neb, pelelanya neb, perobnya nedyok ugunja ganya ek deknewoka ulusulul. 4:9 Ugunda nak ab einiwoka dolum perob una' enyek unulululum; nera nadya ununa' eiyilum gom, nadya yuba sana' enyek unulululum. Dara, Imik Neyung perob elekna' damoknya bera ugunuk ulumnesil. 4:10 Ugunda nauba mandewoka ululuma' ara, ono' wenyek ugunja nasamba uka yok seiniwoka aralenuluma' anasa, nara Wenelesilnya bek bekoka giboka hyak eiya dablenel. Ban wenyhenya nera, ugunja nak dib hibigonuluma' ak lebnenggubna, alda nak ara seinin dara seinilenulum bok, unu seinilenuluma' anyek aranena' ak anyeb laga dangan danyek men okna anasa ununa' orok ak lebna. 4:11 Nadya una' era heka' ak nak ulumla dara, seleb senelenanya bek anasa, nera nak okna ulunela' amba arawaneseng senewoka lebnenggubna. 4:12 Nara yoka'-yoka' garana bulumak gom, ono' nauba bok loboka deregoka ulumaka' ara penya-penya naba seleb unura yibisa. Nara yoka'-yoka' peroba' ak ulumak, malya' ak ulumaka' ara, nara seleb eiru yibisa. Dara, nera dena' nauba yaka' ulumak gom, bona' garana' ak ulumak gom, nidya' gigilamla' ak ulumak gom, bona' yak goma' ak ulumak gom ara, nara nidya' sunuwoka pe ulumna senen ganya bobnuna' aboka ella dangamsa. 4:13 Alda nak migib eleklenel Kristus aralenela' adya, yok-yok igina kwelenel bok pe ulumnesinya ok senen ganya bolomna. 4:14 Bok ugunja danyek, nak garana bulumna' ak eiyiwoka aralenuluma' anasa, wera ugunja nak unu aralenulumnya nera hyak nauba pelenulum. 4:15 Nadya hemyabo Pilipi nim o! Nara men perob lero yanggan yuba lero yabalamsa sum enyek, Makedonia sokok aba' ara lo yabasa dara, yok yuba dona' nim arawanggunyek, ugumbeyok aranuluma' ara ugumba seleb ella ululum; anasa ugun nong anyek, peroba' malya' ara nab neika' debyaawouba. 4:16 Wera ono' nara Tesalonika heikek ulumsakanya, unuruwa' garan ubnela' anasa heka' hubsinya do senewoka buksa salek, ugunja men youboka yoka'-yoka' li gong beibnulum. 4:17 Wera nera nak dara, ugunja beibnuluma' anyek ganya dibyooka dona' ok dob lobnun senen ganya bonggulumna. Alda nadya dara, nim Imik Neyung yuba doboka ulumak nong una' enyek ugunuk sam nauba dosulul senelamna. 4:18 Wera ugunja beibnuluma' ara, nak okna ubnyoknya nera nidya' gigiwoka seleb dobsa, hyak nauba so sounuwoka dobsa! Ugunja yok-yok bona' nak arawonuluma' Epafroditus be bo yanyoka' ara nidya' seleb dobsa. Anadya wera men dara, anyek dobsinya senewoka seinisenya nera nidya' gigiwoka dobsa' ulunel. Ugunja nasamba arawoka beibnuluma' nidya' ara, Imik Neyung ak perob songa lelemla' giboka beil balamak enyek, Imik Neyung adya perob senewoka dolomla bona' eneso' ak beibnulum. 4:19 Yesus Kristus lomok ulumla' si imik nenena' ab, dub una' ab dadya, ugunja dobsibya seneleluma' nidya' ara, nadya Imik Neyung edya eleganesil. 4:20 Nunja' neyung Imik Neyung ara hyak soba' gibelsinilenob! Amin. 4:21 Nadya' ban gibsina' anyek, muna' Imik Neyung mabo nidya' ak, Yesus Kristus ab neika' kwebdangoka ulumak nim ek neyung bera unu gibisil aboka nekdo yibinelum. Hnon ugun kabo nimi nab neika' ulumab nim edya ugunuk gibsaka' anasa sikja' gibna' keboka dobnelum. 4:22 Muna' Imik Neyung mabo nidya' heik enyek an ulumak nim edya, nauba so dib nong ara, Kaisar dubnya bedya' ek welemak nim edya ugunuk perob aboka giboka lebsak. 4:23 Nunja Wenelesilnya Yesus Kristus adya ugunda nidya' ganya ak wana' uboka eleksina' elegoka ulusulul. Paulus Timotius adya nunja gibsinem.
1:1 Imik Neyung adya seinimoka' sunuwoka, Yesus Kristus bedya yuba lena' gaknya Paulus bek ab hnon, nunja hembe Timotius bek ab hnon, 1:2 ugunda Kolose sam Imik Neyung amba geisa uboka, Kristus ak dib senelelum hemyabo nim emba beibsab. Nunja neyung Imik Neyung ak ab wana' uboka eleksina' ab, namen ganya una' ab danyek, ugunja' dangalalul. 1:3 Nunda Imik Neyung ak nunja Wenelesilnya Yesus Kristus alja neyung ak, liga sob-soba' ugunsamba mololosabakanya, alak perob aboka giblemab. 1:4 Ugunja Kristus Yesus ak dib seneleluma' ab, muna' Imik Neyung mabo nidya' ak wana' ulumak an yub enyek, seleb kemouba' anasa, unulumab. 1:5 Ban dib senena' hnon wana' una' hnon ara, imik heikek ugunsamba beillilisila' ak ganya weleluma' ak ab lanalamla. Ban ganya wena' ara, ugunda men dib nong yuba kelum adya ella dangalum. Ban perob lero yanggan yub ara, 1:6 ugunuk an seleb yousuk sok, mok soko nidya' oboka lelewoka doka moru balamla. Dara neikek, ugun gangganek anaba, an yub enyek einilumukanya, Imik Neyung adya wana' uboka perob eleksina' anyek pe ella dangalum salek ek ab ara mouruwoka, doka moru balasil. 1:7 Anasa, ban nidya' ara, nunja neika' welemabakanya, wana' ulumabnya Epafras bek ab ella dangalum. Benera ugunja dara, Kristus wa wenya hyak bojamnya bek ulumla. 1:8 Dara al adya ugunja Geisinya lomok uboka wana' ululuma' ara, nuk neksuk. 1:9 Anasa, an unu ulumak an yub kebub salek eb moruwoka, nunda ugunsamba soba' heng uboka mololdibilloklesab. Ugunda Imik Neyung adya senelamla ganya anyek pe muna' gobdo ella ubluluma' aboka, yok-yok Imik Neyung ak ab geremseng un ganya ab, yuba domna adya ella un ganya ab, boblulum aboka nunda mololosab. 1:10 Dara, alja senelamla anyek pe ella ubmun adya, ugunja ululuma' ara, al saramek ab dom digum ulumla adya or unu ulunok senewanemlakanya, yoka'-yoka' unululuma' nidya' ara perob senewanamla. Nunda heng uboka mololosab ara, ugunda yok-yok perob wa weboka doka moulumnelumukanya, Imik Neyung ak ella dangana' nauba danggiga balalul aboka mololosab. 1:11 Ugunuk yoka'-yoka' lanawanesila' ara, ganya eiya daboka, or malye senewoka, migiba' bal morulululum aboka, alja peroba' senenggom migib edya ugunuk migib gebsulul. 1:12 Hnonda ban adya neyung bek, dilina' pik balamak muna' Imik Neyung mab amba beibuknya nek dobneseng senen nang nenelesilnya benyek, ganya eiya daboka perob aboka giblemnelum. 1:13 Anya, alja nunda guna' migib ak ab seleb lobsuukanya, nunda alja wana' ulumla me nedya heikek doro dibsuk. 1:14 Dara nunda al Kristus adya nunja blebsina' damok dekoka dobsuk ara, wera nunja malya una' memelesila' ara an. 1:15 Alda Kristus ara, Imik Neyung laga eilinggulumaknya bedya sununa' ulumla. Anya yoka'-yoka' uyiwok ak ab dara, alda hyak nonokna' nongnya ulumla. 1:16 Yoka'-yoka' imik heik ulumla' ab, sokok an ulumla' ab dara, al pik ab uyiwok. Wera laka ulumla' laka unggulumla', dubnya una', wenewoka oruksina', wenewoka bo usina', senenggom dub una', ban nidya' ara, al pik ab uyiwok. Anasa, yoka'-yoka' nidya' ara, al pik ab uyiwookanya alsamba, nera alsamba uyiwok. 1:17 Anya yoka'-yoka' nidya' anam bok, alda hyak men ulumok. Dara, yoka'-yoka' nidya' ara al adya bo ulmorulamla. 1:18 Alda nong ak dara, yuba dona' nimi hiboka amba, al Kristus ara, huka, dubnya, ulumla. Alda men yoka' nong, anya somokna' ak ab men nonga subuknya ulumla. Anasa, yoka'-yoka' ab dara, alak danyek, hyak nonokdob. 1:19 Wera anasa, Imik Neyung ulumla' nidya' ara, neyung adya ganya doboka ala' me ak yeindeboka al lomok muna' gobdo ulumla. 1:20 Anya Imik Neyung adya, alda yoka'-yoka' ab, al nong ab, neika' hibnuna' aboka dara, or sokok an ulumla' gom, imik heik ulumla' gom, alda yoka'-yoka' neika' ara hiyiwousununa' aboka, Kristus obek gal eneng pik seleb neikek hiyiwousuk. 1:21 Youma' dara, ugun nong ara, Imik Neyung ak ab mok gebdangoka ululum; ugunja ganya seinina' adya alak isa' nang gebeluma' ara, laga' dok ara, ugunja yu hwam una' adya bekna' laga ella ulumok. 1:22 Bok wera Imik Neyung ara, Kristus adya' nimi nong lomok somogok adya, ugunuk al saramek geisa uboka, gegena pona' oroka' ak beibsulul aboka neika' hiyiwousuk. 1:23 Ugunda ugunja ganya dib seneluma' lomok soba' ubmouboka, wirring-warreng ana' loboka, mel-mela sekoka, anya perob lero yanggan yuba kelum adya ganya wena' ak ab goknenggunusak dara, al saramek anaso beibnesil. Ban blebsin yub ulumla' ara, im damumduk yangawoka' nidya' ak seleb wenyaro yabalamak. Anya, na ban Paulus bera, an yuba wa wenya seleb dasa. 1:24 Anasa, nara wera ugunsamba leboka, igina dolomna dara, eiya dablenel. Wera, Kristus nong amba, alja yuba dona' nim emba leboka, alja nong enyek, igin kweboka buluk loboknya nera, nak an gigilamla. 1:25 Nara ban yuba dona' nimi wa wenya seleb dasa' ara, Imik Neyung adya nak wa nenyek alja yub amba hyak muna' gobdo ugunuk wero balalul senemok adya an yuba lenya dasa. 1:26 Nara yuba lenya dasa ara, ban youma' gibna' gong ek ab ara mouruwoka, me mengewoka nang en lika nang en lika ubgiga yek ab mouruwoka gunuwoka doknomoka' anyek, lebnun aboka dangamsa. Bok wenera Imik Neyung adya alja muna' Imik Neyung mab ek ban doknomok ara, laga amalesil. 1:27 Dara, Imik Neyung ara, yok-yok mok soko nimi nidya' ak, alja mab ak ban gunuwoka doknomoka' ara, har so dub uboka, senenggoma' ulumla' anyek amalesil. Dara, gunuwoka doknona' ara ban: Kristus ara ugun lomok ulusil. Ban Kristus ugun lomok ulusil ara, peroba' senenggoma' ak ganya wena' diba' ara an. 1:28 Dara, ban benyek, nunda nim ek neklesab. Nidya' yok-yok geremseng adya wenewoka, neklesab ara, nimi yok-yok Kristus lomok una' anyek muna' kabnok aboka unulumab. 1:29 Wera anasa, nara ban nenyek unuwoulul aboka, nadya migib nidya' yeiriwoka, ono' alja migib na lomok welenel anyek sunuwoka, an unuwaso senewoka welemna.
2:1 Anasa nadya senelamna ara, har so duboka yeiriwoka ugunsamba welesin anyek, ugunda ella danasom. Anya, sik Laodikia sam ulumak nim ab, nidya' na hogung eibnenggunyek nim eneba, anyek ella danok senelamna. 2:2 Sikda nidya' yok-yok pe ella ubnamaakanya dib mel-mel aboka dib senena' diba' dosulul aboka, anya ono' sikda Imik Neyung adya men laga danggumoka', al Kristus nong anyek pe ella ubnemak aboka, sikda ganya lomok sangabdangoka, wana' ubdangoka ulunok senelamna. 2:3 Dara, nidya' geremseng uboka, ella dangoka pesina' damok ara, alak danyek ulumla. 2:4 Ban wenyaboka lebsinya nera, dib nonggom yub bok, alda ugunuk pero-pero maka' lelewoka, sonda' bok, bobleregeisijek aboka lebna. 2:5 Wera na nong anaba ugunublaboka neika' unggulumab bok, ganya ak dara, nara ugunub neika' ulumab. Anya ugunja Kristus ak dib senewoka migiba' ululum ab, ugunja ganya pe meebdangoka ululum dara, nara eiya dablenel. 2:6 Ugunda Kristus Yesus ara, Wenelesilnya aboka seleb dolum anasa, ugunja ululum ara alab neika' kwebdangoka ubgiga balalulum. 2:7 Hnonda ugunda alak yareng elegoka, ono' al ab migib danggiga balalulum. Anya ugunja dib senena' ganya ara, ugunuk nekesika' sunuwoka, migiba' nenewoka, eiyasa' soba' gibildolunun ganya hogung enyek soba' boro balalulum. 2:8 Dara youma' uru balamek yub eb, sokok an nimi sirika' ganya ak ab yub ara, Kristus adya senenggululanya bok, or orok salya' hwam yub adya, ugunja ganya ek henga goubsijek anasa, pe keeboka ulumnelum. 2:9 Hnonda Kristus alja nong yoka' ara, Imik Neyung ganya ulumla' nidya' ara alak gobdo ulumla. 2:10 Anya ugunda al lomok ululuma' adya hyak muna' gobdo pebdaksuk. Hnonda, wenewoka bo usina', senenggom dub una' nidya' amba dara, alak danyek, huka, dubnya, ulumla. 2:11 Ono' hnonda al pik ab uboka, ugunda ugunja bola' garawousuk ara, nim adya garalesak soknya nenyek unuwanggubsuk. Alda Kristus adya garalasilnya nenyek unuwousuk ara, wera malya una' nong an gwiriwoka loblum an. 2:12 Anasa wera, ugunda meka dasik dara, alab neika' soko lokiyiwosuk. Anya ono' Imik Neyung migiba' adya somokna' gangganek ab, weboka bukiyiwok migib enyek, ugunda dib senewoulum adya, wera ono' ugunda alablaboka neika' subuka bukiyiwousuk. 2:13 Dara ugumbabya youma' dara, ugunja meknena' hnon ugunja soba' malya ululumnya lomok uboka hnon, anedya ugunda seleb somogoka ululum bok, wera Imik Neyung adya Kristus ab neika' seleb embenga' gebsuk. Anya, nunja meknena' hwam malya una' nidya' doboka bobogosuukanya, 2:14 nuk igina berewoka, kweldisina' yok-yok sunuwoka memewoka, an lelemla sunuwoka, deklulum aboka yeirilisuknya nera, alja bo somogok gal ak paku bokoka' adya, wera alja orok nenewoka seleb lubsuk. 2:15 Ban ona' gal pik uboka dara, wenewoka bo usina', senenggom dub una' ab dara, seleb alja alawoka dobok. Anya ban unuwoka oblamagousuk ara, sikenek salya' longowoka ngoulukna' dok. 2:16 Anasa, ugunda nim adya dena' amba gom, mek amba gom, perob sum emba gom, Sabat mem sum emba leboka, yana lelewoka igina kweiyiweisijik anasa, mem. 2:17 Dara ban nidya' ara, eimik lanawanamla' sununa' ek ulumla, bok hyak dib nong ara, Kristus ak ulumla. 2:18 Dara, ugunja oblamakna' ara, or-or uboka sene ganya sokok nenebdangoka, lero nang ek giboka, golokna' dib eillilimaka' anyek sunuwoka, sikja sokok unuro yaban ganya enyek, bekna' orok bok nauba nonggo abdangoka ulumak nang edya, ugunja oblamakna' ara orok neneweisijik, mem. 2:19 Dara, sikda hukuk ara, pe salalmoubnenggulumak. Bok hukuk ab ara, nonga nidya' hiboka, mel-mel ab nolong gwerena' ab dadya, neika' pero welemaka' adya, Imik Neyung bedya ak nelemla. 2:20 Ugunda Kristus ab seleb neika' somogoulum adya, wera sokok an nimi sirika' ganya ek ab seleb blebdolum dara, hekasa ugunda sokok an anam ulumna' anaso anyek, yoka'-yoka' memewoka unulumaknya nek an keboka unululum do? 2:21 Hnonda ban nera soruka salana' mem, nera delyamana' mem, nera belekna' mem, anaso wenyaboka memelemaknya nera, ugunda hekasa keboka unululum do? 2:22 Ban nidya' ara, boboka ulumak adya, anera denghenelanya nek ulumla. An nidya' ara, or orukna' yub ab, nim adya ok neklesaknya nek lelemak. 2:23 Ban unulumaknya nera, sikja giblemaknya hnon, ganya sokok neneldalamaknya hnon, nong oldalamaknya nera, geremseng senen bok, sokok an unulusinya ganya hmenga nenenggulumla.
3:1 Dara, ugunda Kristus ab ganya neika' subuka bukiyiwosuk anasa, Kristus ara, Imik Neyung alja sirik soruk imik bulumla ak, imik sam ululanya nenyek elelulum. 3:2-3 Ugunda seleb somogolumukanya, ugunja ululuma' ara, Kristus lomok beiyiwoka, Imik Neyung ak ulumla anasa, sokoknya nenyek gom, alda imiknya nenyek seinililulum. 3:4 Dara, nunja embenga' ulumaba' Kristus ara, eimik laga nenebdalya dara, ugumbabya alablaboka alja senenggoma' una' ak sam neika' laga nenewanesil. 3:5 Anasa, sokok an ulumaka' yoka'-yoka', gela meknewoka salana', sembeja' neneldana', salye' unulunun ganya hwam ab, malinya nenyek unulunun ganya, nak nauba dangalanulul ganya ara, salya' ak gibna' ganya era, ban nidya' ugun lomok ab ugun dam nang adya somogiyiwanalum. 3:6 Ban nidya' ara, Imik Neyung adya yu ganya damok lanalamla. 3:7 Dara, youma' era, ugumbabya ban nenera unuru balalum. 3:8 Anasa dara, yu ganya, yu sen-sen ana', yok nang ek malya una', deresina', sembeja' yub ugunja sibama' ak ab lanelelanya, ban nidya' ara, wenyek boboganalum. 3:9-10 Ugunda youma' ululum ganya nong ek dara, seleb gwirib loblum anasa, anya wenyok ganya nong una' era, alja uyimoknya bedya ganya gigiwoka ella ubnok aboka, sob-soba' wenyeknya gebgiga balasil anyek, seleb ongowolum anasa, ugunda sonda' leldana' ara mem. 3:11 Ban nenyek dara, Yunani Yahudi nang gom, bola' garaweknya oroknya gom, yu hwam nang Skit nang gom, wa wenya oruknanya gom, ban wenyaboka si singgulumak bok, Kristus ara ban nidya' amba damok ulusilekanya, alda sik nidya' lomok ulusil. 3:12 Wera anasa, Imik Neyung adya alja angoo yadyek ulusuukanya, geisa nenewoka weboka dobsuk nim gekneba' uboka, yadyek senen ganya, angoo senewoka men aran ganya, ganya sokok neneldan ganya, nonga namena' un ganya, soba'anya senewoka or malye senen ganya, ugunda ban ganya danyek bololulum. 3:13 Dara neikek, hnonda nimi be hnon yok nim ek alba dirigonun senewanamla dara, or meewanasil dara, malya ubdangamunya nera, meebdanalum. Imik Neyung adya ugunuk malya una' meewousuk sok, ugumbabya neiksonya nenyek unulululum. 3:14 Anya ban nidya' amba dib nongnya nera, wana' uldana' anyek, neika' hiboka muna' pe goublesila' anyek, ganya enyek soba' bololulum. 3:15 Ugunda hnonok nong una' ulunok aboka, seleb youbosuk anasa, Kristus adya' namen uboka neika' hiboka un ganya anyek, ugunja ganya lomok soba' orugoka bo ulusulul. Anya soba' perob aboka giblelulum. 3:16 Wera Kristus adya yub enyek, ugunuk soba' sounubgiga balasulul. Dara, yoka'-yoka' muna' gobdo geremsenga' adya, ugunda yok nang ek nekoka, wenebdangoka ulululum. Anya, mazmur ber adya hnon, yok giboka sebna' ber edya hnon, yub dona' ak geklen ber edya hnon, ugunda Imik Neyung ak perob aboka bera danedya seboka giblelulum. 3:17 Dara, ugunja yoka'-yoka' nidya', yuba sana' adya gom, soruk adya wena' gom, unuwanalum dara, ban nidya' ara, nunja neyung Imik Neyung ak, al pik uboka perob aboka giboka, nunja Wenelesilnya Yesus bedya si sibuka unulululum. 3:18 Wei, gelewa o, ugunda Imik Neyung adya perob senelamla sunuwoka, ugunja' nenyab ak, alja bo ulunel senewoka ganya sokok neneldalulum. 3:19 Wei, nenyab o, ugunja' gelewa ak hyak wana' uboka, sikenek gasa sonya nera ununggom, mem. 3:20 Wei, memab o, ban nenyek dara, Imik Neyung ara perob senelamla anasa, ugunja nauba nim edya yok-yok yuba nidya' ara, pe keboka unulululum. 3:21 Wei, neyung yab o, sikja ganya angoo senewoka soloma dabijek anasa, uguna' memab ak ganya yu nenenggom, mem. 3:22 Wei, wa arawoka wena' nang o, ugunja sokok an neyung yab edya yok-yok yuba nidya' pe keboka unulululum. Sik hogung ak ganya pel dilinun senewoka nenyek ok ununggom, alda Imik Neyung ak lok ganya boboka, ganya goulubmouboka pe unulululum. 3:23 Anasa ugunja heka' ok unuwanalum dara, nim amba goma', alda Imik Neyung amba senewoka ganya gouluwoka welelulum. 3:24 Ugunda Wenelesilnya Kristus amba wa welelum anasa, ugunda na an welemna wa nemba dara, Imik Neyung bedya beibnyoka' ak dekna' dobnamna senewoka ella ulululum. 3:25 Anasa, Imik Neyung ara alda nimi hogung ak kemewoka perob senenggulululanya anasa, meknelelanya bera, ban meknelemla' damok sunuwoka dobnamla.
4:1 Wei, neyung yab o, banyek beklemnelum, imik heik ara ugumbabya ugunja neyung be ulumla' bekoka, anya wa wen nang ek ara, pe sunuwoka dom digumnya nenyek unulululum. 4:2 Heng uboka molona' ak dara, bojam ulmoublululum. Anya, perob aboka giblemunukanya, pe diri uldalalalulum. 4:3 Imik Neyung ara nunja wenyaro yabalamaba' amba pika baklul aboka, nunsamba heng uboka mololosululum. Nunda ban Kristus an doknomoka' anyek, anesemba leboka na henga goubnyeka' anyek, wenyaro yabalemnemab anasa, mololosululum. 4:4 Ono' nara wenyhenesinya' sunuwoka, pe laga leboka neklesunun aboka, mololonululum. 4:5 Ugunda yok nim ek ara, geremsenga' peroba' adya ok ulululum, anya wen an ubla salek ululanya nera, pe salawoka unulululum. 4:6 Ugunja yuba sabneluma' anaba, wana' un yub ok namen lebnalum bok, ono' angawom ana' diba' gasa sonya hnon salalulum. Anedya yok nimi nidya' ak yuba sabdanalum dara, heka' uboka saawoka sabnamna senewoka ella ubnalum. 4:7 Nak yoka'-yoka' unulunelnya nera, Imik Neyung wa bojam uboka neika' welemabnya, nunja' hem wana' nongnya, Tikhikus bedya ugunuk neknesil. 4:8 Alda nadya ugunuk bilom aboka orugamna' ara, ugunda nuk unulusaka' anyek ella ubnelumukanya, ono' alja ugunuk ganya hek elegousulul aboka orugamna. 4:9 Alda ugun gangganeknya, be hnon bojam uboka wana' ulumabnya, Onesimus beb neika' binirum aboka orugeisin. Wera anyagan yoka'-yoka' nidya' unulusila' ara sikja neknesirik. 4:10 Nadya hembe neika' henga gouboka doronggeisiknya Aristarkus bedya hnon, Barnabas, alja dong bedya me Markus bedya hnon, ugunuk gibisirik. Alsamba dara, ugunuk seleb wenyasika' anasa, yanamla dara, ugunda peroba' leboka ubnelum. 4:11 Hnonda Yesus benyek, Yustus aboka silimaknya bedya hnon gibisil. Wera ban winilya nang danyek, seleb bola' garaweisik nang ek, sikinok nadya' hemyabo dangoka, Imik Neyung wenesin heik amba leboka neika' welemabakanya, sikda nadya ganya gwelelek ana' nang ulumak. 4:12 Hnonda ugun gangganek abnya be hnon, Kristus Yesus amba wa wenya, ugunsamba mel-mel aboka seklemeijikanya, ganya kana' nang dangoka Imik Neyung adya senelamla' nidya' anyek, ganya muna' gobdo olowoka ella ulumak nim ek ulunok senewoka, ugunsamba soba' yeiriwoka mololosilnya, Epafras bedya hnon ugunuk gibisil. 4:13 Nara alsamba leboka laga lebnamna, alda ugunsamba hnon, sik Laodikia ab, Hierapolis ab, ulumak nim emba leboka, hyak yeng ganya boboka pe welesilnya. 4:14 Hnonda wana' ulumaknya hwesinya Lukas bedya hnon, Demas bedya hnon ugunuk gibisirik. 4:15 Nunja perob aboka gibsab yub era, Laodikia ulumak hemyabo nim ek hnon, Nimfa beb, yuba dona' nim alja' ek dolomak nim ek hnon, perob aboka gibisak aboka wenyhenelum. 4:16 Anasa ban ugunuk beisab surat en ugun einibgogowomun dara, ono' sik Laodikia sam yuba dona' nim ek hnon einiwanok aboka beibnelum. Anya sik Laodikia nim emba beiyimabnya neneba, ugunda hnon einiwanalum. 4:17 Dara, Arkhipus bek anaba wenyhenelum, Wenelesilnya amba doblum wa nera pe keeboka nidya' pe welesilom, henelum. 4:18 Nara Paulus bedya gibsin. Ban gibsin yub era nadya soruk nong edya webemna. Nak henga goubnyeka' ara soba' seinilinulum. Wana' uboka eleksina' ara, ugunuk ulusulul. Amin.
1:1 Paulus beb, Silvanus beb, Timotius beb dadya, Tesalonika heikek yuba dona' nim ek momnya dona' en beibsab. Ugunda Imik Neyung lomok ululumukanya, Wenelesilnya Yesus Kristus lomok ululum. Dara, wana' uboka eleksina' hnon, namen ganya bona' hnon, ugunuk elegousulul. 1:2 Nunda mololomab dara, ugunja si silimabakanya, Imik Neyung bek ugun nidya' amba sob-soba' giblemab. 1:3 Ugunda dib senewoka wa wena' ak hnon, ugunda wana' uldalaluma' ak hnon, ugunja Wenelesilnya Yesus Kristus yanamla senewoka ganya mel-mel aboka salalmoubleluma' ak hnon, banera nunja neyung Imik Neyung saramek sam soba' beklemab. 1:4 Imik Neyung adya wana' ulusil hemyab o, Imik Neyung adya ugunuk weboka dosuka' ara ella ulumab. 1:5 Nunda ugunuk perob lero yanggan yuba lelemouba' ara, sibama' adya ok lenggulumouba. Alda migib adya, Geisinya adya, ban yub enera hyak dib nong senewoka leb elegesuba. Ugunuk pewosulula' aboka, nunda ugun gangganek ara, heka' huboka ulumouba' ara, ugunda pe ella ululum. 1:6 Ugunda Imik Neyung adya ununa' hnon, nunja ununa' hnon diliga' doboka ululum. Ugunda hyak yoka'-yoka' adya geregoka igina nauba kwelesuk bok, nunja perob lero yanggan yuba ugunuk lero youb dara, perob ganya boboka eiyasa' dolum. Dara ban ei-ei ganya ara Imik Neyung Geisinya adya anara elegousuk. 1:7 Ban ugunja unuwoluma' nong adya, ugunda Makedonia Akhaya yuba dib senemek nimi nidya' amba sununa' diba' ublum. 1:8 Anasa ugunub anyeb uboka, Wenelesilnya bedya yub era, mok balamoka' ara Makedonia mok eb uboka, Akhaya mok oboka lelewok. Dara ono' nenyek ok gom, alda ugunda heka' huboka Imik Neyung ak dib seneluma' ara, yok-yok mok soko nimi nidya' ella deka' adya, wera nunja dara, ugunsamba dara anaso-anaso unulumak henggunusibya. 1:9 Nunda youma' ugunuk sam yuba bo yanggumouba dara, heka' huboka nuk ugunja peroba' leboka dosuluma' ara, nimi nidya' sikda anaso unumek aboka neklesak. Nimi nidya' ara, ugunda heka' huboka, bisa' ak molowoka gibna' loboka, Imik Neyung hnonok ululanya bek alak ok dib beiliwoka ulunoba' aboka nidya' ara lolumnya nenyek, sikja dara unuwek aboka neklesak. 1:10 Dara ono' al ugunsamba yok nim edya dara, imik ululanya Imik Neyung bedya, nera Yesus anyek, Imik Neyung adya nimi somokna' ak ab embenga' suboka bukiyiwoknya benyek, al yanamla' amba leboka, ugunja ganya nebom aboka diri ululumnya nenesa unulumak aboka neklesak. Dara ban Yesus anedya, Imik Neyung adya yu ganya boboka obnesila' ak ab nunda blebnesil.
2:1 Na kabo nim o! Ugunuk se' yeilimouba' ara, salya' lelem danggumoka' ara, ugunda ella ululum. 2:2 Nunda anam Tesalonika heikek yanggumouba salek era, men dara Pilipi heikek ulumouba salek enyek, nim ara nuk derelesik, olosika' ara, ugunda ella ululum. Nimi nauba nuk ara lek aboka lelesik bok, Imik Neyung adya' asa' ganya elegosuka' adya, ugunuk perob lero yanggan yuba lelesuba. 2:3 Dara, nunja ugunuk unuwanalum alamaba' ara sonda' amba leboka, ugunja ganya bob leregeisinoba' aboka lenggulusab. 2:4 Orok. Imik Neyung adya dara, nuk anyek perob lero yanggan yuba lebnoka' aboka lobonggosuka' anasa, banyek bekoka lelemab. Lelemaba' ara, nimi ganya perob senewanoka' aboka lenggulumab, alda Imik Neyung nunja' ganya ak anaba sunulusilnya benyek perob senewolula' aboka lelemab. 2:5 Nunda ugunuk ara perob-peroba' yub edya meka lelewoka lebnenggusuba, oroka' anaba malya ubsinob senewoka hnon, ugunuk bob leregiyiweisinob senewoka Imik Neyung yuba leb eleganggubsuba. Imik Neyung ara ella ulumla! 2:6 Dara ono' nunda nim adya gigilesinoka' aboka hogunga bo enggulumouba. Nera ugunja hnon, yok nim edya hnon unuweisinok senewanggumouba. 2:7 Nunda aldib Kristus adya yuba lena' gak nang ulumaba' anasa, aldib ugunuk an yoka'-yoka' elegosululum aboka molowanasisibya. Bok, nimi gela hnon alja mab ek bojam uboka pe bo ulumla sok, nunda ugun gangganek an ulumouba dara, perob ganya boboka namena' anyek unulusuba. 2:8 Nunda ugunuk hyak wana' ulusubnya nenesa leboka, Imik Neyung adya perob lero yanggan yub ok leb eleganggusuba, alda nunja nong una' enyek babya elegesuba. Ban nenera nunja ugunuk wana' nauba ulusubnya nenesa usuba. 2:9 Nunja ugun gangganek an nauba yeiriwoka duboka welemouba' ara, ugunda seleb bekleluma' anya'. Nunda Imik Neyung adya' perob lero yanggan yuba ugunuk lero yeilisuba sum era, ugun nang enyek malya nenewoka obnebsibyek senewoka, inimnek yubyek pik nunja yeiriwoka welemouba. 2:10 Ugun Kristus ak dib senelum nimi gangganek ara, nunda geisa' uboka, hyak pe unuwoka, si gegena pona' loboka, ulumouba. Nunja unu ulumoubnya nera, ugumba seleb eillilisulum, hnonda Imik Neyung anaba ella ulusil. 2:11 Nunja ugunuk unulusuba' ara, nimi ben hnon alja mab ek pe unulamla sok, nimi yok-yok sunuwoka pe unulusuba' ara, ugunda seleb ella ululum. 2:12 Nunja ugunuk pe unuwoluluma' aboka wenewoka, ugunda Imik Neyung ak anyek pe ganya hekel elekleluluma' aboka, duka' lolom-lolom alasub dara, hnonda wenewoka unuwanalum alamouba. Anasa ban leboka Imik Neyung ara alja perob heikek wekoka, alja unulamla ununa' era, ugumba unuwoluluma' aboka youbsuk. 2:13 Ugunja hnonok pe unululuma' anyek nunda eiyiwoka Imik Neyung ak soba' giblemab. An wenyhena' ara, nunja ugunuk Imik Neyung yuba leb elegesuba sum enyek, ugunja keboka doluma' ara, nimi sirika' yub anaso ganya boboka dobnenggulum, alda Imik Neyung nong adya yub dib senewoka doluma' nong amba Imik Neyung giblemab. Wera ugun Kristus dolum nimi gangganek an wen welesilnya nera ban Imik Neyung yub enedya welesil. 2:14 Nadya' hemyabo nim o, ugunuk an igina kweboka malya nenelesila' ara, Yudea sam Imik Neyung yuba doboka, Yesus Kristus mabo dangamek nim eneba unulusil. Ugunuk an igina kwellilisaka' ara, ugunja' meneng mok nang edya ulusak, dara Yudea sam yuba dolomak nim igina kwellilisaka' anaba sikja mok nimi Yahudi nang edya ulusak. 2:15 Wera ban Yahudi nim era, sikja Imik Neyung adya' ununumna' lelemek nang nauba olomeka' ara, ono' Wenelesilnya Yesus anaba obeka' ara, wera nuk anaba malya nenewoka saboka olosak. Sikja dara, nidya' mok soko nim ek isa' nenelesaka' anasa, Imik Neyung adya sikenek lek senewoka yu ganya bolosil. 2:16 Oroka' anaba nunja Yahudi gom soko nim ek, nimi blebsin Imik Neyung yuba leb elegeisinoba' ulumna enyek, sikja pika garawoka malya nenelesik. Wera ban unulumaka' adya, Yahudi nimi malya una' ara nauba dangoka einildakna' okna dangalamla. Anya wera sikda Imik Neyung adya yu ganya boboka obnesin senelamla. 2:17 Bok nadya' hemyabo nim o, nunda ugunub se' amba bokdangoka ulumab salek eba' ara, heng kemena' mok anasa ububa bok, ganya ak dara, neika' ok ulumouba. Nunda ugunuk eibsisibya senen ganya nauba boboka, ugunub ok ab eibdeisibya senewoka nauba dulumouba! 2:18 Nunda ugunuk kemel yanasab senewoka ulumoubukanya, anya nak dara, li hnonok penya anaso sunuwasebok, Iblis adya pika garab menegoka ubnyok. 2:19 Ugun nong anyek, nunja' ganya nebom ana' diba' uboka, eiya dabna' diba' ululum. Anasa wera, Wenelesilnya Kristus yanamla sum era, ugunuk danyek nunja' perob bona' diba' danaluma' ak ululum! 2:20 Anasa ugun nong anyek, nunja' perob bona' diba' anaso ululumukanya, nunja' ei-ei ganya nenesina' gak nim ululum!
3:1 Dara, nunda go' ubdaboka ugunuk ab yuba kebnenggubibyek aboka, wera Atena heikek an numbeyok or lobsulul senewoka, 3:2 nunja hem be Timotius bera ugunuk boksunum. Alda Imik Neyung amba wa nub neika' Kristus amba perob lero yanggan yuba neika' welemabnya bek ulumla. Nunda Timotius benyek ugunuk bilom aboka boknama' ara, alja ugunuk pe unuwanalum aboka wenewoka bo uboka, Kristus anyek dib ganya ologoka ulululuma' aboka, al adya ganya migiba' geblemnesil aboka bokonam. 3:3 Wera anadya nunja wen an igina kwelesilnya nenesa leboka, ugun gangganek ara, nimi hnon nang era Kristus ak ganya kweboka una' ara lobmunuk aboka bokonam. Ban unu igina kwelesila' ara, Imik Neyung adya hnon unuwanasil senemoka' ak ulusila' ara ella ululum. 3:4 Nunda neika' ugunub ulumouba sum era, nunda eimik era igina nauba kwebnesila' ak yuba dobab asuba' ara ugunda seleb ella ululum. Wera nera aldib gigiwoka ugun gangganek an unulusila' ara, eillilelum. 3:5 Ban nenesa leboka, ugunja Kristus ak dib senebgiga balaluma' anyek, pe nauba unulumaka' oroka' anyek ella donuna' aboka, Timotius bera ugunuk an bilom aboka orugamsa. Bisa' adya nunja duboka welemouba wa nera sunuweisilya enyek malya uboka, salya' lelem dalyek senewoka lok ganya bomsa. 3:6 Wera Timotius bera nak seleb yeiniboka ugunda Kristus ak heka' huboka dib senewoka uboka, ugunja wana' uldalaluma' ara, perob yub enera neksuk. Dara ono' Timotius bedya nuk ara, heka' huboka pero-pero unululumnya nenyek, anya nunja ganya edya dara pelemak senenya nu beklemnemab senelelumnya nenyek seleb neksuk. Anya ugunja dara nuk sikeneb eibdeisibya seneleluma' ara, nunja' anaba ugunuk eibdeisibya senelemab sok ulululuma' aboka neksuk. 3:7 Hemyab o, ban nenesa leboka, nuk yoka'-yoka' adya igina kweboka, okna berelesila' anaba, ugunuk pe ulumak ana' kelemaba' adya, ganya sangal eleklesil. Ugunja Kristus ak dib seneleluma' adya, nunja ganya nauba perob senelemab. 3:8 Alda ugunuk Wenelesilnya beb neika' kwebdangoka uboka, gasa' anyek pe ululuma' anasa, nunda aldib pe ulumnemab. 3:9 Wera ugunja pe ululumnya nenedya, Imik Neyung saramek sam nunja alak perob aboka giblemaba' ara hyak nauba dangoka ulumla. 3:10 Ugunja Kristus ak dib senena' anyek nunda ugunub ok eibdangoka, hnon ono' mak sounuwoka neksisibya senewoka, yubyek inimnek pik moruwoka Imik Neyung ak nauba mololemab. 3:11 Wera nunja' neyung Imik Neyung yoka' ab, nunja Wenelesilnya Yesus adya, ugunub neika' ok eibdanamab pik era yarawousulul! 3:12 Wenelesilnya bedya migib edya, nunja ugunuk wana' ulusab sok, ugun moumen wana' nauba ubdangoka, anya ono' nimi yok nim ek wana' ubgiga balamuna' adya, wera anadya ugunja wana' una' nauba danggiga balalul senelemab. 3:13 Wera anadya Wenelesilnya Yesus ara nimi nidya' alja' yoka' dangalamak nim eb yanamak sum era, Wenelesilnya bedya ugunja ganya migiba gebiyiwanesila' adya, nunja' neyung Imik Neyung saramek sam, nuk dara geisa' anyek uboka, si gegena' pona oroka' ak dangiyiwanesil.
4:1 Na kabo nim o, wen sidya' lebdaknesin. Imik Neyung perob senewosulula' aboka anaso unulumnulum ara ugunuk nekesub dara, keboka wen unululum. Dara, wenyok Wenelesilnya Yesus si sibuka, soba' nauba so dolula' aboka, ono' unul sounululuma' aboka, duka' lolom-lolom alasab. 4:2 Wenelesilnya Yesus bek ab hek orukna' yub ak ugunuk elegosuba' ara, ugunda ella ululum. 4:3 Imik Neyung senelamla ara, nadya mabo geisa ulunok senelesil, anya yok gel salana' hyak lek senelesil. 4:4-5 Imik Neyung elgom ulumak nim era, gel ganya nauba bolomak sok unggom. Ugunda nidya' ara ugunja nonga geisa ululula' aboka, pe eboka pe unuldalamnalum. 4:6 Ban orukna' yuba blekoka yok nim ek malya ununggom. Ugunuk seleb yuba sekoka lesuba sok, Imik Neyung ara ban malya una' amba yu ganya boboka obnesil. 4:7 Imik Neyung ara malya ulunoka' aboka youbnenggusuk, geisa ulunoka' aboka youbsuka' anasa, ban anaso unggom. 4:8 Anasa, ben hnon ara ban yuba blekoka lolomla dara, nimi yub ak gom, alja Geisinya eleklesil Imik Neyung bedya yub ak blekoka lolomla. 4:9 Imik Neyung adya ugun kabo nim ek wana' ubdanalum aboka seleb nekesuka' anasa, wera, ban yub en ono' momnya dobnenggunusibya. 4:10 Al dib, ugun kabo nimi Makedonia sokok ulumak nimi nidya' ak wana' ulusulum. Bok, hemyab o, nauba so unul sounululuma' aboka duka' lolom-lolom alasab. 4:11 Ugunuk seleb wenyamouba sok, namena' ulumnulum. Yok nim edyinya nek doboka salya' makal banggom. Ugunja soruk adya ugun dam nang wa welemnelum. 4:12 Dara, soba' anaso pe ulumneluma' adya, yok nim era perob senelemnesak. Anya, yok nim ek arawananulum aboka soba' molonggulumnusom. 4:13 Na kabo nim o, seleb somogek nim era hek so ulumak do aboka ella danasom senelemab. Sikenek perob dangana' unggulumak nim era, nauba engelemak sok unuwanggunusom. 4:14 Yesus ara somogoka ono' embenga' welemoka' ara dib senelemaba' anasa, Imik Neyung adya alja mabo men somogomek nim era, Yesus ablaboka bob mamagiyiwanasila' ara dib senelemab. 4:15 Wenelesilnya albeyok wenyasuk sok wenyhenesab, Wenelesilnya yanamla sum era, anam embenga' ulumab nim era men somogomek Imik Neyung mabo mengeb hwibnenggunusab. 4:16 Wenelesilnya bera imik ab yingginiboka bii aboka, lero dubnya wenyaboka, Imik Neyung benggong yuba leblya dara, somogomek nimi Kristus mab ara men welewanamak. 4:17 Ana berem ara, nu anam embenga' ulumab nim era deba' hnoum sikenek bob mamagiyiweisilya dara, Wenelesilnya bera imik sam eb hwibdanamab. Dara, Wenelesilnya ablaboka sob-soba' ulmoublomnamab. 4:18 Anasa, ban yuba lebdangoka ganya hekellildalamnalum.
5:1-2 Wera na kabo nim o, Wenelesilnya yanamla sum era, nim adya hoka' dolomak nim inimnek gelelenga yabalamak sok, al yanamla' ara, ugunda pe ella ululuma' anasa, yoka'-yoka' unulumnamla salek era, ugunuk momnya doboka elekdanggunusibya. 5:3 Nim ara "Pe ulumab e, obnenggunusil e," senelemak salek enyek, wene sab-sab sikenek orok nenewanasil. Me beibnamna gel gek me juga gweklamla sok, sikenek unuwoka merewanggunumak. 5:4 Bok, kabo nim o, ugunda guna' ak sam unggululuma' anasa, ban sum era hoka' dobnun senelelanya bedya gelelenga yalamla sok, ugunuk yanggunusil. 5:5 Ugunda nidya' dilina' mab siliba', yubyek mab siliba' so ululum. Nunda inimnek mab siliba' guna' mab siliba' unggulumab. 5:6 Anasa, nimi salya' hogunga malamak sok unuwanggunumab. Bok pe keebmoubuka pe diri uldalamnamab. 5:7 Hogunga malamaka' ara, inimnek enyek malamak. Ganya uu alasil mek deregoka ulumak nim era inimnek unulumak. 5:8 Bok, nunda dilina' mab siliba' ulumaba' anasa, nunda pe diri ubdangoka, dib senen ganya ab, wana' un ganya ab, seng anaso' enegoka, dib blebnesil senen ganya adya huk golubdangoka ulumnemab. 5:9 Imik Neyung ara yu ganya boboka obsununa' aboka dobnenggusuk, nunja Wenelesilnya Yesus Kristus adya dib blebsulula' aboka dosuk. 5:10 Dara, nunda embenga' ulumab gom, seleb somogomeibya' gom anaba, soba' Yesus ablaboka ulunoba' aboka, nunsamba somogosuk. 5:11 Anasa, seleb unuldalalum sok, ganya gwelelek aldalamnalumukanya, migiba nenellildalamnalum. 5:12 Wera, kabo nim o, ugun gangganek wa nauba welemak nang era, Wenelesilnya bedya wa nenyek, ugunuk mengewoka welesak nang era sikenek gigilelulum e, alasab. 5:13 Sikja welemaka' anasa, wana' uboka sikenek hyak perob aboka seinililulum. Waldana' oldana' loboka, pe hiboka neikek ulumnalum. 5:14 Na kabo nim o, hnon ara ugunuk duka' lolom-lolom alasab, Salya' ulumak nim ek yuba seklulum, lok ganya bolomak nim ek ganya gwelelek aboka leblulum, hmeng ulumak nim ek arawolulum, nimi nidya' ak, yongon ganya boboka berra ununggom. 5:15 Malya ubnyok senewoka, ono' saawoka albabya diriganamna seneweijek aboka, pe kemero ulumnelum bok, ugun dam nang ak hnon, perob dolula' aboka unulumunjok ono' nimi yok nim ek hnon, perob ok unulumnalum. 5:16 Ei-ei ganya bolmorulumnelum. 5:17 Sob-soba' molololulum. 5:18 Yesus Kristus mab ululuma' anasa, nidya' ulusilnya nemba, giblelulum. Imik Neyung ara nenyek perob senelesil. 5:19 Geisinya unulusila' ara lolongnonggom. 5:20 Imik Neyung adya nim ek eleklesil yub era malye senen ganya bonggom. 5:21 Yoka'-yoka' nidya' sunuwomunukanya, peroba' ok gasa salabmoubuka ulululum. 5:22 Yok-yok so malya una' nidya' leiblelulum. 5:23 Imik Neyung ara neikek hillilisilnya, al adya ugunuk gobdo hyak geisa nenewosulul. Nunja Wenelesilnya Yesus Kristus yanamla sum amba, ugunja ganya hnon, ugunja nong una' hnon, ugunja nong eb hnon, nidya' hiboka hyak perob nongnya nenyek bo ulusulul. 5:24 Youblesilnya bera bojam unulmorulesilnya ulumla' anasa, unubdaknesil. 5:25 Na kabo nim o, nunsamba mololesululum. 5:26 Nun kabo nim sikda nidya' ak, nunsamba giblulum. 5:27 Wenelesilnya si sibuka, ban momnya enera na kabo nimi nidya' kebnoka' aboka, siksamba einiwoluluma' aboka orugeisin. 5:28 Nunja Wenelesilnya Yesus Kristus, alja wana' uboka eleksina' ara ugunuk ulusulul.
1:1 Hem yabo Tesalonika heikek yuba dona' nim, nunja' neyung Imik Neyung mabo dangoka Wenelesilnya Yesus Kristus mabo dangalum nim ek, 1:2 nunja nara Paulus, Silas beb Timotius beb dadya dara, nunja neyung Imik Neyung beb nunja' Wenelesilnya Yesus Kristus adya wana' uboka eleksina' ab perob una' ab ara ugunuk ulusulul senelesab. 1:3 Hem yab o, nunda ugunsamba leboka soba' Imik Neyung ak perob aboka giblemab. Ugun nong anyek, Kristus ak nauba dib senebgiga balalumukanya, ugun moumen anaba wana' ubdanggiga balaluma' anasa leboka, wera wanoksodya nera unulumab. 1:4 Anya wera, ban unululumnya nenesa leboka, nunda yok Imik Neyung yub dona' nim ek kemero yabanek ab, ugunuk nekoka, sikda anaso unu yuba dib senewoka unulumak aboka nekdo yabalesab. Ugunuk nong ak dara, yoka'-yoka' damok igina kweboka, nauba gweklelum boka' anyek babya, Kristus ak ganya kweboka dib dololuma' ara dib mel-mel alamla' anasa, unulumak aboka nekdo yabalemab. 1:5 Ban nong adya, anyaganyeb danyek, Imik Neyung ara alda heka' huboka yana lelewoka bekna' dangalamla ara laga danamla' ara, Ugunda Imik Neyung wenesin heik amba leboka nauba igina kweboka gwekleluma' anasa, wera ugunda aldib Imik Neyung wenesin heikek weknelum nimi bekna' laga ulumla. 1:6 Imik Neyung nong ak dara, alda perob ok keeboka unululanya bek adya, ugunuk an igin kwel eleklesak nim ek ara, sikbabya lunuwoka igina kweb eleganesil. 1:7 Wen ugun an yoka' adya igina kwelesil nim ek hnon arawanasil dara, ono' nuk anaba neik so arawanasil. Anasa Imik Neyung ara imik heikek aba' ara alja' senenggom migib lero nang neika' hiboka yingginimak sum enyek unuwanesil, 1:8 dara alda imik ab uk boka' nang penya yeiniboka, nimi nidya' Imik Neyung yuba ganya dibla henggonggom uboka, Imik Neyung adya perob lero yanggan yuba lelesila' sunuwoka unggulumak nim ek ara, obnesil. 1:9 Ban unu malya unulumak nim era, Imik Neyung adya' si imik nenena' migib pik ab hnon mok nenewoka yaknesil dara, sikda mok somokna' heikek sam soba' ulmoublemnemak. 1:10 Ban nidya' ara, Imik Neyung ak dib senelemak nim edya gibnuna' aboka hnon, ono' alja muna' Imik Neyung mab edya nak gibnenoka' aboka yanamla sum era, ugunda nunja bo yeilimouba yub ek dib senewoka doluma' anasa, yok nim unuwanamaka' gangganek sam ugumbabya ulumnelum sum enyek, nidya' gigiwoka unuwanamla. 1:11 Ban nenesa leboka, ugunuk anaso unuwousulula' aboka, nunda ugunsamba soba' heng uboka mololesab. Nunja ugunsamba heng uboka mololesabnya nera, ugun nong anyek Imik Neyung adya ugunuk youbosuka' anasa, anaso unu ubseng senelelanya nenyek, gigiwoka pe ululuma' aboka mololesab. Anasa wera, Imik Neyung adya ugunuk aralesilya' adya, ugunja Kristus ak dib senemoub aboka welelum wa nidya' ara, pe unulumuna' adya pebgiga balalula' aboka, Imik Neyung migib adya ugunuk sam ak dara, alja senelamla sok gigiwoka unulusulul. 1:12 Wera ban nenyek unulumuna' adya, wera nunja' Wenelesilnya Yesus ara si imik nenewanalumukanya, ono' nunja' Wenelesilnya Imik Neyung adya' alja' wana' uboka eleksina' sunuwoka, nunja' Wenelesilnya Yesus Kristus adya ugunja si neneba imik nenewanasil aboka mololesab.
2:1 Nunja' Wenelesilnya Yesus Kristus yanggan yuba nong eb, nun nong anyek neika' ak bobmamaganasilikanya ulumnemab an yub enesa leboka, nadya okoka moloweisina' nong ara ban: 2:2 Yesus ara wera seleb saawoka yeilimok an yub emba leboka, ugunda berra lok ganya boboka ganya daldom-daldom ana' ara mem. Nera or yuba lesija' ak anyeb gom, ununumna' len nang edya gom, nunja' anaba ugunuk beillilesab momnya dona' ak anaba hnon wenyamek aboka ugunuk wenyheijek aboka lebna. 2:3 Anasa Yesus yanamla sum oka dalya dara, ban unurub damok enyek men laga danamla' ara, nimi nauba yuba domeijedyok ganya dangawoka malya danamak, hnonda Kristus ak sonda' amba bobnenewoka nara elgom aboka lebnamla, hnonda nimi malya una' dubnya bisa' heikek weklula' aboka, orowek gegeboknya bera laga goboka seknamla dara, ugunda yoka'-yoka' igin yaka' yanamlya' anaba ugunuk ara sonda' amba bobnenewoka lebsijek. 2:4 Wera, alda hyak dengdang ganya boboka, nimi malya nenewoka al nong nim adya giblemaka' anaso imik nenebdangoka, hnonda nim adya dara, Imik Neyung ak giblemaka' ara an senelemaka' nenebdanamla. Oroka' anaba al nong ara, Imik Neyung yoka' ek sam bukoka, nara Imik Neyung ara an aboka sonda' amba laga lebdanamla. 2:5 Wera nara ugunub neika' ulumouba salek, ban men ugunuk lesisa' anyek, ugunda pe seiniwoka beknelum. 2:6 Ban nidya' lebnanya nera wenyek mandewoka laga danganggulumla' ara, heka' adya gasa salawoka bo ulumla' ara, ugunda seleb ella ululum. Anasa Imik Neyung adya nimi malya nenesina' dubnya bera, wera or laga dolul senemnamla sum yenewalya dara, wera sum enyek, laga danamla. 2:7 Wenyek dara, nimi malya nenesina' nimi gangganek sam wa ara gelelenga wero yabalamla bok, gunuwoka welemla. Bok al ulumla' ara, soruka salalamla' anyek, gokgobok sam nenewalya dara, 2:8 wera nimi malya nenesina' dubnya bera alda laga danamla. Dara Yesus ara alja senenggom ganya nong senedya' uboka yanamla sum era, bisa' dubnya bera alja malya nenesin bolgamala' ablaboka si leboka obnamla. 2:9 Nimi malya nenesina' dubnya bera alda bisa' dubnya Satan bedya nimi malya nenesin migib eb lanawanamla. Dara ban nimi malya nenesina' adya dara, sonda' anasa leboka, yok-yok lok so migib ununa' ab, bekna' ab senenggom lok so' nauba uro yabalemnamla. 2:10 Bisa' migib anadya ok, yok nimi gong dara, nauba malya nenewanasil. Dara, nauba Imik Neyung adya' perob una' ak wana' uboka dona' ara lek aboka, blekoka perob senenggulumaka' anasa, somoganamak. 2:11 Lek aboka ulumaka' anasa, ban unu malya nenewanasil nim ek, Imik Neyung adya sik nonga somoganameija senen malya una' ganya ok dorongganesil dara, wera anadya nimi nauba ara alda senenggom sonda' yub anyek aldib senewanamak. 2:12 Wera ban unulumeija damok enedya, nimi nauba malya una' ak perob senewoka, dib yub ak dib senenggulumeija nim era igina boyiwanesil. 2:13 Nunja' hemyab Imik Neyung adya wana' ulusil nim o! Anasa, Imik Neyung ugunuk blebnesin senewoka weboka dosuknya nenesa leboka, nunda soba' Imik Neyung ak perob aboka giblemab. Ban unusuka' ara, Imik Neyung Geisinya adya, Imik Neyung adya' geisa mabo nenewoka, ugun nong adya Imik Neyung ak ab perob nong yuba hnon dib seneluma' adya ubsuk. 2:14 Ban nenesa leboka, nunja ugunuk perob lero yanggan yuba bo yeilisuba' pik uboka, Imik Neyung adya ugunuk youbsuk. Imik Neyung adya ugunuk youbsuknya nera, damok ara Yesus Kristus imik nenewanamak sum enyek, ugumbabya ugunja si imik nenewosunuk senewoka youbsuk. 2:15 Hemyabo nim o, wera anasa nunja ugunuk momnya dona' pik uboka gom, yuba sibama' adya laga nekesuba yub enyek, pe sekoka salabmoubuka ulululum. 2:16-17 Ugunda perobnya weboka, ono' perobnya nenyek unulululuma' aboka, nunja' Wenelesilnya Yesus Kristus adya, hnonda nunja' neyung Imik Neyung adya, soba' amba ganya sangab elegoka, nunja ganya migiba gebnesil. Imik Neyung adya nuk wana' ulusilekanya, alja' perob ganya edya, siklerob ganya boboka, perobnya nek ganya nebom aboka diri ulumab.
