The New Testament of our Lord and Saviour Jesus Christ
1 Iaminne pattottorang boe-boeNa Isa Almasi, sossorang battua ri Daud, siagang sossorang battua ri Abraham. Punna nisusungi battu ri Abraham sa'genna Daud, iaminne areng-arenna ke'nanga: 2 Abraham, Ishak, Yakub, Yehuda massari'battang, Peres siagang Zerah (amma'na ke'nanga niarengi Tamar), Hezron, Ram, Aminadab, Nahason, Salmon, Boas (amma'na niarengi Rahab), Obed (amma'na niarengi Rut), Isai, na Karaeng Daud. 6 (6b)Battu ri Daud sa'genna ri wattunna nipela' bansa Israel mange ri butta Babel, iaminne areng-arenna ke'nanga: Salomo (amma'na le'baki nibaineang ri Uria), Rehabeam, Abia, Asa, Yosafat, Yoram, Uzia, Yotam, Ahas, Hizkia, Manasye, Amon, Yosia, Yekhonya massari'battang. 12 Battu ri wattunna nipela' bansa Israel mange ri butta Babel sa'genna lassu' Isa Almasi, iaminne areng-arenna ke'nanga: Yekhonya, Sealtiel, Zerubabel, Abihud, Elyakim, Azur, Zadok, Akhim, Eliud, Eleazar, Matan, Yakub, Yusuf bura'nenna Maria. Na battu ri iaminjo Maria lassu' Isa nigallaraka Almasi. 17 Jari, punna nisusungi appakkaramula battu ri Abraham sa'genna Daud nia' sampulo angngappa' lapisi'na sossorang. Na punna nisusung battu ri Daud sa'genna ri wattunna nipela' bansa Israel mange ri butta Babel nia' todong sampulo angngappa' lapisi'na sossorang. Kammayatompa punna nisusung battu ri wattunna nipela' bansa Israel mange ri butta Babel sa'genna nilassukang Almasi nia' todong sampulo angngappa' lapisi'na sossorang. 18 Ia kalassukanNa Isa Almasi kammai anne lampa-lampana. Amma'Na niarenga Maria, eroki nipasialle siagang Yusuf. Mingka lalang tenanapa nasialle ke'nanga, apaji natianammo Maria lanri gau' makoasa battua ri RohNa Allata'ala. Na tanaassenga Yusuf angkanaya lanri gau' makoasa battu ri RohNa Allata'ala natianang anjo Maria. 19 Anjo Yusuf tuli tutui anggaukangi gau' tojenga situru' napangngajarranga agamana. Taerokai ampelakkangi siri'na Maria ri dallekanna tau jaia. Jari ero'mi a'lampa cokko-cokko ambokoi Maria. 20 Mingka lalang nanawa-nawana Yusuf eroka a'lampa, asso'nami ri wattunna tinro. Lalang asso'nana, nia'mo nacini' sitau malaeka'Na Batara battu mae ri ia angkana, “E, Yusuf, sossoranna Daud, teako mallakki a'nikka siagang Maria; nasaba' anjo ana' natiananganga, pa'jari battu ri gau' makoasaNa RohNa Allata'ala. 21 Lammanaki sallang Maria sitau ana' bura'ne. Na anjo anaka musti nuarengi sallang Isa, nasaba' Iami sallang lampasalamaki umma'Na battu ri kapanrakanga.” 22 Nakajariang ngasemmo anjo sikammaya sollanna a'rupamo apa le'baka napabattu na'bi Nasuroa Batara, angkanaya, 23 “Nia' sallang se're tulolo latianang siagang allassukang sitau ana' bura'ne. Anjo anaka lanigallaraki Imanuel.” (Imanuel iamintu bicara tu Ibrani, battuanna “Niaki Allata'ala anrurungangki'”.) 24 Ambangunna Yusuf, nagaukammi anjo pappasang le'baka napabattu malaeka'Na Allata'ala ri ia. A'nikkami siagang Maria. 25 Mingka lalang tenanapa nalassukangi Maria anjo anaka, tenapa nale'ba' sikatinroang Yusuf siagang Maria. Na wattunna lassu'mo anjo anaka, nisaremi areng Isa ri Yusuf.
1 Anjorengi ri kota Betlehem, ri pa'rasangang Yudea, nilassukang Isa, ri wattunna Herodes ammarenta. Anjo wattua nia'mo siapa are tucara'de' accini' bintoeng, battu raya mange ri Yerusalem. 2 Battui akkuta'nang mange-mange ke'nanga angkana, “Kemae pammantanganna anjo Ana' beru nilassukanga, la'jari karaenga ri tu Yahudia? Le'baki nia' ammumba bintoeng pammateiNa iraya. Nia' maki' anne battu ero' anynyomba ri Ia.” 3 Nalangngere'na Herodes anjo kabaraka, teaimi sipato' ta'bangkana. Kammayatompa sikontu tau niaka ri Yerusalem ta'bangka ngaseng tommi. 4 Nasuro kio' ngasemmi Herodes sikontu imang-imang kapalaya siagang guru-guru agamana tu Yahudia. Napa'rappungammi ke'nanga nampa nakuta'nang angkana, “Kemae lanilassukang anjo Karaeng le'baka Napa'janjiang Allata'ala?” 5 Appialimi ke'nanga angkana, “Ri kota Betlehem, ri pa'rasangang Yudea. Nasaba' kammaminne le'baka natulisi' na'bia, 6 ‘Ikau Betlehem, ri pa'rasangang Yudea, Tena sikali naikau kaminang tuna ri alla'na sikamma kota lompo niaka ri Yudea, Nasaba' battu ri kaumi lammumba sitau pamimping eroka ampimpingi ummakKu Israel.’ ” 7 Nalangngere'na Herodes pappialina ke'nanga, nasuro kio' cokko-cokkomi anjo tucara'deka accini' bintoeng. Nampa nakuta'nang ke'nanga angkanaya ringngapanna nappakkaramula ammumba anjo bintoenga. 8 Le'baki anjo nasuromi ke'nanga a'lampa mange ri Betlehem. Na napasang ke'nanga angkanaya, “A'lampamako mange amboya baji'-bajiki anjo Anaka. Napunna nubuntulu'mo, pauang tonga', sollangku mange todong anynyomba ri ia.” 9 A'lampami ke'nanga. Nalalang a'jappanamo ke'nanga, nia'mi pole nacini' ke'nanga anjo bintoeng le'baka ammumba iraya. Tamaka rannuna ke'nanga nacini'namo pole anjo bintoenga. A'lolo'mi anjo bintoenga mange ri dallekang, irateanganna ke'nanga. Sa'genna ammantang irateanganna pammantanganna anjo Anaka. 11 Antama'mi ke'nanga ri pammantanganna anjo Anaka. Nabuntulu'mi anjo Anaka siagang Maria amma'Na. Su'ju'mi ke'nanga anynyomba ri anjo Anaka. Nampa massing nasungke roko'-roko'na ke'nanga, namassing assare koro'bang, iamintu bulaeng, kamanynyang, siagang mur. 12 Ri lammotere'na ke'nanga, nipauammi ri Allata'ala lalang so'na, sollanna tea ammoteri ke'nanga mange ri Herodes. Jari oloang maraemmi naolo ke'nanga ammotere' mange ri pa'rasanganna. 13 Ammotere'namo anjo tucara'deka accini' bintoeng, nia'mi pole malaeka'Na Batara ampappicinikangi kalenna lalang so'na mae ri Yusuf. Nakana anjo malaekaka, “Eroki nasuro boya siagang nasuro buno Herodes antu Anaka. Jari ambangungko nai', erangi antu Anaka siagang amma'Na mange accokko ri Mesir. Ammantang mako anjoreng sa'gennu Kusare poleang kabara'.” 14 Ambangummi Yusuf, na'lampa memang anjo bangngia angngerangi anjo Anaka siagang amma'Na mange accokko ri butta Mesir. 15 Ammantammi ke'nanga anjoreng sa'genna mate Herodes. Lanri kammana, a'rupami kananNa Batara le'baka Nasuro pabattu ri na'biNa, angkanaya, “Kukioki ammotere' anakKu battu ri Mesir.” 16 Naassenna Herodes angkanaya nitipui ri anjo tucara'deka accini' bintoeng niaka battu raya, tamakami larrona. Appasulu'mi parenta, assuro buno ngasengi sikontu ana'-ana' bura'ne niaka lalang ri Betlehem siagang ri ampi'-ampi'na, ia umuru' ruan taunga siagang irawangannaya. Anjo umuruka appakkaramulai nirekeng ri wattu pammumbana anjo bintoenga, situru' le'baka napau anjo tucara'deka accini' bintoeng. 17 Kammaminjo na'rupamo apa le'baka napau Na'bi Yeremia, angkanaya, 18 “Nia' sa'ra karru' kalangngerang ri Rama Kunrareng siagang piraung Rahel angkarruki ana'-ana'na; na taeroka nisaleori lanri taena ngasemmi ana'na.” 19 Ri wattunna matemo Herodes, ri nia'na ija Yusuf siagang anjo Anaka siagang amma'Na ri butta Mesir, nia'mi pole malaeka'Na Batara battu ampappicinikangi kalenna lalang so'na ri Yusuf. 20 Nakana anjo malaekaka, “Mate ngasemmi sikontu tau eroka ambunoi antu Anaka. Jari ambangung mako, allei antu Anaka siagang amma'Na siagang ammotere' mako mange ri Israel.” 21 Ambangummi Yusuf, nampa naerang anjo Anaka siagang amma'Na ammotere' mange ri Israel. 22 Mingka nalangngere'na Yusuf angkanaya Arkelaus, iamintu ana'na Herodes ansambeangi manggena a'jari karaeng ri pa'rasangang Yudea, malla'mi Yusuf mange anjoreng. Mingka nipauammi pole ri Batara lalang so'na, sollanna a'lampa mange ri Daera Galilea. 23 Anjoremmi ammantang ke'nanga, ri se'reang kota nikanaya Nazaret. Lanri kammana, a'rupami apa le'baka napau na'bi-na'bia ri passala'na anjo Anaka angkanaya, “Lanigallaraki Tu Nazaret.”
1 Anjo wattua nia'mi Yohanes Paje'ne' battu ri parang lompoa ri Yudea. Appakkaramulami akkato'ba nakana, 2 “Toba' ngaseng mako battu ri gau' dosa-dosanu, nasaba' tasalloami nappakkaramulamo ammarenta Allata'ala, salaku Karaeng!” 3 Iaminne Yohanes natabaya kananna Na'bi Yesaya ri wattunna angkana, “Nia' tau akkiok-kio' ri parang lompoa angkana, ‘Pasadiai oloanNa Batara; Lappari oloang laNaoloa.’ ” 4 Anjo Yohanes bulu unta pakeanna. Kukkulu' passikko' aya'na, na katimbang siagang bani romang napare' kanre. 5 Jaimi tau battu mange ri Yohanes. Nia' tu battu ri kota Yerusalem, tu battu ri sikontu pa'rasangang Yudea, kammayatompa tu battu ri daera-daera a'biringa ri Binanga Yordan. 6 Namangakuimi dosa-dosana ke'nanga, nampa nije'ne' ke'nanga ri Yohanes lalang ri Binanga Yordan. 7 Jai tommi tu Farisi siagang tu Saduki battu mae ri Yohanes, ero' assuro je'neki kalenna. Mingka nacini'na Yohanes battu todong ke'nanga, nakanamo ri ke'nanga, “Ikau ngaseng tu ja'dalaka! Inai ampauangko angkanaya akkullei nuliliang hukkunganNa Allata'ala, labattua sallang mae ri kau? 8 Pappicinikammi rolong lalang ri panggaukannu, sollanna ma'nassamo angkanaya toba' tojeng mako battu ri gau' dosa-dosanu. 9 Teako akkapangi angkanaya lakkullei nuliliang hukkunganNa Allata'ala lanri nukanana kalennu sossorannako Abraham. U'rangi angkanaya, manna anne batu-batua, akkulle tongi Napa'jari Allata'ala sossoranna Abraham! 10 Sadiami pangkulu' lanipata'banga ri poko' kayua sa'genna ri aka'-aka'na. Sikamma poko' kayu tenaya nabaji' rapponna lanita'bangi nampa nipela' antama' ri pepeka. 11 Inakke je'ne' kupake anje'nekko a'jari pammatei angkanaya ma'nassa toba' mako battu ri gau' dosa-dosanu; mingka labattua sallang ri bokoangangku, iami sallang lanje'nekko pepe' siagang RohNa Allata'ala. La'birangangi nainakke. Manna a'jari pabinting sapatuNa tena todong kusiratang. 12 Nia'mi pa'dinginga lalang limanNa, eroka Napake antapi sikontu berasaka sa'genna tangkasa'. Sikontu berasaka laNaboliki lalang ri pammolikanna, mingka sikamma awanga laNatunui lalang ri pepe' tenaya nalammari rinrana.” 13 Anjo wattua a'lampai Isa battu ri Galilea mange ri Binanga Yordan. Mangemi ri Yohanes assuro je'neki KalenNa. 14 Mingka taerokai Yohanes anje'neki. Nakana Yohanes, “Inakkeji siratang Kije'ne' Bapa'. Mingka ba'lalo iKatte battu mae assuro je'neki KalenTa ri nakke.” 15 Mingka appialimi Isa Nakana, “Boli'mi kamma rolong ri kamma-kammaya anne. Nasaba' lanri kammana minjo nanigaukang ngaseng sikamma Nakaerokia Allata'ala.” Jari nije'ne'mi Isa ri Yohanes. 16 Le'baki nije'ne', assulu'mi Isa battu ri je'neka ri anjo binangaya. Ti'ring tassungkemi langika, nampa nia'mo Nacini' Isa RohNa Allata'ala manurung sangkamma jangang-jangang bodobangkeng, battu attompo' irateanganNa. 17 Nampa nia' kalangngerang sa'ra battu rate ri langika angkana, “Iaminne AnakKu Kukamaseanga. Iami nakate'neang atingKu.”
1 Le'baki anjo, nierammi Isa ri RohNa Allata'ala mange ri parang lompoa, sollanna niso'ri ri billisika. 2 Patampulo allo patampulo bangngi tamangnganrea Isa, sa'genna cipuru'mi. 3 Battumi billisika na nakana, “Sai Ana'Nako Allata'ala? Punna kamma, suromi anjo batu-batua a'jari roti.” 4 Appialimi Isa Nakana, “Nia' tattulisi' lalang ri Kittaka angkanaya: Tena nalanri battu ri rotija bawang nakkulle attallasa' rupataua, mingka lanri battu ri kana-kana Napabattua pole Allata'ala.” 5 Le'baki anjo, nierammi pole Isa ri billisika mange ri Yerusalem, kota matangkasaka, nampa niboli' irate ri tompo'na Balla'Na Batara. 6 Nampa nakana billisika ri ia, “Sai Ana'NaKo Allata'ala? Punna kamma, a'lumpa' maKo naung; nasaba' nia' tattulisi' lalang ri Kittaka angkanaya, ‘LaNasuroi malaeka'-malaeka'Na Allata'ala anjagaiKo, LaNaruppaiKo lalang limanna ke'nanga, Sollanna manna bangkenNu tena todong nata'runtu' ri batua.’ ” 7 Appialimi Isa Nakana, “Mingka nia' todong tattulisi' lalang ri Kittaka angkanaya, ‘Teako so'ri-so'ri Karaeng Allata'alanu.’ ” 8 Nampa nierang pole Isa ri billisika nai' ri moncong tinggi dudua, nampa nipicinikiang sikontu kakaraenganna siagang kakalumanynyanganna linoa mae ri Ia. 9 Nampa nakana billisika ri Ia, “Yangasenna anjo lakupassareang ngasengi mae ri Kau punna su'jukKo anynyomba mae ri nakke.” 10 Appialimi Isa Nakana, “A'lampako Billisi'! Nia' tattulisi' lalang ri Kittaka angkanaya: Sombai Batara, Allata'alanu, siagang Iaji bawang siratang tuli nupakala'biri'!” 11 Kala'busanna, a'lampami Billisika ambokoi Isa. Nampa battumi malaeka'-malaekaka allayani Isa. 12 Nalangngere'na Isa angkanaya nitarungkumi Yohanes, a'lampami alliliangi KalenNa mange ri Galilea. 13 Nabokoimi Nazaret, nampa mange ammantang ri Kapernaum, ri birinna Tamparang Galilea, ri daera Zebulon siagang Naftali. 14 Lanri Nagaukannamo Isa kammaya anjo, a'rupami apa le'baka napau Na'bi Yesaya, angkanaya, 15 “Butta Zebulon siagang Naftali Ri oloang mangea ri tamparanga, ba'leanna Binanga Yordan, Butta Galilea tanapammantangia tu Yahudi! 16 Bansa niaka lalang ri sassanga accini'mi singara' accaya lompoa! Ri tau niaka lalang ri sassanna kamateanga Battumi cayana singaraka assiori!” 17 Iaminjo wattua Nappakkaramulamo Isa ampabattui angkanaya, “Toba' ngaseng mako battu ri gau' dosa-dosanu, nasaba' tasalloami nappakkaramulamo ammarenta Allata'ala, salaku Karaeng!” 18 Ri wattu a'jappana Isa ri birinna Tamparang Galilea, nia'mo Nacini' rua paboya juku', iamintu niarenga Simon (Nigallaraka Petrus) siagang andi'na niarenga Andreas. Sitabangi ke'nanga anjala juku' ri tamparanga. 19 Nakanamo Isa ri ke'nanga, “Maeko amminawang ri Nakke. LaKuajarakko a'jari sanrapang pajala tau.” 20 Nabokoi memammi jalana ke'nanga, nampa amminawang a'lampa siagang Isa. 21 A'jappana pole Isa, nia'mo pole Nacini' tau rua assari'battang, iamintu niarenga Yakobus siagang Yohanes, niarenga Zebedeus manggena. Sitabangi ke'nanga nia' rate ri biseanna appakabaji' jala siagang manggena ke'nanga. Nikio' tommi ke'nanga ri Isa, 22 nanabokoi memammo biseanna siagang manggena ke'nanga, nampa a'lampa amminawang ri Isa. 23 Wattunna ri Galilea, a'lampai Isa angnginroi sikontuna anjo pa'rasanganga. Angngajaraki ri sikamma balla' sambayanga siagang Nabirittakammi Kabara' Bajika angkanaya lammarentami Allata'ala. Naballei tommi sikamma tau garringa siagang tau sala-salanga sa'genna baji' ngaseng. 24 Tassiara'mi kabara'Na Isa mange ri pa'rasangang Siria, sa'genna pila' jaimi tau ambattui. Massing angngerammi ke'nanga tau garring. A'rupa-rupami tau garring siagang tau susa nierang mae ri Ia. Tau nisosoka ri setang, tau mate-mate jangang, tau peso', na maraengannaya, Naballei ngasemmi Isa sa'genna baji' memang silalonna. 25 Jai sikalimi tau amminawang ri Isa anjo wattua. Nia' tu battu ri Galilea, tu battu ri Sampulo Kota, battu ri Yerusalem, tu battu ri Yudea, kammayatompa nia' todong tu battu ri pa'rasangang ba'leanna Binanga Yordan.
1 Wattunna Nacini' Isa anjo tau jaia, nai'mi ri se'reang bonto. Ammemponamo, battu ngasemmi ana'-ana' gurunNa a'reppese'. 2 Appakkaramulami Naajara' ke'nanga: 3 “Mate'nei tau tanjenga ri Allata'ala lanri naassenna kalenna tau tena kullena; nasaba' iami a'jari umma'Na Allata'ala! 4 Mate'nei tau susaya pa'mai'na; nasaba' iami lanisaleori ri Allata'ala! 5 Mate'nei tau tuna pa'maika; nasaba' iami langgappai apa le'baka Napa'janjiang Allata'ala! 6 Mate'nei tau attojeng-tojenga ero' anggaukangi ero'Na Allata'ala; nasaba' iami lanipasukku' tallasa'na ri Allata'ala! 7 Mate'nei tau mangngamaseanga ri paranna tau; nasaba' iami lanikamaseang todong ri Allata'ala! 8 Mate'nei tau lambusu' pa'maika; nasaba' iami langngassengi Allata'ala! 9 Mate'nei tau mappasiamaka paranna tau; nasaba' iami laniakui ri Allata'ala a'jari ana'-ana'Na! 10 Mate'nei tau nisessaya lanri nagaukanna ero'Na Allata'ala; nasaba' iami a'jari umma'Na Allata'ala! 11 Kate'neangi punna nicallako, yareka nisessako siagang nipassalako passabakkang iNakke. 12 Kasukkurangi siagang karannuangi, nasaba' lompoangangi pahala lanutarimaya sallang battu ri Allata'ala. Kamma tomminjo batena nisessa na'bi-na'bi le'baka battu rioloangannu.” 13 “Ikau ngasemmi rapang ce'lana anne linoa. Punna la'bamo ce'laya, maka lakkulleiji nipa'jari ce'la poleang? Ma'nassa tenamo matu-matunna, passangalinna nipela' mami na nionjo'-onjokang ri taua. 14 Ikau ngasemmi rapang singara'na anne linoa. Kota niaka irate ri bontoa takkulleai nicokko. 15 Tenanniakka tau apparinra lampu nampa natongko' katoang. Passangalinna naboliki irate ri pa'dongkokanna, sollanna nasingari ngasengi tau niaka lalang balla'. 16 Kamma todong minjo alarapanna singara'nu, parallui accaya ri dallekanna tau jaia; sollanna nacini' gau' baji'nu, na napakala'biri' Allata'ala Manggenu niaka ri suruga.” 17 “Teako sala pahang kanukana battuA' assuro pelaki atorang agama napabattua Musa siagang napangngajarranga na'bi-na'bia. Tena naKubattu assuro pelaki, passangalinna eroki Kupakasingara' battuanna sitojennaya. 18 U'rangi laloi! Angkanaya lalang nia'na ija langika siagang linoa, manna se're hurupu' yareka titti' kaminang ca'dina anjo atorang agamaya tena sikali lanipela' punna tenapa na'rupa ngaseng! 19 Lanri kammana, inai-nai andakkai kalase'renna anjo parentaya, manna nakaminang ca'diaja, nampa naajara' todong paranna tau a'gau' kamma, iaminjo taua la'jari kaminang ca'di ri umma'Na Allata'ala. Mingka inai-nai anturuki anjo sikamma parentaya, nampa naajara' todong paranna tau anggaukangi, iaminjo taua sallang la'jari malompo ri umma'Na Allata'ala. 20 Jari u'rangi anne: Takkulleako a'jari umma'Na Allata'ala, punna tena nabajikangang batenu anggaukangi ero'Na Allata'ala naanjo guru-guru agamaya siagang tu Farisia!” 21 “Nuassemmi apa le'baka nipangngajarrang mange ri boe-boeta riolo angkanaya: Teako ammunoi; inai-nai ammuno, musti laniadeli. 22 Mingka anne kamma Kukana ri kau ngaseng, inai-nai larro ri paranna tau, laniadeli sallang; siagang inai-nai ampali'boi paranna tau musti niadeli ri dallekanna Pangadelang Agamaya. Siagang inai-nai ampakkanai paranna tau, ‘Tolo,’ siratangi nipela' antama' ri pepe'na narakaya. 23 Lanri kammana, punna nia' kalase'rennu sitabang angngerangi koro'bang sukkuru'nu mae ri Allata'ala, na nuu'rangi angkanaya nia' parannu tau pa'risi' pa'mai' ri kau, 24 bokoi rolong anjo koro'bannu, nunampa mange assibajiki siagang anjo taua. Punna le'ba' mako assibajiki, nampa mako ammotere' mange ampassareangi anjo koro'bannu mae ri Allata'ala. 25 Ebara'na nia' tau antuntukko mange ri pangadelanga, assibajiki memang mako lalang nia'na ija wattu, lalang tenanapa nubattu mange ri pangadelanga. Nasaba' punna tenapa nussibajiki nanubattu mange ri pangadelanga, tena tanapassareannu anjo taua mange ri hakinga; nampa hakinga ampassareangko mange ri pulisia; nampa napantamakko pulisia ri tarungkua; 26 Na u'rangi angkanaya: Ma'nassa takkulleako assulu' battu ri anjo tarungkua punna tena nalappasa' ngaseng inrang nipassalanu.” 27 “Nuasseng ngaseng tommi pangngajarang angkanaya: Teako a'gau' salimarri. 28 Mingka anne kamma Kukana ri kau ngaseng: Inai-nai accini' baine nabattumo cinnana a'gau' salimara', a'gau' salimara'mi siagang anjo bainea ilalang ri nyawana. 29 Punna passala' mata kanannu nudoraka, kocciki assulu' anjo matannu nampa nupela'! Nasaba' bajikangangi tappelaka anjo mata kanannu, naia punna nipasambilako sibatu kale antama' ri naraka. 30 Punna passala' lima kanannu nudoraka, tattaki anjo lima kanannu nampa nupela'! Nasaba' bajikangangi tappelaka anjo lima kanannu, naia punna antamakko sibatu kale ri naraka.” 31 “Nia' todong pangngajarang kammaya anne: Inai-nai antallaki bainenna, parallui nasare sura' talla'. 32 Mingka anne kamma Kukana ri kau ngaseng: inai-nai antallaki bainenna pantaranganna passabakkang a'gau' salimara', iami a'jari saba' na'gau' salimara' anjo bainenna, punna a'bunting poleang anjo bainenna siagang bura'ne maraeng. Na inai-nai bura'ne ambuntingi anjo bainea, tappinawang tommi a'gau' salimara' siagang anjo bainea.” 33 “Nuasseng ngasemmi angkanaya nia' pangngajarang ri boe-boeta kammaya anne: teako takkaluppai ri janjinnu. Apa le'ba' nupa'janjiang siagang assumpa ri dallekanNa Allata'ala, parallui nupa'rupa. 34 Mingka anne kamma Kukana ri kau ngaseng: tea' laloko assumpai. Teako assumpai lanri langika, nasaba' anjo langika empoang kala'biranNa Allata'ala; 35 yareka lanri buttaya, nasaba' anjo buttaya pa'dongkokang bangkenNa Allata'ala; yareka lanri Yerusalem, nasaba' anjo kotaya, kota kalompoanNa Karaenga. 36 Tea tongko assumpai lanri ulunnu, nasaba' takkulleako ampa'jari keboki yareka ampa'jari le'lengi uu'nu manna silawara'. 37 Jari angkana mako bawang ‘Iyo’ punna iyo, yareka ‘Tena’ punna tena. La'biangang na anjo, pangngajara'na mami billisika.” 38 “Nuasseng ngaseng tommi angkanaya nia' pangngajarang kammaya anne: mata nisambei mata; gigi nisambei gigi. 39 Mingka anne kamma Kukana ri kau ngaseng: teako appasibalasaki gau' kodi mange ri tau le'baka a'gau' kodi ri kau. Passangalinna punna nia' antempaka'rangi pilisi' kanannu, boli'mi kamma natempaka'rang todong pilisi' kairinnu. 40 Na punna nia' antuntukko mae ri hakinga ri pangadelanga lanri eroki naalle bajunnu, sareang tongi lipa'nu. 41 Punna nia' tummarenta ampassako angngerangangi barang-baranna se're kilometere' bellana, erangangi rua kilometere' bellana. 42 Punna nia' tau appala' apa-apa ri kau, sare laloi. Siagang teako pattenangi tau eroka angnginrang apa-apa ri kau punna nia'ja ri kau.” 43 “Nuasseng ngasemmi angkanaya nia' todong pangngajarang kammaya anne: kamaseangi agannu na nukabirisi balinnu. 44 Mingka anne kamma Kukana ri kau ngaseng: kamaseangi sikontu balinnu siagang pappala' doangangi tau assessayako, 45 sollannu a'jari ana'-ana'Na Allata'ala Manggenu ri suruga. Nasaba' Napammumbai alloNa Allata'ala sollanna nasiori ngaseng rupataua, baji' natau a'gau' bajika kammayatompa tau a'gau' kodia. Kammayatompa Napaturungi bosiNa Allata'ala sollanna natuju ngaseng rupataua, baji' natau a'gau' bajika kammayatompa tau a'gau' kodia. 46 Nasaba' punna iaji bawang tau angkamaseangako nukamaseang, apa paralluna Nabalasa' Allata'ala anjo panggaukannu? Sai manna parentea angngasseng tonji anggaukangi kammaya anjo? 47 Na punna agannuji bawang nujamakki, apa la'bina kabajikannu? Kamanna tau kapereka nagaukang tonji kammaya. 48 Ia Allata'ala Manggenu ri suruga sukku' Nakamaseangi sikontu rupataua. Jari parallui nukamaseang todong parannu tau.”
1 “U'rangi, teako gaukangi apa napassuroanga agamanu ri dallekanna tau jaia, lanri ero'nu ampappiassengangi ri tau jaia. Punna kamma anjo batenu appanggaukang, mattantu tena nulanggappa pahala battu ri Allata'ala Manggenu niaka ri suruga. 2 Jari, punna assareko passidakka mange ri tau kasi-asia, teako pau-paui mange ri tau maraenga, sangkamma sarroa nagaukang tau munapeka ri balla' sambayanga yareka ri tangngana aganga, lanri eroki nipalece ri taua. U'rangi angkanaya ia tommi anjo pappalecea a'jari pahalana ke'nanga. Pantaranganna anjo pappalecea tenamo pahala maraeng lanagappa. 3 Mingka ikau ngaseng, punna assareko passidakka, teako paui ri tau maraenga sollanna tena tau maraeng angngassengi anjo passidakkanu. 4 Boli'mi kamma na Allata'ala Manggenu ri suruga bawang anciniki siagang angngassengi anjo passidakkanu. Iami sallang assareko pahala lanri assarenu passidakka.” 5 “Punna assambayangko, teako sangkammai tau munapeka. Anjo ke'nanga nangai ammenteng assambayang lalang ri balla' sambayanga, yareka ri panyingkulu'na aganga, lanri eroki nicini' ri tau jaia. U'rangi angkanaya iatommi anjo pahalana ke'nanga punna nicini'mo ri tau jaia assambayang. Pantaranganna anjo, tenamo pahala maraeng lanagappa ke'nanga. 6 Jari, ikau punna erokko assambayang, antamakko ri bili'nu nampa nutongko' pakke'bu'nu, nunampa assambayang ri Allata'ala Manggenu, tenaya naniciniki. Na Manggenumi anciniki anjo sambayannu nugaukanga ri pammantangang taccokkoa. Iami sallang lassareko pahala lanri anjo sambayannu. 7 Na punna assambayangko, tea' mako la'bu dudui bicarannu, sangkamma tau kapereka. Nasaba' napikkiriki anjo tau kapereka angkanaya punna la'bu sambayanna, iaminjo lanitarima ri Allata'ala. 8 Teako kau appakammai anjo batenu assambayang. Kale'ba' Naasseng riolomi Allata'ala parallunu ri tenanapa nuppala'. 9 Jari, punna erokko assambayang pakammaminne batenu: ‘O, Manggea ri suruga: IKattemi Allata'ala Tenaya Ruanna Poro iKatte nisomba siagang nipakala'biri'. 10 IKattemi Karaenna ikambe. Poro iKattemi ammarenta ri lino, na nituruki erotTa ri lino kamma ri suruga. 11 Kisarei ikambe anne alloa apa naparalluanga ikambe. 12 Kipammopporangi dosa-dosana ikambe, Sangkamma napammopporammi ikambe tu salaya ri kalenna ikambe. 13 TeaKi' balang parekangi ikambe nibeta ri paccobaya passangalinna Kipakabellai ikambe battu ri maja'dalaka IKattemi Karaeng makoasaya siagang kaminang mala'birika satunggu-tungguna. Aming!’ 14 Punna nupammopporang tu kasalanga ri kalennu, Napammopporang tongi Allata'ala Manggenu ri suruga dosanu. 15 Mingka punna tena nupammopporangi parannu tau, tena todong Napammopporangi Allata'ala Manggenu ri suruga dosanu.” 16 “Punna appuasako, teako pinra-pinrai tanja'nu a'jari susa, kamma tau munapeka. Anjo tau munapeka nangai napinra-pinra tanja'na a'jari kamma tau susa punna appuasai, lanri ero'na niasseng ri taua angkanaya appuasai. U'rangi angkanaya ia tommi anjo pahalana ke'nanga punna niassemmo ri taua angkanaya appuasai. Pantaranganna anjo tenamo nalanggappa pahala maraeng ke'nanga. 17 Mingka ikau ngaseng, punna appuasako, pira'nyuki rupannu siagang a'jangka baji'-bajikko, 18 sollanna tena naassengi tau maraenga angkanaya appuasako; passangalinna Manggenu bawang ri suruga angngassengi. Na iaminjo Manggenu ri suruga lassareko sallang pahala lanri appuasanu.” 19 “Teako pa'barang-barangang bawang nupasse're ri lino. Nasaba' pa'barang-baranganga ri anne linoa akkullei nakanre kacoa', siagang bu'bu', yareka akkullei nilukka' ri palukkaka. 20 Jari appasse're mako pa'barang-barangang lanueranga mange ri suruga. Nasaba' ri suruga, tena kacoa' siagang bu'bu' langkanrei anjo pa'barang-baranganga, yareka tena palukka' akkulle allukkaki. 21 Lanri kemae ammantang pa'barang-barangannu, anjoreng tommi ta'dongko' nyawanu.” 22 “Anjo mataya rapangi sulo ri batangkalea. Punna tangkasaki siagang corai matannu, singara' ngaseng tommi antu sikontu batangkalennu. 23 Mingka punna ra'masaki matannu, sassang ngaseng tommi antu sikontu batangkalennu. Jari punna sassammi lampu niaka ri kalennu, tamakami sassang makkappu'na anjo sassanga!” 24 “Takkulleai se'rea tau ampa'jari atai kalenna mae ri ruaya karaeng. Nasaba' nia' lanangai, nania' latanajampangia kananna. Yareka la'bi a'dakkikangngangi mae ri se'reanga na maraengannaya. Ikau kamma tommako anjo. Takkulleako lampa'jari atai kalennu mae ri Allata'ala, punna nupa'jari ata todong kalennu mae ri pa'barang-baranganga. 25 Lanri kammana, u'rangi laloi anne; teako ranggaselai ri passala'na katallassannu. Angkanaya apa lanukanre siagang apa lanuinung, kammayatompa apa lanupake ri batangkalennu. Sai la'bi paralluangangi anjo tallasaka naanjo kanrea? Siagang anjo batangkalea naanjo care-carea? 26 Cini' sai anjo jangang-janganga ri panri'bakkanna. Tena nangngasseng a'lamung-lamung, tena nakkatto, kammayatompa tena nammoli' wassele' lamung-lamung ri pammoli'-molikanna. Mingka manna nakamma mamo, niparakai tonji ri Manggenu niaka ri suruga. Sai lompoangangi anggarannu nasikamma anjo jangang-janganga? 27 Maka inaika akkulle antambai umuru'na manna sike'de' lanri ranggaselana? 28 Kammayatompa, angngapa nuranggasela lanri care-carenu? Cini' sai antekamma tallasa'na anjo bunga-bunga rosia attimboa ri paranga. Anjo bunga-bungaya tena nakkulle anjama siagang tena nattannung; 29 u'rangi sai antekamma kalumanynyanna anjo Karaeng Salomo, mingka tenapa nabajikangang pakeanna naanjo bunga-bungaya! 30 Anjo ruku'-ruku' niaka ri paranga, attimboi anne alloa nammuko lanitunui sa'genna cappu'. Mingka manna nakamma, nipipakei tonji ri Allata'ala anjo ruku'-rukuka sa'genna ga'ga nicini'. Jari la'biangampa pole ikau! Tena tanipipakeinu! Mingka sayanna kakurang tappakko! 31 Jari tea' mako bata-batai angkanaya, ‘Apamo lanikanre’, yareka ‘apamo laniinung’, yareka ‘apamo lanipake’? 32 Tau tenayaji natappa' ri Allata'ala tuli angngondang dudui sikammaya anjo. Sikontutojenna le'ba' Naasseng memanji Manggenu ri suruga, angkanaya nuparalluang ngasengi anjo sikammaya. 33 Jari, boyami la'bi riolo antekamma nasollanna Allata'ala ammarenta lalang ri katallassannu, siagang nanugaukang ero'Na. Na sikontu anjo kaparalluannu maraenganga laNasare tonjako Allata'ala. 34 Lanri kammana, tea' mako bata-batai ri passala'na lanukaparalluanga ammuko, nasaba' untu' ammukoa nia' todong bata-batana. Anne alloa angga'nami lanukasusanga, tea' mako tambai ba'lalo susanu.”
1 “Teako mangngadeli ri parannu tau, sollanna tena todong Naadeliko Allata'ala. 2 Nasaba' antekamma batenu mangngadeli ri parannu tau, kamma tomminjo batenu laniadeli ri Allata'ala. Siagang pa'baku' apa nupake ambakuki parannu tau, ia tomminjo sallang pa'bakuka laNapake Allata'ala ambakukko. 3 Angngapa nakkulle nucini' limbu'bu' niaka lalang ri matanna parannu tau, mingka batu niaka lalang ri matannu tanucinikai? 4 Antekamma lanukana ri parannu tau, ‘Mae kupasulukangko anjo limbu'bu' niaka lalang ri matannu,’ nania' batu lompo lalang ri matannu? 5 E, munape'! Pasuluki rolong anjo batu niaka lalang ri matannu, nunampa akkulle accini' baji' ampasuluki anjo limbu'bu' niaka lalang ri matanna parannu tau. 6 Teako assarei barang matangkasa' mange ri kongkonga, sollanna tena na'giling ri kau ambakkaiko. Tea tongko assarei mutiara mange ri bawia, sollanna tena naonjo'-onjokangi anjo mutiaraya.” 7 “Appalakko, nunisare. A'boyako, nunggappa. De'deki pakke'buka, nunisungkeang. 8 Nasaba' inai-nai appala', iami lanisare; inai-nai a'boya, iami langgappa; siagang inai-nai ande'de' pakke'bu', iami lanisungkeang. 9 Maka nia' se're tau toa assare batu punna appala' roti ana'na? 10 Yareka assare ulara' punna appala' juku' ana'na? 11 Manna antekamma ja'dala'nu mingka angngasseng tonjako assare apa-apa baji' mae ri ana'-ana'nu. La'biangampa pole Manggenu ri suruga, ma'nassa laNasarena apa baji' mae ri tau appalaka ri Ia. 12 Gaukammi ri parannu tau apa nungaia lanagaukang parannu tau ri kalennu. Iaminjo hukkung napabattua Musa, siagang pangngajaranna na'bi-na'bia.” 13 “Pakke'bu' seppaka nuolo antama, lanri luaraki oloang mangea ri kapanrakanga, kammayatompa lompoi pakke'bu'na, najaimo tau angngolo anjoreng. 14 Mingka seppaki siagang sukkaraki pakke'bu' angngoloa mange ri katallassanga, nasike'de'ji tau angngolo anjoreng.” 15 “Tutuko mae ri na'bi-na'bi palassua. Sanrapangi nicini' gimbala' ke'nanga, mingka sikontutojenna sanrapangi kongkong nye'nyereka lalang nyawana ke'nanga. 16 Battu ri panggaukanna ke'nanga akkulle nuasseng nubatei. Takkulleai romang-romang akkatintinga a'rappo anggoro'; siagang takkulleai rompo'-rompo' akkatintinga a'rappo ara. 17 Poko' copponga bajiki rapponna, napoko' dattuluka kodi rapponna. 18 Takkulleai poko' copponga lakodi rapponna, kammayatompa poko' dattuluka takkulleai labaji' rapponna. 19 Nasikamma poko' tenaya nabaji' rapponna lanita'bangi nampa nitunu. 20 Kammatommi anjo sikamma na'bi-na'bi palassua. Akkullei nuasseng nubatei battu ri panggaukanna.” 21 “Tayangasenga tau akkioka ri Nakke angkana, ‘O, Batara, o, Batara,’ la'jari umma'Na Allata'ala; mingka iaji bawang tau anggaukangai ero'Na ManggeKu ri suruga. 22 Punna narapi' sallang allonna niadeli taua, jai tau lakkiok-kio' ri Nakke angkana, ‘O, Batara, o, Batara, sai lalang arenTa tonji le'ba' kupabattu pappasanNa Allata'ala? Sai lalang arenTa tommi le'ba' kubongka setanga, anggaukangi gau' appakalannasaka?’ 23 Mingka laKukana sallang appiali, ‘Tena le'bakako Kuasseng! A'lampa ngasengko anrinni ikau le'baka a'gau' ja'dala'!’ ” 24 “Jari, inai-nai ampilangngeri siagang anggaukangi kana-kana Kupangngajarranga, iami sanrapang tau cara'deka, ambangunga balla' irate ri tompo'na batu makassaka. 25 Ri wattunna battu bosia siagang a'baya kammayatompa anging barubua antujui anjo ballaka takkulleai anra'ba, lanri kassaki pammentenganna irate ri batua. 26 Na tau allangngerekai kana-kana Kupangngajarranga mingka tena nagaukangi, iami sanrapang tau toloa, ambangunga balla' irate ri tompo'na kassika. 27 Ri wattunna battu bosia siagang a'baya kammayatompa anging barubua antujui anjo ballaka, anra'bami. Nateaimi sipato' sanna'na panra'na anjo ballaka!” 28 Le'ba'na Isa angngajara', teaimi sipato' lannasa'na ngaseng tau jaia allangngereki anjo apa Napangngajarranga. 29 Lanri lompo sikali pangaruNa nilangngere' bateNa a'bicara. Tasangkammayai batena guru-guru agamana ke'nanga.
1 Naungi Isa battu ri bontoa, najaimo tau ampinawangi. 2 Anjo wattua nia' tommo se're tau garring sala battu akkulantu' ri dallekanNa Isa angkana, “O, Bapa', punna Kierokangi akkulleKi' amballeia' ku'jari baji' ri garringku.” 3 Naangka'mi limanNa Isa naNajama anjo tau garring salaya, na Nakana, “Kuerokangi, a'jari baji' mako!” Apaji nammari memammo silalonna garrinna anjo taua. 4 Le'baki anjo Nakanamo pole Isa ri anjo taua, “U'rangi! Tea' laloko caritai anne kajarianga manna pole ri nai. Mingka a'lampamako mange ri imanga, na nusuro paressa kalennu ri ia. Le'baki anjo, a'lampamako mange assare koro'bang situru' napassuroanga Musa; iaminjo a'jari butti ri taua angkanaya ma'nassa baji' mako ri garrinnu!” 5 Ri wattunna battu Isa ri Kapernaum, nia'mo se're perwira surudaduna Roma mange ambuntuli, ero' appala' tulung. 6 Nakanamo anjo perwiraya, “O, Bapa', garringi pajamaku ri balla'. Sanna'mi sessana, attinro mami rate ri katinroanga lanri peso'mi.” 7 Nakanamo Isa, “ErokKa' a'lampa mange amballei, sollanna a'jari baji'.” 8 Mingka appialimi anjo perwiraya nakana, “Tea' maKi' mangei ri ballakku Bapa'. Nasaba' tena nakusiratang Kibattui ri ballakku. Kiparentakang mami bawang, ma'nassa la'jari baji'mi antu pajamaku. 9 Nasaba' manna inakke amminawang turu' tonja' ri parentana komandang irateangangku. Irawangangku nia' todong siapa are kupimping surudadu, amminawang turuka todong ri parentaku. Punna nia' surudadu kusuro angkana, ‘A'lampako,’ tena ta'lampana. Yareka punna kukana ri maraenganga, ‘Maeko anrinni,’ tena tabattuna mae; kammayatompa punna kuparenta tunisuro-suroku angkana, ‘Gaukangi anne!’ tena tanagaukanna anjo kupassuroanga.” 10 Nalangngere'na Isa kananna anjo perwiraya, teaimi sipato' lannasa'na. Nakanamo ri sikamma tau niaka amminawang ri Ia, “Teai sipato' anne taua. Tenanniakkapa le'ba' Kubuntulu' tau lompo kammaya anne tappa'na ri alla'na tu Israel! 11 Memang, jai tau lania' battu iraya siagang battu ilau' ero' a'rannu-rannu siagang Abraham, Ishak, siagang Yakub, lalang ri Lino BeruNa Allata'ala. 12 Padahala' tau siratanga a'jari umma'Na Allata'ala nipelaki assulukang ri sassanga. Anjoremmi ke'nanga langngarru' siagang langkasiaki sessaya.” 13 Le'baki anjo Nakanamo Isa mange ri anjo perwiraya, “Ammotere' mako mange ri balla'nu, a'jarimi antu apa nukatappakia.” Naanjo wattua baji' memammi ri garrinna pajamana anjo perwiraya. 14 A'lampami Isa mange ri balla'na Petrus. Narapikammi matoang bainena Petrus garring rammusu' irate ri katinroanga. 15 Najamami Isa limanna anjo tau garringa, sa'genna ammari memang silalonna garrinna. Ambangummi nai', nampa mange allayani Isa. 16 Ri wattunna appakkaramulamo karuenga, jaimi tau nisoso' ri setang nierang mange ri Isa. Naporo sibukuji bawang kana Napau Isa naNabongkamo assulu' anjo setang-setanga battu ri yangasenna anjo tunisosoka ri setang, kammayatompa naNaballei ngaseng tommo sikontu tau garringa. 17 Lanri Nagaukanna ngasemmo Isa anjo sikammaya, a'rupami apa le'baka napau Na'bi Yesaya angkanaya, “Natanggongi sikontu pa'risitta siagang Napammolei sikontu garrinta.” 18 Jai sikali tau antammulili Isa. Nacini'na ngaseng Isa ke'nanga, Nasuromi ana'-ana' gurunNa a'lampa a'limbang ri tamparanga. 19 Nia'mo sitau guru agama battu mae ri Ia angkana, “O Pa' Guru, erokka' amminawang ri Katte, manna pole a'lampa kemae!” 20 Appialimi Isa Nakana, “Kongkong romanga nia' pammantanganna; kammayatompa jangang-janganga nia' ru'munna. Mingka Ana' Ma'rupataua manna laNapappadongkoki ulu tena todong.” 21 Nia'mo pole ana' gurunNa maraenga angkana, “O Bapa', Kisarea' rolong kasampatang ammotere' antarawangi maya'na manggeku.” 22 Mingka appialimi Isa Nakana, “Amminawang mako ri Nakke; lappassang tommi tau matea nanatarawang tau matena.” 23 Naiki Isa ri biseanga, namminawang ngaseng todong ana'-ana' gurunNa. 24 Ti'ring battumi anging puttusu' sannaka lompona antujui tamparanga, sa'genna nitunrummi ri bombang anjo biseanga. Na anjo wattua attinroi Isa. 25 Battumi ana'-ana' gurunNa akkiok-kio' anronrongi nakana, “Bapa', natujuki' bala, tulungi ana'-anatTa!” 26 Nakanamo Isa, “Angngapa numalla' kamma ngaseng? Kurang tappakko ri Nakke?” Nampa ammenteng Isa, naNaga'gara' anjo anginga siagang tamparanga. Sa'genna sannang sikalimo anjo tamparanga. 27 Lannasa' ngasemmi ana' gurunNa Isa. Nakanamo ke'nanga, “Tau apamo anne kutaeng? Kamanna anginga siagang bombanga amminawang turu' todong ri parentaNa!” 28 Battui Isa ri ba'leanna tamparanga, ri daera Gadara. Anjoreng nia'mo rua tau nasoso' setang battu mae ri Ia. Tenamo tau barani a'reppese' mae ri anjo tau ruaya, lanri sekke'na. 29 Battu lalangi ke'nanga assulu' ri pa'jerakkanga akkiok-kio' angkana, “E Ana'Na Allata'ala! Apa ero' battu nugaukang ri kambe? Ero' mako battu ansessai kambe, manna tanarapikapa wattunna?” 30 Tena nabella battu anjoreng ri tampaka, jai sikali bawi sitabang a'boya kanre. 31 Napala' dudumi anjo setang-setanga ri Isa angkana, “Punna lanusuroki' assulu' battu lalang ri kalenna anne taua, suromi kambe antama' anjoreng ri bawi-bawia.” 32 Nakanamo Isa, “A'lampamako!” Assulu'mi anjo setang-setanga battu lalang ri kalenna anjo tau ruaya. Nampa a'lette' antama' anjoreng ri bawi-bawia a'lampa mange ambuangi kalenna naung ri tubirika ri tamparanga sa'genna tallang ngaseng. 33 Lari ngasemmi pakalawakinna anjo bawia, mange ri kotaya; nanacarita ke'nanga anjo apa kajarianga, siagang passala'na anjo tau ruaya nasosoka setang. 34 Jari a'lampa ngasemmi anjo tau niaka ri kotaya, mae ri Isa. Nabuntulu'namo ke'nanga Isa, napala' dudumi ke'nanga ri Isa sollanna a'lampamo ambokoi anjo daeraya.
1 Nai'mi Isa ri biseanga, nampa a'limbang anta'leang ammotere' mange ri kamponNa. 2 Battuna mange anjoreng, nia'mo se're tau peso' nierang rate ri katinroanga mae ri Isa. Nacini'na Isa antekamma lompona tappa'na ke'nanga, Nakanamo ri anjo tau pesoka, “Sa'barakko na'! Nipammopporammi dosa-dosanu.” 3 Anjo wattua nia' todong siapa are guru-guru agama anjoreng. Nakanamo lalang nyawana anjo guru-guru agamaya, “Anne taua nahinai Allata'ala!” 4 Na anjo nawa-nawanna ke'nanga Naassengi Isa. Jari Nakanamo Isa ri ke'nanga, “Angngapa naja'dala' kamma batenu ngaseng appikkiri'? 5 Kereanga la'bi gampang: angkanaya ‘Nipammopporammi dosanu’, yareka angkanaya ‘Ambangungko nai' nu'jappa’? 6 Mingka kamma-kamma anne erokKa' ampa'buttiangko angkanaya makoasai Ana' Ma'rupataua ampammopporangi dosaya ri lino.” Nampa Nakana Isa ri anjo tau pesoka, “Ambangungko nai', angkaki katinroannu, siagang ammotere' mako!” 7 Ambangummi nai' anjo tau pesoka, nampa ammotere' mange ri balla'na. 8 Ri wattunna nacini'mo tau jaia anjo apa kajarianga, malla' ngasemmi ke'nanga; nammuji-mujimo ke'nanga ri Allata'ala, lanri Napa'nyatanamo Allata'ala koasa kammaya lompona mae ri tu linoa. 9 Le'baki anjo a'lampami Isa ambokoi anjo tampaka. Lalang a'jappaNa, nia'mo Nacini' sitau pasingara' sima niarenga Matius, sitabang ammempo lalang ri kantoro'na. Nakanamo Isa ri ia, “Maeko amminawang ri Nakke!” Ammentemmi Matius nampa amminawang ri Isa. 10 Ri wattunna angnganre Isa ri balla'na Matius, jaimi pasingara' sima siagang tau nicini' kodia ri tau jaia battu ngaseng todong angngagangi Isa siagang ana'-ana' gurunNa angnganre. 11 Nia'mo siapa are tu Farisi anciniki ke'nanga sipangnganreang. Akkuta'nammi anjo tu Farisia ri ana'-ana' gurunNa Isa angkana, “Apa saba'na naNaagang sipangnganreang gurunnu pasingara' simaya siagang tau kodia sipa'na?” 12 Nalangngere'na Isa pakkuta'nanna ke'nanga, appialimi Isa Nakana, “Tu tenaya nagarring tena naparallu ri dottoro', passangalinna tu garringaji. 13 Pappilajarimi apa battuanna niaka nipau lalang ri Kittaka angkanaya: ‘Pangngamaseang Kukaeroki, jari teai koro'bang olo'-olo'’. Nasaba' iaji Kunia' battu lanri tu dorakaya ero' battu Kukio', jari teai tu tojenga.” 14 Le'baki anjo battumi ana'-ana' gurunna Yohanes Paje'ne' mae ri Isa. Akkuta'nammi ke'nanga ri Isa angkana, “Angngapa natappuasaya Katte ana'-ana' gurunTa, na ikambe anne siagang tu Farisia appuasaki'?” 15 Appialimi Isa angkana, “Maka biasai toanaya si'na atinna punna nia' ija bunting bura'nea ri tangnga-tangngana ke'nanga? Antekamma panggappanu? Tantu tena! Mingka lanarapiki sallang wattunna lanialle anjo bunting bura'nea battu ri tangnga-tangngana ke'nanga. Iaminjo wattua nalasi'namo atinna ke'nanga. 16 Tenanniakka tau annampeng baju toamo nakaeng beru ija napatampeng. Nasaba' punna assibeso' anjo baju toaya siagang anjo kaeng beru nipatampenga, tena tapila' a'jari luara'na kekke'na anjo baju toaya. 17 Kammayatompa, tenanniakka tau ammoli' anggoro' beru ri pammantangang lajappokamo. Nasaba' tena tareppe'na anjo pammantanganna, sa'genna tappela'-pela'mo anjo anggoroka. Jari anjo anggoroka musti anjorengi ri pammantangang berua todong niboli', sollanna tuli baji' anjo anggoroka siagang pammoneanna.” 18 Ri wattunna a'bicara Isa siagang ana'-ana' gurunna Yohanes Paje'ne', nia'mo sitau pamimping balla' sambayang battu. Akkulantuki ri dallekanNa Isa nampa nakana, “Silalonna mate ana' baineku. Mingka kuminasaiKi' naKimange ampadongkoki lima, sollanna attallasa' poleang.” 19 Ammentemmi Isa nampa a'lampa siagang ana'-ana' gurunNa amminawang mange ri balla'na anjo taua. 20 Ri tangngana aganga, nia'mo sitau baine battu ri boko a'reppese' mae ri Isa. Anjo bainea sampulomi anrua taung garring nalari cera'. Na nakana pikkiranna, “Manna kuseroja bawang jubaNa, akkullema' a'jari baji' ri garringku.” Jari naseromi jubaNa Isa. 22 Anjo wattua assailemi Isa, naNaciniki anjo bainea. Siagang Nakanamo ri anjo bainea, “Sa'barakko na'! Lanri tappa'nu ri Nakke, a'jari baji' mako ri garrinnu!” A'jari baji' memammi silalonna anjo bainea. 23 Le'baki anjo anrapi'mi Isa ri balla'na anjo pamimping balla' sambayanga. Nia'mo nacini' tau assuling-suling kamateyang, kammayatompa jaimi sa'ra gegere' nalangngere'. 24 Nakanamo Isa ri ke'nanga, “Assulu' ngasengko! Katena namate anne anaka, mingka attinronaja.” Ammakkala'mi taua angkakkali Isa. 25 Mingka assulu'na ngasemmo anjo taua, antama'mi Isa ri kamara'na anjo anaka, naNata'gala' limanna. Ambangummi nai' anjo ana' bainea. 26 Alla'bammi anjo kabaraka ri sikontu anjo daeraya. 27 A'lampami Isa battu anjoreng ri tampaka. Na ri tangngana aganga, nia'mo rua tau buta ampinawangi. Akkio'-kioki ke'nanga angkana, “O, Ana'na Daud, Kikamaseangi ikambe anne!” 28 Ri wattunna antama' Isa ri se'reang balla', battumi anjo ruaya tau buta mae ri Isa. Akkuta'nammi Isa ri ke'nanga Nakana, “Maka nupatappaki angkanaya akkulleko Kubajiki sa'gennu accini'?” Appialimi ke'nanga angkana, “Iye' tappaki ikambe!” 29 Jari Najamami Isa matanna ke'nanga siagang Nakana, “Lanri tappa'nu, a'jarimi ri kau apa numinasaia.” 30 Apaji nakkullemo accini' ke'nanga. Napakainga' dudumi Isa ke'nanga, sollanna tena napaui ke'nanga anjo kajarianga manna pole ri nai. 31 Mingka a'lampa tonji ke'nanga napa'la'bang anjo kabara' Nagaukanga Isa ri sikontu anjo daeraya. 32 Ri wattunna a'lampamo anjo tau ruaya, nia'mo pole se're tau pepe siagang nisoso' ri setang nierang mae ri Isa. 33 Nabongkami Isa assulu' anjo setanga battu lalang ri kalenna anjo tau pepea; sa'genna akkulle memammo silalonna a'bicara anjo tau pepea. Lannasa' ngasemmi tau jaia anciniki anjo kajarianga. Nakanamo ke'nanga, “Tena le'bakapaki' accini' kajariang kammaya anjo lalang ri pa'rasangang Israel!” 34 Mingka nakanamo tu Farisia, “Kakapalanaji anjo setanga assarei koasa nakkulle Nabongka assulu' anjo setanga.” 35 Kammaminjo pa'lampanna Isa akkuliling battu ri se'reang kota mange ri kota maraenga; battu ri se'reang kampong mange ri kampong maraenga. Angngajara'mi lalang ri sikamma balla' sambayanga, siagang Napabattumi Kabara' Kasalamakkanga, ri passala' antekamma bateNa ammarenta Allata'ala salaku Karaeng. Naballei ngasemmi tau garringa na'jari baji' ngasemmo. Na anjo tau garringa a'rupa-rupai garrinna siagang kasessanna. Kammayatompa tu sala-salanga nabajiki ngaseng tommi. 36 Na ri wattunna Nacini' ngaseng Isa anjo tau jaia, tu'guru'mi pangngamaseanNa. Lanri sanrapangi ke'nanga gimbala' tappelaka siagang dodonga lanri tenana pakalawakinna. 37 Jari Nakanamo Isa ri ana'-ana' gurunNa, “Jaimi kattoang, mingka sike'de'ji tu lakkatto. 38 Jari pala'mi ri patanna tana sollanna nasuro battu pakattona.”
1 Nia' se're allo, Nakio'mi Isa sampuloa anrua ana' gurunNa battu asse're. Nampa Nasare ke'nanga koasa untu' ambongkai roh-roh ja'dalaka siagang amballei nakkulle baji' sikontu tu garringa kammayatompa tu sala-salanga. 2 Naia arenna anjo sampuloa anrua ana'-ana' gurunNa, iaminne: uru-uruna iamintu Simon (nigallaraka Petrus) siagang sari'battanna niarenga Andreas; nampa Yakobus siagang sari'battanna niarenga Yohanes, niarenga Zebedeus manggena. 3 Nampa Filipus siagang Bartolomeus, Tomas siagang Matius pasingara' simaya; kammayatompa Yakobus ana'na Alfeus, siagang Tadeus; 4 na kala'busanna iamintu Simon nigallaraka Patriot, siagang Yudas Iskariot ambalukangai Isa. 5 Le'baki anjo Nasuromi Isa anjo sampuloa anrua tu nisuroNa. Na Napasang angkana, “Teako a'lampai mange ri pantaranganna daerana tu Yahudia. Tea tongko mangei ri kota-kotana tu Samariaya. 6 Mingka a'lampamako mange ri tu Israelka, mange ri tau sala oloanga ri katallassanna. 7 Pabattuammi ke'nanga angkanaya tasalloami Nammarenta Allata'ala salaku Karaeng. 8 Pakabaji'mi sikamma tau garringa; pabangung poleangi tau matea pakabaji'mi tau garring salaya, siagang bongkami sikamma setanga. Na anne Kusareangako, apa kupassareang bawang-bawanji ri kau ngaseng. Jari passareang bawang-bawang tommi mae ri taua. 9 Teako angngerangi doe' lanubokong ri lampanu, baji' na doe' bulaeng, doe' pera', yareka doe' tambaga. 10 Tea tongko angngerangi pammoneang passidakka, yareka pakeang ruang lawara', teako angngerangi sapatu yareka takkang. Nasaba' sikamma tau anjamaya tena tanisareanna kaparalluanna. 11 Punna battuko mange ri se'reang kota yareka kampong, boyami tau eroka antarimako ri balla'na. Ammantang mako anjoreng sa'gennu a'lampa pole. 12 Punna antamakko ri se'reang balla', a'barisallang mako angkana, ‘Poro nibarakkaki ngasengko ri Batara sibatu balla'.’ 13 Na punna natarimajako anjo taua antama' ri balla'na, boli'mi kamma nammantang anjo barakkaka ri ke'nanga sibatu balla'. Mingka punna tanatarimayako ke'nanga, alle poleammi ammotere' anjo barakkaka. 14 Punna nia' tau ri se'reang balla' yareka ri se'reang kota taeroka antarimako, yareka taerokai ampilangngeri kana-kanannu, bokoimi anjo tampaka na nube'besang limbu'bu' niaka ri pala' bangkennu. 15 U'rangi! Angkanaya ri Allo Kiamaka sallang, lakkulleangangi nipammopporang tau niaka ri kota Sodom siagang Gomora, kala ia anjo tau niaka lalang ri kotaya!” 16 “Parhatikangi anne: Sanrapangko gimbala' tenaya pakkullena Kusuro antama' ri tangnga-tangngana kongkong romang sekkeka. Jari paralluko tutu sanrapang ularaka siagang tuna pa'mai' sanrapang jangang-jangang bodobangkenga. 17 A'jaga-jagako, nasaba' lanijakkalakko sallang nampa nierangko mange andallekang ri pangadelang agamaya. Lanisessako ri balla' sambayanga. 18 Lanierangko mange andallekang ri pamarentaya siagang karaenga, passabakkang amminawannu ri Nakke. Mingka iaminjo wattua la'jari kasampatang ri kau untu' la'jari sa'bingKu ri dallekanna ke'nanga siagang tu tenayapa naassengi Allata'ala. 19 Na punna nierangko mange laniadeli, teako bata-batai ri passala' lanupaua yareka antekamma batenu la'bicara. Nasaba' punna narapi'mo wattunnu la'bicara tena tanipauannu apa siratanga lanupau. 20 Nasaba' teai ikau la'bicara anjo wattua, passangalinna RohNa Manggea ri suruga la'bicara battu lalang ri kalennu. 21 Nia' sallang wattunna nakajariang nania' tau ampassareangi sari'battanna nasuro buno; yareka tau toa ampassareangi ana'na nasuro buno. Ana'-anaka lanaewai anrong manggena, siagang nasuro bunoi ke'nanga. 22 Lanikabirisiko ri tau jaia passabakkang amminawannu ri Nakke. Mingka inai-nai tuli attahang sa'genna kala'busang tallasa'na, iami lanipasalama'. 23 Punna nisessako ri se'reang kota, lariko mange ri kota maraenga. Kupauangko angkanaya: Tanula'bangapi numangei sikontu kota-kotaya ri Israel, nania'mo battu poleang Ana' Ma'rupataua. 24 Takkulleai lompoangang ana' gurua na gurunna; kammayatompa takkulleai lompoangang palayanga na karaenna. 25 Sukku'mi sa'genna punna a'jari sangkamma ana' gurua siagang gurunna; yareka a'jari sangkamma palayanga siagang karaenna. Punna nigallara'mo Pinggawa setang kapala ruma tanggaya, la'biangampa pole kodina lanigallarrangi bone balla'na!” 26 “Teako mallakki ri ma'rupataua. Tenanniakka apa-apa taccokko talakacinikang sallang; siagang tenanniakka apa-apa nicokkoi talakaassengang sallang. 27 Apa-apa Kupabattua ri kau lalang ri sassanga, musti nupabattu poleangi lalang ri singara'na alloa. Siagang apa-apa nipa'bicikanga ri tolinnu, pa'la'bangi sa'genna ri kere-keremae! 28 Teako mallakki ri tau akkullea ammuno tubu, mingka tenaya koasaNa ammuno nyawa. Mingka musti mallakko mae ri Allata'ala, niaka koasana ammuno tubu siagang nyawa lalang ri naraka. 29 Ruang kayua cui-cui akkullei niballi se're seng. Mingka manna nakamma mamo, manna sikayua takkulleai tu'guru' naung ri buttaya punna taNakaerokangi Allata'ala Manggea. 30 Siapa jaina uu'nu irate ri ulunnu, le'ba' bilang ngasemmi. 31 Lanri kammana minjo, tea' mako mallakki! Nasaba' lompoangangi anggarannu naanjo jangang-jangang cui-cuia!” 32 “Inai-nai ammangakui ri dallekanna tau jaia angkanaya amminawangi ri Nakke, laKumangakui tongi sallang ri dallekanNa ManggeKu ri suruga. 33 Mingka inai-nai ansassaliA' ri dallekanna tau jaia angkanaya amminawangi ri Nakke, laKusassali tongi sallang ri dallekanNa ManggeKu ri suruga.” 34 “Teako harakki angkanaya passiamakkang battu Kuerang antama' ri anne linoa. Teai passiamakkang Kuerang, passangalinna passisala-salang. 35 Nasaba' passabakkang kabattuangKumi nalanaewa ana'-ana' bura'nea manggena; yareka nalanabali-bali ana'-ana' bainea amma'na; kammayatompa nalanabali-bali mintu bainea matoang bainena. 36 Jari tau lalang ballaka tonji sallang la'jari bali lompo. 37 Inai-nai la'bi angkamaseangi anrong manggena naiNakke, tasiratangai amminawang ri Nakke. Kammaya todong, inai-nai la'bi angkamaseangi ana'-ana' bainena yareka ana'-ana' bura'nena naiNakke, tasiratanga tongi amminawang ri Nakke. 38 Siagang inai-nai taeroka ampisangi salli'na nampa amminawang ri Nakke, tasiratanga tongi amminawang ri Nakke. 39 Inai-nai angkatutui nyawana, iami latappela' nyawana; mingka inai-nai tappela' nyawana lanri tuli jarreki pa'mai'na amminawang ri Nakke, iami langgappai katallassang satunggu-tunggua.” 40 “Inai-nai antarimako, iNakke natarima. Na inai-nai antarimA', natarima tommi ManggeKu assuroA' battu. 41 Inai-nai antarimai na'bia kalanri na'bina anjo taua lanatarimai sallang pahalana na'bia. Na inai-nai antarimai tau bajika kalanri baji'na anjo taua, lanatarimai sallang pahalana tau bajika. 42 Inai-nai assarei je'ne' inung kalase'renna tau tuna dudua, manna naje'ne' dinginja, passabakkang amminawanna ri Nakke, patappa'mi angkanaya tena tanggappana pahala sallang!”
1 Le'baki Naajara' Isa anjo sampuloa anrua ana' gurunNa, a'lampami ambokoi anjo tampaka. A'lampami mange angngajara' siagang ampa'la'bangi pappasanNa Allata'ala ri kota-kota ambania anjoreng. 2 Nalangngere'mi Yohanes, niaka lalang ri tarungkua, sikamma apa le'baka Nagaukang Isa Almasi. Nasuromi siapa are ana'-ana' gurunna mange akkuta'nang ri Isa angkana, 3 “Maka iKatte mintu le'baka Napa'janjiang Allata'ala? Yareka musti lanitayanginji maraenganga?” 4 Appialimi Isa Nakana, “Ammotere' mako mae ri Yohanes nanupauang apa le'baka nucini' siagang nulangngere', iamintu: 5 accini'mi tau butaya, a'jappami tau pesoka, a'jari baji'mi tau garring salaya, allangngere'mi tau tongoloka, attallasa' poleammi tau matea, kammayatompa nibirittakammi Kabara' Baji' battua ri Allata'ala mae ri tu kasi-asia. 6 Mate'nemi tau tenaya nasorongbokoA'!” 7 A'lampanamo ana'-ana' gurunna Yohanes, Nabicarami Isa mae ri anjo tau jaia passala'na Yohanes. Nakana, “Apa mange nucini' ri parang lompoa? Ruku' silawaraka nairi' anging? 8 Apa ero' mange nucini' anjoreng? Tau ammake pakeang ga'ga? Niaki ri balla' lompona karaenga tau ammakeang ga'gaya! 9 Jari angngapa nu'lampa mange ri parang lompoa? Erokko mange accini' na'bi? Annabai, ba'lalo la'biangampa na na'bia. 10 Nasaba' iaminjo Yohanes niaka nisero kana lalang ri Kittaka angkanaya, ‘Nakana Allata'ala, iaminne tunisuroKu, Kusuroa a'lampa rioloanganNu sollanNu nasungkeang oloang.’ 11 U'rangi laloi anne! Tenanniakka tau le'ba' nia' ri lino lompoanganga na Yohanes Paje'ne'. Mingka manna nakamma mamo, inai-nai kaminang tuna ri umma'Na Allata'ala, lalompoangangi na Yohanes. 12 Battu ri pakkaramula nabirittakanna Yohanes anne kabaraka sa'genna kamma-kamma anne, tuli nisusaina umma'Na Allata'ala battu ri tau eroka angkoasai passai ke'nanga. 13 Ri tenanapa nabattu Yohanes le'ba'mi napassareang ngaseng Musa sikontu pangngatorang agamaya. Kammayatompa sikontu apa lakajarianga le'ba'mi napau la'bi riolo na'bi-na'bia. 14 Na ka'de' ero'jako tappa', iaminjo Yohanes le'baka nisero kana kabattuanna. Mingka nukanai Elia anjo Yohanes. 15 Jari punna nia' tolinnu, pilangngerimi! 16 Apa laKupasanrapangangi anne taua ri jammanga? Sanrapangi ana'-ana' pakarenaya ri passua'-suarranga. 17 Nia' angkana, ‘Kelong a'rannu-rannu nikelongang, mingka taerokako akkarena! Kelong tu kamateang nikelongang, mingka taerokako angngarru'!’ 18 Battui Yohanes — nappuasa siagang tangnginunga anggoro'; nanupakkanaimo, ‘Tu setangngang!’ 19 Battuiseng Ana' Ma'rupataua — Nangnganre siagang angnginung; nanipakkanaimo ri taua, ‘Cinissai anjo taua, balalana siagang painunna! Manna pasingara' simaya siagang tau kodi sipaka Naagang ngaseng sipa'rappungang.’ Mingka manna nakamma mamo, lanipa'butti tonjia ero'Na Allata'ala lanri a'nyatana wassele'na.” 20 Le'baki anjo appakkaramulami Nacalla Isa sikamma tau niaka ammantang anjoreng ri kotaya, lanri tenana naero' toba' ke'nanga. Na punna nipikkiri', anjoreng minjo ri kota-kotaya jai gau' appakalannasa' le'ba' Nagaukang Isa ri ke'nanga. 21 “Cilaka mako ikau ngaseng tau niaka ammantang lalang ri Korazim! Kammayatompa ikau ngaseng tau niaka ammantang lalang ri Betsaida, cilaka ngaseng tommako! Ebara' angkana le'ba' tommi nigaukang anjo gau'-gau' appakalannasaka ri tangnga-tangnganu ri Tirus siagang Sidon, ma'nassa sallomi le'ba'na toba' siagang nasassala' kalenna tau niaka anjoreng. 22 U'rangi laloi angkanaya, punna narapi' Allo Kiamaka sallang, akkulleangangi Napammopporang Allata'ala dosa-dosana tau niaka anjoreng ri Tirus siagang Sidon nakala ikau ngaseng! 23 Kammayatompa ikau tau niaka ri Kapernaum! Gassingka nukana lanipakatinggiko nai' ri suruga? Tena! Passangalinna lanipelakko antama' ri naraka! Nasaba' ka'de' anjorengi ri kota Sodom le'ba' nigaukang anjo gau'-gau' appakalannasaka, mattantu nia' iji kota Sodom sa'genna kamma-kamma anne! 24 U'rangi laloi angkanaya, punna narapi' Allo Kiamaka sallang, akkulleangangi Napammopporang Allata'ala dosa-dosana tau niaka anjoreng ri kota Sodom nakala ikau ngaseng!” 25 Anjo wattua appala' doammi Isa Nakana, “O ManggeKu, Batara Makoasaya ri langika siagang ri linoa! Appala' sukkurukKa' ri Katte, lanri Kirahasiakanna ngaseng anne mae ri tau cara'deka siagang tau niaka pangngassenganna; mingka Kipappiassengangi mae ri tu tenaya sikolana. 26 Iaminjo ampakasannangi atinTa.” 27 Nampa Nakana Isa, “Yangaseng-ngasenna le'ba'mi Kipassareang mae ri Nakke. Tenanniakka manna sitau angngassengi AnatTa, pantaranganna iKatte. Tenanniakka todong angngassengKi', pantaranganna AnatTa, siagang sikamma tau le'baka Kupauang. 28 Battu ngaseng mako mae ri Nakke ikau tau posoa siagang tau battalaka erangnganna; laKupakabajiki pakkasia'nu. 29 Amminawang mako ri parentaKu, siagang appilajara' mako ri Nakke. Nasaba' inakke baji' pa'maikKa' siagang sa'barakKa'. Jari lasannammi nusa'ring. 30 Nasaba' lanukarannuangi apa Kupassuroanga, siagang laringangi nusa'ring apa Kupappieranganga ri kau.”
1 Nia' se're allo iamintu ri allo Pammari-marianga nanumalo Isa ri se'reang koko ase. Massing angngattili'mi ase ana' gurunNa Isa nampa nakanre lanri cipuru'na ngaseng. 2 Ri wattunna nicini' ke'nanga ri tu Farisia angkattiliki anjo asea, akkuta'nammi anjo tu Farisia mae ri Isa angkana, “Cini' sai anjo ana'-ana' gurunNu! Nadakkaimi atorang agamata nasaba' nagaukangi apa nipappisangkanga nigaukang ri allo Pammari-marianga.” 3 Appialimi Isa Nakana, “Tena le'bakapi nubaca lalang ri Kittaka, apa nagaukanga Karaeng Daud siagang taunna ri wattunna cipuru'? 4 Antamaki ri Balla'Na Allata'ala, nanakanre roti le'baka nipassareang ri dallekanNa Allata'ala. Padahala', manuru' ri pangatorang agamata takkulleai ke'nanga angkanrei anjo rotia — nasaba' imang-imangaji bawang akkulle angkanrei. 5 Yareka tale'bakapi nubaca lalang ri Kitta' Pangngatorang napabattua Musa; angkanaya imang-imang anjamaya ri allo Pammari-marianga lalang ri Balla'Na Batara nadakkai pangatorang allo Pammari-marianga, mingka tena tonja nipasalai? 6 Pilangngeri bajiki anne kanangKu: niaki anrinni tau lompoanganga na Balla'Na Batara. 7 Nia' tattulisi' lalang ri Kittaka angkanaya: Ia Kukaerokia iamintu pangngamaseang, teai koro'bang olo'-olo'. Ebara' nupahang baji'-baji' anjo bicaraya mattantu tena nupasalai tau tenaya salana. 8 Nasaba' makoasai Ana' Ma'rupataua irateanganna allo Pammari-marianga.” 9 Nabokoimi Isa anjo tampaka nampa mange ri balla' sambayanga. 10 Anjoreng ri balla' sambayanga nia' se're tau mate siali limanna. Nia'mo siapa are tau ero' ampa'boyangi sala Isa. Jari akkuta'nammi ke'nanga ri Isa angkana, “Maka akkulleji niballei taua ri allo Pammari-marianga?” 11 Appialimi Isa nakana, “Ebara' angkana nia' ri kau ammallaki sikayu gimbala', nampa tu'guru' anjo gimbala'na naung ri kali'bong lantanga ri allo Pammari-marianga, maka taerokako ampanaiki anjo gimbalaka battu ri kali'bonga lanri kaallo Pammari-mariangi? 12 Anjo rupataua lompoangangi anggaranna na gimbalaka! Lanri kammanami anjo, nakkulleja taua annulung ri allo Pammari-marianga.” 13 Le'baki anjo Nakanamo Isa ri anjo tau mate sialia limanna, “Pajonjoi limannu.” Napajonjomi limanna anjo taua; apaji na'jari baji'mo limanna anjo taua sangkamma limanna sialia. 14 Mingka a'lampami anjo tu Farisia, nampa sikongkolo' a'boya akkala' ero' ambunoi Isa. 15 Naassengi Isa angkanaya niakkali ero' nibuno ri anjo tu Farisia. Jari a'lampami ambokoi anjo tampaka. Jaimi tau ampinawangi. Naballei ngasemmi sa'genna a'jari baji' sikontu tau garringa. 16 Mingka Napisangkaimi ke'nanga ancaritai anjo apa Nagaukanga Isa mae ri tau maraenga. 17 Lanri kammana, a'rupami apa le'baka Nasuro pabattu Allata'ala ri Na'bi Yesaya angkanaya, 18 “Iaminne TunisuroKu le'ba' Kupilea, TunikamaseangKu siagang TuKupassiratanga ri atingKu. LaKupassareangi RohKu mae ri Ia, LaNakabarrangi kaadelangKu mae ri bansa-bansaya. 19 Tala'geakai siagang talakkio'-kiokai, yareka talappidatoai ri agang-agang lompoa. 20 TalaNata'bangai bulo ta'dundua TalaNabunoai kanjoli ca'dia rinrana. Lappattujuangi sa'genna a'rupa kaadelanga; 21 nalama'minasa sikontu bansa-bansaya ri Ia.” 22 Le'baki anjo, nia'mo se're tau buta siagang pepe nisosoka ri setang nierang mae ri Isa. Naballeimi Isa anjo taua sa'genna akkullemo accini' siagang a'bicara. 23 Lannasa' ngasemmi siagang angkanami taua, “Maka iaminne Ana'na Daud, le'baka nipa'janjiang?” 24 Nalangngere'na tu Farisia anjo pakkuta'nanga, appialimi ke'nanga angkana, “Nakkulle Nabongka setanga anne taua, lanri le'ba'naji nisare koasa ri pinggawana setanga.” 25 Mingka Naassengi Isa nawa-nawana anjo tu Farisia. Jari angkanami Isa ri ke'nanga, “Punna nia' se're bansa ta'bage-bage nampa simusu-musu para ia, ma'nassa tena nalajarre' ammenteng anjo bansaya. Kammayatompa punna nia' tau lalang kota, yareka nia' tau lalang se're balla' ta'bage-bage nampa simusu-musu para ia, mattantu laancuruki. 26 Kamma tomminjo lalang ri pamarentahanna Billisika, punna nia' silokoang ambongkai lokoang maraenga, ma'nassa ta'bage-bagemi siagang lanra'bami pamarentahanna anjo Billisika. 27 Angkana ngasengko nakkulle Kubongka setanga lanri nasareKu koasa pinggawana setanga. Jari punna kamma, lanri inai pata koasa nanabongka setanga ana'-ana' gurunnu? Kalenna ana'-ana' gurunnu ampa'butti angkanaya sala ngasengko! 28 Mingka iNakke nakkulle Kubongka setanga lanri koasa battu ri RohNa Allata'ala. Na iaminjo a'jari pammatei, angkanaya appakkaramulami ammarenta Allata'ala ri tangnga-tangnganu ngaseng. 29 Antekamma lakkulle antama' taua ri se'reang balla', angngalle passai barang-baranna punna tau gassing patanna balla'? Mattantu nasikkoki rolong anjo tau gassinga, patannaya balla'. Punna le'ba'mo nasikkokang anjo patannaya balla', nampami akkulle naalle passa barang-baranna. 30 Inai-nai taeroka a'jari agangKu, sikontutojenna a'jari musui ri Nakke. Siagang tau taeroka ambantuA' ri jama-jamangKu, sikontutojenna iami lampanraki jama-jamangKu! 31 Jari parallui nuasseng angkanaya, punna a'gau' salai siagang a'bicara hinai taua, akkulleji nipammopporang! Mingka punna nahinai RohNa Allata'ala, takkulleami nipammopporang! 32 Punna nia' tau ambali-bali Ana' Ma'rupataua, akkulleji nipammopporang; mingka punna nahinai Rohna Allata'ala, takkulleami nipammopporang ri kamma-kammaya anne kammayatompa ri ahera' sallang!” 33 “Sollanna akkulle baji' rapponna, parallui coppong se'rea poko'-poko'. Punna tacopponga se'rea poko'-poko', tena todong nalabaji' rapponna. Battu ri rapponnai nicini' antekamma copponna yareka tenana nacoppong se'rea poko'-poko'. 34 Ikau tau ja'dala' ngasengko! Antekammako lakkulle ampaui kabajikanga punna tau ja'dalakko? Apa nupau iamintu bonena lalang atinnu, assulu' battu ri bawanu! 35 Tau bajika, tuli apa baji' todong lanapau, nasaba' bajiki lalang atinna. Mingka tau ja'dalaka tuli apa-apa ja'dala' napau, nasaba' ja'dalaki lalang atinna. 36 Jari u'rangi laloi anne: ri Allo Kiamaka sallang, massing lanatanggong jawakki rupataua sikontu bicaranna tenaya matu-matunna. 37 Nasaba' battu ri bicarannu tonji sallang nalanitappuki ma'nassanu sala yareka tena.” 38 Le'baki anjo, nia'mo siapa are guru-guru agama siagang tu Farisi angkana ri Isa, “O Pa' Guru, eroki anne ikambe ancinikKi' anggaukangi gau' appakalannasaka.” 39 Appialimi Isa nakana, “Teai sipato' ja'dala'na siagang dorakana taua ri anne jammanga. NusuroA' anggaukangi gau' appakalannasaka? Manna se're tania' lanipicinikiangko gau' appakalannasa' pantaranganna gau' appakalannasa' le'baka kajariang ri kalenna Na'bi Yunus. 40 Tallungalloi le'ba' ammantang Na'bi Yunus lalang ri battanna juku' lompoa. Kamma tomminjo sallang Ana' Ma'rupataua, latallungalloi ammantang lalang ri battanna buttaya. 41 Punna Allo Kiama' sallang lambangungi taua ri Niniwe siagang taua ri anne jammanga antudui ke'nanga. Nasaba' anjo taua ri Niniwe toba'mi ri wattunna akkato'ba Na'bi Yunus ri ke'nanga. Mingka kamma-kamma anne nia' anrinni lompoangang na Na'bi Yunus! 42 Punna Allo Kiama' sallang, lambangungi karaeng baine battu Timboroka siagang taua ri anne jammanga antuntuki ke'nanga. Nasaba' ri wattu ero'na anjo karaeng bainea allangngereki kacara'dekanna Salomo bella sikalimi najappai, battu ri cappa'na buttaya. Mingka kamma-kamma anne, nia' anrinni lompoanganga na Salomo!” 43 “Punna a'lampa roh ja'dalaka ambokoi se'rea tau, la'lampai anjo roh ja'dalaka akkuliling ri tampa'-tampa' kalotoroka, ero' a'boya pammari-mariang. Mingka tena nanggappa tampa'. 44 Jari nakanamo ri kalenna, ‘Erokka' ammotere' mange ri balla' le'baka kupammantangi.’ Ri wattunna battu mange anjoreng, narapikammi anjo ballaka tena bonena, tangkasa' siagang baji' atoro'na. 45 Jari a'lampami pole nampa battu angngerang tuju roh ja'dala' maraeng, ja'dallanganga na ia. Nampa antama' ke'nanga ammantang ri kalenna anjo taua. Kale'bakkanna a'jari sannakkangammi kodina anjo taua na ri uru-uruna. Ia tomminjo lakajariang ri katallassanna taua ri anne jammanga.” 46 Lalang a'bicaraNa Isa siagang anjo tau jaia, battumi amma'Na siagang sari'battanNa. Eroki antama' ke'nanga angngagangi a'bicara Isa. 47 Nia'mo se're tau angkana ri Isa, “Bapa', niaki ammatTa siagang sari'battanTa pantarang. Eroki ke'nanga angngagangKi' a'bicara.” 48 Appialimi Isa Nakana, “Inaika ammakKu? Siagang inaika sari'battangKu?” 49 Najo'jo'mi sikontu tau amminawanga ri Ia nampa Nakana, “Iaminne ammakKu siagang sari'battangKu. 50 Inai-nai anggaukangi ero'Na ManggeKu ri suruga, iami siratang a'jari sari'battangKu, siagang siratanga a'jari ammakKu.”
1 Anjo memang alloa, a'lampami Isa ambokoi anjo ballaka, nampa mange ammempo ri biring tamparanga. 2 Jai sikali tau a'rappungang angkulilingi Isa. Lanri kammana a'lette'mi nai' ammempo Isa ri se'reang biseang. Na anjo tau jaia anjorengi ri biring tamparanga ammenteng. 3 Nampa Naajara' Isa ke'nanga a'rupa-rupa pangngajarang, lalang se're pangngebarang. Nakana, “Nia' sitau pamarri appakioro' bine. 4 Lalang napakioro'na anjo binea, nia'mo takkioro' ri aganga. Apaji nabattumo jangang-janganga angkanrei anjo binea sa'genna cappu'. 5 Nia' tommo bine takkioro' ri butta jaia batu-batunna, na kuranga buttana. Lanri kuranna buttana anjo tampaka, linta'mi attimbo anjo binea. 6 Mingka ri wattu nai'namo alloa, appakaramulami kalumeng anjo bine beru accu'laka; nampa kalotoro', sa'genna mate, nasaba' tenana nalantang antama' ri buttaya aka'na. 7 Kammayatompa, nia' todong bine takkioro' ri alla'na ruku'-ruku' akkatintinga; naipi'mi anjo bine beru accu'laka sa'genna mate. 8 Mingka nia' todong bine takkioro' ri butta copponga. Baji'mi attimbona anjo binea, coppongi poko'na, najai rapponna; nia' a'lappi sibilangngang, nia' a'lappi annampulo, siagang nia' todong a'lappi tallumpulo jaina rapponna.” 9 Le'ba'na Nacarita Isa anjo pangngebaranga, Nakanamo Isa ri ke'nanga, “Inai-nai nia' tolinna, pilangngerimi baji'-baji'!” 10 Le'baki anjo battumi ana'-ana' gurunNa Isa akkuta'nang ri Ia angkana, “Angngapa Kimmake pangngebarang punna angngajarakKi' mange ri anne tau jaia?” 11 Appialimi Isa Nakana, “Nasaba' ikau nisare ngaseng mako pangngassengang sollanna nupahang rahasiana ri passala' antekamma batena ammarenta Allata'ala. Mingka anjo ke'nanga tanisareai. 12 Nasaba' tau niakamo apa-apanna lanitambaiangi pole sijaiang, sa'genna kala'biang. Mingka tau tenaya apa-apanna, yareka naniaka sike'de' apa-apanna, lanialleangi ba'lalo ammotere'. 13 Iaminjo saba'na naKummake pangngebarang punna Kuajara' anjo tau jaia. Nasaba' accini'ji ke'nanga, mingka sanrapangi tau tenaya naccini'. Allangngere'ji ke'nanga, mingka sanrapangi tau tenaya nallangngere' siagang tau tenaya nammahang. 14 Lanri kammana, a'rupami apa le'baka nasero kana Na'bi Yesaya angkanaya, ‘Nakana Allata'ala: Latuli allangngerekko mingka tanupahangai; Latuli nuparhatikangi mingka tanuassengai apa kajarianga. 15 Nasaba' tattongko' ngasemmi pikkiranna ke'nanga anne, a'jari tamallangngerai tolinna na tatassungkea matanna. Kajariammi anne, sollanna taccinika matanna tallangngera tolinna, tammahanga pikkiranna, na taeroka ammotere' mae ri Nakke, nampa Kupa'jari baji' ngaseng ke'nanga.’ ” 16 Nakana pole Isa ri ana'-ana' gurunNa, “Ikau, teai sipato' upa'nu ngaseng. Nasaba' ikau accini' baji' ngaseng mako siagang allangngere' baji' ngaseng mako. 17 U'rangi, angkanaya jai na'bi siagang umma'Na Allata'ala ero' anciniki anne apa nucinika ri kamma-kammaya anne, mingka takkulleai nacini' ke'nanga. Eroki ke'nanga allangngereki anne apa nulangngereka ri kamma-kammaya anne mingka takkulleai nalangngere' ke'nanga.” 18 Le'baki anjo Nakanamo Isa, “Pilangngerimi battuanna anjo pangngebarang pakioroka. 19 Anjo bine takkioroka ri aganga, iaminjo a'jari pangngebarang mae ri tau allangngerekami ri passala' antekamma bateNa Allata'ala ammarenta, mingka tanapahangai anjo kabaraka. Battui kaja'dallanga angngalleangi anjo apa le'baka nipakioro' ri atinna ke'nanga. 20 Na anjo bine takkioroka ri butta jaia batu-batunna, iaminjo a'jari pangngebarang mae ri tau allangngerekami anjo kabaraka, na natarima memang silalonna siagang te'ne pa'mai'na. 21 Mingka tena nasallo attahang anjo kabaraka lanri tenana nabaji' angngaka'na anjo kabaraka lalang ri atinna ke'nanga. Punna natabamo susa yareka passessa ke'nanga lanri anjo kabaraka, ta'giling memammi silalonna atinna ke'nanga. 22 Naia bine takkioroka ri alla'na ruku'-ruku' akkatintinga, iaminjo pangngebarang mae ri tau allangngerekami anjo kabaraka, mingka ranggasela iji atinna ke'nanga, siagang ero' dudui kalumanynyang lalang ri katallassanna. Lanri kammana, rapang kasepekammi lalang ri atinna ke'nanga anjo Kabara' battua ri Allata'ala, sa'genna takkullea a'rappo. 23 Na anjo bine takkioroka ri butta copponga, iaminjo pangngebarang mae ri sikamma tau allangngerekami anjo kabaraka siagang napahang baji'-baji'. Jaimi rapponna ke'nanga, nia' a'lappi sibilangngang, nia' a'lappi annampulo, siagang nia' a'lappi tallumpulo wassele'na.” 24 Napaccaritammi pole Isa se're pangngebarang maraeng anjo tau jaia. Nakana, “Punna ammarenta Allata'ala, pangngebaranna lakammaminne: Nia' sitau pamarri appakioro' bine ri tanana. 25 Nia'mo se're bangngi, ri wattunna attinro ngasemmo taua, battumi musunna anjo pamarria a'lamung rea ri alla'na anjo asea nampa a'lampa. 26 Ri wattunna appakkaramulamo attimbo anjo lamung-lamunga, siagang appakkaramulamo kacinikang rapponna, kacinikang tommi anjo ruku' reaya. 27 Jari mangemi tungnganre gajina anjo pamarria ampauangi anjo pamarria angkana, ‘O Karaeng, sai lamungang baji'ji bawang le'ba' kilamung ri tanata? Antekamma nakkulle nia' todong ruku' rea attimbo anjoreng?’ 28 Appialimi anjo pamarria nakana, ‘Anjo panggaukanna musua.’ Jari akkuta'nammi pole anjo tungnganre gajina pamarria nakana, ‘Jari kikellai kisuro bi'bu' anjo reaya?’ 29 Appialimi anjo pamarria nakana, ‘Tena, nasaba' punna nibi'buki anjo reaya, akkullei ta'bi'bu' todong anjo asea. 30 Lappassammi attimbo todong anjo reaya sa'genna narapi' wattu pakkattoanga. Lakusuroi sallang pakattoa angkana: Passe'rei rolong anjo reaya siagang sikko' ngasengi nampa nitunu pepe'. Le'baki anjo passe'remi anjo asea, nampa nuboli' lalang ri pammantanganna.’ ” 31 Napaccaritammi pole Isa se're pangngebarang anjo tau jaia. Nakana, “Punna ammarenta Allata'ala, pangngebaranna lakammaminne: Nia' silisere' parekang lamungang ca'di dudu nialle ri se'reang tau, nampa nalamung ri kokonna. 32 Anjo lisere' lamunganga, iami lisere' lamungang kaminang ca'di ri linoa. Mingka punna attimbomo anjo lisere' lamunganga, iami a'jari poko' kaminang lompo ri sikamma lamung-lamungang niaka anjoreng. A'jarimi poko' lompo, sa'genna battumo jangang-janganga appare' ru'mung ri tangke-tangkenna.” 33 Nia' pole se're pangngebarang maraeng Nacarita Isa mae ri anjo tau jaia. Nakana, “Punna ammarenta Allata'ala, sanrapangi pa'gambang niallea ri sitau baine, nampa napasileo' siagang patampulo litere' labu'. Sa'genna pila' a'bakka' jaina anjo labuka!” 34 Sikontu anjo Napangngajarranga Isa mae ri tau jaia, ammakei pangngebarang. 35 Lanri kammana, a'rupami apa le'baka napau na'bia angkana, “PungKu a'bicara ri ke'nanga pangngebarang Kupake Kupakasingara' ngasengi mae ri ke'nanga apa-apa taccokkoa battu ri uru kajarianna anne linoa.” 36 Le'baki anjo, Nabokoimi Isa anjo tau jaia, nampa antama' ri balla'. Battumi ana'-ana' gurunNa akkuta'nang angkana, “Kipakasingara' sai ri kambe battuanna anjo pangngebarang rea attimboa ri alla'na asea.” 37 Appialimi Isa Nakana, “Anjo tau appakioroka lamungang baji', iaminjo Ana' Ma'rupataua nataba. 38 Anjo tanaya, iaminne linoa nataba. Na anjo lamungang bajika, iamintu tau a'jariamo umma'Na Allata'ala. Na anjo reaya, iamintu tau mannurukia ri Billisika. 39 Na ia musu appakioroka rea iamintu Billisika. Wattu pakkattoanga, iamintu Allo Kiamaka, na anjo tau akkattoa, iamintu sikamma malaekaka. 40 Antekamma batena nipasse're nampa nitunu anjo reaya, lakamma tommi anjo sallang ri Allo Kiamaka. 41 LaNasuroi malaeka'-malaeka'Na Ana' Ma'rupataua ampasse're ngasengi sikontu tau a'jari passabakkanga na'gau' dosa taua, kammayatompa sikontu tau a'gau' ja'dalaka. 42 Lanipela' ngasengi ke'nanga antama' ri bara pepe' a'rinra-rinraya; anjoremmi ke'nanga langngarru'-arru', angkasiaki sessaya. 43 Na sikontu tau anggaukangai ero'Na Allata'ala laccayami sanrapang mataalloa lalang ri Lino BeruNa Allata'ala, a'jaria Manggena ke'nanga. Jari, punna nia' tolinnu, pilangngerimi baji'-baji'!” 44 “Punna ammarenta Allata'ala, pangngebaranna lakammaminne: Nia' barang-barang taccokko lalang butta, nanibuntulu' ri se'reang tau, na napoterang pole anjo baranga antama' ri buttaya. Nampa, lanri teai sipato' rannuna, a'lampami anjo taua ambalukang ngasengi sikontu barang-baranna, na nampa ammotere' amballi anjo tampaka sumpaeng.” 45 “Punna ammarenta Allata'ala, pangngebaranna lakammaminne: Nia' sitau padanggang a'boya mutiara ka'jalaka ballinna. 46 Ri wattunna ammuntulu' mutiara sannaka ga'gana, a'lampa memammi linta' mange ambalukang ngasengi sikontu barang-baranna, nampa ammotere' amballi anjo mutiara silisereka.” 47 “Punna ammarenta Allata'ala, lasanrapangi jala nibuanga ri tamparanga, nanggappa a'rupa-rupa juku'. 48 Ri wattunna rassimo anjo jalaya, niangka'mi nai' ri paboya jukuka, na nierang nai' ri tompo'na buttaya. Nampa ammempo ke'nanga ansa'la'-sa'laki anjo jukuka: anjo juku' bajika napantamaki ri katoanga, mingka anjo juku' kodia nipelaki. 49 Kammaminjo sallang kajarianna ri Allo Kiamaka: labattui malaeka'-malaeka'Na Allata'ala ansa'laki sikontu tau ja'dalaka siagang tau anggaukangai ero'Na Allata'ala. 50 Nampa napela' anjo sikontu tau ja'dalaka antama' ri bara pepeka. Anjoremmi ke'nanga langngarru'-arru', angkasiaki sessaya.” 51 Akkuta'nammi Isa Nakana, “Maka nupahang ngasenji anne Kupakkanaya?” Appialimi ke'nanga angkana, “Iye' Bapa', napahanji ikambe.” 52 Jari Nakanamo Isa, “Lanri kammana minjo na anjo sikamma guru agama a'jariamo umma'Na Allata'ala, sanrapangi patanna balla' ampasuluka ngasengi barang-barang beruna siagang barang-barang sallona battu ri pammolikang barang-baranna.” 53 Le'ba'na Nacarita Isa anjo sikammaya pangngebarang, a'lampami ambokoi anjo tampaka, 54 nampa ammotere' mange ri pa'rasanganNa. Battuna mange anjoreng, mangemi ri sikamma balla' sambayanga angngajara'; na lannasa' ngasemmo taua allangngereki anjo apa Napangngajarranga. Nakanamo ke'nanga, “Battu kemaei anggappa pangngassengang kammaya anjo anne Taua? Battu kemaei anggappa koasa kammaya lompona Nakkulle anggaukangi gau'-gau' appakalannasaka? 55 Sai ana'na tukang kayua anne Taua? Sai niarengi Maria amma'Na, siagang assari'battangi Yakobus, Yusuf, Simon na Yudas? 56 Siagang sari'battanNa bainea anrinni ngaseng tonji ammantang. Battu kemae ngasengi Nagappa anjo sikammaya?” 57 Jari tenamo naero' taua antarimai Isa antama' anjoreng ri pa'rasanganga. Nakanamo Isa ri ke'nanga, “Punna na'bi taua, nipakalompoi ri kere-keremae; mingka punna ri kamponNa yareka ri balla' KalenNa tonji, taerokai taua ampakalompoi.” 58 Jari tenamo Naero' Isa appare' gau' appakalannasa' anjoreng, lanri tenana natappa' ke'nanga ri KalenNa.
1 Anjo wattua, Herodes a'jari karaeng ri pa'rasangang Galilea. Nalangngere'mi Herodes kabara'Na Isa. 2 Nakanamo Herodes ri pagawena, “Mattantu Yohanes Paje'ne' anjo taua attallasa' poleang! Iaminjo namakoasa kamma anggaukangi anjo gau'-gau' appakalannasaka.” 3 Nasaba' le'baki pirangalloang nasuro jakkala' Herodes anjo Yohanes, nampa nasikko' na napantama' ri tarungkua. Passabakkang bainenna niarenga Herodias nanajakkala'. Na anjo Herodias, le'ba' bainenna sari'battanna iamintu niarenga Filipus, naalle nabuntingi Herodes. 4 Nale'baki nipakainga' ri Yohanes sollanna tena nabuntingi anjo bainenna sari'battanna. Nakana Yohanes, “Takkulleako a'bunting siagang Herodias!” 5 Na sikontutojenna, eroki Herodes assuro bunoi Yohanes, mingka mallaki ri tau jaia. Nasaba' anjo Yohanes nipatappaki ri taua ma'nassa na'bi. 6 Nia' se're wattu assua'-suaraki Herodes, ansua'-suarri allo kalassukanna. Anjo wattua nasuromi ana' tulolonna Herodias a'dansa ri dallekanna sikamma toana niaka hadere'. Nasanna' sannanna pa'mai'na Herodes anciniki lanri sanna' baji'na batena a'dansa tulolonna. 7 Na lanri sannang duduna pa'mai'na, najanjimi siagang assumpami Herodes, ri anjo tulolonna angkanaya manna apa napala' tena tanisarena. 8 Na lanri niajara' salai ri amma'na, nakanamo anjo tuloloa, “Kupalaki nanisareanga' ulunna Yohanes Paje'ne'. Ero' memanga' kamma-kamma anne nipadongko' irate ri kapparaka!” 9 Nalangngere'na Herodes anjo apa napalaka, teaimi sipato' susana nyawana. Mingka lanri le'ba'namo a'janji siagang assumpa ri dallekanna ngaseng toananna, takkulleami tanaturukiang pappala'na anjo tuloloa. 10 Nasuromi taua mange ri tarungkua, mange ansamballei kallonna Yohanes. 11 Nampa nierang ulunna antama', nipadongko' rate ri kapparaka. Nisareammi anjo tuloloa; nampa napassareang anjo tuloloa mae ri amma'na. 12 Le'baki anjo, battumi ana'-ana' gurunna Yohanes angngallei maya'na, namange ke'nanga antarawangi. Nampa a'lampa ke'nanga ampabattuangi Isa anjo apa kajarianga. 13 Nalangngere'na Isa anjo kabara'na Yohanes, nai'mi ri biseanga, na'lampa kale-kalenna ambokoi anjo tampaka. A'lampai mange akkale-kale ri pammantangang sino-sinoa. Mingka nalangngere'na taua anjo, a'lampami ke'nanga ambokoi kota-kotana mange ampinawangi Isa. Ammolongangi ke'nanga a'jappa rate ri bontoa mange ri tampa' lanamangeia Isa. 14 Ri wattunna naung Isa battu ri biseanga, Nacini'mi anjo tau jaia. Tu'guru'mi pangngamaseanNa Isa anciniki ke'nanga. Naballeimi sikamma tau garringa, niaka todong battu. 15 Ri wattu karuennamo, battumi ana'-ana' gurunNa akkuta'nang ri Ia angkana, “Karuemmi anne, nampa bella anne tampa' nipammantangia. Bajikangang Kisuromi anne tau jaia ammotere', sollanna akkulle ke'nanga ammalli apa-apa lanakanre ri kampong-kamponga.” 16 Nakanamo Isa, “Tea' mako suroi a'lampa ke'nanga. Ikau ngasemmo assarei kanre.” 17 Appialimi ana'-ana' gurunNa Isa angkana, “Mingka limambatuji roti siagang ruang kayuji juku' anne niaka ri katte.” 18 Nakanamo Isa, “Erangi mae anjo apa niaka.” 19 Nasuromi anjo tau jaia ammempo naung ri paranga. Le'baki anjo, Naallemi anjo roti limambatua siagang juku' ruang kayua. Nampa acconga nai' ri langika, appala' sukkuru' ri Allata'ala. Nabage-bagemi anjo rotia, nampa Napassareang mae ri ana'-ana' gurunNa, sollanna natawa-tawai anjo tau jaia. 20 Angnganre ngasemmi ke'nanga sa'genna bassoro'. Le'baki angnganre ke'nanga, napasse'remi ana'-ana' gurunNa Isa sikamma kanre niaka tassesa; nia' sampulo anrua baku' rassi ngaseng anjo kanre alla'bia. 21 Tau angnganrea anjo wattua, nia' limassa'bu jaina, natanirekengapa tubai'-bainea siagang ana'-anaka. 22 Le'baki anjo Nasuromi Isa ana'-ana' gurunNa nai' ri biseanga. Nampa Nasuro ke'nanga a'lampa riolo a'limbang ri tamparanga. Na tau jaia Nasuro ngasemmi ammotere'. 23 A'lampana ngasemmo tau jaia, a'lampa tommi Kale-kalenNa nai' ri se'reang bonto, mange appala' doang. Sa'genna ta'rapi' bangngia nia' iji Isa anjoreng Kale-kalenNa. 24 Anjo wattua, bellami antama' ri tangngana tamparanga biseang nadongkokia ana'-ana' gurunNa. Nipatappa'-tappasa'mi ri bombanga biseanna ke'nanga, lanri a'ruppami siagang anging. 25 Ri wattunna subumo, nia'mi Isa battu, a'jappa irate ri tompo'na je'neka. 26 Ta'bangka ngasemmi ana'-ana' gurunNa anciniki a'jappa ri tompo'na je'neka. Ammarrammi ke'nanga napakamma malla' angkana: “Setang!” 27 Mingka linta'mi Isa appiali Nakana: “Sannangko! Teako mallakki. INakkejinne Isa!” 28 Nakanamo Petrus, “Punna ma'nassa iKatte Isa, suroma' battu mae ri Katte, a'jappa irate ri tompo'na je'neka.” 29 Appialimi Isa Nakana, “Battu mako mae.” Jari naummi Petrus battu ri biseanga, a'jappa irate ri tompo'na je'neka, ero' mange ri Isa. 30 Mingka nacini'na Petrus bombang lompoa ri tamparanga, nabattuimi malla'. Appakkaramulami tallang. Ammarrang lompomi nakana, “O Batara, Kiallea'!” 31 Linta'mi Isa anta'galaki limanna. Nampa Nakana, “O Petrus, anne ikau kurang tappakko. Apa saba'na nanubata-bata?” 32 Nampa nai'mi sipa'rua ri biseanga. Na'jari sannang tommo anginga. 33 Su'ju' ngasemmi ana'-ana' gurunNa Isa anynyomba ri Ia. Angkanami ke'nanga, “Ma'nassa tojeng, iKattemi Batara Ana'Na Allata'ala!” 34 Ri wattunna battumo ke'nanga ri ba'leanna anjo tamparanga, naummi ke'nanga ri Genesaret. 35 Nicini'mi ri tau niaka anjoreng angkana niaki Isa battu. Napa'la'bammi ke'nanga anjo kabara' kabattuanNa Isa ri sikontu daera a'reppeseka ri anjo kotaya. Battumi nierang sikontu tau garringa mange ri Isa. 36 Napala'mi ke'nanga sollanna nipa'biang ke'nanga anjamai jubaNa Isa, manna cappa'naja. Na sikontu tau garring anjamayai jubaNa, a'jari baji' ngasemmi.
1 Nia' siapa are tu Farisi siagang guru-guru agama battu ri Yerusalem mae ri Isa. Akkuta'nammi ke'nanga ri Ia angkana, 2 “Apa saba'na nanadakkai ana'-ana' gurunNu ada'-ada'na tu riolota? Kapunna langnganre ke'nanga tena na'bissa lima situru' atoranga!” 3 Appialimi Isa Nakana, “Mingka angngapa nanudakkai todong passuroNa Allata'ala, lanri ero'nu bawang anggaukangi ada'-ada'na tu riolonu? 4 Nasaba' Nakana Allata'ala, ‘Pakala'biriki anrong-manggenu.’ Siagang, ‘Inai-nai ampakka'-pakkanai anrong-manggena, siratangi nihukkung mate.’ 5 Mingka nupangngajarrangi ikau ngaseng angkana: punna nia' tau angkana ri tau toana angkanaya, ‘Le'ba'mi kupassidakkang mae ri Allata'ala anjo doe' lakupassareanga ri katte,’ 6 anjo tau kammaya tenamo nakkulle nikellai dudu ampakala'biriki tau toana. Jari lanri ada'-ada'na tu riolonu nanubalang parekang kana-kana Napangngajarranga Allata'ala. 7 Munape' ngasengko antu! Annaba sikalimi apa le'baka napau Na'bi Yesaya, ansero kana ngasengko angkanaya: 8 ‘Kammaminne kananNa Allata'ala: Napakala'birikKa' anne taua mingka poro ri bawanaji bawang naia atinna sanna' bellana ri Nakke. 9 Tena matu-matunna anynyomba ke'nanga ri Nakke, nasaba' atorang rupatauji napangngajarrang kamma le'ba' angkana iaminjo atorang Kupassareanga.’ ” 10 Le'baki anjo Nakio'mi Isa tau jaia nampa Nakana ri ke'nanga, “Pilangngerimi sollanna nupahang! 11 Teai apa-apa antamaya ri bawaya anrantassi rupataua; mingka apa-apa assuluka battu ri bawaya, iaminjo anrantassi kalenna.” 12 Battumi ana'-ana' gurunNa angkana, “Maka Kiassenji angkanaya kasi'rikangi anjo tu Farisia nalangngeretTa akkana kamma?” 13 Appialimi Isa angkana, “Sikamma lamung-lamung tenaya Nalamungi Manggeku ri suruga lanibi'buki. 14 Tea' mako jampangi anjo tu Farisia. Anjo ke'nanga sangnging pamimping-pamimping buta. Na punna tau buta ammimping tau buta, tena tatu'guru'na rua-rua naung ri solonganga.” 15 Angkanami Petrus, “Kipakasingara' sai battuanna anjo pangngebaranga ri kambe, Bapa'!” 16 Appialimi Isa mae ri ke'nanga Nakana, “Maka tena ijapa nanupahangi? 17 Tenapa nuassengi, angkanaya apa antamaya ri bawaya, iaminjo naung ri parruka nampa assulu' poleang? 18 Mingka apa assuluka battu ri bawaya, iaminjo battu lalang ri atia; iaminjo anrantassi taua. 19 Nasaba' battu lalammi ri atia ammumba pikkirang-pikkirang ja'dalaka, a'jaria saba' nammuno taua, a'gau' salimara', a'gau' bawang, a'lukka', siagang appitina. 20 Yangaseng minjo kammaya a'jari saba' na'jari rantasa' rupataua. Jari teai lanri angnganre ta'bissa lima.” 21 Le'baki anjo, Nabokoimi Isa anjo tampaka. A'lampami mange ri daera ambania ri kota Tirus siagang Sidon. 22 Nia'mo sitau baine tu Kanaan niaka anjoreng ri daeraya battu mae ri Isa akkiok-kio' angkana, “O Ana'na Daud, Kikamaseanga'! Napantamakki setang ana' baineku. Sanna' dudumi sessana!” 23 Mingka tena sikali Nappiali Isa ri anjo bainea. Napala'mi ana'-ana' gurunNa sollanna Nasuro anjo tu bainea a'lampa. Nakanamo ke'nanga, “Bapa' Kisuro laloi anjo bainea a'lampa. Amminawanji apparicu ri bokota!” 24 Appialimi Isa ri anjo bainea, Nakana, “INakke nisuro mangejA' bawang ri bansa Israelka, la'biangampa ri tau sala oloanga.” 25 Battumi anjo bainea su'ju' ri dallekanNa Isa angkana, “Kitulullaloa' tuang!” 26 Appialimi Isa Nakana, “Tabajikai nialle kanrena ana'-anaka, nampa nipassareang mae ri kongkonga.” 27 Appialimi anjo bainea nakana, “Kammatojengi tuang, mingka kanre nakanrea kongkonga, iamintu sesa-sesa kanre tu'guruka battu ri mejang pangnganreanna karaenna.” 28 Nakanamo Isa ri anjo bainea: “Ibu', teai sipato' lompona tappa'nu. Boli'mi kamma na'jarimo apa nukaerokia!” Apaji naia memang anjo wattua na'jari baji' poleammo ana'na anjo bainea. 29 Nabokoimi Isa anjo tampaka, nampa a'jappa ri birinna Tamparang Galilea. Nampa nai' ammempo ri se'reang bonto. 30 Jaimi tau ambattui. Nia' angngerang tau tempang, tau buta, tau peso', tau pepe, siagang a'rupa-rupa garring maraengang. Niboli'mi ri dallekanNa Isa yangasenna anjo tau garringa. Nampa Naballei Isa na'jari baji' ngaseng silalonna. 31 Lannasa' sikali sikontu tau niaka anjoreng, lanri nacini'na tau pepea akkullemi a'bicara, tau tempanga a'jari baji'mi, tau pesoka a'jappami, siagang tau butaya accini'mi. Ammuji-muji ngasemmi ke'nanga ri Allata'alana bansa Israel. 32 Le'baki anjo Nakio'mi Isa ana'-ana' gurunNa nampa Nakana, “Kukamaseanna anne tau jaia. Tallungallomi angngagangA', natenamo kanrena ke'nanga. Tena nalaKupa'biangi ammotere' ke'nanga punna cipuru', gassingka kodi sallang pakkasia'na ke'nanga ri tangngana aganga!” 33 Akkuta'nammi ana'-ana' gurunNa ri Ia angkana, “Kemaeki' akkulle ampanggappangi kanre tau sikammaya anne jaina ri daera bella kammaya anne?” 34 Akkuta'nammi Isa ri ke'nanga angkana, “Siapa mami jaina roti niaka ri kau ngaseng?” Appialimi ke'nanga angkana, “Tuju mami, siagang pirang kayu are juku' ca'di-ca'di.” 35 Nasuromi Isa ammempo naung anjo tau jaia. 36 Nampa Naalle anjo roti tujumbatua siagang anjo jukuka. Le'baki appala' sukkuru' ri Allata'ala, Nabage-bagemi anjo rotia siagang jukuka nampa Napassareang mae ri ana'-ana' gurunNa. Natawa-tawaimi ke'nanga anjo tau jaia. 37 Angnganre ngasemmi anjo tau jaia sa'genna bassoro'. Le'baki anjo napasse'remi ana'-ana' gurunNa Isa kanre niaka tassesa. Nia' tuju baku' jaina rassi ngaseng. 38 Na anjo tau angnganrea, nia' patassa'bu tau jaina, natanirekengapa tu bai'-bainea siagang ana'-anaka. 39 Le'baki anjo nampami Nasuro Isa ammotere' anjo tau jaia. Nampa Ia KalenNa, nai'mi ri se'reang biseang, Na'lampa mange ri daera Magadan.
1 Nia' siapa are tu Farisi siagang tu Saduki battu mae ri Isa ero' ampa'boyangi kodi. Napala'mi ke'nanga sollanna appa'nia' gau' malompo na Napa'butti Isa angkanaya ma'nassa battu tojengi ri Allata'ala. 2 Appialimi Isa ri ke'nanga angkana, “Punna lalabu alloa, nanucini' eja langika nuassemmi nubatei angkana talabosiai. 3 Na punna bari'basa', nanucini' rammanga le'leng nuassemmi angkana labattui bosia. Jari akkullei nuasseng la'bi riolo angkanaya labosi yareka talabosiai lanri akkullei nubatei ri langika. Mingka pammateina jammanga tanuassengai nubatei. 4 Teai sipato' ja'dala'na siagang dorakana ngaseng taua ri anne jammanga. NusuroA' anggaukangi gau' appakalannasaka. Mingka manna sirupa gau' appakalannasa' tena todong lanipicinikiangko, pantaranganna gau' appakalannasa' le'baka kajariang ri kalenna Na'bi Yunus.” Le'baki akkana kamma Isa, a'lampami ambokoi ke'nanga. 5 Wattunna battumo ana'-ana' gurunNa Isa ri ba'leanna tamparanga nampami naasseng angkanaya nakaluppai ke'nanga angngerang roti. 6 Nakanamo Isa ri ke'nanga, “Tutuko ri pa'gambanna tu Farisia siagang tu Sadukia.” 7 Nalangngere'na ke'nanga akkana kamma Isa, angkanami ke'nanga para ia todong, “Nakkana kamma anjo nasaba' nikaluppai angngerang roti.” 8 Mingka Naassengi Isa anjo apa nabicaraya ke'nanga. Jari angkanami, “Angngapa napassala' tenana roti massing nubicara? Tena ngaseng najarre' tappa'nu! 9 Tena ngasempa nupahangi? Tena nuu'rangi anjo roti limambatua le'baka nipa'bage-bageang, ri limassa'bua tau jaina? Pirang baku' tassesa le'ba' nupasse're? 10 Siagang antekamma anjo roti tujumbatua nipa'bage-bageanga mae ri patassa'bua tau jaina? Pirang baku' le'ba' tassesa nupasse're? 11 Angngapa natanupahanga angkanaya teai passala' roti anjo Kubicaraya ri kau ngaseng sumpaeng? Tutuko ri pa'gambanna tu Farisia siagang tu Sadukia!” 12 Kale'bakkanna napahammi ana'-ana' gurunNa Isa angkanaya nisuroi ri Isa sollanna tutu ke'nanga ri pangngajarang salana tu Farisia siagang tu Sadukia. Jari teai passala' nikellaina ke'nanga tutu ammake pa'gambang punna appare' roti. 13 Anjo wattua a'lampai Isa mange ri daera a'reppeseka ri Kota Kaisarea Filipi. Anjoreng, akkuta'nammi Isa ri ana'-ana' gurunNa Nakana, “Turu' pakkanana taua, inai anjo Ana' Ma'rupataua?” 14 Appialimi ana'-ana' gurunNa nakana, “Nia' angkana Yohanes Paje'ne'. Nia' todong angkana Elia. Maraengannaya angkana Yeremia, yareka kalase'renna na'bi-na'bia.” 15 Akkuta'nammi Isa ri ke'nanga Nakana, “Mingka turu' ri panggappanu ngaseng inaiA' anne?” 16 Appialimi Petrus nakana, “IKattemi Karaeng Mappasalamaka, Ana'Na Allata'ala Mattallasaka.” 17 Nakanamo Isa, “Upa' sikaliko kau Simon ana'na Yona! Nasaba' teai rupataua ampauangko anne, mingka ManggeKu ri suruga. 18 Lanri kammana, siratangi nuasseng angkanaya, ikau mintu Petrus, batu makassaka. Iratemi ri tompo'na anne batu pa'dongkokanga laKupaenteng garejaKu, tenaya lambetai, manna pole kamateanga. 19 LaKupassareangi ri kau konci Lino BeruNa Allata'ala. Apa nupappisangkanga ri linoa, nipappisangkang tongi ri suruga. Siagang apa nupattojenga ri linoa, lanipattojeng tongi ri suruga.” 20 Le'baki anjo Napasammi ana'-ana' gurunNa sollanna tena napappiassengangi manna ri nai, angkanaya Iami Karaeng Mappasalamaka. 21 Anjo wattua appakkaramulami a'bicara silambusu'na Isa mae ri ana'-ana' gurunNa, angkanaya takkulleai ta'lampa mange ri Yerusalem angkasiaki passessa jaia. Iamintu passessa battua ri pingga'-pinggawana tu Yahudia, imang-imang kapalaya, kammayatompa guru-guru agamaya. Lanibunoi, mingka lanipattallasa' poleangi battu ri kamateanga ri makatalluna alloa! 22 Nibeso'mi Isa ri Petrus mae ri sa'ri nampa nipauang angkana, “Tapporo Napakabella laloi Allata'ala ri Katte anjo kammaya, Batara! Poro tena lalo nakajariang anjo kammaya ri Katte Batara!” 23 Mingka assailemi Isa ri Petrus nampa Nakana, “A'lampako anrinni, Setang! NualleA' nurompa-rompai. Antu pikkirannu, pikkirang rupatau; teai pikkiranNa Allata'ala!” 24 Nampa Nakana Isa mae ri ana'-ana' gurunNa, “Tau eroka amminawang ri Nakke takkulleai tanapariboko kaparalluang kalenna, nanapisang salli'na, nampa amminawang tuli ri Nakke. 25 Nasaba' inai-nai angkatutui nyawana, iami latappela' nyawana. Mingka inai-nai angkoro'bangkangi katallassanna untu' iNakke iami langgappai katallassanga. 26 Nasaba' apa matu-matunna nagappa ngaseng taua anne linoa punna latappela' katallassanna? Maka akkullei anjo katallassanga nipassambe apa-apa maraeng? 27 Tasalloami Nabattu Ana' Ma'rupataua siagang kakoasanNa ManggeNa, nirurungang ri malaeka'-malaeka'Na. Iaminjo wattua naNabalasa' massing panggaukanna rupataua. 28 U'rangi anne! Ri alla'nu anne hadereka anrinni, nia' talamateapi punna tenapa naciniki Ana' Ma'rupataua battu poleang a'jari Karaeng.”
1 Annangallo ribokoanganna, Naerammi Isa i Petrus, Yakobus siagang sari'battanna iamintu Yohanes, mange akkale-kale ri se'reang moncong tinggi. 2 Anjoreng, ti'ring tappinrami rupanNa Isa ri dallekanna ke'nanga: a'jari singaraki nicini' rupanNa kamma matanna alloa. Kammayatompa accillaki pakeanNa lanri kebo'na. 3 Nampa nia'mo battu nacini' ke'nanga Musa siagang Elia, a'bicara siagang Isa. 4 Nakanamo Petrus ri Isa, “Baji' sikali nikasia' ammantanga anrinni. Punna Kingai, Batara, erokka' appare' tallu balla' pammantangang anrinni: se're pammantanganTa, se're pammantanganna Musa, na se're pammantanganna Elia.” 5 Lalang a'bicarana Petrus, nia'mo rammang accaya manaung irateanganna ke'nanga. Nania'mo sa'ra kalangngerang battu lalang ri anjo rammanga angkana, “Iaminne Ana' nikamaseangKu. Napakate'nei atingKu. Pilangngerimi kananNa!” 6 Nalangngere'na ana'-ana' gurunNa Isa anjo sa'raya, teaimi sipato' malla'na ngaseng, sa'genna tassu'ju'mi ke'nanga naung ri buttaya. 7 Mingka battumi Isa anta'galaki ke'nanga. Nakana Isa, “Ambangungko nai', teako mallakki!” 8 Assailena ke'nanga, tenamo tau maraeng nacini' pantaranganna Isa. 9 Ri wattunna naung ke'nanga battu ri monconga, appasammi Isa ri ke'nanga Nakana, “Teako niakki ancaritai anjo kajariang nucinika sumpaeng manna ri nai, punna tenapa nipabangungi Ana' Ma'rupataua battu ri kamateanga.” 10 Akkuta'nammi ana'-ana' gurunNa Isa ri Ia angkana, “Angngapa nanakana guru-guru agamana tu Yahudia, angkanaya Elia labattu rioloangang?” 11 Appialimi Isa Nakana, “Battu memangi Elia ero' ampasadiai sikamma parallua nipasadia. 12 Mingka Kukana ri kau ngaseng, battumi Elia mingka tena niassengi ri taua. Sangka' rupami nigaukangi ri ke'nanga. Na kammatommi anjo lanagaukangangi ke'nanga Ana' Ma'rupataua.” 13 Nampami napahang ke'nanga angkanaya Yohanes Paje'ne' anjo natabaya kananNa Isa. 14 Ri wattunna ammotere' ke'nanga mange anjoreng ri tau jaia, nia'mo sitau bura'ne battu su'ju' ri dallekanNa Isa. 15 Angkanami anjo taua, “O Bapa', Kikamaseang laloi anakku. Natabai garring mate-mate jangang. Nateai sipato' sanna'na garrinna. Pammate sanna'na garrinna sa'genna biasai tu'guru' antama' ri pepeka yareka antama' ri je'neka. 16 Le'ba'mi kuerang mange ri ana'-ana' gurunTa, mingka tanakulleai ke'nanga amballei.” 17 Appialimi Isa angkana, “Teaiko anne sipato' ngaseng! Ma'nassa tau sala oloang ngasengko siagang tena ngaseng tappa'nu. Siapapi salloKu lammantang siagang lasa'bara' ri tangnga-tangnganu ngaseng? Erangi mae anjo anaka!” 18 Nampa Nabongka Isa anjo roh ja'dalaka battu lalang ri kalenna anjo anaka. Assulu'mi anjo roh ja'dalaka, na'jari baji'mo anjo anaka silalonna. 19 Ri wattunna kale-kalenna mami Isa, battumi ana'-ana' gurunNa akkuta'nang ri Ia angkana, “O Bapa', apa saba'na nakitakkullea anne ikambe ambongkai roh ja'dalaka?” 20 Appialimi Isa Nakana, “Nasaba' kurang tappa' ngasengko. U'rangi! Punna nia' tappa'nu manna sillompoja lisere' kaminang ca'di dudua, akkulleko angkana mae ri anne buluka, ‘A'lettekko anrinni mange anjoreng!’ ma'nassa tena ta'lette'na anne buluka. Jari tena takkulle nugaukang punna tappakko! 21 Mingka anne roh ja'dala' kammaya pappala' doangang siagang puasaji bawang akkulle ampasuluki.” 22 Ri wattunna a'rappungang ana'-ana' gurunNa Isa ri Galilea, angkanami Isa ri ke'nanga, “Tenamo nasallo nanipassareammo Ana' Ma'rupataua mae ri kakoasanna rupataua. 23 Lanibunoi, mingka lambangung poleangi ri makatalluna alloa.” Jari sanna' ngasemmi si'nana atinna ana'-ana' gurunNa. 24 Ri wattunna battu Isa siagang ana'-ana' gurunNa mange ri Kapernaum, battumi pasingara' simaya ri Balla'Na Batara ri Petrus angkana, “A'bayara' tonji sima gurunnu yareka tena?” 25 Appialimi Petrus nakana, “A'bayaraki.” Ri wattunna ammotere' Petrus, nikuta'nammi ri Isa angkana, “O Simon, antekamma panggappanu? Inai musti a'bayara' sussung yareka sima, mae ri pammarentana anne linoa? Ra'yaka yareka tu battu pantarang pa'rasangang?” 26 Appialimi Petrus nakana, “Tu battu pantarang pa'rasanganga.” Angkanami Isa, “Punna kammanjo, tena naparallu ra'yaka a'bayara'. 27 Mingka takkulleaki' ansusai nyawana anjo taua. Jari a'lampamako mange ammekang ri tamparanga. Allei juku' uru nubantunga. Nia' doe' lanugappa lalang ri bawana anjo jukuka, anggannaka lanipa'bayarrang sima sipa'rua! Allei anjo doeka, nampa nubayara' simata mange ri Balla'Na Batara!”
1 Anjo wattua akkuta'nammi ana'-ana' gurunNa Isa ri Ia angkana, “Inai akkulle nikana kaminang malompo ri sikontu umma'Na Allata'ala?” 2 Akkio'mi Isa sitau ana'-ana', nampa Nasuro ammenteng ri dallekanna ke'nanga. 3 Nampa Nakana Isa, “Patappaki anne kanangKu! Punna a'jari kammako anne ana'-anaka, nampa mako akkulle a'jari umma'Na Allata'ala. 4 Inai-nai ampakatunai kalenna a'jari sanrapang anne anaka, iami la'jari kaminang malompo ri tangnga-tangngana umma'Na Allata'ala. 5 Na inai-nai antarimai ana'-ana' sanrapanga anne lanri iNakke, sanrapang iNakkemi natarima.” 6 “Inai-nai a'jari saba' natenamo natappa' ri Nakke tau ca'di kammaya anne, bajikangangi punna nigentungi batu kallonna nampa nitallangngang naung ri tamparanga. 7 Teai sipato' cilakana anne linoa lanri jaina passabakkang na'jari doraka rupataua. Mingka memang tuli lania'na anjo passabakkang kammaya. Mingka la'biangampa cilakana tau a'jari passabakkanga nadoraka paranna tau! 8 Punna passabakkang limannu yareka bangkennu nudoraka, bajikangang polongi nampa nupela'. Bajikanganji tenaya siali limannu yareka bangkennu assala' Napasalamakko Allata'ala, kala nipelakko antama' ri pepe'na narakaya sibatu kale. 9 Na punna passabakkang matannu nudoraka, bajikangang kocciki assulu' nampa nupela'. Bajikangangi tenaya matannu siali assala' Napasalamakko Allata'ala, kala nipelakko antama' ri pepe'na narakaya sibatu kale.” 10 “Tutuko! Tea' laloko hinai kalase'renna anne tau ca'di kammaya. Nasaba' u'rangi angkanaya, tuli niaki malaeka'na ke'nanga ri dallekanNa ManggeKu ri suruga. 11 Nasaba' tau sala oloanga ero' Napasalama', nabattu Ana' Ma'rupataua! 12 Alarapanna, nia' sitau ammallaki sapi sibilangngang kayunna. Na punna tappela' sikayu, maka apa lanagaukang anjo taua? Antekamma panggappanu? Mattantu lanaboliki anjo sapinna salapampuloa assalapang ri bontoa, nampa a'lampa amboyai anjo sapinna sikayua tappelaka. 13 Tappa' mako angkanaya, punna nabuntulu'mo ammotere' anjo sapinna sikayua, lalompoangangi rannuna ri anjo sapi sikayua kala ri anjo sapi salapampuloa assalapang kayunna, tenaya natappela'. 14 Kamma tomminjo Manggenu ri suruga. Tena Nakellai kalase'renna anne tau beru tappaka ri Nakke sala oloang.” 15 “Punna sala sari'battannu ri kau, battuko mae ri ia nanupauang kasalanna. Ikau tommo sipa'rua punna nupauangi. Na punna napilangngeriji kanannu, nugappamintu ammotere' anjo sari'battannu. 16 Mingka punna tena napilangngeriko, akkiokko pole se're yareka rua tau, nu'rurung mange ampauangi pole. Nasaba' nia' tattulisi' lalang ri Kittaka angkanaya, ‘Kaminang kuranna parallui rua yareka tallu tau a'jari sa'bi nampa akkulle se'rea tau nipattantu kasalanna.’ 17 Punna tena ija napilangngeri pappakainga'na anjo siapaya tau, nampami nipau mange ri jama'aka. Kale'bakkanna, punna tena ijapa naero' ampilangngeri pappakainga'na jama'aka, pasangkammami pasingara' sima siagang tau kapere' anjo taua siagang tau tena natappa' ri Allata'ala.” 18 “Assengi angkanaya: Apa nupappisangkanga ri lino, nipappisangkang tongi ri suruga. Siagang apa nupattojenga ri lino, nipattojeng tongi ri suruga. 19 Kammayatompa asseng tongi angkanaya: Punna nia' rua tau ri kau assamaturu' ri apa-apa mamo nampa appala' doang ri Allata'ala laNatarimai ManggeKu ri suruga pappala'na. 20 Nasaba' kemae nia' rua yareka tallu tau a'rappungang nasaba' iNakke, laniakKa' hadere' ri tangnga-tangngana ke'nanga.” 21 Le'baki anjo mangemi Petrus akkuta'nang ri Isa angkana, “O Batara, punna sala sari'battangku ri nakke, pissiapai akkulle kupammopporang? Sa'genna pintuju?” 22 Appialimi Isa Nakana, “Tena, tena napintujuja, mingka pintujui ri pintujupuloa! 23 Nasaba' punna ammarentamo Allata'ala, lakammai anne pangngebaranna: Nia' se're karaeng ero' assuro lappasi inranna ata-atanna. 24 Wattunna appakkaramula ammaressa, nia'mo sitau atanna nierang mange ri dallekanna, a'juta-jutaya inranna. 25 Tanakulleami nabayara' anjo inranna. Jari napassuroammi anjo karaenga sollanna nibalukang anjo ataya sipakkalabini siagang ana'-ana'na, kammayatompa sikontu barang-baranna, nampa nabayara' inranna. 26 Mingka su'ju'mi anjo ataya ri dallekanna anjo karaenga nappala' tulung angkana, ‘O Tuang, kikamaseangi atanta. Lanabayara' ngasenji atanta anjo inranna ngaseng.’ 27 Tu'guru'mi pangngamaseanna anjo karaenga, sa'genna nabilang lappasa' ngasemmo inranna anjo atanna. 28 Ri wattunna assulu'mo anjo taua, sibuntulammi paranna ata, kainranganga ri ia pirassa'bu are jaina. Nata'gala'mi anjo aganna nanaaccekang kallonna nampa nakana, ‘Bayara' ngasengi inrannu!’ 29 Su'ju'mi anjo aganna ri dallekanna appala' tulung nakana, ‘Sa'barakko rolong gang, kalakubayara' ngasenji inrangku!’ 30 Mingka tanajampangiaji anjo aganna. Ba'lalo napantama'ji ri tarungkua anjo aganna sa'genna nabayara' ngaseng inranna. 31 Nacini'na ata-ata maraenga anjo apa kajarianga, si'nami atinna ke'nanga. Mangemi ke'nanga ampabattui ri karaenga anjo apa kajarianga. 32 Nisuro kio'mi ri karaenga anjo ata kodi sipaka na nakana karaenga ri ia, ‘E kau ata kodi sipaka! Kubilang lappasa' ngasemmi inrannu lanri appala' tulungko ri nakke. 33 Maka tasiratangai nukamaseang anjo agannu sangkamma todong batenu kukamaseang?’ 34 Teaimi sipato' larrona anjo karaenga. Nasuro pantama'mi ri tarungkua anjo ata kodi sipaka sa'genna nalappasi ngaseng inranna.” 35 Na ri kala'busang caritaNa Isa Nakanamo, “Kammatommi anjo sallang laNagaukanga ManggeKu ri kau ngaseng, punna tena nuero' ampammopporangi sari'battannu siagang ati maci'nonnu.”
1 Le'ba'na Napau ngaseng Isa sikammaya anjo, Nabokoimi Galilea, nampa a'lampa mange ri daera Yudea, ri ba'leanna Binanga Yordan. 2 Jaimi tau ampinawangi. Naballeimi sikamma tau garring niaka anjoreng. 3 Battumi tu Farisia ero' ampa'boyangi kasalang. Akkuta'nammi ke'nanga angkana, “Manuru' ri atorang agamata, maka akkulleji taua antallaki bainenna manna napassala' apa mamo?” 4 Appialimi Isa Nakana, “Maka tena ngasempa nubacai lalang ri Kittaka angkanaya ri uru nipare'na rupataua ri Allata'ala, Napareki bura'nea siagang bainea? 5 Na le'ba'na Napare' Nakanamo, ‘Iaminjo saba'na nanabokoi anrong-manggena bura'-bura'nea namange a'jari se're siagang bainenna, sa'genna a'jari se'remi sipa'rua.’ 6 Jari tenamo narua ke'nanga, mingka a'jari se'remi. Jari iaminjo saba'na naapa le'baka Napa'jari se're Allata'ala, takkulleai napasisa'la' rupataua.” 7 Akkuta'nammi pole tu Farisia ri Ia angkana, “Punna paleng kamma, apa saba'na nanasuro taua Musa assarei sura' talla' bainenna punna natalla'?” 8 Appialimi Isa Nakana, “Tena napisangkaiko Musa antallaki bainennu lanri susanu ngaseng niajara'. Mingka sikontutojenna uru-uruna takammayai anjo. 9 Jari, pilangngerimi anne: Inai-nai antallaki bainenna — nateaija passala' a'gau' salimara' — na ribokoanganna na'baine poleang baine maraeng, a'gau' salimara' minjo taua.” 10 Jari angkanami ana'-ana' gurunNa Isa ri Ia, “Punna kammaja anjo pakkalabinianga, bajikangangi tenaya na'bunting taua.” 11 Appialimi Isa Nakana, “Tayangasenga taua akkulle antarimai anne Kupaua, pantaranganna tau le'bakamo Napattantu Allata'ala. 12 Nasaba' nia' tau takkulleai a'bunting lanri naerang memang tongi battu ri lassu'na. Mingka nia' todong takkullea a'bunting lanri panggaukanna tau maraenga. Nania' todong tau ia memang todong tea a'bunting sollanna akkulle a'jari palayanNa Allata'ala. Inai akkulle antarimai anne pangngajaranga, ia tommo antarimai.” 13 Nia' siapa are tau angngerangi ana'na mae ri Isa sollanna nibarakkaki siagang nipappala' doangang anjo ana'-anaka. Mingka nikalarroimi ri ana'-ana' gurunNa Isa anjo taua. 14 Nakanamo Isa ri ana'-ana' gurunNa, “Lappassangi namae ri Nakke anjo ana'-anaka, teako pisangkai. Nasaba' tau kammayami anne la'jari umma'Na Allata'ala.” 15 Naangka'mi limanNa Isa naNabarakkaki ngaseng anjo ana'-anaka. Le'baki anjo a'lampami ambokoi anjo tampaka. 16 Ri se'reang allo, nia' se're tau bura'ne battu mae ri Isa angkana, “O Guru, panggaukang apa baji' kugaukang sollanna akkulle kugappa katallassang sitojennaya siagang mannannunganga?” 17 Appialimi Isa Nakana, “Angngapa nukkuta'nang ri Nakke ri passala' apa bajika? Se'reji bawang baji'. Punna erokko salama', turukimi sikamma apa Napassuroanga Allata'ala.” 18 Akkuta'nammi anjo tau rungkaya angkana, “Apa passuroNa Allata'ala?” Appialimi Isa Nakana, “Teako ammunoi; teako a'gau' salimararri; teako a'lukkaki; teako a'balle-ballei; 19 pakala'biriki anrong-manggenu; siagang kamaseangi parannu tau sangkamma nukamaseanna batangkalennu.” 20 Appialimi pole anjo tau rungkaya angkana, “Yangaseng anjo parenta kammaya le'ba'mi kugaukang. Jari apapi pole parallu kugaukang?” 21 Akkanami pole Isa ri ia, “Punna ma'nassa erokko a'jari tau ganna', a'lampamako ambalukang ngasengi barang-barannu. Passareammi ballinna mae ri tu kasi-asia, nama'nassa lanugappamo sallang pa'barang-barangang niaka ri suruga. Punna le'ba'mo nugaukang anjo kammaya, battu mako mae amminawang ri Nakke!” 22 Nalangngere'na akkana kamma Isa, a'lampami anjo tau rungkaya; si'na sikali atinna nasaba' akkalumanynyang sikali. 23 Nakanamo Isa ri ana'-ana' gurunNa, “Kukanamo ri kau ngaseng, teai sipato' susana tau kalumanynyanga la'jari umma'Na Allata'ala. 24 Siagang Kukana pole ri kau ngaseng; la'bi akkulleangangi sikayua unta antama' ri so'bolo' jarunga kala tau kalumanynyanga lantama' ri Lino BeruNa Allata'ala.” 25 Lannasa' ngasemmi ana'-ana' gurunNa Isa nalangngere'na akkana kamma Isa. Nakanamo ke'nanga, “Punna paleng kamma, jari inai mami akkulle salama'?” 26 Nicinikimi ke'nanga ri Isa; nampa Nakana Isa ri ke'nanga, “Anjo tena memang nantama' ri akkala'na rupataua. Mingka tena tamakkulle punna Nakaerokang Allata'ala.” 27 Nakanamo Petrus, “Kicini' minne, ikambe nibokoi ngasemmi sikamma apa niaka ri kambe lanri erotta amminawang ri Katte. Na apa sallang lanagappa ikambe?” 28 Nakanamo Isa ri ke'nanga, “Tappa' mako angkanaya: Ri Lino Berua, lammempoi Ana' Ma'rupataua irate ri empoang kala'biranNa. Anjo wattua sallang, ikau ngasemmi ana'-ana' gurungKu lammempo irate ri sampuloa anrua empoang kala'birang. Na ikaumi langngadeli sampuloa anrua suku ri bansa Israelka! 29 Na inai-nai ambokoi balla'na, yareka sari'battanna bura'nea, yareka sari'battanna bainea, yareka anrong-manggena, yareka ana'na ngaseng, yareka kokonna, passabakkang iNakke, iami sallang langgappai ammotere' sikamma apa nabokoia a'lappi sibilangngang jaina. Siagang iami langgappai katallassang sitojennaya siagang mannannunganga. 30 Mingka jai tau ri dallekanga ri kamma-kammaya anne la'jari tau ri boko dudui sallang. Na tau ri boko dudua ri kamma-kammaya anne la'jari tau ri dallekang dudui sallang.”
1 “Punna ammarenta Allata'ala, pangngebaranna lakammaminne: Nia' se're tau ero' a'boya pajama ri koko anggoro'na. A'lampa bari'basa'mi a'boya tau. 2 Ri wattunna nia'mo siapa are tau nagappa, sitappukimi angkanaya lanabayaraki ke'nanga se're doe' pera' lalanna sialloa. Le'baki anjo nasuromi ke'nanga a'lampa anjama ri koko anggoro'na. 3 Ri tette' salapanna alloa, a'lampami pole anjo patannaya koko. Nia'mo pole nacini' siapa are tau, tenaya jama-jamanna ri pasaraka. 4 Nakanamo ri ke'nanga, ‘A'lampamako mange anjama ri koko anggorokku, nakubayarakko siapa siratanga.’ 5 A'lampami ke'nanga mange anjama. Kammaminjo pole nakkio'moseng tau anjama ri wattunna a'lampa ri tette' sampulona anrua ri tangngana alloa siagang ri tette' talluna ri karuenga. 6 Nakira-kira ri tette' limana ri karuenga a'lampami pole. Nanacini'mo pole nia' ija tau tenaya jama-jamanna. Akkuta'nammi anjo patanna koko ri ke'nanga angkana, ‘Angngapa nummantang ngaseng anrinni ammenteng sila'busu' allo tena apa-apa nugaukang?’ 7 Appialimi ke'nanga angkana, ‘Katena tau ampajamaki'.’ Nakanamo anjo patanna koko, ‘Punna kamma padeng, mange ngaseng mako anjama ri koko anggorokku.’ 8 Ri karueng dudunamo, nakanamo anjo patanna koko ri mandoro' pajama-jamana, ‘Kio' ngasemmi anjo tau anjamaya. Massing bayara'mi gajina appakkaramula battu ri anjo kala'busang dudua antama' anjama sa'genna tau ri dallekang dudua antama'.’ 9 Battumi anjo pajama tette' limaya ri karuenga nappakkaramula anjama. Massing nibayara'mi tasse'renna doe' pera'. 10 Le'baki anjo battu tommi anjo pajama appakkaramulaya anjama ri bari'basaka. Napikkiriki ke'nanga angkanaya lala'bi lanatarima ke'nanga. Mingka kajarianna se're tonji doe' pera' nibayarrangi ke'nanga. 11 Natarimana doeka ke'nanga, a'moro-moromi ke'nanga ri anjo patannaya koko. 12 Nakana ke'nanga, ‘Pajama ri boko dudua sitette'ji anjama. Na ikatte sila'busu' alloki' nabambangi allo anjama, mingka kipasangkammaji kipa'gajianga ri ke'nanga siagang ri kambe anne!’ 13 Appialimi anjo patanna koko mae ri kalase'renna ke'nanga, angkana, ‘E gang, tena nakusala ri kau. Sai le'ba' maki' sitappuki angkanaya se're doe' pera' gajinu siallo? 14 Jari, allemi anne gajinu, nu'lampa. Ero' memang tonga' assarei anjo tau ri boko dudua antama' anjama, gaji sangkammaya jaina siagang gaji kupassareanga ri kau. 15 Apa takkullea' angngatoroki pa'barang-barangangku situru' apa nakaerokia nyawaku? Yareka assereatiko lanri lammoro' pa'maikka'?’ ” 16 Nampa Nakanamo pole Isa, “Kamma tomminjo, tau ri boko dudua la'jari ri dallekang dudui, na tau ri dallekanga la'jari ri boko dudui.” 17 Ri wattunna a'lampa Isa mange ri Yerusalem, ri tangngana aganga Nakio'mi mange ri tampa' tassa'laka ana'-ana' gurunNa. Nampa Nakana ri ke'nanga, 18 “Pilangngerimi! Anne kamma a'lampa maki' mange ri Yerusalem. Punna battuki' mange anjoreng, lanipassareammi Ana' Ma'rupataua mae ri imang-imang kapalaya siagang guru-guru agamaya. Lanihukkung matei, 19 nanipassareang ri tau teai bansa Yahudi. Lanicau-caui ri ke'nanga, lanisessai, nampa nisalli' ri ke'nanga. Mingka ri makatalluna alloa lanipabangungi pole ammotere'.” 20 Le'baki anjo battumi bainenna Zebedeus siagang ana'-ana'na andallekang ri Isa. Su'ju'mi ri dallekanNa Isa. Nia' ero' napala'. 21 Akkuta'nammi Isa Nakana, “Apa nukaeroki?” Appialimi anjo bainea nakana, “Punna a'jari KaraengKi' sallang kupalaki naKipaempo anne anakku ruaya, se're ri kairinTa na se're ri kananTa.” 22 Nakanamo Isa ri ke'nanga, “Tanupahangai antu apa nupalaka. Maka akkullejako lampisa'ringi todongi passessa laKupisa'ringia?” Appialimi ke'nanga angkana, “Iye', akkulleja'.” 23 Nakanamo Isa, “Memang akkullejako ampisa'ringi passessa laKupisa'ringia. Mingka inai sallang lammempo ri sa'ri kairingKu siagang ri sa'ri kanangKu, teai iNakke lampattantui. Anjo tampaka lanipassareangi ri tau le'bakamo Napattantu Manggea.” 24 Nalangngere'na ana'-ana' gurunNa Isa sampuloa anjo passalaka, larromi ke'nanga mae ri anjo tau ruaya massari'battang. 25 Lanri kammana nikio' ngasemmi ke'nanga ri Isa. Nakanamo Isa ri ke'nanga, “Nuassemmi angkanaya sikamma pamimpinna bansa kapereka ri anne linoa najallakkangi ra'yaka. Kammayatompa sikamma tumalompona ke'nanga anjallakkang tongi ra'ya'. 26 Mingka ikau takkulleako appakamma anjo. Passangalinna inai-nai ero' a'jari tau lompo parallui a'jari palayang. 27 Na inai-nai ero' a'jari tau ri dallekang dudu, parallui a'jari ata. 28 Sangkamma minjo Ana' Ma'rupataua; niaki battu teai sollanna nanilayani, passangalinna sollanna na'jari palayang. NaNapassareang nyawaNa, sollanna nakkulle Napasalama' tau jaia.” 29 Ri wattunna nabokoimo ke'nanga Yerikho, jaimi tau amminawang ri Isa. 30 Nia'mo rua tau buta ammempo ri biring aganga. Nalangngere'na ke'nanga angkanaya niaki Isa numalo, akkiok-kio'mi ke'nanga angkana, “O Ana'na Daud, kamaseangki' anne kodong!” 31 Nikalarroimi siagang nisuromi ke'nanga a'mere' ri sikamma tau niaka anjoreng. Mingka pila' akkio' lompoji pole ke'nanga angkana, “O Tuang, Ana'na Daud, Kikamaseangki' anne kodong!” 32 Jari ammantammi Isa nampa Nasuro kio' ke'nanga. Akkuta'nammi ri ke'nanga angkana, “Apa ero' nupala' Kugaukang ri kau sipa'rua?” 33 Appialimi ke'nanga angkana, “O Tuang, erokki' anne accini'!” 34 Tu'guru'mi pangngamaseanNa Isa ri ke'nanga. Najamami matanna ke'nanga, nakkulle memammo accini' silalonna. Nampa amminawammi ke'nanga ri Isa.
1 A'reppese'namo ri Yerusalem, battumi ke'nanga ri Betfage, ri Bonto Zaitun. Battuna anjoreng Nasuromi rua ana' gurunNa Isa a'lampa riolo. 2 Napasammi ke'nanga angkana, “A'lampamako mange anjoreng ri kampong niaka ri dallekannu. Nia' sinampe' nucini' sikayu keledai tappau' siagang ana'na. Lappassang rua-ruami, nampa nuerang mae. 3 Punna nia' angkuta'nangko, pauammi patanna angkana, ‘Naparalluangi Batara,’ napassareang mintu nuerang anjo keledaia.” 4 Lanri kammana a'rupami apa le'baka napau na'bia angkanaya, 5 “Pabattumi ri Sion, angkanaya nia'mi battu Karaennu mae ri kau. Tunai ri pa'mai', ma'dongko' ri keledai sikayu ana' keledai rungkaya.” 6 A'lampami anjo ruaya ana' gurunNa Isa. Nagaukammi ke'nanga situru' napappasanganga Isa. 7 Naerammi ke'nanga anjo keledaia siagang ana'na. Nampa nalapakki ke'nanga dongko'na anjo keledaia siagang jubana ke'nanga. Nampa nai'mi Isa. 8 Jaimi tau ampalaparaki jubana siagang ansarei leko'-leko' kayu ri tangngana agang laNaoloa Isa. 9 Nampa a'jappa anjo tau jaia ri dallekanNa siagang ribokoNa Isa. Akkiok-kio'mi ke'nanga angkana, “Nipakalompoi Ana'na Daud! Nibarakkakimi battua lalang arenNa Batara! Nipujimi Allata'ala Kaminang Tinggia!” 10 Ri wattunna antama'mo Isa ri kota Yerusalem, gegere'mi sikontu tau niaka ammantang anjoreng ri kotaya. Akkuta'nammi tau anjorenga ri kotaya angkana, “Inai anne taua?” 11 Appialimi tau jaia niaka anrurungangi Isa angkana, “Na'bi Isa, battu ri Nazaret, ri Galilea.” 12 Le'baki anjo antama'mi Isa ri Balla'Na Batara. Nabongka ngasemmi sikamma tau niaka anjoreng a'balu'-balu'. Nabulinta' ngasemmi mejang-mejanna pasambe doeka, kammayatompa bangko-bangkona pabalu' jangang-jangang bodobangkenga. 13 Nampa Nakana ri anjo taua ngaseng, “Nia' tattulisi' lalang ri Kittaka angkana, Nakana Allata'ala, ‘Lanipareki balla' sambayang BallakKu.’ Mingka ikau ngaseng nupareki pa'rappungang paella'!” 14 Battumi tau butaya siagang tau pesoka nierang mae ri dallekanNa Isa lalang ri Balla'Na Batara. Nampa niballei ngaseng ri Isa, na'jari baji' memang silalonna. 15 Mingka larromi imang-imang kapalaya siagang guru-guru agamaya nacini'na Nagaukang Isa anjo gau' appakalannasaka. Larro tommi ke'nanga nalangngere'na ana'-anaka akkiok-kio' lalang ri Balla'Na Batara angkana, “Nipakalompoi Ana'na Daud!” 16 Nakanamo ke'nanga mae ri Isa, “Nulangngere'ji anjo napaua ke'nanga?” Appialimi Isa Nakana, “Iyo, Kulangngere'ji. Tena le'bakapi nubaca apa niaka tattulisi' lalang ri Kittaka angkanaya, ‘Le'ba'mi nuajara' ana'-anaka siagang ana' loloa ampaui kana-kana pammujia’?” 17 Le'baki anjo a'lampami Isa ambokoi ke'nanga. Assulu'mi battu ri kotaya, namange a'bangngi ri Betania. 18 Ammukona bari'basa', lalang a'jappana ammotere' mange ri kotaya cipuru'mi Isa. 19 Nia' nacini' se're poko' ara ri biring aganga. Mangemi anjoreng ri poko' araya. Mingka manna sibatu tania' Nacini' rapponna pantaranganna leko-leko'na bawang. Nakanamo Isa ri anjo poko' araya, “Tenamo nukkulle a'rappo pole!” Nakalumeng memammo silalonna anjo poko' araya. 20 Lannasa' ngasemmi ana'-ana' gurunNa Isa ri wattunna nacini' anjo kajarianga. Akkuta'nammi ke'nanga angkana, “Antekamma nakkulle mate silalonna anjo poko' araya?” 21 Appialimi Isa Nakana, “Sitojeng-tojenna, punna tappakko natena nubata-bata, akkulle ngaseng tongko anggaukangi anjo apa le'baka Kugaukang mange ri poko' araya. Ba'lalo teai anjo bawang. Lakkulleko pole angkana ri anne bontoa, ‘Ta'angkakko, nutassambila naung ri tamparanga’; nalakamma tojeng-tojeng anjo kajarianna. 22 Manna apa mamo nupala' lalang pappala' doangannu assala' tappa' tojeng-tojengko, ma'nassa lanutarimai apa nupalaka.” 23 Le'baki anjo ammotere'mi Isa mange ri Balla'Na Batara. Antama'mi angngajara' lalang. Sitabanna angngajara', battumi mae ri Ia imang-imang kapalaya siagang pamimping-pamimpinna tu Yahudia. Akkuta'nammi ke'nanga angkana, “Apa passabakkanna nakkulle Nugaukang ngaseng anne? Inai assareKo koasa?” 24 Appialimi Isa Nakana, Ero' tongA' akkuta'nang ri kau ngaseng. Na punna nupialimo pakkuta'nangKu, nampa mako laKupauang todong angkanaya inai assareA' koasa anggaukang ngasengi sikammaya anjo apa le'baka Kugaukang. 25 Iaminne pakkuta'nangKu, “Inai assarei koasa Yohanes anje'neki taua? Allata'ala yareka rupataua?” Massing sikuta'nammi para ia anjo imang-imang kapalaya siagang pamimping-pamimpinna tu Yahudia angkana, “Punna nikana ‘Allata'ala assarei koasa,’ lakkuta'nangi pole ri katte angkana, ‘Punna kamma padeng, apa saba'na natena nutappa' ri ia?’ 26 Mingka punna nikana, ‘Taua assarei koasa,’ mallakki' ri tau jaia, nasaba' tappaki taua angkanaya na'bi memang anjo Yohanes.” 27 Jari appialimi ke'nanga angkana, “Tanaassengai ikambe.” Jari Nakanamo Isa ri ke'nanga, “Punna kamma tena todong Kuero' ampauangko angkana inai assareA' koasa anggaukang ngasengi anjo Kugaukanga.” 28 Nakanamo pole Isa, “Nia' sitau bura'ne, nia' ana'na bura'ne rua. Nakanamo ri ana'na toaya, ‘Na', a'lampako anne alloa anjama ri koko anggoroka.’ 29 Appialimi anjo ana'na nakana, ‘Teaja'.’ Mingka tena nasallo, tappinrami pikkiranna, na'lampaja mange anjama ri koko anggoroka. 30 Le'baki anjo a'lampami pole anjo taua mange ri ana' makaruana, nanasuro tommo mange anjama ri kokoa. Appialimi anjo ana' makaruaya nakana, ‘Iye',’ Mingka kale'bakkanna ta'lampayaji. 31 Jari kamma-kamma anne antekamma panggappanu? Kereanga anjo ana' ruaya anggaukangi napassuroanga manggena?” Appialimi imang-imang kapalaya siagang pamimping-pamimpinna tu Yahudia angkana, “Anjo ana'na toaya.” Jari Nakanamo pole Isa ri ke'nanga, “Patappa'mi angkanaya: Rioloangangi sallang parentea siagang bai'-baine ja'dalaka a'jari umma'Na Allata'ala kala ikau ngaseng. 32 Nasaba' battumi Yohanes Paje'ne' ampicinikiang ngasengko carana katallassang Nakaerokia Batara, mingka taerokako tappa' ri pangngajara'na; mingka parentea siagang bai'-baine ja'dalaka tappaki ri ia. Na ikau ngaseng, manna pole nucini' ngasemmi anjo apa kajarianga tena tompa natappinra pikkirannu siagang tena tongija nuero' tappa' ri Batara.” 33 Nakanamo pole Isa, “Pilangngerimi pole anne se'rea pangngebarang. Nia' se're tau ero' allamungi kokonna anggoro'. Napangngalakkimi attammulili kokonna. Nampa appare' kali'bong eroka napake ammacco' je'ne' anggoro'. Appare' tommi balla'-balla' jaga tinggia. Le'baki anjo napappitesangammi anjo koko anggoro'na mae ri siapa are pajama koko. Nampa a'lampa ri se'reang pa'rasangang maraeng. 34 Se're wattu, narapi'mi wattunna lanialle rapponna anjo anggoroka ri kokonna. Nasuromi siapa are palayanna anjo patanna koko mange ampalaki tawana ri anjo tau anjamayai kokonna. 35 Mingka battuna mange anjo palayanna patanna koko, nijakkala'mi ke'nanga ri anjo pajama kokoa. Nia'mo naba'ji, nia'mo nasambila batu, siagang nia' tommo nibuno ri ke'nanga. 36 Nasuromi pole palayanna maraenganga anjo patanna koko, jaiangang naanjo nasuroa riolo. Mingka nipakamma ngaseng tommiseng ke'nanga. Nia' niba'ji, nia' nisambila batu, nania' nibuno ri anjo pajama kokoa. 37 Kala'busanna nasuromi ana' kalenna anjo patanna koko. Napikkiriki angkanaya, ‘Punna anakku mattantu lanipakala'biriki ri ke'nanga.’ 38 Mingka nacini'na ke'nanga anjo ana'na patanna koko nakanamo para ia, ‘Iaminne ana'na, warisi'na patanna koko. Umba nibunoi nampa nialleang warisi'na!’ 39 Najakkala'mi anjo ana'na patanna koko, nampa nabuno, nanapela' assulukang.” 40 Le'baki Nacarita Isa anjo pangngebaranga akkuta'nammi ri ke'nanga angkana, “Jari punna ammotere' anjo patanna koko, apa lanagaukang ri anjo tau anjamayai kokonna?” 41 Appialimi ke'nanga angkana, “Mattantu lanabunoi anjo tau ja'dala' kammaya. Nampa napappitesangang ri tau maraeng anjo kokonna, eroka ambagei punna narapi' wattunna nibage wassele'na anjo kokoa.” 42 Jari Nakanamo Isa ri ke'nanga, “Tale'bakapi nubaca niaka tattulisi' lalang ri Kittaka angkanaya, ‘Batu tenaya napakei tukanga a'jarimi batu panjarreki. Iaminne Napareka Allata'ala; natamaka ga'gana!’ ” 43 Nakanamo pole Isa, “Jari u'rangi angkanaya, yangasenna ha'nu a'jari umma'Na Allata'ala lanialleangko ammotere', nampa nipassareang mae ri bansa maraenga, eroka anggaukangi ero'Na Allata'ala. 44 Tau tu'guruka naung ri batua laancuruki; na tau nitujua ri batua lanijalla'-jallakkangi sa'genna a'jari limbu'bu'.” 45 Nalangngere'na imang-imang kapalaya siagang tu Farisia anjo pangngebarang Nacaritaya Isa, naassemmi angkanaya kalenna ke'nanga nataba anjo pangngebaranga. 46 Jari a'boyami cara ke'nanga ero' anjakkalaki Isa. Mingka mallaki ke'nanga ri tau jaia. Kaanjo tau jaia tappaki angkanaya na'bi anjo Isa.
1 A'bicarami pole Isa ri tau jaia, ammake pangngebarang, 2 Nakana, “Punna ammarenta Allata'ala kammaminne pangngebarranna: Nia' se're Karaeng ampa'buntingi ana'na bura'nea, nanapassua'-suarrang. 3 Nasuromi pala'-palayanna anjo Karaenga mange ambuntuli sikamma tau le'baka niburittai mae ri anjo passua'-suarranga. Mingka taerokai battu anjo sikamma tau le'baka niburittai. 4 Jari nasuromi pole pala'-palayanna maraenga anjo Karaenga. Napasammi ke'nanga angkana: ‘Pauang ngasengi anjo tau le'baka niburittai angkanaya: Tattala ngasemmi apa-apaya ri passua'-suarrang pa'buntinganna Karaenga. Sikamma sapia siagang sapi rungka kaminang bajika le'ba'mi nisuro polong. Kamma-kamma anne sadia ngasemmi. Umbamo kimange anjoreng assua'-suara' ri pa'buntinganga!’ 5 Mingka tenaja nijampangi ri anjo tau le'baka ngaseng niburittai. Massing a'lampaji ke'nanga ri jama-jamanna — nia' a'lampa mange ri kokonna, nia' tommo a'lampa mange ri usahana; 6 ba'lalo nia' tommo anjakkalaki anjo pala'-palayanna nasuroa Karaenga, naallei naba'ji, nampa nabuno. 7 Nalangngere'na Karaenga anjo kajarianga teaimi sipato' larrona. Nakirimmi tantarana nanasuro buno ngaseng anjo tau le'baka ambunoi pala'-palayanna. Kammayatompa kotana ke'nanga nasuro tunu tongi. 8 Le'baki anjo nakio'mi pala'-palayanna maraenganga. Nakana ri ke'nanga, ‘Sadiami passua'-suarranga, mingka tena ngaseng nasiratang anjo tau le'baka niburittai. 9 Kamma-kamma anne a'lampamako mange ri agang-agang lompoa nanukio' ngaseng tau jaia battu mae assua'-suara'.’ 10 A'lampa ngasemmi anjo palayanga. A'lampami ke'nanga ri agang-agang lompoa nanapa'rappungang ngaseng tau nabuntuluka ke'nanga, baji'na tau bajika kammayatompa tau ja'dalaka. Rassimi anjo balla' passua'-suarrang pa'buntinganga napakamma jaina toana. 11 Battumi anjo Karaenga anciniki ngasengi toanaya. Nia'mo sitau nacini' tena nammake pakeang passua'-suarrang. 12 Akkuta'nammi ri anjo taua nakana, ‘E, gang, antekamma nukkulle antama' anrinni natena nummake pakeang passua'-suarrang?’ Tanaassengami appiali anjo taua. 13 Nakanamo anjo Karaenga mae ri pala'-palayanna, ‘Sikkoki bangkenna siagang limanna anne taua nampa nupela' assulukang ri pammantangang sassanga. Anjoremmi langngarru'-arru' siagang lanakasia' sessaya.’ ” 14 Kala'busang Nacaritana Isa anjo pangngebaranga Nakanamo, “Jai tau nikio' mingka sike'de'ji nipile.” 15 Le'baki anjo a'lampami tu Farisia sipa'bicara; eroki ke'nanga a'boya pakkuta'nang sollanna akkulle nakuta'nang Isa nasala pappialinNa. 16 Nasuromi ana'-ana' gurunna ke'nanga mange ri Isa. A'rurummi ke'nanga siagang ana'-ana'na Herodes. Battui mange ri Isa, angkanami ke'nanga, “O Guru, niassemmi angkanaya iKatte tau lambusukKi'. Apa ero'Na Allata'ala Kipangngajarrammi silambusu'na ri sikamma taua. Manna pole inai tena Kijampangi antekamma panggappana. Nasaba' iKatte tena Kimmile-mile tau. 17 Lanri kammana, Kipausai bedeng: Manuru' atoranna agamata, maka siratangki' a'bayara' sima ri Karaenga yareka tena?” 18 Mingka Naassemmi Isa pikkirang ja'dala'na ke'nanga. Jari Nakanamo ri ke'nanga, “E, tu munape'! Angngapa nuero' ampa'boyangA' sala? 19 PicinikiangsA' doe' akkullea nupake a'bayara' sima ri Karaenga!” Nisaremi ri ke'nanga se're doe' pera'. 20 Akkuta'nammi Isa ri ke'nanga Nakana, “Inai pata gambara' siagang areng anne lalang ri doeka?” 21 Appialimi ke'nanga angkana, “Karaenga pata gambara' siagang areng.” Nakanamo Isa ri ke'nanga, “Jari punna kamma, sareammi Karaenga apa napatanga Karaenga; nanusareang Allata'ala apa Napatanga Allata'ala.” 22 Nalangngere'na ke'nanga pappialinna Isa, a'jari lannasa' sikalimi ke'nanga. A'lampami ke'nanga ambokoi Isa. 23 Ia todong anjo alloa nania' siapa are tu Saduki battu mae ri Isa. Anjo tu Sadukia tena natappa' angkanaya lattallasa' poleangi tau matea. 24 Nakanamo ke'nanga ri Isa, “O Pa' Guru, napangngajarrangi Musa kammaya anne: Punna nia' sitau bura'ne mate natena ana'na, parallui sari'battanna ambuntingi anjo bainenna nabokoia, sollanna nasare ana' anjo sari'battanna matea. 25 Le'baki nia' tau tuju assari'battang ammantang anrinni ri pa'rasanganga. A'buntimmi anjo kaminang toaya, namate, natena ana'na. Anjo bainenna nabokoia, nibuntingimi ri sari'battanna. 26 Mingka mate tongi anjo sari'battanna, natena todong ana' naboli'. Kamma tomminjo kajarianna ri sari'battanna maka tallua, sa'genna ri sari'battanna maka tujua. A'bunting ngaseng tommi siagang anjo bainea, mingka mate ngaseng tongi, siagang tena ngaseng ana' naboli'. 27 Kala'busanna mate tommi anjo bainea. 28 Jari punna attallasa' poleang tau matea kereangami pata baine anjo bainea? Nasaba' le'ba' ngasemmi nibuntingi ri anjo tujua bura'ne.” 29 Appialimi Isa Nakana, “Sala pikkirang ngasengko antu. Nasaba' tena nupahangi bonena Kittaka siagang koasaNa Allata'ala. 30 Nasaba' punna attallasa' poleangi sallang tau matea, tenamo nala'bunting poleang ke'nanga. Passangalinna lakammami ke'nanga malaekaka ri suruga. 31 Apa tale'bakapi nubaca lalang ri Kittaka apa le'baka Napau Allata'ala ri passala'na tau mate nipattallasa' poleanga? Nakana Allata'ala, 32 ‘INakkemi Allata'alana Abraham, Allata'alana Ishak, siagang Allata'alana Yakub.’ Anjo Allata'ala, teai Allata'alana tau matea; mingka Allata'alana tau attallasaka!” 33 Nalangngere'na tau jaia akkana kamma Isa, lannasa' ngasemmi ke'nanga ri pangngajaranNa. 34 Nalangngere'na tu Farisia angkanaya takkulleami akkana tu Sadukia Napakamma Isa, a'rappungammi ke'nanga. 35 Nia'mo kalase'renna ke'nanga iamintu sitau guru agama, ero' ancoba-coba ampa'boyangi sala Isa. Nakuta'nammi Isa nakana, 36 “O Pa' Guru, kereanga parenta lomoro' se'rea lalang ri atorang agamaya?” 37 Appialimi Isa Nakana, “Kamaseangi Karaeng Allata'alanu siagang sitepu atinnu, sitepu pa'mai'nu kammayatompa sitepu tallasa'nu. 38 Iaminjo parenta lomoro' se'rea siagang kaminang parallua. 39 Parenta makaruaya, sangkammaya parenta lomoro' se'rea iamintu: Kamaseangi parannu tau sangkamma todong nukamaseanna batangkalennu. 40 Sikontu atorang agama napassareanga Musa siagang napangngajarranga na'bi-na'bia battu anrinni ngaseng minne ri ruaya parenta.” 41 Sitabang a'rappunganna ngaseng ija tu Farisia anjoreng, akkuta'nammi Isa ri ke'nanga Nakana, 42 “Antekamma panggappanu ngaseng ri passala'na Karaeng Mappasalamaka? Sossorang battu ri nai?” Appialimi ke'nanga angkana, “Sossorang battu ri Daud.” 43 Akkuta'nammi Isa Nakana, “Punna kamma, apa saba'na naniajara' Daud ri RohNa Allata'ala sollanna akkio' ‘Batara’ ri Karaeng Mappasalamaka? Nasaba' nakana Daud, 44 ‘Nakana Batara ri Bataraku: Ammempoko ri sa'ri kanangKu, Sa'genna Kusuro ngaseng akkulantu' musu-musunNu ri dallekanNu.’ 45 Jari punna Daud akkio' ‘Batara’ ri anjo Karaeng Mappasalamaka antekamma lakkulle nikana sossorang battui ri Daud?” 46 Manna sitau tenamo akkulle appiali ri Isa. Na appakkaramula anjo alloa tenamo manna sitau barani akkuta'nang apa-apa mamo ri Isa.
1 Le'baki anjo Nakanamo Isa ri tau jaia siagang ana'-ana' gurunNa, 2 “Anjo guru-guru agamaya siagang tu Farisia nisarei pangngissengang ambattuangngi atorang agama napassareanga Musa. 3 Lanri kammana pilangngerimi siagang gaukammi apa napassuroanga. Mingka teako gaukangi apa nagaukanga ke'nanga. Nasaba' kalenna ke'nanga tena nagaukangi apa napangngajarranga ke'nanga. 4 Nasareki' atorang-atorang battala' siagang nakellaiki' anggaukangi apa sannaka susana. Mingka manna sike'de' tena todong natulungki' anggaukangi. 5 Sikontu anjo apa nagaukanga ke'nanga poro ero'naja napappicini'-cinikang ri taua. Napakkunjung-kunjungiammi ke'nanga ammake soro'bang siagang juba turunga! 6 Nangai ke'nanga ammempo ri pammempoang kaminang bajika ri tampa' passua'-suarranga, yareka lalang ri balla' sambayanga. 7 Nangai ke'nanga punna nipakala'biri' ri pasa'-pasaraka, siagang sannang sikali punna nikio' ‘Bapa' Guru’ ri taua. 8 Mingka ikau ngaseng teako eroki nikio' ‘Bapa' Guru’, nasaba' se'reji Gurunnu, na ikau assari'battang ngasengko. 9 Siagang teako akkio' ‘Bapakki’ manna ri nai, nasaba' se'reji Bapa'nu, iamintu Bapa'nu niaka ri suruga. 10 Natea tongko eroki nikio' ‘Pamimping’, nasaba' se'reji pamimpinnu, iamintu Karaeng Mappasalamaka, Napa'janjianga Allata'ala. 11 Inai kaminang la'biri' ri kau parallui a'jari palayang. 12 Inai-nai ampakalompoi kalenna iami lanipakatuna; na inai-nai ampakatunai kalenna, iami lanipakalompo.” 13 Nakanamo pole Isa, “Cilaka ngaseng mako ikau guru-guru agamaya siagang tu Farisia, lanri nungaina assara-saraia. Ikau ngasemmi anrompai taua la'jari umma'Na Allata'ala. Ikau ngasenji tea a'jari umma'Na Allata'ala, nanurompai todong tau maraenga, eroka a'jari umma'Na Allata'ala. 14 Cilaka ngaseng mako ikau guru-guru agamaya siagang tu Farisia lanri nungaina assara-saraia. Nutipui janda-jandaya, nanualleang balla'na. Nalanri ero'na nucokkoi kaja'dallannu, nula'bu-la'buimi punna assambayangko. Lanri kammana minjo nabattala' sikali sallang hukkungannu! 15 Cilaka ngaseng mako ikau guru-guru agamaya siagang tu Farisia, lanri nungaina assara-saraia! A'lampa bella mako a'limbang tamparang, nujappai ngasemmi tompo'na buttaya, naporo sitauji bawang ero' nupantama' ri agamanu. Na punna antama'mo anjo taua ri agamanu, nupa'jarimi parekang tulantamaka ri naraka, a'lappi ruaya ja'dala'na na ikau ngaseng! 16 Cilaka ngaseng mako ikau pamimping-pamimping butaya! Nuajari taua angkana, ‘Punna assumpa taua na Balla'Na Batara nipau, tenaja naparallu niu'rangi anjo sumpaya; mingka punna assumpai lanri bulaeng lalang ri Balla'Na Batara musti niu'rangi anjo sumpaya.’ 17 Ikau ngaseng tu toloa siagang tu butaya! Kereanga paralluangang: bulaenga yareka Balla'Na Batara ampa'jariai matangkasa' anjo bulaenga? 18 Nupangngajarrang tongi angkanaya, ‘Punna assumpa taua na tampa' pakkoro'bangnganga nipau, tenaja naparallu niu'rangi anjo sumpaya; mingka punna assumpa taua na koro'bang ratea ri tampa' pakkoro'bangnganga nipau, parallu niu'rangi anjo sumpaya.’ 19 Teai sipato' butanu ngaseng! Kereanga paralluangang? Koro'banga, yareka tampa' koro'banga ampa'jariai matangkasa' anjo koro'banga? 20 Jari, punna nia' tau assumpa na napau tampa' koro'banga, battuanna napalalang ngasemmi tampa' koro'banga, kammayatompa pole koro'bang niaka irate ri anjo tampa' koro'banga. 21 Siagang punna nia' tau assumpa na napau Balla'Na Batara, battuanna napalalang ngasemmi Balla'Na Batara, kammayatompa pole Allata'ala ammantanga ilalang. 22 Siagang punna nia' tau assumpa na suruga napau, battuanna napalalang tommi empoang kala'biranNa Batara kammayatompa pole Allata'ala niaka ammempo irate ri anjo empoang kala'biranga. 23 Cilaka ngaseng mako ikau guru-guru agamaya siagang tu Farisia, lanri nungai assara-saraia. Assare mako passidakka mae ri Batara; wassele' lamung-lamunnu kammaya lamung-lamung nipareka pa'bumbu lisere'na, lamung-lamung nipareka bumbu yareka pa'minynya'-minynya' siagang lamung-lamung nipareka pa'balle leko'na. Yangasenna anjo nupassidakkammi bage sampulona ri Batara. Mingka kaminang parallua lalang pangatorang agamaya kammaya: Kaadelang, pangngamaseang, siagang akkana sitappaka, tena ngaseng nujampangi. Na sikontutojenna yangaseng minjo parallu nugaukang, nampa nuu'rangi todong maraenganga. 24 Ma'nassa pamimping buta ngasengko! Nubongkai katingalo lalanga ri je'ne' inunnu, na unta sikayu nua'lu'! 25 Cilaka ngaseng mako ikau guru-guru agamaya siagang tu Farisia, lanri nungaina assara-saraia! Nubissai sa'genna tangkasa' bageang pantara'na mangkoka siagang piringa. Na lalanganna teai sipato' ra'masa'na napakamma apa-apa tena na hallala' siagang napakamma angngoa dudunu. 26 E, tu Farisi butaya! Bissaimi sa'genna tangkasa' ilalanganna anjo mangko'-mangko'nu siagang piring-pirinnu, sollanna tangkasa' ngaseng todong pantaranganna! 27 Cilaka ngaseng mako ikau guru-guru agamaya siagang tu Farisia, lanri nungaina assara-saraia! Sanrapangko jera' nice' keboka; sanna' ga'gana nicini' pantaranganna; mingka lalanganna rassi buku-buku sannaka ngaseng botto'na. 28 Kamma ngaseng tommako anjo. Punna nicini' battu pantarang, baji' ngasengko mae ri taua; mingka lalang ri nyawanu, sangnging tu munapekko siagang tena ngaseng nungngasseng atorang.” 29 Nakana pole Isa, “Cilaka ngaseng mako ikau guru-guru agamaya siagang tu Farisia, lanri nungaina assara-saraia! Nuga'gai pare'na jera'na na'bi-na'bia. Siagang numode bajiki mesanna tau baji'-bajika katallassanna. 30 Siagang nukana ngaseng, ‘Ka'de' ninia' tommo ri wattu attallasa'na boe-boeta, tenaja katte nikaturu'-turukang ambunoi na'bi-na'bia.’ 31 Jari numangakuimi angkanaya sossoranna ngasengko tau ambunoai na'bi-na'bia! 32 Punna kamma gaukang tulimi siagang pa'le'ba'mi dosa-dosa le'baka napakkaramulai boe-boenu! 33 E, ikau ngaseng tau ja'dalaka siagang sossorang tau ja'dalaka! Antekamma lakkulle nuliliang hukkunganga ri naraka? 34 Pilangngerimi baji'-baji': LaKusuroi battu ri kau na'bi-na'bia, tu cara'deka, siagang guru-gurua; na nia'mo ri ke'nanga nubuno, nia' tommo nusalli'. Nia' nusessa lalang ri balla' sambayanga, na nia' tommo nuondang mange-mange ri kota-kotaya. 35 Jari lanihukkung ngasengko sallang, lanri nubunona tau tenaya salana: Appakkaramula ri nibunona Habel tenaya salana, sa'genna nubunona Zakharia ana'na Berekia lalang ri alla'na Balla'Na Batara siagang tampa' pakkoro'bangnganga. 36 Patappa'mi angkanaya: yangasenna anjo panggaukanga lanagappa ngasengi hukkunganna tau niaka ri anne jammanga!” 37 “O Yerusalem, O Yerusalem! Kau ambunoi na'bi-na'bia. Nusambilai batu sikamma tunisuroNa Allata'ala sa'genna mate. A'mole-moleMa' ero' anraka' ngasengko sanrapang anrong janganga ancokkoi ana'-ana'na irawangang ka'nyi'na. Mingka tena ngaseng nuero'! 38 Lanri kammana minjo Nataerokamo Allata'ala anrurungangko. 39 Asseng memammi angkanaya: Appakkaramula ri kamma-kammaya anne tenamo nalanucinikKa', sa'gengKu battu poleang sallang nanukanamo, ‘Nibarakkakimi Ia battua lalang arenNa Batara.’ ”
1 Ri wattunna a'lampamo Isa ambokoi Balla'Na Batara ri Yerusalem, battumi ana'-ana' gurunNa anjo'jokangi bangunang-bangunanna Balla'Na Batara. 2 Nakanamo Isa ri ke'nanga, “Nucini' ngasemmi anjo bangunanga? Assemmi angkanaya, manna se're batu talania' sallang ammantang assusung ri tampa'na, nasaba' lanirumbang ngasengi!” 3 Le'baki anjo, a'lampami Isa mange ri Bonto Zaitun. Na ammemponamo, battumi ana'-ana' gurunNa angngagangi a'bicara kale-kalenna. Nakanamo ke'nanga ri Ia, “Kipaumi ri kambe anne, singngapanna nalakajariang ngaseng anjo kammaya? Apa la'jari pammateina punna battu poleangKi' sallang ri allo kala'busang jammanga?” 4 Appialimi Isa Nakana, “Tutu laloko, sollanna tena nanitipuko. 5 Nasaba' lajai sallang tau battu ambalukangi arengKu nakana, ‘Inakke minne Karaeng Mappasalamaka!’ Jaimi tau lanatipu ke'nanga. 6 Lanulangngereki sallang sa'ra bunduka, kammayatompa kabara' pa'bundukanga. Mingka teako mallakki. Nasaba' anjo sikammaya lakajariang ngaseng memang tongi; mingka teaipi anjo wattua nabattu allo kiamaka. 7 Bansa se'rea la'bunduki siagang bansa maraenga, siagang se'rea pa'rasangang lanabakkai pa'rasangang maraenga. Ri kere-keremae lakajariangi bala kacipuranga siagang lata'ge'gosoki linoa. 8 Na yangasenna anjo nampami pakkaramulanna, sanrapang tu tianang appisa'ringia ri wattu ero'na lammana'. 9 Siagang lanijakkalakko nunipassareang nisessa nampa nibuno. Lanikabirisiko ri sikontu bonena linoa, lanri amminawangko ri Nakke. 10 Na anjo wattua jai tau lammono'boko; jai lanynyaleweng, siagang lasikabirisi massing para ia. 11 Jai na'bi patipu lantipui tau jaia. 12 Teai sipato' jaina kaja'dallang alla'bang ri kere-keremae, sa'genna jai sikalimi tau tenamo nangngasseng angngamaseang. 13 Mingka inai-nai attahang sa'genna kala'busang tallasa'na, iami lanipasalama'. 14 Na lanibirittakammo ri sikontu linoa Kabara' Bajika, ri passala' antekamma batena ammarenta Allata'ala, sollanna nalangngere' ngaseng taua. Le'baki anjo nampami battu allo kiamaka.” 15 “Lanuciniki sallang ammenteng ri tampa' matangkasaka, ‘Kaja'dallang langngancuruka’, sangkamma le'baka napau Na'bi Daniel. 16 Anjo wattua, tau niaka ri pa'rasangang Yudea parallui lari nai' ri buluka. 17 Tau niaka irate ri pattongko'na ballaka teami naungi angngalle apa-apa battu lalang ri balla'na. 18 Tau niaka ri kokoa teami ammoteri angngallei bajunna. 19 Anjo allo-alloa teai sipato' appakamalla'na mae ri bai'-baine tiananga siagang bai'-baine appasusua ana' lolo! 20 Appala' doangko sollanna tena laloja nawattu bosi yareka wattu allo Pammari-mariang, nuparallu lari! 21 Ri wattu battuna anjo allo-allo appakamallaka labattumi susa lompo dudua, tenayapa nale'ba' kajariang baku' nia'na linoa, siagang tenayamo nalakajariang pole ribokoanganna. 22 Na ka'de' tena Napa'jari sinampeki Allata'ala anjo wattu kasusaang lompo dudua, ma'nassa manna sitau tenamo lakkulle salama'. Mingka lanri Nau'ranginna umma'Na, Napa'jari sinampe'mi Allata'ala anjo wattu kasusaang lompo dudua. 23 Anjo wattua, punna nia' tau angkana ri kau, ‘Ciniki, niaki anrinni Karaeng Mappasalamaka!’ yareka nakana, ‘Niaki anjoreng!’ — teako tappakki ri anjo taua. 24 Nasaba' lania' sallang battu siapa are tumappasalama' patipu, siagang na'bi-na'bi patipu. Lanappicinikangi ke'nanga gau'-gau' teai sipatoka lompona siagang appakalanna'-lannasaka, sollanna akkulle, manna umma'Na Allata'ala lanatipu todong. 25 Jari, u'rangi memangi! Kupauang mako anne la'bi riolo ri tenanapa nakajariang. 26 Punna nakana taua ri kau, ‘Ciniki, niaki anjoreng ri parang lompoa!’ — teako mangei anjoreng. Yareka punna nakana ke'nanga, ‘Ciniki, niaki anrinni accokko lalang ri kamaraka!’ — teako tappakki. 27 Nasaba' kabattuanNa sallang Ana' Ma'rupataua sanrapangi caya kila' tassioroka battu raya sa'genna kalau'. 28 Kemae nia' maya', anjoreng tommi nia' jangang-jangang pakanre mayaka.” 29 “Tena nasallo ri le'ba'na anjo wattu kasusaanga, la'jari sassammi alloa, na tenamo naccaya singara' bulanga. Latu'guru' ngasemmi bintoenga battu ri langika. Na sikamma makoasaya lalang lino, la'jari sanna'mi ricuna. 30 Le'baki anjo lammumbami rate ri langika pammatei kabattuanNa Ana' Ma'rupataua. Na anjo wattua langngarru' ngasemmi sikontu bansa-bansa niaka lalang lino. Lanacini'mi ke'nanga battu Ana' Ma'rupataua ri tompo'na rammanga, lalang koasaNa siagang kala'birang malompoNa. 31 Nipasa'rami tarompe' lompoa. Na Nasuromo malaeka'-malaeka'Na Ana' Ma'rupataua ampa'rappungangi umma'Na battu ri sikontu linoa, battu raya sa'genna kalau', kammayatompa battu timboro' sa'genna wara'.” 32 “Angngalle mako pappilajarang battu ri poko' araya. Punna lu'mu'mo siagang moncongbulomo tangke-tangkenna, kammayatompa appakkaramulami accu'la', akkullemi nuasseng angkanaya la'birimmi battu bambang alloa. 33 Kamma tomminjo, punna nucini'mo kajariang anjo passala' le'baka Kupauangko, akkullemi nuasseng angkanaya la'biring dudumi battu Ana' Ma'rupataua. 34 Assengi! Angkanaya, tenapa namate ngaseng taua nakajariang anjo passalaka. 35 Lalanynyaki langika siagang linoa, mingka tuli lania'na kana-kanangKu satunggu-tungguna.” 36 “Tena tau angngassengi ringngapanna allonna siagang tette'na; manna malaekaka ri suruga tena todong; kammayatompa manna Ana'Na Allata'ala tena todong Naassengi. Passangalinna Manggea bawang angngassengi. 37 Punna sallang battu Ana' Ma'rupataua, lakammai lampa-lampana ri jammanna Na'bi Nuh. 38 Ri allo-allo tenanapa nabattu a'ba lompoa, angnganre-nganrei, angnginung-nginungi, siagang a'bunting-buntingi taua. Kammaminjo tuli nagaukanga taua, sa'genna antama' Na'bi Nuh ri biseang lompo napareka. 39 Ri wattunna battumo a'ba lompoa antujui ke'nanga nampami naasseng ke'nanga apa kajarianga. Kamma tomminjo lampa-lampana sallang punna battu Ana' Ma'rupataua. 40 Anjo wattua nia' tau rua sitabang anjama ri kokoa: sitau lanierang, na sitau laniboli'. 41 Rua baine sitabang a'dengka ase: sitau lanierang, na sitau laniboli'. 42 Jari a'jaga-jagako, nasaba' tena nuassengi ringngapanna nalabattu Bataranu. 43 U'rangi minne! Ka'de' naasseng patanna balla' angkanaya tette' siapa ri bangngia nalabattu palukkaka, tenaja nalattinro, sollanna tena nantama' palukkaka ri balla'na. 44 Jari parallu tongko sadi'-sadia. Nasaba' tena nuassengi wattunna nati'ring lania' battu Ana' Ma'rupataua.” 45 Nakanamo pole Isa, “Punna kamma, maka kereanga palayang tuli bajika siagang cara'deka? Iami niangka' ri karaenna a'jari kapala mae ri palayang-palayang maraenga, sollanna nasare ke'nanga kanre punna narapi' wattunna. 46 Teai sipato' upa'na anjo palayanga, punna ammotere' karaenna nanirapikang anggaukangi siagang baji' jama-jamanna. 47 Patappa'mi angkanaya lanapappirannuang ngasengi apa-apanna anjo karaenga mae ri anjo palayanga. 48 Mingka punna kodi sipa' anjo palayanga, lanakanamo lalang ri nyawana, 49 ‘Lasallo iji nampa ammotere' karaenga,’ naallemi naba'ji palayang-palayang maraenga. Nampa angnganre siagang angnginung-nginung siagang tu nangaia angnginung sa'genna nasa'ring. 50 Nati'ring ammotere' karaenna ri allo siagang ri tette' tenaya naassengi. 51 Niba'jimi anjo palayanga ri karaenna sa'ge patea-teana, nampa nipela' antama' ri pammantanganna tau munapeka. Lasessa sikalimi siagang langngarru'-arru'mi ke'nanga angkarruki sarenna.”
1 “Punna battu Ana' Ma'rupataua salaku Batara, lakammai anne pangngebaranna: Nia' sampulo tulolo paerang bunting, massing angngalle sulo, nampa a'lampa mange anruppai bunting bura'nea. 2 Nia' lima ri ke'nanga tolo, na lima maraengannaya cara'deki. 3 Anjo limaya tulolo toloa, angngerangi sulo mingka tangngerangai minynya' tana pappasadia. 4 Anjo tulolo cara'deka, angngerangi sulo nangngerang todong minynya' tana pappasadia. 5 Na talintaka battu anjo bunting bura'nea. Jari appakkaramulami ta'do'do' ngaseng anjo tuloloa, sa'genna attinro. 6 Ri lantannamo bangngia, nampami nia' sa'ra akkio' angkana, ‘Nia' minjo mae bunting bura'nea! Umba niruppai!’ 7 Ambangummi anjo sampuloa tulolo na massing naparinra sulona ke'nanga. 8 Nakanamo anjo tulolo toloa mae ri tulolo cara'deka, ‘Sare tongki' minynya' tananu sike'de', kaikatte lamatemi rinrana sulota.’ 9 Appialimi anjo tulolo cara'deka angkana, ‘Takkulleai! Nasaba' kala'busang ngasengki' sallang minynya'. A'lampamako ammalli ri ga'dea.’ 10 A'lampami anjo tulolo toloa mange ammalli minynya' tana ri ga'dea. Lalang a'lampana ke'nanga, battumi bunting bura'nea. Antama'mi anjo tulolo cara'deka anrurungangi anjo bunting bura'nea ri tampa' passua'-suarranga, nampa nitongko' pakke'buka! 11 Le'baki anjo nampami battu anjo tulolo maraenga. Akkiok-kio'mi ke'nanga angkana, ‘O Karaeng, o Karaeng, kisungke sai pakke'buka.’ 12 Mingka appialimi anjo bunting bura'nea nakana, ‘Tena ngaseng nakuassengko!’ ” 13 Le'baki anjo Natongko'mi Isa anjo pangngebaranga Nakana, “Lanri kammana, a'jaga-jaga mako, nasaba' tena nuassengi allonna siagang tette'na nabattu Ana' Ma'rupataua.” 14 “Punna battu Ana' Ma'rupataua salaku Batara, lakammai anne pangngebaranna: Nia' se're bura'ne ero' a'lampa ri se'reang pa'rasangang bella. Nakio'mi tallua palayanna, nampa napappirannuangang barang-baranna ri ke'nanga. 15 Massing nasaremi anjo palayanna situru' massing pakkullena. Anjo se'rea nasarei limassa'bu doe' ringgi' bulaeng. Maka ruaya nasarei ruassa'bu doe' ringgi' bulaeng. Na makatallua nasarei sisa'bu doe' ringgi' bulaeng. Le'baki anjo a'lampami. 16 Anjo palayang annarimaya limassa'bu doe' ringgi' bulaeng, a'lampa memammi a'danggang; nanggappamo passawallang limassa'bu doe' ringgi' bulaeng. 17 Kamma tomminjo nagaukanga palayang annarimaya ruassa'bu doe' ringgi' bulaeng; nanggappamo passawallang ruassa'bu doe' ringgi' bulaeng. 18 Mingka anjo palayang annarimaya sisa'bu doe' ringgi' bulaeng, a'lampami angngeke kali'bong nampa nacokko doe'na karaenna anjoreng. 19 Sallo sikali le'ba'namo anjo, ammotere'mi anjo karaenga. Nappakkaramulamo assirekengang siagang ke'nanga. 20 Battumi anjo palayang annarimaya limassa'bu doe' ringgi' bulaeng, nampa nasare anjo karaenga anjo doeka sampuloa sa'bu. Na nakana ri karaenga, ‘O, karaeng, limassa'bu doe' ringgi' bulaeng le'ba' kisareanga'. Kicini' minne, nia' kugappa limassa'bu passawallang.’ 21 Nakanamo anjo karaenga, ‘Baji' sikalimi! Ikau palayang bajikko siagang tutuko. Lanri akkulleko nipatappa' ri apa-apa sike'deka, lakupirannuangiko pole apa-apa jaianganga. Antama' mako nakisiagang assannang-sannang!’ 22 Nampa battu tommi anjo palayang annarimaya ruassa'bu doe' ringgi' bulaeng. Nakana ri karaenga, ‘O karaeng, ruassa'bu doe' ringgi' bulaeng le'ba' kisareanga'. Kicini' minne, nia' kugappa ruassa'bu passawallang.’ 23 Nakanamo anjo karaenga, ‘Baji' sikalimi! Ikau palayang bajikko siagang tutuko. Lanri akkulleko nipatappa' ri apa-apa sike'deka, lakupirannuangiko pole apa-apa jaianganga. Antama' mako kisiagang assannang-sannang!’ 24 Battu tommi anjo palayang annarimaya sisa'bu doe' ringgi' bulaeng. Nakanamo ri karaenga, ‘O karaeng, kuassengki' angkanaya ikatte tau sekkekki'. Angngalleki' rappo-rappoang battu ri poko'-poko' takilamunga; siagang angngalleki' wassele' ri tampa' tenaya naikatte allamungi bine. 25 Jari lanri mallakku, a'lampama' ancokkoi doetta rawa ri buttaya. Annemi doetta karaeng.’ 26 Nakanamo anjo karaenga, ‘Ikau palayang ja'dalakko siagang malasakko. Sai nuassemmi angkanaya angngallea' rappo-rappoang battu ri poko'-poko' takulamunga; siagang angngallea' wassele' ri tampa' tenaya kulamungi bine? 27 Punna kamma, siratanna nuboliki doekku ri kantoro' banga, sollanna punna niakka' ammotere' akkullei kualle ammotere' doekku siagang bungana. 28 Lanri kammana, allei ammotere' anjo doeka battu ri ia nampa nusareang anjo tau niaka sampulo sa'bu doe' ringgi' bulaenna. 29 Nasaba' tau niakamo ri ia, lanitambaiangi pole la'bi jai, sollanna la'jari kala'biang. Mingka tau tenayapa ri ia, lanialleangi pole apa-apa niaka sike'de' ri ia. 30 Na anjo palayang tenaya matu-matunna pelaki assulukang ri tampa' sassanga. Anjoremmi langngarru' siagang lasessa!’ ” 31 “Punna battu sallang Ana' Ma'rupataua a'jari Karaeng siagang nirurungang ri sikontu malaeka'Na, lammempomi irate ri empoang kala'biranNa. 32 Sikontu bansaya lanipa'rappungang ngasemmi ri dallekanNa. Nampa laNasa'la' anjo rupataua a'jari ruang pammantangang, rapang pakalawaki ansa'laki gimbalaka siagang bembea. 33 Sikamma tau le'baka anggaukangi ero'Na Allata'ala laNapa'rappungangi ri sa'ri kananNa, na maraenganga ri sa'ri kairinNa. 34 Nampa laNakana anjo Karaenga mae ri anjo tau niaka ri sa'ri kananNa, ‘Mae ngaseng mako kau tu nibarakkakia ri ManggeKu. Antama' mako ri Tampa' le'baka nipasadiang memangko ri uru nia'na linoa. 35 Nasaba' ri wattungKu cipuru' nusareA' kanre, ri wattungKu turere nusareA' je'ne inung. Ri wattungKu a'jari tau battu-battu nualleA' nupariballa'. 36 Tena care-carengKu nusareA' care-care. GarringA' nuparakaiA'. NitarungkuA' nanutulungA'.’ 37 Nakana ngasemmo anjo taua, ‘O, Batara, ringngapanna nakucinikKi' cipuru' nakusareKi' kanre, yareka turereKi' nakusareKi' je'ne' inung? 38 Ringngapanna nakucinikKi' a'jari tau battu-battu nakupariballakKi'? Ringngapanna natena Kiccare-care nakusareKi' care-care? 39 Ringngapanna kucinikKi' garring yareka nitarungku nakutulungKi'?’ 40 Lappiali Karaenga Nakana, ‘Asseng laloi anne: ri wattu nugaukanna sikammaya anjo mae ri kalase'renna sari'battangKu kaminang tunaya, ilalang kammana minjo nanugaukammo ri Nakke!’ 41 Nampa Nakana anjo Karaenga mae ri tau niaka ri sa'ri kairinNa, ‘Bellako anrinni, ikau ngaseng tau ja'dalaka! Antama' mako ri pepe' a'rinraya satunggu-tungguna, le'baka napasadiangko Billisika siagang sikamma malaeka'na! 42 Nasaba' ri wattungKu cipuru' tanusareA' kanre; ri wattungKu turere tanusareA' je'ne' inung. 43 Ri wattungKu a'jari tu battu-battu taerokako ampariballakKa'. Tena Kuccare-care, natanusareA' care-care. GarringA' siagang nitarungkuA', natena nuparakaiA'.’ 44 Appialimi ke'nanga ri Ia angkana, ‘O, Batara, ringngapanna nakucinikKi' cipuru', yareka turere, yareka nitarungku, yareka a'jari tu battu-battu, yareka taccare-carea, yareka garring, natakutulungaKi'?’ 45 Lappialimi anjo Karaenga Nakana, ‘Asseng laloi anne: ri wattunnu taeroka antulungi kalase'renna anne tau kaminang tunaya, lalang kammana minjo nutaeroka antulungA'.’ 46 Jari lanihukkung ngaseng minjo taua sa'genna satunggu-tungguna. Mingka tau anggaukangai ero'Na Allata'ala, lanakasia'mi katallassang sitojennaya siagang mannannunganga.”
1 Le'ba'na Napangngajarrang ngaseng Isa anjo sikammaya, Nakanamo ri ana'-ana' gurunNa, 2 “Nuassemmi angkanaya ruangallo mami naallo Lompo Paska, nalaniallemi nipassareang Ana' Ma'rupataua nampa nisalli'!” 3 Anjo wattua a'rappungammi imang-imang kapalaya siagang sikamma pinggawana tu Yahudia ri balla' lompona Imang Malompona Kayafas. 4 A'bicarami siagang a'boyami akkala' ke'nanga, antekamma nakkulle najakkala' cokko-cokko Isa, nampa nabuno. 5 Mingka nia'mo ri ke'nanga angkana, “Mingka teako jakkali ri allonna passua'-suarranga, sollanna tena nasiricui tau jaia.” 6 Ri wattunna nia' Isa ri Betania, ri balla'na Simon le'baka garring sala, 7 nia'mo sitau baine battu mae ri Ia angngerang sibotolo' minynya'-minynya' bau', sannaka ka'jala'na ballinna. Natumpami anjo minynya'-minynya' bauka ri ulunNa Isa, ri sitabanna angnganre Isa. 8 Larromi ana'-ana' gurunNa Isa nacini'na appakamma anjo bainea. Nakanamo ke'nanga, “Apa matu-matunna napa'laboang kamma anjo minynya'-minynyaka? 9 Akkullei nibalukang ka'jala' anjo minynya'-minynyaka nampa nipassareang ballinna mae ri tau kasi-asia!” 10 Nalangngere'na Isa anjo bicaranna ke'nanga, Nakanamo, “Angngapa nanususai kamma anne bainea? Anu baji' siagang anu annaba anne nagaukanga ri Nakke. 11 Ia tau kasi-asia tuli lania'na ri ampi'nu, mingka iNakke tena Kutuli lania' ri ampi'nu. 12 Punna paleng natiriki minynya'-minynya' bau' KalengKu, naparuruiMa' lamange ri jerakKu. 13 Patappa'mi angkanaya, kere-keremae nipa'la'bang Kabara' Baji' battua ri Allata'ala ri sikontu linoa, anjoremmi lanibicara todong anne nagaukanga bainea, a'jari pammatei siagang pangngu'rangi ri ia.” 14 Nia'mo kalase'renna anjo sampuloa anrua ana' gurunNa Isa, iamintu Yudas Iskariot, a'lampa mae ri imang-imang kapalaya. 15 Nakanamo ri ke'nanga, “Apa lanusareanga' punna kupassareang Isa ri kau?” Nisaremi ri ke'nanga tallumpulo doe' pera'. 16 Pakkaramulami anjo wattua a'boyami wattu baji' Yudas antekamma nakkulle napassareang Isa. 17 Ri allo pakkaramulanna allo Passua'-suarrang Roti Tenaya Nammake Pa'gambang, battumi ana'-ana' gurunNa Isa mae ri Ia. Nakanamo ke'nanga, “Kemae erotTa lanipasadia pangnganreang Paskaya?” 18 Appialimi Isa Nakana, “A'lampamako antama' ri kotaya, numange ri se'reang tau anjoreng, angkana, ‘Nakana Gurua: La'birimmi narapi' wattungKu; eroKa' angnganre Paska siagang ana'-ana' gurungKu ri balla'nu.’ ” 19 Nagaukammi ana'-ana' gurunNa Isa anjo Napassuroanga. A'lampami ke'nanga ampasadiai anjo kanre Paskaya. 20 Wattunna bangngimo, ammempomi Isa siagang anjo sampuloa anrua ana' gurunNa. 21 Lalang angnganrena ke'nanga, Nakanamo Isa, “Pilangngeri sai: nia' sallang kalase'rennu ambalukangA'.” 22 Nalangngere'na anjo, sanna' ngasemmi si'nana pa'mai'na ana'-ana' gurunNa. A'le'ba'-le'basa'mi akkuta'nang ri Isa angkana, “Tantu teaiji nakke nataba kananTa?” 23 Appialimi Isa Nakana, “Ia Kuaganga appada appanaung roti ri mangkoka, iaminjo eroka ambalukangA'. 24 Mingka lamate memang tonji Ana' Ma'rupataua, kamma le'ba' tattulisika lalang ri Kittaka. Mingka cilakami anjo tau eroka ambalukangi Ana' Ma'rupataua! Bajikangngangi punna sikali tena nale'ba' nilassukang anjo tau kammaya.” 25 Nakanamo Yudas lapung tau la'baluka, “O, Guru, tantu teaiji nakke nataba kananTa?” Nakanamo Isa, “Kamma mintu kanannu!” 26 Ri wattu angnganre bangngina Isa, angngallemi roti nampa appala' sukkuru'. Nampa Napue-pue anjo rotia. Le'baki anjo Natawa-tawaimi ana'-ana' gurunNa, Nakana, “Allei, kanremi, iaminne tubuKu.” 27 Le'baki anjo angngallemi pangnginungang anggoro' nampa appala' sukkuru' ri Allata'ala. Nampa Napassareang mae ri ana'-ana' gurunNa, na Nakana, “Angnginung ngaseng mako battu ri anne pangnginunganga. 28 Nasaba' iaminne cerakKu, ampakajarrekai janjinNa Allata'ala — cera' nipasolonga, sollanna akkulle nipammopporang sikontu dosana tau jaia. 29 Patappaki: Pakkaramula anne wattua, tenamo Kulangnginung anggoro' sa'genna narapi' wattunna Kuinung anggoro' berua siagang ikau ngaseng lalang ri Lino BeruNa ManggeKu.” 30 Le'baki anjo, akkelong-kelommi ke'nanga se're kelongang pammuji ri Allata'ala. Nampa a'lampa ke'nanga mange ri Bonto Zaitun. 31 Nampa Nakana Isa ri ana'-ana' gurunNa, “Anne bangngia lalari ngasengko ambokoiA' Kale-kalengKu; nasaba' nia' tattulisi' lalang ri Kittaka angkanaya: Nakana Allata'ala, ‘LaKubunoi anjo pakalawakia, nalari ngaseng tassia'-siara' gimbala'na.’ 32 Mingka punna attallasa' poleangA', la'lampa rioloA' mange antayangko ri Galilea.” 33 Nakanamo Petrus ri Isa, “Manna a'lampa ngaseng maraenganga ampilariKi', mingka inakke tena sikali kuero' ampilariKi'!” 34 Nakanamo Isa ri ia, “U'rangi Petrus! Ia memang jinne bangngia, ri tenanapa nattingkoko janganga napintallumMa' nusassali.” 35 Appialimi Petrus nakana, “Manna pole lasikamateangki', mingka tena sikali nakuero' ansassaliKi'!” Kammayatompa ana'-ana' gurunNa maraenga akkana kamma ngaseng tommi. 36 Le'baki anjo a'lampami Isa siagang ana'-ana' gurunNa mange ri se'reang tampa' nikana Getsemani. Nakanamo ri ana'-ana' gurunNa, “Ammempo mako anrinni antayangA', erokKa' a'lampa anjoreng appala' doang.” 37 Naerang tommi Petrus siagang ruaya ana'na Zebedeus. Paccemi siagang si'na sikalimi Nasa'ring pa'mai'Na. 38 Nakanamo ri ana'-ana' gurunNa, “Sanna' si'nana Kusa'ring pa'maikKu, kamma Kusa'ring tau lamatea. Ammantang mako anrinni anrurungangA' a'jaga-jaga.” 39 A'lampa bella-bellami Isa sike'de' mange ri dallekang, nampa su'ju' naung ri buttaya appala' doang angkana, “O, ManggeKu, ka'de' nia' kulleanna, pabellami anne passessaya ri Nakke. Mingka teaKi' naerokKu anjari, passangalinna erotTamo anjari.” 40 Le'baki anjo, ammotere'mi mae ri ana'-ana' gurunNa tallua. Mingka narapikangi attinro ke'nanga. Nakanamo ri Petrus, “Maka takkulleako angngagangA' a'jaga manna sinampe'ja? 41 A'jaga-jaga mako siagang appala' doang mako, sollanna tena nanukasiaki paccobaya. Ero' memanji nyawaya anggaukangi tojenga, mingka tamakkulleai tubua lanri lammana.” 42 A'lampami pole Isa appala' doang maka pinruanna angkana, “O, ManggeKu, punna paleng takkulleami nipakabella anne passessaya ri Nakke, natakkullea taKupisa'ringi, boli'mi kamma Kipa'jari erotTa.” 43 Le'baki anjo ammotere'mi pole, nanarapikang pole ana'-ana' gurunNa attinro, lanri ta'do'do' duduna ke'nanga. 44 Sikalipi pole a'lampa ambokoi ke'nanga, mange appala' doang maka pintallunna, kamma sumpaeng. 45 Nampa ammotere' pole ri ana'-ana' gurunNa, na Nakana, “Attinro ngasengijako siagang ammari-mari ngasengijako? Ciniki, narapi'mi wattunna lanialle Ana' Ma'rupataua, nampa nipassareang mae ri sikamma tau ja'dalaka. 46 Ambangung mako nai', umba naki'lampa! Nia'mi battu tau le'baka ambalukangA'.” 47 Lalang a'bicara kammana Isa, nia'mi battu Yudas, kalase'renna anjo ana' gurunNa sampuloa anrua. Nia'mo tau jai anrurungangi, massing angngerang pa'dang siagang palu-palu. Yangaseng minjo tau nasuroa kapa'-kapalana imanga siagang pingga'-pinggawana tu Yahudia. 48 Le'ba'mi nipato ri Yudas angkanaya, “Kereanga tau kubau sinampe', iaminjo taunna, allemi jakkala'!” 49 Battuna mange anjoreng ke'nanga, mange memammi Yudas ri Isa na nakana, “Salama', Guru!” Nampa nabau Isa. 50 Appialimi Isa Nakana, “Apa parallunu battu sari'battang?” Maju ngasemmi anjo tau jaia anjakkalaki Isa, nampa nasikko'. 51 Ti'ring nia'mo sitau ana' gurunNa niaka anrurungangi, ambi'buki kalewanna, nampa nate'ba' kalase'renna anjo tunisurona imang lompoa, sa'genna kaccili' leko' tolinna. 52 Mingka angkanami Isa ri ia, “Poterangi antama' ri banoanna antu kalewanga; nasaba' inai-nai akkarena kalewang, iami lanipanraki ri kalewang. 53 Maka tenapa nuassengi angkanaya punna erokKa', akkullei Kupala' ri ManggeKu sollanna Nasuro battu silalonna memang surudadu malaeka'Na, sampulo anrua sa'bu battu angngalleiA'? 54 Mingka punna kamma anjo, antekammami la'rupa apa le'baka napau Kittaka, angkanaya tena takajarianna anjo ri kamma-kammaya anne?” 55 Nampa Nakanamo Isa ri anjo tau jaia, “Apaka nucini' ja'dalakKa' numassing angngerang kamma pa'dang siagang palu-palu battu anjakkalakKa'? Allo-alloKu angngajara' lalang ri Balla'Na Allata'ala natena nujakkalakKa'! 56 Mingka lakajariang ngaseng memanji anne kammaya, sollanna a'rupamo apa le'baka natulisi' na'bi-na'bia lalang ri Kittaka.” Le'baki anjo, apaji nalari ngasemmo ana'-ana' gurunNa Isa, a'lampa ambokoi. 57 Le'baki najakkala' Isa, a'lampami ke'nanga angngerangi Isa mange ri balla'na Kayafas, Imang Lompoa. A'rappungang ngasemmi anjoreng sikamma guru-guru agamaya siagang sikamma pinggawana tu Yahudia. 58 Battu bellami Petrus ampinawang bokoi Isa, sa'genna paranglakkenna Imang Lompoa. Antama'mi ammempo ri alla'na pajagaya, ero' naasseng angkanaya antekamma kale'bakkanna lakajarianga ri Isa. 59 Sikamma imang-imang kapalaya kammayatompa sikamma haking Pangadelang Agamaya, massing a'boyami sa'bi a'balle-balle, sollanna akkulle nihukkung mate Isa. 60 Mingka takkulleai ke'nanga appa'nia' butti, manna pole najaimo battu sa'bi a'balle-balle ero' ambattali. Kala'busanna nia'mo rua tau battu andallekang angkana, 61 “Anne taua le'baki angkana, ‘Akkullei Kurumbang anne Balla'Na Allata'ala, nampa Kupabangung poleang ri makatalluna alloa.’ ” 62 Ammentemmi imang lompoa na nakana ri Isa, “Apaka tena Nuero' ampiali bicaranna anne sa'bi-sa'bia?” 63 Mingka tena Nakkana-kana Isa. Nakanamo pole imang lompoa ri Ia, “Nasaba' Allata'ala mattallasaka, paumi ri kambe, maka Ikau tojeng mintu Karaeng Mappasalamaka, Ana'naya Allata'ala?” 64 Appialimi Isa Nakana, “Annaba mintu kanannu. Mingka patappa'mi angkanaya: Anne kamma appakkaramulami lanucini' Ana' Ma'rupataua ammempo ri sa'ri kananNa Allata'ala Kaminang Koasaya. Siagang lanucini' tommi sallang battu poleang irate ri langika ri tompo'na rammanga!” 65 Nalangngere'na imang lompoa akkana kamma Isa, naallemi nasinre' jubana na nakana, “Nahinai Allata'ala! Tenamo naparallu pole sa'bia. Massing nilangngere'mi bicaranNa anghinai Allata'ala. 66 Jari antekamma panggappanu ngaseng?” Appialimi ke'nanga angkana, “A'nassami kasalanna. Jari siratangi nihukkung mate.” 67 Massing battumi ke'nanga ampi'rui rupanNa Isa, nampa nasessa naba'ji. Nia' tommo antempaka'rangi, 68 na nakana, “O, Karaeng Mappasalamaka, tappu sai bedeng siagang pau sai bedeng, inai antempaka'rangKo?” 69 Anjo wattua sitabang niaki Petrus ammempo pantarang ri paranglakkenga. Nia'mo kalase'renna baine palayang battu angkana ri Petrus, “Sai siagang tongko anjo Isa tu battua ri Galilea?” 70 Mingka assassala'mi Petrus ri dallekanna ngaseng ke'nanga, nakana, “Tena kupahangi antu apa nupakkuta'nanganga.” 71 Le'baki appiali kamma, a'lampami mange ri pakke'bu' parang lakkenga. Nia'mo pole baine palayang maraeng anciniki; na nakana ri tau niaka ngaseng anjoreng, “Anne taua assiagang tongi sumpaeng Isa, anjo tu battua ri Nazaret.” 72 Assassala'mi siagang assumpami Petrus nakana, “Tojenga', tena nakuassengi anjo taua!” 73 Tena nasallo le'ba'na anjo, battumi ri dallekanna Petrus tau niaka ammenteng anjoreng, na nakana ke'nanga, “Ma'nassa kalase'rennako battu ri ke'nanga. A'nassa sikali nilangngere' ri batenu a'bicara.” 74 Assumpa-sumpa tojemmi Petrus nakana, “Matea' naung, tena tojeng nakuassengi anjo taua!” Anjo wattua attingkokomi janganga. 75 Nau'rangimi Petrus le'baka Napau Isa ri ia angkanaya, “Ri tenanapa nattingkoko janganga na pintallumMa' nusassali.” Assulukammi Petrus angngarru', si'na pa'mai'na.
1 Ri bari'basa' dudua, natappukimi sikontu kapala imanga kammayatompa pamimping-pamimpinna tu Yahudia, angkanaya lanabunoi Isa. 2 Nasikko'bokomi Isa, nampa naerang ke'nanga mange napassareang ri Pilatus, wakkele'na pamarenta Roma. 3 Nacini'na Yudas, le'baka ambalukangi Isa, angkanaya nihukkummi Isa, nasassala'mi kalenna. Naerammi mange napoterang anjo doeka tallumpuloa doe' pera' ri imang-imang kapalaya siagang pamimping-pamimpinna tu Yahudia. 4 Nakanamo ri ke'nanga, “Dorakama' kubalukangi tau tenaya salanna, sa'genna nihukkung mate!” Appialimi ke'nanga angkana, “Ikatte tena naparallu kijampangi; anjo urusannu kau!” 5 Napasambilami Yudas anjo doeka antama' ri Balla'Na Batara, nampa a'lampa anggentungi kalenna. 6 Mangemi imang-imang kapalaya anrappungi anjo doeka. Na nakana ke'nanga, “Anne doeka, doe' cera'. Situru' atoranga ri agamaya, anne doe' kammaya takkulleai nipantama' ri pammoneang passidakkanga lalang ri Balla'Na Batara.” 7 Assamaturu'mi ke'nanga ampaballi anjo doeka se're tampa' niarenga Tampa' Papare' Uring. Anjo tampaka nipare'mi pa'jerakkanna tau battu pantarang pa'rasanganga. 8 Iaminjo saba'na na sa'genna kamma-kamma anne niarengi anjo tampaka, “Tampa' Cera'”. 9 Lanri kammana, a'rupami apa le'baka napau Na'bi Yeremia, angkanaya, “Natarimai ke'nanga tallumpulo doe' pera', iamintu pa'bayara' ballinna KalenNa, napassamaturukianga bansa Israel. 10 Na anjo doeka napakei ke'nanga ammalli Tampa' Papare' uring, situru' le'baka Napassuroang Batara ri nakke.” 11 Ri wattunna andallekang Isa ri Pilatus, guburnurna anjo pa'rasanganga, akkuta'nammi Pilatus nakana, “Maka karaennaKo tu Yahudia?” Appialimi Isa Nakana, “Kammaminjo nukanaya.” 12 Mingka ri wattunna jai sikali nituduangi ri imang-imang kapalaya siagang pamimping-pamimpinna tu Yahudia, tena sikali Naero' akkana Isa. 13 Jari nakanamo Pilatus ri Ia, “Tanulangngerai anjo apa natuduangKo ke'nanga?” 14 Mingka manna sikali tena todong Naero' appiali Isa, sa'genna lannasa' sikalimi Pilatus. 15 Punna narapi' allo lompo Passua'-suarrang Paska, biasana nia' sitau tu nitarungku nilappassang ri pamarentaya, situru' napilea tau jaia. 16 Anjo wattua nia' se're tu nihukkung, a'la'banga niasseng kaja'dallanna ri tau jaia. Arenna iamintu Isa Barabas. 17 Jari wattunna a'rappungammo tau jaia, akkuta'nammi Pilatus ri ke'nanga nakana, “Kereanga nupala' lakulappassang? Isa Barabas yareka Isa nigallaraka Almasi?” 18 Nakkana kamma anjo Pilatus, kasaba' naassengi angkanaya na napassareang ke'nanga Isa, lanri assereati ke'nanga ri Isa. 19 Ri wattunna ammempo Pilatus anjoreng ri kantoro' pangadelanga nia'mi battu pappasanna bainenna angkana, “Tea' laloko pantama'-tamakki kara-karana antu tau tenaya salana. Nasaba' lanri Iami nakunggappa so'na appakamalla'-malla' dudua, anne alloa.” 20 Mingka imang-imang kapalaya siagang pamimping-pamimpinna tu Yahudia, tuli naajara' salai tau jaia sollanna napala' ri Pilatus, na Barabas nilappassang, nampa Isa nihukkung mate. 21 Akkuta'nammi pole Pilatus ri ke'nanga nakana, “Kereanga anne tau ruaya nupala' kulappassang?” Appialimi ke'nanga angkana, “Barabas!” 22 Akkuta'nammi Pilatus ri ke'nanga nakana, “Jari apa lakugaukangi ri anne Isa, nigallaraka Almasi?” Appialimi ke'nanga angkana, “Allei Salli'!” 23 Akkuta'nammi Pilatus nakana, “Mingka apa kaja'dallanNa?” Pila' akkio' lompomi pole ke'nanga angkana, “Allei Salli'!” 24 Kala'busanna naassemmi Pilatus angkanaya tena memang tommo maraeng akkulle nagaukang. Siagang akkullei a'jallo' anjo tau jaia punna tena niturukiangi ero'na. Jari angngallemi je'ne', nampa nabissai limanna ri dallekanna anjo tau jaia. Na nakana, “Inakke tena nakutanggongi kamateanNa anne taua! Anne urusannu ngaseng kau!” 25 Appiali ngasemmi anjo tau jaia angkana, “Boli'mi kamma, ikambepa siagang ana'-ana'na ikambe antanggongi hukkunganga lanri kamateanNa!” 26 Nalappassammi Pilatus anjo Barabas. Nampa nasuro taua ancamboki Isa; nampa napassareang nierang mange nisalli'. 27 Le'baki anjo nierammi Isa ri surudaduna Pilatus antama' ri balla' lompona guburnurka. A'rappungang ngasemmi surudadua amparitangngai Isa. 28 Napusumi ke'nanga pakeanNa Isa, nampa napipakei juba cura' lame butung. 29 Appare'mi ke'nanga passikko' ulu akkatintinga, nampa napasongko' ri ulunNa Isa. Nampa napita'galliang takkang bulo ri lima kananNa. Le'baki anjo akkulantu'mi ke'nanga ri dallekanNa Isa. Nacau-caumi Isa nakana, “Iye', Karaeng tu Yahudi!” 30 Napi'ruimi rupanNa Isa, nampa naalle anjo takkanga, na napalu-palui ulunNa. 31 Le'baki nakarek-karenai, napasulu'mi ammotere' ke'nanga anjo juba cura' lame butunga. Nampa napipakei ammotere' pakeang KalenNa Isa. Le'baki anjo nierammi assulu' nampa mange nisalli'. 32 Ri tangngana aganga, sibuntulu'mi ke'nanga siagang sitau tu battu ri Kirene, niarenga Simon. Napassami ke'nanga anjo taua ampisangi kayu salli'na Isa. 33 Anrapi'mi ke'nanga mange ri se'reang tampa' niarenga Golgota, battuanna “Tampa' Tangkora'”. 34 Battuna anjoreng nasaremi angnginung anggoro' Isa, nicampuruka campurang sannaka pai'na. Mingka Naassenna kasia'na teami Isa angnginungi anjo anggoroka. 35 Nampa nasalli' ke'nanga Isa. Na nabotorimi pakeanNa ero' nabage massing tawana. 36 Le'baki anjo ammempomi ke'nanga anjagai Isa. 37 Ri tompo' ulunNa Isa, nia' natannang ke'nanga tulisang angkanaya, “Iaminne Isa, Karaenna tu Yahudia”. Iaminjo tattulisika nituduangi Isa. 38 Nia' todong rua tau paella' naagang Isa nisalli'; se're ri sa'ri kananNa, se're ri sa'ri kairinNa. 39 Sikamma tau niaka numalo, massing napammenggong ulunna, nahina-hinaimi Isa. 40 Nakana ke'nanga, “Ikaumi eroka anrumbangi Balla'Na Allata'ala, na nupabangung poleang ri makatalluna alloa! Punna Ana'naKo Allata'ala, naung maKo mae battu ri antu sallika, na Nupasalama' KalenNu!” 41 Kamma tomminjo nagaukang imang-imang kapalaya siagang guru-guru agamaya, kammayatompa pamimping-pamimpinna tu Yahudia. Nacau-cau tommi Isa angkana, 42 “Napasalamaki tau maraenga, na KalenNa taNakulle Napasalama'! Punna Karaennai bansa Israel, lappassammi naung battu ri sallika kamma-kamma anne, na kinampa tappa' ri Ia. 43 Na patappaki Allata'ala, siagang Nakanai KalenNa Ana'Na Allata'ala. Jari umbamo niciniki kamma-kamma anne, maka ero' tojenji Allata'ala ampasalamaki.” 44 Anjo paella' Naaganga nisalli', amminawang turu' tommi anghina-hinai Isa. 45 Ri tangngana alloa, kira-kira tallung tette', a'jari sassammi sikontu pa'rasanganga. 46 Tette' tallu ri karuenga, ammarrang lompomi Isa Nakana, “Eli, Eli, lama sabakhtani?” battuanna, “O, Allata'alaKu, O, Allata'alaKu, angngapa naKibokoiA'?” 47 Nalangngere'na tau niaka anjoreng akkio' kamma Isa, angkanami ke'nanga, “Nakioki Na'bi Elia!” 48 Nia'mo kalase'renna ke'nanga akkaro-karo mange angngalle bunga batu karang, nampa napantama' ri anggoro' kaccia; nampa napasappi' ri cappa' kayu la'bua, na napanai' napa'reppese' mae ri bawaNa Isa. 49 Mingka nia'mo maraenganga angkana, “Tayangi rolong sinampe'. Umba na niciniki, maka battu tojenji Na'bi Elia ampasalamaKi?” 50 Ammarrang lompomi pole Isa, nampa tappu' nyawaNa. 51 Anjo wattua sinre'mi gordenga lalang ri Balla'Na Batara, ta'bage rua battu rate sa'genna naung. Ta'ge'goso'mi buttaya, siagang ta'bage ruami bulu' batua. 52 Tassungkemi kuburuka, siagang jaimi tau mate umma'Na Allata'ala nipattallasa' poleang. 53 Assulu'mi ke'nanga battu ri jeraka ri wattunna attallasa' poleang Isa battu ri kamateanga, nampa antama' ke'nanga ri Yerusalem. Na jai tau anciniki ke'nanga anjoreng. 54 Malla'mi komandanna surudadua siagang sikamma surudadu niaka anjagai Isa, ri wattunna nacini' ta'ge'goso' buttaya siagang yangasenna anjo kajarianga. Nakanamo ke'nanga, “Ma'nassa Ana'Na tojeng Allata'ala anne Taua!” 55 Jai todong tu baine anjoreng, ancini' battu bellai anjo kajarianga. Ia ngaseng minjo ke'nanga le'baka amminawang siagang ambantui Isa appakkaramula battu ri Galilea. 56 Nia' tommi anjoreng Maria Magdalena, Maria amma'na Yakobus siagang Yusuf, kammayatompa anrong ana'-ana'na Zebedeus. 57 Anjo bangngia nia'mo se're tau kalumanynyang battu ri Arimatea niarenga Yusuf, ana' gurunNa todong Isa. 58 A'lampai andallekang ri Pilatus, na napala' maya'na Isa. Na parentakammi Pilatus sollanna nisareang anjo maya'Na Isa. 59 Naallemi Yusuf anjo mayaka nampa naroko' kaeng lenang beru. 60 Nampa naerang anjo maya'Na Isa mange natarawang ri jera' napareka kalenna. Anjo jeraka lalangi ri bulu' batua nipare'. Le'baki napantama' maya'Na Isa, nagulungimi batu lompo nampa natongko' pakke'bu'na anjo jeraka, nampa a'lampa. 61 Mingka Maria Magdalena siagang Maria se'rea, ammantangiji ammempo andallekangi anjo jeraka. 62 Ammukona, ri allo Pammari-marianga, a'lampami imang-imang kapalaya siagang tu Farisia mange andallekang ri Pilatus. 63 Na angkana ke'nanga, “Nau'rangi ikambe angkanaya ri wattu attallasa'na anjo patipua le'baki angkana, ‘Ri makatalluna alloa lattallasa' poleangA'.’ 64 Jari suro jagai baji'-baji' anjo jeraka sa'genna tallungalloa, sollanna tena nabattu ana'-ana' gurunNa allukkaki maya'Na, nampa nakabarrang angkana attallasa' poleammi battu ri kamateanga. Na anne pannipuang ri boko dudua lakodiangangi na pannipuang rioloa.” 65 Nakanamo Pilatus ri ke'nanga, “Nia' surudadu pangawala'nu. A'lampamako suro jagai baji'-baji'anjo jeraka.” 66 A'lampami ke'nanga mange ri jeraka. Najarrekimi ke'nanga anjo batu pannongko'na jeraka. Nampa nasuro surudadua a'jaga ri dallekanna anjo jeraka, sollanna tena tau angkaccaki.
1 Allalonamo allo Pammari-marianga, iamintu ri allonna Minggua, ri bari'basa' dudua, a'lampami Maria Magdalena siagang Maria maraenganga, mange assiara ri jera'Na Isa. 2 Ti'ring ta'ge'goso' sanna'mi buttaya. Nampa nia'mo malaeka'Na Batara manaung battu ri suruga mange anggulungi assulu' anjo batu antongkokiai jera'Na Isa, nampa nai' ammempo ri tompo'na anjo batua. 3 Accayai rupanna nicini' anjo malaekaka kamma kila', na pakeanna sanna' sikali kebo'na. 4 Annekkere'mi anjo sikamma surudadu a'jagaya napakamma malla', sa'genna pi'lasa' ngaseng tanja'na kamma tau matea. 5 Nakanamo anjo malaekaka ri anjo bai'-bainea, “Teako mallakki! Kuassengi angkanaya Isa, le'baka nisalli', battu nuboya. 6 Mingka tenami anrinni. Nasaba' attallasa' poleammi situru' kananNa pirangalloang. Mae mako na nucini' le'ba' pammantanganNa. 7 A'lampamako linta' mange ampauangi ana'-ana' gurunNa angkanaya, ‘Atallasa' poleammi battu ri kamateanNa, na kamma-kamma anne a'lampa riolomi mange ri Galilea. Anjoremmi sallang lanucini'!’ U'rangi laloi anne kupabattua.” 8 Akkaro-karomi anjo bai'-bainea a'lampa ambokoi anjo jeraka. Sanna' malla'na ke'nanga, mingka sanna' todong rannuna ngaseng nyawana. Larimi ke'nanga mange ampabattui ri ana'-ana' gurunNa Isa. 9 Ti'ring nia'mi Isa ampappicinikangi KalenNa ri anjo bai'-bainea, siagang angkanami, “Salama'!” A'reppese'mi ke'nanga mange ero' anrakaki bangkenNa siagang ansombai Isa. 10 Nakanamo Isa ri ke'nanga, “Teako mallakki, a'lampamako mae ri sikamma sari'battangKu na nupauang sollanna a'lampa ke'nanga mange ri Galilea; anjorempA' sallang nacini' ke'nanga.” 11 Lalang a'lampana anjo bai'-bainea, nia'mo siapa are Surudadu a'jagaya ri jeraka, ammotere' ri kotaya. Mangei nalaporo' ke'nanga ri imang-imang kapalaya sikamma anjo apa le'baka kajariang. 12 Sipa'bicarami anjo imang-imang kapalaya siagang pamimping-pamimpinna tu Yahudia. Assikongkolo'mi ke'nanga, nampa nasare doe' sijaiang anjo Surudadu a'jagaya. 13 Siagang napasammi ke'nanga angkanaya, “Paui ri taua angkana battui ana'-ana' gurunNa allukkaki maya'Na ri bangngia ri wattunnu attinro ngaseng. 14 Na punna nalangngere' Pilatus anne passalaka, ikambepa anynyonyoki sollanna tena nunia' anggappa susa.” 15 Naallemi Surudadu pajagaya anjo doeka, na nagaukang anjo apa nipappasanganga ri ke'nanga. Lanri kammana minjo natassiara'mo anjo caritaya ri tangnga-tangngana tu Yahudia sa'genna anne alloa. 16 A'lampami mange se'reang bonto ri Galilea asse're ana'-ana' gurunNa Isa, situru' le'baka Napappasangang Isa ri ke'nanga. 17 Nacini'na ke'nanga Isa anjoreng, su'ju'mi ke'nanga anynyomba ri Ia. Mingka nia' todong ri ke'nanga bata-bata. 18 A'reppese'mi Isa ri ke'nanga, na Nakana, “Sikontu koasaya, ri suruga siagang ri linoa le'ba' ngasemmi nipassareang ri Nakke. 19 Jari a'lampamako mange ri sikontu bansaya ri lino, pa'jarimi ke'nanga ana'-ana' gurungKu. Je'neki ke'nanga lalang arenNa Manggea, siagang Anaka, kammayatompa RohNa Allata'ala. 20 Ajaraki ke'nanga anggaukangi sikontu le'baka Kupassuroang ri kau ngaseng. Na u'rangimi angkanaya laniakKa' anrurungangko sa'genna kala'busang jammanga.”
