The New Testament of our Lord and Saviour Jesus Christ
1 Tiya da mga pangapoan laki Hisos Kiristo ibat sa laki Abraham anggan sa hadi Dabid: 2 Koyay Abraham, kolaki Isaak da- Hakob, laki Hoda da- konin mga arian; kolaki Paris da- Zara (sidawa adang ba bayi Tamar), kora Isrom, Aram, Abinadab, Naason, Salmon, Boos (konin adang ba bayi Rahab), laki Obid (kon adang ba bayi Rot), laki Hisi, da- hadi Dabid. 6 Ibat kay sa hadi Dabid anggan sa odas da mga taga Israil ba inalila sa lopa Babilonya, tiya da mga pangapoan laki Hisos Kiristo: hadi Dabid, laki Salomon (kon adang ba ag sawa galing laki Orias), laki Roboam, Abias, Asa, Hosapat, Horam, Osias, Hotam, Akas, Isikyas, Manasis, Amon, Hosiyas, laki Hikoniyas da- konin mga arian. 12 Ibat sa kora inalila sa Babilonya ba tiya da listahan mga pangapoan laki Hisos Kiristo : laki Hikoniyas, Salatil, Sorobabil, Abiod, Iliyakim, Asor, Sadok, Akim, Iliod, Iliasar, Matan, Hakob, da- laki Hosi, ag sawa bayi Mariya. Bayi Mariya kay da adang laki Hisos pag nag-awit Kiristo. 17 Kaya, ibat sa koyay Abraham anggan sa hadi Dabid ba maki labin-apat ka pangapoan. Ibat kay sa hadi Dabid anggan sa inalila da mga taga Israil sa Babilonya ba labin-apat:takay ka pangapoan da- ibat sa kora inalila sa Babilonya anggan sa laki Kiristo ba labin-apat:takay din ka pangapoan. 18 Makay tiya da inonga laki Hisos Kiristo. Bayi Mariya kon adang da- laki Hosi ba pakasalen. Ngani bayo sidawa mal-anggat:tani ba bayi Mariya ba manraying:ngani mana sa kapangyadihan Ispirito Banal. 19 Laki Hosi, konin batay sawa, ba mataldeng ka iraya da- iya ba dayo magpakaya sa bayi Mariya. Kaya konin rinemrem somway sa konin sa nawed amatangan Roma. 20 Maraw nagremrem laki Hosi tiya ba paban-aw sa konin sa akalkan da sai ka anghil Panginoon. Tiya da konin sinabi : Hosi, kaapoan hadi Dabid, kawo ayaw dayo pakasal sa bayi Mariya; kaya iya manraying ba sa kapangyadihan Ispirito Banal. 21 Iya batay mangonga sai ka lalaki da- da komo batay ginawa ngaran ba Hisos kada iya da batay magribri sa konin kairayaan sa kora mga kadaetan. 22 Nangyadi da boo naba para natped da pinasabi Panginoon sa konin tagabarita amba, 23 Koyo gidte pakarngeyan! Batay manraying da sai ka daraga gidte da- batay mangonga sai ka lalaki da- Imanoil da konin batay ginawa awitan- da alabet sabiyen ba, Tamo kaanggat da Diyos. Naba:a ngani. 24 Maraw apolawan laki Hosi ba konin timped da sogo anghil Panginoon. Pakasal:lani iya sa bayi Mariya. 25 Ngani nawed pinanawenan laki Hosi bayi Mariya anggan sa nawed inonga da polahan, naba ba lalaki. Da- da konin ginawa ngaran ba Hisos.
1 Laki Hisos ba pinreg sa Bitlihim, sai ka goraan te sa porobinsiya Hodiya, ag mga dag-on da hadi ba koyay Hirodis. Bait kay sa Hirosalim ibat sa sirangan mga maki amatangan sa mga magirem. 2 Kora nagtanong amba, Saan pinreg ag batay Hadi mga Diw? Panawen yamen akitan sa sirangan ag magirem da- yamen magparaoy towa para iya ba yamen sambahen. 3 Maraw tiya ba abaritaan koyay Hadi Hirodis ba semamperaket da konin remrem, amba din da boo taga Hirosalim. 4 Kaya konin rinimpon ag boo mga koyay magpamanawen sa balay Diyos da- mga kamatangen sa Bilin da- tinanong sa kora no saan kono batay pinreg da Kiristo. 5 Kora tembag amba, Sa Bitlihim kasakopan Hodiya. Panawen makay tiya da sinorat ag tagabarita ibat sa Diyos : 6 Da- koyo, mga taga Bitlihim, Abaya sabiyen koyo goraan te ba sai sa mga mahalaga sa boo mga lakol ka goraan sa Hoda, Panawen saba batay omibat da sai ka poon batay mag-alaga sa naay kairayaan Israil. Naba:a ngani. 7 Maraw tiya ba konin amatangan ba pinatwagan koyay Hirodis ag mga kamatangen sa nawed amatangan Roma. Konin tinanong sa kora para pihohon no nakay pag odas kora akitan ag magirem. 8 Da- kora ba konin pinaparaoy sa Bitlihim da- kora ba sinabiyan makay tiya : Idaw:wani koyo da- koyo gidte saraken ag onga. No koyo:wani akitan ba koyo paaramen sa naay para ako din kaparaoy da- iya ba naay sambahen. 9 Maraw akarngeyan:nani mga kamatangen da sabi pag hadi ba kora mangadang. Kora ba nagpangonaan ag magirem kora akitan sa sirangan anggan rateng sa ngaway ag onga. 10 Lakol gidte da kora kaangasan maraw akitan da magirem. 11 Maraw kora semled sa balay, kora akitan ag onga sa kon adang bayi Mariya. Kora ba lomohod da- sinamba da onga. Da- kora binokaan kora palagyan da- iya tinaboyan ag kora nagbaba ginto, da- banglo da- sai ka mabango ka reta da ngaran ba mira. 12 Maraw kora batay ag-oli ba kora ba sinabiyan Diyos sa sai ka akalkan amba ayaw:wa paoli sa koyay Hirodis. Kaya Roma:akay da kora dinalanan paoli. 13 Maraw kaalis:sani da mga kamatangen ba paban-aw sa laki Hosi sa sai ka akalkan da sai ka anghil Panginoon. Sinabi sa konin amba, Kawo mangon, komo paanggaten sa Ihipto da tal-inay. Da- kawo ayaw omalis sata anggan nawed naay sabiyen sa komo, panawen batay sinarak koyay Hirodis ag onga para bonoon. 14 Kaya ag madlem din naba ba mangon laki Hosi anggat din ag tal-inay da- kora magparaoy sa Ihipto. 15 Sata kora mamataw anggan nawed natay koyay Hirodis. Naba ba nangyadi para natped da pinasabi Panginoon sa konin tagabarita amba, Naay pinatwagan da naay onga ibat sa Ihipto. Naba:a ngani. 16 Abaisan gidte koyay Hirodis maraw amatangan iya ba nadaya mga kamatangen. Kaya konin pinabono da boo mga onga lalaki sa goraan da- sa mga paribok Bitlihim-boo maki darwa ka dag-on anggan paababa. Da kaodasan naba ba ibat sa sabi sa konin ag mga kamatangen. 17 Naba ba natped da sabi laki Hirimiyas, ag tagabarita ibat sa Diyos amba, 18 Maki sai ka beet arngeyan sa goraan Rama, Magpanangis da- taghoyan gidte, Nag-iyakan bayi Rakil da konin pad onga, Iya ba nawed aayat kada wala:ani kora. Naba:a ngani. 19 Sa odas koyay Hirodis ba natay:yani ba sai ka anghil Panginoon ba paban-aw sa akalkan sa laki Hosi sa Ihipto amba. 20 Kawo mangon, komo:wakay paanggaten sa Israil da tal-inay, kada natay:yani da mga mag-alabet mono sa onga. 21 Kaya mangon nga iya da- pinaanggat sa Israil da tal-inay. 22 Ngani maraw abaritaan laki Hosi koyay Arkilaw da hadi sa Hodiya, kahalili:yakay konin apang koyay Hirodis ba iya ba aliman paraoy sata. Iya ba sinabiyan:nakay sa akalkan, kaya kora paraoy sa porobinsiya Galiliya. 23 Kora ba mamataw sa goraan Nasarit. Sa makay tiya ba natped da sinabi mga tagabarita ibat sa Diyos amba, Iya ba batay inawit Taga Nasarit. Naba:a ngani.
1 Maraw maagot:tani ba ag dag-on naba, laki Howan Tagabaotismo ba rateng sa poro nawed apirmihan iraya sa Hodiya da- magpangadar 2 makay tiya : Koyo magsisi da- ogonan da koyo mga kadaetan, panawen bali:yani da batay maghadi da Diyos. 3 Laki Howan ag nagtodyo laki Isayas ag tagabarita ibat sa Diyos, pag konin sinabi tiya, Tiya da sabi sai ka magpanggayagang sa poro nawed apirmihan iraya, Koyo handaen da batay dinalanan Panginoon, Koyo taldengen da konin mga dalan. Naba:a ngani. 4 Da golanit laki Howan ba yadi sa bolbol hayop kamilyo da- da konin pamigkis ba yadi sa balat hayop. Da konin pamangnen ba balang da- deges sokan. 5 Da- paraoy sa konin ag mga taga Hirosalim da- taga Hodiya da- mga agpamataw sa magkaripay Hordan. 6 Kora ba magsisi sa ropangan mga iraya sa kora mga kadaetan da- kora ba binaotismohan laki Howan sa salog Hordan. 7 Ngani maraw konin akitan maoson sa mga Parisiyo da- sa mga Sadosiyo da agpabali para pabaotismo, konin sinabi sa kora amba, Koyo makay kaosonan mga orpong. Tawa da magtodo sa koyo amba koyo kaalas sa padosa Diyos batay rateng? 8 Koyo paban-awen sa koyo biyag da koyo ba agsisi gidte da- mag-ogon koyo mga kadaetan. 9 Da- koyo ayaw agremremen amba koyo kasabi koyo ba mga kaapoan koyay Abraham. Naay nagsabi sa koyo amba, Da Diyos ba kapamanawen gidte mga kaapoan koyay Abraham ibat sa mga bato tiya. 10 Mona dapo ba nagpatinga:ani da wasay sa wakat ag mga poon kayo. Da tayma poon kayo nawed agpamokar piya ba batay pintol da- batay binenglay sa apoy. 11 Koyo ba naay nagbaotismohan sa sapa makay tanda ag koyo ba agsisi gidte da- mag-ogon koyo mga kadaetan; ngani da batay bait sa naay paoriyan ba iya da batay agbaotismo sa koyo sa Ispirito Banal da- sa apoy. Iya ba makapangyadihan gidte sa naay, ako nawed abaya agbaba konin panlaed. 12 Sa konin alima da birawo para alisen da boo tolyapis bayo konin batay pinalagay sa balay takasan da mga paray, ngani da boo tolyapis ba konin batay inareng sa apoy nawed tay natay. 13 Sa odas din naba ba bait laki Hisos sa salog Hordan ibat sa Galiliya da- pabali sa laki Howan para baotismohan. 14 Magdayo laki Howan amba, Ako disin da komo kailangan baotismohan da- kawo dapo da pabali sa naay! 15 Ngani laki Hisos ba tembag amba, Bayaan mangyadi naba mona, panawen naba da kailangan kita panawenen para natped gidte da kaliyagan Diyos. Kaya pomayag laki Howan. 16 Maraw nabaotismohan:nani laki Hisos ba iya ba tomokad ibat sa sapa. Nabokaan da langit para sa konin da- konin akitan da Ispirito Diyos maglayangan ibat sa langit makay ag sai ka korkoro da- sa konin ba rempa. 17 Da- maki sai ka magtokawanan ibat sa langit amba, Tiya da naay nagpalayaw onga, da naay gidte kaangasan.
1 Maraw kalbas ba laki Hisos ba pinaparaoy Ispirito Banal sa poro nawed apirmihan iraya para togsowen aponin kadaetan. 2 Da- apatnapo ka aldaw da- madlem iya sata ba laki Hisos ba nawed mamangan. Maraw kalbas ba iya ba nabayog:gani. 3 Rateng da anonogso da- sinabi sa konin amba, No kawo da Onga Diyos, komo gaw-en pamangnen pag mga bato naba. 4 Ngani tembag laki Hisos, Nagkasorat sa Banal ka Kasoratan amba, Nawed ngani sa pamangnen nagkabiyag da iraya no nawed ba sa tayma tokawanan ibat sa bibi Diyos. Naba:a ngani. 5 Maraw kalbas ba iya ba pinaanggat ag aponin kadaetan sa Hirosalim, ag goraan hinidang Diyos da- pinatindeg sa ariporo lakol ka balay Diyos 6 amba, No kawo da Onga Diyos ba palabo:a kawo; panawen nagkasorat sa Banal ka Kasoratan amba, Konin batay sinogo sa konin mga anghil amba kawo batay dinahanan; da- amba, Kawo ba batay kora ginenan para ayaw asongko sa bato da komo paa. 7 Tembag laki Hisos, Nagkasorat kay din sa Banal ka Kasoratan amba, Ayaw komo agtogsowen da Panginoon Diyos. Naba:a ngani. 8 Iya ba pinaanggat:takay ag aponin kadaetan sa sai ka atatas gidte ka bogsor. Ibat sata ba Pinaban-Aw sa konin da boo mga kahadian paranawan da- da karon-an mga naba. 9 Da- sinabi ag aponin kadaetan amba, Batay naay tinaboy sa komo da boo mga naba no kawo batay lomohod sa naay. 10 Tembag laki Hisos, Satanas, kawo paadayo sa naay. Kada nagkasorat sa Banal ka Kasoratan amba, Da Panginoon komo Diyos, iya ngani da komo sambahen da- iya ngani da komo pamanawenan. Naba:a ngani. 11 Kaya iya ba inogonan ag aponin kadaetan. Rateng kay da mga anghil da- mamanawen sa konin. 12 Abaritaan laki Hisos piniriso laki Howan kaya iya ba paoli:akay sa Galiliya. 13 Ngani nawed:da iya sa Nasarit mamataw no nawed ba sa Kapirnaom. Da goraan tiya ba sa tebteb dagat-dagatan Galiliya, sa pagpamatawan mga taga Sabolon da- Niptali. 14 Makay tiya natped da sinabi laki Isayas, ag tagabarita ibat sa Diyos amba, 15 Da lopa Sabolon da- da lopa Niptali, Dalan padagat dako, Sa karipay Hordan, Galiliya mga Nawed Diw! 16 Da mga magpamataw sa kadeleman ba batay rinawaan ag sai ka marawa gidte ka solo-, da- da mga magpamataw sa lopa sa galem kapangyadihan katayan ba Romawa sa kora da solo-. Naba:a ngani. 17 Ibat sa odas naba ba laki Hisos ba mangadar:rani. Iya amba, Koyo magsisi da- ogonan da koyo mga kadaetan, panawen bali:ya da batay maghadi da Diyos. 18 Laki Hisos ba magkadangan sa tebteb dagat-dagatan Galiliya. Konin akitan da darwa ka talkaka, kolaki Simon, ag nag-awit Pidro, da- Anris. Sidawa ba angangabel isda. Sa odas naba ba sidawa ba magpaorayap dala sa dagat-dagatan. 19 Konin sinabi sa sidawa amba, Apora kandawa, da- tomongroy sa naay, kandawa ba naay batay ginawa angangabel mga iraya. 20 Sidawa agad inogonan da sidawa mga dala da- anggat sa laki Hisos. 21 Iya toloy:ya magkadangan da- konin dapo akitan da talkaka kolaki Tiyago da- Howan, onga laki Sibidiyo. Sidawa ba sa bangka kaanggat sidawa apang, da- magpagrayaw kora mga dala. Sidawa ba pinatwagan din laki Hisos. 22 Sidawa agad inogonan da bangka da- sidawa apang, da- anggat sa laki Hisos. 23 Sinayasak laki Hisos da boo Galiliya. Iya magtodo sa mga balay pagtiponan mga Diw da- konin nangadar da Pirmida ka Barita para sa batay:ya maghadi da Diyos. Konin din pinapiya da mga iraya sa boo kora mga sakit da- kadamdaman. 24 Iya ba nabarita sa boo lopa Siriya kaya nagpanbaba sa konin da boo maki maskit da- da mga nagpahidapan Roma-Roma ka kadamdaman : mga nag-apo daet ka ispirito, mga peypeyen, mga ketet. Kora boo ba konin pinapiya. 25 Da- iya ba inanggatan kaosonan iraya ibat sa Galiliya, Dikapolis, Hirosalim, Hodiya da- ibat sa karipay Hordan.
1 Maraw akitan laki Hisos da kaosonan gidte ka iraya ba iya tomokad te sa bogsor. Maraw iya tomongka ba pabali sa konin da konin mga nagtod-an 2 da- ag kaosonan ba tindoan makay tiya : 3 Angasan da mga iraya kamatang kora ba wala akayanan no nawed ba ibat ngani sa Diyos, panawen maghadi sa kora da Diyos. 4 Angasan da mga magpanangis panawen kora ba batay inayat Diyos. 5 Angasan da mga ababa da remrem panawen kora batay tinabang da pinangako Diyos. 6 Angasan da mga alabet gidte panawenen da kaliyagan Diyos panawen batay sibay gidte da parongaw Diyos sa kora. 7 Angasan da mga makayawteen panawen kora batay kinayawtean. 8 Angasan da mga maki malinis ka poso, panawen kora batay akitan da Diyos. 9 Angasan da mga maggawa kasaiyan panawen kora ba batay inawit mga onga Diyos. 10 Angasan da mga nagpahidapan panawen sa kora magtoltol sa Diyos; maghadi sa kora da Diyos. 11 Koyo angasan no koyo ba nagmoda, nagpahidapan da- nagsabiyan mga kaboslian panawen sa koyo magtoltol sa naay. 12 Kayno koyo maki mga kahidapan makay naba ba koyo angasan gidte, panawen lakol da batay taboy sa koyo sa soksokowan. Amba din da pinanawen mga iraya sa mga tagabarita ibat sa Diyos ag mga monaan dapo sa koyo. 13 Koyo ba makay asin sa paranawan. No wala:ani alat da asin ba omaning dapo apaalat:takay? Naba ba wala:a kaparosan, no nawed ba nagbenglay:yani da- nanlaedan:nani mga iraya. 14 Koyo ba makay solo- sa paranawan. Nawed batay atago da sai ka goraan lakol sa ariporo bogsor. 15 Amba din, wala magpar-et sai ka solo- da- magpalagay sa galem salopan, no nawed ba naba ba nagpalagay sa patimpowan gidte para apawaan da boo sa galem balay. 16 Makay din, kailangan koyo parawaen da koyo solo- sa ropangan mga iraya, para kora akitan da koyo mga piya ka panawen, da- para kora ba magpalakol sa tamo Apang sa soksokowan. 17 Ayaw koyo agremremen ako paraoy towa para walaen da Bilin tinaboy sa laki Moysis e da mga adar mga tagabarita ibat sa Diyos. Ako towa paraoy nawed para walaen no nawed ba para tepden da mga naba. 18 Naay gidte nagsabi sa koyo amba, Anggan nawed nagkawala da langit da- da lopa, kayno da ibente te ka teldek sa mga bilin ba nawed batay nawala, anggan sa natped gidte da boo nakayman, panawen da Tokawanan Diyos ba baywi anggan kaagoton man. 19 Kaya da tawa man magpawala halaga sa ibente te ka bilin, da- magtodo makay naba sa mga iraya ba iya ba batay binilang Diyos pinakaanlagay sa mga naghadian Diyos. Ngani da magtoltol sa Bilin da- magtodo amba panawenen naba ba batay binilang mahalaga sa mga naghadian Diyos. 20 Panawen naay nagsabi sa koyo amba, No da koyo kataldengan ba makay ngani din kataldengan mga kamatangen sa Bilin da- mga Parisiyo ba koyo nawed batay binilang sa mga naghadian Diyos. Kailangan da koyo kataldengan ba labi dapo sa kora. 21 Koyo akarngeyan ag monaan ba binilin sa mga iraya amba, Ayaw agbono iraya; da iya agbono iraya ba kailangan hosgahen. 22 Ngani naay kay nagsabi sa koyo : da iya abaisan sa konin arian ba kailangan hosgahen. Da- da iya magsabi sa konin arian amba, Kawo tarengteng, ba kailangan hosayen sa hosayan mga koyay. Da- da iya magsabi sa konin arian amba, Kawo bolingaw, ba kailangan linigan sa apoy kapadosahan wala arasan. 23 Kaya no kawo ba sa balay Diyos kawo maki alabet komo taboyon sa Diyos, da- komo aremreman da komo arian ba maki daet ka remrem sa komo, 24 ba komo dapo ogonan da komo taboy sa ropangan arengan da- kawo magkasai:yakay sa konin, bayo kawo paoli:akay da- magtaboy sa Diyos. 25 Kawo agad magkasai sa komo kasombong sa odas kandawa magkadangan dapo sa dalan magparaoy sa hosayan, para kawo ba nawed konin batay tinaboy sa tagahosga, da- tinaboy:yakay sa mga polis, para kawo ba pirisowen. 26 Naay gidte nagsabi sa komo amba, Kawo nawed gidte batay kalwas sata anggan nawed komo nagkaabayadan:na gidte boo komo molta. 27 Koyo akarngeyan binilin amba, Kawo ayaw magpangalonya. 28 Ngani naay kay nagsabi sa koyo amba, Da iya semrey sa sai ka babayi maki daet ka remrem ba iya ba mangalonya:ani sa babayi naba sa konin remrem. 29 No da komo kanan dako mata ba magpadaet sa komo ba komo:wa siwiten da- benglayen. Panawen piya dapo da wala:ani sa komo da sai ka kasangkapan komo lawas sa maki kay da boo, da- sa kawo kay ba binenglay sa kapadosahan wala arasan. 30 No da komo kanan dako alima ba magpadaet sa komo ba komo:wa potlon da- benglayen, panawen piya dapo da wala:ani sa komo da sai ka kasangkapan komo lawas sa maki kay da boo da- sa kawo kay ba binenglay sa kapadosahan wala arasan. 31 Nagsabi din amba, Da tawa man lalaki magpasway sa konin sawa ba kailangan konin pakanen kasoratan sa sidawa malsoway. 32 Ngani naay kay nagsabi sa koyo amba, Da tawa man lalaki magpasway sa konin sawa sa nawed kay mangalonya ba iya ba makay padaan para kapangalonya da konin sawa no iya mangisawa:akay. Da- da iya mangisawa sa babayi sinwayan ba magpangalonya din. 33 Koyo din akarngeyan ag monaan ba binilin sa mga iraya amba, Kawo ayaw manompa sa nawed totoo no nawed gira ba komo tepden da komo nanompa sa Diyos. 34 Ngani naay kay nagsabi sa koyo amba, Ayaw:wa koyo manompa kayno nakayman : kayno soksokowan, panawen naba da tongkaan Diyos; 35 kayno paranawan, panawen naba da timpowan konin paa; kayno Hirosalim, panawen naba da goraan pag makapangyadihan Hadi. 36 Kawo ayaw din manompa kayno komo olo panawen nawed abaya komo papotien e paitemen kayno sai sa komo obok. 37 Ngani koyo:wa ngani sabiyen : No "hee" ba "hee", no "nawed" ba "nawed", panawen ibat sa daet da nakayman koyo dagdagen saba. 38 Koyo akarngeyan binilin amba, Da gantiyanan ba amba, Mata sa mata da- ngipen sa ngipen. 39 Ngani naay kay nagsabi sa koyo amba, Koyo ayaw aggantiyan da iraya magpadaet sa koyo. Ngani no maki somontok sa komo kanan dako pisngi ba komo dapo palobaen da komo kabila dako pisngi. 40 Da- no kawo hinabla tawa man para ngani nagaro da komo bado ba komo taboyon sa konin anggan ag komo pandimla. 41 Da- no maki maglopod sa komo para anggat sa konin mangadang sai ka linabonan kadangen ba kawo mangadang darwa ka linabonan kadangen. 42 Kawo magtaboy sa magpangay-ay sa komo da- ayaw gidte da nawed komo batay pinaeram da magpangeram sa komo. 43 Koyo akarngeyan sinabi amba, Komo palayawen da komo abyan da- komo kay pamaisan da komo kalaban. 44 Ngani naay kay nagsabi sa koyo amba, Koyo palayawen da koyo mga kalaban, da- koyo daranginen da mga magpahidap sa koyo, 45 para koyo ba mga onga gidte koyo Apang sa soksokowan, panawen konin nagpasedak da aldaw kayno sa mga daet ka iraya da- kayno sa mga piya, da- iya ba magpaodan kayno sa mga mataldeng ka iraya da- kayno sa mga nawed mataldeng. 46 No ag mga magpalayaw ngani sa koyo da koyo nagpalayaw ba nakay dapo da batay tinaboy sa koyo. Nawed ma makay din naba da nagpanawen mga magpaningir bohis? 47 Da- no da koyo ngani nagtanong ba da koyo ngani mga talkakaan ba nakay da koyo nagpanawen labi sa mga Roma? Naba ba nagpanawen din mga Nawed Diw. 48 Kaya, kailangan koyo ba semker gidte makay din ag koyo Apang sa soksokowan.
1 Koyo dahanan! Koyo ayaw agpanawen mataldeng sa ban-aw ngani mga iraya. No amba da koyo nagpanawen ba wala:a batay tinaboy sa koyo ibat sa tamo Apang sa soksokowan. 2 Kaya ngani-, sa odas kawo manaboy sa mga mahidapen ba ayaw komo agpamalayen sa Roma, makay pag nagpanawen mga mapalawlaw sata sa mga balay pagtiponan mga Diw da- sa mga danay-danayan. Kora nagpanawen naba para kora podiyen mga iraya. Naay gidte nagsabi sa koyo amba, Naba ngani pag papodi da kora batay tinabang. 3 Ngani no kawo manaboy sa mga mahidapen ba ayaw agpamalayen kayno sa komo abyan maibeng, kayno sa komo sadiri. 4 Sa makay naba ba sa kawo manaboy sa mga mahidapen ba nawed tay amatangan Roma; da- da komo Apang sa soksokowan ag magban-aw sa komo sa nawed amatangan Roma, ba iya da batay magtaboy sa komo. 5 Sa odas kay koyo magdarangin ba koyo ayaw makay mga mapalawlaw. Kora alabet gidte magdarangin magpatograwan sa mga balay pagtiponan da- sa mga palsimangan dalan, para kora ba akitan mga iraya. Naay gidte nagsabi sa koyo amba, Naba:a ngani da kora batay tinabang. 6 Ngani sa odas kawo magdarangin ba sa nawed nagkaamalayan Roma da- kawo ngani magdarangin sa komo Apang ag magban-aw sa komo sa nawed amatangan Roma, da- iya da batay magtaboy sa komo. 7 Sa koyo magdarangin ba koyo ayaw magsagoli-sagoli da koyo darangin makay ag nagpanawen mga Nawed Diw. Kora dia amba kora batay pinakarngeyan Diyos panawen sa maoson kora tokawanan. 8 Koyo ayaw magtolad sa kora. Panawen amatangan:na tamo Apang da koyo kailangan bayo dapo koyo inay-ay sa konin. 9 Makay tiya koyo magdarangin: Yamen Apang sa soksokowan Kawo ngani ngani- da kailangan sambahen boo iraya! 10 Kawo:wa ngani- da maghadi sa mga iraya! Toltolon ngani- da komo kaliyagan towa sa lopa makay din ag nagtoltol sata sa soksokowan. 11 Komo kay taboyon sa yamen da yamen kailangan namangan sa aldaw-aldaw. 12 Da- yamen komo patawaden sa yamen mga kadaetan makay din ag yamen magpatawad mga maki kadaetan sa yamen. 13 Da- yamen ba komo kay paadayoon sa mga kahidapan batay magpatogso sa yamen, da- yamen ba komo ribriyen sa kapangyadihan aponin kadaetan. 14 Panawen no koyo nagpatawad da mga maki kadaetan sa koyo ba koyo ba batay din pinatawad ag tamo Apang sa soksokowan. 15 Ngani no nawed koyo nagpatawad da mga maki kadaetan sa koyo ba koyo nawed din batay pinatawad ag tamo Apang sa soksokowan. 16 No koyo nawed mamangan para ngani- sa Diyos ba koyo ayaw mag-emresan da kiray makay ag mga mapalawlaw, panawen kora nagpaemres da kora kiray para amatangan mga iraya amba kora ba nawed mamangan para ngani- sa Diyos. Naay gidte nagsabi sa koyo : Naba:a ngani da kora batay tinabang. 17 Ngani no kawo ba nawed mamangan para ngani- sa Diyos, ba komo sokrayen da komo obok da- kawo manramos komo kiray makay din ag komo nagpanawen sa kawo ba mamangan, 18 para wala kamatang no nawed ba ag komo Apang ngani sa soksokowan, ag nawed nagkaakitan. Da- da komo Apang, ag magban-aw sa komo sa nawed amatangan Roma ba iya da batay magtaboy sa komo. 19 Koyo ayaw magpaoson mga karon-an towa sa paranawan. Towa ba maki aninida mga nag-apo anay da- karawang da- maki din kasled agpanakaw. 20 No nawed ba koyo paosonon da mga mahalaga gidte sata sa soksokowan. Sata ba wala aninida anay da- karawang da- wala din batay kasled magpanakaw. 21 Panawen no saan da mahalaga sa komo ba sata din da komo remrem. 22 Da mata da makay solo-pagkairaya. Kaya no da komo mata ba malinaw gidte ba batay apawaan da boo komo pagkairaya. 23 Ngani no kolabo kay da komo mata ba batay adeleman da boo komo pagkairaya. Kaya no da rawa sa komo ba kadeleman mana, ba madelem gidte kay! 24 Wala batay kapamanawen sabay sa darwa ka amboy-amboyan, panawen konin batay namaisan da sai da- konin kay batay pinalayaw da sai, iya batay gidte anggat sa sai da- dayo:a sa ikadarwa. Nawed koyo batay kapamanawen sabay sa Diyos da- sa mga nag-apo. 25 Kaya naay nagsabi sa koyo amba, Koyo ayaw magtarongisngis para sa batay apamangan da- batay ininem ag koyo kailangan para koyo nabiyag, e para sa golanit kailangan koyo lawas. Nawed ma da biyag ba labi dapo sa pamangnen, da- da lawas sa mga nagsool? 26 Halimbawa, koyo masdan da mga ibon : kora ba nawed mag-asik kayno mag-ani kayno mag-ipon sa mga banglin. Kayno amba ba kora ba nagpakain tamo Apang sa soksokowan. Nawed ma koyo ba mahalaga dapo sa mga ibon? 27 Tawa sa koyo da batay kapaaba konin biyag kayno sai ka odas sa iya magtarongisngis? 28 Da- kaytang koyo magtarongisngis para sa koyo batay sinool? Koyo gidte remremen no omaning sombok da mga dapo sa kotanan : kora ba nawed magpamanawen gidte e mag-eleg man. 29 Ngani tiya da naay nagsabi sa koyo : kayno hadi Salomon ba nawed man kasool golanit kaganda sai sa mga botakan naba, kayno iya ba makaron-an gidte. 30 No da mga gamasen sa agayen ag mona ba biyagan da- girabas ba nag-atong:nga sa apoy, ba nagpasoolan Diyos, koyo dapo gayed mana! Ibente te gidte da koyo pag-isarig sa Diyos! 31 Kaya koyo ayaw agtarongisngis para sa koyo batay apamangan da- batay ininem da- batay sinool. 32 (Panawen da mga nakayman naba da nag-albet gidte mga nawed dapo mag-isarig sa Diyos.) Amatangan tamo Apang sa soksokowan koyo kailangan da boo naba. 33 Da monaan sa boo ba koyo gidte pihohon amba maghadi sa koyo da Diyos da- koyo magpamiyag mataldeng sa konin ropangan. No amba ba konin batay tinaboy sa koyo da boo koyo kailangan. 34 Kaya koyo ayaw agtarongisngis para sa girabas aldaw. Naba:a da kamatang sa konin sadiri. Sibay:yani sa tayma aldaw da mga kahidapan ag aldaw naba.
1 Koyo ayaw maghosay sa Roma para koyo ayaw hosayen Diyos. 2 Panawen no omaning da koyo hinosay sa Roma ba amba din da batay hinosay Diyos sa koyo. Da- no omaning da sokat koyo hosay sa Roma ba amba din da batay sinokat Diyos sa koyo. 3 Kaytang komo nagkaakitan da sepet sa mata komo arian, ngani nawed kay komo gidte nagmalay da lakol ka potol kayo sa komo mata? 4 Omaning komo batay asabi sa komo arian amba, Komo pabayaan naay alisen da sepet sa komo mata. Ay! Naba lakol kay da lakol ka potol kayo sa komo sadiri mata! 5 Kawo mapalawlaw! Komo dapo alisen da lakol ka potol kayo sa komo mata. Sa makay naba ba kawo batay kaserey piya da- komo batay aalis da sepet sa mata komo arian. 6 Ayaw koyo taboyon sa aso da mga nakayman para sa Diyos, panawen kora batay mamaliwi da- koyo batay nanramag. Ayaw din koyo talayen sa baboy da mahalaga gidte panawen kora:a ngani batay nanayawan naba. 7 Koyo omay-ay sa Diyos da- koyo batay pinakan, koyo somarak, da- koyo batay kaban-aw. Koyo mangaham da- koyo batay pinasled. 8 Panawen nagpakan da tayma mag-ay-ay, kaban-aw da tayma magsarak da- nagpasled da tayma magpangaham. 9 Koyo dia batay pinakan bato da koyo onga mag-ay-ay pamangnen? 10 Da- iya batay dia koyo pinakan orpong no mag-ay-ay isda? 11 No koyo ag mga daet ba kamatang magtaboy mga piya ka nakayman sa koyo mga onga ba kaomaning dapo ngani- da tamo Apang sa soksokowan? Konin gidte batay tinaboy da mga piya ka nakayman sa mga mag-ay-ay sa konin. 12 Kaya koyo panawenen sa Roma da koyo alabet kora panawenen sa koyo. Panawen naba da alabet sabiyen ag Bilin Diyos da- da sinorat mga tagabarita ibat sa Diyos. 13 Koyo semled sa aliget ka sakbawan, panawen maloang da sakbawan da- malapad da dalan magparaoy sa kapadosahan wala arasan, da- tiya da nagdalanan kaosonan. 14 Ngani aliget da sakbawan da- ibente da dalan magparaoy sa biyag gidte, da- nawed te maoson da kaban-aw naba. 15 Koyo magdahan sa mga magpasoli tagabarita. Kora ba mamagpabali sa koyo makay sai ka hayop mabait gidte ngani da totoo ba kora ba makay mga matapang ka aso kotanan. 16 Kora ba koyo batay akilalaan sa kora mga nagpanawen. Nagkabti dia da bokar kabagyo sa talonyong da- da kalang-a sa poon oray? 17 Da tayma piya ka poon kayo ba magbokar piya, ngani da tayma daet ka poon kayo ba magbokar daet. 18 Nawed kapamokar daet da piya ka poon kayo, da- da daet ka poon kayo ba nawed kay kapamokar piya. 19 Da tayma poon nawed agpamokar piya ba nagpotol da- nagbenglay sa apoy. 20 Kaya ngani-, koyo batay akilalaan sa kora mga nagpanawen da mga magpasoli tagabarita. 21 Nawed da boo magpatwag sa naay amba, Panginoon, Panginoon, ba abaya hadian Diyos, no nawed ba pag magtoltol ngani sa kaliyagan naay Apang sa soksokowan. 22 No rateng:nga da aldaw da Diyos ba batay maghosay sa mga iraya ba maoson da batay magsabi sa naay amba, Panginoon, Panginoon, yamen nga ba mangadar, da- magboyaw mga daet ka ispirito, da- mamanawen mga katakataka sa komo ngaran! 23 Da- naay gidte batay sinabi sa kora amba, Koyo nawed tang naay akilalaan. Koyo paadayo sa naay, koyo mga amamanawen daet! 24 Kaya da iya magpakarngey da- mamanawen ag naay tokawanan naba ba batay makay sai ka iraya kamatangen manlobo arigi kinaliyan alalem sa bato. 25 Omodan maeyat da- bomaha da- sinadlakan maeyat ka koaya da balay naba ngani naba ba nawed naranggas panawen nagpaonay sa bato. 26 Da iya magpakarngey sa naay tokawanan da- nawed kay mamanawen naba ba batay makay sai ka iraya tarengteng manlobo konin balay sa boanginan. 27 Omodan maeyat da- bomaha da- sinadlakan maeyat ka koaya da balay. Naranggas:sa gidte da balay naba. 28 Maraw nasabi:yani laki Hisos da mga tokawanan naba ba da kaosonan mga iraya ba mamagtaka gidte, 29 panawen iya ba magtodo makay sai ka maki kapangyadihan, da- nawed makay ag mga kamatangen sa Bilin.
1 Maraw laki Hisos ba domolong ibat sa bogsor ba iya ba tinongroyan maoson gidte ka iraya. 2 Pabali sa konin da sai ka panyakiten da- lomohod. Iya amba, Koyay, no komo alabet ba ako ba abaya komo napapiya. 3 Konin inenat da konin alima da- kinapkap amba, Naay alabet, kawo pomiya. Da- sa odas din naba ba naoli da golat. 4 Sinabi laki Hisos sa konin amba, Ayaw komo agsabiyen da naay pinanawen naba sa tawa man no nawed ba kawo paraoy sa magpamanawen sa balay Diyos da- paban-aw. No kalbas ba kawo ba magtaboy ag binilin sa Bilin tinaboy sa laki Moysis para atonayan gidte sa mga iraya amba kawo ba piya:ani. 5 Maraw laki Hisos ba semled sa goraan Kapirnaom ba pabali da sai ka poon mga sondalo taga Roma da- mag-ateet sa konin amba, 6 Koyay, da naay tagoanggat ba ketet:tani. Iya ba magpadalayan:na ngani sa kalkanan da- masyado:wa gidte ahidapan. 7 Laki Hisos amba, Ako batay sata da- iya ba naay batay pinapiya. 8 Ngani tembag sa konin ag poon sondalo amba, Koyay, ako ba nawed gidte abaya komo paraoyan sa naay balay. Ngani sai ngani ka tokawanan da komo sabiyen ba batay:ya pomiya da naay tagoanggat. 9 Panawen ako ba sa galem sa mga atatas dapo ka poon da- ako ba maki din nagkaasakopan mga sondalo. No naay sinabi sa sai amba, Kawo mangadang, ba iya mangadang, da- sa sai kay amba, Kawo towa pabali, ba iya pabali, da- sa naay tagoanggat amba, Komo panawenen tiya, ba konin nga nagpanawen. 10 Laki Hisos ba angasan gidte maraw konin akarngeyan naba, da- konin sinabi sa mga iraya mag-anggat sa konin, Naay gidte nagsabi sa koyo amba, Nawed ako kaban-aw kayno sai ka Diw maki kaamba kakol ka pag-isarig sa Diyos. 11 Naay nagsabi sa koyo, Maoson da batay rateng ibat sa sirangan da- sa kalnedan da- batay maysarowan sa kahadian sa soksokowan kaanggat koyay Abraham, Isaak da- Hakob. 12 Ngani da mga taga Israil ag para disin sa kahadian ba kora ba batay binenglay sa kadeleman sa lowas. Sata ba kora batay magpakongkong da- batay mangoriet kora ngipen. 13 Da- sinabi laki Hisos sa poon mga sondalo amba, Moli:a kawo, mangyadi nga da toltol sa komo pag-isarig sa naay. Sa odas din naba ba pomiya da tagoanggat poon mga sondalo. 14 Maraw laki Hisos ba paraoy sa balay kora Pidro ba konin akitan da bianan babayi laki Pidro magkalek da- masyado da lagnat. 15 Konin kinapkap da alima ag babayi da- nawala:a da konin lagnat. Kaya iya mangon da- mamanawen para sa konin. 16 Ag madlem din naba ba binaba sa laki Hisos da maoson nag-apo daet ka ispirito. Sa mga tokawanan ngani ba konin:na namoyaw da mga daet ka ispirito, da- konin pinapiya da boo maki kadamdaman. 17 Konin pinanawen naba para natped da sinabi laki Isayas pag tagabarita ibat sa Diyos amba, Iya da gomaro tamo mga kahinaan da- bomaba tamo mga kadamdaman. Naba:a ngani. 18 Maraw akitan laki Hisos da kaosonan iraya sa konin paribok ba konin binilin sa konin mga nagtod-an amba, Tamo:wa omipay. 19 Iya ba pinabaliyan sai ka kamatangen sa Bilin da- konin sinabi amba, Tagatodo, ako ba batay anggat sa komo kayno saan kawo paraoy. 20 Laki Hisos ba tembag amba, Maki lok-an da mga amid da- maki din pogadan da mga ibon, ngani da Onga Iraya ba wala kayno isariyan. 21 Da- sai kay ka nagtod-an magsabi sa konin amba, Koyay, abaya dia ako moli dapo para palebengen da naay apang? 22 Ngani tembag laki Hisos amba, Kawo anggat sa naay da- komo:wa pabayaan sa mga nangatay da maglebeng kora mga nangatay. 23 Laki Hisos ba somakay sa bangka kaanggat din da konin mga nagtod-an. 24 Lomagoblob sa dagat da sai ka maeyat ka bagyo, da- halos ba tinabenan alon da bangka. Ngani laki Hisos ba akalekan. 25 Kaya iya ba pinabaliyan konin mga nagtod-an da- pinolaw amba, Panginoon, ribriyen kay tamo. Tamo batay:ya nalimes. 26 Kaya konin sinabi sa kora amba, Kaytang koyo nangaaliman? Ibente:a gayed da koyo pag-isarig sa Diyos! Iya mangon, da- konin sinaway da koaya da- da dagat, da- nangapra da mga naba. 27 Kora boo ba magtaka da- kora amba, Kayno da koaya da- dagat man ba magpaniwala sa konin! Nakay dia ka iraya naba? 28 Maraw laki Hisos ba rateng sa karipay sa lopa mga taga Gadara ba iya ba sinalobong darwa ka lalaki ibat sa lebengan lineyang bato. Sidawa ba nag-apo daet ka ispirito da- matapang gidte. Kaya wala kadalan saba. 29 Maraw iya sidawa akitan ba agad sidawa tomakap amba, Onga Diyos, nakay da komo pakiaram sa yamen? Kawo dia ba paraoy towa para yamen ba pahidapan sa nawed dapo pagkaodas? 30 Sata sa sai ka patpa ba maki sai ka lakol ka baboyan mamagkain. 31 Omaringi sa konin da mga daet ka ispirito amba, Panawen yamen ba komo batay pinalwas ba bayaan yamen semled sa mga baboy nata. 32 Tembag laki Hisos amba, Abaya! Koyo sata:akay. Kaya kora ba lomwas sa darwa ka lalaki da- semled sa mga baboy. Da boo baboyan ba agad mandalagan paparaoy sa rakyas, nangalabo:a sa dagat da- nangalimes. 33 Mandalagan kay da mga mag-alaga baboyan paraoy sa goraan da- maraw rateng sata ba binarita da boo nangyadi da- da nangyadi sa mga nag-apo daet ka ispirito. 34 Kaya da boo mga taga goraan ba manlowas para laki Hisos ba kora salobongon. Maraw iya ba kora akitan ba kora inaringi amba, Kawo ba ayaw:wa towa sa yamen.
1 Laki Hisos ba somakay:yakay sa bangka, da- omipay:yakay da- paraoy sa konin sadiri goraan. 2 Maraw iya rateng sata ba binaba sa konin da sai ka iraya lompo magtimalmay sa konin kalkanan. Maraw akitan laki Hisos no kaomaning kakol da kora pag-isarig sa konin ba konin sinabi sa lompo amba, Abyan, komo paeyaten da komo remrem. Nagpatawad:dani da komo mga kadaetan. 3 Maraw arngeyan naba ba magkamonong-monong da kalaati mga kamatangen sa Bilin sata amba, Ag iraya naba ba nagtongayaw da Diyos. 4 Ngani amatangan laki Hisos da kora nagremrem kaya konin sinabi, Kaytang daet da koyo nagremrem? 5 Nakay ma da ginhawa sabiyen amba, Nagpatawad:dani da komo mga kadaetan, e sabiyen amba, Kawo patindeg da- mangadang? 6 Naay batay Pinaban-Aw sa koyo da Onga Iraya ba maki kapangyadihan magpatawad mga kadaetan towa sa paranawan. Da- konin sinabi sa lompo, Kawo patindeg, komo babaen da komo kalkanan da- kawo moli. 7 Patindeg nga ag lalaki da- moli. 8 Maraw akitan naba ag mga iraya ba kora ba nangaaliman da- magpalakol sa Diyos ag magtaboy makay naba ka kapangyadihan sa mga iraya. 9 Sa iya lomawey sa poro naba ba akitan laki Hisos da sai ka magpaningir bohis da ngaran ba laki Matiyo. Iya ba magtongka sa paningiran bohis. Sinabi laki Hisos sa konin amba, Kawo anggat sa naay. Patindeg laki Matiyo da- anggat sa konin. 10 Maraw ina ba laki Hisos da- konin mga nagtod-an ba sa balay laki Matiyo. Rateng da maoson ka magpaningir bohis da- Roma ka mga makadaetan, da- kora ba maysarowan mamangan. 11 Maraw akitan naba mga Parisiyo ba kora tinanong da konin mga nagtod-an amba, Kaytang da koyo tagatodo ba magpasaro sa mga magpaningir bohis da- Roma ka mga makadaetan? 12 Ngani arngeyan naba laki Hisos, kaya konin sinabi amba, Da magkailangan anggagamot ba nawed ag mga wala sakit no nawed ba ag mga maki sakit. 13 Idaw:wa koyo da- koyo adaran da alabet sabiyen tiya : Da alabet Diyos ba nawed mga taboy no nawed ba kayawtean. Kaya ako towa paraoy ba nawed para patwagan da mga mataldeng no nawed ba ag mga makadaetan. 14 Sa odas naba ba pabali sa laki Hisos da mga kalaati nagtod-an laki Howan Tagabaotismo. Kora amba, Yamen ba maki kaogalian layen ba nawed mamangan para ngani- sa Diyos, amba din da mga Parisiyo. Kaytang nawed amba da nagpanawen komo mga nagtod-an? 15 Iya tembag amba, Abaya dia marongkot da mga abyan ag lalaki batay kinasal sa odas iya ba saba dapo? No iya ba wala:ani ba bayo kora maki odas ba nawed batay mamangan para ngani- sa Diyos. 16 Wala magtambal sai ka bayo ka papa sa sai ka loma ka golanit, panawen batay komabeste da papa da- lalo batay lakol da sagi. 17 Wala din magsogno bayo ka alak sa loma ka sognoan balat hayop. No amba da pinanawen ba batay nalto da balat, batay nabobo da inemen da- batay naratrat da sognoan. No nawed ba sinogno sa bayo ka sognoan balat hayop da bayo ka alak, da- sa makay naba ba pariho batay maagot. 18 Sa odas nagsabi laki Hisos da mga naba ba rateng kay da sai ka magpamahala. Iya lomohod sa ropangan laki Hisos da- konin sinabi amba, Bayo ngani natay da naay onga babayi, ngani no kawo ngani anggat sa naay da- komo ngani patimpowen da komo alima sa konin ba iya ba batay:yakay biyagan. 19 Laki Hisos ba patindeg da- iya anggat sa konin, da- amba din da konin mga nagtod-an. 20 Pabali kay da sai ka babayi labindarwa:a ka dag-on nagpamahosan. Iya ba pabali sa awak laki Hisos da- konin kinapkap da gawisan konin golanit, 21 panawen konin rinemrem amba, Naay ngani akapkapan da konin golanit ba ako batay:ya pomiya. 22 Laki Hisos ba mamaliwi da- maraw iya ba akitan ba konin sinabi amba, Abyan, paeyaten da komo remrem. Kawo pinapiya komo pag-isarig sa naay. Sa odas din naba ba pomiya da babayi. 23 Maraw laki Hisos ba rateng sa balay ag magpamahala ba konin akitan da mga pandayan magpabeet patarorot da- da maoson ka iraya mag-ayangar. 24 Konin sinabi amba, Koyo boo manlowas. Da dalakita ba nawed natay no nawed ba akalekan ngani. Ngani iya ba kora nanawanan. 25 Ngani maraw napalwas:sa da mga iraya ba iya semled, konin ginenan sa alima da dalakita da- tiya ba mangon. 26 Da- da barita para sa nangyadi naba ba Romateng sa boo looban naba. 27 Maraw laki Hisos ba lomawey sa poro naba ba iya ba nag-anggat-anggatan darwa ka lalaki raprap. Sidawa magpanggayagang amba, Apo hadi Dabid, kawo ayawtean sa kidawa. 28 Maraw semled:da sa balay laki Hisos ba pabali sa konin pag darwa ka raprap. Sidawa ba tinanong laki Hisos amba, Kandawa dia magpaniwala amba ako abaya magpapiya sa kandawa? Sidawa tembag amba, Hee ngani-, Koyay. 29 Kaya konin kinapkap da sidawa mata da- sinabi, Mangyadi sa kandawa da toltol sa kandawa pag-isarig sa naay. 30 Da- sidawa ba kaban-aw:wani. Binilin gidte laki Hisos sa sidawa amba, Ayaw gidte agsabiyen naba sa tawa man. 31 Ngani maraw sidawa ba mangadang:ngakay ba sidawa binarita sa boo looban naba da pinanawen sa sidawa laki Hisos. 32 Maraw sidawa ba mangadang:ngani ba pinaanggat sa laki Hisos da sai ka lalaki otal nag-apo daet ka ispirito. 33 Binoyaw laki Hisos da daet ka ispirito da- katokawanan da otal. Magtaka gayed da kaosonan mga iraya da- kora sinabi amba, Kaagoton man wala tang akitan makay naba sa Israil! 34 Ngani sinabi mga Parisiyo amba, Da poon mga daet ka ispirito da tomaboy sa konin kapangyadihan magboyaw mga daet ka ispirito. 35 Rinibok-ribok laki Hisos da boo mga goraan da- goraan te da- iya magtodo sa mga balay pagtiponan mga Diw. Konin nagpangadar da Pirmida ka Barita para sa batay:ya maghadi da Diyos, da- pinapiya da mga maki sakit, kayno nakay man da kora kadamdaman. 36 Maraw konin akitan da maoson gidte ka iraya, iya ba ayawtean gidte sa kora panawen kora ba balingalag da- mahina:ani makay mga topa wala tagaalaga. 37 Kaya konin sinabi sa konin mga nagtod-an amba, Maoson da aniyen ngani nawed te maoson da batay mag-ani. 38 Kaya koyo daranginen sa aponin aniyen para iya ba magpaidaw mga magpamanawen sa konin batay inani.
1 Tinipon laki Hisos konin labindarwa ka nagtod-an da- pinakan kapangyadihan magboyaw mga daet ka ispirito da- magpapiya boo mga maki sakit, kayno nakay man da kora kadamdaman. 2 Tiya da mga ngaran ag labindarwa ka pinili sogoan: laki Simon ag nag-awit Pidro, da- konin arian laki Anris, kolaki Tiyago da- Howan ag mga onga laki Sibidiyo, 3 manlaki Pilipi, Bartolomi, Tomas da- Matiyo ag magpaningir bohis, laki Tiyago ag onga laki Alpiyo da- laki Tadiyo, 4 laki Simon ag nag-awit Masipagen para sa lasyon Israil da- laki Hodas Iskariyoti ag batay pomaabel sa laki Hisos sa konin mga kalaban. 5 Da labindarwa naba ba sinogo laki Hisos da- konin binilinan amba, Koyo ayaw paraoy sa mga pagpamatawan mga Nawed Diw e semled sa kayno nakay ka goraan mga taga Samariya, 6 no nawed ba koyo saraken da mga kaapoan laki Israil. Kora ba makay mga nalingo ka topa. 7 Idaw:wa koyo da- koyo pangadaren amba bali:yani da batay maghadi da Diyos. 8 Koyo papiyaen da mga maki maskit da- biyagen:nakay da mga nangatay. Koyo papiyaen da mga panyakiten da- boyawen da mga daet ka ispirito. Koyo tomabang wala bayad, kaya koyo din taboyon wala bayad. 9 Koyo ayaw:wa magbaba kwarta-kayno ginto, kayno pilak e tangso-sa koyo mga bokotan. 10 Da- koyo ayaw din magbaba bokot pamangnen sa koyo magkadang-kadang kayno tig darwa ka nagsool, kayno panlaed, kayno bakolo, panawen da tagapamanawen ba bagay tomabang konin kabiyagan. 11 Da- kayno saan ka goraan e goraan te koyo rateng ba koyo somarak iraya abaya koyo toloyan, da- koyo mamataw sata anggan koyo mangadang:ngakay. 12 Sa odas koyo semled sa balay ba koyo sabiyen amba, Sa koyo ngani- da kaginhawahan ibat sa Diyos! 13 Da- no bagay gidte da mga iraya saba ba koyo papirmihen sa kora da kaginhawahan Diyos. Ngani no nawed bagay ba da koyo berya ba wala batay kaparosan sa kora. 14 Da- no koyo dayo tabangen e pakarngeyan sa sai ka pamatawan e goraan ba koyo ayaw:wa sata da- koyo opyasen da onggang sa koyo mga paa-makay tanda koyo ba dayo:ani sa kora. 15 Naay gidte nagsabi sa koyo amba, Sa aldaw batay maghosga da Diyos ba may-an dapo da batay padosa sa goraan Sodoma da- Gomora sa padosa kay ag goraan naba. 16 Koyo gidte pakarngeyan! Koyo ba naay nagsogo makay mga topa sa kaosonan aso kotanan. Kaya kailangan koyo ba kamatangen gidte makay mga orpong da- malomanay makay kalapati. 17 Koyo magdahan sa mga iraya panawen maki batay magpaabel sa koyo para koyo ba paropangen sa mga hosayan mga Diw da- batay hinaplit sa kora balay pagtiponan. 18 Panawen sa koyo mag-isarig sa naay ba koyo batay pinaropang sa mga gobirnador da- sa mga hadi, da- koyo batay magsistigo sa Pirmida ka Barita sa kora ropangan da- sa kora sakopan. 19 Ngani no koyo ba nag-abel:lani ba ayaw koyo magtarongisngis da- pagremremen amba, Omaning:nga ngani da batay tembag? Panawen no rateng da odas ba tiya ba batay pinaremrem sa koyo. 20 Panawen nawed amba koyo da batay magtokawanan no nawed ba da Ispirito koyo Apang sa soksokowan da batay tomaboy sa koyo mga tokawanan. 21 Batay pinaabel mga arian da kora mga arian para pabonoon. Amba din da batay pinanawen mga apang sa kora mga onga. Da- batay linabanan kalaati mga onga da kora mga koyay da- batay pinabono. 22 Da- batay abaisan sa koyo da boo panawen sa koyo mag-isarig sa naay. Ngani da maonay da pag-isarig anggan arasan ba iya da batay naribri. 23 No koyo ba kora nagpahidapan sa sai ka goraan ba koyo domalagan da- paraoy sa sai:yakay ka goraan. Naay gidte nagsabi sa koyo : Nawed dapo batay koyo aparaoyan da boo mga goraan sa Israil ba batay:ya rateng da Onga iraya. 24 Wala nagtod-an labi sa konin tagatodo da- wala din tagoanggat labi sa konin amboy-amboyan. 25 Kailangan angasan da nagtod-an no iya makay din konin tagatodo da- da tagoanggat no iya makay din konin amboy-amboyan. No da poon sai ka mag-anak ba inawit mga iraya laki Biilsibol ba kaomaning dapo ngani- batay pinolaan da konin mga kamag-anak. 26 Kaya ayaw koyo aliman sa kora, panawen da boo nagkatago ba batay gidte akitan da- ag nawed dapo kora amatangan ba batay gidte kora amatangan. 27 Da naay nagsabi sa koyo sa nawed amatangan Roma ba koyo sabiyen sa boo da- da pinaskedanan sa koyo talinga ba koyo batay mamorahaw sa awakan. 28 Ayaw koyo aliman sa mga kabono lawas ngani nawed kay kabono gisarem. No nawed ba da koyo kalimanan ba da kaspo gisarem da- lawas sa kapadosahan wala arasan. 29 Nawed ma nagpabili da darwa ka maya ba sa ibente te ka halaga? Amba man, kayno sai sa darwa naba ba nawed nagkalabo sa lopa no nawed kaliyagan ag tamo Apang sa soksokowan. 30 Amba din, kayno koyo obok ba konin:na bilang boo. 31 Kaya koyo ayaw aliman. Koyo ba labi mahalaga sa maoson ka maya. 32 Da iya magkilala sa naay sa ropangan mga iraya ba naay din batay kinilala sa ropangan naay Apang sa soksokowan. 33 Ngani da iya nawed magkilala sa naay sa ropangan mga iraya ba nawed din naay batay kinilala sa ropangan naay Apang sa soksokowan. 34 Ayaw koyo agremremen amba ako towa paraoy para magbaba kaginhawahan sa paranawan. Ako towa paraoy nawed para magbaba kaginhawahan no nawed ba pisaw. 35 Panawen ako towa paraoy para palabanen da onga lalaki sa konin apang, da onga kay babayi sa konin kay adang, da- da manogang kay babayi sa konin kay bianan babayi. 36 Da kalaban sai ka iraya ba sa konin:na din mag-anak. 37 Da iya magpalayaw sa apang e sa adang labi sa naay ba nawed gidte abaya iya naay nagtod-an. Da- da iya magpalayaw sa onga lalaki e babayi labi sa naay ba nawed gidte din abaya iya naay nagtod-an. 38 Da iya nawed magpas-an konin kodos da- magtongroy sa naay ba nawed gidte abaya iya naay nagtod-an. 39 Da iya alabet naribri konin biyag ba batay nawala da biyag gidte sa konin; ngani da magtaboy konin biyag para gidte sa naay ba iya da batay gidte mag-apo naba. 40 Da iya magtabang sa koyo ba magtabang sa naay, da- da magtabang sa naay ba magtabang sa pomaidaw sa naay. 41 Da iya magtabang sa sai ka tagabarita ibat sa Diyos panawen sa iya ba tagabarita ba batay tomabang taboy makay din ag sa tagabarita. Da- da iya magtabang sa sai ka iraya mataldeng panawen sa iya ba mataldeng ba batay tomabang taboy makay din ag sa iraya mataldeng. 42 Da iya magtaboy kayno sai ka bao sapa madimla sa sai sa mga iraya:a ngani naba panawen sa iya ba naay nagtod-an ba naay gidte nagsabi sa koyo amba iya ba batay gidte tomabang taboy ibat sa Diyos.
1 Maraw natodo:ani laki Hisos da mga naba sa konin mga labindarwa ka nagtod-an ba iya ba mangadang:ngakay para magtodo da- magpangadar sa mga goraan bali sata. 2 Laki Howan Tagabaotismo ba sa pirisohan:nani. Maraw konin abaritaan da mga nagpanawen laki Kiristo ba konin sinogo konin mga nagtod-an 3 para kora tanongon sa konin amba, Kawo:wa dia da nagsabi amba batay towa e yamen kailangan dapo magpanya Roma? 4 Laki Hisos ba tembag amba, Koyo paoli:akay sa laki Howan da- sabiyen sa konin da koyo nagkaakarngeyan da- nagkaakitan : 5 Kaban-aw:wani da mga raprap, kakadang da mga tekya, pomiya da mga panyakiten, karngey da mga bengelen, nangabiyag:gakay da mga nangatay, da- nagpangadar sa mga mahidapen da Pirmida ka Barita. 6 Angasan da iraya nawed nagkaatbek sa naay. 7 Maraw kakadang:ngakay da mga nagtod-an laki Howan ba laki Hisos ba magtokawanan sa kaosonan mga iraya para sa laki Howan amba, Kaytang koyo paraoy sa poro nawed apirmihan iraya? Nakay da koyo alabet akitan? Sai dia ka alainay nag-oyo-oyo koaya? 8 Nakay nga da koyo alabet akitan? Sai dia ka iraya maki nagsool maganda ka golanit? Ngani da maki nagsool maganda ka golanit ba sa pamatawan mga hadi! 9 Nakay nga mana da koyo alabet akitan? Sai dia ka tagabarita ibat sa Diyos? Hee. Naay nagsabi sa koyo amba, Iya ba labi dapo sa sai ka tagabarita ibat sa Diyos. 10 Panawen iya da nagtodyo sa Banal ka Kasoratan amba, Koyo gidte pakarngeyan! Da Diyos ba amba, Naay nagpaidaw da naay sogo sa komo paonaan, Iya da batay maghanda komo batay dinalanan. Naba:a ngani. 11 Naay gidte nagsabi sa koyo amba, Sa mga pinreg sa paranawan ba wala akitan labi dapo mahalaga sa laki Howan Tagabaotismo. Ngani kayno ag ibente sa boo mga naghadian Diyos ba mahalaga dapo sa konin. 12 Ibat ag mangadar laki Howan Tagabaotismo anggan mona ba da kahadian sa soksokowan ba naglooban da- maki mga iraya marahas gidte magporba para agawen sa lopod da kahadian naba. 13 Panawen da boo sinorat mga tagabarita ibat sa Diyos da- da Bilin tinaboy sa laki Moysis ba bomarita:ani para maghadi da Diyos, anggan sa rateng laki Howan. 14 Da- no koyo batay maniwala, Iya da Iliyas ag tinodyo amba iya batay rateng. 15 Da iya maki pakarngey ba makarngey. 16 Sa nakay naay batay pinatolad da mga iraya nagkabiyag sa odas tiya? Kora ba makay mga onga magtongka sa pamiliyan da- magberya sa kora mga kaanggat amba, 17 Koyo ba yamen pinabeetan makaangas ka pabeet, ngani koyo nawed somayaw-sayaw! Koyo ba yamen pinabeetan marongkot ka pabeet da- koyo nawed magpanangis! 18 Panawen towa paraoy laki Howan. Maki odas ba iya ba nawed mamangan, da- nawed tang minem mga inemen kalibed, da- kora nagsabi amba, Iya ba bolingaw! 19 Towa kay din paraoy da Onga Iraya, magkain da- mag-inem, da- kora kay nagsabi amba, Koyo ban-awan ag iraya naba! Asesen da- par-inemen, abyan mga magpaningir bohis da- Roma mga makadaetan! Kayno amba ba abaya amatangan mga iraya amba totoo gidte da kadonongan Diyos sa mga pinanawen naba. 20 Maraw kalbas ba sinombatan laki Hisos da mga taga goraan konin ginaw-an maoson ka katakataka panawen kora nawed magsisi da- mag-ogon kora mga kadaetan. Iya amba, 21 Daet gidte sa koyo, mga taga Korasin! Daet gidte sa koyo, mga taga Bitsaida! Panawen no sa Tiro da- Sidon pinanawen da mga katakataka pinanawen saba sa koyo, maagot:ta disin kora magkolabong kostal da- magtongka sa abowan makay ladawan kora magsisi da- mag-ogon kora mga kadaetan. 22 Naay nagsabi sa koyo amba, Sa aldaw batay maghosga da Diyos ba may-an dapo da padosa batay dinanas ag mga taga Tiro da- taga Sidon sa padosa koyo batay dinanas. 23 Da- koyo kay, mga taga Kapirnaom, koyo dia alabet agpaatatas anggan sa langit? Koyo kay batay linabo sa kalaleman wala toko! Panawen no sa Sodoma pinanawen da mga katakataka pinanawen saba sa koyo, piho ba anggan mona ag goraan naba ba baywi dapo. 24 Ngani naay nagsabi sa koyo : sa aldaw batay maghosga da Diyos ba may-an dapo da padosa batay dinanas mga taga Sodoma sa batay padosa sa koyo. 25 Ag odas naba ba sinabi laki Hisos amba, Naay Apang, kawo da Panginoon ag langit da- lopa. Ako magpasalamat sa komo panawen da mga naba ba nawed komo Pinaban-Aw sa mga madonong da- sa mga kamatangen no nawed ba sa mga maki remrem makay mga onga te. 26 Hee, naay Apang, panawen amba da komo gidte pakana. Naba:a ngani. 27 Da- konin sinabi sa mga iraya amba, Da boo nakayman ba tinaboy naay Apang sa naay. Wala kakilala gidte sa Onga no nawed ba da Apang da- wala din kakilala gidte sa Apang no nawed ba da Onga, da- da tawa man alabet paban-awan ag Onga. 28 Koyo pabali sa naay, koyo boo mga rogso da- maki mabyat ka nagbaba, da- koyo naay batay pinahinga. 29 Koyo pasarangen da naay yogo da- koyo mag-adar sa naay; ako ba malomanay da- ababa da remrem; batay maki kapahingahan da koyo gisarem. 30 Panawen ginhawa sarangen da naay yogo da- may-an da naay nagpababa sa koyo.
1 Sai ka Aldaw Magpahinga ba laki Hisos ba napadalan sa sai ka tirigohan. Nagbayog da konin mga nagtod-an. Kaya kora mangtel mga oay da- namangan da mga beter. 2 Maraw naba ba akitan mga Parisiyo kora sinabi amba, Komo ban-awan da nagpanawen komo mga nagtod-an! Nag-ayawan da magpamanawen no Aldaw Magpahinga. 3 Laki Hisos ba tembag sa kora amba, Nawed ma koyo nagkabasa da pinanawen hadi Dabid maraw iya da- konin mga kaanggat ba nagbayog? 4 Iya semled sa balay Diyos da- gomaro tinapay ag taboy sa Diyos, da- mangan da- konin din pinakain da konin mga kaanggat. Nawed toltol sa Bilin da kora mamangan ag tinapay naba, panawen naba ba para ngani sa mga magpamanawen sa balay Diyos. 5 Nawed dapo ma koyo nagkabasa sa bilin tinaboy sa laki Moysis amba, Sa Aldaw Magpahinga ba da mga magpamanawen sa balay Diyos ba nawed tomoltol sa bilin amba, Koyo ayaw mamanawen sa aldaw naba, da- kayno amba ba nawed kora kadaetan naba? 6 Naay nagsabi sa koyo, Towa ba maki labi dapo mahalaga sa balay Diyos. 7 Nawed disin koyo hinosga maki padosa da mga wala daet no koyo amatangan da alabet sabiyen mga tokawanan naba : Nawed taboy hayop da naay alabet no nawed ba kayawtean. 8 Panawen da Aldaw Magpahinga ba sa galem kapangyadihan ag Onga Iraya. 9 Laki Hisos ba mangadang da- paraoy sa balay pagtiponan mga Diw. 10 Maki sai ka lalaki sata laya da sai ka alima. Sata din da kalaati mga iraya magsarak dahilan para laki Hisos ba nadatosan. Kaya iya ba kora tinanong amba, Toltol dia sa Bilin da magpapiya sa Aldaw Magpahinga? 11 Iya tembag amba, No da tawa man sa koyo ba maki topa nalabo sa balawo ba nawed ma naba ba batay ginaro, kayno Aldaw Magpahinga? 12 Labi dapo mahalaga da sai ka iraya sa sai ka topa! Kaya toltol sa Bilin da mamanawen piya sa Aldaw Magpahinga. 13 Maraw kalbas ba konin sinabi sa iraya amba, Enaten da komo alima. Konin:na inenat da konin alima da- pomiya da- naba ba makay:yakay din ag Roma. 14 Mangadang kay da mga Parisiyo da- mamagtokawanan amba no omaning batay napabono laki Hisos. 15 Maraw naba ba amatangan laki Hisos ba iya ba omalis:sa sata. Maoson da tomongroy sa konin da- konin pinapiya da boo maki maskit, 16 ngani konin gidte binilin sa kora amba, Ayaw koyo agbaritaen da para sa naay. 17 Naba ba nangyadi para natped da sinabi laki Isayas ag tagabarita ibat sa Diyos amba, 18 Koyo gidte pakarngeyan! Tiya da naay nagpalayaw ka tagapamanawen Naay gidte hinidang. Iya da naay gidte kaangasan. Naay batay tinaboy sa konin da naay Ispirito Banal, Konin batay binandira da naay kataldengan sa boo mga iraya, 19 Iya ba nawed tay maglaban, malomanay da konin batay tinokawanan, nawed tay akarngeyan da konin tokawanan sa mga danay-danayan. 20 Nawed konin batay pintol alainay nagkapokan, da- nawed din tay binono da mitsa magloon dapo anggan nawed konin nagpandaeg da kataldengan Diyos. 21 Da- sa konin da batay sarig boo mga iraya. Naba:a ngani. 22 Sa odas naba maki pinaanggat sa laki Hisos sai ka lalaki raprap da- otal nag-apo daet ka ispirito. Pinapiya laki Hisos da lalaki. Kaya iya ba katokawanan:nakay da- kaban-aw:wakay. 23 Agtaka gidte da boo da- kora amba, Tiya:a dia da Kaapoan hadi Dabid? 24 Ngani maraw arngeyan naba ag mga Parisiyo ba kora amba, Kaboyaw daet ka ispirito ag iraya naba panawen laki Biilsibol, ag poon mga daet ka ispirito, da tomaboy sa konin kapangyadihan mamanawen naba. 25 Amatangan laki Hisos da kora nagremrem, kaya konin sinabi sa kora amba, Tayma kasakopan maglabanan da- nagkaeray-eray ba batay nasida da- tayma goraan e pamatawan nagkaeray-eray ba batay naregnas. 26 Da- no laki Satanas ba konin naglabanan da konin sadiri, omaning nga batay maagot da konin kasakopan? 27 Ako kay ba no ako kono magboyaw mga daet ka ispirito sa kapangyadihan laki Biilsibol ba tawa kay da magtaboy kapangyadihan sa koyo mga tagatoltol para kapamanawen makay naba? Kaya kora:a din da magpaban-aw amba koyo ba nawed gidte raoy! 28 Ngani no da Ispirito Diyos da tomaboy sa naay kapangyadihan agboyaw mga daet ka ispirito, ba da alabet sabiyen naba ba rateng:nga sa koyo da maghadi da Diyos. 29 Omaning batay asled da balay sai ka iraya maeyat da- garwen boo konin mga nag-apo no iya nawed tay ginapos. No iya ba gapos:sani ba bayo batay naarongkay da konin balay. 30 Da iya nawed kasai sa naay ba maglaban sa naay, da- da iya nawed magtolong sa naay para mag-ipon ba magsambolat. 31 Kaya naay nagsabi sa koyo amba, Batay pinatawad Diyos sa mga iraya da nakayman kadaetan da- tongayaw, ngani nawed tay pinatawad da nakayman magtongayaw laban sa Ispirito Banal. 32 Da tawa man magtokawanan laban sa Onga Iraya ba batay dapo pinatawad, ngani da tawa man magtokawanan laban sa Ispirito Banal ba nawed:da tay pinatawad, kayno mona da- kadomaen. 33 Koyo amba piya da poon kayo no piya din da bokar, da- koyo kay din amba daet da poon kayo no daet da konin bokar. Panawen sa bokar nagkaakilalaan da poon. 34 Koyo makay onga mga orpong! Omaning koyo batay kasabi mga piya ka nakayman, koyo ag mga daet. Panawen sa kakapnoan poso ba magtokawanan kay da bibi. 35 Piya da nagsabi ag piya ka iraya, panawen kapno kapiyaanan da konin poso. Daet kay da nagsabi ag daet ka iraya, panawen kapno kadaetan da konin poso. 36 Ngani naay nagsabi sa koyo amba, Sa aldaw batay maghosga da Diyos ba bahala da iraya sa tayma tokawanan konin sinabi wala kaparosan. 37 Panawen tamo ba batay pinakan kataldengan e batay kay pinadosahan toltol sa tamo mga tokawanan. 38 Sinabi kay sa konin ag mga kalaati kamatangen sa Bilin da- Parisiyo amba, Tagatodo, abaya dia yamen paban-awan tandaanan amba da Diyos ba sa komo? 39 Laki Hisos ba tembag amba, Koyo mga iraya daet da- nawed mateped sa Diyos! Koyo magsarak tandaanan ngani wala batay Pinaban-Aw sa koyo no nawed ba ag nangyadi sa laki Honas. 40 No omaning laki Honas ba tatlo ka aldaw da- tatlo ka madlem sa boyon isda lakol, amba kay din da Onga Iraya ba batay tatlo ka aldaw da- tatlo ka madlem sa galem lopa. 41 Sa aldaw batay maghosga da Diyos ba batay patindeg da mga taga Ninibi laban sa mga iraya nagkabiyag sa odas tiya da- kora ba batay hinosay kapadosahan; panawen kora ba magsisi da- mag-ogon kora kadaetan panawen sa pinangadar laki Honas, ngani labi dapo makapangyadihan sa laki Honas da towa! 42 Sa aldaw naba batay din patindeg da hadi babayi taga Siba laban sa mga iraya nagkabiyag sa odas tiya da- da mga tiya ba batay hinosay kapadosahan, panawen iya ba rateng ibat sa tebteban paranawan para pakarngeyan da kadonongan laki Salomon, ngani labi dapo makapangyadihan sa laki Salomon da towa! 43 No lomwas ibat sa sai ka iraya da daet ka ispirito, iya ba magkadang-kadang sa mga lokbo ka lopa da- magsarak batay apahingahan. No wala akitan 44 ba konin nagsabi sa konin sadiri amba, Ako batay paoli sa naay balay ag naay inibatan. No iya paoli ba konin akitan malinis da- pinaganda:akay ngani wala gidte laman. 45 Kaya iya mangadang:ngani da- magpaanggat dapo pito ka ispirito daet dapo sa konin; kora ba manled da- magpamataw sata. Kaya lalo dapo daet sa monaan da biyag ag iraya naba. Amba kay din batay mangyadi sa mga iraya daet nagkabiyag sa odas tiya. 46 Maraw laki Hisos ba magtokawanan dapo sa kaosonan iraya ba rateng kay da konin adang da- konin mga arian. Kora magpanya sa lowas balay da- kora ba alabet agtokawanan sa konin. 47 Maki kay agsabi sa konin amba, Saba sa lowas da komo adang da- komo mga arian, da- kora ba alabet gidte magtokawanan sa komo. 48 Sinabi laki Hisos amba, Tawa gidte da naay adang da- mga tawa gidte kay da naay arian? 49 Konin tindo da konin mga nagtod-an da- konin sinabi amba, Da mga tiya da naay adang da- naay mga arian! 50 Panawen da iya magtoltol sa kaliyagan naay Apang sa soksokowan ba iya da naay adang, da naay arian babayi da- lalaki.
1 Ag aldaw din naba, laki Hisos ba lomwas sa balay da- paraoy sa tebteb dagat-dagatan. Sata iya tomongka para magtodo. 2 Iya ba rinipongpongan maoson gidte ka iraya, kaya iya ba somakay sa sai ka bangka da- sata agtongka. Sa pangpang kay da mga iraya. 3 Da- iya magtodo maoson ka nakayman sa halimbawa. Iya amba, Maki sai ka man-aasik lomwas para magsabog. 4 Sa iya agsabog maki mga binhi nangaragrag sa tebteb dalan. Rateng kay da mga ibon da- nanka da mga naba. 5 Maki kay mga binhi nangaragrag sa kabatowanan. Panawen manipis te da lopa sata ba agad sombok da binhi naba, 6 ngani maraw siningkalan: na aldaw ba agad nalayo, panawen wala naw wakat. 7 Maki kay binhi nangaragrag sa dogian; lomamba da mga dogi da- lineek: ka da mga binhi. 8 Ngani da binhi nangaragrag sa piya ka lopa ba omoay-maki oay ba maki tig sai ka daan da- maki kay animnapo da- maki kay tatlompo. 9 Makarngey da maki pakarngey. 10 Pabali sa laki Hisos da konin mga nagtod-an da- kora tinanong amba, Kaytang sa halimbawa da kawo magtokawanan sa mga iraya? 11 Iya ba tembag amba, Nagtaboy sa koyo para koyo amatangan da mga nawed dapo amatangan Roma ag para sa batay:ya maghadi da Diyos, ngani tiya ba nawed nagtaboy sa kora. 12 Panawen da iya maki ba batay dapo pinakan anggan maoson; ngani da wala kay ba kayno da ibente sa konin ba batay dapo ginaro. 13 Kaya ako magtokawanan sa kora sa halimbawa ba panawen kora magserey-serey ngani nawed kora kaban-aw, da- magpakarngey ngani nawed kay karngey da- nawed din batay kamatang. 14 Nagkatped ngani- sa kora da barita laki Isayas amba, Koyo pakarngey-pakarngey man ba nawed batay koyo kamatang, da- kayno koyo semerey-serey ba nawed tay koyo kaban-aw. 15 Panawen pad maskil da remrem ag mga iraya naba; Dayo karngey da kora mga talinga, da- kora pinesek da kora pad mata. No nawed disin amba ba kaban-aw disin da kora mga mata, karngey da kora mga talinga, da- apawaan da kora mga remrem, da- kora disin paoli:akay sa naay da- kora ba naay pinapiya, sinabi Panginoon. Naba:a ngani. 16 Ngani angasan kay koyo, panawen kaban-aw da koyo mga mata da- karngey da koyo mga talinga. 17 Naay gidte nagsabi sa koyo : Maoson tagabarita ibat sa Diyos da- mataldeng ka iraya da alabet gidte kaban-aw sa koyo nagkaakitan ngani naba ba nawed kora akitan, da- karngey sa koyo nagkaakarngeyan ngani naba ba nawed kora akarngeyan. 18 Koyo nga pakarngeyan da alabet sabiyen ag halimbawa para sa man-aasik. 19 Da naasik sa tebteb dalan ba naba da magpakarngey sa mga tokawanan para sa batay:ya maghadi da Diyos ngani nawed kay amatangan da alabet sabiyen mga naba ba batay rateng da aponin kadaetan da- konin batay inagaw da naasik sa konin poso. 20 Da naasik kay sa kabatowanan ba naba da magpakarngey sa Tokawanan Diyos da- agad gidte nagtabang maki kaangasan. 21 Ngani panawen ababaw te da tanem sa konin poso ba nawed nagkawakat da binhi. Da- maraw rateng da mga porba e mga pahidap panawen sa iya tomabang sa Tokawanan Diyos, agad iya paawak sa pag-isarig. 22 Da naasik kay sa kadogian ba naba da magpakarngey sa Tokawanan Diyos ngani iya ba abara gidte sa boo nakayman sa paranawan tiya, da- adayaan mga nag-apo da- binegkel:la mga dogi da tokawanan naasik sa konin poso. Kaya nawed:da mamokar. 23 Da- da naasik kay sa piya gidte ka lopa ba naba da mga magpakarngey sa Tokawanan Diyos da- kora amatangan da alabet sabiyen naba. Kaya kora ba magpamokar gidte maki tig sai ka daan, maki kay tig animnapo da- maki kay tig tatlompo. 24 Sinabi dapo laki Hisos da sai ka halimbawa amba, Da maghadi da Diyos ba makay sai ka iraya mag-asik piya ka binhi sa konin agayen. 25 Maraw akalekan:na da mga iraya ba rateng kay da konin kalaban da- mag-asik batad-batad sa parayan da- mangadang:ngakay. 26 Maraw tombo da paray da- omoay ba tombo din da mga batad-batad. 27 Kaya pabali kay da mga tagoanggat sa aponin da- sinabi amba, Koyay, nawed ma piya ka binhi da komo inasik sa komo agayen? Kaytang maki batad-batad mona? 28 Iya ba tembag amba, Sai ka kalaban da maki panawen naba. Iya ba tinanong mga tagoanggat amba, Yamen dia batay yinabot da mga naba? 29 Ngani iya amba, Ayaw dapo, kaaram sa koyo magyabot mga batad-batad ba nayabot:ta din da paray. 30 Bayaan:na tanan lomakol anggan sa batay ag-ani. No mag-ani ba naay tay sinabi sa mga mag-ani amba, Koyo dapo iponon da mga batad-batad da- koyo pamegkesen para arengen, da- maraw kalbas ba da paray kay ba koyo iponon sa naay balay. 31 Konin:nakay nanoltol da sai kay ka halimbawa: Da maghadi da Diyos ba makay binhi mostasa ginaro sai ka iraya da- tinanem sa konin agayen. 32 Tiya ba ibente sa boo mga binhi ngani no tombo:ani ba batay lakol sa boo mga poon kayo te. Naba ba batay poon kayo nagpanagrirongan da- nagpogadan mga ibon. 33 Konin dapo nanoltol da sai dapo ka halimbawa: Da maghadi da Diyos ba makay pampahilab liniog sai ka babayi sa tatlo ka sarok ginalpong, da- homilab da boo amig. 34 Sinabi laki Hisos sa kaosonan iraya da boo naba sa mga halimbawa da- iya ba wala tindo sa kora no nawed ba sa halimbawa. 35 Konin pinanawen naba para natped da sinabi ag tagabarita ibat sa Diyos amba, Ako batay magtokawanan sa kora sa mga halimbawa. Naay batay Pinaban-Aw sa kora da mga nakayman nawed dapo nagkaamatangan ibat rinarang da paranawan. Naba:a ngani. 36 Maraw kalbas ba inogonan laki Hisos da kaosonan iraya da- iya ba semled:dakay sa balay. Pabali sa konin da konin mga nagtod-an da- sinabi sa konin amba, Komo kay papawaen sa yamen da halimbawa para sa batad-batad sa parayan. 37 Tembag laki Hisos: Da Onga Iraya ba iya da mag-asik piya ka binhi. 38 Da agayen ba naba da paranawan. Da mga onga Diyos ba naba da mga piya ka binhi da- da mga onga kay aponin kadaetan ba naba da batad-batad. 39 Da kalaban mag-asik ag mga naba ba wala Roma no nawed ba ag aponin kadaetan. Da ag-ani ba da arasan paranawan, da- da pad anghil ba naba da mamag-ani. 40 No omaning nag-ipon da mga batad-batad da- nagpanonog, amba kay din da batay mangyadi sa arasan paranawan. 41 Batay pinaidaw ag Onga Iraya da konin pad anghil da- kora batay inipon ibat sa konin kahadian da boo inibatan daet da- da boo magpamanawen daet, 42 da- batay binenglay sa maigang ka timbonan. Sata kora batay mamagpakongkong da- batay mangoriet da kora pad ngipen. 43 Da- da mga mataldeng kay ba batay Romawa makay aldaw sa kahadian kora Apang sa soksokowan. Da maki pakarngey ba makarngey! 44 Da maghadi da Diyos ba makay karon-an mahalaga gidte nagbaon sa sai ka agayen. Tiya ba akaliyan sai ka iraya da- tinabenan:nakay. Iya ba angasan gidte moli da- konin:na pinabili da boo konin nag-apo da- binili:ya da agayen naba. 45 Amba kay din, da maghadi da Diyos ba makay sai ka magligosyo agsarak ag mahal gidte ka beter naggawa salabay da ngaran ba pirlas. 46 Maraw kaban-aw sai ka pirlas mahalaga gidte ba iya ba mangadang da- pinabili da boo konin nag-apo, da- konin binili naba. 47 Da maghadi da Diyos ba makay din sai ka lakol ka dala pinaorayap sa dagat da- kabel sadi-sadi ka kalasi isda. 48 Maraw nakapno:ani ba naba ba rinanggot sa pangpang. Da- da mga angingisda ba magtongka para himayen da mga isda. Kora pinalagay sa kora mga alat da mga maganda ka isda da- namenglay kay da mga daet. 49 Amba din da batay mangyadi sa arasan paranawan. Batay rateng da mga anghil da- kora batay pinasway da mga makadaetan sa mga mataldeng, 50 da- batay binenglay da mga makadaetan sa maigang ka timbonan. Sata kora batay gidte mamagpakongkong da- batay mangoriet da kora ngipen. 51 Laki Hisos ba magtanong sa kora amba, Koyo:wa dia amatangan da alabet sabiyen mga nakayman naba? Kora tembag amba, Hee! 52 Kaya konin sinabi sa kora amba, Kaya ngani- da tayma kamatangen sa Bilin tindoan para sa maghadi da Diyos ba makay sai ka koyay maggaro mga bayo da- loma ka nakayman sa konin absayan. 53 Maraw sinabi:yani laki Hisos da mga halimbawa naba ba iya ba mangadang:ngakay sata. 54 Iya moli sa konin goraan da- iya magtodo sa kora balay pagtiponan. Magtaka gidte da mga karngey sa konin da- kora sinabi amba, Saan kaya gomaro naba ag kadonongan naba da iraya tiya? Omaning iya kapamanawen mga katakataka ka nakayman? 55 Nawed ma iya da onga pag anggagawa balay? Nawed ma bayi Mariya da konin adang, da- kora Tiyago, Hosi, Simon da- Hodas da konin mga arian? 56 Nawed ma towa magpamataw konin mga arian babayi? Saan konin amatangan da boo naba? 57 Da- iya ba dayo gidte kora kilalaen. Kaya sinabi sa kora laki Hisos amba, Wala tagabarita ibat sa Diyos naggalang sa konin sadiri goraan da- kamag-anakan. 58 Iya nawed mamanawen maoson katakataka sata panawen sa kora ba wala pag-isarig sa konin.
1 Ag odas naba koyay Hirodis da gobirnador sa Galiliya. Maraw karateng sa konin da barita para sa laki Hisos ba 2 konin sinabi sa konin mga tagapamanawen amba, Iya ba laki Howan Tagabaotismo sa sapa ag nabiyag:gakay, kaya iya ba kapamanawen mga katakataka. 3 Koyay Hirodis da pomaabel, pomagapos da- pomapiriso sa laki Howan panawen sa bayi Hirodiyas ag sawa konin kakaan laki Pilipi. 4 Panawen nagsabi laki Howan sa koyay Hirodis amba, Nawed mataldeng da kawo ba magpaanggat ag sawa komo kakaan. 5 Alabet koyay Hirodis pabonoon laki Howan ngani iya ba nagkaaliman sa kaosonan iraya, panawen kora nagkilala laki Howan ba tagabarita ibat sa Diyos. 6 Maraw rateng da kaodasan koyay Hirodis ba da onga babayi bayi Hirodiyas ba somayaw-sayaw sa ropangan mga iraya sata. Kinaangasan gidte koyay Hirodis, 7 kaya konin gidte pinangako sa babayi da nakayman konin ay-ayan ba batay gidte konin tinaboy. 8 Sa olok konin adang ba sinabi ag daraga amba, Mona din ba komo taboyon sa naay sa sai ka batiya da olo laki Howan Tagabaotismo. 9 Narongkot ag hadi, ngani panawen sa konin pangako arngeyan mga kaosonan ba konin binilin amba, Taboyon naba sa daraga. 10 Kaya konin pinapotol da leey laki Howan sa pirisohan. 11 Pinalagay sa sai ka batiya da olo da- tinaboy sa daraga. Naba ba binaba kay ag daraga sa konin adang. 12 Rateng kay da mga nagtod-an laki Howan, kora ginaro da konin bangkay da- limbeng. Maraw kalbas ba kora binarita naba sa laki Hisos. 13 Maraw naba ba akarngeyan laki Hisos ba iya ba somakay sa sai ka bangka da- paraoy sa sai ka poro nawed apirmihan iraya. Da konin alabet ba iya ngani. Maraw abaritaan kay naba mga iraya ba kora ba lomwas:sa sa konin-konin goraan da- mangadang magparaoy sa konin. 14 Maraw laki Hisos ba lomongsad sa pangpang ba konin akitan da kaosonan gidte iraya. Iya ba ayawtean sa kora da- konin pinapiya da mga maki maskit sa kora. 15 Maraw giraapon:nani ba pabali sa konin da konin mga nagtod-an. Kora sinabi amba, Nawed nagpamatawan iraya ag poro tiya da- bali:ya nalned da aldaw. Komo:wa paparaoyon sa mga goraan te da mga iraya para kora kabili kora batay apamangan. 16 Ngani tembag laki Hisos amba, Nawed:da kailangan kora omalis dapo, koyo:wa da magtaboy pamangnen sa kora. 17 Kora tembag amba, Lima ngani te ka tinapay da- darwa ngani ka isda da sa tamo. 18 Konin sinabi amba, Koyo babaen towa. 19 Konin pinatongka sa gamasenan da mga iraya, konin ginaro da lima ka tinapay da- darwa ka isda; iya maningara sa langit da- agpasalamat sa Diyos. Konin namisang-misang da mga tinapay da- konin tinaboy sa mga konin nagtod-an para pamakanen da mga iraya. 20 Kora boo ba mamangan da- nangaabsoyan. Inipon mga nagtod-an da tera da- kora ba kapno labindarwa ka alat pad pisang tinapay. 21 Maki lima ka ribo da lalaki da mamangan, poyida dapo da mga babayi da- da mga onga. 22 Laki Hisos ba agad magpasakay sa bangka sa konin mga nagtod-an da- kora ba konin pinaonaan sa karipay dagat-dagatan sa odas konin dapo nagpaoli da mga iraya. 23 Maraw kaalis da mga naba, iya kay ba tomokad sa latayan para magdarangin. Iya ngani te aratengan madlem sata. 24 Da bangka kay ba sa adayo:ani da- nagsabokay alon panawen pasarongat sa koaya. 25 Da- maraw daling-adaw:wani ba laki Hisos ba magparaoy sa kora magkadangan sa ngaway sapa. 26 Mag-orasik sa kaliman da mga konin nagtod-an maraw kora akitan maki agkadangan sa ngaway sapa. Kora amba, Bokaw dia naba! 27 Ngani iya agad manokawanan amba, Koyo ayaw aliman, naba ba ako! 28 Da- laki Pidro ba manokawanan amba, Panginoon, no kawo:wa naba ba ako ba paparaoyon saba sa komo. 29 Iya tembag amba, Apora kawo! Kaya laki Pidro ba lompot sa bangka da- mangadang sa ngaway sapa, pabali sa laki Hisos. 30 Ngani maraw konin amatangan maeyat da koaya ba iya ba aliman da- iya ompisa:a nagkarbes. Iya manggayagang amba, Panginoon, dali kay te ako. 31 Laki Hisos ba agad konin inenat konin alima da- laki Pidro ba ginenan. Da- konin sinabi sa laki Pidro amba, Ibente gayed da komo pag-isarig sa naay! Kaytang kawo mag-alingangaan? 32 Maraw sidawa kasakay:ya sa bangka ba empet kay da koaya. 33 Da- iya ba sinamba konin mga nagtod-an amba, Kawo:wa gidte ngani- da Onga Diyos! 34 Kora ba omipay sa dagat-dagatan da- rateng sa lopa Hinisarit. 35 Laki Hisos ba akilalaan mga taga sata. Agad kora binarita sa boo paribok amba laki Hisos ba rateng, da- kora binaba sa konin da boo maki maskit. 36 Kora inaringi sa konin amba, Pakapkapen kay ngani sa mga maki maskit da gawisan komo bado. Da- da boo komapkap ba pomiya gidte sa kora mga sakit.
1 Maraw ina, pabali sa laki Hisos da kalaati mga Parisiyo, da- mga kamatangen sa Bilin ibat sa Hirosalim. Iya ba kora tinanong amba, 2 Kaytang nagwala koyinta mga komo nagtod-an da tindo tamo pangapoan. Kora mamangan nawed:da mangoyas alima toltol sa tindo tamo pangapoan. 3 Kora timbag laki Hisos amba, Kaytang koyo kay nagwala koyinta da bilin Diyos panawen sa koyo magtoltol sa koyo sadiri todo? 4 Panawen binilin Diyos amba, Komo galangen da komo apang da- adang. Naba:a ngani. Da- amba, Da magtokawanan daet sa apang e sa adang ba kailangan natay. Naba:a ngani. 5 Ngani koyo kay nagtodo amba, No sinabi sai ka iraya sa konin apang e adang amba, Da nakayman naay disin batay atolong sa komo ba taboy sa Diyos, 6 nawed:da kailangan konin galangen da konin apang da- adang. Sa makay naba ba koyo nagwala kaparosan da Tokawanan Diyos para tomoltol sa koyo sadiri mga todo. 7 Koyo mga mapalawlaw! Totoo gidte da binarita laki Isayas ibat sa Diyos para sa koyo amba, 8 Sa tokawanan ngani ako naggalang ag kairayaan tiya, ngani da kora pad poso ba adayo sa naay. 9 Wala kaparosan da kora magsamba sa naay, da kora todo ag kora amba batang sa Diyos ba bilin ngani iraya. Naba:a ngani. 10 Pinabali laki Hisos da mga iraya da- konin sinabi sa kora amba, Koyo pakarngey, para koyo amatangan da naay batay sinabi sa koyo. 11 Nawed ag magseled sa bibi da kapadomi sa iraya no nawed ba ag maglowas. 12 Pabali da mga konin nagtod-an da- kora sinabi sa konin amba, Komo dia amatangan da mga Parisiyo ba adaetan sa komo sinabi? 13 Iya tembag amba, Batay yinabot da tayma alaman nawed tinanem naay Apang sa soksokowan. 14 Koyo bayaan kora. Kora ba pad raprap tagaonaan. Da- no sai ka raprap da mag-onaan sa sai din ka raprap ba tanan batay nalabo sa balawo. 15 Sinabi sa konin laki Pidro amba, Komo nga papawaen sa yamen da halimbawa naba. 16 Kaya konin sinabi amba, Koyo din ma nawed kamatang? 17 Nawed ma koyo amatangan da nakayman magseled sa bibi ba magtoloy sa boyon da- maglowas:sakay? 18 Ngani da maglowas kay sa bibi ba mag-ibat sa poso da- naba da magpadomi sa iraya. 19 Panawen sa poso mag-ibat da daet ka remrem, magbono iraya, magpangalonya, mag-arikoy sa kapowa lalaki e babayi, magpanakaw, magsistigo sa nawed totoo, da- magpanida podi. 20 Da mga naba da magpadomi sa iraya. Ngani da mamangan nawed:da mangoyas alima toltol sa tindo mga pangapoan ba nawed kapadomi sa iraya. 21 Laki Hisos ba omalis sata magparaoy sa lopa bali sa goraan Tiro da- Sidon. 22 Pabali sa konin da sai ka babayi ibat sa mga iraya nag-awit Kananiyo. Iya ba magpamataw sa tebteb da- maeyat magsabi amba, Panginoon, Kaapoan hadi Dabid, kawo ayawtean sa naay! Da naay onga babayi ba nag-apo daet ka ispirito da- masyado nagpahidapan. 23 Ngani laki Hisos ba nawed gidte tembag. Da- pabali kay da konin mga nagtod-an da- inateet sa konin amba, Iya komo:wa alomanahen para iya omalis:sani. Iya ba magkasamang da- mag-anggat-anggat sa tamo. 24 Laki Hisos ba magsabi sa babayi amba, Sata ngani sa mga kaapoan laki Israil ako ba sinogo. Kora ba makay mga nalingo ka topa. 25 Ngani pabali sa konin ag babayi, da- lomohod sa konin ropangan da- sinabi amba, Panginoon, ako ba komo kay tolongan. 26 Laki Hisos ba tembag, Nawed abaya gawen da pamangnen mga onga da- benglayen sa mga sigale. 27 Tembag ag babayi, Hee ngani-, Panginoon, ngani kayno ag mga sigale ba mamangan din mga moyang nagpangaragrag ibat sa pagkainan kora mga aponin. 28 Kaya sinabi sa konin laki Hisos amba, Lakol gidte da komo pag-isarig sa naay! Batay mangyadi da komo nag-ay-ayan. Da- sa odas din naba ba pomiya da konin onga. 29 Maraw omalis sata ba laki Hisos ba paoli sa tebteb dagat-dagatan Galiliya. Da- iya tomokad sa latayan da- tomongka. 30 Magpanbait kay da kaosonan iraya maki nagbaba pad ketet, raprap, tekya, otal da- maoson dapo Roma. Kora namalagay da mga maki maskit sa ropangan laki Hisos da- kora ba konin pinapiya. 31 Mamagtaka da mga iraya maraw kora akitan da mga otal ba magtokawanan, da mga tekya ba pomiya:ani, da mga ketet ba kakadang:nga piya, da- da mga raprap ba kaban-aw:wani. Da- kora nagpodi da Diyos mga taga Israil. 32 Pinatwagan laki Hisos da konin mga nagtod-an da- konin sinabi amba, Ako ba nagkaayawtean sa mga iraya tiya, panawen tatlo:wa ka aldaw kora ba naay kaanggat, da- wala:a kora apamangan. Nawed naay alabet kora ba paalisen nagbayog; kaaram kora nangalognoy sa dalan. 33 Sinabi konin mga nagtod-an amba, Saan sa poro tiya ag nawed apamatawan iraya ba tamo batay gomaro pamangnen sibay sa kaosonan gidte makay naba? 34 Kora ba tinanong laki Hisos amba, Kaomaning kaoson da pamangnen da koyo nagbaba? Kora tembag amba, Pito ka tinapay da- nawed te maoson ka mga isda te. 35 Konin pinatongka da kaosonan mga iraya. 36 Konin ginaro da pito ka tinapay da- da mga isda da- iya magpasalamat sa Diyos. Maraw kalbas ba konin namisang-misang da mga naba da- tinaboy sa konin mga nagtod-an para pamakanen da mga iraya. 37 Mamangan da boo da- nangaabsoyan. Da- maraw kora inipon da tera ba kora kapno pito ka galang. 38 Maki apat ka ribo ka lalaki da mamangan, poyida dapo da mga babayi da- da mga onga. 39 Pinaidaw laki Hisos da mga iraya bayo iya somakay sa bangka magparaoy sa lopa Magadan.
1 Pabali sa laki Hisos da mga Parisiyo da- Sadosiyo para iya ba porbahan. Kora inaringi iya ba magpaban-aw tandaanan amba da Diyos ba sa konin. 2 Ngani laki Hisos ba tembag amba, No giraapon:nani ba koyo nagsabi amba batay maganda da odas panawen dangga da langit. 3 Da- sa omaga gidte ba koyo nagsabi amba, Mona ba batay omodan panawen mapola da- magpandelem da langit. Koyo nagkabasa da mga tandaanan sa langit, ngani nawed kay koyo abasa da mga tandaanan kaodasan tiya. 4 Koyo boo mga iraya ba daet da- nawed matepeden sa Diyos! Koyo magsarak tandaanan ngani wala kay batay Pinaban-Aw tandaanan sa koyo no nawed ba ag nangyadi sa laki Honas. Maraw konin:na nasabi naba ba iya ba omalis:sani. 5 Maraw kora ba omipay sa karipay dagat-dagatan ba alingwanan ag mga nagtod-an magbaba tinapay. 6 Sinabi laki Hisos sa kora amba, Koyo magdahan gidte sa pampahilab mga Parisiyo da- Sadosiyo. 7 Mamagtokawanan da mga nagtod-an amba, Adey! Nawed:da tamo magbaba tinapay, kaya konin sinabi naba. 8 Naba ba amatangan laki Hisos kaya kora ba konin tinanong amba, Kaytang koyo magremrem sa koyo wala nagbaba tinapay? Ibente:a gayed da koyo pag-isarig sa naay! 9 Nawed dapo ma koyo amatangan? Koyo:wa alingwanan pag naay namisang-misang da lima ka tinapay para sa lima ka ribo ka lalaki? Kaomaning dapo kaoson ka alat da natra? 10 Amba din da pito ka tinapay para sa apat ka ribo ka lalaki, kaomaning dapo kaoson ka galang tinapay da natra? 11 Kaytang nawed koyo amatangan amba nawed para sa tinapay da naay nagsabi? Koyo magdahan sa pampahilab mga Parisiyo da- mga Sadosiyo. 12 Da- kora amatangan amba nawed ma sa pampahilab tinapay no nawed ba sa todo mga Parisiyo da- mga Sadosiyo da kora kailangan magdahan. 13 Maraw laki Hisos ba rateng sa sai ka poro bali sa goraan Sisariya Pilipos ba konin tinanong da konin mga nagtod-an amba, Toltol sa mga iraya ba tawa kono da Onga Iraya? 14 Kora ba tembag amba, Da kalaati ba amba, Kawo ba laki Howan Tagabaotismo sa sapa. Da sabi kay mga Roma ba kawo ba laki Iliyas. Da- maki dapo magsabi amba kawo ba laki Hirimiyas e sai sa mga tagabarita ibat sa Diyos. 15 Iya ba magtanong sa kora amba, Da- koyo kay, omaning kay da koyo sabi? Tawa ako? 16 Laki Simon Pidro ba tembag amba, Kawo:wa da Kiristo, ag Onga Diyos biyagan. 17 Sinabi sa konin laki Hisos amba, Simon, onga laki Honas, kawo pinarongawan Diyos! Panawen da katotohanan naba ba nawed pinapawa sa komo tawa man iraya no nawed ba pag naay Apang sa soksokowan. 18 Da- naay kay nagsabi sa komo amba, Kawo ba laki Pidro, da- sa ngaway bato lakol naba ba naay batay limbo da rimponanan boo mag-isarig sa naay. Da- kaagot man ba kora ba nawed batay dinaeg kayno katayan. 19 Naay batay tinaboy sa komo da pad sosi kahadian sa soksokowan : da komo nag-ayawan towa sa lopa ba batay din inayawan sata sa soksokowan, da- da komo nagpayagan towa sa lopa ba batay pinayagan sata sa soksokowan. 20 Da- konin gidte binilinan da konin mga nagtod-an amba, Ayaw agsabiyen sa tawa man amba ako da Kiristo. 21 Ibat sa odas naba ba laki Hisos ba mag-ompisa paaramen sa konin mga nagtod-an amba iya kailangan paraoy sa Hirosalim, da- magdanas maoson ka hidap ibat sa mga poon balayan mga Diw, mga koyay magpamanawen sa balay Diyos da- mga kamatangen sa Bilin, da- iya batay binono. Ngani sa ikatatlo ka aldaw ba iya batay:yakay nabiyag. 22 Iya ba pinaanggat laki Pidro sa tebteb da- sinabiyan makay tiya : Panginoon, ayaw kay agpayagan Diyos! Nawed abaya mangyadi sa komo naba. 23 Ngani laki Hisos ba paloba sa konin da- iya sinabiyan amba, Satanas, kawo paadayo sa naay! Kawo hadang sa naay onaanan. Da komo nagremrem ba nawed ibat sa Diyos no nawed ba ibat sa iraya. 24 Sinabi laki Hisos sa konin mga nagtod-an amba, No da tawa man ba alabet tomongroy sa naay ba iya ba kailangan magdayo sa konin sadiri, konin pas-anen da konin kodos da- magtongroy sa naay. 25 Da iya alabet magribri konin biyag ba batay nawala da biyag gidte sa konin; ngani da iya magtaboy konin biyag para ngani- sa naay ba iya da batay maki naba. 26 Nakay da batay pakinabang sai ka iraya kayno konin natabang da boo paranawan da- nawala kay da biyag gidte sa konin? E nakay da batay tinaboy sai ka iraya sibay sa biyag gidte? 27 Panawen batay:ya rateng da Onga Iraya sa kapangyadihan konin Apang da- kaanggat din da konin mga anghil. Sa odas naba ba konin batay pinakan da tayma iraya toltol sa konin pinanawen. 28 Naay gidte nagsabi sa koyo amba, Da kalaati sa koyo towa ba nawed batay natay anggan nawed kora akitan rateng da Onga Iraya makay hadi.
1 Maraw kadalan anim ka aldaw ba pinaanggat laki Hisos laki Pidro da- da talkaka Tiyago da- Howan, da- kora ngani da tomokad sa sai ka atatas ka bogsor. 2 Maraw kora sata ba kora akitan laki Hisos ba ibahin:nakay maki balawas; pomawa makay aldaw da konin kiray da- pomoti makay layagen da konin bado. 3 Da- kamalay te paban-aw sa kora sidawa Moysis da- Iliyas magtokawanan sa laki Hisos. 4 Kaya sinabi laki Pidro sa laki Hisos amba, Panginoon, piya da towa yamen! No komo alabet ba ako ba batay lombo tatlo ka barangas, sai sa komo, sai sa laki Moysis da- sai din sa laki Iliyas. 5 Iya magtokawanan dapo ba tinakleban:na sai ka marawa ka yaong. Da- ibat saba ba maki magtokawanan amba, Tiya da naay nagpalayaw ka onga, naay gidte kaangasan. Iya koyo pakarngeyan. 6 Maraw arngeyan naba ba da mga nagtod-an ba romombok panawen sa kora ba nangaaliman gidte. 7 Ngani laki Hisos ba pabali sa kora da- kora ba konin kinapkap. Iya amba, Koyo patindeg, ayaw koyo aliman! 8 Kaya kora maningara da- kora ba wala akitan no nawed ba laki Hisos ngani. 9 Da- sa odas kora ba magdolong ba kora ba nagbilinan laki Hisos amba, Ayaw dapo koyo agsabiyen sa tawa man iraya da koyo akitan anggan nawed natay da- nabiyag:gakay da Onga Iraya. 10 Iya tinanong mga nagtod-an amba, Kaytang nagsabi ag mga kamatangen sa Bilin amba kailangan monaan dapo paraoy towa laki Iliyas? 11 Iya tembag amba, Towa nga paraoy laki Iliyas para ayoson:nakay da boo nakayman. 12 Ngani naay nagsabi sa koyo, Towa:a nga paraoy laki Iliyas, ngani iya ba nawed kinilala mga iraya da- kora pinanawen sa konin da kora alabet. Amba kay din kora batay pinahidapan da Onga Iraya. 13 Da- amatangan:na ag konin mga nagtod-an amba laki Howan Tagabaotismo sa sapa da konin nagtodyo. 14 Maraw kora rateng sa kaosonan iraya ba pabali sa konin da sai ka lalaki lomohod sa konin ropangan 15 da- konin sinabi amba, Koyay, kawo ayawtean sa naay onga lalaki! Iya ba nagsompong, da- iya ba masyado gidte nagkahidapan, panawen iya ba layen nagkatwang sa apoy da- no ina ba sa sapa. 16 Iya ba naay:ya binaba sa komo mga nagtod-an ngani nawed kora apapiya. 17 Laki Hisos ba tembag amba, Koyo mga iraya wala pag-isarig sa Diyos da- nawed mataldeng! Kaagot dapo ako ba batay koyo pal-anggat? Kaagot dapo koyo naay batay inagwantahan? Koyo babaen towa da onga! 18 Sinabiyan laki Hisos da daet ka ispirito. Naba ba lomwas da- da onga ba agad pomiya. 19 Pabali sa laki Hisos da konin mga nagtod-an, da- magkaborboran magsabi amba, Kaytang nawed yamen apalwas da daet ka ispirito naba? 20 Laki Hisos ba tembag amba, Panawen sa ibente te da koyo pag-isarig sa Diyos. Naay gidte nagsabi sa koyo, No kakol disin atey mostasa da koyo pag-isarig sa Diyos ba koyo batay asabi sa bogsor naba, Kawo somalyo sata! da- naba ba batay somalyo. Wala nakayman nawed batay koyo apangyadi. 22 Maraw kora boo ba sa Galiliya ba sinabi laki Hisos sa konin mga nagtod-an amba, Da Onga Iraya ba batay inaboso da- pinaabel sa konin mga kalaban. 23 Da- iya ba kora batay binono, ngani sa ikatatlo ka aldaw ba batay:yakay biniyag. Da- kora ba nangalognoy:ya gidte sa karongkotan. 24 Maraw kora rateng sa goraan Kapirnaom ba pabali sa laki Pidro da mga magpaningir bohis para sa balay Diyos. Iya ba tinanong amba, Magbayad dia bohis para sa balay Diyos da koyo tagatodo? 25 Laki Pidro ba tembag amba, Hee. Da- maraw iya ba rateng sa balay ba iya agad tinanong laki Hisos amba, Omaning da komo remrem, Simon? Sa tawa nag-ay-ayan mga hadi sa paranawan da bayad sa bohis da- lisinsiya? Sa mga magpamataw:wa saba e sa mga manalyowan? 26 Iya tembag amba, Sa mga manalyowan. Sinabi laki Hisos, No amba, nawed nag-ay-ayan bayad da mga saba:a magpamataw. 27 Amba man, para kora wala batay asabi sa tamo, kawo paraoy sa dagat-dagatan da- komo benglayen da balwit. Komo gawen da monaan komo abel isda. Komo bokaen da konin bibi da- kawo maki batay akitan sai ka kwarta pilak. Komo gawen naba da- bayaden sa kita bohis.
1 Sa odas din naba ba pabali sa laki Hisos da konin mga nagtod-an da- magtanong amba, Tawa dia da mahalaga sa mga naghadian Diyos? 2 Pinatwagan laki Hisos da sai ka onga da- pinatindeg sa kora ropangan, 3 da- sinabi amba, Naay gidte nagsabi sa koyo, No nawed bayo:wakay da- makay mga onga te da koyo remrem ba koyo nawed gidte batay apabilang sa mga naghadian Diyos. 4 Da iya agpaababa makay ag onga tiya ba iya da mahalaga sa mga naghadian Diyos. 5 Da iya magtabang sa sai ka onga makay tiya panawen sa iya ba naay nagtod-an ba ako da nagtabang. 6 Piya dapo sa sai ka iraya da iya ba takinan bayowan bato lakol sa leey da- laboon sa alalem ka dagat sa iya kay ba batay inibatan kadaetan sa sai ka onga te makay tiya mag-isarig sa naay. 7 Daet gidte sa mga iraya sa paranawan panawen sa pad ibatan kadaetan mga iraya. Nawed batay nawala kaagot man da pad ibatan kadaetan, ngani kapangirabot gidte da iraya batay inibatan naba! 8 No da komo alima e paa da nag-ibatan kadaetan sa komo ba komo:wa potlon naba da- benglayen! Piya dapo kawo kaparaoy sa biyag gidte wala arasan sai ngani da alima e paa sa maki darwa ka alima e paa da- binenglay kay sa apoy nawed tay natay. 9 Da- no da komo kay mata da nag-ibatan kadaetan sa komo ba komo:wa siwiten da- komo benglayen. Piya dapo kawo kaparaoy sa biyag gidte wala arasan sai ngani da mata sa maki darwa ka mata da- binenglay kay sa apoy nawed tay natay. 10 Koyo dahanan! Ayaw koyo aggaw-en wala koyinta da sai sa mga onga te tiya. Naay nagsabi sa koyo, Da kora pad anghil ba boo odas ba sa ropangan naay Apang sa soksokowan. 12 Nakay sa koyo remrem da batay pinanawen sai ka iraya maki sai ka daan ka topa da- nalingo da sai? Nawed ma batay konin inogonan da siyamnapo da- siyam sa kalatayanan para saraken da nalingo? 13 Naay gidte nagsabi sa koyo, No konin:nakay akitan naba ba labi gidte da konin kaangasan sa sai te tiya, sa siyamnapo da- siyam nawed nalingo. 14 Amba kay din, nawed kaliyagan tamo Apang sa soksokowan da kayno sai te sa mga ibente tiya ba batay nalabo sa kapadosahan. 15 No maki kadaetan da komo arian laban sa komo, iya ba komo paraoyan da- sabiyan kandawa ngani. No iya maniwala sa komo sinabi ba iya kom:makay arian sa Panginoon. 16 Ngani no iya dayo kay maniwala sa komo ba kawo paanggat dapo sai e darwa ka arian para da boo koyo nagsabi ba apatonayan gidte darwa e tatlo ka sistigo. 17 No iya nawed maniwala sa koyo ba komo sabiyen naba sa rimponan. Da- no iya nawed din maniwala sa rimponan ba koyo:wa bilangen iya ba sai ka nawed mag-isarig, makay sai ka magpaningir bohis. 18 Naay gidte nagsabi sa koyo, Da nakayman koyo nag-egtan towa sa lopa ba batay din inegtan sata sa soksokowan, da- da nakayman koyo nagbal-anan towa sa lopa ba batay din binal-anan sata sa soksokowan. 19 Naay din nagsabi sa koyo, No da darwa sa koyo sa lopa ba magkasai mag-ay-ay mga nakayman sa kandawa magdarangin ba da kandawa inay-ayan ba batay tinaboy sa kandawa naay Apang sa soksokowan. 20 Panawen kayno saan maki darwa e tatlo magrimpon sa kora maki kasaiyan sa naay ba sata din ako sa kora tenga. 21 Sa odas naba laki Pidro ba pabali sa Panginoon da- magtanong amba, Panginoon, kaomaning kaoson naay batay pinatawad da layen-layen daet sa naay? Kapito dia? 22 Laki Hisos ba tembag sa konin amba, Nawed ngani kapito da naay nagsabi sa komo no nawed ba anggan pitompo ba kapito sinagoli. 23 Panawen da maghadi da Diyos ba makay tiya, Maki sai ka hadi da alabet ba pabayaden da otang konin mga tagapamanawen. 24 Da monaan pinaparaoy sa konin ba ag maki otang sampo ka ragsa ka piso. 25 Panawen sa wala batay abayad ba binilin ag hadi amba iya da- ag konin sawa, anggan ag mga onga da- da boo kora nag-apo ba pabiliyen para kabayad. 26 Lomohod sa ropangan hadi da tagoanggat da- omateet amba, Koyay, ako komo dapo kay pakanen odas da- naay batay binayadan da boo. 27 Ayawtean sa konin da hadi da- iya kay ba konin pinatawad sa konin mga otang da- pinaidaw:wa iya. 28 Ngani maraw iya mangadang ba konin asma da sai sa konin kapowa tagapamanawen maki otang lima ka daan ka piso sa konin. Iya ba konin dinosmogan da- binegkel amba, Magbayad:da kawo sa komo otang sa naay! 29 Iya ba misongo da- omaringi amba, Ako pakanen dapo kay odas da- kawo batay binayadan. 30 Ngani iya ba nawed pomayag no nawed ba pinapiriso konin kapowa tagapamanawen anggan sa iya kabayad. 31 Maraw kay akitan ag konin mga kapowa tagapamanawen da nangyadi, kora ba masyado gidte marongkot. Kora paraoy sa hadi da- kora binarita sa konin da nangyadi. 32 Kaya iya ba pinaparaoy ag hadi. Amba ag hadi, Kawo ba daet gidte! Kaya kawo ba naay:ya pinatawad sa komo otang ba panawen kawo ba omateet sa naay. 33 Ako ayawtean sa komo. Nawed ma kawo kailangan din ayawtean sa komo kapowa? 34 Sa kabaisan hadi iya ba pinapiriso anggan abayadan da boo konin otang. 35 Amba din da batay pinanawen sa koyo naay Apang sa soksokowan no koyo nawed magpatawad sa koyo mga arian.
1 Maraw laki Hisos ba kalbas:sa magsabi naba ba iya ba mangadang ibat sa Galiliya magparaoy sa lopa Hodiya sa karipay salog Hordan. 2 Iya ba inanggatan kaosonan gidte iraya, da- konin pinapiya sata da mga maki maskit. 3 Maki mga Parisiyo pabali sa konin da- alabet gidte iya ba siloon. Kaya kora magtanong amba, Toltol dia sa Bilin da paswayen da sai ka lalaki sa konin sawa sa kayno nakay ka ibatan? 4 Laki Hisos ba tembag amba, Nawed dapo koyo nagkabasa sa Banal ka Kasoratan sa ompisa dapo ba da iraya ba rinarang Diyos lalaki da- babayi. 5 Da- sinabi dapo Diyos amba, Panawen saba ba batay inogonan lalaki da konin apang da- adang, da- iya da- konin sawa ba batay mal-anggat; da- sidawa ba batay sai:ya ngani. 6 Kaya sidawa ba nawed:da darwa no nawed ba sai ngani. Da pinal-anggat Diyos ba ayaw agpalsowayen iraya. 7 Iya ba tinanong mga Parisiyo amba, No amba ba kaytang binilin laki Moysis amba, Pakanen kasoratan ag lalaki ag babayi sa sidawa malsoway bayo sowayen. 8 Laki Hisos ba tembag amba, Panawen sa maskil gidte da koyo olo, kaya pinayagan laki Moysis amba abaya koyo sowayen da koyo sawa. Ngani nawed amba sa ompisa. 9 Kaya naay nagsabi sa koyo, Tawa man lalaki sinway da konin sawa sa nakayman ibatan ayaw ngani sa mangalonya, da- mangisawa:akay sa Roma ba iya magpangalonya. 10 Sinabi sa konin ag mga nagtod-an amba, No amba da kalagayan ag lalaki sa konin sawa ba piya dapo ba ayaw:wa mangisawa. 11 Laki Hisos ba tembag amba, Nawed da boo ba katabang ag mga tokawanan naba no nawed ba ag mga ngani pinarongawan Diyos. 12 Panawen maki Roma-Roma ka ibatan kaytang maki mga lalaki nawed kapangisawa : da kalaati ba panawen sa kora kagisengan kalagayan; da Roma kay panawen sa kapanawenan mga Roma ka iraya; maki kay nawed:da mangisawa para ngani- magpamanawen ag panawenen Diyos. Da katabang ag mga tokawanan naba ba tabangen. 13 Maraw kalbas ba maki bomaba mga onga sa konin para patimpowan konin alima da- konin daranginen. Ngani kora ba sinaway konin mga nagtod-an. 14 Ngani sinabi laki Hisos amba, Koyo pabayaan pabali sa naay da mga onga. Kora ba ayaw koyo paghadangan, panawen sa mga makay kora maghadi da Diyos. 15 Da- konin pinatimpo sa kora da konin alima bayo iya mangadang. 16 Maki kay sai ka lalaki pabali sa konin da- magtanong amba, Tagatodo, nakay ka kapiyaanan da naay kailangan panawenen para ako ba maki biyag gidte wala arasan? 17 Laki Hisos ba tembag amba, Kaytang ako ba komo nagtanong amba no nakay da piya? Sai ngani da piya. No komo alabet kawo maki biyag gidte ba komo toltolon da mga bilin. 18 Konin tinanong amba, Mga nakay dia? Laki Hisos ba tembag amba, Kawo ayaw agbono iraya, ayaw agpangalonya, ayaw agpanakaw, ayaw agpamosli sa kawo magsistigo, 19 komo galangen da komo apang da- adang da- komo palayawen da komo kapowa, makay din ag komo palayaw sa komo sadiri. 20 Sinabi ag binata, Naay pinanawen da boo naba. Nakay dapo da korang sa naay? 21 Laki Hisos ba tembag, No kawo alabet sibay gidte, idaw:wa kawo, komo pabiliyen da komo mga nag-apo da- pangerayen sa mga mahidapen da kabayadan. No naba ba komo pinanawen ba kawo maki batay karon-an sa soksokowan. No kalbas ba kawo paoli da- tomongroy sa naay. 22 Maraw iya karngey naba ba marongkot gidte mangadang da binata, panawen iya ba makaron-an gidte. 23 Sinabi laki Hisos sa konin mga nagtod-an, Naay gidte nagsabi sa koyo, Mahidap gidte apabilang da mga maoson nag-apo sa mga naghadian Diyos. 24 Naay:yakay nagsabi sa koyo, Ginhawa dapo kadalan sa lobot kadayom da hayop lakol sa apabilang kay da sai ka maoson nag-apo sa mga naghadian Diyos. 25 Magtaka gidte da mga nagtod-an maraw kora akarngeyan naba, kaya kora tinanong amba, No amba, tawa da batay aribri? 26 Kora binan-awan laki Hisos da- sinabi, Naba ba nawed apanawen iraya ngani apanawen Diyos da boo nakayman. 27 Da- manokawanan laki Pidro amba, Komo gidte pakarngeyan! Yamen inogonan da boo da- yamen tomongroy sa komo. Nakay kay da batay taboy sa yamen? 28 Sinabi sa kora laki Hisos amba, Naay gidte nagsabi sa koyo, No katongka:ani da Onga Iraya sa konin tongkaan hadi sa odas konin batay Pinaban-Aw konin kalakolan, koyo ag mga tomongroy sa naay ba batay din tomongka sa labindarwa ka tongkaan mga maki kapangyadihan para hosayen da labindarwa ka andana Israil. 29 Da- da tawa man mag-ogon konin pamatawan, mga arian lalaki da- babayi, apang, adang, mga onga e mga agayen para ngani- sa naay ba batay tomabang sai ka daan ka sagoli da- biyag gidte wala arasan. 30 Ngani maoson monaan ba batay paoriyan:nakay, da- maoson kay paoriyan da batay monaan:nakay.
1 Da maghadi da Diyos ba makay tiya, Maraw omaga gidte ba lomwas da aponin alamanan para somarak mga batay mamanawen. 2 Maraw kora magkasai sa bayad sa boo aldaw ba kora ba konin:na pinaparaoy sa konin alamanan. 3 Maraw atatas:sa da aldaw, iya ba lomwas:sakay da- iya kaban-aw Roma dapo ka magpatindeg-patindeg ngani sa pamiliyan. 4 Konin sinabi sa kora amba, Koyo sata din paraoy da- mamanawen sa naay alamanan da- koyo batay pinakan sibay ka bayad. 5 Kaya kora sata nga paraoy. Amba din da konin pinanawen sa tenga aldaw da- sa manorip batang da aldaw. 6 Maraw magsalangdayan:na da aldaw ba iya lomwas:sakay da- iya kaban-aw dapo mga Roma wala din nagpanawen. Konin sinabi sa kora amba, Kaytang koyo magpatindeg-patindeg:ga ngani towa sa boo aldaw? 7 Kora tembag amba, Wala kay magtaboy panawenen sa yamen. Kaya konin sinabi, No amba koyo sata paraoy sa naay alamanan da- mamanawen. 8 Maraw masoram-soram:mani ba konin sinabi sa konin katiwalaan amba, Komo:wa pamatwagan da mga magpamanawen da- kora bayadan ibat sa paoriyan da- anggan sa monaan. 9 Da mga rateng magsalangdayan da aldaw ba tomabang bayad sibay sa boo aldaw. 10 Kaya maraw pabali ag mga monaan ba kora nagremrem amba kora batay tomabang labi sa mga paoriyan. Ngani kora boo ba tomabang bayad makay din ag Roma. 11 Maraw natabang:ngani da bayad ag mga monaan ba kora magdiklamo sa aponin alamanan 12 amba, Sai ngani te ka odas mamanawen ag mga paoriyan rateng. Yamen kay ba boo aldaw ba magpahidap da- mag-agwanta kapasi ibeng aldaw. Kaytang makay din naba da bayad sa yamen? 13 Iya tembag sa sai sa kora, Abyan, kawo nawed naay nag-api. Nawed ma kita ba magkasai sa bayad sa boo aldaw? 14 Komo gawen da para sa komo da- kawo mangadang:ngani. Naay alabet pakanen ag mga paoriyan makay din ag sa komo. 15 Nawed ma abaya naay panawenen nakayman naay alabet sa naay mga nag-apo? E nagkaadagilan kawo sa naay kapiyaanan remrem sa Roma? 16 Kaya da mga paoriyan ba batay monaan da- da mga monaan kay ba batay paoriyan. 17 Maraw laki Hisos ba sa dalan:nani magtokad sa Hirosalim ba konin pinabokod da konin mga labindarwa ka nagtod-an da- sinabiyan kora ngani amba, 18 Koyo gidte pakarngeyan! Tamo ba magtokad:da sa Hirosalim. Sata da Onga Iraya ba batay pinaabel sa mga koyay magpamanawen sa balay Diyos da- sa mga kamatangen sa Bilin. Iya batay hinosay katayan, 19 da- batay tinaboy sa mga Nawed Diw. Iya ba batay nanawanan da- batay pinasaplidan da- batay pinako sa kodos anggan natay. Ngani iya batay:yakay biniyag sa ikatatlo ka aldaw. 20 Da- sa odas din naba ba pabali sa laki Hisos da sawa laki Sibidiyo, kaanggat din konin darwa ka onga. Iya maki alabet aringien kaya iya lomohod sa ropangan laki Hisos. 21 Iya tinanong laki Hisos amba, Nakay da komo alabet? Iya tembag, Komo kay sabiyen da naay darwa ka onga ba katongka da sai ba sa komo kanan da- da sai kay ba sa kaliwa sa kawo batay gidte maghadi. 22 Sinabi laki Hisos sa sidawa amba, Nawed kandawa amatangan da kandawa nag-ay-ayan. Batay dia kandawa kaagwanta sa mga hidap naay batay inagwanta? Sidawa tembag amba, Hee. 23 Sinabi laki Hisos, Da hidap naay batay inagwanta ba kandawa din batay inagwanta. Ngani nawed ako da maki pakana no tawa da batay katongka sa naay kanan da- sa kaliwa dako. Da mga tongkaan koyo nagsabi ba para sa mga hinandaan naay Apang. 24 Maraw naba ba akarngeyan ag sampo konin nagtod-an ba kora abaisan sa talkaka. 25 Kaya kora boo ba pinabali laki Hisos da- sinabi sa kora amba, Koyo amatangan da mga poon mga lasyon ba maghadi sa kora din mga lasyon, da- da mga maki gidte katongkolan ba naba da kora nagtoltol. 26 Ngani sa koyo ba nawed amba. No nawed ba da tawa man sa koyo alabet makapangyadihan ba kailangan iya ba koyo tagapamanawen. 27 Da- da tawa man sa koyo alabet poon ba kailangan iya ba koyo tagoanggat. 28 Makay din ag Onga Iraya ba paraoy towa, nawed para iya ba panawenan no nawed ba para iya mamanawen da- taboyon konin biyag para natbos da kaosonan. 29 Maraw kora mangadang sa goraan Hiriko laki Hisos ba inanggatan kaosonan gidte iraya. 30 Maki kay darwa ka raprap magtongka sa tebteb dalan. Maraw sidawa akarngeyan laki Hisos ba magdalan sidawa ba magberyaan lakol amba, Koyay, ag Kaapoan hadi Dabid, kawo ayawtean sa kidawa! 31 Sidawa nagsabiyan mga iraya da- nagpaepet, ngani sidawa lalo:a magberya amba, Panginoon, ag Kaapoan hadi Dabid, ayawtean kay kawo sa kidawa. 32 Laki Hisos ba magpatindeg, sidawa konin pinatwagan da- tinanong amba, Nakay da kandawa alabet naay panawenen sa kandawa? 33 Sidawa tembag amba, Panginoon, kidawa alabet kidawa ba kaban-aw. 34 Laki Hisos ba ayawtean da- kinapkap da sidawa mata. Agad sidawa kaban-aw da- sidawa tomongroy sa konin.
1 Laki Hisos da- konin mga nagtod-an ba nagkabali:ya sa Hirosalim. Maraw kora rateng sa goraan te Bitpagi sa bogsor Kaolibowan ba pinaonaan laki Hisos da darwa ka nagtod-an. 2 Konin sinabi sa sidawa amba, Kandawa paraoy sa goraan naba:a te. Kandawa batay akitan saba da sai ka tal-inay asno nag-eket. Kandawa okaden da- alyan towa. 3 No maki magtokawanan nakayman sa kandawa ba kandawa sabiyen amba, Tiya ba kailangan Panginoon da- nawed:da batay kora inomaning. 4 Mangyadi naba para natped da pinasabi Diyos sa konin tagabarita amba, 5 Koyo sabiyen sa taga goraan lakol Siyon, Koyo masdan! Naba:ani da koyo Hadi. Iya ba ababa da remrem; iya magsakay sa sai ka asno, sa sai ka bol-o asno. Naba:a ngani. 6 Mangadang:nga ngani- da darwa ka nagtod-an da- pinanawen da binilin laki Hisos. 7 Sidawa inalyan ag tal-inay asno. Sidawa sinablay sa awak ag tal-inay asno da sidawa mga bado da- laki Hisos ba somakay. 8 Maoson da manlatag sa dalan kora mga bado; da mga Roma kay ba mamtol mga sanga kayo da- manlatag din sa dalan. 9 Mamaglalae da mga iraya sa konin onaanan da- da mga magtongroy sa konin amba, Podiyen ngani- da Kaapoan hadi Dabid. Maparongaw da towa magparaoy sa ngaran Panginoon. Podiyen da Diyos! Naba:a ngani. 10 Maraw laki Hisos ba semled sa Hirosalim ba magkasoyapoy da boo taga Hirosalim. Kora magtanong, Tawa kaya naba? 11 Tembag kay da kaosonan amba, Laki Hisos taga goraan Nasarit sa Galiliya, ag tagabarita pinangako Diyos. 12 Laki Hisos ba semled sa lakol ka balay Diyos. Konin binolyaw palwas da mga boo magpabili da- mga magpamili sata da- konin namalombog da mga palagyan mga magpamalit kwarta da- mga tongkaan mga magtindahan kalapati. 13 Konin sinabi sa kora boo amba, Nagkasorat sa Banal ka Kasoratan amba, Da Diyos ba amba, Kailangan gidte da naay balay ba balay sambahan. Ngani naba koyo ginawa leyang mga magpanakaw. 14 Maki mga raprap da- mga tekya pabali sa laki Hisos sa lakol ka balay Diyos da- konin pinapiya. 15 Abaisan da mga koyay magpanawen sa balay Diyos da- mga kamatangen sa Bilin maraw kora akitan da mga katakataka konin pinanawen da- ag mga onga maglalae sa galem balay Diyos amba, Podiyen ngani- da Kaapoan hadi Dabid! 16 Da- kora sinabi sa laki Hisos amba, Komo dia akarngeyan da kora nagsabi? Iya tembag, Hee. Nawed ma koyo nabasa sa Banal ka Kasoratan amba, Kawo gidte nagpodi ag bibi mga onga te da- mga magpandodo dapo. Komo pinasibay da kora papodi. 17 Laki Hisos ba mangadang sa goraan lakol da- lomwas magparaoy sa goraan te Bitanya. Sata:a iya malek. 18 Maraw omaga:akay, maraw laki Hisos ba sa dalan magparaoy:yakay sa goraan lakol ba iya nabayog. 19 Iya kaban-aw sai ka poon igos sa tebteb dalan, da- iya pabali sata. Ngani iya ba wala gidte akitan no nawed ba mga daon. Kaya konin sinabi sa poon igos amba, Kawo nawed:da tay mamokar kaagoton man. Da- sa odas din naba ba nalayo:wani da poon igos. 20 Maraw akitan mga nagtod-an ba kora magtaka. Kora magtanong amba, Omaning agad:da nalayo da poon igos? 21 Laki Hisos ba tembag amba, Naay gidte nagsabi sa koyo, No koyo mag-isarig gidte sa Diyos da- nawed mag-alingangaan ba koyo batay apanawen da naay pinanawen sa poon igos naba. Da- nawed ngani naba! No koyo sabiyen sa bogsor naba amba, Kawo omalis saba da- lomabo sa dagat, ba batay nangyadi da koyo sinabi. 22 No koyo mag-isarig sa Diyos ba da nakayman koyo nag-ay-ayan sa darangin ba koyo batay tinabang. 23 Laki Hisos ba semled sa lakol ka balay Diyos. Sa odas iya magtodo, pabali sa konin da mga koyay magpamanawen sa balay Diyos da- da mga poon balayan mga Diw da- ya ba tinanong amba, Nakay da komo kapangyadihan mamanawen mga nakayman naba? Tawa da omaboy sa komo ag kapangyadihan iya? 24 Laki Hisos ba tembag, Koyo naay din batay tinanong. No ako ba koyo timbag bayo naay kay batay sinabi sa koyo no saan gidte omibat da naay kapangyadihan mamanawen mga nakayman naba. 25 Sa tawa omibat da kapangyadihan laki Howan sa iya magbaotismo : sa Diyos e sa iraya? Da- kora ba magkamonong-monong : No tamo sabiyen amba, Ibat sa Diyos ba konin kay batay sinabi sa tamo amba, Kaytang iya nawed koyo nagpaniwalaan? 26 Ngani no tamo kay sabiyen amba, Ibat sa iraya ba aliman kay tamo sa kaosonan, panawen nagkilala boo laki Howan ba tagabarita ibat sa Diyos. 27 Kaya kora ba tembag sa laki Hisos, Yamen nawed kamatang! Konin sinabi amba, No amba ba nawed din naay batay sinabi sa koyo no saan omibat da naay kapangyadihan mamanawen ag mga naay nagpanawen. 28 Nakay dia sa koyo remrem da makay tiya? Sai ka iraya ba maki darwa ka onga lalaki. Iya pabali sa panganay da- sinabi amba, Yayaw, kawo lomwas da- mamanawen sa agayen. 29 Iya tembag amba, Ako dayo. Ngani isag te ba Roma:akay da konin remrem da- iya ba paraoy din sa agayen. 30 Pabali din da apang sa ikadarwa da- amba din da konin sinabi. Tembag ag onga amba, Batay gidte! Ngani nawed kay sata paraoy. 31 Tawa sa darwa da tomoltol sa kaliyagan konin apang? Kora tembag, Da panganay ngani-. Sinabi sa kora laki Hisos amba, Naay gidte nagsabi sa koyo, Da mga magpaningir bohis da- da mga talandi ba batay abaya dapo sa koyo batay naghadian Diyos. 32 Panawen towa paraoy laki Howan da- Pinaban-Aw sa koyo da mataldeng ka biyag, ngani koyo dayo maniwala sa konin. Ngani iya ba pinaniwalaan gidte ag mga magpaningir bohis da- mga talandi ka babayi. Koyo akitan naba ngani koyo nawed dapo din magsisi da- maniwala sa konin. 33 Sinabi dapo laki Hisos, Koyo gidte pakarngeyan da sai dapo ka halimbawa : Maki sai ka aponin alamanan magtanem obas sa konin agayen da- naba ba konin binakodan. Iya ba gomawa sata lesaan obas, da- lombo sai ka atatas ka balay kora bantayan. Maraw kalbas ba konin pinaalaga sa mga tagaalaga da obasan, da- iya paraoy sa adayo ka poro. 34 Maraw rateng:nga da odas batay manggaro bokar ba pinaparaoy ag aponin obasan da konin mga katiwalaan para gawen sa mga tagaalaga da konin eray. 35 Ngani dinosmogan ag mga tagaalaga da mga katiwalaan. Kora hinaplit da sai, da- binono da ikadarwa da- namato kay da ikatatlo. 36 Pinaparaoy:yakay ag aponin da maoson dapo ka katiwalaan ngani amba din da pinanawen ag mga tagaalaga sa mga naba. 37 Maraw sa paoriyan ba konin pinaparaoy da konin onga lalaki. Konin rinemrem amba, Kora batay ginalang da naay onga lalaki. 38 Ngani maraw akitan ag mga tagaalaga da onga ba kora ba mamagtokawanan amba, Naba:a da batay mag-apo! Tamo bonoon para sa tamo:wani da konin batay nag-apo. 39 Kaya iya ba kora dinosmogan da- pinalwas sa obasan da- binono. 40 Kaya laki Hisos ba magtanong amba, Maraw paoli da aponin obasan ba omaning dia da konin batay pinanawen sa mga tagaalaga naba? 41 Kora tembag, Konin gidte batay binono wala kayawtean ag mga daet ka iraya naba da- batay:yakay pinaalaga da obasan sa mga Roma ka tagaalaga batay magtaboy konin eray sa odas batay mag-ani obas. 42 Tinanong laki Hisos da mga magpakarngey sa konin amba, Nawed dapo ma koyo nabasa sa Banal ka Kasoratan amba, Da toar inimbanda mga magpanlobo balay ba naba da maonay ka arigi sa sorokan. Naba ba pinanawen Panginoon da- naba ba katakataka sa tamo serey. Naba:a ngani. 43 Kaya ngani- naay nagsabi sa koyo, Nawed:da batay sa koyo da maghadi da Diyos no nawed ba sa mga kairayaan batay gidte mateped sa konin. 45 Maraw akarngeyan ag mga koyay magpamanawen sa balay Diyos da- mga Parisiyo da halimbawa laki Hisos ba kora amatangan amba kora:a da konin nagtodyo. 46 Kaya iya ba kora disin alabet abelen, ngani kora ba aliman sa kaosonan iraya, panawen kora nagkilala gidte amba laki Hisos ba tagabarita ibat sa Diyos.
1 Sai dapo ka halimbawa da nanoltol sa kora laki Hisos. Iya amba, 2 Da maghadi da Diyos ba makay tiya : Sai ka hadi ba homanda sa batay kinasal konin onga lalaki. 3 Konin pinaidaw da konin mga katiwalaan para abisahan da mga pinaparaoy sa handaan ngani kora ba dayo paraoy. 4 Kaya iya magpaidaw:wakay mga Roma ka katiwalaan da- konin binilinan amba, Koyo sabiyen sa mga pinaparaoy amba, Handa:ani da naay handaan! Binono:ani da naay mga toro baka da- da mga nagpataba bol-o baka, da- handa:a da boo nakayman. Apora:a koyo sa handaan! 5 Ngani nawed pinakarngeyan ag mga nagpaparaoy. Kora mamaraoy sa kora-kora kay alabet panawenen : da Roma ba sa kora agayen da- da Roma kay ba sa ligosyo. 6 Dinosmogan kay mga Roma da mga katiwalaan, da- pinakaya kay da- binono. 7 Abaisan gidte da hadi. Konin pinaparaoy sata da konin mga sondalo, da- pinabono da mga bomono iraya naba, da- pinaareng da kora goraan. 8 Konin sinabi sa konin Roma ka katiwalaan amba, Handa:ani da naay handaan ngani nawed abaya da mga nagpaparaoy. 9 Kaya koyo paraoy sa mga danay-danayan goraan da- koyo paparaoyon sa handaan da boo koyo akitan. 10 Paraoy ngani- sa mga danay-danayan da mga katiwalaan da- pinaanggat da boo kora akitan, pad daet da- pad piya. Da- nakapno mga mamparaoy da rado handaan. 11 Semled ag hadi para ban-awan ag mga mamparaoy, da- konin akitan sata da sai ka iraya wala bado panhandaan. 12 Iya amba, Abyan, kaytang kawo towa semled nawed agsool bado panhandaan? Nawed gidte katebag ag iraya. 13 Kaya sinabi ag hadi sa mga tagapamanawen amba, Koyo gaposon da konin alima da- paa da- benglayen sa kadeleman sa lowas. Sata ngani- batay magpakongkong da- batay mangoriet da ngipen. 14 Panawen maoson da pinatwagan ngani nawed te maoson da nahidang. 15 Mangadang da mga Parisiyo da- kora mamagpakana no omaning iya ba kora batay inabel sa konin mga tokawanan. 16 Kaya kora pinaparaoy sa konin da kalaati kora mga nagtod-an kaanggat din da kalaati mga kapanig koyay Hirodis. Kora sinabi amba, Tagatodo, yamen amatangan kawo ba mateped gidte, da- komo nagtodo da kaliyagan Diyos para sa yamen biyag toltol sa katotohanan. Nawed bali sa komo kayno nakay da remrem mga iraya, panawen pariho gidte da komo serey sa mga iraya. 17 Nakay da komo remrem? Toltol dia sa Bilin da tomaboy bohis sa Sisar, e nawed? 18 Ngani amatangan laki Hisos da kora daet ka pakana, kaya konin sinabi amba, Koyo mga mapalawlaw! Kaytang koyo alabet ako naabel? 19 Ako paban-awan ag kwarta pambohis. Da- iya ba kora Pinaban-Aw sai ka kwarta naba. 20 Kora tinanong laki Hisos, Tawa ladawan da- ngaran da nasorat towa? 21 Kora amba, Sa Sisar ngani-. Kaya konin sinabi sa kora, No amba, koyo taboyon sa Sisar da sa Sisar, da- sa Diyos da sa Diyos. 22 Mamagtaka kora maraw kora arngeyan naba, da- kora mangalis:sani. 23 Ag aldaw din naba pabali sa laki Hisos da kalaati Sadosiyo. Kora ba nawed agpaniwala amba da mga nangatay ba batay:yakay nabiyag. Kora sinabi amba, 24 Tagatodo, tindo laki Moysis amba, No natay da sai ka lalaki wala onga, da konin arian e kakaan ba kailangan mangisawa:akay sa balo para maki onga para sa natay. 25 Sa yamen ba maki talkakaan pito. Mangisawa ag panganay da- natay wala onga, kaya ag kon sawa ba sa konin:nakay arian. 26 Amba din da nangyadi sa ikadarwa, sa ikatatlo anggan sa ikapito. 27 Maraw kora natay:ya boo ba natay:ya din ag babayi. 28 Sa odas batay:yakay nabiyag da mga nangatay ba tawa kaya sa pito da batay konin sawa, panawen iya ba sawa kora boo. 29 Laki Hisos ba tembag sa kora amba, Koyo ba nawed gidte raoy, panawen nawed koyo amatangan da tindo sa Banal ka Kasoratan kayno ag kapangyadihan Diyos. 30 Panawen sa batay:yakay nabiyag ba da mga iraya ba nawed:da tay magpangisawa e nagpal-isawa. Kora ba makay:ya din mga anghil sa soksokowan. 31 Para kay sa batay:yakay nangabiyag da mga nangatay, nawed dapo ma koyo nabasa da sinabi Diyos sa koyo amba, 32 Ako da Diyos koyay Abraham da- Isaak da- Hakob. Kaya da Diyos ba nawed Diyos mga nangatay no nawed ba Diyos mga biyagan. 33 Da- maraw naba ba arngeyan mga iraya ba kora ba mamagtaka gidte sa konin tindo. 34 Magkarimponan da mga Parisiyo da- mamparaoy sa laki Hisos maraw kora abaritaan laki Hisos ba konin napatangele da mga Sadosiyo. 35 Da- sai sa kora, sai ka madonong gidte sa Bilin mga Diw da magtanong sa laki Hisos para iya porbahan. 36 Tagatodo, nakay da mahalaga gidte ka bilin sa Bilin tinaboy sa laki Moysis? 37 Laki Hisos ba tembag amba, Komo palayawen da komo Panginoon Diyos boo poso, boo gisarem da- boo remrem. 38 Naba da monaan da- da mahalaga gidte sa boo mga bilin. 39 Tiya kay da ikadarwa : Komo palayawen da komo kapowa iraya makay din ag komo sadiri. 40 Da darwa ka bilin naba ba naba gidte da eket boo bilin tinaboy sa laki Moysis da- boo sinorat mga tagabarita ibat sa Diyos. 41 Sa odas magrimpon da mga Parisiyo ba kora ba tinanong laki Hisos amba, 42 Sa koyo remrem ba da Kiristo ba tawa kaapoan? Kora tembag amba, Hadi Dabid. 43 Sinabi laki Hisos, No amba, kaytang hadi Dabid ba omawit sa konin amba Panginoon, sa paremrem Ispirito Banal? Panawen amba da konin sabi, 44 Sinabi Panginoon sa naay Panginoon amba, Kawo tomongka sa naay kanan dako kapet anggan da mga komo kalaban ba naay:yani napasagalem sa komo mga paa. Naba:a ngani. 45 Kaya, no hadi Dabid:da din da omawit sa konin amba Panginoon ba omaning batay asabi amba Kaapoan hadi Dabid da Kiristo? 46 Kayno sai sa kora ba wala katebag da- ibat saba ba wala:a mangahas magtanong dapo sa konin.
1 Maraw kalbas sinabi laki Hisos sa kaosonan mga iraya da- sa konin mga nagtod-an amba, 2 Da mga kamatangen sa Bilin da- da mga Parisiyo da nagkilala tagapapawa sa mga bilin tinaboy sa laki Moysis. 3 Kaya koyo panawenen da kora mga nagtodo da- koyo toltolon da kora mga bilin. Ngani ayaw koyo agtoladan da kora mga nagpanawen panawen nawed kora nagpanawen da kora nagpangadar. 4 Kora ba magbegkes mga mabyat da- mahidap babaen da- kora nagpapas-an sa mga iraya. Ngani kayno solo ngani ba kora dayo tomolong sa nagbaba mga naba. 5 Kora alabet akitan mga iraya da kora nagpanawen. Kora magpalapad kora mga palagyanan Tokawanan Diyos kora binalikeskes sa kora kiray da- kora nagpaaba da kora rawraway sa kora golanit. 6 Da kora alabet ba mga tongkaan mga naggalang sa mga handaan da- da mga pili ka tongkaan sa mga balay pagtiponan mga Diw. 7 Da kora din alabet ba kora beryaan sa mga pamiliyan da- awiten mga iraya, tagatodo. 8 Ngani koyo kay ba ayaw koyo paawit tagatodo, panawen sai ngani da koyo Tagatodo da- koyo boo ba talkakaan. 9 Da- ayaw koyo ag-awiten apang da tawa man iraya towa sa paranawan, panawen sai ngani da koyo Apang, naba da koyo Apang sa soksokowan. 10 Ayaw din koyo paawit poon, panawen sai ngani da koyo Poon, naba ba da Kiristo. 11 Da makapangyadihan sa koyo ba kailangan koyo tagapamanawen. 12 Da iya magpakaatatas ba batay pinaababa da- da iya magpakaababa kay ba batay pinaatatas. 13 Amba laki Hisos, Daet gidte sa koyo, mga kamatangen sa Bilin da- mga Parisiyo! Koyo ba mga mapalawlaw! Koyo naghadangan da mga iraya para kora ba nawed onga Diyos. Koyo dayo:a onga Diyos, koyo dapo din naghadangan da mga alabet onga Diyos. 15 Daet gidte sa koyo, mga kamatangen sa Bilin da- mga Parisiyo! Koyo ba mga mapalawlaw! Koyo magribok-ribok sa mga lopa da- dagat para magsarak batay aranggot kayno sai sa koyo pag-isarig. Da- no iya naranggot:tani ba iya ba koyo nagpanawen kadarwa dapo kadaet sa koyo da- bagay gidte sa kapadosahan labi dapo sa koyo. 16 Daet gidte sa koyo, mga raprap tagaonaan! Koyo nagtodo amba, Da iya manompa sa balay Diyos ba wala nakayman naba, ngani da iya kay manompa sa ginto sa balay Diyos ba kailangan konin tepden da konin sompa. 17 Koyo mga raprap da- mga tarengteng! Alin da mahalaga : da ginto e da balay Diyos ag magpabanal sa ginto? 18 Koyo din nagsabi amba, Da iya manompa sa arengan mga hayop ba wala nakayman naba, ngani da iya kay manompa sa taboy sa arengan ba kailangan konin tepden da konin sompa. 19 Koyo mga raprap! Alin da mahalaga : da taboy e da arengan ag magpabanal sa mga taboy? 20 Kaya ngani- da iya manompa sa arengan ba manompa:a din sa boo taboy sata. 21 Amba din, da iya manompa sa balay Diyos ba manompa:a din sa magpamataw sata. 22 Da- da iya manompa sa soksokowan ba manompa:a din sa tongkaan Diyos da- sa magtongka sata. 23 Daet gidte sa koyo, mga kamatangen sa Bilin da- mga Parisiyo! Koyo ba mga mapalawlaw! Koyo nagtaboy da ikasampo ka eray baranoy, mostasa da- tanglad ngani nawed kay koyo nagtoltol da mahalaga gidte ka adar sa Bilin : naba da kataldengan, kayawtean da- pag-isarig. Naba gidte da kailangan panawenen ngani ayaw alingwanan panawenen din ag Roma. 24 Koyo mga raprap tagaonaan! Koyo nagsala da mga alek-ek ngani koyo kay nagtelen da anwang. 25 Daet gidte sa koyo, mga kamatangen sa Bilin da- mga Parisiyo! Koyo ba mga mapalawlaw! Koyo gidte nag-oyas da lowas koyo ineman da- palato, ngani da galem kay naba ba kapno nakayman ibat sa koyo ba ananakaw gidte da- wala kapigilan. 26 Raprap ka Parisiyo! Komo dapo linisen da galem ineman da- palato para da lowas ba malinis din. 27 Daet gidte sa koyo, mga kamatangen sa Bilin da- mga Parisiyo! Koyo ba mga mapalawlaw! Koyo ba makay mga lebengan binarnisan mapoti, pad maganda gidte sa lowas, ngani da galem kay ba kapno karokasan da- bongkalo mga nangatay. 28 Makay din naba koyo! Sa serey mga iraya ba mataldeng gidte koyo, ngani da totoo ba koyo kapno gidte kapalawlawan da- kadaetan. 29 Daet gidte sa koyo, mga kamatangen sa Bilin da- mga Parisiyo! Koyo ba mga mapalawlaw! Koyo nagpanggaw-an lebengan da mga tagabarita ibat sa Diyos da- koyo nagpaganda da mga lebengan mga iraya mataldeng. 30 Da- koyo nagsabi amba, No yamen disin ba biyagan ag odas yamen pangapoan ba yamen nawed batay omanggat sa mga bomono sa mga tagabarita ibat sa Diyos. 31 Sa koyo sabi naba ba koyo:wa din da magpaban-aw amba koyo ba mga kaapoan mga agpamono mga tagabarita ibat sa Diyos. 32 Hala! Koyo:wa yadien da inompisahan koyo mga pangapoan! 33 Koyo mga otan da- kaosonan mga orpong! Omaning koyo batay kaalas sa kapadosahan wala arasan? 34 Kaya ngani- ako ba batay gidte magpaidaw sa koyo mga tagabarita da- mga madonong da- mga tagatodo mga Bilin Diyos! Koyo batay binono da kalaati da- da Roma kay ba batay pinako sa kodos. Da Roma dapo ba batay hinaplit sa koyo mga balay pagtiponan da- batay nangagak sa tayma goraan. 35 Panawen saba ba batay mangkaneg sa koyo da padosa sa mamono sa boo mataldeng ka iraya sa boo paranawan, ibat sa mono sa mataldeng ka laki Abil anggan sa mono sa laki Sakariyas, ag onga laki Barakyas. Iya koyo binono sa palteng-anan arengan da- rado banal balay Diyos. 36 Naay gidte nagsabi sa koyo, Da padosa para sa mga naba ba batay mangkaneg sa mga iraya sa odas tiya. 37 Laki Hisos ba magsabi dapo amba, Koyo mga taga Hirosalim! Koyo mga taga Hirosalim! Koyo nagbono da mga tagabarita ibat sa Diyos da- nagpamato da mga pinaparaoy Diyos sa koyo! Kaomaning:nga kaoson naay alabet koyo ba rimponon, makay ag maglemlem sai ka onayan sa konin mga sisiw, ngani koyo dayo! 38 Kaya batay:ya gidte pinabayaan Diyos da koyo pamatawan. 39 Naay nagsabi sa koyo, Ako ba nawed:da batay koyo akitan anggan rateng da odas koyo sabiyen amba, Parongawan kay ngani- da towa magparaoy sa ngaran Panginoon.