3:1 Anya wera, hemyabo nim o, nunsamba hnon heng uboka mololesululum. Hnonda Wenelesilnya bedya yub era, ugun dolum sok, li soba' nauba danggiga balamlyekanya, imik nenewanoka' aboka mololesululum. 3:2 Hnonda ono' nimi nidya' ara, Wenelesilnya bedya yub era, ganya eleleng aboka dib senenggulumak bok anasa, nuk yu hwam nim eb, nimi doluwoka malya nenelesak nim ek ab, Imik Neyung adya blebsulula' aboka mololesululum. 3:3 Bok Imik Neyung ara alda bojam hwam ok ululanya. Anasa alja ugunuk ganya migib neneb eleganesilikanya, nimi malya nenesina' ak ab leileiwoka blebnesil. 3:4 Hnonda ugun nong anyek, nunja Imik Neyung lomok uboka, aldib sikda nunja ban unulumnelum aboka orugosuba' ara, wen hnon unulumaka' ara, ono' eimik hnon unulumnumaka' anya' senelesab. 3:5 Wera anadya Wenelesilnya bedya aralesilyekanya, Imik Neyung ara ugunuk yadyek senelesila' anyek pe ella doluluma' aboka hnon, Kristus adya dara, ugunja ganya daklinggoka una' hnon elegosulul senelesab. 3:6 Nunja' hemyabo nim o, nunja' Wenelesilnya Yesus Kristus si sibuka ugunuk wenyhenesin, nunja ugunuk neklesab yub ek dib senena' loboka, wa wena' sulmalya' hwam ok ura yabalamak nim era, men mok nenewoka ulululum. 3:7 Nunda ugun gangganek sam ulumouba dara, wa wena' ara hnon sulmalya' unggulumouba. Anasa ugumbabya nunja wa yeiriwoka welemouba sok, nunja diliga' doboka wa moubuka welelulum. 3:8 Nunda yok nimi dena' doboka denemna dara, hnon salya' del lona' ara unuwanggumouba. Alda nimi yok nang ugun gangganek anaba, ganya malya ub elegeibyek aboka, yubyek inimnek pik moruwoka soba' wa yeiriwoka welemouba. 3:9 Ban nunja nidya' ugun gangganek anya, yeiriwoka wa welemoubnya nera, ugunuk an si akoka molowanggunusibya aboka ulumouba' goma', alda nunja unuweibya enyek, ugumba nuk diliwoka unuwoluluma' aboka ulumouba. 3:10 Wera nunda ugun gangganek uboka wa welemouba dara, nunja ugunuk lelesuba' ara, "Wa wena' orok nang era, dena' salya' dena' ara mem," alasuba. 3:11 Ban wenyasabnya nera, ugun gangganek anyek, hnon nim era sulmalya' hwam ok uboka, wa wenggulumak an yuba hnon, sikda yoka'-yoka' ara ununggulumakjok, yok nim edya ununanya nenyek, hiboka saro bulumak an yub kemouba' anasa lesab. 3:12 Anasa Wenelesilnya Yesus Kristus alja migib si sibuka, sikda ganya daklinggoka uboka, dena' pe eboka deregoka ulunoka' aboka, unulululum hyabakanya, wenewasab. 3:13 Bok neik peroba' ok soba' unubgiga balamaba' lek ganya bona' ara hyak mem. 3:14 Ono' eimik era, hnon nim edya dara, nunja ban momnya dona' lomok enyek an lebabnya nera hnon dib senewanggunumak dara, anaso unulumak nim era sikba alya dabsulula' aboka, ugunda nim enyek keeboka, sikenek neika' una' hyak mem. 3:15 Bok anja dara, alak ara isa' nang diba' anaso geboka ubnenggunulam bok, alda anja weisab eneso uboka wenelelom. 3:16 Wenelesilnya bera nuk pena' ul eleksilnya ulumla. Anasa, Wenelesilnya bedya ugunuk perob una' ara yoka'-yoka' nidya' ara ugunuk eleklesulul. Imik Neyung ara ugunuk nidya' nang ek arawoka bo ulusulul. 3:17 Nara Paulus bedya, nabeyok ban ugunuk gibsin. Ban nenera nadya ok gobdo momnya doboka beibsin. Wera nidya' nadya yoka' beillilesin momnya dona' ara, nadya yoka' nongnya nera sob bekna' diba' unu nabeyok momnya dolomna. 3:18 Anasa wera, nunja' Wenelesilnya Yesus Kristus wana' uboka perob eleksina' adya, ugunuk wana' uboka eleksina' ulusulul.
1:1 Nara Paulus bedya, nunja bleblesilnya Imik Neyung adya orugunyoka' adya hnon, nunja ganya welemabnya Wenelesilnya Kristus Yesus adya hnon, Yesus Kristus amba yuba lena' gaknya ulumnakanya, 1:2 ganya dib senena' ak ara, nadya me yoka' Timotius ansamba ban momnya en momnya doboka beibgen. Anya wera nunja neyung Imik Neyung adya, hnon nunja' Wenelesilnya Yesus Kristus adya, wana' uboka eleksina' hnon, angoo yadyek senewoka arasina' hnon, ganya hekoka una' hnon anak ulunggulul. 1:3 Nara Makedonia sokok balamsa sum enyek, anak duka' lolowoka anda Epesus heikek ululom aboka lenggesa sok, unuwalom. Nimi sonda' anasa bobnenewoka lelesak nang edya malya neneweisijik anasa, anja yuba sekdo anda Epesus heikek ululom. 1:4 Salya' malya hwam deng anyek maro lolomla yub ek ganya we bulumaka' hnon, youma' morublina' nim ek yana lelewoka unuwok aboka neklamna' anyek, kero bulumak nim ek unululuma' ara mem, alalom. Ban nidya' ara mal damok lanalamla' ak anasa, Imik Neyung adya alak dib senewana' anasa eleklesila' anyek sunuwoka ununggulumaka' anasa, mem henelam. 1:5 Nadya anak wenelenggena' ara, nim ara perob ganya bobnoka' aboka hnon geisa ganya anyek ganya dukduk nong ok ululula' aboka hnon, dara ono' sikda Wenelesilnya bek hyak diba' ganya ologoka ulumeijekanya, wera ban adya sik kabo nim ek wana' ulunok senewoka wenelesiloma', aboka lelemna. 1:6 Bok hnon nim era, ban unuwanok senelenanya nera loboka, alda salya' yuba salmorulumaka' ak an sikba gaboka youklomak. 1:7 Ban nera, Yahudi nim emba unuwanalum an yuba neksin nang danob senelemak bok, sikja salamak yuba damok era, ella dangana' ara orok jok, ono' hnonda sikja meka lelewoka salamak yub ek ara, muna' gobdo elgom ulumak. 1:8 Unuwanalum an yub ara, nim adya pe doboka unusin dara, perob dangalamla' ara ella ulumab. 1:9 Bok unuwanalum an yub ara, nimi pe ulumak nim emba eleganggusuk bok, alda yuba lek aboka bleklemak nim emba hnon, asa' hwam uboka yu ganya nim emba hnon, sokok ulumla' digum ok ganya seiniro ulumak nim emba hnon, yuba dona' oroka' anyek salya' ulumak nim emba hnon, orukna' yub era elegousuka' ara, ella ulumab. 1:10 Ono' yok gela salana' hwam ok ulumak nang amba hnon, gel ganya ok boboka nauba meknelemak nang amba hnon, nimi nengmabo moumen dekeldalamak nim emba hnon, sonda' hwam ok wekdeknewoka ulumak nim emba hnon, sonda' anasa bobnenewoka lelemak nim emba hnon, nidya' dib nong yuba elegousuka' ak bleklemak nim emba hnon, orukna' yub ara elegousuka' ara, ella ulumab. 1:11 Imik Neyung adya ugunuk youbsuka' ara pe weisin senelesulula' aboka ugunja dib senena' ak anyek pe sunuwoka, nauba perob danggiga balasulula' aboka, soba' ara nunda ugunsamba mololesab. 1:12 Nara nunja Wenelesilnya Yesus Kristus ak perob aboka sob-soba' giblamna. Alda nak aralenulula' aboka migiba seleb elegenyok. Wera wa nen wen dara, Paulus bera bojamnya senewoka sekiyinyoka' anasa, perob aboka giblamna. 1:13 Men dara, nara alak dib senewanggumsa' adya, nadya alak malya lelemsa, alja mab olomsa, yu ganya boboka ulusebok, elgom adya unulamsa' anasa, nak angoo yadyek senewoka arawanyookanya, ban wa nen welelom aboka elegenyok. 1:14 Wera nunja' Wenelesilnya bedya alja wana' uboka eleksina' ara nak gobdo nauba elekmorunyok. Dib senena' ab, nim ak wana' una' amba migiba, Yesus Kristus lomok aba' ara nak elegenyok. 1:15 Ban yuba nong enyek, hyak dib nong anasa, doboka dib senewanamaka' ara ban: "Yesus Kristus sokok an yeilimoka' ara, malya una' nim enyek blebsununa' aboka yeilimok." Dara sik unulumaka' gangganek ara, na nong anyek hyak okoka yu hwam malya una'anya bek ulumna. 1:16 Bok ban nak malya una'anya bek an ununyoknya nera, Yesus Kristus adya nim ek angoo yadyek senewoka arasina' anyek aawosulula' aboka nak unyok. Nak dara, hyak malya una' hwamnya ulusebok anasa, Imik Neyung ak dib senewoka embenga' una' dobnemak nim enyek eiyiwoka unuwanoka' aboka, nak men ununyok. 1:17 Imik Neyung ara alda li soba' ulmorululanya ulumla. Anya alak soba' giboka ono' si imik nenewoka gigilenok. Alda dib hwekwa ubmoubuka, ono' laga heng eilinggulumaknya ulumla. Alda nunja Imik Neyung diba' alak ok hnonok ulumla. Anasa wera, alak soba' giboka ono' gigilenok. Amin. 1:18 Najabo, Timotius o! Men ununumna' lelemek nang edya Imik Neyung adya anak eimik wa welemnamla aboka geklewoka lenjeka' anyek, sikja lenjeknya nenyek seiniwoka, lebgen. Anasa, banera dib lebnyek senen ganya boboka, pe ganya duboka yeiriwoka welelom. 1:19 Anda dib nong yub enyek ganya kweboka salabmoubmenekanya, ganya seinina' ak nekel eleklesilnya nek pe keboka, dula' engewoka welelom. Hnon nim era, ban ganya lomok ono wenelelanya nenyek pe kena' orok dara, sikja dib senelemaka' ara malya dangoka eiyiba daralamla. 1:20 Wera unumek nim era, hnonda Himeneus beb, Aleksander beb ulurak an. Dara, ban penya nang era, Imik Neyung si malya nenena' anyek lobduruka' aboka, nadya Satan bek doboka elegeisisa.
2:1 Hyak men youbuka ugunuk, molona' ab, heng uboka lena' ab, nauba yoka'-yoka' dib nong amba hnon, nimi nidya' amba Imik Neyung ak perob aboka molowoka gibleluluma' aboka, ugunuk wenewoka moloweisin. 2:2 Hnon ara, mok soko dub nang amba hnon, yoka'-yoka' duka salawoka bo ulumak nim emba hnon, mololululum. Nu ulumab soko namen uboka, nunda Imik Neyung bek lok ganya boboka hyak pe ulunoba' aboka unuro mololululum. 2:3 Ban nenesa ok unuwoka mololomab dara, hyak pelemaba' ara an. Dara, nunja bleblesilnya Imik Neyung adya perob senelesila' nong ara alan. 2:4 Imik Neyung alja hnonok senelamla' ara, nimi nidya' ara blebsina' damoka doboka dib yub ara nidya' ella danok senelamla. 2:5 Imik Neyung ara al hnonok ok ulumlakanya, nim ab Imik Neyung ab hnoumunga wiknenanya soko nang doknya bera, Yesus Kristus hnonok gobdo ulumla. 2:6 Alda nimi nidya' amba leboka sikja malya una' ak blebsunun badya aboka, alja nong enyek leb elekdonuna' aboka, elegesuk. Dara nera, sum enyek unuweisinya senewoka orowek seinimok sum era, yenewoka laga dok dara, al nong elekdok. 2:7 Dara wera ban nenesa leboka, nak yuba lel eleksinya lena' gaknya sekiyinyok. Wera Yahudi gom nim ek, nadya dib senewoka jong dangalamak yuba leb elegosulula' aboka nak sekiyinyok. Nara ban wenyalananya nera dib lelemna, sonda ak lenggulumna. 2:8 Anasa wenera, or yokok-yokok sam anaba nengmab ara, sembeja' mana' orok soruka yangawoka molowanoka' aboka, banara lebsin. Dara, yok nim ek gorogoka yu ganya bona' waldana' ara loboka, mololonoka' aboka lebsin. 2:9 Anasonya neikik gelewa anaba, gelewa ara pe ganya seiniwoka, domdigum boksom enyek ongolonoka' aboka lebsin. Nimi nak perob senewanenoka' aboka honga goboka boloknenggom, emas meilik seleroba' dangman jobdoba' aroba' geregoka, rupiah senenggoma' deklemeija akleng enyek, ongonggom mem. 2:10 Bok alda saawoka gweidya' diba' subnamla' ara, Imik Neyung ak giboka, alja mabo dangamna nim edya ulumaknya nenyek, ana diliga' doboka unulumnemak. 2:11 Gelewa ak dara, yuba sana' ara loboka, gelegoka ganya sokok nenebdangoka, yuba pe keboka ella dangalanok. 2:12 Nadya dara, gelewa ak ara, nengmab ek wenewoka, anyek unuwalom aboka nekoka ululula' aboka yo anggulumna. Alda sikda ganya siklewoka pe ulunok. 2:13 Nera Adam benyek men uyiwoka, Hawa gera eimik uyiwoka' anasa, lelesin. 2:14 Hnon ara Adam bedya gom, alda gel adya sonda' yuba keboka, Imik Neyung yuba blekoka, malya una' lomok malyinggilimok. 2:15 Ban unuwoka' anaba, gelewa ak dara, Imik Neyung bek dib senewoka, wana' uboka, pe geisa uboka, pe ulumnemak dara, memabo hnon beillilimnamak bok adya danyek sikenek bleblemnesil.
3:1 Nimi ben hnon bo usin wa webnun senewalenya bera, alda perob wa webnun ganya seinilamla' adya pelelaba, hnon wenyalamak dara, dib lelemak. 3:2 Dara, nimi bo usin wa welelanya bera, alda si gegena pona' oroknya benyek, alda gela hnonoknya bek, ganya siklewoka pe diri uldalalanya benyek, pe seinililanya benyek, perob ok uboka memeldalalanya benyek, alja ek yanggan nimi peroba' leboka doro diyiwoka, albabya nimi pe nekoka ulusilnya bek ululul. 3:3 Nimi bo usinnya bera, yu meka delelenya bek gom, oldana' hwamnya bek gom, alda saawoka, namen ganya boboka, yok nim ek hekna' ganya ok uboka ululenya benyek ululul. Alda rupiah hogung ok bololenya bera beilina' ara, mem. 3:4 Bera ono' alja mabo siliba' ak pe bo uboka, alja mab era alak nunja neyung senewoka lok ganya boboka, alja yuba keboka, ulumnesengnya benyek, ulumnamso dara, wera nimi bo usinnya ulumnamso. 3:5 Nimi ben hnon, alja meneng mabo siliba' enyek pe bo una' elgom dara, Imik Neyung yuba dona' nim ek dara, alda heka' huboka bo ubnamso do? 3:6 Nimi bo usinnya bera, alda dengdang ganya boblyekanya, alda Iblis ak heng goubna' dobok sok, beneba unuwalyek anasa, wenyok anam yuba dolenya bera sekillina' ara, mem. 3:7 Ban benera, alja si nenera perob deng ok ululul ana' orok dara, nim adya alak meilinya seneweijikanya, alda bisa' dubnya bedya heng wel loblamlya' ak obenggalyek anasa, alda pe ululenya benyek beibnok. 3:8 Neikso, Imik Neyung ek arasina' nang eneba, eirigal ganya bonggulumak nang, sibama' penya-penya lenggulumak nang, yu mek denggulumak nang, rupiah nauba dobsibya ganya bonggulumak nang enyek, yok nim edya sikenek perob senewanemeija nang ek, ulunok. 3:9 Bok, sikda mek ganya geisa uboka, alda Imik Neyung adya laga nenemok dib senena' ak ganya kweboka, dib salabmoubuka, ulunok. 3:10 Arasin nang danara, sikenek sunubyamadijebok, wera meknena' orok nang enyek, or arasin nang aboka diba' sekiyiwaneseng. 3:11 Anasonya neikek, gelewa anaba, yok nim ek malya yuba lena' ab, gelewa danara ganya siklewoka diri ubdangoka, yok nim edya anaba pe ulumak aboka dib senewanemeija gelewa enyek ulunok. 3:12 Arasinya bera alda gela hnonoknya bek ululul. Dara ono' bera alja mab eb, alja ek ulumak nimi nidya' ara pe bo ulusulul. 3:13 Arasin nang era, yuba dolomak nim ek, pe arawoka welemnemak dara, yok nim edya pelemak aboka, sikja si imik nenewoka, sikja Yesus Kristus ak dib senelemaka' ara nauba gokoka laga lero balamnamak. 3:14 Nara anak se' kemel yanenggen senenadyok, or malye aboka ono' ban momnya doboka beibgen. 3:15 Wen unumnya' adya mandewanya' anaba, Imik Neyung mabo dangoka pe ulumaka' damok anyek unulumaka' ara men ella danalum aboka ubna. Dara nera, yuba dolomak nimi nong ara sikda egomna' diba' embenga' ulmoublamla Imik Neyung adya perob dib yuba dukduka dangalamaka' anasa lebna. 3:16 Nimi heka' huboka pe ulumaka' damoka laga dangamok yub era, senenggoma' ulumla' ara hyak dib nong. Wera nenesa ban yub en ulumla' ara, "Alda sokok nim nonga doboka laga dangamok. Alda Imik Neyung Geisinya adya peroba' nong neneiyimok. Dara ono', lero nang edya anaba alak seleb eiyimek. Alak ab yub era mok soko me nidya' yuba elgom ulumak nim ek leb elegesik. Dara ono', soko nim edya alak dib senemek. Dara, alak imik heikek bo weleiyimok," aro lebok.
4:1 Wera, Geisinya adya nuk laga poboka neklesila' ara, dakalongna' berem salek era, hnon nim era yuba dib senelemaka' ara goob loboka, sikda sonda' amba bobnenewoka lelesak yub ek hnon, bisa' adya ban nenyek unuwoluluma' aboka neklesil yub enyek, kebnemak. 4:2 Sikda yuba lelesak nang era, sikja lelesija yub era sonda' yub ella ulumakjok, sene bobnenewoka lebnesak. Sikja ganya lomok ara soba' bleilimna girik ek heilimla soko adya, sik damnya dara nunda malya ulumaba' ara ella unggulumak. 4:3 Sonda' amba bobnenewoka lelesak nim era, sikja dara, gela dona' ara mem, alamak. Hnonda dena' ara salya' dero yabana' ara mem, alamak. Ban wenyalamaka' anaba, dena' ara Imik Neyung ak dib senewoka dib yub ella ulumak nim edya, dena' ara perob aboka Imik Neyung ak giboka delenoka' aboka uyimok bok, lelemak. 4:4 Imik Neyung adya yoka'-yoka' nidya' uyimoka' ara, perob anasa, Imik Neyung alak eleklesilima' perob wenyaboka doboka den dara, wera nera mema' hnon unggulumla. 4:5 Yoka'-yoka' nidya' ara, Imik Neyung yub adya hnon molona' adya hnon, geisa nenelamla' anasa, yoka'-yoka' ara, lek aboka dogom ana' ara, orok. 4:6 Ban nidya' lelenanya nenyek, nunja hemyabo yuba dolomak nim ek, pe neklesimen dara, wera anda Yesus Kristus adya perob wa wenya dangamena' adya ulumenja. Ono' nunja dib senelemabnya, Imik Neyung bedya alja yub edya, anja ganya ek lulunga' hmobdangoka anja wen an neklenjaka' doboka ululam yub ek an, sunuwoka ulumen dara, perob wa wenya ulumenja. 4:7 Nimi ganya pena' orok yuba, salya' hwam nekna' yub ek ab, mok nenewoka ululom. Na nong ara, Imik Neyung alsamba ok pe ulunun senewoka, an damnya sunuwoka pe ululom. 4:8 Nong amba migiba nenendamba dara, or mek perob so dangalamla bok, yuba doboka un ganya migiba neneldamba dara, nauba perob nonga dangalamla. Nera seleb wen salek amba hnon, eimik yanamla salek amba hnon, perob dangalamla an yuba hnon orowek ulumla. 4:9 Ban yub enera hyak dib nong anasa, doboka ono' hyak dib senewanok. 4:10 Nimi nidya' blebsina' dubnya, Imik Neyung embenga' ululanya bek, dib nong ara, nu yuba dib senelemab nimi bleblesilnya bek eleganesin amoka' ara, dib eleganesil anya' aboka, nunda duboka yeiriwoka welemab. 4:11 Ban nenera nidya' dib senewolulum aboka orugoka neklesilom. 4:12 Anda goubenya ululama' anasa, yok nim edya anak, alda mek goubenenya benya' seneweigijek. Bok alda saawoka, Imik Neyung mab adya anja unulumennya nenyek diliwagenoka' aboka, anja yuba sana' maka hnon, anja ununa' hnon, nim ek wana' una' hnon, ganya geisa uboka Yesus Kristus ak dib senen ganya hnon boboka bojam ululom. 4:13 Dara ono' anam yanggumnya salek era, Imik Neyung yub ara nimi yok nim ek hnon laga einib elegoka, pe wenewoka sikenek nekelmorulesilom. 4:14 Ununumna' lelemek nang edya ansamba hnon orowek geklewoka lebjeekanya, nimi bo usin nang edya anak soruka luluwoka, Imik Neyung ak alda ban wa welemnamla aboka soruk diyinjeka' adya, ban unu weleloma' aboka elegenjeknya nera, beillonggom, mem. 4:15 Ban nidya' lebnanya nera pe welelom. Anja perob danggiga balamena' ara, nimi nidya' eibgenoka' aboka, ganya goluwoka bojam unuro balalom. 4:16 Anja unulumena' hnon, anja neklesimena' hnon ara, an moumen anaba pe keebmoubdangoka unulumnelam. Ban nenyek pe unulmorulemen dara, an dam nang hnon, anja yuba kelenjak nimi hnon, nidya' blebnesil.
5:1 Yamen so nim ek, hogunga gorogoka gasa' anyek ooma lenggom, mem. Nadya neyung yabe denga leboka lelesilom. Goubenya nim ek dara, nadya hemyab ulumak senen ganya boboka unululom. 5:2 Wisa gelewa ek dara, nadya genong yab era alan senewoka pe unulusilom. Goubenya gelewa ek dara, sikenek perob geisa ganya adya, nadya hmal gelewa senewoka pe unululom. 5:3 Sikbeyok muna' gobdo youk gelewa ulumak gelewa ek okoka aralalulum. 5:4 Bok, sikja mab edya mab eb, sikja mabo yak gelewa era ulumeijibok dara, yuba diba' dorob nim aboka, oroka' anaba nenyek, Imik Neyung ara perob senelesila' anasa, ban unuwoka sikja neyung genong ak saawoka aralemnemaka' ara, men ganya olowoka ella danok. 5:5 Nimi hnon arana' oroka' anyek albeyok ulumlya youk gel gera, Imik Neyung alak ok seiniwoka, yubyek inimnek pik arawonulul senewoka alak mololsinilamla. 5:6 Bok nadya dobsinya bobsinya senelamna anyek nidya' gigilamla youk gel gera, nong ak dara, anam embenga' ulumla senen bok, ganya ak dara, seleb somogamna' anaso' ak ulumla. 5:7 Ban lebnanya nenyek, si gegena pona' oroka' anyek pe ulunoka' aboka, sikenek pe wenelesilom. 5:8 Nimi ben hnon sik nimi yila' ak hnon, nauba so ara, alja meneng mabo siliba' enyek, pe arasina' orok dara, alja yuba dib senelamla' ara, malya gebdangoka yuba dona' orok nim ek dara, or sang so bok, ban benyek dara hyak malya nonga' ak ulumla. 5:9 Ban damumduk an lebnamna yub enyek, unulumeija gelewa enyek, ugunja dara, wera youk gelewa henelumukanya, momnya dobnelum ara, alja gibna' era denga penya so leboka boklomso dara, hnonda gel genera nenya ara li hnonok doboka ala' nenya somogamso dara, or momnya dobnelum. 5:10 Gelewa danara ban lebna yub enyek, wera youk gelewa heneluma' ara, pe welemla senewoka ella ulumeija dara, alja mabo pe bong-bong aboka weiboka nellilimlya dara, alja' ek yalameija nimi peroba' leboka doro diyiwoka, yuba dolomak yok nim ek arawoka, unuruwa' garana ulusil nim ek arawoka, nidya' perob wa nenyek dib ganya goluwoka bojam welemeija gelewa enyek, wera or youk gelewa henelumakanya, momnya dobnelum. 5:11 Bok, nong ara gobenya bok youk gelewa ek dara, youk gelewa momnya dol yabamena' ak ara, momnya dobnenggunulam, mem. Nera sikda nenya ab neika' ulusinim ganya nauba seiniwoka, nara Kristus ab neika' ulunam senenanya nera mek dangoka, men nenya dobnun senena' anasa, sikja si nera momnya donggom. 5:12 Nera sikenek momnya dobmun bok, nenya dobdanarak dara, sikja Imik Neyung ak pe bojam ulumnemab ameknya nek blekoka lona' adya, sik dam nang malya uldalamak. 5:13 Ono' hnonda nenyek ok gom, alda hnonda neika' ak uldabna' loboka, nim edya ek sam wele goluga una' anasa, loblom. Hyak nauba omoma' loksonya nera, yuba miniwoka bol girikna' hnon, yub era sabnenggom yuba bok, meka lelewoka len yuba hnon, yok nim ek bera unulamla aboka salya' hmouna doboka sal girikna' yuba hnon lelemak. Sikenek nera ugunja unuwanalum ana' orok wa bok, sikjok salya' welemak. 5:14 Nenesa leboka nadya perob senelamna' ara, or goubenya bok youk gel ulumak nim era, nenya dobijekanya me yak dangoka, sikja ek pe wa weboka ulumeija' adya, wera nunja isa'anya nera al pik uboka nunja si malya' neneweisilyek anasa, wera men nenya dobnok. 5:15 Hnon youk gelewa era perob pik era loboka, seleb Satan pik dobdo balamaka' anasa, lelemna. 5:16 Alda ono' seleb yuba dolomak nimi bok, sikja ek an youk gelewa ulumak dara, or sikja sikenek araweisinok. Nenera sikja dara, yuba dolomak nim edya nidya' hiboka aralenok senewoka ubijek. Wera ban unuweija adya yuba dolomaka' gobdo nimi yila' orok youk gelewa enyek, sikja hiboka or arawanamak. 5:17 Ugun yuba dololuma' ak pe weboka bo usin nang ek ara, ugunja li penya so sikenek ganya hek elegoka gigilelulum. Nauba so ara, Imik Neyung yuba yeiriwoka nekoka, lel eleklesak nang enyek anaso pe unulululum. 5:18 Nenesa leboka, Imik Neyung yuba momnya dobok ara, "Sapi pam ara gandum wanama' goroklelebok dara, sibama' henga darawoka goubnenggom mem," hyok. Ono', "Wa welemna nim era welemna' amba dara, dekna' dolomak bok," hyok, anasa lemna. 5:19 Nimi ben hnonjok bo usinnya bek malya ubok aboka yuba bo yanamla dara, kenggom mem. Alda nimi penya winilya aldib meknemoka' ak nunja okoka eibuba aboka, yuba bo yanamak dara, or kebnelum. 5:20 Bok aldib sikda malya ubija dara, yok nim eneba lok ganya bobnok aboka, nimi nauba longolomaka' hnoum ab omoma leboka wabnok. 5:21 Nunda Imik Neyung hogung ak ab, Yesus Kristus hogung ak ab, weboka dosuk im lero nang hogung ak sam ulumabakanya, nadya nidya' unuwalom aboka oruklenggenya nera, pe unuwalom aboka orugagen. Nenera na nimi yila' gom, nenera perob lok so nimi gom, senewoka dolbalek asa' mek so ununggom. Alda al nidya' nim ek neik so perob ok unululom. 5:22 Anda nimi yok nim ek benera Wenelesilnya bedya wa webnamla aboka, men berra soruka dib yaboka ununggom mem. Yok nimi malya una' ak dara, anja dob salawoka neikik ununggom mem. An nong anyek pe geisa ululoma' aboka diri uldalalom. 5:23 Anda mek dem ok soba' denggom. Alda anja mona malya ulunggelekanya, soba' neiklelamnya nenesa, nonga pewogulula' aboka, anggur meka hnon sum era meka' delelom. 5:24 Hnon nimi malya una' ara, anam henga goubuka yana lelewanggunabok laga dangalamla. Bok, hnonda seleb henga goubuka laga yana lelewan danyek, laga dangalamla. 5:25 Neik so, perob una' ara hnonda laga an ulumla. Bok, hnonda wenera berra laga unggululabok, wera doknowoka ubnamenggom anasa, eimik laga danamla.
6:1 Nunja Imik Neyung si ak hnon, nunja neklesab yub ek hnon, nim adya malya neneweisijik aboka, nidya' yok nim edya ek uboka wa welemun nim ek sikenek wa oruklesak nim ek, sikenek perob senewoka ganya sokok nenebdangoka gigilinok. 6:2 Neika' uboka arawoka wa welemaknya bera, alda neik yuba dona'anya bek dara, nunda neik Imik Neyung mab ulumab senewoka, or malye dolbalek neika' anya' senewoka mek so gibnenggunuseng. Sikja arawoka welemaknya bera, alda neika' hiboka wana' ulusilnya anasa, wera nun moumen benyek perob dangalalul senewoka nauba arawanaseng, wenyaboka anja nauba nekoka wenelemnesilim. 6:3 Nimi ben hnonda yok yuba nekoka, nunja Wenelesilnya Yesus Kristus bedya alja eika' un yuba hnon, heka' ak ubibyek Imik Neyung pik pe balamnemab aboka yuba hnon, dib senenggulumla dara, 6:4 alda dengdang ana' adya ella neneldalalabok, yoka'-yoka' hyak elgom nong jok ulumla. Alda malya ganya edyok wek deknewoka ulmeilimdanya' anasa mala weboka, ella ubnamenggom yuba, bobnenewoka geklero salamaka' adya bolgereklamla. Dara, bera ban adya solom ganya hnon, waldana' hnon, hman leldana' hnon, gogoba' ganya bobdangoka malya seneldana' hnon, nauba lanalamla. 6:5 Dara nim enera, gogoba' hman ganya ok wek deknewoka neik ganya ok bobmoubuka ulumak. Nim en sik ulumak pik seleb serekleboka, yuba doboka dib jong pik era hnon laga dangoka unggulumla. Dara, nidya' bona' duka' dangalamak ara, yuba dolomaka' adya anasa unuwanamab senelemak. 6:6 Bok, nimi ben hnon, Imik Neyung pik pe balamlakanya, bona' amba dara, or nak an meka' seleb ulunelnya nok dara perob senewoka, yoka' nauba dobsinya ganya bonggulumla dara, hyak pelemla. 6:7 Nunda sokok an beiyisik sum enyek, yoka'-yoka' ab bo yanggumouba' anasa, ono' somoganamab sum eneba, yoka'-yoka' ab bo gobnenggunumab. 6:8 Anasa wera, ongon akleng eb, dena' ab, ulumlya dara, wera alan seleb, senelemnemab. 6:9 Bok, nunda bona' dub nim deisibya senelemak nim ek dara, nimi nong enyek nauba sunubyamawoka, yoka'-yoka' dobsibya ganya hnon, dongdang ana' ab dadya, heng weboka youlusil. Ban adya, nimi nauba yamnekoka soldob menegoka dengalamak. 6:10 Nim ara, rupiah ganya ok hwilimak dara, wera yok-yok malya una' damoka gong-gong lanalamla. Hnon nim era, rupiah ak nauba dobsibya ganya adya, yuba dib senen ganya dilina' loboka, nimi ganya soldobdangoka, sikda hyak nauba igin ganya nenebdangamek. 6:11 Bok anak dara, Imik Neyung adya nim ululama' anasa, banyan nidya' lebnanya dara, mok nenewoka pe ululom. Anja dara, perob una' pik balanun, Imik Neyung alja diliga' doboka ulunun, dib senen ganya ok bolonun, wana' ganya boboka, ganya siklewoka ulunun, pe namena' ulunun senen ganya ok boboka yeiriwoka dobgiga balalom. 6:12 Anda Imik Neyung yuba dona' amba nimi mala yeiriwoka oldalamak sok, yeiriwoka amba unu welelom. Anda men danyek, nara yuba dib dobna aboka nimi nauba longomeka' gangganek ab pe laga leluma' anasa, Imik Neyung adya anak youbunjoka' anasa, embenga' ulmoubna' pik enyek salabmoublom. 6:13 Nidya' yoka'-yoka' embenga' eleklesilnya, Imik Neyung hogung ak uboka, youma' Pontus Pilatus be saramek sekoka pe laga nekemoknya Yesus Kristus hogung ak ulumabakanya, ban nidya' ara anak orugenggen. 6:14 Wene salek eba' moruwoka, Wenelesilnya Yesus Kristus laga danamla sum era, ban orukna' yuba nidya' ara, mek sirik anaba meknena' loboka, nidya' pe bekoka unubgiga balaloma' aboka, orugenggen. 6:15 Imik Neyung ara hyak pe ululanya uboka, dubnya ben nong ara al hnonok ulumla. Yok-yok nimi sikja' dubnya bera Imik Neyung hnonok dubnya ulumla. Yok-yok wenelesak nang sikja dubnya ulusil. Dara, Imik Neyung adya ban sum nong enyek yanamla amlya sum era, Yesus ara laga yanamla. 6:16 Imik Neyung ara, alak ok hnonok dib embenga' ulmoublumnamla. Somokna' ara alak meka' unggulumla. Alda nimi meka' oka bimenggom dilina' ak ulumla. Nim adya hnon, alak meka' heng eibnenggumeekanya, ono' hnon nim adya eibnamenggom. Alak soba' gibelsinilenok. Alak migib nong soba' ulmorululul. Amin. 6:17 Anda sokok sam bona' dub nim ek soba' ulmoubnenggulumla bona' emba leboka dengdang ganya boboka, bona' ak ganya dib beiliwomunuk aboka, wenyaboka neklesilom. Bok saawoka, alda Imik Neyung nuk yoka'-yoka' nauba gigiwosulul senewoka, eleklesilnya bek ok ganya kweboka welenoka' aboka, neklesilom. 6:18 Sik dub nim ek, anja dara, perob una' anyek yok nim ek unub elegoka, perobnya nenyek ok nauba unubmoruwoka, ganya lowelelek aboka, hekna' hwam ok uboka, yok nim ek eleklesinya ganya bolonoka' aboka, wenewoka lelelom. 6:19 Wera sikda ban nenyek unulumeija' adya, eimik danasa orowek muna' gobdo dobnemab senewoka sunuwoka beilimeija' ara, an. Wera ban adya, sikda hyak dib embenga' ulmoubna' ara dib dobnemak. 6:20 Timotius o, nidya' anak welelom aboka lenjok wa nera, hyak pe keeboka diri ululom. Anak dara, nimi yok-yok yuba salamaka' anyek, perob gomnya nek hnon, malya uboka doluwoka ganggana' gok menegoka, si ara el dangana' alamak ak ab ganya walabdangoka ululom. 6:21 Hnon nim era, nunda yoka'-yoka' ella dangana' ara, seleb domouba wenyaboka, youma' yuba dib senena' damoka domeka' ara, seleb loboka meknewoka unumeka' anasa, amba unuwamenek aboka, keeboka ululom. Wera Wenelesilnya bedya wana' uboka eleksina' ugunuk ulusulul. Nara Paulus bedya seleb perob aboka gibgen.
1:1 Nara Paulus bedya, nadya wana' nong ulunggen me, najabo Timotius anak ban momnya dona' era weboka beibgen. Nara Imik Neyung adya seiniwoka donyoka' adya, Yesus Kristus bedya yuba lena' gaknya uboka, Yesus Kristus lomok nim embenga' ulumnamak amok yuba lero yabalamna. 1:2 Anya wera, nunja' neyung Imik Neyung ak ab, nunja Wenelesilnya Kristus Yesus ak ab, wana' uboka eleksina' ab, angoo yadyek senewoka arasina' ab, namen una' ab dadya, anak arawoka ulunggulul. 1:3 Nadya neyung yab edya youma' sikda ulumek sok, nadya mek ganya senenya lona' adya, aralenanya Imik Neyung bek perob aboka giboka mololamna. Nara inimnek yubyek pik Imik Neyung ak molol yabenek ab dara, ugunuk hnon seiniwoka sob-soba' mololesin. 1:4 Nadya dara, ugunja ganya angwei seneleluma' ara seiniwoka mololesin. Ban nenesa leboka, nara anab hyak okoka eibdeisinima' adya, nadya ganya hekneso senelamna. 1:5 Anja genong Eunike geb, anja donggel Lois geb dadya, sikja Kristus ak dib senelerek sok, anja Kristus ak dib senelelama' ara, nara seiniwoka ulumna. Nadya dara, anda anaso uboka Kristus ak dib senelamla' anya' senelenggen. 1:6 Ban nenesa leboka, nadya anak soruka diyiwoka heng uboka yuba lelelom aboka lenggesa sum enyek, Imik Neyung adya anak elegenjoknya nenyek nauba neneleloma' aboka, gokoka neklenggen. 1:7 Anasa wera, Imik Neyung adya nuk elegosuka' ara, lok ganya ak eleganggusuk. Bok, alda nuk elegosuka' ara, migib un ganya hnon, wana' un ganya hnon, diri uldan ganya hnon, elegosuk. 1:8 Ban nenesa leboka, nunja Wenelesilnya bemba alja yuba lero yabana' ak alya bar aboka longgom, mem. Ono' nak Kristus amba leboka gasa ek henga gouboka beibnyeknya nenesa, alya bar aboka longgom, mem. Bok alda saawoka, anda Imik Neyung adya eleklenggel migib edya, Imik Neyung adya perob lero yanggan yub emba leboka, amba neika' igina kwelenggel bok yeiriwoka welelom. 1:9 Imik Neyung adya nuk bleboka doboka, nuk geisa ulunoka' aboka youbosuk. Imik Neyung adya ban unuwosuka' ara nunja yoknya nek pe unumouba' amba ubnenggubsuk. Alda alja wana' ulusuka' orowek unuwanamna senemoka' ak sunuwoka ubsuk. Ban soko en anam uyiwanggom salek enyek, Yesus Kristus pik uboka, alja wana' una' ara, nuk seleb elegesuk. 1:10 Anya wera, Imik Neyung adya alja wana' una' era, nuk blebsina' dubnya Yesus Kristus laga dangamoka' adya laga amasuk. Yesus adya somokna' migib era seleb yugoma nenewoka, alja perob lero yanggan yuba pik uboka dib embenga' ulmoubna' damok ara, alja bo yeiniboka laga amasuk. 1:11 Ban wenyaboka perob lero yanggan yuba lero yaban damba, Imik Neyung adya nak yuba lena' gaknya hnon, yuba neksinya hnon, jaboka sekiyinyok. 1:12 Ban nenesa leboka, wera nara an yoka'-yoka' igina kwelenel. Bok heknyek dib senemsa' ara, nara dib ella ulumna' anasa, angoo senenggulumna. Nadya banyek dib senelamna' ara, alja nak welelom aboka lobongganyok wa nera, ono' welemnya' ak an alja diri bo ulumlya' moruwoka soko sidya' daknamla sum unuro lobnamla senewoka, dib senelamna. 1:13 Nadya anak an seleb leboka, nidya' nekgesa sok, anyek pe sunuwoka ululom. Anya wera, ono' nunda Yesus Kristus ab neika' hnonok kweldalamaba' adya, nunja' dangamok wana' una' ab, yuba dib senena' ab danyek, anda pe salabmoubuka ululom. 1:14 Nuk ulusil Imik Neyung Geisinya adya anak arawoka, peroba' anak elegenjoknya nera, pe beiyiwoka bo diri ululom. 1:15 Nimi nidya' Asia moka ulumak nim era, nak ara loboka yokok byik. Dara, Figelus beb Hermogenes beb dadya' anaba, seleb nak lo binireka' ara, anda ella ululam. 1:16 Bok, alda Onesiporus bedya ek nim edya danyek, alda nak ganya pe sangab elegoka ulunyok. Anasa, Wenelesilnya bedya, wera e nen nim ek angoo yadyek senewoka arawoka pe bo ulusulul. Nara henga gereksin ek an gereganyeka' anaba, Onesiporus bera henga geregek anasa, alya bar aboka, yoka' seiniwanggumok. 1:17 Bok alda na Roma heikek anam yalamsa sum era, al adya nak men hanyagar ulumlya' ak eibnun do aboka, eboka nak men eibnyok. 1:18 Dara ono,' al Onesiporus bera, na Epesus heikek ulumsa dara, alda hyak nak nauba aralenyoka' ara, anda pe ella ululam. Anya wera benyek anasa, Wenelesilnya bedya nimi nidya' sokok an yana lelewanasil sum era, alak angoo yadyek senewoka arawanamla.
2:1 Nadya me Timotius o! Kristus Yesus ak pik uboka Imik Neyung adya wana' uboka eleksina' adya, anda migib nonga' dangoka ululom. 2:2 Nadya anak nimi hnoumuk sam ab uboka nekenggesa yub era, ono' anja dara, saawoka bojam ulumaka' yok nim ek pe neknemeija nang ek unuwolulum aboka, nekoka dib lolonglesilom. 2:3 Ono' amba hyak Kristus amba bojam uboka yina bololanya gekneba' uboka igina kwelenggelya bok, welmorululom. 2:4 Nimi mala naklenanya bera, alda anam oldalamna salek era, mal gaka'anya bedya perob senewonulul senewoka yeiriwoka naklamnakanya, alja wa yoka' ak ara wel yabenggulumla. 2:5 Anaso neikek, ono' nimi ben hnon bik-bik alalanya bera, ban unuwoka bik-bik hen dara, pelemak senena' anyek pe unuwanggubna dara, wera bera bik-bik henemso' anaba, alda peroba' donggulumla. 2:6 Dara ono' hnonda, nimi wa ara men nonogoka weboka menanya benyek, masa ara nonga ubna dara, alak men boboka delemla. 2:7 Ban nidya' eini lebnanya nera, Wenelesilnya bedya anak anyek ella dolula' aboka, migiba' eleganenggel bok anasa, anda hyak pe keboka senelwenelelom. 2:8 Banyek pe beknelam: Nadya perob lero yanggan yuba lero yeilimsa' ara, Daud nang yila' ak abnya Yesus Kristus nimi somokna' damok ak ab seleb embenga' suboka welewoka' ara, beklemnelam. 2:9 Wera, al ban perob yub enyek lero yabalenanya nenesa, nara hyak yoka'-yoka' nauba igina kwelenel. Anya hyak hoka' donanya beneso' anyek, gasa henga gouboka beillilenyak bok, Imik Neyung yub ak dara, nim adya henga goubnamenggom ulumla. 2:10 Wera anasa, ban nenesa leboka, Imik Neyung weboka gaboka dolosil nim enyek, sikda Kristus pik uboka eleklesil blebna' damok hnon, anya sikenek si imik nenesina' damok anaba, dobnoka' aboka, ono' nara yoka'-yoka' ara igina kweboka goululuma' aboka gweklamna. 2:11 Dara, ban lelemak yub era dib nong: "Nunda alablaboka somogomouba dara, ono' eimik era suboka alab neika' embenga' ulumnemab. 2:12 Nunda pe ganya kaboka siklewoka ulumeibya dara, nunda eimik era, alab neika' dub dangoka wenelemnemab. Nunda alak numba elgomnya alameibya dara, eimik era alba nuk anaba, nab elgom nimi henesil. 2:13 Nunda alak pe bojam unggulumeibya bok, alda al damnya dara, malya neneldanggululanya bek anasa, alda nuk pe bojam ulmorulumnesil." 2:14 Ban nidya' lebnanya nera, nim ek pe unululum aboka wenewoka bekellilisilom. Anya ono', Imik Neyung saramek sam ab, mek yok-yok seinina' ok adya waldalamaknya nera, mem aboka wenelesilom. Nera peroba' nenenggulusil, alda kelemak nimi ganya malya nenelesila' ok. 2:15 Anak Imik Neyung adya dara, nasamba wa pe welenelnya bera an senelenggulula' aboka, hyak pe yeiriwoka welelom. Anja wa welelama' ara, alya ubnelyek senewoka, anya Imik Neyung ak ab nekna' yuba pe sunuwoka nekleloma' aboka hnon, pe keeboka welelom. 2:16 Salya' lelem yub era, Imik Neyung si ak malya' nenelemak yub enyek, anda mok nenewoka ululom. Ban unu malya uro saro yabalamak yub era, nimi malya ganya nauba danggiga balasila' anasa, anak dara, nera mok nenewoka ululom. 2:17 Ban neneso nekna' yub era, nimi somokna' neikna' damok ak belega elesila' anyek ulumla soka' ak ulumla. Ban nenyek seleb unumek nang dara, hnonda Himeneus beb, Filetus beb an ulurak. 2:18 Sikda penya dara, perob yub ek ab seleb malya nenebdangoka mok darek. Wera sikja dara, nim embenga' suboka bun salek era, seleb yenewal wenyaro yabalaraka' adya, nimi yok nim ek hnon sikja dib senena' ara seleb dolul meneklerak. 2:19 Bok, Imik Neyung adya ikimok egomna' era, hyak mel-mel arob nong. Egomna' eilibek ara lero momnya dobokja, "Wenelesilnya bera alja nimi yoka' ak ella ulusil;" ono', "Nimi hnon nara Wenelesilnya bedyinya ulumna aldalalanya bera, alda malya una' ara, hyak gobdo lobnamso." 2:20 Hyak senenggoma' somna ek ara, yok-yok bona' beilina' ara, nauba ulumla. Wera bona' beilina' ara, hnonda dangman meilik yuba' adya memelemak dara, hnonda gal adya gom, soko adya gom, mememna' ak ulumla. Dara beilina' ara, hnonda hyak pero-pero senenggom bona' enesa ulumla dara, hnonda dom digum so bona' danasa ulumla. 2:21 Nimi ben hnon yok-yok malya una' ak, geisa nenebdanelanya bera, benyek muna' nenebdangoka perob wa wena'anya ulumnamla. Dara bera, alja neyung adya al nonga perob wa weboka un danasa, weboka doboka dibnamlakanya, alda yok-yok perob wa nidya' webnuna' aboka, diri ulumnamla. 2:22 Goubenya nim edya nenyek perob senewoka malya ulumaknya nek, anda mok geboka ululom. Anda Imik Neyung amba ok perob senelamla sunuwoka pe uboka, alak hyak dib senewoka, nim ak wana' uboka, hyak namena' anyek ululom. Perob ganya boboka, Wenelesilnya bek araweisilom aboka, molowoka ulumak nim eblaboka, anaso unu ulululum. 2:23 Yok-yok dongdang ana' elgom yuba lelemaka' ak neikik hinggom. Ban sikja unulumaknya nera, waldana' damoka lanalamla ara, anda seleb ella ululama' anasa, ununggom. 2:24 Imik Neyung alja wa welelanya bek dara, waldana' yuba hyak mem. Bok saawoka, alda yok nimi nidya' ak namen ok uboka, yuba pe nekoka, ganya pe siklewoka ululul. 2:25 Alda bera, nimi yok nim edya alak bleklemak nim ek, sikba Imik Neyung adya ganya dangiyiwoka, perob jong yuba dobnok senewoka diri ulusilyikanya, pe namen uboka wenelemnesil. 2:26 Wera anadya sikja nunda anyek ulumaba' aboka ella ubdanamak. Anya sikda Iblis adya nadya yuba kelelulum aboka, sikenek gliboka bo biniboka henga weboka youlusil ak ab blebnesil aboka unulumnesil.
3:1 Anda banyek pe keblom: Mok soko nidya' daknamla sum era, yok-yok damoka nauba igina kwesina' lanawanamla. 3:2 Nim ara nanokok pewonulul senewoka ulumnamak, rupiah hogung ok beiyiwoka ulumnamak, dengdang ana' ganya boboka sonda' hwam ok lelemnemak. Sikda yok nim ek geklewoka derewoka walamnamak, nauba nimi yuba lek senewoka bleklemnemak, eleganelema' perob alamaka' ara, elgom ulumnamak. Dara, hnonda nimi pe ulumaknya nek ara, sikda lek senelemnamak. 3:3 Sikda yok nim ek wana' unggulumnamak, malya ubgen bar aboka, laga leldana' ara ununggulumnamak, sikda yok nimi si ak, bera malya unululanya aboka malya nenelemnemak. Sikda gasa hwam ok boboka ulumak nimi gekneba' ulumnamak. Sikda perob una' ara, hyak lek senelemnemak. 3:4 Sikda yuba bo dil bana' ak perob senelemnemak, sikda imik nenebdangoka, ganya mok seinil banggulumnamak. Sikda Imik Neyung ak wana' unya nera loboka, sokok an ununa' anyek wana' nong ulumnamak. 3:5 Nim adya eilin dara, sikda yuba doboka pe unulumak nimi senen bok, sikda ganya migib diba' ak dogom aboka lolomak. Ban unulumak nim enyek ara, anda mok nenebdangoka ululom. 3:6 Ban nang danara nim edya e pik gelelenga wekel balamak. Dara ono' hyak malya una' hwam ok uboka, yok-yok unuweisinya ganya adya gouluwoka ulumak gelewa ek sene malya unuwanoka' aboka benellilisak. 3:7 Ban unulumak gelewa dara, yuba sob-soba' kelemak bok, dib yub ak sikda ella ubnamenggoma' ak ulumak. 3:8 Youma' danyek Yanes beb, Yambers beb dadya, Musa bek bleklerek sok, ono' neikso ban malya unulumak nim era, Imik Neyung adya dib nong yub ek bleklemak. Sikja ganya era seleb oula' oboka blobsuk. Sikja yuba dib senemeka' ak ara, saawoka dobnamenggom ubsuk. 3:9 Yanes beb, Yambers beb dadya dongdang arek ek, laga ubok sok, sikja dongdang alamaknya nera, nimi nidya' seleb ella danamaka' anasa, sikda yoka'-yoka' nidya' ak ara perowanggunumak ak ulumak. 3:10 Bok anak dara, nadya men nekenggesa yub eb, nadya heka' anaso uboka ulumsa' ab, nadya unu ulunun senelenanya neb dara, anda seleb eiyiwoka ella ululam. Nadya hyak dib nonga' anyek, Yesus Kristus ak dib senewoka ono' nim ek wana' ulusina' ara, anda seleb ella ululam. 3:11 Nak malya uboka saboka oboka, nauba gwekoka igina kwelenyoka' anaba seleb ella ululam. Dara nak Antiokhia heikek ab hnon, Ikonium heikek ab hnon, Listra heikek ab hnon, yoka'-yoka' nidya' ununyok ara, ganya mel-mel aboka siklewoka ulumsa' ara ella ululam. Bok, ban unulunyok bok, Wenelesilnya bedya nak nidya' ak ab seleb blebnyok. 3:12 Anasa wera, nimi nidya' Yesus Kristus ablaboka neika' kwebdangoka uboka, Imik Neyung amba gobdo geisa ulunob senelemak nim ek, loba' nenewoka ol neblemnesak. 3:13 Bok, malya una' hwam nimi hnon, sonda' hwam ok wekdeknewoka ulumak nim era, nauba malya danggiga balamnamla. Sikja dara, yok nim ek sonda' lelemak bok, ono' sikbabya dirigoka sonda' lelemnesak. 3:14 Bok Timotius anak dara, ban nang danadya neknyek senewoka seleb ella ululam bok anasa, anak seleb nekenjeka' keboka, anja seleb hyak dib senelelamnya nenyek pe salabmoubuka ululom. 3:15 Anda hyak mekewek moruwoka, Imik Neyung geisa yuba seleb ella ululama' nong anyek, pe seiniwanalam. Wera ban Imik Neyung yuba buku nong enedya Yesus Kristus pik uboka yuba dib senelemak adya embeng una' dolomaka' ara, ella ululama' anasa, pe salabmouboka ululom. 3:16 Ban nidya' Imik Neyung yuba momnya doboka' anara, Imik Neyung sik ab gobomok. Dara, nim ek lel elekna damba hnon, nera malya ublam aboka wenewoka pe memen damba hnon, nim ara, Imik Neyung adya senelelanya nenyek unu sunuwoka jong ulululum aboka, wenesin damba hnon, peroba' ak ulumla. 3:17 Wera ban Imik Neyung yub anadya, Imik Neyung ak arawoka wa welemak nim era, yoka'-yoka' nidya' perob wa nenyek pe webnoka' aboka, weiboka peroba' nenelesil.
4:1 Yesus Kristus ara sokok an eika' ulumak nimi hnon, somoklomak nimi hnon, yana lelewosununa' aboka yanamla. Dara, alda laga danamlakanya, alda dubnya dangoka wenelemnesilnya nenesa leboka, Imik Neyung saramek sam hnon, Yesus Kristus saramek hnon, ban nenyek unululoma' aboka molowagena' ara, 4:2 Anda Imik Neyung yub ara soba' lel eleklelom. Perob salek gom, malya salek gom, soba' meewoka ululom. Anda nimi ganya dangallilisilom, meilinya nera ban aboka wenelesilom, banyek unuwolulum aboka nimi ganya wekellilisilom. Anda hyak ganya kaboka siklewoka ulumenekanya, pe neklesilom. 4:3 Nimi jonga' pe ulumak yuba dobnenggunumak sum hnon yanalabok anasa, pe neklesilom. Eimik era dobnenggunumaakanya, saawoka nim adya anyek unuweisinya senewanamaakanya, nenyek ok unulumnumak. Dara, nunja o kelemeibya dara, pelemlya anyek kero ulunob senen malya nekna' enyek neklesinoka' aboka, nimi neksin nang nauba, bo boklomnemak. 4:4 Sikenek dara, nimi pe jong ulumak yub ek dara, kebibyek aboka o pika lebeldalamnamak bok, salya' malya hwam yub ek sam ara, or pe kelenob senewoka o bakoka kelemnemak. 4:5 Bok anak dara, nidya' yoka'-yoka' lanalamla ak ab, ganya pe siklewoka diri ululom. Anda Imik Neyung bedya wa wennya diba' uboka, yoka'-yoka' igina kwelenggel bok pe kaboka ululom. Anda perob lero yanggan yuba len wa hyak pe lelewoka welelom. Anak elegenjok wa nidya' anyek, soba' luka bongoldililom. 4:6 Nak anyagan ara, Imik Neyung amba somoganamna salek era, wera seleb oka dal. Maldabna' loboka, mek anam soko enera lo binimna. 4:7 Nara pe yeiriwoka oldalamsa. Nara bik-bikal dakal bilimsa. Nara dib senena' ak pe bojam ulmorulamnya' ara sidya' daknamla. 4:8 Ban nenesemba leboka, pe ulumoka' amba huk gouluna' era seleb diri ulunel. Sidya' daknamla sum era, pe jonga' anyek yana lelesinnya Wenelesilnya bedya ban dekna' era, nara Imik Neyung ab peroba' dangoka ulumna' anasa, nak doboka eleganenel. Nera or nanokok gom, alda nimi nidya' Wenelesilnya be yanamla senewoka ganya neboma diri ulumak nim eneba, ban neik dekna' en dobnemak. 4:9 Nak sam an men younuna' aboka dululom. 4:10 Demas bera sokok anyek wana' uboka, nak ara seleb lo binyok. Alda seleb Tesalonika heikek byuk. Kreskes bera alda seleb Galatia moka byuk. Dara, Titus beneba Dalmatia heikek byuk. 4:11 Alda Lukas bek hnonok nablaboka neika' ulunam. Anda yanggamen dara, nak an aralemnenela' anasa, Markus bera eboka bobgiga yanalam. 4:12 Nara seleb Tikhikus bek anda Epesus heikek bilom aboka bokomsa. 4:13 Anda yanggamen dara, nadya mok gouluna' aklenga Karpus bedya ek sam Troas heikek lo yasa' anyek, hnon doboka bobnenelem. Anya nadya buku aroba' hnon doboka bobnelom. Dib nong so' ara, gal boka' pik weberob buku nong enyek doboka bo yananelem. 4:14 Ya ab, yoka'-yoka' ab, selewoka memelelanya Aleksander bera, nak yok-yok malya una' nauba ununyok. Wenelesilnya bedya alba eimik alja unumoka' sunuwoka diriganamla. 4:15 Bera alda nunja lelemab yub enera, bol nenel goklesila' anasa, anda alak pe keeboka ululom. 4:16 Nak heng goubenyeka' anasa, men yuba garawoka sekeldalamsa sum era, nimi ben hnonok sibin anaba arawanggunyek. Sikda nidya' lobnyeekanya, sen-senem abgogorob. Anasa, wera malye, Imik Neyung adya sikenek nera malya ublum henggunususo, senelamna. 4:17 Bok, Wenelesilnya nak aralenyok. Perob lero yanggan yuba pe lelemlya' adya, nimi nidya' Yahudi gom nimi kebnoka' aboka, nak alja migib elegenyok. Dara ono' nara senenggom bei gam si ak ab blebnyok. 4:18 Nera aldib Wenelesilnya bedya nak malya ublul senewoka sunulunela' ak ab blebelmorulumnenel. Alda nak doboka alja imik heikek pe bo binenel. Alak imik nenewoka soba' pe giblenok. Amin. 4:19 Nadya Priskila geb Akwila beb, Onesiporus bedya ek nim eneba, neika' perob aboka gibsin. 4:20 Erastus bera or Korintus heikek ululabok, Trofimus bek dara, neikel yabok bok, Miletus heikek alda lo yasa. 4:21 Saragena' li yenewanggumlya salek enyek, men bunun senewoka pe duboka nak yanalam. Ebulus beb, Pudes beb, Linus beb, Klaudia geb dadya, anak perob aboka gibjak. Dara ono' anyagan yok yuba dolomak nim edya' anaba, hnon anak perob aboka gibjak. 4:22 Wenelesilnya bera anak ganya arawoka ulunggulul. Wenelesilnya bedya anak wana' uboka eleksina' ulusulul. Nara Paulus bedya seleb lemna.