1 Iaminne Kabara' Baji' ri passala'na Isa Almasi, Ana'Na Allata'ala. 2 Pakkaramulanna anjo Kabara' Bajika sangkammai le'baka natulisi' Na'bi Yesaya angkanaya, “Nakana Allata'ala, ‘Iaminne tunisuroKu; Kusuroi a'lampa rioloanganNu, sollanNu nasungkeang oloang.’ 3 Nia' tau akkiok-kio' ri parang lompoa angkana, ‘Pasadiai oloanNa Batara; Lappari ngasengi oloang laNaoloa.’ ” 4 Sangkamma le'baka tattulisi', nia'mi battu Yohanes ri parang lompoa. Naje'ne'mi taua siagang napabattumi Kabara' battua ri Allata'ala. Nakanamo Yohanes, “Paralluko toba' battu ri dosa-dosanu siagang nije'ne', sollanna Napammopporangko Allata'ala.” 5 A'lampa ngasemmi tuniaka ri pa'rasangang Yudea siagang kota Yerusalem, mange ampilangngeri Yohanes. Namangakuimi dosa-dosana ke'nanga, nampa nije'ne' ri Yohanes lalang ri Binanga Yordan. 6 Na ia Yohanes, bulu unta napare' juba; kukkulu' napare' passikko' aya'; na katimbang siagang bani romang napare' kanre. 7 Iaminne Kabara' napabattua, nakana, “Ri bokoangangku, nia' tau labattu, lompoanganga na inakke. Manna a'dundua ansungkeangi passikko' sapatuNa tena todong kusiratang. 8 Inakke je'ne'ji kuje'nekangko, mingka Ia sallang RohNa Allata'ala laNaje'nekangko.” 9 Anjo wattua nia'mi Isa battu ri Nazaret ri daera Galilea, na nije'ne' ri Yohanes ri Binanga Yordan. 10 Kamma assulu'Na ri binangaya, tassungkemi langika Nacini'; na nia' RohNa Allata'ala naung attompo' ri Ia, sangkamma jangang-jangang bodobangkeng. 11 Nampa nia' sa'ra Nalangngere' iamintu sa'ranNa Allata'ala battu rate ri langika angkana, “IKaumi AnakKu Kukamaseanga. IKaumi nakate'neanga atingKu.” 12 Le'baki anjo nipalampa memammi Isa ri RohNa Allata'ala mange ri parang lompoa. 13 Patampulo alloi ammantang anjoreng, niso'ri ri Billisika. Jai olo'-olo' liaraka Naagang sipammantangang; na battumo malaekaka allayani. 14 Nitarungkunamo Yohanes, a'lampami Isa mange ri Galilea ampabattui Kabara' Baji' battua ri Allata'ala anjoreng. 15 Nakana, “Tasalloami nappakkaramula Allata'ala ammarenta. Toba' mako battu ri dosa-dosanu, siagang tappa' mako ri Kabara' Baji' battua ri Allata'ala!” 16 Ri wattunna a'jappa Isa ri biring Tamparang Galilea, nia' Nacini' rua paboya ri juku', iamintu Simon siagang Andreas andi'na. Sitabangi ke'nanga a'jala juku' ri tamparanga. 17 Nakanamo Isa ri ke'nanga, “Amminawangko ri Nakke. LaKuajarakko a'jari sanrapang pajala tau.” 18 Nabokoi memammi silalonna jalana ke'nanga, nampa amminawang ri Isa. 19 Tulusuki jappaNa Isa, nia'mo pole nacini' rua tau massari'battang, iamintu Yakobus siagang Yohanes ana'-ana'na Zebedeus. Lalangi ri biseanna ke'nanga sitabang ampakabajiki jalana. 20 Nikio'mi ke'nanga ri Isa. Na nabokoimo manggena ke'nanga siagang tungnganre gajina lalang ri biseanga. Nampa a'lampa ke'nanga amminawang ri Isa. 21 Battui Isa siagang ana'-ana' gurunNa ri kota Kapernaum. Ri allo Pammari-marianna poleanga, antama'mi Isa ri balla' sambayanga na appakkaramula angngajara'. 22 Lannasa' ngasemmi sikamma taua allangngereki caraNa angngajara'. Nasaba' lompoi pangaruNa punna angngajaraki. Tena nasangkamma carana guru-guru agamaya. 23 Anjo wattua nia' sitau tu nisoso' ri roh ja'dalaka antama' ri balla' sambayanga. Akkio'-kioki nakana, 24 “E, Isa tu Nazaret, apa ero' Nugaukang mae ri kambe? BattuKo ero' anghukkungi ikambe? Kuassengi angkanaya inaiKo antu: iKaumi Tunisuro matangkasaka, battua ri Allata'ala!” 25 Niga'gara'mi anjo roh ja'dalaka ri Isa angkana, “A'merekko! Assulukko battu ri anne taua!” 26 Naparuntang-runtang sanna'mi roh ja'dalaka anjo taua, nampa ammarrang lompo siagang assulu' battu ri kalenna anjo taua. 27 Sikontu taua lannasa' sikalimi anciniki anjo passalaka. Sa'genna massing nakanamo para ia ke'nanga, “Idende' apami kutadeng anne? Iaminne pangngajarang beru! Lanri kakoasanNa siagang kala'biranNa na Nasuro roh-roh ja'dalaka assulu', siagang amminawang turu' anjo roh-roh ja'dalaka mae ri Ia!” 28 Linta'mi tassiara' mange-mange kabara'na Isa ri sikontu daera Galilea. 29 A'lampami Isa siagang ana'-ana' gurunNa ambokoi anjo balla' sambayanga, nampa mange ri balla'na Simon siagang Andreas. A'lampa tongi Yakobus siagang Yohanes siagang ke'nanga. 30 Anjo wattua sitabangi garring rammusu' matoang bainena Simon ri katinroanga. Jari nipauammi Isa ri wattunna antama' ri balla' siagang ana'-ana' gurunNa. 31 Mangemi Isa anta'galaki limanna anjo matoang bainena Simon, nampa nabantu ambangung. Ammarimi rammusu', siagang appakkaramulami allayani ke'nanga. 32 Karuenna, ri labunamo alloa, naerang ngasemmi taua sikamma tau garringa mae ri Isa siagang sikamma tau nasosoka setang. 33 A'lipummi sikamma tau niaka ri anjo kotaya ri dallekanna anjo ballaka. 34 Sanna' jaina tau nisessa ri garring. A'rupa-rupai garrinna ke'nanga. Nampa Naballei ngasemmo Isa ke'nanga, na'jari baji'. Nabongka ngaseng tommi setanga. Na tena Napa'biangi a'bicara anjo setang-setanga, nasaba' niassengi ri ke'nanga. 35 Ammukona, ri wattu subuna ija, ambangummi Isa nampa a'lampa ambokoi ballaka. Mangei ri tampa' sino-sinoa ri pantaranganna kotaya. Mangei anjoreng appala' doang. 36 Mingka a'lampami Simon siagang agang-aganna mange amboyai. 37 Nabuntulu'na, nakanamo ke'nanga, “Yangaseng taua amboyaKi' Bapa'.” 38 Mingka appialimi Isa Nakana, “Umba kipatulusuki lampata mange ri kota-kota maraenga, ambania anrinni. Parallu tongA' akkato'ba anjoreng. Nasaba' untu' iaminjo naKubattu mae.” 39 Jari a'lampami Isa a'la'bang ri sikontu Galilea. Akkato'bami lalang ri sikamma balla' sambayanga. Siagang Nabongka ngasemmi setang-setanga battu lalang ri kalenna sikamma tau nisosoka ri setang. 40 Nia' sitau tau garring sala battu mae ri Isa. Akkulantu'mi anjo taua na nakana, “Punna Kikaerokangi Bapa', akkulleKi' amballeia' ku'jari baji'.” 41 Tu'guru'mi pangngamaseanNa Isa anciniki anjo taua. Jari Nata'gala'mi anjo taua na Nakana, “Kukaerokangi, a'jari baji' mako!” 42 Ammari memammi garrinna anjo wattua, na'jari baji'mo anjo taua. 43 Nampa Nasuro Isa a'lampa anjo taua. Na Napasang angkana, 44 “Jagako, tea' laloko caritai anne passalaka manna pole ri nai. Mingka a'lampamako mae ri imanga assuro paressai kalennu mattantunu baji'mo. Punna le'ba' anjo, a'lampamako assare koro'bang passidakka situru' napassuroanga Musa, lanri a'jari baji'numo. Iaminjo a'jari butti ri taua angkanaya ma'nassa baji' mako ri garrinnu.” 45 Mingka a'lampaji anjo taua na tuli nacarita mange-mange anjo apa kajarianga. Sa'genna takkulleami Napappicinikang KalenNa Isa punna antama' ri kotaya. Pantaranganna mami kotaya ri tampa' sino-sinoa ammantang. Mingka tuli jaina tau battu ri kere-keremae, battu mae ri Ia.
1 Siapa are allo ribokoanganna, ammotere'mi Isa mange ri Kapernaum. Tassiara'mi kabaraka angkana niaki ri balla'. 2 Jaimi tau battu. A'lipummi ke'nanga anjoreng ri ballaka, sa'genna tenamo tampa' assabang. Manna ri pakke'buka rassi ngaseng tau. Napabattumi Isa biritta battua ri Allata'ala mae ri ke'nanga. 3 Lalang a'bicaraNa Isa, nia'mo tau appa' battu a'bule' tau peso', ero' naerang mae ri Isa. 4 Mingka lanri jaina tau, takkulleami ke'nanga battu mae ri Isa. Jari angngambi'mi ke'nanga nai' ri pattongko'na ballaka. Nampa nasungke ke'nanga pattongko' niaka irateanganna Isa. Le'baki anjo naoloro'mi ke'nanga naung anjo tau pesoka siagang tappere'na. 5 Nacini'na Isa antekamma lompona tappa'na ke'nanga, Nakanamo ri anjo tau pesoka, “O anakKu, nipammopporammi dosa-dosanu.” 6 Nia' siapa are guru agama ammempo anjoreng. Nakanamo lalang ri pa'mai'na ke'nanga. 7 “Baranina anne taua akkana kamma! Nahinai Allata'ala. Inai akkulle ampammopporangi dosaya, pantaranganna Allata'ala bawang?” 8 Anjo wattua Naasseng memammi Isa pikkiranna ke'nanga. Jari Nakanamo, “Angngapa nukkuta'nang kamma ngaseng lalang ri pa'mai'nu? 9 Maka kereanga gampangangang: angkanaya, ‘Nipammopporammi dosanu’ yareka angkanaya, ‘Ambangungko nai', angkaki tappere'nu, nu'jappa’? 10 Mingka kamma-kamma anne eroki Kupa'butti mae ri kau ngaseng angkanaya ri tompo'na anne buttaya makoasai Ana' Ma'rupataua ampammopporangi dosa-dosaya.” Nampa Nakanamo Isa ri anjo tau pesoka, 11 “Ambangungko nai', angkaki tappere'nu, ammotere' mako!” 12 Ambangummi nai' anjo taua, na naalle memang tappere'na, nampa a'lampa assulu' niciniki ri tau jaia. Sanna' ngaseng lannasa'na anjo tau jaia. Ammuji-mujimi ke'nanga ri Allata'ala. Nakanamo ke'nanga, “Tena le'bakkapaki' accini' kajariang kammaya anne!” 13 Ammotere'mi pole Isa mange ri biring Tamparang Galilea. Jaimi tau battu mae ri Ia. Naajara' ngasemmi ke'nanga. 14 Lalang a'jappaNa Isa anjoreng, nia'mo Nacini' pasingara' sima niarenga Lewi, ana'na Alfeus. Sitabangi ammempo lalang ri kantoro' simaya. Nakanamo Isa ri ia, “Amminawangko ri Nakke.” Ammentemmi Lewi nampa amminawang ri Isa. 15 Ri wattunna angnganre Isa ri balla'na Lewi, jaimi pasingara' sima siagang tau nicini' kodia ri tau jaia, angngagangi Isa siagang ana'-ana' gurunNa angnganre. Nasaba' jaimi ke'nanga amminawang ri Isa. 16 Nia'mo siapa are guru-guru agamana tu Farisia anciniki Isa angnganre siagang anjo pasingara' simaya siagang anjo tu nicini' kodia ri tau jaia. Jari akkuta'nammi ke'nanga ri ana'-ana' gurunNa Isa angkana, “Angngapa nasiagang gurunnu anjo pasingara' simaya siagang anjo tu kodi kammaya ngaseng, angnganre?” 17 Nalangngereki Isa akkuta'nang kamma ke'nanga, appialimi Nakana, “Tau tenaya nagarring, tena naparallu ri dottoro', passangalinna tau garringaji. Teai tau nakanaya kalenna baji' battu Kuboya, passangalinna tau nicini' tunaya.” 18 Nia' se're wattu nappuasa ana'-ana' gurunna Yohanes Paje'ne' siagang tu Farisia. Nia'mo tau battu akkuta'nang ri Isa angkana, “Angngapa nappuasa ana'-ana' gurunna Yohanes Paje'ne' siagang ana'-ana' gurunna tu Farisia, mingka ana'-anatTa Katte tena?” 19 Appialimi Isa Nakana, “Maka tena nangnganre toanaya ri passua'-suarranna pa'buntinganga? Punna nia' ija bunting bura'nea angngagangi ke'nanga, mattantu angnganrena ke'nanga. 20 Mingka lania' wattunna na lanialle bunting bura'nea battu ri ke'nanga. Nampami tangnganrea ke'nanga anjo wattua. 21 Punna nia' tau annampeng baju toa, teai kaeng beru napatampeng. Nasaba' punna akkungkung anjo kaeng beru nipatampenga lata'besoki anjo baju toaya sa'genna kekke' poleang, napila' laluara' kekke'na. 22 Kammayatompa pole, punna nia' tau ammoli' anggoro' beru, tena nanjoreng ri pammoneang toaya na pammoliki. Nasaba' lareppeki anjo pammoneang toaya napakamma anjo anggoro' berua. Kale'bakkanna lanipela' rua-ruami. Jari anjo anggoro' berua, parallui niboli' ri pammoneang berua todong!” 23 Nia' se're wattu, ri allo Pammari-marianga, a'jappai Isa ri se'reang koko gandung. Angngattili'mi ana'-ana' gurunNa gandung. 24 Nakanamo tu Farisia ri Isa, “Angngapai anjo ana'-ana' gurunNu na nadakkai atoranga ri agamata, kanagaukangi apa nipappisangkanga nigaukang ri allo Pammari-marianga?” 25 Appialimi Isa Nakana, “Tale'bakapi nubaca apa nagaukanga Daud ri wattunna Abyatar a'jari imang lompo? Anjo wattua cipuruki Daud siagang ana'-ana'na. Na tenamo kanrena ke'nanga. Jari antama'mi ke'nanga ri Balla'Na Batara, nampa nakanre roti le'baka nipakkoro'bangngang mae ri Allata'ala. Napassareang tommi anjo rotia mange ri ana'-ana'na. Na situru' atoranga ri agamata, imang-imangaji bawang akkulle angkanrei anjo rotia.” 27 Nampa Nakana pole Isa, “Nipa'niaki anjo allo Pammari-marianga untu' rupataua; teai rupataua untu' allo Pammari-marianga. 28 Jari makoasai Ana' Ma'rupataua, ba'lalo makoasai irateanganna allo Pammari-marianga.”
1 Ammotere'mi pole Isa mange ri balla' sambayanga. Anjoreng nia' sitau mate siali limanna. 2 Na nia' todong anjoreng siapa are tau eroka amboyai kasalanNa Isa, sollanna akkulle natuntu'. Jari nacinikimi ke'nanga, gassingka Naballei Isa anjo taua ri allo Pammari-marianga. 3 Nakanamo Isa ri anjo tau mate sialia limanna, “Maeko anrinni, ammenteng ri dallekang.” 4 Nampa akkuta'nang ri anjo tau niaka ngaseng anjoreng nakana, “Manuru' agamaya, kereanga akkulle nigaukang ri allo Pammari-marianga? A'gau' baji' yareka a'gau' ja'dalaka? Appasalamaka tau yareka ammunoa tau?” Tenamo na nia' ri ke'nanga akkana. 5 A'jari larromi Isa, na'la'bang Naciniki ngaseng tau niaka ri tammuliliNa. Mingka si'na tommi pa'mai'Na lanri kapala batuna ngaseng ke'nanga. Nampa Nakana ri anjo taua, “Pajonjoi limannu.” Napajonjomi limanna anjo taua, na'jari baji'mo. 6 A'lampami tu Farisia ambokoi anjo balla' sambayanga. Nampa assikongkolo' siagang siapa are ana'-ana'na Herodes, ero' ambunoi Isa. 7 A'lampami Isa siagang ana'-ana' gurunNa mange ri Tamparang Galilea. Jai sikalimi tau battu ri Galilea ampinawangi Isa. Jai todong battu ri Yudea, 8 battu ri Yerusalem, battu ri daera Idumea, battu ri daera rayanganna Binanga Yordan, kammayatompa battu ri kota-kota a'reppeseka ri Tirus siagang Sidon. Battu ngasemmi mae ri Isa, lanri nalangngere'mi ke'nanga sikamma apa le'baka Nagaukang. 9 Lanri sanna' jaina tau, Nasuromi ana'-ana' gurunNa Isa appasadia biseang, untu' KalenNa sollanna akkulle nai' anjoreng na tanisorong-soronga ri tau jaia. 10 Sanna' jaina tau Naballei na'jari baji'. Sa'genna sisorong-sorong ngaseng minjo tau garringa, massing ero' a'reppese' nakkulle nasero Isa. 11 Na sikamma tau nisosoka ri roh ja'dala', punna nacini'mi Isa, su'ju'mi ri dallekanNa siagang ammarrang nakana, “IKaumi Ana'Na Allata'ala.” 12 Mingka Napisangkai dudumi Isa anjo roh-roh ja'dalaka ampappiassengangi KalenNa mae ri taua. 13 Le'baki anjo nai'mi Isa ri se'reang bulu', na Nakio' sikamma tau Nakaerokia. Battu ngasemmi anjo taua, 14 nampa Napilei battu ri ke'nanga sampulo anrua tau. Nakana, “Kupileko sollannu amminawang anrurungangA'. LaKusuroko ampa'la'bangi Kabara' Baji' battua ri Allata'ala. 15 Na lanisareko koasa ambongkai setang-setanga.” 16 Iaminne areng-arenna anjo sampuloa anrua tau: Simon (nigallaraka todong Petrus), 17 Yakobus siagang Yohanes sari'battanna, iamintu ana'-ana'na Zebedeus (anne ke'nanga nigallaraki Boanerges battuanna “ana' gunturu'”), 18 Andreas, Filipus, Bartolomeus, Matius, Tomas, Yakobus ana'na Alfeus, Tadeus, Simon nigallaraka Patriot, 19 siagang Yudas Iskariot ambalukangai Isa. 20 Le'baki anjo ammotere'mi Isa mange ri balla'. Mingka battumi pole a'lipung tau jaia, sa'genna tenamo nasawe angnganre Isa siagang ana'-ana' gurunNa. 21 Nakanamo tau jaia, “Pongoro'mi anne taua!” Nalangngere'na bijanNa Isa anjo kajarianga, a'lampami ke'nanga angngallei Isa. 22 Guru-guru agama battua ri Yerusalem angkanami, “Napantamai Pinggawana Setang! Iaminjo Pinggawana Setanga assarei koasa nakkulle Nabongka setanga.” 23 Jari Nakio'mi Isa anjo tau jaia, nampa Napaccaritang ke'nanga siapa are pangngebarang. Nakana Isa, “Antekamma lakkulle setanga ambongkai setanga? 24 Punna nia' se're bansa, nata'bage-bage taunna nampa assimusu-musu para ia, antekamma lakkulle attahang ammenteng pamarentana anjo bansaya. 25 Na punna nia' se're balla', natena nassamaturu' bonena, siagang assimusu-musui para ia, tena taancuru'na ngaseng bonena. 26 Na punna ta'bage-bage siagang assimusu-musu Billisika lalang ri pamarentahanna, ma'nassa takkulleai lattahang anjo pamarentahanna, passangalinna lalanynyaki kale'bakkanna. 27 Punna nia' paella' antama' ri balla'na tau gassinga, takkulleai naalleang barang-baranna punna tanasikkoka rolong anjo tau gassinga. Le'bappi nasikko' anjo tau gassinga nampa akkulle naalleang barang-baranna. 28 Assemmi angkanaya, punna a'gau' dosa taua, siagang nahinai paranna tau akkulle iji nipammopporang. 29 Mingka punna nahina RohNa Allata'ala, takkulleami nipammopporang! Nasaba' punna nihina RohNa Allata'ala, a'jarimi dosa satunggu-tungguna.” 30 Nakkana kamma Isa, lanri nia'na tau angkana nipantamakki Isa ri roh ja'dalaka.) 31 Le'baki anjo battumi amma'Na siagang sari'battanNa ngaseng Isa. Attayammi ke'nanga pantara', nampa nasuro kio' Isa. 32 Anjo wattua jai tau ammempo angkulilingi Isa. Angkanami ke'nanga ri Isa, “Bapa', niaki pantara' ammatTa siagang sari'battanTa ngaseng. IKatte battu naboya.” 33 Appialimi Isa Nakana, “Inai ammakKu? Inai sari'battangKu?” 34 Nampa Naciniki ngaseng tau niaka ammempo ri tammuliliNa. Nampa Nakana, “Iaminne ammakKu siagang sari'battangKu! 35 Inai-nai anggaukangi ero'Na Allata'ala, iami sari'battangKu bura'ne, sari'battangKu baine, kammayatompa iami ammakKu.”
1 Angngajara'mi pole Isa ri biring Tamparang Galilea. Sanna' jaina tau battu allipungi. Jari nai'mi ammempo ri se'reang biseang attompo' ri je'ne'. Na anjo tau jaia anjoreng ngasengi ri biring tamparanga ammenteng. 2 Jaimi apa-apa Naajarrangi Isa ke'nanga. Ammakei pangngebarang Naajara'na ke'nanga. Na kammaminne Naajarrangi ke'nanga. 3 “Pilangngeri! Nia' sitau pakoko a'lampa appakioro' bine. 4 Na ri wattunna napakioro', nia' bine tu'guru' ri aganga. Nampa battu jangang-janganga angkanrei sa'genna la'busu'. 5 Nia' todong tu'guru' ri butta jaia batu-batunna. Lanri kuranna buttana linta'mi attimbo anjo binea; 6 mingka wattunna nai'mo alloa pakkaramulami kalumeng, sa'genna kalotoro' nampa mate, lanri tena nabella antama' aka'na ri buttaya. 7 Nia' todong bine tu'guru' ri alla'na ruku'-ruku' akkatintinga. Mingka ri wattunna accu'la', takkulleami a'rappo lanri nibetai ri anjo ruku'-ruku' akkatintinga. 8 Na nia' todong bine tu'guru' ri butta copponga. Attimboi anjo binea, sa'genna pila' lompo nampa a'rappo. Nia' a'rappo a'lappi tallumpulo, nia' a'lappi annampulo, kammayatompa nia' a'lappi sibilangngang.” 9 Le'baki Nacarita Isa anjo pangngebaranga, Nakanamo, “Nasaba' nia' ngaseng tolinnu, pilangngerimi!” 10 Ri wattunna Kale-kalenNa mami Isa, battumi ana'-ana' gurunNa siagang tau le'baka allangngerekai pangngajara'Na. Nasuro pakasingara'mi ke'nanga battuanna anjo pangngebaranga. 11 Nakanamo Isa ri ke'nanga, “Le'ba' mako nisare pangngassengang sollanna nuasseng rahasiana angkanaya antekamma batena ammarenta Allata'ala. Mingka tau maraenga ammakepi pangngebarang punna niajara' ke'nanga, 12 sollanna ‘Lanaciniki tojemmi ke'nanga, mingka tanaassengai apa kajarianga, lanapilangngeri tojemmi ke'nanga, mingka tanapahangai, anne kajariangi sollanna tena naciniki siagang tena napahangi ke'nanga na tea battu mae ri Allata'ala, nampa nipammopporang ri Allata'ala ke'nanga.’ ” 13 Nampa Nakana Isa ri ke'nanga, “Punna tena nuassengi battuanna anjo pangngebaranga, antekamma lakkulle nuasseng pangngebarang maraenga? 14 Anjo pakioroka, iamintu tau ampasiaraki Kabara' battua ri Allata'ala. 15 Anjo bine tu'guruka ri aganga, iaminjo pangngebaranna tau allangngerekai kabaraka ri passala'na antekamma batena ammarenta Allata'ala, mingka tanapahangai. Mingka kamma nalangngere'na ke'nanga battumi Billisika angngallei anjo apa le'baka nipakioro' lalang ri atinna ke'nanga. 16 Anjo bine tu'guruka ri batu-batua, iaminjo pangngebaranna tau lintaka antarimai siagang rannu nyawana nalangngere'na anjo kabaraka. 17 Mingka tena nantama' aka'na anjo kabaraka ri atinna ke'nanga, sa'genna tena nasallo attahang. Kamma natujuna susa yareka kamma anggappana passessa ke'nanga passabakkang anjo kabaraka, ammono'boko memammi ke'nanga. 18 Anjo bine tu'guruka ri alla'na ruku' akkatintinga, iaminjo pangngebaranna tau allangngerekai anjo kabaraka, 19 mingka ranggaselai ri passala'na katallassanna ke'nanga, kammayatompa ero' dudui kalumanynyang. A'rupa-rupami apa-apa nakacinnai antama' ri atinna ke'nanga. Lanri nibetami anjo kabara' battua ri Allata'ala lalang ri atinna ke'nanga, takkulleami a'rappo. 20 Na anjo bine tu'guruka ri butta copponga, iaminjo pangngebaranna tau allangngerekai siagang antarimayai anjo kabaraka. A'rappomi ke'nanga, na jai rapponna: nia' a'lappi tallumpulo, nia' a'lappi annampulo, na nia' todong a'lappi sibilangngang wassele'na.” 21 Le'baki anjo Nakanamo pole Isa, “Maka le'baki nia' tau apparinra lampu nampa natongko' katoang, yareka naboli' rawanganna katinroanga? Maka tena napadongkoki irate ri pa'dongkokanna? 22 Tenanniakka apa-apa taccokko talakacinikang; siagang tenanniakka rahasia talatassungke. 23 Jari, punna nia'ja tolinnu, pilangngerimi!” 24 Nampa Nakana pole Isa, “Parhatikangi anne apa nulangngereka. Pa'baku' apa nupake ambakuki parannu tau, iaminjo pa'bakuka laNapake Allata'ala ambakukko — yareka la'biangampa pole. 25 Nasaba' tau niakamo apa-apanna, lanisarei pole jai; mingka tau tenaya apa-apanna, lanialleangi ba'lalo apa-apa niaka sike'de' ri ia.” 26 Nasambummi pole bicaranNa Isa Nakana, “Punna ammarenta Allata'ala salaku Karaeng, lakammaminne pangngebaranna. Nia' se're tau a'lamung gandung ri kokonna. 27 Punna bangngi attinroi; na punna allo ambangungi. Na lalang kammana anjo attimbo minjo lamung-lamunna sa'genna lompo. Mingka tanaassengai antekamma batena attimbo sa'genna lompo anjo lamung-lamunga. 28 Iaminjo buttaya napattimboi sa'genna appa'nia' wassele': uru-uruna tangkenna, nampa bulere'na sa'genna rapponna. 29 Na punna toamo anjo gandunga yareka narapi'mi wattu pakkattoanga, appakkaramulami akkatto.” 30 Akkuta'nammi pole Isa Nakana, “Punna ammarenta Allata'ala, apa akkulle nipasanrapangangi? Pangngebarang apa akkulle nipake ampakasingaraki? 31 Punna ammarenta Allata'ala kammaminne pangngebaranna: Nia' silisere' parekang lamungang sannaka ca'dina lisere'na. Iaminjo lisere' rappo kayu kaminang ca'dia ri lino. Na nia'mo sitau angngallei anjo lisere' kaminang ca'dia, nampa nalamung. 32 Mingka ri wattunna attimbomo, iami a'jari poko' kaminang lompo ri sikamma poko'-poko' lu'muka poko'na. Sanna' copponna tangke-tangkenna, sa'genna akkulle napa'ru'mungi siagang napa'la'langi jangang-jangang.” 33 Kammaminjo bateNa Isa angngajaraki taua. Jai pangngebarang Napake, sollanna akkulle napahang ke'nanga. 34 Punna Naajara' taua ammakei pangngebarang. Mingka punna Ia mami siagang ana'-ana' gurunNa, Napakasingara' ngasemmi battuanna anjo pangngebaranga mae ri ke'nanga. 35 Ri wattunna karueng, ia todong anjo alloa, Nakanamo Isa ri ana'-ana' gurunNa, “Umba ki'lampa a'biseang a'limbang anta'leang.” 36 Jari antama'mi ana'-ana' gurunNa ri biseanga. Nia' memammi Isa antama' riolo ri biseanga. Nabokoimi anjo tau jaia ri biring tamparanga. A'lampami Isa siagang ana'-ana' gurunNa. Nia' todong biseang-biseang maraeng anjoreng. 37 Tena nasallo, battumi anging lompoa. Appakkaramulami nitunrung ri bombang lompo siagang napantamakkimi je'ne' biseanna ke'nanga, sa'genna a'birimmi rassi je'ne'. 38 Na anjo wattua sitabangi attinro Isa, appa'lungang ri ulunNa biseanga. Battumi ana'-ana' gurunNa anronrongi. Nakana ke'nanga, “O Pa' Guru, natujuki anne bala, angngapa natena Kijampangi?” 39 Ambangummi Isa, nampa naga'gara' anjo anginga, siagang Nakana ri anjo tamparanga, “Ammariko siagang sannangko!” Ammarimi anginga, siagang a'jari sannang sikalimi tamparanga. 40 Nampa Nakana Isa ri ana'-ana' gurunNa, “Angngapa numalla'? Angngapa natena nutappa' ri Nakke?” 41 Sanna'mi malla'na ke'nanga. Na sipa'bicaramo massing para ia ke'nanga angkana, “Inai sitojenna anne taua? Kamanna anginga siagang bombanga amminawang turu' ngaseng ri kananNa.”
1 Na battunamo Isa siagang ana'-ana' gurunNa ri ba'leanna Tamparang Galilea, ri daera Gerasa. 2 Kamma Naunna Isa battu ri biseanga, nia'mo sitau bura'ne assulu' battu ri pa'jerakkanga, mae ri Ia. 3 Anjo taua nisosoki ri setang, siagang anjorengi ri pa'jerakkanga ammantang. Takkulleami nisikko', nasaba' manna rantea natappu' ngaseng. 4 A'mole-molemi nisikko' rante bangkenna siagang limanna, mingka tuli natappuki anjo rantea, siagang anjo bassia ri bangkenna napolong todong. Sanna' sikali gassinna sa'genna tenanniakkamo tau akkulle anta'galaki. 5 Allo bangngi tuli a'jappa siagang akkiok-kio' ri pa'jerakkanga siagang ri bulu'-buluka, na naloko'-lokoki kalenna ri batua. 6 Ri wattunna nacini' bella battu Isa, lari-larimi anruppai Isa nampa su'ju' ri dallekanNa. 7 Ammarrang lompomi nakana, “O Isa, Ana'Na Allata'ala Kaminang Tinggia! Apa ero' Nugaukang ri nakke? Nasaba' Allata'ala, kupalaki ri Katte, tea' laloKi' sessaia'!” ( 8 Nakkana kamma anjo taua, lanri Nakanana Isa ri ia, “Ikau roh ja'dalaka, assulukko battu lalang ri kalenna anne taua!”) 9 Nampa akkuta'nang Isa ri ia Nakana, “Inai arennu?” Appialimi anjo taua nakana, “ ‘Legiun’ arengku — nasaba' jai sikalia' sipa'rurungang!” 10 A'mole-molemi napala' dudu anjo roh-roh ja'dalaka ri Isa sollanna tena na nisuro assulu' battu ri anjo daeraya. 11 Tena nabella battu ri anjo tampaka, jai sikali bawi sitabang a'boya kanre ri bonto-bontoa. 12 Napala'mi anjo roh-roh ja'dalaka ri Isa, nakana, “Suro ngasemma' antama' anjoreng ri bawi-bawia.” 13 Niturukiammi ri Isa. Jari assulu'mi anjo roh-roh ja'dalaka, nampa antama' anjoreng ri bawi-bawia. Anjo bawia nia' ruassa'bu jaina. Lari ngasemmi anjo bawia, nampa a'lumpa' battu ri birinna ta'binga naung ri tamparanga, sa'genna tallang ngaseng. 14 Lari ngasemmi pakalawakinna anjo bawia, na napa'la'bang anjo kabaraka lalang ri kotaya siagang desa-desa niaka a'reppese' anjoreng. Jari assulu'mi taua mange anciniki anjo apa kajarianga. 15 Mangemi ke'nanga ri Isa, nampa nacini'mo ke'nanga anjo tau le'baka nasoso' setang, ammempo anjoreng. Ammakemi care-care siagang baji'mi jappana pikkiranna. A'jari malla' ngasemmi ke'nanga. 16 Sikamma tau ancinikai kajarianga ri anjo taua siagang anjo kajarianga ri bawi-bawia, massing nacarita ngasemmi apa le'baka nacini' ke'nanga. 17 Napala'mi panduduka anjoreng ri daeraya mae ri Isa, sollanna a'lampamo Isa ambokoi anjo daeraya. 18 Ri wattunna antama'mo Isa ri biseanga, battu tommi anjo tau le'baka nasoso' setang. Napala'mi ri Isa sollanna nipa'biang amminawang. 19 Mingka nipisangkai ri Isa. Nakanamo Isa ri ia, “Ammotere' mako, na nupauang ngaseng bija-bijannu apa le'baka Nagaukang Allata'ala ri kau, siagang antekamma baji'na Allata'ala mae ri kau!” 20 A'lampami anjo taua. Nappakkaramulamo nacarita lalang daera Sampuloa Kota, anjo apa le'baka Nagaukang Isa ri ia. Lannasa' ngasemmi taua allangngereki anjo kabaraka. 21 Ammotere'mi pole Isa anta'leang ri ba'leanna anjo tamparanga. Anjoreng ri birinna tamparanga jaimi tau battu a'rappungang ri tammuliliNa Isa. 22 Nia'mo sitau, niareng Yairus, battu mae ri Isa. Iami kapalana balla' sambayanga ri anjo kotaya. Battuna mae ri Isa, su'ju'mi ri dallekanNa. 23 Na napala' dudu ri Isa nakana, “Bapa', sanna' sikali garrinna ana' baineku. Kupalaki naKibattu anta'galaki, sollanna akkulle baji', natea matei!” 24 A'lampami Isa siagang Yairus. Sanna' jaina tau ampinawangi battu ri kere-keremae, siagang sisorong-sorong mami taua ero' a'reppese' ri Ia. 25 Nia' tommo sitau baine sannaka garrinna. Sampulomi anrua taung nalari cera'. 26 La'busu'mi barang-baranna napangngongkosang ri dottoroka, mingka tena sikali pamminrana garrinna. Pila' sanna'ji garrinna. 27 Jaimi kabara' nalangngere' anjo bainea apa-apa le'baka Nagaukang Isa. Jari ri tangnga-tangngana tau jaia, battu ribokomi anreppesi Isa. 28 Nasaba' nakana nawa-nawana, “Assala' kusero mamo jubaNa, tena ta'jari bajikku!” 29 Najamami jubaNa Isa, nammari memammo silalonna nilari cera'. A'jari baji'mi Nakasia'. 30 Anjo wattua nakasia' tommi Isa angkanaya nia' kagassingang assulu' battu ri KalenNa. Jari assailemi Isa, nampa Nakuta'nang tau jaia, Nakana, “Inai anseroi jubaKu?” 31 Nakanamo ana'-ana' gurunNa, “KalenTamo anciniki, antekamma jaina tau assiassa'-assa'. Angngapa naKiakkuta'nang ija angkana inai anseroi jubaTa?” 32 Mingka tuli Naciniki ngasemmi Isa sikamma tau niaka ri tammuliliNa ero' Naasseng angkana inai le'ba' anseroi jubaNa. 33 Anjo bainea, naassennamo apa kajarianga ri kalenna, a'jari malla'mi siagang annekkere'mi. Su'ju'mi ri dallekanNa Isa na namangakui ngaseng apa nagaukanga. 34 Nampa Nakanamo Isa ri anjo bainea, “O AnakKu, lanri tappa'nu ri Nakke, a'jari baji' mako! A'lampamako siagang salama'. Baji' sikali mako antu!” 35 Lalang a'bicaraNa Isa, nia'mo siapa are tunisuro battu ri balla'na Yairus. Nakanamo ke'nanga, “Tea' maki' susa-susai Pa' Guru. Nasaba' matemi anjo ana' bainea.” 36 Mingka tena Najampangi Isa kananna ngaseng anjo taua. Nakanamo ri Yairus, “Teako mallakki, tappakko ri Nakke!” 37 A'jappa tulusuki Isa, mingka tena Napa'biangi taua amminawang, pantaranganna Petrus siagang Yakobus na Yohanes sari'battanna. 38 Ri wattunna battu ke'nanga mange ri balla'na Yairus, Nacini'mi Isa taua gegere', siagang nia' tommo Nalangngere' tau appiraung siagang angngarru' lompo. 39 Antama'mi Isa ri ballaka nampa Nakana ri ke'nanga, “Angngapa nugegere' siagang angngarru' kamma ngaseng? Anjo anaka tena namate, mingka attinronaja!” 40 Nikakkalimi Isa ri ke'nanga, lanri akkana kammana. Mingka Nasuro ngasemmi Isa assulu' ke'nanga. Nampa Naerang anrong-manggena anjo anaka siagang anjo tallua ana' gurunNa antama' ri kamara'na anjo anaka. 41 Nata'gala'mi Isa limanna anjo anaka, nampa Nakana ri ia, “Talita kum,” battuanna, “E ana' baine, Kukana ri kau: ambangungko!” 42 Ambangummi nai' anjo ana' tuloloa, nampa a'jappa. (Sampulomi anrua taung umuru'na.) Takkajannang ngasemmi sikamma tau niaka anciniki anjo kajarianga! 43 Mingka Napisangkai dudumi Isa ke'nanga ampappiassengangi anjo kajarianga manna pole ri nai. Nampa Nakana Isa, “Sarei kanre anjo anaka.”
1 Nabokoimi Isa anjo tampaka, nampa ammotere' mange ri kamponNa siagang ana'-ana' gurunNa. 2 Ri allo Pammari-marianga, appakkaramulami angngajara' lalang ri balla' sambayanga. Jai tau anjoreng. Ri wattu nalangngere'na pangngajaranNa Isa, lannasa' sikalimi ke'nanga. Nakanamo ke'nanga, “Battu kemae ngasengi nagappa pangngajarang kammaya anne taua? Pangngissengang apa kutadeng, anne niaka ri taua? Antekamma nakkulle appa'nia' gau' appakalannasa'? 3 Sai anne taua tukang kayu, ana'na Maria, sari'battanna Yakobus, Yoses, Yudas, siagang Simon? Ba, manna sari'battanNa bainea anrinni ngasengi ammantang.” Lanri kammana, teami ke'nanga antarimai Isa. 4 Jari Nakanamo Isa ri ke'nanga, “Se'rea na'bi nipakalompoi ri kere-keremae. Mingka tanijampangiai ri kampong kalenna, ri tangnga-tangngana sari'battanna, yareka ri bija-bijanna todong.” 5 Anjoreng ri tampaka taerokai Isa appa'nia' gau' appakalannasa', pantaranganna siapa are tau garring Napadongkoki lima sa'genna a'jari baji'. 6 Lannasaki Isa lanri tenana natappa' ke'nanga ri Ia. Nampa a'lampa Isa mange angngajara' ri kampong niaka a'reppese' anjoreng. 7 Nakio'mi anjo sampuloa anrua ana'-ana' gurunNa. Nampa Nasuro a'lampa ta'rua-rua. Nasaremi koasa ke'nanga sollanna akkulle nabongka roh-roh ja'dalaka. 8 Siagang Napasammi ke'nanga Nakana, “Teako angngerangi apa-apa ri lampanu, pantaranganna takkanga. Teako angngerangi kanre, yareka pammoneang passidakka, yareka doe'. 9 Pakemi sapatunu, mingka teako ammakei ruang lawara' baju.” 10 Nakana pole, “Punna antamakko ri se'reang balla' ammantang mako anjoreng sa'genna nubokoi anjo kotaya. 11 Mingka punna battuko ri se'reang tampa', na taeroka taua anjoreng antarimako siagang ampilangngeriko, bokoimi anjo tampaka. Siagang be'besangi limbu'bu niaka ri pala' bangkennu, a'jari pappakainga' mae ri ke'nanga!” 12 A'lampami anjo sampuloa anrua ana'-ana' gurunNa Isa. A'lampai ke'nanga ampa'la'bangi kabaraka angkanaya parallui taua toba' battu ri sikontu dosa-dosana. 13 Jaimi setang nabongka ana'-ana' gurunNa Isa, nasapui minynya'-minynya' zaitun mabau' tau garringa sa'genna a'jari baji' ke'nanga. 14 Sikamma kabara'na anjo kajarianga battu tommi mae ri Karaeng Herodes. Nasaba' a'la'bammi niasseng mange-mange arenNa Isa. Nia'mo tau angkana, “Attallasa' poleammi Yohanes Paje'ne'! Iaminjo saba'na na nia'mo koasana anggaukangi anjo gau'-gau' appakalannasaka.” 15 Mingka tau maraenganga nakana, “Iami Elia.” Nia' pole angkana, “Ia na'bi, sangkamma kalase'renna na'bi rioloa.” 16 Nalangngere'na Herodes anjo kabaraka, nakanamo, “Mattantu Yohanes Paje'ne' anne, le'baka kusuro samballe pirangalloang. Kamma-kamma anne attallasa' poleammi ammotere'!” 17 Nasaba' le'baki pirangalloang nasuro jakkala' Yohanes, na napantama' ri tarungkua. Ia passabakkanna iamintu passala' Herodias, bainenna tonji sari'battanna, iamintu Filipus. Nasaba' le'ba'mi nabuntingi Herodias, 18 na rioloanganna a'mole-molemi nipauang ri Yohanes angkana, “Tena nukkulle a'bunting siagang anjo bainenna sari'battannu!” 19 Iaminjo saba'na nanipammoli'-molikammo Yohanes ri Herodias. Eroki nabuno, mingka tanakulleai anggaukangi nasaba' tuli nihalangi ri Herodes. 20 Nasaba' le'ba'mi nasuro jagai baji'-baji' Herodes kasalamakkanna Yohanes lalang ri tarungkua, lanri mallaki ri Yohanes. Naassengi angkanaya tau baji' anjo Yohanes, nisuroa ri Allata'ala. Na memang, punna a'bicara Yohanes, nangai tonji Herodes allangngereki, manna mamo na'jari sanna' lussa'na nyawana napakamma. 21 Mingka kale'bakkanna, anggappami kasampatang Herodias ri allo kalassukanna Herodes. Anjo wattua assua'-suaraki Herodes. Nakio' ngasengi tumalompoa lalang pamarentanga, tau tinggi-tinggia pangka'na, kammayatompa sikamma pamimpinga lalang ri Galilea. 22 Wattunna assua'-suara' nisuromi a'dansa ana' tulolona Herodias. Nasanna' sannanna nyawana Herodes siagang toananna ngaseng anciniki anjo dansa nakarenanga. Lanri rannuna nyawana, nakanamo Herodes ri anjo tuloloa, “Apa nukaeroki, pala'mami nakusareko.” 23 Nampa najanji Herodes anjo tuloloa. Assumpai nakana, “Manna apa nupala' tena takusarenu, manna pole tawaruanna anne pamarentangku!” 24 Jari assulu'mi anjo tuloloa mae akkuta'nang ri amma'na nakana, “Amma', apa baji' kupala'?” Appialimi amma'na nakana, “Pala'mi ulunna Yohanes Paje'ne'.” 25 Ammotere'mi linta' anjo tuloloa mae ri Herodes nampa nakana, “Kupalaki na nisareanga' ulunna Yohanes Paje'ne'. Ia memang anne wattua, nipadongko' rate ri kapparaka!” 26 Nalangngere'na Herodes anjo apa napalaka, sanna'mi susana nyawana. Mingka takkulleami tanaturukiang, lanri le'ba'mi assumpa ri dallekanna ngaseng toananna. 27 Jari nasuromi linta' pangawala'na mange angngallei ulunna Yohanes Paje'ne'. A'lampami anjo surudadua mange ri tarungkua, nampa nasamballe Yohanes. 28 Nampa naerang ulunna napadongko' irate ri kapparaka, na napassareang mae ri anjo tuloloa. Nampa napassareang pole anjo tuloloa ulunna Yohanes mae ri amma'na. 29 Nalangngere'na ana'-ana' gurunna Yohanes anjo kajarianga, a'lampami ke'nanga mange angngallei maya'na Yohanes, nampa natarawang. 30 Ammotere'mi pole anjo ana'-ana' guru Nasuroa Isa, nampa a'rappungang ngaseng siagang Isa. Nalaporo' ngasemmi ke'nanga apa le'baka nagaukang siagang napangngajarang ke'nanga. 31 Jai sikalimi tau battu siagang a'lampa, sa'genna tena sikalimo nasawe angnganre Isa siagang ana'-ana' gurunNa. Lanri kammana, Nakanamo Isa ri ana'-ana' gurunNa, “Umba ki'lampa mange ri tampa' sino-sinoa, ri tampa' akkale-kalea, sollanta akkulle ammari-mari poso sinampe'.” 32 Jari a'lampami ke'nanga a'dongko' biseang, mange ri tampa' sino-sinoa. 33 Mingka jai tau anciniki ke'nanga ri wattunna a'lampa ke'nanga ambokoi anjo tampaka, na niasseng ri ke'nanga. Jari battu ri sikamma kota-kota niaka anjoreng, lari-larimi taua ammolongang rate ri bontoa ero' ampilumbai Isa siagang ana'-ana' gurunNa. 34 Wattunna naung Isa battu ri biseanga, Nacini'mi anjo tau jaia. Tu'guru'mi pangngamaseanNa anciniki ke'nanga, lanri sanrapangi ke'nanga gimbala' tenaya pakalawakinna. Jari appakkaramulami Naajara' ke'nanga a'rupa-rupa pangngajarang. 35 Ri wattu karuennamo Nakanamo ana'-ana' gurunNa Isa ri Ia, “A'birimmi bangngi, na anne tampaka bellai battu ri kampong niaka taunna. 36 Bajikangang Kisuromi a'lampa ngaseng anne taua, sollanna akkulle ammalli kanre ri desa-desaya yareka ri kampong-kamponga, a'reppeseka anrinni.” 37 Mingka appialimi Isa Nakana, “Ikau ngasemmo assarei kanre ke'nanga.” Nakanamo ana'-ana' gurunNa, “Jari la'lampaki' mange ampammalliangi roti kira-kira ruambilangngang doe' pera', lanipakanreangi anne tau sikammaya jaina?” 38 Akkuta'nammi Isa Nakana, “Piram batu roti nia' ri kau ngaseng? A'lampasako mange anciniki!” Battunamo ke'nanga anciniki, angkanami ke'nanga, “Nia' limambatu roti siagang ruang kayu juku'.” 39 Nasuromi Isa ammempo a'gompo-gompo ke'nanga, ri rukuka. 40 Na atoro'mi kalenna ke'nanga ammempo a'gompo-gompo. Nia' tassibilangngang sipammempoang, nia' todong ta'limampulo sipammempoang. 41 Nampa Naalle Isa anjo roti limambatua siagang anjo juku' ruang kayua; nampa acconga nai' ri langika, appala' sukkuru' ri Allata'ala. Le'baki anjo Nabage-bagemi anjo rotia ri limanNa nampa Napassareang mae ri ana'-ana' gurunNa, sollanna natawa-tawai anjo tau jaia. Kammayatompa anjo juku' ruang kayua, natawa-tawai ngaseng tommi ke'nanga. 42 Angnganre ngasemmi ke'nanga sa'genna bassoro' ngaseng. 43 Nampa napasse're ana'-ana' gurunNa Isa anjo kanre alla'bia — nia' sampulo anrua baku' rassi ngaseng. 44 Tau bura'nea bawang na nia' limassa'bu tau angnganre. 45 Le'baki anjo Nasuromi ana'-ana' gurunNa Isa a'lampa linta' a'dongko' biseang a'lampa riolo mange ri Betsaida, ri ba'leanna tamparanga. Na anjo tau jaia Nasuro ngasemmi ammotere'. 46 Le'ba'na Nasuro a'lampa anjo tau jaia, a'lampa nai'mi Isa ri se'reang bonto, mange appala' doang. 47 Wattunna bangngimo, bellami antama' ri tamparang anjo biseanna ana'-ana' gurunNa Isa. Mingka Isa nia' iji rate ri bontoa. 48 Naciniki ana'-ana' gurunNa sidodongi ambisei anjo biseanga lanri a'ruppangi siagang anging. Jari kira-kira tette' tallu sa'genna tette' annang ri bari'basaka, battumi Isa mae ri ke'nanga, a'jappa ri tompo'na je'neka. A'jappa tulusuki kamma angkana lanalaloi ke'nanga. 49 Ri wattunna nacini' ke'nanga a'jappa Isa rate ri tompo'na je'neka na nakanai setang, 50 ammarrang-marrammi ke'nanga napakamma malla'. Nasaba' nacini' ngasengi ke'nanga, siagang ta'bangka ngasengi ke'nanga anciniki. Mingka linta'mi a'bicara Isa ri ke'nanga Nakana, “Sannammako! INakke Isa. Teako mallakki!” 51 Nampa antama' Isa ri biseanga, na'jari sannammo anginga. Lannasa' ngasemmi ana'-ana' gurunNa Isa. 52 Anjo passala' roti limambatu appakalannasaka tenapa napahangi ke'nanga. Sukkara' sikali napahang ke'nanga. 53 Battui ke'nanga anta'leang, anjoremmi ri biring Tamparang Genesaret a'biring. 54 Ri wattunna assulu' ke'nanga battu lalang ri biseanga, nacini'mi taua angkanaya Isa anjo niaka battu. 55 Massing silari-larimi ke'nanga anjoreng ri pa'rasanganga, nampa battu angngerangi tau garringa irate ri tappere', ri dallekanNa Isa. Punna naasseng ke'nanga angkana niaki Isa anjoreng ri se'reang tampa', a'lampamiseng taua mange anjoreng angngerang tau garring. 56 Kemae-kemae battu Isa — baji'na ri kampong-kamponga, ri desa-desaya, yareka ri kota-kotaya — anjoreng tommi battu taua massing angngerangi tau garrinna na napadongko' ri lapanganga. Nampa napala' dudu ri Isa, sollanna nipa'biang ngaseng anjo tau garringa anseroi jubaNa, manna cappa'naja nasero ke'nanga. Na sikontu tau le'baka anseroi jubaNa, a'jari baji' ngasemmi.
1 Nia' siapa are tu Farisi siagang guru-guru agama battu ri Yerusalem, mae ri Isa. 2 Le'baki nacini' ana'-ana' gurunNa Isa angnganre nara'masa' limanna. Tena nabissai rolong limanna, situru' atoranna agamaya. 3 Anjo tu Farisia, kammayatompa sikontu tu Yahudia, sanna' sikali nakatutuina ada'-ada'na tu riolona ke'nanga. Tena nangnganre ke'nanga punna tena nabissai rolong limanna ke'nanga manuru' cara-cara nipattantua. 4 Apa-apa niballia ri pasaraka tena nakkulle nikanre punna tena nibissai rolong. Siagang jai pole atorang-atorang maraeng, battua ri tu riolona ke'nanga, nata'gala' jarre' dudui ke'nanga; kammaya ebara'na: a'bissaya kaca pangnginungang, mangko', siagang pakkakasa' tambagaya. 5 Lanri kammana minjo nakkuta'nammo tu Farisia siagang guru-guru agamaya mae ri Isa, angkana, “Angngapa natena nabissai limanna ana'-ana' gurunNu punna ero' angnganre? Apa saba'na natena naturuki ana'-ana' gurunNu ada'-ada'na tu riolota?” 6 Appialimi Isa Nakana, “Ikau tu munape' ngasengko! Annaba sikali apa le'baka napau la'bi riolo Na'bi Yesaya ri wattunna nasero kana angkanaya, ‘Kammaminne kananNa Allata'ala, Anne taua poro bawana ngasenji anynyomba ri Nakke, mingka nyawana bella sikali ri Nakke. 7 Tena matu-matunna ke'nanga anynyomba ri Nakke, Nasaba' atorang rupatau napangngajarrang sangkamma angkana iaminjo pangatorangKu!’ 8 Tanujampangiai atoranNa Allata'ala, na nuta'gala' jarre' atorang rupataua.” 9 Nampa Nakana pole Isa, “Cara'de' sikaliko ansorongbokoi apa Napassuroanga Allata'ala, sollanna akkulle nupakajarre' atorang kalennu. 10 Nasaba' le'ba' mako nasare Musa anne parentaya angkana, ‘Pakala'biriki anrong-manggenu,’ siagang ‘Inai-nai ampakka'-pakkanai anrong-manggena musti nihukkung matei.’ 11 Mingka ikau ngaseng nupangngajarrangi angkanaya: Punna nakana taua ri anrong-manggena, ‘Apa lakupassareanga ri katte le'ba'mi kupassidakkang mae ri Allata'ala,’ 12 lanri kammana minjo na nulappassammo taua ambalang parekangi anrong-manggena. 13 Jari, battu ri pangngajarrannu ngaseng tonji, na nupattaenamo kana-kananNa Allata'ala. Jai pole apa sangkammaya anne nugaukang ngaseng.” 14 Nampa Nakio' pole Isa sikalipa anjo tau jaia, na Nakana ri ke'nanga, “Pilangngerimi sollanna nupahang! 15 Teai apa-apa battu pantaraka antama' ri bawana taua ampa'jari ra'masaki se'rea tau. Passangalinna apa-apa assuluka battu ri bawana taua iamintu akkulle ampa'jari ra'masaki se'rea tau. 16 Jari, punna nia' tolinnu, pilangngerimi.” 17 Ri wattunna Nabokoimo Isa anjo tau jaia nampa antama' ri balla', napakkuta'nangammi ana'-ana' gurunNa apa battuanna anjo pangngebarang le'baka Napau Isa. 18 Nakanamo Isa ri ke'nanga, “Apaka tena ijapa nupahangi? Maka takkulleai nupahang angkanaya anjo apa-apa antamaya ri bawana taua tena nakkulle ampa'jari ra'masaki taua? 19 Nasaba' anjo apa antamaya tena nanjoreng ri nyawaya numalo; passangalinna anjorengi ri parruka numalo, nampa assulu' poleang.” Battu ri akkana kammana Isa, naNapakasingara'mo angkanaya sikontu apa-apa nikanrea hallala' ngasengi. 20 Nampa Nakana pole Isa, “Apa-apa assuluka battu ri bawana taua, iaminjo ampa'jari ra'masaki se'rea tau. 21 Nasaba' battu lalammi, iamintu battu lalang ri nyawana, ammumba ngaseng pikkirang-pikkirang kodia nakkulle taua a'gau' sala, a'lukka', ammuno, 22 a'gau' salimara', annipu, appitina, siagang anggaukangi sikamma apa-apa ja'dalaka, ampa'jari taua angngoa, tenangngasseng atorang, assereati, tampo, kammayatompa susai niajara'. 23 Sikontu apa-apa kodia, battu lalang ngasengi ammumba, na iaminjo ampa'jari ra'masaki taua.” 24 Le'baki anjo a'lampami Isa ambokoi anjo tampaka nampa mange ri daera ambania ri kota Tirus. Antama'mi ri se'reang balla'. Taerokai niasseng ri taua angkana niaki anjoreng. Mingka takkulleai Nacokko KalenNa. 25 Nia' sitau baine, nasosoki setang ana' bainena. Nalangngere'mi kabara'na Isa. Battumi mae ri Isa nassu'ju' ri dallekanNa. 26 Nampa napala' dudu ri Isa sollanna Nabongka assulu' anjo setanga battu lalang ri ana'na. Anjo bainea teai tu Yahudi. Anjorengi ri daera Fenisia, pa'rasangang Siria, nilassukang. 27 Jari Nakanamo Isa ri ia, “Ana'-anaka rolong musti nisare kanre. Tabajikai nialleang kanrena ana'-anaka nampa nipasambila mange ri kongkonga.” 28 Appialimi anjo bainea nakana, “Annaba sikali kananTa, Tuang; manna kongkong niaka irawanganna mejaya, angnganre tonji sesa-sesa kanre natu'guranga ana'-anaka!” 29 Nakanamo Isa ri ia, “Lanri appiali kammanu, ammotere' mako; assulu' mintu setanga battu ri kalenna ana'nu!” 30 Ammotere'mi anjo tu bainea. Battui ri balla', narapikammi ana'na attinro ri katinroanga, siagang assulu' tojemmi anjo setanga battu ri anjo anaka. 31 Le'baki anjo a'lampami Isa ambokoi daera Tirus, na Napatulusu' lampaNa, allalo ri Sidon mange ri Tamparang Galilea. Oloang allaloa ri daera Sampuloa Kota Naolo. 32 Anjoreng nia'mo se're tau tongolo' siagang pepe naerang taua mae ri Isa. Napala'mi ke'nanga ri Isa, sollanna Napadongko' limanNa irateanganna anjo taua. 33 Naerammi Isa anjo taua a'lampa akkale-kale, nampa Napamange karemenNa ri tolinna anjo taua. Nampa appi'ru na Najama lilana anjo taua. 34 Le'baki anjo accongami nai' ri langika, nampa a'mai' la'bu na Nakana ri anjo taua, “Efata,” battuanna, “Tassungke mako!” 35 Tassungkemi tolinna anjo taua, siagang a'jari lu'mu'mi ammotere' lilana, sa'genna akkullemi a'bicara. 36 Nampa Napisangkai ngaseng Isa anjo taua ancaritai anjo kajarianga manna pole ri nai. Mingka pila' nipisangkai ri Isa, pila' napa'la'banji ke'nanga anjo kajarianga. 37 Nalannasa' ngasemmo taua allangngereki. Nakana ke'nanga, “Napa'jari baji' ngasemmi tau garringa! Ba'lalo Napa'jarimi allangngere' tau tongoloka, siagang a'bicara tau pepea!”
1 Tasalloai le'ba'na anjo, nia'mo pole siapa are jaina tau battu a'rappungang. Na lanri tena kanrena ke'nanga Nakio'mi Isa ana'-ana' gurunNa nampa Nakana, 2 “Tu'guru' pangngamaseangA' anciniki anne tau jaia. Tallungallomi anrurungangA', nakamma-kamma anne kala'busammi ke'nanga ri kanre. 3 Punna Kusuro ke'nanga a'lampa natena bonena battanna, akkullei pinsang ri aganga. Sarropa pole kajai ri ke'nanga tau battu bella.” 4 Appialimi ana'-ana' gurunNa Isa nakana, “Kemae taua lakkulle anggappa kanre ri tampa' tassa'la' kammaya anne untu' tau sikammaya jaina?” 5 Akkuta'nammi Isa Nakana, “Siapa jaina roti nia' ri kau ngaseng?” Appialimi ke'nanga angkana, “Tuju.” 6 Nasuromi Isa anjo tau jaia ammempo ri tompo'na buttaya. Nampa Naalle anjo roti tujumbatua Nappala' sukkuru' ri Allata'ala. Le'baki anjo Nabage-bagemi anjo rotia. Nampa Nasare ana'-ana' gurunNa antawa-tawai anjo tau jaia. Natawa-tawami ana'-ana' gurunNa anjo rotia. 7 Nia' todong siapa are juku' ca'di-ca'dina ke'nanga. Naallemi Isa anjo jukuka nampa appala' sukkuru' ri Allata'ala. Nampa Nasuro ana'-ana' gurunNa antawa-tawa tongi anjo jukuka. 8 Angnganremi ke'nanga sa'genna bassoro'. Anjo taua kira-kira nia' patassa'bu jaina. Le'baki anjo napasse'remi ana'-ana' gurunNa Isa kanre alla'bia. Nia' tuju baku' jaina rassi ngaseng. Nampa Nasuro Isa ammotere' anjo tau jaia. 10 Na Ia siagang ana'-ana' gurunNa, nai'mi ri biseang nampa a'lampa mange ri Dalmanuta. 11 Nia' siapa are tu Farisi battu mae ri Isa, nappakkaramulamo naagang a'gea' Isa, ero' ampa'boyangi kasalang. Nasuromi ke'nanga Isa appa'nia' gau' appakalannasa', a'jari pammatei ma'nassa battu tojengi ri Allata'ala. 12 Akkunraremmi Isa nampa appiali Nakana, “Apa saba'na anne taua ri jammanga nasuroA' appa'nia' gau' appakalannasa'? Tena! Tena nalaKupa'niakkang pammatei kammaya ke'nanga!” 13 Nampa a'lampa Isa ambokoi ke'nanga, Nantama' ri biseanga; nampa a'limbang anta'leang ri ba'leanna tamparanga. 14 Nakaluppai ana'-ana' gurunNa Isa angngerang roti. Sibatuji roti nia' ri ke'nanga lalang ri biseanga. 15 Nakana Isa ri ke'nanga, “Tutuko ri pa'gambanna tu Farisia siagang pa'gambanna Herodes.” 16 Appakkaramulami nabicara ana'-ana' gurunNa Isa anjo passalaka. Nakana ke'nanga, “Nakkana kamma anjo katena ningngerang roti.” 17 Naassengi Isa anjo apa nabicaraya ke'nanga. Jari akkuta'nammi ri ke'nanga Nakana, “Angngapa naia nubicara anjo passala' tenana roti? Apa tena ijapa nuassengi siagang nupahangi? Angngapa nukurang pahang kamma? 18 Nia' ngaseng matannu, angngapa natena nuccini'? Nia' tolinnu, angngapa natena nullangngere'? Tenamo nuu'rangi 19 anjo passala' limambatua roti, le'baka Kubage-bage untu' tau limassa'bua? Pirangbaku' rassi ammantang le'baka nupasse're?” Appialimi ke'nanga angkana, “Sampulo anrua.” 20 Akkuta'nammi pole Isa Nakana, “Wattunna Kubage-bage anjo roti tujumbatua untu' patassa'bu tau, pirambaku' ammantang le'baka nupasse're?” Appialimi ke'nanga angkana, “Tuju.” 21 Nakanamo pole Isa, “Jari tena ijapa nupahangi?” 22 Battumi ke'nanga ri Betsaida. Anjoreng nia'mo tau buta naerang taua mae ri Isa, na napala' ri Isa sollanna Najama anjo tau butaya. 23 Jari Nata'gala'mi Isa limanna anjo tau butaya naNarenreng assulu' battu ri anjo kotaya. Nampa Napi'rui Isa matanna anjo taua. Napadongkoki limanNa ri matanna anjo taua, nampa akkuta'nang ri ia Nakana, “Akkulle mako accini' apa-apa kamma-kamma anne?” 24 Accini'mi mae ri dallekang anjo taua, nampa nakana, “Iye'. Accini'ma' tau a'jappa-jappa mingka sangkammai ke'nanga poko'-poko'.” 25 Napamangemi pole limanNa Isa ri matanna anjo taua. Nampa napikulle-kulleimi pole accini' anjo taua. A'jari baji'mi matanna siagang baji' ngasemmi nacini'na apa-apaya. 26 Le'baki anjo Nakanamo Isa ri anjo taua, “Ammotere' mako, siagang teako ammoteri mange ri anjo kotaya.” 27 A'lampai Isa siagang ana'-ana' gurunNa mange ri desa-desaya, ri ampi'na Kaisarea Filipi. Ri tangngana aganga akkuta'nammi Isa ri ke'nanga Nakana, “Manuru' kananna taua, inaiA' anne?” 28 Appialimi ke'nanga angkana, “Nia' angkana Yohanes Paje'ne'; nia' todong angkana Elia; na maraenganga angkana: kalase'renna na'bia.” 29 Akkuta'nammi Isa Nakana, “Mingka manuru' panggappanu ngaseng todong, inaiA' anne?” Appialimi Petrus nakana, “IKattemi Karaeng Mappasalamaka!” 30 Nampa nipakainga'mo ke'nanga ri Isa, sollanna tena nanapappiassengangi ke'nanga KalenNa Isa ri taua, manna pole ri nai. 31 Le'baki anjo, appakkaramulami Naajara' Isa ana'-ana' gurunNa angkanaya, musti jai passessa laNagappa Ana' Ma'rupataua. Siagang lanimusui ri pamimping-pamimpinga, ri imang-imang kapalaya, kammayatompa guru-guru agamaya. Lanibunoi, mingka ri makatalluna alloa lattallasa' poleangi. 32 Singara' sikalimi bateNa Isa ampauangi ke'nanga, ri sesena anjo passalaka. Nibeso'mi Isa ri Petrus mae ri sa'ri, nampa napakainga'. 33 Mingka assailemi Isa naNaciniki ngaseng ana'-ana' gurunNa. Nampa Nakalarroi Petrus Nakana, “A'lampako anrinni setang! Pikkirannu, pikkirang rupatau; teai pikkiranNa Allata'ala!” 34 Nampa Nakio' Isa anjo tau jai niaka anjoreng, siagang ana'-ana' gurunNa. Nampa Nakana ri ke'nanga, “Tau eroka amminawang ri Nakke, musti nakaluppai kaparalluang kalenna, nampa napisang salli'na, natulusu' amminawang ri Nakke. 35 Nasaba' tau eroka angkatutui tallasa'na, iami latappela' tallasa'na. Mingka tau eroka angkoro'bangkangi tallasa'na untu' iNakke, siagang untu' Kabara' Baji' battua ri Allata'ala, iami lanipasalama'. 36 Apa baji'na mae ri se'rea tau, punna akkulle nakammai anne linoa, mingka tappelaki tallasa'na? 37 Maka akkullei anjo tallasaka nipassambe pa'barang-barangang? 38 Punna nia' tau siri'-siri' angngakuiA' siagang pangngajarangKu ri anne jammang sannaka dorakana siagang ja'dala'na, tena todong Naero' Ana' Ma'rupataua angngakui sallang punna battui siagang koasaNa ManggeNa, nirurungang ri malaeka'-malaeka' matangkasa'Na.”
1 Nakana Isa, “Assemmi angkanaya, ri alla'nu anne niaka anrinni kamma-kamma anne, nia' tena nalamate, ri wattu tenanapa naciniki Allata'ala ammarenta siagang kakoasanNa!” 2 Annangallo le'ba'na anjo Naerammi Isa iamintu Petrus siagang Yakobus na sari'battanna Yohanes, mange tassa'la' ri se'reang bulu' tinggi. Amminrami tanja'Na Isa ri dallekanna ke'nanga. 3 PakeanNa a'jari sanna'mi kebo'na. Tena manna sitau tukang minatu ri lino akkulle assassa kamma anjo kebo'na. 4 Nampa nacini' anjo tallua ana' gurunNa Isa, a'bicara Isa siagang Elia siagang Musa. 5 Nakanamo Petrus ri Isa, “O Pa' Guru, baji' sikali nikasia' anrinni. Bajiki punna ambangungki' tallu kema: se're untu' iKatte, se're untu' Musa, siagang se're untu' Elia.” 6 Sikontutojenna tanaassengai Petrus angkana apa anjo ero' napau, nasaba' malla'na ngaseng ke'nanga. 7 Nampa battu rammanga antongkoki ke'nanga. Na battu lalang ri rammanga, nia'mo sa'ra angkana, “Iaminne AnakKu Kukamaseanga. Pilangngerimi kananNa!” 8 Linta'mi accini' mange ri tammulilina ke'nanga. Mingka tenamo nacini' manna sitau angngagangi ke'nanga, pantaranganna Isa. 9 Wattunna naung ke'nanga battu ri buluka, nipakainga'mi ke'nanga ri Isa angkana, “Teako pau-paui manna ri nai, anjo apa nucinika sumpaeng, punna tenapa nattallasa' poleang Ana' Ma'rupataua battu ri kamateanga.” 10 Napilangngerimi ke'nanga anjo pappasanga. Mingka appakkaramulami nabicara para ia ke'nanga apa battuanna anjo kananNa Isa angkanaya, “attallasa' poleangi battu ri kamateanga.” 11 Jari akkuta'nammi ke'nanga ri Isa angkana, “Angngapa na napau guru-guru agamaya angkana, musti Elia battu la'bi riolo?” 12 Appialimi Isa Nakana, “Memang Elia battu la'bi riolo untu' ampasadiai yangaseng-ngasenna parallua. Mingka antekamma ia passala'na Ana' Ma'rupataua? Apa saba'na na tattulisi' lalang ri Kittaka angkanaya lajai sessa laNapisa'ringi siagang lanihinai ri taua? 13 Mingka Kupauang ngaseng mako anne angkanaya: Nia'mi battu Elia, nasangka' rupa nigaukangi ri ke'nanga. Sicoco'mi siagang apa le'baka tattulisi' lalang ri Kittaka anjo apa kajarianga ri kalenna.” 14 Ri wattunna a'rappungammo pole Isa siagang tallua ana' gurunNa siagang ana'-ana' gurunNa maraenga, jaimi tau nacini' ke'nanga. Nia' siapa are guru agama angngagangi a'gea' anjo ana'-ana' gurunNa Isa. 15 Nacini'na taua nia' battu Isa, takkalannasa'mi ke'nanga, nampa lari-lari mange anruppai. 16 Nakanamo Isa ri ana'-ana' gurunNa, “Apa nupa'geakkang siagang anjo guru-guru agamaya?” 17 Appialimi kalase'renna tau jaia angkana, “O Pa' Guru, kuerangi anakku mae ri Katte. Pepei nasaba' nasosoki roh ja'dala'. 18 Punna nibattuiseng ri roh ja'dalaka, napatappa'-tappasaki kalenna naung ri buttaya, nampa a'busa bawana, a'rekuki giginna siagang ka'doro' ngasengi kalenna. Kupalaki ri ana'-ana' gurunTa sollanna nabongka assulu' anjo roh ja'dalaka, mingka tanakulleai ke'nanga.” 19 Nakanamo Isa ri ke'nanga, “Teai ngasengko sipato' anne! Tau tena ngaseng tojeng tappa'nu. Siapapi salloKu lammantang anrurungangko siagang lasa'bara' ri kau ngaseng? Erangi mae antu anaka!” 20 Naerammi ke'nanga anjo anaka mae ri Isa. Nacini'na roh ja'dalaka Isa, napa'jari ka'doro'mi kalenna anjo anaka, sa'genna tu'guru' anjo anaka anggulung-gulung ri buttaya. A'busai bawana. 21 Akkuta'nammi Isa ri manggena anjo anaka nakana, “Siapami sallona appakamma anne?” Appialimi manggena nakana, “Pakkaramula ri ca'dina! 22 A'mole-molemi anjo roh ja'dalaka ero' ambunoi, naalle natu'gurang antama' ri pepeka siagang antama' ri je'neka. Mingka punna akkulleKi' antulungi, Kikamaseang sai siagang Kitulung sai!” 23 Appialimi Isa Nakana, “Apa kanannu? Punna akkulleKi'? Yangaseng-ngasenna akkullei, assala' tappa' taua!” 24 Ammarrang lompomi linta' manggena anjo anaka, nakana, “O Batara, tappakka', mingka kurang jarreki tappakku. Kitulunga' sollanna a'jari jarre' tappakku!” 25 Wattunna Nacini' Isa, angkanaya appakkaramulami jai tau battu a'lipung, Nasuromi a'lampa anjo roh ja'dalaka. Nakana, “E kau roh tongoloka siagang pepea, Kuparentakangko assulu' battu lalang ri kalenna anne anaka, siagang tea' laloko antamakki pole!” 26 Ammarrammi anjo roh ja'dalaka, nampa napa'jari ka'doro' kalenna anjo anaka, nampa assulu'. A'jari pi'lasa'mi anjo anaka, sangkamma maya' nicini', sa'genna nakana ngaseng taua, “Matemi!” 27 Mingka Nata'gala'mi Isa limanna anjo anaka, na Nabantu ambangung. Nambangummo anjo anaka. 28 Ri wattunna nia'mo Isa ri balla', na Ia mami siagang ana'-ana' gurunNa, akkuta'nammi ana'-ana' gurunNa angkana, “Apa saba'na nakitakkullea ikambe ambongkai anjo roh ja'dalaka?” 29 Appialimi Isa Nakana, “Anjo setang kammaya takkulleai nibongka manna pole antekamma carana, pantaranganna appala' doanga.” 30 Nabokoimi Isa siagang ana'-ana' gurunNa anjo tampaka, napatulusu' lampana angngolo ri Galilea. Taerokai niasseng ri taua angkana kemaei, 31 nasaba' sitabangi Naajara' ana'-ana' gurunNa, “Lanipassareangi Ana' Ma'rupataua mae ri koasana tu linoa, nampa nibuno; mingka ri makatalluna alloa lattallasa' poleangi!” Kammaminjo kananNa Isa. 32 Tanapahangai ana'-ana' gurunNa Isa anjo apa Napangngajaranga, mingka mallaki ke'nanga akkuta'nang ri Ia. 33 Battumi ke'nanga mange ri Kapernaum. Ri wattunna nia'mo ri balla', akkuta'nammi Isa ri ana'-ana' gurunNa Nakana, “Apa nupa'geakkang sumpaeng ri aganga?” 34 Tena nappiali ke'nanga. Nasaba' a'gea'-geaki ke'nanga sumpaeng ri aganga passala' inai ri ke'nanga kaminang lompo. 35 Ammempomi Isa nampa Nakio' anjo sampuloa anrua ana' gurunNa. Nakanamo ri ke'nanga, “Inai-nai ero' a'jari lomoro' se're, musti napa'jari tu ri bokoi kalenna siagang a'jari palayangi ri sikontu taua.” 36 Nampa angngalle Isa sitau ana'-ana' ca'di naNasuro anjo ana' ca'dia ammenteng ri dallekanna ke'nanga. Naraka'mi Isa anjo ana' ca'dia nampa Nakana ri ana'-ana' gurunNa, 37 “Inai-nai antarimai ana'-ana' kammaya anne nasaba' iNakke, akkulle nikana iNakkemi natarima. Na inai-nai antarimA', teai Nakke bawang natarima, mingka akkulle nikana natarima tommi ManggeKu, assuroA'.” 38 Nakanamo Yohanes ri Isa, “O Pa' Guru, nia' le'ba' nacini' ikambe tau ambongkai setanga lalang arenTa. Na kupisangkai, nasaba' teai taunta.” 39 Mingka angkanami Isa, “Teako pisangkai. Nasaba' tenanniakka tau a'gau' appakalannasa' lalang arengKu, akkulle ampau kodiA'. 40 Nasaba' tau tenaya namusuki', akkulle nikana a'jari agangi ri katte. 41 U'rangi! Inai-nai assareko je'ne' inung lanri ana' gurunnako Karaeng Mappasalamaka, mattantu lanagappai pahalana.” 42 “Inai-nai a'jari passabakkang na'jari tenamo natappa' ri Nakke kalase'renna tau ca'di kammaya anne, bajikangangi punna nigentungi batu kallonna nampa nibuang naung ri tamparanga. 43 Punna passala' limannu nu'gau' dosa, polongi anjo limannu assala' salamakko, kala anggannaka rua limannu mingka antamakko ri naraka, ri pepe' a'rinraya satunggu-tungguna. 44 Anjoreng takkulleai mate rinrana pepeka, siagang takkulleai mate oloka. 45 Siagang punna passala' bangkennu nu'gau' dosa, polongi anjo bangkennu. Bajikangangi tenaya siali bangkennu assala' salamakko, kala anggannaka rua bangkennu mingka nipelakko antama' ri naraka. 46 Anjoreng takkulleai mate rinrana pepeka, siagang takkulleai mate oloka. 47 Punna passala' matannu nudoraka, kocciki assulu' anjo matannu! Bajikangangi tenaya siali matannu assala' antamakko ri Lino BeruNa Allata'ala, kala anggannaka rua matannu mingka nipelakko antama' ri naraka. 48 Anjoreng takkulleai mate rinrana pepeka, siagang takkulleai mate oloka. 49 Sikontu taua lanitangkasi siagang pepe', sanrapang koro'bang olo'-oloka nitangkasi siagang ce'la. 50 Anjo ce'laya bajiki; mingka punna a'jari la'bamo, maka akkulle iji nipa'jari ce'la poleang? Jari paralluko sanrapang ce'laya. Sikatutuiko lalang ri tallasa'nu.”
1 Nampa Nabokoi Isa anjo tampaka, Na'lampa mange ri daera Yudea, siagang ri daera ba'leanna Binanga Yordan. Battumi pole tau jaia a'lipung ri tammulilina Isa. Na kamma biasa, Naajara'mi Isa ke'nanga. 2 Nia'mo siapa are tu Farisi battu todong ero' ampa'boyangi kasalang Isa. Akkuta'nammi ke'nanga angkana, “Manuru' atoranga ri agamata, maka akkulleji taua antallaki bainenna?” 3 Appialimi Isa Nakana, “Apa naparentakangko Musa?” 4 Appialimi ke'nanga angkana, “Nakellaiji Musa taua antallaki bainenna, assala' napapparekang rolong sura' talla'.” 5 Nakanamo Isa ri ke'nanga, “Nanatulisi' Musa anjo parenta kammaya, lanri sukkara'nu ngaseng niajara'. 6 Mingka ri pakkaramulanna, ri wattu Napa'jarina Allata'ala rupataua, nipaui angkanaya, ‘Napa'jari Allata'ala ke'nanga bura'ne siagang baine. 7 Iaminjo saba'na na lanabokoi anrong-manggena tu bura'nea nampa mange anjari se're siagang bainenna, 8 jari anjo rupataua anjari se'remi.’ Jari tenamo narua ke'nanga, passangalinna se're mami. 9 Iaminjo saba'na, na apa le'baka Napa'jari se're Allata'ala, takkulleai napasisa'la rupataua!” 10 Antama'namo ke'nanga ri balla', napakkuta'nangammi ana'-ana' gurunNa Isa anjo passalaka. 11 Nakanamo Isa ri ke'nanga, “Inai-nai antallaki bainenna, nampa a'bunting poleang siagang baine maraeng, a'gau' salimara'mi siagang anjo bainea. 12 Kamma todong inai-nai baine antallaki bura'nenna, nampa a'bunting siagang bura'ne maraeng, a'gau' salimara' tommi.” 13 Nia' siapa are tau angngerang ana'-ana' mae ri Isa sollanna Nabarakkaki ke'nanga. Mingka nikalarroimi ke'nanga ri ana'-ana' gurunNa Isa. 14 Nacini'na Isa anjo kammaya, larromi Isa ri ana'-ana' gurunNa. Nakana ri ke'nanga, “Lappassangi anjo ana'-anaka battu mae ri Nakke! Teako pisangkai, nasaba' tau kammaya ngaseng minne a'jaria umma'Na Allata'ala. 15 U'rangimi anne! Inai-nai tena na'jari sanrapang anne anaka andallekang ri Allata'ala, takkulleai a'jari umma'Na Allata'ala.” 16 Le'baki akkana kamma Isa, Naraka'mi anjo ana'-anaka, nampa massing Napadongkoki lima naNabarakkaki ngaseng ke'nanga. 17 Wattunna Napatulusu' pole lampaNa Isa, nia'mo sitau lari-lari battu mae ri Ia. Su'ju'mi anjo taua ri dallekanNa Isa nampa akkuta'nang nakana, “O Guru baji', apa musti kugaukang sollanna akkulle kugappa katallassang sitojennaya siagang satunggu-tungguna?” 18 Akkuta'nammi Isa Nakana, “Angngapa nukana bajikKa'? Tena tau baji', pantaranganna Allata'ala. 19 Nuassemmi sikamma parentaNa Allata'ala angkanaya, ‘Teako ammunoi; teako a'gau' assalimarri; teako a'lukkaki; teako assa'bi balle-ballei; teako annipui; pakala'biriki manggenu siagang amma'nu.’ ” 20 Nakanamo anjo taua, “Pa' Guru, sikontu anjo parenta kammaya kuturukimi pakkaramula ri wattungku rungka.” 21 Nacinikimi Isa anjo taua na Nakamaseang. Nampa Nakana ri ia, “Se'repi nuparalluang. A'lampamako ambalukangi barang-barannu; nampa nupassareang doe'na mae ri tu kasi-asia, nanugappa pa'barang-barangang niaka ri suruga. Le'baki anjo ammotere' mako mae numminawang ri Nakke.” 22 Nalangngere'na akkana kamma Isa, la'bami nyawana anjo taua. A'lampami ambokoi anjo tampaka na susa nyawana lanri akkalumanynyang sikali. 23 Nacinikimi Isa ana'-ana' gurunNa, nampa Nakana ri ke'nanga, “Sukkara' sikali tau kalumanynyanga la'jari umma'Na Allata'ala!” 24 Lannasa'mi ana'-ana' gurunNa allangngereki anjo apa Napaua Isa. Mingka Nakanamo pole Isa, “Ana'-anakKu, sukkara' memangi taua a'jari umma'Na Allata'ala! 25 La'bi lomoangangi sikayua unta antama' ri so'bolo' jarunga kala tau kalumanynyanga antama' ri Lino BeruNa Allata'ala.” 26 A'jari lannasa' ngasemmi ana'-ana' gurunNa allangngereki kana-kana kammana Isa. Sa'genna sikuta'-kuta'nammi para ia ke'nanga angkana, “Punna kamma, inaimi lakkulle salama'?” 27 Nacinikimi Isa ke'nanga nampa appiali Nakana, “Untu' rupataua tena nantama' ri akkala'; mingka untu' Allata'ala tena takkulle anjari.” 28 Nampa nakanamo Petrus, “Cini'mi, ikambe ngaseng le'ba' nibokoimi sikontu apa-apanta lanri untu' amminawang ri Katte Bapa'.” 29 Nakanamo Isa, “Patappa'mi angkanaya: inai-nai ambokoimi balla'na, yareka sari'battang bura'nena, yareka sari'battang bainena, yareka amma'na, yareka manggena, yareka ana'-ana'na, yareka tanana siagang kokonna passabakkang Kabara' Baji' battua ri Allata'ala, 30 lajaiangangi sallang natarima naia ri kamma-kammaya anne. La'lappi sibilangngangi balla' nagappa, sari'battang bura'ne, sari'battang baine, amma', ana'-ana', tana siagang koko; manna mamo najai passessa nakasia' ri kamma-kammaya anne. Mingka ri jammang labattua sallang, lanagappami katallassang satunggu-tungguna. 31 Mingka jai tu ri dallekang kamma-kamma anne, nala'jari tu ri boko dudu sallang. Siagang jai tu ri boko kamma-kamma anne, nala'jari tu ri dallekang dudu sallang.” 32 Sitabangi a'jappa Isa siagang ana'-ana' gurunNa mange ri Yerusalem. Ri dallekangi Isa a'jappa, nalussa' ngaseng ana'-ana' gurunNa. Kammayatompa tau niaka amminawang ri bokoNa Isa malla' ngaseng tommi. Nampa Nakio'mo pole ana'-ana' gurunNa Isa mange anynya'la', na Napauang ke'nanga apa lakajarianga sallang ri KalenNa Isa. 33 Nakana, “Pilangngeri anne; kamma-kamma anne a'lampa maki' mange ri Yerusalem. Anjoreng lanipassareammi Ana' Ma'rupataua mae ri imang-imang kapalaya siagang guru-guru agamaya. Lanihukkung matei, nampa nipassareang mae ri tu kapereka. 34 Lanipare' kare'-karenangi ri ke'nanga, nipi'rui, nisessai, nampa nisalli' ri ke'nanga. Mingka ri makatalluna alloa, lattallasa' poleangi.” 35 Battumi ana'-ana'na Zebedeus mae ri Isa, iamintu Yakobus siagang Yohanes. Nakana ke'nanga, “O Bapa' Guru, nia' ero' napala' ikambe ri Katte, naporo' akkulle laloja Kigaukang untu' ikambe.” 36 Akkuta'nammi Isa Nakana, “Apa nukaeroki laKugaukang ri kau sipa'rua?” 37 Appialimi ke'nanga angkana, “Eroki kambe ammempo ri sa'ri kananTa siagang ri sa'ri kairinTa punna ammempoKi' ri empoang kala'biranTa.” 38 Nakanamo Isa ri ke'nanga, “Tanuassengai antu apa nupalaka. Maka lanukulleji angnginung battu ri pangnginungang rassia passessa, laKuinunga? Siagang maka lanukulleji antama' ri pammantangang jaia passessa, laKupantamakkia?” 39 Appialimi ke'nanga angkana, “Nakulleji ikambe.” Jari angkanami pole Isa ri ke'nanga, “Langnginung memang jako battu ri pangnginungang rassia passessa laKuinunga. Siagang lantama' tonjako ri pammantangang jaia passessa laKupantamakkia. 40 Mingka passala' inai lammempo ri sa'ri kanangKu siagang ri sa'ri kairingKu, anjo teai Nakke lampattantui. Allata'ala lampattantui angkana inai-nai lammempo ri anjo tampaka.” 41 Nalangngere'na anjo sampuloa ana'-ana' gurunNa Isa maraenganga, larromi ke'nanga ri Yakobus siagang Yohanes. 42 Jari Nakio' ngasemmi Isa ke'nanga, nampa Nakana ri ke'nanga, “Nuassengi angkanaya pamimping-pamimpinga siagang tau malompona bansa tenaya naassengi Allata'ala, najallakkangi ra'ya'na. 43 Mingka takkulleako kau appakamma anjo. Passangalinna inai-nai ero' a'jari tau malompo musti a'jari palayangi ri tangnga-tangnganu. 44 Mingka inai-nai ri kau ero' a'jari tau ri dallekang dudu, musti napa'jari atai kalenna mae ri sikontu taua. 45 Nasaba' manna Ana' Ma'rupataua tena Nabattu untu' nilayani. Mingka battui untu' allayani, siagang untu' ampassareangi nyawaNa sollanna akkulle Napasalama' tau jaia.” 46 Battumi ke'nanga mange ri Yerikho. Na ri wattunna Nabokoi Isa siagang ana'-ana' gurunNa, kammayatompa tau jaia anjo tampaka, nia'mo se're tau buta ammempo appala'-pala' ri biring aganga. Arenna nikana Bartimeus, ana'na Timeus. 47 Ri wattunna nalangngere' angkanaya Isa battu ri Nazaret anjo numaloa, akkiok-kio'mi nakana, “O Isa, Ana'na Daud! Kamaseanga' kodong!” 48 Nikalarroimi siagang nisuromi ammakkang ri tau jaia. Mingka pila' akkio' lompomi pole nakana, “O Ana'na Daud, kamaseanga' kodong!” 49 Ammantammi Isa nampa Nakana, “Kioki mae.” Jari nakio'mi ke'nanga anjo tau butaya. Nakana ke'nanga ri ia, “Sannang mako! Ambangungko nai', Nasuro kiokko Isa!” 50 Napasambilami jubana anjo tau butaya, nampa akkaro-karo ammenteng na'lampa mae ri Isa. 51 Akkuta'nammi Isa ri ia Nakana, “Apa nukaeroki Kugaukang ri kau?” Appialimi anjo tau butaya nakana, “O Pa' Guru, erokka' accini'.” 52 Nakanamo Isa, “A'lampamako, nipakabaji' mako ri tappa'nu.” Anjo wattua accini' memammi silalonna anjo tau butaya. Nampa a'lampa amminawang ri Isa.
1 Wattunna a'reppese'mo mange ri Yerusalem, anrapi'mi ke'nanga ri kota Betfage siagang Betania, ri pungku'na Bonto Zaitun. Anjoreng Nasuroi Isa rua ana' gurunNa a'lampa riolo. 2 Nakana Isa ri ke'nanga, “A'lampamako mange ri anjo kampong niaka ri dallekannu. Punna antamakko anjoreng ri kamponga nia' lanucini' sikayu keledai rungka tappaukang, tenayapa nale'ba' nibae ri taua. Lappassangi anjo keledaia nampa nuerang mae anrinni. 3 Na punna nia' tau akkuta'nang ri kau angkana apa saba'na nanulappassang anjo keledaia, angkana mako, ‘Naparalluangi Batara, siagang lalinta'ji Napoterang.’ ” 4 A'lampami anjo ruaya ana' gurunNa Isa, nanagappamo anjo ana' keledaia tappaukang ri pakke'bu' balla' ri biring aganga. Nalappassammi ke'nanga anjo ana' keledaia. 5 Akkuta'nammi ri ke'nanga tau niaka anjoreng ammenteng angkana, “He, apa nupare' antu? Angngapa nulappassangi antu ana' keledaia?” 6 Appialimi ke'nanga, sangkamma batena le'baka nipauangi ri Isa. Jari tenamo nipisangkai ke'nanga angngerangi anjo ana' keledaia. 7 Ri wattunna battumo ke'nanga mae ri Isa nalapakkimi jubana ke'nanga dongko'na anjo keledai. Le'baki anjo nai'mi Isa a'bae. 8 Jaimi tau ampalaparaki jubana ri agang laNaoloa Isa. Siagang nia' tommo tau angngalle tangke-tangke kayu ri kokoa, nampa napasiara' ri aganga. 9 Jaimi tau anrurungangi. Nia' a'jappa ri dallekanNa, siagang nia' a'jappa ri bokoNa. Akkio'-kioki ke'nanga angkana, “Pujimi Allata'ala! Nibarakkakimi Ia battua lalang arenNa Batara! 10 Ammenteng kassa'mi pamarentahanNa labattua, pamarentahanna Daud boeta. Pujimi Allata'ala Kaminang Tinggia!” 11 Nampa battumi Isa mange ri Yerusalem. Antama'mi ri Balla'Na Batara. Attammumi Naciniki ngaseng apa niaka ri tammulilinNa. Mingka lanri a'birimmi sassanga, a'lampami mange ri Betania siagang anjo sampuloa anrua ana' gurunNa. 12 Ammukona, sitabanna a'jappa ke'nanga assulu' battu ri Betania, cipuru'mi Isa. 13 Nia'mo Nacini' battu bella sipoko' ara sannaka copponna leko'na. Jari mangemi anjoreng ero' anciniki bara' nia'ja rapponna. Mingka wattunna battu mange anjoreng, tena sikali rapponna Nacini'. Sangge leko'na bawang coppong, nasaba' anjo wattua teaipi wattunna a'rappo araya. 14 Nakanamo Isa ri anjo poko' araya, “Appakkaramula ri kamma-kammaya anne, tenanniakkamo manna sitau langkanrei rapponnu!” Nalangngereki ana'-ana' gurunNa anjo apa Napaua Isa. 15 Battumi ke'nanga mange ri Yerusalem. Na'lampamo pole Isa mange ri Balla'Na Batara. Nabongka ngasemmi tau niaka a'balu'-balu' anjoreng. Nabulintakkang ngasemmi mejang-mejanna pasambe doeka, kammayatompa bangko-bangkona pabalu' jangang-jangang bodobangkenga. 16 Siagang tenanniakka manna sitau Napa'biang numalo angngerang manna apa-apa mamo ri parang lakkenna Balla'Na Batara. 17 Nampa Naajara' ngaseng tau niaka anjoreng. Nakana, “Nia' tattulisi' lalang ri Kittaka angkana: Nakana Allata'ala, ‘BallakKu laniarengi tampa' pappala' doangang untu' sikontu bansaya.’ Mingka ikau ngaseng nupa'jari pa'ru'mungang paella'!” 18 Nalangngereki imang-imang kapalaya siagang guru-guru agamaya anjo kana-kananNa Isa. Jari appakkaramulami ke'nanga a'boya akkala' ero' ambunoi Isa. Malla'mi ke'nanga ri Ia, lanri lannasa' ngasemmi taua allangngereki apa-apa Napangngajarranga. 19 Ri wattunna la'birimmo bangngi a'lampami Isa siagang ana'-ana' gurunNa ambokoi anjo kotaya. 20 Ammukona bari'basa', ri wattunna nalaloi ke'nanga anjo poko' araya, matemi nacini' anjo poko' araya sa'genna aka'-aka'na. 21 Nau'rangimi Petrus apa le'baka kajariang ri subangngi. Jari akkuta'nammi Petrus ri Isa nakana, “O Bapa' Guru, Kicini' sai! Matemi anjo poko' ara le'baka Kitunrai!” 22 Appialimi Isa Nakana, “Tappa' mako ri Allata'ala. 23 Kapunna tappakko ri Allata'ala, akkulleko angkana ri anne bontoa, ‘Ta'angkakko nutassambila antama' ri tamparanga!’ Tena tanipa'jariannu, assala' tena nubata-bata siagang tappakko angkanaya lakajariang tojeng-tojengi numinasaia. 24 Jari u'rangi angkanaya: Punna appala' doangko appala' apa-apa mamo, tappa' mako angkanaya Nasare mako Allata'ala, siagang lanugappami anjo apa nupalaka. 25 Siagang punna appala' doangko, mingka tena nasannang nyawanu ri se'reang tau, pammopporangi rolong anjo taua, sollanna Napammopporang tongi Manggenu ri suruga dosa-dosanu. 26 Punna tena nupammopporangi dosana parannu tau, tena todong na laNapammopporang Manggenu ri suruga dosa-dosanu.” 27 Ammotere'mi pole ke'nanga mange ri Yerusalem. Na ri wattunna a'jappa Isa angnginroi lalang Balla'Na Batara battumi mae ri Ia imang-imang kapalaya, guru-guru agamaya, kammayatompa pamimping-pamimpinna tu Yahudia. 28 Akkuta'nammi ke'nanga angkana, “Apa saba'na nakkulle Nugaukang ngaseng anjo sikammaya? Inai assareKo koasa?” 29 Appialimi Isa Nakana, “Ero' tongA' akkuta'nang ri kau ngaseng. Pialimi rolong pakkuta'nangKu nampa Kupauangko angkana inai assareA' koasa nakkulle Kugaukang ngaseng sikamma anjo nupakkuta'nanganga. 30 Lanri koasa apa nanaje'ne' taua Yohanes; lanri koasaNa Allata'ala yareka koasa rupatau?” 31 Sipa'bicarami anjo imang-imang kapalaya siagang pamimping-pamimpinna tu Yahudia. Nakanamo para ia todong ke'nanga, “Punna nikana, ‘lanri koasaNa Allata'ala,’ Nakana sallang, ‘Angngapa natena nutappa' ri Yohanes?’ 32 Mingka susa tongi lanikana, ‘Lanri koasa rupatau.’ ” Nasaba' mallaki ke'nanga ri tau jaia lanri napatappaki tau jaia ma'nassana na'bi anjo Yohanes. 33 Jari appialimi ke'nanga angkana, “Tanaassengai kambe.” Nakanamo Isa ri ke'nanga, “Punna kamma, tena todong Kukkulle ampauangko angkana lanri koasa battu kemae nakkulle Kugaukang ngaseng sikamma anjo nupakkuta'nanganga.”
1 Nampa appakkaramulami Isa a'bicara pangngebarang mae ri anjo imang-imang kapalaya, guru-guru agamaya kammayatompa pamimping-pamimpinna tu Yahudia. Nakana Isa, “Nia' se're tau a'lamung anggoro' ri kokoa, nampa nakalli' ri tammulilina. Le'baki anjo angngekemi kali'bong eroka napake ammacco' je'ne' anggoro'. Nampa appare' balla' pakkammikang. Le'baki anjo napappitesangammi anjo koko anggoroka mae ri siapa are pajama koko, nampa a'lampa ri se'reang pa'rasangang maraeng. 2 Ri wattunna narapi'mo wattunna lanialle rapponna anjo anggoroka, nasuromi palayanna anjo patanna koko mange ampalaki tesanna ri anjo pajamaya ri kokonna. 3 Mingka najakkala'mi pajamaya anjo palayang nisuroa. Nampa naba'ji ke'nanga siagang nasuro ammotere' natena apa-apa nasareangi. 4 Jari nasuromi pole palayanna maraenga anjo patanna koko. Mingka napalu-paluimi pajamaya ulunna anjo palayanga, nampa nabongka a'lampa siagang napakka'-pakkanai. 5 Nasuromi pole sitau palayanna maraenga anjo patanna koko. Mingka nabunomi ke'nanga anjo palayanga. Na kammaminjo tuli nagaukang ke'nanga mae ri palayang maraenga: nia' naba'ji, na nia' todong nabuno. 6 Inai mami akkulle nasuro kamma-kamma anne anjo patanna koko? Sitau mami ammantang, iamintu ana' kalenna, sannaka nakamaseanna. Jari kala'busanna nasuromi anjo ana' kalenna mange anjoreng ri pajama-pajamaya. Napikkiriki anjo patanna koko nakana, ‘Mattantu lanapakala'biriki anakku.’ 7 Mingka massing nakanamo anjo pajamaya para ia angkana, ‘Iaminne warisi'na. Umba nibunoi, sollanna akkulle nialle warisi'na!’ 8 Jari najakkala'mi anjo anaka, nampa nabuno. Nampa napela' maya'na assulu' pantaranganna anjo kokoa.” 9 Le'baki anjo akkuta'nammi Isa Nakana, “Maka apa lanagaukang anjo patanna koko? Mattantu labattui na nabuno ngaseng anjo pajamaya. Nampa napappitesangang anjo kokoa mae ri pajama koko maraenga. 10 Tantu le'ba'mi nubaca anne aya' niaka ri Kittaka angkanaya, ‘Batu tenaya napakei tukang-tukang batua a'jarimi batu majarre'na bangunanga. 11 Iaminne Napareka Allata'ala; teai sipato' ga'gana!’ ” 12 Nalangngere'na pamimping-pamimpinna tu Yahudia anjo pangngebaranga naassemmi angkanaya kalenna ke'nanga nataba anjo pangngebaranga. Jari usahami ke'nanga ero' ambunoi Isa. Mingka mallaki ke'nanga ri tau jaia. Jari a'lampami ke'nanga ambokoi Isa. 13 Nia' siapa are tu Farisi siagang siapa are taunna Herodes nisuro mae akkuta'nang ri Isa, ero' napa'boyang kasalang. 14 Battumi ke'nanga mae ri Isa nakkuta'nang angkana, “Bapa' Guru, naassengi kambe angkanaya iKatte tau lambusukKi', siagang manna inai tena Kijampangi panggappana. Punna angngajarakKi' Kipaui silambusu'na apa ero'Na Allata'ala mae ri rupataua. Tena kimmile-mile tau. Jari Kipau sabeki ri kambe, ‘Manuru' ri atoranna agamata, maka akkulleji taua a'bayara' sima mae ri Karaenga yareka tena? Apaka musti nibayaraki anjo simaya yareka tena?’ ” 15 Mingka Naassengi Isa angkanaya munapeki ke'nanga. Jari appialimi Isa Nakana, “Angngapa nuero' ampa'boyangA' kasalang? PicinikiangsA' se're doe' pera'.” 16 Nasaremi ke'nanga Isa se're doe' pera'. Nampa akkuta'nammi Isa Nakana, “Inai pata gambara' siagang areng anne?” Appialimi ke'nanga angkana, “Karaenga.” 17 Nakanamo Isa, “Punna kamma, sareangi Karaenga apa-apanna Karaenga, siagang sareangi Allata'ala apa-apanNa Allata'ala.” Lannasa'mi ke'nanga allangngereki anjo pappialinNa Isa. 18 Nia' siapa are tu Saduki battu mae ri Isa. (Anne ke'nanga tena natappa' angkanaya lattallasa' poleangi tau matea.) 19 Nakanamo ke'nanga ri Isa, “Bapa' Guru, nia' atorang natulisi' Musa untu' ikatte angkanaya: ‘Punna nia' sitau bura'ne mate natena ana'na, nania' sari'battanna bura'ne, anjo sari'battang bura'nena musti nabuntingi anjo le'ba' bainenna sollanna nia' sossorang nasareangi anjo tau mateamo.’ 20 Le'baki nia' tuju bura'ne assari'battang. A'buntimmi anjo bungasaka, mingka matei, natena ana'na. 21 Nampa anjo baine nabokoia nibuntingimi ri sari'battang makaruana anjo tau mateamo. Mingka mate tongi anjo sari'battang makaruana, na tena todong ana'na. Kammatommi anjo kajarianga ri sari'battanna makatallua, 22 sa'genna mange ri sari'battanna makatujua, a'bunting ngasemmi siagang anjo bainea. Mingka mate ngasengi, natena ngaseng ana'na. Kala'busanna mate tommi anjo bainea. 23 Jari punna attallasa' poleang sallang tau matea, inaimi pata baine anjo bainea. Nasaba' anjo bura'ne tujua le'ba' ngasemmi a'bunting siagang anjo bainea!” 24 Appialimi Isa Nakana, “Sala pahang sikaliko antu. Nasaba' tena nupahangi bonena Kittaka siagang koasaNa Allata'ala. 25 Nasaba' punna attallasa' poleang tau matea, tenamo nala'bunting pole. Passangalinna lattallasa' kamma mami malaekaka ri suruga. 26 Na passala' attallasa' poleanna tau matea, tena le'bakapi nubaca lalang ri Kitta' Musa passala'na anjo rompo' a'rinraya? Lalang anjo ri Kittaka nia' tattulisi' angkanaya le'baki angkana Allata'ala ri Musa Nakana, ‘INakkemi Allata'alana Abraham, Allata'alana Ishak, siagang Allata'alana Yakub.’ 27 Anjo Allata'ala, teai Allata'alana tau matea. Iami Allata'alana tau attallasaka. Jari sala pahang sikali ngasengko antu!” 28 Nampa nia'mo sitau guru agama battu ampilangngeri pa'bicaranNa Isa siagang anjo tu Sadukia. Nalangngere'mi anjo guru agamaya angkanaya baji' sikali batena Isa appiali ri anjo tu Sadukia. Jari akkuta'nammi ri Isa nakana, “Kereanga parenta kaminang parallu ri sikontua parentaNa Allata'ala?” 29 Appialimi Isa Nakana, “Parenta lomoro' se'rea iamintu angkanaya: ‘Pilangngerimi ikau bansa Israel! Karaeng Allata'alata, Batara se're-se'rea. 30 Kamaseangi Karaeng Allata'alanu ilalang sitepu atinnu, siagang sitepu pa'mai'nu, siagang sitepu akkala'nu, kammayatompa sitepu pakkullenu.’ 31 Parenta makaruaya iamintu: ‘Kamaseangi parannu tau, sangkamma batenu angkamaseangi batangkalennu.’ Tenamo parenta maraeng la'bi paralluangang naanne parenta ruaya.” 32 Nampa nakanamo anjo guru agamaya ri Isa, “Annaba sikali Pa' Guru! Memang annabai kananTa angkanaya: IKattemi Karaeng Allata'ala tenaya ruanna, tenamo Allata'ala pantaranganTa. 33 Na sikontu taua musti nakamaseangi Allata'ala ilalang sitepu atinna, siagang sitepu akkala'na, kammayatompa sitepu pakkullena. Siagang musti nakamaseang tongi paranna tau sangkamma batena angkamaseangi batangkalenna. Bajikangangi anjo kala assarea koro'bang nitunua yareka koro'bang maraenga mae ri Allata'ala.” 34 Baji' sikalimi Nalangngere' Isa batena appiali anjo guru agamaya. Jari Nakanamo Isa ri ia, “A'birimmako a'jari umma'Na Allata'ala.” Le'baki anjo tenamo manna sitau barani akkuta'nang pole ri Isa. 35 Ilalang angngajara'Na Isa ri Balla'Na Batara, akkuta'nammi ri tau niaka hadere' angkana, “Antekamma nakkulle napau guru-guru agamaya angkanaya anjo Karaeng Mappasalamaka sossoranna Daud? 36 Na kalenna Daud, lanri pangngajara'Na RohNa Allata'ala, le'baki angkana, ‘Nakana Batara ri Bataraku: Ammempoko ri sa'ri kanangKu Sa'genna Kusuro ngaseng balinNu akkulantu' ri dallekanNu.’ 37 Jari punna nakio' ‘Batara’, Daud anjo Karaeng Mappasalamaka, antekamma nakkulle nikana sossoranna Daud?” Anjo tau jaia lalang ri Balla'Na Batara sannang ngasemmi nyawana allangngereki bateNa Isa angngajara'. 38 Nakana Isa ri ke'nanga: “Tutuko mae ri guru-guru agamaya. Sarro nangai ke'nanga ammake juba-juba la'bu a'jappa mange-mange siagang sarro nangai ke'nanga nipakalompo ri pasa'-pasaraka. 39 Nangai ke'nanga ammempo ri tampa'-tampa' tau nipakalompoa lalang ri balla' sambayanga yareka ri passua'-suarranga. 40 Sarro nangai tongi ke'nanga natipu janda-jandaya siagang naalleang balla'na. Na sollanna akkulle natongkoki anjo kaja'dallanna ke'nanga, sarro nangai ke'nanga nala'bu-la'bui punna assambayangi. Mingka sanna' battala'na sallang hukkungang lanagappaya ke'nanga!” 41 Ri wattunna ammempo Isa ri dallekanna pammoneang passidakkaya ri Balla'Na Batara, Naciniki tasse're-se'remi taua appantama' doe' passidakka anjoreng ri pammoneang passidakkaya. Jai tau kalumanynyang appantama' doe' sijaiang. 42 Nampa nia' tommo battu sitau janda kasi-asi appantama' rua doe' tambaga, iamintu doe' kaminang ca'dia anggaranna. 43 Nakio'mi ana'-ana' gurunNa Isa nampa Nakana ri ke'nanga, “Parhatikangi anne: Anjo janda kasi-asia jaiangangi napantama' passidakka ri anjo pammoneang passidakkaya kala yangasenna anjo tau maraenganga. 44 Nasaba' anjo ke'nanga palla'bi-la'biannaji battu ri pa'barang-baranganna napassareang. Mingka anjo jandaya, manna nakasi-asi, mingka napassareang ngasemmi apa-apa niaka ri ia, sannaka naparalluina untu' katallassanna.”
1 Ri wattunna Nabokoi Isa Balla'Na Batara, nia'mo sitau ana' gurunNa angkana, “Bapa' Guru, Kicini' sai anjo bangunanga ngaseng. Kiparhatikang sai batu-batunna sanna' ngaseng ga'gana!” 2 Appialimi Isa Nakana, “Sai nucini' ngasengi bangunang lompoa? Tena manna se're lammantang tassusung anjo batu-batua ri pammantanganna ri anjo bangunang-bangunanga. Nasaba' laniruntung ngasengi.” 3 Nampa a'lampa Isa mange ri Bonto Zaitun, nammempo ri tampa' sidallekanga siagang Balla'Na Batara. Battumi Petrus, Yakobus, Yohanes siagang Andreas angngagangi a'bicara kale-kalenna. 4 Nakana ke'nanga ri Ia, “Kipaumi ri kambe, ringngapanna nalakajariang anjo Kipakkanaya? Siagang apa la'jari pammatei punna narapi'mo wattunna?” 5 Appialimi Isa Nakana, “Tutu laloko, sollanna tena nitipuko. 6 Nasaba' lajai tau battu ambalukangi arengKu na nakana, ‘Inakke minne!’ Sa'genna jai tau natipu. 7 Punna nia' nulangngere' sa'ra pa'bundukang, yareka kabara' pa'bundukang, teako mallakki. Yangasenna anjo lakajariang memangi, mingka tanarapikapi wattu kiamaka. 8 Se'rea bansa la'bunduki siagang bansa maraenga. Se'rea pa'rasangang lanabunduki pa'rasangang maraenga. Kemae-kemae lata'ge'gosoki buttaya siagang lanaallei taua kacipurang. Na yangasenna anjo nampami pammatei pakkaramulanna kasusaanga siagang sessaya sanrapang pa'risi' nakasiaka tu baine eroka ammana'. 9 Paralluko tutu, nasaba' lanijakkalakko siagang lanire'resangko mange ri pangadelang agamaya. Laniba'jiko lalang ri balla' sambayanga. Lanierangko mange ri dallekanna tau koasaya siagang kara'-karaenga, passabakkang amminawangko ri Nakke. Na iaminjo la'jari kasampatang ri kau untu' la'jari sa'bingKu mae ri ke'nanga. 10 Anjo Kabara' Baji' battua ri Allata'ala musti nipa'la'bangi rolong mae ri sikontu bansaya. 11 Na punna nijakkalakko siagang nierangko mange ri pangadelanga, teako bata-batai angkanaya antekamma batenu la'bicara. Nasaba' punna narapi'mo wattunnu la'bicara, labattui RohNa Allata'ala angngajarakko a'bicara. Teai bicarannu lanupau, mingka bicara battu ri RohNa Allata'ala. Jari pau mami bicara nipangngajarranga ri kau. 12 Lanapassareangi taua sari'battang kalenna nasuro buno; kammayatompa se'rea mangge lanapassareangi ana' kalenna nasuro buno. Ana'-anaka lanaewai siagang lanapassareangi nasuro buno anrong-manggena. 13 Lanikabirisiko ri taua ngaseng, passabakkang amminawannu ri Nakke. Mingka inai-nai attahang sa'genna kala'busang tallasa'na, iami lanipasalama'.” 14 “Nia' sallang lanucini' ammenteng ‘Kaja'dallang Lammanra'-manrakia’ ammenteng ri tampa' tasiratanga napammentengi. (Tau ammacaya parallui napahang apa battuanna anne!) Anjo wattua, tau niaka ri Yudea parallui lari nai' ri buluka. 15 Tau niaka irate ri pattongko'na ballaka teami naungi siagang antama' ri balla' angngalle apa-apa. 16 Tau niaka ri kokoa teami ammoteri angngallei bajunna. 17 Anjo allo-alloa teai sipato' appakamalla'na mae ri bai'-baine tiananga siagang bai'-baine appasusua ana' lolo! 18 Appala' doangko sollanna tena laloja nawattu bosi nakajariang anjo passalaka. 19 Ri wattu battuna anjo allo-allo appakamalla'-mallaka, labattumi susa lompo dudua, tenayapa nale'ba' kajariang baku' Napa'jarina Allata'ala linoa sa'genna kamma-kamma anne, siagang tenayamo nalakajariang pole ribokoanganna. 20 Na ka'de' tena Napa'jari sinampeki Allata'ala anjo wattu kasusaang lompo dudua, ma'nassa manna sitau tenamo lakkulle salama'. Mingka lanri Nau'ranginna umma'Na, Napa'jari sinampe'mi Allata'ala anjo wattu kasusaang lompo dudua. 21 Anjo wattua punna nia' tau angkana ri kau, ‘Ciniki, niaki anrinni Karaeng Mappasalamaka!’ yareka nakana, ‘Niaki anjoreng!’ — teako tappakki ri anjo taua. 22 Nasaba' lania' sallang battu tumappasalama' balle-ballea siagang na'bi-na'bi balle-ballea. Lanapappicinikangi ke'nanga gau'-gau' appakalanna'-lannasaka sollanna akkulle annipu, na punna akkulle manna umma'Na Allata'ala lanatipu todong. 23 Jari tutu laloko! Kupauangko anne la'bi riolo ri tenanapa nakajariang yangasenna anjo passalaka.” 24 “Punna le'ba'mo anjo wattu kasusaanga, la'jari sassammi alloa, na tenamo naccaya singara' bulanga. 25 Latu'guru' ngasemmi bintoenga battu ri langika. Na sikamma tau makoasa niaka lalang lino la'jari sanna'mi ricuna. 26 Anjo wattua lania'mi nicini' battu Ana' Ma'rupataua ri tompo'na rammanga lalang koasa malompoa siagang kala'biranNa. 27 LaNasuromi malaeka'-malaeka'Na ampa'rappungangi umma'Na Napilea battu ri sikontu linoa, battu raya sa'genna kalau', kammayatompa battu timboro' sa'genna wara'.” 28 “Angngalle mako pappilajarang battu ri pangngebarranna poko' araya. Punna moncongbulomi siagang lu'mu'mi tangke-tangkenna, kammayatompa appakkaramulami accu'la', nuassemmi nubatei angkanaya la'birimmi wattu timoroka. 29 Kamma tomminjo, punna nucini'mo kajariang anjo pammateia, akkulle tommi nuasseng angkanaya la'biring dudumi battu anjo wattu kasusaang lompo dudua. 30 Asseng memammi! Angkanaya lakajariang ngasemmi anjo Kupaua ri wattu tenanapa namate ngaseng tau niaka attallasa' ri kamma-kammaya anne. 31 Lalanynya' ngasengi langika siagang buttaya, mingka anne kana-kanangKu tuli laniaki satunggu-tungguna.” 32 “Mingka manna nakamma mamo, tenanniakka tau angngassengi ringngapanna allonna yareka ringngapanna tette'na. Manna malaekaka ri suruga siagang manna Ana' Ma'rupataua tena todong Naassengi. Passangalinna Manggea bawang angngassengi. 33 Jari paralluko a'jaga-jaga siagang tutu, nasaba' tena nuassengi ringngapanna wattunna. 34 Pangngebarranna lasangkammai tau a'lampaya ambokoi balla'na nampa mange ri se'reang pa'rasangang bella. Nasuroi palayang-palayanna angngurusuki balla'na, siagang massing nasarei jama-jamang. Pajaga pakke'bu'na napasangi sollanna a'jaga baji'-baji'. 35 Jari paralluko a'jaga-jaga, nasaba' tena nuassengi ringngapanna nalammotere' patanna balla'. Akkulle ri wattu karuenna alloa, akkulle ri tangnga bangngia, akkulle ri wattu subua, yareka ri wattu lammumbana alloa. 36 Punna tanusanna-sannayai nabattu, tapporo tena laloja narapikangko attinro. 37 Anne apa Kupaua mae ri kau ngaseng, Kupau tongi mae ri yangasenna taua: a'jaga-jaga laloko!”
1 Ruangallo mami na allo Paska siagang allo Passua'-suarrang Roti Tenaya Nammake Pa'gambang. A'boyami akkala' imang-imang kapalaya siagang guru-guru agamaya sollanna akkulle najakkala' cokko-cokko siagang nabuno Isa. 2 Nakana ke'nanga, “Mingka teako na ri allonna passua'-suarranga, nanigaukang anjo kammaya, nasaba' akkullei sallang a'jari karicuanga.” 3 Ri wattunna nia' Isa ri Betania, ri balla'na Simon le'baka garring sala, nia' sitau baine battu mae ri Ia. Angngerangi sibotolo' minynya'-minynya' bau', sannaka ka'jala'na ballinna nipareka battu ri aka'-aka' kayu bauka. Ri wattunna ammempo angnganre Isa nasungkemi anjo bainea anjo botoloka nampa natumpa anjo minynya'-minynyaka ri ulunNa Isa. 4 Siapa are tau niaka anjo wattua a'jari larroi nacini'na anjo bainea appakamma anjo. Na nakana ke'nanga para ia, “Apa matu-matunna nipa'labo-laboang kamma anjo minynya'-minynya' bauka? 5 Akkullei nibalukang la'bi tallum bilangngang doe' pera' anjo minynya'-minynyaka. Nakkulle nipassareang ballinna mae ri tu kasi-asia!” Jari larromi ke'nanga mae ri anjo bai'-bainea. 6 Mingka Nakanamo Isa, “Lappassammi nagaukang kammaya! Angngapa nuero' ansusa-susai? Apa baji' siagang apa akkulle nipuji nagaukang mae ri Nakke. 7 Tu kasi-asia tuli nia'na ri tangnga-tangnganu ngaseng. Punna erokko tena masala wattu nakkulle nutulung ke'nanga. Mingka iNakke, tena Kutuli lania' angngagangko. 8 Anne bainea le'ba'mi nagaukang apa akkullea nagaukang. Lanri naminynya'-minynyakingKu, napasadiaMa' lanitarawang genteng tenanapa narapiki wattunna. 9 Patappaki! Angkanaya, kemae-kemae ri sikontu linoa nipa'la'bang Kabara' Baji' battua ri Allata'ala, tuli lanicaritai siagang laniu'rangi tongi anne apa nagaukanga anne bainea, anjari pangngu'rangi mae ri ia.” 10 A'lampami kalase'renna battu ri sampuloa anrua ana' gurunNa Isa, iamintu Yudas, mae ri imang-imang kapalaya. Eroki napassareang nabalukang Isa ri ke'nanga. 11 Teai sipato' sannanna nyawana ke'nanga nalangngere'na pattujunna Yudas. A'janjimi ke'nanga lanasare doe' Yudas. Jari appakkaramulami Yudas a'boya akkala' antekamma nakkulle napassareang Isa. 12 Ri allo makase'rea, ri wattunna Passua'-suarrang Roti Tenaya Nammake Pa'gambang, ammolongi taua gimbala' untu' Paska. Akkuta'nammi ana'-ana' gurunNa Isa angkana, “Kemae Kikellai nipasadia kanre Paskaya untu' iKatte Bapa'?” 13 Jari Nasuromi Isa rua ana' gurunNa Nakana, “A'lampa mako mange ri kotaya. Anjoreng nia' sitau bura'ne angngerang bongki niaka je'ne'na lanuagang assibuntulu'. 14 Amminawang mako mange ri balla' napammantangia, na nupauang patanna balla' angkana, ‘Akkuta'nangi Pa' Guru angkana keremae tampa' eroka Napake angnganre Paska siagang ana'-ana' gurunNa.’ 15 Lanajo'jokang mako anjo taua se're bili' lompo bageang rateang. Le'ba' atoro'mi anjo bilika, siagang sikamma apa-apa niparalluanga. Pasadia ngaseng minjo untu' ikatte.” 16 Jari a'lampami anjo ruaya ana' gurunNa Isa mange ri kotaya. Battuna mange anjoreng nia' tojemmo nabuntulu' ke'nanga sangkamma ngaseng le'baka Napau Isa. Napasadiami ke'nanga kanre Paskaya. 17 Wattunna bangngimo, battumi Isa siagang anjo sampuloa anrua ana' gurunNa. 18 Lalang ammemponamo ke'nanga angnganre, Nakanamo Isa, “Pilangngeri sai: kala se'rennu, ia niaka kamma-kamma anne angngagangA' angnganre, ampasikongkolangA' sallang.” 19 Nalangngere'na akkana kamma Isa, sanna' ngasemmi si'nana pa'mai'na ana'-ana' gurunNa Isa. Akkuta'nang tasse're-se'remi ke'nanga mae ri Isa angkana, “Sai teaiji nakke nataba kananTa Bapa'?” 20 Appialimi Isa Nakana, “Inai-nai kalase'rennu anne sampuloa anrua angngagangA' a'julu piring angnganre iaminjo taunna. 21 Lamate memang tojenji Ana' Ma'rupataua sangkamma niaka tattulisi' lalang ri Kittaka. Mingka teai sipato' cilakana tau ampasikongkolangai Ana' Ma'rupataua! Bajikangangi ka'de' tena sikali nale'ba' nianakkang anjo taua!” 22 Ri wattunna angnganre ke'nanga, angngallemi roti Isa, nampa appala' sukkuru' ri Allata'ala. Le'baki anjo Nabage-bagemi anjo rotia siagang limanNa, nampa Natawa-tawai ana'-ana' gurunNa, na Nakana, “Allemi, siagang kanremi, iaminne pangngebarranna batangkalengKu.” 23 Le'baki anjo angngallemi se're canteng pangnginungang anggoro'. Appala' sukkuru'mi ri Allata'ala, nampa Napassareang anjo canteng le'baka nabonei anggoro' mae ri ana'-ana' gurunNa. Nainummi ana'-ana' gurunNa anjo anggoroka. 24 Le'baki anjo Nakanamo Isa, “Iaminne pangngebarranna cerakKu, iamintu cera' nipasolonga untu' tau jaia, ampa'assayai parjanjianNa Allata'ala. 25 Patappa'mi angkanaya: Tenamo nalaKuinung pole anne anggoroka, sa'genna narapi' wattungKu angnginung anggoro' beru siagang ikau ngaseng, lalang ri Lino BeruNa ManggeKu.” 26 Le'baki anjo akkelommi ke'nanga se're kelong-kelong pammuji ri Allata'ala. Nampa a'lampa ke'nanga mange ri Bonto Zaitun. 27 Le'baki anjo Nakanamo Isa ri ke'nanga, “Lalari ngasengko a'lampa ambokoiA'. Nasaba' nia' tattulisi' lalang ri Kittaka angkanaya, ‘LaNabunoi Allata'ala pakalawakinna, na tassia'-siara'mo gimbala'na.’ 28 Mingka punna attallasa' poleamMa', la'lampa rioloA' mange ri Galilea.” 29 Appialimi Petrus nakana, “Tena! Manna a'lampa ngaseng ke'nanga ampilariKi', mingka inakke tena sikali kuero' ampilariKi'.” 30 Nakanamo Isa, “U'rangi, angkanaya ia memanji anne bangngia, ri tenanapa napinruang attingkoko janganga, napintallung mako ansassaliA'.” 31 Appiali terasa'mi Petrus nakana, “Manna pole musti matea' siagang iKatte Bapa', tena sikali nakulangkana takuassengaKi' Bapa'!” Akkana kamma ngaseng tomminjo ana'-ana' gurunNa maraenga. 32 Battumi ke'nanga ri se'reang tampa' niarenga Getsemani. Nakanamo Isa ri ana'-ana' gurunNa, “Ammempo mako anrinni naKu'lampa rolong appala' doang.” 33 Nampa Nakio' Petrus, Yakobus siagang Yohanes a'lampa siagang KalenNa. Appakkaramulami si'na siagang lussa' pa'mai'Na. 34 Nakanamo Isa ri ke'nanga, “Sanna' si'nana pa'maikKu, kamma Kusa'ring ero'maMa' mate. Ammantang mako anrinni siagang a'jaga-jaga mako!” 35 A'lampami Isa bella-bella sike'de', nampa tassu'ju' naung ri buttaya, appala' doang. Lalang appala' doanNa Napala'mi punna akkulleja teami Naoloi anjo wattu passessaya. 36 Nakana, “Bapa', o Bapa', tena tamakkulle a'jari punna Kierokang. Kipakabellami anne passessaya battu ri Nakke. Mingka teaKi' erokKu Kituruki, passangalinna erotTamo Kipa'jari.” 37 Le'baki anjo ammotere'mi Isa, na Narapikang ana'-ana' gurunNa attinro. Nakanamo ri Petrus, “Simon attinroko? Poro se'reji jang natena nukkulle a'jaga?” 38 Nampa Nakana Isa ri ke'nanga, “A'jaga-jagako siagang appala' doangko sollanna tena natabako paccoba. Memang ero'ji nyawanu a'gau' tojeng, mingka tanukulleai nasaba' sipa'na rupataua lammai.” 39 A'lampami pole sikalipi Isa mange appala' doang. Na ia kana-kananNa sangkammaji le'baka Napau sumpaeng. 40 Le'baki anjo ammotere'mi pole mange ri ana'-ana' gurunNa. Na Narapikammo pole attinroiji ana'-ana' gurunNa lanri sanna' ta'do'do'na ke'nanga. Jari tanaassengami ke'nanga apa siratang nakana ri Isa. 41 Ri wattunna ammotere' pole Isa ri ke'nanga ri makapintallunna, Nakanamo, “Attinro ngasenginjako siagang ammari-mari ngasenginjako? Angganna'mi! Narapi'mi wattunna nipassareang Ana' Ma'rupataua mae ri limanna tau dorakaya. 42 Ambangung ngaseng mako, umba ki'lampa. Ciniki: Battumi tau ampasikongkolangiA'!” 43 Sitabang a'bicarana ija Isa battumi Yudas, kalase'renna anjo sampuloa anrua ana' gurunNa. Jai tau naagang a'rurung, angngerang pa'dang siagang palu-palu. Nisuroi ke'nanga ri imang-imang kapalaya, guru-guru agamaya, siagang pamimping-pamimpinna tu Yahudia. 44 Le'ba'mi nasare pammatei Yudas anjo taua angkana, “Inai-nai kubau, iaminjo taunNa. Jakkala'mi nanuerang siagang nanujagai baji'.” 45 Ri wattunna battumo Yudas, mangemi ri Isa na nakana, “O Bapa' Guru!” nampa nabau. 46 Nampa battu ngasemmo anjo tau naaganga Yudas anjakkalaki siagang ansikkoki Isa. 47 Mingka nia'mo kalase'renna ana' gurunNa Isa ambi'buki pa'danna nampa nate'ba' tunisurona imang lompoa, sa'genna kaccili' tolinna. 48 Nakanamo Isa ri ke'nanga, “Apa nucini' tau ja'dalakKa' na nupangngerangngangA' pa'dang siagang palu-palu ero' anjakkalakKa'? 49 Allo-alloKu nia' ri dallekannu angngajara' lalang ri Balla'Na Batara, angngapa natena nujakkalakKa'? Mingka musti kamma memangi anjo kajarianna, sollanna a'rupamo apa niaka tattulisi' lalang ri Kittaka.” 50 Lari ngasemmi ana' gurunNa ampilari Isa. 51 Nia' se're tau rungka, akkalimbuka silawara' bawang kaeng lenang, ampinawangi Isa. Ero'mi nijakkala' ri taua, 52 mingka nalappassammi kalimbu'na, nampa lari assola'-solara. 53 Nierammi Isa mange ri balla'na imang lompoa. Nia' ngasemmi anjoreng asse're imang-imang kapalaya, pamimping-pamimpinna tu Yahudia, siagang guru-guru agamaya. 54 Amminawang battu bellami Petrus ri Isa sa'genna antama' ri paranglakkenna imang lompoa. Ammempomi anjoreng siagang pangawalaka ngaseng, a'binrung ri pepeka ambambangi kalenna. 55 A'boyami butti-butti sikontu imang kapalaya siagang haking-haking Pangadelang Agamaya, ero' ansalakangi Isa, sollanna akkulle nahukkung mate. Mingka tena sikali butti akkulle nagappa ke'nanga. 56 Jaimi sa'bi nikio', mingka sangnging sa'bi balle-balle ngaseng, lanri simmara'-maraengi batena assare kasa'biang. 57 Nia' siapa are sa'bi balle-balle ammenteng nakana, 58 “Le'baki nalangngere' ikambe anne taua angkana, ‘Eroki Kurumbang anne Balla'Na Allata'ala, napareka rupataua, nampa Kubangung poleang maraenga ri makatalluna alloa, tenaya nasangkamma bate pare'na rupataua.’ ” 59 Mingka simmara'-maraeng tommiseng batena ke'nanga assare kasa'biang. 60 Jari ammentemmi imang lompoa ri dallekanna ngaseng ke'nanga, nampa akkuta'nang ri Isa nakana, “Tena Nuero' ampiali anjo napakkanaiangKo ke'nanga?” 61 Mingka a'merekiji Isa. Tena sikali Naero' appiali. Jari sikalipi pole akkuta'nang anjo imang lompoa nakana, “Maka iKaumi Karaeng Mappasalamaka, Ana'Na Allata'ala Kaminang Matangkasaka?” 62 Appialimi Isa Nakana, “INakke minne, na lanuciniki sallang Ana' Ma'rupataua ammempo ri sa'ri kananNa Allata'ala Kaminang Makoasaya, siagang lanaung battu ri langika ri tompo'na rammanga!” 63 Napasinta'-sinta'mi nakekke' pakeanna anjo imang lompoa siagang nakanamo, “Tenamo naparallu sa'bia! 64 Nulangngere' ngasemmi kana-kananNa, anghinai Allata'ala. Kamma-kamma anne antekamma batenu antappuki?” Natappukimi ke'nanga angkanaya salai Isa, siagang siratangi nihukkung mate. 65 Appakkaramulami siapa areang ri ke'nanga ampi'rui rupanNa Isa. Siagang natongko'mi matanNa nampa naba'ji. Nampa nakana ke'nanga, “Coba sai tappu, inai amba'jiKo?” Amminawang ngaseng tommi pangawalaka antempaka'rangi Isa. 66 Ri wattunna nia' ija Petrus ri paranglakkenga, nia'mo sitau baine palayanna imang lompoa battu mange anjoreng. 67 Nacini'na anjo palayanga Petrus nia' anjoreng a'binrung ambambangi kalenna, naciniki baji'-baji'mi tanja'na. Nampa nakana, “Sai siagang tongko anjo Isa tu Nazaretka?” 68 Mingka assassala'mi Petrus. Nakana ri anjo palayanga, “Takuassengai siagang takupahangai antu bicarannu.” Nampa a'lampami Petrus mange ri pakke'bu' lompona anjo balla'na imang lompoa. Anjo wattua attingkokomi janganga. 69 Nicini'mi pole Petrus ri anjo palayang bainea. Na nakanamo pole ri tau niaka anjoreng, “Ma'nassa aganna memang todong ke'nanga anne taua!” 70 Mingka assassala'mi pole Petrus. Tena nasallo le'ba'na, nakanamo pole tau niaka anjoreng, “Takkulleako assassala', ma'nassa aganna memang tongko ke'nanga; nasaba' tau battu tongko ri Galilea!” 71 Appakkaramulami Petrus assumpa-sumpa nakana, “Matea' naung, ma'nassa tena nakuassengi antu tau nupakkanaya!” 72 Anjo wattua attingkokomi pole janganga makapinruanna. Na nau'rangimi Petrus angkanaya le'baki angkana Isa ri ia, angkana, “Ri tenanapa nattingkoko makapinruang janganga, pintallumMa' nusassali.” Angngu'ranginna Petrus, a'lampami angngarru' tassunge'nge'-nge'nge'.
1 Ri bari'basa' dudua akkaro-karomi sipa'bicara sikontu hakinga ri Pangadelang Agamaya siagang imang-imang kapalaya, pamimping-pamimpinna tu Yahudia kammayatompa guru-guru agamaya. Nasikko'mi ke'nanga Isa nampa naerang mange napassareang ri Pilatus. 2 Akkuta'nammi Pilatus ri Isa nakana, “Kammatojengi angkanaya karaennaKo tu Yahudia?” Appialimi Isa Nakana, “Kammaminjo nupaua.” 3 Jaimi pole tuduhang napau imang-imang kapalaya mae ri Isa. 4 Jari akkuta'nammi pole Pilatus ri Isa nakana, “TaerokaKo appiali? Cini' sai antekamma jaina tuduhang napakkanaiangKo ke'nanga!” 5 Mingka tena sikalimo Nappiali Isa. Sa'genna a'jari lannasa'mi Pilatus. 6 Punna narapi' Passua'-suarranna allo Paskaya, biasana nia' sitau tu nitarungku nalappassang Pilatus, situru' pappala'na tau jaia. 7 Lalang ri tarungkua jai tau nitarungku passabakkang pammunoang siagang appare' karicuang ri pa'rasanganga. Nia' kalase'renna niarenga Barabas. 8 A'rappungammi tau jaia, nampa napala' ri Pilatus sollanna nalappassang sitau tau nitarungkua, sangkamma biasa. 9 Akkuta'nammi Pilatus ri ke'nanga nakana, “Erokko, naia anne karaenna tu Yahudia kulappassang?” 10 Nasaba' naassengi Pilatus angkanaya nanapassareang Isa ke'nanga ri ia, lanri assereati anjo imang-imang kapalaya. 11 Mingka niajara' salami anjo tau jaia ri imang-imang kapalaya sollanna Barabas napala' ke'nanga nilappassang. 12 Jari nakanamo pole Pilatus ri anjo tau jaia, “Jari punna kamma lakuapami anne tau nugallaraka karaenna tu Yahudia?” 13 A'gorami ke'nanga angkana, “Allei salli'!” 14 Akkuta'nammi Pilatus nakana, “Mingka apa kaja'dallanNa?” Pila' a'gora-gorami pole ke'nanga angkana, “Allei Salli'!” 15 Lanri eroki napakasannang Pilatus nyawana anjo tau jaia, nalappassammi Barabas. Nampa nasuro taua ancamboki Isa, nampa napassareang nasuro salli'. 16 Nierammi Isa ri surudadua mange ri balla' lompona guburnurka. Nampa nikio' ngaseng a'rappungang pasukanga. 17 Nampa nipipakei juba cura' lame butung ri ke'nanga siagang nipapparekang songko' akkatintinga, nampa napataba ke'nanga ri ulunNa Isa. 18 Le'baki anjo anynyombami ke'nanga ri Isa nakana, “Iye' Karaenna tu Yahudia.” 19 Napalu-paluimi takkang ke'nanga ulunNa Isa, nampa napi'rui rupanNa siagang su'ju' anynyomba ri dallekanNa. 20 Le'baki nakarek-karenai Isa, napasulu' poleammi ke'nanga anjo juba cura' lame butunga, nampa napipakei ammotere' pakeang KalenNa Isa. Nampa nierang assulu' Isa, lamange nisalli'. 21 Ri tangngana aganga nia'mo sitau nasuro ke'nanga ampisangi kayu salli'Na Isa. Anjo taua beru battui ri desaya ero' antama' ri kotaya. (Niarengi Simon, ana'na Aleksander siagang Rufus tu battua ri pa'rasangang Kirene.) 22 Nierammi Isa ri se'reang tampa' niarenga Golgota, battuanna “Tampa' Tangkora'”. 23 Anjoreng nasaremi ke'nanga Isa anggoro' nicampuruka mur, mingka taerokai Isa angnginungi anjo anggoroka. 24 Nampa nasalli' ke'nanga Isa. Na nabotorimi pakeanNa ero' nabage massing tawana. 25 Tette' salapang ri bari'basaka na nisalliki Isa. 26 Irateang ri kayu sallika nia'mo nitannang tulisang angkanaya: “Karaeng Tu Yahudia.” Iaminjo tattulisika kasalang nituduangi Isa. 27 Nia' todong rua paella' naagang Isa nisalli'. Sitau ri sa'ri kananNa, sitau ri sa'ri kairinNa. 28 Lanri kammana, a'rupami apa tattulisika lalang ri Kittaka angkanaya, “Lanipasibilangi tau ja'dalaka.” 29 Sikamma tau niaka numalo anjoreng napammenggong-menggongi ulunna, siagang nahina-hinai Isa angkana, “He, iKaumi eroka anrumbangi Balla'Na Allata'ala nampa Nupabangung poleang ri makatalluna alloa. 30 Cobami naungKo mae battu ri antu kayu sallika na Nupasalama' KalenNu!” 31 Sikamma imang-imang kapalaya siagang guru-guru agamaya amminawang ngaseng tommi ancau-caui Isa. Angkanami ke'nanga para ia, “Napasalamaki tau maraenga, mingka KalenNa tanakulle Napasalama'! 32 Punna ma'nassa karaenna memang tongi tu Israelka, Karaeng Mappasalamaka, baji'mi punna Napanaung KalenNa battu ri anjo kayu sallika, sollanna na nicini' nakitappa' todong ri Ia!” Kammayatompa anjo tau naaganga Isa nisalli', katuru'-turukang tommi anghinai Isa. 33 Ri tangngana alloa, niaki tallung tette' a'jari sassang ri sikontu anjo pa'rasanganga. 34 Na ri wattunna narapi'mo tette' tallu ri karuenga, ammarrang lompomi Isa angkana, “Eloi, Eloi, lama sabakhtani?” battuanna, “O Allata'alaKu, o Allata'alaKu, angngapa na NubokoiA'?” 35 Sikamma tau niaka anjoreng nalangngereki ammarrang kammanjo Isa. Nakanamo ke'nanga, “Pilangngeri sai, Nakioki Elia!” 36 Nia'mo sitau battu ri ke'nanga linta' mange angngalle bunga batu karang, nampa napantama' ri anggoro' kaccia. Nampa napatinting anjo bunga batu karanga ri se'reang cappa' kayu; na napamange ri bawaNa Isa siagang nakana, “Tayangi, na nicini', maka laniaki battu Elia ampanaungi battu ri anjo kayu sallika.” 37 Nampa ammarrammi Isa, natappu' nyawaNa. 38 Sinre' ta'bage ruami kaeng gordenga ri Balla'Na Batara, battu rate sa'genna naung. 39 Anjo perwira surudadua niaki ammenteng ri dallekanna salli'Na Isa ri wattunna mate Isa. Nacini'mi antekamma batena mate Isa. Nakanamo anjo perwiraya, “Ma'nassa Ana'Na tojeng Allata'ala anne taua!” 40 Nia' todong siapa are bai'-baine ancini' battu bellai anjo sikamma apa kajarianga. Niaki Salome, Maria Magdalena, siagang Maria amma'na Yakobus loloa, kammayatompa Yoses. 41 Yangaseng minjo ke'nanga, bai'-baine ampinawangi siagang antulungai Isa ri wattunna nia' Isa ri Galilea. Na jai pole bai'-baine maraeng anjoreng, amminawanga todong ri Isa battu ri Yerusalem. 42 Ri wattunna ero'mo bangngi nia'mi Yusuf battua ri Arimatea. Anne Yusuf, anggotana tongi haking Pangadelang Agamaya, siagang nikangalikang tongi ri taua. Sallo tommi natayang wattunna na Napakkaramula Allata'ala ammarenta salaku Karaeng. Anjo alloa, allo Pappasadiang (iamintu allo sadiana taua antayangi allo Pammari-marianga, labattua ammuko). Jari napa'baraniammi Yusuf mange andallekang ri Pilatus, ampalaki maya'Na Isa. 44 Lannasa'mi Pilatus ri wattunna nalangngere' angkana matemi Isa. Jari nasuro kio'mi komandang pasukanga na nakuta'nang siapami sallona mate Isa. 45 Le'ba'na nalangngere' a'laporo' anjo komandanga, nakellaimi Pilatus mange Yusuf angngallei maya'Na Isa. 46 Ammallimi Yusuf kaeng lenang alusuka, lanapareka pa'roko' maya'Na Isa. Le'baki anjo naerammi maya'Na Isa, na napantama' ri jera' batu a'bontoa. Nampa natongko' batu lompo anjo jeraka. 47 Anjo wattua, niaki Maria Magdalena siagang Maria amma'na Yoses amminawang, ero' naasseng angkana kemae nitarawang maya'Na Isa.
1 Ri wattunna allalomo allo Pammari-marianga, a'lampami Maria Magdalena, Maria amma'na Yakobus, siagang Salome, mange ammalli minynya'-minynya', untu' lanapake amminynya'-minynyaki maya'Na Isa ri jeraka. 2 Bari'basa' dudu, ri pakkaramula ammumbana alloa, ri allo uru-uruna anjo sidaminggua, a'lampami ke'nanga mange ri jera'Na Isa. 3 Ri tangngana aganga nakanamo ke'nanga massing para ia, “Inaimo lanipappala' tulungi ampalesangi anjo batu pannongko'na jeraka?” Nasaba' anjo batua lompo sikali. Mingka battuna ke'nanga mange anjoreng ri jeraka, nacini'mi ke'nanga le'ba'mi ta'gulung anjo batua. 5 Antama'mi ke'nanga ri anjo jeraka. Nia'mo nacini' ke'nanga sitau tu rungka ammempo lalang ri sa'ri kananna jeraka, ammake juba sannaka kebo'na. Na ta'bangkamo ke'nanga anciniki. 6 Nakanamo anjo tu rungkaya, “Teako mallakki! Kuassengi angkanaya Isa, anjo tu battua ri Nazaret, siagang le'baka nisalli' battu nuboya. Mingka cini'mi tenami anrinni ri tampa'Na niboli'. Le'ba'mi attallasa' poleang. 7 Kamma-kamma anne, a'lampamako ampabattui anne kabaraka mae ri ana'-ana' gurunNa, kammaya Petrus. Pauammi angkanaya, ‘A'lampa riolomi mange ri Galilea. Anjorempi lanucini', sangkamma le'bakamo Napau ri kau ngaseng.’ ” 8 Assulu'mi ke'nanga battu ri jeraka, nampa lari napakamma ta'bangka siagang malla'. Lanri malla'na ke'nanga, takkana-kanayami manna ri nai. 9 A'lampai anjo sikamma bai'-bainea mae ri Petrus siagang agang-aganna, nampa napabattu bodona caritana anjo sikontu apa le'baka nipauangi ke'nanga ri anjo tau rungkaya. 10 Le'baki anjo, KalenNa Isa tete ri ana'-ana' gurunNa ampa'la'bangi battu raya sa'genna kalau' anjo kabara' matangkasaka siagang mannannunganga ri passala'na kasalamakkang satunggu-tunggua. 11 Mingka tena natappa' ke'nanga nalangngere'na angkanaya attallasa' poleammi Isa, siagang le'ba'mi nacini' Maria. 12 Le'baki anjo Napappicinikammi KalenNa Isa mae ri rua ana' gurunNa, sitabanga a'jappa mange ri se'reang kampong. 13 Jari ammotere'mi anjo ruaya ana' gurunNa mange ampabattui anjo kajarianga mae ri agang-aganna maraenga. Mingka tatappakai ke'nanga. 14 Kala'busanna Napappicikammi KalenNa Isa mae ri sampuloa asse're ana' gurunNa, sitabanna angnganre ke'nanga. Napakainga'mi ke'nanga lanri kurang tappa'na ke'nanga, siagang lanri sukkara'na tappa' ke'nanga mae ri tau le'baka anciniki angkanaya le'ba'mi attallasa' poleang Isa. 15 Nakanamo Isa ri ke'nanga, “A'lampamako mange ri sikontu linoa, siagang pa'la'bammi Kabara' Baji' battua ri Allata'ala, mange ri sikontu rupataua. 16 Na inai-nai tatappaka, lanihukkungi. Mingka inai-nai tappa' na nije'ne', iami lanipasalama'. 17 Na la'jari buttia angkanaya tappaki ke'nanga, lanabongkami setanga lalang arengKu; la'bicarai ke'nanga lalang a'rupa-rupa bicara tenaya napahangi ke'nanga. 18 Punna anna'galaki ulara' yareka angnginungi racung, talamangngapa-apayai ke'nanga. Punna napadongko' limanna ke'nanga irateanganna tau garringa, la'jari bajiki anjo tau garringa.” 19 Le'baki a'bicara Isa siagang ke'nanga, ta'angka'mi Isa nai' ri suruga. Anjorengi ammarenta siagang Allata'ala. 20 A'lampami ana'-ana' gurunNa ampa'la'bangi biritta battua ri Allata'ala, mange ri kere-keremae. Na nirurungammo ri Allata'ala lalang jama-jamanna ke'nanga. Siagang napa'buttimi angkanaya ma'nassa tojengi anjo biritta napabattua ke'nanga, lanri gau'-gau' appakalannasaka napappicinikanga ke'nanga.
1 Natarimai tu nipakala'birikku Teofilus, Iaji kupabattuangki' angkanaya, jaimi tau le'ba' ansusung bajiki siagang antulisiki sikamma apa le'baka kajariang ri tangnga-tangngata. 2 Sikamma apa le'baka nicarita mae ri katte, battu ri tau le'baka anciniki anjo kajarianga battu ri pakkaramulanna, yangaseng minjo natulisi' ke'nanga, nampa napa'la'bang kabara'na. 3 Le'ba' ngasemmi kupilajari baji'-baji' battu ri pakkaramulanna sikamma anjo apa le'baka kajariang. Jari kupikkiriki angkanaya, bajiki punna kupannulisangki' se're laporang nisusung bajika ri passala'na sikamma anjo apa-apa le'baka kajariang. 4 Na iaji nakupare' anne laporanga, sollanna akkulle kiasseng angkanaya ma'nassa tojengi anjo apa le'baka nipangngajarrang mae ri katte. 5 Ri wattunna Herodes a'jari karaeng ri pa'rasangang Yudea, nia' se're imang niareng Zakharia, sossorang battua ri imang-imang Abia. Tu ri balla'na niarengi Elisabet, sossorang imang todong. 6 Ningai ri Allata'ala katallassang pakkalabinianna ke'nanga. Nasaba' tutui ke'nanga anturuki ero'Na Allata'ala siagang sikamma atorang Napassareanga Allata'ala. 7 Tena ana'na ke'nanga, nasaba' takkulleai ammana' Elisabet. Nampa toa rua-ruamo ke'nanga. 8 Nia' se're allo na narapi' wattunna sossoranna Imang Abia a'jari imang ri Balla'Na Batara. Jari anjo wattua, Zakharia a'jari imang ri dallekanNa Allata'ala. 9 Le'baki niloterei, kamma biasaya nagaukang imang-imanga, iami nijo'jo' antama' ri Balla'Na Batara attunu kamanynyang. 10 Sitabanna nitunu kamanynyanga, assambayammi tau jaia pantarang. 11 Anjo wattua battumi malaeka'Na Allata'ala ampappicinikangi kalenna mae ri Zakharia. Ammentemmi anjo malaekaka ri sa'ri kananna mejang pa'dongkokanna kamanynyang nitunua. 12 Nacini'na Zakharia anjo malaekaka, a'jari lingu-lingumi napakamma malla'. 13 Mingka nakanamo anjo malaekaka, “Teako mallakki Zakharia! Nalangngere'mi Allata'ala pappala' doannu. Lammanaki tu ri balla'nu Elisabet, sitau bura'ne. Anjo anaka sallang musti nuarengi Yohanes. 14 Lasanna' rannunu, siagang jai tau la'jari rannu punna lassu' sallang anjo anaka! 15 La'jari tu nipakalompoi ri dallekanNa Allata'ala. Talangnginungai anggoro' siagang inungang terasa'. Pakkaramula battu ri nilassukanna lanirurungangi ri RohNa Allata'ala. 16 Jai tu Israel lanaerang ammotere' mae ri Allata'ala, Batarana ke'nanga. 17 La'jari tunisuro magassinNai Allata'ala, siagang lakoasai sangkamma Na'bi Elia. Lanapassiamaki manggea siagang ana'na. Na lanapimping tau tenaya nappilangngeri kana sollanna ammotere' mange ri pikkirang annabaya. Jari appasadiami se're umma' sadia anruppai kabattuanNa Batara.” 18 Akkuta'nammi Zakharia ri anjo malaekaka nakana, “Antekamma batena nakkulle kupahang angkanaya lakajariang tojengi anjo kipakkanaya? Nasaba' inakke toama', na tu ri ballakku toa tommi.” 19 Appialimi malaekaka angkana, “Inakke minne malaeka' Gabriel. Inakke palayanNa Allata'ala, na Iami assuroa' ampabattui anne kabara' bajika mae ri kau. 20 Anne apa kupaua, ma'nassa la'rupai punna narapi'mo wattunna. Mingka lanri tenana nutappa', la'jari pepe mako; na iapa nukkulle a'bicara ammotere', punna a'rupamo anne apa kupauangangko.” 21 Anjo wattua, nitayammi passulu'na Zakharia ri taua. Lannasaki ke'nanga, apa saba'na nasallo kamma Zakharia lalang ri Balla'Na Batara. 22 Na ri wattunna assulu'mo Zakharia, takkulleami a'bicara ri ke'nanga. Limanna mami tuli napagio' punna ero' a'bicara, nasaba' a'jari pepemi. Jari naassemmi taua angkana nia'mo apa-apa nacini' lalang ri Balla'Na Batara. 23 Le'ba'namo nagaukang jama-jamanna ri Balla'Na Batara, ammotere'mi Zakharia ri balla'na. 24 Tasalloai ribokoanganna, tianammi Elisabet, na nakurummo kalenna lalang ri balla' limambulang sallona. 25 Nakanamo Elisabet, “Kale'bakkanna Natulumma' Batara siagang Natongkokamma' sirikku.” 26 Ri wattunna annang bulammo tianang Elisabet, Nasuromi Allata'ala malaeka' Gabriel mange ri kota Nazaret ri daera Galilea. 27 Nisuroi malaeka' Gabriel mange ri sitau tulolo niarenga Maria. Anjo tuloloa eroki nipasialle siagang Yusuf, sossoranna Karaeng Daud. 28 Battumi anjo malaekaka mae ri Maria na nakana, “Salamakko, ikau tu nibarakkakia ri Batara! Poro nirurungangko ri Batara!” 29 Nalangngere'na Maria kananna anjo malaekaka, ta'bangka sikalimi. Akkuta'nammi lalang ri pa'mai'na angkana apa battuanna anjo sallanna malaekaka. 30 Jari nakanamo pole anjo malaekaka, “Teako mallakki Maria, nasaba' ikau tu nipangngellaiko ri pa'mai'Na Allata'ala. 31 Latianangko, siagang lammanakko sitau ana' bura'ne, na musti nuarengi Isa. 32 La'jari tu nipakala'biriki, siagang lanigallaraki Ana'Na Allata'ala Kaminang Tinggia. Lanipa'jari KaraengI ri Karaeng Allata'ala sangkamma Karaeng Daud boeNa. 33 Siagang lammarentai salaku Karaeng satunggu-tungguna ri boe-boena Yakub. Tena kala'busanna bateNa lammarenta.” 34 Nakanamo Maria ri malaekaka, “Mingka tulolo ija', antekamma lakkulle lakajariang anjo kipakkanaya?” 35 Appialimi malaekaka nakana, “Labattui RohNa Allata'ala mae ri kau, siagang laniaki koasaNa Allata'ala anrurungangko. Lanri kammana, anjo ana' lalassuka lanigallaraki Matangkasa', Ana'Na Allata'ala. 36 U'rangi: anjo bijannu Elisabet tianang annang bulammi, manna natoamo, siagang nakana taua tamanangi. 37 Nasaba' punna Nakaerokang Allata'ala, tena apa-apa takkulle Napa'jari.” 38 Nakanamo Maria, “Inakke anne, atanNa' Allata'ala; boli'mi kamma nakajariang ri nakke, antu kipakkanaya.” Le'baki anjo a'lampami anjo malaekaka ambokoi Maria. 39 Le'baki anjo, a'lampami linta' Maria mange ri se'reang kota ri pa'rasangang Yudea, rate buluka. 40 A'lampai mange ri balla'na Zakharia. A'barisallammi ri Elisabet wattunna antama' ri balla'. 41 Na nalangngere'na Elisabet barisallanna Maria, a'gio'mi anjo ana' natiananganga. Nikoasaimi Elisabet ri RohNa Allata'ala; 42 a'gorami Elisabet nakana, “Ikaumi baine kaminang nibarakkakia ri sikontu bai'-bainea! Poro nibarakkakimi anjo ana' lanulassukanga! 43 Inai tonga' anne, nabattukamma amma'Na Batara mae ri nakke? 44 Kulangngere'na sallannu, a'gio'mi napakamma rannu anne ana' kutiananganga. 45 Mate'ne mako, lanri tappa'nu angkanaya lakajariangi ri kalennu anjo Napabattua Batara ri kau!” 46 Nakanamo Maria, “Mammuji atingku ri Batara, 47 nama'rannu-rannu nyawaku kalanri Allata'ala Mappasalamakku. 48 Iami mangngu'rangi ri nakke, anne ata tuna duduNa! Anne kamma sikontu bansaya mangkana minne ri nakke, inakkemi tau mate'ne. 49 Lanri Allata'ala Kaminang Makoasa a'gau' malompo ri kalengku. Nitangkasimi arenNa. 50 Sossorang mange ri sossorang tuli nikamaseang ri Batara tau mallaka ri Ia. 51 Lima makoasaNa mappasimbung tau borro, na mangngaco ri ero' sala. 52 Napanaung ri empoanna sikontu tu nikaraengang napanai' ri tinggia, sikontua tu nihina. 53 Nabassori inai cipuru', battu ri kabajikanNa naNabongka tu kalumanynyang a'lampa tamangngeranga. 54 Natulungi Israel atanNa, lanri janji le'ba' Napare' mae ri boe-boeta. 55 Batara tamakkaluppa ri janjinNa baji' ati ri Abraham na sossorang satungguna.” 56 Niaki kira-kira tallum bulang sallona ammantang Maria ri balla'na Elisabet, nampa ammotere' mange ri balla'na. 57 Narapi'mi wattunna lammana' Elisabet. Ammana'mi sitau ana' bura'ne. 58 Nalangngere' ngasemmi sambori'na siagang bija-bijanna antekamma baji'na Batara mae ri Elisabet. Na rannu ngaseng tommo nyawana ke'nanga sangkamma Elisabet. 59 Ri wattunna sagantuju allomo umuru'na anjo anaka, battumi ke'nanga ansunnaki anjo anaka. Ero'mi ke'nanga nasare areng Zakharia anjo anaka, sangkamma arenna manggena. 60 Mingka nakana amma'na, “Tena, musti niarengi Yohanes.” 61 Nakanamo ke'nanga ri Elisabet, “Mingka tena manna sitau bija-bijannu kammanjo arenna.” 62 Jari, akkuta'nammi ke'nanga ri Zakharia, a'bicara kamma tu pepe, angkana apa laniarengangi anjo anaka. 63 Appala'mi Zakharia se're batu pannulisang nampa natulisi' angkana, “Yohanes arenna.” Lannasa' ngasemmi ke'nanga. 64 Na anjo wattua akkullemi a'bicara pole Zakharia siagang ammuji-muji ri Allata'ala. 65 Malla' ngasemmi sambori'na; na tassiara'mo anjo kabaraka ri sikontu daera monconga ri Yudea. 66 Akkuta'nang ngasemmi lalang ri atinna sikontu tau allangngerekai anjo kabaraka angkana, “La'jari apai anjo anaka sallang?” Nasaba' nirurungangi ri Batara anjo anaka. 67 Anjo Zakharia, manggena anjo anaka, nikoasaimi ri RohNa Allata'ala. Jari napabattumi pappasang battua ri Batara, angkana, 68 “Umba kimammuji ri Batara, Allata'alana bansa Israel! Battumi antulungi umma'Na na Nalappassang ke'nanga. 69 Nasaremaki' tu Mappasalama' makoasaya, ikatte atanNa, sossoranna Daud. 70 Battu ri riolo duduji na Napabattumo na'bi-na'bi nipilea, angkana le'ba'mi assare janji Batara 71 ero' ampasalamakki' battu ri musunta ngaseng na battu ri kakoasanna sikamma tu birisika ri katte. 72 Lanri ero'Na napappicinikang baji' atinNa ri tu riolota, na laNapa'rupa anjo janji matangkasa'Na. 73 Le'ba'mi assumpa ri boeta Abraham, a'janji ero' ampasalamakki' battu ri musunta ngaseng, sollanta akkulle allayani ri Ia 75 kitamalla'-mallaka, kituli anynyomba ri Ia, ampakasannangi atinNa lalang sikontu tallasatta. 76 Ikau anakku, lanigallarakko na'biNa Allata'ala Kaminang Tinggia. Nisuroko rioloangangnganNa Bataraya untu' ampasadiai oloang laNaoloa, 77 Ampabattui kabaraka mae ri umma'Na angkanaya lanipasalamaki ke'nanga, punna le'ba'mo nipammopporang dosa-dosana ri Allata'ala. 78 Baji' ati na mangngamaseang Bataraya; battui lanri erotta Napasalama'. Sanrapang mataallo ammumba ri bari'basaka, 79 kammaminjo na Nasingari sikontu taua niaka lalang ri sassang siagang kamallakkang. Nauluki' mange ri oloang a'lampa mangea ri kabajikanga.” 80 Pila' lompomi anjo ana'na Zakharia. Pila' jarre'mi rohna. Ammantammi ri parang lompoa, sa'genna narapi' wattunna napa'nyata kalenna mae ri bansa Israel.
1 Anjo wattua Karaeng Agustus ammarenta ri pa'rasangang Roma. Sitabangi nisuro bilang ngaseng sikontu tuma'buttaya niaka lalang parentana. 2 Sitabang tongi Kirenius a'jari guburnur Roma ri pa'rasangang Siria, nabungasa' nibilang tuma'buttaya. 3 Jari massing ammotere' ngasemmi taua ri kamponna, assuro bilangi kalenna. 4 A'lampa tommi Yusuf ambokoi Nazaret ri Galilea. Mangemi ri Betlehem ri Yudea, kampong kalassukanna Karaeng Daud; nasaba' anjo Yusuf sossoranna tongi Karaeng Daud. 5 A'lampa tongi siagang Maria, assuro bilangi kalenna. Battuna mange ri Betlehem, tenamo nanggappa ke'nanga balla' pa'bangngiang, napakamma jaina tau battu mange anjoreng. Lanri kammana, mange mami ke'nanga ri se'reang bara sapi a'bangngi. Na anjo wattua tianammi Maria, siagang narapi'mi wattunna lammana'. Nalassu'mo anjo ana' bungasa'na, sitau ana' bura'ne. Nakalimbukimi care-care anjo anaka, nampa napatinro lalang ri tampa' pangnganreang olo'-oloka. 8 Anjo bangngia nia' siapa are pakalawaki sitabang anjagai sapinna ri paranga ri anjo daeraya. Anjo wattua lantammi bangngia. 9 Ti'ring nia' mami battu malaeka'Na Batara ampappicinikangi kalenna ri ke'nanga; tassioro'mi caya kala'biranNa Batara mae ri ke'nanga. Na teaimi sipato' malla'na ke'nanga. 10 Mingka nakanamo anjo malaekaka, “Teako mallakki! Nasaba' kabara' baji' anne battu kupabattuangko; kabara' sannaka lanakarannuanna sikontu rupataua. 11 Anne kamma, ri kota kalassukanna Daud, lassu'mi Karaeng Mappasalama'nu iamintu Almasi. 12 Na iaminne pammateina ri kau: Nia' lanubuntulu' se're ana' lolo nikalimbuki care-care, siagang nipatinro lalang ri pangnganreang olo'-oloka.” 13 Ti'ring jaimi pole malaeka' maraengang battu anrurungangi anjo malaekaka sumpaeng, na mammuji-muji ri Allata'ala, angkana, 14 “Nipujimi Allata'ala ri langi' kaminang tinggia! Nasalewangang rupataua ri tompo'na linoa mappakate'nea ri atinNa Bataraya!” 15 A'bokoi lampana sikamma anjo malaekaka ammotere' nai' ri suruga, massing nakanamo anjo pakalawakia, “Umba ki'lampa mange ri Betlehem anciniki anjo kajariang Napabattua Batara mae ri katte.” 16 A'lampa memammi ke'nanga. Na nabuntulu'mo ke'nanga Maria siagang Yusuf, kammayatompa anjo anaka, nipatinro ri pangnganreang olo'-oloka. 17 Ri wattu nacini'namo pakalawakia anjo anaka, nacaritami ke'nanga anjo apa napaua sikamma malaekaka ri passala'na anjo anaka. 18 Na lannasa' ngasemmo tau allangngerekai caritana anjo pakalawakia. 19 Mingka napariatimi siagang nanawa-nawami Maria sikamma anjo passalaka. 20 Ammotere'mi ke'nanga mange ri paranga, mammuji-muji siagang napakala'biri'mi ke'nanga Allata'ala, lanri yangasenna anjo kajariang le'baka nalangngere' siagang nacini' ke'nanga, tena le'ba' sisalana siagang anjo apa le'baka napau malaekaka mae ri ke'nanga. 21 Narapiki sagantuju allo umuru'na, nisunna'mi anjo anaka. Nampa nisare areng ri ke'nanga Isa. Iaminjo areng le'baka napassareang malaekaka, ri wattu tenanapa na nitianangangi ri amma'Na. 22 Narapi'mi wattunna Yusuf siagang Maria anggaukangi ada' matangkasaka, situru' atorang agama battua ri Musa. Jari naerammi ke'nanga anjo anaka mange ri Yerusalem, mange nipassareang ri Batara. 23 Nasaba' nia' tattulisi' lalang ri Hukkung Napassareanga Batara angkanaya, “Sikontu ana' bura'ne bungasaka musti nipassareangi mae ri Batara.” 24 Ero' tommi ke'nanga mange assare koro'bang, iamintu sipasang jangang-jangang bukkuru', yareka ruang kayu jangang-jangang bodobangkeng rungkaya, situru' apa le'baka nipattantu lalang ri Hukkung Napassareanga Batara. 25 Anjo wattua nia' ri Yerusalem sitau niareng Simeon. Ia tau baji', na malla' ri Allata'ala. Na tayang-tayammi wattunna nabattu Allata'ala ampasalamaki umma' Israel. Antama'mi RohNa Allata'ala ri kalenna. 26 Na le'ba'mi nipauang ri Allata'ala angkanaya talamateapi punna tenapa naciniki Karaeng Mappasalamaka, le'baka Napa'janjiang Batara. 27 Niulumi Simeon ri RohNa Allata'ala antama' ri Balla'Na Batara. Anjo wattua nierangi anjo Isa, ana' loloa, ri Yusuf siagang Maria antama' untu' anggaukangi pa'gaukang nipassuroanga lalang atorang agamaya. 28 Naallemi Simeon anjo anaka, na nakalawing, nampa ammuji-muji ri Allata'ala, nakana, 29 “Anne kamma, o Batara, Kirupaimi janjinTa. Boli'mi kamma ammoterang atanTa siagang sannang. 30 Nasaba' le'ba'mi nacini' mata kalengku Pappasalama' battua ri Katte. 31 Pappasalama' Kipasadia untu' sikontu bansaya: 32 Sanrapang singara', ansingaria oloanna bansa-bansa maraenga, untu' labattu mae ri Katte; singara' angngeranga kala'birang mae ri ummatTa Israel.” 33 Lannasa'mi manggena siagang amma'na anjo anaka allangngereki anjo apa-apa napaua Simeon ri passala'na anjo anaka. 34 Nabarakkakimi Simeon ke'nanga; siagang nakana ri Maria, “Le'ba'mi nipile ri Allata'ala anne anaka untu' anghukkungi siagang untu' appasalama' jai tu Israel. La'jari pannanrai battu ri Allata'ala, lanibaliangi ri tau jaia, 35 na lanri kammana nakaassengammo bone atinna ke'nanga. Lasi'na sikali nusa'ring, sanrapang nito'doka atinnu ri pa'dang sannaka cidu'na.” 36 Nia' todong sitau na'bi baine sannakamo toana. Niarengi Hana, ana'na Fanuel, battu ri suku Asyer. Nampami tuju taung le'ba'na a'bunting, 37 na'jari jandamo Hana. Kamma-kamma anne sagantujupulomi angngapa' taung umuru'na. Tena le'bakai nabokoi Balla'Na Batara. Allo bangngi mange ri Balla'Na Batara appala' doang ri Allata'ala siagang appuasa. 38 Sitabangi battu todong ri Balla'Na Batara anjo wattua. Ammuji-mujimi ri Allata'ala, siagang nabicarami ri passala'na anjo Anaka mae ri sikamma tau attayanga kabattuanNa Allata'ala ampasalamaki bonena Yerusalem. 39 Le'ba'namo nagaukang ngaseng Yusuf siagang Maria sikamma Hukkung Napassuroanga Batara, ammotere'mi ke'nanga mange ri pa'rasangang Galilea, ri Nazaret. 40 Pila' lompomi siagang pila' gassimmi anjo anaka. Sanna' cara'de'na siagang sanna' annabana, na sanna' nikarimangnginna ri Allata'ala. 41 Taung-taungi mange tau toaNa Isa ri Yerusalem untu' ampakalompoi allo Lompo Paskaya. 42 Ri wattunna sampulo anrua taung umuru'Na Isa, a'lampami pole ke'nanga mange ri passua'-suarranga ri Yerusalem kamma biasa. 43 Le'ba'na passua'-suarranga, ammotere'mi ke'nanga. Mingka ammantanginji Isa anjo Anaka ri Yerusalem, natanaassenga manggeNa siagang amma'Na. 44 Nakana ke'nanga nia'ji Isa ri alla'na tau jaia amminawang. A'jappana ke'nanga siallo bujuru' nampa naboya Isa ri passiassenganna siagang ri bija-bijanna. 45 Mingka tenai nabuntulu' anjo Anaka. Jari ammotere'mi ke'nanga mange ri Yerusalem amboyai. 46 Makatallungallonapi naboya ke'nanga nampa nabuntulu' lalang ri Balla'Na Batara. Niaki lalang ammempo ampilangngeri guru-guru agamaya siagang akkuta'nang ri anjo guru-guru agamaya. 47 Sikontu tau allangngerekai lannasa' ngasemmi lanri sanna' cara'de'Na a'bicara. 48 Manna tau toaNa lannasa' tommi allangngereki. Nakanamo amma'Na ri Ia, “Na', angngapa Nuppanggaukang kammanne ri kambe? Sanna' lussa'na nyawaku siagang manggeNu amboyaKo mange-mange!” 49 Appialimi Isa Nakana, “Angngapa nakiboyA'? Takiassengai angkanaya musti niakKa' lalang ri Balla'Na ManggeKu?” 50 Mingka tanapahangai ke'nanga battuanna anjo pappialinNa Isa. 51 Le'baki anjo, ammotere'mi ke'nanga siagang Isa mange ri Nazaret. Amminawang turu'mi Isa ri ke'nanga. Napariatimi amma'Na sikamma anjo passalaka. 52 Pila' lompomi Isa siagang pila' cara'de'mi, na ningai ri Allata'ala siagang ri taua.
1 Ri taung makasampuloa allima ammarenta Karaeng Tiberius, Pontius Pilatus a'jari guburnur ri Yudea; na Herodes ammarenta ri Galilea; na Filipus, sari'battanna Herodes, ammarenta ri Iturea siagang Trakhonitis; na Lisanias ammarenta ri Abilene. 2 Na a'jari imang-imang lompoa, iamintu Hanas siagang Kayafas Iaminjo taunga Na'bicara Allata'ala ri parang lompoa mae ri Yohanes, ana'na Zakharia. 3 Jari a'lampami Yohanes mange ri sikontu daera a'reppeseka ri Binanga Yordan, na napabattu biritta battua ri Allata'ala. Akkiok-kio'mi Yohanes nakana, “Toba' ngaseng mako battu ri dosa-dosanu, siagang musti nije'nekko, sollanna Napammopporangko Allata'ala.” 4 Kammaminjo niaka tattulisi' lalang ri kitta' Na'bi Yesaya angkanaya, “Nia' tau akkiok-kio' ri parang lompoa, angkana, ‘Pasadiai oloanNa Batara, lappari oloang laNaoloa. 5 Lanitambungi sikamma ka'bunga lanilappari sikamma buluka siagang bontoa Parallui nilambusi oloang a'lekko-lekkoa, na lanilappari oloang akkali'-kali'bonga. 6 Lanacini'mi sikontu bonena linoa Napasalama' Allata'ala rupataua!’ ” 7 Jaimi tau mae ri Yohanes untu' nije'ne'. Nakanamo Yohanes ri ke'nanga, “Ikau ngaseng tau ja'dalaka! Inai ampauangko angkanaya lakkullei nuliliang hukkungang labattua ri Allata'ala? 8 Pappicinikammi rolong lalang ri panggaukannu, angkanaya ma'nassa toba' mako battu ri dosa-dosanu! Teako angkanai kaboe-boenu anjo Abraham. U'rangi angkanaya: Manna anne batu-batua akkulle tongi Napa'jari Allata'ala sossoranna Abraham! 9 Sadiami pangkuluka untu' lanipake anta'bangi poko' kayua sa'genna ri aka'-aka'na. Sikamma poko' kayu tenaya na'rappo baji', lanita'bangi nampa nipela' antama' ri pepeka.” 10 Akkuta'nammi taua ri Yohanes angkana, “Jari apa musti nagaukang ikambe?” 11 Appialimi Yohanes nakana, “Tau niaka ruang lawara' bajunna, musti napassareangi silawara' mae ri tu tenaya bajunna. Na tau niaka kanrena, musti nabagei tongi tu tenaya kanrena.” 12 Battu tommi pasingara' rentea mae ri Yohanes ero' nije'ne'. Akkuta'nammi ke'nanga angkana, “O, Pa' Guru, apa musti nagaukang ikambe?” Appialimi Yohanes nakana, 13 “Teako la'bi batenu assingara' doe' sima situru' le'baka nipattantu.” 14 Nia' tommo surudadu akkuta'nang angkana, “Antekamma anne ikambe? Apa musti nigaukang?” Appialimi Yohanes nakana, “Teako paccoki taua, siagang teako garattaki taua lanri ero'na nualle passa doe'na. Kasukkurammi gaji nugappaya!” 15 Pakkaramulami taua assikuta'-kuta'nang, angkana maka iaminne Yohanes Karaeng Mappasalama' salloamo natayang ke'nanga. 16 Jari nakanamo Yohanes ri ke'nanga, “Inakke je'ne' kupake anje'nekko, mingka nia' labattu tau lompoanganga na inakke. Manna alla'gasia otere' sapatuNa tena todong kusiratang. Iami sallang lanje'nekko siagang RohNa Allata'ala siagang pepe'. 17 Nia'mi lalang limanNa pa'dinginga, untu' laNapake antapi sikamma berasaka sa'genna tangkasa'. LaNapasse'rei berasaka lalang ri pammolikanna; mingka awanga laNatunui ri pepe' tenaya nalammari rinrana!” 18 Kammaminjo, na'rupa-rupamo cara napake Yohanes ampakaingaki anjo taua, na napabattu Kabara' Bajika. 19 Mingka napakainga'mi Herodes, ammarentaya ri Galilea ri passala' pa'buntinganna siagang Herodias. Anjo Herodias bainenna sari'battanna niarenga Filipus. Kammayatompa ri passala' kaja'dallang maraenga, le'baka nagaukang Herodes. 20 Mingka pila' natambaiji kaja'dallanna Herodes, lanri napantama'na Yohanes ri tarungkua. 21 Le'ba'na ngasemmo anjo taua nije'ne', nije'ne' tommi Isa. Na ri wattunna appala' doang tassungkei langika, 22 na manurummo RohNa Allata'ala irateanganNa, sangkamma jangang-jangang bodobangkeng. Nampa nia' kalangngerang sa'ranNa Allata'ala battu ri suruga angkana, “IKaumi AnakKu Kukamaseanga. IKaumi ampakasannangi atingKu.” 23 Ri wattunna Napakkaramulamo jama-jamanNa Isa, kira-kira tallumpulo taungi umuru'Na. Manuru' panggappana taua iaminne pattottorang boe-boena Isa: Yusuf, Eli, Matat, Lewi, Malkhi, Yanai, Yusuf, Matica, Amos, Nahum, Hesli, Nagai, Maat, Matica, Simei, Yosekh, Yoda, Yohanan, Resa, Zerubabel, Sealtiel, Neri, Malkhi, Adi, Kosam, Elmadam, Er, Yesua, Eliezer, Yorim, Matat, Lewi, Simeon, Yehuda, Yusuf, Yonam, Elyakim, Melea, Mina, Matata, Natan, Daud, Isai, Obed, Boas, Salmon, Nahason, Aminadab, Admin, Arni, Hezron, Peres, Yehuda, Yakub, Ishak, Abraham, Terah, Nahor, Serug, Rehu, Peleg, Eber, Salmon, Kenan, Arpakhsad, Sem, Nuh, Lamekh, Metusalah, Henokh, Yared, Mahalaleel, Kenan, Enos, Set, Adam, ana'Na Allata'ala.
1 Antama'mi RohNa Allata'ala ri KalenNa Isa ri wattunna assulu' battu ri Binanga Yordan. Nampa nipimping ri RohNa Allata'ala a'lampa mange ri parang lompoa. 2 Ammantammi anjoreng patampulo allo sallona, niso'ri ri Billisika. Patampulo alloi tamangnganrea apa-apa. Sa'genna cipuru'mi Nakasia'. 3 Nakana Billisika ri Ia, “Sai ana'NaKo Allata'ala? Jari suromi anjo batua na'jari roti.” 4 Appialimi Isa Nakana, “Nia' tattulisi' lalang ri Kittaka angkanaya, ‘Teai battu ri rotiaji bawang nattallasa' rupataua.’ ” 5 Nierammi Isa ri Billisika mange ri tampa' tinggi dudua. Na nipicinikiang memang silalonna sikontu kakaraenganna linoa. 6 Nakanamo Billisika ri Isa, “Sikontu anjo kakoasang siagang kakalumanynyangang Nucinika lakupassareangi mae ri Kau. Nasaba' yangasenna anjo le'ba'mi nipassareang mae ri nakke. Jari akkullei kupassareang mae ri tau kungaia kusareang. 7 Punna su'jukKo anynyomba ri nakke lakupassareang ngasengi anjo mae ri Kau.” 8 Appialimi Isa Nakana, “Nia' tattulisi' lalang ri Kittaka angkanaya, ‘Parallui nusomba Karaeng Allata'alanu, siagang Iaji bawang siratang nupakala'biri'!’ ” 9 Nampa nierang Isa ri Billisika mange ri Yerusalem, na niboli' irate ri tompo' kaminang tinggina Balla'Na Batara. Nampa nakana Billisika ri Ia, “Sai Ana'NaKo Allata'ala? Punna Ana'NaKo Allata'ala, a'lumpa' mako bedeng naung. 10 Nasaba' nia' tattulisi' lalang ri Kittaka angkanaya, ‘LaNasuroi Allata'ala malaeka'-malaeka'Na anjagai bajikKo.’ 11 Siagang pole, ‘Lanaruppaiko lalang limanna malaeka'-malaekaka, sollanna manna bangkenNu tena todong nalata'rumpa' ri batua.’ ” 12 Appialimi Isa Nakana, “Nia' tattulisi' lalang ri Kittaka angkanaya, ‘Teako coba-cobai Batara, Allata'alanu.’ ” 13 Le'ba'na niso'ri Isa a'rupa-rupa paccoba ri Billisika, a'lampami Billisika ambokoi Isa, nampa attayang pole wattu baji'. 14 Le'baki anjo ammotere'mi Isa mange ri Galilea. Na nikoasai ri RohNa Allata'ala. Tassiara'mi kabara'Na ri sikontu anjo daeraya. 15 Angngajara'mi lalang ri sikamma balla' sambayanga. Na nipuji-pujimo ri tau jaia. 16 A'lampa tommi Isa mange ri Nazaret, kampong le'baka Napammantangi sa'genna lompo. Kamma kabiasanNa, a'lampami mange ri balla' sambayanga ri wattunna allo Pammari-marianga. Ammentemmi ero' ammaca Kitta'. 17 Na nisaremo kitta' Na'bi Yesaya. Nasungkemi anjo kitta' ta'gulunga, nampa Nagappa siagang Nabaca anne aya' angkanaya, 18 “Niaki RohNa Batara ri KalengKu, Nasaba' le'ba'Ma' Nalanti' untu' ambirittakangi Kabara' Bajika mae ri tu kasi-asia. NasuroA' battu untu' ampa'la'bangi biritta kalappassanna tu nitarungkua siagang lamaccini'na tu butaya; untu' allappassangi tu nijallakkanga 19 ambirittakangi wattu kabattuanNa Batara ampasalamaki umma'Na.” 20 Le'baki Nabaca, Nagulung poleammi Isa anjo kittaka, naNapoterang, nampa mange ammempo. Nicinikimi Isa ri sikamma tau hadereka lalang ri balla' sambayanga. 21 Na appakkaramulamo Isa a'bicara ri ke'nanga angkana, “Anne alloa, ri nulangngere'na Kubaca, a'rupami anjo apa napaua sikamma ayaka sumpaeng.” 22 Sanna' ngaseng baji'na kana-kana Napasuluka. Sa'genna lannasa'mo taua allangngereki, na nipakkontutojeng ri ke'nanga. Nakanamo ke'nanga, “Sai ana'na Yusuf anne Taua?” 23 Jari Nakanamo Isa ri ke'nanga, “Mattantu lanupakei anne pangngebaranga ri Nakke angkanaya, ‘O dottoro', balleimi rolong KalenNu, nampa Nuballei tu maraenga. Gaukammi ri kampong KalenNu anjo gau'-gau' appakalannasaka, nilangngereka kabara'na Nugaukang ri Kapernaum.’ ” 24 Nasambungimi pole bicaranNa Isa Nakana, “U'rangi angkanaya tenanniakka na'bi nipakalompo ri kampong kalenna. 25 Mingka pilangngerimi anne: ri jammang nia'na Na'bi Elia, ri wattu tenana naturung bosia tallun taung sitangnga, naallemi cipuru' sikontu bonena pa'rasanganga. Na anjo wattua jai janda ri Israel. 26 Mingka manna nakamma, tena nanisuroi Elia ri Allata'ala mange antoaki manna kalase'rennaja anjo janda-jandaya. Passangalinna nisuro mangeji ri se'reang janda niaka ri Sarfat, ri daera Sidon. 27 Kammayatompa ri jammang nia'na Na'bi Elisa, jai tau garring sala ri Israel. Mingka manna sitau battu ri ke'nanga tania' niballei ri Elisa. Passangalinna Naaman bawang, anjo tu niaka ri Siria.” 28 Larro sikali ngasemmi tau niaka ri balla' sambayanga nalangngere'na akkana kamma Isa. 29 Ammentemmi ke'nanga nampa nabongka Isa assulu' ri pantaranganna anjo kotaya. Naerammi ke'nanga Isa mange ri tubiri'na buluka ero' nasorongang naung. 30 Mingka ammose'mi Isa ri alla'na tau jaia nampa a'lampa ampilari anjo tampaka. 31 Nampa a'lampa Isa mange ri kota Kapernaum ri Galilea. Naajara'mi taua anjoreng ri allo Pammari-marianga. 32 Lannasa'mi ke'nanga allangngereki bateNa angngajara', nasaba' lompoi pangaruNa punna a'bicarai. 33 Anjoreng ri balla' sambayanga nia' se're tau nisoso' ri setang. Accalli'-calli'mi anjo taua nakana, 34 “He Isa, tu Nazaret! Apa ero' Nugaukang mae ri kambe? BattuKo ero' angngancuruki ikambe? KuassenjaKo angkana inaiKo antu: iKaumi tu matangkasaka, nisuroa battu ri Allata'ala!” 35 Naga'gara'mi Isa anjo setanga Nakana, “A'merekko! Assulukko battu ri antu taua!” Nipatappasa'mi anjo taua ri anjo setanga ri dallekanna ngaseng ke'nanga. Nampa assulu' baji'-baji' anjo setanga battu ri anjo taua. 36 Lannasa' ngasemmi taua, siagang massing nakanamo ke'nanga para ia, “Teai sipato' kana-kananNa anne taua. Lanri koasa siagang pangaru kana-kananNa na Nasuro assulu' setanga, nassulu' tojeng setanga!” 37 A'la'bammi kabara'Na Isa ri sikontu anjo daeraya. 38 Nabokoimi Isa anjo balla' sambayanga, nampa a'lampa mange ri balla'na Petrus. Anjo wattua sitabangi rammusu' matoang bainena Petrus. Nipauammi Isa ri taua anjo passala' garrinna. 39 Mangemi Isa ri katinroanna anjo ibu', nampa Napela' assulu' anjo rammusu'na. Ammarimi anjo rammusuka; nambangung memammo silalonna matoang bainena Petrus, mange allayani ke'nanga. 40 Ri wattunna lalabumo alloa, battu ngasemmi taua angngerangi tau garrinna mae ri Isa. A'rupa-rupami garrinna ke'nanga. Naangka'mi na Napadongko' limanNa Isa irateanganna ke'nanga, sa'genna a'jari baji' ngaseng ke'nanga. 41 Nabongka ngaseng tommi setanga battu ri kalenna taua, nasosoka setang. Na punna assulu' anjo setanga battu ri kalenna taua, ammarrang-marrammi angkana, “IKaumi Ana'Na Allata'ala!” Mingka Naga'gara'mi Isa anjo setang-setanga. Napisangkai appau ke'nanga, lanri naassengi ke'nanga angkana, Iami Karaeng Mappasalamaka. 42 Ri wattunna appakkaramulamo ammumba alloa, Nabokoimi Isa anjo kotaya, nampa a'lampa mange ri se'reang tampa' sino-sinoa. Appakkaramulami taua amboyai. Na ri wattunna nibuntulu'mo ri tau jaia, tenamo nikellai ri taua a'lampa. 43 Mingka Nakanamo Isa, “Musti Kubirittakang tongi passala'na Kabara' Bajika siagang PamarentahanNa Allata'ala ri kota-kota maraenga. Nasaba' untu' iaminjo naNasuroA' battu Allata'ala antama' ri linoa.” 44 Lanri kammana minjo Nakkato'ba Isa lalang ri sikamma balla' sambayanga, ri sikontu pa'rasangang Yudea.
1 Nia' se're wattu nammenteng Isa ri biring Tamparang Genesaret. Jai tau assiassa'-assa', battu ero' allangngereki biritta battua ri Allata'ala. 2 Nia' Nacini' Isa rua biseang ri birinna anjo tamparanga. Sitabangi naung pajalaya antangkasi jalana ke'nanga. 3 Nai'mi Isa ri kalase'renna anjo biseanga, iamintu biseanna Simon. Nampa nasorong Simon anjo biseanga, assulukang sike'de' ri tamparanga. Ammempomi Isa ilalang ri anjo biseanga, nampa Naajara' anjo tau jaia. 4 Le'baki Naajara' ke'nanga, Nakanamo ri Simon, “Bisei biseannu antama' ri tampa' lantanga, nampa nubuang jalanu anjakkala' juku'.” 5 Appialimi Simon nakana, “O Bapa' Guru, sipattangmaki' bujuru' anjama terasa', mingka manna sikayu tania' juku' nigappa. Mingka lanri Kipassuroangi, baji'mi nakumange pole a'jala.” 6 Le'ba'na nagaukang anjo apa Napassuroanga Isa, teaimi sipato' jaina juku' nagappa ke'nanga. Sa'genna appakkaramulami sinre' jalana ke'nanga napakamma juku'. 7 Jari appala' tulummi ri agang-aganna ke'nanga niaka ri biseang maraenga. Battumi agang-aganna ke'nanga nampa nabonei juku' biseanna ke'nanga. Rassi rua-ruai anjo biseanna ke'nanga, sa'genna a'birimmo tallang anjo biseanga napakamma jaina juku'. 8 Ri wattunna nacini' Simon anjo kajarianga, su'ju'mi ri dallekanNa Isa. Nampa nakana, “Bokoima' Batara! Nasaba' inakke anne tau doraka'!” 9 Lannasa'mi Simon siagang sikamma tau naaganga anciniki anjo juku' kammaya jaina, nagappaya ke'nanga. 10 Kammayatompa agang-aganna Simon, iamintu Yakobus siagang Yohanes, ana'na Zebedeus. Nakanamo Isa ri Simon, “Teako mallakki! Pakkaramula ri kamma-kammaya anne la'jariko sanrapang pajala tau.” 11 Nabeso'mi Simon siagang agang-aganna anjo biseanga mange ri biring tamparanga. Nampa nabokoi ngaseng anjo biseanga, namminawang ke'nanga ri Isa. 12 Ri se'reang allo, niaki Isa ri se'reang kota. Anjoreng nia' se're tau bura'ne nataba garring sala. Nacini'na Isa, su'ju'mi anjo taua ri dallekanNa Isa. Nampa nakana ri Isa, “Pa', punna erokKi', akkullea' Kiballei naku'jari baji'!” 13 Naangka'mi limanNa Isa, nampa Nasero anjo taua, siagang Nakana, “ErokKa', a'jari baji' mako.” Anjo wattua lanynya' silalonnami garrinna anjo taua. 14 Napisangkaimi Isa anjo taua ancaritai anjo passalaka, manna pole ri nai. Nakanamo ri anjo taua, “A'lampamako mae ri imanga nampa nusuro amparessai kalennu. Nampa a'lampako mange assare koro'bang situru' napassuroanga Musa. Iaminjo a'jari butti ri taua angkanaya ma'nassa baji' mako ri garrinnu.” 15 Mingka pila' tassiara'mi kabara'Na Isa ri kere-keremae. Jaimi tau battu ero' ampilangngeri apa Napabattua, siagang ero' assuro ballei garrinna ke'nanga. 16 Le'baki anjo, a'lampami Isa mange appala' doang ri tampa' sino-sinoa. 17 Nia' se're allo, ri wattunna angngajara' Isa, na nia' siapa are tu Farisi siagang guru-guru agama ammempo ampilangngeri. Tu battui ke'nanga ri Yerusalem siagang kota-kota niaka ri Galilea siagang Yudea. Niaki ri KalenNa Isa koasaNa Allata'ala untu' amballei na'jari baji' sikamma tau garringa. 18 Anjo wattua, nia'mo siapa are tau battu angngerang tau peso' irate ri katinroanga. Eroki ke'nanga angngerangi anjo tau pesoka antama' ri anjo ballaka, mange ri dallekanNa Isa. 19 Mingka lanri teai sipato' jaina tau, takkulleami ke'nanga antama'. Jari naerammi ke'nanga anjo tau pesoka nai' ri pattongko'na anjo ballaka. Nampa nasungke ke'nanga pattongko'na anjo ballaka. Nampa napanaung anjo tau pesoka ri dallekanNa Isa, ri tangnga-tangngana anjo tau jaia. 20 Ri wattunna Nacini' Isa antekamma tappa'na ke'nanga, Nakanamo ri anjo tau pesoka, “Sari'battang, nipammopporammi dosanu.” 21 Sipa'bicarami guru-guru agamaya siagang tu Farisia nakana, “Inai anne taua nabarani kamma anghinai Allata'ala? Inai akkulle ampammopporangi dosaya, pantaranganna Allata'ala?” 22 Naassengi Isa anjo apa napakkuta'nanganga ke'nanga. Jari Nakanamo, “Angngapa nukkuta'nang kamma ngaseng lalang ri nyawanu? 23 Kereanga la'bi gampang, angkanaya, ‘Nipammopporammi dosanu,’ yareka angkanaya, ‘Ambangungko nai' nu'jappa?’ 24 Mingka kamma-kamma anne Kupa'butti ri kau ngaseng, angkanaya koasai Ana' Ma'rupataua ampammopporangi dosaya ri anne linoa.” Nampa Nakana Isa ri anjo tau pesoka, “Ambangungko nai', angkaki katinroannu, siagang ammotere' mako!” 25 Ambangummi linta' anjo taua ri dallekanna ngaseng ke'nanga. Nampa naangka' katinroanna, ammotere' siagang ammuji-muji ri Allata'ala. 26 Sanna' ngasemmi lannasa'na ke'nanga, nammuji-mujimo ri Allata'ala. Na lalang malla'na, nakanamo ke'nanga, “Teai sipato' appakalannasa'na kajariang nicinika anne alloa!” 27 Le'baki anjo assulu'mi Isa. Nia'mo Nacini' sitau pasingara' sima, niarenga Lewi, sitabang ammempo lalang ri kantoro'na. Nakanamo Isa ri ia, “Amminawangko ri Nakke.” 28 Ammentemmi Lewi siagang nabokoimi yangasenna niaka, nampa amminawang ri Isa. 29 Le'baki anjo appare'mi Lewi passua'-suarrang ri balla'na untu' antoanai Isa. Jaimi pasingara' sima siagang tau maraenganga battu angngagangi ke'nanga angnganre. 30 Nia'mo siapa are tu Farisi siagang guru-guru agama tena nasannang nyawana anciniki ke'nanga. Nakanamo ke'nanga ri ana'-ana' gurunNa Isa, “Angngapa nusipangnganreang siagang sipangnginungang ngaseng siagang pasingara' simaya kammayatompa tau kodi sipaka?” 31 Appialimi Isa Nakana, “Tau tenaya nagarring, tena naparallu ri dottoro'; mingka tau garringaji parallu. 32 Teai tau nakanaya kalenna annaba battu ero' Kukio', passangalinna tau dorakaya, sollanna toba' ke'nanga battu ri dosa-dosana.” 33 Nakanamo taua ri Isa, “Ana'-ana' gurunna Yohanes siagang ana'-ana' gurunna tu Farisia sarroi appuasa siagang appala' doang. Mingka ana'-ana' gurunNu nagaukangi angnganre-angnginunga.” 34 Appialimi Isa Nakana, “Maka nusuroi toanannu appuasa ri pa'buntinganga punna nia'ija bunting bura'nea angngagangi ke'nanga? Tantu tena! 35 Mingka lanarapiki wattunna nalanialle anjo bunting bura'nea battu ri ke'nanga. Iaminjo wattua nalappuasa ke'nanga.” 36 Nampa Nacaritamo pole Isa ri ke'nanga anne pangngebaranga, “Tena tau antampengi baju toana, nakaeng battu ri baju berua napake antampengi. Nasaba' tantu nakekkeki anjo baju berua. Siagang pole, tantu tena nasicoco' anjo kaeng pannampeng berua siagang anjo baju toaya. 37 Kammayatompa, tena tau ammoli' anggoro' beru lalang ri pammoneang toaya. Nasaba' lareppeki anjo pammoneang toaya napakamma anjo anggoro' berua. Jari latappelaki anjo anggoro' berua, napanra' todong anjo pammoneanga. 38 Anggoro' berua musti anjoreng tongi ri pammoneang berua niboli'. 39 Kammayatompa, tena tau ero' angnginung anggoro' beru, punna le'ba'mo angnginung anggoro' sallo. Nasaba' nakana ke'nanga, ‘Bajikangangi anjo anggoro' salloa.’ ”
1 Ri se'reang allo Pammari-mariang, a'jappai Isa na numalo ri se'reang koko gandung. Angngattili'mi ana'-ana' gurunNa gandung, nampa nagisiri' siagang limanna ke'nanga nampa nakanre. 2 Nia'mo siapa are tu Farisi angkana, “Angngapa naNudakkai atoranna agamata, iamintu Nugaukangi apa nipappisangkanga nigaukang ri allo Pammari-marianga?” 3 Appialimi Isa Nakana, “Tenapa nale'ba' nubaca apa le'baka nagaukang Karaeng Daud, ri wattunna cipuru' siagang ana'-ana'na? 4 Antamaki ri Balla'Na Batara angngallei roti le'bakamo nipassareang mae ri Allata'ala, nampa nakanre. Nampa napassareang todong anjo rotia mae ri ana'-ana'na. Na sikontutojenna, situru' atorang agamata, imang-imangaji bawang akkulle angkanrei anjo rotia.” 5 Nampa Nakana pole Isa, “Makoasai Ana' Ma'rupataua irateanganna allo Pammari-marianga!” 6 Ri se'reang allo Pammari-mariang maraenga, a'lampai Isa angngajara' ri balla' sambayanga. Anjoreng ri balla' sambayanga, nia' sitau mate siali limanna. 7 Nia' siapa are guru-guru agama siagang tu Farisi ero' amboyangi kasalang Isa, sollanna akkulle nituntu' Isa. Jari nacinikimi ke'nanga, maka laNaballei Isa anjo taua ri allo Pammari-marianga. 8 Mingka Naassengi Isa pikkirang salana ke'nanga. Jari Nakanamo ri anjo tau mate sialia limanna, “Maeko anrinni ammenteng ri dallekang!” Ammentemmi anjo taua, nampa mange ri dallekang. 9 Nampa akkuta'nang Isa ri tau niaka anjoreng Nakana, “Manuru' agamaya apa akkulle nigaukang ri allo Pammari-marianga? A'gau' baji' yareka a'gau' ja'dala'? Appasalama' tau yareka ancilakai taua?” 10 Naciniki ngasemmi Isa sikamma tau niaka hadere'. Nampa Nakana ri anjo tau mate sialia limanna, “Pajonjoi limannu.” Napajonjomi limanna anjo taua, na'jari baji'mo limanna. 11 Mingka sanna'mi larrona guru-guru agamaya siagang tu Farisia. Sipa'bicarami ke'nanga a'boya cara angkanaya apa akkulle nagaukang ke'nanga mae ri Isa. 12 Anjo wattua naiki Isa ri se'reang bonto, untu' appala' doang. Appala' doangi anjoreng sipattang bujuru'. 13 Ri wattunna singara'mo, Nakio'mi ana'-ana' gurunNa. Nampa Napilei sampulo anrua battu ri ke'nanga. Nagallara'mi tunisuro anjo tau sampuloa anrua. Iaminne areng-arenna ke'nanga: 14 Simon (nigallaraka Petrus,) siagang sari'battanna niarenga Andreas; na Yakobus siagang Yohanes, Filipus siagang Bartolomeus, 15 Matius siagang Tomas, Yakobus ana'na Alfeus, na Simon (nigallaraki Patriot), 16 Yudas ana'na Yakobus siagang Yudas Iskariot ambalukangai Isa sallang. 17 Le'baki anjo naummi Isa siagang tunisuroNa battu ri anjo bontoa, nampa ammantang ri se'reang parang lapparaka. Jai anjoreng ana'-ana' gurunNa maraenga, kammayatompa jai tommi tau battu a'rappungang, battu ri kere-keremae: tu battu ri sikontu pa'rasangang Yudea, Yerusalem, kota-kota Tirus, siagang Sidon kota anjorenga ri biring tamparanga. 18 Battumi ke'nanga ero' ampilangngeri kana-kananNa Isa, siagang ero' assuro ballei kalenna. Kammayatompa tau nasosoka setang nia' tommi battu, naniballei tommo, sa'genna baji' poleang. 19 Ero' ngasemmi taua anseroi Isa, nasaba' nia'na koasa assulu' battu ri KalenNa, akkullea amballei garrinna ke'nanga. 20 Naciniki ngasemmi ana'-ana' gurunNa Isa, nampa Nakana, “Mate'ne ngasengko tau kasi-asia, nasaba' ikaumi umma'Na Allata'ala! 21 Mate'ne ngasengko tau cipuruka ri kamma-kammaya anne; nasaba' lanibassoriko sallang! Mate'ne ngasengko tau angngarruka ri kamma-kammaya anne; nasaba' lammakkalakko sallang! 22 Mate'ne ngasengko punna nikabirisiko, punna nisorongbokoko, punna nihinako, siagang nipitinako passabakkang Ana' Ma'rupataua! 23 Kamanna na'bi-na'bia ri jammang riolo nigau' kamma ngaseng tongi. Punna kajariang anjo ri kalennu, pakasannangi atinnu siagang a'rannu-rannuko; nasaba' sanna' lompona pahala lanugappaya ri suruga. 24 Mingka cilaka ngaseng mako tau kalumanynyanga ri kamma-kammaya anne; nasaba' nukasia'mi apa-apa nungaia! 25 Cilaka ngaseng mako tau bassoroka ri kamma-kammaya anne; nasaba' lanaalleko cipuru'! Cilaka ngaseng mako ikau tau ammakka'-makkalaka ri kamma-kammaya anne; nasaba' lasi'nai atinnu siagang langngarru'-arrukko! 26 Cilaka ngaseng mako, punna nipalece mako ri tau jaia; nasaba' kammatommi anjo batena boe-boena ke'nanga ampalecei na'bi-na'bi patipua ri jammang riolo.” 27 “Mingka ikau ngaseng niaka ampilangngeriA' ri kamma-kammaya anne, iaminne pappasangKu mae ri kau: kamaseangi musu-musunnu, siagang a'gau' bajikko mae ri tau angkabirisiako. 28 Pappalakkangi barakka' tau antunrayako, siagang pappala' doangangi tau ja'dalaka ri kau. 29 Punna natempa ka'rang taua pilisi'nu siali, sareangi pole natempa ka'rangi sialia. Punna nialle passai jubanu, sareangi pole bajunnu. 30 Punna nia' tau appala' apa-apa ri kau, sare laloi. Na punna naalle passa apa-apannu, teako palaki ammotere'. 31 Gaukammi ri parannu tau apa nukaerokia nagaukang ke'nanga ri kalennu. 32 Nasaba' apa pahalanu punna tau mangngamaseanga bawang ri kalennu nukamaseang? Manna tau dorakaya nakamaseang tonji tau mangngamaseanga ri kalenna! 33 Apa pahalanu punna tau a'gau' bajikaji bawang ri kalennu nupa'gau' bajiki? Manna tau dorakaya a'gau' kamma tonji. 34 Kammayatompa, apa pahalanu punna tau akkulleaji ambayarakko nusare angnginrang? Manna tau dorakaya nasare tonji angnginrang paranna tau doraka, nampa napala' ammotere'! 35 Sikontutojenna takammayai anjo! Mingka musti nukamaseangi musunnu, siagang a'gau' bajikko ri ke'nanga. Musti nusarei taua angnginrang, siagang teako attayangi lanipoterangngang. Punna kamma anjo batenu, lompoi pahala lanugappaya, siagang la'jari mako ana'-ana'Na Allata'ala Kaminang Tinggia. Nasaba' baji' pa'maiki Allata'ala mae ri tau tenaya nangngasseng appala' sukkuru', kammayatompa baji' pa'maiki mae ri tau ja'dalaka. 36 Paralluko lompo pangngamaseang sangkamma Manggenu lompo pangngamaseangi.” 37 “Teako angngadeli ri tau maraenga, sollanna tena todong Naadeliko Allata'ala. Teako anghukkungi ri tau maraenga, sollanna tena todong Nahukkungko Allata'ala. Pammopporangi parannu tau, sollanna Napammopporang tongko Allata'ala. 38 Assareko ri parannu tau, sollanna Nasare tongko Allata'ala; lanisareko sanna' jaina la'bina, ri pa'baku' le'baka nibaku' sannaka rassina. Nasaba' pa'baku' apa nupake ambakuki parannu tau, ia todong minjo pa'bakuka laNapake Allata'ala ambakukko.” 39 Le'baki anjo Nacaritami Isa anne pangngebaranga, Nakana, “Punna tau buta anrenrengi paranna tau buta, tena tatu'guru'na sipa'rua naung ri solonganga. 40 Tena ana' guru la'jari lompoangang na gurunna. Mingka punna le'ba'mo appilajara' ana' gurua, lasangkammami gurunna. 41 Angngapa nakkulle nucini' baru'bu' kayua lalang ri matanna sari'battannu, natena nujampangi kayu baloka lalang ri matannu? 42 Antekamma lakkulle nukana ri sari'battannu, ‘Maeko sari'battang, nakupasulu' anjo baru'bu' kayua lalang ri matannu,’ na nia' kayu balo' lalang ri matannu tanucinika? He, munape'! Pasuluki rolong anjo balo' niaka lalang ri matannu. Punna assulu'mo, nampami labaji' paccini'nu, siagang nampami akkulle nupasulu' anjo baru'bu' kayu lalanga ri matanna sari'battannu.” 43 “Punna coppong poko'-pokoka, tena olona lakodi rapponna. Kammayatompa, punna tacopponga poko'-pokoka, tena olona labaji' rapponna. 44 Sikamma poko'-pokoka, akkullei nibatei battu ri rapponna. Takkulleai poko' akkatintinga la'rappo ara. Siagang takkulleai rompo'-rompo' akkatintinga la'rappo anggoro'. 45 Punna baji' taua, mattantu labaji' tongi kana-kananna, lanri sangnging kabajikang lalang ri atinna. Na punna ja'dala' taua, mattantu laja'dala' tongi kana-kananna, lanri sangnging kaja'dallang lalang ri atinna. Nasaba' apa-apa mamo assulu' ri bawaya ia tomminjo niaka lalang ri atia.” 46 “Angngapa nukkio', ‘Batara, Batara’ ri Nakke, mingka taerokako anggaukangi apa Kupaua ri kau? 47 Inaimi lanipasanrapangangi tau battua mae ri Nakke, na napilangngeri siagang nagaukang kanangKu? — Bajiki punna Kupauangko —. 48 Iami sanrapang tau ambangunga balla', nakekei lantang-lantang buttaya, nampa batu napare' pondasi. Ri wattunna battu a'baya siagang battu je'ne' binangaya antujui anjo ballaka, takkulleai ta'ge'goso', nasaba' bajiki pondasina. 49 Mingka inai-nai allangngereki kanangKu mingka tena nagaukangi, iami sanrapang tau ambangunga balla', natena nammake pondasi. Punna battu a'baya antujui, anra'ba memammi silalonna; na teai sipato' lompona panra'na anjo ballaka!”
1 Le'baki Napau Isa sikamma anjo passalaka mae ri tau jaia, a'lampami mange ri Kapernaum. 2 Anjoreng nia' se're perwira surudadu Roma. Anne perwiraya, nia' palayanna, sannaka nakarimangnginna. Na anjo palayanna natabai garring sanna', siagang lamate dudumi. 3 Ri wattunna nalangngere' anjo perwiraya kabara'Na Isa, nasuromi siapa are pamimping tu Yahudi mae ri Isa. Nasuroi ke'nanga mange appala' tulung, sollanna battu Isa amballei anjo palayanna. 4 Ri wattunna battu ke'nanga mae ri Isa, appala' tulung dudumi ke'nanga ri Isa sollanna akkulle Natulung anjo perwiraya. Nakana ke'nanga ri Isa, “Siratangi Kitulung anjo perwiraya Bapa' 5 nasaba' sanna' nakarimangnginna bansata siagang le'ba' maki' napambangungang balla' sambayang.” 6 A'lampami Isa siagang ke'nanga. Ri wattunna la'birimmo battu Isa mange anjoreng ri balla'na anjo perwiraya, nia'mo siapa are aganna anjo perwiraya battu nasuro anruppai Isa. Nasuroi ke'nanga ampabattui pasanna ri Isa angkana, “Tea' maki' susa-susai KalenTa mae ri ballakku, nasaba' tena nakusiratang antarimaKi' ri ballakku. 7 Iaminjo saba'na natena kubarani battu andallekang ri Katte. Jari Kiparentakang mami sollanna a'jari baji' anjo palayangku. 8 Nasaba' manna inakke amminawang turu' tonja' mae ri parentana komandangku. Na irawangangku nia' todong siapa are jaina surudadu, na musti amminawang turu' tongi ri parentaku. Punna nia' tau sitau kusuro angkana, ‘A'lampako!’ ma'nassa tena ta'lampana; na punna kukana ri maraenganga, ‘Maeko anrinni!’ ma'nassa tena tabattuna mae. Siagang punna kusuro palayangku angkana, ‘Gaukangi anne!’ ma'nassa tena tanagaukanna.” 9 Sanna' lannasa'Na Isa allangngereki anjo pappasanna perwiraya. Assailemi nampa Nakana mae ri tau jai niaka amminawang ri Ia angkana, “Teai sipato' anne taua. Manna ri alla'na bansa Israelka tena tompa naKule'ba' ammuntulu' tau lompo kammaya anne tappa'na!” 10 Ri wattunna ammotere' ngaseng anjo tunisuroa mange ri balla'na anjo perwiraya, a'jari baji'mi anjo palayanga. 11 Tena nasallo ribokoanganna, a'lampai Isa mange ri kota Nain. Amminawang tongi ana'-ana' gurunNa siagang tau jaia. 12 Ri wattunna anrapi' Isa ri pakke'bu' lompona kotaya sibuntulu'mi paerang tu mate assulukang kota. Anjo tu matea ana' bura'ne, ana' sitau-tau, na jandamo amma'na. Jai tunjoreng ri kotaya anrurungangi anjo jandaya. 13 Tu'guru'mi pangngamaseanNa Isa anciniki anjo jandaya. Nakanamo ri ia, “Teaki' angngarruki bu'!” 14 Nampa a'reppese' Isa ri pa'bulekanna anjo tu matea nampa Nata'gala'! Ammantammi anjo pabule' tu matea. Nakanamo Isa, “E, turungka, Kusuroko ambangung!” 15 Ambangummi ammempo anjo turungka le'bakamo mate, nappakkaramulamo a'bicara. Nampa Napassareang Isa anjo ana' bura'nea mae ri amma'na. 16 Malla' ngasemmi taua, na mammuji-muji ri Allata'ala. Nakanamo ke'nanga, “Ammumbami na'bi lompoa ri tangnga-tangngata! Nia'mi battu Allata'ala ampasalamaki umma'Na!” 17 Tassiara'mi anne kabara'Na Isa ri sikontu Yudea siagang daera-daera niaka ri tammulilina. 18 Nipauammi Yohanes ri ana'-ana' gurunna sikamma anjo apa le'baka kajariang. Nakio'mi Yohanes rua ana' gurunna, 19 nampa nasuro ke'nanga mange akkuta'nang ri Isa angkana, “Maka iKatte mintu tu labattua situru' Napa'janjianga Allata'ala? Yareka musti lattayangki' maraengannaya?” 20 A'lampami anjo ruaya ana' gurunna Yohanes mange ri Isa angkana, “Nisuroa' sipa'rua ri Yohanes Paje'ne' battu akkuta'nang ri Katte angkanaya, maka iKatte mintu tu labattua situru' Napa'janjianga Allata'ala? Yareka musti lattayangijaki' maraengannaya?” 21 Anjo wattua, sitabangi jai tau Naballei Isa, siagang jai roh ja'dala' Nabongka; kammayatompa jaimi tau buta Napa'jari accini'. 22 Jari appialimi Isa Nakana, “Ammotere' mako mae ri Yohanes na nupauang apa le'baka nulangngere' siagang nucini': accini'mi tau butaya, a'jappami tau pesoka, a'jari baji'mi tau garring salaya, allangngere'mi tau tongoloka, attallasa' poleammi tau matea, siagang nibirittakammi Kabara' Baji' battua ri Allata'ala, mae ri tu kasi-asia. 23 Mate'nemi tau tenaya naero' ansorongbokoA'.” 24 A'lampanamo anjo tu nasuroa Yohanes, Nabicarami Isa ri tau jaia anjo passala'na Yohanes. Nakana, “Apa ero' mange nucini' ri parang lompoa? Silawara' ruku' natuika anging? 25 Apa ero' mange nucini'? Se're tau ammakeang ga'ga? Niaki ri balla' lompona karaenga tau ammakeang ga'gaya siagang tau kala'bianga ri katallassanna! 26 Jari, apa ero' assulu' mange nucini'? Erokko mange accini' sitau na'bi? Kammatojengi, angkanaya na'bi anjo Yohanes; ba'lalo lompoangangi pole na na'bia. 27 Nasaba' iaminjo Yohanes natabaya anjo kana tattulisika lalang ri Kitta' angkanaya, Nakana Allata'ala, ‘Iaminne tunisuroKu,’ ‘Kusuroa a'lampa rioloanganNu, sollanNu nasungkeang oloang!’ ” 28 Nakana pole Isa, “U'rangi angkanaya tenale'bakapi nia' tau lompoangang na Yohanes Paje'ne' ri anne linoa. Mingka inai-nai kaminang ca'di ri umma'Na Allata'ala, iami lompoangang na Yohanes Paje'ne'.” 29 Sikontu taua — kammayatompa pasingara' simaya — allangngereki Isa akkana kamma anjo; yangaseng minjo ke'nanga angkatutui apa-apa Natuntuka Allata'ala, naero' nasuro je'ne' kalenna ri Yohanes. 30 Mingka taerokai tu Farisia siagang guru-guru agamaya antarimai rancanaNa Allata'ala eroka ampasalamaki ke'nanga. Taerokai ke'nanga nije'ne' ri Yohanes. 31 A'bicarami pole Isa Nakana, “Apami ero' Kupasanrapangangi taua ri anne jammanga? Apami sanrapanna ke'nanga? 32 Sanrapangi ke'nanga ana'-ana' ammempoa ri pasaraka; nia' sipa'rappungang akkio' ri maraengannaya angkana, ‘Nikelongang mako kelong a'rannu-rannu, mingka taerokako a'dansa! Nikelongang mako kelong ri kamateanga, mingka taerokako angngarru'!’ 33 Niaki battu Yohanes Paje'ne' — nappuasa siagang tangnginungai anggoro' — na nupakkanai, ‘Napantamakki setang!’ 34 Niaki battu Ana' Ma'rupataua — nangnganre siagang angnginung — na nupakkanai, ‘Cini' sai anjo taua, balalana siagang painunna, aganna pasingara' simaya siagang tu dorakaya.’ 35 Mingka manna nakamma mamo, la'butti ero' kabajikanNa Allata'ala battu ri sikontu tau antarimayai.” 36 Nia' sitau tu Farisi, niarenga Simon, angkioki Isa mange ri balla'na. A'lampami Isa mange ri balla'na anjo taua, nampa ammempo angnganre. 37 Anjoreng ri kotaya nia' pole sitau baine sannaka jaina dosana. Ri wattunna nalangngere' anjo bainea angkanaya niaki Isa sitabang angnganre ri balla'na anjo tu Farisia, battumi angngerang sibotolo' minynya'-minynya' bau'. 38 Mangemi ammenteng ri bokoNa Isa, iamintu ri ampi' bangkenNa Isa. Angngarru'mi anjoreng, nampa nabasai bangkenNa Isa siagang je'ne' matanna. Nampa nalu'lu' nakalotori bangkenNa Isa siagang uu'na, nampa natumpai minynya'-minynya' bau'. 39 Nacini'na anjo tu Farisi patannaya balla' appakamma anjo bainea, nakanamo lalang ri nyawana, “Punna na'bi anne Taua, tantu Naassengi angkanaya baine apa anjo baine anjamayai; tantu Naassengi angkanaya anjo bainea, baine sanna' jaina dosana!” 40 Jari Nakanamo Isa ri Simon, anjo tu Farisi patannaya balla', “Simon, Simon, nia' ero' Kupau ri kau.” Appialimi Simon nakana, “Iye' Pa' Guru, Kipaumi.” 41 Nakanamo Isa, “Nia' rua tau kainrangang doe' ri taua. Anjo se'rea kainrangangi limambilangngang doe' pera' na se'reanga kainrangang limampulo doe' pera'. 42 Mingka takkulleai ke'nanga ambayaraki anjo inranna. Jari tenamo nanipabayaraki ke'nanga. Jari kereanga anjo tau ruaya lala'bi angkamaseangi anjo patannaya doe'?” 43 Appialimi Simon nakana, “Kukira ia anjo kaminang jaia inranna na tanipabayarra!” Appialimi Isa Nakana, “Annaba sikali panggappanu.” 44 Nacinikimi Isa anjo bainea, nampa Nakana ri Simon, “Nuciniki anne bainea? BattuA' anrinni ri balla'nu, natena nupasadiangA' je'ne' pa'bissa bangkeng; mingka anne bainea natangkasi bangkengKu siagang je'ne' matanna, nampa nalu'lu' siagang uu'na. 45 Tena nubattu ambauA' ri wattungKu nuruppai; mingka anne bainea tenammariai ambaui bangkengKu baku' battuKu mae anrinni. 46 Tena nanutumpai minynya' ulungKu, mingka anne bainea natumpaimi minynya'-minynya' bau' bangkengKu. 47 Sitojeng-tojenna, lanri lompo kammana pangngamaseanna ri Nakke, na ma'nassamo angkanaya nipammopporammi dosa-dosana sannaka jaina. Punna sike'de'ji nipammopporangangi dosana taua, sike'de' tonji pangngamaseanna.” 48 Nampa Nakana Isa ri anjo bainea, “Nipammopporammi dosa-dosanu.” 49 Nakanamo para ia tau niaka ammempo angnganre siagang Isa, “Inai anne taua, nakkulle kamma ampammopporangi dosaya?” 50 Mingka Nakanamo pole Isa ri anjo bainea, “Nipasalama' mako lanri tappa'nu mae ri Nakke. A'lampamako siagang pakasannammi pa'mai'nu!”
1 Tena nasallo ribokoanganna, a'lampami Isa mange ri kota-kotaya, siagang ri kampong-kamponga, untu' ambirittakangi Kabara' Bajika, angkanaya lappakkaramulami ammarenta Allata'ala salaku Karaeng. Nia' tongi ana' gurunNa sampuloa anrua amminawang. 2 Kammayatompa siapa are bai'-baine le'baka napantamakki roh ja'dala' siagang tau garring na Naballei Isa, nia' tongi amminawang. Iamintu Maria nigallaraka Magdalena (le'baka napantamakki tuju setang na Nabongka assulu' Isa); 3 Yohana, bainenna Khuza, pagawe balla' lompona Herodes; Susana, siagang jai pole bai'-baine maraeng. Ongkoso' kalenna napake ke'nanga ambantui Isa siagang ana'-ana' gurunNa. 4 Tuli jaina tau battu ri a'rupa-rupaya kota, mange ri Isa. Na ri wattunna jaimo tau a'rappungang, Nacaritami Isa mae ri ke'nanga anne pangngebarang kammaya: 5 “Nia' sitau pamarri mange appakioro' bine. Ri wattunna appakioro', nia' bine takkioro' ri aganga. Jari nia'mo sitangnga nionjokang ri taua, na nia' sitangnga nikanre ri jangang-janganga. 6 Nia' todong takkioro' ri butta jaia batu-batunna. Mingka ri wattunna accu'la', linta'mi kalumeng, lanri kalotoroki buttana. 7 Nia' todong bine takkioro' ri tangnga-tangngana rompo'-rompo' akkatintinga. Attimbomi anjo rompo'-rompo' akkatintinga siagang anjo binea. Apaji niepe'mi anjo binea ri anjo rompo'-rompo' akkatintinga, sa'genna mate. 8 Mingka nia' todong bine takkioro' ri butta copponga, nampa attimbo, na'lappi sibilangngang rapponna.” Le'baki Nacarita Isa anjo pangngebaranga, Nakanamo Isa, “Punna nia' tolinnu pilangngerimi!” 9 Napakkuta'nangammi ana'-ana' gurunNa Isa battuanna anjo pangngebaranga. 10 Appialimi Isa Nakana, “Ikau ngaseng nisare mako pangngassengang untu' angngassengi rahasia battua ri Allata'ala siagang PamarentahanNa. Mingka tau maraenga parallui niajara' siagang pangngebarang, sollanna accini' ke'nanga, mingka tanaassengai apa kajarianga; sollanna appilangngeri ke'nanga mingka takkulleai napahang.” 11 Nakanamo pole Isa, “Iaminne battuanna anjo pangngebaranga: Anjo binea, iaminjo kana-kananNa Allata'ala. 12 Anjo bine takkioroka ri aganga, iaminjo pangngebaranna tau allangngerekai anjo kananNa Allata'ala; mingka battui Billisika angngallei anjo kabaraka battu lalang ri atinna ke'nanga, sollanna tena natappa' siagang tena nanipasalama' ke'nanga. 13 Anjo bine takkioroka ri tampa' a'batu-batua, iaminjo pangngebaranna tau sannanga nyawana ri wattu nalangngere'na anjo kabaraka; mingka tena najarre' anna'gala' aka'na anjo kabaraka lalang ri atinna ke'nanga. Sinampe'ji tappa' ke'nanga; punna battumo paccobaya, ammono'bokomi ke'nanga. 14 Anjo bine takkioroka ri tangnga-tangngana rompo'-rompo' akkatintinga, iaminjo pangngebaranna tau allangngerekai anjo kabaraka, mingka ranggaselai ri passala' katallassanna ke'nanga, siagang cinnai a'jari sannang nakkalumanynyang ilalang ri anne linoa. Yangaseng minjo angngepeki ke'nanga, sa'genna takkulleai ke'nanga a'rappo baji'. 15 Anjo bine takkioroka ri butta copponga, iaminjo pangngebaranna tau allangngerekai anjo kabaraka, nampa naboli' baji' siagang attojeng-tojeng lalang ri atinna ke'nanga. Attahangi ke'nanga, sa'genna sanrapangi ke'nanga poko' kayu a'rappoa.” 16 “Tenanniakka tau apparinra lampu, nampa natongko' katoang, yareka naboli' rawanganna katinroanga. Mingka lanaboliki irate ri pa'dongkokanna, sollanna punna nia' tau antama' akkullei nacini' singara'na. 17 Tenanniakka apa-apa taccokko talakacinikang; siagang tenanniakka apa-apa nirahasiakang talatassungke siagang talakaassengang. 18 Lanri kammana, pilangngerimi baji'-baji' apa-apa nulangngereka. Nasaba' tau niakamo apa-apanna lanitambaiangi pole jaiangang; mingka tenaya apa-apanna, manna apa sike'deka ri ia lanialleangi pole ammotere'.” 19 Ero'mi battu amma'Na siagang sari'battanNa Isa mae ri Isa, mingka takkulleai ke'nanga ta'rapi' mange, lanri sanna' jaina tau. 20 Nia'mo sitau angkana mae ri Isa, nakana, “Pa', niaki ammatTa siagang sari'battanTa pantarang. Eroki ke'nanga angngagangKi' sicini'.” 21 Mingka Nakanamo Isa ri ke'nanga, “Inai-nai ampilangngeri siagang anggaukangi kananNa Allata'ala, iami a'jari ammakKu siagang a'jari sari'battangKu.” 22 Ri se'reang allo nai'mi Isa siagang ana'-ana' gurunNa ri se'reang biseang. Nakana Isa ri ana'-ana' gurunNa, “Umba ki'lampa a'limbang anta'leang ri ba'leanna anne tamparanga.” Jari a'lampami ke'nanga. 23 Ri wattunna attangnga dolangang ke'nanga, attinromi Isa. Ti'ring battumi anging lompoa antujui anjo tamparanga. Appakkaramulami antama' je'neka ri biseanna ke'nanga, sa'genna a'reppese'mi balaya ri ke'nanga. 24 A'lampami linta' ana'-ana' gurunNa Isa anronrongi Isa. Nakanamo ke'nanga, “Pa' Guru, Pa' Guru, natujuki' bala!” Ambangummi Isa nampa Naga'gara' anjo anginga siagang bombang lompoa. Ammarimi anjo anginga siagang bombanga, nampa a'jari sannang sikali tamparanga. 25 Nampa Nakanamo Isa mae ri ana'-ana' gurunNa, “Angngapa natena ngaseng nutappa' ri Nakke?” Lannasa'mi siagang malla'mi ana'-ana' gurunNa Isa. Na massing angkanamo para ia ke'nanga, “Inai sitojenna anne taua sa'genna manna anginga siagang bombanga Naparenta ngaseng, nanituruki parentaNa?” 26 Assombala'mi pole Isa siagang ana'-ana' gurunNa tulusu' mange ri daera Gerasa ri ba'leanna Tamparang Galilea. 27 Ri wattunna naummo Isa ri bontoa, nia'mo sitau bura'ne napantamakki setang, battu anruppai. Anjo taua tau battu ri kotaya. Sallomi taccare-carea siagang tammantanga ri balla'. Anjoreng mami ri kali'bong pa'jerakkang batua ero' ammantang. 28 Nacini'na anjo taua angkana niaki battu Isa, ammarrang lompomi nampa su'ju' ri dallekanNa Isa. Ammarrammi nakana, “O Isa, Ana'Na Allata'ala Kaminang Tinggia! Apa ero' Kigaukang mae ri nakke? Kupalaki natena Kisessa'!” 29 Nakkana kamma anjo taua, lanri Nabongkai Isa assulu' anjo setanga battu ri kalenna anjo taua. A'mole-molemi nipantamakki ri anjo setanga, sa'genna manna nisikko' ngaseng rante limanna siagang bangkenna, siagang sanna' nijagaina, mingka tuli natappu'-tappu'ji anjo rantea, nampa nierang ri setanga mange ri parang lompoa. 30 Akkuta'nammi Isa ri anjo taua Nakana, “Inai arennu?” Appialimi anjo taua angkana, “Legiun,” nasaba' jaimi setang antama' ri kalenna anjo taua. 31 Napala' dudumi anjo setang-setanga sollanna tena nibongkai ri Isa naung ri Kalo'banna Kamateanga. 32 Tena nabella ri anjo tampaka, nia' jai sikali bawi sitabang a'boya kanre ri tompo'na bonto-bontoa. Napala' dudumi anjo setang-setanga sollanna nikellai antama' anjoreng ri bawi-bawia. Naniturukiammo pappala'na ke'nanga ri Isa. 33 Jari assulu'mi anjo setang-setanga battu lalang ri kalenna anjo taua, nampa antama' anjoreng ri bawi-bawia. Nampa lari ngaseng anjo bawia, na'lumpa' naung ri tamparanga, sa'genna tallang ngaseng. 34 Nacini'mi pakalawakinna anjo bawia anjo apa kajarianga. Jari larimi pakalawakinna anjo bawia na napa'la'bang anjo kabaraka ri kotaya siagang ri desa a'reppeseka anjoreng ri kotaya. 35 Assulu'mi taua battu ri kotaya ero' mange anciniki anjo apa kajarianga. Mangemi ke'nanga ri Isa, na nia'mo nacini' ke'nanga anjo tau le'baka nilappassang ri setanga, ammempo ri dallekanNa Isa. Ammakemi care-care, siagang baji'mi jappana pikkiranna. Malla' ngasemmi ke'nanga. 36 Sikamma tau ancinikai anjo apa kajarianga, nacaritami mae ri tau maraenga, antekamma batena niballei anjo taua. 37 Napala' dudu ngasemmi tau ammantanga ri daera Gerasa, sollanna a'lampa Isa ambokoi anjo tampaka, lanri malla' duduna ngaseng ke'nanga. Jari nai'mi Isa ri biseanga, ero' ammotere'. 38 Napala' dudumi ri Isa anjo tau le'baka nilappassang ri setanga sollanna nikellai amminawang ri Isa. Mingka nisuromi a'lampa ri Isa. 39 Nakana Isa, “Ammotere' mako, na nukabarrang anjo apa le'baka Nagaukang Allata'ala ri kalennu.” Jari a'lampami anjo taua ampa'la'bangi anjo apa le'baka Nagaukang Isa ri kalenna sa'genna sepe'-sepe'na kotaya. 40 Ri wattunna battu Isa anta'leang ri ba'leanna tamparanga, battumi taua anruppai. Sanna' ngaseng rannuna ke'nanga anruppai Isa, nasaba' sitabang memangi nitayang ri ke'nanga. 41 Nia'mo sitau kapala balla' sambayang battu mae ri Isa, iamintu niarenga Yairus. Su'ju'mi ri dallekanNa Isa, na napala' dudu sollanna ero' Isa a'lampa mange ri balla'na; 42 nasaba' garringi ana' bainena sitau-taua sampulo anrua taung umuru'na, siagang a'biring dudumi mate. Lalang a'jappaNa Isa mange ri balla'na Yairus, battumi taua attammulili siagang siassa'-assa', mae ri Isa. 43 Nia' tommo ri alla'na ke'nanga sitau baine; anjo bainea sampulomi anrua taung garring nalari cera'. La'busu'mi barang-baranna napangngongkosang mae ri dottoroka, mingka tena manna sitau akkulle amballei. 44 A'reppese'mi anjo bainea battu ri bokoNa Isa, nampa nasero cappa' jubaNa. Ammari memammi silalonna nalari cera' anjo bainea. 45 Akkuta'nammi Isa Nakana, “Inai anseroi jubaKu?” Assassala' ngasemmi taua. Nakanamo Petrus, “Jai sikali tau angkulilingiKi', siagang ansorong-sorongKi' Bapa'!” 46 Nakanamo Isa, “Mingka nia' tau anseroA'. Kuassengi, nasaba' nia' Kusa'ring kagassingang assulu' battu lalang ri KalengKu.” 47 Naassemmi kalenna anjo bainea angkanaya niassemmi apa le'baka nagaukang. Jari battumi su'ju' siagang annekkere' ri dallekanNa Isa. Nacaritami ri dallekanna ngaseng tau jaia, apa saba'na nanasero jubaNa Isa. Na nacarita tommo angkanaya ammarimi silalonna garrinna. 48 Nakanamo Isa ri ia, “AnakKu, lanri tappa'nu ri Nakke, a'jari baji' mako. A'lampamako siagang salama'.” 49 Sitabang a'bicaraNa Isa, nia'mo sitau tunisuro battu mae ri Yairus, iamintu tau battu ri balla'na Yairus. Nakanamo anjo taua ri Yairus, “Matemi anjo ana' baineta. Tea' maki' susa-susai pole anjo Bapa' Guru.” 50 Nalangngere'Na Isa anjo kabaraka, Nakanamo ri Yairus, “Teako mallakki. Tappa' mako, na'jari baji' ana'nu.” 51 Ri wattunna battumo mange ri balla'na Yairus, tenamo Nakellai Isa tau maraenga antama' ri kamara'na anjo anaka, pantaranganna Petrus, Yohanes, Yakobus, siagang anrong-manggena anjo anaka. 52 Angngarru'mi siagang appiraung ngasemmi taua angkarruki anjo ana' matea. Mingka Nakanamo Isa, “Teako niakki angngarru'. Anjo anaka tena namate, mingka attinronaja!” 53 Nikakkalimi Isa ri ke'nanga, nasaba' naassenna ke'nanga angkana matemi anjo ana' bainea. 54 Mingka Nata'gala'mi Isa limanna anjo anaka nampa Nakana, “Ambangungko na'!” 55 Ammotere'mi nyawana anjo anaka, nambangung memammo silalonna. Le'baki anjo Nasuromi Isa ke'nanga ansarei kanre anjo anaka. 56 Lannasa' sikalimi tau toana anjo anaka. Mingka Napisangkaimi Isa ke'nanga ampaui anjo apa kajarianga manna pole ri nai.