1 Laki Hisos ba lomwas sa balay Diyos. Maraw iya ba batay:ya mangadang ba pabali da konin mga nagtod-an da- kora tindo sa konin da nagyadi lakol ka balay Diyos. 2 Ngani sinabi laki Hisos amba, Koyo akitan da balay Diyos tiya? Naay gidte nagsabi sa koyo, Batay rateng da aldaw wala batay natra bato sa ngaway sai:yakay ka bato. Da boo ba batay nangaregnas. 3 Sa bogsor Kaolibowan laki Hisos. Sa odas iya ba magtongka sata ba magkaborboran iya tinanong konin mga nagtod-an amba, Kaagot batay mangyadi da mga nakayman naba? Nakay da batay tandaanan sa kawo batay towa paraoy da- sa arasan paranawan. 4 Laki Hisos ba tembag amba, Koyo magdahan para koyo nawed pinalingo tawa man! 5 Panawen maoson da batay towa sa naay ngaran da- batay magsabi amba, Ako da Kiristo! Da- maoson da kora batay liningo. 6 Koyo batay karngey mga labanan da- batay din kabarita para sa mga labanan, ngani koyo ayaw nabalhag. Kailangan gidte mangyadi mga naba ngani nawed dapo naba da arasan. 7 Panawen batay mamaglabanan da mga lasyon da- batay din mamaglabanan da mga kahadian. Maki batay tagbayog da- mga lindol sa Roma-Roma ka poro. 8 Da boo naba ba makay ompisa batay mamreg. 9 Sa mga odas naba, koyo batay namaisan boo kairayaan panawen sa naay, da- batay ginaladgad para pahidapan da- bonoon. 10 Maoson da batay paawak sa kora pag-isarig da- batay abaisan sa sai-sai. Batay inaboso tayma sai da konin kapowa da- pinaabel. 11 Maoson da batay magpasoli tagabarita da- batay nanlingo da kaosonan. 12 Panawen omoson:na da kadaetan ba da palayaw maoson ba batay mandimla. 13 Ngani da batay magtiyaga anggan arasan ba iya da batay naribri. 14 Da- batay pinangadar da Pirmida ka Barita naba para sa batay maghadi da Diyos sa boo paranawan para naba ba abaya tabangen boo mga lasyon bayo batay rateng da arasan boo nakayman. 15 Kaya ngani- koyo batay akitan magpatindeg sa banal ka poro da kabalhag wala ikadarwa ag nagtodyo laki Danyil, ag tagabarita ibat sa Diyos (remremen ag magbasa para amatangan da alabet sabiyen naba!). 16 Sa odas naba ba da mga iraya sa Hodiya ba kailangan domalagan sa kabogsoran. 17 Da iya kay sa awakan ba ayaw:wa lompot dapo para gomaro kayno nakay sa konin balay. 18 Da- da iya sa agayen ba ayaw:wa moli para gomaro konin bado. 19 Makayawte da mga bonting da- da mga magpadodo sa odas naba! 20 Koyo daranginen para ayaw sa odas tagdimla da- sa Aldaw Magpahinga da koyo domalagan. 21 Panawen sa odas naba ba da mga iraya ba batay kadanas masyado gidte kahidapan nawed tang adanasan ibat rinarang da paranawan anggan mona, da- nawed:da batay adanasan dapo kayno kaagoton man. 22 Da- no nawed pinakabeste Diyos da odas naba ba wala gidte batay naribri. Ngani panawen sa mga hinidang ba konin batay pinakabeste da odas naba. 23 No maki magsabi sa koyo amba, Koyo ban-awan! Towa da Kiristo! e, Saba iya! ba koyo ayaw agpaniwala. 24 Panawen maki batay magpasoli Kiristo da- tagabarita. Kora batay magpaban-aw mga katakataka ka tandaanan da- mga kapanggilalas para lingowen anggan ag mga hinidang Diyos no abaya. 25 Koyo gidte pakarngeyan! Monaan:na naay sinabi sa koyo. 26 Kaya no maki magsabi sa koyo amba, Sata iya sa poro nawed apirmihan iraya ba ayaw sata paraoy. No maki kay magsabi amba, Iya towa sa rado ba koyo ayaw maniwala. 27 Panawen no kaomaning kabilis komislap da koldap ibat sa sirangan anggan sa kalnedan ba makay din da magparaoy towa da Onga Iraya. 28 No saan da bangkay ba sata din magkarimpon da mga sambangan. 29 Maraw kadalan:na te da mga kahidapan gidte naba ba batay mandelem da aldaw, da- nawed:da batay Romawa da bolan, batay nangaragrag ibat sa langit da mga magirem da- batay manartaroy da boo kapangyadihan sa kalaw-awan. 30 No kadalan:na naba ba batay akitan sa langit da tanda sa batay rateng da Onga Iraya, da- batay mangagpangpaw da boo mga lasyon. Kora batay akitan da Onga Iraya sa mga yaong paparaoy towa maki kapangyadihan da- kalakolan gidte Diyos. 31 Sa maeyat ka beet bodyong ba konin batay sinogo da konin pad anghil sa apat ka solok paranawan da- kora batay rinimpon da konin mga hinidang ibat sa boo mga poro. 32 Koyo remremen da alabet sabiyen pag adar ibat sa poon igos : no magpamongkolan da- magpanalbos:sani da pad sanga ba koyo amatangan bali:yani da tag-adaw. 33 Amba kay din, no koyo:wa akitan da boo nangyadi naba ba koyo amatangan bali:ya gidte da odas iya paraoy towa. Iya ba sa song-awan:nani. 34 Naay gidte nagsabi sa koyo, Nawed dapo batay nangatay da mga iraya nagkabiyag sa odas tiya bayo nangyadi da boo naba. 35 Batay nawala da langit da- da lopa ngani da naay kay tokawanan ba nawed gidte batay nawala. 36 Ngani wala gidte kamatang sa aldaw kayno sa odas naba, kayno mga anghil sa soksokowan, kayno da Onga. Da Apang ngani da kamatang. 37 Da batay rateng da Onga Iraya ba makay din pag rateng da oyaw ag odas koyay Noyi. 38 Ag odas naba da mga iraya ba mamagkain, mamag-inem, magpangisawa da- nagpal-isawa, anggan sa aldaw semled sa dawong kora Noyi. 39 Rateng da oyaw nawed:da kora amatangan da- kora boo ba nangaspo. Amba din da batay mangyadi sa batay rateng da Onga Iraya. 40 Sa odas naba ba maki darwa ka lalaki magpamanawen sa agayen; da sai ba batay ginaro da- da sai kay ba batay inogonan. 41 Maki darwa ka babayi magpal-anggat sa magbayo; batay ginaro da sai da- batay inogonan da sai. 42 Kaya koyo magbantay gidte, panawen nawed koyo amatangan no nakay pag aldaw batay rateng da koyo Panginoon. 43 Koyo gidte remremen! No amatangan ngani ag koyay sa sai ka balay no nakay pag odas madlem da batay rateng da agpanakaw ba iya batay magbantay da- nawed batay konin pinabayaan sinled da konin balay. 44 Kaya koyo handa boo odas, panawen batay rateng da Onga Iraya sa odas nawed koyo nag-asahan. 45 Tawa da matepeden da- kamatangen ka tagoanggat. Iya da nagpamahala konin amboy-amboyan sa Roma ka tagoanggat, para kora pakanen pamangnen sibay sa aldaw-aldaw. 46 Angasan da tagoanggat naba no iya aratnganan magpanawen makay naba sa odas rateng konin amboy-amboyan! 47 Naay gidte nagsabi sa koyo, Iya ba batay pinamahala konin amboy-amboyan sa boo konin mga nag-apo. 48 Ngani no daet kay da tagoanggat naba ba batay konin rinemrem sa konin sadiri amba, Batay dapo maagot da naay amboy-amboyan bayo paoli, 49 da- iya batay:ya maghaplit sa konin mga kapowa tagoanggat, da- mamangan da- minem anggat sa mga anginginem kalibed. 50 Batay paoli da amboy-amboyan ag tagoanggat naba sa aldaw nawed konin nag-asahan da- sa odas nawed konin amatangan. 51 Masyado gidte da padosa konin amboy-amboyan sa konin, da- batay pinaanggat sa mga mapalawlaw. Sata:a ngani- da batay agpakongkong da- batay mangoriet da mga ngipen.
1 Da maghadi da Diyos ba batay makay sampo ka daraga lomwas para mandarosog sa lalaki batay kinasal. Da tayma sai ba maki nagbaba solo-. 2 Da lima sa kora ba tarengteng da- da lima kay ba kamatangen. 3 Da mga tarengteng ba agbaba kora solo- ngani nawed agbalon langis. 4 Ngani da mga kamatangen kay ba maki nagbaba palagyan langis poyida dapo sa kora solo-. 5 Maagot bayo rateng da lalaki batay kinasal kaya kora boo ba magrongronga da- nangakalek. 6 Ngani maraw tenga:a madlem ba maki sai ka manokawanan maeyat amba, Towa:ani da lalaki batay kinasal. Koyo lomwas:sani da- darosogon. 7 Mangon ag sampo ka daraga da- pinakapiya da kora solo-. 8 Sinabi ag mga tarengteng sa mga kamatangen amba, Yamen kay koyo pakanen te langis. Batay:ya natay da yamen mga solo-. 9 Tembag da mga kamatangen, Nawed abaya! Kaaram nawed sibay sa tamo boo. Da piya ba koyo paraoy sata sa tindahan da- bomili para sa koyo. 10 Kaya mangadang:ngani da lima ka daraga tarengteng. Kora ba magbili dapo ba rateng:nga da lalaki batay kinasal. Da lima handa:ani ba konin:na kaanggat semled sa rado kasalan, da- linangkeb da sakbawan. 11 Maraw kalbas, rateng kay da lima ka daraga tarengteng. Kora amba, Koyay! Koyay! Komo kay bokaan da sakbawan para sa yamen. 12 Ngani iya ba tembag amba, Naay gidte nagsabi sa koyo, koyo nawed naay kilala. 13 Kaya koyo magbantay panawen nawed koyo amatangan da aldaw, kayno da odas batay rateng da Onga Iraya. 14 Da batay maghadi da Diyos ba makay sai ka iraya magparaoy sa Roma ka poro. Kaya konin pinatwagan da konin pad tagoanggat da- konin kinatiwala sa kora da konin mga nag-apo. 15 Konin pinakan kwarta da tayma sai toltol sa konin-konin akayanan : konin pinakan da sai lima ka ribo ka kwarta ginto, da sai kay ba darwa da- da sai dapo ba sai. Maraw kalbas ba iya mangadang. 16 Agad mangadang da tomabang lima ka ribo da- iya magligosyo anggan omoson lima dapo ka ribo. 17 Amba kay din da tomabang darwa ka ribo ba omoson darwa dapo ka ribo. 18 Ngani da tomabang kay sai ka ribo ba mangadang da- komali da- tinago da kwarta konin amboy-amboyan. 19 Maraw maagot:tani ba paoli:akay da amboy-amboyan mga tagoanggat naba da- kora ba konin tinanong para sa kwarta tinaboy sa kora. 20 Pabali ag tomabang lima ka ribo nagbaba da sampo ka ribo. Iya amba, Amboy-amboyan, tiya da lima ka ribo komo tinaboy sa naay da- tombo dapo lima:akay ka ribo. Tiya:ani! 21 Sinabi sa konin ag amboy-amboyan, Piya gidte! Matepeden da- piya ka tagoanggat! Panawen kawo ba mateped sa ibente ka halaga, kawo batay pinamahala sa lakol ka halaga. Kawo ba kaeray sa naay kasyagan! 22 Pabali din da tomabang darwa ka ribo da- iya amba, Amboy-amboyan, tiya da darwa ka ribo komo tinaboy sa naay da- tombo dapo darwa:akay ka ribo. 23 Sinabi konin amboy-amboyan amba, Piya gidte! Matepeden da- piya ka tagoanggat! Kawo mateped sa ibente ka halaga, kaya kawo batay pinamahala sa lakol ka halaga. Kawo ba kaeray sa naay kasyagan! 24 Da- pabali kay da tomabang sai ka ribo. Iya amba, Amboy-amboyan, naay amatangan kawo ba mahigpit gidte. Kawo mag-ani sa nawed komo inaskan, da- kawo ba mag-ipon ag nawed komo sinabogan. 25 Ako aliman sa komo kaya naay binaon da komo kwarta. Tiya da komo sai ka ribo. 26 Tembag da konin amboy-amboyan amba, Daet da- latod ka tagoanggat! Komo ma amatangan amba ako ba mag-ani sa nawed naay inaskan da- ako ba mag-ipon ag nawed naay sinabogan? 27 No amba ba kaytang nawed komo pinalagay sa bangko. Sa ako rateng ba ako maki batay disin naggaro tobo. 28 Kaya konin sinabi sa konin mga tagoanggat amba, Koyo gawen sa konin da sai ka ribo da- taboyon sa maki sampo ka ribo. 29 Panawen da iya maki:yani ba batay dapo pinakan, da- batay sagana. Ngani da wala kay ba kayno ag ibente sa konin ba batay dapo ginaro. 30 Koyo benglayen sa kadeleman sa lowas da tagoanggat wala kaparosan. Sata:a batay magpakongkong da- batay mangoriet da mga ngipen. 31 Batay rateng da Onga Iraya sa konin kalakolan, kaanggat da boo anghil, da- batay tomongka sa konin madangal ka tongkaan hadi. 32 Sa odas naba, batay rinimpon sa konin ropangan da boo mga lasyon. Kora ba konin batay binokod-bokod makay ag nagpanawen sai ka tagaalaga sa mga topa da- mga kambing. 33 Konin batay pinalagay da mga mataldeng ka iraya makay mga topa sa konin dako kanan da- sa kaliwa kay da mga Roma makay mga kambing. 34 Da- batay sinabi ag hadi sa mga sa kanan dako amba, Apora:a koyo, koyo mga pinarongawan naay Apang! Koyo semled:dani sa kahadian Diyos da- tabangen da hinanda para sa koyo ibat dapo rinarang da paranawan. 35 Panawen ako ba nabayog da- koyo pinakain, ako makainem da- koyo pinainem. Ako ba sai ka manalyowan da- koyo tinabang. 36 Ako ba wala asool da- koyo pinasoolan, ako agkasakit da- koyo inalagaan; ako napiriso da- koyo pinaraoyan. 37 Batay tembag da mga mataldeng amba, Panginoon, nakay pag odas yamen akitan kawo nabayog da- kawo yamen pinakain, e makainem da- yamen pinainem? 38 Nakay pag odas yamen akitan kawo manalyowan da- yamen tinabang e wala asool da- yamen pinasoolan? 39 Da- nakay ag odas kawo yamen akitan maki maskit e sa pirisohan da- yamen dinaraw? 40 Batay sinabi ag hadi amba, Naay gidte nagsabi sa koyo, Maraw koyo pinanawen naba sa sai ka naay arian, kayno sa ibente sa boo naba, ba sa naay koyo pinanawen naba. 41 Da- konin kay batay sinabi sa mga sa kaliwa dako amba, Koyo paadayo sa naay, koyo pad sinompa! Koyo batay sa apoy nawed tay natay hinanda sa aponin kadaetan da- sa konin pad anghil. 42 Panawen ako ba nabayog ngani nawed koyo pinakain, da- makainem ngani nawed koyo pinainem. 43 Ako ba sai ka manalyowan ngani nawed koyo tinabang; ako ba wala:ani asool ngani nawed koyo pinasoolan. Ako ba maki maskit da- sa pirisohan ngani nawed koyo dinaraw. 44 Da- kora batay din tembag amba, Panginoon, nakay pag odas kawo yamen akitan nabayog, makainem, sai ka manalyowan, wala:ani asool, maki maskit e sa pirisohan, da- kawo nawed yamen tinolongan? 45 Da- batay kay sinabi sa kora ag hadi amba, Naay gidte nagsabi sa koyo, Maraw nawed koyo tinolongan da sai sa mga ibente ka naay arian ba ako da nawed koyo tinolongan. 46 Da mga naba ba batay sa kapadosahan wala arasan, ngani da mga mataldeng kay ba batay tomabang biyag gidte wala arasan.
1 Maraw laki Hisos ba kalbas:sa magtodo mga boo naba ba konin sinabi sa konin mga nagtod-an amba, 2 Makay pag koyo amatangan, darwa:a ngani ka aldaw ba odas:sa Paskwa, ag kasayahan mga Diw. Batay inaboso da- pinaabel ag Onga Iraya para pakoon sa kodos para natay. 3 Sa odas naba ba da mga koyay magpamanawen sa balay Diyos da- mga poon balayan mga Diw ba mamagrimpon sa balay ag koyay lakol magpamanawen sa balay Diyos da ngaran ba koyay Kaipas. 4 Kora binalak nawed amatangan Roma para paabelen laki Hisos da- pabonoon. 5 Ngani kora amba, Ayaw sa aldaw kasayahan, kaaram magkagolo gidte da mga iraya. 6 Maraw ina, laki Hisos ba sa goraan te Bitanya sa balay laki Simon ag panyakiten. 7 Sa odas iya magkain, pabali da sai ka babayi maki nagbaba sognoan bato da ngaran ba alabastro kapno mahal gidte ka banglo. Konin binobo naba sa olo laki Hisos. 8 Maraw kora akitan naba ba abaisan kay da konin mga nagtod-an. Kora amba, Kaytang inamba da banglo naba? 9 No disin pinabili sa lakol ka halaga da- tinaboy sa mga mahidapen da kabayadan! 10 Amatangan laki Hisos da kora nagsabi kaya iya amba, Kaytang koyo nagparongkot ag babayi naba? Piya ag konin pinanawen naba sa naay. 11 Boo odas koyo kaanggat da mga mahidapen, ngani ako ba nawed batay koyo kaanggat sa boo odas. 12 Da iya magbobo banglo sa naay lawas ba maghanda sa ako batay limbeng. 13 Naay gidte nagsabi sa koyo, Kayno saan sa boo paranawan batay pinangadar da Pirmida ka Barita naba ba batay din nanoltol da konin pinanawen naba sa magremrem sa konin. 14 Laki Hodas Iskariyoti, sai din sa labindarwa ka nagtod-an, ba paraoy sa mga koyay magpamanawen sa balay Diyos. 15 Iya amba, Nakay da koyo batay tinaboy sa naay no koyo naay tolongan laki Hisos ba naabel? Iya ba kora pinakan tatlompo ka kwarta pilak. 16 Ibat saba laki Hodas ba somarak:kani pagkaodas para abosowen da- paabelen laki Hisos. 17 Rateng:ngani da monaan aldaw kasayahan para mamangan tinapay wala pampahilab. Pabali sa laki Hisos da konin mga nagtod-an da- magtanong amba, Saan komo alabet yamen handaen da tamo tal-aponan pamaskwa? 18 Laki Hisos ba tembag amba, Koyo paraoy sa goraan lakol da- koyo saraken ag iraya naba. Koyo sabiyen sa konin amba, Makay tiya da nagpasabi ag tamo Tagatodo : Bali:ya da naay odas. Ako da- da naay mga nagtod-an ba batay mangan sa komo balay tal-aponan pamaskwa. 19 Tinoltol ag mga nagtod-an da bilin laki Hisos, da- kora hinanda da tal-aponan pamaskwa. 20 Maraw madlem naba, laki Hisos ba tomongka para mamangan kaanggat ag labindarwa ka konin nagtod-an. 21 Sa odas kora agkain ba laki Hisos ba magtokawanan amba, Naay gidte nagsabi sa koyo, Sai sa koyo ba batay omaboso da- batay pomaabel sa naay. 22 Nangarongkot gidte da konin mga nagtod-an da- tayma sai ba magtanong sa konin amba, Ako dia, Panginoon? 23 Iya tembag, Da demede tinapay sa talambo naay din nagdedean ba iya da batay omaboso da- pomaabel sa naay. 24 Da Onga Iraya ba batay natay, toltol sa nagkasorat, ngani daet gidte sa batay pomaabel sa konin! Piya dapo no nawed:da pinreg da iraya naba. 25 Laki Hodas, ag batay pomaabel sa konin ba magtanong din amba, Tagatodo, ako:wa dia? Laki Hisos ba tembag, Kawo da magsabi naba. 26 Sa odas kora magkain, laki Hisos ba gomaro tinapay da- maraw kapasalamat:tani sa Diyos ba konin pinisang da- tinaboy sa konin mga nagtod-an amba, Koyo gawen tiya da- kainen; tiya da naay lawas. 27 Maraw kalbas ba konin ginaro da ineman, iya ba magpasalamat da- tinaboy sa kora amba, Koyo boo ba minem tiya. 28 Panawen tiya da daya magpatibay sa kasaiyan Diyos sa konin mga kairayaan, da naay daya batay nabobo panawen sa kaosonan, para apatawad da mga kadaetan. 29 Ngani naay nagsabi sa koyo, Ako nawed:da batay minem tiya pag sapa obas anggan nawed tamo batay anggat-anggat magpal-ineman ag bayo ka inemen sa odas batay gidte maghadi naay Apang. 30 Da- maraw kora kaigway sai ka igway papodi sa Diyos ba kora paraoy sa bogsor Kaolibowan. 31 Laki Hisos ba magsabi sa kora amba, Sa madlem tiya koyo boo ba batay mandalagan panawen sa batay mangyadi sa naay. Panawen nagkasorat sa Banal ka Kasoratan amba, Da Diyos ba amba, Naay batay sinampok da tagaalaga anggan natay da- batay manambolat da mga topa naay topahan. Naba:a ngani. 32 Ngani no ako nabiyag:gakay, ako batay monaan sa koyo sa Galiliya. 33 Laki Pidro ba tembag, Kayno mandalagan:na da mga Roma ba kawo ba nawed gidte naay batay pinabayaan. 34 Tembag sa konin laki Hisos amba, Naay gidte nagsabi sa komo, Sa madlem din tiya bayo mangarang-it da manok ba katatlo ako komo batay tinanggiyan. 35 Ngani sinabi gidte laki Pidro amba, Kayno ako ba kailangan din bonoon panawen ako komo kaanggat ba kawo nawed gidte batay naay tinanggiyan. Amba din da sinabi boo nagtod-an. 36 Pinaanggat laki Hisos da konin mga nagtod-an sa sai ka poro nag-awit Hitsimani. Konin sinabi sa kora amba, Koyo towa ngani tomongka; ako batay magdarangin sata te dako. 37 Konin pinaanggat laki Pidro da- da darwa ka onga laki Sibidiyo. Da- ibat saba ba iya nagkarongkot da- nagkaalognoyan:na gidte. 38 Konin sinabi sa kora, Da naay poso ba kapno gidte hidap makay ako ba batay:ya natay! Koyo magpanya towa da- ayaw magkalek anggat sa naay. 39 Maraw iya ba sa adayo:a te iya ba lomohod da- magdarangin amba, Naay Apang, no abaya ba paadayoon kay sa naay da kahidapan lakol tiya. Amba man, ayaw da naay alabet no nawed ba da komo alabet da mangyadi. 40 Iya paoli:akay sa kora tatlo da- kora konin aratnganan akalekan. Kaya konin sinabi sa laki Pidro amba, Nawed gidte nga mana koyo kabantay anggat sa naay kayno sai ngani ka odas? 41 Koyo ayaw agkalek da- magdarangin para koyo nawed nadaeg togso. Da ispirito ba alabet gidte disin ngani da akayanan kay iraya ba mahina. 42 Iya ba omadayo:akay da- magdarangin amba, Naay Apang, no nawed abaya nawed ako domalan sa kahidapan naba ba mangyadi da komo alabet. 43 Iya paoli:akay sa kora da- konin:nakay aratnganan nangaakalekan, panawen kora ba nagkakalek gidte. 44 Katatlo konin inogonan da tatlo ka nagtod-an da- iya ba magdarangin:nakay da- naba din da sinabi. 45 Maraw kalbas magdarangin ba iya paoli:akay sa kora da- konin sinabi sa kora amba, Koyo dia akalekan dapo da- magpahinga? Rateng:nga da odas batay inaboso da- pinaabel da Onga Iraya sa mga makadaetan. 46 Koyo patindeg! Tamo:wani! Naba:ani da batay omaboso sa naay. 47 Laki Hisos ba magtokawanan dapo ba rateng:mga laki Hodas, sai sa labindarwa. Iya maki kaanggat maoson gidte ka iraya maki pad nagbaba pisaw da- pamogbog; kora ba pinaparaoy mga koyay magpamanawen sa balay Diyos da- mga poon balayan sa boo kairayaan. 48 Kora ba nawed dapo rateng sata ba tinaboy:ya ag batay omaboso da sai ka tanda amba, Da naay batay inamo ba iya:ani. Koyo abelen. 49 Kaya agad laki Hisos ba pinabaliyan laki Hodas da- binerya amba, Kawo mana, Tagatodo! da- inamo. 50 Sinabi sa konin laki Hisos, Abyan, komo:wa panawenen da komo alabet. Da- iya ba pinabaliyan mga iraya da- dinosmogan. 51 Lomangso pisaw da sai sa mga kaanggat laki Hisos da- konin pinalang da tagoanggat ag koyay lakol magpamanawen sa balay Diyos, da- tinarigbong da kon talinga. 52 Sinabi laki Hisos sa konin, Komo soolon sa kaloban da komo pisaw! Panawen da aggamit pisaw ba sa pisaw din batay natay! 53 Nawed ma komo amatangan ako kaay-ay tolong sa naay Apang da- konin batay agad pinaparaoy sa naay labi dapo sa labindarwa ka kaban lakol mga anghil. 54 Ngani omaning batay natped da mga Banal ka Kasoratan magsabi amba da makay naba ba kailangan gidte mangyadi? 55 Sa odas din naba ba sinabi laki Hisos sa kaosonan amba, Ako dia ba daet ka iraya? Kaytang koyo towa agparaoy maki nagbaba pisaw da- pamogbog para ako ba abelen? Aldaw-aldaw ba ako magtongka sa balay Diyos para magtodo ngani ako nawed koyo inabel. 56 Ngani da boo naba ba nangyadi para natped da sinorat mga tagabarita ibat sa Diyos. Sa odas naba ba mandalagan da boo mga nagtod-an da- iya inogonan iya ngani. 57 Laki Hisos ba pinaanggat mga omabel sa konin sa balay koyay Kaipas, ag koyay lakol magpamanawen sa balay Diyos; sata:ani da mga kamatangen sa Bilin da- mga poon balayan mga Diw. 58 Laki Pidro ba tomongroy sa konin ngani sa badya adayo. Maraw rateng sa pamatawan ag koyay magpamanawen sa balay Diyos ba iya semled sa ayanmanan da- tomongka kaanggat mga magbantay para akitan no omaning da batay mangyadi. 59 Da mga koyay lakol magpamanawen sa balay Diyos pati din ag mga Roma sa hosayan lakol mga Diw ba magsarak kay mga sistigo batay mamosli laban sa laki Hisos, para iya ba apabono. 60 Ngani kora ba wala akitan kayno maoson da romopang da- somabi kaboslian laban sa konin. Maraw sa paoriyan ba maki darwa ka paropang 61 da- magsabi amba, Da iraya tiya ba amba, Naay abaya gerasen da lakol ka balay Diyos da- naay:yakay batay yinadi sa galem tatlo ngani ka aldaw. 62 Patindeg da koyay lakol agpamanawen sa balay Diyos da- sinabi sa laki Hisos amba, Kawo wala batay atebag sa padatos tiya sa komo? 63 Ngani laki Hisos ba nawed tembag. Kaya sinabi sa konin ag koyay lakol agpamanawen sa balay Diyos amba, Naay nagbilin sa komo sa ngaran Diyos biyagan, Kawo gidte mangako sa yamen no kawo da Kiristo, da Onga Diyos. 64 Laki Hisos ba tembag, Kawo:wa da agsabi naba. Naay kay nagsabi sa koyo, Ibat mona ba koyo batay akitan da Onga Iraya ag magtongka sa kanan dako Diyos Makapangyadihan, batay lompot sa ngaway sa mga yaong langit! 65 Maraw naba ba arngeyan ag koyay lakol magpamanawen sa balay Diyos ba konin sinagi da konin nagsool da- sinabi, Iya ba magtongayaw gidte sa Diyos. Nawed:da tamo kailangan da mga sistigo. Koyo akarngeyan da iya magtongayaw sa Diyos! 66 Omaning sa koyo remrem? Kora tembag, Kailangan iya ba natay! 67 Iya ba kora tinepayan sa kiray da- nagpanontok. Sinampal kay ag Roma 68 da- kora amba, No kawo da Kiristo, anta! Komo holaan no tawa da somampal sa komo! 69 Sa odas din naba, laki Pidro ba magtongka sa ayanmanan sa lowas. Iya ba pinabaliyan sai ka babayi tagoanggat da- magsabi amba, Nawed ma kawo ba kaanggat din laki Hisos ag taga Galiliya? 70 Ngani konin tinanggiyan sa ropangan boo amba, Ako ba wala amatangan sa komo nagsabi. 71 Laki Pidro ba paraoy sa tebteb sakbawan ayanmanan. Iya ba akitan sai dapo ka tagoanggat babayi da- sinabi sa mga sata, Da lalaki tiya ba kaanggat laki Hisos taga goraan Nasarit. 72 Iya ba tomanggi:yakay sa konin sompa amba, Nawed gidte ngani- naay kilala da iraya naba. 73 Nawed te kaagot ba pabali sa laki Pidro ag mga sata. Kora amba, Kawo sai nga ma sa konin! Yamen kilala sa kawo agtokawanan. 74 Iya tembag amba, Kayno ako natay ba nawed gidte naay kilala da iraya naba. Sa odas din naba ba mangarang-it da manok. 75 Da- aremreman laki Pidro da sinabi laki Hisos amba, Bayo mangarang-it da manok ba katatlo ako komo batay tinanggiyan. Iya lomwas da- masyado gidte mag-ogwang.
1 Maraw omaga:akay, mamagtokawanan da mga koyay magpamanawen sa balay Diyos da- mga poon balayan mga Diw no omaning batay apabono laki Hisos. 2 Iya ba kora ginapos kon alima da- pinaanggat da- tinaboy sa koyay Pilato, ag gobirnador. 3 Maraw akitan laki Hodas, ag pomaabel sa laki Hisos, laki Hisos ba hinosga katayan ba iya marongkot gidte da- pinaoli sa mga koyay magpamanawen sa balay Diyos da- sa mga poon balayan mga Diw da tatlompo ka kwarta pilak. 4 Konin sinabi amba, Ako maki gidte kadaetan. Naay pinaabel da iraya wala kadaetan. Kora tembag amba, Nakay da yamen pakiaram. Bahala kawo! 5 Binenglay laki Hodas da mga kwarta pilak sa galem balay Diyos bayo iya mangadang da- paeget. 6 Ginaro ag mga koyay magpamanawen sa balay Diyos da kwarta pilak. Kora sinabi amba, Nawed raoy sa Bilin da palagyen tiya sa palagyanan kwarta para gamiten sa lakol ka balay Diyos. Tiya ba kabayadan sa daya sai ka iraya natay. 7 Kora ba magkasai amba, Tiya ba bayaden sa agayen anggagawa keden para gawen lebengan mga manalyowan. 8 Kaya anggan mona ba da agayen naba ba nag-awit amba, Agayen Daya. 9 Sa amba ba natped da sinabi laki Hirimiyas, ag tagabarita ibat sa Diyos amba, Kora ginaro da tatlompo ka kwarta pilak naba da ginawa halaga kalaati mga taga Israil sa konin 10 da- binayad sa agayen anggagawa keden toltol sa binilin sa naay ag Panginoon. Naba:a ngani. 11 Laki Hisos ba pinaropang sa gobirnador da- tinanong amba, Kawo dia da hadi mga Diw? Laki Hisos ba tembag, Kawo da agsabi naba. 12 Ngani maraw iya dinatosan mga koyay magpamanawen sa balay Diyos da- mga poon balayan mga Diw iya ba nawed:da tembag. 13 Kaya sinabi sa konin koyay Pilato, Nawed ma komo akarngeyan da kaosonan kora nagpadatos sa komo? 14 Ngani laki Hisos ba nawed gidte din tembag kayno sa sai ngani ka padatos, kaya agtaka gidte da gobirnador. 15 Tayma Paskwa mga Diw, kaogalian ag gobirnador da magbal-an sai ka piriso, tawa man inaringi mga iraya. 16 Ag odas naba ba maki kilala sai ka piriso da ngaran ba Barabas. 17 Kaya maraw mamagkarimpon da mga iraya ba kora tinanong koyay Pilato amba, Tawa da koyo alabet naay bal-anan, laki Hisos Barabas e laki Hisos ag nag-awit Kiristo? 18 Amatangan koyay Pilato amba panawen sa kora aswitan ba laki Hisos ba tinaboy sa konin ag mga koyay magpamanawen sa balay Diyos da- ag mga poon balayan. 19 Ag odas iya magtongka sa hosayan, pinasabi sa konin ag konin sawa amba, Ayaw kawo magpakiaram sa mataldeng ka iraya naba, panawen aray madlem ba pinahidapan gidte da naay remrem sa naay akalkan panawen sa konin. 20 Ngani da mga koyay kay magpamanawen sa balay Diyos da- da mga poon balayan mga Diw ba lompod sa mga iraya para aringien amba laki Barabas da bal-anan, da- laki Hisos da pabonoon. 21 Kora ba tinanong:ngakay ag gobirnador amba, Tawa sa darwa da koyo alabet naay bal-anan? Kora tembag amba, Laki Barabas ngani-! 22 Sinabi sa kora koyay Pilato, No amba ba omaning da naay batay pinanawen sa laki Hisos ag nag-awit Kiristo? Tembag kora boo amba, Papakoon sa kodos anggan natay! 23 Iya amba, Kaytang? Nakay ka daet da konin pinanawen? Ngani kora ba lalo:a mamaglalae amba, Papakoon sa kodos! 24 Maraw akitan koyay Pilato iya wala:ani apanawen da- lalo dapo batay magolo da mga iraya ba iya ba magpagaro sapa da- mangoyas konin alima sa ropangan mga iraya. Iya amba, Ako ba wala pakiaram sa katayan ag iraya tiya! Bahala:a koyo! 25 Tembag da boo mga iraya, Yamen da- yamen mga onga da bahala sa iya batay natay. 26 Da- konin binal-anan laki Barabas ngani konin kay pinahaplit laki Hisos da- tinaboy sa kora para pakoon sa kodos. 27 Laki Hisos ba pinaanggat ag mga sondalo gobirnador sa konin balay nag-awit Piritoryo, da- magkarimpon da boo kaban mga sondalo sa konin paribok. 28 Iya ba kora linsowan da- sinoolan sai ka golanit mapola. 29 Kora bomararaw sai ka balagen madogi da- kora sinorbong sa konin olo, da- pinagegenan sai ka alainay sa konin kanan alima. Da- iya ba kora naglohod-lohodan da- naglibak kay amba, Palakolon ngani- da hadi mga Diw! 30 Iya ba nagpanepayan; kora:akay ginaro da alainay da- iya ba kora nagsampok sa olo. 31 Maraw kalbas kora linibak, iya kora linsowan golanit mapola da- sinoolan:nakay konin sadiri golanit, da- pinalwas para pakoon sa kodos. 32 Maraw kora ba lomwas sa goraan lakol ba kora akitan sai ka lalaki da ngaran ba Simon. Iya ba taga Sirini. Kora limpod konin pas-anen da kodos laki Hisos. 33 Maraw rateng sa poro nag-awit Golgota (da alabet sabiyen Golgota ba Poro Bongo), 34 ba laki Hisos ba kora pinakan inemen kalibed liniogan apro. Ngani maraw konin tinimosan ba nawed konin ininem. 35 Maraw pinako:a sa kodos laki Hisos ba kora magpostahanan para erayen da konin mga golanit. 36 Da- kora magtongka sata para iya bantayan. 37 Nasorat sa ngaway konin olo da datos laban sa konin amba, Iya ba laki Hisos, da Hadi mga Diw. 38 Darwa kay ka ananakaw da konin kaanggat pinako din sa konin-konin kodos-sai sa kanan, da- sai sa kaliwa. 39 Iya nagtongayaw ag mga agpandalan da- maglinglingayan 40 amba, Nawed ma kawo da batay gemras ag lakol ka balay Diyos da- komo:wakay batay yinadi sa tatlo ngani ka aldaw? No amba, mona ba komo ribriyen da komo sadiri! No kawo ngani- da Onga Diyos ba kawo lompot saba sa kodos! Naba:a ngani. 41 Iya ba linibak din mga koyay magpamanawen sa balay Diyos da- mga kamatangen sa Bilin da- mga poon balayan mga Diw. Kora amba, 42 Konin rinibri da Roma ngani nawed konin aribri da konin sadiri! Nawed ma iya kono da hadi Israil? Iya lompot ngani sa kodos ba yamen batay maniwala sa konin! 43 Iya mag-isarig sa Diyos da- iya magsabi amba iya da Onga Diyos. Iya ba ribriyen Diyos no iya ba nagpalayaw gidte ngani- Diyos! 44 Da- nagmoda kay din ag mga ananakaw konin kasabay pinako din sa kodos. 45 Ibat tenga aldaw anggan manorip batang ba mandelem sa boo lopa. 46 Maraw manorip batang:ngani giraapon ba laki Hisos ba bemerya maeyat amba, Ili, Ili, lama sabaktani? da alabet sabiyen naba ba amba, Naay Diyos, naay Diyos, kaytang ako ba komo pinabayaan? 47 Naba ba akarngeyan mga kalaati magpatindeg sata da- kora sinabi amba, Konin nagpatwagan laki Iliyas! 48 Agad domalaganan da sai sa kora da- gomaro sai ka makay lomot, binabad sa soka, pinalagay sa tangbo sai ka anos da- pinasepsep disin sa laki Hisos. 49 Ngani sinabi kay ag mga Roma amba, Isag dapo, tamo ban-awan no batay rateng laki Iliyas para iya ribriyen! 50 Ngani laki Hisos ba mang-o:wakay lakol da- agtoan:na inawa. 51 Agad nasagi sa tenga da sagodang dingding sa lakol ka balay Diyos ibat sa ngaway anggan sa gaba. Lomindol da lopa da- nangapaka da mga bato, 52 nabokaan da mga lebengan lineyang sa bato, da- nabiyag:gakay da maoson mga banal nangatay:yani. 53 Kora lomwas sa lebengan da- maraw nabiyag:gakay laki Hisos ba kora semled sa banal ka goraan lakol-naba ba Hirosalim-da- kora ba akitan kaosonan sata. 54 Nalpa gidte da poon mga sondalo da- da mga sondalo magbantay sa laki Hisos panawen sa lindol da- panawen sa kora nasistigohan da boo nangyadi. Kora amba, Naba nga mana da Onga Diyos! 55 Sata din da maoson ka babayi magpamatpa sa adayo. Ibat dapo sa Galiliya ba kora mag-anggat:ta sa konin da- magpamanawen sa konin. 56 Kabilang sa kora bayi Mariya Magdalina, da- bayi Mariya adang kolaki Tiyago da- Hosi, da- da sawa laki Sibidiyo. 57 Bayo masoram-soram ba rateng kay da sai ka maoson nag-apo da ngaran ba Hosi. Iya ba taga Arimatiya. Iya ba nagtod-an din laki Hisos. 58 Iya ba pabali sa koyay Pilato da- inay-ayan da bangkay laki Hisos. Binilin kay koyay Pilato amba taboyon sa konin. 59 Kaya ginaro laki Hosi da bangkay da- konin binedbederan papa golanit. 60 Konin pinalagay naba sa sadiri lebeng bayo pinaleyang sa bato. Maraw kalbas, konin linigan sa sakbawan lebeng da sai ka bato lakol, da- iya omalis. 61 Sata din bayi Mariya Magdalina da- sai dapo ka Mariya. Sidawa agtongka sa betek ag lebeng. 62 Maraw omaga:akay, Aldaw Magpahinga, da mga koyay magpamanawen sa balay Diyos da- da mga Parisiyo ba mal-anggatan paraoy sa koyay Pilato. 63 Kora sinabi, Koyay, yamen nagkaaremreman da sinabi ag angangaboso naba ag iya nagkabiyag dapo, amba iya kono batay:yakay nabiyag sa ikatatlo ka aldaw. 64 Kaya koyo nga pabantayan piya da lebeng anggan sa ikatatlo ka aldaw. Kaaram sata paraoy da konin mga nagtod-an da- takawen da bangkay da- sabiyen sa mga iraya amba iya ba nabiyag:gakay. Da- da aboso naba ba lalo dapo daet sa monaan. 65 Sinabi sa kora koyay Pilato amba, Abaya, koyo:wa da agpabantay. Koyo sata paraoy da- koyo pabantayan toltol sa koyo akayanan. 66 Kaya kora sata paraoy da- kora kinoskosan ag bato para matibay, da- magpalagay marka da- inogonan sata da mga tagabantay.
1 Maraw kadalan da Aldaw Magpahinga, maraw nagka-omaga:ani aldaw linggo, bayi Mariya Magdalina da- sai din ka Mariya ba paraoy para ban-awan da lebeng laki Hisos. 2 Kamalay te ba lomindol maeyat. Lompot ibat sa soksokowan da sai ka anghil Panginoon, linigan da bato takleb sa lebeng da- tomongka sa ngaway naba. 3 Da konin kiray ba kasorap makay koldap da- mapoti gidte da konin bado, makay abokay. 4 Manartaroy gidte sa kaliman da mga magbantay da- makay:ya natay maraw kora akitan da anghil. 5 Ngani iya magsabi sa mga babayi amba, Kandawa ayaw aliman. Naay amatangan kandawa nagsarak laki Hisos ag pinako sa kodos. 6 Iya ba wala:a towa panawen iya ba nabiyag:gakay makay ag konin sinabi. Apora kandawa! Kandawa ban-awan da konin pinalagyan. 7 Kandawa kadaldali:a mangadang da- sabiyen sa konin mga nagtod-an amba iya ba nabiyag:gakay ibat sa mga nangatay da- batay monaan sa Galiliya. Iya koyo batay akitan sata! Monaan:na naay nagsabi sa kandawa. 8 Da- sidawa ba kadaldali:a mangadang ibat sa lebeng, maki gidte kaliman da- maki gidte din kaangasan. Da- sidawa domalaganan paraoy sa mga nagtod-an para baritaen da nangyadi. 9 Sa sidawa domalaganan ba sidawa ba sinalobong laki Hisos da- binerya. Da- sidawa pabali da- lomohod da- gemegen sa konin paa da- iya ba sinamba. 10 Sinabi sa sidawa laki Hisos, Kandawa ayaw aliman! Kandawa mangadang da- sabiyen sa naay mga arian kora paraoy sa Galiliya. Sata ba ako ba kora batay akitan! 11 Maraw kaalis da kobayi magparaoy sa mga nagtod-an ba paraoy kay sa goraan lakol da kalaati mga sondalo magbantay sa lebeng da- binarita sa mga koyay magpamanawen sa balay Diyos da boo mangyadi. 12 Mamagrimpon da mga koyay magpamanawen sa balay Diyos da- da mga poon balayan mga Diw para magpakana da- maraw kalbas ba pinakan maoson ka kwarta da mga sondalo. 13 Da- kora binilinan amba, Makay tiya da koyo baritaen: Sa odas yamen akalekan aray madlem ba paraoy da konin mga nagtod-an da- tinakaw da bangkay. 14 Kora dapo sinabi amba, No da gobirnador ba kabarita naba ba koyo ayaw agtarongisngis panawen yamen da bahala mag-amoyot sa konin! 15 Tinabang kay ag mga magbantay da kwarta da- pinanawen da binilin sa kora. Anggan mona ba tiya dapo din da nagsabi-sabi mga Diw. 16 Da labinsai ka nagtod-an ba paraoy sa Galiliya, sa bogsor tindo sa kora laki Hisos. 17 Maraw kora akitan laki Hisos iya ba kora sinamba. Ngani da kalaati ba mag-alingangaan. 18 Laki Hisos ba pabali da- sinabi sa kora amba, Tinaboy:ya sa naay da boo kapangyadihan sa langit da- sa lopa. 19 Kaya, idaw:wani koyo da- koyo gaw-en naay nagtod-an da boo mga lasyon. Kora koyo baotismohan sa ngaran Diyos Apang da- Onga da- Ispirito Banal, 20 da- tod-an tomoltol sa boo naay binilin sa koyo. Koyo gidte pakarngeyan! Ako ba koyo gidte kaanggat boo odas anggan sa arasan paranawan!
1 Tiya da ompisa Pirmida ka Barita para sa laki Hisos Kiristo, Onga Diyos, 2 toltol sa sinorat sa ribro laki Isayas, ag tagabarita ibat sa Diyos amba, Tiya da naay sogoan naay nagsogo sa komo onaanan, Iya da tay maghanda ag komo batay dinalanan. 3 Koyo gidte pakarngeyan! Da tokawanan magtokawanan maeyat sa poro nawed apirmihan iraya ba amba, Koyo handaen da batay dinalanan Panginoon Koyo taldengen da konin mga dalan. Naba:a ngani. 4 Laki Howan ba lomwas sa poro nawed apirmihan iraya da- magbaotismo. Iya magpangadar da magbaotismo, magsisi da- mag-ogon kadaetan sa batay pinatawad kadaetan. 5 Da boo iraya sa porobinsiya Hodiya da- da boo taga Hirosalim ba mamparaoy sa konin. Kora magsisi sa kora mga kadaetan da- kora ba binaotismohan:nani laki Howan sa salog Hordan. 6 Laki Howan ba magsool bado yadi sa bolbol hayop nag-awit kamilyo. Magpamigkis balat hayop sa konin bar-is. Da konin pamangnen ba mga balang da- deges sokan. 7 Iya ba magpangadar amba, Rateng:ngani da naay katongroy ag makapangyadihan dapo sa naay. Nawed abaya ako misongo omokad pangket konin panlaed. 8 Ako ba magbaotismo sa koyo sa sapa, iya kay da batay magbaotismo sa koyo sa Ispirito Banal. 9 Pag aldaw naba rateng laki Hisos ibat sa goraan Nasarit sa porobinsiya Galiliya. Iya ba binaotismohan laki Howan sa salog Hordan. 10 Pag iya tomakdang sa sapa ba konin akitan da langit binokaan, da- da Ispirito Banal lomayangan sa laki Hisos makay sai ka korkoro. 11 Konin arngeyan da sai ka magtokawanan ibat sa soksokowan amba, Kawo da naay nagpalayaw onga, naay gayed kaangasan. 12 Agad iya limpod Ispirito Banal para paraoy sa poro nawed apirmihan iraya, 13 da- iya ba apatnapo ka aldaw sata. Iya nagtogso laki Satanas, pag aponin kadaetan. Konin pal-anggat ba mga hayop sa kotanan. Iya inasikaso mga anghil. 14 Maraw laki Howan ba dina-kep:pani, laki Hisos kay ba paraoy sa porobinsiya Galiliya. Konin nagpangadar da Pirmida ka Barita Diyos 15 amba, Bait:tani da odas, bali:ya te da batay maghadi da Diyos. Koyo magsisi da- mag-ogon kadaetan da- maniwala sa Pirmida ka Barita. 16 Pag magpamalaba laki Hisos sa tebteb dagat-dagatan Galiliya ba konin akitan da talkaka Simon da- Anris magpaorayap dala sa dagat-dagatan, panawen sidawa ba angangabel isda. 17 Sinabi laki Hisos sa sidawa amba, Kandawa tomongroy sa naay, kandawa batay naay pinanawen angangabel iraya. 18 Agad sidawa inogonan da sidawa dala da- tomongroy sa laki Hisos. 19 Maraw iya mangadang dapo te ba konin akitan sa kora bangka da talkaka Tiyago da- Howan, mga onga laki Sibidiyo. Sidawa magpakapiya dala. 20 Sidawa ba pinatwagan laki Hisos. Sidawa inogonan sa bangka da sidawa apang laki Sibidiyo pal-anggat mga iraya opahan da- sidawa tomongroy sa laki Hisos. 21 Kora paraoy sa goraan Kapirnaom. Maraw Aldaw:wa Magpahinga, iya semled sa balay pagtiponan mga Diw da- magtodo. 22 Kora manggilalas sa konin nagtodo, panawen iya magtodo sa kora makay maki kapangyadihan, nawed makay ag mga kamatangen sa Bilin. 23 Sa odas din naba ba maki sai ka lalaki sata sa kora balay pagtiponan. Iya nag-apo daet ka ispirito. Iya magtakap amba, 24 Yayay! Hisos ag taga Nasarit! Nakay da komo pakiaram sa yamen? Kawo dia paraoy towa para yamen ba komo sopoon? Naay amatangan no tawa kawo, kawo da Banal ibat sa Diyos. 25 Pag daet ka ispirito ba sinawayan laki Hisos amba, Kawo empet! Lomwas saba sa konin. 26 Piniripiri ag daet ka ispirito da iraya da- magpang-o lakol maraw iya konin inogonan. 27 Manggilalas da boo iraya, kaya kora kay maltanongan, Nakay tiya? Bayo dia ka todo? Iya maki kapangyadihan magsogo kayno sa mga daet ka ispirito da- iya ba nagtoltol mga naba. 28 Nawed te kaagot iya ba nabarita kayno saan sa boo porobinsiya Galiliya. 29 Agad konin inogonan da balay pagtiponan da- semled sa balay kora Simon da- Anris. Anggat sa konin ba kolaki Tiyago da- Howan. 30 Magkalek naglagnat da bianan babayi laki Simon. Agad kora manoltol sa laki Hisos nagmaskit da babayi. 31 Laki Hisos ba paraoy sa babayi. Konin ginenan da kon alima da- pinatindeg. Kamalay te piya:ani iya sa konin lagnat. Kalbas iya mag-asikaso sa kora. 32 Maraw madlem:mani, nalo-bog:ga da aldaw, binabasa laki Hisos da boo iraya maki maskit, da- da boo nag-apo mga daet ka ispirito. 33 Magrimponan da boo iraya sa lowas sakbawan. 34 Pinapiya laki Hisos da maoson mag-agwanta mga Roma-Roma kay ka maskit. Konin kay binoyaw da maoson ka daet ka ispirito. Konin inayawan magtokawanan da mga daet ka ispirito, panawen kora amatangan no tawa iya. 35 Maraw omaga:akay, madelem-delem dapo, ba mangon:nani laki Hisos. Iya paraoy sa poro nawed apirmihan iraya da- magdarangin sata. 36 Somarak sa konin kora Simon. 37 Maraw iya kora akitan, kora amba sa konin, Kawo ba nagsarak boo iraya. 38 Konin sinabi sa kora amba, Tamo:wani sata sa mga bali te ka goraan para ako kapangadar din sata. Panawen naba ba ako paraoy towa. 39 Konin sinigara da boo porobinsiya Galiliya. Iya magpangadar sa kora balay pagtiponan da- magboyaw din mga daet ka ispirito. 40 Pabali sa konin da sai ka iraya panyakiten maglohod da- mag-aringi sa konin amba, Koyay, no komo alabet ba ako ba abaya komo napapiya. 41 Laki Hisos ba ayawtean sa konin. Konin inenat da konin alima, iya konin kinapkap da- magsabi amba, Naay alabet, pomiya:a kawo. 42 Agad nabaraw da konin maskit. Piya:a iya. 43 Mahigpit iya konin gidte binilinan amba, Sata:a kawo! 44 da- amba, Ayaw agsabiyen naba kayno sa tawa pag iraya no nawed ba kawo paraoy, paban-aw komo lawas sa magpamanawen sa balay Diyos. Komo taboyon da mga taboy binilin Diyos sa laki Moysis, makay magpaban-aw sa mga iraya sa kawo aolian:nani. 45 Kayno amba, mangadang da iraya aolian da- iya mag-ompisa magpanoltol pag panawen naba. Konin gidte nagpamarita da nangyadi. Kaya nawed:dani kasled laki Hisos sa goraan sa nagkaakitan iraya, no nawed ba iya sa lowas nganyani naba. Iya ba pinaraoyan mga iraya ibat sa boo mga poro.
1 Maraw laki Hisos ba paoli sa goraan Kapirnaom, kalawey ned naw maoson ka aldaw, abaritaan mga iraya iya ba sa konin kay balay. 2 Maoson da magtipon sa galem balay anggan wala:a apatindegan sa kora, kayno sa sakbawan. Konin nagpangadar sa kora da Pirmida ka Barita. 3 Maki binaba sa konin sai ka lompo nag-osongan apat ka lalaki. 4 Maraw kora nawed kaparaoy sa konin panawen sa magpalsengkean da mga iraya ba kora limbot da awakan betek sa laki Hisos. Maraw nalbot:ta naba ba kora inaloyan da kalkanan ag lompo. 5 Maraw akitan laki Hisos da kora pag-isarig sa konin ba iya amba sa lompo, Abyan, pinatawad:dani da komo mga kadaetan. 6 Ngani maki ned naw maoson ka kamatangen sa Bilin magtongka sata. Kora magremrem amba, 7 Kaytang magtokawanan makay naba da iraya tiya? Iya magtongayaw sa Diyos. Tawa da tay kapatawad mga kadaetan, ned mana da Diyos ngani? 8 Maraw amatangan laki Hisos sa konin remrem amba kora magremrem gidte makay naba ba konin sinabi sa kora amba, Kaytang koyo magremrem makay naba? 9 Saan da nawed mahidap sabiyen sa lompo amba, Pinatawad:dani da komo mga kadaetan, e sabiyen amba, Kawo mangon, kom babaen da komo kalkanan da- kawo mangadang? 10 Kaya iya magtokawanan sa lompo amba, Para amatangan boo iraya da Onga Iraya ba maki kapangyadihan sa lopa magpatawad kadaetan, naay nagsabi sa komo, Kawo patindeg, babaen da komo kalkanan da- kawo moli. 12 Agad iya mangon, patindeg, binaba da konin kalkanan da- inogonan kora boo. Kaya kora boo ba manggilalas gidte. Kora nagpalakol da Diyos amba, Yamen nawed dapo kaban-aw makay tiya! 13 Paraoy:yakay laki Hisos sa tebteb dagat-dagatan. Magtipon da boo kaosonan sa konin paribok. Kora konin tindoan. 14 Maraw laki Hisos ba magdalan ba konin akitan laki Libi onga laki Alpiyo magtongka sa paningiran bohis. Amba laki Hisos sa konin, Kawo tomongroy sa naay. Iya patindeg da- tomongroy sa konin. 15 Maraw laki Hisos ba magpamangan sa balay laki Libi ba maoson magpaningir bohis anggat mga Roma ka makadaetan da kasaro laki Hisos da- konin mga nagtod-an, panawen maoson sa kora da omanggat sa konin. 16 Maraw akitan mga kamatangen sa Bilin da- mga Parisiyo iya kasaro mga magpaningir bohis anggan mga Roma ka makadaetan ba kora tinanong sa konin nagtod-an amba, Kaytang iya magpasaro sa mga magpaningir bohis da- sa mga Roma ka makadaetan? 17 Maraw arngeyan laki Hisos da kora sabi, konin sinabi sa mga Parisiyo amba, Ag magpangailangan anggagamot ba nawed da mga maeyat da lawas no nawed ba da mga maki maskit. Ako nawed paraoy towa para patwagan da mga mataldeng ka iraya, no nawed ba da mga makadaetan. 18 Da mga nagtod-an laki Howan da- da mga Parisiyo ba maki odas ba kora nawed mamangan para ngani- sa Diyos. Paraoy sa laki Hisos da mga iraya da- magtanong amba, Kaytang nawed malpamangan para ngani- sa Diyos da mga nagtod-an laki Howan da- mga nagtod-an Parisiyo, ngani nawed amba da komo mga nagtod-an? 19 Laki Hisos ba tembag sa kora amba, Batay mana nawed malpamangan da mga iraya sa kasalan maraw kora dapo kaanggat da lalaki batay kinasal? Anggan kora dapo kaanggat da lalaki batay kinasal ba malpamangan kora. 20 Batay:ya rateng da aldaw batay ginaro sa kora da lalaki batay kinasal. Sa aldaw naba ba kora nawed batay mamangan para ngani- sa Diyos. 21 Wala iraya magtambal pag matibay ka papa sa loma ka bado. No makay naba da konin batay pinanawen, batay nasagi da tinambalan pag batay tinambal. Lalo dapo narereg da regnat. 22 Wala magsogno bayo ka alak sa loma ka sognoan balat hayop. No makay naba da konin batay pinanawen, batay linto alak da balat da- batay nasida da alak; sayang kay da mga balat. Kaya da bayo ka alak ba para sa mga bayo ka balat. 23 Pag Aldaw Magpahinga kora Hisos ba magdalan sa tirigohan. Pag kora magkadangan inompisahan mga konin nagtod-an mangtel mga oay. 24 Tinanong mga Parisiyo sa konin amba, Komo ban-awan, kaytang komo mga nagtod-an ba magpanawen pag nag-ayawan sa Aldaw Magpahinga? 25 Iya tembag sa kora amba, Nawed dapo mana koyo nagkabasa no nakay da pinanawen laki Dabid, pag iya da- da konin mga pal-anggat ba ahidapan nagbayog? 26 No omaning iya semled sa balay Diyos sa odas laki Abiatar da koyay lakol magpamanawen sa balay Diyos? Iya mamangan tinapay tinaboy sa Diyos. Sa nagsogo Diyos tiya ba nag-ayawan namangan sa boo iraya no nawed ba sa mga magpamanawen ngani sa balay Diyos. Pinakan dapo din laki Dabid da mga konin pal-anggat. 27 Sinabi dapo laki Hisos sa kora amba, Pinanawen Diyos da Aldaw Magpahinga para sa mga iraya, nawed konin pinanawen da mga iraya para sa Aldaw Magpahinga. 28 Kaya da Onga Iraya da maki kapangyadihan kayno sa Aldaw Magpahinga.
1 Semled:dakay laki Hisos sa balay pagtiponan mga Diw. Sata maki sai ka iraya laya da sai ka alima. 2 Laki Hisos ba binantayan mga iraya sata para aban-awan no konin batay pinapiya da iraya naba sa Aldaw Magpahinga, para iya ba kora:a batay pabintangan. 3 Konin sinabi sa lalaki laya da alima amba, Apora:ani. 4 Kalbas laki Hisos magtanong sa kora amba, Toltol dia sa Bilin Diyos sa Aldaw Magpahinga da mamanawen piya e daet? Piya dia da tomaboy biyag, piya mana da mono? Ngani kora nawed:da magkasamang. 5 Kora ba konin tinerkan. Iya marongkot din panawen sa maskil kora remrem. Konin sinabi sa lalaki amba, Enaten da komo alima. Konin nga inenat. Pomiya:ani kon alima. 6 Lomwas da mga Parisiyo. Agad kora magtarato sa mga kapanig koyay Hirodis laban sa laki Hisos no omaning kora batay pomabono sa konin. 7 Laki Hisos pal-anggat konin mga nagtod-an ba omadayo paraoy sa dagat-dagatan. Maki anggat lakol ka kaosonan ibat sa porobinsiya Galiliya. Maki din mamaraoy sa konin maoson ka iraya ibat sa porobinsiya Hodiya, 8 ibat sa goraan lakol Hirosalim, ibat sa lopa Idomiya, ibat sa karipay salog Hordan, ibat kay sa bali te sa mga goraan Tiro da- Sidon, maraw kora abaritaan da boo konin pinanawen. 9 Sinabi laki Hisos sa konin mga nagtod-an amba handaen da sai ka bangka para sa konin panawen sa kaosonan iraya, para iya ba nawed batay kora naaliget. 10 Panawen iya magpapiya kaosonan ba magpay-aligetan sa konin da boo maki maskit para iya kora kay akapkap. 11 No iya akitan mga daet ka ispirito, kora maglombogan sa konin ropangan magtakap amba, Kawo da Onga Diyos. 12 Konin gayed sinogo sa kora amba, Ayaw pagtod-on no tawa ako. 13 Iya tomokad sa kalatayanan. Konin pinaparaoy sa konin da mga konin alabet, da- kora paraoy sa konin. 14 Iya homidang labindarwa ka iraya para konin kaanggat, da- paidawen magpangadar, 15 da- maki kapangyadihan magboyaw mga daet ka ispirito. 16 Mga tiya da labindarwa: Laki Simon pag konin inawit Pidro; 17 ag talkaka Tiyago da- Howan, mga onga laki Sibidiyo (sidawa ba konin inawit Bowanirgis, da alabet sabiyen ba mga iraya makay dalegdeg); 18 kora Anris, Pilipi, Bartolomi, Matiyo, Tomas, Tiyago onga laki Alpiyo, Tadiyo, Simon pag Masipagen sa lasyon Israil, 19 da- laki Hodas Iskariyoti, ag batay pomaabel sa laki Hisos sa konin mga kalaban. 20 Maraw moli:akay laki Hisos ba magtipon:nakay da maoson ka iraya; sa makay naba kora Hisos ba nawed kapamangan. 21 Maraw tiya ba abaritaan mga konin kaseledan ba kora lomwas para iya ba ranggoton, panawen kora amba, Wala bait iya. 22 Sinabi mga kamatangen sa Bilin ag domolong ibat sa Hirosalim amba, Iya nag-apo laki Biilsibol. Pag aponin kadaetan da magtaboy kapangyadihan sa konin para iya kaboyaw mga daet ka ispirito. 23 Kora ba konin pinaparaoy sa konin da- iya magsabi sa kora sa mga halimbawa amba, Omaning tay bomoyaw laki Satanas sa laki Satanas? 24 No ineray da sai ka kasakopan laban sa sadiri ba nawed batay maagot da kasakopan naba. 25 No da sai ka mag-anak ba darwa ka tompok maglabanan ba nawed batay maagot da mag-anak naba. 26 No laki Satanas ba maglaban sa konin sadiri, iya ba nagkaeray da- nawed batay maagot, no nawed ba rateng:nga da konin arasan. 27 Kayno amba, wala tawa man batay kasled sa balay sai ka maeyat ka iraya tay nanggaro da konin mga nag-apo, no nawed konin dapo inegtan da maeyat ka iraya bayo batay nadosa da konin balay. 28 Naay gidte nagsabi sa koyo amba, Batay pinatawad Diyos sa mga iraya da boo kadaetan, kayno nakay ka tongayaw da kora tinokawanan. 29 Ngani da tawa man magtongayaw laban sa Ispirito Banal ba wala patawad kaagot man no nawed ba iya maki kadaetan wala arasan. 30 Tiya ba sinabi laki Hisos panawen kora amba, Iya maki madomi ka ispirito. 31 Romateng da adang da- mga arian laki Hisos. Kora ba magpatindeg sa lowas balay da- iya kora pinatwagan. 32 Mamagtongka sa konin paribok da maoson ka iraya. Kora sinabi sa konin amba, Sa lowas balay da komo adang anggat komo mga arian; kawo kora nagpatwagan. 33 Iya tembag amba, Tawa da naay adang? Tawa da naay mga arian? 34 Iya maman-aw sa mga mamagtongka sa konin paribok da- konin sinabi amba, Tiya da naay adang, da mga tiya da naay mga arian, 35 panawen da iya magpanawen alabet Diyos, iya da naay arian lalaki, iya da naay arian babayi da- naay adang.
1 Iya mag-ompisa:akay magtodo sata sa tebteb dagat-dagatan. Iya rinipongpongan kaosonan gidte ka iraya, kaya iya somalakyat sa sai ka bangka sa dagat-dagatan, da- sata magtongka. Sa tebteban sigwakan dagat-dagatan da boo kaosonan iraya. 2 Kora ba konin tindoan maoson ka nakayman sa mga halimbawa. Sa iya magtodo ba konin sinabi sa kora amba, 3 Koyo gidte pakarngeyan! Maki sai ka iraya mangadang para magsabog. 4 Sa iya magsabog ba maki mga binhi nangaragrag sa dalan. Romateng da mga ibon, tineka da mga naba. 5 Maki kay binhi nangaragrag sa kabatowanan. Panawen sata ba wala naw lopa, nawed alalem da lopa, ba agad sombok da mga naba. 6 Ngani maraw siningkalan aldaw ba nangalayo da mga naba, panawen wala naw wakat. 7 Maki kay binhi nangaragrag sa kadogian. Tombo da mga dogi, naleek:ka da mga naba, kaya nawed mamokar. 8 Maki dapo mga binhi nangaragrag sa piya ka lopa, naba da mamokar. Lanobo kay da- mag-oay piya-maki oay tig tatlompo ka beter, maki kay animnapo, maki kay sai ka daan. 9 Sinabi dapo laki Hisos amba, Makarngey da iya maki pakarngey. 10 Maraw mangadang:nga da kaosonan, da mga sa paribok laki Hisos pal-anggat da labindarwa ka nagtod-an ba magtanong sa konin para sa mga halimbawa. 11 Konin sinabi sa kora amba, Sa koyo ba tinaboy para koyo amatangan da mga nawed dapo amatangan Roma ag para sa batay:ya maghadi da Diyos. Ngani sa mga Roma kay ba sa mga halimbawa ngani, 12 para Kayno kora semrey ba nawed batay kaban-aw; kayno kora karngey ba nawed batay amatangan; kaaram kora mamaoli remrem sa batay pinatawad. Naba:a ngani. 13 Konin dapo sinabi sa kora amba, Nawed mana koyo kamatang pag halimbawa tiya? Omaning ngani- batay koyo amatangan da boo mga halimbawa? 14 Da man-aasik ba makay mag-asik pag Pirmida ka Barita. 15 No makay sa dalan nag-askan da Pirmida ka Barita ba kora arngeyan naba, ngani agad rateng laki Satanas, konin nag-alis da Pirmida ka Barita naasik sa kora remrem. 16 Amba kay din da mga maki remrem makay kabatowanan. Pag kora karngey pag Pirmida ka Barita, agad kora nagtabang naba maki kaangasan. 17 Ngani panawen kora ba makay wala wakat sa sadiri ba kora nawed naw omagot. No rateng da kahidapan kayno pahidap panawen sa Pirmida ka Barita, agad kora asongko. 18 Da mga makay pag naasik sa kadogian ba naba da magpakarngey pag Pirmida ka Barita, 19 ngani kora ba abara gidte sa boo nakayman sa paranawan, da- adayaan mga maoson ka nag-apo da- mga alabet sa Roma dapo ka nakayman sa kora remrem. Sa kora naba da magpaaliget sa Pirmida ka Barita. Kaya da mga naba ba nawed mamokar. 20 Da mga naasik kay sa piya ka lopa ba naba da mga magpakarngey Pirmida ka Barita. Kora nagtabang naba, da- mamokar-maki tig tatlompo, maki kay animnapo, maki kay sai ka daan. 21 Kora ba tinanong laki Hisos amba, Nagpar-etan dia da solo- para naba ba palagyen sa galem salopan e tagoon? No nawed ba naba ba batay pinalagay sa timpowan gidte solo-. 22 Da boo nagtago ba batay akitan, da boo nakayman nawed dapo amatangan ba batay apawaan. 23 Da maki pakarngey ba makarngey. 24 Konin din sinabi sa kora amba, Koyo dahanan da koyo arngeyan. Sa panokat koyo sinokat sa Roma, sa koyo din batay sinokat da- labi dapo saba. 25 Panawen da iya maki ba batay dapo pinakan; da wala kay ba anggan pag sa konin ba batay dapo ginaro sa konin. 26 Sinabi laki Hisos amba, Da maghadi da Diyos ba makay din sai ka iraya mag-asik binhi sa agayen. 27 Nagkakalek no madlem, no aldaw ba mangon kay. Magsobok kay da binhi, tombo:ani. Nawed konin amatangan no omaning da magsobok naba. 28 Sa sadiri magpabokar da lopa. Pormido magpalintotog te bayo gira oay, kalbas beter magtarakinan sa oay. 29 Maraw hinog:gani da beter, naggamit:ta da yatab sa oay, panawen tag-ani:yani. 30 Sinabi dapo laki Hisos, Sa nakay batay tamo pinatolad da maghadi da Diyos? Nakay ka halimbawa da batay tinoltol para saba? 31 Da maghadi da Diyos ba makay sai ka beter mostasa. Iya da ibente te sa boo atey nagtanem sa lopa. 32 Amba man, pag tiya ba naasik:kani ba magtobo anggan lakol sa boo alaman. Magpananga malabeg, anggan da mga ibon sa kalaw-awan ba magpamogadan sa mga sanga tiya. 33 Sinabi laki Hisos da Pirmida ka Barita sa mga iraya sa maoson makay tiya ka halimbawa, anggan kora akayanan amatangan. 34 Iya nawed magpanoltol sa kora no nawed ba sa mga halimbawa. No iya ba anggat nganyani konin sadiri mga nagtod-an ba konin nagpapawa sa kora da boo konin tindo sa halimbawa. 35 Pag madlem din naba, sinabi laki Hisos sa mga konin nagtod-an amba, Tamo:wa omipay sa karipay. 36 Maraw kora pinaidaw:wa da kaosonan ba kora pinaanggat laki Hisos, ag iya ba baywi sa bangka. Maki mga Roma ka bangka omanggat sa konin. 37 Maki Romateng maeyat ka bagyo. Magsigwak da alon sa bangka. Yi! Nagkaakapnoan sapa! 38 Ngani sa paoriyan bangka laki Hisos magkalekan mag-olwanan. Iya ba kora pinolaw da- sinabi amba, Koyay, piya dia sa komo no tamo nangatay? 39 Iya apolawan, konin kay sinabiyan da koaya, sinabi din sa dagat-dagatan amba, Kawo empet! Nangapra:a da koaya, wala:a alon. 40 Konin sinabi sa mga nagtod-an amba, Kaytang koyo aliman? Nawed mana koyo mag-isarig sa Diyos? 41 Kora manggilalas gayed da- magsabi sa sai-sai amba, Tawa matay tiya? Kayno koaya, kayno dagat-dagatan ba magpaniwala sa konin!
1 Kora rateng sa karipay dagat-dagatan, sa lopa mga Girasino. 2 Maraw iya lompot sa bangka ba iya sinalobong sai ka lalaki ibat sa panlebengan. Iya ba nag-apo daet ka ispirito. 3 Sa panlebengan iya magpamataw. Wala:a kaeket sa konin, kayno tagikara. 4 Layen-layen iya nag-egtan mga pangawan, mga tagikara. Kayno amba, konin nagpangto da mga tagikara da- nagpamari da mga pangawan. Wala iraya maki eyat kadaeg sa konin. 5 Layen te iya magpang-o madlem da- aldaw sata sa panlebengan da- sa mga kalatayanan. Konin nagpangomog konin lawas sa mga bato. 6 Maraw konin akitan laki Hisos sa adayo ba iya domalaganan, maglohod maglombogan sa ropangan laki Hisos. 7 Iya tomakap lakol amba, Hisos, nakay da komo pakiaram sa naay? Kawo Onga Diyos pag Atatas sa boo! Naay gidte nag-ay-ay sa komo sa ngaran Diyos, ako ayaw komo pagpahidapan. 8 Panawen sinabi:yani laki Hisos sa konin amba, Kawo lomwas sa iraya tiya, kawo pag daet ka ispirito. 9 Iya tinanong laki Hisos, Nakay da komo ngaran? Iya tembag amba, Kaosonan da naay ngaran, panawen yamen ba maoson gidte. 10 Konin gidte nag-ay-ayan sa laki Hisos amba, Ayaw kay pagpamoyawen yamen sa lopa tiya. 11 Sata maki kaosonan mga baboy magpalpamangan sa kaliwis latayan. 12 Inay-ayan mga daet ka ispirito sa laki Hisos amba, Yamen ba komo paparaoyon da- pasleden sa mga baboy naba. 13 Kora konin pinayagan. Kaya manlowas sa iraya da mga daet ka ispirito da- manled sa mga baboy. Mandalagan sa lasi anggan sa dagat-dagatan da baboyan. Maki mga darwa ka ribo ka baboy da nangalimes. 14 Mandalagan da mga mag-alaga baboyan. Kora binarita sa mga iraya sa goraan da- sa mga iraya sa mga agayen da nangyadi. Kaya Romateng da mga iraya para ban-awan da nangyadi. 15 Kora paraoy sa laki Hisos. Kora akitan da iraya aray bolingaw, da iraya aray maki kaosonan daet ka ispirito. Iya magtongka sata, magbado:a iya wala:a sibag da konin remrem. Aliman:na kora. 16 Binarita kay pag mga kaban-aw da nangyadi sa inapo mga daet ka ispirito da- sa mga baboy. 17 Kaya da mga iraya ba mag-ay-ay gidte sa laki Hisos para iya omalis sa kora lopa. 18 Maraw laki Hisos ba somakay sa bangka ba mag-ateet gidte sa konin da aray inapo mga daet ka ispirito para iya ba paanggaten. 19 Ngani laki Hisos ba dayo da- iya amba sa konin, Kawo moli sa komo kaseledan, sabiyen sa kora no omaning da pinanawen Diyos sa komo, no omaning iya ba ayawtean sa komo. 20 Iya omalis da- konin inompisahan manoltol sa lopa Dikapolis no omaning da pinanawen laki Hisos sa konin. Manggilalas da boo mga iraya. 21 Laki Hisos ba somakay sa bangka da- omipay:yakay sa karipay dagat-dagatan. Iya rinimponan kaosonan iraya sa tebteb dagat-dagatan. 22 Pabali sa konin da sai ka lalaki nag-awit Hairo. Iya ba sai ka magpamahala sa balay pagtiponan mga Diw. Maraw konin akitan laki Hisos ba iya lomohod sa konin ropangan. 23 Iya mag-ay-ay gayed sa konin amba, Magnawnaw:wani da naay onga te babayi. Kita:ani, komo patimpowen da komo alima sa konin para iya pomiya:akay, da- batay:yakay maeyat. 24 Laki Hisos ba anggat sa konin. Iya inanggatan kaosonan gidte ka iraya. Iya ba kora rinimponan. 25 Maki sai ka babayi labindarwa:a ka dag-on nagpamohosan. 26 Iya maghidap gidte sa maoson ka maggamot sa konin. Kayno konin:nani nanaboy da boo konin nag-apo ba nawed gidte pomiya, kayno kakol te, no nawed ba lalo:ani narereg. 27 Ag konin arngeyan da nagsabi mga iraya para sa laki Hisos, iya pabali sa konin awak magpangayekey sa kaosonan iraya. Iya komapkap sa nagsool laki Hisos, 28 panawen konin rinemrem amba, Naay ngani nakapkap da nagsool laki Hisos ba ako batay:yani pomiya. 29 Kamalay te ba empet da daya. Konin amatangan piya:ani iya, wala:a maskit. 30 Amatangan laki Hisos sa konin sadiri maki lomwas kapangyadihan kaya iya mamaliwi sa kagtengaan boo iraya amba, Tawa da komapkap sa naay nagsool? 31 Sinabi sa konin mga konin nagtodan amba, Komo:wani akitan kawo nag-aliget kaosonan, komo dapo nagsabi amba, Tawa da komapkap sa naay? 32 Laki Hisos ba maman-aw para akitan da pomanawen naba. 33 Ngani da babayi, pag konin amatangan da nangyadi sa konin ba pabali magtartaroy maki aliman. Iya lomohod sa ropangan laki Hisos da- sinabi gayed sa konin da boo katotohanan. 34 Sinabi laki Hisos sa konin amba, Abyan, kawo pinapiya komo panarig sa naay. Mangadang:nga kawo, kawo ayaw kay aliman, kawo pomiya sa komo maskit. 35 Magtokawanan dapo laki Hisos, maki rateng ibat sa balay magpamahala sa balay pagtiponan magsabi amba, Wala:ani da komo onga babayi. Kaytang komo dapo nag-abara da koyay? 36 Makay nawed nangaarngeyan laki Hisos da kora sabi. Konin sinabi sa magpamahala sa balay pagtiponan amba, Kawo ayaw aliman, kawo manarig ngani sa naay. 37 Iya dayo anggatan kayno tawa, no nawed ba kora ngani Pidro, Tiyago da- Howan ag konin arian. 38 Maraw kora rateng sa balay pag magpamahala sa balay pagtiponan ba konin akitan da kagolohan mga iraya magpalpanangis, magpayeyey lakol. 39 Pag iya semled sa balay konin sinabi sa kora amba, Kaytang koyo agkasamang da- magpalpanangis? Nawed natay da onga, no nawed ba nakalek ngani. 40 Iya ba kora nagpatawaan. Konin:nani pinapalwas sa balay da boo iraya. Konin pinaanggat da adang da- apang pag onga, da- mga konin nagtod-an. Kora semled sa pagkalkanan pag onga. 41 Konin ginenan sa alima da onga da- sinabi amba, Talita komi, da alabet sabiyen naba ba, Onga, naay nagsabi sa komo, kawo mangon. 42 Agad mangon da onga, patindeg da- gomiang. Iya labindarwa ka dag-on da kakoyayen. Kora boo ba manggilalas. 43 Magbilin gayed laki Hisos sa kora amba, Ayaw maki batay kamatang tiya. Da- konin sinogo amba, Pakanen pamangnen pag dalakita.
1 Omalis laki Hisos sata da- paraoy sa konin sadiri goraan. Iya inanggatan konin mga nagtod-an. 2 Maraw Aldaw Magpahinga konin inompisahan magtodo sa balay pagtiponan mga Diw. Manggilalas da kaosonan iraya karngey sa konin da- magsabi amba, Saan nagaro pag iraya tiya da konin mga nagtodo tiya? Saan galing ag konin kadonongan naba? Makapangyadihan gidte da pinanawen konin alima! 3 Nawed ma tiya da anggagawa balay, ag onga bayi Mariya? Nawed mana konin mga arian ba manlaki Tiyago, Hosi, Hodas da- Simon? Nawed dia towa sa tamo da konin mga arian babayi? Nagkaatbek da kaosonan sa konin. 4 Sinabi laki Hisos sa kora amba, Wala tagabarita naggalang sa konin sadiri goraan, kayno sa konin sadiri mga kaseledan, kayno sa konin sadiri pamatawan. 5 Iya nawed abaya magpanawen mga makapangyadihan ka panawen sata, no nawed patimpowen da konin alima sa nawed naw maoson maki maskit da- papiyaen. 6 Iya manggilalas sa kora nawed mag-isarig sa Diyos. Konin sinigara da mga goraan te. Sata iya magtodo. 7 Pinaparaoy sa konin da labindarwa ka nagtod-an. Konin inompisahan paidawen darwa-darwa. Kora ba konin tinaboyan kapangyadihan laban sa mga daet ka ispirito. 8 Kora ba konin pinabilinan amba, Ayaw magbalon kayno nakayman, bakolo ngani. Ayaw:wani mga pamangnen, mga sopot, mga kwarta sa konin-konin pamegkes, 9 no nawed ba abaya panlaed ngani. Ayaw magsool darwa ka bado. 10 Konin din sinabi sa kora amba, Kayno sa nakay pag pamatawan koyo semled, koyo magpamataw sata anggan sa omalis koyo sa goraan naba. 11 No koyo nawed tinabang tawa man, no dayo magpakarngey sa koyo ba koyo omalis da- koyo opyasen da onggang sa koyo araprapa makay magpadahan sa kora amba, Batay daet sa koyo! 12 Omalis da labindarwa ka nagtod-an. Amba da kora todo, Koyo magsisi da- mag-ogon kadaetan. 13 Kora magpamoyaw maoson ka daet ka ispirito sa mga iraya. Kora pinairan langis da maoson mga maki maskit da- pinapiya. 14 Abaritaan Hadi Hirodis para sa laki Hisos, panawen nabantog da konin ngaran. Konin sinabi amba, Biyagan:nakay ibat sa mga nangatay laki Howan Tagabaotismo sa sapa, kaya magpanawen sa konin da mga kapangyadihan naba. 15 Sinabi kay mga Roma amba, Iya laki Iliyas. Sinabi dapo mga Roma amba, Iya ba sai ka tagabarita ibat sa Diyos, makay mga tagabarita tangona. 16 Maraw naba ba abaritaan koyay Hirodis ba konin sinabi amba, Laki Howan pag naay pinapotol da konin leey ba biyagan:nakay. 17 Panawen koyay Hirodis da pomaabel, pomaeket, da- pomapiriso sa laki Howan, panawen sa bayi Hirodiyas, ag sawa laki Pilipi kakaan koyay Hirodis, ag konin tinaban. 18 Layen nagsabi laki Howan sa koyay Hirodis amba, Nag-ayawan Diyos da magtaban sawa komo kakaan. 19 Kaya adagilan:nani bayi Hirodiyas sa laki Howan. Alabet ag babayi iya ba pabonoon ngani nawed konin apanawen, 20 panawen koyay Hirodis ba maggalang sa laki Howan sa konin amatangan iya ba sai ka lalaki mataldeng da- banal da- iya konin dinahanan. Maraw konin arngeyan laki Howan ba iya manremrem gidte. Kayno amba iya maki din kaangasan pakarngey sa laki Howan. 21 Ngani Romateng da pagkaodas bayi Hirodiyas. Pag koyay Hirodis ba magremrem sa konin kapangongaan, iya mag-atag maoson ka pamangnen sa konin mga maki pad katongkolan, sa mga poon mga sondalo da- sa mga poon sa Galiliya. 22 Sa odas din naba semled da onga babayi bayi Hirodiyas da- magsayaw. Iya magtaboy kaangasan sa koyay Hirodis da- sa mga iraya konin kasaro. Kaya sinabi pag hadi sa daraga amba, Kawo omay-ay kayno nakayman komo alabet, naay batay tinaboy sa komo. 23 Inakoan koyay Hirodis amba, Kayno nakay da komo batay inay-ayan sa naay, naay batay tinaboy sa komo, kayno kalaati naay kasakopan. 24 Lomwas da daraga da- tinanong da konin adang amba, Nakay da naay batay inay-ayan sa hadi? Konin timbag amba, Ay-ayan da olo laki Howan Tagabaotismo. 25 Agad iya semled:dakay sa pagpamatawan hadi da- omay-ay amba, Naay alabet komo taboyon sa naay, nagpalagay sa sai ka batiya, da olo laki Howan. 26 Narongkot gidte da hadi. Kayno amba, panawen iya omako sa daraga da- akayaan kay sa konin mga kasaro ba dayo nasida da konin inako sa daraga. 27 Agad iya ba magsogo sa sai ka sondalo magbantay amba, Babaen da olo laki Howan. Iya mangadang da- konin pintolan leey laki Howan sa pirisohan 28 da- binaba da olo laki Howan sa sai ka batiya da- tinaboy sa daraga. Tinaboy naba ag daraga sa konin adang. 29 Maraw abaritaan naba mga nagtod-an laki Howan ba kora paraoy sata. Kora ginaro da konin lawas da- limbeng. 30 Paoli sa laki Hisos da mga pinili sogoan. Kora sinabi sa konin da boo kora pinanawen da- tindo. 31 Maoson da magrateng mag-alis da- kora Hisos ba nawed katokor mamangan. Kaya sinabi laki Hisos sa mga pinili sogoan amba, Tamo:wani, sata kay sa bokod, sa sai te ka poro wala iraya. Magpahinga te koyo kaagot te. 32 Kaya mangadang kora Hisos, kora ngani te, magsakay sa sai ka bangka paraoy sa sai ka poro wala iraya. 33 Ngani akitan maoson ka iraya da kora omalis da- kora akilalaan. Domalaganan da kaosonan ibat sa boo pamalayanan da- monaan dapo rateng sa kora Hisos. 34 Maraw laki Hisos ba lompot sa bangka, konin akitan da kaosonan iraya da- iya ba ayawtean sa kora, panawen kora ba makay mga topa wala mag-alaga. Ibat saba iya magtodo sa kora maoson ka todo. 35 Maraw sa kapet giraapon:nani, pabali sa konin da konin nagtod-an magsabi amba, Tiya ba sai ka poro nawed nagpamatawan iraya da- giraapon:nani. 36 Kora komo:wa pakadangen, para kora paraoy sa mga paribok goraan, da- sa mga balayan batay kora bomili pag batay namangan. 37 Tembag laki Hisos sa kora amba, Koyo da magtaboy sa kora kora batay namangan. Kora sinabi sa konin, Yamen ma batay paraoy sata para bomili tinapay halaga darwa ka daan dinaryo para kora ba pinakan pamangnen? 38 Kora ba konin tinanong amba, Kaomaning kaoson da koyo tinapay? Koyo ban-awan. Maraw binan-awan:na kora, kora sinabi, Lima ngani ka tinapay, da- darwa ka isda. 39 Kora boo ba pinatongka bokod-bokod sa ilaw ka gamasenan. 40 Kaya kora tomongka magpalbetekan, maki sandaan, maki limampo. 41 Konin ginenan da lima ka tinapay da- da darwa ka isda da- iya tomingara sa langit, magpasalamat da- namisang-misang da tinapay. Konin tinaboy naba sa mga nagtod-an para pamakanen da mga iraya. Konin kay ineray-eray da darwa ka isda sa kora boo. 42 Kora boo ba mamangan da- absoyan. 43 Labindarwa ka alat tinapay namisang da- isda da tinipon. 44 Da mamangan tinapay ba lima ka ribo ka lalaki. 45 Agad sinogo laki Hisos sa konin mga nagtod-an amba, Koyo somakay sa bangka. Kora konin pinaonaan sa karipay, sa Bitsaida da- konin pinaidaw da kaosonan. 46 Maraw paaram:ma iya sa kora ba iya tomokad sa latayan para manarangin. 47 Maraw madlem:mani, sa tenga dagat-dagatan da bangka. Laki Hisos ngani kay da sa tebteban. 48 Konin akitan kora ba ahidapan sa magsagwan, panawen pasarongat sa kora da koaya. Maraw mamoti olnan:nani, iya paraoy sata sa kora, mangadang sa ngaway sapa. Alaweyan:nani disin kora. 49 Maraw kora akitan iya magkadangan sa ngaway sapa ba kora omorasik amba, Bokaw dia naba! 50 Iya ba akitan kora boo da- kora mangirabot. Iya magtokawanan sa kora amba, Pakalakolon koyo remrem, ako laki Hisos. Koyo ayaw aliman. 51 Iya somakay sa bangka. Napra da koaya. Kora ba masyado manggilalas, 52 panawen nawed kora amatangan da para sa mga tinapay; naba ba nawed dapo rateng sa kora remrem. 53 Maraw kaipay:ya kora ba kora rateng sa balonbonan Hinisarit da- ingket da bangka sa takdangan. 54 Maraw kora lompot:tani ba akilalaan gidte mga iraya laki Hisos. 55 Kaya kora mandalaganan sa boo paribok mga goraanan te da- kora inompisahan babaen sa laki Hisos da mga maki maskit sa kora kalkanan, saan man kora abaritaan iya sata. 56 Saan man iya Romateng, sa mga goraan te man, sa mga goraan man, sa mga agayen man ba kora pinalagay da mga maki maskit sa pamiliyan da- sinabi sa konin amba, Pakapkapen yamen sa mga rawraway ngani bado komo nagsool. Da- pomiya da boo komapkap sa rawraway konin bado.
1 Maraw napatipon sa laki Hisos da mga Parisiyo pal-anggat da kalaati mga kamatangen sa Bilin ibat sa Hirosalim, 2 ba kora akitan maki mga nagtod-an laki Hisos mamangan malebag da alima, sa Roma ka tokawanan ba nawed kora mangoyas. 3 Panawen nawed magpamangan mga Parisiyo da- mga boo Roma Diw, anggan nawed kapangoyas piya. Kora nagtoltol da mga tangona kaogalian mga koyay. 4 No da mga Diw ba ibat sa pamiliyan, kora nawed magpamangan anggan nawed kapangoyas piya kora sadiri. Maoson dapo mga Roma ka ogali mga koyay da kora nagtoltol, makay mga mag-oyas kora mga ineman, mga payong, mga kaldido. 5 Kaya da mga Parisiyo da- da mga kamatangen sa Bilin ba magtanong sa laki Hisos amba, Kaytang nawed magtoltol da komo mga nagtod-an sa tangona ogali mga koyay, no nawed ba magpalpamangan malebag da alima? 6 Kora ba timbag laki Hisos amba, Koyo mga mapalawlaw! Totoo da barita laki Isayas para sa koyo amba, Ako naggalang ag kairayaan tiya sa kora ngani tokawanan ngani da kora pad poso ba adayo sa naay. 7 Wala kaparosan da kora magsamba sa naay, da kora nagtodo amba Bilin Diyos kono ba mga maniho ngani mga iraya. Naba:a ngani. 8 Koyo nag-ogonan da Bilin Diyos, da- nagpanawen gayed da mga ogali mga iraya. 9 Konin dapo sinabi sa kora amba, Maparaan:na gidte koyo sa magbenglay Bilin Diyos para koyo adahanan da koyo mga ogali. 10 Panawen sinabi laki Moysis amba, Komo galangen da komo apang da- adang. Naba:a ngani. Da- amba, Da iya magtokawanan daet sa konin apang kayno adang ba batay gidte binono. Naba:a ngani. 11 Kayno amba koyo nagsabi, No maki magsabi sa konin apang kayno sa konin adang amba, Da naay tolong disin sa kandawa ba Korban:nani (da alabet sabiyen Korban ba taboy sa Diyos), 12 no amba da koyo sabi, nawed:da koyo pinabayaan magtolong da mga iraya sa kora apang da- adang. 13 Sa makay naba ba koyo nagwala kaparosan da tokawanan Diyos, da koyo mga ogali da koyo nagtodo da- maoson dapo ka nakayman makay din naba da koyo nagpanawen. 14 Pinaparaoy:yakay laki Hisos da mga iraya sa konin. Konin sinabi sa kora amba, Koyo boo ba magpakarngey sa naay. Koyo gidte pakarngeyan piya. 15 Wala pamangnen namangan iraya da kapadomi sa konin, no nawed ba da maglowas sa remrem iraya, naba da magpadomi sa konin. 16 No maki pakarngey da tawa man, mangarngey iya. 17 Maraw iya kasled:dani sa balay, konin:nani inogonan da kaosonan, ba iya ba tinanong konin mga nagtod-an para sa halimbawa konin aray sinabi. 18 Konin sinabi sa kora amba, Koyo mana wala din remrem? Nawed koyo amatangan amba nawed magpadomi sa iraya da nakayman semled sa konin lawas ibat sa lowas, 19 panawen nawed magseled da pamangnen sa konin remrem, no nawed ba sa konin boyon, da- nagdomi naba? (Sa makay tiya ba konin sinabi amba, Wala pamangnen kapadomi sa iraya.) 20 Konin dapo sinabi amba, Da maglowas sa remrem iraya, naba da magpadomi sa iraya, 21 panawen ibat sa galem, ibat sa konin remrem ba maglowas da daet ka remrem, da nawed piya ka paamotan, da magpanakaw, da magbono iraya, 22 da magpangalonya, da magpaamag sa iraya, da kadaetan, da magpandaya sa iraya, da kakayaan, da magpanida podi, da kapalampawan, da mga kaboslian. 23 Batang sa galem da boo mga daet naba. Naba da magpadomi sa iraya. 24 Ibat sata laki Hisos paraoy sa lopa palteng-anan goraan Tiro da- Sidon. Iya semled sa sai ka balay. Nawed disin konin alabet amatangan tiya kayno tawa. Kayno amba ba nawed din abaya katago iya. 25 Sata maki sai ka babayi maki onga te babayi nag-apo daet ka ispirito. Maraw abaritaan ag babayi sata laki Hisos ba iya paraoy sa konin, maglohod sa konin ropangan. 26 Iya ba taga Siropinisiya. Girigo da konin tokawanan. Iya mag-ay-ay sa laki Hisos amba, Komo kay boyawen sa naay onga da daet ka ispirito. 27 Tembag laki Hisos sa babayi amba, Pabayaan dapo monaan absoyan da mga onga, panawen nawed abaya garwen da tinapay sa mga onga, da- paenen sa mga sigale. 28 Ngani tembag sa konin da babayi amba, Hee kay, Panginoon. Kayno amba, da mga sigale sa ngato balay ba magkain ag mga moyang nangaragrag ibat sa pagkainan mga onga. 29 Kaya sinabi laki Hisos sa konin amba, Panawen sa komo tokawanan naba ba kawo moli:ani. Inogonan:nani ag daet ka ispirito da komo onga. 30 Iya moli da- konin aratnganan konin onga magkalek sa kalkanan, wala:ani da daet ka ispirito. 31 Paoli laki Hisos ibat sa Tiro dako, domalan sa Sidon toloy sa dagat-dagatan Galiliya. Konin binetek da lopa Dikapolis. 32 Magbaba sa konin da mga iraya sai ka iraya bengelen da- kating da dila. Kora inay-ayan sa konin amba, Patimpowen da komo alima sa maki maskit. 33 Maraw napasway sidawa sa kaosonan ba sinogno laki Hisos da konin solo sa talinga pag bengelen, da- iya tempay da- kinoskos sa konin dila. 34 Iya maningara sa langit, minawa lakol da- sinabi amba, Ipata, da alabet sabiyen ba aboswangan. 35 Kamalay te karngey:ya iya, maloga:a da kon dila da- manokawanan:na mapawa. 36 Kora ba pinabilinan laki Hisos amba, Kayno tawa sa koyo ba ayaw batay mamarita. Kayno kora ba pinabilinan ba lalo kay kora sinabi naba. 37 Kora manggilalas gidte da- kora magsabi amba, Piya gidte da boo konin pinanawen. Konin pinakarngey da bengelen, konin pinatokawanan da kating da dila.
1 Naba pag mga aldaw naba, magkatipon:nakay da kaosonan iraya da- kora ba wala batay namangan. Pinaparaoy laki Hisos sa konin da konin mga nagtod-an da- sinabi sa kora amba, 2 Ako ayawtean sa kaosonan, panawen tatlo:wa ka aldaw kora naay kaanggat da- wala batay namangan. 3 No kora naay batay pinaoli sa kora da- kora nagbayog, kora batay nalibed sa dalan, panawen da kalaati sa kora ba ibat sa adayo. 4 Tembag sa konin da konin mga nagtod-an amba, Omaning tamo batay kagaro pamangnen towa sa poro wala balay sibay para kora ba absoyan? 5 Kora ba konin tinanong amba, Kaomaning kaoson da koyo tinapay? Kora tembag, Pito ngani ka tinapay. 6 Konin pinatongka da kaosonan sa lopa, konin ginaro da pito ka tinapay. Maraw iya kapasalamat:tani sa Diyos ba konin namisang-misang da mga naba. Konin tinaboy sa konin mga nagtod-an para kora pamakanen da mga iraya. Kora nanaboy da mga naba sa kaosonan. 7 Kora maki te din mga ibente ka isda. Maraw iya kapasalamat:tani sa Diyos, konin din tinaboy sa kora para pamakanen da mga iraya. 8 Kora mamangan da- absoyan. Kora tinipon da mga lomabis sa mga namisang, da- kora kapno pito ka galang. 9 Apat ka ribo ka iraya da mamangan. Kora pinaoli laki Hisos, 10 da- iya somakay sa bangka pal-anggat konin mga nagtod-an. Kora ba paraoy sa lopa Dalmanota. 11 Romateng da mga Parisiyo. Kora inompisahan magtalo sa laki Hisos. Kora alabet magporba sa konin, kaya kora omaringi sai ka tandaanan ibat sa soksokowan. 12 Minawa lakol laki Hisos. Iya magsabi amba, Kaytang da mga iraya mona ba mag-ay-ay tandaanan? Naay gidte nagsabi sa koyo amba, Wala batay tinaboy tandaanan sa mga iraya mona. 13 Kora ba konin inogonan. Iya somakay sa bangka da- omipay sa karipay. 14 Da mga nagtod-an laki Hisos ba alingwanan da magbalon tinapay. Kora ba wala no nawed ba sai ngani ka tinapay sa bangka. 15 Binilin laki Hisos sa kora amba, Koyo magdahan sa pampahilab mga Parisiyo da- sa pampahilab koyay Hirodis. 16 Magtokawanan da mga nagtod-an amba, Kaya amba da konin sabi ba tamo ba wala tinapay. 17 Maraw amatangan laki Hisos da kora sabi ba konin tinanong sa kora amba, Kaytang koyo magtokawanan para sa koyo ba wala tinapay? Nawed dapo dia koyo amatangan? Nawed dia mapawa sa koyo remrem? Maskil:la dia da koyo poso? 18 Wala ma mata koyo, kayno talinga? Nawed mana koyo nagkaamatangan? 19 Pag naay namisang da tinapay para sa lima ka ribo ka lalaki, kaomaning kaoson ka alat da kapno tinapay namisang da koyo natipon? Kora sinabi sa konin amba, Labindarwa ka alat. 20 Konin dapo tinanong amba, Maraw da pito ka tinapay da naay pinisang para sa apat ka ribo ka lalaki, kaomaning kaoson ka galang da kapno tinapay namisang da koyo natipon? Kora tembag sa konin amba, Pito ka galang. 21 Konin sinabi sa kora, Nawed dapo din koyo amatangan? 22 Kora Romateng sa Bitsaida. Maki iraya mag-akay sai ka lalaki raprap sa laki Hisos da- inay-ayan amba, Iya ba komo kay kapkapen. 23 Konin ginenan sa alima da lalaki raprap da- inakay sa lowas goraan te. Konin tinepayan da konin mata da- pinatimpowan kon alima. Konin sinabi amba, Kawo maki dia nagkaakitan mga nakayman? 24 Da lalaki ba magban-aw da- iya tembag amba, Ako ba kaban-aw:wa mga iraya, makay mga poon kayo magkadangan. 25 Kinapkap laki Hisos da bolaleg pag lalaki. Maman-aw da lalaki, iya kaban-aw:wani. Mapawa:ani konin akitan da boo nakayman. 26 Iya pinaoli:ani laki Hisos sa konin balay da- magsabi amba, Ayaw dapo kawo magparaoy sa goraan te. 27 Laki Hisos pal-anggat da konin mga nagtod-an ba magpatlayon sa mga goraan te bali sa goraan Sisariya Pilipo. Sa dalan konin tinanong da konin mga nagtod-an amba, Tawa kono ako? Nakay da sabi mga iraya? 28 Kora kay tembag sa konin amba, Kawo kono ba laki Howan Tagabaotismo sa sapa. Da sabi mga Roma ba amba, Kawo kono laki Iliyas, da- da mga Roma amba, Kawo ba sai ka tagabarita ibat sa Diyos. 29 Kora konin tinanong amba, Da- sa koyo kay remrem ba tawa ako? Tembag laki Pidro sa konin, Kawo da Kiristo ag sinogo Diyos. 30 Konin binilin sa kora amba, Ayaw pagsabiyen sa kayno tawa da para sa naay. 31 Inompisahan laki Hisos magtodo sa kora amba, Da Onga Iraya ba kailangan mag-agwanta maoson ka kahidapan. Iya ba batay sinikway mga koyay sa goraan, mga koyay magpamanawen sa balay Diyos da- mga kamatangen sa Bilin. Iya ba batay pinabono, ngani kadalan tatlo ka aldaw ba iya batay:yakay biniyag. 32 Konin sinabi da boo naba sa mapawa. Iya ba binokod laki Pidro da- sinabiyan amba, Ayaw disin amba da komo nagsabi. 33 Ngani pomaropang laki Hisos sa konin mga nagtod-an da- konin sinabiyan laki Pidro amba, Satanas, kawo paadayo sa naay. Panawen da komo nagremrem ba nawed da alabet Diyos no nawed ba da remrem iraya. 34 Maraw kalbas ba pinaparaoy laki Hisos sa konin da mga kaosonan da- da konin mga nagtod-an da- sinabi sa kora amba, Da iya alabet mag-anggat sa naay ba iya kailangan magdayo sa konin sadiri alabet, pas-anen da konin kodos, da- omanggat sa naay. 35 Da iya alabet magribri konin biyag ba batay nawala da biyag gidte sa konin, ngani da iya tomaboy konin biyag para gidte sa naay, para sa Pirmida ka Barita, ba batay mag-apo naba. 36 Nakay da batay pakinabang sai ka iraya, kayno konin inapo da boo paranawan da- nawala kay da biyag gidte sa konin? 37 Nakay dia da batay tinaboy mga iraya makay kapalit sa kora biyag? 38 Da iya akayaan sa naay da- sa naay tokawanan sa ropangan mga daet ka iraya, mga nawed matepeden sa Diyos ag nagkabiyag sa odas tiya, ba batay din akayaan ag Onga Iraya, no iya batay rateng sa kapangyadihan konin Apang, pal-anggat konin mga banal ka anghil.
1 Sinabi dapo laki Hisos sa kora, Naay gidte nagsabi sa koyo amba, Da kalaati sa koyo towa ba nawed gidte batay natay anggan nawed kora nagkaakitan da Diyos ba mag-ompisa maghadi maki kapangyadihan. 2 Maraw kadalan anim ka aldaw ba pinaanggat laki Hisos kora Pidro, Tiyago da- Howan. Kora ngani te ba konin pinaanggat sa sai ka atatas ka bogsor. Ibahin:nakay da konin aban-awan sa kora ropangan. 3 Magbalawas da konin nagsool, mapoti gidte. Kayno nakay pag kamatang magpamoti bado ba wala batay tomolad sa mapoti makay naba. 4 Napakomit sa kora sidawa Iliyas da- Moysis. Sidawa magtokawanan sa laki Hisos. 5 Sinabi laki Pidro sa laki Hisos amba, Koyay, piya tamo towa. Yamen batay maggawa tatlo ka barangas, sai sa komo, sai sa laki Moysis, da- sai sa laki Iliyas. 6 Panawen kora aliman gidte ba nawed amatangan laki Pidro da konin tay sinabi. 7 Maki sai ka yaong lomilom sa kora da- maki arngeyan magtokawanan ibat sa yaong amba, Tiya da naay nagpalayaw Onga, iya ba koyo pakarngeyan. 8 Maraw da mga nagtod-an ba maman-aw sa kora paribok ba kora wala:ani akitan no nawed ba laki Hisos nganyani. 9 Ag kora Hisos ba magdolong ibat sa bogsor, konin binilinan da konin mga nagtod-an amba, Ayaw pagsabiyen sa kayno tawa da koyo akitan, anggan nawed nabiyag:gakay ibat sa mga nangatay da Onga Iraya. 10 Kora rinemrem nganyani da nagtokawanan naba, ngani kora magpaltanongan no nakay da alabet sabiyen pag batay:yakay nabiyag ibat sa mga nangatay. 11 Kora magtanong sa laki Hisos, Kaytang nagsabi mga kamatangen sa Bilin amba, Batay monaan towa paraoy laki Iliyas? 12 Iya tembag sa kora amba, Batay ngani- monaan towa paraoy laki Iliyas para pakapiyaen da boo nakayman. Nawed mana sinorat para sa Onga Iraya amba, Kailangan iya mag-agwanta maoson ka kahidapan anggan naglibak? 13 Ngani naay nagsabi sa koyo, Batang:ngani towa paraoy laki Iliyas. Kora kay pinanawen sa konin da kora alabet, makay ag sinorat para sa konin. 14 Maraw kora rateng sa Roma ka mga nagtod-an ba kora akitan da maoson ka iraya sa kora paribok. Da mga kamatangen sa Bilin ba magsongarngar sa kora. 15 Maraw kora akitan laki Hisos, manggilalas da boo kaosonan da- kora domalaganan sa konin da- magtaboy galang sa konin. 16 Kora ba tinanong laki Hisos, Nakay da koyo nagsongarngar sa kora? 17 Tembag sa laki Hisos da sai sa kaosonan amba, Tagatodo, naay pinaanggat sa komo da naay onga lalaki. Iya nawed katokawanan panawen iya nag-apo daet ka ispirito nawed kapatokawanan. 18 Saanman iya inamotan daet ka ispirito ba iya nagtowang, magbora da bibi, mag-itait da ngipen, maskil:la da lawas. Naay inay-ayan sa komo mga nagtod-an amba, Koyo kay boyawen tiya! Ngani nawed kora akayanan. 19 Sinabi laki Hisos sa kora, Ah! Koyo mga iraya wala pag-isarig sa Diyos! Kaomaning dapo kaagot ako batay towa anggat sa koyo? Kaomaning dapo kaagot koyo ba naay batay inagwantahan? Iya koyo paanggaten towa sa naay. 20 Kora pinaanggat da onga sa laki Hisos. Maraw iya akitan pag daet ka ispirito ba kamalay te magpaalintos gidte daet ka ispirito sa onga; iya natwang sa lopa, magliganan magbora da bibi. 21 Tinanong laki Hisos sa apang pag onga amba, Maagot:tani dia naba? Tembag kay iya, Ibatan:na sa iya inonga. 22 Layen te iya nagbenglay sa apoy ag daet ka ispirito, naglimes sa sapa, para iya bonoon. No kawo maki akayanan, kawo kay ayawtean sa kidawa, tolongan kay kidawa. 23 Sinabi laki Hisos sa konin amba, Maki akayanan! Batay apanawen Diyos da boo nakayman sa iraya mag-isarig sa konin. 24 Agad magberya maeyat da apang pag onga amba, Ako ba mag-isarig sa komo, ako kay tolongan sa kakorangan naay pag-isarig. 25 Maraw akitan laki Hisos da kaosonan magdalaganan magkatipon sa konin ba konin sinabiyan da daet ka ispirito amba, Kawo pag ispirito nawed kapatokawanan da- magpabengel, naay nagsogo sa komo, Kawo lomwas:sa sa onga tiya da- iya ayaw:wa pag-apoan:nakay. 26 Magpang-o:wa da daet ka ispirito da- lomwas:sa sa onga, lalo magpangalintos da onga. Makay:ya natay iya. Kaya maoson da magsabi amba, Wala:ani iya. 27 Ngani ginenan laki Hisos da kon alima da- tinolongan magbangon da- iya magpatindeg. 28 Maraw laki Hisos ba semled sa balay, sa wala Roma ka iraya ba iya tinanong konin mga nagtod-an amba, Kaytang nawed yamen kaboyaw ag daet ka ispirito naba? 29 Konin sinabi sa kora, Nawed batay aboyaw kayno tawa man da makay tiya ka daet ka ispirito no nawed ba sa panarangin ngani. 30 Kora omalis sata da- domalan sa Galiliya. Laki Hisos ba dayo disin akilalaan kayno tawa, 31 panawen iya magtodo sa konin mga nagtod-an. Iya magsabi sa kora amba, Da Onga Iraya ba batay tinaboy sa kapangyadihan mga iraya. Iya batay kora binono. No binono:a iya, kadalan tatlo ngani ka aldaw ba iya batay:yakay nabiyag. 32 Ngani nawed kora amatangan da konin sinabi naba. Kayno amba ba kora aliman magtanong sa konin no nakay da alabet sabiyen naba. 33 Kora rateng sa Kapirnaom. Maraw kora sa balay:yani, tinanong laki Hisos sa konin mga nagtod-an amba, Nakay da koyo magta-lowanan sa koyo magkadangan sa dalan? 34 Kora nawed magkasamang panawen kora nagtalowanan sa kora magkadangan sa dalan no tawa sa kora da koyay. 35 Tomongka laki Hisos, pinaparaoy sa konin da konin labindarwa ka nagtod-an da- konin sinabi sa kora amba, Da iya alabet koyay ba iya:akay da makay onga sa boo da- tagapamanawen boo iraya. 36 Iya omakay sai ka ibente ka onga, pinalagay sa kora kagtengaan. Iya ba konin kinelkel da- sinabi sa kora amba, 37 Da iya magtabang sa makay te tiya ka onga sa naay ngaran ba magtabang din sa naay. Da iya magtabang sa naay ba nawed ako da nagtabang no nawed ba da magsogo sa naay. 38 Sinabi laki Howan sa konin, Tagatodo, yamen kaban-aw sai ka iraya magboyaw mga daet ka ispirito sa komo ngaran. Panawen iya ba nawed yamen pal-anggat ba iya ba yamen inayawan. 39 Ngani sinabi laki Hisos, Iya ba ayaw koyo pag-ayawan, panawen da iraya magpanawen makapangyadihan ka panawen sa naay ngaran ba nawed batay magtokawanan daet laban sa naay. 40 Panawen da iya nawed maglaban sa tamo ba mag-anggat sa tamo. 41 Naay gidte nagsabi sa koyo, Da iya magpainem sa koyo sai ka longbowan sapa panawen sa naay ba batay gayed tomabang taboy sibay sa konin pinanawen. 42 Da iya inibatan kadaetan sa sai ka ibente ka onga makay tiya ag mag-isarig sa naay, piya dapo sa konin da iya ba takinan bayowan bato lakol sa leey da- binenglay sa dagat. 43 No da komo alima da inibatan kadaetan sa komo, komo:wani potlon. Piya dapo da kawo semled sa biyag gidte wala arasan potol da komo sai ka alima sa kawo kay maki darwa ka alima da- binenglay sa kapadosahan wala arasan, sa apoy nawed batay natay. 45 No da komo paa da inibatan kadaetan sa komo, komo:wani potlon. Piya dapo da kawo semled sa biyag gidte wala arasan potol da komo sai ka paa, sa kawo kay maki darwa ka paa da- binenglay sa kapadosahan wala arasan, sa apoy nawed tay natay. 47 No da komo mata da inibatan kadaetan sa komo, komo:wa siwiten. Piya dapo da kawo semled sa kahadian Diyos sai ngani da mata, sa kawo kay maki darwa ka mata da- binenglay sa kapadosahan wala arasan. 48 Sata nawed batay natay da eled magpamangan sa lawas, nawed din batay natay da apoy. 49 Panawen da tayma iraya ba batay lininis sa apoy. 50 Piya gidte da asin. Kayno amba, no wala:a da alat, omaning batay apaalat:takay? Kaya kailangan koyo ba maki makay asin sa koyo sadiri da- magpamiyag sa kaginhawahan sa sai-sai.
1 Omalis sata laki Hisos da- paraoy sa porobinsiya Hodiya, sa karipay salog Hordan. Iya ba rinimponan:nakay mga iraya. Toltol sa konin ogali ba iya magtodo sa kora. 2 Maki mga Parisiyo pabali sa konin da- magtanong sa konin para iya ba siloon. Kora amba, Toltol dia sa Bilin Diyos da magpasway pag lalaki sa konin sawa? 3 Iya tembag sa kora, Nakay da binilin sa koyo laki Moysis? 4 Kora sinabi amba, Pinayagan laki Moysis da pakanen kasoratan ag lalaki sa sidawa malsoway, da- padalaganen da babayi. 5 Ngani sinabi laki Hisos sa kora amba, Panawen sa maskil da koyo remrem, kaya konin sinorat da bilin naba para sa koyo. 6 Ngani sa ibatan rinarang Diyos da paranawan ba rinarang da mga iraya lalaki da- babayi. 7 Panawen saba ba batay inogonan pag lalaki da konin apang da- adang da- iya batay sai ngani sa konin sawa. 8 Batay sai:ya ngani sidawa. Kaya nawed:dani sidawa darwa no nawed ba sai nganyani. 9 Kaya ngani- da pinal-anggat Diyos ba ayaw agpalsowayen kayno tawa pag iraya. 10 Maraw sa balay:yakay ba magtanong sa laki Hisos da mga nagtod-an para saba. 11 Konin sinabi sa kora amba, Kayno tawa pag lalaki magpasway sa konin sawa da- magpangisawa:akay sa Roma ba magpangalonya laban sa konin monaan sawa. 12 No da babayi kay da magsoway sa lalaki da- magpangisawa:akay sa Roma, iya da magpangalonya. 13 Kora magtonton sa konin ag mga onga te para konin kapkapen. Ngani kora sinabiyan mga nagtod-an. 14 Maraw akitan tiya laki Hisos ba iya ba adagilan. Konin sinabi sa kora amba, Koyo pabayaan pabali sa naay da mga onga te, kora ba ayaw koyo pag-ayawan, panawen sa mga makay kora da maghadi da Diyos. 15 Naay gidte nagsabi sa koyo, Da iya nawed naghadian Diyos makay sai ka onga ba nawed batay apabilang sa mga onga Diyos. 16 Kora konin kinelkel, pinarongawan da- konin pinatimpo alima sa kora. 17 Maraw kalwas:sani sa dalan laki Hisos para magkadangan ba maki sai ka lalaki magdalaganan pabali sa konin, lomohod sa konin ropangan da- magtanong sa konin amba, Piya ka tagatodo, nakay da kailangan naay panawenen para apoon da biyag gidte wala arasan. 18 Sinabi laki Hisos sa konin amba, Kaytang ako komo nag-awit piya? Wala piya no nawed ba da Diyos ngani. 19 Komo amatangan da mga bilin Diyos amba, Kawo ayaw magbono iraya, ayaw magpangalonya, ayaw magpanakaw, ayaw magpamosli sa kawo magsistigo, ayaw magpandaya, komo galangen da komo apang da- adang. 20 Tembag da lalaki sa konin amba, Tagatodo, da boo bilin naba ba naay tinoltol ibat sa ako ba onga dapo. 21 Laki Hisos ba man-aw sa konin da- pinalayaw. Konin sinabi sa lalaki amba, Sai ngani ka nakayman da korang sa komo, Mangadang:nga kawo. Komo pabiliyen da komo nag-apo da- taboyon sa mga mahidapen da kabayadan. Sa makay naba ba kawo maki batay karon-an gidte sa soksokowan. Kalbas kawo towa paraoy da- omanggat sa naay. 22 Maraw konin arngeyan da tokawanan naba ba malomsi da konin kiray. Marongkot iya mangadang, panawen iya maoson gidte nag-apo. 23 Laki Hisos ba man-aw sa paribok da- sinabi sa konin mga nagtod-an amba, Mahidap:pa gayed apabilang sa mga naghadian Diyos da mga maki maoson nag-apo. 24 Konin mga nagtod-an ba manggilalas sa konin sinabi. Ngani sinabi:yakay laki Hisos sa kora amba, Mga onga, mahidap:pa gayed apabilang sa mga onga Diyos. 25 May-an dapo kadalan sa lobot kadayom da sai ka kamilyo sa apabilang kay sa mga naghadian Diyos da sai ka maki maoson nag-apo. 26 Kora ba manggilalas gayed da- kora sinabi sa konin amba, No amba, tawa da batay aribri? 27 Laki Hisos ba man-aw sa kora da- magsabi amba, Tiya ba nawed batay apanawen iraya, ngani tiya ba nawed mahidap sa Diyos. Da boo nakayman ba abaya apangyadi sa Diyos. 28 Inompisahan magsabi sa konin laki Pidro amba, Komo pakarngeyan! Yamen inogonan da boo da- yamen omanggat sa komo. 29 Sinabi laki Hisos amba, Naay gidte nagsabi sa koyo, Da iya mag-ogon balay, mga kaseledan lalaki e babayi, adang, apang, mga onga anggan mga lopa panawen sa naay da- panawen sa Pirmida ka Barita, 30 ba batay tomabang sai ka daan sagoli mona-mga balay, mga kaseledan, mga adang, mga onga, mga lopa, maki pal-anggat pahidap. Da- sa kadomaen ba batay tinabang da biyag gidte wala arasan. 31 Ngani maoson da monaan da batay paoriyan:nakay. Maoson da paoriyan da batay monaan:nakay. 32 Kora magkadangan sa dalan magtokad sa goraan Hirosalim. Laki Hisos da magpangonaan sa kora magkadangan. Manggilalas da konin mga nagtod-an da- nangaaliman da mga mag-anggat sa kora. Konin:nakay binokod da labindarwa ka konin nagtod-an da- inompisahan sinabi sa kora da batay mangyadi sa konin. 33 Konin sinabi amba, Koyo gidte pakarngeyan! Tamo magtokad sa Hirosalim. Da Onga Iraya ba batay tinaboy sa mga koyay magpamanawen sa balay Diyos, sa mga kamatangen sa Bilin, iya kora batay hinosay katayan da- tinaboy:yakay sa mga Nawed Diw. 34 Iya kora batay tinoya, tinepayan, pinasaplidan da- binono. Ngani sa ikatatlo ka aldaw ba iya ba batay:yakay biniyag. 35 Pabali sa laki Hisos sidawa Tiyago da- Howan, ag mga onga laki Sibidiyo. Sidawa sinabi sa konin amba, Tagatodo, disin kidawa alabet komo panawenen sa kidawa da kidawa batay inay-ayan sa komo. 36 Sidawa ba konin tinanong, Nakay da kandawa alabet naay panawenen para sa kandawa? 37 Sidawa tembag sa konin amba, Kidawa ba patongkaen sai sa komo kanan kapet da- sai kay sa kaliwa dako sa komo kahadian. 38 Sinabi laki Hisos sa sidawa amba, Nawed kandawa amatangan da kandawa nag-ay-ayan. Kandawa dia batay kainem sa naay batay ininem? Kandawa dia abaya pabaotismo sa baotismo naay batay binaotismohan doma? 39 Sidawa tembag sa konin amba, Abaya ngani-. Sinabi laki Hisos sa sidawa, Da ineman naay batay inineman ba kandawa din batay inineman. Kandawa din batay binaotismohan sa baotismo naay batay binaotismohan. 40 Ngani da batay katongka sa naay kanan da- sa naay kaliwa ba nawed ako da maki pakana. Tiya pag mga tongkaan ba para sa mga hinandaan naay Apang. 41 Maraw arngeyan tiya pag sampo ka nagtod-an ba kora abaisan sa talkaka Tiyago da- Howan. 42 Kora ba pinaparaoy laki Hisos sa konin da- konin sinabi sa kora, Koyo amatangan da mga poon sa mga Nawed Diw ba magpapaniwala sa kora boo da- da mga maki kapangyadihan ba magpasakop sa kora. 43 Ngani sa koyo ba nawed amba. Da iya alabet koyay sa koyo ba batay dapo tagapamanawen. 44 Da iya alabet monaan sa koyo ba batay dapo tagoanggat boo. 45 Panawen da Onga Iraya ba paraoy towa nawed para asikasowen no nawed ba para mag-asikaso da- taboyon da konin biyag para natbos da kaosonan. 46 Laki Hisos ba rateng sa goraan Hiriko, anggat da konin mga nagtod-an da- sai ka lakol ka kaosonan. Maraw kora lomwas sa Hiriko, maki sai ka iraya raprap magtongka sa tebteb dalan da- magpangay-ay taboy. Iya ba laki Bartimiyo onga laki Timiyo. 47 Maraw konin arngeyan amba naba ba laki Hisos taga Nasarit ba iya mag-ompisa magpanggayagang amba, Hisos, Kaapoan hadi Dabid, kawo ayawtean sa naay. 48 Iya sinabiyan mga kaosonan amba, Empet:ta kawo. Ngani iya lalo:a magpanggayagang amba, Kaapoan hadi Dabid, kawo ayawtean sa naay. 49 Laki Hisos ba empet sa magkadangan da- magsabi amba, Iya pabaliyen sa naay. Kora binerya da raprap da- sinabi sa konin amba, Pakalakolon da komo remrem, kawo patindeg, kawo konin nagberya. 50 Binenglay ag raprap da konin islen, agad iya patindeg da- paraoy sa laki Hisos. 51 Iya tinanong laki Hisos amba, Nakay da komo alabet naay panawenen sa komo? Tembag da raprap, Koyay, pakaban-aw en disin ako. 52 Sinabi laki Hisos sa konin, Mangadang:nga kawo, kawo napapiya sa kawo mag-isarig sa naay. Kamalay te ba kaban-aw:wani iya da- tomongroy sa laki Hisos sa dalan.
1 Maraw kora nawed adayo sa Hirosalim, sa mga goraan te Bitpagi da- Bitanya, sata sa bogsor Kaolibowan, magsogo laki Hisos sa darwa sa konin nagtod-an 2 amba, Kandawa paraoy sa kabetek te ka goraan. No kandawa semled sata ba kandawa batay akitan da sai ka onga asno nag-eket, wala batang somakay kayno tawa man. 3 Kandawa okaden da- alyan towa. No maki batay tomanong sa kandawa amba, Kaytang kandawa mag-okad tiya? ba kandawa tebagen amba, Tiya ba nagkailangan Panginoon, isag te batay:yakay pinaoli towa. 4 Kaya sidawa mangadang. Sidawa akitan da onga asno nag-eket sata sa sakbawan sa tebteb dalan. Maraw sidawa nag-okad naba 5 ba tinanong pag magpamataw sata. Ay! Kaytang kandawa nag-okad da onga asno tiya? 6 Sidawa sinabi makay pag sinabi laki Hisos. Sidawa kora:a pinabayaan. 7 Sidawa inalyan da onga asno sa laki Hisos da- sinablay sa awak asno da sidawa mga bado da- sinakyan laki Hisos. 8 Maoson da mamaglatag kora mga bado sa dalan. Da Roma kay ba mamaglatag sa dalan mga kalabeganan pintol sa mga agayen. 9 Da mga mangonaan da- da mga magtongroy sa konin ba mamagpanggayagang amba, Hite! Podiyen da magrateng sa ngaran Panginoon! 10 Piya podiyen da kahadian tamo pangapoan laki Dabid batay rateng! Palakolon da Panginoon sa soksokowan! Naba:a ngani. 11 Rateng laki Hisos sa Hirosalim da- iya semled sa balay Diyos. Maraw binan-awan:nani da boo sa paribok, panawen batay:ya madlem, iya lomwas da- paraoy sa Bitanya pal-anggat da labindarwa ka nagtod-an. 12 Maraw omaga:akay, kora paoli:akay ibat sa goraan te Bitanya. Nabayog laki Hisos. 13 Sa adayo dapo iya kaban-aw sai ka poon igos daonan. Iya paraoy para ban-awen no maki bokar. Ngani iya wala akitan no nawed ba mga daon ngani, panawen nawed tagbokar mga poon igos. 14 Konin sinabi sa poon igos amba, Wala:a disin batay mamangan ag komo bokar. Tiya ba arngeyan konin mga nagtod-an. 15 No kora rateng sa Hirosalim ba semled laki Hisos sa lakol ka balay Diyos. Konin inompisahan palwasen da mga magpabili, da- magbili sa galem balay Diyos. Konin namalombog da mga palagyan mga magpamalit kwarta da- da mga palagyan da- mga tongkaan mga magtindahanan mga kalapati. 16 Konin inayawan da mga maki nagbaba domalan sa balay Diyos. 17 Iya magtodo da- magsabi sa kora amba, Nawed mana nagkasorat amba, Da naay balay ba batay balay daranginan boo mga lasyon ngani koyo pinanawen leyang mga magpanakaw. 18 Tiya ba arngeyan mga koyay magpamanawen sa balay Diyos da- mga kamatangen sa Bilin da- kora rinemrem no omaning iya kora batay apabono. Iya ba kora kalimanan panawen magpanggilalas da boo kaosonan sa konin nagtodo. 19 No madlem:mani ba lomwas:sa sa goraan kora Hisos. 20 Maraw omaga:akay ba sa kora magdalan ba kora akitan da poon igos nalayo:wa anggan wakat. 21 Aremreman laki Pidro da- konin sinabi sa laki Hisos amba, Koyay, kawo man-aw! Nalayo:wani da poon igos pag komo sinompa. 22 Tembag laki Hisos sa kora, Koyo mag-isarig sa Diyos. 23 Naay gidte nagsabi sa koyo amba, Da iya magsabi sa bogsor tiya amba, Kawo omalis saba da- lomabo sa dagat, da- iya nawed mag-alingangaan sa konin remrem no nawed ba maniwala gidte ba batay nangyadi da konin sinabi, batay napanawen naba para sa konin. 24 Kaya naay nagsabi sa koyo, Kayno nakay da koyo inay-ayan sa darangin, koyo maniwala amba koyo:wa tinabang da- koyo ngani- tay tinabang naba. 25 Kayno nakay pag odas koyo manarangin, no koyo maki daet laban sa kayno tawa pag iraya ba koyo magpatawad sa konin para koyo pinatawad din koyo Apang sa soksokowan sa koyo mga kadaetan. 26 Ngani no nawed koyo magpatawad, koyo nawed din batay pinatawad koyo Apang sa soksokowan sa koyo mga kadaetan. 27 Kora paraoy:yakay sa Hirosalim. Anggan magkadangan dapo laki Hisos sa balay Diyos, pabali sa konin da mga koyay magpamanawen saba, da mga kamatangen sa Bilin da- da mga koyay sa goraan. 28 Kora sinabi sa konin amba, Sa nakay ka kapangyadihan komo nagpanawen da mga nakayman tiya? Tawa da tomaboy sa komo kapangyadihan para panawenen da makay tiya? 29 Tembag laki Hisos sa kora, Koyo naay din batay tinanong. Koyo tebagen, da- naay batay sinabi sa koyo no saan omibat da naay kapangyadihan mamanawen mga nakayman naba. 30 Da magbaotismo dia laki Howan ba ibat sa Diyos e ibat sa iraya? Koyo tebagen sa naay. 31 Kora ba magmatowidan sa kora sadiri amba, No tamo batay sinabi, Ibat sa Diyos, konin batay sinabi amba, Kaytang iya ba nawed koyo nagpaniwalaan? 32 Ngani no tamo kay batay sinabi, Ibat sa iraya-ba kora ba aliman sa mga iraya panawen akilalaan boo iraya laki Howan ba tagabarita gidte ibat sa Diyos. 33 Kaya kora tembag sa laki Hisos amba, Yamen nawed kamatang. Sinabi kay laki Hisos sa kora, Nawed din naay batay sinabi sa koyo no saan omibat da naay kapangyadihan mamanawen mga naba.
1 Laki Hisos ba mag-ompisa magtokawanan sa kora sa mga halimbawa amba, Maki sai ka iraya magtanem obas sa agayen da- konin binakodan tiya. Iya romior sa bato tay pesaan obas da- magpalagay bantayan. Konin pinaalaga da obasan sa mga iraya mag-alaga, bayo iya paraoy sata sa Roma ka lopa. 2 Maraw rateng:nga da odas batay manggaro bokar ba konin pinaparaoy sa mga mag-alaga da sai ka tagoanggat para garwen sa kora da konin eray sa bokar obas. 3 Ngani iya kora sinonggaban, binogbog, bayo pinaoli wala nagbaba. 4 Konin:nakay pinaparaoy da sai ka konin tagoanggat. Iya kora pinagolatan sa olo da- tinoya. 5 Pinaparaoy:yakay da sai, ngani iya ba kora binono. Ay! Amba din sa maoson dapo ka tagoanggat. Da kalaati ba kora binogbog, da kalaati kay ba binono. 6 Iya maki dapo sai, da konin nagpalayaw onga lalaki. Sa paoriyan ba iya konin pinaparaoy sa kora. Konin rinemrem amba, Kora batay ginalang da naay onga. 7 Ngani mag-osap-osap da mga mag-alaga amba, Tiya da batay mag-apo. Apora:a koyo, tamo bonoon para tamo da batay mag-apo. 8 Iya kora sinonggaban, binono da- binenglay sa lowas obasan. 9 Nakay dia da batay pinanawen pag aponin obasan? Iya batay paraoy sata, konin batay simpo da mga mag-alaga da- konin batay pinaalaga sa Roma da obasan. 10 Koyo nawed dapo ma nagkabasa da sinorat tiya? Da toar inimbanda mga magpanlobo balay ba tiya da maonay ka arigi sa sorokan. 11 Naba da pinanawen Diyos, naba ba kagilalas sa tamo serey. Naba:a ngani. 12 Kora ginayakan para dakepen laki Hisos, panawen kora amatangan laban sa kora da konin halimbawa. Ngani kora kalimanan da kaosonan, kaya iya kora inogonan da- mangadang:ngani. 13 Pinaparaoy sa laki Hisos da nawed naw maoson ka Parisiyo da- mga kapanig koyay Hirodis, para iya ba dakepen sa konin tokawanan. 14 Kora paraoy sa konin da- magsabi amba, Tagatodo, yamen amatangan kawo ba mateped gidte, wala nagpatabi kayno tawa pag iraya; pariho gidte da komo serey sa mga iraya da- komo nagtodo da kaliyagan Diyos toltol sa katotohanan. Toltol dia sa Bilin Diyos da tomaboy bohis sa Sisar e nawed? 15 Ngani amatangan laki Hisos da kora kapalawlawan, kaya konin sinabi sa kora amba, Kaytang ako koyo nagsilo? Ako koyo babaan sai ka dinaryo para naay akitan naba. 16 Kora binaba sa konin. Konin tinanong sa kora, Tawa ladawan tiya, tawa tiya pag sorat? Kora tembag, Sa Sisar ngani-. 17 Sinabi laki Hisos sa kora, Koyo paolien sa Sisar da sa Sisar, da- sa Diyos da sa Diyos. Kora manggilalas sa konin. 18 Pabali sa laki Hisos da mga Sadosiyo, ag magsabi amba, Wala natay batay:yakay nabiyag. Iya kora tinanong amba, 19 Tagatodo, tiya da sinorat laki Moysis para sa yamen, No natay da panganay mga talkakaan lalaki, wala aogonan onga, maki aogonan sawa ba kailangan sinawa:akay konin arian waraan da balo para maki onga para sa natay. 20 Maki pito ka talkakaan lalaki, mangisawa da panganay. Iya natay wala aogonan onga. 21 Sinawa:akay pag waraan da balo; natay din iya wala aogonan onga. 22 Amba din da ikatatlo, anggan da boo mga arian. Da pito ba wala aogonan onga. Sa paoriyan ba natay din da babayi. 23 Sa odas batay:yakay biniyag da mga nangatay, tawa kay kaya da batay sawa pag babayi, panawen da pito ba batang:nga konin sawa? 24 Sinabi laki Hisos sa kora, Nawed dia tiya da koyo kalokohan? Nawed koyo amatangan da kasoratan? Nawed dia koyo amatangan da kapangyadihan Diyos? 25 Da mga iraya, no batay mangon sa mga nangatay, ba nawed:da batay mangisawa, nawed din batay pinaisawa, no nawed ba kora ba batay makay din mga anghil sa soksokowan. 26 Para sa batay:yakay nabiyag da mga nangatay, nawed mana koyo nagkabasa sa ribro laki Moysis, sa eray para sa magbalangabang ababa ka poon kayo, no omaning da sinabi Diyos sa konin, Ako da Diyos koyay Abraham, da Diyos koyay Isaak da- da Diyos koyay Hakob. 27 Kaya da Diyos ba nawed Diyos mga nangatay, no nawed ba Diyos mga biyagan. Koyo ba nawed gidte raoy. 28 Pabali da sai ka kamatangen sa Bilin mangarngey kora magsongarngar. Maraw konin akitan piya da tebag laki Hisos sa kora ba konin tinanong amba, Nakay ka bilin da pirmida sa boo? 29 Tembag laki Hisos, Da monaan ba, Israil! Komo pakarngeyan! Da Panginoon tamo Diyos, da Panginoon ba sai ngani. 30 Komo palayawen da Panginoon komo Diyos boo komo poso, boo komo gisarem, boo komo remrem da- boo komo eyat. 31 Da ikadarwa ba amba, Komo palayawen da komo kapowa iraya makay din pag komo sadiri. Wala:a Roma ka bilin da batay pirmida sa mga naba. 32 Sinabi pag kamatangen sa Bilin sa konin amba, Totoo gidte da komo sinabi, Tagatodo. Totoo amba sai ngani da Diyos, wala:ani Roma no nawed ba iya ngani. 33 Da iya palayawen boo poso, boo kamatang, da- boo eyat, da- da palayawen da kapowa iraya makay ag komo sadiri ba labi dapo sa boo mga taboy inareng da- sa boo mga hayin. 34 Akitan laki Hisos iya tembag maki kaamatangan gayed kaya konin sinabi sa konin amba, Kawo nawed adayo sa kahadian Diyos. Maraw kalbas naba, wala:ani mangahas magtanong dapo sa konin. 35 Sa odas magtodo laki Hisos sa balay Diyos, konin sinabi, Omaning abaya sabiyen mga kamatangen sa Bilin amba da Kiristo ba Kaapoan hadi Dabid? 36 Hadi Dabid, sa paremrem Ispirito Banal, da somabi amba, Sinabi Panginoon sa naay Panginoon amba, Kawo magtongka sa naay kanan kapet, anggan sa naay:yani pinalagay da komo mga kalaban sa galem komo mga araprapa. Naba:a ngani. 37 No hadi Dabid ba omawit sa konin amba, Panginoon, ba omaning ngani- iya kaongaan hadi Dabid? Da lakol ka kaosonan ba angasan magpakarngey sa konin. 38 Sa iya magtodo konin sinabi, Koyo magdahan sa mga kamatangen sa Bilin. Kora alabet mag-ayamen magsool maaba ka bado, alabet naggalang sa mga pamiliyan. 39 Kora alabet da pili ka tongkaan sa mga balay pagtiponan mga Diw da- alabet kora ba ginalang sa mga kasayahan. 40 Kora mag-aboso sa mga babayi balo da- ginaro da kora mga balay. Kalbas ba kora magdarangin maaba para takleban da kora daet ka pinanawen. Kaya lalo:a mabyat da padosa kora batay tinabang. 41 Laki Hisos ba tomongka betek sa sognoan taboy sa balay Diyos. Konin nagban-awan da kaosonan magpalagay kwarta sa sognoan taboy. Maoson maki karon-an da magpalagay lakol da halaga. 42 Pabali kay da sai ka mahidapen gidte ka babayi balo. Iya lomabo darwa ka kwarta te, da halaga ba sai ka sintimos te. 43 Pinaparaoy laki Hisos sa konin da konin mga nagtod-an da- sinabi sa kora amba, Naay gidte nagsabi sa koyo, Da mahidapen gidte ka babayi balo tiya ba pomalagay labi dapo sa boo magpalagay sa sognoan taboy. 44 Kora boo ba magtaboy ibat sa kalabisan kora mga nag-apo, ngani da mahidapen gidte ka balo naba ba tomaboy boo konin kabiyagan.
1 Sa odas lomwas laki Hisos sa balay Diyos, sinabi sa konin pag sai sa konin nagtod-an amba, Tagatodo, komo ban-awan da kagilalas mga bato ag lakol ka balay Diyos. 2 Sinabi laki Hisos sa konin amba, Komo dia akitan da lakol ka balay Diyos tiya? Wala batay natra bato mag-ikapet sa kapowa bato nawed batay natikwar. 3 Magtongka laki Hisos sa bogsor Kaolibowan betek sa balay Diyos. Iya tinanong kora Pidro, Tiyago, Howan da- Anris sa nawed amatangan Roma amba, 4 Komo sabiyen sa yamen, kaomaning kaagot bayo batay nangyadi naba? Nakay da batay tandaanan sa bali:yani batay nangyadi da boo naba? 5 Sinabi sa kora laki Hisos, Koyo magdahan para koyo nawed liningo kayno tawa man. 6 Maoson da batay towa paraoy sa naay ngaran batay magsabi amba, Ako da Kiristo. Da- maoson da batay kora liningo. 7 No koyo kabarita mga labanan, mga nagsabi-sabi para sa mga labanan, koyo ayaw aliman. Kailangan mangyadi naba. Kayno amba, nawed dapo arasan paranawan. 8 Panawen batay maglabanan da sai ka lasyon laban sa sai:yakay ka lasyon, da sai ka kahadian laban sa sai:yakay ka kahadian. Batay lomindol sa Roma-Roma ka poro, maki batay tagbayog. Tiya ngani da ibatan mga kahidapan. 9 Magdahan nga koyo. Panawen sa naay ba koyo batay ginaladgad sa mga hosayan, koyo batay binogbog sa mga balay pagtiponan mga Diw, batay pinaropang sa mga gobirnador da- mga hadi para magsistigo sa kora. 10 Kailangan dapo pangadaren sa boo mga lasyon da Pirmida ka Barita. 11 No koyo batay dinakep da- hinosay ba koyo ayaw magtarongisngis sa koyo batay sinabi. Koyo sabiyen da batay tinaboy sa koyo sa odas naba, panawen nawed koyo da batay magtokawanan no nawed ba da Ispirito Banal. 12 Da kakaan ba batay magpabono sa kon arian, da apang sa konin onga. Batay lomaban da mga onga sa kora mga apang da- adang da- batay magpabono sa kora. 13 Koyo batay namaisan boo panawen sa koyo mag-isarig sa naay ngaran. Kayno amba, batay naribri da iya mag-agwanta anggan. 14 Ngani no koyo batay akitan da Kabalhag wala ikadarwa batay magpatindeg sata sa nawed konin gidte patindegan (remremen ag magbasa da alabet sabiyen naba!), no naba da mangyadi ba piya domalagan sa kabogsoran da mga sa Hodiya. 15 Da iya sa awakan balay ba ayaw:wa lompot da- semled sa konin balay para gomaro nakayman. 16 Da mga sa agayen ba ayaw:wa moli para gomaro kora islen. 17 Daet gidte sa mga babayi bonting da- sa mga magpadodo sa mga aldaw naba. 18 Koyo daranginen ayaw mangyadi da makay tiya sa tagdimla. 19 Panawen sa mga aldaw naba maki batay kahidapan nawed dapo dinanas iraya ibat rinarang Diyos da paranawan anggan mona, da- nawed:da batay nangyadi kadomaen. 20 No nawed pinabali te Panginoon da aldaw naba ba wala disin iraya naribri. Ngani para ngani sa konin mga hinidang ba konin pinabali te da mga aldaw naba. 21 No maki magsabi sa koyo, Koyo ban-awan! Towa da Kiristo! e, Saba iya! ba koyo ayaw magpaniwala saba. 22 Maki batay magpasoli amba iya da Kiristo, da- magpasoli tagabarita batay magpaban-aw mga tandaanan, mga kapanggilalas para kora lingowen no abaya kayno da mga hinidang. 23 Ngani koyo magdahan! Monaan:na naay sinabi sa koyo da boo. 24 Ngani sa odas naba, no kalawey:yani da kahidapan naba ba batay napleg da aldaw, nawed batay magtaboy rawa da bolan, 25 batay nangaragrag da mga magirem ibat sa langit da- batay magyoyoan da mga kapangyadihan sa kalaw-awan. 26 No kadalan:na naba ba kora batay akitan da Onga Iraya Romateng sa ngaway mga yaong, maki lakol ka kapangyadihan da- kalakolan. 27 Konin batay pinaidaw da konin mga anghil, batay tinipon da konin mga hinidang ibat sa mga apat ka solok paranawan, ibat sa mga hangganan paranawan, kayno saan. 28 Sa nagpangyadi sa poon igos koyo tay amatangan da todo tiya. No magpamongkolan da- magpanalbos da pad sanga naba, koyo amatangan bali:yani da tag-adaw. 29 Amba kay din, no koyo akitan da magpangyadi mga nakayman naba, koyo amatangan bali:yani iya, sa song-awan:na iya. 30 Naay gidte nagsabi sa koyo, Nawed dapo batay nangatay da mga iraya nagkabiyag sa odas tiya bayo mangyadi da boo naba. 31 Batay nawala da langit da- da lopa, ngani nawed batay nawala da naay mga tokawanan. 32 Ngani para sa aldaw, para sa odas naba, wala kamatang, kayno mga anghil Diyos sa soksokowan, kayno da Onga; da Apang ngani da kamatang. 33 Koyo magdahan magbantay panawen nawed koyo amatangan no kaomaning kaagot bayo rateng da odas. 34 Makay sai ka iraya magparaoy sa adayo : sa odas iya mangadang ibat sa konin pamatawan ba konin nagkatiwalaan da konin mga tagoanggat, tayma sai sa konin-konin mga panawenen. Konin:na din sinogoan da magbantay sa sakbawan amba, Kawo magbantay. 35 Kaya layen koyo magbantay, panawen nawed koyo amatangan no kaomaning kaagot bayo rateng da aponin balay-no sa madlem:mani, no sa tenga:ani madlem, no sa daling-adaw, no sa omaga. 36 Kaaram iya bigla rateng kaaram aratnganan koyo magkakalek. 37 Da naay nagsabi sa koyo ba naay nagsabi sa boo : Koyo magbantay.
1 Darwa nganyani ka aldaw bayo odas:sa Paskwa mga Diw. (Naba da odas kora magremrem sa maglekat kairayaan Israil ibat sa Ihipto) da- malpamangan tinapay wala pampahilab. Magremrem mga koyay magpamanawen sa balay Diyos da- mga kamatangen sa Bilin no omaning kora batay gomawa padaan para abelen laki Hisos da- pabonoon. 2 Kora nagsabi amba, Ayaw sa aldaw Paskwa para nawed mabolyawak da mga iraya. 3 Maraw laki Hisos ba sa Bitanya sa balay laki Simon ag panyakiten, sa odas iya magpamangan dapo, maki rateng sai ka babayi maki nagbaba sognoan alabastro makay keden te kapno banglo nag-awit nardo, lakol gidte da halaga. Konin binoong da sognoan, binobo sa olo laki Hisos. 4 Ngani da kalaati magsabi maki dagil amba, Kaytang binobo da banglo sa makay naba? 5 Piya disin pabiliyen dapo sa nawed ngani tatlo ka ribo ka piso da banglo tiya. Piya dapo da taboyon sa mga mahidapen da kabayadan naba. Da- kora minoda da babayi naba. 6 Ngani sinabi laki Hisos, Iya koyo pabayaan, kaytang iya koyo nagmoda? Piya da konin pinanawen naba sa naay. 7 Layen koyo kaanggat-anggat da mga mahidapen. Kayno kaagot no koyo alabet ba abaya koyo panawenen da piya sa kora. Ngani ako ba nawed layen koyo kaanggat. 8 Konin pinanawen da konin akayanan. Da iya magbobo banglo sa naay ba maghanda sa ako batay limbeng. 9 Naay gidte nagsabi sa koyo, Saan man sa boo paranawan batay pinangadar da Pirmida ka Barita ba batay din nanoltol da konin pinanawen tiya, sa magparemrem sa konin. 10 Laki Hodas Iskariyoti, sai sa labindarwa ka nagtod-an ba pomaraoy sa mga koyay magpamanawen sa balay Diyos para paabelen laki Hisos sa kora. 11 No kora arngeyan tiya, kora angasan da- mangako amba batay tinaboyan kwarta laki Hodas. Ibat saba, konin sinarak odas piya para paabelen laki Hisos sa kora. 12 Rateng:ngani da monaan aldaw para malpamangan tinapay wala pampahilab, da- mga aldaw kora nagbono da topa te Pamaskwa. Sinabi sa laki Hisos ag konin mga nagtod-an amba, Saan komo alabet yamen paraoy da- maghanda para sa tamo ag tal-aponan Pamaskwa? 13 Konin pinaidaw da darwa sa kora da- sinabi sa sidawa amba, Kandawa paraoy sa goraan lakol. Koyo maki batay asma sai ka lalaki maki nagbaba keden sapa. 14 Kandawa tomongroy sa konin. Saan man iya semled, kandawa sabiyen sa koyay sa balay naba, Nagsabi ag koyay amba, Saan rado da abaya ako mamangan tal-aponan Pamaskwa kasaro da naay mga nagtod-an? 15 Konin batay Pinaban-Aw sa kandawa da sai ka lakol ka rado sa ngaway, handa:ani da boo kagamitan. Sata kandawa batay maghanda pamangnen para sa tamo. 16 Mangadang kolaki magparaoy sa goraan. Sidawa akitan da boo makay pag konin sinabi sa sidawa da- sidawa hinanda da tal-aponan Pamaskwa. 17 Maraw madlem:mani, laki Hisos ba paraoy sata anggat sa labindarwa. 18 Sa odas kora magpalibay dapo da- malpamangan, sinabi laki Hisos amba, Naay gidte nagsabi sa koyo, Ako batay tinaboy sa naay mga kalaban. Sai sa koyo, naay kasaro towa da batay pomaabel sa naay. 19 Ibat saba kora marongkot da- pasliyanan iya-iya magtanong amba, Ako dia? 20 Konin sinabi sa kora, Sai iya sa labindarwa, ag magdede tinapay sa talambo naay din nagdedean. 21 Batay nata:ani da Onga Iraya, makay ag sinorat para sa konin. Ngani daet gidte sa iraya batay pomaabel sa Onga Iraya. Piya dapo sa iraya naba da iya nawed:da inonga. 22 Sa odas kora ba mamangan dapo, laki Hisos ba gomaro tinapay. Maraw iya kapasalamat:tani, konin namisang-misang te naba, da- tinaboy sa kora magsabi amba, Koyo garwen tiya, tiya da naay lawas. 23 Kalbas iya gomaro ineman. Maraw iya kapasalamat:tani, konin tinaboy sa kora. Kora boo ba minem saba. 24 Konin sinabi sa kora amba, Tiya da naay daya pantibayan sa kasaiyan pinanawen Diyos, ag batay nabobo para sa kaosonan. 25 Naay gidte nagsabi sa koyo amba, Ako nawed:dani batay minem sapa bokar obas anggan sa aldaw ako batay:yakay minem ag bayo ka sapa obas sa kahadian Diyos. 26 No kora kaawit:tani magpasalamat sa Diyos ba kora ba paraoy sa bogsor Kaolibowan. 27 Sinabi laki Hisos sa kora amba, Koyo boo ba batay nagkaatbek sa naay, panawen nagkasorat amba, Naay batay pinakaskitan da mag-alaga topa da- batay mangalat da mga topa. Naba:a ngani. 28 Ngani no ako batay:yakay biniyag, ako batay monaan sa koyo sa Galiliya. 29 Sinabi laki Pidro sa konin, Kayno batay nagkaatbek sa komo da Roma ba ako ba nawed. 30 Sinabi laki Hisos sa konin, Naay gidte nagsabi sa komo, Mona pag madlem tiya, bayo kadarwa mangarang-it da manok ba katatlo:wa ako komo batay tinanggiyan. 31 Ngani magtokawanan maeyat laki Pidro amba, Kayno natay komo kaanggat, kawo nawed gidte naay batay tinanggiyan. Amba din da sinabi kora boo. 32 Kora paraoy sa sai ka poro nag-awit Hitsimani. Sinabi laki Hisos sa konin mga nagtod-an amba, Koyo tomongka dapo towa, ako batay magdarangin. 33 Konin pinaanggat kora Pidro, Tiyago da- Howan, da- inompisahan alsowan remrem, da- nagkaalognoyan gidte. 34 Konin sinabi sa kora, Masyado gidte ako nagkaalognoyan anggan katayan. Koyo towa, koyo magpolawan. 35 Paadayo te iya, da- maglohod da- magdarangin amba, No abaya lomawey kay sa naay da odas naba. 36 Konin sinabi, Naay Apang, da boo nakayman ba komo apangyadi. Pakaadayoon kay sa naay da kahidapan tiya. Kayno man, nawed kay da naay alabet, no nawed ba da komo alabet. 37 Iya pabali sa kora da- konin aratnganan kora nangakalek. Konin sinabi sa laki Pidro amba, Simon, nagkakalek mana kawo! Nawed dia abaya kawo apolawan kayno kaagot te? 38 Koyo polawan da- magdarangin para koyo nawed nadaeg togso. Da ispirito ba alabet gidte disin ngani da lawas kay ba mahina. 39 Iya mangadang:ngakay da- mag- darangin makay ag konin aray dinarangin. 40 Iya pabali:yakay sa kora da- aratnganan kora nangakalek, panawen kora ba nagkakalek:ka gidte. Nawed kora amatangan da batay kora timbag sa konin. 41 Ikatatlo iya paraoy da- sinabi sa kora. Nagkakalek dia koyo da- magpahinga dapo? Sibay:yani naba, rateng:ngani da odas. Mona ba batay:ya pinaabel da Onga Iraya sa alima mga daet ka iraya. 42 Mangon:nani koyo, tamo:wani. Koyo ban-awan, bali:ya te da batay omabel sa naay. 43 Sa odas magtokawanan dapo laki Hisos, rateng laki Hodas, sai sa labindarwa ka nagtod-an, konin pal-anggat da maoson ka iraya batang sa mga koyay magpamanawen sa balay Diyos, sa mga kamatangen sa Bilin da- sa mga koyay sa goraan. Kora maki pad nagbaba pisaw da- pamogbog. 44 Tinaboy:ya ag omaboso sa kora da sai ka tandaanan amba, Da naay batay inamo ba iya:a ngani- da koyo nagsarak. Iya koyo dakepen da- dahanan paanggaten. 45 Maraw rateng laki Hodas, iya pabali sa laki Hisos da-magsabi amba, Tagatodo! da- iya konin inamo. 46 Iya kora ginenan da- dinakep. 47 Linangso konin pisaw ag sai sa mga magpatindeg sata, pinalang da tagoanggat ag koyay lakol magpamanawen sa balay Diyos da- sinapsap da konin talinga. 48 Sinabi laki Hisos sa kora. Koyo mana towa paraoy maki nagbaba pisaw da- pamogbog para mag-abel sa naay? Ako dia ba sai ka magpanakaw? 49 Aldaw-aldaw ako koyo pal-anggat magtodo sa balay Diyos. Kaytang ako nawed koyo inabel? Ngani nangyadi tiya para tepden da mga Kasoratan. 50 Iya inogonan boo konin mga nagtod-an, kora mandalagan. 51 Anggat sa konin ba maki sai ka binata nagpaislen ngani islen da lawas, wala baay. Iya kora sinonggaban. 52 Ngani konin inogonan konin islen da- domalagan maglangdayan. 53 Kora pinaanggat laki Hisos sa koyay lakol magpamanawen sa balay Diyos. Sata magrimpon da boo mga koyay magpamanawen sa balay Diyos, da mga koyay sa goraan da- da mga kamatangen sa Bilin. 54 Tomongroy laki Pidro sa konin da- paogon, anggan sa ayanmanan ag koyay lakol magpamanawen sa balay Diyos. Iya magtongka anggat sa mga magbantay da- magpanaang sa apoy. 55 Da mga koyay magpamanawen sa balay Diyos da- da boo hosayan lakol mga Diw ba somarak batay magsistigo laban sa laki Hisos para iya ba apabono. Ngani kora ba wala akitan. 56 Kayno maoson da somistigo sa kabolaanan laban sa konin ba nawed makay din da kora sabi. 57 Maki nawed naw maoson patindeg magsabi nawed totoo laban sa konin amba, 58 Yamen arngeyan da konin sinabi amba, Naay batay ginras tiya pag balay Diyos pinanawen alima da- sa tatlo ka aldaw ako batay:yakay magpanawen Roma nawed pinanawen alima. 59 Amba man, nawed makay din da kora sabi. 60 Kaya magpatindeg sa kagtengaan kaosonan da koyay lakol magpamanawen sa balay Diyos. Laki Hisos ba konin tinanong amba, Kawo wala dia batay atebag? Nakay da nagsistigohan mga iraya tiya laban sa komo? 61 Ngani iya nawed magkasamang, nawed iya tembag. Iya ba tinanong:ngakay pag koyay lakol magpamanawen sa balay Diyos, Kawo dia da Kiristo, ag Tagaribri pinangako Diyos kapodi-podi? 62 Sinabi laki Hisos, Ako ngani-! Da- koyo batay akitan da Onga Iraya magtongka sa kanan kapet Diyos Makapangyadihan da- batay towa magparaoy sa ngaway mga yaong sa langit. 63 Kaya sinagi pag koyay lakol magpamanawen sa balay Diyos da konin nagsool bado da- sinabi amba, Kaytang tamo kailangan dapo mga sistigo? 64 Koyo:wa da karngey pag iya magtongayaw sa Diyos. Nakay da koyo remrem? Kora boo ba magtarobagan amba, Piya iya bonoon! 65 Da kalaati sa kora ba omompisa iya ba nagpanepayan, kora tinakleban da konin kiray da- sinampal magsabi amba, Anta! Komo holaan! Da- iya ba sinampal mga bantay. 66 Sa ayanmanan dapo laki Pidro. Pabali sai sa mga tagoanggat babayi ag koyay lakol magpamanawen sa balay Diyos. 67 No konin akitan laki Pidro magpanaang ba konin minasdan gidte piya da- sinabi amba, Kawo din ba pal-anggat laki Hisos taga Nasarit. 68 Ngani tomanggi laki Pidro amba, Nawed naay amatangan, nawed naay apawaan da komo nagsabi. Iya lomwas sa makay mga sakbawan. Mangarang-it da manok. 69 No iya akitan pag tagoanggat babayi, konin:nakay sinabi sa mga magpatindeg sata amba, Tiya pag iraya tiya ba sai sa kora. 70 Ngani konin:nakay tinanggiyan. Kaagot te ngani, sinabi:ya kay sa laki Pidro pag mga sata amba, Kawo sai nga ma sa kora panawen kawo ba taga Galiliya. 71 Ngani iya omompisa manompa amba, Amatangan Diyos amba nawed naay akilalaan da iraya tiya ag koyo nagsabi. 72 Kamalay te mangarang-it:takay da manok kadar-wa:ani. Aremreman:nakay laki Pidro da sinabi laki Hisos sa konin amba, Bayo kadarwa mangarang-it da manok ba katatlo:wa ako komo batay tinanggiyan. No aremreman tiya, iya masyado gidte mag-ogwang.
1 Maraw omaga:akay, mamagtokawanan da mga koyay magpamanawen sa balay Diyos, da mga koyay sa goraan da- da mga kamatangen sa Bilin anggan da boo hosayan lakol mga Diw. Kora pi-naeket laki Hisos, pinaanggat da- tinaboy sa koyay Pilato. 2 Tinanong sa konin koyay Pilato amba, Kawo dia da Hadi mga Diw? Iya tembag sa konin amba, Kawo:wa da magsabi. 3 Iya binintang mga koyay magpamanawen sa balay Diyos maoson ka tokawanan. 4 Tinanong:ngakay koyay Pilato sa konin amba, Kawo wala mana batay atebag? Komo arngeyan da kaosonan kora binintang laban sa komo. 5 Ngani nawed:dani tembag laki Hisos, kaya manggilalas koyay Pilato. 6 Tayma Paskwa mga Diw da ogali koyay Pilato ba bal-anan da sai ka piriso kora nag-ay-ayan. 7 Maki sai ka lalaki da ngaran ba Barabas, piniriso anggat sa mga iraya magbolyawak laban sa gobirno. Iya bomono iraya sa odas mabolyawak. 8 Magrimpon da kaosonan da- omompisa ay-ayan sa koyay Pilato amba, Komo kay toltolon da kaogalian nagpanawen dag-on-dag-on sa yamen. 9 Iya tembag sa kora amba, Alabet dia koyo da naay bal-anan sa koyo da Hadi mga Diw? 10 Amatangan koyay Pilato amba panawen aswitan da mga koyay magpamanawen sa balay Diyos ba laki Hisos ba tinaboy sa konin. 11 Ngani inolokan da kaosonan pag mga koyay magpamanawen sa balay Diyos amba laki Barabas da bal-anan sa kora. 12 Tinanong:ngakay sa kora koyay Pilato amba, Nakay ngani- da naay batay pinanawen sa iraya tiya ag koyo nag-awit Hadi mga Diw? 13 Kora magtakap:pakay lakol amba, Papakoon iya sa kodos! 14 Sinabi koyay Pilato sa kora, Kaytang, nakay da konin pinanawen daet? Lalo dapo gidte kora tomakap amba, Papakoon ngani- sa kodos. 15 Kaya panawen alabet koyay Pilato taboyon kaangasan sa kaosonan ba konin binal-anan sa kora laki Barabas. Konin pinabogbog laki Hisos, da- tinaboy sa mga sondalo para pakoon sa kodos. 16 Laki Hisos ba pinaanggat mga sondalo sa balay gobirnador ag nag-awit Piritoryo. Kora rinimpon da kaban sondalo. 17 Kora sinoolan laki Hisos islen tina obi. Kora binalikaw dawey, pinanawen talawak da- sinorbong sa konin olo. 18 Kora inompisahan magberya sa konin amba, Nabiyag! Hadi mga Diw! 19 Kora nanampok bolo sa konin olo da- nanepayan. Kora lomohod magpasoli maggalang sa konin. 20 Maraw iya kora natoya:ani, kora linso da islen tina obi, da- sinool:lakay sa konin da konin mga layen nagsool da- iya pinaanggat para pakoon sa kodos. 21 Laki Simon taga Sirini, apang kolaki Alihanro da- Ropo ba domalan sata batang sa agayen. Iya kora pinirit da- pinapas-an da kodos laki Hisos. 22 Kora pinaanggat laki Hisos sa poro nag-awit Golgota-da alabet sabiyen Golgota ba poro Bongo. 23 Iya kora tinaboyan alak maki kaliog reta nag-awit mira ngani iya dayo minem naba. 24 Iya ba kora pinako sa kodos. Da konin aray sinool ba kora magpostahanan para erayen da- amatangan no nakay da batay nagaro tayma sai. 25 Sa odas pangitlogan manok iya ba kora pinako sa kodos. 26 Makay tiya da kasoratan laban sa konin : da Hadi mga Diw. 27 Maki din darwa ka magpanakaw pinako sa kodos-sai sa konin kanan kapet, sai kay sa kaliwa. 28 Makay naba ba nangyadi:yani da sabi Banal ka Kasoratan amba, Iya pi-naanggat:ta din sa mga makadaetan. Naba:a ngani. 29 Iya naglibak pag mga agdalan maglinglingayan da olo da- magsabi amba, Ey! Nawed ma kawo da magsabi batay maggeras pag balay Diyos da- sa tatlo ka aldaw ba batay:yakay pinanawen; 30 komo kay ribriyen da komo sadiri. Kawo lompot ngani- sa kodos. 31 Pag mga koyay magpamanawen sa balay Diyos pal-anggat mga kamatangen sa Bilin ba magtoya din sa konin amba, Konin rinibri da Roma ngani nawed kay konin aribri da konin sadiri! 32 Lompot mona sa kodos da Kiristo, da Hadi sa Israil, para tamo akitan da- tamo batay maniwala sa konin. Tinoya din iya konin mga pal-anggat pinako sa kodos. 33 Maraw tenga:a aldaw ba kem-lep sa boo lopa anggan magsalangdayan:na da aldaw. 34 Maraw batay:ya magsalangdayan da aldaw ba magpanggayagang maeyat laki Hisos amba, Iloy! Iloy! Lama sabaktani? da alabet sabiyen ba, Naay Diyos, naay Diyos, kaytang ako komo pinabayaan? 35 Maraw arngeyan naba mga kalaati magpatindeg sata ba kora sinabi amba, Koyo pakarngeyan, konin nagberya laki Iliyas. 36 Maki sai ka iraya domalaganan, konin ginaro sai ka makay lomot, dinede sa soka, pinalagay sa tangboan bolo da- pinasepsep sa laki Hisos nagsabi amba, Ayaw dapo, tamo ban-awan kaaram batay rateng laki Iliyas para iya ba palpoton. 37 Laki Hisos ba mang-o lakol bayo iya agtoan:na inawa. 38 Nasagi da sagodang sa kagtengaan balay Diyos ibat sa ngaway anggan sa ngato. 39 Da poon sa sandaan ka sondalo ba magpatindeg magpaloba sa laki Hisos. Maraw konin akitan no omaning nagto da inawa laki Hisos ba konin sinabi amba, Katotohanan da iraya tiya ba Onga Diyos! 40 Maki kay din mga babayi magban-aw ibat sa adayo. Anggat din sa kora bayi Mariya Magdalina, bayi Mariya adang kolaki Tiyago te da- Hosi, da- bayi Salomi, 41 ag layen anggat sa konin da- magtolong sa konin sa Galiliya, da- maoson dapo ka Roma ka babayi tomokad sa Hirosalim anggat sa konin. 42 Ag aldaw da mga Diw ba maghanda para sa aldaw Paskwa, sa odas masoram-soram:mani ba laki Hosi taga Arimatiya ba matapang paraoy sa koyay Pilato da- inay-ayan da bangkay laki Hisos. Iya ba sai ka naggalang anhohosay sa hosayan lakol mga Diw, magpanya sa batay:ya maghadi da Diyos. 44 Rinemrem koyay Pilato kaaram nawed dapo natay laki Hisos. Kaya konin pinatwagan da poon sa sandaan ka sondalo da- tinanong no natay:ya ngani- laki Hisos. 45 Maraw amatangan amba natay:ya ngani- iya, konin sinabi amba abaya garwen laki Hosi da bangkay. 46 Bomili laki Hosi sai ka papa golanit mapoti. Maraw konin:nani lin-at sa kodos da bangkay ba konin binedbederan sa papa golanit, da- limbeng sa lebeng lineyang bato da- konin linigan da sai ka bato takep sa sakbawan lebeng. 47 Akitan kobayi Mariya Magdalina da- Mariya adang laki Hosi no saan iya pinalagay.