1:1 Najabo Titus o! Nara Paulus bedya, Imik Neyung adya wa wenya uboka, ono' Yesus Kristus adya yuba lena' gaknya uboka, ban ara anak momnya doboka beibgen. Imik Neyung adya alja weboka dolosil nim enyek, sikja Imik Neyung ak dib senelemaka' ara, migib dosulula' aboka, nak Imik Neyung adya men weboka doboka bokol yeilinyok. Nunja dolomaba' ak sam neklesil yub enyek, sikba ella dangoka pe ulunoka' aboka, neksulul senewoka donyok. 1:2 Ban nunja dolomab yuba damok enyek sunuwoka, dib embenga' ulmoubna' ara or dobnemab senewoka ella ulumab. Imik Neyung ara hyak sonda' lenggululanya bek adya, men youma' enyek moruwoka, embeng una' damoka nuk eleganesin, wenyasuk. 1:3 Dara wera, perob sum en unuwanamna senemok sum enyek, yuba lelelula' aboka orugomoka' adya, laga dangiyimok. Anadya wera, alja yub era, nak an anja lelelom aboka lobongganyok. Dara, nara nunja Imik Neyung bleblesilnya bedya orugonyok yub ek, sunuwoka lero yabalamna. 1:4 Titus o, anab nab dara, neik Kristus ek dib senenuma' anasa, wera anda nadya me yoka' nong ululam. Nadya dara, anak nunja bleblesilnya Yesus Kristus adya hnon, nunja' neyung Imik Neyung bedya hnon, wana' uboka eleksina' ab, ganya angawoka una' ab, elegogulul e. 1:5 Nadya anak Kreta sokok sam lo yeilinggesa' ara, webnamen ulumla wa nenyek meewoka weleloma' aboka sene lo yeilinggesa. Hnonda, heik ela' gigiro Imik Neyung e dam nang sikillililoma' aboka lo yeilinggesa. Dara ono' ban nadya anaso unuwanalam aboka nekgena' banara pe beklom. 1:6 Nimi yuba dolomaka' gaka bo usinnya bera, si gegena pona' oroknya bek ululul. Alda gela hnonok domlyekanya, alja mab era Kristus ak dib senewoka, ono' nauba blekoka, salya' yiri-yoro al girikna' orok mabo yaknya bek ululul. 1:7 Yuba don nimi bo usinnya bera, Imik Neyung bedya wa nek welemla' anasa, alda si gegena pona' ara hyak mem. Alda dengdang ganya boboka yu ganya bona' loboka, yu meka deregoka ganya uu ana' oroknya bek, oldana' hwam ganya unggululanya bek, rupiah nauba dorowonun senenggululanya bek ululul. 1:8 Dara ono', alja ek sam nimi yalamak dara, peroba' leboka doro diyiwoka, alda perob una' anyek perob senelelanya benyek, ganya siklewoka diri ubdangoka, pelelanya benyek, geisa ganya boboka, yamal longgululanya bek ululul. 1:9 Alda nimi yok nim ek wenelesil dara, dib nong yub enyek sunuwoka ganya heksulula' aboka hnon, nimi dib yub ak lolomak nim ek, nera meilinya nera an aboka, pe leboka aawosulula' aboka hnon, alda alja dib senewoka domok yub ek, nekemek sok, pe salabmoubuka ululul. 1:10 Yuba blekoka e' dem yuba leboka, nimi gliboka yoka' amba bo balasak nim era nauba ulumak. Okoka dara, Yahudi yuba domek nimi nong enyek, anaso nauba ulumak. 1:11 Ban wenyhen nim era, neknenggunuseng yub edya, nimi nauba nim e gebman malya nenelesaka' anasa, sikja sibama' hyak lebnok. Sikda ban unulumaknya nera, anadya dekna' salya' malya uboka dobnoba' aboka ulumak. 1:12 Sik moumen al Kreta sokok ab ununumna' lelemoknya bedya seleb leboka' ara, "Kreta nim era, yu hwam ok bei gam anaso uboka, gwanenga orok nenewoka deregoka ono' sulmalya' ulumaakanya, soba' sonda' hwam ok lelemak nim ulumak," hyok. 1:13 Ban ununumna' lelemoknya benedya lemoknya nera hyak aldib nong. Anasa, sikda dib yuba dolomaka' nong anyek, pe salalmoublenoka' aboka, anda hyak pe oma leboka wenelesilom. 1:14 Anya hnonda Yahudi nim edya' youma' nekna' gom, dib nong yub ek lek aboka ulumak nim edya yub ek an dib salabmoubijek anasa, anja pe neklesilom. 1:15 Nimi ganya geisa ulumak nim ek dara, yoka'-yoka' nidya' ara geisa deng ok ulumla. Bok nimi yuba okoka ganya goluwoka dona' loboka, ganya sembeja' adya ok goluwoka ulumak nim era, sikja soba' seinina' ab, sikja mek ganya seinina' ak ara, seleb sembeja' ok doka' anasa, geisa una' ara meka' me anaba unggulusil! 1:16 Sikda sonda' anasa nunda Imik Neyung ak ella ulumab alamak bok, sikja unulumaka' adya, ella ulumab ana' ak sonda nenelemak. Sikda omoma dablesil nim ulumak. Sikda yub ak ganya dib olokna' ara lek senelemak nim ulumak. Sikda perobnya nemba dara, pe ununa' ara unuwanggunuseng nim ek anara ulumak.
2:1 Titus o, bok anak dara, hyak dib perob nong eika' yub enyek ok neklesilom. 2:2 Nengmabo nauba nang ek dara, sikda ganya siklewoka kaboka ulunoka' aboka, peroba' ok seiniwoka ulunoka' aboka, hnonda yok nim edya perob senelesak nang gekneba' ulunoka' aboka, ono' yuba dib senebmoubuka, hyak wana' ubdangoka, pe siklewoka welenoka' aboka pe neklesilom. 2:3 Anasonya neikek, ono' seleb kalamla nauba nim ek, Imik Neyung mabo pe ulumak diliga' enyek doboka ulunoka' aboka, yok nim ek miniwoka len yuba loboka, yu meka nauba deregoka una' ara mem aboka neklesilom. Ono' sikda perob yub enyek nekdangoka ulunoka' aboka neklesilom. 2:4 Sikda ban unulumeija' adya, wera ono' sikja goubenya gelewa ek, sikja nenyab eb, memab ab, wana' ulunoka' aboka neklesinok. 2:5 Ono' goubenya gelewa era, geremseng uboka, ganya geisa uboka, namen uboka, ono' nenyab adya yuba keboka, perob ek nimi dangalenoka' aboka wenelesinok. Nunja Imik Neyung yub ara yok nim edya malya neneweijek anasa, anaso pe ulunok. 2:6 Anasonya neikek, ono' goubenya nang ek anaba, sikda pe seiniwoka diri ubdangoka pe ulunoka' aboka duka' lolowoka wenelesilom. 2:7 Anda yoka'-yoka' nidya' unulumena' ak ara, yok nang edya diliwagenoka' aboka, perob ok unululom. Anda yuba neklesimena' ak ara dib nong ok anyek, laga angawoka neklesilom. 2:8 Anadya anak malya senelenjak nang era, nunja malya una' hnon ununa' orok adya nuk minina' yuba okna anasa, sikda alya dabsulul aboka, nim adya si malya danganggulumla yuba damok enyek, pe geremsenga' lanawanamlya yuba damok enyek neklesilom. 2:9 Wa arawoka welemak nang ek dara, sik wa welemak ek nim edya yuba pe keboka, sikenek eiya dabsulula' aboka, pe unulunok. Wa unu welemab bok anasa, anyek elegosuso aboka youmbura' debna' ab, yok-yok saawoka lena' ara mem. 2:10 Hoka' dona' anaba hyak mem. Sikda pe uboka, wa bojam welemak senen hogung enyek laga geknelenok. Wera ban unulumeija hogung enyek, yok nim edya eiyiwoka, sikda nunja blebsina' dubnya Imik Neyung bedya yub ek gigilenoka' aboka, unulunok. 2:11 Anasa Imik Neyung ara seleb orowek soko nimi nidya' ak, blebsina' damoka bo yalasil wana' una' era, seleb aawosuk. 2:12 Ban Imik Neyung adya wana' uboka eleksina' adya, nunda sokok an ganya oka dena' ulumla' digum una' hnon, yoka'-yoka' Imik Neyung adya perob gom senelelanya nek hnon, hyak loblulum aboka nuk neklesil. Nunda sokok an ulumeibya danyek, pe ganya siklewoka, geisa uboka, Imik Neyung ak pe bojam ulunoba' aboka, alja wana' una' era neklesil. 2:13 Nunda wenera, nunja perob anasa berra yaso senelemab sum era, nunja' senenggom Imik Neyung uboka nunja bleblesilnya Yesus Kristus laga danamla sum enyek, nauba omom nong ubnamla' anasa, diri ulumab salek enyek, anaso ulumnelum aboka neklesil. 2:14 Nuk malya una' nidya' ak ab blebsununa' aboka, al nong anyek nunsamba leboka elegosuk. Anadya wera alja mab ok nenewoka, malya una' meka' unggom nimi neniyiwoka, perobnya nenyek, yeng ganya boboka ulunoka' aboka, ubsuk. 2:15 Anda hyak loksonya benyek ulumenekanya, anja yuba kelenggija nim ek, ban nidya' lebnanya nera, hyak pe wenewoka ooma leboka neklesilom. Anak yok nim edya dara, alda or maly, mek goubenenya benya', seneweigejek anasa, mem!
3:1 Wenewoka bo usin nang ek hnon, senenggom dub nang ek hnon, pe giboka yuba kelemunukanya, ono' perobnya nera, soba' yeng ganya boboka unulululum aboka, anja yuba dolomak nim ek pe wenelesilom. 3:2 Ono' sikenek, yok nimi si ak malya yub edya, malya nenewomunuk aboka hnon, nimi yok nim eb mala weboka waldana' loboka, pe hekna' ganya boboka ulululum aboka hnon, nidya' yok nim ek, namen uboka pe hekna' hwam ok ulululum aboka hnon, wenelesilom. 3:3 Anya wera, nunda numbabya youma' dara, yuba blekoka dongdang ana' ak ulumouba. Nunda youma' dara, bob nenewoka lelesiikanya yok-yok ganya seinina' edya hnon, yoka'-yoka' unuweisinya senen ganya edya ok goluwoka malya ulumouba. Nunda yu hwam ok uboka, hmana lebdangoka, hyak lek senebdangoka ulumouba. 3:4 Bok nunja blebsina'anya Imik Neyung bedya nuk alja perob una' ab, ono' alja wana' usina' ara, seleb amasuk dara, alda nuk blebsuk. 3:5 Alda nuk blebsuka' ara, nunja alak peroba' ak unumouba amba blebnenggubsuk bok, alda alja men nuk angoo yadyek senewoka arasina' adya ok blebsuk. Imik Neyung Geisinya adya dib embenga' damok ab, penya beilina' ab dara, nuk elegoka mek elegosuka' adya blebsuk. 3:6 Imik Neyung adya alja Geisinya nuk gokoka elegesuka' ara, nunda blebsina' dubnya Yesus Kristus pik uboka elegesuk. 3:7 Wera alja wana' uboka eleksina' adya, nuk peroba' neniyisuukanya, ono' nunja dib embenga' ulmoubna' damok ara, nunja seiniwoka diri ulumabnya nenyek, dobnamak aboka blebsuk. 3:8 Ban lebna yub era hyak dib yuba. Nadya senelamna' ara, ban seleb wenyhenya nenyek, yok nimi seleb Imik Neyung ak dib senelemak nimi nidya' ara, perob wa nong enyek hyak duboka yeiriwoka welenoka' aboka, hyak nauba so pe neklemnesilim. Ban anaso una' era, nimi nidya' ak dara, peroba' ab perobnya neb danyek ulusil. 3:9 Bok anak dara, dongdang aboka yeiriwoka malya gak enyek, heng ero yabalamaknya neb, youma' unumok aboka salya' nekdo bulumak nekna' eb, Yahudi nim emba unuwanalum an yub amba mala weboka waldana' ab dara, ban nidya' ara peroba' ak unggulumlakanya, nuk pesina' damoka bo lanana' oroka' ak anasa, anara mok geboka ululom. 3:10 Nimi yuba dolomaka' ak doluwoka bokol goklesak nang ek ara, anja ban unululama' ara loblom aboka, li penya unu gorogoka lelelom. Ban nen seleb unuwamen bok dara, anda alab neika' uruma dobdangoka una' ara mem. 3:11 Ban anaso nang era, alda hyak seleb malya nonga doknya bera alan. Alja malya ulumla' nong adya, wera alda malya una' hwamnya seleb nenebdangamoka' ara, ella ululam. 3:12 Nadya Artemas bek gom, Tikhikus bek gom, anak bilom aboka ben hnon boknya' anyek, ben hnon anak yalya dara, nara sargena' li yenewalyebok dara, Nikopolis moka ulumnamna senemna' anasa, men na ulumnya' ak berra yanalam. 3:13 Senas yuba damok elnya beb, Apolos beb dara, sikda pe lanawoka baladuruka' aboka, sikenek unggulumlya' nidya' anyek, pe duboka arawanasilim. 3:14 Nunja nim era, sikja una' ek dara, peroba' ak unuwanggubijek aboka, sikja ganya edya anyek desibya bobsibya senelemaknya nera, pe dolonoka' aboka, sikda perobnya nenyek unulmorulunoka' aboka ella dangalanok. 3:15 Nunja hemyabo nimi nidya' anyagan nab neika' ulumab nim edya, ugunuk perob aboka gibsak. Nunja gibsabnya nera, nunja hemyabo yok nimi, yuba dib senelemab adya wana' ulusak nim ek, unu gibisak aboka nekdo yibinelam. Anya wera, Wenelesilnya bedya, ugunuk nidya' nauba wana' uboka eleksina' ara ulusulul. Nara Paulus bedya seleb lebsin.
1:1 Nunja' hem Pilemon o, nunja' hem be uboka, neik wa welemabnya ululam! Nara Paulus, Yesus Kristus amba leboka henga goubnyeknya bedya, nunja' hem be Timotius beb neika' uboka, ban momnya dona' enera anak beibgenem, 1:2 hnonda anja' ek sam yuba dona' nim longolomak nim ek hnon, nun hmal gel Apfia gek hnon, nub neik wa welemabnya Arkhipus bek hnon momnya dona' enera beibsinem. 1:3 Nunja ganya edya ugunuk ara, nunja' Neyung Imik Neyung ab, Wenelesilnya Yesus Kristus ab dadya, wana' uboka eleksina' ab, nimi pe una' ab dara ugunuk eleklesulul senelesab. 1:4 Nara soba' molol yaben dara, anja si sibuka Imik Neyung ak perob aboka molowoka giblamna. 1:5 Nera an nong anyek, Wenelesilnya Yesus ak dib senewoka ganya ologoka ulumlakanya, ono' nimi yok muna' Imik Neyung mab ak wana' ulusil an yuba kelemna' anasa perob aboka ansamba nauba mololenggen. 1:6 Nadya heng uboka mololenanya nera, nunda seleb Kristus ab neika' kwebdangamoubnya nenyek, nunda yuba dib dolomab nimi gekneba' uboka, yuba doboka Kristus lomok ulumaba' adya ulusila' anyek pe ella ubluluma' aboka mololosin. 1:7 Hem Pilemon o, anja nidya' yok Imik Neyung mab ek wana' ulusilima' adya, wera nadya ganya heklenelekanya, naba anaso unuweisinya ganya nauba bolomna! Muna' Imik Neyung mabo nidya' anja nong una' enesa leboka, hyak nidya' anak ara, ei-ei ganya bolonjak. 1:8 Anasa wera nenesa leboka, nunda Kristus bek dib senelemab nang ek anasa, nadya ban nenyek or unuwalom aboka oruganenggisinya bok, 1:9 nunda wana' uldalanamnya nenesa, unuwanalam aboka molowagena' ok. Nara seleb yamen danakanya, wera Yesus Kristus amba leboka gasa ek seleb henga geregoka beinyek. 1:10 Nara Paulus bera, henga goubna' ek ulumsa salek era, Onesimus bera nadya me Imik Neyung me dangamoknya bemba, alak peroba' lebnelam aboka hnonok molowagen. 1:11 Onesimus bera youma' ansamba dara dolbalek senen bok, wenyek dara perobnya bek ulunggel, nera or ansamba ok gom, alda nasamba hnon perobnya bek ulusil. 1:12 Nadya ban hyak wana' ulunanya bera, wera anak sam saawoka bokol yagen. 1:13 Imik Neyung adya' perob lero yanggan yuba lero yabana' anasa, henga gouboka gasa ek beibnyeka' ak an neika' nab ulunimekanya, an lunuwoka na aralenulula' aboka bana' loblom hununa' ubnadyok, wera or bokol yan. 1:14 Bok anja nak or unuwanalam ana' orok bok dara, ununanya nenegom aboka, lobna. Nadya anak unuwanalam aboka duka' len danagom, alda anja ok ganya doboka unuwanasom enyek perob senewoka lobna. 1:15 Onesimus bera anak se' loboka yibijoknya nera, ono' eimik era anadya anja alak soba' amba doro dilililoma' aboka ubnenggubuk de? 1:16 Wenyek dara alda ek wa wenya dangoka una' ok unggululabok, alda perob wa wenya be hnon ulumla. Alda wera hnonda Imik Neyung yuba dolomaba' wana' ulumabnya bek hnon ulumla. Alda wenera nak dara, nadya wana' hemnya ulunelekanya, dara ono' anak dara nauba so wana' ulunggel! Anasa alda wera nunja' orukna' wa wen danaba peroba' ak ulumlakanya, ono' hyak nauba ara Wenelesilnya bedya wa wena' anaba hyak perobnya bek ulumla! 1:17 Anasa wera nenesa leboka, nunda neik yuba don nang ulumaba' anasa, anja nak peroba' leboka dolonelem sok, ono' Onesimus beneba neik so peroba' leboka dobnelama' anasa lebna. 1:18 Alja anak malya unggelya goma, bona' bob longgelya gom ara, nadya anak nidya' ara lunuwanenggen. 1:19 Wei, anasa ban nenera nadya soruk yoka' adya momnya dobna, Nara Paulus, nidya' ara amba lunuwoka deknenggen. (Ambabya nadya dara, yuba doboka ulumak nong una' era gogoba' bob lobnulum aboka laga neknenggununggen). 1:20 Anasa wera, Wenelesilnya benesa leboka, hem o anda nak arawananelem senelamna. Anya Kristus lomok neik wana' uldalamab nim ulumabnya nenesa, nak an ganya sangab eleganenelem. 1:21 Ban momnya dona' en anak beibgena' ara, nadya unuwanalam aboka molowagenya nera, al or unuwanamla' ara ella ulumnakanya momnya doboka beibgen. Oroka' anaba wenyana' oroknya neneba nauba unub lolowanamla' anya' aboka ubna. 1:22 Hnon ugunja nasamba mololenuluma' anyek, Imik Neyung adya keboka unuwanamla' seleb ella ulumna' anasa, na nong anyek doboka ugunuk sam bo yanelya sum era, anja' ek sam mabnamna' anasa, ekla hnon nasamba orowek meeb loneloma' aboka molowagen. 1:23 Yesus Kristus amba leboka, neika' henga goubuka beibsika' ak anyagan ulunamnya Epafras bedya ugunuk perob aboka gibsil. 1:24 Hnonda nadya' hemyabo ban nang danadya, Markus beb, Aristarkus beb, Demas beb Lukas beb dadya ugunuk perob aboka gibsak. 1:25 Anya Wenelesilnya Yesus Kristus adya ugunuk ganya ak wana' uboka eleksina' ulusulul. Nara Paulus bedya gibsin.
1:1 Hyak youma' dara, Imik Neyung ara yuba sabnamna dara, nunja' neyung yab ek li gong-gong ununumna' lelemek nang pik uboka yoka'-yoka' adya sunuwoka yuba salamok. 1:2 Bok wen sidya' dagalongna' salek en era, alja me pik uboka yuba sal eleklesil. Imik Neyung adya alja me Yesus pik uboka hyak nidya' men uyimok. Anya ono' Imik Neyung adya alja me pik uboka uyimok. 1:3 Imik Neyung adya' hyak imik senenggom dilina' era, me al nong ulumla. Imik Neyung nonga laga una' diba' ara, Yesus adya una' pik an ulumla. Wera sokok sam ab imik sam hnon nidya' ulumla' amba dara, alda migib yub adya akwa' doboka bo ulumla. Yesus ara soko nim emba malya una' ak ab seleb peroba' nenebgogowok dara, Imik Neyung hyak imik ululanya beb neika' imik heikek sam nimi wenewoka bo usin ekla buna' ak sam bukok. 1:4 Wera, lero nang ek silisil si nera mek so bok, Imik Neyung adya Yesus ak sib elegok si nera hyak senenggom si nek sibuk. Dara neik so, lero nanga nidya' ara sokok so nenewoka, alja me Yesus anyek hyak senenggom dubnya nenemok. 1:5 Imik Neyung adya dara, lero nanga ben hnonok sibin ak anaba, "Anda nadya me ululam, nak dara sumen anja' neyung be dagen," an dara, hyak meka' hnon wenyhenggumok. Dara ono' Imik Neyung adya' anaba, "Nara alja' neyung be danamna dara, alda nadya me danamla," ana' ara wenyhenggumok. 1:6 Dara Imik Neyung adya alja' yando me sokok an bokol yanggok sum enyek, Imik Neyung adya', "Nidya' Imik Neyung lero nang gong dara, nadya me nek giblemnemak," hyok. 1:7 Alda lero nang emba dara, Imik Neyung adya, "Lero nang era, kabo' doroklamla' anaso nenelesil, alja' aran nim era, uk boka' yaka' dilina' anaso ganya nenelesil," hyok. 1:8 Bok alja me nemba dara, Imik Neyung adya dara, "Wei Imik Neyung o, an bululam oulyang era soba' ulmorulumnamla! Anja wenewoka bo ulumnesilima' ara, hyak perob jong una' enyek lelewoka wenelemnesilim e. 1:9 Blekna' hwam una' ara lek senen ganya boboka perob jong una' wana' nong ululama' anasa, Imik Neyung adya, anja' neyung Imik Neyung adya dara, anja' hemyab era mek so bok, anak weboka dobjookanya, ei-ei ganya bona' anyek anak nauba elegajok," hyok. 1:10 Dara ono' Imik Neyung adya hnon leboka' ara, "Wei, Wenelesilimnya o, men dara, soko nidya' ara anja uyiwoka, ono' im anaba ambeyok uyiwoulum. 1:11 Yoka'-yoka' nidya' ara ongon boksom anaso' ak gweldekoka denghenemla bok anak dara, meka' denghenggunulam. 1:12 Im ab soko ab dara, anja boksom anaso' anyek dob salawoka guksuwoka winiwoka, ono' yoknya lunuwoka beibnelam. Bok an nong ak dara, yok nonga lununa' loboka, anja embeng una' ara, gobdo meka' sidya' dakoka denghenggunumla," hyok. 1:13 Ban nidya' alja me nek lemok bok, Imik Neyung adya dara, yok lero ek ara, "Anda nadya sirik soruk ak sam buknelam dara, anja' isa' nang era anja yan damak beil yanamna dara, anja yan dorokna' gebnalam," ana' ara hnon wenyhenggumok. 1:14 Wera anaso dara, lero nang era, dib nonga' ara hek nang ek ulumak do? Lero nang ek dara, sikda Imik Neyung bedya wa welemak nang ek uboka, nim Imik Neyung adya blebnamla nim ek ganya arasina' amba ulumak nang ek ulumak.
2:1 Wera anasa, nunja kemouba' anyek, mek-meka' uboka mok danggiga bibyek anasa, nunja seleb keboka domouba' ak ara, hyak pe salabmouboka ulumnemab. 2:2 Dara, lero nang pik uboka, dib yuba leb elegeisika' ara, pe kena' orok uboka bleklemek nim era, unulumeka' sunuwoka igina' dolomek dara, 2:3 nunda senenggom blebsina' damok ek, dolbaleka gebnesibya dara, igin elekna' lobnesusu de? Ban blebsina' damok enera, Wenelesilnya bedya men leb elegesuukanya, alak ab kemek nim edya, nuk aldib an bekna' elegesik. 2:4 Imik Neyung ara alja' lok so bekna' eb, senenggom lok so ununa' eb, lok so migib ununa' eb, hnon alja unuwanamna senemoka' sunuwoka, Geisinya anyek alja bokosuknya neb dadya, blebsina' damok enyek laga amasuk. 2:5 Anasa, an nenera, nunja wen an salamab sokok ara, eimik yanamla soko enyek, Imik Neyung adya lero nang ek ara, migib eleganggubsuk. 2:6 Bok nimi hnon Imik Neyung bukuk sam ara lemekja, "Wei, Imik Neyung o, nim ak anasa, anda alak beknesom de? Goma, nimi me ak anasa, alsamba leboka peroba' gebnesom de? 2:7 Bok anda nim ek ara, lero ara imik nenewoka, nim ak dara, sokok nenewolum. Nim ek ara, alja si imik nenewoka, alja si nera gigiwoka, 2:8 yoka'-yoka' nidya' amba leboka dubnya nenewolum," aro momnya dobok. Imik Neyung adya nim ek yoka'-yoka' nidya' amba dubnya nenewok dara, wera hnon yoknya nek nim adya dubnya unggululanya nera hyak unggulumla. Wera ban unuwoka' anyek babya, wera nunja kemen dara, nim ara yoka'-yoka' nidya' ak ara dubnya dangoka bo ulumla' ara hnon eilinggulumab. 2:9 Bok Yesus ara, se' salek amba mek sokok so geboka, lero ara imik geboka, Imik Neyung adya wana' uboka eleksina' adya, nimi nidya' amba somogousulula' aboka umok bok, wera alda somogousuka' adya, alak si imik nenena' ab, gigina' ab gouluwoka' ara nunda eillilemab. 2:10 Dara, Imik Neyung alsamba leboka yoka'-yoka' nidya' ululanya, ono' yoka'-yoka' nidya' uyimoknya bedya, alja mabo gong dara si imik nenelesuukanya, sikja blebsina' damok bo ulusuknya bek igina kweiyiwoka' adya gobdo gigiwok dara, anedya pebok. 2:11 Yesus adya nim ek geisa nenewosuknya beb, an geisa nenelesil nim eb dara, sikda nidya' ara hnonok mabo siliba' ek ab ulumak. Ban nenesa leboka Yesus ara nim ek, nadya' hemyab ana' ara, alya unggulumlakanya wenyalasil. 2:12 Yesus adya Imik Neyung bek, "Anja si nera nadya' hemyab ek nadya leb eleganamna. Sikja yuba longolomeija' gangganek ab anak giblemnenggen," hyok. 2:13 Dara Yesus adya hnon, "Nadya ganya nebom ana' diba' ara, Imik Neyung ak beibnamna," hyok. Anya, "Imik Neyung o, anja doboka nak elegounulum mab era, nab an ulumab e," hyok. 2:14 Ban mab era nim ek ab mab anasa, Yesus anababya sik so' dookanya, sik nonga dobok. Anedya al somogoka' ara, alda somokna' dub migiba' Iblis ak, hmenga' nong gebnuna' aboka unuwok. 2:15 Wera an unuwoka' adya, nimi nauba somokna' ak soba' lok ganya adya, igina kweiyiwoka bo bulusuknya nek ab, muna' gobdo bleboka dobsuk. 2:16 An unuwoknya nera, lero nang ek unuwanggubsuk bok, wera aldib alda nimi Abraham nang yila' ak unuwousuk. 2:17 Ban nenesa leboka, Yesus ara gobdo nimi nonga dangoka, nim adya ununa' dobnuna' aboka ubuk. Wera anadya Yesus ara Imik Neyung amba bojam uboka, angoo yadyek senewoka arasinya dangoka, yuba wa gaka' dubnya ulununa' aboka ubsuk. Dara, nidya' nim adya malya una' doboka bobogosulula' aboka ubsuk. 2:18 Anasa Yesus ak ara, alak men bisa' adya sunuwoka, igin ara har so' kwellilisila' ara, alak seleb unuwoka' ella umoka' adya, alak unu sunuwoka' anyek bekoka, alja mab ek sunulusila' ak ab dara, alda pe aralesil.
3:1 Wera anasa, nadya' hemyabo geisa nim Imik Neyung adya youbsuk nim o! Nunja dib dolomab yuba lena' gaknya bek, Imik Neyung yuba wa gaka' dubnya Yesus bek anyek, ugunja ganya ologoka seinilelulum. 3:2 Dara neik so, Musa bera Imik Neyung ek sam amba wa nidya' ara, bojam ulumok sok, Yesus anaba alak weboka domoknya Imik Neyung amba bojam nong ulumok. 3:3 Wera nim adya somna e nera loboka, alda sololanya bek nauba so gigilemak sok, Yesus ak dara, nauba gigilemak bok, Musa bek dara mek so. 3:4 Nidya' e diba' ak dara, alba sona' elnya bedya ok solomla bok, yoka'-yoka' nidya' pe geremsenga' sunuwoka sololanya bera, Imik Neyung ak hnonok ulumla. 3:5 Musa bera Imik Neyung ek sam amba wa arawoka bojam uboka wenya ulumok. Ban bojam ulumoknya nera, eimik laga wenyhenemoknya nenesa leboka, unulumok. 3:6 Bok Kristus ak dara, albabya Imik Neyung me yoka' uboka, Imik Neyung e amba dara, alda bojam uboka e dubnya ulumla. Nunda ganya dib senena' ab, ganya wena' ab danyek, salalmoublemeibya dara, wera nu nong ara Imik Neyung alja e diba' ulumab. 3:7-8 Anasa wera, Imik Neyung Geisinya adya wenyalasil sok, "Ugunja' neyung yab edya youma' ek hwalek sam ab Imik Neyung ak loba' nenewoka blekoka ulumek sok, ugunda sumen Imik Neyung yuba kebmunjok dara, saawoka gasa ganya bona' ara mem. 3:9 Wera Imik Neyung adya dara, hwalek sam ab ugunja' neyung yabo youma' nim edya, nadya yoka'-yoka' nidya' senenggoma' unulamsa' anyek, denga hnonok uboka ebdobnya meikbadya gibna' seleb eiyimekjok, nak loba' nenewoka sunuwoka ol neblenyek sok, ununggom mem. 3:10 Ban sikja ununa' enesa leboka nara yu ganya boboka wenyamsa' ara, Sikda soba' ara nak bojam ununena' oroka' anyek, nadya yub ek ganya ologoka ununggulumek. 3:11 Anasa leboka, nara yu ganya boboka waboka laga dib unuwanasin hesa' ara, Nadya deregoka pe dek-deka soboka ulumna' ak ara, sikda hyak weknenggunumak, hesa," hyok. 3:12 Nadya' hemyabo nim o, ugun gangganek ara nimi ben hnon yuba dib senena' loboka malya ubdibigamlya' sok moruwoka, Imik Neyung embenga' ululanya bek ab, saawoka loblyek anasa, ugunda pe keeboka diri uldalalulum. 3:13 Bok, ugun gangganek ara, sonda' damok malya una' adya nimi ben hnon alja ganya gasa darawalyek anasa, ugunda nimi ben hnonja hnonnya bek, sumen or anam alalum salek era, ugunda li soba' pe wenewoka unuldalalulum. 3:14 Nunja men youma' ek mouruwoka dib senemouba' anyek, pe gasa salabmouboka ulumeibya' ara, sidya' daknamla dara, aldib Kristus ab seleb neika' un nimi douba. 3:15 Bok, hnon anaso wenhyoka' ak, "Ugunda sumen Imik Neyung yuba kebmunjok dara, ugunja neyung yabo youma' nim edya Imik Neyung ak bleklemek sum enyek, gasa ganya bomek sok ununa' ara mem," aro lebok. 3:16 Wei, nim Imik Neyung yuba kemekjok saawoka gasa ganya bomek alamla nim era, hek nim ek lelemla do? Musa bedya Mesir sokok aba' ara doboka bo balasuk nim ek gom de? 3:17 Anya, hek nim ek denga hnonok uboka ebdobnya meikbadya gibna' Imik Neyung ara yu ganya bobmorusuk do? Nimi nidya' malya ura balameekanya, ono' hwalek sam salya' somokdo balamek nim ek gom de? 3:18 Sum enyek Imik Neyung adya laga dib unuwanamna hyoka' ara, "Nadya deregoka pe dek-deka soboka ulumna' ak ara, sikda hyak weknenggunumak," hyoka' ara, Imik Neyung ara hek nim ek lebok do? Ban wenhyoka' ara, Imik Neyung ak gasa ganya boboka bleklemek nim ek lebnenggubuk de? 3:19 Wera anasa, sikda Imik Neyung ak dib senena' orok adya, weknenggubeka' ara, nunda seleb eillilimab.
4:1 Wera anasa, an Imik Neyung adya dek-deka sona' ak weknelum hyoka' ara, anam or ululabok anasa, nim ugun gangganek ara ben hnon weknenggublyek anasa, hyak pe diri uldalamnemab. 4:2 Anasa Imik Neyung adya' perob lero yanggan yub era, sikenek leb elegeisik sok, ono' nuk anaba leb elegeisik. Bok sikja yuba seleb kebekjok, dib senena' orok anasa, siksamba dara, Imik Neyung yub ara peroba' danggubuk. 4:3 Bok nu wen an Imik Neyung ak dib senelemab nim era, ban dek-deka sobnelum wenyhesuka' ara, dolomab. Ban unulumaba' ara, al Imik Neyung adya ban lebok sok, Nara yu ganya boboka waboka laga dib unuwanasin hesa' ara, "Nadya deregoka pe dek-deka soboka ulumna' ak ara, sikda hyak weknenggunumak," hyoka' ara sunuwoka nuk unulamla. Imik Neyung ara anaso wenhyok bok, alda alja wa nera, soko anam uyiwok salek enyek moruwoka seleb webdakok. 4:4 Sek sum mem sum emba dara, Imik Neyung yub ek ara, "Imik Neyung ara, welemoka' wa nidya' ak ab, sek sum mem sum era, dek-deka somok," wenyaro momnya dobok. 4:5 Anya ban yub enyek an nunda einilimaba' ara, "Nadya deregoka pe dek-deka soboka ulumna' ak ara, sikda hyak weknenggunumak," wenyaro webok. 4:6 Perob yuba men kemek nim era, keboka pe ununa' orok adya, dek-deka sona' ak ara, gigiwoka dobnenggubek. Wera anasa laga geknelamla' ara, nimi hnon yok nim ek lunuwoka anyek an wekel binimak. 4:7 Anasa leboka, Imik Neyung ara, yok sum hnon meewoka' ara, "Ban sumen," hyok. Dara ono' eimik gibna' gong lemok bok, Daud be pik uboka, Imik Neyung adya laga unuwanasin aboka leboka' ara, "Ugunda sumen, Imik Neyung yuba kebmunjok dara, ono' saawoka gasa ganya bonggom mem," hyok. 4:8 Yosua bedya Musa be lunuwoka sikda dek-deka sona' ak seleb bo wekesisobok dara, Imik Neyung ara, ono' eimik enyek yok sum ek henggunumso. 4:9 Wera anasa Imik Neyung adya nim amba dara, yok dek-deka son sum, nera an sek sum ulumla. 4:10 Anasa, heknedya Imik Neyung adya dek-deka sona' ak seleb wekelenya bera, alda neik so, Imik Neyung ara alja wa nek ab dek-deka somok sok, albabya alja wa nek ab dek-deka solomla. 4:11 Men nim edya keboka pe una' orok adya sikda malyinggilimek sok, numba ben hnon unuwalyek aboka, Imik Neyung adya dek-deka sona' ak weknoba' aboka, perob so pik era soba' duboka elemnemab. 4:12 Imik Neyung yub ara, embenga' ab, migiba' ab, yok-yok mal si nek ab dara, hyak yu nonga' ak ulumla. Imik Neyung yub ara, nimi nong ab, nimi ganya ab, lomok wekoka bokol meneklamla, ono' yok ab, nolonggwerena' ab, ana lomok anaba bokol meneklamla. Anya, nimi ganya seinina' ab, unuwesinya ganya eb danaba, yok-yok nenewoka ella ulumla. 4:13 Imik Neyung adya henga kemena' ak ab dara, yoka' nidya' hnon go' pe doknowamenggom. Alda yana lelewanasil dara, nara anasa unumsa aboka laga lebnemabnya bek, yoka'-yoka' nidya' ara, nong baneng laga ok ulumla. 4:14 Anasa wera, Imik Neyung saramek sam seleb byuknya, Imik Neyung bedya me Yesus ara, nunja senenggom yuba wa gaka' dubnya nunsamba ulusila' anasa, nunda Imik Neyung yuba dib dobab amouba' ak pe salabmouboka diri ubdanob. 4:15 Nunja senenggom yuba wa gaka' dubnya bera, alda nuk an igina kweboka malya nenelesila' ara, alda elgom uboka, alba ununa' oroknya bek unggulumla. Bok, albabya numba ulusil sok, seleb bisa' adya sunubyaawoka uboknya bok, alda malya una' ak hnonok meka' oroknya bek ulumla! 4:16 Wera anasa, nunda alja araweisiso senelamab salek era, angoo yadyek senewoka arasina' ab, wana' uboka eleksina' ab, dobnoba' aboka, Imik Neyung nunja aralesilnya bek ara, asa' ganya boboka, alja' perob eleksina' saramek sam ara balanob.
5:1 Anasa, sik yuba wa gaka' dub nang era, Imik Neyung ak ganya doboka eleknanya neb, malya una' amba oboka molonanya neb dara, alja unululula' aboka, nimi gangganek ab weboka, siksamba Imik Neyung ak ara alja yuba saboka unululula' aboka sekillilimak. 5:2 Albabya nim ak adya hmeng ulumla' anasa, yuba wa gak nang ulumna nang era, nimi yoka'-yoka' elgom uboka, yoka'-yoka' adya geregoka meknelemak nang ek ara, namena' pe ganya goluwoka aralesil. 5:3 Imik Neyung adya malya una' doro bobogosulula' aboka bo beil bana' ara, yok nim edya malya una' emba ok gom, alda alja malya una' enesa hnon bo beil balamla. 5:4 Nimi ben hnon alja ok ganya doboka, nara yuba wa gaknya ulumnamna aboka sekillildana' ara orok. Harun bek umok sok, Imik Neyung adya anda wa nen webnelam aboka youbsin dara, nim ara yuba wa gak nang dangalamak. 5:5 Anasonya neikek Kristus anaba, alja ganya doboka nak gigiwanenoka' aboka yuba wa gaka' dubnya nenebdanggubuk bok, alda Imik Neyung adya ok ganya doboka senenggom yuba wa gaka' dubnya aboka sekiyiwok. Imik Neyung adya Yesus ak, "Anda nadya me ululam, sumen enyek moruwoka nara anja' neyung be dagen," hyok. 5:6 Dara ono' Imik Neyung ara yokok sam hnon, "Melkisedek be yuba wa gaknya ulumok sok, anda soba' ara senenggom yuba wa gaknya ulumnelam," hyok. 5:7 Yesus ara anam sokok an ulumok salek era, al nonga somokna' ak ab blebnemoknya Imik Neyung bek, bii aboka engelemookanya, aralenelom aboka mololomok. Wera Imik Neyung ak hyak pe ganya sokok nenebdangoka giblemoka' adya, alja molona' era Imik Neyung adya pe kelemok. 5:8 Yesus ara Imik Neyung bedya me yoka' ulumoka' anyek babya, alak an igina kweboka unulumoka' ak ab, pe unulumoka' adya eiyiwoka ella dangalamok. 5:9 Dara Yesus ara, muna' gobdo pe meebdakok dara, nimi nidya' alak pe keboka unulumak nim emba, diba' blebsina' gaknya dok. 5:10 Imik Neyung adya' anaba, Melkisedek bek yuba wa gaknya ulumok sok, Yesus anaba yuba wa gaka' dubnya ulumnamla aboka, laga sekiyiwok! 5:11 Yesus ara senenggom yuba wa gaknya ulumla' amba dara, nauba lebnesisinya bok, ugunda pe nidya' olowoka ella danggunusom hogung ululuma' anasa, pe yana lelewoka lebnenggunusin. 5:12 Wen era, ugunda yuba len nanga dangamnesom bok, nera ununa' oroka' anyek, alda Imik Neyung yuba doboka ganya kalamaka' damok ara, yok nim edya anam pe neknesiseng hogung ek ululum. Anya, ugunda gasa dena' lowoka, anam moum soub dena' ok delelum. 5:13 Nimi moum soub ok anam delemak nim era, anam ganya hwina' oroka' anyek, ganya olowoka nera peroba', nera malya' senena' ara anam elgoma' ak ulumak. 5:14 Bok gasa dena' ak dara, nimi ganya karob nim edya, soba' sunuwoka eillilimaka' adya, nenera peroba', nenera malya' senewoka, ella dangalamak nim emba ulumla.
6:1 Anasa wera, Kristus ak men eilibik so domouba yub enyek loboka, gasa yuba doboka ganya kabgiga balamnamab. Anya, ganya dangana' yuba hnon, Imik Neyung ak dib senena' hnon, 6:2 mek dana' yuba hnon, nimi soruka diyiwoka heng uboka' len yuba hnon, somogamna nimi suboka embenga' buna' yuba hnon, igina yaka' ubmoruwanesil yuba hnon, nenyek egomna' diba' saawoka iknenggulumnamab. 6:3 Imik Neyung adya nuk sikda or anaso unuwanok senelesilya dara, wera nenyek nunda unulumnumab. 6:4 Anasa, sikja ganya ara seleb dilina' lomok ulumeekanya, imik ab eleksina' hnon doboka, Geisinya adya hnon domekjok, 6:5 perob yuba Imik Neyung bek ab doboka, ono' eimik Imik Neyung adya bo ubnesil migib era, ella dangamekjok, 6:6 ono' saawoka gwabal lolomak dara, sikda Imik Neyung me ak saawoka gal ak oboka glaboka, nimi hnoum ak derewoka walamaka' anasa, saawoka ganya dangana' ara okna' ak ulumak. 6:7 Moka yalamla enyek meka pe oldaklamla soko era, masa wa weboka melemak nim emba nonga moul eleklamla dara, soko era Imik Neyung adya pel eleklamla. 6:8 Bok soko era erebna' ab girikna' ok malamla dara, wera perob masa mebnenggunuseng soko ek anasa, Imik Neyung adya wema dabna' berrem ulumlakanya, eimik era uka dabnamla. 6:9 Bok nadya wana' ulusin hemyabo nim o, nunja an wenhyaba' anaba, nunja dara, ugunuk ara or malye, diba' pe ulumaka' anya' senelesab. Anya, nunja dara, ugunuk ara sikda Imik Neyung adya peroba', sik blebnesiso' ara seleb dobeka' anya' senelesab. 6:10 Imik Neyung ara hyak pe sunuwoka eleklesilnya ulumla. Ugunja alsamba leboka, neik muna' Imik Neyung mab ek wana' leblumukanya youma' hnon araleluma' ara, ono' wen hnon aralesuluma' amba dara, Imik Neyung ara, ugunuk hiliknenggulusila' ak ulumla. 6:11 Ugunja ganya adya nebom aboka dobsibya senewoka diri ululuma' ara, eimik pe dobneluma' anasa, nunja dara, ugun moumen anyek pe yeiriwoka welemuna' ara sidya' daklul senen ganya bolosab. 6:12 Nunja dara, ugunda sulmalya' ganya bona' ara mem. Nim Imik Neyung adya eleganesin amoka' ak dib senewoka, ganya siklewoka pe diri ulumeekanya domek nim ek ulumek sok, ugumbabya sik diliga' diliwoka pe ulululum senelemab. 6:13 Imik Neyung adya Abraham bek peroba' eleganenggen hyok sum era, anara aldib eleganenggena' ak lebna aboka laga lemok. Wera Imik Neyung ulumla' ak ara, ben hnon imik so una' orok anasa, Imik Neyung al damnya si sibuka dib unuwanamna aboka lebdok. 6:14 Imik Neyung adya dara, "Nara anak peroba' lebnenggena' hnon, ono' hnonda anda senenggom nang yila' nenewanenggen," hyok. 6:15 Imik Neyung adya anaso lebok dara, Abraham bera aldib eleganenela' anya' senewoka ganya siklewoka diri ulumok dara, wera Imik Neyung adya alak lemoka' sunuwoka gigiwoka elegok. 6:16 Nimi hnon nadya anak anaso' ak unuwanenggen aboka dubnya saramek unuwanamna aboka diba' wenyalamak dara, dib dangalamlakanya, ban damok enedya yuba lanana' ara unggulumla. 6:17 Anasa Imik Neyung adya dara, alja anyek eleganesin aboka lebsuk nim ek ara, nadya lebna' ara hyak dib unuwanamna ok aboka, wera Imik Neyung ara al damnya si sibdangoka lebdok. 6:18 Wera ban penya damok era saawoka yok danganggulumla ara, Imik Neyung alja laga lena' ab, unuwanasin amna' ak ara, hyak meka' sonda' lenggulumla. Ban nenesa leboka, nunda Imik Neyung ak peroba' leboka muruklumab nim era, nunja' hogung ak an ulumla' ganya nebom ana' ara dib dobnemaba' anya' senen ganya era migib eleklesil. 6:19-20 Nunja dobnemab senewoka ganya nebom alamaba' ara, girik ak henga geregoka, mek lomok sam doublenggamna' anaso ulumla. Ban unu ganya nebom alamaba' ara, Yesus ara nunsamba aboka mengewosuukanya, lomok wiknena' aklenga poboka wekel byuk adya, hyak gasa ulusil. Dara Melkisedek beneso' anyek, Yesus ara imik heikek wekoka, yuba wa gaka' dubnya nunsamba hyak diba' amba ulusil.
7:1 Melkisedek bera Salem moka dubnya uboka, Imik Neyung hyak imik ululanya bedya yuba wa gaknya ulumok. Abraham bera yok-yok soko dub nang ek oblamagoka yanggok dara, wera Melkisedek bedya pika diboka ouma demok. 7:2 Dara Abraham bera mal oldalameka' ak ab alawoka domok bona' era, sagonya hnon bokoka Melkisedek bek elegemok. (Melkisedek an si nera men dara, "Jong una' dubnya," dara ono' Salem heikek dubnya ulumoka' anasa, wera alja si nera hnonda, "Pe namen una' dubnya," alamek.) 7:3 Wera Melkisedek bemba dara, alda neyung genong ara hnon unggulurek, hnonda al nang yila' si oroknya, alda anyek anyeb beiyimeka' ara, ono' anyagan somogok ana' anaba orok. Alda Imik Neyung bedya me Yesus anaso uboka, alda senenggom yuba wa gaknya ulumla. 7:4 Anasa wera, Melkisedek bera senenggomnya ulumoka' anyek seiniwolulum. Alda hyak senenggom dubnya ulumoka' adya, nunja' neyung yabo sikja' neyung Abraham bera, mal ak ab domok bona' era hnon sagonya nera bokoka alak elegemok. 7:5 Yahudi nim edya' unuwanalum an yub ek ara, Lewi nang yila' ok yuba wa gak nang uboka, neik nang yila' Abraham nang yila' bok, sikja' hemyab Israeli nang ek ab, sagonya bolowoka dolomnemak aboka lebgogomok. 7:6 Melkisedek bera, alda Lewi nang yila' una' orok bok, mal ak ab bona' sagonya nera, Abraham bedya bokoka elegemok dara, wera soruk ak ab domok, dara ono' Abraham bera Imik Neyung adya peroba' eleganenggen amoknya bek, peroba' danenggel aboka ouma debok. 7:7 Nimi nidya' benera peroba' danamla aboka ouma debna' ara, imik ululanya bedya meksonya bek unulumak ara, sonda' lebnenggunuseng! 7:8 Youma' yuba wa gak nang uboka sagonya Imik Neyung elegana' bo bololomek nang era, nimi sirika' ak adya hmenga dangoka somoklomek. Bok Imik Neyung yuba momnya doboka' ara, Melkisedek be Abraham bek ab sagonya elekna' dobok alalanya bera, embenga' ulumla. 7:9 Lewi nang yila' yuba wa gak nang ulumeka' anaba, Israeli nim edya sagonya beillilemeka' dolomek bok, Abraham bedya Melkisedek bek sagonya hnon elegel yabok sum era, Lewi nang lunuwoka elekleng so ubok henesibya' anaba dib lebnesibya. 7:10 Nera Lewi bera anam beilina' orok bok, al nang yila' sikja' neyung Abraham benyek, Melkisedek beb yuba sabdangoka sagonya elegok sum era, Lewi beneba Abraham bedya' nong ok an seleb ulumoka' ak ulumla henesibya. 7:11 Lewi nang yila' yuba wa gak nang ulumek sum enyek, sik pik uboka unuwanalum an yub era Israeli nim ek ara, Imik Neyung adya elegosuk. Bok Lewi nang yila' yuba wa gak nang ulumek bok, Imik Neyung wa anyek geisa wa bok pe wel daknenggulumeka' anasa leboka, yok yuba wa gaknya, Melkisedek be ulumok sonya benyek, Harun nang yila' ak ab gom, alda yoknya bek elegosuk. 7:12 Wera yuba lena' gak nang enyek, Lewi nang yila' ara loboka, yok nang yila' ak daneseng dara, wera Yahudi nim edya' unuwanalum an yub eneba yok danamso. 7:13 Ban yoka' dok alamla' ara, Nunja' Wenelesilnya Yesus anyek Lewi nang yila' ak ab beibnenggunumek, alda yuba wa gak nang dangoka wenggulumek nang, Yehuda nang yila' ak ab beibnemeka' anasa lelemla. 7:14 Nimi nidya' ella ulumaba' ara, nunja' Wenelesilnya Yesus ara, Yehuda nang yila' ak ab beibek. Bok Musa bera yuba wa gak nang lelewoka doboka sekiyiwanamok sum era, Yehuda nang yila' ara, hnon yuba wa gak nang ulumnemak aboka, hnon lebnenggumok. 7:15 Wera nunja an wenyaro lebab yub era, Melkisedek beneso' yok yuba wa gaknya be hnon seleb yok aboka lebnemak dara, wera damoka pe olowoka ella danamab. 7:16 Wenyok yuba lena' gaknya Yesus ara, alda senenggom yuba wa gaknya nenewoka' ara, nim adya unulumak ununa' ek sunuwoka yuba gaknya sekiyiwanggubuk bok, alda al nong senenggom dubnya uboka, sidya' somoganamla' ara oroknya bek sekiyiwok. 7:17 Anasa Imik Neyung yuba bukuk sam lelemla ara, "Yuba wa gaknya Melkisedek beneso ak ulumok sok, anda yuba wa gaknya hyak soba' ulmorulumnelam," alamla. 7:18 Youma' unuwanalum an yuba ulumoka' ara dib goma' anyek, migib una' hnon unggulumoka' anasa, men yub era seleb weilik sam gebok. 7:19 Yehudi nim edya' unuwanalum an yub ulumoka' adya dara, nimi yoka' ak ara, peroba' nenewoka geisa nenesina' ara hnon unggulumok. Wera nenesa leboka, wenyek dara, Imik Neyung adya yok perob ganya nebom ana' diba' elegosuk adya, wera nunda an pik enyek anyeb uboka, Imik Neyung al berem ara or balamab. 7:20 Nera, Imik Neyung adya peroba' eleganesin amoknya nek anyek seiniwoka ubsuk. Yok-yok yuba wa gak nang sekiyiwanasik sum era, hnon anasonya nera, wenyana' orok. 7:21 Bok Yesus ak dara, anyek peroba' eleganenggen aboka, laga yuba lena' gaknya ulumnelam aboka, Imik Neyung adya sekiyiwok sum enyek, Imik Neyung adya dib unuwanamna hyoka' ara, "Wenelesilnya bedya seleb laga leboka' ara, ono' saawoka yoka lebnenggunumla, anda aldib senenggom yuba wa gaknya soba' amba ulumnelam," hyok. 7:22 Wera an unuwoka, Yesus nong ara yok eleganesin an yub ek ab dara, bekna' unuwanesila' gebdok. 7:23 Hnonda, yok-yok yuba wa gak nang dara, sikda nauba ulumek bok, sikda somoklomeka' adya, sikja welemek wa nera garal lolomek. 7:24 Bok Yesus ak dara, alda embenga' soba' ulmorulamla' adya, wera alak Imik Neyung adya, anda yuba wa gaknya ulumnelam aboka elegok wa nera yok nim edya salawanggunuseng. 7:25 Wera anasa, Yesus ara, alda soba' ulmorulamlakanya, bleblesil nim enesa leboka, Imik Neyung ak soba' mololosila' anasa, aldib soba' ulmorulamla' adya, nim Imik Neyung ak al pik uboka yalamak nim era, hyak gobdo diba' amba bleblesil. 7:26 Anasa wera, yuba wa gaka' dubnya bera, banasonya benyek, nunda alak aboka, anera, alda meknena' oroka' ak, malya una' sibin ara, alak meka' una' oroka' anyek, geisa nonga' ok ulumlakanya, malya una' nimi gangganek ara unggululanya, anya imik heikek ara hyak imik ululanya. 7:27 Nimi sirika' bok, yuba wa gaka' dubnya bedya, sikja youma' unumna malya una' enesa, pam oboka uka dabnekanya, an nen seleb dara, ono' yok nimi malya una' amba unulumek. Bok Yesus ara anaso gom. Alda al nonga beibdangoka somogoka' ara, li hnonok bok hyak soba' dib nong amba muna' gobdo somogok. 7:28 Yahudi nim edya' unuwanalum an yub edya dara, malya una' hwam nim enyek, yuba wa gaka' dub nang ulumnelum aboka sekillilisuk. Bok eimik era, Yahudi nim emba unuwanalum an yub ek ab dara, Imik Neyung ara, alja me Yesus anyek, nimi blebsina' dubnya ulumnamla bar aboka, Yesus ara senenggom yuba wa gaknya soba' ulmorulumnamla bar aboka, laga unuwanamna aboka hyak muna' gobdo pe sekiyiwok.
8:1 Anyagan nidya' lelewoka lebab yuba damok ara, nunja' yuba wa gaka' dubnya ulusilnya bera, alda Imik Neyung imik senenggoma' ululanya alja sirik ek sam bulumla. 8:2 Al Yesus ara senenggom yuba wa gaknya dangoka, nim adya sorob e nek gom, alda Imik Neyung adya albeyok soboka' dib nonga' ek sam, alak elegok wa nera welemla. 8:3 Nimi yuba wa gaka' dubnya ulumna' ara, yoka'-yoka' Imik Neyung ak bo beil biniboka, uka daboka giblimnamla aboka sekillilisak. Anasonya neikek, nunja' yuba wa gaka' dubnya Yesus anaba, yoka' hnon Imik Neyung ak beiyiwoka eleganamso. 8:4 Yahudi nim emba unuwanalum an yub ek sam lelemla' yuba sunuwoka, seleb welemak nang edya Imik Neyung ak ara yoka'-yoka' uka daboka memelemaka' anasa, Yesus ara sokok an anam ulumso dara, alda senenggom yuba wa gaknya danggunumso. 8:5 Yuba wa gak nang edya welemek Imik Neyung wa nera, imik heikek sam ulumla wa nenesa, sununa' diba' ak welemak. Dara, yuba damok enera, Musa bedya pam boka' e sobnuna' aboka ul yabok sum enyek, Imik Neyung adya Musa bek ara, "Anda pe beknelam! Anja nidya' unuwanalama' ara, Sinai meinik ab nadya anaso-anaso unuwanalam aboka nekenggesa sok pe unuwanalam," hyoka' ara ban nenesa lebok. 8:6 Imik Neyung adya nim ab diba' wenyabdab an yub era, wen lelelanya nera pe leboka' adya, hyak pelemla' anasa, neik so Yesus ara alda hyak senenggoma' perob wa nenyek, youma' yuba wa gak nang edya welemek wa neneso' ak gom, alda hyak peroba' anyek welemla. 8:7 Nera men Yahudi nim ek, Imik Neyung adya unuwanalum an yub elegesuka' ara, peroba' ok ulumso dara, eimik ono' saawoka penenya hnon unuwanalum an yub era eleganggunususo. 8:8 Bok Imik Neyung adya alja mab era hnon penggulumeka' ak eibuka' anasa, alda lebokja, "Nara Israeli sokok nim eb, Yehuda sokok nim eb, sikeneb diba' wenyok wenyaldan yub era yanamla salek hnon yenewanamla' ara, ugunda pe beklemnelum! 8:9 Nadya Israeli nimi Mesir sokok aba' ara bleboka nadya soruk adya bo yabalamsa sum ek nab sikeneb diba' wenyabdouba yub eneso' ak gom, alda yok wenyek perobnya nek eleganesin. Nadya anaso unubdanamab an yub elegesisa bok, sikda pe bojam salawoka ununa' orok anasa, nadya sikda malya deija aboka gwab lobsisa. 8:10 Ban wenyhesa salek en seleb dara, ban wenyek Israeli nim eb wenyaldana' yub eleganesin. Nadya' anaso unubdanamab an yub era, sikja' ganya seinina' ak doronggoka, momnya dobnesin. Dara na nong ara, sikja' Imik Neyung danamna dara, sik nong ara nadya mabo yoka' danamak. 8:11 Sikda nidya' meknya naubenya nak seleb ella ulumnenyaka' anasa, sikja dara, sik moumen gom, sikja' hemyab ek gom, Wenelesilnya Imik Neyung bek ella danalum aboka nekdanggunumak. 8:12 Nara sikja malya una' nidya' hyak gerewoka meewanasilikanya, sikja malya una' ek ara, seiniwanggunumna," wenyaboka lebok. 8:13 Imik Neyung adya unuwanalum an yuba wen eleganesin alamla' adya, youma' men elegesuknya nera dolbaleka dok. Anya, an dolbaleka dangalalanya yamennya nera, denghenemla salek era, oka danggiga balamla.