1 Nakio'mi Isa sampuloa anrua ana' gurunNa. Nampa Nasare ke'nanga koasa untu' ambongkai setanga, siagang amballei tau garringa. 2 Le'baki anjo Nasuromi ke'nanga a'lampa amballei tau garringa siagang ambirittakangi ri passala' antekamma bateNa ammarenta Allata'ala salaku Karaeng. 3 Nakanamo Isa ri ke'nanga, “Teako angngerangngi apa-apa lalang ri pa'lampannu. Teako angngerangngi takkang, yareka purukang pammoneang passidakka, yareka kanre, yareka doe', yareka ruanglawara' pakeang. 4 Kere-kerekomae nitarima, ammantang mako anjoreng sa'genna nubokoi anjo kotaya. 5 Siagang kere-kerekomae tanitarimaya, pabe'bese'mi limbu'bu' niaka ri pala' bangkennu punna nubokoi anjo kotaya, a'jari pappakainga' mae ri ke'nanga.” 6 A'lampami ana'-ana' gurunNa Isa mange ri desa-desaya untu' ambirittakangi Kabara' Bajika, siagang amballei tau garringa ri kere-keremae. 7 Ri wattunna nalangngere' Herodes, ammarentaya ri Galilea, sikamma anjo apa le'baka kajariang, a'jari lingumi. Nasaba' nia' tau angkana attallasa' poleammi ammotere' Yohanes Paje'ne'. 8 Nia' todong tau angkana nia'mi pole battu Elia. Maraenganga angkana sitau na'bi riolo dudua attallasa' poleang ammotere'. 9 Nakanamo Herodes, “Le'ba'mi kusuro taua ansamballei kallonna Yohanes. Mingka inai anjo Taua sikontutojenna? Jai sikalimi kabara'na kulangngere' anjo Taua.” Jari ero'mi Herodes anciniki Isa. 10 Ammotere'mi ana'-ana' gurunNa Isa. Nacarita ngasemmi ke'nanga mae ri Isa sikamma apa le'baka nagaukang ke'nanga. Nikio'mi ri Isa ke'nanga a'lampa anynya'la' ri kota Betsaida. 11 Mingka naassenna taua angkanaya la'lampai Isa, amminawang tommi ke'nanga. Nitarimami ke'nanga ri Isa, nampa Nacarita ri ke'nanga ri passala' antekamma bateNa ammarenta Allata'ala salaku Karaeng. Kammayatompa Naballei tommi tau garringa na'jari baji'. 12 Ri wattunna appakkaramulamo lalabu alloa, battumi mae ri Isa ana'-ana' gurunNa sampuloa anrua. Nakanamo ke'nanga, “Pa', bella sikali anne tampa' nipammantangia. Bajikangang Kisuro ngasemmi anne taua a'lampa sollanna akkulle ke'nanga mange a'boya kanre, siagang a'boya tampa' pa'bangngiang ri kampong-kamponga yareka ri desa-desa niaka a'reppese' anrinni.” 13 Mingka appialimi Isa Nakana, “Ikau ngasemmo assarei ke'nanga kanre.” Appialimi ana'-ana' gurunNa Isa angkana, “Limambatuji roti siagang ruang kayuji juku' nia' ri katte. Jari la'lampaki' ammalli kanre untu' tau sikammaya anne jaina?” 14 (Nia' kira-kira limassa'bu tau bura'ne anjoreng.) Nakanamo Isa ri ana'-ana' gurunNa, “Suromi anjo taua ammempo, a'gompo-gompo, kira-kira limampulo sipa'rappungang.” 15 Nagaukammi ana'-ana' gurunNa Isa anjo apa Napassuroanga. 16 Nampa Naalle Isa anjo roti limambatua siagang juku' ruang kayua. Accongami nai' ri langika, appala' sukkuru' ri Allata'ala. Le'baki anjo Nabage-bagemi anjo rotia siagang jukuka; nampa Napassareang mae ri ana'-ana' gurunNa, sollanna natawa-tawai anjo taua. 17 Angnganre ngasemmi ke'nanga sa'genna bassoro'. Nampa napasse're ana'-ana' gurunNa Isa kanre alla'bia, nia' sampulo anrua baku' jaina. 18 Ri se'reang allo, ri wattunna appala' doang Isa Kale-kalenNa, battumi ana'-ana' gurunNa mae ri Ia. Akkuta'nammi Isa mae ri ke'nanga Nakana, “Turu' kananna taua, inaiA' anne?” 19 Appialimi ke'nanga angkana, “Nia' tau angkana Yohanes Paje'ne'. Nia' todong tau angkana Elia. Na maraenganga nakana kalase'renna na'bi jammang rioloa, attallasa' poleanga ammotere'.” 20 Akkuta'nammi pole Isa Nakana, “Mingka turu' panggappanu ikau ngaseng, inaiA' anne?” Appialimi Petrus nakana, “Ikattemi Karaeng Mappasalamaka, le'baka Napa'janjiang Allata'ala.” 21 Nampa Nakana Isa ri ana'-ana' gurunNa, “Tea sikaliko pau-paui anne manna pole ri nai.” 22 Nakana pole Isa, “Lajai memang tongi passessa laNakasia' Ana' Ma'rupataua, siagang lanimusui ri pamimping-pamimpinga siagang imang-imang kapalaya, kammayatompa guru-guru agamaya. Lanibunoi, mingka ri makatalluna alloa lanipabangung poleangi ammotere'.” 23 Le'baki anjo Nakanamo mae ri yangaseng tau niaka anjoreng, “Inai-nai ero' amminawang ri Nakke, musti nakaluppai rolong kaparalluang kalenna, musti napisangi salli'na allo-allo, nampa tuli amminawang ri Nakke. 24 Nasaba' inai-nai ero' angkatutui nyawana, iami latappela' nyawana. Mingka inai-nai angkoro'bangkangi katallassanna untu' kaparalluangKu, iami lanipasalama' katallassanna. 25 Nasaba' apa matu-matunna nakammai taua bonena anne linoa punna lapanraki siagang latappela'ji nyawana? 26 Inai-nai siri'-siri' angngakuiA' siagang antarimai pangngajarangKu, lasiri'-siri' tongi Ana' Ma'rupataua angngakui sallang punna battu siagang koasaNa, kammayatompa koasaNa ManggeNa siagang koasana malaeka'-malaeka' matangkasaka! 27 Assengi angkanaya: nia' tau anrinni ri alla'nu tenapa nalamate punna tenapa naciniki Allata'ala ammarenta.” 28 Kira-kira sidaminggu le'ba'na Napangngajarrang Isa sikamma anjo passalaka, Naerammi Petrus, Yohanes, siagang Yakobus nai' ri se'reang bulu' untu' appala' doang. 29 Ri wattunna appala' doang Isa anjoreng, tappinrami rupanNa siagang pakeanNa a'jari accilla' sanna' kebo'na. 30 Ti'ring nia'mo rua tau, iamintu Musa siagang Elia battu ampappicinikangi kalenna lalang caya battua ri suruga. A'bicarami ke'nanga siagang Isa, ri passala' kamateang laNaoloa Isa sallang ri Yerusalem. 32 Anjo wattua attinroi Petrus siagang agang-aganna. Mingka ti'ring ambangummi ke'nanga, na nacini'mo ke'nanga accaya Isa, ammenteng siagang anjo tau ruaya. 33 Ri wattunna la'lampamo anjo tau ruaya ambokoi Isa, angkanami Petrus ri Isa, “Pa' Guru, baji' sikali nisa'ring pakkasiaka anrinni. Bajiki punna apparekki' kema: se're untu' iKatte, se're untu' Musa, na se're untu' Elia.” (Kammaminjo kananna Petrus, mingka tanapahangai anjo apa napaua.) 34 Lalang a'bicarana ija Petrus, nia'mo battu rammang antongkoki ke'nanga, sa'genna malla'mo ke'nanga. 35 Nampa nia'mo sa'ra kalangngerang battu lalang ri rammanga angkana, “Iaminne AnakKu Kupilea. Pilangngeri kananNa!” 36 Ammarinamo kalangngerang anjo sa'raya, nacini'mi ke'nanga Kale-kalenNa mami Isa anjoreng. Tenamo nakkana-kana ana'-ana' gurunNa Isa siagang tanapauami manna pole ri nai anjo passalaka siagang kajariang le'baka nacini' ke'nanga. 37 Ammukona, naummi Isa siagang anjo tallua ana' gurunNa battu rate ri anjo buluka. Najaimo tau battu mae ri Isa. 38 Nia'mo sitau bura'ne akkio' battu ri tangnga-tangngana anjo tau jaia nakana, “Pa' Guru, Kitulunga', naKimange anciniki ana' sitau-tauku! 39 Kapunna nipantamakki ri roh ja'dalaka, ti'ring ammarrang-marrammi, siagang ka'doro'mi kalenna nampa a'busa bawana. Sanna' nisessana ri anjo roh ja'dalaka, siagang taerokai anjo roh ja'dalaka assulu' battu ri kalenna! 40 Le'ba'mi kupala' ri ana'-ana' gurunTa sollanna nabongkai assulu' anjo roh ja'dalaka, mingka tanakulleai ke'nanga.” 41 Appialimi Isa Nakana, “Teai ngasengko sipato' anne! Ma'nassa tau sala oloang ngasengko siagang tau tena ngaseng nutappa'! Siapapi salloKu lammantang angngagangko siagang lasa'bara' ri kau ngaseng? Erangi mae antu anaka!” 42 Lalang a'jappana anjo anaka mae ri Isa, nipatappasa'mi anjo anaka ri anjo setanga, siagang a'jari ka'doro'mi kalenna. Mingka niga'gara'mi ri Isa anjo roh ja'dalaka, sollanna assulu', na'jari baji'mo anjo anaka. Nampa nipassareang anjo anaka ammotere' mange ri manggena. 43 Lannasa' ngasemmi taua anciniki antekamma lompona koasaNa Allata'ala. Ri wattunna lannasa' ngaseng ija taua anciniki anjo apa-apa Nagaukang ngasenga, Nakanamo Isa ri ana'-ana' gurunNa, 44 “Pilangngeri baji'-baji', siagang teako kaluppai anne kana-kanangKu: Lanipassareangi Ana' Ma'rupataua mae ri koasana rupataua.” 45 Mingka tanapahangai ana'-ana' gurunNa anjo Nabicaraya Isa. Nirahasiakangi anjo passalaka mae ri ke'nanga sollanna tena napahangi ke'nanga. Mingka mallaki ke'nanga ampakkuta'nangangi anjo passalaka mae ri Isa. 46 A'gea'-gea'mi ana'-ana' gurunNa Isa ri passala' inai ri ke'nanga kaminang la'biri'. 47 Naassengi Isa pikkiranna ke'nanga. Jari angngallemi sitau ana'-ana' ca'di, nampa Nasuro anjo ana'-anaka ammenteng ri sa'rinNa. 48 Nampa Nakana ri ana'-ana' gurunNa, “Inai-nai antarimai anne anaka passabakkang iNakke, battuanna iNakkemi natarima. Na inai-nai antarimA', battuanna natarima tommi Allata'ala assuroA' battu. Nasaba' inai-nai kaminang tuna ri kau, iami kaminang la'biri'!” 49 Nakanamo Yohanes, “Tuang, nia' nacini' ikambe tau ambongkai setanga, na arenTa napake. Jari kupisangkaimi, nasaba' teai tu battu ri kumpulanta.” 50 Nakanamo Isa ri Yohanes siagang ana'-ana' gurunNa maraenga, “Teako pisangkai, nasaba' inai-nai ta'jari musua ri kau, battuanna a'jari agangi ri kau ngaseng.” 51 Ri wattunna tasalloamo naniangka' Isa nai' ri suruga apparurumi untu' la'lampa mange ri Yerusalem. 52 Nasuromi taua a'lampa riolo. A'lampami anjo tau Nasuroa a'lampa, nampa antama' ri se'reang kampong ri Samaria. Napasadiami anjoreng sikamma apa naparalluanga Isa. 53 Mingka taerokami taua anjoreng ri kamponga antarimai Isa, nasaba' a'nassa sikalimi angkanaya a'lampa mangemi ri Yerusalem. 54 Anjo passalaka naassemmi ana'-ana' gurunNa Isa, iamintu Yakobus siagang Yohanes. Jari nakanamo ke'nanga ri Isa, “O Batara, maka erokKi' nanipala' pepeka naung battu ri langika anghukkung ngasengi anne taua?” 55 Assailemi Isa, na Nakalarroi ke'nanga. 56 Le'baki anjo a'lampami ke'nanga mange ri pa'rasangang maraenga. 57 Lalang Napatulusu'na jappaNa Isa siagang ana'-ana' gurunNa, nia'mo tau angkana ri Isa, nakana, “Pa', erokka' amminawang ri Katte manna pole kemae lampaTa!” 58 Appialimi Isa Nakana, “Kongkong romanga nia' kali'bonna, siagang jangang-janganga nia' ru'munna, mingka Ana' Ma'rupataua manna tampa' laNapanra'baia tena todong.” 59 Nampa Nakana Isa ri se'reang tau maraengannaya, “Amminawang mako ri Nakke.” Mingka nakanamo anjo taua, “Pa', boli'ma' kamma ammotere' rolong antarawangi manggeku matea.” 60 Appialimi Isa Nakana, “Lappassammi tau matea antarawangi tau matena. Mingka ikau, a'lampamako siagang pa'la'bammi birittaya, angkanaya appakkaramulami Allata'ala ammarenta.” 61 Nia' todong sitau maraenganga angkana, “Pa', erokka' amminawang ri Katte, mingka boli'ma' kamma ammotere' rolong appala' kana.” 62 Nakanamo Isa ri anjo taua, “Punna appakkaramulamo taua appa'jeko, nampa assaile pole mae ri boko, tena nasiratang a'jari umma'Na Allata'ala.”
1 Le'baki anjo Napileimi pole Isa tujupulo ana' gurunNa, nampa Nasuro ke'nanga a'lampa ta'rua-rua. Nasuroi ke'nanga a'lampa riolo mange ri kota-kota siagang sikamma tampa' eroka Nakunjungi. 2 Nakanamo ri ke'nanga, “Jaimi ero' lanikatto, mingka sike'de'ji tau eroka nisuro akkatto. Jari, pala'mi ri Patanna tana, sollanna Nasuro pajamaya battu angkattoi wassele' lamung-lamunNa. 3 Jari a'lampa ngaseng mako! Sanrapangko gimbalaka Kusuro antama' ri tangnga-tangngana kongkong romanga. 4 Teako angngerangngi pammoneang doe', yareka purukang pammoneang passidakka, yareka sapatu. Teako ammantangngi ri tangngana aganga untu' assare sallang manna pole ri nai. 5 Punna antamakko ri se'reang balla', a'barisallangko rolong angkana, ‘Poro nibarakkaki bonena anne ballaka.’ 6 Punna nia' lalang balla' tau nangai annarima barakka', ammantammi anjo barakka'nu ilalang ri anjo ballaka; mingka punna tena, allemi ammotere' anjo barakka'nu. 7 Ammantang mako ri se'reang balla'. Tarimami apa napassareanga patanna balla' ri kau, nasaba' sikamma tau anjamaya musti natarimai wassele' jama-jamanna. Teako a'lette'-letteki battu ri se'reang balla' mange ri balla' maraenga. 8 Punna battuko mange ri se'reang kota, na nitarima bajikko anjoreng, kanremi apa nisareangako. 9 Balleimi tau garringa ri anjo kotaya, siagang birittakammi mae ri sikamma taua anjoreng angkanaya, ‘Tasalloami Nalappakkaramula Allata'ala ammarenta salaku Karaeng ri tangnga-tangnganu ngaseng.’ 10 Mingka punna battuko mange ri se'reang kota, natena nitarimako anjoreng, assulu' mako ri aganga na nupau angkanaya, 11 ‘Manna limbu'bu' a'dakkika ri bangkenna ikambe, napabe'bese'mi kambe, a'jari pappakainga' ri kau ngaseng. Mingka assemmi angkanaya a'birimmi narapi' wattunna Nappakkaramulamo ammarenta Allata'ala salaku Karaeng ri tangnga-tangnganu!’ 12 U'rangi, angkanaya ri allonna kiamaka sallang, lalomoangangi nipammopporang ri Allata'ala dosana taua ri Sodom, naia tau niaka ri anjo kotaya!” 13 “Cilaka mako ikau tau niaka ri Korazim! Siagang cilaka mako ikau tau niaka ri Betsaida. Naka'de' anjoreng ri kota Tirus siagang ri kota Sidon nigaukang anjo gau'-gau' appakalannasa' le'baka nigaukang ri tangnga-tangnganu, mattantu sallomi le'ba'na toba' tau niaka anjoreng. Siagang sallomi le'ba'na ammakeang tau susa siagang nabonei au ulunna ke'nanga, a'jari pammatei ri katobakkanna ke'nanga. 14 Ri allonna kiamaka sallang, lakkulleangangi nipammopporang ri Allata'ala tau niaka ri Tirus siagang Sidon kala ikau ngaseng. 15 Na ikau tau niaka ri Kapernaum! Bara' nupikkiriki angkanaya laniangkakko nipakatinggi nai' ri suruga? Tena! Passangalinna lanipelakko antama' ri naraka!” 16 Nampa Nakana Isa mae ri ana'-ana' gurunNa, “Inai-nai ampilangngeri kanannu, iNakke mintu napilangngeri. Inai-nai ansorongbokoko, iNakke mintu nasorongboko. Na inai-nai ansorongbokoA', nasorongboko tommi Allata'ala assuroA'.” 17 Ammotere'mi anjo tuju puloa ana'-ana' gurunNa Isa, le'baka Nasuro a'lampa. Rannu ngasemmi ke'nanga wattunna ammotere'. Nakana ke'nanga, “O Batara, amminawang turu' ngasengi setanga punna nibongkai ri kambe assala' arenTa nipau!” 18 Appialimi Isa Nakana, “Kucini'mi Billisika tu'guru' battu rate ri langika sangkamma kila'. 19 Assemmi, angkanaya le'ba' mako Kusare koasa sollannu akkulle angngonjokkangi ularaka siagang olo'-olo' akkullea ammuno tau racunna. Kammayatompa, sollanna akkulle nubeta ngaseng musu-musu kassaka, natena nunggappa kapanrakang. 20 Mingka manna nakamma mamo, teako rannu dudui punna amminawammo roh-roh ja'dalaka ri parentanu. Bajikangangi punna rannuko lanri tattulisi'mi arennu lalang ri suruga.” 21 Anjo wattua rannumi nyawaNa Isa lanri nipantamakki ri RohNa Allata'ala. Nakanamo Isa ri ManggeNa, “O ManggeKu, Batarana langika siagang buttaya! Appala' sukkurukKa' ri Katte, lanri Kicokkoangi anne rahasiaya mae ri tau cara'deka siagang tau niaka pangngissenganna. Mingka Kipappiassengangi mae ri tau tenaya sikolana. Iaminjo Kikarannuanga ri atinTa. 22 Sikontu-kontuna le'ba'mi Kipassareang mae ri Nakke. Tena manna sitau angngassengi anne AnatTa, pantaranganna iKatte. Tena todong sitau angngassengKi', pantaranganna AnatTa, siagang sikamma tau le'baka Napauang AnatTa.” 23 Nampa assaile Isa mae ri ana'-ana' gurunNa, na Nakana ri ke'nanga bawang, “Upa' ngaseng mako ikau, nasaba' nucini'mi anne apa nucinika ri kamma-kammaya anne. 24 Nasaba' u'rangi angkanaya: Jai na'bi-na'bi siagang karak-karaeng ero' anciniki anne nucinika ri kamma-kammaya anne, mingka takkulleai nacini' ke'nanga. Eroki ke'nanga allangngereki anne apa nulangngereka ri kamma-kammaya anne, mingka takkulleai nalangngere' ke'nanga.” 25 Nampa nia'mo sitau guru agama battu ero' ampa'boyangi sala Isa. Akkuta'nammi ri Isa nakana, “Bapa' Guru, apa musti kugaukang sollanna akkulle kugappa katallassang satunggu-tunggua?” 26 Appialimi Isa Nakana, “Apa tattulisi' lalang ri Kittaka? Antekamma panggappanu ri anjo passalaka?” 27 Appialimi anjo taua nakana, “ ‘Kamaseangi Karaeng Allata'alanu ilalang sitepu atinnu, ilalang sitepu pa'mai'nu, siagang ilalang sikontu pakkullenu, kammayatompa ilalang sikontu akkala'nu,’ na ‘Kamaseangi parannu tau sangkamma todong nukamaseanna batangkalennu.’ ” 28 Nakanamo Isa, “Annabami antu pappialinnu. Gaukang ngaseng minjo na nuattallasa'.” 29 Mingka ero'mi napattojeng kalenna anjo guru agamaya. Jari akkuta'nammi pole nakana, “Inai anjo parangku tau?” 30 Appialimi Isa Nakana, “Nia' sitau bura'ne a'lampa battu ri Yerusalem naung ri Yerikho. Ri tangngana aganga, niruppaimi ri paella', nanialleang ngaseng apa-apanna, siagang niba'ji nipasitangnga-mate; nampa nibokoi tappalengang ri aganga, sanna' jaina loko'na. 31 Sitabangi nia' todong sitau imang a'jappa anjoreng ri aganga. Nacini'na anjo taua, a'lilimi nampa napatulusu' jappana. 32 Kamma tomminjo, nia' sitau tu Lewi a'jappa anjoreng ri aganga; ri wattunna nacini' anjo taua tappalengang ri aganga, a'reppese'mi ero' anciniki bajiki anjo taua; mingka kale'bakkanna a'lili tommi nampa napatulusu' jappana. 33 Mingka ribokoanganna, nia'mo sitau tu Samaria sitabang a'jappa todong anjoreng ri aganga. Ri wattunna nacini' anjo taua tappalengang ri aganga, sanna'mi paccena nyawana lanri nakamaseanna anjo taua. 34 A'reppese'mi mange ri anjo taua nampa nabissai loko'na nampa naballei siagang minynya' na anggoro', nampa naroko' kaeng anjo lokoka. Le'baki anjo napanai'mi anjo taua ri jaranna, nampa naerang a'lampa anjo taua mange ri balla' pa'bangngianga naparakai. 35 Ammukona, nasaremi doe' anjo patanna balla' pa'bangngiang; na nakana, ‘Parakai baji'-baji' anne taua. Na punna nia' ongko'-ongkoso'na maraenga, kubayarappi sallang punna ammoterekka' pole mae.’ ” 36 Nampa Natongko' Isa anjo caritaya siagang Nakuta'nammi anjo taua Nakana, “Battu ri anjo tallua tau, turu' panggappanu, kereanga kalase'renna a'jari paranna tau mae ri anjo tau niellaka?” 37 Appialimi anjo guru agama nikuta'nanga angkana, “Ia anjo tau antulungai anjo tau niellaka.” Nakanamo Isa, “A'lampamako padeng nanugaukang todong anjo kammaya!” 38 Le'baki anjo Napatulusu'mi jappaNa Isa siagang ana'-ana' gurunNa, nampa battu mange ri se'reang desa. Anjoreng ri desaya nia'mo sitau baine, niarenga Marta, angkioki Isa mange ri balla'na. 39 Anjo Marta nia' sari'battanna niarenga Maria. Na anjo Maria ammempomi ri ampi'Na Isa ampilangngeri kana-kana Napangngajarranga Isa. 40 Mingka sibu' sikalimi Marta anggaukangi jama-jamanna ri balla'. Mangemi ri Isa angkana, “O Batara, angngapa natena Kijampangi Kipauang Maria ancini'-cinikia' anjama kale-kalengku? Suro sai nanabantua'!” 41 Appialimi Isa Nakana, “Marta, Marta, angngapa na nubata-bata kamma siagang angngapa na'rupa-rupa kamma sibu' nunawa-nawa? 42 Sikontutojenna nia' se're passala' la'bi parallu. Na iaminjo se'rea, sannaka baji'na siagang sannaka paralluna le'ba' napilei Maria, tenaya nalatappela'!”
1 Nia' se're allo Nappala' doang Isa ri se'reang tampa'. Le'ba'na appala' doang, nia'mo kalase'renna ana' gurunNa angkana ri Ia nakana, “O Batara, Kiajara' sai ikambe appala' doang, sangkamma Yohanes naajaraki ana'-ana' gurunna appala' doang.” 2 Jari Nakanamo Isa ri ke'nanga, “Punna appala' doangko, kammaminne batenu a'bicara, ‘Manggea, IKattemi Allata'ala Tenaya Ruanna. Poro iKatte nisomba siagang nipakala'biri'. 3 Kisarei allo-allo kanre naparalluanga ikambe. 4 Kipammopporangi dosa-dosana ikambe, Nasaba' ikambe anne napammopporang tommi sikamma tau kasalanga ri kambe. Siagang teaKi' balang parekangi ikambe nibeta ri paccobaya.’ ” 5 Nakanamo pole Isa ri ana'-ana' gurunNa, “Ebara'na nia' kalase'rennu a'lampa mange ri balla'na agannu ri wattu lantannamo bangngia, na nakana ri ia, ‘O gang, saresa' rolong angnginrang rotinu tallumbatu, 6 nasaba' nia' agangku lalang pa'lampang, silalonna battu ri ballakku, natena sikali apa-apa lakusareangi nakanre!’ 7 Ebara'na appiali anjo agannu battu lalang ri balla'na angkana, ‘Teako susa-susaia'! Takkoncimi ballaka, siagang attinroma' siagang ana'-anakku. Takkullea' ambangung assareko apa-apa.’ ” 8 Nakanamo pole Isa, “Jari antekamma? Kupauangko angkanaya manna pole agannako, mingka tena nalaero' ambangung assareko apa-apa. Mingka lanri tenana nusiri'-siri' tulusu' appala' ri ia, kale'bakkanna ambangunji nampa nasareangko anjo apa nuparalluanga. 9 Jari Kukanamo anne ri kau: Appala' mako nulanisare; a'boya mako nulanggappa; de'de'mi pakke'buka, nulanisungkeang pakke'bu'. 10 Nasaba' inai-nai appala', iami lannarima; inai-nai a'boya, iami langgappa; inai-nai a'de'de' pakke'bu', iami lanisungkeang pakke'bu'. 11 Inai mangge ri kau assarei ulara' ana'na punna appala' juku'? 12 Yareka assarei olo'-olo' niaka racunna, punna appala' bayao ana'na? 13 Manna pole ja'dala' ngasengko, mingka angngasseng tonjako assare apa-apa baji' mae ri ana'nu. La'biangampa Manggea ri suruga! LaNapassareangi RohNa mae ri tau appalaka ri Ia!” 14 Ri se'reang allo, nia' se're tau pepe napantamakki setang, na Nabongka Isa assulu' anjo setanga battu lalang ri kalenna anjo tau pepea. Assulu'namo anjo setanga, appakkaramulami anjo taua a'bicara. Jaimi tau lannasa'. 15 Mingka nia' tommo tau angkana, “Nakkulle Nabongka setanga, nasaba' nisarei koasa ri Beelzebul, Pinggawana setang-setanga.” 16 Nia' tommo siapa are tau ero' ampa'boyangi kasalang Isa. Jari nasuromi Isa anggaukangi gau'-gau' appakalannasaka, a'jari pammatei ma'nassana angkanaya battu tojengi ri Allata'ala. 17 Mingka Naassengi Isa pattujunna ke'nanga. Jari Nakanamo ri ke'nanga, “Punna nia' se're bansa nata'bage-bage siagang assimusu-musu para ia taunna, mattantu tena nakkulle jarre' ammenteng anjo bansaya. Yareka se'rea balla', punna ta'bage-bage siagang assimusu-musu bonena, mattantu laancuruki bonena anjo ballaka. 18 Kamma tomminjo lalang ri pamarentahanna Setanga; punna assiba'ji-ba'ji para ia silokoang, mattantu laruntungi anjo pamarentahanna. Nukana ngaseng angkanaya lanri koasana Pinggawana Setang nakkulle Kubongka anjo setanga. 19 Jari punna kamma, lanri inai pata koasa nakkulle ana'-ana' gurunnu ambongkai anjo setanga? Kalennami anjo ana'-ana' gurunnu ampa'butti ma'nassanu sala ngaseng! 20 Mingka iNakke, lanri koasa battu ri Allata'ala naKubongka setanga. Battuanna, angkanaya appakkaramulami ammarenta Allata'ala ri tangnga-tangnganu ngaseng. 21 Punna kassa' taua, naganna' sanjatana anjagai balla'na, lasalama' ngasengi pa'barang-baranganna. 22 Mingka punna nia' tau kassakkangang battu angngewai siagang ambetai, lanialleang ngasemmi anjo sanjata napattoanga, nampa nialle passa ngaseng todong nampa nipa'bage-bageang pa'barang-baranganna. 23 Inai-nai taeroka angngagangangA', sikontutojenna la'jari musui ri Nakke. Siagang inai-nai taeroka ambantuA', sikontutojenna lanapanrakimi jama-jamangKu!” 24 “Punna a'lampa roh ja'dalaka ambokoi taua, a'lampami anjo roh ja'dalaka akkuliling ri tampa'-tampa' kalotoroka, ero' a'boya tampa' pammari-mariang. Mingka tanggappayai tampa'. Jari nakanamo ri kalenna, ‘Erokka' ammotere' mange ri balla' le'baka kubokoi!’ 25 Ri wattunna battu mange ri anjo ballaka, narapikammi sanna' tangkasa'na siagang sanna' baji'na atoro'na bonena anjo ballaka. 26 Jari a'lampami pole mange akkio' agang, iamintu tuju roh sannakkanganga ja'dala'na nakalenna. Nampa antama'mo ke'nanga ammantang ri kalenna anjo taua. Kale'bakkanna, a'jari sannakkangammi ja'dala'na siagang kodina sipa'na anjo taua.” 27 Le'ba'na akkana kamma anjo Isa, nia'mo sitau baine battu ri alla'na anjo tau jaia angkana ri Isa, nakana, “Teai sipato' upa'na baine anjariangaKo siagang ampasusuaKo!” 28 Mingka appialimi Isa Nakana, “La'bi upakkangangi pole tau allangngerekai siagang anggaukangi kana-kananNa Allata'ala!” 29 Lalang nikulilinginNa Isa ri tau jaia, Nasambungimi bicaranNa Nakana, “Teai sipato' ja'dala'na ngaseng taua ri anne jammanga. NasuroA' anggaukangi gau' appakalannasaka sollanna akkulle tappa' ke'nanga ri Nakke. Mingka manna sirupa tena todong gau' appakalannasa' lanipicinikiangi, pantaranganna gau' appakalannasa' le'baka kajariang ri kalenna Na'bi Yunus. 30 Antekamma appakalannasa'na anjo apa kajarianga ri kalenna Yunus mange ri tau niaka ri Niniwe, kamma tomminjo lappakalannasa'na apa kajarianga ri KalenNa Ana' Ma'rupataua mae ri taua ri anne jammanga. 31 Ri allo kiamaka sallang, lambangummi nai' Karaeng baine battu Timborang pa'rasanganga siagang taua ri anne jammanga, ansalakangi ke'nanga. Nasaba' ri wattunna ero' anjo Karaeng bainea ampilangngeri pangngajara' mabaji'na Salomo, a'jappami sanna' bellana battu ri cappa'na buttaya. Mingka kamma-kamma anne, siagang anrinni ri tampaka, nia'mi lompoanganga na Salomo! 32 Ri allo kiamaka sallang, lambangummi nai' tau niaka ri Niniwe siagang taua ri anne jammanga, ansalakangi ke'nanga nasaba' ri wattunna akkato'ba Yunus mae ri taua ri Niniwe, toba'mi ke'nanga battu ri dosa-dosana. Mingka kamma-kamma anne, siagang anrinni ri tampaka nia'mi lompoanganga na Yunus!” 33 “Tenanniakka tau apparinra lampu, nampa nacokko yareka natongko' katoang. Passangalinna lanaboliki anjo lampua irate ri pa'dongkokanna, sollanna akkulle nicini' singara'na ri tau antamaka ri balla'. 34 Anjo mataya iami sulona batangkalea. Punna tangkasa' matannu, lasingara' sikali tommi sikontu batangkalennu. Mingka punna ra'masaki matannu, lasassang makkapu' tommi sikontu batangkalennu. 35 Lanri kammana, tutu laloko, sollanna tena na'jari sassang anjo singara' niaka ri batangkalennu. 36 Punna singara' sikontu batangkalennu, yareka tena sikali manna sike'de' sassanna, ma'nassa lasingara' sikali sikontu batangkalennu, sanrapang nisiori ri cayana lampua.” 37 Le'ba'na a'bicara Isa, nia'mo sitau tu Farisi angkioki mange angnganre ri balla'na. Jari a'lampami Isa mange anjoreng angnganre. 38 Lannasa'mi anjo tu Farisia anciniki Isa, nasaba' tena Nabissai rolong limanNa nampa angnganre, situru' atoranga ri agamaya. 39 Lanri kammana, Nakanamo Isa ri anjo tu Farisia, “Memang ikau tu Farisia, biasana nutangkasi bageang pantaranganna mangkoka siagang piringa; mingka bageang lalanganna sanna' ra'masa'na lanri tena nutangkasi. Kamma tomminjo sanrapanna bageang lalanganna kalennu, teai sipato' ra'masa'na napakamma sekke' siagang kaja'dallang. 40 Ikau tolo ngasengko! Sai anjo Napa'niaka Allata'ala iamintu bageang pantaraka siagang bageang lalanga? 41 Anjo bageang lalanganna mangko'nu siagang pirinnu, iaminjo musti nupassareang mae ri tu kasi-asia. Punna kammamo anjo batenu, ma'nassa la'jari tangkasa' ngasemmi ri kalennu. 42 Cilaka ngaseng mako ikau tu Farisia! Nupassareammi ri Allata'ala bage sampulona wassele' lamung-lamunnu, kammaya lanipareka minynya'-minynya' rampa, yareka rampa-rampa maraengannaya; mingka kaminang parallua, iamintu kaadelanga siagang pangngamaseanga ri Allata'ala, tena sikali nanujampangi. Na sikontutojenna iaminjo rolong parallu nugaukang, nampa tena todong nukaluppai maraenganga. 43 Cilaka ngaseng mako ikau tu Farisia! Nasaba' nungai ammempoa ri tampa'-tampa' tu nipakala'birika lalang ri balla' sambayanga, siagang nungai punna nipakala'birikko ri taua ri pasa'-pasaraka. 44 Cilaka ngaseng mako! Nasaba' sanrapangko jera' tenaya mesanna, nionjo'-onjokanga ri taua natanaassenga taua.” 45 Nia'mo kalase'renna guru agama angkana ri Isa, nakana, “Pa' Guru, Kihina-hinai tommaki' anne ikambe, lanri akkana kammaTa!” 46 Appialimi Isa Nakana, “Cilaka ngaseng tommako ikau guru-guru agamaya! Nusuroi taua anggaukangi apa-apa sukkaraka, siagang nusarei taua atorang-atorang battala'; mingka manna sike'de' tena todong nanubantui taua anggaukangi. 47 Cilaka ngaseng mako! Nupapparekangi jera' na'bi-na'bia, nampa boe-boenumi le'ba' ambunoi anjo na'bi-na'bia. 48 Jari kalennumi angngakui angkanaya nupassamaturuki anjo apa le'baka nagaukang boe-boenu; nasaba' boe-boenu memang ambunoi na'bi-na'bia, nampa ikau ampapparekangi jera'na. 49 Iaminjo na nakanamo Kana mabaji'Na Allata'ala, ‘LaKusuroi na'bi-na'bia siagang tunisuroKu mange ri ke'nanga; mingka nia'mo sipa'gang lanabuno, siagang nia'mo sipa'gang lanasessa!’ 50 Kammaminjo Nagaukang Allata'ala, sollanna akkulle nihukkung taua ri anne jammanga, lanri pammunoang le'baka nagaukang ke'nanga mae ri na'bi-na'bia, appakkaramula ri wattunna nipa'jari linoa. 51 Iamintu pammunoang appakkaramulaya battu ri Habel sa'genna Zakharia, le'baka kajariang ri ampi'na pakkoro'bangnganga siagang Balla'Na Batara. Patappa'mi angkanaya: Passabakkang yangaseng minjo namattantumo lanihukkunna ngaseng anne taua ri anne jammanga. 52 Cilaka ngaseng mako ikau guru-guru agamaya. Nasaba' niaki ri kau niboli' koncina pangngissenganga. Mingka kalennu tonji taeroka antama' amboyai anjo pangngissenganga. Ba'lalo, ikau ngasemmi anrompa-rompai sikamma tau eroka antama'!” 53 Ri wattunna a'lampamo Isa ambokoi anjo tampaka, sanna'mi nicallana Isa ri guru-guru agamaya siagang tu Farisia. Appakkaramulami ke'nanga angngeppangi Isa sollanna pila' a'rupa-rupami pole Nabicara Isa, nakkulle sala bicaraNa. 54 Nalalang kammana anjo napilangngeri baji'-baji'mi ke'nanga sollanna akkulle najakkala' kananNa Isa punna sala bicarai.
1 Anjo wattua assa'bu-sa'bui jaina tau battu. Assiassa'-assa'mi ke'nanga, sa'genna nia'mo tau nionjokang bangkenna. Lalang a'lipunnamo taua, Nakanamo Isa ri ana'-ana' gurunNa, “Tutuko mae ri pa'gambanna tu Farisia. Battuanna kanangKu, tutuko mae ri sipa'-sipa' munape'na ke'nanga. 2 Nasaba' tenanniakka apa-apa taccokko talakacinikang; yareka tenanniakka apa-apa nirahasiakang talakaassengang. 3 Apa-apa nubicaraya ri wattunna bangngi, lakalangngerangi ri wattunna singara'; yareka apa-apa nupa'bicikanga mae ri tolinna taua ri kamara' tattongkoka, lanipa'la'bangi mange ri kere-keremae.” 4 “U'rangi ikau agangKu ngaseng! Teako mallakki ri tau akkullea ammuno tubu mingka takkulleai anggaukangi lompoanganga pole naanjo ammunoa tubu. 5 Baji'mi punna Kupauangko inai musti nukamallakkang. Iamintu, malla' mako ri Allata'ala. Nasaba' Iami akkulle ambunoko, siagang punna le'ba' mako Nabuno, akkulle tongko' Napantama' ri naraka! Tappa' mako, angkanaya Iaji bawang siratang nukamallakkang. 6 Anjo jangang-jangang cui-cuia tena nasiapa ballinna; mingka manna nakamma tena nanibalang parekangi ri Allata'ala. 7 Anjo uu'nu irate ri ulunnu le'ba' ngasemmi nibilang; jari tea' mako mallakki. Nasaba' lompoangangi anggarannu naanjo jangang-jangang cui-cuia!” 8 “U'rangi baji'-baji': Inai-nai mangaku ri dallekanna tau jaia angkanaya amminawangi ri Nakke, laniakui tongi sallang ri Ana' Ma'rupataua ri dallekanna malaeka'-malaeka'Na Allata'ala. 9 Mingka inai-nai assassala' ri dallekanna tau jaia angkanaya amminawangi ri Nakke, lanisassali tongi sallang ri Ana' Ma'rupataua ri dallekanna malaeka'-malaeka'Na Allata'ala. 10 Punna nia' tau antumpaki kananNa Ana' Ma'rupataua akkulleji nipammopporang; mingka punna nahina RohNa Allata'ala, takkulleami nipammopporang. 11 Punna nierangko mange ri balla' sambayanga laniadeli ri dallekanna pamarentaya yareka tau anna'galaka koasa, teako mallakki. Teako mallakki angkanaya antekamma batenu la'bicara sollanna a'butti angkanaya tena nusala. 12 Nasaba' punna narapi'mo wattunnu la'bicara, laniajara' mako ri RohNa Allata'ala apa siratanga nupau.” 13 Nia'mo kalase'renna anjo tau jaia angkana ri Isa, nakana, “Bapa' Guru, Kipauang sai sari'battangku nanasareanga' tawaruanna warisi'na manggeku.” 14 Appialimi Isa Nakana, “E, sari'battang, inai angngangkaKa' a'jari haking, lambage-bageangko warisi'nu sipa'rua?” 15 Nampa Nakana Isa ri sikamma tau niaka anjoreng, “Tutuko siagang jaga-jagako, gassingka a'jariko tau mangngoa. Nasaba' teai battu ri kakalumanynyanganna nattallasa' rupataua, manna pole sanna' jaina pa'barang-baranganna.” 16 Nampa Nacarita Isa anne pangngebaranga Nakana, “Nia' sitau tu kalumanynyang. Nia' tanana, sannaka jaina wassele'na. 17 Appakkaramulami appikkiri' anjo tu kalumanynyanga nakana, ‘Tenamo tampa' lakupammoliki wassele'na tanaku. Apa akkalakku kamma-kamma anne?’ 18 Appikkiri'mi pole, siagang nakanamo ri kalenna, ‘E, nia' akkalakku; bajikangangi punna kusuro rumbangi gudangku, nampa kubangung poleang lompoanganga. Anjoremmi lakuboli' ngaseng asengku siagang barang-barangku maraenga. 19 Nampa kukana ri kalengku: Upakko kau! Nukammai ngasemmi apa-apa bajika, siagang tenamo nulakala'busang sa'genna attaung-taung. Kamma-kamma anne ammari-mari poso mako! Angnganre-nganre mako, siagang angnginung-nginung mako, kammayatompa kasia'mi baji'-bajika lalang tallasa'nu!’ 20 Mingka Nakanamo Allata'ala ri ia, ‘E tolo! Anne bangngia lamate mako; jari inai langngalle ngasengi anjo barang-barang le'baka nupasse're untu' kalennu?’ 21 Kammaminjo sallang kajarianna sikamma tau eroka a'boya kakalumanynyangang untu' kalenna, mingka teai a'boya kakalumanynyangang ri dallekanNa Allata'ala.” 22 Nampa Nakana Isa ri ana'-ana' gurunNa, “Lanri kammana minjo naKukana, ‘Teako ranggaselai ri passala'na katallassannu, iamintu ri passala' lanukanrea, yareka ri passala' apa lanupake.’ 23 La'bi paralluangangi tallasaka na kanrea, siagang la'bi paralluangangi tubua na care-carea. 24 Cinissai jangang-jangang kalaaka! Tena na'lamung, tena nakkatto, tena todong gudanna yareka pammolikang asenna. Mingka niparakai tonji ri Allata'ala! La'bi lompoangangi anggarannu na anjo jangang-janganga! 25 Inai ri kau akkulle antambai la'buna umuru'na manna sike'de', lanri ranggaselana? 26 Punna apa ca'di kammaya anjo takkullea nugaukang, angngapa nuranggasela ri passala' maraenganga? 27 Cinissai antekamma katallassanna bunga rosia; anjo bunga-bungaya tena nanjama, siagang tena todong nattannung. Mingka cinissai antekamma ga'gana anjo bunga-bungaya. Manna antekamma kalumanynyanna Karaeng Salomo mingka tenapa naga'gangngang pakeanna nicini' na anjo bunga-bungaya! 28 Kammayatompa anjo rukuka ri paranga; anne alloa nattimbo, nammuko lanitunumi sa'genna cappu'. Mingka nimodei tonji anjo rukuka ri Allata'ala, a'jari sanna' ga'gana. La'biampa pole ikau! Mingka kurang tappa' ngasengko! 29 Jari, teako ranggaselai yareka teako lippui nawa-nawannu ri passala' lanukanrea siagang lanuinunga. 30 Tau tenayaji natappa' ri Allata'ala angngondang ngasengi sikammaya anjo. Na sikontutojenna, Naassemmi Allata'ala la'bi riolo angkanaya parallu ngasengi anjo mae ri kau. 31 Mingka ikau, musti nuboyai rolong sollanna ammarenta Allata'ala lalang tallasa'nu, nampa Nasareangko Allata'ala apa-apa maraenganga.” 32 “Ikau tau sike'deka, teako mallakki! Nasaba' sannangi pa'mai'Na Allata'ala assareko barakka' battu ri PamarentahanNa. 33 Balukammi barang-barannu, nampa nupassareang ballinna mae ri tu kasi-asia. Appare' mako pammoneang doe' tenaya nalatoa, iamintu barang-barang lanibolika ri suruga. Anjo barang-baranga takkulleai tappela', nasaba' takkulleai nilukka' ri palukkaka, siagang takkulleai nipanraki ri kacoaka. 34 Nasaba' kere-keremae ammantang barang-barannu, anjoreng tommi ta'dongko' nyawanu!” 35 “A'jaga-jagako ilalang passala' apa-apa mamo. Musti tuli sadiako ammakeang siagang musti tuli a'rinrai lampunnu; 36 sangkamma palayang-palayang tuli sadiaya antayangi pammoteranna karaenna battu ri passua'-suarrang pa'buntinganga. Punna ammotere' karaenna na nade'de' pakke'buka, lanasungkei linta' ke'nanga pakke'buka. 37 Teai sipato' upa'na ngaseng palayang-palayang nirapikanga sadia attayang ri wattunna battu karaenna. Patappa'mi angkanaya: lasadiai anjo karaenga assuroi anjo palayang-palayanga ammempo, nampa nasuro layani kalenna anjo karaenga. 38 Teai sipato' upa'na ngaseng anjo palayang-palayanga punna nirapikang ri karaenga sadia attayang, manna pole lantammi bangngia yareka salloangampa pole nampa ammotere' anjo karaenga. 39 U'rangi anne! Ka'de' naasseng patanna balla' angkanaya tette' siapa nalabattu palukkaka, tantu lanajagaiji sollanna tena nantama' anjo palukkaka ri balla'na. 40 Jari, musti a'jaga-jaga ngasengko, nasaba' tena nalanusanna-sanna Nabattu Ana' Ma'rupataua.” 41 Akkuta'nammi Petrus nakana, “O Batara, untu' inai anne pappilajaranga? Ikambe Kipitujui yareka yangaseng taua?” 42 Appialimi Isa Nakana, “Inai palayang tuli baji' siagang cara'de' sa'genna niangka' ri karaenna a'jari kapala mae ri palayang-palayang maraenga, sollanna nasare kanre ke'nanga punna narapi' wattunna? 43 Teai sipato' upa'na anjo palayanga punna ammotere' karaenna nanirapikang anggaukang bajiki jama-jamanna! 44 Patappa'mi angkanaya: Lanipirannuangi ri karaenna anjo palayanga angkammai sikontu pa'barang-baranganna karaenna. 45 Mingka punna nakana lalang ri pa'mai'na anjo palayanga, ‘Salloinji nampa ammotere' karaengku,’ nampa appakkaramulamo naba'ji ngaseng palayanga siagang angnganre-nganremi nangnginunga tojeng sa'genna nasa'ring. 46 Jari tanasanna-sannayami angkana ri allo apaya siagang tette' siapa nalammotere' karaenna. Na laniba'jimo nipasitangnga mate anjo palayanga ri karaenna, sa'genna nipasangkamma sarenna siagang sikamma tau tenaya namannuruki ri Allata'ala. 47 Inai-nai palayang angngassengi ero'na karaenna, mingka tena nasadia siagang tena nagaukangi ero'na karaenna, lanicambo'mi nipasitangnga mate. 48 Mingka inai-nai palayang tangngassengai ero'na karaenna, nampa nia' kasalang nagaukang sa'genna musti nicambo', latenaja nasanna' dudu nicambo'. Nasaba' inai-nai le'ba' nisare jai, lajai tongi nipappalakkiangi. Na inai-nai jai nipappirannuang ri kalenna, lajai tongi nituntu' battu ri kalenna.” 49 “NiakKa' battu sollanna passabakkang iNakke nakkanre anne linoa. Teai sipato' baji'na punna a'rinramo pepe'na! 50 Nia' ija kasessang sannaka lompona laKukasia'. Nasanna' lussa'na atingKu punna takajariangapa. 51 Gassingka nukana passiamakkang battu Kuerang antama' ri anne linoa? Tena, teai passiamakkang, passangalinna passimusuang. 52 Appakkaramula ri kamma-kammaya anne, punna nia' tau lima lalang se're balla', lasimusu-musumi anjo limaya tau. Anjo ruaya lasimusu-musui anjo tallua tau, yareka anjo tallua lasimusu-musui anjo ruaya tau. 53 Manggea lasiewai ana'na bura'nea, siagang ana'-ana' bura'nea lanaewai manggena. Lasiewai ammaka siagang ana'na bainea, siagang ana'-ana' bainea lanaewai amma'na. Matoang bainea lanaewai mintu bainena, siagang mintu bainea lanaewai matoang bainena.” 54 Nakana tommo Isa ri tau jaia, “Punna nucini' rammanga nai' ri langika ilau', lanukanamo, ‘Laturungi bosia.’ Nabosi tojemmo. 55 Punna battu timboro' anginga nusa'ring, lanukanamo, ‘Labambangi alloa.’ Na bambang tojemmo alloa. 56 Ikau nungai ngasengi assara-saraia. Akkulle ngasengko ambatei kabattuanna bosia siagang bambang alloa punna nucini' langika siagang linoa. Apa saba'na natakkullea nubatei pammateina jammanga ri kamma-kammaya anne?” 57 “Angngapa nateai kalennu ampattantui apa-apa tojenga? 58 Punna nia' tau antuduko nanaerangko mange ri pangadelanga, assiama' mako linta' siagang anjo taua ri wattu tenanapa nunrapi' mange ri pangadelanga. Nasaba' punna tena, tena tanare'resannu mange ri dallekanna hakinga; nampa napassareangko anjo hakinga mae ri pulisia; nampa napantamakko pulisia ri tarungkua. 59 Patappa'mi! Angkanaya, takkulleako assulu' battu ri anjo tarungkua punna tenapa nalappasa' dendanu.”
1 Anjo wattua nacaritami taua ri Isa passala'na siapa are tu Galilea le'baka nibuno ri Pilatus, ri wattunna assare koro'bang ke'nanga ri Allata'ala. 2 Nalangngere'na Isa anjo caritaya Nakanamo, “Jari lanri nibunona anjo ke'nanga nanukanamo lompoangangi dosana ke'nanga na sikontu tu Galilea maraenganga? 3 Tena sikali! Mingka u'rangi, angkanaya: punna tena nutoba' battu ri dosa-dosanu, lamate kamma ngaseng tongko anjo ke'nanga. 4 Jari antekamma anjo tau sampuloa assagantuju, matea todong ri balang Siloam ri wattunna niutungi ke'nanga ri rumbanna cappa'na manaraya? Nukana iaminjo a'jari pammatei angkanaya lompoangangi dosana ke'nanga na sikontu tau maraenga, niaka ammantang ri Yerusalem? 5 Tena sikali! Sikalipi pole Kupauangko angkanaya: Punna tena nutoba' battu ri dosa-dosanu, lamate kamma ngaseng tongko anjo ke'nanga.” 6 Le'baki anjo, Nacarita tommi Isa anne pangngebaranga, Nakana, “Nia' se're tau, nia' poko' ara ri koko anggoro'na. Ri se'reang allo nanaboya rapponna anjo poko' araya, mingka tena manna sibatu nabuntulu' rapponna. 7 Jari, nakanamo ri pajamana anjo kokoa, ‘Cinissai, tallung taumma' battu amboyai rapponna anne poko' araya, mingka manna sibatu tania' rapponna kubuntulu'. Ta'bammi anne poko' araya! Poro nala'bussina kanre battu lalanga ri buttaya!’ 8 Mingka appialimi anjo pajama kokoa nakana, ‘Lappassammi attallasa' pole sitaung, karaeng. Lakubingkungi butta ri tammulilina siagang lakusarei pupu'. 9 Barangiapa nala'rappo ri taung labattua. Mingka punna tena ijapa na'rappo, akkullemi kisuro ta'bang.’ ” 10 Ri se'reang allo Pammari-marianga, angngajaraki Isa ri se'reang balla' sambayang. 11 Nia'mo anjoreng sitau baine garring, lanri nia'na roh ja'dala' lalang ri kalenna. Na sampulomi assagantuju taung garring anjo bainea. A'bukku'mi siagang tena sikalimo nakkulle ammenteng. 12 Nacini'na Isa anjo bainea, Nakio'mi Nakana, “Ibu', ta'lappasa' mako battu ri garrinnu!” 13 Nampa Napadongko' limanNa Isa irateanganna anjo bainea; na anjo wattua akkullemi ammenteng silalonna anjo bainea, nampa ammuji-muji ri Allata'ala. 14 Larromi kapalana anjo balla' sambayanga, lanri Naballeina anjo bainea ri allo Pammari-marianga. Jari nakanamo ri taua ngaseng, “Nia' annangallo akkulle nipake untu' anjama; lalang allo-allo kammaya minjo nubattu punna erokko niballei, teako ri allo Pammari-marianga nubattu!” 15 Appialimi Isa Nakana, “Munape' ngasengko antu! Ri allo Pammari-marianga nalappassang ngasengi taua sapina yareka jaranna battu ri barana, nampa naerang assulu' untu' nasare je'ne' inung. 16 Anrinni nia' sitau baine, sossoranna Abraham, sampulomi assagantuju taung nisessa siagang nisikko' ri Billisi'. Maka takkulleai nila'gasi passikko'na ri Allo Pammari-marianga?” 17 A'jari siri'-siri' ngasemmi anjo musunNa Isa allangngereki pappialinNa Isa; mingka sikamma tau maraenga sannang sikali anciniki sikamma gau' appakalannasa' Nagaukanga Isa. 18 Akkuta'nammi Isa Nakana, “Antekamma kajarianna punna ammarenta Allata'ala? Apa akkulle Kupare' pangngebarang ampakasingariangko? 19 Lakammaminne pangngebaranna: Nia' silisere' parekang lamungang sannaka ca'dina lisere'na naalle taua nampa nalamung ri kokonna. Nampa attimbo anjo lamunganga, a'jari poko' kayu lompo. Battumi jangang-janganga appare' ru'mung ri tangke-tangkenna.” 20 Sikalipi pole akkuta'nang Isa Nakana, “Punna ammarenta Allata'ala apa akkulle Kupare' pangngebarang ampakasingariangko? 21 Kajarianna lasanrapangi pa'gambang naallea sitau baine, nampa napasileo' patampulo litere' labu', sa'genna a'bakka ngaseng anjo labuka.” 22 Lalang a'jappaNa Isa mange ri Yerusalem, assengkami angngajara' ri kota-kotaya siagang kampong-kamponga. 23 Nia'mo tau akkuta'nang ri Ia angkana, “Pa', maka sike'de'ji tau lanipasalama'?” Appialimi Isa Nakana, 24 “Usaha mako antama' siagang numalo ri pakke'bu' seppaka. Nasaba' u'rangi! Jai sikali tau ero' antama' mingka takkulleai. 25 Ri wattunna ambangung patanna balla' siagang natongko' pakke'bu'na, ammentengko pantaranganna ballaka nanukatto'-katto' pakke'buka nukana, ‘Karaeng, kisungke sai pakke'buka!’ Lappialimi anjo karaenga nakana, ‘Takuassengako angkana tau battu kemaeko!’ 26 Lappiali ngaseng mako angkana, ‘Le'ba' maki' sipangnganreang, siagang le'ba' tommaki' angngajara' ri oloang-oloanga lalang ri kotana ikambe!’ 27 Mingka lanakanamo pole anjo karaenga, ‘Takuassengako angkana tau battu kemaeko. Bellako anrinni, ikau tau a'gau' ja'dalaka!’ 28 Ri wattunna nucini' Abraham, Ishak, siagang Yakub kammayatompa na'bi-na'bia a'rannu-rannu lalang ri Lino BeruNa Allata'ala, langngarru' mako siagang lasessa mako, nasaba' lanibongka mako ikau assulu'! 29 Lania'mi taua battu iraya siagang battu ilau', kammayatompa battu wara' siagang battu timboro' la'rannu-rannu lalang ri Lino BeruNa Allata'ala. 30 Sikontutojenna, nia' tau ri boko dudu la'jari ri dallekang dudu, na nia' tau ri dallekang dudu la'jari ri boko dudu.” 31 Anjo todong wattua, nia'mo siapa are tu Farisi battu mae ri Isa na nakana, “TeaKo ammantangngi anrinni! A'lampaKo mange ri tampa' maraenga, nasaba' eroki Herodes ambunoKo.” 32 Appialimi Isa Nakana, “Mange mako pauangi anjo tau tenaya matu-matunna angkanaya, ‘Anne alloa siagang ammuko Kubongkai setanga siagang Kuballei tau garringa, mingka ri maka talluna alloa, laKupa'le'baki jama-jamangKu.’ 33 Mingka manna nakamma, anne alloa, siagang ammuko yareka ammembara', laKupatulusu' tonji lampaKu. Nasaba' tena nabaji' na'bia nibuno ri pantaranganna Yerusalem. 34 O, tuniaka ri Yerusalem, tuniaka ri Yerusalem! Nubunomi na'bi-na'bia! Nusambilami batu sa'genna mate sikamma tu Nasuroa Allata'ala! Pissiapa are mako ero' Kukalimbuki, sanrapang anrong janganga angkalimbuki ana'-ana'na irawanganna ka'nyi'na, mingka taeroka ngasengko! 35 Lanri kammana tenamo Narurungangko Allata'ala! Assemmi angkanaya, appakkaramula ri kamma-kammaya anne tenamo nalanucinikKa', sa'genna nukana, ‘Nibarakkakimi Ia battua lalang arenNa Batara.’ ”
1 Ri se'reang allo Pammari-mariang, a'lampai Isa angnganre ri balla'na se'reang tu Farisi. BattuNa Isa mange anjoreng, nicini'-ciniki tojemmi ri taua. 2 Nia'mo se're tau garring akkambang battanna, kammayatompa akkambang-kambang bangkenna na limanna battu mae ri Isa. 3 Akkuta'nammi Isa ri guru-guru agamaya siagang tu Farisi niaka anjoreng Nakana, “Manuru' atorang agamata, maka akkullejaki' amballei tau garringa ri allo Pammari-marianga?” 4 Tenamo nakkana-kana anjo guru-guru agamaya siagang tu Farisia. Jari Nakio'mi Isa anjo taua, nampa Naballei. Le'baki anjo, Nasuromi anjo taua a'lampa. 5 Nampa Nakana Isa ri taua ngaseng, “Ebara'na nia' sitau ana'nu yareka sikayu sapinu tu'guru' antama' ri bungunga ri allo Pammari-marianga, maka tena nukkaro-karo ambesoki nai' anjo ana'nu yareka anjo sapinu, anjo memang alloa?” 6 Mingka tenamo sitau akkulle appiali ri Isa ri anjo passalaka. 7 Nacini'mi Isa nia' siapa are toana ammilei pammempoang bajika. Jari Nasaremi ke'nanga anne pangngajaranga, Nakana, 8 “Punna niundangko mange ri passua'-suarrang pa'buntinganga, teako mangei ammempo ri kaderana tunipakala'birika. Gassingka nia' tau mala'birangnganga niundang todong. 9 Na punna battu anjo taua tarpassa lanasuro mako patanna pa'gaukang a'lette' ammempo nakana, ‘Kipammopporang mama' naki'lette' ammempo, nasaba' anne kaderaya le'ba'mi nipasadiang anjo toana beru battua.’ Jari tarpassa lasiri'-siri' mako, nampa a'lettekko mange ri pammempoang ri boko dudua. 10 Lanri kammana, punna niundangko, pileimi pammempoang riboko dudua. Sollanna battu patanna balla' angkana ri kau nakana, ‘Maeki', ri dallekangki' ri pammempoang bajika ammempo.’ Jari nipakala'biri' mako ri dallekanna sikontu toana maraenga. 11 Nasaba' inai-nai ampakalompoi kalenna, iami lanipakatuna, mingka inai-nai ampakatunai kalenna, iami lanipakalompo.” 12 Nampa Nakana Isa ri patanna balla', “Punna angngundangko tau battu angnganre allo yareka angnganre bangngi, teako naagannu yareka sari'battannu akkalumanynyanga, yareka bijannu, yareka sambori'nu akkalumanynyanga nuundang. Gassingka lanaundang tongko, sa'genna nutarimami pa'balasa'na undangannu. 13 Jari punna langnganre-nganreko, undammi tu kasi-asia, tu sala-salanga, tu pesoka, siagang tu butaya. 14 Lanibarakkaki mako, nasaba' takkulleai nabalasa' ke'nanga kabajikannu. Mingka laNabalasaki Allata'ala anjo kabajikannu ri wattunna napabangung poleang tau bajika battu ri kamateanga.” 15 Ri wattunna nalangngere' tau naaganga sipangnganreang akkana kamma Isa, nia'mo kalase'renna ke'nanga angkana, “Upa' sikali tau sipangnganreanga Allata'ala punna battu sallang salaku Karaeng!” 16 Mingka Nakanamo Isa ri anjo taua, “Nia' se're wattu, nania' se're tau appare' passua'-suarrang lompo, na jai tau naundang. 17 Ri wattunna lanipakkaramulamo passua'-suarranga, nasuromi palayanna anjo karaenga mange ri sikontu tau naundanga nakana, ‘Mae ngaseng maki', kale'ba' ngasemmi nipasadia!’ 18 Mingka massing appala' popporo' ngasemmi ke'nanga: Nia' angkana ri anjo palayanga nakana, ‘Pammopporanga', kaberu le'baka' ammali tampa' nakuparallu a'lampa mange amparessai.’ 19 Nia' tommo angkana, ‘Pammopporanga', kaberu le'baka ammalli limangngayoka sapi, nakuero' mange ancobai.’ 20 Na maraengannaya nakana, ‘Beru le'baka' a'bunting, jari takkullea' mange anjoreng.’ 21 Jari ammotere'mi anjo palayanga ampauangi karaenna angkanaya takkulleai ke'nanga battu. Sanna'mi larrona anjo karaenga. Nampa nakanamo ri palayanna, ‘A'lampako linta' mange ri agang-agang lompoa siagang ri agang-agang sepe'-sepeka ri kotaya. Kioki siagang erangi mae anrinni tau kasi-asia, tau sala-salanga, tau butaya, siagang tau pesoka.’ 22 Jari a'lampami anjo palayanga. Nale'ba'na nagaukang napassuroanga karaenna, nakanamo anjo palayanga ri anjo karaenga, ‘Le'ba'mi kukio' ngaseng anjo tau kipassuroanga karaeng, mingka jai iji pammempoang tena taunna.’ 23 Jari nakanamo anjo karaenga, ‘A'lampamako assulu' ri pantaranganna kotaya, mangeko kioki tau niaka ri agang-agang lompoa, siagang ri sepe'-sepeka; suro ngasemmi ke'nanga battu, sollanna rassi ballakku. 24 U'rangi angkanaya, tena sikali manna sitau anjo tau le'baka niundang akkulle angkasiaki kanre niaka ri anne passua'-suarrangku!’ ” 25 Jai tau amminawang a'jappa siagang Isa. Assailemi Isa nampa Nakana ri ke'nanga, 26 “Punna nia' tau battu mae ri Nakke, mingka la'bi nakamaseangi amma'na, manggena, bainenna, ana'-ana'na, sari'battanna ngaseng, yareka batangkalenna ba'lalo, takkulleai a'jari ana' gurungKu. 27 Inai-nai taeroka ampisangi salli'na namminawang ri Nakke, takkulleai a'jari ana' gurungKu. 28 Punna nia' kalase'rennu ero' ambangung balla' tinggi, tantu ammempoi rolong anrekengi siapa ongkoso' naparalluanga. Jari akkullei naasseng angkanaya maka ganna'ji doe'na yareka tena, sa'genna akkulle napa'le'ba' anjo balla' lanabangunga. 29 Nasaba' punna le'ba'mo napakkaramulai napare' pundasina, mingka takkulleai napa'le'ba', anjo bangunanga, tena tanikakkalinna ri tau jaia ancinikai anjo jama-jamanga. 30 Tena tanakanana tau jaia, ‘Idende', erottongi ambangung anjo taua, natakkullea napa'le'ba'!’ 31 Punna nia' se're karaeng ero' a'lampa a'bundu' siagang karaeng maraenganga, na nia' sampulo sa'bu surudaduna, tantu ammempoi rolong anjo karaenga ampikkiriki, angkanaya maka lakassa'ji anjo surudaduna langngewai anjo musu lanadallekanga niaka ruampulo sa'bu surudaduna. 32 Punna naassengi angkanaya takassakai surudaduna, tantu nia' memammo nasuro mange ri musunna appala' dame ri bellana ija anjo musunna.” 33 Kala'busanna Nakanamo Isa, “Ikau kamma ngaseng tommako anjo. Tenanniakka manna sitau lakkulle a'jari ana' gurungKu, punna taerokako ambokoi ngasengi apa-apa niaka ri kau.” 34 “Anjo ce'laya bajiki; mingka punna a'jari la'bamo, maka lakkulleiji nipa'jari ce'la poleang? 35 Mattantu tenamo matu-matunna. Takkulleami nipa'matu-matu ri kokoa yareka lanipare' panynyoppongi lamung-lamung. Jari lanipela'mami. Punna nia' tolinnu, appilangngeri mako!”
1 Ri se'reang allo, jai pasingara' sima siagang tau nicini' kodi sipaka ri tau jaia, battu ampilangngeri Isa angngajara'. 2 A'moro-moromi tu Farisia siagang guru-guru agamaya. Nakanamo ke'nanga, “Pui', anne taua natarimai siagang naagangi sipangnganreang tau kodi sipaka!” 3 Lanri kammana anjo Nacaritami Isa ri ke'nanga anne pangngebaranga, Nakana, 4 “Ebara' angkana nia' kalase'rennu ammallaki sibilangngang kayunna gimbala', nampa tappela' sikayu — maka apa lanagaukang? Mattantu lanabokoi anjo gimbala'na salapampuloa assalapang kayunna ri paranga, nampa a'lampa amboyai anjo gimbala' tappelaka, sa'genna nagappa. 5 Na punna nabuntulu' poleang anjo gimbala' tappelaka, mattantu lanasompoi anjo gimbalaka napakamma sanna' rannuna, 6 nampa naerang ammotere'. Nampa nakio' ngaseng agang-aganna siagang sambori'na ngaseng, na nakana, ‘Umba nakiassua'-suara', nasaba' kugappami ammotere' gimbalakku tappelaka!’ 7 Jari kammatommi anjo ri suruga; punna nia' se're tau toba' lania' karannuang lompoangang, kala salapampulo assalapang tau bajikamo, tenayamo naparallu toba'.” 8 “Yareka, ebara' angkana nia' sitau baine ammallaki sampulo doe' pera', natappela' se're — maka apa lanagaukang? Mattantu lapparinrai lampu nampa nabarrasa' balla'na siagang naboya sa'genna nagappa anjo doeka. 9 Na ri wattunna nabuntulu'mo ammotere' anjo doeka, nakio'mi agang-aganna siagang sambori'na ngaseng, nampa nakana, ‘Sanna' rannuna nyawaku kakugappami ammotere' doekku tappelaka. Umba nakiassua'-suara'!’ 10 Kamma tomminjo rannuna malaeka'Na Allata'ala, punna nia' se're tau ja'dala' a'jari toba' battu ri dosa-dosana. Patappa'mi anne!” 11 Nakanamo pole Isa, “Nia' sitau mangge, rua ana'na bura'ne. 12 Nakanamo ana'na bungkoa ri Ia, ‘O, Bapa', sareamma' nakke tawaku kamma-kamma anne battu ri pa'barang-baranganta.’ Jari nabagemi pa'barang-baranganna anjo taua mae ri anjo ruaya ana'na. 13 Siapa are allo ribokoanganna, nabalukammi tawana anjo ana' bungkoa, nampa a'lampa mange ri se'reang pa'rasangang bella. Anjoreng ri pa'rasanganga napa'laboammi anjo doe'na nampa assannang-sannang. 14 Na ri wattunna la'busu'mo doe'na, sitabang naalle tommi cipuru' lompo anjo pa'rasanganga. Sa'genna appakkaramulami a'jari susa tallasa'na anjo anaka. 15 Jari a'lampami anjama ri se'reang tau anjoreng ri pa'rasanganga. Nisuromi mange akkalawaki bawi ri tampa'na anjo tau napanjamaya. 16 Sanna' dudumi cipuru'na, sa'genna ero'mi nakanre anjo kanre bawia. Mingka manna nakamma, tena sikali tau ero' ansarei kanre. 17 Kale'bakkanna nasassala'mi kalenna, na nakana lalang nyawana, ‘Tau anjama-jamaya ri manggeku kala'biangi ri kanre, nampa inakke anrinni lamate naallea' cipuru'! 18 Erokka' a'lampa, ammotere' mae ri manggeku, nampa kukana ri ia: O, Bapa', dorakama' mae ri Allata'ala siagang mae ri katte. 19 Tenamo nakusiratang nibilang ana' ri katte. Kipare' mama' tau anjama-jamata.’ 20 Le'baki akkana kamma lalang ri nyawana, ammotere'mi anjo anaka mae ri manggena. Bella iji battu ri balla'na nicini'mi ri manggena. Larimi battu manggena ambuntuli nampa naraka' siagang nabau, napakamma sanna' rannuna nyawana. 21 Nakanamo anjo anaka, ‘O Bapa', dorakama' mae ri Allata'ala siagang mae ri katte. Tenamo kusiratang nikana anatta.’ 22 Mingka nakio'mi manggena sikamma palayanna na nakana, ‘Lintakko! Angngalleko pakeang kaminang ga'gaya, nanupipakeangi. Pipakei cincing karemenna, siagang pipakei sapatuna. 23 Punna le'ba' angngalle mako sapi rungka siagang co'moka nampa nupolong. Langnganre-nganreki' siagang la'rannu-rannuki'. 24 Nasaba' le'ba'mi mate anne anakku, mingka kamma-kamma anne attallasa' poleammi.’ Jari appakkaramulami ke'nanga assua'-suara'. 25 Anjo wattua, sitabangi nia' ri kokoa ana' bungasaka. Ri wattunna ammotere' nanrapi' ri rampi' ballaka, nalangngere'mi sa'ra sulinga siagang tau a'dansaya. 26 Nakio'mi kalase'renna palayanna nampa nakuta'nang nakana, ‘Apa anne nagaukang taua ri balla'?’ 27 Appialimi anjo palayanga nakana, ‘Niaki ammotere' anditta. Le'ba'mi assurommolong sapi rungka co'mo' manggeta, lanri nagappami ammotere' ana'na siagang salama'!’ 28 Teaimi sipato' larrona anjo ana' bungasaka. Na taerokamo antama' ri ballaka. Jari assulu'mi manggena anynyonyoki nakio' antama' ri balla'. 29 Mingka nakanamo anjo anaka, ‘Attaung-taummi salloku akkareso ampanjamangki'. Tena le'bakai takugaukang apa kipassuroanga ri nakke. Na apa le'ba' kipassareang mae ri nakke? Manna sikayu bembe tale'baka' kisare lakupake assua'-suara' siagang agang-agangku! 30 Anjo anatta le'ba'mi napa'la'bu'-la'busu' barang-baranta siagang bai'-baine a'gau' salaya. Mingka sikalinna ammotere', ba'lalo kipammolongangi sapi rungka siagang co'moka!’ 31 Appialimi manggena nakana, ‘O, ana', ikau tuli nia'nu anrinni siagang inakke. Sikontu barang-barangku a'jari barang-barannu ngaseng tommi. 32 Mingka siratangki' assua'-suara' siagang a'rannu-rannu, lanri le'ba'mi mate anjo andi'nu, mingka kamma-kamma anne attallasa' poleangi; le'baki tappela', mingka kamma-kamma anne nibuntulu' poleammi.’ ”
1 Nakana Isa ri ana'-ana' gurunNa, “Nia' se're tau kalumanynyang. Na nia' sitau pagawena nasarea ammolika doe' siagang angngurusukai pa'barang-baranganna. Nia'mo tau ampabattuangi angkanaya nipa'laboangi doe'na ri anjo pagawe ambolikai doe'na. 2 Jari nasuro kio'mi anjo pagawena ammolika doe' na nakana, ‘Apa kutadeng nugaukangangi barang-barangku? Kamma-kamma anne kukellaiko ampakasingarianga' baji'-baji' antekamma lampa-lampana batenu angngurusuki pa'barang-barangangku. Tenamo kukellaiko amboliki doekku.’ 3 Jari appikkiri'mi anjo pagawena ammolika doe' nakana, ‘Lanapasulukka' anjama karaengku. Jari apami parallu kugaukang kamma-kamma anne? Erokka' ammingkung anjama tana, natakukullea; lamangea' appala'-pala', nakusiri'-siri'. 4 Mingka nia' akkala', ri tenanapa nipasulukka', musti a'boya memamma' passari'battangang jai-jai, eroka sallang ampariballakka' punna nipasulukka'!’ 5 Jari nakio' ngasemmi sikamma tau kainranganga ri karaenna. Ri wattunna nia'mo battu sikamma tau kainranganga nakanamo ri makase'rea, ‘Siapa jaina inrannu ri karaengku?’ 6 Appialimi anjo taua nakana, ‘Sibilangngang botolo' minynya'-minynya' zaitun.’ Nakanamo anjo pagawea, ‘Allei anne sura' pangnginrangannu. Ammempoko nampa nusambei linta' a'jari limampulo.’ 7 Nampa nakana mae ri tau makaruaya, ‘Na ikau siapa jaina inrannu?’ Appialimi anjo taua nakana, ‘Sisa'bu karung gandung.’ Nakanamo anjo pagawena ammolika doe', ‘Allei anne sura' pangnginrangannu. Sambei a'jari sagantuju bilangngang.’ 8 Jari nipujimi ri karaenna anjo pagawe ammolika doe' tenaya nalambusu' ri jama-jamanna, lanri cara'de'na a'boya akkala'. Nasaba' cara'dekangangi tau ammantanga lalang lino angngurusuki urusanna kala tau ammantanga lalang ri singaraka.” 9 Le'baki anjo, a'bicarami pole Isa Nakana, “Pilangngeri anne! Pa'matu-matui pa'barang-barangannu ri anne linoa a'boya passari'battangang, sollanna punna tenamo anggaranna pa'barang-baranganga ri anne linoa, lanitarima mako ammantang ri pammantangang mannannunganga. 10 Inai-nai akkulle nipatappa' ri passala' apa ca'di-ca'dia iami akkulle tongi nipatappa' ri passala' apa-apa lompoanganga. Mingka inai-nai takkullea nipatappa' ri passala' apa ca'di-ca'dia, takkullea tongi nipatappa' ri passala' apa-apa lompoanganga. 11 Jari punna takkulleako nipatappa' ri passala' pa'barang-barangang lalanga ri linoa, inai laero' ampatappakko ri passala' pa'barang-barangang surugaya? 12 Siagang punna ma'nassamo angkanaya takkulleako nipatappa' ri passala' pa'barang-baranganna parannu tau, inaimi laero' assareangko pa'barang-barangang kalennu todong? 13 Tenanniakka se're tau akkulle anjama mae ri ruaya pinggawa; nasaba' nia' lala'bi nakamaseangngang na maraengannaya, yareka la'bi jarrekangngangi pa'mai'na ri se'reanga na maraengannaya. Na nia' tanakamaseang. Kamma ngaseng tommako anjo. Takkulleako anjama-jama untu' Allata'ala nuanjama-jama todong untu' pa'barang-baranganga.” 14 Nalangngere' ngasengi tu Farisia sikamma Napaua Isa. Nikakkalimi Isa ri ke'nanga, lanri nangaina ke'nanga doeka. 15 Mingka Nakanamo Isa ri ke'nanga, “Ikau ngaseng mintu bajika ngaseng nicini' ri dallekanna tau maraenga, mingka Naassengi Allata'ala bonena atinnu. Nasaba' apa nacini' tinggia rupataua iami Nacini' tuna Allata'ala. 16 Sikamma atorang battua ri Musa siagang pangngajaranna na'bi-na'bia tuli nipakei sa'genna battu Yohanes Paje'ne'. Pakkaramula anjo wattua tuli nibirittakammi Kabara' Baji' ri passala' antekamma bateNa ammarenta Allata'ala. Siagang napassami kalenna taua a'boya oloang ero' antama' a'jari umma'Na Allata'ala. 17 Mingka la'bi lomoangangi lanynya' langika siagang linoa kala lanipattaenai se'rea hurupu'na Atorang battua ri Allata'ala. 18 Inai-nai antallaki bainenna, nampa a'bunting siagang baine maraeng, iami a'gau' salimara'. Siagang inai-nai bura'ne ambuntingi anjo baine le'baka nitalla', a'gau' salimara' tommi.” 19 “Nia' se're tau kalumanynyang. Sangnging care-care ka'jala' ballinna napake, siagang sangnging te'nena katallassang allo-allona. 20 Na ri dallekang pakke'bu' balla'na nia' se're tau kasi-asi dudu niarenga Lazarus. Rassi ngaseng kalenna puru-puru. 21 Manna kongkonga battu tommi allepaki puru-puruna. Naero' dudumo nasa'ring angnganre, manna sesa-sesa kanre tu'gurukamo battu ri mejang pangnganreanna anjo tau kalumanynyanga. 22 Tena nasallo, matemi anjo tau kasi-asia. Nierammi ri malaekaka mange ri tampa' kaminang la'birika, iamintu ri sa'rinna Abraham ri suruga. Tena nasallo pole, mate tommi anjo tau kalumanynyanga nanitarawang. 23 Sanna'mi sessana nasa'ring ammantang ri lino pammantanganna tau matea. Na ri wattunna accini' battu rawa nai' nacini'mi battu bella Abraham siagang Lazarus ammempo ri sa'rinna Abraham. 24 A'gorami anjo tau kalumanynyanga angkioki Abraham nakana, ‘O, Pa' Abraham! Kikamaseang laloa'. Kisuro sai Lazarus ambasai karemenna antama' ri je'neka nampa naung mae ambassai lilaku. Teai sipato' sessana kusa'ring ammantang lalang ri anne pepeka!’ 25 Mingka appialimi Abraham nakana, ‘U'rangi ana' angkanaya: lalang sikontu tallasa'nu le'ba'mi kau nugappa siagang nukasia' sikontu apa-apa bajika; mingka Lazarus sangnging apa-apa kodia bawang le'ba' nagappa. Kamma-kamma anne nakasia' tommi Lazarus te'nea anrinni, na ikau nukasia' tommi sessaya. 26 Nampa kamma-kamma anne nasimbang maki' se're kali'bong sannaka lantanna, sollanna takkullea tau niaka anrinni a'limbang mange antureng, kammayatompa tau niaka antureng takkulleai a'limbang mae anrinni!’ 27 Nakanamo anjo tau kalumanynyanga, ‘Punna padeng kamma bapa', kupala' dudui ri katte sollanna kisuro Lazarus mange ri balla'na manggeku. 28 Nasaba' nia' lima sari'battangku anjoreng. Kisuro sai Lazarus ampakaingaki ke'nanga, sollanna tena lalo natu'guru' todong ke'nanga antama' ri tampa' passessaya anne.’ 29 Appialimi Abraham nakana, ‘Nia'mo ri ke'nanga kitta'-kitta'na Na'bi Musa siagang kitta'-kitta'na na'bi-na'bi maraenganga! Boli'mi kamma nanaturuki ke'nanga sikamma apa tattulisika lalang ri anjo kitta'-kittaka!’ 30 Mingka appialimi anjo tau kalumanynyanga nakana, ‘Tagannakapi anjo Bapa' Abraham. Mingka punna nia' tau mate attallasa' poleang, na mange ampakaingaki ke'nanga, latoba'mi ke'nanga ri massing dosa-dosana.’ 31 Mingka nakanamo Abraham, ‘Punna tena najampangi apa-apa napassuroanga Na'bi Musa siagang na'bi-na'bi maraenga, mattantu tena todong nalatappa' ke'nanga, manna pole nia' tau mate attallasa' poleang mange ampakaingaki ke'nanga!’ ”
1 Nakana Isa mae ri ana'-ana' gurunNa, “Mattantu lania' apa-apa a'jaria passabakkang na'gau' dosa taua. Mingka cilakami tau a'jaria passabakkang! 2 Bajikangangi punna nigentungi batu kallonna nampa nipela' antama' ri tamparanga anjo tau kammaya, kala la'jaria passabakkang na'gau' dosa kalase'renna sikamma anne tau ca'dia. 3 Jari tutu laloko! Punna doraka sari'battannu, pakaingaki. Punna nasassala'mo kalenna, pammopporangi. 4 Punna pintujui doraka ri kau lalanna siallo, natuli battu appala' popporo' ri kau nakana, ‘Pammopporanga',’ pammopporangi.” 5 Nakana ana'-ana' gurunNa Batara Isa, “O Batara, Kipakajarreki tappa'na ikambe.” 6 Appialimi Batara Isa Nakana, “Punna nia' tappa'nu manna sillompoja lisere'na sawi-sawia, akkulleko angkana ri anjo poko' kayua, ‘Ta'bi'bukko na nuattimbo ri tamparanga,’ mattantu lanapilangngeri kanannu anjo poko' kayua.” 7 “Ebara'na nia' palayannu nusuro appa'jeko, yareka nusuro akkalawaki gimbala'. Punna ammotere' anjo palayanga battu ri tanaya, maka lanukana ri ia, ‘Maeko linta' angnganre’? 8 Mattantu tena! Mingka lanukana, ‘Pasadianga' kanreku. Ammakeko care-care tangkasa' nunampa ammempo antayanga' sa'gengku le'ba' angnganre siagang angnginung; le'bappa' angnganre siagang angnginung nunampa akkulle angnganre.’ 9 Sai tenaja naparallu nipuji anjo palayanga lanri le'ba'namo nagaukang apa napassuroanga karaenna? 10 Ikau kamma ngaseng tongko anjo. Punna le'ba'mo nugaukang sikamma nipassuroanga ri kau, angkana mako bawang, ‘Inakke poro palayang biasaja'; inakke poro a'matu-matukuji bawang ri jama-jamangku.’ ” 11 Lalang a'jappaNa Isa mange ri Yerusalem, anjorengi ri pa'baeng-baenna daera Samaria siagang Galilea angngolo. 12 Ri wattunna antama' ri se'reang kampong, nia'mo sampulo tau garring sala battu mae ri Ia. Battu bellami ke'nanga ammenteng 13 na'gora angkana, “O, Isa! O, Batara! Kikamaseangi anne ikambe!” 14 Ri wattunna Nacini' Isa ke'nanga, Nakanamo ri ke'nanga, “A'lampamako mae ri imang-imanga, nampa nupala' nanaparessa ke'nanga batangkalennu.” A'lampami anjo sampuloa tau garring sala mae ri imang-imanga. Na lalang a'jappana ke'nanga mange anjoreng, ti'ring ammari ngasemmi garring sala appakamalla'-malla'na ke'nanga. 15 Ri wattunna naasseng kalenna angkana baji'mi, nia'mo kalase'renna ke'nanga ammotere' a'rannu-rannu mammuji ri Allata'ala. 16 Nampa mange ri dallekanNa Isa, anynyomba appala' sukkuru' ri Isa. Anjo taua tau battu ri pa'rasangang Samaria. 17 Nakanamo Isa, “Sai nia' sampulo tau a'jari baji'? Kemaei anjo tau salapanga? 18 Angngapa naiaji bawang anne tau battu pantarang pa'rasanganga ammotere' appala' sukkuru' ri Allata'ala?” 19 Nampa Nakana Isa ri anjo taua, “Ambangungko nai' siagang ammotere' mako. A'jari baji' mako lanri tappa'nu mae ri Nakke.” 20 Nia' siapa are tu Farisi akkuta'nang ri Isa angkana, ringngapanna Nalabattu Allata'ala ammarenta. Appialimi Isa Nakana, “Punna Napakkaramulai PamarentahanNa Allata'ala, tena Napakaramulai siagang pammatei akkullea nacini' mata, 21 sa'genna akkulle taua angkana, ‘Umba naniciniki, iaminne!’ yareka, ‘Niaki anjoreng!’ Nasaba' sikontutojenna appakkaramulami ammarenta Allata'ala ri tangnga-tangnganu ngaseng.” 22 Le'baki anjo Nakanamo Isa ri ana'-ana' gurunNa, “Lanarapiki sallang wattunna nanuero' anciniki se'rea allo ri allo kabattuanNa Ana' Ma'rupataua, mingka takkulleako anciniki. 23 Lanakana sallang taua ri kau, ‘Ciniki, anjoreng!’ yareka nakana, ‘Ciniki, anrinni!’ Mingka teako assuluki mange amboyai. 24 Antekamma batena tassioro' kilaka irate ri langika naccaya battu ri cappa' se'rea mange ri cappa' maraenganga, kammatommi anjo sallang lampa-lampana Ana' Ma'rupataua punna narapi'mo allonNa. 25 Mingka uru-uruna musti jai sessa Nakasia' siagang tanitarimayai ri taua ri anne jammanga. 26 Mingka ri allo nipa'nyatana Ana' Ma'rupataua sallang, lakammai lampa-lampana ri wattu jammanna Na'bi Nuh. 27 Langnganre angnginungi, siagang lasibunting-buntingi taua; iaminjo tuli nagaukang ke'nanga, sa'genna antama' Na'bi Nuh ri biseanga. Nabattumo a'ba lompoa, namate tallang ngasemmo ke'nanga. 28 Kamma tomminjo ri wattu jammanna Lot. Angnganre angnginungi, a'danggangi, a'lamung-lamungi, siagang massing ambangungi taua balla'. 29 Mingka ri wattunna assulu' Lot battu ri kota Sodom, anjo alloa battumi pepeka siagang turummi bara-bara pepeka battu rate ri langika angngancuru' ngasengi ke'nanga. 30 Kammaminjo sallang lampa-lampana ri allo nipa'nyatana Ana' Ma'rupataua. 31 Anjo alloa, tau niaka irate ri pattongko'na ballaka teami naungi angngallei barang-baranna niaka lalang ri balla'na. Kammayatompa tau niaka ri kokoa teami ammotereki mange ri balla'na. 32 U'rangi apa le'baka kajariang ri bainenna Lot! 33 Inai-nai ero' ampasalamaki katallassanna, iami latappela' katallassanna. Mingka inai-nai tappela' katallassanna, iami lanipasalama' katallassanna. 34 Patappa'mi angkanaya: anjo bangngia punna nia' rua tau attinro ri se'rea katinroang, lanierangi a'lampa sitau, nalaniboli' sitau. 35 Na punna nia' rua baine a'dengka ase, lanierangi a'lampa sitau, nalaniboli' sitau. 36 Punna nia' rua tau anjama ri se'rea koko, lanierangi a'lampa sitau, nalaniboli' sitau.” 37 Akkuta'nammi ana'-ana' gurunNa Isa angkana, “Kemae lakajariang anjo kammaya, Batara?” Appialimi Isa Nakana, “Kemae-kemae nia' maya', anjoremmi lania' jangang-jangang pakanre maya'.”
1 Le'baki anjo Nacaritami Isa se'rea pangngebarang, ero' Naajara' ana'-ana' gurunNa sollanna tuli appala' doang siagang tena natappu' panrannuang. 2 Nakana Isa, “Ri se'reang kota, nia' sitau haking, tenaya namalla' ri Allata'ala, siagang manna inai tena todong najampangi. 3 Ri anjo kotaya, nia' todong sitau janda. Anjo jandaya, a'mole-molemi mange andallekang ri anjo hakinga, sollanna nisare ammeta lalang ri kara-karana nibicaraya. Nakana anjo jandaya, ‘Kitulunga' angngewai balingku.’ 4 Salloi taeroka anjo hakinga antulungi anjo jandaya. Mingka kala'busanna appikkiri'mi anjo hakinga nakana, ‘Manna tena kumalla' ri Allata'ala, siagang tena ngaseng kujampangi taua, 5 mingka lanri tuli naricuingku anne jandaya, bajikangangi punna kusare ammeta lalang ri kara-karana. Kapunna tena, tuli labattui ansusaia'.’ ” 6 Nampa Nakana Batara Isa, “Pilangngerimi apa napaua anjo haking tenaya naadele'. 7 Jari, maka tena naNasarei Allata'ala ammeta lalang ri kara-karana umma'Na, punna allo bangngi appala' tulung umma'Na? 8 Patappa'mi angkanaya: Lalintaki Nasare ammeta ke'nanga! Mingka punna battu Ana' Ma'rupataua, maka lania'ja tau tappa' nabuntulu' lalang ri anne linoa?” 9 Nacarita tommi Isa anne pangngebarang tattujua mange ri tau ancini' tunayai paranna tau, na nakana kalennaji bawang baji'. 10 Nakana Isa, “Nia' rua tau a'lampa mange ri Balla'Na Batara appala' doang. Anjo se'rea tu Farisi, na anjo se'rea pole pasingara' sima. 11 Anjo tu Farisia akkale-kalemi ammenteng nampa appala' doang lalang ri atinna nakana, ‘O, Allata'ala, appala' sukkurukka' mae ri Katte, lanri tena kusangkamma tau maraenga; tena kusangkamma tau angngoaya, tau jekkonga, yareka tau a'gau' bawanga. Appala' sukkurukka', lanri tena kusangkamma anjo pasingara' simaya. 12 Pinruanga' appuasa lalanna sidaminggua, siagang kukoro'bangkangi bage sampulona panggappa-gappangku mae ri Katte.’ 13 Mingka anjo pasingara' simaya bellai ammenteng siagang tena nabarani acconga nai' ri langika. Napurusu'mi barambanna na nakana, ‘O, Allata'ala, Kikamaseanga', anne inakke tau dorakaya!’ ” 14 Nakanamo Isa, “Patappa'mi angkanaya, ri wattunna ammotere' mange ri balla', iaminjo pasingara' simaya nitarima pappala'na ri Allata'ala. Jari teai pappala'na anjo tu Farisia. Nasaba' inai-nai ampakatinggi kalenna iami lanipakatuna. Na inai-nai ampakatunai kalenna, iami lanipakatinggi.” 15 Nia' siapa are jaina tau angngerang ana'-ana' ca'di mae ri Isa, sollanna nijama siagang nibarakkaki ke'nanga ri Isa. Nacini'na ana'-ana' gurunNa Isa anjo tau angngeranga ana'-ana', nakalarroi ngasemmi anjo taua. 16 Mingka Nakio'mi Isa, anjo ana'-anaka na Nakana ri ana'-ana' gurunNa, “Lappassangi nabattu ana'-anaka mae ri Nakke! Teako pisangkai, nasaba' tau kammayami anne la'jari umma'Na Allata'ala. 17 U'rangi! Inai-nai tena na'jari sanrapang anne ana'-anaka battu andallekang ri Nakke, takkulleai a'jari umma'Na Allata'ala.” 18 Nia' sitau pamimping tu Yahudi akkuta'nang ri Isa nakana, “O, Pa' Guru, baji' pa'maika, apa musti kugaukang sollanna kugappa katallassang sitojennaya siagang mannannunganga?” 19 Akkuta'nammi Isa ri anjo taua Nakana, “Angngapa nanukana bajikKa'? Tena tau baji' pantaranganna Allata'ala. 20 Nuassemmi sikamma parentaNa Allata'ala, iamintu, ‘Teako a'gau' salimarri, teako ammunoi, teako a'lukkaki, teako assa'bi salai, siagang pakala'biriki anrong-manggenu.’ ” 21 Appialimi anjo taua nakana, “Sikamma anjo parenta kammaya kuturukimi appakkaramula ri rungkaku.” 22 Nalangngere'na Isa kananna anjo taua, Nakanamo, “Nia' ija se're passala' musti nugaukang: Balukang ngasengi sikamma pa'barang-barangannu, nampa nupassareang ballinna mae ri tu kasi-asia, na lanugappa pa'barang-barangang niaka ri suruga. Punna le'ba'mo nugaukang anjo kammaya, battu mako mae amminawang ri Nakke.” 23 Mingka si'nami pa'mai'na anjo taua nalangngere'na anjo Napaua Isa, lanri sanna' kalumanynyanna. 24 Naassengi Isa angkanaya si'nai pa'mai'na anjo taua. Jari Nakanamo Isa, “Teai sipato' sukkara'na tu kalumanynyanga la'jari umma'Na Allata'ala! 25 Lomoangangi sikayua unta antama' ri so'bolo' jarunga, kala sitaua tu kalumanynyang antama' ri Lino BeruNa Allata'ala.” 26 Akkuta'nammi tau allangngerekai Isa akkana kamma nakana, “Punna kamma, inai mami akkulle salama'?” 27 Appialimi Isa Nakana, “Apa tenaya nantama' ri akkala'na rupataua, tena tama'jari punna Naerokang Allata'ala!” 28 Akkanami Petrus nakana, “Kicini'mi anne ikambe! Nibokoimi ballatta, tu bai'-baineta siagang ana'-anatta, nakimminawang ri Katte!” 29 Nakanamo Isa, “Patappa'mi, angkanaya: Inai-nai ambokoi balla'na, yareka tu ri balla'na, yareka sari'battanna, yareka anrong-manggena, yareka ana'-ana'na, lanri ero'na ampa'jari palayangi kalenna ri Allata'ala, 30 iami lanibalasa' a'lappi-lappi ri anne jammanga, siagang lanisareangi sallang katallassang satunggu-tunggua.” 31 Napa'rappungammi Isa ana'-ana' gurunNa ri tampa' anynya'laka. Nampa Nakana ri ke'nanga, “Pilangngeri! Kamma-kamma anne a'lampaki' mange ri kota Yerusalem. Anjoreng lakajariammi sikamma apa le'baka natulisi' na'bi-na'bia ri passala'na Ana' Ma'rupataua. 32 Lanipassareangi mae ri tu kapereka, lanipare' kare'-karenangi ri ke'nanga. 33 Lanisessai siagang lanibunoi ri ke'nanga, mingka lattallasa' poleangi battu ri kamateanga ri makatalluna alloa.” 34 Mingka manna sike'de' tanapahangai ana'-ana' gurunNa anjo Nabicaraya Isa. Na Narahasiakang Isa battuanna anjo kana-kana Napabattua ri ke'nanga. Tanapahangai ke'nanga angkanaya passala' apa anjo Nabicaraya Isa. 35 Ri wattunna a'birimmo anrapi' Isa battu mange ri Yerikho, nia'mo se're tau buta ammempo ri birinna aganga appala'-pala'. 36 Nalangngere'na anjo tau butaya angkanaya jai tau numalo anjoreng ri aganga, akkuta'nammi nakana, “Apa anjo?” 37 Nakanamo ke'nanga ri anjo tau butaya, “Isa, anjo tu Nazaretka, niaki numalo.” 38 Akkiok-kio'mi anjo tau butaya nakana, “O Isa, Ana'na Daud! Kamaseang laloa'!” 39 Larromi anjo tau a'jappaya ri dallekang siagang nasuromi anjo tau butaya a'mereki. Mingka pila' nalompoimi sa'ranna anjo tau butaya, akkiok-kio' nakana, “O, Ana'na Daud! Kamaseang laloa'!” 40 Ammantammi Isa, na Nasuro erang anjo tau butaya mae ri Ia. Ri wattunna battumo anjo tau butaya ri dallekanNa Isa, akkuta'nammi Isa ri ia angkana, 41 “Apa nukaeroki Kugaukang ri kau?” Appialimi anjo tau butaya nakana, “O Batara, erokka' accini'.” 42 Jari Nakanamo Isa, “Punna kamma, accini' mako! Nipakabaji' mako lanri tappa'nu.” 43 Anjo wattua, akkulle memammi accini' silalonna. Nampa amminawang ri Isa, siagang appala' sukkuru'mi ri Allata'ala. Nacini'na tau jaia anjo apa kajarianga, ammuji-muji ngasemmi ke'nanga ri Allata'ala.
1 Ri wattunna battu Isa mange ri Yerikho, a'jappa tulusu'mi Nalaloi anjo kotaya. 2 Anjoreng ri kotaya nia' sitau kapala pasingara' sima, sannaka kalumanynyanna, niarenga Zakheus. 3 Na anne lapung Zakheus, ero' dudui naasseng siagang nacini' angkana inai anjo Isa. Mingka lanri jai duduna tau, siagang bodona pakkaleanna, takkulleami nacini' Isa. 4 Jari larimi a'lampa riolo ampilumbai anjo tau jaia. Nampa angngambi' nai' ri se'reang poko' kayu, sollanna akkulle nacini' Isa lanumaloa sinampe' anjoreng. 5 Ri wattunna anrapi' Isa mange anjoreng ri tujunna poko' kayua, accongami nai'. Nampa Nakana, “O Zakheus, naungko mae linta'! Nasaba' musti mangeA' ri balla'nu anne alloa.” 6 Akkaro-karomi Zakheus naung, namange anruppai Isa, siagang sanna'mi rannuna nyawana. 7 Nalarro ngasemmo taua anciniki anjo passalaka. Nakanamo ke'nanga, “Pui'! A'lampai a'manaikang ri balla'na tau kodi sipaka!” 8 Ri wattunna battumo ri balla'na Zakheus, ammentemmi nampa nakana ri Isa, “O Batara, lakupassidakkangi tawaruanna pa'barang-barangangku mae ri tu kasi-asia; namanna inai punna le'baki kutipu, lakubayaraki ammotere' sa'genna a'lappi appaka!” 9 Nakanamo Isa, “Anne alloa ikau siagang sikamma bone balla'nu, nipasalama' mako ri Allata'ala siagang nisare mako katallassang beru, nasaba' sossoranna tongko Abraham. 10 Nasaba' battui Ana' Ma'rupataua untu' amboyai siagang ampasalamaki tau sala oloanga.” 11 Lalang nipilangngerina ri taua a'bicara, Nacaritami Isa se're pangngebarang. Nasaba' ri wattunna a'reppese'mo ri Yerusalem nakapangi taua angkanaya tasalloami nalammarenta Allata'ala salaku Karaeng ri linoa. 12 Nakanamo Isa, “Nia' se're tu nipakala'biri' a'lampa ri se'reang pa'rasangang bella, ero' niangka' a'jari karaeng anjoreng nampa ammotere' poleang. 13 Ri tenanapa na'lampa, nakio'mi sampuloa palayanna, nampa massing nasare ke'nanga tasse're-se'renna doe' bulaeng. Nakana ri ke'nanga, ‘Pakei anne doeka a'danggang lalang lampaku.’ 14 Mingka sanna' nikabirisinna ri tuma'buttana anjo pa'rasanganga. Jari ri wattunna a'lampamo anjo tu nipakala'birika, nia'mo nasuro ke'nanga mange ampaui angkanaya teami ke'nanga angkaraengangi anjo karaenga. 15 Mingka niangka'mi anjo tu nipakala'birika a'jari karaeng, nampa ammotere' ri pa'rasanganna. Nasuro kio'mi linta' andallekang anjo palayang-palayanna, ero' naasseng angkanaya siapa jaina passawallang massing nagappa ke'nanga. 16 Battumi palayang makase'rea andallekang na nakana, ‘O karaeng, anjo se'rea doe' bulaeng kipassareanga ri nakke, kupa'jari lappi sampulomi.’ 17 Nakanamo anjo karaenga, ‘Baji'mi! Palayang bajikko! Nasaba' akkulleko nipatappa' ri passala' apa-apa ca'dia, lakupa'jari mako tau koasa ammarenta sampulo kota.’ 18 Le'baki anjo battu tommi palayang makaruaya na nakana, ‘O, karaeng, anjo se'rea doe' bulaeng kipassareanga ri nakke, kupa'jari lappi limami.’ 19 Nakanamo anjo karaenga ri anjo palayanga, ‘Lakupa'jariko tau koasa ammarenta lima kota.’ 20 Le'baki anjo battu tommi palayang maraenga pole, na nakana, ‘O, karaeng, anne doetta; kuboliki lalang ri passapungku. 21 Mallaka' ri katte lanri sekkekki'. Kiallei apa-apa tenaya naikatte pata, kiallei wassele'na tampa' tenaya naikatte pata tampa'!’ 22 Nakanamo anjo karaenga ri anjo taua, ‘Ikau palayang ja'dalakko! Lanri kana-kanannu tonji nalakuhukkungko. Nuassengi angkanaya inakke tau sekkekka': kuallei apa-apa tenaya nainakke pata, siagang kuallei wassele'na tampa' tenaya nainakke pata tampa'. 23 Punna kamma, apa saba'na natena nupantamaki doekku ri kantoro' banga sollanna akkulle kualle ammotere' anjo doekku siagang bungana punna ammoterekka'?’ 24 Le'baki anjo, nakanamo anjo karaenga ri sikamma tau niaka anjoreng ammenteng, ‘Allei anjo doe' bulaeng niaka ri ia nampa nupassareang mae ri anjo palayang niaka sampulo doe' bulaenna.’ 25 Mingka nakanamo ke'nanga, ‘O, karaeng, anjo palayanga nia'mo ri ia sampulo doe' bulaeng.’ 26 Appialimi anjo karaenga nakana, ‘U'rangi angkanaya: inai-nai nia'mo apa-apanna, iami lanisare pole la'bi jai. Mingka inai-nai tena apa-apanna lanialleangi ba'lalo apa-apa niaka ri ia. 27 Na kamma-kamma anne erang ngasemmi mae sikamma tau ammusua', iamintu tau tenaya naero' akkaraeng ri nakke. Buno ngasengi ke'nanga ri dallekangku!’ ” 28 Le'ba'na Napau Isa sikammaya anjo passalaka, a'jappa riolomi ri dallekanna ke'nanga, ero' a'lampa mange ri Yerusalem. 29 Ri wattunna battu ke'nanga ri rampi'na Betfage siagang Betania, iamintu ri Bonto Zaitun, Nasuromi ana' gurunNa rua tau a'jappa riolo. 30 Nakana Isa ri ke'nanga, “A'lampamako mange ri anjo kampong niaka ri dallekannu. Na punna battuko mange anjoreng, nia' lanucini' sikayu keledai rungka tappaukang. Tena le'bakapi nibae anjo keledai rungkaya. La'gasimi passikko'na anjo keledaia, nampa nuerang mae anrinni. 31 Punna nia' tau akkuta'nang ri kau angkanaya, ‘Angngapa nanula'gasi antu keledaia?’ pauangi angkana, ‘Naparalluangi Batara.’ ” 32 A'lampami anjo ruaya ana' gurunNa Isa. Nagappa tojemmi sangkamma le'baka Napau Isa. 33 Lalang nala'gasinna ke'nanga passikko'na anjo keledaia, nakanamo patanna anjo keledaia ri ke'nanga, “Angngapa nanula'gasi passikko'na antu keledaia?” 34 Appialimi ke'nanga angkana, “Naparalluangi Batara.” 35 Nampa naerang ke'nanga anjo keledai rungkaya mange ri Isa. Nalapakkimi ke'nanga juba dongko'na anjo keledaia, nampa nabantu Isa nai' a'dongko'. 36 Lalang numalona Isa andongkoki anjo keledaia, napalapara'mi jubana taua ri agang laNaoloa Isa. 37 Ri wattunna a'reppese'mo ri Yerusalem, ri agang anynyoloroka ri Bonto Zaitun, appakkaramula ngasemmi sikamma ana' gurunNa akkiok-kio' mammuji-muji ri Allata'ala. Siagang appala' sukkuru'mi ke'nanga ri Allata'ala, lanri le'ba'na ngasemmo nacini' ke'nanga sikamma gau'-gau' appakalannasa' le'baka Nagaukang Isa. 38 Akkiok-kio'mi ke'nanga angkana, “Nibarakkakimi Karaeng battua lalang arenNa Batara! Salewangangi ri suruga, nanipuji Allata'ala!” 39 Nia' todong siapa are tu Farisi ri alla'na anjo tau jaia. Nakanamo anjo tu Farisia ri Isa, “O, Pa' Guru, Kisuro sai anjo ana'-ana' gurunTa a'mereki'.” 40 Appialimi Isa Nakana, “Patappaki angkanaya: punna a'mereki ke'nanga, la'gora-gorai anne batu-batua.” 41 Ri wattunna pila' a'reppese' Isa ri Yerusalem, naNacini'mo anjo kotaya, angngarru'mi. 42 Lalang angngarru'Na Nakana, “O kodong, baji'na mamo ka'de' nuassemmo anne alloa apa lakkullea angngerang passiamakkang! Mingka kamma-kamma anne takkulleai nucini'. 43 Nia' sallang se're wattu nabattu musunnu ampangngalakkiko ri tammulilinu; lanakurungko ke'nanga, siagang lanabundukiko battu ri sikontu oloang niaka ri tammulilinu. 44 Lanaancurukko siagang sikontu bonenu; na tenanniakka manna sibatu batu tela lanakellai ammantang tassusung ri tampa'na, lanri tenana nanujampangi ri wattunna battu Allata'ala untu' ampasalamakko!” 45 Antama'mi Isa ri Balla'Na Batara, siagang Nabongkami sikamma padanggang niaka anjoreng. 46 Nakana ri ke'nanga, “Nia' tattulisi' lalang ri Kittaka angkanaya: Nakana Allata'ala ‘Lanipareki BallakKu a'jari Balla' Sambayang.’ Mingka ikau ngaseng, nupa'jari balla' paella'!” 47 Allo-allona angngajara' Isa lalang ri Balla'Na Batara. Mingka ero'mi nibuno ri imang-imang kapalaya, siagang guru-guru agamaya, kammayatompa ri pamimping-pamimpinna tu Yahudia. 48 Mingka lanri tuli jaina tau ampilangngeri kana-kananNa, siagang lanri nangaina ngaseng tau jaia ampilangngeri anjo kana-kana Napabattua Isa, tenamo nakkulle ke'nanga anggappa oloang anggaukangi pattujunna.
1 Ri se'reang allo, sitabangi angngajara' Isa, siagang Napabattui Kabara' Baji' battua ri Allata'ala, mae ri tau niaka lalang ri Balla'Na Batara. Battu tommi imang-imang kapalaya, guru-guru agamaya, kammayatompa pamimping-pamimpinna tu Yahudia. 2 Nakanamo ke'nanga ri Isa, “Pau sai bedeng mae ri kambe, inai assareKo pangngellai anggaukang ngasengi anne? Inai assareKo anjo koasa kammaya?” 3 Appialimi Isa Nakana, “Ero' tongA' akkuta'nang. Pauang sabeKa', 4 inai assarei koasa Yohanes a'je'ne' tau? Allata'ala yareka rupataua?” 5 Jari sipa'bicarami ke'nanga massing para ia angkana, “Punna nikana, ‘Pangngellai battu ri Allata'ala,’ nakana sallang, ‘Punna kamma angngapa natena nutappa' ri ia?’ 6 Mingka punna nikana, ‘Pangngellai battu ri rupataua,’ ma'nassa lanasambilaki' taua batu, lanri tappa' ngasengi ke'nanga angkanaya na'bi anjo Yohanes.” 7 Jari appialimi ke'nanga angkana, “Tanaassengai ikambe.” 8 Jari Nakanamo Isa ri ke'nanga, “Punna kamma, tena todong nalaKupau mae ri kau angkanaya inai assareA' pangngellai anggaukang ngasengi sikammaya anne.” 9 Nacaritami Isa mae ri taua anne pangngebarang angkanaya, “Nia' sitau allamungi anggoro' kokonna. Napappitesangangi anjo kokonna mae ri siapa are pajama koko. Nampa a'lampa mange ri pa'rasangang maraeng, nammantang sallo anjoreng. 10 Ri wattunna narapi'mo wattunna lanialle rapponna anjo anggoroka, nasuromi palayanna anjo patanna koko mange ri anjo pajamaya ampalaki tesanna anjo kokonna. Mingka niba'jimi anjo palayanga ri anjo pajamaya. Le'baki niba'ji, nisuromi ammotere' anjo palayanga, natanisarea apa-apa. 11 Jari nasuromi pole palayanna maraenga anjo patanna koko. Mingka niba'ji tommi siagang nihinami anjo palayanga ri anjo pajamaya. Le'baki niba'ji, nisuromi ammotere' anjo palayanga, natanisarea apa-apa. 12 Jari nasuromi pole palayanna makatallua anjo patanna koko. Mingka niba'ji tommi pole anjo palayanga ri anjo pajamaya, nampa nipela' assulu' ri pantaranganna anjo kokoa. 13 Kala'busanna nakanamo anjo patanna koko, ‘Apa mami musti kugaukang? Bajikangang ana' kalengku kukamaseanga kusuro. Tantu lanapakala'biriki ke'nanga punna ana' kalengku kusuro!’ 14 Mingka ri wattunna nicini' anjo ana'na patanna koko ri anjo pajamaya, massing nakanamo ke'nanga para ia, ‘Iaminne warisi'na. Umba nanibunoi, sollanna akkulle nialleang warisi'na.’ 15 Jari nare'resammi ke'nanga assulu' anjo ana'na patanna koko, nampa nabuno.” Le'baki Nacarita Isa anjo pangngebaranga, Nakanamo, “Jari punna ammotere' anjo patanna koko, apa lanagaukang ri anjo siapa area pajama koko? 16 Tantu labattui nanabuno ngaseng anjo pajamaya, nampa napappitesangang anjo kokonna mae ri pajama maraenga.” Nalangngere'na akkana kamma Isa, nakanamo ke'nanga ri Isa, “Tapporo tena sikali nakamma!” 17 Naciniki ngasemmi Isa ke'nanga. Nampa Nakana, “Punna kamma, apa battuanna anne nipaua lalang ri Kittaka, angkanaya, ‘Batu tenaya napakei tukang bangunanga, a'jarimi batu lomoro' se're.’ 18 Sikamma tau tu'guruka ri anjo batua laancuruki; na inai-nai natuju anjo batua lanilissaraki sa'genna a'jari au.” 19 Naassengi guru-guru agamaya siagang imang-imang kapalaya angkanaya kalenna ke'nanga Napitujui Isa anjo pangngebaranga. Jari ero'mi ke'nanga anjakkalaki Isa anjo wattua. Mingka mallaki ke'nanga ri anjo tau jaia. 20 Jari a'boyami ke'nanga kasampatang baji'. Nia'mo se're tau nagaji ke'nanga sollanna assara-sarai a'jari tau lambusu' pa'mai', nampa nasuro anjo taua mange akkuta'nang siagang ampa'boyangi kasalang Isa. Napa'boyangi kasalang Isa, sollanna akkulle ke'nanga a'jamma' mae ri kakoasanna guburnurka, nanijakkala' Isa. 21 Jari a'lampami anjo tau le'baka nigaji, mange akkuta'nang ri Isa nakana, “O Pa' Guru! Naassengi ikambe angkanaya annaba ngasengi sikamma anjo Kipaua siagang Kipangngajarranga. Naasseng tongi ikambe angkanaya Kipangngajarrangi silambusu'na apa Nakaerokanga Allata'ala mae ri rupataua, lanri tena naKipasimmara'-maraengi taua. 22 Jari Kipau sabeki ri kambe, angkanaya, maka akkullei taua a'bayara' sima mae ri karaenga yareka tena, situru' atoranna agamata?” 23 Mingka Naassengi Isa akkala' salana ke'nanga. Lanri kammana, Nakanamo ri ke'nanga, 24 “PicinikiangA' bedeng se're doe' pera'. Inai pata areng siagang inai pata gambara' anne niaka lalang ri doeka?” Appialimi ke'nanga angkana: “Karaenga.” 25 Nakanamo Isa ri ke'nanga, “Punna kamma, sareangi Karaenga apa napatanga Karaenga, siagang sareangi Allata'ala apa Napatanga Allata'ala.” 26 Ma'nassa tena sikalimo nakkulle ke'nanga ampanggappangi kasalang Isa ri dallekanna tau jaia. A'mereki mami takkajannang ke'nanga allangngereki anjo pappialinNa Isa. 27 Nia' siapa are golongang tu Saduki battu mae ri Isa. (Anne golonganna ke'nanga, tena natappa' angkanaya lattallasa' poleangi tau matea.) Akkuta'nangi ke'nanga ri Isa angkana, 28 “O Bapa' Guru, le'baki natulisi' Musa anne hukkung angkanaya: Punna nia' sitau bura'ne mate, natena ana'na musti nibuntingi anjo le'ba' bainenna ri sari'battanna anjo bura'ne matea, sollanna nia' sossoranna anjo bura'ne matea. 29 Le'baki nia' tuju bura'ne assari'battang. A'buntimmi anjo kaminang toaya, mingka tenapa ana'na namatemo. 30 Nampa nibuntingi anjo le'ba' bainenna ri sari'battang makaruana mingka mate tommi natena ana'na. 31 Kamma ngaseng tomminjo kajarianna ri sari'battanna makatallua sa'genna makatujua. A'bunting ngaseng tommi ke'nanga siagang anjo bainea, natena ngasempa ana'na ke'nanga namate ngasemmo ke'nanga. 32 Na kala'busanna mate tommi anjo bainea. 33 Ri allo attallasa'na ammotere' tau matea, inai pata baine anjo bainea? Nasaba' le'ba' ngasemmi anjo bura'ne tujua massari'battang a'bunting siagang anjo bainea.” 34 Appialimi Isa Nakana, “A'bunting ngasengi tau attallasaka ri kamma-kammaya anne. 35 Mingka tau siratanga nipattallasa' poleang battu ri kamateanga, siagang lattallasaka sallang ri jammang labattua, tenamo nala'bunting. 36 Lasangkammami malaeka' siagang talamateami ke'nanga. La'jarimi ana'-ana'Na Allata'ala ke'nanga, nasaba' nipattallasa' poleammi ke'nanga battu ri kamateanga. 37 Kalenna Musa ampakasingaraki ma'nassana angkanaya lanipattallasa' poleangi tau matea. Lalang ri tulisanna ri passala'na anjo rompo' a'rinraya, nagallaraki Batara salaku ‘Allata'alana Abraham, Allata'alana Ishak, siagang Allata'alana Yakub.’ 38 Jari, anjo Allata'ala, teai Allata'alana tau matea! Passangalinna Iami Allata'alana tau attallasaka! Nasaba' untu' Allata'ala nattallasa' ngaseng rupataua.” 39 Nia'mo siapa are guru-guru agama angkana, “Baji' sikali pappialinTa Bapa' Guru.” 40 Lanri kammana, tenamo nabarani pole ke'nanga akkuta'nang apa-apa ri Isa. 41 Akkuta'nangi Isa ri ke'nanga Nakana, “Antekamma nakkulle nikana angkanaya anjo Karaeng Mappasalamaka sossoranna Daud? 42 Na kalenna Daud angkana lalang ri Kitta' Pammuji angkanaya, ‘Nakana Batara ri Bataraku: AmmempoKo ri sa'ri kanangKu, 43 sa'genna Kusuro sikamma musunNu akkulantu' ri Kau.’ 44 Jari punna Daud angkana ‘Batara’, ri anjo Karaeng Mappasalamaka, antekamma nakkulle nikana sossoranna Daud?” 45 Lalang appilangngerina ngaseng taua ri bicaranNa Isa, Nakanamo Isa ri ana'-ana' gurunNa, 46 “Tutuko ri guru-guru agamaya. Nangai ke'nanga a'jappaya ammake juba la'bu, siagang nangai ke'nanga punna nipakala'biri' ri pasa'-pasaraka. Nangai ke'nanga ammempo ri pammempoang mala'birika lalang ri balla' sambayanga siagang ri passua'-suarranga. 47 Nangai ke'nanga antipui siagang angngalle passai balla'na janda-jandaya. Kammayatompa nangai ke'nanga alla'bu-la'bui sambayanna, sollanna akkulle nacokko kaja'dallanna ke'nanga! Iaminjo nateai sipato' battala'na hukkunganna ke'nanga sallang!”
1 Ri Balla'Na Batara, Naciniki Isa tu kalumanynyanga appantama' doe' passidakka ri pammoneang passidakkaya. 2 Na nia' todong nacini' sitau janda sannaka kasi-asina, appantama' rua doe' ece-ece tambaga. 3 Nakanamo Isa, “Pilangngeri: iaminne jandaya kaminang jai napantama' ri sikamma tau appantamaka doe' passidakka. 4 Nasaba' sikamma tau maraenga, la'bi-la'bi doe'naji napantama'. Mingka anne jandaya, manna nasanna' kasi-asina, mingka napassareammi sikamma apa niaka ri ia, iamintu sikamma apa naparalluanga ri katallasanna.” 5 Nia' siapa are tau ambicarai antekamma ga'gana Balla'Na Batara. Nasaba' nibelo-beloi batu-batu sannaka ga'gana siagang barang-barang nipassidakkanga ri Allata'ala. Nakanamo Isa ri ke'nanga, 6 “Nia' sallang nanarapi' wattunna nalanirumbang ngaseng anjo apa nucinika; anne batu niaka anrinni manna sibatu talania'ija tassusung ri pammantanganna!” 7 Jari akkuta'nammi ke'nanga ri Isa angkana, “O, Bapa' Guru, ringngapanna nalakajariang anjo Kipaua? Siagang apa pammateina angkanaya narapi'mi wattunna lakajariang anjo passalaka?” 8 Nakanamo Isa, “Tutu laloko, gassingka nitipuko. Nasaba' lajai tau battu ampakei arengKu, angkana, ‘Inakke minne!’ Siagang nakana, ‘Narapi'mi wattunna.’ Mingka teako turuki ke'nanga. 9 Tea tongko mallakki punna allangngerekko kabara' pa'bundukang siagang passisala-salang. Ia ngaseng minjo musti kajariang rolong. Mingka tenapa nakkulle nikana narapi'mi wattu allo kiamaka.” 10 Nampa Nasambungi bicaranNa Isa Nakana, “La'bunduki se'rea bansa siagang bansa maraenga, yareka se'rea pa'rasangang lanabunduki pa'rasangang maraenga. 11 Lata'ge'gosoki buttaya ri kere-keremae. Lanaallei cipuru' siagang lanatabai garring sikamma rupataua. Nia' lakajariang apa-apa sannaka appakamalla'na rate ri langika. 12 Mingka ri tenana ngasempa nakajariang anjo sikammaya, lanijakkalakko siagang lanisessako rolong. Laniadeliko ri balla' sambayanga siagang lanipantamakko ri tarungkua. Siagang lanire'resangko mange ri dallekanna karak-karaenga siagang tu koasa-koasaya, passabakkang amminawangko ri Nakke. 13 Mingka iaminjo la'jari kasampatang ri kau ambirittakangi Kabara' Bajika, battua ri Allata'ala. 14 Pakajarreki pa'mai'nu, sollanna tena nularanggasela angkanaya apa lanupau angngalleangi kalennu. 15 INakke lassareko kacara'dekang siagang kana-kana lanupaua. Sa'genna manna sitau ri musu-musunnu takkulle ambeta kanako yareka ampassalai apa-apa nupaua. 16 Lanisassaliko ri anrong-manggenu, yareka ri sari'battannu, yareka ri bija-bijannu, siagang ri agang-agannu. Nia' siapa are jaina tau ri kau lanibuno ri ke'nanga. 17 Lanikabirisiko ri tau jaia passabakkang amminawangko ri Nakke. 18 Mingka manna silawara' uu'nu tena todong nalatappela'. 19 Punna sa'barakko siagang attahangko, lanipasalamakko.” 20 “Punna nucini' sallang nitammulili kota Yerusalem ri surudadu, lanuassemmi angkanaya tasalloami nalaruntung anjo kotaya. 21 Anjo wattua, tau niaka ri pa'rasangang Yudea musti lari nai' ri buluka. Tau niaka lalang ri kotaya musti nabokoi kotaya, siagang tau niaka ri pantaranganna kotaya tea' laloi antamakki ri kotaya. 22 Nasaba' iaminjo allo-allo nikanaya, ‘Allo-allo Kabattuanna Hukkunganga,’ sollanna a'rupamo apa le'baka tattulisi' lalang ri Kittaka. 23 Anjo allo-alloa teai sipato' appakamalla'na mae ri bai'-baine tiananga siagang bai'-baine appasusua ana' lolo! Lanatabai kasusaang lompo anne pa'rasanganga, siagang laNahukkungi Batara anne bansaya. 24 Nia' lanibuno siagang pa'dang, siagang nia' todong lanierang mange nipela' ri pa'rasangang maraenga. Siagang lanionjo'-onjokangi anne kota Yerusalem ri tu kapereka, tenaya namalla' ri Allata'ala, sa'genna la'busu'mo wattu le'baka Napattantu Batara mae ri ke'nanga.” 25 “Lania' sallang pammatei irate ri alloa, ri bulanga, siagang ri bintoeng-bintoenga. Lamallaki siagang lalingui bansa-bansaya ri lino, andallekangi anging lompona siagang bombanna tamparanga. 26 Teai sipato' malla'na rupataua andallekangi sikamma apa lakajarianga ri sikontu anne linoa, lanri la'jari tasilolongammi siagang laricu ngasemmi napakamma malla' sikontu tau anna'galaka koasa ri sila'banna linoa. 27 Iaminjo wattua Nalabattu Ana' Ma'rupataua lalang ri rammanga siagang kakoasang na kala'birang malompoNa. 28 Punna kajariang ngasemmo anjo passalaka sallang, ambangung mako nai', siagang angka'mi ulunnu, nasaba' sinampe' mami nanulanipasalama'.” 29 Nampa Nacarita Isa mae ri ke'nanga anne pangngebaranga Nakana, “Cini' sai anjo poko' araya siagang poko'-poko' maraenga. 30 Punna appakkaramulamo kacinikang cu'la'na, nuassemmi angkanaya la'birimmi battu wattu timoroka. 31 Kamma tomminjo, punna nucini'mo kajariang sikamma anjo passalaka, lanuassemmi angkanaya tasalloami nalappakkaramula ammarenta Allata'ala salaku Karaeng. 32 Assemmi angkanaya, tamate ngasengapi tau attallasaka ri kamma-kammaya anne, nalakajariang ngaseng anjo passalaka. 33 Lalanynya' ngasengi langika siagang linoa, mingka kana-kanangKu tuli lania'na satunggu-tungguna.” 34 “Jagai kalennu, gassingka sangnging assua'-suaraka, angnginung inungang terasa', yareka sangnging passala' katallassannu bawang nunawa-nawa, sa'genna tena nusadia natanusanna-sannaya nabattumo anjo wattua. 35 Nasaba' lasanrapangi sikko' nitannanga mae ri sikontu rupataua ri lino, kabattuanna anjo alloa. 36 A'jaga-jagako, siagang tuli appala' doangko sollanna numajarre' andallekangi sikamma anjo apa lakajarianga, siagang nukkulle andallekang ri Ana' Ma'rupataua.” 37 Anjoreng ri Balla'Na Batara angngajara' Isa punna allo. Na punna bangngi a'lampai mange ammantang ri Bonto Zaitun. 38 Bari'basa'-bari'basaki battu ngaseng taua ri Balla'Na Batara ero' ampilangngeri Isa angngajara'.
1 Anjo wattua a'reppese'mi allo Passua'-suarranna Roti Tenaya Nammake Pa'gambang, iamintu niarenga allo Paska. 2 Na anjo wattua a'boyami akkala' imang-imang kapalaya siagang guru-guru agamaya, antekamma nakkulle nabuno Isa. Mingka eroki nabuno cokko-cokko, lanri mallaki ke'nanga ri tau jaia. 3 Antama'mi Billisika ri kalenna Yudas Iskariot, iamintu kalase'renna anjo sampuloa anrua ana' gurunNa Isa. 4 Jari a'lampami Yudas mange sipa'bicara siagang imang-imang kapalaya kammayatompa sikamma kapala pangawalaka ri Balla'Na Batara. Nabicarami ke'nanga angkanaya antekamma batena Yudas ampassareangi Isa mae ri ke'nanga. 5 Teaimi sipato' rannuna ke'nanga, siagang nijanjimi lanisare doe' Yudas ri ke'nanga. 6 Ammiomi Yudas. Appakkaramulami a'boya wattu baji' untu' ampassareangi Isa mae ri ke'nanga, mingka tanaassengai tau jaia. 7 Narapi'mi allonna nisamballe gimbala' lanikanrea ri allo Paskaya, lalang ri Passua'-suarrang Roti Tenaya Nammake Pa'gambang. 8 Jari Nakanamo Isa ri Petrus siagang Yohanes, “A'lampa mako ampasadiai kanre Paska lanikanrea.” 9 Akkuta'nammi ke'nanga angkana, “Kemae Kikellai lanipasadia?” 10 Appialimi Isa Nakana, “Punna antamakko ri kotaya, nia' sitau bura'ne lanuagang assibuntulu', sitabanga angngerang je'ne' lalang bongki. Pinawammi mange ri balla' lanapantamakkia. 11 Nampa nupauang patanna anjo ballaka angkana: Nakana Gurua, ‘Kemae tampa' eroka Kupake angnganre Paska siagang ana'-ana' gurungKu?’ 12 Lanapicinikiangko sallang anjo patanna balla', se're kamara' lompo irate ri lotenga, sukkuka pakkakasa'na. Pasadia ngasemmi niparalluanga anjoreng.” 13 A'lampami Petrus siagang Yohanes, nanagappa tojemmo anjo tampaka, sicoco' sikali sangkamma le'baka Napau Isa. Napasadiami ke'nanga anjo kanre Paskaya. 14 Ri wattunna narapi'mo wattunna lanikanre anjo kanre Paskaya, ammempomi Isa siagang ana'-ana' gurunNa ri mejang parjamuanga. 15 Nampa Nakana ri ana'-ana' gurunNa, “Ero' duduA' angnganre kanre Paska siagang ikau ngaseng ri tenanapa Kupisa'ringi passessaya! 16 Nasaba', patappa'mi angkanaya: Tenamo nalaKukanre pole anne kanre Paskaya sa'genna nipa'nyata battuanna ri Lino Beruna Allata'ala.” 17 Le'baki anjo Naangka'mi Isa piala anggoroka, nampa appala' sukkuru' ri Allata'ala. Nampa Nakana, “Allemi anne, nanubage-bage; 18 nasaba' parallui nuasseng angkanaya: appakkaramula ri kamma-kammaya anne, tenamo nalaKuinung pole anne anggoroka, sa'genna Napa'nyata tojeng-tojemmo koasaNa Allata'ala.” 19 Le'baki anjo angngallemi roti Isa. Na le'ba'na appala' sukkuru', Napue-puemi anjo rotia siagang limanNa, nampa Napassareang mae ri ke'nanga, na Nakana, “Iaminne batangkalengKu nipassareanga untu' ikau ngaseng. Gaukammi anne kammaya, untu' a'jari pangngu'rangi mae ri Nakke.” 20 Kamma tomminjo, ri le'ba'na nakanre ke'nanga anjo rotia, Napassareammi anjo piala anggoroka mae ri ana'-ana' gurunNa, na Nakana, “Anne pialaya iami a'jari pammatei parjanjiang beruNa Allata'ala, nipa'jari assaya siagang cerakKu, iamintu cera' nipasolonga untu' ikau ngaseng.” 21 “Mingka ciniki! Anjo tau eroka ambalukangA' niaki anrinni siagang iNakke! 22 Lamate memangi Ana' Ma'rupataua situru' le'baka Napattantu Allata'ala; mingka cilakami anjo tau ambalukangai KalengKu!” 23 Jari appakkaramulami assikuta'-kuta'nang ke'nanga, ero' naasseng angkanaya inaimi kalase'renna ke'nanga langgaukangi anjo panggaukang kammaya. 24 A'gea'-gea'mi ana'-ana' gurunNa Isa, passabakkang inai ri ke'nanga lanipa'jari kaminang nipakala'biri' sallang. 25 Nakanamo Isa ri ke'nanga, “Sikamma karaenna bansa kapereka najallakkangi ra'ya'na, na sikamma tukoasana nigallaraki ‘Pajaga Ra'ya'’. 26 Mingka ikau ngaseng, takkulleako kamma anjo. Passangalinna, inai-nai ero' kaminang nipakala'biri' ri kau musti napa'jari kalenna kaminang tuna. Siagang inai-nai la'jari pamimping, musti a'jari sangkammai palayang. 27 Kereanga la'bi la'biri'?: tau ammempoa angnganre ri mejanga, yareka tau a'jari palayanga mae ri anjo tau angnganrea? Tantu anjo tau ammempoa angnganre. Mingka nia'Ma' ri tangnga-tangnganu a'jari palayang. 28 Nuagang ngasemMa' ilalang sikontu kasusaangKu. 29 Sangkamma nasareMa' pangngellai ManggeKu ammarenta, sangkamma tommi anjo, laKusare tongko pangngellai kammaya. 30 Lanri kammana, akkulle tommako amminawang a'rannu-rannu siagang iNakke ri wattungKu a'jari Karaeng. Siagang lammempo ngaseng tommako irate ri sampuloa anrua empoang kala'birang, untu' ammarenta ri sampuloa anrua bansa Israel.” 31 Nakanamo Isa mae ri Simon, “O Simon, o Simon, pilangngeri sai! Nikellaimi Billisika anso'ri ngasengko. Sangkamma punna nipasisa'la' asea siagang awanna, kamma tomminjo lanipasisa'laki bajika siagang kodia. 32 Mingka le'ba' mako Kupappala' doangang Simon, sollanna jarre' tappa'nu. Na punna ammotere' mako pole mae ri Nakke, musti nupakajarreki tappa'na sikamma sari'battannu.” 33 Appialimi Petrus nakana, “O, Batara, sadiama' antama' ri tarungkua siagang assikamateang siagang iKatte!” 34 Mingka Nakanamo Isa, “Tappa' mako Petrus, angkanaya tenapa nattingkoko janganga, nanupintallummo ansassaliA'.” 35 Le'baki anjo Nakanamo Isa ri ke'nanga, “Pirangalloang, ri wattunnu Kusuro a'lampa, tena Kukellaiko angngerang pammoneang doe', kocikang yareka sapatu. Apaka kakurangangko anjo wattua?” Appialimi ke'nanga angkana, “Tena!” 36 Nakanamo pole Isa, “Mingka kamma-kamma anne, inai-nai nia' pammoneang doe'na, yareka kocikanna, musti naerangi; siagang inai-nai tena pa'danna, musti nabalukangi jubana, nammalli pa'dang. 37 Nasaba' patappaki anne nipaua lalang ri Kittaka angkanaya, ‘Lanibilangi tau ja'dala'.’ Iaminne musti lakajariang ri KalengKu. Nasaba' apa tattulisika lalang ri Kittaka passala' ri Nakke, iaminne kajariang ri kamma-kammaya anne.” 38 Nakanamo ana'-ana' gurunNa Isa, “O Batara, Kiciniki, anrinni nia' rua pa'dang.” Appialimi Isa Nakana, “Sikamma monjo.” 39 Le'baki anjo Nabokoimi Isa anjo kotaya, nampa sangkamma biasa, a'lampami siagang ana'-ana' gurunNa mange ri Bonto Zaitun. 40 Ri wattunna battu mange anjoreng, Nakanamo mae ri ana'-ana' gurunNa, “Appala' doang ngasengko, sollanna tena nugaukangi dosaya punna nukasiaki paccobaya.” 41 Nampa a'lampa Kale-kalenNa kira-kira nia' sipasambila batu bellana battu ri ke'nanga. 42 Battui mange anjoreng, akkulantu'mi nampa appala' doang Nakana, “O Bapa', punna akkulleja, Kipakabellai anne passessa musti Kukasiaka. Mingka teaKi' naerokKu anjari, passangalinna erotTamo bawang anjari.” 43 Sanna'mi sessana pa'mai'Na Isa. Ammatti'-matti'mi songo'Na naung ri buttaya, sangkamma cera'. Jari pila' attojeng-tojemmi appala' doang. Nampa nia'mo sitau malaeka' battu ampakajarreki. 45 Le'baki appala' doang, ammotere'mi Isa mae ri ana'-ana' gurunNa. Narapikammi ana'-ana' gurunNa attinro ngaseng napakamma sanna' ngaseng mangnganna. 46 Nakanamo ri ke'nanga, “Angngapa nuttinro ngaseng? Ambangung ngaseng mako nai' appala' doang, sollanna tena natabako paccoba.” 47 Lalang a'bicarana ija Isa, nia'mo sijaiang tau battu. Anjo tau jaia Yudas ampimpingi, iamintu kalase'renna ana'-ana' gurunNa Isa. Battumi Yudas ambaui Isa. 48 Mingka Nakanamo Isa ri ia, “O Yudas, iaminne nubauku nupake ambalukangi Ana' Ma'rupataua?” 49 Nacini'na ana'-ana' gurunNa Isa anjo kajarianga, nakanamo ke'nanga, “O Batara, antekamma! Nite'ba'mi pa'dang ke'nanga?” 50 Nampa nia'mo kalase'renna ke'nanga ante'baki pa'dang anjo atanna imang lompoa niaka battu, sa'genna kaccili' tolinna ri kananga. 51 Mingka Nakanamo Isa, “Sikamma monjo!” Nampa Najama tolinna anjo taua, siagang Naballei na'jari baji' ammotere'. 52 Le'baki anjo Nakanamo ri imang-imang kapalaya siagang perwira-perwira pangawala'na Balla'Na Batara, kammayatompa ri pamimping-pamimpinna tu Yahudi battua ero' anjakkalaki, “Apa nucini' tau ja'dalakKa', sa'gennu battu ngaseng angngerang pa'dang siagang palu-palu ero' anjakkalakKa'? 53 Allo-alloKu nia' siagang ikau ngaseng lalang ri Balla'Na Batara, natena nujakkalaKa'. Mingka iaminne wattunnu lappanggaukang ngaseng. Iaminne wattunna tau koasaya ri sassanga lappanggaukang.” 54 Nijakkala'mi Isa ri ke'nanga nampa nierang mange ri balla'na imang lompoa. Amminawang bokomi Petrus battu bella. 55 Ri tangnga-tangngana paranglakkenga niparinrami pepeka. Mange tommi anjoreng Petrus; ammempomi siagang tau jaia ri ampi'na anjo pepeka. 56 Nia'mo sitau baine palayang anciniki Petrus ammempo ri birinna anjo pepeka; nijanjammi Petrus ri anjo baine palayanga. Nampa nakana anjo baine palayanga, “Anne taua siagang tongi Isa sumpaeng!” 57 Mingka assassala'mi Petrus. Nakana, “Tena sikali nakuassengi anjo taua!” 58 Tena nasallo, nia'mo pole tau maraeng anciniki Petrus, siagang nakana, “Ikau pole, kalase'rennako ke'nanga!” Mingka appialimi Petrus nakana, “Tena, teai inakke!” 59 Kira-kira sijang ribokoanganna, nia'mo pole tau maraengang anjo'joki tojengi nakana, “Memang! Ana' gurunNa Isa anne taua, nasaba' tu battu tongi ri Galilea!” 60 Mingka appialimi Petrus nakana, “Apa nukana? Tena nakupahangi antu nupakkanaya!” Anjo wattua, sitabanna a'bicara ija Petrus, attingkokomi janganga. 61 Assailemi Isa mae ri Petrus. Nau'rangimi Petrus apa le'baka Napau Isa ri ia angkanaya, “Ri tenanapa nattingkoko janganga, pintallumMa' nusassali.” 62 Jari assulukammi Petrus, nangngarru'-arru' tassunge'nge'. 63 Nipare' karek-karenammi siagang niba'jimi Isa ri sikamma tau anjagaiyai. 64 Nitongkokangi matanNa, nampa nikuta'nang, angkana, “Coba sai tappu, inai amba'jiKo?” 65 Jai pole kana-kana maraeng napau ke'nanga anghina-hinai Isa. 66 Ri bari'basa'na, a'rappungammi pamimping-pamimpinna tu Yahudia, imang-imang kapalaya, siagang guru-guru agamaya, nampa naerang Isa mange ri dallekanna Pangadelang Agamaya. 67 Nakanamo ke'nanga ri Ia, “Pau sai bedeng, maka iKaumi Karaeng Mappasalamaka?” Appialimi Isa Nakana, “Manna Kupauangko tena ngaseng tonja nulatappa'. 68 Siagang manna akkuta'nangA' ri kau ngaseng tena ngaseng tonja nulappiali. 69 Mingka appakkaramula ri kamma-kammaya anne lammempomi Ana' Ma'rupataua ri sa'ri kananNa Allata'ala Kaminang Koasaya.” 70 Nakana ngasemmo ke'nanga, “Jari punna kamma Ana'NaKo Allata'ala?” Appialimi Isa Nakana, “Kammaminjo kanannu ngaseng.” 71 Jari nakanamo ke'nanga, “Tenamo naparallu sa'bi! Nilangngere'mi KalenNa ampaui!”
1 Ammenteng ngasemmi taua ri sidanga, nampa naerang Isa mange ri dallekanna Pilatus. 2 Anjoreng ri dallekanna Pilatus, nitudumi Isa ri ke'nanga. Nakana ke'nanga, “Anne taua nirapikangi Napasala oloangi ra'yaka. Naajara' salai taua sollanna tena naero' taua a'bayara' sima ri Karaenga, lanri Nakanana KalenNa Iami Almasi, Karaenga.” 3 Jari akkuta'nammi Pilatus ri Isa Nakana, “Kammatojengi, angkanaya karaennaKo tu Yahudia?” Appialimi Isa Nakana, “Kammaminjo kanannu.” 4 Nakanamo Pilatus ri imang-imang kapalaya siagang anjo tau jaia, “Tena sikali kugappa manna se're kasalanna anne taua lampassiratangi nihukkung.” 5 Mingka pila' nakanamo ke'nanga, “Battu ri pangngajara'Na, naNaajara' sala taua ri sikontu Yudea; appakkaramulai ri Galilea Naajara' sala taua, na kamma-kamma anne anrapi'mi mae anrinni pangngajara' salaNa.” 6 Nalangngere'na Pilatus kananna ke'nanga, akkuta'nammi ri ke'nanga nakana, “Apaka anne taua tau battui ri Galilea?” 7 Le'ba'na nipauang ri ke'nanga angkanaya tau battui ri Galilea anjo Isa, iamintu daera kakoasanna Herodes, nikirimmi Isa ri Pilatus mae ri Herodes. Anjo wattua nia' tongi Herodes ri Yerusalem. 8 Nacini'na Isa nierang battu, sanna' sikalimi rannuna nyawana Herodes. Nasaba' sallomi nalangngere'na kabara'Na Isa, naero' dudui anciniki. Eroki nacini' Nagaukang Isa gau' appakalannasaka. 9 Jari jaimi pakkuta'nang napakkuta'nangang mae ri Isa. Mingka tena sikali Naero' Isa appiali. 10 Battu tommi andallekang imang-imang kapalaya siagang guru-guru agamaya, antudua tojengi Isa. 11 Nipare' karek-karenammi siagang nihina-hinami Isa ri Herodes siagang surudadua. Nampa nipipakei pakeang kalompoang, nanikiring ammotere' mae ri Pilatus. 12 Anjo alloa assibajikimi ammotere' Herodes siagang Pilatus. Pirangalloang assimusui ke'nanga. 13 Napa'rappungammi Pilatus imang-imang kapalaya, pamimping-pamimpinga, siagang ra'yaka. 14 Nampa nakana ri ke'nanga, “Nuerangi anne taua mae ri nakke, nanukana Napasala oloangi tau jaia. Na kamma-kamma anne kuparessami ri dallekannu ngaseng, mingka tena sikali manna se're kasalanna kugappa, sangkamma nutuduangi. 15 Kamma todong minjo panggappana Herodes; tena todong kasalanna nagappa. Iaminjo saba'na nakiringi anne Isa ammotere' mae ri nakke. Manna sirupa tena sikali apa sala nagaukang anne taua, ampassiratangi nihukkung mate. 16 Jari lakusuro cambo' mami anne taua nampa kulappassang.” 17 Punna narapi' allo Passua'-suarranna Paskaya, musti nia' sitau tu nitarungku nalappassang Pilatus, situru' pappala'na ra'yaka. 18 A'rappungang ngasemmi tau jaia anjoreng, siagang ammarrang-marrammi ke'nanga angkana, “Bunoi! Lappassammi Barabas untu' ikambe!” ( 19 Anjo Barabas, nanitarungku kapassabakkang pammunoang siagang passabakkang apparicui ri kotaya.) 20 Lanri eroki Pilatus allappassangi Isa, a'bicarami pole mae ri anjo tau jaia. 21 Mingka ammarrang-marrammi pole ke'nanga angkana, “Allei Salli'! Allei Salli'!” 22 Akkio'mi pole Pilatus makapintallunna mae ri ke'nanga angkana, “Mingka apa kasalanna? Tena sikali manna sirupa kasalanna kugappa ampassiratangi nihukkung mate! Lakucambo'mi bawang nampa kulappassang.” 23 Mingka pila' ammarrang lompo tojemmi ke'nanga, angkana musti nisalliki Isa. Na kala'busanna niturukiammi ero'na ke'nanga. 24 Jari natappukimi Pilatus angkanaya nihukkung matei Isa, situru' ero'na ngaseng anjo tau jaia. 25 Nanilappassammo anjo tau napalaka ke'nanga, iamintu tau nitarungkua passabakkang apparicua ri kotaya siagang passabakkang pammunoang. Nampa nipassareang Isa mae ri ke'nanga sollanna appanggaukang ke'nanga mae ri Ia situru' ero'na ke'nanga. 26 Nierammi Isa ri ke'nanga. Ri tangngana aganga, sibuntulu'mi ke'nanga siagang sitau bura'ne, niarenga Simon. Anne Simon tau battu ri Kirene, sitabangi ero' antama' ri kotaya. Nijakkala'mi Simon ri ke'nanga, nampa nipassa ampisangi anjo kayu sallika ri bokoNa Isa. 27 Jai tau amminawang a'jappa ri bokoNa Isa — nia' todong siapa are bai'-baine. Angngarru'mi anjo bai'-bainea angkarruki Isa. 28 Mingka assailemi Isa mae ri ke'nanga, nampa Nakana, “E, tu bai'-bainena Yerusalem! Teako Nakke nukarruki. Mingka kalennumo siagang ana'-ana'numo nukarruki. 29 Nasaba' lanarapiki sallang wattunna nalanakana taua, ‘Teai sipato' upa'na tau tenaya ana'na, iamintu tau tenaya nale'ba' ammana' siagang tenaya nale'ba' appasusu ana' lolo!’ 30 Iaminjo wattua nalanakana taua ri bulu'-buluka, ‘Tujuma'!’ Siagang lanakana mae ri bonto-bontoa, ‘Tambungima'!’ 31 Nasaba' punna kamma anne panggaukanna taua ri kayu attallasaka, la'biangampa pole lanagaukanga ke'nanga mae ri kayu kalotorokamo!” 32 Nia' pole rua tau maraeng — iamintu tau ja'dala' — naerang todong ke'nanga ero' nihukkung mate siagang Isa. 33 Ri wattunna battu ke'nanga mange ri tampa' niarenga “Tangkora',” nisalli'mi Isa siagang anjo ruaya tau ja'dala' — sitau ri kanang na sitau ri kairinna Isa. 34 Appala' doammi Isa Nakana, “O Bapa', pammopporangi anne ke'nanga; nasaba' tanaassengai angkanaya apa anne nagaukanga ke'nanga.” Nalotereimi ke'nanga pakeanNa Isa ero' nabage-bage. 35 Ammenteng ngasemmi tau jaia anjoreng ancini'-ciniki Isa. Na nicau-caumi Isa ri pamimping-pamimpinna tu Yahudia angkana, “Le'baki Napasalama' tau maraenga; coba sabeki Napasalama' KalenNa kamma-kamma anne, punna ma'nassa Karaeng Mappasalama' tojengi, nipilea ri Allata'ala!” 36 Sikamma surudadua amminawang turu' tommi ancau-caui Isa. Battumi ke'nanga assarei Isa anggoro' kacci; 37 nampa nakana ke'nanga, “Punna karaennaKo tu Yahudia, pasalama'mi KalenNu!” 38 Irateang ri anjo kayu salli'Na Isa, nia' tattulisi' angkanaya: “Iaminne Karaenna tu Yahudia.” 39 Nihinami Isa ri kalase'renna anjo tau ja'dala' naaganga nisalli', angkana, “Sai Karaeng MappasalamakKo? Pasalama'mi KalenNu siagang ikambe anne!” 40 Mingka nipauammi ri anjo tu ja'dala' se'reanga angkana, “Tena numalla' ri Allata'ala? Ikau nihukkung mate tongko sangkamma Ia. 41 Mingka ikatte siratang memang tongki' nihukkung situru' panggaukanta. Mingka Ia tena sikali salaNa!” 42 Nampa nakana mae ri Isa, “Isa, U'rangi tonga' sallang punna battuKo a'jari Karaeng!” 43 Nakanamo Isa ri ia, “Tappa' mako, angkanaya anne alloa lassiagang maki' antama' ri Firdaus.” 44 Kira-kira tette' sampulo anrua ri tangngana alloa, tena naccaya alloa, sa'genna a'jari sanna'mi sassanna sikontu pa'rasanganga, sa'genna tette' tallu ri karuenga. 45 Sinre'mi ta'bage rua gordeng niaka lalang ri Balla'Na Batara. 46 Nampa ammarrang lompomi Isa Nakana, “Bapa'! Ri lalang limanTai Kupassareang KalengKu!” Le'baki akkana kamma, tappu'mi nyawaNa. 47 Ri wattunna nacini' perwira pasukanga anjo apa kajarianga, ammujimi ri Allata'ala. Nakana, “Kontu tojengi, anne taua ma'nassa tena nasala!” 48 Sikamma tau jai battua accini'-cini', nacini' ngasemmi anjo apa kajarianga. Massing nasassala' ngasemmi kalenna ke'nanga ri wattunna ammotere'. 49 Na sikamma siassenna Isa, kammayami bai'-baine amminawanga ri Ia battu ri Galilea, battu bella mami anciniki sikamma anjo apa kajarianga. 50 Nia' tau niareng Yusuf, tu battu ri kota Arimatea ri pa'rasangang Yudea. Anne taua, tau baji' siagang nikangalikangi ri tau jaia. Sallo tommi natayang wattunna lammarenta Allata'ala, salaku Karaeng. Anggotana tongi Pangadelang Agamaya. Mingka tena nasitujui anjo apa le'baka natappuki siagang nagaukanga pangadelanga ri Isa. 52 Anne Yusuf, a'lampai mae ri Pilatus ampalaki maya'Na Isa. 53 Le'baki napala', mangemi ampanaungi maya'Na Isa battu ri kayu sallika. Nampa naroko' kaeng lenang anjo mayaka. Le'baki anjo, mangemi napantama' anjo mayaka ri jera' le'baka napare'. Anjo jeraka, pajerakkang batu, tenayapa nale'ba' nipake. 54 Anjo alloa, allo Juma'; jari a'birimmi appakkaramula allo Pammari-marianga tu Yahudia. 55 Ri wattunna a'lampa Yusuf angngerangi maya'Na Isa mange ri jeraka, amminawang tongi bai'-baine amminawanga ri Isa battu ri Galilea. Jari naciniki ke'nanga pammantanganna anjo jeraka. Nacini' tongi ke'nanga antekamma batena nipadongko' maya'na Isa lalang ri jeraka. 56 Le'baki nitarawang Isa, ammotere'mi ke'nanga appasadia bunga-bunga siagang minynya'-minynya' bau', ero' napake amminynya'-minynyaki maya'Na Isa. Ri wattunna allo Pammari-mariang, ammari-marimi ke'nanga massing ri jama-jamanna, sollanna naturuki ke'nanga apa napassuroanga agamaya.
1 Ri wattunna allo Minggu, ri bari'basa' dudua, a'lampami anjo bai'-bainea mange ri jeraka angngerangi anjo bunga-bunga le'baka napasadia ke'nanga. 2 Battui ke'nanga ri jeraka, nacini'mi ke'nanga le'ba' ta'gulung anjo batu pattongko'na jeraka. 3 Antama'mi na naparessa ke'nanga anjo jeraka, mingka tenami nacini' maya'Na Isa. 4 Lalang ammentenna ke'nanga anjoreng siagang lalang lannasa'na ke'nanga annawa-nawai anjo passalaka, ti'ring nia'mo rua tau ammakeang sannaka kebo'na, battu ammenteng ri ampi'na ke'nanga. 5 Sanna'mi malla'na ke'nanga, siagang su'ju'mi ke'nanga naung ri buttaya. Mingka nakanamo anjo tau ruaya, “Angngapa nu'boya tau attallasa' ri alla'na tau matea? 6 Tenami anrinni, nasaba' attallasa' poleammi! U'rangi apa le'baka Napau ri kau ngaseng, ri wattunna nia' ija ri Galilea, 7 angkanaya, ‘Musti nipassareangi Ana' Ma'rupataua mae ri tu dorakaya, nampa nisalli', mingka lattallasa' poleangi ri makatalluna alloa.’ ” 8 Nau'rangimi anjo bai'-bainea apa le'baka Napau Isa. 9 Ammotere'na ke'nanga battu ri anjo jeraka, nacaritami anjo apa kajarianga mae ri sampuloa asse're ana' gurunNa Isa siagang sikamma tau amminawanga ri Isa. 10 Iaminne areng-arenna anjo bai'-bainea ampabattuai anjo apa kajarianga mae ri ana' gurunNa Isa: Maria Magdalena, Yohana, na Maria amma'naya Yakobus, kammayatompa sikamma bai'-baine maraengang naaganga ke'nanga. 11 Mingka nakana anjo ana'-ana' gurunNa, apa takamma-kammaji anjo nacaritaya ke'nanga. Tena natappa' ke'nanga ri caritana anjo bai'-bainea. 12 Mingka ammentemmi Petrus nalari mange ri jeraka. A'dundumi attoa' antama' ri jeraka, nanacini' kaeng pa'roko'na mami Isa lalang. Lannasa' sikalimi Petrus. Ammotere'mi, najai sikalimo napakkuta'nangang lalang ri nyawana, ri passala'na anjo apa kajarianga. 13 Ia todong anjo alloa, nia' rua ana' gurunNa Isa sitabang a'jappa mange ri se'rea desa, niarenga desa Emaus. Anjo desaya kira-kira nia' sampulo asse're kilometere' bellana battu ri Yerusalem. 14 Lalang a'jappana ke'nanga, nabicara tommi sikamma anjo apa le'baka kajariang. 15 Na lalang nabicarana ke'nanga anjo passalaka, battumi KalenNa Isa anrurungangi ke'nanga a'jappa. 16 Nacini'ji ke'nanga Isa, mingka kamma nia' apa are anrompai ke'nanga, sa'genna tanarupaya ke'nanga Isa. 17 Nakanamo Isa ri ke'nanga, “Apa kutadeng nubicara sipa'rua ri tangngana anne aganga sumpadeng?” Ammantammi ke'nanga, na si'na tanja'na nicini'. 18 Angkanami kalase'renna ke'nanga, iamintu niarenga Kleopas, “Kale-kalentaji bawang tau beru battu ri Yerusalem? Takiassengai anjo apa beru kajarianga anjoreng?” 19 Akkuta'nammi Isa Nakana, “Kajariang apa?” Appialimi ke'nanga angkana, “Anjo apa kajarianga ri KalenNa Isa, battua ri Nazaret. Ia na'bi. Teai sipato' lompona koasaNa, baji' ri kana-kananNa, kammayatompa ri panggaukanNa — baji' ri dallekanNa Allata'ala, kammayatompa ri dallekanna sikamma rupataua. 20 Nipassareammi ri imang-imang kapalaya siagang pamimping-pamimpinta sollanna nihukkung mate, na nisalli' ri ke'nanga sa'genna mate! 21 Na sikontutojenna niminasai angkanaya Iami lallappassangi bansa Israelka. Na anne alloa makatallungallonami le'ba'na kajariang anjo passalaka. 22 Nampa nia'mo siapa are bai'-baine battu angngerang kabara', sannaka appata'bangkana. Bari'basa' duduiji namange ke'nanga ri jera'Na Isa. 23 Mingka tenami nacini' maya'Na. Jari ammotere'mi ke'nanga ampaui angkanaya, nia' rua malaeka' nacini' ke'nanga, siagang nipauangi ke'nanga ri anjo malaekaka angkanaya attallasa' poleammi Isa. 24 Na nia'mo siapa are ri kambe a'lampa mange ri jeraka, na ma'nassanamo angkanaya kammatojengi anjo napaua bai'-bainea; mingka tenami nacini' ke'nanga Isa.” 25 Nakanamo Isa ri ke'nanga, “Dongo' ngaseng memang tongko! Sallo sikali nampa akkulle nupatappa' sikamma apa le'baka napau na'bi-na'bia! 26 Sai musti Nakasiaki rolong Karaeng Mappasalamaka anjo passessaya, nampa anrapi' ri kala'biranNa?” 27 Le'baki anjo nipakasingariammi ri Isa ke'nanga, sikamma apa le'baka tattulisi' lalang ri Kittaka, ansero kanayai KalenNa. Napakasingara'mi appakkaramula battu ri kitta'-kitta'na Musa sa'genna kitta'na na'bi-na'bia. 28 Lalang a'jappana ke'nanga, a'reppese'mi ke'nanga mange ri desa natujua ke'nanga. Kammami angkanaya la'jappa tulusuki Isa, 29 mingka nitahammi ri ke'nanga. Nakana ke'nanga ri Ia, “Ammantang maKi' ri balla'na ikambe, nasaba' la'birimmi bangngi siagang appakkaramula tommi sassang.” Jari antama'mi Isa ri balla'na ke'nanga nammantang a'bangngi. 30 Ri wattunna ammempo sipangnganreang ke'nanga, angngallemi roti Isa. Appala' sukkuru'mi ri Allata'ala, naNapue-pue anjo rotia, nampa Napassareang mae ri ke'nanga. 31 Nampami naasseng ke'nanga angkanaya Isa padeng anjo. Mingka ti'ring lanynya'mi Isa ri paccini'na ke'nanga. 32 Nakanamo massing para ia ke'nanga, “Sai sanna' memanji lompona nyawata, ri wattunna a'bicara siagang ikatte, siagang ri wattunna Napakasingara' bonena Kittaka ri katte ri tangngana aganga?” 33 Ammentemmi linta' ke'nanga, nampa ammotere' mange ri Yerusalem. Narapikammi anjoreng sitabang a'rappungang ana'-ana' gurunNa Isa anjo sampuloa asse're, siagang maraengannaya. 34 Nakanamo ke'nanga, “Ma'nassa attallasa' poleammi Batara! Le'ba'mi Napappicinikang KalenNa ri Simon!” 35 Accarita tommi anjo ruaya ana' gurunNa Isa, iamintu beru battua. Nacaritami ke'nanga apa le'baka kajariang ri ke'nanga ri tangngana aganga, kammayatompa antekamma batena nakkulle narupa ke'nanga Batara, ri wattunna Napue-pue rotia. 36 Ri wattu a'bicarana ija ke'nanga, ti'ring nia'mi KalenNa Isa ammenteng ri tangnga-tangngana ke'nanga. Nakana Isa ri ke'nanga, “Salama' ngasengko!” 37 Ta'bangka ngasemmi siagang sanna' ngasemmi malla'na ke'nanga, lanri nakana ke'nanga Setang anjo nacinika. 38 Mingka Nakanamo Isa, “Angngapa numalla' ngaseng? Angngapa nabata-bata lalang nyawanu? 39 Cini'mi limangKu siagang bangkengKu. Tappa' mako angkanaya iNakkeji anne! Jamami siagang cinikimi, nasaba' setanga tena batangkalenna siagang buku-bukunna, sangkamma niaka nucini' ri Nakke.” 40 Akkana kammana Isa, Napappicinikammi limanNa siagang bangkenNa ri ke'nanga. 41 Na lalang tenanapa nakkulle tappa' ke'nanga, lanri rannu duduna siagang lannasa' duduna ke'nanga, akkuta'nammi Isa ri ke'nanga angkana, “Nia' kanre anrinni?” 42 Nisaremi ri ke'nanga sikere' juku' sanggara'. 43 Naallemi Isa anjo jujuka, nampa Nakanre ri dallekanna ke'nanga. 44 Le'baki anjo Nakanamo ri ke'nanga, “Iaminne sikamma passala' le'baka Kupau ri kau ngaseng, ri wattungKu nia'ija assiagang ikau ngaseng. Iamintu angkanaya: sikamma niaka tattulisi' lalang Kitta'-kitta' Musa, Na'bi-na'bia, siagang Pammujia, iamintu ansero kanayai KalengKu, musti kajariang ngasengi.” 45 Le'baki anjo Nasungkeammi Isa pikkiranna ke'nanga, sollanna akkulle napahang battuanna Kittaka. 46 Nampa Nakana Isa ri ke'nanga, “Nia' tattulisi' lalang ri Kittaka angkanaya musti attallasa' poleangi Karaeng Mappasalamaka battu ri kamateanga, ri makatalluna alloa. 47 Kammayatompa, lalang arenNa anjo Karaeng Mappasalamaka, musti nibirittakangi mae ri sikontu bansaya angkanaya musti tobaki sikontu rupataua, kammayatompa Napammopporangi Allata'ala dosa-dosaya. Na anjo birittaya, musti nipabattui appakkaramula battu ri Yerusalem. 48 Ikau ngasemmi a'jari sa'bi ri sikammaya anjo passalaka. 49 Na KalengKu lassuroi battu mae ri kau ngaseng apa le'baka Napa'janjiang Manggea. Mingka musti attayangko rolong anrinni ri kotaya, sa'genna battu koasaNa Allata'ala anrurungang ngasengko.” 50 Le'baki anjo, nirurungammi ke'nanga ri Isa assulu' ri pantaranganna kotaya, sa'genna mange ri Betania bellana. Battui mange anjoreng, Naangka'mi limanNa Isa, nampa Nabarakkaki ke'nanga. 51 Lalang Nabarakkakina ke'nanga, ta'angka'mi Isa nai' ri suruga, nampa tassa'la' battu ri ke'nanga. 52 Su'ju'mi ke'nanga anynyomba ri Ia. Le'baki anjo ammotere'mi ke'nanga mange ri Yerusalem, sanna' ngaseng rannuna nyawana, 53 na tuli mammuji-muji mae ri Allata'ala lalang ri Balla'Na Batara.
1 Ri pakaramulana, ri tenanapa nipa'jari linoa, nia' memammi Kanaya. Nia'mi anjo Kanaya siagang Allata'ala na anjo Kanaya iatonji Allata'ala. 2 Battu ri pakkaramula memanji nasiagang Allata'ala. 3 Tete ri Iami nanipa'jari sikontu apa niaka, na sikontu apa niaka, tenanniakka manna sirupa nipa'jari punna tamannetea ri Ia. 4 Iaminjo Kanaya nakabattui katallassanga, na iaminjo katallassanga assingari rupataua. 5 Accaya minjo Singaraka lalang ri sassanga, na takkullea sassanga ambunoi Singara'Na. 6 Battumi tunisuroa ri Allata'ala, iamintu niarenga Yohanes. 7 Battui angngerang kabara' ri passala'na anjo Singaraka, sollanna akkulle tappa' ngaseng rupataua. 8 Anjo singaraka teai kalenna, ia poro appabattunaji kabara'. 9 Singara' sitojennaya, assingariai sikontu rupataua, nia'mi battu ri lino. 10 Niaki Kanaya ri lino, tete ri Ia nipa'jari linoa, mingka taniassengai ri linoa. 11 Battui ri pa'rasangang KalenNa mingka tanitarimayai ri bansaNa. 12 Mingka nia' todong tau antarimai na tappa' ri Ia, nisarei pangngellai a'jari ana'Na Allata'ala, 13 teai lanri ri rupataua nanilassukang, nasaba' Allata'ala nakabattui anjo katallassang berua. 14 Ma'rupataumi anjo Kanaya, ammantangi ri tangnga-tangngata, na nicini'mo kala'biranNa. Natarimai anjo kala'biranga salaku Ana' sitau-tauNa Manggea. Tete ri KalenNami nanicini' Allata'ala, siagang pangngamaseanNa mae ri katte. 15 Battui Yohanes a'jari sa'biNa, nakabarrammi angkana: “Iaminne kupaua: Laniaki battu ri bokoangangku, mingka lompoangangi nainakke, nasaba' inakke tenapa', nania' memammo Ia.” 16 Lompoi ri pangngamaseang; tena le'bakai ammari, assare barakka' ri katte. 17 Nitarimai HukkunNa Batara, tete ri Musa. Mingka pangngamaseang siagang pangngatutuiNa Allata'ala nipa'nyatami lalang ri Isa Almasi. 18 Tenanniakka le'ba' anciniki Allata'ala, pantaranganna Ana' sitau-tauNa Manggea, sangkammaya siagang Manggea, na majarreka ri KalenNa. Iami ampa'nyatai Manggea ri Katte. 19 Nisuromi imang-imanga siagang tu Lewia ri tu Yahudi anna'galaka koasa ri Yerusalem, mange akkuta'nang ri Yohanes, angkana, “Inaiko antu?” 20 Mangakumi silambusu'na Yohanes angkana, “Teai inakke Karaeng Mappasalamaka.” 21 Akkuta'nammi pole ke'nanga angkana, “Jari punna kamma, inaiko antu padeng? Ikau kutadeng Elia?” Appialimi Yohanes nakana, “Teai.” Akkuta'nammi pole ke'nanga angkana, “Maka Na'biko kapang?” Appialimi pole Yohanes nakana, “Teai.” 22 Nakanamo ke'nanga, “Jari punna kamma, pau sai bedeng ri kambe inaiko antu padeng? Paumi sollanna akkulle nipauang tau assuroaki' anne. Apa lanukana ri passala'na kalennu?” 23 Appialimi Yohanes, nakana, “Inakke minne le'baka nasero kana Na'bi Yesaya ri wattunna angkana, ‘Tau akkio'-kioka ri parang lompoa angkana: Lappari oloang laNaoloa Batara.’ ” 24 Akkuta'nammi pole anjo tunisuroa ri tu Farisia, 25 angkana, “Punna teaiko Karaeng Mappasalamaka, teaiko Elia, teai tongko Na'bi, apa saba'na nuje'ne' tau?” 26 Appialimi Yohanes, nakana, “Inakke je'ne' kupake anje'neki taua. Mingka nia' ri tangnga-tangnganu tau tenaya nuassengi. 27 Ia battu ri bokoangangku, mingka manna alla'gasiangi passikko' sapatuNa tena todong nakusiratang.” 28 Yangasenna anne anjorengi ri Betania kajariang, iamintu biring rayana Binanga Yordan siagang ri tampa'na Yohanes anje'neki taua. 29 Ammukona, nia'mi Isa nacini' Yohanes battu mae ri ia. Nakanamo Yohanes, “Cini'mi, Iaminjo Ana' Gimbala'Na Allata'ala, antangkasiai dosana bonena linoa. 30 Iami le'baka kusero kana angkanaya laniaki battu ribokoangangku, mingka lompoangangi nainakke. Nasaba' tenapa nanilassukanga' inakke, nania' memammo Ia. 31 Uru-uruna tena nakuassengi inai anjo. Nasitojenna battua' anje'neki taua siagang je'ne', sollanna niasseng ri bansa Israelka.” 32 Napabattu tommi Yohanes anne kasa'bianga angkana, “Kuciniki RohNa Allata'ala manurung battu rate ri langika, sangkamma jangang-jangang bodobangkeng, battu ammantang irate ri Ia. 33 Anjo wattua tenapa nakuassengi angkana inai anjo. Mingka nipauamma' ri Allata'ala assuroa' anje'neki taua siagang je'ne' angkana, ‘Punna nucini' manurung RohNa Allata'ala, nampa ammantang irateang se'reang tau, Iaminjo taua lanje'neki taua siagang RohNa Allata'ala.’ ” 34 Nakana Yohanes, “Inakkemi kalengku le'ba' anciniki, siagang inakkemi a'jari sa'bi angkanaya Iaminjo Ana'Na Allata'ala.” 35 Ammukona, nia'mi pole Yohanes anjoreng ri tampaka siagang rua ana' gurunna. 36 Ri wattunna nacini' Isa ammalo, nakanamo, “Ciniki! Iaminjo Ana' Gimbala'Na Allata'ala.” 37 Nalangngere'na anjo ruaya ana' gurunna Yohanes kana-kana kammaya, a'lampami ke'nanga amminawang ri Isa. 38 Assailemi Isa mae ri boko, na Nacini'mo ke'nanga amminawang ri Ia. Akkuta'nammi ri ke'nanga angkana, “Apa nuboya?” Appialimi ke'nanga angkana, “Ra'bi kemaeki ammantang?” (‘Ra'bi’ battuanna guru.) 39 Nakanamo Isa, “Mae mako nakalennu anciniki.” A'lampami ke'nanga siagang Isa, na nacini' kemae ammantang. Anjo wattua tette' appa'mi ri karuenga. Ammantammi ke'nanga siagang Isa anjo alloa. 40 Kala se'renna anjo tau ruaya, allangngerekai apa napaua Yohanes nampa amminawang ri Isa, niarengi Andreas, assari'battanga siagang Simon Petrus. 41 Akkaro-karomi Andreas amboyai Simon, iamintu sari'battanna, na nakana ri ia, “Ikambe assibuntulu' maki' siagang Mesias!” (Mesias sangkammai battuanna siagang Almasi, iamintu: Karaeng Mappasalama'.) 42 Nirurungammi Simon ri Andreas mae ri Isa. Nijanjammi Simon ri Isa, nampa akkuta'nang Isa angkana, “Ikau Simon, ana'na Yona. Lanigallarakko Kefas.” (Kefas sangkammai battuanna siagang Petrus, iamintu: bulu' batu.) 43 Ammukona, a'lampami Isa mange ri pa'rasangang Galilea. Assibuntulu'mi siagang Filipus, na Nakana ri ia, “Maeko amminawang ri Nakke!” 44 Anne Filipus, tau battu ri Betsaida, iamintu kota pammantanganna Andreas siagang Petrus. 45 Assibuntulu'mi Filipus siagang Natanael, na nakana ri ia, “Ikambe nibuntulu'mi anjo tau le'baka nasero kana Na'bi Musa lalang Kitta' HukkunNa Allata'ala, siagang le'baka nakabarrang na'bi-na'bia. Anjo taua nikanai Isa tu battua ri Nazaret, ana'na Yusuf.” 46 Mingka appialimi Natanael nakana, “Maka akkulle tongi apa-apa bajika labattu ri Nazaret?” Appialimi Filipus nakana, “Mae mako nakalennu anciniki.” 47 Nacini'mi Isa nia' battu Natanael; na Napaumo passala' ri batangkalenna Natanael Nakana, “Ciniki, iaminjo tu Israel tojeng-tojenga. Tena apa-apa palassu lalang ri batangkalenna.” 48 Akkuta'nammi Natanael ri Isa, nakana, “Antekamma nakkullea' Kiasseng Bapa'?” Appialimi Isa Nakana, “Tenapa nanakiokko Filipus, naKucini'mako irawanganna poko' araya.” 49 Nakanamo Natanael, “Bapa' Guru, iKattemi Ana'Na Allata'ala! IKattemi Karaenna bansa Israel!” 50 Nakanamo Isa, “Iaji nutappa', lanri Kupauna angkanaya le'ba' mako Kucini' irawanganna anjo poko' araya? Apa-apa lompoanganga pole na anjo lanucini' sallang!” 51 Nakanamo pole Isa, “Tappa' mako, angkanaya sitojeng-tojenna lanuciniki tassungke langika, siagang lanai'-naungi malaeka'-malaekaka ri Ana' Ma'rupataua.”
1 Ruangallo ribokoanganna, nia' passua'-suarrang pa'buntingang ri kota Kana, ri pa'rasangang Galilea. Na nia' tongi amma'Na Isa anjoreng. 2 Niundang tongi Isa siagang ana'-ana' gurunNa mange anjoreng ri pa'buntinganga. 3 Ri wattunna la'busu'mo anggoro' lanipattoananga, nakanamo amma'Na Isa ri Isa, “Kala'busangi anggoro' ke'nanga.” 4 Appialimi Isa Nakana, “Teaki' suroiA' amma'. Tenapa narapiki wattunna laKupakabateang KalengKu.” 5 Mingka nakanamo amma'Na Isa ri pala'-palayanga, “Gaukang mami apa Napassuroanga ri kau ngaseng.” 6 Anjoreng ri tampaka, nia' annang gumbang lompo, nipasadia untu' lanapake taua a'bissa bangkeng situru' ada'na tu Yahudia. Anjo gumbang lompoa akkullei massing nibonei kira-kira sibilangngang litere' jaina. 7 Nakanamo Isa ri anjo pala'-palayanga, “Bonei ngasengi je'ne' anjo gumbanga.” Naboneimi ke'nanga anjo gumbanga, sa'genna rassi ngaseng. 8 Nampa Nakana Isa ri ke'nanga, “Kamma-kamma anne allemi sike'de' anjo je'neka, nampa nuerang mange ri pamimpinna anne passua'-suarrang pa'buntinganga.” Naerammi ke'nanga anjo je'neka mae ri pamimpinna anjo passua'-suarranga. 9 Naso'rimi pamimpinga anjo je'ne' le'baka tappinra a'jari anggoro'. (Tanaassengai angkana battu kemaei anjo anggoroka. Iaji anjo pala'-palayang appatirika je'ne' bawang angngassengi.) Nakio'mi pamimpinga bunting bura'nea, 10 na nakana ri ia, “Biasaya, anggoro' kaminang bajika rolong napattoanang taua, nampa punna sukku'mo nasa'ring toanaya, nampami nipassareang anggoro' biasaya. Mingka ikau nuboliki rolong anggoro' kaminang bajika sa'genna ri kamma-kammaya anne!” 11 Iaminjo uru-uru gau' appakalannasaka Nagaukang Isa. Anjoreng ri kota Kana, ri pa'rasangang Galilea nigaukang anjo gauka. Lanri iaminjo pammateia naNapappicinikammo kalompoanNa. Tappa' ngasemmi ana'-ana' gurunNa ri Ia. 12 Le'baki anjo, a'lampami Isa mange ri Kapernaum. Sipa'rurungang ngasengi a'lampa amma'Na, sikamma sari'battanNa, kammayatompa ana'-ana' gurunNa. Ammantammi ke'nanga anjoreng siapa are allonna. 13 Ri wattunna a'birimmo Allo Lompo Paskana tu Yahudia, a'lampami Isa mange ri kota Yerusalem. 14 Nia'mo Narapikang siapa are pabalu' sapi, gimbala' siagang jangang-jangang bodobangkeng anjoreng ri Balla'Na Batara ri Yerusalem; nia' todong siapa are pasambe doe' ca'di ammempo anjoreng. 15 Appare'mi cambo' otere' Isa, nampa Nabongka ngaseng anjo olo'-oloka, kammaya gimbalaka, sapia, na maraengannaya. Nabongka ngasengi assulu' anjo olo'-oloka battu ri Balla'Na Batara. Nampa Nabulintakkang ngaseng mejang-mejanna anjo pasambe doeka sa'genna tassia'-siara' ngaseng doe' ca'dina ke'nanga. 16 Nampa Nakana ri anjo pabalu' jangang-jangang bodobangkenga, “Angka' ngasengi a'lampa anne. Teako pareki tampa' pa'danggangang Balla'Na BapakKu!” 17 Nau'rangimi ana'-ana' gurunNa apa niaka tattulisi' lalang ri Kittaka angkanaya, “O Allata'ala, ia pangngaiKu ri BallatTa, sanrapangi pepe' akkanrea ri atingKu.” 18 Battumi tau anna'galaka koasa ri tu Yahudia andallekangi Isa. Nakanamo ke'nanga, “Coba sai gaukang gau' appakalannasaka, akkullea a'jari pammatei ri ma'nassaNu siratang anggaukang ngasengi anne sikammaya.” 19 Appialimi Isa Nakana, “Allemi runtung anne Ballaka, na nampa Kupabangung poleang lalanna tallungalloa.” 20 Nakanamo ke'nanga, “Patampuloi angngannang taung sallona nipake untu' ambangungi anne Ballaka. Nampa erokKo iKau ambangung poleangi lalanna tallungalloa?” 21 Mingka Balla' natabaya kananNa Isa, iamintu batangkalenNa. 22 Jari ri boko sallang, ri wattunna attallasa' poleang Isa battu ri kamateanga, nau'rangimi ana'-ana' gurunNa Isa, angkanaya anjo passalaka le'ba' memammi Napau. Jari tappa'mi ke'nanga ri apa niaka tattulisi' lalang ri Kittaka, siagang ri apa le'baka Napau Isa. 23 Lalang ri nia'na Isa ri Yerusalem, ri wattunna allo Passua'-suarranna Paskaya, jaimi tau tappa' ri Ia lanri sikamma gau' appakalannasa' le'baka Nagaukang. 24 Mingka tena nipatappaki ri Isa ke'nanga, lanri Naassenna ngaseng ma'rupataua. 25 Tena naparallu nipauang ri passala'na massing rupataua, lanri Naassenna ngaseng apa niaka lalang ri atinna rupataua.
1 Nia' sitau pamimping agama battu ri golonganna tu Farisia, niarenga Nikodemus. 2 Nia' se're wattu nabattu bangngi mange ri Isa. Nakana ri Isa, “Bapa' Guru, niassemmi angkanaya Allata'ala assuroKi' battu. Nasaba' tenanniakka manna sitau akkulle anggaukangi gau' appakalannasa' sangkamma le'baka Kigaukang, punna tena nanirurungangi ri Allata'ala.” 3 Appialimi Isa Nakana, “Patappaki angkanaya, tenanniakka tau akkulle a'jari umma'Na Allata'ala, punna tena nanilassukang poleangi.” 4 Nakanamo Nikodemus, “Antekamma batena lakkulle tau toaya lalassu' poleang? Maka lakkulle iji ammotere' antama' ri battanna amma'na nampa nilassukang poleang?” 5 Appialimi Isa Nakana, “Kontu tojeng sikali anne kanangKu: punna tena nilassukang poleangi battu ri je'neka siagang RohNa Allata'ala, takkulleai taua a'jari umma'Na Allata'ala. 6 Battu ri lahere'na rupataua, tau toana allassukangi, mingka battu ri rohna rupataua, RohNa Allata'ala allassukangi. 7 Teako lannasaki punna Kukana: musti nilassukang poleang ngasengko. 8 Mammiriki anginga mange ri nakaerokia; nilangngereki sa'ranna, mingka taniassengai nakabattuia siagang lanatujua. Kamma tomminjo tau nilassukang poleanga ri RohNa Allata'ala.” 9 Akkuta'nammi Nikodemus nakana, “Antekamma lakkulle kajariang anjo kammaya?” 10 Appialimi Isa Nakana, “Ikau guruko ri Israel; masa' tena nanuassengi? 11 Patappa'mi angkanaya: nipauang mako apa naassenga ikambe; siagang apa nacinikamo ikambe iatomminjo bawang nasa'bi ikambe; mingka tena ngaseng nuero' ampatappaki kasa'bianna ikambe. 12 Tena nutappa' punna Kucarita ri kau ngaseng passala' apa-apa lalanga ri anne linoa; jari antekammako latappa' punna Kucarita ri kau passala'na surugaya? 13 Tenanniakka tau le'ba' nai' ri suruga, pantaranganna Ia manurunga antama' ri linoa, iamintu Ana' Ma'rupataua. 14 Antekamma batena napanai' Na'bi Musa ulara' tambagaya ri sipolong kayu, wattunna nia' ri parang lompoa, sangkamma tomminjo batena lanipanai' Ana' Ma'rupataua; 15 sollanna sikamma tau tappaka ri Ia lanagappai katallassang sitojennaya siagang mannannunganga.” 16 Nasaba' lanri Nakamaseang duduna Allata'ala rupataua ri lino, sa'genna Napassareammo Ana' sitau-tauNa, sollanna inai-nai tappa' ri Ia tena nalapanra', passangalinna lanagappai katallassang sitojennaya siagang mannannunganga. 17 Nasaba' tena naNasuroi battu Ana'Na Allata'ala untu' anghukkungi anne linoa, passangalinna untu' ampasalamaki. 18 Inai-nai tappa' ri Ia, tena nalanihukkungi. Mingka inai-nai tena natappa', iami nihukkung ri Allata'ala, lanri tenana natappa' mae ri Ana' Sitau-tauNa Allata'ala. 19 Iaminne passala'na nanituntuki: Battumi anjo singaraka antama' ri anne linoa, mingka nangaiangangi rupataua sassanga kala singaraka, lanri ja'dala'na ngaseng panggaukanna ke'nanga. 20 Inai-nai a'gau' ja'dala', iami angkabirisi Singaraka; taerokai battu mae ri singaraka, sollanna tena nakacinikang panggaukang ja'dala'na. 21 Mingka inai-nai anggaukangi ero'Na Allata'ala, battumi mae ri singaraka sollanna a'nassa angkanaya anjo apa nagaukanga situruki ero'Na Allata'ala. 22 Le'baki anjo, a'lampami Isa siagang ana'-ana' gurunNa mange ri Yudea. Ammantammi siagang ke'nanga siapa are sallona, siagang anje'ne'mi tau. 23 Anjo wattua tenapa nitarungkui Yohanes. Anje'neki tau ri Ainon, pammantangang tenaya nabella battu ri Salim, nasaba' anjoreng jai je'ne'. Battumi taua mae ri ia, na naje'ne'mo ke'nanga. 25 Nia'mo siapa are ana' gurunna Yohanes a'gea'-gea' siagang tu Yahudia, passabakkang atoranna pannangkasia batangkale. 26 A'lampami ke'nanga mae ri Yohanes, na nakana ke'nanga, “Pa' Guru, maka kiu'rangi iji tau le'baka kiagang ri ba'leanna anjo Binanga Yordan, le'baka kipappicinikang ri kambe? Kamma-kamma anne anje'ne' tongi tau, na'lampa ngasemmo taua mange ri Ia!” 27 Appialimi Yohanes nakana, “Takkulleai nia' apa-apanna rupataua, punna tanisareanga ri Allata'ala. 28 Nulangngere'mi apa le'baka kupau angkanaya, ‘Teai inakke Karaeng Mappasalamaka. Inakke tau nisuroja' ri dallekanNa.’ 29 Ia bunting bainea, bunting bura'nea pata. Anjo passari'battanganna bunting bura'nea poro ammentennaji anrurungangi siagang ampilangngeri kananna; na sanna' nangaina ampilangngeri sa'ranna anjo bunting bura'nea. Inakke kamma tomma' anjo. Sannang sikalimi atingku kamma-kamma anne. 30 Iami musti a'jari pila' niparalluangang, na inakke a'jari pila' kurang niparalluamma'.” 31 Ia niaka battu rate ri suruga, iami la'biangang na sikamma apa-apa maraenganga. Apa battua ri lino, antamai ri golonganna tu linoa, siagang passala' apa-apa ri lino nabicara. Ia niaka battu rate la'biangangi na sikamma apa-apa maraenganga. 32 Ia nabicara apa-apa le'baka Nacini' siagang Nalangngere', mingka tenanniakka manna sitau ampatappaki kasa'bianNa. 33 Inai-nai ampatappaki kasa'bianNa, iami ammangakui angkanaya ma'nassa tojengi Allata'ala. 34 Nasaba' tunisuroa ri Allata'ala, Napabattui kana-kananNa Allata'ala, lanri nipassareang ngasemmi RohNa Allata'ala ri Ia. 35 Nakamaseangi Manggea Ana'Na, na Napassareang ngasemmo koasaya ri Ana'Na. 36 Inai-nai ampatappaki anjo Anaka, iami langgappai katallassang satunggu-tunggua. Mingka inai-nai tamannurukia ri anjo Anaka, talanagappayai katallassanga. Iami lanihukkung ri Allata'ala sa'genna satunggu-tungguna.
1 Nalangngere'mi tu Farisia angkanaya anje'ne' tongi tau Isa, siagang jaiangangi ana'-ana' guru nagappa kala Yohanes. ( 2 Sikontutojenna teai KalenNa Isa anje'neki taua passangalinna ana'-ana' gurunNaji bawang.) 3 Ri wattunna Naasseng Isa angkanaya nalangngere'mi tu Farisia anjo passalaka, a'lampami battu ri Yudea mange ri Galilea. 4 Lalang a'lampaNa mange anjoreng, musti numaloi ri Samaria. 5 Jari anrapi'mi Isa mange ri se'reang kota ri Samaria, iamintu niarenga kota Sikhar. Anjo kotaya tena nabella battu ri tampa' le'baka napassareang Yakub mae ri ana'na iamintu Yusuf. 6 Anjoreng nia' se're bungung, niarenga bungung Yakub. Sanna' mangnganna Isa napakamma pa'jappang. Jari assengkami ammempo ri birinna anjo bungunga. Anjo wattua kira-kira tette' sampulo anrua ri alloa. 7 Na'lampamo ana'-ana' gurunNa Isa ammalli kanre ri kotaya. Tena nasallo, nia'mo sitau baine Samaria battu anynye'ro' je'ne'. Nakanamo Isa ri ia, “Ibu', maka akkullejA' kisare je'ne' inung?” 9 Appialimi anjo baine battua ri Samaria angkana, “IKatte tu YahudiKi' tuang, na inakke tu Samaria; angngapa naKippala' je'ne' ri nakke?” (Nakkana kamma nasaba' tena passisambunganna tu Yahudia siagang tu battua ri Samaria.) 10 Appialimi Isa Nakana, “Ka'de' nanuasseng passareNa Allata'ala, siagang nanuasseng todong angkana inai appalaka je'ne' ri kau, mattantu ikau kalennu lappala' je'ne ri Ia, na Nasareko je'ne' katallassanga.” 11 Nakanamo anjo bainea, “Tena se'rotTa tuang, siagang anne bungunga teai sipato' lantanna. Battu kemaeKi' akkulle langgappa je'ne' katallassang? 12 Boe-boena ikambe iamintu Yakub ansareki' anne bungunga. Ia kalenna, battu anrinni tongi angngalle je'ne' lanainunga; kammayatompa ana'-ana'na siagang olo'-olo' naparakaia, anrinni ngasengi angngalle je'ne' inung. Maka Kikana lompoangangKi' na Yakub?” 13 Nakanamo Isa, “Inai-nai angnginungi anne je'neka laturere poleangi. 14 Mingka inai-nai angnginungi je'ne' Kupassareanga, tenamo nalaturere sa'genna satunggu-tungguna. Nasaba' anjo je'ne' laKupassareanga la'jarimi timbuseng je'ne' lalang ri kalenna, tassolonga assulu' na napassareang katallassang satunggu-tunggua.” 15 Nakanamo anjo bainea, “Tuang, Kisarema' anjo je'neka, sollanna tenamo nakuturere poleang; siagang tenamo kuparallu pole battu angngalle je'ne' anrinni.” 16 Nakanamo Isa, “A'lampamako, kioki bura'nennu, nampa ammoterekko mae anrinni.” 17 Appialimi anjo bainea nakana, “Tena bura'nengku.” Nakanamo Isa, “Memang annabai kanannu. 18 Nasaba' pillima mako le'ba' a'bunting, na bura'ne nuaganga kamma-kamma anne teai bura'nennu.” 19 Nakanamo anjo bainea, “Kamma-kamma anne kuasseng maKi' angkanaya Na'biKi' padeng. 20 Anrinni ri bontoa boe-boena ikambe anynyomba ri Allata'ala, mingka nakana bansaTa anjorenji bawang ri Yerusalem tampa'na taua anynyomba ri Allata'ala.” 21 Nakanamo Isa ri ia, “Tappa' mako angkanaya nia' se're wattu sallang natenamo nalanrinni ri bontoa, siagang tena tommo nalanjoreng ri Yerusalem, taua anynyomba ri Manggea. 22 Ikau ngaseng tu Samariaya, apa-apa tenaya nuassengi nualle nusomba. Mingka ikatte tu Yahudia, anynyombaki' mae ri Allata'ala niassenga, nasaba' battu lalangi ri tu Yahudia lammumba kasalamakkanga. 23 Mingka lanarapiki wattunna, ba'lalo narapi'mi wattunna, angkanaya lanri koasaNa RohNa Allata'ala nalanynyomba taua ri Manggea salaku Allata'ala matojenga situru' Nakaerokanga Manggea. 24 Nasaba' Roh anjo Allata'ala, jari lanri koasa RohNa Allata'ala bawang nakkulle anynyomba rupataua mae ri Manggea salaku Allata'ala matojenga.” 25 Nakanamo anjo bainea ri Isa, “Kuassengi angkanaya labattui Karaeng Mappasalamaka (nigallaraka Almasi). Punna niaki battu, Iami lampauang ngasengki' sikontu apa-apa tenaya nipahangi.” 26 Nakanamo Isa, “INakke minne. INakke minne battua, a'bicaraya siagang ikau.” 27 Anjo wattua ammotere'mi ana'-ana' gurunNa Isa. Lannasa'mi ke'nanga nacini'na Isa a'bicara siagang anjo bainea. Mingka tenanniakka manna sitau ri ke'nanga akkuta'nang ri anjo bainea angkana, “Apa paralluta ibu'?” yareka akkuta'nang ri Isa angkana, “Angngapa naKi'bicara siagang anjo bainea Bapa'?” 28 Nabokoimi pammoneang je'ne'na anjo bainea anjoreng nampa lari mange ri kotaya. Nakanamo ri tau niaka anjoreng ri kotaya, 29 “Umba mange anciniki tau akkullea ampauanga' sikontu apa le'baka kugaukang. Maka Iami kutadeng anjo taua Karaeng Mappasalamaka?” 30 Nabokoimi taua anjo kotaya nampa a'lampa mae ri Isa. 31 Anjo wattua nikio'mi Isa ri ana'-ana' gurunNa mange angnganre. Nakana ke'nanga, “O Bapa' Guru, mae maKi' angnganre.” 32 Mingka appialimi Isa Nakana, “Nia' kanre ri Nakke, tenaya ngaseng nanuassengi.” 33 Massing sikuta'nammi ana'-ana' gurunNa Isa angkana, “Apa nia' tau le'ba' ampangngerangangi kanre?” 34 Nakanamo Isa, “Ia kanreKu iNakke, iamintu anturuki ero'Na Ia assuroA' battu, siagang ampa'le'baki jamang-jamang Napassareanga ri Nakke. 35 Nukana ngaseng, ‘Patambulang mami nawattu pakkattoanga.’ Mingka Kukana ri kau: Cinikimi tana-tana didiamo asenna, sadiami lanikatto! 36 Appakkaramulami natarima gajina tau akkattoa siagang appasse're wassele' untu' katallassang satunggu-tunggua. Jari tau appakioroka siagang tau akkattoa akkullei sipa'rannu-rannuang. 37 Annabami anne bicara angkanaya, ‘Se'reanga a'lamung, namaraenganga akkatto.’ 38 Kusuroko mange akkatto ri tana tenaya nukaresoi. Tau maraeng anjama anjoreng, na ikau ngaseng antarimai wassele' jama-jamanna ke'nanga.” 39 Jai tu Samaria niaka anjoreng ri kotaya a'jari tappa' ri Isa. Nasaba' nakana anjo bainea, “Napauang ngasenga' sikontu apa-apa le'baka kugaukang.” 40 Jari wattunna assibuntulu' anjo tu Samariaya siagang Isa, napala' dudumi ke'nanga sollanna ammantang Isa siagang ke'nanga. Jari ammantammi Isa ruangallo. 41 Ribokoanganna, pila' jaimi tau tappa' ri Isa, lanri apa-apa Napangngajarranga kalenna ri ke'nanga. 42 Nakanamo ke'nanga ri anjo bainea, “Tappa' ngaseng maki' anne, mingka teai lanri apa nupaua bawang ri kambe; mingka lanri kalennami ikambe allangngereki, naniassemmo angkanaya Ia memang tommi Karaeng Mappasalama'na anne linoa.” 43 Ri wattunna ruangallomo ammantang Isa ri Sikhar, a'lampami mange ri Galilea. 44 Le'ba'mi Napau Isa angkanaya, “Tena nalanipakalompo se'rea na'bi ri pa'rasangang kalenna.” 45 Mingka ri wattunna battu mange ri Galilea, sanna'mi rannuna ngaseng atinna taua anjoreng. Nasaba' nia' tongi ke'nanga ri Yerusalem ri wattunna Allo Lompona Paskaya. Nanacini' ngasemmo ke'nanga sikamma apa le'baka Nagaukang Isa ri Yerusalem. 46 Le'baki anjo, ammotere'mi Isa mange ri Kana, ri Galilea. Anrinni minne le'ba' Isa ampinrai je'neka a'jari anggoro'. Anjoreng ri kotaya, nia' sitau pagawena karaenga, sitabang garring ana'na ri Kapernaum. 47 Nalangngere'na angkana niaki Isa battu ri Yudea mange ri Galilea, a'lampami mae ri Isa. Napala'mi sollanna mange Isa ri Kapernaum na Naballei ana'na la'biring duduamo mate napakamma garring. 48 Nakanamo Isa ri anjo pagawena karaenga, “Ka'de' tanucinika anjo gau'-gau' appakalannasa' le'baka Kugaukang, tena ngaseng nulatappa'.” 49 Appialimi anjo pagawena karaenga, “O, Tuang, akkaro-karoKi' battu, ri tenanapa namate anakku.” 50 Nakanamo Isa ri ia, “A'lampamako, a'jari baji' mintu ana'nu.” Tappa'mi anjo taua ri kananNa Isa, nampa a'lampa. 51 Ri tangngana aganga battumi palayang-palayanna anruppai nangngerang kabara' angkana, “A'jari baji'mi anatta tuang.” 52 Akkuta'nammi ri ke'nanga angkana, tette' siapa nappakkaramula ammari rammusu'na. Appialimi ke'nanga angkana, “Subangngi, kira-kira tette' se're ri tangngana alloa nammari rammusu'na.” 53 Nau'rangimi manggena anjo anaka angkanaya iaminjo wattua na Nakana Isa ri ia, “A'jari baji' mintu ana'nu.” Jari a'jari tappa'mi anjo taua siagang sikontu bone balla'na, mae ri Isa. 54 Iaminjo gau' appakalannasa' makaruaya Nagaukanga Isa ri wattunna nia' battu ri Yudea mange ri Galilea.
1 Le'baki anjo, nia'mo passua'-suarranna tu Yahudia ri Yerusalem. Jari a'lampami Isa mange ri Yerusalem. 2 Anjoreng ri Yerusalem, ri ampi'na tampa' niarenga “Pakke'bu' Gimbala',” nia' se're balang, niarenga Betsaida lalang bicara Ibranina. Anjoreng nia' lima paladang. 3 Jai tau garring attinro ri anjo paladanga; nia' tau buta, nia' tau tempang, siagang nia' todong tau peso'. Attayang ngasengi ke'nanga sa'genna ta'goccang je'neka lalang ri anjo balanga. 4 Nasaba' nia' wattunna nanaung malaeka'Na Batara ri anjo balanga anggoccangi je'ne'na. Na punna ta'goccang je'neka, inai-nai tau garring kaminang riolo naung ri anjo balanga, iami lammari garrinna, manna pole garring apa. 5 Anjoreng ri tampaka, nia' sitau bura'ne tallumpulomi assagantuju taung sallona garring. 6 Nacini'mi Isa anjo taua attinro anjoreng, na Naasseng angkanaya sallo sikalimi garring anjo taua. Akkuta'nammi Isa ri anjo taua Nakana, “Erokko a'jari baji'?” 7 Appialimi anjo taua nakana, “Bapa', tena tau anrinni ero' angngeranga' naung ri kollanga punna ta'goccang je'ne'na. Siagang punna erokka' antama', nia'mo tau rioloangang antama' ri anne balanga.” 8 Nakanamo Isa ri ia, “Ambangungko nai', angkaki tappere'nu siagang a'jappa mako.” 9 Anjo wattua, a'jari baji'mi silalonna anjo taua. Naangka'mi tappere'na nampa a'jappa. Allo Pammari-mariang nakajariang anjo passalaka. 10 Lanri kammana, nakanamo tau anna'galaka koasa ri tu Yahudia mae ri anjo tau beru bajika ri garrinna, nakana, “Anne alloa allo Pammari-mariangi. Tena nakkulle nuangka' tappere'nu.” 11 Mingka appialimi anjo taua nakana, “Anjo tau amballeia' sumpadeng assuroa' angngangkaki tapperekku siagang assuroa' a'jappa.” 12 Akkuta'nammi ke'nanga angkana, “Inai anjo tau assuroako angngangkaki tappere'nu siagang assuroko a'jappa?” 13 Mingka tanaassengai anjo tau le'baka niballei angkana inai anjo tau le'baka amballei. Nasaba' a'lampami Isa battu ri alla'na anjo tau jaia. 14 Ribokoanganna, sibuntulu'mi Isa siagang anjo taua lalang ri Balla'Na Batara. Nakanamo Isa ri ia, “Kamma-kamma anne baji' mako. Tea' mako a'gau' dosai pole, sollanna tena nanukasiaki pole la'bi kodianganga.” 15 A'lampami anjo taua mange ampauangi sikamma tau anna'galaka koasa ri tu Yahudia, angkana Isa le'ba' amballei na'jari baji'. 16 Jari ero'mi ke'nanga ansessai Isa, lanri Naballeina taua ri wattunna allo Pammari-marianga. 17 Mingka Nakanamo Isa ri ke'nanga, “Sa'genna kamma-kamma anne tuli anjamana BapakKu, jari iaminjo naKuanjama todong.” 18 Pila' ero'mi ke'nanga ambunoi Isa, lanri akkana kammana Isa. Eroki ke'nanga ambunoi Isa, tena napassabakkang Naballeina bawang taua ri allo Pammari-marianna ke'nanga, mingka lanri Nakanana pole Isa angkanaya Bapa'Na anjo Allata'ala; jari battuanna, Napasangkammai KalenNa Allata'ala. 19 Appialimi Isa mae ri yangasenna anjo taua angkana, “Patappa'mi angkanaya, takkulleai Anaka anggaukangi apa-apaya punna lanri koasaNa bawang. Iaji bawang Nagaukang apa le'baka Nacini' Nagaukang ManggeNa. Nasaba' apa-apa Nagaukang ManggeNa, ia tomminjo Nagaukang Anaka. 20 Nasaba' lanri NakamaseanNa Manggea Ana'Na, jari iaminjo naNapicinikiang ngaseng sikontu apa Nagaukanga. Ba'lalo Napicinikiangi pole panggaukang-panggaukang la'bi lompoanganga, sa'gennu lannasa' ngaseng. 21 Anjo Manggea ampabangungi tau matea naNasare ke'nanga katallassang sitojennaya siagang mannannunganga; kammayatompa anjo Anaka assarei katallassang mannannungang tau eroka Nasare katallassang. 22 KalenNa Manggea tena Naadeli se'rea tau. Sikontu koasaya untu' angngadeli taua le'ba'mi Napassareang mae ri Ana'Na. 23 NaNapakamma anjo Manggea sollanna nipakala'biri' anjo Anaka battu ri sikontu rupataua, sangkamma napakala'biri'na Manggea ke'nanga. Inai-nai tena napakala'biriki Anaka, tena tommo napakala'biriki Manggea, assuroai battu Anaka. 24 Ma'nassa kontutojengi anne kana-kanangKu: Inai-nai amparhatikangi kana-kanangKu, siagang tappaki mae ri Ia assuroA' battu, ma'nassa nagappami katallassang mannannunganga. Tenamo nalanihukkung; ta'lappasa'mi battu ri kamateanga nanagappa katallassanga. 25 Patappaki angkanaya: Lanarapiki wattunna — ba'lalo narapi'mi wattunna — nalangngere' tau matea sa'ranNa Ana'Na Allata'ala. Na inai-nai allangngereki sa'ranNa, iami lattallasa'. 26 Sangkamma KalenNa Manggea nakabattui katallassanga, kamma tomminjo Ana'Na Napa'jarimi kabattuanna katallassanga. 27 Nasaremi koasa Ana'Na untu' angngadeli rupataua, nasaba' Iami Ana' Ma'rupataua. 28 Teako lannasaki punna nulangngere' anne passalaka; nasaba' lanarapiki wattunna angkanaya lanalangngereki sikontu tau matea sa'ranNa, 29 nampa assulu' ke'nanga battu lalang ri jeraka. Na inai-nai le'ba' a'gau' baji', lambangung poleangi untu' attallasa'. Mingka inai-nai le'ba' a'gau' ja'dala' lambangung poleangi untu' nihukkung.” 30 “Tena apa-apa akkulle Kugaukang punna battu ri ero' KalengKu bawang. Punna angngadeliA', lanri parentaNa bawang Allata'ala Kuturuki. Na adeleki punna iNakke angngadeli, lanri teai erokKu Kuturuki, passangalinna ero'Na Manggea assuroA' battu. 31 Ebara' iNakke assa'bii KalengKu, takkulleai nipatappa' anjo kasa'biangKu. 32 Mingka nia' tau maraeng a'jari sa'bi mae ri KalengKu, naKuasseng angkanaya kontutojengi anjo kasa'bianna. 33 Nia'mo tau nusuro mange akkuta'nang ri Yohanes, na napauang mako kasa'biang kontutojenga ri passala'na KalengKu. 34 NaKupau anne, teai lanri paralluKu ri kasa'bianna rupataua, passangalinna sollannu akkulle ngaseng nipasalama'. 35 Anjo Yohanes, sanrapangi lampu a'rinraya siagang tassioroka cayana. Untu' sinampekang, nungai antarimai anjo cayana. 36 Mingka lompoangangi kasa'biangKu na kasa'bianna Yohanes. Apa Kugaukanga ri kamma-kammaya anne, iamintu jama-jamang Napassuroanga Manggea mae ri Nakke, iaminjo a'jari butti, ma'nassana Manggea assuroA' battu. 37 Siagang Nasuro tongA' Manggea a'jari sa'bi ri KalengKu. Tena le'bakapi nulangngere' sa'ranNa, yareka nucini' rupanNa. 38 Tena nupariati kana-kananNa, lanri tena nutappa' ri Nakke Tu Nasuroa. 39 Nupilajari Kittaka lanri nupikkiriki angkanaya kammaminjo carana nanugappa katallassang mannannunganga. Na iaminjo Kittaka a'jari sa'bi ri KalengKu. 40 Mingka tena ngaseng nuero' battu mae ri Nakke sollanna nugappa katallassang mannannunganga. 41 Tena naKu'boya pappalece battu ri rupataua. 42 Kuasseng ngasengko antu. Kuassengi angkanaya tena ngaseng nukamaseangi Allata'ala lalang ri atinnu. 43 Lalang koasaNa Allata'ala naKubattu, mingka taerokako antarimA'. Mingka punna nia' tau battu lalang areng kalenna, ero'jako antarimai. 44 Antekammako lakkulle tappa' punna erokko nipalece ri parannu tau, mingka taerokako a'boya pammuji battu ri Allata'ala Tenaya Ruanna? 45 Teako angkanai laKupassalako ri dallekanNa Manggea. Ia lampassalayako sallang, iamintu Musa, iamintu tau nurannuanga. 46 Ebara' angkana tappakko ri Musa, mattantu latappa' tommako ri Nakke, nasaba' iNakkemi nasero kana lalang ri apa le'baka natulisi'. 47 Mingka punna tena nutappa' ri apa le'baka natulisi' Musa, antekammako latappa' ri apa-apa Kupaua?”
1 Siapa are allo ribokoanganna a'lampami Isa anta'le ri ba'leanna Tamparang Galilea, niarenga todong Tamparang Tiberias. 2 Battuna mange anjoreng jaimi tau ampinawangi, lanri nacini'na ngasemmo ke'nanga sikamma gau'-gau' appakalannasa' le'baka Nagaukang, iamintu Naballeina sikamma tau garringa sa'genna a'jari baji'. 3 Nai'mi Isa ri se'reang Bonto, nampa ammempo anjoreng siagang ana'-ana' gurunNa. 4 Anjo wattua, a'birimmi narapi' Allo Lompo Paskana tu Yahudia. 5 Accini'na Isa mange ri tammuliliNa, Nacini'mi taua sanna' jaina battu a'duluru'. Jari Nakanamo ri Filipus, “Kemaeki' akkulle ammalli kanre, sollanna akkulle angnganre ngaseng anne taua?” ( 6 Naasseng memammi Isa apa laNagaukanga, mingka akkana kammaminjo lanri eroki Naso'ri Filipus.) 7 Appialimi Filipus nakana, “Manna ruambilangngang doe' pera' nipaballi ri roti, tena todong nalaganna' manna tassike'de'-ke'de'naja anne tau sikammaya jaina.” 8 Nakanamo ana' gurunNa Isa maraenga, iamintu Andreas, sari'battanna Simon Petrus, 9 “Anrinni nia' ana'-ana' bura'ne angngerang limambatu roti siagang ruang kayu juku'. Mingka apa matu-matunna anne mae ri tau sikammaya jaina?” 10 Nakanamo Isa, “Suro ngasengi anjo taua ammempo.” Anjoreng ri tampaka jai ruku'. Jari ammempo ngasemmi anjo taua naung ri rukuka — yangasenna kira-kira nia' limassa'bu jaina poro tau bura'neja bawang nitassere' —. 11 Le'baki anjo, Naallemi Isa anjo rotia nampa appala' sukkuru' ri Allata'ala. Nampa Nabage-bage anjo rotia mae ri anjo tau jaia. Napakamma tomminjo jukuka; le'baki appala' sukkuru' Nabage-bage tommi anjo jukuka. Nangnganre ngasemmo ke'nanga sa'genna bassoro'. 12 Le'ba'na ngasemmo ke'nanga angnganre sa'genna bassoro', Nakanamo Isa ri ana'-ana' gurunNa, “Passe're ngasengi anjo kanre alla'bia, natea niakki tappela'-pela'.” 13 Napasse're ngasemmi ke'nanga, na nia' sampulo anrua baku' rassi ngaseng tassesa battu ri anjo roti limambatua, nakanrea anjo tau jaia. 14 Nacini'na tau jaia anjo gau' appakalannasa' Nagaukanga Isa, nakanamo ke'nanga, “Ma'nassa Iaminne Na'bi niminasaia labattu ri linoa!” 15 Naassengi Isa angkanaya battui ke'nanga ero' ampassai a'jari karaeng Isa mae ri ke'nanga. Lanri kammana, a'lampami Isa alliliangi KalenNa ri daera a'bonto-bontoa. 16 Ri wattunna a'birimmo bangngi, naummi ana'-ana' gurunNa Isa ri tamparanga. 17 Nampa nai' ke'nanga ri se'reang biseang, ero' a'limbang ri anjo tamparanga namange ri Kapernaum. Appakkaramulami sassang, mingka tena ijipi Isa battu mae ri ke'nanga. 18 Na anjo wattua appakkaramulami lompo bombanga napakamma anging sarro. 19 Ri wattunna narapi'mo kira-kira lima yareka annang kilometere' bellana ke'nanga nia'mi nacini' Isa battu mae ri biseanna ke'nanga, a'jappa ri tompo'na je'neka. Namalla' sikalimo ke'nanga. 20 Mingka Nakanamo Isa ri ke'nanga, “Teako mallakki, kaiNakke jinne!” 21 Sannammi atinna ke'nanga antarimai Isa antama' ri biseanga. Na anjo wattua anrapi' tommi ke'nanga mange ri tampa' natujua ke'nanga. 22 Ammukona, nau'rangimi tau jai niaka ija ri ba'leanna tamparanga angkanaya se'reji bawang biseang nia' anjoreng. Naassengi ke'nanga angkanaya a'lampai ana'-ana' gurunNa Isa a'dongko' biseang, mingka ta'lampayai Isa. 23 Nampa nia'mo siapa are biseang battu ri kota Tiberias mange anjoreng ri ampi'na tampa' le'baka napangnganrei roti tau jaia ri wattunna nisare ri Isa. 24 Ri wattunna nacini' tau jaia angkanaya tenami Isa siagang ana'-ana' gurunNa anjoreng, nai' tommi ke'nanga ri biseanga nampa a'lampa ke'nanga mange ri Kapernaum amboyai Isa. 25 Ri wattunna assibuntulu' anjo tau jaia siagang Isa ri ba'leanna tamparanga, akkuta'nammi ke'nanga ri Isa angkana, “Ringngapanna Kibattu anrinni Pa' Guru?” 26 Appialimi Isa Nakana, “Sikontutojenna, iaji nanuboya ngasengA', teai lanri nupahannamo battuanna anjo gau'-gau' appakalannasa' le'baka Kugaukang, passangalinna lanri bassoro'nu ngasemmo angnganre. 27 Teako naporo untu' kanre lala'busuka siagang labottokaji bawang nanuanjama-jama. Anjamako untu' kanre tenaya nakkulle botto' siagang akkullea assare katallassang mannannungang. Iaminjo kanre kammaya laNasareangko Ana' Ma'rupataua, nasaba' Iami le'ba' Nalanti' Allata'ala Manggea.” 28 Akkuta'nammi ke'nanga ri Ia angkana, “Apa musti nagaukang ikambe, untu' anggaukangi ero'Na Allata'ala?” 29 Appialimi Isa Nakana, “Iaminne Nakaeroki Allata'ala: tappakko mae ri Ia Nasuroa Allata'ala.” 30 Nakanamo ke'nanga, “Punna kamma, apa butti akkulle Kipappicinikang sollanna akkulle tappa' ikambe mae ri Katte Bapa'? Apa laKigaukang? 31 Boe-boena ikambe angnganrei kanre Napaturunga Allata'ala ri parang luaraka. Sangkamma tattulisika lalang ri Kittaka angkanaya, ‘Nasarei kanre ke'nanga, iamintu roti battua ri suruga.’ ” 32 Nakanamo Isa ri ke'nanga, “Sitojeng-tojenna, tappa' mako angkanaya, teai Musa, passangalinna ManggeKumi assareko pangngebarang roti sitojennaya, iamintu battu ratea ri suruga. 33 Nasaba' roti Napassareanga Allata'ala, Iamintu niaka manurung battu ri suruga, siagang assarea katallassang mae ri rupataua.” 34 Nakanamo ke'nanga, “Bapa', tuli Kisaremi ikambe anjo rotia.” 35 Nakanamo Isa ri ke'nanga, “INakkemi roti assarea katallassang. Inai-nai battu mae ri Nakke, tenamo nalacipuru' sa'genna satunggu-tungguna. Siagang inai-nai tappa' ri Nakke, tenamo nalaturere pole sa'genna satunggu-tungguna.” 36 “Mingka kamma le'bakamo Kupau ri kau ngaseng, manna pole nucini'Ma', mingka tena nanutappa'. 37 Sikamma tau Napassareanga Manggea mae ri Nakke, labattui mae ri Nakke. Manna inai tena nalaKusorongboko punna battui mae ri Nakke. 38 Nasaba' naKunaung battu ri suruga, teai ero' KalengKu laKugaukang, passangalinna ero'Na Ia assuroA' battu, iamintu ManggeKu. 39 Na iaminne ero'Na anjo assuroA' battu: sikamma tau nipassareanga ri Nakke, manna se're talania' tappela'; passangalinna laKupabangung poleangi ke'nanga battu ri kamateanga, ri Allo Kiamaka sallang. 40 Memang, iaminne Nakaerokanga ManggeKu: Sikamma tau ancinikai Anaka na tappa' ri Ia, nagappami katallassang satunggu-tunggua, siagang laKupattallasa' poleangi sallang ri Allo Kiamaka.” 41 Appakkaramulami a'moro-moro tu Yahudia mae ri Isa, lanri angkanaNa Isa, “INakkemi roti manurunga battu ri suruga.” 42 Nakanamo ke'nanga, “Sai iaminne Isa, ana'naya Yusuf? Naassengi ikambe amma'Na siagang manggeNa! Antekamma lakkulle Nakana KalenNa tu manurungi battu ri suruga?” 43 Nakanamo Isa ri ke'nanga, “Teako a'moro-moroi. 44 Tenanniakka manna sitau akkulle battu mae ri Nakke, punna tanieranga ri ManggeKu battu mae ri Nakke iamintu Mangge assuroA' battu; na inai-nai battu mae ri Nakke, iami laKupabangung poleang ri Allo Kiamaka. 45 Nia' tattulisi' lalang ri Kitta'-kitta'na Na'bi-na'bia angkanaya, ‘Sikontu rupataua laniajaraki ri Allata'ala.’ Jari sikontu tau ampilangngeri Manggea siagang appilajara' ri Ia, battu ngasengi mae ri Nakke. 46 Mingka manna nakamma, tenanniakka tau le'ba' anciniki Manggea. Tena ruanna Ia anjo battua ri Allata'ala, le'ba' anciniki Manggea. 47 Assengi angkanaya: Inai-nai tappa', iami anggappai katallassang satunggu-tunggua. 48 INakkemi roti assarea katallassang. 49 Angnganrei boe-boenu kanre Napaturunga Allata'ala ri parang lompoa, namate tonja ke'nanga. 50 Mingka takammayai anjo roti manurunga battu ri suruga; nasaba' inai-nai angkanrei anne rotia iami tena nalamate. 51 INakkemi roti manurunga battu ri suruga iamintu roti assarea katallassang. Tau angkanreai anne rotia lattallasaki satunggu-tungguna. Roti laKupassareanga iamintu KalengKu, untu' katallassanna rupataua ri lino.” 52 Nalangngere'na akkana kamma Isa, a'gea'mi tu Yahudia massing para ia. Nakana ke'nanga, “Antekamma lakkulle anne taua ampassareangi KalenNa mae ri kambe lanipa'jari kanre?” 53 Nakanamo Isa ri ke'nanga, “Patappaki angkanaya: Punna tena nanukanrei assinNa Ana' Ma'rupataua, siagang tena nanuinungi cera'Na, takkulleako attallasa' tojeng-tojeng. 54 Inai-nai angkanrei assingKu siagang angnginungi cerakKu, nagappami katallassang satunggu-tunggua, siagang laKupabangung poleangi sallang ri Allo Kiamaka. 55 Nasaba' assingKumi kanre sitojennaya, siagang cerakKumi inungang sitojennaya. 56 Inai-nai angkanrei assingku, siagang inai-nai angnginungi cerakKu, iami a'jari se're siagang iNakke, siagang a'jari se'reMa' siagang kalenna. 57 Anjo Mangge attallasaka, Iami assuroA' battu, siagang ri Iatommi anjo Manggea naKuattallasa'. Sangkamma tommi anjo, inai-nai angkanreai assingKu labattu ri Nakkemi nattallasa'. 58 Iaminne roti manurunga battu ri suruga: tena nasangkamma roti nakanrea boe-boenu. Nasaba' ri le'ba'na nakanre anjo rotia, mate tonji ke'nanga. Mingka inai-nai angkanrei anne rotia iami lattallasa' sa'genna satunggu-tungguna.” 59 Yangasenna anjo Napaui Isa ri wattunNa angngajara' lalang ri balla' sambayanga ri Kapernaum. 60 Nalangngere'namo anjo kana-kana Napabattua Isa, jaimi ana' gurunNa angkana, “Battala' sikali anne pangngajaranga. Inaimi lakkulle antarimai?” 61 Naassengi Isa angkanaya a'moko'-mokoki ana'-ana' gurunNa lanri anjo passalaka. Jari Nakanamo, “Kasi'rikangko lanri anjo kana-kanangKu? 62 Antekamma sallang kajarianna punna nucini' Ana' Ma'rupataua nai' ammotere' ri tampa' Nakabattuia? 63 Assareai katallassang rupataua iamintu RohNa Allata'ala. Tena matu-matunna kagassinganna rupataua. Kana-kana Kupabattua ri kau ngaseng iamintu kana-kana RohNa Allata'ala, assarea katallassang. 64 Mingka nia' todong tau ri alla'nu tena natappa'.” (Naasseng memammi Isa battu ri pakkaramulanna angkana inai-nai taeroka tappa', siagang inai langngalle-bokoi.) 65 Nakanamo pole Isa, “Iaminjo saba'na naKupauangko angkanaya tenanniakka manna sitau akkulle battu mae ri Nakke punna tena nisarei pakkulle ri Manggea.” 66 Pakkaramula anjo wattua jaimi ana'-ana' gurunNa a'lampa ambokoi, siagang taerokami pole amminawang ri Ia. 67 Jari akkuta'nammi Isa ri sampuloa anrua ana' gurunNa Nakana, “Ero' ngaseng tongko a'lampa ambokoiA'?” 68 Nakanamo Simon Petrus ri Ia, “O Batara, inaimi lanamangei ikambe? Kana-kananTa assarei katallassang mannannungang. 69 Tappa'mi ikambe siagang jarre'mi ri atinna ikambe angkanaya iKattemi Tu Matangkasa' nisuroa battu ri Allata'ala.” 70 Appialimi Isa Nakana, “Sai sampuloko anrua Kupile? Mingka nia' sitau ri kau a'jari setang!” 71 Anjo natabaya kananNa Isa, iamintu Yudas ana'na Simon Iskariot. Nasaba' manna kalase'renna tongi ri anjo sampuloa anrua ana' gurunNa Isa anjo Yudas, mingka iami langngalle bokoi Isa.
1 Le'baki anjo a'lampami Isa ri kere-keremae ri pa'rasangang Galilea. Taerokai mange ri daera Yudea, lanri ero'na tukoasana tu Yahudia anjoreng ambunoi. 2 Anjo wattua a'birimmi narapi' Allo Lompo Pa'ballakang Leko'-leko Kayua. 3 Jari nakana ngasemmo sari'battanNa Isa ri Ia, “Bokoimi anne tampaka siagang a'lampa maKo mange ri daera Yudea, sollanna akkulle todong nacini' ana'-ana' gurunNu apa-apa Nugaukanga. 4 Tenanniakka tau ancokkoi apa-apa nagaukanga punna eroki a'jari masahoro'. Punna Nugaukang apa-apa kammaya anjo, musti naasseng ngasengi sikontu rupataua ri lino!” ( 5 Nasaba' manna sari'battang KalenNa ngaseng tena natappa' ri Ia.) 6 Nakanamo Isa ri ke'nanga, “Untu' iNakke, tenapa narapiki wattungKu; mingka untu' ikau ngaseng akkulle sambarang wattu. 7 Tena olonu lanakabirisi anne linoa. Mingka iNakke nakabirisi memangA' anne linoa, lanri tuli Kupauanna anne linoa angkanaya ja'dalaki panggaukanna. 8 Ikau ngasemmo kalennu a'lampa mange anjoreng ri passua'-suarranga. INakke tena Ku'lampa, nasaba' untu' iNakke tanarapikapi wattungKu.” 9 Kammaminjo kananNa Isa mae ri sikamma sari'battanNa, nammantammo ri Galilea. 10 A'lampana ngasemmo sari'battanNa ri anjo passua'-suarranga, a'lampa cokko-cokkomi Kale-kalenNa Isa. Tena tau angngassengi ri wattunNa a'lampa. 11 Lalang nigaukanna anjo passua'-suarranga, niboyami Isa ri tukoasana ngaseng tu Yahudia. Akkuta'nammi ke'nanga angkana, “Kemaei Isa?” 12 Jaimi tau ampa'bici'-bicikangi Isa. Nia'mo angkana, “Tau baji' anjo taua.” Nia' tommo angkana, “Tena! Napasala oloangi tau jaia.” 13 Mingka tenanniakka manna sitau ero' a'bicara silambusu'na ri passala'na Isa, lanri malla'na ke'nanga ri tukoasana ngaseng tu Yahudia. 14 Attangnganamo passua'-suarranga, nia'mi antama' Isa ri Balla'Na Batara, nampa appakkaramula angngajara'. 15 Lannasa' ngasemmi tukoasana tu Yahudia, siagang nakanamo ke'nanga, “Antekamma nakkulle jai kamma Naasseng anne taua, natale'baka assikola?” 16 Appialimi Isa Nakana, “Apa Kupangngajaranga teai pangngajarangKu, mingka pangngajaranNa ia anjo assuroA ri Nakke. 17 Inai-nai ero' anturuki ero'Na Allata'ala, lanaassengi angkanaya pangngajarang battu kemae anjo Kupangngajaranga. Apaka pangngajarang battu ri Allata'ala yareka pangngajarang battu ri KalengKu. 18 Inai-nai assare pangngajarang battu ri kalenna, anjo tau kammaya kala'birang untu' kalenna naboya. Mingka inai a'boya kala'birang untu' Ia anjo assuroai, anjo tau kammaya tau lambusu', tena balle-balle lalang ri kalenna. 19 Sai le'ba'mi napassareang Musa ri kau ngaseng sikamma Naparentakanga Allata'ala? Mingka tenanniakka ri kau ngaseng anggaukangi anjo Naparentakanga. Angngapa nanuero' ngaseng ambunoA'?” 20 Appialimi anjo tau jaia angkana, “PongorokKo antu! Inai ero' ambunoKo?” 21 Appialimi Isa Nakana, “Sirupaji apa Kugaukang ri allo Pammari-marianga, na nulannasa' ngasemmo. 22 Nasareko parenta Na'bi Musa sollannu assunna' — manna nasikontutojenna anjo sunnaka teai atorang battu ri Na'bi Musa, passangalinna atorang battu ri boe-boenu ri tenanapa nabattu Na'bi Musa. Lanri kammana, manna ri allo Pammari-marianga ero' tonjako ansunnaki taua. 23 Punna nugaukangi anjo kammaya sollanna tena nudakkai atorang napabattua Musa ri passala'na anjo sunnaka, angngapa nularro ri Nakke lanri Kuballeina taua sibatu kale ri allo Pammari-marianga? 24 Teako angngadeli ri taua passabakkang apa-apa kacinikanga, passangalinna lanri kaadelang bawang.” 25 Le'baki anjo, nia' siapa are tu Yerusalem angkana, “Sai iaminne tau niboyaya, eroka nibuno? 26 Cini'mi antekamma bateNa appaero'-ero' a'bicara ri dallekanna tau jaia, na tenanniakka tau ero' akkana-kana ri Ia! Maka naassemmi pamarentata angkanaya Iaminne Karaeng Mappasalamaka? 27 Mingka punna battu anjo Karaeng Mappasalamaka, tenanniakka manna sitau angngassengi assala' kabattuanNa! Naanne taua niassengi angkanaya battu kemaei assala'na.” 28 Le'baki anjo, lalang angngajara'Na Isa ri Balla'Na Batara, a'gora lompomi Nakana, “Jari nuasseng ngasenjA' angkana inaiA' anne, siagang battu kemae assalakKu? Teai ero' KalengKu naKunia' battu. INakke nisuroA' ri Ia niaka koasana assuro ri Nakke, nakkullei nipatappa'. Mingka tena nanuassengi. 29 INakke Kuassengi lanri battu ri Iami assala' kabattuangKu, siagang Iami assuroA' battu.” 30 Anjo wattua, ero'mi ke'nanga anjakkalaki Isa. Mingka tena tau barani anta'galaki, lanri tenapa narapiki wattunna. 31 Jaimi ri alla'na anjo taua a'jari tappa' ri Isa; nakanamo anne ke'nanga, “jari punna niaki battu anjo Karaeng Mappasalamaka, maka lajaiangangi gau' appakalannasa' Nagaukang naanne taua?” 32 Nalangngere'mi tu Farisia antekamma batena a'bici'-bici' anjo tau jaia ri passala'na Isa. Lanri kammana assama turu'mi ke'nanga siagang imang-imang kapalaya. Assama turu'mi ke'nanga assuroi pangawala'na Balla'Na Batara anjakkalaki Isa. 33 Nakanamo Isa ri anjo tau jaia lalang ri Balla'Na Batara, “Poro sinampe' maMa' nia' anrurungangko. Punna le'ba'mo sallang, lammotere'Ma' mae ri Ia assuroA ri Nakke. 34 LanuboyA' sallang mingka tenamo nukkulle ambuntulukKa'; nasaba' takkulleako battu mange anjoreng ri tampa' Kupammantangia.” 35 Nakana ngasemmo tukoasana tu Yahudia, massing para ia, “La'lampa kemaei anne taua nitakkullea ambuntuluKi? Apa eroKi a'lampa mange ri tu Yahudi pantarang pa'rasanganga, ri pa'rasanganna tu Yunania, naero' Naajara' tu Yunania? 36 Apa ero'Na naNakana laniboyai mingka takkulleaki' ambuntuluKi, siagang takkulleaki' battu mange ri tampa' Napammantangia?” 37 Ri allo kala'busanna anjo passua'-suarranga, iamintu allo kaminang parallua, ammentemmi Isa lalang ri Balla'Na Batara. Nampa a'gora Nakana, “Inai-nai turere, musti battui ri Nakke angnginung. 38 Ri passala'na tau tappaka mae ri Nakke, niaki tattulisi' lalang ri Kittaka angkana, ‘Battu lalang ri atinna assolong je'ne' assarea katallassang.’ ” 39 RohNa Allata'ala anjo Nabicaraya Isa, lanatarimaya tau tappaka ri Ia. Nasaba' anjo wattua tenapa nipassareangi RohNa Allata'ala; lanri tenapa nanipakala'biriki Isa lanri kamateanNa.) 40 Jai tau allangngereki anjo apa Napaua Isa. Na nia'mo ri ke'nanga angkana, “Mattantuna Na'bi anne Taua!” 41 Na maraenganga angkanai, “Iaminne Karaeng Mappasalamaka!” Mingka nia' tommo angkana, “Ha, maka labattu anjorengi ri Galilea Karaeng Mappasalamaka? 42 Kania' tattulisi' lalang ri Kittaka angkanaya anjo Karaeng Mappasalamaka sossoranna Daud siagang labattu anjorengi mae ri Betlehem, iamintu kamponna Daud.” 43 Kale'bakkanna a'gea-gea'mi ke'nanga passala' Isa. 44 Nia'mo ero' anjakkalaki Isa, mingka tenanniakka ero' anta'galaKi. 45 Ri wattunna ammotere'mo sikamma pangawala'na Balla'Na Batara, iamintu le'baka nisuro mange anjakkalaki Isa, akkuta'nammi imang-imang kapalaya, siagang tu Farisia ri ke'nanga, angkana, “Angngapa natena nuerangi mae?” 46 Appialimi anjo pangawalaka ngaseng nakana, “Edede, tenanniakkapa tau kamma Ia a'bicara!” 47 Nakanamo tu Farisia, “Maka napasala oloang ngaseng tommako anjo Taua? 48 Niakka pamarentata yareka tu Farisi tappa' ri Ia? 49 Mingka anne tau jaia tanaassengai hukkung napassareanga Musa, siagang manna antekamma nitunrai tommi ke'nanga.” 50 Kalase'renna anjo tu Farisia iamintu Nikodemus, le'baka battu mange ri Isa. Nakanamo Nikodemus ri tu Farisi maraenganga, 51 “Manuru' undang-undanga, takkulleai nihukkung se'rea tau punna tenapa nilangngereki kara-karana siagang punna tenapa nale'ba' niparessa panggaukanna.” 52 Appialimi ke'nanga angkana, “Barang tu battu tongko ri Galilea? Paressami Kittaka! Lanuassemmi angkanaya tena na'bi labattu ri Galilea.” 53 Le'baki anjo, ammotere' ngasemmi taua ri balla'na.
1 Mingka Isa a'lampami mange ri Bonto Zaitun. 2 Ammukona bari'basa', a'lampami mange ri Balla'Na Batara, siagang jaimi tau battu mae ri Ia. Ammempomi Isa, nampa Naajara' ke'nanga. 3 Anjo wattua battumi siapa are guru-guru agama siagang siapa are tu Farisi angngerang mae ri Ia sitau baine nirapikanga a'gau' salimara'. Nasuromi anjo bainea ammenteng ri tangnga, 4 nampa nakana ke'nanga ri Isa, “Pa' Guru, karapikangi anne bainea a'gau' salimara'. 5 Nia' atorang lalang ri hukkung napassareanga Musa angkanaya, anne baine kammaya musti nisambilai batu sa'genna mate. Kamma-kamma anne, antekamma panggappaTa?” 6 Nakkuta'nang kamma ke'nanga, lanri eroki ke'nanga ampa'boyangi kasalang Isa sollanna akkulle ke'nanga assalakangi Isa. Mingka a'dunduji Isa, annulisi' siagang karemenNa naung ri buttaya. 7 Ri wattunna pila' akkuta'nang ke'nanga, Naangka'mi ulunNa Isa nampa Nakana ri ke'nanga, “Inai-nai ri kau tena dosana, iamo rolong ansambilai batu anjo bainea.” 8 Le'baki akkana kamma, a'dundumi ammotere' Isa nampa annulisi' pole ri buttaya. 9 Nalangngere'na ke'nanga akkana kamma Isa, a'lampa tasse're-se'remi ke'nanga ambokoi anjo tampaka, appakkaramula kaminang toaya. Kala'busanna Isa mami ammantang siagang anjo bainea ammenteng ri pammentenganna. 10 Naangka'mi ulunNa Isa nampa Nakana ri anjo bainea, “Kemae ngasengi ke'nanga? Tena manna sitau ansalakangko?” 11 Appialimi anjo bainea nakana, “Tena, Pa'.” Nakanamo Isa, “Baji'mi; iNakke tena todong Kusalakangko. Kamma-kamma anne a'lampamako, mingka teako a'gau' dosai pole.” 12 A'bicarami pole Isa mae ri tau jaia, Nakana, “INakke minne sanrapang singara'na linoa. Inai-nai amminawang ri Nakke, tena nala'jappa lalang ri sassanga, mingka nagappami singara'na katallassanga.” 13 Nakanamo tu Farisia ri Ia, “Anne iKau tonji ansa'bi KalenNu. Tena natojeng anne kasa'bianNu.” 14 Appialimi Isa Nakana, “Manna naiNakke tonji ansa'bi KalengKu, mingka annabai anjo kasa'biangKu; nasaba' Kuassengi angkana battu kemae kabattuangKu, siagang kemae laKulampai. Ikau tena nuassengi angkana battu kemae kabattuangKu siagang kemae laKulampai. 15 Ikau ngaseng, cara-carana rupataua nupake anghukkungi taua; mingka iNakke, manna sitau tania' tau Kuhukkung. 16 Mingka ebara'na Kuhukkungi taua, adeleki bateKu antappuki hukkunganna nasaba' tena naKale-kalengKuja angngadeli. Niaki Mangge assuroA ri Nakke angngagangA'. 17 Nia' tattulisi' lalang ri Hukkung napassareanga Musa angkana: Kasa'biang tojenga, iamintu kasa'biang battu ri ruaya tau. 18 A'jari sa'bia ri kalengKu nia' rua — iamintu iNakke siagang Manggea, assuroA ri KalengKu.” 19 Nakanamo ke'nanga, “Kemae ManggeNu?” Appialimi Isa Nakana, “Tena nanuassengA' siagang tena nanuassengi ManggeKu. Ka'de' nanuassengA', mattantu nuasseng tommi ManggeKu.” 20 Niaki lalang ri Balla'Na Batara angngajara' wattunna Napau ngaseng anne bicaraya. Anjorengi ri ampi'na patti-patti doe' pakkoro'bangnganga anjo wattua. Mingka tenanniakka manna sitau anjakkalaki Isa, lanri tenapa nanarapiki wattunna. 21 Nakanamo pole Isa ri ke'nanga, “ErokKa' a'lampa sallang, siagang lanuboyA'; mingka lamate ngasengko lanri dosa-dosanu. Ri tampa' laKumangeia, takkulleako mange anjoreng.” 22 Nakanamo siapa are tu ammarentaya ri tu Yahudia, “Gassingka eroki Nabuno KalenNa kaNakana, ‘Ri tampa' laKumangeia, takkulleako mange anjoreng.’ ” 23 Nakanamo Isa ri ke'nanga, “Ikau ngaseng battu rawako; mingka iNakke battu rateA'. Ikau ngaseng tau battuko ri linoa; iNakke teaiA' tau battu ri linoa. 24 Lanri kammana minjo naKukana ri kau ngaseng, angkanaya lamate ngasengko lanri dosa-dosanu. Na memang lamateko lanri dosa-dosanu punna tena nutappa' angkanaya, ‘INakkeminne nikanaya INAKKE NIA'.’ ” 25 Akkuta'nammi ke'nanga angkana, “InaiKo antu sitojenna?” Appialimi Isa Nakana, “Apa pole matu-matunna a'bicaraya siagang ikau ngaseng? 26 Jai iji passala' laKupau ri kau ngaseng siagang laKuadeliangko. Mingka Ia assuroA ri Nakke akkullei nipatappa'. Na Kupabattumi ri lino apa le'baka Kulangngere' battu ri Ia.” 27 Tanapahangai ke'nanga angkanaya passala' Manggea anjo Nabicara Isa mae ri ke'nanga. 28 Jari Nakanamo Isa ri ke'nanga, “Punna nipakatinggimi sallang Ana' Ma'rupataua, lanuasseng ngasemmi angkanaya, ‘INakkeminne nikanaya INAKKE NIA'.’ Siagang lanuassemmi angkanaya tena manna sirupa apa Kugaukang lanri ero' KalengKu. Mingka poro apa battuaji bawang ri Manggea Kupangngajarrang. 29 Na Ia assuroa ri Nakke, niaki angngagangA'. Tenale'baKa' nabalang parekang Kale-kalengKu, nasaba' tuli Kugaukangi apa Nakate'neanga atinNa.” 30 Le'baki Napau Isa yangasenna anjo, jaimi tau a'jari tappa' ri Ia. 31 Nampa Nakana Isa ri tu Yahudi tappakamo ri Ia, “Punna attallasakko situru' ajarangKu, nampa mako amminawang tojeng-tojeng ri Nakke; 32 lanuassemmi Allata'ala tojenga, siagang lanri kammana minjo nula'jari maradeka.” 33 Nakanamo ke'nanga, “Ikambe anne sossorannaki' Abraham. Tenale'bakapaki' ikatte nipare' ata ri tu maraenga! Apa nataba kananNu naNuangkana, ‘Nula'jari maradeka?’ ” 34 Nakanamo Isa ri ke'nanga, “Tojeng-tojengi anne kanangKu. Inai-nai a'gau' dosa, nipare' atami ri dosaya. 35 Na tena pammantangang tulina se'rea ata lalang ri ballaka; mingka Ia Anaka lammantangi lalang ri balla' sa'genna satunggu-tungguna. 36 Lanri kammana minjo, punna tena nilappassangko ri Anaka, tena nulalappasa' tojeng-tojeng. 37 Memang, Kuassenji angkanaya sossoranna ngasengko Abraham. Mingka ero' ngasengko ambunoA', lanri taerokako antarimai ajarangKu. 38 Apa Kucinika ri ManggeKu, iaminjo Kupau. Na ikau ngaseng, nugaukang tonji apa napangngajarang manggenu ri kau.” 39 Appialimi ke'nanga angkana, “Manggena ikambe iamintu Abraham.” Nakanamo Isa, “Ebara' ana'na tojengko Abraham, tantu nugaukang tommi apa nagaukanga Abraham. 40 Kupabattuang mako katojengang Kulangngereka battu ri Allata'ala, mingka ero' ngasengko ambunoA'. Na Abraham tena nakamma anjo panggaukanna! 41 Panggaukanna ngaseng manggenu antu nugaukanga ngaseng todong.” Appialimi ke'nanga angkana, “Ikambe anne teaiki' ana'-ana' harang. Se'reji manggena ikambe, iamintu KalenNa Allata'ala.” 42 Nakanamo Isa ri ke'nanga, “Ebara' manggenu anjo Allata'ala, tantu lanukamaseangA', lanri iNakke battuA' ri Allata'ala. Teai ero' KalengKu naKubattu, passangalinna Allata'ala assuroA'. 43 Apa saba'na natanupahanga apa Kupaua? Lanri tenana nuttahang allangngereki apa Kupangngajaranga. 44 Ia manggenu iamintu Billisika, naia eroka nuturuki iamintu ero'na manggenu. Battu ri uru-urunaji napabuno memang anjo Billisika. Tena le'bakai mae ri katojenganga, lanri tena katojengang ri kalenna. Punna a'balle-balle, anjo biasa memanji ri ia, nasaba' kamma memanjinjo sipa'na. Iami paballe-balle, siagang iami nakabattui sikontu balle-ballea. 45 Mingka iNakke katojengang Kupau, na lanri kammana minjo natena nutappa' ri Nakke. 46 Inai ri kau akkulle ampa'butti angkanaya nia' dosa ri KalengKu? Punna katojengang Kupau, apa saba'na nutatappaka ri Nakke? 47 Inai-nai battu ri Allata'ala, tantu napilangngeri kananNa Allata'ala. Mingka ikau ngaseng, teaiko tau battu ri Allata'ala. Iaminjo saba'na nanutea appilangngeri.” 48 Appialimi anjo tu Yahudia ri Isa angkana, “Sai kammatojengi kananna ikambe angkanaya ikau mintu tu Samaria nasosoka setang?” 49 Appialimi Isa Nakana, “Tena nanasosoKa' setang. INakke Kupakala'biriki ManggeKu, mingka ikau ngaseng nuhina-hinaiA'. 50 Teai kala'birang untu' KalengKu Kuboya. Nia' se're ampa'boyangA' kala'birangKu, na Iami langngadeli taua. 51 Annaba tojengi anne Kukanaya: inai-nai anturuki kanangKu tena nalamate sa'genna satunggu-tungguna.” 52 Nakanamo anjo tu Yahudia ri Isa, “Kamma-kamma anne niassemmi angkanaya ma'nassa nasosokKo setang! Kalenna Abraham matemi, kammayatompa na'bi-na'bia mate ngaseng tommi. Mingka iKau Nukana, ‘Inai-nai anturuki kanangKu, tena nalamate sa'genna satunggu-tungguna.’ 53 Punna kalenna Abraham matemi, kammayatompa na'bi-na'bia mate ngaseng tommi, inaiKo antu? Maka lompongangKo na Abraham boena ikambe?” 54 Appialimi Isa Nakana, “Ka'de' nauntu' kala'birang KalengKu Kuboya, tena matu-matunna anjo kala'biranga. Ampakala'birikai KalengKu iamintu ManggeKu, nukanaya Allata'alanu ngaseng, 55 mingka tena nanuassengi. Mingka iNakke Kuassengi. Ebara'na Kukana tena naKuassengi, a'jari tu paballe-balleMa', sangkamma ikau ngaseng. Mingka iNakke Kuassengi siagang Kuturuki kananNa. 56 Sannang sikali nyawana manggenu Abraham lanri lanaciniki allongKu. Ba'lalo nacini'mi siagang sannammi nyawana!” 57 Nakanamo tu Yahudia ri Isa, “Tenapa limampulo taung umuru'Nu, na Nukana Nucini'mi Abraham?” 58 Appialimi Isa Nakana, “Sitojeng-tojenna Kukana ri kau ngaseng: tenapa nanilassukangi Abraham, naKunia' memammo iNakke.” 59 Massing angngallemi batu anjo tu Yahudia ero' nasambilai Isa; mingka a'lengu'mi Isa, nampa a'lampa ambokoi anjo Balla'Na Batara.