1 Maraw kadalan:na da Aldaw Magpahinga, bayi Mariya Magdalina, bayi Mariya adang laki Tiyago da- bayi Salomi ba bomili banglo para pairan da bangkay laki Hisos. 2 Omaga gidte sa monaan aldaw sa pito ka aldaw, sikat:ta da aldaw, kora paraoy sa lebeng. 3 Kora magtokawanan sa sai-sai amba, Tawa da batay kaligan pag bato takep sa sakbawan lebeng? 4 panawen lakol gidte da bato. Maraw kora riniwa da lebeng, naligan:nani da bato. 5 Kora semled sa lebeng da- akitan sai ka binata magtongka sa kapet kanan, magbado mapoti. Kora ba nangaaliman gidte. 6 Sinabi pag lalaki sa kora amba, Koyo ayaw aliman! Koyo nagsarak laki Hisos taga goraan Nasarit, ag pinako sa kodos. Iya wala:a towa. Iya ba nabiyag:gakay. Koyo ban-awan no saan iya pinalagay. 7 Koyo paraoy da- sabiyen sa konin mga nagtod-an da- sa laki Pidro amba iya batay monaan sa koyo sa Galiliya. Sata iya koyo batay akitan, makay ag konin sinabi sa koyo. 8 Lomwas da mga babayi, magdalagan ibat sa lebeng. Kora magtartaroy da- mangirabot. Panawen sa kora ba aliman gidte, kora wala sinabi kayno sa tawa man. 9 Nagkaomaga gidte sa monaan aldaw sa pito ka aldaw ba nabiyag:gakay laki Hisos. Iya paban-aw dapo sa bayi Mariya Magdalina (ibat sa konin pito ka daet ka ispirito ba binoyaw laki Hisos). 10 Pomaraoy bayi Mariya Magdalina sa mga nagtod-an laki Hisos. Kora marongkot dapo da- magpanangis. Konin binarita amba konin akitan laki Hisos. 11 Ngani kayno kora arngeyan biyagan:nakay laki Hisos da- iya ba akitan bayi Mariya Magdalina, nawed din kora maniwala. 12 Kalbas naba, paban-aw laki Hisos sa darwa ka nagtod-an, ag odas sidawa magkadangan paraoy sa alamanan, sa Roma:akay ka hidsoda. 13 Sidawa ba paoli sa Hirosalim da- binaritaan da mga Roma. Ngani nawed din kora magpaniwala mga naba. 14 Kalbas iya paban-aw sa labinsai ka nagtod-an sa odas kora magpamangan dapo. Kora konin sinabiyan panawen sa kora nawed mag-isarig, da- sa maskil da kora remrem panawen nawed kora nagpaniwalaan da mga kaban-aw sa konin amba iya nabiyag:gakay. 15 Konin sinabi sa kora amba, Koyo paraoy sa boo paranawan da- magpang-adar pag Pirmida ka Barita sa boo kairayaan. 16 Batay naribri da iya mag-isarig sa naay da- binaotismohan. Ngani da iya nawed mag-isarig sa naay ba batay pinadosahan. 17 Da mga tandaanan tiya da batay anggat sa mga mag-isarig : sa naay ngaran ba kora batay kaboyaw mga daet ka ispirito, kora batay katokawanan sa nawed amba sadiri tokawanan, 18 kora batay kagaro mga otan, no kora kainem inemen kakatay ba kora ba nawed batay naomaning. Kora batay pinatimpo da kora alima sa mga maki maskit da- kora batay pomiya. 19 Maraw katokawanan:nani da Panginoon Hisos sa konin mga nagtod-an ba iya ba pinasalbon sa soksokowan da- magtongka sa kanan kapet Diyos. 20 Kora mangadang da- magpangadar sa boo poro. Da Panginoon ba tomolong sa kora da- pomaonay kora nagpangadar sa mga tandaanan konin pinapanawen sa kora. Amba:a ngani-.
1 Maoson:na nga da somikap somorat para sa boo disin mga mahalaga ka nangyadi towa sa tamo. 2 Da kora sinorat ba toltol sa sinabi sa yamen pag mga kaban-aw mga naba ibat sa ompisa da- mga mangadar Tokawanan Diyos. 3 Kaya, madahan gidte ako magsarak piya ibat sa ompisa dapo para sa boo mga nakayman naba, para somorat sa komo, koyay Tiyopilo, sai ka totoo ka panoltolon boo nangyadi 4 para komo gidte apiho da katotohanan mga nakayman tindo sa komo. 5 Maraw koyay Hirodis da hadi sa Hodiya ba maki sai ka koyay magpamanawen sa lakol ka balay Diyos sa Hirosalim da konin ngaran ba laki Sakariyas, ibat sa kaban laki Abias. Da konin sawa bayi Ilisabit ba sai din ka apo mga koyay pomanawen sa balay Diyos. 6 Sidawa tanan mataldeng gidte sa ropangan Diyos; sidawa magpamiyag toltol gidte sa boo mga bilin da- sa mga maniho ibat sa Panginoon. 7 Ngani sidawa wala onga panawen baog bayi Ilisabit, da- sidawa ba koyay:yani. 8 Da kaban laki Sakariyas da maki katongkolan sa odas naba sa balay Diyos, kaya laki Sakariyas ba magpamanawen sa ropangan Diyos. 9 Maraw kora magpaypilian toltol sa kaogalian mga koyay magpamanawen sa balay Diyos iya da napili para semled sa rado banal da- mag-areng pag maayooy. Kaya iya semled sa rado banal balay Diyos 10 sa odas batay mag-areng pag maayooy. Da kaosonan kay ba magrimpon sa lowas da- magdarangin. 11 Da- magpaban-aw sa konin da sai ka anghil Panginoon magpatindeg sa kapet dako kanan arengan maayooy. 12 Maraw akitan laki Sakariyas pag anghil ba komabkaba da konin soot da- aliman gidte. 13 Ngani sinabi pag anghil sa konin amba, Kawo ayaw aliman, Sakariyas! Pinakarngeyan Diyos da komo darangin. Kandawa talsawa bayi Ilisabit ba batay maki onga lalaki da- Howan da komo batay ginawa ngaran. 14 Kawo batay angasan da- batay asyagan da- maoson da batay nangaangasan 15 panawen iya batay maki kapangyadihan sa ban-aw Panginoon. Iya nawed tay minem pag inemen kalibed. Iya sa boyon dapo konin adang batay:ya kapno Ispirito Banal. 16 Iya da batay magpaoli pag kaosonan mga taga Israil sa Panginoon kora Diyos. 17 Iya da batay sa paonaan Panginoon, sa konin da ispirito da- kapangyadihan laki Iliyas para pasaiyen da mga apang da- kora mga onga, da- paolien sa mataldeng ka dalan da mga masowayen, da- para pahandaen da mga iraya hinidang para sa Panginoon. 18 Tinanong laki Sakariyas sa anghil amba, Omaning gidte naay batay amatangan amba batay mangyadi naba, panawen kidawa talsawa ba mga koyay:ya gidte? 19 Tembag da anghil amba, Ako ba laki Gabril magpamanawen para sa Diyos sa konin ropangan. Ako konin sinogo para paratengen sa komo da piya ka barita pag naay:ya sinabi sa komo. 20 Komo gidte pakarngeyan! Panawen kawo ba nawed maniwala sa naay sinabi batay mangyadi sa kaodasan ba kawo ba nawed tay katokawanan ibat mona anggan sa aldaw batay gidte mangyadi da mga nakayman naba. 21 Magkapanyaen gidte kay da kaosonan iraya sa lowas. Kora ba agtaka gayed kaytang maagot:tani laki Sakariyas ba sa galem balay Diyos. 22 Maraw iya lomwas ba nawed:da katokawanan. Patodo:a ngani da konin naggamit. Kaya kora amatangan amba iya ba maki akitan sai ka makay akalkan ibat sa Diyos sa rado banal 23 Maraw kadalan:na da konin katongkolan sa balay Diyos, iya ba moli:ani sa sidawa balay. 24 Nawed:da nga maagot ba manraying konin sawa bayi Ilisabit; iya nawed lomwas sa balay sa palteng-anan lima ka bolan. 25 Iya amba, Tiya da pinanawen Panginoon sa naay : konin tinaboy sa naay da naay kailangan da- konin:na inalis da naay kakayaan sa ropangan mga iraya. 26 Maraw anim:ma ka bolan bonting bayi Ilisabit ba sinogo Diyos da anghil Gabril sa goraan Nasarit sa lopa Galiliya 27 sa sai ka daraga da ngaran ba Mariya. Iya pakasalen sa laki Hosi, sai ka lalaki kaapoan hadi Dabid. 28 Maraw pabali:yani da anghil sa tebteb pag daraga, konin pinasked amba, Salamat! Angasan gidte da Diyos sa komo! Sa komo da Panginoon. 29 Komabkaba da soot bayi Mariya sa makay naba pag tokawanan. Konin nagremrem piya no nakay da alabet sabiyen naba. 30 Kaya sinabi sa konin pag anghil amba, Mariya, kawo ayaw aliman, panawen angasan gidte sa komo da Diyos. 31 Kawo magpakarngey gidte! Kawo batay manraying, batay mamreg sai ka lalaki da- Hisos da komo batay ginawa ngaran. 32 Iya batay makapangyadihan, da- batay inawit Onga Diyos pag Atatas sa boo. Batay tinaboy Panginoon Diyos sa konin da tongkaan hadi ag konin pangapoan hadi Dabid. 33 Iya batay maghadi sa kaapoan laki Hakob anggan kadomaen da- da iya maghadi ba wala arasan. 34 Magtanong bayi Mariya amba, Omaning batay mangyadi tiya panawen ako ba daraga gidte? 35 Tembag da anghil amba, Batay lomayangan sa komo da Ispirito Banal, da- batay sa komo da kapangyadihan Diyos pag Atatas sa boo. Kaya banal da komo batay inonga da- iya batay inawit Onga Diyos. 36 Komo amatangan da komo kaseledan bayi Ilisabit ba manraying sai ka lalaki sa iya koyay:yani. Iya anim:ma ka bolan bonting kayno iya amatangan:nani mga iraya amba iya baog; 37 panawen wala nawed batay apangyadi sa Diyos. 38 Tembag bayi Mariya amba, Ako ba tagoanggat Panginoon, mangyadi sa naay da komo sinabi. Kalbas iya inogonan pag anghil. 39 Sa odas din naba ba bayi Mariya ba agkadaldali tomokad sa sai ka goraan sa kabogsoran Hoda. 40 Maraw iya semled sa balay sidawa Sakariyas ba konin binerya bayi Ilisabit. 41 Maraw arngeyan bayi Ilisabit da berya bayi Mariya, somalbon da onga sa konin boyon. Nakapno Ispirito Banal bayi Ilisabit. 42 Iya tomokawanan maeyat amba, Labi dapo sa boo babayi, kawo ba kinaangasan gidte Diyos da- kinaangasan din da onga sa galem komo boyon. 43 Tawa ako para darawen ag adang naay Panginoon? 44 Panawen sa naay akarngeyan da komo berya ba somalbon sa kaangasan da onga sa naay boyon. 45 Kawo angasan panawen kawo maniwala amba batay gidte mangyadi da sinabi sa komo ag Panginoon. 46 Sinabi bayi Mariya amba, Nagpalakol naay gisarem da Panginoon, 47 da- asyagan gidte ag naay ispirito panawen sa Diyos naay Tagaribri. 48 Panawen konin rinemrem da konin mahidapen ka tagoanggat. Da- ibat mona ako ba batay namarita boo mga kairayaan amba, Iya ba kinayawtean gidte, 49 panawen sa mga piya ka pinanawen sa naay pag Makapangyadihan Diyos- Banal da konin ngaran! 50 Layen iya nagkaayawtean sa boo mga iraya maki kaliman sa konin sa boo mga dag-on. 51 Konin:na Pinaban-Aw iya ba makapangyadihan gidte. Konin:na sinambolat da mga magpalawlaw sa kora remrem. 52 Konin:na rinegnas da mga maki kapangyadihan ibat sa kora mga tongkaan hadi, konin:na kay pinaatatas ag mga mahidapen. 53 Ag mga nagbayog ba konin:na binosogan mga piya ka nakayman, ag mga maki karon-an kay ba konin:na namoyawan wala:a gidte nakayman. 54 Konin:na tinolongan da kasakopan Israil konin tagapamanawen toltol gidte sa konin pinangako sa tamo pad pangapoan, layen sa konin remrem da konin kapiyaanan sa laki Abraham da- sa konin pad kaapoan kaagoton man. Naba:a ngani. 56 Bayi Mariya ba mamataw sa balay bayi Ilisabit; maraw tatlo ka bolan ba iya moli:akay sa konin balay. 57 Rateng:nga da odas batay mamreg bayi Ilisabit, da- konin pinreg da sai ka onga lalaki. 58 Abaritaan mga katingyaw balay da- konin mga kaseledan iya kinayawtean gidte Panginoon da- kora ba nangaangasan anggat din sa konin. 59 Maraw walo:wa ka aldaw pag onga, kora mamparaoy sa kora balay para kora palong-oyon Sakariyas disin da kora batay ginawa ngaran makay ag konin apang. 60 Ngani amba da tebag kon adang, Nawed! Howan:nani da konin batay ngaran. 61 Kora sinabi sa konin amba, Wala tawa man sa koyo kaseledan makay naba da ngaran. 62 Kaya kora tindoan da konin apang da- kora tinanong no nakay da alabet konin ginawa ngaran sa onga. 63 Iya omay-ay batay asoratan da- somorat makay tiya: Howan:nani da konin ngaran. Kora boo ba magtaka gidte. 64 Iya agad katokawanan:nakay, da- konin pinodi da Diyos. 65 Aliman da boo kairayaan sa kora paribok, da- nabarita da nangyadi naba sa boo kabogsoran Hoda. 66 Da- da boo kamatang ba kora gidte rinemrem naba da- kora amba, Batay kaya makay nakay ag onga naba? Panawen mapawa gidte sa konin da Panginoon. 67 Nakapno Ispirito Banal ag konin apang laki Sakariyas da- magbarita makay tiya, 68 Podiyen da Panginoon Diyos Israil! Panawen tamo pag mga konin kairayaan ba konin tinolongan da- binal-anan. 69 Konin pinaparaoy sa tamo da sai ka makapangyadihan Tagaribri ibat sa kaapoan hadi Dabid ag konin tagapamanawen, 70 toltol sa konin pinabarita da konin mga banal ka tagabarita pag monaan dapo amba, 71 Tamo konin batay rinibri sa tamo mga kalaban da- sa alima boo mga nagkaabaisan sa tamo. 72 Panawen pinangako Diyos amba konin gidte batay kinayawtean pag tamo pangapoan da- konin gidte nagremrem da banal ka kasaiyan konin pinanawen sa tamo. 73 Ag maonay ka kasaiyan konin pinanawen sa tamo pangapoan laki Abraham ba amba, 74 Tamo batay gidte rinibri sa tamo mga kalaban da- wala kaliman batay kapamanawen para sa konin, 75 da- para tamo ba banal da- mataldeng sa konin ban-aw anggan tamo ba biyagan. 76 Kawo kay, naay onga, ba batay inawit tagabarita Diyos pag Atatas sa boo panawen kawo batay ag-onaan sa Panginoon para handaen da konin batay dinalanan 77 da- tod-on sa konin kairayaan amba kora batay naribri da- batay pinatawad sa kora mga kadaetan. 78 Panawen lakol da kayawtean tamo Diyos. Sa makay tiya ba iya da batay pomaparaoy karibriyan sa tamo makay pag nagkaomaga ibat sa soksokowan, 79 para da mga sa kadeleman da- sa galem kapangyadihan katayan ba apawaan para tamo sagobayan sa dalan kaginhawahan. Naba:a ngani. 80 Maglakol ag onga da- maglakol din konin pagkairaya. Iya ba sa poro nawed apirmihan iraya anggan sa aldaw iya magpaban-aw sa Israil.
1 Pag dag-on din naba, da bilin impirador koyay Agosto ba amba, Magpalista da boo iraya sa boo nagkaasakopan sa impiryo Roma, pag kasakopan impirador. 2 Da monaan pagpalista naba ba sa odas koyay Kiriniyo da gobirnador sa porobinsiya Siriya, ag konin kasakopan. 3 Kaya paraoy da tayma iraya sa konin-konin goraan para magpalista. 4 Laki Hosi ba taga goraan Nasarit sa porobinsiya Galiliya. Iya ba paraoy sa porobinsiya Hodiya da- tomokad sa goraan Bitlihim, pag goraan pamregan hadi Dabid, ag konin pangapoan. 5 Anggat din paraoy bayi Mariya pag batay konin sawa para magpalista. Bayi Mariya ba bonting. 6 Maraw sata:a sidawa, rateng:nga da odas mamreg bayi Mariya. 7 Konin pinreg da konin panganay, tiya ba lalaki. Konin sinabedan mga lampin ag polahan toltol sa kora kaogalian da- pinaolid sa sai ka panabsaban panawen wala akalkanan para sa sidawa sa balay pangalkanan mga kaosonan. 8 Sa lopa din naba, maki mga tagaalaga topa magbantay sa kora mga topa sa gamasenan sa lowas goraan. 9 Agad magpaban-aw sa kora da sai ka anghil Panginoon da- Romawa sa kora paribok da karawaan Diyos. Kora aliman gayed. 10 Ngani sinabi anghil sa kora amba, Koyo ayaw aliman. Koyo gidte pakarngeyan, panawen naay nagbaba sa koyo da sai ka piya gidte ka barita batay gidte magtaboy kasyagan sa boo kairayaan. 11 Mona pag madlem tiya sa goraan hadi Dabid ba pinreg da koyo Tagaribri, wala Roma no nawed ba da Kiristo, ag Panginoon. 12 Tiya da magtodo para iya koyo akilalaan, Koyo batay akitan da sai ka polahan nagsabedan mga lampin, nagpaolid sa sai ka panabsaban. Naba:a ngani. 13 Agad anggat sa anghil da sai ka lakol ka kaban mga anghil ibat sa soksokowan. Kora nagpodi da Diyos amba, 14 Podiyen ngani- da Diyos sa kangawayan pag langit. Kaginhawahan ngani- sa lopa, sa mga iraya konin nagkaangasenan. Naba:a ngani. 15 Maraw paoli:akay sa soksokowan da mga anghil, mamagtokawanan da mga tagaalaga topa amba, Tamo:wani sa Bitlihim. Tamo ban-awan da nangyadi naba pag pinaaram Panginoon sa tamo. 16 Kaya aporahan kora magparaoy sata. Kora akitan kora Mariya da- Hosi da- da polahan nagpaolid sa panabsaban. 17 Maraw akitan ba kora nanoltol da sinabi mga anghil sa kora para sa onga te naba. 18 Manggilalas da boo karngey pag nanoltol mga tagaalaga topa. 19 Ngani tinanem sa remrem bayi Mariya da boo nangyadi naba. Ibat saba layen te konin nagremrem. 20 Kalbas naba ba moli:akay da tagaalaga topa, magpalakol da- magpodi sa Diyos, panawen sa boo kora arngeyan da- akitan, ag makay din pag binarita mga anghil sa kora. 21 Maraw walo:wa ka aldaw pag onga ba naba da odas para iya long-oyon; iya ginaw-an ngaran laki Hisos-naba da konin ngaran ginawa:ani anghil bayo iya nanrayingan. 22 Labi te sai ka bolan ba bayi Mariya nawed dapo kaparaoy sa balay Diyos panawen sa iya mamreg. Maraw kalawey ba sidawa binaba da onga sa Hirosalim para taboyon sa Panginoon da- para tepden da Bilin Diyos tinaboy sa laki Moysis. 23 Panawen da Bilin ba amba, Da tayma panganay lalaki ba hinidang para gidte sa Panginoon. Naba:a ngani. 24 Da- amba din, Koyo taboyon darwa ka kalapati e darwa ka onga te manatad. 25 Maki sai ka iraya sa Hirosalim da ngaran ba laki Simyon. Iya ba mataldeng da- bali gidte sa Diyos da- iya magpanya gidte sa batay rateng da Kiristo, ag karibriyan mga taga Israil. Sa konin da Ispirito Banal. 26 Pinasked Ispirito Banal sa konin amba iya nawed batay natay anggan nawed akitan da Kiristo sinogo Diyos. 27 Sa pinaremrem Ispirito Banal, iya ba semled sa lakol ka balay Diyos. Maraw laki Hisos ba binaba sata talsawa Hosi para panawenen da Bilin Diyos para sa mga onga ba 28 iya ba kinelkel koyay Simyon da- koyay Simyon ba pomodi sa Diyos amba, 29 Panginoon, nangyadi:ya gidte da komo pangako. Kaya abaya:a natay mona maki kaginhawahan da komo tagapamanawen, 30 panawen naay:ya gidte akitan da karibriyan 31 komo:wa hinanda sa ropangan boo kairayaan. 32 Iya da solo- batay apawaan da boo mga Nawed Diw. Da- panawen sa konin ba tamo mga taga Israil ba batay ginalang. Naba:a ngani. 33 Sidawa Mariya ba magtaka gayed sa sidawa arngeyan para sa onga. 34 Koyay Simyon ba magdarangin para kora ba parongawan da- konin sinabi sa bayi Mariya amba, Pinili Diyos pag onga tiya para da kalaati sa Israil ba pinadosahan da- da kalaati kay ba rinibri panawen sa konin. Iya batay tandaanan Diyos batay sinarongat kaosonan. 35 Iya da batay magpapawa mga boo nagremrem kaosonan. Ngani sa komo kay ba da komo poso ba makay din batay sinandak. Naba:a ngani. 36 Sata din sa lakol ka balay Diyos bayi Ana. Iya ba sai ka babayi tagabarita ibat sa Diyos. Iya ba onga laki Panoil ibat sa andana laki Asir. Iya ba walompo da- apat:ta ka dag-on. Pito ngani ka dag-on sidawa talsawa mal-anggat ba iya nabalo:wani. Iya layen sa lakol ka balay Diyos da- aldaw da- madlem ba magsamba sa Diyos sa iya magdarangin da- maki odas iya ba nawed din mamangan. 38 Iya pabali pag odas din naba da- iya magpasalamat sa Diyos. Iya ba magpanoltol din para sa polahan sa boo magpanya sa karibriyan Hirosalim. 39 Maraw sidawa:a napanawen da boo toltol sa Bilin Panginoon ba kora paoli:akay sa Nasarit kora goraan sa Galiliya. 40 Lomakol da- emeyat da lawas pag onga, da- iya kapno kadonongan. Iya ba makaangas gidte sa Diyos. 41 Dag-on-dag-on, ag talsawa Hosi ba magparaoy-paraoy sa Hirosalim sa odas da mga Diw ba magremrem sa rinibri da kora mga pangapoan ibat sa Ihipto. Naba da nag-awit Paskwa mga Diw. 42 Maraw labindarwa:a ka dag-on laki Hisos ba kora tomokad sata makay din ag monaan sidawa pinanawen. 43 Maraw kalawey:yani da Paskwa ba kora ba mangadang:ngakay padolong. Paogon:na laki Hisos sa Hirosalim nawed sidawa amatangan. 44 Sidawa dia amba kaanggat mga Roma mag-oli din sa Galiliya, kaya sidawa magkadang-kadang sai ka boo aldaw. Maraw kadalan:na da aldaw ba sidawa magpalikosan sa konin sa mga kaseledan da- sa mga akilalaan. 45 Maraw nawed sidawa akitan ba sidawa paoli:akay sa Hirosalim para sata iya saraken. 46 Maraw omaga:akay ba sidawa akitan laki Hisos; iya magtongka sa lakol ka balay Diyos kaanggat mga tagatodo bilin mga Diw. Iya magpakarngey da- magtanong sa kora. 47 Da boo magpakarngey sa konin ba manggilalas sa konin kadonongan da- sa mga tebag. 48 Maraw sidawa akitan ba sidawa ba magtaka gidte. Sinabi konin adang amba, Soan, kaytang komo pinanawen sa kidawa da makay naba? Kidawa nagkalognoy:yani sa magsarak sa komo. 49 Tembag laki Hisos amba, Kaytang ako kandawa nagsarak? Nawed ma kandawa amatangan ako kailangan sa balay naay Apang? 50 Ngani nawed sidawa amatangan da alabet sabiyen naba. 51 Da- iya ba domolong:ngakay sa Nasarit anggat sa sidawa da- iya matoltolon. Da boo naba ba nagtanem gidte sa remrem konin adang. 52 Toloy:ya maglakol laki Hisos sa kadonongan, sa lawas anggan magtaboy kaangasan sa Diyos da- sa mga iraya.
1 Labinlima:a ka dag-on koyay Tibiriyo ba impirador, koyay Ponsiyo Pilato kay da gobirnador sa Hodiya. Sa odas din naba, koyay Hirodis da gobirnador sa Galiliya, konin kay kakaan koyay Pilipi da gobirnador sa Itoriya da- sa Tarakoniti da- koyay Lisaniyas kay da gobirnador sa Abiliniya. 2 Sidawa Anas da- Kaipas da mga koyay lakol magpamanawen sa balay Diyos. Pag dag-on din naba ba da Diyos ba tomokawanan sa laki Howan, ag magpamataw sa poro nawed apirmihan iraya. Iya ba onga laki Sakariyas. 3 Kaya konin rinibok-ribok da mga poro sa magkaripay salog Hordan da- mangadar amba, Koyo magsisi da- mag-ogon koyo mga kadaetan da- koyo magpabaotismo sa sapa para koyo ba patawaden Diyos. 4 Makay ag nagkasorat sa ribro laki Isayas pag tagabarita ibat sa Diyos amba, Tiya da sabi sai ka magpanggayagang sa poro nawed apirmihan iraya, Koyo handaen da batay dinalanan Panginoon, Koyo taldengen da konin mga dalan! 5 Koyo benbenan da mga log-ong, koyo tibagen da mga bogsor da- latayan da- koyo taldengen da mga daet ka dalan, da- koyo patagen da mga dalan log-ong log-ong, 6 da- batay akitan boo iraya da karibriyan batay pinanawen Diyos. Naba:a ngani. 7 Maoson:na gidte ka mga iraya da pabali sa laki Howan para magpabaotismo sa sapa. Konin sinabi sa kora amba, Koyo makay kaosonan mga orpong. Tawa da magtodo sa koyo amba koyo kaalas sa padosa Diyos batay rateng? 8 Koyo kailangan makay sai ka poon kayo magpamokar piya para pakilalaen sa koyo biyag amba koyo ba somisi da- omogon koyo mga kadaetan. Ayaw koyo agsabiyen amba koyo ba mga kaapoan koyay Abraham. Naay nagsabi sa koyo, ibat sa mga bato tiya ba kapanawen da Diyos kaapoan gidte koyay Abraham. 9 Mona dapo ba nagpatinga:ani sa wakat poon kayo da wasay. Kaya da tayma poon kayo nawed magpamokar piya ba batay pintol da- batay binenglay sa apoy. 10 Da mga iraya ba nawed:da mag-epet magtanong sa konin amba, No amba, omaning yamen batay pinanawen? 11 Tembag laki Howan amba, Da iya maki darwa ka bado ba konin taboyon da sai sa wala. Amba din da panawenen, Da iya maki pamangnen ba konin kay pakanen da wala. 12 Rateng da mga magpaningir bohis para magpabaotismo sa sapa. Amba da kora tanong sa konin: Koyay, omaning da piya yamen panawenen? 13 Tembag laki Howan sa kora amba, Ayaw koyo magsingir labi sa magpasingir sa koyo. 14 Iya tinanong din mga sondalo amba, Yamen, omaning kay yamen batay pinanawen? Makay tiya da tebag laki Howan : Ayaw koyo gomaro sa tawa man sa lopod da- padatos nawed totoo; koyo angasan:nani sa kabayadan sa koyo magpanawen. 15 Magpanya gidte da boo iraya sa batay rateng da Kiristo da- kora magremrem amba, Kaaram laki Howan:na da Kiristo. 16 Kaya sinabi laki Howan sa kora boo amba, Ako ba magbaotismo sa koyo sa sapa, ngani ag batay rateng sa naay paoriyan, naba da batay magbaotismo sa koyo sa Ispirito Banal da- sa apoy. Iya ba makapangyadihan dapo sa naay, da- ako nawed gidte abaya mag-okad ag eket konin panlaed. 17 Sa konin alima da birawo para alisen da boo tolyapis bayo konin batay pinalagay sa balay takasan da mga paray, ngani da boo tolyapis ba konin batay inareng sa apoy nawed tay natay. 18 Maoson dapo da mga nakayman sinabi gidte laki Howan sa iya mangadar Pirmida ka Barita sa mga iraya. 19 Ngani maraw konin sinabiyan pag gobirnador Hirodis, panawen konin inagaw bayi Hirodiyas, pag sawa konin kakaan, da- panawen sa boo mga kadaetan konin pinanawen, 20 ba pinapiriso koyay gobirnador Hirodis laki Howan da- sa makay tiya ba lalo:a adagdagan da konin kadaetan. 21 Da boo iraya sata ba binaotismohan:nani sa sapa bayo laki Hisos ba binaotismohan din. Maraw iya ba binaotismohan:nani da- iya magdarangin dapo ba naboka da langit 22 da- lomayangan sa konin da Ispirito Banal makay hidsoda sai ka korkoro. Da- sai ka magtokawanan ibat sa soksokowan da magsabi amba, Kawo da naay nagpalayaw Onga, naay gidte kaangasan. 23 Mga tatlompo:a ka dag-on laki Hisos ba iya ba mag-ompisa magpamanawen. Tiya da mga pangapoan laki Hisos, ibat sa laki Hosi, ag sa remrem mga iraya ba konin apang, anggan sa laki Adan, ag onga Diyos: Laki Hosi, Ili, 24 Matat, Libi, Milki, Hanay, Hosi, 25 Matatyas, Amos, Nahom, Isli, Nagay, 26 Maat, Matatyas, Simi, Hosi, Hoda, 27 Hoanan, Risa, Sorobabil, Salatil, Niri, 28 Milki, Adi, Kosam, Ilmadan, Ir, 29 Hosoi, Ilisir, Horim, Matat, Libi, 30 Simyon, Hoda, Hosi, Honam, Iliyakim, 31 Milia, Mina, Matata, Natan, Dabid, 32 Hisi, Obid, Boos, Salmon, Naason, 33 Aminadab, Admin, Arni, Isrom, Paris, Hoda, 34 Hakob, Isaak, Abraham, Tari, Nakor, 35 Sirog, Ragaw, Pilig, Hibir, Sala, 36 Kainan, Arpaksad, Sim, Noyi, Lamik, 37 Matosalim, Inok, Harid, Mahalalil, Kainan, 38 Inos, Sit, Adan, ag onga Diyos.
1 Mangadang:ngakay laki Hisos ibat sa salog Hordan, iya kapno Ispirito Banal. Iya pinaanggat Ispirito Banal sata sa poro nawed apirmihan iraya 2 da- iya apatnapo ka aldaw nagparemreman daet pag aponin kadaetan. Nawed iya mamangan sa boo odas naba. Maraw kalbas ba iya binayog din. 3 Sinabi sa konin ag aponin kadaetan amba, No kawo da Onga Diyos, komo gaw-en pamangnen da bato naba. 4 Laki Hisos ba tembag sa konin amba, Nagkasorat sa Banal ka Kasoratan amba, Nawed ngani sa pamangnen nagkabiyag da iraya! Naba:a ngani. 5 Iya pinaanggat ag aponin kadaetan sa atatas ka poro da- nawed te kaagot ba Pinaban-Aw sa konin da boo kahadian paranawan. 6 Sinabi sa konin ag aponin kadaetan amba, Naay batay tinaboy sa komo da boo kapangyadihan da- karon-an pag mga kahadian tiya, panawen tinaboy:ya sa naay da mga naba da- abaya naay taboyon sa tawa man naay alabet. 7 No kawo batay somamba sa naay ba komo:wani da boo mga naba. 8 Tembag laki Hisos amba, Nagkasorat sa Banal ka Kasoratan amba, Ag Panginoon komo Diyos da komo sambahen da- sa konin ngani kawo mamanawen. Naba:a ngani. 9 Iya pinaanggat ag aponin kadaetan sa ngaway:ya bobong lakol ka balay Diyos sa Hirosalim da- sinabi sa konin amba, No kawo da Onga Diyos ba magpalabo:a kawo ibat towa sa ngaway 10 panawen nagkasorat sa Banal ka Kasoratan amba, Konin batay binilin sa konin mga anghil amba kawo kora dahanan; 11 da- sinorat din amba, Kawo kora batay ginenan kora alima para ayaw apasongko da komo paa kayno sa sai ka bato. Naba:a ngani. 12 Ngani tembag sa konin laki Hisos amba, Nagkasorat din amba, Ayaw komo agtogsowen da Panginoon komo Diyos. 13 Maraw wala:a apanawen ag aponin kadaetan ba iya mangadang:ngani da- magpanya:akay sa piya ka pagkaodas. 14 Laki Hisos ba paoli:akay sa Galiliya. Sa konin da kapangyadihan Ispirito Banal. Iya ba barita:ani sa paribok poro naba. 15 Iya magtodo sa mga balay pagtiponan mga Diw da- iya pinodi boo mga iraya. 16 Laki Hisos ba moli:akay sa Nasarit. Sata iya tombo. Makay din ag konin kaogalian pag Aldaw Magpahinga, iya ba semled sa balay pagtiponan. Iya patindeg para magbasa Banal ka Kasoratan. 17 Tinaboy sa konin da ribro sinorat laki Isayas pag tagabarita ibat sa Diyos. Konin binokaan da ribro sa poro sinoratan naba : 18 Sa naay da Ispirito Panginoon panawen ako konin hinidang para mangadar Pirmida ka Barita sa mga mahidapen. Ako konin pinaidaw para sabiyen sa mga inapo amba, Koyo batay kabal-an, da- sa mga raprap amba, Koyo batay kaban-aw; da- para ribriyen da mga nagpahidapan, 19 da- sabiyen para sa odas da Diyos ba magribri konin mga kairayaan. Naba:a ngani. 20 Konin tinakleban da Banal ka Kasoratan, pinaoli sa taga pamanawen da- iya tomongka para magtodo. Ag mga iraya sata sa galem balay pagtiponan ba magserey gidte sa konin. 21 Da- iya magsabi sa kora amba, Nangyadi:ya mona da nagkasorat naba ag koyo akarngeyan. 22 Iya pinodi boo iraya, da- kora ba manggilalas gidte sata sa konin piya gidte ka tokawanan. Kora pinasked amba, Nawed dia tiya da onga laki Hosi? 23 Kaya sinabi laki Hisos sa kora amba, Batay gidte koyo sinabi sa naay da kasabiyan naba, Kawo ba anggagamot! Komo gamoton da komo sadiri. Komo kay panawenen sa komo sadiri goraan makay din ag mga yamen nabaritaan komo pinanawen sa goraan Kapirnaom. 24 Konin din sinabi amba, Naay gidte nagsabi sa koyo, Wala tagabarita kinaangasan sa konin sadiri goraan. 25 Ngani totoo din da naay nagsabi sa koyo amba, Maoson ka babayi balo sa Israil pag odas laki Iliyas ba tagabarita ibat sa Diyos. Sa odas naba ba nawed gidte omodan sa tatlo ka dag-on da- anim ka bolan da- binayog gidte da mga iraya sa boo lopa Israil. 26 Ngani nawed sa tawa man sa kora pinaparaoy Diyos laki Iliyas no nawed ba sa sai ka babayi balo sa goraan Saripta, sa lopa Sidon. 27 Amba din, maoson:na gidte da mga panyakiten sa Israil sa odas laki Ilisiyo ba tagabarita ibat sa Diyos, ngani sai ngani da konin pinapiya da- lininis da biyag. Naba ba laki Naaman taga Siriya. 28 Maraw kora arngeyan tiya ba nangaabaisan gidte da boo iraya sa balay pagtiponan. 29 Kora mamatindeg da- kora inaboy laki Hisos sa lowas goraan anggan sa kaliwis latayan kora goraanan. Kora alabet iya ba degseen sata sa rakyas. 30 Ngani iya ba domalan:na sa kora tenga da- inogonan:na kora. 31 Ibat sata laki Hisos ba domolong sa Kapirnaom sa Galiliya. Iya magtodo sa mga iraya sa Aldaw Magpahinga. 32 Kora manggilalas sa konin tindo panawen iya magtokawanan maki kapangyadihan. 33 Sata sa balay pagtiponan da sai ka lalaki nag-apo daet ka ispirito. Iya tomakap lakol amba, 34 Yayay! Nakay da komo pakiaram sa yamen, Hisos taga Nasarit? Kawo paraoy towa para yamen ba sopoon? Naay amatangan no tawa kawo. Kawo da Banal ibat sa Diyos. 35 Ngani sinaway laki Hisos da daet ka ispirito amba, Empet kawo! Kawo lomwas sa iraya naba! Tinwang daet ka ispirito ag lalaki sa ropangan mga kaosonan iraya, da- iya ba inogonan nawed pinakaskitan. 36 Manggilalas kora boo da- kora mamagtokawanan amba, Kayo kaya ka tokawanan naba? Iya magtokawanan mabigkar maki kapangyadihan sa mga daet ka ispirito da- kora gidte nagtoltol! 37 Da- nabarita:ani para sa laki Hisos sa boo lopa naba. 38 Laki Hisos ba lomwas sa balay pagtiponan da- iya paraoy da- semled sa balay laki Simon. Masyado da lagnat ag bianan babayi laki Simon, kaya kora magtanong sa laki Hisos para iya ba papiyaen. 39 Laki Hisos ba pabali da- manrongrong sa maki maskit da- sinaway da lagnat da- wala:akay ngani- lagnat. Agad patindeg ag aray maki maskit da- mamanawen sa kora. 40 Maraw nagkalned:da da aldaw da- kalawey:yani da Aldaw Magpahinga ba binaba ag mga iraya sa laki Hisos da boo maki maskit, kayno nakay da kora kadamdaman. Konin pinatimpo da konin alima sa tayma sai sa kora da- pinapiya kora boo. 41 Sa maoson sa kora ba manlowas din da mga daet ka ispirito. Kora mamagtakap amba, Kawo da Onga Diyos! Ngani kora ba sinaway laki Hisos da- nawed kora pinabayaan magtokawanan panawen kora kilala amba iya da Kiristo, ag Tagaribri pinangako Diyos. 42 Maraw omaga, laki Hisos ba mangadang da- paraoy sa sai ka poro nawed apirmihan iraya. Iya nagsarak mga kaosonan iraya. Maraw iya akitan ba kora maglopod amba, Ayaw dapo omalis. 43 Ngani konin sinabi sa kora amba, Kailangan ako mangadar Pirmida ka Barita para sa batay:ya maghadi da Diyos sa mga Roma ka goraan; panawen naba ba ako pinaidaw. 44 Da- iya mangadar sa mga balay pagtiponan mga Diw sa Hodiya.
1 Maraw ina, laki Hisos ba sa tebteb dagat-dagatan nag-awit Hinisarit. Iya rinipongpongan kaosonan iraya alabet karngey Tokawanan Diyos. 2 Iya ba maki akitan darwa ka bangka sa tebteb dagat-dagatan. Ag mga angangabel isda ba nawed:da sa bangka; kora mag-oyas kora dala. 3 Iya somakay sa sai sa mga bangka naba da- konin sinabi sa laki Simon pag aponin bangka amba, Palotangen te sa dagat-dagatan. Iya magtongka sa bangka da- mangadar sa mga iraya. 4 Kalbas iya mangadar, konin sinabi sa laki Simon amba, Kawo da- komo mga pal-anggat paraoy sata sa alalem da- koyo laboon da mga dala para koyo kabel. 5 Tembag laki Simon amba, Koyay, boo:a madlem ba yamen magpahidap ba wala gidte abel! Ngani panawen sa komo sinabi, naay batay linabo da mga dala. 6 Amba ngani- da kora pinanawen da- sa maoson da kora abel nawed ngani nangasida da kora mga dala. 7 Kaya kora pinayapayan da kora kaanggat sa Roma ka bangka para mag-ay-ay tolong da- pabali da mga naba. Nangakapno da darwa ka bangka nawed ngani nangarbes. 8 Maraw akitan naba laki Simon Pidro ba iya maglohod sa ropangan laki Hisos da- sinabi amba, Kawo paadayo sa naay, Panginoon, panawen ako ba sai ka lalaki makadaetan. 9 Iya da- konin mga kaanggat ba manggilalas panawen sa maoson da kora abel, 10 anggan din ag mga kaanggat laki Simon sidawa Tiyago da- Howan, pad onga laki Sibidiyo. Kaya sinabi laki Hisos sa laki Simon amba, Kawo ayaw aliman. Ibat mona ba iraya:akay da komo batay inabel. 11 Maraw katakdang:ngani sa lopa kora mga bangka, kora inogonan:na da boo da- tomongroy batay:ya pal-anggat sa laki Hisos. 12 Maraw laki Hisos ba sa sai ka goraan, maki sai ka lalaki pabali sa konin. Iya tatap:pa gidte panyakit da lawas, kaya toltol sa Bilin mga Diw iya ba nawed malinis. Maraw konin akitan laki Hisos ba lomohod da panyakiten sa konin ropangan da- magdaying gidte amba, Koyay, no komo alabet ako linisen ba kawo abaya kalinis sa naay. 13 Inenat laki Hisos da kon alima da- iya ba kinapkap da- sinabi amba, Naay alabet. Pomiya kawo! Agad:da pomiya da konin panyakit. 14 Iya ba binilinan laki Hisos amba, Tiya ba ayaw komo agsabiyen sa tawa man. No nawed ba kawo paraoy sa koyay magpamanawen sa balay Diyos para paban-awen da komo sadiri. Kalbas kawo magtaboy pag taboy binilin Diyos sa laki Moysis, makay sistigo sa mga iraya amba piya:a kawo. 15 Ngani lalo:a binarita da para sa laki Hisos. Kaya maoson:na gidte ka iraya da magkarimponan sa konin para pakarngey sa konin da- papiyaen da kora mga kadamdaman. 16 Laki Hisos kay ba layen-layen magparaoy sa poro nawed apirmihan iraya da- magdarangin. 17 Sai ka aldaw, laki Hisos ba magtodo. Sata din da mga Parisiyo da- da mga kamatangen sa Bilin. Kora ba ibat sa boo mga ibente ka goraan sa porobinsiya Galiliya da- Hodiya, da- ibat din sa Hirosalim. Sa konin da kapangyadihan Diyos para magpapiya sa mga maki maskit. 18 Maki rateng mga iraya magbaba sai ka lompo sa konin kalkanan. Kora alabet gidte kasled sa balay para palagyen sa ropangan laki Hisos da maki maskit, 19 ngani wala adalanan panawen sa kaosonan iraya. Kaya kora yomakbang sa ngaway awakan da- kora limbot, da- kora inaloyan da lompo sa kalkanan sa tenga kaosonan iraya sa ropangan laki Hisos. 20 Maraw akitan laki Hisos da kora pag-isarig ba konin sinabi sa lompo amba, Abyan, pinatawad:dani da komo mga kadaetan. 21 Da mga kamatangen sa Bilin da- mga Parisiyo ba magremrem amba, Tawa tiya pag magtongayaw sa Diyos? Nawed ma da Diyos ngani da batay kapatawad mga kadaetan? 22 Ngani amatangan laki Hisos da kora nagremrem. Kaya konin sinabi sa kora amba, Kaytang koyo magremrem makay naba? 23 Alin ma da ginhawa sabiyen amba, Pinatawad:da da komo kadaetan, e sabiyen amba, Kawo mangon da- kawo mangadang. 24 Naay gidte batay Pinaban-Aw sa koyo da Onga Iraya ba maki kapangyadihan towa sa lopa magpatawad kadaetan. Kaya konin sinabi sa lompo amba, Naay gidte nagsabi sa komo, Kawo patindeg, komo babaen da komo kalkanan da- kawo moli! 25 Iya agad patindeg sa ropangan boo iraya, inarwit konin kalkanan da- moli magpodi sa Diyos. 26 Kora boo ba manggilalas da- kora ba mamagpodi sa Diyos amba, Yamen kaban-aw mona mga katakataka ka nakayman. 27 Maraw kalbas naba ba laki Hisos ba lomwas sa balay. Konin akitan da sai ka magpaningir bohis da ngaran ba laki Libi. Iya ba magtongka sa paningiran bohis. Sinabi sa konin laki Hisos, Kawo tomongroy sa naay. 28 Patindeg laki Libi da- konin inogonan da boo konin panawen da- tomongroy sa laki Hisos. 29 Hinanda laki Libi da sai ka lakol ka kasayahan sa konin balay para sa laki Hisos. Sidawa kasaro sata ba maoson ka magpaningir bohis da- mga Roma dapo ka pad iraya. 30 Da mga Parisiyo da- da mga kamatangen sa Bilin ba magpaltanongan. Kora sinabi sa mga nagtod-an laki Hisos amba, Kaytang koyo mamangan da- mag-inem kasaro mga magpaningir bohis da- Roma ka makadaetan? 31 Laki Hisos ba tembag sa kora amba, Ag mga wala maskit ba nawed magpangailangan anggagamot no nawed ba ag mga maki maskit. 32 Ako towa paraoy nawed para patwagan da mga mataldeng no nawed da mga makadaetan para kora magsisi da- mag-ogon kora mga kadaetan. 33 Sinabi mga iraya sa laki Hisos amba, Da mga nagtod-an laki Howan ba maki odas kora ba nawed mamangan no nawed ba magdarangin. Amba din da mga nagtod-an mga Parisiyo. Ngani da komo kay mga nagtod-an ba layen te mamangan da- mag-inem. 34 Laki Hisos ba tembag amba, Abaya ma nawed mamangan da mga abyan pag lalaki batay kinasal no kaanggat dapo da lalaki batay kinasal? 35 Ngani no rateng:nga da aldaw iya ginaro:wa sa kora bayo kora nawed batay mamangan. 36 Konin din sinabi sa kora da sai ka halimbawa, Wala magsagi sa bayo ka golanit para tambalen sa loma. No tiya da pinanawen ba batay nasida da bayo ka golanit da- da bayo ka tambal ba nawed batay bagay sa loma ka golanit. 37 Wala din magsogno bayo ka alak sa loma ka sognoan balay hayop. No amba da pinanawen ba batay nalto bayo ka alak da balat, batay nabenglay da inemen, da- batay nasida da sognoan. 38 Sa bayo ka sognoan da piya sognoon da bayo ka alak. 39 Da- wala batay alabet minem ag bayo ka alak no kainem:ma pag maagot:ta nag-absay, panawen kon tay sinabi amba, Malasa dapo da maagot:ta nag-absay.
1 Ag sai ka Aldaw Magpahinga laki Hisos ba napadalan sa sai ka parayan. Ag konin mga nagtod-an ba mangtel oay, da- kora rinopris sa kora alima da- kora namangan da begas. 2 Sinabi kalaati Parisiyo amba, Kaytang koyo pinanawen da nag-ayawan Bilin sa Aldaw Magpahinga? 3 Laki Hisos ba tembag sa kora amba, Nawed ma koyo nabasa da pinanawen hadi Dabid maraw iya da- konin mga kaanggat ba nagbayog? 4 Iya semled sa balay Diyos da- gomaro mga tinapay taboy sa Diyos da- mamangan mga naba. Konin din pinakan da konin mga kaanggat kayno toltol sa Bilin ba da mga magpamanawen ngani sa balay Diyos da abaya mamangan. 5 Konin dapo sinabi sa kora amba, Da Onga Iraya da Panginoon Aldaw Magpahinga. 6 Ag sai din ka Aldaw Magpahinga laki Hisos ba semled sa balay pagtiponan da- magtodo. Sata ba maki sai ka lalaki laya da kanan alima. 7 Da alabet mga kamatangen sa Bilin da- mga Parisiyo ba nadatosan laki Hisos, kaya kora nagbantayan no iya batay magpapiya sa Aldaw Magpahinga. 8 Ngani amatangan laki Hisos da kora nagremrem, kaya konin sinabi sa lalaki laya da alima amba, Apora kawo towa sa paonaan. Pabali kay ngani- da lalaki da- patindeg sata. 9 Sinabi laki Hisos sa kora amba, Koyo naay batay tinanong. Alin ma da toltol sa Bilin sa Aldaw Magpahinga, da mamanawen piya e mamanawen daet, magribri mga biyag e magbono. 10 Laki Hisos ba maman-aw sa boo iraya sa konin paribok da- sinabi sa lalaki amba, Komo enaten komo alima! Konin nga inenat konin alima da- tiya ba pomiya:akay. 11 Da mga kamatangen sa Bilin da- da mga Parisiyo ba mag-apoy-apoy da kabaisan, da- kora mamagtokawanan no omaning da kailangan kora panawenen sa laki Hisos. 12 Sa odas din naba ba laki Hisos ba tomokad sa bogsor para magdarangin da- boo madlem nga iya magdarangin sa Diyos. 13 Maraw omaga, konin pinatwagan da konin mga nagtod-an da- iya pomili labindarwa sa kora da- konin inawit mga pinili sogoan. 14 Da mga tiya ba laki Simon ag konin inawit Pidro, laki Anris arian laki Pidro, manlaki Tiyago, Howan, Pilipi, Bartolomi, 15 Matiyo, Tomas, Tiyago onga laki Alpiyo, Simon ag nag-awit Masipagen para sa lasyon Israil, 16 Hodas onga laki Tiyago, da- Hodas Iskariyoti ag batay pomaabel sa laki Hisos sa konin mga kalaban. 17 Laki Hisos ba domolong anggat sa kora da- patindeg sa sai ka patag ka poro. Sata da kaosonan konin mga nagtod-an da- da kaosonan iraya ibat sa boo lopa mga Diw, da- sa Hirosalim, anggan sa mga goraan nag-awit Tiro da- Sidon sa tebteb dagat. 18 Kora paraoy sata para magpakarngey sa konin da- papiyaen sa kora mga kadamdaman. Konin din pinapiya da mga nagpahidapan mga daet ka ispirito. 19 Alabet gidte kaosonan iya ba kora nakapkap panawen iya maki kapangyadihan magpapiya sa boo maki maskit. 20 Laki Hisos ba man-aw sa konin mga nagtod-an da- konin sinabi amba, Angasan koyo mga mahidapen, panawen maghadi sa koyo da Diyos! 21 Angasan koyo mga nagbayog mona, panawen koyo batay nangaabsoyan! Angasan koyo mga magpanangis mona, panawen koyo batay nangaangasan! 22 Angasan koyo no koyo nagbantaan mga iraya, da- namoyawan da- nagmoda da- nagsabiyan daet panawen sa koyo ba magtoltol sa Onga Iraya. 23 Amba din da pinanawen kora mga pangapoan sa mga tagabarita ibat sa Diyos. Kaya asyagan koyo sa aldaw naba da- magtarektek sa kaangasan panawen lakol da batay taboy Diyos sa koyo sa soksokowan. 24 Ngani daet gidte kay sa koyo mga maoson nag-apo, panawen naba:a ngani da koyo batay tinabang! 25 Daet gidte sa koyo mga absoyan mona, panawen koyo batay nabayog! Daet gidte sa koyo mga magpatawa mona, panawen koyo batay marongkot da- batay magpanangis. 26 Daet gidte sa koyo no koyo nagpodi boo iraya, panawen amba kay din da pinanawen ag kora pangapoan sa mga magpasoli tagabarita. 27 Ngani naay nagsabi sa koyo mga magpakarngey amba, Koyo palayawen da koyo mga kalaban, koyo panawenen da piya sa mga magbanta sa koyo, 28 koyo mag-ay-ay sa Diyos para konin nagparongawan da mga magpanongayaw sa koyo, koyo daranginen da mga magpahidap sa koyo. 29 No kawo sinampal sa sai ka pisngi ba komo din palobaen da kabila dako; no maki ag-agaw komo bado ba bayaan din konin agawen da komo golanit. 30 Komo pakanen da tayma mag-ay-ay sa komo da- no maki gomaro komo mga nag-apo ba bayaan:na sa konin. 31 No omaning koyo alabet panawenen mga iraya sa koyo ba amba din koyo panawenen sa kora. 32 No ag mga ngani magpalayaw sa koyo da koyo nagpalayaw ba nakay dapo ka podi da koyo batay nagpanyaan? Kayno da mga makadaetan ba magpalayaw din sa mga magpalayaw sa kora. 33 No da mga ngani magpamanawen piya sa koyo da koyo batay nagpanawenan piya ba nakay dapo ka podi da koyo batay nagpanyaan? Kayno da mga makadaetan ba magpamanawen makay din naba. 34 Da- no koyo magpaeram sata ngani sa mga iraya koyo nag-asahan batay kataboy:yakay da koyo nagpaeram ba nakay dapo ka podi da koyo batay nagpanyaan? Kayno da mga makadaetan ba magpaeram din sa mga makadaetan sa kora sarig da mga naba ba batay kataboy:yakay. 35 No nawed ba koyo palayawen da koyo mga kalaban, da- koyo panawenen da piya sa kora. Koyo magpaeram ayaw:wa agremrem amba batay:yakay pinaoli. Sa makay naba koyo batay tomabang lakol ka kapodiyan da- batay mga onga Diyos pag Atatas sa boo, panawen iya ba piya gidte kayno sa mga iraya dayo magpasalamat da- sa mga iraya daet. 36 Makayawteen koyo makay din tamo Apang. 37 Koyo ayaw maghosay para nawed koyo hosayen Diyos. Koyo ayaw magpadosa para nawed koyo padosahan Diyos. Koyo magpatawad sa koyo kapowa ba batay koyo pinatawad Diyos. 38 Koyo magtaboy da- koyo batay pinakan Diyos, sibay gidte sa koyo alat da- sinsinen gidte da- degmeken dapo anggan maglabis, panawen da panarok koyo naggamit, naba din da batay ginamit Diyos sa koyo. 39 Kora ba tinanong laki Hisos sa sai ka halimbawa amba, Abaya ma magpal-akayan da tanan raprap? Nawed ma sidawa tanan batay nalabo sa balawo? 40 Wala nagtod-an labi sa konin tagatodo! Ngani no iya nabiyasa:a gayed ba batay din makay konin tagatodo. 41 Da komo nagban-awan ba da sepet sa mata komo arian ngani nawed komo nagkaakitan da lakol ka potol kayo sa komo mata. 42 Omaning komo batay asabi sa komo arian amba, Arian, komo bayaan naay tay inalis da sepet sa komo mata? Ay! nawed kay komo nagkaakitan da lakol ka potol kayo sa komo sadiri mata! Kawo mapalawlaw! Komo dapo alisen da lakol ka potol kayo sa komo mata, para kawo batay kaban-aw piya. No amba ba komo batay aalis da sepet sa mata komo arian. 43 Wala piya ka poon kayo magpamokar daet, wala din daet ka poon kayo magpamokar piya. 44 Nagkaakilalaan da tayma poon kayo sa konin sadiri bokar. Da kahil ba nawed abaya pitiyen sa halobagat, da kabagyo din ba nawed abaya pitiyen sa talonyong. 45 Da piya ka iraya ba magpamanawen piya panawen kapno kapiyaanan da konin poso; da daet kay ka iraya ba magpamanawen daet panawen kapno kadaetan da konin poso. Sa kakapnoan ag poso ba magtokawanan da bibi. 46 Kaytang ako koyo nag-awit amba, Panginoon, Panginoon, ngani nawed kay koyo nagpanawen da naay nagsabi? 47 Da iya magpabali sa naay da- magpakarngey da- magpamanawen naay mga tokawanan ba naay batay Pinaban-Aw sa koyo no makay tawa iya. 48 Iya ba makay sai ka iraya maglobo balay, konin gidte kinaliyan alalem sa bato; maraw rateng da lakol ka bongkalos ba dinalanan da balay ba nawed gidte lemeblebey da balay panawen maonay gidte da lobo. 49 Ngani da magpakarngey naay mga tokawanan da- nawed magpamanawen ag mga naba ba makay sai ka iraya lombo balay wala paonayan. Bomongkalos da- domalan sa balay naba da sapa da- agad gidte nagras. Naranggas:sa gidte da balay naba. Naba:a ngani.
1 Maraw laki Hisos ba kalbas:sa magtodo sa mga iraya ag boo naba ba iya semled sa goraan Kapirnaom. 2 Sata ba maki sai ka poon mga sondalo taga goraan Roma. Iya ba maki sai ka tagoanggat konin gidte palayaw. Ag tagoanggat naba ba maki maskit da- bali:ya natay. 3 Maraw abaritaan ag poon para sa laki Hisos, konin pinaparaoy sa konin da kalaati mga koyay mga Diw para kora aringien sa laki Hisos amba konin kay paraoyan da- papiyaen da konin tagoanggat. 4 Maraw kora rateng:nga sa laki Hisos ba kora gidte inaringi piya sa konin amba, Kailangan gidte iya kay ba pakanen, 5 panawen konin gidte palayaw tamo mga Diw da- iya da magpalobo tamo balay pagtiponan sa goraan tiya. 6 Kaya laki Hisos ba anggat sa kora. Maraw bali:ya sa balay ba pinadarosog ag poon da konin mga abyan da- konin pinasabi da makay tiya, Panginoon, ayaw:wa kawo magpaabara panawen kawo ba nawed gidte abaya semled sa naay balay. 7 Kaya ngani- nawed ako pabali sa komo, panawen naay nagremrem amba, Ako nawed abaya paloba sa komo. Ngani sa komo ngani tokawanan ba batay:ya pomiya da naay tagapamanawen. 8 Panawen ako ba sakop sa mga maki katongkolan, naay kay sakop da mga sondalo. No naay sinabi sa sai amba, Kawo paraoy sata, ba iya paraoy sata; da- sa Roma kay, Kawo towa paraoy, ba iya pabali; da- sa naay tagoanggat amba, Komo panawenen tiya, ba konin nagpanawen. 9 Maraw akarngeyan laki Hisos da mga tokawanan naba ba iya tomarangasan. Iya lominga-linga sa kaosonan mag-anggat sa konin da- sinabi amba, Naay gidte nagsabi sa koyo, Kayno sa Israil ba nawed ako kaban-aw kaamba kakol ka pag-isarig sa naay! 10 Maraw paoli sa balay da mga pinaparaoy ba kora akitan da tagoanggat ba piya:ani. 11 Nawed te maagot, laki Hisos ba paraoy sa sai ka goraan nag-awit Nain, anggat din da konin mga nagtod-an da- mga kaosonan gidte iraya. 12 Maraw bali:ya sa song-awan goraan, konin asma da mga iraya nagbaba sa lebengan da sai ka natay; iya ba bogtong ka onga ag babayi balo. Maoson da anggat sa maglebeng. 13 Maraw akitan Panginoon da adang ag natay ba iya ba ayawtean da- konin sinabi sa konin amba, Ayaw kawo magpanangis. 14 Pabali laki Hisos da- konin kinapkap da osongan, da- empet kay sa magkadangan ag mga magbaba. Iya manokawanan da- binilin amba, Binata, kawo mangon! 15 Iya ba tomongka da- magtokawanan. Da- sinabi laki Hisos sa konin adang amba, Naba da komo onga. 16 Mangabkaba kora mga soot sa kaliman, da- kora ba mamagpodi sa Diyos amba, Rateng sa tamo da sai ka makapangyadihan ka tagabarita ibat sa Diyos. Towa paraoy da Diyos para konin ribriyen da konin mga kairayaan. 17 Da barita tiya para sa laki Hisos ba rateng:nga sa boo Hodiya da- sa mga poro sa paribok. 18 Da boo nangyadi naba ba binarita sa laki Howan Tagabaotismo sa sapa pag konin mga nagtod-an. Konin pinatwagan da darwa sa kora 19 da- pinaparaoy sa laki Hisos para tanongon amba, No kawo:wa ngani- da batay towa, no yamen batay dapo magpanya sa Roma. 20 Maraw rateng sa laki Hisos ba sidawa sinabi sa konin amba, Yamen pinaparaoy laki Howan para tanongon no kawo:wa ngani- da batay towa, no yamen batay dapo magpanya sa Roma. 21 Ag odas din naba ba maoson da pinapiya laki Hisos: mga pinahidapan kadamdaman, mga inapo daet ka ispirito. Da- maoson ka mga raprap da konin pinapiya da- kora Kaban-aw:wakay. 22 Kaya konin sinabi sa mga pinaparaoy laki Howan amba, Paoli:a koyo da- koyo sabiyen sa laki Howan da koyo mga akitan da- akarngeyan. Kaban-aw da mga raprap, kakadang da mga tekya, pomiya da mga panyakiten, karngey da mga bengelen, nagpangabiyag:gakay da mga nangatay, da- nagpangadar sa mga mahidapen da Pirmida ka Barita. 23 Angasan da iraya nawed nagkaatbek sa naay. 24 Maraw da mga pinaparaoy laki Howan ba kaalis, laki Hisos kay ba magtokawanan sa kaosonan mga iraya para sa laki Howan amba, Kaytang koyo lomwas sa poro nawed apirmihan iraya? Kayo da koyo alabet akitan? Sai ka alainay nagyogyoga koaya? 25 Kayo ngani- da koyo alabet akitan? Sai ka iraya maganda:a gidte da nagsool? Ngani da mga magsool maganda gayed ka golanit da- da biyag ba maoson gidte nag-apo ba kora ba sa pamatawan mga hadi. 26 Kayo ngani- da koyo alabet akitan? Sai ka tagabarita ibat sa Diyos? Hee, naay gidte nagpasked sa koyo, iya ba labi dapo sa sai ka tagabarita ibat sa Diyos. 27 Laki Howan da nagtodyo Banal ka Kasoratan amba, Man-aw, naay nagpaidaw da naay sogo sa komo paonaan. Iya da batay maghanda komo batay dinalanan. Naba:a ngani. 28 Naay nagsabi sa koyo amba, Sa pad inonga mga babayi ba wala makapangyadihan dapo sa laki Howan. Ngani da ibente te sa mga onga Diyos ba lalo dapo makapangyadihan sa laki Howan. 29 Sinabi dapo laki Hisos amba, Pinakarngeyan iya mga kairayaan anggan mga magpaningir bohis. Sa kora binaotismohan sa sapa laki Howan ba kora gidte sinistigohan amba kora magtoltol sa alabet Diyos. 30 Ngani da mga Parisiyo da- mga kamatangen sa Bilin, panawen sa kora dayo baotismohan sa sapa ba kora gidte sinistigohan kora sinikway da alabet Diyos para sa kora. 31 Sa nakay naay batay pinatolad da mga iraya mamiyag sa mga kaodasan tiya? Da- nakay da makay din kora? 32 Kora ba makay mga onga magtongka sa garawanan da- magpalpatwagan sa sai-sai amba, Koyo yamen ba pinabeetan makaangas ka pabeet ngani nawed koyo magsayaw-sayaw! Koyo ba yamen pinabeetan marongkot ka pabeet da- koyo nawed magpanangis. 33 Panawen towa paraoy laki Howan Tagabaotismo sa sapa. Iya nawed mamangan tinapay da- nawed mag-inem mga inemen kalibed, da- koyo nagsabi amba, Iya ba bolingaw. 34 Towa kay paraoy da Onga Iraya magkain da- mag-inem da- koyo nagsabi amba, Koyo ban-awan ag iraya tiya! Asesen da- par-inemen, abyan gidte mga magpaningir bohis da- Roma ka makadaetan. 35 Ngani da kadonongan Diyos ba pinatonayan amba piya gidte sa boo tomabang saba. Naba:a ngani. 36 Laki Hisos ba pinaparaoy sai ka Parisiyo da ngaran ba laki Simon sa konin balay para konin kasaro. Iya semled sa balay Parisiyo da- magpalibay sa tebteb pamangnan toltol sa kora kaogalian. 37 Sa poro naba ba maki sai ka babayi amatangan gidte mga iraya iya ba makadaetan gidte. Maraw konin amatangan laki Hisos ba magkain sa balay pag Parisiyo, iya paraoy sata, konin binaba sai ka sognoan bato da ngaran ba alabastro kapno gidte banglo. 38 Iya pabali sa awak laki Hisos sa paa dako, da- magpanangis. Nabasa- konin bingas da paa laki Hisos da- konin pinairan konin obok; da- iya mag-amo sa paa laki Hisos da- binoboan banglo. 39 Maraw akitan naba pag Parisiyo pomaanggat sa laki Hisos, konin rinemrem sa konin sadiri amba, No tagabarita gidte da iraya tiya ba konin:na amatangan no tawa da- makay nakay ka babayi da magkapkap sa konin-iya sai ka makadaetan! 40 Kaya sinabi laki Hisos sa konin amba, Simon, ako maki batay sinabi sa komo. Laki Simon ba tembag amba, Nakay naba, Tagatodo? 41 Laki Hisos amba, Maki darwa ka lalaki mangotang sa sai ka magpaotang, da sai ba lima ka daan, da sai kay ba limampo. 42 Sidawa tanan nawed kabayad, kaya sidawa tanan pinatawad. Tawa nga sa darwa da lakol da palayaw sa konin? 43 Tembag laki Simon amba, Sa naay remrem ba da lakol da palayaw ba da lakol da pinatawad. Sinabi laki Hisos, Amba:a ngani-. 44 Da- konin binaliwi ag babayi da- sinabi sa laki Simon amba, Komo akitan da babayi naba? Ako semled sa komo balay da- ako nawed man komo pinakan sapa para sa naay mga paa. Ngani binasa- konin bingas da naay paa da- pinairan konin obok. 45 Kawo nawed omamo sa naay, ngani ibat iya semled sa balay ba iya nawed mag-epet mag-amo sa naay paa. 46 Nawed komo pinairan langis da naay olo, ngani konin binoboan banglo da naay mga paa. 47 Kaya naay nagsabi sa komo amba pinatawad:dani da konin maoson kadaetan panawen lakol da konin Pinaban-Aw magpalayaw. Ngani da pinatawad ibente ba ibente din da palayaw. 48 Kaya sinabi laki Hisos sa babayi amba, Pinatawad:dani da komo mga kadaetan. 49 Da konin mga kasaro sa magkain ba magremrem:mani sa kora sadiri amba, Tawa tiya pag magpatawad anggan mga kadaetan? 50 Sinabi laki Hisos sa babayi amba, Kawo rinibri sa komo pag-isarig sa naay; mangadang:nga kawo maki kaginhawahan.
1 Nawed te maagot laki Hisos ba paraoy sa boo mga goraan da- goraan te da- pinangadar da Pirmida ka Barita para sa batay:ya maghadi da Diyos. Konin kaanggat da labindarwa ka nagtod-an, 2 da- da kalaati mga babayi konin pinapiya sa mga daet ka ispirito da- mga sadi-sadi ka maskit: bayi Mariya taga goraan Magdala (ibat sa konin pito ka daet ka ispirito da binoyaw), 3 bayi Howana, sawa laki Kosa ag katiwalaan laki Hirodis, bayi Sosana da- maoson dapo Roma. Kora naggamit da kora mga nag-apo sa kora magtolong sa laki Hisos da- sa konin mga nagtod-an. 4 Mamagrimponan sa laki Hisos da mga iraya ibat sa mga Roma-Roma ka goraan. Konin sinabi sai ka halimbawa: 5 Maki sai ka iraya lomwas para mag-asik. Sa iya mag-asik maki mga binhi nangaragrag sa tebteb dalan. Da kalaati ba nangaasayawan da- maki kay nanka:a ibon. 6 Maki kay nangaragrag sa kabatowanan, da- maraw sombok ba agad nalayo panawen wala rimegmeg. 7 Maki kay mga binhi nangaragrag sa dogian da- tombo kaanggat din mga dogi da- dinaeg da mga binhi. 8 Da Roma ba nangaragrag sa piya gidte ka lopa da- tombo da- mamokar tig sai ka daan ka beter. Maraw kalbas, konin sinabi maeyat sa kora amba, Mangarngey da maki pakarngey. 9 Laki Hisos ba tinanong konin mga nagtod-an no nakay da alabet sabiyen ag halimbawa naba. 10 Tembag laki Hisos amba, Sa koyo ba tinaboy para koyo amatangan da mga nawed dapo amatangan boo ag para sa batay:ya maghadi da Diyos, ngani sa Roma kay ba sa halimbawa ngani para Kayno kora semrey ba nawed kora kaban-aw, da- kayno kora magpakarngey ba nawed kora amatangan. 11 Tiya da alabet sabiyen ag halimbawa : da binhi ba da Tokawanan Diyos. 12 Da mga binhi nangaragrag sa tebteb dalan ba makay ag mga magpakarngey sa Tokawanan Diyos, ngani rateng da aponin kadaetan, da- konin inalis sa kora mga poso da tokawanan para kora ayaw mag-isarig da- ayaw naribri. 13 Da pad nangaragrag kay sa kabatowanan ba makay ag mga magpakarngey sa Tokawanan Diyos da- tomabang gidte maki kasyagan ngani pad tiya ba nawed manwakat. Kora nawed te maagot mag-isarig da- maraw rateng da mga togso ba somway:ya kora. 14 Ag pad naasik kay sa dogian ba makay ag mga magpakarngey sa Tokawanan Diyos, ngani kora nadaeg:ga mga nagremrem da- mga maoson ka nag-apo da- mga kaangasan sa biyag; kaya makay napoyo:wani. 15 Ag pad nangaragrag kay sa piya ka lopa ba makay ag mga magpakarngey sa Tokawanan Diyos maki piya gidte ka poso. Kora dinahanan da kora arngeyan da- kora mag-agwanta anggan mamokar. 16 Wala iraya magpar-et solo-da- kalbas batay tinakleban keden e tinago. No nawed ba tiya ba nagpalagay sa patimpowan gidte para akitan mga magseled da rawa. 17 Kaya naay nagsabi sa koyo amba, Da boo nagtago ba batay akitan da- da boo nakayman nawed dapo amatangan ba batay amatangan da- apawaan. 18 Koyo magdahan sa koyo magpakarngey. Panawen da tawa man maki ba batay pinakan, da- da tawa man wala ba batay inalis anggan ag sa konin remrem ba konin. 19 Rateng da adang da- da mga arian laki Hisos, ngani kora nawed kapabali panawen sa maoson iraya. 20 Maki magtokawanan sa konin amba, Sa lowas balay da kom adang da- da kom mga arian. Kora alabet gidte pakasma sa komo. 21 Ngani konin sinabi sa kora amba, Da pad magpakarngey da- magpamanawen sa Tokawanan Diyos ba naba da naay adang da- da naay pad arian. 22 Sai ka aldaw laki Hisos ba somakay sa sai ka bangka, kaanggat da konin mga nagtod-an. Konin sinabi sa kora amba, Tamo omipay sa karipay dagat-dagatan. Kaya kora nga omangberan. 23 Maraw kora mag-angberan, akalekan laki Hisos. Bomogso da sai ka maeyat ka bagyo kaya sinled:da maoson ka sapa da bangka kaya sa kalimo:wa kora. 24 Iya ba pinabaliyan konin mga nagtod-an da- kora pinolaw. Kora amba, Koyay, koyay, tamo batay:ya nalimes! Mangon laki Hisos da- sinaway da koaya da- pad lakol ka alon, da- nangapra da mga tiya da- pomiya da odas. 25 Sinabi sa kora laki Hisos amba, Kaytang koyo nawed mag-isarig sa naay? Ngani kora ba nangaaliman da- manggilalas, da- da sabi sa tayma sai amba, Tawa kaya iya? Kayno ag mga koaya man da- ag dagat-dagatan man ba konin sinabiyan, da- ag mga naba ba magtoltol kay sa konin mga tokawanan. 26 Kora rateng sa lopa mga Girgisino, sa betek Galiliya. 27 Maraw laki Hisos ba lompot sa bangka, iya ba sinalobong sai ka lalaki taga sata sa goraan. Iya nag-apo mga daet ka ispirito. Maagot:ta iya nawed magsool golanit da- nawed:da magpamataw sa balay. Sata:a sa mga lebengan lineyang bato da magpamataw. 28 Maraw konin akitan laki Hisos ba iya mang-o da- maglombogan sa konin ropangan da- konin sinabi maeyat amba, Hisos, Onga Diyos pag Atatas sa boo, nakay da komo pakiaram sa naay? Ako mag-aringi sa komo amba, Ayaw kay ako komo pahidapan. 29 Konin sinabi naba panawen sinabiyan laki Hisos da daet ka ispirito amba, Lomwas sa iraya naba. Layen iya nag-apo daet ka ispirito. Kayno iya nagbantayan da- nag-egtan tagikara da- nagpangaw ba konin nagpangto da mga naba da- iya ba nagranggot mga daet ka ispirito sa poro nawed apirmihan iraya. 30 Iya tinanong laki Hisos amba, Nakay da komo ngaran? Iya tembag amba, Kaosonan, panawen maoson da mga daet ka ispirito magpamataw sa konin. 31 Da- kora mag-aringi gidte sa laki Hisos amba ayaw kora paparaoyon sa kalaleman wala toko. 32 Sata ba maki kay maoson alagaan baboy mamagpamangan sa kaliwis latayan. Omaringi sa laki Hisos da mga daet ka ispirito amba kora pasleden sa mga naba. Tembag laki Hisos amba abaya. 33 Lomwas sa iraya da mga daet ka ispirito da- semled sa pad baboy. Mandalagan da mga baboy mamparaoy sa rakyas, da- nangalabo:a sa dagat-dagatan da- nangalimes. 34 Maraw akitan mga mag-alaga da nangyadi, mandalagan kora da- binarita da mga nangyadi naba sa goraan da- sa boo paribok. 35 Kaya manlowas da mga iraya para ban-awan da nangyadi. Maraw kora rateng sa laki Hisos ba kora akitan ag aray bolingaw. Iya magtongka sa ropangan laki Hisos maki golanit da- piya:akay da remrem. Kaya kora ba aliman gidte. 36 Nanoltol ag mga magban-aw sa kora no omaning pomiya da aray nag-apo maoson ka daet ka ispirito. 37 Ag pad Girgisino ba omaringi sa laki Hisos para iya ba omalis:sa sa kora, panawen kora ba aliman:na gidte. Kaya laki Hisos ba somakay:yakay sa bangka para omalis. 38 Inateet pag iraya inalisan maoson ka daet ka ispirito amba iya ba paanggaten, ngani iya pinaoli laki Hisos 39 amba, Kawo moli da- komo sabiyen no kaomaning kakol da pinanawen Diyos sa komo. Moli:a ngani- da lalaki da- konin binarita sa boo mga iraya ag mga pinanawen sa konin laki Hisos. 40 Maraw laki Hisos ba paoli ba nangaangasan da kaosonan iraya panawen iya ba nagpanyaan boo. 41 Pabali sa konin da sai ka lalaki da ngaran ba Hairo. Iya da magpamahala sa balay pagtiponan mga Diw. Iya maglohod sa ropangan laki Hisos da- mag-aringi amba anggat sa konin balay 42 panawen ag konin sai ngani te ka onga babayi maki mga labindarwa ka dag-on ba magpanawnaw:wani. Maraw magkadangan dapo laki Hisos, iya ba nag-aliget kaosonan iraya. 43 Saba din da sai ka babayi labindarwa:a ka dag-on nagpamohosan. Konin nanaboy da boo konin nag-apo sa magpagamot, ngani wala kapapiya sa konin. 44 Iya pabali sa awak laki Hisos da- konin kinapkap da gawisan kon bado da- agad empet da daya. 45 Tinanong laki Hisos amba, Tawa da komapkap sa naay? Maraw wala omako ba sinabi laki Pidro da- da konin mga kaanggat amba, Koyay, kawo ba nagdarede da- nag-aliget kaosonan. 46 Ngani sinabi laki Hisos amba, Maki komapkap sa naay panawen naay amatangan maki kapangyadihan lomwas sa naay. 47 Maraw amatangan pag babayi amba nawed ma batay katago konin pinanawen iya ba magtartaroy pabali da- maglombogan sa ropangan laki Hisos. Kalbas ba iya magpanoltol sa ropangan boo kairayaan sata kaytang iya komapkap sa laki Hisos da- no omaning iya agad pinapiya. 48 Sinabi sa konin laki Hisos amba, Abyan, kawo pinapiya komo pag-isarig sa naay. Mangadang:nga kawo maki kaginhawahan. 49 Laki Hisos ba magtokawanan dapo, rateng da sai ka iraya ibat sa balay magpamahala. Iya amba sa laki Hairo, Wala:ani ag komo onga. Ayaw:wa komo pag-abarahen da tagatodo. 50 Maraw naba ba akarngeyan laki Hisos, konin sinabi sa laki Hairo amba, Kawo ayaw aliman, kawo misarig ngani da- iya batay pomiya. 51 Maraw laki Hisos rateng sa balay ba iya wala pinaanggat sa galem no nawed kora Pidro, Howan da- Tiyago da- da apang da- adang ag dalakita. 52 Da boo iraya sata ba ahidapan da remrem da- magpanangis. Kaya sinabi laki Hisos amba, Koyo ayaw magpanangis. Iya nawed natay. Akalekan ngani. 53 Tinawanan:na iya mga kaosonan panawen kora amatangan natay:ya ag onga. Kaya kora ba konin:na pinalwas. 54 Maraw kalbas ba konin ginenan da alima pag onga da- sinabi maeyat amba, Onga, kawo mangon! 55 Paoli:akay da konin inawa da- agad iya ba mangon. Da- sinabi laki Hisos amba, Iya pakanen pamangnen. 56 Da apang da- adang ba magtaka gayed. Ngani sidawa sinabiyan laki Hisos amba, Ayaw agsabiyen sa tawa man da nangyadi.
1 Pinatwagan laki Hisos da labindarwa ka nagtod-an para magrimpon da- kora pinakan kaka-yahan da- kapangyadihan magboyaw boo mga daet ka ispirito da- magpapiya sa mga maki maskit. 2 Da- kora pinaidaw para baritaen da para sa batay:ya maghadi da Diyos da- magpapiya sa mga maki maskit. 3 Da- konin sinabi sa kora amba, Koyo ayaw magbalon nakayman para sa koyo magkadangan, kayno bakolo, kayno bokotan, kayno pamangnen, kayno kwarta, kayno tayma sai sa koyo ba ayaw darwa ka bado. 4 Kayno sa alin pag balay koyo semled, sata koyo mamataw anggan koyo omalis sa goraan naba. 5 No koyo nawed tinabang ba koyo omalis:sakay sa goraan naba da- koyo opyasen da onggang sa koyo mga paa para magpadahan sa kora amba, Batay daet sa koyo! 6 Kaya mangadang da mga nagtod-an da- paraoy sa mga goraan te. Kora pinangadar da Pirmida ka Barita da- magpapiya sa mga maki maskit sa boo poro. 7 Nabaritaan koyay Hirodis pag gobirnador sa Galiliya da boo nangyadi. Magsamperaket da konin remrem, panawen maki magsabi amba, Nabiyag:gakay laki Howan Tagabaotismo sa sapa; 8 maki kay magtokawanan amba, Paban-aw:wakay laki Iliyas; da- maki dapo magsabi amba, Biniyag:gakay da sai sa mga monaan tagabarita ibat sa Diyos. 9 Kaya da sabi koyay Hirodis ba amba, Naay:ya pinapotol da leey laki Howan ngani tawa pag nagkaabaritaan naba? Maoson ako nagkaakarngeyan para sa konin. Kaya konin gidte nagsarak para akitan laki Hisos. 10 Maraw paoli da mga pinili sogoan, kora sinabi sa laki Hisos da boo kora pinanawen. Kora ngani da pinaanggat laki Hisos magparaoy sa goraan da ngaran ba Bitsaida. 11 Ngani maraw naba ba amatangan mga iraya, iya ba kora inanggatan. Laki Hisos ba angasan gidte tomabang sa kora. Iya magtokawanan sa kora para sa batay:ya maghadi da Diyos da- iya magpapiya sa boo kailangan papiyaen. 12 Maraw giraapon:nani, pabali sa konin da labindarwa da- kora sinabi sa konin amba, Komo:wa pakadangen da mga iraya para kora kaparaoy sa mga goraan te da- sa mga alamanan para kasarak batay namangan da- batay akalkanan, panawen tamo ba sa sai ka poro nawed nagpamatawan iraya. 13 Ngani konin sinabi sa kora amba, Koyo da magtaboy pamangnen sa kora. Kora tembag amba, Wala gidte tamo no nawed ba lima ngani ka tinapay da- darwa ka isda. Kailangan dia yamen bomili para maki pamangnen para sa mga kaosonan iraya naba? 14 Panawen maki kaaram lima ka ribo da mga lalaki sata. Konin sinabi sa konin mga nagtod-an amba, Kora koyo patongkaen, da tayma rimponan ba tig limampo. 15 Amba ngani- da kora pinanawen-pinatongka da boo. 16 Ginaro laki Hisos da lima ka tinapay da- darwa ka isda. Iya ba maningara sa langit da- iya magpasalamat sa Diyos. Konin ineray-eray da mga naba da- tinaboy sa konin mga nagtod-an, para kora pamakanen da mga iraya. 17 Kapamangan:na da boo da- nangaabsoyan. Tinipon mga nagtod-an da natra ag tinapay da- isda, da- kora kapno dapo labindarwa ka alat. 18 Maraw ina laki Hisos ba magdarangin poyida, da- kaanggat din da konin mga nagtod-an. Kora ba konin tinanong amba, Nakay da remrem mga iraya, tawa kono ako? 19 Kora tembag amba, Da sabi kalaati ba kawo ba laki Howan Tagabaotismo sa sapa. Da sabi kay pag mga Roma ba kawo ba laki Iliyas. Da- maki kay magsabi amba kawo ba sai sa mga tagabarita ag monaan ba nabiyag:gakay. 20 Amba laki Hisos, Koyo kay, omaning kay da koyo sabi? Tawa ako? Tembag laki Pidro amba, Kawo da Kiristo sinogo Diyos. 21 Binilin gidte laki Hisos sa mga konin nagtod-an amba, Ayaw gidte koyo agsabiyen naba sa tawa man. 22 Da- konin dapo sinabi sa kora amba, Da Onga Iraya ba kailangan mag-agwanta gidte hidap. Iya ba batay sinikway mga koyay sa goraan, da- mga koyay magpamanawen sa balay Diyos da- mga kamatangen sa Bilin. Iya kora batay pinabono, ngani sa ikatatlo ka aldaw iya ba batay:yakay nabiyag. 23 Da- sinabi laki Hisos sa boo amba, Da iya alabet tomongroy sa naay ba iya kailangan magdayo sa konin sadiri, konin pas-anen aldaw-aldaw da konin kodos, da- magtongroy sa naay. 24 Da iya alabet naribri konin biyag ba batay nawala da biyag gidte sa konin, ngani da iya magtaboy konin biyag para gidte sa naay ba iya da batay gidte mag-apo naba. 25 Nakay nga da batay pakinabang sai ka iraya kayno konin natabang da boo paranawan da- nawala kay da biyag gidte sa konin? 26 Panawen da tawa man akayaan sa naay da- sa naay mga tokawanan ba da Onga Iraya ba batay din akayaan sa konin sa iya batay rateng sa konin kalakolan, da- sa kalakolan Diyos Apang da- mga banal ka anghil. 27 Naay gidte nagsabi sa koyo, Da kalaati sa koyo towa ba nawed tay natay anggan nawed akitan da maghadi da Diyos. 28 Maraw kadalan da mga walo ka aldaw ag konin sinabi da mga nakayman naba ba laki Hisos ba tomokad sa bogsor para magda- rangin. Konin pinaanggat kora Pidro, da- Howan, da- Tiyago. 29 Maraw iya magdarangin ba ibahin:nakay da konin kiray da- konin mga nagsool ba mapoti da- magbalawas gidte. 30 Kamalay te ba sata din kolaki Moysis da- Iliyas. Sidawa ba maki din balawas ibat sa Diyos 31 da- sidawa da- laki Hisos ba magtokawanan para sa bali:ya batay natay laki Hisos ag batay nangyadi sa Hirosalim. 32 Nagkakalek gidte laki Pidro da- mga konin kaanggat. Ngani kora ba apolawan:nakay da- kora akitan da balawas laki Hisos da- kolaki Moysis da- Iliyas konin kaanggat. 33 Maraw sidawa ba batay:ya malsoway sa laki Hisos ba sinabi laki Pidro amba, Koyay, piya tamo towa. Batay yamen limbo da tatlo ka barangas, sai sa komo, sai sa laki Moysis da- sai sa laki Iliyas. Nawed amatangan laki Pidro da konin nagsabi. 34 Iya magtokawanan dapo ba somanggayad da yaong da- kora ba atakleban. Maraw kora ba semled sa yaong ba kora ba aliman. 35 Maki sai ka magtokawanan ibat sa yaong amba, Tiya da naay Onga naay hinidang. Koyo magpakarngey sa konin. 36 Maraw empet da magtokawanan ba kora akitan sai:ya ngani laki Hisos. Kora ba agpatangele. Nawed kora sinabi, sa mga odas naba, sa tawa man da kayno nakayman kora akitan. 37 Maraw omaga:akay ba kora domolong ibat sa bogsor. Laki Hisos ba dinarosog kaosonan iraya. 38 Maki sai ka lalaki sata sa kaosonan magtokawanan maeyat amba, Koyay, komo kay ban-awan da naay sai ngani te ka onga lalaki! 39 Maki odas iya nag-apo daet ka ispirito, da- iya kamalay te ba magpang-o. Iya nagpatartaroy anggan magsobo:wa da bibi. Nagpakaskitan iya da- dayo ogonan. 40 Ako ba mag-aringi:a sa komo mga nagtod-an amba kora kay paboyawen da daet ka ispirito ngani wala kora apanawen. 41 Laki Hisos ba tembag amba, Koyo mga daet ka iraya wala pag-isarig! Kaomaning dapo kaagot ako batay koyo kaanggat da- batay mag-agwanta sa koyo? Da- konin sinabi sa lalaki amba, Komo babaen towa da komo onga. 42 Maraw nagpabali:yani sa laki Hisos da onga, iya ba tinwang:nga sa lopa, da- pinatartaroy:ya daet ka ispirito. Kaya sinabiyan laki Hisos da daet ka ispirito, pomiya da onga da- iya tinaboy laki Hisos sa konin apang. 43 Magtaka gidte kora boo panawen sa lakol ka kapangyadihan Diyos. Maraw magtaka da boo mga iraya sa boo pinanawen laki Hisos ba konin sinabi sa konin mga nagtod-an amba, 44 Koyo gidte pakarngeyan da naay batay sinabi : Da Onga Iraya ba batay pinaabel sa mga iraya. 45 Ngani nawed kora amatangan da alabet sabiyen naba. Nagtago sa kora da alabet sabiyen naba kaya nawed kora amatangan. Kora aliman kay magtanong sa konin para sa mga nakayman naba. 46 Maglaban-laban da mga nag-tod-an no tawa sa kora da makapangyadihan sa boo. 47 Amatangan laki Hisos da kora nagremrem, kaya konin pinatwagan da sai ka ibente dapo ka onga da- pinapatindeg sa konin tebteb 48 da- konin sinabi sa kora amba, Da tawa man magtabang sa ibente ka onga makay tiya panawen sa naay ba magtabang sa naay; da- da tawa man magtabang sa naay ba magtabang sa magsogo sa naay. Panawen da ababa gidte sa boo ba iya da maki kapangyadihan. 49 Sinabi laki Howan amba, Koyay, yamen ba maki akitan sai ka iraya magpamoyaw mga daet ka ispirito sa komo ngaran. Iya ba yamen inayawan panawen iya nawed mag-anggat sa tamo. 50 Ngani sinabi laki Hisos amba, Iya ayaw koyo ag-ayawan panawen da nawed maglaban sa koyo ba koyo din pal-anggat. 51 Maraw bali:ya paoli sa soksokowan laki Hisos ba konin gidte pakay ba paraoy sa Hirosalim. 52 Iya magpaidaw mga sogo para mangonaan sa konin. Kaya kora paraoy sa sai te ka goraan sa lopa Samariya para handaen da konin batay kalkanan. 53 Ngani iya ba dayo tabangen mga taga Samariya panawen kora amatangan iya ba magparaoy sa Hirosalim. 54 Maraw amatangan naba konin mga nagtod-an sidawa Tiyago da- Howan ba sidawa sinabi amba, Panginoon, komo dia alabet kidawa omay-ay apoy ibat sa soksokowan para kora arengen? 55 Ngani laki Hisos ba paloba sa sidawa da- konin sinabiyan amba, (Nawed kandawa amatangan no nakay ka kalasi ispirito da sa kandawa, panawen paraoy towa da Onga Iraya nawed para sopoon da mga iraya no nawed ba para ribriyen.) 56 Maraw kalbas ba kora paraoy sa sai:yakay ka goraan. 57 Maraw kora magkadangan ba maki sai ka iraya magsabi sa laki Hisos amba, Ako batay tomongroy sa komo kayno saan kawo paraoy. 58 Tembag laki Hisos amba, Maki lok-an lobot kayo da mga amid da- maki pogadan da mga ibon ngani da Onga Iraya ba wala gidte isariyan. 59 Sinabi laki Hisos sa sai dapo amba, Kawo tomongroy sa naay. Ngani sinabi pag iraya amba, Bayaan ako moli para palebengen da naay apang. 60 Ngani tembag laki Hisos amba, Komo:wa pabayaan sa mga natay da maglebeng kora mga natay, ngani kawo ba idaw:wani. Komo pangadaren da para sa batay:ya maghadi da Diyos. 61 Sinabi kay sai amba, Ako batay tomongroy sa komo, Panginoon, ngani ako batay dapo magpaaram sa naay mga tagabalay. 62 Sinabi laki Hisos sa konin amba, Da tawa man gemegen sa adado da- mamaliwi ba nawed gidte abaya iya ba hadian Diyos.
1 Maraw kalbas da mga nakayman naba, da Panginoon ba homidang dapo pitompo da- darwa mga konin nagtod-an. Kora ba konin pinaonaan darwa-darwa sa tayma goraan da- poro konin batay pinaraoyan. 2 Konin sinabi sa kora amba, Maoson gidte da aniyen ngani nawed te maoson da tagapamanawen. Kaya koyo magdarangin sa aponin aniyen para iya magpaparaoy maoson batay mag-ani sa konin aniyen. 3 Idaw:wa koyo! Koyo naay nagsogo makay mga onga te topa sa kaosonan mga aso kotanan. 4 Koyo ayaw magbalon pekelan, kayno bokot, kayno mga panlaed. Ayaw:wa koyo mag-epet sa magkadangan sa dalan para magberyaan. 5 No koyo semled sa sai ka balay, koyo dapo sabiyen amba, Kaginhawahan ngani- da sa balay tiya. 6 No da magpamataw sa balay naba ba tomabang sa koyo berya ba koyo papirmihen sa konin da kaginhawahan Diyos; ngani no nawed kay iya tomabang sa koyo berya ba da koyo berya ba wala gidte kaparosan sa konin. 7 Mamataw koyo sa balay angasan magtabang sa koyo. Ayaw:wa koyo sa mga balay-balay. Koyo kainen da- koyo inemen da nakayman tinaboy sa koyo, panawen da magpamanawen ba bagay gidte tomabang konin kabayadan. 8 No koyo semled sa kayno alin pag goraan da- koyo tinabang ba koyo kainen da nakayman kora tinaboy sa koyo. 9 Koyo papiyaen da mga maki maskit sata, da- koyo sabiyen sa kora amba, Bali:ya batay maghadi sa koyo da Diyos. 10 Ngani sa kayno alin pag goraan koyo semled da- koyo nawed tinabang ba koyo paraoy sa tenga goraan da- koyo sabiyen amba, 11 Kayno ag mga onggang towa sa koyo goraan mikapet sa yamen paa ba yamen nagpagpag para magpadahan sa koyo amba, Batay daet sa koyo! Ngani koyo gidte masdan : Bali:yani da batay maghadi da Diyos. 12 Naay gidte nagsabi sa koyo, Sa aldaw batay maghosay da Diyos ba may-an dapo da batay dinanas ag mga taga goraan Sodoma sa batay padosa sa mga taga goraan naba. 13 Daet gidte sa koyo, mga taga goraan Korasin! Daet gidte sa koyo, mga taga goraan Bitsaida! Panawen no sa mga goraan Tiro da- Sidon pinanawen da mga makapangyadihan pinanawen towa sa koyo ba maagot:ta disin kora magkolabong kostal da- magtongka sa abowanan makay ladawan kora magsisi da- mag-ogon kora mga kadaetan. 14 Sa aldaw batay maghosay da Diyos ba da batay padosa sa mga goraan Tiro da- Sidon ba may-an dapo sa batay padosa sa koyo. 15 Da- koyo kay, mga taga goraan Kapirnaom, koyo dia batay magpaatatas anggan sa langit? Nawed! Koyo batay linabo sa kalaleman wala toko! 16 Sinabi laki Hisos sa konin mga nagtod-an amba, Da magpakarngey sa koyo ba magpakarngey sa naay, da magsikway sa koyo ba magsikway sa naay, da- da magsikway sa naay ba magsikway sa magsogo sa naay. 17 Paoli:akay nangaangasan gidte da pitompo da- darwa. Kora sinabi amba, Panginoon, kayno ag mga daet ka ispirito ba magpasangato sa yamen sa komo ngaran. 18 Laki Hisos ba tembag amba, Naay akitan lomabo laki Satanas ibat sa langit makay koldap. 19 Koyo gidte pakarngeyan! Koyo naay:ya pinakan kapangyadihan lomaed sa mga otan da- alalasan da- sa boo kapangyadihan laki Satanas ag koyo kalaban da- wala batay kapahidap sa koyo. 20 Amba man, ayaw koyo angasan panawen magpasangato:wa sa koyo da mga daet ka ispirito, no nawed ba da koyo kaangasan ba panawen da koyo ngaran ba nasorat:tani sa soksokowan. 21 Sa odas din naba laki Hisos ba kapno kaangasan sa Ispirito Banal da- konin sinabi amba, Naay Apang, kawo da Panginoon langit da- lopa. Ako magpasalamat sa komo panawen nawed sa mga madonong da- kamatangen komo Pinaban-Aw da mga nakayman naba no nawed ba sa mga iraya da kora remrem ba makay mga ibente dapo ka onga. Hee, naay Apang, panawen naba gidte da komo alabet. 22 Tinaboy sa naay naay Apang da boo mga nakayman. Wala kamatang no tawa da Onga no nawed ba ag Apang, da- wala kamatang no tawa da Apang no nawed ba ag Onga, da- da tawa man konin alabet paban-awan. 23 Laki Hisos ba paloba sa konin mga nagtod-an da- sinabi nawed pinakarngey sa Roma amba, Angasan koyo panawen koyo akitan da koyo nagkaakitan mona! 24 Naay nagsabi sa koyo, Maoson tagabarita da- mga hadi da alabet gidte kora akitan da koyo nagkaakitan ngani nawed kora akitan. Kora din disin alabet arngeyan da koyo nagkaakarngeyan ngani nawed kora akarngeyan. 25 Maki sai ka kamatangen sa Bilin mga Diw pabali sa laki Hisos para iya ba porbahan. Iya amba, Tagatodo, nakay da kailangan naay panawenen para ako maki biyag gidte wala arasan? 26 Laki Hisos ba tembag amba, Nakay da nagkasorat sa Bilin tinaboy sa laki Moysis? Nakay da alabet sabiyen naba? 27 Iya tembag amba, Komo palayawen da Panginoon komo Diyos boo poso, boo gisarem, boo kaya da- boo remrem; da- palayawen da komo kapowa makay ag komo sadiri. 28 Amba laki Hisos, Piya da komo tebag. Komo panawenen naba, da- kawo batay maki gidte biyag. 29 Ngani alabet iya ba iya mataldeng sa ban-aw mga Roma, kaya konin dapo sinabi sa laki Hisos amba, Tawa kay da naay kapowa? 30 Tembag laki Hisos amba, Maki sai ka iraya domolong ibat sa Hirosalim magparaoy sa Hiriko. Iya binakayan mga amamakay, ginaro da konin nagsool da- iya ba kora namogbog anggan halos natay:yani bayo kora inogonan. 31 Napadalan kay da sai ka tagapamanawen sa balay Diyos. Maraw konin akitan pag iraya magtilagay, iya ba omalas:sani da- toloy:ya iya agkadangan. 32 Domalan din da sai ka katolong sa tagapamanawen. Maraw iya konin akitan ba iya ba pabali para ban-awan da- iya omalas:sa din da- toloy:ya din iya agkadangan. 33 Maki kay sai ka taga Samariya napadalan sata. Maraw konin akitan pag iraya ba ayawtean iya. 34 Iya pabali da- binoboan langis da- alak da mga golat da- ingketan. Da- konin:na pinasakay sa konin sakayan hayop, binaba sa balay pangalkanan da- sata inalagaan. 35 Maraw omaga:akay ba iya gomaro kwarta da- konin tinaboy sa aponin ag balay. Da- konin sinabi amba, Komo alagaan da iraya naba, da- no korang dapo ba naay dapo batay binayadan no ako ba towa:akay. Naba:a ngani. 36 Sa komo remrem, tawa sa tatlo naba da kapowa iraya pag iraya binakayan mga amamakay? 37 Tembag ag kamatangen amba, Ag iraya ayawtean sa konin. Kaya sinabi laki Hisos amba, Idaw:wa kawo, amba din da komo panawenen. 38 Maraw laki Hisos ba toloy:ya sa agkadangan anggat din da konin mga nagtod-an ba iya semled sa sai ka goraan te. Sata maki sai ka babayi da ngaran ba Marta. Angasan gidte iya tomabang sa laki Hisos sa konin pamatawan. 39 Iya maki kakaan babayi da ngaran ba Mariya. Iya ba magtongka sa ropangan Panginoon da- magpakarngey gidte sa konin nagsabi. 40 Ngani bayi Marta kay ba abara gidte sa maoson konin nagpanawen. Iya pabali sa laki Hisos da- sinabi amba, Panginoon, abaya dia sa komo da naay kakaan ba nawed magtolong sa naay? Komo kay sabiyen sa konin amba ako ba tolongan kay. 41 Ngani tembag sa konin da Panginoon amba, Marta, Marta, masyado gidte kawo nagkaabara sa maoson ka nakayman, 42 ngani sai ngani da mahalaga gidte. Pinili bayi Mariya da lalo gidte piya da- tiya ba nawed tay inalis sa konin.
1 Maraw ina laki Hisos ba magdarangin sa sai ka poro. Maraw kalbas iya ba sinabi sa konin sai ka konin nagtod-an amba, Panginoon, yamen komo tod-an magdarangin makay din pag pinanawen laki Howan sa konin mga nagtod-an. 2 Sinabi laki Hisos sa kora amba, No koyo magdarangin ba makay tiya da koyo sabiyen : Yamen Apang sa soksokowan, Kawo ngani ngani- da kailangan sambahen boo iraya, kawo ngani- da maghadi sa yamen, 3 komo kay taboyon sa yamen da yamen kailangan namangan sa aldaw-aldaw. 4 Yamen komo patawaden sa yamen mga kadaetan, panawen yamen nagpatawad da tayma kapamanawen daet sa yamen. Da- yamen ba komo kay paadayoon sa mga kahidapan batay magpatogso sa yamen. 5 Konin dapo din sinabi sa kora amba, No maki sai sa koyo ba paraoy sa konin abyan sa tenga madlem da- magsabi amba, Abyan, ako komo kay pakanen tatlo ka tinapay, 6 panawen rateng da sai ka naay abyan ibat sa adayo da- ako ba wala gidte batay ataboy sa konin. 7 Batay tay tembag ag sa galem balay amba, Ako ba ayaw:wa komo oyaminen! Langkeb:ba da sakbawan da- nagkakalek:kani yamen. Nawed:da abaya ako mangon dapo para kawo pakanen pamangnen. 8 Naay nagsabi sa koyo amba, Kayno iya dayo:a mangon para magtaboy pamangnen sa komo kayno iya ba abyan, amba man, panawen sa kawo maglopod ba batay din mangon iya da- batay tinaboy sa komo da boo komo kailangan. 9 Kaya naay gidte nagsabi sa koyo amba, Koyo omay-ay ba koyo batay pinakan; koyo somarak ba koyo batay kaban-aw; koyo mangaham ba da takep sakbawan ba batay binokaan para sa koyo. 10 Panawen da tawa man mag-ay-ay ba batay tomabang; da magsarak ba batay kaban-aw da- batay binokaan da takep sakbawan sa tawa man magpangaham. 11 Tawa sa koyo, mga apang, no mag-ay-ay isda da koyo onga ba da nagtaboy ba orpong? 12 Batay ma iya koyo pinakan alitangan no iya mag-ay-ay itlog sa koyo? 13 No koyo ag mga daet ba kamatang din magtaboy piya sa koyo mga onga, kaomaning dapo gayed kaya da koyo Apang sa soksokowan! Konin batay tinaboy da Ispirito Banal sa mga mag-ay-ay sa konin! 14 Maraw ina laki Hisos ba magboyaw sai ka daet ka ispirito otal. Maraw omalis:sani da daet ka ispirito ba katokawanan:nakay da lalaki. Magtaka gayed da kaosonan iraya. 15 Ngani maki Roma sa kora magtokawanan amba, Laki Biilsibol, pag poon mga daet ka ispirito, iya da magtaboy kapangyadihan sa konin para kaboyaw daet ka ispirito. 16 Maki kay Roma alabet iya porbahan, kaya magsabi amba, Kawo magpaban-aw sai ka tandaanan ibat sa soksokowan (para yamen amatangan amba da Diyos ba sa komo). 17 Ngani amatangan laki Hisos da kora nagremrem. Kaya konin sinabi sa kora amba, Batay naregnas da tayma kasakopan nagkaeray-eray panawen da mga iraya ba magpaylabanan, da- batay din nasida da sai ka mag-anak maglabanan. 18 Kaya no ako kono pinakan laki Biilsibol kapangyadihan magboyaw mga daet ka ispirito ba da alabet sabiyen ba laki Satanas ba maglaban sa konin sadiri. No amba, omaning kaya batay kaagot da konin kasakopan? 19 Da- no ako magboyaw mga daet ka ispirito sa kapangyadihan laki Biilsibol ba koyo kay mga nagtod-an ba tawa kay da magtaboy kapangyadihan sa kora para kaboyaw mga daet ka ispirito? Kora:a din da magpaban-aw gidte sa koyo amba koyo ba nawed gidte raoy! 20 Ngani no ako magboyaw daet ka ispirito sa kapangyadihan Diyos ba da alabet sabiyen ba rateng:nga sa koyo da maghadi da Diyos. 21 No da sai ka iraya maeyat da- armasan ba magbantay sa konin balay ba nawed tay agaro da konin mga nag-apo. 22 Ngani no iya linooban da- iya dinaeg:gani ag sai ka iraya lalo dapo maeyat ba batay nanggaro da konin mga armas konin nag-asahan da- batay nangeray da mga nag-apo konin nagaro. 23 Da iya nawed kasai sa naay ba naay kalaban da- da nawed magtolong sa naay para mag-ipon ba magsambolat. 24 No lomwas:sa ibat sa sai ka iraya da sai ka daet ka ispirito ba naba ba magkadang-kadang sa mga poro wala sapa, da- magsarak batay apahingahan. No wala batay akitan ba batay sinabi sa konin sadiri amba, Ako batay paoli sa naay balay ag naay inibatan. 25 No iya rateng da- semled ba konin akitan malinis gidte da- maganda da balay. 26 Kaya iya batay:yakay lomwas da- batay magpaanggat pito dapo ka daet ka ispirito lalo dapo daet sa konin. Kora batay semled da- batay magpamataw sata. Da- lalo:a daet sa monaan da biyag pag iraya naba. 27 Maraw magtokawanan dapo laki Hisos ba maki sai ka babayi magtokawanan maeyat ibat sa kaosonan amba, Angasan da adang bonting sa komo da- magpadodo sa komo. 28 Ngani laki Hisos ba tembag amba, Lalo dapo angasan da mga magpakarngey Tokawanan Diyos da- magpamanawen naba. 29 Maraw nagkamaoson:nani da mga iraya ba sinabi laki Hisos amba, Pad daet:ta gayed da mga iraya mona! Kora magsarak tandaanan ibat sa soksokowan (para kora amatangan amba da Diyos ba sa naay) ngani wala batay tinaboy sa kora no nawed ba ag nangyadi sa laki Honas. 30 No omaning laki Honas ba tandaanan sa mga taga goraan lakol Ninibi ba makay din naba da Onga Iraya sa mga iraya mona. 31 Sa aldaw batay maghosay da Diyos ba batay patindeg da hadi babayi ibat sa lopa Siba. Iya batay maglaban sa mga iraya nagkabiyag sa odas tiya da- kora batay hinosay, panawen iya ba galing dapo sa adayo gidte ka lopa para pakarngeyan da kadonongan laki Salomon. Da- towa:a mona da sai ka labi dapo sa laki Salomon. 32 Sa aldaw batay maghosay da Diyos ba batay patindeg da mga taga goraan Ninibi. Kora batay maghosay sa mga iraya nagkabiyag sa odas tiya, panawen kora ba magsisi da- mag-ogon kora kadaetan maraw mangadar laki Honas sa kora. Da- towa:a mona da sai ka labi dapo sa laki Honas. 33 Wala iraya magpar-et solo- para palagyen sa sai ka poro nagtago e batay tinakleban keden. No nawed tiya ba nagpalagay sa patimpowan gidte para akitan mga magseled da rawa. 34 Da komo mata da solo-komo pagkairaya. No malinaw da komo mata ba batay apawaan da boo komo pagkairaya. Ngani no kolabo da komo mata ba batay adeleman da boo komo pagkairaya. 35 Kaya kawo magdahan kaaram kawo kono amba solo- sa komo ngani kadeleman mana! 36 No sa mapawa da komo boo pagkairaya da- wala eray sa madelem ba tiya ba apawaan gidte ba makay gidte kawo nagsol-an sai ka marawa ka solo-. 37 Maraw kalbas magtokawanan laki Hisos, iya ba pinaanggat sai ka Parisiyo para mamangan sa konin balay. Kaya iya semled sata da- iya pabali sa pagkainan. 38 Da Parisiyo ba magtaka maraw konin akitan laki Hisos ba mangan nawed:da mangoyas alima toltol sa kora kaogalian. 39 Ag Panginoon ba magsabi sa konin amba, Koyo mga Parisiyo ba koyo nag-oyasan da lowas bao da- palato, ngani da koyo galem ba kapno:a gidte aken da- kadaetan. 40 Mga tolingag! Nawed ma da mamanawen ag nagkaakitan ba naba din da mamanawen ag poso iraya? 41 Koyo dapo erayen sa mga mahidap da laman sata sa koyo mga bao da- palato da- batay gidte malinis da boo para sa koyo. 42 Daet gidte sa koyo, mga Parisiyo! Panawen koyo magtaboy sa Diyos da ikasampo ka eray baranoy, mostasa da- Roma dapo ka mga golayen, ngani koyo:wa alingwanan da kataldengan da- palayaw sa Diyos. Naba da kailangan koyo panawenen ngani ayaw alingwanan panawenen din nata. 43 Daet gidte sa koyo mga Parisiyo, panawen da koyo alabet ba mga pili gidte ka tongkaan sa mga balay pagtiponan mga Diw da- galangen sa mga karimponan. 44 Daet gidte sa koyo! Panawen koyo ba makay lebengan nawed nagkaakitan, da- nawed nagkaamatangan mga iraya magkadangan sa kora ngaway. 45 Sinabi sa konin sai sa mga kamatangen sa Bilin amba, Tagatodo, sa komo sinabi naba ba yamen:na din da komo nagpolaan. 46 Sinabi laki Hisos amba, Daet gidte din sa koyo, mga kamatangen sa Bilin! Panawen koyo nagpababa sa mga iraya da mga mabyat babaen, ngani koyo kayno solo ngani ba dayo gidte koyo komapkap. 47 Daet gidte sa koyo! Panawen koyo maggawa lebengan para sa mga tagabarita ibat sa Diyos nagpamono koyo mga pangapoan. 48 Sa makay naba ba koyo:wa din magpaban-aw amba koyo ba makay din koyo mga pangapoan panawen kora nagpamono da mga tagabarita, da- koyo kay da aggawa kora lebengan. 49 Panawen saba, da Diyos sa konin kadonongan ba magsabi amba, Ako batay magsogo sa koyo mga tagabarita da- mga pinili sogoan. Da kalaati sa kora ba koyo batay binono, da- da Roma kay ba batay pinahidapan. Naba:a ngani. 50 Sa makay naba, batay romogpa sa mga kaapoan naba da padosa panawen sa kora magpamono sa mga tagabarita ibat sa Diyos ibat dapo sa rinarang da paranawan, 51 ibat sa daya laki Abil anggan sa daya laki Sakariyas, ag binono sa palteng-anan arengan mga hayop da- rado banal. Hee, naay nagsabi sa koyo amba, Batay gidte romogpa sa mga kaapoan naba da padosa panawen sa kora pinanawen. 52 Daet gidte sa koyo, mga kamatangen sa Bilin! Panawen koyo inalis da sosi kadonongan. Koyo dayo:a semled, koyo dapo naghadangan da mga alabet semled. 53 Maraw iya lomwas sata ba iya ba linabanan gidte mga Parisiyo da- mga kamatangen sa Bilin. Iya layen te nagtanong para iya magtokawanan sa mga nakayman. 54 Kora mag-abang sa konin para iya abel sa konin mga nagsabi.
1 Sa odas naba mamagrimponan da ribo-ribo ka iraya, kaya kora magpaylaedan. Laki Hisos ba mag-ompisa magtokawanan sa konin mga nagtod-an amba, Magdahan gidte koyo sa mga pampahilab mga Parisiyo, naba ba kora kapalawlawan. 2 Da boo nagkatago ba batay akitan, da- da boo nakayman nawed dapo amatangan ba batay amatangan boo da- apawaan. 3 Da nakayman koyo sabiyen sa madlem ba batay akarngeyan sa aldaw da- da nakayman koyo paskedanan sa sai ka poro wala iraya ba batay yinagyagang sa kaosonan gidte mga iraya. 4 Naay nagsabi sa koyo mga abyan, Ayaw koyo kalimanan da mga magpamono lawas da- kalbas ba wala:a tay apanawen nakayman. 5 Naay batay sinabi sa koyo no tawa da kailangan koyo kalimanan : da koyo kalimanan da- galangen ba pag kalbas gomaro biyag ba maki dapo kapangyadihan magrogno sa kapadosahan. Naay nagsabi sa koyo, da Diyos da kailangan gidte koyo kalimanan da- galangen. 6 Nawed ma nagbili da lima ka maya sa ibente te ka halaga? Amba man, kayno sai sa mga naba ba nawed nagpabayaan Diyos. 7 Kayno da obok sa koyo olo ba konin:na binilang boo. Kaya koyo ayaw aliman. Koyo labi dapo mahalaga sa maoson ka maya. 8 Naay nagsabi sa koyo amba, Da iya magkilala sa naay sa ropangan mga iraya ba iya batay din kinilala pag Onga Iraya sa ropangan mga anghil Diyos. 9 Ngani da iya nawed magkilala sa naay sa ropangan mga iraya ba nawed din batay kinilala pag Onga Iraya sa ropangan mga anghil Diyos. 10 Da iya magtokawanan laban sa Onga Iraya ba batay apatawad; ngani da magtongayaw laban sa Ispirito Banal ba nawed batay apatawad. 11 No koyo pinaanggat sa mga balay pagtiponan mga Diw e sa ropangan mga magpamahala da- mga maki kapangyadihan para koyo hosayen, ayaw koyo magtarongisngis no omaning koyo batay tembag para magpadamay sa koyo sadiri. 12 Panawen sa odas naba, da Ispirito Banal da batay magtodo sa koyo no nakay da bagay koyo sabiyen. 13 Magsabi sa laki Hisos sai sa mga kaosonan amba, Tagatodo, komo gidte sabiyen sa naay kakaan amba taboyon sa naay da naay eray sa yamen mana. 14 Tembag laki Hisos amba, Laki, tawa da pomalagay sa naay para tagahosay e tagaeray koyo mga mana? 15 Da- konin sinabi sa kora boo amba, Magdahan koyo! Ayaw gidte koyo angangaken, panawen da biyag iraya ba nawed sa maoson mga nag-apo. 16 Da- konin dapo sinabi tiya pag halimbawa: da agayen sai ka maoson nag-apo ba omani gidte maoson. 17 Kaya konin nagremrem amba, Omaning da naay tay pinanawen? Wala:a batay apalagyan mga naay ani. 18 Eh! Naay batay inorak naay mga banglin da- ako batay:yakay aglobo mga lalo dapo lakol. Sata naay batay pinalagay naay ani da- boo naay nag-apo. 19 Naay batay sinabi sa naay sadiri amba, Maoson:na ako nag-apo para sa maoson ka dag-on! Kaya magpahinga:a ako, da- mamangan da- minem, da- angasan ako! 20 Ngani sinabi Diyos sa konin amba, Kawo lenge! Sa madlem tiya ba batay naay ginaro komo gisarem. Tawa kaya da batay manginabang sa mga komo hinanda para sa komo sadiri? 21 Makay naba da batay mangyadi sa tawa man magpaoson mga nakayman para sa sadiri, ngani iya ba mahidap kay sa serey Diyos. 22 Maraw kalbas ba sinabi laki Hisos sa konin mga nagtod-an amba, Kaya naay gidte nagsabi sa koyo amba, Ayaw koyo magtarongisngis no nakay da koyo batay namangan para sa koyo biyag e no nakay da koyo batay sinool para sa koyo lawas. 23 Panawen da biyag ba labi gidte sa pamangnen, da- da lawas sa nagsool. 24 Koyo:wa ngani remremen da mga owak. Kora nawed mag-asik e mag-ani. Kora ba wala takasan kayno banglin ngani kora ba nagpakain din Diyos. Koyo labi dapo mahalaga sa mga ibon. 25 Tawa sa koyo da batay kapaaba koyo biyag kayno sai ngani te ka odas sa koyo magtarongisngis? 26 No nawed ngani- koyo apanawen da ibente ka nakayman naba ba kaytang koyo magtarongisngis para sa Roma ka nakayman? 27 Koyo:wa remremen no omaning sombok da mga dapo. Kora nawed agpamanawen e nawed magsansan man. Ngani tiya da naay batay sinabi sa koyo : Kayno laki Salomon ba maganda gidte da konin mga golanit ba iya nawed kasool kaganda mga botakan naba. 28 No da mga gamasen sa mga agayen, mona ba biyagan da- girabas ba nag-atong:nga sa apoy, ba nag-alagaan din Diyos, lalo dapo gayed koyo ba konin batay nagsoolan? Ibente:a gayed da koyo pag-isarig sa Diyos! 29 Kaya ayaw koyo magtarongisngis sa magsarak pag koyo batay namangan da- batay ininem. 30 Panawen da mga nakayman naba ba naba da alabet gidte magsarak mga nawed dapo kilala sa Diyos. Amatangan koyo Apang sa soksokowan amba koyo kailangan da boo naba. 31 Ngani koyo gidte albeten para maghadi sa koyo da Diyos, da- batay konin tinaboy da boo naba koyo kailangan. 32 Koyo ayaw aliman, naay toropa te, panawen alabet gidte koyo Apang da magparongaw sa koyo para koyo konin mga onga. 33 Koyo pabiliyen da koyo mga nag-apo da- da kabayadan ba koyo taboyon sa mga mahidapen! Koyo maggawa mga bokotan nawed nagkaloma, da- koyo magpaoson mga mahalaga gidte sata sa soksokowan nawed batay nasida, nawed din batay atakaw e namangan anay. 34 Panawen no saan da komo nag-apo ba sata din da komo poso. 35 Koyo handa gidte magpamanawen, da- par-etan da koyo mga solo-. 36 Koyo makay pag mga magpanya sa kora amboy-amboyan pag ibat sa sai ka kasalan para no iya rateng ba mangaham ngani ba agad koyo abokaan da takep sakbawan. 37 Angasan da mga tagoanggat aratnganan handa gidte no rateng da kora amboy-amboyan. Naay gidte nagsabi sa koyo amba, Iya batay maghanda magpamanawen, da- kora batay pinatongka para sorongan pamangnen. 38 Angasan kora no kora konin aratnganan handa, kayno tenga madlem iya rateng e daling-adaw. 39 Koyo gidte remremen. No amatangan ngani pag koyay sa sai ka balay no nakay ka odas batay rateng da batay manakaw ba iya batay gidte magmasid da- nawed konin batay pinabayaan semled sa konin balay. 40 Koyo kay din ba kailangan handa gidte panawen da Onga Iraya ba batay rateng sa odas nawed koyo nagremrem. 41 Laki Pidro ba magtanong amba, Panginoon, komo dia nagsabi da halimbawa naba para sa yamen ngani no para sa boo? 42 Tembag da Panginoon amba, Tawa nga da matepeden da- kamatangen ka katiwalaan? Nawed ma iya da bagay gidte mamahala sa boo mga tagapamanawen para magtaboy sa kora kora pamangnen sa aldaw-aldaw? 43 Angasan da tagoanggat naba no iya aratnganan konin amboy-amboyan magpamanawen makay naba. 44 Naay gidte nagsabi sa koyo amba, Iya ba batay ginawa tagapamahala konin amboy-amboyan sa boo konin nag-apo. 45 Ngani no nagsabi sa konin sadiri ag tagoanggat naba amba, Batay dapo maagot bayo batay rateng da naay amboy-amboyan, da- iya magpamogbog sa Roma ka tagoanggat lalaki da- babayi, da- mamangan da- minem da- magbarikan, 46 ba da amboy-amboyan pag katiwalaan naba ba batay rateng sa aldaw nawed konin nagremrem da- sa odas nawed konin amatangan. Mabyat gidte da padosa amboy-amboyan sa konin da- iya ba batay pinaanggat sa mga dayo gidte magtoltol sa Diyos. 47 Da- da katiwalaan, kayno amatangan da alabet konin amboy-amboyan ngani iya ba nawed kay maghanda da- nawed tomoltol sa konin alabet ba batay tomabang mabyat ka padosa. 48 Ngani da tagoanggat nawed konin amatangan da alabet konin amboy-amboyan ngani mamanawen mga nakayman kailangan iya padosahan ba batay tomabang may-an ka padosa. Da pinakan maoson ka nakayman ba batay inay-ayan maoson ka nakayman, da- da inintirigahan maoson ka nakayman ba batay inasahan lalo maoson ka nakayman. 49 Ako ba paraoy towa para magbenglay apoy sa paranawan-da- no disin mag-igang:nga naba. 50 Maki dapo sai ka baotismo kailangan naay tabangen, da- mahidap gidte sa naay remrem anggan nawed nangyadi naba! 51 Koyo dia nagremrem amba ako towa paraoy para magbaba kaginhawahan towa sa lopa? Naay nagsabi sa koyo amba, Lain kaginhawahan no nawed ba pagkaeray-eray. 52 Ibat mona ba batay naeray da lima sa sai ka balay, tatlo ba laban sa darwa da- darwa ba laban sa tatlo. 53 Kora batay naeray, da apang ba laban sa onga lalaki, da onga lalaki kay ba laban sa apang; da adang ba laban sa onga babayi, da onga babayi kay ba laban sa adang; da bianan babayi ba laban sa manogang babayi, da manogang babayi kay ba laban sa bianan babayi. 54 Sinabi dapo laki Hisos sa mga kaosonan amba, No koyo akitan madelem da kalnedan ba koyo magsabi amba batay omodan da- omodan ngani-. 55 Da- no Romamoymoy da koaya kobkobo ba koyo nagsabi amba batay maibeng, da- maibeng ngani-. 56 Koyo mga mapalawlaw! Koyo amatangan da alabet sabiyen mga tandaanan sa lopa da- sa kalaw-awan. Kaytang nawed koyo amatangan da alabet sabiyen mga odas tiya? 57 Kaytang koyo nawed kahosay sa koyo sadiri no nakay da mataldeng? 58 No halimbawa kawo hinabla sa hosayan ba kailangan sa dalan dapo ba komo:wa sikapen kasai:ya sa konin. No nawed ba kaaram kawo ginaladgad sa hosayan da- kawo ba tinaboy:yakay sa polis da- kawo piniriso ag polis naba. 59 Naay nagsabi sa komo amba, Kawo nawed tay kalwas anggan nawed komo nagkaabayadan gidte boo.
1 Ag odas din naba ba maki rateng mga iraya binarita sa laki Hisos amba pinabono koyay Pilato da kalaati mga taga Galiliya sa odas kora magtaboy mga taboy hayop sa Diyos. 2 Konin sinabi sa kora amba, Da koyo dia remrem ba amba kora ba labi gidte makadaetan sa Roma ka taga Galiliya panawen sa makay naba da nangyadi sa kora? 3 Nawed gidte amba! Ngani naay nagsabi sa koyo amba, No koyo nawed magsisi da- mag-ogon koyo mga kadaetan ba koyo boo ba batay nangatay makay din kora. 4 Da- da labinwalo ka iraya nangatay maraw aregnasan da atatas gidte ka balay sa Siloi ba da koyo dia remrem ba amba kora ba labi gidte makadaetan sa Roma magpamatawan sa Hirosalim? 5 Nawed gidte amba! Ngani naay nagsabi sa koyo amba, No koyo nawed magsisi da- mag-ogon koyo mga kadaetan ba koyo boo ba batay din nangatay makay din kora. 6 Sinabi laki Hisos sa kora da halimbawa tiya : Maki sai ka iraya maki sai ka poon bayabas sa konin alamanan. Konin pinaoyan no maki bokar ngani iya wala gidte akitan kayno sai. 7 Kaya konin sinabi sa tagaalaga alamanan amba, Tatlo:wa ka dag-on ako layen magparaoy towa da- ako magsarak bokar sa poon naba ba wala ako akitan bokar. Komo:wa potlon! Mag-aliget ngani sa Roma ka alaman! 8 Ngani tembag ag tagaalaga alamanan amba, Ayaw dapo kay kita pagpotlon sa dag-on tiya. Naay dapo batay pinataba da lopa. 9 No tiya ba mamokar sa dag-on batay rateng ba piya. Ngani no nawed ba kita:a potlon! 10 Sai ka Aldaw Magpahinga, laki Hisos ba magtodo sa sai ka balay pagtiponan mga Diw. 11 Maki sai ka babayi sata labinwalo:wa ka dag-on maki kadamdaman panawen sa sai ka daet ka ispirito ba sa konin. Kaya iya ba bakoong:nga gidte da- nawed:da kaenat. 12 Maraw akitan laki Hisos da babayi ba konin pinatwagan amba, Inay, kawo ba bal-an:nani sa komo kadamdaman! 13 Da- pinatimpo laki Hisos da konin darwa ka alima sa babayi. Ag odas din naba ba kaenat da babayi da- magpodi sa Diyos. 14 Ngani abaisan ag magpamahala sa balay pagtiponan mga Diw panawen laki Hisos ba magpapiya sa Aldaw Magpahinga. Kaya konin sinabi sa mga iraya amba, Maki anim ka aldaw para sa magpamanawen. Koyo towa paraoy sa mga aldaw naba para magpapiya, da- ayaw sa Aldaw Magpahinga. 15 Da Panginoon ba tembag sa konin amba, Koyo mga mapalawlaw! Nawed ma koyo nag-okad sa panabsaban da koyo anwang e kambing da- nag-alyan sa paineman kayno Aldaw Magpahinga? 16 Da babayi naba ag sai sa kaapoan laki Abraham ba ingketan laki Satanas labinwalo:wa ka dag-on. Nawed ma bagay iya bal-anan kayno sa Aldaw Magpahinga? 17 Akayaan da boo kalaban laki Hisos sa konin tebag naba. Da- angasan kay da boo kaosonan sa boo mga kaangas-angas konin pinanawen. 18 Sinabi dapo laki Hisos amba, Sa nakay naay batay pinatolad da maghadi da Diyos? Sa nakay naay batay pinagaya naba? 19 Naba ba makay sai ka atey mostasa ginaro sai ka iraya da- tinanem sa konin alamanan. Naba ba tombo anggan sai:ya ka poon kayo da- namogadan:na mga ibon sa mga sanga naba. 20 Sinabi dapo laki Hisos amba, Sa nakay naay batay pinatolad da maghadi da Diyos? 21 Naba ba makay pampahilab liniogan sai ka babayi sa tatlo lakol ka sarok ginalpong anggan da boo mga amig ba homilab. 22 Toloy:ya magkadangan laki Hisos. Iya magtodo sa tayma goraan da- goraan te konin nagdalanan magparaoy sa Hirosalim. 23 Maki sai ka iraya magtanong sa konin amba, Panginoon, nawed te dia maoson da batay naribri? Konin sinabi amba, 24 Koyo saraken koyo kasled sa aliget te ka sakbawan. Naay nagsabi sa koyo amba, Maoson da batay magporba semled ngani nawed:da batay kasled. 25 No patindeg:gani da koyay sai ka balay da- linangkeb:bani da sakbawan da- koyo kay ba sa lowas ngani magpangaham-magpangaham, ba koyo batay sinabi amba, Panginoon, yamen kay komo pasleden. Koyo konin batay timbag amba, Nawed naay amatangan no taga saan koyo! 26 Da- koyo batay sinabi, Yamen mamangan da- minem komo kasaro, da- kawo magtodo din sa yamen bosngawan. 27 Batay kay sinabi Panginoon, Nawed gidte naay amatangan no taga saan koyo! Koyo paadayo sa naay, koyo boo mga magpamanawen daet. 28 Koyo batay magpakongkong da- batay mangoriet da koyo ngipen panawen sa koyo karongkotan no koyo akitan sa kahadian:na Diyos kora Abraham, da- Isaak, da- Hakob, anggan da boo mga tagabarita ibat sa Diyos, da- koyo kay ba sinikway:ya sa lowas! 29 Batay mandarosog da mga iraya ibat sa sirangan da- kalnedan, da- sa Roma-Roma dapo ka poro, da- batay manakang sa kahadian Diyos. 30 Maki gidte nga mga monaan batay paoriyan:nakay da- maki kay mga paoriyan batay monaan:nakay. 31 Sa odas naba ba rateng da kalaati Parisiyo, da- sinabi sa laki Hisos amba, Kawo omalis:sa towa panawen kawo alabet pabonoon koyay Hirodis! 32 Iya tembag amba, Koyo sabiyen sa aninida naba amba, ako magboyaw mona mga daet ka ispirito, da- magpapiya, girabas ba amba din. Sa makatlo ka aldaw ba naay batay yinadi da naay panawenen. 33 Ngani kailangan toloy:yani ako magkadangan mona, da- girabas da- kalawey girabas, panawen nawed abaya natay da sai ka tagabarita ibat sa Diyos sa lowas Hirosalim! 34 Koyo mga taga Hirosalim, Hee, koyo mga taga Hirosalim! Koyo nagpamono da mga tagabarita ibat sa Diyos da- nagpamato da naay mga pinaparaoy sa koyo! Layen te:a ngani- naay nagsarak koyo ba naay nagrimpon, makay pag maglemlem sai ka inaynin sa konin mga sisiw, ngani koyo kay ba dayo. 35 Kaya koyo goraan ba batay gidte pinabayaan. Naay nagsabi sa koyo amba, Nawed:da batay ako koyo akitan anggan sa rateng da odas koyo batay sinabi amba, Podiyen ngani- da towa paraoy sa ngaran Panginoon!
1 Sai ka Aldaw Magpahinga, laki Hisos ba nagpaparaoy sa balay sai ka poon mga Parisiyo para mamangan. Iya ba nag-arongan gidte mga Parisiyo. 2 Pabali sa laki Hisos da sai ka iraya manasen. 3 Kaya konin tinanong da mga Parisiyo da- da mga madonong sa Bilin tinaboy sa laki Moysis amba, Toltol dia sa Bilin da magpapiya sa Aldaw Magpahinga e nawed? 4 Ngani nawed kora timbag. Kaya konin ginenan da maki maskit, pinapiya da- pinaidaw. 5 Maraw kalbas ba konin sinabi sa kora amba, No koyo onga lalaki kayno koyo baka ba nalabo sa balawo, nawed ma koyo batay ginaro kayno Aldaw Magpahinga? 6 Da- kora ba nawed gidte katebag sa makay naba ka tanong. 7 Akitan laki Hisos da nagpili mga pinaparaoy ba da mga tongkaan hinanda sa mga iraya kailangan galangen. Kaya konin sinabi da halimbawa tiya : 8 No kawo pinaparaoy sa sai ka kasalan, ayaw komo pagpilien da tongkaan hinanda sa mga iraya kailangan galangen. Kaaram maki pinaparaoy towa lalo dapo kailangan galangen sa komo, 9 da- batay pabali da pomaparaoy sa kandawa da- konin batay sinabi sa komo amba, Abaya dia komo taboyon da tongkaan naba sa iraya tiya? Sa makay naba kawo batay akayaan da- sata:akay batay tomongka sa saleg. 10 Da piya ba no kawo pinaparaoy sata ba kawo tomongka kayno sata sa saleg, panawen no pabali da pomaparaoy sa komo ba konin batay sinabi amba, Abyan, apora kawo da- kawo tomongka sa piya gidte ka tongkaan. Sa makay naba ba kawo ba apakanan gidte lakol ka kalakolan sa ropangan mga kasaro. 11 Panawen da magpakaatatas ba batay pinaababa, da- da magpakaababa ba batay pinaatatas. 12 Sinabi kay laki Hisos sa pomaparaoy sa konin amba, No kawo batay maghanda para sa pan-agaan da- sa tal-aponan ba ayaw komo pagpaparaoyon da komo mga abyan, kayno mga arian, kayno mga kaseledan, kayno mga katingyaw balay maki karon-an, panawen kawo ba kora din batay pinaparaoy, da- sa makay naba ba kawo ba nataboyan:nani bayad. 13 Kaya no kawo ba batay maghanda lakol ka sarowanan, da komo paparaoyon ba mga mahidapen, mga tekya, mga ketet, da- mga raprap. 14 Kora nawed batay kabayad sa komo da- sa makay naba ba kawo batay gidte angasan da- batay gidte binayadan Diyos sa odas konin:nakay batay biniyag konin mga onga. 15 Naba ba akarngeyan pag sai sa mga konin kasaro, da- konin sinabi sa laki Hisos amba, Angasan gidte da batay kasaro sa sarowanan sa kahadian Diyos. 16 Laki Hisos ba tembag amba, Da sai ka lalaki ba maki handa sai ka lakol ka sarowanan, da- maoson da konin pinaparaoy. 17 Maraw rateng:ngani da odas sarowanan ba konin pinaidaw da konin tagoanggat da- konin pinasabi sa mga pinaparaoy amba, Apora:a koyo, handa:ani da boo! 18 Ngani kora tanan ba maki mga diklamo. Da sabi pag monaan ba amba, Ako kabili agayen kaya kailangan naay paraoyan. Koyo:wa te kay da bahala. 19 Da sabi kay pag sai ba amba, Ako ba kabili lima ka malkatoga baka da- naay alabet porbahan sa ag-adado da mga naba. Koyo:wa disin da bahala sa naay. 20 Sinabi kay ag sai dapo, Ako ba bayo kasal kaya ngani- nawed ako kaparaoy. 21 Paoli:akay da tagoanggat da- sinabi sa konin amboy-amboyan da kora diklamo. Abaisan da amboy-amboyan da- sinabi sa tagoanggat amba, Kawo agad lomwas sa mga lakol da- sa mga ibente ka dalan goraan, da- komo paanggaten towa da mga mahidapen, balikid, raprap da- tekya. 22 Maraw paoli da tagoanggat ba konin sinabi amba, Koyay, naay:ya napanawen da boo komo sinogo sa naay, ngani lowag dapo kay. 23 Kaya sinabi pag amboy-amboyan sa tagoanggat, Kawo lomwas sa mga danay-danayan da- sa mga taneman, da- komo gidte lopodon da mga iraya, para nakapno da naay balay. 24 Naay nagsabi sa koyo, Kayno sai sa mga monaan pinaparaoy ba nawed tay katimos sa naay handa. 25 Anggat sa laki Hisos da maoson gidte ka iraya. Iya ba paloba sa kora da- konin sinabi amba, 26 Da iya omanggat sa naay da- omalbet sa konin apang, kayno adang, kayno sawa, kayno mga onga da- mga arian, anggan sa konin sadiri labi sa naay, ba nawed abaya iya naay nagtod-an. 27 Da iya nawed magpas-an konin sadiri kodos da- tomoltol sa naay ba nawed batay abaya naay nagtod-an. 28 No da tawa man sa koyo ba alabet maggawa atatas lakol ka balay, nawed ma iya batay dapo tomongka da- batay dapo magremrem no iya maki sibay ka kwarta batay kapayadi naba. 29 Kaaram nalobo:a da arigi ngani nawed kay ayadi ba iya batay pinolaan boo mga magserey sa konin. 30 Kora batay sinabi, Man-aw ag iraya naba! Iya ba mag-ompisa manlobo ngani nawed kay ayadi. 31 Amba din, tawa pag hadi alabet maglaban sa Roma ka hadi da nawed tay tomongka da- magremrem no batay akayanan labanan pag sampo ka ribo konin sondalo da darwampo ka ribo sondalo konin kalaban? 32 No nawed kora akayanan ba pag adayo dapo da kalaban ba iya batay:ya magpaidaw sogoan para kora ba maki kasaiyan. 33 Amba kay din, nawed tay abaya naay nagtod-an da tawa man, no nawed iya magdayo sa boo sa konin. 34 Piya da asin, ngani no naba ba awal-an lasa, naba ba nawed:da batay apaalat:takay. 35 Naba ba nawed:da abaya gamiten kayno sa lopa, kayno sa daplekan mga domi. Kaya naba ba nagbenglay:ya sa lowas. Makarngey da maki pakarngey.
1 Da mga magpaningir bohis da- da Roma ka makadaetan ba mamagpabali sa laki Hisos para makarngey sa konin. 2 Mamag-paskedanan da mga Parisiyo da- da mga kamatangen sa Bilin amba, Da iraya naba ba magtabang mga makadaetan da- magpasaro sa kora. 3 Kaya sinabi sa kora laki Hisos da halimbawa tiya : 4 No da tawa man sa koyo ba maki sai ka daan ka topa da- nalingo da sai ba omaning da konin batay pinanawen? Nawed ma batay konin inogonan da siyamnapo da- siyam sa kagamasenan da- batay sinarak da nagkalingo anggan konin:nakay akitan? 5 No konin:nakay akitan ba iya angasan gidte batay konin binakwag naba. 6 No rateng sa balay ba konin batay pinaparaoy da konin mga abyan da- mga katingyaw balay. Konin batay sinabi amba, Kailangan tamo nangaangasan gidte panawen naay:yakay akitan da naay topa nalingo! Naba:a ngani. 7 Naay nagsabi sa koyo amba, Labi dapo gidte da kaangasan sa soksokowan panawen da sai ka makadaetan ba magsisi da- mag-ogon konin kadaetan, sa kaangasan kay para sa siyamnapo da- siyam ka iraya mataldeng ag nawed kailangan magsisi da- mag-ogon kora kadaetan. 8 Sinabi laki Hisos da sai:yakay ka halimbawa. No da sai kay ka babayi ba maki sampo ka kwarta pilak da- nalingo da sai ba nakay da konin batay pinanawen? Nawed ma konin batay pinar-etan da solo-, da- konin batay lininisan da balay para saraken piya anggan nawed konin akitan. 9 No konin:nakay akitan naba ba konin batay pinaparaoy da konin mga abyan da- konin mga katingyaw balay. Da- konin batay sinabi sa kora amba, Kailangan tamo nangaangasan gidte panawen naay:yakay akitan da naay nalingo kwarta pilak! 10 Naay nagsabi sa koyo amba, Amba din da kaangasan mga anghil Diyos panawen da sai ka makadaetan ba magsisi da- mag-ogon konin kadaetan. 11 Sinabi dapo laki Hisos amba, Da sai ka iraya ba maki darwa ka onga lalaki. 12 Sinabi pag bongsoan sa konin apang amba, Apang, taboyon:na te kay sa naay da naay kay eray kidawa mana. Kaya konin ineray sata sa darwa da konin mga nag-apo. 13 Nawed te kalawey maoson ka aldaw, konin:na pinabili da boo sa konin da- konin inipon da kabayadan da- paraoy sa adayo ka poro. Konin:na sata inagsaya da boo sa nawed piya ka panawenen. 14 Maraw konin:na naobos da boo ba nagkamaki lakol ka tagbayog sa poro naba da- wala:a pamangnen. 15 Kaya iya magpaopa sa sai ka magpamataw sa poro naba. Konin pinaidaw sa konin mga paligawan para pakainen da mga baboy. 16 Konin disin alabet ba iya ba absoyan ag pamangnen nagpakain sa mga baboy ngani kayno iya nagbayog gidte ba wala magtaboy pamangnen sa konin. 17 Maraw konin aremreman ba konin sinabi sa konin sadiri amba, Da mga tagapamanawen naay apang ba maoson da kora pamangnen. Ako kay ba nawed ngani nagkalma bayog towa! 18 Ako batay:yakay paoli sa naay apang da- naay batay sinabi sa konin amba, Apang, ako maki gidte kadaetan laban sa Diyos da- sa komo. 19 Ako ba nawed:da abaya awiten komo onga. Ako ba komo:wa ngani bilangen kaanggat mga komo tagapamanawen. 20 Maraw kalbas ba iya mangadang magparaoy sa konin apang. Iya adayo dapo ba apatpaan:nani konin apang da- iya ba ayawtean gidte sa konin, kaya iya magdalaganan para salobongon, dinep-an da- nangamo. 21 Sinabi pag onga amba, Apang, ako maki gidte kadaetan laban sa Diyos da- sa komo. Ako nawed:da abaya awiten komo onga. 22 Ngani pinatwagan apang da konin mga tagapamanawen amba, Apora:ani! Koyo babaen towa da piya ka golanit da- pasoolon sa konin. Iya ba pasoolan singsing da- panlaed. 23 Gawen da nagpataba bol-o baka da- bonoon. Tamo mamangan da- asayahan gidte! 24 Panawen makay natay:yani da naay onga tiya, ngani abiyagan:ngakay; iya nawala:ani ngani akitan:nakay. Da- kora ba asayahan gidte. 25 Ag panganay kay ba sa parayan. Iya mag-oli da- maraw bali:ya sa balay ba konin akarngeyan da mga igwayanan da- maglabawanan. 26 Konin pinatwagan da sai sa mga tagapamanawen da- tinanong amba, Nakay da magpangyadi sa tamo? 27 Tembag da tagapamanawen amba, Rateng:ngakay da komo arian. Pinabono komo apang da nagpataba bol-o baka, panawen iya ba bait:tani da- biyagan dapo da- iya wala din sakit. 28 Abaisan pag panganay da- iya ba dayo semled sa balay. Kaya lomwas da konin apang da- magtokawanan sa konin. 29 Ngani sinabi ag panganay amba, Kawo magpakarngey! Maoson:na ka dag-on ako magpamanawen para sa komo da- nawed gidte naay sinway da komo mga bilin. Ngani kayno kasai ba nawed man ako pinakan sai ka kayno kambing te para yamen mga tal-abyan ba maki gidte kaangasan. 30 Ngani maraw rateng naba pag komo onga naba pag omobos komo mga nag-apo sa mga talandi ka babayi, komo dapo binonoan nagpataba bol-o baka. 31 Tembag da apang amba, Soan, kita layen te pal-anggat. Da boo naay nag-apo ba sa komo. 32 Ngani tamo ba kailangan asyagan gidte panawen makay natay:ya da komo arian ngani abiyagan:nakay. Iya nawala:ani ngani akitan:nakay.
1 Sinabi din laki Hisos sa konin mga nagtod-an amba, Sai ka maoson nag-apo ba maki sai ka katiwalaan sinombong sa konin amba, Naggamit komo katiwalaan sa wala kaparosan da komo mga nag-apo. 2 Kaya konin pinatwagan da- tinanong amba, Kayo ma tiya ag naay nagkaakarngeyan para sa komo? Komo paban-awen sa naay no nakay da komo pinanawen panawen ibat mona ba nawed:da abaya kawo naay katiwalaan dapo. 3 Rinemrem pag katiwalaan amba, Omaning kaya da naay batay pinanawen? Batay inalis naay amboy-amboyan da naay katongkolan. Omaning nga da naay batay pinanawen? Nawed naay akayanan da mabyat ka panawenen. Nagkaakayaan kay ako magpangay-ay. 4 Eh! Naay:ya amatangan da naay batay pinanawen para kayno ako ba naalis sa naay katongkolan ba maki dapo din batay tomabang sa naay sa kora balay. 5 Kaya sai-sai konin pinatwagan da mga maki pad otang sa konin amboy-amboyan. Konin tinanong da sai amba, Kaomaning kaoson da komo otang sa naay amboy-amboyan? 6 Iya tembag amba, Sai ka daan kantonir langis. Amba da katiwalaan, Tiya da kasoratan komo otang. Apora:ani, kawo tomongka da- da komo soraten ba limampo. 7 Konin kay tinanong da sai amba, Kawo, kaomaning kaoson da komo otang? Tembag kay iya amba, Sai ka daan ka kaban paray. Iya amba, Tiya da kasoratan komo otang. Da komo soraten ba walompo:a ngani. 8 Pinodi amboy-amboyan da andadaya ka katiwalaan panawen sa konin pinanawen makay iya ba maki gidte kaamatangan. Panawen ag mga makaparanawan ba piya gidte kagawa padaan sa mga makaDiyos. 9 Naay nga sinabi sa koyo amba, Koyo gamiten da mga karon-an paranawan para koyo maki gidte mga abyan, para no naobos:sani da mga naba ba koyo kay batay tinabang sa mga pamatawan wala arasan. 10 Da iya akatiwalaan sa ibente ka nakayman ba akatiwalaan din sa mga lakol ka nakayman; da iya kay mandaya sa ibente ka nakayman ba mandaya din sa lakol ka nakayman. 11 No koyo nawed akatiwalaan sa mga karon-an paranawan tiya ba tawa da batay magtiwala sa koyo pag mga karon-an gidte? 12 Da- no nawed koyo akatiwalaan karon-an Roma ba tawa da batay magtaboy pag para gidte sa koyo? 13 Wala tagapamanawen batay kapamanawen sabay sa darwa ka amboy-amboyan. Panawen konin batay namaisan da sai da- da sai kay ba batay pinalayaw; iya batay gidte matepeden sa sai da- da sai kay ba batay pinolaan. Nawed abaya tanan koyo magpamanawen sa Diyos da- sa kwarta. 14 Akarngeyan naba ag mga Parisiyo, kaya laki Hisos ba kora linibak panawen kora ba makay magpanraying gidte sa kwarta. 15 Kaya konin sinabi sa kora amba, Koyo ba magpasoli sa ropangan mga iraya amba koyo mataldeng, ngani amatangan Diyos da koyo pad poso. Panawen da nagremrem mga iraya amba mahalaga gidte ba kapangemres sa ban-aw Diyos. 16 Da Bilin tinaboy sa laki Moysis da- da sinorat mga tagabarita ibat sa Diyos ba maki gidte kaparosan anggan sa laki Howan Tagabaotismo. Da- mona kay ba da Pirmida ka Barita para sa batay:ya maghadi da Diyos da nagpangadar da- tayma sai ba maeyat gidte magsikway para iya ba hadian Diyos. 17 Ngani may-an dapo nawala da langit da- da lopa sa naalis kay da ibente te sa eray Bilin. 18 Da lalaki magpasway sa konin sawa da- mangisawa:akay sa Roma ba magpangalonya, da- da mangisawa sa babayi sinway ba magpangalonya din. 19 Maki sai ka maoson nag-apo, mahal da- maganda gidte ka golanit da konin nagsool, da- masadap da- maoson gidte da konin pamangnen aldaw-aldaw. 20 Da- maki kay sai ka mahidapen da ngaran ba Lasaro, tatap panyakit da lawas. Iya ba magkalek sa lowas sakbawan pag maoson nag-apo 21 da- iya alabet gidte mamangan kayno pag mga moyang nagpangalabo ibat sa pamangnan pag maoson nag-apo. Da- iya ba nagpabaliyan mga aso da- nagpangilaan da konin mga golat. 22 Natay da mahidapen da- iya binaba mga anghil sa tebteb koyay Abraham. Natay din da maoson nag-apo da- iya ba limbeng da- binaba sa pagpanyaan mga nangatay. Sata iya maghidap gidte. 23 Sa konin lakol ka kahidapan sata ba maningara da monaan maoson nag-apo da- konin apatpaan sa adayo laki Lasaro kaanggat koyay Abraham. 24 Da- iya mamatwag amba, Apang Abraham, kawo ayawtean kay sa naay. Komo sogoon laki Lasaro para dedeen sa sapa da kon solo para padimlaen da naay dila, panawen ako maghidap:pa gidte sa apoy tiya. 25 Ngani sinabi sa konin koyay Abraham amba, Onga, komo remremen pag kawo ba biyagan dapo sa lopa ba da boo komo alabet ba sa komo:wani, da- laki Lasaro kay ba mag-agwanta kahidapan. Ngani mona kay ba laki Lasaro ba nagpaangas towa da- kawo kay ba maghidap. 26 Labi sa boo ba pinalagay sa tamo palteng-anan da sai ka lakol da- alalem gidte ka kalaleman para da mga towa ba nawed kaparaoy saba da- da mga saba kay ba nawed kaparaoy towa. 27 Da- sinabi pag monaan maoson nag-apo amba, Apang Abraham, naay nag-ateet sa komo laki Lasaro ba komo paparaoyon sa balay naay apang, 28 panawen ako ba maki lima ka arian lalaki. Iya komo nga paparaoyon sata para kora ba sabiyan para ayaw:wa kora napaparaoy towa sa poro pahidapan tiya. 29 Ngani tembag koyay Abraham sa konin amba, Sa kora:a da mga sorat laki Moysis da- mga tagabarita ibat sa Diyos; bahala:a kora magpakarngey sa mga naba. 30 Ngani sinabi ag monaan maoson nag-apo amba, Nawed sibay da mga naba, ngani no paraoy sa kora da sai ka natay:yani da- nabiyag:gakay ba kora batay magsisi da- mag-gon kora mga kadaetan. 31 Sinabi koyay Abraham sa konin amba, No kora dayo pakarngey sa mga sorat laki Moysis da- mga tagabarita ibat sa Diyos ba nawed din kora batay maniwala kayno da sai ka natay:yani ba nabiyag:gakay.
1 Sinabi laki Hisos sa konin mga nagtod-an amba, Nawed gidte tay nawala da mga batay kadegse sa kadaetan. Ngani daet gidte sa iraya batay inibatan naba! 2 Piya dapo sa konin iya ba takinan bayowan bato sa leey da- benglayen sa dagat, sa iya kay batay inibatan daet sa sai ka ibente tiya. 3 Kaya koyo ba magdahan! No maki kadaetan da komo arian ba komo sabiyan, da- no iya ba magsisi da- mag-ogon konin kadaetan ba komo patawaden. 4 No iya kapito magkadaet sa komo sa boo aldaw, da- iya magsisi da- mag-ogon konin kadaetan ba komo kay patawaden. 5 Sinabi pag mga pinili sogoan sa Panginoon amba, Komo kay dagdagan da yamen pag-isarig sa Diyos! 6 Tembag da Panginoon amba, No koyo maki pag-isarig kakol beter mostasa ba batay koyo asabi sa poon naba amba, Kawo nayabot, da- natanem sa dagat! da- naba ba batay tomoltol sa koyo sabi. 7 Halimbawa, no sai ka amboy-amboyan ba maki tagapamanawen mag-adado e mag-alaga mga topa ba no batang sa agayen da tagapamanawen ba batay dia sinabi sa konin ag amboy-amboyan amba, Apora kawo para kawo kapamangan:nani? 8 Nawed! No nawed ba makay tiya da konin batay sinabi : komo handaen da naay tal-aponan, komo loswen da komo bado da- magsool:lakay sai, da- kawo magpamanawen para sa naay sa odas ako magkain da- mag-inem. No ako kalbas:sani ba bayo kawo mamangan da- minem. 9 Nagpasalamatan dia da tagapamanawen panawen sa konin pinanawen da boo sinogo sa konin? Nawed! 10 Makay din koyo. No koyo:wa napanawen da boo mga nagsogo sa koyo ba koyo sabiyen amba, Yamen ba mga tagapamanawen wala dahilan para podiyen. Yamen ngani pinanawen da yamen katongkolan. 11 Maraw laki Hisos ba magkadangan magparaoy sa Hirosalim ba iya domalan sa palteng-anan Galiliya da- Samariya. 12 Maraw magseled:da sa sai ka goraan te ba iya ba dinarosog sampo ka panyakiten. Kora ba mamagpatindeg sa badya adayo 13 da- mamatwag amba, Hisos! Amay! Kawo kay ayawtean sa yamen! 14 Maraw kora ba akitan ba sinabi laki Hisos amba, Koyo mangadang da- paban-aw sa mga tagapamanawen sa balay Diyos. Da- sa kora magkadangan ba kora ba pomiya:ani. 15 Maraw amatangan sai sa kora iya ba pomiya:ani ba paoli iya magpodi sa Diyos sa maeyat ka tokawanan. 16 Iya ba maglohod sa ropangan laki Hisos da- magpasalamat. Da iraya naba ba taga Samariya. 17 Tinanong laki Hisos amba, Nawed ma sampo da naay pinapiya? Saan:na da siyam? 18 Wala:a mana paoli da- magpodi sa Diyos no nawed ba ag salyo tiya? 19 Da- sinabi laki Hisos sa konin amba, Kawo patindeg da- mangadang:ngani. Kawo pinapiya komo pag-isarig sa naay. 20 Maraw ina ba laki Hisos ba tinanong mga Parisiyo no nakay pag odas batay maghadi da Diyos. Laki Hisos ba tembag amba, Da batay maghadi da Diyos ba batay rateng nawed nagkaakitan, 21 e nawed din batay asabi mga iraya amba, Towa:ani, e Saba:a te, panawen maghadi:ani sa koyo da Diyos. 22 Da- konin sinabi sa mga nagtod-an amba, Batay rateng da odas koyo alabet gidte koyo adanasan kayno sai sa mga aldaw Onga Iraya, ngani nawed tay koyo adanasan. 23 Da- maki batay magsabi amba, Sata:ani iya! e, Towa:ani! Ayaw:wa koyo agparaoy da- ayaw din toltolon. 24 Panawen da Onga Iraya sa odas iya batay rateng ba makay koldap agad Romawa da- pomawa da boo langit. 25 Ngani kailangan dapo iya ba magdanas maoson ka kahidapan da- batay sinikway mga iraya nagkabiyag sa odas tiya. 26 Da batay mangyadi sa odas batay:yakay towa da Onga Iraya ba makay din ag nangyadi sa mga iraya pag biyagan koyay Noyi. 27 Sa odas naba da mga iraya ba mamagkain, mamag-inem da- magpal-isawa anggan sa aldaw kora Noyi ba semled:dani sa dawong lakol. Rateng da oyaw da- kora boo ba nangaspo. 28 Amba din, sa odas laki Lot ba biyagan ba da mga iraya ba mamagkain da- mamag-inem, mamagpamili da- magpabili, mamagtanem, da- mamagpanlobo balay. 29 Ngani maraw aldaw laki Lot ba omalis:sa sa goraan Sodoma ba Romagragan da apoy da- asopri da- kora boo ba nangaspo. 30 Amba din sa aldaw da Onga Iraya ba batay rateng da- batay agpaban-aw konin kapangyadihan. 31 Sa aldaw naba ba da sa awakan ba ayaw:wa lompot para gawen da konin mga nag-apo sa galem balay. Da sa agayen ba ayaw:wa moli. 32 Koyo remremen da nangyadi sa sawa laki Lot. 33 Da iya magsarak naribri da konin biyag ba batay atoawan naba. Ngani da iya atoawan konin biyag ba iya da batay gidte magribri naba. 34 Naay nagsabi sa koyo, Sa madlem naba ba no maki darwa ka iraya magkalek sa sai ka kalkanan ba da sai ba batay ginaro da- da sai kay ba batay inogonan. 35 Maki kay darwa ka babayi magpal-anggat agbayo; batay ginaro da sai da- da sai kay ba batay inogonan. 36 Maki kay darwa ka lalaki magpamanawen sa agayen. Da sai ba batay ginaro da- da sai kay ba batay inogonan. 37 Da konin mga nagtod-an ba magtanong amba, Saan batay naba, Panginoon? Iya tembag amba, No saan dako da mga bangkay ba sata din mamagrimpon da mga sambangan.