9:1 Imik Neyung adya Israeli nim ek anaso unuwanalum an yuba elegosuka' ara, anaso unura giblelulum aboka lemoknya hnon, soruk adya solomek gibna' e nek hnon, ulumok. 9:2 Wera Imik Neyung amba pam boka' e aboka solomeka' ara, men lomok ekla ak ara, geisa nong ekla alameka' ak ulumok. Wera ekla enyek anara, wesa' dinin oulyanga hnon ulumok dara, ono' Imik Neyung ak eleklemek roti gwanenga beilina' yangana' gal ab, mem roti gwaneng ab hnon ulumok. 9:3 Dara ono' weilik sam yok ekla hnon ara, penenya lelin akleng weilik ara, hyak geisa nong ekla alamek ekla ek ulumok. 9:4 Wera ekla en lomok sam ara, Imik Neyung amba yoka'-yoka' uka dalamek oulyang ak hnon, ono' anaso unubdanamab an yuba beilin golonga' ara, penya-penya emas girik boka' adya denewoka meemek. Dara, golonga' en lomok ara, mouk dum-duma' gwaneng meka' ara emas mek hmeiyek libenggoka hnon, Harun bedya' hmouka siligemok gama' dunguna' hnon, sagobadya orukoka unuwanalum an yuba girik lagasa penya momnya doroba' anyek beillilemek. 9:5 Dara ono' golongna' dameijek ara, lero ola sangablorob sununa' gabo penya, Imik Neyung ara anyagan yanggalamla an bekna' hnon ulumok. Wera golonga' dameijek sam an lero ola sangablorob sununa' penya ulumoka' ara, nim adya malya una' doboka boloksin danasa golongna' ibna' gouluna' ak ulumok. Bok ban nidya' ulumoka' amba dara damok ara, anaso' ak ulumok aboka dara, wenyek lelewoka neknenggunusab. 9:6 Nidya' ara anaso unulumnulum aboka orowek meewoka beibuk. Dara, lika sob-soba' ara yuba wa gak nang era, e nenyek men ekla ak an, Imik Neyung ak gibnoba' aboka dara, wekoka yoka'-yoka' beiyiwoka giblemek. 9:7 Hyak geisa nong ekla ara, yuba wa gaka' dubnya ok weklemok. Wera ekla enyek ara gibna' hnonok amba, lika hnonok wekoka Imik Neyung ak giblemok. Ban unulumoka' ara, pam oboka eneng ab boboka, alja' malya una' emba hnon, ono' yok nim edya orowek senewanggonggom malya ulumek malya una' doboka bobogosulula' aboka, Imik Neyung ak bo beil biniboka giboka uka dalamok. 9:8 Wera ban unulumek ununa' enedya, Imik Neyung Geisinya adya nim ek neklesuka' ara, an Israeli nang edya' Imik Neyung gibna' e nenyek or anam ulumok bok dara, hyak geisa ekla diba' ak sam ban pik era anam baknenggumok. 9:9 Ban sununa' era nu wen an ulumab salek enesa, bekna' diba' ulumla' ara, pam oboka eneng ab yok-yok masa bo beil biniboka giblemeka' ara, sik an unuruwa' bo beil yalamek nimi ganya lomok ulumok malya una' doboka boloknenggulusuk bekna' era an ulumla. 9:10 Anasa nimi ganya adya, masa dena' ab mek ab yoka'-yoka' adya geisa nenebdanoba' aboka unulumek ununa' era, or nim ek sam anasa unulumek. Nera unubgiga balameka' ara, gobdo pe memesina' salek dok dara, ban nim ek samnya nera angawok. 9:11 Bok Kristus ara eimik yanamla' perob yub emba, yuba wa gaka' dubnya beneso' ak seleb yok. Dara, alda luboka son e hyak naubukanya, muna' perobnya, nimi soruk adya songgulumaknya, nera an uyiwoka' ak ara unggululanya nera, seleb uru yibuk. 9:12 Kristus ara hyak geisa nong ekla ak ara, li hnonok wekoknya nedya, nimek bleboka soba' pe ulmorulunoka' aboka wekok. Kristus unu weknemok sum era, youma' nimi sirika' adya ulumek sok, kambing yem eneng ab pam eneng ab bo weknenggubuk bok, alda alja eneng enyek bo wekdok. 9:13 Nimi meknemna' amba dara, youma' yuba wa gak nang ulumek nang edya dara, yem kambing eneng ab, yem sapi eneng ab, sapi goubenya pam oboka uka damna uk goulum ek malya umna nim ek ngikoka hwelesik. Wera pam eneng ab uka damna uk goulum ab dadya ngiksin enyek, nimi malya umna' ara, geisa nenelesuka' ara, an nera nim ek sam amba unulusik bok, 9:14 hyak nauba ara Kristus eneng ara, nauba so unulusil. Kristus ara, hyak soba' ulumla Geisinya pik uboka, alja nong enyek Imik Neyung ak, meka' diliga' orok pam eneso' anyek, beibdok. Anedya, Kristus alja eneng edya, nunja ganya salya' hwam ununa' ak ab, Imik Neyung embenga' ululanya bek giboka welenoka' aboka, geisa nenelesil. 9:15 Wera anasa, men youma' unuwanalum an yub ulumoka wenyek, nimi nauba malya dangoka igina kwelesuknya nek ab blebsununa' aboka, Kristus ara somogok. Dara wera, nimi nidya' Imik Neyung adya youboka dolosil nim era, Imik Neyung adya' denghenggunumla bona' eleganesin amoka' anyek dobnoka' aboka, Kristus ara, wenyok unubdanamab yub ek nu an ulumab nim eb danasa hnoumunga wiknenanya ulumla. 9:16-17 Nimi misa' dona' amba weblemaka' ara, webenanya be somokan enyek, misa' eleklemaka' anasa, bona' yoka'-yoka' anyek somogoknya bedya misa' lobongganyok alamak dara, wera somogenanya bedya, aldib somogok an, bekna' laga ululul, alamak. Alda bona' lolonglesilnya benyek anam embenga' ulunabok dara, nimi misa' eleknenggulumak. 9:18 Wera anasa, men unuwanalum an yub ulumoka' anaba, eneng adya ok unulumek. 9:19 Men dara, Imik Neyung adya unuwanalum an yub era, Musa bedya Israeli nim ek leb elegosuk. Wera yuba seleb elegosuk dara, ono' eimik era, sapi me eneng ab yem kambing eneng ab mek sirika' ab neika' hiboka, domba pam arana' hong ab, gal benggena' doboka, Imik Neyung adya unuwanalum an yuba kerob bukuk sam hnon, Israeli nim ek hnon, lobsenja' adya lob goulura yibisuk. 9:20 Ban unulumok ok ab dara, Musa bedya leboka' ara, "Imik Neyung adya unuwanalum an yub elegeisila' ara, hyak unulumnulum aboka, orugosuknya nenyek bekna' eneng ara an," hyok. 9:21 Dara ono' Musa bedya Imik Neyung e ab, nidya' anyagan Imik Neyung gibna danasa beillilemek bona' eb, eneng lobsenja' adya ok lob goulura yibok. 9:22 Yahudi nim edya' unuwanalum an yub edya dara, yoka'-yoka' nidya' ara eneng adya ok malya umna' ara geisa nenelemok. Dara, malya una' anaba al eneng nong anyek yekna' orok dara, malya una' ara memenggulusuk. 9:23 Wera sokok an ulumla bona' era imik heikeknya nenesa sununa' ulumla' ak anaso unulumek bok, imik heikek sam dibnya ululanya nenyek, Yesus enenga peroba' dib nonga' adya geisa nenemok. 9:24 Anasa Kristus ara, nim adya muna' solomeka' diba' imik heikek ulumoknya sununa' amba solomeknya nek weknenggubuk bok, alda imik heikek Imik Neyung ak nuk pen danasa, wekel byuk. 9:25 Yahudi nim edya' yuba wa gaka' dubnya bera, gibna' ella' gigiro hyak geisa nong ekla ak ara, pam oboka enenga bobnekanya lika soba' weklemek sok, Kristus ak dara, al nong ara malya una' amba li soba' saam-saam aboka giboka beildal banggulumla. 9:26 Kristus anyek soba' saam-saam aboka beildal balamso dara, wera soko anam uyiwoka wek mouruwoka liga gong somokdibigemnamso. Bok wenera alda lika hnonok muna' gobdo malya una' amba aboka, al nong anyek wene salek era dib somogok. 9:27 Imik Neyung adya nim ara lika hnonok somoganamla' seleb dara, eimik yana lelewanamna aboka seleb orowek garawok. 9:28 Anasonya neikek Kristus ara nimi nauba sikja malya una' doboka bobogousulula' aboka lika hnonok elekdangoka somogok. Wera sumen penenya yanalanya nera, malya una' amba meewoununa' aboka yanggunumla, alda nim alak yanamla' amba diri ulumak nim enyek dib blebsina' bo yanamla.
10:1 Yahudi nim edya' unuwanalum an yub elegosuka' ara, eimik peroba' yanamoka' anyek diliwoka, guna' inib-inib along soka' ak dib gomnya nenyek sununa' diba' ella dangan danasa elegosuk. An unuwanalum an yub elegosuka' ara, Imik Neyung adya hyak peroba' dibnya eleganesuka' anasa elegosuk. Wera unuwanalum an yub edya dara, li soba' masa unuruwa' adya giboka beil yeiniboka, Imik Neyung ak oka yeindeboka giblemneseng nim eneba muna' gobdo pewanggunusiso. 10:2 Nim Imik Neyung ak masa unuruwa' beil yeiniboka giblemek nim era, ban adya Imik Neyung adya sikja malya una' seleb doboka boboganamso dara, saawoka beil yanggunuseng. Anaso dara, sikda malya ulumab senen ganya bona' loboka, Imik Neyung ak masa unuruwa' beillilimeka' adya, sikja malya una' doboka bobogoka peroba' nenesuso' anasa, saawoka beil yanggunuseng. 10:3 Bok gibna' lelemna' ela' gigiro masa unuruwa' Imik Neyung amba malya una' doboka bobogosulula' aboka bo beil yalamek dara, sikda malya una' nim ulumek senewoka beklemnemak aboka ulumok. 10:4 Anasa, sapi pam eneng ab yem kambing pam eneng ab dadya dara, nim adya malya una' era doboka boloknenggulusil. 10:5 Ban nenesa leboka Kristus ara sokok sam yok sum era, Imik Neyung ak leboka' ara, "Anda pam ab yoka'-yoka' giboka eleklenjaka' ara perob senenggululam bok, alda nadya nong enyek doboka beiblum. 10:6 Anda pam oboka giboka uka dalanjaka' ara pewanyak senenggululam, hnonda malya una' doboka boboganasilim aboka bo beil yalanjak masa era, peroba' leboka donggululam. 10:7 Anasa leboka nadya dara, Imik Neyung o, wera nara an! Kerob bukuk sam nasamba leboka momnya doboka' sunuwoka, nara anja seinililamnya nenyek unuwonuna' aboka yeilimsa," hyok. 10:8 Men Kristus adya, "Pam ab masa unuruwa' bo beil yalanjaka' ara anda lek senelelum, Imik Neyung amba giboka beibnemab aboka uka dalanjak pam eb, malya una' doboka boboganasil bar aboka, bo beil yalanjak masa era perob senewoka doboka denggululum," hyok. Yoka'-yoka' nidya' ara, Yahudi nim edya' unuwanalum an yuba momnya doboka' sunuwoka unulumek bok, Kristus adya dara, anaso penggulumek aboka lebok. 10:9 Nen seleb dara Kristus adya sounuwoka, "Imik Neyung o, nara an ulumna. Nara anja seinililam ganya seinina' enyek unuwanamna senewoka yeilimsa!" hyok. Anasa youma' unuwanalum an yuba bukuk sam momnya doboknya nera oroka' geboka, Kristus anyek nim adya malya una' doboka boloksina' amba lunuwok. 10:10 Yesus Kristus ara Imik Neyung adya unuweisinya senemoka' anyek gigiwoka unuwoka' adya, al nong anyek doboka malya una' doboka boboganasin bar aboka seleb elekdangoka somogok. Wera an al nonga doboka elekdoka' anadya, soba' pe unulmorulula' aboka, lika hnonok somogoka' adya, nunda nidya' ara, Imik Neyung amba ok muna' un nimi dengeiyiwousuk. 10:11 Yahudi nim edya yuba lena' gak ulumek nang era, sob-soba' saam-saam aboka Imik Neyung amba oboka beiri ulumek. Bok sikja ban giboka unu soba' beillilemek beilina' edya, nim adya malya una' hyak doboka boboganggunusisonya nenyek unulumek. 10:12 Bok saawoka, ban yuba lena' gaknya Kristus ara, alja nong anyek soko nimi malya una' doboka boloklemnesin aboka, lika hnonok muna' elekdanggogobok dara, alda imik heikek welewoka Imik Neyung adya' sirikek sam bukok. 10:13 Anya wenyek dara, nidya' Yesus ak dib senena' orok nim era Imik Neyung adya Kristus adya' yan damak sam bob mamaganamla sum enesa diri ulumla. 10:14 Wera Kristus anyek alja nong elekdangoka somogoknya nenedya, malya una' ak ab seleb geisa nenelesil nimi nidya' ara lika hnonok soba' amba aboka muna' gobdo peroba' nenewosuk. 10:15 Wera yuba damok enesa dara, Imik Neyung Geisinya adya nuk, nera aldib Kristus ara unuwok aboka laga lelesil. Wera Imik Neyung Geisinya anaba, 10:16 "Wenelesilnya Imik Neyung bedya dara, ban salek seleb dara, wenyek unubdanamab an yuba nadya eleganasina' ara an. Nadya' unuwanalum an yub ek, sikja ganya lomok sam beibnamna, anya sikja ganya seinina' ak hnon momnya dobnesin, " hyok. 10:17 Dara ono' Imik Neyung ara, "Nara sikja malya una' eb, meknena' ab dara, hnon beknenggulumnamna," hyok. 10:18 Anasa ban malya una' era seleb meewousuk bok dara, eimik enyek yok saawoka malya una' meewanasil bar aboka, Imik Neyung amba giboka pam oboka beil binggunuseng. 10:19 Wei, nadya' hemyabo nim o, Yesus alja eneng adya ok, Imik Neyung adya' hyak geisa nong ekla ek ara, asa' ganya boboka wekel binimab. 10:20 Yesus adya' nusamba leboka, nim embenga' eleksin pika yok perob pika baksuk. Wera pik era Imik Neyung ek sam geisa ekla aboka wiknelemek boksom akleng era, Yesus nong ara an pik diba' seleb ulumla. 10:21 Anya nuk dara wera, senenggom yuba lena' dubnya yak nim ek ulumaba' ara, anara Yesus nong ak ulumla. Dara Yesus ara alda Imik Neyung ek sam wa nusamba welesilnya be hnon ulumla. 10:22 Ban nenesa leboka, nunda hyak perob un ganya boboka, ganya dib senena' migiba' uboka, malya ubna senen ganya era seleb geisa nenewoka, perob mek diba' adya nonga mek elegoka, Imik Neyung ak ok berem soba' al dam balanob. 10:23 Imik Neyung ara aldib alda bojamnya ulumlakanya, alja peroba' eleganesin hyoka' ara aldib eleganesila' anasa, nunja aldib peroba' dobnemab aboka dib senen ganya boboka, nebom alamaba' ara gasa salalmoublenob. 10:24 Nunda yok nim ek pe wana' ulunoba' aboka wenebdangoka, ono' perob una' anyek nauba unubgiga balanoba' aboka, nunda pe kemero uldalamnamab. 10:25 Imik Neyung yuba longolomaba' ara longgom mem. Nimi hnon lolomak sok neik so ununggom. Nunda ganya gwelelek aboka yoka'-yoka' unuldalamnamab. Wenelesilnya bera mek anam yanalabok anasa, nunda soba' nauba so wenebdangoka uldalamnamab. 10:26 Anasa Imik Neyung bedya' dib yub ara nuk seleb leb elegemnesak bok, nunda sene soba' malya ubdibigemnemab dara, malya una' en doboka bobogosulula' aboka dara, yok memena' ara orok. 10:27 Sene soba' malya ubdidiganamab dara, Imik Neyung ara yana lelewoka, alak isa' nenelemak nim ek uka dabnesil senena' ak ok hnonok ulumla. 10:28 Musa bedya unuwanalum an yub enyek, lek aboka lomek nim era, nimi penya nang gom, winilya nang gom edya aldib blekemla alamek dara, unuwanya bek ara, angoo yadyek senena' loboka hyak diba' olomek. 10:29 Bok hyak nauba ara, Imik Neyung bedya me Yesus ak blekoka yan ingib sablamla' amba hnon, malya una' ak ab geisa nenewanesin aboka yekok eneng ek malya' sembeja' senelamla' ak hnon, wana' uboka eleksina' Geisinya bedya ak derelamla' amba hnon, hyak nauba saboka obnamla. 10:30 "Nadya eimik dirigoka obnamna! Nadya malya nenewoka obnamna!" anya hnon leleladya, "Wenelesilnya bedya alja mabo yana lelewanamla," alalanya bera nunda seleb ella ulumab. 10:31 Dara nunda Imik Neyung hyak senenggoma' embenga' ululanya bedya soruk ak sam obnesila' ak sam anyek danamabnya nera, hyak omom nonga' ak ulumab. 10:32 Nadya' hemyabo nim o, ugunda men yuba doboka ululum salek era, Imik Neyung dilina' anam ugunuk yebesuk dara, igina kwesina' ara nauba ulusuk bok, eiwaawom aboka pe unululuma' anyek pe beklemnelum. 10:33 Ugunuk nimi hnoum ab derewoka waboka saboka malya nenewoka olosik. Hnonda ugunja hemyabo nim eb neika' anaso unulusik. 10:34 Nimi henga geregoka beillilesik nang edya engelemeknya nera ugumbabya unululum. Ugunja dara, nunda eimik era songa leboka blobnenggunumla perob so bona' Imik Neyung adya eleganesila' seleb ella ululuma' anasa, ugunja bona' nidya' hoka' nang edya doluwoka dolosik dara, or unulunok senewoka dogom alum. 10:35 Wera anasa, Imik Neyung adya perob dekna' nauba ugunuk eleganesila' anasa, ugunja men ganya goulowoka dib seneluma' ara loboka ganya bokna' ara mem. 10:36 Ugunda Imik Neyung adya unuwanok senelamla' anyek pe unulumuna' adya, pe ulumeija' amba dekna' dobnemak hyoka' ara dib dobnelum aboka, ganya siklewoka pe ulululum. 10:37 Ban nenesa leboka, Imik Neyung yuba bukuk sam ara, "Eimik hyak berra yanamla salek era, or mek ok ubla; al yanamla' ara, nara sum enyek, or eimik ek yanamna' aboka, go' mabdabnenggunumla. 10:38 Nadya me pelelanya bera, nak dib senewoka ganya olokna' senenadyok pe ulumnamla bok, hnon nim era dib senenijedyok, losaawanamak nim era, dara nara sikenek lek senewanasin," aro momnya dobok. 10:39 Bok nuk dara, Imik Neyung pika bana' beibum aboka losaawanamab nim ek unggulumab. Alda nunda Imik Neyung ak dib senemouba' anasa blebsuk nim ek ulumab.
11:1 Anasa ganya dib senena' ara, yoka'-yoka' nunja ganya weboka dobnemaba' senena' nong ak ulumlakanya, nunja yoka'-yoka' eibnenggunanya nek bekna' diba' ak ulumla. 11:2 Dara ban ganya dib senena' nong adyok, nunja youma' nim ek ara, laga eilina' ak sam dara, pe ganya mabok. 11:3 Anasa nunja ganya dib senena' adya, ban nidya' im soko ara Imik Neyung yub adya uyiwok senewoka ella ulumab. Wera anedya ban eillilimaba' nidya' ara nunda eibnenggunusibya' ak ab uyiwoka' ak eillilimab. 11:4 Dara Habel bera, alja ganya dib senena' adya Imik Neyung ak ara Kain bedya giboknya nek ab dara, loboka alda hyak perobnya nenyek elegoka gibok. Wera an pik enyek anyeb uboka, alda alak ara laga lena' doboka' ara alak danyek hyak pebok, anedya Imik Neyung ara alja giboknya nenyek perob senewookanya, alda ganya dib senemoka' nong adya, seleb somogomok bok, weneba soba' alda unumok alamak. 11:5 Dara Henokh bera alja ganya dib senena' adya, alda somogalyek aboka Imik Neyung adya gamyaka' do welewoka' adya alda eibnenggubek. Anasa alda anam do welewanggom dara, alda Imik Neyung ak ganya hekellilemok. 11:6 Bok nim ara ganya dib senena' orok dara, Imik Neyung ara perob senenggulusil. Wera anasa, heknedya Imik Neyung ak yanalanya bera, alda Imik Neyung ara aldib ulumla senewoka ulumlyekanya, alda nim Imik Neyung alak elemak nim era dekna' eleklesil senelelul. 11:7 Dara ganya dib senena' adya, wera Nuh bera anam laga danggumoknya nenyek Imik Neyung adya alak nekemoka' sunuwoka, pe ganya gouluwoka alja ek nimi bleblula' aboka, alda senenggom mek ekla buna' meemok. Anya ban ganya dib senena' adya, alda sokok an igin elegookanya, dara alja ganya dib senelemoka' sunuwoka, alak peroba' donya dok. 11:8 Dara Abraham bera ganya dib senena' adya, alda yok mok soko alja' misa' danamok sokok sam binilam aboka ebok dara, alda hek mok balamna' ara elgoma' anyek pe keboka lanawoka byuk. 11:9 Wera ganya dib senena' adya, alda Imik Neyung adya eleganenggen amok sokok sam ara, sekel yanggan nang mok soko anaso' ak ulumok. Dara anyeganera alda luboka son ek sam ulumok, dara ban hnonok wenyasuk yub en neika' misa' dobek nang Ishak beb, Yakub beb danaba, neik so unu ulumek. 11:10 Anasa alda pe gasa' adya yangawoka son heikek, Imik Neyung adya seiniwoka sobnamla heik senewoka ganya gouluwoka diri ulumok. 11:11 Ono' Abraham bera ganya dib senena' adya, alab Sara geb dara, seleb yamen dangarek bok, me beiblula' aboka migiba dobok. An nera alda ban me eleganenggen hyoknya bera pe bojam ululanya benya' senemoka' adya unuwok. 11:12 Wera ban nenesa, nimi hnonoknya bek ab, alda seleb somogomoknya bek ab bok, alak pik ab danyek nimi nauba likeka' ara, imik sam eini gura' olola' anaso ab, mek gwan gemek egenya' eneso' hyak einibdaknamenggoma' anyek likek. 11:13 Dara ban ganya dib senelemek nimi nidya' ara sikda ban peroba' eleganasin amoka' ara dobnenggubek. Banera mok ab eiyiwoka dobnob senemek bok, dobnenggubek. Anya sikda aldib sokok anera yok mok soko nim eneso' uboka sekel yanggan nang ulumek. 11:14 Anasa sik an anaso wenyalamek nang era, sikda yok heik enyek ganya oka deregoka elemek nang. 11:15 Anya ban unulumeka' ak anyeb, sikja soko yoka' nong enyek an lo yeilisenga' ak an or seiniliseng dara, wera sikda onsok saawoka ban salek nauba ulumok. 11:16 Bok wenera sikda hyak perob heik hnonok ok ubsibya senelemaka' ara, imik heik ok ulumla. Anasa Imik Neyung ara ban hnonok heik era siksamba meewoka solosila' anasa, Imik Neyung ak ara sikja Imik Neyung aboka si silimneseng dara, alda alya dabnenggunumso. 11:17 Dara Abraham bera alda ganya dib senena' adya, alak sunubyamawok dara, Ishak bek giboka beibuk. Wera alja ban unuwanasin an yuba domoknya bedya, alja me yando me nera or oboka gibnun senemok. 11:18 Nera alak ara seleb wenyamok bok, "Dara Ishak be pik ab liknemak nang yila' enedya, alja nang yila' henemak," amoka' anyek babya oboka gibnun senemok. 11:19 Dara alda ban unu seinimoka' ara, Imik Neyung ara nim ak somogamna' ak aba' anaba, migib adya embenga' suboka buklililisilnya benya' senemok. Anasa alda somogamna anaso' bok, saawoka domna' dok. 11:20 Dara Ishak bera alja ganya dib senena' adya, wera alda hyak moknya nenyek seinib gogomookanya, alja' peroba' misa' ara Yakub beb Esau beb peroba' leboka elegosuk. 11:21 Dara Yakub bera alja ganya dib senena' adya, alda anam somoganamok salek era, alja gama' ak huk eriyiwoka giblemokjok, nimi peroba' misa' ara Yusuf bedya mabo moumena' ek leb elegosuk. 11:22 Dara ganya dib senena' adya Yusuf bera anam somoganamok salek era, Israeli nim goubnomeka' ab, alja yok eb dara, pe meewoka bo binilum aboka nekoka leb gogomok. 11:23 Wera ganya dib senena' adya, Musa bera anam beibuk salek era, alja genong gedya dara, me nera hyak goubenyekanya, sikda wenena' dubnya bedya yub ek ara loka dabnenggusuka' anasa, alja nauba nim edya wala' winilya doknemek. 11:24 Dara ganya dib senena' adya, Musa bera seleb nebok dara, alda wenesin dubnya bedya gelma edya me nenya' ana' ara lek hyok. 11:25 Nera alda or se' amba malya una' ak abnya nenyek eiya hlaboka un danegom, alda Imik Neyung adya nim eblawoka igina kweboka unya nenyek perob senelemok. 11:26 Alja ganya seinina' era dekna' dona' anyek mamoka' adya, alda Mesir mok soko nidya' peroba' digum ak ab dara, Kristus anasa leboka derelesaknya nenyek hyak senenggoma' perob bona' senelemok. 11:27 Dara ganya dib senena' adya, Musa bera dubnya be wabnelyek senewoka loka dabnenggubookanya, alda Mesir mok soko lobok. Anya alda lak gomnya nenyek heng yoka' bekoka eiyimna' anaso anyek kemeldablemok. 11:28 Dara ganya dib senena' adya, Musa bera sikja yando memab obsilyek aboka, alda Paskah sum meewoka enenga ngikdo yibuk. 11:29 Wera ganya dib senena' adya, Mesir nim ek dara, Arana' mek gwanek ara meka si dusuk bok, Israeli nim ek dara, mek digin hnoum anyek kelerob arob soko eilib eneso' anyek yibik. 11:30 Dara ganya dib senena' adya, Yerikho heik leka' ara lika sek badya sum bera seboka bob ganagek dara, soboka maro yinggyuk. 11:31 Wera ganya dib senena' adya, Rahab gera salya' dongolomok gel bok, alda mok soko maka hmeil bilirek nang ek peroba' leboka doboka doknosuka' anasa, yok bleklemek nim eb dara neika' obnenggubsuk. 11:32 Anya nara heka' ak hnon wenyhenemna do? Anasa nara ban nang enyek, Gideon bek, Barak bek, Simson bek, Yefta bek, Daud bek, Samuel bek, anya ununumna' len nang ek geklewoka lebnesinya dara, wera wenyhenesinya salek enedya nadya yok unuwanasinya nera mek danamso. 11:33 Dara sikda ban nang era, ganya dib senena' pik uboka, senenggoma' wenesin nang edya heik mok soko era malya' geboka, pena' amba ununumna' leboka, eleganasin amoka' ara doboka, singa' gam si bama' leboka, 11:34 senenggoma' singalamna uk era saranglemek. Anasa sikda mal uk ab dara mereweekanya, hmeng ulusuknya nera migiba' dobeekanya, oldana' ak ab dara, seleb migiba' deekanya, yok mok soko nim edya yin bona' era seleb walawoka obyakek. 11:35 Dara nauba nim era, sikja nim era seleb embenga' subuka bukuldilimeka' anasa, sikda seleb saawoka doro yibik. Bok yok nim ek dara, sikda hyak embenga' subnanya perobnya nenyek dobnob seneweka' adya, sik nong ara igina' doboka, or pe una' ak dara dobnenggubek. 11:36 Dara hnon nang era derewoka walasik, anya hnon yok nang era henga gouboka saragena' ek sam beillilisik. 11:37 Sikda girik adya olosik, sik nong ara gal erena' adya garalesik, yina mal adya olosik. Sikda domba pam ab, kambing pam boka' adya boksom ok ongowoka dongolomek dara, gwaneng oka' ab, weiningdangoka, anya igina nauba dolomek. 11:38 Anasa sokok anera, sikda ubnamenggom. Dara sikda hwalek sam ab, moksoko mein pik ab, girik dam e pik ab, girik lom pik ab mal giriklimek. 11:39 Anya sikda nidya' ara sikja ganya dib senena' ak, laga eilina' ak sam dara, pe ganya mabok bok, alda eleganesin amoknya nera sikda dobnenggubek. 11:40 Anasa Imik Neyung ara nusamba dara, hyak perob nonga' anyek meewoka beillilisil. Anya nuk orok dara, sikda pe muna' pel dakna' ak ara binggunuseng.
12:1 Wera nuk kemelesak nim era nuk goulub ganagok deba' anaso' anyek ulumaka' anasa, wera nuk igina ul eleklesila' nidya' ab, men meknewaneseng malya una' eb dara loboka, ugunsamba yeiriwoka bik-bik aboka unulululum hyoka' ak ara, ganya gouluwoka bik-bik alamnamab. 12:2 Anasa nunda nunja, ganya dib senena' arawoka bo balasilnya be Yesus bek, nunja ganya dib senena' ara pe muna' peldakna' ak bo balasilnya bek heng yoka' bekoka hyak pe unulumnamab. Alda derelemeka' ara eiwaawom aboka, ganya eiya dabna' alsamba ulumoka' ara lunuwoka on gal enyek ganya gouluwoka jaboka bobok. Anya wera alda Imik Neyung bedya ekla buna' ek ara sirik ek sam bulumla. 12:3 Dara ugunda hmenga dangoka ganya obdoumunuk aboka, alda al nong anyek malya una' nim ek ab derena' anyek or wenyalanenok senewoka doboknya bek, anyek hyak soba' beklelulum. 12:4 Anya ugunda malya una' ab oldalalumuk ara, ugunja eneng hnon lananggulusil. 12:5 Wera ugunuk wenesin yub enyek, mek mab ek weneleng sok lelemla yub era, "Wei, najab o, anda Imik Neyung adya nekoka wenelenggela' ara dolbaleka' senenggom mem. Anya, alja omoma leboka wenyalanggel dara, anda ganya oldanggom, mem. 12:6 Nera Imik Neyung ara alja wana' ulumla nim ek ara wenelesilikanya, alda alja mabo geblamla nim ek ara legebna' adya deblesil," wenyalalanya nera ugunda hibigoulum de? 12:7 Wera ugunda wenesina' anyek pe ganya gouluwoka dololulum. Imik Neyung ara ugunuk ara alja me neneso' anyek unulusil. Dara nimi me anyek, eili bedya wenenggulumla me nera hanyegarek ulumla do? 12:8 Bok ugunda ban wenesina' nim igina dobnesenga' ak anyeb or go' ululum dara, wera ugunda memabo yoka' ak unggululum bok, alda beiyik mab ek ululum. 12:9 Dara nunja' neyung be yoka' nong ok ab ban wenena' ara dolomabakanya, sikda nunja dara, nunja' neyung yab senelemab. Wera anaso dara, nunda embenga' dobnemab aboka dara, ganya bo usinnya neyung bek ara hyak pe keboka ganya ologoka ulumnamab. 12:10 Anya sikda nuk wenelesak salek era meka'anya, sikja perob senelemaknya nera an neklesak an. Bok Imik Neyung ara nunda alja' muna' peroba' anyek hnon dobnok senewoka, anya nusamba perob dangan danesa wenelesil. 12:11 Dara aldib, alja nuk wenelesila' ara yoka'-yoka' sunuwoka ganya eiya dabna' lananggululabok, hnonda ganya oka dena' ak lanalamla. Bok eimik dara, alja wenewoka neklesil nim era, ganya namen uboka pe una' dok ak lanalamla. 12:12 Wera anasa, ugunja hmeng ulumla soruk eb, daldom-daldom alamla kom eb dara, migiba' geblelulum. 12:13 Anya, geimdilimak nim era oro beibsilyek, alda merewanoka' aboka ugun yaban pik era pe meewoka yaralelulum. 12:14 Anasa nimi yok nimi nidya' ab dara pe ganya olokdangoka ulunob senewoka ulululum. Anya pe geisa una' orok dara, nimi be hnon Imik Neyung ara eibnenggunumla' anasa, pe geisa una' anyek yeiriwoka doblelulum. 12:15 Dara nimi nauba malya nenewoka, sembeja' gebnesilya damok yu nonga' sika' anyek lanawalyek aboka, ugunda nimi be hnon Imik Neyung bedya perob eleksina' ak ab mok gebdalyek aboka pe diri ulululum. 12:16 Anya nimi hnon hyak gel ak unuweisinya ganya adya wekdeknewoka, Esau bera gwaneng dena' piring hnonok amba alja' yandonya bedya' misa' era, pe seinina' loboka men dekok sok, neikso ununa' ara mem. 12:17 Dara ugunda ella ululuma' ara, Esau bera eimik era alda hyak nauba engewoka elemoka' anyek babya, alja meknena' era or pe memewolul senewoka hnon elekna' orok adya, ban peroba' misa' ara dobnenggubuk. 12:18 Nera ugunda bebeganesom mok soko mein ek hnon, singilamla uk ek hnon, lom nong ok serenggom alamla guna' ak hnon, guna' ulumla' ak hnon, nauba kabo' ek hnon, 12:19 poo ana' benggong yub ak hnon, anya hyak nauba' meijal lelemoka' adya, sik kelemek nim era hnon wenyhemenek alamek yub ek hnon yangganggululum. 12:20 Dara sikda ban yub enyek kebdabnamenggom anasa wenyalameka' ara, "Wera pama unuruwa' anaba ban mein enyek bebeganamla dara, wera girik adyok sabom-saboma obnemaka' ok," wenyalamok. 12:21 Dara banyek kemena' ara hyak lok nong anasa Musa bera wenhyok, "Nara hyak nauba lok nonga dabnelekanya, ber-ber alanel," hyok. 12:22 Bok ugunuk dara, Sion meinik, Imik Neyung embenga' ululanya bedya heikek, Yerusalem imik heik adya' ak sam ab, anya salya' dengsalya' anyek longowoka eiya hlalamak lero nang ek sam ak, seleb youlum. 12:23 Anya yuba dorob nang sikja si nera imik heik momnya dobsuk nimi men yando nang ek ab, nimi nidya' pe yana lelesilnya Imik Neyung bek ab, anya hyak pelemek nang edya ganya gong ek ab, 12:24 anya wenyok yuba bo yanggannya Yesus bek ab, dara Habel bedya eneng era hmeng so, alda hyak yeiriwoka migiba' salamla enenga, lobol goulusin eneng ek sam, seleb youlum. 12:25 Dara ugunda ban yuba leboknya bek lobmunuk aboka pe keboka unulululum. An nenera sik alak sokok an Imik Neyung yuba leboknya benyek lomek dara, sikda hyak merewanggumek. Anasa nunda wanok, nunda alak imik heik ab yuba salalanya bek lobnemab dara, merewanggunumab. 12:26 Wera ban salek era alja yub edya dara, soko ara ebeklemok bok, wenyek dara, alda ban yub enyek wenyab elegousuk, "Bok liga hnon sum era, nara soko ok unuwanggununabok, im anaba salawoka borom-borom ab lobnamna," hyok. 12:27 Dara ban "liga hnon sum enyek" hyoknya nera, yoka'-yoka' uyiwoka' ara, borom-borom henelanya nera, yok-yok dangdo binimla bok, borom-borom henggunulanya nek ok soba' ulumnamla. 12:28 Wera anasa, nuk dara borom-borom henggunumla heik mok soko ek dolomab. An nenesa leboka, nunda Imik Neyung ak perob aboka giboka, nunda alak perob senewanalenya nedya, alak imik geboka hyak lok uboka giblenob. 12:29 Nera nunja Imik Neyung era, momnyanga wouluwoka delemla uk ek ulumla' anasa, unu giblenob.
13:1 Dara, ugunja hemyabo nim ek wana' uldana' ara hyak pe unulululum! 13:2 Dara hnon nim era, yok nim ek, ek yoululum amek dara, sikda elgom bok, wera lero nang ek dena' elegemeka' anasa, ugunda nimi yok nim ek, ek yanalum aboka peroba' lena' ara hiliknenggom mem. 13:3 Wera yok igina dolomak nim ulumak sok, ambabya sikeneblaboka neika' ulumna' anaso' ganya enyek boboka, anda sikenek beklesilom. Anya, sik yok nim edya malya nenelesak nim ek, anda sikeneblaboka neika' unulusina' anaso' ganya enyek boboka, anda sikenek beklesilom. 13:4 Dara ugunda nidya' ara gela nenya doldana' ak ara hyak peroba' senewoka imik nenelemnelum. Wera sik salya' dongolomak nim eb, meknewoka salya' salaldalamak nim eb dara, Imik Neyung adya yana lelewanasila' anasa, ugunda gela nenya ara hyak pe uboka mekneldanggom mem. 13:5 Dara Imik Neyung yub ara banaso lelemla, "Nara anak ara hyak meka' dogom ab lobnenggununggenekanya, nara anak ara hyak meka' gwab lobnenggununggen," wenyalamla' anasa, ugunda rupiah ak nauba dolonun ganya ek ab leiblelulum. Alda ugunuk an ulusila' anyek, eiyasa gigibdangoka ulululum. 13:6 Wera anasa, nunda ganya daboka wenyalamaba' ara, "Imik Neyung ara nadya' arana'anya ulumla. Anasa nara loka dabnenggulumnamna. Dara nim adya dara, nak ara heka' ak unuwanenyak do?" wenyalamab. 13:7 Dara ugunja' dub nang, ugunuk Imik Neyung yuba seleb lel eleklesak nang ek ara beklelulum. Anya sikja unulumaka' ak ab lanelamla anyek pe kemelemunukanya, ugunda sikja unulumaka' anyek dililda doblelulum. 13:8 Anasa, Yesus Kristus ara youma' hnon, wen hnon, eimik hnon, neika' ok soba' ulmorulamla. 13:9 Wera ugunda yok beiyik sam ab nekna' edya ganya bob neneweisilyek mem. Dara perobnya nera ban, ugunja ganya era wana' uboka eleksina' edya migiba' geblesila' anyek hnonok. Alda ban yok-yok dena' edya sik ban dena' enesa lelemla' sunuwoka gigiwoka delemak nim ek peroba' nenenggulusila' anegom. 13:10 Dara nunda yok uka daboka gibna' oulyanga hnon ulusilekanya, ban e lom enyek an welemak nang era ane lomok ulumla' ara dena' mem. 13:11 Anasa yuba wa gaka' dubnya bedya pam eneng anyek perob muna' oulyangak an malya una' lubsin damba bo weklamla' bok, nong ak dara, beiyik e weilik sam uka dalamak. 13:12 Dara Yesus anaba, alja nim era alja yoka' nong eneng edya, geisa nenewousununa' aboka dara, alda nauba' wekna pik beiyik sam igina gwekoka unuwok. 13:13 Wera anasa, nunda alja alya daboka derena' anyek dobnoba' aboka, alak sam e weilik beiyik binimab. 13:14 Anasa nunda anyek anara nunda diba' un heik era unggulumla, bok nunda eimik yanamla heik enyek elemab. 13:15 Al nenesa, nunda Yesus pik uboka, Imik Neyung ak perob aboka gibna' ara, nuk ol nebeldaleng sok una' ara, nunja sibama' edya alja si nek perob aboka soba' giblenob. 13:16 Anya arabdangoka pe ununa' ara, ban ununanya nenyek, Imik Neyung ara perob senelamla' anasa, ugunda yok nim eb arabdangoka pe ununa' ara hileknenggom mem. 13:17 Dara ugunja' dub nang era, ugunuk bo un nang nenebdangoka, sikda ugunja' ganya nong anyek, Imik Neyung kemelesil senewoka, pe keeboka bo ulusaka' anasa, ugunda sikenek pe keboka ganya imik doro dillilisululum. Wera ugunda sikenek igina nenewanalum dara, ugunuk perob damok lanawanggunumla anasa, sikda eiya daboka welesinoka' aboka, ugunda sikenek pe keboka unulululum. 13:18 Dara nunda yoka'-yoka' ak ara hyak pe unya nenyek senelemaba' anasa, wera nusamba leboka hyak soba' heng uboka mololomnesulum. Nenera nunda ella ulumaba' ara nunja' mek ganya ek dara, hyak pe ulumaba' anasa. 13:19 Anya hyak okoka dara, nara ugunuk men berra aboka saawoka elegeisinoka' aboka, nara ugunuk wenewanasina' ara ugunda banera unulumneluma' ak lebna. 13:20 Dara namena' pe una' eleklesil Imik Neyung era, embenga' eleganasin amok eneng pik uboka, domba pam senenggom dubnya, nunja' Wenelesilnya Yesus ara somokna' ak ab saawoka bo yoknya bedya, 13:21 ugunuk yoka'-yoka' peroba' ak alja senelamla' sunuwoka unulunoka' aboka pe muna' lelewoka eleklesulul. Anya dara, alja perob senelamla' ara Yesus Kristus pik uboka, nu lomok welesulul. Wera nidya' senenggoma' peroba' ara al alsamba ok soba' ulmorulul! Aldib, al unululul. 13:22 Dara ban nadya ugunuk wenewoka beibsin yub era, or burum anasa, hemyabo nim o, nara ugunuk wenewoka wenyhenesina' ara ban yub era hyak ugunja ganya siklewoka kelululum. 13:23 Hnonda ella ubneluma' ara nunja' hem Timotius bera seleb bok dorogek. Anya wera al men yalya' seleb dara, nara alablaboka neika' ugunuk kemel yanesinim. 13:24 Dara nunja perob aboka gibsaba' ara ugunja dub nanga nidya' ak hnon, muna' perob nimi nidya' ak hnon wenyhenelum. Anya ban nunja' hemyab Italia sam ab gibsaka' ara pe dobnelum. 13:25 Dara wana' uboka perob eleksina' adya ugunuk bo ulusulul.
1:1 Nara Yakobus bedya Imik Neyung ab, Wenelesilnya Yesus Kristus amba arawoka welenanya bedya, obadya nang yila' ak, mok soko me nidya' ob lelewoka ululum nim ek nadya perob aboka gibsin. 1:2 Hemyabo nim o, ugunuk yoka'-yoka' damok adya nauba sunulusil dara, ban ara peroba' ak ulusil senewoka pe eiya daboka ulululum. 1:3 Ban unu sunulusil salek enyek, Wenelesilnya bek dib seneleluma' adya, wera ugunda pe ganya siklewoka una' dangalamla' ara ella ululum. 1:4 Dara wera ugunja ban unu pe ganya siklewoka wen ululumnya nenedya, ugunda dib ganya kaboka, hnon meka' dangoka una' loboka, ulululuma' aboka, alda nauba danggiga balalula' aboka, ono' pe diri ulululum. 1:5 Nimi ben hnon ugun gangganek an mek geremseng ululenya hnon ulumlya dara, Imik Neyung ara, salya' wanggulusilnya bek anasa, hekna' uboka, geremseng una' ara nimi nidya' eleklesilnya bek anasa, Imik Neyung ak molowalya dara, alak geremseng eleganemla. 1:6 Bok ban geremseng una' eleganenelem aboka molowalenya bera, eleganenel gom orok gom senewoka ganya el menekna' ara mem, alda eleganenela' ak molowan senewoka dib senewolul. Nera ganya el menekna' ara, senenggoma' longomna mek gwan ek, kabo' adya loksom-loksom alamla soka' ak uboka, ganya ena' ara mem. 1:7-8 Ban unu ganya eb menegoka unululanya bera, alda ganya pe siklewoka namena' ak unggulumla, alja unulamla' nidya' ara banyek pe unuwanamna senewoka orowek pe gegenggulumla. Anasa wera, ban anaso unululanya bera, alda Wenelesilnya bek ab yoka' peroba' dobnamna senewoka ganya wena' ara mem. 1:9 Imik Neyung yuba don nimi bok, bona' garana ulumak dara, Imik Neyung adya alak imiknya nenelamla dara, alda bera ei-ei ganya bololul. 1:10 Bona' dub nim era hola' esa' anaso ak haboka denghenemak bok anasa, ono' alda bona' dubnya bok yuba dololanya bera, alak Imik Neyung adya sokok nenelamla dara, alda or perob aboka ei-ei ganya bololul. 1:11 Esa' ara henga doroklamla dara, hyak poba nong adya esa' ara yalawan dara, hogunga pelemla' damok ara haboka dengalamla. Anasonya neikek, bona' dub nim era, nadya bona' nauba donulul senewoka anam dulumlya salek enyek, al nong ara unu haboka denghenemla. 1:12 Yoka'-yoka' sunulyamalamla salek enyek, ganya siklewoka ululanya bera pelemla' nong ara an. Anasa wera, ban benera unu sunuwalyebok, alda ganya pe siklewoka ulumlya dara, wera Imik Neyung adya alak wana' ulumeija nim ek embeng una' eleganesin wenyasuknya nera, al hnon eleganamla' anasa, pe ulumla. 1:13 Bok ono' nimi ben hnon ban unurub sununa' edya sunuwanamla dara, "Ban sununa' era Imik Neyung ak ab yalamla sununa'," ana' ara mem. Imik Neyung ara malya ublul aboka yu' adya dara hnon sununggulumlekanya, ono' alja' anaba nim ak hnon sununggulusilnya, hnon sunuwoka, ono' nim ek hnon salya' sunul yamenggulusilnya. 1:14 Bok nim ara alja nara anyek-anyek malya unuweisinya senewoka meneng seinilamla' adya, al nong sunuwoka gliboka bo balamla' adya alak sunulamla. 1:15 Wera ono' malya ubsinya senewoka seinin ganya era seleb gigiwoka unuwan dara, wera malya una' mengelamla, dara ono' anyek seleb doka moubna dara, wera eimik dara nimi somokna' bo lanalamla. 1:16 Nadya hyak wana' ulusin hemyabo nim o! Ugunuk hyak sonda' amba bobnenewoka malya neneweisijik. 1:17 Yok-yok perob eleksina' nidya' ara, yok-yok dilina' uyimoknya Imik Neyung adya, imik heikek aba' ara dolunglamla. Anya Imik Neyung ara yoka' dangana' adya, alda yok boka' dangaldinggulumla. 1:18 Alja ganya edyok albeyok ganya doboka, alja dib nong ulumla yub edya nuk alja mabo dangiyisuk. Ban unusuknya nera, anadya nidya' yoka'-yoka' uyimoka' ara mek so bok, nuk perob ekla oulyanga dobnoka' aboka unusuk. 1:19 Nadya wana' ulusin hemyabo nim o, ugunda banyek hyak pe seiniwolulum! Nimi nidya' ara ken dara, berra kebnemak bok, yuba saboka nim ek yu ganya bosina' ak dara, mandewanamak dara, perob. 1:20 Nimi yu ganya adya, Imik Neyung adya unuwanok senelelanya nenyek bo yangganggulumla. 1:21 Anasa wera, sob sembeja'anya neb, yu ganya hwamnya neb dara, bobogolulum. Imik Neyung adya alja yub era ugunuk blebsin danasa migib ulumla' anasa, ugunja ganya lomok sam melesila' anyek, ugunja ganya sokok nenebdangoka doblulum. 1:22 Ugunda yuba kelonggom mem. Ugunda yuba kelolomun dara, yuba dib dolomab e senebdomunuk aboka, yuba kelemunukanya ono' unulululum. 1:23 Nim Imik Neyung yuba kelemak bok, pe doboka pe ununa' orok nim era, nimi heng kemeldana' doboka hogunga kemeldalamna' anaso' ak ulumak. 1:24 Nadya hogung era anaso' ak ulumna senewoka keebdan bok, yokok sam yabanek ab dara, har so' ak eibdangabman do senewoka ganya eboka hiligeldalamak soka' ak ulumak. 1:25 Bok, Imik Neyung adya unuwanalum an yub era, nimi blebsina' migib damok ara an ulumla. Anasa nimi nidya' yuba keb loboka hibigal henggonggom pe doboka einiwoka pe keeboka unulumak nim era, alja yok-yok wa welemlya' ara, Imik Neyung adya alak aralamnamla. 1:26 Nimi ben hnon yuba dolomna ak pe unulamna senebdangoka ululabok, alda yuba sibama' silyum pe bo diri uldana' orok dara, alja yuba dib senelamla' ara salya' lelem dangoka, al damnya sonda' leldalamla. 1:27 Imik Neyung adya nim ek yuba dona' ara, yuba pe dib senena' ganya ab, neyung Imik Neyung bek dib senewoka bojam una' damok alja perob senelelanya nera, genonga neyung orok mab ek pe arawoka, ono' nenya oroka' yamen nim unuruwa' oka kwelesil nim ek pe arawoka, sokok anyeb malya ub eleganelyek senewoka, pe diri uldalamak nim era pelemaka' ara an.
2:1 Nadya hemyab o! Ugunda senenggoma' Wenelesilnya Yesus Kristus bek, dib senelelum nim ululuma' anasa, nimi hogung ak keeboka webeldana' ara mem. 2:2 Anasa wera, nimi bona' dubnya ben hnon, hyak perob nong boksom enyek ongowoka, soubna dama' peroba' anyek doronggoka, Yahudi nim edya yuba don e asoma' ak yaso bok, ono' al neikek ara, nimi hnon malya uboka gweldekdo yabalamso akleng enyek ongowoka yaso dara, 2:3 ban perob boksom ongo yasonya benyek eiyiwoka, ono' ugunja dara, "Neyung ban perob ekla buna' ak an buklom," henesom bok, bona' garanya bek dara, "Banyagono seklom" gom, "Or esona' ak an salya' buklom" gom, henesom dara, 2:4 wera ban unululumnya nedya, ugunja malya ganya seiniwoka bera malya senewoka, nimi yila' yana lebdangoka webeldalalum. 2:5 Nadya wana' ulusin nim o! Ugunda banyek seiniwanalum. Sokok an bona' garana ulumak nim era, yuba dib senena' dub nim ulunoka' aboka, Imik Neyung adya weboka dolosil. Imik Neyung adya alak wana' ulumak nim emba lesuk yuba sunuwoka, Imik Neyung alja mabo siliba' yoka' nenelesil. 2:6 Dub nimi nong adya ugunuk digam-gama' neneweisinikanya, nimi yana lelesin ek sam bo balasak nang era, an ulumak bok, ugunja dara nim era loboka, bona' garan nim ek malya geboka derelelum. 2:7 Ban bona' dub nimi nong edya danyek, Imik Neyung ak ab, ugunja perob si doluma' ara malya nenelemak nim era an. 2:8 Ugunja jongnya nenyek nim ek unulumun dara, wera nera ugunda unuwanalum an yuba momnya doboka' ara, "Andamnya wana' uldalalam sok, an kabo nim ek wana' ululom," hyok yub ek sunuwoka unuro perob ok unululuma' ara an. 2:9 Bok ugunda nimi yila' yana leboka weblelum dara, wera nera hyak malya ululumukanya, ono' Imik Neyung adya dara, ban unuweija nim era, unuwanalum an yuba bleklemak nim era an hyoknya nek anara unululum. 2:10 Nimi hnon Imik Neyung adya unuwanalum an yub nidya' ak pe keboka unulamla bok, sirik hnonok bleklamla dara, wera bera Imik Neyung adya nidya' momnya dobok yub ek bleklamla. 2:11 Dara ono' Imik Neyung adya lebokja, "Gela salana' ara mem," wenhyoknya bedya ono' hnon, "Nim ona' mem," hyok. Anasa wera, ugunda gela salana' loboka, nim ak diba' ololum dara, wera neneba unuwanalum an yub ak blekna nang ululuma' ara an. 2:12 Imik Neyung adya eimik nimi bleblesila' sunuwoka yana lelewanasil nimi gekneba' uboka, ugunda unuwanalum an yuba saboka yoka'-yoka' unululum e. 2:13 Anasa wera, Imik Neyung ara nim angoo yadyek senen ganya orok bok yana lelelemak nang ek, albabya angoo yadyek senena' loboka yana lelewanesil. Angoo yadyek senewoka arasina' ara hyak migib nong ak ululabok, nimi yana lelena' ak dara, or mek so ak ulumla. 2:14 Nadya hemyabo nim o! Nimi ben hnon alja unulamla' nidya' ara pe ununa' orokjok, "Nara Imik Neyung yuba donya," henemso dara, nera perob danamso de? Ban unub menegoka dib senenanya nenedya dara al nonga blebnamso de? 2:15 Ugun gangganek ara, nenya gom, gel gom ongon akleng eneba gobdo garan ulusodya ok, ono' dena' anaba hyak soba' oka' bulumso dara, 2:16 ugunda alak lebnesomja, "Anda pob akleng ongowoka, wera or del yabalom," wenyhenesom bok, arawanggunusom dara, perob de? 2:17 Anasonya neikek Imik Neyung yuba dib senena' ak sam ara neneso ulumla, yuba anaso lelemla' anasa, nab anaso seiniwonun senena' orok dara, yuba dib senelemaba' ara salya' lelem dangalamla. 2:18 Ugunja hnon lebnesomja, "Nimi hnonda yuba dib senena' ak sam ganya diboka ulumak dara, nimi hnonda pe ununa' ak sam ganya diboka ulumak." Nadya ugunuk lebnesina' ara, "Nimi hnon pe ununa' orokjok, yuba dib senelemaka' anyek, nak an aawonululum, dara ono' nadya nong una' edya ugunuk yuba dib senelamna' ara aawanasin," henemso. 2:19 Ugunda Imik Neyung ara al hnonok ulumla senewoka dib senelelum gom? Nera ono' bisa' anaba alba dib senewoka, lok anasa ber-ber alamla. 2:20 Ugunda hyak dongdang ana' hwam nim ek ululum! Ugunja dara nimi yuba dib senena' orokjok, pe ununa' ok unulumak anyek nuk aaweisiseng senelelum de? 2:21 Ugunda nunja' neyung Abraham benyek pe kendululum. Alak Imik Neyung adya peroba' leboka domoka' ara, alja me Isak benyek Imik Neyung amba gibna' oulyang ak uka dalbilimoka' amba leboka, alak peroba' leboka doro beiyimok. 2:22 Nunda pe ulumnemab aboka dara, nunja dib senelemaba' anyek bekna' dolula' aboka dara, wera nunja perob nong un una' enyek, pe laga unulunob. 2:23 Ban nen unuwanamabnya nera ban yub en momnya doboka' ara, "Abraham bera Imik Neyung ak dib senewoka, alja ganya golumoka' amba leboka, alda Imik Neyung adya peroba' neniyiwok." Ban nenesa leboka, "Abraham bera Imik Neyung al kabo," alamek. 2:24 Banyeganyeb danyek, wera nunda ella dab, Imik Neyung adya nim ek peroba' leboka doro dilillesila' ara, yuba dib senewoka ganya olokna' adya ok gom, alda yuba dib senewoka pe ununa' nong adya hnon perob senelesil. 2:25 Hnonda salya' nang edya bolowoka salalemek gel Rahab gek hnon pemoka' anyek ugunda pe kendululum. Alda Imik Neyung ara pe unumoka' damok ara, nim Israeli nim edya bokol bisik nanga Kanaan mok soko gelelenga henga kemel bek sum enyek, alja ek sam doro diyiwoka bo masuka' ara, yok pik bo bogol bilisuka' amba leboka pe unumok. 2:26 Anasonya neikek, nimi nong ara ganya orok dara, wera seleb somogamna nong ek ulumla sok, yuba dib senena' ara pe ununa' orok dara, wera seleb somoklamla yuba dib senena' era an.
3:1 Na kabo nim o! Ugunda banyek ella danalum, yok nim era or mek so bok, nunda neksin nang dangalamab nang enyek, eimik era hyak gasa' anyek nauba yana lelewanasil bok anasa, nauba neksin nang danamab senena' ara mem. 3:2 Nunda nidya', hnon sum era malya ulumab. Bok alda yuba sana' adya malya una' hnon unggululanya bera, alda pe ganya kaboka ulumlakanya, al nonga nidya' pe diri uldalamnamso. 3:3 Nunda nim abaksin pama sibama' ak henga darawoka noblemab dara, nera wera pama pika yibinamlya' ara, nunja unuwolul senemeibinya nenyek gigiwolula' aboka uboka, wera ono' anadya pam en nonga nidya' sam samallilimab. 3:4 Hnon sununa' ara, mek ekla buna' ak sunuwanamab. Mek ekla buna' ara, hyak senenggom nonga' uboka, kabo' nonga doroklamla' adya bo yabalamla bok, glililanya bedya unuwolul senewana' sunuwoka, mek ururana' me nedya poweklamna enyek beiliwoka bo yabalamla. 3:5 Anasonya neikek, nunja silyum eneba, silyum ara, mek bok, alda senenggoma' neneldalamla. Ono', ugunda gal donggal ara hyak senenggom boka' anyek, uka meka' me adya singiwoka dengaboka delemla' anyek, ugunda seiniwolulum. 3:6 Silyum anaba, uka desin heikek ulumla. Nunja' nong ok ara, silyum adya nong me nidya' malya damoka doluwoka boklamla. Bisa' heikek ab uk edya, nunja' nong una' nidya' ara uka dinilesil. 3:7 Yoka'-yoka' nidya' yu hwama' ebeklamla' ab, wining ab, sokok belega yabalamla' ab, hadya' ab dara, nim adya namena' nenelemak, hnonda seleb namena' nenemek. 3:8 Bok silyum ak dara, nimi soko nim edya namena gebnenggunuseng. Silyum ara, gasa siklewamenggom uboka, nimi somokna' yu meka wekdeknewoka, malya una' hwama' ak ulumla. 3:9 Silyum ara, nunja dara Imik Neyung ak nunja neyung perob aboka giblemab bok, hnonda ono' Imik Neyung adya alja nonga sunuwoka uyimok nimi, nunja' hemyab ek weme lelemab. 3:10 Neik silyum ak ab, Imik Neyung ak perob aboka gibna' hnon lanalamla dara, ono' nunja hemyab ek weme len yuba lanalamla. Kabo nim o, ban ara hyak mem! 3:11 Neik mek luk ab perob mek eb, sik mek eb goublamla de? 3:12 Na kabo nim o, ara gal edya dara, Zaitun gal dok mouboka, ono' anggur gal edya dara, ara gal dok moubnamso de? Orok! Ono' sik mek luk ab dara, perob meka gobnenggunumso. 3:13 Nimi ben hnon ugun gangganek ara, heknya ek geremseng uboka pe ella ulumla do? Wera unululanya gekneba' alda geremseng uboka, ganya sokok nenebdangoka, perob nong una' adya laga amalelul. 3:14 Bok ugunda hman ganya boboka, ganya oka debdangoka, yok nim era malya so bok nanokok pewonulul senen ganya bolomun dara, wera perob dib una' yub powegoka dangab menegoka, nonggo abdangoka geremseng ulumna senena' ara mem. 3:15 Ban lebna geremseng una' era, imik heikek ab yangganggululabok, alda sokok ab hnon, bisa' ak ab hnon, nimi ganya duka' adya lanalamla. 3:16 Solom ganya boboka hmaba' ganya uboka, nanokok pewonulul senen ulumak ak sam ara, ono' yok-yok malya una' mandebna' ab, nauba malya neneldana' ab ulumla. 3:17 Bok imik heikek ab yalamla geremseng una' era, men nong ara alda geisa ganya boboka ulumla, anya ono' yok nim ek hekna' ganya boboka ulumlakanya, hekom aboka, pe yuba kebdangoka ulumla. Alda angoo yadyek senewoka arawoka, perobnya nok pe unuro balamla. Alda sene or-or una' loboka hnonok ok sam ok ganya kwenggulumla. 3:18 Ek nang nenelesak nim ek ab, namen una' damoka melemaka' adya, perob una' dolomak.