1 Ri wattunna a'jappa Isa, nia'mo Nacini' tau buta battu ri pakaramula nilassukanna. 2 Akkuta'nammi ana'-ana' gurunNa Isa angkana, “Angngapa nabuta nilassukang anne taua Pa' Guru? Apa lanri dosa kalenna yareka lanri dosana anrong-manggena?” 3 Appialimi Isa Nakana, “Teai lanri dosana yareka lanri dosana tau toana nabuta, passangalinna sollanna akkulle nacini' taua antekamma gau' makoasaNa Allata'ala a'nyata lalang ri kalenna anne taua. 4 Ri singara'na ija musti nijama memammi jama-jamang nipassuroanga ri Nakke. Labattui bangngia sa'genna tenanniakka manna sitau akkulle anjama. 5 Ilalang niakKu lalang ri anne linoa, iNakkemi Singara'na linoa.” 6 Le'baki akkana kamma Isa, appi'rumi naung ri buttaya, nampa Naleo' anjo pi'runNa siagang buttaya. Nampa Napasapu mange ri matanna anjo taua, 7 na Nakana ri ia, “A'lampamako ambissai rupannu ri Balang Siloam.” (Siloam battuanna ‘Nisuro’.) Jari a'lampami anjo taua ambissai rupanna. Ri wattunna ammotere', akkullemi accini'. 8 Sikamma sambori'na, siagang sikamma tau le'baka anciniki appala'-pala' anjo taua, angkana ngasemmi, “Sai ia anne tau biasaya ammempo appala'-pala'?” 9 Nia'mo angkana, “Ia memang.” Mingka nia' tommo angkana, “Teai ia, sangkammanaji anjo taua.” Mingka kalenna minjo taua angkana, “Inakkemi anjo taua.” 10 Nakanamo ke'nanga ri ia, “Antekamma kajarianna nukkulle accini'?” 11 Appialimi angkana, “Anjo tau niarenga Isa appare' peo' sike'de', nampa Napasapu ri matangku, na Nakana, ‘A'lampamako ambissai rupannu ri Balang Siloam.’ Jari a'lampama'. Na ri wattunna kubissai rupangku, akkullema' accini'.” 12 Akkuta'nammi ke'nanga angkana, “Kemae anjo taua?” Appialimi angkana, “Tena kuassengi.” 13 Allo Pammari-mariangi ri wattunna Napasileo' pi'runNa Isa siagang buttaya naNaballei anjo tau butaya sa'genna akkulle accini'. Jari nierammi anjo tau le'baka buta mange ri tu Farisia. 15 Nakuta'nang tommi ke'nanga anjo taua, antekamma nakkulle accini'. Appialimi nakana, “Nasarei peo' matangku nampa kubissai nakuakkullemo accini'.” 16 Nia'mo siapa are tu Farisi angkana, “Tena olona laTau battu ri Allata'ala anne Tau anggaukangai anne panggaukanga lanri tena Najampangi allo Pammari-marianga.” Mingka nia'mo maraengang angkana, “Tena olona Tau dorakaya lakkulle anggaukangi gau'-gau' appakalannasa' kammaya anne!” Jari tenamo na'julu panggappa ke'nanga. 17 Jari akkuta'nammi pole anjo tu Farisia ri anjo tau le'baka buta angkana, “Antekamma panggappanu ri anjo Tau le'baka amballeiko nukkulle accini'?” Appialimi nakana, “Na'bi anjo Taua.” 18 Mingka tena ngasemmo natappa' anjo pamarentana tu Yahudia angkanaya butai anjo taua pirangalloang nakkullemo accini' kamma-kamma anne. Jari nakio'mi ke'nanga tau toana anjo taua; 19 nampa akkuta'nang angkana, “Ana'nu tojeng anne, nukanaya buta memammi ri wattunna lassu'? Antekamma batena nakkullemo accini' kamma-kamma anne?” 20 Appialimi anrong-manggena anjo taua angkana, “Memang, ana'na memang ikambe anne; na memang buta memammi pakkaramula ri lassu'na. 21 Mingka antekamma batena nakkulle accini' kamma-kamma anne, tena naassengi ikambe. Kammayatompa, inai amballei nakkulle accini' kamma-kamma anne, tena todong naassengi ikambe. Ia tommo kuta'nang, nasaba' toa tommi; akkullemi kalenna appiali.” 22 Nakkana kamma anjo anrong-manggena, lanri malla'na ke'nanga ri pamarentana tu Yahudia; nasaba' le'ba'mi assamaturu' ke'nanga, angkanaya inai-nai angngakui Isa angkana Iami Karaeng Mappasalama', takkulleai antama' ri balla' sambayanga. 23 Lanri kammana minjo na nakana anrong-manggena anjo taua, “Toa tommi; kalenna tommo kuta'nang.” 24 Jari nakio' poleammi ke'nanga anjo tau le'baka buta, na nakana ri ia, “Assumpa mako angkanaya lanupaui kontutojenga. Naassengi ikambe angkanaya tau doraka anjo Taua.” 25 Appialimi anjo taua nakana, “Dorakai yareka tena anjo Taua, tena nakuassengi. Mingka nia' se're kuasseng; pirangalloang buta', mingka kamma-kamma anne accini'ma'.” 26 Jari nakanamo pole ke'nanga ri ia, “Antekamma bateNa amballeiko nukkulle accini'?” 27 Appialimi anjo taua nakana, “Le'ba' mako kucaritang ngaseng, mingka taeroka ngasengko appilangngeri. Angngapa nanuero' pole allangngereki? Barang ero' tommako amminawang ri Ia?” 28 Napakkanaimi ke'nanga anjo taua siagang nakana, “Ikau mintu tau amminawanga ri Ia; ikambe tena! Ikambe Na'bi Musa nipinawang. 29 Naassemmi ikambe angkanaya le'ba'mi a'bicara Allata'ala mae ri Musa. Mingka passala'na anjo taua, tanaassengai ikambe angkanaya tau battu kemae assala'Na.” 30 Appialimi anjo taua nakana, “Appakalannasa' sikali punna tena ngaseng nanuassengi angkanaya battu kemae assala'Na, nakule'ba'mo anne Naballei sa'gengku akkulle accini'. 31 Naniassemmo angkanaya tanipilangngeriai ri Allata'ala pappala'na tau dorakaya; iaji nipilangngeri pappala'na tau ampakala'birikai Allata'ala, siagang anggaukangai ero'Na. 32 Baku' nia'na linoa tenale'bakapi nilangngere' angkana nia' tau amballei tau butaya ri pakkaramula lassu'na sa'genna akkulle accini'. 33 Punna teai tau battu ri Allata'ala anjo taua, takkulleai laNagaukang anjo panggaukang kammaya.” 34 Appialimi ke'nanga angkana, “Apa? Ikau tau dorakaya memang battu ri pakkaramula lassu'nu ero' angngajaraki ikambe?” Pakkaramula anjo wattua tenamo nanikellai anjo taua antama' ri balla' sambayanga. 35 Nalangngere'mi Isa angkanaya tanikellaiami anjo tau le'baka Naballei antama' ri balla' sambayanga. Naboyami anjo taua nampa Nakana ri ia, “Tappa'jako ri Ana' Ma'rupataua?” 36 Appialimi anjo taua nakana, “Inaika anjo Ana' Ma'rupataua, Tuang? Kitulungsa' naKipauanga' sollangku tappa' ri Ia.” 37 Appialimi Isa Nakana, “Nucini'mi anjo taua. Iami anjo nuaganga a'bicara kamma-kamma anne.” 38 Nakanamo anjo taua, “Tappaka' Batara,” nampa su'ju' ri dallekanNa Isa. 39 Nakanamo Isa, “BattuA' antama' ri anne linoa untu' angngadeli; sollanna akkulle accini' tau butaya, na'jari buta tau accinika.” 40 Nia' siapa are tu Farisi anjoreng allangngereki akkana kamma anjo Isa; jari akkuta'nammi ke'nanga ri Ia angkana, “Jari Nukana buta ngaseng tongki' anne mae?” 41 Appialimi Isa Nakana, “Ebara' angkana buta ngasengko antu, tenaja nudoraka. Mingka lanri nukanana ngaseng, ‘Accini'jaki' anne’, iaminjo battuanna angkanaya doraka ngasengijako.”
1 “Annaba tojengi anne kanangKu: Inai-nai antama' ri baraya natena nanjoreng ri timunganna baraya antama', mingka anjorengi ri kalli' sa'rinna baraya, yareka angngambiki ri oloang maraenga, iaminjo taua pallukka' siagang paella'. 2 Mingka inai-nai antama' battu ri timunganga iami pakalawakinna anjo gimbalaka. 3 Lanisungkeangi timunganga ri pajagana anjo baraya; siagang punna nakioki massing arenna anjo gimbalaka, lanipinawangi sa'ranna, nampa naerang ke'nanga assulu'. 4 Punna le'ba' ngaseng naerang assulu' anjo gimbalaka, a'jappami ri dallekang anjo pakalawakia; nampa amminawang ngaseng ri bokona anjo gimbalaka, lanri niassengi ri ke'nanga sa'ranna. 5 Talaerokai ke'nanga amminawang ri tau maraenga; ba'lalo lanapilari anjo taua, lanri tanaassengai sa'ranna.” 6 Nacaritai Isa ri ke'nanga anjo pangngebaranga, mingka tanaassengai ke'nanga angkana apa battuanna anjo pangngebaranga. 7 Sikalipa pole Nakana Isa, “Annaba tojengi anne kanangKu: INakkemi timungang naoloa gimbalaka. 8 Sikamma tau battua rioloangangKu sangnging palukka' siagang paella'; mingka tanapilangngeriai gimbalaka sa'ranna ke'nanga. 9 INakkemi timungang. Inai-nai ammalo battu ri Nakke antama', iami lanipasalama'; assulu' antamai nanggappa kanre. 10 Punna palukka' battu, ero'naji a'lukka', ammuno siagang ammanraki. Mingka iNakke naKubattu, sollanna anggappa katallassang rupataua iamintu katallassang kala'bianga. 11 INakkemi pakalawaki bajika. Ia pakalawaki bajika, napassareangi nyawana untu' katallassanna gimbala'na ngaseng. 12 Pakanre gajia, teai pakalawaki, teai tongi patanna gimbala'; jari lanapilari anjo gimbalaka punna nia' kongkong romang nacini' battu. Lanikokko'mi siagang lanipasisa'la'-sa'la'mi anjo gimbalaka ri anjo kongkong romanga. 13 Lari anjo tungnganre gajia, nasaba' untu' passawallanji bawang nakkalawaki. Tena najampangi anjo gimbalaka. 14 INakkemi pakalawaki bajika. Sangkamma NaassengKu Manggea na Kuasseng todong Manggea, sangkamma tomminjo Kuassenna gimbalakKu ngaseng, na naasseng tongA' ke'nanga. Kupassareangi nyawaKu sollanna attallasa' ke'nanga. 16 Nia' ija gimbala' maraeng, iNakke todong pata, mingka tantamayapi ri pa'rappunganna anne gimbalaka. Musti Kuerang tongi ke'nanga battu na lanapilangngeri todong sa'rangKu. La'jari sipa'rappungang ngasengi ke'nanga na se're pakalawaki napa'jului. 17 NakamaseangA' Manggea, lanri Kupassareangi nyawaKu, untu' laKugappa ammotere'. 18 Mingka tena manna sitau akkulle angngallei nyawaKu battu ri Nakke. Battu ri erokKu tonji naKupassareang. Nia' koasaKu ampassareangi, na nia' todong koasaKu angngallei ammotere'. Iaminjo tugasa' Kutarimaya battu ri ManggeKu.” 19 Lanri akkana kammana Isa, appakkaramulami a'gea'-gea' tu Yahudia. 20 Jai ke'nanga angkana, “Nasosoki setang anne taua. Pongoroki! Apa matu-matunna nupilangngeri ngaseng?” 21 Mingka nia' todong angkana, “Tena nakamma anjo batena a'bicara tau nasosoka setang! Maka akkullei setanga amballei tau butaya sa'genna accini'?” 22 Assua'-suaraki taua ri Yerusalem ansua'-suarri Allo Lompo Appakkaramula nipakena Balla'Na Batara. Anjo wattua dingingi. 23 A'jappai Isa ri baruga Salomo lalang ri Balla'Na Batara; 24 na anjo wattua battui tu Yahudia a'rappungang ri tammuliliNa Isa. Nakana ke'nanga ri Isa, “Sa'gennapi siapa sallona laNubalang parekangki' anne ranggasela? Paumi silambusu'na, punna ma'nassa iKau mintu Karaeng Mappasalamaka.” 25 Appialimi Isa Nakana, “Le'ba' mako Kupauang, mingka tena ngaseng nutappa'. Sikamma jama-jamang Kugaukanga lalang arenNa ManggeKu, a'jari ngasemmi butti mae ri KalengKu. 26 Tena ngaseng nutappa', lanri tena nuntama' ri pa'rappunganna gimbalakKu. 27 GimbalakKu napilangngeri sa'rangKu. Kuassengi ke'nanga, namminawangi ke'nanga ri Nakke. 28 Kusarei ke'nanga katallassang satunggu-tunggua, natena nalapanra' ke'nanga sa'genna satunggu-tungguna. Tena manna sitau akkulle angngalle passai ke'nanga battu ri limangKu. 29 ManggeKu, ampassareangai ri Nakke, Iami la'bi koasa battu ri sikontu apa niaka. Na tena sitau akkulle angngalle passai ke'nanga battu ri limanNa ManggeKu. 30 INakke siagang Manggea se'rejA'.” 31 Angngallemi pole batu ke'nanga ero' ansambilai Isa. 32 Mingka Nakanamo Isa ri ke'nanga, “Nucini' ngasemmi panggaukang baji' le'baka Kugaukang, situru' tugasa' Napassareanga Manggea ri Nakke. Battu ri yangasenna anjo panggaukanga, kereanga a'jari saba' nanusiratang ansambilA' batu?” 33 Appialimi anjo tu Yahudia nakana, “Teai lanri yangasenna anjo panggaukang baji'Nu naniero' ansambilaKo batu, passangalinna lanri Nuhinana Allata'ala. Ikau a'rupatau biasaya, erokKo ampa'jari KalenNu Allata'ala?” 34 Appialimi Isa Nakana, “Tenaka natattulisi' lalang ri Kitta' Hukkunnu angkanaya: Nakana Allata'ala, ‘allata'ala ngasengko’? 35 Niassengi angkanaya apa tattulisika lalang ri Kittaka tappakei sa'genna satunggu-tungguna. Jari, punna Allata'ala anggallaraki ‘allata'ala’ sikamma tau ampilangngeriai kananNa, 36 apa saba'na nanukana Kuhinai Allata'ala lanri Kukananaja KalengKu iNakke Ana'Na Allata'ala? Padahala' iNakkemi Napile Manggea na NasuroA' battu antama' ri linoa. 37 Punna taKugaukanga jamang Napassuroanga Manggea, teako tappaki ri Nakke. 38 Mingka lanri Kugaukammi, tappa' mako mae ri sikamma anjo apa le'baka Kugaukang, manna pole taerokako tappa' ri Nakke. Lalang kammana minjo nanuasseng siagang nupahang angkanaya tuli se'rena Manggea siagang iNakke, siagang tuli se'reKu siagang Manggea.” 39 Usahami pole ke'nanga ero' anjakkalaki Isa, mingka ta'lappasaki Isa battu ri ke'nanga. 40 Ammotere'mi Isa anta'leang ri ba'leanna Binanga Yordan, ri tampa'na Yohanes anje'neki taua pirangalloang. Ammantammi anjoreng. 41 Jaimi tau battu mae ri Ia. Nakanamo ke'nanga, “Tena gau' appakalannasa' nagaukang Yohanes, mingka sikontu apa napaua ri passala'na anne Taua annaba ngasengi.” 42 Jaimi tau anjoreng tappa' ri Isa.
1 Nia' sitau niareng Lazarus ammantang ri Betania siagang sari'battanna niarenga Maria siagang Marta. 2 Iaminne Maria antirikiai minynya'-minynya' bau' bangkenNa Isa, nampa nalu'lu' siagang uu'na. Nia' se're wattu na nataba garring Lazarus. 3 Assaremi kabara' anjo ruaya sari'battanna mae ri Isa, angkana, “O Batara, garringi sari'battanna ikambe Kikamaseanga.” 4 Nalangngere'na Isa anjo kabaraka, Nakanamo, “Anjo garringa tena nala'jari saba' nalamate. Anne nakajariang sollanna nipakala'biri' Allata'ala, na sollanna nipakala'biri' todong Ana'Na Allata'ala saba' anne kajarianga.” 5 Anjo Marta, Maria siagang Lazarus, nikamaseangi ri Isa. 6 Mingka ri wattunna Nagappa kabaraka Isa angkanaya garringi Lazarus, Nakunjungimi ammantang pole ruangallo ri tampa'Na. 7 Le'ba'pi anjo nampami Nakana ri ana'-ana' gurunNa, “Umba nakiammotere' mange ri Yudea.” 8 Appialimi ke'nanga angkana, “O Bapa' Guru, tenapa nasallo le'batTa ero' nasambila batu tu Yahudia. Angngapa naKiero'moseng ammotere' mange anjoreng kamma-kamma anne?” 9 Nakanamo Isa, “Sai punna siallo nia' sampulo anrua jang sallona? Inai-nai a'jappa ri wattu singara'na alloa, tena nalatatto'ro, nasaba' naciniki cayana anne linoa. 10 Mingka inai-nai a'jappa ri wattunna bangngi latatto'roi, nasaba' tena cayana singaraka ri ia.” 11 Kammaminjo Nakanaya Isa. Nampa Nakana pole, “Attinromi passari'battanganta Lazarus; mingka lamangeA' ampabangungi.” 12 Nakanamo ana'-ana' gurunNa Isa, “Batara, punna attinromi Lazarus, la'jari baji'mi antu ri garrinna.” 13 Ia natabaya kananNa iamintu matemi Lazarus. Mingka nakanai ke'nanga anjo Napakkanaya Isa, attinro biasaji Lazarus. 14 Jari a'bicarami silambusu'na Isa mae ri ke'nanga, Nakana, “Matemi Lazarus. 15 Mingka sannangi Kusa'ring pa'maikKu lanri tenaKu anjoreng namate. Nasaba' la'bi bajikangangi untu' ikau ngaseng punna Kutena anjoreng, sollannu akkulle ngaseng tappa'. Umbamo nakia'lampa mae ri Lazarus kamma-kamma anne.” 16 Nakanamo Tomas, nigallaraka “I Kambara'” mae ri agang-aganna ana' gurunNa Isa, “Umba kimminawang, boli'mi kamma nakisikamateang siagang Ia!” 17 Ri wattunna battu Isa mange anjoreng ri tampaka, patangallomi le'ba'na nitarawang Lazarus. 18 Anjo Betania ambani ri Yerusalem, kira-kira tallu kilometere' bellana. 19 Jaimi tu Yahudi battu angkunjungi Marta siagang Maria untu' ansaleori ke'nanga lanri matena sari'battanna. 20 Nalangngere'na Marta angkana niaki Isa battu, assulu'mi mange anruppai Isa; Maria ammantangi lalang ri balla'. 21 Nakanamo Marta mae ri Isa, “O Batara, ka'de' naKinia' anrinni anjo wattua, mattantu tenapa nalamate sari'battangku. 22 Mingka manna nakamma, kuassengi angkanaya manna ri kamma-kammaya anne manna pole apa Kipala' ri Allata'ala tena taNasareTa.” 23 Nakanamo Isa ri Marta, “Lattallasa' poleangi ammotere' sari'battannu.” 24 Appialimi Marta nakana, “Kuassenji angkanaya lattallasa' poleangi Lazarus punna nipattallasa' poleangi tau matea sallang ri Allo Kiamaka.” 25 Nakanamo Isa ri Marta, “INakkemi assarea katallassang siagang ampattallasa' poleangi tau matea. Inai-nai tappa' ri Nakke iami lattallasa', manna pole namatemo. 26 Na inai-nai attallasa' natappa' ri Nakke, tena nalamate sa'genna satunggu-tungguna. Tappakko ri anjo passalaka?” 27 Appialimi Marta nakana, “Batara, tappaka' ri Katte angkanaya iKattemi Ana'Na Allata'ala, Karaeng Mappasalama' labattua ri anne linoa.” 28 Le'baki akkana kamma Marta, a'lampami angkioki sari'battanna Maria. A'biciki ri Maria nakana, “Niaki battu anrinni Pa' Guru; Napakkuta'nangangko.” 29 Nalangngere'na Maria anjo, akkaro-karomi ammenteng, nampa a'lampa anruppai Isa. 30 Anjo wattua tenapa Nabattu Isa antama' ri desaya. Nia' iji anjoreng ri tampa' napassibuntulia Marta. 31 Niciniki Maria ammenteng siagang a'lampa karo-karo assulu' ri sikamma tu Yahudi niaka battu ri balla'na ansaleori. Jari a'lampami ke'nanga ampinawangi, nasaba' nakapangi ke'nanga angkana la'lampai Maria ri jeraka angngarru'. 32 Ri wattunna battumo Maria mange ri tampa'na Isa siagang nacini'mi Isa, akkulantu'mi Maria ri dallekanNa Isa na nakana, “O Batara, ka'de' naKinia' anrinni anjo wattua, mattantu tenapa namate sari'battangku.” 33 Nacini'na Isa angngarru' Maria, siagang sikamma tu Yahudi niaka battu angngagangi Maria angngarru' ngaseng tommi, a'jari si'nami atinNa siagang sanna'mi dinging-dinginna pa'mai'Na. 34 Jari akkuta'nammi ri ke'nanga Nakana, “Kemaei nutarawang Lazarus?” Appialimi ke'nanga angkana, “MaemaKi' Batara naKicini'.” 35 Angngarru'mi Isa. 36 Nakanamo tu Yahudia, “Ciniki, teai sipato' Nakamaseanna Lazarus!” 37 Mingka nia'mo ri ke'nanga angkana, “Akkullei Napa'jari accini' tau butaya, mingka angngapai natakkullea Natahang sollanna tamatea Lazarus?” 38 Sanna'mi pole dinging-dinginna pa'mai'Na Isa, nampa a'lampami mange ri jeraka. Anjo jeraka, se're jera' batu nitongkoka batu lompo. 39 Nakanamo Isa, “Palesangi anjo batua.” Appialimi Marta, iamintu sari'battanna anjo tau matea, nakana, “Mingka patangallomi le'ba'na nitarawang, Batara. Tantu a'rasa botto'mi!” 40 Nakanamo Isa ri Marta, “Sai le'ba' mako Kupauang angkanaya: Punna tappakko, lanuciniki antekamma lompona koasaNa Allata'ala!” 41 Jari napalesammi ke'nanga anjo batua. Nampa acconga Isa nai' ri langika na nakana, “Tarima kasi', Bapa', lanri Kipilangngerinna pappalakKu. 42 Kuassengi angkanaya tuli Kipilangngeri pappalakKu; mingka naKupau anne, untu' ia ngaseng anne tau niaka anrinni, sollanna nakkulle tappa' ke'nanga angkanaya ma'nassa iKatte assuroA' battu.” 43 Le'baki akkana kamma Isa, akkio' lompomi Nakana, “Lazarus, assulukko mae!” 44 Apaji, nassulu' tojemmo anjo tau matea. Ta'roko' iji kaeng kebo' limanna siagang bangkenna, siagang natongko' iji kaeng rupanna. Nakanamo Isa ri tau niaka anjoreng, “La'gasi anjo kaeng pa'roko'na, sollanna akkulle laloasa a'jappa.” 45 Jaimi anjo tu Yahudi battua angkunjungi Maria, a'jari tappa' ri Isa wattunna nacini' ke'nanga anjo apa kajarianga. 46 Mingka nia' tommo siapa are ri ke'nanga mange ampabattui anjo apa le'baka Nagaukang Isa mae ri tu Farisia. 47 Jari a'rappungammi tu Farisia, imang-imang kapalaya, kammayatompa haking-hakinga ri Pangadelang Agamaya. Nakanamo ke'nanga, “Apa musti nigaukang? Anjo taua jai sikali gau'-gau' appakalannasa' Nagaukang! 48 Punna nipa'laloangi tuli appakamma anjo, kale'bakkanna latappa' ngasengi taua ri Ia. Na kale'bakkanna labattumi pamarenta Roma angngancu'-ancuruki Balla'Na Batara siagang sikontu bansata!” 49 Kalase'renna ke'nanga, iamintu niarenga Kayafas, imang lompoa anjo taunga, angkana, “Tena ngaseng apa-apa nuasseng. 50 Maka tanuassengai angkanaya lanri untu' kabajikanna ra'yaka, bajikangangi mate sitaua, naia laancuru' ngaseng sikontu bansaya?” 51 Sikontutojenna, teai battu ri pikkirang kalenna nakkana kamma anjo Kayafas. Mingka salaku imang lompo anjo taunga napabattu la'bi riolomi angkanaya lamatei Isa untu' bansa Yahudia. 52 Siagang teai untu' bansa Yahudi bawang, passangalinna sollanna napa'rappungang siagang napasse're ana'-ana'Na Allata'ala tassia'-siaraka. 53 Anjo alloa appakkaramulami pamarentana tu Yahudia assikongkolo' ero' ambunoi Isa. 54 Lanri kammana, tenamo Napappicinikangi KalenNa Isa ri dallekanna tau jaia ri tangnga-tangngana tu Yahudia. Nabokoimi Yudea, nampa a'lampa mange ri kota niarenga Efraim, a'reppeseka ri parang lompoa. Ammantammi anjoreng siagang ana'-ana' gurunNa. 55 Anjo wattua a'birimmi narapi' allo passua'-suarranna Allo Lompo Paskana tu Yahudia. Jaimi tau battu ri desa-desaya a'lampa mange ri Yerusalem ero' anggaukang pannangkasi kalea, ri tenanapa narapiki anjo allo passua'-suarranga. 56 Naboyami ke'nanga Isa. Na wattunna a'rappungammo ke'nanga lalang ri Balla'Na Batara, nakanamo ke'nanga massing para ia, “Antekamma panggappanu? Tena kapang Nalabattu ri anne passua'-suarranga.” 57 Nakkana kamma anjo ke'nanga, lanri le'ba'mi appasulu' parenta imang-imang kapalaya siagang tu Farisia, angkanaya, inai-nai anciniki pammantanganNa Isa musti napaui sollanna akkulle nijakkala' Isa.
1 Ri annangallonapi nanarapiki Allo Lompona Paskaya, a'lampami Isa mange ri Betania. Anjorengi ammantang Lazarus, anjo le'baka Napattallasa' poleang Isa battu ri kamateanna. 2 Anjoreng, nitoanami Isa ri ke'nanga, na Marta allayani. Ammempomi angnganre Lazarus siagang Isa, kammayatompa siapa are toananna. 3 Battumi Maria angngerang minynya'-minynya' sannaka bau'na, kira-kira nia' sitangnga litere' jaina, sannaka ka'jala'na ballinna. Napatiri'mi anjo minynya'-minynyaka ri bangkenNa Isa, nampa nalu'lu' siagang uu'na. A'jari bau' ngasemmi niara' lalang sibatu balla' napakamma anjo minynya'-minynyaka. 4 Mingka nakanamo kalase'renna ana' gurunNa Isa, iamintu Yudas Iskariot — ambalukangai Isa sallang —, 5 “Angngapa natanibalukanga tallum bilangngang doe' pera' anjo minynya'-minynya' bauka, nampa nipassareang ballinna mae ri tu kasi-asia?” 6 Nakkana kamma anjo Yudas, teai lanri nakamaseanna tu kasi-asia, passangalinna nasaba' palukkaki. Biasai naalle doe' nibolika, nipappirannuanga ri ia niboli'. 7 Mingka Nakanamo Isa, “Boli'mi kamma nappakamma anjo bainea! Nagaukang minne untu' allo lanitarawangKu. 8 Tau kasi-asia tuli lania'ji ri tangnga-tangnganu ngaseng, mingka iNakke tena.” 9 Jai tu Yahudi allangngereki angkanaya niaki Isa ri Betania. Jari a'lampami ke'nanga mange anjoreng. Namange ke'nanga anjoreng tena nalanri Isa bawang, mingka lanri ero'na todong ke'nanga anciniki Lazarus le'baka nipattallasa' poleang battu ri kamateanga. 10 Lanri kammana minjo naero' tommo imang-imang kapalaya ambunoi Lazarus. 11 Nasaba' passabakkang iaminjo Lazarus najaimo tu Yahudi ambokoi ke'nanga nampa tappa' mae ri Isa. 12 Ammukona bari'basa' nalangngere'mi tau jaia battu ero' ansua'-suarri allo Paskaya, angkanaya nia'mi Isa ri aganga ero' mange ri Yerusalem. 13 Angngallemi leko'-leko' kayu ke'nanga nampa mange anruppai Isa. A'rannu-rannumi ke'nanga angkana, “Pujimi Allata'ala! Nibarakkakimi Ia niaka battu lalang arenNa Batara. Nibarakkakimi KaraenNa Israelka!” 14 Anggappami Isa sikayu keledai nampa Nadongkoki. Jari a'rupami apa niaka tattulisi' lalang ri Kittaka angkanaya: 15 “Teako mallakki, tulolonna Sion! Ciniki Karaennu battu, a'dongko' ri sikayu keledai!” 16 Anjo wattua tanaassengapi ana'-ana' gurunNa Isa angkanaya apa ngaseng battuanna anjo kammaya. (Mingka ri wattunna nipakala'biri'mo Isa battu ri kamateanNa, nampami nau'rangi ke'nanga angkanaya anjo apa le'baka nagaukang taua ri Isa le'ba' memammi tattulisi' lalang ri Kittaka anjo apa kajarianga ri Ia.) 17 Sikamma tau niaka hadere' wattunna Nakio' Isa assulu' Lazarus battu ri jeraka, na Napattallasa' poleang battu ri kamateanga, tuli a'jari sa'bimi ri passala' anjo le'baka nacini' ke'nanga. 18 Lanri kammana minjo na'lampamo anjo tau jaia mae ri Isa; nasaba' nalangngere'mi ke'nanga angkanaya Isa anggaukangi anjo gau' appakalannasaka. 19 Jari nakanamo tu Farisia massing para ia, “Tena apa-apa akkulle nigaukang! Cini'mi lari ngasemmi bonena linoa amminawang ri Ia!” 20 Ri alla'na anjo tau jaia a'lampa mange ri Yerusalem ero' assambayang ri wattunna passua'-suarrang, nia' todong siapa are tu Yunani. 21 Battui ke'nanga mae ri Filipus akkuta'nang, angkana, “Punna akkulleja sari'battang, ero' ngasengki' anne assibuntulu' siagang Isa.” (Filipus, tu battu ri Betsaida, ri Galilea.) 22 A'lampami Filipus ampauangi Andreas. Nampa a'lampa ke'nanga sipa'rua ampabattui anjo kabaraka mae ri Isa. 23 Nakanamo Isa ri ke'nanga, “Narapi'mi wattunna lanipakala'biri' Ana' Ma'rupataua. 24 Annaba tojeng-tojengi anne kanangKu: Punna tanilamunga silisereka gandung antama' ri buttaya nampa mate, tuli lammantanna a'jari silisere' anjo gandunga. Mingka punna mate anjo lisere' gandunga, nampami akkulle assare wassele' a'jari jaiangang gandung. 25 Inai-nai angkarimangngi katallassanna, iami latappela' katallassanna. Mingka inai-nai angkabirisi katallassanna ri anne linoa, iami angkarimangngi katallassanna, la'jari katallassang satunggu-tunggua sallang. 26 Inai-nai ero' a'jari palayang mae ri Nakke, musti amminawangi ri Nakke; sollanna kemae-kemae pammantangangKu akkulle tongi nia' palayangKu anrurungangA'. Inai-nai a'jari palayang ri Nakke, iami lanipakala'biri' ri ManggeKu.” 27 “Lussa'minne atingKu: apa musti laKupau kamma-kamma anne? Mustika laKukana, ‘Bapa', paliliA' ri kamma-kammaya anne’? Mingka untu' iaminne passessaya naKunia' battu. 28 Bapa', Kipakala'biri'mi arenTa!” Nia'mo sa'ra kalangngerang battu rate ri langika angkana, “Kupakala'biri'mi, siagang latuli Kupakala'biriki pole.” 29 Nalangngere'mi tau jai niaka anjoreng anjo sa'raya. Nakanamo ke'nanga, “Gunturu' anjo!” Mingka nia' tommo angkana, “Teai! Malaeka' anjo a'bicara mae ri Ia!” 30 Nakanamo Isa ri ke'nanga, “Teai untu' kaparalluangKu nakalangngerang anjo sa'raya, mingka untu' kaparalluannu ngaseng. 31 Kamma-kamma anne wattunnami niadeli linoa; lanitu'gurammi kakoasanna pamarentana anne linoa. 32 Mingka iNakke anne, punna le'ba'Ma' nipakatinggi ri linoa, laKubeso' ngasengi sikontu taua mae ri Nakke.” 33 Nakkana kamma anjo Isa, lanri eroki Napappiassengang antekamma bateNa lamate sallang. 34 Nakanamo anjo tau jaia ri Ia, “Manuru' Kitta' Hukkung niaka ri kambe, anjo Karaeng Mappasalamaka lattallasaki sa'genna satunggu-tungguna. Antekamma Nukkulle angkana musti nipakatinggi anjo Ana' Ma'rupataua ri lino? Inaika anjo Ana' Ma'rupataua?” 35 Appialimi Isa Nakana, “Poro untu' sinampe'ji lania' anjo singaraka ri tangnga-tangnganu ngaseng. Jari a'jappa mako ilalang nia'na ija anjo singaraka, sollanna tena nanatujuko sassang. Inai-nai a'jappa lalang ri sassanga, tanaassengai angkana kemae lanaolo. 36 Tappa' mako ri anjo singaraka, ilalang nia'na ija anjo singaraka ri tangnga-tangnganu, sollannu a'jari ana'-ana' singaraka.” Le'baki akkana kamma anjo Isa, a'lampami ambokoi anjo tampaka, siagang taerokami ampappicinikangi KalenNa ri ke'nanga. 37 Manna pole najaimo gau'-gau' appakalannasa' le'ba' Nagaukang Isa ri dallekanna ngaseng ke'nanga, mingka tena naero' tappa' ke'nanga ri Ia. 38 Jari a'rupami apa le'baka napau Na'bi Yesaya angkanaya, “O Batara, inaika tappa' ri kabara' napabattua ikambe? Inaimi lanipicinikiang kakoasanTa Batara?” 39 Iaminjo saba'na nataeroka tappa' ke'nanga, lanri le'ba'na tommo Na'bi Yesaya angkana: “Nakana Allata'ala, 40 ‘Kupa'jari butai matanna ke'nanga, Kupa'jari ka'doroki atinna; sollanna taccinika matanna, natammahanga pikkiranna. Sollanna taeroka ammotere' mae ri Nakke, nampa Kuballei ngaseng sa'genna baji'.’ ” 41 Na'bicara kamma Na'bi Yesaya, lanri nacini'mi kala'biranNa Isa. Iaminjo nanasero kana anjo passalaka. 42 Mingka manna nakamma, jai tonji tau tappa' mae ri Isa; ba'lalo nia' todong pamarentana tu Yahudia tappa'. Mingka taerokai ke'nanga mangaku silambusu'na angkana tappaki ke'nanga; lanri mallaki ke'nanga ri tu Farisia, gassingka tanipa'biangai ke'nanga antama' ri balla' sambayanga. 43 La'bi nangaiangangi ke'nanga nipalece ri rupataua, naia nipakalompoa ri Allata'ala. 44 A'gorami Isa Nakana, “Inai-nai tappa' ri Nakke, teai Nakke napatappa', mingka Ia assuroa ri Nakke napatappa'. 45 Na inai-nai anciniki KalengKu, nacini' tommi Ia assuroa ri Nakke. 46 BattuA' antama' ri linoa a'jari sanrapang singaraka, sollanna sikontu tau tappaka ri Nakke tena nammantang lalang ri sassanga. 47 Inai-nai ampilangngeri pangngajarangKu, mingka tena nanaturuki, — teai Nakke anghukkungi. Nasaba' tena naKubattu untu' angngadeli anne linoa, passangalinna untu' lampasalamaki. 48 Inai-nai ansorongbokoA' siagang tanapilangngeriai kanangKu, nia'mo angngadeli anjo taua. Iaminjo kana-kanangKu Kupabattua langngadeli sallang ri Allo Kiamaka. 49 Nasaba' teai battu ri ero' KalengKu naKupabattu anjo bicaraya; Manggea assuroA', Iami ampassuroangi ri Nakke apa musti Kupau siagang Kupabattu. 50 NaKuasseng angkanaya Ia anjo Napassuroanga angngerangi katallassang mannannungang. Jari Kupabattumi situru' apa Napangngajarranga Manggea ri Nakke.”
1 Siallo ri tenanapa narapiki Allo Lompona Paskaya, Naassemmi Isa angkanaya narapi'mi wattunna laNabokoi anne linoa nampa ammotere' mae ri ManggeNa. Nakamaseangi tau a'jaria umma'Na ri anne linoa, siagang tuli laNakamaseangi ke'nanga sa'genna kala'busang lino. 2 Angnganre bangngi Isa siagang ana'-ana' gurunNa. Antama'mi Billisika ri atinna siagang cinnana Yudas, ana'na Simon Iskariot, sa'genna ero'mi Yudas ambalukangi Isa. 3 Naassemmi Isa angkanaya le'ba'mi Napassareang ngaseng ManggeNa sikontu koasaya mae ri KalenNa. Na Naasseng todong angkanaya Ia battui ri Allata'ala, nalammotere' poleang mae ri Allata'ala. 4 Jari ammentemmi assungkei jubaNa, nampa Nasikko' handu' aya'Na. 5 Le'baki anjo appanaummi je'ne' ri se'reang katoang, nappakkaramula Nabissai bangkenna ana'-ana' gurunNa. Nampa Nalu'lu' siagang handu' Napasikkoka ri aya'Na. 6 Anrapi'mi ri Simon Petrus. Nakanamo Simon Petrus, “Batara, masakang iKatte ambissaianga' bangkengku?” 7 Appialimi Isa Nakana, “Kamma-kamma anne tanupahangai anne apa Kugaukanga; mingka ri bokopi sallang nampa nupahang!” 8 Nakanamo Petrus, “TeaKi' Batara; tea laloKi' bissai bangkengku!” Mingka appialimi Isa Nakana, “Punna tena naKubissaiangko bangkennu, tena passisambungannu siagang iNakke.” 9 Nakanamo Simon Petrus, “Punna kamma padeng Batara, teaKi' bangkengku bawang Kibissai, mingka limangku siagang ulungku pole Kibissaiang tonga'!” 10 Nakanamo Isa ri Petrus, “Punna le'ba'mo taua a'je'ne', tangkasa' ngasemmi sibatu kale. Tenamo naparallu nibissai pole; passangalinna bangkenna mami nibissai. Tangkasa' mako, mingka tenapa nutangkasa' ngaseng.” ( 11 Anjo wattua Naassemmi Isa angkana inai ri ke'nanga lampasikongkolangi KalenNa. Iaminjo saba' na Nakana, “Tangkasa' mako mingka tenapa nutangkasa' ngaseng.”) 12 Le'baki Nabissai Isa bangkenna ke'nanga, Napakemi ammotere' jubaNa nampa ammempo poleang. Nampa Nakana ri ke'nanga, “Maka nupahang ngasenji anjo apa le'baka Kugaukang ri kau? 13 Nukio' GuruA' siagang Batara. Anjo siratang memangi. 14 Jari punna iNakke Gurunnu siagang Bataranu ambissai bangkennu ngaseng, kamma tomminjo musti ero' tongko massing sibissaiang bangkennu. 15 Kusare ngaseng mako conto, sollanna nanugaukang todong anjo apa Kugaukanga ri kau. 16 Annaba tojengi anne kanangKu: tena olona lala'birangang se'rea ata na karaenna; siagang tena olona lala'birangang se'rea tunisuro na tau assuroa. 17 Nuasseng ngaseng minne; jari mate'ne mako punna nugaukangi. 18 Tena nanataba ngasengko anne apa Kupabattua. Kuassemmi angkanaya inai-nai le'ba' Kupilei. Mingka musti a'rupai apa niaka tattulisi' lalang ri Kittaka, iamintu, ‘Tau Kuaganga sipangnganreang, la'jari musui ri Nakke.’ 19 Kupabattumi anne passalaka ri kau ngaseng, ilalang tenanapa nakajariang. Sollanna punna kajariammo sallang, latappa' ngaseng mako angkanaya iNakke minne nikanaya INAKKE NIA'. 20 Annaba tojengi anne kanangKu: Inai-nai antarimai tau Kusuroa, Inakkemi natarima. Na inai-nai antarimA', natarima tommi anjo assuroa ri Nakke.” 21 Le'ba'na akkana kamma Isa, a'jari dinging-dingimmi nasa'ring pa'mai'Na. Nakanamo, “Annaba tojengi anne kanangKu: Nia' sallang kalase'rennu ampasikongkolangA'.” 22 A'le'ba'-le'basa'mi sicini'-ciniki ana'-ana' gurunNa, siagang lannasa' ngasemmi ke'nanga, lanri tanaassengai ke'nanga angkana inaimo nataba anjo bicaraya. 23 Anjo ana' guru Nakamaseanga Isa niaki ammempo ri sa'rinNa Isa. 24 Nikodemi ri Simon Petrus, sollanna akkuta'nang ri Isa angkana inai anjo nataba kananNa. 25 Jari a'reppese'mi anjo ana' gurua ri Isa, nampa akkuta'nang nakana, “Inai anjo Kipakkanaya, Batara?” 26 Appialimi Isa Nakana, “Anjo tau Kusarea roti, le'baka Kupatittili' naung ri mangkoka, iaminjo taunna.” Angngallemi roti Isa nampa Napatittili' antama' ri mangkoka; nampa Napassareang mae ri Yudas, ana'na Simon Iskariot. 27 Tasalloai le'ba'na natarima Yudas anjo rotia, antama'mi Billisika ri atinna. Nakanamo Isa ri ia, “Gaukammi linta' apa eroka nugaukang.” 28 Manna sitau ri ke'nanga ammempoa angnganre, tena ampahangi angkanaya apa saba'na Nakkana kamma anjo Isa mae ri Yudas. 29 Nia' ri ke'nanga angkapangi, angkanaya nisuroi kutadeng Yudas mange ammalli apa-apa nikaparalluanga untu' anjo passua'-suarranga. Yareka nisuroi kutadeng Yudas assarei sike'de' doe' tu kasi-asia — nasaba' Yudas nisuro anta'galaki doe'na ke'nanga. 30 Le'ba'na natarima Yudas anjo rotia, a'lampa memammi assulu'. Anjo wattua bangngimi. 31 A'lampanamo Yudas, Nakanamo Isa, “Kamma-kamma anne nipakala'biri'mi Ana' Ma'rupataua, siagang nipakala'biri'mi Allata'ala lalang ri KalenNa. 32 Punna nipakala'biri'mo Allata'ala lalang ri KalenNa Ana' Ma'rupataua, lanipakala'biri' tommi ri Allata'ala anjo Ana' Ma'rupataua lalang ri KalenNa todong. Ba'lalo lanipakala'biri'mi linta' ri Allata'ala. 33 Ana'-anakKu ngaseng, tenamo naKulasallo ammantang angngagangko. LanuboyA' sallang, mingka sangkamma le'baka Kupau ri pamarentana tu Yahudia, kamma tomminjo Kupau ri kau ngaseng; angkanaya takkulleako mange ri tampa' laKumangeia. 34 Kusareko parenta beru: Massing sikamaseangko. Sangkamma bateKu angkamaseangko, kamma tomminjo musti sikamaseang ngasengko. 35 Punna massing sikamaseangko, lanaasseng ngasemmi taua angkanaya ana'-ana' gurungKu ngasengko.” 36 Akkuta'nammi Simon Petrus ri Isa, nakana, “O Batara, la'lampa kemaeKi'?” Appialimi Isa Nakana, “Takkulleako amminawang kamma-kamma anne, mange ri tampa' laKumangeia. Ri bokopako lamminawang sallang.” 37 Akkuta'nammi pole Petrus nakana, “Angngapa nakutakkullea amminawang kamma-kamma anne Batara? Kurellakangi kalengku mate untu' iKatte Batara!” 38 Appialimi Isa Nakana, “Maka attojeng-tojengko larella mate untu' iNakke? Baji'mi nanuasseng angkanaya, tenapa nattingkoko janganga sinampe', nanupintallummo angkana tena nanuassengA'!”
1 Nakana Isa ri ke'nanga, “Teako lussaki ri atinnu. Tappa' mako mae ri Allata'ala, siagang tappa' tommako mae ri Nakke. 2 Ri balla'Na ManggeKu jai tampa' pammantangang. ErokkA' a'lampa mange anjoreng ampasadiang ngasengko tampa'. Ka'de' tena nakamma tena oloKu lakkana kamma ri kau ngaseng. 3 Punna le'ba'Ma' a'lampa ampasadiang ngasengko tampa', lammotere' poleamMa' angngalle ngasengko; sollanna kemae-kemae pammantangangKu, lania' ngaseng tommako anjoreng. 4 Tanuassengai oloanga mange anjoreng ri tampa' laKumangeia.” 5 Nakanamo Tomas ri Isa, “O Batara, tanaassengai ikambe angkana la'lampa kemaeKi', jari antekamma lakkulle niasseng oloanga?” 6 Appialimi Isa Nakana, “INakkemi oloanga untu' angngassengi Allata'ala, siagang untu' anggappai katallassanga. Tenanniakka tau akkulle battu mae ri Manggea punna tena nangngolo ri Nakke. 7 Punna nuassemMa', mattantu lanuasseng tommi ManggeKu. Kamma-kamma anne nuassemmi, siagang nucini'mi.” 8 Nakanamo Filipus ri Isa, “O Batara, Kipicinikiang sai bedeng ikambe anjo Manggea, sollanna sukku' pa'mai'na ikambe.” 9 Mingka appialimi Isa Nakana, “Teaimi sipato' salloKu nia' ri tangnga-tangnganu, mingka tenapa nanuassengA' Filipus? Inai-nai le'ba'mo ancinikKa', nacini' tommi antu Manggea. Apa saba'na nukkulle angkana, ‘Kipicinikiang sai bedeng ikambe anjo Manggea?’ 10 Filipus! Maka tena nutappa' angkanaya iNakke asse'reA' ri Manggea, siagang anjo Manggea asse'rei siagang iNakke? Apa Kupaua ri kau teai battu ri ero' KalengKu bawang naKupau. Manggea, tuli niaka asse're siagang KalengKu, Iami anggaukang ngasengi anjo passalaka. 11 Tappa' mako ri Nakke, angkanaya asse'reA' siagang Manggea, kammayatompa asse'rei Manggea siagang iNakke. Yareka kaminang sike'de'na, tappa' mako lanri sikamma anjo apa le'baka nucini' Kugaukang. 12 Annaba tojengi anne kanangKu: Inai-nai tappa' ri Nakke, lanagaukangi apa le'baka Kugaukang, — ba'lalo lanagaukangi apa lompoanganga — nasaba' a'lampA' mae ri Manggea. 13 Na apa-apa mamo nupala' lalang arengKu, laKupa'rupang ngasengko, sollanna nipakala'biri' Manggea lalang ri KalenNa Anaka. 14 Apa-apa nupala' lalang arengKu, laKupa'rupai mae ri kau.” 15 “Punna nukamaseangA', lanugaukangi sikontu parentaKu. 16 LaKupalaki ri Manggea, sollanna Nasareko Pannulung maraeng, eroka ammantang siagang ikau ngaseng sa'genna satunggu-tungguna. 17 Iami RohNa Allata'ala, lampa'nyatayai katojenganNa Allata'ala. Talanitarimayai ri linoa, lanri tanicinikai siagang taniassengai. Mingka ikau ngaseng nuassengi, lanri niaki ammantang ri kau ngaseng, siagang lasse'rei ri kalennu ngaseng. 18 Tena nalaKubokoiko ammantang kale-kalennu, a'jari sanrapang ana' kukanga. LammoterekKa' pole mae ri kau. 19 Sinampe' mami natenamo nakkulle linoa ancinikKa'. Mingka ikau ngaseng lanucinikKa'. Na lanri attallasakKa', iaminjo nuttallasa' ngaseng todong. 20 Punna narapi'mo wattunna anjo alloa, lanuassemmi angkanaya iNakke asse'reA' siagang Manggea, ikau ngaseng asse'reko siagang iNakke, na Kuasse're siagang ikau ngaseng. 21 Inai-nai antarimai sikamma parentaKu nampa nagaukang, iami angkamaseangA'. Inai-nai angkamaseangA', lanikamaseang tongi ri ManggeKu. LaKukamaseangi anjo taua, siagang laKupa'nyatai KalengKu mae ri ia.” 22 Akkuta'nammi Yudas (teai Yudas Iskariot) ri Isa nakana, “O Batara, angngapa naKiero' ampa'nyatai KalenTa ri kambe anne, mingka tena Kipa'nyatai KalenTa mae ri linoa?” 23 Appialimi Isa Nakana, “Inai-nai angkamaseangA', lanaturuki ajarangKu. Lanikamaseangi ri ManggeKu. LaniakKa' siagang Manggea battu mae ri ia, ammantang anrurungangi. 24 Inai-nai tena nakamaseangA', tanaturukiai ajarangKu. Anjo pangngajarang nulangngereka, teai pangngajarang battu ri Nakke, passangalinna pangngajarang battu ri Manggea, assuroa ri Nakke. 25 Yangasenna anjo, Kupaumi ri kau, lalang ri niakKu ija siagang ikau ngaseng. 26 Mingka RohNa Allata'ala, iamintu Pannulung laNasuroa battu Allata'ala lalang arengKu, Iami langngajara' ngasengko lalang sikontua passala'. Iami lampiu'rangiangko sikontu apa le'baka Kupau ri kau. 27 Kubolikang mako kasalewangang. Kasalewangang battua ri KalengKu Kupassareang mae ri kau. Na anjo apa Kupassareanga mae ri kau, tasangkammayai apa napassareanga linoa mae ri kau. Teako lussaki pa'mai'nu, siagang teako mallakki. 28 Le'ba'mi nulangngere' Kukana, ‘La'lampA', mingka lammotere'jA' pole mae ri kau’. Punna nukamaseangA', lasannangi nyawanu punna a'lampA' mange ri Manggea. Nasaba' anjo Manggea, lompoangangi naiNakke. 29 Kupau memammi kamma-kamma anne ri kau ngaseng, lalang ri tenanapa nakajariang. Sollanna punna kajariammo sallang, la'jari tappa' ngaseng mako. 30 Tenamo nalajai dudu Kubicara mae ri kau ngaseng, nasaba' narapi'mi wattunna labattu pamarentana anne linoa. Mingka tena koasana mae ri KalengKu. 31 Mingka musti kajariang ngasengi anjo sikammaya, sollanna nanaasseng anne linoa, angkanaya Kukamaseangi Manggea siagang Kugaukang ngasengi sikontu Naparentakanga mae ri Nakke. Jari umbamo ki'lampa battu anrinni.”
1 Nakanamo pole Isa, “INakkemi sanrapang poko' anggoro' sitojennaya, na ManggeKu a'jari Tummarakaina ri kokonNa. 2 Sikamma tangke-tangke niaka ri Nakke nata'rappoa, lanipelaki. Na sikamma tangke-tangke a'rappoa, lanitangkasi sollanna pila' jai rapponna. 3 Ikau tangkasa' ngaseng mako, lanri pangngajarang le'baka Kupassareang mae ri kau. 4 Tuli asse're mako mae ri Nakke, naKutuli asse're todong siagang ikau ngaseng. Takkulleai appasulu' rappo tangke-tangkea, punna tena natuli asse're mae ri poko'na. Kamma ngaseng tommako anjo; iapa nukkulle a'rappo, punna tuli asse'reko siagang iNakke. 5 INakkemi sanrapang poko' anggoro', na ikau ngasemmi sanrapang tangke-tangkenna. Inai-nai tuli asse're siagang iNakke naKuasse're siagang ia, iami la'rappo jai; nasaba' punna pantarang KalengKuko, tena apa-apa lakkulle nugaukang. 6 Inai-nai tena natuli asse're siagang iNakke, lanipelaki sanrapang anjo tangkea, nampa a'jari kalotoro'. Anjo tangke-tangke kammaya lanipasse'rei, nampa nibuang antama' ri pepeka, nampa nitunu. 7 Punna tuli asse'reko siagang iNakke, siagang punna tuli nupariati pangngajarangKu, pala'mi ri Manggea apa-apa mamo nukaerokia; tena tanugappana anjo apa nupalaka. 8 Punna jai rapponnu, nipakala'biriki ManggeKu; na lanri kammana minjo nu'jari tojeng-tojemmo ana'-ana' gurungKu. 9 Sangkamma bateNa Manggea angkamaseangA', sangkamma tomminjo Kukamaseannu. Paralluko tuli attallasa' salaku tau Kukamaseanga. 10 Punna nugaukang apa-apa Kuparentakanga, ma'nassami angkanaya tuli jarre' mako ri pangngamaseangKu; sangkamma iNakke tuli jarreKa' ri pangngamaseanNa Manggea, lanri Kugaukanna parenta-parentaNa. 11 Kupau ngaseng minne ri kau, sollanna nupariati karannuangKu, siagang na'jari sukku' karannuannu. 12 Iaminne parentaKu: Sikama'-kamaseangko, sangkamma bateKu angkamaseang ngasengko. 13 Tau kaminang angkamaseangai passari'battanganna, iamintu tau eroka ampassareangi tallasa'na untu' passari'battanganna. 14 Ikau ngasemmi antu passari'battangangKu, punna nugaukangi apa Kuparentakanga ri kau. 15 Tenamo naKukio' atako nasaba' se'rea ata tanaassengai apa nagaukanga karaenna. Kukio' sari'battang mako, nasaba' sikontu apa Kulangngereka battu ri Manggea Kupabattui mae ri kau. 16 Teai ikau ngaseng ampileA'. Mingka iNakke ampile ngasengko, siagang assuro ngasengko a'lampa sollannu akkulle a'rappo jai — natalapanraka anjo rapponnu. Na apa-apa mamo nupala' lalang arengKu, laNasareko Manggea. 17 Iaminne parentaKu ri kau: Sikama'-kamaseangko.” 18 “Punna nakabirisiko linoa, u'rangimi angkanaya iNakkemi la'bi riolo nakabirisi anne linoa. 19 Ebara' angkana napatangko anne linoa, lanakamaseangko anne linoa salaku apa-apanna. Mingka le'ba' mako Kupile battu ri anne linoa, jari teai mako patanna linoa. Iaminjo saba'na nanakabirisiko linoa. 20 U'rangi apa le'baka Kupau mae ri kau, angkanaya, ‘Tena nalompoangang se'rea ata na karaenna.’ Punna iNakke nasessaMa' ke'nanga, lanasessa ngaseng tommako ke'nanga. Punna naturuki ke'nanga ajarangKu, lanaturuki tongi ke'nanga ajarannu. 21 Lanagaukang ngasengi anjo kammaya mae ri kau, lanri amminawannu ri Nakke, siagang lanri tenana naassengi ke'nanga angkana inai assuroA'. 22 Ebara' angkana tena naKubattu siagang tenapa naKupabattuang ngaseng anjo sikammaya mae ri ke'nanga, tenaja naladoraka ke'nanga. Mingka kamma-kamma anne tenamo alasanna ke'nanga untu' antongkoki dosana ke'nanga. 23 Inai-nai angkabirisiA', nakabirisi tommi ManggeKu. 24 Ebara' angkana tenapa naKugaukangi apa-apa takkullea nagaukang tau maraenga ri tangnga-tangngana ke'nanga, tenaja nadoraka ke'nanga. Mingka kamma-kamma anne nacini'mi ke'nanga apa Kugaukanga, nanakabirisi ijA' siagang Manggea. 25 Mingka musti kamma memang tommi anjo, sollanna a'rupamo apa tattulisika lalang ri Kitta' Hukkunna ke'nanga, iamintu: ‘NakabirisiA' ke'nanga, natena passabakkang.’ 26 LaKusuroi battu mae ri kau Pannulung battua ri Manggea. Iamintu Roh, lampa'nyatai katojenganNa Allata'ala. Punna battui, Iami la'jari sa'bi mae ri KalengKu. 27 Na ikau ngaseng, musti a'jari sa'bi tongko mae ri KalengKu, lanri ikau ngasemmi angngagangA' sipa'rurungang battu ri pakkaramulanna.
1 Kupau ngasemmi anjo sikammaya mae ri kau, sollanna tena nummono' boko sallang. 2 Lanipasulukko sallang battu ri balla' sambayanga. Nalanarapiki sallang wattunna nania' tau nakana kalenna a'gau' amala' ri Allata'ala punna nabunoko. 3 La'gau' kammai anjo ke'nanga mae ri kau, lanri tenanapa naassengi Manggea, siagang tenanapa naassengA'. 4 Mingka kamma-kamma anne Kupaumi anjo passalaka mae ri kau, sollanna punna kajariammo sallang, akkullei nuu'rangi angkanaya le'ba' memang mako Kupauang.” “Tena naKupauang memangko anne passalaka battu ri uru-uruna, nasaba' nia' ijA' anrurungangko. 5 Mingka kamma-kamma anne la'lampaMa' mange ri Ia assuroa ri Nakke; na tena manna sitau battu ri kau ngaseng akkuta'nang angkanaya kemae laKulampai. 6 Ba'lalo kamma-kamma anne a'jari si'nami atinnu, lanri Kupauna anne passalaka mae ri kau. 7 Mingka apa kammatojeng anne Kupaua mae ri kau: Angkanaya bajikangangi mae ri kau punna a'lampA'; nasaba' punna tena Ku'lampa, talabattuai anjo Pannulunga mae ri kau. Mingka punna a'lampA' laKusuroi battu anjo Pannulunga mae ri kau. 8 Na punna battui, laNapakasingara'mi mae ri linoa battuang sitojeng-tojenna dosaya, battuang sitojeng-tojenna apa annabaya, kammayatompa battuang sitojeng-tojenna hukkungang battua ri Allata'ala. 9 LaNapakasingaraki angkananaya dorakai tau tenaya natappa' ri Nakke; 10 angkanaya iNakkemi tojeng, nasaba' a'lampA' mae ri Manggea, natenamo nalanucinikKa'; 11 kammayatompa appakkaramulami Allata'ala angngadeli, nasaba' Nahukkummi tau anna'galaka koasa ri anne linoa. 12 Jai iji ero' Kupau ri kau ngaseng, mingka kamma-kamma anne tanukulleapi antarimai. 13 Mingka punna battumo RohNa Allata'ala, iamintu ampa'nyatai katojenganNa Allata'ala, laniajara' mako angngassengi sikontu katojenganga. Tena nabattu ri KalenNa bawang nala'bicara, mingka apa-apa le'ba' Nalangngere' iaminjo Nabicara. Kammayatompa laNapauang tongko apa lakajarianga sallang ri allo ri boko. 14 LaNapakala'biriki KalengKu, nasaba' anjo apa Napabattua ri kau, battu ri Nakkei le'ba' Natarima. 15 Sikontu apa niaka ri Manggea iNakke ngaseng pata. Iaminjo saba'na naKukana ri kau angkanaya anjo apa Napabattua RohNa Allata'ala mae ri kau, apa le'ba' Natarima battu ri Nakke.” 16 “Sinampe' dudu mami natakkulleaMa' nucini'; sinampe' dudu maMa' lakkulle nucini'.” 17 Appakkaramulami massing sikuta'nang siapa area ana'-ana' gurunNa Isa, nakana, “Apa battuanna naNakana mae ri katte angkanaya: ‘Sinampe' dudu mami natakkulleaMa' nucini'; sinampe' dudu maMa' lakkulle nucini'’? Apa todong battuanna nangkana, ‘La'lampA' mae ri Manggea’? ” 18 Akkuta'nang mole-molemi ke'nanga angkana, “Apa battuanna anjo, ‘sinampe' dudu mami’? Tanipahangai angkanaya passala' apa anjo Nabicaraya!” 19 Naassengi Isa angkanaya eroki ke'nanga akkuta'nang ri KalenNa. Jari Nakanamo, “Sumpaeng Kukana, ‘Sinampe' dudu mami natakkulleaMa' lanucini'; sinampe' dudu maMa' lakkulle nucini'.’ Iaka anjo passalaka massing nubicara? 20 Tappa' mako angkanaya, langngarrukko siagang lappiraungko, mingka larannui linoa. Lasusai pa'mai'nu, mingka lanipinrai kasusannu a'jari karannuang. 21 Punna nia' sitau baine la'biring ammana', lasusai, nasaba' narapi'mi wattunna lasessa. Mingka kamma lassu'na ana'na, nakaluppaimi pa'risi'na anjo bainea napakamma rannu, lanri lassu'namo anjo ana'na antama' ri lino. 22 Kamma tomminjo ri kau ngaseng: kamma-kamma anne susai nyawanu, mingka lasibuntulu' poleang jaki' sallang, jari la'jari rannumi nyawanu. Na tenanniakka tau lakkulle angngallei anjo karannuanga battu ri nyawanu. 23 Ri anjo alloa sallang, tenamo nulakkuta'nang apa-apa mae ri Nakke. Tappa' mako angkanaya: apa-apa mamo nupala' mae ri Manggea lalang arengKu, laNapassareangi Manggea mae ri kau. 24 Sa'genna kamma-kamma anne tenapa nule'ba' appala' apa-apa lalang arengKu. Appalakko, nalanugappa, sollanna a'jari sukku' karannuannu.” 25 “Yangasenna anne Kubicarai mae ri kau lalang pangngebarang. Mingka lanarapiki sallang wattunna, natenamo Kummake pangngebarang, punna Kubicara Manggea mae ri kau, mingka laKubicarami silambusu'na. 26 Anjo wattua lappala' mako mae ri Manggea lalang arengKu. Parallui nuasseng angkanaya tena nalaKupappalakkangko mae ri Manggea, 27 nasaba' KalenNa Manggea angkamaseangko. Nakamaseangko Manggea, lanri nukamaseangA', siagang tappakko ri Nakke angkanaya battuA' ri Allata'ala. 28 Memang iNakke assalakKu iamintu battu ri Manggea, siagang nia'Ma' battu antama' ri linoa. Mingka kamma-kamma anne laKubokoimi anne linoa, naKuammotere' mae ri Manggea.” 29 Nakanamo ana'-ana' gurunNa Isa, “Kamma-kamma anne a'bicara maKi' silambusu'na Batara; tenamo Kimmake pangngebarang, 30 nanaasseng ikambe angkanaya sikontu apa-apaya Kiasseng ngasengi, Batara. Tena naparallu taua ampakkuta'nangangi ri Katte. Iaminjo saba'na natappa'mo ikambe angkanaya iKatte battuKi' ri Allata'ala.” 31 Appialimi Isa ri ke'nanga, angkana, “Jari tappa' mako kamma-kamma anne? 32 U'rangi! Angkanaya lanarapiki sallang wattunna, ba'lalo narapi'mi wattunna, nulanipasisa'la'-sa'la'. Massing lammoterekko mange ri balla'nu, nanubokoiA' Kale-kalengKu. Mingka tena nalaKale-kalengKu mamo, nasaba' niaki Manggea anrurungangA'. 33 Kupau ngasengi anne mae ri kau, sollannu anggappa salewangang lanri asse're ngasengko siagang iNakke. Lasessako lalang ri linoa. Mingka jarreki pa'mai'nu! Le'ba'mi Kubeta anne linoa!”
1 Le'baki akkana kamma, accongami Isa nai' ri langika nampa Nakana, “Bapa', kamma-kamma anne narapi'mi wattunna. Kipakala'biri'mi AnatTa, sollanna Napakala'biri' tongKi' AnatTa. 2 Le'ba'mi Kipassareang mae ri AnatTa koasaya irateanna sikontu rupataua, sollanna akkulle Nasare katallassang mannannungang sikamma tau Kikellaia nisare. 3 Iaminne katallassang mannannungang; sollanna naassengKi' taua Bapa', angkanaya tena ruanTa Allata'ala sitojennaya. Kammayatompa nanaasseng tongi Isa Almasi, iamintu Kisuroa battu antama' ri lino Bapa'. 4 Kupa'le'ba'mi jama-jamang Kipassuroanga ri Nakke, sollanTa akkulle Kupakala'biri' ilalang lino. 5 Bapa'! Kipakala'biri'Ma' kamma-kamma anne ilalang KalenTa, situru' kala'birang le'baka nipa'jului riolo, ri wattu tenanapa nanipa'jari anne linoa. 6 Le'ba' maKi' Kupappiassengang mae ri sikamma tau battua ri anne lino le'baka Kipassareang ri Nakke. IKatte ngaseng pata anjo ke'nanga, na le'ba' ngasemmo Kipassareang ke'nanga mae ri Nakke. Naturukimi ke'nanga kananTa. 7 Kamma-kamma anne naasseng ngasemmi ke'nanga, angkanaya sikontu apa Kipassareanga ri Nakke, apa-apa battu ngaseng ri Katte. 8 Le'ba'mi Kupabattu ri ke'nanga kana-kana Kipabattua mae ri Nakke, nanatarimamo ke'nanga. Naassemmi ke'nanga, angkanaya iNakke ma'nassa iKatte Kukabattui, siagang tappa'mi ke'nanga angkanaya iKatte assuroA' battu ri linoa. 9 Kupappala' doangangi ke'nanga. Teai untu' linoa naKuappala' doang, passangalinna untu' sikamma tau Kipassareanga mae ri Nakke, nasaba' iKatte pata anjo ke'nanga. 10 Sikontu apa-apa Kupatanga, iKatte todong pata; sikamma apa-apa Kipatanga, iNakke todong pata. NaKunipakala'biri' ri tangnga-tangngana ke'nanga. 11 Kamma-kamma anne battuMa' mae ri Katte. Tenamo naKuammantang ri linoa; mingka ia ke'nanga niaki ilalang lino. IKatte Bapa' Matangkasa'! Kijagai laloi ke'nanga ilalang koasana arenTa, iamintu areng le'baka Kipassareang mae ri Nakke — sollanna a'jari se're ke'nanga, sangkamma iKatte siagang iNakke se're tonjaKi'. 12 Ri wattu niakKu ija assiagang ke'nanga, Kujagaimi ke'nanga ilalang kakoasanna arenTa — iamintu areng Kipassareanga mae ri Nakke. Le'ba'mi Kujagai ke'nanga, sa'genna tena sikali tappela' manna sitau, pantaranganna ia musti tappela' memanga; sollanna ilalang ri kammana anjo na'rupamo apa niaka tattulisi' lalang ri Kittaka. 13 Kamma-kamma anne battuMa' mae ri Katte. Kupau ngasemmi anne ilalang niakKu ija ri lino; sollanna sukku' ngaseng nakasia'na ke'nanga karannuangKu. 14 Le'ba'mi Kupabattu mae ri ke'nanga kananTa; nanikabirisimo ke'nanga ri linoa, lanri teai anne linoa ampatangi ke'nanga, sangkamma iNakke, teai anne linoa ampatangA'. 15 Tena naKupalaki ri Katte sollanna Kiallei ke'nanga battu ri anne linoa, mingka Kupalaki ri Katte sollanna Kijagai ke'nanga battu ri Kaja'dallanga. 16 Sangkammai iNakke teai anne linoa ampatangA', kammatommi anjo ke'nanga teai linoa ampatangi. 17 Kipa'jari ke'nanga ummatTa Kikatutuia lanri katojenganga; na iaminjo kananTa katojenganga. 18 Sangkamma KisuroKu antama' ri lino, kammaminjo naKusuro todong ke'nanga mange ri linoa. 19 Kupassareammi KalengKu, iamintu tu nikatutuinTa, untu' kaparalluanna ke'nanga, sollanna akkulle todong ke'nanga a'jari ummatTa Kikatutuia, lanri katojenganga. 20 Teai untu' ia anne ke'nanga bawang naKuappala' doang. Mingka appala' doang tongA' untu' sikamma tau latappaka ri Nakke lanri kasa'bianna anne ke'nanga. 21 Kupalaki ri Katte Bapa', sollanna a'jari se're ngaseng anne ke'nanga, sangkamma iKatte siagang iNakke yareka iNakke siagang iKatte se're tonjaKi'. Poro asse're ngasengi ke'nanga mae ri Katte, sollanna akkulle tappa' linoa angkana iKatte assuroA' battu ri lino. 22 Le'ba'mi Kusare kala'birang le'baka Kipassareang mae ri Nakke, sollanna a'jari se're ke'nanga, sangkamma iKatte siagang iNakke se're tonjaKi'; 23 asse'reA' siagang ke'nanga, na iKatte siagang iNakke, sollanna a'jari se're tojeng-tojeng ke'nanga. Jari lanaassemmi linoa angkana iKatte assuroA', siagang Kikamaseangi ke'nanga, sangkamma KikamaseangKu. 24 Bapa', erokKa' angkanaya sikamma anjo tau Kipassareanga ri Nakke, lassiagang ngasengA' anjoreng ri tampa' Kupammantangia, sollanna akkulle nacini' ke'nanga kala'birangKu. Iamintu kala'birang Kipassareanga mae ri Nakke, lanri Kikamaseang memamMa' ri tenanapa nanipa'jari anne linoa. 25 Bapa' maadeleka! TanaassengaKi' anne linoa, mingka iNakke KuassengKi'. Na naasseng ngaseng anne taua angkanaya iKatte assuroA' battu ri lino. 26 Le'ba'mi Kupappiassengang arenTa mae ri ke'nanga; na kammaminjo tuli laKugaukang, sollanna tuli napariati ke'nanga pangngamaseanTa mae ri Nakke, naKuasse're siagang ke'nanga.”
1 Le'baki appala' doang kamma anjo, a'lampami Isa siagang ana'-ana' gurunNa anta'leang ri ba'leanna Binanga Kidron. Anjoreng nia' se're koko. Antama'mi Isa siagang ana'-ana' gurunNa ri anjo kokoa. 2 Naassengi Yudas (ampasikongkolangai Isa) anjo tampaka; nasaba' biasami a'rappungang Isa siagang ana'-ana' gurunNa anjoreng. 3 Jari battumi Yudas mange anjoreng, angngerang se're pasukang tantara Roma siagang siapa are pangawala'na Balla'Na Batara. Iaminne ke'nanga nisuroa ri imang-imang kapalaya siagang tu Farisia. Angngerangi ke'nanga sanjata, lampu, siagang sulo. 4 Naassemmi Isa sikontu apa lakajarianga ri KalenNa. Jari Nareppesimi anjo taua ngaseng, nampa akkuta'nang Nakana, “Inai ngaseng nuboya?” 5 Appialimi ke'nanga angkana, “Isa, battua ri Nazaret.” Nakanamo Isa, “INakkemi anne.” Niaki Yudas anjoreng ammenteng siagang ke'nanga. 6 Ri wattunna Nakana Isa ri ke'nanga, angkana, “INakkemi anne,” ammono'boko ngasemmi ke'nanga, nampa tu'guru' naung ri buttaya. 7 Sikalipi pole akkuta'nang Isa ri ke'nanga Nakana, “Inai ngaseng nuboya?” Appialimi ke'nanga angkana, “Isa, battua ri Nazaret.” 8 Nakanamo Isa, “Le'ba' mako Kupauang angkana iNakke minne. Na punna iNakke memantong nuboya, suromi anne ke'nanga maraenganga a'lampa.” ( 9 Lanri akkana kammana anjo Isa, a'rupami apa le'baka Napau pirangalloang angkana: “Bapa', sikamma tau Kipassareanga ri Nakke, manna sitau talaniakka tappela'.”) 10 Anjo wattua angngerangi pa'dang Simon Petrus. Nabi'bu'mi pa'danna nampa nate'ba' anjo tu nasuroa imang lompoa, sa'genna kaccili' tolinna ri kananga. Anjo tunisuroa Malkus arenna. 11 Nakanamo Isa ri Petrus, “Poterangi antama' ri banoanna antu pa'dannu! Apa nakana pikkirannu talaKutarimayai passessa Napassareanga Manggea mae ri Nakke?” 12 Nijakkala'mi siagang nisikko'mi Isa. Ia battua anjakkalaki Isa iamintu surudadu Roma nipimpinga ri komandanna, siagang pangawala'-pangawala'na tu Yahudia. 13 Uru-uruna nierangi Isa ri ke'nanga mange andallekang ri Hanas, iamintu matoang bura'nena Kayafas. Na anjo Kayafas, iami a'jari imang lompo anjo taunga. 14 Siagang iami le'ba' ampakaingaki pamarentana ngaseng tu Yahudia angkanaya bajikangangi se'rea tau mate untu' sikontu bansaya. 15 A'lampami Simon Petrus siagang sitau ana' guru maraengang amminawang boko ri Isa. Anjo ana' guru maraenganga niassengi ri imang lompoa; jari amminawammi antama' siagang Isa ri paranglakkenna balla' lompona imang lompoa. 16 Mingka Petrus, ammantanji attayang pantarang ri pakke'buka. A'lampami anjo ana' guru maraenganga mange a'bicara siagang palayang baine a'jagaya anjoreng ri pakke'buka, nampa naerang todong Petrus antama'. 17 Nakanamo anjo baine pajaga timunganga ri Petrus, “He, sai ikau kalase'renna tongko ana' gurunna anjo taua?” Appialimi Petrus nakana, “Teai Nakke.” 18 Anjo wattua sanna' dinginna pakkasiaka. Jari apparinrami pepe' palayanga siagang pangawalaka ngaseng, nampa a'binrung ke'nanga. A'lampa tommi Petrus mange anjoreng ero' a'binrung siagang ke'nanga. 19 Nikuta'nammi Isa ri imang lompoa ri passala'na ana'-ana' gurunNa siagang pangngajaranNa. 20 Appialimi Isa Nakana, “Tuli silambusu'na bateKu a'bicara ri dallekanna tau jaia. Tuli angngajarakKa' ri sikamma balla' sambayanga siagang Balla'Na Allata'ala, tampa' biasaya napa'rappungi tu Yahudia. Tena le'bakai nia' apa-apa Kupau cokko-cokko. 21 Jari angngapa nanikuta'nangA'? Iamonjo ke'nanga kuta'nang, nasaba' nalangngere'mi ke'nanga apa Kupangngajarranga. Tantu naassemmi ke'nanga apa le'baka Kupau.” 22 Ri wattunna akkana kamma anjo Isa, nia'mo sitau pangawala' antempaka'rangi siagang nakana, “Nubarani kamma akkana kammanjo mae ri imang lompoa!” 23 Appialimi Isa Nakana, “Punna nia' apa-apa sala Kupau, paumi anrinni angkana apa salana! Mingka punna annaba memang todong anjo Kupaua, apa saba'na nanutempaka'rangA'?” 24 Le'baki anjo nasuromi Hanas taua angngerangi Isa siagang tassikko' limanNa mae ri Imang Lompoa iamintu Kayafas. 25 Anjo wattua nia' iji Simon Petrus ammenteng a'binrung anjoreng ri tampa' napa'binrungia sumpaeng. Nakanamo taua ri ia, “Sai ana' gurunna tongko anjo Taua?” Assassala'mi Petrus nakana, “Teai nakke!” 26 Nia' sitau suro-surona imang lompoa, iamintu bijanna anjo tau le'baka nikaccili' pa'dang tolinna ri Petrus, angkana ri Petrus, “Kucinikko lalang ri kokoa siagang anjo Taua!” 27 Assassala'mi pole Petrus, nakana, “Tena,” — na sitabang anjo wattua attingkokomi janganga —. 28 Ri bari'basa' dudua naerammi ke'nanga Isa battu ri balla'na Kayafas mange ri balla' lompona guburnurka. Sikamma tu Yahudia tena nantama' ri balla' lompoa, sollanna tena na'jari ra'masa' situru' ajarang agamana ke'nanga. Nasaba' eroki ke'nanga amminawang angnganre Paska. 29 Jari a'lampami assulu' Pilatus mange ri ke'nanga nampa akkuta'nang nakana, “Apa nutuntukangi anne Taua?” 30 Appialimi ke'nanga angkana, “Ebara' angkana tena salanna antu Taua, tena olona lanierang mae ri katte.” 31 Nakanamo Pilatus ri ke'nanga, “Allemi anne Taua nampa nuadeli situru' undang-undanna agamanu!” Mingka appialimi anjo tu Yahudia, angkana, “Tena nanikellaiki' ikambe anghukkung matei taua.” ( 32 Kajariammi anne kammaya, sollanna a'rupamo apa le'baka Napau Isa, ri passala' antekamma bateNa lamate.) 33 Ammotere'mi antama' Pilatus ri balla' lompoa nanakio' Isa, nampa nakuta'nang angkana, “Apaka iKaumi Karaeng tu Yahudia?” 34 Appialimi Isa Nakana, “Maka battu ri katte tonji anne pakkuta'nanga, yareka nia' tau maraeng le'ba' ampauangki' passala'na KalengKu?” 35 Appialimi Pilatus nakana, “Bara' nukana tu Yahudia'? BansaNu tonji ampassareangKo mae ri nakke siagang imang-imang kapalaya. Apa kutadeng le'ba' Nugaukang?” 36 Nakanamo Isa, “INakke kakaraengangKu tena nabattu anrinni ri linoa. Ebara' angkana battu anrinni ri linoa kakaraengangKu, ma'nassa langngewai taungKu sollanna tena nanipassareangA' mae ri sikamma pamarentana tu Yahudia. Mingka tena memang nabattu anrinni ri linoa kakaraengangKu!” 37 Akkuta'nammi Pilatus nakana, “Jari punna kamma, KaraengKo padeng?” Appialimi Isa Nakana, “Nupaumi angkanaya iNakke anne karaengA'. Se'reji pattujunna naKunilassukang siagang naKubattu ri anne linoa, iamintu ampabattui katojenganga. Inai-nai battu ri anjo katojenganga iami lampilangngeriA'.” 38 Akkuta'nammi Pilatus nakana, “Apa battuanna anjo katojenganga?” Assulukammi pole Pilatus nampa nakana ri tu Yahudia, “Tena kugappa kasalanna anne Taua, manna sirupa. 39 Mingka situru' kabiasannu ngaseng, tuli nia' se're tunitahang kulappassang ri Allo Lompo Paskaya. Maka ero' ngasenjako punna kulappassangi anne karaenna tu Yahudia untu' ikau ngaseng?” 40 Appialimi siagang ammarrang-marrammi ke'nanga, angkana, “Tena, teaki' Ia kilappassang, mingka Barabas!” (Anjo Barabas, iami paella'.)
1 Le'baki anjo antama'mi Pilatus nampa nasuro taua ancamboki Isa. 2 Appare'mi surudadua se're songko' battu ri tangke-tangke kayu akkatintinga, nampa napataba irate ri ulunNa Isa. Le'baki anjo napipakeimi Isa juba cura' lame butung. 3 Nampa a'mole-mole ke'nanga battu ri dallekanNa Isa angkana, “La'bu lalo umurutTa, karaenna tu Yahudia!” Nampa natempaka'rang ke'nanga Isa. 4 Le'baki anjo assulukammi pole Pilatus nampa nakana ri anjo tau jaia, “Ciniki! Kuerangi anne Taua mae ri dallekannu ngaseng, sollanna nuasseng angkanaya tena kugappa kasalanNa manna sirupa.” 5 Assulu'mi Isa, ammake songko' akkatinting siagang juba cura' lame butung. Nakanamo Pilatus ri ke'nanga, “Cini'mi anjo Taua.” 6 Ri wattunna nacini' imang-imang kapalaya siagang pangawalaka ngaseng anjo Isa, ammarrang-marrammi ke'nanga, angkana, “Allei salli'! Allei salli'!” Nakanamo Pilatus ri ke'nanga, “Allemi anne Taua nampa ikau tommo ansalliki. Nasaba' inakke tena kugappa kasalanNa manna sirupa.” 7 Appialimi tu Yahudia angkana, “Situru' undang-undang niaka ri kambe, musti nihukkung matei antu Taua, nasaba' Nakanai KalenNa Ana'Na Allata'ala.” 8 Nalangngere'na Pilatus akkana kamma ke'nanga, pila' a'jari malla'mi pole. 9 Jari ammotere'mi pole antama' ri balla' lompoa. Na ri wattunna nierammo Isa antama', akkuta'nammi Pilatus ri Ia, nakana, “Battu kemae assala'Nu?” Mingka tappialiai Isa. 10 Jari nakanamo Pilatus, “TeaKo a'bicara siagang inakke? Parallui Nuasseng angkanaya makoasa' allappassangKo, siagang makoasa tonga' ansallikKo!” 11 Appialimi Isa Nakana, “Punna taNasareako' Allata'ala anjo koasanu, tena sikali koasanu mae ri Nakke. Lanri kammana, lompoangangi dosana tau ampassareangai KalengKu mae ri kau, kala ikau.” 12 Nalangngere'na Pilatus akkana kamma Isa, a'boyami cara antekamma nakkulle nalappassang Isa. Mingka ammarrang-marrammi tu Yahudia, angkana, “Punna kilappassangi antu Taua, teaiki' aganna Karaenga! Inai-nai nakana kalenna karaeng, iami musunna Karaenga!” 13 Nalangngere'na Pilatus kana-kana kammaya anjo, naerammi Isa assulu' nampa ammempo ri kadera pangadelanga, ri tampa' niarenga Dapara' Batu. (Lalang bicara Ibrani niarengi Gabata.) 14 Anjo wattua a'birimmi tette' sampulo anrua ri tangngana alloa, iamintu allo rioloanganna Allo Lompo Paskaya. Nakanamo Pilatus ri yangaseng anjo taua, “Anne karaennu.” 15 Ammarrang-marrammi ke'nanga, angkana, “Bunoi! Bunoi! Allei Salli'!” Akkuta'nammi Pilatus nakana, “Maka musti inakke ansalliki karaennu?” Appialimi imang-imang kapalaya angkana, “Tena ruanna karaeng pantaranganna Karaenna ikambe!” 16 Jari napassareammi Pilatus mae ri ke'nanga Isa sollanna nisalli' ri ke'nanga. Niallemi Isa ri ke'nanga, nampa nierang a'lampa. 17 Assulu'mi Isa ampisangi kayu salli'Na, Naerang mange ri tampa' niarenga “Tampa' Tangkora'”. (Lalang bicara Ibrani nikana Golgota.) 18 Anjoremmi nisalli' Isa. Nia' todong rua tau maraeng Naagang nisalli'; sitau nisalli' ri sa'ri kairinNa, na sitau ri sa'ri kananNa, na Isa ammantang ri tangnga nisalli'. 19 Ri kayu salli'Na Isa nia' nasuro tannang Pilatus tulisang angkanaya: “Isa battu ri Nazaret, Karaenna Tu Yahudia”. 20 Jai tu Yahudi ambacai anjo tulisanga, nasaba' anjo tampaka tena nabella battu ri kotaya. Anjo tulisanga nitulisiki lalang bicara Ibrani, bicara Lating, siagang bicara Yunani. 21 Nakanamo imang-imang kapalaya ri Pilatus, “Teaki' tulisiki angkana, ‘Karaenna tu Yahudia’, mingka tulisiki angkana, ‘Anne Taua Nakana KalenNa, iNakke Karaenna tu Yahudia.’ ” 22 Mingka appialimi Pilatus nakana, “Apa le'baka kutulisi', boli'mi kamma anjo tattulisi'.” 23 Le'baki nisalli' Isa ri surudadua, nialleammi ri ke'nanga care-careNa. Anjo care-carea nabage appaki ke'nanga: se're-se're tau anggappai sibageang. Nampa naalle todong jubaNa. Anjo jubaya tena nanijaiki — nitannunji battu irate sa'genna naung. 24 Nakanamo anjo surudadua para ia, “Tea' mako polong-polongi anne jubaya. Umbamo naniloterei nanipattantu angkana inai anggappai.” Kajariammi anjo passalaka sollanna a'rupamo apa tattulisika lalang ri Kittaka angkanaya: “Nabage-bagei ke'nanga care-careKu nanaloterei jubaKu.” Na kamma tojemmi anjo nagaukanga surudadua. 25 Tabellayai ri salli'Na Isa, niaki ammenteng amma'Na Isa, sari'battang bainena amma'Na, Maria bainenna Kleopas, siagang Maria Magdalena. 26 Nacini'Na Isa amma'Na siagang anjo ana' gurunNa Nakamaseanga ammenteng anjoreng, Nakanamo ri amma'Na, “Amma', anjo mae anatta.” 27 Nampa Nakana Isa ri anjo ana' guru Nakamaseanga, “Anjo mae amma'nu.” Pakkaramula anjo wattua natarimami amma'Na Isa ammantang ri balla'na anjo ana' guru Nakamaseanga Isa. 28 Naassemmi Isa angkanaya kamma-kamma anne le'ba' ngasemmi, na sollanna a'rupamo apa tattulisika lalang ri Kittaka, Nakanamo, “TurereA'.” 29 Anjoreng ri tampaka nia' se're mangko' rassia anggoro' kacci. Angngallemi taua se're bunga batu karang nampa napantama' ri je'ne' anggoroka. Nampa nipataba anjo bunga batu karanga ri se'rea passukki', nanipajonjo mae ri bawaNa Isa. 30 Nalepa'mi Isa anjo anggoroka nampa Nakana, “Le'ba'mi!” Nampa a'dundu Isa, natappu'mo nyawaNa. 31 Taerokai pamarentana tu Yahudia amboliki ammantang ta'gentung maya'na anjo tau le'baka nisalli' ri allo Pammari-marianga. La'biangampa pole nasaba' anjo allo Pammari-marianga sitabang tongi Allo Lompona Allo Pammari-marianga. Lanri anjo nisalli'Na Isa tenapa narapiki allo Pammari-marianga, appala' paramisimi tu Yahudia mae ri Pilatus sollanna akkulle natepo' ke'nanga bangkenna anjo tau le'baka nisalli', siagang nipanaung maya'na battu rate ri anjo kayu sallika. 32 Jari a'lampami anjo surudadua mange antepoki rolong bangkenna anjo tau ruaya, Naaganga Isa nisalli'. 33 Ri wattunna battu ke'nanga ri Isa, nacini'mi ke'nanga angkana matemi Isa. Jari tanatepokami ke'nanga bangkenNa Isa. 34 Mingka nia'mo kalase'renna anjo surudadua anto'doki poke sa'rinNa Isa, sa'genna assulu'mi ceraka accampuru' je'ne'. 35 Tau kalennaya anciniki anjo apa kajarianga, iami angkabarrangi anjo passalaka, sollannu tappa' ngaseng todong. Na kontutojeng anjo apa nakasa'bianga, siagang naassengi angkanaya kontutojengi anjo passalaka. 36 Kajariammi anjo passalaka, sollanna a'rupamo apa niaka tattulisi' lalang ri Kittaka, angkanaya, “Tena manna se're lanitepo' bukunNa”. 37 Nia' pole tattulisi' lalang ri Kittaka, angkanaya, “Lanaciniki ke'nanga anjo Tau le'baka natobo'”. 38 Le'baki anjo appala' paramisimi Yusuf battua ri Arimatea mae ri Pilatus, sollanna akkulle naalle maya'Na Isa. (Anne Yusuf, ana' gurunNa todong Isa mingka nacokkoi, lanri mallaki ri pamarentana tu Yahudia.) Nisaremi paramisi ri Pilatus. Jari a'lampami Yusuf angngallei maya'Na Isa. 39 A'lampa tommi Nikodemus le'baka battu ri wattunna bangngi mae ri Isa. Angngerammi Nikodemus rampa-rampa, kammaya campurang minynya'-minynya' bau', siagang minynya'-minynya' bau' cendana — kira-kira nia' tallumpulo kilogarang jaina battala'na. 40 Sipa'rua-ruami anjo taua angngallei maya'Na Isa, nampa naroko' kaeng anjo mayaka, napasiroko' siagang anjo campurang minynya'-minynya' bauka, situru' ada' panguburanna tu Yahudia. 41 Anjoreng ri tampa'Na Isa nisalli' nia' se're koko. Lalang anjo ri kokoa nia' se're jera' beru nipare' tenayapa nale'ba' nipake antarawangi taua. 42 Nasaba' ambaniji anjo jeraka, siagang la'birimmi antama' allo Pammari-marianga, anjoremmi natarawang ke'nanga Isa.
1 Ri bari'basa'na allo Minggua, ri wattu sassanna ija, a'lampami Maria Magdalena mange ri jeraka. Mingka ta'lesammi nacini' batu pattongko'na anjo jeraka. 2 Jari larimi mange amboyai Simon Petrus siagang anjo ana' guru Nakamaseanga Isa, nampa nakana ri ke'nanga, “Nia' le'ba' angngallei maya'Na Batara, natakuassengai angkana kemaei naboli'.” 3 A'lampami Petrus siagang anjo ana' guru Nakamaseanga Isa mange ri jeraka. 4 Larimi ke'nanga sipa'rua, mingka lintakangangi lari anjo ana' guru Nakamaseanga Isa. Sa'genna rioloangangi battu mae ri jeraka. 5 Attoa'mi antama' ri jeraka nanacini' kaeng pa'rokoka ta'dongko' lalang ri jeraka; mingka tantamayai. 6 Amminawang bokomi Simon Petrus; na ri wattunna battu, tulusu'mi antama' ri jeraka. Nacini'mi anjo kaeng pa'rokoka ta'dongko'. 7 Mingka kaeng nipasikkoka ri ulunNa Isa tambaniai anjoreng passangalinna tassa'laki pammantanganna, ta'lappa' baji'-baji'. 8 Antama' tommi anjo ana' guru se'reanga. Nacini'mi anjo apa kajarianga, na'jari tappa'mo. ( 9 Sa'genna anjo wattua tenapa napahangi ke'nanga apa niaka tattulisi' lalang ri Kittaka angkanaya lattallasa' poleangi Isa battu ri kamateanga.) 10 Le'baki anjo ammotere'mi anjo ana'-ana' gurunNa Isa. 11 Ammentemmi Maria Magdalena ri dallekanna anjo jeraka angngarru'. Lalang angngarru'na, attoaki antama' ri jeraka. 12 Apaji nania'mo nacini' rua malaeka' ammakeang kebo'. Ammempoi anjo ruaya malaeka' ri bate pammantanganna maya'Na Isa, se're ri tuju ulunNa, nase're ri tuju bangkenNa. 13 Akkuta'nammi anjo malaekaka nakana, “Angngapa nakiangngarru' ibu'?” Appialimi Maria nakana, “Nia' le'ba' angngallei maya'Na Batara, natakuassengai angkana kemae naboli'.” 14 Le'baki akkana kamma, assailemi mae ri boko. Apaji nania'mo nacini' Isa ammenteng ri bokona. Mingka tanaassengai angkana Isa anjo nacinika. 15 Akkuta'nammi Isa ri ia Nakana, “Ibu', angngapa nakiangngarru'? Inai kiboya?” Nakapangi Maria angkana pajama koko anjo taua. Jari nakanamo, “Bapa', punna ikatte ampaletteki anjo mayaka, kitulunga' nakipauanga' angkana kemae kiboli', sollanna akkulle mae kualle.” 16 Nakanamo Isa ri ia, “Maria!” Assailemi Maria mae ri Isa, nampa nakana lalang bicara Ibrani, “Rabbuni!” (Battuanna “Guru”.) 17 Nakanamo Isa ri ia, “Teako ta'galakiA', nasaba' tenapa naKunai' ri Manggea. Mingka a'lampamako mae ri sikamma sari'battangKu, siagang pauangi ke'nanga angkanaya kamma-kamma anne nai'Ma' ri ManggeKu siagang Manggenu todong, ri Allata'alaku siagang Allata'alanu todong.” 18 Jari a'lampami Maria mange ampauangi ana'-ana' gurunNa Isa, angkanaya le'ba'mi nacini' Batara, siagang Batara le'ba' ampauang ngasengi anjo passalaka. 19 Ri ia memang anjo allo Minggua, ri wattunna bangngimo, a'rappungammi ana'-ana' gurunNa Isa ri se'reang balla'. Nijoli ngasengi pakke'buka, lanri mallaki ke'nanga ri pamarentana tu Yahudia. Ti'ring nia'mi Isa ammumba, siagang ammenteng ri tangnga-tangngana ke'nanga, na Nakana, “Salamakko siagang salewangang ngasengko.” 20 Le'baki akkana kamma, Napappicinikammi limanNa siagang sa'rinNa mae ri ke'nanga. Sanna' ngasemmi rannuna ke'nanga ri wattunna nacini' Batara. 21 Sikalipa pole Nakana Isa ri ke'nanga, “Salamakko siagang salewangang ngasengko. Sangkamma iNakke NasuroA' Manggea, sangkamma tomminjo naKusuro ngaseng tongko.” 22 Nampa Natui' ke'nanga na Nakana, “Tarimami RohNa Allata'ala. 23 Punna nupammopporang dosana se'rea tau, nipammopporang tommi ri Allata'ala. Punna tanupammopporanga dosana se'rea tau tena todong nanipammopporangi ri Allata'ala.” 24 Nia' kalase'renna ri anjo ana' guru sampuloa anrua, iamintu Tomas, (nigallaraka i “Kambara'”), tenai ri wattunna Napappicinikang KalenNa Isa. 25 Nakanamo ana'-ana' gurunNa Isa maraenganga ri Tomas, “Ikambe le'ba'mi nicini' Batara!” Mingka appialimi Tomas nakana, “Punna takucinikapa bate pakua ri limanNa, natenapa nakujamai anjo bokka'Na le'baka nipaku, siagang tenapa kujappuki bokka'Na ri sa'rinNa, tena sikali kutappa'.” 26 Sidaminggu ribokoanganna, nia'mi pole a'rappungang anjo ana'-ana' gurunNa Isa ri anjo tampaka. Anjo wattua nia' tommi Tomas. Ta'joli ngasengi pakke'buka. Mingka nia'mi battu ammumba Isa siagang ammenteng ri tangnga-tangngana ke'nanga, na Nakana, “Salamakko siagang salewangang ngasengko.” 27 Nampa Nakana Isa ri Tomas, “Cini'mi anne limangKu siagang jamami. Pamaemi limannu nanujama sa'ringKu. Tea' mako bata-batai, mingka tappa' mako!” 28 Nakanamo Tomas ri Isa, “O Bataraku, siagang Allata'alaku!” 29 Nakanamo Isa ri ia, “Sai tappa' mako nasaba' nucini'Ma'? Mate'nei tau tappaka, mangKu tanaciniKa!” 30 Jai iji gau'-gau' appakalannasa' maraeng, le'baka Nagaukang Isa ri dallekanna ana'-ana' gurunNa. Mingka tena nanitulisiki lalang anrinni ri kittaka. 31 Mingka nitulisi'mi sikammaya anne niaka nitulisi', sollannu tappa' ngaseng angkanaya Isa Iami Karaeng Mappasalama', Ana'Na Allata'ala; na lanri tappa'nu ri Ia, nanugappamo katallassanga.
1 Le'baki anjo Napappicinikammi pole KalenNa Isa ri ana'-ana' gurunNa, ri wattunna nia' ana'-ana' gurunNa ri Tamparang Tiberias. Kammaminne kajarianna: 2 Nia' se're allo na'rappungang Simon Petrus, Tomas nigallaraka i Kambara', Natanael battua ri Kana ri Galilea, ana'-ana'na Zebedeus, siagang rua ana' gurunNa Isa maraenganga. 3 Nakanamo Simon Petrus ri aganna maraenga, “Erokka' a'lampa mange a'boya juku'.” Nakanamo aganna maraenga, “Lamminawang tongki'.” A'lampami ke'nanga mange ri biseanga. Mingka sa'genna sipattang bujuru' tanggappayai ke'nanga manna sikayu juku'. 4 Ri wattunna appakkaramulamo ammumba alloa, nia'mi Isa ammenteng ri biring tamparanga. Mingka tanaassengai ke'nanga angkanaya Isa anjo niaka ammenteng. 5 Nakanamo Isa ri ke'nanga, “Ana'-ana', nia' juku'nu?” Appialimi ke'nanga angkana, “Tena.” 6 Nakanamo Isa ri ke'nanga, “Buangi jalanu mae ri sa'ri kananna biseanga, nanuanggappa juku'.” Nabuammi jalana ke'nanga mange anjoreng. Mingka tanakulleami ke'nanga ambesoki ammotere' anjo jalaya, nasaba' sanna' jaina juku' lalang. 7 Nakanamo anjo ana' guru Nakamaseanga Isa ri Petrus, “Batara anjo!” Nalangngere'na Simon Petrus angkanaya Batara anjo, napakemi bajunna (nasaba' tena na'baju anjo wattua) nampa a'lumpa' naung ri je'neka. 8 Amminawang ngaseng tommi a'biseang ana'-ana' guru maraenga mae ri biring tamparanga, nanabeso' todong anjo jala rassia juku'. Tena nasiapa bellana ke'nanga battu ri bontoa. Kira-kira sibilangnganji metere' bellana. 9 Ri wattunna naung ke'nanga battu ri biseanga, nia'mo nacini' ke'nanga bara pepe'. Irate ri anjo bara pepeka nia' ta'dongko' juku' siagang roti. 10 Nakanamo Isa ri ke'nanga, “Angngerang sako pirang kayuang juku' beru nijakkalaka.” 11 Nai'mi Petrus ri biseanga, nampa nare'resang jalana mae ri bontoa. Rassi juku' anjo jalaya, nasanna' ngaseng lompona. Nia' sibilangngang limampulo antallu kayunna anjo jukuka. Mingka manna nakamma jaina anjo jukuka, tena tonja nasinre' anjo jalaya. 12 Nakanamo Isa ri ke'nanga, “Maeko nakiangnganre.” Tenanniakka manna sitau ri anjo ana'-ana' gurua barani akkuta'nang angkana, “InaiKi' antu Bapa'?” Nasaba' naassemmi ke'nanga angkanaya Batara anjo. 13 A'reppese'mi Isa mae ri ke'nanga. Naallemi anjo rotia naNapassareang mae ri ke'nanga. Kamma tomminjo, Napassareang tommi anjo jukuka mae ri ke'nanga. 14 Iaminjo maka pintallunna Napappicinikang KalenNa Isa mae ri ana'-ana' gurunNa baku' attallasa'namo poleang battu ri kamateanga. 15 Le'baki ke'nanga angnganre, Nakanamo Isa ri Simon Petrus, “Simon, ana'na Yona, maka lompoangangi pangngamaseannu mae ri Nakke na pangngamaseanna anne ke'nanga mae ri Nakke?” Appialimi Petrus nakana, “Kammatojengi Batara, Kiassengi angkanaya kukamaseangKi' Batara.” Nakanamo Isa ri ia, “Parakaimi ana'-ana' gimbalakKu.” 16 Akkuta'nammi pole Isa maka pinruanna ri ia, Nakana, “Simon, ana'na Yona, maka nukamaseangA'?” Appialimi Petrus nakana, “Kammatojengi Batara, Kiassengi angkanaya kukamaseangKi' Batara.” Nakanamo Isa ri ia, “Parakaimi gimbalakKu ngaseng.” 17 Akkuta'nammi pole Isa makapintallunna ri ia, Nakana, “Simon, ana'na Yona, maka nukamaseangA'?” A'jari si'nami atinna Petrus, lanri pintallummi akkuta'nang Isa ri ia. Jari appialimi pole Petrus nakana, “O Batara, sikamma apa-apaya Kiasseng ngasengi Batara. Kiassengi angkanaya kukamaseangKi' Batara!” Nakanamo pole Isa ri ia, “Parakaimi gimbalakKu ngaseng. 18 Annaba sikali anne kanangKu: Angkanaya ri wattunnu rungka ija, kalennu ansikkoki aya'nu, siagang a'lampako ri kere-keremae situru' ero'nu. Mingka punna toa mako sallang, lanupajonjomi limannu, na tau maraeng ansikkokko, nampa naerangko a'lampa mae ri tampa' tanukaerokia.” 19 (Lalang akkana kammana anjo Isa, Napaumi angkanaya antekamma sallang batena lamate Petrus lanri ero'na ampakala'biriki Allata'ala.) Le'baki anjo, Nakanamo Isa ri Petrus, “Amminawang mako ri Nakke!” 20 Ri wattunna assaile Petrus, nacini'mi anjo ana' guru Nakamaseanga Isa nia' ri bokona. (Iaminne anjo ana' guru a'reppeseka ri Isa ri wattunna angnganre bangngi ke'nanga siagang akkuta'nanga ri Isa angkana, “O Batara inai ero' lampasikongkolangKi' Batara?”) 21 Nacini'na anjo ana' guru Nakamaseanga Isa, akkuta'nammi Petrus ri Isa, nakana, “Antekamma anne taua?” 22 Appialimi Isa Nakana, “Ebara' angkana erokKa' natuli attallasa'na sa'gengKu battu poleang sallang, anjo teai urusannu. Mingka ikau, amminawang mako ri Nakke!” 23 Jari tassiara'mi anjo kabaraka ri ana'-ana' gurunNa ngaseng Isa, angkanaya talamateai anjo ana' gurua. Na sikontutojenna tena na Nakana Isa angkanaya talamateai anjo ana' gurua passangalinna Nakananaja: “Ebara' angkana erokKa' natuli attallasa' sa'gengKu battu, anjo teai urusannu.” 24 Iaminjo ana' gurua assarea kasa'biang ri passala'na ngaseng anne apa-apa kajarianga. Iatommi antulisiki anjo kasa'bianga. Na niasseng angkanaya kontutojengi anjo apa napaua. 25 Jai iji apa-apa maraeng Nagaukanga Isa. Mingka ebara' angkana lanitulisi' ngasengi anjo tasse're-se're, kupikkiriki angkanaya manna sibatu anne linoa tena tompa nalaganna' lanipammonei sikontu anjo kittaka punna lanitulisi' ngasengi anjo passalaka.
1 Natarimai Teofilus, mabaji' pa'maika, Le'ba'mi kupakasingara' lalang ri kitta' makase'rea, sikamma apa le'baka Nagaukang siagang Napangngajarrang Isa, pakkaramula ri uru-uru Nagaukanna jama-jamanNa, 2 sa'genna ri allo ta'angka'Na nai' ri suruga. Ri tenanapa naNai' ri suruga, Nasare ngasemmi pappijo'jo' sikamma tunisuro le'baka Napile, lalang koasaNa RohNa Allata'ala. 3 Ri le'ba'namo attallasa' poleang battu ri kamateanga, lalanna patampulo alloa, a'mole-molei a'nyata sikali Napappicinikang KalenNa mae ri tunisuroNa, lanri ero'Na Napa'nassa angkanaya ma'nassa attallasa' poleammi battu ri kamateanga. Nicini'mi ri ke'nanga, siagang sipa'bicarami siagang ke'nanga ri passala'na Allata'ala siagang PamarentahanNa. 4 Na ri wattunna a'rappungang siagang ke'nanga, Nasaremi parenta ke'nanga Nakana, “Teako rolong a'lampai battu ri Yerusalem. Attayangko rolong anjoreng, sa'gennu Nasare Allata'ala anjo apa le'baka Napa'janjiang, iamintu apa le'baka Kupau ri kau ri pirangalloang. 5 Nasaba' je'ne' napake Yohanes anje'nekko, mingka tasalloami anne nulanije'ne' siagang RohNa Allata'ala.” 6 Ri wattunna a'rappungang sikamma anjo tunisuroa siagang Isa, akkuta'nammi ke'nanga ri Isa, angkana, “O Batara, ero' maKi' kamma-kamma anne ampaenteng poleangi PamarentahanTa ri bansa Israel?” 7 Appialimi Isa Nakana, “KalenNa ManggeKu lampattantui allonna siagang wattunna. Anjo tena naparallu nuasseng, nasaba' anjo lalang koasaNai Manggea. 8 Mingka punna battumo RohNa Allata'ala mange ri kau, langgappa mako koasa. Na la'jari mako sa'bingKu ri Yerusalem, ri sikontu Yudea, ri Samaria, sa'genna ri cappa'na linoa.” 9 Le'baki akkana kamma Isa, niangka'mi nai' ri suruga, nicini' ngaseng ri ke'nanga, sa'genna nitongko' ri rammanga natanicinikamo ri ke'nanga. 10 Lalang accongana ke'nanga nai' ri langika, ri wattunna ta'angka' Isa nai' ri suruga, ti'ring nia'mo rua tau ammakeang kebo', ammenteng ri ampi'na ke'nanga. 11 Nakanamo anjo tau ruaya, “E, ikau ngaseng tu battua ri Galilea, angngapa nummantang bawang antureng acconga nai' ri langika? Anjo Isa, nucinika ta'angka' nai' ri suruga, labattu poleangi sallang lalang kala'biranNa, sangkamma la'biri'Na ri wattunna nucini' nai' ri suruga sumpadeng.” 12 Le'baki anjo ammotere'mi anjo sikamma tunisuroa battu ri Bonto Zaitun mange ri Yerusalem. Anjo bontoa nia' kira-kira se're kilometere' bellana battu ri Yerusalem. 13 Ri wattunna battu ke'nanga mange ri Yerusalem, mangemi ke'nanga ri balla' napannumpangia ke'nanga, nampa nai' ke'nanga ri kamara' ratea ri lotenga. Anjo sikamma tunisuroa iamintu Petrus, Yohanes, Yakobus, Andreas, Filipus, Tomas, Bartolomeus, Matius, Yakobus ana'naya Alfeus, Simon nigallaraka Patriot, na Yudas ana'naya Yakobus. 14 Tuli a'julu atimi a'rappungang ke'nanga untu' appala' doang siagang bai'-bainea, siagang Maria amma'Naya Isa, kammayatompa sikamma sari'battanNa ngaseng Isa. 15 Ri se'reang allo, ri wattunna a'rappungang ke'nanga — nia' kira-kira sibilangngang ruampulo jaina tau hadere' — ammentemmi Petrus a'bicara. Nakana, 16 “Sikamma sari'battangku ngaseng! Apa niaka tattulisi' lalang ri Kittaka, musti kajariang ngasengi. Riolo, Napau memammi RohNa Allata'ala lalang ri kalenna Daud ri passala'na anjo Yudas, le'baka ampimpingi taua battu anjakkalaki Isa. 17 Anjo Yudas iami kalase'renna tau battua ri katte, siagang le'ba' tongi nipile untu' angngagangki' sipanjamang.” ( 18 Anne lapung Yudas anggappami butta untu' jera'na, a'jari sawala'na ri gau' kaja'dallanna ampasikongkolangi Isa. Tu'guru'mi naung ri buttaya namate, pue battanna, sa'genna assulu' ngaseng parru'na. 19 Naasseng ngasemmi sikontu tau niaka ammantang ri Yerusalem anjo passalaka. Iaminjo saba'na nanaaremmo ke'nanga Akeldama anjo tampaka, situru' bicaranna ke'nanga, battuanna ‘Butta Cera'’.) 20 “Nasaba' nia' tattulisi' lalang ri Kitta' Pammuji-mujia angkana, ‘Lappassammi ammantang a'jari sino pammantanganna; teako niakki manna sitau ammantang lalang.’ Nia' pole tattulisi' angkanaya, ‘Lappassammi naalle tau maraeng empoanna.’ 21 Lanri kammana minjo, namusti nia' sitau ansambeangi Yudas, amminawanga siagang ikatte a'jari sa'bi angkanaya ma'nassa attallasa' poleammi Batarata Isa battu ri kamateanga. Anjo tau ansambeangai, musti kalase'renna tau niakamo tuli angngagangki' ri wattunna a'lampa Isa ri kere-keremae siagang ikatte. Iamintu appakkaramula ri wattunta naje'ne' Yohanes, sa'genna niangka' Isa nai' ri suruga battu ri tangnga-tangngata.” 23 Jari nia'mo rua tau nacalongkang anjo tau hadereka, iamintu Yusuf nigallaraka Barsabas (nigallara' tongi Yustus), siagang Matias. 24 Nampa appala' doang ke'nanga. Nakana ke'nanga, “O Batara, iKatte angngasseng ngasengi atinna sikontu rupataua. Tu'guru'mi Yudas battu ri empoanna salaku tunisuroTa, siagang matemi. Jari Kijo'jokang sai ikambe, kereanga ri anne tau ruaya Kipile antarimai anne jama-jamanga, ansambeangai Yudas.” 26 Le'baki anjo, nilotereimi anjo ruaya areng, natu'guru' mae ri Matias. Jari niangka'mi Matias a'jari tunisuro, lasiaganga anjo sampuloa asse're tunisuroNa Allata'ala.
1 Ri wattunna narapi'mo allo Pentakosta, a'rappungang ngasemmi sikamma tau tappaka ri se'reang tampa'. 2 Ti'ring nia'mo sa'ra kalangngerang battu ri langika, sangkammaya anging lompo sa'ranna. Sangnging ia mami anjo sa'raya kalangngerang anjoreng ri balla' napammantangia ke'nanga ammempo a'rappungang. 3 Nampa nia'mo nacini' ke'nanga lila-lila kamma pepe', allepa' mange-mange sa'genna a'dongko' massing-massing mae ri ke'nanga. 4 Nikoasai ngasemmi ke'nanga ri RohNa Allata'ala, sa'genna appakkaramulamo akkulle a'bicara lalang a'rupa-rupa bicara. Akkullemi a'bicara ke'nanga situru' apa nisareangai ri RohNa Allata'ala untu' lanapau. 5 Anjo wattua jai tu Yahudi ammantang ri Yerusalem, battua ri a'rupa-rupa pa'rasangang ri sikontu linoa. Sangnging tau malla' ngaseng ke'nanga ri Allata'ala. 6 Ri wattunna kalangngerang anjo sa'raya, jaimi tau battu a'lipung. Ta'bangka ngasemmi ke'nanga nalangngere'na akkulle a'bicara anjo tau tappaka ngaseng situru' massing bicaranna ke'nanga. 7 Lalang lannasa'na siagang takkajanna'na ke'nanga, nakanamo ke'nanga, “Sikontu anjo tau a'bicaraya sangnging tu Galilea! 8 Antekamma kajarianna, sa'genna akkulle nilangngere' ke'nanga a'bicara lalang bicara battua massing ri pa'rasanganta? 9 Ikatte tu battua ri pa'rasangang Partia, Media, Elam; Mesopotamia, Yudea, Kapadokia, Pontus, Asia, 10 Frigia, Pamfilia, Mesir, siagang battu ri daera-daera Libia sikambania Kirene; ikatte niakki' tu battu ri Roma, 11 nia' tu Yahudi, siagang tu bansa-bansa maraeng antamayamo agama Yahudi; nia' todong tu battu ri Kreta siagang battu ri Arab. Massing nilangngere' ngasemmi ke'nanga a'bicara lalang bicaranta ngaseng; nabicaraya ke'nanga iamintu gau'-gau' appakalannasa' Nagaukanga Allata'ala!” 12 Lalang lannasa'na siagang takkajanna'na ke'nanga, akkuta'nang ngasemmi para ia ke'nanga angkana, “Apa ngaseng battuanna anne apa kajarianga?” 13 Mingka nia' tommo ri ke'nanga pacau-cau, angkana, “Hah, poro nasa'ring ngasennaja anjo ke'nanga!” 14 Ammentemmi Petrus siagang anjo sampuloa asse're tunisuro maraenganga, nampa a'bicara mae ri anjo tau jaia. Nalompoimi sa'ranna Petrus angkana, “Sikamma sari'battangku, tu Yahudia siagang sikamma tau niaka ammantang ri Yerusalem! Pilangngeri baji'-baji', nasaba' parallui nipakasingara' anne passalaka mae ri kau ngaseng. 15 Anne taua tena nanasa'ringi sangkamma nupakkanaya ri nawa-nawannu, nasaba' kamma-kamma anne nampai tette' salapang ri bari'basaka. 16 Mingka anne passalaka, le'ba' memammi Napabattu Allata'ala lalang ri kalenna Na'bi Yo"el, ri wattunna angkana: 17 Nakana Allata'ala, ‘Ri allo kala'busanna jammanga laKupaturungi RohKu mae ri sikamma taua. Lanapabattuangko ana'-ana' bura'nenu siagang ana'-ana' bainenu sikamma apa-apa le'baka Kupabattu mae ri ke'nanga. Lanaciniki tu rungkanu apa-apa Kupappicinikanga mae ri ke'nanga. Lasso'nai tu toa-toanu, iamintu so'na Kupabattua mae ri ke'nanga. 18 Ba'lalo manna ata-atangKu — bura'ne siagang baine — laKupiturungi tongi RohKu anjo allo-alloa. Lanapabattuangko ke'nanga, apa-apa le'baka Kupabattu mae ri ke'nanga. 19 Lappa'niakKa' apa-apa appakalannasa' rate ri langika, siagang gau'-gau' tantamaya ri akkala'nu irawa ri anne linoa; lania' cera' siagang pepe', umbu siagang saliu'. 20 La'jari sassangi alloa, la'jari ejai bulanga sangkamma cera' ri tenanapa nabattu AllonNa Batara, iamintu allo malompoa siagang mala'birika. 21 Anjo wattua, inai-nai akkio' mae ri Batara iami lanipasalama'.’ 22 Sikamma sari'battangku tu Israelka! Pilangngeri anne apa kupaua: Anjo Isa, battua ri Nazaret, nisarei tugasa' ri Allata'ala untu' ikau ngaseng. A'nassa sikalimi anjo lalang ri gau'-gau' appakalannasa' siagang apa-apa tenaya narapiki akkala'nu, le'baka Nagaukang Allata'ala ri tangnga-tangnganu lalang ri KalenNa anjo Isa. Yangasenna anjo massing nuassemmi. 23 Situru' ero' KalenNa, Natappukimi Allata'ala laNapassareang Isa Almasi mae ri kau ngaseng. Na ri wattunna nipassareang mae ri kau ngaseng, nuallemi nubuno, lanri nubalang parekanna nisalli' ri tau ja'dalaka. 24 Mingka nipattallasa' poleangi ri Allata'ala battu ri alla'na tau matea. Nia'luki ri kamateanga, mingka nilappassangi ri Allata'ala, lanri tena olona lakkulle tuli lanikoasai ri kamateanga. 25 Ri passala'na anne Isa, le'baki Daud akkana kamma anne, ‘Kuciniki Batara tuli nia' ri dallekangku; Narurunganga' ri sa'ringku, sollangku tanipakamallaka ri apa-apa mamo. 26 Iaminjo saba'na namarannu sanna' atingku nakupaumo pammuji-mujia; na sannammonne batangkalengku lamattayang lalang ri jerakku. 27 Nasaba' tena natuli nubalang parekangi nyawaku ammantang lalang ri linona tu matea. Tanubalang parekangai ata majarreka ri kau a'jari ancuru' na la'busu'. 28 Le'ba'ma' Nujo'jokang oloang mangea ri katallassang sitojennaya. Sanna' sikalimi lompona rannuku, lanri nia'Nu anrurunganga'.’ 29 Sikamma sari'battangku, boli'mi kamma nakupau silambusu'na ri passala'na Daud boeta ngaseng. Matemi Daud siagang le'ba'mi nitarawang; sa'genna kamma-kamma anne nia' iji jera'na ri tangnga-tangngata. 30 Le'ba'mi a'janji siagang assumpa Allata'ala mae ri Daud, angkanaya nia' sallang kalase'renna sossoranna Daud laniangka' ri Allata'ala a'jari karaeng. Lanri naassenna Daud anjo janjia, siagang ia na'bi tongi, 31 naasseng tommi apa laNagaukanga pole Allata'ala. Jari napaumi la'bi riolo angkanaya lattallasa' poleangi battu ri kamateanga anjo Karaeng Mappasalamaka, anjo Napa'janjianga Allata'ala. Nakana Daud, ‘Tena nanibalang parekangi ammantang ri linona tu matea; talaancurai siagang talala'busai BatangkalenNa.’ 32 Iaminne Isa nipattallasa' poleanga ri Allata'ala battu ri kamateanga. Ikambe minne le'ba' anciniki anjo apa kajarianga. 33 Niangka'mi nai' ri empoang kaminang tinggia siagang nisaremi koasa ri Allata'ala, nampa Natarima RohNa Allata'ala, le'baka Napa'janjiang Manggea. Na anne apa nulangngereka siagang nucinika kamma-kamma anne iaminjo RohNa Allata'ala, Napaturunga mae ri kambe. 34 Kalenna Daud tanaikai ri suruga, mingka angkanai Daud, ‘Nakana Batara mae ri Bataraku: 35 Ammempo maKo ri sa'ri kanangKu, sa'genna Kusuro ngaseng akkulantu' musu-musunNu ri dallekanNu!’ 36 Iaminjo saba'na namusti naasseng tojeng-tojeng sikontu bansa Israel angkanaya anjo Isa, le'baka nusalli', Iatommi anjo Isa le'baka Naangka' Allata'ala a'jari Batara siagang Karaeng Tumappasalamaka!” 37 Nalangngere'na ngaseng ke'nanga anjo napaua Petrus, sanna' ngasemmi dinging-dinginna atinna ke'nanga. Jari akkuta'nammi ke'nanga ri Petrus siagang anjo tunisuro maraenganga, angkana, “Jari apamo musti nigaukang anne, sari'battang?” 38 Appialimi Petrus nakana, “Toba' ngaseng mako battu ri dosa-dosanu. Siagang musti massing nije'ne' ngasengko lalang arenNa Isa Almasi, sollanna nipammopporang dosa-dosanu. Nampa lanutarima passareNa Allata'ala, iamintu RohNa Allata'ala. 39 Nasaba' anjo Napa'janjianga Allata'ala untu' ikau ngaseng siagang sossorannu, kammayatompa untu' tau battua ri pammantangang bellaya — iamintu sikontu tau Nakioka Allata'ala Batarata battu mae ri Ia.” 40 Kammaminjo napakasingaraka Petrus mae ri ke'nanga. Siagang ilalang a'rupa-rupa bicara maraengang, napakainga' tommi ke'nanga sollanna napakabella kalenna ke'nanga battu ri anne bansa ja'dalaka laNahukkunga sallang Allata'ala. 41 Jaimi tau tappa' mae ri anjo napaua Petrus, nampa nije'ne'mo ke'nanga. Jari anjo alloa katambammi jaina tau tappaka a'jari tallussa'bu tau. 42 Tuli attojeng-tojemmi ke'nanga appilajara' ri tunisuroNa Allata'ala. Siagang tuli a'rappungammi ke'nanga appala' doang siagang sipangnganreang. 43 Jai sikali gau'-gau' appakalannasa' nagaukang tunisuroNa Allata'ala. Sa'genna jaimi tau a'jari lannasa' siagang a'jari malla'. 44 Tuli ma'julu ati ngasengi anjo tau tappaka. Punna nia' apa-apanna ke'nanga, napassama-samai napake. 45 Nabalukammi apa-apanna siagang pa'barang-baranganna ke'nanga, nampa nabage-bage ballinna ke'nanga situru' massing kaparalluanna ke'nanga. 46 Allo-allona ke'nanga tuli a'rappungang ri Balla'Na Batara; kammayatompa a'le'ba'-le'basaki ke'nanga assama-sama angnganre ri balla'na. Na rannu pa'mai' siagang tuna pa'mai' ngasengi ke'nanga. 47 Siagang tuli mammuji-muji ke'nanga ri Allata'ala, na ningai ngaseng ri tau jaia. Pila' mange allo pila' katambangi jaina ke'nanga, lanri pila' Natambai Allata'ala tau nipasalamaka mae ri ke'nanga.
1 Ri se'reang allo a'lampai Petrus siagang Yohanes mange ri Balla'Na Batara. Anjo wattua tette' tallu ri karuenga, iamintu wattu passambayanganga. 2 Anjoreng ri pakke'bu' lompoa, niarenga “Pakke'bu' Ga'gaya”, nia' sitau bura'ne peso'. Peso' memammi baku' nilassukanna. Allo-allona nierang anjo taua mange anjoreng untu' appala'-pala' ri tau eroka antama' ri Balla'Na Batara. 3 Ri wattunna nacini' anjo tau pesoka angkana niaki Petrus siagang Yohanes ero' antama' ri Balla'Na Batara, appala'mi apa-apa ri ke'nanga. 4 Najanjammi ke'nanga anjo tau pesoka, nampa nakana Petrus, “Cinikia'!” 5 Nicinikimi ke'nanga ri anjo tau pesoka, na'minasa anjo tau pesoka lanisare apa-apa ri ke'nanga. 6 Mingka nakanamo Petrus ri anjo tau pesoka, “Tena sikali doekku. Mingka apa niaka ri nakke, iaminjo lakusareangko: Lanri koasaNa Isa Almasi, battua ri Nazaret, kukana ri kau a'jappa mako!” 7 Nampa nata'gala' Petrus lima kananna anjo tau pesoka, na nabantu ammenteng. Ajari kassa' memammi silalonna bangkenna anjo tau pesoka. 8 A'lumpa'mi nai' nammenteng, siagang a'jappa anrai'-kalau'. Nampa antama' ri Balla'Na Batara siagang Petrus na Yohanes, a'lumpa'-lumpaka tojeng na mammuji-muji ri Allata'ala. 9 Nicini'-cinikimi ri taua a'jappa' siagang ammuji-muji ri Allata'ala. 10 Na naassennamo tau jaia angkanaya iaminjo papala'-pala' biasaya ammempo ri “Pakke'bu' Ga'gaya” ri Balla'Na Batara. Lannasa' sikalimi siagang takkajanna'mi ke'nanga anciniki anjo apa kajarianga ri kalenna anjo taua. 11 Tuli amminawammi anjo taua ri Petrus siagang Yohanes. Na ri wattunna battu ke'nanga ri tampa' niarenga “Tampa' Salomo”, battu ngasemmi taua allipungi ke'nanga napakamma lannasa'. 12 Ri wattunna nacini' Petrus anjo tau jaia, nakanamo ri ke'nanga, “E, tu Israel, angngapa nulannasa' ngaseng anciniki? Angngapa naikambe tulusu' nujanjang? Barang nukana lanri kakoasanna ikambe yareka lanri mannurukinna ikambe ri Allata'ala nakkulle a'jappa' anne taua? 13 Allata'ala nasombaya Abraham, Ishak, Yakub, Allata'alana boeta, Iaminjo Allata'ala ampakalompoai Ana'Na, iamintu Isa. Iaminjo Isa le'baka nupassareang ri pamarentaya, siagang numusua ri dallekanna Pilatus, ri wattunna ero' nilappassang ri Pilatus. 14 Ia tau matangkasa' siagang tau baji', mingka nukabirisi siagang nupassai Pilatus allappassangi tu pabunoa untu' ikau sollanna nihukkung anjo Isa. 15 Nubunoi anjo Isa, na sikontutojenna Iami kabattuanna katallassanga untu' sikontu rupataua. Mingka nipattallasa' poleammi ri Allata'ala battu ri kamateanga. Kalennami ikambe anciniki anjo apa kajarianga. 16 Nucini'mi siagang nusa'bimi apa kajarianga ri kalenna anne tau pesoka. A'jari baji'mi siagang gassimmi ammotere' lanri tappaki mae ri Isa siagang kakoasanNa. Lanri tappa'na mae Isa, a'jari baji'mi ammotere' anne taua ri dallekannu ngaseng. 17 Sikamma sari'battangku ngaseng! Kamma-kamma anne kuassemmi angkanaya anjo apa nugaukanga siagang pamimping-pamimpinnu mae ri Isa, apa tena ngaseng nanupahangi nanugaukangi. 18 Na lanri kammana tomminjo, na'rupamo apa le'baka Napabattu riolo Allata'ala lalang ri na'bi-na'biNa, angkanaya musti lanisessai anjo Karaeng Mappasalama' nipa'janjianga. 19 Lanri kammana minjo sari'battangku ngaseng, nuparallumo massing toba' battu ri dosa-dosanu, siagang ammotere' mako ri Allata'ala sollanna naNapammopporang dosa-dosanu. 20 Labattui Batara mae ri kau nalanukasia' kasannangang pa'maika. Siagang lanisuroi Isa ri Batara battu mae ri kau, nasaba' Iami le'ba' Napattantu Allata'ala a'jari Karaeng Mappasalama'nu. 21 Musti ammantangi ri suruga sa'genna le'ba' ngaseng Napa'jari beru linoa Allata'ala, situru' apa le'baka Napattantu Allata'ala lalang ri na'bi-na'biNa ri jammang riolo. 22 Le'baki Musa angkana, ‘Lania' sitau na'bi Nasuro Allata'ala battu mae ri kau, sangkammaya todong inakke Nasuroa' battu mae ri kau. Anjo na'bia tu battu tonji ri bansanu. Musti nupilangngeri ngasengi sikontu apa napaua anjo na'bia mae ri kau. 23 Inai-nai taeroka ampilangngeri apa-apa napaua anjo na'bia, iami lanibuang assulu' battu ri passe'reanna umma'Na Allata'ala nampa nisessa.’ 24 Sikamma na'bi-na'bi le'baka ampabattui kabara' battua ri Allata'ala, iamintu appakkaramula battu ri Na'bi Samuel sa'genna na'bi-na'bi maraengannaya ribokoanganna, le'ba' ngasemmi nakabarrang apa-apa lakajarianga ri anne jammanga. 25 Sikontu anjo apa-apa Napa'janjianga Allata'ala lalang ri na'bi-na'biNa, untu' ikau ngaseng. Lalang ri anjo parjanjiang Napareka Allata'ala mae ri boe-boenu, kammai anne kananNa Allata'ala mae ri Abraham, ‘Battu lalangi ri sossorannu nalaKubarakkaki sikontu bansaya ri anne linoa.’ Jari anjo parjanjianga untu' ikau ngaseng todong. 26 Iaminjo saba'na naNapattantumo Ana'Na Nasuro rolong battu mae ri kau, sollanna naNabarakkakiko. Ia bateNa ambarakkakiko, iamintu Napa'jari tobakko battu ri kaja'dallanga lalang ri katallassannu.”
1 Lalang a'bicarana ija Petrus siagang Yohanes mae ri anjo taua ngaseng, battumi imang-imang kapalaya, komandang pajagaya ri Balla'Na Batara, kammayatompa tu Sadukia mae ri ke'nanga. 2 Larromi ke'nanga lanri napauna Petrus siagang Yohanes mae ri taua angkanaya attallasa' poleammi Isa battu ri kamateanga. Na iaminjo a'jari butti angkana lattallasa' poleangi tau matea. 3 Nijakkala'mi Petrus siagang Yohanes ri ke'nanga, nampa nipantama' ri tarungkua. Nitahammi Petrus siagang Yohanes anjoreng sa'genna ammukona, lanri anjo wattua bangngimi. 4 Mingka jaimi tau le'bakamo allangngereki anjo napangngajarrang tunisuroa, a'jari tappa'. Katambammi jaina ke'nanga a'jari kira-kira limassa'bu tau. 5 Ammukona a'rappungammi tumalompoa ri Pangadelang Agamaya, pamimping-pamimpinna tu Yahudia, siagang guru-guru agamaya ri Yerusalem. 6 Assibuntulu' ngasemmi ke'nanga siagang Imang Malompoa iamintu Hanas, siagang Kayafas, Yohanes, Aleksander, kammayatompa sikontu bija ma'reppese'na anjo imang lompoa. 7 Nierammi Petrus siagang Yohanes mae ri dallekanna ke'nanga. Nikuta'nammi ri ke'nanga angkana, “Antekamma batenu amballei anjo tau pesoka? Kagassingang apa yareka koasa battu kemae nupake anggaukangi anjo kammaya?” 8 Anjo Petrus nikoasaimi ri RohNa Allata'ala. Appialimi nakana, “Tabe', mae ri katte ngaseng pamimping bansaya siagang anggotana pangadelang agamaya! 9 Anne alloa niadelia' sipa'rua lanri a'gau' baji'na ikambe ero' antulungi se'rea tau peso'. Na kamma-kamma anne ero' ngasengki' angngassengi antekamma batena niballei anjo taua. 10 Jari, ikatte ngaseng, kammayatompa sikontu bansa Israel, musti kiasseng ngasengi angkanaya lanri kagassinganNa siagang kakoasanNa Isa Almasi anjo battua ri Nazaret, nakkullemo nia' ammenteng ri dallekannu ngaseng anne taua. Kamma-kamma anne gassimmi siagang salewangammi tubuna anne tau le'baka peso', lanri anjo Isa Almasi. Ikatte ngasemmi le'ba' ansalliki anjo Isa Almasi. Mingka nipattallasa' poleammi ammotere' ri Allata'ala. 11 Iaminjo Isa nisero kanaya lalang ri anne aya' lalang Kittaka, angkanaya, ‘Anjo batu tenaya nupakei ikau tukang-tukanga, kamma-kamma anne iami a'jari batu kaminang parallu.’ 12 Lalang bawang ri Isa nakkulle nipasalama' rupataua. Nasaba' ri sikontu anne linoa, tenanniakka se're tau le'ba' nisare koasa ri Allata'ala untu' ampasalamakki', pantaranganna Isa Almasi.” 13 Lannasa' ngasemmi anggota-anggotana anjo Pangadelanga anciniki kabaranianna Petrus siagang Yohanes. La'biangampa pole nanaassennamo ke'nanga angkanaya anjo Petrus siagang Yohanes tau biasaji bawang, tutenaya sikolana. Nasadarimi ke'nanga angkanaya anjo tau ruaya ana' gurunNa Isa. 14 Mingka tanaassengami angkana apa lanakana ke'nanga, lanri anjo tau le'baka niballei niaki ammenteng siagang Petrus na Yohanes ri dallekanna ngaseng ke'nanga. 15 Jari nasuromi ke'nanga assulu' Petrus siagang Yohanes battu ri kamara' sidanga, nampa sipa'bicara ke'nanga. 16 Nakanamo ke'nanga, “Apa musti nigaukang ri anjo tau ruaya? Sikontu tau niaka ammantang ri Yerusalem naasseng ngasemmi angkanaya anjo tau ruaya anggaukangi anjo gau' appakalannasaka. Takkulleami nicokkoi anjo apa nagaukanga ke'nanga. 17 Mingka sollanna tena napila' tassiara' anjo passalaka mae ri tau jaia, umba nanigarattaki anjo tau ruaya, sollanna tenamo na'bicara mae ri taua lalang arenNa Isa.” 18 Le'baki anjo, nakio'mi ke'nanga ammotere' Petrus siagang Yohanes, nanapauang angkanaya tena sikalimo nanipa'biangi ke'nanga ampaui yareka angngajara' lalang arenNa Isa. 19 Mingka appialimi Petrus siagang Yohanes angkana, “Pikkiri'mi ri kalennu ngaseng, angkanaya kereanga annaba ri dallekanNa Allata'ala: parentanu nituruki, yareka parentaNa Allata'ala. 20 Nasaba' takkulleai ammari ikambe ambicarai anjo apa le'baka nacini' siagang nalangngere' ikambe.” 21 Takkulleami anggappa alasang manna sirupa anjo anggota-anggota sidanga ri pangadelanga, untu' anghukkungi Petrus siagang Yohanes. Jari nagaratta'mi ke'nanga anjo tau ruaya, nampa nalappassang, nasaba' ammuji-muji ri Allata'ala tau jaia passabakkang anjo kajarianga. 22 Anjo tau peso' le'baka niballei lalang anjo gau' appakalannasaka, la'bimi patampulo taung umuru'na. 23 Ri wattunna nilappassammo Petrus siagang Yohanes, ammotere'mi ke'nanga mae ri agang-aganna ke'nanga. Nacaritami ke'nanga sikontu apa le'baka napau imang-imang kapalaya siagang pamimping-pamimpinna tu Yahudia mae ri ke'nanga. 24 Nalangngere'namo agang-aganna anjo apa nacaritaya ke'nanga, ma'julu atimi ke'nanga naassama-sama appala' doang mae ri Allata'ala. Nakana ke'nanga, “O Batara, iKattemi ampa'jari langika siagang linoa, kammayatompa tamparanga na sikontu bonena. 25 Lalang RohTa le'bakKi' a'bicara lalang atanTa Daud iamintu boena ikambe; anjo wattua angkanaKi', ‘Angngapa nalarro tu tenaya naassengi Batara; angngapa nappanggaukang tenaya matu-matunna bansa-bansaya? 26 Sadiai karaeng-karaenna linoa ero' a'bundu', siagang asse're ngasemmi pamimping-pamimpinga angngewai Batara, Karaeng Mappasalamaka.’ 27 Nasaba' memang, a'rappungammi sipa'bicara Herodes, Pontius Pilatus, sikamma tu tenaya naassengi Batara, siagang tu Israel anrinni ri kotaya. A'rappungammi ke'nanga ero' angngewai Isa, Ana' matangkasatTa, le'baka Kiangka' a'jari Karaeng Mappasalama'. 28 Asse'remi ke'nanga ero' a'gau' sangka' rupa, situru' apa le'baka Kipattantu angkanaya lakajariang memangi anjo kammaya. Na lanri koasa KalenTa siagang ero' KalenTa naKipattantu anjo apa lakajarianga. 29 Kamma-kamma anne, o, Batara, Kicini'mi antekamma batena ke'nanga anggarattaki ikambe. Na Kisaremi pangngellai ikambe anne, ata-atanTa, ampa'la'bangi kabara' battua ri Katte lalang kabaraniang. 30 Kipa'nyatai pannulunTa sollanna akkulle niballei tau garringa, siagang nakajariang gau'-gau' appakalannasaka, lanri koasana siagang kagassingang battua ri arenNa Isa, Ana' MatangkasatTa.” 31 Le'baki ke'nanga appala' doang, a'gio'mi anjo tampa' napammantangia ke'nanga a'rappungang. Nikoasai ngasemmi ke'nanga ri RohNa Allata'ala. Siagang appakkaramulami ke'nanga a'jari sanna' baranina a'bicara ri passala'na kabara' battua ri Allata'ala. 32 A'julu atimi siagang a'julu nyawa ngasemmi anjo sikontu tau tappaka. Punna nia' apa-apanna ke'nanga, tena manna sitau langkana anjo apa-apaya ia bawang pata. Sikontu apa niaka ri ke'nanga, napassama-samaimi napake. 33 Lalang koasa malompo battua ri Allata'ala, a'jari sa'bi ngasemmi anjo tunisuroa, angkanaya ma'nassa attallasa' poleammi Isa battu ri kamateanga. Sanna'mi nibarakkakina ke'nanga ri Allata'ala. 34 Na manna sitau tania' ri ke'nanga kakurangang. Nasaba' ia niaka tanana yareka balla'na, nabalukammi nampa naerang ballinna, 35 nanapassareang mae ri sikamma tunisuroNa Allata'ala. Nampa nipa'bage-bageang anjo doeka mae ri sikamma tau kaparalluanga. 36 Kamma tomminjo nagaukanga Yusuf, sossorang battu ri Lewi, battu ri Siprus, nigallaraka Barnabas (battuanna Panynyaleori) ri tunisuroNa Allata'ala. Nabalukang tommi tanana, nampa napassareang ballinna mae ri sikamma tunisuroNa Allata'ala.
1 Mingka nia' sitau bura'ne niareng Ananias. Siagangi bainenna niarenga Safira, ambalukang tongi sisapa' tanana. 2 Anjo doe' ballinna anjo tanaya, naboliki tawaruanna untu' kalenna ke'nanga, nampa tawaruanna maraenga napassareang mae ri tunisuroNa Allata'ala. Anne apa nagaukanga naasseng tongi bainenna. 3 Nakanamo Petrus, “Ananias, angngapa nanupassareang atinnu nakoasai Billisika, sa'gennu a'balle-balle ri RohNa Allata'ala? Iamintu nuboli' cokko-cokkoi untu' kalennu tawaruanna doe' ballinna anjo tanaya? 4 Anjo tanaya ikau pata ri wattunna tenapa nubalukangi. Na ri wattunna le'ba' nubalukang anjo tanaya, anjo doe' ballinnaya, ikau tonji pole pata. Jari angngapa nania' lalang ri atinnu ero' appanggaukang kammaya anjo? Teai rupataua nuballe-ballei, mingka Allata'ala!” 5 Kamma nalangngere'na Ananias anjo kana-kana napaua Petrus, tu'guru'mi, namate. Sikontu tau allangngerekai anjo apa kajarianga, a'jari malla' ngasemmi. 6 Battumi ana'-ana' rungkaya anrokoki anjo maya'na Ananias, nampa naerang assulu' ero' mange natarawang. 7 Kira-kira tallung tette' ribokoanganna, antama' tommi bainenna. Tanaassengapi anjo apa beru kajarianga. 8 Nakanamo Petrus ri ia, “Pauang sabeka': Maka sikamma tojeng anne ballinna anjo tana le'baka nubalukang siagang bura'nennu?” Appialimi nakana, “Tojeng-tojenga', iamintu ballinna.” 9 Nakanamo Petrus ri ia, “Angngapa nusikongkolo' siagang bura'nennu ero' ancobai RohNa Batara? Pilangngerimi! Ammotere'mi tau mangea antarawangi bura'nennu. Lanaerang tongko ke'nanga assulu'.” 10 Anjo wattua, tu'guru' memammi anjo bainenna Ananias, namate ri dallekanna Petrus. Na wattunna antama' anjo ana'-ana' rungkaya, narapikammi ke'nanga matemi anjo bainenna Ananias. Naerammi ke'nanga assulu' anjo mayaka, nampa naerang mange natarawang ri ampi'na bura'nenna. 11 Sikontu anjo tau tappaka siagang tau maraenga, a'jari malla' ngasemmi nalangngere'na anjo apa kajarianga. 12 Jaimi kajariang siagang gau' appakalannasa' kajariang ri tangnga-tangngana tau jaia, lanri jama-jamang nagaukanga tunisuroNa Allata'ala. A'julu atimi a'rappungang sikamma tau tappaka ri Kamara' Salomo, ri Balla'Na Batara. 13 Na tabarania tau battu pantaraka a'rappungang siagang anjo tau tappaka. Siagang angngali' ngasengi tau jaia mae ri anjo sikamma tau tappaka. 14 Napila' mange allo, pila' katambangi jaina anjo tau tappaka mae ri Batara — baji' na bura'ne, baji' na baine. 15 Ba'lalo lanri kammana anjo, nierammi assulu' ri aganga tau garringa rate ri bulekang, yareka nipadongko' ri tappereka, sollanna punna numalo Petrus, kaminang sike'de'na manna taung-taunnaja antabai anjo tau garringa, nakkulle a'jari baji'. 16 Teaimi sipato' jaina tau a'lipung-lipung battu, iamintu tu battua ri kota-kota niaka a'reppese' ri Yerusalem. Massing naerammi tau garrinna ke'nanga, yareka tau nasosoka setang. Naniballei ngasemmo anjo taua, sa'genna a'jari baji' silalonna. 17 Kale'bakkanna angngallemi tindakang imang lompoa siagang taunna ngaseng, iamintu golongang tu Sadukia, lanri assereatina ke'nanga. 18 Nijakkala'mi anjo sikamma tunisuroNa Allata'ala nampa nipantama' ri tarungku lompoa. 19 Mingka ri wattu lantanna bangngia, battumi malaeka'Na Batara assungke ngasengi pakke'bu'na anjo tarungkua, nampa naerang anjo sikamma tunisuroNa Allata'ala assulu'. Nakanamo anjo malaekaka mae ri sikamma anjo tunisuroNa Allata'ala. 20 “A'lampako mange ammenteng ri Balla'Na Batara siagang pauang ngasemmi taua passala'na anne katallassang berua.” 21 Naturukimi sikamma tunisuroNa Allata'ala anjo apa napappasanganga anjo malaekaka. Ri bari'basa' dudua, a'lampami ke'nanga mange ri Balla'Na Batara, nappakkaramula angngajara' anjoreng. Anjo wattua a'rappungammi pole imang lompoa siagang taunna ngaseng, ero' sipa'bicara siagang pamimping-pamimpinna tu Yahudia. Nampa nasuro taua mange angngallei anjo sikamma tunisuroNa Allata'ala, battu ri tarungkua, lanaerang mae ri dallekanna ke'nanga. 22 Mingka ri wattunna battu mange ri tarungkua anjo tunisuroa, tenami narapikang sikamma anjo tunisuroNa Allata'ala. Jari ammotere'mi ke'nanga, nampa napabattu anjo passalaka mae ri pangadelanga. Nakanamo ke'nanga mae ri sikamma anjo tau niaka ri pangadelanga, 23 “Ri wattunna battu ikambe mange anjoreng ri tarungkua, anjo pakke'bu'na tarungkua takkonci baji' ngasenji, siagang nia' ngasenji pangawalaka a'jaga ri pakke'buka. Mingka ri wattunna nisungke anjo pakke'bu' tarungkua, manna sitau tania' bonena anjo tarungkua.” 24 Ri wattunna nalangngere' perwira pangawalaka ri Balla'Na Batara siagang imang-imang kapalaya anjo laporanga, lingumi ke'nanga annawa-nawai passala'na anjo tunisuroNa Allata'ala. Siagang malla'mi ke'nanga ampikkiriki angkana apa are kutadeng lakajariang. 25 Tasalloai, nia'mo sitau bura'ne battu angngerang kabara', angkana, “Pilangngeri sai! Anjo tau kitahanga ri tarungkua, kamma-kamma anne nia' ngasengi angngajaraki tau jaia lalang ri Balla'Na Batara!” 26 Jari a'lampami perwira pangawala'na Balla'Na Batara siagang pangawalaka ngaseng, mange angngallei ammotere' anjo sikamma tunisuroNa Allata'ala. Mingka tena nanaerang passai ke'nanga, lanri mallaki ke'nanga ri tau jaia; gassingka nisambilai sallang batu ke'nanga ri anjo tau jaia. 27 Nierammi anjo sikamma tunisuroNa Allata'ala antama' ri pangadelanga. Nampa niparessa ke'nanga ri imang lompoa. 28 Nakana imang lompoa, “Le'ba' mako nipisangkai ampangngajarrangi arenNa anjo Taua. Mingka kamma-kamma anne, apa le'ba' nugaukang! Nupa'la'bammi anjo pangngajarannu mae ri sikontu tau niaka ri Yerusalem. Kammayatompa, erokko ba'lalo ampakkanaiki' anne, angkanaya passala' ikambe anne namate anjo Taua.” 29 Appialimi Petrus siagang agang-aganna, angkana, “Musti ero'Na Allata'ala naturuki ikambe, teai ero'na rupataua. 30 Anjo Isa, le'baka nusalli', nipattallasa' poleammi ammotere' battu ri kamateanga, lanri koasaNa Allata'alana boe-boeta. 31 Siagang nisaremi ri Allata'ala empoang siagang kakoasang matinggi, a'jari Pamimping siagang Mappasalamaka; sollanna nisare kasampatang bansa Israel untu' a'jari toba' battu ri dosa-dosana na nipammopporang. 32 Ikambe minne a'jari sa'bi ri yangasenna anjo passalaka — ikambe siagang pole RohNa Allata'ala, Napassareanga Allata'ala mae ri tau mannurukia ri parentaNa.” 33 Ri wattu nalangngere'na anggota-anggotana anjo Pangadelang Agamaya anjo apa napaua tunisuroNa Allata'ala, teaimi sipato' larrona ngaseng ke'nanga. Sa'genna assama turu' ngasemmi ke'nanga ero' ambunoi anjo sikammaya tunisuroNa Allata'ala. 34 Mingka nia' kalase'renna anggotana anjo pangadelang agamaya tu Farisi, niarenga Gamaliel. Iami guru agama sannaka nipakalompona ri tau jaia. Ammentemmi nai', nampa nasuro erang rolong assulu' sinampe' sikamma anjo tunisuroNa Allata'ala. 35 Nampa nakana ri anggota-anggotana anjo Pangadelang Agamaya, “Sikamma sari'battangku tu Israel! Pikkiriki rolong baji'-baji' apa lanugaukanga mae ri anne taua. 36 Nasaba' riolo le'baki nia' tau niarenga Teudas, nakanaya kalenna tumalompo, sa'genna kira-kira nia' patambilangngang tau amminawang ri ia. Mingka mate nibunomi, siagang tassia'-siara'mi sikamma tau amminawanga ri ia, sa'genna lanynya' kale-kale anjo kumpulanna. 37 Le'baki anjo, ri wattunna nisuro bilang ngaseng tuma'buttaya, nia'mo pole tau niareng Yudas, iamintu tau battu ri Galilea. Nasaba' lompona pangaruna, jai tommi tau amminawang ri ia. Mingka mate nibuno tommi, siagang tassia'-siara' ngasemmi tau amminawanga ri ia. 38 Jari kamma-kamma anne, pappakaingakku ri anne passalaka iamintu: tea' mako nanuapa-apai anne sikamma taua, mingka lappassang tommi mange ke'nanga. Nasaba' punna apa-apa battu ri rupataua anjo napangngajarranga siagang nagaukanga ke'nanga, ma'nassa lalanynya' kale-kale tonji anjo apa napangngajarranga nagaukanga ke'nanga. 39 Mingka punna apa-apa battu ri Allata'ala anjo napangngajarranga siagang nagaukanga ke'nanga, ma'nassa takkulleako ambetai ke'nanga. Ba'lalo akkullei a'butti angkanaya nuewai Allata'ala.” Natarimami sidanga anjo pappakainga'na Gamaliel. 40 Jari nikio'mi anjo sikamma tunisuroNa Allata'ala. Nicambo'mi nampa nipisangkai pole ke'nanga angngajara' lalang arenNa Isa. Le'baki anjo, nampami nilappassang ke'nanga. 41 A'lampami anjo sikamma tunisuroNa Allata'ala ambokoi anjo sidang Pangadelang Agamaya. Sanna' ngaseng rannuna ke'nanga, lanri nipassiratammi ri Allata'ala ke'nanga angkasiaki paccallaya, lanri arenNa Isa. 42 Na allo-allonamo angngajara' ke'nanga ri Balla'Na Batara siagang ri balla'na ngaseng taua. Tuli napabattumi ke'nanga Kabara' Bajika lalang arenNa Isa, angkanaya Iami anjo Karaeng Mappasalama' le'baka nipa'janjiang.
1 Pila' sallo, pila' jaimi tau tappa' ri Isa. Anjo wattua a'jari tenamo nasannang nyawana tau tappa' bansa Yahudi a'bicara Yunania mae ri tau tappa' bansa Yahudi totoka. Nakanamo a'bicara Yunania, “Sikamma bai'-baine janda niaka ri kambe tanibageiyai ongkoso' kaparalluang allo-allo nipa'bage-bageanga mae ri taua.” 2 Jari anjo sampuloa anrua tunisuro napa'rappungammi sikontu tau tappaka, nampa nakana ri ke'nanga, “Tabajikai punna lammari ikambe ampabattui kananNa Allata'ala, lanri langngurusu'na passala' apa-apa lanikanrea. 3 Jari, bajiki punna nupileimo battu ri kau ngaseng tuju tau baji' ampea siagang nikoasaia ri RohNa Allata'ala, akkullea nisare jama-jamang, langngatoroki anne passala' apa-apa lanikanrea; 4 nasaba' eroka lanajama ikambe iamintu appala' doanga siagang ampabattui kana-kananNa Allata'ala.” 5 Assamaturu' ngasemmi ke'nanga ri anjo apa napaua anjo sikamma tunisuroNa Allata'ala. Napileimi ke'nanga tuniarenga Stefanus, sannaka tappa'na ri Isa, siagang nikoasaia ri RohNa Allata'ala. Maraengannaya nipile tommi: Filipus, Prokhorus, Nikanor, Timon, Parmenas, siagang Nikolaus battua ri Antiokhia. Anne Nikolaus teai tu Yahudi, mingka antama'mi agama Yahudi. 6 Nierammi anne tujua tau mae ri sikamma tunisuroNa Allata'ala, nampa nipappala' doangang siagang nipappalakkang barakka' ri Batara. 7 Kammaminjo, napila' a'la'bammo kabara' battua ri Allata'ala, siagang pila' katambammi jaina tau tappaka ri Isa anjoreng ri Yerusalem. Na jai tommo imang-imang a'jari tappa' ri Isa. 8 Anjo Stefanus sanna' nibarakkakina ri Allata'ala; sa'genna jai sikalimi gau'-gau' appakalannasa' nagaukang ri tangnga-tangngana tau jaia. 9 Mingka nia'mo siapa are tau angngewai; iamintu anggotana ngaseng balla' sambayang niarenga Balla' Sambayanna Tu Bebasaka. Anggota-anggotana anjo balla' sambayanga, iamintu tu Yahudi battua ri Kirene siagang Aleksandria. Sipammemtengammi ke'nanga siagang tu Yahudi battua ri Kilikia siagang Asia, anggea'-geakki Stefanus. 10 Mingka tanakulleai ke'nanga ampitompoki anjo kana napaua Stefanus, nasaba' le'ba'mi nisare Stefanus kacara'dekang ri RohNa Allata'ala, untu' a'bicara. 11 Lanri kammana, nia'mo siapa are tau nasare doe' ke'nanga, nampa nasuro appau angkana, “Le'baki anjo taua a'bicara anghina-hinai Musa siagang Allata'ala!” 12 Kammaminjo batena ke'nanga angkompa-kompa salai sa'genna nassu tau jaia, pamimping-pamimpinna tu Yahudia, kammayatompa guru-guru agamaya. Mangemi ke'nanga anjakkalaki Stefanus, nampa naerang mange andallekang ri pangadelang agamaya. 13 Siagang naerang tommi ke'nanga battu andallekang sa'bi-sa'bi a'balle-ballea, ero' ambattalli Stefanus. Nakanamo anjo sa'bi-sa'bia, “Anne taua tuli nahinai Balla'Na Batara matangkasaka, siagang nahinai sikamma parentaNa Allata'ala napabattua Musa. 14 Le'baki nalangngere' ikambe angkana anne taua, angkanaya anjo Isa tu battua ri Nazaret, laNarumbangi anne Balla'Na Batara, nampa Napinra ngaseng pangngadakkang le'baka napassareang Musa mae ri katte!” 15 Nicinikimi Stefanus ri sikontu tau niaka hadere' lalang ri anjo sidang Pangadelang Agamaya. Na anjo wattua, attanja' kammami malaeka' nicini' rupanna Stefanus.
1 Akkuta'nammi imang lompoa ri Stefanus, nakana, “Maka kamma ngaseng tojengi anjo napaua taua?” 2 Appialimi Stefanus nakana, “Sikamma bapa'-bapaka siagang sari'battanga! Pilangngeri sai anne kanangku! Ri tenanapa na'lette' boeta Abraham battu ri pammantanganna ri Mesopotamia mange ri Haran, battui Allata'ala mala'birika mae ri ia, angkana, 3 ‘Bokoi anne pa'rasangannu siagang bija-bijannu. A'lampako mange ri pa'rasangang laKujo'jokangako sallang.’ 4 Jari a'lette'mi Abraham battu ri pa'rasangang Kasdim mange ri Haran. Ri wattunna matemo manggena Abraham, nipalette'mi Abraham ri Allata'ala mae anrinni, ri pa'rasangang nupammantangia ngaseng kamma-kamma anne. 5 Anjo wattua, manna sike'de' tania' anne pa'rasanganga Napassareanga Allata'ala mae ri Abraham a'jari pa'rasanganna; manna sipala' bangkeng tania' nipassareang mae ri ia. Mingka a'janji Allata'ala angkanaya laNapassareangi mae ri Abraham siagang sossoranna anne pa'rasanganga, a'jari pa'rasanganna. Anjo wattua tena ana'na Abraham. 6 Mingka iaminne kananNa Allata'ala ri ia, ‘Lammantangi sossorannu a'jari tu battu-battu ri pa'rasanganna taua. Lanipa'jari atai ke'nanga ri patanna anjo pa'rasanganga, siagang lanigau' pallaki ke'nanga patambilangngang taung sallona. 7 Mingka laKuhukkungi anjo bansa ampa'jari atayai ke'nanga, nampa assulu' ke'nanga battu anjoreng ri pa'rasanganga. Nampa lanynyombai ke'nanga mae ri Nakke anrinni ri tampaka.’ 8 Le'baki akkana kamma Allata'ala, Napa'jari assami anjo janjinNa lalang pangngadakkang sunnaka. Jari ri wattunna lassu' ana'na Abraham, iamintu Ishak, nasunna'mi anjo ana'na ri wattunna sagantuju allomo umuru'na. Nampa ribokoanganna sallang nasunna' tommi ana'na Ishak, iamintu Yakub. Nakamma tomminjo Yakub, nasunna' tongi anjo ana'na sampuloa anrua, a'jaria boe-boena bansa Yahudia. 9 Na anjo boe-boeta assereati mae ri Yusuf, sa'genna nabalukang anjo Yusuf a'jari ata ri Mesir. Mingka nirurungangi Yusuf ri Allata'ala, 10 nanitulung battu ri sikontu kasusaanna. Nisarei ri Allata'ala kabajikang pa'mai' siagang kacara'dekang ri wattunna andallekang ri Firaun karaenga ri Mesir. Sa'genna niangka' a'jari Tumalompo ri pa'rasangang Mesir, siagang tukoasa ri Balla' Lompona Karaeng Firaun. 11 Nampa nia' se're wattu nanaalle kacipurang lompo tuma'buttaya ri sikontu pa'rasangang Mesir siagang pa'rasangang Kanaan, sa'genna sanna' ngaseng pa'risi'na katallassanna taua. Takkulleami anggappa apa-apa lanakanre boe-boeta. 12 Jari ri wattunna nalangngere' Yakub angkana nia' gandung ri Mesir nasuromi ana'-ana'na, iamintu boe-boeta a'lampa mange anjoreng, maka sikalina. 13 Ri wattunna a'lampa pole ke'nanga maka pinruanna, napappiassengammi kalenna Yusuf mae ri anjo sari'battanna ngaseng. Nampami anjo wattua naasseng karaeng Mesir bija-bijanna Yusuf. 14 Nampa appasang Yusuf mae ri manggena, iamintu Yakub, sollanna ero' a'lette' siagang sikontu bija-bijanna mae ri Mesir — yangasenna nia' tujupulo allima tau jaina. 15 A'lette'mi Yakub mae ri Mesir. Nanjoremmo mate siagang boe-boeta. 16 Nampa ri bokoang allo nipalette'mi jera'na ammotere' mange ri Sikhem, iamintu jera' le'baka naballi riolo Abraham battu ri bansa Hemor ri Sikhem. 17 Ri wattunna la'birimmo narapi' wattunna laNarupai janjinNa Allata'ala mae ri Abraham, pila' katambammi jaina bansata ri pa'rasangang Mesir. 18 Kale'bakkanna nia'mo se're karaeng maraeng ammarenta ri Mesir, tenaya naassengi anjo Yusuf. 19 Anjo karaenga napare' karek-karenammi bansata, siagang sanna'mi nakapallakkina boe-boeta. Napassami boe-boeta ampelaki ana'-ana' lolona punna lassu' sollanna nibawang-bawangngang na mate anjo ana' loloa. 20 Iaminjo wattua nanilassukangi Musa; sanna' ga'gana ri wattunna ana' lolo. Tallum bulangi sallona niparakai cokko-cokko ri balla'na tau toana; 21 ri wattunna nipela' naung ri je'neka, nirappummi ri ana' tulolona Firaun, nampa naparakai sangkamma ana' kalenna. 22 Sikamma pappilajaranna bansa Mesirka nipangngajarrang tommi mae ri ia. Na'jarimo tau sannaka lompona koasana, baji' lalang kana-kananna kammayatompa lalang panggaukanna. 23 Ri wattunna patampulo taummo umuru'na Musa, nakku'mi lalang atinna, ero' mange anciniki antekamma katallassanna bansana, iamintu bansa Israel. 24 Na nia'mo sitau bansana narapikang nisessa ri tu Mesir; naallemi anjo tu nisessaya, nampa nabuno anjo tu Mesirka. 25 Nakapangi Musa angkanaya lanapahangi bansana angkanaya lanipakei kalenna ri Allata'ala untu' allappassangi anjo bansana. Mingka tanapahangai ke'nanga. 26 Ammukona nia'mo pole narapikang rua tu Israel assiba'ji. Naallemi nasa'lakki nampa napa'dame ke'nanga. Nakana ri ke'nanga, ‘Ikau antu tau assari'battangko. Apa saba'na nuero' assiba'ji?’ 27 Mingka nisorongammi Musa mae ri biring, ri anjo tau amba'jiai aganna, nampa nakana, ‘Inai angngangkakko a'jari pamimping siagang a'jari haking mae ri kambe? 28 Erottongko ambunoa' sangkamma anjo tu Mesir nubunoa subangngi?’ 29 Nalangngere'na Musa kananna anjo taua, larimi Musa battu ri Mesir, nampa mange ri pa'rasangang Midian. Anjoremmi anggappa rua ana'. 30 Patampulo taung ribokoanganna, nia'mo sitau malaeka' battu mae ri Musa, ri wattunna nia' ri parang kassika, ri ampi'na Bulu' Sinai. Battui anjo malaekaka lalang ri pepe' rompo' a'rinraya. 31 Lannasa'mi Musa anciniki anjo apa kajarianga. A'reppese'mi mange anjoreng ero' angngassengi anjo apa kajarianga. Nampa nia'mo nalangngere' sa'ranNa Batara angkana, 32 ‘INakke minne Allata'alana boe-boenu; iNakkemi Allata'alana Abraham, Ishak, siagang Yakub.’ Annekkere'mi Musa napakamma malla'. Tenamo nabarani pole accini' mae anjoreng ri rompoka. 33 Nakanamo pole Batara, ‘Pasuluki pa'la'pa' bangkennu, nasaba' antu butta nupammantangia ammenteng, butta matangkasa'. 34 Kucini'mi siagang Kuparhatikammi antekamma pa'risi'na katallassanna ummakKu ri Mesir. Kulangngere'mi kunrarenna ke'nanga, naKunaummo ero' allappassangi ke'nanga. Kamma-kamma anne, mae mako! LaKusuroko ammotere' mange ri Mesir.’ 35 Iaminne Musa, tenaya niakui ri bansa Israel, siagang nisorongbokoa angkana, ‘Inai le'ba' angngangkakko a'jari pamimping siagang a'jari haking mae ri kambe?’ Mingka sitojenna, iami nisuro ri Allata'ala a'jari pamimping siagang appasalamaka, lanri bantuanna anjo malaeka' battua mae ri ia lalang ri anjo rompo' a'rinraya. 36 Iaminjo Musa ampimpingi bansa Israel assulu' battu ri Mesir; iami anggaukangi anjo gau'-gau' appakalannasaka ri Mesir, ri Tamparang Ejaya, kammayatompa ri parang lompoa patampulo taung sallona. 37 Ia tomminjo Musa angkanaya ri bansa Israel, ‘LaNasareko Allata'ala sitau na'bi nipilea battu ri tangnga-tangnganu, sangkammaya bateku Napilei.’ 38 Musa tommi niaka ri tangnga-tangngana bansa Israel ri parang kassika, a'jaria tetena malaeka' naaganga a'bicara ri Bulu' Sinai siagang boe-boeta. Iami antarimayai battu ri Allata'ala kabara' katallassanga eroka nipabattu mae ri katte. 39 Mingka manna nakamma, taerokai boe-boeta anturuki kananna. Nisorongbokoi ri ke'nanga, siagang erokangangi ke'nanga ammotereka mange ri butta Mesir. 40 Nakana ke'nanga mae ri Harun, ‘Papparekang maki' rewata maraenganga, sollanna napimpingki' anjo rewataya. Nasaba' taniassengami apa kajarianga ri anjo Musa, angngerangaki' assulu' battu ri Mesir!’ 41 Anjo wattua appare'mi ke'nanga se're patung ana' sapi. Nampa angngerang ke'nanga koro'bang mae ri anjo patunga; siagang assua'-suara'mi ke'nanga untu' ampakalompoi anjo apa napare' kalennaya ke'nanga. 42 Jari nibokoimi ke'nanga ri Allata'ala siagang nibalang parekammi ke'nanga anynyomba mae ri sikamma bintoeng-bintoeng niaka ri langika. Sicoco'mi anjo siagang apa niaka tattulisi' lalang ri kitta'na na'bi-na'bia. Kammaminne tattulisika, ‘E ikau tu Israelka! Teai untu' iNakke nanusamballe siagang nukoro'bangkang olo'-oloka ri wattunna patampulo taung ri parang lompoa. 43 Mingka balla'-balla'na rewata Molokh nuerang mange-mange siagang patunna bintoeng rewatanu, iamintu Refan; iaminjo patung nupareka, ero' nusomba. Iaminjo saba'na nalaKupelakko sa'gennu bella mange ri ba'leanna pa'rasangang Babel.’ 44 Balla' pammantanganNa Allata'ala ri wattunna battu mae ri rupataua niaki ri boe-boeta ri parang lompoa. Anjo pa'balla'-ballakanga nipareki situru' parentaNa Allata'ala mae ri Musa, siagang situruki panrala' le'baka Napappicinikang Allata'ala mae ri Musa. 45 Nampa naerang boe-boeta siagang Yosua anjo pa'balla'-ballakanNa Allata'ala ri wattunna a'lampa ke'nanga ambunduki nampa naalle ke'nanga anne pa'rasanganga battu ri kakoasanna bansa-bansa nibongkaya ri Allata'ala battu ri dallekanna ke'nanga. Niaki anjoreng anjo pa'balla'-ballakanNa Allata'ala sa'genna jammang pamarentahanna Daud. 46 Nipakasannammi atinNa Allata'ala ri Daud siagang napala'mi sollanna nikellai appare' se're Balla' Sambayang untu' Allata'ala, nisombaya ri Yakub. 47 Mingka Salomomi ambangungi anjo ballaka untu' Allata'ala. 48 Mingka tena nammantang Allata'ala Kaminang Tinggia lalang ri balla' napareka rupataua; nasaba' nia' tattulisi' lalang ri Kitta'na na'bia angkanaya, 49 ‘Langika a'jari empoang kala'birangKu, na linoa a'jari pa'dongkokang bangkengKu. Balla' apa eroka nupaentengangA'? Kemae tampa' laKupammari-maria? 50 Sai KalengKu ampa'jari sikontu apa niaka?’ kammaminjo kananNa Allata'ala. 51 Teai sipato' kapala batunu ngaseng, siagang teai sipato' sukkara'nu mannuruki ri Allata'ala! Teai sipato' tongolo'na tolinnu mae ri kana-kananNa Allata'ala! Sangkamma le'ba' ngasengko siagang boe-boenu; tuli erokko angngewa ri RohNa Allata'ala! 52 Maka nia' na'bi tanisessaya ri boe-boenu? Nabunoi ke'nanga tunisuroNa Allata'ala, le'baka ampabattui riolo dudu angkanaya labattui anjo Ata matojenNa Allata'ala. Na kamma-kamma anne le'ba'mi nupasikongkolang siagang nubuno anjo Ana'Na Allata'ala. 53 Le'ba'mi napabattu malaeka'-malaekaka sikamma parentaNa Allata'ala mae ri kau mingka taerokako anturuki!” 54 Kamma nalangngere'na anggota-anggota sidang Pangadelang Agamaya sikamma anjo napaua Stefanus, pa'risi' sikalimi nyawana ke'nanga siagang sanna' ngasemmi larrona mae ri Stefanus. 55 Mingka anjo Stefanus nikoasaimi ri RohNa Allata'ala, naccongamo nai' ri langika. Nacini'mi kala'biranNa Allata'ala, siagang nia'mi nacini' Isa ammenteng ri tampa' kakoasanNa, iamintu ri sa'ri kananNa Allata'ala. 56 Nakanamo Stefanus, “Ciniki, tassungkei kucini' surugaya na nia' Ana' Ma'rupataua ammenteng ri sa'ri kananNa Allata'ala!” 57 Natongko'mi tolinna anjo anggota-anggotana sidang pangadelang agamaya, siagang ammarrang-marrang, nampa assama-sama ke'nanga ambakkai Stefanus. 58 Nare'resammi ke'nanga Stefanus assulu' battu ri kotaya nampa namanang-manangngi nasambila batu. Naboli'mi pakeanna anjo tau ancinikai anjo apa kajarianga mae ri se'rea tu rungka niarenga Saulus. 59 Lalang nasambilana ke'nanga Stefanus, akkio'mi Stefanus, nakana, “O Batara Isa, Kitarimami nyawaku!” 60 Nampa akkulantu' siagang ammarrang lompo, nakana, “O Batara, teaKi' patanggongiangi anne dosaya mae ri ke'nanga.” Le'baki akkana kamma, matemi Stefanus.
1 Na sannang todong nyawana Saulus ri nibunonamo Stefanus. Iatommi anjo alloa nappakkaramulamo niondang mange-mange jama'aka ri Yerusalem. Sa'genna tassia'-siara'mo sikamma tau tappaka ri sikontu daera Yudea siagang Samaria. TunisuroNa mami Allata'ala tena natassia'-siara'. 2 Mangemi sikamma tau mallaka ri Allata'ala antarawangi maya'na Stefanus. Nakarrukimi ke'nanga Stefanus. Sanna' ngaseng si'nana atinna ke'nanga. 3 Mingka tuli usahaji pole Saulus ansessai jama'aka. A'lampai ri tasse're-se'reang balla', nanare'resang ngaseng assulu' tau tappaka. Nampa napantama' ke'nanga ri tarungkua. 4 Sikamma anjo tau tappa' tassiaraka, massing napabattumi anjo Kabara' Baji' battua ri Allata'ala ri kere-keremae. 5 A'lampami Filipus mange ri kota Samaria na napabattu passala'na anjo Karaeng Mappasalama' Napa'janjianga Allata'ala, mae ri tau niaka anjoreng ri Samaria. 6 Ri wattunna nalangngere' taua a'bicara Filipus, siagang nacini' gau'-gau' appakalannasa' nagaukanga, jaimi ke'nanga amparhatikangi anjo apa napaua Filipus. 7 Nasaba' assulu'mi roh ja'dalaka ammarrang kodi battu ri tau jai nasosoka setang, lanri nabongkai Filipus assulu'. Jai tommi tau peso' siagang tau tempang niballei na'jari baji'. 8 Sanna'mi rannuna tau niaka ri Samaria. 9 Anjoreng ri Samaria nia' se're tau bura'ne niareng Simon. Sallomi napakalanna'-lannasa' taua ri Samaria lanri jaina pangngissenganna. Nacaritami kalenna mae ri taua angkanaya ia tau sannaki porena. 10 Jari sanna'mi niparhatikanna ri sikamma tau niaka ri anjo kotaya ri Samaria. Nakanamo ke'nanga, “Iaminne tau kagassinganNa Allata'ala, ia masahoroka nikana, ‘Kagassingang Malompoa.’ ” 11 Sallo sikalimi napakalanna'-lannasa' taua lanri pangngissengang baca-bacana. Sa'genna sanna'mi niparhatikanna ri taua. 12 Mingka napabattumi Filipus mae ri ke'nanga ri passala' antekamma bateNa Allata'ala lampaentengi PamarentahanNa, siagang passala'na Isa Almasi, Karaeng Mappasalamaka. Tappa'mi ke'nanga mae ri anjo kabara' Baji' napabattua Filipus. Nije'ne'mi ke'nanga, bura'ne-baine. 13 Manna Simon tappa' tommi. Na ri wattunna le'ba'mo nije'ne', amminawang tulimi ri Filipus. A'jari takkalanna'-lannasa'mi Simon napakamma anjo gau'-gau' appakalannasa' kajarianga. 14 Nalangngere'mi sikamma tunisuroNa Allata'ala ri Yerusalem angkanaya natarimami taua ri Samaria kananNa Allata'ala. Jari nasuromi ke'nanga Petrus siagang Yohanes mange anjoreng. 15 Ri wattunna battu Petrus siagang Yohanes mange anjoreng, napappala' doangammi anjo taua ri Samaria, sollanna nisare ke'nanga RohNa Allata'ala. 16 Nasaba' tenapa manna sitau ri ke'nanga nikoasai ri RohNa Allata'ala; nampa nije'ne' ke'nanga lalang arenNa Isa Almasi. 17 Naangka'mi limanna Petrus siagang Yohanes, irateanganna sikamma anjo tu Samariaya; jari natarimami ke'nanga RohNa Allata'ala. 18 Nacini'mi Simon angkanaya lanri naangka'na limanna anjo tunisuroNa Allata'ala irateanganna ngaseng anjo taua, nanisaremo anjo taua ngaseng RohNa Allata'ala. Jari angngerammi doe' Simon mae ri Petrus siagang Yohanes, 19 nampa nakana, “Sareang tomma' anjo koasa kammaya, sollanna punna kupadongko' limangku irateanganna taua, lanatarimami anjo taua RohNa Allata'ala.” 20 Mingka appialimi Petrus nakana, “Cilaka mako ikau siagang doe'nu! Nukana lakkullei niballi passareNa Allata'ala siagang doe'? 21 Tena ha'nu kau lamminawang lalang ri jama-jamanna ikambe, nasaba' talambusai atinnu mae ri Allata'ala. 22 Lanri kammana, bokoimi anjo pikkirang ja'dala'nu, nampa nupala' ri Batara sollanna Napammopporangi anjo pikkirang ja'dala'nu. 23 Nasaba' kuassengi angkanaya sanna' assereatinu, siagang nipare' atako ri kaja'dallanga.” 24 Nakanamo Simon mae ri Petrus siagang Yohanes, “Tulunga', nakipala' ri Batara sollanna tena lalo manna sirupa kajariang mae ri nakke, anjo apa kipaua.” 25 Le'baki ke'nanga assare kasa'biang siagang napabattu kana-kananNa Batara, ammotere'mi Petrus siagang Yohanes mange ri Yerusalem. Na lalang a'jappana ke'nanga, napabattumi ke'nanga anjo Kabara' Bajika ri kampong-kamponga ri Samaria. 26 Nia'mo sitau malaeka' battu mae ri Filipus angkana, “A'lampako linta'! A'lampako timboro', ri agang battua ri Yerusalem mange ri Gaza.” Anjo aganga sinoi. 27 A'lampami Filipus. Anjo wattua nia' sitau pagawe balla' lompoa ri Etiopia, sitabang lalang pa'lampanna ammotere' mange ri pa'rasanganna. Anjo taua pagawe tinggi, anta'galakai sikontu pa'barang-baranganna Kandake, karaeng bainea ri Etiopia. Anjo taua battumi ri Yerusalem, untu' anynyomba ri Allata'ala. Na anjo wattua ammotere'mi siagang ratei a'dongko' ri karetana. Lalang ammempona rate ri karetana, sitabangi nabaca Kitta'na Na'bi Yesaya. 29 Nakanamo RohNa Allata'ala mae ri Filipus, “Mangeko anreppesi anjo karetaya.” 30 Mangemi Filipus a'reppese' ri anjo karetaya, nanalangngere'mo anjo taua ammaca Kitta' Yesaya. Akkuta'nammi Filipus ri anjo taua nakana, “Maka kipahanji battuanna anjo apa kibacaya?” 31 Appialimi anjo taua nakana, “Antekamma lakkulle kupahang punna tena ampakasingarianga'?” Nampa nakio'mi Filipus nai' ri karetaya nammempo siagang. 32 Iaminne anjo aya'-aya' nabacaya ri Kittaka, “Sanrapangi gimbala' nieranga lamange nisamballe, sanrapangi ana' gimbala' tenaya nassa'ra punna nigoncingi bulunna, kamma tomminjo tamakkana-kanana. 33 Nihinai siagang nigau' tenai naadele'. Niallei nyawaNa battu ri linoa sa'genna tenanniakka manna sitau akkulle ancaritai antekamma passossoranNa.” 34 Nakanamo anjo pagawe tinggi battua ri Etiopia mae ri Filipus, “Pauang sabeka', inai napakkanai anne na'bia? Kalennaka, yareka tau maraeng?” 35 Appakkaramulami Filipus a'bicara. Napakemi anjo aya'-ayaka appakkaramula ancaritai Kabara' Bajika ri passala'na Isa Almasi, mae ri anjo pagawe tinggia. 36 Ri tangngana aganga; anrapi'mi ke'nanga mange ri se'reang tampa' niaka je'ne'na. Nakanamo anjo pagawea, “Ciniki, anjo mae nia' je'ne'! Apapi pole kakuranganna punna erokka' nije'ne'?” 37 Nakanamo Filipus, “Punna tappa' tojeng-tojemmaki' ri atinta, akkulle maki' nije'ne'.” Nakanamo anjo pagawe tinggi battua ri Etiopia, “Tappa'ma' angkanaya anjo Isa, Ana'Na Allata'ala.” 38 Nasuro pamantammi karetana. Nampa naung ke'nanga sipa'rua iamintu Filipus siagang anjo pagawea ri je'neka, nanije'ne' ri Filipus. 39 Ri wattunna assulu' ammotere' ke'nanga battu lalang ri je'neka, battumi RohNa Allata'ala angngallei Filipus. Tanicinikami Filipus ri anjo pagawe tinggi battua ri Etiopia. Sanna'mi rannuna nyawana anjo pagawe tinggia, nanapatulusu' pa'lampanna. 40 Ti'ring nia'mi Filipus ri Asdod. Na ri wattunna napatulusu' pa'lampanna napabattumi Kabara' Bajika ri passala'na Isa, ri sikamma kota-kotaya sa'genna battu mange ri Kaisarea.
1 Na lalang anjo wattua tuli ero'mi Saulus ansessai siagang ambunoi sikamma tau tappaka ri Isa. A'lampami mae ri imang lompoa, 2 nappala' sura' koasa untu' lanapake a'lampa mae ri pamimping-pamimpinna balla' sambayanna tu Yahudia ri Damsyik. Sollanna, punna nia' tau tappa' ri Isa nagappa anjoreng, akkullei najakkala' ke'nanga, nampa naerang mange ri Yerusalem. 3 Lalang a'lampana mange ri Damsyik, ri wattunna a'reppese'mo mange anjoreng ri kotaya, ti'ring nia'mo singara' battu ri langika, tassioro' mae ri tammulilina Saulus. 4 Tu'guru'mi Saulus naung ri buttaya, nampa nia' sa'ra nalangngere' angkana ri ia, “O Saulus, Saulus! Apa saba'na nanusessa kamma duduA'?” 5 Akkuta'nammi Saulus nakana, “InaiKi' antu, Karaeng?” Appialimi anjo sa'raya nakana, “INakke Isa, nusessa dudua. 6 Mingka kamma-kamma anne ambangung mako nai', na nuantama' ri kotaya. Anjorempi nampa nipauangko apa musti lanugaukang.” 7 Ta'bangka ngasemmi anjo tau naaganga Saulus sa'genna takkulleamo assa'ra ke'nanga; nasaba' nalangngereki ke'nanga anjo sa'raya, mingka tena tau manna se're nacini' ke'nanga. 8 Ammentemmi Saulus naero' nasungke matanna, mingka takkulleami accini' apa-apa. Jari nita'gala'mi limanna ri ke'nanga, nampa nirenreng antama' ri Damsyik. 9 Tallungalloi takkullea accini', na anjo wattua tena sikalimo nangnganre siagang angnginung. 10 Anjoreng ri Damsyik nia' se're tau tappa' ri Isa, niarenga Ananias. Battumi Batara a'bicara mae ri ia ilalang pappiso'na. Nakana Batara ri ia, “Ananias!” Appialimi Ananias nakana, “Iye', Batara.” 11 Nakanamo Batara, “A'lampako kamma-kamma anne. A'lampako mange ri balla'na Yudas, ri Agang Lambusuka. Pakkuta'nangangi anjoreng tu niarenga Saulus, battua ri kota Tarsus. Anjo taua sitabangi appala' doang. 12 Na lalang pappiso'nana, nia' sitau bura'ne nacini' battu mae ri ia, niarenga Ananias. Battui mae ri ia ampadongkoki limanna irateanganna sollanna akkulle accini' poleang anjo taua.” 13 Appialimi Ananias nakana, “O Batara, jaimi kabara'na kulangngere' anjo taua. La'biangampa, kabara'na antekamma batena ansessai ummatTa ri Yerusalem. 14 Na kamma-kamma anne nia'mi battu anrinni, angngerang sura' koasa battu ri imang-imang kapalaya, sollanna akkulle najakkala' sikamma tau tappaka mae ri Katte.” 15 Mingka Nakanamo Batara ri Ananias, “A'lampamako! Nasaba' le'ba'mi Kupile anjo taua a'jari palayangKu; sollanna akkulle napabattu arengKu mae ri bansa-bansa maraenga, tenaya nantama' agama Yahudi, siagang ri sikamma karaenga, kammayatompa ri umma' Israel. 16 Siagang KalengKu ero' ampicinikiangi sikamma kapa'risang musti lanakasiaka passabakkang iNakke.” 17 A'lampami Ananias mange anjoreng ri ballaka, na napadongko' limanna irateanganna Saulus. Nakana Ananias, “Sari'battangku Saulus, Batara Isa nucinika ri tangngana aganga ri wattunnu mae anrinni, Iami assuroa' battu mae ri kau, sollannu akkulle accini' poleang, siagang nikoasai ri RohNa Allata'ala.” 18 Ia memang anjo wattua nia'mo kamma sissi' juku' tu'guru' battu ri matanna Saulus, nakkullemo accini' poleang. Ambangummi nai', nampa nije'ne'. 19 Na ri wattunna le'ba'mo angnganre, a'jari gassing poleammi. Ammantammi Saulus ri Damsyik, siagang sikamma tau tappaka ri Isa. Niaki pirangallo are ammantang anjoreng. 20 A'lampami mange ri sikamma balla' sambayanga, nappakkaramulamo ampabattui angkanaya, iaminjo Isa Ana'Na Allata'ala. 21 Lannasa' ngasemmi taua allangngereki Saulus angngajara'. Nakanamo ke'nanga, “Sai iaminne tau le'baka ambunoi sikamma tau tappaka ri Isa, ri Yerusalem? Sitojenna battui mae anrinni ero' anjakkalaki tau tappaka, nampa naerang mange ri imang-imang kapalaya!” 22 Mingka pila' a'jari lompomi pangaruna Saulus. Sikamma butti-butti napabattua ri passala'na Isa sanna' sikali jarre'na, angkanaya ma'nassa Iaminjo Isa Karaeng Mappasalamaka. Sa'genna takkulleami tu Yahudi niaka ri Damsyik anggeakki anjo apa napaua. 23 Tena nasallo ribokoanganna, assikongkolo'mi tu Yahudia ero' ambunoi Saulus. 24 Mingka naassemmi Saulus anjo apa eroka nagaukang ke'nanga. Allo bangngimi ke'nanga attayang ri pakke'bu' lompona kotaya, ero' ambunoi Saulus. 25 Mingka ri se'reang bangngi, battumi ana'-ana' gurunna Saulus angngallei Saulus, nampa napantama' ri karanjeng lompoa nanaoloro' napanaung battu rate ri tembo'na kotaya. 26 A'lampami Saulus mange ri Yerusalem. Ero'mi mange a'rappungang siagang tau tappaka ri Isa. Mingka malla'mi ke'nanga ri ia, lanri tenapa natappa' ke'nanga angkana tappa' tojemmi Saulus ri Isa. 27 Battumi Barnabas, nampa naerang Saulus mae ri sikamma tunisuroNa Allata'ala. Nacaritami Barnabas mae ri ke'nanga, antekamma kajarianna ri wattunna nacini' Saulus anjo Batara ri tangngana aganga, siagang antekamma batena a'bicara Batara mae ri Saulus. Nacarita tommi Barnabas antekamma baranina Saulus angngajara' lalang arenNa Isa ri Damsyik. 28 Jari ammantammi Saulus siagang ke'nanga. Siagang sanna'mi baranina akkato'ba lalang arenNa Isa ri sikontu kota Yerusalem. 29 A'bicarami siagang siewa bicarami siagang tu Yahudi a'bicara Yunania; naero'mo ke'nanga ambunoi Saulus. 30 Naassennamo sikamma tau tappa' maraengannaya anjo passalaka, naerammi ke'nanga Saulus mange ri Kaisarea, nampa nasuro a'lampa mange ri Tarsus. 31 A'jari sannammi sikontu jama'aka ri Yudea, Galilea, siagang Samaria. Na lanri malla'na ri Batara siagang pannulunNa RohNa Allata'ala, pila' jarre'mi siagang pila' katambammi jaina ke'nanga. 32 A'lampami Petrus mange-mange, angkunjungi jamaah-jama'aka. Ri se'reang allo a'lampami angkunjungi umma'Na Batara niaka ri Lida. 33 Anjoreng, assibuntulu'mi siagang sitau bura'ne, niarenga Eneas. Anjo taua pesoki, na sagantuju taummi tambangung-bangunga battu ri katinroanna. 34 Nakanamo Petrus ri Eneas, “O Eneas, kamma-kamma anne Naballeiko Isa Almasi. Ambangung mako nai' nanupakabaji' katinroannu.” Ambangung memammi Eneas anjo wattua. 35 Sikamma tau niaka ri Lida siagang Saron nacini' ngasemmi anjo apa kajarianga ri kalenna Eneas. Na tappa' ngasemmo ke'nanga mae ri Batara. 36 Anjoreng ri Yope, nia' sitau baine, niarenga Tabita. Ia tau tappa' ri Isa. (Lalang bicara Yunani arenna nikana, Dorkas, battuanna jonga.) Tuli nagaukangi apa-apa bajika, nanatulung tu kasi-asia. 37 Anjo wattua garringi, sa'genna matemo. Ri le'ba'namo nije'ne' maya'na, nipadongko'mi ri kamara' irateanga. 38 Anjo Yope tena nasiapa bellana battu ri Lida. Jari nalangngere'na tau tappaka ri Yope angkana niaki Petrus ri Lida, nia'mo rua tau nasuro ke'nanga mange ambuntuli Petrus. Appasammi ke'nanga ri Petrus angkana, “Akkaro-karoki' battu mae.” 39 Ammentemmi linta' Petrus, nampa a'lampa ampinawangi anjo tunisuroa battu. Battuna ke'nanga mange anjoreng, nierammi Petrus nai' ri kamara' rateanga. Battu ngasemmi janda niaka anjoreng angngarru', allipungi Petrus. Napaccinikammi ke'nanga mae ri Petrus sikamma baju-bajua siagang juba-juba najaika Dorkas, eroka napassareang Dorkas ri ke'nanga ri wattu attallasa'na. 40 Nasuromi Petrus assulu' ngaseng ke'nanga, nampa akkulantu' appala' doang. Le'baki anjo, a'dalle' mangemi ri maya'na Dorkas, nampa nakana, “Tabita, ambangungko!” Nasungkemi matanna Dorkas; na ri wattunna nacini' Petrus, ambangummi nai' ammempo. 41 Nampa nata'gala' Petrus limanna nanatulung ammenteng. Le'baki anjo nakio'mi Petrus sikamma tau tappa' niaka anjoreng siagang sikamma anjo janda-jandaya, nampa napassareang Dorkas le'bakamo attallasa' poleang, mae ri ke'nanga. 42 Tassiara'mi anjo apa kajarianga mae ri sikontu tau niaka ri Yope. Sa'genna jaimi tau a'jari tappa' ri Isa, a'jari Karaeng Mappasalama'na ke'nanga. 43 Ammantammi Petrus pirangallo are anjoreng, ri balla'na sitau pajama kukkuluka, niarenga Simon.
1 Anjoreng ri Kaisarea, nia' sitau bura'ne niarenga Kornelius. Jama-jamanna, iamintu kapiteng ri “Pasukang Italia”. 2 Ia tau malla' ri Allata'ala. Sikontu bone balla'na tau anynyomba ngaseng mae ri Allata'ala. Jai tu kasi-asi bansa Yahudi natulung. Tuli appala' doangi ri Allata'ala lalang tallasa'na. 3 Ri se'reang allo, kira-kira tette' tallu ri karuenga, nia'mo nacini' a'nyata sikali lalang pappiso'na, sitau malaeka'Na Allata'ala battu angkioki nakana, “Kornelius!” 4 Najanjammi Kornelius anjo malaekaka, nateai sipato' malla'na. Nakanamo, “Apa kutadeng Karaeng?” Appialimi anjo malaekaka nakana, “Nitarimami ri Allata'ala sikamma pappala' doannu siagang pa'mai' baji'nu, kammayatompa Nau'rangiko Allata'ala. 5 Kamma-kamma anne suromi taua mange ri Yope, nanakio' Simon. Areng la'buna iamintu Simon Petrus. 6 Kamma-kamma anne niaki annompang ri balla'na pajama kukkuluka, niarenga Simon, niaka ammantang ri biring tamparanga.” 7 A'lampanamo anjo malaeka' a'bicaraya mae ri Kornelius, nakio'mi Kornelius rua palayanna ri balla', siagang sitau tantara pangawala' baji'na. 8 Nacaritami Kornelius mae ri ke'nanga anjo apa le'baka kajariang, nampa nasuro ke'nanga a'lampa mange ri Yope. 9 Ammukona alloa, lalang a'jappana ija anjo tunisuroa siagang a'biringamo battu mange ri Yope, nai'mi Petrus ri ballaka ero' appala' doang. 10 Sanna' sikalimi cipuru'na, naero' dudumo angnganre. Lalang nipasadiana kanrea anggappami pappiso'na. 11 Tassungkei nacini' langika, nampa nia' nacini' kaeng la'ba' nioloro' naung ri linoa, ta'gentung ri appaka panynyingkulu'. 12 Ilalanganna, nia' sangka' rupa olo'-olo' appaka bangkenna, sikamma olo'-olo' akkadangkanga, siagang jangang-jangang liaraka. 13 Nampa nia'mo sa'ra angkana ri ia, “Petrus, ambangungko! Samballei, nampa nukanre!” 14 Appialimi Petrus nakana, “Tena, Batara! Tena le'bakapa' angnganre apa-apa haranga siagang ra'masaka.” 15 Mingka nakanamo pole anjo sa'raya ri ia, “Apa le'baka Nahallallang Allata'ala, teako pa'jari harangi.” 16 Pintallungi tuli battu anjo pappiso'naya, nampa ta'angka' ammotere' nai' ri suruga anjo kaenga. 17 Lippumi nawa-nawana Petrus ampikkiriki angkana apa battuanna anjo pappiso'naya. Lalang appikkiri'na Petrus, nibuntulu'mi balla'na Simon ri anjo tunisuroa ri Kornelius. Nia'mi ke'nanga ri dallekanna pakke'buka. 18 Akkio'mi tau ke'nanga nanakuta'nang angkana, “Maka nia' toana a'bangngi anrinni niarenga Simon Petrus?” 19 Lalang tuli napikiri'na ija Petrus angkana apa battuanna anjo pappiso'nana, Nakanamo RohNa Allata'ala ri ia, “He, Petrus, nia' tau tallu amboyako. 20 Lintakko naung, siagang teako bata-batai ampinawangi ke'nanga, nasaba' iNakke assuroi ke'nanga.” 21 Naummi Petrus battu ri anjo ballaka, na nakana ri anjo taua, “Inakkemi antu nuboyaya. Apa kutadeng parallu nukabattuang?” 22 Appialimi ke'nanga angkana, “Kapiteng Kornelius ansuroi anne ikambe battu mae. Anjo Kornelius tau baji', siagang tau malla' ri Allata'ala, kammayatompa sanna' nipakalompona ri sikamma tu Yahudia. Niaki malaeka'Na Allata'ala ansuroi sollanna nasuro kiokki' mange ri balla'na. Iaminjo ampa'nassai angkanaya nipilangngerimi pappala' doanna ri Allata'ala, punna akkullemo nalangngere' apa lakipabattua mae ri ia.” 23 Nakio'mi Petrus ke'nanga antama' ri balla', nampa a'bangngi ke'nanga. Ammukona, ambangummi Petrus nampa a'lampa siagang ke'nanga. Nia' todong siapa are tau tappa' ri Yope amminawang todong ri ke'nanga. 24 Siallo le'ba'na anjo, battumi ke'nanga mange ri Kaisarea. Sallomi ke'nanga nitayang-tayang ri Kornelius siagang bija-bijanna, kammayatompa passari'battangang baji'na niaka todong nakio' battu. 25 Ri wattunna battumo Petrus, mangemi Kornelius anruppai, nasu'ju' ri dallekanna. 26 Mingka nipaentemmi ammotere' ri Petrus nampa nakana, “Ambangungko nai'! Inakke tau biasa tonja'.” 27 A'bicarami Petrus siagang Kornelius, nantama' tommo ke'nanga ri balla'. Jaimi nacini' Petrus tau battu a'rappungang. 28 Le'baki anjo nakanamo ri ke'nanga, “Nuasseng ngasenji sari'battang, angkanaya situru' ajarang agamana tu Yahudia, tanipa'biangai ke'nanga angkunjungi balla'na bansa maraenga, yareka assileo' siagang bansa maraenga. Mingka le'ba'ma' Napabattuang Allata'ala, angkanaya takkulleai kucini' ra'masa' yareka harang tau maraenga. 29 Iaminjo, na ri wattungku kikio' battu, kukate'neammi eroka battu. Jari kamma-kamma anne eroki kuasseng, apa kutadeng saba'na nakikioka' battu?” 30 Appialimi Kornelius nakana, “Ri tallungallona allaloa, kira-kira ri wattu kamma-kammaya anne, sitabanga' appala' doang ri ballakku, ri wattu tette' tallu ri karuenga. Ti'ring nia'mo sitau bura'ne ammenteng ri dallekangku. Accilla'-cillaki pakeanna anjo taua. 31 Nakana ri nakke, ‘Kornelius! Natarimami Allata'ala pappala' doannu, siagang Nau'rangimi pa'mai' baji'nu. 32 Jari suromi taua mange ri Yope angkioki tau niarenga Simon Petrus. Kamma-kamma anne niaki a'bangngi ri balla'na se'rea pajama kukkulu', niarenga Simon; anjo ballaka anjorengi ri biring tamparanga.’ 33 Lanri kammana minjo nakusuromo linta' taua mae angkiokki'. Nasanna' baji'na pa'maitta, kaerokki' battu mae anrinni. Kamma-kamma anne nia' ngasemmi ikambe anrinni, ri dallekanNa Allata'ala, ero' ampilangngeri sikamma apa Nasuro pabattua Allata'ala mae ri kambe.” 34 Nakanamo Petrus, “Kamma-kamma anne ma'nassa nupahang tojemmi angkanaya Napasangkamma ngasengi Allata'ala sikamma rupataua. 35 Inai-nai malla' ri Allata'ala siagang anggaukangi kabajikanga, iami nitarima ri Allata'ala, manna pole bansa apa. 36 Nuasseng ngasemmi bonena kabara' Napabattua Allata'ala mae ri bansa Israel. Anjo kabaraka, iamintu ri passala'na Kabara' Baji' passiamakkang lalang ri KalenNa Isa Almasi iamintu Batara mae ri sikontu rupataua. 37 Nuassemmi apa le'baka kajariang ri sikontu Yudea, iamintu appakkaramula battu ri Galilea ri le'ba'namo napassuroang Yohanes anjo pa'je'nekanga mae ri taua. 38 Nuassemmi angkanaya le'ba'mi Napile Allata'ala anjo Isa tu Nazaretka, naNapassareang RohNa Allata'ala siagang koasaNa mae ri Ia. Nuasseng tommi angkanaya le'ba'mi a'lampa mange-mange Isa anggaukangi kabajikanga; Naballeimi sa'genna a'jari baji' sikamma tau nasosoka setang, lanri niaki Allata'ala anrurungangi. 39 Ikambemi anne le'baka anciniki sikontu apa le'baka Nagaukang ri pa'rasanganna tu Yahudia siagang ri Yerusalem. Mingka manna nakamma, nisalli'mi siagang nibunomi ri tu Yahudia. 40 Mingka ri makatalluna alloa, nipattallasa' poleammi ammotere' ri Allata'ala battu ri alla'na tau matea, nanipappicinikang ri rupataua angkanaya ma'nassa attallasa' poleammi. 41 Mingka tena nipappicinikang ngasengi mae ri sikontu taua, passangalinna ri kambeji bawang tu le'baka Napile la'bi riolo Allata'ala a'jari sa'bi-sa'binNa: Sipangnganreangi ikambe siagang Ia ri wattunna attallasa' poleammo battu ri kamateanga. 42 Na Nasuromo anne ikambe ampabattui anjo Kabara' Bajika mange ri sikontu rupataua. Kammayatompa a'jari sa'bi angkanaya Iami niangka' ri Allata'ala a'jari Haking mae ri sikontu tau attallasaka ija siagang tau mateamo. 43 Sikontu na'bi-na'bia, le'ba' ngasemmi nabicara riolo anjo passalaka. Nakana ke'nanga, sikamma tau tappaka ri Isa lanipammopporangi dosa-dosana, lanri kakoasanNa Isa.” 44 Sitabang a'bicarana ija Petrus, naummi RohNa Allata'ala, nanakoasai sikamma tau allangngerekai anjo kabaraka. 45 Sikamma tu Yahudi tappakamo ri Isa, anjo niaka amminawang ri Petrus battu ri Yope, a'jari lannasa' ngasemmi anciniki anjo apa kajarianga. Lannasa' ngasengi ke'nanga anciniki nasaba' Napassareang tongi RohNa Allata'ala mae ri bansa maraenga, pantaranganna bansa Yahudia. 46 Nasaba' nalangngere'mi ke'nanga anjo taua a'bicara lalang a'rupa-rupa bicara, siagang ammuji-muji ri Allata'ala. Nampa nakanamo pole Petrus, 47 “Cini'mi anne taua ngaseng, anggappa tommi RohNa Allata'ala, sangkamma ikatte. Jari maka akkulleiji taua napisangkai punna nije'ne'mo siagang je'ne' ke'nanga?” 48 Jari nasuromi Petrus ke'nanga nije'ne' lalang arenNa Isa Almasi. Le'baki anjo napala'mi ke'nanga, sollanna ammantang ija Petrus angngagangi ke'nanga pirang-pirangallo are sallona.
1 Nalangngere'mi sikamma tunisuroNa Allata'ala siagang sikamma tau tappaka ri sikontu Yudea, angkanaya manna tau tenayapa nantama' agama Yahudi natarima tommi kananNa Allata'ala. 2 Jari ri wattunna a'lampa Petrus mange ri Yerusalem, nicallami Petrus ri tu Yahudi tappakamo. 3 Nakana ke'nanga ri Petrus, “Angngapa nu'lampa todong mange ri balla'na tu tenayapa nisunnaki? Ba'lalo sipangnganreang tongko siagang ke'nanga!” 4 Jari napakasingara'mi Petrus mae ri ke'nanga ngaseng, sikamma apa le'baka kajariang, appakkaramula battu ri pakkaramulanna. Nakana Petrus, 5 “Sitabanga' appala' doang ri Yope, nania' se're pappiso'na battu mae ri nakke. Nia' kucini' apa-apa kamma silawara' kaeng la'ba' nipaturung battu ri langika, ta'gentung ri appaka panynyingkulu'na, nampa ammantang ri sa'ringku. 6 Ri wattunna kuciniki lalanganna, nia' kucini' olo'-olo' appaka bangkenna, olo'-olo' liaraka, olo'-olo' akkadangkanga, kammayatompa jangang-jangang liaraka. 7 Nampa nia' kulangngere' sa'ra angkana mae ri nakke, nakana, ‘Ambangungko nai' Petrus! Samballei nampa nukanre!’ 8 Mingka appialima' kukana, ‘Tena, Batara! Tena' le'bakapa' angnganre kanre harang yareka ra'masaka.’ 9 Mingka nakanamo pole anjo sa'raya battua ri langika, ‘Apa le'baka Nahallallang Allata'ala, teako pa'jari harangi.’ 10 Pintallungi kucini' anjo apa kajarianga. Nakala'busanna ta'angka' ngasemmi ammotere' nai' ri suruga. 11 Sitabang anjo wattua, nia' tommi anjo tau tallua battu ri Kaisarea iamintu tunisuroa battu mae ri nakke, battu mae ri anjo balla' kupa'bangngia. 12 Nampa Nasuroma' RohNa Allata'ala a'lampa ampinawangi ke'nanga, siagang Napasanga' sollanna tena nakubata-bata ampinawangi anjo ke'nanga. Manna anne annang sari'battanga amminawang tongi ri nakke a'lampa mange ri Kaisarea, nakisiagang ngasemmo antama' ri balla'na Kornelius. 13 Nampa nacaritamo Kornelius mae ri kambe antekamma ri wattunna nacini' malaekaka ammenteng ri balla'na na nakana, ‘Suroi taua mange ri Yope nanakio' se'rea tau bura'ne niarenga Simon Petrus. 14 Iami lampabattui mae ri kau kabara' lakkullea ampasalamakko siagang sikontu bone balla'nu.’ ” 15 Napannarrusuki caritana Petrus nakana, “Na ri wattungku appakkaramula a'bicara kamma anjo, Naummi RohNa Allata'ala mae ri ke'nanga ngaseng, sangkamma le'baka kajariang mae ri katte ngaseng pirangalloang. 16 Nampa kuu'rangimo angkanaya le'baki akkana kamma anne Batara, ‘Yohanes je'ne' napake anje'neki taua, mingka ikau ngaseng lanije'nekko siagang RohNa Allata'ala.’ 17 Jari singara'mi ma'nassana angkanaya Napassareang tongi Allata'ala passare kammaya mae ri tu tenaya nantama' agama Yahudi, sikamma apa Napassareanga mae ri katte ngaseng ri wattunta tappa'mo mae ri Isa Almasi. Jari antekamma bateku lampisangkai Allata'ala?” 18 Nalangngere'namo anjo apa napabattua Petrus, tenamo nakkana-kana ke'nanga. Nampa ammuji-mujimo ke'nanga ri Allata'ala. Nakana ke'nanga, “Punna kamma, manna bansa maraenga nisare tommi oloang ri Allata'ala sollanna toba' ke'nanga battu ri dosa-dosana, nanapahang baji' katallassang sitojennaya!” 19 Ri le'ba'namo Stefanus nibuno, appakkaramulami niondang mange-mange tau tappaka ri Isa, sa'genna tassia'-siara'mo ke'nanga ri kere-keremae. Nia' lari mange ri Fenisia, nia' todong mange ri Siprus siagang Antiokhia. Napabattumi ke'nanga kabara' battua ri Allata'ala. Mingka tu Yahudiaji bawang napabattuang ke'nanga. 20 Mingka nia' todong anjo tau tappaka, iamintu tu battua ri Siprus siagang Kirene, a'lampa mange ri Antiokhia. Na iaminne ke'nanga ampabattui tongi Kabara' Bajika ri passala'na Isa mae ri tu tenayapa nantama' agama Yahudi. 21 Niaki koasaNa Batara anrurungangi ke'nanga, sa'genna jaimi tau a'jari tappa', nanapassareang kalenna mae ri Batara. 22 Sikontu kabara'na anne apa kajarianga anrapi' tommi mae ri jama'aka ri Yerusalem. Jari nasuromi ke'nanga Barnabas mange ri Antiokhia. 23 Na ri wattunna battu Barnabas mange anjoreng, nacini'mi antekamma bateNa Allata'ala ambarakkaki ngasengi anjo taua. Sanna'mi rannuna Barnabas. Na napakainga'mo ke'nanga sollanna jarre' tojeng-tojeng tappa'na ke'nanga ri Batara. 24 Anne Barnabas tau baji' pa'mai' siagang nikoasaimi ri RohNa Allata'ala; kammayatompa sanna' jarre'na tappa'na ri Batara, sa'genna jaimi tau amminawang tappa' ri Batara. 25 Nampa a'lampa Barnabas mange ri Tarsus, amboyai Saulus. 26 Ri wattunna sibuntulu'mo Saulus, naerang tommi Saulus mange ri Antiokhia. Niaki sitaung ke'nanga ammantang a'rappungang siagang jama'aka anjoreng, najai tau naajara' ke'nanga. Anjoremmi ri Antiokhia uru-uru nigallara' tu Karisteng sikamma tau tappaka ri Isa. 27 Anjo wattua nia' siapa are na'bi battu ri Yerusalem mange ri Antiokhia. 28 Kalase'renna ke'nanga niarengi Agabus. Lanri pangngajara'Na RohNa Allata'ala, natappu riolomi angkanaya lakajariangi sallang ri sikontu linoa kacipurang lompoa. (Na anjo napakkanaya kajariang tojemmi ri wattunna Karaeng Klaudius ammarenta.) 29 Jari assamaturu'mi sikamma tau tappaka ri Isa, ero' appikatu sumbangang mae ri sikontu sari'battang niaka ammantang ri Yudea; massing appikatumi ke'nanga situru' pakkullena. 30 Nagaukammi ke'nanga anjo passamaturukanga. Na'lampamo Barnabas siagang Saulus angngerangi anjo sumbanganga mae ri pamimping-pamimping jama'aka ri Yudea.
1 Iatommi anjo wattua nappakkaramulamo Karaeng Herodes anjallakkangi anggota-anggota jama'aka. 2 Iami amparentakangi, nanibunomo siagang pa'dang sari'battanna Yohanes, iamintu Yakobus. 3 Ri wattunna nacini' Herodes angkanaya rannui nyawana tu Yahudia anciniki anjo apa nagaukanga, pila' katambammi panggaukang kammana; nasuro tommi taua anjakkalaki Petrus. Anjo wattua Allo Lomponai Roti Tenaya Nammake Pa'gambang. 4 Ri wattunna nijakkala'mo Petrus nipantama'mi ri tarungkua. Nia' appa' regu tantara nisuro anjagai Petrus — tasse're-se're regu, nia' appa' anggota tantara. Le'bappi passua'-suarrang allo Paskaya, nampa laniadeli Petrus ri Herodes, ri dallekanna tau jaia. 5 Jari nitahammi rolong Petrus lalang ri tarungkua; mingka tuli appala' doang dudumi sikontu jama'aka mae ri Batara sollanna Narurungangi Petrus. 6 Ri bangngi tenanapa nalanierang Petrus andallekang ri Herodes siagang tau jaia, attinromi Petrus. Anjo wattu attinrona tassikkoki rua-rua limanna, nanijagai ri rua tantara pangawala'. Anjoreng ri pakke'bu' tarungkua, nia' todong rua pangawala' maraengang anjagai tarungkua. 7 Ti'ring nia'mo malaeka'Na Batara ammenteng anjoreng, siagang accayami singaraka lalang ri kamara'na anjo tarungkua. Nironrommi Petrus ri anjo malaekaka, sa'genna ambangung Petrus. Nampa nakana anjo malaekaka, “He, ambangungko linta'!” Anjo wattua ta'lappasa'mi anjo rante bassi nipasikkoka ri limanna Petrus. 8 Le'baki anjo nakanamo anjo malaekaka, “Pakemi pakeannu siagang patabami sapatunu!” Ammakeammi Petrus siagang napatabami sapatuna. Le'baki anjo, nakanamo pole anjo malaekaka, “Pakemi jubanu, siagang amminawangko ri nakke!” 9 Jari amminawammi Petrus ri anjo malaekaka, assulu' battu ri anjo tarungkua. Mingka tena naassengi Petrus angkanaya anjo apa nagaukanga malaekaka ma'nassa kajariang tojeng-tojengi. Nakapangi Petrus angkanaya asso'naji bawang. 10 Ri wattunna nalaloimi ke'nanga tampa' pajaga makase'rea siagang makaruaya, anrapi'mi ke'nanga ri pakke'bu' bassia, angngoloa mange ri kotaya. Tassungke kale-kalemi anjo pakke'buka. Assulu'mi ke'nanga, nampa a'jappa ri se'reang lorong. Ti'ring lanynya'mi anjo malaekaka ambokoi Petrus. 11 Le'baki anjo nampami naasseng Petrus anjo apa le'baka kajariang ri kalenna. Nakanamo ri kalenna, “Kamma-kamma anne kuassemmi angkanaya ma'nassa Nasuromi malaeka'Na Batara battu allappassanga' battu ri kakoasanna Herodes siagang battu ri sikontu apa eroka nagaukang bansa Yahudi mae ri nakke.” 12 Naassennamo Petrus anjo passalaka, a'lampami Petrus mange ri balla'na Maria, amma'naya Yohanes, nigallaraka todong Markus. Anjoreng jai tau a'rappungang appala' doang. 13 Nade'de'mi Petrus pakke'buka. Nia'mo sitau baine palayang niarenga Rode, battu ero' assungkei pakke'buka. 14 Naasseng memanji silalonna sa'ranna Petrus. Lanri rannu duduna, akkaro-karomi ammotere' antama', natanasungkeapa pakke'buka. Nampa napauang sikamma tau niaka anjoreng angkana niaki Petrus pantarang. 15 Nakanamo ke'nanga, “Pongorokko antu!” Mingka attojeng-tojemmi Rode angkana ma'nassa Petrus tojeng anjo pantarang. Jari nakanamo ke'nanga, “Malaeka'naji anjo!” 16 Anjo wattua nade'de' tulimi Petrus pakke'buka. Jari nasungkemi ke'nanga pakke'buka. Na ri wattunna nacini' ke'nanga Petrus, sanna'mi lannasa'na ke'nanga. 17 Nikodemi siagang lima ke'nanga ri Petrus, sollanna sannang ke'nanga. Nampa nacarita antekamma bateNa Batara angngerangi assulu' ri tarungkua. Nampa nakana, “Pabattumi anne kabaraka mae ri Yakobus siagang sikamma sari'battang maraengannaya.” Le'baki anjo, a'lampami Petrus ambokoi anjo tampaka, nampa mange ri tampa' maraenga. 18 Ammukona bari'basa', gegere' ngasemmi tantara pangawalaka ri tarungkua. Sanna' lannasa'na ke'nanga ri passala'na anjo apa kajarianga ri kalenna Petrus. 19 Nasuromi Herodes taua mange amboyai Petrus. Mingka takkulleami ke'nanga ambuntuluki Petrus. Jari naparentakammi Herodes sollanna nikuta'nang ngaseng anjo tantara pangawalaka nampa nibuno. Le'baki anjo a'lampami Herodes battu ri Yudea, namange ammantang siapa are sallonna ri Kaisarea. 20 Sanna' larrona Herodes ri tu Tiruska siagang tu Sidonga. Lanri kammana, a'lampami ke'nanga mange andallekang ri ia. Uru-uruna nanyonyo'mi rolong Blastus, iamintu kapalaya ri balla' lompona Herodes, sa'genna sipammentengang Blastus siagang ke'nanga. Le'baki anjo nirurungammi ke'nanga mange andallekang ri Herodes. Appala' damemi ke'nanga ri Herodes, nasaba' apa-apa nikanrea ri pa'rasanganna ke'nanga, sangnging apa-apa battu ri pa'rasanganna Herodes. 21 Ri se'reang allo, iamintu allo le'bakamo nipattantu, napakemi pakeang kalompoanna Herodes. Nampa ammempo ri empoang kakaraenganna, nappakkaramula appidato ri dallekanna ra'yaka. 22 Nalangngere'na ra'yaka anjo pidatona Herodes, akkiok-kio'mi ke'nanga angkana, “Anne sa'ra rewata, teai sa'ra tau!” 23 Mingka anjo wattua battumi malaeka'Na Batara antempaka'rangi Herodes, lanri tenana nahargai Allata'ala. Nikanremi Herodes ri gallang-gallang nampa mate. 24 Jari pila' a'la'bammi mange-mange kana-kananNa Allata'ala, siagang pila' majarre'mi. 25 Le'ba'namo nagaukang jama-jamanna Barnabas siagang Saulus, a'lampami ke'nanga ambokoi Yerusalem. Naerang tommi ke'nanga Yohanes Markus.
1 Ri jamaah Antiokhia nia' siapa are na'bi siagang guru. Areng-arenna ke'nanga iamintu: Barnabas, Simeon nigallaraka I Le'leng, Lukius battua ri Kirene, Menahem siaganga Herodes niparakai sa'genna lompo, siagang Saulus. 2 Ri wattunna assambayang mae ri Batara siagang appuasa ke'nanga, Nakanamo RohNa Allata'ala mae ri ke'nanga, “Pilei nanusa'lakkangA' Barnabas siagang Saulus, sollanna Kusuro anjamai jama-jamang le'baka Kupattantuangi ke'nanga.” 3 Le'baki appuasa siagang appala' doang ke'nanga, napadongko'mi limanna ke'nanga irateanganna Barnabas siagang Saulus, nampa nabarakkaki nanasuro ke'nanga sipa'rua a'lampa. 4 Lanri nisuroi ke'nanga ri RohNa Allata'ala, a'lampami Barnabas siagang Saulus mange ri Seleukia. Battu anjorengi ke'nanga assombala' mange ri pulo Siprus. 5 Ri wattunna battu ke'nanga mange ri Salamis, napabattumi ke'nanga kana-kananNa Allata'ala lalang ri sikamma balla' sambayanna tu Yahudia. Nibantumi ke'nanga ri Yohanes Markus lalang ri pa'jappanna ke'nanga. 6 Najappai ngasemmi ke'nanga anjo puloa, sa'genna battu mange ri Pafos. Anjoreng assibuntulu'mi ke'nanga siagang se're tu Yahudi, niarenga Bar Yesus. Jama-jamanna iamintu pabale'-bale' mata, na nakana kalenna na'bi. 7 Anne taua agang bajiki siagang Sergius Paulus, iamintu Guburnur ri anjo puloa. Anjo Guburnurka sanna' cara'de'na siagang sanna' baji'na. Nakio'mi Barnabas siagang Saulus lanri ero' tongi nalangngere' kananNa Allata'ala. 8 Mingka nihalangimi Barnabas siagang Saulus ri Elimas, anjo pabale'-bale' mataya. Nasaba' najagai Elimas (iaminjo arenna anjo pabale'-bale' mataya lalang bicara Yunani) gassingka a'jari tappaki anjo Guburnurka mae ri Isa. 9 Mingka nikoasaimi ri RohNa Allata'ala Saulus — nigallaraka todong Paulus; sa'genna najanjang anjo pabale'-bale' mataya, 10 nampa nakana, “He, ikau paballe-balle lompoa, ana' tu sannaka ja'dala'na! Ikaumi musunna sikontu apa-apa bajika. Angngapa nutaeroka ampamari anrompa-rompai ero'Na Allata'ala untu' ampasalamaki rupataua? 11 Kamma-kamma anne lanuciniki, naNahukkungko Batara! La'jari butako siapa are sallona, sa'genna takkullea nucini' matanna alloa.” Anjo wattua nia' memammo silalonna nakasia' Elimas kamma rammang le'leng antongkoki matanna. Sa'genna angngasala'mi mange-mange, a'boya tau akkullea anrenrengi. 12 Nacini'na anjo Guburnurka anjo apa kajarianga, a'jari tappa'mi ri Isa. Nasaba' sanna' baji'na antama' ri atinna anjo pangngajarang battua ri Batara. 13 Battu ri Pafos, assombala'mi Paulus siagang agang-aganna mange ri Perga, daera Pamfilia. Battuna mange anjoreng a'lampami Yohanes Markus ambokoi ke'nanga, ammotere' mange ri Yerusalem. 14 Battu ri Perga, napatulusu'mi lampana ke'nanga mange ri Antiokhia, ri daera Pisidia. Ri allo Pammari-marianga, a'lampami ke'nanga mange ammempo ri balla' sambayanga. 15 Ri wattunna le'ba' nibaca Kitta'na Musa siagang Kitta'na Na'bi-na'bia, nasuromi pamimping-pamimping balla' sambayanga akkuta'nang tau niaka hadere' mae ri Paulus siagang agang-aganna. Nakanamo pamimping balla' sambayanga mae ri Paulus siagang aganna, “Sikamma sari'battangku, punna nia' pappakainga' ero' nupabattuangi anne taua ngaseng, pabattuammi.” 16 Ammentemmi Paulus, nanaangka' limanna, nampa nakana, “Sikamma sari'battangku bansa Israel, kammayatompa sari'battangku ngaseng maraengannaya, niaka anrinni, anynyombaya ri Allata'ala. Pilangngeri sai anne kana kupabattua: 17 Le'ba'mi Napile Allata'ala bansa Israel, boe-boeta, naNapa'jari jai anne bansaya ri wattunna ammantang ke'nanga annumpang ri butta Mesir. Nampa lalang kakoasang lompoNa Allata'ala, Naerammi Allata'ala assulu' ke'nanga battu ri Mesir. 18 Sa'baraki Allata'ala anciniki gau'-gau'na ke'nanga ri wattunna a'jappa ke'nanga patampulo taung sallona ri parang lompoa. 19 Tuju bansa maraeng nabeta Nabunduki ri butta Kanaan. Nampa Nabage-bage Allata'ala anjo butta Kanaan mange ri bansa Israel, sollanna nakammai anjo buttaya. 20 Yangasenna anjo patambilangngang allimampulo taung sallona kajariang. Le'baki Nabage Allata'ala anjo butta Kanaan mae ri ke'nanga, Nasaremi ke'nanga haking-haking a'jari pamimpinna ke'nanga. Haking kala'busanga iamintu Na'bi Samuel. 21 Nampa appala' ke'nanga sitau karaeng. Nisaremi Allata'ala ke'nanga se're karaeng, iamintu Saul, ana'na Kis, battua ri suku Benyamin. Iaminjo Saul a'jari karaeng ri ke'nanga patampulo taung sallona. 22 Ri wattunna Nalekka' Allata'ala empoanna Saul a'jari karaeng, Naangka'mi pole Allata'ala karaeng maraenga iamintu Daud a'jari karaenna ke'nanga na iaminne kananNa Allata'ala ri passala'na Daud, ‘Kugappami Daud, ana'na Isai, ampakasannangai atingKu. Iami langgaukangi erokKu.’ 23 Battu ri sossorannami anjo Daud, Napasadia Allata'ala sitau Karaeng Mappasalama'na bansa Israelka, situru' apa le'baka Napa'janjiang riolo. Na iaminjo Isa Karaeng Mappasalama' le'baka nipa'janjiang. 24 Ri tenanapa Napakkaramulai Isa jama-jamanNa, napakkio'-kiokammi Yohanes mae ri bansa Israel, sollanna toba' ke'nanga battu ri dosana nampa nije'ne'. 25 Na ri wattu lakala'busannamo jama-jamanna Yohanes, nakanamo mae ri taua, ‘Turu' panggappanu, anne inakke inaia'? Teai inakke anjo Tau salloamo nutayang. U'rangi, anjo Taua labattui ri bokoangangku; manna assungkeangi passikko' sapatuNa tena todong kusiratang.’ 26 Sossoranna ngasengko Abraham. Siagang sikamma sari'battang maraenganga anrinni anynyombai mae ri Allata'ala! Napabattumi Allata'ala mae ri katte anjo kabara' kasalamakkanga; 27 nasaba' tanapahangai tau ammantanga ri Yerusalem siagang pamimping-pamimpinna ke'nanga angkana Iaminjo Isa Karaeng Mappasalamaka. Tanapahangai ke'nanga pangngajaranna na'bi-na'bia, tuli nibacaya punna allo Pammari-mariang. Iaminjo saba'na nanabunoi ke'nanga Isa. Mingka lanri nagaukannamo anjo ke'nanga, na'jari a'rupamo apa le'baka nasero kana na'bi-na'bia riolo. 28 Manna takkullea ke'nanga anggappa kasalang ri Isa, ampassiratangai nihukkung mate, mingka kammaji napala'na ke'nanga ri Pilatus, sollanna nibuno anjo Isa. 29 Na le'ba'namo nabuno Isa, situru' apa le'baka tattulisi' lalang ri Kittaka, napanaummi ke'nanga maya'Na battu ri kayu sallika nampa napantama' ri jeraka. 30 Mingka nipattallasa' poleammi ri Allata'ala battu ri kamateanga. 31 Nampa a'mole-mole battu ampappicinikangi KalenNa mae ri sikamma tau Naaganga battu ri Galilea mange ri Yerusalem, ero' ampa'nassai angkanaya attallasa' poleammi battu ri kamateanga. Iaminjo ke'nanga a'jari sa'biNa kamma-kamma anne mae ri bansa Israel. 32 Jari, kamma-kamma anne napabattumi ikambe anjo Kabara' Bajika mae ri kau ngaseng: Anjo apa le'baka Napa'janjiang Allata'ala mae ri boe-boeta, 33 Napa'rupami mae ri katte lanri attallasa'Na ammotere' Isa battu ri kamateanga. Nasaba' ilalang ri Kitta' Pammuji-muji passala' rua nia' tattulisi' angkana, ‘Ikaumi AnakKu, anne alloa iNakkemi a'jari ManggeNu.’ 34 Nipattallasa' poleammi ammotere' ri Allata'ala battu ri kamateanga. Kamma-kamma anne tenamo nalaNakasia' pole nikanaya kamateang lalang ri jeraka. Ri anjo passalaka Nakanamo Allata'ala, ‘LaKusareKo janji matangkasa', attantua laKurupaina, le'ba' Kupa'janjianga mae ri Daud.’ 35 Kammayatompa, lalang ri aya' maraenga nia' angkana, ‘Tena nalaNubalang parekang anjo Ata majarre'Nu la'jari botto' lalang ri jeraka.’ 36 Matemi Daud ri le'ba'namo nagaukang apa-apa Napassuroanga Allata'ala ri ia. Le'ba'mi nitarawang siagang boe-boena. Anjo maya'na Daud ancuru' tommi a'jari butta ngaseng. 37 Mingka anjo Isa, nipattallasa' poleanga ammotere' battu ri kamateanga, tena naancuru' a'jari butta maya'Na. 38 Lanri kammana minjo sari'battangku ngaseng, musti nuasseng ngasengi angkanaya ilalang arenNa minjo Isa nanipabattumo anjo kabara' nipammopporanna dosaya mae ri kau ngaseng; musti nuassengi angkanaya inai-nai tappa' ri Ia, lanipata'lappasaki battu ri sikontu dosaya, tenaya nakkulle nipata'lappasa' lanri sikamma parentaNa Allata'ala napassareanga Musa. 40 Lanri kammana minjo namusti nuparhatikang baji'-baji', sollanna tena nakajariang mae ri kau apa le'baka napau na'bia, angkana, 41 ‘Parhatikangi baji'-baji' ikau tau nungaia pahina-hina! La'jari lannasakko, nunampa mate! Nasaba' anne jammanga nia' apa-apa Kugaukang tenaya nalanupatappaki, manna nia' tau ampakasingaraki mae ri kau.’ ” 42 Ri wattunna lanabokoimo Paulus siagang Barnabas anjo balla' sambayanga, napala'mi taua sollanna battu pole ke'nanga punna allo Pammari-mariang poleang, nanapakasingara' baji' anjo passalaka. 43 Assulu'na ngasemmo anjo taua battu ri balla' sambayanga, jaimi tau amminawang ri Paulus siagang Barnabas. Anjo taua tu Yahudi siagang bansa maraeng, antamayamo agama Yahudi. Nipakainga'mi ke'nanga ri anjo tunisuroNa Allata'ala, sollanna tuli tanjeng ke'nanga mae ri pangngamaseanNa Allata'ala. 44 Ri allo Pammari-mariang poleanga, a'birimmi battu ngaseng tau anjorenga ri kotaya ero' ampilangngeri kana-kananNa Batara. 45 Ri wattunna nacini' tu Yahudia anjo tau jaia, sanna'mi akkimburuna lalang atinna ke'nanga. Nahinami Paulus, siagang nageakki ngasemmi anjo apa napabattua. 46 Mingka pila' baranimi Paulus siagang Barnabas a'bicara silambusu'na. Nakanamo ke'nanga, “Musti nipabattu memangi rolong kananNa Allata'ala mae ri kau ngaseng. Mingka lanri tenana nuero' antarimai, jari kalennu tommi ampattantui angkanaya tena nusiratang antarimai katallassang sitojennaya siagang satunggu-tunggua. Jari kamma-kamma anne kubokoi ngaseng mako, nampa a'lampa ikambe mae ri bansa maraenga. 47 Nasaba' iaminne parentaNa Batara mae ri kambe; Nakana Batara, ‘Kupa'jari mako singara' mae ri bansa-bansa maraenga, teaiya tu Yahudi, sollanna nupabattu kasalamakkang mae ri sikontu linoa.’ ” 48 Ri wattunna nalangngere' tau battua ri bansa maraenga anjo kananna Paulus, sannang sikalimi nyawana ke'nanga. Ammuji-mujimi ke'nanga ri Batara. A'jari tappa'mi sikamma tau le'baka nipattantu ri Allata'ala langgappai katallassang satunggu-tunggua. 49 A'la'bammi kana-kananNa Batara mange ri kere-kere mae ri sikontu anjo daeraya. 50 Mingka nikompa-kompa salami ri tu Yahudia sikamma tumalompoa siagang bai'-baine tumalompoa ri anjo kotaya, ia tu mallakamo ri Allata'ala. Napasimusumi ke'nanga siagang Paulus na Barnabas. Sa'genna nibongkamo Paulus siagang Barnabas battu ri anjo daeraya. 51 Napatu'du'mi nanapasulu' limbu'bu' niaka ri pa'lapa' bangkenna Paulus siagang Barnabas ri dallekanna ngaseng ke'nanga. Iaminjo a'jari pappakainga' mae ri ke'nanga. Le'baki anjo a'lampami Paulus siagang Barnabas mange ri Ikonium. 52 Sanna'mi rannuna ngaseng tau tappaka ri Antiokhia siagang nikoasaimi ke'nanga ri RohNa Allata'ala.
1 Kammatommi anjo kajarianga ri Ikonium. A'lampa tommi Paulus siagang Barnabas ri balla' sambayanna tu Yahudia; na'bicara kamma tommo anjo, sa'genna jai sikali tu Yahudi siagang bansa maraenga a'jari tappa' ri Isa. 2 Mingka tu Yahudi tenaya naero' tappa' nakompa-kompa salami bansa maraenga, sa'genna birisi'mo ke'nanga mae ri tu tappaka ri Isa. 3 Iaminjo saba'na nammantammo sallo-sallo Paulus siagang Barnabas anjoreng. A'bicarami ke'nanga siagang barani ri passala'na Batara. Na Napa'buttimo Batara angkanaya ma'nassa kontutojengi anjo kabara' pangngamaseanNa; Nasaremi ke'nanga koasa anggaukangi gau'-gau' appakalannasaka. 4 Mingka sisala-salami para ia anjo tau niaka anjoreng ri kotaya; nia' ammenteng mae ri tu Yahudia na nia' ammenteng mae ri anjo tunisuroNa Allata'ala. 5 Assikongkolo'mi tu Yahudia siagang pamimping-pamimpinna ke'nanga, siagang pole bansa-bansa maraenga ero' ansessai siagang ansambilai batu anjo tunisuroNa Allata'ala. 6 Mingka naassemmi tunisuroNa Allata'ala anjo passikongkolanna ke'nanga. Jari naliliammi ke'nanga anjo balaya, na'lampa mange ri Listra siagang Derbe, iamintu kota-kota niaka ri daera Likaonia, siagang ri daera-daera ri ampi'naya. 7 Anjoremmi ke'nanga ampa'la'bangi anjo Kabara' Bajika. 8 Ri Listra, nia' sitau bura'ne peso'. Peso' memammi ri pakaramula nilassukanna, sa'genna takkullea a'jappa lanri sanna' lammana bangkenna. 9 Ammempomi anjo tau pesoka ampilangngeri Paulus a'bicara. Nacini'mi Paulus angkana tappaki anjo tau pesoka, jari akkullei niballei. Najanjammi Paulus anjo taua, 10 nampa nalompoi sa'ranna nakana, “Ammentengko nai'!” A'lumpa'mi ammenteng nai' anjo taua, nampa a'jappa. 11 Nacini'na tau jaia anjo apa nagaukanga Paulus, ammarrammi ke'nanga lalang bicara Likaonia, battuanna, “Manurummi rewata-rewataya antama' ri lino, a'rupa tau.” 12 Naaremmi ke'nanga anjo Barnabas Rewata Zeus; na Paulus Rewata Hermes, nasaba' iami a'bicara. 13 Battumi imanna Rewata Zeus angngerang siapa are sapi laki siagang bunga-bunga ri pakke'bu' lompona anjo kotaya. Ri dallekannai kotaya ammantang anjo balla' panynyombanga mae ri Rewata Zeus. Battu tongi anjo imanga ero' amminawang ri tau jaia assare koro'bang mae ri Paulus siagang Barnabas. 14 Nalangngere'na Barnabas siagang Paulus anjo apa eroka nagaukang anjo taua ngaseng, nakekke'-kekke'mi pakeanna ke'nanga, nalari mange ri tangnga-tangngana anjo tau jaia, nampa ammarrang angkana, 15 “He, angngapa nanugaukang ngasengi anne kammaya? Ikambe anne tau biasa tonjaki' sangkamma ikau ngaseng! Niaki ikambe mae anrinni untu' ampabattui Kabara' Bajika mae ri kau ngaseng, sollanna nubokoi anjo apa-apa tenaya matu-matunna; na nubattu mae ri dallekanNa Allata'ala attallasaka, ampa'jariai langika siagang linoa, kammayatompa tamparanga siagang sikontu apa niaka lalang. 16 Ri jammang allaloa Nacini'-ciniki Allata'ala bansa-bansaya anggaukangi ri tallasa'na apa-apa ero' kalenna. 17 Mingka tena Natakkaluppa ampa'butti kabajikanNa ilalang apa-apa Nagaukanga. Nasare ngasengko bosi battu ri langika, siagang wassele'na buttaya punna narapi' wattunna. Nasareko apa-apa lanukanrea siagang Napakasannangi atinnu.” 18 Mingka manna nakkana kammamo anjo Paulus siagang Barnabas, sukkara' iji lanihalangi anjo taua ngaseng assare koro'bang mae ri kalenna Paulus siagang Barnabas. 19 Nia'mo siapa are tu Yahudi battu ri Antiokhia ri daera Pisidia siagang battu ri Ikonium mange ri Listra. Napangaruimi tau jaia sa'genna ammenteng mae ri ke'nanga tau jaia. Nasambilami ke'nanga batu Paulus nampa nare'resang assulu' ri pantarangang kota. Nakapangi ke'nanga angkana matemi Paulus. 20 Mingka ri wattunna ammenteng tau tappaka anjoreng angkulilingi Paulus, ambangummi Paulus nampa ammotere' antama' ri kotaya. Ammukona, a'lampami mange ri Derbe siagang Barnabas. 21 Nabirittakammi Paulus siagang Barnabas Kabara' Bajika ri Derbe. Najaimo tau a'jari tappa' ri Isa anjoreng. Le'baki anjo ammotere'mi ke'nanga mange ri Listra, nampa mange ri Ikonium, nampa mange ri Antiokhia ri daera Pisidia. 22 Napakajarre'mi atinna sikamma tau tappaka ri Isa ri anjo kota-kotaya. Napakainga'mi ke'nanga, sollanna tuli jarre' tappa'na mae ri Isa. “Musti jai rolong pa'risi' nikasia', nampa akkulle nikasia' mate'nea lalang ri Lino BeruNa Allata'ala,” kammami anjo napangngajarrang tunisuroNa Allata'ala mae ri sikamma tau tappakamo mae ri Isa, ri anjo kota-kotaya. 23 Nampa naangka'mo Paulus siagang Barnabas pamimping-pamimpinga ri massing-masinna anjo jama'aka. Nampa appala' doang siagang appuasa ke'nanga, nanapassareang ke'nanga anjo pamimping-pamimping jama'aka mae ri Batara napatappaka ke'nanga. 24 Le'baki anjo, napatulusu'mi lampana ke'nanga, allalo ri daera Pisidia sa'genna anrapi' mange ri Pamfilia. 25 Na le'ba'na napabattu ke'nanga kana-kananNa Allata'ala ri Perga, a'lampami ke'nanga mange ri Atalia. 26 Battu anjoremmi ke'nanga assombala' ammotere' mange ri Antiokhia. Iaminjo kota napattampakia ke'nanga ri wattunna nipassareang ke'nanga mae ri Allata'ala, sollanna nagaukang ke'nanga anjo jama-jamang napa'le'bakamo ke'nanga kamma-kamma anne. 27 Ri wattunna battumo ke'nanga mange ri Antiokhia, napa'rappungammi ke'nanga sikamma anggota jama'aka anjoreng. Nampa nacaritakang ngaseng anjo anggota jama'aka sikamma apa le'baka Nagaukang Allata'ala lalang ri kalenna ke'nanga ilalang ri pa'lampanna ke'nanga. Nacarita tommi ke'nanga antekamma batena Nasungkeang todong Allata'ala bansa-bansa maraenga agang, sa'genna akkulle todong ke'nanga a'jari tappa' mae ri Isa. 28 Ammantammi sallo Paulus siagang Barnabas anjoreng ri kotaya siagang sikamma tau tappaka.