1 Laki Hisos ba magpanoltol sai ka halimbawa para tod-on sa kora amba kailangan magdarangin boo odas da- ayaw atorayan. 2 Konin sinabi amba, Sa sai ka goraan ba maki sai ka hoyis nawed nagkaaliman sa Diyos da- wala iraya konin naggalang. 3 Sa goraan din naba ba maki sai ka babayi balo layen te magrokoy sata sa hoyis da- mag-ay-ay amba, Ako kay ba komo tolongan sa naay kalaban. 4 Maagot-agot te din ba dayo mag-asikaso sa konin pag hoyis. Ngani maraw maagot-agot:tani ba konin rinemrem amba, Kayno ako nawed nagkaaliman sa Diyos da- nawed maggalang sa tawa man ba 5 iya ba naay:ya batay tinolongan sa konin kalaban panawen sa iya ba layen:na te magrokoy sa naay ba kaaram ako ba manerek sa konin. 6 Da- sinabi Panginoon amba, Koyo akarngeyan da sinabi pag daet ka hoyis. 7 Nawed ma batay pinakan kataldengan Diyos da konin mga hinidang ag mag-aringi sa konin aldaw da- madlem, kayno badya maagot:tani? 8 Naay nagsabi sa koyo, Hee, no rateng:nga da odas ba agad iya batay magtaboy kataldengan sa kora. Ngani no batay rateng da Onga Iraya towa sa paranawan tiya, iya dia maki batay akitan mga iraya mag-isarig sa konin? 9 Sinabi din laki Hisos da sai ka halimbawa sa mga iraya kora nagremrem amba kora ba mataldeng da- nagwala kay koyinta da Roma. 10 Maki darwa ka lalaki tomokad sa lakol ka balay Diyos para magdarangin. Da sai ba Parisiyo da- da sai kay ba magpaningir bohis. 11 Da Parisiyo ba magpatograwan da- magdarangin agkaborboran. Makay tiya da konin darangin : Eh! Diyos, ako magpasalamat sa komo panawen ako ba nawed makay ag mga Roma, mga magpanakaw, mga andadaya, mga magpangalonya, e makay ag magpaningir bohis naba! 12 Kadarwa sa sai ka linggo ba ako nawed mamangan para ngani- sa komo; ako magtaboy ikasampo ka eray sa boo naay nagkaakitan. 13 Ag magpaningir kay bohis ba magpatindeg sa adayo; iya nawed gayed kapaningara sa langit, no nawed ba kabkabaan da konin soot panawen sa konin karongkotan da- nagsabi amba, Eh! Diyos, kawo kay ayawtean sa naay, panawen ako ba sai ka makadaetan. 14 Naay nagsabi sa koyo : Da lalaki naba da paoli kinaangasan Diyos, ngani ag Parisiyo kay ba nawed. Panawen da iya magpakaatatas ba batay pinaababa, da- da magpakaababa kay ba batay pinaatatas. 15 Binaba din mga iraya sa laki Hisos da kora mga polahan para konin kapkapen da- para kora ba parongawan. Maraw kora ba akitan ag mga nagtod-an ba kora sinabiyan da mga iraya. 16 Ngani pinaparaoy laki Hisos da mga polahan da- konin sinabi sa konin mga nagtod-an amba, Koyo bayaan ag mga polahan pabali sa naay. Ayaw koyo pag-ayawan panawen da Diyos ba maghadi sa mga iraya makay kora. 17 Naay gidte nagsabi sa koyo, Da tawa man nawed naghadian Diyos makay ag mga ibente ka onga ba nawed batay apabilang sa mga Onga Diyos. 18 Iya ba tinanong sai ka lalaki maki katongkolan amba, Piya ka tagatodo, nakay da kailangan naay panawenen para ako maki biyag gidte wala arasan? 19 Laki Hisos ba tembag amba, Kaytang ako komo nag-awit amba piya? Wala piya gidte no nawed ba da Diyos ngani. 20 Komo:wa amatangan da mga bilin Diyos : Kawo ayaw magpangalonya, kawo ayaw magbono iraya, kawo ayaw magpanakaw, kawo ayaw magpamosli sa kawo magsistigo, komo galangen da komo apang da- adang. 21 Da- iya ba tembag amba, Ibat dapo sa ako ba ibente dapo ba naay:ya nagpanawen da boo mga naba. 22 Maraw naba ba akarngeyan laki Hisos ba konin sinabi amba, Sai dapo ka nakayman da korang sa komo. Komo pabiliyen da boo komo nag-apo, da- komo erayen da kabayadan sa mga mahidapen, da- sa makay naba ba kawo batay maki maoson nag-apo sata sa soksokowan. Kalbas ba kawo paoli da- tomongroy sa naay. 23 Ngani maraw akarngeyan naba ba marongkot gidte ag lalaki panawen iya ba maoson:na gidte nag-apo. 24 Amasdanan laki Hisos ba iya ba marongkot kaya konin sinabi amba, Mahidap gayed apabilang sa mga naghadian Diyos da mga maoson nag-apo. 25 Ginhawa dapo kadalan sa lobot kadayom da sai ka hayop lakol sa apabilang sa mga naghadian Diyos da sai ka maoson nag-apo. 26 Da mga karngey naba ba magtanong amba, No amba ba tawa da batay aribri? 27 Kora timbag laki Hisos amba, Da nawed apanawen iraya ba apanawen Diyos. 28 Da- laki Pidro ba magtokawanan amba, Komo nga pakarngeyan! Yamen:na nga inogonan da boo para anggat sa komo. 29 Kaya sinabi sa kora laki Hisos amba, Naay gidte nagsabi sa koyo, Da iya mag-ogon konin pamatawan, konin sawa, mga kakaan da- mga arian, mga koyay, e pad onga para magpamanawen para sa Diyos ba 30 batay tomabang labi dapo sa odas tiya, da- biyag gidte wala arasan kadomaen. 31 Binokod laki Hisos da labindarwa ka konin nagtod-an da- konin sinabi sa kora amba, Koyo gidte pakarngeyan! Tamo batay tomokad sa Hirosalim da- sata ba batay gidte mangyadi da boo sinorat mga tagabarita ibat sa Diyos para sa Onga Iraya. 32 Iya ba batay tinaboy sa mga Nawed Diw; iya ba batay tinawanan ag mga naba, iya batay linaes da- batay nanepayan. 33 Iya ba kora batay binogbog, da- batay binono, ngani sa katlowan aldaw ba batay:yakay biyagan. 34 Ngani nawed kora amatangan no nakay gidte da nagsabi laki Hisos; nagtago gidte sa kora da alabet sabiyen naba, kaya wala gidte amatangan sa kora akarngeyan. 35 Laki Hisos ba bali:ya sa goraan Hiriko. Sata ba maki sai ka lalaki raprap magtongka sa tebteb dalan da- magpangay-ay. 36 Maraw konin akarngeyan magpandalan da maoson ka iraya ba konin tinanong amba no nakay da magpangyadi. 37 Kora amba, Batay domalan towa laki Hisos taga goraan Nasarit. 38 Kaya iya ba bemerya maeyat amba, Hisos, Kaapoan hadi Dabid! Kawo ayawtean sa naay! 39 Iya ba sinaway mga monaan mandalan, ngani lalo:a iya bemerya maeyat amba, Kaapoan hadi Dabid, kawo kay ayawtean sa naay. 40 Kaya patindeg laki Hisos, da- amba, Pabaliyen sa naay da raprap. Pinabali nga naba da- tinanong laki Hisos amba, 41 Nakay da komo alabet naay panawenen sa komo? Amba da konin tebag, Panginoon, naay disin alabet ba ako ba kaban-aw:wakay. 42 Da- sinabi laki Hisos amba, Kawo kaban-aw:wani! Kawo pinapiya komo pag-isarig sa naay. 43 Naba din ag odas naba ba kaban-aw:wa nga iya da- anggat sa laki Hisos da- magpodi gidte sa Diyos. Maraw naba ba akitan mga iraya ba kora boo ba magpodi gidte din sa Diyos.
1 Laki Hisos ba semled da- magsigara sa goraan Hiriko. 2 Sata ba maki sai ka lalaki maoson nag-apo da ngaran ba laki Sakiyo. Iya ba poon mga magpaningir bohis. 3 Konin gidte nagsarak akitan no tawa laki Hisos. Ngani nawed abaya akitan panawen iya ba tayakad da- maoson gidte iraya. 4 Kaya iya domalaganan sa onaanan kaosonan iraya da- yomakbang sa sai ka poon kayo para konin akitan panawen saba batay domalan. 5 Maraw rateng laki Hisos sa poon naba ba iya maningara da- sinabi sa konin amba, Sakiyo, kawo lompot:tani, panawen mona ba ako kailangan mamataw sa kom balay. 6 Kadaldali lompot laki Sakiyo da- angasan gidte tomabang sa laki Hisos sa konin balay. 7 Da boo magban-aw ba magpaskedanan amba, Iya sata magpamataw sa balay sai ka daet ka iraya. 8 Nawed te maagot ba laki Sakiyo ba patindeg da- sinabi amba, Panginoon, naay:ya batay tinaboy sa mga mahidapen da sai ka eray naay nag-apo kakol din ag sa naay. Da- no ako gomaro sa tawa man sai ka eray nawed amba naay ba da naay batay tinaboy ba apat ka eray. 9 Kaya sinabi sa konin laki Hisos, Mona rinibri:yani Diyos da mag-anak tiya panawen kawo ba kaapoan gidte din laki Abraham. 10 Panawen towa paraoy da Onga Iraya para saraken da- ribriyen da nalingo. 11 Toloy:ya magtokawanan laki Hisos da- konin dapo sinabi da sai ka halimbawa sa mga magpakarngey sa konin monaan sinabi. Iya bali:ya sa Hirosalim kaya kora dia amba bali:ya gidte batay maghadi da Diyos. 12 Konin sinabi amba, Maki sai ka nawed amba basta iraya paraoy sa adayo ka poro para iya ba gawen hadi da- paoli:akay no kalbas naba. 13 Bayo iya mangadang ba konin pinatwagan da sampo sa konin mga tagapamanawen. Kora ba konin pinakan tig sai ka ginto da- konin sinabi sa kora amba, Koyo ligosyohon naba anggan sa ako ba towa:akay. 14 Ngani abaisan gidte da konin mga kasakopan kaya pinaparaoy sata da mga sogoan para sabiyen amba, Yamen ba dayo gidte maghadi sa yamen da iraya naba. 15 Ngani iya ba ginawa hadi. Maraw kalbas ba iya moli. Konin pinapatwag da mga tagapamanawen ag konin mga pinakan ginto, para amatangan no omaning kora lomigosyo kora tinabang. 16 Pabali sa konin da monaan da- sinabi, Panginoon, da komo ginto ba omoson sampo. 17 Iya tembag amba, Piya, kawo ba mateped gidte ka tagapamanawen. Panawen sa kawo ba akatiwalaan sa ibente ka nakayman ba kawo ba batay pinakatiwalaan sa sampo ka goraan. 18 Pabali da ikadarwa da- magsabi amba, Panginoon, komo ginto ba omoson:nakay lima. 19 Kaya konin sinabi sa konin amba, Kawo batay pinakatiwalaan sa lima ka goraan. 20 Pabali kay da sai dapo ka tagapamanawen da- magsabi amba, Panginoon, tiya nga da komo ginto. Naay pinotos sa panyo da- naay tinago, 21 panawen ako ba nagkaaliman sa komo panawen kawo ba mahigpit gidte. Komo naggaro da nawed amba komo, da- komo nag-ani da nawed komo inasik. 22 Iya timbag ag hadi, Kawo ba daet ka tagapamanawen! Sa komo tokawanan naba kawo batay hinosay. Komo mana amatangan amba ako ba mahigpit. Komo sinabi naay naggaro da nawed amba naay da- naay nag-ani da nawed naay inasik. 23 No amba ba kaytang nawed komo pinalagay sa bangko para no ako paoli:akay ba maoson:na te disin da ginto naba? 24 Kaya konin sinabi sa mga saba, Koyo garwen sa konin da ginto da- koyo taboyon sa maki:ya sampo. 25 Kora sinabi sa konin amba, Panginoon, iya ba maki:ya sampo ka ginto. 26 Ngani tembag da hadi amba, Naay nagsabi sa koyo, Da iya maki ba batay dapo pinakan, ngani da wala kay ba kayno da ibente sa konin ba batay dapo ginaro. 27 Para kay sa mga naay kalaban dayo ako ba maghadi sa kora, koyo paanggaten towa da- koyo bonoon sa naay ropangan. 28 Maraw konin:na nagsabi naba ba iya ba toloy:ya mangonaan paparaoy sa Hirosalim. 29 Maraw bali:yani sa mga goraan te Bitpagi da- Bitanya, sa bogsor Kaolibowan konin pinaonaan da darwa konin nagtod-an. 30 Konin sinabi sa sidawa amba, Kandawa paraoy sa kabetek te ka goraan. No kandawa semled sata ba kandawa batay akitan da sai ka onga te asno nag-eket. Naba ba nawed tang sinakayan tawa man. Kandawa okaden da- alyanen towa. 31 No maki magtanong amba, Kaytang kandawa nag-okad naba, ba kandawa sabiyen amba, Tiya ba kailangan Panginoon. 32 Kaya mangadang:nga ngani- sidawa da- sidawa nga akitan toltol sa sinabi laki Hisos sa sidawa. 33 Maraw sidawa nag-okad ag onga te asno ba tinanongag mga aponin amba, Kaytang kandawa nag-okad naba? 34 Sidawa amba, Tiya ba kailangan Panginoon. 35 Sidawa inalyan sa laki Hisos da onga asno da- sinablay sa awak asno da sidawa bado para laki Hisos ba kasakay. 36 Maraw iya toloy:yani magkadangan ba nagpanlatag mga iraya sa konin batay dinalanan da kora mga bado. 37 Maraw iya bali:yani padolong sa kaliwis bogsor Kaolibowan, asyagan gidte mangag-igwayan da- mamagpodi sa Diyos da kaosonan mga nagtod-an panawen sa mga makapangyadihan ka panawen kora akitan. 38 Kora amba, Tamo podiyen da hadi towa magparaoy sa ngaran Panginoon! Kaginhawahan ngani- sa soksokowan da- podiyen da Diyos pag Atatas sa boo! 39 Maki mga Parisiyo sa kaosonan magsabi sa konin amba, Tagatodo, komo sawayen da komo mga nagtod-an. 40 Ngani tembag laki Hisos amba, Naay gidte nagsabi sa koyo, No kora ba nawed agkasamang ba da mga bato kay da batay magyagyagang lakol! 41 Maraw iya ba bali:ya sa Hirosalim da- konin apatpaan da goraan lakol ba iya ba alognoyan gidte da- agpanangis. 42 Konin sinabi amba, Koyo mga taga Hirosalim, no sa aldaw tiya ba koyo disin amatangan no nakay da batay kataboy kaginhawahan sa koyo! Ngani mona ba nawed nagkaakitan sa koyo serey. 43 Batay rateng da mga aldaw koyo batay pinaribokan koyo mga kalaban. Koyo batay tinalikopanan anggan nawed kalwas. 44 Koyo goraan lakol ba batay rinegnas da- koyo boo ba batay nangaspo. Kayno sai ka bato ba wala batay inogonan sa ngaway sai kay ka bato, panawen nawed koyo amatangan amba naba da odas rateng da Panginoon para koyo ba ribriyen. 45 Laki Hisos ba semled sa ayanmanan lakol ka balay Diyos da- konin binolyaw da mga magtindahanan. 46 Konin sinabi sa kora amba, Nagkasorat amba, Da naay balay ba batay balay daranginan. Ngani koyo ginawa leyang mga magpanakaw. 47 Aldaw-aldaw ba laki Hisos ba magtodo sa lakol ka balay Diyos. Nagsakonaan mga koyay magpamanawen sa balay Diyos da- mga kamatangen sa Bilin kaanggat din mga koyay sa goraan amba iya batay pinabono. 48 Ngani kora ba wala akitan padaan para kora apanawen naba, panawen magpakarngey gidte sa konin da boo sa goraan.
1 Sa mga aldaw naba ba laki Hisos ba magtodo sa mga iraya sata sa lakol ka balay Diyos da- magpangadar Pirmida ka Barita. Pabali kay da mga koyay magpamanawen sa balay Diyos da- da mga kamatangen sa Bilin kaanggat din mga poon balayan sa goraan. 2 Kora sinabi sa konin amba, Komo nga sabiyen sa yamen amba no saan omibat da kapangyadihan kawo magpamanawen naba e tawa da tomaboy sa komo kapangyadihan para kawo magpamanawen mga naba. 3 Laki Hisos ba tembag amba, Koyo ba naay din batay tinanong. 4 Saan omibat da kapangyadihan laki Howan para magbaotismo sa sapa, ibat sa Diyos e sa mga iraya? 5 Kaya kora-kora kay ba mamagtokawanan amba, No tamo sabiyen amba, ibat sa Diyos, ba konin kay batay sinabi amba, Kaytang koyo nawed maniwala sa konin? 6 No tamo kay sabiyen amba, Ibat sa mga iraya, ba tamo ba batay namato mga iraya panawen kora magpaniwala amba laki Howan ba tagabarita ibat sa Diyos. 7 Kaya kora ba tembag amba, Nawed yamen amatangan. 8 Kaya sinabi sa kora laki Hisos amba, No amba ba nawed din naay batay sinabi sa koyo no saan omibat da kapangyadihan ako mamanawen mga naba. 9 Sinabi laki Hisos sa mga iraya da sai dapo ka halimbawa. Iya amba, Maki sai ka iraya magtanem obas sa konin agayen. Naba ba konin inintiriga sa mga tagaalaga da- iya paraoy sa adayo ka poro da- iya ba maagot din sata. 10 Maraw rateng da odas magpamti:yani obas ba konin pinaparaoy da sai ka tagoanggat para gawen da konin eray. Ngani namogbog mga tagaalaga da tagoanggat da- pinaoli wala nagbaba. 11 Konin:nakay pinaparaoy da sai ka tagoanggat; naba din ba namogbog da- pinakaya da- pinaoli wala nagbaba. 12 Pinaparaoy dapo sata da ikatatlo ka tagoanggat; naba ba ginolatan din da- pinalwas. 13 Maraw amba ba rinemrem ag aponin obasan amba, Omaning kaya da naay piya panawenen? Da piya dia ba naay batay sinogo da naay nagpalayaw onga. Iya disin ba kora batay gidte ginalang. 14 Ngani maraw iya ba akitan pag mga tagaalaga obas ba kora ba mamagtokawanan amba, Tiya da batay mag-apo; tamo:wa bonoon para tamo da batay mag-apo ag obasan. 15 Da- iya ba pinalwas sa obasan da- binono. Nakay dia da batay pinanawen sa kora pag aponin obasan? 16 Iya batay sata da- batay binono da mga tagaalaga naba, da- batay:yakay inintiriga sa Roma da obasan. Maraw naba ba kora akarngeyan ba sinabi mga iraya amba, Ayaw kay batay mangyadi! 17 Kora ba tinerkan laki Hisos da- tinanong amba, No amba ba omaning da alabet sabiyen da nagkasorat tiya sa Banal ka Kasoratan amba, Da toar inimbanda mga maglobo balay Ba naba da batay arigi maonay sa sorokan. Naba:a ngani. 18 Da tayma napaompog sa arigi naba ba batay nangasida da- da alaboan naba ba batay nangadodog. 19 Da mga kamatangen sa Bilin da- da mga koyay magpamanawen sa balay Diyos ba gomawa padaan para laki Hisos ba napaabel sa odas din naba, panawen kora amatangan da halimbawa naba ag konin tinokawanan ba laban sa kora. Ngani kora ba aliman sa mga iraya. 20 Kaya iya kora gidte nagbantayan da- kora ba manogo mga tiktik magpasoli mataldeng para iya ba abelen sa konin mga tokawanan da- para iya ba taboyon sa kapangyadihan da- kapamahalaan gobirnador. 21 Tinanong sa konin ag mga tiktik naba amba, Tagatodo, yamen amatangan kawo ba magtokawanan da- magtodo mataldeng; kawo ba wala nagpili iraya no nawed ba komo gidte nagtodo da alabet Diyos para sa yamen biyag. 22 No amba, abaya dia yamen magbayad bohis sa impirador e nawed? 23 Ngani amatangan laki Hisos da kora daet ka rarang kaya konin sinabi amba, 24 Ako koyo paban-awan sai ka kwarta pilak. Tawa ladawan da- ngaran nasorat towa? Kora tembag amba, Sa koyay Sisar ngani-. 25 Sinabi laki Hisos sa kora, No amba, taboyon sa koyay Sisar da sa koyay Sisar, da- taboyon kay sa Diyos da sa Diyos. 26 Sa konin sinabi sa ropangan mga iraya ba kora ba wala arngeyan tokawanan para iya ba kora abelen, no nawed kay ba kora ba manggilalas gidte panawen sa konin tebag da- kora ba wala:a asabi. 27 Maki mga Sadosiyo pabali sa laki Hisos. Da mga Sadosiyo ba nawed magpaniwala amba batay:yakay nabiyag da mga nangatay:yani. Kora tinanong sa konin amba, 28 Tagatodo, maki bilin sinorat laki Moysis para sa tamo amba, No natay da sai ka lalaki da- inogonan wala onga da konin sawa, ba kailangan:nakay mangisawa sa konin arian e kakaan lalaki da balo para maki onga para sa kakaan natay. 29 Maki pito ka talkakaan lalaki. Da panganay ba mangisawa da- natay wala onga. 30 Mangisawa:akay sata sa balo da ikadarwa, da- natay din. 31 Amba din da nangyadi sa ikatatlo anggan sa ikapito; kaya ag pito ba nangatay wala inogonan onga. 32 Maraw kalbas ba natay din ag babayi. 33 Sa batay:yakay nabiyag doma, tawa gidte da batay sawa ag babayi naba, panawen ag pito ba batang:nga konin sawa? 34 Laki Hisos ba tembag amba, Sa biyag tiya ba da mga lalaki da- da mga babayi ba magpangisawa e nagpal-isawa, 35 ngani ag mga abaya gidte sa biyag wala arasan da- abaya mamiyag sa bayo ka lopa ba nawed:da tay magpangisawa e nagpal-isawa. 36 Kora ba nawed:da batay natay panawen kora ba makay:ya din mga anghil. Kora ba mga onga Diyos panawen kora ba biniyag:gakay Diyos. 37 Para kay sa batay:yakay nabiyag da mga nangatay:yani ba naba ba Pinaban-Aw laki Moysis ag konin sinorat para sa magbalangabang apoy sa ababa ka poon kayo. Iya amba, Da Panginoon Diyos ba Diyos laki Abraham, Diyos laki Isaak da- Diyos laki Hakob. 38 Kaya da Diyos ba nawed Diyos mga nangatay no nawed ba Diyos mga biyagan. Panawen sa konin ba da boo ba biyagan. 39 Sinabi mga kalaati kamatangen sa Bilin amba, Piya gidte da komo tebag, tagatodo! 40 Da- ibat sata da mga iraya ba aliman:na magtanong dapo sa konin. 41 Sinabi sa kora laki Hisos amba, Omaning batay asabi da Kiristo ag Tagaribri pinangako Diyos ba Kaapoan hadi Dabid? 42 Hadi Dabid:da din da magsabi sa Ribro mga Igway amba, Sinabi Panginoon Diyos sa naay Panginoon amba, Kawo tomongka sa naay kanan kapet, 43 anggan nawed dapo naay napalagay sa galem komo araprapa da komo mga kalaban. Naba:a ngani. 44 No iya inawit hadi Dabid amba iya ba Panginoon ba omaning kay batay asabi amba da Kiristo ba Kaapoan hadi Dabid. 45 Sa odas magpakarngey da mga iraya ba sinabi laki Hisos sa konin mga nagtod-an amba, 46 Koyo magdahan sa mga kamatangen sa Bilin, panawen kora angasan gidte magsool maaba ka bado para magpaban-aw amba kora ba mahalaga ka iraya, da- kora gidte alabet ba kora galangen gidte sa mga karimponan. Kora gidte magpili da mga pili ka tongkaan sa mga balay pagtiponan, da- da kora alabet ba kora ba sa tebteb mga maki kapangyadihan sa mga kasayahan. 47 Kora mag-aboso sa mga babayi balo da- kora ginaro da kora mga balay. Kalbas ba kora magdarangin maaba para takleban da kora daet ka pinanawen. Kaya lalo:a mabyat ka padosa da kora batay tinabang.
1 Maraw semrey laki Hisos ba konin akitan da mga maoson nag-apo maglabo kora mga taboy sa palagyanan taboy sa lakol ka balay Diyos. 2 Konin din asereyan da sai ka mahidapen gidte ka babayi balo lomabo sata darwa te ka sintimos. 3 Amba laki Hisos, Naay gidte nagsabi sa koyo amba, Labi sa boo mga Roma ka iraya da tinaboy ag mahidapen ka babayi balo naba. 4 Kora boo ba magtaboy ibat sa kalabisan kora mga nag-apo, ngani da mahidapen gidte ka balo naba ba tomaboy boo konin kabiyagan. 5 Mamagtokawanan da kalaati sa kora para sa lakol ka balay Diyos, amba no kaomaning kaganda da mga namalagay dingding bato da- mga pakislap tinaboy sa Diyos. Kaya sinabi laki Hisos amba, 6 Batay rateng da odas da boo koyo nagkaakitan naba ba wala batay natra, kayno sai ka bato ba wala batay inogonan sa ngaway sai kay ka bato. 7 Kora ba magtanong sa laki Hisos amba, Tagatodo, nakay pag odas batay mangyadi naba? Da- nakay da batay tandaanan sa batay:ya nangyadi naba? 8 Laki Hisos ba tembag amba, Magdahan koyo para nawed koyo nadaya tawa man. Panawen maoson da batay rateng sa naay ngaran amba, Ako da Kiristo! da- amba, Rateng:nga da odas! Ayaw koyo magtoltol sa kora. 9 No koyo abaritaan da mga labanan da- mga kagolohan ba ayaw koyo aliman, panawen kailangan mangyadi dapo da mga naba, ngani nawed dapo agad batay rateng da arasan boo nakayman. 10 Da- konin dapo sinabi sa kora amba, Batay maglaban da sai ka lasyon sa sai:yakay ka lasyon, da- sai ka kahadian sa sai:yakay ka kahadian. 11 Maki batay maeyat ka lindol, batay gidte tagbayog da- maki batay domalan pangaskiten sa Roma-Roma ka poro. Maki batay akitan mga kapangirabot ka nakayman da- mga lakol ka tandaanan sa langit. 12 Ngani bayo batay mangyadi da boo naba ba koyo batay inabel da- pinahidapan. Koyo batay tinaboy sa mga balay pagtiponan mga Diw para koyo ba hosayen da- koyo batay pinapiriso. Koyo batay pinaloba sa mga hadi da- mga poon panawen sa naay. 13 Naba:a da koyo pagkaodas para magsistigo para sa naay. 14 Kaya koyo gidte remremen amba nawed:da kailangan maghanda no omaning da koyo batay tembag; 15 panawen koyo naay batay pinakan kaamatangan da- mga tokawanan nawed akayanan atebag e asarongat koyo mga kalaban. 16 Koyo ba batay pinaabel kayno koyo mga apang e adang, e mga talkakaan, mga kaseledan da- mga abyan. Da- batay pinabono da kalaati sa koyo. 17 Koyo batay namaisan boo panawen sa naay, 18 ngani wala batay naragas kayno sai sa koyo mga obok. 19 Sa koyo magpakaonay ba koyo batay tinabang da biyag gidte. 20 No koyo akitan talikop:pa sondalo da goraan Hirosalim, koyo:wa amatangan naba ba bali:ya nangaregnas. 21 No amba, da mga sa porobinsiya Hodiya ba kailangan mandalagan paraoy sa kabogsoran, da- da mga sa goraan lakol ba kailangan:na lomwas. Da sa mga kaagayenan ba ayaw:wa semled sata. 22 Panawen naba ba mga aldaw batay magpadosa da Diyos da- sa makay tiya ba batay:ya natped da boo nagkasorat sa Banal ka Kasoratan. 23 Makayawte da mga bonting da- da mga maki te polahan sa mga odas naba, panawen batay rateng da lakol ka kahidapan sa lopa naba da- da kabaisan Diyos sa mga kairayaan sata. 24 Da kalaati ba batay nangatay sa tarem pisaw, da- da kalaati kay ba batay inalila sa Roma ka poro. Da- da goraan lakol Hirosalim ba batay nanlaedan mga Nawed Diw anggan kalbas:sa da kora odas. 25 Batay magkamaki mga tanda- anan sa aldaw, sa bolan da- sa mga magirem. Da- sa lopa kay ba da boo lasyon ba batay magseksekal sa kaliman panawen sa torongon da- magsorbak da dagat. 26 Da mga iraya ba batay nangalpa sa kaliman panawen sa remrem mga batay nangyadi sa paranawan panawen da mga kapangyadihan nagkaakitan sa langit ba batay magpirpiraan gidte. 27 Sa odas naba ba da Onga Iraya ba kora batay akitan magrateng:ngani sa sai ka yaong, maki lakol ka kapangyadihan da- kalakolan. 28 No mag-ompisa:ani mangyadi da mga nakayman naba ba koyo gidte manaranga panawen bali:yani da koyo katbosan. 29 Laki Hisos ba magsabi sa kora sai ka halimbawa amba, Koyo ban-awan da poon igos da- da Roma ka poon kayo. 30 No magpanalbos:sani naba ba koyo amatangan bali:ya da tag-adaw. 31 Amba kay din, no koyo:wa akitan mangyadi:yani da mga naba ba koyo:wa amatangan bali:ya te batay maghadi da Diyos. 32 Naay gidte nagsabi sa koyo amba, Da boo naba ba batay nangyadi bayo natay da mga iraya biyagan mona. 33 Batay nawala da langit da- lopa, ngani da naay tokawanan ba nawed gidte tay nawala. 34 Koyo magdahan! Ayaw koyo angasan sa katakawan, sa par-inemen, da- sa pagkaabara sa mga nakayman sa paranawan tiya, kaaram batay nalognoy da koyo poso, da- aratengan koyo ag aldaw naba koyo nawed handa. 35 Makay ateb ba amba kay din batay rempa da aldaw naba sa boo iraya sa paranawan. 36 Kaya kailangan handa gidte koyo sa boo odas. Koyo magdarangin boo odas para koyo maki kaya para koyo karibri sa boo batay mangyadi naba, da- kapaloba sa Onga Iraya. 37 Laki Hisos ba aldaw-aldaw ba magtodo sa lakol ka balay Diyos. No madlem kay ba iya magtokad sa bogsor nag-awit bogsor Kaolibowan. Iya ba sata boo madlem. 38 Omaga dapo ba mamparaoy:ya sa lakol ka balay Diyos da boo iraya sa goraan para magpakarngey sa konin.
1 Nagkabali:yani da Paskwa mga Diw. Sa odas naba ba da mga Diw ba nawed mamangan tinapay maki pampahilab. 2 Da mga koyay magpamanawen sa balay Diyos da- da mga kamatangen sa Bilin ba magsarak padaan sa nawed batay amatangan kaosonan para napabono laki Hisos panawen nagkaaliman kora sa mga iraya. 3 Semled kay laki Satanas sa laki Hodas nag-awit Iskariyoti, sai sa labindarwa ka nagtod-an. 4 Iya omalis da- magtokawanan sa mga koyay magpamanawen sa balay Diyos da- sa mga poon magbantay sa balay Diyos no omaning konin batay apaabel laki Hisos sa kora. 5 Kora angasan da- kora magpangako gidte batay pinakan kwarta laki Hodas. 6 Iya ba magkasai sa kora da- ibat saba ba iya somarak pagkaodas para paabelen laki Hisos sa nawed akitan kaosonan. 7 Rateng:nga da aldaw para mamangan tinapay wala pampahilab; sa aldaw din naba ba ag mga Diw ba magbono topa te para sa Paskwa. 8 Sinogo laki Hisos kolaki Pidro da- Howan amba, Kandawa paraoy sata da- kandawa handaen da tamo tal-aponan Pamaskwa. 9 Sidawa magtanong amba, Saan komo alabet kidawa handaen naba? 10 Iya tembag amba, Kandawa paraoy sa goraan lakol. Sai ka lalaki maki nagbaba sai ka tabayay sapa ba batay asma kandawa. Kandawa anggat:ta sa konin anggan sa balay kon batay sinledan. 11 Da- kandawa sabiyen sa aponin ag balay amba, Nagpatanong ag tagatodo amba no saan rado da abaya iya mamangan tal-aponan Pamaskwa kasaro da konin mga nagtod-an. 12 Da- konin batay tindo sa kandawa da sai ka lakol ka rado sa ngaway, handa:ani da boo kagamitan. Sata kandawa maghanda. 13 Sidawa mangadang da- sidawa akitan da boo makay gidte ag konin sinabi sa sidawa. Da- sidawa naghanda da tal-aponan Pamaskwa. 14 Maraw rateng:nga da odas, laki Hisos da- konin mga pinili sogoan ba sata:a magpalibay sa tebteb pag pagkainan. 15 Konin sinabi sa kora amba, Naay gidte alabet koyo naay kasaro sa tal-aponan Pamaskwa tiya bayo ako maghidap. 16 Naay nagsabi sa koyo amba, Ako nawed:da tay mangan:nakay naba anggan sa natped sa odas batay gidte maghadi da Diyos. 17 Konin ginenan da sai ka ineman da- iya magpasalamat sa Diyos, kalbas iya amba, Koyo gawen tiya da- koyo magpal-ineman. 18 Naay nagsabi sa koyo amba, Ibat mona ba ako ba nawed:da tay minem tiya ag sapa obas anggan nawed dapo maghadi da Diyos. 19 Da- iya gomaro tinapay da- maraw kapasalamat:tani sa Diyos ba konin pinisang-pisang da- tinaboy sa kora amba, Tiya da naay lawas naay nagtaboy para sa koyo. Koyo panawenen tiya sa magremrem sa naay. 20 Amba kay din, maraw kalbas kapanal-aponan ba konin ginenan da ineman da- tinaboy sa kora da- magsabi amba, Da ineman tiya da bayo ka maonay ka kasaiyan pinanawen Diyos ag pinatibay naay daya ag bali:ya batay nabobo para sa koyo. 21 Ngani naay kasaro towa da batay pomaabel sa naay. 22 Batay:ya nga natay da Onga Iraya toltol gidte sa pakana Diyos; ngani kapangirabot gidte da batay mangyadi sa iraya batay pomaabel sa Onga Iraya. 23 Kaya kora ba mamagpaltanongan no tawa sa kora da batay pomanawen makay naba. 24 Magpaltomangan da mga nagtod-an no tawa sa kora da batay amatangan amba iya da maki kapangyadihan. 25 Kaya sinabi sa kora laki Hisos amba, Da mga hadi sa paranawan tiya ba nagpanginoon da mga kora kasakopan, da- da mga maki kapangyadihan ba kora alabet awiten amba kora ba piya gidte magtolong sa mga iraya. 26 Ngani sa koyo ba nawed amba, no nawed ba da maki kapangyadihan sa koyo ba kailangan iya ba makay pinagkaonga, da- da iya magpamahala ba kailangan iya ba makay sai ka tagapamanawen. 27 Tawa ma da labi makapangyadihan sa magtongka sa pagkainan da- sa mag-asikaso sa konin? Nawed ma da magtongka sa pagkainan? Ngani ako ba koyo kaanggat makay sai ka tagapamanawen. 28 Koyo da naay kaanggat boo odas sa mga kahidapan naay dinalanan. 29 Da naay Apang ba tomaboy sa naay kapangyadihan maghadi da- ako kay ba batay din magtaboy sa koyo kapangyadihan maghadi 30 para koyo batay mamangan da- minem naay kasaro sa odas ako batay maghadi. Da- koyo batay tomongka sa mga tongkaan hadi para hadien da labindarwa ka andana Israil. 31 Simon! Simon! Kawo gidte pakarngey! Koyo ba inaringi laki Satanas para koyo ba porbahan gidte makay paray giniek. 32 Ngani naay kay dinarangin para ayaw nawala:a gidte da komo pag-isarig sa Diyos. Da- no kawo kay ba maonay:yakay sa komo pag-isarig ba komo paonayen da komo mga arian. 33 Tembag laki Pidro amba, Panginoon, ako ba handa napiriso da- natay kaanggat sa komo. 34 Amba laki Hisos, Pidro, naay gidte nagsabi sa komo! Bayo mangarang-it da manok sa aldaw tiya ba katatlo ako komo batay tinanggiyan. 35 Maraw kalbas ba kora tinanong laki Hisos amba, Maraw koyo naay sinogo wala nagbaba pekelan, da- bokotan, da- panlaed ba koyo dia kinorang nakayman? Kora tembag amba, Nawed kay! 36 Konin sinabi amba, Ngani mona kay ba no koyo maki pekelan da- bokotan ba koyo babaen. Da wala pisaw ba pabiliyen da konin pandimla da- bomili sai ka pisaw. 37 Panawen naay nagsabi sa koyo amba, Kailangan natped da nagsabi sa Banal ka Kasoratan amba, Iya ba binilang:nga din sa mga makadaetan. Naba:a ngani. Panawen bali:ya natped da nasorat para sa naay. 38 Da- sinabi mga nagtod-an amba, Panginoon, tiya da darwa ka pisaw. Laki Hisos ba tembag amba, Sibay:ya naba. 39 Laki Hisos ba omalis sa Hirosalim da- makay ag konin kaogalian ba tomokad sa bogsor Kaolibowan, anggat din da konin mga nagtod-an. 40 Maraw rateng sata ba konin sinabi sa kora amba, Koyo magdarangin, para koyo ba maonay sa odas koyo ba nagtogso. 41 Maraw kalbas ba iya paadayo sa kora mga tatlo ka kawayan, da- iya lomohod da- magdarangin 42 amba, Naay Apang, no kom alabet ba paadayoon sa naay da lakol ka kahidapan tiya. Amba man ba ayaw da naay alabet da mangyadi no nawed ba da komo alabet. 43 Paban-aw sa konin da sai ka anghil ibat sa soksokowan da- pinaeyat da konin remrem. 44 Alsowan remrem iya ba magdarangin lalo dapo maonay; tomro sa lopa da konin pawis makay lakol ka tarikatak daya. 45 Maraw kadarangin:nani ba iya patindeg da- pabali sa konin mga nagtod-an. Kora ba konin aratnganan nangaakalekan panawen sa kora marongkot. 46 Kora ba konin tinanong amba, Kaytang koyo mamagkalek? Koyo mangon da- magdarangin para koyo ba maonay sa odas koyo ba nagtogso. 47 Laki Hisos ba magtokawanan dapo ba rateng:nga da kaosonan iraya; da agpangonaan ba laki Hodas, kabilang sa labindarwa ka nagtod-an. Konin pinabaliyan laki Hisos para amoon. 48 Ngani sinabi laki Hisos sa konin amba, Hodas, komo dia nagpaabel da Onga Iraya sa sai ka amo? 49 Maraw akitan ag mga nagtod-an konin kaanggat no omaning da batay nangyadi ba kora sinabi amba, Panginoon, kailangan dia yamen mamalang? 50 Da- pinalang:nga ngani- ag sai sa kora da tagoanggat sa koyay lakol magpamanawen sa balay Diyos da- tinarigbong da konin kanan dako talinga. 51 Ngani sinabi laki Hisos amba, Ayaw! Koyo pabayaan kora! Konin kinapkap da talinga pag tagoanggat da- pinapiya. 52 Da- sinabi laki Hisos sa mga koyay magpamanawen da- sa mga poon mga tagabantay sa lakol ka balay Diyos, da- sa mga poon balayan sa goraan magparaoy sa konin para iya abelen amba, Ako dia ba sai ka magpanakaw? Kaytang koyo towa paraoy maki pad pisaw da- mga pamogbog? 53 Aldaw-aldaw ako magtodo sa balay Diyos da- sata din koyo; ngani ako ba nawed koyo inabel. Ngani koyo:wa odas mona da- odas din kapangyadihan kadeleman. 54 Kora nga inabel laki Hisos da- iya ba pinaanggat da- pinasled sa balay ag koyay lakol magpamanawen sa balay Diyos. Laki Pidro kay ba tomongroy din sa konin ngani adayo da palteng-anan. 55 Maraw rem-et:ta da apoy sa tenga ayanmanan ba mamagtongka sa paribok da mga iraya sata. Laki Pidro kay ba kaliog din sa kora. 56 Sa iya ba magpaidang sa apoy ba iya ba akitan sai ka sogoan babayi da- iya ba minasdan gidte piya. Da babayi ba amba, Kaanggat din laki Hisos da iraya tiya! 57 Ngani naba ba tinanggiyan laki Pidro amba, Ay! Nawed! Iya ba nawed naay kilala! 58 Maraw kadalan nawed te kaagot ba iya ba akitan sai ka lalaki da- iya magtanong amba, Kawo din ba sai sa kora? Ngani iya amba, Ay! Nawed! 59 Maraw kalawey mga sai ka odas ba pinirit kay ag sai amba, Kaanggat nga laki Hisos da iraya tiya, panawen iya din ba taga Galiliya. 60 Ngani laki Pidro ba tembag, Laki, nawed naay amatangan da komo nagsabi. Iya magtokawanan dapo maraw mangarang-it da manok. 61 Da Panginoon ba bomaliwi da- semrey sa laki Pidro. Da- aremreman laki Pidro da sinabi Panginoon sa konin amba, Bayo mangarang-it da manok sa aldaw tiya ba katatlo ako komo batay tinanggiyan. 62 Laki Pidro ba lomwas da- masyado gidte mag-ogwang. 63 Laki Hisos ba naglibak da- nagsampok mga magbantay sa konin. 64 Kora yinatepan konin mata da- tinanong amba, Anta! Komo nga sabiyen! Tawa da agsampok sa komo? 65 Da- mga nakay-nakay dapo ka pambais da kora nagsabi sa konin. 66 Maraw omaga:akay ba magrimpon da hosayan lakol mga Diw; naba ba da mga poon balayan sa goraan, mga koyay magpamanawen sa balay Diyos da- mga kamatangen sa Bilin. Laki Hisos ba pinaloba sa kora kapolongan. 67 Kora amba, Komo sabiyen sa yamen no kawo:wa ngani- da Kiristo ag Tagaribri pinangako Diyos. Iya tembag amba, Naay man sabiyen sa koyo ba nawed din koyo batay maniwala, 68 da- no koyo kay naay tanongon ba nawed din koyo batay tembag. 69 Ngani ibat mona da Onga Iraya ba batay tomongka sa kanan kapet Makapangyadihan Diyos. 70 Kaya kora boo ba magtanong amba, Da komo alabet sabiyen ba kawo da Onga Diyos? Iya tembag, Koyo:wa da magsabi naba. 71 Kora sinabi amba, Nakay dapo da sistigo da tamo kailangan? Tamo:wa da karngey, ibat sa konin sadiri bibi.
1 Patindeg da boo kapolongan da- kora pinaanggat laki Hisos sa ropangan gobirnador koyay Pilato. 2 Kora inompisahan iya ba kora padatosan. Kora amba, Yamen asbokan da iraya tiya ba magpanolsol sa yamen mga kairayaan da- mag-ayaw kora magbayad bohis sa koyay Sisar, da- iya amba iya kono da Kiristo, sai ka hadi. 3 Kaya iya ba tinanong koyay Pilato amba, Kawo dia da hadi mga Diw? Laki Hisos ba tembag amba, Kawo:wa da magsabi naba. 4 Sinabi koyay Pilato sa mga koyay magpamanawen sa balay Diyos da- sa kaosonan iraya amba, Ako ba wala gidte akitan dahilan para magpadosa sa iraya tiya. 5 Ngani kora ba lalo:a magpirit mamagsabi amba, Panawen sa konin mga todo ba konin nagbolyawak da mga iraya ibat sa porobinsiya Galiliya anggan sa Hodiya da- mona ba towa:a din. 6 Maraw tiya ba arngeyan koyay Pilato ba konin tinanong no laki Hisos ba taga Galiliya. 7 Maraw kon amatangan amba iya ba nagkaasakopan gobirnador koyay Hirodis ba iya ba konin pinaanggat sa konin panawen ag aldaw naba ba koyay Hirodis din ba sa Hirosalim. 8 Angasan gidte koyay Hirodis maraw konin akitan laki Hisos. Maoson:na iya abaritaan para sa konin da- maagot:ta konin alabet akitan. Konin gidte sarig ba laki Hisos ba batay gomawa katakataka da- alabet konin akitan naba. 9 Kaya iya ba konin gidte nagtanong-tanong ngani iya nawed gidte tembag kayno te man. 10 Sata da mga koyay magpamanawen sa balay Diyos da- da mga kamatangen sa Bilin nawed mag-epet sa magpadatos sa laki Hisos. 11 Laki Hisos ba linibak da- winala:a gidte koyinta koyay Hirodis da- konin mga sondalo. Kora ba agpasool sa konin maganda ka golanit da- pinaoli sa koyay Pilato. 12 Ag monaan ba sidawa Hirodis da- Pilato ba magpalbaisan. Ngani pag aldaw naba ba sidawa tal-abyan:nani. 13 Pinapatwag koyay Pilato da mga koyay magpamanawen sa balay Diyos, da- da mga poon balayan sa goraan da- da mga kairayaan, 14 da- sinabi sa kora amba, Koyo pinaanggat sa naay da iraya tiya sa iya magpanolsol sa mga iraya. Mona iya ba naay gidte tinanong sa koyo ropangan, da- naay gidte amatangan amba ako ba wala akitan toltol sa koyo mga padatos para iya padosahan. 15 Amba din koyay Hirodis, kaya laki Hisos ba konin pinaoli sa naay. Da mapawa gidte ba iya ba nawed magpanawen nakayman daet para padosahan katayan. 16 Kaya iya ba naay batay pinabogbog bayo batay binal-anan. 17 Tayma Paskwa mga Diw kailangan koyay Pilato ba magbal-an sa sai ka piriso para sa kora. 18 Ngani magsabayan gidte mamaglalae kora boo amba, Pabonoon da iraya naba! Bal-anan laki Barabas! 19 Napiriso laki Barabas panawen sa iya magbolyawak sa mga iraya sa goraan da- panawen sa iya bomono iraya. 20 Kasai dapo manokawanan sa kora koyay Pilato, sa para ngani nabal-anan laki Hisos. 21 Ngani lomalae da mga iraya amba, Papakoon sa kodos! Papakoon iya sa kodos! 22 Katatlo gayed tomokawanan sa kora koyay Pilato amba, Kaytang? Nakay da konin pinanawen daet? Ako ba wala akitan ibatan para iya ba pabonoon. Naay:ya ngani batay pinabogbog bayo batay binal-anan. 23 Ngani lalo:a gidte kora mamaglalae amba, Papakoon iya sa kodos! Da- sa kalbas ba mandaeg da kora mga lalae. 24 Kaya pinayagan koyay Pilato panawenen da kora nag-ay-ayan. 25 Toltol sa kora nag-ay-ayan ba konin binal-anan da iraya napiriso panawen sa magbolyawak da- sa bomono iraya da- konin tinaboy sa kora laki Hisos para panawenen da kora alabet. 26 Maraw kora nagpaanggat laki Hisos para pakoon ba kora asma da sai ka lalaki ibat sa agayen. Iya ba laki Simon taga Sirini. Iya ba kora pinegelan da- pinapas-an sa konin da kodos, katongroy laki Hisos. 27 Laki Hisos ba nag-anggatan kaosonan iraya, anggat din da mga babayi mamagpangla da- mamagpanangis panawen sa konin. 28 Kora ba binaliwi laki Hisos da- sinabi sa kora amba, Koyo mga kababayiyan taga Hirosalim, koyo ayaw agpanangis sa naay. Ngani da koyo kay kailangan magpanangis ba sa koyo sadiri da- sa koyo mga onga. 29 Panawen batay rateng da odas batay sinabi mga iraya amba, Angasan da mga baog, da mga babayi nawed tang bonting da- nawed tang magpadodo. 30 Sa mga aldaw naba ba batay sinabi mga iraya sa mga bogsor amba, Koyo Romagonronan sa yamen! da- sa mga latayan amba, Tabenan:na yamen! 31 Panawen no makay tiya da nagpanawen sa naay ag wala pinanawen daet ba omaning kay kaya da batay pinanawen sa mga makadaetan? 32 Kora maki dapo pinaanggat darwa ka daet gidte ka iraya para bonoon kaanggat laki Hisos. 33 Maraw kora rateng sa poro nag-awit Bongo ba pinako mga sondalo sa kodos laki Hisos. Kora din pinako sa konin-konin kodos da darwa ka daet ka iraya, sai sa kapet kanan laki Hisos, sai kay ba sa kapet kaliwa. 34 Sinabi laki Hisos amba, Naay Apang, kora ba komo patawaden panawen nawed kora amatangan da kora nagpanawen. Kora magpostahanan para eray-erayen da mga golanit laki Hisos sa tayma sai. 35 Da mga iraya ba mamagpatindeg sata da- mamagban-aw. Iya naglibak kay mga poon balayan mga Diw. Kora amba, Konin rinibri da Roma. Bayaan iya, konin ribriyen da konin sadiri no iya da Kiristo, da hinidang Diyos! 36 Iya ba naglibak din mga sondalo, kora pinabaliyan da- nagpakan soka. 37 Kora sinabi amba, No kawoda da hadi mga Diw, komo ribriyenda komo sadiri. 38 Nasorat kay sa ngaway kodos da makay tiya : Iya da hadi mga Diw. 39 Iya ba linibak sai sa mga daet ka iraya pinako din sa kodos sa konin tebteb amba, Nawed ma kawo da Kiristo? Komo ribriyen da komo sadiri da- anggan yamen. 40 Ngani iya sinabiyan ag konin kaanggat amba, Nawed ma kawo aliman sa Diyos, panawen kawo ba nagpadosahan makay din iya? 41 Mataldeng ngani kita padosahan makay tiya panawen sa kita mga pinanawen; ngani da iraya tiya ba wala pinanawen daet. 42 Da- konin sinabi amba, Hisos, ako komo gidte remremen no kawo ba rateng:ngani sa komo kahadian. 43 Laki Hisos ba tembag sa konin amba, Naay gidte nagsabi sa komo, Mona din ba kawo batay naay pinaanggat sa paraiso. 44 Maraw tenga:a gidte aldaw, mandelem sa boo lopa anggan manorip batang da aldaw giraapon. 45 Nawala:a da rawa aldaw; da- da sagodang balay Diyos ba nasagi sa tenga. 46 Laki Hisos ba bemerya maeyat amba, Naay Apang, naay nagkatiwala sa komo da naay ispirito! Maraw konin:na nasabi naba ba nagto:a da konin inawa. 47 Maraw akitan ag poon sondalo da nangyadi ba iya ba magpodi sa Diyos da- konin sinabi amba, Mataldeng gidte ngani- ag iraya tiya! 48 Maraw kora akitan da nangyadi, da kaosonan iraya sata magserey ba paoli:akay kabkabaan da kora mga soot panawen asayangan gidte. 49 Magpatindeg kay sa nawed naw adayo da mga kakilala laki Hisos, kaanggat din da mga babayi mag-anggat-anggat sa konin ibat sa Galiliya. Kora gidte akitan da nangyadi. 50 Maki sai ka lalaki da konin ngaran ba Hosi. Iya ba taga Arimatiya, sai ka goraan mga Diw. Iya ba mag-asa gidte sa batay maghadi da Diyos da- iya ba piya da- mataldeng. Kaya, kayno iya ba sai sa hosayan lakol mga Diw ba iya ba nawed angasan sa kora pinasiya da- pinanawen sa laki Hisos. 52 Iya pabali sa koyay Pilato da- konin inay-ayan da bangkay laki Hisos. 53 Maraw konin:na nagaro da bangkay, naba ba konin binedbedan sa sai ka maganda ka papa golanit da- pinalagay sa sai ka lebeng-sata ba wala tang limbeng. 54 Naba ba aldaw Biyirnis, aldaw kora ba maghanda para sa Aldaw Magpahinga ag bali:ya mag-ompisa. 55 Anggat din sa laki Hosi da mga babayi kaanggat laki Hisos ibat sa Galiliya, da- kora akitan da lebeng da- omaning da pomalagay konin bangkay. 56 Maraw kalbas ba kora moli da- kora hinanda da mga banglo da- maayooy para palagyen sa bangkay laki Hisos no kalawey:yani da Aldaw Magpahinga. Maraw rateng da Aldaw Magpahinga ba kora ba magpahinga toltol sa Bilin tinaboy sa laki Moysis.
1 Kaomagahan gidte aldaw linggo da mga babayi ba paraoy sa lebeng maki nagbaba mga banglo kora hinanda. 2 Maraw kora rateng ba kora akitan naligan:nani da bato takep sa sakbawan lebeng. 3 Kora semled. Adey! Wala:ani da bangkay Panginoon Hisos! 4 Kaya magsamperaket da kora remrem. Da- sa odas kora ba magremrem saba ba kora akitan darwa ka lalaki kasorap da golanit. 5 Panawen sa kora aliman gidte ba kora ba lomombogan. Kora ba tinanong ag darwa ka lalaki amba, Kaytang koyo nagsarak ag biyagan sa mga nangatay? 6 Iya ba wala:a towa. Iya ba biyagan:nakay! Koyo remremen da konin sinabi sa koyo pag odas iya ba sa Galiliya dapo 7 amba, Da Onga Iraya ba kailangan paabelen sa mga makadaetan da- papakoon sa kodos, ngani sa ikatatlo ka aldaw ba iya ba batay:yakay nabiyag. 8 Da- aremreman:nakay ngani- ag mga babayi da konin sinabi. 9 Kora paoli:akay ibat sa lebeng da- kora nanoltol da boo naba sa labinsai ka pinili sogoan, da- sa Roma dapo kora kaanggat. 10 Da mga babayi naba ba kora Mariya Magdalina, Howana, da- Mariya adang laki Tiyago. Kora da- da mga Roma dapo ka babayi kora kaanggat da magbarita naba sa mga pinili sogoan laki Hisos. 11 Ngani da remrem mga pinili sogoan ba amba kaboslian ngani da kora sinabi, kaya kora nawed maniwala sa mga babayi. 12 Ngani laki Pidro ba patindeg da- magdalaganan magparaoy sa lebeng. Iya romiwa da- maraw iya man-aw sa galem ba iya ba wala akitan no nawed ba ag mga maganda ka papa golanit. Kaya iya moli magtaka gidte sa nangyadi. 13 Ag aldaw din naba, darwa sa mga nagtod-an ba magparaoy sa sai ka goraan te nag-awit Imaos, darwa ka linabonan kadangen ibat sa Hirosalim. 14 Sidawa magtokawanan sa mga nangyadi. 15 Sa sidawa agtokawanan da- agpaltanongan ba laki Hisos ba pabali da- anggat:ta sa sidawa. 16 Kayno sidawa akitan ba makay nasoram da sidawa mata sa odas naba da- iya ba nawed sidawa kilala gidte. 17 Sidawa ba tinanong laki Hisos amba, Nakay da kandawa nagtokawanan? Da- sidawa ba empet sa agkadangan nagkalomsi da sidawa kiray. 18 Sinabi ag sai da ngaran ba Kiliopas amba, Kawo ngani dia da manalyowan sa Hirosalim nawed dapo kamatang sa mga bayo ngani nangyadi sata ag mga aldaw kadalan. 19 Konin tinanong amba, Nakay pag mga nangyadi? Da- sidawa tembag sa konin amba, Da nangyadi sa laki Hisos taga Nasarit. Iya ba sai ka tagabarita makapangyadihan sa mga panawen da- sa mga todo, kayno sa ropangan Diyos da- kayno sa boo mga iraya. 20 Iya ba pinaabel mga koyay magpamanawen sa balay Diyos da- mga poon para hosgahen sa katayan, da- iya ba pinako sa kodos. 21 Iya dapo gayed da yamen nag-asahan batay magbal-an sa tamo mga taga Israil. Nawed ngani naba. Ikatatlo:wa ka aldaw mona ibat ag nangyadi naba. 22 Ngani yamen nabigla gayed sa binarita kalaati mga babayi yamen kaanggat. Maaga gidte kono kora paraoy sa lebeng 23 da- nawed kora akitan da konin bangkay. Kora paoli:akay da- kora magsabi amba kora maki akitan makay sa akalkan mga anghil magtokawanan amba laki Hisos ba biyagan. 24 Paraoy din sa lebeng da kalaati sa kidawa kaanggat da- makay din nga naba da kora akitan, ngani nawed kora akitan laki Hisos. 25 Sinabi sa sidawa laki Hisos amba, Kandawa ba tolingag! Mahidap gidte kandawa apaniwalaan da boo sinabi mga tagabarita ibat sa Diyos! 26 Nawed ma kailangan aghidap da Kiristo boo mga naba bayo iya pinalakol gidte Diyos. 27 Da- pinapawa sa sidawa laki Hisos da boo nagkasorat sa Banal ka Kasoratan para sa konin sadiri ibat sa ribro laki Moysis anggan sa ribro mga tagabarita ibat sa Diyos. 28 Maraw kora ba bali:yani sa goraan te kora nagparaoyan, laki Hisos ba makay toloy dapo sa iya magkadangan. 29 Ngani iya ba sidawa nag-ayaw-ayawan amba, Kawo ba towa:a sa kidawa panawen nagkalned:da da aldaw da- batay:ya madlem. Kaya iya ba anggat:ta ngani- sa sidawa. 30 Maraw iya ba sidawa kasaro sa pagkainan ba iya gomaro tinapay da- magpasalamat sa Diyos, konin namisang-misang da- tinaboy sa sidawa. 31 Ibat saba ba sidawa gidte amatangan da- akilalaan. Ngani iya ba agad:dakay nawala. 32 Sidawa magtokawanan amba, Kaya mana agsorapo da kita poso sa odas iya magtokawanan sa kita sa dalan, da- sa konin pinapawa sa kita da Banal ka Kasoratan. 33 Sa odas din naba ba sidawa ba paoli:akay sa Hirosalim. Sidawa aratnganan magrimpon da mga labinsai ka pinili sogoan da- da mga Roma dapo ka nagtod-an. 34 Kora boo ba magsabi amba, Biyagan gidte ngani- da Panginoon! Paban-aw sa laki Simon. 35 Binarita kay ag darwa da nangyadi pag sidawa ba sa dalan da- no omaning sidawa akilalaan gidte laki Hisos maraw konin namisang-misang da tinapay. 36 Sa odas kora nagtokawanan dapo da mga naba ba laki Hisos ba kora:a ngani akitan sa kora tenga. Konin sinabi amba, Kaginhawahan ngani- da sa koyo! 37 Ngani kora ba nangaaliman da- nangirabot panawen kora dia amba belag. 38 Kaya sinabi sa kora laki Hisos amba, Kaytang koyo nangaaliman da- mag-alingangaan? 39 Koyo masdan da naay mga alima da- paa. Ako nga naba! Ako koyo kapkapen da- ban-awan. Da belag ba wala ener da- wala bot-ol, ngani ako ba maki. 40 Maraw kalbas konin nasabi naba ba konin Pinaban-Aw sa kora da konin mga alima da- paa. 41 Maraw kora nawed dapo din kapaniwala panawen sa kora lakol ka kaangasan da- sa kora magtaka gayed ba kora ba tinanong laki Hisos amba, Maki dia batay apamangan towa? 42 Iya ba kora pinakan kapotol inihaw isda. 43 Konin ginaro naba da- namangan sa kora ropangan. 44 Maraw kalbas naba, konin sinabi sa konin mga nagtod-an amba, Tiya da naay sinabi sa koyo pag ako ba koyo dapo kaanggat amba, Kailangan natped da boo nagkasorat para sa naay sa ribro laki Moysis, sa ribro mga tagabarita ibat sa Diyos, da- sa ribro pad Igway. 45 Da- konin binokaan da kora pad remrem para kora apawaan da nagsabi Banal ka Kasoratan. 46 Da- konin sinabi sa kora amba, Makay tiya da nagkasorat : Kailangan aghidap da Kiristo, da- natay, da- nabiyag:gakay sa ikatatlo ka aldaw; 47 da- kailangan pangadaren sa konin ngaran ibat sa Hirosalim anggan sa boo mga lasyon da magsisi da- mag-ogon mga kadaetan para kora ba pinatawad Diyos. 48 Koyo da mga sistigo sa mga nakayman naba. 49 Koyo gidte pakarngeyan! Naay batay sinogo sa koyo da Ispirito pinangako naay Apang, kaya koyo ayaw dapo omalis sa goraan lakol anggan koyo nawed dapo nataboyan konin kapangyadihan. 50 Maraw kalbas ba kora ba pinaanggat laki Hisos sa lowas goraan anggan sa goraan te Bitanya. Maraw rateng sata ba konin pinaatatas konin alima da- kora ba pinarongawan. 51 Da- sa odas kora konin nagparongawan dapo ba iya kay ba nagkaadayo pasalbon:na sa soksokowan. 52 Iya ba kora sinamba da- maraw kalbas ba kora ba paoli sa Hirosalim; kora ba kapno gidte kasyagan. 53 Layen kora ba sa lakol ka balay Diyos da- magpodi sa Diyos.
1 Sa ompisa dapo boo nakayman, monaan:nani da Tokawanan. Kaanggat Diyos da Tokawanan da da Tokawanan ba Diyos. 2 Sa ompisa dapo iya kaanggat:ta Diyos. 3 Konin pinararang Diyos da boo nakayman da- wala nakayman nawed napararang sa konin. 4 Ibat sa konin da biyag gidte da- da biyag ba magparawa sa mga kairayaan. 5 Da rawa ba magrawa sa kadeleman da- naba ba nawed batay nadaeg kadeleman. 6 Pinaidaw Diyos da konin sogo da ngaran ba laki Howan. 7 Iya pomaraoy towa para somistigo para sa rawa da- para misarig sa rawa da boo iraya panawen sa konin sinistigohan. 8 Nawed iya da rawa no nawed ba iya ba pomaraoy towa para magsistigo para sa rawa. 9 Da rawa gidte ba paraoy towa sa paranawan da magrawa sa boo kairayaan. 10 Da Tokawanan ba sa paranawan. Konin pinararang da paranawan ngani iya nawed kinilala mga iraya sa paranawan. 11 Iya pomaraoy sa konin sadiri lasyon ngani iya nawed tinabang ag konin kalasyon. 12 Ngani da boo tomabang da- misarig sa konin ba konin pinakan kapangyadihan para onga Diyos. 13 Kora ba binilang onga Diyos nawed panawen sa kora inonga sa alabet lawas da- sa pinanawen iraya no nawed ba ibat sa Diyos. 14 Da Tokawanan ba naggawa iraya da- iya mamatawan sa yamen, magpaban-aw gidte boo kapiyaanan remrem da- katotohanan Diyos. Yamen akitan da konin kalakolan konin tinabang ibat sa Apang sa iya konin sai ngani ka onga. 15 Iya sinistigohan gidte laki Howan amba, Iya da naay nagtodyo maraw naay sinabi amba, Da batay rateng sa naay paoriyan ba mahalaga dapo sa naay, panawen iya ba iya:ani bayo ako inonga. Naba:a ngani. 16 Ibat sa semker gidte da konin kapiyaanan remrem, tamo boo ba magtabang dason-dason ka konin parongaw. 17 Pinababa Diyos sa laki Moysis da bilin, ngani da kapiyaanan remrem da- da katotohanan Diyos ba laki Hisos Kiristo da pomaban-aw. 18 Wala tang iraya kaban-aw sa Diyos. Da sai ngani ka onga Diyos ag iya ba Diyos wala ikadarwa da- apalayawan gidte Apang ba iya da pomakilala sa konin. 19 Tiya da sistigo laki Howan maraw pinaparaoy mga poon mga Diw sa Hirosalim da kalaati magpamanawen sa balay Diyos da- mga kaapoan laki Libi para tanongon sa laki Howan no tawa iya. 20 Iya ba nawed dayo magtebag no nawed ba iya magpapawa gidte amba, Nawed ako da Kiristo, ag Tagaribri pinangako Diyos. 21 Kora magtanong amba, No amba, tawa kay kawo? Kawo dia ba laki Iliyas? Iya tembag, Nawed gidte! Kora magtanong dapo amba, Kawo dia da Tagabarita ibat sa Diyos yamen nagpanyaan? Iya tembag, Nawed! 22 Kaya kora magtanong dapo, No amba, tawa kawo? Komo sabiyen sa yamen para yamen asabi sa mga pomaparaoy sa yamen. Nakay da komo batay asabi para sa komo sadiri? 23 Tembag laki Howan, makay ag sinabi sa barita laki Isayas amba, Ako da magtokawanan maeyat sa poro nawed apirmihan iraya amba, Koyo taldengen da batay dinalanan Panginoon! Naba:a ngani. 24 Da mga agtanong ba pinaparaoy mga Parisiyo. 25 Kora magtanong dapo sa laki Howan amba, Nawed kay ma amba kawo da Kiristo, nawed din amba laki Iliyas, kayno da Tagabarita! No amba, kaytang kawo magbaotismo sa sapa? 26 Iya tembag, Ako magbaotismo sa sapa, ngani sa koyo:wani da sai nawed dapo koyo kilala. 27 Iya da batay sa naay paoriyan ngani ako nawed abaya kayno mag-okad ngani eket konin panlaed. 28 Naba ba mangyadi sa goraan Bitanya, sa karipay salog Hordan ag pagbaotismohan laki Howan. 29 Maraw sai:yakay ka omaga akitan laki Howan laki Hisos pabali sa konin. Konin sinabi amba, Tiya da Topa te Diyos mag-alis kadaetan mga taga paranawan! 30 Iya da naay nagtodyo ag naay sinabi amba, Da sai ka mahalaga dapo sa naay ba batay sa naay paoriyan panawen Iya ba Iya:ani bayo ako inonga. 31 Iya nawed naay kilala gidte ag monaan kayno ako towa magparaoy da- magbaotismo sa sapa para iya pakilalaen sa mga taga Israil. 32 Laki Howan ba magsistigo amba, Naay akitan da Ispirito Banal maglayangan ibat sa langit makay ag sai ka korkoro, da- mamataw:wa sa konin. 33 Iya nawed naay kilala gidte ag monaan, ngani da Diyos ag pomaidaw sa naay para ako magbaotismo sa sapa ba iya da somabi sa naay amba, Komo batay akitan da Ispirito Banal batay lomayangan da- mamataw sa sai ka iraya-iya da batay magbaotismo sa Ispirito Banal. 34 Naba ba naay akitan da- naay nagsistigohan amba iya da Onga Diyos. 35 Maraw sai:yakay ka aldaw, sata:akay din laki Howan anggat da darwa sa konin mga nagtod-an. 36 Konin akitan laki Hisos magdalan sata da- konin sinabi, Tiya da Topa te Diyos! 37 Akarngeyan ag darwa ka nagtod-an da konin nagsabi naba da sidawa ba tomongroy sa laki Hisos. 38 Laki Hisos ba mamaliwi. Maraw konin akitan sidawa magtongroy sa konin ba konin tinanong amba, Nakay da kandawa nagsarak? Sidawa tembag amba, Rabi, kawo saan magpamataw? (Da alabet sabiyen Rabi ba Tagatodo). 39 Amba laki Hisos, Apora kandawa da- ban-awan. Sidawa anggat da- akitan da konin pamatawan, da- sidawa sata:ani ag aldaw naba. Badya:a giraapon. 40 Da sai sa sidawa karngey sa sabi laki Howan ba laki Anris arian laki Simon Pidro. 41 Agad konin asbokan da konin kakaan, da- sinabi sa konin amba, Kidawa asbokan da Misiyas (da alabet sabiyen ba Kiristo, ag Tagaribri pinangako Diyos). 42 Iya ba pinaanggat laki Anris sa laki Hisos. Iya ba binan-awan laki Hisos da konin sinabi amba, Kawo ba laki Simon. Da kom apang ba nag-awit din Howan. Da batay ginawa ngaran sa komo ba Sipas. 43 Maraw omaga:akay da pakana laki Hisos ba paraoy sa Galiliya. Konin akitan laki Pilipi da- sinabi sa konin amba, Kawo tomongroy sa naay. 44 Laki Pilipi ba taga Bitsaida, ag goraan din kolaki Pidro da- Anris. 45 Akitan laki Pilipi laki Tanail da sinabi sa konin amba, Yamen asbokan laki Hisos taga Nasarit, ag onga laki Hosi. Iya da nagtodyo sa Ribro laki Moysis ag sinoratan Bilin, da- iya din da nagtodyo ag mga tagabarita ibat sa Diyos. 46 Magtanong laki Tanail amba, Abaya dia maki omibat piya sa Nasarit? Tembag laki Pilipi, Kawo towa! Komo ban-awan! 47 Maraw akitan laki Hisos laki Tanail ba pabali sa konin ba konin sinabi amba, Tiya da sai ka bagay gidte awiten Israil, nawed tang mandaya. 48 Iya tinanong laki Tanail, Omaning ako komo:wa akilala? Laki Hisos ba tembag amba, Bayo kawo pinaparaoy laki Pilipi ba kawo naay akitan sa poon igos. 49 Amba laki Tanail, Tagatodo, kawo nga da Onga Diyos! Kawo nga da Hadi Israil! 50 Sinabi laki Hisos amba, Mag-isarig dia kawo panawen sa naay sinabi amba kawo naay akitan sa poon igos? Kawo batay kaban-aw mga nakayman labi dapo makapangyadihan saba! 51 Da- konin dapo sinabi sa laki Tanail, Naay gidte nagsabi sa koyo, Koyo batay akitan boka da soksokowan da- da mga anghil Diyos ba magyakbang da- maglopot sa Onga Iraya.
1 Maraw kalawey darwa ka aldaw, maki kasayahan sa kasalan sa goraan Kana sa porobinsiya Galiliya. Sata da adang laki Hisos. 2 Pinaparaoy din sata laki Hisos da- konin mga nagtod-an. 3 Maraw naobos:sani da inemen kalibed ba sinabi adang laki Hisos sa konin amba, Kora naobosan:nani inemen kalibed. 4 Amba laki Hisos, Anday, ako ayaw komo agsakwatan. Nawed dapo rateng da odas para akilalaan mga iraya no tawa gidte ako. 5 Sinabi konin adang sa mga magpamanawen amba, Koyo panawenen da nakayman konin batay sinabi sa koyo. 6 Sata ba maki anim lakol ka tapayan yadi sa bato. Naba da tapayan naggamit mga Diw sa kora maglinis toltol sa kora maniho. Da tayma sai ba laman dalwampo anggan tatlompo ka tabayay. 7 Sinabi laki Hisos sa mga magpamanawen amba, Koyo pakapnoon sapa da mga tapayan. da kora nga pinakapno anggan nawed ngani maglabis. 8 Maraw kalbas ba konin sinabi, Koyo somarok:kani da koyo babaen sa magpamahala pag handaan. Iya kora nga binabaan. 9 Konin nga tinikman da sapa nagawa inemen kalibed. Amatangan mga somarok no saan galing naba, ngani nawed amatangan ag magpamahala kaya konin pinatwagan da lalaki kinasal 10 da- pinodi amba, Da layen monaan nahayin ba ag masadap gidte ka inemen da- maoson:na ininem mga iraya ba bayo naghayin da kasagadan ngani. Ngani koyo kay pinaori da masadap gidte ka inemen. 11 Sata sa Kana, Galiliya, ba pinanawen laki Hisos da monaan ka tandaanan naba. Sa makay naba ba konin Pinaban-Aw da konin kapangyadihan da- misarig sa konin da konin mga nagtod-an. 12 Maraw kadalan naba laki Hisos ba domolong sa Kapirnaom kaanggat da konin adang da- mga arian da- mga nagtod-an. Da- kora mamataw sata nawed maoson ka aldaw. 13 Bali:yani da mga aldaw kasayahan Paskwa mga Diw, kaya laki Hisos ba tomokad sa Hirosalim. 14 Konin akitan sa ayanmanan lakol ka balay Diyos da mga magpabili mga baka da- mga topa da- mga kalapati, da- da mga magpamalit kwarta magtongka sata. 15 Iya gomawa sai ka pamogbog lobid da- konin binolyaw palwas da mga baka da- topa. Konin sinambolat da mga kwarta mga magpamalit da- nagpamalombog da kora mga palagyanan. 16 Konin binilin sa mga magpabili kalapati amba, Koyo alsen towa da mga naba! Ayaw koyo gaw-en pamiliyan da balay naay Apang! 17 Aremreman konin mga nagtod-an da sinabi sa Banal ka Kasoratan amba, Naay Diyos, da naay gidte alapet sa komo balay ba makay apoy magsikrab sa naay poso. Naba:a ngani. 18 Panawen naba iya tinanong mga poon mga Diw amba, Nakay ka tandaanan da komo batay apaban-aw sa yamen para apatonayan kawo abaya gomawa makay naba? 19 Laki Hisos ba tembag amba, Koyo ngani gerasen da balay Diyos tiya da- naay:yakay batay ginawa sa tatlo ngani ka aldaw. 20 Sinabi ag mga Diw amba, Apatnapo da- anim ka dag-on pinanawen da balay Diyos tiya da- komo kono batay:yakay pinanawen sa tatlo ngani ka aldaw? 21 Ngani da balay Diyos nagtodyo laki Hisos ba konin lawas. 22 Kaya maraw iya nabiyag:gakay ba aremreman konin mga nagtod-an da konin sinabi naba da- kora maniwala sa Banal ka Kasoratan da- sa mga sinabi laki Hisos. 23 Ag mga aldaw kasayahan Paskwa ba laki Hisos ba sa Hirosalim. Sa odas naba ba maoson da misarig sa konin maraw kora akitan da mga tandaanan konin pinanawen. 24 Ngani laki Hisos ba nawed komatiwala konin sadiri sa kora, panawen konin gidte kilala kora boo. 25 Nawed:da kailangan maki dapo magtokawanan sa konin para sa tawa man, panawen konin:na amatangan da remrem boo iraya.
1 Maki sai ka poon mga Diw da ngaran ba Kodimo. Iya ba sai ka Parisiyo. 2 Sai ka madlem iya ba paraoy sa laki Hisos da magsabi sa konin amba, Tagatodo, yamen amatangan kawo ba sai ka tagatodo ibat sa Diyos, panawen wala kapamanawen tiya pag mga tandaanan komo nagpanawen no nawed ba ag sa konin da Diyos. 3 Laki Hisos ba tembag, Naay gidte nagsabi sa komo, No nawed da sai ka iraya ba inonga:akay ba nawed iya batay naghadian Diyos. 4 Tinanong laki Kodimo amba, Omaning batay aonga:akay da sai ka iraya no koyay:yani? Nawed gidte abaya kasled:dakay sa boyon kon adang para aonga:akay! 5 Amba laki Hisos, Naay gidte nagsabi sa komo, No nawed sa sapa da- sa Ispirito Banal inonga ag iraya ba iya nawed abaya onga Diyos. 6 Da inonga iraya ba iraya ngani- da- da inonga Ispirito Banal ba ispirito ngani-. 7 Kawo ayaw magtaka sa naay sinabi sa komo amba, Kailangan koyo ba inonga:akay. 8 Magramoymoy da koaya kayno saan da alabet da- koyo akarngeyan da bagorbor naba, ngani nawed koyo amatangan no saan mag-ibat da- no saan magparaoy. Amba kay din da tayma inonga Ispirito Banal. 9 Tinanong laki Kodimo amba, Omaning batay apangyadi naba? 10 Laki Hisos ba tembag, Kawo ba kilala tagatodo sa Israil ngani nawed kay komo amatangan da mga nakayman naba! 11 Naay gidte nagsabi sa komo, Da yamen amatangan da yamen nagsabi, da- da yamen akitan da yamen nagpatonayan, ngani nawed kay koyo nagtabang da yamen nagsabi. 12 No nawed koyo nagpaniwalaan da naay nagsabi sa mga nakayman sa paranawan tiya ba omaning koyo batay apaniwalaan no da naay batay sinabi ba mga nakayman ibat sa Diyos? 13 Wala somalbon sa soksokowan no nawed ba ag lompot ibat sa soksokowan-wala Roma no nawed ba da Onga Iraya. 14 Da- no omaning pinataas sa kayo laki Moysis da otan ag konin pinanawen sata sa poro nawed apirmihan iraya, amba kay din da Onga Iraya ba kailangan pataasen, 15 para da tawa man mag-isarig sa konin ba kamaki biyag gidte wala arasan. 16 Amba:a ngani- da palayaw Diyos sa paranawan, kaya konin nga tinaboy konin sai ngani ka onga para da iya mag-isarig sa konin ba nawed batay natay no nawed ba kamaki biyag gidte wala arasan. 17 Panawen pinaidaw Diyos sa paranawan da konin Onga, nawed para hosgahan da mga sa paranawan no nawed ba para kora ba konin ribriyen. 18 Nawed naghosgahan da iya mag-isarig sa Onga Diyos, ngani hinosgahan:nani da iya nawed mag-isarig sa konin, panawen iya ba nawed mag-isarig sa sai ngani ka Onga Diyos. 19 Kora ba hinosgahan panawen paraoy towa sa paranawan da rawa ngani da mga iraya ba alabet sa kadeleman da- dayo kay sa rawa, panawen daet da kora nagpanawen. 20 Da iya magpamanawen daet ba dayo sa rawa da- nawed magpabali saba para nawed nabandira da konin mga pinanawen. 21 Ngani da iya magpamiyag sa kataldengan ba magpabali sa rawa para nabandira:ani da konin mga nagpanawen ba ibat sa iya maki kasaiyan sa Diyos. Naba:a ngani. 22 Maraw kalawey naba laki Hisos da- konin mga nagtod-an ba paraoy sa porobinsiya Hodiya. Sata iya mamataw kora kaanggat nawed naw maagot ka odas da- magbaotismo. 23 Laki Howan ba magbaotismo kay din sa Inon bali te sa Salim, panawen sata da maoson sapa. Magpamparaoy sa konin da mga iraya da- magpabaotismo. 24 Ag odas naba ba nawed dapo napiriso laki Howan. 25 Da kalaati mga nagtod-an laki Howan da- da sai ka Diw ba magdibatihan para sa kaogalian mga Diw sa maglinis. 26 Kaya kora paraoy sa laki Howan da- sinabi sa konin amba, Tagatodo, ag lalaki nata komo kaanggat sa karipay salog Hordan, ag komo nagpatonayan, ba magbaotismo din da- magparaoy sa konin da boo! 27 Laki Howan ba tembag amba, Wala batay atabang da iraya no nawed ba iya ba pinakan Diyos. 28 Koyo:wa din da sistigo pag naay sinabi amba, Nawed ako da Kiristo; ako ba pinaidaw ngani sa konin paonaan. 29 Da babayi batay kinasal ba para sa lalaki batay kinasal. Sata da abyan ag lalaki batay kinasal da- magpakarngey. Iya angasan gidte no karngey tokawanan ag lalaki batay kinasal. Amba kay din ako ba angasan gidte mona. 30 Kailangan iya ba pinahalagahan da- ako kay ba pinaababa. 31 Da ibat sa soksokowan ba makapangyadihan sa boo. Da ibat sa lopa ba taga lopa ngani- da iya magtokawanan para sa mga nakayman sa lopa. Da ibat sa soksokowan ba makapangyadihan sa boo. 32 Konin nagsistigohan da konin akitan da- akarngeyan, ngani wala maniwala sa konin sistigo. 33 Ngani da iya magpaniwala sa konin sistigo ba magpatonay amba totoo da nagsabi Diyos. 34 Da pinaidaw Diyos ba magpangadar tokawanan Diyos panawen nagtaboy Diyos sa konin da konin Ispirito anggan. 35 Da Onga Diyos ba nagpalayaw kon Apang da- iya ba konin nagpamahala sa boo nakayman. 36 Da iya mag-isarig sa Onga ba maki biyag gidte wala arasan; ngani da etean kay sa Onga ba nawed batay maki biyag gidte no nawed ba batay gidte mamirmi sa konin da kabaisan Diyos.
1 Nabaritaan mga Parisiyo maoson dapo da naranggot da nabaotismohan laki Hisos sa laki Howan kay. 2 Ngani da totoo ba nawed laki Hisos da bomaotismo no nawed ba ag konin mga nagtod-an. 3 Kaya maraw naba ba amatangan laki Hisos ba iya omalis sa Hodiya paraoy:yakay sa Galiliya. 4 Kailangan iya domalan sa porobinsiya Samariya. 5 Iya rateng sa sai ka goraan Samariya ag nag-awit Sikar, bali te sa agayen tinaboy laki Hakob sa kon onga laki Hosi ag tangona dapo. 6 Sata da bal-on tangona laki Hakob. Laki Hisos ba tomongka sa tebteb naba, panawen iya ba rogso:ani sa magkadangan. Halos tenga:ani aldaw. 7 Rateng da sai ka babayi taga Samariya para omasoy. Sinabi sa konin laki Hisos amba, Ako kay komo painemen! 8 Wala saba da konin mga nagtod-an panawen kora ba paraoy sa goraan para bomili pamangnen. 9 Sinabi sa konin ag babayi, Kaytang kawo magpainem sa naay? Kawo ba Diw da- ako kay ba taga Samariya. Panawen da mga Diw ba wala pakiaram sa mga taga Samariya. 10 Laki Hisos ba tembag, No komo ngani amatangan da nagtaboy Diyos da no tawa da mag-ay-ay sa komo batay ininem, kawo ba batay omay-ay sa konin, da- kawo kay ba konin batay pinakan sapa magtaboy biyag gidte. 11 Amba da babayi, Koyay, alalem da bal-on tiya da- kawo ba wala kay panarok. Saan kawo batay gomaro sapa magtaboy biyag gidte? 12 Makapangyadihan dapo dia kawo sa tamo pangapoan laki Hakob ag tomaboy ag bal-on tiya? Iya da- konin mga onga da- konin din mga hayop ba minem towa. 13 Laki Hisos ba tembag, Da mag-inem ag sapa tiya ba batay:yakay makainem, 14 ngani da kasai minem ag sapa naay batay tinaboy ba nawed:da tay makainem kaagot man. Naba ba batay makay sai ka bokalan sa konin magbokbokal da- batay magtaboy sa konin biyag gidte wala arasan. 15 Sinabi ag babayi, Koyay, pakanen kay ako ag sapa komo nagsabi, para ako nawed:da makainem kayno towa paraoy para omasoy. 16 Amba laki Hisos, Moli:a kawo, komo paanggaten towa da komo koyay. 17 Amba da babayi, Ako ba wala koyay. Tembag laki Hisos, Totoo da komo sinabi kawo wala koyay! 18 Panawen lima:ani da komo sawa da da komo nagpaanggat mona ba nawed amba komo koyay. Totoo da komo sinabi. 19 Sinabi ag babayi amba, Koyay, naay amatangan sa komo sabi kawo ba sai ka tagabarita ibat sa Diyos. 20 Yamen mga pangapoan ba sa bogsor tiya kora magsamba sa Diyos ngani koyo kay mga Diw nagsabi amba, Sa Hirosalim ngani abaya sambahen da Diyos. 21 Laki Hisos ba tembag sa konin amba, Inay, kawo maniwala sa naay, magrateng:nga da odas koyo batay sinamba tamo Apang, nawed sa bogsor tiya kayno sa Hirosalim. 22 Nawed koyo akilalaan da koyo nagsamba ngani yamen kilala da yamen nagsamba, panawen da karibriyan pinangako Diyos ba ibat sa mga Diw. 23 Ngani magrateng:nga da odas da- mona:a ngani-, da mga magsamba gayed sa Apang ba batay somamba sa konin sa Ispirito Banal da- sa katotohanan. Panawen tiya da nagsarak Apang sa mga magsamba sa konin. 24 Da Diyos ba Ispirito kaya da mga magsamba sa konin ba kailangan gidte iya ba sambahen sa Ispirito da sa katotohanan. 25 Sinabi ag babayi amba, Naay amatangan batay towa da Kiristo. No iya towa iya da batay mangadar sa tamo boo nakayman. 26 Amba laki Hisos, Ako ag magtokawanan sa komo ba iya:a ngani-! 27 Sa odas din naba ba rateng da konin mga nagtod-an. Kora ba namangha gayed maraw kora akitan laki Hisos ba magtokawanan sa sai ka babayi. Amba man ba kayno sai ba wala magtanong sa konin amba, Nakay da komo alabet sa konin? e amba, Kaytang kawo magtokawanan sa konin? 28 Inogonan ag babayi da konin tabayay, paoli sa goraan da- sinabi sa mga taga sata amba, 29 Apora koyo! Koyo ban-awan da iraya magsabi sa naay ag boo naay:ya pinanawen. Iya:a nga dia da Kiristo, ag Tagaribri pinangako Diyos? 30 Kaya kora lomwas sa goraan da- paraoy sa laki Hisos. 31 Sa odas naba ba da mga nagtod-an ba mag-ateet kay sa laki Hisos amba, Tagatodo, mamangan:na kawo! 32 Ngani laki Hisos ba tembag, Ako maki pamangnen para mangan nawed koyo amatangan. 33 Kaya magpaltanongan da mga nagtod-an amba, Maki dia bomaba pamangnen sa konin? 34 Sinabi sa kora laki Hisos, Da naay pamangnen ba da tepden da kaliyagan ag pomaidaw sa naay da yadien da konin pinapanawen. 35 Nawed ma koyo maki kasabiyan amba, Apat dapo ka bolan ba tag-ani:yani. Ngani naay nagsabi sa koyo, Koyo man-aw piya sa mga agayen: mapola:ani da- abaya:a aniyen. 36 Da mag-ani ba magtabang kabayadan da- magtipon bokar para sa biyag gidte wala arasan. Kaya tanan nagkaasyagan da mag-asik da da mag-ani. 37 Kaya totoo nga da kasabiyan amba, Roma da mag-asik da- Roma kay da mag-ani. 38 Koyo naay:ya sinogo para aniyen da nawed koyo inasik. Mamanawen da Roma, da- koyo da mag-ani sa kora pinaghidapan. 39 Maoson da mga taga Samariya sa goraan naba da misarig sa laki Hisos panawen sa sinabi ag babayi amba, Konin sinabi da boo naay:ya pinanawen. 40 Kaya pabali da mga taga Samariya sa laki Hisos da- kora inaringi amba, Kawo towa dapo te! Da- iya sata darwa ka aldaw. 41 Da- maoson dapo da misarig maraw iya ba akarngeyan, 42 da- kora sinabi sa babayi amba, Yamen mag-isarig mona nawed:dani sa komo sinabi no nawed ba sa yamen akarngeyan sa konin. Yamen:na kilala iya nga da Tagaribri boo mga kairayaan. 43 Maraw kalawey da darwa ka aldaw laki Hisos ba omalis paraoy:yakay sa Galiliya, 44 panawen iya:a din da magsabi amba, Da tagabarita ibat sa Diyos ba naggalang kayno saan poyida ngani sa konin sadiri kalasyon. 45 Maraw iya rateng sa Galiliya, iya ba tinabang gidte piya ag mga taga sata, panawen kora din ba sa Hirosalim ag odas kasayahan Paskwa da- kora akitan da boo konin pinanawen sata. 46 Laki Hisos ba paraoy:yakay sa Kana, Galiliya. Sata konin ginawa inemen kalibed da sapa. Sa Kapirnaom ba maki sai ka atatas ka poon. Maki maskit da konin onga lalaki. 47 Maraw konin abaritaan laki Hisos ba paoli:akay sa Galiliya ibat sa Hodiya ba iya ba konin pinaraoyan. Konin inateet domolong sa Kapirnaom da- papiyaen da konin onga magpanawnaw. 48 Sinabi sa konin laki Hisos amba, Anggan nawed koyo akitan da mga tandaanan da mga kapanggilalas ba nawed dapo koyo mag-isarig sa naay. 49 Ngani sinabi ag poon, Koyay, kita:a dapo bayo natay da naay onga. 50 Laki Hisos ba tembag, Kawo moli:ani. Piya:a da komo onga. Maniwala ngani- ag lalaki sa sinabi laki Hisos da- iya nga ba moli. 51 Sa dalan dapo ba iya ba sinalobong:nga konin mga tagoanggat da- sinabi amba, Piya:ani da komo onga. 52 Kora konin tinanong amba, Nakay da odas iya pomiya? Kora amba, Naapon dapo kalawey tanghali ba iya wala:ani lagnat. 53 Aremreman ag apang amba ag odas din naba da sinabi laki Hisos amba, Piya:ani da komo onga. Kaya iya da- da boo konin mag-anak ba misarig sa laki Hisos. 54 Naba da ikadarwa ka tandaanan konin pinanawen sa Galiliya maraw iya paraoy:yakay sata ibat sa Hodiya.
1 Maraw kadalan:na naba ba rateng da sai:yakay ka kasayahan mga Diw, kaya laki Hisos ba tomokad sa goraan lakol Hirosalim. 2 Sata sa bali Sakbawan mga Topa ba maki linaw lakol no nag-awit sa tokawanan Hibriyo ba Bitisda. Sata maki lima ka makay pasirongan. 3 Sata da kaosonan maki maskit-mga raprap, mga tiklay, da- mga lompo. Kora nagpanyaan komiskisaw da sapa, 4 panawen maki odas maglopot sa linaw da sai ka anghil Panginoon da- nagpakiskisaw da sapa. Da monaan lompot no komiskisaw:wa da sapa ba pomiya:ani kayno nakay da konin maskit. 5 Sata ba maki sai ka lalaki tatlompo:a da- walo ka dag-on maki maskit. 6 Akitan laki Hisos iya sata magtilagay. Konin amatangan amba maagot:ta maki maskit ag lalaki tiya. Kaya iya ba tinanong laki Hisos amba, Kawo alabet pomiya? 7 Tembag da maki maskit amba, Koyay, wala magpalpot sa naay no nakiskisaw:wa da sapa. Ako magparaoy dapo disin sata ba maki:ya monaan sa naay. 8 Sinabi sa konin laki Hisos, Kawo patindeg, komo babaen da komo kalkanan da kawo mangadang. 9 Agad pomiya ag lalaki, binaba konin kalkanan da mangadang. Naba ba Aldaw Magpahinga, 10 kaya sinabi mga poon mga Diw sa lalaki pinapiya amba, Mona ba Aldaw Magpahinga. Nag-ayawan tamo Bilin da babaen da komo kalkanan. 11 Ngani iya tembag, Da pomapiya sa naay da somabi amba naay babaen da naay kalkanan da- ako mangadang. 12 da iya ba kora tinanong, Tawa gidte ag iraya naba ag somabi sa komo amba babaen da komo kalkanan da- kawo mangadang? 13 Ngani nawed nakilala ag lalaki da pomapiya sa konin, panawen maoson gidte da mga iraya sata da- laki Hisos kay ba wala:a sata. 14 Maraw kalbas, ag lalaki ba akitan laki Hisos sa balay Diyos, da iya ba sinabiyan amba, Kawo gidte pakarngey! Kawo piya:ani mona! Kawo ayaw:wa mamanawen daet kaaram maki dapo mangyadi sa komo lalo:a daet. 15 Omalis da lalaki da- sinabi sa mga poon mga Diw amba, Laki Hisos da pomapiya sa naay. 16 Kaya ibat saba laki Hisos ba nagpahidapan mga poon mga Diw, panawen iya ba magpapiya sa Aldaw Magpahinga. 17 Kaya sinabi sa kora laki Hisos amba, Anggan mona ba da naay Apang ba toloy:ya magpamanawen ag konin kailangan panawenen, da amba din ako. 18 Panawen sa konin sinabi naba ba lalo dapo iya ba alabet kora pabonoon, panawen konin:na winala koyinta da kora maniho para sa Aldaw Magpahinga da- konin dapo nagsabi da Diyos da konin Apang da- sa makay naba, konin nagtepeng sa Diyos da konin sadiri. 19 Kaya sinabi sa kora laki Hisos amba, Naay gidte nagsabi sa koyo, Ako ag Onga Diyos ba wala apanawen sa naay sadiri ngani. Da naay ngani apanawen ba ag naay akitan nagpanawen naay Apang. Da nagpanawen naay Apang ba naba din da naay nagpanawen. 20 Panawen ako ag Onga ba nagpalayaw naay Apang kaya nagpaban-aw sa naay da boo konin nagpanawen. Da- lalo dapo makapangyadihan sa mga naba da konin batay Pinaban-Aw sa naay, para koyo boo ba nangamangha gidte. 21 No omaning nagbiyag:gakay naay Apang da mga nangatay da- magtaboy biyag gidte sa kora, amba kay din ako, ag konin Onga ba magtaboy din biyag gidte sa tawa man naay alabet. 22 Da naay Apang ba nawed maghosga sa tawa man no nawed ba ako, ag konin Onga, da tinaboyan boo kapangyadihan maghosga 23 para ako ba galangen boo, makay din ag kora maggalang sa naay Apang. Da iya nawed maggalang sa Onga ba nawed din maggalang sa Apang ag pomaidaw sa Onga. 24 Naay gidte nagsabi sa koyo, Da iya agpakarngey sa naay tokawanan da- mag-isarig sa pomaidaw sa naay ba maki biyag gidte wala arasan. Iya nawed batay pinadosahan no nawed ba makay pinasepat:tani ibat sa katayan anggan sa biyag. 25 Naay gidte nagsabi sa koyo, Magrateng da odas, da- mona:a ngani-, batay akarngeyan ag mga nangatay da tokawanan ag Onga Diyos da da makarngey da- maniwala sa konin ba batay nangabiyag. 26 No omaning da naay Apang da maki kapangyadihan magtaboy biyag gidte, amba kay din ako, ag konin Onga, ba konin pinakan kapangyadihan magtaboy biyag. 27 Ako pinakan din kapangyadihan homosga panawen ako da Onga Iraya. 28 Koyo ayaw magtaka sa naay batay sinabi, panawen batay:ya rateng da odas da boo nangatay:yani ba batay karngey naay tokawawan, 29 da- kora batay:yakay nangabiyag da- kora batay manlowas sa kora limbengan. Da iya mamanawen piya ba batay pinakan biyag gidte wala arasan da da iya kay mamanawen daet ba batay pinadosahan. 30 Ako ba wala gidte apanawen sa naay sadiri kapangyadihan. Ako ba maghosga toltol ngani sa sabi naay Apang, kaya mataldeng da naay hosga. Da naay nagtoltol ba nawed ag naay sadiri alabet no nawed ba da alabet ag pomaidaw sa naay da naay nagtoltol. 31 No ako ngani da magsistigo para sa naay ba nawed abaya tabangen da naay sistigo, 32 ngani maki Roma magsistigo para sa naay da- naay amatangan totoo da konin nagsabi. 33 Koyo pinaidaw sa laki Howan da koyo mga sogo da- iya ba somistigo para sa katotohanan. 34 Nawed:da kailangan da sistigo iraya; naba ba naay ngani nagsabi para koyo disin ba naribri. 35 Laki Howan ba makay maigang ka solo- magrawa, da- koyo ba asyagan sa konin rawa nawed te maagot. 36 Ngani maki sistigo para sa naay mahalaga dapo sa sistigo kay laki Howan: naba da mga nagpapanawen sa naay naay Apang, ag naay timped. Da mga naba da magpatonay amba ako ba pinaidaw naay Apang. 37 Da naay Apang ag pomaidaw sa naay ba magsistigo din para sa naay. Nawed tang koyo arngeyan da iya agtokawanan da- nawed din koyo akitan da konin hidsoda. 38 Nawed koyo nagpapirmi sa koyo poso da konin tokawanan panawen koyo nawed maniwala sa naay, ag konin pinaidaw. 39 Koyo magsarak sa mga Banal ka Kasoratan, panawen koyo magremrem amba sata koyo batay asbokan da biyag gidte wala arasan. Da mga naba da magsistigo para sa naay 40 ngani koyo dayo kay pabali sa naay para koyo kamaki biyag gidte. 41 Ako ba nawed maghangad ako nagpodi mga iraya. 42 Ngani koyo naay kilala da- naay amatangan koyo nawed nagpalayaw da Diyos sa koyo poso. 43 Ako ba nagpaparaoy gidte towa naay Apang ngani koyo ba dayo tomabang sa naay. Ngani no maki Roma paraoy towa sa konin ngani sadiri kapangyadihan ba iya kay da koyo batay tinabang. 44 Omaning koyo batay kapaniwala sa naay no da koyo naghangad ba da magpodiyan sa sai-sai da- nawed koyo naghangad da papodi ibat sa sai ngani ka Diyos? 45 Ayaw koyo agremremen amba ako da batay magsombong sa Apang laban sa koyo; laki Moysis, ag koyo nag-asahan, iya da magsombong laban sa koyo. 46 No koyo gidte pinaniwalaan laki Moysis ba koyo batay:ya din disin maniwala sa naay, panawen iya somorat para sa naay. 47 Ngani no nawed koyo pinaniwalaan da konin mga sinorat, omaning koyo batay apaniwalaan da naay mga nagsabi?
1 Maraw kalawey:ya mga aldaw, kora Hisos ba omipay sa karipay dagat- dagatan Galiliya ag nag-awit din dagat-dagatan Tibiriyas. 2 Iya nag-anggatan kaosonan gidte iraya panawen kora akitan da mga kamangha-mangha konin pinanawen sa iya pomapiya sa mga maki maskit. 3 Laki Hisos ba tomokad sa latayan kaanggat da konin mga nagtod-an, da- manongka sata. 4 Bali:ya da mga aldaw kasayahan Paskwa mga Diw. 5 Laki Hisos ba man-aw. Konin akitan da kaosonan gidte iraya naba:ani. Konin tinanong laki Pilipi amba, Saan tamo batay bomili pamangnen para kapamangan da boo mga iraya tiya? 6 Konin sinabi naba para porbahan laki Pilipi, panawen amatangan:na laki Hisos da konin batay pinanawen. 7 Laki Pilipi ba tembag, Kayno:wa darwa ka daan ka dinaryo ba nawed batay sibay pabiliyen tinapay para kapamangan kay te da tayma sai. 8 Sinabi laki Anris, ag sai sa konin mga nagtod-an da- arian laki Simon Pidro amba, 9 Maki towa sai ka onga lalaki maki nagbaba lima ka tinapay sibada da- darwa ka isda. Ngani kaomaning te tiya sa kaamba kaoson ka iraya! 10 Laki Hisos amba, Kora koyo patongkaen. Gamasenan ag poro naba. Manongka kora boo-Mga lima ka ribo da mga lalaki. 11 Ginaro laki Hisos da tinapay da maraw kapasalamat:tani sa Diyos ba pinangeray sa mga iraya. Amba din da konin pinanawen sa isda. Namakan da boo anggan kora alabet. 12 da maraw kora nangaabsoyan:nani ba konin sinabi sa konin mga nagtod-an amba, Koyo tiponon da mga natra para nawed nasayang. 13 Kaya kora tinipon da natra sa mga namisang-misang ibat sa lima ka tinapay sibada da- kora kapno dapo labindarwa ka alat. 14 Maraw akitan mga iraya da tandaanan naba pinanawen laki Hisos ba kora sinabi amba, Tiya:a ngani- da Tagabarita amba batay towa sa paranawan! 15 Amatangan laki Hisos batay pabali da mga iraya da- iya batay gidte limpod para gaw-en hadi, kaya omalis:sakay iya ngani paraoy sa kalatayanan. 16 Maraw masoram-soram:mani, da mga nagtod-an laki Hisos ba paraoy sa tebteb dagat-dagatan 17 da- somakay sa bangka paipay sa goraan Kapirnaom. Madelem:ma ba laki Hisos ba wala dapo. 18 Nagkamaeyat:ta da koaya da lakol:la da pad alon. 19 Maraw kora agpanagwan darwa ka patpa, kora akitan laki Hisos agkadangan sa ngaway sapa, pabali sa bangka ngani nawed kora akilalaan. Kaya kora ba mangirabot gidte. 20 Ngani konin sinabi sa kora, Koyo ayaw aliman! Tiya ba ako! 21 Angasan kora pinasakay sa bangka laki Hisos, da kamalay te ba pomondo:wa da bangka sa kora nagparaoyan. 22 Maraw omaga:akay, sata dapo da kaosonan mga iraya sa poro kora mamangan. Kora aremreman sai ngani ka bangka sata. Kora din amatangan laki Hisos ba nawed kaanggat sa konin mga nagtod-an sa bangka, panawen kora ngani da somakay sa bangka da- omalis. 23 Rateng kay da Roma ka bangka ibat sa goraan Tibiriyas da- pomondo sa poro bali sa kora mamangan tinapay maraw kapasalamat da Panginoon. 24 Maraw akitan ag kaosonan iraya laki Hisos ba wala:a sata, kayno ag konin mga nagtod-an, ba kora somakay sa mga bangka sata da- paraoy din sa Kapirnaom para saraken laki Hisos. 25 Kora akitan laki Hisos sa karipay dagat-dagatan da- kora tinanong amba, Tagatodo, kawo kaagot dapo towa? 26 Laki Hisos ba tembag, Naay gidte nagsabi sa koyo, Ako koyo nagsarak nawed panawen sa mga tandaanan koyo akitan no nawed ba panawen sa koyo kapamangan tinapay da- nangaabsoyan. 27 Koyo mamanawen nawed para maki pamangnen nagkapanis, no nawed ba para maki pamangnen mag-agot, ag magtaboy biyag gidte wala arasan. Naba da batay tinaboy sa koyo ag Onga Iraya, panawen iya da pinatonayan Diyos Apang. 28 Kaya iya kora tinanong, Nakay-nakay da yamen kailangan panawenen para yamen atped da kaliyagan Diyos? 29 Amba laki Hisos, Tiya da alabet Diyos koyo panawenen: Koyo manarig sa konin pinaidaw. 30 Kora amba, Nakay dapo ka tandaanan komo batay Pinaban-Aw sa yamen para yamen misarig sa komo? Nakay da komo batay pinanawen? 31 Da tamo mga pangapoan ba mamangan pamangnen nag-awit mana sa poro nawed apirmihan iraya toltol sa nasorat sa Banal ka Kasoratan amba, Kora ba konin pinakan pamangnen ibat sa soksokowan. Naba:a ngani. 32 Laki Hisos ba tembag, Naay gidte nagsabi sa koyo, Nawed laki Moysis da tomaboy sa koyo pamangnen ibat sa soksokowan, no nawed ba ag naay Apang. Iya da magtaboy sa koyo ag pamangnen gidte ibat sa soksokowan. 33 Panawen da pamangnen taboy Diyos ba da maglopot ibat sa soksokowan da- magtaboy biyag gidte sa mga kairayaan. 34 Kora amba, Koyay, yamen boo odas komo pakanen ag pamangnen naba. 35 Amba laki Hisos, Ako da pamangnen magtaboy biyag gidte. Da iya magpabali sa naay ba nawed:da batay nabayog da- da iya mag-isarig sa naay ba nawed:da batay makainem kaagot man. 36 Ngani naay sinabi sa koyo kayno ako ba koyo akitan, amba man koyo nawed mag-isarig sa naay. 37 Batay anggat sa naay da boo nagtaboy sa naay naay Apang. Da- nawed gidte naay batay sinikway da iya magpabali sa naay, 38 panawen ako ba lompot ibat sa soksokowan nawed para panawenen da naay kaliyagan no nawed ba da kaliyagan ag pomaidaw sa naay. 39 da tiya da kaliyagan ag pomaidaw sa naay amba, Ayaw naay pabayaan nawala da kayno sai sa konin tinaboy sa naay no nawed ba kora biyagen:nakay sa paoriyan aldaw. 40 Panawen tiya da kaliyagan naay Apang amba, Da boo kaserey da- mag-isarig sa naay ag Onga Diyos ba kamaki biyag gidte wala arasan da- kora ba naay:yakay batay biniyag sa paoriyan aldaw. 41 Da mga Diw ba mag-ompisa agbolong-bolongan laban sa konin panawen konin sinabi amba, Ako da pamangnen lompot ibat sa soksokowan. 42 Kaya kora sinabi amba, Nawed ma tiya laki Hisos ag onga laki Hosi? Tamo kilala da konin apang da- adang. Omaning mona konin asabi amba iya lompot ibat sa soksokowan? 43 Kaya sinabi laki Hisos amba, Koyo empet sa magbolong-bolongan. 44 Wala kapabali sa naay no nawed pinabali ag pomaidaw sa naay-wala Roma no nawed ba ag Apang sa soksokowan. Da- da iya batay pabali sa naay ba naay:yakay batay biniyag sa paoriyan aldaw. 45 Nagkasorat sa ribro sai sa mga tagabarita ibat sa Diyos amba, Kora boo ba batay tindoan Diyos. Naba:a ngani. Kaya da tayma magpakarngey sa naay Apang da- konin tindoan ba pabali sa naay. 46 Nawed naay nagsabi amba maki:ya kaban-aw sa naay Apang, no nawed ako ngani, ag ibat sa naay Apang, da kaban-aw:wani sa konin. 47 Naay gidte nagsabi sa koyo, Da iya mag-isarig sa naay ba maki biyag gidte wala arasan. 48 Ako da pamangnen magtaboy biyag gidte. 49 Da koyo mga pangapoan ba mamangan pamangnen nag-awit mana pag kora ba sa poro nawed apirmihan iraya, amba man kora nangatay. 50 Ngani da iya mamangan tiya pag pamangnen ibat sa soksokowan ba nawed:da batay natay. 51 Ako da pamangnen magtaboy biyag gidte ag lompot ibat sa soksokowan. Batay nabiyag kaagot man da iya magpamangan ag pamangnen tiya. Da- da pamangnen naay batay tinaboy para sa batay kabiyag mga kairayaan ba da naay lawas. 52 Panawen saba ba da mga Diw ba abaisan da- magpaltanongan amba, Omaning batay ataboy sa tamo ag iraya tiya da konin lawas para tamo kainen? 53 Kaya sinabi laki Hisos amba, Naay gidte nagsabi sa koyo, No koyo nawed magpamangan ag lawas Onga Iraya da- nag-inem da konin daya, ba koyo nawed batay kamaki biyag gidte. 54 Da iya magpamangan ag naay lawas da- mag-inem naay daya ba maki biyag gidte wala arasan, da- iya naay:yakay batay biniyag sa paoriyan aldaw. 55 Panawen da naay lawas ba pamangnen gidte da- da naay daya ba inemen gidte. 56 Da iya magkain naay lawas da- mag-inem naay daya ba magpamirmi gidte sa naay da- ako kay ba magpamirmi sa konin. 57 Da naay Apang ag pomaidaw sa naay ba iya da magtaboy biyag, da- ako ba nagkabiyag panawen sa konin. Amba kay din da iya magpamangan sa naay ba batay nabiyag panawen sa naay. 58 Kaya tiya da pamangnen lompot ibat sa soksokowan amba, Da iya magpamangan tiya ba batay nabiyag kaagoton man. Tiya ba nawed makay ag pamangnen namangan tamo mga pangapoan sa poro nawed apirmihan iraya. Kora nangatay kayno kora mamangan naba. 59 Naba ba sinabi laki Hisos ag iya magtodo sa balay pagtiponan mga Diw sa Kapirnaom. 60 Naba ba arngeyan ag mga konin kaanggat da- maoson sa kora da magsabi amba, Naba ba mahidap ka tokawanan! Tawa da batay katabang naba? 61 Amatangan laki Hisos sa konin sadiri amba magpaybolongan da konin mga kaanggat para saba, kaya konin sinabi sa kora amba, Panawen sa mga tokawanan naba ba koyo batay:ya dia awal-an koyo pag-isarig sa naay? 62 Lalo:a dia no da Onga Iraya ba koyo akitan pinasalbon sa konin monaan inibatan? 63 Da magtaboy biyag gidte ba da Ispirito Diyos. Naba ba nawed batay apanawen iraya. Panawen sa mga tokawanan naay sinabi sa koyo ba koyo katabang ag Ispirito ag magtaboy biyag gidte. 64 Ngani maki sa koyo dayo mag-isarig sa naay. Panawen amatangan:na laki Hisos ibat dapo ag monaan no tawa-tawa da nawed mag-isarig sa konin da- no tawa da batay pomaabel sa konin. 65 Konin dapo sinabi amba, Naba da dahilan kaya naay sinabi sa koyo amba, Wala kapabali sa naay no nawed inabaya naay Apang. 66 Ibat saba, maoson sa konin mga kaanggat da paawak da- dayo:a anggat sa konin. 67 Kaya tinanong laki Hisos da labindarwa ka nagtod-an amba, Koyo kay, koyo alabet din dia omalis? 68 Tembag laki Simon Pidro amba, Panginoon, yamen saan batay paraoy? Sa komo da mga tokawanan magtaboy biyag gidte wala arasan. 69 Yamen agpaniwala da yamen nagkapiho kawo da Banal ibat sa Diyos. 70 Laki Hisos ba tembag amba, Nawed ma koyo naay hinidang, koyo ag labindarwa? Ngani da sai sa koyo ba sai ka aponin kadaetan! 71 Da konin nagtodyo ba laki Hodas ag onga laki Simon Iskariyoti. Panawen laki Hodas, kayno iya ba sai sa labindarwa, iya da batay pomaabel sa laki Hisos.
1 Maraw kadalan naba, rinibok laki Hisos da Galiliya; dayo konin ribokon da Hodiya panawen alabet iya ba bonoon mga poon mga Diw sata. 2 Nagkabali:yani da mga aldaw sai:yakay ka kasayahan mga Diw. Sa mga aldaw naba ba kora mamataw sa mga barangas. 3 Kaya sinabi sa laki Hisos konin mga arian amba, Kaytang kawo nawed omalis towa da- paraoy sa Hodiya, para akitan komo mga katongroy da komo mga nagpanawen? 4 No da alabet sai ka iraya ba nakilala ba iya ba nawed magpanawen sa nawed akitan Roma. Ganyang komo nagpanawen da mga nakayman naba ba kawo paban-aw:wani sa boo mga kairayaan. 5 Kayno ag mga arian laki Hisos ba nawed din mag-isarig sa konin. 6 Iya tembag, Nawed dapo naay odas. Ngani sa koyo kay ba kayno nakay pag odas ba abaya. 7 Da mga iraya sa paranawan ba nawed abaya nagkaabaisan sa koyo ngani ako ba kora nagpamaisan, panawen naay layen nagsabi amba daet da kora nagpanawen. 8 Koyo:wa ngani da paraoy sa kasayahan. Ako nawed batay paraoy sa kasayahan panawen nawed dapo naay odas. 9 Maraw nasabi naba ba iya paogon:nani sa Galiliya. 10 Maraw kaalis da konin mga arian magtokad sa kasayahan, laki Hisos ba tomokad din sata nawed anggat sa kaosonan no nawed ba sa nawed akitan mga iraya. 11 Iya ba nagsarak sata mga poon mga Diw. Kora amba, Saan kaya iya? 12 Magbolonganan gidte da kaosonan mga iraya para sa konin. Maki amba, Iya ba piya ka iraya! Maki kay amba, Nawed! Konin naglingo da mga iraya. 13 Ngani wala mangahas magtokawanan sa akarngeyan kaosonan para sa konin, sa aliman sa kora mga poon. 14 Maraw batay:ya kagtengaan kasayahan, laki Hisos ba tomokad da- semled sa lakol ka balay Diyos da mag-ompisa magtodo. 15 Manggilalas gidte da mga poon mga Diw da kora amba, Saan gomaro kadonongan da iraya naba? Iya ba nawed tang tindoan! 16 Laki Hisos ba tembag, Da naay nagtodo ba nawed ibat sa naay sadiri no nawed ba ibat sa Diyos, ag pomaidaw sa naay. 17 Da iya handa gidte panawenen da kaliyagan Diyos ba konin batay amatangan no da naay nagtodo ba ibat sa Diyos no sa naay ngani sadiri. 18 Da iya magtokawanan ibat sa konin ngani sadiri ba alabet iya ba palakolon. Ngani da iya agpamanawen para palakolon da pomaidaw sa konin ba totoo gidte da- nawed magpamosli. 19 Nawed ma tinaboy:ya sa koyo laki Moysis da Bilin? Amba man ba wala kayno sai sa koyo agpamanawen naba. Kaytang kay koyo alabet ako ba pabonoon? 20 Tembag da mga iraya, Kawo mana ba nag-apo daet ka ispirito! Tawa da alabet pomabono sa komo? 21 Laki Hisos tembag amba, Sai ngani ka nakayman da naay pinanawen ba koyo boo ba manggilalas:sani. 22 Tinaboy sa koyo laki Moysis da bilin para sa maglong-oy da- naba ba koyo nagpanawen kayno Aldaw Magpahinga. (Da katotohanan naba ba nawed gidte ibat sa laki Moysis naba no nawed ba ibat sa konin dapo pangapoan.) 23 No naglong-oy da sai ka polahan lalaki kayno sa Aldaw Magpahinga para tepden da Bilin tinaboy sa laki Moysis, kaytang koyo nagkaabaisan sa naay sa ako magpapiya sa sai ka iraya sa Aldaw Magpahinga? 24 Ayaw koyo homosga toltol sa nagkaakitan ngani, no nawed ba toltol sa totoo gidte. 25 Kaya sinabi ag kalaati mga taga Hirosalim amba, Nawed ma tiya ag iraya kora alabet pabonoon? 26 Koyo ban-awan! Iya ba magtodo sa akarngeyan gidte boo ngani kora wala nagsabi laban sa konin! Amatangan:na gidte dia tamo mga poon amba iya da Kiristo, ag Tagaribri pinangako Diyos? 27 Ngani ag iraya naba ba tamo amatangan no taga saan iya, ngani no batay rateng da Kiristo ba wala batay kamatang no saan omibat! 28 Laki Hisos ba magtodo sa lakol ka balay Diyos da- iya magtokawanan maeyat amba, Ako dia ba koyo kilala? Koyo dia amatangan no ako ba taga saan? Ako nawed paraoy towa sa naay sadiri ngani. Da pomaidaw sa naay ba asarigan, ngani iya ba nawed koyo kilala gidte. 29 Iya naay kilala panawen ako ba ibat sa konin da iya da pomaidaw sa naay. 30 Kaya kora magporba iya ba paabelen. Ngani wala kabel sa konin panawen nawed dapo konin odas. 31 Kayno amba, maoson sa kaosonan mga iraya da misarig sa konin. Kora amba, No batay paraoy towa da Kiristo ba iya dia batay kapanawen tandaanan makapangyadihan dapo sa mga pinanawen ag iraya tiya? 32 Akarngeyan din kalaati mga Parisiyo da bolong-bolongan mga iraya para sa laki Hisos. Kora da- da mga koyay magpamanawen sa balay Diyos ba pomaidaw mga tagabantay sa balay Diyos para abelen laki Hisos. 33 Kaya konin sinabi amba, Ako batay dapo koyo kaanggat sa nawed maagot ka odas, da- ako batay:yakay paoli sa pomaidaw sa naay. 34 Ako koyo batay sinarak ngani ako nawed koyo batay akitan, panawen koyo nawed batay kaparaoy sa naay batay pinaraoyan. 35 Mamagpaltanongan da mga poon mga Diw amba, Saan kaya batay paraoy da iraya naba, da- nawed tamo batay akitan? Batay dia sata sa mga Diw manambolat sa mga goraan mga Nawed Diw para magtodo din sa mga Nawed Diw? 36 Nakay dia da alabet sabiyen ag konin nagsabi amba, Ako koyo batay sinarak da ako nawed batay koyo akitan, da amba, Koyo nawed kaparaoy sa naay batay pinaraoyan? 37 Maraw paoriyan aldaw kasayahan, ag mahalaga sa boo, laki Hisos ba patindeg da- magtokawanan maeyat amba, Da iya makainem ba pabali sa naay da- minem. 38 Toltol sa nasorat sa Banal ka Kasoratan amba, Da iya mag-isarig sa naay ba da mga bokalan sapa magtaboy biyag gidte ba batay bomokbokal sa konin poso. 39 Da konin nagtodyo ba da Ispirito Banal batay tinabang mga mag-isarig sa konin. Ag odas naba nawed dapo nagkataboy da Ispirito Banal, panawen nawed dapo pinalakol laki Hisos. 40 Sa mga karngey sa konin ba maki magsabi amba, Iya:a gidte ngani- da Tagabarita tamo nagpanyaan! 41 Amba da Roma, Iya nga da Kiristo! Ngani tembag kay da Roma, Abaya dia omibat sa Galiliya da Kiristo? Nawed gidte! 42 Nawed ma nagkasorat sa Banal ka Kasoratan amba da Kiristo ba batay omibat sa andana hadi Dabid, da- batay inonga sa Bitlihim, ag goraan te inibatan hadi Dabid? 43 Kaya naeray-eray da remrem mga iraya para sa konin. 44 Da alabet kalaati ba iya paabelen ngani wala kay kasonggab sa konin. 45 Da mga tagabantay sa balay Diyos ba paoli:akay sa mga poon magpamanawen para sa Diyos da- sa mga Parisiyo, da- kora tinanong amba, Kaytang iya nawed koyo pinaanggat towa? 46 Kora tembag amba, Wala dapo iraya magtokawanan makay iya! 47 Amba da mga Parisiyo, Koyo dia ba nadaya:a din ag iraya naba? 48 Maki ma mga poon e mga Parisiyo magpaniwala sa konin? 49 Mga iraya ngani wala amatangan sa Bilin tinaboy sa laki Moysis da agpaniwala sa konin-kora ba sa galem sompa Diyos! 50 Da sai din sa kora ba laki Nikodimo, ag pomaraoy sa laki Hisos ag monaan. Kora konin tinanong amba, 51 Nawed ma inayawan tamo Bilin da hosgahen da sai ka iraya no nawed dapo tinanong da- inaram no nakay da konin pinanawen? 52 Kora tembag amba, Kawo dia ba taga Galiliya din? Komo saraken sa Banal ka Kasoratan da- komo batay akitan wala tagabarita mag-ibat sa Galiliya.
2 Kaomagahan gidte ba iya sata:akay sa lakol ka balay Diyos. Pabali sa konin da boo kairayaan, kaya iya tomongka da kora ba tindoan. 3 Pinaanggat sa konin mga kamatangen sa Bilin da- mga Parisiyo da sai ka babayi abel sa magpangalonya. Iya kora pinatindeg sa kora tenga, 4 da- sinabi sa laki Hisos amba, Tagatodo, ag babayi tiya ba abel sa magpangalonya. 5 Sa tamo Bilin ba binilin laki Moysis sa tamo amba, Batowen da babayi makay naba anggan anggan iya natay natay. Omaning da komo batay asabi para sa konin? 6 Amba da kora tanong para iya porbahan para kora ba maki asombong laban sa konin. Ngani laki Hisos ba misongo da- somorat konin solo sa lopa. 7 Maraw kora ba toloy:ya magtanong sa konin ba kora ba konin binan-awan da- sinabi amba, Da tawa man sa koyo wala kadaetan ba iya da monaan bomato sa konin. 8 Da- iya misongo:wakay da- somorat sa lopa. 9 Maraw kora akarngeyan naba kora ba sai-sai malpangadang, da monaan ba mga koyay. Wala aogonan no nawed ba laki Hisos ngani da- ag babayi sa konin ropangan. 10 Iya ba binan-awan laki Hisos da tinanong, Saan:na kora? Wala dia homosga sa komo? 11 Tembag ag babayi amba, Wala ngani-, koyay! Sinabi laki Hisos, Kawo nawed din naay batay hinosgahan. Idaw:wa kawo da- ayaw:wa mamanawen daet. 12 Laki Hisos ba tomokawanan:nakay sa mga iraya amba, Ako da magparawa sa mga kairayaan sa paranawan. Da iya mag-anggat sa naay ba nawed:da batay mangadang sa kadeleman no nawed ba maki batay rawa magtaboy biyag gidte. 13 Sinabi sa konin mga Parisiyo amba, Kawo ba magsistigo para sa komo sadiri kaya nawed totoo da komo sistigo. 14 Laki Hisos ba tembag, Kayno ako ba magsistigo sa naay sadiri ba totoo da naay sistigo panawen naay amatangan no saan ako omibat da- no saan ako batay paraoy. Ngani nawed kay koyo amatangan da naay inibatan da da naay batay pinaraoyan. 15 Koyo maghosga toltol sa kaogalian mga iraya, ngani ako kay ba nawed maghosga sa tawa man. 16 Kayno ako maghosga ba totoo da naay hosga panawen nawed ngani ako da maghosga no nawed ba kaanggat din da naay Apang ag pomaidaw sa naay. 17 Sa koyo Bilin ba nasorat amba, Da sistigo darwa ka iraya ba totoo. 18 Ako magsistigo para sa naay sadiri da- magsistigo din da naay Apang ag pomaidaw sa naay. 19 Kaya iya ba kora tinanong amba, Saan da kom Apang? Laki Hisos ba tembag, Ako nawed koyo kilala, kayno ag naay Apang. No ako disin koyo kilala gidte ba koyo din batay kilala da naay Apang. 20 Naba ba sinabi laki Hisos ag iya ba magtodo sa lakol ka balay Diyos, sa maki mga palagyanan taboy. Ngani wala iraya kaabel sa konin panawen nawed dapo konin odas. 21 Sinabi:yakay sa kora laki Hisos amba, Ako batay:ya omalis da- ako koyo batay sinarak, ngani koyo batay nangatay sa koyo mga kadaetan. Koyo nawed kaparaoy sa naay batay pinaraoyan. 22 Mamagtokawanan da mga Diw amba, Iya batay dia pakatay kaya konin sinabi, Koyo nawed kaparaoy sa naay batay pinaraoyan? 23 Laki Hisos amba, Koyo ba taga lopa da- ako kay ba taga kangawayan. Koyo ba taga paranawan tiya, ako ba nawed. 24 Kaya naay sinabi sa koyo, Koyo batay nangatay sa koyo mga kadaetan. Koyo batay nga nangatay sa koyo mga kadaetan no koyo nawed maniwala amba, Ako ba Ako ngani-. 25 Kora amba, Tawa kawo? Laki Hisos ba tembag amba, Ag naay:ya sinabi sa koyo ag monaan dapo. 26 Ako ba maoson batay asabi da- batay ahosga laban sa koyo. Ngani da pomaidaw sa naay ba asarigan da- da mga nakayman naay akarngeyan sa konin ba naba da naay nagsabi mga iraya sa paranawan. 27 Nawed kora amatangan iya ba magtokawanan para sa konin Apang sa soksokowan. 28 Kaya sinabi laki Hisos, No koyo:wa napataas da Onga Iraya, koyo:wa batay amatangan amba Ako ba Ako ngani-. Ako ba wala nagpanawen ibat sa naay ngani sadiri no nawed ba ako magtokawanan toltol sa tindo naay Apang sa naay. 29 Da- naay kaanggat da pomaidaw sa naay. Ako nawed konin nag-ogonan panawen boo odas naay nagpanawen da kaangas-angas sa konin. 30 Ag odas konin nagsabi da mga naba ba maoson mga karngey da maniwala sa konin. 31 Sinabi kay laki Hisos sa mga Diw magpaniwala sa konin amba, No koyo magtoltol sa naay todo ba koyo ba naay gidte nga mga nagtod-an; 32 koyo batay amatangan da katotohanan da- da katotohanan da batay magbal-an sa koyo. 33 Kora tembag sa konin amba, Yamen ba kaapoan laki Abraham, da- yamen ba nawed tang tagoanggat kayno tawa. Omaning komo asabi amba yamen batay binal-anan? 34 Laki Hisos ba tembag amba, Naay gidte nagsabi sa koyo amba, Da iya magpanawen daet ba tagoanggat kadaetan. 35 Da tagoanggat ba nawed batay kabilang sa mag-anakan boo odas ngani da onga ba kabilang kaagoton man. 36 No koyo nagbal-anan ag Onga ba koyo ba bal-an:na gayed. 37 Naay amatangan koyo ba kaapoan laki Abraham, kayno amba ba ako koyo alabet bonoon, panawen dayo koyo tabangen da naay todo. 38 Naay nagsabi da naay akitan sa naay Apang; koyo kay nagpanawen da koyo akarngeyan sa koyo apang. 39 Kora amba, Laki Abraham da yamen pangapoan. Tembag laki Hisos amba, No laki Abraham da koyo pangapoan ba koyo batay tinoladan da konin pinanawen. 40 Ngani ako ba koyo alabet bonoon, ag naay ngani kay nagsabi da katotohanan naay akarngeyan sa Diyos. Nawed amba da pinanawen laki Abraham. 41 Da koyo nagpanawen ba makay ag nagpanawen koyo apang. Kora tembag amba, Yamen nawed mga onga sa kalonya! Da Diyos ngani da yamen gidte Apang. 42 Sinabi laki Hisos, No da Diyos gidte ngani-da koyo Apang ba ako koyo disin nagpalayaw panawen ako ba towa paraoy ibat sa Diyos. Ako nawed paraoy towa sa naay ngani sadiri no nawed ba ako konin pinaidaw. 43 Kaytang nawed koyo amatangan da naay nagsabi? Panawen nawed koyo atabang da naay nagtodo sa koyo. 44 Da aponin kadaetan da koyo apang da- no nakay da konin alabet ba naba da koyo alabet panawenen. Ibat dapo tangona, iya ba amomono da- kalaban katotohanan. Nawed batay asbokan sa konin da katotohanan kayno kaagot man. No iya ba magpamosli ba naba ba ibat gidte sa konin sadiri ogali, panawen iya ba boslien da- aponin boo kaboslian. 45 Ngani da naay nagsabi ba katotohanan, kaya ako nawed koyo nagpaniwalaan. 46 Tawa sa koyo da batay kasabi amba ako ba pomanawen daet? No katotohanan da naay nagsabi, kaytang koyo nawed maniwala sa naay? 47 Da iya ba ibat sa Diyos ba magpaniwala sa tokawanan Diyos. Ngani koyo ba nawed ibat sa Diyos kaya koyo dayo magpaniwala sa konin tokawanan. 48 Sinabi sa konin ag mga Diw amba, Nawed ma totoo da yamen sinabi amba, Kawo ba sai ka taga Samariya da- kawo nag-apo daet ka ispirito? 49 Tembag laki Hisos, Ako nawed nag-apo daet ka ispirito. Naay naggalang da naay Apang ngani ako ba koyo nagwala koyinta. 50 Ako nawed magsarak naay kapodiyan; maki alabet ako ba galangen da- iya da maghosga. 51 Naay gidte nagsabi sa koyo, Da magtoltol sa naay nagtodo ba kaagot man ba nawed batay kadanas katayan. 52 Sinabi ag mga Diw amba, Mona ba yamen gidte apiho kawo nga ba nag-apo daet ka ispirito. Laki Abraham ba natay, amba din da mga tagabarita Diyos, ngani komo nagsabi amba nawed batay natay da iya magtoltol sa komo nagtodo. 53 Kawo dia makapangyadihan dapo sa yamen pangapoan laki Abraham? Iya ba natay, amba din da mga tagabarita Diyos. Omaning da komo remrem sa komo sadiri? 54 Laki Hisos ba tembag amba, No ako da magpalakol sa naay sadiri ba wala kaparosan naba. Da naay Apang, ag koyo nagsabi amba kono iya da koyo Diyos, ba iya da magpalakol sa naay. 55 Iya nawed koyo nagkilala ngani iya ba naay gidte nagkilala. No naay nagsabi iya nawed naay kilala ba ako ba boslien din makay koyo. Ngani iya ba naay gidte kilala da- naay nagpanawen da konin nagsabi. 56 Angasan gidte da koyo pangapoan laki Abraham sa konin akitan da aldaw ako batay towa. Konin nga akitan naba da- iya ba angasan. 57 Panawen saba ba sinabi sa konin ag mga Diw amba, Kawo wala dapo limampo ka dag-on da komo:wa kono akitan laki Abraham? 58 Laki Hisos ba tembag, Naay gidte nagsabi sa koyo, Bayo inonga laki Abraham ba Ako ba Ako ngani-. 59 Kora gomalamit bato para iya ba batowen ngani laki Hisos ba tomago da- lomwas sa balay Diyos.
1 Ag laki Hisos ba agkadangan ba iya maki akitan sai ka lalaki raprap ibat sa iya inonga. 2 Iya tinanong ag konin mga nagtod-an amba, Tagatodo, kaytang iya raprap ibat sa iya inonga? Tawa kaya da maki kadaetan? Iya dia no konin mga koyay? 3 Laki Hisos ba tembag, Ag lalaki tiya ba raprap ibat sa iya inonga nawed panawen sa iya maki kadaetan kayno ag konin mga koyay, no nawed ba saba ba batay akitan da kapangyadihan Diyos. 4 Kailangan tamo panawenen da nagpapanawen ag pomaidaw sa naay anggan aldaw dapo. Maraw rateng da madlem ba wala:a batay kapamanawen. 5 Anggan ako towa dapo sa paranawan ba ako ba magparawa sa paranawan. 6 Maraw nasabi naba laki Hisos ba iya tempay sa lopa da- ginawa losak da- naba ba pinair sa mata ag raprap. 7 Sinabi sa konin laki Hisos amba, Kawo paraoy sata sa linaw Siloi (da alabet sabiyen Siloi ba Pinaidaw). Kawo manramos sata. Amba ngani- da pinanawen ag raprap da- maraw iya moli sa konin balay ba kaban-aw:wani. 8 Tinanong ag konin mga katingyaw balay da- ag mga kaban-aw sa konin ag iya ba magpangay-ay dapo amba, Ned ma naba ag lalaki ag monaan ba magtongka da magpangay-ay? 9 Tembag da kalaati amba, Naba ngani-! Amba kay ag Roma, Nawed! Ngani makay din konin kiray. Kaya sinabi ag lalaki, Ako:wa ngani-! 10 Iya ba kora tinanong amba, Omaning kawo kaban-aw mona? 11 Iya tembag amba, Ag lalaki nag-awit Hisos ba tempay sa lopa da- ginawa losak da- pinair sa naay mata da konin sinabi amba, Kawo paraoy sa Siloi da- manramos. Kaya ako sata nga paraoy da- ako manramos da- ako kaban-aw:wani. 12 Iya kora tinanong amba, Saan:na iya? Iya tembag amba, Awan! 13 Kora pinaanggat sa mga Parisiyo ag aray raprap. 14 Ag laki Hisos ba gomawa losak da- pinapiya da raprap ba Aldaw Magpahinga. 15 Iya ba tinanong din ag mga Parisiyo no omaning iya kaban-aw. Konin sinabi sa kora, Konin pinairan losak da naay mata, da- ako manramos da mona ako kaban-aw:wani. 16 Kaya da kalaati mga Parisiyo ba amba, Nawed ibat sa Diyos ag iraya naba panawen iya nawed magtoltol sa Bilin para sa Aldaw Magpahinga. Ngani sinabi kay ag Roma amba, Omaning batay kapamanawen makay naba ka tandaanan da sai ka iraya makadaetan? Da- naeray-eray da kora remrem. 17 Kaya kora:akay tinanong da aray raprap, Omaning da komo remrem sa iraya naba, ag pomapiya kono komo mata? Iya tembag amba, Iya ba sai ka tagabarita! 18 Ag mga Diw ba dayo maniwala amba iya ba ag monaan ba raprap da- mona ba kaban-aw:wani, kaya kora pinaparaoy da konin mga koyay 19 da- sidawa tinanong amba, Kandawa dia onga tiya? Totoo ngani- iya ba raprap ibat sa iya inonga? Kaytang iya ba kaban-aw:wani mona? 20 Tembag da konin mga koyay, Kidawa amatangan iya ba kidawa onga, da- iya ba raprap ibat sa iya inonga. 21 Ngani nawed kidawa amatangan kaytang iya ba kaban-aw:wani mona no tawa kaya da pomapiya sa konin. Iya:a da koyo tanongon! Iya ba sibay:ya da kaamatangan da- iya kasabi:yani para sa konin sadiri. 22 Makay naba da sabi konin pad koyay panawen sa sidawa aliman sa mga Diw, panawen kasaiyan:na mga Diw da palwasen sa rimponan da tawa man magsabi amba laki Hisos ba iya da Kiristo. 23 Naba da dahilan kaya sidawa sinabi amba, Iya ba sibay:ya da kaamatangan. Iya da koyo tanongon. 24 Kaya kora:akay pinaparaoy ag aray raprap da- sinabi sa konin amba, Kawo mangako sa ropangan Diyos amba kawo batay gidte magsabi totoo! Yamen amatangan makadaetan ag iraya naba. 25 Iya amba, Nawed naay amatangan no iya makadaetan no nawed. Da naay ngani amatangan ba ag monaan ba ako ba raprap ngani mona ba kaban-aw:wani. 26 Iya kora:akay tinanong, Omaning da konin pinanawen sa komo? Omaning konin pinapiya da komo mata? 27 Iya tembag, Naay:ya sinabi sa koyo da- koyo dayo maniwala. Kaytang koyo:wakay alabet akarngeyan? Koyo dia alabet din konin mga nagtod-an? 28 Iya ba kora gidte dinagilan kaya kora amba, Kawo da nagtod-an ag iraya naba. Yamen kay ba mga nagtod-an laki Moysis. 29 Yamen amatangan tomokawanan da Diyos sa laki Moysis ngani ag iraya naba ba nawed yamen amatangan no saan iya omibat! 30 Tembag ag lalaki, Naba nga da kapanggilalas! Nawed koyo amatangan no saan iya omibat, ngani konin kay pinapiya da naay mata. 31 Tamo amatangan nawed nagpakarngeyan Diyos da mga iraya makadaetan, no nawed ba konin nagpakarngeyan da mga magsamba sa konin da- magtoltol sa konin kaliyagan. 32 Ibat sa ompisa paranawan ba wala arngeyan amba maki iraya kapapiya sai ka iraya raprap ibat sa iya inonga. 33 Wala apanawen ag iraya naba no iya ba nawed ibat sa Diyos! 34 Kora tembag amba, Kawo ba makadaetan ibat sa inonga da- kawo dapo da batay magtodo sa yamen? Da- iya ba kora inimbanda. 35 Abaritaan laki Hisos amba ag lalaki konin pinapiya ba inimbanda mga Parisiyo kaya maraw konin akitan ba iya konin tinanong amba, Kawo dia mag-isarig sa Onga Iraya? 36 Tembag ag lalaki, Koyay, tawa iya para ako ba kapag-isarig sa konin? 37 Amba laki Hisos, Iya ba komo akitan, iya ag magtokawanan sa komo. 38 Amba da lalaki, Panginoon, ako ba mag-isarig sa komo! Da- iya lomohod da- konin sinamba laki Hisos. 39 Sinabi dapo laki Hisos amba, Ako towa paraoy para homosga-para da mga raprap ba kaban-aw da- naraprap kay da mga kaban-aw. 40 Naba ba akarngeyan mga kalaati Parisiyo bali sa konin da- iya ba kora tinanong amba, Da komo dia alabet sabiyen yamen ba raprap din? 41 Laki Hisos ba tembag, No koyo ba raprap ba koyo ba wala disin kadaetan! Ngani koyo nagsabi amba koyo ba kaban-aw kaya koyo ba magpamirmi sa koyo mga kadaetan.
1 Naay gidte nagsabi sa koyo, Da magseled sa kolongan mga topa da- nawed magdalan sa sakbawan, no nawed ba magyakbang sa bakodan, ba magpanakaw da daet ka iraya. 2 Ngani da magdalan sa sakbawan ba iya da mag-alaga mga topa. 3 Iya nagpasled ag tagabantay sakbawan, da- nagpakarngeyan mga topa da konin belsan. Konin nagpatwagan da konin mga topa sa konin-konin ngaran da- nagpalwas sa kolongan. 4 No napalwas:sani da boo konin topa, iya ba magpangonaan sa kora da- da mga topa kay ba magtongroy sa konin panawen kora kilala da konin belsan. 5 Kora nawed magtongroy sa Roma, no nawed ba magdalagan dapo paadayo, panawen nawed kora kilala da kora belsan. 6 Nanoltol laki Hisos sa mga iraya da halimbawa naba, ngani nawed kora amatangan da konin alabet sabiyen. 7 Kaya sinabi:yakay laki Hisos amba, Naay gidte nagsabi sa koyo, Ako da sakbawan mga topa. 8 Da boo mga monaan sa naay ba mga magpanakaw da- daet ka iraya, ngani kora ba nawed pinakarngeyan mga topa. 9 Ako da sakbawan. Da iya naay pinasled ba batay naribri, iya batay semled da- batay lomwas da- batay kaban-aw maganda ka gamasenan. 10 Kaya ngani batay towa da magpanakaw ba para manakaw da- bomono da- somida. Ako towa paraoy para da mga topa ba kamaki biyag-sai ka biyag sibay gidte. 11 Ako da piya ka tagaalaga topa. Nagtaboy ag piya ka tagaalaga da konin biyag para sa mga topa. 12 Da magpaopa ba magdalagan no akitan magrateng:nga da aso kotanan. Konin nag-ogonan da mga topa panawen iya ba nawed tagaalaga da- da mga topa ba nawed konin. Kaya nagtangay aso kotanan da sai da- manambolat:tani da mga topa. 13 Iya magdalagan panawen iya ba nag-opahan ngani da- iya ba wala alapet sa mga topa. 14 Ako da piya ka tagaalaga topa. Naay kilala da naay mga topa da ako kay ba kora kilala 15 makay din ag ako ba kilala naay Apang da iya kay ba naay kilala. Da- naay nagtaboy da naay biyag para sa mga topa. 16 Ako maki Roma ka topa wala dapo sa kolongan tiya. Kailangan kora naay din pasleden towa. Kora batay pinakarngeyan da naay belsan. Sa makay naba kora ba batay sai ngani ka topahan da- sai din da mag-alaga. 17 Kaya ako ba nagpalayaw naay Apang ba panawen naay nagtaboy da naay biyag para ako ba abaya:akay nabiyag. 18 Wala kagaro sa naay naba. Ako gidte da magtaboy naba sa katayan. Ako maki kapangyadihan magtaboy naba da- biyagen:nakay. Tiya da nagpapanawen naay Apang sa naay. 19 Panawen sa mga tokawanan naba, nawed:dakay magkasai da mga Diw. 20 Maoson sa kora da magsabi amba, Iya nag-apo daet ka ispirito da- nagkabolingaw! Kaytang koyo agpakarngey sa konin? 21 Sinabi kay ag Roma, Nawed abaya magtokawanan makay naba da sai ka nag-apo daet ka ispirito! Batay dia kapaban-aw:wakay sa sai ka raprap da sai ka daet ka ispirito? 22 Tagdimla:ani ag odas naba, odas gidte kasayahan magpodi para sa balay Diyos sa Hirosalim. 23 Laki Hisos ba magkadangan sa balay Diyos sa pasirongan ag nag-awit pasirongan laki Salomon. 24 Iya ba pinaribokan mga Diw da- kora sinabi sa konin amba, Kaomaning dapo kaagot yamen komo batay pinapanya? Komo:wa sabiyen mapawa sa yamen no kawo:wa ngani- da Kiristo! 25 Laki Hisos ba tembag, Naay:ya sinabi sa koyo, ngani koyo dayo maniwala. Da nagpapanawen sa naay naay Apang da magsistigo para sa naay. 26 Ngani koyo dayo maniwala panawen koyo nawed kabilang sa naay mga topa. 27 Magpakarngey sa naay da naay mga topa. Kora naay kilala da- kora magtongroy sa naay. 28 Kora naay nagpakan biyag gidte wala arasan da kaagot man ba kora nawed batay natay. Kora nawed batay aagaw tawa man sa naay. 29 Da naay Apang, ag tomaboy sa kora sa naay, ba lalo makapangyadihan sa boo, da- kora nawed batay aagaw tawa man sa naay Apang ag mag-alaga sa kora. 30 Ako da- naay Apang ba sai ngani. 31 Panawen sa konin sinabi naba ba da mga Diw ba gomalamit:takay bato para iya ba batowen. 32 Kaya sinabi sa kora laki Hisos amba, Maoson:na piya ka panawen da pinapanawen sa naay naay Apang da- koyo akitan da mga naba. Alin sa mga naba da dahilan kaya ako koyo alabet batowen? 33 Iya timbag mga Diw amba, Nawed sa mga piya ka panawen kaya kawo yamen alabet batowen no nawed ba sa kawo magtongayaw sa Diyos, panawen amba kawo Diyos ag kawo kay ba iraya ngani. 34 Tembag laki Hisos, Nawed ma nasorat sa koyo Bilin, Da Diyos ba amba, Koyo ba mga diyos? 35 Tamo amatangan da Banal ka Kasoratan ba nawed gidte abaya sidaen! No amba, no inawit diyos da mga tinaboyan Banal ka Kasoratan ba 36 omaning koyo asabi amba ako, ag pinoyida naay Apang da- pinaidaw sa paranawan, ba magtongayaw sa Diyos, panawen sa naay nagsabi amba, Ako da Onga Diyos. 37 No nawed naay nagpanawen da mga nagpapanawen sa naay naay Apang ba koyo ayaw maniwala sa naay. 38 Ngani no naay nagpanawen da mga naba, kayno koyo dayo maniwala sa naay, koyo kay maniwala sa naay mga nagpanawen, para koyo gidte amatangan sa naay da Apang da ako ba sa konin. 39 Kora:akay pinorbahan iya ba abelen, ngani iya ba domalagan. 40 Laki Hisos ba paraoy:yakay sa karipay salog Hordan sa pagbaotismohan galing laki Howan. Sata iya mamataw. 41 Maoson pabali sa konin. Kora amba, Laki Howan ba wala pinanawen katakataka ngani boo gidte totoo da konin sinabi para sa iraya tiya. 42 Da- sata ba maoson da misarig sa laki Hisos.
1 Maki sai ka iraya da ngaran ba laki Lasaro. Iya ba magpamataw sa goraan te Bitanya kaanggat kobayi Mariya da- Marta, ag konin mga kakaan. Bayi Mariya da bomobo pamango da- pomair konin obok sa mga paa Panginoon. Agkasakit laki Lasaro, 3 kaya pinasabi sa laki Hisos ag talkaka amba, Panginoon, da komo nagpalayaw ka abyan ba maki sakit. 4 Ngani maraw naba ba akarngeyan laki Hisos ba konin sinabi, Nawed batay katay da sakit naba no nawed ba para da Diyos ba palakolon, da- sa makay naba ba batay din pinalakol da Onga Diyos. 5 Palayaw gidte laki Hisos da talkakaan Marta da- Mariya da Lasaro. 6 Kayno amba ba ibat konin:na abaritaan laki Lasaro ba maki sakit ba konin dapo pinalawey darwa ka aldaw 7 bayo konin sinabi sa konin mga nagtod-an amba, Tamo:wakay sa Hodiya. 8 Tembag da konin mga nagtod-an amba, Tagatodo, nawed ma bali naapon ngani te ba kawo ba alabet kora batowen. Kaytang kawo sata:akay batay paraoy? 9 Sinabi laki Hisos, Nawed ma maki labindarwa ka odas sa boo aldaw? Nawed nagkasongko da iya magkadangan aldaw, panawen konin gidte akitan da rawa paranawan tiya, 10 ngani nagkasongko kay da iya agkadangan madlem panawen wala sa konin da rawa. 11 Sinabi laki Hisos da mga naba da- konin dapo sinabi amba, Akalekan laki Lasaro ag tamo abyan. Ako batay sata para iya ba polawen. 12 Kora tembag amba, Panginoon, no amba ba iya batay pomiya. 13 Da alabet sabiyen laki Hisos ba laki Lasaro ba natay:yani ngani kora dia amba akalekan ngani ngani-. 14 Kaya sinabi gidte laki Hisos amba, Natay:yani laki Lasaro 15 da- panawen saba ba koyo batay mag-ompisa mag-isarig sa naay. Kaya ako ba wala sata ako din ba angasan, panawen naba ba batay gidte maki pakinabang sa koyo. Tamo:wani! 16 Laki Tomas ag nag-awit Siing ba amba sa konin mga kaanggat, Tamo:wani anggat sa tamo Tagatodo, para tamo ba natay anggat sa konin. 17 Ag laki Hisos ba rateng ba iya sinabiyan amba apat:ta ka aldaw laki Lasaro ba limbeng sa leyang bato. 18 Da Bitanya ba korang darwa ka patpa sa Hirosalim, 19 da- maoson sa mga Diw da domaraw sa kobayi Marta da- Mariya para sidawa ba ayoon panawen sa natay ag sidawa arian. 20 Maraw akarngeyan bayi Marta laki Hisos ba magrateng:ngani ba iya konin sinalobong. Bayi Mariya kay ba sata ngani sa balay. 21 Sinabi bayi Marta sa laki Hisos amba, Panginoon, no kawo ba towa ba nawed disin natay da naay arian. 22 Ngani naay amatangan kayno mona ba da nakayman komo ay-ayan sa Diyos ba batay tinaboy sa komo. 23 Amba laki Hisos, Batay:yakay biniyag da komo arian. 24 Bayi Marta ba tembag, Naay:ya nga amatangan iya ba batay:yakay biniyag sa paoriyan aldaw sa odas batay:yakay biniyag da mga nangatay. 25 Sinabi laki Hisos amba, Ako da magpabiyag:gakay da ako da biyag. Da iya mag-isarig sa naay ba kayno natay ba batay:yakay biniyag, 26 da- da iya nagkabiyag gidte da- mag-isarig sa naay ba nawed batay natay kaagot man. Kawo dia magpaniwala saba? 27 Iya tembag amba, Hee ngani-, Panginoon! Ako mag-isarig amba kawo da Kiristo, ag Onga Diyos, ag amba batay towa sa paranawan. 28 Maraw nasabi naba ba moli bayi Marta. Konin pinatwagan bayi Mariya sa nawed akarngeyan Roma. Iya amba, Saba:ani da Tagatodo, kawo konin nagpaparaoy. 29 Maraw akarngeyan naba, agad gidte patindeg bayi Mariya, da- mangadang paparaoy sa laki Hisos. 30 Nawed dapo kasled sa goraan te laki Hisos. Iya ba sata dapo sa iya sinalobong bayi Marta. 31 Bayi Mariya ba inanggatan mga Diw omayo sa konin maraw iya agad patindeg da- lomwas sa balay. Kora dia amba, Iya batay paraoy sa lebeng da- sata magpanangis. 32 Rateng bayi Mariya sa laki Hisos da- maraw iya konin akitan ba iya lomohod sa konin ropangan da- iya amba, Panginoon, no kawo ba towa ba nawed disin natay da naay arian. 33 Nalognoy:ya gidte laki Hisos maraw konin akitan magpakongkong bayi Mariya da- da mga Diw konin kaanggat. 34 Iya amba, Iya saan koyo pinalagay? Kora tembag, Panginoon, kawo towa da- komo ban-awan. 35 Laki Hisos ba magpanangis, 36 kaya sinabi ag mga Diw amba, Konin gidte nga nagpalayaw laki Lasaro! 37 Ngani sinabi kay ag kalaati amba, Napaban-aw ag iraya tiya da raprap! Kaytang nawed konin nahadangan para nawed natay laki Lasaro? 38 Nalognoy:yakay laki Hisos. Iya paraoy sa lebeng. Naba ba leyang nagtakleban sai ka bato. 39 Laki Hisos ba amba, Koyo alsen da bato. Bayi Marta, ag kakaan ag natay, ba tembag amba, Panginoon, bawo:wa mona. Apat:ta ka aldaw iya ba natay. 40 Laki Hisos amba, Nawed ma naay:ya sinabi sa komo no kawo mag-isarig sa naay ba komo batay akitan no kaomaning kakol da kapangyadihan Diyos? 41 Kaya kora inalis da bato. Laki Hisos ba maningara da- iya amba, Naay Apang, ako magpasalamat sa komo panawen ako komo:wa pinakarngeyan. 42 Naay amatangan ako ba boo odas komo nagpakarngeyan, ngani naay sinabi naba para da mga iraya sa naay paribok ba batay kamatang amba kawo da pomaidaw sa naay. 43 Maraw nasabi:ya naba, iya tomokawanan maeyat amba, Lasaro, kawo lomwas! 44 Lomwas nga laki Lasaro, nagpanabedan dapo papa golanit panlebeng da konin mga alima da- paa, da- nagpotos panyo da konin kiray. Sinabi laki Hisos sa kora, Iya ba koyo okadan da- bayaan mangadang. 45 Maoson sa mga Diw domaraw sa bayi Mariya da- kaban-aw sa pinanawen laki Hisos da misarig sa konin. 46 Ngani da kalaati kay ba paraoy sa mga Parisiyo da- binarita da pinanawen laki Hisos. 47 Kaya pinatipon mga koyay magpamanawen sa balay Diyos da- mga Parisiyo da hosayan lakol mga Diw da kora sinabi amba, Nakay da tamo batay pinanawen? Ag iraya naba ba magpamanawen maoson ka katakataka. 48 No iya tamo batay pinabayaan, batay misarig sa konin da boo. Batay towa da mga poon taga Roma da- batay rinanggas da tamo lakol ka balay Diyos da- batay namono da tamo lasyon. 49 Sai sa kora ba magtokawanan. Iya ba laki Kaipas, ag koyay lakol magpamanawen sa balay Diyos ag dag-on naba. Iya amba, Koyo ba wala amatangan! 50 Nawed ma koyo naremrem piya dapo para sa tamo no sai ka iraya ngani da natay para sa kairayaan sa nangatay kay da boo lasyon? 51 Konin sinabi naba nawed sa konin ngani sadiri no nawed ba makay poon sa mga magpamanawen sa balay Diyos ag dag-on naba ba konin hinolaan batay natay laki Hisos para sa mga Diw- 52 da- nawed para sa mga Diw ngani no nawed ba para konin tiponon da pasaiyen da boo mga onga Diyos manambolat sa Roma-Roma ka poro. 53 Ibat sa aldaw naba ba kora:a sinakona amba pabonoon laki Hisos, 54 kaya iya ba nawed:da agkadangan magpaban-aw sa mga Diw, no nawed ba iya paraoy sa goraan Ipraim, sai ka goraan bali sa poro nawed apirmihan iraya. Da- sata iya mamatawan anggat sa konin mga nagtod-an. 55 Nagkabali:yani da kasayahan Paskwa mga Diw. Maoson taga goraanan te da tomokad sa Hirosalim bayo magpaskwa para kora panawenen da maglinis toltol sa Bilin. 56 Laki Hisos ba kora nagsarak da- maraw kora magpatindeg sata sa lakol ka balay Diyos ba kora ba magpaltanongan amba, Omaning kaya sa koyo? Iya kaya batay paraoy sa kasayahan e nawed? 57 Binilin ag mga koyay magpamanawen da- mga Parisiyo tod-on ag mga kamatang no saan laki Hisos para iya ba kora paabelen.