4:1 Ugun gangganek an wabdangoka oldana' lanalamla' ara hanyagar ab do? Ugunja sokok anyeb anyek-anyek dobsibya ganya bololuma' adya, doluwoka oldalamlakanya, wera damoka bekna' diba' ara an anara ulumla do? 4:2 Ugunda dobnob senelelum bok, dobnenggubna dara, wera hnon oldalalum. Ugunda hman ganya boboka, dobnob senelelumnya dobnenggubna dara, wera ugunda mala weboka oldalalum. Ugunda Imik Neyung ak molenggululuma' adya, yoka'-yoka' ara donggululum. 4:3 Ugunja mololuma' ara nunok ok pewosulul senen ganya boboka, malya uboka mololeluma' anasa, ugunda molowana' anaba elekna' lobsin dara yoka'-yoka' hnon donggululum. 4:4 Ugunda hyak bojam una' orok nim ek ululum! Nimi sokok ab kwebdangoka ulumak dara, Imik Neyung ak ara, isa' geblemaka' ara, ugunda ella ululum de? Anasa nimi ben hnon sokok sam wana' ulunun senelelanya bera Imik Neyung ak ara isa'anya geblamla. 4:5 "Nunja' nong lomok ara, Imik Neyung adya beibuk geisa ganya enyek dibum-dibum aboka ulumla'" ara, Imik Neyung yuba momnya doboka'anya' anasa salya' lebok senenggom, mem. 4:6 Ban ununa' anaba, Imik Neyung adya nuk elegosuk wana' uboka arasina' enyek hyak senenggoma' ulumla. Ban nenesa leboka Imik Neyung yuba bukuk sam ara, "Imik Neyung ara, ganya imik nenewoka ulumak nim ek lek senelesilikanya, ganya sokok nenebdangoka ulumak nim ek wana' uboka aralesil," aro momnya dobok. 4:7 Anasa wera, ugunda Imik Neyung bek, nunja dubnya senewoka, pe kelemunukanya, Iblis bek mala bolomun dara, yeiri bindowanamla. 4:8 Ugunda Imik Neyung berem bumun dara, alda ugun berem yanasil. Ugunda malya una' nim o, ugunja soruk era pe mek elekdolulum! Ugunda ganya penya-penya ululum nim o, ugunja ganya enyek geisa nenebdolulum! 4:9 Ugunda hyaka' gobdo solom ganya boboka, angwei senewoka, engewoka, ugunja oksena' ganya anyek, engena' geboka, perob ganya anyek, suguna' ganya geboka, ulululum. 4:10 Ugunda Wenelesilnya bek ganya sokok nenebdangoka ulululum, dara alda ugunuk imik nenewanasil. 4:11 Na kabo nim o, ugunda geklewoka waldana' ara hyak mem. Neik yuba dolomak nimi moumen geklewoka wabdangoka, yana lelelanya bera, alda Imik Neyung adya unuwanalum an yub ak geklewoka waboka yana lelelamla. Anya ugunda ban Imik Neyung yub ak yana lelelelum dara, wera ugunda Imik Neyung adya unuwolulum alamla yub ek, ununa' loboka, alda yana lelen nimi dangalalum. 4:12 Alda nim amba yuba meewoka yana lelelesilnya bera hnonok ulumla. Ara Imik Neyung adya hnonok embenga' dangiyi somogiyi ulusilnya bek hnonok ulumla' ara an. Anasa wera, ek ululuma' adya, wera anda meneng nim ek yana lelelesilem do? 4:13 "Nunda sumen yok heikek don biniboka, gibna' hnonok uboka bona' dekoka rupiah elemnemab," ugunda wenyalalum nim era, nadya wenesina' anyek pe kebnelum. 4:14 Ugunuk an ampum heka' unuwanasila' ara, ugun dam nang anaba elgom ululum! Ugunda huka' ak anam salek ok laga welena' ara, eimik era dengalamla soka' ak ululum. 4:15 Alda ban nenyek wenyhenesom dara perob, "Imik Neyung adya unuwanamak senemlya dara, nunda embenga' ulumeibyekanya, ban unu an unu ulumnamab," henesom dara perob. 4:16 Bok ugunda wenera dengdang ganya boboka nauba nonggo aldalalum. Anya ban unu leleluma' ara malya una' anya'. 4:17 Wera anasa, nimi ben hnon pe ununa' ara ella ululadyok, ununggulumla dara, malya una' ara alan.
5:1 Na kabo nim bona' dub nim o! Nadya ban wenewanasina' anyek pe keblululum. Ugunda nauba ngolugoka engewanaluma' anasa, wera ngolugoka engelelulum! 5:2 Ugunja bona' dara seleb songa leboka blolosil. Ugunja akleng era seleb bolbola' delesil. 5:3 Ugunja meilik eb dangman ab dara, seleb mura bongolamla; wera mura bongona' nong adya ugunuk malya nenewanasilikanya, eimik era uk anaso' adya ugunja nonga nidya' dengaboka denesil. Ugunda sidya' daknamla sum enesa aboka, bona' ara nauba bolowoka beillilelum. 5:4 Kendululum! Ugunja wak sam wa welesak nang emba dara, dekna' deknenggululuma' adya, wera sikja ugunuk omoma leboka yo yablesak. Ugunja gwanenga yongowoka mamaklesak nim edya deknenggulusak aboka araweisilom aboka bii aboka lelemak yub era, imik ululanya Imik Neyung bedya' ok sam seleb balamla. 5:5 Ugunda hyak unuruwa' garan oroka' anyek, pero-pero senenanya loboka, sokok an ulumla' nidya' damoka lelewoka dero dakdowolum. Ugunda youbnamna pam eneso' ak ugun damnya weildalalum. 5:6 Nimi nidya' malya una' orok nim ek, ugunja henga geregoka ololum bok, sikja dara ugunuk ara hnon kemel samasina' orok. 5:7 Wera anasa, nadya' hemyab o, ugunda ganya siklewoka ulumuna' moruwoka Imik Neyung yanamla. Nimi wa weboka melelanya bera, wa weboka meb lomna' ara moka yeiniboka nong ubna dara doboka delemla' amba diri ulumla' anyek, ugunda sunuwoka kendululum. Dara bera alda siklewoka ulumna' ara, esa' uruklamla salek hnon, nong ulumna salek hnon diri ulumla. 5:8 Imik Neyung yanggan salek era, oka dala' anasa, ugunda hnon ugunja ganya hwiboka ganya siklewoka pe diri ulululum. 5:9 Imik Neyung adya ugunuk henga geregoka obsilyek anasa, ugun moumen malya nenebdangoka, youmbura' debdangoka uldana' ara mem. Nimi yan lelesina'anya bera seleb younuna' aboka gegelamla bok anasa, ugunda pe beknelum! 5:10 Na kabo nim o, youma' Wenelesilnya si anasa leboka ununumna' lelemek nang era, sikda nauba igina kweboka gwekoka, ganya siklewoka ulumeka' anyek, ugumba diliwanalum. 5:11 Sikda pe ulumek alamaka' ara, ganya siklewoka heiboka ulumeknya nenesa lelemak. Ayub bedya ganya siklewoka ulumok enyek, eimik era Imik Neyung adya alak peroba' nauba elegemok an yub era, ugunda seleb kelelum. Anasa Imik Neyung ara, hyak angoo yadyek nong senewoka perobnya bek ulumla. 5:12 Hyak men mem nonga' ara, ugunda im ak si sibuka, soko ak si sibuka, yoka'-yoka' ak si sibuka laga dib unuwanamna aboka mema lena' ara hyak mem. Imik Neyung adya igina yaka' boyiwesilyek anasa, ugunja lebnemuna' ara dib dara, "Yo" hululum, sonda' danalyebok dara, "Orok" hululum. 5:13 Ugunda nimi ben hnon alda ganya ebnamla dara, men Imik Neyung ak molowolul. Nimi ben hnon alda perob ganya boblya dara, alda men Imik Neyung ak bera seboka giblelul. 5:14 Nimi ben hnon neikna' salawanamla dara, alda yuba dona' nimi bo ulusak nang ek el bilya enyek, nang enedya alsamba heng uboka molowoka, Wenelesilnya si sibuka ngikna' mek adya ngiknemak. 5:15 Sikja molowanamaka' ara, hyak ganya dib senewoka molowanamak dara, wera Wenelesilnya bedya neiklelenya bera meriyiwoka, alja malya umlya' ara meewanamla. 5:16 Anasa wera, ugunda merewanalum aboka dara, malya ulumuna' ara laga lebdangoka, ono' heng uboka mololdalalulum. Imik Neyung ak pelemak nim edya mololesak dara, senenggom migiba lanalamla. 5:17 Elia bera alba nimi sirika' nun so ulumok bok, alda Imik Neyung ak moka yanggunumla aboka, hyak dib beiliwoka molomok dara, wera gibna' winilya uboka wala' hnab badya moka meka' yanggumok. 5:18 Dara ono' eimik danyek, moka or youlul aboka, Imik Neyung ak molomok dara, wera mok yeiniboka masa nidya' ara nong oru yabalamok. 5:19 Na kabo nim o! Nimi ben hnon ugun gangganek ara, dib yuba pik loboka yok ok sam balalabok, yoknya bedya benyek Imik Neyung ak gliboka bo yanamla dara, 5:20 ugunda ban yub enyek seiniwanaluma' ara, Nimi malya una' pik balanabok doboka peroba' ak sam beil yalalanya bera, malya ulumna nong una' hnon bleboka, ono' somokna' ak ab bleboka dolomlakanya, wera dololanya bedya malya una' nauba doboka boloklamla. Nara Yakobus bedya gibsin e.
1:1 Nadya' hemyabo nim o, Imik Neyung adya weboka dobsuk nim, Pontus moka hnon, Galatia moka hnon, Kapadokia moka, Asia uboka Bitinia moka doluwoka obyakasik nim ek, nara Petrus, Yesus Kristus adya yuba lena' gaknya bedya, Imik Neyung adya ugunuk perob elekna' ab, pe una' ab, hyak nauba eleklesulul senelamna. 1:2 Neyung Imik Neyung bedya albeyok men seinimoka' sunuwoka, Imik Neyung Geisinya adya, alja geisa mabo nenelesila' adya, ugunda Yesus Kristus ak pe keeboka unuwoluluma' aboka, Yesus eneng adya mek elegosulula' aboka, Imik Neyung adya ugunuk weboka dobsuk. Anara Imik Neyung amba ok muna' gobdo ulunoka' aboka ubsuk. 1:3 Nunda Imik Neyung ak nunja' Wenelesilnya Yesus Kristus alja giblelanya alja' neyung bek gibnemab! Alda nuk angoo yadyek senewoka arasuka' sunuwoka, Yesus Kristus somokna' ak ab embenga' suboka bukiyiwoka' adya, wenyek embeng una' ara nuk elegosuk. Ban adya ganya welmoruna' ganya nuk elegosuk. 1:4 Anasa, Imik Neyung adya alja mab emba imik heikek beillilesil bona' era blona' loboka goowoka denghenggunumla, mura bongowanggunumla bona' enyek, nunja' danamla senewoka diri ulumab. 1:5 Ugunda Imik Neyung migib adya bo ulusil nim ek, ban bona' era ugunsamba' ak beillilesil. Yoka'-yoka' nidya' denghenemla sum enyek, al laga danamla, Imik Neyung nimi blebsina' damoka beibuka' anyek, diba' dobnoka' aboka, ugunja dib senena' adya, ugun nonga migiba geboka bo ulusil. 1:6 Dara, ugunda wenyek dara, yoka'-yoka' nauba se' amba bobgeregoka sunulusil bok, ban amba bekoka ei-ei ganya bololum. 1:7 Ban yoka'-yoka' ak geregoka sunulusila' damok ara, ugunda aldib Wenelesilnya bek okoka dib senelum gom, oroka' anyek, laga dolula' aboka ulusil. Dangmana peroba' anaba jobok oroka' ara, uk ak dalyamalemak. Anasa Imik Neyung ak dib senena' ara hyak peroba' ak uboka, eimik denghenemla dangman era or malya so anasa, ugunuk hnon sunulusil. Dara Yesus Kristus laga danamla sum era, ugunja dib senena' ara seleb laga doka' adya, ugunuk dara, peroba' leboka gibnesilikanya, ugun nong ara imik nenewanasil. 1:8 Ugunda wera Kristus ak ara heng eibnenggulumjok, wera alak wana' ululum. Ono' wenera alak ara eilina' orokjok, alak dib senelelum. Ban nenesa leboka ugunda wenera hyak ei-ei ganya bolomunukanya, hyak perob senewoka nauba eiya hlalalum. 1:9 Dara, ugunja yuba dib senena' nong anyek gigiwoka pelesila' adya, wera ugunja ganya blebsina' nong ara dib dololum. 1:10 Ban ugunja ganya blebsina' nong anasa leboka, youma' ununumna' len nang era ella ubsibya senewoka eboka dulumek. Hnonda ugunja ganya blebnesila' anyek, sikda orowek lelemek. 1:11 Kristus alja' Geisinya sikja' ganya lomok an ulusuukanya, al Geisinya adya Kristus ara heka' huboka somogoka, eimik era al nong ak imik nenewanamoka' anyek unuwanamla aboka sikenek lelesuk. Dara heka' huboka, hek sum ek dib gigiwanamla' ella danob senewoka dulumek. 1:12 Imik Neyung adya ununumna' lelemek nang ek ara, ugunsamba leldanggululum, alda eimik ulumnemak nim emba lelelum aboka nekesuk. Anara ugun wen an Imik Neyung yuba len nang ek ab, Yesus Kristus amba yuba keleluma' anyek lelesik. Sikja ugunuk lero yalasika' ara, Imik Neyung Geisinya adya, imik heikek aba' ara, eleklesila' anyek ugunuk lelesak. Dara, lero nang edya' anaba, sikja lelesak yub era ella danob senewoka dulumak. 1:13 Ban nenesa leboka, ugunja ganya seinina' pe meewoka ublulum. Yesus Kristus yanamla sum enyek eleganesila' anyek dib dobnemab senewoka, ugunja ganya weleluluma' ara, pe keeboka unulululum. 1:14 Imik Neyung ak pe keboka unulululum. Ugunda Imik Neyung ak elgom ululuma wenyek, ululum nong una' enyek ugunja ganya edya ok diliga' en doboka unggom. 1:15 Imik Neyung ugun youbsuknya bera geisa ulumla sok, ugunja yoka'-yoka' unululuma' ak ara geisinya danalenya nok eboka unulululum. 1:16 Imik Neyung yuba momnya doboka' ara, "Nara geisa ulumna' anasa, ugumbabya geisa ulululum," hyoka' anasa unulululum. 1:17 Ugunda heng uboka mololyabenek ab dara, Imik Neyung ara nunja' neyung aboka giblelum. Ban wenyalalum Imik Neyung enedya, nim adya heka' unulumaka' ara, hnonok-hnonok nidya' sunuwoka yana lelelesil. Anasa wera, ugunda sokok an anam ululum salek enera, Imik Neyung ak lok ganya boboka ulululum. 1:18 Ugunja' neyung yabo youma' ulumek nang edya salya' lelem ulumeka' ara, ugunuk lobonggeisika' anyek, loboka blebnesuka' amba dara, alja dara heka' adya ugunsamba deksuka' ara, ugunda ella ululuma' anya'. Alja deksuka' ara dangman meilika joboka dengalamla' anaso' ak deknenggubsuk, 1:19 alda hyak perob nonga' anyek deksuk. Kristus ara giriwa' deregoka menenga' unggulumla domba pam eneso' ak uboka, al Kristus alja eneng era, senenggom dekna' eneso eneng edya deksuk. 1:20 Imik Neyung ara soko anam uyiwanggom bok, Kristus ak men weboka doboka sekiyimok. Wera mok soko sidya' daknamla salek enera, ugunuk blebsununa' aboka sokok sam yeilimok. 1:21 Wera ugunda Kristus anyek nimi somokna' ak ab embenga' suboka bukiyiwoka, imik nenewoknya be pik anyeb uboka, Imik Neyung bek ara dib senelelum. Anasa Imik Neyung enyek anyek, ugunda dib senewoka, ono' Imik Neyung enyek ganya nebom aboka diri ululum. 1:22 Ugunda Imik Neyung yub anyek dib seneleluma' adya, ugun nong ara seleb geisa nenebdangoka, neik yuba dololum nim ek ara pe wana' ulusulum. Anasa leboka, ugun moumen pe ganya goluwoka wana' uldalalulum. 1:23 Wera embenga' uboka, pe migiba' ulumla Imik Neyung pik anyeb uboka, ugun nong ak dara, nim adya beillilesak nong una' ek gom, alda imik sam soba' pe ulumla Imik Neyung ek ab wenyok nonga nenewosuk. 1:24 Imik Neyung yuba bukuk sam ara, "Nimi nidya' ara hola' anaso' ak ulumak, nimi nidya' sikja unulumak migib era esa' anaso' ak ulumla. Hola' ara yalalamla, esa' halamla bok, 1:25 Imik Neyung yub ak dara, or soba' ulmorulamla," aro momnya dobok. Dara ban Imik Neyung yub enyek ugunuk ara leb elegesik.
2:1 Anasa wera ban nenesa leboka, ugunuk ab nidya' yu hwama' ara gwiriwoka loblulum. Sonda' lena' ab, sene or-or una' ab, hman ganya boldana' ab, yok nimi geklewoka derewoka wana' nidya' ara hyak loblulum. 2:2-3 Wenelesilnya bera hyak perobnya ulumla' ara, ugumba seleb ella ululuma' anasa, ugunda wenyok beibna me neneso uboka, perob geisa moum soub mek enyek desinya senen ganya bololulum. Ban anadya ugunja ganya nebnesilikanya, blebnesil. 2:4 Kristus al nong ak dara, nim adya malya girik senewoka lobek bok, Imik Neyung adya dara, peroba' leboka weboka domoka' embeng un girik ek ulumla. Anasa, ugunda Wenelesilnya bek youmun dara, 2:5 ugun nong ak dara, embeng girik gong ek anaso ululuma' anasa, ugun nong anyek, Imik Neyung adya doboka perob ganya e solomla. Wera anadya ugun nong ak dara, Imik Neyung amba ok muna' gobdo ulumak yuba lena' gak nang anaso uboka, Yesus Kristus pik uboka, Imik Neyung ak giboka perob aboka ganya elekna' eleklelum. Dara, alda ban elekna' enyek perob senelesil. 2:6 Nenesa leboka, Imik Neyung yuba momnya dona' ak sam ara, "Nadya hyak perob girik ek weboka dobna, Sion heikek sam men iklemak girik eneso' ak beibna. Anasa, alak dib senewanamak nim era, sikenek solom ganya nenewanggunusil," aro momnya dobok. 2:7 Ban girik enera, ugunja alak dib senelelum nim ek dara, dekna' nauba girik era an. Bok girik enyek an, dib senena' orok nim emba dara, ban yub enyek lero momnya doboka' gigilamla' ara, "E sona' nang edya ikoka sobnenggumek girik era, wera hyak gobdo perob girika dok," aro momnya dobok. 2:8 Anya, "Nimi yok oluka dikna' girika dok, hnonda alja yok nim ek malyanggal dilisil girika dok," hyok. Nimi nidya' oluka diklesila' ara, Imik Neyung yuba nong ak dib senenggulumaka' nong adya ulusil. Nenesa leboka, sikda yuba dib senena' orok nim era, ban amba orowek gegewoka beibsuk. 2:9 Bok ugun nim enyek dara, seleb orowek Imik Neyung adya weboka dobsuk nim ek ululum. Yuba lena' gak nim ek uboka, geisa sokok nim ek ululum. Imik Neyung amba ok uboka, Imik Neyung alja mabo siliba' ululum. Imik Neyung adya ugunuk weboka doboka, guna' lomok aba' ara, alja dilina' ak sam yoululum aboka youbusuka' ara, alja senenggom ununa' enyek ugunja hyak nauba yok nim ek lero yibiluluma' aboka anara ubsuk. 2:10 "Ugunda youma' dara, Imik Neyung mabo siliba' unggululum bok, wenyek dara, Imik Neyung alja mabo siliba' ululum. Youma' era, angoo yadyek senewoka arasina' orok nim ek ululum bok, wenyek dara, angoo yadyek senewoka arasina' seleb dolum nim ek ululum," hyok. 2:11 Nadya wana' ulusin hemyabo nim o! Ugun nong ara sekel yanggan nim uboka, salya' soko pik dongol girikna nim ululuma' anasa, nimi malya ubsinya ganya bolomaka' anyek, nimi ganya lomok sam malya ul eleklesila' anyek, ugumba hnon ununa' mem aboka yuba garawoka sekna. 2:12 Ugunja nong una' era nimi yuba donggulumak nimi gangganek ara, hyak pe ulululum. Anadya sikja ugunuk ara malya aboka wabnesak bok, ugunja pe ulumuna' anyek eibija dara, sikbabya anyek eiyiwoka, Imik Neyung yanamla sum era, Imik Neyung ak gibnemak. 2:13 Imik Neyung amba leboka, nimi soko dub nang ulumak nanga nidya' sikja yuba pe keboka unulululum. Nera or mok soko damnya bedya yuba gom, 2:14 mok soko senenggom dubnya bedya yub ek gom, nera mok soko damnya bedya, malya ulumeija, dara henga gereganesil, pe ulumnemak dara, peroba' lelemnesil aboka sekililanya bedya yub eneba pe kelelulum. 2:15 Anasa Imik Neyung adya ugunuk seinilesila' ara, ugunja perob ununa' enedya, dongdang aboka malya yuba saro yabalamak nim edya sibama' era, yuba geleganok senelamla. 2:16 Ugun nong ara seleb numba yok sekuba nimi geknewa' anaso ulululum, bok ugun sekiyiwosuka' ak dara, malya una' lomok hnon siklewoka una' ara loboka, Imik Neyung adya wa wen nang bekna' ulululum. 2:17 Nimi nidya' nim ek peroba' lelelulum. Ugun neik yuba dololum nim ek nauba wana' ulusululum. Imik Neyung ak dib senewoka lok ganya bolomunukanya, mok soko damnya bedya yuba pe kelelulum. 2:18 Hemyabo nim ugun yok nimi wa wen nang dangoka ululum nim era, ugunja' neyung yabo wa welelum nim edya yuba hyak nauba pe keboka unulululum. Nera hekna' ganya boboka pe unulusak nim ok gom, alda ugunuk yu leboka lelesak nim ek anaba neik so unulululum. 2:19 Ugunuk hyak malya nenelesija' anaba, Imik Neyung amba leboka or siklewoka ulumnelum dara, Imik Neyung adya ugunuk perob senewanasil. 2:20 Ugun malya ulusom enyek, henga geregoka igina kwelisina' anyek siklewoka ulusom dara, ugunuk gigiwanasiseng de? Orok! Bok perobnya nek unululuma' amba leboka ugunuk igina kwelesil dara, pe siklewoka ulumun dara, wera nera Imik Neyung adya ugunuk hyak perob senewanasil. 2:21 Ban nenesa leboka, Imik Neyung ara ugunuk youbsuk. Anasa Kristus ara ugunsamba leboka somogookanya, ugunda alja una' diliwoululuma' aboka, alda ugunsamba pik diba' yarawousuk. 2:22 "Kristus ara malya una' hyak meka' hnon unggululanya bek ulumok. Dara ono' yok nim edya anyek sonda' leboka' ara, alak ab hnon meka' kebnenggumek." 2:23 Al nong ak derewoka walamek sum era, alja sikba dirigoka wabnenggubsuk. Alda igina kweboka gweklemok sum era, hekasa ulunulum aboka dirigoka obnesin wenyhenggubsuk. Alda alja nong una' era, Imik Neyung pe sunuwoka unulusilnya bek elegok. 2:24 Nu nong anyek malya una' adya gobuka ulusuka' anyek bleboka peroba' nenewosununa' aboka, anadya Imik Neyung adya unu ubseng senelelanya sunuwoka ubnoka' aboka, nunja malya una' gong dara, Kristus adya huka boboka gal ak somogok, Kristus adya eneng menenga' edya ugunuk ara bleboka hwebsuk. 2:25 Youma' dara, ugun nong ara weiningdangamna pam eneso ululum, bok wenyek dara, perob pama beilina'anya bek dobdo yeiniboka, ugunja ganya beiyiwoka bo usinya bek yeiniboka ululum.
3:1 Anasonya neikek ugun gelewa anaba, ugunja nenyab edya yuba pe kelelulum. Dara, ugun gangganek ara, Imik Neyung yuba dib senenggulumeija nimi hnon ulumnemak dara, ugunja dara sikenek ara yuba sal elekna' loboka, ugunja pe unulumun nong una' enedya sikda Imik Neyung ak dib senewanamak. 3:2 Ugunja yuba sana' orok bok, sikda yuba donggulumak nenyab era, ugunja lok ganya boboka geisa uboka pe ulumuna' nong anyek eibnesaakanya, dib senewanamak. 3:3 Ugun nong ak dara, boka' eilibek amba goubenya neneldana' ara mem. Dara honga lelekna' gom, yok gweidya' bona' gom, perob boksom onguna' gom, ban nidya' anadya perob senewananenoka' aboka seneldana' ara mem. 3:4 Bok saawoka, alda ugunuk goubenya ubneluma' ara ban: ugun goubenya ubnamna senen ganya era, ugunja' ganya lomok anyek namen uboka, dogom aboka pe ulunun senen ganya, ugunja' ganya lomok ab, Imik Neyung adya nenyek perob senelamla' anasa, ugunja perob neneldana' ara an. 3:5 Ban neneso ununa' enedya youma' Imik Neyung amba muna' ulumek gelewa dara, Imik Neyung ak hnonok ganya dib beiliwoka, sikja nenyab edya yuba pe keboka unulumeka' adya perob neneldalamek. 3:6 Dara Sara geneba neik so unulumok, alja nenya Abraham bedya yuba pe keboka, alja nenya emba dara, nadya' neyung alamok. Ugun wenyek gelewa era, ugunda perobnya nenyek unuwoka ulumun dara, yoka'-yoka' ak ara lok ganya bobnenggubmun dara, ugunda Sara gedya gel mab ek ulumnulum. 3:7 Ono' neik so ugun nengmab ak dara, ugunja gelewa ek anaso nim ek ulumla senewoka ella dangoka ulululum. Gelewa ara sikda hmenga' yaka' ak ulumak senewoka, ugunda sikenek peroba' leboka pe unulululum. Ugun nengmab ab neika' Imik Neyung adya embeng una' ara dolomab senewoka sikenek pe unulululum. Wera ugunja molona' era okna dabsilyek anasa, ban nidya' unulululum. 3:8 Anasa damok ara, ugunda nidya' pe neik ganya boboka, neik yuba saboka ulululum. Ugunja una' era neik noungousa eneso' anyek wana' uldalalulum. Ugun moumen wana' uldalamunukanya, ganya sokok nenebdangoka ulululum. 3:9 Ugunda naba malya ubnela' anasa, alba malya ubnun senewoka malya una' moumen dirigeldana' ara mem. Bok saawoka, alda Imik Neyung peroba' nenelesilom aboka mololdalalulum. Imik Neyung adya ugunuk yoululum aboka youbsuka' ara, anaso perob una' enyek unuwoka ono' peroba' dobnoka' aboka ubsuk. 3:10 Imik Neyung yuba bukuk sam ara, "Nimi ben hnon nara pe deregoka uboka, pe ubgiga binimna' ak ara pe ulumnamna senewalenya bera, malya una' yub ara sablyek anasa, sibama' serekdangoka, sonda' ara salya' lero yibilyek anasa, pe diri uldalalul. 3:11 Bera ono' malya una' ak dara, mok geboka ululul. Hnonda anya, alda perobnya nenyek ok unululul. Nara yok nim ek ara hekna' ganya ok boboka ulumnamna senewoka duboka ululul. 3:12 Imik Neyung ara malya ulumna nim era, malya nenelesilnya anasa, alak pelemak nim ek kemelesilikanya, sikja molona' nauba kelesilnya bek anasa, pe ululul," aboka momnya dobok. 3:13 Ugunda perob una' enyek ok unulunob senen ganya bolomnelum bok dara, heknedya ugunuk ara malya ubnesuso do? 3:14 Bok, ugunda pe ululumnya nenesa leboka, igina nauba kwelesila' anaba, nera hyak pe ululum. Ugunda ganya daldom-daldom aboka, yok nim ek lok ganya bona' ara hyak mem. 3:15 Bok ugunja ganya lomok ara, Kristus ara nunja' Wenelesilnya ulusulula' aboka diba' mema' nenewoululum. Ugunja Imik Neyung adya eimik era anyek eleganesila' dobnemab senewoka diri ululuma' anyek, yok nim edya ugunuk heibnesak dara, nunda anasa ulumab aboka orowek seinibgoboka pe neknelum. 3:16 Bok ban unuwanamuna' amba dara, pe namen ganya edya hekna' ganya boboka unuwanalum. Ugunda Kristus adya diriga ban nim ulumneluma' anasa, yok yuba dona' orok nim edya wabnesak bok, ugunja pe ulumnelumnya nenesa wabnesak ab dara, ono' sik dam nimi meknewab senewoka sikenek saawoka alya dabnesila' anasa, perob una' an ella ululumnya nok unulululum. 3:17 Imik Neyung adya or unuwaseng senemnelanya nenyek, pe unulumnelum bok, ugunuk igina kwebnesil dara perob bok, malya ulumuna' anasa igina kwelemnesil dara, nera hyak malya nong. 3:18 Anasa leboka, Kristus ara lika hnonok ugunja malya una' amba aboka, malya unggulumoknya benyek malya una' nim emba aboka somogok. Kristus adya ban unuwoknya nera, anadya ugun nong anyek doboka Imik Neyung ak bo busununa' aboka ubok. Alda nong boka' ak salya' obek bok, suboka' ak dara, ganya ak suboka bukok. 3:19 Dara, Kristus ara ganya adya, henga geregoka beillilamla ganya ulumek ak sam yuba bo lel elegel byuk. 3:20 Nera Nuh be ulumok salek, Imik Neyung ak keboka ununggulumek nim ek lel elegel byuk. Ban salek era Nuh bera anam mek ekla buna' e solomok dara, Imik Neyung ara or siklewoka diri ulumoka' ara, seleb sobdakok sum era, nimi nidya' seleb gobdo somogek bok, nimi linbadya nim ok blebsuk. 3:21 Ban youma' unumoka' ara, sununa' diba' ara wen an ugun blebsina' damok ara, meka dalasak an. Ban meka dalasaka' adya, ugunja malya una' ganya lomok ulusila' nidya' anyek doboka boloknenggulusak, alda ugunja Imik Neyung ak nara eimik saawoka hnon malya ub sounuwanggunumna, anya nenesa bekna' diba' meka dalasak. Mek dana' adya nimi bleblesilnya nera, Yesus Kristus anyek malya una' ak sam ab seleb somogoka suboka welewoka' adya ok bleblesil. 3:22 Wera Kristus ara imik heikek Imik Neyung sirikek sam bindewoka, lero nang ek hnon, nidya' dub nang ulumaka' ab, senenggom migib ulumla' nidya' ara alja yuba kelemak.
4:1 Kristus ara nimi boka' adya gweklemoka' anasa, numba alba seinilemok sok seinilemnemab senen ganya boboka migiba gebeldalalulum. Nimi nong sirika' anyek oka gweklelanya bera, ono' malya una' lolomla. 4:2 Dara, alda sokok sam anam ulumnamla salek enera, nim adya bolomak ganya ek bonggulumnamla bok, alda Imik Neyung adya unu ubseng senelesilnya nenyek sunuwoka ulumnamla. 4:3 Ugunda youma' yuba dobnenggulum salek era, nim Imik Neyung yuba dobnenggom nim edya unulumak ununa' seleb ura dakdowolum. Ugunda hyak nauba malya ululum. Ugunda youma' dara, yoka'-yoka' malya unuweisinya ganya adya hnon, gela salaweisinya ganya hnon, yu meka deregoka ganya uu asin meka delelum, malya una' hwam adya goluwoka, bisa' nauba hyak pe giboka, henga kemena' malya dangalamla malya una' eneba unululum. 4:4 Wenyek dara, ugunuk ara yuba dona' orok nim edya dara, lok anasa ngoluklesak. Nera ugunja youma' nong una' enyek, malya ura un nong una' enyek oroka' anyek eililesaka' anasa lelesak. Ban nenesa leboka wera ugunuk ara sikja dara walasak. 4:5 Bok ono' sikbabya, eimik embenga' ulumak nimi hnon, seleb sogomek nimi hnon, yana lelewanasilnya Imik Neyung be yanamla sum enyek, sikba nunda anaso ulumab aboka laga lelewanamak. 4:6 Ban unuwanasilnya nenesa, seleb somogek nim ek men dara, Imik Neyung adya' nimi blebsin yub era leb elegeisik. Ban unumeknya nera, anadya wera nimi nong ak dara, yana lelewanasilnya nera, nimi nidya' hiboka yana lelelesil sok, yana lelewanasil aboka ubok. Ono' hnon ganya ak dara, Imik Neyung adya unu ubseng senelamla sok, yuba dolomaka' sunuwoka ulunoka' aboka ubok. 4:7 Yoka'-yoka' sidya' daknamla sum era, wera seleb oka yalamla' anasa, ugunda pe heng uboka molowoka ulululuma' aboka, ugunda keebdangoka pe diri uldalalulum. 4:8 Nim ara sik moumen wana' uldalamna' adya, ono' malya una' nauba bok, laga lebdangoka doboka bologoldalamaka' anasa, yok-yok ununa' era mek so bok, ugun moumen anyek hyak nauba wana' uldalalulum. 4:9 Yoka'-yoka' ak seiniwoka yu yabna' loboka, ugun moumen anaba ugunja' e pik peroba' lebdangoka doboka beil dalalulum. 4:10 Imik Neyung adya yok-yok elekna' eleklesila' ara, ugumbabya yok-yok sunuwoka webnesoma' sunuwoka dolum. Imik Neyung adya eleklesila' doboka welemak nimi bekna' ululuma' anasa, ugunja webnesoma' geknelemla wa nera, yok nim emba webnun senen ganya boboka pe welelulum. 4:11 Nimi ben hnon yuba lebnelenya bera, alda Imik Neyung yub aldib an aboka lelelul. Nimi yok nim ek arawanasin senewalenya bera, Imik Neyung adya elegamlya migib ek sunuwoka aralesulul. Wera anadya yoka'-yoka' unulumneluma' ak ara, Yesus Kristus pik uboka Imik Neyung si ak imik nenewanoka' aboka unulululum. Imik Neyung ak hnonok alak ok senenggom migibnya ululul, alak ok soba' gibelmorulunok. Amin. 4:12 Nadya hyak wana' ulusin hemyabo nim o! Ugunda wenera yoka'-yoka' igina kwelesila' ara, nadya yuba dib dobek gom, anya nenesa ganya sene ulusil. Dara, ugun gangganek sam ulusilya dara, lok ganya boboka, hekasa anaso unuwanggunususonya nek ulusil do senenggom, mem. 4:13 Bok ugunda Kristus ab neika' igina kwelesila' anasa, pelesil senewoka eiya dabnesuso. Dara Imik Neyung adya Kristus imik nenemoka' laga danamla salek enyek, ugunja ganya hyak nauba eiya dabnesil. 4:14 Ugunda Kristus adya diriga ban nim ululuma' amba leboka yok nim edya walasak dara, wera anara Kristus adya' Geisinya imik ululanya, Imik Neyung Geisinya bera ugunuk an seleb ulusil bekna' ulumla' anasa, pe ululum. 4:15 Ugun gangganek ara nimi ben hnon, alda nim olomla gom, hoka' dolomla gom, yu ganya boboka malya unulamla' adya gom, yok nim edya' bok dobsalawoka ulumla' adya, malya dangalamla adya igina kwewoka gweklelum dara, perob gom. 4:16 Bok, Imik Neyung yuba dona' nim ululuma' amba leboka igina kwelesil dara, ban nenesa leboka, ugunda alya ganya bona' ara hyak mem. Bok alda saawoka, nunda Kristus si ak bo yabalamaba' senewoka, Imik Neyung ak perob aboka giblelulum. 4:17 Imik Neyung adya sokok an yana lelewanamla hyok salek era, wera seleb ubnabla. Imik Neyung mab ulumak nim enyek men yana lelewanasil. Dara, Imik Neyung nu alja mab ulumab nim enyek men yana leleb einiwanasil dara, Imik Neyung adya' perob lero yanggan yub ek dib senewoka donggulumak nim ek ara heka' hubnamla do? 4:18 Imik Neyung bukuk sam ara, "Nimi pe ulumak nim enyek babya okoka blebsina' okna ulusil dara, nimi nauba malya ulumaakanya, Imik Neyung ak hyak gobdo meka' elgom nim ek ara heka' hubnesil!" aro momnya dobok. 4:19 Anasa wera, nimi hnon nim era Imik Neyung adya senemlya' adya, igina kweboka ulumnemak dara, nim en pe jonga' uboka sik nong ara uyiwosuknya bek elegoka ono' pe ulmorulunok. Imik Neyung ara alja unuwanasin ananya nera, alda gigiwoka unululanya bek ulumla.
5:1 Nim ugun yuba dololum nimi bo usin nang ek kebnoka' aboka anara moloweisin. Nadya ban ugunuk momnya doboka beibsina' anara, ugun kabo yuba dona' nimi bo usinya bedya, Kristus gwekoka somogoka' ara, nab okoka eibsenya bedya, anya Kristus si imik nenewanamla' ara nim ek laga danamla sum era, neika' unuwanasilnya bedya, ugunuk moloweisin. 5:2 Imik Neyung adya ugunuk lebsuk domba pam danyek pe bo ulululum. Imik Neyung adya seinilamla sok sunuwoka, igin ganya bona' loboka, perob ganya boboka beiyiwoka bo ulululum. Wa webnemuna' ara dekna' anyek dobnun senen ganya boboka wenggom, alda ugun nong adya aldib yok nim emba welemak nang ululumnya nenesa leboka welelulum. 5:3 Ugunja nim enera, bo ubnelum aboka elegeisik nim ek ara, ugunja dara, senenggom dub nang edya ununa' enyek ununggom, mem; alda sikja ugunuk diliwanesijenya nenyek unulululum. 5:4 Anya senenggoma' imiknya nimi bo ulusilnya yanamla sum era, ugunuk ara senedya' meka' habnenggunumla bona' enyek, senedya' yaka' anyek eleganesil. 5:5 Dara ono' ugun anam goubenya ululum nang ek hnon lebnesin. Ugunja' nauba so nim edya yuba pe kelelulum. Imik Neyung yub ek sam ara, "Imik Neyung ara dengdang ganya bolomak nim ek lek senelesilikanya, sokok nenebdangoka ulumak nim ek wana' ulusil," aro momnya doboka' anasa, ugunda nidya' ara ganya sokok nenebdangoka pe kemeldalamnelum. 5:6 Anasa wera, Imik Neyung adya' migib soruk dam ak sam ganya sokok nenebdangoka ulululum. Dara, imik nenewanasil sum era, ugunda imik nenewanasil. 5:7 Imik Neyung adya ugun nong ak wana' ulusila' anasa, ugunuk an ganya elesila' nidya' ara nunda unulusil aboka alak elegoululum. 5:8 Bisa' dubnya Iblis ara alda ugunja' senenggom isa'anya ulumla' anasa, ugun nonga pe diri ubdangoka mala websiniwoka ulululum. Iblis ak dara, bei gam adya dena' eibnenggumnekanya ngouboka ero yabalamla sok, ero yabalesila' anasa keeboka ulululum. 5:9 Nimi nidya' nunja' hemyabo mok soko me nidya' sikba igina kweboka numba gweklemab sok gweklemak bok anasa, Iblis ak ara, ugunja yuba dib senen ganya enyek hyak nauba adya alak ara pe welsinilelulum. 5:10 Wene salek enesemba ok ugunda se' igina kweboka gwekgogowomun dara, Imik Neyung adya alja ok ganya doboka peroba' nenewanasil. Imik Neyung adya ugunuk gasa geboka, migiba' nenewanasilikanya, ugunuk ara pe sekiyiwanesil. Anasa alda Imik Neyung ara Kristus pik uboka imik nenewanasil aboka youbusuknya bera, alda peroba' eleklesilnya bek anasa, ugunuk anaso pe unuwanasil. 5:11 Imik Neyung ak hnonok alak ok hyak soba' or migiba' ulmorululul. Amin. 5:12 Nadya ban burum momnya dona' beibsina' anara, Silas benya arawoka beibsinem. Nadya dara, Silas bera nunja' hem be yuba dona'anya bojamnya bek ulumla. Nadya ban weboka beibsina' anara, Imik Neyung adya peroba' eleklesila' diba' anyek, ugunuk unuwaneseng senewoka, unuwanaluma' anya' aboka beibsin. Ugunda ban unu eleklesila' anyek pe salabmoubuka ulululum. 5:13 Imik Neyung adya weboka domok nimi, Babilon heikek yuba dona' nimi, ugunja' hemyab edya, ugunuk perob aboka giboka beibsak. Dara ono' nadya wana' ulunanya Markus bedya ugunuk hnon gibsil. 5:14 Ugun moumen anaba Imik Neyung yuba dolomak nimi bekna' dolulula' aboka, nadya' hemyab aboka gibdangoka ulululum. Dara, Imik Neyung adya Kristus mabo siliba' dangalum nim ek hekna' ganya ara soba' ulusulul. Nadya Petrus bedya seleb lebna.
1:1 Yesus Kristus ara nunja' Imik Neyung uboka, blebsina' dubnya ulumlakanya, alda perob nenena' edya dib blebsuk. Dara, nuk dib blebsina' elegosuk sok, ugun hnon ban dib senena' dolum nim ek momnya dona' en beibsin. Ban momnya dona' enera, Yesus Kristus adya wa arawoka yuba lena' gaknya Simon Petrus bedya ugunsamba beibsin. 1:2 Ugunda nunja' Wenelesilnya Yesus ak hnon, Imik Neyung ak hnon, ella ululuma' adya, ugunuk nimi pe una' ab, alja' perob elekna' ab dara, ugunuk nauba danggiga balasulul. 1:3 Imik Neyung adya alja' senenggom migib edya ongowoka, yoka'-yoka' nidya' ara, yuba doboka pe ulunoka' aboka nuk seleb elegosuk. Imik Neyung adya ban unuwosuknya nera, alja' senenggom migib eb perob una' ab danyek, boboka ulunoka' aboka, youbusuknya bek ella dangamouba' adya ubsuk. 1:4 Ban unu elegousuknya nenedya, Imik Neyung ara senenggom perob elekna' hnon, hyak nauba perob elekna' era, alja orowek eleganesin amoknya nenesa, nuk sunuwoka elegosuk. Ban unu elegosuk elekna' enedya, wera ugunda malya ubsinya senen ganya edya malya nenelesil ununa' era loboka, Imik Neyung adya ununa' enyek neika' unulululuma' aboka, wera seleb elegosuk. 1:5 Anasa ban unuwosuknya nenesa leboka, ugunda Kristus ak hyak gobdo ganya ologoka dib senewoka, ugunja dib seneleluma' ak ara, ono' hnon perob una' unuwoka ulumnulum. Ugunda pe ulumunuk ab dara, ono' hnon geremsenga dangoka ulululum. 1:6 Dara, ugunda geremseng nang uboka, hnonda ugun nong anyek pe diri uldalalulum. Dara ono' pe diri uldalamunuk ab dara, yoka'-yoka' lanawanamlya sum enesa leboka, ugun nong ara ganya migiba' gebdangoka pe ubmoruwanob senen ulululum. Ono' ganya migiba' gebdangoka pe ulmorulumunuk ab dara, Imik Neyung adya anaso ubseng senelamla' sunuwoka ulululum. 1:7 Dara, Imik Neyung senelamla sok sunuwoka ulumunuk ab dara, ugun neik yuba dololum nim ek peroba' lebdangoka yadyek ganya bobdangoka pe unuldalalulum. Ugun nim ek yadyek uboka pe unuldalamunuk ab dara, ono' nimi yok nim ek wana' una' diba' pe unulusululum. 1:8 Ban nidya' lebna ganya era, ugunja unuwanasoma' ara an. Anasa ban lebna una' ganya en diliga' doboka nauba danggiga balasilya dara, nunja' Wenelesilnya Yesus Kristus ak anaba hyak pe ganya olowoka ella danaluma' ak dara, ugunda yeiriwoka wa weboka pewanalum. 1:9 Bok nimi nidya' ganya enyek boboka, una' orok nim era, sikda heng ulusila' adya, pe eilina' loboka, nadya youma' unulamsa malya una' era seleb doboka boboganyoka' ara hibigoka salya' ganya ulumak. 1:10 Anasa wera, nadya hemyab o, Imik Neyung adya ugunuk weboka youbusuka' ara, duboka pe ulumuna' adya, dib ulusil aboka amalelulum. Ugunda ban una' enyek pe unulumun dara, yuba dololuma' ara, eimik era goowoka denghenggunumla. 1:11 Ban unu ulumuna' adya, eimik nunja' Wenelesilnya uboka, nimi blebsina' dubnya Yesus Kristus ululanya bera nuk alja' perob heikek weknemaba' amba, or ana' gak eleganesil. 1:12 Ban nenyek unuwanaseng senewoka, ugunda seleb ella dangoka ono' Imik Neyung yub ak ella dangalumnya, nera seleb doboka pe salalalum bok, sounuwoka hnon bekluluma' aboka soba' neklemnesin. 1:13-14 Nunja' neyung Wenelesilnya Yesus Kristus adya nara sokok anara loboka, imik heikek sam bininanya nera ulumna seleb nekenela' anasa, nara anam embenga' ulumna salek era, nadya wa nenya' aboka ugunuk pe bekellilimnesin dara, perob senelamna. 1:15 Wera nera seleb somoganya' anaba, nimi peroba' dangalamla yuba nekesinya' ara, ugunda or bekleluluma' aboka duboka unulamna. 1:16 Nunja' Wenelesilnya Yesus Kristus migiba' eimik yanamla aboka neklesuba' anyek, nim adya geremseng adya, meka lelewoka salamak yub ek neknenggusuba. Kristus anyek Imik Neyung adya imik nenewoka' ara, nu nong adya ok ab okoka eibuba. 1:17 Imik Neyung adya Yesus ak giboka imik nenewoka' ara, numba ok ulumoub bok ubok. Ban sum imik senenggom heikek ab yuba kebuba' ara, "Nadya wana' ulumna me nera ban. Alja nadya ganya hekel eleklenel!" hyok. 1:18 Ban wenyan yuba kebuba' ara, nunda alab neika' geisa meinik sam ulumouba sum enyek, Yesus ak imik heikek aba' leboka' kebuba. 1:19 Ban nong anyek eiyiwoka, Imik Neyung adya' nidya' ununumna' lelemek nang edya lemeka' ara gobdo dib senelemab. Dara, ban yub era, wesa' ak guna' ak yeblamla' anaso ulumla' anasa, ugunja ganya lomok ara heng anam dorogol yabana' anaso uboka, ono' yali sam olola' anam yebnenggulumla salek enyek, ugunda ban wesa' enyek an pe keeboka sunuwoka ulumnelum aboka lebsin. 1:20 Ugunda hyak okoka dib nonga' banyek beklemneluma' ara, Youma' ununumna' lelemek nang edya, Imik Neyung yuba momnya doboka' anyek, leb elegeisika' ara, sikja nimi ganya adya ok doboka lebnenggumek. 1:21 Nera Imik Neyung yub ara, hnon nim adya ok salya' ganya doboka lebnesinya senewoka lenggulumek. Bok, alda Imik Neyung Geisinya anyek, Imik Neyung yuba leblula' aboka, nimi ganya ak wekemok nang edya lelemek.
2:1 Youma' dara, nimi yuba dolomeka' hnoum ara, sonda' amba yuba len nang aldalamek nimi hnon lanalemek. Anaso neikek weneba ugun gangganek ara sonda' amba bobnenewoka yuba lesin nim abdangoka hnon lanawanamak. Ban nang enedya dara, ugunuk ara dib gom yuba, nim ek malya gebellilimnesak yub enyek, bo lanawanasak. Dara sikja malya una' emba dekesuknya senenggom Imik Neyung benyek unggulumla aboka bobnenewoka lebnesak. Unu Imik Neyung ak yaab lobnemaka' adya, senenggom somokna' damok ara sik dam nang ek bo lanawanasil. 2:2 Nimi nauba ara, ban malya nim enedya sikja unulumaknya nenyek diliwoka unulumnemak. Sik nong anyek unuro malya una' ganya enyek diliwoka unulumnemak. Dara, ban nim enedya, nimi nauba ara jonga' perob pik Imik Neyung pik ab malya geboka unulumnemak. 2:3 Sikenek sonda' yub ok miniwoka neklesak nang ek adya, ugunja sikenek peroba' elegosunuk senewoka, dib gomnya nenyek miniwoka ugunuk neklemnesak. Bok ban unulumaka' amba leboka, Imik Neyung adya igina yaka' ara seleb orowek beibuk, hnonda nenesemba leboka Imik Neyung adya sikenek obnesin aboka gegewoknya nera or anam diri ulusil. 2:4 Malya lero nang dara, hyak guna' serewora alamla gwerenek sam beiyisuka' ara yana lelewanasil sum doboka yana lelewanasil. Sikda malya ulumak dara, Imik Neyung adya obnamla' ak ab salya' blebnenggubsuk. 2:5 Anasonya neikek, youma' danaba Imik Neyung adya dara, unu obnesin ananya nera gigiwoka oro yibisuk. Nimi malya ulumek nim obnuna' aboka, Imik Neyung adya senenggom meka gwenewoka obsuk. Nimi nidya' ara dengaboka obsuk bok, jong una' amba lelemoknya Nuh beb, yok nimi sekbadya nim ok, Imik Neyung adya sikenek or blebsuk. 2:6 Dara ono' nimi malya ulumak nim era, Imik Neyung adya dara, heka' huboka yu ganya boboka olosila' ara, ella danoka' aboka, Sodom Gomora heik ara uka daboka obsuk. 2:7 Nimi nidya' heik ene nimi nidya' ara, malya una' hwam ok ura ulumek bok, alda Lot bek hnonok alak ok Imik Neyung adya pelemoknya senemoka' anasa, unu ol yabasuk sum era Lot bek hnonok blebok. 2:8 Ban unu malya ulumeka' gangganek sam ulumok dara, Lot bera ganya ara hyak nauba soldelenabok, malya ulumeka' ara li soba' eillilemokjok, alak ok hnonok dogom aboka pe ulumok. 2:9 Anasa ban eini lebmana' adya eillilemab. Imik Neyung ara alak ella uboka, pe ulumak nim era, sikenek yoka'-yoka' adya geregoka malya nenelesil sum era, har so blebnamna' ara pe ella ulumla. Dara ono' Imik Neyung ara, nimi malya ulumak nim era sidya' daknamla sum ek henga geregoka yana lelewanamna senewoka, ban amba bo una' ara alda ella ulumla. 2:10 Nauba so ara, nimi yana lelewanasila' ara, malya una' adya ok wekdeknewoka unulumak nimi hnon, sembeja' ganya adya ok uboka, Imik Neyung adya migib si nek malya nenelemak nim enyek, yana lelewoka obnesil. Nimi malya una' hwam nim era hyak asa' ganya boboka, dengdang ganya bolomaka' adya imik heikek ulumak nim anaba geklewoka malya ura walamak! 2:11 Senenggom migib enyek, nimi malya ulumak nim era hmeng so bok, hyak migib ulumak lero nang edya Imik Neyung saramek ab dara, anaso nim ek malya ulumak aboka yana kiboka wanggulumak boka' anyek, sikja malya nenewoka walamak. 2:12 Sikda pam unuruwa' ak beiyiwoka oboka youn danasa liklemak soka' ak ulumak. Sikda hyak perob ganya era meka' seininggulumak, anya sikja unulumaka' nidya' ara salya' anyek unulumaba' ara elgomjok, damok ara anaso danamla' ara salya' ulumaka' adya malya geboka derewoka lelemak. Anadya sikja meneng meknewoka unulumak malya una' edya sik nonga geregoka, nim adya pam olomak sok, Imik Neyung adya dara, sikenek obnesil. 2:13 Sikja meneng orowek igina nenebdangoka malya neneldalamaka' amba, sik nong ak igina kweboka nauba gweknemak. Sik nim en nong ak dara, sikja nonga ganya gigiwoka malya una' ok laga yubyek hnoum enyek, unulumak dara, pewab senelemak. Anaso malya una' anyek laga yok nimi ngouluklenabok ura yabalamak nim era, ugunub neika' bukoka dena' delelum dara, sikja malya una' hogung ok beiyi bulumaka' anyek, ugunda eiyiwoka dara duk lobnesom. 2:14 Nimi malya una' ok goluwoka ulumak nim era, hyak nauba malya ulwenelemak. Sumen enyek anyek unumouba' ara elgom uboka, beiyik salya' salalemak gelewa enyek ganya wekenadyok ulumak. Anya nimi yuba dib ganya olokna' orok nimi gliboka anyagan bo balasak. Sikda bona' dub nang danob senewoka, sikja ganya era malya una' adya ok e soboka ulumak. Sikda seleb malya nenewoka, Imik Neyung adya obsuk nim ek ulumak. 2:15 Ban unu nauba malya unulumak nim era, wana' una' pik era bana' loboka, malya pik biniboka seleb weiningdangamek. Ban nim enera Beor bedya me Bileam bedya balamok pik enyek, doboka balamak. Ban Bileam bera alja malya pik anyeb uboka, nauba rupiah dobnamna senewoka malya ulumok. 2:16 Bok alja' abakna pam era yuba sanggulumla pam bok, nimi yub adya saboka wenewok. Dara ban ununumna' lelemoknya bera unu wenewok sum nauba meknelemoknya nera hnon lobok. 2:17 Ban malya uboka, yuba bobnenewoka neklesak nang era, dalalamla mek lu neneso' ak uboka, deba' ak kabo' adya doluwoka bolgoklamla' anaso nang ek ulumak. Ban unu malya ulumaka' amba dara, siksamba Imik Neyung adya hyak guna' nong oulyang ak seleb meewoka beibsuk. 2:18 Sikda umeng-ameng aboka, hyak salya' nong yuba hnon, dengdang ganya bon yub enyek nekdo yabalasak. Sikda nimi ganya oka desina' anyek unuwolulum aboka wenewoka, nimi wenyek malya una' ak aba' ganya dangawanob senen ulumak nim ek wenewoka gliboka bo malya nenelemak. 2:19 Ban malya uboka bobnenewoka neklesak nang edya dara, sikja malya ul eleklesak nim ek an, ugumba yok perob nimi dangoka ulumneluma' amba or seknelum ana' eleganasab alasak bok, sik nong ak dara, sokok an nimi malya nenesina' damok adya sikenek seleb henga goubsuk nang ek ulumakjok lelemak. Anasa nim ara yoka'-yoka' adya henga goublamla dara, wera bera henga goumna' anadya wa wenya ulumla. 2:20 Nunja' Wenelesilnya uboka, nimi blebsina' dubnya Yesus Kristus adya nimi malya nenelesil sokok ab seleb bleboka dobsuk bok, ono' eimik saawoka henga weboka youlesil dara, wera unuwanya bera men dara or pe ulunabok, eimik era hyak gobdo malya dangalamla. 2:21 Ban anaso uboka malya una' hwam ok salabmoubuka ulumak nim era, Imik Neyung adya' jong pik ella dangana' loboka, Imik Neyung ak anaba elgom ulumneseng dara perob bok, Imik Neyung bedya yuba seleb ella ubnekanya, ono' nu lek aboka, malya pik balaseng dara, nauba so malya ulumak. 2:22 Sikja malya unulumaka' ara ban bol nenena' yub enyek gigilamla' ara, "Gam ara alja men dukumna dena' enyek, eimik saawoka del balamla," hnonda, "Pam ara meka hwillilimak pam era, ono' saawoka lesa dal balamak," hyok. Anaso nim Imik Neyung yub ella ulunadyok, eimik sum era yuba lolomak nim era nenyek gigilamla.