1 Nia'mo siapa are tu battu ri Yudea mange ri Antiokhia. Naajara'mi tau tappaka ri Antiokhia angkanaya takkulleai salama' ke'nanga, punna tena nanisunnaki ke'nanga situru' Napassuroanga Allata'ala, le'baka napangngajarrang Musa. 2 Sanna'mi nageakkinna Paulus siagang Barnabas panggappana anjo taua. Kale'bakkanna nipassamaturukimi sollanna a'lampa Paulus, Barnabas, siagang siapa are tau maraengannaya ri Antiokhia, mange ri Yerusalem. A'lampami ke'nanga mange ambicarai anjo passalaka siagang sikamma tunisuroNa Allata'ala kammayatompa pamimping-pamimping niaka anjoreng. 3 Nirurungammi ke'nanga ri anggota-anggota jama'aka sa'genna assulukang kota. Nampa a'lampa ke'nanga allalo ri Fenisia siagang Samaria. Anjoreng, nacaritami ke'nanga antekamma batena bansa-bansa maraenga ampassareang tommi kalenna mae ri Allata'ala. Sanna'mi rannuna ngaseng tau tappaka anjoreng allangngereki anjo kabaraka. 4 Ri wattunna battu ke'nanga mange ri Yerusalem, nitarima baji'-baji'mi ke'nanga ri jama'aka, ri tunisuroNa Allata'ala, kammayatompa ri pamimping-pamimping jama'aka. Nampa nacarita ngasemmo ke'nanga sikamma apa le'baka Nagaukang Allata'ala lalang ri kalenna ke'nanga. 5 Mingka nia'mo siapa are tu Farisi tappakamo, ammenteng angkana, “Musti nisunnaki anjo bansa-bansa maraenga, siagang musti naturuki apa-apa napassuroanga Allata'ala, le'baka napabattu Musa.” 6 Assirapakkang ngasemmi tunisuroNa Allata'ala siagang pamimping-pamimpinga, ero' ambicarai anjo passalaka. 7 Sanna' sallona ke'nanga sipa'bicara. Kala'busanna ammentemmi Petrus na nakana, “Sikamma sari'battangku ngaseng! Nuasseng ngasemmi angkanaya ri siapa are wattu allaloa Napilema' Allata'ala battu ri tangnga-tangnganu, untu' ampa'la'bangi anjo Kabara' Bajika mange ri bansa-bansa maraenga, sollanna nalangngere' todong siagang tappa' todong ke'nanga. 8 Na Allata'ala angngassengi atinna rupataua. Iami ampappicinikangi angkanaya Natarimami ke'nanga. Jari Napassareang tommi RohNa Allata'ala mae ri ke'nanga, sangkamma le'baka Napassareang todong mae ri katte. 9 Tena Napasimmara'-maraengki' Allata'ala siagang ke'nanga. Natangkasi atinna ke'nanga, lanri tappa'na ke'nanga. 10 Jari apa saba'na nanuero' ambali Allata'ala kamma-kamma anne lanri ero'nu ambattali atorang-atorang anjo tau tappaka? Na sikontutojenna manna boe-boeta, yareka manna kalenta ngaseng tena todong nanikkulle anggaukangi anjo atoranga. 11 Kabalekanna, kamma-kamma anne tappakki', angkanaya iaji nikkulle salama' lanri pangngamaseanNa bawang Batara Isa; kamma le'ba' tommi anjo ke'nanga.” 12 Tenamo nania' akkana sikontu anjo tuniaka assirapakkang. Nampa napilangngerimo ke'nanga Barnabas siagang Paulus ancarita poleangi sikamma anjo gau'-gau' appakalannasa' le'baka Nagaukang Allata'ala lalang ri kalenna ke'nanga ri tangnga-tangngana bansa maraenga. 13 Le'baki ke'nanga a'bicara, nakanamo Yakobus, “Sikamma sari'battangku! Pilangngeri sai anne kanangku. 14 Beru le'baki napakasingara' Simon, antekamma uru-uruna Allata'ala amparhatikangi bansa-bansa maraenga, lanri ero'Na Allata'ala ampile todongi bansa maraenga a'jari umma'Na. 15 Anjo coco' sikali siagang apa le'baka nasero kana na'bi-na'bia riolo. Nasaba' nia' tattulisi' lalang ri Kitta' angkanaya, 16 Nakana Batara, ‘Le'baki anjo labattu poleangA', laKupabangung poleangi balla'na Daud, le'baka rumbang laKupakabajiki ri rumbanna, nampa Kupaenteng poleang; 17 sollanna sikamma anjo tau niaka tassesa naboyai Batara, assama-samai bansa maraenga, Kukioka a'jari ummakKu.’ Kammaminjo kananNa Batara, 18 le'baka Napabattu memang ri jammang riolo.” 19 Nakanamo pole Yakobus, “Jari turu' ri panggappaku, takkulleaki' ansusai bansa maraenga, punna ero' ampassareangi kalenna mae ri Allata'ala. 20 Mingka musti apparekki' sura' mae ri ke'nanga, na nipakainga' ke'nanga sollanna tena nanakanre ke'nanga kanre ra'masaka, iamintu kanre le'baka nipassareang mae ri barhalaya; kammayatompa ceraka, yareka olo'-olo' mate niaccekanga. Kammayatompa napakabellai kalenna ke'nanga battu ri panggaukang assalimaraka. 21 Nasaba' battu riolo duduji napabattu Musa passuroNa Allata'ala, siagang tuli nibacami punna allo Pammari-mariang ri sikamma balla' sambayanga siagang nibirittakang ri kota-kotaya.” 22 Assamaturu'mi tunisuroNa Allata'ala, pamimping-pamimpinga, siagang sikontu anggota jama'aka, ero' ampilei siapa are tau lanisuroa angngagangi Paulus siagang Barnabas a'lampa mange ri Antiokhia. Napilemi ke'nanga Silas siagang Yudas, nigallaraka todong Barsabas. Iaminne tau ruaya nibilang tutoa ri sikamma tau tappaka ri Yerusalem. 23 Nisaremi anne ke'nanga angngerang se're sura', kammaya anne bonena, “Natarimai sikontu sari'battang bansa-bansa maraenga, niaka ammantang ri Antiokhia, Siria, siagang Kilikia. Salama' battu ri kambe ngaseng tunisuroNa Allata'ala siagang pamimping-pamimpinga, iamintu sari'battannu ngaseng. 24 Nia' kabara' nalangngere' ikambe angkanaya nia' siapa are tau battu ri kambe le'ba' mae ri kau ngaseng assareko pangngajarang sala, sa'gennu a'jari lussa' siagang lingu napakamma ke'nanga. Sikontutojenna teai ikambe assuroi anjo ke'nanga battu mae ri kau ngaseng anggaukangi anjo kammaya. 25 Jari le'ba' maki' sipa'bicara ngaseng, nakissamaturu'mo assuroi battu mae ri kau ngaseng anne siapa area tau. Laniaki ke'nanga battu mae ri kau ngaseng angngagangi sari'battang nikamaseanta, iamintu Barnabas siagang Paulus. 26 Anne tau ruaya le'ba'mi narellakang kalenna lanri Batarata Isa Almasi. 27 Jari nisuromi sari'battanta iamintu Yudas siagang Silas battu mae ri kau ngaseng. Iaminne ke'nanga lampabattuang ngasengko anne apa niaka tattulisi' lalang ri suraka. 28 Nasitujuimi RohNa Allata'ala — siagang ikambe nisitujui tommi — sollanna tena nanisareko atorang-atorang battallanganga na anne parallua: 29 teako angnganrei kanre le'baka nipassareang mae ri barhalaya; teako angnganrei cera', teako angnganrei olo'-olo' mate niaccekanga, siagang pakabellai kalennu ri gau'-gau' assalimaraka. Punna nupakabella ngasemmo kalennu ri apa-apa kammaya anjo, nugaukammi nikanaya kabajikang. Sikammamo anne, poro salama' ngasengko!” 30 Le'baki appala' kana ke'nanga, a'lampami anjo tunisuroa mange ri Antiokhia. Battui ke'nanga mange ri Antiokhia, nakio' ngasemmi sikontu jama'aka nampa napassareang anjo suraka. 31 Ri wattunna nabaca ke'nanga anjo suraka, teaimi sipato' sannanna ke'nanga; nasaba' bonena anjo suraka a'jari panynyaleori ri atinna ke'nanga. 32 Anjo Yudas siagang Silas, na'bi-na'bi todong, salloi sipa'bicara siagang sikamma tu tappaka ri Antiokhia; napakalompomi sumanga'na siagang napakajarre'mi tappa'na anjo sikamma tu tappaka. 33 Niaki siapa are sallona ammantang Yudas siagang Silas ri Antiokhia. Le'baki anjo nikellaimi ammotere' ke'nanga. Akkirimmi sallang sikamma tu tappaka ri Antiokhia mae ri sikamma tau assuroai ke'nanga battu. 34 Mingka ammantang tulimi Silas ri Antiokhia. 35 Ammantang tongi Paulus siagang Barnabas siapa are sallona ri Antiokhia. Angngajara'mi siagang napabattui ke'nanga kana-kananNa Batara anjoreng. Jai tau maraeng naagang ke'nanga angngajara' ampabattui kana-kananNa Batara. 36 Tasalloai, nakanamo Paulus ri Barnabas, “Umba ki'lampa pole angkunjungi sikamma paranta tu tappa' ri Isa niaka ri kota-kota le'baka nibattui ampa'la'bangi kana-kananNa Batara; sollanna akkulle nicini' antekamma katallassanna ke'nanga.” 37 Eroki Barnabas angngerang tongi Yohanes Markus, 38 Mingka napikkiriki Paulus angkanaya tabajikai nierang Markus; nasaba' taerokai assamaturu' anjama siagang ke'nanga, kammayatompa le'baki Markus ampilari ke'nanga ri wattunna nia' ri Pamfilia ke'nanga. 39 Jari a'gea' lompomi Paulus siagang Barnabas sa'genna assisa'la'mo ke'nanga: A'lampami Barnabas siagang Markus, na assombala' mange ri Siprus. 40 Na Paulus napileimi Silas lanaagang a'lampa. Le'baki nipassareang ke'nanga ri jama'aka ri Antiokhia mae ri pangngamaseanNa Batara, a'lampami ke'nanga. 41 A'lampami ke'nanga angkulilingi Siria siagang Kilikia; napakajarre'mi ke'nanga sikamma jamaah niaka anjoreng.
1 Napatulusu'mi lampana Paulus mange ri Derbe, nampa mange ri Listra. Anjoreng nia'mo se're tu tappa' ri Isa niareng Timotius. Amma'na tu Yahudi, tappakamo ri Isa; mingka manggena tu Yunani. 2 Alla'bangi niasseng ri sikamma tu tappaka ri Listra siagang Ikonium, angkanaya anjo Timotius tau baji'. 3 Ero'mi Paulus sollanna amminawang Timotius ri ia; jari nasunna'mi Timotius. Nasunna'mi Timotius, lanri naasseng ngasengi tu Yahudi niaka ammantang anjoreng ri daeraya, angkanaya tu Yunani manggena anjo Timotius. 4 Napabattumi ri sikamma tau tappa' niaka ri kota-kota nakunjungia ke'nanga, anjo apa le'baka natappuki siagang napattantu tunisuroNa Allata'ala siagang pamimping-pamimping niaka ri Yerusalem. Napakainga'mi ke'nanga sikamma anjo tau tappaka sollanna naturuki anjo atorang-atorang le'baka nipattantu. 5 Jari pila' jarre'mi tappa'na anjo jamaah-jama'aka, siagang pila' mange allo pila' katambammi jaina ke'nanga. 6 Tena nikellai Paulus siagang Silas ri RohNa Allata'ala ampa'la'bangi kana-kananNa Allata'ala ri daera Asia. Jari napatulusu'mi lampana ke'nanga mange ri daera Frigia siagang Galatia. 7 Ri wattunna anrapi' ke'nanga ri pa'baeng-baenna daera Misia, ero'mi ke'nanga antama' ri daera Bitinia; mingka tena nikellai ke'nanga ri RohNa Isa mange anjoreng. 8 Jari ammolongammi ke'nanga ri daera Misia nampa annarrusu' mange ri Troas. 9 Ri wattunna bangngi ri Troas, nabattuimi Paulus pappiso'na. Lalang pappiso'nana, nia' nacini' se're tau battu ri daera Makedonia ammenteng ri dallekanna. Napala' dudumi anjo taua sollanna a'lampa Paulus mange ri Makedonia antulungi ke'nanga. 10 Ri le'ba'namo nabattui Paulus anjo pappiso'naya, sadia-sadia maki' ero' a'lampa mange ri daera Makedonia. Nasaba' tappa' maki' angkanaya Allata'ala assuroki' mange ambirittakangi Kabara' Bajika ri sikamma tau niaka anjoreng. 11 Nibokoimi Troas nampa kiassombala' annarrusu' mange ri Samotrake. Ammukona mange maki' ri Neapolis. 12 Battu anjoreng maki' nakimange ri Filipi, iamintu se're kota makase'rea ri daera Makedonia. Anne kota Filipi, niaki rawangang parentana karaeng Roma. Ammantang maki' anjoreng pirang-pirangallo. 13 Ri wattunna narapi' allo Pammari-marianga, a'lampa maki' mange ri biring binanga niaka ri pantaranganna pakke'bu' lompona kotaya. Nasaba' nipikkiriki angkanaya nia' tampa' passambayanganna tu Yahudia anjoreng. Ammempo maki' a'bica'-bicara siagang siapa are bai'-baine niakamo a'rappungang anjoreng ri tampaka. 14 Kalase'renna ri ke'nanga niareng Lidia, tu battu ri daera Tiatira. Jama-jamanna iamintu padanggang kaeng lango-lango. Lanri mangngamaseanna ri Allata'ala, nipagio'mi atinna ri Batara sollanna natarima anjo apa napangngajarranga Paulus mae ri ia. 15 Nije'ne'mi Lidia siagang sikontu bone balla'na. Le'baki nije'ne', nakio' maki' mange ri balla'na. Nakana Lidia, “Punna kipikkiri' ngasengi angkanaya ma'nassa tappa' tojeng-tojemma' ri Isa, umbamo kimange a'bangngi ri ballakku.” Napala' dudumi sollanna niturukiang pappala'na. 16 Ri se'reang allo a'lampa maki' mange ri tampa' passambayanganga. Ri tangngana aganga assibuntulu' maki' sitau baine ata. Anjo bainea nisosoki ri setang, sa'genna akkullei natappu la'bi riolo apa lakajarianga sallang. Lanri akkullena natappu dalle'na taua, jai sikalimi doe' napanggappangi pingga'-pinggawana anjo bainea. 17 Tuli amminawammi anjo bainea ri Paulus siagang ri kambe. Akkio'-kioki anjo bainea angkana, “Anne taua suro-suroNa Allata'ala Kaminang Lompoa! Battui ke'nanga ero' ampauang ngasengko antekamma batena nukkulle salama'!” 18 Niaki pirangallo are sallona tuli amminawang anjo bainea akkiok-kio' kamma anjo. Sa'genna takkulleami sa'bara' Paulus napakamma; jari assailemi Paulus, nampa nakana ri anjo rohna setanga, “Lanri arenNa Isa Almasi, kusuroko assulu' battu ri anne bainea!” Anjo wattua, assulu' memammi anjo rohna setanga battu lalang ri kalenna anjo bainea. 19 Ri wattunna naasseng pingga'-pinggawana anjo bainea angkanaya tappela'mi panggappang doe'na ke'nanga, najakkala'mi Paulus siagang Silas, nampa nare'resang anjo tau ruaya mange ri paranga, andallekang ri pamarentaya. 20 Naerammi ke'nanga Paulus siagang Silas mange andallekang ri wakkele'na ngaseng pamarentaya ri Roma; nampa nakana ke'nanga, “Anne tau ruaya tu Yahudi. Battui ke'nanga angkaco-kacoi kotata. 21 Naajaraki taua anggaukangi ada'-ada' sisalaya siagang atorang-atoranta ikatte tu Romaya. Takkulleaki' ikatte antarimai siagang anggaukangi ada'-ada' kammaya anjo!” 22 Battu ngaseng tommi tau jaia ero' ambakkai Paulus siagang Silas; nakekke'mi pamarentaya pakeanna anjo ruaya tunisuroNa Allata'ala, nampa nasuro taua ancamboki ke'nanga. 23 Le'baki nipisannakki nicambo' nipantama'mi ke'nanga ri tarungkua. Nisuromi kapala tarungkua anjagai baji'-bajiki ke'nanga. 24 Jari nitahammi ke'nanga ilalang ri kamara' lalang duduna tarungkua; nirantemi limanna siagang bangkenna ke'nanga mae ri baloka. 25 Kira-kira tangnga bangngi sitabangi appala' doang siagang akkelong-kelong mammuji ri Allata'ala Paulus siagang Silas. 26 Sikamma tu nitarungku maraeng nalangngereki ke'nanga akkelong. Ti'ring ta'ge'goso' sanna'mi buttaya, sa'genna ta'ge'goso' tommo batu pundasina anjo tarungkua. Tassungke ngasemmi pakke'bu'na tarungkua, kammayatompa ta'lappasa' ngaseng tommi rantena tu nitarungkua. 27 Ta'bangkami ambangung anjo kapala tarungkua. Ri wattunna nacini' tassungke ngaseng pakke'bu'na tarungkua nabi'bu'mi pa'danna naero' nabuno kalenna, nasaba' nakana lari ngasemmi tu nitarungkua. 28 Mingka ammarrang lompomi Paulus nakana, “Teako bunoi kalennu! Nia' ngaseng jaki' anrinni!” 29 Appala'mi lampu anjo kapala tarungkua nampa lari antama'. Annekkere'mi nakkulantu' anynyomba ri dallekanna Paulus siagang Silas. 30 Nampa naerang kapala tarungkua assulu' ke'nanga, na nakana, “O Tuang, apa musti kugaukang sollangku nipasalama'?” 31 Appialimi Paulus siagang Silas angkana, “Tappakko ri Batara Isa, sollannu nipasalama' — iamintu ikau siagang sikontu tau niaka lalang balla'nu!” 32 Le'baki anjo napakasingara'mi Paulus siagang Silas kana-kananNa Batara mae ri anjo kapala tarungkua siagang sikontu tau niaka ri balla'na. 33 Ia memang anjo ri tangngana bangngia, nanaerang sikontu tau niaka ri balla'na anjo kapala tarungkua mange antangkasi bokka'-bokka'na ke'nanga. Nampa nije'ne' memammo anjo kapala tarungkua siagang sikontu tau niaka ri balla'na. 34 Le'baki anjo nierammi Paulus siagang Silas mange ri balla'na anjo kapala tarungkua nampa nitoana siagang nisare kanre ke'nanga. Sannang sikalimi anjo kapala tarungkua siagang sikontu tau niaka ri balla'na, lanri tappa'mi ke'nanga ri Allata'ala. 35 Ammukona bari'basa', nisuromi pulisia ri pamarenta battu ri Roma mange ri tarungkua untu' ampabattui parentaya sollanna nilappassang Paulus siagang Silas. 36 Napabattumi kapala tarungkua anjo kabaraka mae ri Paulus. Nakana, “O Tuang, nasuro lappassammaki' pamarenta battua ri Roma. Kamma-kamma anne akkulle maki' ammotere'. Salamakki' ri lampata!” 37 Mingka angkanami Paulus ri anjo pulisia ngaseng, “Ikambe anne bansa Romaki'. Tenapa niadeliki' nakile'ba'mo nicambo' ri dallekanna tau jaia siagang nipantama' ri tarungkua. Nampa kamma-kamma anne nisuro maki' a'lampa cokko-cokko. Tena nakiero'! Suromi nakalenna battu mae anrinni anjo pamarentaya nanalappassanga' sipa'rua.” 38 A'lampami anjo pulisi-pulisia ampabattui kananna Paulus mae ri pamarenta battua ri Roma. Nalangngere'na pamarenta battua ri Roma angkanaya taunna pamarenta Roma anjo Paulus, a'jari malla'mi ke'nanga. 39 Jari a'lampami ke'nanga appala' popporo' ri Paulus siagang Silas. Nampa narurungang ke'nanga Paulus siagang Silas assulu' battu ri tarungkua, siagang napala'mi ke'nanga sollanna a'lampamo Paulus siagang Silas ambokoi anjo kotaya. 40 A'lampami Paulus siagang Silas ambokoi anjo tarungkua, nampa mange ri balla'na Lidia. Le'ba'na assibuntulu' siagang sikamma tau tappaka anjoreng, siagang napakajarre' ke'nanga, a'lampami Paulus siagang Silas.
1 Napatulusu'mi lampana Paulus siagang Silas. Ammolongangi ke'nanga ri Amfipolis siagang Apolonia, nampa battu ke'nanga mange ri Tesalonika. Anjoreng nia' balla' sambayang tu Yahudi. 2 Kamma biasaya nagaukang punna nia' balla' sambayang tu Yahudi ri se'reang tampa', a'lampami Paulus mange anjoreng ri balla' sambayanga. A'bicarami Paulus siagang sikamma tau niaka ri balla' sambayanga, ri passala'na apa-apa niaka tattulisi' lalang ri Kittaka. Kammaminjo nagaukanga Paulus sa'genna pintallung allo Pammari-mariang assisambung-sambung. 3 Situru' apa niaka tattulisi' lalang ri Kittaka, napakasingara'mi siagang napa'buttimi Paulus angkanaya parallui Nakasia' sessaya siagang ambangung poleang battu ri kamateanga anjo Karaeng Mappasalama' Napa'janjianga Allata'ala. Nakana Paulus, “Anjo Isa, kukabarranga mae ri kau ngaseng, Iami Karaeng Mappasalama' le'baka Napa'janjiang Allata'ala.” 4 Nia'mo siapa are tau a'jari tappa', nampa amminawang ri Paulus siagang Silas; kammayatompa jai todong tu Yunani mallaka ri Allata'ala, siagang bai'-baine nibilang tutoaya, a'jari tappa' todong. 5 Mingka assereatimi tu Yahudia. Nakio'mi ke'nanga tau ja'dalaka siagang pasolle' tenaya jama-jamanna, nampa a'rappungang ke'nanga ero' apparicu. Apparicumi ke'nanga ri kota-kotaya; nampa namangei balla'na se'rea tau tappa' niarenga Yason, ero' amboyai Paulus siagang Silas, kaeroki ke'nanga angngerangi Paulus siagang Silas assulu', ri dallekanna tau jaia. 6 Mingka lanri tenana nabuntuluki ke'nanga Paulus siagang Silas, a'gilimmi ke'nanga anre'resangi Yason siagang siapa are tau tappa' maraenganga, mae ri dallekanna sikamma pamarenta anna'galaka koasa ri anjo kotaya. Akkio'-kioki ke'nanga angkana, “Anne tau ruaya angngacoi ri kere-keremae! Kamma-kamma anne battu tommi ke'nanga ri kotata; 7 na natarimamo Yason anjo ke'nanga ri balla'na. Nadakkaimi ke'nanga apa-apa le'baka napattantu Karaenga ri Roma, lanri nakanana ke'nanga nia' ija karaeng maraeng niarenga Isa.” 8 A'jari lussa'mi tau jaia siagang sikamma pamarentaya ri anjo kotaya nalangngere'na anjo kana-kana kammaya. 9 Nisuromi Yason siagang sikamma tau tappa' maraengannaya ri pamarentaya a'bayara' doe' pappassala. Le'baki a'bayara' nampami nilappassang ke'nanga. 10 Anjo bangngia nisuromi Paulus siagang Silas ri tau tappaka anjoreng ri kotaya, a'lampa mange ri Berea. Battuna Paulus siagang Silas ri Berea, mangemi ke'nanga ri balla' sambayanna tu Yahudia. 11 Anjo tau anjorenga ri Berea baji'-bajikangangi pa'mai'na na tau niaka ri Tesalonika. Sannangi pa'mai'na ke'nanga ampilangngeri anjo kabara'Na Isa; allo-allona napilajari ke'nanga apa niaka tattulisi' lalang ri Kittaka, lanri ero'na ke'nanga angngassengi angkanaya maka kontutojengi anjo napangngajarranga Paulus. 12 Jaimi ri ke'nanga a'jari tappa' ri Isa. Jai tommi tu nipakalompona tu Yunania a'jari tappa', baji' nabaine kammayatompa bura'nea. 13 Ri wattunna nalangngere' tu Yahudi niaka ri Tesalonika angkanaya nabirittakang tommi Paulus kana-kananNa Allata'ala ri Berea, mangemi ke'nanga ri Berea; nampa napa'jari lussa' siagang napakabambang nyawana tau niaka ri Berea. 14 Akkaro-karomi tau tappaka ri Berea angngantaraki Paulus mange ri biring tamparanga. Mingka Silas siagang Timotius ammantanji anjoreng ri kotaya. 15 Le'baki naantara' Paulus sa'genna ri Atena, ammotere'mi anjo sikamma tau tappaka mange ri Berea. Angngerammi pasang ke'nanga battu ri Paulus, sollanna linta' amminawang Silas siagang Timotius. 16 Lalang natayanna Paulus kabattuanna Silas siagang Timotius ri Atena, si'nami atinna anciniki anjo kotaya lanri jaina barhala anjoreng. 17 Lanri kammana sipa'bicarami Paulus lalang ri balla' sambayanga siagang sikamma tu Yahudia kammayatompa sikamma tau anynyombaya ri Allata'ala anjoreng. Kammayatompa allo-allona sipa'bicara Paulus ri pasa'-pasaraka siagang sikamma tau niaka anjoreng. 18 Assigea'mi Paulus siagang guru-guru battua ri golongang Epikuros siagang golongang battua ri Stoa. Nia' siapa are maraeng ri ke'nanga angkana, “Apa todong naasseng anne taua? Sike'de' duduji pangngissenganna mingka teai sipato' jaina bicaranna!” Nia' todong siapa are tau angkana, “Kamma nicini' rewata-rewata bansa maraeng nakabarrang.” Akkana kammai anjo ke'nanga, lanri passala'Na Isa siagang passala' attallasa'Na ammotere' Isa battu ri kamateanga nabicara Paulus mae ri ke'nanga. 19 Nampa naerang ke'nanga Paulus mange ri passirapakkanga irate ri Bonto Areopagus. Battui mange anjoreng, nakanamo ke'nanga ri Paulus, “Eroki ikambe angngassengi anjo pangngajarang berua nupabattua. 20 Nasaba' sangnging apa-apa tena nantama' ri akkala' antu nupabattua. Jari ero' maki' anne angngassengi battuanna.” ( 21 Nasaba' anjo tau niaka ri Atena siagang sikamma tau niaka battu anjoreng, nangai ke'nanga ampakei wattu-wattu tanjamana a'rappungang ampilangngeri siagang ambicarai passala' apa-apa beru nalangngereka ke'nanga.) 22 Ri wattunna ammenteng Paulus ri dallekanna ngaseng anjo tau niaka a'rappungang ri Areopagus, angkanami Paulus, “He, ikau ngaseng tu Atenaya! Turu' ri apa kucinika, sanna' ngaseng nukatutuina agamaya. 23 Nasaba' ri wattungku a'jappa-jappa akkuliling ri kota-kotanu, nakuparhatikang sikamma tampa' passambayangannu, nia' tommo kucini' se're tampa' biasaya nupake assare koro'bang. Anjoreng ri tampaka nia' tattulisi' angkanaya, ‘Mae ri Allata'ala Tenaya Naniassengi.’ Na kamma-kamma anne, iaminjo Allata'ala nusombaya mingka tanuassengai, Iaminjo Allata'ala kukabarranga ri kau ngaseng. 24 Allata'ala ampa'jariai anne linoa siagang sikontu bonena, Iami Batarana langika siagang buttaya. Tena nalalang ammantang ri sikamma balla' rewata napareka rupataua. 25 Tena todong Naparallu ri pannulunna rupataua, nasaba' Iami assarei katallassang siagang nyawa, kammayatompa assarei sikontu apa-apa rupataua! 26 Battu ri se'rea tau Nanapa'jari sikontu bansaya, nampa Nasuro ke'nanga ampammantangi sikontu buttaya. Iatommi ampattantui battu ri uru-uruna angkana kemae sa'genna siagang kemaei akkulle ammantang rupataua. 27 Kammaminjo Nagaukanga Allata'ala, sollanna niboya Allata'ala ri rupataua. Niminasai sollanna assibuntulu' siagang Allata'ala, ri wattu naboyana ke'nanga Allata'ala. Mingka sikontutojenna tena nabella Allata'ala battu ri kalenta ngaseng. 28 Kamma biasaya napau taua angkana, ‘Akkulleki' nia', attallasa', siagang a'gio' ri anne linoa lanri kakoasanNa Allata'ala.’ Sangkamma tonji siagang apa napaua tu cara'de'nu, angkanaya, ‘Ikatte ngaseng, ana'-ana'Naki' Allata'ala.’ 29 Jari, lanri ana'-ana'Naki' Allata'ala, takkulleaki' ampasangkammai Allata'ala siagang patung bulaeng nipareka, yareka pera', yareka batu nipareka situru' kacara'dekanna rupataua. 30 Anjo wattu kadongokanta Nakaluppaimi Allata'ala, mingka kamma-kamma anne Nasuromi toba' battu ri dosa-dosana sikontu rupataua ri lino. 31 Nasaba' le'ba'mi Napattantu wattunna nalaNaadeli sikontu bonena anne linoa siagang adele'. Anjo tugasaka lanagaukangi tau le'bakamo nipile ri Allata'ala untu' anggaukangi anjo tugasaka. Na sollanna akkulle tappa' ngaseng taua ri anjo passalaka, Napattallasa' poleammi Allata'ala anjo taua battu ri kamateanga!” 32 Ri wattunna nalangngere' ke'nanga anjo passala' attallasaka ammotere' battu ri kamateanga, nia'mo ri ke'nanga angkakkali Paulus. Nia' todong angkana, “Ero' ijaki' allangngerekko ambicarai pole anne passalaka!” 33 Nabokoimi Paulus anjo tampa' pa'rappunganga. 34 Mingka nia' todong ri ke'nanga angngalle-alleangi Paulus, siagang a'jari tappa' ri Isa: nia' niareng Dionisius anggota kumpulanna Areopagus, siagang sitau baine niarenga Damaris, na siapa are pole tau maraengannaya.
1 Le'baki anjo a'lampami Paulus ambokoi Atena, namange ri Korintus. 2 Anjoreng ri Korintus assigappami siagang se're tu Yahudi, niarenga Akwila, battua ri pa'rasangang Pontus. Anne Akwila beru-beru battui ri Italia siagang bainenna niarenga Priskila. Battumi ke'nanga mange ri Korintus lanri nisuro ngasemmi ri Karaeng Klaudius assulu' tu Yahudia battu ri Roma. A'lampami Paulus angkunjungi anjo tau ruaya. 3 Ammantammi Paulus anjoreng siagang ke'nanga, siagang anjamami siagang ke'nanga. Nasaba' a'julu pa'boya-boyangi Paulus siagang ke'nanga, iamintu appareka balla'-balla' niarenga kema. 4 Mingka punna narapi' allo Pammari-marianga, a'lampami Paulus mange ri balla' sambayanga. A'bicarami siagang tu Yahudia kammayatompa tu Yunania, sollanna tappa' ke'nanga mae ri Isa. 5 Ri wattunna nia'mo Silas siagang Timotius battu ri Makedonia, napakemi Paulus sikontu wattunna niaka, untu' ampabattui kabara' battua ri Allata'ala mae ri tu Yahudia. Napabattumi mae ri ke'nanga ri passala'na Isa, Karaeng Mappasalama' le'baka Napa'janjiang Allata'ala. 6 Mingka lanri tuli nigeakkinna siagang tuli nicallana Paulus ri taua, napatu'du'mi bangkenna siagang napaba'basa'mi pakeanna sollanna a'lesang limbu'bu'na; iaminjo a'jari pammatei siagang pappakainga' ri kasalanna ngaseng ke'nanga. Nakanamo Paulus, “Punna cilakako, passala' kasalannu ngaseng tonji! Pantarang limangkuko! Pakkaramula ri kamma-kammaya anne la'lampa mangema' ri bansa-bansa maraenga.” 7 Le'baki anjo, a'lampami Paulus ambokoi ke'nanga nampa mange ammantang ri ba'leanna anjo balla' sambayanga. Anjo ballaka, teai balla' tu Yahudi, mingka tau anynyombai ri Allata'ala tau ammantanga anjoreng. Anjo patanna balla' niarengi Titus Yustus. 8 Mingka kapalana anjo balla' sambayanga, iamintu niarenga Krispus siagang sikontu tau niaka ri balla'na, a'jari tappa'mi ri Batara Isa. Siagang pole jai tommi tu Korintus maraenganga allangngereki anjo kabara' napabattua Paulus, na'jari tappa' mae ri Isa nampa nije'ne' ke'nanga. 9 Ri se'reang bangngi nabattuimi pappiso'na Paulus. Lalang pappiso'nana Nakana Batara ri Paulus, “Teako mallakki Paulus! A'bicarako turus, teako ammakkangi. 10 Nasaba' niaKa' anrurungangko. Tena manna sitau akkulle a'gau' ja'dala' ri kau, nasaba' jai taungKu anrinni ri kotaya.” 11 Jari ammantammi Paulus se're sitangnga taung sallona ri Korintus, siagang napangngajarrammi kana-kananNa Allata'ala mae ri ke'nanga. 12 Ri wattunna Galio a'jari Guburnur ri Akhaya, assamaturu'mi tu Yahudia ambaliangi Paulus nanaerang mange ri pangadelanga natuntu'. 13 Kammaminne tuntutanna ke'nanga mae ri Paulus, “Anne taua ampangarui tau jaia anynyomba sala ri Allata'ala; nasaba' sisalai anjo apa napangngajarranga siagang apa Napassuroanga Allata'ala le'baka napabattu Musa mae ri kambe!” 14 Kamma ero'na appiali Paulus, la'bi riolomi Galio angkana mae ri tu Yahudia, nakana, “He, ikau ngaseng tu Yahudia! Ka'de' passala' kasalang yareka kaja'dallang nanutuntu' anne taua memang siratanga' sa'bara' ampilangngeri anne tuntutannu. 15 Mingka anne passala' passigeakkang bicara, passigeakkang areng-areng, siagang passigeakkang ri passala' atorang-atorannu tonji! Jari ikau ngaseng tommo ampasilolongangi. Tena nakuero' angngadeli anne passala' kammaya!” 16 Le'baki anjo nibongkami ke'nanga assulu' ri Galio. 17 Jari a'gilimmi ke'nanga anjakkalaki Sostenes, iamintu kapalana anjo balla' sambayanga, nampa naba'ji ri dallekanna mejang pangadelanga. Mingka tena sikali najampangi Galio anjo apa nagaukanga ke'nanga. 18 Le'baki anjo sallo iji ammantang Paulus ri Korintus. Mingka ri se'reang allo appala' kanami Paulus ri sikamma tau tappaka anjoreng, nampa a'lampa assombala' siagang Priskila na Akwila mange ri Siria. Battui ke'nanga mange ri Kengkrea, nasuro cukkuru'mi uu'na Paulus, le'baka a'jari la'bu siapa are sallona lanri tinja'na mae ri Batara. 19 Ri wattunna battu ke'nanga mange ri Efesus, nasuromi ammantang Priskila siagang Akwila, nampa antama' ri balla' sambayanga sipa'bicara siagang tu Yahudi niaka anjoreng. 20 Napala'mi ke'nanga sollanna ammantang sallo-sallo Paulus, mingka takkulleai ammantang sallo Paulus. 21 Mingka manna nakamma, ri wattunna la'lampa Paulus, nakanamo ri ke'nanga, “Punna nia' pangngellai battu ri Allata'ala, labattu poleanja' antu sallang mae anrinni.” Le'baki akkana kamma, a'lampami Paulus mange ri Efesus. 22 Ri wattunna naung ri Kaisarea, a'lampami Paulus mange ri Yerusalem ampabattui sallanna ri jamaah niaka anjoreng, nampa annarrusu' mange ri Antiokhia. 23 Niaki siapa are sallona ammantang anjoreng. Le'baki anjo a'lampami angkunjungi jamaah-jamaah niaka ri daera Galatia siagang Frigia ero' ampakajarreki tappa'na sikontu anggota jama'aka. 24 Anjo wattua, nia'mo se're tu Yahudi battu mange ri Efesus, niarenga Apolos, anjorenga ri Aleksandria nilassukang. Anne Apolos tau cara'de' a'bicara, siagang napahang bajiki bonena Kittaka, 25 kammayatompa le'ba'mi niajara' sollanna naasseng pangngajarranga ri passala'na Isa. Mingka nampami sa'genna passala' pa'je'ne' nagaukanga Yohanes naasseng. Mingka manna nakamma sanna'mi lompona sumanga'na angngajara'. Naajara' baji'-baji'mi taua ri passala'na Isa. 26 Appakkaramulami a'bicara siagang barani Apolos lalang ri balla' sambayanga. Na ri wattunna nalangngere' Priskila siagang Akwila anjo apa napangngajarranga Apolos, nakio'mi ke'nanga Apolos mange ri balla'na ke'nanga. Anjoreng ri ballaka napauang la'bi baji'mi ke'nanga Apolos ri passala' antekamma ero'Na Allata'ala ampasalamaki rupataua lalang ri KalenNa Isa. 27 Le'baki anjo apparurumi Apolos ero' a'lampa mange ri Akhaya. Jari annulisi'mi sura' tau tappaka ri Isa niaka ri Efesus mae ri tau tappaka ri Akhaya sollanna ero' ke'nanga antarimai Apolos siagang te'ne pa'mai'. Na ri wattunna Apolos mange ri Akhaya, ma'nassa sanna'mi lompona matu-matunna pannulunna mae ri sikamma tau tappaka ri Isa lanri pangngamaseanNa Allata'ala. 28 Nasaba' akkullei nabeta bicara tu Yahudia punna sipa'bicara ke'nanga ri dallekanna tau jaia. Siagang akkullei napa'butti situru' apa-apa niaka tattulisi' lalang ri Kittaka angkanaya ma'nassa Iaminjo Isa Karaeng Mappasalama' le'baka Napa'janjiang Allata'ala.
1 Ri wattunna nia' Apolos ri Korintus, sitabang tongi a'lampa Paulus anjappai padalamanna anjo daeraya, sa'genna battu mange ri Efesus. Anjoreng, assibuntulu'mi siagang siapa are tau tappakamo ri Isa. 2 Akkuta'nammi Paulus ri ke'nanga angkana, “Le'ba'mi nutarima RohNa Allata'ala ri wattunnu tappa' ri Isa?” Appialimi ke'nanga angkana, “Tenapa. Ba'lalo tenapa kile'ba' allangngere' angkanaya nia' RohNa Allata'ala.” 3 Akkuta'nammi Paulus angkana, “Jari lanri inai nanije'nekko?” Appialimi ke'nanga angkana, “Lanri pa'je'ne'na Yohanes.” 4 Nakanamo Paulus, “Naje'neki Yohanes taua sollanna akkulle nipa'nassa angkanaya ma'nassa toba' ngasemmi anjo taua battu ri dosa-dosana. Mingka tuli napau tongiji Yohanes mae ri tu Israelka, angkanaya musti tappaki ke'nanga mae ri Tau niaka battu ribokoanganna, iamintu Isa.” 5 Ri wattunna nalangngere'mo ke'nanga anjo napaua Paulus, nasuro je'ne'mi kalenna ke'nanga lalang arenNa Batara Isa. 6 Na ri wattunna napatompang limanna Paulus irateanganna ke'nanga, battumi RohNa Allata'ala angkoasai ke'nanga; sa'genna akkullemo ke'nanga a'bicara lalang a'rupa-rupa bicara appakalannasaka, siagang napabattumi ke'nanga kabara' battua ri Allata'ala. 7 Niaki kira-kira sampulo anrua jaina ke'nanga. 8 Niaki tallum bulang sallona tuli a'bicara siagang barani Paulus mae ri tau niaka lalang ri balla' sambayanga. A'bicarami siagang ke'nanga sollanna akkulle a'jari tappa' ke'nanga mae ri Allata'ala siagang PamarentahanNa. 9 Mingka nia' siapa are ri ke'nanga sanna' terasa'na pa'mai'na, siagang taerokai tappa'. Nacallami ke'nanga ri dallekang pa'rappunganna anjo taua, anjo pangngajarang ri passala' ero'Na Allata'ala ampasalamaki rupataua lalang ri KalenNa Isa. Lanri kammana, a'lampami Paulus ambokoi ke'nanga, nampa a'lampa siagang tau tappakamo ri Isa mange ri kamara' sikolana Tiranus. Anjoreng, allo-allomi sipa'bicara siagang taua. 10 Iaminjo tuli nagaukang ruan taung sallona, sa'genna sikontu tau niaka ammantang ri daera Asia, baji' na tu Yahudi yareka bansa-bansa maraenga, nalangngere' ngasemmi ke'nanga kana-kananNa Batara. 11 Jaimi gau' appakalanna'-lannasa' Nagaukang Allata'ala lalang ri kalenna Paulus. 12 Ebara'na, punna nierang passapunna yareka passikko' aya' le'baka napake Paulus mae ri tau garringa, akkullemi a'jari baji' taua, yareka assulu'mi roh ja'dalaka ri kalenna ke'nanga. 13 Anjo wattua nia' siapa are sanro-sanro tu Yahudi masarroa a'lampa kere-keremae ambongkai roh ja'dalaka battu lalang ri kalenna tau nasosoka roh ja'dala'. Nacoba-coba tongi anjo sanro-sanroa ampakei arenNa Isa untu' ambongkai anjo roh-roh ja'dalaka. Angkanami ke'nanga ri anjo roh-roh ja'dalaka, “Lalang arenNa Isa, anjo napabattua Paulus, kamma-kamma anne kusuroko assulu'!” 14 Niaki tuju ana'-ana' bura'nena imang kapalaya, iamintu niarenga Skewa anggaukangi anjo kammaya. 15 Mingka nakanamo roh setanga ri ke'nanga, “Kuassengi anjo Isa, kammayatompa kuasseng tongi anjo Paulus; mingka ikau anne, inai ngasengko?” 16 Nampa a'lumpa'mi anjo tau nasosoka setang siagang sanna'mi larrona ambakkai ke'nanga nanakokko'. Sa'genna lari ngasemmi ke'nanga ambokoi anjo ballaka. A'bokka'-bokka'mi kalenna, siagang assolara'mi, lanri nikekke'-kekkekangi care-carena battu ri kalenna ke'nanga. 17 Nalangngere'mi sikontu tu Yahudia siagang bansa-bansa maraeng niaka ammantang ri Efesus anjo apa kajarianga, sa'genna a'jari malla'mi ke'nanga. Napila' nipujimo arenNa Batara Isa. 18 Jaimi tau tappakamo ri Isa battu ammangakui ri dallekanna tau jaia sikamma panggaukang salana ke'nanga ri wattu allaloa. 19 Na sikamma tau biasaya ammake baca-baca, massing napa'rappungammi sura' jima'-jima'na ke'nanga nampa natunu ri dallekanna tau jaia. Punna nipasse're ballinna anjo sura'-sura' nitunua, nia' kira-kira limampulo sa'bu doe' pera' jaina. 20 Kammaminjo, sanna' heba'na batena pila' tassiara' kana-kananNa Batara, siagang pila' lompomi pangaruna. 21 Le'ba'namo kajariang ngaseng anjo sikammaya, apparurumi Paulus ero' a'lampa mange ri Makedonia siagang Akhaya, nampa annarrusu' mange ri Yerusalem. Nakana Paulus, “Punna battu anjoremma' musti lamange tonga' ri Roma.” 22 Jari nasuromi rua pambantuna, iamintu Timotius siagang Erastus, a'jappa riolo mange ri Makedonia. Na ia ammantangiji siapa are sallona ri daera Asia. 23 Kira-kira iaminjo wattua nania' karicuang lompo ri Efesus passabakkang pangngajarang ri passala'na Isa. 24 Nasaba' anjoreng ri kotaya nia' sitau tukang pera', niarenga Demetrius, appareka balla'-balla'na Rewata Artemis. Sanna' jaina wassele' nagappa anjo taua mae ri pajama-jamana. 25 Lanri kammana napa'rappungammi sikamma pajama-jamana siagang pajama-jamana tukang pera' maraenganga; nampa nakana, “Kammanne sari'battangku ngaseng! Massing nuassemmi angkanaya battu ri anne jama-jamanta kinggappa wassele'. 26 Na kamma-kamma anne massing nucini'mi siagang massing nulangngere'mi, apa nagaukanga anjo Paulus. Napaui angkana anjo rewata-rewata napareka rupataua tena sikali nakkulle nikana rewata. Najaimo tau akkulle a'jari tappa' ri anjo pangngajaranna; tena na ri Efesus bawang mingka a'birimmi a'la'bang todong ri sikontu daera Asia. 27 Bahayana mae ri katte, iamintu nasaba' akkullei anggappa areng kodi usahata. Ba'lalo tena nasikammaja anjo bawang, nasaba' manna balla'na Rewata Artemis lanicini' tuna tommi siagang lanionjo'-onjokammi kalompoanna; padahala', iami rewata nipakalompoa ri sikontu tau niaka ri Asia siagang tau niaka ri sikontu linoa!” 28 Nalangngere'na ke'nanga anjo bicara kammaya, a'jari bambammi nyawana ke'nanga. Akkiok-kio'mi ke'nanga angkana, “Nipakalompoi Artemis, rewatana tu Efesus!” 29 A'la'bammi anjo karicuanga sa'genna ri sikontu kotaya. Nampa mangemi anjo kumpulanna tau apparicua anjakkalaki Gayus siagang Aristarkhus. Nasaba' iaminjo tau anrurungangi Paulus battu ri Makedonia lalang ri pa'lampanna. Nare'resammi ke'nanga anjo tau ruaya mange ri tampa' luara'na anjo kotaya. 30 Ero'mi Paulus antama' ampinawangi ke'nanga, mingka nipisangkai ri sikamma tau tappaka ri Isa. 31 Nia' todong siapa are tumalompo ri daera Asia, a'jari aganga ri Paulus, assuro pauangi Paulus sollanna tena namange ampappicinikangi kalenna anjoreng ri tampa' luaraka. 32 Anjo wattua sikamma tau niaka a'rappung ri lapanganna anjo kotaya a'jari sanna'mi ricuna. Sangka' rupami napau taua ammarrang-marrang. Nasaba' jaiangangi ke'nanga tangngassengai angkana apa saba'na nania' ke'nanga anjoreng ri paranga a'rappungang. 33 Nia' sitangnga ri ke'nanga nakana passala' Aleksander, nasaba' iami nisorong mae ri dallekang ri tu Yahudia. Jari napanai'mi limanna Aleksander sollanna nisare wattu a'bicara ampakasingaraki kalenna ri dallekanna anjo tau jaia. 34 Mingka nacini'na ke'nanga angkana tu Yahudi anjo Aleksander, appada-padami ke'nanga ammarrang lompo angkana, “Nipakalompoi Artemis, rewatana tu Efesus!” 35 Kale'bakkanna akkullemi nipakasannang anjo tau jaia ri jurutulisi'na anjo kotaya. Nakana anjo jurutulisika, “Ikau ngaseng tau ammantanga ri Efesus! Baji' ngaseng naassenna taua angkanaya anne tau niaka ri Efesus amparakai balla'na Rewata Artemis siagang batu matangkasa' tu'guruka battu ri langika. 36 Manna sitau tena nania' akkulle anggeakki anne passalaka. Jari lanri kammana, sannang ngaseng mako, siagang teako pitigau'-gauki ri apa-apa tenaya nupahangi. 37 Anne taua nuerangi mae anrinni teai passabakkang le'ba'na naalle passa apa-apa niaka ri balla' rewataya, yareka lanri le'ba'na nahina ke'nanga rewatanta. 38 Punna nia' tau lanatuntu' Demetrius siagang pajama-jamana, boli'mi kamma nanaerang anjo parkaraya mange ri pangadelanga. Tuli tassungkeji pangadelanga, siagang tuli nia' tonji pamarentaya punna nia' tau ero' nituntu'. 39 Mingka punna nia' ija apa-apa maraengang nukaeroki, anjo musti nipassirapakkang baji'-bajiki lalang ri passirapakkang tau jaia. 40 Nasaba' anne kajarianga anne alloa, akkullei a'jari bahaya ngaseng mae ri katte. Akkulleki' nitudu ero' angngewai pamarentaya, nasaba' tena sikali akkulle nipare' pattuppuang nakkulle nipannaba anne karicuanga.” 41 Le'baki akkana kamma anjo jurutulisika, nasuromi ammotere' ngaseng anjo tau jaia.
1 Ri wattunna a'jari sannammo ammotere' taua ri Efesus, napa'rappungammi Paulus anggota jama'aka nampa napakajarre' ke'nanga. Le'baki anjo appala' kanami, nampa a'lampa mange ri Makedonia. 2 Nakunjungimi sikamma tau tappaka ri Isa ri daera Makedonia. Jaimi pappakainga' napauangi ke'nanga, siagang napakajarre'mi tappa'na ke'nanga. Le'baki anjo a'lampami mange ri Yunani. 3 Tallum bulangi sallona ammantang anjoreng. Nampa ri wattunna apparuru ero' assombala' mange ri Siria, nia'mo kabara' angkanaya assikongkoloki tu Yunania ero' ambunoi. Jari a'giling a'lampa mangemi ammotere' angngolo ri Makedonia. 4 A'lampami siagang Sopater, ana'na Pirus battua ri Berea; nia' tommi amminawang Aristarkhus, Sekundus tu battu ri Tesalonika, siagang Gayus, tu Derbe. Kammayatompa Timotius, Tikhikus siagang Trofimus, battua ngaseng ri daera Asia. 5 A'jappa riolomi ke'nanga, nampa attayang ri Troas. 6 Le'baki Passua'-suarrang Roti Tenaya Nammake Pa'gambang, a'lampa maki' assombala', ambokoi Filipi. Narapiki limangallo sallona, a'rappungang siagang ke'nanga ri Troas. Sidamingguki' ammantang anjoreng. 7 Ri wattunna bangngi daminggu a'rappungang maki' ero' sipangnganreang ampakajarreki passari'battanganta. A'bicara memammi Paulus siagang sikamma tau hadereka, nasaba' ammukona ero'mi a'lampa. Sa'genna tangnga bangngi a'bicara iji Paulus. 8 Anjo kamara' nipa'rappungia kamara' irateang. Jai lampu lalang ri anjo kamaraka. 9 Nia'mo se're turungka ammempo ri jandelaya niarenga Eutikhus. Lanri tenapa nammari-mari a'bicara Paulus, ta'do'do' sikalimi anjo turungkaya. Tanasa'ringami kalenna nattinro ri jandelaya sa'genna tu'guru' naung battu rate ri loteng makatallua. Ri wattunna niangka', niassemmi angkana matemi anjo turungkaya. 10 Mingka naummi Paulus, nanra'ba anrakaki anjo turungkaya. Nakanamo Paulus ri taua, “Teako batai, attallasa' iji!” 11 Le'baki anjo nai'mi ammotere' Paulus ri kamara' napa'rappungia ke'nanga. Nabage-bagemi rotia nampa para angnganre ke'nanga. Sa'genna bari'basa' a'bicara iji Paulus. Le'baki anjo a'lampami Paulus. 12 Naerammi taua anjo turungka attallasa' poleanga ammotere' mange ri balla'na. Sannang ngasemmi nyawana ke'nanga siagang anggappami panynyaleori lompo ke'nanga. 13 A'lampa riolo maki' mange ri kappalaka nampa kiassombala' mange ri Asos. Anjorempaki' antayangi Paulus ri kappalaka. Nasaba' le'ba'mi naatoro' Paulus angkana ia lanumalo ri bontoai mange ri Asos. 14 Ri wattunta assigappamo ammotere' ri Asos, nai'mi Paulus ri kappalaka, nampa kiassombala' mange ri Metilene. 15 Battu anjoreng assombala' maki' pole, sa'genna ammukona battu maki' mange ri tampa' sidallekanga siagang Khios. Ammembara'na anrapi' maki' mange ri Samos. Nasiallo pole battu maki' mange ri Miletus. 16 Le'ba'mi napattantu Paulus angkana tena nalassengka ri Efesus sollanna tena nasallo dudu ammantang ri daera Asia. Eroki akkaro-karo battu mange ri Yerusalem sollanna narapikang allo lompo Pentakostaya. 17 Battu ri Miletus, akkirimmi kabara' Paulus mae ri pamimping-pamimping jama'aka ri Efesus. Napasangi ke'nanga battu angngagangi assibuntulu' punna battu Paulus mange anjoreng. 18 Ri wattunna assibuntulu'mo siagang ke'nanga, nakanamo Paulus ri ke'nanga, “Sikamma sari'battangku; nuasseng ngasemmi angkanaya antekamma bateku attallasa' ri tangnga-tangnganu pakkaramula ri uru battuku ri daera Asia. 19 Kupa'jari tunami kalengku, siagang jaimi assolong je'ne' matangku ri wattunna kugaukang jama-jamanNa Batara. Kukasia'mi pa'risika lanri kaja'dallanna tu Yahudia mae ri nakke. 20 Nuasseng ngasemmi angkanaya tena nakumalla'-malla' ampauangko apa niaka matu-matunna mae ri kau. Kusareko pangngajarang lalang ri pa'rappunganna tau jaia, yareka massing ri balla'nu ngaseng. 21 Baji' namae ri tu Yahudia, yareka mae ri bansa-bansa maraenga, tuli kupakainga' ngasemmi sollanna massing toba', battu ri dosa-dosana ke'nanga nabattu mae ri Allata'ala siagang tappa' mae ri Isa. 22 Kamma-kamma anne lakuturukimi parentaNa RohNa Allata'ala, nakua'lampa mange ri Yerusalem. Na takuassenga angkanaya apa lakajariang mae ri kalengku punna battua' mange anjoreng. 23 Iaji kuasseng angkanaya le'ba'ma' Nalambusiang RohNa Allata'ala angkanaya lanitarungkua' siagang lakukasiaki sessaya. Iaminjo Napauanga' Allata'ala ri wattungku a'lampa ri kota-kota le'baka kupa'lampai. 24 Mingka takujampangiai anne tallasakku, assala' akkulle mamo kupa'le'ba' anjo tugasa' Napassareanga Batara Isa mae ri nakke; kammayatompa assala' akkullea' jarre' sa'genna kala'busang tallasakku ampa'la'bangi Kabara' Bajika, iamintu ri passala'na pangngamaseanNa Allata'ala. 25 Le'ba' ngaseng mako massing kukunjungi, siagang le'ba' ngaseng tommi kupabattu mae ri kau ri passala'na Allata'ala siagang PamarentahanNa. Kamma-kamma anne nia'mi ri pakkasiakku angkanaya iaminne kala'busangku assicini' siagang ikau ngaseng. 26 Jari kulambusiang mako kamma-kamma anne, angkanaya punna nia' ri kau anggappai kapanrakanga sallang, teaimi inakke pata sala. 27 Tena nakule'ba' ampilari tugasakku untu' ampakasingariangko sikontu apa eroka Nagaukang Allata'ala ri kau ngaseng. 28 Paralluko anjagai kalennu. Kammayatompa paralluko anjagai sikontu jamaah le'baka Napassareang RohNa Allata'ala mae ri kau untu' lanujagai; nasaba' le'ba' mako niangka' a'jari tummarakai ri anjo jama'aka. Parallui nujagai anjo jama'aNa Allata'ala, sanrapang pakalawaki anjagai gimbala'na; nasaba' le'ba'mi Napa'jari Allata'ala anjo jama'aka a'jari pisakaNa lanri kamateanNa Ana' KalenNa. 29 Punna a'lampa' sallang, ma'nassa laniaki battu kongkong romang nye'nyereka ri tangnga-tangnganu. Na anjo tau nujagaia la'jarimi sanrapang kanre-kanrena anjo kongkong romang nye'nyereka. 30 Ba'lalo lania' tau battu ri tangnga-tangnganu tonji ambirittakangi biritta salaya. Lappanggaukang kammai anjo ke'nanga sollanna akkulle tau tappakamo ri Isa a'jari sala oloang, nampa amminawang ri ke'nanga. 31 Lanri kammana, paralluko a'jaga-jaga! U'rangi angkanaya tallun taungi salloku tammari-maria angngajarakko allo bangngi, siagang jaimi je'ne' matangku ammatti' lalang kugaukanna anjo jama-jamanga. 32 Kamma-kamma anne kupassareang mako mae ri Allata'ala, naporo Iami amparakai ngasengko, siagang nuporo anna'gala' jarre' ngaseng mae ri anjo kabara' pangngamaseanNa Allata'ala. Koasai Allata'ala ampakajarrekko siagang assareko barakka'-barakka'Na, le'baka Napasadia untu' sikontu umma'Na. 33 Manna sitau tania' le'ba' kupattayangi doe' yareka care-care. 34 Ikau ngaseng tonji angngassengi angkanaya battu ri posoku tonji anjama nakkulle kututuki kaparalluang allo-alloku siagang sikamma tau amminawang ri nakke. 35 Lalang ri kammana anjo, nakusare mako conto, angkanaya paralluki' anjama terasa', sollanna akkulle nitulung tu tenaya pakkullena. Nasaba' parallui niu'rangi apa le'baka Napau Isa, angkanaya, ‘La'bi te'neangangi nikanaya assare naia nikanaya annarima.’ ” 36 Le'baki a'bicara Paulus, akkulantu'mi siagang ke'nanga nampa appala' doang. 37 Angngarru' ngasemmi ke'nanga siagang naraka'mi Paulus nampa nalappassang na napasalama' a'lampa Paulus. 38 Sanna' ngaseng si'nana atinna ke'nanga, la'biangampa lanri nakanana Paulus angkanaya talasicinikami ke'nanga. Naantara'mi ke'nanga Paulus sa'genna nai' ri kappalaka.
1 Assijama'-jamakki maki' siagang anjo pamimping-pamimping jama'aka ri Efesus. Le'baki anjo a'lampa maki' ambokoi ke'nanga. Assombala' maki' annarrusu' mange ri pulo Kos; ammukona battu maki' mange ri pulo Rodos. Battu anjoreng annarrusu' maki' assombala' mange ri palabuhang Patara. 2 Ri Patara, anggappa maki' kappala' eroka mange ri Fenisia. Jari nai' maki' ri anjo kappalaka kinampa a'lampa. 3 Assombala' maki sa'genna nicini'mo pulo Siprus ri ba'leang kairinta; mingka annarrusu' maki' assombala' mange ri Siria. Battu maki' mange ri Tirus. Nakinaummo ri bontoa anjoreng, lanri lanabongkara'mi apa-apa naeranga anjo kappalaka. 4 Mange maki' angkunjungi tau tappaka ri Isa anjoreng ri tampaka, nampa ammantang maki' siagang ke'nanga sidaminggu sallona. Lanri pappijo'jo'Na RohNa Allata'ala napakainga'mi ke'nanga Paulus, sollanna tena na'lampa Paulus mange ri Yerusalem. 5 Mingka ri wattunna lala'busu'mo wattunta lammantang anjoreng, a'lampa maki' ambokoi ke'nanga, nanipannarrusu' lampata. Amminawang ngasemmi ke'nanga massing sipammanakang angngantarakki' sa'genna assulu' ri pantaranganna kotaya. Anjoreng ri biring tamparanga, akkulantu' ngaseng maki' appala' doang. 6 Le'baki anjo assijama'-jamakki maki', kinampa nai' ri kappalaka; nammotere' ngaseng tommo ke'nanga. 7 Annarrusu' maki' assombala' battu ri Tirus sa'genna mange ri Ptolemais. A'lampa maki' angkunjungi sikamma tau tappaka ri Ptolemais, untu' ampabattui sallanta. Ammantang maki' anjoreng siallo siagang ke'nanga. 8 Ammukona a'lampa maki' pole, nakibattumo mange ri Kaisarea. Anjoreng, mange maki' ri se'reang pabiritta Kabara' Baji' niarenga Filipus. Ammantang maki' ri balla'na. Anne Filipus, iami kalase'renna anjo tau tujua le'baka nipile ri Yerusalem. 9 Nia' appa' ana' tulolona le'ba' nisare pakkulle ri Allata'ala ampa'la'bangi Kabara' Baji' battua ri Allata'ala. 10 Ri wattunta pirangallo aremo ammantang anjoreng, nia'mo battu sitau na'bi niarenga Agabus; anne Na'bi Agabus battu anjorengi ri Yudea. 11 Battui mae ri kambe nampa naalle passikko' aya'na Paulus. Napakemi anjo passikko' ayaka ansikkoki lima kalenna siagang bangkeng kalenna nampa nakana, “Iaminne Napaua RohNa Allata'ala: Anne patanna passikko' ayaka lanisikko' kammaminne ri tu Yahudia ri Yerusalem, nampa nipassareang mae ri bansa maraenga.” 12 Nilangngere'na anjo bicara kammaya, nipala'mi siagang sikontu tau tappaka ri Kaisarea, sollanna tena na'lampa Paulus mange ri Yerusalem. 13 Mingka appialimi Paulus angkana, “Apa matu-matunnu angngarru' kamma ngaseng, sa'genna a'jari ancuru' kusa'ring atingku? Kamma-kamma anne sadiama'; teako angkana nijakkala' bawang, mingka sadiama' ba'lalo mate lanri Batara Isa.” 14 Taerokai Paulus ampilangngeri kananna ikambe, jari ammari maki' ampisangkai Nikanamo: “Boli'mi kamma naero'Namo bawang Batara anjari.” 15 Le'bakki' ammantang siapa are sallona anjoreng, nipasadiami apa-apanta, kinampa a'lampa mange ri Yerusalem. 16 Nia'mo siapa are sari'battanga ri Kaisarea amminawang todong angngantarakki', mange ri balla'na Manason, nasaba' anjoreng maki' a'bangngi-bangngi. (Anne Manason tau battu ri Siprus, siagang sallomi a'jari tappa' ri Isa.) 17 Ri wattunta battu mange ri Yerusalem, nitarima baji' maki' ri sikamma sari'battanga anjoreng. 18 Ammukona, a'lampa maki' siagang Paulus mange angkunjungi Yakobus; nia' ngaseng tongi pamimping-pamimping jama'aka anjoreng. 19 Le'bakki' massing sijamakki, nacaritami Paulus mae ri ke'nanga sikontu apa le'baka Nagaukang Allata'ala lalang ri kalenna ri tangnga-tangngana bansa-bansa maraenga. 20 Le'baki nalangngere' ke'nanga anjo caritana Paulus, ammuji-muji ngasemmi ke'nanga mae ri Allata'ala. Nampa nakanamo ke'nanga ri Paulus, “Paulus! Parallui nuasseng sari'battang, angkanaya assa'bu-sa'bumi tu Yahudi a'jari tappa' ri Isa. Najarre' ngaseng ke'nanga angkatutui sikamma parentaNa Allata'ala, le'baka napabattu Musa. 21 Na kamma-kamma anne nalangngere'mi ke'nanga angkanaya le'ba'mi nuajara' sikamma tu Yahudi niaka ammantang ri tangnga-tangngana bansa maraenga, sollanna nabokoimo ke'nanga anjo sikamma parentaNa Allata'ala napabattua Musa. Nupakainga'mi ke'nanga sollanna tenamo nanasunnaki ana'-ana'na ke'nanga, yareka tenamo nanaturuki ke'nanga ada'-ada'na tu Yahudia. 22 Kamma-kamma anne tantu naassemmi anjo sikamma tu Yahudi tappakamo angkanaya niakko anrinni. Jari, apamo lanigaukang kamma-kamma anne? 23 Bajikangang pilangngerimi anne pappakainga'na ikambe. Nia' appa' tau anrinni le'bakamo a'janji ri Batara. 24 Jari a'lampamako siagang ke'nanga mange appare' acara massing antangkasi ngasengi kalennu. Siagang tanggongimi ongkoso'na ke'nanga sollanna akkulle nicukkuru' ke'nanga. Punna nugaukangi anjo kammaya, la'nassami mae ri taua angkanaya tena nakamma tojeng anjo kabara' nalangngereka ke'nanga; nasaba' manna ikau nugaukang tonji sikamma parentaNa Allata'ala, situru' apa le'baka napabattu Musa. 25 Mingka anjo bansa maraenga siagang tappakamo ri Isa, le'ba'mi nikiringi sura' ke'nanga, ampauangi apa le'baka nitappuki, angkanaya: takkulleai ke'nanga angkanrei kanre le'baka nipassareang mae ri barhalaya, takkulleai ke'nanga angnganre cera', yareka takkulleai ke'nanga angnganre olo'-olo' mate niaccekang; siagang takkulleai ke'nanga anggaukangi nikanaya gau' assalimara'.” 26 Jari a'lampami Paulus siagang anjo appaka tau. Ammukona, appare'mi acara ke'nanga sollanna akkulle massing natangkasi ngaseng kalenna ke'nanga. Le'baki anjo antama'mi ke'nanga ri Balla'Na Batara ero' ampaui angkanaya pirangallopi nampa le'ba' anjo acara pannangkasi kalea. Kammayatompa angngerammi ke'nanga koro'bang, eroka massing napassareang ke'nanga. 27 Ri wattunna lala'busu'mo anjo wattu tuju alloa, nia'mo siapa are tu Yahudi battu ri daera Asia anciniki Paulus lalang ri Balla'Na Batara. Napakabambammi ke'nanga tau jaia, nampa nata'gala' Paulus. 28 Nakkio' ke'nanga angkana, “He, tu Israelka, bantu saiki'! Iaminne tau le'baka a'lampa mange-mange angngajaraki sikontu taua pangngajarang angngewai bansa Israelka, siagang andakkai sikamma parentaNa Allata'ala, le'baka napabattu Musa; kammayatompa nahina tongi anne Balla'Na Batara. Na kamma-kamma anne ba'lalo naerammi bansa-bansa maraenga antama' ri Balla'Na Batara, anra'ma'-ra'massi anne tampa' matangkasaka!” ( 29 Kammaminjo kananna ke'nanga lanri nacini'mi Trofimus anjo tu Efesuska assiagang Paulus ri kotaya; na nakapammi ke'nanga angkanaya naerang tommi Paulus anjo taua antama' ri Balla'Na Batara.) 30 A'jari sanna'mi ricuna taua ri sikontu anjo kotaya, siagang assilari-larimi mange a'lipung. Najakkala'mi ke'nanga Paulus, nampa nare'resang assulu' ri Balla'Na Batara. Anjo wattua nitongko'mi linta' pakke'bu' Balla'Na Batara. 31 Lalang ero'na anjo sikamma tau apparicua ambunoi Paulus, nia'mo tau lari mange ri komandang pasukanna tantara Roma. A'laporo'mi anjo taua angkanaya sanna' ricuna taua ri sikontu kota Yerusalem. 32 Akkio'mi linta' siapa are tantara siagang siapa are perwira anjo komandang pasukanga. Le'baki anjo akkaro-karomi ke'nanga mange anjoreng ri tampa' karicuanga. Nacini'na anjo tau jaia battu anjo komandanga siagang pasukanna, ammarimi ke'nanga amba'ji Paulus. 33 Mangemi anjo komandanga ri Paulus nampa najakkala', nampa nasuro taua ansikkoki limanna. Le'baki anjo akkuta'nammi anjo komandanga angkana inai tau anjo Paulus, siagang apa le'ba' nagaukang. 34 A'rupa-rupami batena appiali anjo tau jaia. Teaimi sipato' ricuna anjo taua. Sa'genna takkulleami napahang anjo komandanga angkanaya apa sitojenna le'ba' kajariang. Jari nasuro erammi Paulus mange ri kantoro' tantaraya. 35 Ri wattunna narapi'mo tuka'-tukaka, a'jallo' lompo ngasemmi anjo tau apparicua. Sa'genna musti niangka' mami Paulus ri anjo pasukanga. 36 Nipinawammi ke'nanga ri sikamma anjo tau apparicua. Akkiok-kio'mi anjo tau apparicua angkana, “Allei buno!” 37 Ero'namo antama' ke'nanga ri kantoro' tantaraya, nakanamo Paulus ri anjo komandanga, “Maka akkulleja' a'bicara siagang ikatte komandang?” Akkuta'nammi anjo komandanga nakana, “Akkulleko a'bicara Yunani? 38 Jari punna kamma, teai ikau anjo tu Mesir le'baka angngewai pamarentaya pirangalloang nampa lari angngerang patassa'bu tau pangaco siagang sanjata antama' ri parang lompoa?” 39 Appialimi Paulus nakana, “Inakke tu Yahudia'; kota pammantangangku ri Tarsus, kota lompoa ri daera Kilikia. Kitulunga' nakisarea' kasampatang a'bicara mae ri anjo taua ngaseng.” 40 Nisaremi kasampatang a'bicara Paulus. Ammentemmi ri tuka'-tukaka nampa naangka' limanna a'jari pammatei ri taua angkana eroki a'bicara. Sannang ngasemmi taua. Le'baki anjo a'bicarami Paulus mae ri ke'nanga lalang bicara Ibrani, nakana,
1 “Ikatte ngaseng bapa'-bapaka, siagang sari'battanga ngaseng! Eroki kupakasingara' kalengku mae ri katte ngaseng. Jari pilangngerimi anne kanangku!” 2 Nalangngere'na anjo tau jaia a'bicara Ibrani Paulus, pila' sannang ngasemmi ke'nanga. Jari nasambummi pole bicaranna Paulus nakana, 3 “Inakke tu Yahudia'. Anjorenga' ri kota Tarsus, ri pa'rasangang Kilikia nilassukang. Mingka anrinnia' ri Yerusalem nipakalompo. Siagang anrinnia' niajara' baji' ri guru lompoa Gamaliel ri passala' atorang-atorang le'baka napassareang Musa ri boe-boeta. Sangkamma ikau ngaseng niaka anne alloa anrinni, sanna' todong rajengku anynyomba mae ri Allata'ala. 4 Le'baki kusessa sa'genna mate tau tappaka mae ri anjo pangngajarang berua. Kujakkala' ngasengi ke'nanga, bura'ne baine, nampa kupantama' ri tarungkua. 5 Kalenna imang lompoa siagang sikontu anggotana Pangadelang Agamaya akkulle a'jari sa'bi angkanaya tena ku'balle-balle. Nasaba' iaminjo ke'nanga le'ba' assarea' sura' koasa, kueranga mae ri tu Yahudi niaka ri Damsyik. Anjo sura' koasaya akkullei kupare' panna'gallang untu' anjakkalaki sikamma tau tappaka mae ri anjo pangngajarang berua, ri Damsyik, nampa kuerang ke'nanga mange ri Yerusalem sollanna nihukkung.” 6 “Ri wattu lalang a'lampaku siagang la'birimmo battu mange ri Damsyik, kira-kira ri wattu attangngana alloa, ti'ring nia'mo caya tassioro' battu ri langika angkulilingia'. 7 Anra'bama' naung ri buttaya napakamma. Nampa nia' kulangngere' sa'ra angkana mae ri nakke, nakana, ‘Saulus, Saulus! Angngapa nanusessa kamma duduA'?’ 8 Jari akkuta'namma' angkana, ‘InaiKi' antu, Batara?’ Appialimi anjo sa'raya angkana, ‘INakkemi Isa, tu Nazaretka, sannaka nusessana.’ 9 Sikamma tau niaka kuagang a'jappa anjo wattua nacini' ngaseng tongi anjo cayaya; mingka tanalangngerai ke'nanga anjo sa'ra a'bicaraya mae ri nakke. 10 Akkuta'namma' pole angkana, ‘Apa musti kugaukang Batara?’ Appialimi Batara angkana, ‘Ambangungko nai' nampa antamakko ri kota Damsyik. Anjoreng pako sallang lanipauang sikontu apa eroka Nasuro gaukang Allata'ala ri kau.’ 11 A'jari butama' anjo wattua napakamma sioro'na anjo cayaya. Jari nirenreng mama' ri agang-agangku antama' ri Damsyik. 12 Anjoreng ri Damsyik nia' sitau niareng Ananias. Anjo taua sanna' baji'na. Tutui anggaukangi sikamma parentaNa Allata'ala, le'baka napassareang Musa mae ri katte. Sanna' nipakala'biri'na ri sikontu tu Yahudi niaka ammantang ri Damsyik. 13 Battumi antoakka'. Ammentemmi ri sa'ringku nampa nakana, ‘Sari'battangku Saulus, kamma-kamma anne accini' poleang mako!’ Anjo wattua assailema', nakucini'mo Ananias. 14 Nampa nakanamo pole Ananias mae ri nakke, ‘Napile mako Allata'alana boe-boeta, sollanna nuasseng ero'Na. Kammayatompa sollanna nucini' Isa, AtanNa Allata'ala anggaukangai ero'Na Allata'ala, kammayatompa nulangngere' kalennu sa'ranNa Isa. 15 La'jari sa'biko ampa'la'bangi anjo apa le'baka nucini' siagang nulangngere', mae ri sikontu rupataua. 16 Kamma-kamma anne tea' mako sallo-salloi pole attayang. Ambangung mako nai', nanupassareang kalennu nije'ne'. Appala' popporo' mako mae ri Batara, sollannu nipammopporang ri dosa-dosanu.’ ” 17 “Ammotere'ma' mange ri Yerusalem. Na ri wattungku sitabang appala' doang ri Balla'Na Batara, battumi RohNa Allata'ala angkoasai kalengku. 18 Kucini'mi Batara; Nakana mae ri nakke, ‘A'lampako linta' ambokoi Yerusalem. Nasaba' taerokai taua anrinni antarimai kasa'biannu mae ri Nakke.’ 19 Kukanamo, ‘O Batara, baji' ngaseng naassenna ke'nanga angkanaya le'bakka' antama' ri sikamma balla' sambayanga anjakkalaki ke'nanga, siagang amba'ji sikamma tau tappaka mae ri Katte. 20 Kammayatompa ri wattunna nibuno anjo sa'binTa Stefanus, nia' tonga' anjoreng siagang kusitujui tongi nanibuno. Ba'lalo inakkemi anjagai pakeanna sikamma tau ambunoai.’ 21 Mingka Nakanamo pole Batara mae ri nakke, ‘A'lampamako, nasaba' laKusuroko a'lampa mange ri tampa'-tampa' bellaya, mange ri bansa-bansa maraenga.’ ” 22 Appilangngeri ngasengi anjo tau jaia ri wattunna a'bicara Paulus. Mingka nalangngere'na ke'nanga anjo kala'busang kananna Paulus, ammarrang-marrammi ke'nanga angkana, “Bunoi anjo tau kammaya. Tena nasiratang attallasa'!” 23 Lalang ammarrang-marranna ke'nanga, napakape'-kape' tommi jubana ke'nanga sa'genna sanna'mo jaina limbu'bu' a'gapullung nai' ri langika. 24 Jari nisuro erammi Paulus ri anjo komandang pasukang Roma mange ri kantoro' tantaraya. Niparessa terasa'mi anjoreng, ero' niasseng angkanaya apa saba'na nammarrang-marrang kamma anjo tu Yahudia mae ri ia. 25 Mingka ri wattunna le'ba'mo nisikko' Paulus nampa lanicambo', nakanamo Paulus ri anjo perwira niaka ammenteng anjoreng, “Maka akkullei nicambo' bansa Romaya punna tenapa nale'ba' niadeli?” 26 Nalangngere'na anjo perwiraya akkana kamma Paulus, a'lampami anjo perwiraya mae ri komandang pasukanga na nakana, “Apa anne kigaukanga bapa'? Anne taua tau bansa Roma!” 27 A'lampami anjo komandanga mae ri Paulus, na nakuta'nang Paulus angkana, “Bedeng, kammatojengi angkana ikau bansa Romako?” Nakanamo Paulus, “Iye', inakke bansa Roma memanga'.” 28 Nakanamo pole anjo komandanga, “Inakke sanna' jaina kubayara' nampa akkullea' a'jari bansa Roma!” Appialimi Paulus nakana, “Mingka inakke ri wattu nilassukangku memanji nakua'jari bansa Roma memammo.” 29 Anjo wattua ammono'boko ngasemmi anjo tantara eroka amparessai Paulus. Kammayatompa anjo komandanga a'jari malla' tommi lanri le'ba'namo nasikko' Paulus, padahala' anjo Paulus bansa Roma paleng. 30 Ero' dudumi anjo komandang pasukang Romaya angngassengi angkanaya passabakkang apa sitojenna nanipasala Paulus ri anjo tu Yahudia. Jari ammukona nakio'mi imang-imang kapalaya siagang anggota-anggotana Pangadelang Agamaya sollanna a'rappungang ke'nanga. Nampa nala'gasi passikko'na Paulus, nanaerang mange ri dallekanna ngaseng ke'nanga.
1 Najanjang tasse're-se'remi Paulus anjo anggota-anggotana pangadelang agamaya, nampa nakana, “Sikamma sari'battangku! Sa'genna anne alloa tena kukasia' ri pa'maikku angkanaya sala' mae ri Allata'ala ri katallassangku.” 2 Ri wattunna akkana kamma Paulus, nisuro tempa ka'rammi bawana Paulus ri Imang Lompo Ananias ri anjo tau ammentenga ri sa'rinna Paulus. 3 Jari nakanamo Paulus ri anjo Imang Lompoa, “Mattantu laNatempaka'rang todongko Allata'ala, ikau tu munape' kammaya, assara-saraia sangkamma tu matangkasa'! Ammempoko antureng angngadelia' situru' parentaNa Allata'ala napabattua Musa, padahala' ikaumi kalennu andakkai anjo parentaya lanri nusurona taua antempaka'ranga'!” 4 Nakanamo anjo siapa are tau niaka ri sa'rinna Paulus, “Nuhinai Imang LompoNa Allata'ala!” 5 Mingka appialimi Paulus nakana, “O, takuassengai sari'battang angkanaya imang lompoi padeng anjo taua. Nia' memang tattulisi' lalang ri Kittaka angkana, ‘Teako hinai pamimpinna bansanu.’ ” 6 Naciniki Paulus angkanaya anjo anggota-anggota pangadelanga nia' sitangnga tu Saduki na sitangngana maraenganga tu Farisi. Lanri kammana, nakanamo mae ri ke'nanga, “Sikamma sari'battanga! Inakke anne tu Farisia', nasaba' sossorang tu Farisia'. Nakuniadeli anrinni passabakkang tappaka' angkanaya lattallasa' poleangi ammotere' tau matea.” 7 Ri wattunna akkana kamma Paulus, appakkaramulami a'gea' tu Farisia siagang tu Sadukia; sa'genna ta'bage ruamo anjo anggota-anggota pangadelanga. ( 8 Nasaba' panggappana tu Sadukia nakana, tena nalattallasa' poleang tau matea, siagang tena malaeka', kammayatompa tena natappa' ke'nanga angkana nia' roh-roh; mingka tu Farisia tappaki angkanaya, lattallasa' poleangi tau matea, angkanaya nia' malaeka' siagang nia' roh-roh.) 9 Kale'bakkanna sanna'mi siricuina ke'nanga. Nia'mo siapa are tu Farisi a'jari guru agamaya ammenteng siagang appa'ngaraya tojeng. Nakanamo ke'nanga, “Situru' panggappana ikambe, anne taua tena salana manna sike'de'! Nasaba' nakulle nia' memang todong roh yareka malaeka' a'bicara mae ri kalenna!” 10 Pila' sanna'mi ricuna anjo pa'geakkanga, sa'genna malla'mi anjo komandang pasukanga, nakana gassingka niborongi Paulus ri ke'nanga. Jari nasuromi pasukanna mange angngallei Paulus battu ri tangnga-tangngana anjo tau jaia, nampa naerang mange ri kantoro' tantaraya. 11 Bangngi poleanna, nia'mi battu Batara Isa ri sa'rinna Paulus na Nakana, “Pakajarreki pa'mai'nu! Le'ba' mako a'jari sa'bingKu ri Yerusalem. Musti la'jari sa'bi tongko sallang ri Roma.” 12 Ammukona ri subu-subua, appakkaramulami assikongkolo' tu Yahudia. Assumpami ke'nanga angkana talangnganreai siagang talangnginungai ke'nanga punna tanabunoapi Paulus. 13 Niaki la'bi patampulo jaina, anjo tau assikongkoloka. 14 A'lampami ke'nanga mae ri imang-imang kapalaya siagang pamimping-pamimpinna tu Yahudia, nampa nakana ke'nanga, “Le'ba'mi assumpa ikambe, angkanaya talangnganreai siagang talangnginungai ikambe, punna tenapa nale'ba' nibuno Paulus ri kambe. 15 Jari, akkiring maki' sura' siagang anggota-anggota Pangadelang Agamaya mae ri anjo komandang pasukanna tantara Romaya. Kipalaki ri anjo komandanga sollanna naerang pole Paulus ri pangadelang agamaya, sangkamma eroki kiparessa baji'-baji' ammotere' parkarana. Nampa sadia memang ikambe ambunoi ilalang tenanapa nanrapi' mae anrinni.” 16 Mingka nalangngere'mi kamanakanna Paulus anjo eroka lanagaukang ke'nanga. Jari a'lampami anjo kamanakanna Paulus ampauangi anjo kabaraka mae ri Paulus ri kantoro' tantaraya. 17 Akkio'mi Paulus sitau perwira nampa napauang angkana, “Erang sai anne turungkaya mae ri komandanga, nia' ero' napabattu mae ri komandanga.” 18 Nierammi anjo turungkaya ri anjo perwiraya mae ri komandanga. Napabattumi anjo perwiraya ri komandanga angkana, “Napalaki Paulus, anjo tu nitahanga, sollanna kuerang anne turungkaya mae ri katte; nia' ero' napabattu ri katte.” 19 Nata'gala'mi anjo komandanga limanna anjo turungkaya nampa naerang mange ri sa'riang akkale-kale. Nampa nakuta'nang nakana, “Apa ero' nupabattu mae ri nakke?” 20 Appialimi anjo turungkaya nakana, “Assikongkoloki tu Yahudia ero' napala' ri katte sollanna kierang Paulus ammuko mange andallekang ri Pangadelang Agamaya, assara-sarai ke'nanga ero' amparessa baji'-baji' poleangi parkarana Paulus. 21 Mingka teaki' turukiangi pappala'na ke'nanga, nasaba' nia' tau la'bi patampulo accokko ero' anruppai Paulus ri aganga. Le'ba' ngasemmi ke'nanga assumpa angkanaya talangnganreai siagang talangnginungai ke'nanga punna tanabunoapi Paulus. Kamma-kamma anne sadia memammi attayang ke'nanga; kabara' pappialinta mami natayang ke'nanga.” 22 Nakanamo anjo komandanga, “Teako pau-paui manna ri nai angkana le'ba'mi nupabattu anne kabaraka mae ri nakke.” Le'baki anjo, nasuromi ammotere' anjo turungkaya. 23 Le'baki anjo akkio'mi anjo komandanga rua perwira, nampa nakana ri ke'nanga, “Appasadiako ruambilangngang tantara kammayatompa tujupulo tantara padongko' jarang, siagang ruambilangngang tantara angngeranga poke, nampa a'lampa memangki' ri tette' salapang anne bangngia mange ri Kaisarea. 24 Appasadia tongko jarang lanadongkokia Paulus, nampa nuerang siagang salama' mae ri Guburnur Feliks.” 25 Nampa annulisi' sura' anjo komandanga, kammaya anne bonena, 26 “Natarimai Karaeng Tunipakala'birika, Guburnur Feliks. Salama' battu ri Klaudius Lisias! 27 Anne taua le'ba'mi nijakkala' ri tu Yahudia, siagang sike'de' mami nibuno ri ke'nanga, ka'de' tena nakulinta' battu siagang pasukanga angngallei, lanri kulangngereki kabara'na angkanaya anne taua bansa Roma. 28 Lanri eroki kuasseng angkana apa sikontutojenna kasalang natuduangi ke'nanga anne taua, jari kuerammi mange ri Pangadelang Agamana tu Yahudia. 29 Kale'bakkanna a'nassai angkanaya tena sikali panggaukang salana ampassiratangi nihukkung mate yareka nitarungku. Iaji bawang nipassalangi ri ke'nanga, lanri atorang-atorang agamana tonji ke'nanga. 30 Nampa nia'mo tau ampabattuanga' angkanaya assikongkoloki tu Yahudia ero' ambunoi anne taua. Jari iaminjo saba'na nakukiring anne taua mae ri katte. Nale'ba'mi kupauang sikamma tau antuduai anne taua, sollanna battu andallekang ri katte ampabattui tuduhanna ke'nanga.” 31 Jari a'lampami anjo tantaraya ngaseng anggaukangi apa nipassuroanga ri ke'nanga. Mangemi ke'nanga angngallei Paulus, nampa naerang a'lampa bangngi sa'genna mange ri Antipatris. 32 Ammukona nalappassammi ke'nanga tantara padongko' jaranga ampatulusuki lampana siagang Paulus, nampa ammotere' ke'nanga mange ri kantoro' tantaraya. 33 Ri wattunna battu anjo tantara padongko' jaranga mange ri Kaisarea, napabattumi ke'nanga anjo suraka mae ri guburnurka, nampa napassareang todong Paulus mae ri ia. 34 Le'baki nabaca guburnurka anjo suraka, akkuta'nammi ri Paulus angkana battu kemaei assala'na Paulus. Nalangngere'na angkanaya anjo Paulus tau battu ri pa'rasangang Kilikia, 35 nakanamo, “Baji'mi! Lakuparessai anne parkaranu punna battumo mae anrinni anjo tau antuduako.” Le'baki anjo nasuro tahammi Paulus lalang ri balla' lompona Herodes.
1 Limang allo ribokoanganna, a'lampami Imang Lompo Ananias siagang pamimping-pamimpinna tu Yahudia mange ri Kaisarea. Angngerang tommi ke'nanga sitau pabicara niarenga Tertulus. Mangemi ke'nanga andallekang ri Guburnurka, iamintu Feliks, nampa napabattu tuntutanna ke'nanga mae ri Paulus. 2 Ri wattunna nikio' Tertulus mae ri dallekang, kammaminne batena antudui Paulus, nakana, “Tunipakala'birika, Guburnurka! Baku' nia'na irawang parentata, a'jari sannangi siagang salewangangi pa'rasanganna ikambe. Siagang lanri kabajikanta, jai tommi apa-apa le'ba' nipakabaji' untu' bansana ikambe. 3 Nayangasenna anne tuli nitarima ngasemmi siagang kasukkurang kammayatompa pappakalompo sitinggi-tinggina ri kere-keremae. 4 Mingka sollanna tena nala'bu dudu karaeng, kupalaki pa'mai' bajitta nakipilangngeri anne tuntutanna ikambe. Bodo kanana iaminne: 5 Anne taua pangacoi siagang akkullei angngerang bahaya. Kemae-kemae appa'nia' karicuang ri alla'na tu Yahudia. Siagang iami a'jari pamimpinna tu Nazaretka. 6 Ba'lalo le'baki ero' nara'massi Balla'Na Batara, mingka nijakkala'mi ri kambe. Eroki ikambe angngadeli situru' atorang agamana ikambe. 7 Mingka niallei ri komandang Lisias battu ri kambe, 8 nampa nasuro sikamma tau eroka annuntu' battu andallekang ri katte. Punna kiparessa anne taua, lakilangngere'mi kalenta battu ri ia, angkanaya ma'nassa kontutojengi anne apa natuntuka ikambe mae ri anne taua.” 9 Amminawang ngaseng tommi sikamma tu Yahudi niaka anjoreng antudui Paulus. Siagang napakkontu tojemmi ke'nanga sikamma anjo apa le'baka napau Tertulus. 10 Le'baki anjo nisaremi wattu Paulus ri anjo Guburnurka sollanna a'bicara. Jari a'bicarami Paulus nakana, “Kuassengi angkanaya attaung-taummi sallota a'jari haking anrinni ri pa'rasanganga karaeng. Iaminjo saba'na nasannang nyawaku ero' a'bicara ampakasingaraki ri dallekang mala'biritta angkanaya tena nakusala. 11 Kalenta akkulle ansalidiki karaeng, angkanaya sampulo anrua allonna allaloa, a'lampa' mange ri Yerusalem, ero' assambayang. 12 Nakutale'baka narapikang anjo sikamma tu Yahudia a'gea'-gea' siagang manna sitaua tau; yareka tena le'bakai ke'nanga anrapikanga' ampa'rappungangi taua ero' appa'nia' karicuang, baji' nailalang ri Balla'Na Batara kammayatompa ri tampa'-tampa' maraenga lalang ri kotaya. 13 Siagang tena todong nakkulle napa'butti sikamma anjo apa natuduanga' ke'nanga ri dallekanta. 14 Mingka memang musti kuakui ri dallekanta, angkanaya anynyomba' mae ri Allata'ala nasombaya boe-boena ikambe situru' apa Napangngajarranga Isa; na iaminjo nabilang sala ke'nanga mae ri nakke. Mingka tuli tappa' tonja' mae ri sikamma apa tattulisika lalang ri Kitta'na Musa siagang Kitta'na Na'bi-na'bia. 15 Sangkamma ke'nanga, inakke tappa' tonja' mae ri Allata'ala, angkanaya sikontu tau matea lattallasa' poleangi ammotere' — iamintu sikamma tau bajika kammayatompa sikamma tau ja'dalaka! 16 Iaminjo saba'na natuli kuusahai baji'-baji', sollanna tangkasa' atingku mae ri Allata'ala siagang tangkasa' mae ri parangku rupatau. 17 Le'baki pirang taung are kubokoi Yerusalem, ammotere'ma' mange anjoreng angngerang doe' bantuang mae ri bansaku, siagang ero' angngerang koro'bang mae ri Allata'ala. 18 Mingka narapikamma' ke'nanga ri wattunna kuerang anjo koro'banga ri Balla'Na Batara, siagang ri wattungku le'ba' antangkasi kalengku. Tena najai tau kuagang, siagang tena todong karicuang anjoreng anjo wattua. 19 Nia' siapa are bawang tu Yahudi battu ri daera Asia, anjo wattua. Iaji anjo ke'nanga musti nia' anrinni antuntuka' ri dallekanta, punna nia' apa-apa lanatuntukanga'. 20 Yareka boli'mi kamma nakalenta ngaseng anne taua ampa'butti angkanaya kaja'dallang apa nagappa ri kalengku, ri wattungku niadeli ri dallekanna Pangadelang Agamaya. 21 Iaji bawang nagappa ke'nanga ri kalengku, anne kana sirupaya, iamintu ri wattu kukanana ri dallekanna ke'nanga, angkanaya: anne alloa niadelia' passabakkang tappaka' angkanaya lanipattallasa' poleangi ammotere' tau matea.” 22 Anjo Feliks, jaimi naasseng apa le'baka Napangngajarrang Isa. Jari natongko'mi anjo sidanga nakana, “Battupi komandang Lisias nampa kutappuki anne parkaraya.” 23 Le'baki anjo nasuromi anjo perwiraya angngerangi Paulus, sollanna nitahang ija. Mingka nisarei sike'de' kalonggangang Paulus, siagang tena nipisangkai punna nia' agang-aganna battu ampangngerangangi apa-apa naparalluanga. 24 Pirangallo are ribokoanganna, battumi Feliks siagang bainenna niarenga Drusila; anne Drusila tu Yahudi. Nasuromi Feliks taua angngallei Paulus, nampa nasuro Paulus ambicarai nikanaya katappakkang mae ri Isa Almasi. 25 Mingka ri wattunna narapi' nabicara Paulus passala' kalambusanga siagang antahangi kacinnanga, kammayatompa passala' hukkungang labattua punna Allo Kiama', a'jari malla'mi Feliks. Jari nakanamo Feliks, “Kamma-kamma anne akkulle mako a'lampa. Lakusuro kio' jako antu pole punna nia' wattu.” 26 Naanjo wattua attayangi Feliks ri pa'mai'na angkana lanisarei doe' ri Paulus. Iaminjo saba'na na'mole-mole nasuro taua angngallei Paulus ero' angngagangi a'bicara. 27 Ruan taungi sallona, nisambeammi Feliks ri Perkius Festus a'jari Guburnur. Na lanri ero'na Feliks angngallei pa'mai'na tu Yahudia, natahang tulimi Paulus lalang ri tarungkua.
1 Tallungalloi battuna Festus, mange anjoreng ri daeraya, nabokoimi Kaisarea nampa a'lampa mange ri Yerusalem. 2 Battumi mae ri ia imang-imang kapalaya siagang pamimping-pamimpinna tu Yahudia anjoreng, ampabattui tuntutanna ke'nanga mae ri Paulus. Tuli nanyonyo'mi ke'nanga Festus, 3 siagang napala'mi ke'nanga pa'mai' baji'na, sollanna ero' assuro erangi Paulus mange ri Yerusalem; nasaba' le'ba'mi assikongkolo' ke'nanga ero' ambunoi Paulus ri tangngana aganga. 4 Mingka appialimi Festus nakana, “Kamma-kamma anne nitahangi Paulus ri Kaisarea; natena tommo nasallo nakuammotere' mange anjoreng. 5 Jari, bajikangangi punna nia' siapa are pamimpinnu kuagang mange ri Kaisarea nampa nibicara anjo parkaraya anjoreng, punna ma'nassa nia' tojeng panggaukang salana Paulus.” 6 Kira-kira narapiki sagantuju allo yareka sampulo allo pole ammantang ri Yerusalem, ammotere'mi Festus mange ri Kaisarea. Ammukona appare'mi sidang ri pangadelanga, nampa nasuro erang Paulus battu andallekang. 7 Ri wattunna battu Paulus, ammentemmi anjo sikamma tu Yahudi battua ri Yerusalem angkulilingi Paulus. Nampa appakkaramulamo ke'nanga antudui siagang ambattalli Paulus. Mingka takkulleai ke'nanga ampa'butti anjo sikamma tuduhang napaua ke'nanga. 8 Ri wattunna napakasingara' kalenna Paulus nakanamo, “Tena sikali apa-apa sala le'ba' kugaukang mae ri sikamma apa-apa le'baka Napassuroang Allata'ala, situru' le'baka napabattu Musa. Tena todong panggaukang sala le'ba' kugaukang mae ri Balla'Na Batara, yareka mae ri Karaenga ri Roma.” 9 Mingka eroki Festus angngallei pa'mai'na anjo tu Yahudia. Jari akkuta'nammi ri Paulus nakana, “Maka erokko a'lampa mange ri Yerusalem nampa niadeliko anjoreng ri dallekangku ri passala'na sikammaya anjo tuduhanga mae ri kau?” 10 Appialimi Paulus nakana, “Kamma-kamma anne niakka' ammenteng ri dallekanna pangadelanna Karaenga ri Roma; jari anjoremma' ri tampaka siratang niadeli. Kalentami angngassengi angkanaya tena salaku mae ri tu Yahudia. 11 Punna nia' atorang le'ba' kudakkai siagang nia' panggaukang sala le'ba' kugaukang, nakusiratang nihukkung mate, lakurellakangi kalengku nihukkung mate. Mingka punna tannabaya tuduhanna ke'nanga, tena manna sitau akkulle ampassareangi kalengku mae ri ke'nanga. Kupalaki nakuniadeli ri pangadelanna Karaenga ri Roma!” 12 Le'baki sipa'bicara Festus siagang tutoa-tutoa biasaya napappalaki pikkirang, nakanamo mae ri Paulus, “Lanri nupalaki niadeli ri pangadelanna Karaenga ri Roma, jari musti a'lampako mange andallekang ri Karaenga.” 13 Tasalloai ribokoanganna, niaki battu Karaeng Agripa siagang Bernike ero' ampasalamaki Festus. 14 Narapiki pirangallo are ke'nanga nia' ri Kaisarea, nacaritami Festus anjo parkarana Paulus mae ri Karaeng Agripa. Nakana Festus, “Nia' anrinni sitau tahanang nabolika Feliks. 15 Ri wattungku nia' ri Yerusalem, battui ri nakke imang-imang kapalaya siagang pamimping-pamimpinna tu Yahudia antuntuki siagang ansuro hukkungi anjo taua. 16 Mingka appialima' ri ke'nanga angkanaya tabiasayai tu Romaya ampassareang bawang-bawangi nihukkung se'rea tu nitudu, punna tenapa nanipasidallekangi siagang balinna, kammayatompa punna tenapa nisarei wattu anjo tu nitudua a'bicara ampakasingaraki kalenna. 17 Jari, ri wattunna battu ke'nanga mae anrinni tenamo kusallo attayang. Ammukona appare' memamma' sidang pangadelang, nampa kusuro erang anjo taua andallekang. 18 Ri wattunna ammenteng sikamma tau antuduai ampaui tuntutanna ke'nanga, takkulleai ke'nanga ampa'butti manna sirupa, angkana apa panggaukang salana anjo taua. 19 Assisala pahannaji ke'nanga ri passala' agamana ke'nanga, siagang passala' se'rea tau niarenga Isa. Anjo taua matemi mingka naterassi Paulus angkana attallasaki anjo taua. 20 Nasaba' lingua' kusa'ring angkana antekamma bateku langgappa kasingarang ri anne parkaraya, akkuta'namma' ri Paulus angkana maka eroki a'lampa mange ri Yerusalem. Anjorempi niadeli anne parkarana. 21 Mingka napalaki Paulus sollanna nai' ri pangadelang lompoanganga; napalaki ammantanga ri tahananga sa'genna natappuki Karaenga ri Roma anjo parkarana. Iaminjo saba'na nakusuro tahang tuli, sa'gengku anggappa kasampatang angkiringi mae ri Karaenga.” 22 Nakanamo Agripa mae ri Festus, “Manna inakke ero' tonga' allangngereki bicaranna anjo taua.” Appialimi Festus nakana, “Ammuko akkullei kipilangngeri.” 23 Ammukona, battumi Agripa siagang Bernike siagang ada' kalompoang. Antama'mi ke'nanga ri pammantangang sidanga siagang sikamma tumalompona tantaraya, kammayatompa tumalompona anjo kotaya. Nasuro erammi Festus antama' Paulus. 24 Nampa nakana Festus, “Tunipakalompoa Agripa, siagang sikontu tau hadereka! Anne taua le'ba'mi nituntu' ri dallekangku ri sikontu bansa Yahudia, baji' ia niaka ri Yerusalem kammayatompa niaka anrinni. Ammarrang-marrammi ke'nanga antuntuki anne taua angkanaya tena nasiratang nipa'biang attallasa' anne taua. 25 Mingka tena kugappa manna sirupa panggaukang sala le'ba' nagaukang anne taua, sa'genna siratang nihukkung mate. Na lanri kammana, le'ba'mi napala' kalenna, sollanna anjoreng ri pangadelanna Karaenga niadeli parkarana. Jari le'ba'mi kutappuki sollanna nikiring anne taua mae ri Karaenga ri Roma. 26 Mingka tenapa kugappa kasingarang baji' dudu, ri passala' batangkalenna anne taua, akkullea kutulisi' lalang sura' mae ri Karaenga. Lanri kammana minjo nakuerang battu andallekang ri dallekanta ngaseng, la'biangampa ri dallekanna tunipakala'birika Karaeng Agripa! Pattujungku iamintu, sollanna punna le'ba'mo niparessa anne taua, akkullema' anggappa kasingarang angkana apa lakutulisi' lalang ri suraka mae ri Karaenga ri Roma. 27 Nasaba' situru' ri pakkasiakku, tena nasiratang nikiring se'rea tahanang punna tena nanipa'nassai angkanaya apa-apa kasalanna nanituntuki.”
1 Nakanamo Agripa mae ri Paulus, “Kamma-kamma anne nisareko kasampatang a'bicara, untu' ampakasingaraki kalennu punna tena nusala.” Jari naangka'mi limanna Paulus nampa a'bicara kamma anne. 2 “Tunipakala'birika Karaeng Agripa! Kubilang upa' sikali kusa'ring kalengku, lanri akkulleku a'bicara ri dallekang mala'biritta ri passala' sikammaya anjo apa-apa napappituduanga tu Yahudia mae ri nakke; 3 la'biangampa pole nasaba' kiasseng sikali ada'-ada'na siagang passa'-passala'na katallassanna tu Yahudia. Lanri kammana minjo, kupalaki pa'mai' bajitta nakipilangngeri baji'-baji' anne apa eroka kupakasingara'. 4 Naasseng ngasengi sikamma tu Yahudia angkana antekamma katallassangku appakkaramula ri wattungku rungka. Naassengi ke'nanga angkanaya appakkaramula ri wattungku a'jari tau rungka, nia'ma' ri tangnga-tangngana bansaku ri Yerusalem. 5 Sallomi naasseng ke'nanga angkanaya antekamma katallassangku. Na punna ero' ke'nanga, akkullei ke'nanga a'jari sa'bi angkanaya riolo iji nakuattallasa'mo sangkamma tu Farisi, siagang kuturuki ngasemmi sikontu atorang-atorang kaminang terasaka lalang ri agamana ikambe. 6 Na kamma-kamma anne niakka' ammenteng anrinni niadeli passabakkang tappakka' mae ri janjinNa Allata'ala mae ri boe-boena ikambe. 7 Ia tomminjo janjia le'ba' naminasai dudu sampuloa anrua suku bansa Israel. Sa'genna assambayang ke'nanga ri Allata'ala allo bangngi. Na lanri tappakku mae ri anjo janjia, Karaeng Tunipakala'birika, iaminjo nakunapassala mamo tu Yahudia. 8 Angngapa natakkullea tappa' sikamma sari'battangku tu Yahudia angkanaya laNapattallasa' poleangi ammotere' Allata'ala tau matea? 9 Uru-uruna, manna inakke kukana tonja musti nigaukangi sikamma apa nikullea nigaukang angngewai anjo Isa battua ri Nazaret. 10 Na memang iaminjo le'baka kugaukang ri Yerusalem. Lanri sura' koasa battu ri imang-imang kapalaya, jai sikalimi tau jarre' tappa'na ri Allata'ala le'ba' kupantama' ri tarungkua. Ba'lalo, kusitujui tongi sollanna nihukkung mate ke'nanga. 11 A'mole-mole sikali kusessa ke'nanga ri sikamma balla' sambayanga, lanri ero'na kupassa ke'nanga ambokoi anjo apa napatappaka ke'nanga. Lanri bambanna nyawaku mae ri ke'nanga, sa'genna manna mange ri kota-kota maraenga a'lampa tonja' angngondangi ke'nanga anjoreng.” 12 “Iatommi anjo pattujungku nakua'lampamo mange ri Damsyik siagang angngerang sura' koasa battu ri imang-imang kapalaya. 13 Na ri wattungku ri tangngana aganga, Karaeng Tunipakala'birika, kira-kira ri attangngana alloa, nia'mo kucini' singara' battu rate ri langika, singaranganga cayana namatanna alloa. Accayami anjo singaraka angkulilingia' siagang sikamma anjo tau kuaganga a'rurung. 14 Tu'guru' ngaseng maki' naung ri buttaya. Nampa nia'mo kulangngere' sa'ra a'bicara mae ri nakke lalang bicara Ibrani nakana, ‘Saulus, Saulus! Angngapa natuli nusessa kamma duduA'? Ikau tonji langkasiaki pa'risika punna tuli nuewana pimpinanNa a'jaria karaennu.’ 15 Jari kukanamo, ‘INaiki' antu Karaeng?’ Appialimi Batara Nakana, ‘INakkemi Isa, tuli nusessaya. 16 Ambangungko siagang ammentengko nai'! Kupappicinikangi KalengKu lanri erokko Kupicinikiang angkana apa saba'na naKuangkakko a'jari palayangKu. Musti nupa'la'bangi mae ri tau maraenga apa nucinika anne alloa. Iamintu passala'na KalengKu, siagang passala'na apa laKupicinikiangko sallang ri allo labattua. 17 LaKulappassangko battu ri limanna bansa Israelka siagang bansa-bansa maraenga. LaKusuroko a'lampa mae ri ke'nanga, 18 untu' ansungkeangi matanna ke'nanga, sollanna akkulle assulu' ke'nanga battu ri sassanga nampa antama' ri singaraka; sollanna ta'lappasa' ke'nanga battu ri pangngajara' salana Billisika, nampa nikoasai ke'nanga ri Allata'ala. Na lanri tappa'na ke'nanga mae ri Nakke, naKupammopporammo dosa-dosana siagang la'jarimi ke'nanga umma'Na Allata'ala nipilea.’ ” 19 “Jari lanri kammana, Karaeng Agripa, tuli kuusahaimi nikanaya amminawang turu' mae ri anjo apa le'baka nipicinikianga' siagang kutarimaya battu ri Allata'ala. 20 Kupaumi silambusu'na mae ri taua angkanaya musti toba' ngasengi ke'nanga battu ri massing dosa-dosana. Musti napassareangi tallasa'na ke'nanga mae ri Allata'ala. Siagang musti napa'butti lalang ri katallassanna ke'nanga, angkanaya ma'nassa toba' tojeng-tojemmi battu ri dosa-dosana ke'nanga. Uru-uruna anjorengi ri Damsyik kupau anne passalaka. Le'baki anjo nampa ri Yerusalem, siagang ri sikontu Yudea, ri tangnga-tangngana bansa maraenga. 21 Jari iaminjo saba'na nanajakkalaka' tu Yahudia ri Balla'Na Batara, siagang naero'mo ke'nanga ambunoa'. 22 Mingka sa'genna kamma-kamma anne tuli nijagaia' ri Allata'ala, sa'gengku akkulle ammenteng anrinni, a'jari sa'bi mae ri sikamma taua — baji' natau lompo kammayatompa tau ca'dia. Anne apa kupaua tena le'ba' sisalana siagang apa-apa le'baka nasero kana na'bi-na'bia siagang Musa; 23 iamintu angkanaya musti sessai anjo Karaeng Mappasalama' le'baka Napa'janjiang Allata'ala, siagang Iami la'jari tau uru-uru attallasaka ammotere' battu ri kamateanga. Sollanna lanri kammana anjo, akkullemi Napabattu kasalamakkanga, baji' namae ri tu Yahudia, kammayatompa mae ri bansa-bansa maraenga.” 24 Lalang a'bicara kammana Paulus ampakasingaraki kalenna, ammarrammi Festus nakana, “Pongoro' mako antu Paulus! Napa'jari pongoro' mako anjo pangngassengannu jai dudua!” 25 Mingka appialimi Paulus nakana, “Tena nakupongoro', karaeng. Anjo bicara kupaua sangnging bicara annaba, siagang sangnging battu ri pikkirang baji'. 26 Kalenna Karaeng Agripa angngasseng bajiki sikamma anjo passalaka. Iaminjo saba'na nakubarani a'bicara silambusu'na ri dallekanna karaenga. Tappaka' angkanaya tena manna sirupa anjo passalaka tanaassengapa karaenga, nasaba' tena nanjoreng ri tampa' kacokkoanga kajariang sikamma anjo passalaka. 27 Tunipakala'birika Karaeng Agripa, maka tappakki' mae ri anjo apa-apa le'baka napau na'bi-na'bia? Pakkasiakku kukana tappakki' Karaeng!” 28 Nakanamo Agripa mae ri Paulus, “Nukana gampanga' lanupa'jari tu Karisteng silalonna?” 29 Appialimi Paulus nakana, “Ri wattu silalonna yareka lalang wattu salloa, appala' doanga' mae ri Allata'ala sollanna ikatte siagang sikamma tau hadereka appilangngeri anne alloa, akkulle ngasengki' ajari sangkamma inakke — pantaranganna anne rante assikkoka'!” 30 Kala'busanna ammentemmi Karaenga, Guburnurka, Bernike, siagang sikamma tau hadereka. 31 Battui ke'nanga assulukang, massing nakanamo para ia ke'nanga, “Anjo taua tena sikali panggaukang sala nagaukang ampassiratangai nihukkung mate yareka nitarungku.” 32 Nakanamo Agripa ri Festus, “Anjo taua akkullemi nilappassang ka'de' tena nanapalaki niadeli parkarana ri pangadelanna Karaenga ri Roma.”
1 Le'ba'mi nitappuki angkanaya musti a'lampa maki' mange ri Italia. Jari nipassareammi Paulus siagang siapa are tahanang maraenga mae ri Yulius, iamintu perwira tantara Roma nigallaraka “Pasukanna Karaenga”. 2 Nai' maki' ri kappalaka ri Adramitium nampa a'lampa maki' assombala'. Anjo kappalaka eroki assombala' mange ri sikamma palabuhang niaka ri daera Asia. Nia' tongi Aristarkhus angngagangki' irate ri anjo kappalaka. Anne Aristarkhus tau battu ri Makedonia. 3 Ammukona, battu maki' mange ri Sidon. Anjo Paulus nikatutui bajiki ri Yulius. Nisarei kasampatang Paulus mange angkunjungi agang-aganna sollanna akkulle nisare ri ke'nanga apa-apa naparalluanga Paulus. 4 Battu anjoreng ri Sidon nipatulusu'mi assombala'. Mingka lanri niruppaiki' ri anging, anjoreng maki' ri birinna pulo Siprus annarrusu' assombala', lanri ta'linrungi sike'de' ri anging anjoreng. 5 Le'baki anjo assombala' maki' ri tamparang sidallekanga siagang Kilikia na Pamfilia, sa'genta battu mange ri Mira, pa'rasangang Likia. 6 Anggappami perwiraya kappala' battu ri Aleksandria, eroka mange ri Italia. Jari nipalette' maki' ri anjo perwiraya mange anjoreng ri kappalaka. 7 Pirangallo are sallota sanna' lansanta assombala'. Sanna' susata assombala' nampa akkulle nirapi' sa'genna kota Knidus. Nampa lanri kodina ija anginga, takkullea maki' annarrusu' assombala' situru' oloang nitujua uru-uruna. Jari a'lampa timboro'na maki' Pulo Kreta assombala', allalo ri Tanjung Salmone, sollanta ta'linrung ri anginga anjoreng. 8 Sanna'mi susata assombala' antulakkangi birinna anjo puloa; sa'genta anrapi' mange ri se'reang tampa' niareng Palabuhang Ga'ga, tenaya nabella battu ri kota Lasea. 9 Anjo wattua allalomi Allo Lompo Passiamakkanna tu Yahudia. Jai sikalimi wattu tappela', sa'genna tabajikami nisa'ring wattua assombala'. Jari nipakainga'mi ke'nanga ri Paulus, angkana, 10 “Sikamma sari'battangku, turu' ri panggappaku, lompo sikali bahayana punna annarrusu' ijaki assombala'. Langgappaki' karugiang lompo. Teai poro karugiang barang-barang siagang kappala', mingka manna nyawata akkulle todong tappela'.” 11 Mingka tappakangangi anjo perwiraya mae ri jurumudia siagang kapiteng kappalaka, na mae ri kananna Paulus. 12 Tena memang nabaji' napammantangi kappala' anjo palabuhanga punna wattu dinging. Iaminjo saba'na najaiangang ana'-ana' kappalaka erokangang a'lampaya pole assombala' ambokoi anjo palabuhanga. Eroki nausahai ke'nanga anrapi' mange ri Feniks nampa ammantang anjoreng sa'genna allalo wattu dinginga. Feniks, iamintu palabuhang ri Pulo Kreta a'dalle' mangei ri warakkanna sike'de' ri tampa' labuna alloa. 13 Anjo wattua battu timboroki anginga siagang lammai nisa'ring battuna. Jari nakana ana'-ana' kappalaka akkullemi ke'nanga assombala' pole. Jari assombala'mi ke'nanga antulakkangi birinna Pulo Kreta. 14 Mingka tasalloai, battumi anging lompoa — iamintu niarenga anging Battu Timboroka — battu rate ri bontoa, 15 antunrungi kappala'na ikambe. Tena sikalimo nikkulle assombala', anruppai anjo anginga. Jari sa'bara' mamaki', nanilappassang mamo ammanyu' kappalaka nierang ri anging. 16 Ri wattunta allalo ri se'reang pulo ca'di, ri timboranna pulo niarenga Kauda, ta'linrung maki' sike'de' ri anginga. Anjorenta teaimi sipato' susata angngurusuki linta' sikocina kappalaka. 17 Le'baki nipanai' sikocia ri kappalaka, nipakajarre' tommi kappalaka; nisikko' siagang nipakaluki otere'. Mallakki' nianyukang mange anjoreng ri pammantangang ambawaya, iamintu kassi'na Sirtis. Jari nipanaummi sombalaka nampa nilappassang kappalaka ampinawangi anginga. 18 Pila' sanna'mi lompona anginga. Sa'genna ammukona nipela'mi barang-baranga naung ri tamparanga. 19 Allo ammukona pole napela' tommi ana'-ana' kappalaka pakkakasa'-pakkakasa'na kappalaka naung ri tamparanga. 20 Pirangallo aremi sallona tena nakiaccini' allo siagang bintoeng. Kammayatompa pila' a'jallo' tommi anginga. Kala'busanna, tappu' panrannuang maki' lasalama'. 21 Siapa aremi sallona tena ngaseng nangnganre taua. Jari mangemi Paulus ammenteng ri tangnga-tangngana ke'nanga nampa nakana, “Sikamma sari'battangku! Ka'de' nupilangngeri kanangku natanibokoia Kreta, tenaja nalanikasia' ngaseng anne kapanrakanga siagang karugianga. 22 Mingka kamma-kamma anne kupala' dudui pole mae ri kau ngaseng, sollanna nupakalompo ngaseng pa'mai'nu. Tenapa manna sitau battu ri katte lamate. Iaji anne kappalaka bawang latappela'. 23 Nasaba' ri bangngia niaki malaeka'Na Allata'ala battu mae ri nakke, iamintu Allata'ala kusombaya, Allata'ala makoasaya mae ri kalengku. 24 Nakana anjo malaekaka, ‘Teako mallakki Paulus! Nasaba' lamangeko andallekang ri Karaenga ri Roma. Lanri kabajikanNa Allata'ala mae ri kau, nasikontu anne tau nuaganga assombala', lanipasalama' ngasengi passabakkang ikau.’ 25 Lanri kammana minjo, sari'battangku ngaseng, parallui nupakalompo pa'mai'nu! Nasaba' tappaka' ri Allata'ala angkanaya laNapa'rupa ngasengi anjo kana le'baka Napabattu mae ri nakke. 26 Mingka lanianyukangki' sallang mange ri biring ri se'reang pulo.” 27 Ri bangngi makasampulona angngappa', ammawang-mawang mami kappalaka ri Tamparang Adria. Kira-kira ri wattu lantanna bangngia nakanamo pakkasia'na ana'-ana' kappalaka angkana a'reppese'mi kappalaka mange ri bontoa. 28 Jari naukkuru'mi siagang otere' nagentungi batu anjo tamparanga. Nania' tojeng mamo kira-kira patampulo metere' lantanna anjo tamparanga. Tasalloai naukkuru'mi pole ke'nanga tampa' nirapika, nania' mamo tallumpulo metere' lantanna. 29 Malla'mi ke'nanga gassingka tassambangi kappalaka mae ri batu karanga. Jari appanaummi ke'nanga appa' jangkara' ri bokona kappalaka. Na'minasamo ke'nanga sollanna linta'mo singara'. 30 Ero'mi a'lampa cokko-cokko anjo ana'-ana' kappalaka ambokoi kappalaka. Napanaummi ke'nanga sikocia, assara-sarai ero' appanaung jangkara' battu ri ulunna kappalaka. 31 Mingka nakanamo Paulus ri anjo perwiraya siagang sikamma anjo tantara niaka ri kappalaka, angkana, “Punna tammantanga anjo ana'-ana' kappalaka anrinni ri kappalaka, tena ngaseng nulasalama' battu ri anne bahayaya.” 32 Jari mangemi tantaraya angkereki otere'na anjo sikocia, sa'genna ammanyu' anjo sikocia. 33 Ri wattunna a'birimmo ammumbamo alloa, nasuromi Paulus angnganre ngaseng taua. Nakana Paulus, “Sampulomi anggappa' allonna tuli attayang jako bawang lalang malla'nu, nanutangnganrea apa-apa. 34 Kupakaingakko sollannu angnganre sike'de'. Anne untu' kabajikannu ngaseng, sollannu anggappa ammotere' kagassingang. Nasaba' lasalama' ngasengko nutangngapa-apa.” 35 Le'baki akkana kamma Paulus, angngallemi roti nampa appala' sukkuru' mae ri Batara ri dallekanna ngaseng ke'nanga. Nampa napa'bage-bageang anjo rotia, nanakanre anjo rotia. 36 A'jari lompo ngasemmi ammotere' sumanga'na ke'nanga, siagang massing angnganre tommi ke'nanga. 37 Nia' ruambilangngang tujupulo angngannang jaina anjo taua ri kappalaka. 38 Le'baki angnganre ngaseng ke'nanga, napela'mi gandung niaka naerang anjo kappalaka naung ri tamparanga, sollanna a'jari ringang anjo kappalaka. 39 Ri wattunna singara'mo, accini'mi bonto ana'-ana' kappalaka, mingka tanaassengai ke'nanga angkana apa arenna anjo bontoa. Nia' nacini' ke'nanga bonto ca'di siagang birinna. Jari ero'mi ke'nanga angngerangi kappalaka mange anjoreng punna akkulleja. 40 Jari nipolommi otere'na ngaseng jangkaraka, nampa nilappassang tallang naung ri tamparanga. Nampa nalappassang ngaseng todong ke'nanga passikko' calagana anjo kappalaka. Le'baki anjo napanai'mi ke'nanga sombalaka ri ulunna kappalaka sollanna nierang ri anging kappalaka mange anjoreng ri birinna bontoa. 41 Mingka ta'lappoi kappalaka mae ri kassi' rawanganna anjo tamparanga. Tassangkala'mi ulunna kappalaka sa'genna takkulleami a'gio'. Na ia bokona kappalaka ancuru'mi nitunrung ri bombang lompo. 42 Ero'mi anjo tantaraya ri kappalaka ambuno ngasengi sikamma tunitahanga, lanri nakamallakkangi angkana gassingka nia' tunitahang a'lange mange ri bontoa nampa lari. 43 Mingka nipisangkai ke'nanga ri perwiraya, lanri ero'na napasalama' Paulus. Nasuro ngasemmi tau akkullea a'lange a'lumpa' rolong naung nampa a'lange mange ri birinna bontoa; 44 ia maraenganga amminawang bokoi anna'gala' ri papang-papanga, yareka apa-apa maraenganna anjo kappala' ancurukamo. Kammaminjo bateta sa'genta akkulle salama' ngaseng battu mange ri bontoa.
1 Ri wattunta salama' ngasemmo battu nai' ri bontoa, nampami niasseng angkana Malta arenna anjo puloa. 2 Sanna' ngaseng baji'na tuma'buttana anjo puloa mae ri kambe. Natarima maki' baji'-baji' siagang naparinrang maki' pepe' nasaba' appakkaramulami turung bosia kammayatompa sanna' tommo dinginna pakkasiaka. 3 Appasse'remi Paulus kayu-kayu, nampa napadongko' anjo kayua rate ri pepeka. Ri wattunna napadongko' anjo kayua ri pepeka, ti'ring nia'mo sikayu ulara' assulu' napakamma bambanna anjo pepeka. Nanitotto'mo limanna ri anjo ularaka. 4 Nacini'na tuma'buttaya anjoreng ri anjo puloa ta'gentung anjo ularaka ri limanna Paulus, massing nakanamo ke'nanga, “Ma'nassa pabuno tau anne taua. Nasaba' manna pole ta'lappasa'mi battu ri bahaya ri tamparanga, mingka tena nikellai attallasa' ri Dewi Kaadelanga.” 5 Mingka nasoeammi Paulus anjo ularaka antama' ri pepeka siagang tena sikali manna sike'de' pa'risi'na nakasia'. 6 Napikkiriki tuma'buttaya anjoreng angkanaya tasalloami nakkambang limanna Paulus, yareka anra'ba naung nampa mate. Mingka sallo-sallomi ke'nanga attayang natenaja apa-apa kajariang ri kalenna Paulus. Jari appakkaramulami amminra pikkiranna ke'nanga, nampa nakana rewata kutadeng anjo Paulus. 7 Tena nabella anjoreng ri tampaka, nia' buttana tuniarenga Publius, iamintu kapala sukuna taua ri anjo puloa. Natarima baji' maki' Publius, napare' kamma toananna tallungallo sallona. 8 Anjo wattua sitabangi nataba garring rammusu' manggena anjo Publius. Jari a'lampami Paulus antoaki anjo tau garringa. Napadongko'mi limanna irateanganna anjo tau garringa nampa appala' doang, sa'genna a'jari baji'mo silalonna anjo taua. 9 Lanri nia'na anjo kajarianga, nierang ngasemmi sikamma tau garringa ri anjo puloa mae ri Paulus. Naniballei ngasemmo ke'nanga sa'genna a'jari baji'. 10 Jaimi hadia nasareangki' ke'nanga. Na ri wattunta ero'mo a'lampa assombala' battu ngasemmi ke'nanga mange ri kappalaka ampangngerangangki' sikamma apa-apa niparalluia sallang ri tangngana dolanganga. 11 Tallum bulangki' ammantang anjoreng, nampa a'lampa maki' ambokoi anjo puloa. Nai' maki' ri se'reang kappala' battu ri Aleksandria, niaka ammantang anjoreng ri palabuhanna anjo puloa lalanna wattu dinginga. Anjo kappalaka ammakei gambara' “Rewata Kambara'na Kastor siagang Poluks.” 12 Ammantang maki' tallungallo ri palabuhanna kota Sirakusa. 13 Battu anjoreng maki' assombala' pole antulakkangi biring tamparanga sa'genta battu mange ri kota Regium. Ammukona, appakkaramulami battu anging battu timboroka, sa'genna lalang ruangallona anrapi' maki' mange ri kota Putioli. 14 Anjoreng ri kota Putioli assigappa maki' siagang siapa are tu tappa' ri Isa. Nakio' maki' ke'nanga mange ri balla'na. Nakiammantammo siagang ke'nanga sidaminggu sallona. Le'baki anjo a'lampa maki' mange ri kota Roma. 15 Anrapi'mi kabaratta mange ri sikamma sari'battang tappaka ri Isa ri Roma. Jari battumi ke'nanga sa'genna ri Pasara' Apius siagang Pasanggarahang Tallu, ero' anruppaiki'. Ri wattunna assibuntulu'mo Paulus siagang ke'nanga, appala' sukkuru'mi Paulus mae ri Allata'ala. A'jari sannammi pa'mai'na. 16 Ri wattunna battu mange ri Roma nipa'biammi Paulus ammantang akkale-kale siagang nijagai ri sitau tantara. 17 Narapiki tallungallo nia' ri Roma, nasuro kio'mi Paulus pamimping-pamimpinna tu Yahudia anjoreng. A'rappunganna ngasemmo ke'nanga, nakanamo Paulus mae ri ke'nanga, “Sikamma sari'battangku! Tena apa-apa kasalangku mae ri bansata, yareka mae ri ada'-ada' nitarimaya battu ri boe-boeta. Mingka manna natena salaku nijakkala' tonja' ri Yerusalem, nampa nipassareanga' mae ri tu Romaya. 18 Le'baki niparessa parkaraku, ero'mi ke'nanga allappassanga', nasaba' ma'nassa tena manna sirupa gau' sala kugaukang ampassiratanga' nihukkung mate. 19 Mingka lanri annuntu'na tu Yahudia, tarpassa kupala'mi sollanna ri pangadelanna Karaeng Roma niadeli anne parkaraku. Mingka nakupala' kammaya, teai lanri erokku antuntuki bansaku. 20 Jari iaminjo saba'na nakuero' angngagang ngasengko assibuntulu' siagang angngagang ngasengko a'bicara. Nasaba' iaji nanisikkoka' kapassabakkang Karaeng Mappasalama' salloamo naminasai bansa Israel.” 21 Nakanamo ke'nanga ri Paulus, “Tena le'bakapaki' annarima sura' manna silawara' battu ri Yudea ri passala'na batangkalennu. Siagang tenapa manna sitau battu mae anrinni angngerangi kabara'nu, yareka ambicara kodiko. 22 Mingka ero' tonjaki' anne allangngereki anjo apa nupatappaka, nasaba' nalangngere'mi ikambe antekamma batena nicalla anjo ajarang nupatappaka.” 23 Jari appattantumi ke'nanga siagang Paulus se're allo untu' a'rappungang pole. Anjo alloa jai tau battu mange ri pammantanganna Paulus. Battu ri bari'basa' sa'genna karueng napakasingara'mi siagang napabattumi Paulus anjo biritta battua ri Allata'ala siagang Pamarentahanna. Napakemi Paulus apa-apa niaka tattulisi' lalang ri Kitta'na Musa siagang Kitta'na Na'bi-na'bia, ampakasingariangi ke'nanga sollanna a'jari tappa' ke'nanga mae ri Isa. 24 Nia'mo ke'nanga a'jari tappa' ri anjo apa napabattua Paulus, mingka nia' tommo tena natappa'. 25 Ri wattunna a'lampa ngasemmo ke'nanga ambokoi anjo tampaka massing sisalami panggappana ke'nanga. Nasaba' nakana Paulus mae ri ke'nanga, “Memang annaba sikali apa le'baka Napau RohNa Allata'ala lalang ri Na'bi Yesaya mae ri boe-boenu! 26 Nakana RohNa Allata'ala, ‘A'lampako mange ampaui ri anne bansaya: Tuli lamallangngere'nu ngaseng, mingka tanupahangai; tuli lamaccini'nu ngaseng, mingka tanuassengai apa kajarianga. 27 Nasaba' a'jari pokkolo'mi pikkiranna anne bansaya, nijempammi tolinna ke'nanga, siagang nitongko'mi matanna ke'nanga. Nasaba' punna tena nakamma, mattantu lamaccini'ji matanna ke'nanga, lamallangngere'ji tolinna ke'nanga, lammahanji atinna ke'nanga, siagang lammotere'mi ke'nanga mae ri Nakke, nampa Kupa'jari baji' ke'nanga ammotere',’ kammaminjo kananNa Allata'ala.” 28 Kala'busanna, nakanamo Paulus, “Musti nuasseng ngasengi sari'battang, angkanaya nipabattumi anne kabara' kasalamakkang battua ri Allata'ala mae ri bansa-bansa maraenga. Nalanapinawammo ke'nanga anne kabaraka!” 29 Le'baki akkana kamma Paulus, a'lampa ngasemmi anjo tu Yahudia, na'gea'-gea' para ia. 30 Ruan taungi sallona ammantang Paulus ri Roma, ri balla' nasewaya kalenna. Sannang sikali nyawana antarimai sikamma tau niaka battu angkunjungi. 31 Napabattumi siagang barani mae ri ke'nanga antekamma bateNa ammarenta Allata'ala, kammayatompa ri passala'na Isa Almasi. Nagaukammi Paulus sikammaya anjo siagang laloasa, tena tau anghalang-halangi.
1 Natarimai sikamma sari'battangku niaka ri Roma, nikamaseanga ri Allata'ala, siagang le'baka nikio' a'jari umma'Na Allata'ala. Le'ba'ma' nipile siagang niangka' untu' poro ambirittakangi Kabara' Baji' battua ri Allata'ala. 2 Anjo Kabara' Bajika le'ba'mi Napa'janjiang Allata'ala ri jammang riolo, Nasuro pabattua ri na'bi-na'bia, siagang le'ba'mi tattulisi' lalang ri Kittaka. 3 Naia bonena anjo Kabara' Bajika iamintu ri passala'na Ana'Na Allata'ala, Batara Isa Almasi. Lalang rupatauna, Iami sossorang battu ri Daud; 4 mingka lalang kakaraenganna, ma'nassa Iami Ana'Na Allata'ala. A'buttimi anjo lalang ri koasa malompoNa, iamintu lalang ri attallasa'Na ammotere' battu ri kamateanga. 5 Lanri Iami anjo Isa Almasi, nakuNasaremo pangngamaseang Allata'ala, a'jari tunisuroNa. Sollanna, akkulle kupakala'biri' Almasi, siagang akkulle kururungang sikontu bansa-bansaya na'jari tappa' siagang mannuruki ri Allata'ala. 6 Naia nikanaya sikontu bansa, iamintu ikau pole sikamma sari'battangku niaka ri Roma; ikau pole, nikio' ngaseng tommako a'jari umma'Na Isa Almasi. 7 Iaminjo saba'na nakutulisi' anne suraka mae ri kau ngaseng. Poro Nabarakkakiko siagang Nasareko katallassang salewangang Allata'ala Manggea siagang Batarata Isa Almasi. 8 Marioloangang dudu, appala' sukkuruka' mae ri Allata'ala lalang arenNa Isa Almasi, lanri ikau ngaseng sari'battangku. Nasaba' sikontumi linoa angngassengi angkanaya tappa' sikali ngasengko mae ri Almasi. 9 Punna appala' doanga' tuli kuu'ranginnu ngaseng. Allata'alami a'jari sa'bingku ma'nassana kammatojeng anne kukanaya. Iami Allata'ala kusombaya siagang sikontu pa'maikku, iamintu kupa'la'bangi Kabara' Bajika ri passala'na Ana'Na. 10 Sanna'mi kupala'na ri Allata'ala, tapporo Nakellaia' battu angkunjungi ngasengko. 11 Nasaba' cinna dudua' angngagangko assicini' ngaseng, sollanna akkulle tongko kubagei passare pangngamaseanNa RohNa Allata'ala, nukkulle nipakajarre'. 12 Ia natabaya kanangku iamintu, nasaba' para tappa' ngaseng maki' mae ri Isa Almasi, jari paralluki' massing sipakajarre'. 13 Sikamma sari'battangku! Eroki kupappiassengang ri kau ngaseng angkanaya, sikontutojenna a'mole-mole sikalima' ero' battu angkunjungi ngasengko, mingka tuli nia' salibanra. Sanna' erokku, sollanna nia' todong wassele' jama-jamangku ri tangnga-tangnganu, sangkamma ri pa'rasangang maraenga ri tangnga-tangngana bansa maraenga. 14 Nasaba' nia' tugasakku mae ri sikontu bansaya: ia angngassengamo atorang yareka tenapa nangngasseng atorang, ia niaka sikolana yareka tenayapa sikolana. 15 Iaminjo saba'na nakuero' dudu ampa'la'bang tongi anjo Kabara' Bajika mae ri kau sikamma sari'battangku niaka ammantang ri Roma. 16 Inakke tappa' sikalia' mae ri anjo Kabara' Bajika, lanri iaminjo kabara' kakoasanNa Allata'ala eroka ampasalamaki sikontu tau tappaka; uru-uruna iamintu bansa Yahudia, nampa bansa maraenga pole. 17 Nasaba' iaminjo Kabara' Bajika ampa'nassai angkana antekamma batena a'jari baji' ammotere' passisambunganna rupataua siagang Allata'ala. Carana, iamintu tappaki taua ri Allata'ala battu ri pakaramulanna sa'genna kala'busang. Kammaminjo niaka tattulisi' lalang ri Kittaka angkanaya, “Inai-nai tappa' ri Allata'ala sa'genna a'jari baji'mo ammotere' passisambunganna siagang Allata'ala, iami lattallasa'!” 18 Battu ratei ri suruga Napappicinikang larroNa Allata'ala ri sikontu dosana siagang kaja'dallanna rupataua. Nasaba' anjo kaja'dallanga anrompai taua sa'genna tanaassenga taua pangngajarang annabaya battu ri Allata'ala. 19 Anjo apa akkullea naasseng rupataua ri passala'na Allata'ala singara'mi lalang ri atinna taua, nasaba' KalenNami Allata'ala le'ba' ampakasingaraki mae ri rupataua. 20 Appakkaramula battu ri wattu Napa'nia'na Allata'ala linoa, anjo sipa'Na Allata'ala tenaya nakacinikang, iamintu sipa' Allata'alaNa siagang kakoasanNa tamamminraya, akkullemi napahang rupataua lalang ri sikontu apa Napa'niaka. Jari tena sikalimo alasanna rupataua untu' lampattojengi kalenna. 21 Naassengi rupataua Allata'ala, mingka taerokai rupataua ampakala'biriki salaku Allata'ala, siagang tena todong nappala' sukkuru' ri Ia. Ba'lalo apa-apa tenayaji matu-matunna nanawa-nawa rupataua; a'jari sassammi nawa-nawanna ke'nanga. 22 Nakanai cara'de' kalenna, padahala' sikontutojenna toloi. 23 Teai Allata'ala tamamminraya nasomba ke'nanga, passangalinna patung-patung sangkammaya apa lakkullea mate; iamintu rupataua, jangang-janganga, olo'-olo' appaka bangkenna, siagang olo'-olo' a'loloka rawa ri buttaya. 24 Iaminjo saba'na nanibalang parekammo ke'nanga ri Allata'ala nikoasaia ero'na ke'nanga untu' anggaukangi kaja'dallanga. Sa'genna nagaukammi ke'nanga apa-apa ra'masaka mae ri massing para ia. 25 Nasambei Allata'ala kontutojenga siagang anu takontutojenga. Teai Allata'ala appa'niaka nasomba siagang nalayani ke'nanga, passangalinna apa-apa nipa'niaka. Padahala' iaji anjo appa'niaka musti nipuji satunggu-tungguna! Aming. 26 Lanri kammana anjo panggaukanna rupataua, nibalang parekammi ke'nanga ri Allata'ala anturuki hawa napasu hinana ke'nanga. Tubai'-bainena ke'nanga tenamo naero' ri bura'nea sangkamma biasaya ri rupataua, passangalinna parannami bai'-baine nakaeroki. 27 Bura'-bura'nea kamma todong; nabokoimi tubai'-bainena ke'nanga, nampa paranna bura'ne naagang a'gau' bawang. Panggaukang appakasiri' nagaukang tubura'-bura'nea ri paranna tu bura'ne, sa'genna massing natarimamo pa'balasa' kaja'dallanna ke'nanga. 28 Lanri nakanana tenamo naparallu rupataua angngassengi Allata'ala, nibalang parekammi sollanna a'jari panra' pikkiranna ke'nanga; sa'genna nagaukammi ke'nanga apa-apa tenaya nakkulle nigaukang. 29 Sangnging kaja'dallang mami lalang ri atinna ke'nanga, sangnging apa tenaya nannaba; sangnging kangoang, kabottokang siagang sereati; sangnging eroka ammuno, assiba'ji, annipu, siagang sentimeng. Nangai ke'nanga nabicara paranna tau, 30 nangai nabotto'-bottoki arenna paranna tau; sanna' ngaseng tampona siagang kurangajara'na ke'nanga; nakabirisi Allata'ala siagang nangai pitikana-kanai ke'nanga. Cara'deki ke'nanga a'boya cara-cara untu' anggaukangi kaja'dallanga. Naewai siagang nabali-bali ke'nanga tau toana; 31 taerokai ke'nanga ampahangi tau maraenga; tajarrekai ke'nanga ri janjinna siagang sanna' palla'na. 32 Naassenji ke'nanga angkanaya siratangi nihukkung mate situru' hukkunNa Allata'ala tau a'gau' kammaya ngaseng anjo. Mingka manna nakamma nagaukang tonji ke'nanga panggaukang-panggaukang kammaya; ba'lalo nasitujui tongi ke'nanga a'gau' kamma todong tau maraenga.
1 Lanri kammana, sari'battangku ngaseng, inaiko kutadeng antu sa'gennu akkulle ampasalai tau maraenga? Tena sikali apa-apa ri kau untu' akkulle ampattojengi kalennu! Nasaba' punna nupasala parannu tau, padahala' kalennu anggaukangi anjo apa-apa nagaukanga ke'nanga, ikau tommi ampabattui hukkunganga mae ri kalennu. 2 Niassemmi angkanaya punna Napabattumi hukkunganNa Allata'ala mae ri sikamma tau a'gau' kammaya anjo, anjo hukkunganga siratang memang tongi. 3 Mingka ikau ngaseng sikamma sari'battangku, ikau pole anggaukang tongi anjo apa-apa nucallaya nagaukang tau maraenga. Gassingka nukana lakkulleko ta'lappasa' battu ri pangngalarroiNa Allata'ala? 4 Yareka nucapaki pangngamaseanNa siagang kabajikanNa kammayatompa kalompoanNa Allata'ala? Mattantu nuassengi angkanaya iaji naNapappicinikang kabajikang pa'mai'Na Allata'ala, lanri nakellainu ngaseng toba' ri dosa-dosanu. 5 Mingka kapala batu ngasengko siagang taerokako ampinrai gau'nu. Jari battu ri kau ngaseng tonji napila' battala' hukkungang lanugappaya sallang punna Allo Kiama', iamintu punna Napa'nyata sallang pangngalarroiNa Allata'ala siagang Napabattu hukkunganNa adeleka. 6 Nasaba' laNabalasaki Allata'ala mae ri taua situru' massing panggaukanna. 7 Nasarei Allata'ala katallassang sitojennaya siagang mannannunganga tau jarreka anggaukangi kabajikanga, sollanna nagappa katallassang mala'birika, katallassang malompoa siagang satunggu-tunggua. 8 Mingka inai-nai sangnging kaparalluang kalennaji bawang naparutusu', siagang tamaerokai mannuruki ri Allata'ala, passangalinna tau ja'dalakaji naturuki, iami lasanna' nikalarroina ri Allata'ala. 9 Sikamma tau nangaia a'gau' ja'dala', iami lapanra' siagang lasessa; uru-uruna tu Yahudia, nampa pole bansa-bansa maraenga. 10 Mingka sikamma tau nangaia a'gau' baji' lanisarei kala'birang, siagang kalompoang kammayatompa katallassang salewangang ri Allata'ala; uru-uruna mae ri tu Yahudia, kammayatompa mae ri bansa-bansa maraenga. 11 Nasaba' Napasangkamma-kamma ngasengi Allata'ala sikamma rupataua. 12 Dorakai bansa-bansa maraenga, mingka tanaassengai hukkung agamana tu Yahudia. Jari nihukkungi ke'nanga ri pantaranganna anjo hukkung-hukkung agama Yahudia. Mingka dorakai tu Yahudia ri wattu naassennamo anjo hukkung-hukkunga; jari lanihukkungi ke'nanga situru' anjo hukkung-hukkunga. 13 Nasaba' teai lanri naassennamo taua hukkung agamana tu Yahudia nampa akkulle assibajiki ammotere' siagang Allata'ala; passangalinna lanri nagaukannamo anjo apa-apa tattulisika lalang ri anjo hukkung-hukkunga. 14 Tanaassengai bansa-bansa maraenga hukkung agamana tu Yahudia. Mingka punna lanri ero' kalenna ke'nanga nanagaukang anjo napassuroanga anjo hukkunga, atinna tommi ke'nanga a'jari hukkung mae ri kalenna ke'nanga, manna natanaassenga ke'nanga hukkung agama Yahudia. 15 Panggaukannami ke'nanga ampa'nassai angkanaya tattulisiki ri atinna ke'nanga anjo apa-apa napassuroanga anjo hukkung-hukkunga. Atinnami pole ke'nanga ampa'nassai anjo passalaka, nasaba' nia' wattunna nanipasala yareka nanipannaba ri pikkirang kalenna todong ke'nanga. 16 Kammaminjo lakajarianga sallang ri allo le'bakamo nipattantu. Ri anjo alloa — situru' Kabara' Baji' kubirittakanga — laNaadeli Allata'ala lalang Isa Almasi rahasia atinna siagang rahasia pikkiranna sikontu rupataua. 17 Mingka kamma-kamma anne, antekamma ri kalennu ngaseng sari'battang? Mangakuko angkana tu Yahudiko. Anna'galakko mae ri hukkung agama Yahudia siagang tinggi pa'maikko lanri passisambungannu siagang Allata'ala. 18 Anggappako pitunju'-pitunju' battu ri anjo hukkung-hukkunga, sa'genna nuasseng sikamma apa Nakaerokia Allata'ala, siagang nuassengi nupattantu angkana kereanga baji'. 19 Tappakko angkanaya ikaumi parenrenna tau butaya siagang singara'na tau niaka lalang ri sassanga; 20 ikaumi gurunna tau bodo pikkiranga, siagang gurunna tau tenayapa nappikkiri' tau toa. Tappakko angkanaya lanri nuassenna anjo hukkung agama Yahudia, jari nia' ngasemmi ri kau sikamma pangngassenganga siagang pangngajarang katojenganga. 21 Nuajara'mi tau maraenga; jari angngapa natanuajarra todong kalennu? Nuajaraki taua sollanna tena na'lukka'; mingka kalennu a'lukka'! 22 Nuajaraki taua sollanna tena nassalimara'; mingka kalennu a'gau' bawang! Birisikko mae ri barhalaya; mingka kalennu angngallei barang-barang niaka ri balla' barhalaya. 23 Tinggi pa'maikko lanri nukana niaki ri kau hukkunNa Allata'ala, iamintu le'baka napabattu Musa; mingka kalennu anghinai Allata'ala lanri tenana nugaukangi anjo apa-apa Napassuroanga! 24 Nia' tattulisi' lalang ri Kittaka, angkanaya, “Passabakkang ikau tu Yahudia, nanira'ma'-ra'massimo arenNa Allata'ala ri tangnga-tangngana bansa-bansa maraenga.” 25 Punna nuturuki hukkung-hukkung agama Yahudia, nia' tommo matu-matunnu nisunna'. Mingka punna takkulleako anggaukangi anjo apa-apa nipassuroanga lalang ri anjo hukkung-hukkunga, ma'nassa tena sikalimo matu-matunnu nisunna'. 26 Punna nia' bansa maraeng tena nanisunnaki, mingka naturuki hukkung-hukkung agama Yahudia, jari maka tena nalaNapasangkamma Allata'ala anjo taua tau le'ba' nisunna'? 27 Lanapasalako anjo tu tenaya nisunnaki ikau tu Yahudia. Nasaba' niaki hukkung agama Yahudia ri kau, siagang pole ikau nisunnakko, mingka tena nanuturuki anjo hukkunga. Tena nanisunnaki ke'nanga, mingka iami ke'nanga anturuki hukkung-hukkung agama Yahudia. 28 Nasaba' nikanaya tu Yahudi tojeng-tojeng, teai poro arennaji bawang nikana tu Yahudi; naia nikanaya tu nisunna' tojeng-tojeng, teai lahere'naji bawang nisunna'. 29 Mingka ia nikanaya tu Yahudi tojeng-tojeng iamintu tu Yahudia memang todong lalang ri atinna siagang nyawana; naia nikanaya sunna' tojeng-tojeng iamintu sunna' lalanga ri atia, ia Nagaukanga RohNa Allata'ala; jari tena nalalang ri kittaka nitulisi'. Tau kammaya minjo lannarima pammuji battu ri Allata'ala; jari teai battu ri rupataua.
1 Jari punna kamma, apami upa'nu a'jari tu Yahudi? Siagang apami matu-matunnu anturuki anjo atoranna sunnaka? 2 Mattantu jai matu-matunna! Lomoro' se're, nasaba' tu Yahudiami Napappirannuangi Allata'ala anjo kana-kananNa. 3 Mingka antekamma punna nia' sitangnga tu Yahudi tena namajarre'? Maka iaminjo passabakkang nala'jari talajarrekamo Allata'ala? 4 Mattantu tena! Nasaba' ma'nassami angkanaya tuli annabai Allata'ala, manna pole a'jari paballe-balle ngasemmi rupataua. Sangkamma niaka lalang ri Kittaka tattulisi' angkanaya, “Poro a'butti laloi katojengannu ilalang ri kana nupabattua, nummeta punna narapi' wattunnu niadeli.” 5 Mingka punna pila' a'nyatamo kaadelanNa Allata'ala, lanri nigaukanna apa-apa tenaya nannaba, apami lanikana? Angkanaya tena Naadele' Allata'ala punna Nahukkungki'? (Memang siratangi anne pakkuta'nang kammaya situru' pikkirang linota.) 6 Tena sikalia! Nasaba' punna tena Naadele' Allata'ala, maka antekamma bateNa lakkulle angngadeli anne linoa? 7 Mingka punna pila' a'nyata apa tojenga battu ri Allata'ala lanri panggaukang tenaya nannaba, sa'genna nipakala'biri' Allata'ala, angngapa nanisalakangija tau a'gau' ja'dalaka, salaku tau doraka? 8 Siagang angngapa nanitakkullea angkana, “Umba nakia'gau' ja'dala' sollanna ammumba kabajikanga?” Memang nia'mo siapa are tau anghina-hina', angkanaya inakkemi le'ba' akkana kamma anjo. Tau kammaya ngasemmi anjo siratang Nahukkung Allata'ala. 9 Jari, maka la'bi bajikangangi empoanta ikatte tu Yahudia na empoanna bansa-bansa maraenga? Tena sikalia! Le'ba'mi kupau angkanaya, baji' tu Yahudi yareka tu battua ri bansa-bansa maraenga, nikoasai ngasemmi ri dosaya. 10 Sangkamma niaka tattulisi' lalang ri Kittaka, angkana, “Tena manna sitau annaba, 11 tena manna sitau ammahang siagang tena manna sitau anynyomba ri Allata'ala. 12 Napakabella ngasemmi kalenna taua battu ri Allata'ala; sala oloang ngasemmi taua. Tena manna sitau a'gau' baji'; manna sitau tena todong! 13 Sangkamma mami jera' tassungke karro'-karro'na ke'nanga. Sangnging balle-balle mami napau lilana, siagang sangnging pitina mami ri bawana, sanrapang lila ulara' niaka racunna. 14 Rassi mami bawana ke'nanga pattunra siagang paccalla. 15 Sanna' linta'na a'dakka bangkenna ke'nanga punna ero' assessa tau siagang ammuno. 16 Sangnging kasusaang mami siagang kaancurang napasiara' mange-mange. 17 Butami ke'nanga mange ri oloang mate'nea, 18 siagang tenamo napakala'biriki Allata'ala.” 19 Kamma-kamma anne niassemmi angkanaya sikamma anjo tattulisika lalang ri hukkung-hukkung agama Yahudia, tattuju mae ri sikamma tau niaka irawangang pamarentahanna anjo hukkung-hukkunga. Lanri kammana, tenamo sitau akkulle appare' alasang siagang akkullei nituntu' ri Allata'ala sikontu bonena linoa. 20 Nasaba' tena manna sitau akkulle assibajiki siagang Allata'ala lanri nagaukanna apa-apa niaka tattulisi' lalang ri hukkung-hukkung agamaya. Ba'lalo anjo hukkung-hukkunga poro napappiassenganji bawang mae ri rupataua angkanaya ma'nassa dorakai rupataua. 21 Mingka kamma-kamma anne Nasaremi Allata'ala oloang rupataua sollanna akkulle assibajiki siagang Allata'ala; na anjo carana, tena sikali passisambunganna siagang hukkung-hukkung agamana tu Yahudia. Kitta'-kitta'nami Musa siagang na'bi-na'bia ampa'nyatai anjo passalaka; 22 angkanaya, iaji naNasare Allata'ala oloang rupataua assibajiki siagang Allata'ala, punna tappa' taua mae ri Isa Almasi. Anne Nagaukangi Allata'ala untu' sikontu tau tappaka mae ri Almasi; nasaba' tena simmaraenna rupataua: 23 sikontu rupataua doraka ngasemmi siagang bellami battu ri Allata'ala, akkullea ampasalamaki ke'nanga. 24 Jari, lanri passare mangngamaseanNa bawang Allata'ala, iamintu Napassareang bawang-bawanga, nampa akkulle a'jari baji' ammotere' passisambunganna rupataua siagang Allata'ala; carana iamintu: nilappassangi rupataua ri Isa Almasi. 25 Nakoro'bangkangi Allata'ala anjo Isa Almasi; sollanna, lanri kamateanNa anjo Isa Almasi, nilappassammi rupataua battu ri dosa-dosana, punna tappa'ja ke'nanga mae ri Isa Almasi. Nagaukammi Allata'ala kammaya anjo, lanri eroki Napappicinikang kaadelanNa. Nasaba' ri wattu allaloa, Nasa'barrammi Allata'ala dosa-dosana rupataua, sa'genna tena naNahukkungi ke'nanga. 26 Mingka kamma-kamma anne Natuntu'mi Allata'ala dosa-dosaya, lanri ero'na Napa'butti kaadelanNa. Kammaminjo carana, naNapappicinikammo katojenganNa; na inai-nai tappa' mae ri Isa, Napa'nyatami mae ri anjo taua angkanaya assibajikimi ammotere' siagang Allata'ala. 27 Lanri kammana, tenamo oloanta latinggi-tinggi pa'mai'. Angngapa nakamma? Nasaba' tenanamo nanigaukangi apa-apa tattulisika lalang ri hukkung-hukkung agama Yahudia? Teai! Passangalinna lanri tappattamo. 28 Nasaba' bodona kana kammaminne: Nikanaya tau assibajikimo ammotere' siagang Allata'ala teai lanri nagaukanna apa-apa tattulisika lalang ri hukkung-hukkung agama Yahudia, passangalinna lanri tappa'na ri Isa Almasi. 29 Yareka lanri anjo Allata'ala, Allata'alanaji bawang tu Yahudia? Sai Allata'alana todong bansa maraenga? Memang Allata'alana tongi bansa maraenga! 30 Nasaba' se'reji Allata'ala. Iami assarei oloang tu Yahudia assibajiki ammotere' siagang Allata'ala, lanri tappa'na ke'nanga. Ia tommi assarei oloang bansa-bansa maraenga assibajiki ammotere' siagang Allata'ala, lanri tappa'na todong ke'nanga. 31 Jari punna tappa' maki' mae ri Isa Almasi, maka lanipela'mi anjo hukkung-hukkung agama Yahudia? Tena sikalia! Ba'lalo, lanri lalang matappattamo, naparallumo nikatutui anjo hukkung-hukkunga.
1 Jari punna kamma, apa lanikana ri passala'na Abraham, boena bansata? Antekamma pangalamanna? 2 Punna lanri apa-apa nagaukanga nakkulle nitarima ri Allata'ala a'jari tau nikarannuang ri atinNa Allata'ala, tantu nia'ja alasanna untu' latinggi pa'mai'. Mingka takkulleai tinggi pa'mai' ri dallekanNa Allata'ala. 3 Nia' tattulisi' lalang ri Kittaka angkanaya, “Tappaki Abraham ri Allata'ala; na lanri tappa'na ri Allata'ala, nitarimami a'jari tau nikarannuanga ri atinNa Allata'ala.” 4 Inai-nai anjama, annarimai gaji; na anjo gajina teai passare, passangalinna ha'na memang todong. 5 Mingka nia' tau tena nausaha kalenna napare' panna'gallang; passangalinna napappirannuangi kalenna mae ri Allata'ala, nasaba' Allata'alami allappassangi tau dorakaya battu ri dosa-dosana. Lanri iaminjo tappa'na nanitarimamo anjo taua a'jari tau nikarannuang ri atinNa Allata'ala. 6 Kamma tomminjo panggappana Daud; iaminjo saba'na nanapabattumo sallang mate'nena Daud mae ri tau nitarimaya a'jari tau nikarannuang ri atinNa Allata'ala, Natanijampangia panggaukang-panggaukang salana ke'nanga. Kammaminne kananna Daud, 7 “Salamakko ri mate'nea tau nipammopporanga salana siagang dosa-dosana siagang le'baka nitarawang ri Allata'ala dosa-dosana! 8 Salamakko ri mate'nea tau tenaya nanituntuki dosa-dosana ri Batara!” 9 Maka tau mannurukiaji bawang ri atorang sunnaka natuju anne sallang mate'nea? Yareka natuju tongi tau tenaya namannuruki ri atorang sunnaka? Le'ba'mi kupau riolo, angkanaya nitarimami Abraham a'jari tau nikarannuang ri atinNa Allata'ala, lanri tappa'na Abraham mae ri Allata'ala. 10 Jari, maka ringngapanna nanitarimai Abraham ri Allata'ala? Ri wattu tenanapa yareka ri wattu le'ba'napa nisunna'? Memang, ri wattu tenanapa nanisunnaki, teai ri wattu le'ba'napa. 11 Ri bokopi nampa nisunnaki Abraham. Na anjo sunnaka poro a'jari pammateiji bawang angkanaya nitarimami a'jari tau nikarannuang ri atinNa Allata'ala, lanri tappa'na mae ri Allata'ala. Natarimami ri Allata'ala ri wattu tenanapa naturuki atorang sunnaka. Na'jarimo Abraham bapa' rohanina sikontu tau tappaka mae ri Allata'ala; na lanri kammana minjo nanitarimamo taua a'jari tau nikarannuang ri atinNa Allata'ala, manna natanaturukia atorang sunnaka. 12 A'jari tommi Abraham bapa' rohanina tau anturukiai atorang sunnaka. A'jari bapa' rohanimi ri ke'nanga, teai lanri naturukinna bawang ke'nanga atorang sunnaka, passangalinna lanri tappa'na todong ke'nanga mae ri Allata'ala, sangkamma todong Abraham ri wattunna tenapa naturuki atorang sunnaka. 13 A'janjimi Allata'ala mae ri Abraham siagang sossoranna, angkanaya anne linoa la'jari warisi'nai Abraham. Na'janji kamma anjo Allata'ala teai lanri naturukinna Abraham hukkung-hukkung agama Yahudia, passangalinna lanri tappa'na mae ri Allata'ala sa'genna nitarimamo a'jari tau nikarannuang ri atinNa Allata'ala. 14 Nasaba' punna tau mannurukiaji bawang ri hukkung-hukkung agama Yahudia lantarimai apa Napa'janjianga Allata'ala, tena sikalimo matu-matunna taua tappa' ri Allata'ala; kammayatompa tena tommo matu-matunna anjo janjinNa Allata'ala. 15 Anjo hukkung-hukkung agama Yahudia appabattu tongi hukkungang battu ri Allata'ala. Mingka ka'de' tenai anjo hukkung-hukkunga, tena tommi panggaukang andakkaiyai anjo hukkung-hukkunga. 16 Jari lanri tappa'naji taua mae ri Allata'ala nania' anjo janjinNa Allata'ala. Iaminjo a'jari pammatei mattantua mae ri sossoranna Abraham, angkanaya nisareang bawang-bawanji ke'nanga anjo janjia battu ri Allata'ala; teai untu' tau mannurukiaji bawang ri hukkung agama Yahudia, passangalinna untu' tau tappaka pole ri Allata'ala, sangkamma tappa'na Abraham mae ri Allata'ala. Nasaba' iaminjo Abraham bapa' rohanita ngaseng. 17 Nasaba' kammaminne kananNa Allata'ala mae ri Abraham, “Kupa'jari mako bapa'na jaia bansa ri lino.” Kammaminjo bateNa Allata'ala assarei janji Abraham. Natappa'mo Abraham mae ri Ia. Iami Allata'ala ampattallasa' poleangai ammotere' tau matea; Ia tommi Allata'ala poro akkanayaji bawang nakkullemo Napa'jari nia' apa-apa tenaya nale'ba' nia'. 18 Tuli ma'minasana siagang tuli tappa'na Abraham manna natenamo panrannuang. Iaminjo saba'na na'jari bapa'mo mae ri jaia bansa. Sangkamma niaka tattulisi' lalang ri Kittaka, angkanaya, “La'jari sanna' jaina sossorannu.” 19 Anjo wattua naassemmi Abraham angkanaya tenamo olona lakkulle anggappa ana', nasaba' toa sikalimi nasa'ring kalenna, nasaba' la'birimmi narapi' sibilangngang taung umuru'na; la'biangampa pole, nasaba' tau tamanang bainenna, iamintu Sara. Mingka manna nakamma, tena na'jari kurang tappa'na Abraham. 20 Tuli tappaki siagang tena nabata-bata mae ri janjinNa Allata'ala. Ba'lalo, a'jari pila' jarre'mi nasaba' tappa'na; sa'genna mammuji-mujimi ri Allata'ala. 21 Sanna' napatappa'na angkanaya laNarupai janjinNa Allata'ala. 22 Iaminjo saba'na nanitarimamo Abraham a'jari tau nikarannuang ri atinNa Allata'ala. 23 Anjo kana angkanaya, “nitarimai a'jari tau nikarannuang ri atinNa Allata'ala,” teai untu' Abraham bawang nanitulisiki, 24 passangalinna untu' ikatte ngaseng pole. Lanitarima tongki' a'jari tau nikarannuanga ri atinNa Allata'ala, lanri tappatta mae ri Allata'ala, le'baka ampattallasa' poleangi ammotere' Isa, Batarata, battu ri kamateanga. 25 Anjo Isa le'ba'mi nipassareang untu' nibuno passabakkang dosa-dosata; nampa nipattallasa' poleang ammotere' ri Allata'ala, sollanta nisare oloang assibajiki ammotere' siagang Allata'ala.
1 Kamma-kamma anne assibajiki maki' ammotere' siagang Allata'ala, lanri tappa' maki' mae ri Ia. Siagang lanri kammana, attallasa' maki' lalang kasiamakkanga siagang Allata'ala, tete ri Batarata Isa Almasi. 2 Nasaba' tappa' maki' mae ri Isa Almasi, nisare maki' pakkulle ampahang bajiki pangngamaseanNa Allata'ala, siagang lanri iaminjo pangngamaseanga nakiattallasa' kamma-kamma anne. Lanri kammaminjo narannumo pa'maitta, nasaba' nia'mo panrannuanta angkanaya akkullei nikasia' mate'nea, laNapassareanga Allata'ala! 3 Ba'lalo, akkulleki' a'rannu-rannu lalang ri kapa'risanga, nasaba' niassemmi angkanaya anjo kapa'risanga ampa'jariki' majarre'; 4 na anjo majarreka ampa'jariki' tau attahanga ri paccobaya; iaminne assareki' panrannuang. 5 Anjo panrannuang kammaya tena nalanapakala'ba pa'maitta, nasaba' le'ba'mi nibonei atinta siagang pangngamaseanNa Allata'ala. Na anjo Nagaukangi Allata'ala tete ri Roh MalanynyinNa, le'bakamo Napassareang mae ri katte. 6 Ri wattunta nia' lalang ri kalammanga, matemi Isa Almasi untu' ikatte, ri wattu le'bakamo Napattantu Allata'ala; padahala' ikatte tau bella maki' battu ri Allata'ala. 7 Manna untu' tau adeleka sukkara' tonji lania' tau ero' angkamateangi. Nakulle nia' tonja tau barani ero' angkamateangi taua, mingka tau bajikaji ero' nakamateang. 8 Mingka Napappicinikammi pangngamaseanNa Allata'ala mae ri katte, iamintu ri wattu ero'Na Isa Almasi angkamateangki' ri wattunta doraka ngasengija! 9 Kamma-kamma anne assibajiki maki' ammotere' siagang Allata'ala lanri kamateanNa Isa Almasi; lanri kammana, mattantu tommi lanipasalamatta battu ri pangngalarroinNa Allata'ala lanri Isa Almasi. 10 Punna ri wattu assimusuta siagang Allata'ala nanipassiama' maki' siagang Ia tete kamateanNa Ana'Na, la'biangampa ri kamma-kammaya anne, ri wattu a'jari baji'namo ammotere' passisambunganta siagang Allata'ala, mattantu tommi lanipasalamatta tete ri tallasa'Na Isa Almasi. 11 Ba'lalo la'biangampa pole, marannu tommi pa'maitta lanri kabajikanNa Allata'ala tete ri Batarata Isa Almasi. Nasaba' mannete ri Isa Almasi nanikasia'mo anjo passisambungang bajika siagang Allata'ala. 12 Lanri se're tau nantama'mo dosaya ri lino, siagang battu ri iaminjo dosaya ammumba kamateanga. Iaminjo na'la'bammo kamateanga mae ri sikontu rupataua, nasaba' doraka ngasemmi rupataua. 13 Ri wattu tenanapa nanipassareangi hukkung-hukkung agama Yahudia, nia' memammi dosaya lalang lino. Mingka tena nanituntuki dosaya, lanri tenapi anjo hukkung akkullea nidakkai. 14 Mingka battu ri wattu jammanna Adam sa'genna jammanna Musa, nikoasai sikontu rupataua ri kamateanga. Ba'lalo, manna tau tenaya nasangkamma panggaukanna Abraham anggaukangi kasalanga, amminawang tommi nikoasai ri kamateanga. Adam a'jari pammatei mae ri Ia labattua sallang ri lino. 15 Mingka tena nasangkamma anjo tau ruaya; nasaba' lompoangangi passareNa Allata'ala punna nipasiukkuruki siagang dosa nagaukanga Adam. Passabakkang se're tau sala najaimo tau mate. Mingka la'biangampa lompona pangngamaseanNa Allata'ala siagang hadia kasalamakkang Napassareanga mae ri sannaka jaina tau tete ri baji' pa'mai'na se'rea tau iamintu Isa Almasi. 16 Bella todong lompona hadiaNa Allata'ala punna nipasiukkuruki siagang dosana anjo se'rea tau. Nasaba' ri wattunna dorakamo anjo se'rea tau, nitappukimi angkanaya, “salai.” Mingka ri wattunna jaimo tau doraka, battumi hadiaNa Allata'ala angkanaya, “Tena nasala.” 17 Passabakkang se're tau doraka, na'la'bammo kamateanga tete ri anjo tau se'rea. Mingka la'biangampa lompona barakka'na mae ri rupataua passabakkang se'rea tau maraengannaya, iamintu Isa Almasi. LaNapa'la'bang bawang-bawangi pangngamaseanNa Allata'ala mae ri ke'nanga sa'genna akkulle ke'nanga assibajiki ammotere' siagang Allata'ala; lamakoasai ke'nanga ri anne linoa lanri Isa Almasi. 18 Jari, sangkamma angkanaya passabakkang kasalang se're tau nanihukkung sikontu rupataua, kamma tomminjo, passabakkang se're tau anggaukangi ero'Na Allata'ala nanilappassammo sikontu rupataua battu ri dosana nampa nisare katallassang. 19 Kammayatompa sangkamma angkanaya passabakkang se're tau tamannuruki ri Allata'ala najaimo tau a'jari doraka, sangkamma tomminjo passabakkang se're tau anggaukangi ero'Na Allata'ala, nalajai tommo tau assibajiki ammotere' siagang Allata'ala. 20 KalenNa Allata'ala ampassareangi hukkung-hukkung agama Yahudia. Mingka pila' usahai rupataua anggaukangi anjo hukkung-hukkunga, pila' nadakkaimi anjo hukkung-hukkunga siagang pila' dorakami mae ri Allata'ala. Mingka pila' a'gau' dosana rupataua, pila' nikamaseang tommi ke'nanga ri Allata'ala. 21 Jari sangkamma angkanaya musti mateki' passabakkang nigaukanna dosaya, sangkamma tomminjo Nasare maki' oloang Allata'ala sollanta assibajiki ammotere' siagang Ia, lanri mangngamaseanNa mae ri katte. Na lanri baji'mi ammotere' passisambunganta siagang Allata'ala, laNasare tommaki' katallassang mannannungang tete ri Isa Almasi, Batarata.
1 Jari punna kamma, apamo lakkulle nikana? Jari musti tuli nigaukammi dosaya sollanta pila' nikamaseang ri Allata'ala? 2 Tantu tena! Nasaba' tenamo nanakoasaiki' dosaya. Jari apa saba'na natuli lanigaukang dosaya lalang ri tallasatta? 3 Maka nuasseng ngasenji sari'battang, angkanaya ri wattunta nije'ne' nipasileo'mi tallasatta siagang Isa Almasi? Anjo battuanna angkanaya nipasileo' maki' siagang kamateanNa Isa Almasi. 4 Iaminjo nije'netta a'jari pammatei angkanaya sikamateang maki' Isa Almasi, siagang nipasitarawang maki' siagang KalenNa; sollanna, antekamma batena attallasa' poleang ammotere' Isa Almasi lanri koasa mala'biri'Na Allata'ala Manggea, kamma tomminjo akkullei nigappa katallassang berua. 5 Punna assileo' maki' siagang Isa Almasi lanri sikamateanta lalang ri KalenNa, kamma tomminjo lanipasileo' tommaki' attallasa' poleang ammotere' battu ri kamateanga sangkamma Ia. 6 Niassemmi angkanaya nipasibunomi sipa'-sipa' kodi rupatauta salloa ri wattunna nibuno Isa ri kayu sallika, sollanna a'jari ancuru' koasana sipa'-sipa' kodita; lanri kammana, tenamo nanapare' ataki' dosaya. 7 Nasaba' punna matemo taua, nilappassammi battu ri koasana dosaya. 8 Punna le'ba' maki' sikamateang siagang Isa Almasi, tappa' maki' angkanaya lasikatallassang tommaki' ammotere' lalang ri KalenNa Isa. 9 Nasaba' niassemmi angkanaya le'ba'mi nipattallasa' poleang ammotere' Almasi battu ri kamateanga siagang talamateami pole ribokoanganna; tenamo nakkulle nikoasai KalenNa ri kamateanga. 10 Anjo kamateang Naoloa Almasi iami kamateang mae ri dosaya. Anjo sikaliji kajariang sa'genna satunggu-tungguna. Na anjo katallassang Naoloa ri kamma-kammaya anne, iamintu katallassang untu' mae ri Allata'ala. 11 Ikau ngaseng pole, musti nupasangkamma tongi angkanaya matemi kalennu lalang ri dosa-dosaya, mingka attallasa' poleang mako ammotere' nusijarreki siagang Allata'ala tete ri Isa Almasi. 12 Tea' mako pole pa'biangi nikoasai tallasa'nu ri dosaya ilalang ri anne linoa, sollanna tena nanuturukiangi ero' kaja'dallanna. 13 Tea tongko passareangi tubunu mae ri kakoasanna dosaya nanipake anggaukangi kaja'dallanga. Passangalinna passareangi kalennu mae ri Allata'ala, a'jari tau le'bakamo nipalette' battu ri kamateanga mae ri katallassanga. Passareangi sikontu batangkalennu mae ri Allata'ala, sollanna nipakei anggaukangi ero'Na Allata'ala. 14 Takkullea mako nikoasai ri dosaya, nasaba' tenamo nurawanganna hukkung-hukkung agama Yahudia attallasa', passangalinna irawanganna mako pangngamaseanNa Allata'ala. 15 Jari, kamma-kamma anne apa bodona bicaraya? Maka akkullei nigaukang dosaya nasaba' tenamo nakirawangang kakoasanna hukkung-hukkung agama Yahudia passangalinna irawangang kakoasanNa pangngamaseanNa Allata'ala? Tena sikalia! 16 Maka nuassenji angkanaya punna nupassareang kalennu mae ri se'reang tau nanugaukang apa ero'na, sikontutojenna napa'jari ata mako anjo tau nuturukia ero'na? Akkulleko a'jari ata mae ri apa langngeranga mae ri kamateanga, yareka a'jari ata mannurukia mae ri Allata'ala nalanri kammana assibajiki mako ammotere' siagang Allata'ala. 17 Mingka sukkuru' maki' mae ri Allata'ala! Nasaba' riolo a'jari atako ri dosaya, mingka kamma-kamma anne nuturuki tojeng-tojemmi pangngajarang annabaya, le'baka nipassareang mae ri kau. 18 Le'ba' mako nilappassang battu ri dosa-dosaya, nakamma-kamma anne a'jari ata mako mae ri ero'Na Allata'ala. 19 Nasaba' sukkara' sikali nupahang, ammakema' pangngebarang mae ri nikanaya a'jari ata sollanna gampang nupahang. Riolo nupassareangi sikontu batangkalennu a'jari ata mae ri apa-apa ra'masaka siagang panggaukang ja'dalaka untu' kaja'dallanga. Kamma tomminjo ri kamma-kammaya anne, musti nupassareangi sikontu batangkalennu a'jari ata mae ri ero'Na Allata'ala, untu' anggaukangi ero'Na bawang Allata'ala. 20 Wattunnu nipare' ata ri dosa-dosaya, tena nanikoasaiko ri ero'Na Allata'ala. 21 Anjo wattua apa passawallang nugappa ri anjo panggaukang appakasirika? Poro kamateang bawang naerang anjo panggaukang-panggaukang kammaya! 22 Mingka kamma-kamma anne nilappassang mako battu ri dosa-dosaya, siagang a'jari mako atanNa Allata'ala. Naia passawallang nugappaya iamintu angkanaya nupassareammi tallasa'nu mae ri Allata'ala, siagang iaminjo langngerang wassele' katallassang sitojennaya siagang katallassang satunggu-tunggua. 23 Nasaba' pahalana dosaya iamintu kamateanga; mingka pangngamaseang Napassareang bawang-bawanga Allata'ala, iamintu katallassang sitojennaya siagang katallassang satunggu-tunggua lalang ri Isa Almasi, Batarata.
1 Sikamma sari'battangku! Nuasseng ngasemmi anjo hukkung-hukkunga. Jari nuassemmi angkanaya ri wattunnaji attallasa'ija taua nanikoasai ri anjo hukkung-hukkunga. 2 Akkullei nialle pangngebarang se'reang baine, niakamo bura'nenna: Ri wattu attallasa'naija bura'nenna, tassikko'iji mae ri bura'nenna anjo bainea situru' hukkunga. Mingka punna matemo anjo bura'nenna ta'lappasa'mi anjo bainea mae ri bura'nenna situru' hukkunga. 3 Punna assialle siagang bura'ne maraeng anjo bainea ri wattu attallasa'naija bura'nenna, nikana a'gau' bawammi anjo bainea. Mingka punna matemi bura'nenna, ta'lappasa'mi anjo bainea, situru' hukkunga. Punna assialle pole siagang bura'ne maraeng, tenaja na'gau' bawang. 4 Sangkamma ngaseng tomminjo mae ri kau, sari'battangku ngaseng. Sanrapang mate ngaseng mako mae ri hukkung agama Yahudia lanri nipasileo'mi tallasa'nu siagang Isa Almasi, le'baka attallasa' ammotere' battu ri kamateanga; Iami ampatangi katallassannu. Nipattallasa' poleangi ammotere' battu ri kamateanga, sollanna akkulle a'jari a'matu-matu katallassanta mae ri Allata'ala. 5 Nasaba' katallassanta riolo, ero' batangkalenta bawang niturukiang. Anjo wattua ammumbai cinnata a'gau' dosa lanri nia'na anjo hukkung-hukkung agamaya angngatoroki kalenta. Iaminjo saba'na nanigaukammo panggaukang angngeranga mange ri kamateanga. 6 Mingka kamma-kamma anne ta'lappasa' maki' battu ri hukkung-hukkung agama Yahudia. Sanrapang mate maki' mae ri hukkung-hukkung makoasaya riolo mae ri batangkalenta. Tenamo nasangkamma riolo bateta anynyomba mae ri hukkunga, iamintu anynyomba situru' hukkung-hukkung tattulisika. Passangalinna kamma-kamma anne niberuimi bateta anynyomba, iamintu situru' apa Napangngajarranga RohNa Allata'ala mae ri katte. 7 Jari punna kamma, apamo lanikana? Lanikana ja'dalaki anjo hukkung-hukkung agama Yahudia? Tantu tena! Mingka iaminjo hukkung-hukkunga angngajarakki' angngassengi nikanaya dosa. Takuassengai angkana apa anjo nikanaya angngoa, ka'de' tena nanakana anjo hukkung agamaya, “Teako angngoai.” 8 Battu ri iaminjo hukkung-hukkung agamaya nanggappamo kasampatang dosaya ampamumbai a'rupa-rupaya kangoang lalang ri atingku; nasaba' ka'de' tena anjo hukkung-hukkung agamaya, ma'nassa mate tommi dosaya. 9 Riolo tena nakuassengi anjo hukkung-hukkung agamaya ilalang tallasakku. Mingka ri wattunna ammumbamo anjo hukkung-hukkung agamaya, appakkaramulami attallasa' dosaya, nakumatemo inakke. 10 Jari anjo hukkung-hukkung agama nikanaya ri uru-uruna lassare katallassang, ba'lalo angngeranji kamateang mae ri kalengku. 11 Nasaba' ilalammi ri anjo hukkung-hukkung agamaya angngalle kasampatang anjo dosaya antipua' siagang ambunoa'. 12 Anjo hukkung-hukkung agamaya battu ri Allata'ala assala'na, siagang sikamma anjo apa nipassuroanga lalang ri hukkung agamaya, battu ri Allata'ala assala'na, jari adeleki siagang bajiki. 13 Jari punna kamma, maka anjo apa bajika angngerangi kamateang mae ri kalengku? Tantu tena! Mingka anjo dosaya angngerangi anjo kamateanga. Nipakei anjo kabajikanga ri dosaya angngerang kamateang mae ri kalengku, sollanna a'nassa nicini' sipa'-sipa'na anjo dosaya. Battu ilalammi ri apa-apa Napassuroanga Allata'ala, a'butti ma'nassa antekamma ja'dala'na anjo dosaya. 14 Niassemmi angkanaya anjo hukkung-hukkung agama Yahudia battu ri Allata'ala assala'na; mingka inakke anne lammai batangkalengku. Le'ba'ma' nibalukang untu' a'jari ata mae ri dosa-dosaya. 15 Nasaba' takuassengai apa nagaukanga batangkalengku. Apa eroka kugaukang, iaminjo tena nagaukangi; mingka apa-apa kumusua, ba'lalo iaminjo kugaukang. 16 Jari, punna ia anjo apa-apa sisalaya siagang erokku kugaukang, battuanna kumangakuimi angkanaya annabai anjo hukkung-hukkung agama Yahudia. 17 Jari sikontutojenna teaimi kalengku anggaukangi sikammaya anjo, passangalinna iaminjo dosaya, makoasaya ri kalengku. 18 Kuassemmi angkanaya tena sikalimo apa-apa baji' lalang ri batangkalengku, iamintu lalang ri sipa'-sipa' rupatauku. Nasaba' nia' erokku anggaukangi kabajikanga, mingka takkullea' anggaukangi. 19 Tena nakugaukangi kabajikanga situru' apa kukaerokia; passangalinna apa-apa takukaerokia kugaukang, iamintu kaja'dallanga. 20 Punna kugaukang apa-apa takukaerokia, sikontutojenna teai inakke anggaukangi sikammaya anjo, passangalinna dosa makoasaya lalang ri kalengku anggaukangi. 21 Jari, kubodoimi kanangku angkanaya iaminjo hukkung-hukkunga angngatoroki kalengku: iamintu angkanaya punna erokka' anggaukangi apa bajika, kajarianna apa ja'dalakaji ammumba ri kalengku. 22 Atingku lalang nangai apa-apa Napassuroanga Allata'ala, 23 mingka kuassengi angkanaya nia' todong hukkung maraeng lalang ri kalengku angngatoroki kalengku — iamintu hukkung assisalaya siagang hukkung natarimaya pikkirangku. Iaminjo saba'na nakutassikko'mo mae ri hukkung dosa makoasaya mae ri kalengku. 24 Jari kammaminjo katallassangku: kuturuki hukkung-hukkung battua ri Allata'ala, siagang pikkirangku, mingka sipa'-sipa' ma'rupatauku mannuruki mae ri dosaya. Teai sipato' cilakaku anne! Inaimi ero' ampasalamaki anne batangkalengku, eroka mange ri kamateanga? Sukkuruka' mae ri Allata'ala! Nasaba' Iami ampasalamakka' tete ri KalenNa Isa Almasi.
1 Kamma-kamma anne tenamo hukkungang lantabai tau assileokamo katallassanna siagang Isa Almasi. 2 Nasaba' hukkung battua ri RohNa Allata'ala ampasileoki katallassanta siagang Isa Almasi; Iami allappassangki' battu ri hukkung angngerangaki' mae ri dosaya siagang kamateanga. 3 Apa tenaya nakkulle nagaukang hukkung-hukkung agamaya, lanri lammana batangkalenta ikatte rupataua, iaminjo le'ba' Nagaukang Allata'ala. Le'ba'mi Nabeta Allata'ala koasana dosaya lalang ri sipa'na rupataua; iamintu lalang Nasurona battu Ana' KalenNa, le'bakamo battu sanrapang rupatau dorakaya, sollanna Natangkasi dosa-dosata. 4 Kammaminjo Nagaukang Allata'ala, sollanna akkulle nigaukang anjo apa-apa Nakaerokia lalang ri hukkung-hukkung agama Yahudia, lalang ri batangkalenta ikatte tau mannurukia mae ri RohNa Allata'ala, jari teai mannurukia mae ri sipa'-sipa' ma'rupatauta. 5 Inai-nai mannuruki mae ri sipa'-sipa' rupataua, tuli lananawa-nawai apa-apa nakaerokia sipa'-sipa' ma'rupataua. Mingka inai-nai attallasa' mannuruki ri RohNa Allata'ala, tuli lananawa-nawai anjo apa Nakaerokia RohNa Allata'ala. 6 Punna nikoasai pikkirannu ri sipa'-sipa' ma'rupataua, kale'bakkanna lanugappai kamateanga. Mingka punna nikoasai pikkirannu ri RohNa Allata'ala, kale'bakkanna lanugappai katallassanga siagang passiamakkanga siagang Allata'ala. 7 Inai-nai nikoasai pikkiranna ri sipa'-sipa' ma'rupataua, iami assimusu siagang Allata'ala; nasaba' anjo taua tamannurukiai ri hukkung Napassuroanga Allata'ala; siagang tena memang todong nakkulle mannuruki ri hukkunNa Allata'ala. 8 Inai-nai attallasa' mannuruki ri sipa'-sipa' ma'rupataua, anjo tau kammaya tanikarannuangai ri atinNa Allata'ala. 9 Mingka ikau ngaseng teako mannuruki ri sipa'-sipa' rupataua lalang tallasa'nu. Punna mattantu RohNa Allata'ala angngatoroki kalennu, mattantu lamannurukiko ri RohNa Allata'ala lalang tallasa'nu. Inai-nai tena ri kalenna RohNa Almasi, anjo taua teai taunNa Almasi. 10 Mingka punna nia'mo Almasi lalang ri kalennu, manna pole lamate tubunu passabakkang dosa, mingka lanri baji'na passisambungannu siagang Allata'ala, lanisareko ammotere' katallassang ri RohNa Allata'ala. 11 Punna niaki lalang ri kalennu RohNa Allata'ala, iamintu Roh ampattallasa' poleangai Almasi battu ri kamateanga, Ia tomminjo RohNa lampattallasaki tubunu akkullea mate. 12 Iaminjo saba'na, sari'battangku ngaseng, nanisare maki' tanggongang parallua nikatutui; mingka teai tanggongang mae ri sipa'-sipa' rupataua, nasaba' tena naparallu niturukiang ero'na sipa'-sipa' rupataua. 13 Nasaba' punna niturukiang ero'na sipa'-sipa' rupataua ma'nassa lamateko; mingka punna lanri koasaNa RohNa Allata'ala natuli nupamate panggaukang-panggaukang dosanu, ma'nassa lattallasakko. 14 Inai-nai nirurungang ri RohNa Allata'ala, iami ana'-ana'Na Allata'ala. 15 Nasaba' anjo Roh Napassareanga Allata'ala mae ri kau ngaseng, tena Napa'jari atako sa'gennu a'jari malla' lalang ri katallassannu. Passangalinna anjo RohNa Allata'ala ampa'jariko ana'-ana'Na Allata'ala. Siagang lanri koasaNa anjo RohNa Allata'ala akkulle maki' angkana ri Ia, “Manggeku, Manggeku!” 16 RohNa Allata'ala siagang rohna kalenta ampa'nassai angkanaya a'jari maki' ana'-ana'Na Allata'ala. 17 Jari punna a'jari maki' ana'-ana'Na, ma'nassa a'jari tommaki' warisi'Na, lantarimayai sikamma barakka' le'baka Napasadia Allata'ala untu' ana'-ana'Na. Lannarimaki' siagang Isa apa le'baka Napasadia Allata'ala untu' Isa; nasaba' punna sikapa'risangki' siagang Almasi, lasiagang tommaki' Almasi nipakala'biri'. 18 Sikamma pa'risi' nikasiaka ri kamma-kammaya anne turu' ri panggappaku, tena nasiapa punna nipasingnganggaraki siagang kala'birang lanipa'nyataya mae ri katte sallang. 19 Sikontu linoa sanna' ngasemmi manakku'na antayangi angkanaya kerepi wattu naNapa'nyata Allata'ala kala'birang laNapassareanga mae ri ana'-ana'Na. 20 Nasaba' niboli'mi a'jari jappo' linoa, teai lanri ero'na linoa, passangalinna lanri niboli'na kamma ri Allata'ala. Mingka manna nakamma nia'ija panrannuang: 21 angkanaya nia' se're wattu nanilappassang sikontu linoa battu ri kakoasang ammanrakia siagang lamminawang tongi lanipamaradeka kammayatompa lanipakala'biri' siagang ana'-ana'Na Allata'ala. 22 Niassengi angkanaya sa'genna kamma-kamma anne akkunrareng ngasengi sikontu linoa napakamma sessa, sanrapang sessana sitaua baine punna lammana'. 23 Ba'lalo teai linoa bawang akkunrareng; passangalinna manna ikatte akkunrareng tongi lalang atinta. Le'ba'mi nitarima RohNa Allata'ala. Iaminjo passare uru-uruNa Allata'ala. Mingka attayangijaki', sollanna nilappassang todong sikontu batangkalenta ri Allata'ala siagang Napa'jariki' ana'-ana'Na. 24 Nasaba' lanri pa'minasata, nakinipasalama'. Mingka punna nigappa memammi anjo apa niminasaia, anjo teaimi pa'minasa arenna. Nasaba' inaika amminasai apa nagappayamo? 25 Mingka punna ma'minasaki' ri apa-apa tenayapa nigappai, paralluki sa'bara' antayangi anjo niminasaia. 26 Kamma tomminjo, punna lammaki', battui RohNa Allata'ala antulungki'. Nasaba' taniassengai angkana antekamma bateta musti appala' doang; Iaminjo Roh mange andallekang ri Allata'ala sannaka batena ampappalakkangki', sa'genna taniassengamo ikatte nipau anjo apa parallua nipala'. 27 Allata'alaji angngassengi atinna rupataua; jari Iami angngassengi anjo apa Napalaka Roh. Nasaba' anjo Roh ampappalakkangi ri Allata'ala apa naparalluanga umma'Na Allata'ala; siagang situruki ero'Na Allata'ala anjo apa napalaka. 28 Niassengi angkanaya Allata'ala ngaseng angngatoroki sikontu apa-apaya, sa'genna a'jari baji' mae ri sikamma tau angkamaseangai, iamintu sikamma tau Nakioka situru' ero' panggaukanNa. 29 Sikamma tau le'baka Napile Allata'ala, le'ba' tommi nipattantu battu ri uru-uru memang untu' a'jari sangkamma ana'Na, iamintu Isa Almasi. Lanri kammana, iaminjo Isa Almasi a'jari ana' bungasa' mae ri sikamma sari'battanna ngaseng. 30 Kammaminjo bateNa Allata'ala angkioki sikamma tau le'baka Napattantu memang la'bi riolo; na sikamma anjo tau Nakioka nisare oloang assibajiki ammotere' siagang Allata'ala. Na sikamma anjo tau le'baka nisare oloang assibajiki ammotere' siagang Allata'ala, nisare tommi pammantangang lalang katallassang KalenNa Allata'ala. 31 Apamo lanikana kamma-kamma anne ri passala' kammaya ngaseng anjo? Punna Narurungangki' Allata'ala, maka inai akkulle angngewaki'? 32 Manna ana' KalenNa tena todong Nakadarangi, passangalinna Napassareammi untu' kaparalluanta ngaseng; maka talaNasareaki' sikamma kaparalluanta maraenganga? 33 Maka inai lakkulle antuntukki' ikatte umma' le'baka Napile Allata'ala, punna KalenNamo Allata'ala angkana tenamo nisala? 34 Maka lania' tau ampasalaki'? KalenNa Isa Almasi sallang angngalle-ngalleangki'. KalenNami le'ba' mate, kammayatompa KalenNami le'ba' nipattallasa' poleang ammotere' battu ri kamateanga siagang nia'mi ri sa'rinNa Allata'ala iamintu ri tampa' makoasaya. 35 Maka inai lakkulle ampisangkai Almasi angkamaseangki'? Maka akkullei kasusaanga yareka kasukkaranga, yareka passessaya, yareka kacipuranga, yareka kakasi-asianga, yareka bahayaya, yareka kamateanga, ampisangkai Almasi angkamaseangki'? 36 Nia' tattulisi' lalang ri Kittaka kana kammaya anne: “Sikabusu'na alloa niaki lalang ri bahaya kamateanga ikambe passabakkang Ikau. Nipare' sangkamma maki' gimbala' eroka nisamballe.” 37 Tena! Ba'lalo lalang ri sikammaya ngaseng anjo anggappa maki' pammetang tojeng-tojenga lanri Ia mangngamaseanga mae ri katte ngaseng! 38 Nasaba' tappa' sikalia' angkanaya ri sikontu linoa, baji' nakamateang yareka katallassang, baji' namalaeka' yareka tu makoasaya, baji' tuntutang ri kamma-kammaya anne yareka tuntutang labattua sallang, yareka kakoasang maraengannaya; 39 baji' naapa-apa niaka ri langika yareka naapa-apa niaka ri buttaya, yareka apa-apa mamo maraengannaya, yangasenna anjo takkulleai ampisangkai Allata'ala angkamaseangki', sangkamma le'bakamo Napappicinikang lalang ri KalenNa Isa Almasi, Batarata.
1 Kontutojengi anne apa eroka kupau lanri inakke taunNa' Isa Almasi. Tena nakua'balle-balle. Atingku siagang pa'maikku, nirurunganga ri RohNa Allata'ala, ampakatappa' tonga' ma'nassana kontutojengi anne kanangku. 2 Sanna' si'nana siagang pa'risi'na atingku, 3 passabakkang julu bansaku. Nasaba' untu' ike'nammi nakurella todong anggappa pangngalarroi battu ri Allata'ala siagang nisa'la' battu ri Isa Almasi. 4 Ike'nammi umma' nipilea siagang nipa'jaria ana'-ana' KalenNa ri Allata'ala, kammayatompa le'baka angkasiaki kakoasanNa Allata'ala. A'janjimi Allata'ala mae ri ke'nanga, siagang nisaremi ke'nanga hukkung-hukkung agama. Nipauammi ri Allata'ala ke'nanga angkanaya antekamma batena ke'nanga musti anynyomba ri Allata'ala; kammayatompa natarimami ke'nanga janji-janjinNa Allata'ala. 5 Iami ke'nanga sossoranna boe-boeta. Battu ri bansanami ke'nanga assala' kabattuanNa Almasi, ri wattu battuNa a'jari ma'rupatau ri lino. Iami kaminang mala'biri' ri sikontuna taua. Nipujimi Allata'ala satunggu-tungguna! Aming. 6 Tena nalakukana tenamo natappake janjinNa Allata'ala; mingka tena nasikontu bansa Israelka nipile ri Allata'ala a'jari umma'Na. 7 Tena nasikontu sossoranna Abraham a'jari ana'-ana'Na Allata'ala. Nasaba' Nakana Allata'ala ri Abraham, “Sossorannaji bawang Ishak laniareng sossorannu.” 8 Battuang kana, sossoranna Abraham a'jaria ana'-ana'Na Allata'ala, iaji bawang sossorang nilassukanga lanri janjinNa Allata'ala; jari tena nasossoranna ngaseng. 9 Nasaba' kammami anne janjinNa Allata'ala, “Punna narapi'mo wattu le'baka nipattantu labattua pole, nalania'mo ana'na Sara, sitau ana' bura'ne.” 10 Kammayatompa pole: Anjo Ribka rua ana' bura'ne nalassukang battu ri se'rea mangge, iamintu Ishak, nene' boeta. 11 Ri wattu tenanapa nanilassukangi anjo ana' ruaya, le'ba' memammi Napattantu Allata'ala ana' lanipilea sallang. Anjo pammileNa Allata'ala tena nabattu ri panggaukanna rupataua, passangalinna battu ri ero' pakkio'Na bawang Allata'ala. Nasaba' ri wattunna tenapa nangngasseng a'gau' baji' yareka a'gau' kodi anjo ruaya ana'na Ribka, 12 le'ba' memammi angkana Allata'ala mae ri Ribka, “Anjo toaya la'jari palayangi mae ri anjo loloa.” 13 Nia' tattulisi' lalang ri Kittaka angkanaya, kammaminne kananNa Allata'ala, “Kukamaseangi Yakub, mingka birisikKa' mae ri Esau.” 14 Jari apa bodona kana kamma-kamma anne? Lanikana tena naadele' Allata'ala? Mattantuna adeleki Allata'ala! 15 Nasaba' Nakana Allata'ala mae ri Musa, “LaKupappicinikangi barakkakKu, mae ri tau eroka Kupicinikiang barakkakKu, siagang laKupappicinikangi pangngamaseangKu mae ri tau eroka Kupicinikiang pangngamaseangKu.” 16 Jari anjo apa Natappukia Allata'ala, teai lanri usahana yareka rellana rupataua, passangalinna kabajikang pa'mai'Na bawang Allata'ala mae ri anjo tau Napilea. 17 Nasaba' nia' tattulisi' lalang ri Kittaka angkanaya, “Nakana Allata'ala mae ri karaeng Mesir, ‘Se'reji bawang erokKu naKupa'jariko karaeng, iamintu eroki Kupappicinikang kakoasangKu battu ri kau, siagang na'jari masahoro' arengKu ri sikontu linoa.’ ” 18 Jari, iaji namangngamaseang Allata'ala mae ri se'rea tau punna Nakaerokangi kammaya. Kammayatompa a'jari kapala batui se'rea tau punna Nakaerokangi Allata'ala kammaya. 19 Jari, lanukana kapang ri nakke, “Punna kamma, apa saba'na Naero' ija Allata'ala ampasalai rupataua? Sai manna inai takkulleaji natahang ero'Na Allata'ala?” 20 Mingka ikau sari'battang, tau biasajako bawang! Takkulleako barani appiali mae ri Allata'ala! Maka akkullei se'rea pammantangang bunga mae ri tau amparekai, angkana, “Apa saba'na nanupare' kamma' anne?” 21 Sai ero'-ero'na todong anjo taua antekamma tanja'na anjo pammantangang bungaya napareka? Battu ri sikangkang butta pi' anjo taua akkullei napare' ruang rupa anjo pammantangang bungaya: se're baji', namaraenganga tena nabaji' dudu. 22 Kamma tomminjo ri apa Napareka Allata'ala. Eroki ampappicinikangi pangngalarroinNa siagang kakoasanNa. Mingka sa'baraki Allata'ala mae ri anjo tau siratanga nihukkung lanri napakalarro-larrona Allata'ala. 23 Mingka ero' tongi ampappicinikangi mae ri katte kate'neang masukkuka, ia Napassareanga mae ri katte tau Nakamaseanga. Kamma-kamma anne Napasadia maki' untu' antarimai anjo kate'neanga. 24 Ikattemi le'baka Nakio', tena nabattu ri bansa Yahudia bawang, mingka battu ri bansa-bansa maraenga pole. 25 Nasaba' Nakana Allata'ala lalang ri Kitta' Na'bi Hosea, “Tau teai ummakKu, laniarengi ‘UmmakKu’. Bansa tenaya naKukamaseangi, laKuarengi ‘TunikamaseangKu’. 26 Siagang kere-keremae tampa' nikanaya ri taua, ‘Teaiko ummakKu,’ anjoremmi taua laniareng ana'-ana'Na Allata'ala attallasaka.” 27 Naterassimi nakana Na'bi Yesaya ri sesena bansa Israelka, “Manna pole nasangkamma kassika ri tamparanga jaina bansa Israelka, mingka sike'de'ji lasalama'; 28 nasaba' tasalloami naNapaturung pangngalarroinNa Batara mae ri bonena linoa.” 29 Nakana pole Na'bi Yesaya, “Ebara' angkana tenamo sossorang Nabolikangki' Allata'ala Kaminang Koasaya, mattantu le'ba' ngaseng maki' a'jari sangkamma taua ri Sodom siagang Gomora.” 30 Jari bodona kana kammaminne: Anjo bansa-bansa maraenga tena nausaha sollanna a'jari baji' ammotere' passisambunganna siagang Allata'ala. Mingka lanri tappa'na ke'nanga, Napa'jari baji'mi ammotere' Allata'ala passisambunganNa siagang ke'nanga. 31 Mingka bansa Yahudia tuli nausahai anturuki hukkunga sollanna a'jari baji' ammotere' passisambunganna siagang Allata'ala. Mingka kale'bakkanna tena wassele'na. 32 Angngapa natena wassele'na ke'nanga? Nasaba' tena nanagaukangi ke'nanga lanri tappa'na ri Allata'ala, passangalinna lanri usaha kalennaji ke'nanga. Jari iaminjo saba'na natu'guru' tatto'ro ke'nanga ri “Batu Pattatto'roanga”. 33 Ri sesena anjo batua, nia' tattulisi' lalang ri Kittaka angkana, “U'rangi baji'-bajiki anne: Ri Sion nia' batu le'ba' Kuboli', la'jari sabaka natatto'ro taua; iamintu se're batu lompo, la'jari sabaka natu'guru' taua. Mingka inai-nai tappa' ri Ia tena nalala'ba' pa'mai'na.”
1 Sikamma sari'battangku ngaseng! Sanna' ma'minasaku sollanna nipasalama' ngaseng sikontu bansaku. Nasanna'mo bateku ampappala' doangangi ke'nanga mae ri Allata'ala. 2 Barania' ampaui angkana sanna' lompona sumanga'na ke'nanga anynyomba mae ri Allata'ala. Mingka anjo sumanga'na ke'nanga tena nasituru' pangngassengang battua ri Allata'ala. 3 Tena naassengi ke'nanga antekamma caraNa Allata'ala ampa'jari bajiki ammotere' passisambunganNa siagang rupataua. Nalanri cara kalenna ke'nanga naturuki, jari tenamo nanaturuki ke'nanga cara Napappicinikanga Allata'ala. 4 Anjo hukkung-hukkung agamaya le'ba'mi Napa'ganna' Almasi. Jari inai-nai tappa' mae ri Almasi, a'jari baji'mi ammotere' passisambunganna siagang Allata'ala. 5 Natulisiki Musa angkanaya inai-nai assibajiki siagang Allata'ala situru' hukkung-hukkung agamaya, iami lattallasa' lanri mannurukinna mae ri anjo hukkung-hukkung agamaya. 6 Mingka ri passala' antekamma carana taua assibajiki siagang Allata'ala situru' katappakkang mae ri Allata'ala, kammaminne nakana lalang ri Kittaka, “Tea' mako angkanai lalang ri atinnu, ‘Inaika lanai' ri suruga?’ (battuanna angngerangi naung Almasi), 7 yareka ‘Inaika lanaung ri pammantanganna tau matea?’ (battuanna angngangkaki nai' Almasi battu ri kamateanga.)” 8 Battuanna kammaminne, “Anjo biritta battua ri Allata'ala sanna' a'reppese'na ri kau; iamintu niaki ri bawanu siagang lalang ri atinnu.” Iaminjo biritta napa'la'banga ikambe; iamintu biritta ri passala'na tappaka. 9 Nasaba' punna mangakuko siagang bawanu angkanaya, “Batara anjo Isa,” siagang tappakko lalang ri atinnu angkanaya le'ba'mi Napattallasa' poleang ammotere' Allata'ala anjo Isa battu ri kamateanga, ma'nassa lasalama' mako. 10 Nasaba' lanri tappa'na taua lalang atinna, sa'genna nitarimamo ri Allata'ala anjo taua assibajiki siagang Allata'ala. Siagang lanri mangakuna taua siagang bawana, sa'genna nipasalama' ri Allata'ala. 11 Nia' tattulisi' lalang ri Kittaka angkanaya, “Inai-nai tappa' tena nalanipakala'ba pa'mai'na.” 12 Anne nataba ngasengi sikontu rupataua; nasaba' tena simmaraenna tu Yahudia siagang bansa-bansa maraenga. Anjo Allata'ala se'rea, Bataranai sikontu rupataua. Napassareangi barakka'Na alla'bia jaina mae ri sikamma tau appala' tulunga mae ri Ia. 13 Nia' tattulisi' lalang ri Kittaka angkanaya, “Sikamma tau akkioka mae ri Batara lasalama' ngasengi.” 14 Mingka antekamma lakkulle taua akkio' mae ri Batara punna tenapa natappa' ke'nanga? Siagang antekamma lakkulle tappa' ke'nanga mae ri Batara punna tenapa nalangngereki biritta battua ri Batara? Kammayatompa, antekamma lakkulle nalangngere' ke'nanga biritta battua ri Batara punna tena tau ampabattui anjo birittaya? 15 Kammayatompa pole, antekamma lakkulle taua ampabattui anjo birittaya punna tena nanisuroi ke'nanga? Nia' tattulisi' lalang ri Kittaka angkanaya, “Teai sipato' baji'na kabattuanna tau angngeranga Kabara' Baji' battu ri Allata'ala.” 16 Mingka tayangasenna taua antarimai anjo Kabara' Bajika. Nasaba' nakana Na'bi Yesaya, “O, Batara, inaika tau ampatappaki biritta napabattua ikambe?” 17 Iaminjo saba'na na'jari tappa' taua, nasaba' allangngereki biritta, siagang nania' tau allangngereki anjo birittaNa Almasi nasaba' nia' tau ampabattui anjo birittaya. 18 Mingka erokka' akkuta'nang: Maka tena memang tompa nalangngereki ke'nanga anjo birittaya? Mattantu le'ba'mi! Nasaba' nia' tattulisi' lalang ri Kittaka angkanaya, “Alla'bammi sa'ranna ke'nanga ri sikontu linoa, anrapi'mi kana-kananna ke'nanga mange ri cappa'na linoa!” 19 Erokka' akkuta'nang pole: Maka tanaassengapi bansa Israelka anjo birittaya? Boli'mi kamma na Musa rolong ampiali anne pakkuta'nanga. Nakana Musa, “Kammaminne kananNa Allata'ala, ‘LaKupa'jari akkimburuko mae ri se'rea bansa tenaya naUmma'Na Allata'ala siagang laKupa'jari larroko mae ri se'rea bansa dongo'.’ ” 20 La'bi baraniangangi pole Na'bi Yesaya. Nakana, “Kammaminne kananNa Allata'ala, ‘Tau tenaya naboyA', iami ambuntulukKa'; siagang Kupappicinikammi KalengKu mae ri tau tenaya nale'ba' ampakkuta'nangangA'.’ ” 21 Mingka ri sesena bansa Israelka, nakana Na'bi Yesaya, “Kammaminne kananNa Allata'ala, ‘Sikabusu'na alloa Kupajonjo limangKu mae ri se'rea bansa kapala batua siagang tamaeroka mannuruki.’ ”
1 Erokka' akkuta'nang: Maka Napela'mi Allata'ala umma' KalenNa? Tantu tena! Inakke kalengku bansa Israelka', sossoranna Abraham, siagang battu ri suku Benyamin. 2 Tena! Tena naNapelaki umma'Na Allata'ala, le'baka Napile battu ri uru-uruna. Nuasseng ngasenji apa tattulisika lalang ri Kittaka, ri passala'na Na'bi Elia, ri wattunna natuntu' bansa Israelka mae ri Allata'ala. Nakana Na'bi Elia, 3 “O, Batara, nabunomi taua na'bi-na'biTa, siagang napanra'-panraki ngasemmi tampa'-tampa' eroka nipake assare koro'bang mae ri Katte. Inakke mami kale-kalengku ammantang, naero' tommo ke'nanga ambunoa'.” 4 Apa pappialinNa Allata'ala mae ri Na'bi Elia anjo wattua? Nakana Allata'ala, “Nia'mo Kuboli' tuju sa'bu tau untu' ri KalengKu. Tena le'bakapi ke'nanga anynyomba mae ri Rewata Baal.” 5 Kamma tomminjo kamma-kamma anne: nia' siapa are jaina tau le'ba' Napile Allata'ala lanri pangngamaseanNa bawang. 6 Napilei Allata'ala ke'nanga lanri pangngamaseanNa bawang, jari teai lanri panggaukanna ke'nanga. Nasaba' punna lanri panggaukang baji'na naNapilei Allata'ala rupataua, teaimi pangngamaseang tojeng-tojeng anjo pangngamaseanNa Allata'ala. 7 Jari antekamma? Tanagappayai bansa Israelka anjo apa naboyaya ke'nanga. Anggappayai, iamintu sipa'rappungang ca'diji tau, ia le'baka Napile Allata'ala. Ia maraenganga, a'jari kapala batu ngasengi mae ri pakkio'Na Allata'ala. 8 Nasaba' nia' tattulisi' lalang ri Kittaka angkanaya, “Napa'jari tattongko'mi Allata'ala atinna siagang pikkiranna ke'nanga; siagang sa'genna kamma-kamma anne takkulleai accini' matanna ke'nanga, siagang takkulleai allangngere' tolinna ke'nanga.” 9 Nakana todong Daud, “Balang pare'na a'jari sikko' mae ri kalenna passua'-suarrang kalenna ke'nanga, siagang a'jari kalo'bang napatu'guria ke'nanga, napanra'. 10 Balang pare'na a'jari sassang paccini'na ke'nanga sollanna takkullea accini'; siagang balang pare'na a'jari bukku' ke'nanga sa'genna satunggu-tungguna.” 11 Erokka' pole akkuta'nang: Ri wattunna tu'guru' tu Yahudia, maka lanri nikellaina panra' ke'nanga natu'guru'? Tena sikalia! Mingka lanri dorakana ke'nanga, ba'lalo nanipasalama'mo bansa maraenga, sa'genna a'jari akkimburumo bansa Yahudia mae ri anjo bansa maraenga. 12 Lanri salana siagang tenana manannuruki bansa Yahudia mae ri ero'Na Allata'ala, nanibarakkakimo bansa-bansa maraenga ri Allata'ala. Jari la'biangampa pole punna a'jari baji'mo ammotere' passisambunganna bansa Yahudia siagang Allata'ala; tantu lala'bi lompoangangi pole barakka' laNapassareanga Allata'ala! 13 Mingka kamma-kamma anne bajiki punna a'bicara' mae ri sikamma sari'battang bansa maraenga. Anne siapaya sallona, a'jariku tunisuro mae ri bansa-bansa maraenga, teai sipato' kupakalompona anjo jama-jamangku. 14 Kuminasai nakuakkulle ampa'jari akkimburu bansaku mae ri bansa maraenga, sollanna akkulle a'jari saba' nakuakkulle ampasalamaki sipa'rua ke'nanga. 15 Lanri nisorongbokona ke'nanga ri Allata'ala, na'jari baji'mo ammotere' passisambunganNa Allata'ala siagang linoa; jari la'biangampa pole punna nitarima ke'nanga ri Allata'ala! Tantu sangkamma le'ba'mi ke'nanga tau mate attallasa' poleanga ammotere'! 16 Punna sikere' roti uru-urua nipassareammi mae ri Allata'ala, battuanna anjo roti sibatua nipassareang tommi mae ri Allata'ala. Na punna Allata'ala pata anjo aka'na poko' kayua, battuanna anjo tangke-tangkenna Ia todong pata. 17 Anjo tangke-tangkenna poko' zaitunga — iamintu pangngebaranna tu Yahudia — le'ba'mi nitoto sipa'rua. Nampa anjoreng ri bate le'baka nitoto nipaccangkokimi tangke poko' zaitun tenaya niparakai, iamintu pangngebaranna ikau bansa maraenga. Nipacangko' mako mae anjoreng sollanna nukasia' sikamma kabajikang battua ri katallassang rohanina tu Yahudia. 18 Lanri kammana, teako cini' tunai anjo tau sanrapang le'baka nitoto sangkamma anjo tangke-tangkea. Musti nuu'rangi angkanaya ikau sanrapang poro tangke jako bawang. Nateai tangkea assarei kanre anjo akaka, passangalinna anjo akaka assarei kanre anjo tangkea. 19 Mingka lanukana kapang, “Iye', mingka nitotoi anjo tangke-tangkea sollangku akkulle nipacangko' mae ri poko'na!” 20 Anjo kammatojengi. Mingka nanipela' ke'nanga lanri tenana natappa' ke'nanga, naikau nitarimako lanri tappa'nu. Jari lanri kammana, teako a'jari tampoi; passangalinna musti mallakko. 21 Nasaba' punna tena Napassayangi Allata'ala naNapela' tu Yahudia sanrapang anjo tangke-tangke aslia, teako angkanai laNapassayangko Napela'! 22 Jari anrinni akkullei nicini' antekamma baji'Na Allata'ala, mingka akkulle tongi nicini' antekamma terasa'Na. Sanna' terasa'Na mae ri tau dorakaya, mingka sanna' baji'Na mae ri kau ngaseng — assala' tuli tutuko attallasa' battu ri kabajikanNa. Nasaba' punna tena, ma'nassa lanipela' tongko. 23 Na ri passala'na anjo tu Yahudia, punna a'jari tappa'mo ke'nanga lanitarimami ke'nanga ammotere'; nasaba' makoasai Allata'ala antarimai ke'nanga ammotere'. 24 Ikau teaiko bansa Yahudi, sanrapangko tangke-tangke battu ri poko' zaitun tenaya niparakai. Jari, punna ikau tenaya nacoco' sipa'nu, mingka akkulleko sanrapang nipacangko' mae ri anjo poko' zaitun aslia, la'biangampa pole anjo tu Yahudia sanrapanga tangke-tangkenna anjo poko' zaitun aslia. Tantu la'bi akkulleangangi Napoterang Allata'ala ke'nanga mae ri poko' zaitun kalenna todong ke'nanga. 25 Sikamma sari'battangku! Kupalaki natena nanukana kalennu nuasseng ngasemmi apa-apaya. Nasaba' nia' apa Nakaeroki Allata'ala mingka tanaassengapi rupataua. Nakukellai sollanna nuasseng anjo; iamintu: Kapala batui sipa'gang tu Yahudia; mingka tenaja nalatuli kamma anjo sipa'-sipa'na ke'nanga. Punna ganna' bansa-bansa maraenga battu mae ri Allata'ala, 26 lanipasalama' ngaseng tommi sikontu tu Yahudia. Nasaba' nia' tattulisi' lalang ri Kittaka angkanaya, “Laniaki Karaeng Mappasalamaka battu ri Sion; laNapakabella ngasengi sikontu kaja'dallanna battu ri sossoranna Yakub. 27 LapparekKa' janji majarre' siagang ke'nanga ri wattunna Kupammopporang dosa-dosana ke'nanga.” 28 Lanri teana tu Yahudia antarimai Kabara' Baji' battua ri Allata'ala, a'jari musumi ke'nanga ri Allata'ala; na iaminjo ba'lalo ampa'jari upaki bansa-bansa maraenga. Mingka lanri nipilena ri Allata'ala, tuli nikamaseammi ri Allata'ala anjo tu Yahudia, passabakkang boe-boena ke'nanga. 29 Nasaba' punna Napilei Allata'ala anjo taua siagang Nabarakkaki, tale'bakai Nabeso' ammotere' anjo apa le'baka Nagaukang. 30 Riolo tena ngaseng numannuruki mae ri Allata'ala. Mingka kamma-kamma anne Napa'nyatami Allata'ala angkanaya le'ba' mako nipata'lappasa' battu ri kasalanga, lanri tenana namannuruki tu Yahudia. 31 Kamma tomminjo mae ri anjo tu Yahudia. Kamma-kamma anne tamannurukiai ke'nanga mae ri Allata'ala, sollanna nipa'nyata angkanaya nipakabella mako battu ri kasalanga. Mingka anjo ke'nanga lanipakabella tongi sallang battu ri kasalanga. 32 Nasaba' le'ba'mi nibalang parekang ri Allata'ala nikoasai rupataua ri sipa' tamannurukia, sollanna akkulle Napappicinikang pangngamaseanNa mae ri yangasenna ke'nanga. 33 Teai sipato' heba'na kakalumanynyanganNa Allata'ala! Teai sipato' tinggina kacara'dekanNa siagang pangngamaseanNa! Maka inai akkulle ampappilajari sikamma apa le'baka Napattantu? Maka inai akkulle ampahangi cara-caraNa anjama? 34 Nia' tattulisi' lalang ri Kittaka angkanaya, “Maka inai akkulle angngassengi pikkiranNa Batara? Maka inai akkulle assarei pappakainga'? 35 Maka inai le'ba' assare apa-apa mae ri Batara sa'genna akkulle annuntu' pa'balasa' battu ri Ia?” 36 Allata'ala ampa'niaki sikontu apa-apa niaka. Sikontu apa-apaya battu ri Allata'ala kabusuki assala'na siagang untu' Allata'ala kabusu'. Nipujimi Allata'ala sa'genna satunggu-tungguna! Aming.
1 Sikamma sari'battangku! Sanna' baji'Na Allata'ala mae ri katte. Iaminjo saba'na nakupala' dudu ri kau ngaseng sollanna nupassareang sikontu batangkalennu a'jari koro'bang attallasa', siagang matangkasaka, kammayatompa nikarannuanga ri atinNa Allata'ala. Mustina kammaminjo caranu anynyomba mae ri Allata'ala. 2 Teako amminawangngi ri atorang-atoranna anne linoa. Boli'mi kamma na Allata'ala ampa'jari berui sipa'-sipa' niaka ri kalennu, sollannu akkulle tappinra. Lanri kammanapi anjo nampa akkulle nuasseng apa Nakaerokanga Allata'ala — iamintu apa nikanaya baji', siagang sukkuka ganna'na, kammayatompa nikarannuanga ri atinNa Allata'ala. 3 Le'ba'ma' Nasare passare malammoro'Na Allata'ala. Lanri kammanami anjo nakupakainga' ngasengko angkanaya: Teako pakatinggi dudui kalennu battu ri siratannaya. Parallui nupakatuna pa'mai'nu nampa nuparessa rolong kalennu; massing-massing tau parallui naparessa kalenna situru' pakkulle natarimaya battu ri Allata'ala lanri tappa'na ri Isa. 4 Anjo batangkalea jai anggotana. Massing-massing anggota batangkalea nia' ngaseng jama-jamanna. 5 Kammatommi anjo ri katte ngaseng. Manna nakijai, mingka a'jari se're maki' batangkale lanri assileo' maki' lalang ri Isa Almasi. Siagang nipasisambung ngaseng maki' a'jari anggota-anggota lalang ri se'rea batangkale. 6 Massing nia' pakkulle untu' allayani Napassareang Allata'ala mae ri katte, tenaya nasangkamma ngaseng. Anjo pakkullea, passare battu ri Allata'ala lanri pangngamaseanNa mae ri katte. Lanri kammana, musti nipakei anjo pakkullea. Tau anggappaya passare untu' ambirittakangi biritta battua ri Allata'ala, musti nabirittakangi situru' pakkullena anjo biritta battua ri Allata'ala. 7 Tau niaka pakkullena untu' antulungi paranna tau, musti natulung tojeng-tojengi paranna tau. Tau niaka pakkullena untu' angngajara', musti angngajara' tojeng-tojengi. 8 Tau niaka pakkullena untu' ampakajarreki paranna tau, musti napakajarre' tojeng-tojengi paranna tau. Tau niaka pakkullena untu' assarei apa-apanna paranna tau, musti lammoro' pa'maiki, situru' siratannaya assare ri paranna tau. Tau niaka pakkullena untu' ammimping, musti ammimping tojeng-tojengi. Tau niaka pakkullena untu' ampappicinikangi pangngamaseanna mae ri paranna tau, musti napappicinikangi anjo pangngamaseanna situlusu' pa'mai'na mae ri paranna tau. 9 Angngamaseangko siagang ci'nong pa'mai'. Musti nukabirisi gau' ja'dalaka, siagang anna'gala' jarrekko mae ri apa-apa bajika. 10 Musti massing sikamaseang duduko sangkamma tau assari'battanga lalang se're balla'; kammayatompa massing sipirioloiko assare sallang. 11 Rajengko anjama-jama. Teako kuttui. Anjamako untu' Batara lalang sumanga' battua ri RohNa Allata'ala. 12 Musti rannui pa'mai'nu ma'minasa ri Batara; sa'barakko lalang kasusaanga, siagang teako lanrei appala' doang. 13 Tulungi parannu tu Karisteng ampa'gannaki kaparalluanna, siagang pakate'nei atinnu antarimai julu tappa'nu tenaya nuassengi ke'nanga antama' ri balla'nu. 14 Pappalakkangi barakka' mae ri Allata'ala tau pallaka panggaukanna mae ri kau. Pappalakkangi barakka', tea' laloko sarei kana-kana pattunra. 15 Amminawangko rannu siagang tau rannua; siagang amminawang tongko angngarru' siagang tau angngarruka. 16 Massing assiamakko siagang assibajikiko. Teako tinggi langgai, mingka pakatunai kalennu sangkamma tau tunaya. Teako angkanai kalennu cara'de' dudu ri sitojennaya. 17 Punna nia' tau a'gau' ja'dala' mae ri kalennu, teako balasaki siagang kaja'dallang. Gaukangi apa nakanaya ngaseng taua baji'. 18 Usahakangi sollannu akkulle assiama' ngaseng siagang taua lalang tallasa'nu. 19 Sikamma sari'battangku! Tea' laloko a'balasaki ri kaja'dallanna taua mae ri kau; boli'mi kamma na Allata'ala ampabattui hukkunganna. Nasaba' nia' tattulisi' lalang ri Kittaka angkanaya, “Nakana Batara, iNakkemi lambalasaki panggaukanna taua. INakkemi langhukkungi.” 20 Jari, punna cipuru' musunnu sarei kanre; na punna turerei, sarei je'ne' inung. Nasaba' punna kamma anjo panggaukannu mae ri ia, ma'nassa latu'guru' siri'-siri'mi anjo musunnu. 21 Teako pa'biangi kalennu nibeta ri kaja'dallanga, passangalinna musti nubetai anjo kaja'dallanga siagang panggaukang baji'.
1 Yangasenna taua musti mannuruki mae ri pamarentaya; nasaba' tena pamarenta tabattua ri Allata'ala kakoasanna. Siagang anne pamarenta ri kamma-kammaya anne, napajappai kakoasanna situru' Napassuroanga Allata'ala. 2 Lanri kammanami anjo, napunna nia' tau angngewai pamarentaya, sangkamma le'ba'mi angkanaya naewai anjo apa le'bakamo Napattantu Allata'ala. Na inai-nai appanggaukang kamma anjo iami langgappa hukkungang. 3 Nasaba' inai-nai a'gau' baji' tena naparallu malla' mae ri pamarentaya. Iaji tau a'gau' kodia musti malla'. Punna erokko tena numalla' ri pamarentaya, musti a'gau' bajikko, nanuanggappa pammuji. 4 Nasaba' anjo pamarentaya atanNa Allata'ala, anjamaya untu' kabajikannu. Mingka punna a'gau' ja'dalakko, memang musti mallakko mae ri pamarentaya; nasaba' tena naporo nia'naja koasana anghukkungi taua. Iami atanNa Allata'ala, ampabattuai hukkunganNa Allata'ala mae ri tau a'gau' ja'dalaka. 5 Lanri kammanami anjo namusti mannurukiko mae ri pamarentaya — teai lanri teanuja bawang nihukkung, mingka lanri ero'na memang todong pa'mai'nu. 6 Lanri kammana tommi anjo nanua'bayara' sima; nasaba' anjo pamarentaya pagaweNa Allata'ala ampajappayai anne tugasa'na memang. 7 Jari bayaraki mae ri pamarentaya apa siratanga nubayara' ri ia. A'bayarakko sima punna siratangko a'bayara' sima; siagang a'bayarakko sussung punna siratangko a'bayara' sussung. Musti nubilang lompoi tau siratang nubilang lompo siagang musti nupakala'biriki tau siratanga nupakala'biri'. 8 Teako kainrangangi apa-apa mamo manna pole ri nai, pantaranganna kainrangang pangngamaseanga ri massing para ikau. Nasaba' inai-nai angkamaseangi paranna tau, sangkammami angkanaya nagaukang ngasemmi apa-apa Napassuroanga Allata'ala le'baka napabattu Musa. 9 Nasaba' anjo hukkung-hukkung agama Yahudi angkanaya: Teako assalimaraki; teako ammunoi; teako a'lukkaki; teako cinnai ri apa-apanna parannu tau; yangasenna anjo siagang hukkung-hukkung maraengannaya pole, le'ba'mi nipakabodo a'jari se're hukkung, iamintu, “Kamaseangi parannu tau, sangkamma todong nukamaseanna batangkalennu.” 10 Inai-nai angkamaseangi paranna tau, tena olona la'gau' ja'dala' ri paranna tau. Jari inai-nai angkamaseangi paranna tau, sangkammami angkanaya nagaukang ngasemmi sikamma apa napassuroanga hukkung agamaya. 11 Pantaranganna ngaseng anjo pole, nuassengi angkanaya iaminne ri wattu kamma-kammaya anne nusiratang ambangung battu ri tinronu. Nasaba' kamma-kamma anne pila' ambaniangammi wattunta lanipasalama', naia ri wattu beru appakkaramulata a'jari tappa'. 12 A'birimmi allalo bangngia; natasalloami nasingara'. Jari, baji' maki' ammari anggaukangi gau'-gau' sassanga. Parallui nipipakei kalenta sanjata singaraka. 13 Musti nigaukangi apa-apa mala'birika, sangkamma biasaya nagaukang taua ri wattu singaraka; teako alla'bi dudu batenu assua'-suara', yareka teako ta'liwakki batenu angnginung sa'gennu nasa'ring. Teako assalimaraki, yareka teako appanggaukang kammai tu tena nungngasseng atorang. Teako assiba'ji, yareka teako assereati. 14 Boli'mi kamma na Batara Isa Almasi ampattantui apa siratanga nugaukang. Siagang teako mannuruki ri sipa'-sipa'na tau dorakaya sollanna nupasukku' nakacinnaia hawa napasunu.
1 Musti nutarimai siagang baji' tau lammaya tappa'na sangkamma sari'battannu. Teako a'geakki siagang ia ri passala' panggappana. 2 Nia' tau nakana a'rupa-rupai kanre-kanreang akkulle nakanre. Mingka nia' todong tau lammai tappa'na nanakana gangang-ganganji akkulle nakanre. 3 Inai-nai a'rupa-rupa akkulle nakanre, teai nacini' tunai tau kanre-kanreang attantuaji bawang nakanre; na inai-nai kanre-kanre attantuaji bawang nakanre, teai napasalai tau a'rupa-rupaya nakanre, nasaba' anjo taua nitarimami ri Allata'ala. 4 Inaikoka antu sa'gennu akkulle angngadeli atanna tau maraenga? Natu'gurukka yareka nambangungka anjo ataya, anjo urusanna karaenna. Na memang lammentengi nai' anjo ataya, lanri Makoasai Batara ampamentengi nai'. 5 Nia' tau angkana nia' allo attantu la'bi paralluanganga naallo-allo maraenganga; mingka nia' todong tau maraengang angkanaya yangasenna anjo allo-alloa sangkamma ngasenji. Boli'mi kamma, namassing napattantu panggappana taua. 6 Nia' tau ampa'jari la'bi paralluangangi allo-allo attantua, lanri ero'na napakala'biri' Batara. Nia' tau a'rupa-rupai nakanre, lanri ero'na napakala'biri' Batara, nasaba' napakei appala' sukkuru' mae ri Allata'ala anjo kanrea. Kammatommi anjo tau kanre-kanreang attantuaji bawang nakanre; anjo taua napakala'biriki Batara siagang appala' sukkuruki mae ri Allata'ala. 7 Tenanniakka tau attallasa' untu' kalenna bawang; siagang tenanniakka tau lamate untu' kalenna bawang. 8 Punna attallasakki', untu' Batara nakiattallasa'. Napunna mateki', untu' Batara todong nakimate. Jari, ri attallasatta yareka ri mateta, anne kalenta Batara pata. 9 Le'ba'mi mate Almasi nattallasa' ammotere'. Lanri kammanami anjo Na'jari Bataramo mae ri tau attallasaka siagang mae ri tau mateamo. 10 Jari, sikamma sari'battangku! Apa saba'na nanupasala sari'battang julu tappa'nu? Siagang apa saba'na nanucini' tunai? Ikatte anne lamange ngasenjaki' andallekang nakiniadeli ri dallekanNa Allata'ala. 11 Nia' tattulisi' lalang ri Kittaka angkanaya, “Nakana Batara, sikontutojenna, lasu'ju' ngasengi anynyomba taua ri dallekangKu; na sikontu rupataua massing lamangakui ri Nakke angkanaya iNakkemi Allata'ala.” 12 Jari musti laniadeli ngasengki' ri Allata'ala, lanri sikontu panggaukanta. 13 Lanri kammana, takkulleaki' massing sisalakang. Mingka usahakangi natena nugaukangi apa-apa akkullea ampasala oloangi sari'battang julu tappa'nu, sa'genna doraka. 14 Lanri assileo'na katallassangku siagang Batara Isa, tappa' sikalima' angkanaya sikontutojenna tena apa-apa harang ri passala'na sikontu apa-apa nikanrea; mingka harangi anjo apa-apaya mae ri se'reang tau, punna niharangngangi ri anjo taua. 15 Mingka punna passala' anjo apa nukanrea napa'risi pa'mai' sari'battang julu tappa'nu, tenamo namangngamaseang batenu appanggaukang. Punna le'ba'mo mate Almasi untu' anjo taua, teako balang parekangi a'jari panra' anjo taua passabakkang apa-apa nukanrea. 16 Lanri kammana, katutui sollanna tena nanicini' kodi ri parannu tau apa-apa nukanaya baji' ri kalennu. 17 Nasaba' punna lalang ri pamarentahanNa Allata'ala, tena naparallu nikanaya apa-apa akkullea nikanre yareka apa-apa akkullea niinung. Mingka ia parallua iamintu angkanaya mannuruki rupataua ri ero'Na Allata'ala, nakasiaki nikanaya salewangang ri pa'maika, kammayatompa karannuang Napassareanga RohNa Allata'ala. 18 Inai-nai kamma anjo batena allayani mae ri Almasi, iami lanikarannuang ri atinNa Allata'ala, kammayatompa nipakalompo ri sikamma tau maraenga. 19 Lanri kammana, ia parallua tuli niusahakang iamintu sikamma akkullea appa'nia' passiamakkang siagang sipaenteng mae ri sikamma taua. 20 Teako passabakkang apa-apa nikanre, nanupanraki apa-apa le'baka Napare' Allata'ala. Memang sikontu kanre-kanreanga hallala' ngasengi untu' nikanre; mingka punna passabakkang anjo apa nukanrea nadoraka taua, sala mako. 21 Bajikangang teako angnganrei dageng yareka teako angnginungi anggoro' yareka teako anggaukangi apa-apa mamo, punna passabakkang ia anjo na'jari doraka sari'battang julu tappa'nu. 22 Boli'mi kamma na ikau tommo anggaukangi anjo apa nupatappaka ri dallekanNa Allata'ala untu' kalennu. Inai-nai tena naranggasela anggaukangi apa annabaya, iami mate'ne. 23 Mingka inai-nai bata-bata angkanrei apa-apaya, nakamma nakanrena tonja anjo apa-apaya, iami lanipasala ri Allata'ala, nasaba' teai lanri tappa'na ri apa annabaya siagang salaya nappanggaukang anjo taua. Na apa-apa mamo nigaukang tena nasiagang tappa', sala ngasengi.
1 Ikatte tau tappa' tojeng-tojenga ri apa nipatappaka musti sa'barakki' punna akkabaratangi tau lammaya tappa'na mae ri katte. Takkulleaki' kasannangang kalenta bawang niboya. 2 Mingka ikatte musti nipakasannangi atinna paranta tau untu' kabajikanna, sollanna pila' katambang jarre'na tappa'na mae ri Allata'ala. 3 Nasaba' manna Almasi teai kasannangang KalenNa Nanawa-nawa. Nia' tattulisi' lalang ri Kittaka angkanaya, “Sikontu paccalla lamangea ri kalennu, tu'guru' mange ngasemmi ri Nakke.” 4 Sikontu anjo apa-apa niaka tattulisi' lalang ri Kittaka, lanipake ngasengi untu' angngajarakki'. Nasaba' anjo pappilajarang nitarimaya battu ri Kittaka naajarakki' a'jari sa'bara' siagang a'jari majarre' sanggenta akkulle manrannuang mae ri Allata'ala. 5 Poro Allata'ala, akkullea assarei kasa'barrang siagang panynyaleori rupataua, antulung ngasengko sollannu akkulle a'julu ati, mannuruki ri katallassanNa Isa Almasi. 6 Lalang ma'julu atinu nukkulle assama-sama mammuji mae ri Allata'ala, ManggeNa Batarata Isa Almasi. 7 Lanri kammana, paralluko massing sitarima siagang te'ne pa'mai', sangkamma nitarimanu todong ri Almasi untu' ampakala'biriki Allata'ala. 8 Nasaba', u'rangi, le'ba'mi Nalayani Almasi tu Yahudia, lanri ero'Na Napappicinikang angkanaya ma'nassa jarreki Allata'ala ri janjinNa, naNarupaimo anjo janjinNa mae ri boe-boeta. 9 Napa'jari tommi Isa bansa-bansa maraenga appakala'biri' mae ri Allata'ala, lanri baji' pa'mai'Na Allata'ala mae ri ke'nanga. Nia' tattulisi' lalang ri Kittaka, angkanaya, “Lanri kammanami anjo nakulamammuji-muji mae ri Katte ri tangnga-tangngana bansa-bansaya, lamakkelonga' mammuji-muji mae ri arenTa.” 10 Nia' todong pole tattulisi' angkanaya, “Ma'rannu-rannuko siagang umma'Na Allata'ala Napilea, ikau bansa-bansaya!” 11 Siagang nakana pole, “Pujimi Allata'ala, ikau sikontu bansa-bansaya, sikontu rupataua parallui mammuji mae ri Ia!” 12 Siagang kammami anne napaua pole Na'bi Yesaya, “Battu ri sossoranna Isai nia' lammumba sitau lammarentaya mae ri bansa-bansaya; Iami lanapanrannuangi anjo bansa-bansaya.” 13 Allata'alami tampa' panrannuannu. Poro Nabonei pa'mai'nu sikontu karannuang siagang salewangang, lanri tappa'nu mae ri Ia, sollanna lanri koasa RohNa Allata'ala nanupila' manrannuang mae ri Allata'ala. 14 Sikamma sari'battangku! Tappaka' angkanaya jai apa-apa baji' ri kau ngaseng. Jai todong apa-apa nuasseng, siagang akkulleko massing siajara'. 15 Mingka nia'ija apa-apa maraengang parallu kuterassi kupakaingakkangko anrinni ri suraka, situru' tugasa' Napassareanga Allata'ala mae ri nakke. 16 Napa'jarima' palayanNa Isa Almasi, sollangku nisuro mae ri bansa pantaranganna bansa Yahudia, iamintu bansa-bansa maraenga. Nipa'jarima' imang sollanna kubirittakang Kabara' Baji' battua ri Allata'ala mae ri ke'nanga, sollanna akkulle ke'nanga nitarima a'jari koro'bang mae ri Allata'ala. Kuminasai ke'nanga nanitangkasi ri RohNa Allata'ala, sollanna akkulle a'jari koro'bang matangkasa' mae ri Allata'ala. 17 Jari, lanri assileo'mi katallassangku siagang Isa Almasi, akkullemi kukalompoang pa'mai' jama-jamangku untu' Allata'ala. 18 Iaji nakubarani akkana kamma lanri inakkena Napake Isa Almasi ampappicinikangi apa Nagaukanga Isa, iamintu Napa'jari mannurukimi bansa-bansa maraenga mae ri Allata'ala. Kugaukammi anjo lalang kana-kana siagang panggaukang; 19 kammayatompa ilalang gau'-gau' appakalannasaka, siagang sukkaraka antama' ri akkala'na rupataua; yangasenna anjo koasaNa RohNa Allata'ala anggaukangi. Le'ba' ngasemmi kubirittakang sikamma Kabara' Baji' ri passala'na Isa Almasi mae ri taua, appakkaramula battu ri Yerusalem sa'genna ri Ilirikum. 20 Ia pa'minasangku iamintu poro akkullea' ambirittakangi Kabara' Baji' battua ri Allata'ala ri tampa'-tampa' tenayapa nale'ba' nalangngere' taua passala'na Isa Almasi. Nasaba' tena nakuero' sanrapang tau ambangung irate ri pondasi le'bakamo napadongko' tau maraenga. 21 Nia' tattulisi' lalang ri Kittaka angkanaya, “Sikamma tau tenayapa nale'ba' anggappai birittaNa, lanacini'mi; siagang tau tenayapa nale'ba' allangngere', lanapahammi.” 22 Iami anjo saba'na nakua'mole-molemo ero' battu angkunjungi ngasengko, mingka tuli nia' halangang. 23 Mingka kamma-kamma anne le'ba'mi jama-jamangku anjoreng ri daera-daeraya. Attaung-taummi salloku tuli ero' angkunjungi ngasengko. 24 Sallang punna a'lampa' mange ri pa'rasangang Spanyol, erokka' assengka ri kota nupammantangia; nakuma'minasa sollanna akkulleki' assibuntulu', nakukkulle a'rannu-rannu sinampe' siagang ikau ngaseng. Napunna le'baki anjo, kuminasai sollanna akkulle ngasengko ambantua' untu' anjo pa'lampangku mange ri Spanyol. 25 Mingka kamma-kamma anne erokka' a'lampa mange ri Yerusalem ampangngerangangi sumbangang untu' umma'Na Allata'ala niaka anjoreng. 26 Nasaba' le'ba'mi assamaturu' jamaah-jama'aka ri pa'rasangang Makedonia siagang Akhaya untu' assarei sumbangang sikamma sari'battang kasi-asia niaka ri alla'na umma'Na Allata'ala ri Yerusalem. 27 Kammami anjo le'baka natappuki ke'nanga siagang te'ne pa'mai'. Nasaba' sikontutojenna siratang memang tongi ke'nanga antulungi sikamma sari'battang kasi-asi niaka ri Yerusalem; nasaba' battu anjoremmi ri bansa Yahudia anggappa bansa-bansa maraenga sikamma barakka'Na Allata'ala. Jari, siratang tongi anjo bansa-bansa maraenga antulungi bansa Yahudia siagang barakka' pa'barang-barangang. 28 Punna le'ba'mo kupa'le'ba' anne tugasakku, siagang le'ba'mi kupabattu anne sumbangang le'baka nipasse're untu' ke'nanga ri Yerusalem, ero'ma' a'lampa mange ri Spanyol nakuassengka ri kota nupammantangia. 29 Punna battua' sallang mae ri kau ngaseng, mattantu jai barakka' battu ri Isa Almasi lakupabattuangko. 30 Lanri Batarata Isa Almasi, siagang lanri pangngamaseang RohNa Allata'ala, sanna' kupala'na mae ri kau ngaseng sollannu amminawang ngaseng todong attojeng-tojeng siagang inakke appala' doang mae ri Allata'ala. 31 Pappala' doanganga' sollangku akkulle ta'lappasa' battu ri limanna tau tenaya natappa' ri pa'rasangang Yudea; kammayatompa sollanna akkulle kupajappa tugasakku ampabattui anjo sumbanganga mae ri Yerusalem, siagang natarima baji' ke'nanga siagang te'ne pa'mai'. 32 Sa'genna, punna Nakaerokang Allata'ala, akkullea' battu mae ri kau ngaseng siagang baji'. Nakuakkulle anggappa panynyaleori ri tangnga-tangnganu ngaseng. 33 Poro Allata'ala, akkullea assarei salewangang rupataua, anrurungang ngasengko lalang ri katallassannu. Aming!