1 Anim ka aldaw bayo rateng da kasayahan Paskwa. Laki Hisos ba rateng sa Bitanya, sa goraan te laki Lasaro ag konin:nakay biniyag. 2 Iya ba hinandaan sata tal-aponan. Bayi Marta ba mamanawen da- laki Lasaro ba sai sa mga kasaro laki Hisos. 3 Bayi Mariya kay ba gomaro mahal gidte ka banglo, sai ka gatang malislisaw ka banglo da ngaran ba nardo da- binobo sa mga paa laki Hisos. Maraw kalbas ba pinairan konin obok. Omayooyan sa boo balay da banglo. 4 Laki Hodas Iskariyoti, sai sa mga nagtod-an laki Hisos, ag batay pomaabel sa konin, ba magsabi amba, 5 Kaytang nawed pinabili ag banglo da- tinaboy sa mga mahidapen da kabayadan? Batay tatlo ka daan ka dinaryo da kabayadan naba. 6 Konin sinabi naba nawed sa iya ba maki alapet sa mga mahidapen no nawed ba panawen sa iya ba ananakaw. Iya da mag-alaga kora kwarta da konin layen naggaro naba. 7 Laki Hisos ba tembag, Iya koyo pabayaan! Konin binokod tiya para sa aldaw ako batay limbeng. 8 Boo odas batay koyo kaanggat da mga mahidapen, ngani ako ba nawed batay koyo kaanggat sa boo odas. 9 Abaritaan kaosonan mga iraya amba laki Hisos ba sa Bitanya kaya kora sata paraoy nawed ngani panawen sa konin no nawed ba para kora akitan laki Lasaro ag konin biniyag:gakay. 10 Kaya sinakona ag mga koyay magpamanawen sa balay Diyos amba pabonoon din laki Lasaro, 11 panawen maoson ka mga Diw da somway sa kora da- misarig sa laki Hisos, panawen sa konin pinanawen sa laki Lasaro. 12 Maraw omaga:akay abaritaan kaosonan gidte iraya paraoy sa kasayahan amba laki Hisos ba magparaoy sa Hirosalim. 13 Kora gomaro mga daon barawan da lomwas sa goraan lakol para iya ba salobongon. Kora magyagyagang amba, Hite! Podiyen ngani- da iya magrateng sa ngaran Diyos! Podiyen ngani- da Hadi sa Israil! 14 Maraw akitan laki Hisos da sai ka onga asno ba konin sinakayan makay ag nasorat amba, 15 Koyo taga goraan lakol Sion! Koyo ayaw aliman! Koyo masdan! Magrateng da koyo hadi magsakay sa sai ka onga asno. Naba:a ngani. 16 Ag monaan ba nawed amatangan konin mga nagtod-an da alabet sabiyen naba, ngani maraw laki Hisos ba nabiyag:gakay da- pinalakol ba kora aremreman, naba da nagsabi Banal ka Kasoratan para sa konin da- amba nga da nangyadi. 17 Binarita kaosonan iraya da kora sinistigohan maraw pinatwagan laki Lasaro ibat sa lebeng da- biniyag ibat sa mga nangatay. 18 Naba da dahilan kaya iya ba sinalobong kaamba kaoson ka iraya-kora abaritaan da konin pinanawen kapanggilalas. 19 Mamagtokawanan da mga Parisiyo amba, Tamo ba nawed:da batay kapandaeg! Magtoltol:la sa konin da boo kairayaan! 20 Maki mga Nawed Diw tomokad din sa Hirosalim para somamba sa Diyos sa odas kasayahan. 21 Kora pabali sa laki Pilipi taga Bitsaida, sa Galiliya, da- omateet amba, Koyay, yamen alabet agpakasma sa laki Hisos. 22 Sinabi naba laki Pilipi sa laki Anris da- sidawa pabali sa laki Hisos da- pinaaram da kora aringi. 23 Sinabi sa kora laki Hisos amba, Magrateng:nga da odas batay pinalakol da Onga Iraya. 24 Naay gidte nagsabi sa koyo, No da beter tirigo ba nawed nabobod da- makay natay sa lopa ba batay mamirmi sai ngani. Ngani no makay natay ba naba ba batay mamokar maoson. 25 Da iya magpahalaga sa konin sadiri biyag ba iya da batay awal-an naba, ngani da iya kay magwala halaga sa konin sadiri biyag sa paranawan tiya ba iya da batay maki naba anggan sa biyag gidte wala arasan. 26 Da iya magpamanawen sa naay ba kailangan tomongroy sa naay. da kayno saan ako ba sata din da naay tagapamanawen. Batay pinodi naay Apang da iya magpamanawen sa naay. 27 Mona ba nagkaalognoyan gidte da naay remrem. Da- omaning da naay batay sinabi? Naay Apang, ako komo ribriyen sa odas naba? Nawed gidte! Panawen tiya da dahilan kaya ako towa paraoy-para danasen da kahidapan naba. 28 Naay Apang, komo palakolon da komo ngaran. Maki magtokawanan ibat sa soksokowan amba, Naay:ya pinalakol, da- naay:yakay batay pinalakol. 29 Naba ba akarngeyan kaosonan mga iraya sata da- da kalaati sa kora ba amba, Domalegdeg! Amba kay da Roma, Magtokawanan sa konin da sai ka anghil. 30 Kaya sinabi laki Hisos sa kora amba, Da tokawanan tiya ba pinakarngey nawed para sa naay no nawed ba para sa koyo. 31 Mona:ani da odas para hosgahan da paranawan. Mona:ani batay inaboy da pamoonan sa paranawan tiya. 32 Da- no ako ba pinataas:sani naay batay pinabali sa naay da boo iraya. 33 Konin sinabi naba para paaramen no omaning iya batay natay. 34 Tembag da kaosonan mga iraya amba, Yamen arngeyan sa Bilin amba da Kiristo ba batay mamirmi kaagot man. Kaytang komo nagsabi amba kailangan pataasen da Onga Iraya? Tawa mana da Onga Iraya naba? 35 Sinabi laki Hisos sa kora, Kabeste:a te da odas koyo batay dapo kaanggat da rawa. Koyo mangadang anggan koyo dapo kaanggat da rawa, para koyo nawed adeleman. Nawed amatangan ag magkadangan sa delem no saan iya paraoy. 36 Ag koyo dapo kaanggat da rawa ba koyo misarig sa rawa para koyo ba mga iraya magpamiyag sa rawa. Maraw naba ba nasabi laki Hisos ba iya omalis da- tomago. 37 Kayno kora akitan iya pomanawen maoson ka tandaanan ba kora nawed dapo din misarig sa konin. 38 Sa makay naba ba natped da sinabi laki Isayas ag tagabarita Diyos amba, Panginoon, tawa da maniwala sa yamen mga tokawanan? Sa tawa Pinaban-Aw Panginoon da konin kapangyadihan? Naba:a ngani. 39 Naba da dahilan kaya kora nawed kapaniwala, makay ag pinasabi dapo Diyos sa laki Isayas amba, 40 Naay rinaprap da kora mga mata da- pinakaskil da kora olo para kora nawed kaban-aw kayno kamatang da kora remrem kayno paoli sa naay para kora ba naay papiyaen. Naba:a ngani. 41 Naba ba sinabi laki Isayas panawen konin akitan da kalakolan laki Hisos da- iya tomokawanan para sa konin. 42 Kayno amba, maoson din da misarig sa konin kayno mga poon mga Diw. Ngani naba ba nawed kora nanoltol panawen kora aliman sa mga Parisiyo, kaaram kora alsen sa rimponan mga Diw. 43 Panawen da kora alabet ba kora papodiyan mga iraya sa kora kay ba papodiyan Diyos. 44 Laki Hisos ba magtokawanan maeyat amba, Da iya mag-isarig sa naay ba nawed ngani sa naay mag-isarig no nawed ba sa pomaidaw din sa naay. 45 Da- da kaban-aw sa naay ba kaban-aw din sa pomaidaw sa naay. 46 Ako paraoy towa sa paranawan makay rawa para da mga misarig sa naay ba nawed mamirmi sa kadeleman. 47 Da iya karngey naay tokawanan da- nawed konin timped naba ba iya nawed naay batay hinosgahan, panawen ako towa paraoy nawed para hosgahan da mga iraya sa paranawan no nawed ba para kora ba ribriyen. 48 Maki batay homosga sa tawa man somikway sa naay da- nawed tomabang sa naay mga tokawanan. Da tokawanan naay pinangadar ba naba da batay homosga sa konin sa paoriyan aldaw. 49 Panawen ako nawed tomokawanan sa naay ngani kapangyadihan no nawed ba da naay Apang da bomilin sa naay no omaning da naay batay sinabi da- pinangadar. 50 Da- naay amatangan da konin bilin da magtaboy biyag gidte wala arasan. Kaya da nagpasabi naay Apang ba naba da naay nagsabi.
1 Sai dapo ka aldaw bayo rateng da kasayahan Paskwa mga Diw. Amatangan laki Hisos rateng:nga da odas iya batay omalis sa paranawan tiya da- batay paoli sa konin Apang. Konin:na nagpalayaw ag konin mga nagtod-an towa sa paranawan da- semker:ra gidte da konin palayaw sa kora. 2 Magpanal-aponan laki Hisos da- konin mga nagtod-an. Nagpalagay:ya ag aponin kadaetan sa remrem laki Hodas, ag onga laki Simon Iskariyoti, da para sa batay pomaabel sa laki Hisos. 3 Amatangan:na laki Hisos tinaboy:yani sa konin konin Apang da boo kapangyadihan. Konin din amatangan iya ba batang sa Diyos da- batay:yakay paoli sa konin. 4 Kaya iya ba patindeg da- linso da konin panlowas nagsool da- magbegkes towalya sa konin bar-is. 5 Maraw kalbas iya bomobo sapa sa batiya da- mag-ompisa mag-oyas mga paa konin mga nagtod-an da- pairan towalya ag nagbegkes sa konin. 6 Maraw iya pabali sa laki Simon Pidro ba laki Pidro ba magdiklamo amba, Panginoon, komo dia batay inoyasan da naay mga paa? 7 Laki Hisos ba tembag amba, Nawed komo amatangan mona da naay nagpanawen ngani komo din batay amatangan no kalbas. 8 Sinabi sa konin laki Pidro, Nawed gidte naay batay pinaoyas sa komo da naay mga paa. Amba laki Hisos, No kawo ba nawed naay batay inoyasan ba kawo ba wala eray sa naay kahadian. 9 Kaya sinabi laki Pidro amba, Panginoon, no amba ba nawed ngani paa, no nawed ba anggan alima da- olo! 10 Amba laki Hisos, Da iraya karangoy:yani ba kailangan:na ngani mag-oyas paa panawen malinis:sani da boo konin lawas. Da- koyo malinis:sani ngani sai sa koyo ba nawed. 11 Panawen amatangan laki Hisos no tawa da batay pomaabel sa konin kaya konin sinabi malinis:sa kora ngani sai sa kora ba nawed. 12 Maraw naoyasan:nani laki Hisos da kora mga paa, iya ba mag- sool:lakay golanit da- sata:akay sa pagkainan. Kora konin tinanong amba, Koyo dia amatangan no nakay da naay pinanawen sa koyo? 13 Ako koyo nag-awit Tagatodo da Panginoon, da- amba ngani- koyo, panawen ako ngani-. 14 No ako, ag koyo Panginoon da- Tagatodo, ba omoyas koyo mga paa, kailangan din koyo magpal-oyasan koyo mga paa. 15 Koyo naay pinakan halimbawa da- naba da koyo kailangan toladan. 16 Naay gidte nagsabi sa koyo, Wala tagoanggat mahalaga dapo sa konin panginoon, kayno ag pinaidaw sa pomaidaw sa konin. 17 No koyo amatangan da mga naba da- koyo batay pinanawen ba koyo ba angasan. 18 Nawed koyo boo da naay nagtodyo. Naay kilala da naay mga hinidang. Ngani kailangan natped da nasabi sa Banal ka Kasoratan amba, Da mamangan anggat sa naay ba iya da somikad sa naay. Naba:a ngani. 19 Naay nagsabi naba sa koyo bayo mangyadi para no naba ba nangyadi:yani ba koyo misarig amba, Ako ba Ako ngani-. 20 Naay gidte nagsabi sa koyo, Da magtabang sa naay nagpaidaw ba magtabang sa naay, da- da magtabang sa naay ba magtabang sa pomaidaw sa naay. 21 Maraw nasabi naba, nagkaalognoyan da remrem laki Hisos da- konin gidte sinabi amba, Naay gidte nagsabi sa koyo, Da sai sa koyo ba batay pomaabel sa naay. 22 Magpaysereyan da konin mga nagtod-an. Nawed gidte kora amatangan no tawa da konin nagtodyo. 23 Sai sa kora, pag nagtod-an nagpalayaw gidte laki Hisos, ba magtongka sa konin tebteb. 24 Kinamit laki Pidro da- sinabi amba, Komo tanongon no tawa da konin nagtodyo. 25 Kaya iya ba misari sa soot laki Hisos da- konin tinanong amba, Panginoon, tawa da komo nagtodyo? 26 Laki Hisos ba tembag, Da naay pinakan dinede pisang pamangnen ba iya:a ngani-. Da- maraw nagaro:wani da- nadede:ani da pisang pamangnen ba konin tinaboy sa laki Hodas, onga laki Simon Iskariyoti. 27 Maraw nata-bang:ngani laki Hodas da pamangnen ba laki Satanas kay ba semled sa konin. Sinabi laki Hisos amba, Da komo batay:ya pinanawen ba komo:wa agad panawenen. 28 Ngani kayno sai sa konin kasaro ba wala kamatang no kaytang konin nasabi naba. 29 Panawen laki Hodas da mag-alaga kora kwarta ba kora dia amba iya nagpabili laki Hisos da kora kailangan sa kasayahan e nagpanaboy sa mga mahidapen. 30 Maraw naman-gan:nani laki Hodas da pamangnen ba iya omalis. Madlem:mani. 31 Maraw kaalis:sani laki Hodas ba sinabi laki Hisos, Mona ba nagpaban-aw:wani da nagpalakol ag Onga Iraya, da- nagpalakol:la din da Diyos panawen sa konin. 32 Da- no da Diyos ba nagpalakol:lani panawen sa konin ba iya kay ba batay pomaban-aw ag kalakolan konin Onga da- naba ba agad konin batay nayadi. 33 Naay mga nagpalayaw, Kabeste:a da odas ako koyo batay dapo kaanggat. Ako koyo batay sinarak, ngani naay nagsabi sa koyo mona da naay:ya sinabi sa mga Diw amba, Koyo nawed kaparaoy sa naay nagparaoyan. 34 Sai ka bayo ka bilin da naay nagtaboy sa koyo, Koyo magpalayawan. No omaning koyo naay pinalayaw ba amba kay din koyo magpalayawan. 35 No koyo magpalayawan ba koyo batay akilalaan boo iraya amba koyo ba naay mga nagtod-an. 36 Tinanong laki Pidro amba, Panginoon, kawo saan batay paraoy? Laki Hisos ba tembag, Sa naay paraoyan ba kawo ba nawed abaya anggat mona, ngani isag kawo batay din sata. 37 Laki Pidro amba, Kaytang ako nawed abaya anggat sa komo mona? Ako handa magtaboy naay biyag para sa komo. 38 Laki Hisos ba tembag amba, Totoo dia komo nga batay tinaboy da komo biyag para sa naay? Naay gidte nagsabi sa komo, Bayo mangarang-it da manok, katatlo ako komo batay tinanggiyan.
1 Koyo ayaw nagkaalognoyan da koyo remrem. Koyo mag-isarig sa Diyos da- mag-isarig din sa naay. 2 Sata sa naay Apang ba maoson pamatawan. No nawed amba ba nawed:da disin naay sinabi sa koyo amba, Mona ba ako batay sata para naay handaen da koyo batay pamatawan. 3 No ako sata:ani da- naay:ya nahanda da koyo batay pamatawan ba ako batay:yakay towa da- koyo naay batay kaanggat. Sa makay naba ba kayno saan ako ba koyo ba sata din. 4 Koyo:wa amatangan da dalan paparaoy sa naay nagparaoyan. 5 Sinabi sa konin laki Tomas amba, Panginoon, yamen nawed amatangan no saan kawo batay paraoy, omaning yamen batay amatangan da dalan? 6 Laki Hisos ba tembag, Ako da dalan, da da katotohanan da- da biyag. Wala kaparaoy sa naay Apang no nawed sa naay ngani. 7 No ako koyo:wa kilala ba koyo:wa din batay kilala da naay Apang. Ibat mona ba iya koyo:wa kilala da- akitan. 8 Sinabi sa konin laki Pilipi amba, Panginoon, komo nga paban-awen sa yamen da Apang da- sibay:yani sa yamen. 9 Laki Hisos ba tembag amba, Pilipi, maagot:ta ako koyo kaanggat. Kaytang ako nawed dapo komo kilala? Da kaban-aw:wa sa naay ba kaban-aw:wa din sa Apang. Kaytang komo nagsabi amba, Komo paban-awen sa yamen da Apang? 10 Nawed ma kawo magpaniwala ako ba sai sa Apang, da- da Apang ba sai din sa naay? Da mga tokawanan naay nagsabi sa koyo ba nawed sa naay sadiri no nawed ba da Apang ag magpamirmi sa naay ba iya da magpanawen konin mga panawenen. 11 Koyo maniwala sa naay : ako ba sai sa Apang da- da Apang ba sai din sa naay. No koyo dayo maniwala sa naay nagsabi ba koyo maniwala sa mga naay nagpanawen. 12 Naay gidte nagsabi sa koyo, Da iya mag-isarig sa naay ba batay kapamanawen naay mga nagpanawen da- labi dapo saba, panawen ako batay:ya paraoy sa Apang. 13 Da- da nakayman koyo ay-ayan sa Apang sa koyo maki kasaiyan sa naay ba naay batay pinanawen. Sa makay tiya, da Apang ba batay pinalakol panawen sa naay. 14 Naay batay pinanawen da nakayman koyo aringien sa koyo maki kasaiyan sa naay. 15 No ako ba koyo nagpalayaw koyo batay magteped sa naay mga bilin. 16 Ako batay omay-ay sa naay Apang da- koyo ba konin batay pinakan sai dapo ka Anonolong koyo batay kaanggat kaagot man, 17 wala Roma no nawed ba da Ispirito Banal, ag magpaban-aw katotohanan Diyos. Iya nawed atabang mga taga paranawan panawen iya nawed kora akitan kayno akilalaan. Ngani iya ba koyo kilala panawen iya ba sa koyo da- batay mamirmi sa koyo. 18 Koyo nawed naay batay inogonan koyo ngani wala palkabano. Ako batay:yakay sa koyo. 19 Nawed te maagot ka odas ako ba nawed:da tay akitan mga taga paranawan. Ngani ako ba koyo batay:yakay akitan, panawen ako ba batay biyagan da koyo batay din biyagan. 20 Koyo batay amatangan sa aldaw naba amba ako ba sai sa naay Apang, da- koyo kay ba sai din sa naay da- ako kay ba sa koyo. 21 Da iya magtabang sa naay mga bilin da- magteped sa mga naba ba iya da magpalayaw sa naay. Da iya magpalayaw sa naay ba batay pinalayaw naay Apang. Iya naay din batay pinalayaw da- ako batay gidte magpakilala sa konin. 22 Iya tinanong laki Hodas (nawed ag Iskariyoti) amba, Panginoon, kaytang sa yamen ngani kawo batay gidte magpakilala da- nawed sa mga taga paranawan? 23 Laki Hisos ba tembag, Da iya magpalayaw sa naay ba batay temped sa naay mga tokawanan. Iya batay pinalayaw naay Apang da- kidawa batay sa konin da- batay mamataw sa konin. 24 Da iya nawed magpalayaw sa naay ba nawed magteped sa naay mga todo. Nawed naay da mga todo koyo akarngeyan no nawed ba ibat sa naay Apang ag pomaidaw sa naay. 25 Naay:ya sinabi sa koyo da mga naba sa ako koyo dapo kaanggat. 26 Ngani da Anonolong-wala Roma no nawed ba da Ispirito Banal-ag batay pinaidaw naay Apang panawen sa koyo maki kasaiyan sa naay, ba iya da batay magtodo sa koyo boo nakayman da- batay magparemrem ag boo naay sinabi sa koyo. 27 Kaginhawahan da naay nag-ogonan sa koyo. Da naay kaginhawahan da naay nagtaboy sa koyo. Ako ba nawed magtaboy kaginhawahan makay ag magtaboy mga taga paranawan. Koyo ayaw nagkaalognoyan da- ayaw aliman. 28 Koyo akarngeyan naay sinabi sa koyo amba, Ako batay:ya omalis ngani batay:yakay paoli sa koyo. No ako koyo nagpalayaw ba koyo disin kaangasan da ako ba paraoy sa naay Apang, panawen da naay Apang ba mahalaga dapo sa naay. 29 Bayo dapo mangyadi naba ba naay:ya nagsabi sa koyo para no nangyadi:yani ba koyo ba misarig sa naay. 30 Ako ba nawed:da batay magtokawanan maaba sa koyo, panawen magrateng:nga da pamoonan paranawan tiya. Iya wala kapangyadihan sa naay, 31 ngani kailangan amatangan mga taga paranawan naay nagpalayaw da naay Apang, da- da boo naay nagpanawen ba da konin gidte mga binilin sa naay. Koyo patindeg, tamo:wani.
1 Ako da piya gidte ka poon obas da- da naay Apang da an-aalaman. 2 Konin nagpotol da tayma sanga sa naay nawed agpamokar da- konin nagkapon da- naglinis da tayma sanga magpamokar para lalo maoson da bokar. 3 Koyo nalinis:sani sa mga tokawanan naay sinabi sa koyo. 4 Koyo mamirmi sa naay da- ako ba batay mamirmi sa koyo. Nawed batay kapamokar da sanga nawed mag-ikapet sa poon. Amba kay din koyo nawed batay kapamokar no koyo nawed magpamirmi sa naay. 5 Ako da poon obas, koyo kay da mga sanga. Da iya magpamirmi sa naay da- ako sa konin ba iya da magpamokar maoson. Panawen koyo ba wala apanawen no nawed sa naay tolong. 6 Da nawed magpamirmi sa naay ba batay binenglay da- batay natoyo makay ag sanga tigpas:sani. Da makay naba ka mga sanga ba batay gidte inipon da- binenglay sa apoy para naareng. 7 No koyo magpamirmi sa naay da- magpamirmi sa koyo da naay tokawanan ba koyo ay-ayan da koyo alabet da- batay tinaboy sa koyo. 8 No koyo ba magpamokar maoson ba batay napalakol da naay Apang da- sa makay naba ba koyo ba naay gidte nagtod-an. 9 No omaning ako nagpalayaw naay Apang ba amba kay din koyo naay nagpalayaw. Koyo magpamirmi sa naay palayaw. 10 No koyo nagteped da naay mga bilin ba koyo batay mamirmi sa naay palayaw, makay din ako, naay nagteped da mga bilin naay Apang da- ako ba magpamirmi sa konin palayaw. 11 Naay:ya sinabi sa koyo da mga naba para sa koyo da naay kaangasan da- semker:ra gidte da koyo kaangasan. 12 Tiya da naay bilin, Koyo magpalayawan makay din ag naay palayaw sa koyo. 13 Wala palayaw labi dapo sa palayaw sai ka iraya magtaboy konin biyag para sa konin mga abyan. 14 Koyo ba naay mga abyan no koyo magteped naay mga bilin. 15 Koyo nawed:da naay nag-awit mga tagoanggat panawen nawed amatangan tagoanggat da pakana konin panginoon, no nawed ba koyo ba naay nag-awit mga abyan panawen naay sinabi sa koyo da boo naay akarngeyan sa naay Apang. 16 Nawed koyo da pomili sa naay. Ako ba pomili da- homidang sa koyo para koyo mangadang da- magpamokar, da- para mamirmi da koyo bokar. No amba ba da nakayman koyo ay-ayan sa naay Apang sa koyo maki kasaiyan sa naay ba batay tinaboy sa koyo. 17 Da naay nagbilin sa koyo ba, Koyo magpalayawan. 18 No nagkaabaisan sa koyo da mga taga paranawan ba kailangan koyo amatagan abaisan:na kora sa naay bayo sa koyo. 19 No koyo ba maki kasaiyan sa mga taga paranawan ba koyo kora batay pinalayaw makay kora gidte. Ngani ganyang koyo ba naay pinili ibat sa paranawan tiya da koyo ba wala:a kasaiyan sa mga taga paranawan, ba kora ba nagkaabaisan sa koyo. 20 Koyo remremen da naay sinabi sa koyo, Wala tagoanggat mahalaga dapo sa konin panginoon. No ako kora pinahidapan ba koyo ba batay din kora pinahidapan. No kora timped da naay mga tokawanan ba kora din batay timped da koyo mga tokawanan. 21 Ngani da boo naba ba kora batay pinanawen sa koyo panawen sa koyo maki kasaiyan sa naay, da- panawen nawed kora kilala da pomaidaw sa naay. 22 No ako nawed towa paraoy da- mangadar sa kora ba kora disin ba wala kadaetan. Ngani kora wala:a batay adahilan sa kora kadaetan. 23 Da nagkaabaisan sa naay ba nagkaabaisan din sa naay Apang. 24 No ako nawed pomanawen sa kora ropangan mga panawen ibat:ta ba nawed napanawen tawa man ba kora disin ba wala kadaetan. Ngani kora akitan da naay mga pinanawen. Kayno amba, kidawa naay Apang ba kora namaisan. 25 Ngani naba ba nangyadi para natped da nasorat sa kora Bilin amba, Kora abaisan sa naay wala dahilan. 26 No rateng da Anonolong ag naay batay pinaidaw ibat sa naay Apang ba iya batay somistigo para sa naay. Iya ba wala Roma no nawed ag Ispirito ibat sa naay Apang ag magpaban-aw ag katotohanan Diyos. 27 Da- koyo batay din magsistigo para sa naay panawen koyo naay:ya kaanggat ibat sa ako mag-ompisa mangadar.
1 Da boo tiya ba naay:ya sinabi sa koyo para koyo ayaw awal-an pag-isarig sa naay. 2 Koyo batay namoyawan mga Diw sa mga balay pagtiponan. Batay rateng da odas da iya bomono sa koyo ba batay magremrem amba iya mamanawen para sa Diyos. 3 Da- kora batay pinanawen naba sa koyo panawen kidawa naay Apang ba nawed kora nagkilala. 4 Tiya ba naay:ya sinabi sa koyo para no rateng da odas kora batay pinanawen da mga naba ba koyo batay aremreman naay:ya pinaonaan naba sa koyo. Nawed dapo naay sinabi sa koyo da mga naba ibat dapo ag monaan panawen ako koyo dapo kaanggat; 5 ngani mona ba ako batay:ya sata sa pomaidaw sa naay. Amba man, wala kayno sai sa koyo magtanong sa naay no saan ako batay paraoy? 6 Da- mona ag naay:ya sinabi sa koyo naba ba koyo nangarongkot:ta gidte. 7 Ngani naay nagsabi sa koyo da katotohanan maraw naay nagsabi amba, Da ako omalis ba para sa koyo kapakinabangan, panawen nawed batay towa paraoy sa koyo da Anonolong no ako nawed batay omalis ngani no ako omalis ba iya ba naay batay pinaidaw sa koyo. 8 No iya rateng konin batay pinapihohan da mga taga paranawan para sa kora kadaetan, sa kataldengan da- sa hosga. 9 Para sa kadaetan panawen kora nawed mag-isarig sa naay, 10 para sa kataldengan panawen ako batay:ya sa naay Apang da- ako nawed:da koyo batay akitan, 11 da- para kay sa hosga panawen da pamoonan paranawan tiya ba hinosgahan:nani. 12 Ako maoson dapo batay sinabi sa koyo ngani nawed dapo koyo atabang mona. 13 Ngani no rateng:nga da Ispirito ag magpaban-aw katotohanan Diyos, koyo batay konin tinolongan para koyo amatangan da boo katotohanan. Iya ba nawed batay magtokawanan sa konin sadiri no nawed ba konin batay sinabi sa koyo da konin akarngeyan da- da mga batay rateng. 14 Ako konin batay pinalakol panawen konin:nakay batay sinabi sa koyo da konin akarngeyan sa naay. 15 Da boo sa naay Apang ba naay, kaya ako amba, Batay:yakay sinabi sa koyo ag Ispirito da konin akarngeyan sa naay. 16 Kabeste:a da odas ako nawed:da koyo batay akitan, da- kalawey nawed te maagot ba ako koyo:wakay batay akitan. 17 Mamagtokawanan da kalaati konin nagtod-an amba, Nakay dia da konin alabet sabiyen? Kaytang konin sinabi amba, Kabeste:a da odas ako nawed:da koyo batay akitan, da- kalawey nawed te maagot ba ako koyo:wakay batay akitan? da amba dapo, Panawen ako batay:ya sa naay Apang. 18 Kaya kora amba, Nakay dia da alabet sabiyen ag kabeste:a da odas? Nawed tamo amatangan. 19 Adamdaman laki Hisos kora ba alabet magtanong, kaya konin sinabi, Koyo ma magpaltanongan para sa naay sinabi amba, Kabeste:a da odas ako nawed:da koyo batay akitan da- kalawey nawed te maagot da- ako koyo:wakay batay akitan? 20 Naay gidte nagsabi sa koyo, Koyo batay manangis da batay magpakongkong ngani batay angasan da mga taga paranawan. Koyo batay gidte marongkot ngani da koyo karongkotan ba batay:yakay kaangasan. 21 No nagkaadamdaman:nani da sai ka babayi batay mangonga ba iya nagkalognoy panawen rateng:nga da odas sa iya nagpamarian. Ngani no mangonga:ani, nawed:dani nagkaaremreman ag iya nagpamarian. Iya ba nagkaangasan panawen inonga:ani sa paranawan da sai ka polahan. 22 Amba kay din koyo : koyo nagkaalognoyan mona ngani ako koyo batay:yakay akitan da- koyo batay gidte kapno kaangasan nawed batay aagaw tawa man. 23 Sa aldaw naba ba koyo ba wala:a kailangan tanongon sa naay. Naay gidte nagsabi sa koyo, Kayno nakay koyo ay-ayan sa naay Apang sa koyo maki kasaiyan sa naay ba konin batay tinaboy sa koyo. 24 Anggan mona koyo wala dapo nag-ay-ayan sa konin sa maki kasaiyan sa naay. Koyo mag-ay-ay da- koyo batay tomabang, para sibay gidte da koyo kaangasan. 25 Da mga naba ba naay sinabi sa koyo pahalimbawa. Ngani batay:ya rateng da odas nawed:da makay naba da ako batay magtokawanan sa koyo, no nawed ba batay:ya gidte naay sinabi sa koyo da para sa naay Apang. 26 Sa aldaw naba ba koyo batay omay-ay sa konin sa maki kasaiyan sa naay. Nawed naay nagsabi amba ako batay omay-ay sa naay Apang para sa koyo, 27 panawen koyo ba nagpalayaw ngani-naay Apang. Koyo konin nagpalayaw panawen ako koyo nagpalayaw da koyo magpaniwala ako ba batang sa Diyos. 28 Ako ba batang sa naay Apang da- paraoy towa sa paranawan; mona ako batay omalis sa paranawan da- batay paoli sa naay Apang. 29 Sinabi ag konin mga nagtod-an amba, Mona ba mapawa:ani da komo nagsabi sa yamen da- nawed:da pahalimbawa! 30 Mapawa:a sa yamen mona na komo:wa amatangan da boo nakayman da- kawo nawed kailangan tanongon tawa man. Panawen saba yamen magpaniwala amba kawo ba batang sa Diyos. 31 Laki Hisos ba tembag amba, Koyo kono ba magpaniwala:a mona? 32 Batay:ya rateng da odas da- mona:a ngani-, koyo batay manambolat, da- iya-iya ba batay mangoli da- ako koyo batay inogonan. Kayno amba ba ako nawed ako ngani panawen naay kaanggat da naay Apang. 33 Naba ba naay:ya sinabi sa koyo para koyo kamaki kaginhawahan sa koyo maki kasaiyan sa naay. Koyo batay pinahidapan mga taga paranawan, ngani paeyaten da koyo remrem! Naay:ya rinegnas da kapangyadihan paranawan tiya.
1 Maraw nasabi:yani laki Hisos da mga tokawanan naba ba iya ba tomingara sa soksokowan da iya amba, Naay Apang, rateng:nga da odas. Ako, ag komo Onga, ba komo palakolon para kawo kay ba naay apalakol, 2 panawen ako ba komo pinakan kapangyadihan sa boo kairayaan, para magtaboy biyag gidte wala arasan sa boo komo tinaboy sa naay. 3 Da biyag gidte wala arasan ba da magkilala gidte sa komo, ag sai ngani da- Diyos gidte, da- sa laki Hisos Kiristo ag komo pinaidaw. 4 Naay Pinaban-Aw towa sa lopa da komo kalakolan. Naay:ya yinadi da komo pinapanawen sa naay. 5 Kaya mona, naay Apang, ako komo kay pakanen kalakolan sa komo ropangan, ag naay kalakolan pag ako komo kaanggat bayo dapo rinarang da paranawan. 6 Kawo naay pinakilala sa mga iraya komo tinaboy sa naay ibat sa paranawan. Kora ba komo. Kora komo tinaboy sa naay da- kora timped da komo tokawanan. 7 Mona ba kora amatangan ibat sa komo da boo komo tinaboy sa naay, 8 panawen naay tindo sa kora da komo tindo sa naay da- kora kay tinabang. Kora gidte amatangan ako ba batang sa komo da- kora agpaniwala amba kawo ngani- da pomaidaw sa naay. 9 Kora ba naay nagdarangin. Nawed da mga taga paranawan da naay nagdarangin no nawed ba da boo komo tinaboy sa naay, panawen kora ba komo. 10 Da boo sa naay ba komo da- da boo sa komo ba naay. Da- ako ba pinalakol:la panawen sa kora. 11 Da- mona ba ako batay:ya sa komo. Ako batay:ya omalis sa paranawan ngani kora ba sa paranawan dapo. Naay Apang, kawo da Banal gidte! Kora komo dahanan sa komo gidte kapangyadihan, ag komo tinaboy sa naay, para kora ba sai ngani makay din ag kita ba sai ngani. 12 Sa odas ako kora kaanggat, kora naay dinahanan sa komo gidte kapangyadihan komo tinaboy sa naay. Kora naay inalagaan da- kayno sai sa kora ba wala naomaning no nawed ba ag bagay padosahan sa katayan, para natped da Banal ka Kasoratan. 13 Da- mona, ako batay:ya sa komo da- naay nagsabi naba sa ako ba sa paranawan dapo para kora poso ba nangakapno naay kasyagan. 14 Naay:ya tinaboy sa kora da komo mga todo, da- kora ba namaisan mga taga paranawan, panawen kora ba wala:a kasaiyan sa mga taga paranawan, makay din ako ba wala kasaiyan sa mga taga paranawan. 15 Nawed naay nagdarangin amba kora ba alisen sa paranawan no nawed ba kora ba komo ribriyen sa nag-awit Daet. 16 Kora ba wala kasaiyan sa mga taga paranawan makay din ako ba wala kasaiyan sa mga taga paranawan. 17 Kora komo pabokodon para sa komo. Da komo katotohanan da magpabokod sa kora. Da komo tokawanan ba katotohanan. 18 No omaning ako komo pinaidaw sa paranawan ba amba kay din kora naay:ya pinaidaw sa paranawan. 19 Da- naay nagtaboy da naay sadiri sa komo para ngani sa kora, para kora kay ba taboyon gidte din sa komo. 20 Nawed ngani kora da naay nagdarangin no nawed ba anggan din ag mga batay mag-isarig sa naay panawen sa kora magsistigo. 21 Naay Apang, naay darangin ba kora boo ba sai gidte, makay ag kawo ba sai sa naay da- ako kay ba sai sa komo. Disin ba kora ba sai gidte sa kita. Sa makay naba ba da mga taga paranawan ba batay misarig amba ako ba komo pinaidaw. 22 Naay tinaboy sa kora da kalakolan komo tinaboy sa naay, para kora ba sai gidte, makay din kita ba sai ngani gidte, 23 ako ba sa kora da- kawo ba sa naay. Sa makay naba ba kora batay gidte nga sai, da batay akilalaan mga taga paranawan amba ako komo pinaidaw, da- kora ba komo nagpalayaw makay din ag komo palayaw sa naay. 24 Naay Apang, naay alabet kaanggat sa naay batay pinaraoyan da mga komo tinaboy sa naay para kora amasdan da kalakolan komo tinaboy sa naay, panawen ako komo:wa pinalayaw bayo rinarang da paranawan. 25 Naay Apang, kawo da mataldeng gidte! Kawo nawed kilala mga taga paranawan ngani kawo naay kilala, da- amatangan ag mga komo tinaboy sa naay amba kawo da pomaidaw sa naay. 26 Kawo naay pinakilala sa kora da- batay dapo pinakilala para da komo palayaw sa naay ba sa kora din da- ako kay ba sai din sa kora.
1 Maraw nasabi:ya laki Hisos da mga naba, iya omalis kaanggat da konin mga nagtod-an. Kora paraoy sa karipay tekran Kidron da- semled sa sai ka alamanan sata. 2 Ag poro naba ba amatangan laki Hodas ag batay pomaabel sa konin panawen layen te laki Hisos da- da konin mga nagtod-an ba sata malkasma. 3 Kaya laki Hodas ba paraoy sata kaanggat da sai ka barkadahan mga sondalo taga goraan Roma da- da kalaati mga tagabantay sa balay Diyos nagpaparaoy mga koyay magpamanawen sa balay Diyos da- mga Parisiyo. Kora maki nagbaba mga armas da- solo- da- saleng. 4 Amatangan laki Hisos da boo batay mangyadi sa konin kaya kora ba konin sinalobong da- tinanong amba, Tawa da koyo nagsarak? 5 Kora amba, Laki Hisos ag taga goraan Nasarit. Iya amba, Ako ba Ako ngani-. Kora kaanggat laki Hodas ag magpaabel sa konin. 6 Maraw sinabi laki Hisos sa kora amba, Ako ngani-, ba kora napaelnek da nangatwang:nga sa lopa. 7 Iya magtanong:ngakay amba, Tawa gidte mana da koyo nagsarak? Kora tembag amba, Laki Hisos ag taga Nasarit. 8 Iya amba, Naay:ya sinabi sa koyo ako:wa ngani-. No ako da koyo nagsarak ba koyo pabayaan omalis da naay mga nagtod-an. 9 Konin sinabi naba para natped da konin sinabi amba, Kayno sai sa komo tinaboy sa naay ba wala naomaning. Naba:a ngani. 10 Linangso laki Simon Pidro da konin pisaw da- pinalang ag tagoanggat ag poon sa mga magpamanawen sa balay Diyos, da- natigpas da kanan dako kon talinga. Da ngaran ag tagoanggat naba ba laki Malko. 11 Sinabi laki Hisos sa laki Pidro amba, Komo:wakay soolon kom pisaw! Nawed ma naay kailangan inemen sa ineman kahidapan tinaboy sa naay naay Apang? 12 Laki Hisos ba inabel da- ginapos kon alima ag barkadahan mga sondalo kaanggat kora kapitan da- ag mga bantay mga Diw. 13 Iya ba kora dapo pinaanggat sa laki Anas ag bianan laki Kaipas, ag koyay lakol magpamanawen sa balay Diyos ag odas naba. 14 Laki Kaipas da somabi sa mga Diw amba, Piya dapo da sai ka iraya ngani da natay para sa boo lasyon. 15 Laki Simon Pidro da- sai dapo ka nagtod-an ba tomongroy sa laki Hisos. Kakilala gidte ag poon mga magpamanawen sa balay Diyos da nagtod-an naba, kaya iya kasled kaanggat laki Hisos sa ayanmanan balay ag poon. 16 Naogonan kay laki Pidro magpatindeg sa lowas sakbawan. Lomwas:sakay ag nagtod-an kilala ag poon da- magtokawanan sa daraga agbantay sa sakbawan da pinasled laki Pidro. 17 Laki Pidro ba tinanong ag daraga amba, Kawo ba kasai din sa mga nagtod-an ag iraya naba? Tembag laki Pidro amba, Nawed! 18 Madimla ag odas naba kaya da mga tagoanggat da- da mga tagabantay ba magpatindeg sa paribok sai ka baya para magpanaang. Laki Pidro ba lomiog sa kora, da magpanaang din. 19 Laki Hisos ba tinanong pag poon sa mga magpamanawen para sa konin mga nagtod-an da- sa konin tindo. 20 Tembag laki Hisos amba, Layen ako magtokawanan sa akarngeyan boo. Layen ako magtodo sa mga balay pagtiponan mga Diw da- sa lakol ka balay Diyos. Sata nga ba magrimpon da kaosonan mga Diw. Ako ba wala sinabi sa nawed akarngeyan Roma. 21 Kaytang ako da koyo nagtanong? Da koyo tanongon ba ag karngey sa naay sinabi. Kora da kamatang no nakay da naay tindo. 22 Maraw nasabi naba, iya ba sinampal sai sa mga agbantay sata. Konin tinanong amba, Kaytang komo timbag amba da poon ag mga magpamanawen? 23 Iya ba timbag laki Hisos, No ako tomokawanan daet ba komo gidte sabiyen ag daet. Ngani no piya da naay sinabi kaytang ako komo sinampal? 24 Laki Hisos nagapos dapo ba pinaanggat koyay Anas sa koyay Kaipas, ag poon sa mga magpamanawen sa balay Diyos. 25 Sata dapo din laki Simon Pidro magpatindeg magpanaang. Iya tinanong ag mga sata, Nawed dia kawo ba nagtod-an din ag iraya naba? Naba ba tinanggiyan laki Pidro amba, Nawed gidte! 26 Iya ba tinanong kay sai sa mga tagoanggat ag poon sa mga magpamanawen sa balay Diyos. Ag tagoanggat naba ba kaseledan ag lalaki konin tinigpasan talinga. Iya amba, Nawed ma kawo ag naay akitan kaanggat laki Hisos sa alamanan? 27 Naba ba tinanggiyan:nakay gidte laki Pidro. Kamalay te ba mangarang-it:ta da manok. 28 Laki Hisos ba kora pinaanggat ibat sa balay koyay Kaipas anggan sa balay lakol ag gobirnador. Nagkaboka:ani naba. Da mga Diw ba dayo semled sa balay lakol ag gobirnador para kora ayaw abilang maki daet toltol sa kora kaogalian da- sa makay naba ba kora abaya mamangan topa te pamaskwa. 29 Kaya lomwas koyay Pilato da- kora tinanong amba, Nakay da koyo sombong laban sa iraya tiya? 30 Kora tembag, No iya nawed mamanawen daet ba iya nawed yamen batay binaba sa komo. 31 Sinabi sa kora koyay Pilato, No amba, iya koyo paanggaten da- koyo hosgahen toltol sa koyo bilin. Tembag da mga Diw, Yamen ba wala kapangyadihan homosga para natay da tawa man. 32 Naba ba nangyadi para natped da sinabi laki Hisos no omaning da konin batay katayan. 33 Koyay Pilato ba semled:dakay sa balay lakol da- pinaparaoy laki Hisos. Iya magtanong sa konin amba, Kawo dia da Hadi mga Diw? 34 Laki Hisos ba tembag amba, Naba dia ba ibat sa komo sadiri remrem e maki magsabi naba sa komo? 35 Koyay Pilato ba tembag, Ako dia ba Diw? Da komo mga kalasyon da- da mga koyay magpamanawen sa balay Diyos da pomaanggat sa komo towa. Nakay dia da komo pinanawen? 36 Laki Hisos ba tembag, Da naay kahadian ba nawed sa paranawan tiya. No sa paranawan tiya da naay kahadian ba batay disin maglaban da naay mga kairayaan da- nawed disin batay apaabel mga Diw. Ngani nawed sa paranawan tiya da naay kahadian. 37 Amba koyay Pilato, No amba, kawo dia ba sai ka hadi? Laki Hisos ba tembag, Kawo:wani da magsabi amba ako ba hadi. Tiya gidte da dahilan kaya ako ba inonga da- paraoy towa sa paranawan: para magtokawanan para sa katotohanan. Da tawa man sa katotohanan ba magpakarngey sa naay. 38 Tinanong koyay Pilato amba, Nakay da katotohanan? Maraw nasabi:ya naba, lomwas:sakay koyay Pilato da- sinabi sa mga Diw amba, Ako wala akitan kadaetan sa konin. 39 Tayma kasayahan Paskwa ba kailangan ako magbal-an sai ka piriso para sa koyo. Koyo dia alabet naay bal-anan da Hadi mga Diw? 40 Kora boo ba tomakap amba, Nawed! Ayaw iya no nawed ba laki Barabas! Laki Barabas ba sai ka daet ka iraya.
1 Kaya laki Hisos ba tinaboy koyay Pilato sa mga sondalo da- pinahaplit. 2 Da mga sondalo ba gomaro sai ka balagen madogi da- binararaw da- sinorbong sa olo laki Hisos. Maraw kalbas ba iya pinasoolan sai ka bado kolay obi 3 da- sai-sai ba pabali sa konin da amba, Palakolon ngani- da hadi mga Diw! Da- iya ba kora nagpanampal. 4 Lomwas:sakay koyay Pilato da sinabi sa mga Diw amba, Koyo gidte pakarngeyan! Iya naay batay pinaloba sa koyo para koyo amatangan ako wala akitan kadaetan sa konin. 5 da pinalwas laki Hisos maki nagsool sorbong dogi da- bado kolay obi. Sinabi sa kora koyay Pilato, Koyo man-aw! Tiya da iraya! 6 Maraw iya ba akitan mga koyay magpamanawen sa balay Diyos da- da mga tagabantay ba kora mamagtakap amba, Iya papakoon sa kodos! Iya papakoon sa kodos! Sinabi koyay Pilato, Iya koyo gawen da- koyo da magpako sa konin. Ako wala akitan kadaetan sa konin. 7 Tembag da kaosonan mga Diw, Yamen maki bilin da- toltol sa bilin naba ba iya kailangan natay panawen iya amba iya da Onga Diyos. 8 Lalo aliman koyay Pilato maraw konin akarngeyan da mga tokawanan naba. 9 Iya semled:dakay sa balay lakol da- laki Hisos ba tinanong amba, Taga saan kawo? Ngani nawed tembag laki Hisos. 10 Amba koyay Pilato, Kawo dia dayo magtokawanan sa naay? Nawed ma komo amatangan kawo abaya naay bal-anan kayno papakoon sa kodos. 11 Laki Hisos ba tembag amba, Kawo ba wala kapangyadihan laban sa naay no nawed ba ag tinaboy Diyos sa komo. Kaya lalo makadaetan ag pomagaladgad sa naay towa. 12 Maraw naba ba akarngeyan koyay Pilato ba lalo:a konin alabet bal-anan laki Hisos. Ngani mamagtakap da kaosonan mga iraya amba, No komo binal-anan da iraya naba ba kawo nawed:da abyan koyay Sisar! Da tawa man amba iya hadi ba kalaban koyay Sisar. 13 Maraw akarngeyan koyay Pilato da mga tokawanan naba ba konin pinalwas laki Hisos. Da- iya tomongka sa tongkaan anhohosay, sata dako sa nag-awit "Latag Bato", ag sa tokawanan Hibriyo ba Gabata. 14 Naba ba aldaw maghanda kasayahan Paskwa da- batay:ya tenga aldaw. Sinabi sa mga Diw koyay Pilato amba, Towa da koyo hadi! 15 Kora mamagtakap amba, Iya pabonoon! Iya pabonoon! Papakoon sa kodos! Tinanong koyay Pilato amba, Naay dia batay pinapako sa kodos da koyo hadi? Tembag da mga koyay magpamanawen sa balay Diyos, Yamen ba wala hadi no nawed ba da Sisar! 16 Kaya laki Hisos ba tinaboy koyay Pilato sa mga sondalo para iya pakoon sa kodos. Kora nga ginaro laki Hisos. 17 da iya lomwas nagpas-an konin kodos paparaoy sa poro nag-awit Bongo, ag sa tokawanan Hibriyo ba Golgota. 18 Maraw rateng sata ba iya pinako sa kodos, kaanggat darwa dapo-sai sa kapet kanan da- sai sa kaliwa. 19 Koyay Pilato ba pomasorat makay tiya ka tokawanan da- pinaikapet sa kodos: Laki Hisos ag taga Nasarit, Hadi mga Diw. 20 Naba ba nagkasorat sa mga tokawanan Hibriyo da- Latin da- Girigo da- maoson sa mga Diw da kabasa naba panawen bali sa goraan lakol da poro pinakoan laki Hisos. 21 Sinabi sa koyay Pilato ag mga koyay magpamanawen amba, Ayaw komo agsoraten amba Hadi mga Diw, no nawed ba iya da magsabi amba, Ako da Hadi mga Diw. 22 Tembag koyay Pilato amba, Da naay:ya nasorat ba nasorat:tani. 23 Maraw laki Hisos ba pinako:a sa kodos mga sondalo, kora ginaro da konin mga nagsool da- kora nangeray kora apat. Kora din ginaro da konin panggalem nagsool. Naba ba wala tayi da- pinanawen boo ibat sa ngaway da anggan sa gaba. 24 Mamagtokawanan da mga sondalo, Ayaw tamo agsagien tiya! Tamo magpostahanan:na ngani para amatangan no tawa da batay tomabang naba. Nangyadi nga naba para natped da nagsabi sa Banal ka Kasoratan amba, Kora nangeray da naay mga nagsool da- da naay panggalem nagsool ba kora pinostahanan. Naba:a ngani. Amba nga da pinanawen mga sondalo. 25 Bali te sa kodos laki Hisos ba agpatindeg konin adang, da- ag arian babayi konin adang, da- bayi Mariya sawa laki Kiliopas. Anggat din sa kora bayi Mariya taga Magdala. 26 Maraw akitan laki Hisos da konin adang da- konin gidte nagpalayaw ka nagtod-an magpatindeg sata ba konin sinabi, Adang, naba da makay komo onga! 27 Da- konin sinabi sa nagtod-an amba, Naba da makay komo adang! Ibat saba ba ag adang laki Hisos ba pinapamataw ag nagtod-an sa konin balay. 28 Maraw kalbas naba amatangan laki Hisos amba nayadi:a ngani- da boo, da- para natped da Banal ka Kasoratan konin sinabi amba, Ako makainem! 29 Sata ba maki sai ka keden kapno inemen kalibed maarsem. Kora binabad sata da sai ka makay lomot, da- tinakes sa sanga alaman isopo, da- pinasepsep sa konin bibi. 30 Maraw konin:na nasepsep da inemen ba konin sinabi amba, Nayadi:ani! Konin pinoklay da konin olo da- nagto da konin inawa. 31 Naba ba aldaw maghanda da- ag mga Diw ba dayo sata dapo sa kodos da mga bangkay sa Aldaw Magpahinga, panawen mahalaga gidte ag Aldaw Magpahinga naba. Kaya kora inay-ayan sa koyay Pilato amba patigloon da mga binti ag mga pinako sa kodos, da- alsen sata da mga bangkay. 32 Sata nga paraoy da mga sondalo da- naniglo nga da mga binti ag darwa pinako kasabay din laki Hisos. 33 Ngani maraw kora sata sa laki Hisos da- kora akitan iya natay:yani ba nawed:da kora tiniglo da konin mga binti. 34 Ngani sinandak sai ka sondalo da tagiriran laki Hisos da- agad tomaridis da daya da- sapa. 35 Da agban-aw naba da magsistigo da- totoo gidte da konin sistigo da konin amatangan totoo gidte da konin sinabi. Konin sinistigohan naba para koyo mag-isarig din. 36 Nangyadi da mga naba para natped da nagsabi sa Banal ka Kasoratan amba, Wala batay natiglo kayno sai sa konin bongkalo. Naba:a ngani. 37 Da- sinabi kay ag Roma dapo ka eray sa Banal ka Kasoratan amba, Kora batay magban-aw sa konin ag kora sinandak. Naba:a ngani. 38 Maraw kalbas naba laki Hosi taga Arimatiya ba paraoy sa koyay Pilato para omay-ay payag para nagaro da bangkay laki Hisos. Laki Hosi ba sai din ka nagtod-an laki Hisos ngani nawed paaram panawen sa iya aliman sa mga Diw. Iya kay ba pinayagan koyay Pilato. Kaya lingkat laki Hosi da bangkay laki Hisos da- binaba sa batay paglebengan. 39 Omanggat sa konin laki Nikodimo. Iya da pomaraoy sa laki Hisos ag sai ka madlem. Iya maki nagbaba banglo-mga sai ka salop da- kalaati pag pinayliog mira da- aloy. 40 Sidawa ginaro da bangkay laki Hisos da pinalagyan banglo da- nagsabedan papa golanit toltol sa kaogalian mga Diw. 41 Sata sa poro pinakoan laki Hisos ba maki alamanan da- sata ba maki sai ka batay lebeng wala tang limbeng. 42 Ganyang ag odas naba ba aldaw maghanda mga Diw para sa Aldaw Magpahinga, da- bali kay da lebeng naba ba sata:a sidawa limbeng laki Hisos.
1 Madelem-delem dapo pag omaga linggo ba sata:a magparaoy sa lebengan bayi Mariya taga Magdala. Konin akitan wala:ani da bato panakep sa sakbawan lebeng. 2 Kaya iya magdalaganan magparaoy sa laki Simon Pidro da- sa nagtod-an nagpalayaw gidte laki Hisos da sinabi sa sidawa amba, Ginaro:wa sa lebeng da bangkay Panginoon da- nawed yamen amatangan saan:na binaba! 3 Kaya laki Pidro da- ag Roma ka nagtod-an ba magparaoy sa lebengan. 4 Sidawa ba tanan magdalaganan ngani laki Pidro ba aonahan ag nagtod-an nagpalayaw gidte laki Hisos. 5 Iya ba misongo da riniwa da galem. Konin akitan da papa golanit, ngani iya ba nawed semled. 6 Rateng kay laki Simon Pidro da- iya toloy semled sa lebeng. Konin akitan da papa golanit mag-ilatag, 7 da da panyo pamotos sa olo laki Hisos. Naba ba nawed kaanggat ag mga papa no nawed ba bokod kay nagbaroron sa tebteb. 8 Semled din ag nagtod-an monaan rateng. Konin akitan naba da iya maniwala. 9 Nawed dapo sidawa amatangan gidte ag nasorat sa Banal ka Kasoratan amba, Laki Hisos ba kailangan nabiyag:gakay. 10 Da- moli da mga nagtod-an. 11 Bayi Mariya ba magpatindeg sa lowas ag lebeng da- magpanangis; iya misongo da- semrey sa galem. 12 Iya maki akitan darwa ka anghil magsool kasorap ka golanit magtongka sa palagyan bangkay laki Hisos, sai ba sa olo dako da- sai ba sa paa dako. 13 Sidawa tinanong bayi Mariya amba, Inay, kaytang kawo magpanangis? Iya tembag, Kora ginaro da naay Panginoon da nawed naay amatangan no saan binaba. 14 Da- iya mamaliwi da konin akitan laki Hisos agpatindeg sata, ngani nawed konin kilala amba naba ba laki Hisos. 15 Iya tinanong laki Hisos amba, Inay, kaytang kawo magpanangis? Tawa da komo nagsarak? Amba dia bayi Mariya iya da mag-alaga ag alamanan, kaya konin sinabi amba, Koyay, no kawo da gomaro ba komo kay tod-on sa naay no saan komo binaba da- naay batay ginaro. 16 Amba laki Hisos, Mariya! Iya paloba da- konin sinabi sa tokawanan Hibriyo, Raboni! da alabet sabiyen ba Tagatodo. 17 Amba laki Hisos, Ako ayaw dapo komo aggenan, panawen ako nawed dapo kaparaoy sa naay Apang. No nawed ba kawo paraoy sa naay mga arian da- komo sabiyen ako batay dapo somalbon sa naay Apang da- koyo Apang, sa naay Diyos da- koyo Diyos. 18 Kaya bayi Mariya taga Magdala ba paraoy sa mga nagtod-an da- sinabi, Naay akitan da Panginoon! Da- konin nanoltol sa kora da mga sinabi laki Hisos. 19 Sa madlem ag aldaw linggo naba, da mga nagtod-an ba magrimpon. Langkeb da mga sakbawan panawen sa kora ba aliman sa mga Diw. Laki Hisos ba rateng da magpatindeg sa kora tenga. Iya amba, Sa koyo:wa ngani- da kaginhawahan! 20 Maraw konin nasabi naba ba konin Pinaban-Aw da konin mga alima da- konin tagiriran. Nangaangasan gidte da mga nagtod-an maraw kora akitan da Panginoon. 21 Sinabi:yakay laki Hisos sa kora amba, Sa koyo:wa ngani- da kaginhawahan! No omaning ako pinaidaw naay Apang ba amba kay din koyo naay nagpaidaw. 22 Da- kora ba konin minaroymoyan da- konin sinabi, Koyo tabangen da Ispirito Banal. 23 No koyo nagpatawad da kadaetan tawa man ba napatawad:da ngani-. Ngani no nawed koyo nagpatawad da mga naba ba nawed din napatawad. 24 Ngani laki Tomas ag nag-awit Siing, sai sa labindarwa ka nagtod-an ba wala sata pag rateng laki Hisos. 25 Kaya sinabi sa konin ag mga Roma ka nagtod-an amba, Yamen akitan da Panginoon! Laki Tomas ba magtebag, Ako nawed gidte batay maniwala anggan nawed naay akitan da mga limbaed pako sa konin mga alima da- batay apalbog da naay solo sata, da- da naay alima sa konin tagiriran. 26 Maraw kalawey:ya da walo ka aldaw, agrimpon:nakay sa galem balay da mga nagtod-an; kora kaanggat laki Tomas. Langkeb da mga sakbawan ngani laki Hisos ba semled da- patindeg sa kora tenga, da- sinabi amba, Sa koyo:wa ngani-da kaginhawahan. 27 Da- konin sinabi sa laki Tomas amba, Komo pabaliyen towa da komo solo da- kom ban-awan da naay mga alima. Palbogon da komo alima sa naay tagiriran. Kawo ayaw:wa ag-alingangaan no nawed ba kawo maniwala:ani. 28 Tembag laki Tomas amba, Naay Panginoon da naay Diyos! 29 Sinabi sa konin laki Hisos amba, Kawo dia maniwala:ani panawen ako komo akitan? Angasan da iya magpaniwala kayno ako nawed konin akitan. 30 Maoson dapo ka tandaanan pinanawen laki Hisos da sinistigohan ag mga konin nagtod-an, ngani nawed nagkasorat sa kasoratan tiya. 31 Da mga nasorat towa ba para koyo mag-isarig amba laki Hisos da Kiristo, ag Onga Diyos da- sa koyo mag-isarig sa konin ba koyo kamaki biyag gidte sa koyo maki kasaiyan sa konin.
1 Maraw kalawey naba ba laki Hisos ba paban-aw:wakay sa konin mga nagtod-an sa tebteb dagat-dagatan Tibiriyas. Makay tiya da nangyadi. 2 Mal-anggatan kora Simon Pidro, Tomas ag nag-awit Siing, Tanail taga goraan Kana, Galiliya, da mga onga laki Sibidiyo, da darwa dapo sa konin mga nagtod-an. 3 Sinabi sa mga Roma laki Simon Pidro amba, Ako batay mangisda. Kora amba, Yamen batay anggat. Kaya kora omalis da- somakay sa bangka, ngani wala abel ag madlem naba. 4 Maraw mapoti:a da sirangan, laki Hisos ba patindeg sa pangpang, ngani iya ba nawed akilalaan mga nagtod-an. 5 Konin sinabi, Mga padi, koyo dia maki abel? Kora amba, Wala gidte! 6 Amba laki Hisos, Koyo laboon da koyo lambat sa kanan dako koyo bangka, da- koyo batay kabel. Kora nga linabo da kora lambat da- naba ba nawed kora aranggot panawen sa maoson da abel. 7 Sinabi sa laki Pidro pag nagtod-an nagpalayaw gidte laki Hisos amba, Iya nga da Panginoon! Maraw naba ba akarngeyan laki Simon Pidro, ba konin binegkes sa lawas da konin golanit (panawen iya ba wala bado) da- tomalon sa sapa. 8 Da mga nagtod-an konin kaanggat ba sa bangka da- batay:ya pomondo nagranggot da lambat kapno isda. Kora nawed naw adayo sa pangpang-mga sampo ka kawayan ngani. 9 Maraw kora katakdang sa pangpang ba kora kaban-aw maki baya maki isda nag-ihaw da- mga tinapay. 10 Laki Hisos amba, Koyo magbaba te towa koyo abel isda. 11 Kaya laki Pidro ba somalakay sa bangka da- rinanggot sa pangpang da lambat kapno mga isda lakol-sai ka daan da- limampo da tatlo da boo. Nawed nasagi da lambat, kayno kaamba kaoson da isda. 12 Laki Hisos amba, Apora koyo da- man-aga. Kayno sai sa mga nagtod-an ba wala mangahas magtanong sa konin no tawa iya, panawen kora amatangan iya da Panginoon. 13 Laki Hisos ba pabali da- ginaro da tinapay da tinaboy sa kora. Amba din da isda. 14 Tiya da ikatatlo laki Hisos ba paban-aw sa konin mga nagtod-an ibat sa iya nabiyag:gakay. 15 Maraw kora kapamangan ba laki Simon Pidro ba tinanong laki Hisos amba, Simon, onga laki Howan, ako dia komo nagpalayaw labi dapo sa mga tiya? Iya tembag, Hee ngani-! Panginoon, komo amatangan kawo naay nagpalayaw. Sinabi sa konin laki Hisos, Komo alagaan da naay mga topa te. 16 Iya tinanong:ngakay laki Hisos, Simon, onga laki Howan, ako dia komo nagpalayaw? Amba laki Simon, Hee ngani-, Panginoon! Komo amatangan kawo naay nagpalayaw. Amba laki Hisos, Komo alagaan da naay mga topa. 17 Katatlo:wani iya tinanong laki Hisos, Simon, onga laki Howan, ako dia komo nagpalayaw? Marongkot laki Pidro panawen katatlo:wa iya tinanong laki Hisos amba, Ako dia komo nagpalayaw? Iya tembag, Panginoon, komo amatangan da boo nakayman. Komo amatangan kawo ba naay nagpalayaw. Sinabi sa konin laki Hisos, Komo alagaan da naay mga topa. 18 Naay gidte nagsabi sa komo, Ag kawo kaongaan dapo ba kawo da magsool sa komo sadiri da kawo magkadangan no saan da komo alabet. Ngani no kawo koyay:yani ba komo batay inenat da komo alima da Roma da batay magsool sa komo da kawo batay binaba no saan da nawed komo alabet. 19 Konin sinabi naba para pakilalaen no omaning batay natay laki Pidro da- sa makay naba batay pinalakol da Diyos. Maraw kalbas ba sinabi sa konin laki Hisos, Kawo tomongroy sa naay! 20 Laki Pidro ba mamaliwi. Konin akitan magtongroy ag nagtod-an nagpalayaw gidte laki Hisos. Iya da misari sa soot laki Hisos maraw kora magpanal-aponan da- tomanong amba, Panginoon, tawa da batay pomaabel sa komo? 21 Maraw iya akitan laki Pidro ba laki Pidro ba magtanong sa laki Hisos amba, Panginoon, nakay kay da batay nangyadi sa iraya tiya? 22 Laki Hisos ba tembag, No naay alabet iya ba biyagan anggan sa ako batay:yakay paoli towa ba nakay da komo pakiaram? Kawo tomongroy sa naay! 23 Panawen saba ba nabarita sa mga arian amba nawed batay natay da nagtod-an naba. Ngani nawed sinabi laki Hisos iya ba nawed tay natay, no nawed ba, No naay alabet iya ba biyagan anggan ako batay:yakay paoli towa ba nakay da komo pakiaram? 24 Tiya nga da nagtod-an magsistigo para sa mga nakayman naba. Iya din da somorat ag mga naba, da- yamen amatangan totoo gidte da konin sistigo. 25 Maoson dapo da pinanawen laki Hisos. No batay sinorat da boo ba naay nagremrem wala:a batay palagyan sa boo paranawan para sa boo mga kasoratan naba.
1 Nagpalayaw Tiyopilo, Naay nanoltol sa naay monaan ribro da boo pinanawen laki Hisos, da boo konin tindo ibat sa mag-ompisa konin panawen, 2 anggan sa aldaw iya ba pinasalbon Diyos sa soksokowan. Sa kapangyadihan Ispirito Banal ba konin binilin da mga pinili sogoan konin hinidang bayo iya somalbon. 3 Koyo remremen! Laki Hisos ba pinahidapan anggan iya natay. Ibat sa iya nabiyag:gakay anggan apatnapo ka aldaw, layen iya ba paban-aw sa kora; sa makay naba ba amatangan gidte iya ba nabiyag:gakay. Sa iya paban-aw sa kora ba iya magpanoltol sa kora para sa batay:ya maghadi da Diyos. 4 Sa odas iya karimpon dapo sa kora, laki Hisos ba magbilin sa kora amba, Ayaw dapo koyo mangadang ibat sa goraan lakol Hirosalim, no nawed ba koyo panyaan sata da pangako Diyos Apang sa soksokowan, pag naay:yani sinabi sa koyo. 5 Laki Howan ba batang:ngani magbaotismo iraya sa sapa; ngani sa nawed naw maagot ba koyo batay binaotismohan sa Ispirito Banal. 6 Maraw karimpon laki Hisos sa mga konin nagtod-an, iya ba kora tinanong amba, Panginoon, batay:yakay dia komo pinaoli mona da kasakopan sa Israil? 7 Iya ba tembag sa kora amba, Da mga dag-on anggan da mga odas ba pinili naay Apang. Nawed:da kailangan koyo da- po amatangan no kaomaning kaagot naba. Iya da kamatang. 8 Ngani koyo batay pinakan akayanan no rateng sa koyo da Ispirito Banal, para koyo kapanoltol pag koyo amatangan para sa naay sa mga iraya sa Hirosalim, da- sa boo Hodiya, da- sa Samariya, anggan sa mga tangrawan lopa. 9 Kalbas konin sinabi naba, maraw iya ba kora dapo nagban-awan, iya ba pinasalbon Diyos pangaway da- tinakleban yaong. 10 Maraw kora magtingara dapo sa ngaway sa iya nagkaadayo, maki rateng sa kora tebteb darwa ka lalaki magbado mapoti gidte. 11 Sidawa amba, Mga taga Galiliya, kaytang koyo magpatindeg towa magtingara sa langit? Tiya pag laki Hisos, pag somalbon sa soksokowan ba batay:ya-kay towa paraoy makay din pag koyo akitan iya somalbon:na sa ngaway. 12 Da mga pinili sogoan laki Hisos ba paoli:akay sa Hirosalim ibat sa bogsor nag-awit Kaolibowan. Maki mga lima ka daan ka depa da kaadayoon dalan kadangen. 13 Da mga tiya ba kora Pidro, Howan, Tiyago, Anris, Pilipi, Tomas Bartolomi, Matiyo; laki Tiyago onga koyay Alpiyo, laki Simon ag Masipagen para sa lasyon Israil, anggan laki Hodas onga koyay Tiyago. Maraw kora manbait sa kora pamatawan sa goraan lakol, kora toloy:ya yomakbang sa basagan sa ngaway. 14 Layen kora boo ba magrimpon magkasai sa magda- rangin, anggat din da mga babayi da- bayi Mariya anday laki Hisos; saba din da mga arian laki Hisos. 15 Pag mga aldaw naba ba magrimpon da mga arian sa laki Hisos, mga sai ka daan da- dalwampo kora boo. Patindeg laki Pidro sa kora tenga da- iya magtokawanan amba, 16 Mga kaanggat arian, kailangan mangyadi da tokawanan nagsorat sa Ribro Diyos tangona dapo, pag pinasabi Ispirito Banal sa hadi Dabid para sa batay mangyadi sa laki Hodas. Laki Hodas da tomonton sa mga omabel sa laki Hisos. 17 Pag monaan iya ba kabilang sa yamen; iya yamen din pal-anggat sa magpamanawen para sa Diyos. 18 Da kwarta konin tinabang sa konin pinanawen daet ba binayad sa sai ka sokat lopa. Iya manlipog pasongsong, nalto da konin boyon da- lomwas:sa da pena. 19 Naba ba abaritaan boo mga iraya magpamataw sa Hirosalim; kaya ngani- sa kora tokawanan pag lopa naba ba nag-awit Akildama, da alabet sabiyen ba "Agayen abaribodan daya". 20 Nagkasorat sa ribro mga Igwayan amba, Pabayaan:nani konin balay wala iraya. Ayaw:wani maki magpamataw sata. Da- amba, Bayaan garwen Roma da konin katongkolan. Naba:a ngani. 21 Kaya kailangan tamo pomili sai ka batay yamen pal-anggat, batay din magpanoltol sa mga iraya amba laki Hisos ba biniyag:gakay Diyos. Kailangan iya ba sai sa mga mag-anggat-anggat sa yamen sa boo mga dag-on da Panginoon ba mamiyag sa tamo, ibat iya ba binaotismohan sa sapa laki Howan anggan iya pinasalbon sa soksokowan. 23 Kora ba pomili darwa ka lalaki : laki Matiyas da sai, da ikadarwa kay ba laki Hosi pag nag-awit Barsabas, ag konin palayaw ba Hosto. 24 Kora ba magdarangin amba, Panginoon, komo amatangan da remrem boo mga iraya. Komo kay pakilalaen sa yamen no tawa sa darwa tiya da komo gidte pinili 25 para iya ba anggat sa labinsai ka pinili sogoan da- batay magpanawen pag katongkolan inogonan laki Hodas pag iya paraoy sa poro bagay sa konin. 26 Kora ba magpaypilian da- laki Matiyas da napili. Iya:akay da nabilang sa labinsai ka pinili sogoan.
1 Maraw bait da aldaw nag-awit Pintikostis ba magkarimpon sa sai ka poro kora boo mag-isarig sa laki Hisos. 2 Kamalay te arngeyan da sai ka aleng ibat sa soksokowan makay:ya bagorbor maeyat ka koaya, da- pinakapno:a da boo balay kora pagrimponan. 3 Kora maki akitan makay te pag dila-dila apoy rempa sa tayma sai sa kora. 4 Kora boo ba kapno Ispirito Banal. Kora tomokawanan sa nawed amba sadiri tokawanan, pag tinaboy Ispirito Banal para kora tokawanen. 5 Maki mga Diw ibat sa Roma-Roma ka poro magpamatawan sa Hirosalim naba pag odas naba, mga iraya masambahen sa Diyos. 6 Maraw kora arngeyan da aleng tiya ba magkarimpon da kaosonan iraya. Kora manggilalas panawen kora arngeyan kora-kora tokawanan tinokawanan mga pinili sogoan laki Hisos. 7 Sa kora manggilalas ba kora sinabi amba, Nawed mana taga Galiliya kora boo? 8 Kaytang dia mga tamo sadiri kagisengan tokawanan da tamo nagkaakarngeyan sa kora? 9 Tamo ba mga taga Partiya, mga taga Midya, mga taga Ilam, mga magpamataw sa Misopotamya, sa Hodiya, sa Kapadosya, sa Ponto, sa Asiya, 10 sa Pirigya, sa Pampilya, sa Ihipto, sa mga lopa sakop sa lopa Libya sa tebteb goraan Siniri, mga iraya ibat sa goraan Roma magpamatawan sa Hirosalim, kayno mga Diw, kayno mga Nawed Diw pag naranggot sa kaogalian mga Diw; 11 mga taga Kirita, mga taga Arabya-amba man ba tamo nagkaarngeyan kora magtokawanan sa tamo-tamo sadiri tokawanan sa kora magbarita para sa mga makapangyadihan ka panawen Diyos. 12 Kora boo ba magtaka gidte da- makay:ya samperaket kora remrem. Kaya nawed mag-epet kora magpaltanongan amba, Nakay dia pag nangyadi naba? 13 Ngani da mga Roma ba magtoya amba, Mga lasing naba! 14 Maraw kalbas patindeg laki Pidro kaanggat da Roma labinsai ka pinili sogoan. Iya magtokawanan maeyat amba, Koyo mga kapowa Diw da- koyo boo magpamatawan sa goraan Hirosalim, koyo gidte pakarngeyan piya da naay tay sinabi. 15 Nawed lasing da mga iraya tiya makay pag koyo remrem, panawen pangitlogan ngani da aldaw. 16 No nawed ba tiya pag nangyadi ba pag sinabi laki Hoyil pag tagabarita ibat sa Diyos amba, 17 Da Diyos ba amba, Tiya da batay naay pinanawen sa mga paoriyan aldaw, da boo iraya ba naay batay pinakan naay Ispirito, da koyo mga onga ba batay magbarita ibat sa naay, da koyo mga binata ba batay kaban-aw ag naay batay Pinaban-Aw sa kora sa makay akalkan, da koyo mga koyay ka lalaki ba batay maki akalkan ibat sa naay. 18 Hee, sa mga aldaw naba, naay mga tagoanggat, kayno lalaki kayno babayi, ba batay din naay pinakan naay Ispirito, da- kora batay magbarita ibat sa naay. 19 Ako batay magpaban-aw mga katakataka sa langit da- mga tandaanan sa lopa, daya, apoy, lipetek ka loon. 20 Batay naklep da aldaw, da bolan kay ba batay mapola makay:ya daya bayo bait da aldaw Panginoon, ag kaangasen piya ka aldaw. 21 Sa odas naba, da iya magdarangin sa Panginoon amba Ako kay ribriyen, ba iya batay rinibri. 22 Amba dapo laki Pidro, Koyo mga taga Israil, koyo pakarngeyan da mga tokawanan tiya! Laki Hisos taga goraan Nasarit ba sinogo Diyos para pomanawen sa koyo tenga mga makapangyadihan ka panawen, mga katakataka, mga tandaanan pag pinapanawen Diyos sa konin. Tiya ba koyo:wa amatangan. 23 Ngani da iraya tiya pag tinaboy sa koyo ba koyo pinapako sa kodos, da- pinabono sa mga daet ka iraya. Naba ba toltol sa alabet Diyos, toltol din sa kaamatangan Diyos ibat sa katangonaan dapo. 24 Ngani iya ba biniyag:gakay Diyos, iya ba konin pinalwas sa kapangyadihan katayan. Nawed abaya iya ba naggenan katayan, 25 makay pag sinabi hadi Dabid para sa konin amba, Naay akitan da Panginoon ba layen sa naay ropangan iya ba naay pal-anggat, kaya nawed batay samperaket da naay remrem. 26 Panawen saba ba angasan da naay poso, kapno podi da naay dila, da- ako ba batay magkalek maki sarig sa Diyos. 27 Panawen naay gisarem ba nawed batay komo pinabayaan baywi sa kapangyadihan katayan. Nawed batay komo pinabayaan narokas da bangkay komo Banal. 28 Komo tindo sa naay da mga dalan magparaoy sa biyag, maraw kawo naay pal-anggat ba ako ba batay kapno kaangasan. 29 Amba laki Pidro, Mga kapowa Diw, ako pabayaan naay gidte asabi sa koyo para sa tamo tangona hadi Dabid. Iya ba natay da- limbeng. Saba te baywi da konin lebeng anggan mona. 30 Iya sai ka tagabarita ibat sa Diyos. Konin amatangan da pinangako Diyos sa konin amba, Sai sa komo mga kaapoan ba batay hadi makay din kawo. 31 Akitan hadi Dabid da magbiyag:gakay sa Pinili Diyos, da- tiya ba konin:nani nanoltol pag konin sinabi amba, Iya nawed batay pinabayaan baywi sa kapangyadihan katayan; Nawed batay pinabayaan narokas da konin bangkay. 32 Da Hisos tiya ba biniyag:gakay Diyos. Yamen boo ba kaban-aw iya ba biyagan:nakay. 33 Maraw iya pinaatatas sa kanan kapet Diyos, konin tinabang sa konin Apang da pinangako Ispirito Banal. Da- tiya ba konin:nakay tinaboy sa yamen makay din pag koyo nagkaakitan da- nagkaarngeyan mona. 34 Hadi Dabid ba nawed pinasalbon sa soksokowan, ngani iya din da somabi amba, Sinabi Panginoon sa naay Panginoon amba, Kawo tomongka sa naay kanan kapet, 35 anggan nawed dapo naay napalagay sa galem komo araprapa da komo mga kalaban. Naba:a ngani. 36 Kaya da boo mga taga Israil ba kailangan kamatang pag Hisos tiya, pag koyo pinako sa kodos-iya da pinanawen Diyos da Panginoon da- Kiristo! 37 Maraw kora arngeyan da sinabi laki Pidro ba asleban da kora remrem. Kora tinanong laki Pidro da- da Roma ka pinili sogoan amba, Mga kapowa Diw, nakay da yamen kailangan panawenen? 38 Tembag laki Pidro amba, Magsisi:yani da- mag-ogon tayma sai sa koyo koyo mga kadaetan, da- koyo magpabaotismo sa ngaran laki Hisos Kiristo para apatawad da koyo mga kadaetan da- batay tinaboy Diyos sa koyo da Ispirito Banal. 39 Panawen da pangako ba para sa koyo da- sa koyo mga onga, da- para sa boo mga iraya mga taga adayo-sa tayma batay pinili Panginoon tamo Diyos. 40 Maoson dapo da sinabi laki Pidro para kora amatangan gidte da konin:nani sinabi ba totoo; iya magdaying sa kora amba, Koyo omadayo sa mga daet ka kairayaan tiya para koyo naribri sa kapadosahan. Naba:a ngani. 41 Da mga maniwala sa konin sinabi ba magpabaotismo sa sapa; kaya pag aldaw naba ba da nadagdag sa kora ba tatlo ka ribo ka iraya. 42 Kora ba boo odas sa todo mga pinili sogoan, layen kora mal-anggatan makay kora talkakaan, layen kora mamagpalpisangan pamangnen, layen te kora magdarangin. 43 Panawen sa maoson katakataka da- tandaanan pinanawen mga pinili sogoan laki Hisos ba aliman da boo iraya. 44 Da boo mag-isarig sa laki Hisos ba layen mal-anggatan. Da kora nag-apo ba kora:a boo da maggamit. 45 Kora pinabili da kora mga nag-apo, da- da kabayadan ba kora nangeray sa boo, toltol sa kailangan tayma sai. 46 Aldaw-aldaw kora magrimpon sa lakol ka balay Diyos, kora magpalpisangan pamangnen sa kora mga balay. Kora magpaysarowanan, angasan kora remrem. 47 Kora mamagpodi sa Diyos. Aldaw-aldaw nagdagdag Panginoon Hisos sa kora da mga nagkaribri.
1 Sai ka aldaw ba manorip batang da aldaw, pag odas layen kora magdarangin, kolaki Pidro da- Howan ba paraoy sa lakol ka balay Diyos. 2 Sata sa sakbawan nag-awit Maganda, maki sai ka lalaki lompo ibat sa iya inonga. Iya ba nagbaba sata aldaw-aldaw para mangay-ay taboy sa mga iraya magseled sa lakol ka balay Diyos. 3 Maraw konin akitan kolaki Pidro da- Howan batay semled sa balay Diyos, iya mag-ay-ay taboy sa sidawa. 4 Iya sinrey kolaki, da- sinabi laki Pidro sa konin amba, Kawo man-aw sa kidawa. 5 Man-aw nga iya sa kolaki. Konin sarig ba iya batay tinaboyan. 6 Ngani sinabi laki Pidro amba, Ako wala pilak kayno ginto, ngani da sa naay ba naay batay tinaboy sa komo; sa ngaran laki Hisos Kiristo taga Nasarit, kawo patindeg da- mangadang. 7 Ginenan laki Pidro da kanan alima ag iraya lompo; 8 iya omigtad da- patindeg da- mangadang. Iya igtadan semled sa lakol ka balay Diyos pal-anggat:ta din kolaki, angasan gidte magpodi sa Diyos. 9 Akitan boo iraya iya ba magkadangan da- magpodi sa Diyos. 10 Kora ba magtaka gayed maraw kora akilalaan iya ngani- pag mahidapen aray te magtongka da- magpangay-ay taboy sa sakbawan nag-awit Maganda sa balay Diyos. 11 Maraw pag iraya aray lompo ba mag-arikoy sa kolaki Pidro da- Howan sa maki pasirongan laki Salomon ba magdalaganan paraoy sa kora da mga iraya magtaka gayed sa nangyadi naba. 12 Maraw akitan laki Pidro da mga iraya, iya amba, Mga kapowa taga Israil, kaytang koyo magtaka sa nangyadi tiya? Kaytang yamen ba koyo nagbotlogan makay naba? Amba dia koyo remrem, iya kidawa napakadang sa kidawa sadiri kapangyadihan? Amba dia koyo remrem, iya kidawa napakadang sa kidawa makaDiyos? 13 Da Diyos pag sinamba manlaki Abraham, Isaak, da- Hakob, da Diyos ag sinamba tamo mga pangapoan, iya da pomalakol sa laki Hisos pag magpamanawen sa konin. Ngani iya koyo pinaabel sa mga maki katongkolan, iya koyo sinikway sa ropangan koyay Pilato, kayno amba disin bal-anan iya. 14 Iya ba Banal da- Mataldeng, ngani iya koyo sinikway. Sai ka amomono iraya da koyo inay-ayan bal-anan. 15 Da- koyo binono da nag-ibatan biyag gidte, ngani iya ba biniyag:gakay Diyos. Yamen ba magban-aw iya ba biyagan:nakay. 16 Da kapangyadihan ibat sa ngaran laki Hisos da pomapiya sa lalaki tiya. Iya pomiya sa iya mag-isarig sa ngaran laki Hisos. Da mag-isarig sa laki Hisos naba gidte da pomapiya sa konin, makay pag koyo nagkaakitan. 17 Mona, mga kapowa Diw, naay amatangan nawed koyo amatangan da koyo pinanawen, da- nawed din amatangan koyo mga poon da kora pinanawen. 18 Ngani sa koyo pinanawen tiya, nangyadi:yani pag tangona dapo pinabarita Diyos sa konin mga tagabarita amba kailangan pahidapan gidte laki Kiristo. 19 Kaya koyo magsisi:yani da- mag-ogon koyo mga kadaetan da- paoli koyo remrem sa Diyos para konin barawen da koyo kadaetan 20 da- koyo batay tinaboyan Panginoon odas magpaginhawa sa koyo remrem. Konin batay sinogo laki Hisos, naba da Kiristo, konin hinidang para sa koyo. 21 Kailangan iya ba mamataw dapo sa soksokowan anggan rateng da odas batay:yakay pinabayo da boo nakayman, makay pag pinabarita Diyos sa konin mga banal ka tagabarita ag bomarita ibat dapo tangona. 22 Sinabi laki Moysis amba, Batay pomili da Diyos sai sa koyo mga kaapoan para iya tagabarita Panginoon makay din ako. Koyo pakarngeyan da boo konin batay sinabi sa koyo. 23 Da iya nawed magpakarngey sa tagabarita naba ba batay pinasway sa mga kairayaan Diyos, da- batay simpo. 24 Para sa mga aldaw tiya ba bomarita din da boo mga tagabarita ibat sa Diyos ibat sa laki Samwil anggan da boo sa konin paoriyan. 25 Da kasaiyan pinanawen Diyos sa konin mga tagabarita ba para din sa koyo. Kaanggat din koyo sa maonay ka kasaiyan pinanawen Diyos sa tamo mga pangapoan, pag konin sinabi sa laki Abraham amba, Sai sa komo kaapoan batay naay sinangkap para da boo iraya sa paranawan ba parongawan. 26 Kaya hinidang Diyos da konin tagapamanawen. Iya ba monaan pinaparaoy sa koyo para koyo ba konin parongawan, para koyo ba tolongan paawak sa koyo daet ka biyag.
1 Magtokawanan dapo kolaki Pidro da- Howan maraw bait da mga magpamanawen sa balay Diyos, da kapitan mga tagabantay sa balay Diyos, da- da mga Sadosiyo. 2 Panawen magsabi mga Sadosiyo amba wala natay batay:yakay nabiyag, kora abaisan gidte sa sidawa maraw sidawa magbarita sa mga iraya amba laki Hisos ba biniyag:gakay, panawen mapawa gayed toltol sa sidawa sabi amba batay:yakay biniyag da mga nangatay:yani. 3 Kaya kora inabel kolaki, da- piniriso dapo anggan omaga:akay panawen madlem:mani naba. 4 Kayno amba, maoson sa mga karngey sa sidawa tindo ba mag-isarig sa laki Hisos. Da boo lalaki mag-isarig anggan sa odas naba ba lima ka ribo da kaosonon. 5 Maraw omaga:akay, magrimpon sa Hirosalim da kora mga poon, da mga koyay sa goraan, da- da mga kamatangen sa Bilin Diyos. 6 Sata din laki Anas, pag koyay lakol magpamanawen sa balay Diyos, manlaki Kaipas, Howan, Alihanro da- da boo barkadahan mga koyay magpamanawen sa balay Diyos. 7 Maraw pinapaloba sa kora sidawa Pidro da- Howan ba sidawa ba kora tinanong amba, Sa nakay ka kapangyadihan, sa tawa ngaran kandawa pinanawen tiya? 8 Laki Pidro pag kapno Ispirito Banal ba tembag amba, Mga poon, mga koyay sa goraan, 9 koyo nagtanong gidte mayam kidawa mona para sa kidawa pinanawen piya sa sai ka iraya aray lompo, no omaning iya pomiya, 10 koyo boo da- da boo taga Israil ba pakarngey para koyo amatangan amba da iraya tiya ag magpatindeg sa koyo ropangan ba iya pomiya:a gidte panawen sa makapangyadihan ka ngaran laki Hisos Kiristo taga Nasarit pag koyo pinapako sa kodos, ngani iya ba biniyag:gakay Diyos. 11 Pag Hisos tiya Da toar inimbanda koyo mga magpanlobo balay, iya da toar batay arigi maonay sa sorokan. Naba:a ngani. 12 Sa laki Hisos Kiristo ngani batay akitan da karibriyan, panawen sa ngato langit ba da konin ngaran ngani da tinaboy Diyos sa karibriyan mga iraya. 13 Magtaka da boo sa hosayan lakol mga Diw sa kakasagan Pinaban-Aw kolaki Pidro da- Howan, lalo:ani maraw kora amatangan sidawa ba basta iraya:a ngani da- nawed tang mag-adar. Kora akilalaan amba sidawa ba pal-anggat laki Hisos pag iya ba biyagan dapo. 14 Ngani maraw kora akitan sa tebteb kolaki da iraya pinapiya, kora ba wala asombong sa kolaki. 15 Kaya sidawa pinalwas dapo sa hosayan lakol, bayo gira kora ba magpaypolongan. 16 Kora magpaltanongan amba, Nakay da tamo batay pinanawen sa mga iraya tiya? Panawen amatangan:nani boo taga Hirosalim amba sai ka katakataka gidte da sidawa pinanawen da- nawed:da tamo batay atanggiyan. 17 Para ayaw:wani Romateng dapo tiya sa Roma, sidawa ba tamo gidte limanen amba, Ayaw:wani magtokawanan sa tawa man ka iraya para sa ngaran tiya. 18 Kaya sidawa kora:akay pinasled da- liniman gidte amba, Ayaw:wani magtokawanan da- ayaw magtodo para sa ngaran laki Hisos. 19 Ngani tembag kolaki Pidro da- Howan amba, Koyo:wani da homosga no saan da piya sa remrem Diyos-da tomoltol sa koyo sabi, no da tomoltol sa sabi Diyos. 20 Nawed abaya no nawed kidawa magbarita pag kidawa akitan da- arngeyan. 21 Sidawa ba lalo gidte liniman pag hosayan lakol bayo gira binal-anan. Wala kora akitan padaan para sidawa ba padosahan, panawen ag mga iraya ba magpalakol sa Diyos panawen sa nangyadi. 22 Da lalaki pag sidawa pinapiya ba nawed ngani apatnapo ka dag-on da kakoyayen. 23 Maraw binal-anan kolaki Pidro da- Howan sidawa paraoy sa sidawa kabarkadahan. Sidawa nanoltol da sinabi pag mga koyay magpamanawen sa balay Diyos da- mga koyay sa goraan. 24 Maraw arngeyan tiya, mal-anggatan kora magdarangin sa Diyos amba, Panginoon, kawo da Romarang pag langit, lopa, dagat da- pag boo maki biyag towa! 25 Kawo din da pomasabi sa yamen pangapoan hadi Dabid, pag komo tagapamanawen, sa paremrem Ispirito Banal, pag konin sinabi amba, Kaytang abaisan gayed da mga Nawed Diw, kaytang da mga iraya ba magremrem gidte mga wala kaparosan? 26 Handa lomaban da mga hadi sa lopa magkatipon da mga poon laban sa Panginoon Diyos da- laban sa konin Pinili. Naba:a ngani. 27 Magkarimpon sa goraan lakol tiya kora Hirodis, laki Ponsiyo Pilato, kaanggat din da mga Nawed Diw da- da boo Israil, laban sa komo banal ka tagapamanawen laki Hisos pag komo Pinili. 28 Kora pinanawen da boo kailangan mangyadi, pag hinanda komo kapangyadihan, toltol sa komo alabet pag monaan dapo. 29 Mona, Panginoon, komo ban-awan yamen ba kora nagliman. Komo kay tolongan da komo mga tagoanggat para pangadaren da komo tokawanan wala gidte kaliman. 30 Komo enaten da komo alima para magpapiya, para yamen kapanawen mga tandaanan da- katakataka ka panawen sa ngaran laki Hisos pag komo banal ka tagapamanawen. 31 Maraw kora kapandarangin:nani ba domalineg da kora pagtiponan. Kora boo ba kapno Ispirito Banal da- kora mangadar tokawanan Diyos wala gidte kaliman. 32 Sai ngani da remrem, sai ngani da alabet pag barkadahan mga mag-isarig sa laki Hisos. Nawed amba da tawa man sa kora ba da konin nag-apo ba konin sadiri, no nawed ba para sa kora boo. 33 Da mga pinili sogoan laki Hisos ba layen-layen magpamanawen mga katakataka da- magsistigo amba, Da Panginoon Hisos ba biniyag:gakay. Kora boo ba pinakan Diyos lakol gidte ka parongaw. 34 Sa kora ba wala mahidapen panawen kora nagpabili da kora mga lopa no nawed ba mga balay da- da mga kabayadan kwarta 35 ba nanaboy dapo sa mga pinili sogoan laki Hisos. Nangeray kay tiya para sa kailangan tayma sai. 36 Makay naba da pinanawen laki Hosi, pag inawit mga pinili sogoan ba Birnabi (da alabet sabiyen ba Maparemrem). Iya ba taga Sipri, sai ka Diw ibat sa kaapoan laki Libi. 37 Konin pinabili da konin agayen. Da kwarta kabayadan ba konin tinaboy sa mga pinili sogoan.
1 Maki sai ka lalaki da ngaran ba Ananiyas. Iya da- konin sawa bayi Sapira ba magpabili din lopa. 2 Ginarwan laki Ananiyas da kalaati kabayadan para sa sadiri, amatangan din konin sawa. Da natra ngani da konin tinaboy sa mga pinili sogoan. 3 Kaya iya ba tinanong laki Pidro amba, Ananiyas, kaytang kawo napadaeg sa laki Satanas? Kaytang kawo mamosli sa Ispirito Banal? Kaytang komo ginarwan da kalaati kandawa kabayadan lopa? 4 Pag nawed dapo napabili da kandawa lopa, nawed mana naba ba kandawa ngani-? Maraw napabili:yani nawed ma kandawa din da kabayadan? Kaytang kandawa dapo aremreman panawenen naba? Nawed sa iraya da kawo mamosli no nawed ba sa Diyos. 5 Maraw tiya ba arngeyan laki Ananiyas ba iya ba natwang da- nagto:a da inawa. Da boo karngey sa nangyadi tiya ba aliman gayed. 6 Patindeg da mga binata, binoos da bangkay da- limbeng. 7 Maraw kalawey mga tatlo ka kalinabonan ba bait kay konin sawa. Iya ba nawed kamatang sa nangyadi. 8 Tomokawanan sa konin laki Pidro amba, Komo sabiyen sa naay, tiya ngani dia da kabayadan kandawa lopa? Iya tembag, Hee, naba ngani te. 9 Kaya sinabi sa konin laki Pidro, Kaytang kandawa sai ngani da remrem sa magporba sa Ispirito Banal? Kawo man-aw, mona sa sakbawan:nani da mga lembeng sa kom sawa, kawo din batay:ya pinaanggat. 10 Agad iya natwang sa ropangan laki Pidro da- nagto:a da inawa. Maraw manled da mga binata, kora akitan iya ba natay:yani. Kaya iya ba kora limbeng sa tebteb din kon sawa. 11 Aliman gidte da boo rimponan mga mag-isarig sa laki Hisos da- da boo kabarita tiya pag nangyadi. 12 Maoson ka katakataka da- tandaanan da pinanawen mga pinili sogoan laki Hisos sa akitan mga iraya. Magtipon-tipon sa pasirongan laki Salomon da boo mag-isarig sa laki Hisos. 13 Wala nawed mag-isarig sa laki Hisos mangahas anggat sa kora; amba man kora ba pinalakol gidte boo mga iraya. 14 Nagkamaoson da mga mag-isarig sa Panginoon-mga lalaki da- mga babayi. 15 Da mga maki maskit ba binaba sa mga dalan da- pinalagay sa kora mga kalkanan da- mga banig amaken para, no domalan sata laki Pidro, ba batay aaninowan da kalaati sa kora. 16 Bait din da kaosonan iraya ibat sa mga goraan katebteb lakol ka goraan Hirosalim, magbaba kora mga maki maskit da- nagtonton da mga nagpahidapan daet ka ispirito. Kora boo ba pinapiya. 17 Ngani amagan gidte sa mga pinili sogoan da koyay lakol magpamanawen sa balay Diyos da- da mga boo konin kaanggat, ag kapanig sa mga Sadosiyo, kaya kora magpatindeg da- 18 inabel da mga pinili sogoan da- piniriso. 19 Ngani maraw madlem:mani binokaan pag sai ka anghil Panginoon da mga sakbawan pirisohan da- pinalwas da mga pinili sogoan laki Hisos. Sinabi pag anghil sa kora amba, 20 Koyo paraoy sa lakol ka balay Diyos. Koyo sabiyen sa boo da para sa bayo ka biyag tiya. 21 Maraw kora arngeyan naba ba batay:ya daling adaw ba kora semled sa lakol ka balay Diyos da- inompisahan magtodo. Maraw bait da koyay lakol magpamanawen sa balay Diyos da- da konin mga kaanggat, kora pinarimpon da boo mga koyay sa Israil da- mga anhohosay sa hosayan lakol mga Diw. Kora pinagaro sa pirisohan da mga pinili sogoan. 22 Ngani maraw bait da mga sondalo sa pirisohan ba wala:ani da mga piniriso. Kaya kora paoli:akay sa hosayan lakol da- makay tiya da barita, 23 Yamen akitan langkeb gidte da mga sakbawan pirisohan, magpatindeg sa lowas da mga magbantay. Ngani maraw yamen binokaan ba kora ba nawed yamen akitan sa galem! 24 Maraw arngeyan tiya, natolineng da mga koyay magpamanawen sa balay Diyos da- da kapitan mga tagabantay sa balay Diyos. Nawed kora aobos remremen no nakay da nangyadi sa mga pinili sogoan. 25 Ngani maki rateng sai ka lalaki magbarita sa kora amba, Koyo gidte pakarngeyan! Da mga lalaki koyo piniriso ba sata sa balay Diyos da- kora ba magtodo sa mga iraya. 26 Kaya da kapitan ba paraoy sa balay Diyos pal-anggat mga poon sondalo. Kora pinaanggat da mga pinili sogoan, ngani nawed sa lopod panawen sa kaliman kaaram kora batay namato mga kaosonan. 27 Da mga pinili sogoan ba tinonton sa ropangan hosayan lakol da- kora ba tinanong pag koyay lakol magpamanawen sa balay Diyos 28 amba, Nawed ma yamen gidte inayawan sa koyo da magtodo sa ngaran laki Hisos? Ngani koyo ban-awan da koyo pinanawen. Rateng:ngani sa boo goraan Hirosalim da koyo todo; koyo alabet dapo yamen ba sangkalen sa katayan pag iraya naba. 29 Ngani tembag laki Pidro da- da mga Roma ka pinili sogoan amba, Da alabet Diyos da kailangan yamen toltolon da- nawed da sabi mga iraya. 30 Da Diyos pag sinamba tam pangapoan, iya da bomiyag:gakay sa laki Hisos, pag koyo binono pag iya koyo tinakin sa kodos. 31 Iya ba pinaatatas Diyos sa konin kanan kapet, makay Tagaonaan da- Tagaribri para pakanen pagkaodas da mga taga Israil para kora magsisi da- ogonan da kora kadaetan da- sa makay naba ba kora batay apatawad. 32 Yamen:na da sistigo mga tiya da- sistigo din da Ispirito Banal, pag tinaboy Diyos sa mga magpaniwala gidte sa konin. 33 Maraw kora arngeyan tiya ba mag-apoy-apoy da kabaisan mga anhohosay. Kora alabet pabonoon da mga pinili sogoan. 34 Ngani da sai sa kora ba patindeg. Iya ba sai ka Parisiyo da ngaran laki Gamalyil, tagatodo Bilin Diyos naggalang gidte boo goraan. Konin sinogo palwasen dapo da mga pinili sogoan, 35 da- tomokawanan amba, Mga kagoraan, koyo gidte remremen piya da koyo batay pinanawen sa mga iraya tiya. 36 Pag nawed dapo maagot ba sombok laki Tiodas magpasoli amba iya sai ka makapangyadihan ka poon; iya kaakat mga apat ka daan ka tagatoltol. Ngani maraw iya binono, malsowayan:na da konin mga tagatoltol, kaya wala:a kaparosan. 37 Kalbas sombok kay laki Hodas, taga Galiliya, pag dag-on magpalista; Iya kaakat din kaosonan iraya. Maraw iya binono ba malsowayan din da boo konin tagatoltol. 38 Kaya naay nagsabi sa koyo, Ayaw koyo agpakiaram sa mga iraya tiya. Kora ba koyo bayaan. No da kora pakana da- kora panawen tiya ba ibat sa iraya ba batay nasida. 39 Ngani no ibat kay sa Diyos ba nawed batay koyo asida; kaaram koyo dapo batay akitan koyo ba maglaban sa Diyos. Kora pinanawen da pakana laki Gamalyil. 40 Pinasled:dakay da mga pinili sogoan da- kora ba pinabogbog da- inayawan mangadar sa ngaran laki Hisos da- kora ba binal-anan. 41 Angasan gidte mangadang da mga pinili sogoan ibat hosayan lakol mga Diw. Kora angasan gidte panawen inabaya Diyos kora ba minoda sa ngaran laki Hisos. 42 Aldaw-aldaw kora ba magparaoy sa balay Diyos da- sa mga pamatawan; sata kora ba magtodo da- magpangadar Pirmida ka Barita para sa laki Hisos, amba iya da Kiristo.
1 Pag mga aldaw din naba, maraw maoson:nani da mga mag-isarig ba da mga Diw pag da tokawanan ba Girigo ba domiklamo laban sa mga Diw pag da tokawanan ba Hibriyo amba, Nagkapabayaan da magpangeray kabiyagan sa yamen mga babayi balo sa aldaw-aldaw. 2 Kaya pinarimpon pag labindarwa da kaosonan mag-isarig da- kora sinabi, Nawed abaya yamen pabayaan da magpangadar tokawanan Diyos para mag-asikaso sa magpangeray kabiyagan. 3 Kaya, mga arian sa laki Hisos, koyo pomili sa koyo mga pal-anggat pito ka lalaki amatangan mga iraya amba maki piya gidte ka remrem, kapno Ispirito Banal da- kamatangen da- kora tamo batay pinalagay sa panawenen tiya. 4 Yamen kay ba batay mamirmi boo odas sa magdarangin da- sa magtodo tokawanan Diyos. 5 Piniya pag boo kaosonan da mga tokawanan tiya, kaya kora pinili laki Tiban, sai ka lalaki maonay da konin pag-isarig sa Diyos da- kapno Ispirito Banal. Kora din pinili manlaki Pilipi, Porokro, Nikanor, Timon, Parminas da- Nikolas taga Antiyokya, sai ka Nawed Diw naranggot sa kaogalian mga Diw. 6 Da mga tiya ba kora pinaloba sa mga pinili sogoan da- dinaranginan, da- kora ba namatimpowan alima mga pinili sogoan. 7 Lomangba da tokawanan Diyos; omoson:na gidte da bilang mga mag-isarig sa laki Hisos sa goraan Hirosalim. Da- maoson:na din da mga magpamanawen sa balay Diyos da mag-isarig gidte. 8 Pinarongawan Diyos laki Tiban da- iya ba kapno kapangyadihan, kaya iya kapanawen mga katakataka da- tandaanan sa ropangan mga iraya. 9 Magsongarngar sa laki Tiban da Roma ka kaanggat sa balay pagtiponan mga Diw, ag nag-awit barkada mga Pinaligayaw, pag boo mga Diw taga Sirini, taga Alihanriya, taga Silisiya da- taga Asiya. 10 Ngani kora wala apanawen laban sa kadonongan tinaboy Ispirito Banal sa laki Tiban. 11 Kaya tago kora inolokan da kalaati ka lalaki para magsabi amba, Yamen arngeyan konin nagtongayaw laki Moysis da- Diyos. 12 Sa makay naba kora naolokan abaisan sa laki Tiban da mga iraya da- da mga koyay sa goraan da- da mga kamatangen sa Bilin Diyos. Iya ba kora sinonggaban da- pinaloba sa hosayan lakol mga Diw. 13 Kora gomaro mga boslien ka sistigo para magsabi kaboslian laban sa laki Tiban amba, Da iraya tiya ba wala epet magtokawanan daet laban sa banal ka balay Diyos da- laban sa Bilin Diyos tinaboy sa laki Moysis. 14 Panawen yamen:nani arngeyan konin sinabi tiya ag Hisos taga Nasarit ba konin batay rinegnas tiya pag balay Diyos, da- konin batay binago hinalinghan da mga monaan ogali ag pinamana sa tamo laki Moysis. 15 Da boo magtongka sa hosayan lakol ba magban-aw sa laki Tiban, kora akitan da konin kiray ba maki balawas makay kiray anghil.
1 Laki Tiban ba tinanong pag koyay lakol magpamanawen sa balay Diyos amba, Totoo dia da boo naba? 2 Tembag laki Tiban amba, Mga arian lalaki, mga koyay, koyo pakarngeyan da naay batay sinabi. Da makapangyadihan gidte ka Diyos ba napaban-aw sa tamo pangapoan Abraham pag iya sa lopa Misopotamya dapo bayo iya mamatawan sa lopa Haran. 3 Sinabi Diyos sa konin, Komo:wa ogonan da komo pamatawan da- komo kaseledan; kawo paraoy sa poro naay tay tindo sa komo. 4 Maraw amba, konin inogonan da pamatawan mga Kaldiyo da- iya mamatawan sa Haran. Maraw natay konin apang ba iya pinasalyo:wakay Diyos towa sa lopa tiya pag koyo pagpamatawan mona. 5 Amba man, iya ba nawed pinakan Diyos, kayno gapalad ngani te ka lopa, ngani pinangako Diyos sa konin amba, Tiya ba batay din sa komo da- sa komo mga kaapoan, kayno man kawo wala dapo onga pag odas tiya. 6 Makay tiya da sabi Diyos sa konin, Batay mamatawan sa Roma ka poro ag komo kaapoan; kora batay tinagoanggat sata; kora batay pinahidapan sa boo apat ka daan ka dag-on. 7 Ngani naay batay pinadosahan da lasyon batay magtagoanggat sa kora; kora batay mangadang ibat sata da- batay somamba sa naay sa poro tiya. 8 Binilin Diyos sa laki Abraham da maglong-oy makay tanda konin maonay ka pangako. Kaya maraw pinreg da konin onga laki Isaak, iya ba konin linong-oy sa ikawalo ka aldaw. Makay din tiya da pinanawen laki Isaak sa konin onga laki Hakob. Amba din laki Hakob sa konin labindarwa ka onga lalaki, pag tamo tangona mga kakoyayan. 9 Amagan sa laki Hosi da sampo ka konin mga kakaan kaya iya ba pinabili para tagoanggat sa lopa Ihipto. Ngani anggat sa konin da Diyos. 10 Iya ba konin rinibri sa boo pad konin kahidapan. Iya ba pinarongawan Diyos da- pinakan kaamatangan pag iya paloba sa Paraon pag hadi sa Ihipto. Iya ba pinalagay gobirnador hadi Paraon sa Ihipto da- sa konin boo paysereran. 11 Bait da sai ka tagbayog sa boo Ihipto da- sa lopa Kanaan. Maki:ya gidte kahidapan, wala:a agarwan pamangnen da tamo mga pangapoan. 12 Maraw arngeyan laki Hakob amba maki pamangnen tirigo sa Ihipto, konin pinaparaoy da tamo mga pangapoan. 13 Sa kora paraoy:yakay sata ba pomakilala:ani laki Hosi sa konin mga kakaan da- amatangan laki Paraon da para sa mga kakaan laki Hosi. 14 Pinakaon laki Hosi konin apang laki Hakob da- da boo konin kaseledan da- kora ba pinaparaoy sa konin. Kora boo ba pitompo da- lima ka iraya. 15 Domolong kora Hakob sa Ihipto. Sata iya natay, amba din da Roma tamo mga pangapoan. 16 Binaba da mga bangkay anggan sa lopa Sikim, da- sata kora limbeng sa lebengan binili tangona kora pangapoan Abraham sa mga onga koyay Hamor. 17 Maraw bali:ya da dag-on batay pinanawen Diyos da konin pangako sa laki Abraham, maoson:na gidte da mga taga Israil sa Ihipto. 18 Da hadi kay sa Ihipto pag odas naba ba nawed kilala sa laki Hosi. 19 Konin inapi da tamo mga pangapoan-konin binilin sa tamo pangapoan amba, Pamenglayen sa salog da koyo mga polahan para ayaw:wa nabiyag. 20 Ag odas din naba inonga laki Moysis, sai ka onga kaangasan Diyos. Iya ba inalagaan tatlo ka bolan sa balay konin apang. 21 Maraw iya ba pinalagay sa sai ka sokloban da- binenglay sa salog ba iya ba inampon onga babayi ag Paraon da- iya ba konin inalagaan makay din konin sadiri onga. 22 Tindoan laki Moysis sa boo kadonongan mga taga Ihipto. Iya ba maki kapangyadihan sa tokawanan da- sa panawen. Amba dapo laki Tiban, 23 Maraw batay:ya apatnapo ka dag-on laki Moysis ba konin aremreman konin paraoyan da konin mga kapowa taga Israil, para ban-awan no omaning da kora biyag. 24 Konin akitan da sai sa kora ba nagpakaskitan sai ka taga Ihipto da- iya konin tinolongan da- sa konin kabaisan konin binono da taga Ihipto. 25 Rinemrem laki Moysis amba batay amatangan konin mga kapowa taga Israil amba iya batay ginamit Diyos para kora ba naribri, ngani nawed kora amatangan tiya. 26 Maraw omaga:akay, iya ba maki akitan darwa ka taga Israil maglaban da- konin rinemrem amparahen amba, Mga abyan, kaytang kandawa maglaban? Kandawa tanan ba taga Israil. 27 Ngani iya ba sinikway pag lalaki magpakaskit sa Roma amba, Tawa da malagay sa komo para kawo ba yamen poon da- tagaampara? 28 Alabet dia ako komo bonoon makay din pag komo pinanawen naapon sa taga Ihipto? 29 Maraw tiya ba arngeyan laki Moysis ba iya ba domalagan da- iya mamatawan sa kotanan Madyan. Sata iya mangisawa da- magkaonga darwa ka lalaki. 30 Kadalan da apatnapo ka dag-on, da sai ka anghil Diyos ba paban-aw sa laki Moysis sa sai ka magbalangabang ababa ka poon kayo sa sai ka poro nawed apirmihan iraya, nawed naw adayo sa bogsor Sinai. 31 Magtaka laki Moysis sa konin akitan da- maraw konin pinabaliyan da kayo para ban-awan gidte ba konin arngeyan da tokawanan Panginoon Diyos amba, 32 Ako da Diyos komo mga pangapoan, da Diyos kora Abraham, Isaak da- Hakob. Laki Moysis ba manartaroy sa kaliman, dayo iya man-aw. 33 Sinabi Panginoon Diyos sa konin amba, Komo loswen da komo panlaed panawen banal da poro tiya ag komo nagpatindegan. 34 Naay akitan da naay kairayaan ba nagpahidapan mga taga Ihipto. Naay arngeyan da kora pad aringi da- ako ba lompot para kora ba naay ribriyen. Kawo towa, kawo ba naay:yakay batay pinaparaoy sa Ihipto. Magpanoltol dapo laki Tiban amba, 35 Kora sinikway laki Moysis maraw kora sinabi, Tawa da malagay sa komo para kawo yamen poon da- tagaampara? Ngani pag Moysis din naba da sinogo Diyos para poon da- tagaribri, sa tolong anghil Diyos pag magpaban-aw sa konin sa ababa ka poon kayo. 36 Iya da romibri sa kora sa kora mga kahidapan sa iya mamanawen mga tandaanan da- mga katakataka sa Ihipto, sa dagat Mapola da- sa poro nawed apirmihan iraya, sa boo apatnapo ka dag-on. 37 Naba din ag laki Moysis da somabi sa mga taga Israil amba, Da Diyos ba batay pomili sai sa koyo da- iya batay tagabarita ibat sa Diyos, makay din ako. 38 Ag odas da mga taga Israil ba magpolong sata sa poro nawed apirmihan iraya ba iya da kaanggat ag anghil pag tomokawanan sa konin da- sa tamo mga pangapoan sa bogsor Sinai. Laki Moysis da tomabang mga tokawanan magtaboy biyag ibat sa Diyos para taboyon sa tamo. 39 Ngani iya nawed tinoltol tamo mga pangapoan, no nawed ba kora sinikway; da kora alabet ba paoli sa Ihipto. 40 Kora amba sa laki Aaron, Yamen komo gaw-an mga diyos batay magpangonaan sa yamen, panawen nawed yamen amatangan no nakay da nangyadi sa pag Moysis naba, pag pomalwas sa yamen sa Ihipto. 41 Da- kora gomawa ngani- mga nawed amba Diyos makay hidsoda bol-o baka, kora magbono mga hayop da- inatag sa nawed amba Diyos naba, panawen kora angasan sa pinanawen kora alima. 42 Panawen saba kora ba pinaawakan Diyos da- kora konin pinabayaan, kora ba somamba sa mga makay mga aldaw, bolan anggan magirem, toltol sa nagkasorat sa ribro mga tagabarita ibat sa Diyos amba, Mga kairayaan Israil, nawed gidte ako da koyo pinakan mga taboy da- mga hayop binono sa poro nawed apirmihan iraya sa boo apatnapo ka dag-on. 43 Da koyo nagbaba-baba ba pag balay te nawed amba Diyos nag-awit laki Molok, pag magirem koyo nawed amba Diyos nag-awit laki Rinpan, mga ladawan koyo pinanawen para sambahen. Kaya koyo ba naay batay pinasalyo sa kalawey dapo lopa Babilonya. Naba:a ngani. 44 Da torda ag maonay ka kasaiyan pinanawen Diyos sa mga iraya ba sa tamo mga pangapoan ag tangona kora ba sa poro nawed apirmihan iraya; da torda pagsambahan tiya ba pinanawen toltol sa Bilin Diyos sa laki Moysis da- toltol sa toladan Pinaban-Aw sa konin. 45 Naba ba inapo kora mga onga da- naba ba kora binaba sa odas kora ba pinangonaan laki Hoswi, da- pinasled sa mga lopa nagpamatawan mga kairayaan pinadaeg Diyos sa kora, da- naba ba mamirmi sata anggan sa mga dag-on laki Dabid. 46 Laki Dabid ba kinaangasan Diyos. Iya omay-ay para maggawa balay pamatawan para sa Diyos pag sinamba laki Hakob. 47 Ngani laki Salomon kay da magpagawa balay pamatawan naba. 48 Amba man, da Diyos ag Atatas sa boo ba nawed mamataw sa mga balay pinanawen iraya, makay ag sinabi ag tagabarita ibat sa Diyos amba, 49 Da Panginoon Diyos ba amba, Da langit da naay tongkaan hadi, da lopa da timpowan naay araprapa. Nakay dapo ka balay da koyo batay ginawa para sa naay? E nakay dapo ka poro da batay naay pangaronanan? 50 Nawed ma ako da gomawa boo tiya? Naba:a ngani. Amba dapo laki Tiban, 51 Pad maskil gidte da koyo olo! Nawed dapo bayo:wakay da koyo remrem! Koyo dayo magpakarngey sa kapiyaanan! No nakay da pinanawen koyo pad pangapoan, naba din koyo nagpanawen-layen koyo maglaban sa Ispirito Banal. 52 Tawa pag tagabarita ibat sa Diyos da nawed pinahidapan koyo mga pangapoan? Kora binono da mga magbarita para sa batay rateng da Mataldeng ag koyo dinaet da- binono. 53 Koyo tinabang da Bilin tinaboy Diyos tinonton mga anghil Diyos, ngani nawed koyo tinoltol naba! 54 Maraw arngeyan tiya mga boo anhohosay ba kora magbarongkaret panawen abaisan:na gidte laban sa laki Tiban. 55 Ngani laki Tiban ba kapno Ispirito Banal da- maningara sa langit. Konin akitan da balawas gidte Diyos da- laki Hisos magpatindeg sa kanan kapet Diyos. 56 Laki Tiban amba, Boka da langit da- naay akitan da Onga Iraya Hisos magpatindeg sa kanan kapet Diyos. 57 Kora tinakleban da kora talinga da- kora lomalae da- malsabayan kora dinosmogan laki Tiban. 58 Iya ba kora rinanggot anggan sa lowas goraan lakol para pamatowen. Linso mga sistigo da kora pad nagsool da- inogonan sa sai ka binata nag-awit Saolo. 59 Sa odas kora namato laki Tiban, laki Tiban kay ba magdarangin amba, Panginoon Hisos, komo kay tabangen da naay gisarem. 60 Lomohod laki Tiban da- iya tomokawanan maeyat amba, Panginoon, ayaw:wani padatoson sa kora da kadaetan tiya!
1 Kalbas magtokawanan tiya ba iya natay. Laki Saolo ba sai din sa magbono laki Tiban. Pag aldaw din naba ba rateng:nga da pahidap gayed laban sa rimponan mga mag-isarig sa goraan lakol Hirosalim. Poyida sa mga pinili sogoan Panginoon, da boo mag-isarig ba magrinasik sa mga porobinsiya Hodiya da- Samariya. 2 Laki Tiban kay ba limbeng mga iraya aliman magpanawen daet laban sa Diyos da- kora magpanangis gayed sa konin. 3 Ngani sinikap laki Saolo sidaen da rimponan mga mag-isarig. Konin nagpanled da mga balay, konin nagranggot da mga mag-isarig, kayno lalaki kayno babayi da- kora ba konin nagpamiriso. 4 Maraw magrinasik:ka da mga mag-isarig ba kora nangadar da tokawanan Diyos kayno saan kora rateng. 5 Laki Pilipi ba paraoy sa sai ka goraan lakol sa Samariya da- sata iya ba mangadar para sa Kiristo, ag Tagaribri pinangako Diyos. 6 Maraw abaritaan da mga iraya da- kora akitan da mga katakataka pinanawen laki Pilipi ba kora gidte pinakarngeyan piya da konin nagsabi. 7 Panawen da mga daet ka ispirito ba manlowas sa mga iraya nag-olian daet ka ispirito da- sa odas kora maglowas ba kora ba magpang-o. Maoson gidte ka iraya nawed kakadang da- mga tekya da pinapiya. 8 Kaya angasan:na gidte da mga iraya sa goraan lakol naba. 9 Maki sai ka lalaki nag-awit Simon, pag monaan dapo ba konin nagpataka da mga taga Samariya sa maoson ka balikmata. Iya ba magpalawlaw gidte amba iya maki nag-aken gidte kapangyadihan; 10 kora boo, kayno kamatangen kayno mga nawed kamatang, ba magpakarngey sa konin. Kora amba, Tiya pag lalaki tiya da kapangyadihan Diyos ag nag-awit kapangyadihan gidte. 11 Maagot:ta ka dag-on ba kora konin pinataka sa konin balikmata, kaya iya ba kora nagpakarngeyan dapo anggan. 12 Ngani maraw kora arngeyan da Pirmida ka Barita pinangadar laki Pilipi para sa batay:ya maghadi da Diyos da- para sa laki Kiristo, ba kora misarig:gani da- pomabaotismo sa sapa, mga lalaki da- mga babayi. 13 Kayno laki Simon ba misarig din, da- iya ba binaotismohan sa sapa; iya layen mag-anggat-anggat sa laki Pilipi. Iya magtaka maraw konin akitan da mga tandaanan da- da mga katakataka nagpanawen laki Pilipi. 14 Maraw abaritaan mga pinili sogoan Panginoon sa Hirosalim amba, Tinabang:ngani pag mga taga Samariya da Tokawanan Diyos ba kora sinogo kolaki Pidro da- Howan. 15 Maraw sidawa bait sata, sidawa dinarangin da mga taga Samariya para kora tabangen din da Ispirito Banal, 16 panawen nawed dapo mamataw sa tawa man sa kora da Ispirito Banal. Kora ba binaotismohan ngani sa ngaran Panginoon Hisos. 17 Pinatimpowan alima sidawa Pidro da- Howan da mga taga Samariya da- kora ba pinakan:nani Ispirito Banal. 18 Akitan laki Simon da mga namatimpowan alima mga pinili sogoan laki Hisos ba pinakan Ispirito Banal, kaya iya ba magyaya kwarta sa kolaki Pidro da- Howan amba, 19 Ako kay kandawa pakanen kapangyadihan tiya para da tawa man naay batay pinatimpowan naay alima batay din pinakan Ispirito Banal. 20 Ngani amba laki Pidro sa konin, Kawo batay naomaning anggat din kom kwarta panawen kawo dia amba batay abili kwarta da taboy Diyos? 21 Kawo wala gidte eray sa mga panawen tiya, panawen amatangan Diyos da komo poso ba nawed mataldeng. 22 Kawo magsisi sa komo kadaetan da- magdarangin sa Panginoon, para kawo ba patawaden sa daet komo nagremrem. 23 Panawen naay akitan kawo ba amagan:na gayed da- kawo ba nag-egtan gidte komo kadaetan. 24 Tembag laki Simon sa kolaki amba, Ako kay kandawa daranginen sa Panginoon, para ayaw kay rateng sa naay da boo kandawa aray sinabi. 25 Maraw kolaki Pidro da- Howan ba somistigo:wani da- manoltol pag tokawanan Panginoon sa Samariya, sidawa ba paoli:akay sa goraan Hirosalim. Sa pad goraan te sa Samariya sidawa dinalanan ba sidawa din nanoltol da Pirmida ka Barita para sa laki Kiristo. 26 Maraw kalbas laki Pilipi kay ba sinogo sai ka anghil Panginoon amba, Kawo paraoy sa kabaraybayen dako sa kaliwa dalan aldaw sa dalan magdolong sa goraan lakol Gasa ibat sa goraan lakol Hirosalim. Tiya ba poro nawed apirmihan iraya. 27 Kaya mangadang laki Pilipi. Saba kay da sai ka yonoko. Iya ba poon sa Itiopiya magpamahala sa boo kayamanan bayi Kandis, pag hadi babayi sa Itiopiya. Iya paraoy sa Hirosalim da- somamba sa Diyos, da- pag odas naba ba iya mag-oli:akay sa Itiopiya. Iya ba sakay sa konin kalisa da- magbasa tokawanan Diyos sa ribro sinorat laki Isayas pag tagabarita ibat sa Diyos. Sa odas din naba ba somong-aw laki Pilipi. 29 Da Ispirito ba amba sa laki Pilipi, Kawo paraoy sata sa kalisa nata, da- kawo somabay:ya sa konin. 30 Magdalaganan laki Pilipi paraoy sa kalisa. Konin arngeyan nagbasa pag lalaki sa kalisa da ribro sinorat laki Isayas. Kaya konin tinanong da lalaki magbasa amba, Komo kay amatangan da alabet sabiyen pag komo nagbasa? 31 Iya tembag, Omaning tay naay amatangan, no wala batay magpapawa sa naay? Konin yinakag laki Pilipi amba, Kawo somakay:ya towa, tomongka sa naay tebteb. 32 Tiya da tokawanan Diyos konin nagbasa: No omaning wala tebag da topa nag-alyan sa pagbonoan Makay din ag onga te topa sa ropangan mga anggogonting nawed man meet, Amba kay din nawed man iya moka bibi. 33 Iya ba ginambala da- dinamotan kaparosan. Wala batay alista para sa konin kaapoan, Panawen pinto:ani da konin biyag towa sa lopa. Naba:a ngani. 34 Amba da lalaki sa laki Pilipi, Komo kay nga sabiyen sa naay, tawa mana da nagtodyo towa pag magbarita ibat sa Diyos? Konin dia sadiri, e Roma? 35 Ibat sa tokawanan Diyos tiya ba nanoltol laki Pilipi sa konin da Pirmida ka Barita para sa laki Hisos. 36 Sa sidawa ba magkadangan dapo ba sidawa rateng sa sai ka poro maki sapa. Amba da yonoko, Kawo man-aw, maki sapa towa. Nakay, ako nawed dapo abaya baotismohan? 37 Sinabi sa konin laki Pilipi, Abaya:ani no kawo mag-isarig gidte boo komo poso. Iya tembag, Ako mag-isarig:ga gidte amba laki Hisos Kiristo da Onga Diyos. 38 Pinaepet pag lalaki da konin kalisa. Sidawa domolong sa sapa, da- da lalaki ba binaotismohan laki Pilipi. 39 Maraw sidawa tomakdang sa sapa, laki Pilipi ba ginaro:wani Ispirito Panginoon. Nawed:da iya akitan pag yonoko. Iya kay ba magkadangan dapo anggan da- iya angasan:na gidte. 40 Amasdanan laki Pilipi iya ba sa goraan Asoto:wa mana. Ibat sata ba konin nanoltol da Pirmida ka Barita para sa laki Hisos sa boo goraan konin dinalanan, kayno saan iya rateng anggan sa goraan lakol Sisariya.
1 Adey! Alabet:ta gidte laki Saolo pahidapan anggan bonoon da mga nagtod-an Panginoon, kaya iya paraoy sa koyay lakol magpamanawen sa balay Diyos, 2 da- iya omay-ay mga sorat para sa mga poon sa mga balay pagtiponan mga Diw sa goraan lakol Damasko, para konin abelen da tawa man konin asbokan sata, mga magpasai sa bayo ka pag-isarig-kayno lalaki, kayno babayi-para babaen nangketan sa Hirosalim. 3 Mangadang laki Saolo paraoy sa Damasko. Maraw iya ba bali:yani sa goraan lakol, agad Romawa lakol sa konin paribok da sai ka kasorap gidte ka rawa ibat sa langit. 4 Yi! Iya ba napatedek:kani sa lopa. Konin arngeyan da sai ka magtokawanan amba, Saolo, Saolo, kaytang ako komo nagpahidapan? 5 Laki Saolo amba, Tawa kay kawo, Panginoon? Tembag sa konin da Panginoon, Ako laki Hisos pag komo nagpahidapan. 6 Kawo patindeg. Kawo semled sa goraan lakol. Sata maki batay magsabi sa komo no nakay da kailangan komo panawenen. 7 Abolaleg da mga pal-anggat laki Saolo; kora arngeyan da tokawanan, ngani kora wala akitan tawa man. 8 Patindeg laki Saolo, mamolalat konin mata, ngani iya nawed kaban-aw, kaya iya ba kora inakay anggan sa goraan Damasko. 9 Tatlo ka aldaw nawed iya kaban-aw, nawed iya mangan, nawed din minem. 10 Sata kay sa Damasko maki sai ka nagtod-an nag-awit laki Ananiyas. Iya binerya Panginoon sa sai ka makay akalkan amba, Ananiyas! Iya tembag, Nakay kay naba, Panginoon? 11 Tembag da Panginoon, Kawo paraoy sa karsada nag-awit Mataldeng, sa balay laki Hodas. Komo tanongon da sai ka lalaki taga goraan Tarso, da ngaran ba Saolo. Iya ba magdarangin mona. 12 Sa sai ka makay akalkan ba konin akitan kawo ba semled sa iya sata. Komo pinatimpowan komo alima para iya kaban-aw. 13 Tembag laki Ananiyas, Panginoon, maoson:nani da magbarita sa naay para sa boo kadaetan pinanawen ag iraya tiya sa komo mga mag-isarig sa Hirosalim. 14 Da- iya magparaoy towa sa Damasko maki kapangyadihan ibat sa mga koyay lakol magpamanawen sa balay Diyos, para abelen da- gaposon da boo mga mag-isarig sa komo ngaran. 15 Ngani sinabi sa konin ag Panginoon, Kawo paraoy sata, panawen iya naay pinili para pakilalaen da naay ngaran sa mga Nawed Diw, sa mga hadi, anggan sa mga iraya taga Israil, 16 da- naay batay pinaaram sa konin da boo kailangan konin agwantahen para sa naay. 17 Paraoy ngani- laki Ananiyas. Iya rateng sa balay da- pinatimpowan konin alima laki Saolo. Iya amba, Arian Saolo, ako ba sinogo towa Panginoon Hisos, pag magpaban-aw sa komo sa dalan pag kawo magparaoy towa. Ako konin sinogo para kawo kaban-aw:wakay da- para kawo kapno Ispirito Banal. 18 Agad nangaragrag da makay kariskis ibat sa kon mata, da- iya kaban-aw:wakay. Iya patindeg da- magpabaotismo. 19 Iya mamangan, da- maeyat:takay. Ned naw maoson ka aldaw laki Saolo ba kaanggat sa mga nagtod-an sa Damasko. 20 Iya semled sa balay pagtiponan. Sata iya mangadar para sa laki Hisos amba, Iya da Onga Diyos. 21 Magtaka da boo karngey sa konin. Kora tinanong amba, Nawed ma tiya ag narwaan magpahidap sa mga mag-isarig sa ngaran laki Hisos sa Hirosalim? Mona iya magparaoy towa para kora ba abelen, babaen nangketan sa mga koyay magpamanawen sa balay Diyos. 22 Ngani lalo:a gayed piya da pamarita laki Saolo. Natolineng da mga Diw magpamatawan sa Damasko panawen sa konin maonay gidte magpaban-aw amba laki Hisos ba iya da Kiristo. 23 Kadalan da maoson ka aldaw magkasai da mga Diw para bonoon:nani laki Saolo, 24 ngani konin amatangan tiya. Aldaw da- madlem kora nag-abangan sa mga sormokan goraan para iya bonoon. 25 Ngani sai ka madlem, laki Saolo ba sinogno mga nagtod-an sa sai ka galang da- kora inaloyan sa kasalyo bakodan. 26 Maraw bait laki Saolo sa Hirosalim, konin gidte sinarak para iya ba kaanggat:tani sa mga nagtod-an laki Hisos. Ngani kora boo ba aliman sa konin; kora nawed din magpaniwala amba iya ba sai ka nagtod-an. 27 Ngani iya ba pinaanggat laki Birnabi sa mga pinili sogoan. Konin nanoltol sa kora no omaning napaban-aw da Panginoon sa laki Saolo pag iya sa dalan magparaoy sa Damasko, no omaning da Panginoon ba magtokawanan sa konin. Konin din sinabi amba laki Saolo ba wala kaliman mangadar sa Damasko sa ngaran laki Hisos. 28 Laki Saolo ba kora kaanggat-anggat sa Hirosalim. Sata iya ba mangadar wala kaliman sa ngaran Panginoon. 29 Iya ba magtokawanan din da- magsongarngar sa mga Diw pag da tokawanan ba Girigo, kaya kora sinarak no omaning iya ba kora abono. 30 Maraw tiya ba amatangan mga talkakaan sa laki Hisos, kora tinonton laki Saolo sa goraan lakol Sisariya, da- iya kora pinaoli sa goraan lakol Tarso. 31 Gominhawa da rimponan mga mag-isarig sa boo porobinsiya Hodiya, da- Galiliya anggan Samariya. Da mga mag-isarig ba omonay da- omoson sa tolong Ispirito Banal; kora mamiyag aliman maggawa daet laban sa Panginoon. 32 Mag-alokan laki Pidro para darawen da mga talkakaan mag-isarig. Sa iya tomangaw sa mga talkakaan sa goraan Lida, 33 konin asbokan sata laki Iniyas. Iya ba ketet. Walo:wa ka dag-on iya magpadalayan sa balay. 34 Laki Pidro amba, Iniyas, kawo nagpapiya laki Hisos Kiristo. Kawo patindeg, komo baroronon da komo kalkanan. Iya ba patindeg agad. 35 Iya akitan pag boo magpamataw sa goraan Lida anggan sa gaba Saron da- kora mag-isarig sa Panginoon. 36 Sa goraan kay Hopi ba maki sai ka nagtod-an babayi nag-awit Tabita. Iya layen magpanawen piya. Iya ayawteen sa mga mahidapen. 37 Mga aldaw naba, iya magkasakit da- natay. Maraw iya pinairan mga nagtod-an, iya ba pinayakbang sa basag sa ngaway. 38 Da goraan Lida ba nawed naw adayo sa goraan Hopi. Maraw abaritaan mga nagtod-an ba sata sa Lida laki Pidro ba kora sinogo da darwa ka lalaki para mag-ay-ay iya ba agad paraoy sa Hopi. 39 Kaya anggat sa sidawa laki Pidro. Maraw bait sata, iya pinayakbang sa basag sa ngaway. Agad iya ba pinaribokan ag mga babayi balo mangagpanangis. Kora nagpaban-aw sa konin da mga bado, mga pandimla ag nanayi bayi Dorkas ag iya biyagan dapo. 40 Kora boo ba pinalwas laki Pidro; iya lomohod, da- domarangin. Maraw kalbas iya paloba sa bangkay da- iya magsabi amba, Tabita, kawo mangon. Mamolalat bayi Tabita; maraw akitan laki Pidro ba iya tomongka. 41 Ginenan laki Pidro da konin alima. Konin tinolongan iya ba patindeg. Maraw kalbas ba konin binerya da mga mag-isarig da- da mga babayi balo, pinaloba sa kora bayi Dorkas sa iya biyagan:nakay gidte. 42 Maraw tiya ba abaritaan boo taga Hopi ba maoson:na da mangisarig sa Panginoon. 43 Maagot din mamataw laki Pidro sa Hopi, sa balay laki Simon ag pandayan katad.
1 Sa goraan lakol Sisariya ba maki sai ka lalaki nag-awit Kornilyo. Iya ba kapitan sa maoson ka sondalo sa armi Romano ibat sa lopa Italya. 2 Pag iraya tiya ba masambahen sa Diyos, iya aliman magpanawen daet laban sa Diyos, amba din da boo magpamataw sa konin balay. Layen iya magtolong sa mga Diw mahidap; layen iya magdarangin sa Diyos. 3 Bali:ya manorip batang da aldaw ba iya maki makay akalkan. Konin gidte akitan semled sa konin balay da sai ka anghil ibat sa Diyos. Iya ba binerya pag anghil amba, Kornilyo! 4 Iya ba semrey, iya ba tembag nagkaaliman, Nakay kay naba, Panginoon? Sinabi sa konin pag anghil, Kinaangasan Diyos da komo darangin anggan da komo pinanawen tolong. 5 Kawo magpaparaoy mona nawed maoson ka iraya sa goraan Hopi, para tagboon da sai ka iraya, da ngaran ba laki Simon pag nag-awit din Pidro. 6 Iya ba magpamatawan sa balay laki Simon pag pandayan katad. Pag konin balay ba sa tebteb dagat. 7 Maraw kaalis pag anghil, binerya laki Kornilyo darwa sa konin mga sogo-sogoan da- sai ka sondalo masambahen sa Diyos. Iya ba sai sa mga layen te handa magpamanawen sa konin. 8 Nanoltol laki Kornilyo sa kora da boo nangyadi, da- kora ba konin pinaparaoy sa goraan Hopi. 9 Maraw omaga:akay, pag bali:yani sa Hopi da mga pinaparaoy laki Kornilyo, laki Pidro kay ba yomakbang sa awakan para magdarangin. Batay:ya tanghali pag odas naba, 10 iya ba nagbayog:ga gidte. Pag odas naghanda dapo da pamangnen, iya ba maki makay akalkan. 11 Konin akitan nabokaan da langit da- sai ka lakol ka islen masaklang makay nag-apoyot sa apat ka gawisan ba nag-aloyan ibat sa langit rateng sa lopa. 12 Sata konin akitan da boo kalasi hayop-boo magkadangan sa lopa, boo mag-ariwangan da- boo mag-ilayog sa kalaw-awan. 13 Da- konin arngeyan da magtokawanan amba, Pidro, kawo patindeg, kawo magbono da- mamangan. 14 Ngani tembag laki Pidro, Nawed gayed naay tay apanawen naba, Panginoon! Panawen nawed tang ako mangan nakay man nag-ayawan namangan mga Diw. 15 Konin:nakay arngeyan da magtokawanan sa konin amba, Pag lininis Diyos ba ayaw komo remremen ba nag-ayawan. 16 Katatlo nangyadi tiya, maraw kalbas ba rinanggot:takay pangaway pag makay apoyot. 17 Nagremrem dapo laki Pidro da alabet sabiyen pag makay akalkan naba ba rateng kay da mga pinaparaoy laki Kornilyo. Maraw kora amatangan da balay laki Simon ba kora paraoy sata, 18 kora magtanong no sata ngani- magpamataw laki Simon pag nag-awit din Pidro. 19 Nagremrem dapo gidte laki Pidro da makay akalkan, maraw sinabi sa konin Ispirito Banal, Maki tatlo ka lalaki magsarak sa komo. 20 Kawo lompot:ta agad da- ayaw ag-alingangaan anggat sa kora panawen ako da somogo sa kora. 21 Kaya lompot laki Pidro, iya amba sa manlaki, Ako:wa da koyo nagsarak. Nakay kay ma da koyo alabet? 22 Kora tembag amba, Panawen yamen ba pinaparaoy towa laki Kornilyo. Iya ba piya ka kapitan mga sondalo, aliman magpanawen daet laban sa Diyos, iya naggalang boo mga Diw. Panawen sinabi sa konin sai ka anghil Diyos amba kawo tagboon da- pakarngeyan da komo batay sinabi. 23 Da manlaki ba pinasled laki Pidro, saba:ani kora malek. Maraw omaga:akay, iya anggat sa kora, iya inanggatan din mga nawed maoson ka talkakaan sa laki Hisos taga goraan Hopi. 24 Kalawey sai ka aldaw magkadangan, kora bait sa Sisariya. Magpanya:a sa kora laki Kornilyo, da konin mga kaseledan anggan konin mga maibeng ka abyan, pag konin yinakag. 25 Maraw bait laki Pidro, iya ba tinagbo laki Kornilyo; laki Kornilyo ba misongo sa konin ropangan, magsamba sa konin. 26 Ngani iya pinapatindeg laki Pidro da- sinabi amba, Kawo patindeg, ako ba iraya din makay kawo. 27 Sidawa ba magtokawanan dapo anggan semled sa balay. Akitan laki Pidro maki maoson ka iraya sata. 28 Konin sinabi amba, Koyo amatangan amba da sai ka Diw ba nag-ayawan konin kaogalian ba anggat, kayno tomangaw sa sai ka Nawed Diw. Ngani pinaaram Diyos sa naay da tawa man ba ayaw naay remremen ba nawed piya anggatan. 29 Kaya maraw ako koyo pinatagbo. ako ba nawed mag-abara anggat. Naay alabet amatangan kaytang ako koyo pinatagbo. 30 Tembag laki Kornilyo amba, Ikaapat:ta ka aldaw mona makay:ya din tiya manorip batang da aldaw, ako ba magdarangin towa sa naay balay, kangani ba patindeg sa naay ropangan da sai ka lalaki makasorap gidte da konin nagsool. 31 Iya amba, Kornilyo, arngeyan Diyos da komo mga darangin, kinaangasan Diyos da komo pinanawen tolong. 32 Komo patagboon sa Hopi laki Simon pag nag-awit din Pidro. Iya magpamatawan sa balay laki Simon ag pandayan katad, pag sa tebteb dagat. 33 Agad ako pomaparaoy sa komo; piya kay sa komo kawo paraoy towa. Mona towa:a yamen magkatipon para pakarngeyan da pinasabi Panginoon. 34 Magtokawanan laki Pidro amba, Mona gidte naay amatangan wala nagpatabi da Diyos. 35 Iya ba nagkaangasan sa tawa man aliman magpanawen daet laban sa konin, sa tawa man magpanawen mataldeng, kayno taga saan iya. 36 Sa mga taga Israil tinaboy Diyos da konin tokawanan. Konin pinapawa sa kora da Pirmida ka Barita para sa kasaiyan pinapanawen Diyos sa laki Hisos Kiristo ngani para sa mga iraya. Iya da Panginoon boo mga iraya! 37 Koyo:wa amatangan da nangyadi tiya ibat sa lopa Galiliya anggan sa boo lopa Hodiya, kalbas mangadar laki Howan para sa baotismo sa sapa. 38 Da naay nagsabi ba para sa laki Hisos pag taga goraan Nasarit. Tinaboy Diyos sa konin da Ispirito Banal da- kapangyadihan. Panawen anggat sa konin da Diyos, kayno saan iya paraoy, iya magpanawen kapiyaanan, da- magpapiya sa boo nagpahidapan laki Satanas. 39 Yamen ba kaban-aw sa boo konin pinanawen sa goraan lakol Hirosalim da- sa lopa mga Diw sa kadatig Hirosalim. Amba man, iya ba kora pinako sa kodos anggan natay. 40 Ngani iya ba biniyag:gakay Diyos sa ikatatlo ka aldaw. Iya paban-aw:wakay, 41 ngani nawed sa boo iraya no nawed ba sa yamen ngani pag monaan dapo ba pinili:ani Diyos para yamen kaban-aw. Maraw iya nabiyag:gakay ba iya ba yamen kasaro pag yamen mamangan da- minem. 42 Yamen ba konin sinogo mangadar sa mga iraya da- magsistigo amba iya da hinanda Diyos para maghosga sa mga biyagan da- sa mga nangatay:yani. 43 Laki Hisos da nagtodyo mga boo tagabarita ibat sa Diyos, maraw kora pinapawa da tayma batay mangisarig sa konin ba batay tomabang kapatawadan sa kora mga kadaetan, sa konin kay ngaran. 44 Magtokawanan dapo laki Pidro, rateng kay da Ispirito Banal sa boo magpakarngey sa konin barita. 45 Magtaka da mga Diw mag-isarig kaanggat din laki Pidro, panawen da mga Nawed Diw ba pinakan din Ispirito Banal. 46 Kora arngeyan da mga Nawed Diw ba magtokawanan sa nawed amba kora sadiri tokawanan da- magpalakol sa Diyos. Kaya sinabi laki Pidro amba, 47 Da mga iraya tiya ba pinakan Ispirito Banal makay din tamo. Tawa dapo da abaya mag-ayaw sa kora amba, Koyo ayaw baotismohan sa sapa? 48 Konin sinogo kora ba baotismohan sa ngaran Panginoon. Maraw kalbas ba kora inay-ayan laki Pidro mamataw dapo sata nawed maoson ka aldaw.
1 Abaritaan pag mga pinili sogoan da- mga talkakaan sa laki Hisos sa boo lopa Hodiya amba kayno sa mga Nawed Diw ba maki din mangisarig sa tokawanan Diyos. 2 Maraw tomokad laki Pidro sa Hirosalim, iya ba tinagsahan mga talkakaan sa laki Hisos, mga Diw amba, 3 Kawo ba paraoy sa mga Nawed Diw da- magpasaro dapo gayed sa kora pamangnen. 4 Kaya nanoltol laki Pidro sa kora da boo nangyadi, ibat sa ompisa. 5 Amba laki Pidro, Pag ako sa goraan lakol Hopi, pag ako magdarangin, ako maki makay akalkan. Ibat sa langit ba inaloyan anggan sa naay betek da sai ka makay lakol ka islen nag-apoyot sa apat ka gawisan. 6 Naay gidte binan-awan tiya, naay akitan sata da boo kalasi hayop magkadangan, mag-ariwangan sa lopa, da- mga maiglas ka hayop, anggan mga mag-ilayog sa kalaw-awan. 7 Da- naay arngeyan da sai ka magtokawanan amba, Pidro, kawo patindeg, kawo magbono da- mamangan! 8 Ngani ako amba, Nawed gayed naay tay apanawen naba, Panginoon. Panawen nawed tang ako mangan nakayman nag-ayawan namangan mga Diw. 9 Naay:yakay arngeyan da tokawanan ibat sa langit amba, Pag lininis Diyos ba ayaw komo remremen nag-ayawan. 10 Katatlo nangyadi tiya, da- rinanggot:takay pasalbon sa langit ag makay apoyot. 11 Pag odas te din naba, rateng kay sa balay naay pagpamatawan da tatlo ka lalaki pinaparaoy sa naay ibat sa goraan Sisariya. 12 Sinabi Ispirito Banal sa naay amba, Ayaw mag-abara anggat sa kora. Anggat din sa naay ag anim ka talkakaan sa laki Hisos tiya. Yamen semled sa balay laki Kornilyo. 13 Konin nanoltol sa yamen amba iya kaban-aw sai ka anghil magpatindeg sa galem kon balay da- sinabi sa konin amba, Kawo magpaparaoy sa Hopi, tagboon laki Simon pag nag-awit din Pidro. 14 Konin batay sinabi sa komo da batay kalkat sa kadaetan sa komo anggan sa boo magpamataw sa kom balay. 15 Mag-ompisa ngani dapo ako magtokawanan, rateng:ngani sa kora da Ispirito Banal makay din pag rateng Ispirito Banal sa tamo ag monaan. 16 Naay aremreman da sinabi Panginoon amba, Laki Howan ba magbaotismo sa sapa, ngani koyo ba batay binaotismohan sa Ispirito Banal. 17 No kora pinakan Diyos Ispirito Banal makay din pag konin tinaboy sa tamo pag tamo mag-isarig sa Panginoon Hisos Kiristo, tawa ako para ayawan da Diyos! 18 Maraw kora arngeyan tiya, nangapra:a da kora magtagsa, da- kora ba magpalakol sa Diyos amba, No amba, da mga Nawed Diw ba pinakan din pagkaodas magsisi da- mag-ogon kadaetan para kora tabangen da biyag gidte! 19 Pag odas binono laki Tiban ba mag-ompisa:a da pahidap sa mga mag-isarig. Kaya kora ba malsowayan:nani. Maki Romateng sa kotanan Pinisiya, maki kay sa inelangan Sipri anggan sa goraan lakol Antiyokya; kora pinangadar da tokawanan Diyos kayno saan kora rateng, ngani nawed sa boo iraya no nawed ba sa mga Diw ngani. 20 Ngani maki din sa kora kaanggat nawed maoson ka taga Sipri, mga taga Sirini din, maraw kora bait sa Antiyokya ba kora mangadar sa mga Girigo pag Pirmida ka Barita para sa Panginoon Hisos. 21 Anggat din sa kora da kapangyadihan Panginoon, kaya maoson da misarig, da- pasakop sa Panginoon. 22 Rateng sa rimponan mga mag-isarig sa Hirosalim da barita amba maoson:na da mag-isarig sa Antiyokya, kaya kora pinaparaoy sata laki Birnabi. 23 Maraw iya bait sata ba konin akitan da pinanawen Diyos makay bayo:wakay da kora biyag da- iya ba angasan gidte. Konin gidte nandoan kora boo amba, Ayaw magsoway sa Panginoon anggan biyagan no nawed ba koyo magpamirmi sa konin. 24 Piya ka iraya laki Birnabi, kapno Ispirito Banal, maonay da konin pag-isarig sa Diyos; maoson ka iraya da konin tinolongan para mag-isarig sa Panginoon. 25 Paraoy laki Birnabi sa goraan Tarso para saraken laki Saolo; 26 maraw konin akitan ba konin pinaanggat sa Antiyokya. Sai gidte ka dag-on sidawa mag-anggat-anggat sa rimponan mga mag-isarig sata da- magtodo sa maoson ka iraya. Sata sa Antiyokya da monaan inawit makaKiristo da mga nagtod-an Panginoon Hisos. 27 Pag odas din naba, maki rateng sa Antiyokya mga tagabarita ibat sa Diyos sa Antiyokya ibat sa Hirosalim. 28 Patindeg da sai sa kora, pag nag-awit laki Agabo. Sa kapangyadihan Ispirito Banal iya pomapawa amba batay rateng da sai ka lakol ka tagbayog sa boo paranawan. (Tiya ba nangyadi pag mga dag-on laki Kalaodyo ba impirador.) 29 Magpakana da mga nagtod-an amba kora batay magpababa tolong sa mga talkakaan sa laki Hisos pag magpamataw sa Hodiya, sa konin-konin akayanan. 30 Amba ngani- da kora pinanawen, kora pinababa sa kolaki Birnabi da- Saolo da kora tolong sa mga koyay sa rimponan mga mag-isarig sa Hodiya.
1 Pag mga odas naba, mag-ompisa koyay hadi Hirodis pahidapan da nawed maoson ka kanggat sa rimponan mga mag-isarig. 2 Laki Tiyago, ag kakaan laki Howan ba konin pinapotol da leey. 3 Maraw konin akitan tiya ba magpaangas sa mga Diw ba laki Pidro kay ba konin pinaabel. (Tiya ba nangyadi pag mga aldaw kasayahan tinapay wala pampahilab.) 4 Kalbas inabel laki Pidro iya ba piniriso, pinabantay sa labin-anim ka sondalo, ba ineray apat ka barkada. Da pakana koyay Hirodis ba laki Pidro ba konin paropangen sa kaosonan iraya maraw kalbas da mga aldaw kasayahan, 5 kaya laki Pidro ba baywi dapo sa pirisohan. Sa odas din naba layen te magdarangin da rimponan mga mag-isarig para sa konin. 6 Ag madlem ba laki Pidro ba akalekan sa tenga darwa ka sondalo, konin alima ba binegkes tagikara, maki dapo mga magbantay sa lowas sakbawan pirisohan. No omaga:ani ba batay:yani pinaropang koyay Hirodis sa kaosonan iraya. 7 Kamalay te ba bomildang da rawa sa rado pirisohan, da- magpatindeg sai ka anghil Diyos sa tebteb laki Pidro. Piniltik sa tagiriran laki Pidro para polawen. Da anghil ba amba, Kawo mangon, apora! Naokad da mga tagikara sa konin alima. 8 Amba da anghil, Komo:wa soolon da komo bado anggan komo panlaed. Amba kay da konin pinanawen. Sinabi dapo pag anghil sa konin, Komo soolon da komo pandimla da- kawo anggat sa naay. 9 Iya anggat sa anghil palwas sa pirisohan, ngani nawed konin amatangan no nangyadi gayed tiya. Sa konin remrem ba tiya ba makay akalkan. 10 Sidawa ba kalawey:ya sa monaan anggan sa ikadarwa ka mga bantay. Sidawa karateng:ngani sa sakbawan balayang pag lowasan magparaoy sa goraan lakol. Da sakbawan ba iya kay naboka, da- sidawa lomwas. Maraw sidawa kalawey sa sai ka palsimangan, kamalay te ba wala:ani da anghil. 11 Agad aremreman laki Pidro, konin gidte amatangan nawed ngani akalkan da nangyadi, kaya konin sinabi sa sadiri, Mona gidte naay apiho totoo gidte da boo nangyadi! Sinogo Panginoon da konin anghil, ako rinibri sa kapangyadihan koyay Hirodis, ako rinibri din sa alabet mga Diw mangyadi sa naay. 12 Konin din rinemrem da nangyadi da- iya ba paraoy sa balay bayi Mariya anday laki Howan pag nag-awit din Markos. Maoson da mga talkakaan da magkarimpon sata da- magdarangin. 13 Laki Pidro ba tomigtig sa sakbawan bakod, kalbas paraoy da sai ka sogoan daraga nag-awit Roda para ban-awan no tawa naba. 14 Konin amatangan da belsan laki Pidro. Sa iya angasan:na gidte, nawed:da konin binokaan da takep sakbawan no nawed ba agad domalaganan semled sa balay. Konin sinabi sa boo amba, Laki Pidro ba sa sakbawan. 15 Kora tembag, Komo kaboslian naba! Ngani iya amba, Sata gidte ngani- iya. Kaya kora tembag, Kaaram konin ngani anghil. 16 Magtigtig dapo kay anggan laki Pidro sa sakbawan. Kora binokaan da takep sakbawan; maraw iya kora akitan ba kora manggilalas. 17 Ngani konin pinayapay sa kora konin alima para kora nangapra; kalbas konin nanoltol no omaning iya pinalwas Panginoon sa pirisohan. Iya amba, Koyo sabiyen tiya sa laki Tiyago da- sa mga talkakaan. Kalbas iya mangadang:ngakay paraoy sa Roma ka poro. 18 Maraw omaga:akay, magkabol-yawak:ka gidte pag mga magbantay sa pirisohan panawen laki Pidro ba wala:a sata. Nawed kora amatangan no nakay da nangyadi sa konin. 19 Iya pinasarak koyay Hirodis; maraw nawed asbokan ba siniyasat da mga magbantay da- pinabono. Maraw kalbas ba domolong koyay Hirodis sa Sisariya ibat sa Hodiya. Sata iya mamataw. 20 Maagot:ta gidte abaisan koyay Hirodis sa mga taga Tiro da- mga taga Sidon, kaya da mga taga Tiro da- Sidon ba mal-anggatan paraoy sa balay koyay Hirodis. Kora ba magpaabyan sa laki Blasto pag tagapamanawen sa balay koyay Hirodis, kora mag-ay-ay kaginhawahan panawen da kora pamangnen ba ibat din sa mga kasakopan koyay Hirodis. 21 Maraw rateng da aldaw pinili, koyay Hirodis ba magsool bado nawed layen konin nagsool da- iya tomongka sa konin tongkaan hadi, da- iya magpanoltol sa mga taga Tiro da- taga Sidon. 22 Omayangar da boo iraya amba, Makay da sai ka diyos da magtokawanan, nawed gidte iraya! 23 Naba din pag odas naba iya ba pinakaskitan sai ka anghil Panginoon, panawen nawed konin pinalakol da Diyos. Iya ba ineled anggan natay. 24 Ngani magtobo da tokawanan Diyos, magrateng sa adayo anggan maoson da lingkat sa kadaetan. 25 Kolaki Birnabi da- Saolo, maraw kalbas:sa sidawa panawenen ba paoli:akay ibat sa Hirosalim, sidawa pinaanggat laki Howan pag nag-awit din Markos.