3:1 Nadya' hemyabo nim o! Ban momnya dona' beibsina' anara penenya nek beibsin. Ban beibsin momnya dona' pik ab dara, ugunja ganya hyak pe seinilemnelum aboka ugunuk beibsin. 3:2 Nadya ugunuk unuwanasina' ara, Imik Neyung adya geisa ununumna' lelemek nang edya youma' yuba ugunuk nekesika' anyek pe seiniwoka ulululum, hnonda Imik Neyung yuba lena' gak nang edya ugunuk neklesaka' anyek, nimi blebsina' dubnya dangoka wenewanasil yub enyek bekoka ulululum. 3:3 Ugunda men nonogoka bekneluma' nong ara, yoka'-yoka' sidya' daknamla sum era, nimi nauba malya ulumaka' adya ok wekdeknewoka ulumak nim enyek boboka lanawanamak. Sikja ugunuk derewoka walamnesak. 3:4 Anya ban wenyalamnasaka' ara, "Imik Neyung ara yanamna hyok alaluma' ara wera har laga yal? Wera alda hanyagar ulumla? Nunja' neyung yabo youma' nang era seleb somogeka' anaba, yoka'-yoka' ara yok hogunga beilina' loboka, youma' anam uyimoka' weneso' ak or ulumla!" aboka lelemnesak. 3:5 Ban malya una' hwam nim edya dara, Imik Neyung adya men youma' enyek im ab soko ab dara, alja yub edya uyimok aboka laga lena' ara lolomak. Soko ara mek ek ab doboka uyimoka' ara, on mek enedya uyimok. 3:6 Dara al neik mek edya, senenggom mek dangoka iliwoka youma' soko ulumoka' ara dengaboka omok. 3:7 Bok wen an ulumla im eb soko ab dara, Imik Neyung yub adya bo ulumla' ara ono' eimik uka dabnamla' ak ulumla. Wera soko ab im ab dara, Imik Neyung adya or bo ulumlya' ara, nimi malya una' hwam ok ulumak nimi yana lelewanesil sum enyek, uka dabnamla. 3:8 Bok nadya' hemyabo nim o, ban nadya lebnesina' banyek hyak meka' hibiganggunuluma' ara ban: Imik Neyung adya senelamla dara, li hnonok ara gibna' denga salya' anaso uboka, gibna' denga salya' ara, li hnonok anaso ulumla. Alak dara, nidya' ara hnonok ok ulumla. 3:9 Nim adya dara, Imik Neyung adya unu eleganesin hyoka' hnon mandelemla senen ganya bolomak bok, alda anaso ununggulumla. Bok Imik Neyung ara, ugunuk hnon somogeijek senelamla' anasa, or anam siklewoka ulumla. Imik Neyung adya dara, nimi nidya' malya una' loboka, eibkweboka ganya dangawanok senelesil. 3:10 Bok Imik Neyung yanamla' ara, nim edya' hoka' dolomak nimi gelelenga yabalamak sok uboka yanamla. Imik Neyung yanamla sum era, im ara liming yub adya iriri aboka joboka denghenemla. Imik sam yoka'-yoka' ulumla' ara dengaboka uka denemla. Soko ab yoka'-yoka' nidya' dubuk sam ulumla' dengaboka orok danamla. 3:11 Anasa, yoka'-yoka' nidya' anyek anaso ura denghenemla anasa, ugunuk dara, heka' huboka go' ubnemab senelelum do? Ugun nong ara, Imik Neyung amba ok muna' gobdo geisa ganya boboka ulululum. 3:12 Imik Neyung yanamla' anya' senewoka diri ululum salek era, geisa ganya boboka ulululum. Imik Neyung yanamla sum era, im ara nidya' dengaboka uka denemla dara, poba nong adya, imik sam yoka'-yoka' nidya' ulumla' ara, uk adya nonowanamla. 3:13 Bok nuk dara, Imik Neyung adya wenyok im eb wenyok soko eb peroba' ok ulumla soko eleganesin hyoka' anyek dib senewoka diri ulumab. 3:14 Anasa wera, nadya wana' ulusin hemyabo nim o, ugunda Imik Neyung yanamna amok sum enesa diri ululum salek era, ugunja una' era, meka' gegena' pona' loboka, hyak geisa' nonga' anyek diba' pe ulululum. Imik Neyung ab ugunub neika' pe kwebdangoka una' ara, hyak pe bo uldalalulum. 3:15 Imik Neyung ara men yangganggulumla' ara, nuk blebsununa' uboka' senewoka ugunda ganya enyek, pe boblulum. Nunja' hem be hiboka wana' ulumabnya Paulus bedya ugunuk wenyaboka momnya doboka beibsuk. Alda ugunuk momnya doboka beibsuka' ara, Imik Neyung adya alak geremseng eleklelanya nedya ubsuk. 3:16 Paulus bedya nidya' momnya beillilisila' ak ara, alda nenyek wenyaro beillililesil. Alja beillililesila' momnya dona' era, hnon yuba damok era ella dangana' okna so ulumla. Anya elgom ubsin yuba damok era, nimi yoka'-yoka' elgom ulumak nim eb, Imik Neyung ak dib ganya ologoka dona' orok nim edya dara, dangawoka malya nenebmenekoka lolomak. Sikja dongdang aboka meknewoka unulumaknya nenedya, ono' sik nong anaba meneng dongdang ana' enedya malya neneldalamak. 3:17 Nadya wana' ulusin hemyabo nim o, ugunuk dara, wenyhenya nera seleb orowek ella dangalum. Anasa, nimi malya ulumak nim edya ugunuk gliboka bo bisija' ak malya nim ulumaka' ak malya domunuk anasa, anya migibnya bek malya nenebdomunuk anasa, keeboka diri uldalalulum. 3:18 Nunja' Wenelesilnya uboka, nunja' blebsina' dubnya Yesus Kristus adya peroba' eleklesila' hnon, alak ella una' hnon ak dara, nebgiga balalulum. Imik Neyung ak ara alja migib una' emba leboka, wenyek hnon uboka, soba' alak ok giblenok! Amin.
1:1 Ban yub enyek nidya' ara, nim embenga' una' eleklesil yuba men youma' ek moruwoka ulumoka' anyek momnya dobab. Nunja o kemoubukanya, heng eiyimouba. Nunja seleb okoka eiyiwoka ono' nunja soruk edya seleb salamouba. 1:2 Ban embenga' una' en laga dangal yabok sum era, nunda alak okoka eiyimouba. Anasa wera, nunda anasemba leboka ban embenga una' anyek ugunuk lero yabalamab. Wera ban dib embenga' ulmoubna' ara, Neyung beblaboka neika' ulureka' ara, alda nuk hogung ak seleb laga dangamok. 1:3 Wera ugunub nub neika' ganya kwebdangoka ulunoba' aboka, nunja seleb heng eiyimouba o kemouba' anyek, ugunuk lel eleklesab. Nunja ganya kwebdangoka ulumabnya nera, Neyung beb, alja me Yesus Kristus ab, neika' ganya kwebdangoka ulumab. 1:4 Ban nenyek nidya' ugunuk wenyaboka momnya dosaba' ara, anadya nunja ganya hyak heksulula' aboka ubsab. 1:5 Ban yub enyek alja me nek ab kemoubukanya, ugunuk leb elegesuba yub era ban: Imik Neyung ara alda dilina' ok uboka, guna' ara al lomok hnon meka' unggulumla. 1:6 Nunda guna' lomok anam ulumabjok, nunda Imik Neyung ab neika' ganya kwebdangoka ulumab alamab dara, nunda sonda' leldalamabakanya, dib yub ara nunda ununggulumab. 1:7 Bok Imik Neyung anaba alda dilina' lomok ulumla sok, wera numbabya neikik dilina' ak ulumeibya dara, wera nunda ganya kwebdangoka ulumabakanya, alja me Yesus Kristus adya eneng edya nunja yok-yok malya una' nidya' ara mek elegellilisil. 1:8 Nun dam nang leldalamabja, Nak malya una' unggulunel aldalamab dara, wera nu damnya bol neneldalamabakanya, dib yub ara nunja ganya lomok sam unggulusil. 1:9 Nunja malya una' laga lelemeibya dara, Imik Neyung ara bojam uboka, hyak meknenggululanya anasa, alda nunja malya una' meewanasilikanya, nuk malya una' nidya' ak ab geisa neniyiwanesil. 1:10 Nunja lelemabja, Nara malya ubnenggumsa wenyalamab dara, wera Imik Neyung ak sonda'anya nenewoka, alja yub era nunja ganya lomok unggulusil.
2:1 Najabo yab o! Ban momnya en ugunuk momnya doboka beibsina' ara, ugunuk malya ubmunuk aboka ubsin. Bok, hnon malya umeibya dara, wera nunsamba arawoka sasinya ben hnon ulumla' ara, nera Yesus Kristus pelelanya bek lebna. Alja' Neyung bek malya una' doboka bobogeisilom aboka mololesil. 2:2 Wera Yesus Kristus al nong adya pika moruwoka nunja malya una' amba somogousuk. Nera or nunja malya una' ok gom, al nidya' soko nimi malya una' amba somogok. 2:3 Nunda Imik Neyung yub ak pe keboka unulumab dara, wera nunda Imik Neyung ak dib ella ulumaka' damok ara an unulumab an. 2:4 Ben hnon leleladya, "Nara Imik Neyung ak ella ulumna," alaladyok, alja alak oruklamla anyek pe ununggulumla dara, bera alda sonda'anya ulumlakanya, dib yub ara alja ganya lomok unggulumla. 2:5 Bok nimi hnon Imik Neyung yub ak pe keboka unululanya bera, alda Imik Neyung wana' una' ak seleb kaboknya be ulumla. Wera nunda Imik Neyung ab neika' kwebdangoka ulumaba' damok ara an. 2:6 Heknedya nara Imik Neyung ab neika' kwebdangoka ulunam wenyalalanya bera, alda Kristus adya nidya' unulumok diliga' doboka lunuwoka unululul. 2:7 Nadya hyak wana' ulusin hemyabo nim o! Nadya wen ban momnya doboka beibsin anara wenyek yuba gom. Alda ugun anam Kristus ak dib senewoka dob einilum sum ugunuk seleb lesiknya nenyek, ugun anam sum Imik Neyung yuba nonga kelum yub ek beibsin. 2:8 Ban men wenyhen bok anaba, ono' wenyek yuba hnon momnya doboka beibsin. Nera dib ulumla' ara Kristus alja nong lomok hnon, ugunuk ulusila' hnon, eillilemaka' anasa lebna. Anasa wera, guna' ak dara, dengabgiga balamlakanya, dilina' diba' ak dara, wera seleb yebel einilamla. 2:9 Nimi ben hnon, "Nara dilina' ak ulumna," alaladyok, al kab ek lek senelamla dara, bera weneba or anam guna' ak ulmorulamla. 2:10 Alja hem yab ek wana' uboka ululanya bera, alda dilina' ak pe ulumla. Wera anadya alak yoka' unuwalya dara, yok nimi malya una' lomok malyinggijek senena' ara, oluk dikna' hyak unggulumla. 2:11 Bok alja hem yab ek lek senelelanya bera, alda guna' ak or anam ulumla. Alda guna' lomok sam yabalamlakanya, guna' adya alja henga leblamla' adya, alda mok enyek an binimna' ara elgom ulumla. 2:12 Najaba yab o, ban ugunuk momnya dobsina' ara, Kristus si pik uboka ugunja malya una' seleb meewousuka' anasa ubsin. 2:13 Neyung yab o, ban ugunuk momnya dobsina' ara, men youma' youbuka ulumoknya bek seleb ella ululuma' anasa, ubsin. Goubenya nang o, ugunuk ara yu hwam bisa' enyek seleb oblamakaluma' anasa, momnya dobsin. 2:14 Najabo yab o, momnya doboka beibsinya nera, ugunda mekmab era ugunja neyung Imik Neyung bek seleb ella dangaluma' anasa, ubsin. Neyung yab o, ugunuk momnya doboka beibsinya nera, ugunda men youma' ulumok yub ek seleb ella dangaluma' anasa, ubsin. Goubenya nang o, ugunuk momnya doboka beibsina' ara, ugunda migib ululuma' anasa, ubsin. Imik Neyung yub ara ugunja ganya ek seleb ulusil. Dara ono', yu bisa' ara seleb ugunja yugom neneluma' anasa, ubsin. 2:15 Ugunda soko anyek wana' una' ara mem. Anyek okoka unu wana' una' anaba yoka'-yoka' nidya' soko dubuk sam ulumla' deng anyek, wana' una' ara mem. Ugunda sokok anyek wana' ulumun dara, Neyung bek ara wana' una' ara unggulumunja. 2:16 Nidya' yoka'-yoka' sokok an ulumla' ara, nimi ganya malya ulumak ganya edya oka delesila' hnon, nera heng adya eibnakanya dobsinya senelemaka' hnon, ono' perobja aboka nonggo alamaka' hnon, ban nidya' ulumla deng dara, Neyung bek ab gom, alda sokok anyeba' ak ulumla. 2:17 Soko nim eb, yoka'-yoka' soko dubuk ulumla nidya' ara, nim adya perob senelemaka' anyek, seleb dengabgiga balamla. Bok, nim Imik Neyung yuba doboka dib senelemak nim enyek, hnonok or soba' ulmoublemnemak. 2:18 Najabo yab o! Yoka'-yoka' nidya' sidya' daknamla sum era, seleb oka dal! Hnonda eimik era Kristus ak isa' nenewanelanya hnon lanawanamla' keluma' ara, wera seleb lanawoka, nimi nauba Kristus ak isa' nenelemak. Wera anadya nunda sidya' dakna salek era oka dal, senewoka ella ulumab. 2:19 Kristus adya alja isa' nang ara, nun nang yila' dib unggulumekjok, nuk seleb lo bilisik. Nimi danara nun nimi yila' uluseng bok dara, wera nub neika' ulumnesibya. Bok nuk seleb lo bilisiknya nera, wera aldib nun nang yila' unggulumaka' anyek, laga geknewolul. 2:20 Bok ugunuk dara, geisa ululanya bek ab Geisinya ara ugunuk seleb lobonggosuka' anasa, wera ban adya dib nong yub ara, ugunda seleb ella ululum. 2:21 Anasa wera, nadya ban ugunuk momnya doboka beibsina' ara, ugunuk dib nong yub elgom ululuma' amba gom. Alda ugunda seleb ella uboka, ono' dib yuba lomok ab ara, sonda' damoka meka' hnon lananggulumla' ella ululuma' anasa, anara weboka beibsin. 2:22 Sonda' lelelanya bek dara, Yesus ara Imik Neyung adya soko nimi blebsina' dubnya anggulumla, alalanya bera sonda' lelelanya bera an. Ban wenyalalanya bera, Kristus bedya isa' anya ulumlakanya, Neyung beb alja me neb dak, bol nenelamla. 2:23 Alja me nek, Imik Neyung me aboka laga lena' orok nim era, Neyung bek anaba dib donggulumak. Alda alja me nek, Imik Neyung bedya me aboka lelemak nim era, wera nera Neyung bek dib dolomak. 2:24 Anasa wera, ugunda anam yuba dib seneb einilum sum kelum yub era, ganya lomok beiyiwoka pe keeboka diri ulululum. Yuba nong enyek pe keeboka diri bo ulumnelum dara, wera ugunda soba' Imik Neyung ab, alja me neb neika' kwebdangoka ulumnelum. 2:25 Anya wera, al ban damok enyek, Imik Neyung adya' anaba orowek nuk seleb eleganesin husuka' ara, dib embenga' ulmoubna' damok ak eleganesin, hyok. 2:26 Nadya ban ugunuk momnya doboka beibsina' ara, ugunuk sonda' amba bobgeregoka lebsinoba' aboka ulumak nim ek, anara beibsin. 2:27 Bok ugunsamba dara, al adya Geisinya yek gouluna' ara ugunuk anam ulusil bok dara, nim adya ok hnon ugunuk neknenggunusiseng. Anasa wera, ban yek goulusina' adya yoka'-yoka' nidya' wen neklesil bok dara, anya wera alja neklesilnya nera, anara sonda' ak unggulumla' anasa, anera aldiba' ak ulumla. Anasa wera, yek gouluna' adya yoka'-yoka' nidya' neklesila' anyek, ugunda dib senewoka, al lomok ululum. 2:28 Najabo yab o! Anasa wera, ugunda Kristus ab neika' soba' kwebdangoka ulululum. Anadya wera, asa' ganya boboka al yalya' ak binoba' aboka, alya anasa lomok doknoweibyek aboka pe keeboka ulululum. 2:29 Alda pelemla' ok ulumla' ara, ugunda ella ululum. Anasa, pelemak nimi nidya' ara, anera alak ab beiyimek nim ulumaka' ara, ugumbabya nen hnon ella ululum.
3:1 Imik Neyung adya nuk hyak nauba yadyek ulusila' anyek, ugunda kendululum. Anadya wera, nuk nadya mab aboka si silisil. Dara aldib, nunda Imik Neyung alja mab ulumaba' aja. Anasa wera, soko nim era Imik Neyung ak meka' elgom ulumaka' adya, nuk anaba elgom ulusak. 3:2 Nadya wana' ulusin hemyabo nim o, nunda wenera Imik Neyung mab ulumab bok, eimik ek dara, heka' huboka ulumnemaba' ara, okoka laga danganggulumla. Bok Kristus anyek eimik yanamla dara, alja nong yoka' nong ak eibnamaba' anasa, nunda also danamab anyek hnonok, ella ulumab. 3:3 Nimi nidya' ban nenyek nak unuwanenel senewoka ganya welemak nim era, al nong ara pe geisa ulunun aboka diri uldalamak. Wera Kristus anaba geisa ulumla sok, malya una' ak ab loboka geisa' ak ulunun senelemak. 3:4 Malya ulumak nim era, malya unulumak dara, Imik Neyung adya unuwanalum an yub ek blekoka unulumak. Wera malya una' damok ara, Imik Neyung adya unuwanalum an yub ek bleklemaka' damok ara al an. 3:5 Kristus sokok sam yeilimok ara, nim adya malya una' doboka bobogosununa' aboka yeilimoka' ara, ugunda ella ululum. Dara, malya una' ara Kristus lomok ara hyak unggulumla' ara, hnon ella ululum. 3:6 Ben hnon ara, Kristus ablaboka neika' kwebdangoka uluraknya bera, sob-soba' sounuwoka malya ununggulumla. Sob-soba' sounuwoka malya unululanya bera, Kristus ak anam eilina' oroka' uboka, alda hyak elgom ulumla. 3:7 Najabo yab o, yok nim edya ugunuk malya ub elegosunuk senewoka, ugun moumen sene pika yaraldanggom mem. Kristus adya pe unulamla sok, ono' perob ok unulumak nim era, peroba' nenelamla nim era an. 3:8 Iblis ara youma' ek moruwoka malya' ok ulmorulamla' anasa, bok weneba soba' malya uldibilloklomak nim era, Iblis alja mab ulumak. Imik Neyung me yeilimoka' ara, ban Iblis alja wa nenyek orok nenewonuna' aboka yeilimok. 3:9 Seleb Imik Neyung mabo dangamek nim era, Imik Neyung alja unulamla diliga' yina' anaso seleb sikenek ulusila' anasa, soba' malya unubmoruwamenggom. Dara ono', sikda Imik Neyung adya mengesuk nim anasa, wera sob-soba' malya unubmoruwamenggom. 3:10 Anara Imik Neyung mab ulumak, nenera Iblis mab ulumaka' aboka, bekna' damoka ella dangalamaba' ara ban adya. Heknedya Imik Neyung seinilamla' ak ununggulumla gom, al kab ek wana' unggulumla gom dara, wera bera alda Imik Neyung alja me unggulumla' ara an. 3:11 Nunda wana' uldalamnemab an yub era, men youbuka ugunuk seleb leb elegesik. 3:12 Kain bera bisa' wa wenya dangoka, alja weis oboksonya nera, nunda ununa' ara mem. Hekasa Kain bera alja weis ek omok do? Nera alja unulumoknya nek dara, malya bok, alja weis edya unulumoknya nera perob anasa, obok. 3:13 Nadya hemyab o, anasa wera, sokok an nim edya ugunuk malya nenewoka derewoka walasak dara, ugunda salya lelesak aboka lok ganya bonggom. 3:14 Alda nunja ella ulumabnya nera, nunda somokna' damok ok ab ara goubuka, embenga' una' damok ok sam yeilimoubnya hnonok, ella ulumab. Nunda ban nen ella ulumaba' ara, nun kabo nim ek wana' ulumaba' adya, anara ella ulumab. Wana' unggulusilnya bera, wera weneba alda somokna' lomok or anam ulumla. 3:15 Nimi ben hnon alja hem bek lek senelelanya bera, alda nim osinya ulumla ara an. Anasa nim osin nang hnon ulumak dara, sikda embeng una' oroka' ak ulumaka' hnonok ella ululum. 3:16 Nunda ban pik enyek anyeb, wera nimi yok nim ek wana' una' damok era ella dangalamaba' ara, Yesus Kristus alja nong era, nunsamba leboka, nuk elegosuka' adya, ella dangalamab. Anasa wera, ban unuwosuk bar aboka, nunja nong enyek, nadya hemyab emba aboka elek lobnesibya. 3:17 Nimi ben hnon alda sokok an yoka'-yoka' ara pe nauba ululabok, alkabo ben hnon bona' garan ulumla' eilliladyok, arana' loboka eil lolomla dara, ban unululanya bera, alda Imik Neyung ak wana' ululanya bera an heneseng de? 3:18 Najabo yab o! Nunda sibama' adyok gom, yuba dem adyok wana' uldana' ara mem. Bok nunda ganya goluwoka dib arawoka, dib aralemab ana' ara, nunja dib unulumnamaba' adya, wana' uldalamnamab. 3:19 Wera ban nenedya nuk dara, Imik Neyung alja mab ulumaka' ara ella uboka, ono' ban nenedya danyek Imik Neyung saramek ara, nunda pe ganya daboka ulumab. 3:20 Nunda meneng ganya edya malya nenelesil bok, Imik Neyung adya alja el dangana' ara, senenggoma' ulumlakanya, nunjinya nera meka' me anasa, Imik Neyung anyek alda hyak yoka'-yoka' nidya' ara ella ulumla' ara ella ulumab. 3:21 Nadya hyak wana' ulusin hemyabo nim o, anasa wera, nunja ganya edya nuk malya nenesina' orok dara, wera nunda Imik Neyung ak pe asa' ganya boboka alak binimab. 3:22 Dara, hnonda alja yub ek pe keboka unuwoka, ono' alja pelemak senewoka ganya sangelesilnya nenyek unulumnamabakanya, nunda yoka'-yoka' alak moloweibya' ara dobnemaba' ok ulumla. 3:23 Imik Neyung adya unulululum aboka oruklesilnya nera an: Nunda alja me si Yesus Kristus ak dib senewoka, ono' Kristus adya nuk lebsuk sok, nun moumen wana' uldalamnemab aboka oruklesil. 3:24 Nimi nidya' Imik Neyung yub ak dib senewoka ganya ologoka dolomak nim era, Imik Neyung al lomok ulumaakanya, albabya sik lomok ulusil. Hnonda alja Geisinya era seleb nuk elegesuka' adya, wera Imik Neyung ara nu lomok ulusil senewoka ella ulumab.
4:1 Nadya wana' ulusin hemyabo nim o! Sonda' anasa nunda ununumna' len nang aboka, bobnenewoka lemek nang era, mok soko nidya' ob lelewal bok anasa, yok-yok senena' ak ara salya' dib senena' ara loboka, alda men ganya seinina' enera Imik Neyung adyinya gom, nera yok gom aboka men sunuwomunjok, wera aldib senewanalum. 4:2 Wera ugunja nera, Imik Neyung ak ab ganya seinina' ara ban, anya yok seinina' era ban, aboka okoka bekna' ella danaluma' ara, ban adya ella danalum: Yesus Kristus ara sokok an nimi dangoka yeilimok aboka, laga lelelanya benyek, wera Imik Neyung ak ab seinilelanya bera an. 4:3 Bok Yesus ara anaso aboka laga lena' orok dara, ban ganya seinina' era Imik Neyung ak ab lananggulumla. Ban ganya seinina' era Kristus ak, isa' nenelemak seinina' ek ulusil. Hem yab o, ugunja yok seinina' sokok yanamla an yuba keluma' ara, wera sokok an seleb yeiniboka ulumla. 4:4 Bok najabo yab, ugunuk dara, Imik Neyung alja mab ululum. Sokok an ululanya nera mek so bok, ugunuk ulusil Geisinya bera, senenggoma' migiba' ulusila' anasa, wera ugunda sonda' anasa ununumna' lelemab alamak nang ek, ugunja seleb oblamagelum. 4:5 Sonda' anasa nunda ununumna' lelemab alamak nang era, sik nong ara sokok anyeb ulumaka' anasa, sikda sokok anyebnya nek geklewoka lero yabalamak. Dara, sokok nim era sikja yuba kelemak. 4:6 Bok nuk dara, Imik Neyung ak ab nim ulumab. Dara, Imik Neyung ak ella ulumak nim era, nunja yuba kelemak. Bok, Imik Neyung ak ab una' orok nim edya dara, nunja lelemab yub ek kenggulusak. Wera nunda ban adya dib ulumla ganya seinina' ab, sonda' anasa seinina' eb, ella dangalamab. 4:7 Nadya wana' ulusin hemyabo nim o! Wana' una' ara Imik Neyung ak ab lanalamla' anasa, nunda wana' uldalamnemab e. Wana' ganya ululanya bera, alda Imik Neyung adya beiyimoknya ulumlakanya, alda Imik Neyung ak ella ululanya bera an ulumla. 4:8 Imik Neyung ara wana' ululanya anasa, nimi ben hnon alda wana' unggulumla dara, wera Imik Neyung bek ara elgom ulumla. 4:9 Imik Neyung nuk yadyek ulusuka' damok ara, Imik Neyung alja yando me hnonok bok, nuk embenga' una' al adya dobnoka' aboka sokok an bokol yeilisuka' adya, alda wana' ulusuka' ara amasuk. 4:10 Wana' una' ara ban: Nunja Imik Neyung ak men wana' ulumouba goma', bok alda Imik Neyung adya nuk wana' ulusuukanya, nunja malya una' amba doboka bobogosulula' aboka, alja yando me hnonok bok nunsamba bokol yeilisuk. 4:11 Nadya wana' ulusin hemyabo nim o, Imik Neyung adya nuk anaso unu wana' ulusil dara, wera numbabya nun moumen wana' uldalanob. 4:12 Nimi hnonok sibin anaba, Imik Neyung ak ara heng eilina' orok bok, nun moumen wana' uldalamnemab dara, Imik Neyung ara nub neika' kwebdangoka ulumnemabakanya, alja wana' una' ara, nun lomok kalasil. 4:13 Imik Neyung adya alja Geisinya benyek, seleb nuk elegesuk dara, wera nunda Imik Neyung lomok ulumabakanya, ono' Imik Neyung ara nu lomok ulusila' ara, ella ulumab. 4:14 Imik Neyung bedya me nera, Imik Neyung adya soko nimi blebsina' dubnya dolula' aboka bokol yeilimoka' anyek, nunja seleb okoka eiyimoubakanya, nim ek leb elekdo yabalamab. 4:15 Heknedya Yesus ara Imik Neyung bedya me aboka laga lelemla dara, Imik Neyung ara al lomok ulumlakanya, bera ono' Imik Neyung lomok ulumla. 4:16 Dara nuk dara, Imik Neyung adya nuk wana' ulusila' ara, nunja ella dangoka dib senelemab. Imik Neyung alda wana' una' damoknya ulumla. Nimi wana' una' adya ok deknewoka ululanya bera, alda Imik Neyung ab neika' hiboka uluraakanya, ono' bera Imik Neyung ab neika' kwebdangoka ulurak. 4:17 Sokok anyeb, numba Kristus ulumla sok, unu ulumeibya anasa, Yesus adya yana lelewanasil sum era, wera asa' ganya bobnemab aboka, wana' una' ara nu lomok kalasil. 4:18 Wana' una' ak sam ara, lok ganya hnon unggulumla. Wana' una' kana' adya lok ganya dengallilimla. Lok ganya ara, heng goubna' adya lanalamla' anasa, lok ganya bololanya bera wana' ganya anam kanggulumla. 4:19 Imik Neyung adya youma' enyek nuk men wana' ulusuka' anasa, nunda wenera wana' ulumab. 4:20 Nimi ben hnon leleladya, "Nara Imik Neyung bek wana' ulumna," alaladyok, alkabo nim ek wana' usina' orok dara, alda sonda' lelelanya ulumla. Anasa wera, nimi ben hnon alkabo heng eillililanya benyek wana' una' orok dara, wera Imik Neyung heng eilinggululanya bek ara, alda heka' huboka wana' ubnamso do? 4:21 Ban nenesa leboka, Kristus adya unulululum aboka nuk elegesuk yub era ban: "Heknedya Imik Neyung ak wana' ulumla dara, wera alkab ek anaba wana' ululul," hyok.
5:1 Yesus ara Imik Neyung adya sokok blebsina' dubnya Kristus aboka lesuk aboka dib senelelanya bera, alda aldib Imik Neyung alja me ulumla. Nimi hnon ben hnon ak wana' ulumla dara, wera ala' me ak anaba wana' ulumla. 5:2 Wera ban pik enedya danyek, nunda Imik Neyung mab ak wana' ulumaba' ara ella dangalamab. Nunda Imik Neyung ak wana' ulumabakanya, alja oruklesil yub ek dib senewoka ganya oloklemab dara, nunda Imik Neyung mab ak wana' ulumab. 5:3 Anasa wera, Imik Neyung ak wana' ulumab dara, nunda alja oruklesil yub ek pe keboka unulumab ok. Dara, ban oruklesil yub era nunsamba igin nong unggulusil. 5:4 Anasa wera, Imik Neyung mab ulumak nim era, sokok an malya una' hwam ulumla' ara, migib adya ol lamaklamak. Dara ono' nenyek dara, nunja dib senena' adya ara, sokok an yoka'-yoka' ol lamaklamab. 5:5 Heknedya sokok an yoka'-yoka' ob lamaganamso do? Al Yesus ara Imik Neyung bedya me yoka' ulumla aboka dib senelelanya bedyok ol lamaklamla. 5:6 Yesus Kristus nong ak hnonok alak ok mek ab, eneng eb dadya uboka, sokok yeilimok. Yesus ara mek dem adyok yanggumok bok, alda mek ab eneng eb neika' hiboka yeilimok. Imik Neyung Geisinya ara sonda' lena' oroknya anasa, nera aldib unumok aboka Geisinya enedya nuk laga neklesil. 5:7-8 Ban nong ak dara, damok winilya danadya nuk laga neklesak ara, Imik Neyung Geisinya hnon, mek adya hnon, eneng adya hnon, sik winilya dadya, neik yub enyek ok laga neklesak. 5:9 Nunda nim adya yoka' ak laga lelemak dara, dib senelemab bok, Imik Neyung adya laga lelelanya nera hyak migiba' senenggoma' ak ulumla. Dara ban nenyek, Imik Neyung adya alja me nemba nekoka elegesuka' laga lena' era an. 5:10 Anasa ban nenesa leboka, Imik Neyung alja me nek dib senelemak nim era, ban laga lelemla yub enera, seleb ganya lomok ulusil. Bok Imik Neyung ak dib senena' orok nim era, Imik Neyung ara sonda' lelelanya nenelemak. Ban unulumaknya nera, Imik Neyung adya alja me nemba lelemla' anyek dib senenggulumaka' adya sonda' lelelanya nenelemak. 5:11 Dara laga len yub era ban: Imik Neyung ara nuk seleb dib embenga' ulmoubna' elegesuk. Dara, ban dib embenga' ulmoubna' damok ara alja me lomok ulumla. 5:12 Heknedya alja me nek dib dolomla dara, alda embenga' una' yaka' ak ulumla, bok Imik Neyung me dona' oroknya bera, alda embeng una' oroka' ak ulumla. 5:13 Ugun Imik Neyung bedya me si nek dib senelelum nim ek, ban momnya doboka beibsin. Anadya ugunda dib embenga' ulmoubna' ara seleb nunja' ak ulusil senewoka ella doluluma' aboka ubna. 5:14 Dara nunja yoka'-yoka' mololemaba' ara alja seinilamla sok mololomab dara, wera nunja molona' kelesil senewoka dib ella ulumab. An anasa, nunda Imik Neyung alja' saramek uboka asa' ganya boboka mololomab. 5:15 Dara, nunja yoka'-yoka' alak mololemab dara, nunja molona' kelesil senewoka seleb ella ulumab dara, ono' nunja yoka'-yoka' mololemaba' ara eleganesila' anya' senewoka ella ulumab. 5:16 Wera ugun kabo yuba dololanya bedya, alja ban adya somoganggunumso malya una' enyek ubnamla' eibnesom dara, ugunja Imik Neyung ak molowanasom dara, embenga' una' ara onsok Imik Neyung adya benyek eleganamla. Ban nenera yuba dona' nim edya malya ulumak bok, somoganggunumaknya nenesa lebna. Bok hnon malya una' ak dara, somokna' lanalamla. Ban nenyek dara, nara ugunuk Imik Neyung ak molowolululuma' aboka lebnenggubna. 5:17 Nidya' yoka'-yoka' meknewoka unulumaknya nera, anara malya una' ok ulumla, bok hnon malya una' ara dib somoganggunumak malya una' hnon ulumla. 5:18 Nimi nidya' Imik Neyung mabo seleb dangamek nim era, sob-soba' malya unulmorunggulumaka' ara nunda ella ulumab. Nera Imik Neyung alja me adya sikenek goluwoka bo ulusil dara, bisa' ara sikenek yoka'-yoka' hnon ununggulusil. 5:19 Soko me nidya' ara bisa' adyok salawoka bo ulumla bok, nuk dara, Imik Neyung alja mab ulumaba' anyek hnonok ella ulumab. 5:20 Nunda jong ulumla Imik Neyung ek ella ulunoka' aboka, Imik Neyung me ara seleb yeiniboka geremsenga seleb elegesuka' ara ella ulumab. Wera nunda jong ulumla Imik Neyung eblaboka neika' kwebdangoka ulumab. Dib nong ara, alja me Yesus Kristus ablaboka neika' kwebdangoka ulumab. Wera al benyek, jong ulumla Imik Neyung era an. Dara ono', dib embenga' ulmoubna' ara an. 5:21 Najabo yab o, ugunda yoka'-yoka' sunuwoka giblemaka' ak aba' ara mok nenewoka ulululum e.
1:1 Genong Imik Neyung adya an weboka donjok gel geb, ana' mab abdak momnya doboka beibsin. Ban momnya dona' enera, yuba don nimi bo usinnya bedya, dib yuba lomok uboka ugunuk wana' uboka beibsin. Nera or nadyok wana' unggulusin. Alda nimi nidya' dib yuba ella ulumak nim edya ugunuk yadyek senewoka wana' ulusak. 1:2 Dib yub ara, nunja ganya lomok ulusilekanya, alda hyak sob-soba' nu lomok ulmoublemnesila' anasa, wana' ulusab. 1:3 Anya wera, Imik Neyung adya hnon, ala' me Yesus Kristus adya hnon, nuk perob eleksina' ab, angoo yadyek senewoka arasina' ab, perob ok una' ab, or eleklesururuk e. Ban nidya' ara, nunda dib yuba lomok uboka ganya wana' ubdangoka dobnemab. 1:4 Imik Neyung adya nuk alja lelesil sok, genong anja mabo darasam ara, dib yuba sunuwoka ulumaka' anyek, nara eiyiwoka, nara hyak eiya ulunel. 1:5 Anasa wera, genong o, nara nun moumen wana' uldalanoba' aboka hyak pe molowagen. Wera ban wenyhenya nera, nadyok wen seiniwoka lebnenggubna. Alda men youma' yuba dib senemouba wenyek, nuk seleb elegesuk yub ek, lebna. 1:6 Wana' una' diba' ara, Imik Neyung yuba lelesila' sunuwoka ulumaba' ara, alan. Dara, alja orugosuka' ara, ugunda anam yuba dib senelum sum enyek moruwoka kelum sok, soba' wana' ubdangoka ulululum aboka orugosuk. 1:7 Nim ek sonda' bobnenewoka malya nenelesak nang era, mok soko nidya' oboka lelewal. Ban lebna nang danara, sikja dara, Yesus Kristus ara nimi nonga dangoka sokok yeilimok aboka laga lenggulumak nang ulumak. Anasa ban nang danara, sonda' hwam nang uboka, Kristus adya alja isa' nang ulumaka' ara an. 1:8 Wera nenesa, nunja ugunsamba memesubnya nenyek weininggomunuk aboka, pe diri bo ulululum. Imik Neyung ak ab perob dekna' ugunja weleluma' sunuwoka dobgogowanob senewoka yeiriwoka keebmoublulum e. 1:9 Kristus adya neklesuk yub ek pe salalmoubna' loboka, Kristus adya yub ak pik aklel hwilimak nim era, sikda Imik Neyung oroka' ak ulumak. Alda Kristus adya neklesuk yuba lomok pe ululanya bera, neyung Imik Neyung anaba, alja me neneba yaka' ak ulumla. 1:10 Anasa wera, nimi hnon Kristus adya neknenggusuk yub enyek, ugunuk lero yanggeisija dara, sikenek giboka ugunja ek doro beilina' ara mem. 1:11 Bok wera, ben hnonja ban nang enyek an giboka unuwalya dara, wera benera ban nang enyeb neika' malya unulumak. 1:12 Nadya dara, yok-yok yuba nauba wenyhenesisinya bok, momnya dona' pik uboka danagom senewana' anasa lobna. Alda nunja ganya eiya dabsulula' aboka, nara ugunuk se' kemel yeisinya sum enyek, ugunub neika' bukoka sabnemab senewan. 1:13 Genong o, anja Imik Neyung adya gaboka domok weis alja mab edya' anaba, anak perob aboka gibenjak.
1:1 Hem Gayus wana' nong ulunggenya o! Nara nimi yuba don nimi bo usinnya bedya, dib yuba lomok uboka wana' ulunggenya bek momnya doboka beibgen. 1:2 Nara anak eika' anyek ulumenekanya, nidya' yoka'-yoka' ara perob ok ulunggulula' aboka mololenggen. Anya wera, anda ganya ak dara pe ululam sok, yoka' nidya' pelenggulula' aboka mololenggen. 1:3 Nimi yuba dolomak nimi hnon ara, anyagan yeiniboka, anda dib nong yub ek bojam uboka, al dib yub ek sunuwoka soba' ulmorulamla an yuba nak neknyeka' anasa, nara hyak perob senewoka eiya dabnel. 1:4 Yoknya nedya nak ganya sangab elegoka ubnenggununeso, alda wera nadya mab era, dib yuba lelemla' sunuwoka ulumak an yub edya danyek, hnonok hyak nauba eiya dablenel. 1:5 Nadya hem o! Nunja hem yabo yuba dolomak nim emba welelam dara, hnonda an ella ululam nim emba hnon, hnonda amba elgom ululam bok, yuba dolomak nim emba hyak yeiriwoka bojam weboka aralesilim. 1:6 Anja wana' uboka wa bojam welelama' ara, nun an yuba dona' nim ek an seleb unulamla aboka laga nekesik. Anda sik balamak pik pe arawoka bo balasilima' anadya, Imik Neyung ganya sangab elegolula' aboka lebna. 1:7 Anasa wera, Imik Neyung si amba leboka, wa wero yibinemab aboka goubomeka' ara, wa welemna' amba dara, Imik Neyung yuba elgom ulumak nim ek ab dekna' donggulumak. 1:8 Anasa wera, nun yuba dona' nim ulumaba' ara, nunja hemyabo ban anaso ulumak nim ek arawoka ulumnemab. Anadya wera, ono' sikeneb neika' dib yub amba angawoka welemnamab. 1:9 Nara yuba dolomak nim ek mek burum momnya dona' hnon weboka seleb dibsa bok, yuba don nimi dubnya ulunun senelelanya Diotrefes bedya danyek, nak alja yub era kebnyek senewoka ulumla. 1:10 Bok eimik na anyagan yanya sum era, nidya' alja yok-yok malya una' uboka, sonda' leboka, nauba gunulamla' deng ara, nunsamba hnon geklewoka sonda' lelelanya nera, laga poboka lebnamna. Bok ban nidya' unulamla' ara, nenyek ok unuro dakdowonun senenggulumla. Ono' nunja hemyabo yuba dona' nimi yanggan dara, alja ek doboka beilisina' ara alda lek senelamla. Dara ono' yok nim edya nunja ek an mabnemab aboka ul yabana' anaba, alja mem aboka yuba sekoka, ono' sik arawanob senelemak nim ek yuba dolomak ak ab yaklesil. 1:11 Nadya wana' ulunggena' hem o! Anda meilinya nek hyak dilina' ara mem nong. Alda anda perobnya nenyek dililelom. Perob una' unulumak nim era, sikda Imik Neyung adyinya ulumak. Alda malya una' unuro ulumak nim era, sikda Imik Neyung ak elgom ulumak nim era an. 1:12 Nimi nidya' ara Demetrius bek pelemla bar aboka gigilemak. Ono' alja unulamla' ara dib yuba lelesil sok neik digum unulamla' anasa, gigilamla. Dara ono' nunja anaba perob aboka gigiwab. Dara, nunja lebsabnya nera dib nong ara ugumba ella ululum. 1:13 Nadya dara, yoka'-yoka' nauba anak lebgunun senewanjok, momnya dona' pik ab danagom senewoka lobna. 1:14 Alda anab neika' eibdeinimekanya, ok ab neika' bukoka pe sabnoma' aboka, dubla ana' loboka yananabok anasa, lobna. 1:15 Wera Imik Neyung adya perob ok una' ara, anak ulunggulul. Ugunja' hemyabo na ulumna' ak an nim edya ugunuk perob aboka gibsak. Nadya perob aboka gibsinnya nera, nunja hemyabo yok nimi nidya' ak nei bera alja si nedya unu gibesil aboka nekdanalum.
1:1 Ban momnya dona' era, nara Yudas, Yakobus alja weis edya, Yesus Kristus adya wa wenya uboka, nunja' neyung Imik Neyung adya wana' uboka, Yesus Kristus amba bo uboka youbsuk nim ek beibsin. 1:2 Angoo yadyek senewoka arasina' ab, namen ganya boldana' ab, wana una' ab dara, ugunuk nauba danggiga balasulul senelamna. 1:3 Nadya hemyabo wana' ulusin nim o! Nunja neika' dib senewoka domouba blebsina' damok enesa, momnya doboka beibsununa' aboka ulumnakanya, ono' muna' Imik Neyung mab ek dib senena' damok gobdo elegesuknya bemba, ugunda duboka salabmoubnelum aboka, ugunuk duka' lolom-lolom along sok wenyaboka lebnesin senewoka momnya doboka beibsin. 1:4 Imik Neyung orowek obnamna senewoka memeb gegewok nang era, nu gangganek sam seleb gelelenga wekel yalamaka' anasa lebna. Sikja malya ubnob senewoka, Imik Neyung adya gouluwom aboka wana' un yub enyek, nimi ganya oka desina' amba samab menegoka, sikda malya nim ek ulumak. Anya sikda nunja hnonok dubnya Yesus Kristus anyek, Wenelesilnya goma' aboka boro dorogol dilimak. 1:5 Ban nidya' ara seleb ella ululum bok, hnonok saawoka bekneluma' aboka lebnesina' ara, Imik Neyung adya Israeli nimi Mesir sokok ab bleboka bo balasuk bok, Imik Neyung ak dib senena' orok nim era, eimik saawoka obsuk. 1:6 Hnonda, Imik Neyung ara lero nang sikja webneseng wa wikneba' era ella umekjok, ono' sik ulumeka' aba' ara, hnon lo yibilemek dara, busa' heng adya geregoka, hyak guna' lomok sam diba' beibsuka' ara, eimik senenggom sum era yana lelewoka obnesil. 1:7 Youma' Sodom heik ab, Gomora heik ab, ok berem heik eb hnon ara, neikso malya ulumek. Sikda gela salawoka, anaso' malya una' gong mandebna' unuru yabalemeka' amba leboka, Imik Neyung adya singilmorulamla uk edya loba' nenewoka obsuka' ara, anera bekna' diba' ulumla. 1:8 Dara, Sodom Gomora heik nimi malya ulumek sok, ban wekel yalamak nimi salye' hwam seinilemak nim enyek, neikso malya ulumak. Sikda sik nong ak malya neneldalamaakanya, blekna' hwam ulumak, imik heik sam geisa peroba' ulumla' ak derelemak. 1:9 Lero dubnya Mikhael bera, bisa' dubnya Iblis beb Musa bedya be' enesa mala webdek sum era, "Iblis ak ara, yub adya anda malya ululam aboka gasa lebnenggubuk bok, alda Imik Neyung adya eb ngalagoka ooma lebgulul," ana' ok lebok. 1:10 Bok ban malya ulumak nim era, yoka'-yoka' elgom ulumaknya nek derelemak. Dara sikja ella ulumaknya nera, ganya oroka' adya seinilamla sok, gobdo nauba malya ulumak. Wera anadya sik nonga dengabdanamaka' ara an. 1:11 Sikda hyak omom nonga' ak ulumak! Wera an unulumaka' ara, Kain bedya unumok malya una' enyek, neik diliga' unulumak. Ono', rupiah dobnob senewan dara, Bileam bedya umok diliga' doboka, dibum aboka malya ulumak. Hnonda, Korah bedya blekoka umok diliga' doboka, blekoka orok neneldalamak. 1:12 Wera an unu malya ulumak nim eb neika' delelum dara, sik nong ara, ugun gangganek sik mekla' ulumak. Wera delelum dara, alya oroka' anyek, yok nimi wana' una' loboka, siksamba ok nonogoka delemak. Sikja una' era, kabo' adya deba' ak walawoka bo yibin enyek, moka yanggana' lolomla sok unulumak. Hnonda sik nong ara, gal mekla' gololamla li era, doka mounggulumla' anaso' ak uboka, yarenga dama delewan enyek, yalegoka diba' oula' olomla sok ulumak. 1:13 Sik nong ara, nauba mek gwanek lo saawoka elilamla soka' ak ulumaakanya, sikja alya usina' ara, mek elilamla' adya bolgamala' bouruklamla' anaso' ak ulumla. Hnonda, sik nong anaba, salya' eini yabalamla gura' ara, guna' lomok sam dengalamlakanya, guna' lomok ulmorulamla sok ulumak. 1:14-15 Adam bek aba' li seknya likimeknya Henokh bedya, ban nang ak ununumna' lebgogomoka' ara, "Nimi nidya' ak yana lelewosunun aboka, Wenelesilnya bera, alja' geisa ganya ulumak nim eb, denga yuba' gong-gong yanamak. Nim adya malya una' pik balamaakanya, hyak nauba meknewoka malya ulumak ununa' nidya' anasa, yana lelewanesil. Ono', nimi malya ulumak nim edya, Imik Neyung ak derewoka walamaknya nenesa, yana lelewanesil." 1:16 Wera an unu malya una' hwam ok ulumak nim era, soba' yu yaboka gaga kiboka yok nim ek meknelelum aboka malya geblesak. Sikja nong una' era, malya ubsinya ganya diliga' enyek ulumaakanya, sikda nonggo aldalamaakanya, nuk perob dosulul senewan dara, dibnya gom bok, miniwoka leboka, yok nim edya unuruwa' amba, pe maka' lelewoka lelemak. 1:17 Bok, nadya wana' ulusin hemyabo nim o, nunja Wenelesilnya Yesus Kristus amba yuba lena' gak nang edya, ugunuk men leb elegesik yub enyek, pe beklelulum. 1:18 Sikja dara ugunuk ara, "Eimik soko dengaboka sidya' daknamla salek oka danamla dara, perob yub ek dolbalek nenelemak nimi hnon lanawanamak. Wera an nim era, sikja malya unulunob senen ganya edyok wekdeknewoka ulumak nim ek ulumnemak," hyek. 1:19 Wera an nim era, nimi ganya yok-yok bokdanok senewoka benelesak nim ulumak. Sikenek ara sokok an ganya ok dena' anyek deknewoka ulumaakanya, Geisinya bedya arawoka bo usina' hyak gobdo orok nim ek ulumak. 1:20 Bok nadya' hemyab ugunuk dara, ugunja dib seneluma' ara, hyak peroba' geisa nong ulusila' anyek, wera migib nenebdanggiga balamunukanya, ugunda Imik Neyung Geisinya migib una' lomok uboka mololelulum. 1:21 Ugunja Wenelesilnya Yesus Kristus adya gouluwom aboka angoo yadyek senewoka arasina' anadya uboka, dib embenga' ulmoubna' anyek, ganya weboka diri ulumunukanya, Imik Neyung adya wana' ulusila' lomok sam soba' ulumnelum aboka, pe kemero ulululum. 1:22 Hnon nim era, ganya penya-penya uboka, hmeng ulusil nim ek ara, ugunja sikenek angoo yadyek senena' bekna' damoka pe sunuwoka aralesululum. 1:23 Yok nim ek, uk ab ugunja salawoka gliboka perob pik dil yalalulum. Ono' yok nim ek ara, sikenek angoo yadyek senen ganya bobmunjok, ono' lok ganya boboka, sikja ongon akleng eneba malya una' seinina' hwam adya sembeja' nenemeka' ak lek senemunjok, blebsululum. 1:24 Imik Neyung ara, ugunuk malyinggijek aboka migiba' pe bo ulusilnya bek, anya ugun nonga doboka Imik Neyung al omoma' peroba' saramek sam si gegena pona' oroka' anyek, ei-ei ganya gekman, migib imik nenewanasil. 1:25 Ono' nunja' Wenelesilnya Yesus Kristus pik uboka, nunja bleblesilnya bek, alak hnonok si imik nenena' ab, alja senedya' omom una' ab, hyak dub una' ab, alja' migib una' ab danyek, youma', wen, eimik eneba, senenya loboka soba' ulmorululul. Aldib unululul.
1:1 Ban buku enyek an momnya doboka' ara, Yesus Kristus adya eimik unuwanalanya nemba yub ek ulumla. Imik Neyung adya dara, Kristus ak ono' alja wa wen nim ek eimik men berra unuwanamla' anyek aawosulula' aboka elegok. Ban nenesa leboka Kristus adya dara, alja lero pik uboka, alja wa wenya Yohanes bek nekok. 1:2 Dara ono' aldib Yohanes bedya alja' dib heng yoka' adya eibuka' nidya' ara, Imik Neyung adya lebok yuba hnon, anya Yesus Kristus amba len yuba hnon, ban bukuk sam laga lelemla. 1:3 Ban nidya' ununumna' leboka' ara, mandena' loboka unuwanalabok anasa, alda ban buku enyek an momnya doboka' ak laga einililanya hnon, sikda ban unuwanamla' hyok yub pe keboka al lomok ulumla yuba nidya' salabmouboka unulumak nimi hnon, pe ulumnamak. 1:4 Nadya' hemyabo nim, sekbadya Asia sokok sam yuba don heikek yuba dona' nim ek gibsin! Ugunuk wana' uboka eleksina' ab, namen ganya una' ab dara, al wen ululanya, youma' ulumoka' ara, ono' eimik soba' ulmorulumnelanya bedya' ara ugunuk elegoka ulusulul, anya alja' saramek sam sekbadya ganya edya' anaba ugunuk elegoka ulusulul. 1:5 Anya Yesus Kristus yuba bojam laga lelesilnya bedya ugunuk ban nidya' elegoka ulusulul. Yesus nong anyek, alak men nimi somokna' ak ab suboka embenga' bukiyimoknya uboka, ono' al nong anyek nidya' soko dub nang ulumaka' sikenek wenewoka bo usina' dubnya ulumla. Dara alak, al Yesus ara nuk wana' uboka, alja eneng edya, nunja' malya una' ak sam ab, blebsuknya bek, 1:6 anya ono' alja dara, wenewoka bo un nang, yuba wa gak nang, gebsuk. Dara, ban Yesus Kristus enyek, hyak imik nenewoka, ono' alak hnonok senenggom dubnya migiba' sob-soba' ulusulul. Amin. 1:7 Wera, Yesus ara deba' hnoumung sam uboka yalamlye' anyek kendululum e! Nimi nidya' soko nim eibnemak dara, ono' alak gama' adya gondowoka orob nim eneba eibnemak. Dara, nimi mok soko yok-yok nidya' ara, alak eiyiwoka nauba engena' salawanamak. Anasa aldib nera hyak dib unuwanamla! Amin! 1:8 Wenelesilnya Imik Neyung wen ulumla', youma' men ulumoka' ara, ono' eimik yanalanya bera, ono' hyak senenggoma' migib ululanya bedya dara, "Nak danyek, men ub einiwasenya bera ono' eimik sidya' dakoka ubdaknanya ulumna," alamla. 1:9 Nara Yohanes bera, ugunja' hem be nimi nidya' Kristus mabo dangamna nim ek kwelesil igin yaka' neikek kwelesilnya bek ulumna. Nunda igina kwelesil bok, Imik Neyung amba ulumaba' anasa, or unulusulula' aboka ganya siklebdaboka ganya gouluwoka ulumabakanya, alja mabo hnonok ulumab. Dara nara, mek dubuk sokok Patmos heikek an henga gouboka bokol yanyeka' ara, Imik Neyung yub amba hnon, Yesus amba len yub enyek, lero yabana' amba leboka ubnyek. 1:10 Wenelesilnya bedya sum yenewoka' eibsa' ara, nara Imik Neyung Geisinya adya ok gologanyookanya, poo ana' benggong yub anaso' anyek, nadya' weilik sam lel yaboka' ak kebsa. 1:11 Wera ban yub enedya nak, "Anja seleb eiblama' ara nidya' momnya doboka, an momnya dobmen buku era, ban sekbadya heikek yuba dona' nim ek, Epesus, Smirna, Pergamus, Tiatira, Sardis, Filadelfia, anya Laodikia heikek hnon, beibnelam," henyok. 1:12 Ban heknedya sal eleklenel do aboka saawoka weilik sam kemel yabesa. Dara uk dinina' sekbadya emas adya memeroba' anyek beiyimeka' ak eibsa. 1:13 Dara ono' ban uk dinina' sekbadya beiyimeka' hnoum ara, nimi sirika' anaso' ak ben hnon sekemok. Bera alda hyak waran nonga' anyek yan anaba siklemok akleng ek ongomok. Alja' saramek sam ara dangman seleroba' ak wan-wanamok. 1:14 Alja huk era hong anyek, hyak kul ara domba pam kul anasookanya, geisa nong deba' anaso honga yaknya bek sekemok. Alja heng era uk boka' anaso' ak lara yabalamok. 1:15 Benedya yan era gabya we' uka singilamla' anaso' anyek singelemok. Alja yub era, mek lumdam yub anaso' anyek olalalak alamok. 1:16 Alja' sirik soruk ak sam ara gura' sekbadya salamok, alja' sibama' ak sam ab parang u penya' ak goublemok. Alja hogung era, hyak yubyek dukdukanek dingilamla' heng senedya' eneso ulumok. 1:17 Nara benyek eilil yabasa dara, na nong ara somoganya beneso' ak, alja' yan berem glob lobsa. Bok alja' sirik soruk era nak diyiwoka lebnyoka' ara, "Anda lok ganya bonggom, mem. Nara men youboka ulusenya bera, ono' eimik sidya' daknananya ulumna. 1:18 Nak danyek, embenga' ulmorulunanya bera an! Nak dara, seleb somogasebok, wera nara hyak soba' ulmorulumnamna. Nara somokna' amba dubnya uboka, nimi soko nimi somokna' heikek amba dara, nara pik bakna' salananya ulumna. 1:19 Anasa wenera, ban nenesa leboka, wen anja seleb eiblama' ara, wen ululanya neb, eimik unuwanamla' ab, anja okoka eiblama' lelewoka momnya dobnelam. 1:20 Wera sekbadya gura' nadya' sirik soruk ak sam ab, uk dinina' sekbadya ulumla' eiblama' gunun damok ara, Sekbadya gura' era sekbadya yuba dona' nim edya lero nang era an, anya sekbadya uk dinina' ara, sekbadya yuba dona' nim era, gereja nong ara an," hyok.