1 Eroki kupappiassengang ri kau ngaseng, sari'battang baineta, iamintu Febe. Iami ambantui jama'aka ri Kengkrea. 2 Tarimami anne sari'battanta, salaku kalase'renna umma'Na Batara. Kamma memang tomminjo batena tau tappaka mae ri Allata'ala musti massing sitarima. Tulungi punna nia' apa-apa naparalluang battu ri kau; nasaba' jai tommi le'ba' nabantu — kalase'renna tau le'baka nabantu iamintu inakke. 3 Pabattuanga' sallangku mae ri Priskila siagang Akwila, le'baka kuagang anjama untu' Isa Almasi. 4 Le'baki ke'nanga sike'de' mate lanri ero'na ke'nanga ampalilia' ri balaya. Appala' sukkurukka' mae ri ke'nanga; ba'lalo teai inakke bawang, mingka sikontu jamaah bansa-bansa maraenga appala' tarima kasi' ngasengi mae ri ke'nanga. 5 Pabattuang tonga' sallangku mae ri jamaah niaka a'rappungang ri balla'na ke'nanga. Sallangku mae ri Epenetus, kukamaseanga. Iami tau uru-urua tappa' mae ri Almasi ri sikontu daera niaka ri Asia. 6 Sallangku todong mae ri Maria. Iami le'ba' anjama terasa' untu' ikau ngaseng. 7 Pabattu tongi sallangku mae ri Andronikus siagang Yunias. Anjo ke'nanga a'julu pa'rasangangi siagang a'julu bansai siagang inakke, kammayatompa le'baki ke'nanga nitarungku siagang inakke. Ri tenanapa kutappa' mae ri Almasi, rioloangammi ke'nanga tappa'. Masahoroki ke'nanga mae ri sikamma tunisuroNa Allata'ala. 8 Sallangku mae ri Ampliatus, kukamaseanga, lanri para assileo'mi katallassangku siagang Batara. 9 Pabattuanga' sallang pappakala'birikku mae ri Urbanus, niaganga sipanjama-jamang untu' Almasi. Kammayatompa sallang pappakala'birikku mae ri Stakhis, kukamaseanga. 10 Sallangku mae ri Apeles. A'buttimi tamalanrena mae ri Almasi. Sallangku todong mae ri Aristobulus sibatu balla', 11 kammayatompa mae ri Herodion, julu pa'rasangangku siagang julu bansaku. Kammayatompa pole sallangku mae ri sikamma julu tappatta niaka ri balla'na Narkisus. 12 Sallangku mae ri Trifena siagang Trifosa, anjama terasaka allayani Batara, kammayatompa mae ri Persis kukamaseanga, le'baka todong anjama terasa' untu' Batara. 13 Sallangku mae ri Rufus siagang amma'na, kupasangkammaya todong amma' kalengku. Rufus tu nipilea ri Batara, siratanga nipuji. 14 Pabattuanga' sallangku mae ri Asinkritus, Flegon, Hermes, Patrobas, Hermas, siagang sikamma sari'battang julu tappatta niaka assiagang ke'nanga. 15 Sallangku mae ri Filologus siagang Yulia; kammayatompa mae ri Nereus siagang sari'battang bainena; mae ri Olimpas siagang sikamma tau tappa' niaka assiagang ke'nanga. 16 Massing sisareko sallang sikarimangngi salaku tu Karisteng. Sikamma jamaah-jama'aNa Almasi appikatu ngasengi sallang mae ri kau ngaseng. 17 Sikamma sari'battangku ngaseng! Sanna' kupala'na mae ri kau ngaseng: tutuko mae ri tau eroka appasisala-sala siagang tau eroka angkacoi tappa'na taua mae ri Batara. Assisalai anjo kammaya siagang apa le'baka nipangngajarrang mae ri kau. Pakabellai kalennu battu ri tau kammaya anjo. 18 Nasaba' anjo tau kammaya ngaseng panggaukanna, teai untu' Batarata Isa napanjama-jamang, passangalinna untu' napasu kalenna ke'nanga ero' napasukku'. Natipui tau tenaya nangngasseng apa-apa siagang kana-kana sanna' baji'na. 19 Naasseng ngasemmi taua angkanaya tamalanreako mae ri pangngajarang Kabara' Baji' battua ri Allata'ala. Na sannammo pa'maikku mae ri kau ngaseng lanri anjo passalaka. Kuminasai sollannu cara'de' mae ri apa-apa bajika, na nudongo' mae ri apa-apa ja'dalaka. 20 Allata'ala assarei salewangang rupataua; tasalloami naancuru' Billisika nampa naboli' irawangang kakoasannu. Poro tuli nibarakkaki ngasengko ri Batarata Isa Almasi! 21 Agangku Timotius, appikatui sallang mae ri kau ngaseng. Kammayatompa Lukius, Yason siagang Sosipater, iamintu julu pa'rasangangku siagang julu bansaku. 22 Antulisikai anne suraka iamintu inakke, Tertius. Appikatua' sallang passari'battangang mae ri kau ngaseng. 23 Gayus, appikatu tongi sallang mae ri kau ngaseng. Anjorenga' ri balla'na ammantang, siagang anjoreng tommaki' ri balla'na assambayang. Erastus, kapala bendaharana kotaya appikatu tongi sallang mae ri kau ngaseng, kammayatompa Kwartus sari'battanta. 24 Poro Nabarakkaki ngasengko Batarata Isa Almasi. Aming! 25 Nipujimi Allata'ala! Makoasai anjarreki tappa'nu, situru' Kabara' Baji' battua ri Allata'ala, iamintu ri passala'na Isa Almasi, le'baka kubirittakang. Kubirittakangi anjo passalaka situru' apa Napa'nyataya Allata'ala; iamintu ri sesena rancanaNa Allata'ala, a'bilangngang taungamo tanaassenga taua. 26 Mingka kamma-kamma anne, situru' passuroNa Allata'ala mannannunganga, le'ba'mi nipa'nyata siagang nipabattu anjo rancanaya mae ri sikontu bansa-bansaya, iamintu le'baka natulisi' na'bi-na'bia, sollanna tappa' ngaseng siagang mannuruki ngaseng ke'nanga mae ri Allata'ala. 27 Iami Allata'ala tenaya ruanna, kaminang bajika siagang annabaya. Poro Iami nipakalompo sa'genna satunggu-tungguna, lalang ri Isa Almasi! Aming! Sallangku, Paulus, atanNa Isa Almasi
1 Sikamma sari'battangku, anggota jama'aNa Allata'ala ri Korintus! Le'ba' mako nikio' ri Allata'ala a'jari umma'Na, lanri taunNako Isa Almasi; assiagang ngaseng sikontu tau niaka ri kere-keremae anynyomba ri Batarata Isa Almasi, iamintu Batarana ke'nanga siagang Batarata todong. Inakke Paulus siagang sari'battanta Sostenes, ma'minasa poro nibarakkakiko siagang nisare ngasengko salewangang ri Allata'ala Manggeta, siagang Batara Isa Almasi. Anne suraka kutulisiki salaku tunisuroNa Isa Almasi, niangkaka ri Allata'ala, lanri ero' KalenNa Allata'ala. 4 Tuli appala' sukkurukka' mae ri Allata'ala saba' ikau ngaseng, nasaba' nutarimami passare malammoro'Na Allata'ala, tete ri Isa Almasi. 5 Akkalumanynyang mako lalang ri yangasenna apa-apaya ri katallassanga, lanri a'jari taunNa mako Isa Almasi. Jaimi pangngassengannu, siagang cara'de' mako ampangngajarrangi anjo pangngassenganga. 6 Iami anjo a'jari butti angkanaya baji'mi antama'na ri atinnu anjo biritta ri passala'na Isa Almasi; 7 sa'genna tenamo nukakurangang barakka' manna sirupa, lalang nutayanna kabattuanNa Batarata Isa Almasi ampa'nyatai KalenNa mae ri sikontu rupataua. 8 KalenNa Almasi ampakajarrekko sa'genna kala'busang, sollanna punna battu poleangi sallang, tena callanu narapikang. 9 Akkullei nipatappa' tojeng-tojeng Allata'ala. Iami Allata'ala le'baka angkiokko untu' a'jari se're siagang Ana'Na, iamintu Isa Almasi, Batarata. 10 Sikamma sari'battangku! Kupalaki, lalang arenNa Batarata Isa Almasi, sollannu a'julu kana; sollanna tena nanusisa'la'-sa'la'. Paralluko a'jari se're, a'julu ati siagang a'julu pikkirang. 11 Nasaba' nia' tau battu ri balla'na Klo"e ampabattui ri nakke angkanaya nia' passigea'-geakkang ri kau ngaseng. 12 Natabaya kanangku iamintu nia' ri kau angkana, “Inakke amminawanga' ri Paulus,” nia' angkana, “Inakke amminawanga' ri Apolos,” nia' todong angkana, “Inakke amminawanga' ri Petrus,” kammayatompa nia' angkana, “Inakke amminawanga' ri Almasi.” 13 Masakang ta'bage-bagei Almasi? Tena nale'ba' nisalli' Paulus untu' ikau! Sai tena todong nanije'nekko untu' a'jari tumminawanna Paulus? 14 Sukkurukka', nasaba' tena manna sitau le'ba' kuje'ne' ri kau ngaseng, pantaranganna Krispus siagang Gayus. 15 Tapporo tena lalo manna sitau angkana iaji nakuje'ne' sollanna a'jari tumminawang ri nakke. ( 16 O, memang! Inakke anje'neki Stefanus sibatu balla'. Inakke memang anje'neki ke'nanga. Mingka pantaranganna anjo, turu' pangngu'rangingku tenamo tau maraeng le'ba' kuje'ne'.) 17 Nasuroa' Almasi teai untu' a'je'ne' tau, passangalinna untu' ambirittakangi Kabara' Baji' battua ri Allata'ala, siagang pole, anjo kugaukangi teai lanri kacara'dekang a'bicara salaku rupatau, sa'genna la'jari sia-siamo anjo koasa kamateanNa Isa Almasi ri kayu sallika. 18 Nasaba' anjo kabara' kamateanNa Isa Almasi a'jari kabara' balle-ballei mae ri tau lamangea ri kapanrakanga. Mingka untu' ikatte tu nipasalamaka ri Allata'ala, anjo kabaraka iami a'jari pammatei ri Napa'nyatana kakoasanNa Allata'ala. 19 Nasaba' Nakana Allata'ala lalang ri Kittaka, “LaKukacoi kaporeanna tau cara'deka siagang laKupa'lanynyaki pammahanna tau niaka pangngassenganna.” 20 Jari, apa matu-matunna anjo tau niaka pangngassenganna? Apa matu-matunna sikamma anjo tau cara'deka? Apa matu-matunna tu panritaya ri anne linoa? Le'ba'mi Napakasingara' Allata'ala angkanaya kaporeanna anne linoa poro balle-balle lompo bawang! 21 Nasaba' manna pole antekamma cara'de'na rupataua, mingka takkulleai mangngasseng ri Allata'ala punna lanri kacara'dekanna bawang. Mingka lanri mangngamaseanNa Allata'ala, Naero'mo ampasalamaki sikamma tau tappaka ri Ia, tete ri anjo biritta napabattua ikambe, nicini' a'balle-ballea ri anne linoa. 22 Tu Yahudia annuntuki gau' appakalannasa' salaku butti, kammayatompa tu Yunania naboyai lalang ri kaporeang niaka ri anne linoa. 23 Mingka ikatte anne iaji bawang nibirittakang iamintu biritta ri passala'na Isa Almasi le'baka mate ri kayu sallika. Anjo birittaya napakanassui pa'mai'na tu Yahudia, siagang nicini' a'balle-ballei ri bansa-bansa maraenga. Na bansa maraenga nakanai kadongokang anjo kammaya. 24 Mingka untu' sikamma tau le'bakamo nikio' ri Allata'ala — baji' tu Yahudi yareka bansa-bansa maraenga — iami a'jari pammatei ri butti Napa'nyatana kakoasanNa siagang kabajikanNa Allata'ala. 25 Nasaba' ia dongoka nicini' ri Allata'ala, iami la'bi poreangngang nakaporeanna rupataua. Na ia lammaya nicini' ri Allata'ala iami gassingangngang nakagassinganna rupataua. 26 Sikamma sari'battangku! Cobasai u'rangi antekamma katallassannu ri wattunnu Nakio' Allata'ala. Sike'de' duduji ri kau tau pore, yareka tau koasa, yareka tau tinggia empoanna ri paccini'na rupataua. 27 Nasaba' Nakunjungi memang tongi Allata'ala ampilei tau nicini' dongoka ri anne linoa; sollanna a'jari siri'-siri' tau cara'deka. Siagang Napile tommi Allata'ala tau nicini' lammaya ri anne linoa, sollanna a'jari siri'-siri' tau makassaka siagang magassinga ri anne linoa. 28 Napilemi Allata'ala apa-apa nicini' rawaya, nicini' tunaya, yareka nicini' tenaya matu-matunna ri anne linoa, sollanna Naancu'-ancuru' Allata'ala apa-apa nicini' mala'birika ri anne linoa. 29 Sollanna punna kamma anjo, tenamo manna sitau akkulle ampattampo-tampoangi kalenna ri dallekanNa Allata'ala. 30 KalenNa Allata'ala ampasse'rei katallassannu siagang Isa Almasi. Tete ri Isa Almasi nanipa'jariki' cara'de'. Siagang tete ri Iatommi naNapasibajiki maki' Allata'ala mae ri KalenNa, iamintu Napa'jari maki' umma'Na, kammayatompa Napa'jari bebasa' maki'. 31 Jari, sangkamma tattulisika lalang ri Kittaka, “Inai-nai ero' ampakalompoi pa'mai'na, musti napakalompoi pa'mai'na lanri apa-apa Nagaukanga Batara.”
1 Sikamma sari'battangku! Ri wattungku battu mae ri kau, nakupabattu rancanaNa Allata'ala tenayapa naassengi anne linoa, teai kacara'dekanna anne linoa kupake, yareka teai bicara ta'liwa'-liwaka baji'na nilangngere'. 2 Nasaba' le'ba'mi kupakkalepu ri atingku angkanaya ilalang niakku ri tangnga-tangnganu ngaseng, tena maraeng apa-apa lakupabattu mae ri kau, pantaranganna passala'na Isa Almasi; marioloangannaya iamintu angkanaya le'ba'mi mate ri kayu sallika. 3 Sanna' lammana kalengku siagang annekkerekka' napakamma malla' ri wattungku nia' ri tangnga-tangnganu ngaseng. 4 Teai bicara sannaka baji'na nilangngere' lanri kacara'dekang ri rupataua kupake ampabattui anjo birittaya mae ri kau ngaseng. Mingka kammaminjo caraku ampabattui untu' ampa'butti angkanaya makoasai RohNa Allata'ala. Akkulle ngasemmi nucini' anjo passalaka. 5 Kammaminjo bateku anggaukangi, sollanna teai lanri kacara'dekang rupatau nanutappa' mae ri Almasi, passangalinna lanri koasaNa Allata'ala. 6 Mingka manna nakamma, kupake tonji pangngassenganga ampabattui anjo birittaya mae ri tau rapang ti'nokamo katallassang rohanina. Mingka anjo pangngassenganga teai pangngassengang battu ri lino, yareka pangngassengang battu ri sikamma tau anna'galaka koasa ri anne jammanga, ia lalanynyaka sallang kakoasanna. 7 Anjo pangngassengang kupabattua iamintu pangngassengang battu ri Allata'ala. Anjo pangngassenganga tanaassengai anne linoa, mingka iami anjo le'baka Napasadia Allata'ala ri wattu tenanapa nipa'jari anne linoa, untu' katallassang mate'neta ngaseng. 8 Tena manna se're tau anna'galaka koasa ri anne jammanga angngassengi anjo pangngassenganga. Nasaba' ka'de' naassemmi ke'nanga, tantu tenamo nanasalliki ke'nanga anjo Batara kaminang mala'birika. 9 Mingka sangkamma apa tattulisika lalang ri Kittaka angkanaya, “Apa tenaya nale'ba' nacini' yareka nalangngere' rupataua, kammayatompa tenaya nale'ba' ammumba lalang ri pikkiranna rupataua, iaminjo Napasadia Allata'ala untu' tau mangngamaseanga ri Ia.” 10 Mingka le'ba'mi Napappiassengang RohNa Allata'ala mae ri katte. Iami anjo RohNa Allata'ala ansalidiki ngasengi sikontu apa-apaya, sa'genna pole rancanaNa Allata'ala kaminang taccokkoa. 11 Sai akkullea angngassengi bonena atinna se'rea tau, iamintu atinna tonji anjo taua? Kammatommi anjo rapanna Allata'ala. Ia akkullea angngassengi bonena atinNa Allata'ala iamintu RohNa tonji Allata'ala! 12 Na ikatte anne teai roh battu ri anne linoa nisareangki', passangalinna Roh battu ri Allata'ala; sollanna niasseng ngaseng apa le'baka Napassareang Allata'ala mae ri katte ngaseng. 13 Lanri kammana, punna napakasingara' ikambe sikamma anjo passala' battua ri Allata'ala mae ri tau nikoasaia ri RohNa Allata'ala, teai kacara'dekang battu ri rupataua napake ikambe ampakasingaraki anjo passalaka, mingka situru' ajarang battua ri RohNa Allata'ala. 14 Inai-nai tena nikoasai ri RohNa Allata'ala, takkulleai natarima anjo apa Napakasingaraka RohNa Allata'ala. Nasaba' a'jari sangkammaji kadongokang anjo passalaka mae ri anjo tau kammaya. Anjo tau kammaya takkulleai napahang anjo passalaka, nasaba' anjo passalaka takkulleai nipahang situru' apa-apa kacinikanga. 15 Inai-nai nikoasai ri RohNa Allata'ala, akkulle ngasengi napahang sikontu apa-apaya; mingka kalenna anjo taua manna sitau tania' akkulle ampahangi. 16 Nasaba' nia' tattulisi' lalang ri Kittaka angkanaya, “Maka inai akkulle ampahangi pikkiranNa Batara? Siagang inai akkulle ampakaingaki?” Mingka ikatte niaki pikkiranNa Almasi ri katte!
1 Sikontutojenna sari'battangku ngaseng, takkullea' a'bicara ri kau ngaseng sangkamma tau nikoasaia ri RohNa Allata'ala. Mingka sanrapanja' bawang a'bicara tu mannurukia ri ero'na anne linoa; sanrapanga' ana' loloa lalang ri katappakkanga mae ri Almasi. 2 Riolo sanrapangi kanre ana' lolo kusareangko, jari teai kanre tau toa; nasaba' tanukulleapi angnganre kanre terasa'. Mingka ri kamma-kammaya anne sanrapang tena tompa nanuakkulle angkanrei anjo kanre terasaka, 3 nasaba' mannuruki ijako ri cara sipa'-sipa' rupataua lalang ri katallassannu. Nasaba' punna massing sikimburu ijako siagang masarro ijako assiba'ji para ikau, sai iami anjo buttina ma'nassanu mannuruki ijako ri cara sipa'-sipa' tau tenaya natappa' ri Allata'ala lalang ri katallassannu? 4 Punna nia' angkana, “Ikambe Paulus kipinawang,” na ia maraenganga angkana, “Ikambe Apolos kipinawang,” sai iaminjo buttina ma'nassana angkanaya appanggaukang kamma ijako tu linoa? 5 Sikontutojenna inai anjo Apolos? Siagang inai anjo Paulus? Ikambe anne poro palayanNa jaki' bawang Allata'ala, ia le'baka ampimpingko sollannu tappa' mae ri Almasi. Ikambe poro nigaukannaji bawang jama-jamang Napassuroanga Batara mae ri kambe. 6 Inakke sanrapanja' tau a'lamunga, na Apolos sanrapang ansirangi je'ne', mingka KalenNa Allata'ala ampattimboi anjo lamung-lamunga. 7 Jari ia parallua iamintu Allata'ala, nasaba' Iami appattimbo. Tau a'lamunga siagang tau anynyiranga je'ne' tena naparallu; 8 anjo ruaya sangkammai. Massing lanatarimai pahalana situru' pakkaresoanna. 9 Ikambe sangkamma jaki' para tau anjama ri Allata'ala; na ikau sanrapangko kokonNa Allata'ala. Yareka sanrapang tongko balla' bangunanNa Allata'ala. 10 Sanrapanga' tu nisare kacara'dekang a'jari panrita balla' ri Allata'ala. Iami anjo kacara'dekanga kupake le'ba' ampadongkoki batu pondasina anjo bangunanga, nampa tau maraeng ampatulusuki ambangung irateanna anjo pondasia. Sikontu taua musti naparhatikangi baji'-baji' antekamma batena musti ambangung irateanna anjo pondasia. 11 Nasaba' le'ba'mi Napattantu Allata'ala angkanaya tena ruanna Isa Almasi akkulle a'jari sanrapang pondasina anjo bangunanga. 12 Nia' ammake bulaeng ambangung irateanna anjo pondasia, nia' ammake pera', nia' ammake batu paramata, nia' ammake kayu, nia' todong ammake ruku' yareka batang ase. 13 Sikontu apa-apa le'baka najama taua, massing lakacinikangi sallang punna battu poleang Almasi. Nasaba' pepe' sallang lampa'nassa ngasengi apa-apa massing le'baka nagaukang rupataua. Pepe' lanipake angnguji siagang ampattantui baji'-kodina anjo jama-jamanga. 14 Punna parrang ri pepe' anjo bangunang nibangunga irateanna anjo pondasia, lannarimami hadia anjo tau ambangunga. 15 Mingka punna akkanrei anjo bangunang najamaya, larugimi anjo taua; kalenna lasalamaki, mingka sanrapangi tau ta'lappasaka battu ri pepeka. 16 Maka nuassenji angkanaya ikau antu sanrapangko balla'Na Allata'ala? Siagang angkanaya niaki RohNa Allata'ala ammantang lalang ri kalennu? 17 Punna nia' tau ampanraki balla'Na Allata'ala, anjo taua lanipanraki tommi ri Allata'ala. Nasaba' anjo balla'Na Allata'ala matangkasaki, naia nikanaya balla'Na Allata'ala iamintu ikau. 18 Tea' laloko niakki antipui kalennu. Punna nia' tau ri tangnga-tangnganu nakana kalenna nia' pangngassenganna situru' pangngukkuru'na anne linoa, anjo taua musti a'jari dongoki, sollanna akkulle a'jari tau niaka tojeng pangngassenganna. 19 Nasaba' tau nicini' cara'deka ri anne linoa, sikontutojenna nicini' dongoki ri Allata'ala. Nia' tattulisi' lalang ri Kittaka angkanaya, “Battu ri kacara'dekanna tonji tu cara'deka, nanijakkala'mo kananna ri Allata'ala.” 20 Nia' todong tattulisi' angkanaya, “Naassengi Batara angkanaya pikkirang tena ngaseng matu-matunna anjo pikkiranna tu cara'deka.” 21 Lanri kammana, tea' laloko niakki ampalece dudui rupataua, nasaba' yangasenna nipassareang ngasemmi mae ri kau, a'jari ikau pata: 22 Paulus, Apolos, Petrus, anne linoa, katallassanga siagang kamateanga, anne jammanga yareka jammang labattua, yangaseng-ngasenna ikau ngaseng pata. 23 Na ikau taunnako Almasi, kammayatompa anjo Almasi Allata'ala pata.
1 Alle rapammi angkanaya ikambe anne palayang-palayanNaki' Almasi; ikambemi nisare tugasa' ambirittakangi sikamma rancanaNa Allata'ala, tenayapa naassengi anne linoa. 2 Uru-uruna nituntu' ri anjo palayang kammaya iamintu tamalanrea mae ri karaenna. 3 Untu' inakke, tena nanjari apa-apa angkanaya antekamma panggappanu — yareka panggappana tau maraenga — mae ri kalengku. Ba'lalo manna inakke tena todong naparallu angkanaya antekamma panggappaku mae ri kalengku todong. 4 Tena nakuassengi kalengku angkanaya nia' salaku manna pole passala' apa mamo; mingka anjo takkulleai a'jari butti angkanaya tena memang salaku. Kalenna bawang Batara akkulle ampattantui angkanaya sala' yareka tena nakusala. 5 Lanri kammana, nasaba' tenapa narapiki wattunna, teako akkaro-karo dudui ampattantui angkanaya salai yareka tena nasala se'rea tau. Tayangi sa'genna battu sallang Batara. Iami lassungke ngasengi sikontu rahasia taccokkoa lalang ri sassanga. Iami lampakacinikang ngasengi sikontu apa le'baka narancana lalang ri massing atinna taua. Iapi anjo wattua nampa massing lannarima taua pujiang siratannaya battu ri Allata'ala. 6 Sikamma sari'battangku! Lanri untu' kaparalluannu ngaseng, nakalengkumo siagang Apolos kupitujui anne bicaraya; sollannu akkulle accini' conto mae ri kambe, angkanaya antekamma batenu appilajara' ampahangi anne bicara angkanaya, “Anna'gala' majarre' mako mae ri paratorang niaka.” Sa'genna tenamo manna sitau akkulle ampakalompo dudui se'rea tau, nampa nacini' tuna maraenganga. 7 Inaika ampa'jariko malompoangang na tau maraenga? Sai yangaseng-ngasenna sangnging apa-apa nutarimaji battu ri Allata'ala. Jari angngapa nanuero' ampattampo-tampoangi kalennu, sangkamma le'ba' angkana anjo apa-apa niaka ri kau teai apa-apa nutarima? 8 Memang tenamo apa-apa nuparalluang pole! Nasaba' akkalumanynyang mako! A'jari karaeng mako! Na ikambe tena. Teai sipato' baji'na ka'de' a'jari karaeng tojeng-tojeng mako, sollanta akkullemo siagang ammarenta. 9 Nasaba' turu' panggappaku, ikambe tunisuroNa Allata'ala, le'ba' maki' Napare' paccini'-cinikang Allata'ala ri dallekanna rupataua siagang malaekaka. Ikambe sangkamma maki' tau tuna le'baka nihukkung mate ri dallekanna tau jaia siagang nigora-gorai ri bonena linoa. 10 A'jari tau dongo' maki' lanri Almasi, nanua'jari cara'de'mo tu Karistenga! Ikambe a'jari lamma maki', na ikau a'jari gassing mako! Ikambe nicalla maki' na ikau nipuji-puji mako! 11 Sa'genna kamma-kamma anne nakasia'mi ikambe nikanaya cipuru' siagang atturere; care-carena ikambe ia mami ammantang niaka ri kalenna ikambe; nisessa maki' ri taua; tenamo tampa' pammantanganna ikambe; 12 akkareso terasa'mi ikambe amboyai kaparalluang allo-alloa. Punna nitunraiki', nibalasa'mi siagang barakka'; punna nisessaki', sa'bara' mamaki'; 13 punna nabicara kodiki' taua, nibalasa'mi siagang kana-kana baji'. Sanrapang bajikangang mami loro-lorona anne linoa na ikambe; sa'genna kamma-kamma anne nipasanrapang mamaki' ra'masa'na anne linoa. 14 Teai lanri erokku ampakasirikko nakutulisi' anne kammaya mae ri kau, mingka lanri erokku ampakaingakko sangkamma ana'-ana' kalengku. 15 Nasaba' inakkemi a'jari manggenu ngaseng, manna pole ebara' angkana nia'mo sampulo sa'bu gurunnu. Lalang attallasa'numo a'jari se're siagang Almasi inakkeji bawang a'jari manggenu, nasaba' inakke ampabattui anjo Kabara' Baji' battua ri Isa Almasi mae ri kau. 16 Lanri kammanami anjo nasanna' kupala'na ri kau ngaseng, sollannu angngalle conto mae ri nakke. 17 Iami anjo nakusuromo Timotius battu mae ri kau ngaseng. Salaku tumminawang ri Almasi, sangkammai ana' kalengku, kukamaseanga. Iami ana' akkullea nipatappa'. Iami lampakaingakko ri passala'na katallassang kupinawanga ri wattungku a'jari tappa'mo mae ri Almasi; iamintu katallassang le'baka kupangngajarrang mae ri sikontu jamaah niaka ri kere-keremae. 18 Nia' siapa are battu ri kau a'jari tampo, lanri nakana kapang ke'nanga talabattua' mae ri kau ngaseng. 19 Mingka punna Naerokang Batara tena tabattuku mae ri kau ngaseng. Iapi anjo wattua sallang nakucini' todong apa akkullea nagaukang anjo tau tampo kammaya; jari teai poro bicaranna bawang ke'nanga kulangngere'. 20 Nasaba' punna ammarenta Allata'ala lalang ri katallassanna taua, tena naporo lalang ri bicaranna bawang nipa'butti mingka lalang pole ri koasa katallassanna anjo taua. 21 Jari pilei mami apa la'bi nungaia! Apa erokko nakuterassi bateku angngajarakko punna battua' mae ri kau, yareka kulammai siagang kupakkamaseangi?
1 Sikontutojenna battumi mae ri nakke kabara'na angkanaya nia' tau ta'liwa'-liwa' batena a'gau' bawang ri tangnga-tangnganu; nia' tau assalimara' siagang amma' aona. Manna tau kapereka ta'gau' kammayai! 2 Mingka manna nakamma, ero' ijako tuli attampo-tampo. Sikontutojenna, musti si'nai nyawanu siagang musti nupassuluki anjo tau a'gau' kammaya battu ri alla'nu. 3 Bellai batangkalengku battu ri kau ngaseng, mingka pa'maikku niaki ri tangnga-tangnganu. Jari erokka' a'bicara sangkamma angkana niakka' ri tangnga-tangnganu, “Lalang arenNa Batara Isa Almasi nakupau angkanaya, anjo tau le'baka anggaukangi anjo panggaukang ra'masa' kammaya, musti nihukkungi!” Punna a'rappungangko pasanrapangi angkanaya nia' tonga' hadere' lanri koasaNa Isa Almasi. 5 Musti nupassareangi anjo taua mae ri Billisika; sollanna panra' tubuna siagang lanri kammana nanipasalama' rohna ri wattu battuna pole ammotere' Batara. 6 Tena nabaji' anjo apa nupattampo-tampoanga! Nuassemmi kapang anne lampangkana angkanaya, “Pa'gambang sike'deka ampa'bakkaki labu' le'baka nileo'.” 7 Pelaki rolong anjo pa'gambang salloa, iamintu dosaya, sollannu a'jari sanrapang labu' berua nileo', tangkasaka battu ri pa'gambanna dosa salloa. Nakuasseng angkanaya kamma mako anjo, lanri sadiami passua'-suarrang allo Paskata: Almasi a'jari sanrapang gimbala' Paska, le'baka nikoro'bangkang. 8 Jari, maeko nanipakalompo anjo passua'-suarranga siagang roti tenaya nammake pa'gambang; iamintu roti a'jaria pangngebarang mae ri apa-apa tenaya callana siagang Nakaerokanga Allata'ala. Teaki' nakipakalompoi anjo passua'-suarrang Paskaya siagang roti niaka pa'gambang sallona, iamintu pa'gambang dosaya siagang kaja'dallanga. 9 Kupaumi lalang ri surakku allaloa, sollanna tena nanuassileo' siagang tau nangaia a'gau' bawang. 10 Naia kupakkanaya tau a'gau' bawang teai tau tenayapa nanaassengi Allata'ala, yareka tau angngoa, yareka paballe-balle, yareka tau anynyomba ri barhala, tena sikaliapa naassengi Allata'ala! Teai ke'nanga kupakkanai! Nasaba' punna musti nupakabellai kalennu battu ri ke'nanga, tantu assulu' taba sikali mako battu ri anne linoa. 11 Mingka ia kupakkanaya iamintu, angkanaya teako asse'rei siagang tau nakanaya kalenna Karisteng, mingka a'gau' bawangi, yareka angngoai, yareka anynyombai barhala, yareka nangai napau kodi paranna tau, yareka painungi, yareka palukkaki. Manna ammempoa sipangnganreang siagang ke'nanga tea' laloko! 12 Memang, teai urusangku angngadeli tau tenaya na Karisteng. KalenNa Allata'ala langngadeli ke'nanga. Mingka ri sesena anggota-anggota jama'aka, sai musti kalenna tonji jama'aka angngadeli ke'nanga? Nia' tattulisi' lalang ri Kittaka angkanaya, “Bongkai tau ja'dalaka battu ri alla'nu.”
1 Angngapa nunia' barani a'lampa mae ri haking tenaya natappa' ri Allata'ala antuntuki parannu tau tappa' ri Allata'ala, punna assisala pahangko siagang ia? Angngapa natena numae ri umma'Na Allata'ala ampassilolongangi? 2 Tenaka nanuassengi angkanaya umma'Na Allata'ala langngadeli anne linoa? Jari punna ikau memang langngadeli anne linoa, maka tanukulleai ampassilolongangi anjo parkara kammaya ca'dina? 3 Tenaka nanuassengi angkanaya ikatte langngadeli malaekaka? Jari la'biangampa pole punna parkara katallassang allo-alloaja. 4 Jari punna ammumba parkara kammaya anjo maka lanuerangi mae ri tu tena sikalia empoanna lalang ri jama'aka? 5 Punna kamma, teai sipato' appakasiri'-siri'na! Tantu nia'ja tu cara'de' ri tangnga-tangnganu ampakabajiki punna nia' para tu Karisteng assisala pahang! 6 Mingka angngapa nania' ri kau mange antuntuki paranna tu Karisteng ri dallekanna tu tenaya na Karisteng? 7 Teako angkana mangea bawang akkara-kara ri dallekanna tu tenaya na Karisteng nanusala; ba'lalo nampa mako assisala-sala para ikau nanunibeta lompomo. La'bi bajikangangi punna tanugappaya kaadelanga yareka nipakarugiko naia appakammaya anjo! 8 Mingka, ba'lalo ikaumi kalennu a'gau' taadele' siagang ampakarugi tu maraenga! Ba'lalo parannu tonji tau tappa' nupakamma! 9 Maka nuassenji angkanaya takkulleai a'jari umma'Na Allata'ala tu tenaya namannuruki? Teako eroki nitipu. Inai-nai a'gau' bawang, inai-nai anynyomba ri barhalaya, inai-nai a'gau' bawang, inai-nai a'gau' sala siagang paranna bura'ne yareka paranna baine, 10 inai-nai a'lukka', angngoa, siagang painung, inai-nai nangai ambicara kodi paranna tau siagang ampaccoki paranna tau — yangasemmi anjo tau kammaya takkullea a'jari umma'Na Allata'ala. 11 Nia' siapa are jainu appanggaukang kamma anjo riolo. Mingka kamma-kamma anne le'ba' mako nitangkasi battu ri dosa-dosaya, sollannu a'jari umma' matangkasa'Na Allata'ala. Le'ba' mako assibajiki ammotere' siagang Allata'ala lanri tappa'nu mae ri Batara Isa Almasi siagang lanri koasa Roh battu ri Allata'alata. 12 Nia' tau angkana, “Yangaseng-ngasenna akkulleji nigaukang.” Mingka untu' inakke tena nayangasenna a'matu-matu kugaukang. Jari manna na'rupa-rupa apa-apa akkulle kugaukang, mingka tena nakuero' ampassareangi kalengku nikoasai ri apa-apa mamo. 13 Nia' todong angkana, anjo kanrea untu' battang, siagang anjo battanga nipasadiai untu' napantamai kanre. Mingka anjo ruaya, iamintu kanrea siagang battanga lanipattaena ngasengi ri Allata'ala. Anjo batangkalea takkulleai nipake untu' a'gau' bawang, mingka untu' poro nipake allayani mae ri Batara. Na Batarami lamparakai anjo batangkalea. 14 Le'ba'mi nipattallasa' poleang ammotere' Isa Almasi ri Allata'ala battu ri kamateanga; kammatommi anjo, laNapattallasa' poleang maki' ammotere' Allata'ala lanri kakoasanNa. 15 Nuassemmi angkanaya anjo batangkalennu anggota batangkalenNa Almasi. Jari, maka akkullei kualle anjo anggota batangkalenNa Almasi, nampa kupa'jari anggota ri batangkalenna baine ja'dalaka? Tena sikali nakkulle! 16 Yareka tanuassengapi angkanaya inai-nai ampasiallei batangkalenna siagang baine ja'dalaka, a'jari se'remi batangkalenna siagang anjo baine ja'dalaka? Nasaba' nia' tattulisi' lalang ri Kittaka angkanaya, “Anjo ruaya a'jari se'remi.” 17 Mingka inai-nai ampa'jari se'rei kalenna siagang Batara, assileo'mi RohNa Batara siagang rohna anjo taua. 18 Pakabellai kalennu battu ri sikamma panggaukang bawanga. Nasaba' sikontu dosa maraenga nagaukanga taua, pantarangang batangkalennai anjo taua kajariang. Mingka inai-nai a'gau' bawang, battuanna a'gau' dosami mae ri kalenna. 19 Musti nuassengi angkanaya anjo batangkalennu pammantanganNa RohNa Allata'ala. Anjo RohNa Allata'ala ammantangi lalang ri kalennu. Kammayatompa KalenNa Allata'ala ampassareangi anjo RohNa mae ri kau. Anjo kalennu teaimi ikau pata, mingka Allata'ala pata. 20 Le'ba' mako Naballi Allata'ala, siagang lappasa'mi ballinnu. Lanri kammana, katutuimi anjo batangkalennu, sollanna akkulle nupa'matu-matu untu' ampakala'biriki Allata'ala.
1 Kamma-kamma anne erokka' a'bicara ri passala' apa nupaua lalang ri sura'nu ngaseng. Punna nia' bura'ne tena na'bunting, anjo bajiki. 2 Mingka sollanna tena nanigodai taua anggaukangi apa-apa tenaya matu-matunna, bajikangangi punna massing nia' baine kalenna se're-se'rea bura'ne, kammayatompa massing nia' bura'ne kalenna se're-se'rea baine. 3 Sikontu tu bura'nea musti nagaukang bajiki kawajibanna mae ri bainenna, kammayatompa sikontu tu bainea musti nagaukang bajiki kawajibanna mae ri bura'nenna; jari rua-rua musti massing nagaukangi kawajibanna siagang baji'. 4 Bainea tena nakalenna koasa mae ri tubuna; mingka ia koasaya mae ri tubuna iamintu bura'nenna. Kammayatompa, bura'nea tena nakalenna koasa mae ri tubuna; mingka ia koasaya mae ri tubuna iamintu bainenna. 5 Teako assikabellai salaku tau akkalabini. Akkulle jako assikabellai untu' poro sinampekang punna assamaturu' jako. Sollanna punna kamma, akkulleko sipappala' doangang natena nunggappa paccoba. Mingka musti ammoterekko sikambani salaku tau akkalabini. Punna takammaya, akkulleko ninyonyo' ri setanga, nasaba' takkulleai nutahang hawa napasunu. 6 Anne tena nakuparentako punna kupauangko, mingka kupakaingakko. 7 Sikontutojenna la'bi kungaiangangi punna a'jari sangkamma ngasengi inakke taua. Mingka massing le'ba' ngasemmi taua anggappa passare battu ri Allata'ala. Nia' tau anggappa passare kamma anne, nia' anggappa passare kamma anjo. 8 Iaminne pappakaingakku mae ri tau tenayapa na'bunting siagang tau jandayamo: Bajikangangi punna akkale-kale tuli mako sangkamma inakke. 9 Mingka punna tanukulleai amparrangngi napasunu, bajikangang a'buntingko. Nasaba' bajikangangi punna a'buntingko kala sanna' dudua lompona hawa napasunu. 10 Naia kuparentakanga mae ri tau le'bakamo a'bunting iaminne: (Sikontutojenna teai inakke assarei parenta mingka Batara.) Inai-nai baine le'ba'mo a'bunting, takkulleai nabokoi bura'nenna. 11 Mingka punna nabokoimi bura'nenna, musti tenamo na'bura'ne, yareka musti ammotereki mae ri bura'nenna. Na se'rea bura'ne takkulleai natalla' bainenna. 12 Naia pappakaingakku mae ri mara'-maraengannaya, iaminne: — anne pappakainga' kalengku, teai Batara — punna nia' sitau bura'ne Karisteng a'baine sitau baine tenaya natappa' mae ri Almasi, naero'ja anjo bainenna assikatallassang siagang ia, anjo taua takkulleai natalla' bainenna. 13 Kammayatompa punna sitau baine Karisteng a'bura'ne sitau bura'ne tenaya natappa' mae ri Almasi, naero'ja anjo bura'nenna assikatallassang siagang ia, anjo bainea takkulleai antallaki bura'nenna. 14 Nasaba' bura'ne tenaya natappa' a'jari nipassiratangi ri Allata'ala, a'jari umma'Na Allata'ala lanri pa'buntinganna siagang anjo baine a'jariamo umma'Na Allata'ala. Kammayatompa, anjo baine tenayapa natappa', akkullei a'jari nipassiratang a'jari umma'Na Allata'ala, lanri pa'buntinganna siagang anjo bura'ne a'jariamo umma'Na Allata'ala. Punna takammaya, anjo ana'-ana'na ke'nanga tantu la'jari sangkammai ana'-ana' kapereka, padahala' anjo ana'-anaka nipasanrapangi anggota umma'Na Allata'ala. 15 Mingka punna nabokoi anjo taua bainenna yareka bura'nenna Karistengamo, teako tahangi. Laluasako ri anne passalaka, nasaba' Nakellai Allata'ala sollannu tasisala-salaya lalang ri katallassannu. 16 Nasaba' ikau salaku baine, iamintu baine tappakamo mae ri Batara, antekamma lakkulle nuasseng angkanaya ma'nassa takkulleai nupasalama' bura'nennu? Kammayatompa ikau salaku bura'ne Karistengamo, antekamma lakkulle nuasseng angkanaya ma'nassa takkulleai nupasalama' bainennu? 17 Parallui massing nuatoro' katallassannu situru' Nakaerokia Batara, iamintu situru' apa le'bakamo Napattantu Allata'ala ri wattunnu Nakio' Allata'ala a'jari tau tappa' mae ri Ia. Iami anjo paratorang le'baka kupangngajarrang ri sikontu jama'aka. 18 Alarapanna, punna nia' tau le'ba' memammi nisunna' ri wattunna natarima pakkio'Na Allata'ala, teami nausahakangi ampattaenai anjo pammateina sunnaka. Kammayatompa, punna nia' tau tenapa nale'ba' nisunna' ri wattunna natarima pakkio'Na Allata'ala, teami nasuro sunnaki kalenna. 19 Nasaba' nipinawangi yareka tena anjo paratorang sunnaka, rua-rua tena naparallu. Ia parallua iamintu mannurukia ri sikamma parentaNa Allata'ala. 20 Boli'mi kamma massing attallasa' taua sangkamma ri wattunna natarima pakkio'Na Allata'ala. 21 Punna atako ri wattunnu nikio', tena naparallu nususai kalennu annawa-nawai anjo passalaka. Mingka punna nia' se're wattu nunggappa kasampatang a'jari tu bebasa', pakemi anjo kasampatanga. 22 Nasaba' punna nia' se're ata tappa'mi mae ri Batara, anjo taua a'jarimi umma'Na Batara siagang a'jarimi tau bebasa'. Na punna nia' tu bebasa' a'jari tappa'mo mae ri Batara, a'jarimi atanNa Almasi. 23 Le'ba' mako niballi ri Allata'ala, siagang lappasa'mi ballinnu. Lanri kammana, teako passareangi kalennu a'jari ata mae ri rupataua. 24 Jari, ikau sikamma sari'battangku, manna pole antekamma lampa-lampana katallassannu ri wattunnu nikio', paralluko tuli attallasa' ilalang ri ero'Na Allata'ala. 25 Kamma-kamma anne passala'na tau tenayapa na'bunting. Ri sesena anne passalaka tena nakuanggappa parenta battu ri Batara. Mingka salaku tau akkullea nipatappa' lanri pangngamaseanNa Allata'ala, erokka' ampakaingakko. 26 Nasaba' jaina kasusaang akkulle antabaki' kamma-kamma anne, kupikkiriki angkanaya bajikangangi punna kamma tommo anjo kamma-kammaya anne katallassanna taua. 27 Punna takkala a'baine mako, teako pelakki anjo bainennu. Punna tenapa nu'baine, tea' mako a'boyai baine. 28 Mingka teaiji dosa punna a'baineko. Kammayatompa punna nia' tulolo a'bunting, anjo teai dosa. Mingka lajai kasusaang nagappa anjo tau a'buntinga. Naerokka' sollannu nipakabella battu ri anjo kasusaang-kasusaang kammaya. 29 Pattujungku kammai anne sari'battang: Tenamo najai wattu ri katte. Appakkaramula ri kamma-kammaya anne, sikontu tau a'baineamo parallui attallasa' sanrapang tau tenayapa na'baine; 30 inai-nai angngarru', sanrapangi tau tenaya nasi'na nyawana; inai-nai ammakkala', sanrapangi tau tenaya narannu; inai-nai le'ba'mo ammalli apa-apa, sanrapangi tau tenaya apa-apanna; 31 siagang inai-nai jai urusanna ri passala'na pakkalinoanga, sanrapangi tau tenaya najampangi anjo passalaka. Nasaba' tasalloami anne linoa niaka nicini' ri kamma-kammaya anne lalanynya' ngasengi. 32 Kukellaiko ta'lappasa' ngaseng battu ri kasusaanga. Tau tenaya bainenna akkullei napasse're pikkiranna mae ri apa-apa Nakaerokia Batara, sollanna akkulle napakasannang pa'mai'Na Batara. 33 Mingka tau niakamo bainenna jaiangammi anne pakkalinoanga napikkiri', lanri ero'na napakasannang nyawana bainenna; 34 kale'bakkanna ta'bagemi pikkiranna. Baine tenaya na'bura'ne, yareka se'rea tulolo, lala'bi jaiangammi ero'Na Batara napikkiri', lanri ero'na napassareang sikontu katallassanna a'jari Allata'ala pata. Mingka baine niakamo bura'nenna, napasse'remi pikkiranna mae ri passala' pakkalinoanga, lanri eroki napakasannang nyawana bura'nenna. 35 Yangasenna anne untu' kabajikang kalennu nakupauangko; teai lanri ero'nu kupisangkai appakamma anne yareka appakamma anjo. Ia kukaerokia iaji bawang angkanaya sollanna akkulle nugaukang apa-apa annabaya siagang apa-apa siratanga; kammayatompa sollanna akkulle nupasse're pikkirannu mae ri apa-apa Nakaerokia Batara. 36 Punna nia' tau angkasu'mangi ri kalenna angkanaya tena nasiratang batena appanggaukang mae ri parekang bainenna, yareka takkulleai naparrangngi hawa napasuna, kammayatompa parallumi nasa'ring a'buntinga, boli'mi kamma na'bunting ke'nanga. Tena nasala punna a'buntingi ke'nanga. 37 Mingka punna nia' tau le'ba'mi natappuki lalang ri nyawana angkanaya tala'buntingai, siagang natenaja nanipassai, bajiki anjo apa nagaukanga; bajiki punna tena na'bunting, assala' akkulleji naparrangangi anggaukangi kammaya anjo. 38 Bodona kana, bajiki punna a'bunting taua, kammayatompa bajikangangi pole punna ta'buntinga taua. 39 Inai-nai baine le'ba' a'bunting, tassikkoki anjo bainea mae ri bura'nenna lalang attallasa'na anjo bura'nenna. Punna matemo anjo bura'nenna, ta'lappasa'mi anjo bainea. Akkullemi a'bunting poleang siagang bura'ne nakaerokia, assala' a'bunting cara tu Karistengi. 40 Mingka la'bi upakangangi punna tenamo na'bunting poleang. Anne panggappaku tonji; mingka ri pakkasiakku, lanri koasa RohNa Allata'ala nakupau anne sikammaya.
1 Kamma-kamma anne ri passala'na kanre nipassareanga mae ri barhalaya. Memang annabai apa napaua taua angkana, “Ikatte cara'de' ngaseng maki'.” Mingka anjo kacara'dekanga akkulle napa'jari tampo taua; na anjo pangngamaseanga akkullei nabangung kalenna taua. 2 Punna nia' tau nakana kalenna jaimi apa-apa naasseng, sikontutojenna tenapa naasseng bajiki anjo apa-apaya. 3 Mingka inai-nai attojeng-tojeng mangngamaseang mae ri Allata'ala, iami niasseng baji' ri Allata'ala. 4 Ri passala'na nikanaya angnganre kanre le'bakamo nipassareang mae ri barhalaya sikontutojenna anjo barhalaya apa tena nanikana nia'. Iaji niasseng angkanaya se'reji Allata'ala; tena ruanna. 5 Memang jai todong apa-apa niareng rewata siagang karaeng; baji nairate ri langika kammayatompa ri tompo'na buttaya. 6 Mingka untu' ikatte, se'reji bawang Allata'ala. Iami Manggeta, ampa'jariai sikontu apa niaka. Untu' Iami nakiattallasa'. Kammayatompa se'reji Batara, iamintu Isa Almasi. Tete ri Iami nanipa'jari sikontu apa niaka, kammayatompa lanri Iami nakiattallasa'. 7 Mingka manna nakamma, tena nayangaseng taua angngassengi anjo passalaka. Nia' biasai riolo anynyomba mae ri barhalaya. Jari lanri kammanami anjo nasa'genna kamma-kamma anne tuli nakanana ke'nanga angkanaya anjo kanre le'baka nipassareang mae ri barhalaya a'jarimi kanre barhala. Jari punna nakanrei ke'nanga anjo kanrea, nakana dorakai kalenna ke'nanga; nasaba' tenapa najarre' tappa'na ke'nanga. 8 Sikontutojenna teai anjo kanrea pila' ampakabajiki passisambunganta siagang Allata'ala. Punna nikanre anjo kanrea, tena apa-apa passawallang nigappa. Kammayatompa punna tanikanrea tena tonja apa-apa karugianta. 9 Mingka tutuko! Gassingka passabakkang sangka' rupana nugaukang na'jari doraka todong tau maraenga, lanri tenanapa najarre' tappa'na ke'nanga. 10 Ia kupakkanaya iaminne: Alarapanna ikau, jarreka tappa'nu, sitabangko ammempo angnganre lalang ri balla' barhalaya, nampa nia' tau ancinikko. Punna tena najarre' tappa'na anjo taua, tantu labaranimi anjo taua angkanrei anjo kanre le'baka nipassareang mae ri barhalaya. 11 Lanri kammana, passabakkang ikaumi na'jari sala oloang anjo tau tenaya najarre' tappa'na. Padahala' untu' iatommi anjo taua namate Almasi. 12 Na punna nugaukang kasalang kammaya anjo mae ri parannu tu Karisteng — iamintu tu Karisteng lammaya tappa'na — doraka mako mae ri Almasi. 13 Lanri kammana, punna passabakkang apa kukanrea nadoraka sari'battangku, tena sikalimo nakuero' angkanrei anjo dageng kammaya. Nasaba' gassingka passabakkang inakke nadoraka sari'battangku.
1 Sai inakke tau bebasakka'? Sai inakke tunisuroNa' Allata'ala? Maka tenapa nakuciniki Isa, Batarata? Maka teaiko wassele' jama-jamangku untu' Batara? 2 Punna padeng taeroka taua angngakuia' salaku tunisuroNa Allata'ala, kaminang sike'de'na ikau numangakui! Nasaba' a'jarinumo tu Karisteng, iami anjo a'jari butti angkanaya tunisuroNa memang tonga' Allata'ala. 3 Punna nia' tau ancalla', iaminne pappialingku: 4 Maka tena nakusiratang anggappa kanre siagang je'ne' inung lanri jama-jamangku? 5 Maka tena nakusiratang angngerang sitau baine tu ri ballakku lalang lampaku, sangkamma nagaukanga sari'battanNa ngaseng Batara Isa, siagang tunisuroNa Allata'ala maraenganga, kammaya Petrus? 6 Yareka inakkeji bawang siagang Barnabas musti amboya kale-kalei kaparalluang katallassangku? 7 Tenanniakka tantara angngongkosi kale-kalei kalenna lalang ri tugasa'na! Tenanniakka tau a'lamung apa-apa natanakanrea anjo wassele' lamung-lamunna! Tenanniakka tau akkatuo sapi natakkullea nainung dadi' battua ri anjo sapi nakatuoa! 8 Teai lanri battu ri pangalamang katallassang allo-alloa bawang anne kupabattua mae ri kau; passangalinna lanri kammatommi anjo nipaua lalang ri Kittaka. 9 Lalang ri Kitta' Musa nia' tattulisi' kammaya anne, “Teako jempangi bawana sapi masarroa nupake akkareso.” Maka sapia nataba anne kananNa Allata'ala? 10 Yareka ikatte nataba? Memang untu' ikatte anjo niaka tattulisi'. Nasaba' inai-nai anjama koko siagang antangkasi anjo kokoa, siratang memang tongi anjo taua ma'minasa langgappa bageang battu ri wassele' jama-jamanna ri anjo kokoa. 11 Jari ikambe anne le'ba' maki' sanrapang appakioro' bine rohani ilalang ri katallassannu ngaseng. Na punna anggappa ikambe barakka' pa'barang-barangang battua ri kau ngaseng, maka nukana jai dudumi natuntu' ikambe battu ri kau ngaseng? 12 Punna nia' ha'na tau maraenga amminasai anne battu ri kau ngaseng, maka tena nala'bi niakkangang ha'na ikambe na ke'nanga? Mingka inakke tenapa nakupakei anjo ha' kammaya. Nasaba' la'bi kungaiangangi kalengku antanggong ngasengi anjo sikammaya naia appa'niaka kasukkarang, akkullea anghalangi pa'la'banganna Kabara' Bajika ri passala'na Almasi. 13 Tantu nuassemmi angkanaya inai-nai anjama lalang ri Balla'Na Allata'ala, battu anjoremmi ri Balla'Na Allata'ala anggappa kanre ke'nanga. Siagang inai-nai angngurusuki tampa' pakkoro'bangnganga, anggappa tongi bageang battu ri anjo koro'bang nipassareanga anjoreng. 14 Kammatommi anjo, le'ba'mi Napattantu Batara angkanaya inai-nai ambirittakangi anjo Kabara' Bajika, musti nisarei kaparalluang katallassanna lanri anjo biritta napa'la'banga. 15 Mingka manna nakamma, inakke tenale'bakapi kupake manna sirupa anjo ha' kammaya. Siagang punna kutulisi' anne suraka mae ri kau ngaseng, teai lanri erokku sollanna nupassareang anjo sikammaya sumpaeng mae ri nakke. Nasaba' erokanganga' matea naia tappelaka sirikku lanri passabakkang kammaya anjo sumpaeng. 16 Nasaba' takkullea' ampakatinggi pa'maikku punna passabakkang iaja anjo kubirittakanna Kabara' Baji' battua ri Allata'ala; nasaba' Allata'ala assuroa' anggaukangi anjo jama-jamanga. Cilakama' kusa'ring punna tena nakubirittakangi anjo Kabara' Bajika! 17 Ebara' angkana battu ri ero' kalengku nakugaukang anjo jama-jamanga, akkulle memanga' attayang gaji. Mingka iaji nakubirittakang anjo Kabara' Bajika lanri nisuro memang tonga'. Allata'ala assarea' tugasa' anggaukangi anjo jamanga. 18 Jari punna kamma apa passawallangku? Iaminne passawallangku: angkanaya akkullei kubirittakang anjo Kabara' Bajika, natena manna sitau kubattali untu' angngongkosia', lanri tenana nakutuntuki anjo ha' siratanga ri nakke salaku tau ambirittakangai anjo Kabara' Bajika. 19 Inakke anne tena manna sitau ampare' ata'; inakke tau bebasakka'. Mingka manna nakamma, kupa'jari atami kalengku mae ri tau jaia. Naiaji kuappakamma anjo sollanna pila' jai tau akkulle kuerang mae ri Almasi. 20 Kupa'jari kalengku sanrapang tu Yahudi mae ri tu Yahudia, sollanna akkulle kuerang tu Yahudia mae ri Almasi. Kupa'jari kalengku sanrapang tau mannurukia ri hukkunna Allata'ala napabattua Musa mae ri tu attallasaka situru' hukkung napabattua Musa; manna sikontutojenna natenaja kutassikko' ri anjo hukkunga. Naiaji kuappakamma anjo, sollanna akkulle kuerang tau kammaya ngaseng anjo mae ri Almasi. 21 Kupa'jari kalengku sanrapang teaia' tu Yahudi, tenaya natarimai hukkung napabattua Musa. Mingka tena nakutamannurukia ri hukkung-hukkunNa Almasi. Iaji kuappakamma anjo sollanna akkulle kuerang tau kammaya ngaseng anjo mae ri Almasi. 22 Kupa'jari kalengku sanrapang tau tenaya najarre' tappa'na ri tangnga-tangngana tau tenaya najarre' tappa'na, sollanna akkulle kubeso' ke'nanga a'jari tumminawang ri Almasi. Bodona kana, kupa'jari kalengku sanrapang apa-apa mamo, sollanna a'rupa-rupai carana nakkulle kuerang taua mae ri Almasi nanipasalama'. 23 Iaji nakugaukang ngaseng sikammaya anjo, sollanna akkulle kupa'la'bang Kabara' Baji' battua ri Allata'ala, kammayatompa sollanna kunibarakkaki todong. 24 Tantu nuasseng ngasenji angkanaya punna appa'lumba taua, para lari ngasengi anjo tau appa'lumbaya; mingka se'reji langgappa hadia. Lanri kammana, usahakammi antekamma batenu lari sollanna nugappa anjo hadiaya. 25 Inai-nai a'latihang, musti naparrangngipi kalenna ri sangka' rupaya apa-apa. Naia naappakamma anjo lanri ero'na nipakalongi bunga pammetang, iamintu bunga akkullea kalumeng. Mingka ikatte anne niparrangngi kalenta ri sangka' rupaya lanri erotta nipakalongi bunga tenaya nakkulle kalumeng. 26 Lanri kammanami anjo nakulari mae ri tampa' attantua tujunna. Alarapanna punna attandinga' a'bossere', tena nasambarang bateku anja'guru'. 27 Kupassareangi kalengku nilati terasa' sa'gengku akkulle a'jari kassa'. Ia nakuappakamma anjo sollanna tena nakajariang angkanaya inakke angkioki taua amminawang appa'lumba nakalengku nisorongboko.
1 Sikamma sari'battangku! Parallui nuu'rangi apa le'baka kajariang ri boe-boeta ri wattunna amminawang ke'nanga ri Musa. Nila'langi ke'nanga siagang rammang, siagang nipasalamaki ke'nanga a'limbang ri Tamparang Ejaya. 2 Sanrapang nije'ne'mi ke'nanga lalang ri anjo rammanga siagang lalang ri anjo tamparanga, sollanna akkulle ke'nanga a'jari tumminawang ri Musa. 3 Para angnganremi ke'nanga kanre rohani sangkammaya, 4 siagang para angnginummi ke'nanga je'ne' inung rohani sangkammaya. Angnginung ngasemmi ke'nanga battu ri je'ne' assuluka ri bulu' batu rohani niaka anrurungangi ke'nanga; anjo bulu' batua iamintu KalenNa Almasi. 5 Mingka manna nakamma mamo, jaiangangi ri ke'nanga taningaia ri Allata'ala; iaminjo saba'na nasanna' jaina maya'na ke'nanga attambung ri parang lompoa. 6 Yangasemmi anjo a'jari conto mae ri katte, untu' ampakaingakki' sollanna tena nicinna mae ri apa-apa ja'dalaka sangkamma ke'nanga. 7 Kammayatompa sollanna tena ninynyomba todong barhala sangkamma nagaukanga ke'nanga. Nia' tattulisi' lalang ri Kittaka angkanaya, “Appakkaramulami anjo bansaya angnganre angnginung, kammayatompa a'dansa-dansa untu' anynyomba ri barhalaya.” 8 Ikatte takkulleaki' anggaukangi nikanaya a'gau' bawang, sangkamma nagaukanga ke'nanga. Nasaba' nia' ruampulo antallussa'bu jaina battu ri ke'nanga mate lalanna sialloa, lanri nagaukanna kammaya ke'nanga. 9 Takkulleaki' anso'ri Batara sangkamma nagaukanga ke'nanga riolo, sa'genna mate nitotto' ke'nanga ri ulara'. 10 Takkullea tongki' a'moro-moro, akkunrareng; sangkamma nagaukanga ke'nanga riolo, sa'genna nibuno ke'nanga ri Malaeka'na Kamateanga. 11 Yangasemmi anjo kajariang mae ri ke'nanga, untu' a'jari conto mae ri tau maraenga. Kammayatompa nitulisi' ngaseng tommi anjo apa kajarianga untu' a'jari pappakainga' mae ri katte ngaseng. Nasaba' kamma-kamma anne nia' maki' attallasa' ri kala'busanna jammanga. 12 Inai-nai nakana kalenna kassa' ri pammentenganna, parallui tutu, sollanna tena natu'guru'. 13 Sikamma paccoba nukasiaka, sangnging paccoba samara' ngaseng nakasia' rupataua. Mingka tuli jarre'Na Allata'ala mae ri janjinNa. Tena nalaNabalang parekangko nicobai alla'bi battu ri pakkullenu. Punna natabako paccoba, Iami lassareko kajarrekang sollannu akkulle attahang. 14 Lanri kammana, sikamma sari'battang kukamaseanga, paralluko angkabirisi anjo panggaukang anynyombaya mae ri barhalaya. 15 Kupaumi anne mae ri kau ngaseng, kubilanga tau cara'de' annimbang bicara. Parallui nupikkiri' baji'-baji' anne bicara kupaua. 16 Ri wattunta sipangnginungang anggoro' siagang appala' sukkuru' mae ri Allata'ala, sai iaminjo a'jari pammatei angkanaya a'jari se're ngaseng maki' siagang Almasi lalang ri kamateanNa? Kammayatompa ri wattunna nibage-bage anjo roti se'rea nampa assama-samaki' angkanrei, sai iaminjo a'jari pammatei angkanaya a'jari se're maki' lalang ri batangkalenNa Almasi? 17 Lanri se'reji bawang roti, na iami anjo roti se'rea nikanre nipassama-samai, ma'nassami angkanaya ikatte anne tu jaia a'jari se're maki' batangkale. 18 Alle sai parhatikang tu Yahudia. Nakanrei ke'nanga anjo kanre nipassareanga mae ri barhalaya irate ri pammantangang koro'banga; jari a'jari se'remi ke'nanga siagang anjo tampa' koro'banga. 19 Apa nataba anne kanangku? Anjo barhalaya siagang kanre nipassareanga ri barhalaya tena sikali matu-matunna. 20 Anjo apa nipassareanga ri tampa' koro'banga untu' barhalaya, teai Allata'ala nisare, passangalinna setang-setanga. Na tena kuero' punna a'jari se'reko siagang setanga. 21 Takkulleako angnginung battu ri pangnginungang anggoro'Na Batara, nampa angnginung tongko battu ri pangnginungang anggoro'na setanga. Takkulleako angnganre ri mejanNa Batara, nampa angnganre tongko ri mejanna setanga. 22 Yareka erokki' ampa'jari Batara akkimburu'? Maka kassakangangki' na Batara? 23 Nia' tau angkana, “Akkulleki' anggaukangi sikontu apa eroka nigaukang.” Annabai! Mingka tayangasenna anjo apa ningaia a'matu-matu ri katte. “Akkulleki' anggaukangi sikontu apa eroka nigaukang” — mingka tayangasenna anjo nikaerokia akkulle ambangungi katallassanta. 24 Takkulleai taua poro kaparalluang kalennaji bawang naboya. Sikontu taua parallui naboya todong kaparalluanna tau maraenga. 25 Sikamma dageng niaka nibalukang ri pasaraka akkullei nukanre. Tea' mako paressai rolong, manna pole nania' bata-batana nyawanu. 26 Nasaba' nia' tattulisi' lalang ri Kittaka angkanaya, “Anne linoa siagang sikontu bonena, Batara ngaseng pata.” 27 Punna nia' tau tenaya na Karisteng angkiokko mange angnganre ri balla'na, nanutarima anjo pakkio'na, kanremi sikamma apa-apa napattoananga ri kau. Tea' mako paressai rolong angkana battu kemae assala'na anjo kanrea, sollanna tena nabata-bata lalang nyawanu. 28 Mingka punna nia' angkana mae ri kau, “Anne kanrea le'ba'mi nipassareang mae ri barhalaya,” tea' mako kanrei anjo kanrea, lanri paralluna nuparhatikang kaparalluanna anjo taua, kammayatompa lanri batami lalang nyawanu. 29 Ia natabaya kanangku iamintu, teai nyawanu bata mingka nyawana anjo taua. Nia' kapang akkuta'nang angkana, “Jari, musti nibatasi kabebasangku lanri batana nyawana tau maraenga? 30 Punna appala' sukkurukka' ri Allata'ala angkanrei kanrea, angngapa nakunacalla taua, nakule'ba'mo appala' sukkuru' mae ri Allata'ala?” 31 Apa-apa mamo nugaukang — angnganreko yareka angnginungko — gaukammi anjo untu' ampakala'biriki Allata'ala. 32 Bajikimi batenu attallasa', sollanna tena napassabakkang ikau na'gau' dosa tau maraenga; baji' na tu Yahudi yareka bansa maraenga, yareka anggota jama'aNa Allata'ala. 33 Pasangkammami bateku attallasa' batenu todong attallasa'. Inakke kuusahakangi sollanna sannang ngaseng taua mae ri nakke; mingka teai lanri nia'na kaparalluang kalengku kuboya. Iaji kuboya iamintu sollanna nipasalama' ngaseng ke'nanga.
1 Iaminjo conto battu ri nakke mae ri kau. Mingka inakke conto battu tonji ri Almasi kupinawang. 2 Siratangko kupuji nasaba' tuli nuu'rangia' siagang tuli nuta'gala' jarreki pappilajarang le'baka kupassareang mae ri kau. 3 Mingka nia' ija se're passala' kukellai nuasseng, iamintu angkanaya Almasi a'jari sanrapang ulu mae ri sikontu bura'-bura'nea; kammayatompa bura'nea a'jari sanrapang ulu mae ri massing tu bai'-bainena, kammayatompa pole Allata'ala a'jari sanrapang ulu mae ri Almasi. 4 Punna natongko' ulunna tu bura'-bura'nea ri wattunna appala' doang yareka ri wattunna napabattu biritta battua ri Allata'ala ri dallekanna tu jaia, nahinai Almasi. 5 Siagang punna tena na'bongong tu bai'-bainea ri wattunna appala' doang yareka ri wattunna napabattu biritta battua ri Allata'ala ri dallekanna tu jaia, nahinami tu bura'-bura'nena a'jari kapalaya mae ri kalenna. Punna kamma anjo, sanrapangi le'baka nicukkuru' ulunna anjo bainea. 6 Nasaba' punna nia' tu baine taeroka a'bongong, bajikangangi punna nicukkuru' ulunna yareka nigoncing uu'na, sollanna a'jari pammatei angkanaya nihinai anjo tu bainea. Jari bajikangangi punna a'bongongi. 7 Tena naparallu tu bura'-bura'nea natongko' ulunna, nasaba' iami sanrapang carammeng ampappicinikangai KalenNa siagang kalompoanNa Allata'ala. Mingka tu bai'-bainea a'jarimi sanrapang carammeng ampappicinikangai kalompoanna tu bura'-bura'nena, 8 nasaba' tena nabattu ri tu bai'-bainea nanipa'jari tu bura'-bura'nea, passangalinna tu bai'-baineaji nipa'jari battu ri tu bura'-bura'nea. 9 Siagang teai untu' kaparalluanna tu bai'-bainea nanipa'jari tu bura'-bura'nea, passangalinna tu bai'-baineaji nipa'jari untu' kaparalluanna tu bura'-bura'nea. 10 Iami anjo saba'na, sollanna napakasannang atinna sikontu malaekaka musti tuli ammakei bongong tu bai'-bainea untu' a'jari pammatei angkanaya niaki irawangang kakoasanna tu bura'-bura'nena. 11 Mingka manna nakamma ilalang katallassanta, ikatte tu Karistenga, tena nammenteng kale-kale bai'-bainea, ta'lappasa' battu ri tu bura'-bura'nena; kammayatompa tena nammenteng kale-kale bura'-bura'nea, ta'lappasa' battu ri tu bai'-bainena. 12 Nasaba' manna nabattu ri tu bura'nea nipa'jari tu bainea ri uru-uruna, mingka ri le'ba'namo anjo battu ri tu baineami lassu' tu bura'nea; mingka sikontu-kontuna Allata'ala ngaseng assala'na. 13 Coba sai nutimbang anne passalaka: Maka bajiki punna tena na'bongong tu bai'-bainea ri wattunna appala' doang mae ri Allata'ala ri dallekanna tau jaia? 14 Akkullemi nuasseng battu ri pangalamannu, angkanaya tasiratangai nicini' tu bura'nea punna la'bu uu'na. 15 Mingka nisarei uu' tu bainea nakatongkokang ulunna, siagang punna la'bu uu'na iaminjo a'jari kala'birang mae ri kalenna. 16 Jari, punna nia' tau ero' ampa'geakkangi anne passalaka, se'reji bawang akkulle kupau; iamintu angkanaya, ikambe siagang sikamma jama'aNa Allata'ala, se'reji bawang kabiasanta lalang ri jama'aka, tena pantaranganna. 17 Mingka ri passala'na anne eroka kusero kana pole, takkulleako kupuji. Nasaba' punna a'rappungangko anggaukangi sambayannu teai apa-apa langngeranga kabajikang wassele'na, mingka kakodianga. 18 Nasaba' uru-uru kulangngereka iamintu angkanaya punna a'rappungangko salaku jamaah, assisa'la'-sa'lakko a'jari a'rupa-rupa golongang nampa assigea'-geakko. Na anne kabaraka kukira-kira nia' kamma tojenna. 19 Mingka lania' memang todong passisa'la'-sa'lakkang ri tangnga-tangnganu, sollanna kabateang sallang angkanaya kereanga tu Karisteng tojeng-tojeng. 20 Sikontutojenna teai ParjamuanNa Batara nugaukang punna a'rappungangko. 21 Nasaba' punna angnganreko, massing kalennu tonji nupangngalleang; massing a're'bukangko, sa'genna nia' tanggappaya nania' maraengang nala'ju sa'genna nasa'ring. 22 Angngapa nakkulle kamma? Sai massing nia' balla'nu? Akkulleko angnganre angnginung massing ri balla'nu. Yareka erokko anghinai jama'aNa Allata'ala siagang ampakasiriki tu kasi-asia? Jari apa musti kukana ri kau ngaseng? Musti kupujiko? Tena! Tena sikali nalakupujiko! 23 Nasaba' anjo kupangngajarranga mae ri kau, pangngajarang kutarima battu ri KalenNa Batara: angkanaya ri bangngi nipassareanna Isa, Batarata, angngallei roti; 24 na ri wattunna le'ba' appala' sukkuru' mae ri Allata'ala, Nabage-bagemi anjo rotia, nampa Nakana, “Iaminne batangkalengKu nipassareanga untu' ikau ngaseng. Gaukammi anne kammaya untu' pangngu'rangi mae ri Nakke.” 25 Kammatommi anjo ri le'ba'na angnganre, angngalle tommi pangnginungang anggoro', nampa Nakana, “Anne anggoroka, iami a'jari pammatei Parjanjiang BeruNa Allata'ala, nipa'jari assaya lanri cerakKu. Kere-kere wattu nanuinungi, gaukammi anne kammaya untu' a'jari pangngu'rangi mae ri Nakke.” 26 Memang, kere-kere wattu nanukanre anne rotia siagang nuinung anne anggoroka, nubirittakammi kamateanNa Batara, sa'genna battu poleang pole sallang. 27 Lanri kammana, inai-nai sala carana angkanrei rotiNa Batara siagang sala carana angnginungi anggoro'Na Batara, dorakami anjo taua mae ri Batara, le'baka angkoro'bangkangi batangkalenNa siagang cera'Na. 28 Jari, parallui massing naparessa kalenna tasse're-se'rea tau nampa akkulle nakanre anjo rotia siagang nainung anjo anggoroka. 29 Nasaba' inai-nai angkanrei anjo rotia siagang angnginungi anjo anggoroka natena najampangi angkanaya anjo parjamuanga nia' passisambunganna siagang batangkalenNa Batara, anjo taua angnganremi siagang angnginummi hukkungang battu ri Allata'ala mae ri kalenna. 30 Iaminjo saba'na nujaimo a'jari garring siagang lamma, ba'lalo nia' todong mate. 31 Punna nukatutui anne passalaka, tenamo nalangngerang hukkungang battu ri Allata'ala anjo pa'rappungang sambayannu. 32 Mingka punna Nahukkungki' Allata'ala, laNacambokki', sollanna tena nanataba tongki' hukkungang lantujuai anne linoa. 33 Lanri kammana, sikamma sari'battangku, punna a'rappungangko ero' angnganre ri parjamuanNa Batara, musti sitayang bajikko. 34 Punna nia' tau cipuru', parallui angnganre rolong ri balla'na. Punna nuparhatikang anne kammaya anjo pa'rappungang sambayannu, tenamo nalappabattu hukkungang mae ri kalennu. Ia passala' maraenganga, battupa' sallang nampa kupakasingariangko!
1 Kamma-kamma anne ri passala'na sikamma passare battua ri RohNa Allata'ala. Anne passalaka, kukellai nuasseng sikontutojennaya. 2 U'rangi angkanaya ri wattunna tenapa nutappa' mae ri Batara, amminawangko anynyomba mae ri barhala pepea. 3 Musti nuassengi angkanaya tau nipimpinga ri RohNa Allata'ala takkulleai angkana, “Poro nitunra laloi Isa!” Kammayatompa tenanniakka tau akkulle angkana, “Iami anjo Isa Batara!” punna tanipimpinga ri RohNa Allata'ala anjo taua. 4 A'rupa-rupai passare battua ri RohNa Allata'ala, mingka se'reji Roh nakabattui anjo passare a'rupa-rupaya. 5 A'rupa-rupai jama-jamang untu' allayani Batara, mingka anjo Batara nilayania, Batara se're tonji bawang! 6 A'rupa-rupai cara untu' anjamai jama-jamanNa Batara, mingka se'reji Allata'ala assareai kagassingang sikamma anjo tau anjamaya. 7 Massing Napakemi RohNa Allata'ala anjama tasse're-se'rea tau untu' kabajikanta ngaseng. 8 Nia' tau nisare ri RohNa Allata'ala pakkulle a'bicara sa'genna lompo pangaruna. Maraenganga nia' nisare kacara'dekang untu' ampakasingaraki biritta battua ri Allata'ala; naia tonji anjo Roh se'rea assarei kacara'dekang. 9 Ia tonji anjo Roh se'rea assarei taua pakkulle lompo untu' matappa' mae ri Almasi, nampa Ia tonji pole assarei tau maraenganga pakkulle untu' amballei taua. 10 Nia' tau nisare koasa untu' anggaukangi gau' appakalannasaka, nampa tau maraenganga nisare pakkulle untu' ampakasingaraki sikamma apa laNagaukanga sallang Allata'ala. Nia' maraenganga nisare pakkulle ri RohNa Allata'ala untu' angngasseng ambatei angkana kereanga passare battu ri RohNa Allata'ala, na kereanga teai. Nia' nisare pakkulle untu' a'bicara a'rupa-rupa bicara sukkaraka nipahang; nampa nia' todong nisare pakkulle untu' ampakasingaraki anjo bicara-bicara sukkaraka. 11 Mingka se'reji Roh anggaukangi anjo sikammaya; massing nisarei tasse're-se'rea tau pakkulle, situru' ero' KalenNa RohNa Allata'ala. 12 Almasi sanrapang tubuna taua; anjo tubua se'reji, mingka jai anggotana. Sikontu anjo anggota tubua, manna najai, mingka a'jari se'rei ilalang ri tubua. 13 Kamma ngaseng tommaki' anjo; ikatte tu Yahudia kammayatompa bansa-bansa maraenga, ikatte nikanaya kalenta ata kammayatompa tau bebasaka, le'ba' ngaseng maki' nije'ne' lalang se're Roh, sollanta nipa'jari se're lalang ri tubuNa Almasi. Sukku' ngaseng tommi le'ba'na nikasia' kakoasanNa anjo Roh se'rea. 14 Nasaba' tena nasirupaja anggotana anjo tubua, mingka jai rupanna. 15 Jari punna nakana bangkenga, “Nasaba' inakke teaiya' lima, jari teaiya' anggotana tubua,” takkulleai nikana tenamo nantama ri anggotana tubua anjo bangkenga. 16 Siagang punna nakanana tolia, “Nasaba' inakke teaiya' mata, jari teaiya' anggotana tubua,” takkullea tongi nikana tenamo nantama' ri anggotana tubua anjo tolia. 17 Ebara' angkana a'jari mata ngaseng mami anjo tubua, maka antekammami lakkulle allangngere' anjo tubua? Yareka punna a'jari toli ngaseng mami anjo tubua, maka antekammami lakkulle angngara' anjo tubua? 18 Nicini'mi angkanaya Naboli'mi Allata'ala anjo anggota-anggota tubua lalang ri tubua. Massing-massimmi Naboli' Allata'ala ri pammantanganna lalang ri tubua situru' Nakaerokia Allata'ala. 19 Punna yangasenna anjo a'jari sirupaji anggota, kereangami lanikana tubu? 20 Jari jai memangi anggota, mingka se'reji tubu. 21 Lanri kammana, takkulleai mataya angkana mae ri limaya, “Tena nakuparalluangko!” Yareka ulua angkana mae ri bangkenga, “Tena nakuparalluangko!” 22 Ba'lalo anjo anggota tubu nikanaya lamma, sikontutojenna sanna' nikaparalluanna; 23 siagang anjo anggota-anggota nikanaya tena anggaranna, sikontutojenna parallui la'bi nianggara'. Anggota tubu tenaya naga'ga la'bi parallui niparhatikang. 24 Mingka anjo anggota-anggota tubu bajika nicini', tenamo naparalluangi nianggaraka. Le'ba'mi Nasusung baji' Allata'ala anjo tubua, sa'genna anjo anggota-anggota kuranga anggaranna akkullemi la'bi nipakajai anggaranna. 25 Lanri kammana, tenamo nasanrapang ta'bage-bage anjo tubua; massing sijampangimi anjo anggota tubua. 26 Punna nia' kalase'renna anjo anggotaya pa'risi', anjo anggota maraenganga nakasia' tommi anjo pa'risika; punna nia' kalase'renna anjo anggotaya nipuji, anjo anggota maraenganga amminawang tommi nakasia' rannua. 27 Ikau ngasemmi antu sanrapang tubuNa Almasi siagang ikau ngaseng tommi antu sanrapang anggota-anggotana anjo tubua. 28 Sangkamma tomminjo sanrapanna lalang ri jama'aka; le'ba'mi Napattantu Allata'ala massing tampa'na tasse're-se'rea tau: uru-uruna nia' a'jari tunisuroNa Allata'ala, makaruana na'bi-na'bi, makatalluna guru-guru, nampa anggaukanga gau' appakalannasa' nampa nia' maraenganga nisare pakkulle untu' ampakabajiki tau garringa, yareka untu' antulungi paranna tau, yareka untu' ammimping, yareka kacara'dekang untu' a'bicara a'rupa-rupa bicara appakalannasaka. 29 Tena na'jari tunisuro ngaseng ke'nanga; yareka tena na'jari na'bi ngaseng; kammayatompa tena na'jari guru ngaseng ke'nanga. Tena nanisare ngasengi pakkulle untu' anggaukangi gau' appakalannasaka, 30 yareka untu' ampakabajiki tau garringa, yareka untu' a'bicara a'rupa-rupa bicara appakalannasa', yareka untu' ambattuangi anjo bicara-bicara appakalannasaka. 31 Lanri kammana, paralluko usaha tojeng-tojeng nanugappa passare lomoro' se'rea. Mingka lakupicinikiangko pole oloang kaminang bajika.
1 Manna pole a'rupa-rupai bicara tu lino kuasseng, ba'lalo manna pole akkullea' a'bicara malaeka', mingka tena kumangngamaseang mae ri parangku tau, anjo bicarangku a'jari bicara lompoji bawang, tenaya matu-matunna. 2 Manna pole cara'deka' ampabattui biritta battua ri Allata'ala, siagang kupahang apa-apa sukkaraka, kupahang baji' ngaseng apa-apaya, kammayatompa sanna' lompona tappakku mae ri Allata'ala sa'genna akkulle kupalette' buluka, mingka tena kumangngamaseang mae ri parangku tau, a'jari tena sikalimo matu-matungku! 3 Manna pole kupassidakkang ngaseng sikontu apa-apangku mae ri tu kasi-asia, siagang kupassareangi kalengku nitunu, mingka tena kumangngamaseang ri parangku tau, yangasenna anjo a'jari tena sikali ngasemmo matu-matunna. 4 Tau mangngamaseanga ri paranna tau, iamintu tau sa'baraka siagang baji' ati. Tena nasanna' pasereatina, tena natinggi langga siagang tena natampo. 5 Tena naborro, tena na'gau' takamma-kamma; tena napassai taua amboyangi kaparalluang kalenna bawang, tena nalinta' kasi'rikang, siagang tena napammoli'-molikangi punna nia' tau sala ri kalenna. 6 Tau mangngamaseanga ri paranna tau tena nangai kaja'dallanga; mingka katojengangaji nangai. 7 Attahangi andallekangi sikontu apa-apaya, siagang tappaki mae ri apa-apa kaminang bajika lalang ri kalenna tasse're-se'rea tau; manna pole antekamma takkulleai tappu' panrannuang siagang sa'baraki antayangi sikontu apa-apa nitayanga. 8 Tenanniakka wattu nataparallua taua sikamaseang. Kamma-kamma anne nia' tau cara'de' ampabattui biritta battua ri Allata'ala, mingka nia' se're wattu nalammarimo ampabattui anjo birittaya. Kamma-kamma anne nia' tau cara'de' a'bicara a'rupa-rupa bicara appakalannasa', mingka nia' se're wattu nalammarimo a'bicara appakalannasa'. Kamma-kamma anne nia' tau cara'de' angngasseng ngasengi sikontu apa-apaya, mingka nia' se're wattu nalammarimo angngasseng ngasengi sikontu apa-apaya. 9 Nasaba' ikatte tena nasukku' baji'na pangngassenta siagang pakkulleta untu' ampabattui biritta battua ri Allata'ala. 10 LaNapa'jari sukku' ngasengi Allata'ala sikontu apa-apaya, nanipattaena ngaseng sikontu apa-apa tenaya nasukku' baji'na. 11 Ri wattungku ana'-ana', a'bicara kamma' ana'-ana', akkasu'mang kamma' ana'-ana', kammayatompa appikkiri' kamma' ana'-ana'. Kamma-kamma anne toama'; kupela'mi anjo panggaukang ana'-anakku. 12 Anne apa nicinika ri kamma-kammaya anne, sanrapangi apa-apa nicinika lalang ri carammeng tenaya natangkasa'. Mingka sallang, lasingara' ngasengi nicini'na. Kamma-kamma anne tenapa kuasseng ngasengi apa-apaya; mingka sallang lasukkuki kuassenna, sangkamma sukku' Naassengku Allata'ala. 13 Jari kamma-kamma anne nia' tallunrupa parallu nigaukang iamintu: matappa', ma'minasa siagang mangngamaseang; na ia Kaminang Lompoa ri anne tallua, iamintu, mangngamaseanga ri tau maraengang.
1 Usahakangi mangngamaseanga ri parannu tau siagang usahakang tongi sollanna nutarima sikamma passare battua ri RohNa Allata'ala; lomoro' se'rea iamintu nanutarima pakkullea untu' ampabattui sikamma rancanaNa Allata'ala mae ri rupataua. 2 Inai-nai a'bicara siagang bicara appakalannasa', teai rupataua napa'bicarai, mingka Allata'ala. Tenanniakka tau ampahangi anjo apa napaua, nasaba' RohNa Allata'ala assarei pakkulle untu' ampaui anjo bicara Allata'alaya bawang ampahangi. 3 Kabalekkanna, inai-nai ampabattui biritta battua ri Allata'ala, rupataua napabattuang anjo birittaya; iamintu sollanna napakajarre' taua, nasarei sumanga', kammayatompa nasaleori ke'nanga. 4 Inai-nai a'bicara lalang bicara appakalannasaka, kalennaji bawang napakajarre'; mingka inai-nai ampabattui biritta battua ri Allata'ala, natulummi jama'aka sollanna akkulle pila' maju jama'aka. 5 Teai sipato' baji'na punna akkulle ngasengko a'bicara a'rupa-rupa bicara appakalannasa'. Mingka la'bi kaminang bajika punna akkulleko ambirittakangi sikamma rancanaNa Allata'ala. Nasaba' lompoangangi anggaranna appabattua biritta battu ri Allata'ala, naia a'bicaraya siagang bicara appakalannasa'; simmaraengi punna akkulleja napakasingariang jama'aka anjo bicara napaua, sollanna nia' matu-matunna mae ri sikontu jama'aka. 6 Ebara'na inakke battu mae ri kau ngaseng nakua'bicara appakalannasa' mae ri kau, maka apa matu-matunna mae ri kau? Mattantu tena matu-matunna manna sike'de'! Simmaraengi punna kupa'nyata apa eroka Napa'nyata Allata'ala, yareka kupakasingara' apa-apa battua ri Allata'ala, yareka kupabattu biritta battua ri Allata'ala yareka kuajarakko. 7 Anjo pakkakasa' pakkelong-kelonganga tena sikali nyawana manna sike'de' sangkammaya sulinga siagang kacapia, punna tena nipasa'ra bajiki siagang punna tena naniko'bi' bajiki, antekamma batena lakkulle naasseng taua angkanaya kelong apa anjo nakelonganga? 8 Nia' pole conto maraeng: Punna nipasa'ra sambarangang anjo tarompe' pa'bundukanga, maka inai lasadia ero' a'bundu'? 9 Sangkamma tommi anjo ri pakkullenu a'bicara siagang a'rupa-rupa bicara appakalannasa'. Punna nupake anjo pakkullenu ampaui bicara tenaya nasingara' battuanna, ma'nassa tena manna sitau akkulle ampahangi anjo apa nupaua. Lalanynya' kale-kaleji a'jari tena matu-matunna anjo bicara nupaua. 10 Nia' siapa are jaina rupanna bicara lalang ri anne linoa, mingka tenanniakka manna sirupa anjo bicaraya tania' battuanna. 11 Mingka punna takupahanga bicara napaua se'reang tau, anjo taua a'jarimi sanrapang tu battu pantarang pa'rasangang mae ri nakke; kammayatompa inakke sanrapamma' tu battu pantarang pa'rasangang mae ri anjo taua. 12 Na ikau ngaseng, kuassengi angkanaya cinna sikaliko anggappa pakkulle battu ri RohNa Allata'ala. Mingka lomoro' se'rea musti nupake bajiki anjo pakkulle nugappaya untu' antulungi jama'aka sollanna akkulle a'jari maju. 13 Lanri kammanami anjo, na inai-nai akkulle a'bicara appakalannasa', parallui napala' mae ri Allata'ala sollanna nisare todong pakkulle untu' ampakasingaraki anjo apa napaua. 14 Nasaba' punna appala' doanga' nabicara appakalannasa' kupake, appala' doang memang tongi nyawaku, mingka tena na'jappa pikkirangku. 15 Jari, apa musti kugaukang? Iaminne lakugaukanga: Lappala' doanga' siagang rohku, mingka lappala' doang tonga' siagang pikkirangku. Lamakkelonga' siagang rohku, mingka lamakkelong tonga' siagang pikkirangku. 16 Nasaba' punna rohnuji bawang appala' sukkuru' mae ri Allata'ala, nania' tau maraeng tena napahangi anjo bicara appakalannasa' battua ri RohNa Allata'ala, takkulleai anjo taua angkana, “Cocoka'” siagang anjo pappala' sukkuru'nu lalang pappala' doangannu; nasaba' tanaassengai angkana apa anjo nupaua. 17 Manna pole nasanna' baji'na anjo pappala' doangang sukkuru'nu mae ri Batara, mingka tena sikali matu-matunna anjo pappala' doangannu mae ri tau maraenga. 18 Appala' sukkurukka' mae ri Allata'ala, lanri la'bi akkulleanganga' a'bicara a'rupa-rupa bicara appakalannasa' na ikau ngaseng. 19 Mingka punna a'rappungangki' untu' anynyomba mae ri Batara, la'bi kungaiangangi limambukua bicara kupake assala' akkulle napahang taua, naia assa'bu-sa'bua bicara appakalannasa' kupake natanapahanga taua. Kungaiangangi kammaya anjo, sollangku akkulle angngajaraki taua. 20 Sikamma sari'battangku! Teako appikkiri' kammai ana'-ana'. Ri passala' nikanaya panggaukang sala, paralluko a'jari tuli kamma ana' ca'di. Mingka ri passala'na nikanaya pikkirang, paralluko a'jari tau toamo. 21 Nia' tattulisi' lalang ri Kittaka angkanaya, “Nakana Batara, ‘Tete ri sikamma tau a'bicaraya siagang bicara appakalannasa', erokKa' a'bicara mae ri anne ummaka. Ba'lalo, tete ri bansa-bansa maraenga, erokKa' a'bicara mae ri ummakKu; mingka manna nakamma, taerokai ke'nanga allangngereki kana-kanangKu.’ ” 22 Jari anjo pakkullea a'bicara a'rupa-rupa bicara appakalannasa', a'jari pammatei mae ri sikamma tau tenaya natappa'; jari teai untu' tau tappaka. Siagang pakkullea untu' ampappiassengangi rancanaNa Allata'ala mae ri taua a'jari pammatei mae ri tau tappaka, teai mae ri tau tenaya natappa'. 23 Lanri kammana, ebara' angkana a'rappungang jama'aka, nampa a'bicara appakalannasa' ngaseng sikontu jama'aka, nania' hadere' siapa are tu battu pantarang, yareka tu tenaya na Karisteng, tantu lanakanamo anjo taua angkanaya pongoro' ngasengko. 24 Mingka punna appabattu ngasengko biritta battu ri Allata'ala, nampa nia' hadere' se're tu tenaya na Karisteng yareka tu battu pantarang, akkullemi nupakasingariang ngaseng dosa-dosana anjo taua, siagang akkullemi nasadari ngaseng dosa-dosana. 25 La'jari singara'mi sikamma apa taccokkoa lalang ri atinna, sa'genna napakatuna kalenna, nampa anynyomba mae ri Allata'ala. Lamangakumi angkanaya ma'nassa nia' tojengi Allata'ala ri tangnga-tangnganu. 26 Jari, apa ngaseng battuanna anne, sari'battang? Punna a'rappungangko ero' anynyomba ri Batara, bajiki punna nia' akkelong, nia' angngajara', nia' ampabattui apa-apa battua ri Allata'ala, nia' a'bicara siagang bicara appakalannasaka siagang nia' ampakasingaraki battuanna anjo bicara appakalannasaka. Mingka yangasenna anjo musti nugaukangi untu' angngajara' siagang untu' kabajikannu ngaseng. 27 Punna nia' ero' a'bicara siagang bicara appakalannasaka, musti ruamo yareka kaminang jaina tallumo tau a'le'basa' a'bicara. Siagang musti nia' ampakasingaraki anjo le'baka napau ke'nanga. 28 Punna tena akkulle ampakasingaraki, bajikangangi punna a'mereki anjo tau akkullea a'bicara appakalannasa'. Boli'mi kamma a'bicara lalang mamo ri atinna ke'nanga mae ri Allata'ala. 29 Punna nia' rua yareka tallu tau ampabattui biritta battua ri Allata'ala, musti nia' maraenganga antimbangi anjo apa napabattua ke'nanga. 30 Mingka ebara' angkana nia' maraengannaya anjo tau hadereka ammempo anggappa biritta battu ri Allata'ala, naero' napabattu anjo birittaya, musti ammari rolong anjo tau sitabanga a'bicara. 31 Kammami anjo carana, sa'gennu akkulle ngaseng tasse're-se're massing ampabattui biritta battua ri Allata'ala; sa'gennu massing akkulle ngaseng anggappa pappilajarang, kammayatompa pila' a'jari tappa'. 32 Anjo passare battua ri RohNa Allata'ala untu' ampabattui biritta battua ri Allata'ala, akkullei niatoro' baji' ri anjo tau ampabattuai. 33 Anjo Allata'ala Nangai apa-apa niatoro' bajika; taNangaiyai apa-apa tenaya nabaji' atoro'na. Kamma nigaukanga ri sikontu jama'aNa Allata'ala, 34 musti a'mereki tu bai'-bainea punna a'rappungangi jama'aka. Tanikellaiyai ke'nanga a'bicara. Takkulleai ke'nanga a'jari pamimping; kammaminjo ero'na hukkung agamaya. 35 Punna nia' ero' naasseng ke'nanga, bura'nenna musti nakuta'nang ri balla'na. Tabajikai tu bai'-bainea a'bicara lalang ri pa'rappunganna jama'aka. 36 Maka ikau nakabattui anjo birittaNa Allata'ala? Yareka untu' ikauji bawang lanipabattuang anjo birittaya? 37 Punna nia' tau naassengi kalenna angkanaya nia' pakkullena untu' ampabattui anjo biritta battua ri Allata'ala, yareka nia' pakkulle maraeng natarima battu ri RohNa Allata'ala, anjo taua musti nasadari angkanaya parenta battu ri Batara anne kutulisika. 38 Mingka punna nia' battu ri ke'nanga tanatarimayai anne, teako jampangi anjo tau kammaya. 39 Lanri kammana, sari'battangku ngaseng, usaha mako untu' ambirittakangi biritta battua ri Allata'ala, mingka teako pisangkai tau eroka a'bicara lalang bicara appakalannasaka. 40 Mingka musti nubajiki siagang nuatoroki batenu anggaukangi.
1 Na kamma-kamma anne, sari'battangku ngaseng, kukellai nanuu'rangi poleang Kabara' Baji' battua ri Allata'ala, le'baka kupabattuangko riolo. Nutarimami anjo Kabara' Bajika, siagang tappa' mako mae ri Almasi lanri anjo Kabara' Bajika. 2 Punna anna'gala' majarrekko mae ri anjo kupabattua mae ri kau, lanipasalama' mako ri anjo Kabara' Bajika; passangalinna bawang punna tappakko natena pammahannu. 3 Anjo apa kupabattua mae ri kau, apa le'baka tonji kutarima. Ia kaminang parallua, kamma tattulisika lalang ri Kittaka, iamintu kupabattumi mae ri kau ngaseng angkanaya matemi Almasi lanri dosa-dosata ngaseng; 4 le'ba'mi nitarawang, mingka nipattallasa' poleammi ammotere' ri makatalluna alloa. Ia anjo tattulisi' tommi lalang ri Kittaka. 5 Le'ba' todong mako kupauang angkanaya ri nipattallasa' poleanna Almasi, Napappicinikammi KalenNa mae ri Petrus, nampa mae ri sampuloa anrua tunisuroNa. 6 Le'baki anjo Napappicinikang tommi KalenNa mae ri la'bia limambilangngang tu matappa'Na. Jai ri ke'nanga attallasa' iji sa'genna kamma-kamma anne, nampami siapa are tau ammoterang. 7 Le'baki anjo Napappicinikang tommi KalenNa mae ri Yakobus, nampa mae ri sikontu tunisuroNa. 8 Kala'busanna Napappicinikang tommi KalenNa mae ri inakke — inakke sanrapanga' ana' lolo tenayapa narapiki bulanna nanilassukang! 9 Inakkemi suro kaminang tunaNa Batara. Tena nakusiratang nigallara' tunisuro, nasaba' le'baki kusessa jama'aNa Allata'ala. 10 Mingka lanri pangngamaseanNa Allata'ala, nakunipa'jarimo sangkamma anne ri kamma-kammaya anne. Siagang tena nasia-sia pammopporanNa Allata'ala mae ri nakke. Ba'lalo inakkemi kaminang anjama terasa' ri sikamma tunisuroa. Mingka sikontutojenna anjo sikammaya teai usahaku; anjo usahaNa Allata'ala, mangngamaseanga mae ri nakke, siagang niaka angngaganga' sipanjamang. 11 Jari, manna pole battu ri nai nutarima anjo Kabara' Bajika — apaka battu ri nakke yareka tunisuro maraengannaya — anjo tena na'jari passala'. Ia parallua iamintu napabattumi ikambe anjo Kabara' Bajika nanua'jari tappa'. 12 Punna le'ba'mi nabirittakang ikambe angkanaya le'ba'mi attallasa' poleang ammotere' battu ri kamateanga Almasi, angngapa nania' tu battu ri kau angkana tena nalanipattallasa' poleang ammotere' tau matea? 13 Punna kammatojeng angkanaya tanipattallassai poleang tau matea, tantu tena tommo nanipattallasa' poleang ammotere' Almasi battu ri kamateanga. 14 Siagang ebara' angkana tena nanipattallasa' poleang ammotere' Almasi battu ri kamateanga, tenamo matu-matunna anjo apa le'baka nabirittakang ikambe; kammayatompa tena tommo matu-matunnu a'jari tappa', nasaba' tena panna'galanna anjo katappakkannu. 15 La'biangampa pole, ma'nassami angkanaya a'balle-ballemi ikambe ambirittakangi Allata'ala; nasaba' nabirittakammi ikambe angkanaya le'ba'mi nipattallasa' poleang ammotere' Almasi battu ri kamateanga ri Allata'ala, mingka tena nakamma — punna kammatojeng angkanaya tena nalanipattallasa' poleang ammotere' tau matea! 16 Nasaba' punna tena nanipattallasa' poleangi ammotere' tau matea, tena tommo nanipattallasa' poleangi ammotere' Almasi battu ri kamateanga. 17 Siagang punna tena nanipattallasa' poleangi ammotere' Almasi, a'jari sanrapang mami so'na anjo katappakkannu; battuanna tuli lalang ijako ri kakoasanna dosaya, siagang tena sikalimo panrannuannu. 18 Battuanna pole, sikamma anjo tau Karisteng mateamo, tena tommo panrannuanna. 19 Punna ri wattuntaja bawang attallasa' ri lino kimanrannuang mae ri Almasi, ikattemi kaminang cilaka ri sikontu rupataua ri anne linoa! 20 Mingka a'buttimi angkanaya ma'nassa le'ba'mi nipattallasa' poleang Almasi battu ri kamateanga. Iaminne a'jari pammatei ma'nassa lanipattallasa' poleangi ammotere' tau matea. 21 Nasaba' passabakkang se're tau nantama' kamateanga ri anne linoa; kamma tomminjo, passabakkang se'rea todong tau nalanisare todong rupataua katallassanga ammotere' battu ri kamateanga. 22 Sikontu rupataua lamate ngasengi lanri a'jari se'rena golongang siagang Adam, kamma tomminjo sikontu rupataua lanipattallasa' ngasengi ammotere' lanri a'jari se'rena golongang siagang Almasi. 23 Mingka la'massing-massingi wattunna taua nipattallasa' poleang: uru-uruna Almasi; le'baki anjo, punna battu poleang Almasi, nampa sikamma tau antamaya ri pa'rappunganna umma'Na Almasi. 24 Le'baki anjo battumi kiamaka. Anjo wattua Napasomba ngasemmi Almasi sikontu pamarentahanga, sikontu kakoasanga, kammayatompa sikontu apa-apa magassinga; nampa Napassareang kakoasanNa salaku Karaeng, mae ri Allata'ala, Manggeta. 25 Musti ammarenta tuli Almasi sa'genna nipasomba ngaseng ri Allata'ala sikontu musunNa Almasi ri dallekanNa Almasi. 26 Musu kaminang kala'busanga lanipasomba, iamintu kamateanga. 27 Nia' tattulisi' lalang ri Kittaka angkanaya, “Napasomba ngasemmi Allata'ala sikontu apa niaka mae ri dallekanNa.” Singara'mi angkanaya, anjo nikanaya “sikontu apa niaka” tena nantama' KalenNa Allata'ala, ampasombayai sikontu apa niaka mae ri dallekanNa Almasi. 28 Mingka punna le'ba' ngasemmo nipasomba irawangang pamarentahanNa Almasi, iami KalenNa, iamintu Ana'Na Allata'ala, ampasombai KalenNa mae ri Allata'ala, Ia le'baka ampasombai sikontu apa-apa niaka mae ri dallekanNa. Jari KalenNami Allata'ala lammarenta mae ri sikontu apa-apa niaka. 29 Punna tanipattallasa' poleangang ammotere' tau matea angngapa nania' tau nije'ne' untu' tau matea? Apa matu-matunna nagaukang ke'nanga anjo kammaya? Punna tena sikali memang nalanipattallasa' poleang ammotere' tau matea, apa matu-matunna nagaukang ke'nanga anjo kammaya? 30 Siagang apa tommi matu-matunna ikambe tuli ero' andallekangi bahayaya? 31 Sikamma sari'battangku ngaseng! Allo-allona kuparrangi nikanaya sessa lanri lompona pa'maikku mae ri katallassannu ngaseng, lanri tappa' mako mae ri Isa Almasi, Batarata. 32 Punna untu' pakkalinoang bawang nakunisessa angngewai sanrapang olo'-olo' nye'nyereka anrinni ri Efesus, apa passawallang lakugappa? Punna tena memang todong nalanipattallasa' poleang ammotere' tau matea, bajikangangi: “Maeko nakiangnganre-angnginung siagang assannang-sannang, nasaba' ammuko lamate mangkajaki'”; kammami anjo paruntu' kanaya. 33 Teako eroki nitipu! Punna a'rappungangko siagang tau ja'dalaka, ma'nassa manna baji' sipa'nu mingka la'jari ja'dala' tommako. 34 Angngu'rangi mako ri kamma-kammaya anne, siagang tea' mako eroki pole a'gau' dosa. Siratanna musti a'jari siri'-sirikko lanri nia'na ija ri tangnga-tangnganu tau tenapa natappa' ri Allata'ala. 35 Gassingka nia' akkuta'nang angkana, “Antekamma punna nipattallasa' poleang ammotere' taua matea? Antekamma sallang tanja'na tubuna, punna attallasa' poleammo ammotere' ke'nanga?” 36 Dongo' sikali anjo pakkuta'nanga! Punna a'lamungko bine naung ri buttaya, talattimboai anjo binea punna tamatea rolong anjo binea. 37 Na anjo bine nulamunga naung ri anjo buttaya — bine gandung yareka maraengannaya — poro lisere'naji bawang anjo binea attimbo sallang; tena nayangaseng anjo binea attimbo. 38 KalenNa Allata'ala lampa'jari antekamma tanja'na punna attimbo anjo lamunganga, situru' ri apa Nakanaya baji' mae ri anjo lamunganga. Anjo sikammaya rupanna bine, massing nia' tanja'na punna attimbo sallang. 39 Sikontu apa-apa niaka nyawana tena nasangkamma ngaseng tanja'na. Rupataua nia' tanja'na tubuna, olo'-oloka nia' todong tubuna, mingka maraengi tanja'na; jangang-janganga maraeng tongi tanja'na, kammayatompa jukuka maraeng tongi tanja'na tubuna. 40 Kammayatompa apa-apa niaka rate ri langika siagang apa-apa niaka ri tompo'na buttaya. Sikamma apa-apa niaka rate ri langika massing nia' ga'gana nicini', mingka simmara'-maraengi; kamma tomminjo apa-apa niaka ri tompo'na buttaya. 41 Simmaraengi ga'gana mataalloa siagang ga'gana bulanga. Sikamma bintoenga maraeng tongi ga'gana. Ba'lalo anjo sikamma bintoenga massing simmara'-maraeng tongiji ga'gana. 42 Kammami anjo alarapanna sallang sikamma tau matea punna nipattallasa' poleang ammotere'. Anjo tubua ri jeraka akkullei a'jari botto', mingka anjo tubu nipattallasa' poleanga ammotere' sallang, iamintu tubu tenaya nakkulle a'jari botto'. 43 Ri wattunna nitarawang anjo tubua, kodi tanja'na siagang lammai; mingka ri wattunna nipattallasa' poleang ammotere', a'jarimi tubu maga'ga siagang makassa'. 44 Ri wattunna nitarawang, anjo tubua, tubu battu ri lino; mingka ri wattunna attallasa' poleammo ammotere', anjo tubua, tubu passare battu ri RohNa Allata'ala. Nia' tubu battu ri lino, nia' todong tubu battu ri Allata'ala. 45 Nia' tattulisi' lalang ri Kittaka angkanaya, “tau riolo dudua, iamintu Adam, a'jari tu mattallasa',” mingka ia Adam kala'busanga iamintu Roh assarea katallassang. 46 Rioloanganga battu iamintu tubua, teai rohania. Ri bokoangangi battu rohania. 47 Adam rioloa butta nipa'jari, mingka Adam makaruaya battu ri suruga assala'na. 48 Sikamma rupataua ri anne linoa sangkammai Adam rioloa, iamintu butta assala'na; mingka sikamma tu surugaya sangkammai anjo battua ri suruga. 49 Sangkamma todong ri kamma-kammaya anne sanrapangki' Adam buttaya assala'na, kamma tomminjo sallang la'jari sanrapang tommaki' anjo battua ri suruga. 50 Ia natabaya kanangku, sari'battangku ngaseng, iamintu: anjo tubu nipa'jaria battu ri assi siagang cera', takkulleai antama' ri Lino BeruNa Allata'ala; siagang anjo tubu akkullea mate takkulleai a'jari tubu mannannungang. 51 Parhatikangi anne rahasiaya: tena nilamate ngaseng, mingka lamminra ngasengki'. 52 Tanisanna-sannayai nalakajariang silalonna, ri wattunna kala'busang assa'ra tarompeka. Nasaba' ri wattunna assa'ra anjo tarompeka, lanipattallasa' poleammi ammotere' tau matea a'jari tubu mannannungang, siagang lanipinra ngasengki'. 53 Anne tubuta akkullea mate musti nisambei siagang tubu tenaya nakkulle mate; siagang tubu battua ri lino musti nisambei siagang tubu battua ri suruga. 54 Punna nisambeimo tubu akkullea mate siagang tubu tenaya nakkulle mate, siagang anne tubu battua ri lino nisambeimi siagang tubu battua ri suruga, anjo wattua nampami kajariang apa niaka tattulisi' lalang ri Kittaka angkanaya, “Le'ba'mi nipattaena kamateanga; nigappami ammetaya!” 55 “E, kamateanga, kemaemi pammetannu? E, kamateanga, kemaemi racunnu?” 56 Racunna kamateanga, iamintu dosaya, siagang anjo dosaya lalangi ri hukkung agamaya a'boya oloang. 57 Sukkurukki' mae ri Allata'ala; nasaba' Nasare maki' pammetang lalang ri Isa Almasi, Batarata! 58 Lanri kammana, sari'battangku ngaseng sannaka kukamaseanna, pakkassakangi siagang pakajarreki kalennu. Attojeng-tojeng mako tuli anjama untu' Batarata, lanri nuassemmi angkanaya tena nala'jari sia-sia sikamma apa nugaukanga untu' Batarata.
1 Kamma-kamma anne passala'na doe' eroka nupassareang a'jari sumbangang mae ri paranta tu Karisteng; kukellaiko sollanna nugaukang situru' apa le'baka kupau mae ri jama'aka ri Galatia. 2 Punna allo Minggu, iamintu allo bungasaka, paralluko massing assare doe', situru' massing panggappanu. Boliki anjo doeka sa'gengku battu, sollanna punna battua', tenamo naparallu nipasse're pole. 3 Punna battua' sallang, lakusuromi tau le'baka nupassamaturuki untu' a'lampa angngerangi anjo sumbanganga. Lakusarei ke'nanga sura' pangngantara', sollanna naerang ke'nanga anjo sumbanganga mange ri Yerusalem. 4 Na punna nukana bajikangangi punna a'lampa tonga' siagang ke'nanga, la'lampa tonga' antu sallang siagang ke'nanga. 5 Erokka' battu angkunjungiko punna kulalloimo Makedonia, nasaba' erokka' numalo sallang anjoreng. 6 Kira-kira lammantanga' sinampekang ri tangnga-tangnganu, kira-kira punna battu wattu dinginga sallang. Punna le'baki anjo kuminasai nakkullea' nubantu ampannarrusuki pa'lampangku mange ri tampa' maraenganga. 7 Tena nakuero' poro assengka bawang battu antoakko. Punna Nakellai Batara, erokka' sallo-sallo ammantang ri tangnga-tangnganu ngaseng. 8 Ri kamma-kammaya anne, erokka' ammantang anrinni ri Efesus, sa'genna allo Pentakosta. 9 Anrinni jai kasampatang untu' jama-jamang a'matu-matua, manna najai tau ero' anghalang-halangi. 10 Punna battu Timotius mae ri kau ngaseng, tarima bajiki sollanna ero' ammantang sallo-sallo ri tangnga-tangnganu; nasaba' Timotius siagang inakke sangkammaja', iamintu para anjama' untu' Batara. 11 Gassingka nia' tau tanjampangiai. Bantui sollanna akkulle napannarrusu' pa'lampanna ammotere' mae ri nakke siagang salama'; nasaba' kutayangi kabattuanna siagang sari'battang maraenganga. 12 Ri passala'na sari'battanta Apolos, pissiapa aremi kupala' ri ia sollanna battu todong angkunjungiko sipa'rurungang sari'battang maraenganga. Mingka tenapa nakkulle napattantu labattu ri kamma-kammaya anne. Mingka punna nia' sallang wattu, tantu labattuji antu. 13 Paralluko tutu siagang jarre' tappa'nu lalang ri katallassannu salaku tu Karisteng. Pa'baraniangi kalennu anggaukangi jama-jamannu siagang a'jariko tau magassing lalang ri katallassannu. 14 Sikontu apa nujamaya, gaukangi siagang mangngamaseang. 15 Tantu massing nuassemmi Stefanus siagang sikontu tau niaka ri balla'na; iaminjo ke'nanga uru-uru a'jari tu Karisteng ri butta Akhaya. Attojeng-tojengi ke'nanga anjama untu' allayani umma'Na Allata'ala. 16 Kupalaki ri kau ngaseng sollanna nupilangngeri tojeng-tojeng kananna anjo tau kammaya, siagang sikamma tau maraengannaya naaganga ke'nanga anjama-jama siagang allayani. 17 Sanna' rannuku lanri battuna Stefanus, Fortunatus, siagang Akhaikus. Sanrapangi ke'nanga sambennu ngaseng mae ri nakke. 18 Sanna' sikali napakarannuna ke'nanga atingku, sangkamma napakarannuna atinnu ngaseng. Musti nupakala'biri' tojeng-tojengi anjo tau kammaya ngaseng. 19 Sallanna sikamma jama'aka ri butta Asia mae ri kau ngaseng. Kammayatompa Akwila siagang Priskila, kammayatompa pole sikontu jamaah niaka a'rappungang ri balla'na ke'nanga, appikatu ngasengi sallang Karisteng mae ri kau ngaseng. 20 Sikontu sari'battanga anrinni appikatu ngasengi sallang mae ri kau ngaseng. A'le'ba'-le'basakko massing sisare sallang, sikarimangngi salaku tu Karisteng. 21 Kutambai pole sallang kutulisika kalengku: Sallang battu ri nakke, Paulus. 22 Inai-nai tena namangngamaseang mae ri Batara, lappassammi anggappa pangngalarroi! Maranatha — O, Batara, battu maKi' linta'! 23 Poro nibarakkaki ngasengko ri Isa Almasi. 24 Kupapinawangi pangngamaseangku mae ri kau ngaseng, asse'reamo mae ri Isa Almasi. Sallangku, Paulus
1 Sikamma sari'battangku, anggota jama'aNa Allata'ala ri Korintus, kammayatompa sikontu Umma'Na Allata'ala niaka ri sikontu butta Akhaya. Inakke Paulus, le'baka niangka' a'jari tunisuroNa Isa Almasi lanri ero'Na Allata'ala, kammayatompa sari'battanta Timotius; 2 ma'minasa' mae ri Allata'ala Manggea siagang mae ri Isa Almasi, sollannu nibarakkaki ngaseng, siagang nisare ngaseng kasalewangang. 3 Nipujimi Allata'ala, ManggeNa Batarata Isa Almasi. Mangge sannaka baji'na pa'mai'Na, Allata'ala assarea panynyaleori mae ri rupataua. 4 Iami ansaleori pa'mai'na ikambe ilalang sikamma kasukkaranna ikambe. Sollanna lanri panjarrekkinNa, nakkulle tommo ikambe ansaleori tongi sikontu tau natujua susa. 5 Sikamma passessa le'baka antujui Almasi, jai tommi tattuju mae ri kambe. Siagang tete ri KalenNa tommi Almasi nasanna'mo nipakajarre'na pa'mai'na ikambe. 6 Punna nituju ikambe ri kasukkarang, nikellaimi sollanna nipakajarre' pa'mai'nu, na nunipasalama'. Punna nipakajarre' pa'mai'na ikambe, nipakajarre' tommi pa'mai'nu. Jari akkulle mako sa'bara' lalang sikontu kasukkarang antujuako, sangkamma kasukkarang le'baka todong tattuju mae ri kambe. 7 Tuli jarre'na panrannuanna ikambe tena niranggasela mae ri kau ngaseng, lanri naassenna ikambe angkanaya nukasia' tommi kasukkaranna ikambe. Lanri kammana, lanugappa tommi panjarreki nagappaya ikambe. 8 Sikamma sari'battangku ngaseng! Kukellai nanuasseng ngaseng todong kasukkarang le'baka antujui ikambe ri butta Asia. Teai sipato' battala'na anjo kasukkarang antujuai ikambe, sa'genna tappu' panrannuang maki' angkanaya lattallasa' ijaki'; 9 sanrapang mamaki' tau le'bakamo nitappuki lanihukkung mate. Mingka nania' anjo kajariang kammaya lanri nikellaina ikambe tanjeng mae ri Allata'ala, akkullea ampattallasaki tau matea; jari tena nakitanjeng mae ri batangkalenta. 10 Iami le'baka ampasalamaki ikambe battu ri bahaya lompona anjo kamateanga. Kammayatompa Ia tommi sallang lampasalamaki ikambe ri allo-allo labattua. Nasaba' Iami panrannuanna ikambe. 11 Tappaki ikambe angkanaya lanri pappala' doangannu ngaseng, tena tanipasalama'na pole ikambe ri Allata'ala battu ri bahayaya. Najaimo tau appala' sukkuru' ri Allata'ala, iamintu sikontu tau le'baka appala' doang, nasaba' nitarimana pappala' doanna, iamintu lanri nibarakkakinamo ikambe ri Allata'ala. 12 Lompomi pa'mai'na ikambe lanri tappa'na ikambe, angkanaya sikamma apa nagaukanga ikambe ri anne linoa, la'biangampa pole nagaukanga ikambe mae ri kau ngaseng, akkullemi nagaukang ikambe siagang lambusu' pa'mai' kammayatompa ati maci'nong. Yangasenna anjo nagaukangi ikambe, teai lanri kacara'dekanna ikambe, mingka lanri pakkulle Napassareanga Allata'ala mae ri kambe. 13 Naia anne natulisika ikambe, iaji bawang apa-apa akkullea nubaca siagang akkullea nupahang. Anne kamma takkulleapi nupahang baji', mingka kuminasai sollanna akkulle sallang nupahang baji' anne apa napakkanaya ikambe. Sollanna, punna battu sallang Batara Isa, akkulle mako angkalompoang pa'maiki ikambe, sangkamma todong ikambe angkalompoang pa'mai' ngasengko. 15 Lanri tappakkumo ri anne passalaka nakuero'mo pirangalloang battu angkunjungi ngasengko, sollanna a'lappi rua barakka' nugappaya. 16 Erokka' battu angkunjungiko punna a'lampa' mange ri butta Makedonia, siagang nakuassengka pole punna ammoterekka'; sollangku akkulle nubantu punna kupannarrusu' lampaku mange ri pa'rasangang Yudea. 17 Mingka kupinrami anjo wattu pa'lampangku. Jari punna kamma, maka tena nattantu nawa-nawangku? Maka ero' kalengku pirangalloang ri wattunna kunawa-nawa eroka a'lampa, na uru-uruna kukana, “Iyo,” mingka sinampekang kukanaseng “Tena”? 18 Lanri Allata'ala akkullea nipatappa', sitojeng-tojenna anjo janjingku mae ri kau teai passala' “Iyo” yareka “Tena”. 19 Nasaba' anjo Isa Almasi, Ana'Na Allata'ala, nabirittakanga sari'battanta Silas, Timotius, kammayatompa kalengku, teai passala' “Iyo” yareka “Tena”. Passangalinna passala' pappiali Iyo battu ri Allata'ala. 20 Nasaba' le'ba'mi Allata'ala angkana “Iyo” mae ri sikontu janjinNa, tete ri KalenNa Isa Almasi. Lanri kammanami anjo nakiangkanamo “Aming” mae ri Allata'ala, tete ri KalenNa Isa Almasi. Kammami anjo nagaukanga ikambe sollanna nipakala'biri' Allata'ala. 21 KalenNa Allata'ala ampakajarre' ngasengki' a'jari se're mae ri KalenNa Almasi; Iatommi KalenNa ampileki' Napamae ri KalenNa. 22 Untu' iaminjo nakile'ba'mo Nasare pammatei a'jari taunNa, siagang Napassareang RohNa antama' ri atinta. Iaminjo a'jari pammatei pannanggongi angkanaya laNapassareang ngasengi Allata'ala sikontu apa le'baka Napa'janjiang. 23 Allata'alami a'jari sa'bingku — nasaba' Naassengi bonena atingku — angkanaya nakutanjaria mange ri Korintus, lanri tenana nakuero' ampakasi'nai pa'mai'nu. 24 Tena nakuero' ampassako ri passala' apa siratanga nupatappa', lanri jarre'namo tappa'nu mae ri Isa. Erokkuji bawang angngagangko sipanjamang, sollannu pila' mate'ne ri tallasa'nu.
1 Lanri kammanami anjo nale'ba'mo kutappuki angkanaya tenamo nakulabattu poleang angkunjungiko sa'genna a'jari si'na pa'mai'nu. 2 Nasaba' punna kupakasi'na pa'mai'nu, inaimi lakkulle ansaleoria', punna teai anjo tau le'baka kupakasi'na pa'mai'na? 3 Iaminjo saba'na nakutulisi' anne suraka mae ri kau. Taeroka' angkunjungiko, nampa nupakasi'na pa'maikku. Sikontutojenna musti nupakarannui pa'maikku. Nasaba' tappaka' angkanaya punna rannua', amminawang ngaseng todong mako rannu. 4 Sanna' si'nana siagang sanna' battala'na pa'maikku, kammayatompa ammatti'-mattiki je'ne' matangku ri wattunna kutulisi' anne suraka. Mingka teai lanri kukellainu si'na nakupau anne, passangalinna sollanna akkulle nuasseng angkanaya sanna' ngaseng kukarimangnginnu. 5 Punna nia' tau a'jari passabakkang ri anne si'naya, teai kalengku bawang napitujui, mingka ikau ngaseng, yareka kaminang sike'de'na attawa ruako napitujui. Anne kulammai sike'de' bicarangku mae ri anjo taua. 6 Anjo tau kammaya angganna'mi hukkungang nagappaya ri tangnga-tangnganu. 7 Anne kamma musti nupammopporammi, siagang parallui nupakajarre' pa'mai'na sollanna tena nasi'na dudu pa'mai'na sa'genna tappu' panrannuang. 8 Jari kupalaki ri kau ngaseng, sollanna nupappicinikang pole mae ri ia, angkanaya ma'nassa sanna' tojeng nukarimangnginna. 9 Nakukiring anne suraka mae ri kau, lanri ero'na kuasseng angkanaya maka ero' jako tuli anturuki apa-apa kupaua mae ri kau. 10 Punna nupammopporang tau le'baka kasalang mae ri kau, inakke pole kupammopporang tongi anjo taua. Nasaba' apa le'baka kupammopporang — punna nia' memang todong parallu nipammopporang — kupammopporangi ri dallekanNa Almasi, untu' kabajikannu ngaseng. 11 Nakugaukang anjo kammaya, sollanna takkullea Billisika anggappa kasampatang angkoasaiki'; nasaba' niassemmi sikamma ero'na anjo Billisika. 12 Ri wattungku battu mange ri Troas ero' ambirittakangi Kabara' Baji' ri passala'na Almasi, Nasungkeamma' oloang Batara anggaukangi anjo jama-jamanga anjoreng. 13 Mingka tena nasannang nyawaku, nasaba' tena nakusibuntulu' siagang sari'battanta Titus anjoreng. Jari appala' kanama' mae ri taua anjoreng, nampa annarrusu' a'lampa mange ri butta Makedonia. 14 Mingka appala' sukkurukki' mae ri Allata'ala! Lanri Iami tuli ampimpingi ikambe amminawang lalang ri barrisi' passua'-suarrang pammetanNa Almasi lanri asse'rena ikambe mae ri Ia. Nipakemi ikambe ri Allata'ala ampa'la'bangi biritta ri passala'na Almasi, sanrapang bau' a'la'banga rasanna ri kere-keremae. 15 Nasaba' ikambemi sanrapang kamanynyang mabauka rasanna, nitunua ri Almasi untu' mae ri Allata'ala. Ri tau a'jappa mangea ri possoka, ikambe anne sanrapangki' a'rasa botto' angngeranga kamateang; mingka ri tau nieranga mange ri kasalamakkanga, sanrapangki' rasa mabau' angngeranga katallassang. Jari, maka inai akkulle anggaukangi anne jamanga? 17 Ikambe tena kisangkamma taua, ampare' kammai danggangang biritta battua ri Allata'ala. Ikambe ci'nongi pattujunta, nasaba' Allata'ala assareki' jama-jamang. Siagang KalenNa Allata'ala anciniki angkanaya nipa'jari atanNami Isa kalenta ampabattui anjo birittaya.
1 Maka sangkammai angkanaya napuji kalenna ikambe ilalanna anne passalaka? Yareka nakulle parallui ikambe sura' pammuji untu' ikau, yareka battu ri kau, sangkamma naparalluanga sikamma tau maraenga? 2 Kalennu ngasemmi sura' pammujina ikambe tattulisika lalang ri atinna ikambe, akkullea naasseng siagang nabaca sikontu taua. 3 Kalennami ke'nanga akkulle anciniki, angkanaya sanrapangko sura' Natulisika Almasi, nikiringa siagang napabattua ikambe. Anjo suraka teai dawa' nipatulisi' mingka Roh mattallasa'Na Allata'ala; tena todong nalalang ri karattasaka nitulisi', passangalinna lalangi ri atinna rupataua. 4 Akkana kammami anjo ikambe, lanri tappa'na ikambe mae ri Allata'ala tete ri Almasi. 5 Tena manna sirupa kagassingang ri kalenna ikambe nakkulle ikambe anggaukangi anne jama-jamanga; mingka Allata'ala assarei pakkulle ikambe. 6 Iami assarei pakkulle ikambe a'jari palayang untu' parjanjiang berua; iamintu parjanjiang tatta'galaka ri RohNa Allata'ala, jari teai ri hukkung tattulisika. Nasaba' anjo tattulisika angngerangi kamateang, mingka anjo RohNa Allata'ala angngerangi katallassang. 7 Ri wattunna nipare' siagang niukiri' anjo parjanjiang angngeranga kamateang ri batua, accayami singara' kalompoanNa Allata'ala ri rupanna Musa. Teai sipato' accayana anjo singaraka, sa'genna takkulleai bansa Israelka anciniki rupanna Musa; manna pole nappakkaramulamo a'jari kurang accaya ammotere' rupanna Musa anjo wattua. Jari, punna kamma anjo lompona singaraka nipake ampareki anjo parjanjiang appamatea, 8 mattantu la'bi lompoangangi singara'na anjo parjanjiang Napassareanga RohNa Allata'ala ri wattunna nipare'. 9 Punna kamma anjo lompona cayana parjanjiang anghukkungai rupataua, tantu la'bi lompoangangi pole cayana anjo parjanjiang akkullea ampakabajiki ammotere' passisambunganna rupataua mae ri Allata'ala. 10 Akkulle nikana anjo apa-apa lompoa cayana ri pirangalloang tenamo nalompo cayana ri kamma-kammaya anne, lanri nia'mi battu caya malompoanganga. 11 Punna kamma anjo lompona cayana apa-apa tenaya nasallo attahang, tantu la'bi lompoangangi cayana apa-apa akkullea attahang sa'genna satunggu-tungguna. 12 Lanri nia'namo anne panrannuang kammaya ri kambe, nabaranimo ikambe a'bicara kamma anjo. 13 Ikambe tena kisangkamma Musa antongkokai rupanna sollanna takkullea nacini' bansa Israel ri wattunna mate siagang lanynya' anjo cayaNa Batara ri rupanna. 14 Katongkokammi pikkiranna ke'nanga. Na sa'genna ri kamma-kammaya anne sanrapangi tuli natongko' iji bongong pikkiranna ke'nanga ri wattunna nabaca anjo kitta'-kitta' parjanjiang salloa. Iapa nakkulle tassungke anjo bongonga punna a'jari se're taua mae ri KalenNa Almasi. 15 Manna ri kamma-kammaya anne, punna nabaca ke'nanga kitta'-kitta'na Musa, sanrapang nitongko' iji pikkiranna ke'nanga ri anjo bongonga. 16 Mingka punna battu taua andallekang ri Batara, sanrapang nisungkemi anjo bongonga battu ri rupanna anjo taua. 17 Jari, nikanaya Batara anrinni iamintu Roh. Na kere-keremae nia' RohNa Batara, anjoremmi nia' kalappassang. 18 Kamma-kamma anne tenamo nanitongkoki bongong rupanta. Sanrapang maki' tau angngeranga caya malompoNa Batara Isa. Na lanri kammana minjo nakituli pila' nipinramo a'jari sangkamma KalenNa; pila' sallo pila' accaya maki'. Anjo caya malompoa, caya battu ri RohNa Batara.
1 Lanri pangngamaseanNa Allata'ala nakkulle nagaukang ikambe anne jama-jamanga. Iaminjo saba'na natena natappu' panrannuang ikambe. 2 Tena nakiaccokko-cokko siagang tena nakiappakasiri' bateta anggaukangi anne jama-jamanga. Tena nakiero' jekkong anggaukangi anne jama-jamanga, yareka tena nakiero' amputara' baleki kananNa Allata'ala. Silambusu'na bawang ero'Na Allata'ala nabirittakang ikambe. Lanri kammana, naminasai ikambe nanabilang baji' ngaseng ri pa'mai'na taua anjo apa nagaukanga ikambe. 3 Punna tena ijapa napahangi taua anjo Kabara' Baji' nabirittakanga ikambe, tau eroka mamo a'lampa mange ri possoka takkullea ampahangi. 4 Barhala ja'dala' niaka ri lino antongkoki pikkiranna tau tenaya natappa' ri anjo Kabara' Bajika. Iaminjo barhalaya anrompa-rompai ke'nanga sollanna tanacinika singara' battua ri anjo Kabara' Bajika, ri sese kalompoanNa Almasi, a'jaria pammatei rupanNa Allata'ala. 5 Anjo biritta napabattua ikambe teai biritta ri sesena ikambe. Anjo birittaya, biritta ri sesena Isa Almasi, angkanaya Iami Batara; na ikambemi anne a'jari atannu ngaseng lanri Isa. 6 Nakana Allata'ala, “Nikellai ammumba singaraka battu lalang ri sassanga,” na KalenNa tommi Allata'ala ampamumbai anjo singaraka lalang ri atinta, sollanna a'jari singara' pikkiranta, nakkulle nipahang caya malompoNa Allata'ala niaka accaya ri rupanNa Almasi. 7 Mingka anjo pa'barang-barangang rohani ga'gaya, ikambemi anne angngerangi, iami antu tubu tenaya anggaranna lanri buttaji nipare'. Lanri kammana, ma'nassami angkanaya anjo koasa malompoa niaki ri Allata'ala, jari tena nania' ri kambe. 8 Sanrapang nibundukimi ikambe battu ri kere-keremae, mingka tena nakasepekang ikambe. Kala'busang akkala' maki', mingka tena nitappu' panrannuang. 9 Jai tau ammusuki', mingka tena nakile'ba' nibokoi kale-kalenta. Siagang manna ki'mole-mole sanrapang nipatappasa' naung ri buttaya, mingka tena nakikkulle mate. 10 Tuli niaki nikasia' kamateanNa Isa ri kalenna ikambe. Sollanna a'nyata todong katallassanNa ri tubuna ikambe. 11 Ilalang ri tallasa'na ikambe, tuli niondangi ikambe ri kamateanga lanri Isa, sollanna ilalang ri kammana anjo na'batemo katallassanNa Isa ri anne kalenna ikambe akkullea mate. 12 Iami anne a'jari pammatei angkanaya niaki a'gio' kamateanga lalang ri tubuna ikambe; mingka rannui pa'mai'na ikambe lanri nia'na katallassanga a'gio' lalang ri massing tubunu. 13 Nia' lalang ri Kittaka angkanaya, “Lanri tappakku, iaminjo saba'na naku'bicara.” Jari, lanri tappa' lompo kammaya tomminjo na'bicara todong ikambe lanri tappa'na ikambe. 14 Tappa'mi ikambe angkanaya le'ba'mi nipattallasa' poleang ammotere' Isa ri Allata'ala; jari tappa' tommi ikambe angkanaya lanipattallasa' tommi ikambe tete ri Isa. Na Iami langngerang ngasengki' mange ri dallekang mala'biri'Na. 15 Yangasenna anjo, untu' kaparalluannu ngaseng. Nasaba' punna pila' jai tau angkasiaki pangngamaseanNa Allata'ala, pila' jai tommi pappala' sukkuru' nipanai' ri Allata'ala; jari nipakala'biri'mi Allata'ala. 16 Lanri kammanami anjo natena natappu' panrannuang ikambe. Manna pole pila' panra' katallassang lahere'na ikambe, mingka tuli beruna allo-allo katallassang lalanga ri atinna ikambe. 17 Na anne kasusaang tenaya nasiapa jaina, le'baka nakasia' ikambe siagang tenaya nasiapa sallona, iami langngerang wassele' katallassang mate'nea, wassele' sannaka lompona anggaranna siagang akkullea mannannungang. Bella lompona anjo kate'neanga na anjo kasusaanga ri kamma-kammaya anne. 18 Nasaba' teai apa-apa kacinikanga napacciniki ikambe, passangalinna apa-apa tenaya nakacinikang. Anjo apa-apa kacinikanga poro sinampe'ji akkulle attahang; mingka anjo apa-apa tenaya nakacinikang attahangi sa'genna satunggu-tungguna.
1 Nasaba' naassemmi ikambe angkanaya punna nibongkara' anne balla' nipammantangia ri lino, iamintu pangngebarranna tubuta, le'ba' memammi Napasadia Allata'ala balla' niaka ri suruga; iamintu balla' Napareka KalenNa Allata'ala siagang akkullea attahang sa'genna satunggu-tungguna. 2 Ilalang ri anne balla' kamma-kammaya anne, akkunrarengki' lanri sanna' nakkutta ero' mange ammantang ri anjo ballatta niaka ri suruga. 3 Iaminjo ballaka sanrapang tubu beruta. 4 Lalang ammantanta ija lalang ri anne balla' battua ri lino, musti akkunrarengki' lanri battala'na tanggonganta. Teai lanri erotta ta'lappasa' battu ri tubu battuta ri anne linoa, passangalinna lanri erottamo ampakei anjo tubu battua ri suruga, sollanna akkulle nikoasai ri katallassang anne tubuta akkullea mate. 5 NaKalenNa Allata'ala ampasadiaki', siagang Iami assareki' RohNa a'jari pammatei pannanggonginNa ri katte. 6 Lanri kammanami anjo natuli jarre' pa'mai'na ikambe. Naassengi ikambe angkanaya lalang ammantanna ija ikambe ilalang ri anne tubuna ikambe, bella iji ikambe battu ri anjo balla' lanipammantangia siagang Batara. 7 Nasaba' lanri tappa' bawang mae ri Almasi nattallasa' ikambe, teai lanri apa-apa niaka nicini'; 8 iaminjo saba'na nakisa'bara' ri pa'maitta. Erokangangki' ta'lappasaka battu ri anne tubua, sollanna nikkulle sipammantangang siagang Batara. 9 Lanri kammanami anjo nattojeng-tojemmo ikambe ampakasannangi atinNa, baji' na ri wattunna anrinni ija ri balla'na ikambe ri kamma-kammaya anne, yareka anjorengang sallang. 10 Nasaba' attantumi angkanaya lanierangki' mange andallekang ri pangadelanNa Almasi; siagang massing langgappa maki' pa'balasa' situru' apa le'baka nigaukang ri linoa anne, iamintu panggaukang baji' yareka panggaukang ja'dala'. 11 Naassemmi ikambe angkana apa battuanna nikanaya malla' mae ri Batara; iaminjo saba'na nausahamo ikambe ampakatappaki taua ri sesena kalenna ikambe. Baji' niassenna ikambe ri Allata'ala, naminasai sollanna nanuasseng todong ikambe lalang ri atinnu ngaseng. 12 Mingka teai lanri ero'na ikambe appala' pammuji battu ri kau ngaseng. Passangalinna lanri ero'naji bawang ikambe assareko alasang baji', sollanna lompo pa'mai'nu mae ri kambe; sollannu angngasseng appiali mae ri tau angngalleangangai apa-apa nacinika ri tanja'na taua, na ia sipa'-sipa'na. 13 Punna sanrapammo nucini' tau pongoroka ikambe, anjo lanri kaparalluang lamae ri Allata'ala. Na punna baji' nucini' jappana pikkiranna ikambe, anjo lanri kaparalluannu ngaseng. 14 PangngamaseanNami Almasi makoasa mae ri kambe; nanaassemmo ikambe angkanaya punna matemo tau se'rea untu' kaparalluanna sikontu rupataua, anjo battuanna angkanaya mate ngasemmi sikontu rupataua. 15 Matemi Almasi untu' sikontu rupataua, sollanna punna attallasa' rupataua, tenamo nauntu' kaparalluang kalenna bawang punna attallasa'; passangalinna untu' Almasi, iamintu le'baka mate siagang nipattallasa' poleanga ammotere' untu' kaparalluanna ke'nanga. 16 Lanri kammanami anjo, nataerokamo ikambe ambakuki se'rea tau situru' pa'baku'na rupataua. Memang, le'baki ikambe ambakuki Almasi situru' pa'baku'na rupataua, mingka kamma-kamma anne tenamo. 17 Inai-nai ampakase'remi kalenna mae ri KalenNa Almasi, a'jarimi tau le'ba' niberui taba sikali tallasa'na. Tenami apa-apa salloa ri kalenna, lanri le'ba' ngasemmi niberui. 18 Yangasenna anjo sangnging Allata'ala anggaukangi. Tete ri Isa Almasi Napa'jari assibajiki maki' mae ri KalenNa, nampa Nasareki' tugasa' sollanna akkulle todong tau maraenga assibajiki siagang Allata'ala. 19 Ia biritta napabattua ikambe iamintu angkanaya Napa'jari assibajikimi Allata'ala rupataua mae ri KalenNa, tete ri Almasi. TaNabilangai sikontu kasalang le'baka nagaukang rupataua mae ri KalenNa. Na ikambemi Nasuro Allata'ala ambirittakangi anjo kabaraka. 20 Jari ikambemi anne tunisuroNa Almasi. A'bicarami ikambe sangkamma angkanaya KalenNa Allata'ala a'bicara mae ri kau ngaseng lalang ri kalenna ikambe. Lalang arenNa Almasi, nanapala' dudumo ikambe sollanna nujamakkimo limanNa Allata'ala assareako oloang nukkulle assibajiki siagang KalenNa. 21 Tena dosaNa Almasi, mingka nipipisangiangi ri Allata'ala sikontu dosata mae ri Ia, sollanta akkulle assibajiki siagang KalenNa, lanri asse'retamo mae ri KalenNa Almasi.
1 Lanri assiaganNa Allata'ala ikambe anggaukangi anjo jama-jamanga, iami anjo nanapala' tojeng-tojemmo ikambe sollanna tena nanubawang-bawangangi anjo kabajikang pa'mai'Na Allata'ala. 2 Nakana Allata'ala lalang ri Kittaka, “Ri wattu pangngellaingKu, Kupilangngerimi pappala'nu, siagang ri wattu allo kasalamakkanga, Kupasalama' mako.” U'rangi baji'-baji'! Iaminne wattua, wattu pangngellaiNa Allata'ala. Kammayatompa iaminne alloa, allo pappasalama'Na Allata'ala. 3 Taerokai ikambe angkanaya nibilang salai palayanang nagaukanga ikambe. Jari usahami ikambe sollanna tena manna sitau akkulle ampasalai jama-jamang nagaukanga ikambe. 4 Jari ilalang ri sikontu apa nagaukanga ikambe napa'nyatami ikambe angkanaya ikambe anne atanNaki' Allata'ala. A'rupa-rupami kasukkarang le'ba' nakasia' ikambe siagang sa'bara': 5 nisessa maki', nitarungku maki', siagang niborongi maki' niba'ji; anjama terasa' maki', masarro maki' tattinroa, kammayatompa masarro tommaki' tamangnganrea. 6 Tulusu' pa'mai' maki', mangngasseng baji' maki', sa'bara' maki', kammayatompa baji' pa'mai' maki' mae ri kau ngaseng, sollanna nuasseng angkanaya ikambe anne ma'nassa atanNaki' Allata'ala. Kammayatompa tanjeng maki' mae ri Roh pannulunNa Allata'ala, mangngamaseang maki' situlusu' pa'maitta; 7 lalang koasaNa Allata'ala nanibirittakang kabara' battua ri Allata'ala; na lanri kammanami anjo nanapappicinikammo ikambe angkanaya ikambe anne ma'nassa atanNaki' Allata'ala. Anna'gala' jarre' maki' mae ri ero'Na Allata'ala. Iaminjo a'jari kagassinganna ikambe untu' langngewa yareka lanjagai kalenta punna battu mae musu lammanrakia. 8 Nipakala'birikki' mingka nihina tongki'; nipujiki' mingka nipa'boyang tongki' kodi. Manna kilambusu' pa'mai', nipakkanai tonjaki' paballe-balle. 9 Nikanamo tau tena angngassengki', mingka niasseng ngasengki' ri tau jaia. Nikana mate maki', mingka ma'nassa attallasa' ijaki'. Manna kinisessa, mingka tamateajaki'. 10 Manna nanipakasi'na pa'maitta, mingka tuli rannujaki'. Kasi-asi maki' nicini', mingka jaimi tau nipa'jari kalumanynyang. Tena nicini' apa-apanta, mingka sikontutojenna nia' ngasemmi ri katte sikontu apa-apaya. 11 Sikamma sari'battang kukarimangngia ri Korintus! A'bicara maki' silambusu'na mae ri kau ngaseng. Sikontu bonena atinta nipauang ngaseng mako. 12 Nasungke luara'mi atinna ikambe mae ri kau, mingka ikau ngaseng mami antongkoki atinnu mae ri kambe. 13 Jari boli'mi kamma naku'bicaramo mae ri kau sanrapang mae ri ana' kalengku. Kupalaki sollanna nusungke tommo atinnu mae ri kambe, sangkamma nasungkenamo atinna ikambe mae ri kau. 14 Teako eroki sipa'rappungang siagang tau tenaya naero' tappa' mae ri Isa; tena nacoco' anjo kammaya. Antekamma olona lakkulle a'jari se're kabajikanga siagang kaja'dallanga? Tena olona lakkulle a'jari se're singaraka siagang sassanga. 15 Tena olona lakkulle assamaturu' Almasi siagang Billisika. Apa sangkammanna tu Karistenga siagang tu tenaya na Karisteng? 16 Apa passisambunganna Balla'Na Batara siagang balla'na barhalaya? Ikattemi anne sanrapang Balla'Na Batara, iamintu Allata'ala attallasaka. KalenNa Allata'ala angkana, “LammantangA' ri tangnga-tangngana ke'nanga, na Kusikatallassang siagang ke'nanga. La'jariMa' Allata'ala mae ri ke'nanga, na la'jarimo ke'nanga ummakKu. 17 Lanri kammana, bokoimi anjo tau tenaya namangngasseng ri Allata'ala, siagang pakabellami kalennu battu ri ke'nanga. Tea' laloko sikarapiki siagang apa-apa ra'masaka, nampa Kutarimako mae ri KalengKu. 18 La'jariMa' Manggenu, nula'jari ana'-anakKu, kammami anjo kananNa Batara Kaminang Makoasaya.”
1 Sikamma sari'battangku kukarimangngia! Sikontu anjo janjia untu' ikatte ngaseng. Lanri kammana, parallui nitangkasi kalenta battu ri sikamma apa-apa akkullea anra'massi tubuta siagang nyawata. Paralluki' malla' mae ri Allata'ala. Sollanta akkulle attallasa' baji' siagang matangkasa' untu' Allata'ala. 2 Tarima maki' antama' ri atinnu ngaseng. Tena salana ikambe mae ri se'reang tau, siagang manna sitau tena le'ba' nipa'jari rugi ri kambe. Tena manna sitau le'ba' nipassawalli ri kambe. 3 Teai lanri ero'nu kusalakang nakuakkana kamma anne mae ri kau ngaseng. Nasaba', kamma le'bakamo kupau, sanna' kikamaseannu, kammayatompa sanrapang maki' tau assari'battang, sikatallassang sikamateang. 4 Sanna' sikali kupatappa'nu ngaseng. Ba'lalo sanna' lompona pa'maikku lanri ikau ngaseng! Manna mamo najai kasukkarang antujui ikambe, mingka sanna'mi nisaleorinna atingku lanri ikau ngaseng. Sanna' tojeng rannuna atingku! 5 Ri wattunna battu ikambe mange ri butta Makedonia, tena sikali nakisawe ammari-mari poso. Battu iraya ilau'mi kasukkaranga antujuki'; pa'beseranna taua mae ri kambe, kammayatompa malla'-malla' tommaki' ilalang ri atinta. 6 Mingka sukkurukki', lanri tuli nipakalompona ri Allata'ala atinna tu tappu' panrannuanga; Iami ampakasannangi atinna ikambe ri wattu battuna Titus mae ri kambe. 7 Teai lanri battuna bawang Titus nanisaleori atinna ikambe; mingka lanri napauna todong antekamma nisaleorinna pa'mai'na lanri ikau ngaseng. Napabattui mae ri kambe angkanaya teai sipato' nakku'nu ngaseng ero' angngaganga' assicini'; angkanaya assesse' lalang mako ri panggaukannu riolo, nanuero'mo angngaganga' sipammentengang. Iaminjo pila' ampakarannui atingku. 8 A'jari si'nai atinnu lanri anne surakku. Mingka tena nakuassesse' lalang antulisiki anne suraka. Memang sangkamma assesse' lalang tonja' sike'de' ri wattunna kuasseng angkanaya a'jari si'nai pa'mai'nu lanri anne surakku, manna nusinampe'ja si'na. 9 Mingka kamma-kamma anne sannamma' — teai lanri si'nami pa'mai'nu, passangalinna lanri amminranamo sipa'nu passabakkang si'nana pa'mai'nu. Memang, Nakellai memang tongi Allata'ala sollanna nukasia' anjo si'na kammaya. Jari tena nakipa'jari rugiko. 10 Nasaba' anjo si'na kammaya akkullei appa'nia' katobakkang siagang kasalamakkang; kammayatompa tena nala'jari sesse' lalang taua lanri passabakkang anne passalaka. Mingka punna si'na passabakkang anne linoa, lanaerangi taua mange ri kamateanga. 11 Alle sai cini' wassele'na si'na situruka ero'Na ri Allata'ala! Iamintu attojeng-tojengko ampakabajiki apa kodia! A'jari numusui dosaya, a'jari mallakko, a'jari nakkukko, a'jari lompoi sumanga'nu, kammayatompa rellako anghukkungi tau salaya! Ilalang yangasenna anjo nupa'buttimi ri kalennu angkanaya tena nanusala mae ri anjo passalaka. 12 Jari, punna kutulisi' anjo suraka, teai passabakkang anjo tau salaya, teai tongi lanri nakasia'namo ke'nanga passessaya passabakkang anjo kasalanga. Mingka nakutulisi' anjo suraka, sollanna nanuasseng ri dallekanNa Allata'ala, antekamma lompona panjampanginnu ngaseng mae ri kambe. 13 Iaminjo saba'na nanisaleorimo atinna ikambe. Pantaranganna panynyaleoria, ba'lalo sanna'mo rannuta anciniki karannuanna Titus; ikau ngasemmi le'ba' ansaleori atinna. 14 Memang, le'ba'mi kucarita mae ri ia antekamma baji'nu ngaseng. Sukkuru'ma', lanri tenaja nanupakasirika'. Ma'nassa kontutojeng ngasengi anjo apa-apa le'baka nacarita ikambe mae ri kau ngaseng. Kammayatompa anjo apa-apa le'baka nacarita ikambe mae ri Titus ma'nassa kontutojeng ngasengi. 15 Kamma-kamma anne pila' lompomi pangngamaseanna mae ri kau ngaseng. Nasaba' nau'rangi antekamma ero'nu ngaseng ampilangngeri kananna. Kammayatompa lompona ngaseng pangngali'nu mae ri ia ri wattunna nutarima. 16 Sannang sikali pa'maikku, lanri akkullenu nirannuang.
1 Sari'battangku ngaseng; kukellai nanuasseng todong antekamma baji'Na Allata'ala mae ri jama'aka ri butta Makedonia. 2 Le'ba'mi ke'nanga niso'ri siagang kasukkarang lompo. Mingka ri tangnga-tangngana anjo kasukkaranga, tuli rannuna pa'mai'na ke'nanga. Manna nakasi-asi ke'nanga, mingka lammoro' pa'maiki ke'nanga assare sumbangang, untu' antulungi tau maraenga. 3 Kalengku anciniki antekamma batena napikulle-kullei ke'nanga assare, ba'lalo la'biangampa pole na ri pakkullena ke'nanga. 4 Tanisuroai, nakalenna tonji ke'nanga ampala' dudui sollanna akkulle todong ke'nanga amminawang turu' ansarei sumbangang Umma'Na Allata'ala ri pa'rasangang Yudea. 5 Assaremi ke'nanga la'biangang ri naminasaia ikambe. Uru-uruna napassareammi kalenna ke'nanga mae ri Batara. Le'baki anjo napassareang tommi kalenna ke'nanga mae ri kambe, situru' ero'Na Allata'ala. 6 Iaminjo nasanna' kukellaina Titus — le'baka ampakaramulai anne jama-jamanga — sollanna napannarrusu' todong anne jama-jamang bajika ri tangnga-tangnganu ngaseng. 7 Baji' ngaseng mako lalang ri sikontu katallassannu. Sanna' baji'nu lalang ri tappa'nu, lalang ri pau-paunu, lalang ri pangngissengannu, lalang ri sikontu usahanu, siagang pangngamaseannu mae ri kambe. Lanri kammana bajiki punna baji tommako lalang ri anne jama-jamang bajika. 8 Tena nakuero' amparentakangi anne nakupauangko. Mingka eroki kupappicinikang mae ri kau antekamma attojeng-tojenna tau maraenga antulungi paranna tau. Na ero' tongi kuasseng angkanaya sa'ge kemae tongi bellana pangngamaseannu. 9 Nasaba' baji' ngaseng nuassenna angkanaya teai sipato' nikarimangnginta ri Isa Almasi Batarata: Kalumanynyangi, mingka Napa'jari kasi-asimi KalenNa untu' kaparalluannu ngaseng; sollanna battu ri kakasi-asianNa nukkulle a'jari kalumanynyang. 10 Turu' ri panggappaku, kamma-kamma anne siratang memang tommi nupa'le'ba' anjo apa-apa le'baka nupakaramulai ri taung allaloa. Nasaba' ikaumi uru-uru annawa-nawai siagang ampakaramulai anne jama-jamanga. 11 Jari, kamma-kamma anne pannarrusu'mi anne jama-jamanga situru' pakkullenu. Parallui nulompoi sumanga'nu ampa'le'baki anne jama-jamanga, sangkamma lompona todong sumanga'nu ri wattunna nampa nunawa-nawa anne jama-jamanga. 12 Punna rellako assare, ma'nassa laNatarimai Allata'ala anjo passarenu. Lanatarimai situru' pakkullenu, tena nasituru' apa tenaya ri kau. 13 Mingka tena sikali nakuero' ampalili tau maraenga ri anne passalaka, nampa ikau kubattalli. Passangalinna parallui massing sambattala'. Nasaba' kamma-kamma anne massing ganna'-ganna' ngaseng mako ri kaparalluannu; jari siratang mako ampa'gannaki kakuranganna ke'nanga. Punna ikau kakurangang sallang, na ke'nanga massing ganna'-ganna', ke'nanga tosseng ambantuko. Jari lanri kammana anjo, para silayani mako. 15 Nia' tattulisi' lalang ri Kittaka angkanaya, “Tau jaia panggappana, tena nakala'biang, na tau sike'deka panggappana, tena nakakurangang.” 16 Teai sipato' sukkuru'na ikambe mae ri Allata'ala nasaba' nisarena todong pakkulle Titus attojeng-tojeng ambantu ngasengko! 17 Nasaba' tena naporo rella bawang anggaukangi apa napassuroanga ikambe. Mingka battu ri ero' kalenna tonji nattojeng-tojeng ero' ambantuko. Kalenna tonji ero' a'lampa mae ri kau ngaseng. 18 Nia' todong sitau naagang a'rurung kusuro mae ri kau. Iamintu tau sannaka nipakalompona ri sikamma jama'aka, lanri jama-jamanna ambirittakangi Kabara' Baji' battua ri Allata'ala. 19 Pantarangannaya pole, anjo taua ngaseng le'ba' tommi nipile siagang nipattantu ri jama'aka untu' amminawang ri kambe lalang ri pa'lampanna ikambe. Nasaba' eroki ikambe a'lampa ampabattui anjo sumbanganga; sollanna nipakala'biri' Batara, kammayatompa nanuasseng ngaseng angkanaya rella tongi ikambe annulung. 20 Parallui tutu ikambe ri passala'na anne sumbanganga. Sollanna tenanniakka tau ampasalai ikambe ri nipabattuna anne sumbangang jai kammaya. 21 Nasaba' paralluki' a'gau' lambusu' ri dallekanNa Batara siagang ri dallekanna rupataua. 22 Nia' pole sitau sari'battang maraeng kusuro todong amminawang ri Titus siagang anjo sari'battanga. A'mole-molemi niuji anjo sari'battanga, na'buttimo angkanaya nangai annulunga. Na kamma-kamma anne, la'bi-la'bi pole ero'na ambantu ngasengko, nasaba' nia'na panrannuang lompona mae ri kau ngaseng. 23 Na passala'na Titus, iami agang bajikku, kuaganga sipanjama-jamang ambantu ngasengko. Kammayatompa anjo sari'battanga ruaya, niaka anrurungangi Titus, iami ke'nanga tau nisuroa ri sikamma jama'aka, siagang nikarannuanga untu' Almasi. 24 Kiminasai nanupappicinikang ngaseng pangngarimanginnu mae ri ke'nanga. Sollanna naasseng ngaseng jama'aka angkanaya nukarimangngi ke'nanga. Kammayatompa na'buttimo angkanaya kontutojengi apa nakalompoang pa'maika ikambe ri sesena ikau ngaseng.
1 Sikontutojenna tenamo naparallu kutulisi' mae ri kau ngaseng lalang sura' anjo passala' sumbangang nikiringa mae ri Umma'Na Allata'ala niaka ri Yudea. 2 Kuassengi angkanaya nungai annulunga; na anne le'ba'mi kucarita mae ri taua ri butta Makedonia. Le'ba'mi kupau kalompoang pa'maikku mae ri ke'nanga angkanaya battu ri taung allaloaji nasadiamo sari'battanga ri butta Akhaya assare sumbangang. Na iaminjo sumanga'nu ampakalompo tongi sumanga'na ke'nanga. 3 Kamma-kamma anne kusuromi Titus siagang anjo rua sari'battanga battu mae ri kau ngaseng. Sollanna akkulle a'butti anjo kalompoang pa'mai' le'baka nacarita ikambe teai poro carita bawang. Jari, paralluko sadia, nasaba' le'ba'mi kupau ri ke'nanga angkanaya sadia ngaseng mako. 4 Kubata-batai gassingka nia' todong tu battu ri butta Makedonia amminawang ri nakke punna battua' mae ri kau sallang. Na punna narapikangko tena nusadia, teaimi sipato' siri'-siri'na ikambe. Nasaba' le'ba'mi nipau angkanaya sanna' akkullenu nipatappa'! Nampa ikau pole lasanna' todong siri'-siri'nu. 5 Iaminjo saba'na naparallu kusuro a'lampa riolo anjo ke'nanga mae ri kau, angngurusuki anjo sumbangang le'baka nupa'janjiang. Kammami anjo kugaukang sollanna punna battua' sallang, sadiami anjo sumbangannu. Lanri kammana, a'nassami angkanaya tena nabattala' passangalinna te'nei pa'mai'nu ampassareangi anjo sumbanganga. 6 U'rangi laloi! Angkanaya inai-nai a'lamung sike'de', sike'de' tonji wassele' lanagappa. Mingka inai a'lamung jai, lajai tongi wassele' nagappa. 7 Parallui taua massing assare siagang te'ne pa'mai'na. Teako assarei siagang bata-bata yareka battala' pa'mai'. Nasaba' nikarimangngi ri Allata'ala tau te'nea pa'mai'na assare. 8 Makoasai Allata'ala assareko barakka' allumpa-lumpa, sollanna tena nukakurangang ri apa-apa nuparalluanga. Ba'lalo lakala'biangko, sollannu akkulle a'gau' baji' siagang appare' amala'. 9 Ri passala'na Allata'ala nia' tattulisi' lalang ri Kittaka angkanaya, “Appakio'-kioroki mae ri tu kasi-asia; mannannungangi kabajikang pa'mai'Na.” 10 Allata'ala ampasadiai bine napakioroka taua siagang kanre niparalluia. Ia tommi ampasadiai siagang ampa'jari jai anjo bine le'baka nupakioro', sa'genna katambang todong wassele'na anjo apa le'baka nupa'lammorang. 11 Lanri kammana, laganna' mako ri sikontu kaparalluannu, sa'gennu tuli akkulle malammoro' assare. Na anjo passarenu ngaseng, napa'bage-bageanga ikambe, la'jari passabakkammi najai tau lappala' sukkuru' mae ri Allata'ala. 12 Nasaba' anne gau' baji' nugaukanga, tena naporo lappa'ganna' bawang mae ri kakuranganna Umma'Na Allata'ala. Passangalinna la'jari tongi passabakkang najai tau lappala' sukkuru' mae ri Allata'ala. 13 Na battu ri iami anjo kabajikang nupappicinikanga, najaimo tu Karisteng ri Yudea lamammuji mae ri Allata'ala. Lanri nacini'na ke'nanga antekamma jarre'nu mae ri Kabara' Baji' nupinawanga, iamintu ri sesena Almasi. Kammayatompa mammujimi ke'nanga ri Allata'ala lanri lammoro'na pa'mai'nu ambage-bagei ke'nanga siagang tau maraenga, apa-apa niaka ri kau. 14 Na lanapappala' doangangko siagang pa'mai' mangngarimangngi mae ri kau, lanri sanna' baji'Na Allata'ala mae ri kau. 15 Paralluki' appala' sukkuru' mae ri Allata'ala, lanri teai sipato' lompona anjo passareNa!
1 Kamma-kamma anne, kalengku Paulus, nia' ero' kupabattuangko. Inakke anne, turu' kananna taua, sanna' tunana kana-kanangku punna sidallekanga' siagang ikau ngaseng. Mingka punna sikabellaiki' sanna' baraniku. Jari, lanri tunaNa siagang kabajikanNa Almasi, 2 kupala' dudui ri kau ngaseng, tea' laloko passaia' sa'gengku a'bicara terasa' punna battua' sallang mae ri kau. Nasaba' eroki kuterassi sikamma tau angkanaya untu' pakkalinoanga nanagaukangi ikambe anne jama-jamanga. 3 Memang lalang ijaki' ri linoa attallasa', mingka teai lanri untu' anne linoa nabarjuang ikambe. 4 Kagassinganna ikambe lalang anggaukangi anne jama-jamanga teai kagassingang battu ri anne linoa, passangalinna kagassingang battu ri Allata'ala. Iaminjo kagassinganga napake ikambe angngancuruki kagassinganna linoa, antepoki bicara pa'geakkanga, 5 kammayatompa anruntungi pa'ballakang katampoanna ke'nanga, eroka angngewai katojenganNa Allata'ala. Iami nipake ampadundui pikkiranna sikamma rupataua, sa'genna amminawang turu' mae ri Almasi. 6 Na punna amminawang turu' ngaseng mako, sadiami ikambe untu' anghukkungi sikamma tau tenaya namminawang turu'. 7 Parallui nupahang baji' apa-apa niaka nucini' kajariang. Punna nia' tau tappa' tojeng-tojeng angkanaya ma'nassa taunNami Almasi, parallui napakainga' kalenna na nasadari todong angkanaya ikambe anne taunNa tongki' Almasi, sangkamma ia. 8 Tena nakusiri'-siri' tuli angkalompoang pa'maiki kakoasang le'baka Napassareang Batara mae ri kambe. Nasaba' anjo kakoasanga eroki nipake untu' ambangungko. Teai untu' anruntungko. 9 Tena nakukellaiko angkana kupakamalla'-mallakko lalang ri sura'-surakku. 10 Lanakana kapang taua, “Sanna' terasa'na siagang sanna' baji'na sura'-sura'na Paulus. Mingka punna kalenna nia' ri tangnga-tangngata, lamma sikaliji siagang tena nasiapa pau-pauna!” 11 Parallui nasadari tau kammaya anjo, angkanaya punna battu sallang ikambe ri tangnga-tangnganu, tena sisalana apa lanagaukanga sallang ikambe siagang anjo apa napaua ikambe ilalang ri sikamma sura'-sura'na ikambe. 12 Tantu tena nakibarani ampasangkammai yareka ampasantinggi kalenta siagang tau nakanaya kalenna tinggi. Teai sipato' dongo'na ke'nanga! Appareki pa'baku' untu' kalenna ke'nanga, nampa napake anjo pa'bakuka mae ri kalenna. 13 Ikambe tena nakikamma anjo. Punna lompo pa'maitta, tena nita'liwa'-liwa'. Ikatte ilalang tonjaki' anjama-jama ri daera le'baka Napattantuangki' Allata'ala. Na ikau ngaseng, niakko lalang ri daera panjama-jamanna ikambe. 14 Jari, ri wattunna battu ikambe angkunjungiko angngerang Kabara' Baji' ri sesena Almasi, sitojenna tena nakiassulu' battu ri daera panjama-jamanna ikambe. 15 Tena nakipuji kalenta passabakkang wassele' jama-jamanna tau maraenga pantarang daera le'baka Napattantu Allata'ala untu' ikambe. Mingka tuli lalang tonji ikambe ri daera le'baka Napattantuangki' Allata'ala, na ma'minasa ikambe angkanaya pila' tappa' mako mae ri Almasi, sollanna akkulle ikambe anggaukangi jama-jamang lompoanganga. 16 Jari, akkulle maki' pole ambirittakangi anjo Kabara' Bajika ri sikamma butta maraenga, mingka tena nanipalecei kalenta passabakkang wassele' jama-jamang le'baka nagaukang tau maraenga ri anjo daeraya. 17 Nia' tattulisi' lalang ri Kittaka angkanaya, “Inai-nai ero' angkalompoang pa'maiki apa-apaya, parallui apa-apa le'baka Nagaukang Batara nakalompoang pa'mai'.” 18 Nasaba' tau akkullea nipuji iamintu tau nipujia ri Batara; teai tau ampaleceai kalenna.
1 Boli'mi kamma kupa'jari dongo' rolong kalengku sike'de'. Sai akkulleji? 2 Nakkuka' mae ri kau ngaseng, sangkamma KalenNa Allata'ala nakku' tongi mae ri kau ngaseng. Sanrapangko se're tulolo, le'bakamo kujanji lakupa'nikka siagang sitau bura'ne, iamintu Almasi. 3 Mingka ranggaselai pa'maikku, gassingka nigodai pikkirannu sa'genna tenamo nujarre' ri janjinnu mae ri Almasi. Sangkamma todong Hawa riolo, nigoda tongi ri kacara'dekanna ularaka. 4 Nasaba' kamma kusa'ring tuli sannangko antarima ngasengi tau battua mae ri kau angngajara' ri sesena Isa maraengannaya; jari teai Isa kipangngajarranga mae ri kau napangngajarrang ke'nanga. Na nuero' todong antarimai anjo roh siagang “kabara' baji'” sanna' sikali simmaraenna siagang RohNa Allata'ala yareka Kabara' Baji' le'baka nutarima battu ri kambe. 5 Tena sikali nakurapang kalengku la'bi tunaangngang na anjo sikamma anjo “tunisuro” nukanaya sannaka heba'na! 6 Nakkulle kapang tena nakucara'de' a'bicara; mingka ri passala' pangngassengang mae ri Allata'ala, teaiya' tau dongo'. Anjo le'ba'mi kupa'butti mae ri kau lalang a'rupa-rupa passala'. 7 Ri wattunna kubirittakang Kabara' Baji' battua ri Allata'ala mae ri kau ngaseng, tena nakuppala' ongkoso' mae ri kau manna sike'de'; na lanri kammanami anjo nakupa'jari tuna kalengku. Kammami anjo kugaukanga, sollannu akkulle kupakatinggi. Maka salai anjo kugaukanga mae ri kau? 8 Ri wattunnu kulayani, jama'ah-jama'ah maraengang angngongkosia'. Akkulle nikana kupakarugi anjo jama'ah-jama'ah maraenga sollannu akkulle nibantu. 9 Punna kakuranganga' anjo wattua, tena le'bakai nia' tau battu ri kau kususai manna sitau. Sikamma apa-apa kuparalluanga napa'ganna' ngasengi sari'battang battua ri jama'ah Makedonia. Kukatutui sollanna tena nakususaiko, manna na passala' kaparalluang apa-apa mamo. Na tuli kukatutuina anjo kammaya. 10 Takkulleai nipattaena anne apa nakalompoanga pa'maikku, manna pole ri kere-keremae ri sikontu butta Akhaya, lanri nia'na ri nakke pangngajarang annabaya, battua ri Almasi. 11 Angngapa nakuakkana kamma? Maka lanri tenana nakukamaseangko? Naassengi Allata'ala angkanaya kukamaseangko! 12 Anne apa kugaukanga ri kamma-kammaya anne, tuli lakugaukangi situlusu'na. Sollanna tena alasanna sikamma “tunisuro” maraenganga ampakalompoi kalenna, angkana anjama tongi sangkamma ikambe. 13 Anjo tau kammaya sangnging suro a'balle-balle. Anjo ke'nanga sangnging pajama ero' apa'lingu-lingu tau, assara-saraia a'jari tunisuroNa Almasi. 14 Takkulleaki' lannasa' punna appakamma anjo ke'nanga, nasaba' manna Billisika ammakeang kamma tonji malaeka' singaraka! 15 Jari tena nappakalannasa' punna ammakeang kamma todong palayanNa Allata'ala anjo sikamma palayanna Billisika. Mingka kale'bakkanna lanagappa ngaseng tonji pa'balasa'na sikontu panggaukanna ke'nanga. 16 Sikalipi pole kukana: Gassingka nia' tau ampakkanaia' dongo'. Mingka punna kamma tonji lanupakkanaingku dongo', boli'mi kamma nakupakalompo sike'de' pa'maikku. 17 Eroki kupau sike'de' apa nakalompoanga pa'maikku. Mingka teai Batara assuroa' ampakalompoi anne pa'maikku. Anne a'bicara' sanrapang tojeng-tojeng tau dongoka. 18 Memang, jai tau ampakalompoi pa'mai'na passabakkang pakkalinoanga; jari ero' tongi kupakalompo sike'de' pa'maikku. 19 Akkulleko sa'bara' mae ri tau dongoka, lanri nukanana kalennu tau cara'de'! 20 Nubalang parekangi kalennu punna nipare' atako ri taua, yareka napaccokko siagang napassawalliko, kammayatompa nakana kalenna tinggiangangi na ikau, nampa barani antempaka'rangko! 21 Siri'-sirika' angngakui angkanaya tena sikali nakkulle ikambe anggaukangi anjo panggaukang kammaya. Mingka apa barania nakalompoang pa'mai' taua, inakke barani tonja'! (Anne a'bicara tau dongokka'.) 22 Maka tu Ibrani anjo ke'nanga? Inakke tu Ibrani tonja'. Tu Israel ke'nanga? Inakke tu Israel tonja'. Turungannai Abraham ke'nanga? Inakke pole kamma tonja'! 23 PalayanNai Almasi ke'nanga? Kammama' kapang nilangngere' tau kala'busang akkala'; mingka inakke palayang memanga', iamintu palayang bajikanganga na yangasenna anjo ke'nanga! Inakke terassangangi bateku anjama. A'mole-moleanganga' nipantama' ri tarungkua. Jaiangangi passessa kukasia' siagang a'mole-molema' sike'de' mate. 24 Pillimama' nisessa ri tu Yahudia, nicambo' tappintallumpulo assalapang. 25 Pintalluma' nicambo' manuru' hukkunna tu Romaya; le'ba' tonga' nimanang-manangngi nisambila batu. Pintallunga' anggappa bala ri tamparanga sike'de' tallang. Siagang le'baka' sikali ammawang-mawang ri tamparanga siallo sipattang. 26 A'mole-molema' andallekang bala ri pa'lampangku: andallekang bala a'ba lompo, bala paella', bala battu ri tu Yahudia yareka bansa-bansa maraenga, bala ri kotaya, bala ri pantarangang kota, bala ri tamparang kammayatompa bala battu ri tau nakanaya kalenna Karisteng nampa tenaja na Karisteng. 27 Sitangnga matea' akkareso: a'mole-molea' tattinroa, tangnganrea, tangnginunga; a'mole-molea' naalle cipuru', naalle dinging lanri kuranna care-careku siagang tenana pammantangangku. 28 Pantarangannaya anjo, allo-alloku todong lussa' napakamma sikontu jama'aka. 29 Punna nia' tau lamma, amminawang tonga' lamma kusa'ring. Punna nia' tau tu'guru' naung ri dosaya, posso' tongi nyawaku kusa'ring. 30 Jari, punna nia' apa-apa musti nakalompoang pa'maikku, iaminjo kapa'risangku nakalompoang pa'maikku. 31 Nasaba' tena nakua'balle-balle; Allata'ala, ManggeNa Batarata Isa a'jari sa'bi mae ri nakke! Nipujimi arenNa satunggu-tungguna. 32 Ri wattungku nia' ri kota Damsyik, guburnur ammarentaya anjo wattua iamintu Karaeng Aretas; iami assuroi tantaraya anjagai pakke'bu'na kotaya lanri erokku nasuro jakkala'. 33 Mingka nipantamama' ri karanjenga nampa niolorokka' naung ri se'reang kali'bonna tembo' pa'rinrinna kotaya. Kammami anjo nakuta'lappasa'mo battu ri limanna anjo guburnurka.
1 Memang, tena passawallang nigappa punna nipakalompo pa'maika. Mingka kamma tonji erokku angkalompoang pa'maiki apa-apa le'baka Napappicinikang Allata'ala mae ri nakke. 2 Nia' kuasseng se're tu Karisteng sampulo angngappa' taung allaloa, niangkaka nai' ri lonjo' kaminang tinggina surugaya. (Takuassengai angkanaya maka tubuna tojeng-tojeng niangka' nai' ri suruga yareka paccinikkuji bawang. Allata'alaji bawang angngassengi.) 3 Sikalipi pole kupau: Anne taua kuassengi angkanaya niangkaki mae ri Firdaus. (Takuassengai angkanaya maka tubuna tojeng-tojeng niangka' nai' ri suruga yareka paccinikkuji bawang. Allata'alaji bawang angngassengi.) Anjoreng nia' nalangngere' anjo taua apa-apa tenaya nakkulle napau rupataua siagang tenaya nipa'biangi napau rupataua. 5 Iaminjo taua ero' lakukalompoang pa'mai', teai kalengku. Ri sesena kalengku, iaji bawang anjo apa-apa kukalammanga, ero' kukalompoang pa'mai'. 6 Alarapanna nia' todong apa-apa ero' lakukalompoang pa'mai', tena nakuero' a'jari tu lompo bicara, tenaya bonena; mingka apa-apa kontutojengaji bawang lakupau. Mingka kujagai kalengku, lanri tenana kuero' punna nia' tau la'bi dudu batena ambakuki apa-apa le'baka nacini' kugaukang, yareka apa-apa le'baka nalangngere' kupau. 7 Mingka sollanna tena nakua'jari tampo dudu lanri ri anjo pappicini' lompoa, le'baka kucini', nisarema' sirupa garring antama' ri kalengku. Anjo garringa akkullei napake Billisika. Nisarea' anjo garringa a'jari pa'ba'bala' ri kalengku, sollanna tena nakua'jari tampo. 8 Pintallunga' appala' doang mae ri Batara sollanna akkulle nipasulu' anjo garringa battu ri kalengku. 9 Mingka appialimi Batara angkana, “MangngarimangngiA' mae ri kau, naganna'mo anjo mae ri kau; nasaba' punna lammai nukasia' kalennu, iaminjo wattua napila' magassing koasaKu.” Lanri kammanami anjo nakula'bi sannang angkalompoang pa'maiki apa-apa kukalammanga; nasaba' punna lammai kusa'ring kalengku, iaminjo wattua nakukasia' pannulunNa siagang kakoasanNa Almasi mae ri nakke. 10 Jari kukarannuang tongi anjo sikamma kalammangku. Kukarannuang tongi punna lanri Almasi nakunitudu tarigaukku, punna natujua' susa, punna niondanga' ri kere-keremae, kammayatompa punna natujua' kasukkarang lanri Almasi. Nasaba' punna lamma kukasia', iaminjo wattua nakugassing. 11 A'gau' sanrapang tojemma' tau dongoka — mingka passabakkang ikaumi naku'jari kamma anjo. Sikontutojenna ikau ngasemmi siratang ampujia'. Nasaba' manna tena sikali anggarangku, mingka tena nakunibeta ri sikamma anjo suro balle-balle nukanaya sannaka porena! 12 Le'ba'mi kupappicinikang mae ri kau siagang sa'bara' sikamma gau' appakalannasaka siagang gau' malompoa, yareka jama-jamang sannaka lompona; sollanna a'buttimo mae ri kau angkanaya inakke ma'nassa tunisuroNa' Allata'ala. 13 Ri passala apaya nukurang nijampangi sangkamma jama'ah-jama'ah maraenga? Kaminang jaina ri passala' iaji anne: Angkanaya tena nakususaiko untu' angngongkosia'. Pammopporanga' ri anjo kasalangku! 14 Kamma-kamma anne maka pintallungkumi apparuru ero' battu angkunjungiko. Natena nakuero' ansusaiko. Nasaba' teai barang-barannu kukaeroki, passangalinna kalennu. Nasaba' teai ana'-anaka ampa'boyangi katallassang tau toana, passangalinna tau toanaji musti ampa'boyangi katallassang ana'-ana'na. 15 Lanri kammana, rellami nyawaku ero' angkoro'bangkangi sikontu katallassangku untu' ikau ngaseng. Ba'lalo manna sa'genna batangkalengku rella tonja' angkoro'bangkangi untu' ikau. Punna kamma anjo batenu kukarimangngi, maka siratangi punna kurang nukarimangngia'? 16 Jari, nupahammi angkanaya tena nakule'ba' ansusaiko. Mingka nia' tau ampakkanaia' la'bu akkala'; angkanaya kupanggappaiko passawallang, lanri kuakkaliko siagang akkala' la'bu. 17 Antekamma lakkulle! Maka battu ri anjo sikamma tu kusuroa mae ri kau nakupanggappaiko passawallang? 18 Kusuromi Titus a'lampa angkunjungiko, siagang kusuro tongi anjo sari'battang Karisteng maraenga anrurungangi. Maka nia' passawallang naalle Titus battu ri kau? Inakke siagang Titus a'julu pa'maikka' anjama-jama, siagang sangkamma-kammai bateku anjama! 19 Gassingka nukana ngaseng anne siapa sallona erokka' alliliangi kasalangku mae ri kau. Sala pahang sikaliko antu. Naassengi Allata'ala angkanaya yangaseng anjo napaua ikambe situruki ero'Na Almasi. Sikontu anjo apa kigaukanga iamintu untu' ambangung ngasengi tappa'nu. 20 Ranggaselai nyawaku gassingka punna battua' sallang angkunjungiko nakurapikangko tasangkammaya apa kuminasaia. Kammayatompa nurapikang tonga' tasangkammaya pa'minasanu. Gassingka nia' sallang kurapikang passiba'jiang, sereati, pa'bambangang, kaparalluang kalennaji bawang naboyai, sipitina, sikompa-kompa sala, katampoang siagang karicuang. 21 Kukamallakkangi gassingka Napakatuna' Allata'alaku sallang ri dallekannu punna battua' angkunjungiko. Ranggasela tonga' gassingka jaiko sallang lampakarruka', lanri tenana nuero' ampinrai gau' dosanu allaloa, anggaukangi gau' bawanga, gau' ra'masaka, kammayatompa gau' tenaya nasiratang.
1 Iaminne makapintallungku battu angkunjungiko. Nia' tattulisi' lalang ri Kittaka angkanaya, “Punna nia' parkara musti nia' rua yareka tallu tau a'jari sa'bi nampa a'jari assa anjo parkaraya.” 2 Sikamma tau le'baka a'gau' dosa ri wattu allaloa, le'ba'mi kupakainga' pirangalloang, ri wattungku makapinruang battu angkunjungiko. Kamma-kamma anne, ri wattu sikabellainta, kupakainga' poleang mako angkanaya punna battua' pole sallang, tena manna sitau ri ke'nanga lata'lappasa' battu ri hukkunganga. 3 Jari lanucini'mi butti nukaerokia angkanaya ma'nassa a'bicara tojeng-tojengi Almasi tete ri kalengku. Punna Nahukkungko Almasi, tena nalamma, passangalinna laNapappicinikangi kakoasanNa ri tangnga-tangnganu. 4 Memang, ri wattunna nisalli' lammai; mingka kamma-kamma anne attallasa' poleammi lanri kakoasanNa Allata'ala. Ikambe tulamma tonjaki' lalang assileo'na katallassanta siagang Almasi; mingka punna sidallekangki' siagang ikau ngaseng, a'jari majarre' tommaki' lanri koasaNa Allata'ala. 5 Coba sai paressa kalennu, maka attallasa' tojeng-tojeng mako situru' matappa'nu mae ri Almasi? Ma'nassa langngu'rangiko angkanaya niaki Isa Almasi lalang ri kalennu! Simmaraengi punna tena nutappa' tojeng-tojeng. 6 Kuminasai nanuasseng angkanaya ikambe anne teaiki' tau akkullea antahangi paccobaya. 7 Appala' doangki' mae ri Allata'ala sollannu Natulung, natena nugaukangi salaya. Teai lanri erotta ampappicinikangi angkanaya ikambe anne tau cara'dekki' anjama-jama. Mingka sollanna nugaukang ero'Na Allata'ala — manna nakamma nucini' tena wassele' jama-jamanna ikambe. Tena nangngapa-apa! 8 Nasaba' manna sike'de', takkulleaki' anggaukangi apa-apa tenaya Nakaerokangi Allata'ala; musti nigaukangi ero'Na Allata'ala. 9 Rannu maki', punna ikambe lamma na ikau majarre'. Appala' doangki', sollannu a'jari sukku' baji' ri tallasa'nu. 10 Iaminjo saba'na nakutulisi' anne suraka, lalang tenanapa nakunia' ri tangnga-tangnganu. Jari, punna battua' sallang, tenamo naparallu kupake katerassanga mae ri kau siagang kakoasang Napassareanga Batarata mae ri nakke. Anjo kakoasanga Napassareangi mae ri nakke Batara untu' ambangungko. Teai untu' lanruntungko. 11 Kala'busang kana, sari'battangku ngaseng, paralluko a'rannu-rannu, siagang usahakangi nu'jari sukku'. Tarima ngasemmi pappakaingakku. Paralluko a'julu ati siagang assiama' lalang tallasa'nu. Allata'ala Kaminang Mangngarimangngia siagang mappasiamaka lanrurungangko. 12 Massing sipasalamakko nusikajarreki salaku tu Karisteng assari'battanga. Appikatui sallang sikontu Umma'Na Allata'ala mae ri kau ngaseng. 13 Poro Nabarakkakiko Batara Isa Almasi, naNakarimangngiko Allata'ala, kammayatompa Narurungang ngasengko RohNa Allata'ala! Sallangku, Paulus
1 Natarimai sikamma sari'battanga, iamintu jama'ah-jama'ah niaka ri sikontu butta Galatia. Battu ri nakke Paulus kammayatompa sikamma tu Karisteng niaka kuagang anrinni; ma'minasaki' nuporo nibarakkaki siagang nisare ngaseng katallassang salewangang battu ri Allata'ala Manggea, siagang battu ri Almasi. Inakke, teai tete ri rupataua nakuniangka' a'jari tunisuroNa Allata'ala; passangalinna tete ri Isa Almasi, siagang Allata'ala Manggeta le'baka ampabangung poleangi Almasi battu ri kamateanga. 4 Napassareammi KalenNa Almasi a'jari koro'bang untu' dosa-dosata, lanri Naturukinna ero'Na Allata'ala Manggeta. Sollanta akkulle nipasalama' battu ri anne jammang kaja'dallanga. 5 Nipujimi Allata'ala sa'genna satunggu-tungguna. Aming. 6 Lannasaka' mae ri kau ngaseng sari'battang! Nasaba' le'ba' mako nikio' ri Allata'ala lanri pangngarimangnginNa tete ri Almasi. Mingka kamma-kamma anne teai sipato' linta'nu ambokoi Allata'ala. Amminawangko mae ri “kabara' baji'” maraengannaya na Kabara' Baji' battua ri Allata'ala. 7 Sikontutojenna tena “kabara' baji' maraeng”. Mingka nia'naji bawang siapa are tau ambirittakangi mae ri kau “kabara' baji'” ri sesena Almasi, nanaputara' bale' anjo kabaraka sa'gennu nipa'jari lingu. 8 Lappassammi nihukkung ri Allata'ala anjo tau ambirittakangai “kabara' baji'” simmaraenga siagang Kabara' Baji' nabirittakanga ikambe. Manna pole na ikambe anjo taua, yareka malaeka' battu ri suruga! 9 Le'ba'mi kupau pirangalloang, nakamma-kamma anne sikalipi pole kupau angkanaya: Anjo tau ambirittakangai mae ri kau “kabara' baji'” simmaraenga siagang Kabara' Baji' le'baka nutarima battu ri kambe, anjo tau kammaya musti nihukkungi ri Allata'ala! 10 Punna kamma, gassingka nukana kuminasai sollangku niakui ri rupataua? Tena sikali! Allata'ala bawang kuminasai angngakuia'. Maka erokkuji ningai ri rupataua nakualle pa'mai'na? Punna kamma anjo bateku, teaiya' tunisuroNa Almasi. 11 Musti nuassengi angkanaya anjo Kabara' Baji' kubirittakanga, teai kabara' battu ri rupataua. 12 Tena nabattu ri rupataua kutarima anjo kabaraka. Siagang tena manna sitau ampangngajarrangi mae ri nakke. KalenNa Isa Almasi ansungkei bonena anjo Kabara' Bajika mae ri nakke. 13 Tantu le'ba'mi nulangngere' katallassangku pirangalloang salaku tu tappa' ri agama Yahudia. Nuassengi antekamma sekke'na panggaukangku mae ri jama'aNa Allata'ala. Siagang antekamma terasa'na usahaku ero' angngancuruki ke'nanga. 14 Ri passala'na anggaukangai pangngajaranna agama Yahudia, inakkemi kaminang la'bi ri sikontu tu Yahudi sanrungka-rungkaku. Inakkemi kaminang rajeng angkatutui ada'na boe-boena ikambe. 15 Mingka lanri baji' atiNa Allata'ala, Napile memamma' ri wattu tenanapa nakunilassukang. Siagang Nakio'ma' untu' a'jari palayang mae ri Ia. 16 Napappiassengammi Ana'Na Allata'ala mae ri nakke; sollanna akkulle kubirittakang anjo Kabara' Baji' ri sesena Ana'Na, mae ri bansa-bansa maraenga. Anjo wattua tena ku'lampa appala' pappitangara' manna ri nai. 17 Tena todong nakumange ri tau niaka ri Yerusalem, rioloanganga na inakke a'jari suroNa Allata'ala. Mingka a'lampa' mange ri butta Arab, nampa battu anjorenga' nakuammotere' mange ri Damsyik. 18 Tallun taung ribokoanganna, a'lampama' mange ri Yerusalem, ero' assiasseng siagang Petrus. Ammantamma' siagang ia sampulo allima allonna. 19 Tena nakusigappa siagang sikamma suro maraenganga, pantaranganna Yakobus, sari'battanNaya Batara. 20 Anne kutulisika apa kontutojeng. Naassengi Allata'ala angkanaya tena ku'balle-balle! 21 Le'baki anjo a'lampa' mange ri daera-daera Siria siagang Kilikia. 22 Sa'genna anjo wattua tenapa naassengi tanjakku sikamma jama'ah Karisteng niaka ri Yudea. 23 Nampami kabara' nalangngere' ke'nanga angkana, “Anjo tau le'baka ansessaki' riolo, iami ambirittakangi anjo katappakkang le'baka ero' nabuno riolo.” 24 Jari, ammuji-mujimi ke'nanga ri Allata'ala, passabakkang inakke.
1 Sampulo angngappa' taung ribokoanganna, ammotere'ma' mange ri Yerusalem siagang Barnabas, kammayatompa nakuerang todong Titus. 2 A'lampa' mange ri Yerusalem, nasaba' le'baka' Nasare pappiso'na Allata'ala, angkanaya musti a'lampa'. Na lalang se're passirapakkang siagang pamimping-pamimpinga anjoreng, kupakasingariammi ke'nanga anjo Kabara' Baji' le'baka kupabattu mae ri bansa-bansa maraenga. Nasaba' tena nakuero' punna a'jari sia-sia anjo usahaku riolo siagang ri kamma-kammaya anne. 3 Anjo Titus, kuaganga sipa'lampang, tu Yunani. Mingka tena nanipassai anturuki paratoranna sunnaka; 4 manna pole nakamma nia' siapa are tau ero' ansuro passai. Anjo ke'nanga tau antama' cokko-cokko ri golonganta, assara-sarai a'jari sari'battang siagang ikatte. Antama' cokko-cokkoi ke'nanga lanri eroki nasalidiki kabebasanta ikatte tau assileoka katallassanta lalang ri Isa Almasi. Eroki ke'nanga ampoterangki' ammotere' mange ri katallassanta riolo, a'jari ata. 5 Mingka manna sike'de', takkuleaki' anturukiangi ero'na ke'nanga, nasaba' erokki' angkatutui anjo Kabara' Bajika, sollanna tuli majarre' ri kau ngaseng. 6 Mingka manna nakamma, tena apa-apa maraeng lakkulle napala' tau nipakala'birika mae ri nakke — untu' inakke tena simmaraenna tau nipakala'birika yareka tena, nasaba' tena Napasimmara'-maraengi Allata'ala rupataua. 7 Ba'lalo anjo nicini' tu nipakala'birika namangakuimi angkana Allata'ala assuroa' ambirittakangi anjo Kabara' Bajika mae ri bansa-bansa maraenga. Sangkamma todong Iami assuroi Petrus ambirittakangi anjo Kabara' Bajika mae ri bansa Yahudia. 8 Nasaba' Allata'ala assarei pakkulle Petrus a'jari tunisuroNa mange ri bansa Yahudia. Iatommi assarea' pakkulle a'jari tunisuro mange ri bansa-bansa maraenga. 9 Anjo Yakobus, Petrus, siagang Yohanes a'jari pamimpinga mae ri jama'ah-jama'aka; namangakui ke'nanga angkana ma'nassa Allata'ala assarea' anne jama-jamang matangkasaka. Jari assijamakkimi ke'nanga siagang Barnabas, na inakkemi a'jari pammateina anjo passari'battanganga. Nampa assamaturu' ngasemmo ke'nanga siagang ikambe angkanaya ikambemi lanjama ri tangnga-tangngana bansa-bansa maraenga, na ke'nanga lanjama ri tangnga-tangngana bansa Yahudia. 10 Se'reji bawang pappala'na ke'nanga mae ri kambe, iamintu parallui niparhatikang tu kasi-asia. Na inakke teai sipato' sannanna nyawaku anggaukangi anjo kammaya. 11 Ri wattunna battu Petrus ri Antiokhia kupakaingaki silambusu'na, lanri salai batena appanggaukang. 12 Uru-uruna ammempoi sipangnganreang siagang sari'battang battua ri bansa maraenga. Mingka ri wattunna nia' battu tau nasuroa Yakobus, napakabellami kalenna battu ri anjo sari'battang battua ri bansa maraeng. Taerokami ammempo sipangnganreang siagang ke'nanga, nasaba' mallaki mae ri tau eroka assuro sunna' ngasengi taua. 13 Amminawang turu' tommi sari'battang tu Yahudi maraenga a'jari munape' sangkamma Petrus. Sa'genna manna Barnabas kuturu'-turukang todong a'gau' kamma ke'nanga. 14 Kucini'na ke'nanga appakamma gio'na lalang ri anjo katojenganna Kabara' Bajika, kukanamo mae ri Petrus ri dallekanna ngaseng tau niaka hadere' anjoreng, “Punna ikau tu Yahudiko mingka sangkammami gio'nu siagang bansa maraenga, angngapa nanupassa kamma-kamma anne tau maraenga a'jari sangkamma tu Yahudia ri katallassanna?” 15 Memang, battu ri kalassukanta ikambe tu Yahudiki'; teai “bansa maraeng, iamintu bansa dorakaya”. 16 Mingka niassengi angkanaya lanri tappa'na taua mae ri Isa Almasi nakkulle assibajiki ammotere' siagang Allata'ala; teai lanri nagaukanna hukkung-hukkung agamaya. Ikambe pole, tappa' tommaki' mae ri Isa Almasi; sollanta akkulle assibajiki ammotere' siagang Allata'ala tete ri anjo matappatta. Jari teai lanri kigaukanna hukkung-hukkung agamaya. Nasaba' tena manna sitau lakkulle assibajiki ammotere' siagang Allata'ala lanri nagaukanna hukkung-hukkung agamaya. 17 Usahaki' assibajiki ammotere' siagang Allata'ala, tete ri assileo'na tallasatta siagang Almasi. Mingka punna nigaukammo anjo kammaya nituli “tu doraka” ija sangkamma bansa-bansa maraenga, maka Almasimi a'jari saba' ni'jari tu doraka? Tantu tena! 18 Punna appakkaramula kupaenteng ammotere' hukkung agama le'baka kuruntung, ma'nassami ri kalengku angkana a'jarima' tu mandakkai hukkung agama. 19 Mingka le'ba'ma' mate mae ri hukkung-hukkung agamaya — iaminjo hukkung agamaya ambunoa' — sollangku akkulle attallasa' untu' Allata'ala. Le'ba'ma' nipasisalli' siagang Almasi. 20 Kamma-kamma anne teaimi kalengku attallasa' mingka Almasi attallasa' ri kalengku. Anne katallassang niaka ri nakke kamma-kamma anne, iamintu katallassang matappa' mae ri Ana'Na Allata'ala, mangngamaseanga ri nakke, siagang le'baka angkoro'bangkangi KalenNa untu' katallassangku. 21 Tena nakubalang parekangi anne pangngamaseanNa Allata'ala. Punna a'jari baji' ammotere' passisambunganna taua siagang Allata'ala lanri nagaukanna hukkung-hukkung agamaya, a'jari tenamo matu-matunna kamateanNa Isa mae ri kalenna!
1 Sikamma sari'battangku niaka ri Galatia! Teai sipato' dongo'nu. Maka inai le'ba' angngajara' salako? Le'ba'mi kupakasingara' baji'-baji' mae ri kau battuanna anjo kamateanNa Almasi ri kayu sallika! 2 Pauanga' bedeng anne se'rea passala': Maka lanri nugaukanna hukkung-hukkung agamaya nakkulle nutarima RohNa Allata'ala? Yareka lanri nulangngere'na Kabara' Baji' battua ri Allata'ala siagang lanri tappa'nu mae ri Almasi? 3 Angngapa nudongo' kamma! Appakkaramula mako attallasa' lalang ri katallassang berua siagang RohNa Allata'ala; angngapa naero' nuboya kasukkukanna siagang kagassingang kalennu? 4 Maka tena matu-matunna anjo apa le'baka nutarima? Tena na sia-sia! 5 Allata'ala assareko RohNa, naNapappicinikang gau'-gau' makoasaNa ri tangnga-tangnganu. Maka lanri nugaukanna hukkung-hukkung agamaya, naNagaukang Allata'ala anjo kammaya? Yareka lanri nulangngere'namo anjo Kabara' Bajika siagang lanri tappa'numo mae ri Almasi? 6 Kammami anjo tattulisika lalang ri Kittaka ri sesena Abraham, angkanaya, “Tappaki Abraham mae ri Allata'ala. Na lanri anjo tappa'na, nitarimami ri Allata'ala a'jari tau nikarannuang ri atinNa Allata'ala.” 7 Jari parallui nuasseng baji' angkanaya, inai-nai tappa' mae ri Allata'ala, iami ma'nassa sossoranna Abraham. 8 Le'ba' memammi nipau lalang ri Kittaka angkanaya akkullei assibajiki ammotere' bansa maraenga siagang Allata'ala punna tappa' ke'nanga mae ri Ia. Le'ba'mi nipauang la'bi riolo Abraham anjo Kabara' Bajika ilalang ri janji angkanaya, “Battu ri kaumi nalaNabarakkaki Allata'ala sikontu rupataua ri lino.” 9 Tappa'mi Abraham, jari nibarakkakimi. Kammatommi anjo sikontu rupataua. Punna tappaki, lanibarakkaki siagang Abraham. 10 Sikamma tau tanjenga mae ri hukkung-hukkung agamaya, laniparawa ngasengi ri pangngalarroiNa Allata'ala. Nasaba' nia' tattulisi' lalang ri Kittaka angkanaya, “Inai-nai tena najarre' anggaukangi apa-apa tattulisika lalang ri Kitta' Hukkung Agamaya, langgappai pangngalarroi battu ri Allata'ala!” 11 Tenanniakka manna sitau akkulle assibajiki siagang Allata'ala, lanri nagaukanna hukkung-hukkung agamaya. Anjo kammaya le'ba'mi nipau lalang ri Kittaka angkanaya, “Tau tappakaji bawang mae ri Allata'ala akkulle a'jari baji' ammotere' passisambunganna siagang Allata'ala; iami lakkulle anggappai katallassanga!” 12 Mingka anjo hukkung-hukkung agamaya tena natanjeng mae ri katappakkanga. Nia' tattulisi' lalang ri Kittaka angkanaya inai-nai anggaukangi hukkung-hukkung agamaya, lanri iatommi anjo hukkung agamaya nattallasa'. 13 Mingka le'ba' maki' Napakabella Almasi battu ri pangngalarroiNa Allata'ala lanri hukkung-hukkung agamaya. Napassareammi KalenNa nituju ri pangngalarroia passabakkang ikatte. Nasaba' nia' tattulisi' lalang ri Kittaka angkanaya, “Cilakami tau mate nigentunga irate ri kayu sallika.” 14 Nagaukammi Almasi kammaya anjo, sollanna nisare todong bansa-bansa maraenga barakka' le'baka Napa'janjiang Allata'ala mae ri Abraham. Jari, ikatte tau tappaka mae ri Allata'ala, akkulle tommaki' anggappai anjo Roh Napa'janjianga Allata'ala. 15 Sikamma sari'battangku! Baji'mi nakusareko pangngebarang ri katallassang allo-alloa. Punna nia' tau assijanji, nampa le'ba'mo niassai anjo janjia, takkulleai nia' manna sitau akkulle lesso' battu ri anjo janjia; yareka takkulleai natamba-tambai anjo janjia. 16 Anjo janji-janjinNa Allata'ala, KalenNa ampareki untu' Abraham siagang untu' sossoranna Abraham. Tena nanakana lalang ri Kittaka, “siagang untu' sikamma tau sossoranna Abraham,” battuanna jai tau. Ia niaka tattulisi' iamintu, “siagang untu' sossorannu,” battuanna sitauji bawang, iamintu Almasi. 17 Ia eroka kupau anrinni, iaminne: le'ba'mi nipare' siagang nipa'jari assa la'bi riolo janjinNa Allata'ala. Anjo hukkung agama nipassareanga ri patambilangngang antallumpulo taung ribokoanganna, takkulleai ampalessoki yareka ampalanynyaki anjo janjinNa Allata'ala. 18 Nasaba' punna battu ri ia anjo hukkung agamaya naNapassareang passareNa Allata'ala, anjo passarea teaimi battu ri janjinNa Allata'ala. 19 Jari punna kamma, untu' apa padeng nanipassareang anjo hukkung agamaya? Pialinna iamintu angkanaya, anjo hukkunga nipappitambangi sollanna nipa'nassa gau' dosana rupataua. Wattu tappakena anjo hukkung agamaya sa'gennaji kabattuanna sitau sossoranna Abraham le'baka nipau lalang ri janjinNa Allata'ala mae ri Abraham. Anjo hukkung agamaya, malaeka'-malaeka' ampabattui tete ri rupataua. 20 Jari, musti nia' rua tau, nampa parallu se're tau ri tangnga. Mingka tena Naparalluangi Allata'ala nikanaya tau ri tangnga, nasaba' KalenNami battu anggaukangi anjo jamanga. 21 Jari maka assisalai anjo hukkung agamaya siagang janjinNa Allata'ala? Tantu tena! Nasaba' punna lanri akkullena natallasi rupataua nanipassareang anjo hukkung agamaya, tantu akkullemi assibajiki rupataua siagang Allata'ala tete ri anjo hukkung agamaya. 22 Mingka nia' tattulisi' lalang ri Kittaka angkanaya nikoasai ngasemmi sikontu rupataua ri dosaya. Lanri kammana, anjo passare nipa'janjianga nipassareangi mae ri tau tappaka, lanri tappa'na ke'nanga mae ri Isa Almasi. 23 Ri wattu tenanapa narapiki wattunta a'jari tappa' mae ri Almasi, sanna' bateta nijagai baji' ri hukkung agamaya; sangkammaki' tau nikurunga, sa'genna nipa'nyatamo anjo tappatta. 24 Jari anjo hukkung agamaya a'jari sanrapangi pajaga mae ri kalenta, sa'genna battu Almasi ampassibajikiki' ammotere' siagang Allata'ala, lanri tappatta mae ri Almasi. 25 Kamma-kamma anne, lanri narapi'mi wattunna akkulle tappa' rupataua mae ri Isa Almasi, tenamo nanajagaiki' hukkung agamaya. 26 Lanri tappa' mako mae ri Isa Almasi, a'jari se'remi tallasa'nu mae ri Ia; na lanri kammana, a'jari mako ana'-ana'Na Allata'ala. 27 Le'ba' ngaseng mako nije'ne' lalang arenNa Almasi; jari nutarimami mae ri kalennu sipa'-sipa' KalenNa Almasi. 28 Lalang ri kammana anjo tenamo nanipasimmaraengi tu Yahudia siagang bansa-bansa maraenga, yareka ataya siagang tau bebasaka, yareka tu bura'nea na tu bainea. A'jari se're ngaseng mako lanri Isa Almasi. 29 Punna taunnako Almasi, a'jari sossoranna mako Abraham. Siagang lanutarimami apa le'baka Napa'janjiang Allata'ala.
1 Mingka paralluko kupauang baji' angkanaya: punna ca'di ija tau lannarimaya warisi', nia' tau anjagai siagang angngurusangi sikamma kaparalluanna, sa'genna narapi'mo umuru' le'baka napattantu manggena. Nipare' kamma iji ata, manna naia pata anjo sikontu barang-baranga. 3 Sangkamma tommi anjo mae ri katte. Ri wattu tenanapa natoa pikkiranta, nipare' ataki' ri roh-roh niaka ilalang ri anne linoa. 4 Mingka ri wattunna narapi' baji'mo wattunna, Nasuromi Ana'Na Allata'ala antama' ri anne linoa. Nilassukammi anjo ana'Na ri se'reang baine, nattallasa'mo irawangang kakoasanna hukkung agamaya. 5 Lanri kammanami anjo naNalappassammo sikamma tau attallasaka irawangang kakoasanna hukkung agamaya; sollanta akkulle todong a'jari ana'-ana'Na Allata'ala. 6 Nasaba' ana'-ana'Naki' Allata'ala, Nasuromi RohNa Ana'Na Allata'ala antama' ri atinta; iamintu Roh angkanaya, “Bapakku, o Bapakku.” 7 Jari, teai mako ata, passangalinna ana' mako. Na lanri ana'Na mako Allata'ala, laNasareang ngaseng mako sikontu apa-apa le'baka Napasadia untu' ana'-ana'Na. 8 Riolo tanuassengai Allata'ala. Iaminjo saba'na nu'jari atamo mae ri koasa-koasa nikanaya allata'ala, mingka sikontutojenna teai Allata'ala tojeng-tojeng. 9 Mingka kamma-kamma anne nuassemmi Allata'ala; yareka bajikangangi punna nikana, Naasseng mako Allata'ala. Angngapa nanuero' ammotere' poleang mae ri roh-roh niaka lalang lino, lammaya siagang kasi-asia? Angngapa nuero' poleang nipare' ata ri roh-roh kammaya anjo? 10 Nupakalompoi allo-allo attantua, bulang-bulang attantua, siagang taung-taung attantua. 11 Bata-batai nyawaku, gassingka la'jari sia-siaji posoku mae ri kau. 12 Sari'battangku ngaseng! Kupala' dudui mae ri kau sollannu a'jari sangkamma inakke. Nasaba' inakke a'jari sangkamma tomma' ikau. Tena apa-apa kasalang le'ba' nugaukang mae ri nakke. 13 Tantu nuu'rangi iji apa saba'na ri uru-uruna nakubirittakang anjo Kabara' Bajika mae ri kau. Saba'na, iamintu lanri natabaku garring. 14 Anjo wattua tena nu'ringi'-ringi' mae ri nakke, manna na'jari paccoba lompo anjo garringku mae ri kau ngaseng. Ba'lalo nutarima bajikka' sangkamma malaeka'Na Allata'ala yareka sangkamma KalenNa Isa Almasi. 15 Sanna' te'nena pa'mai'nu anjo wattua. Mingka kamma-kamma anne, kemaemi anjo te'nenu? Kuassengi angkanaya anjo wattua ka'de' akkulle kapang, manna matannu ero' tonjako angkocciki assulu' nampa nupassareang mae ri nakke. 16 Maka nucini' kammama' musu ri kamma-kammaya anne, lanri kupa'nassana apa tojenga mae ri kau? 17 Lompoi sumanga'na tau maraenga amboyako, mingka tena nabaji' pattujunna ke'nanga. Ero'naji ke'nanga antappuki passisambunganta, sollanna akkulle lompo sumanga'nu amminawang mae ri ke'nanga. 18 Memang bajiki punna lompo sumangatta mae ri apa-apa kabajikanga. Assala' tuli kammana anjo. Tena nangkana iaji punna niakka' ri tangnga-tangnganu. 19 Sikamma ana'-anakku kukarimangngia! Kamma-kamma anne lussa'mi sedeng nyawaku lanri ikau ngaseng. Pa'risikka' kusa'ring, sanrapang baine eroka allassukang ana'. Punna tenapa nanutarima ri kalennu sipa'-sipa' battua ri Almasi, tuli lakupisa'ringinna anne pa'risika! 20 Sanna' nakkukku ero' nia' ri tangnga-tangnganu ri kamma-kammaya anne; sollangku akkulle a'bicara sa'ra maraeng mae ri kau, lanri takuassengami angkanaya apa mami lakugaukang mae ri kau! 21 Inai-nai ero' attallasa' irawangang kakoasanna hukkung-hukkung agamaya, pilangngerimi anne kanangku! Erokko kupauang apa sitojenna tattulisika lalang ri Kitta' Hukkung napassareanga Musa. 22 Nia' lalang tattulisi' angkanaya nia' rua ana'na Abraham: amma'na anjo ana' se'rea iamintu ata. Na amma'na anjo ana' maraengannaya iamintu tau bebasa'. 23 Ana'na anjo baine ataya, biasaji bawang kalassukanna, lanri battu ri ero'na rupataua nalassu'. Mingka ana'na anjo baine bebasaka, lanri janjinNa Allata'ala nanilassukangi. 24 Anne akkullei nipake a'jari pangngebarang. Anjo baine ruaya ebara' ruang rupa parjanjiang: anjo se'rea parjanjiang battu ri Bulu' Sinai — iamintu Hagar; a'jari atai ana'-ana' nalassukanga. 25 Jari, iaminjo Hagar sanrapang Bulu' Sinai, niaka ri butta Arab. Iami pangngebaranna kota Yerusalem siagang sikontu tuma'buttana, a'jaria ata kamma-kamma anne. 26 Mingka anjo Yerusalem, niaka ri suruga iamintu Yerusalem bebasaka, siagang iami anronta ikatte. 27 Nasaba' nia' tattulisi' lalang ri Kittaka angkanaya, “Pakarannumi pa'mai'nu ikau baine tamananga, tenaya nale'ba' allassukang ana'! Assannang-sannang mako siagang ma'reja-reja mako ikau tau tale'baka ampisa'ringi pa'risi'na pammanakkanga! Nasaba' baine nibokoia ri tu bura'nenna lanisarei la'bi jaiangang ana', na ia baine niaka tuli a'rurung siagang tu bura'nenna.” 28 Sari'battangku ngaseng! Ikau ana'-ana'Na ngasengko Allata'ala, nilassukanga lanri janjinNa Allata'ala; sangkammako Ishak. 29 Anjo wattua, anjo ana' nilassukanga lanri ero'Na RohNa Allata'ala lanisessai ri ana' nilassukanga lanri ero'na rupataua. Kamma tomminjo ri kamma-kammaya anne. 30 Mingka apa nakana pole lalang ri Kittaka? Nia' tattulisi' angkanaya: “Suroi a'lampa anjo baine ataya siagang ana'na, nasaba' anjo ana' battua ri baine ataya tena nakkulle lannarima warisi' sangkamma anjo ana'na baine bebasaka.” 31 Jari, sari'battangku ngaseng, ikatte anne teaiki' ana'na baine ataya; ikatte ana'naki' baine bebasaka.
1 Kamma-kamma anne bebasa' maki', lanri le'ba' maki' Nalappassang Almasi! Lanri kammana, attahang mako ri kabebasannu; teako ero' poleangngi nipa'jari ata. 2 U'rangi angkanaya punna nusuro sunnaki kalennu, battuanna tenamo matu-matunna Almasi mae ri kalennu. Kalengku Paulus, ampauangko anne. 3 Sikalipi pole kupakainga' tau assuro sunnakai kalenna, angkanaya musti nagaukang ngasengi anjo sikontu apa-apa napassuroanga hukkung-hukkung agamaya! 4 Punna erokko assibajiki ammotere' siagang Allata'ala tete ri hukkung-hukkung agamaya, battuanna a'jari tappu'mi passisambungannu siagang Almasi. Jari pantarang pangngamaseanNa mako Allata'ala attallasa'. 5 Mingka untu' ikambe, manrannuang maki' mae ri pannulunNa RohNa Allata'ala; na lanri tappatta mae ri Almasi, Nasare maki' oloang assibajiki ammotere' siagang KalenNa. 6 Nasaba' punna asse'remi tallasatta siagang Almasi, tenamo naparallu anjo nikanaya mannuruki yareka tena, mae ri paratorang sunnaka. Ia mami parallu anjo tappaka mae ri Almasi; na anjo tappaka ma'nassai lalang ri pangngamaseanta mae ri paranta tau. 7 Riolo attojeng-tojeng mako anggaukang bajiki jama-jamannu! Mingka kamma-kamma anne, angngapa natenamo numannuruki mae ri ero'Na Allata'ala? Inai le'ba' anynyonyo' salako? 8 Mattantu teai Allata'ala le'baka angkiokko anggaukangi anjo kammaya! 9 Nakana taua, “Anjo pa'gambang sike'deka akkullei napabakka' sikontu tarigu le'baka nileo'.” 10 Mingka manna nakamma, tappa' ija' angkanaya tena nulamminawang mae ri oloang maraenga, lanri asse'remi tallasatta siagang Almasi. Siagang tappa' tonga' angkanaya manna inai, punna nakacoi pikkirannu lanihukkungi ri Allata'ala. 11 Na inakke, sari'battangku ngaseng, apa saba'na nakutuli nimusu punna kubirittakang angkanaya parallui anjo paratoranna sunnaka? Punna kamma memang anjo kubirittakanga, tenamo na'jari passala' punna kubirittakang anjo Salli'Na Almasi. 12 Bajikangangi punna assulu' memang battu ri jama'aka anjo tau angkacoai pikkirannu! 13 Le'ba' mako nikio' a'jari tau bebasa'. Mingka teako pake salai anjo kabebasannu, untu' anggaukang ero' kalennu. Passangalinna musti sikamaseangko siagang massing siparakaiko. 14 Nasaba' anjo sikontu bonena hukkung agamaya le'ba'mi nipakabodo a'jari se're hukkung, iamintu angkanaya, “Parallui nukamaseang parannu tau sangkamma nukamaseanna batangkalennu.” 15 Mingka punna massing sikara'musukko, tutu laloko, sollanna tena nupara ancuru'. 16 Kamma anne natabaya kanangku: Boli'mi kamma naNarurungangko RohNa Allata'ala; siagang teako turukiangi ero'na sipa'-sipa' rupataunu. 17 Nasaba' assisalai ero'na rupataua siagang ero'Na RohNa Allata'ala; kammayatompa assisalai ero'Na RohNa Allata'ala siagang ero'na rupataua. Assisala rua-ruai; jari takkulleako anggaukangi apa nukaerokia. 18 Mingka punna Napimpingko RohNa Allata'ala, tenamo nukkulle nakoasai hukkung-hukkung agamaya. 19 Anjo ero'na sipa'-sipa' rupataua a'nyatai lalang ri panggaukang-panggaukang salimaraka, panggaukang ra'masaka, siagang panggaukang tenaya nasiratang; 20 kammayatompa ri panggaukang anynyombaya ri barhala, baca-baca pangngissenganga; assimusu-musua, passiba'jianga, akkimburua, pa'larroanga, kaparalluang kalennaji bawang naboyai, appasisala-salaya tau, siagang a'golongang-golonganga; 21 kammayatompa assereatia, painunga sa'genna nasa'ring, assua'-suara' appala'busuka apa-apa, na maraengannaya. Yangasennami anjo kupakaingakkangko kamma-kamma anne; sangkamma todong kupakainga'nu pirangalloang, angkanaya anjo tau a'gau' kammaya takkulleai a'jari anggota Umma'Na Allata'ala. 22 Mingka, punna nipimping ri RohNa Allata'ala taua, iaminne wassele'na: sikamaseangi ke'nanga, rannui, assiamaki, sa'baraki siagang lammoro' pa'maiki, bajiki ri paranna tau, majarreki, 23 tuna pa'maiki, siagang akkullei nalewai kalenna. Tena hukkung agama ampappisangkangi anjo sikammaya. 24 Inai-nai a'jarimo taunNa Almasi, matemi sipa'-sipa' rupatauna siagang sikamma ero' napasu rupatauna. 25 Nasare maki' RohNa Allata'ala katallassang beru; jari musti Ia tommi angkoasai sikontu katallassanta. 26 Takkulleaki' a'jari tampo, yareka sipa'ri'-pa'risi pa'mai', kammayatompa assikimbu'-kimburui.
1 Sikamma sari'battangku! Punna nia' tau nugappa a'gau' dosa, ikau nipimpinga ri RohNa Allata'ala parallui nuerang ammotere' anjo taua mange ri oloang annabaya. Mingka musti tuna pa'maikko anggaukangi, siagang katutui kalennu sollanna tena nunataba todong paccoba. 2 Paralluko situlung-tulung antanggongi susana parannu tau, nasaba' lanri kammanami anjo nanugaukammo apa Napassuroanga Almasi. 3 Punna nia' tau nakana kalenna cara'de', mingka sikontutojenna tena apa-apa naasseng, anjo taua naballe-ballei kalenna. 4 Parallui taua massing naparessa kalenna, maka bajiki panggaukanna yareka tena. Punna ma'nassa baji' tojeng kalenna, akkullemi lompo pa'mai'na. Mingka teami napareki kalenna pa'baku' mae ri panggaukanna tau maraenga. 5 Nasaba' musti massing lanatanggongi kalenna tasse're-se'reang tau. 6 Tau annarimaya pangngajarang battu ri Almasi, parallui nabage siagang gurunna apa-apa niaka ri ia. 7 Teako eroki nitipu. Anjo Allata'ala takkulleai nipakkarek-karenang! Apa nilamung iatommi anjo lanikatto. 8 Punna sipa'-sipa' tulino nalamung taua, kamateang lanakatto battu ri anjo sipa'-sipa'na. Mingka punna a'lamungi situru' ero'Na RohNa Allata'ala, katallassang sitojennaya siagang katallassang mannannunganga lanagappa battu ri RohNa Allata'ala. 9 Lanri kammana, takkulleaki' lanre anggaukangi apa-apa bajika; nasaba' punna tena nilanre anggaukangi anjo apa-apa bajika, nia' se're wattu sallang nalanigappa wassele'na. 10 Jari, lalang nia'na ija kasampatang ri katte, paralluki' a'gau' baji' mae ri yangasenna rupataua, la'biangampa mae ri sikamma sari'battang julu tappatta. 11 Parhatikangi baji'-baji' anne apa kutulisika kalengku siagang hurupu' lompo-lompo! 12 Inai-nai ampalecei kalenna ri apa-apa lahereka, iaminjo ke'nanga ero' ampassako anturuki paratorang sunnaka. Mingka lanri malla'naji nisessa ri tu Yahudia na'gau' kamma ke'nanga, passabakkang salli'Na Almasi. 13 Kamanna tau anturukiai paratorang sunnaka tena tonja nagaukangi hukkung-hukkung agamaya. Mingka nakellaiko ke'nanga nisunna', sollanna akkulle napattampo-tampoang ke'nanga lanri nuturukinna anjo paratoranga. 14 Mingka inakke tena sikali lakkulle kukalompoang pa'mai', pantaranganna Batarata Isa Almasi, le'baka mate nisalli'. Nasaba' lanri le'ba'Namo mate ri kayu sallika, natenamo anggaranna anne linoa mae ri nakke. Na inakke sanrapamma' tau mateamo mae ri anne linoa. 15 Nisunnaki taua yareka tena, anjo tenamo naparallu. Ia parallua, iamintu a'jaria tau beru. 16 Kuminasai ri Allata'ala sollanna nisare katallassang salewangang siagang pangngamaseang anjo tau kammaya katallassanna; kammayatompa sikontu umma'Na Allata'ala. 17 Kammayatompa pole, poro tena lalomo manna sitau ansusaia' pole; nasaba' nia'mi butti-buttina ri kalengku, angkanaya ma'nassa ana' gurunNa' Isa. 18 Poro tuli nibarakkaki ngasengko ri Batarata Isa Almasi. Aming. Sallangku, Paulus
1 Natarimai umma'Na Allata'ala ri Efesus, majarreka tappa'na mae ri Isa Almasi. 2 Battu ri nakke, Paulus, tunisuroNa Isa Almasi, lanri ero'Na Allata'ala; ma'minasa' mae ri Allata'ala Manggeta, siagang Batara Isa Almasi, nuporo Nasare barakka' siagang katallassang salewangang. 3 Nipujimi Allata'ala, ManggeNa Batarata Isa Almasi. Iami ambarakkakiki' siagang sikontu barakka' rohani lalang ri suruga, lanri a'jari se'reta siagang Almasi. 4 Ri wattu tenanapa nipa'jari anne linoa, le'ba' memang maki' Napilei Allata'ala tete ri Almasi; sollanta akkulle a'jari umma' matangkasa'Na, tenaya callanna ri dallekanNa. Lanri pangngamaseanNa Allata'ala, 5 le'ba' memammi Napattantu la'bi riolo, angkanaya laNaangka' maki' a'jari ana'-ana' KalenNa, tete ri Isa Almasi. Na memang iaminjo eroka Nagaukang. 6 Nipujimi Allata'ala lanri la'biri'na kabajikang pa'mai'Na, le'baka allumpa Napa'nyata mae ri katte ri tete Ana'Na Nakarimangngia. 7 Nasaba', nilappassang maki' ri Allata'ala, lanri kamateanNa Almasi; battuanna le'ba'mi nipammopporang dosa-dosata. 8 Teai sipato' lompona pangngarimangnginNa Allata'ala, le'baka Napa'laboang mae ri katte situru' kabajikang siagang pangngassengang. 9 Lanri ero' KalenNa, Napauang maki' rahasiana jama-jamang eroka Nagaukang; le'ba'mi Napattantu angkanaya anjo jama-jamanNa laNapa'le'baki sallang lalang ri KalenNa Almasi. 10 Anjo eroka Nagaukang, iamintu, sollanna sikontu linoa, baji' na niaka ri suruga yareka na niaka ri buttaya, a'jari se're ngasengi lalang ri Almasi, a'jaria kapala. Na punna narapi'mi wattunna, laNapa'le'ba'mi Allata'ala anjo jama-jamanga. 11 Sikontu jama-jamanga, Napattantui siagang Nagaukangi Allata'ala situru' ero' KalenNa. Le'ba' maki' Napile memang battu ri pakkaramulanna, lanri Nakellaiki' sollanta a'jari umma'Na lanri a'jari se'reta siagang Almasi. 12 Boli'mi kamma naikatte, uru-uru manrannuanga mae ri Almasi, mammuji-muji mae ri Allata'ala lanri mala'biri'Na! 13 Ikau ngaseng, a'jari tommako umma'Na Allata'ala ri wattunna nulangngere' pasanNa Allata'ala, iamintu Kabara' Baji' assareako kasalamakkang. Tappakko mae ri Isa Almasi iaminjo naNasareko pammatei Allata'ala ma'nassana taunNako, iamintu RohNa, le'baka Napa'janjiang. 14 Iaminjo RohNa a'jari pammatei mattantua, angkanaya ma'nassa lanitarimai apa le'baka Napa'janjiang Allata'ala mae ri umma'Na. Iaminne ampakajarreki tappatta angkanaya ma'nassa laNalappassangi umma'Na Allata'ala. Nipujimi Allata'ala lanri kala'biranNa. 15 Lanri kammana, ri uru kulangngere'na angkanaya tappa' mako mae ri Batara Isa, siagang nukamaseammo sikontu Umma'Na Allata'ala, 16 tenamo tappu'-tappukku appala' sukkuru' mae ri Allata'ala lanri ikau ngaseng. Tuli kupauna arennu ri wattungku appala' doang. 17 Kupalaki mae ri Allata'ala, Batarata Isa Almasi, Mangge mala'birika, sollannu Nasare RohNa. Iaminjo RohNa lampa'jari cara'dekko, siagang lampappiassengangi sa'genna nuasseng Allata'ala. 18 Kupalaki ri Allata'ala sollanna Nasungke pikkirannu, sa'genna a'jari singara'; sollanna akkulle nupahang apa akkullea nurannuang battu ri Allata'ala, le'baka angkiokko. Kammayatompa sollanna nuasseng todong antekamma alla'bi-la'bina barakka' baji'Na Allata'ala, le'baka Napasadia untu' umma'Na; 19 siagang antekamma heba'na kakoasanNa Allata'ala Nagaukanga lalang ri jama-jamanna ri tangnga-tangngata tau tappaka. Teai sipato' heba'na anjo koasaNa Allata'ala, 20 le'baka Napake ampattallasa' poleangi ammotere' Almasi battu ri kamateanga; nampa Nasare empoang kaminang tinggia ri sa'rinNa Allata'ala ri suruga. 21 Bella tinggina anjo empoanNa Almasi na empoanna sikontu pamarentaya, sikontu tukoasaya, sikontu pamimpinga, sikontu karaenga, yareka inai-nai mamo le'baka nisare empoang tinggi; baji' ia attallasaka ri anne jammanga, kammayatompa ia attallasaka ri jammang labattua. 22 Le'ba'mi Napakkulantu' ngaseng Allata'ala irawangang kakoasanNa Almasi; nampa Napa'jari Kapalamo Almasi irateanganna sikontu jama'aka. 23 Anjo jama'aka sanrapangi TubuNa Almasi; Iami lampassukkuki baji'na sikontu apa-apa niaka ri kere-keremae.
1 Riolo matemi katallassang rohaninu, lanri dorakanu siagang nudakkaina parentaNa Allata'ala. 2 Anjo wattua nupinawangi kabiasanna ngaseng anne linoa; battuanna nuturuki ero' kakoasanna linoa; iamintu roh niaka angkoasai atinna sikontu tau tenaya namminawang turu' mae ri Allata'ala. 3 Riolo sangkamma ngaseng tongki' anjo ke'nanga; amminawang turukki' mae ri sipa'-sipa' rupatauta, siagang iaji nigaukang apa akkullea ampakasannangi tubuta siagang pikkirang ja'dalatta. Anjo wattua nataba tongki' pangngalarroiNa Allata'ala, sangkamma tau maraenga. 4 Mingka teai sipato' lompona kabajikang pa'mai'Na Allata'ala! Sanna' Nakamaseanta, 5 sa'genna ri wattunna mate katallassang rohanita, lanri gau'-gau' salata, Napattallasa' poleang maki' ammotere' siagang Almasi. Jari, lanri kabajikanNa bawang Allata'ala, naNapasalamakko. 6 Lanri asse're maki' siagang Isa Almasi, Napattallasa' poleang maki' ammotere' Allata'ala siagang Almasi; sollanta ammarenta todong siagang Ia lalang ri suruga. 7 Kammami anjo Nagaukang Allata'ala, sollanna akkulle nacini' rupataua ri jammang labattua, antekamma lompona kabajikang pa'mai'Na Napappicinikanga lalang ri Isa Almasi. 8 Nakarimangngiko Allata'ala. Iaminjo Nanapasalamakko, lanri tappa'nu mae ri Isa. Anjo kasalamakkannu, teai wassele' usaha kalennu. Mingka passare malammoro'Na Allata'ala. Jari, tena manna sitau akkulle ampattampo-tampoangi kalenna ri anjo passalaka. 10 Ikatte bate pare'Naki' Allata'ala; tete ri Isa Almasi, Napare' beru maki' Allata'ala, sollanna nigaukang apa-apa bajika, le'baka Napasadiangki' Allata'ala. 11 Sikamma sari'battang, pantaranganna bansa Yahudia! U'rangi katallassannu wattu riolo; nigallarakko “tau tenaya nassunna'”, ri tu Yahudi nakanaya kalenna assunna' (battuanna anggappami pammatei ri kalenna, nipareka ri rupataua). 12 Anjo wattua tena nusse're siagang Almasi; a'jariko tau maraeng, tenaya nantama' ri umma' Napilea Allata'ala. Tena nuntama' ri janji le'baka Napare' Allata'ala siagang umma'Na. Tena panrannuannu siagang tena Allata'alanu ammantang ri anne linoa. 13 Mingka kamma-kamma anne asse're mako siagang Isa Almasi. Riolo bellako, mingka kamma-kamma anne nipa'reppese' mako, lanri kamateanNa Almasi. 14 Nasaba' KalenNa Almasi a'jari tu Mappasiamatta. Iami ampa'jari se'rei tu Yahudia siagang bansa-bansa maraenga, a'jari se're bansa. Anjo tembo' passimbanga, iamintu passimusuanga, le'ba'mi Naruntung lanri kamateanNa. 15 Le'ba'mi Napa'lanynya' hukkung-hukkung agama Yahudia siagang parenta-parenta kammayatompa paratorang-paratoranna; sollanna anjo bansa-bansaya a'jari se'rei bansa tau beru, asse'rea lalang ri Almasi. Kammaminjo bateNa Almasi mappasiama'. 16 Lanri kamateanNa ri kayu sallika, Napa'jari se'remi anjo ruaya bansa Napassiama' siagang Allata'ala, sa'genna lanynya'mo anjo passimusuanga. 17 Iaminjo saba'na Nabattu Almasi ambirittakangi Kabara' Bajika, iamintu passala'na anjo passiamakkanga, mae ri kau ngaseng; baji' na mae ri kau bansa maraenga, bellaya battu ri Allata'ala, kammayatompa na mae ri kau bansa Yahudia, a'reppeseka ri Allata'ala. 18 Tete ri Almasi, siagang lanri RohNa Allata'ala se'rea, akkulle maki' a'reppese' mae ri Manggea, baji' na tu Yahudi yareka bansa maraenga. 19 Lanri kammana, teai mako tau maraeng yareka tau pantarang. Kamma-kamma anne para umma'Na ngaseng mako Allata'ala. Anggota-anggota ngaseng mako lalang ri balla'Na Allata'ala. 20 Nibangung tommako irate ri batu le'baka napadongko' sikamma tunisuroNa Allata'ala siagang na'bi-na'biNa; nampa Isa Almasi a'jari sanrapang batu malompona anjo bangunanga. 21 Iami ansusungi anjo sikontu bangunanga, a'jari Balla' matangkasa'Na Allata'ala, untu' KalenNa Batara. 22 Lanri asse'remi katallassannu lalang ri Almasi, kamma-kamma anne nipasibangung tommako siagang tau maraenga, a'jari se're balla' untu' Allata'ala; anjoremmi ammantang Allata'ala siagang RohNa.