1 Maki mga tagabarita da- mga tagatodo sa rimponan mga mag-isarig sa goraan Antiyokya, kaanggat din towa kora Birnabi da- Simyon pag pamalayaw sa konin ba laki Maitem, Losyo taga Sirini, Saolo da- Manain arian sa yatas koyay Hirodis. 2 Sa odas kora magpodi sa Panginoon, da- nawed mamangan para ngani- sa Diyos, sinabi Ispirito Banal sa kora amba, Koyo bokodon kolaki Birnabi da- Saolo. Sidawa ba naay pinili para sa sai ka panawen naay gidte hinanda sa sidawa. 3 Maraw kalbas da kora nawed mamangan para ngani- sa Diyos, kora magdarangin, kora pinatimpowan kora alima kolaki sa hinanda para sa panawen naba. Maraw kalbas sidawa ba kora pinaidaw. 4 Kaya kolaki Birnabi da- Saolo, pag sinogo Ispirito Banal, ba domolong sa goraan Silosiya. Ibat saba ba somakay sa bangka lakol magparaoy sa inelangan Sipri, 5 anggan sa goraan Salamina. Tomolong din sa sidawa laki Howan Markos. 6 Kalbas kora mangadang anggan sa goraan lakol Papos sa tangrawan inelangan Sipri, kora asbokan sata da sai ka Diw balikmatahan magpasoli iya ba tagabarita. Bar-Hisos da konin ngaran. 7 Iya kaanggat gobirnador laki Sirgiyo Paolo, sai ka lalaki madonong. Yinakag gobirnador sidawa Birnabi da- Saolo, panawen alabet gidte konin arngeyan da tokawanan Diyos. 8 Ngani sidawa ba sinarongat laki Ilimas ag balikmatahan para ayaw misarig da gobirnador. 9 Laki Saolo, pag nag-awit din Pablo, ba kapno Ispirito Banal. Konin tinerkan laki Ilimas, 10 da- iya amba, Kawo! Kawo nag-apo aponin kadaetan. Kawo ba kalaban boo kapiyaanan! Kawo kapno gidte kadayaan da- kadaetan! Kaytang layen komo nagpiri da kataldengan Panginoon? 11 Mona, kawo batay konin pinadosahan! Kawo batay asepet, maagot kawo nawed batay kaban-aw mapawa! Agad amasdanan laki Ilimas makay tinakleban maitem ka yaong da konin mata, da- iya maghaligap magrakam-rakam magsarak batay mag-akay sa konin. 12 Maraw akitan gobirnador da nangyadi iya ba misarig:ga din, iya ba magtaka gidte sa mga adar ibat sa Panginoon. 13 Manlaki Pablo ba somakay sa bangka ibat sa Papos da- kora ba pomondo sa betek goraan Pirga, sa lopa Pampilya. Somway:ya sa sidawa laki Howan da- iya moli:akay sa Hirosalim. 14 Kolaki kay ba magkadang-kadang dapo anggan rateng sa goraan Antiyokya sa lopa Pisidya. Maraw bait da Aldaw Magpahinga, sidawa ba semled sa balay pagtiponan mga Diw da- tomongka. 15 Kalbas binasa mga iraya da tokawanan Diyos sa ribro mga Bilin Diyos tinaboy sa laki Moysis, da- sa ribro sinorat mga tagabarita ibat sa Diyos, sinabi mga poon sa balay pagtiponan sa sai sa kora amba, Sabiyen sa kolaki amba, Mga arian, no kandawa maki kay adar sa mga iraya ba magtokawanan:na kandawa! 16 Kaya patindeg laki Pablo, kalbas konin pinayapay konin alima para kora nangapra. Amba iya, Mga taga Israil, mga iraya aliman magpanawen daet laban sa Diyos, koyo pakarngey! 17 Da Diyos ag nagpodi tamo mga taga Israil iya da pomili sa tamo mga pangapoan. Kora konin ginawa sai ka lakol ka kaosonan iraya sa odas kora magpamataw sa lopa Ihipto. Kora ba konin pinalwas sa Ihipto panawen iya ba makapangyadihan gidte. 18 Inagwanta Diyos da kora nawed piya ka ogali sa poro nawed apirmihan iraya korang ngani apatnapo ka dag-on. 19 Kalbas konin simpo da pito ka kairayaan sa lopa Kanaan, konin tinaboy sa kora da lopa 20 sa batay:ya apat ka daan limampo ka dag-on. Kalbas kora konin pinakan mga tagaampara anggan ag odas laki Samwil da tagabarita ibat sa Diyos. 21 Maraw kora omay-ay hadi, tinaboy Diyos sa kora laki Saolo, onga laki Kis, ibat sa andana laki Binhamin. Laki Saolo maghadi sa boo apatnapo ka dag-on. 22 Maraw iya sinikway Diyos, laki Dabid:dakay da konin tinaboy para maghadi sa kora. Makay tiya da sabi Diyos para sa laki Dabid, Naay amatangan laki Dabid onga laki Hisi ba magpaangas sa naay, handa iya mamanawen boo naay nagsabi. 23 Ibat sa andana laki Dabid ba tinaboy Diyos sa mga taga Israil laki Hisos tagalekat sa kadaetan konin pinangako. 24 Bayo iya bait ba pinangadar laki Howan sa boo taga Israil amba kailangan kora magsisi da- mag-ogon kadaetan, kalbas pabaotismo. 25 Maraw batay:ya kalbas da panawen laki Howan ba konin sinabi sa mga iraya amba, Ako ba nawed ag koyo nagremrem. Nawed ako da Kiristo. Ngani iya batay rateng sa naay:ya te paoriyan. Kayno mag-okad ngani pag eket konin panlaed ba ako nawed abaya. 26 Naay mga kapowa Diw ibat sa kaapoan laki Abraham da- koyo ag mga iraya aliman magpanawen daet laban sa Diyos, koyo da binabaan pag barita tiya para sa kalkatan sa kadaetan. 27 Da mga magpamataw sa Hirosalim anggan ag kora mga poon nawed kora amatangan no tawa gidte iya. Nawed din kora rinemrem da mga monaan sinabi mga tagabarita ibat sa Diyos, pag kora nagbasa tayma Aldaw Magpahinga; ngani sa kora hinosgahan katayan laki Hisos ba kora:a din da pomanawen ag mga monaan sinabi mga tagabarita. 28 Kayno wala sibay kora ban-awan para iya ba pabonoon, amba man kora inay-ayan dapo sa koyay Pilato amba iya pabonoon. 29 Maraw kora:a napanawen da boo nagkasorat para sa laki Hisos ba iya ba lin-at sa kodos sidawa Hosi da- Nikodimo da- limbeng. 30 Ngani iya biniyag:gakay Diyos. 31 Kalbas sa boo maoson ka aldaw ba iya paban-aw sa konin mga kaanggat pag kora magparaoy-paraoy dapo sa Hirosalim ibat sa Galiliya. Mona, kora ba konin mga sistigo sa mga taga Israil. 32 Kidawa towa para papawaen sa koyo da Pirmida ka Barita amba, Da pangako Diyos sa tamo mga pangapoan 33 ba konin:na pinanawen para sa tamo boo ag mga Diw maraw konin pinaparaoy laki Hisos. Tiya da nagkasorat sa ikadarwa ka Igway amba, Kawo da naay Onga, mona ba ako da komo Apang. Naba:a ngani. 34 Para sa biniyag:gakay laki Hisos para nawed konin sinalaket da karokasan, makay tiya da sinabi Diyos amba, Naay batay tinaboy sa koyo da piya ka parongaw pag naay pinangako sa laki Dabid. 35 Sinabi din sa Roma kay ka Igway amba, Nawed batay komo pinabayaan somalaket karokasan da komo Banal. 36 Kalbas pinanawen laki Dabid da kaliyagan Diyos, iya natay da- limbeng sa tebteb konin mga pangapoan, iya ba somalaket karokasan. 37 Ngani da biniyag:gakay Diyos ba nawed somalaket karokasan. 38 Mga kapowa Diw, kailangan gidte koyo amatangan amba sa laki Hisos ngani da kapatawadan kadaetan, pag pinangadar:ra sa koyo. 39 Da iya mag-isarig sa konin ba pinatawad sa boo kadaetan, pag nawed batay apatawad sa koyo sa magpamanawen sa Bilin Diyos tinaboy sa laki Moysis. 40 Kaya koyo magdahan para nawed mangyadi sa koyo da sinabi mga tagabarita ibat sa Diyos amba, 41 Koyo ban-awan, koyo mga anonoya! Koyo batay magtaka, da- batay nangatay! Panawen ako maki batay pinanawen sa odas koyo biyagan, sai ka panawen nawed gidte koyo batay rinemrem kayno maki manoltol sa koyo! Naba:a ngani. 42 Maraw sidawa Pablo da- Birnabi ba lomwas sa balay pagtiponan ba yinakag dapo mga iraya sidawa amba magtokawanan:nakay sa sai:yakay ka Aldaw Magpahinga para sa mga nakayman naba. 43 Kalbas lomwas:sa da boo kaosonan, anggat sa sidawa Pablo da- Birnabi da maoson ka Diw da- mga Nawed Diw naranggot sa kaogalian mga Diw. Magtokawanan sa kora da mga pinili sogoan. Kora sinabi gidte amba, Koyo mamiyag boo odas sa biyag mag-isarig pag inabaya ag kapiyaanan remrem Diyos. 44 Maraw bait:takay da Aldaw Magpahinga nawed ngani kay malpagpagan magkatipon da boo iraya sa goraan para pakarngeyan da tokawanan Diyos. 45 Maraw akitan mga Diw da maoson gidte ka iraya ba kora amagan gidte, kaya kora sinongarngar laki Pablo da- iya ba kora tinawanan. 46 Ngani lalo gidte emeyat da remrem sidawa Pablo da- Birnabi. Sidawa amba, Sa koyo dapo disin da kailangan monaan papawaen da tokawanan Diyos. Ngani panawen sa koyo:wa sinikway tiya, koyo:wa Pinaban-Aw da koyo sadiri ba nawed gidte abaya sa koyo da biyag gidte wala arasan, kaya yamen batay:ya paraoy sa mga Nawed Diw. 47 Panawen makay tiya da sinabi Panginoon, Kawo naay:ya ginawa makay solo-sa mga nawed Diw Para komo pamaritaen da kalkatan kadaetan Anggan sa tangrawan paranawan. Naba:a ngani. 48 Maraw tiya ba arngeyan pag mga Nawed Diw ba kora ba nangaangasan da- kora magpalakol sa Panginoon panawen sa konin tokawanan misarig da mga pinili Diyos para sa biyag gidte wala arasan. 49 Maoson:nani da iraya karngey pag tokawanan Panginoon sa boo poro naba. 50 Ngani inolokan pag mga Diw da mga babayi magpodi sa Diyos da- da mga babayi naggalang kaosonan, amba din da mga lalaki naggalang boo iraya sa goraan. Kora:a pinahidapan:nani sidawa Pablo da- Birnabi da- sidawa ba kora:a namoyawan sa poro tiya. 51 Kaya sidawa pinagpag da onggang ibat sa sidawa mga panlaed, tanda magpaban-aw sa kora amba kora:a din da kamatang, panawen kora:a sinikway da Pirmida ka Barita. Maraw kalbas ba sidawa paraoy:yani sa Ikoniyo. 52 Pag mga nagtod-an kay sa Antiyokya ba kapno kaangasan da- kapno din Ispirito Banal.
1 Amba din da nangyadi sa Ikoniyo : sidawa Pablo da- Birnabi semled sa balay pagtiponan. Piya gidte da sidawa pangadar kaya maoson da misarig mga Diw da- mga Girigo. 2 Ngani ginarit mga Diw dayo mangisarig da mga Nawed Diw laban sa sidawa Pablo da- Birnabi. Sidawa ba kora sinida gayed. 3 Maagot te din magpamataw sata sidawa Pablo da- Birnabi da- sidawa wala gidte kaliman mangadar para sa Panginoon. Pinaban-Aw kay Panginoon totoo gidte da sidawa nangadar para sa konin kapiyaanan remrem, maraw konin tinaboy sa kora konin kapangyadihan para kapanawen mga tandaanan da- katakataka. 4 Kaya nangeray da remrem mga iraya sa goraan lakol-da Roma ba anggat sa mga Diw da- da Roma kay ba sa mga pinili sogoan Panginoon. 5 Da mga Nawed Diw da- da mga Diw anggat din kora mga poon ba mag-ompisa maglaban sa mga pinili sogoan. Kora pinakana sidawa ba pakayaen da- batowen. 6 Ngani maraw tiya ba sidawa amatangan ba sidawa domalagan paraoy sa mga goraan lakol Listra da- Dirbi sa lopa Likaonya, paraoy din sa mga poro paribok sata. 7 Sidawa nangadar sata da Pirmida ka Barita. 8 Sa goraan Listra maki sai ka lalaki nawed kakadang, panawen iya ba lompo ibat dapo sa iya inonga. 9 Iya magtongka da- magpakarngey sa adar laki Pablo. Maraw akitan laki Pablo da lompo ba maki sarig para iya papiyaen ba iya ba konin sinerey 10 da- magberya maeyat amba, Kawo patindeg mataldeng. Da- omigtad pag lalaki, komadang-kadang. 11 Maraw akitan pag mga iraya sa goraan da pinanawen laki Pablo, kora lomalae sa tokawanan mga taga Likaonya amba, Lompot:ta sa tamo da mga diyos sa hidsoda iraya! 12 Laki Birnabi ba kora inawit Sios, laki Pablo kay ba Irmis, panawen iya da layen magtokawanan. 13 Sa sormokan goraan da pagpodiyan Sios. Da magpamanawen para sa Sios ba tomonton sa tagpoanan goraan mga toro baka maki salabay botakan, para iya anggat sa mga iraya sa goraan sa magtaboy sa sidawa. 14 Maraw amatangan naba sidawa Birnabi da- Pablo, rinatrat sidawa bado da- domalaganan paraoy sa tenga kaosonan, da- magberya maeyat amba, 15 Mga iraya, ayaw koyo panawenen naba. Kidawa ba iraya makay din koyo! Kidawa nagpangadar sa koyo da Pirmida ka Barita, para koyo paawak sa mga nakayman tiya ag wala kaparosan, da- paoli koyo sa Diyos biyagan. Iya da Romarang langit da- lopa, dagat da- boo nakayman sa paranawan. 16 Pag mga dag-on kalawey, konin pinabayaan da boo iraya magpanawen konin-konin alabet. 17 Amba man, iya tomaboy sibay ka sistigo para iya koyo akilalaan sa kapiyaanan konin nagpanawen sa koyo, ag koyo ba konin nagpakan odan ibat sa langit, maoson gidte ani sa tayma dag-on. Koyo konin pinakabsoy pamangnen, pinakapno kaangasan da koyo remrem. 18 Kayno man sidawa nanoltol da mga tiya ba alabet dapo din mga iraya sidawa ba pakanen mga atag. 19 Ngani maki mga Diw bait sata ibat sa Antiyokya sa Pisidya da- ibat din sa Ikoniyo. Kora inolokan mga iraya laban sa laki Pablo. Iya ba kora namato. Kalbas iya rinanggot sa lowas goraan; sa kora remrem iya ba natay:yani. 20 Ngani maraw iya ba rinibok mga mag-isarig, patindeg laki Pablo, iya semled:dakay sa goraan Listra. Maraw omaga:akay, paraoy sidawa Birnabi sa goraan Dirbi. 21 Pinangadar sidawa Pablo da- Birnabi da Pirmida ka Barita sa Dirbi. Maoson din da mangisarig sa sidawa pangadar. Kalbas sidawa paoli:akay sa Listra, sa Ikoniyo da- sa Antiyokya sa Pisidya. 22 Sidawa pinaeyat da remrem mga mag-isarig, kora ba sidawa nandoan amba, Ayaw magsoway sa mag-isarig anggan biyagan. Batay dapo tamo magsalaket maoson ka kahidapan bayo batay gidte maghadi sa tamo da Diyos. 23 Sa odas din naba, sidawa pomili mga koyay batay magpamanawen sa tayma rimponan mga mag-isarig. Maraw kadarangin:nani, nawed din mamangan para ngani- sa Diyos, sidawa sinabi sa Panginoon amba, Kawo da mag-alaga sa mga tiya, panawen kawo da kora nagsarigan. 24 Sidawa sinaray da lopa Pisidya anggan rateng sa goraan Pampilya. 25 Sidawa pinangadar sa goraan Pirga da tokawanan Diyos, da- domolong sa goraan Atalya. 26 Ibat sata sidawa somakay sa bangka paoli sa goraan Antiyokya sa lopa Siriya, pag narwaan dapo sidawa ba pinaalaga sa Diyos mga mag-isarig sata, para magpanawen mga panawen mona sidawa pinanawen. 27 Maraw sidawa bait sata, sidawa tinipon da mga mag-isarig sa laki Hisos. Sidawa nanoltol da boo pinanawen Diyos sa sidawa sata magpangadar, no omaning binokaan Diyos da dalan para da mga Nawed Diw ba misarig din. 28 Maagot din ka odas sidawa magpamatawan sata, pal-anggat mga mag-isarig.
1 Da nawed maoson ka iraya ba bait sa Antiyokya ibat sa Hodiya. Kora tindo sa mga talkakaan sa laki Hisos da makay tiya: no nawed koyo palong-oy toltol sa Bilin Diyos tinaboy sa laki Moysis, koyo ba nawed batay karibri. 2 Sidawa Pablo da- Birnabi somongarngar gidte sa kora para saba. Kaya da mga mag-isarig ba magpakana paparaoyon sa Hirosalim sidawa Pablo da- Birnabi, anggat da nawed te maoson ka talkakaan taga Antiyokya, para pakasma sa mga pinili sogoan da- sa mga koyay sa rimponan mga mag-isarig da- magtanong sa kora no nakay da piya para sa kahidapan tiya. 3 Kora ba pinaparaoy mga mag-isarig. Pag kora domalan sa lopa Pinisiya da- Samariya, kora binarita no omaning da Nawed Diw ba mag-isarig sa Diyos. Panawen saba ba angasan gidte da boo mga talkakaan sa laki Hisos. 4 Maraw bait sa Hirosalim, kora ba tinanong mga pinili sogoan, mga koyay sa rimponan mga mag-isarig anggan mga boo mag-isarig sa laki Hisos; kora nanoltol da boo pinanawen Diyos sa kora sata magpangadar. 5 Ngani patindeg da nawed maoson mag-isarig sa laki Hisos ibat sa barkada mga Parisiyo. Kora amba, Da piya gidte ba long-oyon da Nawed Diw mag-isarig, koyo sogoan sa kora amba kora panawenen da Bilin tinaboy sa laki Moysis. 6 Magmiting da mga pinili sogoan da- da mga koyay sa rimponan mga mag-isarig para pag-adaran da kahidapan tiya. 7 Kalbas da maagot ka songarngaran, patindeg laki Pidro da- iya amba, Mga talkakaan, koyo amatangan sa mga aldaw kalawey, ako ba pinili Diyos ibat sa koyo para mangadar Pirmida ka Barita sa mga Nawed Diw. Mona kora ba mangisarig:gani sa Diyos. 8 Da Diyos pag magban-aw sa boo nagremrem iraya ba iya din da magsistigo kora ba konin din nagtabang maraw kora ba konin pinakan Ispirito Banal makay din tamo. 9 Da magban-aw Diyos sa mga Nawed Diw ba nawed Roma sa tamo mga Diw panawen lininis din Diyos da kora kadaetan sa kora poso panawen kora misarig din sa laki Hisos Kiristo. 10 Kaytang koyo mana kamatangen dapo sa Diyos? Kaytang nga koyo nagpababa sa mga mag-isarig da sai ka baba nawed tamo ababa, nawed din ababa tamo mga pangapoan? 11 No tamo misarig, no tamo ba naribri ba panawen sa kapiyaanan remrem Panginoon Hisos, da- amba kay din kora. 12 Nangapra da boo kaosonan. Kora magpakarngey sa kolaki Birnabi da- Pablo sa sidawa nagpanoltol da mga katakataka da- tandaanan pinapanawen Diyos sa sidawa pag odas sidawa ba sa mga Nawed Diw. 13 Maraw kalbas:sa magtokawanan sidawa, laki Tiyago kay da magtokawanan amba, Mga kapowa Diw, koyo pakarngey sa naay. 14 Aray te ngani nanoltol laki Simon no omaning dinaraw Diyos da mga Nawed Diw para kora ba konin din sadiri kairayaan. 15 Tiya ba toltol sa sinabi mga tagabarita ibat sa Diyos amba, 16 Maraw kalbas tiya ba ako batay:yakay paoli towa, Batay:yakay naay pinatindeg da nagras pamatawan laki Dabid. Batay:yakay naay binolkat naba ibat sa konin kagrasan, 17 Para da Panginoon ba saraken mga Roma ka iraya, Anggan mga Nawed Diw naay pinili para naay din kairayaan. 18 Amba da sabi Panginoon pag pomapawa pag mga nakayman tiya ibat dapo tangona. Naba:a ngani. 19 Kaya sa naay remrem ayaw:wani tamo pakotingtingen da mga Nawed Diw magpabali sa Diyos. 20 No nawed ba kora ba tamo soratan amba, Ayaw mamangan nakayman ka pamangnen batang inatag sa mga nawed amba Diyos, ayaw magpanaban, ayaw din magpataban, ayaw mamangan nakayman ka hayop nawed inalis da daya, ayaw din mamangan daya. 21 Panawen maagot:ta din ka dag-on da Bilin tinaboy sa laki Moysis ba nagbasa da- nagpangadar sa mga balay pagtiponan sa tayma goraan tayma Aldaw Magpahinga. 22 Kaya da mga pinili sogoan, mga koyay sa rimponan anggan da boo mag-isarig ba pomili nawed maoson sa kora para sogoon sa Antiyokya, kaanggat sidawa Pablo da- Birnabi. Kora din sinogo laki Hodas pag nag-awit din Barsabas, da- laki Silas, tanan naggalang gidte mga talkakaan mag-isarig. 23 Kora ba pinababaan sorat, makay tiya da nagsabi, Yamen mga pinili sogoan anggan mga koyay sa rimponan mga mag-isarig, yamen magtanong sa koyo yamen mga talkakaan Nawed Diw sa goraan Antiyokya, sa lopa Siriya da- sa poro din Silisiya amba, Makay nakay kay koyo saba? 24 Yamen abaritaan nalingo:wa da koyo remrem panawen sa todo sa koyo mga iraya batang towa kayno nawed kora yamen sinogo. 25 Kaya yamen magkasai para paparaoyon sa koyo da mga lalaki kaangat mga nagpalayaw kolaki Birnabi da- Pablo, 26 pag pinapaen sidawa biyag para sa mga panawen Panginoon Hisos Kiristo. 27 Yamen ngani- nagsogo sa koyo sidawa Hodas da- Silas para papawaen sa koyo da nagsabi sa sorat tiya. 28 Panawen alabet Ispirito Banal, alabet din yamen koyo ayaw apahidapan sa mga Roma ka bilin, no nawed ba tiya ngani da kailangan sa koyo : 29 Ayaw mamangan nakayman ka pamangnen batang inatag sa mga nawed amba Diyos, ayaw din mamangan daya, anggan nakayman ka hayop nawed inalis da daya, ayaw magpanaban, ayaw din magpataban. Koyo pakaadayo sa mga naba para batay piya gidte koyo biyag. Anggan ngani towa. 30 Kalbas kora pinaidaw kora Pablo. Maraw kora bait sa Antiyokya kora rinimpon da mga arian, da- tinaboy da sorat. 31 Maraw kora binasa da sorat ba angasan da mga arian sa kora arngeyan ibat sa sorat. 32 Maraw kalbas ba kolaki Hodas da- Silas, mga tagabarita din ibat sa Diyos ba pinapawa da maoson ka tokawanan sa kora. Tiya ba magpaeyat gidte sa kora remrem, magpaonay sa kora pag-isarig. 33 Kora ba mamataw sata nawed maagot ka odas. Maraw kalbas kora paoli:akay sa magsogo sa kora, anggat din da darangin mga talkakaan para sa kora piya ka magkadangan. 34 Ngani rinemrem laki Silas piya dia no iya paogon ngani. 35 Sidawa Pablo da- Birnabi kay ba mamataw sa Antiyokya pal-anggat mga kaosonan sata da- magtodo da- mangadar tokawanan Panginoon. 36 Kalawey nawed maoson ka aldaw, sinabi laki Pablo sa laki Birnabi amba, Kita paoli:akay, kita darawen da mga talkakaan sa boo goraan kita pinangadaran tokawanan Panginoon, kita ban-awan no makay nakay da kora biyag. 37 Alabet laki Birnabi konin paanggaten laki Howan pag nag-awit din Markos, 38 ngani dayo kay laki Pablo, panawen narwaan nawed:da anggat laki Markos sa kora panawen, no nawed ba somway:ya sa sidawa sa Pampilya. 39 Sidawa maki gidte maibeng ka songarngaran da- panawen saba ba sidawa malsoway. Pinaanggat laki Birnabi laki Markos. Sidawa ba somakay:ya sa bangka paraoy sa inelangan Sipri. 40 Pinaanggat kay laki Pablo laki Silas. Mangadang:nga sidawa kalbas magdarangin da mga talkakaan amba, Sidawa kay dahanan Panginoon. 41 Magkadangan sidawa Pablo ibat sa Antiyokya. Sidawa dinalanan da Siriya anggan Silisiya da- pinaonay da mga mag-isarig sa mga rimponan.
1 Paraoy din sidawa Pablo da- Silas sa Dirbi anggan sa Listra. Maki sai ka mag-isarig sata nag-awit laki Timotiyo. Da konin adang ba sai ka Diw mag-isarig din. Konin apang kay ba Girigo. 2 Amatangan mga arian sa laki Hisos sa Listra da- sa Ikoniyo laki Timotiyo ba piya ka iraya. 3 Kaya iya ba alabet paanggaten laki Pablo. Konin pinalong-oy, panawen amatangan boo mga Diw sa goraan naba amba Nawed Diw da konin apang. 4 Kaya sa tayma goraan sidawa dinaraw ba sidawa pinaaram sa mga talkakaan sa laki Hisos da bilin sa sorat ibat sa mga pinili sogoan da- sa mga koyay sa rimponan mga mag-isarig sa Hirosalim. Kora magsabi amba, Koyo panawenen da mga tiya. 5 Kaya maonay sa pag-isarig da mga rimponan. Nagkamaoson-nagkamaoson da mga mangisarig aldaw-aldaw. 6 Kora magkadangan ibat sa Listra batay disin paraoy sa poro Asiya para mangadar, ngani inayawan Ispirito Banal, kaya kora domalan sa mga lopa Pirigya da- Galasiya. 7 Maraw rateng sa lopa Misiya, alabet disin kora paraoy sa kadatig lopa Bitinya, ngani nawed pinayagan Ispirito laki Hisos. 8 Kaya kora ba domalan sa Misiya padolong sa Toroas. 9 Maraw madlem, maki makay akalkan laki Pablo. Konin akitan da sai ka lalaki magpatindeg. Iya ba taga Masidonya. Iya mag-aringi sa konin amba, Koyo omipay towa sa Masidonya, yamen kay tolongan. 10 Kalbas pag makay akalkan tiya, yamen manggayak agad panawen yamen amatangan nagpaban-aw Diyos sa yamen amba kailangan yamen pangadaren da Pirmida ka Barita sa Masidonya. 11 Ibat sa Toroas, yamen somakay sa bangka paraoy sa Samotrasiya; maraw omaga:akay yamen diritso sa Niyapolis. 12 Ibat sata yamen paraoy sa Pilipos, sai ka goraan sakop sa goraan Roma. Naba da lakol ka goraan sa sai ka poro sa Masidonya. Yamen ba mamataw sata nawed maoson ka aldaw. 13 Maraw Aldaw Magpahinga, yamen lomwas sa goraan, paraoy sa tebteb salog, panawen yamen rinemrem maki sata pagdaranginan mga Diw. Yamen magtongka da- magtokawanan sa mga babayi magkatipon sata. 14 Sata din bayi Lidya taga Tiatira. Iya magpabili mga bado makay tina obi. Iya ba masambahen din sa Diyos. Binokaan Panginoon da konin remrem da- iya maniwala sa magpangadar laki Pablo. 15 Iya pabaotismo sa sapa anggan da boo magpamataw sa konin balay. Kalbas konin sinabi amba, No koyo magremrem ako ba mag-isarig:ga gidte sa Panginoon ba koyo towa dapo sa yamen. Panawen yamen konin gidte nalopod, kaya nawed:da yamen asida. 16 Sai ka aldaw, pag yamen magparaoy sa pagdaranginan ba yamen asma da sai ka daraga tagoanggat. Iya ba nag-apo daet ka ispirito pag magtaboy sa konin kapangyadihan para iya maghola ag batay mangyadi. Lakol gidte da nagkaakitan pag konin mga amboy-amboyan panawen sa konin kapangyadihan. 17 Yamen ba konin nag-agak-agak, magberya maeyat amba, Da mga iraya tiya ba tagoanggat Diyos pag Atatas sa boo. Kora nagpapawa sa koyo no omaning koyo batay karibri. 18 Panawen maoson:na ka aldaw konin nagpanawen tiya, kaya abaisan da remrem laki Pablo. Iya ba paropang sa konin da- konin sinabi sa daet ka ispirito amba, Naay nagsogo sa komo sa ngaran laki Hisos Kiristo, kawo lomwas sa babayi tiya! Pag odas din naba lomwas:sani da daet ka ispirito. 19 Maraw akitan mga amboy-amboyan pag tagoanggat kora ba wala:a batay akitan kwarta ba kora dinosmogan kolaki Pablo da- Silas da- sidawa ba kora rinanggot sa tenga goraan, da- pinaropang sa mga koyay sa goraan. 20 Kora sinabi sa mga atatas gidte sa kora poon taga Roma amba, Da mga Diw tiya ba magpalingo remrem sa mga taga goraan. 21 Sidawa magtodo mga kaogalian laban sa maniho tamo mga sakop sa Roma. Tamo nawed abaya akenen e panawenen da mga kaogalian naba. 22 Sidawa ba dinarosog mga iraya, da- linsowan:na bado mga poon, sidawa ba paoli-oli sinampok, 23 pinapiriso, da- pinabantayan piya. 24 Sidawa ba pinasled pag tagabantay sa kagaleman pirisohan, namangaw da sidawa paa. 25 Maraw tenga:a madlem, sidawa Pablo da- Silas ba magdarangin da- mag-igway palakol sa Diyos. Pakarngey kay da mga Roma ka piriso. 26 Kamalay te ba lomindol maeyat gidte. Manyogyoga da mga arigi pirisohan. Agad nabokaan da boo sakbawan, nangalkat kay da mga kadina sa mga piriso. 27 Bigla apolawan da tagabantay pirisohan. Maraw konin akitan boka:a da mga sakbawan konin yinabot da konin pisaw da- alabet:ta magpakatay panawen sa konin remrem ba kadalagan:na da mga piriso. 28 Ngani manokawanan maeyat laki Pablo amba, Ayaw kay pakaskitan da komo sadiri! Yamen boo ba towa! 29 Omay-ay solo- da tagabantay, domalaganan semled da- magtartaroy lomombogan sa ropangan sidawa Pablo da- Silas. 30 Sidawa ba konin pinalwas da- konin tinanong amba, Mga koyay, nakay kay da kailangan naay panawenen para ako kay ba naribri? 31 Sidawa tembag, Kawo misarig sa Panginoon Hisos da- kawo batay naribri anggan da boo magpamataw sa kom balay. 32 Da tokawanan Diyos ba sidawa pinapawa sa konin da- sa boo sa konin balay. 33 Pag madlem din naba ba inoyasan ag tagabantay da sidawa mga golat, iya pabaotismo anggan da boo magpamataw sa kon balay. 34 Maraw kalbas, sidawa ba konin pinaanggat sidawa sa konin pamatawan, sata sidawa ba konin hinayinan pamangnen. Angasan:na gidte iya anggan da boo magpamataw sa konin balay, panawen kora ba misarig:ga gayed sa Diyos. 35 Maraw omaga:akay, pinaparaoy mga poon sa goraan da mga polis sa tagabantay pirisohan magsabi amba, Komo bal-anan da mga iraya naba. 36 Sinabi pag tagabantay pirisohan sa laki Pablo amba, Nagsogo mga poon amba, Bal-anan:na kandawa. Kaya kandawa omadayo maki kaginhawahan. 37 Ngani sinabi laki Pablo sa mga polis, Kidawa ba kora pinabogbog sa ropangan kaosonan, da- pinapiriso pag nawed man kora tinanong kidawa no nakay kidawa, kayno kidawa ba sakop din sa goraan Roma. Mona ba nagtago mayam kidawa bal-anan! Nawed abaya! Kora da paraoy towa da- bomal-an sa kidawa. 38 Pinaaram pag mga polis sa mga poon sa goraan da sabi laki Pablo. Kora aliman maraw kora amatangan sidawa ba sakop din mana sa goraan Roma. 39 Kaya kora ba paraoy sata da- omay-ay tawad sa sidawa. Sidawa ba kora pinalwas da- pinasked amba, Omalis:sa kandawa towa. 40 Maraw sidawa Pablo da- Silas lomwas:sani sa piriso ba toloy sa balay bayi Lidya. Sata aratnganan sidawa da mga talkakaan sa laki Hisos. Bayo sidawa omalis, kora ba sidawa binilinan amba, Koyo magpakaonay sa mag-isarig.
1 Sidawa domalan sa Ampipolis da- Apolonya anggan bait sa Tisalonika; sa goraan tiya maki balay pagtiponan mga Diw. 2 Toltol sa kaogalian laki Pablo, iya ba semled sata. Sa boo tatlo ka linggo, sa tayma Aldaw Magpahinga ba kora nagbatayan ibat sa ribro Diyos. 3 Konin gidte pinapawa da kailangan gidte mag-agwanta da Kiristo bayo iya ba biniyag:gakay. Iya amba, Da Hisos tiya, pag naay nagpapawa sa koyo, ba iya da Kiristo! 4 Naranggot da kalaati sa sidawa todo da- kora anggat sa sidawa Pablo da- Silas; amba din da mga maoson ka Girigo aliman magpamanawen daet laban sa Diyos da- maoson ka babayi maki kapangyadihan. 5 Ngani amagan da mga Diw, kaya kora tinipon da mga magpasyada sa tenga goraan, kora nagringangaw da boo goraan. Kalbas kora dinarosog da balay laki Hason, kora alabet abelen sidawa Pablo da- Silas para palobaen sa kaosonan. 6 Maraw sidawa nawed kora asbokan ba kora rinanggot laki Hason da- nawed maoson sa mga arian sa ropangan mga poon sa goraan. Makay tiya da kora gayagang, Da tamo goraan ba asledan mga iraya magparingangaw kayno saan rateng. 7 Sidawa ba tinabang laki Hason sa konin balay. Kora boo ba maglaban sa maniho impirador da- nagsabi amba maki dapo Roma ka hadi da ngaran ba Hisos. 8 Nangabolyawak da kaosonan iraya sa goraan da- da mga poon sa goraan panawen sa lalaean tiya. 9 Kora Hason ba pinadoti mga poon bayo binal-anan. 10 Pag madlem din naba ba sidawa Pablo da- Silas ba pinaparaoy mga arian sa goraan Biriya. Maraw sidawa bait sata ba sidawa semled sa balay pagtiponan. 11 Piya dapo da remrem mga Diw sa Biriya sa mga taga Tisalonika. Kora asyagan gidte magpakarngey sa Tokawanan Diyos nagtodo laki Pablo. Aldaw-aldaw kora nagbarokay da Ribro Diyos para ban-awan no totoo gidte da konin nagsabi. 12 Mangisarig da maoson ka Diw sata, amba din da mga Girigo, mga lalaki da- mga babayi maki kapangyadihan. 13 Ngani maraw abaritaan pag mga Diw sa Tisalonika amba nagpangadar din laki Pablo sa Biriya da Tokawanan Diyos ba kora ba paraoy sata da- inolokan da kaosonan iraya sa goraan magpabolyawak. 14 Agad laki Pablo ba pinaalis mga talkakaan. Iya ba kora tinonton anggan sa tebteb dagat. Ngani naogonan sidawa Silas da- Timotiyo. 15 Pag mga talkakaan magtonton sa laki Pablo ba omanggat sa konin anggan sa goraan Atinas. Kalbas kora paoli:akay sa Biriya, maki nagbaba bilin ibat sa laki Pablo para sa sidawa Silas da- Timotiyo amba, Kandawa tomongroy agad sa naay. 16 Sa odas sidawa ba nagpanyaan laki Pablo sa Atinas, konin amasdanan sa goraan naba maoson gidte mga nawed amba Diyos kora nagsamba, kaya omibeng da konin remrem. 17 Kaya iya somongarngar sa mga Diw da- sa mga Nawed Diw masambahen sa Diyos, sata sa kora balay pagtiponan, kayno sa tawa man konin asma sa tenga goraan aldaw-aldaw. 18 Konin din kasongarngar da nawed naw maoson ka mga tagatodo nag-awit Ipikoriyo no nawed ba Istowiko. Amba da kalaati, Nakay ma da alabet sabiyen sa tamo tiya pag magmadonong? Da sabi kay ag Roma, Iya magpangadar dia para sa bayo:wakay ka Diyos. Amba da kora sabi panawen magpangadar laki Pablo para sa laki Hisos, para din sa batay:yakay biniyag da mga iraya. 19 Kaya iya kora pinaanggat sa latayan nag-awit Ariyopago, da- sata pinaloba sa kora miting. Kora amba sa laki Pablo, Abaya dia yamen amatangan no nakay tiya pag bayo ka adar pag komo nagsabi, 20 kaya alabet yamen amatangan no nakay da alabet sabiyen tiya. 21 Panawen wala:a nagpanawen da mga taga Atinas da- da mga manalyowan magpamatawan sata, no nawed ba magpakarngey, magboyboy para sa nakayman bayo kora arngeyan. 22 Kaya patindeg laki Pablo sa ropangan miting Ariyopago, da- magtokawanan amba, Mga taga Atinas, da naay nagkaamasdanan ba asesen:na gidte da koyo remrem sa koyo nagsamba. 23 Panawen sa ako magkadang-kadang sa koyo goraan ba naay nagmasdan da koyo mga pagsambahan, naay akitan da sai ka arengan pagsambahan maki sorat makay tiya, Sa Diyos Nawed Akilalaan. Da Diyos nawed koyo kilala, ag koyo nagsamba kayno nawed koyo kilala, iya da naay nagpangadar sa koyo. 24 Da Diyos ag gomawa paranawan da- pag boo sata ba iya da Panginoon langit da- lopa, kaya nawed iya magpamataw sa mga balay ginawa iraya para sa konin. 25 Nawed din konin kailangan da nakayman kayno iya nag-asikaso mga iraya, panawen iya da magtaboy biyag da- inawa da- boo nakayman sa boo kairayaan. 26 Ibat sa sai ka iraya konin rinarang da boo kairayaan sa paranawan. Konin:nani pinakana da konin-konin odas, konin-konin pamatawan. 27 Konin pinanawen tiya para kora saraken da Diyos, kaaram kora batay asbokan iya sa kora magsarak. Nawed gidte iya adayo sa tayma sai sa tamo. 28 Panawen Iya da magtaboy sa tamo biyag da- iya da magpaleblebey sa tamo da- ibat din sa konin da tamo pagkairaya. Naba:a ngani. Makay din pag sinabi kalaati sa koyo mga anonorat, Tamo ngani- ba konin mga onga. Naba:a ngani. 29 Panawen tamo ba mga rinarang Diyos ba ayaw tamo remremen da Diyos ba makay mga ladawan ginto, pilak da- bato, pag boo pinanawen remrem da- alima iraya. 30 Kayno amatangan Diyos da boo, ba maoson ka dag-on nawed konin inalomana sa boo nawed kamatang sa Diyos, ngani mona kay ba konin nagsogo sa mga iraya sa boo paranawan da magsisi da- mag-ogon kora kadaetan, 31 Panawen konin:na hinanda da aldaw iya batay maghosay sa boo iraya sa paranawan sa boo katowidan; da konin hinidang da batay mamanawen tiya. Pinatonayan Diyos tiya sa boo iraya, pag konin biniyag:gakay da iraya naba! 32 Maraw kora arngeyan da sabi laki Pablo para sa nabiyag:gakay da mga nangatay ba iya ba tinoya pag kalaati sa kora, da Roma kay ba magsabi amba, Yamen alabet:takay arngeyan para saba. 33 Omalis sata laki Pablo. 34 Anggat din sa konin da kalaati. Kora ba misarig sa Diyos. Laki Dinisyo kora din kabilang, ag sai sa mga kaanggat sa miting Ariyopago da- sai ka babayi da ngaran ba Damaris da- da mga Roma dapo. Da boo tiya ba misarig sa Diyos.
1 Maraw kalbas ba laki Pablo ba omalis sa Atinas, paraoy sa Korinto. 2 Sata konin asbokan laki Akila, sai ka Diw taga Ponto. Bayo te din bait iya ibat sa Italya, pal-anggat kon sawa bayi Prisila, panawen da boo mga Diw sa Roma ba namoyawan laki Kalaodyo, ag poon balayan sa goraan Roma. Laki Pablo ba pakasma sa sidawa, 3 da- magpamataw sata sa sidawa, panawen sidawa ba pandayan torda sagodang matekba, makay din iya. Iya tomolong din sa sidawa. 4 Tayma Aldaw Magpahinga iya magpapawa gidte tokawanan Diyos sa balay pagtiponan. Konin nagranggot da mga Diw anggan mga Girigo sa mag-isarig. 5 Maraw bait sidawa Silas da- Timotiyo ibat sa Masidonya, ginamit laki Pablo da boo odas sa magpangadar da- magpapawa sa mga Diw amba, Laki Hisos ba iya da Kiristo, da Tagaribri pinangako Diyos. 6 Maraw iya kora sinongarngar da- pinatawan konin yinabyab da onggang sa konin nagsool makay tanda nagpadahan sa kora amba, Batay daet sa koyo. Konin sinabi, Kadaetan:na koyo no koyo naomaning! Nawed:da ako da kamatang! Ibat mona ako batay paraoy sa mga Nawed Diw. 7 Kaya iya omalis:sa sata da- semled sa balay sai ka Nawed Diw da ngaran ba laki Tito Hosto. Iya ba masambahen sa Diyos. Kadatig balay pagtiponan da kon balay. 8 Laki Kirispo, ag magpamanawen sa balay pagtiponan da- da boo magpamataw sa konin balay ba misarig sa Panginoon. Da maoson sa mga taga Korinto magpangarngey sa laki Pablo ba misarig din, da- magpabaotismo. 9 Sai ka madlem, sinabi Panginoon sa laki Pablo sa sai ka makay akalkan, Ayaw kawo aliman! Kawo magpangadar anggan! Nakayman da nangyadi, kawo ayaw tay empet, 10 panawen ako ba sa komo. Kawo nawed batay naomaning, panawen ako ba maoson dapo mga kairayaan batay mag-isarig sa naay sa goraan tiya. 11 Iya mamataw sata sa boo sai ka dag-on da- anim ka bolan da- iya magtodo tokawanan Diyos. 12 Sa odas laki Galyon ba gobirnador sa lopa Akaya sakop sa goraan Roma ba magkasai da mga Diw abelen laki Pablo da- babaen sa hosayan. 13 Kora amba, Konin nagranggot da mga iraya para kora magsamba sa Diyos laban sa maniho mga Diw! 14 Batay:ya disin magtokawanan laki Pablo maraw sinabi laki Galyon amba, No da osapen tiya ba para sa lakol ka kadaetan, no mamanawen daet, piya disin koyo ba naay pakarngeyan. 15 Ngani da koyo sabi ba para ngani sa mga tokawanan, sa mga ngaran da- sa maniho koyo mga Diw, kaya koyo ba nawed naay batay hinosay sa mga naba. Koyo:wa da kamatang! 16 Da- kora ba konin pinalwas sa hosayan. 17 Kaya kora dinosmogan laki Sostinis, pag magpamanawen sa balay pagtiponan da- iya ba kora binogbog sa lowas hosayan. Ngani tiya ba nawed man inalomana laki Galyon. 18 Maraw kalbas tiya ba laki Pablo ba mamataw dapo nawed maoson ka aldaw sa Korinto, bayo magpaaram sa mga talkakaan sa laki Hisos. Maraw bait sa Kinkiriya ba iya magpagopit kon obok panawen iya ba maki sai ka sawetan. Kalbas iya somakay:ya sa bangka paraoy sa Siriya, pal-anggat da talsawa Akila da- Prisila. 19 Maraw bait sa Ipiso, sidawa ba inogonan laki Pablo. Iya ba semled sa balay pagtiponan mga Diw da- iya magkatowidanan sa mga sata. 20 Kora inay-ayan iya mamataw dapo sata maagot-agot te ka odas, ngani iya ba dayo. 21 No nawed ba pag iya magpaaram sa kora ba iya amba, Ako batay paoli towa, no alabet Diyos. Iya mangadang ibat sa Ipiso magsakay sa sai ka mapor. 22 Maraw iya katakdang sa Sisariya, iya tomokad sa Hirosalim. Iya amba sa mga arian, Makay kay nakay koyo towa? Kalbas iya domolong:nga sa Antiyokya. 23 Pagka iya mamataw sata nawed maagot ka odas sata ba iya mangadang:ngakay. Iya mag-alokan sa tayma goraan sa lopa Galasiya da- Pirigya, konin pinaonay sa mag-isarig da boo mga nagtod-an. 24 Bait sa Ipiso da sai ka Diw da ngaran ba Apolos. Iya ba taga Alihanriya. Kamatangen gidte iya magtodo da- maoson da konin amatangan sa mga todo sa Ribro Diyos. 25 Panawen iya tindoan para sa Dalan Panginoon, iya bibo gidte sa magpangadar. Iya magtodo mataldeng para sa laki Hisos, ngani da baotismo konin amatangan ba pag baotismo ngani laki Howan. 26 Iya wala gidte kaliman magtokawanan sa balay pagtiponan. Maraw iya arngeyan sidawa Akila da- Prisila, iya ba sidawa pinaanggat sa sidawa balay da- tindo gidte piya sa konin da mga nakayman nawed dapo konin amatangan para sa Dalan Diyos. 27 Maraw alabet laki Apolos omipay sa Akaya, iya ba tinolongan mga talkakaan sa Ipiso. Iya ba pinababaan din sorat para sa mga talkakaan sa Akaya amba, Tabangen gidte piya laki Apolos. Maraw bait sata, lakol da konin tolong sa mga mag-isarig panawen sa kapiyaanan remrem Diyos. 28 Wala apanawen sa konin ag mga Diw, sa kora magsongarngar sa ropangan kaosonan, ibat sa konin pinapawa sa Ribro Diyos kora gidte amatangan amba laki Hisos ba iya da Kiristo.
1 Pag odas laki Apolos ba sa Korinto, laki Pablo kay ba magdalan sa boo mga kabogsoran dako anggan iya rateng sa Ipiso. Konin asbokan sata da kalaati mga mag-isarig. 2 Kora konin tinanong amba, Koyo:wa dia tinabang da Ispirito Banal pag odas koyo misarig? Kora tembag amba, Nawed mayam! Nawed yamen arngeyan maki Ispirito Banal. 3 Konin tinanong, Sa nakay koyo ba binaotismohan no amba? Kora amba, Sa baotismo laki Howan. 4 Kaya sinabi laki Pablo amba, Da baotismo laki Howan ba tanda magsisi sa kadaetan. Sinabi laki Howan sa mga taga Israil kailangan kora mag-isarig sa batay rateng pag sa konin paoriyan, naba ba laki Hisos. 5 Maraw kora arngeyan tiya ba kora pabaotismo sa ngaran Panginoon Hisos. 6 Pinatimpo laki Pablo da konin alima sa kora. Rateng sa kora da Ispirito Banal da- kora ba magtokawanan sa nawed amba sadiri tokawanan da- kora magbarita pag tokawanan Diyos. 7 Kora boo ba mga labindarwa ka lalaki. 8 Sa boo tatlo ka bolan, layen magseled laki Pablo sa balay pagtiponan, iya magtodo sa boo sata da- wala kaliman konin nagpapawa sa kora da para sa batay maghadi da Diyos para kora ba konin aranggot. 9 Ngani da Roma sa kora ba dayo gidte mag-isarig, no nawed ba magtokawanan dapo laban sa Dalan Panginoon sa ropangan kaosonan. Kaya omalis laki Pablo sata anggat sa mga mag-isarig, kaya sata:akay sa paadaran laki Tirano ba iya magpapawa dapo aldaw-aldaw. 10 Konin pinanawen tiya sa boo darwa ka dag-on, kaya da boo magpamataw sa kotanan Asiya, kayno mga Diw kayno mga Girigo ba karngey pag Pirmida ka Barita para sa Panginoon. 11 Pinapanawen Diyos sa laki Pablo da mga katakataka gidte. 12 Kayno panyo kayno bado konin ginamit ba nagbaba sa mga maki maskit da- piya:akay da mga tiya da- manlowas sa kora da mga daet ka ispirito. 13 Maki nawed maoson ka Diw sata magbarindawan da- magpamoyaw din daet ka ispirito. Kora pinorbahan gamiten da ngaran Panginoon Hisos sa mga nag-apo daet ka ispirito. Kora sinabi amba, Sa ngaran laki Hisos pag nagpangadar laki Pablo, naay nagsogo sa koyo, koyo lomwas. 14 Da mamanawen naba ba pito ka lalaki, onga laki Iskiba, sai ka Diw, sai sa mga koyay magpamanawen sa balay Diyos. 15 Ngani tembag sa kora da daet ka ispirito amba, Naay akilalaan laki Hisos da- naay din amatangan da para sa laki Pablo, ngani tawa-tawa kay koyo? 16 Kalbas kora ba inigtadan pag lalaki nag-apo daet ka ispirito. Kora ba konin dinaeg pinahidapan gidte. Yi! kora mandalagan sa balay naba, mamaglandayan da- agolatan:nani. 17 Abaritaan tiya pag boo magpamataw sa Ipiso, kayno Diw kayno Girigo. Kora boo ba aliman gayed da- lalo gidte pinalakol da ngaran Panginoon Hisos. 18 Maoson sa mga mangisarig da paraoy sata da- kora gidte inaken da kora nagpanawen. 19 Tinipon mga marayawan da kora ribrito, da- kora inareng mga tiya sa ropangan kaosonan. Maraw kora binilang da halaga mga ribrito naba ba maki limampo ka ribo ka pilak dipalata. 20 Sa nangyadi naba ba Romateng sa adayo da- mandaeg da tokawanan Panginoon. 21 Kalbas pag mga nangyadi tiya, gomayak laki Pablo iya magkadangan sa Masidonya anggan sa Akaya bayo iya paraoy sa Hirosalim. Iya amba, Piya no naay dapo paraoyan da goraan lakol Roma, no batang sa Hirosalim. 22 Konin pinaonaan sa Masidonya kolaki Timotiyo da- Irasto. Sidawa konin katolong. Iya kay ba mamataw te sa Asiya. 23 Pag odas din naba, nangyadi sa Ipiso sai ka lakol ka bolyawak panawen sa Dalan Panginoon. 24 Maki sai ka pandayan pilak da ngaran ba laki Dimitiriyo, iya magpanggawa mga makay te balay kora pagsambahan sa kora nawed amba Diyos nag-awit bayi Diana. Lakol gidte da nagkaakitan mga pandayan tiya. 25 Tinipon laki Dimitiriyo da konin mga kapanday pilak da- da Roma dapo ka iraya makay din naba da kora panawen. Iya amba, Mga kaanggat, koyo amatangan sa tamo magsarak kabiyagan ba lakol gidte da tamo nagkaakitan. 26 Koyo nagkaakitan da- koyo nagkaarngeyan no nakay da nagpanawen pag Pablo tiya. Konin nagsabi amba, Nawed Diyos da mga pinanawen iraya. Maoson da maniwala da- naranggot panawen sa konin nagsabi, nawed ngani towa sa Ipiso no nawed ba anggan sa boo Asiya. 27 Batay mamokar daet da adar naba. Nagkaaliman:na kaaram batay nawala da tamo nagsarak kabiyagan, da pagsambahan tamo lakol gidte ka nawed amba Diyos bayi Diana ba batay awal-an kaparosan, nawed:da tay ginalang bayi Diana ag nagsamba boo iraya sa Asiya anggan sa boo paranawan. 28 Maraw kora arngeyan tiya ba kora abaisan:na gidte da- kora manggayagang makay tiya, Lakol gidte bayi Diana pag nawed amba Diyos mga taga Ipiso. 29 Kaya nagkabolyawak da iraya sa boo goraan. Kora rinanggot sidawa laki Gayo da- Aristarko, tanan taga Masidonya, pag pal-anggat laki Pablo sa magkadangan da- sidawa kora mal-anggatan dinosmogan sa pagripongpongan. 30 Alabet disin laki Pablo paloba sa kaosonan ngani da mga talkakaan ba amba, Ayaw! 31 Nawed maoson ka poon sa Asiya pag mga abyan laki Pablo ba magpaparaoy mga iraya sa konin para sabiyen gidte sa konin amba, Ayaw paraoy sa pagripongpongan. 32 Mabolyawak gidte da kaosonan sata. Maki maggayagang sai ka nakayman da- da Roma ba Roma kay ka nakayman, panawen nawed kamatang da kaosonan no kaytang kora magkatipon. 33 Ibat sa kaosonan iraya ba kora pinaonaan laki Alihanro, panawen iya da dinegse mga Diw sa onaanan. Kaya pinayapay laki Alihanro konin alima sa mga iraya para kora nangapra para iya magpapawa. 34 Ngani maraw kora akilalaan iya ba Diw, malsabayan kora manggayagang sa boo darwa ka kalinabonan makay tiya, Lakol gidte bayi Diana pag nawed amba Diyos mga taga Ipiso! 35 Ngani napaepet sai ka poon balayan sa goraan da kora bolyawak. Iya amba, Mga taga Ipiso, tawa ma da nawed kamatang da mga taga Ipiso da tagaalaga pag pagsambahan tamo lakol gidte ka bayi Diana, anggan da tamo nagsambahan bato pag nalabo ibat sa langit? 36 Nawed abaya pamoslian pag mga nakayman tiya. Kaya malomanay kay da koyo tokawanan! Ayaw koyo aporahan sa koyo batay pinanawen! 37 Da mga iraya koyo binaba towa ba nawed magpanakaw sa pagsambahan, nawed din magpanawen daet sa bayi Diana tamo nawed amba Diyos. 38 Kaya no laki Dimitiriyo da- da konin mga kapanday maki sabi laban sa tawa man, handa da mga anhohosay da- maki mga pamoon saba. Magsabi da tawa man sa koyo. 39 Ngani no maki dapo Roma ka nakayman koyo naghabol ba tiya ba abaya din sinsinen sa sai ka miting toltol sa maniho. 40 Aliman apadatosan tamo magpamolyawak sa aldaw tiya, panawen wala gidte kaparosan da ibatan pag bolyawak tiya. 41 Pag konin sinabi tiya ba konin pinakadang da mga iraya.
1 Maraw empet:ta da bolyawak, rinimpon laki Pablo da mga mag-isarig da- konin pinaeyat da kora remrem. Kalbas iya magpaaram sa kora da- iya paraoy sa Masidonya. 2 Konin tinangaw da mga goraan sata, da- tindoan da mga mag-isarig. Iya mangadang anggan bait sa Girisiya. 3 Sata iya mamataw tatlo ka bolan. Batay:ya disin iya somakay sa mapor paraoy sa Siriya, ngani konin abaritaan amba maki banta da mga Diw laban sa konin. Kaya konin rinemrem batay domalan sa Masidonya sa iya batay:yakay paoli. 4 Laki Sopatir, onga laki Piro taga Biriya, sidawa Aristarko da- Sigondo taga Tisalonika, laki Gayo taga Dirbi, laki Timotiyo, sidawa Tikiko da- Toropimo taga Asiya ba anggat sa laki Pablo anggan sa lopa Asiya. 5 Kora mangonaan, da- magpanya sa kidawa sa Toroas. 6 Maraw kalawey:ya da mga aldaw kasayahan tinapay wala pampahilab ba kidawa ba somakay sa bangka ibat sa goraan Pilipos. Maraw ikalima ka aldaw ba kidawa bait sa kora sa Toroas. Kidawa mamataw sata boo pito ka aldaw. 7 Maraw monaan aldaw sa pito ka aldaw yamen magkatipon para magpaysarowanan sa pamangnen, laki Pablo ba mangadar sa mga nagtod-an anggan tenga madlem, panawen iya batay:ya omalis girabas. 8 Maoson solo- sa ikatatlo ka panaleganan sa ngaway sa balay yamen pagrimponan. 9 Sai ka binata da ngaran ba Otiko ba magtongka sa rongawan. Panawen sa maagot magtokawanan laki Pablo ba iya magrongronga anggan akalekan gidte nangalping. Iya nalabo ibat sa rongawan anggan sa lopa. Maraw iya ba kora pinonit ba natay:ya iya. 10 Ngani lompot laki Pablo da- konin kinawel. Iya amba, Koyo ayaw magkasamang. Biyagan kay iya. 11 Yomakbang:ngakay laki Pablo, kalbas kora mamagpalpisangan pamangnen da- mamangan. Maraw kalbas iya magtokawanan dapo sa kora anggan magbanaag-banaag da aldaw bayo iya mangadang. 12 Da binata kay ba biyagan gidte. Iya ba kora pinaanggat:takay paoli, kora nangaangasan gidte anggan. 13 Yamen somakay sa bangka magparaoy sa Ason; sata yamen panyaan laki Pablo. Naba da konin sabi sa yamen, panawen konin pakana ba iya mangadang. 14 Maraw malban-aw yamen sa Ason, iya somakay mal-anggatan yamen paraoy sa Mitilini. 15 Ibat saba ba yamen magsakay. Maraw omaga:akay yamen rateng sa betek Kiyo. Maraw omaga:akay yamen domalan sa inelangan Samos. Kadalan dapo sai ka aldaw yamen bait sa goraan lakol Milito. 16 Rinemrem laki Pablo laweyan da Ipiso para ayaw:wa iya naabara sa Asiya panawen iya aporahan. No abaya, konin alabet iya ba sa Hirosalim sa Aldaw Pintikostis. 17 Ibat sa Milito, laki Pablo ba maki sinogo sa Ipiso amba paraoy towa da mga koyay sa rimponan mga mag-isarig sata. 18 Maraw kora bait konin sinabi sa kora amba, Koyo amatangan no omaning naay ginastos da boo mga dag-on pag layen ako sa koyo, ibat pag monaan aldaw ako rateng sa Asiya. 19 Ako mag-asikaso sa Panginoon maki ababa ka remrem da- maki din odas magpamingas. Ako mag-agwanta din maoson ka kahidapan panawen sa mga banta mga Diw. 20 Ako wala gidte tinago nakayman para sa koyo kapiyaanan sa ako magtodo da- mangadar sa koyo, kayno sa kaosonan, kayno sa koyo mga balay-balay. 21 Naay gidte pinangadar kayno sa mga Diw kayno sa mga Girigo amba, Koyo gidte magsisi da- ogonan da koyo kadaetan, koyo paloba sa Diyos, koyo misarig sa tamo Panginoon Hisos Kiristo. 22 Mona ako batay:ya sa Hirosalim panawen sa alabet Ispirito Banal. Nawed naay amatangan no nakay da batay nangyadi sa naay sata. 23 Tiya ngani da naay amatangan: sa tayma goraan naay dinaraw, pinapawa Ispirito Banal sa naay amba, Kawo batay din magdanas kahidapan da- maki tay magpiriso sa komo. 24 Ngani labi dapo sa naay biyag da naay ngani apanawen da naay katongkolan anggan nayadi da panawen tinaboy sa naay Panginoon Hisos, wala Roma no nawed ba da magpangadar Pirmida ka Barita para sa kapiyaanan remrem Diyos. 25 Koyo naay pinaraoyan pag naay nangadar para sa batay:ya maghadi da Diyos. Mona naay amatangan tamo ba nawed:da tay malban-awan:nakay. 26 Kaya sa aldaw tiya naay nagsabi, Nawed ako da kamatang no naomaning man da tawa man sa koyo. 27 Panawen naay pinapawa sa koyo da boo kaliyagan Diyos. Wala ako binisok nakayman sa koyo. 28 Kaya koyo dahanan da koyo sadiri anggan da boo koyo barkadahan mag-isarig sa Diyos, panawen kora ba inintiriga Ispirito Banal sa koyo. Koyo alagaan da rimponan Diyos, pag timbos konin sai ngani ka Onga pag iya natay sa kodos. 29 Naay amatangan no ako kaalis ba batay manled da mga iraya makay aso kotanan da- wala etek batay tinampalas da barkadahan mag-isarig sa Diyos. 30 Ibat:ta din sa koyo batay sombok da mga iraya batay magtokawanan kaboslian para napatoltol sa kora da mga mag-isarig da- sa makay tiya ba kora ba batay liningo. 31 Kaya koyo magbantay da- koyo magdahan. Koyo remremen koyo ba naay tindoan aldaw da- madlem sa boo tatlo ka dag-on-layen din maki bingas. 32 Koyo ba naay inintiriga sa Diyos anggan sa konin tokawanan pag magpapawa konin kapiyaanan remrem. Iya da tay kapaonay sa koyo da- tay kataboy pag boo rongaw konin hinanda sa boo konin binanal. 33 Ako nawed din amagan sa pilak, ginto e sa mga golanit tawa man. 34 Koyo amatangan ako din da mamanawen para ako maki akitan ag naay kailangan anggan din ag naay mga pal-anggat. 35 Sa boo naay pinanawen, naay Pinaban-Aw sa koyo no omaning kailangan koyo magpanawen gidte para tolongan da mga nawed maeyat. Kailangan tamo remremen gidte da mga tokawanan Panginoon Hisos amba, Labi dapo angasan da iya magtaboy sa magtabang. 36 Maraw konin:na sinabi naba, laki Pablo ba lomohod da- magdarangin anggat kora boo. 37 Kora boo ba mamagpanangis, kora kinawel da- inamo laki Pablo. 38 Da magparongkot gidte sa kora ba pag konin sinabi amba, Tamo ba nawed:da tay malban-awan:nakay. Maraw kalbas iya kora tinonton sa mapor layagan.
1 Kalbas yamen magpaaram sa kora, yamen somakay sa bangka toloy sa inelangan nag-awit Kos. Maraw omaga:akay yamen ba bait sa goraan Rodas. Ibat sata yamen paraoy sa lakol ka pantalan Patara. 2 Yamen akitan sata da sai ka mapor layagan magparaoy sa Pinisiya, kaya somakay:ya yamen. 3 Yamen apatpaan da inelangan Sipri sa kaliwa dako kapet. Palawey:ya yamen anggan bait sa Siriya. Yamen pomondo sa lakol ka goraan Tiro, panawen batay ginaro da mga karga sa mapor layagan. 4 Yamen sinarak da mga mag-isarig sata, da- mamataw sa kora boo sai ka linggo. Sa paremrem Ispirito Banal kora sinabi sa laki Pablo amba, Ayaw:wa tomokad sa Hirosalim. 5 Ngani maraw kalawey:ya da boo sai ka linggo ba yamen mangadang:ngani ibat sa Tiro. Yamen ba tinonton kora boo, anggat din da mga tal-inayan anggan sa lowas goraan. Maraw yamen bait sa aplaya ba yamen boo ba lomohod da- magdarangin. 6 Kalbas yamen magpaaram, yamen somakay sa mapor layagan. Kora kay ba moli. 7 Ibat sa Tiro, yamen toloy sa mapor layagan anggan rateng sa goraan Tolimayda. Yamen pakasma sa mga talkakaan sata da- boo aldaw yamen mamataw sa kora. 8 Maraw omaga:akay yamen mangadang, kalbas yamen bait sa goraan Sisariya. Yamen paraoy sa balay laki Pilipi tagapangadar Pirmida ka Barita da- sata yamen mamataw. Iya da sai sa pito ka lalaki pinili pag monaan dapo sa mga mag-isarig sa Hirosalim. 9 Iya maki apat ka onga daraga magbarita ibat sa Diyos. 10 Kalawey nawed maoson ka aldaw, ibat sa Hodiya bait sa kora sa Sisariya laki Agabo, sai ka tagabarita ibat sa Diyos. 11 Yamen konin pinaraoyan. Konin ginaro da pamegkes laki Pablo da- konin inegtan da konin sadiri paa da- alima, da- iya amba, Tiya da sabi Ispirito Banal, Makay tiya batay inegtan mga Diw sa Hirosalim da aponin pag pamegkes tiya. Iya batay kora tinaboy sa mga Nawed Diw. 12 Maraw arngeyan tiya, yamen da- da mga taga Sisariya ba mag-ayaw gidte sa laki Pablo amba, Ayaw:wa magparaoy sa Hirosalim. 13 Ngani iya tembag amba, Kaytang koyo magpanangis? Ayaw koyo paibenteen da naay remrem. Panawen no kailangan ba ako ba handa paeket kayno natay sa Hirosalim panawen sa ngaran Panginoon Hisos. 14 Maraw iya ba nawed yamen aayawan ba empet:ta yamen. Yamen amba, Piya no sa alabet Panginoon da mangyadi. 15 Kalawey nawed maoson ka aldaw, yamen gomayak da- paraoy sa Hirosalim. 16 Anggat din sa yamen da kalaati mga mag-isarig taga Sisariya. Yamen kora inanggatan sa balay laki Manason taga inelangan Sipri. Maagot:ta din iya mag-isarig. Sa kon balay yamen mamataw. 17 Maraw yamen bait sa Hirosalim, yamen ba tinabang angasan:na gidte ag mga talkakaan mag-isarig. 18 Maraw omaga:akay, yamen laki Pablo ba paraoy sa kora Tiyago. Sata din da mga koyay sa rimponan. 19 Kalbas iya magberya sa kora amba, Piya kay koyo towa, konin nanoltol sai-sai da mga nakayman pinanawen Diyos sa mga Nawed Diw sa iya mag-asikaso sata. 20 Maraw tiya ba kora arngeyan ba kora magpalakol sa Diyos da- kora sinabi sa laki Pablo, Nagpalayaw arian, komo amatangan ribo-ribo:wa da mga Diw mag-isarig sa laki Hisos, kora boo nagteped gidte da Bilin Diyos sinorat laki Moysis. 21 Kora abaritaan komo kono nagtodo sa boo mga Diw magpamataw sa mga kamalwakan mga Nawed Diw amba, Koyo:wa ogonan da mga Bilin Diyos tinaboy sa laki Moysis. Da- amba, Ayaw:wa long-oyon da koyo mga onga lalaki, ayaw:wa din tepden da kaogalian mga Diw. 22 Nakay mona da piya panawenen? Kora batay abaritaan kawo bait. 23 Da piya dia ba makay tiya da komo panawenen: maki towa apat ka lalaki maki pansawet. 24 Kora ba komo paanggaten, koyo panawenen da kalayihan maglinis toltol sa maniho mga Diw. Kawo:wa da magbayad para sa boo kora batay ginastos sa napalondong da kora obok. Sa makay tiya batay amatangan boo nawed mana katotohanan da barita para sa komo, no nawed gira ba kawo magtoltol sa Bilin tinaboy sa laki Moysis. 25 Para kay sa mga Nawed Diw mag-isarig, yamen:na sinorat sa kora da yamen pasinsin amba, Ayaw koyo mamangan nakayman ka pamangnen batang hinayin sa nawed amba Diyos, ayaw mamangan daya da- nakayman ka hayop nawed inalis da daya, ayaw magpanaban, ayaw din magpataban. 26 Maraw omaga:akay, pinaanggat laki Pablo da mga lalaki, da- kora pinanawen da kalayihan maglinis. Maraw kalbas iya semled sa lakol ka balay Diyos para sabiyen no kaomaning kaoson dapo ka aldaw batay nayadi da maglinis da- batay kaatag da hayop para sa tayma sai sa kora. 27 Maraw batay:ya kalbas da pito ka aldaw, laki Pablo ba sa lakol ka balay Diyos. Iya akitan sata mga Diw taga Asiya. Kora binolyawak da boo iraya da- dinosmogan laki Pablo. 28 Kora yomagyagang amba, Mga kapowa taga Israil, yamen koyo tolongan! Da iraya tiya ba magtodo laban sa tamo mga taga Israil, laban sa Bilin tinaboy sa laki Moysis da- laban sa lakol ka balay Diyos kayno saan iya rateng. Iya mamaanggat dapo mga Girigo sa galem lakol ka balay Diyos. Konin din dinaet da banal ka betek tiya! 29 (Amba da kora sabi, panawen kora akitan laki Toropimo taga Ipiso kaanggat laki Pablo sa goraan. Kora remrem ba iya pinaanggat laki Pablo sa galem lakol ka balay Diyos.) 30 Nabolyawak da boo iraya sa goraan, makay bongkalos manbait da mga iraya sa goraan ibat sa boo rogar. Kora dinosmogan laki Pablo da- ginodgod palwas sa lakol ka balay Diyos, kalbas sinarado agad da boo sakbawan. 31 Kora alabet ba bonoon disin laki Pablo, ngani bait da barita sa poon mga kaosonan sondalo taga goraan Roma amba magkabolyawak da boo goraan Hirosalim. 32 Kaya konin agad pinaanggat da konin mga sondalo da- mga kapitan, magdalaganan magparaoy sa kamadahan. Maraw kora akitan da poon da- da mga sondalo, empet:ta kora magbogbog sa laki Pablo. 33 Pabali da poon da- konin inabel laki Pablo, da- pinaegtan darwa ka tagikara. Maraw kalbas ba konin tinanong amba, Tawa pag iraya tiya? Nakay da kon pinanawen? 34 Tartarebag da mga iraya. Panawen sa bolyawak nawed apawaan pag poon no nakay da nangyadi, kaya konin pinababa laki Pablo sa maskil ka balay. 35 Maraw kora bait sa bayitangan, inarwit mga sondalo laki Pablo panawen pag garit da mga iraya, 36 panawen kora boo ba magtongroy sa kora da- magyagyagang amba, Iya bonoon! Iya bonoon! 37 Maraw batay:ya pinasled laki Pablo sa maskil ka balay, konin sinabi sa poon, Abaya te kay dia ako magtokawanan sa komo? Tembag da poon, Ah! Kamatang ma kawo tokawanan Girigo! 38 No amba mana, nawed kawo da taga Ihipto pag narwaan ngani ba magpangonaan sa artikolo, magpaanggat sa kabogsoran apat ka ribo ka lalaki. 39 Tembag laki Pablo amba, Ako ba sai ka Diw tobo sa goraan Tarso sa Silisiya da- ako ba taga towa sa lakol gayed ka goraan tiya. Naay nag-ay-ayan sa komo amba ako ba kom payagan katokawanan sa mga iraya. 40 Iya ba pinayagan ag poon, kaya patindeg laki Pablo sa bayitangan, pinayapay konin alima sa mga iraya para kora nangapra. Maraw kora napra:ani ba magtokawanan laki Pablo sa tokawanan mga Diw, sa Hibriyo.
1 Laki Pablo amba, Mga koyay, mga arian, koyo pakarngeyan da naay tay sinabi mona para magdamay sa naay sadiri. 2 Maraw kora arngeyan iya magtokawanan sa kora sadiri tokawanan, lalo:a kora nangapra. Anggan:na magtokawanan laki Pablo. Iya amba, 3 Ako sai ka Diw, inonga sa goraan Tarso sa Silisiya ngani tombo towa sa Hirosalim. Ako tindoan gidte piya laki Gamalyil sa mga Bilin Diyos tinoltol tamo mga pangapoan. Ako ba masipag gidte magpamanawen sa Diyos makay din koyo boo. 4 Naay pinahidapan da- pinabono da mga magtoltol sa bayo ka pag-isarig tiya. Kora ba naay pinaeket da- pinapiriso, kayno mga lalaki kayno mga babayi. 5 Da koyay lakol magpamanawen sa balay Diyos da- da boo mga koyay ba abaya magpatonay para sa mga naay nagsabi tiya. Kora dapo da tomaboy sorat sa naay para sa mga Diw sa Damasko da- ako paraoy sata para abelen da mga magtoltol sa bayo ka pag-isarig, da- babaen towa sa Hirosalim da- padosahan. 6 Magtokawanan dapo din laki Pablo, Batay:ya tanghali pag odas naba, ako bali:ya sa goraan lakol Damasko. Bigla ba Romawa lakol sa naay paribok da sai ka mapawa gidte ka rawa ibat sa langit. 7 Ako narombok sa lopa, da- naay arngeyan da sai ka magtokawanan amba, Saolo! Saolo! Kaytang ako komo nagpahidapan? 8 Ako tembag amba, Tawa kay kawo, Panginoon? Iya tembag, Ako laki Hisos taga Nasarit pag komo nagpahidapan. 9 Akitan pag naay mga kaanggat da rawa, ngani nawed kora arngeyan da magtokawanan sa naay. 10 Naay tinanong, Nakay kay da naay tay pinanawen, Panginoon? Iya amba sa naay, Kawo patindeg, kawo paraoy sa goraan lakol Damasko. Sata batay sinabi sa komo da boo kailangan komo panawenen. 11 Ako naraprap panawen sa sorap rawa naba, kaya ako ba inakay:ya ngani naay mga kaanggat anggan sa Damasko. 12 Maki sai ka lalaki sata da ngaran ba Ananiyas. Iya ba sai ka iraya aliman magpamanawen daet laban sa Diyos, iya magpanawen pag maniho mga Diw, iya ba naggalang boo mga Diw magpamataw sa Damasko. 13 Ako konin pinaraoyan, da- iya amba, Arian Saolo, kawo batay:yakay kaban-aw! Naba din ag odas naba ba ako kaban-aw:wakay, iya naay akitan. 14 Konin dapo sinabi amba, Kawo pinili Diyos pag sinamba tam pangapoan, para komo amatangan da konin kaliyagan, da- akitan da konin Banal ka Tagapamanawen da- para komo arngeyan da iya magtokawanan. 15 Panawen kawo batay konin sistigo para komo panoltolon sa boo iraya da komo akitan da- arngeyan. 16 Mona, kawo ayaw:wa mag-abara. Kawo patindeg, kawo magberya sa ngaran Panginoon, da- kawo pabaotismo. Kawo batay lininis sa komo mga kadaetan. 17 Magtokawanan dapo din laki Pablo, Ako paoli towa sa Hirosalim. Sa odas ako magdarangin sa lakol ka balay Diyos ba ako ba maki makay akalkan. 18 Naay akitan da Panginoon da- konin sinabi sa naay amba, Kawo mag-apora! Kawo agad omalis sa Hirosalim, panawen nawed batay maniwala da mga iraya towa sa komo nagsabi sa kora para sa naay. 19 Ako amba, Panginoon, kora amatangan:na gidte naay namaraoyan da mga balay pagtiponan mga Diw para papirisowen, da- pabogbogon da mga mag-isarig sa komo. 20 Maraw binono laki Tiban pag magbarita para sa komo, ako din ba sata da- ako ba kasai din sa nangyadi. Ako dapo gayed da magmataw sa mga nagsool linso mga bomono sa konin. 21 Ngani sinabi sa naay ag Panginoon, Kawo paraoy, panawen kawo naay batay pinaparaoy sa adayo, sa mga Nawed Diw. 22 Anggan sa mga tokawanan naba, magpakarngey da mga iraya sa laki Pablo. Ngani maraw naba kora arngeyan ba kora yomagyagang amba, Bonoon da iraya naba! Nawed abaya iya biyagan! 23 Anggan dapo kora ba magyagyagang da- mamagsabog abowan da- pinangharibo da kora pandimla. 24 Kaya sinogo pag poon mga kaosonan sondalo amba, Babaen laki Pablo sa maskil ka balay, da- iya bogbogon para amatangan no kaytang masyado:wa gidte magyagyagang da mga Diw laban sa konin. 25 Ngani maraw kora:a inegtan laki Pablo para bogbogon, sinabi laki Pablo sa kapitan sata amba, Nagpayag dia maniho bogbogon da sai ka sakop sa goraan Roma, kayno nawed dapo ako koyo tinanong no nakay ako? 26 Maraw arngeyan tiya ag kapitan, iya paraoy sa poon da- iya amba, Omaning kay ma tiya? Sakop mana sa goraan Roma pag iraya tiya! 27 Kaya paraoy sa laki Pablo da poon da- iya amba, Kawo dia ba sakop sa goraan Roma? Iya tembag, Hee kay. 28 Sinabi ag poon mga kaosonan sondalo amba, Lakol gidte da naay binayad sa gobirno para ngani ako sakop sa goraan Roma. Amba laki Pablo, Ngani sata:a ako aboklatan. 29 Agad paondang da mga batay disin magtoga sa konin. Aliman din da poon mga sondalo panawen konin pinaeket laki Pablo, sai mana ka sakop sa goraan Roma. 30 Alabet apiho pag poon no nakay nga da sombong mga Diw laban sa laki Pablo, kaya maraw omaga:akay konin miniting da mga koyay magpamanawen sa balay Diyos da- da boo hosayan lakol mga Diw da- kora lin-owan laki Pablo, pinalpot da- pinaropang sa kora.
1 Semrey laki Pablo sa hosayan lakol mga Diw, da- iya amba, Mga kapowa Diw, nagkabiyag ako malinis naay remrem sa ropangan Diyos anggan sa aldaw tiya. 2 Maraw arngeyan naba laki Ananiyas, ag koyay lakol magpamanawen sa balay Diyos, ba konin sinogo sa mga magpatindeg bali te sa konin amba, Sampalen sa bibi laki Pablo. 3 Sinabi laki Pablo, Kawo batay sinampok Diyos, kawo anlalampaw! Kawo magtongka towa para ako hosayen toltol sa bilin ngani ako komo nagpasampal, naba ba laban sa bilin. 4 Sinabi pag mga magpatindeg sata amba, Komo nag-alangan da koyay lakol magpamanawen sa balay Diyos! 5 Tembag laki Pablo amba, Mga arian, nawed naay amatangan iya mana da koyay lakol magpamanawen sa balay Diyos. Panawen nagkasorat ngani-amba, Kawo ayaw magtokawanan daet laban sa magpoon sa komo lasyon. 6 Amatangan laki Pablo saba maki mga Sadosiyo da- mga Parisiyo, kaya iya manokawanan maeyat amba, Mga arian, ako ba Parisiyo, naay mga koyay ba Parisiyo. Para sa naay sarig batay:yakay nabiyag da mga nangatay, kaya ako nagtanong gidte mona. 7 Maraw kalbas sinabi tiya laki Pablo, maltomangan da mga Parisiyo da- da mga Sadosiyo da- naeray da kaosonan iraya. 8 Panawen da sabi mga Sadosiyo ba nawed batay:yakay nabiyag da mga nangatay, kora din sabi wala anghil kayno ispirito, ngani da mga Parisiyo kay ba magpaniwala batay:yakay nabiyag da mga nangatay, maki din anghil, maki din ispirito. 9 Lomakas da yagyagangan mga Sadosiyo da- mga Parisiyo, da- kora somongarngar gidte amba, Yamen ba wala akitan kadaetan sa iraya tiya. Kaomaning no maki sai ka ispirito e sai ka anghil magtokawanan sa konin? 10 Maraw maibeng:ngani da kora paltomangan, aliman da poon kaaram kora pinogotanan laki Pablo, kaya konin pinalpot da mga sondalo, pinagaro laki Pablo da- pinasled sa maskil ka balay. 11 Maraw madlem, paban-aw da Panginoon sa laki Pablo da- iya amba, Paeyaten da komo remrem! Makay ag kawo somistigo para sa naay towa sa goraan Hirosalim ba amba kay din da komo batay pinanawen sa goraan Roma. 12 Maraw omaga:akay, magmiting da mga Diw, kora mangako amba nawed batay mamangan, nawed tay minem anggan nawed kora nabono laki Pablo. 13 Labi apatnapo ka lalaki da mangako makay naba. 14 Kora paraoy sa mga koyay magpamanawen sa balay Diyos da- sa mga koyay sa goraan, da- magsabi amba, Yamen ba mangako gidte nawed batay tomikim pamangnen anggan nawed yamen nabono laki Pablo. 15 Kaya mona, koyo da- da mga anhohosay sa hosayan lakol ba koyo sabiyen sa poon mga sondalo amba, Palpoton:nakay towa laki Pablo, amba kono batay koyo hinosay piya da konin osapen. Yamen batay handa iya bonoon bayo iya rateng towa. 16 Ngani arngeyan pamangkin lalaki laki Pablo, ag onga kon arian babayi, da para sa nagsakonan mag-abang kaya iya paraoy da- semled sa maskil ka balay da- tiya ba konin sinabi sa laki Pablo. 17 Pinaparaoy laki Pablo sa konin da sai sa mga kapitan. Iya amba, Komo kay te anggatan da binatilyo tiya sa poon mga sondalo panawen iya maki ngani- kono batay sinabi. 18 Kaya iya inanggatan pag kapitan sa poon mga sondalo. Amba da kapitan, Ako pinaparaoy sa komo laki Pablo pag piriso. Konin kay pinaanggatan sa komo da binatilyo tiya, panawen maki kono tay sinabi sa komo. 19 Da binatilyo ba ginenan sa alima pag poon, tomabi te sa kaosonan. Iya amba, Nakay ma da kom batay sinabi sa naay? 20 Iya tembag amba, Pinagkasaiyan:nani mga Diw amba ay-ayan sa komo palpoton girabas naay maen Pablo para paropangen sa hosayan lakol mga Diw. Amba kono batay kora hinosay piya dapo gidte para sa konin, 21 ngani ayaw kay kawo maniwala panawen iya batay inabangan labi dapo apatnapo ka lalaki. Da mga iraya tiya da maki pangako amba nawed batay kora mamangan, nawed batay minem anggan nawed kora nabono laki Pablo. Handa:a gidte kora mona, komo:wa ngani pakana da kora nagpanyaan. 22 Da poon ba amba, Ayaw komo pagsabiyen sa tawa man tiya ag komo pinaaram sa naay. Da- iya ba konin:nakay pinaoli. 23 Da poon mga sondalo ba pomaparaoy sa konin darwa sa mga kapitan, iya amba sa sidawa, Kandawa handaen da darwa ka daan ka sondalo, anggat din da pitompo ka angangabayo sondalo da- darwa ka daan ka sondalo ananandak para paraoy sa Sisariya isag madlem kagisengan onga. 24 Koyo maghanda din mga kabayo batay sakayan laki Pablo da- iya koyo tontonon sa gobirnador Pilis. Iya koyo dahanan piya! 25 Da- iya somorat sa gobirnador Pilis amba, 26 Sa Kamahalan gobirnador Pilis, ibat sa laki Kalaodyo Lisyas, magpapiya kay ako sa komo! 27 Da lalaki tiya ba inabel mga Diw, iya batay:ya disin kora binono. Naay amatangan iya ba sai ka sakop sa goraan Roma. Kaya ako maanggat mga sondalo para iya ba ribriyen. 28 Sa naay alabet amatangan no nakay da kora sombong laban sa konin, iya naay pinatonton sa hosayan lakol mga Diw. 29 Naay amatangan da kora padatos sa konin ba para sa mga kahidapan sa kora maniho, ngani nawed sibay ka dahilan naba para iya ba pabonoon e pirisowen. 30 Maraw naay amatangan iya nagbantaan bonoon mga Diw, iya naay pinatonton agad sa komo. Naay din sinabi sa mga magsombong laban sa konin amba sa komo:wa kora magsombong laban sa konin. 31 Tinoltol pag mga sondalo da sinogo sa kora. Maraw madlem kora ginaro laki Pablo, iya kora tinonton anggan sa goraan Antipatris. 32 Maraw omaga:akay, paoli:akay sa maskil ka balay da mga sondalo, ngani toloy da mga angangabayo sondalo para dahanan laki Pablo. 33 Maraw bait sa Sisariya, kora tinonton laki Pablo sa gobirnador Pilis da- kora tinaboy da sorat. 34 Maraw binasa:ani da sorat, laki Pablo ba tinanong ag gobirnador amba, Taga saan kawo? Iya amba, Taga Silisiya. Maraw amatangan laki Pablo ba taga Silisiya ba 35 iya amba, Naay batay pinakiaraman da kom osapen no bait da mga magsombong laban sa komo. Kalbas konin pinatanodan laki Pablo sa balay lakol pinagawa tangona hadi Hirodis.
1 Kalawey da lima ka aldaw, bait sa Sisariya laki Ananiyas ag koyay lakol magpamanawen sa balay Diyos, kaanggat din da Roma ka poon balayan sa goraan da- sai ka ambabalasa, da ngaran ba laki Tirtolo. Kora binaba sa gobirnador Pilis da kora sombong laban sa laki Pablo. 2 Maraw sa ropangan:na kora laki Pablo, inompisahan:nani laki Tirtolo da mga sombong. Iya amba, Kamahalan gobirnador Pilis, yamen gidte otang remrem sa komo kamatangen magpangonaan da lakol gidte ka kalinawan ag maagot:ta yamen nagtabang, yamen din otang remrem da mga bayo ka ogali para sa kapiyaanan boo kaosonan iraya towa. 3 Tiya ba yamen gidte mag-amele, yamen gidte nagpapiya sa komo kayno saan kayno kaagot man. 4 Ngani para kawo kay nawed naw abara, no abaya kay te yamen pakarngeyan sa odas tiya. 5 Panawen yamen amasdanan da iraya tiya ba magkotingting; konin nagpabolyawak da mga Diw, kayno saan iya bait; tagaonaan din iya sa mga magtoltol sa adar Nasarino 6 Konin dapo binanta daeten da lakol ka balay Diyos, kaya iya yamen inabel. Iya yamen disin batay hinosay toltol sa yamen maniho, 7 ngani bait laki Lisyas pag poon mga kaosonan sondalo da- iya konin inagaw sa yamen. 8 Konin sinabi sa yamen, sa komo:wa sombongon da iraya tiya. No iya komo batay tinoga, komo batay amatangan da boo yamen sombong laban sa konin. 9 Kaabat da mga Diw sa sombong laki Tirtolo, kora pomayag boo konin sabi ba totoo. 10 Pinayapayan gobirnador Pilis laki Pablo para magtokawanan; iya amba, Naay amatangan maagot:ta kawo ba anhohosay sa boo kaosonan lasyon tiya, kaya angasan:na gidte ako magdamay naay sadiri sa komo ropangan. 11 Wala dapo te labindarwa ka aldaw ibat ako bait sa Hirosalim para magsamba-naba komo batay apiho no kawo magtoga sa naay. 12 Kayno kasai ako nawed kora akitan magtomang sa tawa man sa galem lakol ka balay Diyos, e magpabolyawak sa balay pagtiponan mga Diw, kayno sa saan man dako sa goraan. 13 Wala kora apaban-aw sibay ka dahilan para sa kora padatos laban sa naay. 14 Naay kay nag-aken da ako magsamba sa Diyos sinamba yamen mga pangapoan toltol sa bayo ka pag-isarig, pag sa kora remrem ba nawed raoy ka adar. Ako magpaniwala din sa boo nagkasorat sa ribro Bilin Diyos tinaboy sa laki Moysis da- sa mga ribro sinorat mga magbarita ibat sa Diyos. 15 Makay din kora, ako din mag-isarig batay:yakay biniyag Diyos da boo iraya kayno piya kayno daet. 16 Kaya naay layen nagsikap para malinis da naay remrem sa ropangan Diyos da- mga iraya. 17 Maoson-oson te din ka dag-on wala ako sa Hirosalim. Kalbas ako paoli:akay para magtonton tolong sa kaosonan mga Diw makay din ako, da- magtaboy hayop sa Diyos. 18 Amba nga da naay nagpanawen maraw ako kora asbokan sa lakol ka balay Diyos, kalbas naay pinanawen da kalayihan maglinis toltol sa maniho mga Diw. Nawed te maoson da iraya sata, wala kay bolyawak. Da iraya sata ba nawed maoson Diw ibat sa Asiya, 19 kora disin da paraoy towa para magsombong, no kora maki batay sinombong laban sa naay. 20 E no nawed kay ba magsabi da mga iraya towa no nakay da kadaetan kora akitan sa naay pag ako paropang sa hosayan lakol mga Diw. 21 Kaaram, batay kora sinabi nawed raoy da naay pinanawen maraw naay sinabi sa kora ropangan amba, Para sa naay sarig amba batay:yakay nabiyag da mga nangatay, kaya ako nagtanong gidte sa koyo ropangan mona. 22 Panawen amatangan gidte pag gobirnador Pilis da para sa bayo ka pag-isarig tiya, kaya konin dapo pinaepet da magtanong gidte. Kalbas iya amba, Naay batay sininsin da komo osapen no bait laki Lisyas. 23 Konin sinogo sa kapitan amba pabantayan laki Pablo, ngani paayamenen kay iya, bayaan iya darawen para iya ba tolongan konin mga abyan. 24 Kalawey da nawed maoson ka aldaw, bait da gobirnador Pilis, kaanggat konin sawa bayi Dorsila, sai ka Diw. Konin pinaparaoy sa konin laki Pablo, konin pinakarngeyan para sa pag-isarig sa laki Kiristo Hisos. 25 Ngani maraw toloy:ya magtokawanan laki Pablo para sa kataldengan, sa magsogpo sa sadiri da- sa batay maghosay doma, mangirabot laki Pilis; iya amba, Abaya:a kawo mangadang. Kawo naay:yakay batay pinaparaoy towa no ako maki odas. 26 Layen te konin pinaparaoy laki Pablo da- iya magtokawanan sa konin panawen konin nagpanyaan iya pakanen kwarta laki Pablo. 27 Kalawey darwa ka dag-on, hinalinghan laki Porsyo Pisto laki Pilis. Sa alabet laki Pilis magpaangas sa mga Diw, konin pinabayaan sa piriso laki Pablo.
1 Bait laki Pisto sa porobinsiya konin batay inasikaso. Kalawey:ya tatlo ka aldaw, iya paraoy sa Hirosalim ibat sa Sisariya. 2 Da mga koyay magpamanawen sa balay Diyos da- da mga poon mga Diw ba magsombong sa konin laban sa laki Pablo. 3 Kora inay-ayan sa gobirnador makay payag sa kora amba pababaen laki Pablo sa Hirosalim. Kora maki pakana iya abangan da- bonoon. 4 Tembag laki Pisto amba, Laki Pablo ba nagpiriso sa Sisariya; ako agad batay paoli sata. 5 Anggat:ta sa naay da koyo mga poon, sombongon da iraya tiya no iya maki kadaetan. 6 Mamataw dapo laki Pisto sa Hirosalim walo ka aldaw anggan sampo, kalbas paoli sa Sisariya. Maraw omaga:akay iya tomongka sa konin tongkaan para maghosay, da- konin sinogo mga sondalo amba, Paanggaten towa laki Pablo. 7 Maraw bait:ta laki Pablo ba iya pinaribokan mga Diw ibat sa Hirosalim. Kora magsombong maoson da- mabyat ka padatos laban sa konin, ngani nawed din abaya kora apatonayan da kora sabi. 8 Sinabi laki Pablo makay magdamay sa sadiri amba, Wala ako pinanawen laban sa kamanihohan mga Diw, kayno laban sa lakol ka balay Diyos e sa impirador. 9 Alabet laki Pisto magpaangas sa mga Diw, kaya konin tinanong laki Pablo amba, Kawo alabet paraoy sa Hirosalim para sata kawo tanongon gidte sa naay ropangan? 10 Tembag laki Pablo amba, Towa:a mayam ako sa ropangan hosayan impirador, kaya towa:a ako piya tanongon. Ako wala kay napanawen kadaetan sa mga Diw, naba ba komo gidte amatangan. 11 No ako kay ba tomomang sa maniho e no kapanawen nakayman abaya padosahan sa katayan ba ako wala diklamo. Ngani no nawed totoo da kora mga padatos laban sa naay, nawed abaya ako taboyon sa kora. Ako batay maghabol sa impirador. 12 Magtanong laki Pisto sa konin mga katolong, da- iya amba sa laki Pablo, Panawen komo sinabi amba kawo maghabol sa impirador ba sa impirador kawo batay pinaanggat. 13 Kalawey da nawed maoson ka aldaw, bait sa Sisariya da hadi Agripa kaanggat konin arian bayi Birnisi para magtanong sa laki Pisto. 14 Maraw maagot-agot:ta te sidawa sata, binokatkat laki Pisto sa hadi da para sa laki Pablo amba, Laki Pilis ba maki inogonan towa sai ka piriso. 15 Pag ako ba sa Hirosalim, iya ba sinombong sa naay mga koyay magpamanawen sa balay Diyos da- mga koyay mga Diw, kora inay-ayan iya ba padosahan. 16 Kora ba naay timbag amba, Nawed ogali mga taga Roma da padosa sa tawa man nagsombong no nawed dapo karopang da mga magsombong, para maki panggarwan da iraya nagsombong magdamay sa konin sadiri. 17 Kaya maraw kora bait towa, nawed:dani ako mag-abara. Maraw omaga:akay naay pinaparaoy sa hosayan da iraya naba. 18 Maraw mayropangan:na kora, iya kay nawed kora sinombong sa nakayman mabyat ka kadaetan, sa makay naay nagremrem kora batay pinadatos. 19 Ngani da kora nagpaltomangan ba para sa kora mag-isarig, para sa sai ka iraya nag-awit Hisos ag natay:yani, ngani laki Pablo amba biyagan gidte iya. 20 Nawed naay amatangan no nakay da naay batay pinanawen sa makay tiya, kaya iya naay tinanong no konin alabet sa Hirosalim iya tanongon gidte. 21 Ngani magdiklamo laki Pablo. Konin inay-ayan amba pabayaan:na sa impirador da magsinsin sa konin osapen. Kaya iya naay pinabantayan para patontonon sa impirador. 22 Sinabi hadi Agripa sa laki Pisto amba, Alabet disin naay apakarngeyan da iraya naba. Tembag laki Pisto, Iya komo batay apakarngeyan girabas. 23 Maraw omaga:akay, sidawa Agripa da- Birnisi ba bait ka-pandayawen gidte kaosonan. Kora semled sa hosayan kaanggat da atatas ka poon mga sondalo da- da mga iraya baritaen sa goraan. Sa sogo laki Pisto ba pinasled laki Pablo sata. 24 Sinabi laki Pisto amba, Hadi Agripa, da- boo towa yamen kaanggat, towa da lalaki sinombong sa naay ag mga Diw, kayno towa kayno sa Hirosalim. Kora nagyagyagangan amba nawed:da abaya iya biyagan. 25 Ngani sa naay toga sa konin wala ako akitan sibay ka dahilan para iya padosahan katayan. Panawen iya alabet maghabol sa impirador, naay sininsin patontonon iya sata. 26 Ngani ako wala piho ka sombong para magsorat sa Kamahalan para sa konin. Kaya iya naay pinaropang sa koyo, lalo gidte sa komo, hadi Agripa, para maki naay asorat no iya tamo:wa tinoga. 27 Naay nagremrem nawed dia abaya patontonon sa impirador da sai ka piriso no nawed dapo bokatkat da mga sombong laban sa konin.
1 Sinabi koyay Agripa sa laki Pablo amba, Abaya kawo magtokawanan. Nakay kay da komo batay asabi para sa komo sadiri? Laki Pablo ba pomayapay da- manokawanan para magdamay para sa sadiri amba, 2 Hadi Agripa, naay kay nagremrem sai ka lakol ka rongaw sa komo ropangan ba ako magdamay sa naay sadiri laban sa mga sombong mga Diw, 3 panawen komo gidte amatangan da kaogalian da- mga paltomangan mga Diw. Kaya naay gidte nag-ay-ayan ako kay komo pakarngeyan piya. 4 Amatangan boo Diw no omaning ako mamiyag ibat dapo ako onga, sa naay sadiri lasyon da- sa Hirosalim. 5 Maagot:ta kora amatangan, kora:a da batay kasabi no kora batay inaken, ako ba mamiyag sai gidte ka kaanggat sa mga Parisiyo, pag mahigpit sa boo adar sa tamo pag-isarig. 6 Mona ako kora nagtanong gidte panawen sa naay pag-asa sa pangako Diyos sa tamo mga pangapoan. 7 Pag pangako din naba da nag-asahan pag labindarwa ka andana magsamba gidte sa Diyos aldaw da- madlem. Panawen sa pag-asa din tiya, hadi Agripa, ako ba nagsombong mga Diw! 8 Kaytang kora tay rinemrem nawed abaya biyagan:nakay Diyos da mga nangatay? 9 Naay din remrem ag monaan dapo, kailangan naay panawenen da boo naay batay apanawen laban sa mga mag-isarig sa laki Hisos taga Nasarit. 10 Amba ngani- da naay pinanawen sa Hirosalim. Maoson da mga makaKiristo da naay pinapiriso, sa kapangyadihan mga koyay magpamanawen sa balay Diyos. Maraw kora binono ba kasai din ako saba. 11 Naay namaraoyan da boo balay pagtiponan mga Diw, kayno tawa man sa kora naay aratnganan sata, naay pinadosahan para kora ba lopodon magtokawanan laban sa laki Hisos. Sa naay gidte kabaisan kora ba naay pinahidapan kayno sa mga goraan sa Roma ka kotanan. 12 Naba din da naay pakay ag ako paraoy sa Damasko, maki kapangyadihan da- payag ibat sa mga koyay magpamanawen sa balay Diyos. 13 Maraw kagtengaan aldaw pag odas yamen magkadangan, naay akitan, hadi Agripa, da sai ka mapawa gidte ka rawa ibat sa langit, makasorap dapo sa aldaw. Kasorap da rawa sa paribok yamen magpal-anggatan. 14 Yamen boo ba naparombok sa lopa da- naay arngeyan da sai ka magtokawanan sa naay sa tokawanan Hibriyo amba, Saolo, Saolo, kaytang ako komo nagpahidapan? Kawo:wa din da batay askitan sa komo nagpanawen naba, makay magsikad sa ansereyan. 15 Naay tinanong, Tawa kay kawo, Panginoon? Iya tembag, Ako laki Hisos pag komo nagpahidapan. 16 Kawo patindeg! Ako magpaban-aw sa komo para kawo ba naay sogoon da- magsistigo para sa komo akitan mona da- sa mga naay dapo batay Pinaban-Aw sa komo. 17 Kawo ba naay batay rinibri sa mga Diw da- sa mga Nawed Diw, ag sa kora kawo naay sinogo. 18 Kawo naay batay sinogo sa mga iraya naba para kapamolalat da kora mata, para paolien sa kapawaan ibat sa kadeleman, para paolien sa Diyos ibat sa kapangyadihan laki Satanas. Sa pag-isarig ngani sa naay kora batay pinatawad sa kora mga kadaetan da- batay inamele da parongaw Diyos kaanggat sa mga hinidang! 19 Panawen saba, hadi Agripa, ako nawed magsoway sa Pinaban-Aw Panginoon sa naay ibat sa langit. 20 Ako mangadar, da monaan ba sa Damasko kalbas sa Hirosalim anggan sa boo porobinsiya Hodiya, amba din sa mga Nawed Diw. Naay pinangadar amba kailangan gidte kora magsisi sa kadaetan da- paoli sa Diyos. Kailangan kora paban-awen sa kora mga panawen amba kora ba magsisi gidte da- mag-ogon kora mga kadaetan. 21 Panawen sa mga nangyadi tiya, ako ba inabel mga Diw pag ako ba sa lakol ka balay Diyos da- ako binantaan bonoon. 22 Ngani layen ako tinolongan Diyos anggan mona. Ako magpatindeg towa da- ako magsistigo kayno sa mga nawed naw kamatang kayno sa mga kamatangen. Ako wala nagsabi no nawed ba da mga sinabi mga magbarita ibat sa Diyos da- laki Moysis ag batay mangyadi 23 amba kailangan magsalaket kahidapan da Kiristo, iya da monaan batay:yakay biniyag para apawaan da mga Diw da- da mga Nawed Diw. 24 Sa odas magtokawanan dapo laki Pablo sa magdamay sa sadiri ba manokawanan maeyat laki Pisto amba, Pablo! Kawo dia nagkatolingag! Labis:sa komo kadonongan kaya kawo nagkatolingag! 25 Ngani tembag laki Pablo amba, Ako nawed kay nagkatolingag, Kamahalan Pisto! Da boo naay nagsabi ba totoo da- mataldeng. 26 Amatangan:na mayam hadi Agripa da boo tiya. Kaya ako nawed akayaan magtokawanan sa komo. Piho gidte wala bisok sa konin, panawen nawed sa lipid da nangyadi tiya. 27 Hadi Agripa, komo dia nagpaniwalaan da mga magbarita ibat sa Diyos? Naay amatangan komo nagpaniwalaan! 28 Sinabi laki Agripa sa laki Pablo, Sa nawed maagot ka odas komo dia alabet ako makaKiristo:wani? 29 Tembag laki Pablo, Kayno sa nawed maagot ka odas e kayno sa maagot, naay darangin sa Diyos ba nawed ngani kawo, no nawed ba da boo karngey sa naay mona ba batay makaKiristo makay din ako, poyida ngani sa tagikara tiya. 30 Patindeg da hadi, da gobirnador Pisto, bayi Birnisi da- da boo kora kaanggat. 31 Maraw kora lomwas ba makay tiya da kora tokawanan sa sai-sai amba, Da iraya tiya ba wala pinanawen nakayman abaya padosahan katayan e pirisowen. 32 Sinabi koyay Agripa sa koyay Pisto amba, No nawed disin inay-ayan pag iraya naba maghabol sa impirador, abaya:a disin iya ba bal-anan.
1 Maraw yamen gayak:kani batay somakay sa mapor layagan paraoy sa Italya, laki Pablo da- da Roma ka piriso ba pinaapo sa laki Holyo pag sai ka kapitan mga kaosonan sondalo mga sakop pag impirador sa Roma. 2 Yamen somakay sa sai ka mapor layagan batang sa Adramityo, magparaoy sa mga pondohan Asiya, kalbas mangadang:nga da mapor layagan. Yamen kaanggat laki Aristarko, sai ka taga Tisalonika sa Masidonya. 3 Maraw omaga:akay, yamen pomondo sa goraan Sidon. Laki Holyo magmaawas da remrem sa laki Pablo da- iya pinayagan darawen konin mga abyan para iya kora apakanan konin kailangan. 4 Kalbas ba yamen somakay:yakay sa mapor layagan. Panawen sa pasarongat sa yamen da koaya ba yamen ba mamalaba sa kapet dako sirangan Sipri panawen sarem sa bagyo. 5 Yamen omipay sa betek lopa Silisiya da- Pampilya, da- yamen bait sa goraan Mira sa lopa Lisya. 6 Sata ataonan kapitan da sai ka mapor layagan ibat sa Alihanriya paparaoy sa Italya da- yamen ba somakay sata. 7 Mag-ariedan da kadang mapor da- omagot maoson ka aldaw, yamen ba ahidapan bayo karateng sa betek Nido. Ibat towa nawed yamen katoloy magkadangan sa kamalwakan panawen pasarongat sa yamen da koaya. Kaya yamen domalan sa maki rongos nag-awit Salmon, yamen bomalaba sa sirangan Krita panawen sarem sa bagyo, 8 da- mag-andoka mamalaba sa tebteban anggan yamen karateng sa sai ka pondohan nag-awit Piya ka Pailiyan, bali te sa goraan Lasiya. 9 Maoson ka odas da kalawey kora sata kadalan:na din da aldaw mga Diw nawed mamangan para ngani- sa Diyos kaya odas:sani tagbagyo, dilikado:wani da mangadang sa dagat da mapor layagan. Kaya sinabi gidte laki Pablo sa kora amba, 10 Mga koyay, naay akitan da tamo magkadangan tiya batay mamokar lakol ka porohisiyo nawed ngani sa mga katorosan da- sa mapor layagan, no nawed ba anggan sa tamo mga biyag? 11 Ngani maniwala da kapitan Holyo sa sabi aponin mapor layagan da- sa sabi kapitan mapor, nawed gidte sa sabi laki Pablo. 12 Panawen nawed piya ka pailiyan da pondohan sa odas tagdimla, sinabi gidte kaosonan amba mangadang dapo. Kora sarig ba kora batay rateng sa Pinisi. Tiya ba sai ka pondohan sa Krita pag paloba sa kanan dako kalnedan da- sa kaliwa dako kalnedan, kaya piya ka pailiyan sa odas tagdimla. 13 Da koaya ba magramoymoy andatay te ibat sa kabaraybayen kanan kalnedan, kaya kora rinemrem abaya:ani kora mangadang. Kora sinalyat da pamondo da- kora mamalaba sa Krita. 14 Ngani nawed te maagot ba rempa:akay da maeyat ka koaya ibat sa kaliwa poro Krita, 15 kalbas sinampok da mapor. Da mapor layagan ba nawed kasarongat sa koaya, kaya yamen ba anggat nganyani. 16 Maraw yamen paslem sa sai ka ibente ka inelangan nag-awit Kalaoda ba yamen sinalyat da boti kayno man yamen ahidapan bayo napanawen naba. 17 Maraw nasalyat naba, kora binegkesan lakol ka lobid da mapor layagan. Sa kora aliman tomoy-od sa boanginan sa Sirti ba kora rinogos da layag da- magpalotang nganyani. 18 Toloy:ya maglipetek da bagyo, kaya maraw omaga:akay kora inompisahan benglayen sa dagat da mga katoros. 19 Maraw sai:yakay ka aldaw, kora:akay din namenglay da mga nakayman sa mapor layagan. 20 Maagot yamen nawed akitan da aldaw da- mga magirem, nawed mag-epet da maeyat gidte ka bagyo, kaya yamen awal-an sarig batay dapo karibri. 21 Panawen maagot:ta nawed mamangan da mga sa mapor, patindeg laki Pablo, da- manokawanan amba, Mga kaanggat, no koyo makarngey ngani disin sa naay da- no nawed tamo omalis sa Krita, nawed disin tamo rinateng da makay tiya. 22 Tiya mona da naay nagsabi gidte sa koyo, Koyo kay paeyaten da koyo remrem, wala tay naomaning sa kayno sai sa koyo! Da mapor layagan ngani da batay naranggas. 23 Aray madlem paban-aw sa naay da sai ka anghil Diyos, pag Diyos naay nagsamba da- naay nagpanawenan. 24 Iya amba, Pablo, ayaw aliman! Kawo batay gidte paloba sa impirador. Panawen sa komo ba batay dinahanan Diyos da boo komo pal-anggat sa mapor layagan. 25 Kaya, mga kaanggat, paeyaten da koyo remrem! Ako mag-isarig sa Diyos amba batay mangyadi da boo toltol sa konin sinabi sa naay. 26 Ngani tamo batay binarnik sa sai ka inelangan. 27 Labin-apat:ta ka madlem yamen ba nagbarnik bagyo sa dagat nag-awit Adriatiko. Maraw batay:ya tenga madlem, amasdanan mga magpamanawen sa mapor layagan bali:yani yamen sa boanginan. 28 Kora linabo da bato maki lobid sa dagat da- kora akitan dalwampo ka depa da kalalemen. Kalbas mangadang dapo te ba linabo:wakay da bato da- kora akitan maki labinlima:a ngani ka depa. 29 Sa aliman yamen nabongdol sa batowan, kora linabo da apat ka pamondo sa paoriyan mapor layagan da- kora alabet omaga:a disin. 30 Tinikis mga magpamanawen sa mapor kora domalagan sa mapor, kaya kora linabo sa sapa da boti nagbegkes sa ngaway mapor dahilan kono batay maglabo pamondo sa onaan. 31 Ngani sinabi laki Pablo sa kapitan da- sa mga sondalo, No nawed baywi sa mapor layagan da mga iraya tiya ba nawed batay koyo karibri. 32 Kaya ginto mga sondalo da lobid boti da- pinabayaan:na tiya nalabo. 33 Maraw nagkaboka:a omaga, kora boo ba yinakag gidte laki Pablo mamangan. Iya amba, Labin-apat:ta ka aldaw mona nawed koyo namangan nakayman da- boghaw da remrem sa magpanya. 34 Kaya koyo mamangan:nani! Kailangan gidte koyo tiya para koyo karibri. Nawed batay naomaning da tawa man sa koyo! 35 Kalbas konin sinabi tiya ba iya gomaro tinapay da- sa ropangan boo iya magpasalamat sa Diyos da- namisang-misang da tinapay, da- mag-ompisa mamangan. 36 Emeyat da remrem kora boo, kora din mamangan. 37 (Yamen boo ba darwa ka daan pitompo da- anim.) 38 Maraw kora absoyan:nani, kora namenglay sa dagat da katoros tirigo para may-an da mapor layagan. 39 Maraw batay:yani omaga ba kora maki aparipayan poro, ngani nawed kora akilalaan no nakay pag poro naba. Kora amasdanan sai ka soha maki boanginan da- kora binalak papondohon sata da mapor, no abaya. 40 Kaya kora ginto da eket mga pamondo pag kora:a inogonan sa dagat da- kora inokad din da eket mga timon. Kora sinalbon da layag sa onaan para da mapor ba bongkoson koaya paraoy sa boanginan, 41 ngani napatangba da mapor layagan sa poro ababaw. Kalbas tomoy-od da onaanan mapor kaya nawed:da kaalis. Da paoriyan kay ba naranggas panawen sa kasasampok maeyat gidte ka alon. 42 Alabet disin bonoon mga sondalo da mga piriso para wala:a karangoy da- kadalagan. 43 Ngani kora ba inayawan kapitan mga sondalo panawen konin alabet ribriyen laki Pablo. Konin sinogo da mga kamatang Romangoy manrisbog:ga sa sapa anggan katakdang sa boanginan. 44 Da mga Roma kay konin sinogo gomaro mga tabla e kaboongan mapor layagan, manimpowan:na nganyani. Sa makay tiya ba yamen boo ba katakdang sa boanginan.
1 Maraw yamen karibri:yani da- tomakdang ba da mga taga sata ba amba da poro tiya ba nag-awit Malta. 2 Piya gayed sa yamen ag mga taga sata. Panawen tomogpo da odas da- madimla ba kora ba magsagrang da- yamen ba kora inasikaso piya. 3 Laki Pablo ba manlimot kayo anggan sai ka sakyem. Maraw konin tinimbon sa sagrang ba maki lomwas sai ka orpong panawen nadadang sa apoy. Tiya ba misabed sa konin alima da- tomangenget. 4 Maraw akitan pag mga taga sata da otan ba magrambitinan sa alima laki Pablo ba kora amba sa sai-sai, Piho magpamono iraya da lalaki tiya. Iya ba karibri nga sa dagat, ngani nawed kay pinayagan Diyos iya ba biyag dapo. 5 Ngani konin yinabyab ngani sa apoy da otan da- iya nawed din naomaning. 6 Kora nagpanyaan mamaya laki Pablo, no nawed ba iya natwang nganyani da- natay. Maraw maagot:ta kora magpanya da- wala kay mayam nangyadi sa konin ba bayo:wakay da kora remrem. Kora amba, Sai ka diyos naba. 7 Da poon kay sa poro naba ba sai ka iraya da ngaran ba Pobliyo bali te sa yamen tinakdangan da konin lopa. Angasan:na gidte yamen konin pinaserer sa konin balay sa boo tatlo ka aldaw. 8 Pag odas din naba ba magpadalayan da apang laki Pobliyo panawen naglagnat da- nagribosbos, kaya tinangaw laki Pablo. Maraw kadarangin:nani, konin pinatimpo konin alima sa maki maskit da- tiya ba pomiya. 9 Panawen sa nangyadi tiya, manbait da Roma taga sata maki maskit da- kora ba pinapiya din. 10 Kaya yamen ba kora pinalakol, yamen kora pinakan maoson ka nakayman. Maraw yamen batay:yakay mangadang yamen kora pinakan boo nakayman yamen kailangan sa magkadangan. 11 Tatlo ka bolan da kalawey bayo yamen mangadang ibat sata, sakay sa sai ka mapor layagan pag magpalawey din tagdimla sa poro din naba. Tiya pag mapor nag-awit Siing ba batang sa goraan Alihanriya. 12 Yamen pomondo sa Sirakosa. Tatlo ka aldaw yamen sata. 13 Toloy yamen magkadangan anggan bait sa Rigyo. Maraw omaga:akay da koaya ba Romamoymoy ibat sa kabaraybayen kanan kalnedan da- kalawey darwa ka aldaw yamen bait sa Potioli. 14 Yamen maki asbokan mga talkakaan sa laki Hisos sata da- yamen kora yinakag mamataw sata pito ka aldaw. Ibat sata ba yamen paraoy sa goraan Roma. 15 Abaritaan mga talkakaan sa Roma da para sa yamen, kaya kora paraoy sa pamiliyan Apiyo da- sa goraan Tatlo ka Tabirna para yamen tagboon. Maraw laki Pablo kaban-aw sa kora iya magpalakol sa Diyos, da- emeyat da konin remrem. 16 Maraw yamen bait sa goraan Roma, laki Pablo ba pinayagan sadiri pamatawan anggat sai ka sondalo magbantay sa konin. 17 Kadalan da tatlo ka aldaw, yinakag laki Pablo da mga koyay Diw sa goraan Roma para magmiting. Maraw magkatipon:na kora, konin sinabi amba, Mga kapowa Diw, kayno man wala ako pinanawen laban sa tamo kairayaan kayno sa mga kaogalian tamo mga pangapoan, ako piniriso sa Hirosalim da- tinaboy sa katiwalaan impirador sa Roma. 18 Kalbas ako tinanong gidte, ako disin batay:ya binal-anan panawen wala kay ako pinanawen abaya padosahan sa katayan. 19 Ngani domiklamo da mga Diw, kaya ako magpilit maghabol sa impirador kayno man wala ako sombong laban sa tamo kairayaan. 20 Ako naegtan tagikara tiya panawen sa laki Hisos ag sarig mga taga Israil. Panawen saba naay inay-ayan koyo towa paraoy para ako katokawanan sa koyo. 21 Kora tembag amba, Wala din yamen nagkatabang sorat ibat sa Hodiya para sa komo. Kayno man mga tamo kapowa Diw paraoy towa ba wala din magbarita e magtokawanan man nakayman laban sa komo. 22 Amba man, yamen alabet apakarngeyan no nakay da komo tay asabi, panawen yamen amatangan kayno saan, maoson da nagsabi mga iraya laban sa adar tiya. 23 Kora tinarato sai ka aldaw, kaya maoson da paraoy sa pamatawan laki Pablo maraw bait:ta da aldaw naba. Iya magpapawa sa kora da- magsistigo para sa batay:ya maghadi da Diyos. Konin gidte alabet kora ba misarig sa laki Hisos kaya konin pinapawa da mga Bilin Diyos tinaboy sa laki Moysis da- da mga sorat mga magbarita ibat sa Diyos para sa laki Hisos. 24 Maki misarig da- maki nawed misarig sa konin sinabi. 25 Kora nawed magkasai. Sinabi laki Pablo da mga tokawanan tiya, Totoo da pinasabi Ispirito Banal sa laki Isayas sa koyo mga pangapoan amba, 26 Kawo paraoy sa mga iraya tiya, da- sabiyen sa kora amba, koyo pakarngey-pakarngey man ba nawed batay koyo kamatang. Da- kayno koyo semerey-serey man, ba nawed tay koyo kaban-aw. 27 Panawen nagrongronga da remrem mga iraya tiya Bengelen:na da kora mga talinga, kora pinesek da kora mga mata. No nawed disin amba ba kaban-aw disin da kora mga mata, karngey da kora mga talinga, da- apawaan da kora mga remrem da- kora disin paoli:akay sa naay da- kora ba naay pinapiya, sinabi Panginoon. Naba:a ngani. 28 Sinabi dapo laki Pablo amba, Piya gidte no koyo amatangan amba batay pinapawa sa mga Nawed Diw da barita tiya ibat sa Diyos para sa karibriyan da- kora tay pinakarngeyan! Maraw nasabi:ya tiya laki Pablo ba mangadang:nga da mga Diw, kora-kora ba magpaltomangan gidte. 30 Boo darwa ka dag-on laki Pablo magpamataw sa balay konin nagbayadan sa goraan lakol Roma. Konin tinabang da boo magtangaw sa konin. 31 Wala kaliman da- wala din hadang iya mangadar para sa batay:ya maghadi da Diyos, iya magtodo pag para sa Panginoon Hisos Kiristo.
1 Ako laki Pablo da magsorat sa koyo mga mag-isarig sa laki Hisos sa goraan Roma. Ako ba tagoanggat laki Kiristo Hisos, ako pinili Diyos para ako konin pinili sogoan, ako konin hinidang para mangadar Pirmida ka Barita ibat sa Diyos. 2 Pag Pirmida ka Barita naba ag konin:na pinangako pag monaan da- po sa bibi mga tagabarita ibat sa Diyos, ag nagkasorat din sa Banal ka Kasoratan, 3 ba para sa konin Onga, ag tamo Panginoon Hisos Kiristo. Para sa konin lawas iraya, iya ba kaapoan hadi Dabid, ngani para sa konin kagisengan kabanalan remrem, iya ba Pinaban-Aw makapangyadihan Onga Diyos pag iya biniyag:gakay Diyos ibat sa natay. 5 Ibat sa konin ngani- ba naay tinabang sa Diyos da parongaw para ako pinili sogoan, para da boo iraya sa boo paranawan ba naay akayen sa mag-isarig da- sa magtoltol sa konin. 6 Kabilang:nga din koyo sa mga pinili para tagatoltol laki Hisos Kiristo. 7 Sa koyo boo ag magpamataw sa goraan Roma, mga nagpalayaw Diyos, mga pinili para batay banal. Sa koyo:wa ngani- da parongaw Diyos, da- da kaginhawahan ibat sa Diyos tamo Apang, ibat din sa Panginoon Hisos Kiristo. 8 Da monaan sa boo naay batay sinabi ba ako magpasalamat sa Diyos panawen sa laki Hisos Kiristo para sa koyo boo, panawen da koyo pag-isarig ba barita gidte sa boo paranawan. 9 Layen te koyo naay nagdarangin. Tiya ba amatangan Diyos ag naay nagpanawenan boo poso sa ako magpangadar pag Pirmida ka Barita para sa konin Onga. 10 Layen te naay nag-ay-ay sa Diyos, ako kay konin pakanen odas para ako kaparaoy:yani sa koyo. 11 Ako mag-alabet:ta gidte kaban-aw sa koyo para aerayan kay parongaw para sa biyag ibat sa Diyos, pag kapaeyat sa koyo. 12 Da naay alabet sabiyen para tamo magpaytolongan magpaonay sa sai-sai panawen sa tamo pag-isarig sa Diyos. 13 Mga kaarianan sa laki Hisos, naay alabet koyo amatangan layen te ako maggayak para paraoy saba sa koyo, ngani ako nawed nagkaatoloy. Naay alabet ako kaakay din saba mga batay misarig sa laki Kiristo, makay din naay pinanawen sa mga Roma Nawed Diw. 14 Ako maki katongkolan magpangadar sa mga taga goraan, da- sa mga taga olnan; sa mga kamatang da- sa mga nawed kamatang. 15 Panawen saba ba ako ba mag-alabet gidte naay nagpangadar da Pirmida ka Barita sa koyo saba din sa goraan Roma. 16 Ako nawed akayaan sa Pirmida ka Barita para sa laki Kiristo, panawen tiya da kapangyadihan Diyos para aribri da tayma mag-isarig-da monaan ba ag mga Diw, amba din da mga Nawed Diw. 17 Nagpaban-aw Pirmida ka Barita amba da Diyos ba magtaboy kataldengan sa mga iraya panawen ngani sa kora boo odas ba mag-isarig ngani, toltol sa nagkasorat amba, Da iya pinakan kataldengan panawen sa mag-isarig ba batay nabiyag. Naba:a ngani. 18 Nagpaban-aw Diyos ibat sa soksokowan da konin kabaisan laban sa boo kadaetan, laban sa boo daet ka panawen, mga iraya maghadang sa katotohanan panawen sa kora kadaetan. 19 Da abaya amatangan para sa Diyos ba mapawa sa kora maraw Pinaban-Aw Diyos naba sa kora. 20 Ibat dapo pag konin rinarang da paranawan mapawa nagpaban-aw da mga nakayman pinanawen Diyos, da konin kaogalian nawed nagkaakitan, naba ba da konin wala arasan kapangyadihan da- konin pagkaDiyos. Kaya nawed:dani abaya kora magdahilan, 21 panawen kayno kora:ani akilalaan da Diyos, iya ba nawed kora pinalakol makay Diyos, nawed din kora pinasalamatan da Diyos. No nawed ba kora magremrem mga nakayman wala kaparosan, da- adeleman da kora tolingag ka remrem. 22 Sa kora magpasoli amba kora madonong ba lalo:ani nagkatolingag, 23 da- kora pinaawakan da kalakolan Diyos wala katayan. Kora sinambahan da mga ladawan iraya batay natay, ladawan ibon, ladawan mga hayop, da- mga ladawan mga magdanglayan. 24 Kaya kora pinabayaan:nani Diyos para panawenen da kora madomi ka alabet, anggan sa kora manobyan sa magpamanawen kakayaan sa sai-sai. 25 Kora pinaawakan da katotohanan para sa Diyos da- kora magpaniwala:akay sa kaboslian; kora sinamba da- pinanawenan da rinarang, nawed:dani da Romarang pag iya da kailangan gidte papodiyan anggan kaagoton man! Amba:a ngani-. 26 Panawen naba ba kora pinabayaan Diyos sa makakaya kora alabet. Da mga babayi ba dayo:ani paayon sa kora mga sawa panawen mag-arikoy da mga babayi sa babayi. 27 Makay din da mga lalaki, dayo:ani kora paayon sa kora sawa no nawed ba mag-arikoy sa kapowa lalaki, kaya nagkatimpowan:nani sa kora sadiri lawas da padosa Diyos kailangan sa kora kadaetan. 28 Panawen kora dayo remremen da Diyos, kora pinabayaan Diyos sa kora daet ka nagremrem da- sa kora nawed bagay ka ogali. 29 Kora tagoanggat:tani boo kalasi kadaetan, kabalikoan, kaakenan, daet ka remrem, kora kapno kaamagan, daet ka nag-alabet, da- kora alabet mamono iraya, magpaltomangan da- madaya. Kora mapakiaram, 30 magpanida podi, magbais sa Diyos, wala galang, magpakaatatas sa sadiri, magpalawlaw, mag-ombinto kadaetan, da- magsoway sa koyay, 31 mga tolingag, mga pabaya, mga wala kayawtean, da- nawed kamatang magtolong sa Roma. 32 Kora amatangan da sabi Bilin Diyos amba, Sa mga magpamanawen kadaetan makay naba ba kailangan padosahan sa katayan. Kayno amba, nawed ngani toloy:ya din kora mamanawen daet, no nawed kora angasan dapo gayed no kora akitan mga Roma ba magpamanawen makay naba.
1 Kaya, tawa man kawo ag maghosay sa Roma ba nawed:dani abaya kawo magdahilan. Panawen sa kawo maghosay sa Roma ba kawo maghosay din sa komo sadiri, panawen kawo pag maghosay ba magpamanawen din pag mga kadaetan naba. 2 Tam amatangan mataldeng maghosay da Diyos laban sa mga magpamanawen pag kadaetan naba. 3 Kawo dia amba kawo batay kaalas sa maghosay da Diyos no komo hosayen da mga magpamanawen ag komo din nagpamanawen? 4 No nawed ba komo dia nagpadaet da Diyos, panawen iya ba piya gayed, mapigil da- maagwantahen? Nawed ma komo amatangan kaya da magpamanawen piya da Diyos para sa komo ba para komo kilalaen da kadaetan da- magbayo:wakay da biyag? 5 Ngani panawen maskil gayed komo olo, da- nawed komo magkilala sa kadaetan ba komo nagpamabyat da padosa batay tinimpo sa komo sa aldaw maghosay mataldeng da Diyos, sa odas din konin batay Pinaban-Aw da konin kabaisan laban sa kadaetan. 6 Panawen da Diyos da batay gomanti sa boo iraya toltol sa kora mga panawen. 7 Da mga toloy:yani magpamanawen piya panawen da kora alabet ba kapodiyan, kalakolan da- wala katayan, ba konin batay pinakan biyag gidte wala arasan. 8 Ngani kabaisan gidte kay da- padosa Diyos da batay tomarogpa sa mga iraya akenan, sa mga dayo tomoltol sa katotohanan no nawed sa kabalikoan. 9 Batay pinahidapan da- pinakaskitan Diyos da tayma magpamanawen kadaetan, da monaan ba ag mga Diw, amba din sa mga Nawed Diw. 10 Ngani da Diyos ba batay magtaboy galang, kapodiyan da- kaginhawahan sa tayma magpamanawen piya, da monaan sa mga Diw, amba din sa mga Nawed Diw. 11 Panawen wala nagpatabi da Diyos. 12 Pag nag-amba mga Nawed Diw wala gidte Bilin Diyos tinaboy sa laki Moysis ba da tawa man sa kora magpamanawen daet ba batay pinadosahan Diyos sa nawed toltol sa Bilin. Da mga Diw kay ag maki Bilin Diyos ba da tawa man sa kora, no magpamanawen daet ba batay hinosay Diyos toltol sa Bilin. 13 Panawen nawed sa mga magpakarngey sa Bilin no nawed ba sa mga magpaniwala sa Bilin, da Diyos batay magtaboy kataldengan. 14 Sa odas da mga Nawed Diw wala gidte Bilin tinaboy sa laki Moysis, kora magpamanawen toltol sa nag-ay-ay Bilin, sa maniho kora kagisengan remrem ba naba ba makay:ya Bilin sa kora kayno kora wala Bilin tinaboy sa laki Moysis. 15 Nagpaaram kora nagpanawen amba nagkasorat sa kora mga poso da nag-ay-ayan Bilin. Kora amba totoo din naba, panawen no ina ba magsaway kora remrem, no ina kay ba mag-ompormi. 16 Toltol sa Pirmida ka Barita naay nagpangadar, batay nangyadi da naay aray sinabi sa aldaw mga lihim iraya ba batay hinosay Diyos sa laki Kiristo Hisos. 17 Ngani kawo, kawo amba kawo Diw, kawo mag-isarig sa Bilin tinaboy sa laki Moysis da- kawo magpalawlaw amba, Tamo mga Diw ba pinili Diyos. 18 Komo amatangan da konin alabet, komo akilalaan da mga piya ka nakayman, panawen kawo tindoan Bilin. 19 Da komo remrem ba kawo tagaakay mga raprap, kawo solo-sa mga sa kadeleman, 20 tagataldeng sa mga tolingag, tagatodo sa mga makay onga, panawen kawo amba komo amatangan ibat sa Bilin da boo kaamatangan da- katotohanan. 21 No amba kawo pag magtodo sa Roma, kaytang nawed komo tindoan da komo sadiri? Kawo pag magpangadar laban sa magpanakaw, kaytang kawo magpanakaw? 22 Kawo pag amba, Ayaw magpangalonya, ngani kawo din ba magpangalonya! Kawo pag adomiyan sa mga nawed amba Diyos, kaytang kawo magseled sa mga balay nawed amba Diyos para ngani kawo kapanakaw? 23 Kawo magpalawlaw amba kawo maki Bilin tinaboy sa laki Moysis, ngani komo kay din nag-anyaya- da Diyos sa kawo magsoway sa Bilin Diyos! 24 Panawen nagkasorat amba, Da ngaran Diyos ba nagdaet mga Nawed Diw panawen sa koyo mga Diw. Naba:a ngani. 25 Da kawo long-oy ba mahalaga, ngani no kawo magtoltol sa Bilin tinaboy sa laki Moysis; ngani no kawo kay din ba maglaban sa Bilin, kawo ba makay din nawed long-oy. 26 Kaya no da sai ka iraya nawed long-oy ba magpamanawen toltol sa nag-ay-ayan Bilin, nawed mana makay long-oy iya sa ban-aw Diyos? 27 Kaya, koyo mga long-oy pag maki Bilin nagkasorat sa Banal ka Kasoratan ngani magsoway din sa Bilin, koyo batay hinosay Diyos panawen sa mga nawed long-oy panawen kora ba magtoltol sa Bilin Diyos. 28 Panawen nawed Diw gidte da sai ka iraya panawen ngani sa maglong-oy sa lawas pag makay sai ka tanda nagkaakitan. 29 Ngani da tanda Diw gidte ba nawed nagkaakitan. Da iraya bayo:wani da poso da- remrem toltol sa Ispirito Banal, da- nawed toltol sa Bilin nagksasorat sa Banal ka Kasoratan, naba da Diw gidte. Da papodi sa konin ba nawed ibat sa iraya no nawed ba ibat sa Diyos.
1 No amba, nakay da kalabiyan mga Diw sa mga Nawed Diw? Nakay da kaparosan no long-oy? 2 Maoson gayed. Monaan sa boo, da mga Diw da pinakan Tokawanan Diyos para intirigahen sa kora. 3 Koyo remrem dia amba no maki Roma ka mga Diw nawed gidte maniwala sa Tokawanan Diyos ba batay dia wala kaparosan da nagpanawen Diyos da konin sabi? 4 Nawed gidte! No nawed ba nagpanawen Diyos da konin nagsabi nawed gidte magsalto iya kayno man boslien da tayma iraya, makay pag nagkasorat amba, Kailangan kawo kora kilalaen amba mataldeng sa komo mga nagsabi, da- no kawo batay:yani hinosay ba kawo batay mandaeg. 5 Ngani no da tamo kabalikoan ba magpaban-aw pag kataldengan Diyos, nawed mana batay asabi mona amba nawed mataldeng da Diyos panawen tamo konin nagpadosahan? (Amba da diklamo kalaati mga iraya) 6 Nawed gidte, nawed! No nawed mataldeng da Diyos ba omaning konin batay hinosay da boo iraya sa paranawan? 7 No sa naay kaboslian ba lalo nagkaakitan da kalakolan Diyos panawen napaban-aw da iya totoo gidte, mataldeng dia ako padosahan Diyos makay ako sai ka makadaetan? 8 Kaytang ngani- tamo nawed amba, Tamo mamanawen daet no batay piya da bokar naba? Amba kono da naay nagtodo, amba pag mga iraya magpanida sa naay. Kora batay pinadosahan Diyos panawen sa kora nagsabi para sa naay. Naba da bagay sa kora. 9 Nakay ngani da koyo remrem? Maki naw kalabiyan mana tamo mga Diw sa mga Nawed Diw? Wala gidte! Panawen naay:yani Pinaban-Aw sakop sa kapangyadihan kadaetan da boo iraya kayno mga Diw kayno mga Nawed Diw. 10 Makay pag nagkasorat amba, Wala iraya mataldeng, wala, kayno sai; 11 Wala kamatang, wala magsarak sa Diyos. 12 Da boo iraya ba somimang sa dalan da- paraoy sa kadaetan; Wala magpamanawen piya, kayno sai. 13 Makay lebeng boka da kora talawo, Da kora mga dila ba naggamit sa magpamosli. Da tokawanan ibat sa kora ngingian ba malala makay tingka orpong. 14 Kapno magtongayaw da- magpakaskit ka tokawanan da kora bibi. 15 Kora handa gidte magpakaskit da- magbono iraya. 16 Kayno saan kora paraoy ba anggat da kasidaan da- kahidapan. 17 Nawed kora amatangan da dalan kaginhawahan. 18 Da kaliman mamanawen daet laban sa Diyos ba wala olian sa kora poso. Naba:a ngani. 19 Da- tamo nagkaamatangan da nakayman nagsabi Bilin tinaboy sa laki Moysis ba nagsabi sa mga sakop sa Bilin, para nawed:dani abaya magdahilan da tawa man; da- para amatangan mga iraya kora boo batay hinosay Diyos. 20 Panawen da Diyos ba nawed magtaboy kataldengan sa mga iraya panawen sa kora nagpanawen toltol sa Bilin, panawen sa Bilin akilalaan iraya amba iya ba makadaetan. 21 Ngani mona ba akitan:nani da Diyos ba nawed magtaboy kataldengan sa mga iraya panawen sa kora magpamanawen kayno nakay pag maniho. Sinistigohan mga Bilin tinaboy sa laki Moysis da- mga tagabarita ibat sa Diyos amba da Diyos ba nawed magtaboy kataldengan sa mga iraya panawen sa kora magpamanawen kayno nakay pag maniho. 22 Da Diyos ba magtaboy kataldengan sa boo mag-isarig sa laki Hisos Kiristo, kayno mga Diw kayno mga Nawed Diw, panawen sa kora pag-isarig sa konin. 23 Panawen da boo ba mamanawen daet da- tayma sai ba adayo sa Diyos pag Tagaribri. 24 Amba man, panawen sa kapiyaanan remrem Diyos ba kora ba konin pinakan kataldengan panawen sa laki Kiristo Hisos, pag magtobos sa kora. 25 Iya da hinanda Diyos para taboy sa katayan para, sa magbobo da konin daya ba maki kapatawadan sa kadaetan da mga iraya sa mag-isarig sa konin. Naba ba pinanawen Diyos para paaramen amba iya mataldeng, panawen pag monaan ba da Diyos ba mapigil da- mag-agwanta sa mga kadaetan pinanawen mga iraya. 26 Kaya mona, konin pinakan kataldengan da mga mag-isarig sa laki Hisos da- Pinaban-Aw amba iya ba mataldeng gidte. 27 Nakay mona da tamo abaya kalawlawan? Wala! Kaytang? Panawen dia sa tamo nagpanawen da Bilin tinaboy sa laki Moysis? Nawed sa tamo nagpanawen no nawed ba panawen sa tamo mag-isarig sa laki Kiristo. 28 Panawen mapawa:ani da iraya ba pinakan kataldengan sa iya mag-isarig sa laki Kiristo, nawed sa magpamanawen Bilin. 29 Da Diyos dia ba Diyos ngani mga Diw? Nawed mana iya Diyos din mga Nawed Diw? Hee, panawen iya da Diyos boo iraya. 30 Sai ngani da Diyos. Kaya kayno mga Diw kayno mga Nawed Diw, kora konin batay pinakan kataldengan panawen sa kora mag-isarig sa laki Kiristo. 31 Da alabet dia sabiyen naba ba yamen winala kaparosan da Bilin tinaboy sa laki Moysis? Nawed! No nawed ba yamen dapo gidte pinahalagahan da Bilin.
1 Nakay da yamen batay asabi para sa yamen kay pangapoan laki Abraham? Nakay da konin adalanan sa biyag? 2 No iya pinakan kataldengan panawen sa konin piya ka panawen ba iya maki disin batay kalawlawan. Ngani iya wala batay kalawlawan sa ban-aw Diyos, 3 panawen nagsabi Banal ka Kasoratan amba, Misarig sa pinangako Diyos laki Abraham; kaya, rinemrem Diyos para sa konin amba iya ba mataldeng. Naba:a ngani. 4 Da nagtaboy sa iraya magpaopa ba nawed nag-awit taboy no nawed ba opa. 5 Ngani da nawed ngani- magpamanawen piya para iya pinakan kataldengan, no nawed ba iya mag-isarig sa Diyos, pag magtaboy kataldengan sa mga makadaetan ba iya da nagremrem Diyos iya ba mataldeng panawen sa iya mag-isarig sa konin. 6 Kaya laki Dabid amba, Marongaw da iraya nagremrem Diyos amba iya mataldeng nawed panawen sa konin mga panawen. 7 Tiya da sabi amba, Marongaw da mga iraya da kora mga soway ba pinatawad:dani; da kora mga kadaetan ba nabaraw:wani. 8 Marongaw da iraya da konin mga kadaetan ba nawed:da nagremrem Panginoon. Naba:a ngani. 9 Pag rongaw dia naba ba para ngani sa mga linong-oy? Nawed! Naba ba para din sa mga nawed linong-oy. Toltol sa Banal ka Kasoratan ba naay nagsabi amba, Rinemrem Diyos para sa laki Abraham amba iya ba mataldeng panawen sa iya mag-isarig. 10 Nakay dapo ag odas nangyadi naba? Pag nawed dapo iya nalong-oy e pag iya nalong-oy:yani? Nawed pag iya linong-oy:yani no nawed ba pag nawed dapo linong-oy. 11 Laki Abraham ba linong-oy makay tanda da- patonayan iya pinakan Diyos kataldengan panawen sa iya mag-isarig pag iya nawed dapo long-oy. Kaya laki Abraham da makay apang boo mag-isarig sa Diyos, sa makay naba, da mga mag-isarig ba pinakan Diyos kataldengan kayno kora ba nawed long-oy. 12 Amba kay din laki Abraham ba apang mga long-oy, nawed ngani panawen sa kora mga long-oy, no nawed ba panawen sa kora mag-isarig ba makay din ag pag-isarig tamo pangapoan laki Abraham pag iya nawed dapo linong-oy. 13 Pinangako Diyos sa laki Abraham da- sa konin mga kaapoan amba kora batay mag-apo pag paranawan. Naba ba konin pinangako sa kora panawen sa kora mag-isarig, nawed panawen sa kora pinanawen da konin Bilin da- panawen sa kora pag-isarig kora ba rinemrem Diyos kora ba mataldeng. 14 No da mga magpamanawen ngani Bilin da batay mag-apo, wala kapangyadihan da pangako Diyos, wala kay kaparosan da mag-isarig. 15 Da bokar Bilin tinaboy sa laki Moysis ba kabaisan Diyos; no wala maniho, wala din maglaban. 16 Kaya ngani-, sa pag-isarig ngani tamo batay tomabang pag pinangako Diyos, pag bokar konin parongaw. Tiya pag pangako ba sai ka taboy Diyos sa boo kaapoan laki Abraham, nawed ngani sa mga magpamanawen Bilin Diyos no nawed ba sa boo mag-isarig sa Diyos, makay din laki Abraham ba mag-isarig. Panawen laki Abraham ba apang tamo boo. 17 Makay tiya da nagkasorat para sa laki Abraham amba, Kawo ba naay pinanawen apang maoson ka lasyon. Naba:a ngani. Da pangako naba ba maki kapangyadihan sa ropangan Diyos pag konin sinarigan, pag magtaboy biyag sa mga nangatay, da- magpanawen boo nakayman sa iya magtokawanan. 18 Kayno man nawed:da nag-asahan batay dapo magkaonga, amba man mag-isarig dapo din laki Abraham iya da batay apang maoson ka lasyon, makay pag sinabi sa konin amba, Kaoson mga magirem da komo batay mga kaapoan. 19 Batay:ya sai ka daan ka dag-on iya pag odas naba da- iya magrapi-rapi:ani. Baog kay bayi Sara ag konin sawa; amba man nawed ahinaan da konin pag-isarig. 20 Nawed iya mag-alingangaan sa pangako Diyos, no nawed ba magtionay dapo gayed da konin pag-isarig, da- konin din pinodi da Diyos. 21 Iya mag-isarig gidte batay kapanawen Diyos da konin pangako. 22 Kaya amba da Kasoratan, Rinemrem Diyos para sa konin amba iya ba mataldeng panawen sa konin pag-isarig. Naba:a ngani. 23 Ngani da sabi amba, Rinemrem Diyos iya ba mataldeng ba nawed ngani para sa laki Abraham, 24 no nawed ba para din sa tamo. Tamo ba rinemrem din Diyos tamo mataldeng panawen sa tamo mag-isarig sa konin, pag bomiyag:gakay sa laki Hisos tamo Panginoon ibat sa mga nangatay. 25 Iya ba pinabono panawen sa tamo mga kadaetan da- iya ba biniyag:gakay para abaya tamo pakanen kataldengan.
1 Panawen tamo ba pinakan kataldengan sa konin ba tamo maki kaginhawahan sa ban-aw Diyos panawen sa mag-isarig sa tamo Panginoon Hisos Kiristo. 2 Sa laki Hisos ngani- tamo tinabang sa pag-isarig da kapiyaanan remrem Diyos pag tamo nagkaasyagan (da- sata tamo nagkaonay). Tamo angasan gidte sa tamo nag-asahan sa batay kaanggat sa konin kalakolan. 3 Labi dapo saba, tamo angasan sa tamo nagdanas kahidapan, panawen tamo amatangan naba ba magbokar magtiyaga. 4 Da magtiyaga magbokar kay mahalaga tamo sa ban-aw Diyos, no tamo mahalaga ba tamo maki:ya nag-asahan. 5 Pag nag-asahan tiya ba nawed magpasida sa tamo, panawen da palayaw Diyos ba kapno sa tamo poso. Tinaboy:yani Diyos sa tamo da Ispirito Banal. 6 Panawen pag tamo ba mga makadaetan dapo da- wala dapo kaya ba natay laki Kiristo para sa tamo da- para sa boo mga makadaetan, sa odas hinanda Diyos. 7 Mahidap sa tawa man da taboyon da konin biyag sa katayan para ngani- sa sai ka iraya mataldeng-amba man abaya maki iraya magpangahas magtaboy konin biyag sa katayan para ngani- sa sai ka piya ka iraya. 8 Ngani makay tiya nagpaban-aw Diyos da konin palayaw sa tamo: pag tamo ba makadaetan dapo ba natay laki Kiristo para ngani- sa tamo. 9 Mona tamo ba pinakan kataldengan panawen sa katayan laki Hisos, lalo:ani piho tamo batay rinibri laki Hisos ibat sa bais Diyos. 10 Panawen no tamo ba lomaban dapo sa Diyos, tamo ba konin:nani tinabang para konin:nani mga padi panawen laki Kiristo ag konin Onga ba natay para sa tamo. Kaya piho dapo da tamo kalkatan sa kadaetan panawen sa biyagan:nani laki Kiristo ag konin Onga. 11 Nawed ngani naba! Maraw tamo ba tinabang:ngani Diyos para konin:nani mga padi panawen sa tamo Panginoon Hisos Kiristo, tamo angasan da- magpodi sa Diyos. 12 Da kadaetan ba semled sa paranawan panawen sa sai ka iraya da- anggat din da katayan panawen sa konin daet ka panawen. Sa makay naba ba da boo iraya ba nagpangatay, panawen da boo iraya ba magpamanawen daet. 13 Bayo gira tinaboy da Bilin tinaboy sa laki Moysis ba sa paranawan:nani da kadaetan, ngani no wala maniho ba wala disin koyinta da kadaetan. 14 Amba man ibat sa dag-on laki Adan anggan sa mga dag-on laki Moysis, da katayan da homadi sa mga iraya, kayno sa kora pag kora kadaetan ba nawed makay pag magsoway laki Adan. Tiya pag laki Adan ba makay ladawan sai ka batay rateng. 15 Ngani nawed pariho pag darwa naba, panawen da taboy Diyos ba nawed pariho sa pagsoway laki Adan. Totoo gayed da magsoway laki Adan ba tomonton katayan sa maoson iraya, ngani lakol da kalabiyan kapiyaanan remrem Diyos da- pag konin taboy magrateng sa kaosonan iraya panawen sa kapiyaanan remrem sai ngani ka iraya-laki Hisos Kiristo. 16 Nawed pariho da taboy Diyos sa binokar pag magsoway laki Adan. Sa iya somway ba da hosay ba padosa, ngani kalbas, maraw Romateng da taboy ba kayno maoson da magsoway ba da hosay ba kataldengan taboy Diyos. 17 Panawen sa kadaetan sai ka iraya-laki Adan-ba homadi da katayan. Ngani panawen sa sai ngani din ka iraya-laki Hisos Kiristo-ba lalo dapo da tinabang mga iraya kinayawtean gidte Diyos, mga pinakan kataldengan; kora batay maghadi sa biyag gidte. 18 Kaya no omaning da daet ka panawen sai ka iraya ba bomokar kapadosahan sa boo iraya, makay din da mataldeng ka panawen sai ka iraya ba magribri sa boo iraya sa kapadosahan da- magtaboy biyag gidte sa kora. 19 Panawen sa magsoway sai ka iraya maoson da inadi makadaetan, amba kay din sa magtoltol da sai ka iraya maoson da batay inadi mataldeng. 20 Da Bilin ba tinaboy sa laki Moysis para omoson da maglaban. Ngani omoson man da maglaban, ba lalo dapo kay omoson da kapiyaanan remrem Diyos. 21 Kaya ngani-, no omaning homadi da kadaetan para katayan, amba kay din batay maghadi da kapiyaanan remrem Diyos para da mga iraya ba pakanen kataldengan para kora batay tinabang da biyag gidte wala arasan panawen sa laki Hisos Kiristo pag tamo Panginoon.
1 Nakay mona da tamo batay sinabi? Tamo dia batay anggan dapo magpamanawen daet para omoson gidte da kapiyaanan remrem Diyos? 2 Nawed! Tamo natay:yani sa kapangyadihan kadaetan kaya nawed:dani abaya tamo mamiyag sa magpamanawen daet. 3 Nawed ma koyo amatangan amba tamo boo pag binaotismohan sa sapa ba Pinaban-Aw amba natay laki Hisos da- tamo din ba pal-anggat sa konin katayan? 4 Da alabet sabiyen, tamo ba natay, da- limbeng anggat sa laki Hisos sa odas tamo binaotismohan sa sapa para makay din laki Kiristo ba biniyag:gakay Diyos sa konin lakol gidte ka kapangyadihan ba tamo din kapamiyag sa bayo:wakay ka biyag. 5 Panawen no tamo sai sa laki Kiristo sa kon katayan, piho tamo batay sai sa konin sa iya biyagan:nakay. 6 Tamo amatangan pag tamo monaan pagkairaya ba pinako:ani sa kodos anggat sa laki Kiristo, para natay da daet ka alabet lawas iraya, para tamo nawed:dani tagoanggat kadaetan. 7 Panawen da iya natay:yani ba binal-anan sa kapangyadihan kadaetan. 8 Ngani tamo magpaniwala no tamo natay pal-anggat sa laki Kiristo ba tamo batay din nabiyag pal-anggat sa konin. 9 Tamo amatangan laki Kiristo da iya biniyag:gakay ba nawed:dani batay natay. Da katayan ba wala:ani kapangyadihan sa konin. 10 Pag iya natay ba kasai ngani iya natay para sa kapangyadihan kadaetan. Mona pag iya ba biyagan ba konin biyag ba kasai:yani sa Diyos. 11 Kaya kailangan koyo remremen, koyo sadiri ba natay:ya gidte sa kapangyadihan kadaetan, ngani biyagan kay sa Diyos panawen sa koyo kasaiyan sa laki Kiristo Hisos. 12 Ayaw:wa koyo paghadien da kadaetan sa galem koyo lawas batay natay, para nawed:da koyo batay tagoanggat daet ka alabet naba. 13 Ayaw:wa koyo pagpasakopon sa kapangyadihan kadaetan da nakayman ka eray koyo lawas makay kasangkapan kadaetan. No nawed ba koyo pasakop sa Diyos makay mga iraya natay kalbas biniyag:gakay. Taboyon sa konin da boo koyo pagkairaya para kasangkapan kataldengan. 14 Panawen nawed:dani abaya maghadi sa koyo da kadaetan, panawen koyo nawed:da sakop sa bilin no nawed ba sakop sa kapiyaanan remrem. 15 No amba, batay dia tamo magpamanawen kadaetan panawen tamo ba nawed:dani sakop sa bilin no nawed ba sakop:pani sa kapiyaanan remrem? Nawed ngani-! 16 Koyo amatangan no koyo magpasakop sa tawa man para koyo konin tagoanggat, koyo ba tagoanggat ngani- pag magsakop sa koyo; no mga tagoanggat kadaetan ba da bokar naba ba katayan; no mga tagoanggat Diyos ba da bokar naba ba nagpakan kataldengan. 17 Ngani salamat sa Diyos, panawen koyo pag monaan ba mga tagoanggat kadaetan ba matoltolon:na gidte sa todo koyo tinabang. 18 Koyo binal-anan:nani sa kadaetan, da- mona koyo tagoanggat:tani kataldengan. 19 (Ako magtokawanan sa layen nagkaamatangan mga iraya para koyo agad amatangan panawen podol da koyo remrem.) No omaning koyo pinasakop da koyo sadiri sa kadomiyan da- sa lalo dapo ka kadaetan, mona kay ba koyo taboyon da koyo sadiri para tagoanggat kataldengan para sa koyo batay:yani banal. 20 Pag koyo tagoanggat dapo kadaetan, koyo nawed sakop sa kataldengan. 21 Ngani nakay nga da koyo natiyamo sa mga nakayman naba pag koyo nagkaakayaan mona? Da bokar mga naba ba katayan. 22 Ngani mona koyo binal-anan:nani ibat sa kadaetan. Koyo mga tagoanggat:tani Diyos. Da koyo natabang ba pag magpabanal sa koyo da- da bokar naba ba biyag gidte wala arasan. 23 Panawen katayan da nagpatawtaw kadaetan, ngani da taboy Diyos ba biyag gidte wala arasan sa kasaiyan sa laki Kiristo Hisos pag tamo Panginoon.
1 Mga arian sa laki Hisos, koyo kamatang para sa maniho, kaya koyo gidte amatangan sai ka iraya ba nagkasakop sa maniho anggan ngani iya biyagan. 2 Kahalimbawa: toltol sa maniho ba sai ka babayi ba nagkasakop sa konin sawa anggan biyagan dapo da sawa. Ngani no natay iya, bal-an:nani da babayi sa mga eray maniho para sa mga maki sawa. 3 Kaya ngani-, no iya anggat:takay sa Roma ka lalaki, sa odas biyagan dapo da konin sawa ba da babayi naba ba batay inawit talandi. Ngani no natay:yani da konin sawa, nawed:da iya sakop sa mga eray maniho naba. Kaya no iya mangisawa:akay sa Roma ka lalaki, iya ba nawed magpangalonya. 4 Amba kay din, mga kaarianan sa laki Hisos, koyo natay:ya sa Bilin tinaboy sa laki Moysis pag koyo eray:yani lawas laki Kiristo sa iya natay. Ngani laki Kiristo ba biniyag:gakay Diyos da- koyo ba eray:yani laki Kiristo para kapanawen mga piya ka panawen para sa Diyos. 5 Pag tamo nagkabiyag dapo toltol sa tamo monaan pagkairaya, da tamo mga daet ka alabet pinolaw Bilin tinaboy sa laki Moysis da pomaremrem sa tamo sa magpamanawen pag mga nakayman batay mamokar katayan. 6 Ngani mona tamo natay:ya sa kapangyadihan kadaetan pag tomagoanggat sa tamo. Nawed:dani tamo sakop sa Bilin. Kaya tamo magpamanawen para sa Diyos, nawed toltol sa monaan Bilin nagkasorat, no nawed ba toltol sa bayo ka biyag ibat sa Ispirito Banal. 7 Da alabet dia sabiyen naba ba da Bilin tinaboy sa laki Moysis ba daet? Nawed! Amba kay, nawed:da disin naay amatangan no nakay da kadaetan no nawed da Bilin da pomaaram sa naay. No nawed sinabi Bilin amba, Kawo ayaw amagan, ba nawed disin naay akilalaan no nakay da amagan. 8 Ngani da kadaetan ba mag-abong da- pomolaw sa naay remrem sa boo kalasi amagan. Panawen makay natay da kadaetan no wala Bilin. 9 Pag monaan, pag nawed dapo naay amatangan da Bilin tinaboy sa laki Moysis ba ako biyagan ngani maraw naay amatangan da magsogo Bilin ba nabiyag da kadaetan, 10 ako kay da natay. Da sogo din naba pag bagay disin magtaboy biyag ba magtaboy katayan sa naay. 11 Mag-abong da kadaetan para konin gamiten da sogo para ako ba dayaen. Sa makay naba, ako ngani- nabono kadaetan. 12 Kaya banal da Bilin tinaboy sa laki Moysis, da tayma sogo ba banal din, mataldeng da- piya. 13 Da alabet dia sabiyen ba tomaboy katayan sa naay da piya ka Bilin? Nawed! Da kadaetan da bomono sa naay. Ginamit kadaetan da piya ka Bilin sa magbono sa naay. Sa makay naba, Pinaban-Aw sa naay no kaomaning kadaet da kadaetan. 14 Tamo amatangan amba para sa ispirito da Bilin tinaboy sa laki Moysis, ngani ako ba iraya ngani da- ako tagoanggat kadaetan. 15 Nawed gidte naay amatangan da naay sadiri. Panawen da naay alabet ba nawed naay nagpanawen, no nawed gira da nakayman naay nagkadomiyan da naay nagpanawen. 16 Ngani, no naay nagpanawen pag nawed naay alabet, ako mag-ompormi amba piya da Bilin. 17 Kaya, nawed:da ako da maki panawen naba, no nawed ba da kadaetan pag magpamataw sa naay. 18 Naay amatangan wala piya ka nakayman magpamataw sa naay, da naay alabet sabiyen ba sa naay lawas tiya pag iraya. Naay akayanan da mag-alabet sa kapiyaanan, ngani nawed naay kaya da magpamanawen pag naay nag-alabet piya. 19 Panawen nawed naay nagpanawen pag piya naay nag-alabet, no nawed pag daet dayo naay panawenen ba naba da naay nagpanawen. 20 No naay nagpanawen pag dayo naay panawenen, nawed:da ako da maki panawen tiya, no nawed ba da kadaetan ag magpamataw sa naay. 21 Kaya naay akitan tiya da layen magpangyadi sa naay: no naay alabet panawenen da piya, da daet ngani da naay akayanan. 22 Sa naay kaybosolan poso, ako angasan sa Bilin Diyos. 23 Ngani naay nagkaamatangan maki Roma ka remrem magsogo sa mga eray naay lawas, tiya pag remrem magsogo ba laban sa remrem magsogo sa naay remrem. Panawen saba, ako ba napiriso:wani sa kapangyadihan kadaetan pag magpamataw sa mga eray naay lawas. 24 Makayawte gidte da naay biyag! Tawa:a ngani- da batay magribri sa naay ibat sa lawas tiya pag magtaboy katayan sa naay? 25 Da Diyos da batay magribri sa naay panawen sa laki Hisos Kiristo pag tamo Panginoon! Salamat sa Diyos! Amba da naay biyag: da naay remrem ba magtoltol sa Bilin Diyos, ngani da naay lawas ba magtoltol sa kapangyadihan kadaetan.