2:1 Epesus heikek yuba dona' nimi lero ek, ban unuwoka momnya dobnelam: "Sekbadya gura' soruk ak salawookanya, sekbadya emas uk dinina' dam pik yabalelanya bedya yub era an lebsil. 2:2 Anja heka' unululama' ara, anda wa yeiriwoka welelama' hnon, anda ganya siklewoka welmorululama' hnon, nara seleb ella ulumna. Anja ganya era malya ulumak nim ek or unulunok senenggululam. Nimi nidya' yuba lena' gak nang diba' orokjok, nunda yuba lena' gak nang aldalamak nang ek, anda seleb sunubyamalumukanya, sikda sonda' hwam nang ulumaka' ara, seleb ella dangalum. 2:3 Anda nadya si amba leboka, igina kwelesila' anaba siklewoka ululumukanya, hmenga' danggiga banggululam." 2:4 "Bok nara anak sam malya senelenggena' ara, Nak men danyek anda wana' ulunulum sok, weneba anaso ununena' anyek orok ak hnonok. 2:5 Anasa wera ban nenesa leboka, anda hekmok ab malyingguluma' nong anyek pe beknelam! Anja malya una' ak ab wen ganya dangawoka, youma' pe unululum ununa' enyek ono' unub einiwanalam. Nenyek pe unuwanggunulam dara, nara anak an yeiniboka anja uk dinina' era al ulumla' ak ab gwenewoka dobnamna. 2:6 Ban wenyhena' anaba yoka' don peroba' anak ab ulumla' ara, Nikolaus bek diriga ban maba lek alamna' digum anyek, ambabya lek ganya bololama' anasa, nenyek hnon pelemla senelenggen." 2:7 "Heknyek o yaka' ara, Imik Neyung Geisinya adya yuba dona' nim ek lelemla' ara pe keblul! Heknedya malya una' ak ab oblamaganalanya bera, Imik Neyung perob heik sam nim embeng una' gal doka delemnamla henemna," aro momnya dobnelam, hyok. 2:8 Smirna heikek yuba dona' nimi lero ek ban unu: "Ban yub enera men youma' ulumoka' ara, ono' eimik soba' ulmorulumnelanya bedya yuba, alda seleb somogoka ono' embenga' dangamoknya bedya yub era an. 2:9 Anak an yoka'-yoka' okna uboka ulunggela' ara nara seleb ella ulumna. Anda bona' garan ululama' ara naba ella ulumna! (Bok saawoka anda aldib dubnya ululam.) Hnon nim era bisa' dubnya Satan alja bisa' mabo siliba' uboka, Yahudi nimi diba' una' orokjok, nunda Yahudi nim aldalamak nim edya anak an, geklewoka derewoka walasaka' ara nara seleb ella ulumna! 2:10 Wene salek enyek, yoka'-yoka' igina kwebnenggelnya nenesa leboka, anda lok ganya bona' ara mem. Anda pe beknelama' nong ara, anak sunuwanenggela' ara, Iblis adya ugun gangganek sam hnon nimi doboka gasa ek sam henga geregoka beibnesil. An henga geregoka beiyisilya salek era, lika sagobadya mabnelum. Unuweigija' anaba, anda bojam ululom! Anya somogamen dara, nadya anak dib embenga' ulmoubna' huk goluna' ek goliyiwanenggen." 2:11 "Heknya o yaka' ara, Imik Neyung Geisinya adya yuba dona' nim ek lelemla' ara pe keblul! Heknedya malya una' ak ab oblamaganalanya bera, eimik somokna' damoka lanawanamla sum era, alak bebeganggunumla," aro momnya dobnelam, hyok. 2:12 Pergamus heikek yuba dona' nimi lero ek ban unuwoka momnya dobnelam: "Ban yub enera u penya' paranga sala ululanya bedya yub era an. 2:13 Nara anda har sam ululama', nara seleb ella ulumna' ara, anda bisa' dubnya Satan bedya dub heikek sam ululam. Anyek bok, anak dara, nadya si nek hyak pe bojam ulunelem. Nadya bojam unenya Antipas be ugunja heikek obek sum eneba, anja dara, nara Yesus ak dib senenggulumna aboka gunuwoka lebnenggublum." 2:14 "Ban unulum bok, ono' yok-yok una' hnon unululama' anyek, nara lek senelamna' ara, nim an gangganek sam hnon, Bileam bedya neklesil yub ek salabmouboka ulumak. Bileam bedya dara, Balak bedya Israeli nim ek heka' huboka malya una' lomok bobonggesuka' anyek nekemok, bisa' ak sam beil balamek dena' delelulum, hnonda gela salya' salelulum aboka neklesilom aboka nekemok. 2:15 Dara, hnon ugun gangganek ara, Nikolaus bedya neklesil yub ek neik so salawoka ulumak nimi hnon ulumak. 2:16 Ban nenyek dara, al wene salek enyek, ganya dib dangawanalam! Unuwanggubmen dara, nara mek anam yanamnakanya, nadya' sibama' ak an ulunel parang enedya sikenek obnesin." 2:17 "Heknya o yaka' ara, Imik Neyung Geisinya adya yuba dona' nim ek lelemla' ara, pe keblul! Heknedya malya una' ak ab oblamaganalanya bera, doknowoka ulumla mana gwaneng delom aboka elegoka, nadya' geisa dangman girik era benyek eleganamna. Ban girik enyek ara, yok nim elgom ulumak. Alda sik dobnemak nim edya ok ella ubnemak wenyok si nenyek, momnya dorob girik ek eleganamna," aro momnya dobnelam, hyok. 2:18 Tiatira heikek yuba dona' nimi lero ek ban unuwoka momnya dobnelam: "Ban yub enera Imik Neyung bedya me, alja heng era uk boka' laralamla' anaso uboka, alja yan era gabya silika' uka damna' ak seng-senga' mengewoka delemla' soka' ak delelanya bedya, yub ek ulumla. 2:19 Anja unululama' ara, nara nidya' ella ulunggen. Anera, anda wana' ululama' hnon, anda dib senelelama' hnon, nidya' ara nara seleb ella ulumna. Anya anda yok nim emba aralalama' hnon, anda siklewoka welmorululama' ara, nara seleb ella ulumna. Hnonda anda youma' dara, wa welelum bok, wenyek danyek, nauba welelama' ara, nara seleb ella ulunggen." 2:20 "Bok nara anak igin ganya bolenggena' ara, Imik Neyung adya lelemla aboka laga sonda' amba lelemla gel Izebel gek, eil lololama' ak, banyek hnonok ulumla. Nimi nadya wa wen nang ek sonda' leboka, gela salana' nauba unuwoka, bisa' ak beil balamak dena' bukoka dero yabalemaka' ak, bobnenewoka malya pik bo ablesil. 2:21 Anasa, alja malya ulumla' ak ab ganya dangawolulula' aboka, ganya dangan salek elegasebok, alda nauba malya uboka, salawoka malya uluneseng ganya ok bolomla. 2:22 Wera anda kendelom! Gel genyeb, sikda alak malya ulumak nim eb, ban unulumaka' nidya' ak ab ganya dangawanggunumak dara, al nonga doboka, gweklamla ekla mana' ak boboganamna. Dara anyek anyeb al nong ab alak salalemak nang eb dara, oka nauba gweklemnemak. 2:23 Anya gel genedya mab era, dengaboka obnamna. Anya, yuba dona' nimi nidya' ara, nara nimi nong lomok ab ganya lomok eboka eillilesinya bek ulumna' ara, ella danamak. Anasa leboka, ugunja nidya' unululum sok sunuwoka ugumba deknesin." 2:24-25 "Bok ugun yok nimi Tiatira heikek ululum nim era, ban malya una' yub ek sunuwoka ununa' loboka, Satan bedya hyak lomok so unuwanalum alalanya nek ara einiwoka ella danganggululum nim ek lebsin. Ugunuk an heka' ulusila' anyek, pe salabmoubuka ulumuna' moruwoka na yanamna. (Nara anak an yok igin yaka' ara hnon eleganggununggen.)" 2:26-27 "Heknedya malya una' ak ab oblamaganamlakanya, nadya unuwanok senelamna' anyek unubmoruwanalanya bek ara, yok soko-yok soko nimi nidya' wenewosulula' aboka, nadya neyung bek ab migib una' domsa una' enyek, ono' alak hnon eleganamna. Dara, Imik Neyung bukuk sam momnya dobok sok, Alda gasa gama' dunguna' boboka mok soko me nidya' alja dub dangoka wenelemnesilikanya, ono' alja soko adya memelemaknya jobol meneklemak sok, alja unub meneganesil. 2:28 Dara, nara alak yale sam gura' ak eleganamna." 2:29 "Heknya o yaka' ara, Imik Neyung Geisinya adya yuba dona' nim ek lelemla' ara pe keblul!" aro momnya dobnelam, hyok.
3:1 Sardis heikek yuba dona' nimi lero ek, ban unuwoka momnya dobnelama' ara: "Ban yub enera Imik Neyung alja' sekbadya ganya eb, sekbadya gura' eb, danyek salalanya bedya yub era an. Anja unululama' nidya' ara nara seleb ella ulumna. Anak dara, hnon nim edya dara, anam embenga' ulumla alanjak bok, seleb somogoluma' ak ululam. 3:2 Anasa, bukoka pe diri uldalalom. Anja welelam wa nek dara, nadya Imik Neyung hogung ak ara, nidya' ara, perob ok eilinggulumna' anasa, anam somogonuna' ululanya nek nidya' somogalyek aboka, migiba' gebnelam. 3:3 Anasa, anda men youma' enyek unuwanalam aboka nekenjeka' hnon pe seiniwanalam. Hnonda heka' ak unuwanalam an yuba keluma' anyek beklom. Dara, ban pe unubgiga balamenekanya, anda malya una' loboka ganya dangawalom. Bok anda anam bukoka pe diri uldana' orok dara, na yanamna salek era, sumen yanamla' ara elgom umen bok, hoka' don nang eneso' anyek gelelenga yanamna." 3:4 "Bok, an Sardis heikek ara nimi hnon nim era, nadya boksom sembeja' ubnelyek senewoka pe ulumaka' ak ella ulumna. Ban nim enyek dara, sikda anaso unuwaneseng hogunga geknelemla' anasa, geisa akleng ongowoka nab neika' yabalemnemab. 3:5 Heknedya malya una' ak ab oblamaganalanya bera, neik so geisa akleng ek ongowanamla. Anya alja si nera nim embenga' un bukuk sam ulumla' ara, eimik eneba hyak lubnenggunumna. Nadya' neyung Imik Neyung be saramek sam hnon, alja lero nang hogung ak sam ab, nim enera nadya' ak ulumla aboka laga lebnamna." 3:6 "Heknyek o yaka' ara, Imik Neyung Geisinya adya yuba dona' nim ek lelemla' pe keblul," hyok. 3:7 Filadelfia heikek yuba dona' nimi lero ek ban unu momnya dobnelama' ara: "Ban yub enera, hyak geisa uboka, hyak dib nong ululanya bedya yub era ban. Dara, Daud bedya pik bakna' era alja bo ulumla. Alja pika baknamso dara, nimi yok nang edya seregamenggom, anya ono' alja sereganamso dara, yok nang edya anaba baknamenggom. 3:8 Anja heka' unululama' ara, nara seleb ella ulumna. Anasa, nadya ansamba yok nang edya sereganggom pik era seleb bak lobgesa. An nong ara mek migiba' ululamakanya, nadya yuba ek pe salawoka, nadya si nera gununggululama' ara, nara seleb ella ulumna. 3:9 Dara nimi nidya' bisa' dubnya Satan bedya bisa' mab siliba' ulumak nang era, Yahudi nang yoka' gom bok, sonda' anasa nunda Yahudi nang enya' aldalamak nang era, nadya anja' saramek sam yeiniboka gibgenoka' aboka unuwanok senen ganya enyek eleganesin. Anedya sikda, nara anak wana' ulunggena' ara gobdo ella danamak. 3:10 Anda nadya yub ek dib senewoka pe siklewoka unululama' anasa, nababya amba lunuwoka soko me nidya' igina kwebnesil sum ek ab kemero ubnenggen. Ban unuwanamla' ara soko nimi nidya' ak sunuwanasil." 3:11 "Nara berra yanamna! Yok nang edya anak an Imik Neyung adya perob huk gouluna' era doblyek anasa, anak an ulunggela' ara pe salabmoubuka ululom. 3:12 Heknedya malya una' ak ab oblamaganalanya bera, nadya' Imik Neyung ek sam alak senenggom egomna' nenewanamna. Dara, alda hyak meka' goubnenggunumla. Anya, nadya' Imik Neyung bedya si neb, Imik Neyung bedya' anyek imik heikek ab uboka eleganasil heik si Yerusalem ara, benyek an momnya dobnamna. Anya ono' nadya' wenyok si neneba benyek an momnya dobnamna." 3:13 "Heknyek o yaka' ara, Imik Neyung Geisinya adya alja yuba dona' nim ek lelemla' ara, pe keblul!" hyok. 3:14 Laodikia heikek yuba dona' nim lero ek unu momnya dobnelama' ara: "Ban yub enera, Amin, yo aldib ana' damnya, yoka'-yoka' eiyiwoka aldib ulumla aboka, bojam uboka dib nong ok lelelanya, anya Imik Neyung adya yoka'-yoka' uyiwoka' nidya' gaknya bedya yub era ban. 3:15 Anja yoka'-yoka' unululama' ara nara seleb ella ulunggen. Penya-penya una' loboka, hnonok ok ubnenggeso dara, perob senewanasinya bok, anja nonga poba unggulunggela' anaba, ono' saragena' denggulunggela' ara nara seleb ella ulumna! 3:16 Anasa, anja nong una' era, saragena' degena' anaba orokokanya, poba sen-sen ana' anaba orok bok, alda anda poba saragena' gangganek ululam. Ban nenesa leboka, nadya' sibama' ak ab dukoka bobogonun aboka ulunggen. 3:17 Dara anja lelelama' ara, nara bona' dubnya uboka, yoka'-yoka' nidya' sanga' ok ulunel aboka, anasa yoka'-yoka' ak ara, bunya buknenggunusinya, alalam. Bok an nong ara hyak malya nonga' anyek senggeiriwoka igina kwelenggel bok, ella unggululamakanya lelelam! Anda bona' garan uboka, akleng ongona' oroka' anyek, henga luma yajoka' ak ululam. 3:18 Anasa nadya dara, anak ara dub daloma' aboka, nadya' senedya' yaka' meilik dangman enyek dekloma' aboka wenelenggen. Hnonda nong baneng uboka, alya ubgelyek anasa, nadya geisa' akleng enyek dekloma' aboka wenelenggen. Anya heng ek ngikoka, pe eibloma' aboka heng hwena' meka nak ab deknelam wenyalenggen." 3:19 "Nadya okoka yoka' nauba wana' ulusin nanga nong enyek, ooma leboka nauba wenelesin. Anasa, anda yeiriwoka migiba' anyek anja malya una' eibkweboka loboka ganya dib dangawalom. 3:20 Nara pik sindamak sam sekoka pika glorum-glorum alasina' anyek kendululum e! Nimi ben hnon nadya yuba keboka pika baknelya dara, nara wekoka alab eibdananamakanya, nara alab, alda nab, neika' delemnenam. 3:21 Nara malya una' oblamagoka nadya' neyung beb alja ekla' buna' ak sam neika' bulunuma sok, heknedya malya una' ak ab oblamaganalanya bera, nadya bulumna ekla buna' ak sam or neika' buknenam aboka lebnamna." 3:22 "Heknyek o yaka' ara, Imik Neyung Geisinya adya yuba dona' nim ek lelemla' anyek, pe keblul!" hyok.
4:1 Wera nen nidya' seleb dara, nara kemel yabasa enyek, imik heik sam ara pika hnon bakoka' ak eibsa. Dara, men danyek, poo ana' benggong yub anaso' ak kemsa yub enyek, ono' anaso anyek wenyal yaboka' ak kebsa' ara, "An nen seleb dara, eimik heka' unuwanamla anyek, anak amawanenggen anasa, anyagan wele yalom," hyok. 4:2 Dara wene sab-sab enyek, Geisinya adya nak gologanyok dara, wera, imik heik sam ara, dubnya senenggomnya bedya ekla buna' hnon uboka, an eilib ara, nimi ben hnon bulumok ak amawanyok. 4:3 Wera an ekla buna' eilib bulumoknya bera, kemen dara, yaspis girik ab, sardis girik ab, melela' beining anaso' ak ulumok. Dara ono' mano hnon an ekla buna' eilib samarud girik melela' beining anaso' anyek, keeb ganagamok. 4:4 Dara, ban ekla buna' en gogob dara-dara ara, yok domdara' badya ekla buna' hnon ulumookanya, wera an ekla buna' eilib era, domdara' badya nang, nonga kaboka wa borob nang era, geisa boksom ongob ligiwoka, sikja hukuk ara, emas huk goluna' golumek nang ek, anyekan bulumek. 4:5 Dara ban ekla buna' ak ab danyek, ebna' lengem-lengem aboka, ono' irr aboka, anya liminga yuba dalagoka, gururu aro yabok. Wera an ekla buna' saram enyek ara, wesa' sekbadya ak uk boka' singilimok. Wera nera, Imik Neyung sekbadya' ganya era an. 4:6 Dara nauba ekla buna' saramek ara, mek gwan anyek, kristal heng kemeldana' beining anaso ak, houm-houm alamok. Dara ekla buna' en berem dara-dara nidya' ara, gamyaka' dombadya' adya, saramek weilik sam nidya' ara, heng dok adyok lararo lomoka' ak ulumek. 4:7 Men youboka heng laramok gamyaka' era, singa anaso ak ulumok. Bok penenya nera, yem sapi pam eneso ak ulumok. Winilinya nera, alja hogung era nim hogung anaso ulumookanya, domnya nek dara, balyo gwerega' wining anam gwebdo yabalamna weneso ak ulumok. 4:8 Dara, ban dombadya gamyaka' nidya' ara, nidya' ola hnabbadya dara-dara ulumok. Bok darasam sikja lomok ak dara, nidya' heng doka yaka' ak ulumek. Anya sik ban gamyaka' edya dara, inimnek yubyek buluk lobongganggonggom, bera soba' sebelsinilimek. "Geisa, geisa, geisa! Wenelesilimnya Imik Neyung hyak senenggomnya geisa ok ulumla! Youma', wen, eimik soba' ulumnalanya benya', geisa ok ulumla!" wenyalamek. 4:9 Sikda dombadya gamyaka' edya lero seblemek ber era, al ekla buna' ak bululanya bek perob aboka si imik nenewoka, gigiwoka, perob aboka giblemek. Dara an giboka seblemek salek era, 4:10 domdara' badya nonga kaboka wa borob nang dara, ekla buna' ak bulumoknya be saramek sam koma lumugoka dunuwoka oumub ligiweekanya, alak sob-soba' ululanya bek eiya hlaboka gibek. Dara sikja meilik huk goluna' ara ban ekla buna' dam enyekan, boro boboka lelemekja, 4:11 "Nunja wenelesilimnya, nunja Imik Neyung o! Wera anja yoka'-yoka' nidya' ara uyiwolumukanya, anja ganya seinina' edya, ban nidya' uyiwoluma' ara ulumla anasa, anak danyek, si imik nenena' ab, ganya sokok nenebdangoka gibna' ab, hyak senenggom migiba' ab dara, anak danyek ok dololom," wenyalamek.
5:1 Dara, nara kemel yabasa enyek, domba me senenggom ekla buna' ak sam bukoka, kerob buku hnon, momnya dara-dara domeka' anyek, sekbadya bekna' denena' denemeka' ak, alja sirik sorukuk, salamoka' ak eibsa. 5:2 Ono' hyak senenggom lero edya, "Heknyek an sekbadya bekna' denena' ara glokoka kerob buku era, alja baknamso geknenanya bera ulumla goma?" senenggoma' yuba saboka wenyal yaboka' ak eibsa. 5:3 Bok, nimi ben hnon sibin anaba, imik heik gom, sokok an gom, sokok damumduk gom, ban buku keroba' en baknamsokanya lomok sam kendenesonya beneba, benyek senena' ara orok. 5:4 Nimi ben hnon or buku keroba' en bakoka lomok sam kemedenesonya bera orok anasa, nara hyak angoo senewoka nauba engewasa. 5:5 Dara ban nonga kaboka wa borob nang danyek, anyaganyeb be hnonja nak lebokja, "Anda engena' ara mem! Keblom, Yehuda nang yila' bei gam singa adya, Daud bek ab mengebdangdobnya bedya seleb oblamagal. Anedya alak danyek, ban buku keroba' eb, alja sekbadya' bekna' denena' eb dara, alja baknamla," hyok. 5:6 Wera nara ekla buna' hnoumung ab, ban dombadya gamyaka' ab, anya ban nonga kaboka wa borob nang hnoumunga ara, kemel yabasa enyek, domba pam me hnonok, seleb oboka beiyimna' anaso' anyek, bonga sekbadyakanya, henga sekbadya ak sekemoka' anera, Imik Neyung alja' ganya sekbadya ak mok soko me nidya' ak boksuk ara an. 5:7 Dara ban domba pam me nera yeindeboka, ban buku keroba' en ekla buna' ak bulumoknya bedya soruk ab dobok. 5:8 Ban unu dol yabok dara, an dombadya gamyaka' eb, domdara' badya nonga kaboka wa borob nang eb dara, al saramek hogung oumub ligiwek. Dara, sikda yok-yok benggong hnonok, emas mek hmeiya hnonok, gen-gen song mekla' adyok deknemoka' anyek salawek. Anera muna' Imik Neyung mab adya molona' era an. 5:9 Anya sikda wenyok yok ber enyek an wenyaro seblemeka' ara, "Anda seleb objeekanya, an anja eneng edya, anda sik yok-yok nimi yila' ulumaka' ak ab, sik yok-yok yuba salamak nim ek ab, sikja nimiguma' yok-yok unulumak nim ek ab, sik yok-yok mok soko ulumak nim ek ab dara, Imik Neyung amba dekoka doblum anasa, al anak danyek ban buku keroba' en dobnelamakanya, alja bekna' denena' danera, or anja baknelam. 5:10 Anya anda sikinek hyak senenggoma' wenewoka bo un heik nang nenewousulumukanya, nunja neyung Imik Neyung amba sikda yuba wa gak nang dangiyiwousulum. Anasa sokok anera, sikda dub nang dangoka wenelemnesak," wenyaro seblemeka' ak eibsa. 5:11 Dara nara, yuba hnon keboka kemel yabasa enyek, lero nang era, ekla buna' ab, gamyaka' ab, nonga kaboka wa borob nang ek longob ganagoka, yuba nauba saro balameka' ak eibsa. Sikja deng mandebna' era, deng salya' uboka, ono' denga salya' adya deng mandebna' era hyak gong ulumek. 5:12 Sikda yuba yeiriwoka saboka wenyalameka' ara, "Orob domba pam me nenyek danyek, damnya bedya len migib ab, bona' dub ab, ella una' damok ab, yeirin migib ab, alak nauba senewoka gibna' ab, si imik nenena' ab, gigina' nauba ab dara, alak danyek dobnamla," wenyaro seblemek. 5:13 Dara nara gamyaka' ulumla' imik heik ab, sokok ab, soko damumduk ab, nauba mek gwanek ab, ane lomok nidya' ulumla' ara wenyalamekja, "Al mok heik enyek an ekla buna' eilib bululanya beb, domba pam me ab dara, gigina' nauba ab, nauba senewoka gibna' ab, si imik nenena' ab, yoka' len migib eb dara, siksamba hyak soba' ulmorulumnamla!" wenyaboka lelemek. 5:14 Wera ban dombadya gamyaka' era, "Al aldib or unululul," hyek. Dara ban nonga kaboka wa borob nang eneba doro boublingdangoka giblemek.
6:1 Dara nara kemelamsa enyek, domba me ara mem an bekna' denena' sekbadya ulumoka' ak anyeb, mennya nek bakoka' ak eibsa. Anya, dombadya gamyaka' anyek, mennya nedya liming yub anaso' ak bii aboka, "Yanggalom!" al yabok ak kebsa. 6:2 Ono' nara kemelamsa enyek, wera, nim abakna pam kul pam ek hnon eibsa. Pam en eilib abakamoknya bera, yina salamookanya, alak ara dub nang goululumak huk gouluna' anyek elegok. Anya, alda ollamaklelanya benesonya bek adya, ono' oblamagoka alawoka dobnuna' aboka yanggoka' ak eibsa. 6:3 Wera ono' domba me ara penenya'anya bekna' denena' bakal yabok dara, dombadya gamyaka' anyek, penenya nedya lel yabokja, "Yanggalom!" al yabok ak kebsa. 6:4 Anya abaksin pam yoknya hnon, honga goronoka' houm-houm alamoka' ak yanggok. Dara abagamoknya bera, ganya pe namena' una' anyek, sokok anyeb doblula' aboka, anya sokok dubuk an ulumek nim era obdangdo yabalanok aboka, unun migib enyek alak elegok. Anya alak ara senenggom gab enyek mal diba' elegel yaboka' ak eibsa. 6:5 Dara ono' domba me ara winilinya bekna' denena' bakal yabok dara, winilinya gamyaka' era, "Yanggalom!" al yaboka' ak kebsa. Anya nara, wera, abaksin pama hnon, honga mirinoka' ak ulumookanya, an eilib abakamoknya bera, igina sununa' ak alja sorukuk salamoka' ak eibsa. 6:6 Anya nara or yoka' adya yub enyek, ban gamyaka' dombadya' hnoum anyeb sal yabakdo senewasa' ara lel yabokja, "Perob gandum enyek igina hnonok dara, liga hnonok wa webna' amba eleklesak sok, dekna' adya dekoka dobnemak, dara yok gandum era, igina winilya amba anaba al neikik, lika hnonok weboka donya nedya dekoka dobnemak. Bok pam mek ab, anggur mek ab dara, sekoka bolokdo yabana' ara mem," wenyalameka' ak kebdongowasa. 6:7 Wera ono' domba me ara domnya bekna' denena' bakal yabok sab-sab, nara kebsa enyek, domnya gamyaka' edya, "Yanggalom!" al yaboka' ak kebsa. 6:8 Anya, wera, abaksin pama hnon, hong ara embeng mekla' uboka, weik boka' aleb-aleb aroba' ak ulumookanya, an eilib abagamoknya bedya alja si nera, somokna' damok. Anya somokna' nang heikek era, eimik dobgiga yalamok. Anya sikenek ara, sokok an ulumek nanga nidya' ara, dombadya bokoka dara, hnonok obnemek migib enyek, mal oldana' pik ab, gwaneng oka' bun pik ab, neikna' damok don pik ab, sokok an yok-yok yu nonga' beiyik ulumla' pik ab benewoka obnoka' aboka migib era, elegel yabasuka' ak eibsa. 6:9 Dara domba me ara lamnya bekna' denena' bakal yabok dara, nara sik Imik Neyung yub amba hnon, laga pe lena' sikja boboka lelemeknya nenesa leboka, seleb osik nang edya, sikja ganya era, uka daboka gibna' oulyang damumduk sam eibsa. 6:10 Anya sikda hyak yeiriwoka bii aboka, banaso wenyalamek, "Ai, hyak migiba' senenggoma' yangawolumnya, hyak geisikanya, aldib ok unululamnya o, anda nunja eneng emba leboka, sik sokok ulumak nang ek dirikna' ara, lika hekbadya so ublya ek yana lelena' lolomnalam do?" hyek. 6:11 Dara sikenek yok-yok ongon akleng hyak geisa nong anyek elegel yabasuukanya, sikenek anaso wenhyok, sikda or dek-deka soboka diri ul yabamuna' ara, sikja hemyab neik wa wen nang eb, sik kabo nang eb, sikja hemyabo men osik sok, nang en eimik neika' amba leboka, nimi wene nang obnemak aboka einina' anyek gigiwalya danyek anasa, or diri ublulum, hyok. 6:12 Dara ban domba me ara hnabnya bakal yabok salek, nara kemel yabasa enyek, wera, hyak okna senenggom sogouma' enyek dorogookanya, heng ara hyak mirin nong boksum eneso' anyek dookanya, wala' ara eneng anaso anyek, hyak eneng ok dangdo lobok. 6:13 Wenyek gura' imik sam nidya' ara, baroka kabo' dolomna enyek, daka-daka malyanggalamla sok, unu daka malyanggalamok. 6:14 Dara im ara keroba' buku anaso' anyek kebok enyek, moksoko mein ab, nauba mek gwan hnoum soko dumung eb dara, nidya' men bukumok oulyang ek ab gogoka-gogoka buru yibuk. 6:15 Wenyek sokok sam an wenesin dub nang eb, si sina' senenggom nang eb, yin bona' dub nang eb, bona' dub nang eb, migiba' obleboka un nang eb, wa orugan enyek wen nanga nidya' ab, yoknya bedya dangoka un gom nang eb dara, ban mok mein enyek an welewoka buru yibilimok girik lum pik hnon, dunuwoka bulumla girik sen-sen pik hnon murugul balamek. 6:16 Dara sikda ban girik mein danyek an lebeka' ara, "Dakoka nuk sikleweisiminikanya, al imik ekla buna' ak bululanya bedya hogung ak ab, domba me adya waboka osina' ak ab, nunda dokneiyiweisilom," alamek. 6:17 Wera sikenek senenggoma' lero obnesil sum era seleb yal anasa, heknyek soba' anya' senewoka or sekmoubnamla do?
7:1 Nen seleb dara, dombadya lero nang era, soko gokgoba dombadya sek ligiwoka, kabo' ara beiyik sam ab hnon, mek gwanek sam ab hnon, ono' gal donggalek sam ab hnon, dorogalyek aboka, sala seklemeka' ak eibsa. 7:2 Wera hnon kemelamsa dara, yok lero hnon henga doroklamla sam ak ab lanawoka' ak eibsa. Lero era Imik Neyung mem an bekna' ak bomookanya, alda dombadya lero, soko ab mek ab soldob meneganalum aboka migiba' enyek elegosuk nang ek an hyak senenggoma' bii aboka, 7:3 lelemokja, "Nunja' Imik Neyung bedya wa wen nang ek, mem an bekna' enyek asok ak anam denewanggumeibya bok dara, soko ab mek gwan ab gal donggala nidya', soldel menekna' ara mem!" alamok. 7:4 Wera an mem an bekna' denesuk nang hiboka, deng ara anaso' ak kebsa. Nimi Israeli nang nidya' nimi yila' sunuwoka doboka denesuk nang era, denga salya' anyek hiboka seratus empat puluh empat ribu nim ulumak, an yub ek kebsa. 7:5 Yehuda nang yila' ek ab dara, denga yuba' ara, dua belas ribu nang bekna' en denesuk. Ruben nang yila' ek ab dara, denga yuba' ara, dua belas ribu nang bekna' en denesuk. Gad nang yila' ek ab dara, denga yuba' ara, dua belas ribu nang bekna' en denesuk. 7:6 Asyer nang yila' ek ab dara, denga yuba' ara, dua belas ribu nang bekna' en denesuk. Naftali nang yila' ek ab dara, denga yuba' ara, dua belas ribu nang bekna' en denesuk. Manasye nang yila' ek ab dara, denga yuba' ara, dua belas ribu nang bekna' en denesuk. 7:7 Simeon nang yila' ek ab dara, denga yuba' ara, dua belas ribu nang bekna' en denesuk. Lewi nang yila' ek ab dara, denga yuba' ara, dua belas ribu nang bekna' en denesuk. Isakar nang yila' ek ab dara, denga yuba' ara, dua belas ribu nang bekna' en denesuk. 7:8 Zebulon nang yila' ek ab dara, denga yuba' ara, dua belas ribu nang bekna' en denesuk. Yusuf nang yila' ek ab dara, denga yuba' ara, dua belas ribu nang bekna' en denesuk. Anya, Benyamin nang yila' ek ab dara, denga yuba' ara, dua belas ribu nang bekna' en denesuk. 7:9 Nen seleb dara, nimi mandebna' hyak einildakna' okna' anyek, senenggom dub ekla buna' ak, domba me adya saramek seklemeka' ak eibsa. Dara, seklemek nim era, nidya' yok-yok mok soko ulumak nim ek ab hnon, nidya' yok-yok nimi yila' ulumaka' ek ab hnon, nidya' sikja nimiguma' yok-yok unulumak nim ek ab hnon, nidya' yok-yok yuba salamak nim ek ab hnon, an nimi gong danyek ulumek. Sikda geisa dolungna' akleng ongowoka, anya yokol mekla' sikja soruk ak leb salawoka bo seklemek. 7:10 Anya yuba senenggoma' bii aboka, "Nimi blebsina' ara nunja' Imik Neyung senenggom ekla buna' bululanya bek ab hnon, ono' domba me ak ab hnon, lanalamla," alamek. 7:11 Dara, lero nidya' ara ekla buna' ab, nonga kaboka wa borob nang eb, dombadya gamyaka' ab ulumeka' ak aknewoka sek ganagoka, ekla buna' dam berem huk oumuwoka Imik Neyung ak giblemeekanya, 7:12 lelemekja, "Amin! Gigina' ab, si imik nenena' ab, geremsenga' ab, perob aboka gibna' ab, wa bona' amba gigina' ab, migiba' ab, senenggom una' ab, nunja' Imik Neyung ak dara, or soba' ulmorululul, aldib or unululul!" wenyaro giblemek. 7:13 Dara anyagan nonga kaboka wa borob nang enedya, be hnon nak, "Dolungna' geisa akleng ongomak nang era, hek nang uboka, sikda hekmok ab yeilimak nang do?" aboka heibnyok. 7:14 Dara nadya benyek an, "Nadya' neyung o, anda seleb ella ululam," hesa. Dara ono' alja nak, "Wera an nang enera igina kweboka okna ulusila' ak ab gobek nang era an. Sikja akleng era, domba me eneng adya seleb meka elegoka, geisa neneroba' ak ulumak nang era an. 7:15 Wera anedya nang danera, Imik Neyung adya ekla buna' saramek sekoka, inimnek yubyek pik, alja ek sam alsamba welemak. Wera al senenggom ekla buna' ak sam an bululanya bedya, sikenek alja e nera sob goluwanesil. 7:16 Dara, sikda gwaneng oka, mek oka, kwebnenggunusil. Anya henga yu ab, yok pob edya dara, sikenek meka' obnenggunusil. 7:17 Wera domba me, senenggom ekla buna' ak hnoum ululanya bedya, sik nong ara pe beiyiwoka bo ulumnesilikanya, alda embeng mek luk sam bo balamnesil. Anya wera, Imik Neyung adya sikenek ulusil heng meka' nidya' ara, lubnesil," wenyaboka lebnyok.
8:1 Domba me adya sek bekna' denena' bakal yabok enyek, imik heikek ara wene salek setengah jam yuba unuruwa' oroka' anyek deso aro lobok. 8:2 Dara sekbadya lero nang Imik Neyung saramek seklemek nang ek, poo ana' benggonga sekbadya elegosuka' ak eibsa. 8:3 Dara ono' yok lero ben hnon perob meilik yanggola salamoknya be yeiniboka Imik Neyung amba uka daboka gibna' oulyang ak, sekemok. Dara lero ek ara, perob gen-gen song mekla' nauba ara, muna' Imik Neyung mab edya mololemak molona' anaba uka daboka gibna' oulyang ak sam uka dablula' aboka elegok. 8:4 Dara, gen-gen song mekla' soloma ab, muna' Imik Neyung mab adya molona' ab dara, neika' hiboka lero enedya soruk ak ab ara, Imik Neyung saramek sam welok. 8:5 Dara ono' lero era meilik yanggol enyek doboka, Imik Neyung amba uka daboka gibna' oulyang ak sam uk ek libookanya, uk era sokok sam nakdo dorogok. Dara, ebna' langom-langom aboka, liming gururu aboka sogouma' dorogok. 8:6 Dara sekbadya lero nang era, sekbadya poo ana' benggong lebnoba' aboka meewoka diri ubek. 8:7 Dara men lero era, poo ana' benggong lel yabok enyek, saragena' mok eb uk ab eneng ab neika' hiboka sokok sam nakok enyek, mok soko ara, yok-yok nauba' anyek winilya geboka, gal donggala anaba winilya geboka, hnon darasam ab, hola' nidya' ab dara, uka momnyanga woluwoka jok. 8:8 Dara ono' penenya lero alja benggonga lel yabok enyek, yoka' senenggom mok soko mein anaso uka singilimoka' ak anyek soboka, senenggom mek gwanek sam bobogok. Dara mek gwana winilya garawoka, darasam hnonda eneng ok dok. 8:9 Wenyek, mek lomok sam ulumla' nidya' ara nauba' anyek winilya geboka, darasam hnonda somogok. Anya mek ekla buna' nidya' ara ono' winilya geboka, darasam hnonda uka jok. 8:10 Dara winilinya lero era, alja benggonga lel yabok enyek, senenggom gura' hnon sokok sam uk wesa' anaso' anyek yinggyuk enyek, meka nidya', mek lu ab, nauba' anyek winilya geboka, darasam hnonda uka momnyanga wolubok. 8:11 Gura' an malyinggilimoka' ara, alja si nera Apsintus sika leleksin gura' alamek. Anya, meka nidya' ara, nauba' anyek yok-yok winilya garawoka, darasam hnonda sik ok dok. Dara meka nidya' ara, sik hwam ok dangoka, delemek nim era, anedya nauba somogek. 8:12 Dara ono' dom lero era alja benggonga lel yabok enyek, henga ara darasam soldowookanya, wala' ab gura' ab dara, joboka, winilya' yok-yok geboka, darasam hnonda gobdo guna' ok dok. Dara, yubyek eb, inimnek eb dara, yok-yok nauba' winilya geboka, darasam hnonda guna' ok dangoka ubmoruwok. 8:13 Dara ono' hnon kelemsa enyek, weidya wininga hnon hyak im nongok lak-laka yabelemookanya, yuba senenggoma' anyek, "Sik sokok ulumak nim ek ara, hyak omom nong ak ubnesil. Ono' winilinya lero edya sikja benggong anam lebnamak anasa, hyak omom nong ak ubnesil," alamoka' ak eibsa.
9:1 Lam lero era, alja benggonga lel yabok enyek, gura' hnon imik aba' ara, sokok malyinggyuk. Dara, an malyinggyuknya nek ara, nimi somokna' gweren selenga' pik bakna' ek elegoka' ak eibsa. 9:2 Dara, somokna' gweren selenga' pika bakal yabok enyek, hyak senenggom solom enyek lom enyek anyeb goboka, heng ab, im pika nidya' ara, solom enedya guna' ok neneb lobok. 9:3 Dara ono' solom lom enyek anyeb dara, wim kweng mandebna' anyek, goboka sokok yalamek. Wera kweng gong enyek ara, hyak lok so siribna' migib enyek elegok. 9:4 Dara ono' kweng gong danyek ara, hola' ak denggunulum, gal mekla' gom, embenga' ulumla digum gom ara, denggunulum. Alda sik asok ak Imik Neyung bekna' denesina' orok nim enyek ok, delemnelum aboka orugosuk. 9:5 Wera ono' al neik kweng ek ara, nim ak obnenggunulum bok, wala' lambadya ok, oka nauba gweklenoka' aboka, igina kweiyiwanasulum aboka, hnon orugosuk. Dara, oka delemnesil ara, siribna' adya nimek si sabsin ek oka delesil sok, unu oka delemnesil. 9:6 Unu delemnesil salek era, nim ara men somogonun senewoka, elemnemak bok, somokna' ara, meka' eibnenggunumak. Anya somogeisibya senen ganya nauba bolomnemak bok, somokna' ara sikja dob salawanggunumak. 9:7 Dara kweng hogung ara, mala obdan danasa beillilimak abaksin pam hogung anaso uboka, anya pam hukuk ara, dub nang ongolomaka' meilik huk goluna' goluwoka, sikja hogung era nim hogung anaso' ak ulumek. 9:8 Sikja hong era, waran uboka, sikja si nera beigam singa si anaso' ak ulumek. 9:9 Sikja saram ara girik lagasa anaso uboka, sikja ol lak-lak ana' era, abaksin pam mandebna' gong, gliboka bolomak e yan glorum-glorum ana' eneso ak lelemok. 9:10 Dara, sikja amo era, siribna' si anaso nekesa yarawoka yu nonga' ak uboka, sikja nekesa enedya wala' lambadya dara, anadya doboka ol nebsin migib ek ulusuk. 9:11 Anya sikja dubnya bera, somokna' gweren selenga' pik amba dubnya ulumok. Alja si nera, Ibrani yub adya dara Abadon alamak bok, Yunani yub adya dara, Apolion alamak. Bok nunja yub edya dara, Soldel meneknanya henemab. 9:12 Wera men nimi loba' nenewoka osina' era an bok, ono' eimik era, penya' adya obnesiriknya nek hnon lanawanarak. 9:13 Dara hnab lero edya alja benggong lel yabok enyek, Imik Neyung bulumla' ak alsamba meilik uka daboka gibna' oulyanga bonga yaka' ulumla hnoum ab, senenggom yuba hnon lanawoka' ak kebsa. 9:14 Anya yub enedya dara, hnab benggong lebnuna' aboka salamok lero ek an, "Efrat meka lomok an lero dombadya nang henga gouboka beibsika' anyek, lobsilom," aboka lelemok. 9:15 Dara an dombadya lero nang era, ban jam ab, lika ab, wala' ab, gibna' ab, obsinoka' aboka, meebgogosuk lero nang ek wen sokok an nimi nidya' ara, winilya geboka darasam ara, obsinok aboka lobonggosuk. 9:16 Wera yin bona' nang era, abaksin pam dubuk abakdiriga yaboka' ara, denga yuba' salya' anyek, dua ratus juta aboka, einil yabasuka' ak okoka kebsa. 9:17 Hnonda lendar dib eibsa' ara, abaksin pam mandebna' ab, pam enyek an obdanoba' aboka abakamek nang hogung ak eibsa. Anya, sikja senga enegemeka' ara, goron seng eb, mirin seng eb, embenga' mekla' seng ab, enegemek. Abaksin pam hogung ara, bei gam singa anaso uboka, sikja sibama' lomok ab dara, uk ab, solom ab, yok uk boka' eb, nidya' hibmenegoka neika' goblomok. 9:18 Dara, sibama' ak ab dara, uk ab, solom ab, yok uk boka' ab goblomoka' ara, wera ban winilya obsina' damok era, sokok an ulumek nimi winilya geboka darasam ara obsik. 9:19 Wera abaksin pam migib era, sibama' ak hnon, amo ak hnon, ulumok. Dara, abaksin pam amo ara, baga' anaso uboka, huka yaka' adya, wera anedya nim unuruwa' ara olosik. 9:20 Anyek bok, an unuwoka osina' orok nim era, sikja malya unulumeka' ak ab ganya dangawanggumek. Hnonda, dangman adya hnon, mal gablena' dabom girik adya hnon, gal adya hnon, yoka'-yoka' adya hnon, memelemek sununa' ek, heng eilinggulumla', o kenggulumla', yana yabanggulumla' anyek, gibelmorulumek. 9:21 Anya sikda nim ona' ak ab, nimi guma gukoka gera dosina' ak ab, gela salana' ak ab, hoka dona' ak ab, ganya dangawanggumek.
10:1 Wera nara yok lero be hnon, hyak migib nong anyek imik heik ab golugoka yanggoka' ak eibsa. Alda deba' adya lilib ganagamookanya, mano ara alja huk dubuk geemok. Anya alja hogung era, henga dingiro lolomna anaso uboka, alja yan era, uka singilamna egomna' gal eneso' ak umok. 10:2 Dara alja sorukuk ara, mek buku kerewa' bak loroba' ak salamok. Dara alja sirik yan era, gwakna' seiriwoka nauba mek gwan eilib ingibookanya, alja waneng yan era soko eilib ingiwok. 10:3 Dara, alda yu nong ulumla singa gam edya yeiriwoka ngoublamla sok, yuba nauba bii alamok. Wenyalamok dara, sekbadya liming era yuba sab onowek. 10:4 Dara ban sekbadya liming danera, seleb yuba sabgogowek dara, nara momnya dobnuna' aboka ul yabesebok, wene salek yok yuba hnon imik heik ab, anaso wenyal yabok, "Ban sekbadya liming edya yuba sabaka' ara, gelelenga doknowoka deneb lendewanalam bok, momnya dona' ak dara, dobnenggunulam!" wenyal yaboka' ak kebsa. 10:5 Dara ono' mek gwan eilib hnon, soko eilib hnon, yan ingi seklemoka' eiyimsa lero era, alja sirik soruk era, imik sam ok weininggok. 10:6 Unuwoka alda, hyak dib hwekwa ulmoublelanya, im ab, soko ab, mek gwan ab, nidya' ane lomok ulumla' uyiwoknya bedya si sibuka, dib unuwanamna aboka anaso wenyal yabok, "Go' mabdabnenggunumla. 10:7 Dara, sek lero edya alja benggonga yuba lelemnamlya sum era, Imik Neyung adya alja wa wen nang ek hnon, ununumna' len nang enyek, seleb wenyalamok sok, Imik Neyung adya' gunuwoka' ara gigiwanamla," alamok. 10:8 Dara imik sam ab hnon, nadya yuba hnon nak lebnyoka' ara, "Biminekanya, mek eilib soko dubuk yan ingi seklelanya bedya sorukuk, bak lorob buku ulumla' anyek dobnelam," wenyhenyok. 10:9 Dara nara benyek an biniboka, mek buku kerewa' ara, nak elegounulula' aboka, alak molowasa. Wenyek alja nak, "Anera or dobmenekanya, denelam. An del yabamen dara, anja mon era sika lebnelabok, anja' si lomok ara, lusa mek anaso' anyek pe lebnamla," henyok. 10:10 Dara nara buku enyek, ban lero enedya' sorukuk ab doboka del yabasa dara, nadya' sik ara, lusa mek anaso' ak pe lebok bok, alda seleb debdaksa dara, nadya mon era, sik ok lebok. 10:11 Dara alda ono' nak hnon, "Anda yok mok soko nimi gong ek hnon, yok-yok nimi yila' gong ek hnon, yok-yok yuba salamak nimi gong ek hnon, wenesin dub nang gong ek hnon, ununumna' yuba hnon lero yibinelam," aboka oruganyok.
11:1 Wera alda wira anyek, sununa' gama' anaso' ak, nak elegoka, "Bimenekanya, Imik Neyung e ab, uka daboka gibna' oulyang eb, e lomok wekoka giblemeija nim eb, danyek sunuwanalam aboka oruganyok. 11:2 Bok geisa e nedya eremek sam anyek hnonok, alda yok-yok mok soko nim ek seleb elegookanya, sikda eimik era geisa heik era wala' anyek denga hnonok uboka, ebdobnya meija dara' badya yana ingil sablemnemak anasa, anera sunuwamenek, mem," hyok. 11:3 Anya nara nadya penya pe laga len nang ek ara, sikenek migiba' ak hnon eleganasin. Anedya sikda engena' ganya boboka, liga seribu dua ratus enam puluh sum ununumna' lelemnerak. 11:4 Wera sik an nang era, Zaitun gal penya ab, uka dinina' penya ab dara, Wenelesilnya nidya' im soko yangawoknya bedya saramek sam uluraka' ara an. 11:5 Dara nimi hnon sikenek waboka obnesina' anaso ubnesak dara, uk ara sikja sibama' ak ab goblyekanya, sikja isa' nang era, bolowoka denemla. Anya nimi hnon sikenek ganya oka delesulul senewoka, yoka' unuwanaseng dara, sikbabya unuseng diliga' pik enedya somoganaseng. 11:6 Sik ununumna' lelerija salek era, moka yalyek aboka dara, imi serekna' migib era sikenek ulumnesilikanya, sikda meka nidya' enenga nenewanasereng migib eneba sikenek ulumnesil. Dara sikja soba' seiniwoka an unuwanom senelerija dara, sokok anera yok-yok malya damok edya waboka obnoma' aboka, sikenek unun migiba' ulumnesil. 11:7 Wera sikda penya laga len nang era, seleb wenyabgogoweirija dara, yok embenga' gamyaka' yu nong ara, somokna' gweren selenga' ak ab lanawalyakanya, sikenek we doboka oblamageisilyekanya, obnesil. 11:8 Dara sikja be' era, senenggom heik yabalamak pikek, Sodom, Mesir aboka sunuwoka silimak heikek anyeganyeba' ara, sikja Wenelesilnya be oboka glabameija' heikek an beibnemak. 11:9 Wenyek sikja nimiguma' yok-yok unulumak nim eb, sik yok-yok nimi yila' ulumaka' ab, sik yok-yok yuba salamak nim eb, sik yok-yok mok soko ulumak nim eb dara, sikja be' era, liga winilya gobdo uboka, lika hnon bok loboka mablyebok eibnemak. Bok ban nim en sikenek ara, nim danedya be' nera diba' doboka soko lokmunuk mem, henemak. 11:10 Dara nidya' soko anam ulumeija nim era, ban penya ununumna' len nang emba, sikenek malya nenewoka ol neblesirija' anasa leboka, wera sikenek pewarek aboka eiya hlaboka, ganya hekna' diba' ak hnon, elegeldalamnamak. 11:11 Bok liga winilya' uboka, lika hnon bok loboka maboka' seleb dara, embenga' una' hiba' ganya era Imik Neyung bek ab, sikenek diba' wekel yousuk. Dara anedya sikda embenga' suboka bukdek. Dara nimi nidya' sikenek eibsik nim era, hyak nauba loka dabsuk. 11:12 Dara ban penya nang era imik heik ab sikenek, "Or wele yanggururum!" aboka bii al yabasuka' anyek kebdek dara, sikja isa' nang era ngolugul yabisik salek, sikda deba' ganggan pik uboka, imik heikek welewarek. 11:13 Wera ban salek nong era, senenggom sogouma' dorogoka, senenggom heik era sagobadya amba anaso' bokoka, luk menegookanya, sogouma' enedya dara, tujuh ribu nim obsuk. Dara, oboka bok lobok nim era, hyak loka daboka, Imik Neyung imik heik ululanya bek giblemek. 11:14 Dara penenya loba' nenewoka osina' ara, seleb dongowom al bal bok, wera ono' winilinya nera berra yanggala' anyek, kendelom. Yuba 11:15 Dara sek lero era, alja benggong lel yaboka' enyek, imik heikek lomok ara nauba yuba saro, banaso wenyalamek, "Sokok an wenen yub ek dara, nunja Wenelesilnya Imik Neyung bedya, alja sekiyimoknya Kristus bedya hnon, danamlakanya, alda dubnya wenesinya dangoka hyak soba' wenelmorulumnesil," wenyaro balamek. 11:16 Dara ono' nonga kaboka wa borob nang domdara' badya nang era, sikda Imik Neyung saramek bulumek nang, anya sikda oumuwoka Imik Neyung ak giblemek. 11:17 Anya banaso wenyaboka giblemeka' ara, "Ai, Imik Neyung, hyak migib nongnya, seleb ululumukanya, weneba ululama' anasa, nunda gibildolonjab. Anya anda anja migib nong senenggoma' anyek doboka, seleb dubnya wenesinya dangoka einiwoka wenelesilima' anasa, giblenjab. 11:18 Yok-yok mok soko nim era, yu ganya bolomek bok, anja yu ganya era, seleb yal. Dara seleb somogek nim emba yana lelesin salek era, seleb dal. Anya anja wa wen nim era, ununumna' len nang eb, muna' Imik Neyung mab ab, anja si nek lok ganya boboka ulumak nim eb, dekna' eleksin salek seleb dal. Nimi mek nang eb, senenggom nang eb dara, nidya' hiboka eleksin salek era, seleb dal. Dara sokok malya nenewoka unun nim ek, malya nenewoka osin salek era, seleb dal," wenyalamek. 11:19 Wenyek Imik Neyung bedya e imik heikek ara, bak lobookanya, alja orowek mem golonga' era, seleb laga dookanya, ebna' ab, liming yub gururu ana' ab, sogouma' ab, saragena' mok dok ab, anera nauba ul yabok.
12:1 Wera imik ara yoka' ak hyak senenggomokanya, okna so bekna' ubuka' ak eibsa. Dara, gela hnon, alda heing einira boksom diba' ongowoka, wala' ara yan damumduk geboka seklemok. Anya alja hukuk ara, dub nang edya gouluna' enyek, gura' o badya uruwa' ak goulumok. 12:2 Wera ban gel gera me bomookanya, beibnamen salek anasa, alda me juga gweklemok. 12:3 Bok ono' imik ara, yokso bekna' anyek, lanawok. Wera anera, naga baga' gorona senenggoma' huka sekbadya uboka, bonga sagobadya umok baga' ek lanewok. Dara, huka yok-yok, dub nang huk gouluna' anyek goulumok. 12:4 Anya, alja amo edya imik umok gura' olola' era, winilya geboka hnon sam legewoka sokok boroboublinggok. Anya, ban naga baga' era, alda me beillil yabelya salek enyek, doboka menegounun senewoka, gel gen saramek oka diri seklemok. 12:5 Bok gel gera nengma ak, nimi mok soko ulumak nimi nidya' ak, besi gama' adya bomlyekanya wenelemnesilnya bek beibok. Bok beibok salek era, me nera gel genyek anyeb alawoka, Imik Neyung bek, al bulumoka' ak bo byuk. 12:6 Dara gel gera Imik Neyung adya anyagan ulumnamla senewoka orowek mememlya' ak, egenya' ok maro lomlya sokok yeiri bilimok. Dara, alda anyeganara liga seribu dua ratus enam puluh sum arawoka bo ublul aboka bilimok. 12:7 Dara wera, imik heik ara mala lanabdek. Wera Mikhael beb, alja lero nang eb dara, ban naga baga' ek, mala lanawoka obdang einiwek. Dara ono' ban naga baga' enebabya, alja lero nang edya arawoka, Mikhael bek mala boboka oldalamek. 12:8 Bok ban naga baga' era, alak sam ara oblamageisik. Anedya, alab alja lero nang eb dara, imik heik un oulyang era, hnon alawanggubek. 12:9 Dara ban senenggom naga baga' era sokok yakdo boblenggok! Wera ban wisa youma' baga' era, nidya' sokok an sonda' leboka malya' geblamla', alja si nera Iblis hnon, Satan hnon aboka si silimak ara an. Alab, nidya' alak aralemek lero eb dara, sokok an unu boublinggosuk. 12:10 An nen seleb dara, nara ono' imik heik ab yuba hnon nauba lel yaboka' ak kebsa: "Wera ban nunja hemyab ek, yubyek inimnek Imik Neyung bek miniwoka, meknelum alalanya bera, imik heik ab seleb boublinggal anasa, Wenera Imik Neyung ara alja nimi blebsin salek! Wenera Imik Neyung ara dubnya wenesinnya bemba alja migiba' laga dal salek! Anya ono' alja bokol yeilisuknya, Kristus beneba alja wenesina' laga dal salek! 12:11 Dara nunja hemyab era, domba me eneng adya hnon, dib yub ak hnon, sikja laga lelemeknya nenedya, alak oblamagamek. Sikda sik nong anaba, or somogamnya anaba senewoka seleb unuru yabalamek nang. 12:12 Wera anasa, imik heik ab, ane lomok nidya' ulumunya nera, eiya hlaboka globlulum! Bok bisa' dubnya Iblis ara, seleb yinggila' anasa, sokok mekek ululum nang nidya' o, hyak loba' nenewoka obnesila' ak ululum. Iblis ara unun salek era seleb mek ok ubla senewoka seleb ella ublakanya, hyak yu asa' ganya bolomla," wenyaboka lebok. 12:13 Dara, ban naga baga' era, nara sokok an seleb boublingganyo senewoka seinimok dara, alda ban nengma beiyimlya gel genyek yeiriwoka dobdibigomok. 12:14 Bok ban gel genyek ara, naga baga' adya berewanamla danyek, hwalek mok, egenya' ak sokok, lak-laka biniboka, pe murugoulula' aboka, senenggom weidya wining edya oll enyek ongiyiwok. Dara anyaganara gibna' winilya uboka, wala' hnabbadya bo ublul aboka unu mememok. 12:15 Dara ban naga baga' era, ban gel genyek meka boblul aboka, alja si bama' ak ab, ililamla mek anaso anyek gel genyek sam larara dorogok. 12:16 Unuwok bok, soko ara gel genyek arawok. Arawoka' ara, soko ara lek loboka, ban naga baga' edya larel yabok mek enyek, dobom-doboma menegok. 12:17 Unuwoka' anasa, ban naga baga' era hyak yu nong berewoka, gel gen nimi yila' yok nim ek, Imik Neyung adya oruksin yub pe keboka unulumek nim eb, Yesus adya laga lena' bolomek nim eb danyek, waregoka norowousuk.
13:1 Unuwoka, ban naga baga' era, nauba longon mek berem sokok diri seklemok. Dara nara ono' kendesa enyek, hnon gamyaka' yu nong anyek, nauba longowok mek gwanek ab lanawoka' ak eibsa. Banera, bong ara sagobadyakanya, huk ara sekbadya ak lanawok. Anya ban bong ok ara, dub nang huk gouluna' anyek yok-yok goluwookanya, ban sekbadya hukuk ara, Imik Neyung ak waboka derena' si anyek, yok-yok ulumok. 13:2 Ban mek gwanek ab lanawoka' ara, nadya eibsa dara, senenggom bei girik mana' senenggomnya neneso' ak eibsa. Alja yan era nauba mana', juenem mana' yana anaso. Anya hogung ara nauba yu girik mana', singa mana' anaso. Dara ban lanawoknya nek, naga baga' edya, alja migiba' ab, perob ekla dub nang edya buna' ekla eb, migiba' dangoka wenesina' ab, damok danyek elegok. 13:3 Banera, huk ara sekbadya bok, hnonnya nera menenga' adya hyak nauba meilimla senena' bok, seleb nibdangamok. Dara, soko nidya' ara banyek, ganya hyak lokja senemeekanya, wera anyeblaboka neika' balamek. 13:4 Anya naga baga' edya, banyek alja migiba' uboka ununa' anyek seleb elegemok anasa leboka, sikda naga baga' ek an giblemek. Bok ono' hnonda banyek hnon, sikda giblemek. Anya sikda, "Banera hyak yok nong! Alak ara asa' ganya boboka, hnon alab obdanggunuseng!" wenyaboka lelemek. 13:5 Dara, ban yu nonga' ak ara, wera anda nonggo aldana' yuba gom, Imik Neyung ak deren yuba gom, or salalom, wenyaboka lebgogowok. Ono' hnonda, liga empat puluh dua wala' anaso or wenewoka ubnesilim wenyaboka lebgogowok. 13:6 Anya alda, Imik Neyung ab, Imik Neyung si ab danyek derewoka, malya' gebeyiwok. Hnonda, Imik Neyung ulumla ol eb, imik heik ulumeijinya nidya' ara derewoka walamok. 13:7 Hnonda ono' alak, anja muna' Imik Neyung mab ek mala boboka obdangoka, sikinek oblamaganasilim aboka migiba' elegok. Anya sik yok-yok nimi yila' ulumaka' ab, sikja nimi guma' yok-yok unulumak nim eb, sik yok-yok yuba salamek nim eb, sik yok-yok mok soko ulumak nim eb dara, alak yeiriwoka unuru yibinilam aboka unun migiba' elegok. 13:8 Dara ban yu nonga' ak ara, sokok an ulumak nimi nidya' ara, alak giblemnemak. Bok anam soko uyiwanggom salek enyek ab moruwoka orob domba me alja' nim embenga' un buku lomok sam si unggulumlya nim era, ban yu nonga' ak giblemnemak. 13:9 Wera anasa, heknedya o yak dara, or keblul! 13:10 Nimi hnon doboka doknowanamaknya bera, wera al unuwanamak. Ono' nimi hnon mala adya obnamaknya bera, wera mal adya obnemak. Wera an unuru yibinamla' anasa, muna' Imik Neyung mab ara, ganya siklebmouboka, ganya gouluwoka bojam un ganya enyek bobnok. 13:11 Dara hnon yoknya, ban yu nonga' ak ara, sokok ab goboka lanewoka' ak eibsa. Banera domba' me anaso anyek, bonga penya uboka, alja yuba sana' ak dara, naga baga' yuba anaso ak salamok. 13:12 Dara ban eimik an yu nonga' edya, ban mennya nek ab yeiriwoka unun migiba' doboka, mennya nemba arawoka welemok. Dara, soko dubuk an ulumak nimi nidya' ara, ban men yu nonga' edya menenga' diliga' nauba bok, seleb nibdangemlya' ak an hyak elel nong bok, giblelulum aboka, eimiknya nedya orugosuk. 13:13 Wera ban penenya gamyaka' era, hyak ganya lokja senewoka, loka dabnoka' aboka, ganya en mablul aboka dara, yoknya-yoknya unuru yabalemok. Anya nimi hogung ak ara, alda uk anyek, imik ab ara, sokok an gliboka bo dil yinggyuk. 13:14 Dara, ban eimik yu nonga' enedya, lok so bekna' diba' alak elegok adya, men yu nonga' amba leboka, loka dabsina' unuru yabalamok adya, ban sokok an ulumeija nimi nidya' ara, bobnenewoka ubsuk. Hnonda, ban men yu nonga' era, oldan gab edya menenga' diliga' hwam bok, or ulumlya' anyek, alja nonga sunuwoka memena' ara, galak girikek gom meewoka sekiyiwolulum aboka orugosuk. 13:15 Anya ono' penenya yu nonga' ak, ban nonga sunuwoka memena' ak an, embeng un hiba' elegolul aboka, migiba' anyek elegok. Anedya banera yuba saboka ubnamlakanya, nimi nauba ban sunuwoka memena' ak an, gibnenggunumak nim era, obnesil aboka un hiba' ganya enyek elegok. 13:16 Dara nimi, meknya naubenya gom, bona' dub nang garen nang gom, wa wennya oruksinya gom nimi nidya' ara, ban gamyaka' enedya, yoka' anyek, bekna' diba', ugunja soruk gom, asok ok gom, beiblulum aboka orugosuk. 13:17 Anedya nimi hnon, ban yu nonga' adya si gom, einin momnya dona' an bekna' diba' si unggulumlya nim era, yoka'-yoka' anaba dekoka, ono' deknok senewoka beilina' anaba, hyak unuwanggunumak aboka, anera unuwosuk. 13:18 Anasa, nunda geremseng uboka, pe seinin ganya enyek, bobnemab. Ban yu nonga' adya einin momnya dona' era, be hnonja ella donun aboka, geremsenga' ganya ulumso dara, or sunuwoka pe einiwolul. Wera, alja si nera, einin momnya dona' edya webnamla' ara, enam ratus enam puluh enam ak gegewoka momnya dobnamla' ak ulumnamla.