1 Iaminjo saba'na, na inakke anne, Paulus, nitarungkuma' lanri Isa Almasi untu' ikau ngaseng bansa-bansa maraenga. 2 Tantu nulangngere'mi, angkanaya, lanri kabajikanNa Allata'ala Nasarema' jama-jamang untu' kabajikannu ngaseng. 3 Nasungkemi Allata'ala mae ri nakke rahasia eroka Nagaukang na Napauanga'. (Bodona anne passalaka le'ba'mi kutulisi' irate; 4 na punna nubaca, lanupahammi rahasiana anjo ri passala'na Almasi, sangkamma bateku ampahangi.) 5 Riolo tena le'bakai nipau anjo rahasiaya mae ri rupataua; mingka kamma-kamma anne Nasungkemi RohNa Allata'ala mae ri tunisuroNa siagang na'bi-na'biNa. 6 Iaminne anjo rahasiaya: Passabakkang anjo Kabara' Bajika, para anggappami barakka'-barakka'Na Allata'ala bansa maraenga, siagang bansa Yahudia, iamintu barakka'-barakka' le'baka Napasadia Allata'ala; para a'jarimi ke'nanga anggota battu lalang ri tubu sangkammaya, siagang para natarima tommi ke'nanga apa Napa'janjianga Allata'ala tete ri Isa Almasi. 7 Nasarema' pangngamaseang Allata'ala, iamintu jama-jamang, untu' ampa'la'bangi anjo Kabara' Bajika. Kutarimami anjo pangngamaseanga lalang ri koasaNa Allata'ala, anjamaya lalang ri kalengku. 8 Ri sikontu umma'Na Allata'ala, inakkemi anne kaminang tuna. Mingka Nasarema' Allata'ala anne pangngamaseanga: Iamintu jama-jamang untu' ambirittakangi mae ri bansa-bansa maraenga Kabara' Bajika, iamintu kakalumanynyanganNa Almasi tenaya la'busu'na; 9 kammayatompa sollanna battu ri nakke nanaasseng sikontu rupataua angkana antekamma bateNa Allata'ala, — le'baka ampa'niaki sikontu anne linoa — anggaukangi ero'Na, Narahasiakanga mae ri linoa siapa sallona battu riolo. 10 PattujunNa Allata'ala iamintu sollanna tete ri jama'aka kamma-kamma anne, akkullemi naasseng sikontu tau anna'galaka koasa ri lino, antekamma pangngassenganNa Allata'ala ilalang sikontu apa Nagaukanga. 11 Nagaukammi Allata'ala anjo sikammaya situru' ero' laNagaukanga satunggu-tungguna, siagang Nagaukanga tete ri Isa Almasi, Batarata. 12 Lanri tappatta mae ri Almasi, siagang lanri asse'retamo siagang Ia, Nasaremaki' kabebasang untu' a'reppese' mae ri Allata'ala siagang tappa' majarre'. 13 Lanri kammana, iami anne pappalakku ri kau: teako ranggaselai ri passala' kapa'risang kukasiaka passabakkang ikau ngaseng; nasaba' yangasenna anjo untu' kabajikannu ngaseng. 14 Iaminjo saba'na nakuakkulantu' ri dallekanNa Manggea. 15 Battu ri Iami sikontu kaluargaya ri suruga siagang ri lino anggappai massing sipa'Na. 16 Appala' doanga' mae ri Allata'ala kaminang mala'birika naporo Najarreki pa'mai'nu siagang RohNa. 17 Naporo lanri tappa'nu mae ri Almasi, nammantammo Almasi lalang ri atinnu; siagang na'jari jarre'mo katallassannu lanri tatta'gala' jarre'namo pangngamaseanga lalang ri kalennu. 18 Appala' doanga' mae ri Allata'ala nuporo siagang ngaseng sikontu Umma'Na Allata'ala, akkulle ampahangi antekamma luara'na siagang la'buna, kammayatompa antekamma tinggina siagang lantanna pangngamaseanNa Almasi, 19 tenaya nakkulle napahang baji' akkala'na rupataua. Poro nupahang lalo anjo pangngamaseanNa Almasi, sa'genna Napa'jari sukku' Allata'ala batangkalennu. 20 Lanri pappagio'na koasaNa Allata'ala lalang ri kalenta, akkullemi la'bi jaiangang Nagaukang Allata'ala, naia akkullea nipala' yareka ninawa-nawa. 21 Poro nipakala'biri'mi Allata'ala sa'genna a'lapi'-lapisi' sossorang lalang ri jama'aka, tete ri Isa Almasi. Nipujimi Allata'ala satunggu-tungguna! Aming.
1 Iaminjo saba'na nainakke anne tu nitarungkua lanri kulayanina Batara, kupala' dudui ri kau ngaseng: bajikimi empoang tallasa'nu situru' empoannu salaku tu le'bakamo nikio' ri Allata'ala. 2 Paralluko tuna pa'mai', lamma bicarannu, siagang sa'bara'. Pappicinikangi pangngamaseannu lalang ri passitulung-tulunganga. 3 Attojeng-tojengko usaha; sollanna akkulle nukatutui anjo kase'reang le'baka Napare' RohNa Allata'ala, lanri assiama'nu lalang katallassannu. 4 Se'reji bawang tubu, siagang se'reji bawang Roh. Kamma tomminjo, nikio' mako untu' se're bawang panrannuang. 5 Se'reji bawang Batara, se'reji katappakkang, se'reji pa'je'ne', 6 siagang se'reji Allata'ala a'jari Manggea mae ri sikontu rupataua. Iami Batara makoasa mae ri sikontu linoa, anggaukangai sikontu jama-jamanga, siagang makoasaya mae ri sikontu apa niaka lalang lino. 7 Massing nisare maki' barakka' situru' apa Napassareanga Almasi. 8 Nia' tattulisi' lalang ri Kittaka angkanaya, “Ri wattunNa nai' ri tampa' kaminang tinggia, jai Naerang tu nitahang; nampa jai passare Napassareang mae ri rupataua.” 9 Jari, punna nikana “naiki” battuanna Iami uru-uru le'baka naung sa'genna ri tampa' kaminang rawaya ri anne buttaya. 10 Na Ia minjo le'baka naung, Ia tommi nai' sa'genna ri tampa' la'bi bellaya tinggina na sikontu langika, sa'genna rassimo sikontu linoa ri kahaderanNa. 11 Iami “assarei sikamma passarea mae ri rupataua”; nia' Nasare pangngellai a'jari tunisuro, na maraenganga Nasare pangngellai a'jari na'bi; maraengannaya pole Nasarei pangngellai a'jari paerang Kabara' Baji'; na maraengannaya pole Nasarei pangngellai a'jari tummarakai jama'ah siagang a'jari guru. 12 Kammami anjo Nagaukanga, sollanna nipasadia baji' Umma'Na Allata'ala sollanna akkulle nalayani Batara siagang nabangung TubuNa Almasi. 13 Lanri kammana, a'jari se're ngaseng maki', a'julu tappa' siagang a'julu pahang mae ri Ana'Na Allata'ala. Siagang a'jari tau toa pikkirang ngaseng maki', pila' mange allo pila' nipa'jari sukku' sangkamma Almasi. 14 Jari, tena nisanrapang ana'-ana', akkullea nierang anrai'-kalau' ri pangngajaranna tau la'bua akkala' salana. Natipui siagang naakkala' salai taua, nanaerang mae ri oloang salaya. 15 Tena lalo! Ba'lalo, musti nipa'nyatai katojenganga siagang ati mangngamaseang, sa'genna ilalang apa-apa mamo, pila' a'jari sukku' maki' sangkamma Almasi, a'jaria kapala mae ri katte. 16 Irawangang pimpinanNa, nisusung baji' ngaseng sikontu anggota tubua; siagang nipasigappa ngaseng passisambung-sambunganna. Na punna massing anjama baji' ngaseng anjo anggota-anggotaya, la'bakka'mi anjo tubua a'jari kassa' lalang ri pangngamaseanga. 17 Lanri kammana, nasaba' arenNa Batara, iaminne lakupaua siagang lakupattantua: tea' mako attallasa' sangkammai pole tau tenayapa natappa' ri Allata'ala, siagang tau tenaya nannaba-naba pikkiranna. 18 Sassangi pikkiranna ke'nanga. Tanaassengai ke'nanga katallassang Napassareanga Allata'ala, nasaba' tena sikali apa-apa naasseng ke'nanga ri passala'na Allata'ala. Kammami anjo ke'nanga, lanri sanna' kapala batuna ke'nanga. 19 Tangngassengami siri'-siri' ke'nanga; sa'genna naturukiammi sikontu hawa napasuna siagang a'gau' bawang mami situru' pangngaina ke'nanga. 20 Mingka takammayai anjo Almasi nuassenga! 21 Le'ba'mi nulangngere' kabara' battua ri KalenNa! Salaku tau amminawanga ri Ia, le'ba' tommako niajara' ri passala' katojengang sipa'-sipa'Na Allata'ala niaka ri KalenNa! 22 Lanri kammana, pela'mi anjo sipa'-sipa' rupatau allalonu, nipanrakia ri kaerokang appa'lingu-lingua. 23 Parallui niberui ngaseng sikontu pa'mai'nu siagang pikkirannu. 24 Paralluko a'jari tau beru lalang tallasa'nu, lanri le'ba'numo niberui situru' ero'Na Allata'ala; iamintu assipa' tojeng, lambusu', siagang matangkasa'. 25 Lanri kammana, parallu ngasengko massing a'gau' lambusu'. Tea' mako a'balle-ballei pole, nasaba' ikatte a'jari ngaseng maki' anggota TubuNa Almasi. 26 Punna larroko, teako pa'biangi anjo larroa a'jari passabakkang nudoraka. Teako larroi sikabusu' allo. 27 Teako sarei kasampatang Billisika. 28 Tau biasaya a'lukka' musti napammarimi a'lukkaka. Nampa musti anjamami sollanna nagappa pattallasanna siagang lambusu'; siagang nakkulle nutulung tau kakuranganga. 29 Punna a'bicarako, teako ammakei bicara ra'masa'. Pakemi kana-kana appakabajika siagang akkullea antulungi tau maraenga. Anjo kana-kana kammaya langngerangi kabajikang mae ri tau allangngerekai. 30 Teako pa'jari si'nai atinNa RohNa Allata'ala. Le'ba' mako nisare pammatei mattantu ri RohNa Allata'ala, ma'nassanu a'jarimo taunNa Allata'ala. Ia tommi anjo RohNa Allata'ala a'jari pammatei janji majarre' angkanaya labattui mae ri kau Allo Kalappassanga. 31 Pela'mi sikontu pa'risi' pa'maika, sentimenga, siagang larroa. Tea' mako pole akkio'-kioki sipakka'-pakkanai. Pela'mi sipa' sikabirisia yareka sipa'-sipa' sangkammaya anjo. 32 Paralluko baji' ati siagang tuna pa'mai' mae ri massing para ikau; kammayatompa massing sipammopporangko, sangkamma todong Napammopporangko Allata'ala tete ri Almasi.
1 Ikau ana'-ana'Na ngasengko Allata'ala, sannaka Nakarimangnginna; lanri kammana, paralluko mannuruki ri Allata'ala. 2 Paralluko attallasa' lalang ri pangngamaseanga, sangkamma todong Almasi mangngamaseangi mae ri katte. Nakoro'bangkangi KalenNa untu' ikatte, a'jari passare siagang koro'bang mabau', Nakarannuanga atinNa Allata'ala. 3 Ikau ngaseng Umma'Nako Allata'ala. Lanri kammana, tasiratangai nia' ri tangnga-tangnganu nikanaya gau' bawang, gau'-gau' tenaya nasiratang, yareka kangoanga. Gassingka nia' napare' alasang taua ampakkanaiko angkana nugaukangi anjo sikammaya. 4 Tena todong nasiratang nucarita nikanaya carita-carita gau' bawang, yareka bicara ra'masaka, yareka a'bicara bonga-bonga tenaya nasiratang. Mingka paralluko appala' sukkuru' mae ri Allata'ala. 5 U'rangi baji'-baji': ia tau nangaia a'gau' bawang, yareka a'gau' tenaya nasiratang yareka angngoaya (anjo gau' kammaya sangkamma le'ba'ji gau' anynyombaya barhala), anjo tau kammaya takkulleai a'jari anggota umma' niparentaya ri Almasi siagang Allata'ala. 6 Teako erokki nitipu ri bicara-bicara tenaya bonena. Nasaba' ia ngasemmi anne kammaya ampammumbai pangngalarroiNa Allata'ala mae ri tau tenaya namannuruki ri Ia. 7 Jari, tea' laloko assileoki tau kammaya anjo. 8 Ikau riolo niakko lalang ri sassanga. Kamma-kamma anne a'jari mako umma'Na Batara; jari nia' mako lalang ri singaraka. Lanri kammana, musti attallasakko lalang singaraka. 9 Nasaba' battu ri iaminjo singaraka ammumba sikontu gau' bajika siagang gau' annabaya ri dallekanNa Allata'ala. 10 Usahakammi nanuasseng apa Nakarannuanga pa'mai'Na Allata'ala. 11 Teako katuru'-turukangi ri taua anggaukangi gau'-gau' tenaya matu-matunna nagaukanga tau ammantanga lalang ri kasassanganga. Passangalinna parallui nusolarri gau'-gau' kammaya anjo. ( 12 Nasaba' anjo gau' cokko-cokkona ke'nanga, poro nibicara bawang nappakasiri'-siri'mo.) 13 Sikontu apa-apa nisuloiya lakacinikang baji' ngasengi. 14 Na sikontu apa nicini' bajika, a'jari singara'mi. Iaminjo saba'na nania' nikana, “Ambangungko ikau tau tinroa, ammentengko nai' battu ri kamateanga! Accayami singara'Na Almasi irateangannu.” 15 Lanri kammana, parhatikangi baji'-baji', antekamma katallassannu. Teako attallasaki sangkamma tau dongoka. Attallasakko sangkamma tau cara'de'. 16 Pake bajiki sikontu kasampatang niaka ri kau; nasaba' anne jammanga, jammang kaja'dallang. 17 Teako dongoki, mingka pappilajari apa Nakaerokia Batara. 18 Teako nabengoi anggoro', nasaba' anjo anggoroka akkulleko napanraki. Passangalinna paralluko nikoasai ri RohNa Allata'ala. 19 Pakei kana-kana mappakala'birika, kelong pammuji-mujia siagang lagu-lagu rohania lalang ri kana-kanannu. Paralluko rannu pa'mai' akkelong mammuji-muji mae ri Batara makoasaya. 20 Lalang ri apa-apa mamo, paralluko tuli appala' sukkuru' mae ri Allata'ala Manggea, lalang arenNa Isa Almasi, Batarata. 21 Paralluko sipilangngeri sollanna nupakala'biri' Almasi. 22 Ikau tu bai'-bainea, paralluko tundu' mae ri bura'nennu, sangkamma tundu' mae ri Batara makoasaya. 23 Nasaba' anjo bura'nea iami kapala mae ri bainenna, sangkamma Almasi a'jari kapala mae ri jama'aka; kammayatompa Ia tommi a'jari Karaeng Mappasalama' mae ri jama'aka, a'jaria TubuNa. 24 Sangkamma anjo jama'aka tunduki mae ri Almasi, kammatommi anjo tu bai'-bainea musti tundu' tongi mae ri tubura'-bura'nena, lalang ri passala' apa-apa mamo. 25 Ikau tubura'-bura'nea, karimangngi bainennu, sangkamma Almasi Nakarimangngi jama'aka. Siagang Nakoro'bangkangi KalenNa untu' anjo jama'aka. 26 NaNagaukang Almasi anjo kammaya, sollanna akkulle Natangkasi jama'aka lalang ri pangngajaranNa kammayatompa lalang ri je'ne' pa'je'ne', nampa akkulle Napassareang anjo jama'aka mae ri Allata'ala. 27 Battu ri kammanami anjo naNapaenteng baji'mo siagang matangkasa'mo anjo jama'aka ri dallekanNa, tena sikali panra'na yareka tena sikali callanna manna sike'de'. 28 Kammatommi anjo tubura'-bura'nea, musti nakarimangngi bainenna, napasanrapang batangkalenna. Inai-nai angkarimangngi bainenna, sangkammami angkana batangkalenna nakarimangngi. ( 29 Tena le'bakai taua nakabirisi batangkalenna. Passangalinna naparakai siagang najagai, sangkamma todong Almasi Naparakai jama'aNa; 30 niassengi anjo nasaba' ikatte anggota-anggota tubuNaki' Almasi.) 31 Nia' tattulisi' lalang ri Kittaka angkanaya, “Lanri kammanami anjo nalanabokoi anrong-manggena bura'nea, nampa a'jari se're siagang bainenna, nanjari se'remo anjo tau ruaya.” 32 Anjo ayaka lantang sikali battuanna. Kupasinrapangi anjo antekamma passisambunganNa Almasi siagang jama'aka. 33 Mingka anjo ayaka nia' todong passisambunganna siagang kalennu: Sikontu tu bura'nea parallui nakarimangngi tubainenna, sanrapang anjo bainenna batangkalenna tonji; kammayatompa sikontu bainea musti napakalompoi tu bura'nenna.
1 Ikau ana'-anaka! Salaku ana'-ana' gurunNa Almasi, parallui nupilangngeri tau toanu, nasaba' iaminjo siratanga nugaukang. 2 “Pakala'biriki anrong-manggenu,” iaminjo parenta lomoro' se're battu ri Allata'ala, siagang janji, 3 iamintu: “Sollanna numate'ne siagang la'bu umuru'nu ri lino.” 4 Ikau ngaseng a'jari manggea! Teako pakanassu-nassui pa'mai'na ana'nu. Mingka pakalompoi pa'mai'na siagang ajara' bajiki ke'nanga situru' pangngajaranNa Batara. 5 Ikau a'jari pajamaya! Turuki parentana pinggawanu ri anne linoa. Gaukangi anjo parentana siagang lompo pangngali', malla', kammayatompa attojeng-tojeng, sanrapang angkanaya anjo sikammaya nugaukangi mae ri KalenNa Almasi. 6 Teako angkanaya nijagaipako nampa nugaukang anjo kammaya, lanri ero'nuji nipalece ri rupataua. Mingka parallui nugaukang sangkamma atanNa Almasi, mannurukia ri ero'Na Allata'ala sikalepu pa'mai'. 7 Anjo jamang nugaukanga salaku ata, parallui nugaukang siagang rannu pa'mai', sanrapang angkana nugaukangi mae ri Batara, jari teai poro mae ri rupataua bawang. 8 U'rangi angkanaya, massing-massing rupataua, baji' na ata yareka natau bebasa', lannarima ngasengi pa'balasa' battu ri Batara situru' apa-apa baji' le'baka nagaukang. 9 Ikau a'jari pinggawaya! Paralluko assipa' kamma todong anjo mae ri pajama-jamanu. Tea' mako pakei sipa'-sipa' a'garattaka siagang appakamallaka. U'rangi angkanaya ikau siagang anjo pajama-jamanu, nia' se're pinggawa nupa'jului, iamintu Batara ri suruga. Anjo Batara tena nammile tau. 10 Kala'busanna, paralluko magassing, lanri kagassingang nugappaya battu ri kakoasanNa Batara, lanri asse'renu siagang Batara. 11 Pake ngasengi sikontu sanjata Napassareanga Allata'ala mae ri kau; sollannu akkulle attahang angngewai sikamma akkala' salana Billisika. 12 Nasaba' teai rupataua bawang laniewa, passangalinna kagassinganna pole setang-setang makoasaya ri anne jammang ja'dalaka. Ia laniewaya iamintu kagassinganna pole roh-roh ja'dalaka, makoasaya todong ilalang ri anne linoa. 13 Lanri kammana, anne kamma pake ngasemmi sikontu sanjataNa Allata'ala sollannu akkulle angngewai musua ri allo-allo kaja'dallanga anne. Sollanna punna le'ba' mako a'bundu' sa'genna kala'busang, tuli makassa' ijako. 14 Paralluko tuli jaga-jaga. Pakei katojenganga sanrapang passikko' aya'nu, siagang katangkasanga sanrapang pa'lapa' barambannu. 15 Paralluko tuli rella ambirittakangi Kabara' Bajika, angngeranga kasalewangang; pakemi anjo a'jari sanrapang pa'lapa' bangkennu. 16 Kere-kere wattu parallui tuli nupake tappaka mae ri Batara a'jari sanrapang sanjata akkullea ampasalai sanjatana musua; iaminjo katappakkanga akkulle nupake ambunoi rinrana ana' panana kaja'dallanga. 17 Allei anjo kasalamakkanga a'jari sanrapang topi baja; siagang kana-kananNa Allata'ala sanrapang pa'dang RohNa Allata'ala. 18 Gaukang ngasemmi anjo kammaya, nanuappala' doang siagang appala' tulung mae ri Allata'ala. Ri sikamma kasampatang niaka, appala' doangko situru' panrurunganNa RohNa Allata'ala mae ri kau. Paralluko tuli jaga-jaga, siagang teako eroki ampappibetangi kalennu. Tuli pappala' doangangi sikontu Umma'Na Allata'ala. 19 Siagang inakke pole, pappala' doangang tonga'; sollanna punna a'bicara', Nasarea' Allata'ala kana-kana cocoka lakupau. Kammayatompa nakubarani ampaui anjo rahasiana Kabara' Bajika. 20 Passala' iaminjo Kabara' Bajika nakua'jarimo se're tunisuro, niaka kamma-kamma anne lalang ri tarungkua. Pappala' doanganga', sollangku barani ambicarai anjo Kabara' Bajika, situru' apa siratanga lakubicara. 21 Sari'battantapa Tikhikus, iamintu palayang majarreka ri jama-jamanNa Batara, ampauangko sikontu passala'na batangkalengku; sollanna akkulle nuasseng antekammai jama-jamangku siagang batangkalengku. 22 Iaminjo saba'na nakusuro Tikhikus battu mae ri kau ampauang ngasengko antekamma katallassanna ikambe; sollanna na'jari lompo ngaseng pa'mai'nu. 23 Poro Allata'ala Manggea, siagang Batara Isa Almasi ansarei pakkulle sikontu jama'aka untu' assamaturu' siagang assikamaseang kammayatompa tuli tappa' mae ri Almasi. 24 Poro Nabarakkaki ngasengko Allata'ala, ikau mangngamaseanga mae ri Batarata Isa Almasi, iamintu pangngamaseang tenaya nammari-mari rinrana. Sallangku, Paulus
1 Natarimai sikontu sari'battangku umma'Na Allata'ala, niaka ammantang ri Filipi, asse'reamo siagang Isa Almasi. Kammayatompa sikamma pamimpinga siagang pambantuna jama'aka! Inakke Paulus, siagang Timotius, pajama-jamaNa Isa Almasi; 2 ma'minasaki' mae ri Allata'ala Manggeta siagang Batarata Isa Almasi, nuporo Nasare barakka' siagang katallassang salewangang. 3 Punna kurapikko kuu'rangi, tuli appala' sukkuruka' mae ri Allata'ala. 4 Siagang punna kupappala' doangang ngasengko, teai sipato' sannanna atingku. 5 Appala' sukkuruka' mae ri Allata'ala lanri battu ri pakkaramulanna sa'genna kamma-kamma anne, tuli nubantuma' ampa'la'bangi Kabara' Baji' battua ri Allata'ala. 6 KalenNa Allata'ala le'ba' ampakaramulai anne jama-jamang bajika ri kau; na tappaka' angkanaya Ia tommi lampannarrusuki anjo jama-jamanga sa'genna le'ba' ri Allo kabattuanNa ammotere' Isa Almasi. 7 Tuli nia'nu ngaseng lalang ri atingku. Memang siratangi punna kammai anjo nyawaku mae ri kau ngaseng. Nasaba' le'ba' ngaseng tommako annarima siagang inakke iamintu passare malammoro' Napassareanga Allata'ala mae ri nakke; baji' na ri kamma-kammaya anne, iamintu ri wattungku nia' lalang ri tarungkua, kammayatompa pole ri wattungku nia' pantara' untu' angngalleangangi siagang ampamentengangi anjo Kabara' Bajika. 8 Naassengi Allata'ala angkanaya teai sipato' nakkukku mae ri kau ngaseng; nakkuka' lanri pangngamaseang majarre' battua ri KalenNa Isa Almasi. 9 Iaminne pappala' doangangku untu' ikau: poro pila' mangngamaseangko ri Allata'ala siagang ri parannu tau siagang natuli katambang pangngassengannu ri katojenganga siagang kacara'dekanga, 10 sollanna akkulle nuasseng ampilei apa kaminang bajika natangkasa' katallassannu battu ri kakodianga siagang battu ri tuduhang apa-apa mamo punna narapi' sallang allo kabattuanNa ammotere' Almasi. 11 Lakala'biang mako ri sikamma panggaukang bajika; iamintu jama-jamang KalenNaya bawang Isa akkulle anggaukangi; naporo nipakala'biri'mo siagang nipuji-pujimo Allata'ala. 12 Kukellai nuasseng ngaseng, angkanaya passabakkang iaminne apa-apa kajariang mae ri kalengku, napila' jaimo tau allangngereki siagang ampatappaki Kabara' Bajika. 13 Passabakkang kammaminjo nanaasseng ngasemmo pangawala'na balla' karaenga siagang tau maraengannaya anrinni ri kotaya, angkanaya passabakkang a'jari palayangku mae ri Almasi nanitarungkua'. 14 Siagang lanri iaminne nitarungkuku nujaimo tu Karisteng anrinni ri kotaya a'jari pila' tappa' mae ri Batara; sa'genna pila' baranimo ke'nanga ambirittakangi pappasanNa Allata'ala. 15 Memang, nia' siapa are ri ke'nanga ambirittakangi Almasi lanri assereatina siagang ero'na a'boya pa'beserang; mingka nia' todong maraengang attojeng-tojeng memang tongi ambirittakangi Almasi. 16 Anne ke'nanga, lanri mangngamaseanna mae ri Allata'ala siagang mae ri nakke nanagaukang anjo jamanga; nasaba' naassengi ke'nanga angkanaya Allata'ala le'ba' assuroa' untu' ampa'nyatai angkanaya ma'nassa kontutojengi anjo Kabara' Bajika. 17 Mingka anjo tau maraengannaya, lanri pattujuang sala nanabirittakang Almasi; untu' kaparalluang kalenna nanabirittakang ke'nanga anjo Kabara' Bajika. Napikkiriki ke'nanga angkanaya lakkullea' napa'jari pila' susa lalang ri tarungkua punna nagaukang ke'nanga anjo sikammaya. 18 Mingka tena nangngapa! Nasaba' manna pole antekamma, iaka nanigaukang anjo jamanga lanri pattujuang baji' yareka napattujuang sala, mingka kanibirittakang mangkaji Almasi; jari, sannangi kusa'ring pa'maikku. Na tuli lakammana sannanna pa'maikku; 19 nasaba' kuassengi angkanaya lanri pappala' doangannu ngaseng, siagang lanri pannulunNa RohNa Isa Almasi, nakulanipakabebasa'. 20 Iaji kukaerokia siagang kuminasaia, iamintu: tapporo tena sikali laloja nakusia-sia lalang ri jama-jamangku. Mingka tuli ma'minasaku, la'biangampa ri kamma-kammaya anne, sollanna akkulle a'jari barani nyawaku siagang batangkalengku — baji' na ri wattu attallasakku yareka ri wattu mateku — kupakala'biriki Almasi. 21 Nasaba' untu' inakke, mangeanna tallassakku iamintu Almasi bawang! Na matea iamintu upakku. 22 Mingka, punna lanri attallasakku ri anne linoa nakkulle kugaukang jama-jamang la'bi niaka matu-matunna, takuassengami angkana kereanga lakupilei. 23 Battu pimbalimi pikkirang battua mae ri nakke. Ero' dudua' ambokoi anne linoa nakua'lampa mange ammantang siagang Almasi, nasaba' iaminjo kaminang baji'. 24 Mingka lanri untu' kaparalluannu ngaseng, bajikangangi punna ammantanga' ri lino. 25 Tappaka' ri anne passalaka. Iaminjo saba'na nakuasseng angkanaya lammantanga' anrinni. Lammantanga' siagang ikau ngaseng, sollangku akkulle antulungko a'jari pila' majarre' siagang pila' sannang lalang ri katappakkannu mae ri Almasi. 26 Lanri kammana, punna ammoterekka' sallang mae ri kau, asse'reamo siagang Isa Almasi, lapila' jaimi alasannu angkalompoang pa'maiki kalengku. 27 Jari, ia parallua kamma-kamma anne, iamintu musti attallasakko situru' apa nakaerokanga anjo Kabara' Bajika ri sesena Almasi. Jari, iaka nisigappa yareka tena, mingka lakulangngereki angkanaya majarrekko asse're, siagang lasiagang ngasengko anjama a'julu ero' siagang a'julu pattujuang; iamintu untu' katappakkang situru' anjo Kabara' Baji' battua ri Allata'ala. 28 Paralluko tuli barani; teako mallaki mae ri musu-musunnu. Iaminjo a'jari butti angkanaya ma'nassa lanibetai ke'nanga, na ikau mattantu lammeta, nasaba' KalenNa Allata'ala ampassareangi anjo pammetanga mae ri kau. 29 Nasaba' Nasare mako pangngamaseang Allata'ala teai untu' katappakkang bawang mae ri Almasi, passangalinna untu' angkasia' tongi sessaya lanri Almasi. 30 Kamma-kamma anne amminawang ngaseng tongko siagang inakke lalang anne se'rea jama-jamang; iamintu jama-jamang le'baka nucini' kugaukang riolo, siagang kugaukanga ija sa'genna ri kamma-kammaya anne, kamma nulangngereka kamma-kamma anne.
1 Majarrekko, lanri asse'reko siagang Almasi. Siagang nisaleoriko lanri Nakamaseangko Almasi! Nirurungangko ri RohNa Allata'ala, jari paralluko massing sikamaseang siagang sikarimangngi. 2 Jari attojeng-tojeng mako ampakasannangi pa'maikku lalang ri anne passalaka, iamintu: A'julu atiko ilalang se're pangngamaseang, ilalang se're pikkirang, siagang se're pattujuang. 3 Teako na lanri kaparalluang kalennu nanugaukang se'rea jama-jamang, yareka lanri ero'na nupattampo-tampoang kalennu. Mingka paralluko massing tuna pa'mai', nanucini' bajikangang taua na kalennu. 4 Parhatikangi kaparalluanna tau maraenga; teako kaparalluang kalennu bawang nuparhatikang. 5 Parallui sangkamma nyawanu siagang nyawaNa Isa Almasi; iamintu: 6 Sikontutojenna sangkammai la'biri'Na siagang Allata'ala, mingka tenamo namusti Najampangi anjo kala'birang kammaya. 7 Passangalinna, Nabokoi ngasemmi anjo sikammaya nampa Napa'jari sangkamma ata KalenNa. A'jari sangkammami rupataua, Nattallasa' sangkamma nicini' rupataua. 8 Napa'jari tunai KalenNa namannuruki ri Allata'ala sa'genna mate — iamintu mate ri kayu sallika. 9 Iaminjo saba'na naniangka' ri Allata'ala ri kaminang tinggia, nampa Nasare kakoasang la'bi lompoanganga na sikontu kakoasang maraengannaya. 10 Jari, sollanna nipakala'biri' Isa, sikontu apa-apa attallasaka ri suruga, siagang ri linoa, siagang rawanganna linoa, lanynyomba ngasemmi mae ri Ia. 11 Lamangaku ngasemmi ke'nanga angkanaya Ia minjo Isa Almasi Batara; na lanri kammanamo anjo nanipakala'biriki Allata'ala Manggea. 12 Lanri kammana, sikamma sari'battang sannaka kukarimangnginna, antekamma batenu tuli mannuruki ri nakke ri wattu niakku ri tangnga-tangnganu, sangkamma tomminjo kamma-kamma anne, ri wattunta assikabellai, paralluko mannuruki ri nakke. Le'ba' mako nipasalama' ri Allata'ala. Lanri kammana, paralluko tuli usaha, sollanna a'jari sukku' kasalamakkannu. Gaukammi anjo sikammaya siagang malla' siagang mannuruki mae ri Allata'ala; 13 nasaba' KalenNa Allata'ala anjama lalang ri kalennu, sa'gennu ero' siagang akkulle ampakarannui pa'mai'Na Allata'ala. 14 Gaukammi sikontu jama-jamannu; mingka teako a'moro-moroi yareka teako a'besereki anggaukangi. 15 Lanri kammanami anjo nanupappicinikammo angkanaya ma'nassa ana'-ana'Nako Allata'ala tenaya callanna, lambusuka siagang annabaya batena attallasa' ri tangnga-tangngana tau ja'dalaka siagang dorakaya. Siagang ri wattunna nupabattu mae ri ke'nanga anjo biritta katallassanga, paralluko a'jari sanrapang singara' mae ri ke'nanga, ansioriai linoa. Punna kamma anjo batenu attallasa', nia'mo sallang alasangku langkalompoang pa'maikko, ri wattunna battu poleang ammotere' Isa Almasi. Iaminjo buttina angkanaya tena nasia-sia usahaku, passangalinna nia'ja wassele'na. 17 Nakulle kapang lanibunoa' siagang latassolongi cerakku anjari sangkamma koro'bang nipatirika irate ri apa nupassareanga mae ri Allata'ala anjari' pammatei angkana tappakko ri Ia. Punna memang musti kammai anjo, appala' sukkuruka', siagang amminawang tonga' rannu siagang ikau ngaseng. 18 Kamma tommako anjo, paralluko appala' sukkuru' todong siagang amminawang rannu siagang inakke. 19 Matappaka' angkanaya lanri pannulunNa Batara Isa, akkullei kusuro linta' Timotius battu ri kau; sollangku akkulle anggappa panynyaleori allangngereki kabara'nu. 20 Timotius bawang tau niaka anrinni assangkamma nyawaku, attojeng-tojenga annawa-nawai kate'neannu. 21 Ia maraenganga sangnging kaparalluang kalenna ngasenji naurusu'; teai kaparalluanNa Isa Almasi. 22 Kalennu ngasemmo anciniki buttina angkanaya a'matu-matui Timotius. Anjama terasa' tommi siagang inakke untu' ampa'la'bangi Kabara' Baji' battua ri Allata'ala. Ikambe sipa'rua sangkamma maki' ana' na mangge. 23 Lanri kammana, punna kuassemmo angkana antekamma kale'bakkanna parkaraku, lakusuromi linta' Timotius mae ri kau. 24 Matappaka' angkanaya lanri pannulunNa Batara, tena tommo nasallo nakubattu todong angkunjungiko. 25 Ri passala'na sari'battanta Epafroditus, le'baka nusuro battu ambantua', parallui kusuro ammotere' mae ri kau. Le'ba'ma' nabantu lalang ri jama-jamangku siagang usahaku. 26 Sanna' nakku'na mae ri kau ngaseng; siagang sanna' lussa'na lanri nugappana kabara'na angkana garringi anrinni. 27 Garring memangi, sa'genna sike'de' mami mate. Mingka nikamaseangi ri Allata'ala; siagang tena naiaja bawang nikamaseang, mingka inakke pole, sollanna tena nakupila' si'na. 28 Iaminjo saba'na napila' katambammo erokku assuroi ammotere' mae ri kau; sollannu akkulle rannu ammotere' punna assigappako siagang ia, na'jari sannang tommo pa'maikku. 29 Jari, tarimami siagang te'ne pa'mai'. Pasangkammai sari'battannu, lanri a'julu tappa'nu. Pakalompo ngasengi sikamma tau kammaya ia. 30 Sike'deki mate lanri kaparalluang jama-jamanNa Almasi; nabotorimi nyawana lanri ero'na antulunga' lalang arennu ngaseng.
1 Jari, sari'battangku ngaseng, paralluko marannu lanri asse're mako siagang Batara. Tena nabattala' kusa'ring ampau poleangi apa le'baka kutulisi' mae ri kau riolo; nasaba' anjo bajiki untu' kasalamakkannu. 2 Tutu laloko mae ri tau a'gau' ja'dalaka. Anjo tau kammaya siratangi nipasanrapang kongkong. Napassa-passai taua sollanna nisunna'. 3 Na sitojenna ikattemi anne le'bakamo anggappai nikanaya sunna' tojeng-tojenga; teai ke'nanga. Ikattemi anynyomba mae ri Allata'ala lanri KalenNa RohNa Allata'ala angnguluki'; siagang appala' sukkuru' maki' lanri asse're maki' siagang Isa Almasi lalang ri tallasatta. Tena katte nitanjeng mae ri sikamma pangngadakkang nacinika mata. 4 Sikontutojenna akkulle tonga' tanjeng mae ri sikamma pangngadakkang kammaya anjo. Nasaba' punna nia' tau angkana nia' saba'na nakkulle tanjeng mae ri pangngadakkang nacinika mata, inakke la'biangampa pole. 5 Inakke, sagantuju allo umurukku nanisunnaka', salaku tu Israel, battu ri suku bansa Benyamin. Inakke Ibrani totoka'. Ri passala' mannurukia mae ri hukkung agama Yahudia, inakke anne anggotana' golongang Farisia. 6 Ba'lalo, lanri lompona sumangakku, sa'genna kusessamo anggota jama'aka. Punna niciniki battu ri passala' hukkung-hukkung agama Yahudia, inakkemi tau baji' siagang tena callangku. 7 Mingka lanri Almasi, sikamma anjo apa kukanaya lompo matu-matunna riolo, kamma-kamma anne a'jarimi se're karugiang. 8 Teai sikammaya anjo bawang; mingka yangaseng-ngasenna kucini' a'jari karugiang ngaseng mami. Ia niaka ri nakke kamma-kamma anne lompoangangi anggaranna: iamintu kuassemmi Isa Almasi, Bataraku. Nasaba' Almasi, kubokoi ngasemmi anjo yangaseng-ngasenna. Yangasenna anjo kucini' loro mami, sollanna akkulle kugappa Almasi, 9 siagang nakuakkulle asse're tojeng-tojeng siagang Ia. Teaimi kalengku angngusahai passisambungang bajikku siagang Allata'ala, iamintu lanri kuturukinna hukkung agamaya. Kamma-kamma anne a'jari baji'mi passisambungangku siagang Allata'ala, lanri tappaka' mae ri Almasi. Jari battu ri KalenNa Allata'ala anjo passisambungang bajika, siagang lanri katappakkang mae ri Isa Almasi. 10 Se're-se'reji bawang kukaerokia, iamintu: sollanna akkulle kuasseng Almasi, siagang akkulle kukasia' todong kakoasang le'baka ampabangungi ammotere' battu ri kamateanga. Ero' tonga' amminawang angkasiaki pa'risika siagang Ia, siagang amminawang todong sangkamma Ia ilalang ri kamateanNa. 11 Siagang kuminasai angkanaya kalengku lanipabangung tonga' ammotere' battu ri kamateanga. 12 Mingka tena nakuangkana kugappami wasseleka, yareka a'jari sukku'ma'. Passangalinna tulusu' kuusahai sollanna akkulle kugappa hadia Napasadiaya Isa Almasi. Iaminjo saba'na naNaallea' nampa Napa'jaria' taunNa. 13 Tantu tena nakukana sari'battang, angkanaya kugappami anjo hadiaya. Mingka nia' se're passala' kugaukang; iamintu kukaluppaimi apa niaka ri bokoku, nampa kuusahai tojeng-tojeng anggappai anjo apa niaka ri dallekang. 14 Lanri kammanami anjo nakulari tulusu'mo mae ri dallekang, mange ri tampa' kala'busang nitujua, sollangku akkulle ammeta, iamintu kugappai katallassanga ri suruga; untu' iaminjo naNakiokki' Allata'ala tete ri Isa Almasi. 15 Ikatte, tau toayamo ri katallassang rohania, musti nigaukangi kammaya anjo. Mingka punna nia' ri kau maraeng panggappana, KalenNa Allata'ala lampakasingaraki pole mae ri kau. 16 Mingka anne passalaka parallui nuparhatikang, iamintu: Paralluki' tuli anturuki lalang ri tallasatta anjo paratorang le'baka nipinawang sa'genna kamma-kamma anne. 17 Sikamma sari'battangku! Turukimi conto niaka ri kalengku. Le'ba' mako nasare ikambe conto annabaya; lanri kammana, parhatikangi baji'-baji' katallassanna sikamma tau anturukiai anjo conto napassareanga ikambe. 18 A'mole-molema' ampauangko pole, nakamma-kamma anne kupaui pole nakuangngarru' angkanaya jai tau ambattuang salai matu-matunna anjo kamateanNa Almasi ri kayu sallika. 19 Mingka lapossoki kale'bakkanna katallassanna anjo tau kammaya; nasaba' rewata nasombaya lalang ri katallassanna ke'nanga, iamintu apa-apa nakacinnaia kalenna ke'nanga. Sangnging apa-apa appakasirikaji ba'lalo nakalompoang pa'mai' ke'nanga; nasaba' apa-apa ri iaji anne pakkalinoanga bawang nanawa-nawa ke'nanga. 20 Mingka ikatte anne umma'naki' suruga. Battu anjoreng tommi labattu Karaeng Mappasalamatta, iamintu Batara Isa Almasi. Iami nikanakkukanga, siagang salloamo nitayang. 21 Anne tubuta lammaya siagang lapossoka, laNapinrai Almasi a'jari sangkamma TubuNa mala'birika. Akkullei Nagaukang anjo kammaya, lanri nia' kakoasanNa untu' ampatundu' ngasengi sikontu apa-apa niaka.
1 Lanri kammana, sikontu sari'battangku kukarimangngia, paralluko attojeng-tojeng tappa' mae ri Batara lalang ri katallassannu. Nakku' sikali pa'maikku mae ri kau ngaseng! Ikaumi nakalompoanga pa'maikku siagang kukarannuanga. 2 Ikau Euodia siagang Sintike, a'jari sari'battang bainea! Kupalaki ri kau sipa'rua sollannu a'julu ati, sangkamma tau assari'battanga lalang ri katappakkanga. 3 Kupala' tongi mae ri sikamma bela majarrekku, sollanna nubantu anjo baine ruaya. Le'ba'mi ke'nanga anjama terasa' siagang inakke untu' ambirittakangi Kabara' Baji' battua ri Allata'ala; sangkamma Klemen siagang sikamma sari'battang maraengannaya kuaganga ngaseng sipanjamang. Nia'mi areng-arenna ke'nanga tattulisi' lalang ri Kitta'na Tau Attallasaka. 4 Poro tuli rannu ngasengi pa'mai'nu, lanri le'ba'numo asse're siagang Batara. Sikalipi pole kukana: rannu mako! 5 Parallui nacini' ngaseng taua sipa'-sipa' baji'nu ri katallassannu. Nasaba' tasalloami Nalabattu Batara. 6 Teako bata-batai ri passabakkang apa-apa mamo. Appala' doangko siagang pabattui pappala'nu mae ri Allata'ala, ilalang sikontu kaparalluannu. Teako lanre ampaui kaparalluannu mae ri Allata'ala; siagang paralluko appala' sukkuru'. 7 Na Iaminjo Allata'ala takkullea napahang akkala'na rupataua, lassareko katallassang salewangang; siagang langkatutui nyawanu siagang pikkirannu le'bakamo asse're siagang Isa Almasi. 8 Na kala'busanna, sari'battangku ngaseng, parallui nubonei pikkirannu siagang apa-apa niaka anggaranna, siratanga nipuji, iamintu: apa-apa annabaya, mala'birika, adeleka, matangkasaka, mate'nea, siagang bajika. 9 Gaukammi anjo apa-apa le'baka nupappilajari siagang nutarima battu ri nakke; baji' nakana-kanangku, yareka apa-apa kugaukanga. Naporo Allata'ala, kabattuanna salewanganga, anrurungang ngasengko ri katallassannu. 10 Lalang asse'rena tallasakku siagang Batara, a'jari sannang sikali nyawaku; nasaba' siapa sallona, kamma-kamma anne nisare mako pole kasampatang untu' annawa-nawai katallassangku. Mingka nakukkana kamma, tena nakukana le'baka' nukaluppai; memang nuparhatikanga', mingka siapa sallona tena nunggappa kasampatang ampappicinikangi. 11 Teai lanri kakurangangku nakupau anne; nasaba' le'ba'ma' appilajara' angkasukkurangi apa-apa niaka. 12 Le'ba'mi kukasia' katallassang kakuranganga, siagang katallassang kala'bianga. Kuassemmi rahasiana untu' andallekangi a'rupa-rupaya katallassang; baji' nakatallassang akkalumanynyanga yareka katallassang kala'bianga, yareka nakatallassang kakuranganga. 13 Lanri kakoasang Napassareanga Almasi mae ri nakke, akkullema' majarre' andallekangi a'rupa-rupaya katallassang. 14 Mingka le'ba'ma' nutulung ilalang ri kasusaangku; na memang bajiki anjo apa nugaukanga mae ri nakke. 15 Sari'battangku ngaseng tu Filipia! Baji' ngaseng nuassenna, angkanaya ri wattunna kubokoi butta Makedonia riolo, ri wattunna uru-uru nipa'la'bang anjo Kabara' Bajika, tena ruannu jama'ah ambantua'; tena ruannu kuagang angkasiaki susaku siagang karannuangku. 16 Ri wattungku nia' ri Tesalonika nakuparallu nibantu, tena nusikalija akkiring bantuang mae ri nakke. 17 Mingka tena nakukana tuli erokkuji bawang annarima passare. Ia kukaerokia, iamintu: sollanna akkulle kucini' sikamma wassele' akkullea antambai kaupakkannu. 18 Inakke le'ba'mi kutarima ngaseng — ba'lalo la'bimi ri gannaka! Sikamma anjo passare le'baka nukiring mae ri nakke, kutarima ngasemmi battu ri Epafroditus. Kamma-kamma anne nia' ngasemmi ri nakke apa kukaparalluanga. Anjo passarenu ngaseng, sanrapangi passare mabauka rasanna, battu ri koro'bang nipassareanga mae ri Allata'ala iamintu koro'bang nitarimaya siagang Nakarannuanga pa'mai'Na Allata'ala. 19 Allata'ala kusombaya, allumpai kakalumanynyanganNa lalang ri Isa Almasi; na Iami lassareang ngasengko sikontu kaparalluannu. 20 Nipujimi Allata'ala Manggeta sa'genna satunggu-tungguna. Aming! 21 Pabattuanga' sallangku mae ri sikontu Umma'Na Allata'ala asse'rea siagang Isa Almasi. Siagang tarima tommi sallanna sikamma sari'battanta niaka kuagang anrinni. 22 Sikamma Umma'Na Allata'ala niaka anrinni ri kotaya, la'biangampa niaka anrinni ri balla' lompona karaenga akkiring ngaseng tongi sallang mae ri kau. 23 Poro Nabarakkaki ngasengko Batara Isa Almasi. Sallanna ikambe, Paulus siagang Timotius
1 Natarimai sikamma sari'battangku, umma'Na Allata'ala niaka ri Kolose, majarreka asse're siagang Almasi! Battu ri nakke, Paulus, niangkaka a'jari tunisuroNa Isa Almasi, lanri ero'Na Allata'ala, siagang sari'battanta Timotius; ma'minasaki' mae ri Allata'ala Manggea, nuporo Nasare barakka' siagang katallassang salewangang. 3 Nalangngere'mi ikambe angkanaya tappa' mako mae ri Isa Almasi; kammayatompa mangngamaseang mako mae ri sikamma Umma'Na Allata'ala. Iaminjo saba'na, na ri wattunnu kipappala' doangang, appala' sukkuru' maki' mae ri Allata'ala, ManggeNa Batarata Isa Almasi. 5 Tappa' mako siagang mangngamaseang mako, nasaba' nurannuammi apa Napasadiaya Allata'ala ri suruga untu' ikau. Le'ba'mi nulangngere' anjo kabaraka, ri wattunna nipabattu Kabara' Baji' tojenga battua ri Allata'ala mae ri kau. 6 Tassiara'mi anjo kabaraka alla'bang lino. Na nibarakkakimo katallassanna rupataua lanri anjo birittaya; sangkamma todong nibarakkakimi katallassannu appakkaramula ri nulangngere'na anjo passare malammoro'Na Allata'ala na nupahang baji'-baji'. 7 Anjo birittaya Epafras ampabattui mae ri kau, bela nakamaseanga ikambe. Ia pajama-jamaNa Almasi, attojeng-tojenga anjama untu' kaparalluanta. 8 Battu ri iami nalangngere' ikambe angkanaya lanri koasa battua ri RohNa Allata'ala nukkullemo massing sikamaseang. 9 Iaminjo saba'na nakituli ampappala' doangangko appakkaramula ri nilangngere'na kabara'nu. Kipalaki mae ri Allata'ala sollannu Nasare RohNa Allata'ala kacara'dekang siagang pangngassengang sollanna nupahang baji' apa Nakaerokia Allata'ala. 10 Na lanri kammanami anjo nukkullemo attallasa' situru' ero'Na Allata'ala, siagang natuli nupakasannang pa'mai'Na; sa'genna ilalang ri apa-apa mamo, akkulleko appa'nia' wassele' apa-apa baji'. Kammayatompa katambang tommi pammahannu ri sesena Allata'ala. 11 Poro nipakajarrekko lanri kakoasang malompoNa Allata'ala, sa'gennu akkulle attahang angkasiaki sikamma kapa'risanga siagang sa'bara', yareka sannang pa'mai', 12 kammayatompa appala' sukkuru' mae ri Manggea. Nasaba' iaminjo Manggea ampa'jari siratangko antarimai apa le'baka Napasadia Allata'ala untu' umma'Na lalang ri kakaraengang singaraka. 13 Le'ba' maki' Nalappassang battu ri kakoasanna masassanga, nampa napalettekki' antama' ri pamarentahanNa Ana'Na Nakamaseanga. 14 Lanri Iaminjo Ana'Na nakinilappassang; battuanna le'ba'mi nipammopporang dosa-dosata. 15 Iaminjo Almasi rupa ma'nyataNa Allata'ala tenaya nakacinikang; iaminjo Almasi ana' bungasa', mala'bianganga na sikontu apa-apa nipa'niaka. 16 Nasaba' tete ri Iami Napa'jari Allata'ala sikontu apa-apa niaka ri suruga siagang irate ri linoa, sikontu apa-apa kacinikanga siagang tenaya nakacinikang; kammayatompa pole sikontu roh niaka koasana siagang ammarentaya. Sikontu anne linoa nipa'jari tete ri Almasi, siagang untu' Almasi. 17 Ri tenanapa nania' sikontu apa-apaya, nia' riolo memammi Almasi. Siagang lanri Ia tommi na massing nia' ri pammantanganna sikontu apa-apaya. 18 Iami a'jari ulu mae ri KalenNa, iamintu jama'aka; lanri Iami assarei katallassang anjo jama'aka. Iami a'jari ana' bungasa', uru-uru nipattallasa' poleanga ammotere' battu ri kamateanga; sollanna Ia mami bawang a'jari kaminang parallu ilalang ri sikontu katallassanga. 19 KalenNa tonji Allata'ala angkaerokangi sollanna sikontu apa-apa niaka ri KalenNa Allata'ala, nia' ngaseng tongi ri KalenNa Ana'Na. 20 Siagang tete ri Ia tommi anjo Ana'Na, naNapa'jari assibajiki ngasemmo ammotere' sikontu apa-apaya siagang KalenNa — baji' na sikontu apa-apa niaka ri lino kammayatompa apa niaka ri suruga. Anjo Nagaukanga Allata'ala tete ri kamateanNa Ana'Na irate ri kayu sallika. 21 Riolo bellako ri Allata'ala. Numusui Allata'ala, lanri ja'dala'na pikkirannu siagang panggaukannu. 22 Mingka kamma-kamma anne, Napa'jari baji'mi ammotere' passisambungannu siagang KalenNa, lanri kamateanNa Ana'Na. Kammami anjo carana nukkulle nierang mange andallekang siagang malanynying, matangkasa' siagang tena callanu ri dallekanNa Allata'ala. 23 Mingka tantu musti tuli majarrekko tappa' siagang ammenteng kassa' ri katappakkannu. Gassingka nulappassangi anjo panrannuang le'baka nisareangko ri wattunna nutarima anjo Kabara' Baji' battua ri Allata'ala. Anjo kabaraka le'ba'mi nibirittakang mae ri sikontu taua ri lino. Na untu' iatommi anjo nainakke anne, iamintu Paulus, ku'jari palayang. 24 Kamma-kamma anne sannammi pa'maikku angkasiaki pa'risika untu' kaparalluannu. Nasaba' lanri kapa'risang nakasiaka tubuku, kupa'ganna'mi kasessang mustia Nakasia' Almasi untu' jama'aNa, iamintu tubuNa. 25 Nasuroma' Allata'ala a'jari palayang mae ri jama'aNa untu' kaparalluannu. Musti kupabattu ngasengi biritta battua ri Allata'ala; 26 iamintu biritta a'bilangngang taungamo Narahasiakang Allata'ala mae ri sikontu rupataua, mingka kamma-kamma anne Napa'nyatami mae ri umma'Na. 27 Mae ri anjo umma'Na, eroki Allata'ala ampa'nyatai antekamma baji'na siagang mala'biri'na anjo rahasiaNa untu' sikontu rupataua. Anjo rahasiaya, iamintu: Niaki Almasi lalang ri kalennu; battuanna langgappa tongko bageang lalang ri kalompoanNa Allata'ala. 28 Iaminjo Almasi nabirittakanga ikambe mae ri sikontu rupataua. Kipakainga'mi siagang kiajara' ngasemmi ke'nanga siagang baji'-baji'. Pattujunna ikambe iamintu sollanna akkulle ngaseng nierang rupataua mae ri Allata'ala, salaku tau baji'mo katallassang rohanina, lanri asse'renamo siagang Almasi. 29 Untu' yangasennami anjo passalaka nakuanjama terasa'mo. Usaha tojeng-tojemma' siagang sikontu pakkulle Napassareanga Almasi mae ri nakke; na anjo anjamaya lalang ri kalengku sanna' makoasana.
1 Kukellai sollanna nuasseng antekamma heba'na usaha kugaukanga untu' ikau siagang untu' tau niaka ri pa'rasangang Laodikia, kammayatompa sikamma tau tenayapa naasseng bajikka'. 2 Nakugaukang ngaseng anne sikammaya, lanri kukellaina a'jari jarre' pa'mai'na ke'nanga siagang namassing sikamaseang, sollanna pila' majarre' ke'nanga a'jari se're. Jari pila' napahang tojemmi ke'nanga na'jari tappa' sa'genna naasseng rahasia battua ri Allata'ala, iamintu KalenNa Isa Almasi. 3 Almasimi ampa'nyatai sikontu apa-apa tenayapa niassengi battu ri kacara'dekanNa siagang pangngassenganNa Allata'ala, ia taccokkoa riolo. 4 Kupauangko anne, sollanna tena napa'dongo'-dongokko manna pole inai, sannaka baji'na bicaranna mae ri kau. 5 Nasaba' manna pole nakisikabellai, mingka nyawaku tuli niaki ri tangnga-tangnganu. Na sanna' rannuku ancinikko a'julu ati siagang majarre' tappa' mae ri Isa Almasi. 6 Nutarimami Isa Almasi a'jari Bataranu. Lanri kammanami anjo paralluko asse're siagang Ia lalang ri katallassannu, 7 siagang anna'gala' majarre' mako mae ri Ia. Parallui nubangung katallassannu lalang ri Isa Almasi, sanrapanga batu majarre'. Parallui pila' majarre' tappa'nu mae ri Isa situru' apa le'baka nipangngajarrang mae ri kau. Siagang paralluko tamalanrea appala' sukkuru'. 8 Paralluko tutu, gassingka nia' tau anggodako siagang pikkirang tenaya matu-matunna siagang angngeranga mange ri oloang salaya. Anjo pikkirang-pikkirang kammaya teai pikkirang battu ri Isa Almasi, passangalinna pikkirang battuji ri rupataua siagang roh-roh koasaya ri anne linoa. 9 Nasaba' sikontu batangkalenNa Allata'ala nia'mi lalang ri KalenNa Almasi, iamintu lalang ri ma'rupataua. 10 Na lanri asse'renamo katallassannu siagang Almasi, nisare tommako katallassang sukkuka. Nasaba' Almasi a'jari kapala mae ri sikontu roh-roh makoasaya siagang ammarentaya. 11 Le'ba' mako nisunna' lanri asse're mako siagang Almasi; mingka teai sunna' nagaukanga rupataua, passangalinna sunna' Nagaukanga Almasi, le'baka allappassangko battu ri kakoasanna sipa'-sipa' dorakaya. 12 Nasaba' ri wattunnu nije'ne', iaminjo a'jari pammatei angkanaya nitarawang mako siagang Almasi; siagang iatommi anjo pa'je'neka a'jari pammatei angkanaya nibangung poleang todong mako battu ri kamateanga siagang Almasi, lanri tappa'nu ri koasaNa Allata'ala, ampabangung poleangai Almasi battu ri kamateanga. 13 Riolo, le'ba'mi mate katallassang rohaninu lanri dosanu, siagang lanri tenana nisunnakko ri lahere'nu. Mingka kamma-kamma anne nipabangung poleang mako ammotere' ri Allata'ala siagang Almasi. Le'ba'mi Napammopporang sikontu dosata, 14 siagang tanjaria maki' natuntu' ri sura' pangnginranganta, sannaka battala'na mae ri katte. Lanri nasalli'namo anjo sura' pangnginranganga mae ri kayu sallika, taNarekenga ngasemmi Allata'ala anjo laNatuntuka mae ri katte. 15 Anjoremmi ri kayu salli'Na Almasi Napatundu' ngaseng sikontu roh-roh ammarentaya siagang niaka koasana. Lanipareki paccini'-cinikang ke'nanga ri dallekanna tau jaia ri wattunna nire'resang a'jari tu nitahang ke'nanga ri Almasi lalang ri barisang passua'-suarrang pammetanNa. 16 Lanri kammana, teako pa'biangi taua ampasalako ri passala' apa-apa nikanrea yareka apa-apa niinunga, yareka ri passala' allo-allo lompona agamaya, yareka passua'-suarrang bulang berua, yareka ri passala'na allo Pammari-marianga. 17 Yangasenna anjo poro bayang-bayannaji bawang apa-apa labattua; mingka lampa'nyatayai sikammaya anjo iamintu Almasi! 18 Teako pa'biangi kalennu nipakarugi ri tau assara-saraia napakatuna kalenna siagang anynyombaya malaeka'-malaeka'. Anjo tau kammaya tampoi ri pikkirang-pikkirang pakkalinoanga siagang napa'borro-borroangi apa tasamara' le'baka nacini' ke'nanga; 19 sa'genna tenamo natanjeng ke'nanga mae ri Almasi, a'jaria kapala mae ri ke'nanga. Irawangang pimpinanNa Almasi, sikontu tubua niparakai siagang nipa'jari se're ri passisambung-sambunganna, kammayatompa a'bakka' situru' ero'Na Allata'ala. 20 Le'ba' mako mate siagang Almasi, siagang nilappassang battu ri roh-roh makoasaya ri anne linoa. Jari, angngapa nuttallasa' sangkamma ija tau nikoasaia ri anne linoa? Angngapa nutundu' mae ri paratorang-paratorang angkanaya, 21 “Teako jamai anne”, “teako lepakki anjo”, “teako seroi anne”? 22 Sikontu anjo paratoranga tassikaliji nipake ri apa-apaya natenamo matu-matunna. Anjo paratorang-paratoranga siagang pangngajarang-pangngajaranga rupatauaji ampareki. 23 Anjo memang bajiki nicini'; nasuroi taua anynyomba malaeka', napakatunai siagang nasessai kalenna; mingka tena ngaseng matu-matunna anjo untu' angkatutui napasuna rupataua.
1 Nipabangung poleang mako ammotere' battu ri kamateanga siagang Almasi. Lanri kammana, musti usaha mako untu' anggappai apa-apa niaka ri suruga; iamintu ri tampa'Na Almasi, ammarenta siagang Allata'ala. 2 Pituju mangemi pikkirannu ri apa-apa niaka anjoreng; teako na ri apa-apa niaka ri linoa. 3 Nasaba' le'ba' mako mate, nataccokko tallasa'nu siagang Almasi lalang ri Allata'ala. 4 Jari, assala'na katallassannu sitojenna iamintu battu ri Almasi; na punna a'nyatamo Almasi sallang, la'nyata tommako siagang Ia lalang ri kalompoanNa. 5 Lanri kammana, bunomi sikontu ero' pakkalinoannu, tuli ansusaiyai kalennu; kammaya pa'gau' bawanganga, kabamballanga, hawa napasua, cinnaya a'gau' ja'dala', siagang kangoang (nasaba' anjo angngoaya sangkammai siagang anynyombaya barhala). 6 Yangasennami anjo kammaya ampabattui pangngalarroinNa Allata'ala mae ri tau tenaya namannuruki ri Ia. 7 Kalennu pole riolo nuturuki tongi sikamma anjo kacinnang kammaya, ri wattunnu nikoasai ri anjo sikammaya kacinnang. 8 Mingka kamma-kamma anne parallui nupela' battu ri kalennu sikamma sipa'-sipa' ja'dalaka. Tea' mako larroi yareka a'jalloki pole yareka teako birisi' pa'maiki mae ri parannu tau. Tea sikaliko pasuluki ri bawanu kana-kana pali'boa, yareka bicara ra'masaka. 9 Teako assiballe-ballei, nasaba' le'ba'mi nubokoi sipa'-sipa' katallassang sallonu. 10 Kamma-kamma anne le'ba' mako nisare katallassang beru. Ikau a'jari tau beru mako, tulusu' niberuia ri Mappa'jaria, iamintu Allata'ala, situru' rupa KalenNa. Pattujunna iamintu sollanna pila' sukku' nuassenna Allata'ala. 11 Kale'bakkanna allanynya'mi sikontu passimmaraenganna tu Yahudia siagang bansa-bansa maraenga, yareka tu nisunnaka siagang tu tenaya nisunnaki; tenamo passimmaraengang ri bansa battu-battua siagang tau bambalaka; tenamo passimmaraengang ri tu a'jari ataya siagang tu bebasaka; nasaba' Almasimi a'jari yangaseng-ngasenna. Asse're ngasemmi ke'nanga lalang ri Almasi! 12 Ikau Umma'Nako Allata'ala. Nakamaseangko Allata'ala siagang Napileiko Allata'ala untu' a'jari umma'Na nasa'la' maraenga. Iaminjo saba'na numusti mangngamaseang, baji' pa'mai', tuna pa'mai', tena nukasara', siagang attahangko angkasiaki pa'risika. 13 Musti sa'barakko mae ri parannu tau, siagang massing sipammopporangko punna sipammolikangko larro mae ri parannu tau. Nangaiko Napammopporang Batara; jari musti ero' tongko massing sipammopporang. 14 Siagang kaminang parallua iamintu: musti sikamaseangko nasaba' iaminjo pangngamaseanga ampa'jari se're ngasengko, sa'gennu a'jari sukku'. 15 Parallui passiamakkang Napassareanga Almasi lalang ri atinnu ampattantui apa-apa eroka nutappuki. Nasaba' Nakiokko Allata'ala untu' a'jari anggota ri se'rea tubu, sollannu akkulle attallasa' lalang passiamakkang lanri anjo Almasi. Paralluko appala' sukkuru'. 16 Parallui antama' ri atinnu ajarang-ajaranNa Almasi rassia barakka'. Paralluko massing siajara' siagang sipakainga' baji'-baji'. Kelongangi kelong-kelonga siagang pammuji-mujia kammayatompa lagu-lagu rohania; sukkurukko lalang ri atinnu nukkelong-kelong untu' Allata'ala. 17 Sikontu apa nugaukanga yareka nupaua, musti nugaukangi siagang nupaui lalang arenNa Batara Isa. Appala' sukkurukko mae ri Allata'ala Manggea lanri apa le'baka Nagaukang Isa untu' ikau. 18 Ikau ngaseng a'jari tu bai'-bainea! Mannurukiko mae ri bura'nennu, nasaba' musti kammai anjo gau'nu lalang ri katallassang Karistenga. 19 Ikau ngaseng a'jari tubura'-bura'nea! Kamaseangi bainennu. Teako kasarri mae ri ia. 20 Ikau ana'-anaka! Nikellaiko musti tuli mannuruki salaku tu Karisteng mae ri anrong-manggenu, nasaba' kammayami anjo Nakarannuang pa'mai'Na Allata'ala. 21 Ikau ngaseng a'jari manggea! Teako pa'ri'-pa'risi pa'mai'na ana'-ana'nu, sollanna tena a'jari la'ba pa'mai'na. 22 Ikau ngaseng a'jari palayanga! Lalang ri apa-apa mamo, paralluko amminawang turu' mae ri pinggawanu ri anne linoa. Teako naiaja bawang numminawang turu' punna niaki anjagaiko, lanri ero'nu nipalece. Turuki ke'nanga situlusu' pa'mai'nu, lanri nupakala'biri'na Batara. 23 Jama-jamang apa mamo nugaukang, parallui nugaukang situlusu'na pa'mai'nu; sanrapang angkanaya untu' Batara nanugaukangi anjo jamanga, teai untu' rupataua bawang. 24 U'rangi angkanaya langgappako pahala battu ri Batara. Apa Napasadiaya Batara untu' umma'Na, iaminjo laNapassareang mae ri kau. Nasaba' pinggawa sitojennaya nulayani kamma-kamma anne, iamintu KalenNa Almasi. 25 Na manna pole inai punna salai, lanatanggongi anjo sikamma kasalanna; nasaba' tena Nammile tau Batara.
1 Ikau ngaseng a'jari pinggawaya! Paralluko a'gau' tojeng siagang adele' mae ri palayang-palayannu. U'rangi angkanaya nia' todong se're pinggawanu ri suruga. 2 Paralluko tamalanrea appala' doang siagang a'jaga-jaga, kammayatompa appala' sukkuru' mae ri Allata'ala. 3 Appala' doang tongko untu' ikambe, sollanta Nasare Allata'ala kasampatang baji', untu' ampa'la'bangi biritta rahasiaNa Almasi. Nasaba' passabakkang iaminjo nakunia'mo kamma-kamma anne ri tarungkua. 4 Appala' doangko sollanna akkulle kupakasingara' anjo rahasiaya sa'genna singara' tojeng-tojeng. 5 Mae ri parannu tau, ia tenayapa natappa', baji'-bajiki katallassannu nanupake baji' sikamma kasampatang niaka. 6 Sikamma bicara nupasuluka parallui appakasannang pa'mai' siagang appatimbo pangngai. Parallui nuasseng baji' appiali ri pakkuta'nanna taua. 7 Tikhikus, sari'battang nikamaseanta, lampabattuang ngasengko sikontu kabara' battua ri batangkalengku. Iami majarre' anrurungangi ikambe anggaukangi jama-jamang mangea ri Batara. 8 Kusuromi battu mae ri kau sollanna akkulle nuasseng katallassanna ikambe, nanukkullemo kasaleorang. 9 Nia' tongi Onesimus lanaagang Tikhikus a'lampa mae ri kau; Ia tau battu antureng tonji. Iami sari'battanta majarreka, siagang nakarimangngia ikambe. Iami siagang Tikhikus lampabattuang ngasengko sikontu apa-apa kajarianga anrinni ri tampa' kupammantangia. 10 Aristarkhus, niaka kuagang anrinni ri tarungkua, akkiringi sallang mae ri kau ngaseng. Kammayatompa Markus, sampu sikalinna Barnabas. (Le'ba' mako nisare kabara' sollanna nuruppai siagang nutarima bajiki punna battu mae ri kau.) 11 Sallanna pole Yesus nigallaraka todong Yustus. Battu ri sikamma tu Yahudi tappakamo mae ri Batara Isa, iaji anne bawang ke'nanga tallua angngaganga' anggaukangi jama-jamang battua ri Allata'ala. Teai sipato' natulungku tojeng ke'nanga. 12 Sallang battu ri Epafras. Anne Epafras tau battu antureng tonji. Pajama-jamaNa tongi Isa Almasi, tenaya lanrena tuli ampappala' doangangko. Sanna' napala'na mae ri Allata'ala, sollanna pila' jarre' tappa'nu siagang a'jari toa tojeng pikkirang rohaninu; sollannu a'jari sukku' mannurukinnu mae ri ero'Na Allata'ala. 13 Kalengku ansa'bi antekamma batena anjama terasa' untu' ikau ngaseng siagang sikamma tau niaka ri Laodikia siagang Hierapolis. 14 Dottoro' Lukas, nikarimangngia, siagang Demas, akkiring tongi sallang mae ri kau ngaseng. 15 Pabattu tongi sallanna ikambe mae ri sikamma sari'battanta tu Karistenga ri Laodikia; kammayatompa mae ri sari'battanta Nimfa siagang sikamma jama'ah a'rappunganga assambayang ri balla'na. 16 Punna le'ba' nibaca anne suraka mae ri kau ngaseng, usahakang tongi sollanna nibacakang todong mae ri jama'ah niaka ri Laodikia. Kammayatompa, musti nubaca tongi sura' lanikiringa battu ri Laodikia mae ri kau. 17 Siagang pauangi Arkhipus, angkanaya, “Pa'le'baki jama-jamang nipassareanga mae ri kau untu' allayani Batara.” 18 Sallang battu ri nakke, Paulus. Kalengku antulisiki anne bageang anrinnia. Teako kaluppai angkanaya nia' ija' lalang ri tarungkua. Poro Nabarakkaki ngasengko Batara. Sallangku, Paulus
1 Natarimai sikontu sari'battangku, iamintu jama'ah niaka ri Tesalonika, a'jaria Umma'Na Allata'ala Manggea siagang Batara Isa Almasi: Ikambe, iamintu Paulus, Silas, siagang Timotius, ma'minasa ngasengki' nuporo nisare ngaseng barakka' siagang salewangang ri Allata'ala. 2 Tuli appala' sukkuruki ikambe mae ri Allata'ala passabakkang ikau ngaseng. Punna appala' doang ikambe mae ri Allata'ala Manggeta tuli mangngu'rangiki' ri kau ngaseng, siagang tuli kipappala' doangang ngaseng tongko. Kiu'rangi antekamma nupa'nyatanamo lalang ri panggaukannu, ma'nassanu tappa' mae ri Almasi; kammayatompa antekamma batenu mangngamaseang ri parannu tau, sa'genna nulayanimo ke'nanga; kammayatompa pole antekamma jarre'na panrannuannu mae ri Batarata Isa Almasi. 4 Naassengi ikambe, angkanaya Nakamaseang ngasengko Allata'ala, siagang le'ba' mako Napile nampa Nasa'lakko a'jari umma'Na. 5 Nasaba' teai lalang kana-kana bawang batena ikambe ampabattui anne Kabara' Bajika, mingka lalang koasaNai siagang lalang RohNa Allata'ala, siagang lanri matappa'na ikambe ri katojenganna anjo Kabara' Bajika. Ri wattunna nia' ikambe ri tangnga-tangnganu, nuassemmi antekamma batena attallasa' ikambe untu' kabajikannu. 6 Nucontoimi katallassanna ikambe siagang Batara. Manna teai sipato' pa'risi'na katallassannu, mingka nutarima tonji siagang rannu pa'mai'nu anjo kabara' napabattua ikambe mae ri kau ngaseng. Anjo karannuanga RohNa Allata'ala assareko. 7 Lalang kammana minjo nu'jari contomo mae ri sikontu Umma' Karisteng niaka ri Makedonia siagang Akhaya. 8 Nasaba' tassiara'mi birittaNa Allata'ala appakkaramula battu ri kau ngaseng sa'genna mange ri butta Makedonia siagang Akhaya. Ba'lalo tena nasikammaja anjo bawang; nasaba' anjo katappakkannu mae ri Allata'ala tassiara'mi ri kere-keremae, sa'genna tenamo apa-apa parallu napau ikambe. 9 Nacarita ngasemmi taua antekamma batenu antarimai ikambe pirangalloang, ri wattunna battu ikambe mae ri kau. Nacaritami ke'nanga antekamma batenu ambokoi sikamma barhalaya nunampa battu mae ri Allata'ala mattallasaka siagang tenaya ruanna untu' anynyomba mae ri Ia. 10 Nacarita tommi ke'nanga antekamma batenu anrannuangi kabattuanNa Ana'Na Allata'ala battu ri suruga, iamintu Isa, le'baka nipattallasa' poleang ammotere' battu ri kamateanga ri Allata'ala. Ia tomminjo Isa ampasalamakki' battu ri pangngalarroiNa Allata'ala labattua sallang.
1 Sikamma sari'battangku! Kalennu ngasemmi angngassengi angkanaya tena nasia-sia kabattuanna ikambe mae ri kau ngaseng. 2 Nuassengi angkanaya ri tenanapa nabattu ikambe mange ri kau ngaseng ri Tesalonika, le'ba'mi ikambe nisessa siagang nihina ri Filipi. Mingka manna najai tau ammusui ikambe, le'ba'mi nisare kabaraniang ikambe ri Allata'alata untu' ambirittakangi mae ri kau ngaseng Kabara' Baji' battua ri Ia. 3 Ia pakkio'na ikambe mae ri kau ngaseng teai pakkio' sala; kammayatompa teai saba' akkala' sala yareka ero' annipu. 4 Teai kammaya anjo! Tena na'bicara ikambe lanri ero'na napakasannang nyawana taua, passangalinna lanri ero'na ikambe ampakasannangi atinNa Allata'ala, angngassengai atinna ikambe. Nasaba' Iami assarei pangngellai ikambe untu' ampa'la'bangi anjo Kabara' Bajika. 5 Nasaba' kalennu angngassengi angkanaya tale'bakai ikambe a'baji'-baji' ri bawa lanri nia' ero' kangoang taccokkona ikambe. Allata'ala a'jari sa'bi ri anne passalaka! 6 Teai todong lanri ero'na ikambe nipalece ri taua, baji' nabattu ri kau yareka battu ri tau maraenga. Sikontutojenna salaku tunisuroNa Almasi, akkullei ikambe annuntu' apa-apa mae ri kau. 7 Mingka napakatunami kalenna ikambe ri wattunna nia' ri tangnga-tangnganu, sanrapang se're amma' amparakai ana'-ana'na. 8 Lanri kikarimangnginnu, kiero'mo assareangko tena naanjo Kabara' Baji' battua ri Allata'ala bawang, passangalinna katallassanna pole ikambe. Lanri teai sipato' kikarimangnginnu. 9 Tantu nuu'rangi ngasengiji antekamma terasa'na usaha siagang barjuang ikambe. Allo bangngi anjama ikambe sollanna tena manna sitau ri kau nisusai ri kambe, ri wattunna napa'la'bang ikambe anjo Kabara' Baji' battua ri Allata'ala mae ri kau. 10 Matangkasaki, tojengi, siagang tena callanna katallassanna ikambe mae ri kau ngaseng, ikau matappakamo mae ri Almasi. Ikau ngasemmi siagang Allata'ala, a'jari sa'bina ikambe. 11 Nuassemmi angkanaya kipare' mako sanrapang ana'-ana' kalenna ikambe. 12 Kipakainga' mako, kipamajuko, siagang kikellai tojengko attallasa' situru' ero'Na Allata'ala, sa'genna nupakasannang atinNa. Nasaba' le'ba' mako Nakio' Allata'ala untu' a'jari umma'Na lalang ri Lino BeruNa siagang lalang ri kalompoanNa. 13 Nia' pole maraengannaya a'jari saba' natuli appala' sukkuru' ikambe mae ri Allata'ala. Iamintu, angkanaya ri wattunna napabattu ikambe anjo biritta battua ri Allata'ala, nupilangngeri siagang nutarimai anjo birittaya, teai salaku biritta battu ri rupataua, passangalinna salaku biritta battu ri Allata'ala. KalenNa Allata'ala anggaukangi anjo jama-jamanga lalang ri kalennu, ia matappaka mae ri Almasi. 14 Sikamma sari'battangku, apa nukasiaka ri tallasa'nu, le'ba' tommi nakasia' sikamma jama'aNa Allata'ala ri butta Yudea, a'jaria taunNa Isa Almasi. Nukasiaki passessaya battu ri julu bansanu tonji, sangkamma nakasiaka sikamma Jama'aNa Allata'ala ri butta Yudea battu ri tu Yahudia. 15 Iaminjo ke'nanga ambunoi Batara Isa siagang na'bi-na'bia, kammayatompa assessai ikambe. Namusu ngasengi rupataua, nanicallamo ke'nanga ri Allata'ala. 16 Ba'lalo nahalang-halangimi ikambe untu' ambirittakangi mae ri bansa-bansa maraenga anjo biritta akkullea ampasalamaki ke'nanga. Lanri kammana, anjo tu Yahudia pila' tuli natambaimi dosa-dosana, sa'genna a'jari sukku'mo jaina dosana ke'nanga. Nakala'busanna, kamma-kamma anne nitujumi ke'nanga ri pangngalarroiNa Allata'ala. 17 Mingka sikamma sari'battangku, baku' anynya'la'na ikambe battu ri kau ngaseng — sisa'la' ri mata mingka tena ri pa'mai' — pila' nakku'mi ikambe mae ri kau ngaseng. Nakiattojeng-tojemmo usaha untu' angngagang ngasengko assibuntulu' poleang! 18 Usaha maki' ero' battu angkunjungiko; na inakke Paulus, la'bima' ri sikalia ancobai, mingka tuli nihalangia' ri Billisika. 19 Tojeng-tojengi angkanaya ikau ngasemmi panrannuanna siagang karannuanna ikambe. Nasaba' punna battu sallang Batara Isa, nakiandallekang ri Ia, ikau ngasemmi nakalompoang nyawana ikambe! 20 Namemang, ikau ngasemmi nakalompoang nyawana ikambe siagang nakarannuanga nyawana ikambe!
1 Kala'busanna tanatahangami nakku'na ikambe. Lanri kammana appikkiri' maki' angkana bajikangang ammantang maki' ri Atena, 2 nanisuro riolo sari'battanta Timotius battu mae ri kau: Anne Timotius, iami palayanNa Allata'ala, assiaganga ikambe anjama untu' ambirittakangi Kabara' Bajika, iamintu ri passala'na Almasi. Kisuromi Timotius battu mae ri kau ngaseng, sollanna napakajarrekko siagang napamajuko nupila' tappa' mae ri Almasi. 3 Sollanna tenanniakka manna sitau battu ri kau ammono'boko passabakkang sikamma anne kasessanta ngaseng. Kalennumi angngassengi, angkanaya anjo sikamma passessaya antama' memang tongi lalang ri ero' rancanaNa Allata'ala untu' ikatte. 4 Ri wattunna assiagangija ikambe siagang ikau ngaseng, le'ba' memammi kipau la'bi riolo mae ri kau ngaseng angkanaya lanikasiaki sessaya. Na ma'nassa kajariang tojemmi anjo kipakkanaya; kalennu ngasemmi angngassengi anjo kammaya. 5 Lanri kammana minjo nakusuromo Timotius battu mae ri kau ngaseng, sollanna akkulle kuasseng antekamma kamajuanna katappakkannu, nasaba' teai sipato' ero'na kuasseng. Bata-batai nyawaku, gassingka naso'riko Billisi' sa'genna a'jari sia-sia ngaseng kaposoanna ikambe. 6 Kamma-kamma anne nia'mi ammotere' Timotius; siagang napabattumi ri kambe kabara' nakarannuanga ikambe, iamintu ri passala'na katappakkannu mae ri Almasi siagang passikamaseannu. Napabattumi ri kambe angkanaya tuli nuu'rangi baji'na ngaseng ikambe lalang ri pa'mai'nu ngaseng. Siagang angkanaya ero' ngasengko angngagangi ikambe assicini', sangkamma todong ikambe sanna' todong ero'na ikambe angngagang ngasengko assicini'. 7 Iaminjo saba'na, sikamma sari'battangku ngaseng, nailalang sikontu kasusaanna siagang kasessanna ikambe, anggappa maki' panynyaleori lanri biritta battua ri kau ngaseng. Tappa'nu ngasemmi mae ri Almasi ampakalompoi pa'mai'na ikambe; 8 sa'genna kamma-kamma anne attallasa' tojeng-tojemmi nakasia' ikambe, assala' tuli majarrekko, asse're mae ri Batara. 9 Teai sipato' lompona kasukkuranna ikambe mae ri Allata'ala lanri sikontu karannuang nagappaya ikambe ri dallekanNa Allata'ala passabakkang ikau ngaseng. 10 Allo bangngi maki' appala' doang tojeng-tojeng, sollanna nakiakkulle assicini' siagang ikau ngaseng, nakkulle ikambe ampa'gannaki apa-apa kakuranganga ri katappakkannu. 11 Naporo KalenNa Allata'ala Manggeta, kammayatompa Batarata Isa, allappari oloanna ikambe sollanta akkulle assicini'! 12 Poro pila' Napasikama'-kamaseang ngasengko Batara, kammayatompa napila' nukamaseang todong sikontu rupataua, sa'genna pila' katambang pangngamaseannu, sangkamma pangngamaseanna ikambe mae ri kau. 13 Lanri kammana, akkullemi Napakajarre' Batara pa'mai'nu, sa'gennu matangkasa' siagang tena callannu ri dallekanNa Allata'ala Manggeta, punna battu poleang sallang Batara Isa a'rurung siagang sikontu taunNa ngaseng.
1 Lanri kammana, sikamma sari'battangku, paralluko angngalle conto battu ri kambe, antekamma batenu musti attallasa' sollanna nupakasannang pa'mai'Na Allata'ala. Memang kamma-kamma anne sangkammami anjo katallassannu. Mingka kamma-kamma anne lalang koasaNa Batara Isa, napala' tojeng-tojengi ikambe siagang kisekeki ngasengko sollannu pila' appattujuang pole ilalang ri anjo passalaka! 2 Nasaba' nuassemmi anjo pitunju'-pitunju' le'bakamo kipassareang mae ri kau ngaseng lalang koasaNa Batara Isa. 3 Iaminne Nakaerokia Allata'ala: Nikellaiko sollannu matangkasa' lalang tallasa'nu, untu' KalenNa siagang nupakabella kalennu battu ri a'gau' bawanga. 4 Sikontu bura'ne-bura'ne niaka ri kau parallui naasseng antekamma carana attallasa' siagang bainenna siagang matangkasa' na baji', napakasannang atinNa Allata'ala siagang rupataua. 5 Teako turuki hawa napasunu mae ri bainennu sangkamma nagaukanga tau kapere' tenaya naassengi Allata'ala. 6 Ri anne passalaka, tea' laloko niakki appanggaukang sala yareka annipu mae ri sari'battanna. Pirangalloang le'ba'mi napau sitojeng-tojenna ikambe mae ri kau ngaseng angkanaya laNahukkungi Batara sikontu tau anggaukangai kasalang kammaya anjo. 7 Nakiokki' Allata'ala, teai sollanta a'gau' bawang lalang ri katallassanta, passangalinna sollanta attallasa' mappakasannang mae ri atinNa Allata'ala. 8 Lanri kammana, inai-nai taeroka antarimai anne pangngajaranga, teai rupataua tanatarimaya, passangalinna Allata'ala ampassareangai Roh matangkasa'Na mae ri kau ngaseng. 9 Tenamo naparallu ikambe antulisiki mae ri kau ri passala' antekamma batenu musti angkamaseangi sikamma sari'battang julu tappa'nu. Le'ba' mako niajara' ri Allata'ala sollannu massing sikamaseang. 10 Na anjo passalaka le'ba'mi nupappicinikang mae ri sikamma sari'battang julu tappatta ri sikontu butta Makedonia. Jari, sari'battangku ngaseng, napala' tojeng-tojengi ikambe mae ri kau ngaseng, sollannu pila' a'jari la'bi baji' lalang ri katallassannu. 11 Usahako sollanna nupakasannang tallasa'nu, siagang teako pantama'-tamakki kalennu ri urusanna tau maraenga. Paralluko anjama, nanuboya lanukatallassanga, sangkamma le'baka naparentakang ikambe mae ri kau ngaseng ri pirangalloang. 12 Punna kamma ngaseng anjo batenu attallasa', tenamo nulatanjeng mae ri tau maraenga untu' katallassannu; siagang lanianggara' tommako ri tau tenayapa natappa' mae ri Almasi. 13 Sikamma sari'battangku; kikellaiko sollanna nuasseng antekamma sitojenna ri passala'na tau mateamo; sollanna tena nasi'na pa'mai'nu sangkamma tau maraenga, tenaya panrannuanna. 14 Tappa' maki' angkanaya le'ba'mi mate Isa Nattallasa' poleang ammotere'. Iaminjo saba'na nakitappa' tommo angkanaya laNapattallasa' poleangi Allata'ala sikontu tau matea lalang KalenNa Isa, iamintu sikontu tau tappaka mae ri Ia, sollanna attallasa' tommo ke'nanga lalang ri Ia. 15 Untu' anjo passalaka, iaminne pangngajara'Na Batara, eroka napabattu ikambe mae ri kau ngaseng: Punna battu sallang Isa, ikatte tau attallasaka ija talanipilumbayai tau la'bi rioloa mate. 16 Punna sallang naung KalenNa Isa battu ri suruga, lakkio' lompoi malaeka' lompoa siagang lanipasa'rai tarompe'Na Allata'ala untu' a'jari pammatei. Nampa nipabangung la'bi riolo tu Karistenga. 17 Le'baki anjo, ikatte tau attallasaka ija anjo wattua lanipasiangka' ngasengki' siagang ke'nanga antama' ri rammanga untu' mange assibuntulu' siagang Batara. Nampa lammantang maki' siagang Batara sa'genna satunggu-tungguna. 18 Lanri kammana anjo, paralluko massing sipakajarre' ri tappa'nu lalang ri anne kana-kana kammaya.
1 Sikamma sari'battangku; tena naparallu natulisi' ikambe angkana ringngapanna wattu sitojennaya nalakajariang anjo passalaka ngaseng. 2 Nasaba' baji'mi nuassenna ngaseng angkanaya anjo Allo kabattuanNa Batara lasanrapangi palukka' battua ri wattunna bangngi. 3 Punna nakana taua, “Amang ngasenji siagang sannang ngasenji,” iaminjo wattua nati'ring natuju ke'nanga kapanrakang na tena manna sitau akkulle ta'lappasa'. Tena nanisanna-sannai nakajariang anjo passalaka; sanrapangi pa'risi'na se'rea baine ri wattunna lanalassukang ana'na. 4 Mingka ikau ngaseng, teaiko tau lalanga ri kasassanganga attallasa', sa'gennu a'jari ta'bangka punna kajariang anjo passalaka, sanrapang tau nibattui ri palukka'. 5 Ikau ngaseng, tau lalangko ri singaraka attallasa'; antamakko ri golongang allo masingaraka. Ikatte teaiki' tau lalanga ri kasassanganga attallasa', yareka teaiki' tau antamaya ri golongang bangngi masassanga. 6 Lanri kammana, takkulleaki' attinro sangkamma tau maraenga. Paralluki' a'jaga-jaga siagang parallui singara' pikkiranta. 7 Ri wattu bangngia attinroi taua, kammayatompa ri wattu bangngia todong na'jari nasa'ring taua inung-inungang. 8 Mingka ikatte anne tau lalangki' ri singaraka, antamaya ri golongang allo masingaraka; lanri kammana parallui a'jari singara' pikkiranta. Paralluki' tuli tappa' mae ri Batara, tuli mangngamaseang ri paranta tau, kammayatompa tuli majarre' panrannuanta mae ri Allata'ala, eroka ampasalamakki'. Iaminjo sanjatata untu' alla'langi kalenta siagang angngewai kaja'dallanga. 9 Napileki' Allata'ala teai sollanta Natuju pangngalarroiNa, passangalinna sollanna akkulle nigappa kasalamakkanga tete ri Batarata Isa Almasi. 10 Matemi Isa untu' ikatte, sollanna punna battu poleang sallang — baji' nanittallasa' ija, yareka nakimatemo — akkulleki' attallasa' sipa'rurungang siagang Ia. 11 Lanri kammana, paralluko massing sipakamaju siagang massing sipakajarre' ri tappa'nu, sangkamma nugaukangamo ri kamma-kammaya anne. 12 Sikamma sari'battangku; kipala' tojeng-tojengi mae ri kau ngaseng, sollanna nupakala'biri' tau niaka anjama-jama ri tangnga-tangnganu; iamintu sikamma tau le'baka Napile Batara untu' ampimpingko siagang ampakaingakko. 13 Pakala'biriki ke'nanga sibaji'-baji'na. Kamaseangi ke'nanga, lanri nuu'ranginna jama-jamang nagaukanga ke'nanga. Tuli assiamakko massing para ikau lalang ri katallassannu. 14 Kipala' tongi mae ri kau ngaseng sari'battang, sollanna nupakainga' siagang kana-kana baji' tau tenaya naero' anjama lalang ri katallassanna. Pakalompoi pa'mai'na tau la'ba pa'maika; tulungi tau tenaya pakkullena, siagang sa'barakko mae ri yangasenna taua. 15 Jagai sollanna tena nanubalasa' kaja'dallanga siagang kaja'dallang. Usahako tuli a'gau' baji' mae ri massing para ikau, kammayatompa mae ri yangasenna taua. 16 Paralluko tuli marannu; 17 tuli appala' doangko mae ri Allata'ala. 18 Lalang yangasenna katallassannu paralluko tuli appala' sukkuru'; nasaba' iaminjo Nakaerokanga Allata'ala mae ri kau salaku tau ampakase'reai katallassanna siagang Isa Almasi. 19 Teako jallakkangi RohNa Allata'ala. 20 Teako cini' tunai biritta-biritta napabattua RohNa Allata'ala. 21 Yangaseng-ngasenna parallui nuparessa baji'; ia bajika parallui nuturuki. 22 Pakabellai kalennu battu ri sangka' rupaya kaja'dallang. 23 Poro KalenNa Allata'ala, assareaki' kasalewangang, ampa'jariko tau attojeng-tojenga attallasa' untu' Allata'ala bawang. Poro Allata'ala anjagai sikontu batangkalennu, baji' roh, nyawa, yareka tubunu; sa'genna tena callannu sallang ri wattunna battu poleang Batarata Isa Almasi. 24 Allata'ala, Ia le'baka angkio' ngasengko, langgaukangi anjo sikammaya mae ri kau, lanri tena lanreNa mae ri kau ngaseng. 25 Sari'battangku ngaseng, pappala' doangangi ikambe! 26 Massing sibarisallangko para ikau ngaseng, assiamakko nusikarimangngi salaku tu Karisteng. 27 Tete ri koasaNa Batara, kupala' tojeng-tojengi ri kau ngaseng sollanna nubaca anne suraka ri dallekanna sikontu sari'battang julu tappatta. 28 Poro Nabarakkaki ngasengko Batarata Isa Almasi. Sallangku, Paulus
1 Natarimai sikontu sari'battangku, iamintu jama'ah niaka ri Tesalonika, a'jaria Umma'Na Allata'ala Manggeta siagang Batara Isa Almasi! Ikambe, iamintu Paulus, Silas siagang Timotius, 2 ma'minasa ngasengki' nuporo nisare ngaseng barakka' siagang salewangang ri Allata'ala. 3 Sikamma sari'battangku; tena tappu'na appala' sukkuru' ikambe mae ri Allata'ala lanri ikau ngaseng. Na memang, siratang memang tongi appala' sukkuru' ikambe, lanri pila' tappa' ngasengko mae ri Almasi, siagang pila' massing sikamaseangko. 4 Iaminjo saba'na natuli nacaritako ikambe punna mangeki' akkunjungi jama'ah-jama'aNa Allata'ala nakipuji ngasengko ri alla'na sikamma jama'aNa Allata'ala. Lompomi pa'mai'na ikambe ancaritai antekamma majarre'na tappa'nu mae ri Almasi ri tangnga-tangngana passessaya siagang kapa'risang nukasiaka. 5 Anrinnimi anne a'nyata antekamma adele'na apa le'baka Natappuki Allata'ala; Le'ba'mi nukasia' sessaya passabakkang Lino BeruNa Allata'ala, jari lanikellai mako antama' anjoreng. 6 LaNagaukangi Allata'ala apa adeleka. LaNabalasaki passessa sikamma tau le'baka ampa'jari sessako. 7 Na untu' ikau angkasiakai pa'risika ri kamma-kammaya anne — kammayatompa ri kambe — laNasareki' kasalewangang Allata'ala, punna battu sallang Batara Isa, manaunga battu ri suruga ampa'nyatai KalenNa siagang malaeka'-malaeka' lompoNa 8 kammayatompa pepe' a'rinra-rinraya. Manaungi untu' anghukkungi tau tenaya naero' anjampangi Allata'ala, siagang tau tenaya naero' mappilangngeri ri Kabara' Bajika ri passala'na Isa Almasi Batarata. 9 Anjo tau kammaya langgappai hukkungang kapanrakang sa'genna satunggu-tungguna; nipelaki assulukang battu ri pammantanganNa Batara, battu ri kalompoanNa siagang kakoasanNa, 10 iamintu punna battu sallang Batara untu' lanipakalompo ri umma'Na siagang untu' lanikangalikang ri sikontu tau tappaka. Ikau pole, lania' ngaseng tongko ri alla'na anjo umma'Na Allata'ala, lanri tappa' ngaseng mako mae ri anjo biritta napabattua ikambe mae ri kau ngaseng. 11 Lanri kammanami anjo nakituli appala' doang untu' ikau ngaseng. Appala' doangi ikambe mae ri Allata'ala, sollannu Nasare pangngellai untu' attallasa' situru' ero'Na; iaminjo saba'Na naNakio' ngasengko. Poro Allata'ala lalang koasaNa Napa'rupai ero'Na untu' a'gau' baji', ampassukkuki jama-jamang nugaukanga lanri tappa'nu mae ri Almasi. 12 Lanri kammana anjo nanipakalompomo Batarata Isa ri kau ngaseng; kammayatompa nipakalompo tommako ri Isa lanri kabajikang pa'mai'Na Allata'ala siagang Batara Isa Almasi.
1 Ri passala'na kabattuanNa Batarata Isa Almasi, siagang lanipasse'reta ngaseng untu' sipammantangang siagang Batara, iaminne kupala' tojeng-tojenga mae ri kau ngaseng: 2 Teako linta' dudui a'jari lingu siagang lussa' lanri nia'na kabara' angkanaya narapi'mi allonna labattu poleang Batara Isa. Nakulle kapang anjo kabaraka battu ri pappiso'nai, yareka battu ri pangngajarangi; yareka nia' kapang tau angkana le'baki natulisi' ikambe anjo kabaraka lalang ri sura'na ikambe. 3 Mingka manna antekamma, teako eroki nitipu ri taua. Nasaba' ri tenanapa nabattu anjo Alloa, musti nia' apa-apa kajariang la'bi riolo: Jai tau lammono'boko, ansassali Almasi; siagang Tau Ja'dala' le'baka nipattantu lantama' ri naraka, laniaki ampappicinikangi kalenna. 4 Lalang katampoanna nalanaewa siagang lanapakatinggi kalenna irateanganna sikamma nasombaya rupataua, yareka sikamma apa nakanaya rewata rupataua. Ba'lalo lammempoi lalang ri Balla'Na Allata'ala, nampa nakana kalenna iami Allata'ala. 5 Maka tanuu'rangiai angkanaya le'ba' mako kupauang ngaseng anjo ri wattungku nia' ri tangnga-tangnganu ngaseng? 6 Mingka ri kamma-kammaya anne nia' ijapa apa-apa antahangi natammumbayapa anjo Tau Ja'dalaka; nanuasseng angkanaya apa anjo antahangai. Punna narapi'mo sallang anjo wattu le'baka Napattantu Allata'ala, lammumbami anjo Tau Ja'dalaka. 7 Anjo kagassingang anggaukangai anjo kaja'dallanga appakkaramulami anjama cokko-cokko, mingka nitahang-tahangiji. Punna nipalesammo sallang anjo antahangai, 8 nampami kacinikang anjo Tau Ja'dalaka. Jari punna battu Batara Isa, la'mai'ji bawang naNabuno anjo Tau Ja'dalaka siagang laNalissara' ri kalompoang kabattuanNa. 9 Battu ri panggaukanna Billisika nammumba anjo Tau Ja'dalaka siagang kakoasang lompona. Natipui taua nanagaukang sikamma panggaukang appakalanna'-lannasaka. 10 Lanapakei sikamma akkala' patipu kaja'dallanga sollanna akkulle napakalingu sikamma tau langgappaya kapanrakang. Lapanraki ke'nanga lanri tenana naero' antarimai siagang tenana nangai biritta katojengang battua ri Allata'ala, akkullea ampasalamaki ke'nanga. 11 Iaminjo saba'na naNapabattu Allata'ala mae ri ke'nanga koasa appakalingu-lingua, sa'genna napatappa' ke'nanga apa tenaya natojeng. 12 Kale'bakkanna, sikamma anjo tau angngaiyai dosaya siagang tenaya natappa' mae ri anjo katojenganga, lanihukkungi. 13 Sikamma sari'battangku nikamaseanga ri Batara! Musti tuli appala' sukkuruki ikambe mae ri Allata'ala passabakkang ikau ngaseng; nasaba' battu ri uru-uruna memang naNapile mako Allata'ala untu' nipasalama'. Anjo, RohNa Allata'ala anggaukangi mae ri kau; sollannu nipa'jari umma'Na Allata'ala matangkasaka; siagang lanri tappa'nu mae ri biritta tojenga battua ri Allata'ala. 14 Tete ri Kabara' Baji' napabattua ikambe mae ri kau ngaseng naNakiokko Allata'ala. Nakiokko Allata'ala, lanri eroki Allata'ala sollanna nunggappa todong pammantangang lalang ri kalompoanNa Batarata Isa Almasi. 15 Lanri kammana, sikamma sari'battangku, paralluko tuli tamalanrea siagang tuli majarre' anna'gala' mae ri pangngajarang-pangngajarang le'baka napabattu ikambe mae ri kau ngaseng, baji' lalang kana-kana, kammayatompa lalang apa natulisika ikambe. 16 Poro KalenNa Batarata Isa Almasi, siagang Allata'ala Manggeta ansaleoriko siagang ampakajarre' ngasengi atinnu, sollanna akkulle nugaukang siagang nubirittakang apa bajika. Nasaba' Nakamaseangki' Allata'ala, siagang lanri lammoro' pa'mai'Na naNasareki' kabaraniang tojenga siagang panrannuang bajika.
1 Kala'busanna, sari'battangku, appala' doangko untu' ikambe. Appala' doangko sollanna akkulle a'la'bang linta' siagang nitarima baji' biritta battua ri Batara, sangkamma le'baka kajariang mae ri kau ngaseng pirangalloang. 2 Appala' doang tongko sollanna Napakabella Allata'ala ikambe battu ri sikamma tau panraka siagang tau ja'dalaka. Nasaba' tena nayangaseng taua latappa' mae ri anjo biritta battua ri Batara. 3 Mingka tamamminrayai Batara. LaNapakajarrekko siagang laNajagaiko battu ri kaja'dallanga. 4 Siagang ma'nassa tappa' tojeng-tojengi ikambe mae ri Batara ri passala'nu, angkanaya kamma-kamma anne nugaukangi siagang latuli nugaukangi apa napassuroanga ikambe mae ri kau ngaseng. 5 Poro Narurungangko Batara sa'genna pila' la'bi nupahang pangngamaseanNa Allata'ala siagang kasa'barrang Napassareanga Almasi mae ri kau. 6 Sikamma sari'battangku, lanri koasaNa Batara Isa Almasi, kikellai ngasengko sollanna nupakabella kalennu battu ri tau a'mala'-malasaka, siagang tau taeroka anturuki pangngajarang napabattua ikambe mae ri ke'nanga. 7 Massing nuasseng ngasemmi angkanaya antekamma batenu musti angngalle conto battu ri kambe. Ikambe tena nakia'mala'-malasa' ri wattunna nia' ikambe ri tangnga-tangnganu ngaseng. 8 Tangnganreai ikambe kanrena taua nampa nata'bayarra ikambe. Mingka allo bangngi akkareso tojeng ikambe sollanna tenanniakka manna sitau kibattali battu ri kau; 9 teai lanri tenana nakkulle ikambe appala' tulung mae ri kau ngaseng, passangalinna sollanna akkulle ikambe a'jari conto mae ri kau ngaseng. 10 Ri wattunna nia' ija ikambe ri tangnga-tangnganu ngaseng, napabattumi ikambe anne paratoranga angkanaya, “Tau tenaya naero' anjama, teako sarei kanre.” 11 Akkana kammami anne ikambe lanri nalangngere'na ikambe angkanaya nia' siapa are jaina tau ri alla'nu a'mala'-malasa' lalang ri katallassanna. Sangnging urusannaji tau maraenga napantama'-tamakki, siagang tena manna sirupa jama-jamang nagaukang. 12 Lanri koasaNa Batara Isa Almasi naparentakangi siagang napappakaingakkangi ikambe mae ri ke'nanga, sollanna anjama baji'-baji' ke'nanga, siagang namassing naboya katallassanna. 13 Mingka manna nakamma sari'battangku ngaseng, teako lanrei a'gau' baji'. 14 Nakulle kapang nia' tau taeroka anturuki anne apa napabattua ikambe lalang ri anne suraka. Tutuko ri anjo tau kammaya; teako eroki assierang-erang siagang anjo tau kammaya sollanna a'jari siri'-siri', 15 mingka teako pa'jari musui anjo taua; passangalinna pakaingaki sangkamma sari'battannu. 16 Batara kabattuanna kasalewanganta. Poro Iami tuli assareko kasalewangang lalang sikontu katallassannu. Poro tuli Narurungang ngasengko Batara. 17 Sallang battu ri nakke Paulus. Anne bageang anrinnia kalengku antulisiki. Iaminne pammatei mae ri sikontu sura'-surakku. 18 Poro Nabarakkaki ngasengko Batarata Isa Almasi. Sallangku, Paulus
1 Natarimai Timotius, ana' kontutojengku lanri ri Batara. Anne suraka battu ri nakke, Paulus, tunisuroNa Isa Almasi lanri ero'Na Allata'ala, Mappasalamatta, siagang lanri ero'Na Isa Almasi, panrannuanta. Poro nisareko barakka', pangngamaseang siagang kasalewangang battu ri Allata'ala Manggea siagang Isa Almasi Batarata. 3 Kukellaiko sollannu ammantang ri Efesus. Anne le'ba' mako kupauang baji'-baji' ri wattungku mange ri daera Makedonia. Nasaba' nia' siapa are tau ri Efesus angngerang pangngajarang sala. Na parallu nupammari angngajara' sala anjo ke'nanga. 4 Pakaingaki ke'nanga sollanna tena naparhatikangi anjo carita nipare'-pareka siagang carita pattottorang tenaya la'bu'-la'busu'na. Yangasenna anjo kammaya sangnging pa'beseranji naerang, siagang tena napakamajui jama-jamanNa Allata'ala ia akkullea niasseng tete ri katappakkang bawang mae ri Ia. 5 Ia ero'na pappakaingakku, iamintu sollanna akkulle a'jari tulusu' siagang matangkasa' pa'mai'na taua, kammayatompa a'jari matappa' tojeng-tojeng mae ri Batara, sollanna akkulle nakamaseang paranna tau. 6 Nia'mo tau takammayami anjo katallassanna. Sala oloammi ke'nanga mange ri pa'gea'-geakkang tenaya matu-matunna. 7 Eroki ke'nanga a'jari guru-guru agama, namanna kalenna ke'nanga tanapahangai anjo bicara napaua yareka anjo apa-apa napabattua ke'nanga siagang tappa' dudu. 8 Niassengi angkanaya bajiki anjo hukkung-hukkung agamaya, punna nipake ri sitojennaya. 9 Tantu musti niu'rangi angkanaya teai untu' tau bajika nanipare' anjo hukkung-hukkunga, passangalinna untu' sikamma tau andakkayai hukkunga, tau bannaka, tau dorakaya, tau tenaya agamana, tau assipa' pakkalinoanga, tau ambunoai tau toana, yangasenna tau pabunoa, 10 tau a'gau' bawanga, tau sigau' bawanga para bura'ne, pagorraka, paballe-ballea; sa'bi-sa'bi balle-ballea, kammayatompa inai-nai mamo anggaukangai apa-apa assisalaya siagang pangngajarang tojenga. 11 Anjo pangngajaranga niaki lalang ri Kitta' Kabara' Bajika ia nipassuroanga mae ri nakke untu' nipa'la'bang, iamintu Kabara' Baji' mala'birika battua ri Allata'ala siagang siratanga nipuji. 12 Appala' sukkurukka' mae ri Batarata Isa Almasi. Iami le'ba' assarea' kagassingang untu' allayani mae ri Ia, siagang ampa'jaria' tau siratang anggaukangi anjo jama-jamanga. 13 Riolo le'baki kupitina, kusessa siagang kuhina. Mingka manna nakamma Nakamaseang tonja' Allata'ala, nasaba' anjo wattua tenapa nakutappa', jari takuassengai anjo apa kugaukanga. 14 Mingka ba'lalo nipila'bi-la'bianga' kalammorang pangngamaseang ri Batarata. Nasarea' pakkulle untu' tappa' ri Ia, siagang pangngamaseang akkullea nipatang punna asse'reki' siagang Isa Almasi lalang ri katallassanta. 15 Kontu tojengi anne bicaraya; jari siratangi nitarima siagang nipatappa' tojeng-tojeng, angkanaya: “Battui Isa Almasi antama' ri anne linoa untu' ampasalamaki tau dorakaya.” Na inakkemi anne tau doraka kaminang ja'dalaka. 16 Mingka lanri kammanami anjo naNakamaseanga' Allata'ala, sollanna akkulle Napappicinikang sikontu kasa'barranNa Isa Almasi mae ri nakke, tau kaminang dorakaya anne. Siagang a'jarimi anne conto mae ri sikontu tau latappaka sallang ri Ia nanagappa katallassang sitojennaya siagang mannannunganga. 17 Siratangi nipakalompo siagang tuli nipuji Allata'ala, Karaenna sikontu jammanga, lanri Iami mannannungang, tenaya nakacinikang siagang tenaya ruanna! Aming. 18 Anakku, Timotius! Kupappirannuangi anne jama-jamanga mae ri kau, lanri kuu'ranginna pappasanNa Allata'ala, napabattua na'bi-na'bia ri tangnga-tangngana jama'aka ri passala'na kalennu. Parallui nupa'jari sanrapang bokong anjo pappasanga, lalang jama-jamang bajika. 19 Appattujuang mako na nuanna'gala' majarre' ri katappakkang tojenga siagang ati mailalang. Nia' tau tanajampangiai sa'ra ati mailalanna, sa'genna ancuru'mo tappa'na ke'nanga. 20 Kammayami Himeneus siagang Aleksander. Anjo tau ruaya le'ba'mi kupassareang mae ri Billisika, sollanna akkulle ke'nanga appilajara' ammari ancalla-callai Allata'ala.
1 Marioloangannaya, kupala' dudui mae ri kau sollanna nupangnganrokang nupassambayangang, nupappala' doangang siagang nupappala' sukkurang mae ri Allata'ala sikontu taua; 2 untu' sikamma karaenga siagang untu' sikamma tau anna'galaka kakoasang. Pappalakangki' sollanta akkulle sannang siagang taricua kammayatompa a'gau' siratannaya lalang tallasatta ri dallekanNa Allata'ala. 3 Iaminjo kammaya baji' siagang akkullea ampakasannangi atinNa Allata'ala, Batara Mappasalamatta. 4 Eroki sollanna nipasalama' ngaseng rupataua siagang naasseng katojenganga. 5 Nasaba' se'reji bawang Allata'ala, kammayatompa se're tonji bawang akkullea a'jari tetena rupataua mae ri Allata'ala, iamintu Isa Almasi. 6 Le'ba'mi Napassareang KalenNa lalang a'rupa tauNa sollanna akkulle Nalappassang sikontu rupataua battu ri dosa-dosana. Kammami anjo nanapa'nyatamo ri wattunnaya, angkanaya Nakellai Allata'ala sollanna nipasalama' ngaseng sikontu rupataua. 7 Na iaminjo saba'na kunisuromo a'lampa mange ri bansa-bansa maraenga untu' ambirittakangi mae ri ke'nanga biritta ri sesena katappakkang annabaya. Anne kupabattua ma'nassa biritta kontutojeng; tena nakua'balle-balle. 8 Manna pole kemae, sikamma tu bura'nea kukellai assambayang siagang ati matangkasa', takkulleai nagaukang lalang kalarroang yareka passisala-salang. 9 Kukellai tongi tubai'-bainea sollanna tena nata'liwa'-liwa' dudu batena a'mode yareka ammake pakeang. Teako ta'liwa' dudu batenu ammodei uu'nu yareka ambelo-beloi kalennu siagang bulaeng yareka mutiara, yareka pakeang-pakeang ka'jalaka ballinna. 10 Mingka paralluko tubai'-bainea ammodei kalennu siagang panggaukang-panggaukang baji', situru' siratannaya mae ri tubaine anynyombaya ri Allata'ala. 11 Musti appilajaraki tubainea a'mereki siagang mappilangngeri. 12 Takupa'biangai tubai'-bainea angngajaraki yareka amparentai tubura'-bura'nea; musti a'mereki ke'nanga. 13 Nasaba' ia uru-uru nipa'jaria ri Allata'ala iamintu Adam nanampa Hawa. 14 Siagang teai Adam, passangalinna baineaji nitipu, sa'genna nadakkai parentaNa Allata'ala. 15 Mingka manna nakamma, lanipasalamaki tubainea lalang allassukanna ana', assala' napakatunai kalenna natuli tappa' mae ri Almasi, siagang tuli nakamaseangi paranna tau, kammayatompa napassareang katallassanna mae ri Allata'ala bawang.
1 Kontu tojengi anne bicara angkanaya, “Inai-nai ero' a'jari pamimping jama'ah, eroki ri jama-jamang sannaka lompona anggaranna.” 2 Se'rea pamimping jama'ah, musti tau tena callanna, se'reji bainenna, naassengi napakalewa kalenna, annabai siagang angngassengi atorang; nangai annarimaya tau ri balla'na, akkullei angngajaraki taua; 3 teai tau painung sa'genna nasa'ring, yareka teai tau nangaia assiba'ji. Mingka tunai ri kana-kananna siagang nangai assiamaka. Takkulleai angngondang dudu doe'. 4 Musti angngassengi angngatoroki siagang baji' sikamma tubone balla'na, kammayatompa angngajaraki ana'-ana'na sollanna mappilangngeri siagang mappakalompo mae ri ia. 5 Nasaba' punna tanaassenga taua angngatoroki tubone balla'na, antekamma batena lakkulle angngatoroki jama'aNa Allata'ala? 6 Se'rea pamimping jama'ah takkulleai tau beru antamaya Karisteng, nasaba' gassingka a'jari tampoi nanggappa pangngalarroi sangkamma Billisika riolo. 7 Musti tau nipau bajika arenna lalang ri tangnga-tangngana tau jaia; nasaba' punna tena nakamma, gassingka lanihinaji ri taua, sa'genna tu'guru' antama' ri kalo'bang natannanga Billisika. 8 Ia tau anggaukangai jama-jamang pambantua lalang ri jama'aka, musti tau bajika siagang tau lambusuka; takkulleai tau nangaia anginung jai dudu anggoro' yareka tau paondang doeka. 9 Musti anna'gala' jarreki mae ri pangngajarang katappakkang Karistenga, ia le'bakamo Napa'nyata Allata'ala. Musti nagaukangi ke'nanga anjo jama-jamanga siagang situlusu' ati mailalanna. 10 Parallui nipilajari baji' rolong ke'nanga; na punna tenaja apa-apa callanna ke'nanga, nampami akkulle niangka' ke'nanga a'jari pambantu lalang ri jama'aka. 11 Bainenna ke'nanga musti tau baji' todong, teai tu nangaia appasilemba-lemba bicara. Musti naassengi ke'nanga ampakalewai kalenna, siagang musti lambusuki ke'nanga ala ri apa-apa mamo. 12 Inai-nai a'jari pambantu lalang ri jama'aka musti se'reji bainenna. Musti naassengi angngatoro' bajiki ana'-ana'na siagang ruma tanggana. 13 Sikamma tau a'jaria pambantu siagang baji' lalang ri jama'aka lanipakala'biriki siagang la'jari pila' barani a'bicara ri passala'na katappakkanna ke'nanga mae ri Almasi. 14 Kuminasai natasalloamo nakulabattu angkunjungiko. Mingka manna nakamma parallu tonja' angkiringi anne suraka mae ri kau, 15 sollanna punna tenapa nakulinta' battu, nuasseng memammi angkana antekamma bateta musti attallasa' salaku ana'-ana'Na Allata'ala, iamintu jama'aNa Allata'ala mattallasaka. Iaminne jama'aka a'jari sanrapang benteng panjarrekinna siagang pattumpa'na katojengang battua ri Allata'ala. 16 Tena manna sitau akkulle ansassali, antekamma lompona rahasiana agamata, angkanaya: Napa'nyatai KalenNa lalang tubuna rupataua, na nipa'nyata katojenganNa ri RohNa Allata'ala siagang nicini' ri sikamma malaekaka. Nipakkiokkammi birittana mae ri sikamma bansa-bansaya, na nipatappa' ri sikontu linoa siagang niangka' nai' ri suruga.
1 Naterassimi Napau RohNa Allata'ala angkanaya ri jammang labattua sallang, nia' sipa'gang tau lambokoi siagang lansassali Almasi. Lamminawang turuki sallang ke'nanga mae ri roh-roh salaya, siagang lanapinawangi ajarang-ajarang setanga, 2 napabattua tau munapeka siagang tau paballe-ballea. A'jari sassammi ati mailalanna anjo tau kammaya. 3 Napangngajarrangi sollanna ta'buntinga taua; siagang jai apa-apa tanapa'bianga nikanre. Na sikontutojenna anjo kanre-kanreanga Allata'ala ampa'niaki. Yangasenna anjo Nakellai Allata'ala sollanna nikanre siagang sukkuru' ri sikamma tau tappakamo mae ri Almasi siagang tau naassengamo pangajarang katojengang battua ri Allata'ala. 4 Sikontu apa-apa Napa'niaka Allata'ala sikontutojenna baji' ngasengi; tena manna sirupa akkulle niharangngang punna nitarimai siagang sukkuru' battu ri Allata'ala. 5 Nasaba' nipa'jari hallala'mi anjo apa nikanrea lanri pappala' doangang siagang barakka'Na Allata'ala. 6 Punna nupangngajarrang baji'mo yangasenna anjo mae ri parannu tau tappa', a'jari palayanNa mako Isa Almasi, siagang nugaukang baji'mi jama-jamannu. Siagang parallui pila' nupattimbo pa'mai'nu siagang kana nipatappaka battu ri Allata'ala, siagang pangngajarang katojengang nupinawangamo siapa sallona ri kamma-kammaya anne. 7 Pakabellai kalennu battu ri carita-carita kosong tenaya matu-matunna. Parallui nupa'biasa kalennu a'jari tau anynyombaya ri Allata'ala lalang ri katallassannu. 8 Anjo latihang tubua sike'de'ji matu-matunna; mingka latihang rohania a'matu-matui lalang sikontu-kontuna katallassanta, nasaba' akkimbolongi janji untu' katallassanta ri kamma-kammaya anne siagang katallassang labattua. 9 Anjo kammatojengi na siratangi nitarima siagang nipatappa' tojeng-tojeng. 10 Iaminjo saba'na kippattujuang siagang anjama terasa', lanri manrannuang tojeng-tojengki' mae ri Allata'ala mattallasaka; Iami Batara Mappasalama'na sikontu rupataua, la'biangampa pole mae ri sikamma tau tappaka. 11 Pangngajarrang ngasengi anjo siagang passuroangi mae ri taua sollanna naturuki. 12 Teako pa'biangi kalennu nicini' tuna lanri rungkanu ija. Mingka paralluko a'jari conto mae ri sikontu tau tappaka ilalang ri pau-paunu, panggaukannu, katappakkannu, pangngamaseannu, kammayatompa katangkassanna katallassannu. 13 Kammayatompa, ilalang tenanapa kubattu, paralluko attojeng-tojeng ambacakangi Kittaka mae ri taua, siagang nupakamaju, kammayatompa nuajara' ke'nanga. 14 Teako takkaluppai ampakei passareNa RohNa Allata'ala ri wattunna napatompang limanna pamimping-pamimping jama'aka irate ri ulunnu, kammayatompa ri wattunna napabattu na'bi-na'bia pappasanNa Allata'ala ri passala'na kalennu. 15 Attojeng-tojengko anggaukangi yangasenna anjo, sollanna akkulle nacini' ngaseng taua kamajuannu. 16 Katutui kalennu siagang katutui tongi pangngajarannu. Paralluko tamamminraya anggaukangi yangasenna anjo nasaba' kammaminjo nanupasalama' kalennu kammayatompa sikamma tau allangngerekai apa nupangngajarranga.
1 Teako liwakki larronu mae ri tau la'bi toanganga na ikau. Usahakangi nanapilangngeri kana-kanannu sanrapang angkana iami manggenu. Ia tau rungkaya pasangkammai sari'battannu; 2 siagang bai'-baine toaya pasangkammai amma'nu. Ia tuloloa pasangkammai andi' tojeng-tojennu. 3 Pakala'biriki janda-janda akkale-kalea tojemmo lalang katallassanna. 4 Mingka punna janda nia' ana'-ana'na yareka cucu-cucunna, iaminjo ana'-ana'na yareka cucu-cucunna parallu todong nipakainga' sollanna nau'rangi ke'nanga bijanna, siagang nabalasa' pa'mai' baji'na tau toana yareka nene'na ke'nanga. Nasaba' iaminjo kammaya ampakarannui atinNa Allata'ala. 5 Ia janda-janda akkale-kalea tojemmo, natena tojemmo tau akkulle amparakai, parallui manrannuang mae ri Allata'ala bawang. Allo bangngi tuli appala' doang untu' appala' tulung mae ri Allata'ala. 6 Mingka ia janda nangaia assannang-sannang lalang ri katallassanna, sikontutojenna matemi manna pole nattallasa' ija nicini'. 7 Pabattui anne sikamma pappakaingaka mae ri ke'nanga, sollanna natangkasi katallassanna ke'nanga, natena callanna. 8 Mingka punna nia' tau tena naparakai bija pammanakanna, la'biangampa nabone balla'na tonja, anjo tau kammaya nasassalimi katappakkanna; anjo tau kammaya la'bi kodiangammi natau tenaya natappa'. 9 Iaji janda-janda kammaya anne akkulle nipantama' arenna lalang ri kitta' areng-areng jandaya, iamintu: umuru'na tena nakurang ri annampuloa taung, sikaliji le'ba' a'bunting, 10 niassemmi angkanaya nangai a'gau' bajika, kammaya: le'ba'mi napakalompo baji' ana'-ana'na, nangai annarimaya toana a'bangngi ri balla'na, nalayani tau tappaka, siagang natulungi tau susaya; bodona kana, le'ba'mi nagaukang tojeng-tojeng a'rupa-rupaya jama-jamang baji'. 11 Teako pantamai arenna ri bukua janda-janda loloa ija. Nasaba' punna battui cinnana ke'nanga, akkullea ampakabellai ke'nanga battu ri Almasi, ero' poleammi ke'nanga a'bunting. 12 Jari salami ke'nanga lanri allessoki ri janjinna mae ri Almasi. 13 Nampa pole napela'-pela' salami wattunna ke'nanga assulu' antama' ri balla'na taua. Siagang la'bi kodianganga pole, iamintu appilajara'mi ke'nanga ambotto'-bottoki arenna taua; siagang napantama'-tamakki urusanna tau maraenga, kammayatompa nabicarami apa-apa tenaya nasiratang nibicara. 14 Iaminjo nakukellai sollanna a'bunting poleang janda-janda loloa, nanggappa ana', sollanna naparutusu' ruma tanggana; sa'genna tenamo nanggappa kasampatang musu-musunta untu' ambotto'-bottoki arenta. 15 Nasaba' nia' janda-janda sala oloang nampa napinawang ero'na Setanga. 16 Mingka punna nia' baine Karisteng nia' bijanna jandamo, musti nabantui anjo jandaya. Takkulleai nabalang parekang sa'genna jama'aka antanggongi. Jari akkullemi jama'aka ambantui janda-janda tena sikalia bija pammanakanna. 17 Sikamma pamimping anggaukang bajikai jama-jamanna siratangi a'lappi rua batena nipakala'biri', la'biangampa ia rajenga akkato'ba siagang angngajara'. 18 Nasaba' nia' tattulisi' lalang ri Kittaka angkanaya, “Punna nipakei sapia appa'jeko takkulleai nijempang bawana”; kamma tomminjo, “Tau anjama-jamaya musti nagappai sawala'na”. 19 Teako pilangngeri tuduhanga mae ri pamimping jama'aka, punna tena nangganna' kaminang rawana rua tau a'jari sa'bi. 20 Inai-nai a'gau' dosa, musti nipakaingaki ri dallekanna sikontu jama'aka, sollanna a'jari malla' maraengannaya. 21 Ri dallekanNa Allata'ala, Isa Almasi, siagang malaeka'-malaeka' nipileNa, kupala' tojeng-tojengi ri kau sollanna nuturuki anne pappakaingaka; teako ranggaselai manna ri nai, siagang teako assialle-alleangangi. 22 Teako linta' dudui ampatompangi limannu untu' angngangkaki se'rea tau a'jari palayanNa Batara. Punna a'gau' dosa taua teako katuru'-turukangi anggaukangi anjo dosaya. Jagai kalennu sollanna nutuli matangkasa'. 23 Teako tuli je'ne' bawang nuinung; mingka angnginung tongko sike'de' anggoro' sollanna a'jari baji' lalang parru'nu, natena nutuli garring-garring. 24 Sipa'gang taua a'nassa memammi dosana ri tenanapa niadeli. Mingka sipa'gang taua nampami a'nassa dosana ri wattunna le'ba' niadeli. 25 Kamma tomminjo panggaukang-panggaukang bajika a'nassa memammi nicini'. Siagang manna sukkaraka nicini', tena todong nakkulle tuli lataccokko.
1 Ia tu Karisteng a'jari ataya, musti napassiratangi napakala'biri' pinggawana, sollanna takkullea taua ambotto'-bottoki arenNa Allata'ala yareka pangngajaranta. 2 Sikamma ata tu Karistenga pinggawana, takkulleai tanajampangia pinggawana lanri sangkammaji ke'nanga para tu Karisteng. Ba'lalo musti nalayani la'bi bajiki pole pinggawana ke'nanga, nasaba' anjo pinggawa nalayani bajika julu tappa'na tonji nikamaseanga. Yangasenna anne musti nupangngajarrangi siagang nupappakaingakkangi. 3 Inai-nai tau ampangngajarrangi pangngajarang maraengannaya, siagang tena nasitujui pangngajarang tojeng battua ri Batarata Isa Almasi tena todong nasitujui ke'nanga pangngajaranna agamata, 4 yangasenna anjo tau kammaya sangnging tau tampo, mingka tena apa-apa naasseng! Ia garrinna ke'nanga iamintu nangai a'gea'-geaka siagang a'besereka passabakkang bicara appamumbaya sereati, passisa'la-sa'lakkang, pitina, sibata-batai kodia, 5 siagang passisala-salang tenaya le'ba'-le'ba'na. Lingumi siagang tannabayami batena appikkiri' anjo tau kammaya. Napikkiriki angkana akkullei ke'nanga anggappa passawallang battu ri agamaya. 6 Memang assarei passawallang lompo agamaya punna sukkuru'mo taua ri apa-apa niaka ri ia. 7 Nasaba' tena sikali apa-apa nierang antama' ri anne linoa. Kammayatompa tena sikali todong apa-apa akkulle nierang punna nibokoi anne linoa! 8 Jari, punna nia'mo nikanre siagang nipake, angganna'mi anjo. 9 Mingka inai-nai ero' a'jari kalumanynyang, nigodami siagang nijarro'mi ri a'rupa-rupa kacinnang dongoka siagang ammanrakia. Iaminjo sikammaya kacinnanna ke'nanga ampa'jari ancuruki siagang ampa'jari cilakai ke'nanga. 10 Nasaba' battu ri sipa' cinnayami ri doe' ammumba a'rupa-rupaya kaja'dallang. Nia' sipa'gang tau angngondang dudu doe' siagang tenamo naturuki pangngajarang Karistenga, sa'genna nituju ke'nanga ri jai kasessang angngancurukai atinna ke'nanga. 11 Mingka ikau taunNako Allata'ala; jari musti nupakabellai kalennu battu ri yangasenna anjo sikammaya. Usahako sollannu a'jari tau annaba ri paccini'Na Allata'ala, ampare' atayai kalenna mae ri Allata'ala; kammayatompa tappaka mae ri Almasi, niaka pangngamaseanna, sa'baraka siagang baji' pa'maika. 12 Usaha tojeng-tojengko untu' apa nupatappaka salaku tu Karisteng, kammayatompa parallui nugappa hadia sitojennaya siagang mannannunganga. Nasaba' untu' iaminjo Nanakiokko Allata'ala ri wattunna numangakui ri dallekanna taua angkanaya tappa' mako mae ri Almasi. 13 Na kamma-kamma anne, ri dallekanNa Allata'ala assarea nyawa sikontu apa-apa attallasaka kammayatompa ri dallekanNa Isa Almasi assarea kasa'biang tojeng mae ri Pontius Pilatus, iaminne kuparentakanga mae ri kau: 14 Gaukang ngasengi sikamma anjo parentaya siagang tangkasa' yareka tena callanna, sa'genna narapi' allo kabattuanNa ammotere' Batarata Isa Almasi. 15 KalenNa Allata'ala lampattantui wattu mattantuna kabattuanNa. Iami Makoasaya tenaya ruanna; Iami mala'biri', Karaenna sikontu karaenga, Batarana sikontu rewataya. 16 Iaji bawang takkullea nikoasai ri kamateanga; Iami ammantang lalang ri singara' tenaya nakkulle nireppesi ri manna pole inai. Tena manna sitau le'ba' anciniki, yareka akkulle anciniki. Untu' Iami kala'biranga siagang kakoasanga sa'genna satunggu-tungguna! Aming! 17 Sikamma tau kalumanynyanga ri anne linoa, parallui nupakainga' sollanna tena na'jari tampo ke'nanga. Kammayatompa tena namanrannuang mae ri barang-barang latappelaka, kammayami kakalumanynyanganga. Musti manrannuang mangei ke'nanga ri Allata'ala assareaki' alla'bi-la'bi sikontu-kontuna niparalluia, sa'genta a'jari sannang. 18 Pakaingaki ke'nanga nanapa'nyata kabajikanga, namasarro anggaukangi apa-apa bajika, lammoro' pa'maiki siagang nangai assare-sarea apa-apa. 19 Lalang kammana anjo, napasse'remi ke'nanga pa'barang-barangang akkullea a'jari modala' baji' untu' jammang labattua sallang. Siagang lanri kammanami anjo nalanagappamo ke'nanga katallassang mannannunganga, iamintu katallassang sitojennaya. 20 Timotius! Katutui bajiki anjo apa nipappirannuanga ri kau! Pakabellai kalennu battu ri pa'bicarang tenaya matu-matunna siagang passigea'-geakkang ri apa-apa nikanaya “Pangngissengang”, nampa teaiji pangngissengang. 21 Nasaba' nia' siapa are tau ampangngajarrangi anjo kammaya, sa'genna allesso'mo ke'nanga battu ri sikamma pangngajarang Karisteng le'baka napatappa' ke'nanga riolo. Poro Nabarakkaki ngasengko Batara. Sallangku, Paulus
1 Natarimai Timotius, anakku sannaka kukarimangnginna! Anne suraka battu ri nakke, Paulus. Ma'minasa' sollannu nisare barakka', pangngamaseang malammoro', siagang kasalewangang battu ri Allata'ala Manggea siagang Batarata Isa Almasi. Lanri ero'Na Allata'ala, nakuniangka' a'jari tunisuroNa Isa Almasi siagang nisuro untu' ambirittakangi ri sesena katallassang Napa'janjianga Allata'ala. Anjo katallassanga akkullei nitarima lanri asse'reki' siagang Isa Almasi. 3 Appala' sukkurukka' mae ri Allata'ala Ia kulayania situlusu'na ati mailalangku, sangkammaya nagaukanga boeku riolo. Punna kuu'rangiko lalang ri pappala' doangangku allo bangngi tuli appala' sukkurukka' mae ri Allata'ala. 4 Kuu'rangi kasi'nanna atinnu. Iaminjo saba'na kuero' dudumo angngagangko sicini', sollangku akkulle a'jari rannu tojeng-tojeng. 5 Kuu'rangi katappakkang tojeng-tojennu mae ri Almasi, sangkamma katappakkang nene'nu Lois siagang amma'nu Eunike. Na kupatappakko angkanaya kamma tongi anjo katappakkannu. 6 Lanri kammana kupappiu'rangiangi mae ri kau sollanna nupattimbo anjo passare malammoro'Na Allata'ala mae ri kau ri wattunna kupatompang limangku irateanganna ulunnu. 7 Nasaba' anjo Roh Napassareanga Allata'ala mae ri katte teai Roh ampa'jariki' ballorang. Mingka anjo RohNa Allata'ala Napa'jari majarrekki', sukkukki' lalang pangngamaseang siagang akkullei nipakalewa kalenta. 8 Lanri kammana, teako siri'-siriki a'jari sa'bi mae ri Batarata, siagang tea tongko kasirikangia', ia nitarungkua lanri Batarata. Mingka, lanri kagassingang nugappaya battu ri Allata'ala, siratangko angkasia' tongi kasessanga untu' anjo Kabara' Bajika. 9 Napasalamakki' siagang Nakiokki' Allata'ala untu' a'jari umma' KalenNa. Iaji naNagaukang Allata'ala anjo kammaya teai lanri apa-apa le'baka nigaukang nabilang ri kalenta, passangalinna lanri ero' KalenNa siagang lanri pangngamaseang malammoro'Na tete ri Isa Almasi, ri wattu tenanapa nanipa'jari anne linoa. 10 Na kamma-kamma anne, Napa'nyatami pangngamaseang malammoro'Na Allata'ala mae ri katte lalang ri kabattuanNa Karaeng Mappasalamatta, Iamintu Isa Almasi. Nabetami Isa kakoasanna kamateanga siagang angngerammi katallassang mannannungang lalang ri anjo Kabara' Bajika. 11 Untu' iaminjo Kabara' Bajika lanibirittakang naNaangkaka' Allata'ala a'jari tunisuro siagang guru. 12 Lanri kammanami anjo nakukasia'mo anne kasessang kammaya jaina; mingka tuli jarreki tappakku, nasaba' bajiki kuassenna angkana inai kupatappa'. Tappa' sikalia' angkanaya akkullei Nakatutui anjo apa le'baka Napappirannuang mae ri nakke sa'genna narapi' Allo Kiamaka. 13 Attojeng-tojengko anturuki pangngajarang tojenga, ia le'baka kupassareang mae ri kau. Siagang paralluko tuli anna'gala' ri katappakkanta siagang ri pangngamaseanta lanri asse'reta siagang Isa Almasi. 14 Siagang lanri pannulunNa RohNa Allata'ala, ia niaka lalang ri katallassanta, paralluko angkatutui baji'-bajiki sikamma apa-apa nipappirannuanga mae ri kau, ia lompoa anggaranna. 15 Nuassemmi angkanaya nabokoi ngasemma' sikamma tau niaka ri daera Asia, kammayatompa Figelus siagang Hermogenes. 16 Mingka a'mole-molema' nipakarannu ri Onesiforus siagang sikamma tubone balla'na. Poro nisare laloi pangngamaseang ke'nanga ri Batara. Manna kulalang ri tarungkua, mingka tena nakasirikanga' Onesiforus. 17 Battuku mange ri Roma, naboya memamma' linta' sa'genna assibuntulu' siagang inakke. 18 Siagang ri wattungku ri Efesus jai sikalimi natulunganga'. Yangasenna anne nuasseng ngasemmi. Poro Napappicinikang laloi pangngamaseanNa Batara mae ri ia, ri allo niadelina ngaseng sikontu rupataua ri Batara.
1 Anakku Timotius! Paralluko a'jari majarre' lanri pangngamaseang malammoro' nipassareanga mae ri katte, lanri asse'reta siagang Isa Almasi. 2 Anjo pangngajarang le'bakamo nulangngere' battu ri nakke ri dallekanna tau jaia, parallui nupappirannuang mae ri sikamma tau akkullea nipatappa' siagang cara'deka angngajaraki tau maraenga. 3 Musti amminawang tongko angkasiaki kasessanga salaku surudadu majarre'Na Isa Almasi. 4 Surudadu sitabanga anggaukangi tugasa'na, takkulleai urusang kalenna naparutusu', lanri eroki napakasannang pa'mai'na komandanna. 5 Se'rea pakarena olaraga, takkulleai a'jari juara lalang attandinna punna tena naturuki paratorang-paratoranna anjo olaragaya. 6 Pamarri attojeng-tojenga anjama terasa', iami kaminang siratang anggappai wassele' lamung-lamunna. 7 Nawa-nawa bajiki anne kupaua, nasaba' laNasareko pakkulle Batara untu' ampahang ngasengi anne passalaka. 8 U'rangi anne: Anjo Kabara' Baji' kubirittakanga iamintu kabara' ri passala'na Isa Almasi, sossoranna Daud; Iami Almasi, le'baka attallasa' ammotere' battu ri kamateanga. 9 Lanri kubirittakannamo Kabara' Bajika, nakukasia'mo kasessanga; ba'lalo nirantema' sangkamma tau sannaka ja'dala'na. Mingka anjo kana-kananNa Allata'ala takkulleai nirante. 10 Iami anjo saba'na nakusa'bara' antanggong ngasengi anjo kasessanga, lanri kaparalluanna sikamma tau le'bakamo Napile Allata'ala. Sollanna nagappa ngaseng todong ke'nanga kasalamakkang Napassareanga Allata'ala tete ri Isa Almasi, nirurunganga ri kala'birang mannannunganga. 11 Kammatojengi anne bicara angkanaya, “Punna mate maki' siagang Ia, lattallasa' tommaki' siagang Ia, 12 Punna tuli sa'barakki' lammarenta tommaki' siagang Ia. Punna tanitarimayai, talaNatarimaya tommaki'. 13 Punna tamajarrekaki' Ia tuli majarreki, nasaba' takkulleai assisala siagang KalenNa.” 14 Yangasenna anne parallui nupappakaingakkang mae ri taua. Pakaingaki ri dallekanNa Allata'ala ke'nanga sollanna tena na'gea'-gea' ke'nanga passabakkang kana-kana. Anjo kammaya tena matu-matunna, passangalinna napa'lingu-linguji tau allangngerekai. 15 Paralluko attojeng-tojeng appattujuang sollanna Naakuiko Allata'ala angkanaya ma'nassa tau siratang memang tongko anjama untu' Allata'ala. Usahako sollanna tena nu'jari siri'-siri' passabakkang jama-jamannu; passangalinna pangngajarrangi baji'-baji' sikamma pangngajarang tojeng battua ri Allata'ala. 16 Pakabellai kalennu battu ri bicara-bicara tenaya matu-matunna siagang ampakatunayai Allata'ala. Anjo bicara-bicara kammaya pila' napa'jari ja'dala'ji taua. 17 Pangngajaranna anjo tau kammaya sanrapangi garring lompo akkullea a'lette'-lette'. Antama' tommi kammaya Himeneus siagang Filetus. 18 A'lesso'mi ke'nanga battu ri pangngajarang tojenga, siagang napa'lingu-lingumi katappakkanna sipa'gang taua. Napangngajarrammi ke'nanga angkanaya kamma-kamma anne kajariammi anjo katallassanta ammotere' battu ri kamateanga. 19 Mingka anjo pammentengang makassa' le'baka Napare' Allata'ala takkulleai nipata'ge'goso'. Irateanganna nia' tattulisi' angkanaya, “Naassengi Batara sikamma taunNa,” siagang “Inai-nai nakana kalenna taunNa Batara, musti ammarimi anggaukangi gau' salaya”. 20 Lalang se'rea balla' lompo nia' a'rupa-rupa pakkakasa' balla'. Nia' pakkakasa' pera' yareka bulaeng, mingka nia' todong battu ri kayu yareka butta. Nia' lanipake untu' kaparalluang lompo, na nia' todong lanipake untu' kaparalluang biasa. 21 Inai-nai antangkasi kalenna battu ri sikontu gau' tenaya nabaji' iami lanipake untu' gau'-gau' kaparalluang lompoa. Iami a'jari taunna siagang a'matu-matua mae ri karaenna. Iami nipasadia untu' lanipake ri jama-jamang bajika. 22 Pakabellai kalennu battu ri kasannang-sannanganna tau rungkaya. Usahako untu' attallasa' situru' ero'Na Allata'ala, untu' majarre' tappa'nu mae ri Ia, mangngamaseang ri parannu tau siagang nia' kasannangang ri atinnu. Kammami anjo batenu attallasa' siagang sikamma tau akkioka appala' tulung mae ri Batara situlusu' atinna. 23 Teako pantamakki kalennu ri pa'gea'-geakkanna tau dongo' tenaya apa-apa naasseng. Nuassemmi angkanaya yangasenna anjo sangnging pa'beseranji bawang napattimbo. 24 Inai-nai anjama-jama untu' Batara tasiratangai a'besere'; musti sombereki mae ri yangasenna taua, siagang akkullei naajara' taua siagang baji' na sa'bara'. 25 Musti tunai angngajaraki tau nangaia pabali-bali; barang nisareji kasampatang ri Allata'ala anjo ke'nanga untu' a'jari toba' battu ri dosa-dosana siagang naasseng pangngajarang tojenga. 26 Lalang kammana anjo, akkullemi angngu'rangi ammotere' ke'nanga, siagang ta'lappasa'mi battu ri sikko'na Billisika, ia angngalleai pangngainna ke'nanga siagang ampassayai ke'nanga anturukiangi ero'na.
1 U'rangi anne: Ri allo-allo kala'busanga sallang, lajai kasusaang battu. 2 Massing kaparalluang kalenna mami lanaondang rupataua; massing angngondang dudui doe', tampoi siagang nangai a'bicara kosonga. Nangai ke'nanga nahina taua, naewai tau toana, tangngassengai appala' sukkuru', siagang nakabirisi nikanaya katallassang rohani. 3 Tena pangngarimangnginna siagang pangngamaseanna ke'nanga, tanangaiyai ampammopporangi paranna tau, nangai nabotto'-bottoki arenna paranna tau, nangai ammassa ri paranna tau, pallaki, siagang birisiki mae ri kabajikanga. 4 Nangai ke'nanga a'bali'ballang, tena nappikkiri' baji' siagang borroi. Lanangaiangangi ke'nanga kasannanganna linoa namannurukia ri Allata'ala. 5 Manna namannuruki lahere'na ke'nanga nicini' anggaukangi napassuroanga agamaya, mingka sikontutojenna tanatarimayai ke'nanga kakoasanna anjo agamaya. Pakabellai kalennu battu ri tau kammaya anjo. 6 Nia'mo ke'nanga antama' cokko-cokko ri balla'na taua, nampa nanyonyo' baine-baine lammaya, sannaka jaina dosana siagang nikoasaia ri sangka' rupa kacinnang. 7 Tuli nasuro ajaraki kalenna anjo bai'-bainea, mingka tena le'bakai naasseng pangngajarang tojenga, ia battua ri Allata'ala. 8 Sangkamma Yanes siagang Yambres naewai Musa riolo, sangkamma tommi anjo ke'nanga naewai pangngajarang battua ri Allata'ala. Panra'mi pikkiranna ke'nanga, siagang kapeokammi tappa'na ke'nanga. 9 Mingka talanggappayai apa-apa ke'nanga, nasaba' niassemmi kadongokanna ke'nanga ri yangasenna taua, sangkamma kajarianga todong ri kalenna Yanes siagang Yambres. 10 Mingka ikau nuturukimi sikamma pangngajarangku, panggaukangku, siagang pamangeanna katallassangku. Nucini'mi kalennu antekamma attojeng-tojengku tappa' ri Isa Almasi, kasa'barrangku, pangngarimangngingku siagang pangngamaseangku ri paranta tau. 11 Nucini'ma' nisessa siagang angkasiaki kapa'risanga. Nuasseng ngasengi apa kajarianga ri nakke ri kota Antiokhia, Ikonium, siagang Listra; siagang nuasseng ngasengi sikamma kasessang antujua'! Mingka Nalappassanga' Allata'ala battu ri yangasenna anjo kasessanga. 12 Memang, lanisessa memangi sikamma tau eroka anynyomba ri Allata'ala siagang tau asse'rea siagang Isa Almasi lalang ri katallassanna; 13 na ia tau ja'dalaka siagang tau paballe-ballea lapila' ja'dalaki. Natipui paranna tau, mingka sikontutojenna manna kalenna ke'nanga nitipu tonji. 14 Mingka ikau Timotius, paralluko tuli anna'gala' ri pangngajarang-pangngajarang tojenga, ia le'baka nipangngajarrang mae ri kau siagang nupatappa' tojeng-tojemmo; nasaba' nuassemmi angkana inai-naiang guru-gurunnu. 15 Musti nuu'rangi angkanaya battu ri ca'dinu iji nanuassennamo Kittaka. Anjo Kittaka akkulleko nasare pangngassengang untu' anggappai kasalamakkanga tete ri katappakkang mae ri Isa Almasi. 16 Sikontu apa tattulisika lalang ri Kittaka, nisingari ri Allata'ala, siagang lompoi matu-matunna untu' ampangngajarrangi apa tojenga, untu' appakainga' siagang untu' ampannabai apa salaya, siagang untu' angngajaraki taua sollanna attallasa' situru' ero'Na Allata'ala. 17 Iami anjo Kittaka nipake ampipakei bajiki tau eroka allayani Allata'ala untu' a'rupa-rupa jama-jamang baji'.
1 Labattu poleangi Isa Almasi antama' ri anne linoa untu' angngadeli sikontu tau attallasaka siagang tau matea; siagang labattui untu' ammarenta, a'jari Batara. Iami anjo saba'na nakupala' tojeng-tojeng mae ri kau, ri dallekanNa Allata'ala siagang Isa Almasi: 2 Parallui nubirittakang anjo biritta battua ri Allata'ala; paralluko tuli sadia lalang ri wattu bajika yareka ri wattu tenaya nabaji'. Parallui nupa'jari tappa' taua, nupauang kasalanna, siagang nupakamaju ke'nanga. Sa'bara' tojeng-tojengko angngajaraki taua. 3 Nasaba' nia' sallang nanarapi' wattunna nataerokamo taua antarimai pangngajarang tojenga. Mingka ero' kalenna mami lanaturuki ke'nanga; siagang lappa'rappummi ke'nanga jai guru sollanna niajara' ke'nanga apa-apa bajika nalangngere' ri tolinna ke'nanga. 4 Lanatongko'mi tolinna ke'nanga mae ri apa-apa tojenga, mingka lanasungkemi tolinna ke'nanga mae ri carita-carita kosonga. 5 Mingka manna naantekamma, ikau musti nupakalewai kalennu. Sa'barakko lalang ri kapa'risannu, siagang gaukangi jama-jamannu ambirittakangi anjo Kabara' Bajika, kammayatompa gaukang baji' tommi jama-jamannu a'jari palayanNa Allata'ala. 6 Passala'na kalengku, narapi'mi wattungku lamate a'jari koro'bang mae ri Allata'ala. Sinampe' mami nalakubokoi anne linoa. 7 Le'ba'ma' sanrapang amminawang appa'lumba sibaji'-baji'na, siagang anrapi'ma' battu mae ri bassika. Tuli anna'gala' majarreka' lalang tappakku mae ri Isa sanggenna kale'bakkanna. 8 Na kamma-kamma anne sadiami hadia pammetangku. Ri Allo Kiamaka sallang, laNapassareammi Batara, Haking adeleka, anjo hadiaya mae ri nakke, lanri assibajikingku siagang Allata'ala lalang ri katallassangku. Siagang teai inakkeji bawang lannarima hadia kammaya anjo, mingka sikontu pole tau sannaka nakku'na antayangi kabattuanNa Batara. 9 Usahako linta' battu mae ri nakke, 10 nasaba' nabokoima' Demas lanri nakarimangnginna anne linoa. A'lampami mange ri Tesalonika. A'lampami Kreskes mange ri Galatia, siagang Titus a'lampami mange ri Dalmatia. 11 Lukas mami kuagang ammantang. Alle tongi Markus nanuerang mae anrinni, nasaba' akkullea' nabantu lalang ri jama-jamangku. 12 Kusuromi Tikhikus a'lampa mange ri Efesus. 13 Punna battuko mae, erangang tonga' jubaku kubolika ri Troas ri balla'na Karpus. Erang tongi buku-bukuku, la'biangampa anjo buku-buku karattasa' kukkuluka nipare'. 14 Aleksander, anjo tukang tambagaya sanna' ja'dala'na panggaukanna mae ri nakke. Mingka lanibalasaki ri Batara situru' anjo panggaukanna. 15 Musti nukatutui kalennu mae ri ia, nasaba' sanna' tenana nangai anjo biritta nipabattua. 16 Ri wattunna uru-uru kubela kalengku ri pangadelanga, tena sikali manna sitau anrurunganga'; a'lampa ngasemmi taua ambokoia'. Poro tena lalo nanipasalai ri Allata'ala ke'nanga ri anne passalaka! 17 Mingka Narurunganga' Batara. Nasarea' kagassingang sa'gengku akkulle ambirittakangi sikontu anjo Kabara' Bajika, sollanna akkulle nalangngere' ngaseng bansa-bansa maraenga. Siagang ta'lappasa'ma' battu ri bahayana kamateanga. 18 Memang, tuli laNalappassanga' Batara battu ri sikontu usaha ja'dalaka mae ri kalengku. LaNaeranga' siagang salama' antama' ri KakaraenganNa ri suruga. Poro nipakala'biriki sa'genna satunggu-tungguna! Aming. 19 Sallangku mae ri Priskila siagang Akwila kammayatompa Onesiforus siagang sikamma tubone balla'na. 20 Erastus ammantangi ri Korintus, siagang Trofimus kuboliki ri Miletus nasaba' garringi. 21 Usahako nubattu linta' genteng tenanapa nabattu wattu dinginga. Ebulus, Pudes, Linus, siagang Klaudia, akkiring ngaseng tongi sallang mae ri kau; kammayatompa sikamma julu tappatta maraengannaya, akkiring ngaseng tongi sallang. 22 Poro nirurungangko ri Batara. Poro nibarakkaki ngasengko ri Batara! Sallangku, Paulus
1 Natarimai anakku Titus! Anne suraka battu ri nakke Paulus, atanNa Allata'ala siagang tunisuroNa Isa Almasi. Nipilea' siagang nisuroa' untu' antulungi sikamma tau Napilea Allata'ala sollanna a'jari jarre' tappa'na ke'nanga. Musti kubantu tongi ke'nanga sollanna naasseng katojengang napangngajarranga agamata, 2 situru' panrannuanga mae ri katallassang sitojennaya siagang mannannunganga. Le'ba'mi Napa'janjiang Allata'ala anjo katallassanga ri wattu tenanapa nanipa'jari anne linoa; natena olona la'balle-balle Allata'ala. 3 Punna narapi'mo wattunna, laNapa'nyatami anjo janjinNa Allata'ala lalang pappasanNa mae ri linoa. Anjo pappasanNa Napappirannuammi mae ri nakke, siagang kubirittakammi anjo pappasanga situru' parentaNa Allata'ala Mappasalamatta. 4 Titus! Ikau ana' tojeng-tojengkuko, lanri ikau siagang inakke para tappa' maki' mae ri Almasi. Kuminasai nanisareko barakka', pangngamaseang malammoro' siagang kasalewangang battu ri Allata'ala Manggea siagang Isa Almasi Karaeng Mappasalamatta. 5 Kuboli' mako ri Kreta pirangalloang sollanna akkulle nupa'le'ba' apa-apa parallua nujama. Kammayatompa sollanna akkulle nuangka' pamimping-pamimping jama'aka ri kota-kotaya. Siagang u'rangi anne pappasangku: 6 Se'rea pamimping jama'ah parallui tau tenaya callanna; musti sitauji bainenna; ana'-ana'na musti tappa'mi ri Almasi, siagang teai ana'-ana' bambala' yareka tenaya nakkulle niatoro'. 7 Nasaba' anjo pamimping jama'aka, iami angngurusuki jama-jamanga untu' Allata'ala; jari takkulleai nia' callanna. Takkulleai tampo yareka pa'larroang, yareka painung sa'genna nangai nasa'ring, yareka nangai assiba'jia, yareka mangngoai ri doe'. 8 Musti nangai annarimaya tau ri balla'na, nangai apa-apa kabajikanga, naassengi napakalewa kalenna, lambusuki, tangkasaki siagang ta'atoroki lalang ri katallassanna. 9 Musti anna'gala' jarreki mae ri pappasanNa Allata'ala, iamintu biritta akkullea nipatappa' sangkamma le'baka nipangngajarrang mae ri ia. Lanri kammana, akkullemi ampakaingaki taua situru' pangngajarang tojenga, siagang napicinikiang kasalanna tau taeroka mappilangngeri. 10 Nasaba' jai tau taeroka mappilangngeri, la'biangampa tau le'baka anna'gala' ri agama Yahudi; nangai a'bicara kosong ke'nanga sa'genna natipu taua. 11 Anjo tau kammaya musti nijempangi bawana, nasaba' jaimi kaluarga napakalingu ke'nanga lanri pangngajarang tenana matu-matunna ke'nanga. Nanagaukang ke'nanga anjo kammaya iaji kalanri ero'na ke'nanga anggappa passawallang takamma-kamma! 12 Le'baki nia' na'bina ke'nanga, battua todong ri Kreta, angkana, “Anjo tu Kretaya memang tuli paballe-ballei, sanrapangi olo'-olo' sekke', angngoai siagang kuttui.” 13 Kammatojengi apa napaua anjo na'bia. Iami anjo saba'na namusti nuterassi nupakainga' ke'nanga; sollanna akkulle tuli anna'gala' jarre' ke'nanga ri ajarang tojenga, 14 siagang tenamo natappa' ke'nanga mae ri carita-carita kosonna tu Yahudia yareka paratorang-paratorang napareka taua untu' ansorongbokoi pangngajarang tojenga. 15 Sikontu apa-apaya tangkasa' ngasengi mae ri tau tangkasaka. Mingka mae ri tau ra'masaka pikkiranna siagang tau tenaya natappa' tena sikali apa-apa matangkasa', nasaba' ra'masa'namo pikkiranna siagang ati mailalanna ke'nanga! 16 Nakana kalenna ke'nanga Naassengi Allata'ala, mingka ma'nassa nasassali lalang ri panggaukanna ke'nanga. Sanna' appakaringi'-ringi'na ke'nanga siagang taerokai mappilangngeri; tau tena sikali naero' ke'nanga anggaukangi apa-apa bajika.
1 Mingka ikau Titus, parallui nupangngajarrang pangngajarang tangkasaka. 2 Pakaingaki tau toa bura'nea sollanna naasseng ampakalewai kalenna ke'nanga lalang ri katallassanna, bajiki siagang napakalewai kalenna; sollanna annaba cara tallasa'na salaku tu nipangngaliki. Musti anna'gala' jarreki ri ajarang tojeng battua ri Allata'ala, attojeng-tojengi mangngamaseang, siagang sa'baraki angkasiaki kasessanga. 3 Kammayatompa, parallu tongi nupakainga' tau toa bainea sollanna matangkasa' ke'nanga ri panggaukanna sangkamma siratannaya ri katallassanna tau anynyombaya ri Allata'ala. Takkulleai napitina paranna tau, siagang takkulleai tu'guru' cinnana ke'nanga mae ri inung-inungang terasaka. Musti napangngajarrangi ke'nanga apa-apa bajika; 4 sollanna lalang ri kammanami anjo nakkullemo naajara' bai'-baine loloa untu' angkamaseangi bura'nenna siagang ana'-ana'na, 5 untu' a'jari tangkasa' siagang untu' a'jari tu baine bajika lalang ri pakkalabinianna, iamintu mappilangngeria mae ri bura'nenna. Lalang ri kammana anjo tenamo tau akkulle ancallai biritta battua ri Allata'ala. 6 Kammayatompa, pakainga' tongi sikamma tau rungkaya sollanna a'jari tau annaba. 7 Siagang paralluko ikau kalennu, lalang ri apa-apa mamo, ampappicinikangi conto bajika lalang ri panggaukannu. Punna angngajarakko, musti lambusukko siagang attojeng-tojengko. 8 Pakei kana-kana bajika, tenaya nakkulle nacalla taua, sollanna a'jari siri'-siri' balinnu, lanri tena apa-apa kodi akkullea napake ambicara kodiki'. 9 Sikamma ataya musti mappilangngeri mae ri pinggawana, siagang tuli napakasannangi atinna pinggawana lanri panggaukanna. Takkulleai ke'nanga pabali-bali, 10 yareka a'lukka'. Parallui tuli napappicinikang sipa' baji'na siagang tamamminrana ke'nanga; sollanna akkulle napuji taua pangngajarang battua ri Allata'ala, Mappasalamatta, lanri yangasenna anjo apa nagaukanga ke'nanga. 11 Nasaba' Napappicinikammi lammoro' pangngamaseanNa Allata'ala, sollanna Napasalama' sikontu rupataua. 12 Anjo lammoro' pangngamaseanNa Allata'ala eroki angngajarakki' sollanna tenamo nasisala katallassanta siagang ero'Na Allata'ala, siagang tenamo naniturukiang kaerokanna pakkalinoanga. Niajarakki' sollanta niasseng ampakalewai kalenta, lambusu' siagang anynyomba mae ri Allata'ala lalang ri katallassanta. 13 Kamma-kamma anne nitayammi anjo Allo niminasaya; anjo Alloa lanacini'mi bonena linoa kala'biranNa Isa Almasi, iamintu Allata'ala Kaminang Lompoa siagang Karaeng Mappasalamatta. 14 Le'ba'mi Nakoro'bangkang KalenNa untu' kasalamakkanta battu ri sikontu kaja'dallanga, na Napa'jariki' umma'Na matangkasaka, siagang rajenga a'gau' baji'. 15 Pangngajarrangi yangasenna anjo, siagang pakaingaki kammayatompa piu'rangi sikamma tau mallangngereka; usahakangi nangngali' ke'nanga mae ri kau. Teako pa'biangi kalennu nicini' tuna ri taua.
1 Piu'rangiangi anggota-anggota jama'anu sollanna mappilangngeri mae ri pamimping-pamimpinga siagang mae ri tau anna'galaka koasa ri pa'rasanganga; kammayatompa mannuruki siagang sadia anggaukangi sikamma kabajikanga. 2 Pauangi ke'nanga sollanna tena napitinai paranna tau, passangalinna parallui assiama' siagang sombere' mae ri taua. Siagang parallui tuli tuna kana-kananna ke'nanga mae ri yangasenna taua. 3 Nasaba' ikatte riolo dongo' tonjaki', lingu tonjaki' siagang tena tonja nimappilangngeri. Nipare' ataki' ri a'rupa-rupaya hawa napasuta siagang kacinnanta; a'rupa-rupai ero' ja'dalatta, assereatiki', siagang sikabiri'-birisiki'. 4 Mingka Napappicinikang maki' pangngamaseanNa siagang kabajikang pa'mai'Na Allata'ala Mappasalamatta. 5 Napasalama' maki', lanri KalenNa angkamaseangki', jari teai lanri nia'na kabajikang le'ba' nigaukang. Napasalamakki' tete ri RohNa Allata'ala assareaki' kajariang beru siagang katallassang beru lanri Natangkasinta. 6 Napassareangi RohNa Allata'ala mae ri katte tete ri Isa Almasi, Batara Mappasalamatta; 7 sollanna lanri lammoro' pangngamaseanNa Isa nakiakkullemo assibajiki ammotere' siagang Allata'ala kammayatompa nakigappamo katallassang sitojennaya siagang katallassang mannannungang niminasaia. 8 Sanna' kontutojenna anne bicaraya. Kukellaiko ampakasingara' tojeng-tojengi yangasenna anne, sollanna akkulle usaha tojeng-tojeng sikamma tau tappaka mae ri Allata'ala, untu' anggaukangi jama-jamang bajika siagang a'matu-matua untu' yangasenna taua. 9 Pakabellai kalennu battu ri pa'gea'-geakkang tenaya matu-matunna siagang carita-carita pattottoranga. Liliangi pa'beseranga siagang passiba'jianga ri passala'na hukkung-hukkung agamaya. Yangasenna anjo tena matu-matunna siagang tena wassele'na. 10 Punna nia' tau appasisala-sala lalang ri jama'aka, parallui nupakainga' sikali yareka pinruang; le'baki anjo punna taeroka mappilangngeri tea' mako agangi pole sipa'rappungang. 11 Nuassemmi angkanaya ja'dalaki anjo tau kammaya siagang dosa-dosanami ampa'butti ma'nassana sala. 12 Punna battumo Artemas yareka Tikhikus kusuro mae ri kau, akkaro-karo mako battu mae ri nakke ri Nikopolis, nasaba' erokka' ammantang anjoreng sa'genna le'ba' wattu dinginga. 13 Attojeng-tojengko usaha untu' ambantui Zenas, anjo tu cara'deka ri pangngassengang hukkung-hukkunga, siagang Apolos; sollanna tena kakuranganna punna a'lampa ke'nanga. 14 Yangaseng taunta musti appilajaraki anggaukangi apa-apa bajika, sollanna akkulle massing nagappa apa-apa sannaka naparalluina ke'nanga; gassingka tena matu-matunna katallassanna ke'nanga. 15 Sikamma sari'battanta niaka kuagang anrinni, akkiringi sallang mae ri kau. Pabattui sallanna ikambe mae ri agang-aganta ngaseng, julu tappatta ri Almasi. Poro Nabarakkaki ngasengko Batara. Sallangku, Paulus
1 Natarimai Filemon, sari'battanna siagang belana ikambe! Battu ri nakke Paulus nitarungkua kamma-kamma anne passabakkang Isa Almasi; siagang pole sari'battanta Timotius. Ikambemi ampareki anne suraka untu' ikau 2 siagang anggota jama'ah niaka a'rappungang ri balla'nu; kammayatompa untu' sari'battang baineta Apfia na sipa'julu jama-jamanta iamintu Arkhipus. 3 Ma'minasaki' mae ri Allata'ala Manggeta siagang mae ri Batara Isa Almasi, nuporo Nasare barakka' siagang katallassang salewangang. 4 Punna appala' doanga', tuli kupaui arennu nakuappala' sukkuru' mae ri Allata'ala. 5 Nasaba' kulangngere'mi kabara'nu angkanaya nukamaseangi sikontu umma'Na Allata'ala, siagang tappa' tojeng-tojeng mako mae ri Batara Isa. 6 Appala' doanga' naporo anne passari'battanganta salaku tau tappa' langngerangi pangngassengang la'bi jai mae ri barakka' niaka ri katte, lanri asse'reta siagang Almasi. 7 Pangngarimangnginnu mae ri sikontu umma'Na Allata'ala, sari'battang, napakarannui pa'maikku siagang napakalompoi sumangakku! Tassaleori ngasemmi sikontu Umma'Na Allata'ala lanri ikau. 8 Lanri kammana, salaku sari'battang julu tappa'nu, akkulleko kusuro anggaukangi apa parallua nugaukang. 9 Mingka lanri kukarimangnginnu, kupala'ji bawang mae ri kau. Inakke anne toama', siagang nitahanga' lalang ri tarungkua ri kamma-kammaya anne passabakkang Isa Almasi. 10 Inakke, Paulus, nia' pappalakku mae ri kau; iamintu passala'na Onesimus, anakku lanri Almasi. Nasaba' a'jari bapa' rohaninama' lalang ri anne tarungkua. 11 Riolo tena matu-matunna mae ri kau; mingka kamma-kamma anne sanna'mo lompona matu-matunna. Tena nauntu' ikauji bawang, passangalinna untu' inakke pole. 12 Kamma-kamma anne kusuromi ammotere' mae ri kau anjo tu kukamaseanga, iamintu Onesimus. 13 Sikontutojenna eroki kutahang anrinni a'jari sambennu; sollangku akkulle nabantu ilalang niakku lalang anrinni ri tarungkua passabakkang Kabara' Baji' battua ri Allata'ala. 14 Mingka tena kuero' anggaukangi anjo kammaya punna tenapa nanusitujui rolong. La'bi kungaiangangi punna kalennu todong rella anggaukangi anjo kammaya; tena nakuero' ampassako. 15 Nikellai memang tongko kutadeng assisa'la' rolong sinampekang siagang Onesimus; sollanna akkulle nugappa pole ammotere' untu' satunggu-tungguna. 16 Kamma-kamma anne teaimi poro pajama-jamannu bawang; mingka la'biangampa pole. A'jarimi paranta tu Karisteng sannaka nikamaseanna. Nasaba' sanna' lompona todong matu-matunna mae ri nakke; la'biangampa pole mae ri kau, tantu la'bi lompoangangi matu-matunna. Baji' na'jari pajama-jama, kammayatompa na'jari sari'battang lanri Batara! 17 Lanri kammana, tarimami ammotere', nanupare' sari'battang paranta tu Karisteng. Tarimami anne Onesimus sangkamma angkana inakkemi nutarima. 18 Punna nia' kasalanna yareka nia' inranna mae ri kau, boli'mi kamma na inakke antanggongi ngasengi anjo sikammaya. 19 Jari baji'mi nakutulisi' kalengku anrinni angkanaya: Inakkepa Paulus ambayara' ngasengi sallang. (Tantu tena naparallu kupappiu'rangiang angkanaya kalennu pole kainrangang tongko mae ri nakke, iamintu lanri katallassang berunu salaku tu Karisteng.) 20 Lanri kammana sari'battang, tulunga' lanri Batara; pakarannui pa'maikku sangkamma sari'battannu lanri Batara. 21 Tappa' sikalia' ri wattunna kutulisi' anne suraka, angkanaya lanuturukianga' anne pappalakku. Na memang kuassengi angkanaya lala'biangangi pole lanuturukingku. 22 Pantaranganna anjo, pappasadianga' tampa' ri balla'nu; nasaba' kuminasai ri Allata'ala naNasareangko pappala'nu ngaseng, iamintu nanaeranga' ammotere' mae ri tangnga-tangnganu. 23 Appikatui sallang Epafras, mae ri kau ngaseng. Nia' tongi anrinni lalang ri tarungkua siagang inakke passabakkang Isa Almasi. 24 Tarima tommi sallanna agangku ngaseng iamintu: Markus, Aristarkhus, Demas siagang Lukas. 25 Poro Nabarakkaki ngasengko Batara Isa Almasi. Sallangku, Paulus
1 Ri jammang riolo, a'mole-molemi a'bicara Allata'ala mae ri boe-boeta. A'bicarami tete ri na'bi-na'bia, siagang a'rupa-rupami cara Napake a'bicara. 2 Mingka anne ri kala'busang jammanga, a'bicarami mae ri katte tete ri Ana'Na. Tete ri Iami anne Ana'Na naNapa'nia' sikontu linoa siagang bonena. Siagang Napattantumi Allata'ala angkanaya Ia tommi anne Ana'Na siratang angkammai sikontu apa-apa niaka. 3 Iami ampaccayai lalang ri KalenNa singara' kalompoanNa Allata'ala; Iami rupa ma'nyataNa battu ri KalenNa Allata'ala. Iatommi angkatutui kajarrekanna anne linoa, siagang sanna' makoasana kana Napaua. Ri le'ba'namo Nasare oloang rupataua untu' nilappassang battu ri dosa-dosana, mangemi ammempo ri empoang kala'biranNa ri suruga, ammarenta siagang Allata'ala, anna'galaka koasa kaminang tinggi. 4 Anjo Anaka nisarei empoang tinggianganga na malaekaka; kammayatompa nisarei ri Allata'ala areng bellaya la'biri'na na areng nipassareanga mae ri malaekaka. 5 Tena le'bakai Allata'ala akkana kamma anne mae ri se'reang malaeka', “Ikaumi AnakKu; anne alloa iNakke a'jari ManggeNu.” Tena le'baka tongi Allata'ala akkana kamma anne ri sesena se'reang malaeka', “INakke la'jari ManggeNa, na Ia la'jari AnakKu.” 6 Mingka ri wattunna Nasuro Ana' bungasa'Na antama' ri anne linoa, akkana kammai anne Allata'ala, “Sikontu malaeka'Na Allata'ala musti anynyombai mae ri anjo Anaka.” 7 Ri sesena sikontu malaekaka, akkana kammai anne Allata'ala, “Napa'jari kammai anging malaeka'-malaeka'Na Allata'ala, siagang Napa'jari kammai pepe' palayang-palayanNa.” 8 Mingka mae ri anjo Anaka, Nakana Allata'ala, “Empoang kala'biranNu, o Allata'ala, lasa'genna satunggu-tungguna! PamarentahanNu, iamintu pamarentahang adele'. 9 MangngaiKo ri kaadelanga, birisikKo ri kajekkonganga; iaminjo saba'na, naNapileKo Allata'ala, iamintu Allata'alaNu, na Nasareko kalompoang, langngeranga karannuang, la'bianganga na agang-aganNu.” 10 Nakana pole Allata'ala, “Ikau Batara, uru-uru ampa'niaki buttaya siagang KalenNu ampareki langika. 11 Yangasenna anjo lalanynyaki, la'jari sanrapangi pakeang toa mingka Ikau talamminrayaKo. 12 LaNulappaki anne linoa sanrapang baju siagang laNusambei maraengannaya. Mingka Ikau tena le'bakaKo lamamminra siagang tena kala'busanna tallasa'Nu.” 13 Tena le'bakai Allata'ala akkana kamma anne mae ri se'reang malaeka', “Maeko ammempo ri sa'ri kanangKu, sa'genna Kusuro ngaseng akkulantu' sikontu musunnu ri dallekannu.” 14 Jari punna kamma, apai sikontutojenna anjo malaeka'-malaekaka? Anjo ke'nanga, iamintu roh-roh allayaniai Allata'ala, siagang nisuroa ri Allata'ala antulungi sikontu tau lannarimaya kasalamakkang.
1 Iaminjo saba'na kimusti la'bi attojeng-tojeng anna'gala' jarre' mae ri sikontu pangngajarang le'baka nilangngere' battu ri Allata'ala, sollanna tena nanibokoi katappakkanta. 2 Anjo pappasang-pappasang napabattua sikamma malaekaka mae ri boe-boeta a'nyatami angkana ma'nassa tojengi, siagang inai-nai tena napinawangi yareka tena naturuki musti anggappai hukkungang siratannaya. 3 La'biangampa pole anjo kasalamakkang hebakkanganga na anjo sikamma pappasanga. Punna tena nanijampangi anjo kasalamakkanga, mattantu takkulleaki' lata'lappasa' battu ri hukkunganga. Nasaba' KalenNa Batara uru-uru ampa'la'bangi anjo kasalamakkanga; na sikamma tau uru-uru allangngerekai le'ba'mi napa'butti katojenganna mae ri katte. 4 Kammayatompa, KalenNa Allata'ala ampakajarreki kasa'bianna anjo taua ngaseng, iamintu lalang Nagaukanna a'rupa-rupaya gau' appakalannasaka siagang gau'-gau' sannaka heba'na; siagang lalang Napa'bage-bageanna sikamma passare malammoro' battua ri RohNa Allata'ala situru' kaerokang KalenNa. 5 Tena nanggappa koasa malaeka'-malaekaka battu ri Allata'ala untu' ammarenta ri lino beru labattua, iamintu lino nibicaraya ri kamma-kammaya anne. 6 Kabalekanna, nia' tattulisi' lalang ri Kittaka angkana, “Apai kutadeng anjo rupataua, o Allata'ala, sa'genTa ero' angngu'rangi? Anjo rupataua poro tauji bawang, mingka erokKi' anjampangi! 7 Untu' wattu sinampekang Kipa'jarimi irawanganna sike'de' malaekaka; Kisarei empoang mala'biri' siagang malompo, 8 kammayatompa Kipa'jari tukoasa irateanganna sikontu apa-apa niaka.” Jari, punna nikana Allata'ala ampa'jari rupataua “tukoasa irateanganna sikontu apa-apa niaka”, anjo battuanna angkanaya tena manna sirupa apa-apa tarawangang kakoasanna rupataua. Mingka manna nakamma, tanicinikapi kamma-kamma anne rupataua makoasa irateanganna sikontu apa-apaya. 9 Mingka punna Isa, nicini'mi makoasa! Nipa'jarimi irawanganna sike'de' malaekaka untu' wattu sinampekang; sollanna akkulle mate untu' sikontu rupataua, lanri baji' pa'mai'Na Allata'ala. Nicini'mi kamma-kamma anne nisare empoang mala'biri' siagang malompo lanri le'ba'namo Nakasia' sessaya sa'genna mate. 10 Memang siratang memang tongi Allata'ala — le'baka ampa'niaki sikontu apa-apaya situru' apa Nakaerokanga — ampa'jari Isa Pappasalama' sukkuka tete ri kasessanga. Lanri kammanami anjo nakkullemo jai tau Nakio' Allata'ala amminawang nipakalompo siagang Isa. Nasaba' Iami panynyungke oloang mae ri ke'nanga untu' akkulle nipasalama'. 11 Isa antangkasi rupataua battu ri dosa-dosana ke'nanga; na Ia annangkasia, kammayatompa anjo ke'nanga nitangkasia, se'reji Mangge napa'jului. Iaminjo natasiri'-sirika Isa angngakui ke'nanga a'jari sari'battanNa. 12 Nakana Isa mae ri Allata'ala, “LaKubirittakangi mae ri sikamma sari'battangKu ri sesena iKatte. LamammujiA' mae ri Katte ri tangnga-tangngana passe're-se'reanna ke'nanga.” 13 Nakana pole Isa, “LaKupadongkoki panrannuangKu mae ri Allata'ala.” Na Nakana pole, “INakkemi anne, siagang sikamma ana'-ana' le'baka Napassareang Allata'ala mae ri Nakke.” 14 Nasaba' anjo sikamma tau Nakanaya ana', iamintu tau akkullea mate, napa'jarimi KalenNa Isa sangkamma kalenna ke'nanga, siagang attallasa'mi sangkamma rupataua. Kammami anjo Nagaukanga, sollanna lanri kamateanNa nakkullemo Nabeta sa'genna posso' Billisika, iamintu makoasaya ri kamateanga. 15 Kammami anjo caraNa ampakabebasaki sikontu tau nipa'jari ataya lalang sikontu tallasa'na, lanri malla'na mae ri kamateanga. 16 Ma'nassami angkanaya teai malaekaka Natulung, passangalinna sossoranna Abraham. 17 Jari battuanna, angkanaya Iami musti a'jari sangkamma sari'battanNa ngaseng lalang ri sikontu-kontuna. Siagang lanri kammanami anjo nakkullemo a'jari Imang Malompo, Ia tamalanrea siagang lompo pangngamaseanga. Battu ri iaminjo palayananNa nakkullemo nipammopporang dosana rupataua. 18 Siagang lanri KalenNa le'ba' tongi Nakasia' sessaya siagang paccobaya, iaminjo nakkullemo Natulung tau natabaya paccoba. Kammami anjo carana nakkullemo Natulung sikamma tau natabaya paccoba, lanri Ia le'ba' tommi nataba paccoba siagang angkasiaki pa'risika.
1 Sikamma sari'battangku, parangku tu Karisteng, nikioka tommo ri Allata'ala! Alle sai pikkiri' baji'-baji' anne ri sesena Isa! Nisuromi ri Allata'ala untu' a'jari Imang Malompo lalang ri agamata. 2 Tamalanreai mae ri Allata'ala, le'baka ampilei untu' anggaukangi anjo jama-jamanga; sangkamma todong Musa riolo, tamalanreai anggaukangi jama-jamanna ri Balla'Na Allata'ala. 3 Mingka siratangi Isa anggappa kala'birang malompoanganga na Musa. Nasaba' musti la'bi lompoangangi kala'birang nagappaya anjo tau ambangunga balla', kala anjo ballaka. 4 Memang, tasse're-se'rea balla' tantu nia' ambangungi; mingka anjo ambangungai sikontu-kontua, iamintu KalenNa Allata'ala. 5 Tamalanreai Musa a'jari palayang lalang ri Balla'Na Allata'ala siagang ampabattui apa-apa laNapa'nyataya Allata'ala sallang ri allo labattua. 6 Mingka tamalanreai Isa salaku Ana' antanggongiai amparakai Balla'Na Allata'ala. Na ikattemi anne sanrapang Balla'Na Allata'ala, punna tuli lompona sumangatta siagang tuli tappatta angkanaya tena tanigappana anjo apa niminasaia. 7 Lanri kammanami anjo, sangkamma Napaua RohNa Allata'ala, “Punna nulangngere' sa'ranNa Allata'ala anne alloa, 8 teako tamappilangngeri, sangkamma boe-boenu riolo, ri wattunna nabali siagang naso'ri ke'nanga Allata'ala ri parang lompoa. 9 Nakana Allata'ala, ‘AnjoremMa' naso'ri siagang nauji boe-boenu, manna pole nacini'mi ke'nanga apa le'baka Kugaukang patampulo taung sallona.’ 10 Iaminjo saba'na naKularro siagang Kukana mae ri ke'nanga, ‘Tuli mamminra-minrana ke'nanga, siagang tuli teana anturuki parentaKu.’ 11 LarroMa' siagang assumpaMa' Kukana, ‘Talantamakkai ke'nanga ri anjo pa'rasanganga untu' sipammari-mariang siagang iNakke!’ ” 12 Sikamma sari'battangku, tutu laloko, gassingka niakko kalase'rennu sanna' ja'dala'na pa'mai'na siagang tena natappa', sa'genna a'boko siagang napakabella kalenna battu ri Allata'ala assarea katallassang! 13 Jari sollanna tena manna sitau ri tangnga-tangnganu nitipu ri dosaya sa'genna tamappilangngeria ri Allata'ala, paralluko allo-allonu sipakainga' ilalang attallasatta ija ri anjo jammang napakkanaia Kittaka “Anne Jammanga”. 14 Ikatte anne bela sipanjama-jamanna ngasengki' Almasi, assala' tuli nita'gala' jarreki katappakkang niaka ri katte battu ri uru-uruna sa'genna kala'busang. 15 Iaminne tattulisika lalang ri Kittaka, angkanaya, “Punna nulangngere' sa'ranNa Allata'ala anne alloa, teako tamappilangngeri sangkamma boe-boenu riolo, ri wattunna nabali Allata'ala.” 16 Jari, inaika anjo tau allangngerekai sa'ranNa Allata'ala nampa nabali Allata'ala? Sai yangasemmi anjo tau le'baka napimping Musa assulu' battu ri butta Mesir? 17 Siagang inaika Nakalarroi Allata'ala patampulo taung sallona? Sai iami anjo ke'nanga dorakaya siagang matea ri parang lompoa? 18 Ri wattunna assumpa Allata'ala Nakana, “Talantamayai ke'nanga ri tampa' pammari-mariangKu, sipammari-mariang siagang iNakke,” maka inai nataba anjo kananNa Allata'ala? Sai iami anjo tau ambaliai Allata'ala nataba? 19 Kamma-kamma anne nipahammi angkanaya takkulleai ke'nanga antama', lanri tenana natappa' ke'nanga mae ri Allata'ala.
1 Anjo janjinNa Allata'ala napajappa iji, na laNasareki' tampa' untu' pammari-mariang Napa'janjianga. Jari paralluki' tutu sollanna tena manna sitau battu ri kau ngaseng talanggappayai anjo pammari-mariang nipa'janjianga. 2 Nasaba' sangkamma mae ri ke'nanga, anjo Kabara' Bajika le'ba'mi nibirittakang mae ri katte. Mingka tena matu-matunna nipabattu anjo birittaya mae ri ke'nanga. Nasaba' tena natappa' ke'nanga ri wattunna nalangngere' anjo birittaya. 3 Mingka ikatte tau tappaka, lanigappai anjo tampa' pammari-mariang Napa'janjianga Allata'ala. Anne sicoco'mi siagang apa le'baka Napau Allata'ala, angkanaya, “LarroA' siagang assumpA', angkana talantamayai ke'nanga ri tampa' pammari-mariangKu sipammari-mariang siagang iNakke!” Akkana kammami anjo Allata'ala manna pole riolo iji naNapa'le'ba'mo jama-jamanNa, iamintu ri wattunna Napa'jari anne linoa. 4 Nasaba' ri passala'na allo makatujua, nia' tattulisi' lalang ri Kittaka angkanaya, “Ri makatujuna alloa ammari-marimi Allata'ala battu ri sikontu jama-jamanNa.” 5 Ri anne passalaka nia' pole tattulisi' angkanaya, “Talantamayai ke'nanga ri tampa' pammari-mariangKu sipammari-mariang iNakke.” 6 Jari anjo ke'nanga uru-uru allangngerekai anjo Kabara' Bajika, talanagappayai tampa' pammari-marianga, lanri tenana natappa' ke'nanga. Jari punna kamma, ma'nassami angkanaya nia' tau maraeng akkulle anggappai anjo tampa' pammari-marianga. 7 Nasaba' le'ba'mi Napattantu Allata'ala se'reang allo maraeng pole, ia nikanaya, “Anne Alloa.” Attaung-taung ribokoanganna Nabicarai Allata'ala anjo passalaka tete ri Daud, iami antu lalang aya' le'bakamo nipau sumpadeng, angkanaya, “Punna nulangngere' sa'ranNa Allata'ala anne alloa, teako tamappilangngeri.” 8 Punna ebara' angkana le'ba'mi naerang Yosua anjo taua antama' ri tampa' pammari-mariang Napa'janjianga Allata'ala, tenamo Nala'bicara pole Allata'ala ri passala' se'reang allo maraeng. 9 Jari, untu' Umma'Na Allata'ala nia' ija janji untu' lammari-mari sangkamma ammari-mariNa Allata'ala ri anjo allo makatujua. 10 Nasaba' anjo tau antamaya ri tampa' pammari-mariang Napa'janjianga Allata'ala ri ia, lammari-mari tommi battu ri sikontu jama-jamanna, sangkamma Allata'ala. 11 Lanri kammana, mae mako nakiattojeng-tojeng usaha untu' antama' ri anjo tampa' pammari-mariang Napa'janjianga Allata'ala. Teako niakki manna sitau tanggappaya sangkamma ke'nanga riolo, lanri tenana natappa' mae ri Allata'ala. 12 Anjo kananNa Allata'ala, iami kana-kana assarea katallassang siagang kagassingang; la'bi tarangi na pa'dang tarang pimbalia. Anjo kana-kanaya anno'doki sa'genna antama' ri atia siagang nyawaya; narapiki pa'leso-lesoanga siagang buku-bukua, sa'genna naasseng ngaseng pikkiranna siagang nawa-nawanna rupataua. 13 Tenanniakka manna sirupa apa-apa attallasa' lakacokkoang ri paccini'Na Allata'ala. Sikontu-kontuna lakacinikang ngasengi siagang latassungke ngasengi ri dallekanNa. Siagang musti latanggong-jawa' ngaseng maki' mae ri Ia. 14 Iaminjo saba'na kimusti anna'gala' jarre' mae ri pangakuang katappakkanta. Nasaba' nia' Imang Malompota, le'bakamo antama' sa'genna ri dallekanNa Allata'ala — iamintu Isa, Ana'Na Allata'ala. 15 Anjo Imang Malompota teai imang tenaya nakkulle amminawang angkasiaki kapa'risanta. Passangalinna, le'ba' tommi Nataba paccoba lalang a'rupa-rupa passala', sangkamma todong massing-massing ikatte; iaji bawang tena Nagaukangi dosaya! 16 Lanri kammana, mae mako nakipa'baraniang kalenta andallekang ri Allata'ala, baji' pa'maika ammarenta. LaNakamaseangki' siagang laNabarakkakiki' Allata'ala sollanta akkulle anggappa pannulung ri sitabanna le'ba' wattunna.
1 Massing-massing imang lompoa nipilei battu ri tangnga-tangngana ummaka, na niangka' a'jari wakkele'na ke'nanga untu' allayani mae ri Allata'ala. Jama-jamanna iamintu angngerangangi Allata'ala sikamma passare lanipabattua siagang sikamma koro'banga sollanna nipammopporang dosa-dosaya. 2 Kalenna anjo imang lompoa jai tongi kakurangnganna; mingka lanri kammanami anjo nakkullemo a'jari tuna pa'mai' mae ri tau tenaya apa-apa naasseng siagang tau sala oloanga ri jappana. 3 Na lanri kalenna jai tongi kakurangnganna, jari musti assaremi koro'bang; teai lanri dosa-dosana bawang ummaka, mingka lanri dosa-dosa kalenna pole. 4 Tenanniakka manna sitau angngangkaki kalenna a'jari imang lompo. Iapa nakkulle a'jari imang lompo taua, punna KalenNa Allata'ala angkioki — sangkamma ri nikio'na Imang Harun. 5 Kamma tomminjo Almasi. Teai Ia angngangkaki KalenNa a'jari Imang Malompo. Mingka KalenNa Allata'ala angngangkaki. Nakana Allata'ala mae ri Ia, “IKau AnakKu; anne alloa iNakke a'jari Bapa'Nu.” 6 Ri tampa' maraengannaya Nakana pole Allata'ala, “IKaumi Imang sa'genna satunggu-tungguna, sangkamma Imang Melkisedek.” 7 Ri wattunna attallasa' Isa ri anne linoa, akkio' lompoi siagang angngarruki appala' doang mae ri Allata'ala, akkullea ampasalamaki battu ri kamateanga. Na lanri tunduki siagang Napakalompoi Allata'ala, nipilangngerimi pappala'Na. 8 Isa Iami Ana'Na Allata'ala; mingka manna nakamma, appilajara'mi a'jari tu mappilangngeri lalang ri kapa'risanNa. 9 Jari ri le'ba'namo nipa'jari Tumappasalama', a'jarimi patteteang kasalamakkang mannannungang mae ri sikamma tau mannurukia ri Ia; 10 kammayatompa nipa'nyatami ri Allata'ala angkana Iami a'jari Imang Malompo, antamaya sangkamma Imang Melkisedek! 11 Ri sesena anjo empoanna Isa a'jari Imang Malompo, jai parallu napabattu ikambe mae ri kau ngaseng; mingka sukkaraki lanipakasingara', nasaba' sallo dudui nampa akkulle nupahang. 12 Sikontutojenna narapi'mi wattunnu la'jari guru; mingka ma'nassa parallu ijako appilajara' mae ri tau maraenga ri passala'na poko'-poko' pangngajaranNa Allata'ala. Takkullea pako nisare kanre terasa'; parallu ijako angnginung dadi'. 13 Inai-nai angnginung ija dadi', sanrapang ana' lolo iji; tenapa pangalamanna ri passala'na nikanaya apa tojeng yareka apa sala. 14 Anjo kanre terasaka untu' tau toaya; nasaba' lanri nia'namo pangalamanna akkullemi naasseng angkana kereanga baji' siagang kereanga kodi.
1 Lanri kammana, mae mako nakimaju ri pappilajarang-pappilajarang ribokoangannaya pole, iamintu ri passala'na kajarrekanna katallassang Karistenga. Teako tuli poko' pangngajarang rioloa bawang nuparhatikang. Tea' maki' ammoteri pole mange ri pappilajarang uru-urua, iamintu angkanaya musti ammari taua anggaukangi apa-apa tenaya matu-matunna, siagang musti tappakki' mae ri Allata'ala; 2 yareka pappilajarang uru-urua ri passala'na pa'je'nekanga yareka appatompanga lima irateanganna taua untu' ambarakkaki; yareka ri passala'na attallasa' poleanga ammotere' battu ri kamateanga siagang hukkungang satunggu-tunggua. 3 Punna nia' pangngellaiNa Allata'ala, mae mako nakimaju mange ri pappilajarang-pappilajarang la'bi lompoanganga! 4 Nasaba' tenamo olona lanirurungang ammotere' tau ammono'bokoa. Riolo nia'mi ke'nanga lalang ri kasingaranNa Allata'ala, siagang nakasia'mi passareNa. Kammayatompa amminawang tommi ke'nanga nikoasai ri RohNa Allata'ala. 5 Naassemmi battu ri pangalamanna ke'nanga angkanaya bajiki anjo kananNa Allata'ala, siagang natarimami ke'nanga passare malammoro' makoasa untu' jammang labattua. 6 Mingka le'baki anjo, ammono'bokomi ke'nanga! Antekamma batena laniulu toba' poleang ke'nanga battu ri dosa-dosana? Nasaba' nasalli' poleammi ke'nanga Ana'Na Allata'ala nanihina-hina ri dallekanna tau jaia. 7 Anjo butta masarroa annarima je'ne' bosi, nampa angngerang wassele' lamung-lamung kabajikang mae ri tau akkaresoa, Nabarakkaki Allata'ala. 8 Mingka punna rea siagang ruku'-ruku' akkatinting wassele'na anjo buttaya, tenamo matu-matunna anjo buttaya siagang lanitunrai sallang ri Allata'ala nampa ri kala'busanna lanitunui sa'genna la'busu'. 9 Mingka sikamma sari'battang kukarimangngia! Manna anjo kikkana kamma tappakki' angkanaya le'ba'mi nutarima sikamma barakka' la'bi bajikanganga, iamintu bageang kasalamakkannu. 10 Anjo Allata'ala teai Allata'ala tangngassenga adele'. TaNakaluppaiyai apa-apa le'baka nugaukang mae ri Ia siagang pangngamaseang le'baka nupappicinikang mae ri Ia ri wattunna nutulung sikamma julu tappatta, baji' na riolo, yareka na ri kamma-kammaya anne. 11 Kikellai sollanna tuli massing lompo sumanga'nu sa'genna kala'busang, sa'genna akkulle nutarima anjo apa-apa numinasaia. 12 Tena kikellaiko a'jari malasa'. Mingka kikellaiko sollannu attallasa' sangkamma tau antarimayai apa Napa'janjianga Allata'ala, lanri tappa'na mae ri Ia, siagang lanri sa'bara'na attayang. 13 Ri wattunna a'janji Allata'ala mae ri Abraham, assumpai angkanaya laNarupai anjo apa Napa'janjianga. Nasaba' tenamo tinggiangang na Allata'ala, jari assumpami lalang areng KalenNa. 14 Nakana Allata'ala, “A'janjiA' angkana laKubarakkakiko siagang laKupa'jari sannaki jaina sossorannu.” 15 Attayammi Abraham siagang sa'bara', sa'genna natarimamo anjo apa Napa'janjianga Allata'ala mae ri ia. 16 Punna nia' tau assumpa, areng tumaraeng la'bi tinggianganga napau, sa'genna akkullemo napa'le'ba' pa'geakkanna ri passabakkang anjo sumpaya. 17 Eroki Napakajarre' janjinNa Allata'ala mae ri sikamma tau Najanjia angkanaya talaNapinrayai janjinNa. Iaminjo saba'na naNapirurungi sumpa anjo janjinNa. 18 Anjo ruaya passala' takkulleai lamminra; tena olona la'balle-balle Allata'ala ri janjinNa siagang sumpaNa! Lanri kammana, ikatte tau a'la'langamo irawanganNa Allata'ala, nikellaiki' anna'gala' jarre' mae ri panrannuang niaka ri dallekanta. 19 Anjo panrannuanta a'jari panna'galang majarre' siagang amang mae ri katallassanta, nasaba', lanri sanna' lantanna nipatto' naung. Pappokokanna niaki lalang Kamara' Kaminang Matangkasaka lalang ri Balla'Na Batara ri suruga. 20 Le'ba'mi Nasungke Isa oloang mangea anjoreng ri tampaka untu' ikatte; siagang le'ba'mi antama' anjoreng a'jari Imang Malompota satunggu-tungguna lalang ri golonganna Imang Melkisedek.
1 Anne Melkisedek karaeng battu ri Salem, siagang imang Kaminang Tinggina Allata'ala. Ri wattunna ammotere' Abraham battu ri pa'bundukanga nanabeta karak-karaeng balinnaya, battumi Imang Melkisedek anruppai siagang ambarakkaki. 2 Jari napassareammi Abraham mae ri Melkisedek bage sampulona battu ri sikontu barang-barang naallea battu ri balinna. (Battuanna anne areng Melkisedek uru-uruna iamintu, “Karaeng Kaadelang”; siagang pole lanri ia karaeng battui ri Salem, jari battuanna pole anne arenna iamintu “Karaeng Kasalewangang”.) 3 Ri sesena anne Melkisedek tena kasingaranna nipau angkanaya nia' manggena, yareka amma'na, yareka boe-boena; tena todong kasingarang ri passala' kalassukanna, yareka ri kamateanna. Ia sangkammai Ana'Na Allata'ala; iami imang satunggu-tunggua. 4 Jari nicini'mi anrinni antekamma malompona anne Melkisedek; pammate malompona, sa'genna Abraham, iamintu boe-boena bansata, napassareangi mae ri ia bage sampulona anjo sikontu barang-barang nagappaya battu ri pa'bundukanga. 5 Ilalang ri hukkung agama Yahudia nia' nipattantu angkanaya musti angngallei imang-imang sossoranna Lewi bage sampulona panggappanna umma' Israel, iamintu sari'battang kalenna ke'nanga, manna pole para sossorannai Abraham. 6 Melkisedek teai sossoranna Lewi, mingka annarima tongi bage sampulona battu ri barang-barang nagappaya Abraham, siagang nabarakkaki tongi Abraham, ia le'baka anggappa janji-janji battu ri Allata'ala. 7 Memang takkulleai nisassali angkanaya la'bi rawangangangi tau nibarakkakia na ia tau ambarakkakiai. 8 Anjo imang-imang annarimaya pa'bayara' bage sampulo, tau akkulle tonji mate. Mingka turu' ri Kittaka: Anjo Melkisedek annarimaya passare bage sampulo, tau tuli attallasa'na. 9 Akkulle nikana anjo Lewi, annarimaya sossoranna bage sampulo battu ri umma' Israel, a'bayara' tongi tete ri Abraham mae ri Melkisedek. 10 Manna natenapa nanilassukangi Lewi, mingka akkullei nikana nia'mi lalang ri kalenna Abraham, iamintu boe-boena, ri wattunna assigappa Melkisedek siagang Abraham. 11 Irawangang pimpinannai imang-imang Lewi nanipassareang hukkung agama Yahudia mae ri umma' Israelka. Lanri riolo, takkulleai nagaukang imang-imang Lewi sa'genna sukku' baji'na anjo jama-jamang musti nagaukanga ke'nanga, jari musti nia' imang maraeng, iamintu sangkammaya Imang Melkisedek; jari teaimi imang battu ri golonganna Harun. 12 Jari, punna amminramo empoanna imang-imanga, musti amminra tommi hukkung-hukkung agama Yahudia. 13 Ia nipakkanaya anrinni iamintu Batarata: Ia battu ri suku maraeng; tena le'bakapi nia' manna sitau battu ri sukuNa anggaukangi jama-jamang imanga. 14 Sikontu rupataua naasseng ngasengi angkanaya battu ri suku Yehuda assala'Na Batarata; na tale'bakai nasero kana Musa anjo sukua ri wattunna nabicara passala'na imang-imanga. 15 Anne apa nibicaraya a'jari pila' singara'mi pole, ri wattunna nia'mo battu sitau imang maraeng sangkamma Melkisedek. 16 Niangkaki a'jari imang, teai lanri paratorang-paratoranna rupataua, passangalinna lanri makoasana ri tallasa'na siagang lanri tenana kala'busanna katallassanna. 17 Nasaba' nia' lalang ri Kittaka angkana, “Ikaumi imang sa'genna satunggu-tungguna, sangkamma Imang Melkisedek.” 18 Jari, kamma-kamma anne nibokoimi paratorang salloa, lanri tena najarre' siagang tena matu-matunna. 19 Takkulleai hukkung agama Yahudia ampa'jari sukkuki baji'na se'rea apa-apa. Lanri kammanami anjo nakinisaremo kamma-kamma anne panrannuang la'bi bajikanganga; iaminjo patteteang nakiakkulle a'reppese' mae ri Allata'ala. 20 Nampa pole, yangasenna anjo narurungangi sumpaNa Allata'ala. Tena sanrapanna anjo sumpaya, ri wattunna niangka' imang-imang maraenga. 21 Mingka Isa, ammakei sumpa ri wattunna niangka' a'jari imang, iamintu ri wattunna Nakana Allata'ala mae ri Ia, “Le'ba'mi assumpa Batara, siagang talamamminrayai ri kananNa, ‘IKaumi Imang satunggu-tungguna.’ ” 22 Lanri iatommi anne na'jarimo Isa panjarreki ri janji la'bi bajikanganga. 23 Nia' ija se're passala': anjo imang-imang maraenga jai, lanri massing mate ngasengi ke'nanga, sa'genna takkulleai napannarrusu' jama-jamanna. 24 Mingka Isa, attallasaki satunggu-tungguna; jari takkulleai a'lette' mae ri tau maraenga anjo jama-jamang imang niaka ri Ia. 25 Lanri kammanami anjo nakkulle Isa sa'genna satunggu-tungguna ampasalamaki sikontu tau battua mae ri Allata'ala tete ri KalenNa; nasaba' attallasaki satunggu-tungguna sollanna akkulle Napappala'-palakkang sikamma anjo taua mae ri Allata'ala. 26 Jari, Ia minjo Isa Imang Malompo niparalluanga. Iami Imang matangkasa'; tena sikali kasalang yareka dosa ri KalenNa. Nisa'la'mi battu ri tau dorakaya, na nipanai' ri tampa' tinggianganga na sikontu langika. 27 Tasangkammayai imang-imang lompo maraenganga, allo-alloa angngerang koro'bang lanri dosa-dosa kalenna rolong, nampa koro'bang lanri dosa-dosana ummaka. Isa, sikaliji bawang angngerang koro'bang untu' satunggu-tungguna, iamintu ri wattunna Napassareang KalenNa a'jari koro'bang. 28 Hukkung agama Yahudia angngangkaki tau tenaya nasukku' baji'na a'jari imang lompo. Mingka ribokoanganna, battu ri ia anjo hukkung-hukkunga appare'mi janji siagang assumpami Allata'ala angkanaya Naangkaki a'jari Imang Malompo, anjo Ana' le'ba'ka nipa'jari Tumappasalama' sukkuka baji'na sa'genna satunggu-tungguna.
1 Poko'na anne sikamma nibicaraya iamintu: Nia' Imang Malompota sangkammaya anjo; niaka ammempo ammarenta siagang Allata'ala Kaminang Lompoa ri suruga. 2 Ia anggaukangi jama-jamang Imang Lompoa ri Kamara' Kaminang Matangkasaka, iamintu ilalang KemaNa Batara sitojennaya, Napaentenga Batara, jari teai rupataua ampaentengi. 3 Sikontu imang lompoa niangkaki untu' angngerang koro'bang yareka passare mae ri Allata'ala. Kammatommi anjo Imang Lompota; musti nia' apa-apa ri Ia untu' laNapassareang. 4 Ebara' angkana niaki ri anne linoa, tena Nala'jari Imang, nasaba' nia'mo imang langngerangai anjo koro'bang nituntuka lalang ri hukkung agama Yahudia. 5 Anjo jama-jamang imang nagaukanga ke'nanga, sikontutojenna poro pangngebaranji siagang bayang-bayanji bawang mae ri apa niaka ri suruga. Anjo le'ba'mi Napau Allata'ala mae ri Musa riolo, iamintu ri wattunna lappaenteng KemaNa Batara Musa. Kammami anne kananNa Allata'ala mae ri Musa, “U'rangi! Yangasenna anjo musti nupareki situru' panrala' le'baka nipaccinikangko rate ri monconga.” 6 Mingka kamma-kamma anne la'bi lompoangangi jama-jamang imang Nagappaya Isa, naanjo jama-jamang imang nagaukanga ke'nanga. Nasaba' anjo passijanjiang Napareka Allata'ala siagang rupataua la'bi bajikangangi lanri situruki ri janji apa-apa la'bi bajikanganga. 7 Ebara' angkana tena kakuranganna anjo janji makase'rea, tantu tenamo naparallu nipare' anjo janji makaruaya. 8 Mingka nia'mo kasalang Nagappa Allata'ala ri Umma'Na, sa'genna Nakanamo Allata'ala, “U'rangi, angkanaya lanarapiki sallang wattunna, naKulappare' passijanjiang beru siagang bansa Israel, siagang bansa Yehuda. 9 Tasangkammayai passijanjiang Kupareka siagang boe-boena ke'nanga ri wattunna Kururungang ke'nanga assulu' battu ri butta Mesir. Allessoki ke'nanga ri passijanjiang Kupareka siagang ke'nanga, lanri kammanami anjo nataKujampangia ke'nanga. 10 Mingka anne kamma, iaminne passijanjiang laKupareka siagang umma' Israel ri allo-allo labattua, Nakana Batara: LaKupadongkoki paratorangKu ri nawa-nawanna ke'nanga, naKutulisi' todong ri atinna. INakke la'jari Allata'ala mae ri ke'nanga, naKupa'jari ke'nanga UmmakKu. 11 Taparalluai ke'nanga siajara' para ia, yareka ampauangi sari'battanna angkana, ‘Tappakko mae ri Batara.’ Nasaba' yangasenna ke'nanga ca'di lompo, latappaki mae ri Nakke. 12 LaKupammopporangi sikamma kasalanna ke'nanga, siagang laKukaluppai dosa-dosana ke'nanga.” 13 Lanri appare'namo Allata'ala passijanjiang beru, a'jari toami siagang rotto'mi anjo passijanjiang rioloa; na anjo apa toayamo, tasalloami nalanynya'.
1 Anjo passijanjiang uru-urua, nia' paratorang-paratorang panynyombanna, siagang nia' todong tampa' panynyombanna napareka rupataua. 2 Se're pammantangang nipaenteng niarenga Kamara' Matangkasa' bageang ri dallekanna. Anjoreng nia' bangkeng pa'dongkokang kanjoli, siagang niaka mejang pammantangang roti lanipangngadakkanga mae ri Allata'ala. 3 Bageang lalanganna, iamintu ri bokona gordeng makaruaya, nia' kamara' niarenga Kamara' Kaminang Matangkasaka. 4 Lalang ri anjo kamaraka, nia' pattunuang dupa bulaenga nipare', siagang nia' todong Patti Passijanjiang nilapisika bulaeng. Lalang ri anjo Pattia nia' uring bulaeng pammoneang roti, takkanna Harun accu'lakamo, siagang ruang lawara' batu pannulisang niaka tattulisi' irateanganna sampuloa paratorang Napassuroanga Allata'ala. 5 Irateanganna anjo Pattia nia' rua patong malaeka' akka'nyika, a'jaria pangngebarang ri kahaderanNa Allata'ala. Anjo ruaya ka'nyi'na patung malaekaka tassungkei irateanganna anjo pattongko' Pattia, iamintu tampa' pammopporanna dosa-dosaya. Mingka takkullea ngasengi anjo sikammaya nipakasingara' apa battuanna sa'genna a'jari singara' tojeng-tojeng. 6 Kamma ngasemmi anjo batena niatoro'. Allo-allona imang-imanga antama' anjoreng ri bageang dallekanna anjo pammantangang nipaentenga, untu' anggaukangi jama-jamanna ke'nanga. 7 Akkullea antama' ri bageang kaminang lalanna anjo pammantanganga, iamintu imang lompoaji bawang. Naporo sikaliji bawang sitaung nagaukang anjo kammaya. Siagang punna nagaukang anjo kammaya, angngerangi cera' untu' lanapangngadakkang mae ri Allata'ala untu' kalenna anjo imanga, siagang lanri sikamma dosa nagaukanga umma'Na. 8 Ilalammi ri anne atoranga, Napappicinikang RohNa Allata'ala sa'genna singara' angkanaya ilalang nia'na ija ammenteng bageang dallekanna anjo pammantanganga, tenapa natassungke oloang antamaya mae ri anjo Kamara' Kaminang Matangkasaka. 9 Iaminne pangngebarranna jammang kamma-kammaya anne; battuanna angkanaya sikamma apa-apa nipassareanga siagang koro'bang olo'-olo' nipassareanga mae ri Allata'ala, takkulleapi napa'jari sukku' baji'na ati mailalanna tau angngeranga passare. 10 Nasaba' anjo upacara-upacaraya poro mange bawang ri passala' kanre-kanreang, inung-inungang, siagang a'rupa-rupa upacara pannangkasi. Yangasenna anjo poro paratorang-paratorang nacinikaji bawang mata, akkullea tappake sa'genna bawang ri wattunna Naberui ngaseng Allata'ala sikontu apa-apa niaka. 11 Mingka nia'mi battu Almasi a'jari Imang Lompo ri yangasenna passala' kabajikang niakamo. KemaNa Batara Napammantangia anggaukangi jama-jamanNa salaku Imang Lompo, la'bi lompoangangi siagang la'bi sukkukangangi. Naanjo teai rupataua ampareki; battuanna, teai anne lino nipa'niaka assala'na. 12 Sikaliji Almasi antama' ri anjo Kamara' Kaminang Matangkasaka ilalang ri anjo kemaya sa'genna satunggu-tungguna. Anjo wattua tena Nangngerang cera' bembe laki, yareka cera' sapi rungka untu' lanipangngadakkang; passangalinna cera' KalenNa Naerang, na lanri kammanami anjo naNalappassang maki' battu ri dosa-dosaya sa'genna satunggu-tungguna. 13 Anjo cera' bembea siagang sapi lakia kammayatompa auna anjo koro'bang sapi rungkaya, nipakei untu' amba'basaki sikamma tau ra'masaka, sollanna a'jari tangkasa' ke'nanga. Jari, punna akkulle ceraka siagang aua antangkasi kara'massanna ke'nanga, 14 la'biangampa pole cera'Na Almasi. Tete ri Roh mannannunganga, Napassareammi KalenNa Almasi mae ri Allata'ala a'jari koro'bang sukkuka baji'na. Cera'Na antangkasi ati mailalanta battu ri upacara agama tenaya matu-matunna sollanta akkulle a'jari palayang mae ri Allata'ala mattallasaka. 15 Lanri kammanami anjo, na'jarimo tete Almasi untu' passijanjiang beru, sollanna akkulle natarima sikamma tau le'baka Nakio' Allata'ala untu' annarima barakka'-barakka' mannannungang le'baka Napa'janjiang Allata'ala. Yangasenna anjo kammaya akkullei kajariang lanri nia'na le'ba' mate, iamintu Almasi; na battu ri iaminjo kamateanNa Nakkullemo Nalappassang rupataua battu ri sikamma kasalang le'baka nagaukang ke'nanga, ri wattu tappakena ija passijanjiang uru-urua. 16 Punna nia' sura' warisi', musti nia' todong buttina angkanaya ma'nassa matemi anjo tau appareka sura' warisi'. 17 Nasaba' ilalang attallasa'na ija anjo tau appareka sura' warisi', takkulleapi tappake anjo suraka punna tenapa namate anjo taua. 18 Iaminjo saba'na namusti nipa'nassa parjanjiang rioloa siagang cera'. 19 Uru-urua napabattui Musa sikontu anjo hukkung Napassuroanga Allata'ala mae ri bansa Israelka. Le'baki anjo, angngallemi Musa cera' sapi rungka siagang cera' bembe laki. Nampa nacampuru' siagang je'ne', nampa napaba'basa' mange ri Kitta' Hukkung-hukkung battua ri Allata'ala siagang mange ri sikontu bansa Israelka. Ruku'-ruku' siagang bulu gimbala' eja toaya tanja'na napaba'basa'. 20 Lalang napaba'basa'na nakanamo Musa, “Iaminne cera' ampa'nassayai parjanjiang battua ri Allata'ala. Musti nuturuki anne parjanjianga.” 21 Le'baki anjo napaba'basa' kammatommi anjo Musa anjo ceraka mae ri kemaNa Batara siagang sikontu pakkakasa' sarroa nipake assambayang. 22 Kammami anjo pangngatorang agamana tu Yahudia, angkanaya yangaseng-ngasenna parallui nitangkasi siagang cera'; kammayatompa iapa nakkulle nipammopporang dosaya punna nia' cera' tassolong. 23 Kammami anjo batena nipangngebarang antekamma paralluna apa-apa niaka ri suruga nitangkasi. Mingka anjo apa-apa niaka ri suruga niparalluangi koro'bang bellaya la'bi baji'na. 24 Nasaba' teai Kamara' Matangkasa' bate pare'na rupataua Napantamakki Almasi. Anjo Tampaka poro pangngebaranji bawang ri Kamara' Matangkasa' sitojennaya. Ma'nassa suruga tojeng Napantamakki Almasi; anjoremmi kamma-kamma anne andallekang ri Allata'ala untu' kasalamakkanta ngaseng. 25 Taung-taungi Imang lompona tu Yahudia antama' ri Kamara' Kaminang Matangkasaka lalang ri Balla'Na Batara. Antamaki angngerang cera'na sikayua olo'-olo'. Mingka antamaki Almasi angkoro'bangkangi KalenNa tena nauntu' a'mole-mole. 26 Nasaba' punna a'mole-molei Nagaukang kammaya, tantu a'mole-molemi Napisa'ringi sessaya baku' nipa'jarina linoa. Mingka a'nassami angkanaya ri anne kala'busang jammanga, battumi sikaliji bawang angkoro'bangkangi KalenNa sollanna Natangkasi dosaya. 27 Le'ba'mi Napattantu Allata'ala angkanaya sikaliji bawang mate rupataua. Le'baki anjo niadelimi ri Allata'ala. 28 Kammatommi anjo Almasi. Sikaliji bawang nipassareang a'jari koro'bang, najai tau Natangkasi dosana. Labattu poleangi makapinruanna. Mingka teaimi untu' antanggongi dosaya; passangalinna untu' ampasalamaki sikamma tau antayangai kabattuanNa.
1 Anjo hukkung agama Yahudia, poro pangngebarang bawang mae ri katte ri apa-apa baji' labattua; teaipi sitojennaya ri anjo passalaka. Taung-taungi tuli sakamma-kammana anjo koro'bang nipassareanga. Jari, antekamma batena lakkulle anjo hukkung kammaya siagang koro'bang kammaya ampasukkuki tangkasa'na tau battua anynyomba mae ri Allata'ala? 2 Ebara' angkana le'ba' tojeng-tojemmi nitangkasi battu ri dosaya anjo tau anynyombaya ri Allata'ala, tantu tenamo nasa'ring nadoraka kalenna ke'nanga. Siagang tantu tenamo naparallu taua assare koro'bang. 3 Mingka ma'nassami angkanaya anjo koro'bang nipassareanga taung-taung ampakaingaki ke'nanga ri dosa-dosana. 4 Nasaba' tena memang nakkulle anjo cera' sapia siagang cera' bembe lakia ampa'lanynyaki dosaya. 5 Iaminjo saba'na na ri wattunna antama' Almasi ri linoa, Nakana mae ri Allata'ala, “TaerokaKi' ri koro'banga siagang passarea; mingka appasadia maKi' tubu untu' iNakke. 6 TaKingaiai koro'bang nitunua yareka koro'bang untu' ampammopporangai dosaya. 7 Nampa Kukana, ‘INakkemi anne, O, Allata'ala BattuMa' untu' anggaukangi erotTa, situru' apa tattulisika lalang ri Kittaka ri sesena BatangkalengKu.’ ” 8 Uru-uruna Nakana Almasi, “TaerokaKi' ri koro'banga siagang passarea; taKingaiai koro'bang olo'-olo' nitunua siagang koro'bang untu' ampammopporangai dosaya.” Akkana kammami anjo Almasi, manna pole nanipassareang anjo sikontu koro'banga situru' hukkung-hukkung agama Yahudia. 9 Le'baki anjo Nakanamo Almasi, “INakkemi anne, o Allata'ala! BattuMa' untu' anggaukangi erotTa.” Jari Napela'mi Allata'ala anjo koro'bang salloa, nampa Nasambei siagang koro'bang KalenNa Almasi. 10 Le'ba'mi Nagaukang Isa Almasi apa Nakaerokia Allata'ala, na Napassareang KalenNa a'jari koro'bang. Poro sikaliji bawang Nagaukang untu' satunggu-tungguna, na nitangkasimo dosa-dosata ngaseng. 11 Sikamma imang Yahudia massing nagaukangi jama-jamang allo-allona; siagang a'mole-molei assare koro'bang natuli sangkammanaja anjo koro'bang napassareanga. Mingka sikamma anjo koro'banga tena sikali nakkulle natangkasi dosaya. 12 Na Almasi, poro se'reji bawang koro'bang Napassareang untu' ampammopporangi dosa-dosata; anjo koro'banga a'matu-matumi sa'genna satunggu-tungguna. Le'baki Napassareang Almasi anjo koro'banga ammempomi ri sa'ri kananNa Allata'ala, ammarenta siagang Allata'ala. 13 Na kamma-kamma anne attayammi Almasi, sa'genna Nasuro Allata'ala musu-musunNa anynyomba ri dallekanNa. 14 Jari, tete ri se'rea koro'bang, Napasukku'mi Almasi matangkasa'na sikamma taua battu ri dosaya. 15 Ri anjo passalaka a'jari sa'bi tommi RohNa Allata'ala mae ri katte. Nakana RohNa Allata'ala, 16 “ ‘Iaminne parjanjiang laKupareka siagang ke'nanga ri allo-allo labattua, laKuboliki hukkung-hukkungKu lalang ri atinna ke'nanga siagang laKutulisiki lalang ri pikkiranna ke'nanga.’ ” 17 Nakana pole Allata'ala, “LaKukaluppaimi dosa-dosana siagang sikamma kaja'dallanna ke'nanga.” 18 Jari, le'ba'mi nipammopporang anjo dosa-dosaya siagang sikamma kaja'dallanga; jari tenamo naparallu pole nipassareang koro'banga untu' nipammopporanna dosaya. 19 Jari sari'battangku ngaseng, kamma-kamma anne barani maki' antama' ri Kamara' Kaminang Matangkasaka, lanri kamateanNa Isa. 20 Le'ba' maki' Nasungkeang Isa se're oloang beru, iamintu oloang assarea katallassang. Anjo oloanga iamintu battu ri gordenga, iamintu BatangkalenNa Isa. 21 Na kamma-kamma anne nia'mo imang lompota, anjagayai Balla'Na Allata'ala. 22 Lanri kammana, mae mako nakia'reppese' ri Allata'ala siagang tulusu' pa'mai' kammayatompa tappa' majarre'; siagang pa'mai' le'baka nitangkasi battu ri kasalanga, kammayatompa tubu le'baka nitangkasi je'ne' maci'nong. 23 Paralluko anna'gala' jarre' mae ri panrannuang le'baka nimangakui, nasaba' tappakki' angkanaya laNarupai janjinNa Allata'ala. 24 Siagang paralluki' massing sijampangi; sollanta akkulle sipakainga' tojeng-tojeng anggaukangi apa-apa bajika, kammayatompa mangngamaseanga ri paranta tau. 25 Teako takkaluppai tuli a'rappungang, sangkamma tau maraenga. Ikatte paralluki' la'bi tamalanre massing sipakajarre'; nasaba' niassengi angkanaya tasalloami Nabattu poleang Batara. 26 Nasaba' punna le'ba'mo nipabattu biritta tojenga battua ri Allata'ala mae ri katte, mingka tuli nipakkunjungianna nigaukang dosaya, tenamo koro'bang lakkulle antangkasi dosata. 27 Se're mami sadia untu' ikatte, iamintu andallekanga mae ri pangadelanNa Allata'ala siagang pepe' pangngalarroiNa, lantunuai sa'genna la'busu' tau mangngewaya ri Allata'ala! 28 Tau tenaya namannuruki ri hukkung napassareanga Musa musti nihukkung matei, punna rua tallumo tau a'jari sa'bi ma'nassana salai. 29 Teaimi sipato' la'bi battala'na musti hukkunganna tau angngonjo'-ngonjokangai Ana'Na Allata'ala. Napakatunai cera' passijanjianNa Allata'ala, iamintu kamateanNa Almasi antangkasiai dosana. Nahinai Roh assarea passare malammoro'. 30 Ikatte niassengi inai anjo angkanaya, “La'balasakA'! LassareA' hukkungang!” kammayatompa angkanaya, “LaNaadeli Batara Umma'Na.” 31 Teai sipato' appakamalla'na punna tu'guru' taua antama' ri limanNa Allata'ala Mattallasaka! 32 U'rangi antekamma lampa-lampana katallassannu ngaseng ri wattu allaloa. Anjo wattua, ri wattunnu Nasiori cayaNa Allata'ala, teai sipato' jaina pa'risi'nu; mingka tuli majarrekko attahang siagang akkareso. 33 Nia' wattunna nunihina siagang nigau' takamma-kamma ri dallekanna tau jaia. Nia' todong wattunna numminawang todong ampisa'ringi sessana tau nigau' kammaya. 34 Siagang amminawang tongko ampisa'ringi si'nana tau nitarungkua. Siagang ri wattunna nialle passa apa-apannu, nupassareangi siagang sannang pa'mai'. Nasaba' nuassengi angkanaya nia' ijapa ri kau apa la'bi bajikanganga, akkullea attahang sa'genna satunggu-tungguna. 35 Lanri kammana, teako tappu' panrannuangngi. Nasaba' punna jarre' tappa'nu, nia' pahala lompo untu' ikau! 36 Paralluko sa'bara', sollanna akkulle nugaukang ero'Na Allata'ala. Na lanri kammana lanutarimai apa Napa'janjianga Allata'ala. 37 Nasaba' nia' tattulisi' lalang ri Kittaka angkanaya, “Sinampe' mami nalania'mo battu Ia lalintaka battu; talaNapamonokami wattu kabattuanNa. 38 Na ia ummakKu annabaya latappa'mi siagang lattallasa'mi; mingka punna nia' ri ke'nanga lammono'boko, tasannangai pa'maikKu mae ri ia.” 39 Ikatte anne teaiki' umma' ammono'bokoa siagang sala oloanga. Mingka ikatte umma' matappakki' mae ri Allata'ala siagang nipasalamaka ri Allata'ala.
1 Tappa' battuanna matappa' tojeng-tojeng mae ri apa-apa nirannuanga; battuanna mattantumi panrannuanta ri apa-apa tanicinika. 2 Nasaba' lanri tappa'na, naningaimo ri Allata'ala tau ri jammang rioloa. 3 Lanri tappatta, nanipahammo angkanaya anne linoa nipa'jari battu ri KananNa Allata'ala; jari, apa-apa akkullea nicini', kajariang battu ri apa-apa takkullea nicini'. 4 Lanri tappa'na, nanapassareang Habel koro'banga mae ri Allata'ala, iamintu koro'bang bajikanganga na koro'bang napassareanga Kain. Lanri ia anjo tappa'na, nanitarimamo Habel ri Allata'ala a'jari tau baji'; nasaba' ma'nassami angkana nitarimai ri Allata'ala koro'banna. Matemi Habel, mingka lanri anjo tappa'na, tuli a'bicarana ija sa'genna kamma-kamma anne. 5 Lanri tappa'na, natamateamo Henokh; passangalinna niangkaki siagang nierangi mae ri Allata'ala. Tena manna sitau akkulle ambuntuluki, lanri niangka'mi ri Allata'ala. Nia' tattulisi' lalang ri Kittaka angkanaya ri tenanapa niangkaki Henokh, le'ba'mi napakasannang atinNa Allata'ala. 6 Takkulleai taua ampakasannangi atinNa Allata'ala, punna tena natappa' ri Allata'ala. Nasaba' inai-nai battu mae ri Allata'ala, musti tappaki angkanaya ma'nassa nia' Allata'ala, kammayatompa angkana laNasarei pa'balasa' Allata'ala sikamma tau amboyayai. 7 Lanri tappa'na nanatarimamo Nuh pappakainga' Napassareanga Allata'ala mae ri ia; iamintu passala'na apa-apa lakajarianga tenaya nakkulle nacini' Nuh. Naturukimi Nuh kananNa Allata'ala. Jari appare'mi se're biseang lompo. Nama'nassa iaminjo biseang lompoa ampasalamaki kalenna siagang pole sikamma ana'na siagang tubai'-bainena. Jari nihukkummi linoa, mingka Nuh nipattojemmi ri Allata'ala nikana tau baji' lanri tappa'na. 8 Lanri tappa'na, naturukimi Abraham ero'Na Allata'ala ri wattunna nikio' siagang nisuro ri Allata'ala a'lampa mange ri pa'rasangang Napa'janjianga Allata'ala mae ri ia. A'lampami Abraham manna natanaassenga pa'rasangang lanatujua. 9 Lalang tappa'na ammantammi Abraham ri anjo pa'rasangang Napa'janjianga Allata'ala, a'jari kamma tu battu-battu. Ammantangi Abraham anjoreng, lalang ri kema napareka. Kamma tomminjo Ishak siagang Yakub, le'baka todong antarimai anjo janji kammaya battu ri Allata'ala. 10 Nasaba' natayangi Abraham kota eroka Nabangung Allata'ala irate ri pammentengang majarreka. 11 Lanri tappa'na Abraham, nakkullemo angappa ana' battu ri Sara, manna pole natoa dudumo Abraham, siagang natamanang pole Sara. Tappaki Abraham angkanaya ma'nassa laNarupai janjinNa Allata'ala. 12 Manna pole nakanamo tulamate duduamo kalenna Abraham anjo wattua, mingka battu ri iami ammumba jaia sossorang, tenaya nakkulle nibilang jaina — sanrapanga bintoeng ri langi' yareka kassi' ri biring tamparang jaina. 13 Sikamma anjo ke'nanga tappa' ngasengi sa'genna mate. Tenapa natarimai ke'nanga anjo apa-apa Napa'janjianga Allata'ala, mingka poro nacini' bellaji ri pa'mai'na ke'nanga siagang panrannuang. Nalalang kammana anjo napappicinikammi ke'nanga angkanaya poro tau battu-battuji ke'nanga ri anne linoa. 14 Sikamma tau akkana kammaya napakasingara' baji'mi angkanaya a'boyai ke'nanga pa'rasangang lanapa'jaria butta pa'rasanganna ke'nanga. 15 Teai anjo pa'rasangang le'baka nabokoi nanawa-nawa ke'nanga. Nasaba' punna kamma, jaimi kasampatanna ke'nanga untu' lammotere' ri anjo pa'rasanganga. 16 Mingka ma'nassami angkanaya nakkuki ke'nanga ri se'reang pa'rasangang la'bi bajika, iamintu pa'rasangang niaka ri suruga. Lanri kammana minjo natena nasiri'-siri' Allata'ala nikio' Allata'ala ri ke'nanga. Nasaba' le'ba'mi Napasadiang Allata'ala ke'nanga se're kota untu' ke'nanga. 17 Lanri tappa'na todong, nanapassareammo Abraham ana'na, iamintu Ishak, a'jari koro'bang, ri wattunna niso'ri tappa'na ri Allata'ala. Le'ba'mi nijanji Abraham ri Allata'ala mingka narellakang tonji Abraham anjo ana' sitau-taua. 18 Le'baki angkana Allata'ala mae ri Abraham, Nakana, “Battu ri iaminne Ishak lanugappa sossorang le'baka Kupa'janjiang mae ri kau.” 19 Tappaki Abraham angkanaya koasai Allata'ala ampattallasa' poleangi Ishak battu ri kamateanga — jari akkulle nikana natarimami Abraham ammotere' Ishak battu ri kamateanga. 20 Lanri tappa'na, nanapa'janjiammo Ishak sikamma barakkaka mae ri Yakub siagang Esau untu' allo ri boko. 21 Lanri tappa'na, na ri tenanapa namate Yakub, nabarakkakimi ana'-ana'na Yusuf, ri wattunna napatanjeng kalenna ri ulu takkanna nanynyomba ri Allata'ala. 22 Lanri tappa'na, na ri wattunna la'birimmo mate Yusuf, nanapau riolomo angkanaya lassulu'mi ammotere' umma' Israel battu ri butta Mesir; kammayatompa ammoli'mi pasang angkanaya lanipaanteikamma sallang maya'na punna matei. 23 Lanri tappa'na, nanicokkomo Musa ri tau toana tallum bulang sallona ri wattunna beru nilassukang. Niciniki ri tau toana angkanaya sanna' ga'gana anjo anaka, siagang tena namalla' ke'nanga ambalang parekangi parentana karaenga. 24 Lanri tappa'na, na ri wattunna lompomo Musa, taerokai nikana ana'na ana' tubainena karaeng Mesir. 25 Nangaiangangi angkasiaki sessaya siagang umma'Na Allata'ala naia angkasiaki kasannanganga poro untu' sinampekang lalang ri katallassang kadorakanga. 26 Naassengi Musa angkanaya la'bi lompoangangi anggaranna nipakatunaya lanri Karaeng Mappasalama' Napa'janjianga Allata'ala, naia anggappaya sikamma kakalumanynyangang battu ri butta Mesir; nasaba' pahala untu' allo ri bokoa narannuang Musa. 27 Lanri tappa'na, natamallakamo Musa ri pangngalarroinna karaenga nanabokoi butta Mesir. A'lampami Musa mange ri tampa' lanatujua sangkamma le'ba' angkanaya le'ba'mi nacini' anjo Allata'ala tenaya nakacinikang. 28 Lanri tappa'na nappare'mo Passua'-suarrang untu' Allo Kalappassang; siagang nasuro ba'basa'mi cera' olo'-olo' sikamma tompo' pakke'bu'na tu Israelka, sollanna tanibunoa ana' bungasa'na ke'nanga ri Malaeka' Paalle Nyawaya. 29 Lanri tappa'na, nakkullemo tu Israelka a'limbang ri Tamparang Ejaya, sangkamma le'ba' angkana irateji ri butta kalotoroka a'jappa ke'nanga. Naia tu Mesirka nia'lu'mi ri anjo tamparanga, ri wattunna nacoba todong ke'nanga a'limbang. 30 Lanri tappa'na tu Israelka, naruntummo sikamma tembo'-tembo'na kota Yerikho ri wattunna le'ba' nainroi ke'nanga tuju allo sallona anjo tembo'-tembo'na kotaya. 31 Lanri tappa'na todong, natanibunoa todong anjo baine pasundala' niarenga Rahab, siagang sikamma tau angngewayai Allata'ala; nasaba' natarima bajiki mata-matana tu Israelka. 32 Jari, akkullei jai pole lakubicara, mingka tagannakkai wattungku. Nasaba' tenapa nakurapiki kupau Gideon, Barak, Simson, Yefta, Daud, Samuel, siagang na'bi-na'bia. 33 Lanri tappa'na ngaseng ke'nanga, nanabetamo sikamma karaeng ammarentaya. Nagaukangi ke'nanga apa-apa tojenga, sa'genna natarimamo apa Napa'janjianga Allata'ala. Natongkoki ke'nanga bawana singa-singaya, 34 nabunoi pepe' lompoa, tassalai ke'nanga battu ri pattobo' pa'danga. Tena kagassinganna ke'nanga, mingka a'jari kassaki; porei ke'nanga lalang ri pa'bundukanga sa'genna nabeta ngaseng pasukang bansa maraenga. 35 Lanri tappa'na sikamma tubainea nanagappamo ammotere' sikamma taunna le'bakamo mate. Nia' tommo ampassareangi kalenna nisessa sa'genna mate; taerokami nilappassang, lanri ero'na nipattallasa' poleang nanagappa katallassang la'bi bajikanganga. 36 Nia' nicau-cau, nicambo', nisikko' rante nampa nipantama' ri tarungkua. 37 Nia' nisambilai batu sa'genna mate, nia' nisamballe siagang garagaji, kammayatompa nibuno siagang pa'dang. Mange-mangei a'lampa ke'nanga ammakeang kukkulu' gimbala' yareka kukkulu' bembe; kasi-asi tallasa'na ke'nanga, nigau' takamma-kammai siagang nisessai. 38 Anne linoa teai tampa' siratang mae ri ke'nanga. Mangei ri parang lompoa ke'nanga siagang bulu'-buluka, nammantang lalang ri kali'bong batua yareka kali'bong buttaya. 39 Teai sipato' lompona pammetang nagappaya ngaseng anjo taua lanri tappa'na ke'nanga! Mingka tenapa natarimai anjo apa Napa'janjianga Allata'ala; 40 nasaba' nia' ero' Nagaukang Allata'ala mae ri katte, ia la'bi bajikanganga. Ia eroka Nagaukang iamintu punna tena nasipa'rurungang ke'nanga siagang ikatte, takkulleai ke'nanga a'jari sukku' baji'na.
1 Jari, ri passala'na ikatte, jai sa'bi angkulilingiki'! Lanri kammana mae mako, nanipela' ngaseng sikontu apa-apa ambattaliaki' siagang sikontu dosa tuli a'dakkika ri katte. Siagang mae mako nakituli appa'lumba mange ri dallekang. 2 Parallui tuli tattuju paccinitta mae ri Isa, nasaba' Iami ampabangungi siagang amparakai tappatta battu ri pakkaramulanna sa'genna kala'busang. Attahangi Isa angkasiaki sessaya ri kayu sallika! TaNajampangiai angkanaya anjo matea ri kayu sallika sannaki appakasiri'na. Iaji bawang Nau'rangi karannuang laNakasiaka sallang. Nakamma-kamma anne ammempomi ri sa'ri kanang empoang kala'biranNa Allata'ala, ammarenta siagang Allata'ala. 3 Alle sai pikkiri' antekamma sessaNa Isa andallekangi sikamma tu dorakaya sannaka batena angngewa mae ri Ia! Lanri kammana, teako la'ba pa'maiki siagang teako tappu' panrannuangi. 4 Nasaba' lalang nuusahaina angngewai dosaya, tenapa nasa'genna musti nia' cera' tassolong. 5 Siagang teako kaluppai pappakainga'Na Allata'ala, ia Napassareanga mae ri kau sangkamma mae ri ana'-ana'Na! Nakana Allata'ala, “AnakKu, parhatikangi baji'-baji' pangngajara'Na Batara, nutea la'ba' pa'maiki punna Nakalarroiko. 6 Nasaba' Naajaraki Batara sikamma tu Nakamaseanga, na Nacambo' tu Naakuia salaku ana'Na.” 7 Parallui nutarima paccambo' battua ri Allata'ala salaku pangngajara' battua ri manggenu. Nasaba' niakka ana' tale'baka nihukkung ri manggena? 8 Punna tena nunihukkung todong sangkamma yangasenna ana'-ana'Na maraenga, battuanna teaiko ana' tojeng-tojenNa. 9 Nia' manggeta ri lino. Naajarakki' siagang nipakala'biriki. Jari, la'biangampa mae ri Mangge rohanita, niaka ri suruga, tantu musti la'bi tundukki' mae ri Ia sollanta attallasa'. 10 Punna naajarakki' tau toata ri anne linoa nia' batasa'na, situru' apa nakanaya baji' ke'nanga. Mingka punna Naajarakki' Allata'ala, anjo untu' kabajikang kalenta tonji, sollanta akkulle turu' siagang Ia a'jari matangkasa'. 11 Memang, ri wattunta Naajara', tena nasannang pa'maitta ri anjo hukkunganga, passangalinna poro a'jari la'baji pa'maitta. Mingka ri le'ba'na anjo, ikatte tau le'bakamo niajara', passabakkang iaminjo hukkunganga na kimannurukimo ri ero'Na Allata'ala lalang katallassanta; sa'genna a'jari salewangammo nisa'ring kalenta. 12 Lanri kammana, pakkassakangi anjo limannu lammaya siagang anjo kulantu'nu annekkereka! 13 Oloang lapparaka tuli nuolo a'jappa, sollanna tena natassala ura'na anjo bangkeng lammanu, mingka a'jari bajiki ammotere' ba'lalo. 14 Usahako sollannu assiama' siagang yangasenna taua lalang katallassannu; kammayatompa usahako sollannu a'jari tangkasa' ri dallekanNa Batara. Nasaba' punna takammaya anjo tena manna sitau akkulle anciniki Batara. 15 Jagai sollanna tena manna sitau ambokoi kabajikang pa'mai'Na Allata'ala; sollanna tena nania' a'jari sanrapang lamung-lamung niaka racunna ri tangnga-tangnganu sa'genna appa'nia' kasukkarang siagang jai tau napanraki siagang racunna. 16 Jagai sollanna tena nanunia' a'gau' sala yareka tanuanggara' bajikai katallassang rohania, sangkamma le'baka nagaukang Esau. Nabalukangi empoanna salaku ana' bungasa', passabakkang sipanne ca'di kanre. 17 Nanuassemmo angkanaya ribokoanganna anjo, eroki Esau anggappa barakka' battu ri manggena, mingka tanisareai. Nasaba' manna pole angngarru'-arruki appala' lanapakabaji' anjo kasalanna, mingka tenamo kasampatang. 18 Tena nasangkamma apa-apa nudallekanga siagang apa-apa nadallekanga bansa Israel riolo. Nasaba' ia ke'nanga andallekangi apa akkullea nita'gala', iamintu Bulu' Sinai siagang pepe'na a'rinra-rinraya; andallekangi ke'nanga sassang makkappu' siagang anging lompo; 19 andallekangi ke'nanga sa'ra tarompe', siagang sa'ra teai sipatoka heba'na. Ri wattunna nalangngere' anjo sa'raya, napala' dudumi ke'nanga sollanna tenamo na'bicara pole anjo sa'ra-sa'raya mae ri ke'nanga. 20 Mingka tanatahangai ke'nanga allangngereki anjo parenta napabattua anjo sa'raya. Nasaba' nakana anjo sa'raya, “Sikamma tau anseroai anne buluka, baji' naolo'-olo', yareka manna pole inai, musti nisambilai batu sa'genna mate.” 21 Teai sipato' heba'na anjo apa nacinika tu Israel; sa'genna nakanamo Musa, “Mallakka' siagang annekkerekka'!” 22 Mingka ikau, battu mako ri Bulu' Sion siagang kotaNa Allata'ala assarea katallassang, iamintu kota Yerusalem niaka ri suruga siagang assa'bu-sa'bu malaeka'na. 23 Pa'rappungang sannaka suara'na nuhaderi — iamintu passibuntulanna ana'-ana' bungasa'Na Allata'ala, ia niaka areng-arenna tattulisi' lalang ri suruga. Allata'ala nudallekang, Hakinna sikontu rupataua. Roh-rohna tau bajika siagang tau le'bakamo nipasukku' tallasa'na nudallekang. 24 Isa nudallekang patteteang amparekai anjo parjanjiang berua; cera' nipa'ba'basaka nudallekang, iamintu cera' ampattantui la'bi baji'na apa-apaya, naia napattantua cera'na Habel. 25 Lanri kammana, tutu laloko, gassingka taerokako ampilangngeri kananNa Tau ampabattuai biritta battua ri Allata'ala. Ia tau tenaya naero' ampilangngeri biritta nipabattua battu ri Allata'ala lalang ri anne linoa, takkulleai allariangi kalenna. La'biangampa ikatte anne, allangngerekai anjo a'bicaraya battu ri suruga! Punna taerokaki' ampilangngeri, antekamma bateta lakkulle ta'lappasa'. 26 Anjo wattua nipata'bangkai linoa ri sa'ranNa. Mingka kamma-kamma anne a'janjimi pole Nakana, “LaKupata'bangka iji sikalipi pole, teai linoa bawang, mingka langika pole.” 27 Bicara angkanaya “sikalipi pole” Napa'nassai angkanaya lanigoccangi siagang lanipelaki sikontu lino le'baka nipare', sa'genna ia mami ammantang sikamma tenaya nakkulle ta'goccang. 28 Lanri kammana, paralluki' appala' sukkuru' mae ri Allata'ala, lanri nitarimana battu ri Allata'ala, kakaraengang tenaya nakkulle ta'goccang. Paralluki' appala' sukkuru' siagang mappakala'biri' anynyomba mae ri Ia siagang malla', situru' cara Nakaerokia KalenNa Allata'ala. 29 Nasaba' anjo Allata'alata sanrapangi pepe' appakamutunga.