1 Kaya ngani-, nawed:dani batay hinosay para padosahan da mga sai sa laki Kiristo Hisos. 2 Ako nawed:dani sakop sa kapangyadihan kadaetan da- katayan, panawen ako ba binal-anan kapangyadihan Ispirito Banal pag magtaboy biyag, tiya ba bokar kasaiyan sa laki Kiristo Hisos. 3 Da nawed apanawen Bilin tinaboy sa laki Moysis panawen sa kagisengan kahinaan iraya ba pinanawen Diyos. Konin pinaparaoy towa sa lopa da konin sadiri Onga sa hidsoda iraya makadaetan, para konin taboyon da konin biyag sa katayan para garwen da kadaetan da- sa makay naba konin inalis da kadaetan sa pagkairaya. 4 Da boo naba ba konin pinanawen para tamo abaya panawenen da boo kataldengan nag-ay-ayan Bilin tinaboy sa laki Moysis, tamo pag magpamiyag toltol sa Ispirito Banal da- nawed toltol sa alabet lawas. 5 Panawen da mga magpamiyag toltol sa alabet lawas ba layen alabet gidte sa mga magpapanawen lawas. Ngani da magpamiyag toltol sa Ispirito Banal ba da kora remrem ba sa galem kapangyadihan Ispirito Banal. 6 Da layen mag-alabet gidte sa mga nakayman alabet lawas ba batay magbokar katayan, ngani da mga iraya sa galem kapangyadihan Ispirito Banal ba batay magbokar biyag gidte da- kaginhawahan. 7 Panawen da iya mag-alabet gidte sa mga nakayman sa alabet lawas ba maglaban sa Diyos. Iya nawed magtoltol sa Bilin Diyos da- iya wala kaya magtoltol. 8 Da mga magpamiyag toltol sa alabet lawas ba nawed batay kapaangas sa Diyos. 9 Ngani no da Ispirito kay Diyos da magpamataw:wa gidte sa koyo, koyo magpamiyag nawed:dani toltol sa alabet lawas, no nawed ba toltol sa Ispirito Banal. No da Ispirito laki Kiristo ba nawed magpamataw sa sai ka iraya, iya ba nawed sakop sa laki Kiristo. 10 Ngani no laki Kiristo ba magpamataw sa koyo ba kayno natay:yani da koyo mga lawas panawen sa kadaetan, koyo mga ispirito kay ba biyagan panawen koyo pinakan Diyos kataldengan. 11 No magpamataw sa koyo da Ispirito Diyos pag bomiyag:gakay sa laki Hisos, da Diyos pag bomiyag:gakay sa laki Kiristo, iya da batay magtaboy biyag gidte sa koyo mga lawas pag batay natay. Tiya ba konin batay pinanawen sa konin Ispirito pag magpamataw sa koyo. 12 Mga arian sa laki Hisos, tamo ba nawed:dani tagoanggat pag kagisengan alabet lawas, kaya nawed:dani bagay mamiyag toltol sa alabet lawas. 13 Panawen no koyo magpamiyag toltol sa alabet lawas, koyo batay gidte natay; ngani no koyo nagbono sa tolong Ispirito Banal da mga daet ka panawen alabet lawas, koyo ba batay biyagan. 14 Da boo iraya nagsararayan Ispirito Diyos ba mga onga Diyos. 15 Panawen da Ispirito Banal pag tinaboy Diyos sa koyo ba nawed magpatagoanggat sa koyo para koyo aliman, no nawed ba da Ispirito ba magtaboy kapangyadihan para koyo inadi mga onga Diyos, da- magtaboy din sa tamo kapangyadihan mag-awit sa Diyos amba, Apang! Naay Apang! 16 Da Ispirito Banal ngani- da magsistigo kaanggat tamo ispirito amba tamo mga onga Diyos. 17 Da- panawen tamo konin mga onga ba tamo batay mag-apo mga rongaw ibat sa Diyos da- anggat sa laki Kiristo mag-apo mga rongaw hinanda Diyos para sa konin. Panawen no tamo mag-agwanta kahidapan pal-anggat sa laki Kiristo, tamo batay din pinalakol Diyos pal-anggat sa laki Kiristo. 18 No sa naay, da mga nag-agwanta sa biyag mona ba wala gidte nakayman no tepengen sa kalakolan Diyos batay konin Pinaban-Aw sa tamo doma. 19 Magpanya da- mag-alabet gidte da boo rinarang Diyos ba konin paban-awen da konin mga onga. 20 Sinakop sa wala kaparosan da boo rinarang Diyos, nawed sa naba da kora alabet, no nawed ba panawen naba da pinili Diyos. Kayno amba, maki dapo din sarig, 21 panawen da boo rinarang Diyos ba konin batay binal-anan sa magtagoanggat sa karokasan, para kora kamaki eray sa lakol gidte ka kaginhawahan mga onga Diyos. 22 Tamo amatangan anggan mona da boo rinarang ba mag-adayayan makay pag babayi nagpamarian batay mamreg da- alabet gidte iya kapamreg:gani. 23 Nawed ngani amba pag boo rinarang! Kayno tamo pag tomabang Ispirito Banal pag monaan taboy Diyos ba mag-adayayan din da- mag-alabet gidte sa odas batay binal-anan Diyos da tamo mga lawas. Kaya tamo nagpanyaan da odas batay Pinaban-Aw Diyos amba tamo ba inadi:ani konin mga onga. 24 Tamo ribri:yani panawen sa tamo mag-asa sa Diyos. Ngani da mag-asa ba nawed:dani mag-asa no akitan:nani da nag-asahan. Panawen tawa da batay mag-asa no konin:nani akitan? 25 Ngani no tamo mag-asa sa nawed dapo tamo akitan, naba ba tamo nagpanyaan sa boo katiyagaan. 26 Amba kay din, tamo nagtolongan Ispirito Banal sa tamo kahinaan. Tamo nawed madonong manarangin piya, kaya da Ispirito Banal ba mag-aringi sa Diyos Apang para sa tamo, sa iya mag-aringi sa Diyos ba da konin naggamit ba beet nawed:da aratengan tokawanan. 27 Da Diyos pag kamatang pag sa poso iraya ba kamatang pag alabet sabiyen Ispirito Banal, panawen da Ispirito Banal ba mag-aringi para sa mga kairayaan Diyos, toltol sa alabet Diyos. 28 Tamo amatangan da boo magpangyadi ba naggamit Diyos para sa kapiyaanan mga magpalayaw sa konin, naba ba mga pinili Diyos para panawenen da konin alabet. 29 Panawen ibat dapo pag monaan amatangan:na Diyos no tawa da sa konin; pag mga naba konin binokod para kora ba makay din konin Onga laki Hisos, sa makay naba ba laki Hisos da makay pangakaan sa tamo boo ag mag-isarig sa konin. 30 Da konin mga binokod pag monaan dapo ba konin:na pinili. Da konin mga pinili ba konin din rinemrem kora mataldeng, pag konin rinemrem kora mataldeng ba konin din pinalakol. 31 Nakay dapo da tamo batay asabi para saba? No da Diyos ba tamo kakampi, wala batay kadaeg sa tamo. 32 Nawed inayawan Diyos taboyon da konin sadiri Onga, no nawed ba iya konin tinaboy para natay para sa tamo boo. No amba ba nawed ma konin din batay tinaboy sa tamo da boo nakayman, anggat sa konin Onga? 33 Tawa da batay magpaban-aw sombong laban sa mga pinili Diyos? Maraw da Diyos ba magremrem kora ba mataldeng, wala batay apaban-aw sombong laban sa kora. 34 Tawa ngani- da batay maghosay para kora ba padosahan? Laki Kiristo Hisos dia? Nawed. Iya dapo ngani- da natay da- biniyag:gakay Diyos, hee mona iya ba sa kanan kapet Diyos da- iya magdarangin para sa tamo. 35 Nakay da batay kapalsoway sa tamo sa kapalayawan laki Kiristo? Wala, kayno tamo ahidapan, kayno tamo naapiki, kayno tamo nagpahidapan, kayno tamo nagbayog, kayno korang da nagsool, kayno tamo sa kalimo, kayno tamo batay binono. 36 Toltol sa nagkasorat amba, Para ngani- sa komo, boo aldaw yamen bali:yani batay natay, Yamen kora nagremrem yamen ba makay topa batay binono. Naba:a ngani. 37 Ngani sa boo tamo nagdanas ba tamo magpandaeg gayed panawen sa kapangyadihan laki Hisos pag pomalayaw sa tamo. 38 Panawen naay apiho wala batay kapalsoway sa tamo sa konin palayaw, kayno da katayan, kayno da biyag, kayno mga anghil, kayno mga poon mga daet ka ispirito, kayno da magpangyadi mona, kayno da nakayman batay dapo mangyadi, kayno da mga kapangyadihan, 39 kayno mga sa kalaw-awan, kayno mga sa toyongan, kayno pag nakayman rinarang, wala batay kapalsoway sa tamo sa palayaw Diyos, pag palayaw konin Pinaban-Aw sa tamo sa laki Kiristo Hisos pag tamo Panginoon.
1 Panawen ako maki kasaiyan sa laki Kiristo konin amatangan katotohanan da naay nagsabi; ako nawed magpamosli. Amatangan din Ispirito Banal amba malinis naay remrem sa naay batay sinabi tiya sa koyo: 2 lakol gidte da naay karongkotan, nawed abaraw da kapanglawan sa naay poso 3 para sa naay mga kaarianan pag naay mga kalasyon. Panawen sa naay remrem ba piya dapo no ako sompaen da- napasway sa laki Kiristo no naba da kataboy kalkatan sa kora. 4 Kora da lasyon Israil, kora da inawit Diyos konin mga onga, da- konin Pinaban-Aw sa kora da konin kalakolan, da- da kasaiyan konin pinanawen sa kora; konin din tinaboy sa kora da konin Bilin da- da konin mga pangako. Konin Pinaban-Aw sa kora no omaning iya kora sambahen piya. 5 Kora ba ibat sa mga pangapoan, naba ba kora Abraham, Isaak da- Hakob. Pag laki Kiristo ba inonga ba kora ba konin din kalasyon. Papodiyan anggan kadomaen da Diyos sa kangawayan! Amba:a ngani-. 6 Nawed sa nasida da tokawanan Diyos. Panawen nawed da boo inonga sa lasyon Israil da kabilang sa kairayaan hinidang Diyos, 7 nawed da boo inonga laki Abraham da nagbilang mga onga Diyos. Sinabi Diyos sa konin amba, Da batay inonga laki Isaak da batay kabilang komo mga kaapoan. 8 Da alabet sabiyen naba ba nawed da boo onga laki Abraham da batay binilang mga onga Diyos, no nawed da mga onga ngani toltol sa pangako Diyos da batay binilang. 9 Panawen makay tiya da pangako: sinabi Diyos amba, Ako batay paoli sa sai:yakay ka dag-on, sa makay din tiya pag odas da- bayi Sara ba batay:ya mamreg sai ka lalaki. 10 Ngani nawed ngani naba. Naba da nangyadi sa siing ka onga bayi Ribika pag sawa tamo pangapoan koyay Isaak. 11 Bayo dapo sidawa ba inonga ba pinaaram Diyos amba da iya magpili ba toltol sa konin sadiri pakana, nawed toltol sa batay pinanawen kayno tawa sa sidawa. Naba pag nangyadi ba bayo dapo sidawa ba kapanawen piya e daet. 12 Pag odas naba sinabi:ya Diyos sa bayi Ribika amba, Batay magpamanawen da kakaan para sa arian. 13 Toltol sa nagkasorat amba, Ako pomili sa laki Hakob Da- ako domayo sa laki Isaw. 14 No amba, batay dia tamo asabi nawed mataldeng da Diyos? Nawed! 15 Panawen makay tiya da konin sabi sa laki Moysis, Ako batay ayawtean sa naay alabet kayawtean, Ako batay aawaan sa naay alabet kaawaan. Naba:a ngani. 16 Kaya da panawen Diyos ba nagsarig sa konin kayawtean, nawed sa alabet e sikap mga iraya. 17 Panawen sa Banal ka Kasoratan, da Diyos ba somabi sa hadi sa lopa Ihipto amba, Kawo naay ginawa hadi para sa komo biyag ba abaya naay paban-awen da naay kapangyadihan, para abaritaan boo iraya sa paranawan da naay ngaran. 18 Kaya ngani-, nagkayawtean Diyos da tawa man konin alabet kayawtean, da- konin nagpaete da tawa man konin alabet paeteen. 19 Ngani kaaram maki batay sinabi sa naay amba, Kaytang nagsombong dapo Diyos da iraya? Tawa da batay kalaban sa alabet Diyos? 20 Ngani kawo pag iraya ngani, tawa kawo para magtokawanan makay naba sa Diyos? Batay dia asabi iraya sa gomawa sa konin amba, Kaytang ako komo ginawa makay tiya? 21 Wala dia kapangyadihan da maggawa keden para maggawa sai ka maganda ka lotoan keden, da- sai ka anlagay:ya ngani ka keden ibat sa sai ka tigkal losak? 22 Kayno alabet paban-awen Diyos da konin bais da- paaramen da konin kapangyadihan ba boo tiyaga dapo konin inagwanta da mga iraya bagay padosahan, bagay sopoon. 23 Konin pinanawen naba para paaramen da konin wala kapantay ka kalakolan pag konin tinaboy sa tamo pag mga iraya konin nagkayawtean, pag mga monaan dapo konin:nani hinanda para sa konin kalakolan. 24 Kaya tamo ba konin pinili, nawed ngani ibat sa mga Diw, no nawed ba ibat din sa mga Nawed Diw, 25 makay ag nagsabi Diyos sa ribro sinorat laki Osiyas amba, Pag nawed naay kairayaan ba naay batay inawit "Naay kairayaan". Pag nawed naay nagpalayaw ba naay batay inawit "Naay palayaw" 26 Da- sa poro ngani sinabi sa kora amba, "Koyo nawed naay kairayaan" ba sata kora naay batay inawit mga onga Diyos biyagan. Naba:a ngani. 27 Tiya kay da pinabarita laki Isayas para sa lasyon Israil amba, Kayno kaoson boangin sa tebteb dagat da bilang mga onga lasyon Israil, ibente ngani sa kora da batay rinibri. 28 Panawen hosto da- agad batay pinanawen Panginoon pag konin hosay sa iraya sa paranawan. Naba:a ngani. 29 Laki Isayas din da somabi amba, No da Panginoon Makapangyadihan ba nawed omogon mga Roma sa tamo kalasyon Tamo disin makay:ya pag goraan Sodoma, makay:ya din pag goraan Gomora. Naba:a ngani. 30 Kaya nakay da tamo batay asabi? Da mga Nawed Diw pag nawed magsikap para kora ba mataldeng ba konin pinakan kataldengan, panawen sa kora mag-isarig. 31 Ngani da lasyon Israil kayno magsikap magpanawen Bilin Diyos para tomabang kataldengan ba nawed din tinabang da bokar pag kora nagsikap. 32 Kaytang? Panawen kora sinikap para magpaangas sa Diyos sa kora sadiri panawen, da- nawed sa mag-isarig sa konin. Makay ngani-kora nasongko sa bato kasongkoan, 33 toltol sa nagkasorat, Da Diyos ba amba, Man-aw, ako pomalagay sai ka bato kasongkoan sa Sion, Naba ba pag sai ka lakol gidte ka bato kora batay katwangan, Ngani nawed batay asidaan da iya mag-isarig sa naay. Naba:a ngani.
1 Mga arian sa laki Hisos, da naay gayed alabet da- da naay darangin sa Diyos ba da naay kalasyon ba naribri. 2 Abaya kora naay sistigohan amba kora magsikap gayed para kora kaangasan Diyos, ngani nawed sibay da kora amatangan. 3 Panawen nawed kora amatangan no omaning da alabet Diyos sa magtaboy kataldengan, kora somikap mag-ombinto sadiri pakana, nawed:dani kora magtoltol sa pakana Diyos. 4 Laki Kiristo da yomadi pag Bilin tinaboy sa laki Moysis para naba ba wala:a kapangyadihan; sa makay naba ba da tawa man mag-isarig sa laki Kiristo ba batay pinakan kataldengan. 5 Makay tiya da sinorat laki Moysis para sa magtaboy kataldengan sa kora magpamanawen pag Bilin amba, Batay nabiyag da magpamanawen pag Bilin. 6 Ngani makay kay din tiya da nagsabi para sa magtaboy kataldengan sa kora mag-isarig amba, Ayaw komo sabiyen sa komo sadiri, "Tawa da batay yomakbang sa langit"? (da alabet sabiyen ba para palpoton laki Kiristo.) 7 Ayaw din komo sabiyen, Tawa da batay paraoy sa kalaleman wala toko? (da alabet sabiyen para garwen laki Kiristo ibat sa mga nangatay). 8 Ngani tiya da konin nagsabi amba, Bali te sa komo da tokawanan Sa komo bibi da- sa komo poso. Naba:a ngani. (Naba da tokawanan para sa mag-isarig ag yamen nagpangadar.) 9 No batay sinistigo komo bibi amba laki Hisos da Panginoon, no kawo batay mag-isarig boo poso amba iya ba biniyag:gakay Diyos, ba kawo batay naribri. 10 Panawen no mag-isarig da iraya sa konin poso, iya ba pinakan kataldengan; no magsistigo da konin bibi ba iya ba nagkaribri. 11 Nagsabi Diyos sa Banal ka Kasoratan amba, Nawed batay asidaan da iya mag-isarig sa naay. 12 Sa ropangan Diyos ba wala kaRomahan kayno Diw kayno Nawed Diw. Sai ngani da Panginoon boo iraya. Iya da magtaboy konin rongaw sa boo mag-aringi sa konin. 13 Panawen nagsabi Banal ka Kasoratan amba, Batay naribri da iya mag-aringi sa ngaran Panginoon. 14 Ngani omaning batay aringian mga iraya da nawed kora nagsarigan? Omaning kora batay mag-isarig no wala dapo kora nagkaarngeyan para sa konin? Omaning kay abaya kora magpakarngey no wala magpangadar? 15 Omaning kay abaya mangadar da tawa man no nawed iya nagpaparaoy? Toltol sa nagkasorat amba, Makaangas no akitan rateng da magtonton Pirmida ka Barita! 16 Ngani nawed boo mga Diw ba magpaniwala sa Pirmida ka Barita, makay ag sinabi laki Isayas amba, Panginoon, tawa da maniwala sa yamen sinabi? 17 Kaya da pag-isarig ba bokar sa magpakarngey; abaya ngani iya magpakarngey no maki magpangadar para sa laki Kiristo. 18 Ngani da naay tanong ba nawed dia kapakarngey da mga Diw? Kapakarngey ngani- kora. Panawen nagsabi tokawanan Diyos amba, Rateng sa boo poro da sinabi mga tagapangadar Da kora mga tokawanan ba karateng:nga sa tangrawan paranawan. Naba:a ngani. 19 Tiya dapo da naay sai ka tanong: Nawed dia kamatang naba da lasyon Israil? Pag monaan dapo ba sinorat:ta laki Moysis da sabi Diyos amba, Koyo naay batay pinaamag sa mga iraya nawed kay sai ka lasyon. Koyo batay naay pinabais laban sa sai ka lasyon tolingag. 20 Lalo gidte maeyat da remrem laki Isayas pag konin sinabi amba, Ako akitan mga iraya nawed mangagsarak sa naay. Ako napaban-aw sa mga iraya nawed magtanong no saan ako. 21 Ngani para sa lasyon Israil sinabi din Diyos amba, Sa boo aldaw, ako magyakag sa sai ka lasyon etean da- anlalaban. Naba:a ngani.
1 Kaya tiya da naay tanong: Sinikway dia Diyos da konin kairayaan? Nawed! Ako din ba sai sa lasyon Israil, ibat sa kaapoan laki Abraham da- kabilang sa andana laki Binhamin. 2 Nawed sinikway Diyos da konin kairayaan pag sa monaan dapo ba konin:nani hinidang. Nawed mana koyo amatangan da nagsabi Banal ka Kasoratan para sa laki Iliyas? Iya mag-aringi sa Diyos panawen sa nagpanawen lasyon Israil 3 amba, Panginoon, kora binono da komo mga tagabarita, kora rinanggas da komo mga arengan pagsambahan. Ako ngani da natra, kora dapo din alabet ako kora bonoon. 4 Ngani nakay da tebag Diyos sa konin? Amba da tebag, Ako temra para sa naay sadiri pito ka ribo ka lalaki pag nawed tang somamba sa nawed amba Diyos nag-awit Baal. 5 Amba kay din mona, maki dapo tera sai ka eray mga hinidang Diyos panawen sa konin kapiyaanan remrem. 6 Kora konin ngani- hinidang nawed panawen sa kora mga nagpanawen no nawed ba panawen sa konin kapiyaanan remrem, panawen no sa mga nagpanawen iraya, nawed:dani abaya sabiyen amba tiya ba sa kapiyaanan remrem Diyos. 7 Nakay mona? Nawed akitan lasyon Israil da kora nagsarak. Panawen etean da mga kaosonan sa kora, da mga hinidang ngani da kaban-aw tiya, 8 makay ag nagsabi Banal ka Kasoratan amba, Tinaboyan Diyos da mga iraya tiya pag podol ka remrem, Da kora mata ba nawed kaban-aw, da kora talinga ba nawed kakarngey, anggan sa mga odas tiya. 9 Nagsabi din laki Dabid amba, Piya dapo disin no makay sai ka parkaya disin da kora kasayahan para kora abel, para kora nalabo da- aratengan padosa. 10 Nakolabo:wa disin da kora mga mata para kora nawed:dani kaban-aw da- naboklong:nga kora sa kahidapan anggan biyagan. Naba:a ngani. 11 Alabet dia sabiyen ba panawen nasongko da kairayaan lasyon Israil ba toloy:ya iya natwang? Nawed! Ngani panawen sa kora nasongko panawen sa kora kaetean ba rateng sa mga Nawed Diw da karibriyan, para sa makay tiya ba amagan da mga Diw sa mga Nawed Diw. 12 Ngani no da maglaban mga Diw ba tomaboy lakol ka parongaw sa boo iraya sa paranawan, da- da kora kasidaan ba lakol ka parongaw sa mga Nawed Diw, piya:a gayed dapo no kora boo mamaoli:akay! 13 Tiya kay da naay tay sinabi sa koyo, mga Nawed Diw. Panawen ako da sai ka pinili sogoan sa mga Nawed Diw, magalang naay nagpanawen da naay panawenen 14 para amagan disin da naay kalasyon, da- sa makay naba abaya naribri da kalaati sa kora. 15 Sa sinikway Diyos da mga Diw ba pinasai:yakay sa Diyos da mga iraya sa paranawan, kaya no tinabang:ngakay Diyos da mga Diw ba makay din nabiyag ibat sa mga nangatay. 16 No da monaan pinisang tinapay ba tinaboy sa Diyos, pag boo tinapay ba sa Diyos din. No tinaboy sa Diyos da wakat sai ka poon kayo, tinaboy:ya din sa Diyos da mga sanga. 17 No tiniglo da kalaati ka sanga poon olibo gidte, da- kawo sai ka sanga pangolibowen ba pinaikapet sa tinigloan pag sanga olibo gidte, para kaeray din sa pater ibat sa wakat, 18 nawed abaya kawo magpalawlaw sa mga sanga gidte. Komo remremen amba nawed kawo da magpabiyag sa wakat no nawed ba da wakat da magpabiyag sa komo. 19 Komo kay tay sinabi amba, Tiniglo Diyos da mga sanga para ako ba abaya paikapeten. 20 Totoo kay naba. Kora tiniglo Diyos panawen sa nawed kora mag-isarig, ngani kawo kay ba pinaikapet panawen ngani sa kawo mag-isarig sa konin. Kaya ayaw kawo magpalawlaw, no nawed ba kawo ba aliman. 21 Panawen no da saper ba nawed pinanghinayangan Diyos, kawo din ba nawed konin batay pinanghinayangan. 22 Towa tamo kaban-aw pag kapiyaanan Diyos da- konin kahigpitan. Iya mahigpit sa mga nawed mag-isarig sa konin, ngani iya ba piya sa komo ag boo odas magpamirmi sa konin kapiyaanan. No nawed amba, kawo kay din batay pintol. 23 Da mga Diw ba abaya:akay paikapeten sa poon no kora nawed:da batay toloy sa nawed mag-isarig, panawen maki kapangyadihan da Diyos para kora ba paikapeten:nakay sa poon. 24 No kawo ag sai ka sanga pangolibowen ba pinaikapet sa poon olibo gidte, kayno nawed amba da layen nagpanawen lalo dapo piya no pag sanga olibo gidte ba pinaikapet sa konin gidte poon! 25 Mga arian sa laki Hisos, maki sai ka katotohanan mona ngani amatangan. Naba ba naay alabet koyo amatangan para koyo nawed batay magpalawlaw sa koyo sadiri. Da kadaetan lasyon Israil ba sa mga odas tiya, nawed anggan kaagoton no nawed anggan ngani kapabali sa Diyos da boo bilang mga Nawed Diw. 26 Sa makay naba ba batay lingkat da boo lasyon Israil, toltol sa nagkasorat amba, Da Tagalekat ba batay rateng ibat sa poro Sion, konin batay binaraw da kadaetan sa kaapoan koyay Hakob. 27 Naba da batay naay kasaiyan sa kora no naay:yani inalis da kora mga kadaetan. Naba:a ngani. 28 No magremrem sa sinikway mga Diw da Pirmida ka Barita ba kora kalaban:nani Diyos, para koyo ag mga Nawed Diw ba katabang sa Barita. Ngani no magremrem sa maghidang da Diyos, da mga Diw ba konin dapo din nagpalayaw, panawen sa pangako Diyos sa kora mga pangapoan. 29 Panawen nawed Roma:akay da remrem Diyos para sa konin mga taboy da- sa konin pili. 30 Ag monaan ba koyo mga Nawed Diw ba masowayen sa Diyos, ngani mona ba koyo kinayawtean Diyos panawen sa magsoway da mga Diw. 31 Amba kay din, mona ba kora ba masowayen sa Diyos para, mona ag koyo ba kinayawtean Diyos ba kora ba batay din kinayawtean Diyos. 32 Panawen pinabayaan Diyos da boo iraya ba tagoanggat kora kadaetan para konin paban-awen sa kora boo konin kayawtean. 33 Sagana gayed da kayawtean Diyos! Nawed aratengan remrem da konin kadonongan da- kaamatangan da- nawed akayanan remremen da konin hosga da- pakana! Toltol sa nagkasorat amba, 34 Tawa da kamatang remrem Panginoon, tawa da madonong mag-ayo sa konin? 35 Tawa da kataboy nakayman sa Diyos para kailangan konin paolien? Naba:a ngani. 36 Panawen ibat sa konin, da- panawen sa konin da- para sa konin da boo nakayman. Sa konin da kalakolan anggan kadomaen. Amba:a ngani-.
1 Kaya ngani-, mga arian sa laki Hisos, panawen sa lakol ka kayawtean Diyos sa tamo, ako mag-aringi sa koyo amba, Koyo taboyon koyo sadiri sa Diyos, sai ka taboy sa katayan ngani biyagan dapo hinanda sa panawen Diyos da- magpaangas sa konin. Naba gidte da bagay ka magsamba sa Diyos. 2 Koyo ayaw mag-ompormi sa ogali mga iraya makaparanawan. No nawed ba koyo bayaan da Diyos mamanawen sa koyo pagkairaya da- magtaboy sa koyo bayo:wakay ka remrem, bayo:wakay ka maras, para koyo amatangan no nakay da alabet Diyos-no nakay da piya da- magpaangas sa konin da- sibay gidte. 3 Panawen sa taboy Diyos sa naay, naay nagsabi sa tayma sai sa koyo amba, Koyo ayaw magremrem magpalabi sa kailangan ngani koyo remremen para sa sadiri, no nawed ba koyo gidte remremen da koyo gidte biyag, sa kasokatan pag-isarig tinaboy Diyos sa tayma sai sa koyo. 4 Kahalimbawa, naboo maoson ka eray da sai ka lawas, nawed pariho da panawen tayma sai ka eray lawas. 5 Amba kay din maoson tamo ngani nagkaboo sa sai ngani ka lawas laki Kiristo, da- tayma sai ba eray anggat sa sai-sai. 6 Panawen tamo tinaboyan Diyos Roma-Roma ka kalasi taboy toltol sa konin kapiyaanan remrem sa tamo, tamo gamiten da mga taboy naba. No tamo ba pinakan pag kaya magbarita ibat sa Diyos ba tamo baritaen sa kasokatan tamo pag-isarig, 7 no da kaya tinaboy ba magpamanawen para sa mga arian ba tamo magpamanawen para sa kora. Da iya tomabang kaya magtodo ba iya magtodo 8 da- da iya tomabang kaya magpangadaran ba magpangadaran. No iya tomabang kaya magpangeray ba iya mangeray maki gidte kaangasan, no iya tomabang kaya pamoonan ba iya mamoonan sa boo sikap. No iya tomabang kaya magtolong sa mga mahidap, iya magtolong maki kaangasan. 9 Kailangan totoo da koyo palayaw. Koyo pamaisan da daet, alabeten gidte da piya. 10 Koyo magpalayawan makay talkakaan gayed, koyo magpaylabiyan sa maggalang sa sai-sai. 11 Koyo ayaw mga latod sa magpamanawen, boo kaya koyo magpamanawen para sa Panginoon. 12 Koyo layen angasan panawen koyo maki nagsarigan, koyo magtiyaga sa koyo kahidapan, da- layen magdarangin. 13 Koyo magtolong sa mga arian sa laki Hisos maki kailangan da- koyo tabangen mga iraya ibat sa adayo. 14 Koyo daranginen amba parongawan kay da mga magpahidap sa koyo, parongawan da- ayaw sompaen. 15 Koyo angasan anggat sa nagkaangasan, koyo magpanangis anggat sa mga magpanangis. 16 Koyo magkasai sa nagremrem. Da koyo remrem ba ayaw sata sa mga nakayman kapalawlawan no nawed ba nakayman maki kaababaan. Koyo ayaw remremen da koyo sadiri ba madonong gidte. 17 Koyo ayaw gantihen daet da daet. Koyo sikapen mamiyag mataldeng sa nagkaamatangan boo iraya. 18 No abaya anggan koyo akayanan ba koyo mamiyag maki kasaiyan sa boo iraya. 19 Mga nagpalayaw, koyo ayaw magganti, koyo pabayaan da Diyos da magganti. Panawen nagkasorat amba, Sa naay da magganti. Ako da batay gomanti, sinabi Panginoon. 20 No nawed ba, no da maglaban sa komo ba nagbayog ba komo pakanen, no iya makainem ba komo painemen; sa makay naba, komo batay napaakayaan:na gidte sa konin sadiri. 21 Kawo ayaw padaet sa daet, no nawed ba komo daegen da daet sa piya ka panawen.
1 Da boo iraya ba kailangan pasakop sa mga poon maki atatas ka kapangyadihan. Panawen wala atatas ka kapangyadihan no nawed ba ibat sa Diyos da- da mga maki atatas ka kapangyadihan ba pinalagay Diyos. 2 Kaya ngani-, da iya maglaban sa maki atatas ka kapangyadihan ba maglaban sa mga hinanda Diyos, da- iya batay tomabang padosa sa sadiri. 3 Da mga poon da kailangan kalimanan mga magpamanawen daet, ngani kora nawed kailangan kalimanan mga magpamanawen piya. Kawo dia alabet nawed aliman sa mga poon? Kawo mamanawen piya da- kawo batay kora pinodi. 4 Kora ba mga tagapamanawen Diyos para sa komo kapiyaanan. Ngani kawo aliman no kawo magpamanawen daet panawen kora ba maki gidte kapangyadihan magpadosa sa komo. Kora mga tagapamanawen Diyos da- batay magpadosa sa mga magpamanawen daet. 5 Kaya ngani-, kailangan pasakop sa mga poon, nawed ngani para kaalas sa bais Diyos, no nawed panawen koyo amatangan sa koyo remrem naba da mataldeng. 6 Naba din da dahilan kaytang koyo magbayad bohis. Da mga poon maki atatas ka kapangyadihan ba mga tagapamanawen Diyos. Kora da magpamahala sa mga nakayman tiya. 7 Koyo taboyon sa tayma sai da kailangan sa konin-magbayad bohis sa kailangan bohisan, maggalang sa kailangan galangen, aliman sa kailangan kalimanan, palakolon da kailangan palakolon. 8 Koyo ayaw mangotang nakayman sa tawa man, no nawed ba sa magpalayawan sa sai-sai, panawen da iya magpalayaw sa kapowa ba kapanawen:nani Bilin tinaboy sa laki Moysis. 9 Da mga sogo makay tiya, Kawo ayaw magpangalonya, kawo ayaw magbono, kawo ayaw magpanakaw, kawo ayaw amagan, da- kayno nakay dapo ka sogo makay pag mga naba ba saklaw dapo pag Bilin tiya amba, Komo palayawen da komo kapowa makay din pag komo palayaw sa komo sadiri. Naba:a ngani. 10 Da iya magpalayaw ba nawed magpamanawen daet sa tawa man, kaya da palayaw ba magtoltol sa boo Bilin tinaboy sa laki Moysis. 11 Kailangan koyo panawenen tiya panawen koyo amatangan no nakay:ya da odas mona. Odas:sani para koyo apolawan sa magkalek, panawen da odas tamo karibriyan ba lalo dapo bali:yani sa odas mona sa monaan tamo mag-isarig sa laki Hisos. 12 Da madlem ba magpaaram:mani da- bali:ya da nagkamapawa. Tamo:wa benglayen da boo mga panawen kadeleman, tamo garwen da panlaban para handa maglaban no naboka:ani. 13 Tamo mamiyag mataldeng makay pag sa aldaw, ayaw paggamiten da odas sa maglasing da- wala sanggahan ka garawan, ayaw magpasawa sa alabet lawas da- kakayaan, sa maglaban da- kaamagan. 14 Koyo soolon da Panginoon Hisos Kiristo, ayaw pag daet ka alabet lawas da koyo toltolon para pakanen kaangasan da koyo sadiri lawas.
1 Koyo tabangen da mahina sa mag-isarig makay din talkaka, da- ayaw pagtomangen da konin nagkaaremreman. 2 Maki magpaniwala amba abaya iya mamangan kayno nakay, maki din mahina da pag-isarig ba golay ngani da nagkain. 3 Ayaw pagpolaan pag magpamangan kayno nakay sa magpamangan ngani golay, da- ayaw kay paghosayen pag magpamangan ngani golay da magpamangan kayno nakay, panawen iya ba tinabang din Diyos. 4 Tawa kay kawo para maghosay sa tagoanggat Roma? Laki Hisos, ag konin nagpanawenan ba iya ngani da batay kasabi no iya ba bagay no nawed. Da Panginoon da maki kapangyadihan magpaeyat sa konin. 5 Maki magremrem amba sai ka aldaw ba lalo dapo piya sa Roma ka aldaw, maki kay magremrem amba pariho da tayma aldaw. Paonayen da remrem tayma sai sa konin pakana para sa nakayman naba. 6 Da magpangilin sa sai ka pinili aldaw ba magpangilin para ngani- sa Panginoon. Da mamangan kayno nakay ba mamangan naba para ngani- sa Panginoon, panawen iya magpasalamat sa Diyos para sa pamangnen; da iya kay nawed mamangan kayno nakay ba magpamangan makay naba para ngani- sa Panginoon da- iya magpasalamat kay din sa Diyos. 7 Wala tawa man sa tamo da nagkabiyag para sa konin sadiri. Amba kay din, wala tawa man sa tamo da nagkatay para sa konin sadiri. 8 No tamo nagkabiyag ba tamo nagkabiyag para sa Panginoon, no tamo nagkatay ba tamo nagkatay para sa Panginoon. Kaya ngani-, sa tamo nabiyag da- natay man ba tamo ba sa Panginoon. 9 Panawen laki Kiristo ba natay da- nabiyag:gakay para iya da Panginoon mga nangatay da- mga biyagan. 10 Ngani kawo pag magpamangan kayno nakay, kaytang komo naghosay da komo arian? Da- kawo kay pag magpamangan ngani golay, kaytang komo nagpolaan da komo arian? Tamo boo ba batay paropang sa hosayan Diyos. 11 Panawen sinorat sa Banal ka Kasoratan amba, Da Panginoon ba amba, Ako da Diyos gidte biyagan, Naay nagsabi gidte amba da boo toor ba batay lomohod sa naay ropangan, Da boo dila ba batay magpodi sa Diyos. Naba:a ngani. 12 Kaya da tayma sai sa tamo ba batay gidte manoltol sa Diyos boo konin pinanawen da- pag nawed konin pinanawen. 13 Ayaw:wa tamo maghosay sa sai-sai. No nawed ba tamo remremen amba ayaw tamo magpanawen kasongko e magdegse sa daet sa sai ka arian. 14 Ako sai:yani sa Panginoon Hisos, kaya naay apiho wala pamangnen nag-ayawan, ngani no magremrem da tawa man amba nag-ayawan da sai ka pamangnen ba naba ba nag-ayawan ngani- sa konin. 15 No panawen sa komo nagpamangan ba askitan da remrem komo arian ba nawed:dani sa palayaw da komo nagpanawen. Laki Kiristo ba natay para sa konin, kaya ayaw iya komo pagpadaeten panawen sa komo pamangnen. 16 Da sa komo remrem ba piya ba ayaw komo pabayaan polaan Roma. 17 Panawen da maghadi da Diyos sa iraya ba nawed sa mga nagpamangan da- sa mga mag-inem, no nawed ba sa iya ba pinataldeng, pinasai da- kinaangasan; da boo mga naba ba taboy Ispirito Banal. 18 Da magpamanawen makay naba para sa laki Kiristo ba magpaangas sa Diyos da- maggalang sa konin da mga iraya. 19 Kaya, layen tamo magsikap panawenen pag magbokar kaginhawahan, da- magtolong sa kaonayan sa sai-sai. 20 Panawen sa koyo pamangnen ayaw koyo pagpadaeten da pinanawen Diyos. Wala pamangnen nag-ayawan, da daet ba no kawo magpamanawen nakayman daet kasongko sa Roma panawen sa komo nagpamangan. 21 Piya da nawed mamangan ablasen e minem alak e magpamanawen nakayman batay kasongko sa daet sa komo arian. 22 Kawo:wa ngani da- da Diyos ba bagay kamatang sa komo nagpaniwalaan para sa nakayman tiya. No pinanawen sai ka iraya da sa konin remrem ba piya, da- nawed nagpaaraman konin ispirito amba daet konin pinanawen, ba angasan pag iraya naba. 23 Ngani da tawa man magpamangan da- sa konin remrem ba mag-alingangaan ba naghosay Diyos panawen nawed toltol sa konin pag-isarig da konin nagpanawen. Kadaetan da boo panawen nawed pinanawen toltol sa mag-isarig.
1 Tamo pag mga maeyat sa pag-isarig ba kailangan tamo agwantahen da mga mahina sa pag-isarig, da- ayaw da sadiri kasyagan da remremen. 2 Tamo pakanen kasyagan da tamo kapowa para batay konin kapiyaanan, para omeyat da konin pag-isarig. 3 Kayno laki Kiristo ba nawed rinemrem da konin sadiri kasyagan no nawed toltol sa nagkasorat amba, Sa kora magpola sa komo ba ako da pinolaan. 4 Da nakayman sinorat sa mga Banal ka Kasoratan pag mga aldaw kadalan ba para tamo kamatang, panawen pag tamo nagbasa da mga adar tamo nagkaakitan sa mga Kasoratan ba da mga naba ba magpaonay sa tamo, magpaeyat sa tamo remrem da- nagkamaki sarig. 5 Da naay darangin sa Diyos, pag magpaonay da- magpaeyat sa remrem ba amba, Taboyon ngani- Diyos da kaya para koyo mamiyag maki pakianggat sa sai-sai da- sa kasaiyan sa laki Kiristo Hisos, 6 para koyo magpalsabayan podiyen da Diyos da- Apang tam Panginoon Hisos Kiristo. 7 No omaning laki Kiristo ba tomabang sa koyo maki kaangasan amba kay din koyo panawenen sa sai-sai para palakolon mga iraya da Diyos. 8 Naay nagsabi sa koyo amba, Laki Kiristo ba batang tagapamanawen mga Diw para paban-awen piya gayed da Diyos da- konin nagpanawen da konin mga pangako sa mga pangapoan 9 da- para kay da mga Nawed Diw ba magpodi sa Diyos panawen sa konin kayawtean. Toltol sa nagsabi Kasoratan amba, Kawo naay batay pinodi sa ropangan mga Nawed Diw, Da- naay batay inigway da komo ngaran. Naba:a ngani. 10 Sinabi dapo mga Kasoratan amba, Koyo angasan, koyo mga Nawed Diw, pal-anggat konin kairayaan! Naba:a ngani. 11 Da- sinabi dapo din amba, Koyo boo mga Nawed Diw, koyo podiyen da Panginoon. Koyo ag boo mga iraya sa paranawan ba iya ba koyo podiyen! Naba:a ngani. 12 Sa mga Kasoratan din laki Isayas amba, Batay bait da sai sa kaapoan laki Hisi, da batay pinatindeg para maghadi sa mga Nawed Diw. Iya da kora batay sinarigan. Naba:a ngani. 13 Da Diyos pag magtaboy sa tamo pag nag-asahan, iya da magtaboy ngani- sa koyo boo kaangasan da- kaginhawahan sa koyo mag-isarig, para koyo mag-asa gidte panawen sa kapangyadihan Ispirito Banal. 14 Mga arian sa laki Hisos, ako magpaniwala gidte amba koyo ba kapno kapiyaanan, sibay gidte da koyo amatangan da- madonong magsabi para magparemrem sa sai-sai. 15 Amba man, sa sorat tiya ba ako wala hadang paremremen sa koyo para sa mga nawed maoson ka nakayman. Naay pinanawen naba panawen ako pinarongawan Diyos 16 para tagapamanawen laki Kiristo Hisos makay pag koyay magpamanawen sa balay Diyos para sa mga Nawed Diw. Naay nagpangadar sa kora da Pirmida ka Barita Diyos, para kora sai ka taboy kaangas-angas sa Diyos, panawen kora ba hinidang Ispirito Banal para sa Diyos. 17 Kaya maki kataldengan ako magyabang sa naay pinanawen para sa Diyos panawen ako maki kasaiyan sa laki Kiristo Hisos. 18 Panawen da naay nagtodyo wala hadang ba da pinanawen ngani laki Kiristo para aranggot da mga Nawed Diw sa Diyos. Konin ginamit da naay tokawanan da- panawen, 19 sa kapangyadihan mga tanda da- katakataka, da- sa kapangyadihan Ispirito Banal. Kaya sa boo kotanan ibat sa goraan lakol Hirosalim anggan sa poro Iliriya, naay:yani pinangadar gidte boo da Pirmida ka Barita para sa laki Kiristo. 20 Da layen naay alabet ba pangadaren da Pirmida ka Barita sa mga poro nawed dapo kora arngeyan da para sa laki Kiristo, para ako nawed:dani mangadar sa pinangadaran:nani Roma, 21 toltol sa nagkasorat amba, Batay kaban-aw da nawed dapo abaritaan para sa konin. Batay kamatang da nawed dapo karngey para sa konin. 22 Naba da dahilan kaytang layen ako nawed kaparaoy sa koyo. 23 Ngani mona ba yadi:ani da naay panawen sa mga poro tiya, da- panawen maagot:tani naay gidte nag-alabet paraoy saba sa koyo, 24 naay sarig ba batay tamo malban-aw no ako domalan magparaoy sa Ispanya. No tomabang:nga kasyagan kayno ako ba nawed te maagot saba sa koyo ba da naay kay din nagsarig ba ako koyo batay tinolongan para ako katoloy magkadangan anggan sa Ispanya. 25 Ngani mona, ako ba batay dapo paraoy sa goraan lakol Hirosalim para babaen da tolong sa mga kaarianan pag mga hinidang Diyos sata. 26 Panawen kaangasan ag mga mag-isarig, taga Masidonya da- taga Akaya magpababa tolong para sa mga mahidap ka kaarianan sa goraan Hirosalim. 27 Kora angasan tomaboy tolong, da- bagay kay ngani- kora gaw-en naba. Panawen da mga Nawed Diw ba kaeray din sa mga rongaw mga Diw para sa ispirito ba kailangan gidte kora tolongan da mga Diw sa magtaboy sa kora pag mga rongaw para sa lawas. 28 No ako kababa:ani tolong sa mga kaarianan sa laki Hisos sa Hirosalim ba ako batay dapo domaraw saba sa koyo, bayo gira ako paraoy sa Ispanya. 29 Ako magpaniwala sa odas ako paraoy saba ba ako batay bait ako kapno gidte parongaw ibat sa laki Kiristo. 30 Naay nag-aringi sa koyo, mga arian sa laki Hisos, para ngani- sa tamo Panginoon Hisos Kiristo da- sa palayaw ibat sa Ispirito Banal, koyo kay mal-anggatan sa naay sa darangin. 31 Tamo:wa gidte magdarangin para sa naay para ako karibri sa mga nawed mag-isarig sa Hodiya, da- para da naay nagbaba tolong sa Hirosalim ba tabangen kay mga kaarianan sata. 32 No amba, sa alabet Diyos ba ako angasan batay karateng saba sa koyo da- batay kapahinga. 33 Sa koyo boo ngani- da Diyos pag ibatan tamo kaginhawahan. Amba:a ngani-.
1 Naay nagpakilala sa koyo yamen arian bayi Pibi, sai ka magpamanawen sa rimponan mga mag-isarig sa goraan Sinkiriya. 2 Iya koyo tabangen para ngani- sa Panginoon, makay pag kailangan panawenen sa mga hinanda Diyos. Iya koyo tolongan sa nakayman konin batay kailangan, panawen maoson:na konin tinolongan da- ako:wa da sai. 3 Koyo kay tanongon para sa naay da talsawa Prisila da- Akila, naay mga pal-anggat sa magpamanawen para sa laki Kiristo Hisos. 4 Sidawa pinaen da sidawa biyag bali te sa katayan para naribri da naay biyag, da- nawed ngani ako da magpasalamat no nawed anggan da boo mga rimponan mga mag-isarig mga Nawed Diw. 5 Koyo kay din tanongon para sa naay da rimponan mga mag-isarig pag magrimpon sa balay talsawa tiya. Koyo kay din tanongon para sa naay da naay nagpalayaw laki Ipinito, da monaan mag-isarig sa laki Kiristo sa porobinsiya Asiya, 6 da- bayi Mariya, pag pomanawen lakol gidte para sa koyo. 7 Koyo din tanongon para sa naay da naay mga kalasyon sidawa laki Adroniko da- bayi Honya, pag naay din pal-anggat sa pirisohan. Sidawa ba kilala gidte pinili sogoan. Monaan dapo sa naay sidawa tomabang sa laki Kiristo. 8 Koyo kay tanongon para sa naay laki Ampliato pag naay nagpalayaw sa Panginoon, 9 anggan laki Orbano pag tamo pal-anggat sa magpamanawen para sa laki Kiristo, da- naay nagpalayaw laki Istakis, 10 amba din laki Apilis pag porbado da konin pag-isarig sa laki Kiristo. Koyo kay din tanongon para sa naay da mag-anak kora Aristobolo, 11 naay kalasyon laki Hirodion, da- da mga arian sa Panginoon sa mag-anak kora Narsiso. 12 Koyo kay tanongon para sa naay kobayi Tiripina da- Tiriposa ag masipag ka tagapamanawen Panginoon, amba kay din bayi Pirsida pag naay nagpalayaw pag maoson:nani da konin pinanawen para sa Panginoon, 13 da- laki Ropo pag piya gidte ka tagapamanawen Panginoon, da- konin adang pag makay:ya din naay adang. 14 Koyo kay din tanongon para sa naay manlaki Asinkirito, Piligonti, Hirmas, da- da boo mga arian sa laki Hisos pag kora pal-anggat, 15 da- laki Pilogogo, bayi Holya, laki Niryo da- konin arian babayi, amba kay din laki Olimpas da- boo mga arian sa laki Hisos pag kora pal-anggat. 16 Koyo kay magtanongan makay talkakaan sa laki Kiristo. Koyo nagtanong boo mga rimponan mga mag-isarig sa laki Kiristo. 17 Naay nag-aringi sa koyo, mga arian sa laki Hisos, koyo magdahan sa mga magmidsa magkaeray-eray da- magsida sa pag-isarig mga iraya da magpaawak sa mga todo koyo tinabang. Koyo omalas sa kora. 18 Pag makay naba ka iraya ba nawed magpamanawen para sa laki Kiristo tam Panginoon, no nawed ba da kora nagpanawenan ba kora sadiri boyon, da- sa kora nagpaganda gidte da kora tokawanan ba kora nagdaya da mga iraya mahina da remrem. 19 Nabarita:ani sa boo iraya da koyo magpaniwala sa laki Kiristo, da- tiya da naay nagkaangasan. Ngani da naay alabet ba koyo kamatangen sa mga piya ka nakayman, da- nawed kamatang sa mga daet ka nakayman. 20 Da Diyos da magtaboy kaginhawahan ba nawed:da batay maagot da- konin batay dinaeg laki Satanas da- iya batay pinasangato sa koyo kapangyadihan. Sa koyo:wa ngani- da parongaw tamo Panginoon Hisos Kiristo. 21 Koyo ba nagtanong laki Timotiyo naay kamamanawen, da- kora Losyo, Hason da- Sosipatro naay kalasyon. 22 (Ako laki Tirsiyo da somorat tiya pag sorat para sa laki Pablo ba magtanong din sa koyo sa ngaran Panginoon.) 23 Koyo ba nagtanong laki Gayo, pag magpapamataw sa naay sa konin bala-sa konin balay magrimpon da boo mag-isarig sa laki Hisos. Koyo ba nagtanong din laki Irasto pag mag-alaga kwarta goraan da- laki Kwarto ag tamo arian sa laki Hisos. 25 Tamo podiyen da Diyos. Iya ba kapaonay sa koyo pag-isarig toltol sa Pirmida ka Barita para sa laki Kiristo Hisos, pag naay nagpangadar sa koyo da- toltol sa katotohanan pag nawed amatangan pag maoson ka dag-on kadalan ngani pag mona ba amatangan. Da katotohanan naba ba Pinaban-Aw sa mga sinorat mga tagabarita ibat sa Diyos da- panawen sa sogo Diyos wala arasan ba nagpaban-aw mona sa mga lasyon para kora ba manarig da- maniwala sa laki Kiristo. 27 Kaya sa Diyos ag sai ngani, da- madonong sa boo-sa konin ba taboyon ngani- da kapodiyan anggan kaagoton man panawen sa laki Hisos Kiristo! Amba:a ngani-.
1 Ako laki Pablo, pinili Diyos toltol sa konin alabet para ako pinili sogoan laki Kiristo Hisos da- tamo arian laki Sostinis da omanggat sa naay sa 2 ako magsorat sa koyo sa rimponan mga mag-isarig sa goraan Korinto-sa mga hinidang Diyos para konin:nani panawen sa kora kasaiyan sa laki Kiristo Hisos, da- anggat sa mga hinidang Diyos sa boo poro, pag magdarangin sa ngaran Panginoon Hisos Kiristo pag kora Panginoon da- tamo din Panginoon. 3 Sa koyo:wa ngani- da parongaw da- kaginhawahan ibat sa Diyos pag tamo Apang da- sa Panginoon Hisos Kiristo. 4 Ako ba layen magpasalamat sa naay Diyos panawen sa konin mga parongaw sa koyo panawen sa laki Kiristo Hisos. 5 Koyo ba yomaman sa boo nakayman, kayno sa boo tokawanan da- sa boo kaamatangan, panawen sa koyo kasaiyan sa laki Kiristo Hisos. 6 Da katotohanan yamen pinangadar para sa laki Kiristo ba mapawa nagkaakitan sa koyo 7 anggan nawed korang sa koyo da nakayman taboy para sa ispirito, anggan batay:yakay towa da tamo Panginoon Hisos Kiristo ag tamo nagpanyaan. 8 Tamo konin batay pinaonay anggan sa arasan para tamo ba akitan boo gayed sa aldaw batay:yakay towa tamo Panginoon Hisos Kiristo. 9 Da Diyos pag pomili sa tamo ba batay pinanawen da konin sabi para tamo sai:yani sa konin Onga laki Hisos Kiristo pag tamo Panginoon. 10 Mga arian sa laki Hisos, ako mag-aringi sa koyo sa ngaran tamo Panginoon Hisos Kiristo, koyo mag-kasai sa tokawanan, sa remrem da- sa maras, para nawed koyo magkaeray-eray. 11 Mga arian, binarita mga mag-anak Koloi sa naay amba koyo kono ba maki paltomangan. 12 Tiya da naay nagtodyo amba, Da sabi sai ba, Ako sa laki Pablo, amba kay din da sai, Ako sa laki Apolos. Maki kay Roma magsabi amba, Ako sa laki Sipas, da- maki dapo magsabi, Ako sa laki Kiristo. 13 Nagkaeray dia laki Kiristo? Laki Pablo dia da pinako sa kodos para sa koyo? Koyo dia ba binaotismohan sa sapa sa ngaran laki Pablo? 14 Ako magpasalamat sa Diyos amba ako wala binaotismohan sa sapa sa koyo no nawed kolaki Kirispo da- Gayo. 15 Kaya wala iraya batay kasabi amba koyo ba binaotismohan sa sapa sa naay ngaran. 16 (Naay nga mayam aremreman naay binaotismohan sa sapa da mag-anak Sotipanas. Poyida sa kora ba ako wala:a nagkaaremreman ba naay binaotismohan sa sapa.) 17 Panawen ako ba pinaparaoy laki Kiristo nawed para naay baotismohon sa sapa da mga iraya no nawed para mangadar Pirmida ka Barita. Naay ngani- pinangadar naba, ngani nawed sa mga tokawanan maki kadonongan makaparanawan, para sa makay naba ba nawed awal-an kaparosan da katayan laki Kiristo sa kodos. 18 Sa mga nagkaaomaning sa kadaetan da todo para sa katayan laki Kiristo sa kodos ba katolingagan, ngani sa tamo pag mga naglekat sa kadaetan pag todo naba ba kapangyadihan Diyos. 19 Panawen nagkasorat sa Banal ka Kasoratan amba, Naay batay sinida da kadonongan mga madonong, Da- naay batay winal-an kaparosan da kaamatangan mga kamatangen. Naba:a ngani. 20 Mona nakay da kaparosan mga madonong? Nakay da kaparosan mga kamatangen sa Bilin Diyos? Nakay da kaparosan mga matiwidan sa paranawan tiya? Pinaaram Diyos amba da kadonongan pag paranawan tiya ba katolingagan. 21 Panawen toltol sa kadonongan Diyos ba nawed konin rinogar iya ba akilalaan mga iraya sa kadonongan pag paranawan tiya, no nawed ba konin kinaangasan amba da mga mag-isarig sa konin ba ribriyen panawen sa Pirmida ka Barita pag yamen nagpangadar, ag sa maras mga iraya sa paranawan ba sai ka katolingagan. 22 Da mga Diw ba mag-ay-ay mga binagro makay tanda, kadonongan kay da nagsarak mga Girigo. 23 Ngani da yamen nagpangadar ba laki Kiristo pag pinako sa kodos-sai ka pakaskitan sa remrem mga Diw da- katolingagan sa mga Nawed Diw. 24 Ngani sa mga pinili Diyos, kayno Diw, kayno Girigo, da barita ba laki Kiristo da kapangyadihan da- kadonongan Diyos. 25 Panawen da tamo nagremrem amba katolingagan Diyos ba kadonongan labi dapo sa boo kadonongan iraya da- da tamo nagremrem amba kahinaan Diyos ba eyat labi dapo sa boo kaeyatan iraya. 26 Mga arian sa laki Kiristo, koyo remremen da koyo biyag pag koyo ba pinili Diyos. Pag odas naba, sa ban-aw paranawan ba nawed naw maoson sa koyo da madonong, da makapangyadihan e da kaongaan mga maki lakol ka kapangyadihan. 27 Ngani pinili Diyos da mga tolingag sa maras paranawan para pakayaen da mga madonong, konin pinili da mga mahina sa nagremrem mga iraya sa paranawan para pakayaen da mga maeyat. 28 Konin pinili da mga nagremrem taga paranawan amba wala koyinta, wala halaga da- wala kaparosan para walaen halaga da mga nagremrem mga taga paranawan amba mahalaga. 29 Kaya wala abaya magpalawlaw sa ban-aw Diyos. 30 Ngani ibat sa konin da tamo kasaiyan sa laki Kiristo Hisos pag pinanawen Diyos para iya tamo kadonongan. Panawen din sa laki Kiristo tamo ba pinakan kataldengan, tamo ba binanal da- rinibri Diyos. 31 Kaya ngani- makay pag nagsabi sa Banal ka Kasoratan amba, Da Panginoon da palakolon mga alabet magpalakol.
1 Mga arian, maraw ako paraoy saba, naay pinaaram sa koyo da mga katotohanan Diyos, ngani nawed sa mga alalem ka tokawanan e sa atatas ka kadonongan. 2 Naay gidte padisir ba amba wala ako batay pinangadar sa koyo no nawed ba laki Hisos Kiristo pag pinako sa kodos. 3 Ako mahina, aliman da- tartaroyan maraw ako paropang sa koyo. 4 Sa naay tokawanan da- sa naay pinangadar koyo nawed naay rinanggot sa naay nagpaganda irgohan maki kadonongan mga iraya, no nawed sa sistigo Ispirito Banal da- sa kapangyadihan Diyos. 5 Sa makay naba ba nawed sa kadonongan iraya no nawed ba sa kapangyadihan Diyos nagkasarig da koyo pag-isarig sa laki Kiristo. 6 Ngani sa mga maki:ya kamatang sa biyag sa ispirito ba kadonongan da yamen nagpangadar, ngani nawed kadonongan iraya sa paranawan tiya e kadonongan ibat sa mga maghadi sa paranawan tiya pag batay gidte nasida. 7 Da yamen nagtodyo ba da kadonongan ibat sa Diyos, pag kadonongan nagkatago sa iraya, bayo dapo konin rinarang pag paranawan, pag kadonongan naba ba konin hinanda para sa tamo kalakolan. 8 Kayno sai sa mga maghadi sa paranawan tiya ba wala maki kamatang sa kadonongan naba. No kora amatangan naba ba nawed disin kora pinako sa kodos da makapangyadihan Panginoon. 9 Makay tiya da nagsabi Banal ka Kasoratan amba, Nawed dapo nagkaakitan mata, kayno nagkaarngeyan talinga, Nawed dapo din semled sa remrem iraya Da hinanda Diyos para sa mga magpalayaw sa konin. Naba:a ngani. 10 Ngani naba ba Pinaban-Aw Diyos sa tamo, da Ispirito Banal da pomaban-aw naba. Nasayasak Ispirito Banal da boo nakayman anggan da kaalaleman kadonongan Diyos. 11 Wala maki kamatang sa nagremrem sai ka iraya no nawed konin sadiri ispirito. Amba kay din wala maki kamatang sa mga nagremrem Diyos no nawed ba da Ispirito Diyos. 12 Nawed da ispirito paranawan no nawed ba da Ispirito Diyos da tamo tinabang para tamo amatangan da mga parongaw tinaboy Diyos sa tamo. 13 Da yamen nagpapawa ba mga katotohanan para sa ispirito sa mga nagpamatawan Ispirito Banal, da yamen naggamit ba mga tokawanan tindo Ispirito Banal da- nawed mga tokawanan ibat sa kadonongan iraya. 14 Ngani da mga iraya nawed nagpamatawan Ispirito Banal ba dayo tomabang mga katotohanan ibat sa Ispirito Banal. Para sa kora ba katolingagan da mga naba da- nawed kora nagkaamatangan panawen da mga katotohanan para sa ispirito ba amatangan ngani sa tolong Ispirito Banal. 15 Da iraya nagpamatawan Ispirito Banal ba nagkaamatangan da kahalagahan tayma nakayman ngani iya nawed nagkaamatangan mga Roma iraya. 16 Makay tiya da nagkasabi sa Banal ka Kasoratan amba, Tawa da kamatang pag nagremrem Panginoon? Tawa da abaya mag-ayo sa Panginoon? Naba:a ngani. Ngani sa tamo:wani da nagremrem laki Kiristo.
1 Mga arian, pag koyo bayo te mag-isarig sa laki Kiristo koyo ba nawed naay atokawanan makay pag naay nagtokawanan sa mga iraya nagpamatawan Ispirito Banal. Kailangan koyo naay tokawanen makay mga iraya magpamiyag sa alabet lawas. 2 Koyo makay naay pinadodo, nawed naay pinakain pamangnen maskil panawen naba ba nawed dapo koyo akayanan. Da- anggan mona ba nawed dapo din koyo akayanan 3 panawen da alabet lawas da maghadi dapo sa koyo. Koyo maki dapo amagan da- paltomangan, da- naba da magpakilala amba koyo makaparanawan dapo da- magpamiyag sa alabet lawas. 4 Maraw nagsabi sai amba, Ako sa laki Pablo, da Roma amba, Ako sa laki Apolos, nawed ma tanda naba koyo ba magpamiyag dapo sa alabet lawas? 5 Panawen nakay da katongkolan laki Apolos? Da- nakay da naay katongkolan? Mga tagapamanawen ngani Diyos pag konin ginamit para koyo ba akayen sa pag-isarig sa laki Kiristo. Nagpanawen tayma sai sa kidawa da panawen pinapanawen Panginoon. 6 Ako da tomanem, laki Apolos da gomamas ngani da Diyos da pomalamba. 7 Da mahalaga ba nawed da magtanem, nawed din da maggamas no nawed ba da Diyos pag magpalamba ba iya da mahalaga. 8 Da magtanem da- da maggamas ba tanan tagapamanawen ngani da- tayma sai ba batay tinaboyan sibay sa konin katiyagaan. 9 Yamen boo ba magpaytolong sa panawen Diyos da- koyo da konin mga nagtanman. Koyo din da balay pinanawen Diyos. 10 Toltol sa taboy Diyos sa naay, ako da lombo mga arigi, makay sai ka piya ka tagalobo balay. Mga Roma kay ba toloy:yani magbayaw boo kasangkapan balay. Ngani kailangan madahan da tayma magbayaw. 11 Panawen wala:ani Roma ka arigi no nawed pag limbo:ani Diyos, naba ba laki Hisos Kiristo. 12 Maki batay magbayaw da kora ginamit ba makay mga ginto, pilak, kayno mga mahal ka bato, maki kay din batay magbayaw da kora ginamit ba makay kayo, padang kayno panggosadan. 13 Batay akilalaan da kalasi panawen tayma sai sa aldaw batay maghosay da Diyos. Panawen sa aldaw naba ba da apoy da batay pomorba da- batay pomaban-aw sa nakayman ka kalasi pinanawen tayma sai. 14 No da binayaw tawa man sa ngaway sarigan ba baywi dapo, da bomayaw ba batay tomabang taboy. 15 Ngani no naareng kay ba iya nawed batay tomabang taboy, amba man ba iya batay naribri, ngani makay iya ba iniyawan apoy. 16 Nawed ma koyo amatangan koyo ba balay Diyos da- koyo ba nagpamatawan konin Ispirito? 17 Batay sinida Diyos da magsida sa konin balay. Panawen banal da balay Diyos da- koyo pag balay naba. 18 Ayaw dayaen tawa man da konin sadiri. No maki magmaras amba iya ba madonong sa kadonongan paranawan tiya, kailangan iya ba tolingag para iya ba madonong:nga gidte. 19 Panawen da kadonongan paranawan tiya ba katolingagan sa ban-aw Diyos. Makay tiya da nagsabi Banal ka Kasoratan amba, Konin nag-abel da mga madonong sa kora din kabolangwaen. Naba:a ngani. 20 Amba kay din, Amatangan Panginoon amba da mga nagremrem mga madonong ba wala kaparosan. Naba:a ngani. 21 Kaya ayaw pagpalakolon tawa man da nagkaapanawen iraya panawen da boo ba sa koyo. 22 Kayno ako, kayno laki Apolos, da- kayno laki Sipas, kayno da paranawan tiya, kayno da biyag, kayno da katayan, kayno da sa mona da- kayno da sa batay rateng-da boo mga tiya ba koyo:wa ngani-. 23 Da- koyo ba sa laki Kiristo da- laki Kiristo kay ba sa Diyos.
1 Yamen ba mga tagapamanawen laki Kiristo da- inintirigahan mga katotohanan Diyos nawed dapo amatangan boo-amba da kailangan koyo maras sa yamen. 2 Da mga nag-intirigahan ba kailangan panawenen da nagpapanawen sa kora pag kora panginoon. 3 Wala nakayman sa naay da ako koyo hosayen, kayno ako hosayen nakayman hosayan iraya; ako ba nawed din maghosay sa naay sadiri. 4 Wala ako remrem pomanawen daet, ngani nawed naba da magtaboy kataldengan sa naay. Da Panginoon da maghosay sa naay. 5 Kaya ayaw tamo maghosay no nawed dapo odas, tamo magpanya sa rateng:ngakay da Panginoon. Batay konin binandira da mga nakayman pag mona ba nagkatago sa kadeleman da- batay Pinaban-Aw da mga lihim ka alabet tayma sai. Sa odas naba, tayma sai ba batay tomabang podi kailangan sa konin ibat sa Diyos. 6 Mga arian, para sa koyo kapakinabangan, kidawa laki Apolos da naay ginamit kahalimbawa para koyo amatangan da alabet sabiyen pag kasabiyan amba, Ayaw lomabi sa nagkasorat. Ayaw palakolon tawa man da sai da- polaan kay da Roma. 7 Nakay da komo kalabiyan sa Roma? Nawed ma da boo pag sa komo ba taboy Diyos? No amba, kaytang komo nagyabangan naba makay naba ba nawed taboy sa komo? 8 Koyo mayam ba asyagan:nani! Koyo mayam ba mayaman:nani! Koyo mayam ba maghadi:ani da- kidawa ba nawed koyo pinaanggat! Disin ba mga hadi:ani koyo para kidawa kay ba mga hadi:a din anggat sa koyo. 9 Panawen sa naay remrem, yamen mga pinili sogoan ba pinanawen Diyos para yamen da nawed kabagay sa boo mga iraya. Yamen da makay mga iraya hinosay sa katayan, mga nagpanoodan mga sa paranawan, naba ba mga anghil da- mga iraya. 10 Yamen ba mga tolingag para ngani- sa laki Kiristo, ngani koyo ba mga madonong para sa laki Kiristo. Yamen ba mga mahina, koyo ba mga maeyat. Yamen ba nagpolaan, koyo ba nagpalakol. 11 Anggan sa mga odas tiya, yamen ba nagbayog, makainem da- halos wala:a nagsool, Yamen ba nagpamaisan da- wala aolian. 12 Yamen magtiyaga para maki batay namangan. Yamen nagdarangin da mga magpola sa yamen, pagka yamen nagpahidapan, tiya ba yamen nag-agwanta. 13 Malomanay ka tokawanan da yamen nagtebag sa mga magpanida podi sa yamen. Anggan mona yamen ba makay rikot, makay nawed kabagay ka kalasi iraya sa paranawan. 14 Tiya ba naay nagsorat, nawed para koyo akayaan, no nawed ba para koyo naay paremremen makay naay mga onga nagpalayaw. 15 Panawen kayno anggan sampo ka ribo da koyo tagatodo para sa biyag sa laki Kiristo, ako ngani da koyo apang. Panawen koyo ba naay inonga sa pag-isarig sa laki Kiristo Hisos pag naay pinangadar da Pirmida ka Barita sa koyo. 16 Kaya naay nag-aringi sa koyo, ako koyo toladen. 17 Panawen naba, naay nagpaparaoy saba laki Timotiyo pag naay nagpalayaw da- matoltolon ka onga sa Panginoon. Iya da batay magparemrem sa koyo pag naay maniho sa naay biyag sa naay kasaiyan sa laki Kiristo Hisos da- da mga maniho din naba ag naay nagtodo sa tayma rimponan mga mag-isarig kayno saan pag poro. 18 Da kalaati sa koyo ba magpaatatas sa sadiri, panawen sa kora nagmaras ba amba ako nawed:dani batay paraoy saba. 19 Ngani no batay pinarogar Panginoon ba ako batay paraoy saba sa nawed maagot ka odas da- naay batay binan-awan no nakay ngani- da kora batay apanawen sa kaosonan kora nagsabi. 20 Panawen da maghadi Diyos ba akitan nawed sa tamo mga tokawanan no nawed ba sa tamo biyag. 21 Nakay da koyo alabet? Ako paraoy saba maki nagbaba pamogbog e maki palayaw da- malomanay ka remrem?
1 Romateng sa naay da nawed bosli ka barita amba daet gidte da nagpanawen sai sa koyo. Sai ka lalaki ba nag-apo da konin adang pangoman. Kayno da mga nawed mag-isarig sa laki Kiristo ba nawed din magpamanawen makay naba ka madomi ka nagpanawen. 2 Da- koyo ba alabet dapo gayed magpaatatas sa sadiri. Kailangan disin koyo akayaan da- magpanangis da- koyo gidte paswayen sa koyo da magpamanawen naba. 3 Kayno wala saba sa koyo da naay lawas ba saba din da naay ispirito, kaya makay saba din ako. Panawen naba naay:yani hinosay 4 sa ngaran Panginoon Hisos da magpamanawen naba. Da naay ispirito ba kaanggat sa koyo sa odas koyo magrimpon. Da- sa kapangyadihan tamo Panginoon Hisos 5 ba koyo taboyon sa laki Satanas da iraya naba para sidaen da konin lawas para naribri da konin ispirito sa aldaw Panginoon. 6 Nawed abaya koyo magpalawlaw. Nawed mana koyo amatangan da kasabiyan amba, Da pampahilab kayno ibente no pinaliog sa ginalpong para gaw-en tinapay ba batay magpahilab sa boo tinapay? 7 Koyo benglayen da monaan pampahilab, naba ba da kadaetan, para koyo ba malinis:sani. Sa makay naba, koyo ba batay makay sai ka bayo ka tinapay wala pampahilab da- amba ngani-koyo. Tangona mga Diw pag kora omalis sa Ihipto ba mono topa te. Laki Kiristo da tamo Topa te. Da- iya ba tinaboy:yani Diyos sa katayan para sa tamo. 8 Kaya tamo magkasaya makay naba, nawed sa mamangan tinapay maki pampahilab, da alabet sabiyen naba ba da kadaetan da- da daet ka remrem, no nawed ba sa mamangan tinapay wala pampahilab, da alabet sabiyen naba ba da tinapay kalinisan remrem da- katotohanan. 9 Naay sinabi sa naay sorat ba ayaw koyo mag-anggat sa mga magpamanawen madomi. 10 Da naay nagtodyo ba nawed sa mga nawed mag-isarig sa laki Kiristo pag magpamanawen madomi, angangaken, magpanakaw e magsamba sa mga nawed amba Diyos, panawen no amba ba kailangan koyo omalis sa paranawan tiya para kora koyo aalasan. 11 Da naay nagtodyo ba ayaw koyo pag-anggatan da magsabi:ya amba iya ba sai ka arian sa laki Kiristo ngani iya magpamanawen madomi, angangaken, magsamba sa mga nawed amba Diyos, magpola, maglasing e magpanakaw, ayaw din koyo kayno pagsarowan sa pamangnen da makay naba ka iraya. 12 Panawen ako wala kapangyadihan maghosay sa mga nawed mag-isarig sa laki Kiristo. Da Diyos da batay homosay sa kora. Da mga mag-anggat sa tamo sa rimponan mga mag-isarig da kailangan tamo hosayen, nawed mana? Makay tiya da nagsabi Banal ka Kasoratan amba, Koyo paswayen sa koyo rimponan da daet ka iraya.
1 No ina ba da sai sa koyo ba maki diklamo laban sa sai ka arian sa laki Kiristo. Da iya maki diklamo ba nawed:dani abaya magsabi sa mga hosayan mga nawed mag-isarig sa laki Kiristo, no nawed ba konin paaramen sa mga hinidang Diyos para kora da maghosay sa osapen tiya? 2 Nawed mana koyo amatangan amba da mga hinidang Diyos da batay homosay sa mga makaparanawan? Da- no tamo da batay homosay sa mga makaparanawan, nawed mana koyo akayanan hosayen da makay naba ka ibente ka nakayman? 3 Nawed mana koyo amatangan amba tamo batay homosay sa mga anghil? Kaomaning dapo da mga nakayman para sa biyag tiya! 4 No koyo maki osapen koyo dapo mana batay pinahosay tiya sa mga iraya wala kaparosan sa mga rimponan mga mag-isarig? 5 Kakaya-kaya kay koyo. Wala:a mana sa koyo kayno sai ka iraya madonong maghosay sa tomanganan mga talkakaan sa laki Kiristo? Maki. 6 Kaytang koyo ba magsabi dapo sa hosayan, da arian ba laban sa arian, da- nagparopang dapo gayed sa mga iraya nawed mag-isarig. 7 Da koyo maki osapen laban sa sai-sai ba sai ka kasidaan sa koyo mga talkakaan. Nawed mana piya dapo koyo:wa ngani agwantahen kayno koyo nag-api kayno koyo nagdaya. 8 Ngani koyo dapo da mag-api da- magdaya, da- tiya ba koyo nagpanawen sa koyo kay din mga arian. 9 Nawed mana koyo amatangan amba da mga makadaetan ba wala gidte batay eray sa kahadian Diyos? Ayaw koyo pagdayaen da koyo sadiri. Da mga magpamanawen madomi, magsamba sa nawed amba Diyos, magpangalonya, mag-arikoy sa kapowa, 10 da mga magpanakaw, angangaken, anlalasing, amomola e andadaya-da mga iraya makay naba ba wala batay eray sa kahadian Diyos. 11 Makay naba da kalaati sa tamo pag monaan. Ngani tamo ba lininis:sani sa tamo mga kadaetan, tamo ba binokod:dani para sa Diyos, tamo ba pinakan kataldengan Diyos sa ngaran Panginoon Hisos Kiristo da- sa kapangyadihan Ispirito tamo Diyos. 12 Maki batay magsabi makay tiya, Abaya ako pomanawen kayno nakay. Totoo ngani- naba ngani nawed da boo nakayman ba katolong sa koyo kapiyaanan. Abaya din naay sabiyen, Abaya ako pomanawen kayno nakay, ngani ako ba nawed batay magpasangato kayno sa nakayman. 13 Da pamangnen ba para sa boyon da- da boyon ba para sa pamangnen. Totoo naba, ngani da mga naba ba tanan batay sinida Diyos. Da lawas ba nawed para sa magpangalonya no nawed ba para sa Panginoon da- da Panginoon kay ba da aponin tamo lawas. 14 Biniyag:gakay Diyos da Panginoon Hisos da- tamo man ba konin batay:yakay din biniyag panawen sa konin kapangyadihan. 15 Nawed mana koyo amatangan amba koyo lawas ba mga eray lawas laki Kiristo? Naay dia batay ginaro da eray lawas laki Kiristo para eray:yakay lawas sai ka babayi daet da konin biyag? Nawed gidte! 16 Nawed mana koyo amatangan amba da magpasai sa makay naba ka babayi ba sai:ya ngani ka lawas sa konin? Panawen nagsabi sa Banal ka Kasoratan amba, Sidawa batay sai:ya ngani. 17 Ngani da maki kasaiyan sa Panginoon ba sai ngani sa konin sa Ispirito Banal. 18 Tamo alasen da magpangalonya. Sa nakayman Roma ka kadaetan nag- panawen iraya, Roma da nagkapadaet, ngani sa magpangalonya konin sadiri lawas da konin nagkapadaet. 19 Nawed mana koyo amatangan amba da tamo lawas ba olian Ispirito Banal pag sa tamo, pag tamo tinabang ibat sa Diyos? Da tamo lawas ba nawed gidte tamo no nawed ba Diyos da maki. 20 Tamo ba konin binili sa halaga. Kaya tamo gamiten da tamo lawas para papodiyan da Diyos.
1 Para kay sa koyo sorat, makay tiya da naay batay asabi, Da piya sa sai ka lalaki ba ayaw mangisawa. 2 Ngani para aalasan da magpangalonya ba tayma lalaki da- tayma babayi ba bagay maki konin-konin sawa. 3 Da lalaki ba bagay panawenen da konin katongkolan sa konin sawa, amba din da babayi. 4 Panawen nawed:da da babayi da maki kapangyadihan sa sadiri lawas no nawed ba da konin sawa. Amba kay din nawed:da da lalaki da maki kapangyadihan sa sadiri lawas no nawed ba da konin sawa. 5 Kandawa ayaw magdayo sa sai-sai poyida no kandawa magkasai amba, Ayaw dapo kita magboya para kita kataboy odas sa magdarangin. No kalbas magboya:akay kandawa para kandawa nawed atogso laki Satanas panawen sa kandawa nawed:da kapigil. 6 Da naay nagsabi ba nawed bilin no nawed ba papawa sa koyo biyag. 7 Naay disin alabet ba koyo boo ba makay din ako. Ngani da tayma sai ba maki konin-konin taboy ibat sa Diyos da- nawed pariho pag mga naba. 8 Tiya kay da naay batay asabi sa mga wala sawa da- sa mga babayi balo amba piya dapo sa kora no nawed:da disin mangisawa makay din ako. 9 Ngani no kora nawed kapigil sa sadiri ba kora mangisawa, lalo dapo piya da mangisawa sa magpanlapad da mata. 10 Sa mga maki:ya sawa tiya da naay nagbilin, nawed ako no nawed da Panginoon da magbilin amba, Ayaw gidte mag-ogon da babayi sa konin sawa. 11 No iya ba batay omogon ba ayaw:wani mangisawa ngani abaya paoli:akay sa konin sawa. Da- ayaw kay pag-ogonan lalaki da konin sawa. 12 Sa mga Roma kay tiya da naay nagsabi, nawed:da da Panginoon da magsabi amba, No da sai ka lalaki mag-isarig ba maki sawa nawed mag-isarig da- da babayi angasan mag-anggat dapo sa konin, ayaw iya pag-ogonan pag lalaki. 13 No da sai ka babayi mag-isarig ba maki sawa nawed mag-isarig da- da lalaki angasan mag-anggat dapo sa konin ba ayaw iya mag-ogon sa lalaki. 14 Panawen da lalaki nawed mag-isarig ba binagay sa Diyos panawen sa konin sawa, da- da babayi nawed mag-isarig ba binagay sa Diyos panawen sa konin sawa. No nawed amba ba nawed malinis sa ban-aw Diyos da sidawa mga onga, ngani da totoo ba da mga onga ba bagay sa Diyos. 15 No alabet omogon da sawa nawed mag-isarig panawen konin sawa ba mag-isarig ba koyo bayaan iya omogon. Sa makay naba ka nangyadi da lalaki kayno babayi mag-isarig ba kabal-an:nani, panawen tamo ba pinili Diyos para tamo mamiyag sa kaginhawahan. 16 Babayi, omaning komo batay amatangan kaaram kawo da batay ginamit Diyos para ribriyen da komo sawa? Lalaki, omaning komo batay amatangan kaaram kawo da batay ginamit Diyos para ribriyen da komo sawa? 17 Tayma sai ba mamiyag toltol sa tinaboy Panginoon sa konin da- iya toloy:yani sa konin panawen sa konin biyag makay pag sa odas iya pinili Diyos. Tiya da naay nagtodo sa boo mga rimponan mga mag-isarig. 18 No da sai ka iraya ba long-oy pag iya pinili Diyos, ayaw konin pagtagoon da mga tanda iya ba long-oy. Da- da nawed dapo long-oy ba ayaw:wani palong-oy. 19 Wala halaga da long-oy kayno nawed long-oy. Da mahalaga ba da magpamanawen pag mga bilin Diyos. 20 Baywi da tayma sai sa konin nagpanawen sa biyag pag iya pinili Diyos. 21 Kawo dia ba tagoanggat pag kawo pinili Diyos? Ayaw:wa komo pagremremen. Ngani no kawo maki pagkaodas batay kabal-an ba kawo magpabal-an:nani. 22 Panawen da sai ka tagoanggat pag iya pinili Panginoon ba bal-an:nani para sa Panginoon. Amba kay din, da iraya ligayaw pag iya pinili laki Kiristo ba iya ba tagoanggat:tani laki Kiristo. 23 Tamo ba binili Diyos sa halaga, ayaw tamo pasangato sa iraya. 24 Mga arian, nakayman da koyo nagpanawen sa biyag pag koyo pinili Diyos ba koyo ba layen sa makay naba ka biyag anggat sa Diyos. 25 Para kay sa mga wala sawa ako ba wala batay ataboy bilin ibat sa Panginoon. Ngani makay sai ka iraya aintirigahan panawen sa kayawtean Panginoon sa naay, ako batay magpasked pag naay nagremrem. 26 Panawen sa lakol ka kahidapan sa mona naay nagmaras ba piya dapo sa sai ka lalaki no omaning da konin biyag mona ba layen makay naba. 27 No kawo maki:yani sawa ba ayaw kawo mag-ogon. No kawo wala dapo sawa ba ayaw magremrem mangisawa. 28 No kawo mangisawa ba kawo nawed magpanawen daet. Da- no da sai ka daraga ba mangisawa ba iya nawed magpanawen daet. Ngani kora batay domanas mga kahidapan sa biyag tiya da- naba da naay alabet koyo alasen. 29 Tiya da naay alabet sabiyen, mga arian, kabeste:a da tamo biyag, kaya ibat mona da iya maki sawa ba mamiyag makay wala sawa. 30 Da mga magpanangis ba makay nawed magpanangis, da mga nagkaangasan ba makay nawed nagkaangasan, da mga magbili ba makay wala binili, 31 da- da mga magpabili nakayman para maki mga nakay te man sa paranawan tiya ba makay nawed kora nagremrem tiya. Panawen da boo nakayman sa paranawan tiya ba batay nawala. 32 Naay alabet koyo ba karibri sa remrem nagkaabotogan. Da lalaki wala sawa ba da nagpilitan ba mga panawen para sa Panginoon panawen konin alabet ba iya magpaangas sa Panginoon. 33 Ngani da lalaki maki sawa ba da nagpilitan ba mga nakayman para sa paranawan tiya, panawen da konin alabet ba iya magpaangas sa konin sawa. 34 Panawen naba nagkaeray:ya da konin nagpilitan. Amba kay din da nagpilitan babayi wala sawa da- daraga ba da mga nakayman para sa Panginoon panawen da konin alabet ba handaen gidte da konin sadiri para magpamanawen para sa Panginoon. Ngani da babayi maki sawa ba da nagpilitan ba da mga nakayman para sa paranawan tiya panawen da konin alabet ba iya magpaangas sa konin sawa. 35 Naay nagsabi tiya para koyo tolongan. Koyo ba nawed naay nagsabiyan gidte ngani da naay alabet ba koyo mamiyag piya da- sa makay naba abaya koyo kapanawen gidte sa Panginoon. 36 Para sa maki tarato amba magkasai sidawa nawed:da tay mal-isawa, no nagremrem pag lalaki amba nawed abaya da makay naba, da- no iya mag-alabet gidte da- panawen saba ba kailangan sidawa mal-isawa, nawed kay kadaetan naba. 37 Ngani no da lalaki magremrem gidte amba iya nawed batay mangisawa, piya naba no maonay da konin remrem, no nawed iya nagkalopod ngani, da- no iya maki kaya magpigil sa konin sadiri. 38 Kaya piya da mangisawa sa konin katarato, ngani lalo dapo piya da iya magpigil sa sadiri da- nawed mangisawa sa konin katarato. 39 Da babayi ba nagkaegtan sa konin sawa anggan iya biyagan dapo. Ngani no natay:ya da lalaki ba da babayi ba bal-an:nani da- abaya:akay mangisawa sa tawa man konin alabet, ngani sa sai ka mag-isarig sa laki Kiristo. 40 Ngani iya lalo dapo batay angasan no nawed:da tay mangisawa. Naba da naay remrem, da- sa naay remrem ba sa naay din da Ispirito Diyos.
1 Naay kay batay pinapawa sa koyo da para sa mga pamangnen tinaboy sa mga nawed amba Diyos. Tamo amatangan tamo boo ba maki kaamatangan, makay kora nagsabi. Pag makay naba ka kaamatangan ba magparemrem sa iraya para magpalawlaw, ngani da palayaw ba kapaonay. 2 Da iya magmaras ba iya ba maki amatangan ba iya nawed dapo kamatang pag konin bagay amatangan. 3 Ngani amatangan Diyos da magpalayaw sa konin. 4 Para ngani- sa mamangan mga pamangnen tinaboy sa mga nawed amba Diyos, tamo amatangan amba wala kaparosan da mga nawed amba Diyos da- tamo din amatangan amba sai ngani da Diyos. 5 Kayno maki nag-awit mga diyos sa langit kayno sa lopa-da- da totoo ba maoson da nag-awit mga diyos da- mga panginoon- 6 para sa tamo mga mag-isarig ba sai ngani da Diyos, naba da Apang pag Romarang boo nakayman, da- tamo ba nagkabiyag para sa konin. Sai ngani da Panginoon, naba ba laki Hisos Kiristo, da- panawen sa konin ba rinarang da boo nakayman da- panawen din sa konin tamo ba nagkabiyag. 7 Ngani nawed boo ba kamatang naba. Da kalaati ba magpamihasa sa magsamba sa nawed amba Diyos, kaya anggan mona, pagka kora mamangan makay naba ka pamangnen, sa kora remrem ba tinaboy dapo din sa mga nawed amba Diyos da kora nagpamangan. Maraw korang da kora kaamatangan, nagkaabotogan kora ispirito da- sa kora remrem ba kora ba magpanawen daet. 8 Nawed ibat sa pamangnen kaya tamo ba kaangas-angas sa Diyos. Wala batay nawala sa tamo no nawed tamo mamangan kayno nakay pag kalasi ka pamangnen da- wala din kapiyaanan batay binokar sa tamo no tamo mamangan naba. 9 Ngani tamo magdahan, kaaram da tamo namangan kayno nakayman pag pamangnen ba magpasikway sa mahina dapo sa pag-isarig para pomanawen daet. 10 No kawo ba maki kaamatangan makay kora nagsabi ba magpamangan sa galem balay mga nawed amba Diyos da- kawo akitan pag mga mahina dapo sa pag-isarig, nawed dia kora lalo dapo batay emeyat da remrem mamangan mga pamangnen tinaboy sa mga nawed amba Diyos? 11 Kaya panawen sa komo kono kaamatangan ba nagkaasidaan da komo arian mahina dapo sa pag-isarig, da- sa konin ba natay laki Kiristo. 12 Sa makay naba, tamo magpamanawen daet laban sa laki Kiristo panawen tamo pinaremrem para kapamanawen daet da tamo arian da- tamo ginolatan da konin mahina ka ispirito. 13 Kaya no ibat sa pamangnen batay kapanawen daet da naay arian ba ako ba nawed:da batay mamangan tiya pag ablasen para iya ba ayaw kapamanawen daet.
1 Nawed mana ako ba sai ka iraya ligayaw? Nawed mana ako ba sai ka pinili sogoan? Nawed mana naay akitan laki Hisos tamo Panginoon? Nawed mana koyo da bokar naay pinanawen para sa Panginoon? 2 Kayno sa mga Roma ako ba nawed pinili sogoan, sa koyo kay ba ako ba pinili sogoan. Koyo da sistigo ako ba pinili sogoan Panginoon. 3 Sa mga batay magtoga sa naay, tiya da naay tebag amba, 4 Wala mana yamen kapangyadihan yamen pagtaboyan rimponan mga mag-isarig sa yamen kailangan sa pamangnen da- inemen? 5 Wala mana yamen kapangyadihan magpaanggat yamen sawa mag-isarig, makay pag nagpanawen laki Pidro da- mga Roma ka pinili sogoan da- pag mga arian Panginoon? 6 Kidawa ngani mana laki Birnabi da wala kapangyadihan empet sa magsarak kabiyagan? 7 Tawa pag sondalo da magpamanawen sa wala magtaboy sa konin? Tawa pag iraya da magtanem obas da- nawed man kapamangan sa mga bokar naba? Tawa pag tagaalaga kaosonan hayop da nawed kainem sa mga yatas? 8 Da naay nagsabi ba nawed ngani nagkasarig sa nagpanawen iraya, naba din da nagsabi Bilin Diyos. 9 Nagkasorat sa Bilin tinaboy sa laki Moysis amba, Ayaw komo pagbogsongan da baka anggan naggamit sa maggiek. Mga baka ngani gidte dia da nagremrem Diyos? 10 Nawed. Tamo da konin nagtodyo. Kaya naba ba nasorat panawen sa tamo, panawen kailangan da mag-agay da- da maggiek ba mag-asa sidawa ba maki eray sa batay inani. 11 Yamen ba omasik sa koyo ag mga parongaw para sa ispirito, lakol kay mana ka nakayman no yamen omani mga pakinabang para sa lawas ibat sa koyo? 12 No pag mga Roma ba bagay kora ba koyo pakanen, nawed mana lalo dapo bagay yamen ba pakanen? Amba man, nawed yamen ginamit yamen kapangyadihan para mag-ay-ay koyo tolong, no nawed ba yamen inagwanta da boo para yamen ba nawed hadang sa Pirmida ka Barita para sa laki Kiristo. 13 Nawed mana koyo amatangan amba da mga magpamanawen sata sa lakol ka balay Diyos ba magtabang pamangnen ibat sa lakol ka balay Diyos, da- da mga magpamanawen sa pag-arengan ba maki din eray sa mga hayop nagtaboy sa Diyos sa ngaway pag-arengan? 14 Makay din naba, binilin Panginoon amba da mga magpangadar Pirmida ka Barita ba kailangan tomabang kabiyagan ibat sa mga tomabang sa Pirmida ka Barita. 15 Ngani kayno abaya mga naba ba nawed gidte naay pinanawen, da- koyo nawed naay nagsoratan para ako koyo pakanen din tolong. Piya dapo sa naay da ako natay sa garwen sa naay tawa man da naay sarigan papodiyan. 16 Kayno ako magpangadar Pirmida ka Barita, nawed naba da naay sarigan papodiyan. Naba da katongkolan tinaboy sa naay. Nawed gidte piya sa naay no nawed naay pangadaren da Pirmida ka Barita. 17 No tiya naay nagpanawen sa naay sadiri alabet, ako ba maki bayad batay pinanyaan. Ngani no naay kay nagpangadar da Pirmida ka Barita makay magpanawen ako sa naay katongkolan, panawen naba ba inintiriga sa naay, 18 nakay mona da bayad sa naay? Da makay bayad sa naay ba naay pangadaren da Pirmida ka Barita wala opa, da- da ako nawed maggaro opa kayno naba da kailangan sa naay makay sai ka tagapangadar. 19 Ako ba ligayaw da- nawed sangato tawa man, ngani ako magpasangato sa boo iraya para ako lalo dapo karanggot maoson sa Panginoon. 20 No ako anggat sa mga Diw ako pomanawen makay din mga Diw para kora ba naay aranggot sa Panginoon. Kayno ako nawed sakop sa Bilin tinaboy sa laki Moysis, ako pomasakop sa Bilin naba sa odas naay pal-anggat da mga sakop sa Bilin para kora ba naay aranggot sa Panginoon. 21 No ako kay ba anggat sa mga Nawed Diw pag nawed sakop sa Bilin tinaboy sa laki Moysis, ako ba pomanawen makay sai ka Nawed Diw da- nawed sakop sa Bilin tinaboy sa laki Moysis para kora ba naay din aranggot. Da alabet sabiyen naba ba nawed amba nawed naay nagtoltol da mga bilin Diyos, panawen ako ba sakop sa bilin laki Kiristo. 22 No ako ba anggat sa mga mahina sa pag-isarig ako ba makay din mga mahina sa pag-isarig para kora naay aranggot. Sa boo nakayman ako ba makay din boo iraya para kayno da kalaati ngani ba naay aribri kayno sa nakay ka padaan. 23 Naay nagpanawen da boo naba para ngani- sa Pirmida ka Barita para kaeray ako sa mga parongaw naba pag barita. 24 Koyo amatangan amba da mga kabilang sa magdalaganan ba boo magdalagan, ngani sai ngani da batay mandaeg da- kamaki taboy. Kaya koyo domalagan piya para koyo da mandaeg. 25 Da boo mga anggagaraw pag magsanay ba magpigil sa sadiri sa boo mga nakayman para kora tabangen da sai ka taboy nawed maagot batay nasida, ngani da taboy nag-alabet gidte tamo ag mga mag-isarig ba pag nawed batay asida kayno kaagoton. 26 Kaya ako maeyat magdalagan magparaoy sa sai ka batay gidte rinatengan, da- ako maeyat magsontok da- nawed din magsontok sa koaya. 27 Naay nagpahidapan da naay lawas da- nagsogpo da naay sadiri, kaaram kalbas ako mangadar sa Roma ba ako kay da sinikway.
1 Mga arian, naay alabet koyo amatangan da nangyadi sa tamo mga pangapoan pag kora ba omanggat sa laki Moysis. Kora boo ba tinirong yaong sa kora magkadangan, kora boo ba omipay sa dagat nag-awit Mapola. 2 Da- sa makay naba kora boo ba makay binaotismohan sa yaong da- sa dagat makay mga tagatoltol laki Moysis. 3 Kora boo ba mamangan sai ka kalasi pamangnen tinaboy Diyos, 4 da- kora boo ba minem din sa sapa ibat sa Bato pag taboy Diyos da- pag omanggat sa kora; pag Bato naba ba laki Kiristo. 5 Kayno amba ba nawed din kinaangasan Diyos da kaosonan sa kora, kaya kora nangatay da- da kora mga bongkalo ba laglagati sa poro nawed apirmihan iraya. 6 Da mga nangyadi naba ba todo sa tamo para tamo ayaw mag-alabet pag mga nakayman daet makay ag kora inalabet. 7 Koyo ayaw somamba sa mga nawed amba Diyos makay pag kalaati sa kora. Toltol sa nagkasorat amba, Tomongka da mga iraya para malpamangan da- magbarikan da- kora patindeg para magsayawan. 8 Tamo ayaw magpangalonya makay pag pinanawen kalaati sa kora, kaya dalwampo da- tatlo ka ribo ka iraya da nangatay sa sai ngani ka aldaw. 9 Ayaw tamo pagporbahan da Panginoon, makay pag pinanawen pag kalaati sa kora, kaya kora ba nangatay sa nanka otan. 10 Ayaw din tamo magdiklamo makay pag kalaati sa kora, kaya kora simpo pag Anghil Anonopo. 11 Naba ba nangyadi sa kora para todo sa tamo, da- nasorat para tamo ba tod-an panawen tamo da mga rinateng paoriyan ka odas. 12 Kaya ngani- da tawa man magremrem amba iya magpatindeg maonay ba magdahan kaaram iya nalabo. 13 Wala dapo togso rateng sa koyo pag nawed dinanas mga Roma ka iraya. Matepeden da Diyos da- koyo nawed konin batay pinabayaan togsowen pag labi sa koyo akayanan daegen. No nawed ba no Romateng da togso, koyo konin batay tinaboyan eyat para agwantahen naba anggan kaalas. 14 Kaya ngani-, mga nagpalayaw, koyo ayaw magsamba sa mga nawed amba Diyos. 15 Makay tiya da naay nagsabi sa koyo panawen koyo ba kamatangen, koyo:wa da homosay no totoo da naay nagsabi. 16 Nawed mana pag tamo mag-inem sa ineman sa banal ka tal-aponan pag tamo nagpasalamat ba tamo maki eray sa daya laki Kiristo? Da- pag tamo mamangan pamangnen pag tamo nagpamisang nawed mana tamo ba maki eray kay sa lawas laki Kiristo? 17 Kaya ngani- panawen sai ngani da pamangnen kayno tamo ba maoson, tamo ba sai ngani ka lawas, panawen tamo boo ba maki eray sa sai ngani ka pamangnen. 18 Koyo remremen da lasyon Israil. Nawed mana pag boo malpamangan mga hayop nagtaboy sa pag-arengan ba kasai sa nagpanawen sa pag-arengan? 19 Nakay da naay alabet sabiyen? Amba dia maki kaparosan da nawed amba Diyos kayno da pamangnen tinaboy sa mga nawed amba Diyos? 20 Wala! Da naay alabet sabiyen ba da mga nawed mag-isarig sa Diyos ba pag magtaboy kora taboy ba sa mga daet ka ispirito da kora magtaboy, nawed sa Diyos da- ako dayo koyo batay kasai:yani sa mga daet ka ispirito. 21 Tamo nawed abaya minem sa ineman Panginoon da- sa ineman mga daet ka ispirito. Tamo nawed abaya somaro sa kainan Panginoon da- sa kainan daet ka ispirito. 22 Tamo dia alabet mangimbolo da Panginoon? Sa koyo remrem mana tamo ba lalo dapo maeyat sa Panginoon? 23 Maki kay batay magsabi amba, Abaya ako mamanawen kayno nakay. Ngani nawed da boo nagpanawen ba piya gidte. Hee, abaya ako mamanawen kayno nakay. Ngani nawed da boo nagpanawen ba kapaonay. 24 Ayaw ngani pag para sa sadiri da tamo pagsaraken no nawed ba pag para din sa mga Roma. 25 Tamo mamangan kayno nakay ka ablasen nagkabili sa tindahan da- tamo ayaw:wani mag-alingangaan para ayaw magtanong. 26 Panawen nagsabi sa Banal ka Kasoratan amba, Da lopa da- da boo nakayman saba ba sa Panginoon. 27 No tamo yinakag sai ka nawed mag-isarig da- tamo alabet anggat, tamo mamangan kayno nakay da tinaboy sa tamo da- tamo ayaw:wani mag-alingangaan para ayaw magtanong. 28 Ngani no maki magsabi sa tamo amba, Tiya ba tinaboy sa mga nawed amba Diyos ba ayaw:wa tamo mamangan naba sa magremrem sa damdamen pag somabi sa tamo para ayaw din ahidapan da ispirito. 29 Da naay alabet sabiyen ba da ispirito tamo kapowa da- nawed pag tamo ispirito. Batay kay sinabi pag Roma amba, Kaytang da ako mamangan kayno nakayman batay hinadangan da ispirito mga Roma? 30 No ako ba magpasalamat sa Diyos para sa pamangnen naba, kaytang ako batay sinabiyan panawen sa ako mamangan pamangnen pag naay kay pinasalamat sa Diyos. 31 Kaya ngani-, kayno tamo magpamangan, kayno mag-inem, kayno nakay da tamo nagpanawen, tamo panawenen da boo para palakolon da Diyos. 32 Tamo ayaw batay ibatan para kapanawen daet da tawa man, kayno mga Diw kayno mga Girigo kayno pag mga kaanggat sa rimponan mga mag-isarig. 33 Makay din ako, naay nagsikap pakanen kasyagan da boo iraya sa tayma naay nagpamanawen. Da naay nagsarak ba nawed pag sa naay sadiri kapiyaanan no nawed pag kapiyaanan mga kaosonan para kora aribri.
1 Ako da koyo toladan makay din pag naay nagtoladan ba laki Kiristo. 2 Koyo naay nagpodi panawen ako ba layen koyo nagremrem da- koyo nagtoltol da mga todo naay tinabang da- naay:yakay tindo sa koyo. 3 Ngani naay alabet koyo amatangan amba laki Kiristo da magkoyay sa tayma lalaki, da lalaki da magkoyay sa konin sawa da- da Diyos kay da magkoyay sa laki Kiristo. 4 Da lalaki magdarangin e magbarita ibat sa Diyos maki takleb da olo ba magpakaya sa magkoyay sa konin. 5 Da babayi magdarangin e magbarita ibat sa Diyos wala takleb da olo ba magpakaya sa magkoyay sa konin. Iya ba makay babayi londong. 6 No dayo maki takleb sa olo da sai ka babayi ba konin:na palondongon da konin obok. Panawen kakaya-kaya sa babayi da magpaogoy e magpalondong da- iya ba kailangan maki takleb sa olo. 7 Nawed bagay no maki takleb sa olo da lalaki panawen iya ba ladawan da- kalakolan Diyos. Ngani da babayi ba kalakolan lalaki, 8 panawen da lalaki ba nawed ibat sa babayi ngani da babayi ba omibat sa lalaki. 9 Da- nawed din rinarang da lalaki para sa babayi no nawed da babayi da rinarang para sa lalaki. 10 Panawen naba da- para ngani- sa mga anghil da babayi ba kailangan maki takleb sa olo makay tanda iya ba magpasangato sa konin sawa. 11 Kayno amba no sa Panginoon kailangan pag mga babayi da lalaki da- kailangan kay din pag mga lalaki da babayi. 12 Kayno ibat sa lalaki da babayi, da lalaki kay ba nagpamreg babayi da- ibat sa Diyos da boo nakayman. 13 Koyo:wani da maghosay. Abaya dia sa sai ka babayi da akitan magdarangin wala takleb sa olo? 14 Nawed mana koyo amatangan sa kagisengan layi amba kakaya-kaya sa sai ka lalaki da magpaaba obok 15 ngani naba ba kalakolan kay sa babayi? Panawen tinaboy sa konin da obok para makay takleb sa olo. 16 Ngani no maki dapo alabet tomomang para naba ba wala:a ako batay asabi no nawed tiya : sa pagsamba ba makay naba da yamen ogali da- da ogali mga rimponan magsamba sa Diyos. 17 Para sa mga naay batay inolbat mona koyo ba nawed abaya naay podiyen. Da koyo magrimpon ba nawed sa koyo kapiyaanan no nawed ba sa lalo magpadaet sa koyo. 18 Monaan sa boo, naay abaritaan amba koyo kono ba magpay-eray-eray sa koyo magrimpon da- ako ba magpaniwala maki katotohanan naba. 19 (Kailangan dapo mana koyo naeray-eray para akilala no tawa-tawa da mga tonay). 20 Sa koyo magrimpon ba nawed pag Banal ka Tal-aponan da koyo nagpamangan. 21 Panawen da tayma sai sa koyo ba mag-apora mamangan pag konin-konin alabet, kaya nagkabayog da kalaati da- da kalaati kay ba nagkalibed sa ininem. 22 Koyo mana ba wala sadiri balay para sata dapo mamangan da- minem? Koyo mana nagwal-an koyinta da rimponan magsamba sa Diyos da- nagpakaya da mga mahidapen? Nakay da naay batay sinabi sa koyo? Koyo dia naay batay pinodi? Nawed. Koyo ba nawed naay batay pinodi. 23 Tiya da adar pag naay tinabang ibat sa Panginoon da- naay:yakay nagtaboy sa koyo amba, Da Panginoon Hisos pag madlem iya tinaboy sa mga kasida ba iya gomaro tinapay. 24 Maraw iya kapasalamat:tani ba konin pinisang-pisang naba da- sinabi amba, Tiya da naay lawas naay nagtaboy sa katayan para sa koyo. Koyo mamangan tiya para magremrem sa naay. 25 Amba kay din, maraw kapanal-aponan:nani ba konin ginenan da ineman da- sinabi amba, Da laman pag ineman tiya ba da bayo ka kasaiyan sa naay daya. Tayma koyo inemen tiya koyo panawenen tiya sa magremrem sa naay. Amba:a ngani. 26 Panawen tayma koyo batay mamangan pag pamangnen tiya da- batay minem sa ineman tiya ba koyo nagpaban-aw da katayan Panginoon anggan iya batay:yakay paoli towa. 27 Kaya da tawa man mamangan pamangnen e minem sa ineman Panginoon sa nawed bagay ka remrem da- ogali ba kapanawen daet laban sa lawas da- daya Panginoon. 28 Kaya kailangan saraken iraya sa konin sadiri para amatangan gidte iya ba wala kadaetan bayo gira mamangan pamangnen da- minem sa ineman. 29 Panawen da tawa man magpamangan da- mag-inem da- nawed nagpahalagahan da lawas Panginoon ba magpamangan da- mag-inem padosa sa konin sadiri. 30 Naba da ibatan kaytang da kaosonan sa koyo ba mahinaen da- masakiten da- da kalaati ba nangatay:yani. 31 Ngani no tamo dapo batay sinarak sa tamo sadiri da kadaetan tamo nawed batay hinosay Panginoon. 32 Ngani no tamo ba naghosay Panginoon tamo ba konin nagtaldeng para tamo ba nawed batay pinadosahan anggat sa mga nawed mag-isarig. 33 Kaya ngani-, mga arian, no koyo magrimpon para malpamangan banal ka tal-aponan ba koyo magpanyaan, 34 para nawed Romateng sa kapadosahan da koyo magrimpon no maki nagkabayog ba sa konin dapo balay iya mamangan. Para sa Roma kay ka nakayman ako:wa ngani- da batay magsinsin no ako Romateng saba.
1 Da naay batay pinapawa mona ba para kay sa mga taboy Ispirito Banal. Mga arian, naay alabet mapawa gidte sa koyo da boo para sa mga taboy tiya. 2 Narwaan pag koyo nawed dapo mag-isarig, koyo ba naparanggot sa kayno nakay ka mga nawed amba Diyos pag nawed kay katokawanan. Naba ba koyo kay amatangan. 3 Kaya naay alabet koyo amatangan amba da iya nagparemreman Ispirito Diyos ba kaagot man ba nawed batay katokawanan amba, Sompaen laki Hisos. Da- nawed din batay katokawanan da tawa man amba, Laki Hisos da Panginoon, no iya ba nawed nagparemreman Ispirito Banal. 4 Roma-Roma da mga taboy ngani sai ngani da Ispirito Banal pag magtaboy mga naba. 5 Roma-Roma da kalasi nagpamanawen ngani sai ngani da Panginoon pag nagpamanawenan. 6 Roma-Roma din da mga nagpanawen ngani sai ngani da Diyos pag magtaboy kaya sa boo iraya kapanawen mga naba. 7 Da tayma sai ba tinaboyan taboy pag magpaaram amba sa konin da Ispirito Banal, para sa kapiyaanan boo mga mag-isarig. 8 Sa sai ba tinaboy Ispirito Banal da akayanan magtokawanan mga kadonongan Diyos da- sa sai ba da tinaboy ba akayanan magtokawanan mga kaamatangan Diyos. 9 Pag sai ngani ka Ispirito Banal din naba da magtaboy sa Roma pag lakol gidte ka pag-isarig sa Diyos, da- sa mga pag kapangyadihan magpapiya sa mga maki maskit. 10 Maki tinaboyan kapangyadihan para magpaban-aw binagro, maki kay tinaboyan kapangyadihan magbarita ibat sa Diyos. Da maki din tinaboyan akayanan para amatangan no nakay da ibat sa Ispirito Banal da- no nakay da ibat sa daet ka ispirito. Maki din tinaboyan akayanan magtokawanan sa nawed amba sadiri tokawanan da- da sai dapo ba tinaboyan akayanan magpapawa pag alabet sabiyen pag mga tokawanan naba. 11 Ngani sai ngani ka Ispirito Banal da mamanawen boo mga naba da- mag-eray Roma-Roma ka taboy toltol sa konin alabet. 12 Panawen laki Kiristo ba makay sai ngani ka lawas maki maoson ka eray, kayno man nagboo Roma-Roma ka eray ba sai dapo ngani din ka lawas. 13 Tamo boo mga mag-isarig kayno Diw kayno Nawed Diw, kayno tagoanggat kayno ligayaw ba da boo ba binaotismohan sa laki Kiristo sa sai ngani ka Ispirito Banal para sai:yani ka lawas. Tamo boo ba makay pinainem sa sai ngani ka Ispirito Banal. 14 Da lawas ba nawed nagboo sai ngani ka eray no nawed ba maoson ka eray. 15 No da paa amba, Ako nawed alima kaya ako ba nawed sai ka eray lawas, ba eray dapo din lawas da paa. 16 No da talinga amba, Ako nawed mata kaya ako ba nawed sai ka eray lawas, ba eray dapo din lawas da talinga. 17 No mata:ani da boo lawas ba omaning tay kapakarngey? No talinga:a da boo lawas ba omaning tay kaarek? 18 Ngani pinalagay Diyos da tayma eray lawas sa konin-konin rogar toltol sa konin alabet. 19 Nawed abaya awiten lawas no naba ba sai ngani ka eray. 20 Ngani da totoo ba maoson da mga eray ngani ba sai ngani da lawas. 21 Kaya nawed abaya sabiyen pag mga mata sa mga alima amba, Kandawa ba nawed kidawa kailangan, kayno pag olo ba nawed abaya sabiyen sa mga paa amba, Kandawa ba nawed naay kailangan. 22 Da totoo ba da mga eray lawas pag makay wala kaya ba naba dapo da lalo kailangan gidte. 23 Da mga eray lawas pag tamo nagremrem ba nawed naw kapodi-podi ba lalo tamo nag-alagaan piya. Da mga eray nawed maganda ba naba lalo tamo nagpaganda, 24 nawed:dani kailangan panawenen naba sa mga maganda ka eray. Pag pinanawen Diyos da tamo lawas konin tinaboy lakol dapo ka kapodiyan sa mga eray nawed naw kapodi-podi, 25 para sibay gidte da kasaiyan da- para da boo ba magpaytolongan. 26 No nagkaaskitan da sai ka eray lawas ba nagkaaskitan da boo. No nagpapodiyan da sai ka eray lawas ba nagkaasyagan da boo. 27 Koyo ngani- boo ba sai ngani ka lawas laki Kiristo da- tayma sai ba eray naba. 28 Magtaboy da Diyos sa rimponan mga mag-isarig sa laki Kiristo pag monaan ba mga pinili sogoan, ikadarwa ba mga tagabarita ibat sa Diyos da- ikatatlo ba mga tagatodo. Iya pomalagay din mga kapaban-aw binagro, mga kapapiya sa mga maki maskit, mga tagatolong, mga magpangonaan da- mga magtokawanan sa nawed amba sadiri tokawanan. 29 Nawed da boo ba pinili sogoan, kayno tagabarita ibat sa Diyos, kayno tagatodo, nawed da boo ba tinaboyan akayanan magpaban-aw binagro, 30 kayno magpapiya sa mga maki maskit, kayno magtokawanan sa nawed amba sadiri tokawanan, kayno magpapawa pag mga naba. 31 Kaya sa boo mga taboy tinaboy Ispirito Banal, tamo alabeten gidte da mga taboy, pag lalo dapo maki pakinabang. Da- mona ba naay batay tindo sa koyo da lalo piya sa boo.
1 Kayno tamo katokawanan sa tokawanan nawed amba tamo sadiri tokawanan da- sa tokawanan mga anghil, no tamo ba wala kay palayaw tamo ba makay ngani beet tigtig kampana no nawed ba beet bodyong. 2 Kayno tamo ba maki akayanan magbarita ibat sa Diyos da- kamatang sa boo mga barita nawed amatangan Roma ka iraya, no tamo man maki boo kaamatangan da- lakol gidte ka pag-isarig anggan tamo apasalyo da mga bogsor ngani tamo wala kay palayaw ba tamo ba wala kaparosan. 3 Kayno tamo panaboyon da boo tamo nag-apo, da- kayno tamo taboyon da tamo lawas para arengen, no tamo wala kay palayaw ba wala kapiyaanan batay ataboy naba sa tamo. 4 Da palayaw ba matiyaga da- mabait, nawed amagan, da palayaw ba nawed magmalapodi, nawed magpaatatas sa sadiri, 5 nawed langsod, nawed makasadiri, nawed baisen, nawed din magpadaet sa kapowa. 6 Da palayaw ba nawed angasan sa panawen daet no nawed ba angasan sa katotohanan. 7 Da palayaw ba maagwantahen sa boo, matiwalaen, kapno sarig da- magtiyaga anggan arasan. 8 Kayno da akayanan magbarita ibat sa Diyos ba batay awala doma, kayno da akayanan magtokawanan sa nawed amba sadiri tokawanan ba batay empet, kayno batay awala da kaamatangan, ngani da palayaw ba wala arasan. 9 Nawed dapo sibay da tamo kaamatangan da- da akayanan magbarita ibat sa Diyos 10 ngani no rateng da sibay gidte ba da korang batay awala. 11 Pag tamo ba onga dapo tamo magtokawanan, magremrem da- magmatiwid makay din pag boo mga onga. Mona tamo ba sibay:ya da kakoyayen da- tamo:wani inogonan da mga ogali onga. 12 Sa mona ba makay kolabo ka anino da tamo nagkaakitan sa istampa, ngani batay rateng da aldaw da Diyos ba tamo batay gidte karopang. Badyana ngani da tamo amatangan mona, ngani batay rateng da aldaw batay sibay gidte da tamo batay amatangan, makay pag amatangan Diyos para sa tamo. 13 Tiya pag tatlo ba baywi, da pag-isarig, pag-asa da- palayaw, ngani da makapangyadihan sa tatlo naba ba da palayaw.
1 No amba da palayaw ba tamo alabeten gidte. Tamo alabeten da mga taboy Ispirito, lalo:ani gidte da taboy para magbarita ibat sa Diyos. 2 Da iya magtokawanan sa nawed amba sadiri tokawanan ba nawed magtokawanan sa iraya no nawed sa Diyos panawen wala iraya abaya kamatang pag konin nagsabi. Ngani iya sa tolong Ispirito Banal ba magtokawanan mga barita nawed amatangan Roma ka iraya. 3 Ngani da iya kay magbarita ibat sa Diyos ba magtokawanan sa mga iraya para magpaonay sa kora pag-isarig, magpaeyat sa kora remrem da- para magpaangas sa kora. 4 Da sadiri biyag ispirito da nagpaonay pag magtokawanan nawed amba sadiri tokawanan, ngani da rimponan mga mag-isarig da nagpaonay pag magbarita ibat sa Diyos. 5 Naay disin alabet koyo boo ba tinaboyan akayanan magtokawanan sa nawed amba sadiri tokawanan, ngani da lalo dapo naay alabet ba koyo kabarita ibat sa Diyos. Lalo mahalaga da magbarita ibat sa Diyos saba kay sa magtokawanan sa nawed amba sadiri tokawanan poyida ngani- no maki magpapawa no nakay da alabet sabiyen pag konin sabi para katolong sa magpaonay sa pag-isarig mga rimponan mga mag-isarig. 6 Kaya, mga arian, kayno ako paraoy saba sa koyo da- magtokawanan sa koyo sa tokawanan nawed tamo tokawanan, nakay da koyo batay napakinabang ibat sa naay? Wala. Koyo batay ngani kapakinabang no naay batay ineray sa koyo sai ka barita ibat sa Diyos, e da kaamatangan para sa Diyos e da mga batay mangyadi e da mga todo. 7 Kayno sa mga pabeet wala biyag makay mga bangsi da- kodyapi, omaning batay ahawagan tawa man no nakay da rimpa no nawed mapawa da beet repa? 8 Da- no nawed mapawa da berya bodyong, tawa da batay amatangan iya ba patwagan para sa labanan? 9 Amba kay din, omaning batay amatangan tawa man da tamo alabet sabiyen no tamo magtokawanan sa mga tokawanan nawed tamo tokawanan pag nawed kay kora nagkaamatangan? Makay tamo magtokawanan sa koaya. 10 Maoson ka Roma-Roma ka kalasi tokawanan sa paranawan da- tayma sai ba maki alabet sabiyen, 11 ngani no ako nawed madonong pag tokawanan magtokawanan naay katokawanan ba kidawa ba batay magpatengelan. 12 Panawen koyo mag-alabet gidte sa mga taboy tinaboy Ispirito Banal, koyo sikapen koyo tabangen da mga taboy kapaonay sa pag-isarig mga rimponan mga mag-isarig. Naba gidte da kailangan sa boo taboy. 13 Panawen naba ba kailangan daranginen pag magtokawanan sa nawed amba sadiri tokawanan amba pakanen din iya pag taboy para kapapawa din pag konin nagtokawanan. 14 No tamo magdarangin sa tokawanan nawed amba tamo sadiri tokawanan, da tamo ispirito da magdarangin ngani wala pakinabang da tamo remrem. 15 Nakay da tamo kailangan panawenen? Tamo:wa magdarangin sa tamo ispirito, ngani tamo din gamiten da tamo remrem sa tamo darangin. Tamo:wa omigway sa tamo ispirito ngani tamo din gamiten da tamo remrem sa tamo mag-igway. 16 No tamo magpasalamat sa Diyos sa tamo ispirito ngani, omaning batay kasabi "Amba:a ngani-" da sai ka iraya saba pag wala mga makay naba ka taboy, panawen nawed konin amatangan da tamo nagsabi? 17 Piya da tamo magpasalamat, piho naba, ngani naba ba nawed batay katolong sa Roma da- nawed batay kapaonay sa kora biyag ispirito. 18 Ako magpasalamat sa Diyos ako magtokawanan sa mga tokawanan nawed amba naay sadiri tokawanan labi dapo sa koyo boo. 19 Ngani sa magrimpon da mga mag-isarig, piya dapo sa naay da magtokawanan lima ka tokawanan amatangan boo para magtodo sa mga Roma, sa sampo ka ribo ka tokawanan nawed amatangan tawa man. 20 Mga arian, koyo ba ayaw remrem onga. Koyo ba kailangan makay:ya polahan pag nawed dapo kamatang kadaetan, ngani koyo kailangan koyay:yani sa magremrem. 21 Makay tiya da nagkasorat sa Banal ka Kasoratan amba, Da Panginoon ba amba, Ako batay magtokawanan sa lasyon tiya. Da mga iraya sa mga Roma ka lasyon, pag maki Roma ka tokawanan da batay magtokawanan para sa naay; Da mga bibi mga taga Roma ka lopa da naay batay ginamit, Kayno amba ba ako ba nawed batay pinakarngeyan naay kairayaan. Naba:a ngani. 22 No amba, da taboy para katokawanan sa mga nawed amba sadiri tokawanan ba sai ka tanda para sa mga nawed mag-isarig, nawed sa mga mag-isarig, sai ka tanda amba da Ispirito Banal ba sa tamo. Ngani da taboy magbarita ibat sa Diyos ba tanda para sa mga mag-isarig da- nawed sa mga nawed mag-isarig. 23 No sa odas magrimpon da boo mga mag-isarig tamo boo ba magtokawanan sa nawed amba tamo tokawanan da- maki Romateng saba mga iraya wala makay naba ka taboy kayno mga nawed mag-isarig, nawed ma kora batay sinabi sida da tamo olo? 24 Ngani no tamo boo ba magbarita ibat sa Diyos da- Romateng saba da sai ka nawed mag-isarig kayno iraya wala makay naba ka taboy, da boo konin arngeyan ba batay pinaaram amba iya ba hinosay Diyos, 25 da- iya batay omaken pag boo nagkatago sa konin poso. Kaya iya batay lomohod, batay somamba sa Diyos da- batay:ya sinabi amba, Totoo da Diyos ba towa sa tamo tenga. 26 Mga arian, mona nakay da alabet sabiyen pag boo naba? Sa odas tamo magrimpon, maki batay mag-igway, maki batay magtodo, maki batay magpapawa pag alabet Diyos, maki batay magtokawanan sa nawed amba sadiri tokawanan da- maki kay batay magpapawa pag tinokawanan naba. Tamo:wa panawenen da boo nakayman sa batay kapaonay sa pag-isarig mga rimponan. 27 No maki batay magtokawanan sa nawed amba sadiri tokawanan, sibay:yani da darwa no nawed ba tatlo da- sidawa no nawed ba kora ba halinghanan da- kailangan kay ba maki batay magpapawa pag alabet sabiyen pag kora nagsabi. 28 Ngani no wala batay magpapawa pag alabet sabiyen, ayaw:wa ngani magkasamang da tayma sai, no nawed sa konin sadiri poso da iya magtokawanan sa Diyos. 29 Magtokawanan da darwa no nawed ba tatlo ka iraya pag tomabang pag taboy magbarita ibat sa Diyos, da- timbangen kay pag mga Roma da kora mga nagsabi. 30 Da- no da sai kay sa mga magtongka saba ba tomabang sai ka barita ibat sa Diyos ba empet kay da monaan magtokawanan. 31 Panawen tamo boo ba abaya sai-sai magbarita ibat sa Diyos para atod-an da boo da- apaeyat da remrem. 32 Da mga tomabang pag taboy magbarita ibat sa Diyos ba kailangan magpigil sa sadiri, 33 panawen da Diyos ba nawed nagkaangasan sa magsamperaket no nawed sa kaginhawahan. Makay pag bagay mangyadi sa boo mga rimponan mga hinidang Diyos, 34 da mga babayi da kailangan ayaw magkasamang sa odas magrimpon da mga mag-isarig. Panawen nag-ayawan sa kora da magtokawanan sa makay naba ka magrimpon, kora kailangan pasangato makay pag nagsabi Bilin tinaboy sa laki Moysis. 35 No kora maki alabet amatangan, kora tanongon sa kora sawa no rateng sa balay, panawen kakaya-kaya da magtokawanan da sai ka babayi sa odas magrimpon. 36 Kaaram kay da koyo remrem ba da tokawanan Diyos ba omibat sa koyo e koyo ngani da tomabang naba! 37 No nagremrem tawa man amba iya ba tomabang pag barita ibat sa Diyos e nakayman ka taboy Ispirito, kailangan konin ameleen amba bilin Panginoon da naay nagsorat sa koyo. 38 Da iya dayo magkoyinta naba ba ayaw din koyo koyintahen. 39 Kaya, mga arian, tamo alabeten gidte kabarita ibat sa Diyos, ngani ayaw kay tamo pag-ayawan da magtokawanan sa nawed amba sadiri tokawanan. 40 Ngani tamo panawenen da boo nakayman sa bagay da- maayos ka padaan.
1 Mga arian, naay nagparemrem sa koyo da Pirmida ka Barita pag naay pinangadar sa koyo, pag koyo tinabang da- sarigan:nani koyo pag-isarig. 2 Sa Pirmida ka Barita naba ba koyo ba naribri, no koyo maonay maggegen sa tokawanan naba pag naay pinangadar sa koyo-poyida ngani no koyo misarig ba nawed nagremrem da koyo sinarigan. 3 Panawen naay tinaboy sa koyo da adar pag mahalaga dapo sa boo, pag naay din tinabang amba, Laki Kiristo ba natay panawen sa tamo mga kadaetan toltol sa nagkasabi Banal ka Kasoratan, 4 iya ba limbeng da- iya ba biniyag:gakay sa katlowan aldaw toltol din sa Banal ka Kasoratan, 5 da- iya ba paban-aw nawed ngani sa laki Pidro no nawed ba sa kora boo labindarwa ka nagtod-an. 6 Kalbas ba iya paban-aw sa sai ngani ka odas sa labi sa lima ka daan mga kaarianan. Da kaosonan sa kora ba biyagan dapo anggan mona, ngani natay:yani da kalaati. 7 Da- iya ba paban-aw din sa laki Tiyago da- sa boo mga pinili sogoan. 8 Sa paoriyan iya ba paban-aw din sa naay-ngani ako ba makay onga lolo. 9 Panawen ako da lalo dapo nawed abaya sa mga pinili sogoan. Ako ba nawed abaya awiten pinili sogoan panawen naay pinahidapan da rimponan mga hinidang Diyos, naba da mga mag-isarig. 10 Ngani panawen sa kapiyaanan remrem Diyos ako ba makay:yakay tiya, da- nawed kay nawal-an kaparosan da konin tinaboy tiya sa naay. Ako ba magtiyaga labi dapo sa tawa man sa mga pinili sogoan, kayno tiya ba nawed sa naay sadiri akayanan no nawed ba sa tolong Diyos sa naay. 11 Kaya kayno ako kayno kora, naba da yamen nagpangadar da- naba da koyo nagsarigan. 12 Mona, no yamen nagpangadar amba laki Kiristo ba biniyag:gakay, kaytang maki nagsabi da kalaati sa koyo amba nawed batay biniyag:gakay da mga nangatay? 13 No totoo ngani- nawed batay biniyag:gakay da mga nangatay ba akitan nawed biniyag:gakay laki Kiristo. 14 Da- no nawed biniyag:gakay laki Kiristo ba wala kaparosan da yamen nagpangadar da- wala din kaparosan da tamo pag-isarig. 15 No amba ba akitan yamen ba mga boslien ka sistigo para sa Diyos. Panawen yamen sinistigohan laki Kiristo ba biniyag:gakay Diyos, ngani akitan naba ba nawed totoo, no nawed ngani-batay biniyag:gakay da mga nangatay. 16 No nawed batay biniyag:gakay da mga nangatay ba nawed din biniyag:gakay laki Kiristo. 17 Da- no nawed biniyag:gakay laki Kiristo ba tamo ba sa tamo dapo mga kadaetan, da- wala kaparosan da tamo pag-isarig. 18 Kaya, no amba, da boo mga mag-isarig sa laki Kiristo nangatay ba nangatay:ya sa wala arasan. 19 No da tamo mag-asa sa laki Kiristo ba para sa biyag ngani tiya, tamo:wa da lalo gidte kakayawte sa boo iraya. 20 Ngani da totoo ba laki Kiristo ba da monaan biniyag:gakay ibat sa mga nangatay. Kaya piho gidte tiya ba ako- amba batay gidte biniyag:gakay da mga mag-isarig nangatay:yani. 21 No omaning rateng da katayan panawen sa sai ka iraya, amba kay din, Romateng din da magbiyag:gakay panawen sa sai ka iraya. 22 Panawen no omaning batay natay da boo iraya panawen sa kora kasaiyan sa laki Adan, amba kay din batay nabiyag:gakay da boo iraya panawen sa kora kasaiyan sa laki Kiristo, 23 ngani da tayma sai ba sa konin-konin odas hinanda, laki Kiristo da monaan sa boo, kalbas ba da mga sa laki Kiristo gidte sa odas iya paraoy:yakay towa. 24 Kalbas batay rateng da arasan paranawan, sa batay dinaeg laki Kiristo da boo kasakopan, kapoonan da- kapangyadihan sa kalaw-awan ba konin batay tinaboy sa Diyos Apang da konin kahadian. 25 Panawen kailangan maghadi laki Kiristo anggan da boo konin mga kalaban ba dinaeg da- pinasangato Diyos sa konin. 26 Da paoriyan gidte ka kalaban pag batay simpo ba da katayan. 27 Makay tiya da nagsabi Banal ka Kasoratan amba, Da boo nakayman ba pinasangato gidte Diyos sa konin. Naba:a ngani. Ngani sa mga tokawanan amba, boo nakayman ba mapawa da Diyos ba nawed anggat sa mga nagsabi naba, panawen iya da batay pomalagay pag boo nakayman sa galem kapangyadihan laki Kiristo. 28 Da- pagka da boo ba pinasangato:wani sa kapangyadihan laki Kiristo pag Onga Diyos ba iya kay ba batay pinasangato sa kapangyadihan Diyos Apang, pag pomalagay boo nakayman sa galem konin kapangyadihan. Sa makay naba, da Diyos ba batay gidte maghadi sa boo-boo. 29 No nawed amba ba nakay da halaga no magpabaotismo sa sapa da mga iraya kahalang sa mga nangatay? No nawed gidte batay:yakay biyagan da mga nangatay, kaytang dapo magpabaotismo sa sapa da mga iraya kahalang sa mga nangatay? 30 Da- yamen, kaytang dapo yamen batay pinaen yamen biyag sa katayan tayma odas? 31 Mga arian, wala aldaw ako nawed nagkabali sa katayan. Naay nagsabi tiya panawen koyo ba naay nagpalakol panawen sa tamo kasaiyan sa laki Kiristo Hisos tamo Panginoon. 32 No ibat sa naay ngani alabet da ako maglaban sa mga kalaban pag makay mabangis ka hayop towa sa Ipiso wala:a batay naay apakinabang. No nawed ngani- batay biniyag:gakay da mga nangatay, piya dapo no tamo toltolon da kasabiyan tiya amba, Tamo mamangan:na maoson da- minem:ma maoson, Panawen girabas tamo ba batay natay. Naba:a ngani. 33 Ayaw koyo padaya. Maki kasabiyan amba, Da mga daet ka pal-anggat ba kasida mga piya ka ogali. Naba:a ngani. 34 Koyo:wa remremen piya da- ayaw:wani magpamanawen daet. Da kalaati sa koyo ba nawed kilala sa Diyos. Naay nagsabi tiya para koyo akayaan. 35 Ngani maki batay magtanong amba, Omaning batay:yakay biniyag da mga nangatay? Nakay da batay hidsoda kora lawas? 36 Kawo matolingag! Nawed batay nabiyag da beter komo nag-asik anggan nawed narokas naba, da alabet sabiyen ba makay natay. 37 Da- da komo nag-asik ba nawed amba sobok:kani no nawed ba beter, makay beter paray kayno Roma ka beter. 38 Da Diyos da magtaboy pag lawas sa beter naba toltol sa konin alabet, sa tayma beter ba konin nagtaboy pag konin gidte lawas. 39 Da- nawed pariho da ener boo mga rinarang maki biyag. Sai ka kalasi ener da mga iraya, Roma:akay da ener mga hayop, Roma kay da ener mga ibon, da- Roma kay da ener mga isda. 40 Maki mga lawas sa langit da- maki kay mga lawas sa lopa. Roma da kagandahan mga lawas sa langit, Roma da kagandahan mga lawas sa lopa. 41 Roma da kagandahan aldaw, Roma kay da kagandahan bolan, da- Roma kay din da kagandahan mga magirem, da- kayno da kagandahan sai ka magirem ba Roma sa kagandahan mga Roma ka magirem. 42 Amba kay din, da biniyag:gakay mga nangatay:yani. Da lawas pag limbeng ba nagkarokas, ngani da lawas pag biniyag:gakay ba nawed tay narokas kaagoton man. 43 Pag iya limbeng ba nawed maganda, pag iya biniyag:gakay ba maganda. Pag iya limbeng ba wala kaya, pag iya biniyag:gakay ba maki kapangyadihan. 44 Pag iya limbeng ba lawas para sa lopa, pag iya biniyag:gakay ba lawas para sa soksokowan. No maki lawas para sa lopa ba maki din lawas para sa soksokowan. 45 Makay tiya da nagsabi sa Banal ka Kasoratan amba, Da monaan iraya, naba ba laki Adan, ba rinarang da- tinaboyan biyag. Naba:a ngani. Da paoriyan Adan, naba ba laki Hisos, ba Ispirito pag magtaboy biyag. 46 Ngani nawed da monaan da para sa soksokowan, da para sa lopa da monaan, bayo pag para sa soksokowan. 47 Da monaan lalaki ba ibat sa lopa, panawen iya rinarang ibat sa onggang, da ikadarwa ka lalaki ba ibat sa soksokowan. 48 No omaning da monaan iraya ba rinarang ibat sa onggang, makay din da boo mga iraya rinarang ibat sa onggang. No omaning da iraya ibat sa soksokowan ba makay din da mga taga soksokowan. 49 No omaning tamo ba makay hidsoda iraya omibat sa lopa, batay rateng da aldaw tamo batay din makay hidsoda iraya ibat sa soksokowan. 50 Mga arian, tiya da naay alabet sabiyen, da nagboo ener da- daya ba nawed batay kaapo pag kahadian Diyos, da- da nagkarokas ba nawed tay kaapo pag wala karokasan. 51 Koyo gidte magpakarngey, naay nagpanoltol sa koyo da katotohanan mona ngani amatangan amba, Nawed tamo boo ba batay natay ngani tamo boo ba batay binago, 52 sa nawed te maagot, sa sai ka pirpira, sa odas meet da paoriyan bodyong. Panawen batay meet da bodyong, da mga mag-isarig nangatay:yani ba batay:yakay biniyag da- nawed:da batay narokas. Tamo boo ba batay binago, 53 panawen tiya pag lawas nagkarokas ba kailangan gidte palitan pag nawed nagkarokas da- da lawas nagkatay ba kailangan gidte palitan pag nawed nagkatay. 54 No napalitan:nani pag wala karokasan da nagkarokas da- no napalitan:nani pag wala katayan da nagkatay ba batay nangyadi da nagkasorat sa Banal ka Kasoratan amba, Dinaeg:gani da katayan, sibay:ya gidte da pandaeg. Naba:a ngani. 55 Da- amba, O katayan, saan da komo pandaeg? O katayan, saan da komo kapangyadihan magbono? Naba:a ngani. 56 Da kapangyadihan katayan magbono ba ibat sa kadaetan da- da kapangyadihan kadaetan ba mag-ibat sa Bilin tinaboy sa laki Moysis. 57 Ngani tamo magpasalamat sa Diyos pag magtaboy pandaeg sa tamo panawen sa tamo Panginoon Hisos Kiristo. 58 Kaya ngani-, mga nagpalayaw arian, tamo magpakaonay da-ayaw pababa. Tamo magsipag gidte sa panawen para sa Panginoon panawen tamo amatangan nawed batay wala kaparosan da tamo nagtiyaga para sa Panginoon.
1 Para kay sa torobosyon sa mga hinidang Diyos sa lopa Hodiya, koyo panawenen da makay pag naay sinabi sa mga rimponan mga mag-isarig sa lopa Galasiya. 2 Tayma aldaw linggo, da tayma sai sa koyo ba magbokod sai ka eray kwarta toltol sa konin akayanan, da- naba ba koyo iponon para nawed:da batay kailangan da magpangay-ay torobosyon no ako paraoy saba. 3 No ako bait saba naay batay pinakan sorat para akilalaan da koyo pinili, da- kora naay batay pinaparaoy sa goraan Hirosalim para babaen da koyo torobosyon. 4 Da- no bagay ako ba paraoy sata kora ba naay batay pinaanggat. 5 Ako batay domalan sa lopa Masidonya. No kadalan:nani ba ako batay paraoy saba sa koyo. 6 Kaaram ako batay mag-agot saba sa koyo da- kaaram saba:a din batay magpamataw anggan kadalan da tagdimla, kalbas ako koyo atolongan no ako batay mangadang kayno saan ako paraoy. 7 Ako ba dayo domalan ngani saba mona, da naay alabet ba maagot te sa koyo, no batay pinarogar Panginoon. 8 Ngani ako batay mamataw towa sa Ipiso anggan sa aldaw Pintikostis. 9 Lakol da pagkaodas towa para sa mabokar ka panawen kayno maoson da maghadang. 10 No laki Timotiyo ba bait saba sa koyo, iya koyo anggatan piya para wala kaliman da konin remrem, panawen iya ba makay din ako magpamanawen para sa Panginoon. 11 Iya ayaw koyo pagpolaan kayno tawa man, no nawed ba iya ba koyo tolongan para iya kaoli:akay towa sa naay wala nakayman, panawen iya ba naay nagpanyaan anggat sa mga kaarianan. 12 Para kay sa tam arian laki Apolos, iya ba naay gidte inaringi para iya domaraw saba sa koyo anggat sa mga arian, ngani iya nawed dapo alabet paraoy saba. Ngani iya batay din domaraw sa koyo no odas:sani. 13 Tamo layen handa da- magpakaonay sa tamo pag-isarig. Tamo magpakatapang da- magpakaeyat. 14 Da boo tamo nagpanawen ba tamo panawenen maki palayaw. 15 Mga arian, koyo amatangan amba da mag-anak laki Istipanas ba monaan tomabang sa Panginoon sa lopa Akaya, da- kora binokod da kora sadiri para sa magpamanawen sa mga hinidang Diyos. Mga arian, naay gidte nag-aringi sa koyo, 16 Koyo ba pasangato sa mga makay kora da- sa tayma magpamanawen da- magtiyaga anggat sa kora. 17 Ako angasan maraw rateng kora Istipanas, Portonato da- Akaiko, panawen kora pinanawen da nawed koyo apanawen. 18 Kora da pomaeyat sa naay remrem, amba din sa koyo remrem. Koyo pahalagahan da mga makay naba ka iraya. 19 Koyo ba nagtanong pag mga rimponan mga mag-isarig sa lopa Asiya. Sa ngaran Panginoon koyo ba nagtanong din talsawa Akila da- Prisila da- pag rimponan mga mag-isarig pag magrimpon sa sidawa balay. 20 Koyo ba nagtanong din pag boo mga kaarianan towa. Koyo kay magtanongan makay talkakaan sa laki Kiristo. 21 Ako laki Pablo da magsorat tiya pag tanong amba, Makay nakay koyo saba? 22 Sompaen da tawa man wala palayaw sa Panginoon! Marana tha! da alabet sabiyen ba, Yamen Panginoon, kawo kay bait:tani! 23 Sa koyo:wa ngani- da parongaw Panginoon Hisos. 24 Sa koyo:wa boo da naay palayaw panawen sa laki Kiristo Hisos.
1 Ako laki Pablo pinili sogoan laki Kiristo Hisos toltol sa alabet Diyos da- tamo arian laki Timotiyo da omanggat sa naay sa ako magsorat sa rimponan mga mag-isarig sa laki Kiristo sa goraan Korinto da- sa boo mga hinidang Diyos pag sa boo looban Akaya. 2 Sa koyo:wa ngani- da parongaw da- kaginhawahan ibat sa Diyos pag tamo Apang da- sa Panginoon Hisos Kiristo. 3 Tamo podiyen da Diyos da- Apang pag tamo Panginoon Hisos Kiristo, ag makayawteen ka Apang da- Diyos ag nag-ibatan boo kapaeyat sa remrem. 4 Nagpaeyat Diyos da tamo remrem sa boo tamo mga kahidapan, para no omaning konin pinaeyat da tamo remrem ba tamo kay ba kapaeyat sa remrem mga nagpahidapan nakayman. 5 No kaomaning kaoson da kahidapan yamen nagda- nas panawen sa yamen kasaiyan sa laki Kiristo, amba din da kasibayan eyat sa remrem yamen nagtabang panawen sa kasaiyan sa laki Kiristo. 6 Kayno yamen ba ahidapan, tiya ba para paeyaten da koyo remrem da- naribri. No yamen ba pinaeyat da remrem, koyo kay ba pinaeyat din da remrem para agwantahen da mga kahidapan koyo nagdanas makay din pag yamen nagdanas. 7 Maonay da yamen nag-asa para sa koyo, panawen yamen amatangan no omaning koyo ba kaeray sa yamen nag-agwanta amba din koyo ba kaeray din sa yamen nagpaeyat da remrem. 8 Mga arian, yamen nag-olbat sa koyo da mga kahidapan yamen dinanas sa Asiya. Halos nawed yamen akayanan da kahidapan yamen dinanas, kaya yamen ba nawal-an:nani pag-asa yamen batay dapo biyagan. 9 Amba sa yamen remrem ba rateng:nga da odas yamen ba batay:ya natay. Ngani naba ba nangyadi para yamen ba ayaw mag-isarig sa yamen sadiri no nawed ba sa Diyos pag magbiyag:gakay sa mga nangatay. 10 Naba pag odas ba yamen ba konin rinibri da- batay dapo rinibri ibat sa batay gidte binono. Maonay gidte da yamen pag-asa amba yamen ba konin dapo batay rinibri. 11 Yamen koyo kay tolongan sa darangin. Sa makay naba maoson da batay magpasalamat sa Diyos panawen sa konin parongaw sa yamen makay tebag sa darangin kaosonan mga iraya. 12 Tiya da dahilan kaya yamen ba magmalapodi sa kaangasan amba, nagsistigo yamen ispirito amba aasahan da- nawed magpasoli da yamen pakianggat sa boo, lalo:ani sa koyo. Tiya ba sa tolong Diyos da- nawed sa sadiri kadonongan iraya. 13 Kaya ayaw koyo magtaboy Roma ka alabet sabiyen sa yamen mga sorat sa koyo, no nawed ba pag nagsabi ngani saba sa sorat. Naay nag-asahan ba koyo gidte batay amatangan piya, 14 kayno yamen ba nawed dapo koyo gidte akilalaan. Para, no omaning koyo batay angasan sa yamen sa batay rateng da aldaw Panginoon Hisos, makay din yamen batay angasan sa koyo. 15 Panawen sa naay paniwala tiya da naay pakana ba paraoy dapo disin saba para dagdagan dapo da koyo kasyagan. 16 Naay alabet disin ba domalan:nani saba no ako ba paraoy sa Masidonya, da- doma-lan:nakay paoli ibat sa Masidonya para ako kay koyo atolongan sa ako magkadangan magparaoy sa Hodiya. 17 Mona maraw ako nawed:dani kaparaoy ba koyo dia batay asabi amba ako ba idaw elnek? Koyo dia maras ba amba magpokan-pokan da naay pakana makay pag nagpanawen mga iraya makaparanawan, pag mona ba amba, Hee, da- isag te ba amba, Nawed? 18 No omaning da Diyos ba nawed boslien ba amba din ako ba nawed boslien da- da naay tokawanan sa koyo amba Hee mona ba Hee ngani-. 19 Ag laki Hisos Kiristo Onga Diyos pag pinangadar yamen Silbano da- Timotiyo ba nawed amba mona ba, Hee, maraw kalbas ba, Nawed. Sa laki Kiristo ba da hee ba amba hee ngani-, 20 panawen sa laki Kiristo tamo kaabel da boo mga pangako Diyos. Panawen sa konin ba tamo katebag, Amba:a ngani-, para palakolon da Diyos. 21 Da Diyos da magpaonay sa yamen paniwala da- sa koyo paniwala panawen sa tamo kasaiyan sa laki Kiristo, da- iya din da homidang sa tamo. 22 Tamo ba tinanda Diyos da- tinaboyan pag konin Ispirito para tamo amatangan amba konin batay pinanawen da boo konin pangako. 23 Da naay sistigo ba da Diyos-konin amatangan da boo pag sa naay poso. Para ayaw pakaskitan da koyo remrem, ako ba nawed:da dapo batay paraoy saba sa Korinto. 24 Nawed kay sa yamen alabet dapo manihohan koyo sa koyo pag-isarig panawen maonay:ya koyo saba, yamen ngani alabet tomolong para koyo ba angasan gidte sa koyo magpamiyag.
1 Sa naay sadiri remrem ba ako nawed:da dapo batay paraoy saba para nawed naay pakaskitan da koyo remrem. 2 Panawen no naay pinakaskitan da koyo remrem wala:ani batay magpaangas sa naay no nawed ba koyo pag naay pinakaskitan da remrem. 3 Kaya naay:yani sinorat da makay naba sa koyo. Sa makay naba no ako ba batay paraoy saba ba ako nawed batay koyo pinakaskitan da naay remrem, koyo pag kailangan disin magpaangas sa naay, panawen ako magpaniwala sa koyo boo amba da naay kaangasan ba kaangasan din koyo boo. 4 Da naay poso ba kapno kahidapan da- karongkotan pag odas koyo naay sinoratan, da- halos nawed:da empet da magkabibingas. Kaya koyo ba naay sinoratan ba nawed para pakaskitan da koyo remrem no nawed ba para paban-awen sa koyo da naay lakol gidte ka palayaw sa koyo. 5 No maki pomakaskit sa tawa man remrem nawed ako da pinakaskitan naba. Ngani para malomanay da naay nagsabi ba piya dapo da magsabi amba koyo boo da pinakaskitan sa remrem. 6 Sa makay naba ka iraya ba sibay:yani da padosa pinanawen kaosonan sa konin. 7 Mona, iya ba koyo:wani kay patawaden, da- paeyaten da konin remrem para iya ba nawed ahinaan da remrem panawen labi:ya da karongkotan. 8 Kaya naay nag-aringi amba koyo kay paban-awen sa konin amba iya ba koyo dapo nagpalayaw. 9 Kaya ako somorat sa koyo narwaan ba para koyo ba porbahan para naay amatangan no koyo nagtoltol piya da boo naay pinangadar sa koyo. 10 Da tawa man koyo nagpatawad ba naay kay din nagpatawad. No maki man, da nakayman naay pinatawad, ba naay:ya pinatawad para kay sa koyo sa ropangan laki Kiristo, 11 para tamo ayaw tay nadaeg laki Satanas panawen tamo amatangan da konin mga rarang. 12 Maraw ako rateng sa Toroas para mangadar Pirmida ka Barita para sa laki Kiristo, tinaboy Panginoon sa naay da piya ka pagkaodas para magpamanawen para sa konin. Naay disin alabet ako maagot sata, 13 ngani nawed kapamataw da naay remrem panawen nawed man naay akitan sata da tamo arian laki Tito. Kaya ako paaram:ma sa kora da- toloy:ya pomaraoy sa Masidonya. 14 Ngani salamat sa Diyos pag layen magpangonaan sa tamo sa pandaeg panawen sa tamo kasaiyan sa laki Kiristo. Da- tamo ba konin naggamit para maglibosawan da bango pagkilala sa laki Kiristo kayno saan. 15 Tamo ba makay bango nagtaboy laki Kiristo sa Diyos da- magrateng sa mga iraya nagkaribri da- sa mga iraya nagkaparaoy sa kapadosahan. 16 Sa mga nagkaparaoy sa kapadosahan tiya ba sai ka bawo:wa gidte magso-rangyob sa batay katayan, ngani sa mga iraya nagkaribri tiya ba mabango maglibosawan da- magtaboy biyag. Tawa dia da maki sibay ka akayanan para sa makay naba ka panawen? 17 Yamen ba nawed makay mga Roma pag nagpabili ngani da Tokawanan Diyos para magsarak kabiyagan. No nawed ba yamen kay ba asarigan da- yamen ba mga sinogo ibat sa Diyos. Kaya sa ban-aw Diyos ba yamen ba magtokawanan panawen yamen maki kasaiyan sa laki Kiristo.
1 Da alabet sabiyen tiya ba nawed kay makay yamen:nakay nagma-lapodi da yamen sadiri, yamen ba nawed makay mga Roma pag kailangan mga sorat kayno para sa koyo kayno ibat sa koyo, para abaya amatangan mga rimponan no omaning da yamen gidte biyag. 2 Koyo gidte sadiri da makay naba ka sorat nagkasorat sa yamen poso para amatangan da- nabasa boo iraya. 3 Mapawa koyo da sorat laki Kiristo, pag sorat pinababa sa yamen. Tiya ba nawed sinorat iraya no nawed ba pinasorat ag Ispirito Diyos biyagan sa yamen, da- nawed sinorat sa sinapsap bato no nawed ba sa poso iraya. 4 Yamen magpangahas nagkaasabi da makay naba panawen sa yamen magtiwala sa Diyos panawen sa laki Kiristo. 5 No sa yamen sadiri ngani yamen ba wala gidte akayanan. Da boo yamen akayanan ba taboy Diyos, 6 pag tomaboy sa yamen akayanan para yamen ba tagapamanawen pag bayo ka kasaiyan, pag kasaiyan nawed nagkasarig sa Bilin nagkasorat, no nawed ba sa Ispirito Banal. Panawen da nagkasorat sa Bilin ba magbono, ngani da Ispirito Banal da magtaboy biyag. 7 Maraw tinaboy da Bilin nagkasorat sa sinapsap bato kaanggat da kasorap rawa Diyos, nawed aban-awan mga taga Israil da kiray laki Moysis, kayno da kasorap ka rawa naba ba nagkapra. No da panawenen pag nagkasarig sa Bilin nagkasorat, pag mono ba tinaboy maki anggat kasorap rawa, 8 kaomaning dapo gayed kasorap da rawa pag panawenen tinaboy toltol sa Ispirito Banal? 9 No da magtaboy padosa katayan ba maki kasorap rawa, lalo dapo makasorap da rawa naba pag magtaboy kataldengan. 10 Panawen saba tamo kasabi amba da monaan kasorap rawa ba napra:ani panawen naba ba dinaeg:gani pag lalo dapo kasorap ka rawa. 11 No maki kasorap rawa napra ba labi kay da kasorap rawa nawed:da tay napra. 12 Panawen yamen maki makay naba ka sarig, maeyat da yamen remrem magtokawanan. 13 Tamo ba nawed makay laki Moysis, pag tomak-leb konin kiray para nawed akitan mga taga Israil da kasorap rawa sa konin ba nagkapra. 14 Ngani kora ba etean kaya anggan mona ba baywi da takleb naba tayma odas kora nagbasa da monaan kasaiyan. Da- batay ngani aalis da takleb naba no da iraya ba maki:ya kasaiyan sa laki Kiristo. 15 Anggan mona, maki dapo takleb da kora remrem tayma odas kora nagbasa da mga ribro sinorat laki Moysis. 16 Ngani no paoli da iraya sa Panginoon ba da takleb ba batay naalis. 17 Da Panginoon pag nagtodyo towa ba da Ispirito Banal, da- no sa tawa da Ispirito Panginoon ba iya ba bal-an:nani. 18 Mona pag naalis:sani da takleb sa tamo kiray, tamo boo ba magban-aw makay anino pag kalakolan Panginoon. Da- da kalakolan naba pag mag-ibat sa Panginoon pag Ispirito Banal da magpabayo sa tamo hidsoda para tamo ba batay lalo:ani anino kalakolan Panginoon anggan tamo ba makay:ya din konin hidsoda.
1 Panawen sa kayawtean Diyos yamen konin hinidang para sa panawenen tiya kaya maeyat da yamen remrem. 2 Yamen dayo gidte sa mga makakaya ka panawen da- mga ogali nagtago. Yamen dayo gidte magpandaya da- nawed yamen nagpiri sa magdaya da Tokawanan Diyos. No nawed ba yamen magtokawanan pag katotohanan sa boo iraya para da boo ba kaban-aw yamen magpamanawen piya sa ban-aw Diyos. Kaya yamen ba handa pahosgahen sa tawa man. 3 No maki dapo takleb da Pirmida ka Barita pag yamen nagpapawa, naba ba nagkaatakleban ngani sa mga batay sa kapadosahan. 4 Kora ba nawed mag-isarig panawen da kora remrem ba binolag laki Satanas pag diyos sa paranawan tiya. Kora remrem ba konin binolag para nawed kora akitan da kapawaan pag Pirmida ka Barita para sa kalakolan laki Kiristo. No tamo ba magban-aw sa laki Kiristo, naba ba makay tamo ba magban-aw sa Diyos. 5 Laki Kiristo Hisos pag tamo Panginoon ba iya da yamen nagpangadar da- nawed yamen sadiri. Yamen ba koyo tagoanggat panawen sa laki Hisos. 6 Panawen da Diyos pag pomasked amba, Ibat sa kadeleman ba batay:ya lomwas da kapawaan, ba iya din da tomaboy kapawaan sa yamen mga remrem para yamen akilalaan da kalakolan Diyos pag nagkaakitan sa kiray laki Kiristo. 7 Ngani yamen pag tinaboyan tiya pag kayamanan ba wala koyinta-no makay sa mga sognoan yadi ngani sa lopa-para paban-awen amba da nawed akayanan amatangan pag kapangyadihan ba ibat sa Diyos da- nawed sa yamen. 8 Yamen ba layen nagkaapiki sa paribok ngani nawed kay nagkadaeg, maki odas yamen ba alingangaan ngani nawed kay awal-an pag-asa. 9 Yamen ba nagpahida- pan ngani nawed nagpabayaan wala palkabano, maki odas yamen ba nagpakaskitan ngani nawed nagbono. 10 Layen sa yamen lawas da katayan laki Hisos, para da biyag laki Hisos ba akitan sa yamen lawas. 11 Anggan nagkabiyag yamen ba layen nagkapabali sa katayan panawen sa laki Kiristo, para sa yamen lawas nagka-tay ba akitan da biyag laki Hisos. 12 Yamen layen nagkapabali sa katayan para panawen naba koyo ba pinakan biyag gidte wala arasan. 13 Nagpasked Banal ka Kasoratan amba, Kaya ako ba tomokawanan ba panawen ako ba misarig. Amba:a ngani. Makay din naba da yamen paniwala ba yamen din ba magtokawanan panawen yamen kay ba mag-isarig. 14 Panawen yamen amatangan da Diyos pag bomiyag:gakay sa Panginoon Hisos ba iya din da batay:yakay bomiyag sa yamen anggat sa laki Hisos da- batay bomaba sa tamo boo sa konin ropangan. 15 Da mga boo yamen kahidapan ba para ngani- sa koyo, para maoson da batay naribri panawen sa palayaw Diyos, da- lalo dapo maoson da batay magpasalamat da- magpodi sa konin. 16 Kaya yamen ba nawed nagkaahinaan da remrem. Kayno nagkamahina da yamen lawas onggang ba da yamen ispirito kay ba nagkamaeyat aldaw-aldaw. 17 Da nawed lakol da- nawed maagot ka kahidapan pag yamen nagdanas mona ba batay magbokar sai ka kalakolan wala arasan da- wala:a makay naba, 18 panawen da yamen gidte nagban-awan ba da mga nakayman nawed nagkaakitan, nawed da nagkaakitan, panawen da nagkaakitan ba nawed tay maagot, ngani da mga nakayman nawed nagkaakitan ba wala arasan.
1 Maraw tamo amatangan no naranggas da barangas pag tamo nagpamatawan mona, naba da tamo lawas onggang, tamo ba maki:yakay lawas sa soksokowan, sai ka pamatawan pinanawen Diyos da- nawed pinanawen iraya. Naba ba kaagot man ba nawed batay aranggas. 2 Yamen ngani- mag-aroran sa yamen lawas tiya da- masyado gidte tamo alabet da pamatawan sa soksokowan, 3 para no yamen nabihisan:nani ba nawed:da tay akitan tamo ba wala:a lawas. 4 Anggan tamo ba magpamataw da- po sa barangas tiya-naba da lawas onggang-tamo ba ahidapan da- mag-aroran, nawed kay para walaen da lawas onggang ngani para maki:yakay bayo ka lawas pag abaya sa soksokowan. Da- sa makay naba, da tamo lawas maki arasan ba batay bayo:wakay ka lawas pag abaya sa biyag gidte wala arasan. 5 Da Diyos:sa din da homanda sa tamo para sa nakayman tiya da- konin tinaboy sa tamo da Ispirito Banal para tamo amatangan konin din batay pinanawen da boo konin mga pangako. 6 Kaya layen maeyat da yamen remrem. Yamen amatangan anggan tamo ba sa pamatawan dapo tiya, naba da tamo lawas onggang, ba tamo ba nawed dapo sa ropangan gidte Panginoon, 7 panawen yamen magpamiyag sa mag-isarig sa Diyos da- nawed sa mga nagkaakitan. 8 Maeyat gidte da yamen remrem amba piya dapo da ogonan ag lawas tiya pag yamen nagpamatawan para mamataw anggat sa Panginoon. 9 Labi dapo sa boo da yamen gidte alabet ba kaangas-angas sa konin kayno sa lawas dapo tiya kayno sa ropangan:na Diyos. 10 Panawen tamo boo ba batay magparopang sa hosgahan laki Kiristo para da tayma sai ba tomabang pag bagay sa konin pinanawen, piya man da- daet, pag iya nagkabiyag dapo sa paranawan tiya. 11 Panawen yamen amatangan amba tamo boo ba kailangan aliman magpamanawen daet laban sa Panginoon, yamen nagsikap ranggoton da mga iraya para paoli sa konin. Amatangan Diyos da boo nakayman sa yamen biyag da- yamen nagsarigan ba yamen ba koyo:wa din amatangan makay naba. 12 Naay nagsabi tiya nawed para yamen:nakay magpodi sa yamen sadiri, no nawed ba para koyo ba pakanen dahilan magmalapodi panawen sa yamen da- para koyo ba maki:ya atebag sa mga iraya magpalakol sa nagkaakitan sa iraya da- nawed sa konin pagkairaya. 13 No yamen ba makay nasida da remrem ba para ngani sa Diyos, ngani no piya gidte kay da yamen remrem ba para sa koyo din kapiyaanan. 14 Panawen da palayaw laki Kiristo da magsogo sa yamen. Mona yamen amatangan amba panawen da sai ka iraya, naba ba laki Hisos Kiristo, ba natay para sa boo iraya ba da boo ba nangatay:ya din. 15 Iya ba natay para sa boo iraya para da mga nagkabiyag dapo mona ba ayaw:wa mamanawen pag kora sadiri nag-alabet no nawed ba pag nag-alabet laki Kiristo pag natay para sa kora da- biniyag:gakay. 16 Kaya ibat mona da yamen nagremrem sa iraya ba nawed sa kora nagpanawen sa lawas. Narwaan ba makay naba da yamen nagremrem para sa laki Kiristo, ngani mona ba nawed:dani. 17 No da tawa man ba maki:ya kasaiyan sa laki Kiristo ba iya ba bayo:wakay ka rinarang. Da boo monaan ogali ba kalawey:yani, mona ba da boo ba bayo:wani. 18 Da boo naba ba da Diyos da pomanawen. Panawen sa laki Kiristo tamo ba konin pinasai sa konin sadiri da- yamen ba konin hinidang para pasaiyen sa konin da mga iraya. 19 Da naay alabet sabiyen ba, sa laki Kiristo da boo iraya ba nagpasai Diyos sa konin sadiri da- konin:nani naglingo da kora kadaetan. Da- konin inintiriga sa yamen da barita para sa omaning batay maki kasaiyan sa Diyos. 20 Kaya yamen ba mga sogo laki Kiristo. Makay:ya din da Diyos da magpaaringi sa yamen sa koyo, sa ngaran laki Kiristo amba, Koyo mag-ay-ay para koyo ba pinasai sa Diyos. 21 Laki Kiristo ag nawed tang pomanawen daet ba pinababa Diyos da tamo kadaetan. Panawen naba ba tamo maki:ya kasaiyan sa laki Kiristo da- tamo kaeray sa kataldengan Diyos.