14:1 Ono' nara kemedesa enyek, na saramek sam ara, domba me ara Sion meinik seklemoka' ak eibsa. Wera alablaboka dara, alja si ab, alja nei bedya si neb, sik asok ok momnya dorob nang era, seratus empat puluh empat ribu nang ab neika' seklemek. 14:2 Anya ono' nara, nauba mek lumdam yuba ollallek alamla anaso ab, senenggom liming yub anaso ab hnon, imik sam ab unuru wenyalamoka' ak kebsa. Ban yub en sana' ara, nim adya henga nauba geregoka doblemak benggong yub eneso' ak lelemok. 14:3 Hnonda senenggom dubnya bedya ekla buna' saramek ab, gamyaka' dombadya ab, ono' nonga kaboka wa borob nang eb, sikja' saramek sam ara, ban empat ratus empat puluh ribu nang edya, wenyok bera doboka seblemek. Ban ber era yok nang edya dara, ella dangoka sebnenggunuseng bok, alda seratus empat puluh empat ribu nanga, sokok anyeb seleb dekoka blebsuk nang edyok, seblemek. 14:4 Ban nang era, sikda gelewa ab neika' unggulumek nang. Sikda anam goubunya ulumna gel, nengmab adya hnon anam salawanggumna' gel geneso' ak ulumek nang. Anya ban domba me ara, yokok yabalamna' nidya' ara, sikda neika' ok balamek. Hnonda sokok an ulumak nimi nidya' ak ab dara, sikinek hnonok muna' dekoka, Imik Neyung bek ab, domba me ak, mennya elekna' diba' gebsuk nang. 14:5 Dara, sikenek ara sonda' lena' meka' sibin anaba hnon lenggulumeekanya, sikda meka' gegena pona' orok nang ek ulumek. 14:6 Dara ono' lero be hnon, hyak imik nongok gwebdo yabalamoka' ak eibsa. Dara ban lero era, perob lero yanggan ulmoubna' yuba nimi sokok an perob yuba siksamba wenyhusunun aboka yok. Dara, sik yok-yok mok soko ulumak nim eb, sik yok-yok nimi yila' ulumaka' ab, sik yok-yok yuba salamak nim eb, sikja nimi guma' yok-yok unulumak nim eb, hyak nidya' dumunga ab, ban nidya' ara yok-yok bok, perob yuba siksamba wenyhusunun aboka yok. 14:7 Anya ban lero era, bii aboka, "Imik Neyung adya nimi yana lelesin salek era, seleb yala' anasa, Imik Neyung ak lok ganya boboka, alja' si imik nenewoka, alak geklewoka giblelulum. Anya al im ab, soko ab, mek gwan ab, mek lu nidya' uyiwoknya benyek, koma lumugoka giblelulum!" wenyaboka lebok. 14:8 Dara ono' penenya lero hnon, men lero ek dolgounul yeindeboka leboka' ara, "Seleb malyinggil! Ban Babel heik senenggoma' ara, seleb malyinggil! Alda yok-yok mok nimi nidya' ak, alja malya ulumoka' adya, Imik Neyung ak yu sen-sen ana' nenewoka, alja alak igina kwena' ara, ono' sikenek nidya' benewosuk ak ara, wera seleb malyinggil," wenyaboka lebok. 14:9 Dara ono' winilinya lero hnon, ban men penya lero ek dolgounul yeindeboka lebok ara, "Yu nonga' ab, yoka' anyek al nonga sunuwoka mememeka' ak, giblemak nim era, alja bekna' diba' sikja asok ok gom, sorukuk gom, ulumlya nim era, 14:10 Imik Neyung adya yu sen-sen ana' ara, seleb orowek beiyimlya' anyek, hnon meka' namena' nenena' orok anyek, dobnemak! Ban dobnemak nim era, geisa lero nang ab, ban domba me ab, sikja saramek sam, uk mek adya birim-birim aboka singilamlya' lomok, loba' nenewoka gweklemnemak. 14:11 Anya ban nim en singilimnamla uk solom era, hyak sob-soba' lo welelemnamla. Hnonda, ban yu nonga' ab, yoka' anyek al nonga sunuwoka mememeka' ak, giblemak nim era, alja bekna' diba' sikja asok ok gom, sorukuk gom, si nen ulumlya nim era, sikda yubyek inimnek hnon dek-deka sona' orok anyek, soba' gweklemnemak," wenyaboka yuba yallebna' leboka wenhyok. 14:12 Wera ban unuwanamla' anasa, muna' Imik Neyung mab ara, alja oruksina' yub ak pe keboka, Yesus ak bojam ganya boboka ulumak nim era, ganya siklebdaboka ganya gouluwoka pe salawoka ulunok. 14:13 Wera an seleb dara, imik heik ab hnon leboka' ak kebsenya nera, "Banyek nidya' momnya dobnelam: Wenyok ab mouruwoka, sik Wenelesilnya lomok uboka somoganamak nim era, pe ulumnamak!" aboka lebok. Dara, Imik Neyung Geisinya ara, "Aldib!" hyok. Hnonda, "Sikja igina berewoka welemeknya nera, jakmana' danamlakanya, sikja welemeka' amba dara, dekna' dobnemak," wenyaboka lebok. 14:14 Nen seleb dara, hyak geisa nong deba' enyek laga doka' ak, nara hnon eibsa. Dara, ban deba' en dubuk ara, nim anaso' ak, be hnon bulumok. Wera alja hukuk ara, dub nang edya huk gouluna' emas adyok mememeka' ak goulumookanya, alja' sorukuk ara, hola' hlen parang hyak hleb aleng-aleng aroba' ak salamok. 14:15 Wera ono' yok leronya be hnon, Imik Neyung e lomok ab gobdo dorogoka yibuk. Benera alda yeiriwoka bii aboka, ban deba' dubuk bulumoknya bek an, "Soko ara hwiboka, yongowamen salek anasa, anja hlena' parang salalama' adya, or hlero yabamenekanya, or yongowonggalom!" wenyaboka lebok. 14:16 Dara ban deba' dubuk bukumoknya bera, parang sokok an hyablemok enyek, soko ara nonga yongowonggok. 14:17 Wera an nen seleb dara, yok lero be hnon, Imik Neyung bedya e, imik heikek ab, goboka' ak eibsa. Ono' albabya yu parang ek salamok. 14:18 Dara ono' yok lero hnon, uka bo ulumoknya bera, uka daboka gibna' oulyang ak ab yok. Dara, alda paranga salamok lero ek yuba migiba' leboka, alak, "Anggur dok ara seleb eng olomla' anasa, sokok an anggur era parang adya garawoka, dakdo balalom," wenyaboka lebok. 14:19 Dara, paranga salamok lero era, ban anggur danyek, garawoka dakoka Imik Neyung adya yu sen-sen ana' londena' ak, bo borobowogok. 14:20 Dara, ban anggur galdok londena' ak ara, heik gogobok londelemeka' ak ara, anyaganyeb eneng ara mek anaso' anyek, mok so ara tiga ratus kilometer anaso uboka, lomok so dara, dua meter anaso ma yabalamok.
15:1 Wera ono' hnon imik sam ara, yoka' hyak omoma' yok so anyek, lanawoka' ak eibsa. An eibsa' ara lero sekbadya nang, malya damok ok sekbadya, sidya' obnesila' anyek, yok-yok bomek. Anya Imik Neyung adya yu sen-sen ana' hyak dengaboka obnesila' ara wera an. 15:2 Nen seleb dara, yoka' ak hnon, gwan mek ak heng kemeldana' anaso ab, uk boka' ab, an penya anera hiboka neika' ulumoka' ak, nara eibsa. Dara ban mek gwan anaso gemek ara, yoka' anyek yu nonga' al nong anaso sununa' ab, alja einin nomor si ara enam ratus enam puluh enam ab, anya anyek oblamagamek nang ek seklemek. Dara ban oblamagamek nang era, Imik Neyung adya sikenek benggong elegesuka' ak, bo seklemek. 15:3 Dara, Imik Neyung wa wenya Musa beb, domba me ab, sikja seblemek bera era anaso: "Imik Neyung, hyak migib nongnya ululam. Anja unululama' ara hyak omom nongokanya, hyak senenggom! Nidya' mok soko amba wenewoka bo uboka, senenggom dubnya ululam. Anja unulusilima' ara pe bekna' sunuwoka, yana lelewoka, perob ok unululamnya. 15:4 Anasa Imik Neyung o, heknedya anak ara loka dabnenggununggeso do? Ono' heknedya anja si imik nenewoka gibnenggununggeso do? Anasa anak ok hyak geisa nong ak ululam. Hnonda anja yuba saboka memena' anyek, nimi seleb nauba eillilimak anasa, yok-yok mok nimi nidya' ara, anak gibil yalemnenjak," wenyaboka seblemek. 15:5 Wera nen seleb dara, imik heik ara, Imik Neyung adya e lomok, alda sik gangganek ulumok an bekna' e nenyek, pika bakoka' ak, nara eibsa. 15:6 An unuwok dara, ban sekbadya lero nang era, an sekbadya sidya' obnesil damok en boboka, ban lomok geisa ek ab gobek. Wera sikja ongomek boksom era melela' bobogoka, hyak namenoka' sembeja' orok boksom ek ongomek. Dara, sikja sara' goukwa norona' era, emas adya wimek ak ongomek. 15:7 Dara, ban gamyaka' dombadya anera, hnonnya nedya ban sekbadya lero ek, emas mek hmeiya sekbadya doboka elegosuk. Ban sekbadya mek hmeiya era, Imik Neyung hyak soba' ulmoublelanya, alja yu sen-sen ana' adya deknewoka beiyimok. 15:8 Anya, ban Imik Neyung e lomok ara, Imik Neyung adya migiba' ab, alja melela' senedya' ab dadya, uk solom anaso ak weleldo lobok. Anasa, ban sekbadya sidya' ona', sekbadya lero nang edya bomeka' ara, anam nidya' gigiwanggom dara, nimi be hnon sibin anaba, ban geisa e lomok ara weknenggunumak.
16:1 Wera ono' nara hnon kebsa enyek, Imik Neyung bedya e lomok ab, ban sekbadya lero ek, "Bindewoka ban Imik Neyung adya yu sen-sen ana' beiyimla' anyek, mok soko eilib yekel bululum," wenyaboka yuba migiba' leboka orugoul yabasuk. 16:2 Dara men lero era bindewoka, alja bomoknya nera, mok soko eilib yekok. An unuwok enyek, ban yu nonga' adya alja yok bekna' diba' ulumok nim eb, yoka' anyek alja nong anaso sununa' ab danyek, giblemek nim era, soroka mouboka yamawousuk enyek, ok adya hyak nauba gwekdo balamek. 16:3 Ono' penenya lero era bindewoka, alja bomoknya nera, mek gwan eili yekok. An unuwok enyek, mek gwan ara, somogamna nim edya eneng eneso' ok dookanya, yoka'-yoka' mek gwanek uru yabalamla' nidya' ara somogok. 16:4 Wera ono' winilinya lero era bindewoka, ma yabalamla mek eilib ab, mek lu nidya' ab, alja bomoknya nera, an eilib yekdo bobogok enyek, meka nidya' ara eneng ok dok. 16:5 Wenyek mek ak bo ulumok lero era, "Hyak geisa nongnya bek ululam, hnon anja boublinggalem igin kwena' era, pe bekna' sunuwoka ublam. Wera anda Imik Neyung bek ululamakanya, seleb orowek dib hweko ululam Imik Neyung. 16:6 Dara sikda muna' Imik Neyung mab ab, ununumna' len nang enenga seleb yek menegek anasa, anda wera sikbabya ono' eneng anyek deb eleganasilim. Ban enenga dena' ara sikinek dara, hyak domdigum nong!" globoka wenyaboka lebok. 16:7 Hnonda uka daboka gibna' oulyang edya lel yaboka' ak ab kebsenya nera, "Imik Neyung, Imik Neyung, anda hyak migib nongnya, anja igina kweldina' boro boublinggalama' ara hyak bekna' sunuwoka, perob ok ublam!" wenyal yabok. 16:8 Wera nen seleb dara, ono' dom lero era, ban alja bomoknya nera, heng ak yamaro bobogok enyek, heng ara poba migib nong adya, nim ara uka singiro balamok. 16:9 Dara nim ara, ban poba enedya yalegoka sesero byuk. Hnonda sik Imik Neyung si, ban igin damok bo uboka ululanya bek, derewoka malya' geblemek. Wera an unuwosuk bok, sikda sikja malya una' ak ab, ganya dangawoka Imik Neyung senenggomnya ululanya bek ara, gibnenggulumek. 16:10 Dara ono' lam lero era aljinya ban yu nonga' adya ekla buna' ak yamaro bobogok. An unuwok enyek, ban alja wenewoka bo ulumok mok era, guna' ok dok adya, nim ara si silyum sabdangoka, ok anasa nauba gweklemek. 16:11 Wera an unu oka deregoka, soroka mouru balasuk dara, sikda Imik Neyung ak derewoka waboka ulumek. Anababya, sikda sikja yu hwam uboka unun malya una' ak ab, ganya dangawanggumek. 16:12 Nen seleb dara, hnabnya lero era, alja bomoknya hyak nauba mek Efrat mekek yekdo bobogok. Unuwoknya nera, yali sam ab wenewoka bo un nang dub nang enyek mek en dalawalya pik an yanok aboka unuwok. 16:13 Dara yu hwam una' ganya winilya enyek, hyeiya anaso' ak hnon eibsa. Ban hyeiya era, naga baga' edya si ak hnon, yu nonga' adya si ak hnon, sonda amba bobnenewoka len nang edya si ak hnon, goboka lanawok. 16:14 Wera ban hyeiya anaso' ara, hyak yu hwam una' ganya enyek, yoka'-yoka' mengewoka unuru yibilimek. Dara ban winilya ganya yu nong era, nidya' soko me bilimeekanya, wenewoka bo un dub nang ek, Imik Neyung hyak migib ululanya bedya senenggom sum enera, obdanok aboka, mamagiyiweisik. 16:15 Wera keblulum! Nara hoka' donya beneso' ak yanamna! Alda nong baneng yibinya' adya, nimi hogung ak alya dabnelyek aboka dara, alda pe diri uboka, alja boksom pe keeboka bo ululanya bera, hyak pe ulumla. 16:16 Dara alda, Ibrani yub adya dara, Harmagedon alamak olok, sik dub nang era, anyagan mamagiyiweisik. 16:17 Nen seleb dara, sek lero era alja bomoknya nera, salya' imik yamaro bobogok. An unuwok salek, Imik Neyung adya ekla buna' ak ab, "Seleb sidya' dakla!" wenyaboka yeiriwoka lel yabok. 16:18 An wenhyok sab-sab, liming yub ab, ebna' ab, souguma' ab dara, borom-borom aboka, hyak yok so dok. Anya ban souguma' era, nimi uyiwousuk salek ek aba' ara mouruwoka, hnon anaso souguma' era, oroka' ak unuwok. Anasa hyak yok so' ak unuwok! 16:19 Dara ban nauba' soboka ulumek heik era joboka, winilya gebookanya, soko dubuk an nauba solomek heik eneba, soldowoka urub-urub hyok. An unuwok ara, hnonda Imik Neyung ara Babel heik amba, ganya bekokokanya, alsamba Imik Neyung adya yu sen-sen ana' anggur mek enyek memewoka elegok. 16:20 Hnonda mek dubuk soko era dengaboka, mok soko meini nidya' ara orok dok. 16:21 Anya saragena' mok doun nauba' anyek, alja igin era lima puluh kilogram anaso' ak, imik ab ara, nimi eilib ak siklero yibok. An unuwok enyek, ban nim enesa leboka, Imik Neyung ak derewoka hyak malya' geblemek.
17:1 Wera nen seleb dara, ban sekbadya lero nang era, sekbadya nimi somogollisina' bomek nang era, ben hnon nak yeiniboka, "Salya' dongolamla gel, mek gong hnoum bulumla gel genyek, heka' huru obnamla' anyek anak amawanenggena' anasa, yalom. 17:2 Sokok an bo uboka wenesin nang era, alak nauba salawoka, ono' sokok an ulumak nim era, ban alak salana' ganya edya uu aro yabalamak," wenyaboka lebnyok. 17:3 Dara nara Imik Neyung Geisinya adya gologanyookanya, lero enedya hola' sekna' orok mok bo binyok. An bo binyok ak ara, gela hnon yoka' yu nonga' goron houm-houm aroba' eilibik bulumoka' ak eibsa. Anya ban yoka' yu nonga' ak anera, Imik Neyung ak geklewoka walameka' si gong-gong momnya enyek domeka' anyek ulumok. Wera ban yu nonga' ara, huk ara sekbadyakanya, bong ara sagobadya bogomok. 17:4 Dara ban gel gera, goronoka' houm-houm aroba' hnon, imengen gwaneng bunduk anaso boksom hnon ongowoka, emas ab, meilik ab, dangman ab, bona' danyek urugoka, gereng yaleng amok gel gek bulumok. Dara alja sorukuk ara, alak salawoka ulumeka' hyak malya' sembeja' enyek, emas adya mek hmeiyek sala bulumok. 17:5 Dara alja asok ok ara, yok si gunuwoka sin si nenyek momnya domek. Ban unu momnya domek si nera, "Babel heik hyak senenggom nong heik era, nimi sokok an malya dangoka, salya' dongon gelewa sikja' genong genya'!" wenyaboka webemek. 17:6 Dara ban gel gera, muna' Imik Neyung mab uboka, Yesus amba laga leboka ulumek nang, sikja eneng enedya, yu meka demna anaso' anyek, ganya uu aro bulumoka' ak eibsa. An gel gen eibsegab dara, nara omom uboka hyak loka dabnyok. 17:7 Anasa ban lero era nak, "Anda hekasa omom ganya bololam do? Wera anasa nara anak, ban gel gera, alda hek gel ge ulumla' ara, al yok yu nonga' enyek, alak abagamoka' ara, huk ara sekbadya ubookanya, bonga sagobadya bogoka' anyek, neknenggen. 17:8 Ban yok yu nonga' eiblama' ara, men dara ulumok bok, wenera unggulumla. Bok, alda somokna' gweren selenga' lomok ab gobnamlakanya, ono' somokna' ak sam binimla. Soko an anam uyiwanggom enyek, sikja si embenga' un buku lomok momnya dobnenggubsuk nim era, ban yoka' yu nonga' ara, men ulumok bok dengamoka' ara, ono' lanawanamla' anyek eibnemak dara, hyak lokja senewoka ganya omom uboka loka dabnesil. 17:9 Anasa, geremseng un ganya boboka beknemaka' ara ban. Ban huka sekbadya' ara, gel gen bulumla meina sekbadya ulumla' ara an. 17:10 Dara, sekbadya wenewoka bo usin dub nang ulumaka' ara, lambadya dara seleb malyinggik. Anya ben hnonda or weneba bo ulumlakanya, ono' yoknya be hnonda anam yanggom. Bok yalya dara, alda or meka' ok ubnamla. 17:11 Dara, ban yok yu nonga' youma' men ulumok bok, wen unggulumla' ara, wenewoka bo usin dubnya linnya bera an. Ban benera sik sekbadya nang en ulumek sonya bok, alda somokna' ak binimla. 17:12 Dara bonga sagobadya' eiblama' ara, sagobadya wenewoka bo un dub nang, anam wenggulusak nang era an. Bok sikda ban yok yu nonga' ab neika' wenewoka bo ubsinok aboka, wene salek ok ban wa nera eleganesil. 17:13 Dara ban sagobadya dub nang era, sikja unuwanamab senewanamak ganya era neikik hnonok ganya ok bobnemak. An ganya era, nunda ban yok yu nonga' ak migiba' ab, dub una' ab, danyek alak eleganamab senewanamak. 17:14 Anya sikda domba me ak mala boboka oldalamnamak. Bok ban domba me ara nidya' wenelesak nang sikja senenggom Wenelesilnya ulumnamlakanya, nidya' dub nang dubnya ulumla' anasa, alab, sikenek weboka doboka alak bojam ulumak nang eb dadya, oblamaganamak," wenyaboka nekenyok. 17:15 Anya hnonda lebokja, "Ban eiblam mek gong dara, gel gen bulumla mek danera, sikja nimi guma' yok-yok unulumak nim eb, sik nimi dumunga yok-yok ulumak nim eb, sik yok-yok mok soko ulumak nim eb, sik yok-yok yuba salamak nim eb dara, an. 17:16 Dara, bonga sagobadya eiblama' ara, ban yoka' yu nonga' ab dadya, dongon gel gek hyak lek senewanamak. Hnonda sikda alja heka' ok alak ulumlya' nidya' ara doboka, nong baneng nenewanamak. Anya, alja nong soub era gweboka deregoka, ono' uk adya dengaboka dabnemak. 17:17 Dara Imik Neyung ara, alja senelamla' gigiwoka unuwanamak aboka, sikja ganya lomok ara, unuwanok senen ganya enyek beibsuk. Anedya sikda neik ganya boboka, sikja wenesin migib era yoka' yu nonga' ak eleganamab ganya era hnon elegosuk. Wera anedya, Imik Neyung yuba nidya' ara, gigiwoka unuwanamla aboka unuwok. 17:18 Hnonda ban eiblam gel gera, sokok sam an dub nang wenesin dub heik era al an," wenyaboka neknyok.
18:1 Wera nen seleb dara, lero be hnon imik heik ab yinggyuka' ak, nara eibsa. Alda senenggom migiba' yaknya uboka, alja senedya' era, soko nidya' dilina' ok ub lobok. 18:2 Dara alda yuba migiba' nauba bii aboka, "Seleb malyinggil! Ban Babel nauba heik era seleb malyinggil! Anya, wenera bisa' gong danyeb, yu hwam ganya adya un oulyanga dal. Anya ane lomok an nidya' ab, hyak malya anasa lek senelemak wining gong eb danyek, ulumak. 18:3 Dara, yok-yok mok soko ulumak nim era, alja salya' salaleneseng ganya anggur mek enyek, seleb sikda jek. Hnonda sokok an wenewoka bo un dub nang eneba, alak salya' salawoka, sokok an bona' dekdo yaben nang eneba, alja salya' salaleneseng ganya youruk-youruk ana' enedya dub dangamek," hyok. 18:4-5 Hnon ono' imik heikek ab yok kebsenya nera, "Alja malya una' hwam era deknebgiga balamla' ara, imik si singiwanamlakanya, Imik Neyung ara alja malya una' ek seiniwanamla' anasa, ugunda nadya nim edya alja malya una' hwam enyek dilildo dobnenggom. Anedya igina kwena' ara, alab neika' dobmunuk aboka, alak ab loblulum! Alak ab loboka, ane lomok ab goboka yibilulum. 18:6 Dara, alja ugunuk unulusuka' sunuwoka, ono' albabya unuwanalum. Anya alja unulusuka' amba dara, anyek ugunsamba beiyisuk sok, ono' albabya lunuwoka penya yandara diriganalum. 18:7 Hnonda alak ara, nauba perobnya benya ana' ab, dub dangoka pe ulumoka' sunuwoka, ganya okna dangana' ab, ganya soloma dabna' ab, danyek alak eleganalam. Hnonda al nong anasa, soba' leleladya, Nara nenya somogamna gel goma', nara wenewoka usin dub gel! Anasa nara ganya okna dabsina' ara, hnon nak dobnenggunusinya, wenyaboka nonggo alamla. 18:8 Wera an wenyaboka nonggo ana' anasa, neik sum ok gwaneng oka' ab, ganya angoo senena' ab, somokna' damok ab, alak yamab gouluwanamla. Dara Imik Neyung ara, alak yana lelenanya bera senenggomnya ulumla' anasa, alda uk adya gara' selewoka deregoka hama buknamla," wenyaboka lel yaboka' ak kebsa. 18:9 "Hnonda sokok an wenesin dub nang era, alak neika' salya' salawoka ulumeija nang era, ono' ban gel gedya dub dangoka pe ulumaka' bokoka domek nang enyek, sikda alak uka delemlya soloma welelamlya' eibnemak dara, alsamba ganya ingmuna berewoka engewanamak. 18:10 Anya ono' alja gwegoka unulamlya', hyak okna anyek, nuk doroweisilyek senewoka, mok seklemnemak. Dara sikda, Lok bar, Babel heik ara, hyak migib nong bok, alak igina doboka' ara, hyak omom nong! Wera wene salek ok bok, anak igina kwena' adya, seleb malya gebgel," wenyaboka lebok. 18:11 "Dara ono', sokok an bona' dekdo yaban nang eneba, nimi sikja bona' dekoka dona' orok anasa, alsamba ganya ingmun berewoka, nauba geklewoka engewanemak. 18:12 Anya, sikja emas bona' gom, perak bona' gom, dangman gom, meilik gom anaba, hnon deknenggunumak. Hnonda, goulun boksom gom, namena' anyek ongon boksom gom, imengen gwaneng bunduk boksom gom, goron boksom gom, ono' yok-yok perob gal eneba, dobnenggunumaakanya, nauba deklemek perob-perob gal eb, gaja pam bong ab, besi bona' gasa' ab, tembaga bona' ab, yok perob girik eneba, hnon dekoka dobnenggunumak. 18:13 Anya ono', perob gal boka' ab, dokna' galdok ab, so mekla' ab, weik ab, perob song mekla' ab, anggur ab, pam mek ab, gwaneng werena' aso ab, gandum ab, sapi pam ab, domba pam ab, abaksin pam ab, gliboka bo yabasin ekla buna' ab, wa arawoka wen nang eb, anya nimi nong anaba, hnon dekoka dobnenggunumak," hyok. 18:14 "Anasa ban bona' dekdo yaben nang era, ban gel genyek an, anja yoka'-yoka' nidya' dobsinya senelelama' ara, wera denghyok. Anya anja hyak dub dangoka pero ululamnya nera, seleb denghel. Anasa wenera hnon anaso' diguma' ara, ono' saawoka hnon eibnenggunulam, wenyaboka lebnemak. 18:15 Dara ban dek girigoka alak ab dub dangameija nang era, alak ganya okna daboka una' anyek, nuk doroweisilyek aboka, mok diri seklemnemak. Hnonda sikda ganya ingmun berewoka engewoka, 18:16 lebnemakja, Lokja, alda si sina' heik bok, malya' nong anyek dobla! Alda namen boksom ab, goron boksom ab, imengen gwaneng bunduk boksom ab, ongowoka, meilik ab, dangman bona' ab, emas ab dadya, e diblelabok unuwal! 18:17 Dara alja dub dangoka ulumla' nidya' ara, wene salek ok, nidya' ara dengaro lobla, henemak. Hnonda nauba mek ekla buna' bon nang eb, an eilibik wekemeija' anyek, bosilya nim eb, ane lomok welemeija nang eb dara, mok ab sekoka ngouluganemak. 18:18 Anya sikda ban heik enyek, uk adya bluboka delemlyekanya soloma lo welelamlya' anyek eibija dara, sikda unuwamen heikek, goma' senewoka, ban nauba senenggom heik era, hnon anaso' heik era, yoknya nera unggululabok! wenyaboka, hina kwe aboka ngouluganemak. 18:19 Dara sikja ganya soloma dabna' diba' ara, sikja' hukuk aso dakdangoka, mamagoka ban wenyaro engewanamak: Angoo, ban nauba' senenggom heik era, hyak malya' dala' ara, lok bar! Anya, alja bona' mandebna' edya mek dubuk yabalamla' bolomak nang nidya' ara dub dangiyiwousuk! Bok alja yoka'-yoka' nidya' ara, wene salek ok dengaro lobla! wenyaro engelemnemak," hyok. 18:20 Hnon kebsenya nera, "Dara Imik Neyung ara, alja ugunuk unulusuka' ara, seleb lunuwoka alba dirigala' anasa, wei, imik heik o, ganya heklom. Wei, muna' Imik Neyung mab o, yuba lena' gak nang o, ununumna' len nang o, anera hyak pewal senewoka ganya heksulul!" wenyaboka leboka' ak kebsa. 18:21 Wera nen seleb dara, lero be hnon hyak senenggomnya bedya, nauba girik dam e girik eneso' ak, dobsalawoka, mek gwanek bobogol yabookanya lebokja, "Babel heik nauba si sina' heik era, ban anaso unu yeiriwoka boboganamla' adya, hyak gobdo soldowanamlakanya, hnon saawoka eibnenggunumak. 18:22 Hnonda benggong lena' yub gom, bera sebna' gelewa edya ber sebna' gom, poo ana' benggong yub gom, gegena poroba' soruk adya siklewum-siklewum alamak benggong yub gom, anak ab dara, hnon kebnenggunumak! Anya, yok geremseng uboka wa wen nang hyak unggulumnemak. Dara, yoka' ak girika ya seikna' yub eneba hnon ane lom pik ab kebnenggunumak. 18:23 Anya nim ara lampu dilina' gom, nenya gela domna enyek eiya hlaboka sana' yub gom digum danaba, hyaka' hnon kebnenggunumak. Hnonda anja bona' bo dekel girikna' nang era, senenggom nang ulumeekanya, yok-yok mok soko nimi nidya' ara, anja bobnenewoka sonda lebsulum. 18:24 Anasa ban Babel heikek igina kweiyiwoka' ara, an heik lom enyek anera, ununumna' len nang enenga ab, muna' Imik Neyung mab eneng ab, eibuka' anasa unuru obok. Dara, ban ok gom, alda soko dubuk an nidya' obsuk nim eneng eneba, eibuk," wenyaboka lebok.
19:1 Ban nen seleb dara, imik heikek ara, nimi gong longowoka yuba irir aboka salamna' anaso ak kebsa' ara, "Haleluya! Imik Neyung ak or giblenob e! Blebsina' ab, si imik nenena' ab, migib una' ab dara, nunja' Imik Neyung alja' ak ulumla. Alak giblenob e. 19:2 Alja yana lelelesila' ara hyak perob ok bekna' sunuwoka pe unulusil! Imik Neyung era, sokok an alak salalemek malya una' edya senenggoma' malya nenelesuk gel gek seleb igina elegok. Anya, Imik Neyung mab alsamba welemek obsuk nang era, sikja eneng emba dara, Imik Neyung adya gel genyek an seleb dirigok," wenyaboka lelemek. 19:3 Dara ono' hnon yuba salameknya nera, "Haleluya! Imik Neyung ak giblenob e! Alak uka daboka olomlya solom era, soba' welelemnamla!" wenyaboka lelemek. 19:4 Dara, domdara' badya nonga kaboka wa borob nang eb, yok gamyaka' dombadya' ab dara, Imik Neyung alja ekla buna' ak bulumoknya bek oumuwoka, "Amin! Haleluya! Aldib e, or Imik Neyung ak giblenob e!" wenyaro giblemek. 19:5 Ban nen berem ara, senenggom ekla buna' ak ab, yuba hnon lanawoka' ara, "Nunja' neyung Imik Neyung ak giblelulum e! Wei, or mek nanga nauba nang, ugun alja wa wen nang nidya', ugun alak lok ganya bolulum nang era, ono' weneba alak gigilelulum e!" wenyalamek. 19:6 Dara nara, ono' nimi gonga longowoka yuba irir aboka salamna anaso ab, mek lumdam yub ollallek ana' anaso ab, liminga gururu ana' yub anaso ab dara, an unurub digum anaso' adya wenyalamoka' ak kebsa' ara, "Haleluya! Nunja' Wenelesilnya Imik Neyung senenggom migib yaknya bera, wera seleb dubnya dangoka wenel yabalasil. Imik Neyung ak or giblenob e! 19:7 Domba me gela don sum era, seleb oka dalakanya, alja dobnamla gel gera seleb meebgogowala' anasa, wera nunda nidya' ara eiya ganya boboka, eiya hlaboka glolomnemabakanya, alja si imik nenelemnemab! 19:8 Anya nimi gel dobnamna' anasa ongolomaka' melela' namena' uboka geisa perob akleng era, ongowolula' aboka seleb alak an elegal," wenyalameka' ak kebsa. (Ban melela' namena' boksom era, muna' Imik Neyung mab adya, sikja perobnya unulumaka' ara an.) 19:9 Dara ono' lero adya nak hnon, "Banyek momnya dobnelama' ara, Sik domba me gela dobnamla' ak an masa del yanalum henesil nim era pe ulumnamak, momnya dobnelam," henyok. Dara ono' hnon lebokja, "Ban lebna yub dara, Imik Neyung bek ab uboka, hyak aldib nonga' ak lebna yub era an," wenyhenyok. 19:10 Wenyek, nara al yan berem oumuwoka gibnuna' ul yabasa bok, alja dara, "Anaso ununa' ara mem! Nababya anaso uboka, an kabo Yesus ak laga lemok yub ek salawoka ulumak nang eb, neik wa wen nang ulumab. Alda Imik Neyung ok giblelom!" wenyhenyok. Anasa Yesus ak laga lena' ara, ununumna' len ganya era an. 19:11 Dara ono' hnon eimik so danyek, imik heikek ara gaboka, wera nim abaksin pama, kul pam ek eibsa. Pam en abagemoknya bedya alja si nera Bojam hwam uboka, dib nongnya aboka simek. Alda nimi henga goubna' ab, mala weboka oldana' ab dara, pe senenya loboka yana lelelesil. 19:12 Alja heng dok era, uk boka' anaso singiwoka, alja hukuk ara, yoka'-yoka' ak oblamagana' amba dona' ara gong uboka, al nongok ara, alak ok ella ulumla si nenyek, benyek an ulumok. 19:13 Dara alja waran akleng era, eneng lomok sam hwiboka ngikimek akleng enyek ongomookanya, wera alja si nera, Imik Neyung bek ab yubnya, alamek. 19:14 Dara imik heikek sam yin bona' ulumak nanga nidya' ara, peroba' geisa boksom ok ongob dirigoka, nim abaksin pama, kul pam ek bukoka alak diriga yabalamek. 19:15 Dara, alja' sibama' ak ab hyak yu nong parang eneso' ak lanawoka, parang enedya mok soko me nimi nidya' oblamagoka, alda dub nang edya gasa gama' edya wenewoka bo ulumnesil. Anya Imik Neyung migib yaknya bedya yu sen-sen aboka obnesila' ara, anggur meka londena' ak anggur dok londelemak sok, unuwoka obnesil. 19:16 Hnon alja' akleng ek ara, anya eilik ab dara, Mok soko me dub nang nidya' dubnya ulumlakanya, nidya' wenelesak nang dubnya ulumla, wenyaboka momnya domek si nenyek ulumoka' ak eibsa. 19:17 Wera ono' nara hnon kemel yabasa dara, lero ben hnon heng lomok sekoka, alda im hnoumung nonga kwebdo yabalamok wining gong ek, yuba yeiriwoka saboka lel yabokja, "Anyagan yoululum! Imik Neyung adya dena' youmla' ak, hyak senenggoma' meemla' ak neika' mamagoka ubibyekanya, 19:18 ugunda mok soko wenesin nang edya soub eb, yina bona' dub nang edya soub eb, mal si sina' uboka oldana' geremseng nang edya soub eb, abaksin pam soub eb, pam enyek an abakna nang edya soub eb, or mek nang gom, senenggom nang gom, sikbeyok un nang gom, nim amba wa salya' wen nang gom, sikja soub eb danyek, or denelum anasa, yoululum," wenyaboka bii al yaboka' ak eibsa. 19:19 Anya nara, ban yu nonga' ab, sokok an wenesin nang gong eb, sikja yin bona' nang gong eb dara, sikda kul kuda pam abagamoknya beb, alja yin bona' nang eb danyek, mala boboka obdanoba' aboka seleb mamagameka' ak eibsa. 19:20 Dara ban yu nonga' ab, anyeb neika' dara sonda leboka gamyaka' hogung ak yok-yok damoka memelemoknya beb, henga goubsuk. Ban sonda lelemoknya bera, bekna' diba' yok so damok unulumoka' adya, sikda gamyaka' adya bekna' doboka, alja' sunumna' ak giblemek nang ek bob nenesuknya. Wera sik penya danera, gasa' adya soba' singilamla' uk mek gwanek, embenga' somobdaboka obsuk. 19:21 Wera ban abaksin pam eilib abagamoknya bedya' sibama' ak ab goblomok parang enedya, yok isa' nang era, nidya' saboka hyaka' obsuk. Dara wining mandebna' ara, gong-gong yeiniboka obsuk nanga soub enyek delemeekanya, mona bulusuka' ak eibsa.
20:1 Dara nara ono' kendesa enyek, leronya ben hnon imik heikek aba' ara, goluklemoka' ak eibsa. Dara, lero enedya' sorukuk ara, somokna' nang dorongna' somokna' gweren selenga' pik bakna' ab, senenggoma' gel heng gasa' anyek hnon, salawookanya yanggoka' ak eibsa. 20:2 Dara alda youma' eneba ulumoknya senenggom wisa naga baga' era, Iblis goma, Satan goma aboka si silimaka' ara an. Wera alda gibna' ara, seribu gibna' lebnamla' anasa aboka, ban gasa heng enedya diba' gouboka' ak eibsa. 20:3 Dara ono' al neik lero enedya, baga' era, somokna' selenga' lomok boro boublinggok. Dara, alda seribu gibna' ulumlya salek era, anam denghenggulyebok, yok-yok mok soko me ulumak nim era, sonda' bobnenewoka malya gebsilyek aboka ubokomokja, ban somokna' gweren selenga' pik ara hyak gasa seregookanya, an eilib ara, yok bekna' memewok. Wera anya eimik danyek, seribu gibna' ulumlya' seleb dara, or mek ok se' ubnamla aboka lob lobongganamla. 20:4 Dara ono', nara perob ekla buna' mandebna' enyeb, an eilibik bulumek nang eb, hnon eibsa. Wera ban nang danyek, nimi yana lelen migib elegosuka' ak hnon eibsa. Dara ono' al neikek anera, nimi nidya' Yesus bek laga leboka Imik Neyung yuba lero yabana' amba leboka, ya nganga dakoka osik nang ganya ek hnon, eibsa. Sik an nang era, ban yu nonga' nong ak hnon, yoka' ak al nong sunuwoka memena' ak anyek, gibnenggulumek nang. Dara ban nang dara, bisa' ak giblemak nang era an aboka, bekna' diba' asok ak gom, soruk ak gom, an bekna' beilina' era, orok nang. Ban nenesa leboka, sikda embenga' subeekanya, Kristus ab neika' dub nang dangoka, seribu gibna' ulumlya salek era, nimi nidya' sokok nim ek wenewoka bo ulumeka' ak eibsa. 20:5 Dara nenyek nimi youma' somogomek nimi mennya suboka bukiyiwanasilnya nera an. Bok yok hnon nim era an seribu badya gibna' ubnemaknya nera anam seleb denghenggulyebok dara, embenga' suboka bukiyiwanggunusil. 20:6 Nimi nidya' Imik Neyung mab ulumek bok, men somogorob nimi men subnemak nim era, or pe uboka, muna' ulumnamak. Nim eimik hnon sounuwoka somoganamaknya nera sikenek ara hnon meka' bebeganggunusil. Sik nong ara, Imik Neyung ab, Kristus ab dadya, yuba wa gak nim ulumnemak dara, sikda hiboka Imik Neyung ab neika' seribu badya gibna' salek era, nimi nidya' ak wenewoka bo ulumnesak. 20:7 Wera ono' bisa' dubnya Satan ara, henga geregoka gasa ek sam beiyimlya' ara, gibna' seribu badya leblya' seleb salek era, henga lob lobnamla. 20:8 Dara, bisa' enedya mok soko me pika dombadya nidya' eb girigoka, yok-yok mok soko nimi nidya', Gog beb Magog bebdak anyek, sonda' lero yibinamla. Dara, nimi bolowesilya nim era, obdanob aboka ebmamaganamlakanya, nimi deng ara, mek weneng anaso' ak danamla. 20:9 Wera ban nimi danedya, mok soko me neika' ok niniwoka lobijekanya, Imik Neyung mab longolomek heik era, Imik Neyung adya wana' heik, anyek aknewoka doluwanasak. Bok uk ara imik ab yingginiboka, sik nonga dengaboka denesilikanya, 20:10 sikenek nauba sonda' leboka malya nenelesuk bisa' dubnya Iblis ara, soba' singilamla uk mek gwanek doboka doronggok. Wera anyaganera, men dara, yu nonga' ab, sonda leboka bob nenesuknya beb, doronggousuk. Dara sikda anyeganera, inimnek yubyek pik, malya nenewoka nauba soba' gwekelmorulumnemak. 20:11 Dara ono' eimik so era, yok hyak senenggom geisa ekla buna' ek, ana dubuk ara, alak bukumoka' ak eibsa. Dara, im ab soko ab, benedya' hogunguk ak ab dengaro lobok adya, ban danedya oulyang era, oroka' dok. 20:12 Dara ono' nimi nidya', mek nimi, nauba nimi, seleb somogorobnya nera, senenggom ekla buna' beremek sam seklemeka' ak eibsa. Anya, momnya dolomok buku gong era, pika bakloro yibuk. Dara ono' yok buku hnon, nim embenga' un buku enyek, hnon bakok. Wera nimi nidya' somogomek nim, embenga' ulumeka wenyek, sikja unulumek ununa' gong era, buku enyek an momnya dolosuka' sunuwoka, sikenek yana lelewosuk. 20:13 Anya ono', senenggom mek gwan edya nimi somogomek nim alak an ulumeknya nera doboka elegok. Anya somokna' damok ab, alja somokna' nang heik digum, somokdoba' anyek ulumek nim era, doboka elegarek. Dara sik nimi danera, sikja yoka'-yoka' unulumeka' nidya' ara, sunuwoka yana lelewosuk. 20:14 Dara nimi somokna' damok ab, alja somokna' nimi heik digum eb dara, doboka, soba' singilamla' uk mek gwanek doboka doronggosuk. (Ban soba' singilamla' uk mek gwan alalanya nera, diba' somoganamaknya, penenya nera an.) 20:15 Dara, nimi nidya' sikja si, nimi embenga' un buku lomok sam momnya dona' orok nim era, ban soba' singilamla' uk mek gwanek sam doboka doronggousuka' ak eibsa.
21:1 Dara ono', men im eb men soko eb dara, orok dengaboka, youma' mek gwan eneba nidya' hiboka denghyoka' adya, nara wenyok im eb wenyok soko eb danyek eibsa. 21:2 Dara ono' wenyok geisa Yerusalem heik era, nera hyak wenyok nong Yerusalem enyek, Imik Neyung adya' ak imik heikek aba' ara yanggalamoka' ak eibsa. Ban Yerusalem heik era, gel ak nenya anam dobnamna salek ek gweidya' sulumla soka' ak yanggok. 21:3 Dara ono' ban senenggom ekla buna' ak ab, yuba hnon bii aboka lelemoka' ak kebsa' ara, "Imik Neyung adya albeyok ulumla oulyang era, wenyok nim ak dal! Imik Neyung ara nim ab neika' ulumnemak dara, nim ara ono' alja mabo siliba' dangoka ulumnemak. Imik Neyung ara nim ab neika' uboka, alda sikja Imik Neyung ulumnamla. 21:4 Imik Neyung adya sikja heng meka' nidya' ara lubnesil. Youma' ek malya nenelesuka' damoka nidya' ara denghenemla' adya, somokna' damok ara hnon ubnenggunumla. Ganya suguna' ab, engena' damok ab, ok ulusila' ab, yoka'-yoka' nidya' igina kwelesila' ara, hnon sounuwoka ubnenggunumla," wenyalamok. 21:5 Dara ono' al ekla buna' ak bukumoknya bedya, "Yoka'-yoka' nidya' ara, gobdo wenyoknya nenewana' ara, kendelom!" hyok. Dara ono' hnon nak, "Ban yub enera hyak dib nonga' uboka, alda dib senewanamak yub ek anasa, anda or momnya dobnelam," wenyaboka lebnyok. 21:6 Dara ono' hnon yuba lebnyoka' ara, "Wera seleb gobdo unura dakdowan! Na nong anyek, men nongnya uboka, ono' eimik sidya'anya ulumna e. Nak danyek, men einina' ak ab uboka, sidya' dakna'anya ulumna. Nimi nidya' mek ok ulusil nim era, nim embenga' eleksin mek luk ab, embenga' una' mek era or salya' eleganamna," hyok. 21:7 "Nimi malya una' ak ab oblamaganalanya bera, ban lebna' nidya' eleganesina' ara, dobnamla. Nara alja Imik Neyung danamna dara, alda nadya me danamla. 21:8 Bok nimi nidya' lok hwam nim eb, yuba dib senena' orok nim eb, malya uboka gasa ganya bolomak nim eb, nimi salya' olomak nim eb, gela' nauba salalemak nang eb, nimi guma guklesak nang eb, bisa' girik gala giblemak nim eb, nimi nidya' sonda' hwam nim eb dara, ban soba' singilamla' uk mek gwanek sam doboka dabnesil. Wera penenya somoganamaka' ara an," wenhyok. 21:9 Wera ono', ban sekbadya nimi somokna' damoka sala ulumek sekbadya lero nang enyek, ben hnonja nak yeiniboka lebokja, "Imik Neyung bedya me nedya gela dobnamla' anyek aawanenggena' anasa, anyagan kemel yalom," henyok. 21:10 Dara nak Imik Neyung Geisinya adya ok gologanyookanya, hyak senenggom mok soko meinik imik nongok sam bo welewanyookanya, wera anyaganyeb dara, Imik Neyung adya' geisa heika, wenyok Yerusalem heik ara, imik heikek ab, Imik Neyung adya' ara bo yanggoka' ak aawanyok. 21:11 Wera heik en hogung era, Imik Neyung adya imik si nenena' ab, dilina' ara, dangman melela' waragoka, ura' girik melela' anaso boka' beiyiwoka mal gablena' boka' anaso ulumoka' ak eibsa. 21:12 Dara heik era, leka' ara girik adya hyak senenggomokanya, im nongok dob ganagoka, nauba wekna pik era, obadya pobok. Dara pik gong en eileb dameijek sam ara, lero nang enyek yok-yok ella' gigiro ulumeekanya, Israeli nang obadya nang yila' sunuwoka, sikja si momnya dobok. 21:13 Wera pik serekna' winilya-winilya nidya' mok soko hogunga sunuwoka poboka' ara, yali sam ara pika winilya, woru sam ara pika winilya, dabo sam ara pika winilya, anya kemban sam ara, pika winilya pobok. 21:14 Anya, heik en egomna' ikoka' ara, obadya senenggoma' ikoka sobookanya, domba me adya nim obadya nang yuba lena' gak nang, sikja si nera anyagan momnya dobok. 21:15 Wera alda ban nak yuba salanyoknya bera, meilik seleroba' adya memerob heika sunun gama' ek, nera heik domenya ab, leka' ab, pik mandebna' nidya' hiboka sunun danasa bomok. 21:16 Heik domenya era, gwana dounguwoka bleblya ara dombadya ulumookanya, ono' domdama bleblya anaba al neikik. Wera heik era, alja' soruk ak sam salamok gama' enedya sunulumok dara, wareba ara dua ribu empat ratus meter ubok. Warana ab, domdam imik sam ab anaba neikik dok. 21:17 Dara ono' lero enedya lega' domek ebelengna' ak sunulumok dara, dom damak sam era, enam puluh meter anaso ubok. Ban lero enedya unu sunuwoknya nera, nim adya sunuwoka einilimaksonya nenyek, unuwok. 21:18 Dara heik en lega' dobok ebelengna' era, youn yarang anaso boka' girik edya weibookanya, heik nong ak dara, meilik dangman selerob boka' adya soroba' ara jendela' pik iblemaka' kaca anaso hogung boka' ek eleb-alab alamok. 21:19 Anya mek yabna' ikok girik era, gaba' eleb-alab alamla sok girik dadya yangaro byuk. Men yangawok egomna' era eleb-alab alamla girik edya yangawok. Penenya nera embeng mekla girik boka' edya yangawok. Winilinya nera, embeng mirin sub girik edya yangawok. Domnya nera, embeng elerob nong girik edya yangawok. 21:20 Lamnya nera, embeng jobdob girika, hnabnya nera, embeng gal boka' girika, seknya nera, heng kemena' alawom aboka pelemla' anaso' girika, linnya nera, embeng mekla' mirina yokoka ubok girika, soubnanya nera, yoka'-yoka' nidya' gorona' mirina' adya yokdob girika, sagonya nera, weik boka' girika, goklomnya nera, mirin im boka' girika, anya onya nera, mirina yokong goma eleroba' yoklamla girik edya yangawok. 21:21 Nauba senenggoma' wekna pikik ara, pika yok-yok amba, meilik yuba' hnonok-hnonok ulumok. Heik en gangganek nauba yaban pik era, dangman adya niniwoka jakookanya, eleb alab alamla' ara jendela iblemaka' kaca boka' hogung anaso ak ulumok. 21:22 Dara heik enera, Imik Neyung al nong ab, domba pama me ab danyek, Imik Neyung ek an ulurak adya, yok Imik Neyung e ara, hnon eibnenggubsa. 21:23 Dara, domba pama me ara dilina' alan seleb ulumlakanya, Imik Neyung nong anaba heik enyek an dilina' ul eleknanya ulumla' anasa, heik enyek anera, heng gom, wala' gom ara, unggulumnamla. 21:24 Anya mok soko me nidya' nim ulumaknya nera, Imik Neyung adya dilina' lomok sam an ura yabalamnemaakanya, mok soko dub nanga nidya' ara sikja bona' peroba' diguma' nidya' ara, heik enyek an bo beil yalamnamak. 21:25 Dara ono' heik enyek anera, inimnek hnon guna' dangoka inina' ara orok adya, pik ara meka' serekna' loboka, soba' ara bakalmorulumnamla. 21:26 Dara, nimi soko nim edya sikja' senenggom dub nang dangoka ulumaka' ab, sikja bona' peroba' diguma' nidya' ara, heik enyek an alak bo beil yanamak. 21:27 Bok hyak dib nong ara, ban perob heikek ara, sembeja' digum gom, nimi nidya' malya una' hwam ok unulumak nimi gom, sonda' nauba lelemak nimi gom, ane digum nim era, hyak weknenggunumak. Alda, sik domba me adya alja' embenga' un bukuk sam, si momnya domlya nim enyek ok, go' weknamak.
22:1 Wera ono' lero enedya nak nim embenga' eleklesil mek era, Imik Neyung ab, domba me ab, sikja buna' ekla ek ab, goboka, eleb-alab aroba' ak yabalamok mek enyek, nak aawanyok. 22:2 Dara, heik enyegan nauba' yaban pik hnoumung era, mek en maboka' ge dara-dara ara, nim embenga' eleklesil gala gong ek sekdo byuukanya, gibna' hnonok dara, wala' ela' gigiro lika obadya moulumla. Dara, gal mekla' danedya mekla' era, nimi nidya' soko nim merellisina' amba ulumla. 22:3 Anya, si malya nenewanamso' diguma' ara, hyak meka' sibin anaba hnon unggulumnamla. Imik Neyung ab, domba me ab dadya, bun ekla buna' era, heik lom enyek an ulumnamlakanya, Imik Neyung bedya alja mabo era, alak gibdo ulumnemak. 22:4 Dara, alja hogung era eillilemnemaakanya, alja si nera, nang enedya asok ak nidya' momnya domlya' ak ulumnemak. 22:5 Anya anyegeinira, guna' ara hyak meka' una' orok uboka, Wenelesilnya Imik Neyung anyek, alak dilina' uboka, sikenek yeblemnesila' adya, sikda uk dilina' yebna' ab, heng dilina' ab dara, lobnemak. Dara, sikda dub nang dangoka mok soko me nidya' wenewoka hyak soba' amba bo ulumnesak. 22:6 Dara ono' an lero era nak hnon lebnyoka' ara, "Ban lebna yub danera, hyak dib nongokanya, ganya beilimna' nong yub ek ulumla. Anya Wenelesilnya Imik Neyung bera, ununumna' lelemek nang, sikja Wenelesilnya benya', alja lero ek Imik Neyung bedya mab ek eimik unuwanamla' anyek, sikenek ella danoka' aboka, laga neksulul aboka nak oruganyok," wenyhenyok. 22:7 "Aldib, dib nong ara, nara hyak berra yanamna. Anasa, ban buku enyek an unuwanamna lena' anyek, dib senewoka ganya oloklelenya bera pe ulumla!" hyok. 22:8 Dara, nara Yohanes bedya, ban nidya' ara, nadya seleb keboka eibsa. Anya, nara ban nidya' seleb eiyiwoka kebgogowasakanya, nak an yoka'-yoka' bo amalenyok lero ek an gibnuna' aboka, alja' saramek oumuwoka ubsabok, 22:9 alda nak lebokja, "Anaso ununggom, mem! Nara an so' ak uboka, anja' hemyab ununumna' lelemek nanga hnon, ono' nimi nidya' ban buku enyek an momnya dobok yub ek dib senewoka ulumak nang enesonya. Alda Imik Neyung ak ok hnonok gibnelam!" hyok. 22:10 Dara ono' alda hnon lebokja, "Ban nidya' ununumna' lebna' danera, mandebna' loboka, berra unuwanalabok anasa, ban buku ek an momnya doboka' ara, anja hnon gunuwoka, mem an bekna' beilina' ara mem. 22:11 Anasa, nimi heknedya meknelemla dara, or meknebgiga balalul. Anya, nimi hnon malya una' hwam ok unulamla dara, or malya ubgiga balalul. Anya, nimi hnon pelemla dara, or pebgiga balalul. Anya, Imik Neyung amba ok muna' ululanya bera, or Imik Neyung amba leboka, muna' gobdo ululul," wenyhenyok. 22:12 "Aldib, dib nong ara, nara mek anam yanamnakanya, nimi nidya' sikja unulumaka' sunuwoka deknesina' anasa, dekna' en bo yanamna. Dara, nidya' sikja unumeka' sunuwoka, gigiwoka eleganesin. 22:13 Nak men youma'anya uboka, ono' eimik sidya' daknanya ulumnakanya, al nak danyek, men einina' ak aba' ara, ono' sidya' einil dakna' amba Wenesinya ulumna," hyok. 22:14 "Nimi nidya' sikja' ongon aklenga mek elekdob nim era, pe ulumak. Anasa, sikda embenga' un gal doka dena' hnon dobnemaakanya, perob pik uboka heik enyek an weknemak. 22:15 Bok nimi guma guklesak nang eb, gel salana' hwam ok ulumak nang eb, nim dib olomak nim eb, bisa' girik gala giblemak nim eb, sonda' hwam ok lelemak nim eb, nera yuba sirik adya sonda' lelemak gom, sene bobnenewoka wana' ulumak nim eb, ban nimi digum nidya' ara, perob heikek ab weilik geboka ulumnemak," hyok. 22:16 "Dara, nara Yesus adya, nadya yuba dona' nim enyek kebnoka' aboka, ban nidya' unuwanamla' yub era, wenyaro bijebok aboka, nadya lero bek orugamsa. Na benyek Daud nang yila' uboka, ono' yali sam yeblamla eleb-alab arob olola' ulumna," hyok. 22:17 Dara, Imik Neyung Geisinya ab, Imik Neyung me ak dobnomok gel geb dadya dara, "Wera, anyagan yoululum!" wenyalarak. Nimi nidya' ban yub en kebnelanya bera, "Or, yangganok!" henok! Anya heknyek mek ok ubnamla dara, wera or meka del youlul! Heknyek nara embenga' ulunun senewalenya bera, wera nim embenga' eleklesil mek enyek, or salya' doboka del youlul! 22:18 Dara, nara Yohanes bedya, nimi nidya' ban buku enyek an, ununumna' leboka momnya doboka' ak kebnemak nim era, nadya lebnesina' banyek keblulum: Heknedya ban unuwanamna aboka lebok yub enyek, nauba nenewoka maknamla dara, Imik Neyung anaba albabya, ban buku enyek an, malya nenewanesin aboka momnya dobok yub edya malya nenena' ara, alba diriganamla. 22:19 Anya nimi ben hnon, ono' ban unuwanamna aboka, ban buku enyek an ununumna' leboka' momnya dobok yub enyek, meka' nenewanamla dara, Imik Neyung anaba alja' embeng un gala denesonya neb, alja' geisa heikek ulumnesonya neb, ban buku enyek an momnya doboka leboka' ara dorowanamla, keblulum. 22:20 Dara ban yub en, unuwanamna aboka lelelanya bedya lelemla ara: "Yo, aldib, nara hyak berra aboka yanamna!" wenyalamla. Amin. Wenelesilimnya Yesus o, or yalom e! 22:21 Dara, Wenelesilnya Yesus adya' wana' uboka perob eleksina' ara, ugun nidya' ak, ulusulul e!