1 Paralluki' tuli sikamaseang salaku tu Karisteng assari'battanga. 2 Teako battala' pa'maiki antarimai ri balla'nu tau tenayapa nuassengi. Nasaba' lanri nugaukanna anjo kammaya, nale'ba' nia' tau antarimai malaekaka ri balla'na, na tanaassenga angkanaya malaeka' anjo natarimaya. 3 U'rangi tau niaka lalang ri tarungkua, sanrapang angkana nia' tongko lalang ri tarungkua siagang ke'nanga. Kammayatompa u'rangi tongi tau nigau' takamma-kammaya, sanrapang angkana ikau nipakamma tongko anjo. 4 Sikontu taua musti napappicinikangi angkanaya napakalompoi nikanaya pa'nikkang; iaminjo saba'na naparallu massing tamalanrea tukkalabinia sijarreki ri pakkalabinianna. Inai-nai a'gau' sala yareka assalimara' laniadeli ri Allata'ala. 5 Teako eroki nikoasai ri sipa' angngondang dudua doe' lalang katallassannu, mingka parallui nukasukkurang apa-apa niaka ri kau. Nasaba' le'baki Nakana Allata'ala, “Tena nalaKubalang parekangko yareka tena nalaKubokoiko.” 6 Lanri kammana kibaranimo angkana, “Batara Pannulungku, tenamo nakumalla'. Apa lakkulle nagaukang taua mae ri nakke?” 7 Teako kaluppai sikamma pamimpinnu, ampabattuai pappasanNa Allata'ala mae ri kau. Parhatikangi antekamma batena attallasa' siagang antekamma batena mate ke'nanga, kammayatompa contoimi katappakkanna ke'nanga. 8 Tuli kammana Isa Almasi, baji' na riolo, kamma-kamma anne, siagang sa'genna satunggu-tungguna. 9 Teako sarei kasampatang ajarang mara'-maraenga ampakalinguko. Musti nipakajarreki atinta lanri kabajikang pa'mai'Na Allata'ala; iaminjo bajika mae ri katte; jari teai paratorang-paratoranna agamaya ri passala'na kanre-kanreanga. Sikamma tu rioloa, anturukiai anjo paratorang-paratoranga, tena ngaseng nagappai matu-matunna. 10 Ikatte nia' tampa' pakkorobangnganta untu' assare koro'bang mae ri Allata'ala. Na anjo imang-imang allayania lalang ri KemaNa Batara, tena ha'na angkanrei anjo koro'bang niaka irate ri anjo tampa' koro'banga. 11 Cera' olo'-olo' nipassareanga a'jari koro'bang untu' antangkasi dosaya, nierangi ri imang lompoa mange ri Kamara' Kaminang Matangkasaka; mingka kalenna anjo olo'-oloka nitunui ri pantaranganna kemaya. 12 Iaminjo saba'na napantaranganna todong pakke'bu' lompona kotaya mate Isa, sollanna nakkulle Natangkasi dosana sikontu umma'Na, lanri anjo cera' KalenNa. 13 Lanri kammana, mae mako nakia'lampa mae ri Ia, ri pantaranganna pa'balla'-ballakanga, nakimminawang todong nihina siagang Ia. 14 Nasaba' tena pammantanganta untu' satunggu-tungguna ri lino; ikatte a'boyaki' pammantangang untu' labattua. 15 Lanri kammana, tete ri Isa, paralluki' tuli mammuji-muji ri Allata'ala; iaminjo a'jari koro'bang sukkurutta mae ri Ia, nipassareanga lalang kana-kana nipaua untu' ampakala'biriki arenNa. 16 Teako takkaluppai a'gau' baji' siagang situlung-tulung, nasaba' iaminne kammaya koro'bang-koro'bang ampakasannangai atinNa Allata'ala. 17 Turuki parentana pamimping-pamimpinnu, siagang tundukko mae ri ke'nanga. Nasaba' tuli naparhatikangi ke'nanga nyawanu, namusti attanggong jawaki ke'nanga mae ri Allata'ala. Punna nuturuki ke'nanga, akkullei ke'nanga anjama siagang sannang pa'mai'na; punna tena, akkullei a'jari si'na pa'mai'na ke'nanga anjama, napunna kamma latena matu-matunna mae ri kau. 18 Tuli appala' doangko untu' ikambe. Sanna' tappa'na angkana ci'nongi ati mailalanna ikambe, nasaba' ilalang sikontu-kontuna, tuli eroki ikambe anggaukangi apa-apa tojenga. 19 Kalengku pole ampala' dudui, sollanna nupappala' doanganga', sollanna linta' Allata'ala ampoteranga' mae ri kau. 20 Napattallasa' poleammi Allata'ala Batarata Isa battu ri kamateanga. Lanri iaminjo kamateanNa nakamma-kamma anne a'jarimi Pakalawaki Mala'biri' mae ri katte, sanrapanga gimbala'Na ngaseng. Ia tomminjo kamateanNa ampattantui parjanjiang mannannungang Napareka Allata'ala siagang ikatte. 21 Poro Allata'ala, iamintu kabattuanna barakka' kasalewanganga ampassukku' ngasengko siagang sikontu apa-apa baji', nuparalluanga untu' anggaukangi ero'Na. Poro tete ri Isa Almasi, naNagaukang Allata'ala lalang ri kalenta apa Nakaerokia. Poro tuli nipuji-puji Almasi sa'genna satunggu-tungguna! Aming. 22 Kupalaki sollanna nuparhatikang anne sikamma pappakaingakku siagang sa'bara', nasaba' tenaja nala'bu dudu anne surakku. 23 Parallui nuasseng angkanaya nilappassammi sari'battanta Timotius battu ri tarungkua. Punna battu sallang anrinni ri tampakku, kuerang tonji antu sallang battu angkunjungiko. 24 Pabattuanga' sallangku mae ri sikamma pamimpinnu siagang mae ri sikontu Umma'Na Allata'ala. Tarima tommi sallang battua ri sikamma sari'battanta ri Italia. 25 Poro nibarakkaki ngasengko ri Batara.
1 Natarimai sikontu Umma'Na Allata'ala, ia niaka tassiara' ri sikontu linoa. Sallang battu ri nakke Yakobus, atanNaya Allata'ala siagang Batara Isa Almasi. 2 Sikamma sari'battangku! Punna nukasia' a'rupa-rupaya paccoba, parallui nubilang upa' kalennu. 3 Nasaba' nuassemmi, angkanaya punna attahangko ri tappa'nu mae ri Batara ri wattunnu nataba paccoba, wassele'na iamintu: a'jari mako tau sa'bara'. 4 Boli'mi kamma pila' katambang sa'bara'nu sa'gennu a'jari makassa' siagang sukku' kammayatompa tenamo apa-apa kakurangannu. 5 Punna nia' tau ri kau ngaseng kurang pangngissengang, parallui nupappalakkang battu ri Allata'ala, sollanna nisare pangngissengang battu ri Allata'ala; nasaba' yangasenna taua akkullei Nasare Allata'ala lanri lammoro' pa'mai'Na, kammayatompa lanri pangngamaseanNa. 6 Inai-nai appala', musti tappaki appala'; takkulleai bata-bata. Nasaba' inai-nai bata-bata, sanrapangi bombang ri tamparang nairika anging anrai'-kalau'. 7 Anjo tau kammaya tena nattantu pikkiranna; takkulleai napattantu baji' sikontu apa-apa nagaukanga. Lanri kammana, tena tommo nakkulle ma'minasa untu' langgappa apa-apa battu ri Batara. 9 Tau Karisteng kasi-asia parallui marannu punna nipakatinggi ri Allata'ala. 10 Kammayatompa tau Karisteng kalumanynyanga parallu tongi marannu punna nipakatuna ri Allata'ala. Nasaba' lalanynyaki anjo tau kalumanynyanga sanrapang rukuka. 11 Ri wattunna battu alloa nanitaba ri bambang sarrona, kalumemmi anjo rukuka sa'genna ru'rusu' bungana siagang tappela'mi kaga'ganna. Kamma tomminjo mae ri tau kalumanynyanga: laancuruki ri wattunna napajappa usahana. 12 Maupaki tau sa'baraka ri wattunna nataba paccoba. Nasaba' punna akkullemi attahang lalang ri anjo paccobaya, lanatarimami passawallanna, iamintu katallassang le'baka Napa'janjiang Allata'ala mae ri sikamma tau mangngamaseanga ri Ia. 13 Punna nia' tau nigoda ri anjo paccoba kammaya, takkulleai angkana, “Anjo pa'godaya, pa'goda battu ri Allata'ala,” nasaba' takkulleai Allata'ala nigoda ri kaja'dallanga, kammayatompa tena todong nale'ba' nagoda taua, manna pole inai. 14 Mingka iapa nata'goda se'rea tau punna nipagio' siagang nikai' ri kaerokang ja'dala'na. 15 Nampa, punna naturukimo anjo kaerokang ja'dala'na, iaminjo allassukang dosa; napunna jarre'mo anjo dosaya, iaminjo angngerang kamateang. 16 Sikamma sari'battangku, sannaka kukarimangnginna; teako kau eroki nitipu! 17 Sikontu passare bajika siagang hadia sukkuka, sangnging battu ngaseng ri suruga, nipaturunga ri Allata'ala, ampa'jariai sikontu apa-apa singaraka ri langika. Iami Allata'ala tamamminraya, tenaya Nammoli' bayang-bayang lanri pamminroanna apa-apaya. 18 Lanri ero' KalenNa na Napa'jariki' ana'-ana'na tete ri kana matojenNa. Nagaukammi anjo kammaya sollanta anggappa tampa' lomoro' se're ri tangnga-tangngana sikontu apa-apa attallasa' le'baka Napa'jari. 19 Sikamma sari'battangku, sannaka kukarimangnginna! Parhatikangi anne baji'-baji'! Sikontu taua musti lintaki mappilangngeri, mingka tena nakkaro-karo ero' a'bicara siagang tena nalinta' larro. 20 Inai-nai larro takkulleai nagaukang apa-apa bajika, ia nakarannuanga atinNa Allata'ala. 21 Lanri kammana, pela' ngasemmi sikontu kabiasang ra'masaka siagang ja'dalaka. Tarimami siagang ati matuna kana-kana Nalamunga Allata'ala lalang ri atinnu, nasaba' anjo kana-kanaya nia' kakoasanna untu' ampasalamakko. 22 Parallui nugaukang apa-apa Napaua Allata'ala; teako poro nullangngere'naja bawang, sa'genna sangkammami nuballe-ballei kalennu. 23 Inai-nai allangngereki kananNa Allata'ala, mingka tena nagaukangi, sanrapangi tau ancinikai rupanna sitojennaya ri carammenga. 24 Le'baki naparhatikang baji'-baji', a'lampami siagang nakaluppaimi angkana antekamma anjo rupanna. 25 Anjo hukkunNa Allata'ala sukkuki siagang makoasai untu' ampakabebasaki rupataua. Na inai-nai ansalidiki siagang amparhatikang baji'-bajiki kammayatompa anggaukangi anjo hukkung-hukkunga, jari tena na nalangngere'ja bawang nampa nakuluppai, iami lanibarakkaki ri Allata'ala lalang sikontu apa-apa nagaukanga. 26 Punna nia' tau nakana kalenna tutu ri agamaya, mingka tena nakatutui lilana, anjo taua naballe-balleimi kalenna; tenamo matu-matunna sambayanna. 27 Tutu situlusu'na siagang sitojennaya ri agamaya situru' paccini'Na Allata'ala, iamintu annulunga ana'-ana' kukang siagang janda-janda kasi-asi, kammayatompa mangngatutui ri kale sollanna tena nanipanraki ri anne linoa.
1 Sikamma sari'battangku! Salaku tau tappa' mae ri Batara Isa Almasi, Batara Kaminang Mala'birika, tea' laloko passimmara'-maraengi parannu tau situru' apa nacinika mata. 2 Nasaba' punna nia' se're tau kalumanynyang ammake cincing bulaeng siagang pakeang ga'ga-ga'ga battu ri passe're-se'reannu, nampa nia' pole tu kasi-asi ammakeang kekke'-kekke', 3 la'bi nupakala'birangammi anjo tau ammakeang ga'gaya. Nukanamo ri ia, “Anrinniki' ammempo ri kadera kaminang bajika.” Mingka mae ri anjo tu kasi-asia nukanamo, “Anjoreng mako mae ammenteng,” yareka nukana, “Anrinni mako ri daparaka ammempo.” 4 Lanri kammana anjo batenu, nupassimmara'-maraemmi parannu tau siagang pikkirang ja'dala'mi nupake angnganggaraki parannu tau. 5 U'rangi sikamma sari'battangku, sannaka kukarimangnginna! Ia tau nicini' kasi-asia ri anne linoa, iami nipilei ri Allata'ala untu' a'jari tu kalumanynyang lalang ri katappakkanga. Iaminjo tau kammaya la'jari Umma'Na Allata'ala situru' Napa'janjianga Allata'ala mae ri sikamma tau angkamaseangai. 6 Mingka ikau nuhinai tu kasi-asia; na sikontutojenna iaji anjo tu kalumanynyanga anjallakkangko siagang anre'resangko mange ri pangadelanga! 7 Iaminjo ke'nanga anghinai areng mala'biri' nutarimaya battu ri Allata'ala! 8 Nugaukammi annabaya, punna nugaukang hukkung Kakaraengang niaka tattulisi' lalang ri Kittaka angkanaya, “Paralluko angkamaseangi parannu tau, sangkamma nukamaseanna batangkalennu.” 9 Mingka punna nupassimmara'-maraeng parannu tau situru' apa nacinika mata, a'gau' dosa mako, siagang napa'nyatami hukkunNa Allata'ala angkanaya nudakkaimi hukkunga. 10 Inai-nai andakkai kalase'renna hukkunNa Allata'ala, sikontutojenna nadakkai ngasemmi anjo hukkunga. 11 Nasaba' Ia angkanaya, “Teako a'gau' bawangi,” Ia tonji angkanaya, “Teako ammunoi.” Jari punna tena nu'gau' bawang, mingka ammunoko, sikontutojenna nudakkai tommi anjo hukkunga. 12 A'bicara mako siagang appanggaukang mako salaku tau laniadelia situru' hukkunNa Allata'ala ampakabebasakai rupataua. 13 Nasaba' talaNapa'nyatayai pangngamaseanNa Allata'ala mae ri tau tenaya nangngasseng mangngamaseang. Mingka la'bi jarrekangangi pangngamaseanga na anjo hukkunganga! 14 Sikamma sari'battangku! Apa matu-matunna angkana taua, “Inakke tappakka',” punna tena napa'nyatai anjo katappakkanna lalang ri panggaukanna? Maka akkullei anjo katappakkang kammaya ampasalamaki anjo taua? 15 Ebara' angkana nia' se're parannu tau parallu care-care siagang tena nangganna' kanre allo-allona. 16 Apa matu-matunna punna nukana ri anjo taua, “Salamakko ammake pakeang kammu' siagang salamakko ri mangnganrenu!” — punna tena nusarei anjo apa naparalluia ri tallasa'na? 17 Kammatommi anjo ri katappakkanga; punna tena nanipa'nyatai lalang ri panggaukanga, tena matu-matunna anjo katappakkanga. 18 Gassingka nia' tau angkana, “Nia' tau tanjeng ri tappa'na siagang nia' todong tau tanjeng mae ri panggaukanna.” Lakukanamo ri ia, “Picinikiangsa' antekamma batena akkulle taua nikana tappa' mingka tena na'nyata lalang ri panggaukanna, nampa kupicinikiang todong lalang ri panggaukangku untu' ampa'nyatai angkanaya ma'nassa nia' tappakku.” 19 Sai tappakko angkanaya anjo Allata'ala se'reji bawang? Kammatojengi! Kamanna setanga tappa' tonji siagang annekkere'mi napakamma malla'! 20 Ma'nassa sanna' dongo'nu! Maka paralluko nipa'buttiang angkanaya ma'nassa tena matu-matunna nia' tappatta punna tena na'nyata lalang ri panggaukanta? 21 Ciniki anjo boe-boeta Abraham. Nitarima bajiki ri Allata'ala lanri panggaukanna, iamintu ri wattunna napassareang ana'na, iamintu Ishak, mae ri Allata'ala irate ri tampa' pakkoro'bangnganga. 22 Anrinni a'nassami angkanaya anjo katappakkanga musti nipa'nyatai lalang ri panggaukanga sollanna a'jari sukku'. 23 Anjo situru'mi nakanaya lalang ri Kittaka, “Tappaki Abraham mae ri Allata'ala, siagang lanri iaminjo tappa'na nanitarimamo ri Allata'ala salaku tau anggaukangai ero'Na Allata'ala.” Iaminjo saba'na nanigallara'mo Abraham, “Agang baji'Na Allata'ala.” 24 Jari singara'mi kamma-kamma anne, angkanaya nanitarima baji' taua ri Allata'ala iamintu lanri panggaukanna anjo taua; jari teai lanri tappa'na bawang. 25 Cini' tongi anjo Rahab, iamintu baine pasundalaka. Nitarima bajiki ri Allata'ala lanri panggaukanna, iamintu ri wattunna natarima ri balla'na mata-matana bansa Israelka siagang natulunna ke'nanga lari ri oloang maraenga. 26 Jari, sanrapang tubua punna tena rohna nikana matei, kammatommi anjo katappakkanga, punna tena na'nyata lalang ri panggaukanga nikanami mate anjo katappakkanga.
1 Sikamma sari'battangku! Teako jai dudui ero' a'jari guru. Nuassengi angkanaya ikatte a'jari gurua lala'bi terassangangi punna niadeliki' na tau maraenga. 2 Ikatte a'mole-mole ngasengki' appare' kasalang. Mingka inai-nai tena le'baka appare' kasalang lalang ri bicaranna, iami tau sukku', akkullea angkoasai sikontu batangkalenna. 3 Punna nisa'mangi bawana jaranga sollanna akkulle naturuki erotta, akkullemi nilewai sikontu batangkalenna anjo jaranga. 4 Angngalle tongko pangngebarang mae ri kappalaka. Manna pole sanna' lompona anjo kappalaka siagang akkulle nierang ri anging sannaka lompona, mingka akkullei nilewai siagang pallewai sannaka ca'dina, situru' nakaerokia juraganga. 5 Kammatommi anjo pangngebaranna lilata; manna sanna' ca'dina anjo lilata, mingka akkullei napattampoang kalenna ri passala' apa-apa lompoa. Nawa-nawa sai antekamma lompona romanga, mingka akkullei akkanre passabakkang pepe' sannaka ca'dina! 6 Anjo lilaya sanrapangi pepeka. Iami akkulle nakabattui kaja'dallanga lalang ri batangkalenta; akkullei a'la'bang anjo kaja'dallanga mae ri sikontu batangkalenta battu ri anjo lilaya. Akkullei ammutung sikontu katallassanta napakamma pepe' battua ri naraka, passabakkang lilata. 7 A'rupa-rupai olo'-olo' sekke', jangang-jangang, olo'-olo' a'loloka rawa ri buttaya, kammayatompa juku'-juku' liaraka, akkullei nipa'jari annaba; najaimo olo'-olo' liara' napa'jari annaba rupataua. 8 Mingka tena manna sitau akkulle ampannabai lilaya. Anjo lilaya teai sipato' ja'dala'na, siagang takkulleai nilewai; rassi racung akkullea ammuno. 9 Akkullei nipake untu' appala' sukkuru' mae ri Batara siagang Manggeta; mingka akkulle tongi nipake untu' ampakkanai paranta tau, le'baka Napa'jari Allata'ala situru' rupanNa. 10 Battu ri bawaya assulu' kana-kana appala' sukkuruka, mingka battu ri iatommi anjo bawa se'rea assulu' kana-kana ansapatai taua. Mustina tena nakamma anjo, sikamma sari'battangku! 11 Maka nia' se're timbuseng je'ne appasulu' je'ne' la'ba nappasulu' todong je'ne' pai'? 12 Anjo poko' araya, sari'battangku ngaseng, takkulleai a'jari zaitun rapponna; kammayatompa anjo poko' anggoroka takkulleai a'jari la'ba je'ne'na. 13 Punna nia' tau cara'de' siagang baji' ateka' ri tangnga-tangnganu, parallui napappicinikang katallassang bajika, nagaukangi apa-apa bajika, kammayatompa cara'deki na tuna pa'mai' ri katallassanna. 14 Mingka punna pakimburuko, punna pa'risi' pa'mai'nu, siagang punna kaparalluang kalennu bawang nuondang, tea' mako pattampo-tampoangi anjo kacara'dekannu, nasaba' punna kamma anjo nuputara'-bale'mi biritta katojengang battua ri Allata'ala. 15 Anjo kacara'dekang kammaya tena nabattu ri suruga assala'na. Mingka battu ri lino, battu ri hawa napasuna rupataua, siagang battu ri setanga! 16 Kemae-kemae nia' sipa' pakkimburuang siagang sipa' kaparalluang kalenna bawang naondang, anjoreng tommi nia' karicuang siagang a'rupa-rupa kaja'dallang. 17 Mingka inai ampatangi kacara'dekang battu ratea ri suruga, iami maci'nong, nangai assiamaka, sombereki, siagang mappilangngeri. Iami sanna' jaina pangngamaseanna siagang a'nyatami panggaukang-panggaukang baji'na. Tena nabattala' siali, siagang tena nangai assara-sarai. 18 Memang anjo kabajikanga, iami wassele' binena passiamakkang napakioroka tau nangaia assiama'!
1 Battu kemae assala'na passiba'jianga siagang pa'beseranga ri tangnga-tangnganu? Sai battu ri sikamma cinna tuli a'besereka lalang ri kalennu untu' anggappai kasannangang linoa. 2 Cinnako, mingka tena nunggappa; jari ero' mako ammuno! Lompoi sumanga'nu, mingka tanugappayai apa nuboyaiya; jari a'besere' mako siagang assiba'ji mako. Tena nunggappa apa-apa, lanri tena nuppala' mae ri Allata'ala. 3 Siagang manna pole le'ba' mako appala', mingka tena nunggappa, lanri salai pattujunnu; anjo apa nupalaka sangnging untu' kasannangang kalennu bawang. 4 Teai ngasengko tau majarre'! Maka nuassengi angkanaya punna agangko mae ri linoa, a'jari musuko mae ri Allata'ala? Jari inai-nai ero' a'jari agang mae ri anne linoa, napa'jarimi kalenna musu mae ri Allata'ala. 5 Teako kapangngi angkanaya tena saba'na punna nakana Kittaka, “Ilalang ri kalenta nia' Naboli' Allata'ala Roh sannaka terasa'na cinnana.” 6 Mingka manna nakamma, la'bi terassangangi pangngamaseang Napassareanga Allata'ala mae ri katte na anjo cinnana roh niaka ri katte. Iaminjo saba'na na nia' todong tattulisi' lalang ri kittaka angkanaya, “Nimusui ri Allata'ala tau tampoa, mingka Nakamaseangi tau tunaya atinna.” 7 Lanri kammana, tundu' mako mae ri Allata'ala, siagang ewai Billisika, sollanna lari Billisika battu ri kau. 8 A'reppesekko mae ri Allata'ala na'reppese' todong Allata'ala mae ri kau. Bissaimi limannu, ikau tau dorakaya! Siagang tangkasi atinnu, ikau tau a'rua nyawaya! 9 Paralluko angngarru' siagang appiraung lanri nusassala' tojenna kalennu; parallui amminra kakkala'nu a'jari karru', siagang amminra karannuannu a'jari si'na! 10 Paralluko ampakatunai kalennu ri dallekanNa Batara, sollannu Napakatinggi sallang Batara. 11 Sikamma sari'battangku; teako assicalla-callai yareka teako assisala-salakangi. Inai-nai ancallai yareka ansalakangi paranna tu Karisteng, nacallami siagang nasalakammi hukkunNa Allata'ala. Na punna nusalakammo hukkung-hukkunNa Allata'ala, ma'nassa tenamo nanuturuki anjo hukkung-hukkunga, passangalinna a'jari mako haking mae ri anjo hukkung-hukkunga. 12 Na sikontutojenna se'reji nia' ha'na assarei hukkung siagang angngadeli rupataua. Iamintu Allata'ala, niaka kakoasanNa ampasalamaki siagang anghukkungi rupataua. Jari, inaiko antu, sa'gennu akkulle ansalakangi parannu tau? 13 Sikamma sari'battangku; ikau angkanaya, “Anne alloa yareka ammuko, erokka' a'lampa mange ri kota anu nakuammantang anjoreng sitaung untu' a'danggang siagang a'boya doe',” pilangngeri anne pappakaingakku. 14 Apa lakajariang lalang ri katallassannu ammuko, tena sikali nanuassengi! Sanrapang le'ba' jako umbu sinampe' duduaji kacinikang, nampa a'lanynya'. 15 Mustina lakammai anne batenu angkana, “Punna Naerokang Batara, lattallasa'ma' siagang lakugaukammi anne yareka anjo.” 16 Mingka kamma-kamma anne a'jari tampo mako siagang lompomi bicarannu. Anjo bicara lompo kammaya sala ngasengi. 17 Lanri kammana, inai-nai angngassengi apa bajika, nanaasseng angkanaya musti nagaukangi anjo apa bajika mingka tena nagaukangi, anjo taua dorakami.
1 Sikamma sari'battangku, akkalumanynyanga! Pilangngeri anne pappakaingakku. Paralluko angngarru' siagang appiraung lanri lanukasia'na kasessanga! 2 A'jari botto'mi kakalumanynyangannu. Nakanremi kacoa' pakeannu. 3 Attaiammi bulaennu siagang pera'nu; iaminjo taianna la'jari sa'bi angngewayako siagang la'jari sanrapang pepe' langkanreai tubunu sa'genna la'busu'. Nupattambung-tambummi pa'barang-barangannu ri anne allo kala'busanga. 4 Tanubayarrai gajina sikamma tungnganre gajia ri kokonnu. Kamma-kamma anne pilangngerimi kunrarenna ke'nanga! Sikamma tau ampasse'reai wassele'na kokonnu akkiok-kio'mi appala' tulung mae ri Allata'ala; siagang Nalangngere'mi Allata'ala, Batara Kaminang Koasaya anjo pakkio'na ke'nanga. 5 Alla'bi-la'bi mako ri katallassannu, siagang nukasia'mi kasannanganga ri anne linoa. Sanrapangko tau nupakaco'moka kalennu untu' lanisamballe sallang ri allo labattua. 6 Nuhukkummi siagang nubunomi tau tenaya salana, na tanaewayako ke'nanga. 7 Lanri kammana, sa'bara' ngasengko sari'battang, sa'genna battu Batara. Ciniki antekamma sa'bara'na palamung-lamunga antayangi wassele' lamung-lamung lompoa anggaranna mae ri ia. Sa'baraki antayangi wattu bosia siagang wattu pa'rapponna lamung-lamunna. 8 Parallu tongko sa'bara' siagang lompo pa'mai'nu, nasaba' a'reppese'mi allo kabattuanNa Batara. 9 Teako ta'liwakki larronu siagang teako sisalakangi, sollanna tena Nahukkungko Allata'ala. U'rangi! A'reppese'mi hakinga! A'birimmi battu! 10 Sikamma sari'battangku, u'rangi na'bi-na'bi a'bicaraya lalang arenNa Batara. Sa'baraki ke'nanga angkasiaki kasessanga. Jari angngalle mako conto mae ri ke'nanga. 11 Nigallara'mi ke'nanga tau sunggu, lanri sa'bara'na ke'nanga. Nulangngere' tommi kasa'barranna Ayub, siagang nuasseng tommi antekamma batena nibarakkaki ri Batara, ri kale'bakkanna. Nasaba' teai sipato' baji' pa'mai'Na siagang lompo pangngamaseanNa Batara. 12 Sikamma sari'battangku; ia lomoro' se'rea, iamintu: Teako assumpai, baji' nanupau langika, baji' nalinoa, yareka naapa-apa mamo nupau. Iamo bawang nupau angkanaya “Iyo” punna iyo memang todong, siagang “Tena” punna tena memang todong; sollanna tena naNahukkungko Allata'ala. 13 Punna nia' ri tangnga-tangnganu tau susa, parallui appala' doang. Punna nia' tau rannu, parallui akkelong mammuji ri Allata'ala. 14 Punna nia' tau garring parallui nakio' pamimping-pamimping jama'aka. Siagang parallui anjo pamimping-pamimping jama'aka ampappala' doangangi siagang ansapui minynya' lalang arenNa Batara anjo tau garringa. 15 Inai-nai appala' doang siagang tappa' tojeng-tojeng mae ri Batara, lanipamollei battu ri garrinna. Lanipamollei garrinna ri Batara, siagang lanipammopporangi dosa-dosana le'baka nagaukang. 16 Lanri kammana, paralluko massing ammangakui kasalannu mae ri parannu tau, siagang sipappala' doangangko, sollannu nipammolle. Pappala' doangang situruka ero'Na Allata'ala, lompo sikali kakoasanna. 17 Anjo Elia, tau biasa tonji kamma ikatte. Attojeng-tojengi appala' doang sollanna tena naturung bosia; apaji natena tojemmo naturung bosia tallun taung assitangnga sallona. 18 Nampa ribokoanganna appala' doammi pole; apaji naturummo bosia battu ri langika sa'genna nia'mo pole wassele'na tanaya. 19 Sikamma sari'battangku! Punna nia' tau ri tangnga-tangnganu taerokamo anturuki pangngajarang battua ri Allata'ala, nampa nia' tau akkulle ampoterangi anjo taua mae ri Allata'ala, 20 u'rangimi anne nakanaya Kittaka: Inai-nai ampoterangi tau dorakaya mange ri oloang tojenga, iami ampasalamaki nyawana anjo tau dorakaya battu ri kamateanga siagang a'jari saba' najai dosa nipammopporang. Sallangku, Yakobus
1 Natarimai sikamma sari'battangku, umma' Napilea Allata'ala, niaka tassiara' ri bori' bellaya, iamintu ri daera-daera Pontus, Galatia, Kapadokia, Asia, siagang Bitinia. Anne suraka battu ri nakke, Petrus, tunisuroNa Isa Almasi; kuminasai ri Allata'ala sollannu Nasare ngaseng alla'bi-la'bi barakka' siagang kasalewangang. Nipileiko a'jari Umma'Na Allata'ala situru' ero' laNagaukanga Allata'ala Manggea. Siagang nipa'jari mako matangkasa' ri RohNa Allata'ala sollannu a'jari Umma' KalenNa Allata'ala, siagang sollannu mappilangngeri ri Isa Almasi siagang nitangkasi ri cera'Na. 3 Maeko nakiappala' sukkuru' mae ri Allata'ala, ManggeNa Batarata Isa Almasi! Sanna' mangngamaseanNa mae ri katte; lanri kammanami anjo naNasare maki' katallassang beru. Carana iamintu, Napattallasa' poleangi ammotere' Isa Almasi battu ri kamateanga. Iaminne assareki' panrannuang attantua. 4 Manrannuangki' untu' langgappai barakka'-barakka' Nabolika ri suruga, sa'genna takkullea panra' yareka a'jari botto', yareka a'jari a'langnge. 5 Yangasenna anjo nipasadiai untu' ikau, lanri tappa' mako ri Allata'ala. Jari nijagai mako siagang kakoasanNa Allata'ala, sollanna akkulle nutarima kasalamakkang le'bakamo nipasadia untu' nipa'nyata sallang ri kala'busang jammanga. 6 Lanri kammana, paralluko rannu ri pa'mai'nu, manna pole kamma-kamma anne untu' sinampekang musti a'jari si'nai pa'mai'nu lanri a'rupa-rupana paccoba antujuko. 7 Matu-matunna ngaseng anjo iamintu sollanna akkulle a'butti katappakkang tojeng-tojennu mae ri Batara yareka tena. Manna bulaeng akkullea panra' niuji tonji siagang pepe'. Jari, anjo katappakkannu la'bi lompoangangi anggaranna na bulaenga; jari musti niuji tongi sollanna a'jari jarre'. Siagang lanri kammana, lanipuji mako siagang lanipakala'biri' mako, kammayatompa lanipakatinggi mako sallang ri allo kabattuanNa ammotere' Isa Almasi. 8 Mangngamaseangko ri Ia, manna pole tanucinika riolo. Siagang tappakko ri Ia manna pole tanucinika kamma-kamma anne. Iaminjo saba'na nanurannu, siagang nanukasia' karannuang mala'birika siagang sukkaraka nicarita. 9 Nasaba' nugappami wassele'na, iamintu kasalamakkanna nyawanu. 10 Iami anjo kasalamakkang napilajari bajika siagang nasalidikia na'bi-na'bia; siagang napau la'bi riolomi ke'nanga barakka' Napassareanga Allata'ala mae ri kau. 11 Nasalidikimi ke'nanga angkanaya antekamma siagang ringngapanna nalakajariang anjo passalaka, iamintu Napakkanaya RohNa Almasi niaka lalang ri kalenna ke'nanga. Anjo wattua napau la'bi riolomi RohNa Almasi mae ri ke'nanga passala'na kasessang laNakasiaka Almasi siagang kala'biranNa la'nyataya ribokoanganna anjo. 12 Napaumi Allata'ala mae ri anjo na'bi-na'bia angkanaya anjo apa nagaukanga ke'nanga teai untu' kaparalluang kalenna ke'nanga, passangalinna untu' kaparalluannu; iamintu apa-apa singarakamo nulangngere'na kamma-kamma anne battu ri sikamma tau ambirittakangai anjo Kabara' Baji' ri passala'na Isa Almasi. Napabattumi ke'nanga anjo kabaraka mae ri kau ngaseng lalang koasaNa RohNa Allata'ala, nikiringa battu ri suruga. Ba'lalo manna sikamma malaekaka ero' tongi angngassengi anjo kabara' nabirittakanga ke'nanga. 13 Lanri kammana, paralluko tuli a'jaga-jaga. Tutuko siagang manrannuang tojeng-tojengko mae ri barakka' lanipassareanga mae ri kau ri wattunna battu Isa Almasi sallang. 14 Mappilangngeriko mae ri Allata'ala, siagang teako turukiangi ero'nu rioloa, ri wattunna tenapa nuassengi Allata'ala. 15 Mingka, paralluko matangkasa' lalang sikontu apa nugaukanga, sangkamma matangkasa'Na anjo Allata'ala angkiokako. 16 Nia' tattulisi' lalang ri Kittaka angkanaya, “Paralluko matangkasa', nasaba' iNakke tangkasaka'.” 17 Ri wattunnu appala' doang, akkio' Manggeko mae ri Allata'ala. Jari, Iami anjo Allata'ala langngadeli rupataua situru' massing panggaukanna; na tena nalammile tau. Lanri kammana, genteng ri nia'nu ija ri anne linoa, parallui nupakala'biri' Allata'ala lalang ri katallassannu. 18 Nuassengi apa le'baka nipa'bayarrang untu' kalappassannu battu ri katallassang tenaya matu-matunna nasossoranga boe-boenu mae ri kau. Ia pa'bayara'na teai apa-apa akkullea panra' sangkamma peraka yareka bulaenga, 19 passangalinna apa sannaka lompona anggaranna; iamintu KalenNa Almasi, a'jaria sanrapang gimbala' tenaya callanna, nikoro'bangkanga mae ri Allata'ala. 20 Le'ba' memammi nipile Almasi ri tenanapa Napa'jari Allata'ala anne linoa. Na ri allo ma'reppese'namo anne kala'busang jammanga, battumi antama' ri linoa sollannu nipasalama'. 21 Tete ri Iami nanutappa' mae ri Allata'ala, le'baka ampattallasa' poleangi battu ri kamateanga siagang le'baka ampakala'biriki. Jari, Allata'alami nupatappa', siagang ri Allata'ala tommi le'ba' nupadongko' panrannuannu. 22 Lanri mappilangngerinnu mae ri pangngajaranNa Allata'ala, parallui nutangkasi kalennu siagang nukamaseang julu tappa'nu situlusu'na pa'mai'nu. Lanri kammana, paralluko massing sikamaseang lalang sikalepu pa'mai'nu, 23 nasaba' tete ri Iami anjo kana mattallasa'Na siagang kana mannannunganNa Allata'ala nanunipa'jari tau beru; teai lanri nilassukannu ri rupataua, passangalinna battu ri Mangge mannannunganga. 24 Nia' tattulisi' lalang ri Kittaka angkanaya, “Sikontu rupataua sanrapangi ruku', sikontu kalompoanna sanrapangi bunga ruku'. Punna kalumeng rukuka, ru'rusu' tommi bunganna; 25 mingka kananNa Batara, niaki satunggu-tungguna.” Anjo kanaya Kabara' Baji' le'bakamo nibirittakang mae ri kau.
1 Lanri kammana, pela'mi sikontu apa ja'dalaka battu ri kalennu; tea' mako a'balle-ballei pole, siagang tea' mako assara-sarai. Teako pakimburui, siagang teako hinai parannu tau. 2 Paralluko a'jari sanrapang ana' lolo beru lassuka, tuli turerea ero' angnginung je'ne' susu rohani tenaya bengkoro'na, sollannu akkulle a'bakka' siagang nipasalama'. 3 Nia' tattulisi' lalang ri Kittaka angkanaya, “Le'ba'mi massing nukasia' ri kalennu, antekamma baji'na Batara.” 4 Lanri kammana, battu mako mae ri Batara. Iami sanrapang batu mattallasaka, iamintu batu nipelaka ri rupataua lanri nakana tena matu-matunna; mingka nipilei ri Allata'ala a'jari batu lompoa anggaranna. 5 Ikau sanrapang ngasengko batu-batu mattallasaka. Lanri kammana paralluko ampassareangi kalennu untu' nipake ambangung Balla' rohaniNa Allata'ala. Lalang kammana anjo a'jari mako imang-imang mae ri Allata'ala lalang ri katallassannu; siagang tete ri Isa Almasi angngerang mako koro'bang rohani mae ri Allata'ala, iamintu koro'bang nitarima bajika ri atinNa Allata'ala. 6 Nasaba' nia' tattulisi' lalang ri Kittaka angkanaya, “Le'ba'mi Kupile batu lompoa anggaranna, Kupadongkoka a'jari batu majarre' ri kota Sion; na inai tappa' ri Ia talamala'bayai pa'mai'na.” 7 Anjo batua sanna' lompona anggaranna untu' ikau tau tappaka. Mingka tau tenaya natappa', kammami anne nakanaya Kittaka mae ri ke'nanga, “Anjo batu tenaya napakei tukang-tukang bangunanga, ma'nassa iami batu majarre'.” 8 Siagang “Iami anjo batua napattatto'roi taua, batu ampatu'gurukai ke'nanga.” Tatto'roi ke'nanga lanri tatappakai mae ri kananNa Allata'ala. Kammami anjo le'baka Napattantuangi Allata'ala untu' ke'nanga. 9 Mingka ikaumi bansa le'baka nipile, imang-imang allayania karaeng, bansa matangkasaka, untu' KalenNa Allata'ala, siagang umma' KalenNa Allata'ala. Napileko siagang Nakiokko Allata'ala assulu' battu lalang ri sassanga untu' antama' ri singara' kalompoanNa, sollanna nupa'la'bang biritta ri sesena sikontu panggaukang malompoNa. 10 Riolo teaiko umma'Na Allata'ala, mingka kamma-kamma anne umma'Na mako Allata'ala. Riolo tanikamaseangako ri Allata'ala; mingka kamma-kamma anne nutarimami pangngamaseanNa. 11 Sikamma sari'battangku, sannaka kukarimangnginna! Ikau teaiko tuma'buttana anne linoa; ikau tau battu-battu jako. Lanri kammana, kupala' tojeng-tojengi mae ri kau sollanna tena nanuturuki hawa napasu rupataua, tuli ambundukiai nyawaya. 12 Musti sannaki nubajikinna panggaukannu ri tangnga-tangngana tau tenaya naassengi Batara. Sollanna punna napitinako ke'nanga angkana tau ja'dalakko, mingka musti napakkontutojengi panggaukang-panggaukang baji'nu; sa'genna lanapuji sallang ke'nanga Allata'ala, ri allo kabattuanNa. 13 Lanri Batara, paralluko mappilangngeri mae ri tau anna'galaka koasa: baji' namae ri karaeng a'jari Kapala pamarentahang, 14 kammayatompa mae ri guburnur nisarea koasa ri anjo Kapala pamarentahang untu' anghukkungi tau a'gau' ja'dalaka siagang untu' ampakalompoi tau a'gau' bajika. 15 Nasaba' Nakellai Allata'ala sollanna lanri nugaukanna panggaukang bajika nakkullemo nujempang bawana sikamma tau a'bicara salaya. 16 Paralluko a'jari tau bebasa' lalang katallassannu; mingka teako pakei anjo kabebasannu untu' antongkoki kaja'dallanga, passangalinna a'jari mako ata-atanNa Allata'ala lalang ri katallassannu. 17 Anggara' baji' ngasengi taua, siagang kamaseangi sari'battang parannu tu Karisteng. Mallakko mae ri Allata'ala, siagang pakalompoi Kapala pamarentahanga. 18 Sikamma sari'battangku a'jari palayanga, paralluko mappilangngeri baji'-baji' mae ri pinggawanu; tena namae ri ia baji' pa'maika siagang sombereka bawang, mingka mae ri ia pole sekkeka. 19 LaNabarakkakiko Allata'ala, punna sa'barakko angkasiaki panggaukang tenaya naadele' mae ri kau, lanri nuassenna ero'Na Allata'ala. 20 Nasaba' apa kala'bianna punna sa'barakko angkasiaki hukkungang siratang memang todonga nutarima lanri kasalannu? Mingka punna sa'barakko antarimai kasessang antujuako lanri nugaukanna katojenganga, laNabarakkaki mako Allata'ala. 21 Untu' iami anjo naNakiokko Allata'ala. Nasaba' KalenNa Almasi le'ba' tommi angkasiaki kasessanga untu' ikau; na lalang kammana anjo Nasare mako conto sollanna nuturuki bateNa. 22 Tena nale'ba' a'gau' dosa, siagang tale'bakai nia' tau allangngereki a'balle-balle. 23 Ri wattunna nipali'boi, tena Na'balasa' appali'bo. Ri wattunna sessa, tena Na'garatta'; poro Nabuangammi anjo parkaraya mae ri Allata'ala, Haking adeleka, sikamma kara-kara antujuai. 24 KalenNa Almasi ampisangi sikontu dosa-dosata irate ri kayu sallika, sollanta akkulle bebasa' battu ri kakoasanna dosaya, siagang nakiattallasa' situru' ero'Na Allata'ala. Loko'-loko'Nami Almasi ampamolleko ri garrinnu. 25 Riolo sanrapangko gimbala' tappelaka, mingka kamma-kamma anne le'ba' mako nierang ammotere' untu' amminawang ri Pakalawakinnu siagang Pammarakainna nyawanu.
1 Kammaya todong ikau, sikamma tu bai'-bainea, musti mappilangngeriko mae ri bura'nennu. Sollanna punna nia' tau tena natappa' bura'nenna ri biritta battua ri Allata'ala, akkullemi a'jari tappa' lanri nacini'na panggaukannu. Siagang tena nuparallu a'bicara apa-apa mae ri ke'nanga, 2 lanri nacini'namo panggaukang baji'nu siagang lambusu'nu. 3 Teako nabattu pantaranga bawang nicini' kaga'gannu, alarapanna batenu ammodei uu'nu, yareka ammake pa'belo-belo, yareka ammakeang pakeang ka'jalaka ballinna. 4 Mingka, anjo kaga'gannu parallui battu lalang ri ati mailalannu, battu ri panggaukang baji'nu, siagang tunanu ri pa'mai'; yangasemmi anjo kaga'gang satunggu-tunggua, sannaka lompona anggaranna ri paccini'Na Allata'ala. 5 Kammami anne carana riolo angga'gai kalenna sikamma bai'-baine niaka agamana siagang manrannuanga ri Allata'ala, iamintu mappilangngeri mae ri bura'nenna ke'nanga. 6 Kamma tomminjo Sara, mappilangngeri mae ri Abraham siagang akkio' tuangi mae ri Abraham. Ikau kamma-kamma anne ana'-ana'na ngaseng tommaka Sara, punna nugaukang apa-apa bajika siagang tena sikali numalla'-malla' manna pole ri apa-apa mamo. 7 Ikau pole, sikamma bura'-bura'nea, parallui baji' pammahannu mae ri bainennu; parallui nuasseng angkanaya anjo tubai'-bainea tau lammai. Bajiki panggaukannu mae ri ia, nasaba' lasiagang ngasengko ke'nanga lantarimai passare lammoro'Na Allata'ala iamintu katallassang sitojennaya. Gaukangi anne kammaya, sollanna tena anrompai pappala' doangannu. 8 Bodona kana iaminne: parallu ngasengko ma'julu kana siagang majulu pa'mai'. Paralluko sikarimangngi sangkamma tau assari'battanga. Siagang paralluko sikama'-kamaseang siagang tuna ri pa'mai'. 9 Teako pasibalasaki kaja'dallanga siagang kaja'dallang, yareka kana-kana pali'bo siagang kana-kana pali'bo; mingka pappalakkangi barakka' mae ri Allata'ala; iaminjo nupa'balassang. Nasaba' iaji naNakiokko Allata'ala kaNakellaiko sollannu akkulle annarima barakka' battu ri Ia. 10 Nia' tattulisi' lalang ri Kittaka angkanaya, “Inai-nai ero' angkasiaki mate'nena tallasaka, naero' ampisa'ringi allo-allo bajika, musti nakatutui bawana sollanna tamappaua bicara ja'dala', natamakkana balle-ballea. 11 Musti napakabellai kalenna battu ri kaja'dallanga nanagaukang kabajikanga; parallui appattujuang tojeng-tojeng untu' anggappai passiamakkanga. 12 Nasaba' tuli Naparhatikangi Batara tau anturukiai ero'Na, tuli Napilangngeri pappala' doanganna ke'nanga; mingka Nabaliangi sikamma tau anggaukangai kaja'dallanga.” 13 Inaika ero' a'gau' ja'dala' mae ri kau, punna nungai a'gau' bajika? 14 Mingka manna pole musti nukasia' kasessanga lanri nugaukanna apa-apa bajika, ikau upa' mako! Teako mallakki manna pole ri nai, siagang teako bata-batai. 15 Mingka lalang ri pa'mai'nu, parallui Almasi bawang nupakalompo situru' empoanNa salaku Batara. Siagang paralluko tuli sadia ampiali sikamma tau akkuta'nanga mae ri kau ri sesena panrannuang niaka ri kau. 16 Mingka gaukangi anjo siagang tuna pa'mai'nu yareka siagang baji'. Siagang parallui ci'nong ati mailalannu, sollanna punna nipitinako lanri tappa'nu mae ri Almasi lalang tallasa'nu, lasiri'-siri'mi mae ri kalenna anjo tau ampitinayako. 17 Bajikangangi sessaya lanri a'gau' baji' — punna Nakaerokang Allata'ala — naia sessaya lanri a'gau' ja'dalaka. 18 Nasaba' le'ba'mi sikali mate Almasi untu' satunggu-tungguna passabakkang dosana rupataua; Ia tena salanna mingka matemi untu' tau salaya. Nagaukammi Almasi kammaya anjo sollannu akkulle Narurungang ngaseng mae ri Allata'ala. Nibunomi tubuNa, mingka nipattallasa' poleammi ammotere' katallassang rohaniNa. 19 Iaminjo RohNa a'lampa ambirittakangi biritta battua ri Allata'ala mae ri roh-roh nitarungkua: 20 iamintu rohna sikamma tau tenaya namappilangngeri mae ri Allata'ala ri jammang tallasa'na Nuh. Anjo wattua sa'baraki attayang Allata'ala lalang appare'na kappala' Nuh. Iaji bawang anjo tau niaka lalang ri kappalaka — nia' sagantuju tau — nipasalama' battu ri anjo a'ba lompoa. 21 Jari anjo kajarianga a'jarimi pangngebarang mae ri anjo pa'je'ne' ampasalamakako ri kamma-kammaya anne. Anne pa'je'neka teai pa'gaukang akkullea antangkasi kalennu battu ri sikontu apa-apa ra'masaka, passangalinna a'jari janjinnu mae ri Allata'ala, iamintu janji baji'nu battu lalang ri ati mailalannu. Anjo pa'je'neka napasalamakko lanri attallasa'Namo ammotere' Isa Almasi battu ri kamateanga, 22 siagang lanri nai'Namo ri suruga. Kamma-kamma anne koasaI siagang Allata'ala siagang Naparentami sikontu malaekaka, sikontu tau anna'galaka koasa, kammayatompa sikontu kagassingang niaka lalang ri jama-jamang rohania.
1 Lanri le'ba'mi Nakasia' Almasi kasessanga lalang ri TubuNa, musti nupakajarre' tommi kalennu ri pammetang kammaya anjo. Nasaba' inai-nai angkasiaki kasessanga lalang ri tubuna, tenamo nagaukangi dosaya. 2 Lanri kammana, paralluko anturuki ero'Na Allata'ala lalang tallasa' lanudallekanga pole, ri anne linoa siagang teai kaerokang rupatau nuturuki. 3 Ri wattu allaloa, le'ba'mi sallo nugaukang apa nangaia nagaukang tau tenaya natappa' mae ri Batara. Tena nabaji' batenu appanggaukang ri katallassannu. Nuturukiangi hawa napasunu, angnginung-nginungko sa'gennu nasa'ring, assua'-suarakko, angnginung-nginungko siagang appakaringi'-ringikko anynyomba mae ri barhalaya. 4 Kamma-kamma anne lannasa'mi tau tenaya natappa' ri Batara, lanri tenamo nuturuki ke'nanga angkasiaki panggaukang dosaya lalang kara'massanga. Iaminjo saba'na nanahina mako ke'nanga. 5 Mingka musti nituntuki sallang ke'nanga ri Allata'ala, Ia sadiayamo untu' angngadeli sikontu tau attallasaka siagang tau matea. 6 Iaminjo saba'na nanibirittakang tommo Kabara' Bajika mae ri sikamma tau matea. Pattujunna iamintu sollanna anjo tau le'bakamo niadeli tubuna — sangkamma yangasenna taua laniadeli — akkullemi attallasa' rohanina ke'nanga situru' ero'Na Allata'ala. 7 Sikontu apa-apaya a'reppese'mi mae ri kale'bakkanna; lanri kammana paralluko tutu siagang nupakalewa kalennu, sollannu akkulle appala' doang. 8 La'biangampa pole nayangasennaya, paralluko attojeng-tojeng massing sikamaseang; nasaba' punna massing sikamaseangko sadia tommako untu' sipammopporang. 9 Paralluko massing sitoana baji' ri balla'nu, siagang teako akkunrarengi. 10 Massing annarima ngaseng mako passare pakkulle battu ri Allata'ala; anjo passarea tena nasangkamma-kamma. Lanri kammana, urusu' bajiki anjo passareNa Allata'ala; parallui massing nupake anjo pakkullea untu' kaparalluang nupa'juluia ngaseng. 11 Inai-nai appabattu biritta, musti napabattui biritta battua ri Allata'ala; inai allayani ri paranna tau, musti allayani situru' kagassingang battua ri Allata'ala; sollanna ilalang yangaseng-ngasenna, akkullemi nipakala'biri' Allata'ala tete ri Isa Almasi. Iami Makoasa siagang siratanga nipakala'biri' sa'genna satunggu-tungguna. Aming. 12 Sikamma sari'battangku, sannaka kukarimangnginna! Kamma-kamma anne sanna' sessanu lanri niujiko. Mingka teako lannasakki, sangkamma angkana nia' apa sanna' heba'na kajariang mae ri kalennu. 13 Ba'lalo, parallui a'jari sannang pakkasia'nu lanri amminawannu todong angkasiaki sessaya siagang Almasi. Jari sallang, punna nipa'nyatamo kala'biranNa Almasi, larannu mako. 14 Upakko punna nihinako lanri tappa'nu mae ri Almasi. Punna kamma anjo, battuanna nia'mi ri kau Roh Mala'birika, iamintu RohNa Allata'ala. 15 Tea' laloko niakki angkasiaki sessaya lanri ammunonu, yareka lanri a'lukka', yareka lanri a'gau' ja'dala', yareka lanri napantama'-tamakkinna urusanna tau maraenga. 16 Mingka punna nukasia' sessaya lanri Karistennu, teako siri'-siriki lanri anjo passalaka. Appala' sukkurukko mae ri Allata'ala, angkanaya nuerammi arenNa Almasi. 17 Narapi'mi wattunna laNaadeli Allata'ala linoa. Na Umma' KalenNa Allata'ala laniadeli la'bi riolo. Jari punna lappakkaramula angngadeli Allata'ala ri katte, antekammami kajarianna sikamma tau tenaya natappa' ri anjo Kabara' Baji' battua ri Allata'ala? 18 Nia' tattulisi' lalang ri Kittaka angkanaya, “Punna sikamma tau bajika sukkara'mi lanipasalama', apami lakajariang mae ri sikamma tau doraka tenaya natappa' mae ri Batara!” 19 Lanri kammana, punna nia' tau angkasiaki sessaya lanri Nakaerokinna Allata'ala kammaya anjo, parallui nabajiki tallasa'na siagang parallui napappirannuang kalenna mae ri Batara Mappa'jarina ke'nanga. Iami tuli lanrupai janjinNa.
1 Kupalaki mae ri pamimping jama'ah niaka ri tangnga-tangnganu, sollanna naparhatikang anne. Inakke, parannu pamimping jama'ah, antulisiki anne suraka; kalengku le'ba' anciniki kasessanNa Almasi. Na punna nipa'nyatamo kala'biranNa mae ri rupataua, lamminawang tonga' nipakala'biri'. Kupala' tojeng-tojengi mae ri kau ngaseng, 2 sollanna nukalawaki sikamma gimbala' Napappirannuanga Allata'ala mae ri kau ngaseng. Kalawaki ke'nanga siagang sannang pa'mai'nu, sangkamma Nakaerokanga Allata'ala. Teako battalaki pa'mai'nu angkalawaki ke'nanga. Tea tongko lanri ero'nuji anggappa passawallang nanugaukang jama-jamannu. Passangalinna lanri ero'nu attojeng-tojeng allayani. 3 Teako a'jari kammai tau koasa mae ri ke'nanga, nipappirannuanga mae ri kau. Mingka a'jariko conto baji' mae ri ke'nanga. 4 Na punna battu sallang Pakalawaki Mala'birika, langgappa mako hadia sannaka ga'gana. Anjo hadiaya takkulleai amminra kaga'ganna. 5 Kammayatompa ikau sikamma tau rungkaya. Mappilangngeriko mae ri tau toaya. Musti nupakatunai kalennu; siagang musti silayaniko siagang tuna pa'mai'nu. Nasaba' nia' tattulisi' lalang ri Kittaka angkanaya, “Nabaliangi Allata'ala tau tampoa, mingka Nakamaseangi tau tunaya pa'mai'na.” 6 Lanri kammana, pakatunai kalennu irawangang lino magassinNa Allata'ala. Sollanna Napakatinggiko sallang punna narapi' wattunna. 7 Erangi ranggaselanu mae ri Allata'ala, nasaba' Iami anjampangiko. 8 Paralluko tuli tutu siagang a'jaga-jaga! Nasaba' anjo Billisika iami musunnu. A'lampai anrai'-kalau' sanrapang singa nye'nyereka amboyai apa akkullea nalollong. 9 Jarreki tappa'nu nanuewa. Nasaba' nuassemmi angkanaya yangasenna parannu tu Karisteng ri sikontu linoa sessa ngaseng tongi sangkamma ikau. 10 Mingka punna le'ba' mako sessa sinampe', KalenNa Allata'ala lampa'jari sukkukko. LaNapaentengko, siagang laNasareko kagassingang kammayatompa laNapakajarrekko. Nasaba' Iami Allata'ala sannaka baji'na pa'mai'Na; Iami le'baka angkiokko untu' angkasia' tongi kala'birang mannannunganga tete ri Almasi. 11 Iami makoasa sa'genna satunggu-tungguna! Aming! 12 I Silas ambantua' nakupare' anne sura' bodoa bonena. Kubilangi Silas tu Karisteng tamamminraya. Erokka' ampakamajuko siagang ampakajarreki tappa'nu angkanaya anne apa kutulisika biritta kammatojeng ri sesena passare lammoro'Na Allata'ala. Paralluko anna'gala' jarre' mae ri anjo passare malammoroka. 13 Sikamma paranta anggota jama'ah ri Babilon, nipilea todong ri Allata'ala, akkiringi sallang mae ri kau ngaseng. Kammayatompa anakku Markus, sannaka kukarimangnginna, akkiring tongi sallang. 14 Sikamaseang duduko, siagang sisallang-sallangiko salaku tu Karisteng massari'battanga. Poro Nabarakkaki ngasengko Batara, ikau sikontu tau a'jaria taunNa Almasi. Sallangku, Petrus
1 Natarimai sikamma sari'battangku, le'bakamo anggappa katappakkang sangkammaya baji'na katappakkanna ikambe. Le'ba' maki' Nasare katappakkang Isa Almasi, Iamintu Allata'ala siagang Karaeng Mappasalamatta, lanri Nagaukanna apa annabaya. Anne suraka battu ri nakke, iamintu Simon Petrus, atanNa siagang tunisuroNa Isa Almasi. 2 Kuminasai, poro Nasareko alla'bi-la'bi barakka' siagang kasalewangang Allata'ala lanri tappa'nu ri Allata'ala siagang Isa, Batarata. 3 Le'baki Napake koasa kakaraenganNa Allata'ala untu' assareki' sikontu apa-apa niparalluanga sollanta akkulle anynyomba ri Ia lalang tallasatta. Nagaukangi kammaya anjo tete ri mangngassenta mae ri Isa Almasi le'baka angkiokki' sollanna akkulle todong nikasia' kalompoanNa siagang kabajikanNa. 4 Kammami anjo caraNa Allata'ala ampa'lammorangi barakka'-barakka' sannaka heba'na siagang sannaka lompona anggaranna mae ri katte, ia le'baka Napa'janjiang. Lanri iami anjo barakka'-barakkaka nakiakkullemo ta'lappasa' battu ri sikamma kaerokang ja'dalaka, akkullea angngerangi anne linoa mae ri possoka; sollanna nukkulle todong anggappa bageang lalang ri sipa' kakaraenganna. 5 Lanri kammana, attojeng-tojeng mako appattujuang sollanna nipakajarre' tappa'nu ri katallassang bajika. Sipa'rurunganna katallassang bajika, parallui nia' pangngassengannu; 6 siagang sipa'rurunganna pangngassenganga, parallu tongko akkulle ampakalewai kalennu, siagang sipa'rurunganna ampakalewai kalennu, parallu tongko ampa'biasai kalennu sa'bara' andallekangi sikontu apa-apaya. Sipa'rurunganna sa'baraka andallekangi sikontu apa-apaya musti nuturuki tongi ero'Na Allata'ala lalang ri katallassannu. 7 Siagang sipa'rurunganna mannurukia ri ero'Na Allata'ala, musti nigannakki tongko sipa' mangngamaseang mae ri parannu tu Karisteng. Nampa parallu tongi nutambai anjo sipa' mangngamaseanga ri parannu tu Karisteng siagang sipa' mangngamaseang mae ri yangasenna taua. 8 Yangasenna anjo sipa'-sipa' kammaya nuparalluangi. Punna alla'bi-la'bimo anjo sipa' kammaya ri kau, lanapa'jari attojeng-tojeng mako anjama, siagang lappa'nia' mako wassele' ri jama-jamannu; kammayatompa pila' lanuasseng baji'mi pole Batarata Isa Almasi. 9 Mingka tau tenaya sipa' kammana anjo, bodoi pikkiranna; takkulleai accini' siagang nakaluppai angkanaya le'ba'mi nitangkasi dosa-dosana allaloa. 10 Lanri kammana, sikamma sari'battangku, paralluko pila' nuterassi usahanu sollanna pila' a'jari majarre' anjo pakkio'Na siagang pammileNa Allata'ala mae ri kalennu. Punna nugaukang anjo kammaya, tena nulanipassala. 11 Lalang kammanami anjo nulanikellai tojeng-tojemmo antama' ri Kakaraengang mannannungang battua ri Batara siagang Karaeng Mappasalamatta Isa Almasi. 12 Lanri kammanami anjo natuli kupakaingakko ri yangasenna anjo passalaka, manna pole nanuassemmo siagang manna pole nanutappa' tojeng-tojemmo mae ri anjo biritta nutarimaya battu ri Allata'ala. 13 Genteng ri tallasakku ija, paralluko kupakaingakkang yangasenna anjo passalaka. 14 Nasaba' kuassengi angkanaya tasalloami nalakubokoi anne linoa, lanri le'ba'ma' Napauang baji' Batarata Isa Almasi. 15 Jari lakuusahai sollanna manna pole matema', tuli lanuu'ranginna ammotere' yangasenna anne passalaka. 16 Ri wattunna kipabattu mae ri kau antekamma mala'biri'na kabattuanNa Batarata Isa Almasi, tena nakituruki carita kosong battua ri rupataua. Anjo kala'biranNa Almasi mata kalennami ikambe le'ba' anciniki. 17 Niakki' anjoreng ri wattunna nipakalompo siagang nipakala'biri' ri Allata'ala Manggea. Anjo wattua kalangngerammi sa'ra battua ri Kaminang Makoasaya, angkanaya, “Iaminne AnakKu Kukamaseanga. Iami nakate'neang atingKu!” 18 Kalenna ikambe allangngereki anjo sa'ra battua ri suruga ri wattunta nia' angngagangi rate ri anjo bulu' matangkasaka. 19 Iaminjo saba'na nakipila' tappa'mo pole ri anjo biritta battua ri Allata'ala napabattua na'bi-na'bia. Teai sipato' baji'na punna nuparhatikang anjo birittaya; nasaba' anjo birittaya sanrapangi singara'na lampua lalang ri tampa' sassanga sa'genna battu bari'basaka, siagang accaya bintoeng battu rayaya lalang ri atinnu. 20 Mingka iaminne kaminang parallu sikalia nuu'rangi: Anjo apa-apa lakajarianga sallang, nisero kanaya ri biritta battua ri Allata'ala, takkulleai nibattuangngi situru' pikkirang kalenta. 21 Nasaba' tale'bakai nia' tau angkana battu ri ero' kalenna nakkulle napabattu biritta battua ri Allata'ala ri passala'na anjo apa-apa lakajarianga. Yangasenna anjo taua nikoasai ri Roh KalenNa Allata'ala ri wattunna Napabattu anjo biritta battua ri Allata'ala.
1 Ri wattu allaloa nia' na'bi-na'bi takontutojeng ammumba ri alla'na Umma'Na Allata'ala. Kamma tomminjo lania' todong guru-guru takontutojeng ammumba ri tangnga-tangnganu. Lanapantamaki ajarang-ajarang salaya, ampanrakiai taua. Siagang lanasassali ke'nanga Karaeng Makoasa le'baka angkoro'bangkangi kalenna sollanna nakkulle a'jari bebasa' ke'nanga. Lalang kammana napabattumi kapanrakanga mae ri kalenna ke'nanga, labattua linta' antujui ke'nanga. 2 Mingka manna nakamma, lajai tau ampinawangi katallassanna anjo guru takontutojenga, nikoasaia ri hawa napasuna ke'nanga. Siagang lanri panggaukanna anjo gurua najaimo tau naturungang anghinai Oloang Katojengang mangea ri Allata'ala. 3 Lanri angngoana anjo guru-guru takontutojenga nalanacaritamo mae ri kau carita-carita napare'-pareka kalenna sollanna akkulle anggappa passawallang battu ri kau. Mingka sallomi nipasadia pangadelang eroka antappuki hukkunganna ke'nanga; kammayatompa sallo tommi attayang kapanrakang le'bakamo nipattantu lanagappaya ke'nanga. 4 Manna malaeka'-malaeka' dorakaya tena todong nalata'lappasa' battu ri hukkunganNa Allata'ala. Lanipela' tongi ke'nanga antama' ri naraka. Nipantamaki ke'nanga ri tampa' sassanga, nanitahang anjoreng sa'genna narapi' Allo Pangadelanga. 5 Kammayatompa lino jammang rioloa, tena todong nalata'lappasa' battu ri hukkunganNa Allata'ala. Appabattui a'ba lompo Allata'ala antama' ri linona tau ja'dalaka anjo wattua. Nuh bawang siagang tuju tau maraengannaya nipasalama', lanri napa'la'banna Nuh biritta katallassang nipangngellaia ri atinNa Allata'ala. 6 Kamma tomminjo kota Sodom siagang Gomora; Naancu'-ancuruki Allata'ala anjo kotaya siagang pepe', sollanna a'jari conto ri passala'na apa lakajarianga sallang mae ri sikamma tau tenaya natappa' ri Allata'ala. 7 Mingka Lot nipasalamaki, lanri naturukinna ero'Na Allata'ala; sanna' sikali sessana nakasia' lanri panggaukang takamma-kammana tau tenaya najampangi hukkunga. 8 Ri tangnga-tangnganami anjo tau kammaya attallasa' anjo Lot tau bajika, angkasiaki pa'risi' pa'maika, lanri allo-allona nacini' siagang nalangngere' panggaukang ja'dala'na ke'nanga. 9 Jari Naassengi Batara angkanaya antekamma batena ampasalamaki tau eroka mannuruki ri ero'Na, punna nadallekangi sikamma paccobaya. Siagang Naassengi Batara angkanaya antekamma batena amboliki sikamma tau ja'dalaka, sollanna akkulle nisessa sallang ri Allonna Pangadelanga, 10 la'biangang sikamma tau anturukiai kaerokang kalenna sannaka ra'masa'na siagang anghinayai kakoasanNa Allata'ala. Antekamma baranina siagang tampona anjo guru-guru takontutojenga, sa'genna manna apa attallasa' mala'birika ri suruga tamangngalika tongi ke'nanga anghinai! 11 Sa'dangkang malaeka'-malaeka' la'bi gassinganga siagang makoasanganga na anjo guru-guru takontutojenga takkana kamma antuntuki apa mala'birika katallassanna ri dallekanNa Batara. 12 Mingka anjo guru-guru takontutojenga, teai sipato'! Sanrapang mami ke'nanga olo'-olo' nianakkanga untu' lanijakkala' siagang lanibunoa bawang. Tappikkirai ke'nanga, passangalinna kaerokang nyawanaji naturukiang. Sa'genna napakkanaimo ke'nanga apa-apa tanapahanga siagang kana-kana pahinaya. Lanri kammana, laposso' tommi ke'nanga sanrapang olo'-olo' sekkeka, passabakkang panggaukanna tonji ke'nanga. 13 Lanakasiaki ke'nanga kasessanga, a'jari pa'balasa' mae ri kasessang le'baka napare' ke'nanga. Ia nangaia ke'nanga iamintu tena masala nagaukang ri wattu singara'na alloa, sollanna napassukku' apa nakacinnanga tubuna ke'nanga. Punna simammempoangko siagang ke'nanga ri wattu pangnganre-nganreanga, sanna' appakaringi'na panggaukanna ke'nanga lanri nibengona ri hawa napasuna ke'nanga. 14 Nasaba' tenamo lanrena ke'nanga a'gau' dosa, sa'genna ia mami pangngainna ke'nanga iamintu ancinikia tojengi baine pagau' bawanga. Na nanyonyo'mo tau beru tappaka siagang tau tenaya najarre' tappa'na. Le'ba' a'jari biasami atinna ke'nanga ri kangoanga. Anjo ke'nanga sangnging tau langgappa pangngalarroi! 15 Sala oloammi ke'nanga, lanri tenana naero' anturuki oloang lambusuka. Oloang le'baka naolo Bileam ana'naya Beor riolo, naolo ke'nanga. Anjo Bileam a'gau' ja'dalaki lanri ero' duduna anggappa doe'. 16 Mingka niterassimi nipakainga' lanri kaja'dallanna, iamintu ri wattunna akkulle a'bicara kamma tau, keledaina. Jari nipassami anjo na'bia sollanna nammari anggaukangi anjo panggaukang pongoroka. 17 Anjo guru-guru takontutojenga sanrapangi timbuseng kalotoroka je'ne'na, siagang sanrapangi saliu' niirika ri anging lompo. Le'ba'mi nipasadiang ke'nanga se're tampa' sannaka sassanna ri Allata'ala. 18 A'bicara tampoi siagang a'bicara kosongi ke'nanga; siagang napakemi hawa napasuna ke'nanga untu' ampasala oloangi tau beru ta'lappasaka battu ri pa'rappunganna tau lingua ri katallassanna. 19 Najanjimi taua kabebasang anjo guru-guru takontutojenga, nakalenna ke'nanga nipare' ata iji ri kabiasang ampanrakiai rupataua; nasaba' inai-nai nibeta battu ri se'reang apa-apa, iami nipare' ata battu ri anjo ambetayai. 20 Punna ta'lappasa'mo taua battu ri kakoasanna lino anra'massiai rupataua, lanri tappa'namo mae ri Batara siagang Mappasalamatta Isa Almasi, nampa nijarro' poleang sa'genna nibeta ri anjo kakoasanga, kajarianna lapila' panra'mi anjo taua na rioloangannaya. 21 Anjo tau kammaya la'bi bajikangangi punna sikali tenale'bakai naasseng oloang tojeng battua ri Allata'ala, naia naassenga mingka taerokai anturuki apa Napassuroanga Allata'ala mae ri ke'nanga. 22 Anjo panggaukanna ke'nanga napa'buttimi kontutojenna lampang kana angkanaya, “Lanakanre poleangi kongkonga apa le'baka nalangngewang”; yareka “Tedong le'baka nije'ne', lamange poleangi anggulungi kalenna ri peoka.”
1 Sikamma sari'battangku sannaka kukarimangnginna! Iaminne surakku makaruaya mae ri kau. Lalang ri anjo surakku ruaya, kuusahakammi ampabangungi pikkirang-pikkirang annabaya lalang ri kalennu. 2 Kukellaiko sollanna nuu'rangi kana-kana le'baka napau na'bi-na'biNa Allata'ala riolo, siagang apa Napassuroanga Batara, Karaeng Mappasalamatta, ia napabattua sikamma tunisuroNa mae ri kau. 3 Uru-urua, musti nuassengi angkanaya ri allo-allo kala'busanga sallang, lania' ammumba sikamma tau nikoasaia katallassanna ri hawa napasu kalenna. Lanacau-cauko ke'nanga, 4 nakana, “Sai nukana a'janji Batara labattu! Kemaemi kamma-kamma anne? Matemi boe-boeta, mingka yangasenna apa-apaya tuli kammana ri uru nipa'jarina linoa!” 5 Napakkunjungiangi taeroka ke'nanga angngassengi angkanaya langika siagang buttaya nipa'jari la'bi riolo tete ri kananNa Allata'ala; angkanaya je'ne' siagang battu ri je'neki nipa'jari buttaya; 6 kammayatompa je'ne' todong, iamintu je'ne' a'ba nipake ampanraki anjo lino jammang rioloa. 7 Mingka anne langika siagang buttaya ri kamma-kammaya anne, niparakaia todong siagang kananNa Allata'ala, laniancuru' tongi sallang siagang pepe'. Kamma-kamma anne niparakai iji langika siagang buttaya sa'genna narapi' allonna lanihukkung siagang niancuru' sikontu tau tenaya natappa' ri Allata'ala. 8 Mingka sari'battangku ngaseng, anne se'rea passala' teako kaluppai: angkanaya ri paccini'Na Batara, anjo se'rea allo tena sisalana siagang sisa'bua taung. Anjo ruaya wattu sangkamma le'ba'ji mae ri Ia. 9 Tena nasallo Batara nampa Napassareang apa Napa'janjianga, manna pole nania' tau sala pahang kamma anjo. Mingka sa'baraki mae ri kau, nasaba' taNapa'biangako nia' panra' manna pole sitau. Eroki sollanna toba' ngaseng taua battu ri dosa-dosaya. 10 Mingka lasanrapangi palukka' kabattuanna anjo Allo kabattuanNa Batara. Anjo Alloa lassa'ra lompoi gunturuka nalanynya' langika; sikamma apa-apa niaka ri langika lala'busuki nakanre pepe'. Kammayatompa lalanynyaki buttaya siagang sikontu apa-apa niaka lalang. 11 Nasaba' yangasenna anjo sikammaya laniancuru' kammai anjo batena, antekammami batenu musti attallasa'? Jari musti nutangkasimi katallassannu ri dallekanNa Allata'ala, siagang mappilangngeri mako mae ri Ia, 12 lalang nutayanna siagang nupakalinta'na Allo kabattuanNa Allata'ala. Anjo Alloa lala'busuki nakanre pepe' langika, siagang lassolongi sikamma apa-apa niaka ri langi' napakamma bambang. 13 Mingka ikatte nitayammi apa Napa'janjianga Allata'ala, iamintu langi' berua siagang butta berua, niaka kaadelang lalanganna. 14 Lanri kammana, sikamma sari'battangku sannaka kukarimangnginna; ilalang nutayanna anjo Allo labattua, attojeng-tojengko usaha untu' a'jari tangkasa' siagang tena callannu lalang ri katallassannu ri dallekanNa Allata'ala. Siagang katutui bajiki passisambungannu siagang Allata'ala. 15 Pakemi anjo kasa'barranNa Batara a'jari kasampatang Napassareang mae ri kau sollannu akkulle salama'. Kamma tomminjo le'baka napau Paulus lalang sura'na mae ri kau. Pangngajara' battu ri Allata'ala nanatulisi' Paulus anjo kana kammaya mae ri kau. 16 Anjo passalaka tuli napauna Paulus lalang ri sikamma sura' natulisika. Memang, nia' siapa are passala' anjo napaua lalang ri sura'na sukkara' nipahang. Na anjo tau tenaya napahangi siagang tenaya najarre' tappa'na, naputara' bale'mi anjo apa natulisika Paulus. Anjo ri kammaya tena niparallu lannasa'. Lanri kamma tomminjo panggaukanna ke'nanga mae ri bageang maraengannaya bonena Kittaka. Anjo panggaukang kammaya poro kapanrakang bawang wassele'na mae ri kalenna ke'nanga. 17 Mingka ikau sikamma sari'battangku sannaka kukamaseanna, nuasseng ngasemmi anne passalaka. Lanri kammana, tutu laloko, gassingka katuru'-turukangko mae ri kalinguanna anjo tau tenaya naassengi atoranga sa'gennu tu'guru' battu ri pammantangang amanga. 18 Poro pila' nukasia' lalo passare lammoro'Na Batara, Karaeng Mappasalamatta iamintu Isa Almasi, siagang poro pila' tappa' laloko mae ri Ia. Poro Iami nipuji, ri kamma-kammaya anne sa'genna satunggu-tungguna! Aming. Sallangku, Petrus
1 Ia bonena anne kittaka, iamintu passala'na Kana attallasaka, iamintu Kana niaka memammo battu ri pakkaramulanna. Le'ba'mi nalangngere' siagang nacini' mata kalenna ikambe. Le'ba'mi nacini' siagang nata'gala' limanna ikambe. 2 Ri wattunna nipa'nyata anjo tallasaka, nacini'mi ikambe. Iaminjo saba'na na'jari sa'bimo ikambe mae ri anjo passalaka. Kibirittakammi mae ri kau ngaseng passala'na anjo tallasa' sitojennaya siagang mannannunganga, ia niaka siagang Manggea, kammayatompa le'bakamo nipa'nyata mae ri kambe. 3 Apa le'baka nacini' siagang nalangngere' ikambe, ia tomminjo nabirittakang ikambe mae ri kau ngaseng; sollannu amminawang todong siagang ikambe ampa'nyatai katallassang assiamaka, asse'rea siagang Manggea, kammayatompa asse're siagang Ana'Na iamintu Isa Almasi. 4 Natulisi'mi ikambe anne suraka sollanna rannu tojeng-tojeng pa'maitta. 5 Iaminne biritta le'baka nalangngere' ikambe battu ri Ana'Na siagang eroka napabattu ikambe mae ri kau ngaseng: Iaminjo Allata'ala singaraka, siagang tena sikali apa-apa sassang ri Ia. 6 Punna nikana asse'remi katallassanta siagang Ia, mingka attallasa' ijaki' lalang ri sassanga, a'balle-balle maki', baji' lalang kana-kana kammayatompa lalang panggaukang. 7 Mingka punna attallasakki' lalang ri singaraka, sangkamma Allata'ala niaki lalang ri singaraka, assiama' maki' massing para ikatte lalang ri katallassanta; kammayatompa nitangkasimi sikontu dosa-dosata lalang ri cera'Na Isa, Ana'Na Allata'ala. 8 Punna nikana tena nakidoraka, niballe-balleimi kalenta; taniassengami Allata'ala lalang ri atinta. 9 Mingka punna nimangakui dosa-dosata mae ri Allata'ala, laNarupaimi janjinNa siagang laNagaukammi apa-apa adeleka mae ri katte. LaNapammopporangi dosa-dosata siagang laNatangkasiki' battu ri sikontu kaja'dallanga. 10 Mingka punna angkanaki' tena kidoraka, sangkammami angkanaya nibilang paballe-ballei Allata'ala; battuanna tenamo niboliki ri atinta kananNa Allata'ala.
1 Sikamma ana'-anakku! Iaji nakutulisi' anne suraka kakukellaiko sollanna tena nugaukangi dosaya. Mingka punna nia' a'gau' dosa, nia' akkulle angngalleiki' iamintu Isa Almasi, Ia adeleka; laNapappala' tulungangki' mae ri dallekanNa Manggea. 2 Tete ri Ia minjo Isa Almasi nanipammopporang dosa-dosata. Siagang teai dosa-dosataji bawang, passangalinna dosana pole sikontu rupataua. 3 Punna mappilangngeriki' mae ri sikamma parentaNa Allata'ala, iaminjo a'jari pammatei angkanaya niassemmi Allata'ala. 4 Inai-nai angkana, “Kuassengi Allata'ala,” mingka tena namappilangngeri mae ri sikamma parentaNa, a'balle-ballemi anjo taua, siagang tanaassengai Allata'ala lalang ri atinna. 5 Mingka inai-nai mappilangngeri ri kananNa Allata'ala, iaminjo taua sukku' batena angkamaseangi Allata'ala. Iaminjo a'jari pammatei angkanaya asse're maki' siagang Allata'ala lalang ri katallassanta. 6 Inai-nai angkana asse'rei siagang Allata'ala lalang ri katallassanna, musti sangkammai siagang Almasi batena attallasa'. 7 Sikamma sari'battang sannaka kukarimangnginna! Anne apa kutulisika teai parenta beru. Anne parenta sallomo, le'bakamo nipabattu mae ri kau ngaseng battu ri uru-uruna tappa'nu mae ri Almasi; iamintu biritta battu ri Allata'ala le'bakamo nulangngere' ri pirangalloang. 8 Mingka manna nakamma, beru tonji anne kutulisika; nasaba' akkullei nicini' katojenganna lalang ri KalenNa Almasi siagang lalang ri kalennu ngaseng. Nasaba' lanynya'mi kamma-kamma anne sassanga siagang assioro'mi singara' kontutojenga. 9 Inai-nai nakana kalenna niaki lalang ri singaraka mingka nakabirisi sari'battanna, ma'nassa niaki lalang ri sassanga sa'genna kamma-kamma anne. 10 Inai-nai angkamaseangi sari'battanna, anjo taua attallasa'mi lalang ri singaraka, sa'genna tenamo apa-apa ri kalenna akkullea a'jari saba' natu'guru' naung ri dosaya paranna tau. 11 Mingka inai-nai angkabirisi sari'battanna, ma'nassa lalammi ri sassanga. Lalammi ri sassanga a'jappa, siagang tanaassengami angkana la'lampa kereimae, nasaba' takkulleai accini' napakamma anjo sassanga. 12 Kutulisiki anne suraka mae ri kau ngaseng ana'-anakku, nasaba' le'ba'mi nipammopporang dosa-dosanu lanri Almasi. 13 Kutulisiki mae ri kau ngaseng sikamma bapa'-bapakku, nasaba' nuassemmi anjo Ia niaka memammo battu ri pakkaramulanna. Kutulisiki mae ri kau ngaseng, sikamma ana'-ana' rungkaya, nasaba' le'ba'mi nubeta anjo I Ja'dala'. 14 Kutulisiki anne suraka mae ri kau ngaseng ana'-anaka nasaba' nuassemmi Allata'ala Manggea. Kutulisiki mae ri kau ngaseng sikamma bapa'-bapakku, nasaba' nuassemmi anjo Kana niaka memammo battu ri pakkaramulanna. Kutulisiki mae ri kau ngaseng sikamma ana'-ana' rungkaya, nasaba' gassing ngasengko. Niaki kananNa Allata'ala lalang ri atinnu ngaseng, siagang le'ba'mi nubeta anjo I Ja'dala'. 15 Teako karimangngi dudui anne linoa, yareka apa-apa mamo niaka ilalang ri anne linoa. Punna nukarimangngi dudui linoa, tenamo nalanukarimangngi Manggea. 16 Sikontu apa-apa niaka ilalang ri anne linoa, iamintu sikontu apa-apa nakaerokia sipa'-sipa' ma'rupatauna tau dorakaya, sikontu apa-apa nicinika siagang eroka nikammai, siagang sikamma apa-apa akkullea nikalompoang pa'mai' ri anne linoa, yangasenna anjo teai Allata'ala Manggea assala'na: passangalinna battu ri linoa assala'na. 17 Anne linoa siagang sikontu apa-apa niaka lalanganna, ia nakaerokia rupataua, kamma-kamma anne lanynya'mi. Mingka inai mappilangngeri ri ero'Na Allata'ala, tuli lattallasaki sa'genna satunggu-tungguna. 18 Sikamma ana'-anakku, a'reppese'mi kala'busang jammanga! Le'ba' mako nipauang la'bi riolo angkanaya labattui MusunNa Almasi; na kamma-kamma anne jaimi ammumba musu-musunNa Almasi. Iaminjo a'jari pammatei angkanaya la'birimmi wattunna Allo Kiamaka. 19 Ia musu-musunNa Almasi, iamintu sikamma tau a'lampayamo ambokoiki', nasaba' anjo ke'nanga teai memangi taunta. Punna taunta anjo ke'nanga, tantu tuli ammantangi assiagang ikatte. Mingka assulu'mi ke'nanga battu ri katte, sollanna a'jari singara'mo angkanaya tena manna sitau battu ri ke'nanga antama' tojeng-tojenga ri golonganta. 20 Mingka nutarimami RohNa Allata'ala, le'baka Napaturung Isa Almasi. Iaminjo saba'na nanuassemmo pangngajarang tojenga. 21 Jari kutulisiki anne suraka mae ri kau ngaseng teai lanri tenanapa nanuassengi pangngajarang tojenga, mingka ba'lalo lanri nuassennamo; siagang nuassenna tommo angkanaya anjo pangngajarang tojenga tale'bakai a'balle-balle. 22 Ia a'balle-ballea iamintu tau angkanaya teai Karaeng Mappasalama' Napa'janjianga Allata'ala anjo Isa. Iaminjo taua MusunNa Almasi; tena namangakui anjo Manggea siagang Anaka. 23 Inai-nai tena namangakui Anaka, ma'nassa tena tommo namangakui Manggea. Na inai-nai ammangakui Anaka, ma'nassa namangakui tommi Manggea. 24 Lanri kammana, musti nujagai baji'-baji' ri atinnu anjo biritta le'bakamo nulangngere' battu ri uru tappa'nu. Punna nuparhatikang baji'-baji' anjo birittaya, latuli asse're mako lalang ri katallassannu siagang Anaka kammayatompa Manggea. 25 Na iaminne Napa'janjianga KalenNa Almasi mae ri katte: Katallassang sitojennaya siagang mannannunganga. 26 Kutulisiki mae ri kau ngaseng ri passala'na sikamma tau eroka kamma-kamma anne antipuko. 27 Mingka ri passala'na kalennu ngaseng, le'ba'mi Napaturung Almasi RohNa mae ri kau ngaseng. Na lalang nia'na RohNa ri kau ngaseng, tenamo naparallu nia' tau angngajarakko. Nasaba' iaminjo RohNa angngajarakko untu' sikontu passalaka; na anjo apa Napangngajarranga kontutojengi, teai balle-balle. Lanri kammana, paralluko mannuruki ngaseng mae ri anjo apa Napangngajarranga; siagang paralluko tuli asse're siagang Almasi lalang ri katallassannu. 28 Jari, sikamma ana'-anakku, tuli asse're mako siagang Almasi lalang ri katallassannu, sollanna punna battui sallang, akkulle maki' andallekang mae ri Ia siagang barani; siagang tenamo nuero' accokko lanri siri'-siri'nu. 29 Nuassemmi angkanaya mappilangngeri Almasi mae ri ero'Na Allata'ala lalang ri katallassanNa. Lanri kammana, musti nuasseng tongi angkanaya inai-nai mappilangngeri mae ri ero'Na Allata'ala lalang ri katallassanna, iami ana'Na Allata'ala.
1 Coba sai cini'! Teai sipato' Nakamaseanta Allata'ala, sa'genta niareng ana'-ana'Na Allata'ala; na kamma memang tongi, ikatte anne ana'-ana'Naki' Allata'ala. Iaminjo saba'na natena napahangki' anne lino ja'dalaka, nasaba' anne linoa tanaassengai Allata'ala. 2 Sikamma sari'battangku sannaka kukarimangnginna! Ikatte kamma-kamma anne ana'-ana'Na maki' Allata'ala, mingka antekamma kajarianta sallang, tenapa na'nassa. Mingka niassengi angkanaya punna battu sallang Almasi, la'jari sangkamma maki' Ia, nasaba' lanicini'mi kalenta sitojeng-tojennaya. 3 Sikontu tau niaka panrannuang kammana anne mae ri Almasi lanajagai kalenna sa'genna tangkasa' tojeng-tojeng, iamintu tangkasa' battu ri dosa-dosaya sangkamma tangkasa'Na todong Almasi. 4 Inai-nai anggaukangi dosaya, nadakkaimi hukkunNa Allata'ala, nasaba' nikanaya dosa iamintu nidakkai hukkunNa Allata'ala. 5 Nuassengi angkanaya battui Almasi untu' antangkasi dosa-dosana rupataua, siagang angkanaya tena dosa lalang ri KalenNa. 6 Sikontu tau asse'rea siagang Almasi lalang ri katallassanna, tenamo natuli lanagaukang ija dosaya. Inai-nai tuli anggaukangi dosaya, tenale'bakai nacini' siagang naasseng Almasi. 7 Sikamma ana'-anakku, teako passareangi kalennu nipasala oloang ri tau maraenga. Inai-nai anggaukangi ero'Na Allata'ala, iami ana'Na Allata'ala sangkamma todong Almasi Ana'Na Allata'ala. 8 Mingka inai-nai tuli a'gau' dosa, iami ana'na Billisika, nasaba' anjo Billisika doraka memammi battu ri pakkaramulanna. Untu' iaminne Nabattu Ana'Na Allata'ala, iamintu untu' angngancuruki jama-jamanna Billisika. 9 Inai-nai a'jarimo ana'Na Allata'ala, tenamo natuli la'gau' dosa, nasaba' nia'mi sipa'Na Allata'ala ri kalenna. Nasaba' iaminjo Allata'ala Manggena, tenamo natuli lanagaukang ija dosaya. 10 Iaminne sisalana ana'-ana'Na Allata'ala siagang ana'-ana'na Billisika: inai-nai tena nagaukangi ero'Na Allata'ala, yareka tena nakamaseangi paranna tau, anjo taua teai ana'Na Allata'ala. 11 Battu ri pakkaramulannaji nanipabattumo anne birittaya mae ri kau ngaseng, angkanaya: musti massing sikamaseangki' ikatte ma'rupataua. 12 Teako sangkammai Kain, ia battua ri I Ja'dala' assala'na, siagang ambunoai sari'battang kalenna. Apa saba'na nanabuno Kain sari'battanna? Nasaba' salai anjo apa-apa nagaukanga mingka annabai anjo apa-apa nagaukanga sari'battanna. 13 Lanri kammana, sikamma sari'battangku, teako lannasakki punna nakabirisiko tu linoa anne. 14 Niassemmi angkanaya assulu' maki' battu ri kamateanga siagang a'lette' maki' mae ri katallassanga. Niassemmi anjo, nasaba' massing sikamaseang maki' para ikatte. Inai-nai tena namangngamaseang, iami nikoasai ri kamateanga. 15 Inai-nai angkabirisi paranna tau iami pabuno tau; na nuassemmo angkanaya anjo tau kammaya takkulleai nagappa katallassang sitojennaya siagang mannannunganga. 16 Battu ri kammanami anne naniassemmo antekamma bateta angkamaseangi paranta tau. Le'ba'mi Napassareang katallassanNa Almasi untu' ikatte. Lanri kammana, musti nipassareang tongi katallassanta untu' sikamma paranta tau! 17 Punna nia' tau angkammai pa'barang-baranganna linoa, nampa nacini' paranna tau kakurangang, mingka taerokai antulungi anjo paranna tau, antekamma lakkulle nikana nakamaseangi Allata'ala? 18 Sikamma ana'-anakku! Teako ri bawanuji yareka ri bicarannuji bawang mangngamaseang. Mingka paralluki' mangngamaseang tojeng-tojeng, siagang nipa'butti lalang ri panggaukanta. 19 Iaminne carata angngassengi angkanaya ma'nassa antamakki' ri golonganna tau battua ri Allata'ala, sollanna akkulle sannang atinta ri dallekanNa Allata'ala. 20 Punna nibilang salaki' ri ati mailalanta, niassengi angkanaya lompoangangi pangngassenNa Allata'ala na pangngassengang niaka ri atinta siagang Naasseng ngasengi sikontu apa-apaya. 21 Jari, sikamma sari'battangku kukarimangngia, punna tena nanibilang salaki' ri ati mailalanta, akkulle maki' andallekang ri Allata'ala siagang barani. 22 Siagang apa-apa mamo nipala' battu ri Ia, tena tanigappana, lanri mappilangngeriki' mae ri sikamma parentaNa, siagang nigaukangi apa Nangaia ri atinNa. 23 Ia Napassuroanga mae ri katte iamintu: musti tappakki' mae ri Ana'Na, iamintu Isa Almasi; siagang musti massing sikamaseangki', sangkamma le'baka Napassuroang Almasi mae ri katte. 24 Sikontu tau mappilangngeria mae ri sikamma parentaNa Allata'ala, asse'rei mae ri Allata'ala lalang ri katallassanna, siagang asse're tongi Allata'ala mae ri katallassanna. Na niasseng angkanaya asse'rei Allata'ala mae ri katallassanta, lanri le'ba'mi Napassareang RohNa mae ri katte.
1 Sikamma sari'battangku sannaka kukarimangnginna! Teako patappa' ngasengi tau nakanaya niaki RohNa Allata'ala ri kalenna; mingka pilajari rolong baji'-baji' sollanna akkulle nuasseng angkanaya roh battu kemae anjo niaka ri ke'nanga: Roh battuka ri Allata'ala yareka teai. Nasaba' kamma-kamma anne jai na'bi balle-balle a'jappa mange-mange. 2 Kamma anne carana nakkulle nuasseng angkanaya apaka anjo RohNa Allata'ala yareka teai: Inai-nai ammangakui angkanaya anjo Isa Almasi Iami battua ri lino ma'rupatau, iaminjo taua nia' Roh battu ri Allata'ala lalang ri kalenna. 3 Mingka inai-nai tena namangakui anjo kammaya mae ri Isa, iaminjo taua tena RohNa Allata'ala ri kalenna. Rohnaji MusunNa Almasi nia' ri kalenna anjo tau kammaya. Le'ba'mi nulangngere' angkanaya laniaki battu anjo roh kammaya, siagang kamma-kamma anne nia'mi lalang ri anne linoa. 4 Mingka sikamma ana'-anakku, ikau tau battu ngasengko ri Allata'ala assala'nu. Le'ba'mi nubeta na'bi-na'bi balle-ballea, nasaba' Roh niaka ri kau la'bi makoasangangi na roh niaka ri taunna ngaseng anne linoa. 5 Anjo na'bi-na'bi balle-ballea sangnging passala' linoa nabicara; nipilangngerimi bicaranna ke'nanga ri anne linoa, nasaba' anjo ke'nanga tau battu ri linoa assala'na. 6 Mingka ikatte anne ana'-ana'Naki' Allata'ala; na inai-nai angngassengi Allata'ala, napilangngeri tommi bicaranta. Inai-nai teai taunNa Allata'ala tena nalaNapilangngeri bicaranta. Kammami anjo carata nakkulle niasseng antekamma sisalana Roh assarea pangngajarang tojeng, siagang roh ampasala oloangai taua. 7 Sikamma sari'battang sannaka kukarimangnginna! Mae mako kimassing sikamaseang; nasaba' Allata'ala assala'na anjo pangngamaseanga. Inai-nai mangngamaseang, iami ana'Na Allata'ala siagang iami angngassengi Allata'ala. 8 Tau tenaya namangngamaseang, tanaassengai Allata'ala; nasaba' anjo Allata'ala mangngamaseangi. 9 Napa'nyatami pangngamaseanNa Allata'ala lalang ri atinta, lanri Nasuromi Ana' sitau-tauNa untu' antama' ri linoa sollanna akkulle nigappa katallassanga tete ri anjo Ana'Na. 10 Iaminne pangngamaseanga: Teai ikatte le'ba' angkamaseangi Allata'ala, mingka Allata'ala angkamaseangki' siagang Nasuroi battu Ana'Na sollanna tete ri Ia nanipammopporang dosa-dosata. 11 Sikamma sari'battangku, sannaka kukarimangnginna; punna sanna' bateta nikamaseang ri Allata'ala, musti massing sikamaseang tongki'. 12 Tena manna sitau le'ba' anciniki Allata'ala; mingka punna massing sikamaseangki', asse'remi Allata'ala mae ri katte siagang a'jari sukku'mi pangngamaseanNa lalang ri kalenta. 13 Lanri le'ba'mi Napassareang RohNa Allata'ala mae ri katte, jari niassemmi angkanaya asse're maki' lalang katallassanta mae ri Allata'ala, siagang asse'remi Allata'ala mae ri katallassanta. 14 Kalenna ikambe le'ba' anciniki Ana'Na Allata'ala, siagang napabattumi ikambe mae ri tau maraenga angkanaya Iami anjo Ana'Na Nasuro Allata'ala antama' ri linoa untu' a'jari Karaeng Mappasalama' ri anne linoa. 15 Inai-nai ammangakui anjo Isa angkanaya Iami Ana'Na Allata'ala, asse'remi Allata'ala mae ri katallassanna anjo taua; kammayatompa anjo taua asse're tommi lalang tallasa'na mae ri Allata'ala. 16 Niassemmi siagang tappa' maki' mae ri pangngamaseanNa Allata'ala mae ri katte. Anjo Allata'ala Iami mangngamaseang. Inai-nai nikoasai katallassanna ri pangngamaseang, iaminjo taua asse're katallassanna mae ri Allata'ala, siagang asse'remi Allata'ala mae ri katallassanna. 17 Nipa'jari sukkuki pangngamaseanga lalang ri atinta, sollanna nakia'jari barani ri Allo Pangadelanga. La'jari baraniki', nasaba' sangkammami carata attallasa' ri anne linoa siagang caraNa Almasi attallasa'. 18 Inai-nai mangngamaseang, tanaassengami nikanaya malla'; nasaba' anjo pangngamaseang sukkuka napa'lanynya'mi nikanaya malla' lalang ri kalenna taua; nasaba' anjo mallaka nia' passisambunganna siagang hukkunganga. 19 Mangngamaseangki', lanri Allata'ala la'bi riolo angkamaseangki'. 20 Punna nia' tau angkana, “Kukamaseangi Allata'ala,” mingka nakabirisi paranna tau, paballe-ballei anjo taua. Nasaba' inai-nai tena nakamaseangi paranna tau, iamintu nacinika matanna, tena olona lakkulle nakamaseang Allata'ala, ia tenaya naciniki. 21 Lanri kammana, iaminne parenta Napassareanga Almasi mae ri katte: Inai-nai mangngamaseang ri Allata'ala, musti nakamaseang tongi paranna tau.
1 Inai-nai tappa' angkanaya iaminjo Isa, Karaeng Mappasalama' Napa'janjianga Allata'ala, iami Ana'Na Allata'ala. Na inai-nai mangngamaseang ri Manggea, nakamaseang tongi Anaka. 2 Lalang kammanami anne nakkulle niasseng angkanaya nikamaseangi ana'-ana'Na Allata'ala, iamintu: mangngamaseangki' mae ri Allata'ala, siagang nipilangngeri sikamma parentaNa. 3 Nasaba' battuanna nikanaya mangngamaseang mae ri Allata'ala, iamintu nipilangngeri sikamma parentaNa. Na anjo sikamma parentaNa tena nabattala' untu' ikatte; 4 nasaba' sikamma ana'Na Allata'ala akkulle ngasengi nabeta anne lino ja'dalaka. Na anne linoa akkullei nibeta siagang katappakkanta. 5 Inaika akkulle ambetai lino ja'dalaka? Iaji bawang tau tappaka angkanaya anjo Isa, Iami Ana'Na Allata'ala. 6 Iaminjo Isa Almasi, antamaka ri anne linoa angngerang je'ne' lanapa'je'neka siagang cera' kamateanNa. Tena naje'ne' bawang Naerang battu, mingka je'ne' siagang cera'. Na KalenNa RohNa Allata'ala a'jari sa'bi angkanaya kammatojengi anjo; nasaba' iaminjo Roh kontutojenga. 7 Jari, nia' tallu sa'bi: 8 RohNa Allata'ala, je'ne', siagang cera'; anne tallua sangkamma ngasengi kasa'bianNa. 9 Tappakki' mae ri kasa'bianna rupataua, mingka jarrekangangi pole kasa'bianNa Allata'ala. Na iaminjo kasa'biang le'baka Napassareang Allata'ala ri passala'na Ana'Na. 10 Lanri kammana, inai-nai tappa' ri Ana'Na Allata'ala, natarimami anjo kasa'bianga lalang ri atinna; mingka inai-nai tena natappa' mae ri Allata'ala, nacini' paballe-ballemi Allata'ala, nasaba' tena napatappaki bicaranNa Allata'ala ri passala'na anjo Ana'Na. 11 Iaminne kasa'bianna: Nasare maki' Allata'ala katallassang sitojennaya siagang mannannunganga, siagang Ana'Nami kabattuanna anjo katallassanga. 12 Inai-nai antarimai anjo Anaka, natarimami anjo katallassanga; na inai-nai tena natarimai anjo Ana'Na Allata'ala, tenamo natarimai anjo katallassanga. 13 Kutulisi'mi anne suraka mae ri kau ngaseng tau tappaka ri Ana'Na Allata'ala, sollanna nuasseng angkanaya nutarimami anjo katallassang sitojennaya siagang mannannunganga. 14 Siagang barani maki' andallekang ri Allata'ala, lanri tappakki' angkanaya laNaiyoi pappala' doanganta; manna pole apa nipala' mae ri Ia laNaiyoi assala' situruki ero'Na anjo pappalatta. 15 Nasaba' niassengi angkanaya lanipilangngeriki' punna appalakki' ri Ia, jari niasseng tommi angkanaya laNasareangki' sikamma apa nipalaka ri Ia. 16 Punna nia' nucini' parannu tu Karisteng a'gau' dosa natenaja nangngerang kamateang, paralluko appala' doang ri Allata'ala; nalanisaremo katallassang anjo taua. Anne natabaya iamintu tau a'gau' dosaya, mingka tenaja nangngerang kamateang. Mingka nia' gau' dosa angngerang kamateang; tena nakukana musti appala' doangko mae ri Allata'ala lanri anjo passalaka. 17 Sikamma panggaukang salaya dosa ngaseng, mingka nia' dosa tenayaja nangngerang kamateang. 18 Niassengi angkanaya sikontu tau a'jariamo ana'-ana'Na Allata'ala, tenamo natuli a'gau' dosa ija; nasaba' nijagai ri Ana'Na Allata'ala siagang takkulleami I Ja'dala' a'gau' apa-apa mae ri ia. 19 Niassemmi angkanaya ikatte anne tau battuki' ri Allata'ala, manna pole nanikoasaimo sikontu linoa ri I Ja'dala'. 20 Niassemmi angkanaya battumi Ana'Na Allata'ala siagang le'ba' maki' Napapahangngiang sollanta tappa' mae ri Allata'ala sitojennaya. Asse're maki' mae ri Allata'ala sitojennaya lalang ri katallassanta, kammayatompa asse're tommaki' mae ri Ana'Na, iamintu Isa Almasi. Iami Allata'ala sitojennaya, siagang Iami katallassang sitojennaya siagang mannannunganga. 21 Sikamma ana'-anakku, pakabellai kalennu battu ri sikamma barhalaya!
1 Battu ri nakke, pamimping jama'aka; kupappitarimangi anne suraka mae ri Amma' Napilea Allata'ala, siagang mae ri ana'-ana'na Amma' sannaka kukarimangnginna. Teai inakke bawang, mingka sikontu pole tau angngassengai Allata'ala tojenga, Nakarimangngi ngaseng tongko. 2 Nasaba' niaki Allata'ala matojenga ammantang lalang ri atinta, siagang latuli niaki anrurungangki' sa'genna satunggu-tungguna. 3 Poro nisareki' barakka', pangngamaseang kammayatompa kasalewangang battu ri Allata'ala Manggea, siagang battu ri Isa Almasi Ana'Na anjo Manggea. Poro nitarima ngasengi anjo siagang ati maci'nong kammayatompa lalang pangngamaseang. 4 Sanna' rannuku lanri kuassenna angkanaya nia' ana'-anatta attallasa' situru' ajaranNa Allata'ala, situru' Napassuroanga Allata'ala Manggea mae ri katte. 5 Lanri kammana anjo, Amma', kupala' tojeng-tojengi nakipara sikamaseang ngaseng. Anne kupaua teaiji parenta beru; anne parentaya nipassareang memammi mae ri katte battu ri uru tappatta. 6 Battuanna nikanaya mangngamaseang, iamintu nipilangngeri sikamma parentaNa Allata'ala. Na anjo parenta le'bakamo nulangngere' battu ri pakkaramulanna, iamintu angkanaya musti massing sikamaseangko lalang ri katallassannu. 7 Jaimi patipu a'lampa mange-mange ri sikontu linoa. Ia ke'nanga, iamintu sikamma tau tenaya namangakui angkanaya antama'mi Isa Almasi ri lino ma'rupatau. Anjo tau kammaya, iami patipu, siagang musunNa Almasi. 8 Lanri kammana, jagai gassingka niakko ampelaki anjo apa le'baka nausahakang ikambe untu' ikau ngaseng. Usahako sollanna nutarima ngaseng sawala'nu. 9 Inai-nai tena nanna'gala' jarre' mae ri pangngajaranNa Almasi, passangalinna ammengkai battu ri apa le'baka Napangngajarrang, anjo taua tena Allata'alana. Inai-nai tuli anna'gala' mae ri pangngajaranNa Almasi, natarima tommi Allata'ala Manggea siagang pole Anaka. 10 Lanri kammana, punna nia' tau battu siagang nabirittakang mae ri kau pangngajarang tenaya Napangngajarrangi Almasi, teako tarimai anjo taua antama' ri balla'nu; tea tongko a'barisallangi mae ri ia angkana “Salamakko.” 11 Nasaba' inai-nai a'barisallang mae ri anjo tau kammaya, ma'nassa amminawang tommi siagang anjo taua anggaukangi panggaukang ja'dalaka. 12 Jai sikali parallu lakupau mae ri kau ngaseng, mingka bajikangangi punna tena nakupalalangi ri suraka. Kuminasai nakuakkulle battu angkunjungiko siagang kalengku a'bicara mae ri kau ngaseng, sollanna akkulle rannu tojeng-tojeng atinta. 13 Akkiringi sallang mae ri katte sikamma ana'-ana'na sari'battanta bainea, nipilea todong ri Allata'ala.
1 Sari'battangku Gayus, sannaka kukarimangnginna! Battu ri nakke, pamimping jama'aka, angkamaseang tojeng-tojengako; 2 appala' doanga' sollannu gassing tamangngapa-apa, siagang baji'-baji' ngaseng ri kalennu, sangkamma baji'na pa'mai'nu. 3 Sanna' rannuna pa'maikku ri wattunna nia' siapa are paranta tu Karisteng battu na napabattu antekamma tamamminranu mae ri Allata'ala matojenga; nasaba' memang tuli attallasa' mako situru' ero'na anjo birittaya. 4 Tena akkulle la'bi ampakarannuangangi pa'maikku, naanjo kulangngere'na angkanaya attallasaki ana'-anakku situru' ajaranNa Allata'ala. 5 Sari'battangku! Sanna' tamamminranu lalang jama-jamang nugaukanga mae ri paranta tu Karisteng; ba'lalo manna tau tenayapa nuassengi, nulayani tongi. 6 Napaumi ke'nanga mae ri jama'aka anrinni ri sesena pangngamaseannu. Tulung sai ke'nanga sollanna akkulle napannarrusu' lampana ke'nanga. Gaukammi anjo siagang cara akkullea ampakasannangi atinNa Allata'ala, 7 nasaba' anjo pa'lampanna ke'nanga iamintu allayani jama-jamanNa Almasi. Nagaukangi ke'nanga anjo jama-jamanga siagang tena sikali apa-apa nagappa ke'nanga battu ri tau tenaya natappa' mae ri Almasi. 8 Lanri kammana, ikatte tu Karistenga musti nitulungi paranta tu Karisteng kammaya anjo, sollanta akkulle amminawang turu' lalang ri usahana ke'nanga, iamintu untu' ampa'la'bangi biritta tojeng battua ri Allata'ala. 9 Le'ba'ma' annulisi' sike'de' sura' mae ri jama'aka, mingka anjo Diotrefes, eroka a'jari pamimping lalang ri jama'aka, taerokai ampilangngeria'. 10 Punna battua' sallang, eroki kubicara anjo passala' apa-apa le'baka nagaukang iamintu kaja'dallanga siagang bicara balle-ballea, ia le'baka nacarita ri sesena ikambe! Mingka tagannakapi anjo sikammaya mae ri ia. Ri wattunna battu anjo aganta ngaseng paranta tu Karisteng, taerokai antarimai ke'nanga. Ba'lalo napisangkai tau eroka antarimai ke'nanga, siagang nasuroi ke'nanga assulu' battu ri jama'aka! 11 Sari'battangku, sannaka kukarimangnginna; teako turuki apa-apa kodia. Iamo apa-apa bajika nuturuki. Inai-nai a'gau' baji', iami anjo taua tau battu ri Allata'ala. Na inai-nai a'gau' ja'dala', ma'nassa tenapa nale'ba' sibuntulu' siagang Allata'ala. 12 Sikontu taua napuji Demetrius. Ba'lalo Allata'ala pole Napuji tongi. Ikambe pole ampuji tongi, siagang nuasseng ngasemmi angkanaya annabai anne apa napabattua ikambe. 13 Jai sikali parallu lakupau mae ri kau ngaseng, mingka bajikangangi punna tena nakupalalangi ri suraka. 14 Kuminasai angkanaya tenamo nasallo nakilasibuntulu', naki'bicara kalenta. 15 Poro Nabarakkakiko Batara! Akkiringi sallang mae ri kau, sikamma sari'battang niaka anrinni. Pabattuanga' sallangku mae ri sikamma sari'battanta tasse're-se're.
1 Sikamma sari'battangku, ia le'baka nikio' siagang sannaka nikamaseanna ri Allata'ala Manggea, kammayatompa nikatutuia untu' Isa Almasi. Battu ri nakke, atanNa Isa Almasi, iamintu Yudas, sari'battanna Yakobus; 2 ma'minasa' mae ri Allata'ala sollannu Nasare ngaseng alla'bi-la'bi barakka', pangngamaseang, kammayatompa kasalewangang. 3 Sikamma sari'battangku sannaka kukarimangnginna! Sanna' dudu erokku annulisi' sura' mae ri kau ngaseng ri passala'na kasalamakkang nitarimayamo. Mingka kamma-kamma anne erokka' kusa'ring ampakaingakko lalang ri anne suraka, sollannu barjuang turus untu' katappakkanta; anjo katappakkanga sikaliji Napassareang Allata'ala sa'genna satunggu-tungguna mae ri Umma'Na. 4 Nasaba' tanisa'ringai na nia'mo siapa are tu kodi ateka' antama' ri tangnga-tangngata. Anjo ke'nanga sangnging tau panra'; naputara' baleki biritta pangngamaseanNa Allata'alata, sollanna akkulle anggappa kasampatang ke'nanga untu' anggaukangi ero' hawa napasuna. Taerokai ke'nanga antarimai Isa Almasi, Batara Makoasa tena ruanna. Battu riolo dudu iji nanipau la'bi riolo memammo lalang ri Kittaka hukkungang lanagappaya ke'nanga. 5 Yangasenna anjo nuasseng ngasemmi. Mingka, erokko kupakainga' ri passala' antekamma bateNa Batara ampasalamaki umma' Israel battu ri butta Mesir; mingka ribokoanganna Nabunoi sikamma tau tenaya natappa' ri alla'na ke'nanga. 6 U'rangi tongi sikamma malaeka' eroka appanggaukang allaloangai kakoasanna ke'nanga, sa'genna a'lampa ke'nanga ambokoi pammantanganna. Nisikko'mi ri Allata'ala sikamma anjo malaekaka siagang rante tamattappuka, irawa ri tampa' sassanga rawanganna buttaya. Anjoremmi ke'nanga nitahang turus, sa'genna nitappuki hukkunganna ke'nanga ri Allo sannaka heba'na sallang. 7 U'rangi tongi kota Sodom siagang Gomora kammayatompa kota-kota niaka ri ampi'na, appanggaukang kammaya todong anjo sikamma malaekaka tuma'buttana. Nagaukangi ke'nanga nikanaya gau' bawang siagang gau' bambalaka; sa'genna nisessa ke'nanga siagang pepe' a'rinraya satunggu-tungguna, untu' a'jari pappakainga' mae ri sikontu rupataua. 8 Kammatommi anjo tau a'rupa-rupa dudua nanawa-nawa, sa'genna a'gau' dosamo ri batangkalenna tonji ke'nanga. Nacini' rawai kakoasanNa Allata'ala siagang nahinai sikamma apa-apa attallasaka siagang mala'birika ri suruga. 9 Manna kalenna Mikhael, iamintu kapalana malaekaka, tale'bakai a'gau' kamma anjo. Ri wattunna a'besere' siagang Billisika passabakkang inai langgappai maya'na Musa, tena nabarani Mikhael angngadeli siagang bicara hina Billisika. Angkanaji bawang Mikhael, “LaNapakainga' lompoko Batara!” 10 Mingka napakka'-pakkanaimi siagang nahinami ke'nanga sikontu anjo apa-apa tanapahanga ke'nanga. Sanrapangi ke'nanga olo'-olo' tenaya pikkiranna, iamintu pakkasia'naji bawang napake untu' angngassengi apa-apaya. Mingka passabakkang iatommi anjo apa-apa kammaya naancuru' ke'nanga. 11 Cilaka ngasengi ke'nanga! Amminawammi ke'nanga rioloang le'baka naolo Kain. Napanaummi kalenna ke'nanga ri kalo'bang kalinguanga sangkamma Bileam, sollanna akkulle ke'nanga anggappa doe'. Na niancuru' tommo ke'nanga lanri angngewana sangkamma Korah. 12 Ri wattunnu assua'-suara' angnganre, ia ngasemmi anjo tau kammaya anra'massiko. Nasaba' tena siri'na ke'nanga angnganre siagang sanna' angngoana; kaparalluang kalennaji bawang najampangi ke'nanga. Sanrapangi ke'nanga rammang nairika anging mingka tena nappaturung bosi. Sanrapang tongi ke'nanga poko' kayu tenaya na'rappo manna pole nawattu pa'rappoammo; sanrapangi poko' kayu le'bakamo nibi'bu' siagang mate taba sikalimi. 13 Sanrapang bombang sannaka lompona siagang a'busa-busaya ri tamparanga, sangkamma tommi anjo sanrapanna a'busa-busana panggaukang appakasiri'-siri'na ke'nanga. Sanrapangi ke'nanga bintoeng-bintoeng pitilampa-lampaia, siagang le'bakamo nipasadiang tampa'na ri Allata'ala, iamintu lalang ri tampa' sannaka sassanna sa'genna satunggu-tungguna. 14 Henokh, iamintu sossorang makatujua lapisi'na battu ri Adam, le'baki napau la'bi riolo pirangalloang ri passala'na ngaseng anne tau kammaya. Angkanai Henokh, “Ciniki sallang, labattui Batara siagang assa'bu-sa'bu malaeka' matangkasa'Na, 15 untu' angngadeli sikontu rupataua. LaNahukkung ngasengi Batara sikamma tau ja'dalaka lanri panggaukang bambala'na ke'nanga. Siagang laNahukkung ngaseng tongi bicara-bicara hina napaua sikamma tau dosaya siagang dorakaya.” 16 Anjo taua tuli a'reku'na ngaseng giginna siagang tuli nasalakanna tau maraenga. Tuli naturukiangi ke'nanga apa nakaerokia pa'mai' dorakana ke'nanga. Napalecei kalenna ke'nanga, siagang a'bali' ballammi ke'nanga sollanna akkulle anggappa passawallang. 17 Mingka sikamma sari'battangku sannaka kukarimangnginna, u'rangi apa-apa le'baka napau sikamma tunisuroNa Batara Isa Almasi pirangalloang. 18 Napauang ngaseng mako la'bi riolo angkanaya punna a'reppese'mo Allo Kiamaka, lammumbami tau ancau-cauako, iamintu sikamma tau anturukiai ero' kaja'dallanna lalang ri katallassanna. 19 Yangasemmi anne ke'nanga tau lappa'niaka passisala-salang siagang nikoasaia ri sipa'-sipa' ero' pakkalinoanga. Anjo ke'nanga tau tena ngaseng nanipantamai ri RohNa Allata'ala. 20 Mingka ikau ngaseng, sikamma sari'battangku, parallui tuli nupakajarre' turus katappakkannu mae ri Isa Almasi; anjo tappa'nu sanna' tangkasa'na. Na lalang kammana anjo appala' doangko siagang koasa RohNa Allata'ala; 21 siagang tuli a'la'lang mako irawangang pangngamaseanNa Allata'ala, lalang nutayanna passareNa Batarata Isa Almasi, Ia lassareako katallassang sitojennaya siagang mannannunganga. 22 Ia tau ranggaselaya atinna, parallui nupa'nyata pangngamaseannu mae ri ia. 23 Besoki assulu' tau sanrapang lalanga ri pepeka sollanna salama' ke'nanga. Mae ri tau maraenganga, parallui nupa'nyata pangngamaseannu nirurunganga siagang malla'; mingka kabirisi ba'lalo pakeang ra'masa'na ke'nanga napakamma kaerokang dorakana ke'nanga. 24 Allata'ala, Makoasaya anjagaiko sollanna tena nutu'guru' siagang Makoasaya angngerangko mae ri dallekang mala'biri'Na siagang rannu kammayatompa tena callannu, 25 Iami Allata'ala, tenaya ruanNa; Iami ampasalamakki' tete ri Isa Almasi Batarata. Iami Allata'ala Mala'birika, Malompoa, Makoasaya, kammayatompa Magassinga battu riolo sa'genna kamma-kamma anne kammayatompa sa'genna satunggu-tungguna! Aming.
1 Ia bonena anne Kittaka, iamintu apa-apa le'baka Napappicinikang Isa Almasi ri passala'na sikontu apa-apa lakajarianga sallang. Napappiassengangi Allata'ala mae ri Almasi sollanna Napabattu Almasi mae ri sikontu atanNa Allata'ala apa-apa tenayamo nasallo namusti kajariang. Nasuromi Almasi a'lampa malaeka'Na mae ri atanNa, iamintu Yohanes, untu' ampappiassengangi mae ri ia anjo apa-apa lakajarianga. 2 Nampa nacarita ngasemmo Yohanes sikontu anjo apa-apa nacinika; na iaminne laporanna ri sesena pappasanNa Allata'ala, nipakajarreka ri Isa Almasi tete ri kasa'bianNa. 3 Maupaki tau ambacayai siagang tau allangngerekai biritta napau la'bi rioloa anne kittaka, kammayatompa nanaturuki apa niaka tattulisi' ilalang. Nasaba' tasalloami nalakajariang ngaseng anne sikammaya. 4 Sikamma sari'battang niaka ri tujua jama'ah ri daera Asia! Inakke, Yohanes, ma'minasa' nuporo nisare ngaseng barakka' siagang kasalewangang battu ri Allata'ala, Ia niaka battu ri pakaramulanna, ri kamma-kammaya anne, sa'genna satunggu-tungguna; kammayatompa battu ri tujua roh ia niaka ri dallekang empoang kala'biranNa Allata'ala, 5 siagang battu ri Isa Almasi, sa'bi tamamminraya. Iami uru-uru nipattallasa' poleanga ammotere' battu ri kamateanga siagang Iami makoasaya irateanganna sikamma karaeng niaka ri lino. Nakamaseangki' Isa, siagang lanri kamateanNa naNapata'lappasa' maki' battu ri dosa-dosata ngaseng. 6 Nampa Napa'jariki' se're bansa imang-imang, allayania mae ri Allata'ala, ManggeNa. Iaminjo Isa Almasi malompoa siagang makoasaya sa'genna satunggu-tungguna. Aming! 7 Ciniki, niakI battu lalang ri rammanga! Sikontu rupataua lanacini' ngasengI, kammayatompa tau le'baka antobokI poke. Lanri Iami nalappiraung ngaseng sikontu bansa-bansaya ri lino. Mattantu kammana! Aming! 8 “INakkemi uru-urua, siagang iNakkemi kala'busanga,” kammami anjo kananNa Karaeng Allata'ala, Ia niaka battu ri pakaramulanna, ri kamma-kammaya anne, sa'genna satunggu-tungguna, Ia Kaminang Makoasaya. 9 Inakke Yohanes, sari'battannu ngaseng, nuaganga' a'julu sessa sangkamma nakasiaka sikontu tau amminawanga ri Almasi. Sa'barakki' angkasiaki kasessanga, lanri ikatte anne umma'Naki'. Nipelakka' mange ri Pulo Patmos passabakkang kupa'la'bangi pappasang battua ri Allata'ala, Napakajarreka Isa lalang ri kasa'bianNa. 10 Ri allonNa Batara, nikoasaia' ri RohNa Allata'ala; nampa nia' kulangngere' sa'ra sannaka lompona, sangkamma sa'ra tarompe', battu ri bokoku. 11 Nakana anjo sa'raya, “Tulisiki apa nucinika, nampa nukiring anjo kitta' nutulisika mae ri tujua jama'ah, iamintu: Efesus, Smirna, Pergamus, Tiatira, Sardis, Filadelfia, siagang Laodikia.” 12 Assailema' mae ri boko ero' anciniki angkana maka inai anjo a'bicara mae ri nakke. Nampa nia' kucini' tuju bangkeng lampu ammakea sumbu, bulaenga nipare'. 13 Ri tangnga-tangngana anjo sikamma bangkeng-bangkeng lampua nia' sitau ammenteng a'rupa taua nicini' tanja'Na. Ammakei juba turunga sa'genna naung ri bangkenNa. Na barambanNa ammakei passikko' bulaeng. 14 Uu'Na keboki sangkamma bulunna gimbalaka, kebo'Na sangkamma le'baki kapasa'. MatanNa a'rinra-rinrai sangkamma pepe'; 15 na bangkenNa accayai sangkamma tambaga nitunua. Sa'ranNa sangkammai je'ne' ammarrung lompoa battu. 16 Lima kananNa anna'galaki tuju bintoeng, na battu ri bawaNa nia' assulu' pa'dang sannaka taranna, siagang tarang pimbali-balia. RupanNa accayai sangkamma matanna alloa ri wattu tangngana alloa. 17 Ri wattunna kucini', su'ju'ma' naung ri dallekanNa sangkamma tau matea. Mingka Napadongko'mi lima kananNa ri kalengku nampa Nakana mae ri nakke, “Teako mallakki! INakkemi uru-urua siagang iNakkemi kala'busanga. 18 INakkemi mattallasaka! Le'ba'Ma' mate, mingka cini'mi, attallasaKa' sa'genna satunggu-tungguna. MakoasA' irateanganna kamateanga, kammayatompa irateanganna linona sikontu tau matea. 19 Lanri kammana, tulisi' ngasengi sikamma apa-apa nucinika, iamintu apa-apa niaka ri kamma-kammaya anne, siagang apa-apa lakajarianga sallang. 20 Iaminne rahasiana tujua bintoeng nucinika lalang ri lima kanangKu, siagang anjo tujua bangkeng lampu bulaenga: Anjo tujua bintoeng, iamintu tujua malaeka'na anjo tujua jama'ah; na anjo tujua bangkeng lampu, iamintu anjo tujua jama'ah.”
1 “Untu' mae ri malaeka'na jama'ah Efesus, tulisiki kamma anne: Iaminne pappasang battu ri Ia anta'galakai anjo tujua bintoeng ri lima kananNa, siagang a'jappaya ri alla'na anjo tujua bangkeng lampu bulaenga. 2 Kuassengi apa nugaukanga ngaseng: anjama terasakko, siagang teai sipato' sa'bara'nu. Kuassengi angkanaya taerokako assarei pa'mai' tau ja'dalaka. Na anjo sikamma tau nakanaya kalenna tunisuroNa Allata'ala, nasikontutojenna teai, le'ba'mi nuparessa baji'; na nuasseng ngasemmo angkanaya anjo ke'nanga sangnging tau paballe-balle. 3 Sa'bara' ngasengko, siagang nukasia'mi pa'risika passabakkang iNakke, na tena nutappu' panrannuang. 4 Mingka nia' Kukabattallang mae ri kau ngaseng, iamintu: Tenamo nanukamaseangA' sangkamma ri pakaramulanna. 5 Lanri kammana, u'rangi angkanaya teaimi sipato' lantanna katu'gurannu! Toba' laloko ri dosa-dosanu, siagang gaukangi ammotere' apa le'baka nugaukang ri pakaramulanna. Punna tena, labattuA' nampa Kubi'bu' ammotere' anjo bangkeng lampunnu battu ri pammantanganna. 6 Mingka nia' apa baji' ri kau ngaseng, iamintu: Birisi' ngasengko mae ri panggaukanna ana'-ana' gurunna Nikolaus, Kukabirisia todong. 7 Inai-nai akkulle allangngere', parallui naparhatikang anjo apa Napaua RohNa Allata'ala mae ri jama'ah-jama'aka! Ia ammetaya, laKukellai angkanrei rapponna poko' katallassanga, attimboa lalang ri KokonNa Allata'ala.” 8 “Untu' mae ri malaeka'na jama'ah Smirna, tulisiki kamma anne: Iaminne pappasang battu ri Ia uru-urua siagang kala'busanga, le'baka mate Nattallasa' poleang. 9 Kuassengi kasusannu ngaseng; Kuassengi angkanaya kasi-asiko, mingka sikontutojenna kalumanynyang ngasengko! Kuassengi sikamma pitina nipamangea ri kau, napare'-pareka sikamma tu nakanaya kalenna tu Yahudi, na sikontutojenna teai; anjo ke'nanga sangnging umma'na Billisika. 10 Teako mallakki mae ri kapa'risanga, tenayamo nasallo namusti nukasia'. U'rangi, angkanaya jaiko lanapantama' Billisika ri tarungkua untu' lanaso'ri. Lasessako sampulo allo sallona. Paralluko tamamminraya ri tappa'nu sa'gennu mate; na iNakke lassareangko katallassang sitojennaya siagang mannannunganga, a'jari hadia ri pammetannu. 11 Inai-nai akkulle allangngere', parallui naparhatikang anjo apa Napaua RohNa Allata'ala mae ri jama'ah-jama'aka! Ia ammetaya, tena sikali nalasessa apa-apa ri kamateang makaruaya.” 12 “Untu' mae ri malaeka'na jama'ah Pergamus, tulisiki kamma anne: Iaminne pappasang battu ri Ia anna'galaka pa'dang tarang pimbalia. 13 Kuassengi angkana kemaeko ammantang. Lalangko ammantang ri tampa' kakoasanna Billisika. Tamamminrayako mae ri Nakke. Ba'lalo, ri wattunna nibuno Antipas ri Billisika ri dallekannu, iamintu sa'biKu tamamminraya, tena todong nanussassala' angkanaya tappakko mae ri Nakke. 14 Mingka manna nakamma, nia' siapa are taKungaia ri kau ngaseng: Nia' siapa are jaina tau ri kau anturuki apa napangngajarranga Bileam. Bileam angngajaraki Balak antekamma batena antu'gurangi umma' Israel naung ri dosaya; iamintu nanyonyoki ke'nanga angkanrei kanre le'baka nipassareang mae ri barhalaya, siagang anggaukangi gau' bawanga. 15 Kammayatompa, nia' todong siapa are jaina tau ri kau anna'gala' mae ri pangngajaranna ana'-ana' gurunna Nikolaus. 16 Lanri kammana, toba' laloko battu ri dosa-dosanu ngaseng! Punna tena, sinampe' mami Kulabattu mae ri kau ngaseng ambunduki siagang pa'dang niaka ri bawaKu anjo tau kammaya. 17 Inai-nai akkulle allangngere', parallui naparhatikang anjo apa Napaua RohNa Allata'ala mae ri jama'ah-jama'aka! Ia ammetaya, laKukellai angkanrei kanre taccokkoa; siagang massing lanatarimai battu ri Nakke se're batu kebo'. Lalang ri anjo batua nia' tattulisi' areng beru, tenaya naassengi rupataua, pantaranganna tau antarimayai.” 18 “Untu' mae ri malaeka'na jama'ah Tiatira, tulisiki kamma anne: Iaminne pappasang battu ri Ana'Na Allata'ala, a'rinra-rinraya matanNa sangkamma pepe', siagang accayaya bangkenNa sangkamma tambaga nitunua. 19 Kuasseng ngasengi sikamma apa nugaukanga; Kuassengi angkanaya mangngamaseangko ri parannu tau, angkanaya tamamminrayako, angkanaya anjamako, siagang sa'barakko angkasiaki pa'risika. Kuassengi angkanaya la'bi jai nujama ri kamma-kammaya anne naia nujamaya riolo. 20 Mingka nia' Kukabattallang mae ri kau ngaseng: Nusarei pa'mai' Izebel, anjo baine nakanaya kalenna tunisuro ri Allata'ala. Jaimi atangKu le'ba' natipu siagang naajara' untu' a'gau' bawang siagang angkanrei kanre le'baka nipassareang mae ri barhalaya. 21 Le'ba'mi Kusare kasampatang untu' toba' battu ri dosa-dosana, mingka taerokai ammari anggaukangi anjo gau' bawanga. 22 U'rangi! Angkanaya laKupatappasaki sa'genna a'jari garring ri katinroanga. Anjoremmi siagang anjo tau naaganga ngaseng a'gau' bawang lanakasia' sessa dudua. Yangasenna anjo laKugaukangi kamma-kamma anne, punna tena nammari ke'nanga anggaukangi anjo apa-apa ja'dalaka siagang ia. 23 Sikamma ana' gurunna laKubuno ngaseng tongi, sollanna nasadari ngaseng jama'aka angkanaya iNakkemi anne angngasseng ngasengi pikkiranna siagang nawa-nawanna rupataua. LaKubalasa' ngasengko situru' massing-massing panggaukannu. 24 Mingka ikau maraenganga ri Tiatira tena nanupinawangi anjo pangngajarang ja'dalaka, siagang tena nanupappilajari anjo pappilajaranna Billisika. Kupauangko angkanaya tenamo nalaKutambai battala'na apa nueranga. 25 Mingka ri sa'gengKu battu sallang, paralluko tuli angkatutui apa niakamo ri kau. 26 Ia ammetaya, siagang sa'genna kala'busang tuli nagaukangi erokKu, laKusarei koasa sangkamma Kutarimaya battu ri ManggeKu. Lannarimai ke'nanga koasa siagang takkang bassi; kammayatompa untu' langngancuruki bansa-bansaya sanrapang uring tanaya. 28 Lannarimai ke'nanga battu ri Nakke sanrapang bintoeng battu rayaya. 29 Inai-nai akkulle allangngere', parallui naparhatikang anjo apa Napaua RohNa Allata'ala mae ri jama'ah-jama'aka!”
1 “Untu' mae ri malaeka'na jama'ah Sardis tulisiki kamma anne: Iaminne pappasang battu ri Ia ampatangai anjo tujua roh battu ri Allata'ala siagang anjo tujua bintoeng. Kuassengi apa nugaukanga ngaseng. Nukana kalennu attallasa' nusikontutojenna mate! 2 Lanri kammana, ambangungko nai', siagang pakajarreki apa niaka ija ri kau ngaseng, genteng tenanapa numate taba sikali. Nasaba' Kurapikangi angkanaya anjo apa nugaukanga tenapa manna se're a'jari sukku' baji'na ri dallekanNa Allata'ala. 3 Jari, u'rangi ammotere' apa le'baka nipangngajarrang mae ri kau riolo siagang apa le'bakamo nulangngere'. Gaukangi anjo sikammaya, siagang toba' ngaseng mako battu ri dosa-dosanu. Punna tambangungako, labattuA' mae ri kau sanrapang palukkaka; natanuassenga angkanaya ringngapanna wattua naKulabattu. 4 Mingka ri tangnga-tangnganu ri Sardis, nia' ija tau anjagai sollanna tuli tangkasa' pakeanna. Anjo ke'nanga lassiagangA' a'jappa ammakeang kebo', nasaba' nipassiratangi ke'nanga untu' anjo. 5 Ia ammetaya lanisarei pakeang kebo'. TalaKupasulukai areng-arenna ke'nanga lalang ri Kitta'na Tau Attallasaka. Na ri dallekanNa ManggeKu siagang malaeka'-malaeka'Na, laKuakui ke'nanga angkanaya anjo ke'nanga ma'nassa taungKu ngaseng. 6 Inai-nai akkulle allangngere', parallui naparhatikang anjo apa Napaua RohNa Allata'ala mae ri jama'ah-jama'aka!” 7 “Untu' mae ri malaeka'na jamaah ri Filadelfia, tulisiki kamma anne: Iaminne pappasang battu ri Ia matangkasaka siagang kontutojenga. Iami anta'galaki konci battua ri Daud; punna Nasungkei pakke'buka, tena manna sitau akkulle antongkoki, siagang punna Natongkoki, tena manna sitau akkulle ansungkei. 8 Kuassengi apa nugaukanga ngaseng. Kuassengi angkanaya tena nasiapa kagassingannu; nuturukimi pangngajarangKu siagang tamamminrayako mae ri Nakke. Kusungkeang mako se're pakke'bu' untu' ikau ngaseng, tenaya nakkulle natongko' manna pole inai. 9 U'rangi anne: Anjo tau a'jaria umma'na Billisika, paballe-balle nakanaya kalenna tu Yahudi, na sikontutojenna teai, laKupakkulantuki assu'ju' ri dallekannu ngaseng. Nalanaasseng ke'nanga angkanaya Kukamaseang ngasengko. 10 Lanri nuturukimi apa Kuparentakanga mae ri kau, iamintu Kukellaiko tamalanrea, laKujagai mako ri kasusaang lantujuai sallang sikontu linoa. Lakajariangi anjo sikammaya, untu' a'jari paccoba mae ri sikontu rupataua ri lino. 11 LalintakKa' battu! Jagai baji'-baji' apa niaka ri kau ngaseng, sollanna tena tau maraeng akkulle angngalleangko anjo hadia nubetaya. 12 Ia ammetaya laKupa'jari sanrapang benteng lalanga ri Balla' Matangkasa'Na Allata'alaKu, siagang lammantammi ri anjo tampaka sa'genna satunggu-tungguna. LaKutulisiki ri kalenna anjo taua arenNa Allata'alaKu, siagang areng kotaNa Allata'alaKu — iamintu Yerusalem berua, iamintu niaka naung battu ri suruga, battu ri Allata'alaKu. Kammayatompa, laKutulisi' tongi areng beruKu mae ri kalenna ke'nanga. 13 Inai-nai akkulle allangngere', parallui naparhatikang anjo apa Napaua RohNa Allata'ala mae ri jama'ah-jama'aka!” 14 “Untu' mae ri malaeka'na jama'ah Laodikia, tulisiki kamma anne: Iaminne pappasang battua ri Aminga, Sa'bi tojenga siagang tamamminraya, kabattuanna sikontu apa Napa'niaka Allata'ala. 15 Kuassengi apa nugaukanga ngaseng; Kuassengi angkanaya tena nudinging, na tena todong nubambang. Mustina kalase'renna dingingko yareka bambangko! 16 Mingka kammu'-kammu' kanukuko: tena nubambang, tena todong nudinging. Iaminjo saba'na nalaKulangngeangko assulu' battu ri bawaKu. 17 Nukana ngaseng: Akkalumanynyangko siagang ganna' mako ri katallassannu; tenamo apa-apa kakurangannu. Mingka tanuassengai kalennu angkanaya teai sipato' kasi-asinu, siagang teai sipato' appakasi'nana katallassannu. Kasi-asiko, assolarakko, siagang butako. 18 Lanri kammanami anjo naKupakaingakko sollannu ammalli ngaseng battu ri Nakke bulaeng, iamintu bulaeng ti'no', sollannu a'jari kalumanynyang. Ammalli todong mako battu ri Nakke pakeang kebo' sollannu akkulle ammakeang siagang nutongko' kalennu natena nussolara' siagang natena nuppakasiri'. Siagang ammalli todong mako pa'balle untu' nupasapu mae ri matannu, sollannu akkulle accini'. 19 Sikamma tau Kukamaseanga Kupakaingaki siagang Kuba'balaki. Lanri kammana, paralluko allompoi ngasengi sumanga'nu, siagang toba' battu ri dosa-dosanu ngaseng. 20 Ciniki! NiakKa' ammenteng ri dallekang pakke'bu' siagang akkatto' pakke'bu'. Punna nia' allangngereki sa'rangKu, nanasungkeangA' pakke'bu', lantamakKa' ambuntuli; lasipangnganreangA' siagang ia, siagang lasipangnganreangi siagang iNakke. 21 Ia ammetaya, laKupa'biangi ammempo ri empoang kala'birangKu siagang sipammempoangA' sangkamma Kalengku le'bakamo ammeta siagang kamma-kamma anne siagang ManggeKu ri empoang kala'biranNa. 22 Inai-nai akkulle allangngere', parallui naparhatikang anjo apa Napaua RohNa Allata'ala mae ri jama'ah-jama'aka!”
1 Le'baki anjo anggappama' pole paccini'. Accinikka' se're pakke'bu' tassungke ri suruga. Nampa kulangngere'mo pole anjo sa'ra le'baka kulangngere' a'bicara mae ri nakke, sangkammaya tarompe' sa'ranna. Nakana anjo sa'raya, “Naikko mae anrinni. Erokko Kupicinikiang apa lakajarianga sallang.” 2 Anjo wattua Nakoasai memamma' RohNa Allata'ala. Nampa nia' kucini' ri suruga se're empoang kala'birang, na nia' tau ammempo ri anjo empoang kala'biranga. 3 Accayai rupanna anjo taua sangkamma paramata baiduri pandang siagang paramata delima. Nia' tarawe kammaya samru' tanja'na angkaluki anjo empoang kala'biranga. 4 Na nia' todong ruampulo angngappa' empoang kala'birang maraengang angkulilingi anjo empoang kala'birang se'rea. Anjoreng nia' ammempo ruampulo angngappa' pamimping ammakeang kebo', siagang ammake songko' bulaeng. 5 Accayai anjo empoang kala'biranga sanrapang kila' angngeranga sa'ra gunturu' sannaka lompona. Na ri dallekanna anjo empoang kala'biranga, nia' tuju sulo a'rinra; iaminjo tujua RohNa Allata'ala. 6 Nia' todong ri dallekanna anjo empoang kala'biranga sangkammaya nicini' tamparang kaca, sannaka ci'nonna nicini'. Ri tammulilina anjo empoang kala'biranga, iamintu ri sikamma sa'rinna, nia' appa' anu attallasa', sannaka jaina matanna ri dallekanna siagang ri bokona. 7 Anjo anu se'rea sangkammai singa. Makaruaya sangkammai sapi laki. Makatallua sangkammai tau rupanna. Anjo makaappaka sangkammai nicini' jangang-jangang rajawali, sitabanga anri'ba'. 8 Anjo appaka anu attallasa', massing nia' annang ka'nyi'na; siagang rassi ngasengi mata ri tammulilina kalenna siagang ilalanganna kalenna. Allo bangngi anjo anu attallasaka tena nale'ba' ammari akkelonga tojeng, angkana, “Matangkasa', matangkasa', matangkasaki Batara, Allata'ala Kaminang Koasaya; Ia niaka ri pakaramulanna, ri kamma-kammaya anne, sa'genna satunggu-tungguna.” 9 Anjo appaka anu attallasa' akkelongi lagu-lagu pammuji, pappakala'biri' siagang kasukkurang mae ri Ia ammempoa ri anjo empoang kala'biranga, iamintu Ia attallasaka sa'genna satunggu-tungguna. Na ri wattunna akkelong anjo anu attallasaka, 10 su'ju'mi anjo pamimping ruampuloa angngappa', mae ri anjo ammempoa ri empoang kala'birang, nampa anynyomba mae ri Ia anjo mattallasaka sa'genna satunggu-tungguna. Nampa napasambila ke'nanga massing songko'na mae ri dallekanna anjo empoang kala'biranga, nangkana, 11 “O Batara, Allata'alana ikambe! IKatteji bawang siratang annarima pammuji, pappakala'biri' siagang kakoasang. Nasaba' iKattemi ampa'niaki sikontu apa-apa niaka, siagang lanri erotTa tommi nanjari siagang attallasa' sikontu apa-apa niaka.”
1 Nampa nia' kucini' ri limanNa anjo ammempoa ri empoang kala'biranga se're kitta', sangkammaya gulungang karattasa'. Anjo kittaka rassi tulisang pimbali-bali. Nibatei gulunganna anjo kittaka siagang tuju segele'. 2 Nampa nia' kucini' se're malaeka' sannaka kassa'na akkiok-kio' lompo nakana, “Inai siratang anreppeki anne segeleka siagang ansungkei anne kittaka?” 3 Mingka baji' na ri suruga kammayatompa ri lino tena manna sitau akkulle ansungkei anjo kittaka, siagang anciniki bonena. 4 Angngarru'-arru'ma' tassunge'nge' lanri tenana manna sitau akkulle ansungkei anjo kittaka siagang anciniki bonena. 5 Nampa nakanamo kalase'renna anjo pamimpinga mae ri nakke, “Teako angngarruki! Ciniki! Ammetami anjo singa battua ri suku Yehuda, sossorang lompona Daud. Akkullei Nareppe' anjo segeleka siagang Nasungke anjo kittaka.” 6 Nampa nia' kucini' sikayu Ana' Gimbala' ammenteng ri tangnga-tangngana anjo empoang kala'biranga nikulilingi ri anjo appaka anu attallasa' siagang sikontu anjo pamimpinga. Anjo Ana' Gimbalaka sangkammai le'ba' nisamballe nicini'. Nia' tuju tanru'na siagang tuju matanna: iamintu tujua roh battu ri Allata'ala, nisuroa battu mange ri sikontu linoa. 7 Nampa maju anjo Ana' Gimbalaka angngallei anjo gulungang kittaka battu ri lima kananNa anjo ammempoa irate ri empoang kala'biranga. 8 Ri wattu appakammana anjo Ana' Gimbalaka, su'ju'mi naung anjo appaka anu attallasa' siagang anjo ruampuloa angngappa' pamimping ri dallekanNa anjo Ana' Gimbalaka. Massing anna'galaki kacaping siagang mangko' bulaeng niaka kamanynyanna anjo ke'nanga, iamintu pappala' doanganna Umma'Na Allata'ala. 9 Akkelommi ke'nanga se're kelongang beru nakana: “IKattemi siratang angngallei anjo kittaka, siagang anreppeki sege'-segele'na. Nasaba' Ikattemi le'ba' nibuno, na lanri kamateanTa, na le'ba'mo Kiballi sikontu rupataua battu ri a'rupa-rupa suku, bahasa, pa'rasangang, siagang bansa, untu' Kierang ri Allata'ala. 10 Kipa'jarimi ke'nanga se're bansa nisa'laka iamintu bansa imang-imang sollanna nalayani ke'nanga Allata'alata, nammarenta irateanganna linoa.” 11 Nampa accinikka' pole. Nia' kulangngere' sa'ra malaeka' assa'bu-sa'bu siagang a'juta-juta jaina! Ammentengi ke'nanga angkulilingi anjo empoang kala'biranga siagang anjo appaka anu attallasa' kammayatompa anjo ruampuloa angngappa' pamimping. 12 Siagang sa'ra lompo, nakana, “Anjo Ana' Gimbala' le'baka nisamballe, siratangi annarima koasa, kakalumanynyangang, kacara'dekang siagang kagassingang; siratangi nipakalompo, nipakala'biri' siagang nipuji-puji!” 13 Nampa akkelong kulangngere' sikontu anu attallasa' niaka ri langi', ri lino, irawanganna linoa, siagang lalang ri tamparanga; bodona kana sikontu anu attallasa' niaka ri anne linoa akkelong ngasengi angkana, “Ia ammempoa irate ri empoang kala'biranga, siagang anjo Ana' Gimbalaka, Iami nipuji na nipakalompo, kammayatompa nipakala'biri' na makoasa, sa'genna satunggu-tungguna!” 14 Appialimi anjo appaka anu attallasa', angkana, “Aming!” Nasu'ju'mo anynyomba anjo pamimping-pamimpinga.
1 Le'baki anjo kucini'mi anjo Ana' Gimbalaka anreppeki segele' makase'rea ri anjo tujua segele'. Nampa kulangngere' kalase'renna anjo appaka anu attallasa' angkana, “Maeko!” Ia sa'ranna sangkammai gunturu'. 2 Kucinikimi, nampa nia' kucini' sikayu jarang kebo'. Pabaena anjo jaranga anna'galaki anrong pana, nanisare se're songko' kakaraengang. Majui mae ri dallekang salaku tau ammeta mangea angngallei pammetanna. 3 Nampa Nareppe' pole anjo Ana' Gimbalaka segele' makaruaya, siagang kulangngere'mi olo'-olo' makaruaya angkana, “Maeko!” 4 Nampa nia'mo pole jarang maraeng assulu'. Anjo jaranga ejai tanja'na. Pabaena anjo jaranga nisarei koasa ampattaenai passiamakkanga ri lino, sollanna massing sibuno-buno rupataua. Jari nisaremi se're pa'dang lompo. 5 Nampa Nareppe' anjo Ana' Gimbalaka segele' makatallua. Nakulangngere'mo olo'-olo' makatallua angkana, “Maeko!” Kucinikimi, nampa nia' kucini' sikayu jarang le'leng. Pabaena anna'galaki sipasang timbangang ri limanna. 6 Na nia'mo kulangngere' se're sa'ra, kammaya nilangngere' sa'ra akkioka ri tangnga-tangngana anjo appaka anu attallasa'. Nakana anjo sa'raya, “Silitere' berasa' baji' singnganggaraki passawallang siallo, siagang tallung litere' berasa' maraeng singnganggara' tongi passawallang sialloa. Mingka teako panraki poko'-poko' zaitunga siagang koko anggoroka!” 7 Nampa Nareppe' anjo Ana' Gimbalaka segele' makaappaka. Nakulangngere'mo anu attallasa' makaappaka angkana, “Maeko!” 8 Kucinikimi, nampa nia' kucini' sikayu jarang pi'lasaka tanja'na. Pabaena niarengi Kamateang. Ri bokona a'reppese'mi amminawang Lino Kamateanga. Kakoasanga mae ri bage appa'na anne linoa nipassareangi mae ri ke'nanga, sollanna akkulle ke'nanga ammuno lalang ri pa'bundukanga, lalang ri kacipuranga, lalang ri kagarringanga, kammayatompa battu ri olo'-olo' sekkeka. 9 Le'baki anjo Nareppe'mi anjo Ana' Gimbalaka segele' makalimaya. Kucini'mi irawanganna anjo tampa' koro'banga nyawana ngaseng anjo tu nibunoa lanri najarrekinna anjo biritta battua ri Allata'ala tete ri kasa'bianna ke'nanga. 10 Akkio' lompomi ke'nanga angkana, “O Batara Kaminang Koasaya, Ia matangkasaka na tojeng! Siapapi sallona nampa Kiadeli tuma'buttaya ri lino siagang Kihukkung ke'nanga lanri nabunona ikambe?” 11 Nampa massing nisare ke'nanga silawara' juba kebo'. Le'baki anjo nisuromi ke'nanga ammari-mari sinampe', sa'genna angganna'mo jaina sikamma julu sipanjama-jamanna ke'nanga siagang sikamma sari'battanna ke'nanga, lanibunoa todong sangkamma ke'nanga. 12 Nampa Nareppe' kucini' anjo Ana' Gimbalaka segele' makaannanga. Ta'ge'goso' sanna'mi linoa. A'jari le'lemmi matanna alloa sangkamma kaeng le'leng kasaraka; kammayatompa a'jari ejami bulanga sangkamma cera'. 13 Tu'guru'mi sikamma bintoenga battu ri langika naung ri buttaya, sangkamma rappo ara tenayapa natoa tu'guru' battu rate ri poko'na ri wattunna nige'gosang ri anging lompo. 14 Lanynya'mi langika sangkamma karattasa' nigulunga, siagang sikontu buluka siagang puloa a'lesso' ngasengi battu ri tampa'na. 15 Nampa karak-karaeng niaka ri lino, sikamma tumalompoa, sikamma panglimaya, sikamma tau kalumanynyanga, siagang sikamma tau anna'galaka koasa kammayatompa sikamma tau maraengannaya, baji' na ata yareka tau bebasa', mange ngasemmi ancokkoi kalenna ri kali'-kali'bong buluka yareka ri alla'-alla'na batua ri buluka. 16 Akkio'mi ke'nanga mae ri buluka siagang batu-batua, angkana, “Tujumi naung ikambe! Cokkoi ikambe battu ri paccini'Na anjo ammempoa irate ri empoang kala'biranga, siagang battu ri pangngalarroiNa anjo Ana' Gimbalaka! 17 Battumi anjo allo sannaka heba'na; kamma-kamma anne napassulu' ngasemmi larrona ke'nanga, siagang tenamo manna sitau akkulle attahang ri dallekanna ke'nanga!”
1 Le'baki anjo, nia'mo kucini' appa' malaeka' ammenteng ri appaka panyingkulu'na buttaya. Natahammi ke'nanga appaka anging ri buttaya sollanna tena namammiri' mange ri bontoa, yareka ri tamparanga, yareka mange ri poko'-poko' kayua. 2 Nampa nia' pole kucini' se're malaeka' maraengang ammumba battu raya. Angngerangi segele' battua ri Allata'ala Mattallasaka. Nalompoimi sa'ranna anjo malaekaka akkio', angkioki anjo appaka malaeka' le'bakamo anggappa koasa battu ri Allata'ala untu' ampanraki bontoa siagang tamparanga. 3 Nakana anjo malaekaka, “Teako rolong panraki bontoa, yareka tamparanga yareka poko'-poko' kayua punna tenapa nisarei pammatei segele' ri kanynyinna sikamma Umma'Na Allata'ala.” 4 Nampa nipauamma' angkanaya nia' 144.000 jaina tau nisare pammatei segele' battu ri Allata'ala ri kanynyinna ke'nanga. Anjo taua niallei battu ri sampuloa anrua suku bansa Israel; 5 battu ri tasse're-se'rea suku nia' 12.000 jaina tau. Iamintu battu ri suku: Yehuda, Ruben, Gad, 6 Asyer, Naftali, Manasye, 7 Simeon, Lewi, Isakhar, 8 Zebulon, Yusuf, siagang Benyamin. 9 Le'baki anjo kucinikimi pole, na nia'mo kucini' tamparang tau, sannaka jaina tau bonena; tena manna sitau akkulle anrekengi jaina! Ia ke'nanga tau battu ri massing-massing bansa, suku, pa'rasangang, siagang bahasa. Ammenteng ngasengi anjo tau jaia andallekang mae ri empoang kala'biranga siagang andallekang mae ri anjo Ana' Gimbalaka; ammakeang juba kebo' ngasengi ke'nanga siagang massing anna'galaki leko'-leko' kaluku lolo. 10 Nampa akkio' lompo ke'nanga angkana, “Battu anjorengi ri Allata'ala kasalamakkanta, niaka ammempo irate ri empoang kala'biranga, siagang battu anjorengi ri anjo Ana' Gimbalaka!” 11 Sikontu malaekaka ammentengi angkulilingi empoang kala'biranga siagang sikamma anjo pamimpinga, kammayatompa anjo appaka anu attallasa'. Su'ju' ngasengi anjo malaekaka ri dallekanna empoang kala'biranga nampa anynyomba ri Allata'ala. 12 Akkio'mi ke'nanga angkana, “Aming! Nipujimi Allata'ala Mala'birika siagang Mabajika. Iami siratanga nipitujui alla'bi-la'bi kasukkurang siagang pappakalompo. Iami makoasa siagang magassing sa'genna satunggu-tungguna! Aming.” 13 Akkuta'nammi kalase'renna anjo pamimpinga mae ri nakke angkana, “Inai ngaseng anne tau ammakea juba kebo' siagang battu kemae ngasengi ke'nanga?” 14 Appialima' angkana, “Takuassengai Karaeng. KalenTaji antu angngassengi.” Jari nakanamo pole mae ri nakke, “Yangasemmi anne tau le'baka nipasalama' battu lalang ri passessa sannaka heba'na. Le'ba'mi nasassa jubana ke'nanga siagang cera'Na anjo Ana' Gimbalaka sa'genna a'jari kebo'. 15 Iaminjo saba'na nammenteng ke'nanga ri dallekanna empoang kala'biranNa Allata'ala, siagang anynyomba ri Ia allo bangngi lalang Balla'Na Allata'ala. Na Ia ammempoa irate ri anjo empoang kala'biranga lahadereki ri tangnga-tangngana ke'nanga untu' anjagai ke'nanga. 16 Tena nalanakasia' ke'nanga nikanaya cipuru' yareka turere; tenamo nalanibambangi ke'nanga ri matanna alloa yareka ri bambanga; 17 nasaba' anjo Ana' Gimbala' ammempoa ri tangnga-tangngana anjo empoang kala'biranga la'jari pakalawaki mae ri ke'nanga. Lanirurungangi ke'nanga mae ri timbuseng je'ne' assarea katallassang. Na Allata'ala lassapui sikamma je'ne' matanna ke'nanga.”
1 Ri wattunna Nareppe' anjo Ana' Gimbalaka segele' makatujua, a'jari sinomi suruga nia' kira-kira sitangnga jang sallona. 2 Nampa kucini' anjo tujua malaeka' ammentenga ri dallekanNa Allata'ala, siagang nisarei ke'nanga tuju tarompe'. 3 Nia'mo sitau malaeka' maraengang, battu ammenteng ri dallekanna tampa' pakkoro'banganga; angngerangi se're pa'dupang bulaeng. Sanna' jaina kamanynyang nisareangi untu' lanapanaung ri pappala' doanganna sikontu umma'Na Allata'ala, siagang untu' lanipassareanga ri tampa' pakkoro'bangngang bulaenga nipare' ri dallekanna empoang kala'biranga. 4 Anjo pappala' doanganna sikontu Umma'Na Allata'ala nai'mi siagang umbuna anjo dupa nitunua, battu ri limanna anjo malaeka' ammentenga ri dallekanNa Allata'ala. 5 Nampa naalle anjo malaekaka anjo pa'dupanga, na nasare pepe' battua ri tampa' pakkoro'bangngang, nampa napasambila irateanganna buttaya. Assa'ra lompomi gunturuka siagang assisambung-sambummi kilaka; kammayatompa ta'ge'goso'mi buttaya. 6 Le'baki anjo, sadia-sadiami anjo tujua malaeka' anna'galaka tarompe' untu' ampasa'rai anjo tarompeka. 7 Napasa'rami tarompe'na malaeka' makase'rea; turummi bosia kamma es siagang pepe', accampuruki siagang cera' sannaka batena a'lo'loro' naung ri buttaya. La'busu'mi bage talluna linoa akkanre; kammayatompa bage tallunna poko'-poko' kayua, siagang sikamma ruku'-ruku' moncongbuloa. 8 Nampa napasa'ra tarompe'na malaeka' makaruaya; nia'mo apa-apa sanna' lompona, kammaya nicini' bulu' a'rinra-rinraya, nipasambilaya antama' ri tamparanga. Amminrami a'jari cera' bage talluna tamparanga, 9 siagang matemi bage talluna olo'-olo' niaka ri tamparang; kammayatompa ancuru' ngaseng tommi bage talluna sikamma kappalaka. 10 Nampa napasa'ra tarompe'na malaeka' makatallua; na nia'mo se're bintoeng lompo, a'rinra-rinraya sangkamma sulo, tu'guru' battu rate ri langika, nanatuju bage talluna sikontu binangaya siagang sikontu timbusenna je'neka. 11 (Arenna anjo bintoenga iamintu “Pai'”.) Jari a'jari pai'mi bage talluna je'neka, najaimo tau mate lanri nainunna anjo je'ne' a'jari paikamo. 12 Nampa napasa'ra tarompe'na malaeka' makaappaka. Natattunrummo bage talluna mataalloa, bage talluna bulanga, kammayatompa bage talluna sikontu bintoenga; sa'genna tappela'mi bage talluna cayana ke'nanga. Kammayatompa bage talluna singaraka tenamo nasingara' siagang kamma tomminjo bage talluna bangngia. 13 Nampa kucinikimi pole; na nia'mo kulangngere' sa'ra jangang-jangang rajawali sitabanga anri'ba' tinggi rate ri allaka akkio' angkana, “Cilakai! Cilakai! Cilakai sikontu tau niaka ri lino punna nalangngere' sinampe' anjo tallua malaeka' maraenga ampasa'rai tarompe'na!”
1 Nampa napasa'ra tarompe'na malaeka' makalimaya; na nia'mo kucini' se're bintoeng tu'guru' battu ri langika naung ri buttaya. Anjo bintoenga nisarei koncina tubiri'na kamateanga. 2 Jari nasungkemi anjo bintoenga anjo tubiri'na kamateanga; na nia'mo umbu assulu' battu ri anjo tubiri' tassungkea, sangkamma umbunna bara kayu lompoa. A'jari sassammi mataalloa siagang linoa napakamma anjo umbu battua ri tubirika. 3 Nampa nia'mo sikamma katimbang assulu' battu ri anjo umbua nanaung ri linoa. Anjo katimbanga nisare ngasengi koasa sangkamma nipassareanga mae ri olo'-olo' kalajengkinga. 4 Tanipa'biangai ke'nanga ampanraki ruku'-rukuka, yareka poko'-poko' kayua, yareka lamung-lamung maraenga. Tau tenayaji bawang ri abanna pammatei segele' battu ri Allata'ala, akkulle nabunduki ke'nanga. 5 Tanipa'biangai anjo katimbanga ambunoi anjo taua, passangalinna nasessaji ke'nanga sa'genna limambulang sallona. Anjo pa'risi'na batena anynyessa anjo katimbanga, sangkammai pa'risi'na batena angngokko' olo'-olo' kalajengkinga. 6 Limambulangi sallona nausahai ke'nanga ero' mate, mingka takkulleai mate ke'nanga; eroki ke'nanga mate, mingka bellai kamateanga battu ri ke'nanga. 7 Anjo tanja'na katimbanga sangkamma nicini' jarang sadiaya ero' a'bundu'. Ri ulunna ke'nanga nia' kamma nicini' songko' karaeng bulaenga nipare'. Tanja'na ke'nanga sangkammai tanja' rupataua. 8 Uu'na ke'nanga sangkammai uu' bai'-baine, nampa giginna sangkammai gigi singa. 9 Barambanna ke'nanga nilapakki apa-apa sangkammaya baju bassi. Sa'ra ka'nyi'na sangkammai sa'ra kareta nibesoka ri jarang, sannaka jaina maju lalang ri pa'bundukanga. 10 Nia' ingkonna ke'nanga, siagang potinna kammai poti kalajengking. Na lalang ri ingkonna nia' kagassingang untu' ansessai rupataua untu' limambulang sallona. 11 Nia' karaenna, amparentayai ke'nanga; na anjo karaenna ke'nanga iamintu malaeka' anjagayai tubiri'na kamateanga. Arenna ilalang bicara Ibrani iamintu Abadon; na lalang bicara Yunanina iamintu Apolion (battuanna “Pammanrakia”). 12 Allalomi cilaka makase'rea. Le'baki anjo nia' pole rua cilaka musti battu. 13 Nampa napasa'ra tarompe'na malaeka' makaannanga. Nia'mo kulangngere' sa'ra battu ri appaka panyingkulu'na anjo tampa' pakkoro'bangngang bulaenga nipare' niaka ri dallekanNa Allata'ala. 14 Nakana anjo sa'raya mae ri malaeka' makaannanga, “Lappassangi anjo appaka malaeka' tassikko' ri anjo Binanga Efrat!” 15 Nilappassammi anjo appaka malaeka'. Nipasadiami ke'nanga untu' ambunoi bage talluna sikontu rupataua; massing nipasadiai ke'nanga angkana untu' tette' siapa, allo apa, bulang siapa, siagang taung siapa nasadia ke'nanga ammuno. 16 Nipauamma' angkana nia' ruambilangngang juta jaina anjo pasukang a'jaranga. 17 Na lalang paccinikku, kuciniki anjo jaranga siagang sikontu pabaena. Anjo pabaena ammake ngasengi baju bassi sannaka ejana siagang a'rinraya tanja'na, gau' siagang kunyi' accaya. Anjo jaranga sangkamma ngasengi singa ulunna; na nia' pepe', umbu, siagang bara pepe' assulu' battu ri bawana. 18 Iaminjo assuluka battu ri bawana anjo jaranga, iamintu: pepe', umbu siagang bara pepe' ampanraki siagang ambunoi bage talluna sikontu rupataua. 19 Anjorengi ri bawana siagang ingkonna kagassinganna anjo jaranga. Ingkonna sangkammai ulara' ruaya ulunna. Iaminjo ingkonna napake ansessai rupataua. 20 Mingka anjo tau ammantanga, tenaya nanibunoi ri anjo balaya, tena tompa natoba' battu ri dosa-dosa nagaukanga ke'nanga. Tenapa nammari ke'nanga anynyomba mae ri setang-setanga, siagang mae ri barhala-barhala bulaenga, peraka, tambagaya, batua siagang kayu tenaya nakkulle accini' yareka allangngere', yareka a'jappa. 21 Tena todong natoba' ke'nanga anggaukangi ammunoa, pangngassengang baca-bacaya, panggaukang bawanga, kammayatompa a'lukkaka.
1 Nampa nia' kucini' malaeka' maraeng sannaka gammara'na naung battu ri suruga. Nikalimbuki ri rammang, siagang nia' tarawe takkalu' ri ulunna. Accayai rupanna sangkamma mataallo, na bangkenna sangkammai benteng pepe'. 2 Na ri limanna nia' se're gulungang kitta' ca'di ia tassungkea. Bangkeng kananna lalangi ri tamparanga angngonjo', na bangkeng kairinna ratei ri bontoa angngonjo'. 3 Nampa akkio' sangkamma singa ammarrang lompoa. Le'ba'na akkio' anjo malaekaka, appialimi anjo tujua gunturu' sangkamma sa'ra ammarrunga. 4 Assa'rana anjo gunturuka, ero'mi kutulisi'; mingka nia'mo kulangngere' sa'ra battu ri suruga angkana, “Rahasiakangi anjo apa napaua anjo tujua gunturu', teako tulisiki!” 5 Nampa kucini' anjo malaeka' angngonjoka ri tamparanga siagang ri bontoa angngangkaki lima kananna nai' ri langika. 6 Assumpai lalang arenNa Allata'ala mattallasaka satunggu-tungguna, ampa'niakai langika, buttaya, tamparanga siagang sikontu apa-apa niaka lalanganna. Nakana anjo malaekaka, “Tenamo nalanipamono' pole wattunna! 7 Mingka punna napasa'ra tarompe'na anjo malaeka' makatujua, laNapa'jarimi rahasia eroka Nagaukang Allata'ala, sangkamma le'baka napabattu ngaseng ata-atanNa, iamintu na'bi-na'bia.” 8 Nampa anjo sa'ra le'baka kulangngere' battu ri suruga a'bicarami pole mae ri nakke. Nakana, “A'lampako angngallei anjo gulungang kitta' ca'di tassungkea, niaka ri limanna anjo malaeka' angngonjoka ri tamparanga siagang ri bontoa.” 9 Jari a'lampama' mae ri anjo malaekaka, nampa kupala' sollanna napassareang anjo gulungang ca'dia mae ri nakke. Nakanamo, “Allei na nukanre anne. La'jari paiki lalang ri battannu, mingka la'jari te'nei sangkamma je'ne' bani lalang ri bawanu.” 10 Kuallemi anjo gulungang ca'dia battu ri limanna nampa kukanre. Sangkammai je'ne' bani kasia'na lalang ri bawaya, mingka ri wattunna kua'lu', a'jari paiki lalang ri battanga. 11 Nampa nisuroma' angkana, “Pa'la'bangi sikalipa pole biritta battua ri Allata'ala ri passala'na bansa-bansaya, sikamma pa'rasanganga, bahasa-bahasaya, kammayatompa sikamma karak-karaenga.”
1 Le'baki anjo nisarema' sipolong kayu sangkammaya takkang pangngukkuru', nampa nisuroa' angkana, “A'lampako angngukkuruki Balla'Na Allata'ala ri Yerusalem siagang tampa' pakkoro'bangnganga. Rekengi siapa jaina tau assambayang ilalang. 2 Mingka teako ukkuruki paranglakkeng pantaranganna anjo Balla'Na Allata'ala, nasaba' anjo bageanga le'ba'mi nipassareang mae ri tau tenaya natappa' mae ri Batara. Lanaonjo'-onjokangi ke'nanga anjo kota matangkasaka patampulo anrua bulang sallona. 3 LaKusuroi rua sa'bingKu ammakeang tau kamateanga, na lanapa'la'bang biritta battua ri Allata'ala 1260 allo sallona.” 4 Anjo ruaya sa'bi iamintu rua poko' zaitun siagang rua bangkeng lampu niaka ri dallekanNa Batarana sikontu linoa. 5 Punna nia' tau ancoba-cobai a'gau' kodi mae ri ke'nanga, lassulu'mi battu ri bawana ke'nanga pepe' akkullea angngancuruki musu-musunna. Kammaminjo carana nanabuno sikamma tau eroka ampa'ri'-pa'risi ke'nanga. 6 Nia' kakoasanna ke'nanga untu' antongkoki langika sollanna tena naturung bosia ri wattu napa'la'banna ke'nanga biritta battua ri Allata'ala. Nia' todong kakoasanna ke'nanga mae ri sikontu timbuseng je'neka, untu' ampinrai je'neka a'jari cera'. Siagang nia' todong kakoasanna untu' antunrungi buttaya siagang a'rupa-rupa bala, kere-kere wattu punna ero' ke'nanga anggaukangi. 7 Le'baki napabattu birittana ke'nanga, laniewami ke'nanga ri anjo olo'-olo' assuluka battu ri tubiri'na kamateanga. Lanibetai siagang lanibunoi ke'nanga. 8 Siagang latappepara'mi maya'na ke'nanga ri agang lompona kota lompoa, ri tampa'na Batarana ke'nanga le'ba' nisalli'. Areng pangngebarranna anjo kotaya iamintu kota Sodom yareka Mesir. 9 Lanicini'mi maya'na ke'nanga ri sikontu bansaya, sukua, bahasaya, siagang sikontu pa'rasanganga tallungallo assitangnga sallona; siagang tanipa'biangai nikuburu' anjo maya'na ke'nanga. 10 Lamarannui tuma'buttaya ri lino lanri matena anjo ruaya sa'bi. Lassua'-suaraki ke'nanga siagang massing lasikiringi ke'nanga hadia, lanri iaminjo ruaya na'bi le'ba' angngerang passessa mae ri sikontu rupataua ri lino. 11 Le'baki tallungallo assitangnga sallona, battumi nyawa attallasa' battua ri Allata'ala, nantama' poleang ri kalenna anjo ruaya na'bi. Ammentemmi nai' ke'nanga, sa'genna a'jari malla' sikalimo sikontu tau ancinikai. 12 Nampa nia' nalangngere' anjo ruaya na'bi sa'ra lompo angkioki ke'nanga battu ri suruga angkana, “Naikko mae anrinni!” Nampa ri dallekanna musu-musunna ke'nanga, nai'mi ke'nanga ri suruga, nikalimbuki ri rammang. 13 Na anjo wattua ta'ge'goso' sanna'mi buttaya. Ancuru'mi bage sampulona anjo kotaya, siagang nia'mo tuju sa'bu jaina tau mate napakamma anjo ta'ge'goso'na buttaya. A'jari malla' sikali ngasemmi tau maraenganga, nampa mammuji ke'nanga mae ri kalompoanNa Allata'ala ri suruga. 14 Allalomi cilaka makaruaya. Mingka ciniki! Tasalloami nalabattu pole cilaka makatallua. 15 Nampa napasa'ra tarompe'na malaeka' makatujua; na nia'mo nilangngere' ri suruga sa'ra-sa'ra sannaka lompona, angkanaya, “Kamma-kamma anne nia'mi lalang limanNa Batarata siagang Karaeng Mappasalama' Napa'janjianga kakoasanga untu' ammarenta ri anne linoa, iamintu Karaeng Mappasalama' Napa'janjianga. Lammarentai sa'genna satunggu-tungguna!” 16 Jari su'ju'mi anynyomba ri dallekanNa Allata'ala anjo ruampuloa angngappa' pamimping, niaka ammempo ri empoang kala'biranna ke'nanga. 17 Nakana ke'nanga, “Batara, Allata'ala Kaminang Koasaya, Ia niaka, siagang niakamo! Appala' sukkuruki ikambe mae ri Katte lanri Kipakemi kakoasang lompoTa, siagang appakkaramula maKi ammarenta! 18 A'jalloki tau tenaya natappa' ri Batara, lanri narapi'mi wattunTa ampappicinikangi kalarroanTa, siagang narapi' tommi wattunna Kiadeli tau matea. Iaminne wattunna laKisare passawallang sikontu atanTa, na'bi-na'biTa, kammayatompa sikontu ummatTa, iamintu sikontu tau anynyombaya mae ri Katte, baji' natau lompo, kammayatompa tau ca'di. Iaminne wattunna laKiancuru' tau angngancurukai buttaya!” 19 Nampa tassungkemo Balla'Na Allata'ala ri suruga, na kacinikammo Patti Parjanjianga ilalang. Nampa nia'mo kila' assisambung-sambung siagang sa'ra gunturu' a'gamarrung siagang a'garumbang, kammayatompa ta'ge'goso'mi buttaya nabosi sannaka sarrona, angngerang es.
1 Nampa nia' nicini' ri langika apa-apa sannaka appakalannasa'na. Nia' sitau baine ammakeang mataallo ammenteng irate ri bulanga. Ri ulunna nia' songko' niaka bintoenna sampulo anrua. 2 Anjo bainea sitabangi tianang, siagang lanri narapi'mi wattunna lammana', ammarrang-marrammi napakamma pa'risi'. 3 Nampa nia' pole nicini' ri langika apa-apa appakalannasaka. Iamintu nia' sikayu naga eja na sanna' lompona, tujua ulunna siagang sampuloa tanru'na. Massing-massing ulunna ammake ngasengi songko' karaeng. 4 Nare'resammi bage talluna sikontu bintoenga ri langika siagang ingkonna nampa napasambila naung ri buttaya. Ammentengi anjo nagaya ri dallekanna anjo baine eroka ammana', lanri eroki nakanre ana'na anjo bainea punna lassuki. 5 Allassukammi anjo bainea sitau ana' bura'ne lamparentayai sikontu bansaya siagang takkang bassi. Mingka nialle passami anjo anaka battu ri anjo bainea, nampa nierang mae ri Allata'ala siagang ri dallekang empoang kala'biranNa. 6 Jari larimi anjo bainea mange ri parang lompoa, ri tampa' le'baka nipasadiangi ri Allata'ala. Anjoremmi ri tampaka laniparakai 1260 allo sallona. 7 Nampa a'jarimo pa'bundukanga ri suruga. A'bundu'mi Mikhael siagang malaeka'-malaeka'na angngewai anjo nagaya. Nangngewamo anjo nagaya, nibantu ri malaeka'-malaeka'na todong, angngewai Mikhael. 8 Mingka nibetami anjo nagaya. Tenamo nanipa'biangi ammantang ri suruga siagang malaeka'-malaeka'na. 9 Nipela'mi anjo naga lompoa assulukang! Iami anjo ulara' toaya niarenga Billisi' yareka Roh Ja'dalaka, antipuai sikontu linoa. Nipela'mi naung ri linoa siagang sikontu malaeka'na. 10 Nampa nia' kulangngere' sa'ra lompo ri suruga angkana, “Iaminne wattunna Napasalama' Allata'ala umma'Na! Kamma-kamma anne Napappicinikammi kakoasanNa Allata'ala salaku Karaeng! Kamma-kamma todong minne naNapappicinikang kakoasanNa anjo Karaeng Mappasalama' nipa'janjianga! Nasaba' nipasulu'mi battu ri suruga anjo antuduai allo bangngi sari'battanta ri dallekanNa Allata'ala. 11 Le'ba'mi nibeta ri sari'battanta tete ri cera'Na anjo Ana' Gimbalaka, siagang tete ri katojenganna anjo biritta battua ri Allata'ala, ia le'baka napa'la'bang ke'nanga. Rellai ke'nanga angkoro'bangkangi kalenna sa'genna mate. 12 Lanri kammana, parallui ma'rannu-rannu surugaya siagang sikontu tau niaka ammantang lalang! Mingka cilakami buttaya siagang tamparanga, nasaba' naummi Billisika mae ri kau sanna' larrona, lanri naassenna angkana sinampe' mami wattunna.” 13 Ri wattunna naasseng kalenna anjo nagaya angkana nipela'mi naung ri buttaya, appakkaramulami naondang anjo baine le'baka allassukang ana' bura'ne. 14 Mingka nisaremi anjo bainea rua ka'nyi' jangang-jangang rajawali lompoa sollanna anri'ba' mae ri tampa'na ri parang lompoa; anjoremmi laniparakai tallun taung assitangnga sallona, sa'genna a'lilimo battu ri anjo nagaya. 15 Jari appasappuru'mi battu ri bawana anjo nagaya sanna' jaina je'ne' mae ri anjo bainea, sollanna akkulle ammanyu'. 16 Mingka nibantumi anjo bainea ri buttaya; nasungkei bawana buttaya na naa'lu' anjo je'ne' assuluka battu ri bawana anjo nagaya. 17 A'jari sanna'mi larrona anjo nagaya mae ri anjo bainea, sa'genna a'lampa mange ambunduki sossoranna maraenga anjo bainea, iamintu sikontu tau mannurukia ri parentaNa Allata'ala, siagang a'jari sa'bia ri passala'na Isa siagang kakoasanNa. 18 Nampa ammentemmo anjo nagaya ri biring tamparanga.
1 Nampa nia' kucini' sikayu olo'-olo' ammumba battu lalang ri tamparanga. Nia' sampulo tanru'na na tuju ulunna. Ri massing-massing tanru'na nia' songko' karaeng, kammayatompa ri massing ulunna nia' tattulisi' se're areng anghinayai Allata'ala. 2 Anjo olo'-oloka sangkammai kucini' macang burika, na bangkenna sangkammai bangkeng beruang, kammayatompa muncenna sangkammai munceng singa. Nampa napassareang anjo nagaya kagassingang kalenna mae ri anjo olo'-oloka; kammayatompa empoang kala'biranna siagang kakoasang lompona nasareang tommi. 3 Kalase'renna anjo tujua ulunna anjo olo'-oloka sangkammai nicini' le'baki bokka' sanna' lompona, mingka piami anjo bokkaka. Amminawang ngasemmi siagang lannasa' sikontu linoa mae ri anjo olo'-oloka. 4 Nasombami ke'nanga anjo naga le'baka assarei kakoasang anjo olo'-oloka. Kammayatompa anjo olo'-oloka nasomba tommi ke'nanga. Nakanamo ke'nanga, “Tenamo sangkammanna anne olo'-oloka! Tenamo akkulle angngewai a'bundu'.” 5 Nilappassammi anjo olo'-oloka ampaui bicara-bicara sannaka tampona siagang anghinai Allata'ala. Nipa'biammi ammarenta patampulo anrua bulang sallona. 6 Nampa appakkaramulamo anghinai Allata'ala siagang arenNa Allata'ala. Kamma tomminjo pammantanganNa Allata'ala siagang sikontu tau ammantanga ri suruga nahina ngaseng tommi. 7 Nipa'biang tommi angngewai siagang ambetai Umma'Na Allata'ala. Kammayatompa nipassareammi ri ia kakoasanga mae ri sikontu sukua, pa'rasanganga, bahasaya, siagang bansa-bansaya. 8 Anjo olo'-oloka lanisombai ri sikontu tau attallasaka ri lino, pantaranganna tau le'bakamo nitulisi' arenna ri wattu tenanapa nipa'niaki linoa, lalang ri kitta' katallassanNa anjo Ana' Gimbala' le'baka nisamballe. 9 Lanri kammana, punna akkulle ngasengko allangngere', pilangngerimi anne birittaya: 10 “Tau lanitarungkua, musti lanitarungkui. Siagang tau lanibunoa siagang pa'dang mattantu lanibunoi siagang pa'dang. Iaminjo saba'na namusti sa'bara' siagang tamamminraya Umma'Na Allata'ala.” 11 Nampa nia' kucini' sikayu olo'-olo' maraeng ammumba battu lalang ri buttaya. Nia' rua tanru'na sangkamma tanru' ana' gimbala'. Sa'ranna sangkammai sa'ra naga. 12 Ri dallekanna anjo olo'-olo' bungasaka ammakei kakoasang lompo iamintu kakoasang natarimaya battu ri anjo olo'-olo' bungasaka. Sikontu buttaya siagang sikontu tau ammantanga ri tompo'na napassa ngasemmi anynyomba mae ri anjo olo'-olo' bungasaka sumpaeng, anjo piayamo bokka' lompona. 13 Anjo olo'-olo' makaruaya appa'nia'mi siapa are panggaukang sanna' lompona siagang sannaka appakalannasa'na. Appaturummi pepe' battu rate ri langika naung ri buttaya, ri dallekanna sikontu rupataua. 14 Na natipu ngasemmo sikontu rupataua ri lino lanri anjo gau'-gau' appakalannasa' akkullea nagaukang ri dallekanna anjo olo'-olo' bungasa' battua sumpaeng. Siagang nasuro ngasemmi ke'nanga appaenteng se're patung untu' anjo olo'-olo' le'baka bokka' nataba pa'dang, mingka attallasa' iji. 15 Nipa'biammi anjo olo'-olo' makaruaya ansarei nyawa anjo patunga, sa'genna akkullemo a'bicara anjo patunga siagang nabuno sikamma tau tenaya naero' anynyomba mae ri ia. 16 Sikontu rupataua, lompo yareka ca'di, kasi-asi yareka kalumanynyang, tau ata yareka tau bebasa', nipassa ngasemmi ri anjo olo'-oloka untu' annarima pammatei ri lima kananna ke'nanga yareka ri tompo' kanynyinna ke'nanga. 17 Tena manna sitau akkulle ammalli yareka a'balu' apa-apa punna tena anjo pammateia ri ia, iamintu areng kalenna anjo olo'-oloka, yareka lomoro' ampa'nassayai anjo arenga. 18 Anrinni parallui nia' pangngissengang. Inai-nai baji' pangngissenna, akkullei narekeng battuanna lomoro'na anjo olo'-oloka; nasaba' anjo lomoroka, iamintu areng se're tau. Lomoro'na iamintu 666.
1 Nampa kuciniki, nakucini'mo anjo Ana' Gimbalaka ammenteng rate ri Bulu' Sion. Nia' Naagang tau 144.000 jaina, niaka ngaseng ri tompo' kanynyinna ke'nanga tattulisi' arenNa siagang arenNa ManggeNa. 2 Nampa nia' kulangngere' sa'ra battu rate ri langika ammarrung sangkamma sa'ra je'ne' tu'guru' lompoa siagang sangkamma gunturu' a'gamarrung lompoa. Anjo sa'raya sangkamma nilangngere' sa'ra kacapi niko'bika ri pakarena kacapia. 3 Na ri dallekanna anjo empoang kalompoanga, siagang appaka olo'-olo', kammayatompa sikamma anjo pamimping akkulilinga ri anjo empoang kala'biranga, akkelong ngasemmi anjo tau 144.000 jaina. Kelongang beru anjo nakelonganga ke'nanga. Manna inai takkulleai napappilajari anjo kelonga, pantaranganna anjo tau 144.000 jaina. Yangasemmi anjo ke'nanga tau le'baka nilappassang battu ri linoa. 4 Iaminjo ke'nanga le'baka anjagai katangkasanna ke'nanga lanri tenana nale'ba' sialle siagang bai'-bainea; tangkasaki ke'nanga sangkamma tuloloa. Amminawangi ke'nanga ri Ana' Gimbalaka manna kemae Nalampai. Iaminjo ke'nanga le'baka nilappassang battu ri sikontu rupataua, a'jari bungasa' passare mae ri Allata'ala siagang mae ri Ana' Gimbalaka. 5 Tale'bakai a'balle-balle ke'nanga, siagang tena callanna ke'nanga manna sike'de'. 6 Nampa nia' kucini' se're malaeka' maraengang anri'ba' tinggi rate ri langika. Anjo malaekaka angngerangi biritta iamintu ri sesena Kabara' Baji' mannannunganga, untu' nipabattu mae ri rupataua ri lino; iamintu mae ri sikontu bansaya, sukua, bahasaya siagang pa'rasanganga. 7 Akkio' lompomi anjo malaekaka nakana, “Malla' mako ri Allata'ala, siagang pujimi kalompoanNa! Nasaba' narapi'mi wattunna laNaadeli Allata'ala rupataua. Sombami Ia ampa'jariai langika, buttaya, tamparanga siagang sikontu timbusenna je'neka!” 8 Battumi pole malaeka' ribokoanganna anjo malaeka' uru-urua; akkio'mi anjo malaeka' makaruaya angkana, “Tu'guru'mi! Tu'guru'mi kota Babel lompoa! Napa'jari nasa'ring ngasemmi je'ne' anggoro' sikontu bansaya ri lino, iamintu anggoro' battu ri napasu gau' bawanna!” 9 Nia'mo malaeka' makatallu, ribokoanganna anjo malaeka' ruaya, akkio' lompoi angkana, “Anjo tau anynyombaya ri anjo olo'-oloka siagang patunna, siagang nia' pammateinna anjo olo'-oloka ri abanna yareka limanna, 10 anjo taua langnginungi anggoro'Na Allata'ala, iamintu anggoro' pangngalarroinNa le'bakamo nipanaung ri pangnginunganna; manna sike'de' tena nalanipakurang anjo anggoro' pangngalarroia! Yangasenna anjo taua lanisessai lalang ri pepeka siagang bara a'rinraya ri dallekanna malaeka'-malaeka' matangkasaka siagang ri dallekanNa anjo Ana' Gimbalaka. 11 Anjo umbunna pepe' ansessayai anjo taua lanaiki turus sa'genna satunggu-tungguna. Allo bangngi tena nale'ba' ammari nisessa ke'nanga, iamintu sikamma tau anynyombaya ri anjo olo'-oloka siagang patunna, sikamma tau niaka pammateina areng battu ri anjo olo'-oloka.” 12 Lalang ri anne passalaka parallui a'jari sa'bara' Umma'Na Allata'ala, ia amminawang turuka ri parentaNa Allata'ala siagang tamamminraya mae ri Isa. 13 Nampa nia' kulangngere' sa'ra battu ri suruga angkana, “Tulisiki anne: Maupaki tau matea appakkaramula ri kamma-kamma anne, ilalang nalayanina Batara!” Appialimi RohNa Allata'ala angkana, “Annabai! Lammari ke'nanga anjama terasa', lanri tuli nia'na wassele' palayananna ke'nanga anrurungangi.” 14 Nampa kuciniki, na nia'mo kucini' rammang kebo'. Irate ri anjo rammanga nia' sitau ammempo sangkammaya nicini' tau tanja'Na. Ri ulunNa nia' songko' bulaeng, na ri limanNa nia' se're kandao tarang. 15 Nampa nia' se're malaeka' maraengang assulu' battu ri Balla'Na Allata'ala. Akkio' lompomi mae ri Ia anjo ammempoa irate ri rammanga angkana, “Soeammi kandaoNu siagang akkatto mako kamma-kamma anne, nasaba' narapi'mi wattunna pakkattoanga; toami buttaya, jari wattunnami nikatto!” 16 Nampa Napasoemo kandaoNa anjo ammempoa irate ri rammanga nanikattomo linoa. 17 Nampa nia' kucini' se're malaeka' maraengannaya pole assulu' battu ri Balla'Na Allata'ala ri suruga. Anna'gala' tongi se're kandao tarang. 18 Le'baki anjo, nia'mo pole se're malaeka' maraengang, iamintu malaeka' makoasaya ri pepeka, battu ri tampa' pakkoro'bangnganga. Akkio' lompomi mae ri anjo malaeka' anna'galaka kandao tarang angkana, “Soeammi kandaonu nanukere' ngaseng sikontu rapponna anggoroka ri buttaya, nasaba' ti'no' ngasemmi rapponna!” 19 Jari napasoemi kandaona naung ri buttaya anjo malaekaka, nampa nakere' ngaseng rapponna anjo anggoroka battu ri poko'na, nampa napasambila antama' ri pammaccokang anggoro' pangngalarroi lompoNa Allata'ala. 20 Nipacco'mi anjo anggoroka pantarang kota; nassolommo ceraka battu ri anjo pammaccokang anggoroka sangkamma je'ne' binanga a'lo'loroka sa'genna tallum bilangngang kilometere' bellana, siagang la'biringi rua metere' lantanna.
1 Nampa nia' kucini' ri langika apa appakalannasaka siagang sannaka heba'na. Nia' tuju malaeka' siagang tuju bala kala'busanga. Iaminne kala'busanna Napappicinikang kalarroanNa Allata'ala. 2 Le'baki anjo nia'mo kucini' apa sangkammaya nicini' tamparang kaca accampuruka pepe'. Kucini' tommi tau le'bakamo ammeta ri anjo olo'-oloka siagang patunna, siagang ammetayamo mae ri anjo tau nibateia lomoro' arenna. Ammenteng ngasemmi anjo tau ammetayamo ri birinna tamparang kacaya, nanata'gala' kacapi Napassareanga Allata'ala mae ri ke'nanga. 3 Na nakelongammo ke'nanga kelong-kelonna Musa, atanNaya Allata'ala; kammayatompa kelong-kelonNa Ana' Gimbalaka. Kammaminne anjo kelong-kelonga, “Batara, Allata'ala Kaminang Koasaya, teai sipato' lompona siagang appakalannasa'na sikamma panggaukanTa! Karaenna sikontu bansaya, teai sipato' adele'na siagang annabana sikamma gautTa! 4 Inai tamallakka ri Katte, Batara? Inai taeroka ampa'la'bangi kalompoanTa? IKatteji bawang matangkasaka. Sikontu bansaya labattui anynyomba ri Katte, nasaba' nacini' ngasemmi sikontu taua kaadelang le'baka Kigaukang.” 5 Le'baki anjo kucini'mi tassungke Balla'Na Batara ri suruga; siagang nia'mi lalang KemaNa Batara. 6 Nampa assulu'mo battu ri Balla'Na Allata'ala anjo tujua malaeka' siagang tujua bala. Pakeanna ke'nanga kaeng lenang sannaka tangkasa'na siagang accilla'-cillaka. Siagang ammakei ke'nanga pa'lapa' barambang bulaenga nipare'. 7 Nampa kalase'renna battu ri anjo appaka anu attallasa' ansarei anjo tujua malaeka' tuju pammoneang bulaenga nipare', rassia siagang kalarroanNa Allata'ala, iamintu Allata'ala Mattallasaka satunggu-tungguna. 8 Jari rassimi Balla'Na Allata'ala siagang umbu kala'biranNa siagang kakoasanNa Allata'ala. Siagang ilalang tenanapa nacappu' anjo tujua bala, iamintu bala naeranga anjo tujua malaeka', tena manna sitau akkulle antama' ri Balla'Na Allata'ala.
1 Nampa nia' kulangngere' sa'ra lompo battu lalang ri Balla'Na Allata'ala angkana mae ri anjo tujua malaeka' angkana, “A'lampako nanutumpa bonena anjo pammoneang kalarroanNa Allata'ala naung ri buttaya!” 2 A'lampami anjo malaeka' makase'rea nanatumpa bonena anjo pammoneanga naung ri butta. Jari attimbomi sikamma lattang sannaka heba'na siagang sannaka pa'risi'na ri kalenna sikontu tau niaka pammateina anjo olo'-oloka, siagang ri sikontu tau anynyombaya ri patunna. 3 Le'baki anjo natumpami bonena pammoneanna anjo malaeka' makaruaya naung ri tamparanga. Jari a'jari sangkammami cera' tau mate je'ne' tamparanga, sa'genna mate ngasemmo sikontu olo'-olo' niaka attallasa' lalang ri tamparanga. 4 Nampa natumpami bonena pammoneanna anjo malaeka' makatallua naung ri sikamma binangaya siagang sikamma timbuseng je'neka, sa'genna a'jari cera' je'ne'na. 5 Kulangngere'mi anjo malaeka' makoasaya ri je'neka angkana, “Adeleki hukkungang Kipassareanga, o Kaminang Matangkasaka, Allata'ala niaka, siagang niakamo! 6 Le'baki napassolong cera'na Umma'Na Allata'ala siagang cera'na na'bi-na'bia; kamma-kamma anne Kisuromi ke'nanga angnginung cera'. Memang siratang memang tongi anjo kammaya mae ri ke'nanga!” 7 Nampa nia' kulangngere' sa'ra battu ri tampa' pakkoro'bangnganga angkana, “Batara, Allata'ala Kaminang Koasaya, annabai siagang adeleki sikamma hukkungang le'baka Kitappuki!” 8 Le'baki anjo natumpami bonena pammoneanna anjo malaeka' makaappaka mae ri mataalloa; nanipa'biammo mataalloa ampa'jari ammutungi rupataua battu ri bambang ta'liwaka. 9 Ammutummi rupataua napakamma bambanna, sa'genna natunraimo arenNa Allata'ala, Makoasaya mae ri sikamma anjo balaya. Manna nakamma tena todong naero' toba' ke'nanga battu ri dosa-dosana siagang tena naero' ke'nanga ammuji ri kalompoanNa Allata'ala. 10 Nampa natumpami bonena pammoneanna anjo malaeka' makalimaya mae ri empoang kala'biranna anjo olo'-oloka. Na'jari sassang ngasemmo sikontu pa'rasangang naparentaya anjo olo'-oloka, namassing nakokko'mo lilana rupataua napakamma pa'risi'. 11 Nampa natunraimo ke'nanga Allata'ala ri suruga lanri pa'risi'na siagang lanri anjo lattanna ngaseng ke'nanga. Mingka tena tompa naero' toba' ke'nanga battu ri panggaukang ja'dala'na. 12 Le'baki anjo natumpami bonena pammoneanna anjo malaeka' makaannanga naung ri Binanga lompoa, iamintu Efrat. A'jari kalotoro'mi anjo binangaya sa'genna a'jappamo sikamma karaeng battu rayaya angngolo anjoreng. 13 Nampa nia'mo kucini' tallu roh ja'dala' sangkammaya tumpang tanja'na. Anjo tumpanga battu anjorengi assulu' ri bawana nagaya, battu ri bawana anjo olo'-oloka, siagang battu ri bawana na'bi balle-ballea. 14 Iaminjo ke'nanga roh-roh ja'dalaka, appareka panggaukang appakalanna'-lannasa'. A'lampami anjo tallua roh mae ri sikontu karaenga ri sikontu linoa nampa napa'rappungang ke'nanga untu' a'bundu' ri Allo lompoa, iamintu AllonNa Allata'ala Kaminang Koasaya. 15 “Pilangngeri! BattuA' sangkamma palukkaka! Maupaki tau tuli a'jagaya siagang nakatutuia pakeanna, sa'genna tena nassolara' a'jappa siagang tena nasiri'-siri' a'jappa ri dallekanna tau jaia!” 16 Nampa napa'rappung ngaseng roh-roh anjo sikontu karaenga ri tampa' niarenga lalang bahasa Ibrani: Harmagedon. 17 Le'baki anjo natumpami bonena pammoneanna anjo malaeka' makatujua naung ri allaka. Na nia'mo nilangngere' sa'ra lompo battu ri empoang kala'biranga ri Balla'Na Allata'ala, angkana, “Le'ba'mi!” 18 Nampa assisambung-sambummo kilaka siagang a'gamarrummi na'galutturu' gunturuka, kammayatompa ta'ge'goso' sanna'mi buttaya. Tenale'bakai ta'ge'goso' kamma anjo buttaya baku' nipa'nia'na rupataua. Iaminne kaminang sannaka ta'ge'goso'na buttaya! 19 Assisa'la'mi anjo kotaya ta'bage tallu, siagang ancuru' tommi kota-kotaya ri sikontu pa'rasanganga ri linoa. Nampa Nau'rangimo Allata'ala anjo Babel lompoa. Jari Napainummi Allata'ala anjo Babel anggoro' battua ri pammoneang anggoro'Na Allata'ala — iamintu anggoro' pangngalarroi lompoNa. 20 Lanynya' ngasemmi sikontu pulo-puloa, kammayatompa sikontu buluka lanynya' ngaseng tommi. 21 Turummi bosi es lompoa, massing ta'limampuloa kilo battala'na tassilitere'; tu'guruki battu rate ri langika nanatuju ngaseng rupataua. Natunraimi ke'nanga Allata'ala passabakkang anjo bala bosi es sannaka heba'na.
1 Le'baki anjo battumi mae ri nakke kalase'renna anjo tujua malaeka' anna'galaka pammoneang na nakana, “Maeko, lakupicinikiangko antekamma batena lanihukkung anjo pasundala' lompoa, iamintu anjo kota lompoa, nibangunga ri ampi'na binanga-binangaya. 2 A'gau' bawang ngasemmi karaenna linoa siagang ia, siagang nasa'rimmi bonena linoa lanri nainunna ke'nanga anggoro' panggaukang bawanna.” 3 Nampa nikoasaima' ri RohNa Allata'ala, siagang nieramma' mange ri parang lompoa ri anjo malaekaka. Anjoreng nia'mo kucini' sitau baine ammempo irate ri dongko'na sikayua olo'-olo' ejaya siagang a'rinraya nicini'; rassi kalenna siagang tulisang-tulisang areng antunraiyai Allata'ala. Nia' tuju ulunna siagang sampulo tanru'na anjo olo'-oloka. 4 Anjo bainea ammakei baju lango-lango siagang eja toaya tanja'na, kammayatompa nibelo-beloi siagang belo-belo bulaeng, paramata, siagang mutiara. Na ri limanna nia' nata'gala' se're mangko' bulaeng rassia bonena siagang apa ra'masaka siagang kodi dudua, wassele' panggaukang bawanna. 5 Ri tompo' kanynyinna nia' tattulisi' areng, niaka rahasiana battuanna. Anjo arenga iamintu “Babel Lompoa, anronna sikontu pasundalaka siagang tau kodi sipaka ri lino.” 6 Nampa nasa'ring kucini' anjo bainea napakamma cera'na Umma'Na Allata'ala siagang cera'na tau nibunoa lanri tamamminrana mae ri Isa. Teai sipato' lannasakku ri wattunna kucini' anjo bainea. 7 Nampa nakana anjo malaekaka ri nakke, “Apa saba'na nanulannasa' kamma? Baji'mi nakupauangko rahasiana anjo bainea siagang rahasiana anjo olo'-olo' nadongkokia, iamintu olo'-olo' tujua ulunna siagang sampuloa tanru'na. 8 Anjo olo'-oloka le'baki attallasa' pirangalloang, mingka kamma-kamma anne tenamo nattallasa'. Sinampe' mami nassulu'mo battu ri tubiri'na kamateanga nampa mange ri kapanrakanga. Sikamma tau attallasaka ri lino, natena tattulisi' arenna lalang Kitta' Tau Attallasaka ri wattu tenanapa nanipa'jari linoa, lalannasaki ri wattunna nacini' anjo olo'-oloka. Nasaba' le'baki attallasa' anjo olo'-oloka pirangalloang. Kamma-kamma anne tenamo nattallasa', mingka lammumba poleangi ammotere'. 9 Lalang ri anne passalaka parallui nia' pangngissengang siagang pammahang. Anjo tujua ulu battuanna iaminjo tujua bulu'; iamintu bulu'-bulu' napammempoia anjo bainea. Siagang anjo tujua ulu battuanna pole iaminjo tuju karaeng: 10 limami ri ke'nanga tu'guru', se're ammarenta iji, na se'reanga pole tenapa nabattu. Punna battui sallang, musti ammarentai mingka sinampe'ji bawang. 11 Na anjo olo'-olo' le'baka attallasa', mingka tenamo kamma-kamma anne, iaminjo karaeng makasagantujua. Battu ri kalase'renna tonji ri anjo tujua karaeng, a'lampayamo kamma-kamma anne mange ri kapanrakanga. 12 Anjo sampuloa tanru' nucinika iamintu sampuloa karaeng, tenayapa nappakkaramula ammarenta. Mingka lanisarei ke'nanga koasa untu' ammarenta a'jari karaeng siagang anjo olo'-oloka poro sijang sallona. 13 Anne sampuloa karaeng sangkamma ngasengi pattujunna; para napassareang ngasengi ke'nanga kagassinganna siagang kakoasanna mae ri anjo olo'-oloka. 14 La'bunduki ke'nanga angngewai anjo Ana' Gimbalaka. Mingka lanibetai anjo sikamma karaenga ri anjo Ana' Gimbalaka siagang sikamma taunNa tamamminraya le'baka Nakio' siagang Napile; nasaba' Ia minjo Ana' Gimbalaka Batarana sikamma tumalompoa, siagang Karaenna sikamma karaenga.” 15 Nakana pole anjo malaekaka, “Anjo je'ne' nucinika, napammempoia anjo pasundalaka, iaminjo bansa-bansaya, ra'ya'-ra'yaka, pa'rasangang-pa'rasanganga siagang bahasa-bahasaya. 16 Anjo sampuloa tanru' siagang anjo olo'-olo' nucinika labirisiki mae ri anjo pasundalaka. Lanarampasaki ke'nanga sikamma apa-apa niaka ri ia, siagang lanapa'jari assolaraki. Lanakanrei ke'nanga assinna siagang lanaancuruki siagang pepe'. 17 Nasaba' Napagio'mi Allata'ala atinna ke'nanga untu' anggaukangi pattujunNa Allata'ala. LaNapassamaturu'mi ke'nanga untu' ampassareangi kakoasanna ke'nanga mae ri anjo olo'-oloka sollanna ammarenta anjo olo'-oloka sa'genna kajariang apa Napaua Allata'ala. 18 Anjo baine nucinika, iaminjo kota lompoa, amparentayai karaeng-karaenga ri lino.”
1 Le'baki anjo nia'mo kucini' se're malaeka' maraeng naung battu ri suruga. Nia' kakoasang lompona, siagang suara'nami ampa'jari singaraki sikontu linoa. 2 Akkio' lompomi angkana, “Tu'guru'mi anjo bainea! Tu'guru'mi Babel lompoa! Kamma-kamma anne anjarimi tampa' pammantanganna setang-setanga siagang roh-roh ja'dalaka. Lalammi ammantang sangka' rupaya jangang-jangang rantasa' siagang nakabirisia taua. 3 Nasaba' sikontu bansaya le'ba' ngasemmi angnginungi anggoro' napasu panggaukang bawanna. A'gau' bawammi karaeng-karaenna linoa siagang ia; siagang a'jari kalumanynyammi sikamma padangganga ri lino lanri napasuna tenaya nakkulle natahang-tahang.” 4 Nampa nia' sa'ra maraeng kulangngere' battu ri suruga angkana, “Assulukko, ikau ngaseng ummakKu! Assulukko battu lalang! Teako pinawangngi dosa-dosana, siagang teako amminawangngi antanggongi hukkunganna! 5 Nasaba' attambung-tambungi dosana sa'genna ri langika, na Nau'rangi Allata'ala kaja'dallanna. 6 Appanggaukang mako mae ri ia sangkamma batena appanggaukang mae ri kau ngaseng; balasaki a'lappi rua sikamma apa le'baka nagaukang Bonei mangko'na inungang a'lappi ruaya terasa'na nainungang napasadiaya untu' ikau ngaseng. 7 Sarei kasessang siagang kasusaang sangkammaya jaina siagang kalompoang nakala'biang nasareangai ri kalenna todong. Nasaba' tuli nakanana mae ri kalenna, ‘Inakke anne karaeng baine ammarentaya! Inakke teaia' janda; tena nalakukasia' nikanaya si'na!’ 8 Passabakkang iaminjo, nasialloji bawang nanatujumo bala, — iamintu garring, si'na, siagang kacipurang. Na lanipammutungi siagang pepe', lanri Karaeng Allata'ala, sannaka MakoasaNa angngadeli.” 9 Amminawang tongi karaeng-karaeng linoa ri panggaukang bawanna siagang hawa napasuna anjo bainea; jari lamminawang tommi ke'nanga angkarruki siagang ampiraungi anjo kotaya punna nacini' ke'nanga nai' umbunna pepe' ampamutungai. 10 Lammenteng battu bellami ke'nanga lanri mallaki ke'nanga nitaba todong ri kasessanna. Nakanamo ke'nanga, “Adudu, teai sipato' cilakana anne kota masahoroka, kota Babel kassaka! Sinampe' duduji sallona hukkunganTa naKiposso'mo!” 11 Angngarru' tommi siagang susa ngaseng tommi padangganga ri lino lanri anjo bainea, nasaba' tenamo manna sitau akkulle amballi barang-barang dangganganna ke'nanga. 12 Tenamo amballi bulaenna, pera'na, paramatana, siagang mutiarana ke'nanga; kammayatompa kaeng lenang, kaeng lango-lango, sa'be, siagang kaeng eja toa; a'rupa-rupa kayu langkaraka nigappa, barang-barang gadinga siagang kayu-kayu ka'jalaka ballinna, tambagaya, bassia siagang batu laccu' keboka; 13 kuli' kayu bauka, rampa-rampaya, sitanggi, minynya' bau', siagang kamanynyang; anggoro' siagang minynya', tarigu siagang gandung; sapi siagang gimbala'; jarang siagang bendi, ata-ataya, ba'lalo nyawana pole taua. 14 Nakanamo sikamma padangganga mae ri anjo bainea, “Tena ngasemmi sikamma apa nukaerokia; siagang tappela' ngaseng tommi kakalumanynyanganga siagang kagammarranga. Tenamo nalanugappa ammotere'!” 15 Ammenteng battu bellami sikamma anjo padanggang a'jari kalumanynyanga napakamma anjo kotaya, lanri malla'na ke'nanga nataba kasessanna. Lasusami siagang langngarru'mi ke'nanga, 16 nampa angkana, “Adudu, teai sipato' cilakana anne kota masahoroka! Biasana ammakei kaeng lenang, kaeng lango-lango siagang kaeng eja a'rinraya tanja'na; biasana rassi kalenna belo-belo bulaeng, paramata siagang mutiara! 17 Mingka sijangji bawang sallona, nalanynya' ngasemmo sikontu kakalumanynyanganna!” Sikamma juraganga, padongko' kappalaka, siagang ana'-ana' kappalaka, kammayatompa sikontu a'boya-boyaya ri tamparanga, ammenteng battu bella ngasemmi. 18 Siagang ammarrammi ke'nanga ri wattunna nacini' ke'nanga nai' umbu pepe' angkanreai anjo kotaya. Nakana ke'nanga, “Tenanniakkapa kota maraeng assangkamma anne kota lompoa!” 19 Jari naboneimi au ulunna ke'nanga a'jari pammatei attau matei ke'nanga; nampa angngarru' siagang ammarrang-marrang ke'nanga angkana, “Adudu, teai sipato' cilakana anne kota lompoa! Kakalumanynyanganna ampa'jari kalumanynyangi sikamma tau niaka kappala'na ri tamparanga. Mingka lalang sijangji bawang sallona, natappela' ngasemmo sikontu apa-apanna!” 20 He, surugaya, a'rannu-rannuko lanri posso'na anjo kotaya. He, Umma'Na Allata'ala, suro-suroa, siagang na'bi-na'bia ma'rannu-rannuko! Nasaba' nihukkummi ri Allata'ala anjo kotaya, a'jari pa'balasa' mae ri apa-apa le'baka nagaukang mae ri kau ngaseng! 21 Le'baki anjo, nia'mo malaeka' sannaka kassa'na angngangka' se're batu lompo, sangkamma batu pa'giling sannaka lompona, nampa napasambila antama' ri tamparanga, siagang nakana, “Kammaminne batena anjo kota Babel masahoroka lanipasambila sarring, sa'genna tenamo nalanibuntulu' ammotere'. 22 Sa'ra kacapia, sa'ra pakelonga, sa'ra sulinga, siagang sa'ra tarompeka, tena ngasemmo nakalangngerang lalang ri kau. Tena tommo lanubuntulu' tu cara'de' manna sitau anjoreng, kammayatompa tena tommo sa'ra batu pa'giling lakalangngerang. 23 Tenamo nalaccini' taua singara' lampu lalang ri kau; siagang tena tommo lanilangngere' passua'-suarrang pa'buntingang antureng. Sikamma padanggannu kaminang pore ri lino, siagang nutipumi sikontu bansaya ri lino siagang pangngassengang bale'-bale' matanu!” 24 Nihukkungi Babel, lanri nia'na nigappa lalang ri anjo kotaya iamintu cera'na na'bi-na'bia, cera'na Umma'Na Allata'ala; bodona kana, cera'na sikontu tau le'baka nibuno ri linoa.
1 Le'baki anjo nia'mo kulangngere' sa'ra gamarrunna tau jaia battu ri suruga, akkiok-kio' angkana, “Pujimi Allata'ala! Allata'alata, iamintu Allata'ala Mappasalamaka; Ia Allata'ala Mala'biri' siagang Makoasa! 2 Adeleki siagang annabai pangngadelanNa! Napabattumi hukkunganNa mae ri pasundala' lompoa, ampanrakiai linoa siagang gau' bawanna. Le'ba'mi Nahukkung Allata'ala anjo pasundalaka, lanri nabunona sikamma ata-atanNa Allata'ala.” 3 Nampa akkio' pole anjo sa'ra tau jaia, angkana, “Pujimi Allata'ala! Talammari-mariai umbunna anjo pepe' ampamutungai anjo kota lompoa!” 4 Anjo ruampuloa angngappa' pamimping, siagang anjo appaka olo'-olo' akkulilinga ri anjo empoang kala'biranga, su'ju' ngasemmi anynyomba mae ri Allata'ala ammempoa irate ri anjo empoang kala'biranga. Angkanami ke'nanga, “Aming! Pujimi Allata'ala!” 5 Nampa nia' kulangngere' sa'ra battu ri anjo empoang kala'biranga angkana, “Pujimi Allata'ala, ikau sikontu atanNa, siagang sikontu rupataua, tau lompo yareka ca'di, ia anynyombaya ri Allata'ala, pujimi Allata'ala!” 6 Le'baki anjo nia'mo kulangngere' kamma sa'ra tau sannaka jaina sipa'rappungang; sa'ranna sangkammai sa'ra bombang sannaka lompona siagang sangkammai gunturu' a'gamarrunga. Kulangngere'mi ke'nanga angkana, “Pujimi Allata'ala! Nasaba' Iami Batara, Allata'alata Kaminang Koasaya, ammarentaya kamma-kamma anne! 7 Maeko kima'rannu-rannu siagang assannang-sannang; maeko nanipuji kalompoanNa! Nasaba' narapi'mi allo pa'buntinganNa anjo Ana' Gimbalaka, siagang sadiami balinNa untu' lanipa'bunting. 8 Nipassareammi mae ri Ia kaeng lenang accillaka untu' Napake.” (Anjo pakeang lenanga iamintu panggaukang-panggaukang baji' nagaukang Umma'Na Allata'ala.) 9 Nampa nakana anjo malaekaka mae ri nakke, “Tulisiki anne: ‘Maupaki sikamma tau le'baka nibuntuli mae ri passua'-suarranna pa'buntinganNa anjo Ana' Gimbalaka.’ ” Nampa nasambung pole anjo malaekaka angkana, “Iaminne biritta tojenga, battua ri Allata'ala.” 10 Nampa su'ju'ma' ri dallekanna anjo malaekaka, ero' anynyomba ri ia; mingka nakanamo ri nakke, “Teako! Teako anynyombai ri nakke, mingka Allata'ala nusomba! Nasaba' inakke ata tonja' sangkamma ikau siagang sikontu sari'battannu anna'gala' jarreka mae ri biritta tojenga, Napabattua Isa!” Nasaba' iaminjo kasa'bianga mae ri Isa assarei taua pangngissengang untu' ampabattui biritta battua ri Allata'ala. 11 Tassungkei kucini' surugaya, nampa nia' kucini' sikayu jarang kebo'. PabaeNa niarengi I Tamamminraya siagang I Tojeng. Adeleki hukkungang Natappukia siagang pa'bundukang Nagaukanga. 12 MatanNa sangkammai pepe' a'rinraya siagang ri ulunNa ammakei jai songko' karaeng. Ri KalenNa nia'mo tattulisi' areng; siagang KalenNaji bawang angngassengi anjo arenga. 13 PakeanNa iamintu juba le'baka nitallangngang antama' ri ceraka. Siagang niaremmi “KananNa Allata'ala”. 14 Amminawang ngasemmi ri Ia tantara surugaya, a'dongko' jarang kebo' ngaseng, siagang ammakeang kaeng lenang kebo' sannaka ngaseng kebo'na. 15 Battu ri bawaNa nia' assulu' pa'dang tarang; siagang iaminjo pa'danga laNapake ambetai bansa-bansaya, nampa laNaparenta ke'nanga siagang takkang bassi. LaNapaccoki anggoroka lalang ri pammaccokang anggoro' kalarroanNa Allata'ala Kaminang Koasaya. 16 Ri jubaNa siagang ri bongganNa nia' tattulisi' areng kammaya anne, “Karaenna sikamma karaenga, siagang Batarana sikamma tumalompoa.” 17 Nampa nia' kucini' sitau malaeka' ammenteng irate ri matanna alloa. Akkio' lompomi mae ri sikontu jangang-jangang anri'baka ri langika, angkana, “Maeko a'rappungang untu' anghaderi passua'-suarrang lompoNa Allata'ala! 18 Maeko angkanrei assinna ngaseng karaenga, panglimaya, siagang assinna tau rewaya; maeko angkanrei assinna sikamma padongko' jaranga siagang jaranna ngaseng, kammayatompa assinna sikontu rupataua, tau lompo yareka tau ca'di, ata yareka tau bebasa'!” 19 Nampa kucini' anjo olo'-oloka, karaeng-karaenna linoa siagang sikontu tantarana ke'nanga, a'rappungang ngasengi untu' a'bundu' angngewai anjo a'dongko' jarang keboka siagang sikontu tantaraNa. 20 Nijakkala'mi anjo olo'-oloka siagang sikontu na'bi takontutojenga, iamintu le'baka appare' panggaukang appakalannasa' ri dallekanna anjo olo'-oloka. (Iaminjo gau'-gau' appakalannasaka napake anjo olo'-oloka antipui anjo tau le'baka ngaseng nabatei anjo olo'-oloka, siagang anjo tau anynyombaya mae ri patunga.) Nampa nipela' attallasa' anjo olo'-oloka siagang na'bi balle-ballea antama' ri tamparang pepe' a'rinra-rinraya siagang bara. 21 Nampa nibuno ngaseng tantarana ke'nanga siagang pa'dang assuluka battu ri bawana anjo padongko' jarang keboka. Nabattu ngasemmo jangang-janganga angkanrea tojengi assinna anjo ke'nanga nibunoa.
1 Le'baki anjo nia'mo kucini' se're malaeka' naung battu ri suruga. Nia' nata'gala' ri limanna koncina tubiri'na kamateanga siagang passikko' lompo. 2 Nampa najakkala' anjo nagaya, anjo ulara' toaya — iamintu Billisika yareka Roh Ja'dalaka — nampa nasikko' untu' sisa'bu taung sallona. 3 Nampa napela' malaekaka anjo nagaya antama' ri tubiri'na kamateanga, nampa nakonci siagang nasegele' anjo tubirika sollanna tenamo nakkulle antipui bansa-bansaya ilalang tenanapa nala'busu' anjo wattu sisa'bua taung. Le'baki anjo nilappassammi ammotere' untu' poro sinampekang. 4 Nampa kucini' sikamma anjo empoang kala'biranga siagang sikamma tau niaka ammempo irate nisarei koasa untu' annappuki hukkungang. Kucini' tommi nyawana sikamma tau le'baka nisamballe passabakkang a'jari sa'bina ke'nanga ri passala'na Isa, siagang napa'la'bang pappasang battua ri Allata'ala. Yangasenna anjo taua tanasombayai olo'-oloka, yareka patunna. Tena todong nale'ba' ke'nanga anggappa pammatei battu ri anjo olo'-oloka, iamintu pammatei irateanganna kanynyinna yareka ri limanna ke'nanga. Jari attallasa' poleammi ke'nanga siagang ammarentami a'jari karaeng ke'nanga sisa'bu taung sallona siagang Almasi. 5 Iaminne tau bungasaka ngaseng nipattallasa' poleang battu ri kamateanga. (Mingka anjo tau mate maraenganga tena nanipattallasa' poleangi ilalang anjo wattu sisa'bua taung.) 6 Maupaki sikamma tau nipattallasa' poleanga todong ri anjo wattu bungasaka. Iami ke'nanga siratang a'jari taunNa Allata'ala. Tenamo nakoasa kamateang makaruaya mae ri ke'nanga. La'jarimi ke'nanga imang-imanNa Allata'ala siagang imang-imanNa Almasi; na lammarentamo ke'nanga siagang Ia sa'genna sisa'bu taung sallona. 7 Punna le'ba'mo anjo wattu sisa'bua taung, lanilappassammi anjo Billisika battu ri tarungkua, 8 nala'lampamo natipu bansa-bansa tassiaraka ri sikontu linoa iamintu Gog siagang Magog. Nipa'rappungammi ri Billisika ke'nanga untu' a'bundu'; sanna' jaina ke'nanga, sanrapangi kassi' ri tamparanga jaina. 9 Ta'bage-bagemi ke'nanga a'la'bang mae ri sikontu linoa, nampa nakurung pammantanganna Umma'Na Allata'ala siagang kota Nakamaseanga Allata'ala. Mingka naummi pepeka battu ri langika nampa naancu'-ancuru' ke'nanga. 10 Nampa nipasambila anjo Billisi' antipuai ke'nanga antama' ri tamparang pepeka siagang bara a'rinraya. Anjoremmi rolong nipela' anjo olo'-oloka siagang na'bi takontutojenga. Tammari-mariai ke'nanga lanisessa allo bangngi sa'genna satunggu-tungguna. 11 Le'baki anjo nia'mo kucini' se're empoang kala'birang; lompoi siagang keboki tanja'na anjo empoang kala'biranga siagang nia' tommi rate patanNa empoang ammempo. Lanynya'mi langika siagang buttaya battu ri dallekanNa, sa'genna tenamo nakacinikang. 12 Siagang nia'mi kucini' sikamma tau matea, tau lompo yareka tau ca'di, ammenteng ri dallekanna anjo empoang kala'biranga. Nisungkemi kitta'-kittaka. Nampa nia' tommo se're kitta' maraeng nisungke iamintu Kitta'na Tau Attallasaka. Nampa nitappukimi hukkunganna sikamma tau matea situru' panggaukanna ke'nanga, kamma niaka tattulisi' lalang ri anjo kitta'-kittaka. 13 Nampa napassareammo tamparanga sikamma tau matea, niaka lalang ri ia. Kamateanga siagang Linona Kamateanga napassareang ngaseng tommi sikamma tau mate niaka ri ia. Nanihukkung ngaseng tommo anjo tau matea situru' panggaukanna ke'nanga. 14 Nampa nipasambilamo Kamateanga siagang Lino Kamateanga antama' ri tamparang pepeka. (Anne tamparang pepeka, iamintu kamateang makaruaya.) 15 Sikamma tau tenaya natattulisi' arenna lalang ri Kitta'na Tau Attallasaka, lanipela' ngasemmi antama' ri tamparang pepeka.
1 Nampa nia'mo kucini' langi' beru siagang lino beru. Tenami langi' uru-urua siagang lino uru-urua; kammayatompa tamparanga lanynya' tommi. 2 Kucini'mi anjo kota matangkasaka, iamintu kota Yerusalem berua, turunga battu ri Allata'ala ri suruga. Le'ba'mi nipasadia anjo kotaya sanrapang bunting baine nimodeia untu' bunting bura'nena. 3 Nampa nia'mo kulangngere' sa'ra lompo akkio' battu ri anjo empoang kala'biranga angkana, “Kamma-kamma anne nia'mi pammantanganNa Allata'ala ri tangnga-tangngana pammantanganna rupataua! Lattallasa'mi siagang ke'nanga, siagang la'jarimi ke'nanga umma'Na. KalenNa Allata'ala lania' ri tangnga-tangngana ke'nanga siagang la'jari Allata'ala mae ri ke'nanga. 4 LaNasapui sikamma je'ne' mata niaka ri matanna ke'nanga. Tenamo nalania' kamateang; tenamo si'na, karru', kammayatompa garringa latena ngaseng tommi. Sikontu apa-apa salloa lanynya' ngasemmi.” 5 Nampa Nakanamo anjo niaka ammempo irate ri empoang kala'biranga, “Kamma-kamma anne Kupa'jari beru ngasemmi sikontu apa-apa niaka!” Nakana pole ri nakke, “Tulisiki anne, nasaba' sikamma anne kana-kanaya sangnging kana tojeng siagang siratangi nipatappa'.” 6 Nampa Nakana, “Le'ba'mi! INakkemi uru-urua siagang kala'busanga; iNakkemi Batara battu ri Pakaramulaya sa'genna ri Kala'busanga. Sikamma tau turerea laKusare cuma-cumai je'ne' inung battu ri timbuseng je'ne' katallassanga. 7 Tau ammetaya lanatarima ngasengi yangasenna anjo battu ri Nakke. INakke la'jari Allata'alana siagang ia la'jari anakKu. 8 Mingka tau balloranga, tau a'bali' ballanga, tau bambalaka pabuno-bunoa, tau pagau' bawanga, tau ammakea pangngissengang siagang baca-baca, tau anynyombaya barhala, kammayatompa sikontu tau paballe-ballea, lanipelaki antama' ri tamparang pepeka siagang bara a'rinra-rinraya, iamintu kamateang makaruaya.” 9 Kalase'renna anjo tujua malaeka' anta'galakai pammoneanna anjo tujua bala kala'busang, battui mae ri nakke na nakana, “Maeko! Lakupicinikiangko Buntinga, iamintu bainenNa anjo Ana' Gimbalaka.” 10 Nikoasaima' ri RohNa Allata'ala, siagang naeramma' anjo malaekaka nai' ri tompo'na moncong sannaka tinggina. Napicinikiamma' kota Yerusalem, anjo kota matangkasaka. Anjo kotaya turungi battu ri Allata'ala, battu ri suruga, 11 siagang suara'na kammayatompa kala'biranNa Allata'ala. Accillaki anjo kotaya sangkamma batu paramata, sangkamma batu baiduri moncongbulo sannaka ci'nonna kamma kaca. 12 Tembo'na attammulili sanna' lompona siagang tinggina; nia' sampulo anrua pakke'bu' lompona, na nijagai ri sampulo anrua malaeka'. Massing nia' tattulisi' ri anjo pakke'bu' lompoa areng-arenna anjo sampuloa anrua suku bansa Israel. 13 Nia' tallu pakke'bu' lompo a'dalle' mae ri appaka kabattuang: tallu irayangang, tallu timborangang, tallu warakkangang, siagang tallu laukangang. 14 Iratei ri sampuloa anrua batu pundasi nibangung anjo temboka. Ri anjo batu-batu pundasia massing niaki tattulisi' arenna sampuloa anrua tunisuroNa anjo Ana' Gimbalaka. 15 Anjo malaeka' a'bicaraya mae ri nakke nia' takkang bulaenna, untu' napake angngukkuruki anjo kotaya, sikamma pakke'bu' lompoa siagang tembo'na. 16 Anjo kotaya appasagi appaki; sangkammai la'buna siagang sangkara'na. Naukkuru'mi anjo malaekaka anjo kotaya, siagang takkang pangngukkuru'na; a'nassami angkanaya 2400 kilometere' la'buna, sangkara'na siagang tinggina sangkammaji la'buna. 17 Ri wattunna naukkuru' anjo malaekaka tembo'na, a'nassami angkanaya annampulo metere' tinggina. Anjo ukkurang napakea malaekaka iaminjo ukkurang le'baka napake rupataua. 18 Anjo tembo'na kotaya batu baiduri moncongbulo nipare'; nampa kotana iamintu bulaeng ti'no' nipare', ci'nong sangkamma kaca. 19 Batu pundasina nibelo-beloi ngasengi a'rupa-rupa batu paramata. Batu pundasi makase'rea iamintu batu baiduri moncongbulo nipare', pundasi makaruaya battu ri batu nilang, pundasi makatallua battu ri batu yaku', pundasi makaappaka battu ri batu samru', 20 pundasi makalimaya battu ri batu baiduri sepa, makaannanga battu ri batu dalima, pundasi makatujua battu ri batu ratna campaka, pundasi makasagantujua battu ri batu pirusu', pundasi makasalapanga battu ri batu topasa', pundasi makasampuloa battu ri batu karisoparasa', pundasi makasampuloa asse're battu ri batu lasuardi, siagang pundasi makasampuloa anrua battu ri batu kacubung. 21 Anjo sampuloa anrua pakke'bu' lompona iamintu sampulo anrua mutiara; tasse're-se'rea pakke'bu' massing mutiara nipare'. Agang lompona anjo kotaya sangnging bulaeng ti'no' nipare', ci'nong nicini' sangkamma kaca accillaka. 22 Tenai kucini' Balla'Na Allata'ala ilalang ri anjo kotaya, nasaba' ia Balla'Na Allata'ala iamintu KalenNa Batara, Allata'ala Kaminang Koasaya, siagang anjo Ana' Gimbalaka. 23 Tena naparallu nasiori mataallo yareka bulang anjo kotaya, lanri nisiorimi ri kala'biranNa Allata'ala, siagang Iaminjo Ana' Gimbalaka a'jari lampunna. 24 La'jappami bansa-bansaya ri lino lalang ri singara'na, siagang karaeng-karaenga lanaerammi kakalumanynyanganna antama' ri anjo kotaya. 25 Latassungkemi sikamma pakke'bu' lompona kotaya sila'busu' allo; tenamo nalatattongko', nasaba' tenamo bangngi anjoreng. 26 Lanierammi kalompoanna siagang kakalumanynyanganna sikontu bansa-bansaya antama' ri anjo kotaya. 27 Mingka tau anggaukangai apa appakaringi'-ringika, tau a'balle-ballea, bodona kana, sikontu apa-apa ra'masaka tena sikali nakkulle antama' anjoreng. Ia lanipa'biang antama' iamintu tau niaka bawang tattulisi' arenna lalang ri kitta'Na anjo Ana' Gimbalaka, iamintu Kitta'na Tau Attallasaka.
1 Napicinikiang tomma' anjo malaekaka binanga assarea katallassang je'ne'na. Anjo binangaya accillaki je'ne'na sanrapang kaca a'lo'loroka battu ri empoang kala'biranNa Allata'ala siagang battu ri anjo Ana' Gimbalaka, 2 angngoloa ri tangnga-tangngana agang lompona anjo kotaya. Ri biring pimbali-baliNa anjo binangaya, nia' poko' katallassang, pissampuloa anrua a'rappo lalanna sitaung, iamintu sikali sibulang. Leko'na nipakei untu' amballei bansa-bansaya. 3 Tena sikali lalang ri anjo kotaya apa-apa akkullea nataba pangngalarroiNa Allata'ala. Anjo empoang kala'biranNa Allata'ala siagang Ana' Gimbalaka niaki lalang ri anjo kotaya. Lanynyombami sikamma atanNa Allata'ala mae ri Allata'ala; 4 siagang lanacini'mi ke'nanga rupanNa Allata'ala. Latattulisi'mi arenNa Allata'ala ri tompo' kanynyinna ke'nanga. 5 Tenamo nalaparallu ke'nanga ri lampu yareka ri singara'na mataalloa, nasaba' latenamo bangngi kammayatompa nasaba' KalenNami Karaeng Allata'ala lansingari ke'nanga. Nalammarentamo ke'nanga, a'jari karaeng sa'genna satunggu-tungguna. 6 Nampa nakana anjo malaekaka mae ri nakke, “Sikamma anne bicaraya sangnging bicara kontutojeng siagang akkullei nipatappa'. Karaeng Allata'ala iamintu le'baka ampassareangi RohNa mae ri na'bi-na'bia, iami assuroi malaeka'Na untu' ampappiassengangi mae ri ata-atanNa apa-apa tenayamo nasallo namusti kajariang.” 7 Nakana Isa, “Parhatikangi anne! Tenamo nasallo Kubattu. Maupaki tau amparhatikangai kana-kana nipau la'bi rioloa memang lalang ri anne kittaka!” 8 Inakke, Yohanes, le'ba' ngasemmi kulangngere' siagang kucini' ngaseng sikammaya anjo. Le'ba'na kulangngere' siagang kucini', su'ju'ma' ri dallekanna anjo malaeka' ampicinikianga' sikammaya anjo, siagang ero'ma' anynyomba mae ri ia; 9 mingka nakanamo mae ri nakke, “Teako! Teako anynyombai ri nakke! Allata'alamo nusomba! Nasaba' inakke ata tonja' sangkamma ikau, sangkamma sikontu sari'battannu na'bi-na'bia, kammayatompa sikontu tau amparhatikangai sikamma pappakaingaka lalang ri anne kittaka!” 10 Nampa nakanamo pole, “Teako rahasiakangi kana-kana nipau la'bi rioloa lalang ri anne kittaka, nasaba' tasalloami nalakajariang ngaseng. 11 Ia tau ja'dalaka, lappassammi a'gau' ja'dala' turus; ia tau ra'masaka lappassammi tuli nara'massi kalenna; ia mannurukia ri ero'Na Allata'ala lappassammi tuli mannuruki ri ero'Na Allata'ala, siagang ia napassareangamo katallassanna untu' Allata'ala bawang, lappassammi attallasa' turus untu' Allata'ala bawang.” 12 Nakana Isa, “Parhatikangi anne! Tenamo nasallo Kubattu angngerang sawala' untu' lanipa'balassang mae ri sikamma taua situru' apa massing le'baka nagaukang. 13 INakkemi uru-urua siagang kala'busanga; iNakkemi Batara battu ri Pakaramulaya sa'genna Kala'busanga.” 14 Maupaki tau antangkasiai jubana sa'genna tangkasa'. Iaminjo ke'nanga lanipa'biang langkanrei rapponna anjo poko' katallassanga, siagang la'jappa antama' ri anjo kotaya, angngolo ri pakke'bu' lompona. 15 Mingka sikontu tau anggaukangai apa-apa tenaya matu-matunna, tau ammakea pangngissengang baca-baca, tau a'gau' bawanga, tau ammunoa, tau anynyombaya barhala, siagang tau a'balle-ballea, baji' na'balle-balle lalang bicara yareka lalang panggaukang, sikontu anjo tau kammaya pantaranganna ngasengi anjo kotaya tampa'na. 16 “INakke Isa, Kusuromi malaekakKu mae ri kau ngaseng sollanna napau ngaseng anne passalaka untu' kasalamakkanna sikontu jama'aka. INakkemi sossoranna Daud; iNakkemi anjo bintoeng singaraka, niaka battu raya.” 17 Nakanamo RohNa Allata'ala siagang Bunting Bainea, “Mae mako!” Sikamma allangngerekai musti angkana tongi, “Mae mako!” Inai-nai turere, battu mako mae! Siagang inai-nai ero' mae mako angngalle cuma-cuma je'ne' katallassang! 18 Mae ri sikamma tau allangngerekai kana-kana nipau la'bi rioloa lalang ri anne Kittaka, inakke, Yohanes, iaminne kupakaingakkangko: Inai-nai antambai anne kana-kana le'baka nipau la'bi riolo, lanitambai tongi hukkunganNa ri Allata'ala, sangkamma bala niaka nipau lalang ri anne kittaka. 19 Na inai-nai angkurangngi anne kana-kana le'baka nipau la'bi riolo, laNakurangngi tongi Allata'ala tawana, sangkamma bageang niaka nipau lalang ri anne kittaka; iamintu bageang battu ri anjo poko' katallassanga siagang anjo kota matangkasaka. 20 Ia ampabattuai sikammaya anne birittaya angkanami, “Kontutojengi, mattantu labattuA' linta'!” Aming! Battu maKi', o Batara Isa! 21 Poro Napassareangi barakka'Na Batara Isa mae ri sikontu Umma'Na Allata'ala!