1 Maraw yamen ba mga katolong sa magpanawen Diyos, yamen mag-aringi sa koyo amba, Ayaw koyo nagwala kaparosan da kapiyaanan remrem Diyos pag koyo:wa tinabang. 2 Panawen nagsabi Diyos amba, Sa piyor gidte ka odas ba kawo ba naay pinakarngeyan, Sa aldaw karibriyan kawo ba naay tinolongan. Naba:a ngani. Koyo gidte pakarngeyan! Mona:ani da piyor gidte ka odas, mona:ani da aldaw karibriyan. 3 Yamen dayo magpahidap sa biyag tawa man para wala batay akitan daet sa yamen nagpamanawen. 4 No nawed ba da boo yamen nagpamanawen ba magmalapodi amba yamen ba mga tagapamanawen Diyos, maraw yamen ba mag-agwanta gidte sa mga lakol gidte ka kahidapan, sa mga nagkailangan, sa mga kaapikihan. 5 Yamen ba binogbog, piniriso, binolyawak mga iraya, yamen ba magpamanawen sobra:ani, no ina nawed:da din magkalek, nawed mamangan. 6 Yamen din magmalapodi amba yamen ba mga tagapamanawen Diyos panawen piya gidte da yamen ogali, da- yamen maki kaamatangan, katiyagaan sa magtolong, kabaitan; amba din panawen sa yamen da Ispirito Banal, da- yamen magpalayaw gidte, 7 panawen nawed bosli da yamen tokawanan da- panawen sa kapangyadihan Diyos, da- sa yamen panlaban da- panangga-naba da yamen mataldeng ka ogali. 8 No ina ba yamen ba nagpodiyan, no ina kay ba nagsidaan podi. No ina ba yamen ba nagpolaan, no ina kay ba nagpalakol gidte. Kayno yamen ba nag-awit boslien ba katotohanan da yamen nagsabi. 9 Makay yamen ba amba nawed kilala kayno yamen ba kilala gidte. Kayno yamen batay:ya disin natay ba yamen mayam ba biyagan dapo. Kayno yamen ba nagpadosahan ngani nawed kay nagbono. 10 Kayno yamen ba magrongkot, yamen ba layen din angasan. Kayno yamen ba makay mahidapen ba yamen magpakaron-an sa maoson. Yamen ba makay wala gidte, ngani yamen kay din da boo. 11 Mga arian sa Korinto, yamen ba magtokawanan mapawa sa koyo. Da yamen remrem ba boka sa koyo. 12 Koyo ba yamen gidte nagpalayaw, ngani koyo kay da madimla da palayaw sa yamen. 13 Ako ba magtokawanan sa koyo makay koyo ba naay mga onga, amba, Maraw ako ba magboka naay remrem sa koyo ba koyo kay din bokaan da koyo remrem sa naay. 14 Koyo ayaw magboya makisai sa mga nawed mag-isarig. Panawen omaning batay makisai da kataldengan sa kabalikoan? Omaning batay magpal-anggat da kapawaan sa kadeleman? 15 Abaya dia magpalsai laki Kiristo da- laki Satanas? Nakay da kasaiyan ag mag-isarig sa nawed mag-isarig? 16 Nakay da kasaiyan ag mga nawed gidte Diyos sa lakol ka balay Diyos? Tamo da balay Diyos biyagan! Iya:a din da amba, Ako batay mamataw sa kora da- batay mamiyag anggat sa kora, Ako da batay kora Diyos, kora da naay batay kairayaan. Naba:a ngani. 17 Kaya nagsabi Panginoon amba, Kaya koyo omadayo sa mga nawed mag-isarig, Koyo somway sa kora. Koyo ayaw magkapkap sa kayno nakay te man ka madomi, Da- koyo ba naay batay tinabang maki kaangasan. 18 Ako batay koyo Apang, Koyo da batay naay mga onga lalaki da- babayi. Naba da pinasked Panginoon pag makapangyadihan sa boo. Amba:a ngani.
1 Mga nagpalayaw, maraw da boo mga naba ba pinangako sa tamo ba tamo:wa benglayen da boo magpadomi sa tamo lawas da- ispirito. Tamo sikapen mamiyag sa maki aliman magpanawen daet laban sa Diyos para tamo ba banal gidte sa ban-aw Diyos. 2 Yamen koyo pakanen te sai ka rogar sa koyo remrem. Yamen ba wala dinaet, wala inanyaya- da- yamen ba wala dinaya kayno tawa man sa koyo. 3 Kaya naay nagsabi tiya ba nawed para koyo ba sawayen no nawed ba makay pag naay aray sinabi amba koyo ba yamen gidte nagpalayaw da- tamo batay layen mal-anggatan sa biyag da- sa katayan. 4 Lakol gidte da naay sarig sa koyo. Layen koyo ba naay gidte nagpalapodi! Kayno maoson da yamen kahidapan maeyat gidte da naay remrem, da- malabi da naay kaangasan. 5 Ibat sa yamen ba rateng sa Masidonya, yamen ba nawed din kapahinga: layen kahidapan da yamen dinanas. Maki maglabanan sa yamen paribok da- alingangaan sa yamen remrem. 6 Ngani da Diyos pag magpaeyat sa mga nagkaahinaan da remrem ba iya da pomaeyat sa yamen remrem pag rateng laki Tito. 7 Da pomaeyat sa yamen remrem ba nawed ngani pag rateng laki Tito no nawed ba anggat din da konin barita no omaning koyo din ba pomaeyat sa konin remrem. Iya amba koyo ba karemrem gidte sa naay, koyo ba marongkot sa nangyadi da- koyo ba handa gidte magkampi sa naay, kaya lalo:a ako angasan. 8 Kayno da naay sorat narwaan ba magpakaskit sa koyo remrem ba nawed naay nagpadaet naba. Ngani pag odas naba ba ako ba marongkot panawen naay amatangan da naay sorat ba magpakaskit sa koyo remrem, kayno nawed naw maagot. 9 Kayno amba, mona ba ako ba angasan, nawed sa pinakaskitan da koyo remrem, no nawed ba panawen da bokar naba ba koyo magbayo biyag. Da magpakaskit sa remrem naba ba ginamit Diyos, kaya da yamen sorat ba nawed magpadaet sa koyo. 10 Panawen da kaskitan sa remrem pag ibat sa Diyos ba magparemrem sa koyo para magsisi sa kadaetan da- magbayo:wakay ka biyag da- naba ba magbokar sa karibriyan pag wala:akay kaskitan sa remrem. Ngani da kaskitan sa remrem ibat sa paranawan ba magbokar katayan. 11 Koyo remremen da bokar pag kaskitan sa remrem ibat sa Diyos. Koyo ba magsikap gidte para pakilalaen koyo ba wala kadaetan para sa mga nakayman naba. Koyo ba abaisan sa nangyadi, koyo ba aliman gidte mamanawen daet laban sa Diyos, koyo ba alabet gidte ako ba rateng:ngakay sa koyo, da- koyo magremrem gidte magtolong, da- koyo alabet da magpamanawen daet ba padosahan. Koyo:wa ngani- Pinaban-Aw koyo ba wala pinanawen daet sa nangyadi naba. 12 Amatangan Diyos amba da naay sorat sa koyo ba nawed panawen sa kapanawen daet, nawed din sa pinanawenan daet, no nawed ba para paban-awen, sa ban-aw Diyos, no omaning da koyo magpalayaw sa yamen. 13 Kaya da koyo pinanawen ba magpaeyat gidte sa yamen remrem. Nawed ngani sa pinaeyat da yamen remrem, no nawed yamen ba angasan gidte din panawen sa kaangasan laki Tito sa koyo, panawen koyo din pinaeyat da konin remrem. 14 Koyo ba naay pinamalapodi sa laki Tito da- ako nawed kay akayaan sa naay pinanawen. Panawen no kaomaning kay totoo da boo yamen sinabi sa koyo ba amba kay din akitan laki Tito amba totoo da boo yamen sinabi sa konin para magmalapodi sa koyo. 15 Laki Tito ba magremrem sa koyo amba koyo boo ba matoltolon, iya ba koyo tinabang piya maki boo galang. Tayma iya magremrem makay tiya ba lalo maglakol da konin palayaw sa koyo. 16 Ako ba angasan panawen sibay:ya gidte da naay paniwala sa koyo mona.
1 Mga arian, yamen alabet paaramen sa koyo da para sa pinanawen pag palayaw Diyos sa mga rimponan mga mag-isarig sa lopa Masidonya. 2 Kayno kora domanas pag lakol gidte ka kahidapan makay porba gidte sa kora, ba kora maki dapo din kasyagan da- magorang mantaboy kayno kora ba mahidapen gidte. 3 Kora sadya kay mantaboy nawed ngani sa kora akayanan no nawed ba labi dapo sa kora akayanan. Tiya da naay amatangan panawen, 4 kora gidte inaringi sa yamen amba yamen kay paanggaten sa magtolong sa mga hinidang Diyos sa lopa Hodiya. 5 Kaya labi dapo sa yamen nag-asahan da kora taboy, da monaan ba kora dapo tinaboy da kora sadiri sa Panginoon da- bayo kay sa yamen toltol sa alabet Diyos. 6 Kaya panawen laki Tito da ibatan tiya pag panawen magtolong ba iya naay inaringi amba koyo konin tolongan anggan sibay gidte da koyo nantaboy tolong sa mga mahidapen. 7 Koyo ba maonay gidte sa mag-isarig, sa magpangadar, sa kaamatangan, sa kasipagan da- sa koyo palayaw sa yamen. Kaya koyo din sikapen koyo maonay gidte sa magpantaboy tolong sa mga arian sa Hodiya. 8 Nawed amba koyo ba naay nagsogo, naay ngani kay nagsabi sa koyo da nagpanawen tolong pag mga Roma ka mag-isarig para akitan no totoo gidte da koyo palayaw. 9 Panawen koyo:wa amatangan no kaomaning kakol da palayaw tamo Panginoon Hisos Kiristo amba kayno iya ba mayaman ba iya inadi mahidapen para ngani- sa tamo, para sa iya ba mahidapen ba tamo ba konin pinayaman. 10 Da- tiya da naay todo sa koyo para saba, amba koyo panawenen anggan kalbas pag koyo inompisa panawenen kadag-on dapo. Koyo da mangonaan nawed ngani sa magtaboy tolong no nawed ba sa mag-alabet magtaboy. 11 Kaya no omaning da koyo kasipagan pag koyo omompisa magtaboy tolong ba amba kay din da koyo kasipagan anggan kalbas:sani magtaboy tolong. Mantaboy koyo toltol sa koyo akayanan. 12 Panawen no ibat gidte sa remrem da tamo magpantaboy ba batay tinabang Diyos kayno kaomaning kakol da tamo akayanan, da- nawed kay konin nag-ay-ayan da wala sa tamo. 13 Nawed sa ako alabet koyo ba abyatan sa magpantaboy da- da Roma ba nawed. 14 Ngani da naay alabet ba pariho da boo. Mona ba koyo ag maki labi sa kailangan ba bagay koyo ba magtolong sa mga nagkorang. Doma no koyo:wakay da wala naw da- kora:akay da maki labi sa kora kailangan ba kora:akay da batay tomolong sa koyo. No amba ba koyo da- kora ba pariho magpaytolongan sa sai-sai. 15 Toltol sa nagkasorat sa Banal ka Kasoratan amba, Da somimot maoson ba nawed lomabis, Da- da somimot ibente ba nawed kinorang. Naba:a ngani. 16 Tamo magpasalamat sa Diyos panawen konin tinaboy sa laki Tito da kasipagan magtolong sa koyo makay din yamen. 17 Nawed ngani konin tinoltol da yamen inay-ayan, no nawed ba iya ba alabet gidte din tomolong sa koyo kaya sadya kay iya da paraoy saba. 18 Yamen batay pinaanggat sa laki Tito da sai ka arian kilala gidte sa boo rimponan mga mag-isarig sa laki Hisos panawen sa iya magpangadar Pirmida ka Barita. 19 Nawed ngani sa iya kilala gidte. Iya ba hinidang din mga rimponan mga mag-isarig para iya kaanggat sa yamen sa mga taboy yamen nag-asikaso, ag batay magpalakol sa Panginoon da- batay pomaban-aw pag tamo gidte alabet magtolong sa mga arian sa laki Hisos. 20 Yamen ba magdahan gidte para wala asabi da tawa man para sa lakol ka tolong tiya ag yamen nag-asikasohan. 21 Yamen gidte nagsikap panawenen piya tiya, nawed ngani sa ban-aw Panginoon no nawed ba kayno sa ban-aw din mga iraya. 22 Kaya yamen batay pinaanggat sa kora para paraoy sa koyo da sai dapo ka tamo arian pag maoson:na ka odas yamen:nani naporbahan da- yamen gidte akitan da konin alabet magtolong. Mona ba lalo dapo iya alabet magtolong panawen sa lakol da konin sarig sa koyo. 23 Para sa laki Tito, iya ba naay kamamanawen da- katolong sa naay nagpanawen para sa koyo. Para kay sa mga arian konin pal-anggat, kora ba mga sogoan mga rimponan mga mag-isarig sa laki Hisos. Da kora nagpanawen ba magpalakol sa laki Kiristo. 24 Kaya koyo kay paban-awen sa mga arian naba da koyo gidte palayaw para akitan mga rimponan mga mag-isarig da yamen nawed mamosli magmalapodi para sa koyo.
1 Nawed:da kailangan ako somorat dapo sa koyo para sa mga batay tinaboy tolong sa mga hinidang Diyos sa Hodiya. 2 Naay amatangan koyo ba handa tomolong da- koyo da naay nagmalapodi sa mga taga Masidonya amba, Kadag-on dapo koyo pag mga taga Akaya ba handa:ani magtolong. Da kaosonan sa kora ba pinolaw da remrem panawen sa koyo katiyagaan. 3 Ngani naay batay pinaonaan saba tiya da mga arian sa laki Hisos tiya para da yamen magpalakol para sa koyo magtaboy tolong ba nawed batay nawal-an kaparosan da- da koyo tolong ba handa:ani makay pag naay sinabi. 4 Panawen no maki mga taga Masidonya batay omanggat sa naay da- kora akitan koyo ba nawed handa, ba nawed ngani yamen batay akayaan no nawed ba kayno koyo din, panawen yamen ba batang magmalapodi para sa koyo. 5 Kaya naay rinemrem ba kailangan gidte paonaen saba da mga arian sa laki Hisos para koyo handaen da koyo batay tinaboy tolong pag koyo inako. No amba, no yamen batay Romateng ba handa:ani da koyo batay tinaboy da- batay akitan da koyo magtaboy tolong ba sa alabet gidte da- nawed sa lopod. 6 Koyo remremen amba, Da magtanem ibente ba batay omani ibente, da- da magtanem kay maoson ba batay omani maoson. 7 Da tayma iraya ba kailangan magtaboy toltol sa konin rinemrem. Ayaw sa dayo magtaboy da- nawed nagkalopod ngani. Nagkaangasan da Diyos sa iraya magtaboy maki lakol ka kaangasan. 8 Da Diyos ba maki kaya magpaoson sa tamo pag boo nakayman anggan labi dapo sa tamo nagkailangan, para tamo maki atolong sa mga maki kailangan. 9 Makay ngani- pag nagsabi sa Banal ka Kasoratan amba, Iya ba magorang magpantaboy sa mga mahidapen, Da konin kapiyaanan ba wala arasan. Naba:a ngani. 10 Da Diyos pag magtaboy sa magtanem pag batay tinanem da- pamangnen para apamangan, ba iya din da batay tomaboy sa koyo pag pananem da- batay magpalanobo tiya para batay mamokar maoson da koyo magorang magtaboy. 11 Da koyo biyag ba konin batay pinaoson sa boo nakayman para lalo dapo koyo batay katolong sa mga kaosonan. Sa makay naba ba batay omoson da magpasalamat sa Diyos panawen sa koyo tinaboy tolong pag yamen binaba sa kora. 12 Da koyo batay tinaboy tolong naba sa mga arian sa laki Kiristo ba nawed ngani batay kasibay sa kora nagkailangan no nawed ba batay dapo maglabi da pasalamat sa Diyos ibat sa kaosonan. 13 Da koyo matolongon sa kora da- sa boo ba magpaban-aw sa kora koyo gidte nagtoltol da Pirmida ka Barita para sa laki Kiristo da- panawen saba, kora ba batay magpodi sa Diyos. 14 Kaya koyo ba kora batay rinemrem da- dinarangin panawen kora akitan da lakol gidte ka parongaw Diyos sa koyo. 15 Tamo:wa magpasalamat sa Diyos panawen sa konin wala katepeng ka parongaw sa tamo.
1 Panawen laki Kiristo ba malomanay da remrem da- mabait ba ako laki Pablo ba maki nag-aringi sa koyo. Da kalaati sa koyo ba amba ako ba ababa da remrem no magpaloba sa koyo ngani ako matapang kay no ako adayo sa koyo. 2 Da naay nag-aringi sa koyo ba ako ba ayaw kay koyo lopodon magtokawanan mabyat, makay pag naay batay pinanawen sa mga magpasked amba ako ba magpamiyag toltol sa alabet lawas. 3 Kayno ako nagkabiyag sa paranawan ba nawed da ako maglaban ba makay ag maglaban mga makaparanawan. 4 Da naay panlaban ba nawed makay pag panlaban makaparanawan no nawed ba maki kapangyadihan ibat sa Diyos da- abaya paranggasen kayno nakay ka kota. Naay nagsida da mga nawed raoy ka matiwidan, 5 naay nagranggas da boo pag magpaatatas laban sa pagkilala sa Diyos, da- nag-abel da boo remrem para pasangatowen sa laki Kiristo. 6 Da- no boo:a gidte da koyo magpasangato, ako ba handa:ani magpadosa sa boo mga etean. 7 Da mga nakayman nagkaakitan ngani da koyo nagremrem. Hee. No magremrem da tawa man amba iya ba sa laki Kiristo ba konin remremen amba ako kay din ba sa laki Kiristo makay din iya. 8 Kayno labi da naay malapodi sa kapangyadihan tinaboy Panginoon sa naay ba ako nawed akayaan. Panawen ako ba konin pinakan kapangyadihan nawed para sidaen da koyo pag-isarig, no nawed ba para paonayen naba. 9 Ayaw koyo pagremremen amba da naay mga sorat sa koyo ba paliman ngani. 10 Da kalaati ba amba, Da konin mga sorat ba maki kaparosan, da- matapang, ngani no iya ba magropang sa yamen ba da konin lawas ba mahinaen da- da konin tokawanan ba wala kaparosan. 11 Pag mga iraya magtokawanan makay naba ba kailangan amatangan amba no nakay da naay nagsabi mona sa sorat sa ako adayo dapo ba amba din da naay batay pinanawen no ako ba sa koyo:wa din ropangan. 12 Ako nawed batay maggaya da- nawed batay magpatepeng naay sadiri sa mga Roma pag magpaatatas sa sadiri. Tolingag:ga gidte kora! Panawen kora-kora:a din magpanawen panokat sa kora sadiri, da- kora ba magpatepeng sa makay naba ka panokat. 13 Ngani sa ako magmalapodi ba ako nawed batay lomawlaw sa sokat tinaboy Diyos sa naay, pag sokat panawenen konin hinanda para sa naay, anggat din saba da ako magpangadar sa koyo. 14 Ako ba nawed maglawlaw panawen koyo ba sa galem sokat naba pag monaan ako paraoy saba sa koyo maki nagbaba Pirmida ka Barita para sa laki Kiristo. 15 Nawed labi da naay palapodi panawen nawed naay nagmalapodi da pinanawen ag Roma. Ako nawed din batay lomawlaw sa panokat tinaboy Diyos sa naay no nawed ba da naay sarig ba batay dapo omonay da koyo pag-isarig, da- panawen saba ba batay dapo lomapad da naay panawen, 16 para naay batay apangadar da Pirmida ka Barita sa mga poro sa koyo paribok. Sa makay naba ba nawed naay batay palapodiyen da pinanawen mga Roma sa eray pinapanawen Diyos sa kora. 17 Makay pag nagsabi sa Banal ka Kasoratan amba, Da Panginoon da palakolon mga alabet magpalakol. Naba:a ngani. 18 Da nagmahalaga Panginoon ba nawed da magmalapodi sa sadiri no nawed da mga iraya abaya gidte sa konin.
1 Naay alabet ba koyo mag-agwanta sa naay batay sinabi makay mayam ako ba tolingag. Koyo kay te pakarngeyan da naay nagsabi. 2 Ako ba magpangimbolo sa koyo panawen tiya ba tinaboy Diyos sa naay. Koyo ba makay sai ka daraga malinis batay pinaisawa sa sai ngani ka lalaki, wala Roma no nawed laki Kiristo. 3 Ngani ako ba mag-alingangaan, kaaram koyo remrem ba makay alason da- koyo batay:ya napaadayo sa totoo da- malinis ka pag-isarig sa laki Kiristo makay bayi Iba ba dinaya otan. 4 Panawen koyo mayam nagtabang maki kaangasan da tawa man magrateng sa koyo da- magpangadar Roma ka laki Hisos, da- lain pag naay pinangadar, da- koyo din nagtabang da sai kay ka ispirito da- lain pag koyo:wa tinabang da- koyo nagtabang da sai kay ka Pirmida ka Barita da- lain pag naay tindo sa koyo. 5 Ngani da naay remrem ba ako ba kapariho din naba pag mga pinili sogoan lakol ag koyo amba ba maki kapangyadihan. 6 Kayno ako nawed amba panday magtokawanan, ba ako ba nawed kay korang sa kaamatangan. Tiya ba naay Pinaban-Aw sa koyo sa boo padaan da- sa boo nakayman. 7 Pag naay pinangadar sa koyo da Pirmida ka Barita ibat sa Diyos, koyo ba nawed naay inay-ayan nakayman ka bayadan. Ako ba pomaababa sa sadiri para koyo da pinaatatas. Naay dia kadaetan tiya? 8 Pag ako pomangadar saba sa koyo ba maki mga Roma ka rimponan mga mag-isarig da magpantaboy tolong sa naay. Makay kora ba naay tinakawan para ngani koyo ba atolongan. 9 Da- pag ako saba sa koyo, kayno pag odas ako ba aobosan ba ako nawed magpalabiyag sa tawa man sa koyo, panawen ako ba tinontonan tolong ibat sa mga arian sa Masidonya. Ibat dapo pag monaan ba naay inalas da magpalabiyag sa koyo sa kayno ibente ka nakayman, da- naba da naay dapo batay pinanawen anggan kadomaen. 10 No omaning piho da katotohanan laki Kiristo ba sa naay, piho din wala tawa man batay kapaepet sa ako magmalapodi makay tiya kayno saan saba sa Akaya. 11 Kaytang naay nagsabi da makay tiya? Panawen dia sa koyo ba nawed naay nagpalayaw? Amatangan Diyos amba koyo ba naay gidte nagpalayaw! 12 Ngani toloy:yani naay batay pinanawen da naay nagpanawen mona para ayaw magkamaki katiwidan da mga magsabi amba da kora nagpamanawen ba makay din pag naay nagpamanawen. 13 Kora ba nawed gidte mga pinili sogoan no nawed ba magpandaya ngani da- kora ba magpasoli mga pinili sogoan laki Kiristo. 14 Tiya ba nawed din kataka! Panawen kayno laki Satanas ba magpasoli iya ba anghil kapawaan. 15 Kaya nawed din kataka no konin mga tagapamanawen ba magpasoli mga tagapamanawen Diyos pag mataldeng. Da kora batay padosa sa tingkowan ba toltol ngani sa kora mga pinanawen. 16 Naay nag-olbat amba, Ayaw pagremremen tawa man amba ako ba tolingag. Ngani no amba da koyo nagremrem, naay:ya batay tinabang para ako kay ba kapagyabang makay sai ka tolingag. 17 Da naay nagsabi sa magmalapodi makay tiya ba nawed ibat sa kapangyadihan Panginoon no nawed ba ako magyabang makay sai ka tolingag. 18 Da- panawen maoson da magmalapodi sa mga nakayman makaparanawan, ako kay din ba batay magmalapodi. 19 Koyo mayam ba madonong gidte, kaya koyo nag-agwanta maki kaangasan da mga iraya bongog. 20 Koyo nag-agwanta kayno koyo ba nagtagoanggat, naggama, nagdaya, nagwala koyinta, nagsampal. 21 Kayno makakaya akenen ba sa naay pinanawen sa koyo ba ako ba mahina. Mona ako ba magtokawanan makay sai ka tolingag amba, No maki abaya magmalapodi ba ako din ba abaya magmalapodi. 22 No kora ba Hibriyo ba ako din. No kora ba mga taga Israil ba ako din. No kora ba kaapoan laki Abraham ba ako ba makay din kora. 23 No kora ba mga tagapamanawen laki Kiristo ba ako ba lalo dapo piya ka tagapamanawen laki Kiristo. Pag naay nagsabi naba ba makay pag nagsabi sai ka bolingaw. Ako magpamanawen labi dapo kabyat sa kora, ako ba piniriso, binogbog, da- napabali sa katayan labi sa kora kadanasan. 24 Ako ba kalima:a binogbog mga poon mga Diw. Tayma ako binogbog ba tatlompo da- siyam ka bogbog. 25 Katatlo:wani ako sinampok mga poon taga Roma, kasai ako ba binato. Katatlo naay dinanas da asidaan mapor. Kasai ako ba maglotang-lotang sa dagat boo madlem da- boo aldaw. 26 Sa ako magkadangan ba maoson ka kaliman da naay:yani dinalanan, makay sa mga sapa baha, sa mga tolisan, sa kabaisan mga kapowa Diw, da- kabaisan mga Nawed Diw, maki din mga kaliman sa mga goraan lakol, sa mga poro nawed apirmihan iraya, da- sa dagat, kayno sa mga magpasoli amba kora ba arian sa laki Kiristo. 27 Naay din adanasan da labis ka hidap da- rogso sa ako magpanawen, no ina nawed:da nagkakalek, no ina nagbayog gayed da- makainem, no ina nawed mamangan para ngani- sa Diyos, ako dinimla panawen wala batay naislen. 28 Da- poyida sa mga Roma ka nakayman makay naba, aldaw-aldaw ako ba mag-alingangaan no omaning da biyag boo mga rimponan mga mag-isarig sa laki Kiristo. 29 No maki mga mahinaen ba ako din ba mahina. Da- no maki nagkaranggot sa kadaetan, ako ba ahidapan gidte da remrem. 30 No kailangan ako ba magmalapodi, da naay batay minalapodi ba da mga magpaban-aw amba ako maki kahinaan. 31 Ako nawed magpamosli. Naba ba amatangan Diyos pag Apang Panginoon Hisos. Podiyen da konin ngaran anggan kaagoton man. 32 Pag ako ba sa goraan Damasko, da sormokan goraan ba pinaabangan gobirnador nagkasakop sa hadi Aritas para ako ba abelen, 33 ngani ako ba sinogno sa sai ka arasyang kalbas ibat sa sai ka bintana ako ba inaloyan sa kasalyo bakodan bato ag goraan da- ako ba kadalagan:nani.
1 Kailangan ako magmalapodi kayno wala pakinabang naba sa naay. Da naay kay batay sinabi mona ba da mga paban-aw makay sa akalkan da- mga papawa ibat sa Panginoon. 2 Ako batay magpanoltol para sa sai ka iraya sakop sa laki Kiristo naay gidte kilala. Labin apat:ta ka dag-on da kadalan ibat sa iya binagit anggan sa soksokowan. Nawed naay amatangan no sa lawas gidte iya, no sa ispirito ngani. Da Diyos ngani da kamatang. 4 Da- iya rateng sa alamanan Diyos da- konin arngeyan sata da mga nakayman nawed abaya papawaen sa tokawanan da- mga nag-ayawan tokawanen. 5 Para sa iraya naba ba ako batay magmalapodi, ngani ako ba nawed batay magmalapodi sa naay sadiri, no nawed ba sa naay mga kahinaan ngani. 6 Da- kayno ako alabet magmalapodi ako nawed kay batay tolingag, panawen totoo da naay batay sinabi. Ngani ako nawed:dani batay magmalapodi sa naay dinanas panawen ako dayo da tawa man ba magremrem ako labi dapo sa konin nagkaakitan sa naay da- nagkaarngeyan sa naay. 7 Ngani para ako nawed magpaatatas sa naay sadiri panawen sa kaosonan kagilalas ka mga paban-aw Pinaban-Aw Diyos sa naay, ako ba pinakan maskit makay dogi sa lawas. Tiya pag maskit ba makay sogoan laki Satanas pag magpakaskit sa naay para ako ayaw magpaatatas sa sadiri. 8 Katatlo naay inaringi sa Panginoon amba, Alsen kay tiya pag maskit. 9 Makay tiya da tebag Panginoon amba, Da naay kapiyaanan remrem ba sibay:yani sa komo, panawen da naay kapangyadihan ba lalo dapo nagkaadanasan no kawo ba mahinaen. Naba:a ngani. Kaya ngani- boo kasyagan naay nagmalapodi da naay kahinaan para da kapangyadihan laki Kiristo ba magpamataw sa naay. 10 Para ngani- sa laki Kiristo, ako ba angasan kayno ako mahinaen, kayno nagwala koyinta, kayno nagpahidapan, kayno nagpanawenan daet, kayno nagpaagwanta kahidapan, panawen sa odas ako mahinaen ba ako kay ba nagpaeyat. 11 Ako ba magpamanawen makay tolingag. Ngani koyo da lomopod para ako mamanawen makay naba. Koyo disin da kailangan pomodi sa naay. Kayno ako ba wala kaparosan, ako kay ba pariho din sa mga pinili sogoan lakol ag koyo amba maki kapangyadihan. 12 Boo tiyaga naay Pinaban-Aw sa koyo amba ako ba sai ka totoo ka pinili sogoan, sa mga tanda, mga katakataka da- mga binagro naay pinanawen. 13 Nakay da nawed pariho sa naay pinanawen para sa Roma ka rimponan mga mag-isarig? Wala, poyida sa ako nawed magpalabiyag sa koyo. No sa koyo remrem ba kadaetan naba ba ako kay te ba koyo patawaden. 14 Mona:ani da patatlo ako maggayak para paraoy saba sa koyo. Ngani ako nawed batay magpalabiyag sa koyo. Koyo gidte da naay alabet, nawed da koyo mga nag-apo. Da mga koyay da kailangan mag-alaga sa mga onga dapo, da- nawed da mga onga dapo da mag-alaga sa mga koyay. 15 Da- naay kasyagan ba gastoson da boo sa naay da- taboyon naba kaanggat din da naay biyag para koyo ba maki pakinabang. No koyo ba naay lalo dapo nagpalayaw, paibente dapo dia da koyo palayaw sa naay? 16 Ngani koyo amatangan ako ba nawed tang magpalabiyag sa koyo. Ngani maki magtokawanan amba ako ba omaboso da- koyo ba naay ngani dinaya. 17 Omaning koyo ba naay dinaya? Pag naay pinaparaoy sa koyo ba koyo dia ba kora dinaya? 18 Naay inaringi sa laki Tito amba paraoy sa koyo da- naay pinaanggat sa konin da sai ka arian. Nakay, koyo dia ba dinaya laki Tito? Kidawa laki Tito ba sai ngani sa magpamiyag da- sa ogali. 19 Da koyo dia remrem ba amba anggan mona ba naay nagdispinsa da naay sadiri? Nawed gidte amba! Ako ba magtokawanan sa ban-aw Diyos panawen ako ba maki kasaiyan sa laki Kiristo. Mga nagpalayaw, da boo naay nagpanawen ba para koyo ba paonayen sa koyo mag-isarig. 20 Ako ba mag-alingangaan kaaram no ako rateng saba sa koyo kaaram ba ako maki nagkaakitan sa koyo pag ako ba dayo da- amba din kaaram koyo ba maki din nagkaakitan sa naay pag koyo ba dayo. Kaaram naay batay aratengan koyo ba magpal-awayan, magpangimbolowan, magpalbaisan, magpangaken, magpanida podi, magpanombong, magpalawlaw da- magkonin-konin remrem. 21 Ako mag-alingangaan kaaram no ako rateng:ngakay saba sa koyo, ako ba batay pinakaya Diyos sa koyo ropangan. Da- kaaram ako batay magpanangis panawen sa kaosonan ag pinanawen daet ngani nawed sinisi da- inogonan sa kora magpanawen madomi, magpangalonya da- kora mga makakaya kapanawen.
1 Mona da patatlo ako magparaoy sa koyo. Makay pag nagsabi sa Banal ka Kasoratan amba, Da nakayman ka sombong ba ayaw pagpaniwalaan no nawed darwa anggan tatlo da magsistigo. Naba:a ngani. 2 Pag ako towa, adayo dapo sa koyo, naay:yakay nag-olbat sa mga kapanawen daet, da- sa mga Roma dapo, da naay:ya sinabi pag ikadarwa ako domaraw saba sa koyo, amba no ako batay:yakay sa koyo ba kora ba naay:ya gidte batay pinadosahan. 3 Naay batay pinanawen naba para paban-awen sa koyo amba laki Kiristo da somogo para ako magtokawanan makay naba. Laki Kiristo ba nawed amba mahinaen sa konin pakianggat sa koyo no nawed ba iya ba maki gidte kapangyadihan sa koyo. 4 Kayno iya ba mahinaen pag iya ba pinako sa kodos, ba iya ba nagkabiyag mona panawen sa kapangyadihan Diyos. Panawen sa yamen kasaiyan sa laki Kiristo ba yamen din ba mahinaen. Ngani sa yamen pakianggat sa koyo yamen ba batay mamiyag anggat sa konin sa kapangyadihan Diyos. 5 Koyo saraken gidte sa koyo sadiri, no koyo ba magpamiyag toltol sa pag-isarig. Hosayen gidte da koyo sadiri. Nawed mana koyo nagkaamatangan amba sa koyo laki Kiristo Hisos? Poyida ngani no koyo ba mga nag-imbanda. 6 Da naay sarig ba koyo batay akitan yamen ba nawed mga inimbanda. 7 Yamen darangin sa Diyos ba koyo ba ayaw:wa disin pomanawen daet, nawed para akitan mga iraya yamen ba raoy, no nawed ba para koyo ba kapanawen piya kayno yamen da makay mga inimbanda. 8 Panawen nawed yamen atomang da katotohanan, no nawed ba yamen nagtoltol da katotohanan. 9 Yamen ba nagkaangasan kayno yamen ba mahinaen da- koyo ba maeyaten. Yamen din nagdarangin amba koyo ba batay nagkaboo gidte. 10 Kaya naay nagsorat da mga nakayman naba ag ako ba wala dapo saba, para no ako saba:ani ba nawed kailangan ako magpakaskit sa koyo remrem sa kapangyadihan tinaboy Panginoon sa naay, nawed para sidaen da koyo pag-isarig no nawed ba para paonayen naba. 11 Mga arian, anggan:na ngani towa da naay sorat. Paaram:mani. Koyo sikapen koyo ba boo gidte, da- toltolon da naay mga nag-aringi, da- koyo magkasai sa remrem da- mamiyag sa kaginhawahan. No amba, da Diyos pag magpalayaw sa koyo da- magpaginhawa sa koyo ba batay:ya sa koyo. 12 Koyo magtanongan makay mga talkakaan sa laki Kiristo. 13 Koyo ba nagtanong boo mga hinidang Diyos sa rimponan mga mag-isarig. 14 Sa koyo:wa ngani- boo da parongaw Panginoon Hisos Kiristo, da kapalayawan Diyos da- da pakianggat Ispirito Banal.
1 Ako laki Pablo pinili sogoan laki Hisos da magsorat tiya. Ako nawed hinidang mga iraya da- nawed din panawen sa tawa man pag iraya, no nawed ba laki Hisos Kiristo da- Diyos Apang sa soksokowan pag bomiyag:gakay sa laki Hisos da homidang sa naay. 2 Kaanggat din da mga arian sa laki Hisos sa ako magsorat tiya sa mga rimponan mga mag-isarig sa kotanan Galasiya. 3 Sa koyo:wa ngani- da parongaw da- kaginhawahan ibat sa Diyos tam Apang, da- sa Panginoon Hisos Kiristo. 4 Tinaboy laki Hisos da konin biyag sa katayan panawen sa tamo kadaetan, toltol sa alabet tamo Diyos da- Apang sa soksokowan, para tamo aribri sa kadaetan pag maghadi mona sa paranawan. 5 Podiyen da Diyos anggan kaagoton man! Amba:a ngani-. 6 Ako magtaka no kaytang agad:da koyo pinaawakan da Diyos pag pomili sa koyo panawen sa palayaw laki Kiristo, da- koyo maniwala sa Roma ka piya ka barita. 7 Da totoo ba wala Roma ka pirmida ka barita, ngani maki mga magkotingting sa koyo da- magsikap din paRomahen da Pirmida ka Barita para sa laki Kiristo. 8 Kayno yamen, kayno sai ka anghil ibat sa soksokowan da mangadar sa koyo Roma ka pirmida ka barita sa yamen pinangadar sa koyo, iya ngani- sompaen Diyos! 9 Yamen:na sinabi da- mona naay:yakay nag-olbat, no maki mangadar sa koyo Roma kay ka pirmida ka barita sa koyo:wa tinabang, iya ngani- sompaen Diyos! 10 Mona, da alabet sabiyen tiya dia ba da naay alabet ba podiyen mga iraya? Nawed! Da naay alabet ba da Diyos da magpodi sa naay. Naay dia nagsikap ako magpaangas sa mga iraya? No naba ngani da naay alabet ba nawed:da disin ako tagoanggat:tani laki Kiristo. 11 Naay alabet koyo amatangan, mga arian sa laki Hisos, nawed ibat sa iraya da Pirmida ka Barita pag naay nangadar. 12 Nawed naay tinabang tiya ibat sa tawa man iraya, nawed din tindo tawa man iraya sa naay. Laki Hisos Kiristo da pomaban-aw tiya sa naay. 13 Nawed lihim sa koyo no omaning naay pinanawen makay sai ka masipag ka pal-anggat sa Kaogalian mga Diw, boo katapangan naay pinahidapan da rimponan mga mag-isarig sa Diyos, naay din sinikap naba ba sopoon. 14 Sa kaogalian tiya ba ako ba masipag gidte dapo sa maoson Diw kakoyay din sa naay; da- lakol gidte da naay pagdamay sa mga kaogalian yamen mga pangapoan. 15 Ngani panawen sa kapiyaanan remrem Diyos, ako konin:na hinidang bayo dapo ako inonga da- ako konin pinili para konin:nani tagapamanawen. Maraw rinemrem Diyos piya paaramen sa naay 16 no tawa gidte da konin Onga, para da Pirmida ka Barita para sa konin ba naay apangadar sa mga Nawed Diw, ako ba nawed omay-ay tolong sa tawa man. 17 Ako nawed din tomokad sa goraan Hirosalim para magtokawanan sa mga pinili sogoan monaan dapo sa naay. No nawed ba ako paraoy sa kotanan Arabya. Kalbas ba ako paoli sa goraan Damasko. 18 Kalawey dapo da tatlo ka dag-on ibat ako misarig bayo ako tomokad sa Hirosalim para magpanoltolan laki Pidro da- kidawa mal-anggat labin-lima ka aldaw. 19 Ako wala akitan Roma ka pinili sogoan no nawed laki Tiyago ngani pag arian Panginoon. 20 Totoo da boo naay nagsabi sa sorat tiya. Amatangan Diyos ako nawed magpamosli. 21 Kalbas ako paraoy sa mga kotanan Siriya da- Silisiya. 22 Pag odas naba ba ako nawed dapo kilala mga mag-isarig sa laki Kiristo sa lopa Hodiya. 23 Kora ngani abaritaan amba, pag monaan ba pomahidap sa tamo ba mona ba magpangadar:ra-ni para sa pag-isarig pag narwaan ba konin sinikap sopoon! Naba:a ngani. 24 Kaya kora pomodi sa Diyos panawen sa konin pinanawen sa naay.
1 Kalawey:ya da labin-apat ka dag-on, ako tomokad:dakay sa Hirosalim anggat sa laki Birnabi, naay din pinaanggat sa kidawa laki Tito. 2 Kaya ako paoli sa Hirosalim panawen pinaaram Diyos sa naay amba kailangan gidte ako paraoy sata. Ako:wa gidte da tomokawanan sa mga kilala ka koyay da- naay pinapawa sa kora da Pirmida ka Barita pag naay layen nagpangadar sa mga nawed Diw. Naay pinanawen naba panawen ako dayo wala kaparosan da ako magpakahidap sa kalawey da- sa mona. 3 Laki Tito, ag naay pal-anggat, kayno iya ba sai ka Girigo ba nawed nalopod iya palong-oy, 4 kayno man alabet disin palong-oyon mga Roma pasoli mga arian da- kora lomiog para masdan da karibriyan tinabang ibat sa laki Kiristo Hisos. Da kora alabet ba yamen ba patagoanggaten sa mga kaogalian mga Diw, 5 ngani yamen nawed napasai sa kora alabet kayno kaagot te, para yamen adahanan para sa koyo da katotohanan pag Pirmida ka Barita. 6 Ngani wala din dinagdag mga kilala koyay naba sa mga naay sinabi-wala nakayman sa naay no tawa man kora, panawen da Diyos ba wala nagpatabi. 7 No nawed ba kora nagkaamatangan ako ba hinidang Diyos para mangadar Pirmida ka Barita karibriyan sa mga Nawed Diw, makay din laki Pidro ba hinidang Diyos para mangadar Pirmida ka Barita karibriyan sa mga Diw. 8 Da Diyos da homidang sa laki Pidro para iya ba pinili sogoan sa mga Diw, ba iya din da homidang sa naay para ako kay ba pinili sogoan sa mga Nawed Diw. 9 Amatangan din kora Tiyago, Pidro da- Howan pag mga kilala sandaran rimponan mga mag-isarig amba da Diyos iya da tomaboy sa naay tiya pag lakol gidte ka panawen. Kaya sa kora mag-ablasa sa kidawa, kidawa laki Birnabi ba kora tinabang makay mga kamamanawen. Yamen boo maki kasaiyan amba kidawa ba magpangadar sa mga Nawed Diw, kora kay ba magpangadar sa mga Diw. 10 Da kora ngani aringi ba ayaw kay kidawa pabayaan da mga mahidapen, naba kay da naay nagsikap panawenen. 11 Ngani maraw laki Pidro ba bait sa Antiyokya, sa ropangan mga mag-isarig iya ba naay sinabiyan panawen nawed raoy da konin nagpanawen. 12 Panawen pag nawed dapo bait da mga nawed naw maoson ka lalaki pinaparaoy laki Tiyago, iya ba magpasaro sa mga arian Nawed Diw. Ngani maraw bait:ta da mga lalaki naba ba iya paadayo:ani, da- nawed:da magpasaro sa kora panawen sa iya aliman sa barkadahan tiya mga arian Diw pag magsabi gidte amba kailangan palong-oyon da mga Nawed Diw. 13 Tomolad:da din sa konin da Roma mga arian sa laki Hisos saba, mga Diw din; anggan din laki Birnabi nababa:ani sa kora magpasoli. 14 Maraw naay akitan kora mamiyag nawed:da magtoltol sa alabet gidte sabiyen Pirmida ka Barita, naay sinabi sa laki Pidro sa ropangan kora boo amba, No kawo sai ka Diw ba magpamiyag makay sai ka Nawed Diw da- nawed makay sai ka Diw, omaning komo batay alopod da mga Nawed Diw magpamiyag makay mga Diw? 15 Kayno man da yamen mga koyay ba Diw da- nawed makay mga Nawed Diw pag nag-awit makadaetan, 16 yamen amatangan da iraya ba nagpakan kataldengan panawen sa mag-isarig sa laki Hisos Kiristo, nawed sa magpamanawen toltol sa maniho mga Diw. Yamen ba mag-isarig din sa laki Kiristo Hisos, para yamen ba pakanen Diyos kataldengan panawen sa mag-isarig sa laki Kiristo da- nawed sa magpamanawen maniho. Panawen da iraya ba nawed batay pinakan kataldengan sa magpamanawen toltol sa maniho. 17 Ngani no pag yamen magsikap para pakanen kataldengan panawen sa yamen kasaiyan sa laki Kiristo, yamen ba kora akitan makadaetan makay mga Nawed Diw, da alabet dia sabiyen ba panawen sa laki Kiristo ba yamen magpamanawen kadaetan? Nawed amba! 18 No naay:yakay batay pinaolian pag naay:ya pinaawakan ba ako:wa magpaoli sa maniho pag magpaban-aw amba ako ba sai ka nawed gidte magtoltol sa maniho. 19 Da maniho da bomono sa naay da- ako ba natay:yani sa maniho para ako nabiyag para sa Diyos. Ako natay:yani pal-anggat laki Kiristo sa kodos, 20 da- no ako man ba biyagan ba nawed:dani ako da nagkabiyag no nawed laki Kiristo da nagkabiyag sa naay. Anggan ako towa dapo sa paranawan, ako nagkabiyag sa Pag-isarig sa Onga Diyos pag pomalayaw sa naay da- tomaboy konin biyag para sa naay. 21 Nawed naay awal-an kaparosan da kapiyaanan remrem Diyos. No da iraya ba nagpakan kataldengan sa magpamanawen maniho ba wala kaparosan da katayan laki Kiristo!
1 Nagkatolingag:ga dia koyo mga taga Galasiya? Tawa da magpa-sida sa koyo remrem. Naay pinapawa gidte sa koyo no omaning da katayan laki Hisos Kiristo sa kodos! 2 Tiya ngani da naay alabet amatangan sa koyo : koyo dia tinabang da Ispirito Banal sa koyo magtoltol sa maniho da- sa koyo magpakarngey da- mag-isarig sa Pirmida ka Barita para sa laki Kiristo? 3 Pad tolingag:ga gidte koyo! Koyo pag omompisa bayo ka biyag sa kapangyadihan Ispirito Banal ngani mona mana koyo magpasibay sa sadiri kaya? 4 Wala:a dia piya ka bokar sa koyo da koyo dinanas? Kaaram ba maki din. 5 Kaytang koyo nagpakan Diyos konin Ispirito Banal? Kaytang iya magpamanawen mga katakataka sa koyo kagtengaan? Panawen dia sa koyo magpamanawen toltol sa maniho e panawen sa koyo magpaniwala sa Pirmida ka Barita pag koyo arngeyan? 6 Makay ag nangyadi sa laki Abraham amba, Iya manarig sa Diyos, kaya iya ba rinemrem Diyos iya ba mataldeng. Naba:a ngani. 7 No amba ba mapawa amba da iya mag-isarig gidte sa Diyos ba iya da kaapoan gidte laki Abraham. 8 Pag monaan dapo ba Pinaban-Aw:wani Banal ka Kasoratan amba da mga Nawed Diw ba batay pinakan Diyos kataldengan panawen sa kora mag-isarig sa konin. Kaya ag monaan ba pinapawa sa laki Abraham da Pirmida ka Barita amba, Panawen sa kawo mag-isarig ba batay pinarongawan Diyos da boo mga lasyon. Naba:a ngani. 9 Manarig gidte sa Diyos laki Abraham da- iya pinarongawan, kaya da boo mag-isarig gidte sa Diyos ba batay din pinarongawan makay din iya. 10 Da boo mag-isarig kora batay mataldeng sa ropangan Diyos panawen sa kora magtoltol sa maniho mga Diw ba sakop sa sompa. Panawen nagkasorat sa Banal ka Kasoratan amba, Sompaen da nawed magpamanawen sa boo nagkasorat sa ribro maniho. Naba:a ngani. 11 No amba ba mapawa wala iraya batay rinemrem Diyos iya ba mataldeng sa iya magtoltol sa maniho, panawen amba da Banal ka Kasoratan, Da pinakan kataldengan ba batay nabiyag sa mag-isarig ngani. Naba:a ngani. 12 Ngani da maniho ba nawed nagkasarig sa mag-isarig gidte, panawen nagsabi Banal ka Kasoratan amba, Da magpamanawen boo nag-ay-ayan maniho ba batay nabiyag sa iya magpamanawen naba. Naba:a ngani. 13 Tamo ba timbos laki Kiristo sa sompa maniho pag iya gidte da sinompa panawen sa tamo. Panawen nagkasorat sa Banal ka Kasoratan amba, Sinompa da tawa man tinakin sa poon kayo. Naba:a ngani. 14 Tamo konin timbos para da mga parongaw pinangako Diyos sa laki Abraham ba natabang mga Nawed Diw panawen sa laki Kiristo Hisos da- sa tamo mag-isarig sa konin ba sa tamo din da Ispirito Banal pag pinangako Diyos. 15 Mga arian sa laki Hisos, naay batay ginamit da sai ka kahalimbawa amba, No da sai ka kasaiyan ba pinirmahan:nani, nawed:da tay awal-an kaparosan tawa man, nawed din abaya naba ba dagdagan e bawasan. 16 Koyo remremen tiya, Mangako da Diyos parongaw sa laki Abraham da- sa sai sa konin kaapoan. Nawed nagsabi amba, Da- sa komo kaapoan, panawen da alabet sabiyen kaapoan ba kaosonan, ngani da nagsabi ba amba, Da- sa sai sa komo kaapoan. Da alabet sabiyen sai sa komo kaapoan ba sai ngani. Tiya ba laki Kiristo. 17 Tiya da alabet naay sabiyen, Da kasaiyan pinanawen Diyos ba konin pinaonay amba konin batay gidte pinanawen. Da kasaiyan naba ba nawed batay awal-an kaparosan ag Bilin ag tinaboy maraw kalawey:ya apat ka daan da- tatlompo ka dag-on. Nawed din batay awal-an kaparosan da konin mga pangako. 18 No da parongaw kataldengan taboy Diyos ba nagkasarig sa Bilin ba tiya ba nawed:da nagkasarig sa pangako Diyos. Ngani da parongaw kataldengan ba tinaboy Diyos sa laki Abraham makay sa iya mangako. 19 No amba, kaytang tinaboy Diyos da Bilin? Da Bilin ba dinagdag Diyos sa konin kasaiyan para paban-awen no nakay da maglaban sa Bilin, anggan sa rateng da pinangakoan Diyos, pag sai sa kaapoan laki Abraham. Pinababa Diyos da Bilin tiya sa mga anghil sa tolong sai ka tagapapiya sa Diyos da- sa mga iraya. 20 Ngani da kailangan ngani sa tagapapiya ba magpapiya sa darwa, ngani da Diyos ba sai ngani. 21 Da alabet ma sabiyen tiya, ba da Bilin ba laban sa mga pangako Diyos? Nawed! Makay tiya da alabet sabiyen: no kataboy biyag da Bilin, da iraya batay disin mataldeng sa ropangan Diyos sa magtoltol ngani sa Bilin. 22 Ngani nagsabi Banal ka Kasoratan amba da boo iraya ba tagoanggat kadaetan, para da mga mag-isarig ba tomabang mga pinangako Diyos panawen ngani sa kora mag-isarig sa laki Hisos Kiristo. 23 Ag yamen ba nawed dapo misarig sa laki Hisos ba yamen ba nagbantayan makay din mga piriso Bilin anggan Pinaban-Aw Diyos da pag-isarig tiya. 24 Kaya da Bilin ba makay tagabantay sa yamen anggan sa bait laki Kiristo, kalbas yamen ba pinakan kataldengan sa mag-isarig sa konin. 25 Mona yamen mag-isarig:gani sa konin, yamen ba nawed:dani sakop sa tagabantay sa yamen. 26 Panawen sa koyo mag-isarig sa laki Kiristo Hisos, koyo boo ba mga onga:ani Diyos. 27 Panawen da boo binaotismohan sa laki Kiristo ba somool pag biyag laki Kiristo. 28 Nawed:da Roma da Diw sa Nawed Diw, da tagoanggat sa ligayaw, da lalaki sa babayi-koyo boo ba sai ngani panawen sa koyo kasaiyan sa laki Kiristo Hisos. 29 Koyo ba kabilang sa mga kaapoan laki Abraham da- koyo batay tomabang sa pinangako Diyos, no koyo ba sa laki Kiristo.
1 Tiya da alabet naay sabiyen, Anggan onga dapo da batay tomabang boo mana konin apang, nawed iya kalabi sa sai ka tagoanggat, kayno man iya da aponin boo mana, 2 panawen iya ba sakop dapo sa mga tagaalaga da- tagaasikaso sa konin anggan sa sibay da kon kakoyayen makay ag sinabi konin apang. 3 Amba kay din, pag tamo nawed dapo kamatang pag katotohanan, tamo ba tagoanggat dapo sa mga kapangyadihan sa kalaw-awan pag maghadi sa paranawan tiya, 4 ngani maraw bait da odas pinili Diyos, pinaparaoy Diyos da konin Onga sa paranawan. Iya ba inonga sai ka babayi, konin biyag ba sakop din sa mga maniho mga Diw, 5 para pamal-anan da mga sakop sa mga maniho. Sa makay naba, tamo mga mag-isarig ba batay:ya gidte inadi mga onga Diyos. 6 Panawen tamo ba mga onga Diyos ba pinasled Diyos sa tamo poso da Ispirito konin Onga para tamo kaawit sa konin amba 'Apang, naay Apang'! 7 Kaya panawen sa pinanawen Diyos ba kawo ba nawed:da tagoanggat no nawed ba onga da- panawen kawo ba onga, kawo batay tomabang pag boo mana hinanda Diyos para sa konin mga onga. 8 Pag nawed dapo koyo akilalaan da Diyos, koyo ba tagoanggat mga nawed amba Diyos ag ibat sa monaan ba nawed gidte Diyos. 9 Ngani mona koyo gidte akilalaan da Diyos-lalo gidte piya naay sabiyen amba, Mona koyo ba kilala:ani Diyos-kaytang koyo magpaoli sa mga monaan kapangyadihan sa kalaw-awan pag maghadi sa paranawan tiya pag wala batay binokar piya da- wala kaparosan? Kaytang koyo alabet:takay tagoanggat sa mga naba? 10 Koyo nagpangilin da mga aldaw, mga bolan, mga odas-odas, da- mga dag-on! 11 Ako mag-alingangaan kaaram wala kaparosan da boo naay pinanawen para sa koyo. 12 Mga arian sa laki Hisos, naay gidte nag-ay-ayan sa koyo, koyo kay tomolad sa naay panawen ako ba makay din koyo. Wala gidte koyo pinanawen daet sa naay. 13 Koyo kay amatangan kaya naay nangadar sa koyo da Pirmida ka Barita ba panawen ako maki maskit pag monaan. 14 Kayno naay maskit ba makay lakol gidte ka kahidapan sa koyo remrem, amba man ako ba nawed koyo binoy-boy e pinolaan man; no nawed ba ako koyo tinabang makay ag koyo tabang sa sai ka anghil Diyos, da- labi dapo makay ag koyo tabang sa laki Kiristo Hisos! 15 Koyo asyagan gidte pag odas naba! Nakay da nangyadi mona? Ako:wa din da abaya magsistigo amba no abaya ngani koyo siwiten da koyo mata ba koyo:wa siniwit para taboyon sa naay. 16 Koyo dia nagremrem mona ako ba koyo kalaban panawen naay nagsabi da katotohanan? 17 Koyo ba nag-albet mga iraya magtodo laban sa Pirmida ka Barita, ngani nawed piya da kora pakay. Kora ngani alabet koyo ba paadayoon sa naay para koyo mag-albet sa kora. 18 Nawed daet da layen te mag-albet piya, no piya ngani da pakay-layen piya naba, nawed ngani sa ako koyo karopang! 19 Naay nagpalayaw mga onga panawen sa koyo ba ako mag-damdam:makay hidap makay babayi batay mamreg, anggan koyo batay makay gidte laki Kiristo. 20 Da naay disin alabet ba koyo naay karopang mona, para malomanay da naay asabi sa koyo, panawen mag-alingangaan da naay remrem para sa koyo. 21 Tiya da naay tanong sa koyo, koyo ag alabet pasakop sa Bilin tinaboy sa laki Moysis : nawed ma koyo amatangan da nagsabi Bilin? 22 Da nagkasorat sata ba laki Abraham ba maki darwa ka onga lalaki, da sai ba onga ag tagoanggat, da sai kay ba onga ag nawed tagoanggat. 23 Da konin onga sa tagoanggat ba inonga makay din kaosonan nagpangonga mga onga, ngani da onga sa nawed tagoanggat ba inonga panawen sa pangako Diyos. 24 Tiya ba sai ka kahalimbawa. Da darwa ka babayi ba darwa ka kasaiyan. Da sai ba kasaiyan sa bogsor Sinai makay tinolad sa bayi Agar da- sa konin mga onga pag boo ba tagoanggat. 25 Bayi Agar ba tinolad sa bogsor Sinai sa kotanan Arabya da- ladawan goraan Hirosalim mona pag makay tagoanggat, kaanggat konin kairayaan. 26 Ngani da Hirosalim sa soksokowan ba ligayaw, da- iya da makay tamo adang, 27 toltol sa Banal ka Kasoratan amba, Kawo angasan, kawo babayi nawed magkaonga! Mang-o kawo panawen sa kasyagan, Kawo ag nawed tang kadanas hidap sa mamreg! Panawen da babayi inogonan ba lalo gidte maoson da konin tay mga onga sa babayi maki sawa. Naba:a ngani. 28 Mga arian sa laki Hisos, tamo ba makay din laki Isaak, ba mga onga Diyos toltol sa pangako. 29 No pag odas naba ba da inonga sa alabet Ispirito Diyos ba pinahidapan pag inonga makay din kaosonan nagpangonga mga onga, ba amba kay din mona. 30 Amba ngani- da nagsabi Banal ka Kasoratan, Komo:wa boyawen da babayi tagoanggat da- da konin onga, panawen da onga ag babayi tagoanggat ba nawed abaya kaeray sa mana ag onga babayi nawed tagoanggat. 31 Kaya ngani-, mga arian sa laki Hisos, tamo nawed mga onga ag babayi tagoanggat, no nawed ba mga onga ag babayi nawed tagoanggat.
1 Tamo ba binal-anan:na laki Kiristo para tamo bal-an:na ngani-. Koyo magpakaonay ngani- da - ayaw:wa patagoanggat:takay. 2 Ako laki Pablo da magtokawanan sa koyo, No koyo nagpalong-oy koyo nagwala kaparosan laki Kiristo. 3 Naay nagsabi sa tawa man batay magtoltol sa magpalong-oy, Kailangan konin toltolon da boo Bilin tinaboy sa laki Moysis. 4 Da magsikap panawenen da Bilin tinaboy sa laki Moysis para iya mataldeng sa ropangan Diyos ba nagpasway da konin sadiri sa laki Kiristo da- nawed:da iya sakop sa kapiyaanan remrem Diyos. 5 Ngani yamen sarig ba panawen sa Ispirito Banal, yamen batay inadi mataldeng panawen sa tamo mag-isarig. 6 Sa mga maki kasaiyan sa laki Kiristo Hisos, nawed mahalaga da kayno iya long-oy, kayno nawed. Ngani da mahalaga gidte ba da tamo mag-isarig sa laki Hisos ba nagkaakitan sa tamo tolong sa Roma ibat sa magpalayaw. 7 Piya:a da koyo pinanawen. Tawa ma da homadang sa koyo sa magtoltol sa katotohanan? 8 Naba ba nawed pinanawen Diyos pag pomili sa koyo. 9 Maki nga kasabiyan amba, Da pampahilab, kayno ibente, no pinaliog sa ginalpong para gaw-en tinapay ba batay magpahilab sa boo tinapay. Naba:a ngani. 10 Panawen sa tamo kasaiyan sa Panginoon, naay gidte amatangan nawed batay Roma koyo remrem para sa nakayman tiya. Naay gidte apiho batay pinadosahan Diyos da tawa man magkotingting sa koyo. 11 Mga arian sa laki Hisos, no naay gidte nagpangadar amba kailangan da magpalong-oy, kaytang ako nagpahidapan dapo anggan mona? No naba gidte da naay nangadar ba nawed:da disin kaskitan remrem da naay pangadar para sa katayan laki Kiristo sa kodos. 12 Da mga naba ag magkotingting sa koyo ba ayaw:wa ngani palong-oy no nawed ba papotlon:nani. 13 Mga arian sa laki Hisos, koyo ba pinili Diyos para koyo ba bal-an. Ngani kayno koyo bal-an, ayaw:wa koyo magremrem mamanawen mga daet ka panawen alabet lawas, no nawed ba koyo magpaytolongan sa sai-sai panawen sa koyo magpalayawan. 14 Panawen da boo maniho mga Diw ba maki sai ngani ka begkes amba, Komo palayawen da Roma makay din kawo magpalayaw sa komo sadiri. Naba:a ngani. 15 Ngani no koyo ba makay hayop magpalkayatan, da- magpalbangayan, koyo magdahan kaaram koyo batay nangaspo. 16 Tiya da naay nagsabi sa koyo, Koyo toltolon da alabet Ispirito Banal, ayaw koyo toltolon da alabet lawas. 17 Panawen da mga alabet lawas ba maglaban sa mga alabet Ispirito Banal da- da mga nag-alabet Ispirito Banal ba maglaban sa mga alabet lawas. Maglabanan pag darwa tiya, kaya nawed koyo apanawen da koyo alabet panawenen. 18 No da Ispirito Banal da koyo nagtoltol ba nawed:da koyo sakop sa maniho. 19 Amatangan boo iraya da mga magpamanawen lawas, mga tiya: magpamanawen madomi, magpamanawen sa lihim, kadomiyan, 20 pag-samba sa mga nawed amba Diyos, magmarayaw, nagkaabaisan, paltomangan, magpangimbolo, baisen, angangaken, daet ka eray-eray, mga kampi-kampi, 21 amagan, maglasing, wala sanggahan ka maggaraw, da- Roma dapo makay din tiya. Koyo naay:yakay nagsabiyan makay din pag monaan naay sinabi amba nawed batay tinabang sa kahadian Diyos da tawa man magpamanawen pag makay naba ka mga kadaetan. 22 Ngani da bokar Ispirito Banal ba palayaw, kaangasan, kaginhawahan, katiyagaan, kabaitan, kapiyaanan, panarigan, 23 malomanay ka remrem, da- magpigil sa sadiri. Wala bilin maglaban sa makay tiya ka panawen. 24 Da mga maki kasaiyan sa laki Kiristo Hisos ba kora:a binono da kora monaan pagkairaya, anggat din da mga daet ka alabet lawas. 25 Da Ispirito Banal da magtaboy biyag sa tamo, kaya iya din da kailangan maghadi sa tamo mga biyag. 26 Kaya tamo ayaw magpalawlaw, ayaw anlalaban, da- ayaw maamagan.
1 Mga arian sa laki Hisos, no maki nalabo sa daet ka panawen, koyo ag mga magtoltol sa Ispirito Banal da kailangan magpaoli sa konin sa mataldeng. Koyo panawenen tiya sa boo malomanay ka remrem da- koyo magdahan kaaram koyo:wakay da nalabo sa daet ka panawen. 2 Koyo magpaytolongan sa mga mabyat ka nagbaba, sa makay tiya koyo batay apanawen da Bilin laki Kiristo. 3 No da tawa man magremrem sa konin sadiri iya ba labi dapo sa Roma, ngani nawed kay, ba konin nagdaya da konin sadiri. 4 Remremen piya tawa man da tayma konin panawen. No piya da konin nagpanawen ba iya angasan, nawed:da kailangan konin patepengen naba sa pinanawen ag Roma. 5 Panawen da tayma sai ba kailangan magbaba pag konin sadiri nagbaba. 6 Da iya magtodo tokawanan Diyos ba kailangan erayen mga parongaw Diyos nagtabang mga nagtod-an. 7 Ayaw koyo pagdayaen da koyo sadiri, da Diyos ba nawed kay adaya tawa man. No nakay ka binhi da konin inasik ba naba din da konin tay inani. 8 Da mag-asik sa alabet lawas ba saba din batay mag-ani karokasan. Da mag-asik para sa Ispirito Banal ba batay mag-ani sa Ispirito Banal biyag gidte wala arasan. 9 Kaya tamo ayaw tay manghinawa sa magpamanawen piya. No bait da odas hinanda, tamo batay mag-ani no tamo ba nawed manghinawa. 10 Tamo:wa tiyagaen da boo odas sa magpamanawen piya sa boo iraya, lalo:a sa mga arian sa mag-isarig. 11 Koyo batay akitan lakol da rirok pag naay sorat tiya; ako gidte da somorat tiya! 12 Da mga iraya alabet magpalawlaw sa mga pinanawen sa kora lawas ba batay manlopod sa koyo magpalong-oy. Kora nagpanawen naba para kora ayaw:wa pahidapan panawen sa adar para sa katayan laki Hisos sa kodos. 13 Kayno man da mga magpalong-oy ba nawed magpamanawen sa maniho, kora ngani alabet kapapodi amba koyo din magtoltol sa kora magpalong-oy panawen koyo ba kora inateet. 14 Ayaw kay mangyadi sa naay da makay naba. Da katayan ngani tamo Panginoon Hisos Kiristo sa kodos, naba ngani da naay nagpapodi. Panawen ngani sa konin katayan sa kodos, da kaogalian paranawan ba natay:yani para sa naay, da- ako din ba natay:yani para sa kaogalian paranawan. 15 Nawed mahalaga no da sai ka iraya ba long-oy no nawed. Da mahalaga gidte ba iya ba bayo:wani rinarang. 16 Sa boo magpamiyag toltol sa naay aray sinabi, da- sa boo mga kairayaan Diyos-sa kora ngani- da kaginhawahan da- parongaw Diyos! 17 Ibat mona, ayaw:wa dagdagan tawa man da naay agwantahen. Sibay:yani da naay golato, para akilalaan boo ako ba tagoanggat laki Hisos. 18 Mga arian sa laki Hisos, sa koyo:wa ngani- boo da parongaw tamo Panginoon Hisos Kiristo. Amba:a ngani-.
1 Ako laki Pablo da magsorat sa koyo sa goraan Ipiso, mga hinidang Diyos, pag mga magpamiyag magtionay gidte sa laki Kiristo Hisos. Ako pag nagawa pinili sogoan laki Kiristo Hisos toltol sa kaliyagan Diyos. 2 Sa koyo:wa ngani- da parongaw da- kaginhawahan ibat sa Diyos tam Apang, ibat din sa Panginoon Hisos Kiristo. 3 Tamo magpasalamat sa Diyos pag Apang tam Panginoon Hisos Kiristo! Panawen sa tamo kasaiyan sa laki Kiristo, tamo tinaboyan Diyos boo parongaw para sa gisarem ibat sa soksokowan. 4 Panawen sa tamo kasaiyan sa laki Kiristo, tamo konin:na hinidang bayo dapo rinarang da paranawan, para tamo ba banal da- boo gidte sa ropangan Diyos. Panawen sa palayaw Diyos ba 5 tamo konin:na binokod para konin mga onga panawen sa pinanawen laki Hisos Kiristo. Naba da konin pakana da- kaliyagan. 6 Tamo palakolon da Diyos panawen sa konin lakol gidte ka taboy sa tamo panawen sa konin nagpalayaw Onga! 7 Tamo timbos laki Kiristo, sa iya ba natay para sa tamo, da- sa makay naba ba pinatawad:dani da tamo mga kadaetan. Lakol gidte da palayaw 8 konin Pinaban-Aw sa tamo! Sa kabooan kadonongan da- kaamatangan Diyos 9 ba konin pinaaram sa tamo da konin pakana nawed dapo amatangan boo pag batay konin pinanawen panawen sa laki Kiristo 10 no bait da odas hinanda. Da pakana tiya ba pasaiyen sa laki Kiristo da boo sa soksokowan da- sa lopa. 11 Panawen sa kasaiyan sa laki Kiristo, ba yamen, ag mga monaan omasa sa laki Kiristo ba nagawa pag-aadi Diyos pag magpanawen boo nakayman toltol sa konin pakana da- kaliyagan. Nangyadi naba panawen pag monaan dapo yamen ba konin:na hinidang, sa lalo magpalakol sa konin kalakolan! 13 Koyo man ba nagawa din pag-aadi Diyos maraw koyo misarig sa konin kalbas koyo arngeyan da tokawanan katotohanan, da Pirmida ka Barita pag magpatawtaw karibriyan. Kaya tinaboy sa koyo da Ispirito Banal pag pinangako Diyos makay tanda koyo ba konin:na hinidang. 14 Da Ispirito Banal da paonayan sa mga pangako Diyos sa tamo mga hinidang anggan tamo ameleen da karibriyan gidte. Tamo podiyen da konin kapangyadihan! 15 Kaya ngani-, ibat naay abaritaan da para sa koyo pag-isarig sa Panginoon Hisos da- koyo magpalayaw sa boo mga hinidang ba 16 da naay pasalamat sa Diyos para sa koyo ba wala:a epet. Koyo naay gidte nagremrem sa naay darangin, 17 da- nag-aringi sa Diyos tamo Panginoon Hisos Kiristo, pag Apang lakol gidte, amba koyo kay konin pakanen Ispirito Banal pag magtaboy kadonongan da- pag sibay gidte kakilala sa Diyos. 18 Rawaan ngani- Ispirito Banal da koyo mga remrem para koyo amatangan da tamo nag-asahan sa iya magpili sa tamo, da- da nawed aremrem kalakolan konin hinanda sa konin mga hinidang, 19 da- konin kapangyadihan wala sokat sa tamo mga mag-isarig sa konin. Nangyadi naba panawen sa konin lakol ka kapangyadihan 20 ag bomiyag:gakay sa laki Kiristo, da- pomatongka sa konin sa soksokowan, sa kapet dako kanan Diyos Apang. 21 Kaya sa galem kapangyadihan laki Kiristo da boo kasakopan, kapoonan, kapangyadihan da- pamoonan sa kalaw-awan da- sa soksokowan. Da awitan Kiristo ba labi sa boo awitan, nawed ngani sa odas tiya no nawed ba sa boo mga batay dapo bait ka odas. 22 Pinasagalem Diyos sa kapangyadihan laki Kiristo da boo nakayman, da- iya da konin ginawa olo boo mga rimponan mga mag-isarig. 23 Mga naba da lawas laki Kiristo, da konin kaskeran ag magpakasker sa boo gidte.
1 Pag monaan dapo koyo ba makay natay panawen sa koyo magsoway da- mamanawen daet. 2 Pag monaan koyo tinoltol da daet ka ogali mga iraya sa paranawan tiya. Koyo din napasagalem sa aponin kadaetan, da poon ispirito sa kalaw-awan pag maghadi sa mga iraya masowayen sa Diyos. 3 Pag monaan dapo, tamo ba kabilang sa mga naba; tamo mamiyag toltol sa daet ka alabet lawas, da- pinanawen da daet ka nag-alabet tamo lawas da- remrem. Kaya sa tamo kagisengan ogali, ba tamo kabilang din sa mga iraya batay pinadosahan Diyos. 4 Ngani panawen lakol gidte da palayaw Diyos sa tamo ba konin Pinaban-Aw sa tamo no kaomaning kakol da konin kayawtean. 5 Tamo konin biniyag anggat sa laki Kiristo kayno tamo ba makay natay dapo panawen sa tamo magsoway. Panawen sa konin kapiyaanan remrem koyo ba naribri gidte. 6 Panawen sa tamo kasaiyan sa laki Kiristo Hisos, tamo ba biniyag:gakay pal-anggat sa konin, da- tamo pinatongka Diyos pal-anggat sa laki Hisos sa soksokowan. 7 Konin pinanawen naba para sa mga batay bait odas ba konin tay apaban-aw da nawed:da abilang kaosonan konin kapiyaanan remrem sa tamo panawen sa laki Kiristo Hisos. 8 Panawen sa kapiyaanan remrem Diyos ba koyo naribri sa odas koyo mag-isarig sa laki Kiristo. Da karibriyan naba ba nawed ibat sa koyo no nawed ba taboy Diyos. 9 Naba ba nawed ibat sa koyo mga pinanawen, kaya nawed abaya magpalakol sa sadiri da tawa man sa koyo. 10 Tamo ba ginawa Diyos, rinarang maki kasaiyan sa laki Kiristo Hisos para tamo kapamanawen ag mga piya ka panawen hinanda:a Diyos para sa tamo ibat dapo ag monaan. 11 Kaya koyo kay remremen da koyo monaan biyag. Koyo ba inonga mga Nawed Diw ag nag-awit mga Diw amba nawed long-oy. (Da mga Diw ba nag-awit long-oy toltol sa kora nagpanawen sa kora lawas.) 12 Koyo remremen, pag mga odas naba, koyo ba soway sa laki Kiristo, nawed kabilang sa kasakopan Israil, da- nawed sakop sa mga kasaiyan sarig sa mga pangako Diyos. Pag odas naba koyo nagkabiyag towa sa paranawan wala nag-asahan da- wala Diyos. 13 Ngani mona, panawen sa koyo kasaiyan sa laki Kiristo Hisos, ba koyo pag monaan ba sa adayo ba napabali panawen sa iya ba natay. 14 Iya da tamo kaginhawahan da- tamo konin pinalsai. Yamen mga Diw da- koyo mga Nawed Diw ba konin pinasai. Maraw iya natay, konin inawas da paltomangan makay dingding pag magpasway sa tamo. 15 Konin winal-an kaparosan da mga maniho mga Diw pag boo ngani bilin da- mga papanawenen, para pasaiyen sa konin sadiri da darwa ka barkadahan para maghadi da kaginhawahan. 16 Sa odas iya natay sa kodos, konin:na rinang-gas da paltomangan makay dingding sa tenga darwa ka barkadahan, tanan pinaoli sa Diyos da- pinalbegkes sa sai ngani ka lawas. 17 Pomaraoy towa laki Kiristo da- konin pinangadar sa boo da Pirmida ka Barita pag magtaboy kaginhawahan, sa koyo mga Nawed Diw adayo sa Diyos, da- sa mga Diw bali sa konin. 18 Panawen sa laki Kiristo, tamo boo kaparaoy sa Apang panawen sa sai ngani ka Ispirito Banal. 19 No amba, koyo ned:da mga manalyowan e taga Roma ka kotanan, no nawed ba kabarkadahan mga hinidang Diyos da- kabilang:nga din sa konin kamag-anakan. 20 Koyo ba pinaanggat din sa sarigan boo toar tindo mga pinili sogoan Diyos da- mga tagabarita ibat sa Diyos, pag mga arigi naba ba laki Kiristo Hisos. 21 Da- sa konin ngani mal-anggatan da tayma toar balay anggan nagawa sai ka banal ka balay Panginoon. 22 Panawen din sa koyo kasaiyan sa konin, koyo din kora pal-anggat nagawa sai din ka toar sa pamatawan Diyos pag nagpamatawan Ispirito Banal.
1 Panawen naba, ako laki Pablo, piriso para sa laki Kiristo Hisos panawen sa koyo mga Nawed Diw ba magdarangin sa Diyos. 2 Kaaram kay ba koyo:wa abaritaan amba panawen sa kapiyaanan remrem Diyos ba konin inintiriga sa naay da katongkolan naba para sa koyo din kapaboran. 3 Pinaaram Diyos sa naay da konin pakana nawed dapo amatangan boo, makay pag naay:yani nanoltol sa monaan odas. 4 Sa odas koyo nagbasa tiya, koyo batay amatangan naay:yani amatangan da katotohanan para sa laki Kiristo. Da Diyos da magpakama-tang sa naay. 5 Da katotohanan naba ba nawed pinaaram sa mga iraya pag mga dag-on kadalan, ngani mona ba Pinaban-Aw Diyos; da Ispirito Banal da pomaban-aw sa mga pinili sogoan konin hinidang da- sa mga tagabarita ibat sa Diyos. 6 Da- tiya da nawed amatangan narwaan amba, panawen sa Pirmida ka Barita, da mga Nawed Diw, makay din mga Diw ba batay din kaanggat mag-apo:a mga rongaw ibat sa Diyos. Kora din ba mga eray sai ngani ka lawas, da- kasaro din sa mga pinangako Diyos panawen sa laki Kiristo Hisos. 7 Sa kapiyaanan remrem Diyos, ako konin ginawa tagapamanawen para sa Pirmida ka Barita panawen sa konin kapangyadihan. 8 Ako da lalo nawed kabagay sa boo mga hinidang Diyos. Kayno amba, ako inadi Diyos ako bagay, kaya konin tinaboy sa naay da panawenen tiya, amba pangadaren sa mga Nawed Diw da Pirmida ka Barita para sa sagana gidte da- ned:da akayanan aremrem ka parongaw mag-ibat sa laki Kiristo, 9 da- papawaen sa boo iraya no omaning tay pinanawen da pakana Diyos, pag nawed dapo amatangan boo iraya. Naba ba maagot:ta ka dag-on nawed Pinaban-Aw Diyos, pag Romarang boo nakayman, 10 para, panawen sa boo mga rimponan mga mag-isarig ba apaaram mona sa mga poon da- sa mga maki kapangyadihan sata sa kalaw-awan da- sa soksokowan da lakol gidte ka kadonongan Diyos pag nagkaakitan sa tayma konin panawen. 11 Naba ba toltol sa wala arasan pakana konin pinanawen sa laki Kiristo Hisos pag tamo Panginoon. 12 Panawen sa tamo kasaiyan da- mag-isarig sa konin, tamo abaya magpabali sa Diyos ginhawa da remrem. 13 Kaya naay nag-aringi sa koyo amba, Koyo ayaw tay asidaan remrem panawen sa mga kahidapan naay nag-agwanta para ngani sa koyo, panawen tiya ba sa koyo kapiyaanan. 14 Panawen naba ako maglohod sa ropangan Diyos Apang, 15 pag panawen iya Apang ba magpabi-yag sa tayma kamag-anakan kayno saan. 16 Naay nag-aringi, toltol sa konin ned tay napra kalakolan amba, Konin ngani- paeyaten da koyo biyag gisarem, panawen sa eyat nagtaboy Ispirito Banal. 17 Mamataw ngani- sa koyo poso laki Kiristo panawen sa koyo pag-isarig sa konin, koyo mga wakat ba magpaalalem ngani- sa palayaw Diyos da- koyo sarigan ba magtionay sa konin palayaw, 18 para koyo abaya amatangan, pal-anggat mga hinidang Diyos, no kaomaning kaslang, kaaba, katas da- kalalem da palayaw laki Kiristo. 19 Koyo akilalaan ngani- da palayaw Diyos pag nawed abaya sokaten, para koyo ba masker:ra gidte sa boo kaskeran Diyos. 20 Tamo magpasalamat sa Diyos pag kapanawen pag labi dapo sa boo pag abaya tamo aringien da- remremen, toltol sa konin kapangyadihan pag maghadi sa tamo! 21 Da boo rimponan mga mag-isarig pag maki kasaiyan sa laki Kiristo Hisos ba magpalakol sa Diyos anggan kaagoton man! Amba:a ngani-.
1 Kaya ako, pag sai ka piriso para sa Panginoon, ba magbilin gidte sa koyo amba, Koyo mamiyag makay kailangan gidte sa mga pinili Diyos. 2 Koyo magpasangato, maapo, da- marokay. Koyo magpalayawan da- magpatawadan. 3 Koyo panawenen boo koyo akayanan para dahanan sa koyo boo odas da kasaiyan ibat sa Ispirito Banal. Da begkes kaginhawahan da magdahan naba. 4 Sai ngani da lawas da- sai ngani da Ispirito Banal; makay din, sai ngani da nag-asahan koyo boo, bokar sa magpili sa koyo. 5 Sai ngani da Panginoon, sai ngani da pag-isarig, da- sai ngani da baotismo, 6 sai ngani da Diyos da- Apang tamo boo mag-isarig sa laki Hisos. Iya ba atatas sa boo, iya da magpanawen para sa boo, da- iya sa boo. 7 Da tayma sai sa yamen ba pinakan sadya taboy toltol sa sokat tinaboy laki Kiristo. 8 Makay tiya da nagsabi sa Tokawanan Diyos amba, Maraw iya yomakbang sa soksokowan Iya bomaba maoson ka inabel, Da- iya tomaboy mga taboy sa iraya. 9 Nakay da alabet sabiyen, "Iya yomakbang?" Da alabet sabiyen naba ba iya ba lompot dapo sa galem lopa. 10 Da lompot ba iya din pag yomakbang sa kangawayan, sa ngaway dapo boo mga langit, para aratengan konin kapangyadihan da boo-boo. 11 Tiya da mga sadya taboy, da Roma konin pinanawen pinili sogoan Diyos, da Roma ba tagabarita ibat sa Diyos, da Roma ba tagapangadar Pirmida ka Barita, da Roma ba tagaalaga da- tagatodo sa rimponan mga mag-isarig. 12 Konin pinanawen naba para konin handaen sa magpamanawen da boo konin hinidang para paonayen gidte da lawas laki Kiristo, naba pag konin boo mga rimponan. 13 Sa makay naba, tamo boo batay magkasai gidte sa mag-isarig da- sa magkilala sa Onga Diyos, da- batay pinanawen semker da tamo pagkairaya toltol sa kaskeran gidte laki Kiristo. 14 Tamo nawed:da tay atolad sa mga onga pag nagkababa tayma adar. Kora makay mapor nagsabokay-sabokay baniraw da- nagbaba koaya. Tamo ned:da tay adaya mga iraya da alabet ba tamo liganen sa nawed raoy. 15 No nawed gira ba sa magtokawanan katotohanan anggat da palayaw ibat sa Diyos, ba tamo batay semker gayed sa laki Kiristo pag iya da olo boo mga rimponan mga mag-isarig. 16 Panawen laki Kiristo da olo ba ibat sa tayma eray ba nagkaboo da lawas malsomag da boo sa konin-konin kay rogar, kalbas no magpanawen piya konin-konin kolpado da tayma eray boo lawas, ba batay magtobo da- mag-eyat sa magpalayawan Diyos. 17 Sa ngaran Panginoon, tiya da naay nagsabi da- naay alabet gidte amba, Koyo ayaw:wa mamiyag makay ag mga Nawed Diw nawed dapo mag-isarig. Wala kaparosan da kora nagremrem, 18 da- nagteplan da kora pangkamatang para nawed aratengan da kapawaan. Panawen sa kora katolingagan da- kaskilan olo ba kora wala eray sa biyag taboy Diyos. 19 Kora ba manobyan sa mga madomi ka panawen, da- kora wala kakayaan kayno ibente man. Kora ba wala:a nagpanawen piya no nawed ba alabet gidte magpamanawen boo madomi ka panawen. 20 Nawed kay amba da koyo amatangan sa laki Kiristo, 21 no koyo gidte pinakarngeyan da konin todo da- koyo tinanem gidte da mga katotohanan pag sa laki Hisos. 22 Koyo:wa ogonan da koyo monaan ogali. Koyo:wa loswen pag koyo monaan pagkairaya, pag nagkarokas panawen sa mga daet ka alabet remrem pag mga magdaya sa koyo. 23 Koyo:wakay bagowen da koyo maras da- koyo remrem; 24 da- koyo soolon da bayo:wakay pagkairaya pinanawen kaladawan Diyos, kaladawan konin totoo ka kataldengan da- kabanalan. 25 Panawen naba, benglayen:na tayma sai da kaboslian, da- koyo boo ba magtokawanan katotohanan sa koyo mga kaarianan, panawen tamo ba eray sai ngani ka lawas, pag lawas laki Kiristo. 26 No koyo abaisan man, ayaw kay magpadaet. Koyo agad lingowen sa remrem da kabaisan. 27 Ayaw koyo pagpakanen siwang aponin kadaetan. 28 Da takawan ba ayaw:wa magpanakaw; no nawed ba iya magpanawen da- gamiten da konin alima sa boo piya ka panawen para maki kay tay ataboy sa mga badya korang. 29 Koyo ayaw maggamit kayno sai ngani ka daet ka tokawanan; layen koyo rokayen koyo remrem para da boo koyo tokawanan ba piya gidte da- sibay gidte sa magpaeyat sa mga maki kailangan, para maki gidte pakinabang da mga tay karngey. 30 Da- ayaw kay koyo pagmidsahan maskit sa remrem Ispirito Banal, panawen iya da tanda Diyos sa koyo ba konin:nani, makay kaonayan koyo katbosan anggan bait:ta da aldaw hinanda. 31 Koyo:wa alisen da boo mapait sa remrem, da- bais; koyo ayaw:wa magbolyawak, magpamola, da- magpakaskit sa remrem Roma. 32 Nawed gira amba, pad mabait te koyo da- makayawteen sa sai-sai, da- koyo magpatawadan, makay din pomatawad Diyos sa koyo panawen sa katayan laki Kiristo.
1 Panawen koyo mga onga nagpalayaw Diyos, iya koyo toladan. 2 Koyo mamiyag semker palayaw Diyos makay laki Kiristo; panawen sa konin palayaw sa tamo, konin tinaboy konin biyag sa katayan, makay maayooy ka taboy sa Diyos. 3 Koyo mga hinidang Diyos, kaya nawed bagay sambeten man sa koyo mga irgohan da nakayman ka kalasi kakaya-kaya e kadomiyan e amagan. 4 Amba din da nakayman maloswa, e wala kaparosan ka irgohan, da- nawed piya ka garaw ag nawed abaya sa mga mag-isarig. Nawed gira amba, koyo magpasalamat sa Diyos. 5 Koyo amatangan wala eray sa kahadian laki Kiristo da- Diyos, da iraya angangalonya sa Roma, kakaya e amagan, panawen da amagan ba magpodi din sa mga nawed amba Diyos. 6 Koyo ayaw tay nadaya tawa man sa mga tokawanan wala kaparosan, panawen sa makay naba ka panawen, da Diyos ba nagkaabaisan sa mga iraya masowayen sa konin. 7 Kaya koyo ba ayaw tay padamay sa kora. 8 Pag monaan dapo koyo ba sa kadeleman, ngani mona sa mapawa panawen koyo ba sa Panginoon. Koyo mamiyag makay pag kailangan gidte sa mga iraya apawaan:nani 9 panawen da nagbokar magpamiyag sa mapawa ba boo piya, mataldeng da- totoo. 10 Koyo pag-adaran no nakay gidte da kaangas-angas sa Panginoon. 11 Koyo ayaw tay padamay sa mga iraya amamanawen mga nakayman wala nagbokar kapiyaanan, mga nakayman kora nagpanawen sa kadeleman. Nawed gira amba, kora koyo:wa bandirahen anggan kora mga panawen. 12 Panawen kakaya-kaya sambeten da mga nakayman kora nagpanawen nagtago. 13 Ngani no koyo pabandirahen da mga naba, kora nagkaarawaan kapawaan, da- akitan:nani da kora kadaetan, 14 panawen da boo nagkaarawaan ba nagkaapawaan. Kaya maki nagsabi amba, Kawo gomiseng, pag nagkakalek, Kawo mangon ibat sa mga nangatay Da- kawo tay pinawaan laki Kiristo. Naba:a ngani. 15 Kaya koyo dahanan no omaning koyo tay mamiyag makay mga kamatangen, da- nawed makay mga wala amatangan. 16 Panawen daet:ta gidte da kadang paranawan, kaya koyo:wa adimohanen da boo odas para koyo kapanawen piya. 17 Koyo ayaw pad tolingag; koyo saraken no nakay da kaliyagan Panginoon. 18 Koyo ayaw maglasing, panawen kasida naba ag piya ka pamiyag. Nawed gira amba koyo ay-ayan koyo ba pakapnoon Ispirito Banal, 19 anggat-anggat koyo paban-awen da koyo damdamen sa mga igway magpalakol sa Diyos da- mga igway para sa gisarem. Koyo boo poso mag-igway da- magpodi sa Panginoon. 20 Koyo boo odas magpasalamat sa Diyos Apang sa soksokowan panawen sa boo nakayman, sa ngaran tam Panginoon Hisos Kiristo. 21 Koyo pasangato sa sai-sai, naba da tanda koyo maggalang sa laki Kiristo. 22 Mga babayi, koyo pasangato sa koyo-koyo sawa makay pag koyo magpasangato sa Panginoon. 23 Panawen da lalaki da olo konin sawa, makay laki Kiristo iya da olo mga rimponan mga mag-isarig, pag konin lawas, da- iya din da kora Tagaribri. 24 No omaning nagkasangato laki Kiristo da mga rimponan, amba kay din, da mga babayi kailangan gidte pasangato sa kora-kora sawa. 25 Mga lalaki, koyo kay palayawen da koyo-koyo sawa, makay din ag palayaw laki Kiristo sa mga rimponan. Konin tinaboy konin biyag para sa mga rimponan, 26 para kora ba bokodon para sa Diyos kalbas linisen sa sapa tokawanan Diyos. 27 Konin pinanawen naba para apaloba sa konin sadiri da mga rimponan, mabildang banal, wala kapil, da- wala nakayman lebag, wala din kemres. 28 Kailangan palayawen mga lalaki da kora-kora sawa makay pag kora sadiri lawas. Da lalaki magpalayaw sa konin sawa ba magpalayaw sa konin sadiri. 29 Wala iraya nagkaabaisan sa konin sadiri lawas, no nawed ba nagpakakan da- nag-alagaan, makay pag nagpanawen laki Kiristo sa mga rimponan. 30 Tamo ba mga eray konin lawas. 31 Kaya nagsabi Tokawanan Diyos amba, Panawen naba batay inogonan lalaki da konin apang da- adang da- batay mal-anggat sidawa talsawa; da- sidawa batay:ya sai. 32 Da nagpaban-aw tiya ba sai ka pakana Diyos nawed dapo amatangan boo. Da kasaiyan laki Kiristo sa mga rimponan da naay nagtodyo. 33 Ngani naba ba magtodyo din sa tayma sai sa koyo. Mga lalaki, koyo palayawen da koyo-koyo sawa makay pag koyo sadiri. Mga babayi, koyo kay galangen da koyo-koyo sawa.
1 Mga onga, koyo toltolon da koyo mga koyay, makay sa bilin Panginoon, panawen tiya da kailangan gidte. 2 Komo kay galangen da komo apang da- adang. Naba da monaan bilin maki kaanggat pangako amba, 3 No naba da komo nagpanawen ba kawo batay apiyaan da- batay maaba da komo biyag towa sa lopa. 4 Mga koyay, ayaw kay koyo pagpaban-awan kabaisan da koyo mga onga laban sa koyo panawen sa koyo pinanawen sa kora, no nawed ba kora koyo patoboon sa koyo magpataldeng sa kora da- magtodo adar Panginoon. 5 Mga sosoy, koyo toltolon da koyo mga amboy-amboyan towa sa lopa, pag boo galang, da- boo matoltolon, makay laki Kiristo da koyo nagpanawenan. 6 Nagban-awan man koyo mga amboy-amboyan e nawed man amba da koyo panawenen, nawed para magtaboy kaangasan sa kora no nawed ba panawen koyo ba tagoanggat laki Kiristo, da- ibat sa sadiri remrem magpanawen kaliyagan Diyos. 7 Koyo magpanawen maki piya ka remrem, makay sa Panginoon koyo magpanawen, nawed sa mga iraya ngani, 8 panawen koyo amatangan batay tinaboyan Panginoon da tayma sai toltol sa konin pinanawen piya, tagoanggat man e ligayaw man. 9 Mga amboy-amboyan, koyo mamanawen din piya sa koyo mga tagoanggat da- ayaw kay kora pagpanliman, panawen koyo amatangan koyo ba tanan tagoanggat sai ngani ka Panginoon pag sa soksokowan da- iya ba wala nagpatabi. 10 Sa paoriyan, koyo magpakaonay panawen sa koyo kasaiyan sa Panginoon da- sa tolong konin lakol gidte ka kapangyadihan. 11 Koyo soolon da boo mga gamit taboy Diyos, para koyo alabanan da mga rarang ag aponin kadaetan. 12 Panawen da tamo kalaban ba nawed mga iraya, no nawed ba mga poon, mga maki kapangyadihan, da- mga maghadi sa kadeleman tiya sa kaodasan tiya, naba ba da mga lakol ka kaban ispirito kadaetan sa kalaw-awan. 13 Kaya koyo soolon da boo panlaban ibat sa Diyos. Sa makay naba, koyo abaya alabanan no bait da daet ka aldaw naba, da- no kalbas:sani koyo maglabanan ba koyo magpatindeg dapo maonay. 14 Kaya koyo maghanda gidte. Koyo gaw-en begkes sa bar-is da katotohanan, takleban sa soot da balayang kataldengan, 15 da- da Pirmida ka Barita para sa kaginhawahan Diyos naba da koyo soolon sa koyo mga paa makay mga sipatos. 16 Layen koyo sakrayen sa koyo ropangan da panepel, naba da pag-isarig sa laki Kiristo, para nawed katalab da- nawed kaareng ag mga magbalangabang ka tonod aponin kadaetan. 17 Koyo soolon da sorbong sa olo, naba da karibriyan, da- koyo genan da pisaw taboy Ispirito Banal, naba ba da tokawanan Diyos. 18 Da boo naba ba koyo panawenen sa magdarangin da- mag-ay-ay. Koyo manarangin sa boo odas, sa sararay Ispirito Banal. Koyo layen handa da- anggan dapo koyo magdarangin para sa boo hinidang Diyos. 19 Ako koyo din daranginen para ako ba parongawan sibay gidte ka panokawanen para naay apapawa wala kaliman da Pirmida ka Barita ag nawed dapo amatangan boo. 20 Panawen sa Pirmida ka Barita naba, ako da sai ka sogo, ngani mona ako da nagkapiriso. Kaya koyo kay daranginen naay apapawa naba wala kaliman, makay pag kailangan gidte. 21 Laki Tikiko, pag tamo palayaw arian da- pag matoltolon ka tagapamanawen Panginoon, da batay magbarita sa koyo pag boo nakayman para sa naay biyag da- naay nagpanawen. 22 Kaya iya naay nagpaparaoy sa koyo para koyo amatangan da yamen biyag da- para maangas kay da koyo remrem. 23 Da kaginhawahan da- da palayaw kaanggat din da pag-isarig ba taboyon kay ngani- Diyos Apang da- Panginoon Hisos Kiristo sa mga kaarianan. 24 Da parongaw Diyos ba sa koyo:wa ngani- boo pag magpalayaw wala salto sa tam Panginoon Hisos Kiristo.
1 Tiya pag sorat ba ibat sa laki Pablo da- laki Timotiyo mga tagoanggat laki Kiristo Hisos-sa mga taga goraan Pilipos hinidang Diyos da- mag-isarig sa laki Kiristo Hisos, kabilang din da mga koyay sa rimponan da- da mga tagapamanawen Diyos. 2 Sa koyo:wa ngani- da parongaw da- kaginhawahan Diyos tamo Apang sa soksokowan da- Panginoon Hisos Kiristo. 3 Ako magpasalamat sa naay Diyos tayma koyo naay nagkaaremreman. 4 Sa naay darangin sa Diyos para sa koyo ba ako layen kapno kaangasan, 5 panawen sa koyo tolong sa naay sa magparateng sa mga Roma pag Pirmida ka Barita para sa laki Kiristo, ibat naba koyo tinabang anggan mona. 6 Naay apiho da piya ka panawen pag inibatan Diyos sa koyo ba konin batay yinadi anggan sa batay bait da aldaw batay paoli towa laki Kiristo Hisos. 7 Bagay ngani- koyo boo naay naggaw-an halaga makay tiya, panawen koyo ba palayaw sa naay. Koyo ba naay pal-anggat sa parongaw tinaboy Diyos, nawed ngani pag ako magdamay da- magpaonay sa Pirmida ka Barita, no nawed ba mona din sa ako nagkapiriso. 8 Amatangan Diyos da ako magremrem gidte sa koyo boo ba kakol pag palayaw sa koyo laki Kiristo Hisos. 9 Da naay nag-ay-ayan sa Diyos ba koyo palayaw ba maglakol, da- koyo magkilala ba mapawa, da- da koyo kaamatangan ba sibay gidte, 10 para koyo apili da piya gidte sa boo. No amba, sa batay bait da aldaw batay paoli towa laki Kiristo, batay akitan koyo ba malinis, boo gayed, 11 da- kapno pag piya ka ogali taboy sa koyo laki Hisos Kiristo, sa kalakolan da- sa kapodiyan Diyos. 12 Naay alabet koyo amatangan, mga arian sa laki Hisos, da nangyadi sa naay ba tomolong gayed sa magparateng sa mga Roma pag Pirmida ka Barita. 13 Amatangan mga tagabantay sa Piritoryo, da- mga Roma towa amba ako napiriso para sa laki Kiristo, 14 da- da maoson sa mga arian ba lalo omonay sa kora pag-isarig sa Panginoon. Nawed ngani naba, kora remrem ba lalo dapo emeyat sa magtodo tokawanan Diyos wala kaliman. 15 Totoo ngani- laki Kiristo ba nagpangadar mga Roma panawen sa kora amagan da- kora maglaban, ngani da Roma kay ba magpangadar sa maki piya ka remrem. 16 Da kora nagpangadar ba laki Kiristo panawen sa kora palayaw sa naay, panawen kora amatangan ako ba napiriso panawen ako magdamay sa Pirmida ka Barita. 17 Da Roma kay ba magpangadar nawed sadya gidte, no nawed ba ibat sa makasadiri alabet, panawen da kora alabet ba ako ba kora pakaskitan sa odas ako nagkapiriso. 18 Ngani wala nakayman sa naay da boo naba. Angasan ngani- da po ako sa mga nangyadi. Da mahalaga ba laki Kiristo ba nagpangadar kayno sa nakayman ka pakana, kayno piya kayno nawed piya da kora pakana sa magpangadar. Da sai dapo naay nagkaangasan ba 19 naay amatangan ako batay:yakay kalwas doma panawen sa koyo mga darangin, panawen din sa tolong Ispirito Hisos Kiristo. 20 Lalo dapo sa Roma ka nakayman ba da naay alabet da- da naay sarig ba ako ayaw nadaeg sa naay kolpa sa magpamanawen, no nawed ba emeyat da naay remrem kayno omaning kaagot da- mona gidte, para laki Kiristo ba naay palakolon sa naay biyag, kayno sa ako biyagan, kayno sa ako natay. 21 Panawen para sa naay da naay biyag ba laki Kiristo da- maki pakinabang da katayan. 22 Ngani no anggan ako biyagan ba ako batay kapanawen mga piya ka panawen-nawed naay amatangan no saan sa darwa da batay naay pinili. 23 Da naay alabet ba ako natay para ako anggat sa laki Kiristo. Tiya gidte da lalo piya sa naay. 24 Ngani batay lalo piya sa koyo no ako batay maagot dapo biyagan towa sa paranawan. 25 Naay apiho, ako batay dapo biyagan da- batay dapo koyo pal-anggat para koyo boo ba naay atolongan para koyo maki kaangasan da- maglakol sa koyo pag-isarig sa Panginoon. 26 Kaya, sa odas ako saba:akay sa koyo, lalo ako koyo batay pinamalapodi panawen sa koyo kasaiyan sa laki Kiristo Hisos. 27 Kaya ngani-, koyo magsikap mamiyag toltol sa Pirmida ka Barita para sa laki Kiristo. Sa makay naba, kayno ako kaparaoy saba da- kaban-aw sa koyo, kayno nawed, naay batay abaritaan ba koyo ba boo odas sa sai ngani ka alabet, koyo ba magpal-anggatan magdamay Pirmida ka Barita. 28 Koyo ayaw aliman sa koyo mga kalaban. Da koyo nawed aliman ba batay sai ka tanda sa kora amba kora batay nadaeg ngani koyo kay ba batay mandaeg panawen da Diyos da magribri sa koyo. 29 Panawen koyo ba tinaboyan Diyos para magpamanawen para sa laki Kiristo, nawed ngani para mag-isarig sa konin no nawed para mag-agwanta din para sa konin. 30 Mona, koyo naay pal-anggat sa labanan pag koyo akitan naay linabanan narwaan da- koyo abaritaan naay dapo naglabanan anggan mona.
1 Magtaboy dia kasidlahan sa koyo da biyag napasai sa laki Kiristo? Koyo dia nagpaangas pag palayaw laki Kiristo? Totoo dia koyo maki kasaiyan sa Ispirito Banal? Koyo dia maki gidte alabet tomolong sa Roma? 2 No amba, koyo pakapnoon da naay kaangasan sa koyo layen sai ngani- da koyo remrem-koyo malbegkes pag sai ngani ka palayaw, koyo sai ngani sa damdamen da- remrem. 3 Koyo ayaw magpanawen nakayman sa koyo magkampihanan e para koyo podiyen, no nawed ba magpaababa da koyo remrem da- koyo remremen da Roma ba piya dapo sa koyo. 4 Koyo remremen da pakana Roma, nawed ngani da koyo sadiri. 5 Kailangan koyo maki remrem makay pag remrem laki Kiristo Hisos amba, 6 Da sapolan ogali laki Hisos ba ogali Diyos Apang, ngani ba konin inadi sai ka nakayman nawed bagay panggenan da iya baywi kapariho Diyos. 7 No nawed ba konin linso da konin pagkapariho sa Diyos Da- konin sinool da sapolan ogali sai ka tagoanggat da- iya ba inonga iraya. 8 Sa iya iraya, iya pomaababa da konin remrem, da- nawed gidte etean anggan sa katayan, hee, anggan sa katayan sa kodos. 9 Kaya iya pinaatatas Diyos para iya ba atatas sa boo. Iya ba konin pinakan ngaran labi dapo sa boo ngaran 10 para, no arngeyan da ngaran Hisos, da boo rinarang sa soksokowan, sa lopa da- sa galem lopa ba batay maglohod da- magsamba sa konin, 11 da- batay pinaaram boo iraya amba laki Hisos Kiristo da Panginoon, para palakolon da Diyos Apang sa soksokowan. Naba:a ngani. 12 Kaya ngani-, naay mga nagpalayaw, pag ako saba dapo sa koyo, koyo nawed gidte etean, kaya mona ba sa ako wala saba sa koyo, lalo koyo kailangan nawed etean. Kailangan koyo galangen gidte da Diyos sa koyo magpamanawen kapiyaanan anggan sibay gidte da koyo karibriyan, 13 maraw da Diyos da magtaboy sa koyo alabet da- akayanan para koyo kapanawen konin alabet. 14 Koyo panawenen da boo nakayman sa wala diklamo da- paltomangan, 15 para koyo ba wala daet da- wala kamaymayen, mga onga Diyos wala lebag, kayno koyo ba sa tenga mga iraya baliko da- daet da remrem. Saba koyo ba magrawa makay mga solo-, makay pag tala magpamildang sa langit, 16 maraw koyo nagtonton sa kora pag barita karibriyan. No amba, no bait:takay laki Kiristo ba koyo ba naay batay apalakol panawen nawed nawal-an kaparosan da ako magsikap da- magpahidap. 17 Kayno ako batay binono da- da naay daya ba batay binobo makay dagdag sa koyo taboy pag-isarig sa Diyos, ako ba angasan da- batay din angasan anggat sa koyo. 18 No amba, kailangan din koyo magkaangas da- angasan din anggat sa naay. 19 Ako mag-asa sa alabet Panginoon Hisos naay batay agad pinaparaoy saba laki Timotiyo para paeyaten da naay remrem no naay:yani amatangan sa laki Timotiyo no omaning da koyo mga biyag. 20 Wala:a Roma maglabi dapo sa konin sa kasaiyan sa naay remrem da- sa magremrem sa koyo biyag. 21 Panawen da Roma ka iraya ba wala nagremrem no nawed ba pag sa sadiri kay biyag-nawed:da pag para sa laki Hisos Kiristo. 22 Koyo:wa din da kamatang mahalaga gidte laki Timotiyo. Ako konin tinolongan sa naay nagpamanawen para sa Pirmida ka Barita, makay pag sai ka onga magtolong sa konin apang. 23 Kaya, naay sarig ba iya da naay batay apaparaoy saba kalbas naay batay apiho da naay batay biyag towa. 24 Ako mag-asa sa tolong Panginoon, ako din batay kaparaoy saba sa nawed naw maagot. 25 Naay remrem ba kailangan paolien saba sa koyo laki Ipaprodito, ag tamo arian sa Panginoon. Iya ba naay kamamanawen da- kasondalo Diyos. Iya da koyo sinogo para magtolong sa naay kailangan towa. 26 Karemrem:makay iya moli saba. Ahidapan da konin remrem panawen koyo abaritaan iya maki maskit. 27 Iya ngani- magkasakit anggan nawed ngani natay, ngani iya kinayawtean Diyos. Da- nawed ngani iya no nawed ba ako din, para nawed malsaeban da naay karongkotan. 28 Kaya ngani-, naay alabet gidte iya kaoli:a sa koyo para koyo batay angasan no koyo:wakay akitan iya. No amba ba batay nawala da karongkotan sa naay remrem. 29 Kaya, iya ba koyo tabangen boo kaangasan makay sai ka arian sa Panginoon da- koyo galangen da mga iraya makay din iya. 30 Da konin biyag ba konin pinaen bali:ya sa katayan sa konin nagpamanawen para sa laki Kiristo maraw iya tomolong para sa naay makay kahalang sa koyo.
1 Kalbas, naay mga arian sa laki Hisos, koyo angasan sa Panginoon. Kayno naay:yani sinorat sa koyo da mga todo makay tiya, nawed mahidap sa naay da magsorat:takay da- tiya kay ba para din sa koyo kapiyaanan. 2 Koyo magdahan sa mga iraya bait aso, sa mga iraya maalabeten sa kadaetan. Koyo magdahan sa mga maglopod koyo ba long-oyon. 3 Koyo remremen, nawed kora no nawed tamo da totoo long-oy, panawen tamo ba nawed mag-isarig sa nagpamanawen sa lawas. Tamo magsamba sa Diyos sa Ispirito Banal da- tamo kaangasan ba sa kasaiyan sa laki Kiristo Hisos. 4 Da totoo ba ako din ba abaya gidte maki sarig sa nagpamanawen sa lawas. No nagremrem tawa man amba abaya iya maki sarig sa makay tiya ka panawen ba lalo dapo abaya ako. 5 Ako linong-oy sa ikawalo ka aldaw ibat ako pinreg. Naay mga koyay ba Israilita ibat sa andana laki Binhamin, ako ba Hibriyo gidte. Para sa magtoltol sa mga maniho mga Diw, ako ba Parisiyo. 6 Para sa kasipagan sa ako magtoltol sa maniho ba naay pinahidapan da rimponan mga mag-isarig. Para kay sa kataldengan sa magtoltol sa mga maniho, ako ba bagay gidte. 7 Ngani panawen sa laki Kiristo da boo nakayman naay rinemrem maki pakinabang sa naay ba naay:yani rinemrem ba logi gidte. 8 Hee, naay rinemrem da boo nakayman ba logi, makay kahalang pag lalo mahalaga, naba da pagkilala sa laki Kiristo Hisos naay Panginoon. Naay nagremrem wala kaparosan da boo nakayman da- makay sokal ngani, naay ngani atabang laki Kiristo, 9 da- ako maki kasaiyan sa konin. Ako wala:a sarig tay mataldeng sa magtoltol sa maniho mga Diw no nawed ba sa ako mag-isarig sa laki Kiristo. Naay kataldengan mona ba taboy Diyos panawen sa mag-isarig. 10 Da naay ngani- alabet mona ba akilalaan gidte laki Kiristo, da- naay adanasan da kapangyadihan ibat sa iya biniyag:gakay da- ako kadamay sa konin mga kahidapan anggan makay:ya din iya, sa iya ba natay, 11 sa sarig ako din ba batay:yakay biniyag ibat sa natay. 12 Nawed sa naay:yani tinabang naba. Nawed din sa ako bagay:yani, no nawed ba ako magsikap para naay tabangen naba da- naay aratengan pag nagparateng sa naay laki Kiristo Hisos, panawen ako ba konin:nani tinabang. 13 Mga arian sa laki Hisos, nawed naay nagremrem naay:yani narateng, ngani sai ngani da naay nagpamanawen mona: naay naglingo da kadalan da- naay nagsikap tabangen da sa batay rateng. 14 Ako toloy:yani sa batay tingkowan, para tabangen da taboy nagpili Diyos para sa naay panawen sa laki Kiristo Hisos-naba da biyag batay tongko sa soksokowan. 15 Amba da kailangan tamo remremen, tamo ag mga maonay sa pag-isarig. No nawed makay tiya da koyo magpaniwala, tiya ba batay pinamapawa Diyos sa koyo. 16 Da kailangan ngani ba tamo toloy:yani sa tamo:wani amatangan. 17 Mga arian sa laki Hisos, koyo boo ba tomolad sa naay. Koyo tandaan da boo magtoltol sa yamen kahalimbawa tiya. 18 Makay pag layen naay nagsabi sa koyo da- mona ba mabingas naay nag-olbat sa koyo amba maoson da magpamiyag makay mga kalaban ag kodos laki Kiristo. 19 Kapadosahan da kora tay rinateng, panawen da kora nagsamba ba da nag-alabet lawas. Kora nagpalakol da mga nakayman kailangan disin kora akayaan, da- kora nagremrem ba da mga nakayman para ngani sa paranawan. 20 Sa tamo kay, pag soksokowan da tamo gidte pamatawan, da- ibat sata tamo gidte nagpanyaan da tamo Panginoon Hisos Kiristo, pag tamo Tagaribri. 21 No bait da aldaw naba, konin batay binago da tamo nawed piya ka lawas, da- konin batay ginawa makay din pag konin piya gidte ka lawas. Konin batay pinanawen naba sa kapangyadihan konin naggamit sa magpasoko pag boo nakayman sa konin.
1 Kaya ngani-, naay nagpalayaw mga arian sa laki Hisos, pag naay gidte nagpalayaw, da- naay gidte alabet akitan:nakay, koyo da naay kaangasan da- bokar naay pandaeg. Naay mga nagpalayaw, koyo magpakaonay sa koyo biyag sa kasaiyan sa Panginoon. 2 Yodiya, Sintiki, ako mag-aringi sa kandawa, magkasai da kandawa remrem maraw kandawa talkaka:ani sa Panginoon. 3 Naay din nag-aringi sa komo, naay matoltolon ka pal-anggat, Komo kay sidawa ba tolongan. Sidawa din ba naay katolong sa magparateng sa mga Roma pag Pirmida ka Barita, pal-anggat kora Kiliminti da- pal-anggat din mga Roma naay kamamanawen. Da kora kay ngaran ba nagkasorat:tani sa listahan mga maki:ya biyag. 4 Koyo layen angasan sa Panginoon. Naay:yakay nag-olbat, koyo angasan. 5 Koyo paban-awen sa boo da koyo maganda ka remrem. Bali:ya batay bait da Panginoon. 6 Ayaw magtarongisngis para sa kayno nakayman. No nawed ba sa koyo panarangin ba koyo ay-ayan sa Diyos kayno nakay da koyo kailangan da- magpasalamat sa konin. 7 Da nawed akayanan koyo remremen pag kaginhawahan Diyos da batay magdahan sa koyo poso da- remrem panawen sa koyo kasaiyan sa laki Kiristo Hisos. 8 Bali:ya nayadi da naay sorat. Mga arian sa laki Hisos, ponoon koyo remrem pag boo kapiyaanan da- kapodi-podi, naba ba mga boo nakayman totoo, piya, mataldeng, malinis, maganda da- kagalang-galang. 9 Koyo panawenen da boo koyo amatangan, tinabang, arngeyan, da- akitan sa naay. No amba ba batay sa koyo da Diyos pag magtaboy kaginhawahan. 10 Lakol gidte da naay kaangasan sa Panginoon, maraw maagot:tani ba koyo ba karemrem:makay sa naay. Naay amatangan ako nawed koyo nagkaalingwanan. Kaya ngani, koyo ba wala pagkaodas magtolong sa naay. 11 Naay nagsabi naba nawed sa ako magpangailangan, panawen ako ba biyasa:a angasan, kayno omaning da naay biyag. 12 Maki odas ako batang mahidapen, maki kay odas ako batang maki te karon-an. Maraw ako biyasa:ani layen angasan naay remrem kayno nakay da naay batay biyag: kayno absoyan, kayno abayogan, kayno somagana, kayno nangilodan. 13 Pag boo naba ba naay akayanan panawenen panawen sa eyat tinaboy laki Kiristo sa naay. 14 Amba man, angasan gidte ako sa koyo pinanawen tolong sa naay kahidapan. 15 Koyo kay amatangan, koyo mga taga goraan Pilipos, koyo ngani da naay kadamay sa kahidapan da- sa kasaganaan pag ako mangadang ibat sa Masidonya pag ako mag-ompisa ngani dapo sa mangadar pag Pirmida ka Barita. 16 Maraw ako sata:ani sa Tisalonika ba nawed ngani kasai ako koyo tinontonan tolong. 17 Nawed sa naay alabet layen tomabang mga taboy, no nawed ba da naay alabet ba sagana da pakinabang batay koyo tinabang. 18 Ako ba maki boo nakayman da- sagana. Sobra dapo sa naay kailangan da koyo tolong sa naay, pag tinonton laki Ipaprodito. Da mga taboy naba ba maayooy ka taboy sa Diyos, mga taboy piya gidte da- magpaangas sa konin. 19 Da naay Diyos da batay tomaboy sa koyo boo koyo kailangan ibat sa konin karon-an sa soksokowan, pag karon-an nawed tay naobos, panawen sa koyo maki kasaiyan sa laki Kiristo Hisos. 20 Tamo podiyen da tamo Diyos da- Apang sa soksokowan anggan kadomaen. Amba:a ngani-. 21 Ibat sa naay da- ibat din sa tamo mga arian naay pal-anggat, koyo paratengen sa boo pinili Diyos da- misarig sa laki Kiristo Hisos da tanong amba, Makay kay nakay koyo saba? 22 Da boo tamo mga arian sa laki Hisos towa, lalo:ani pag mga magpamanawen sa Piritoryo ba magparateng din sa koyo pag kora tanong amba, Makay kay nakay koyo saba? 23 Sa koyo:wa ngani- boo da parongaw Panginoon Hisos Kiristo.
1 Ako laki Pablo pag pinili sogoan laki Kiristo Hisos toltol sa kaliyagan Diyos da magsorat sa koyo mga hinidang Diyos sa goraan Kolosas, da- mga matoltolon ka kaarianan sa laki Kiristo. Anggat sa magpababa tiya pag sorat ba laki Timotiyo tam arian sa laki Hisos. Sa koyo:wa ngani- da parongaw da- kaginhawahan ibat sa Diyos tamo Apang. 3 Tayma koyo yamen nagdarangin ba layen yamen magpasalamat sa Diyos pag Apang tamo Panginoon Hisos Kiristo, 4 maraw yamen abaritaan da para sa koyo pag-isarig sa laki Kiristo Hisos da- para sa koyo palayaw sa boo mga hinidang Diyos, 5 panawen koyo maki sarig koyo batay tinabang da hinanda para sa koyo sata sa soksokowan. Koyo:wa amatangan da para sa koyo nagsarigan tiya pag monaan odas koyo arngeyan da tokawanan totoo pag Pirmida ka Barita 6 pag pinangadar sa koyo. Tiya pag Pirmida ka Barita ba magrateng sa boo paranawan da- magpamokar da- magtobo dapo, makay pag nangyadi sa koyo ibat dapo pag koyo arngeyan da- amatangan no omaning gidte da kapiyaanan remrem Diyos, 7 pag koyo amatangan ibat sa laki Ipapras, ag matoltolon ka tagapamanawen laki Kiristo da- yamen palayaw kamamanawen da- yamen katiwalaan sa koyo. 8 Sa konin din yamen amatangan da para sa palayaw tinaboy Ispirito Banal sa koyo. 9 Kaya ibat yamen arngeyan tiya, layen yamen magdarangin sa Diyos para sa koyo amba koyo konin kay ngani- pakapnoon kaamatangan pag taboy Ispirito Banal para koyo gidte amatangan da konin kaliyagan. 10 Sa makay naba abaya koyo mamiyag bagay gidte da- kaangas-angas sa Panginoon, mabokar piya sa koyo nagpanawen da- magtobo sa koyo pagkilala sa Diyos. 11 Koyo yamen din nagdarangin amba koyo kay paonayen gidte sa tolong konin lakol gidte ka kapangyadihan para koyo wala diklamo mag-agwanta sa boo kahidapan. Koyo din magpasalamat sa Diyos Apang maki kaangasan, panawen koyo konin inadi abaya gidte kaanggat sa mga hinidang pag maki batay eray sa kahadian kapawaan. 13 Tamo konin rinibri ibat sa kapangyadihan kadeleman da- pinasalyo sa kahadian konin nagpalayaw Onga. 14 Konin Onga da magpatawad sa tamo mga kadaetan da- magribri sa tamo. 15 Laki Kiristo da- Diyos ag nawed nagkaakitan ba naba din. Laki Kiristo ba Onga:ani Diyos bayo rinarang da boo. 16 Panawen da boo nakayman kayno sa langit, kayno sa lopa, kayno mga nagkaakitan, kayno mga nawed nagkaakitan ba rinarang Diyos Apang kaanggat laki Kiristo. Kayno ag mga maghadi, mga pamoonan sa kalaw-awan da- sa soksokowan, kayno mga maki kapangyadihan ba rinarang din Diyos sa laki Kiristo para kora ba sakop sa konin. 17 Laki Kiristo ba monaan biyagan sa boo, da- sa konin nagkapirmi da boo nakayman. 18 Laki Kiristo da olo boo mga rimponan mga mag-isarig, pag konin lawas. Iya da magtaboy biyag sa konin lawas. Iya da panganay Diyos, ag monaan biniyag:gakay ibat sa mga nangatay para iya ngani da maki kapangyadihan sa boo nakayman. 19 Da alabet Diyos ba no omaning iya ba Diyos ba amba gidte din kon Onga. 20 Inalabet din Diyos da boo paranawan ba pinalsai sa konin sa tolong konin Onga. Panawen laki Kiristo ba binono sa kodos da- nabobo da konin daya ba pinalsai Diyos sa sadiri da boo rinarang sa langit da- sa lopa. 21 Koyo ba kabilang din naba. Narwaan koyo ba adayo sa Diyos. Da koyo nagremrem ba laban sa konin da- da koyo nagpamanawen ba boo kadaetan. 22 Ngani mona kay, koyo ba pinalsai Diyos sa sadiri, panawen sa katayan laki Kiristo lawas para koyo ba konin aparopang sa Diyos koyo banal, wala lebag da- boo gidte. 23 Ngani koyo kailangan boo odas ba alalem da- maonay da koyo pag-isarig da- ayaw kay koyo magpayogyoga para ayaw nalingo da koyo pag-asa pag koyo tinabang pag koyo arngeyan da Pirmida ka Barita. Da Pirmida ka Barita naba ba pag nagpangadar sa boo mga iraya. Ako laki Pablo ba pinili Diyos para magpamanawen sa magpangadar tiya. 24 Ako ba angasan sa ako mag-agwanta kahidapan sa naay lawas para sa koyo panawen sa makay tiya pag kahidapan ako magtolong anggan sibay da mga kahidapan kailangan da- po agwantahen makay pag inagwanta laki Kiristo para sa boo mga rimponan mga mag-isarig, naba ba pag konin lawas. 25 Ako ginawa tagapamanawen sa mga rimponan maraw ako hinidang Diyos para sa koyo kapiyaanan. Ako konin hinidang para naay apaaram gidte da konin tokawanan. 26 Naba ba sai ka barita pag mona ngani amatangan, pag barita maagot:ta ka dag-on nawed tang Pinaban-Aw Diyos sa mga sanib-sanib ka kaapoan ngani mona ba konin:na pinaaram sa konin mga hinidang. 27 Inalabet Diyos paaramen sa kora naba pag lakol da- katakataka ka barita pag mona ngani amatangan. Tiya da barita pag nag-alabet Diyos papakarngeyen sa boo iraya amba, Mamataw kay sa koyo poso laki Kiristo, kaya koyo piho batay kaanggat sa Diyos sata sa konin kalakolan. 28 Yamen nagpangadar da para sa laki Kiristo sa boo iraya. Sa boo kadonongan yamen nagparemreman da boo iraya para alasen da daet da- kora yamen mapawa gidte nagtod-an para yamen apaloba sa Diyos da tayma sai boo gayed da- sa kasaiyan sa laki Kiristo. 29 Panawen naba ako magpamanawen gayed da- magpakatiyaga sa lakol gidte ka kapangyadihan taboy laki Kiristo sa naay.
1 Naay alabet koyo amatangan no kaomaning kakol da naay pinanawen para tomolong sa koyo da- sa mga taga goraan Laodisiya da- sa mga Roma nawed tang kaserey sa naay. 2 Naay nagpanawen naba para emeyat da kora remrem da- para kora ba malbegkesan sa magpalayaw. Sa makay naba kora batay magkamaki pag sibay gidte ka amatangan bokar kora kilala gidte sa laki Kiristo pag barita Diyos pag mona ngani amatangan. 3 Sa laki Kiristo ba nagkaakitan da boo pag kadonongan da- kaamatangan Diyos. 4 Naay nagsabi naba para koyo nawed batay nadaya tawa man sa kora tokawanan pamaen. 5 Kayno wala saba sa koyo da naay lawas ba saba din da naay ispirito. Ako nagkaangasan panawen sa koyo piya ka pamiyag da- sa koyo maonay ka pag-isarig sa laki Kiristo. 6 No omaning koyo tinabang laki Kiristo Hisos para iya ba koyo Panginoon ba koyo kailangan din mamiyag boo odas maki kasaiyan sa konin. 7 Kailangan koyo mga wakat ba magpaalalem sa laki Kiristo da- koyo pasarigen sa konin pag sarigan boo toar da koyo biyag. Magpaonay sa koyo pag-isarig pag tindo sa koyo. Koyo layen magpasalamat sa Diyos. 8 Koyo magdahan para nawed koyo naranggot tawa man sa kora mga wala kaparosan da- madaya ka adar. Da mga adar naba ba nawed ibat sa laki Kiristo, no nawed ba ibat sa mga panoltolon mga koyay da- ibat sa mga ispirito maghadi sa paranawan. 9 Kayno laki Kiristo ba inonga gidte iraya ba no omaning da Diyos ba amba dapo din laki Kiristo da- wala korang. 10 Kaya koyo biyag ba sibay:ya gidte maraw koyo ba pinasai sa laki Kiristo. Sakop sa laki Kiristo da boo kapangyadihan da- pamoonan. 11 Sa laki Kiristo koyo ba makay linong-oy, nawed sa linong-oy sa koyo lawas, no nawed sa koyo rinibri sa kapangyadihan daet ka alabet lawas. Tiya da makay long-oy ibat sa laki Kiristo. 12 Maraw koyo ba binaotismohan sa sapa, koyo ba makay limbeng anggat sa laki Kiristo, da- koyo ba makay biniyag:gakay anggat sa konin, panawen sa koyo pag-isarig sa kapangyadihan Diyos pag bomiyag:gakay sa laki Kiristo ibat sa mga nangatay. 13 Koyo pag mga Nawed Diw, pag monaan koyo ba makay natay panawen sa koyo mga kadaetan da- panawen wala sa koyo da Bilin tinaboy Diyos sa laki Moysis, ngani mona ba koyo ba biniyag:gakay Diyos pal-anggat sa laki Kiristo. Tamo konin pinatawad sa boo tamo mga kadaetan. 14 Konin pinawal-an kaparosan da boo sinorat laban sa tamo anggat da mga batay disin tamo tebagen. Binaraw gidte Diyos da boo mga sinorat laban sa tamo pag laki Kiristo ba pinako sa kodos. 15 Pag natay laki Kiristo sa kodos, konin dinaeg da mga poon mga daet ka ispirito da- da mga maki kapangyadihan sa paranawan. Pag mga naba ba makay mga nag-egtan konin binandira sa boo makay katonayan sa iya mandaeg. 16 Kaya koyo ayaw magpasagalem sa mga nakayman nagpapanawen para sa pamangnen e inemen, para sa mga nagpangilin mga kasayahan, da- mga bayo ka bolan, mga Aldaw Magpahinga. 17 Da boo mga nagpapanawen makay naba ba makay anino ngani mga batay rateng. Laki Kiristo gidte da maki anino. 18 Ayaw koyo pabayaan tawa man garwen da bokar koyo daeg. Alabet gidte mga iraya naba koyo magpasoli magpaababa sa koyo sadiri da- magsamba sa mga anghil. Kora nagsabi gidte amba kora labi dapo sa koyo panawen sa kora kono akitan sa mga makay akalkan ibat sa Diyos. Da mga iraya naba ba nawed:da maggegen sa laki Kiristo ngani sa wala dahilan ba kora magpalawlaw panawen da kora nagkaamatangan ba makay nagkaamatangan boo iraya. Laki Kiristo da olo mga rimponan mga mag-isarig da- maki kapangyadihan sa boo lawas, para magpalsomag sa mga los-an da- mga lapgapen. Laki Kiristo din da magpalanobo sa lawas toltol sa nag-alabet Diyos. 20 Koyo natay:yani anggat sa laki Kiristo. Koyo wala:a sa kapangyadihan mga ispirito maghadi sa paranawan. Kaytang koyo magpamiyag dapo makay mga makaparanawan? Kaytang koyo magtoltol dapo sa mga maniho makay pag amba, 21 Kawo ayaw maggegen tiya, Kawo ayaw magtikim tiya, Kawo ayaw magkapkap tiya. 22 Da mga naba ba mga maniho da- todo ngani iraya para sa mga nakayman batay nangilodan sa maggamit. 23 Balat kayo makay ibat sa kadonongan da mga todo naba pag magsamba sa mga anghil, pag magpasoli magpaababa sa sadiri da- magpaskit sa lawas. Ngani da mga naba ba nawed aampara sa mga daet ka alabet lawas.
1 Koyo ngani- ba biniyag:gakay kaanggat sa laki Kiristo. Kaya koyo saraken da mga nakayman sa soksokowan no saan laki Kiristo ba magtongka sa kapet dako kanan Diyos Apang. 2 Koyo gidte layen pagremremen da mga nakayman sa soksokowan, nawed da mga nakayman sa lopa. 3 Panawen koyo natay:yani, da koyo gidte biyag ba nagkatago sa Diyos kaanggat sa laki Kiristo. 4 Laki Kiristo da koyo gidte biyag. No doma iya rateng:ngakay towa ba koyo din batay kaanggat sa konin da- kaeray sa konin kalakolan. 5 Kaya kailangan koyo bonoon da mga daet ka alabet lawas makay pangalonya, kakayaan, daet ka magsikrab kadamdamen, daet ka nag-alabet, da- amagan pag sai ka kalasi magsamba sa mga nawed amba Diyos. 6 Panawen sa mga nakayman naba ba da Diyos ba magpadosa sa mga iraya maglaban sa konin kaliyagan. 7 Pag monaan dapo koyo din ba magpamanawen mga naba, pag koyo naghadian dapo mga daet ka alabet lawas. 8 Ngani mona koyo benglayen da boo mga tiya-kabaisan, kaibengen olo, adaetan remrem, tongayaw da- kaloswaan. 9 Koyo ayaw magpamos-lian sa sai-sai, panawen koyo:wa linso da monaan pagkairaya anggan konin mga daet ka panawen. 10 Koyo:wa sinool da bayo ka pagkairaya, pag nagkabago toltol sa ladawan Diyos pag Romarang sa koyo, anggan sibay gidte da koyo kaamatangan para sa konin kaliyagan. 11 Kaya nawed:dani amba Roma da mga Diw sa mga Nawed Diw, da long-oy sa mga nawed long-oy, da manalyowan sa mga iraya matapang, da tagoanggat sa mga ligayaw. Laki Kiristo da mahalaga sa boo naba da- iya ba sa koyo boo. 12 Koyo ba hinidang Diyos, koyo konin pinili da- konin nagpalayaw. Kaya koyo kailangan makayawtean, maki piya ka remrem sa Roma, ababa da- malomanay da remrem, agwantahen. 13 Koyo magpahinohodan da- sa odas koyo maki adaetan sa remrem sa sai-sai ba koyo magpatawadan sa sai-sai. Koyo ba pinatawad Panginoon kaya koyo magpatawadan din sa sai-sai. 14 Labi sa boo mga naba koyo magpalayawan sa sai-sai panawen tiya ba makay magpamegkes sa koyo sa kasaiyan gidte. 15 Koyo paghadien sa koyo mga poso da kaginhawahan nagtaboy laki Kiristo. Koyo ba pinili para sa kaginhawahan tiya para koyo ba kaeray sa sai ka lawas. Koyo layen magpasalamat. 16 Koyo tanemen piya sa koyo remrem da tokawanan para sa laki Kiristo para mamokar piya. Koyo ba magpayremreman da- magpaltodoan sa sai-sai sa boo kaamatangan. Koyo mag-igway mga igway magpalakol sa Diyos anggan mga igway para sa ispirito. Koyo mag-igway maki pasalamat sa Diyos ibat sa koyo poso. 17 Da boo koyo batay pinanawen kayno sa tokawanan kayno sa panawen ba koyo panawenen sa ngaran Panginoon Hisos da- panawen sa konin ba magpasalamat koyo sa Diyos Apang. 18 Mga babayi, koyo pasangato sa koyo-koyo sawa panawen naba ba bagay panawenen mga mag-isarig. 19 Mga lalaki, koyo kay palayawen da koyo-koyo sawa da- kora ayaw koyo pagpamaisan. 20 Mga onga, layen koyo toltolon da koyo mga koyay panawen naba ba magtaboy kaangasan sa Panginoon. 21 Mga apang, koyo ayaw agpa-bais sa koyo mga onga, kaaram batay mahina kora remrem. 22 Mga soan, koyo toltolon sa boo nakayman da koyo mga amboy-amboyan towa sa lopa, nagban-awan man koyo mga amboy-amboyan e nawed man, nawed para magtaboy kaangasan sa mga iraya no nawed panawen koyo ba matoltolon da- koyo aliman magpanawen daet laban sa Panginoon. 23 Nakayman da koyo nagpanawen, may-an sa koyo remrem da koyo magpamanawen para sa Panginoon da- nawed para sa iraya ngani. 24 Koyo kay amatangan koyo batay pinakan Panginoon parongaw, ag konin hinanda para sa konin mga onga, panawen laki Kiristo da Panginoon ag koyo nagpanawenan. 25 Da makadaetan kay ba batay pinadosahan Diyos toltol sa konin kadaetan panawen da Diyos ba wala nagpatabi.
1 Mga amboy-amboyan, koyo ba mga piya da- mataldeng sa koyo mga tagoanggat. No omaning da Panginoon ba magremrem para sa koyo, amba din koyo remremen para sa koyo tagoanggat. 2 Boo odas koyo magdarangin. Koyo magdarangin boo remrem da- magpasalamat sa Diyos. 3 Boo odas yamen koyo kay daranginen para yamen pakanen Diyos pagkaodas para yamen apangadar da- apaaram konin tokawanan para sa barita para sa laki Kiristo pag mona ngani amatangan. Panawen saba ba ako nagkapiriso mona. 4 Koyo kay daranginen para naay apaaram naba mapawa gidte, makay pag bagay naay paaramen. 5 Bagay koyo kamatangen sa koyo pakianggat sa mga nawed mag-isarig sa laki Kiristo. Koyo tiyagaen tayma odas para apaaram da boo tiya sa kora. 6 Kailangan da koyo mga irgohan ba makay deges sa kora da- maki kadonongan. Koyo din pag-adaran piya no omaning tay tembag sa tayma sai. 7 Laki Tikiko pag yamen nagpalayaw arian da- matoltolon ka katolong, ag anggat sa yamen ba tagapamanawen din Panginoon, iya da batay magbarita sa koyo pag boo nakayman para sa naay. 8 Iya naay pinaparaoy saba para koyo amatangan no omaning da yamen biyag para, sa makay naba ba emeyat da koyo remrem. 9 Konin pal-anggat ba laki Onisimo pag matoltolon da- nagpalayaw arian, sai ka taga saba din sa koyo. Sidawa da batay magbarita sa koyo ag boo nangyadi towa. 10 Laki Aristarko pag naay din kapiriso da- laki Markos ag pinsan laki Birnabi magtanong amba, Makay kay nakay koyo saba? Koyo naay:yani binilinan para sa laki Markos amba iya koyo tabangen maki kaangasan no iya bait saba. 11 Laki Hoswi pag nag-awit Hosto ba magtanong din amba, Makay kay nakay koyo saba? Sa boo naay kamamanawen towa kora tatlo ngani da mga Diw makaKiristo pag magtolong sa naay sa magpangadar para sa kahadian Diyos. Kora gidte pomaeyat sa naay remrem. 12 Laki Ipapras ag tagapamanawen laki Kiristo Hisos, sai din taga saba sa koyo, ba magtanong din amba, Makay kay nakay koyo saba? Koyo ba konin layen nagdarangin boo remrem amba koyo paonayen Diyos para sibay da- matoltolon gidte sa kaliyagan Diyos. 13 Ako ba sistigo sa konin lakol ka magtiyaga para sa koyo da- para sa taga Laodisiya da- Hirapolis. 14 Laki Dimas anggan laki Lokas pag tamo nagpalayaw magpanggamot ba magtanong amba, Makay kay nakay koyo saba? 15 Da mga talkakaan sa Laodisiya da- bayi Nimpas da- da rimponan mga mag-isarig pag magsamba sa Diyos sa konin balay ba koyo tanongon para sa naay amba, Makay kay nakay koyo saba? 16 No koyo nabasa da sorat tiya, koyo din pabasahen sa rimponan mga mag-isarig sa goraan Laodisiya. Koyo kay din basahen da sorat batay rateng sa koyo ibat sa Laodisiya. 17 Koyo kay sabiyen sa laki Arkipo amba, Panawenen gidte da panawen komo tinabang ibat sa Panginoon. 18 Ako laki Pablo da magsorat tiya pag tanong amba, Makay kay nakay koyo saba? Koyo kay remremen ako ba sa piriso. Sa koyo ngani- da parongaw Diyos.
1 Da sorat tiya ba ibat sa yamen Pablo, Silas da- Timotiyo para sa rimponan mga mag-isarig sa laki Hisos sa goraan Tisalonika, pag mga hinidang tamo Diyos Apang da- Panginoon Hisos Kiristo. Yamen darangin ba, Sa koyo:wa ngani- da parongaw da- kaginhawahan. 2 Layen yamen magpasalamat sa Diyos panawen sa koyo boo, tayma yamen magdarangin ba koyo yamen nagpaanggat sa yamen darangin. 3 Yamen nagremrem sa ropangan tamo Diyos Apang da koyo mga panawen makay bokar koyo pag-isarig sa laki Hisos, da koyo magrokayan para paban-awen koyo palayaw sa Diyos, da- da koyo onay gidte nag-asahan sa tam Panginoon Hisos Kiristo. 4 Yamen amatangan, mga kaarianan sa laki Hisos, amba koyo ba hinidang Diyos, pag magpalayaw sa koyo. 5 Da Pirmida ka Barita, pag yamen gidte nagpaniwalaan, ba yamen pinapawa sa koyo, nawed ngani sa tokawanan, no nawed ba maki kapangyadihan da- ibat sa Ispirito Banal. Koyo akitan no omaning yamen mamiyag sa koyo ropangan, naba ba yamen pinanawen para sa koyo kapiyaan. 6 Yamen koyo tinoladan da- da Panginoon. Koyo tinabang da Pirmida ka Barita; kalbas koyo domanas gidte lakol ka kahidapan. Amba man, sa koyo da- po din da kaangasan taboy Ispirito Banal. 7 Kaya koyo ba nagawa toladan boo kaarianan sa laki Hisos sa kotanan Masidonya da- sa kotanan Akaya. 8 Panawen nawed ngani pag tokawanan Panginoon da rateng sa Masidonya da- sa Akaya ibat sa koyo no nawed da barita para sa koyo mag-isarig sa Diyos ba komalat sa boo poro. Kaya yamen ba nawed:da mistil magtokawanan dapo para saba sa mga Roma. 9 Kora:a ngani- da magbarita no omaning yamen koyo tinabang da- koyo:wa pinaawakan da magsamba sa mga nawed amba Diyos para koyo magpamanawen para sa Diyos gidte biyagan, 10 para koyo magpanya sa konin Onga laki Hisos, pag batay:yakay paoli towa sa paranawan ibat sa soksokowan. Iya da biniyag:gakay Diyos ibat sa mga nangatay. Laki Hisos din da batay magribri sa tamo mga mag-isarig sa konin doma ibat sa padosa Diyos.
1 Mga kaarianan, koyo:wa din da kamatang maki gidte kaparosan da yamen paraoy sa koyo. 2 Koyo amatangan pag odas yamen ba sa goraan Pilipos yamen ba pinahidapan da- ti-nawanan. Amba man, pinaeyat Diyos da yamen remrem para paaramen sa koyo da Pirmida ka Barita Diyos, kayno sa maoson hadang kahidapan. 3 Da yamen pangadar ba nawed sarig sa nawed raoy e sa kakayaan remrem, nawed din sa alabet mandaya. 4 Yamen kinaangasan Diyos, matang konin inintiriga sa yamen da Pirmida ka Barita. Kaya yamen mangadar nawed para pakanen kaangasan da mga iraya, no nawed ba da Diyos, ag magban-aw sa tamo poso no nakay da tamo nagremrem. 5 Amatangan Diyos, koyo din amatangan sa yamen pangadar narwaan yamen nawed gidte magtokawanan pasoli ka papodi, nawed din magtokawanan para takleban da alabet mangaken. 6 Nawed yamen inalabet da koyo papodi kayno tawa man, 7 kayno yamen mga pinili sogoan laki Kiristo maki kapangyadihan magpanya mga naba. Pag yamen anggat sa koyo yamen maambet gidte sa koyo, makay sai ka anday mag-alaga gidte sa konin mga onga. 8 Panawen lakol gidte da yamen kapalayawan sa koyo, yamen:na hinanda da yamen sadiri para mangadar sa koyo pag Pirmida ka Barita ibat sa Diyos. Nawed ngani naba, kayno yamen biyag ba yamen handa taboyon para sa koyo no kailangan panawen koyo yamen nagpalayaw:wa gidte. 9 Mga kaarianan, piho koyo gidte aremreman dapo no omaning yamen mamanawen da- magrokayan aldaw da- madlem para yamen nawed magpahidap sa tawa man sa koyo sa odas yamen nagpaaram sa koyo da Pirmida ka Barita ibat sa Diyos. 10 Koyo yamen sistigo da- amba din da Diyos, yamen ba naggawa da yamen sabi, yamen mataldeng da- sibay gidte da yamen pakoanggat sa koyo mga mag-isarig sa laki Hisos. 11 Makay din pag koyo amatangan, yamen makay sai ka apang sa tayma sai sa koyo. 12 Yamen pomaeyat da- pomaangas sa koyo remrem. Koyo yamen inateet amba, Koyo mamiyag piya sa ban-aw Diyos pag homidang sa koyo para koyo kaeray sa konin kahadian da- kalakolan. 13 Tiya dapo da yamen layen nag-pasalamat sa Diyos: Maraw yamen pinangadar sa koyo da konin Tokawanan koyo kay tinabang naba nawed makay tokawanan iraya no nawed makay Tokawanan gidte Diyos, anggan da kapangyadihan tokawanan Diyos ba nagkaakitan sa koyo biyag, koyo mga mag-isarig. 14 Mga kaarianan, da magpangyadi sa koyo ba makay pag nangyadi sa mga rimponan mga mag-isarig sa Diyos sa kotanan Hodiya, sa mga taga sata mag-isarig sa laki Kiristo Hisos. Koyo ba nagpahida- pan ag daet koyo mga kalasyon, makay din mga taga kotanan Hodiya ba pinahidapan kora kapowa Diw. 15 Naba pag mga Diw bomono sa mga tagabarita ibat sa Diyos da- sa Panginoon Hisos. Kora din da pomahidap sa yamen. Kora ba sa-rongat sa remrem Diyos da- kabangga boo iraya. 16 Kaya kora gidte naghadangan da yamen pangadar Pirmida ka Barita sa mga Nawed Diw sa batay karibri sa kora. Rateng:nga sa toko da kora daet gidte ka pinanawen, matang Romateng:ngani gidte sa kora da kapadosahan Diyos! 17 Mga kaarianan, pag yamen napasway te sa koyo-nawed napasway sa remrem no nawed ba sa ban-aw ngani- yamen karemrem gidte sa koyo yamen gidte alabet akitan:nakay koyo. 18 Nawed ngani kasai ako maggayak para domaraw sa koyo, ngani yamen layen naghadangan laki Satanas. 19 Koyo makay mga Roma ka mag-isarig ba yamen nag-asahan, yamen kasyagan da- da bokar yamen pandaeg, matang koyo da yamen batay nagpalakol doma sa ropangan Panginoon Hisos sa iya batay:yakay paoli towa. 20 Koyo gidte da yamen kalakolan da- kasyagan.
1 Pag nawed:dani yamen kaagwanta da alabet magban-aw:wakay sa koyo, kayno ako ngani da ogonan towa sa goraan Atinas, 2 ba yamen:na rinemrem piya no paparaoyon sa koyo laki Timotiyo pag tamo arian sa laki Hisos da- yamen kamamanawen Diyos sa pangadar Pirmida ka Barita para sa laki Kiristo. Iya ba yamen pinaparaoy para paonayen da koyo pag-isarig sa Panginoon da- paeyaten da koyo remrem 3 para wala kamaymayen da tawa man sa koyo panawen sa mga pahidap koyo nagdanas. Koyo kay amatangan da pahidap ba eray din kaliyagan Diyos para sa tamo, 4 panawen pag yamen ba sata dapo sa koyo yamen:na sinabi sa koyo amba tamo batay pinahidap, da- naba ngani- da nangyadi. 5 Maraw nga ako nawed:da kaagwanta, ba naay:ya pinaparaoy sata laki Timotiyo para ako kabarita para sa koyo pag-isarig sa Panginoon sa odas tiya. Ako magremrem kaaram koyo nadaya:ani laki Satanas. No naamba ba batay wala kaparosan da yamen magrokayan. 6 Ngani, kaoli:akay towa laki Timotiyo. Iya maki nagbaba piya ka barita para sa koyo pag-isarig da- palayaw sa Diyos da- sa Roma. Konin din binarita sa yamen amba yamen koyo nagkaaremreman da- lakol:la da koyo alabet koyo:wakay akitan yamen, makay din pag yamen alabet yamen:nakay akitan koyo. 7 Mga kaarianan, ibat sa koyo pag-isarig sa laki Kiristo ba emeyat yamen remrem kayno yamen maki kahidapan anggan kakorangan. 8 Pag koyo layen-layen maonay ka pag-isarig da magpaeyat sa yamen biyag. 9 Nawed yamen aobos aremrem no omaning yamen batay pinasalamatan da Diyos panawen sa yamen kasyagan yamen tinabang ibat sa koyo sa ropangan tam Diyos. 10 Yamen gidte magdarangin aldaw da- madlem para koyo ba yamen:nakay akitan, para koyo yamen atolongan para sibay gidte koyo pag-isarig. 11 Yamen darangin ba yamen pakanen kay ngani- odas tam Diyos Apang sa soksokowan da- tam Panginoon Hisos para yamen kaparaoy sa koyo. 12 Palambaen kay ngani- da- paibengen Panginoon da koyo magpalayawan sa sai-sai da- sa boo iraya, makay din pag yamen magpalayaw sa koyo. 13 No naba da nangyadi, konin tay pinaeyat koyo remrem, para koyo boo odas wala kadaetan da- boo gidte sa ropangan tam Diyos Apang sa soksokowan anggan sa oman:nakay bait tam Panginoon Hisos, pal-anggat da boo konin mga hinidang.
1 Ako maki dapo tay sinabi sa koyo, mga kaarianan, koyo amatangan ibat sa yamen todo no omaning da piya koyo mamiyag para magpaangas sa Diyos. Makay din naba da koyo nagpamanawen mona. Mona yamen mag-aringi da- magtodo gidte sa koyo sa ngaran Panginoon Hisos, gaw-en dapo anggan da makay naba. 2 Koyo kay amatangan da mga adar ibat sa Panginoon Hisos ag yamen tindo sa koyo. 3 Alabet Diyos koyo magpakabanal: koyo omadayo sa kakayaan. 4 Kailangan banal, magalang da nagpanawen lalaki sa konin sawa, 5 nawed gidte magtoltol sa mga alabet lawas makay ag mga magpangalonya, makay ag nagpanawen mga iraya nawed magkilala sa Diyos. 6 No amba, ba nawed tay nanlaedan tawa man da kapiyaan konin kapowa para nawed abawasan da kalakolan konin kapowa. Makay din pag yamen sinabi sa koyo pag monaan dapo, yamen:na gidte pinaonaan da yamen tokawanan amba batay pinadosahan Panginoon da tawa man mamanawen mga kadaetan makay naba. 7 Da boo mag-isarig ba pinili Diyos para magpamiyag sa kabanalan, nawed sa kakayaan. 8 Kaya, da tawa man somikway sa adar tiya ba nawed sa iraya magsikway no nawed ba sa Diyos, pag magparongaw konin Ispirito Banal sa tamo mga mag-isarig. 9 Para sa magpalayawan sa mga kaarianan mag-isarig sa Panginoon, nawed:dani kailangan yamen tod-on dapo sa koyo, panawen tindo:ani Diyos sa koyo no omaning koyo magpalayawan. 10 Da- naba ngani- da koyo nagpanawen sa mga kaarianan sa boo kotanan Masidonya. Amba man, ba yamen dapo nagsabi sa koyo, mga kaarianan, lalo gidte koyo palakolon da koyo palayaw. 11 Koyo sikapen koyo magpamiyag wala gidte kamaymayen. Da- koyo ropangen da koyo sadiri panawenen. Koyo magrokayan para sa koyo kabiyagan makay din pag yamen sinabi sa koyo. 12 No amba, koyo tay ginalang mga nawed magkilala sa Panginoon da- nawed batay koyo sinarig sa Roma da koyo kabiyagan. 13 Mga kaarianan, yamen alabet koyo amatangan da katotohanan para sa mga nangatay:yani para koyo ayaw naRomaymay makay mga iraya wala nag-asahan. 14 Tamo magpaniwala gidte laki Hisos ba natay da- nabiyag:gakay. Amba din tamo magpaniwala batay:yakay biniyag Diyos da boo mga nangatay misarig sa laki Hisos para kora ba paanggaten sa laki Hisos. 15 Tiya da adar Panginoon da yamen nagsabi sa koyo amba: sa odas batay bait da Panginoon, tamo ag mga biyagan dapo ba nawed ba- tay monaan ginaro sa mga nangatay. 16 Sa aldaw naba, maki magsen gidte tokawanan Panginoon anggat din kon bilin, maki din tokawanan poon anghil, da- beet bodyong Diyos, kalbas batay lompot da Panginoon ibat sa soksokowan. Da mga nangatay:yani misarig sa laki Kiristo ba batay dapo biniyag Diyos, 17 kalbas tamo ag mga biyagan dapo ba konin tay tinipon sa yaong da- pinaanggat sa mga biniyag:gakay para tagboon sa kalaw-awan da Panginoon. Sa makay naba tamo batay kaanggat Panginoon kaagoton man. 18 Kaya ngani-, koyo magpaeyatan remrem sa sai-sai sa mga adar naba.
1 Nawed:dani kailangan naay da- po soraten sa koyo no kaagot tay mangyadi pag mga nakayman naba, 2 panawen koyo:wa gidte amatangan da batay bait aldaw Panginoon ba makay din pag batay bait da batay manakaw sa madlem. 3 No nagsabi mga iraya amba, Wala kamaymayen da- piya gidte da boo, kangani ba bait kay da kaomaningan. Makay ag batay bait kahidapan sa sai ka babayi batay mamreg kora ba ned tay kaalas sa tay bait naba. 4 Ngani, mga kaarianan sa mag-isarig, koyo nawed nagkabiyag sa kadeleman, kaya koyo ba ned tay alikagan sa aldaw naba batay bait, makay tay manakaw. 5 Koyo boo ba kabilang sa mga onga kapawaan da- mga onga aldaw, nawed sa mga onga kadeleman e sa madlem. 6 Kaya ngani- kailangan gidte tamo ba layen polawan, layen handa, da- mapawa da remrem, nawed makay mga Roma. 7 No madlem ba nagkakalek gidte da iraya, amba din no madlem ba mamaglasing gidte da Roma iraya. 8 Nawed kailangan tamo maglasing, panawen tamo ba mga onga aldaw. Tamo soolon da pag-isarig da- palayaw makay tamo magsool balayang para panangko sa ropangan lawas, tamo din sorbongon sa olo da sarig sa magribri tay pinanawen Diyos sa tamo. 9 Tamo pinili Diyos nawed para padosahan, no nawed ba para ribriyen panawen sa tamo Panginoon Hisos Kiristo ba natay para sa tamo, 10 para kayno sa tamo biyagan e natay:yani sa odas iya towa:akay ba tamo konin batay pal-anggat kaagoton man. 11 Matang koyo anggan dapo magparemreman anggan magpaonayan sa sai-sai makay koyo nagpanawen mona. 12 Mga kaarianan sa mag-isarig, yamen nag-ateet sa koyo, koyo kay galangen da mga magrokayan sa koyo, da mga pinili Diyos para koyay da- tagatodo sa koyo. 13 Kora koyo gidte galangen da- palayawen, panawen sa kora nagpanawen. Koyo mal-anggatan maginhawa gidte. 14 Mga kaarianan sa mag-isarig, yamen te din nag-ateet sa koyo, koyo kay paremremen sa mga dayo magpamanawen, paeyaten da mga nawed maeyat da remrem, da- tolongan kay da mga wala akayanan. Koyo kay te aligdonon kora boo. 15 Ayaw koyo gantiyan da mamanawen daet sa koyo, no nawed ba koyo anggan dapo magpamanawen piya sa tayma sai da- sa boo. 16 Koyo layen angasan. 17 Koyo ayaw tay empet sa magdarangin. 18 Kayno nakay da mangyadi, koyo magpasalamat. Naba da alabet Diyos, panawen sa koyo kasaiyan sa laki Hisos Kiristo. 19 Ayaw koyo paghadangan da Ispirito Banal. 20 Ayaw koyo gaw-en wala kaparosan da nakayman barita ibat sa Diyos. 21 Koyo gidte remremen da boo nakayman; koyo somimang sa boo nakayman daet da- tomoltol sa boo piya. 23 Koyo ngani- pabanalen gidte Diyos pag magtaboy gidte kaginhawahan. Konin kay ngani- layen dahanan boo gidte koyo boo pagkairaya-da koyo ispirito, gisarem da- lawas-anggan sa bait tamo Panginoon Hisos Kiristo. 24 Naggawa gidte Diyos da konin sabi. Iya da pomili sa koyo, da- konin gidte batay pinanawen da mga nakayman naba. 25 Koyo mga kaarianan sa pag-isarig, yamen koyo kay daranginen. 26 Koyo maltanongan kay sa sai-sai ibat sa koyo piya ka remrem. 27 Yamen kay te nag-ateet sa koyo sa ngaran Panginoon amba, koyo kay te basahen sa boo mga kaarianan da sorat tiya. 28 Da yamen darangin ba sa koyo:wa ngani- da parongaw tam Panginoon Hisos Kiristo.
1 Da sorat tiya ba ibat sa yamen Pablo, Silas da- Timotiyo -para sa rimponan mga mag-isarig sa laki Hisos sa goraan Tisalonika-pag mga hinidang tamo Diyos Apang da- Panginoon Hisos Kiristo. 2 Yamen darangin ba : sa koyo:wa ngani- da parongaw da- kaginhawahan Diyos Apang da- Panginoon Hisos Kiristo. 3 Bagay gidte yamen ba layen te magpasalamat sa Diyos panawen sa koyo, mga kaarianan sa mag-isarig. Piya yamen panawenen naba, panawen lalo:a nagkaonay da koyo pag-isarig sa laki Kiristo, da- anggan dapo din da koyo maibeng ka magpalayaw sa sai-sai. 4 Koyo yamen nagpalakol sa mga rimponan Diyos panawen sa koyo mag-isarig da- mag-agwanta kayno maki mga pahidap da- mga kahidapan koyo nagsalaket. 5 Pag aray mga kaogalian naba da sistigo mataldeng da hosay Diyos. Kaya koyo batay inadi abaya gidte naghadian Diyos da- naba da bokar koyo mag-agwanta. 6 Batay pinanawen Diyos da kailangan panawenen. Piho konin batay pinahidapan da mga magpahidap sa koyo. 7 Koyo kay pag mga mag-agwanta ba batay rinibri Diyos pal-anggat din sa yamen sa batay:yakay towa da Panginoon Hisos ibat sa soksokowan, konin pal-anggat da konin mga makapangyadihan anghil. 8 Iya tay bait sa tenga magdangalas balangabang da- tay pinadosahan da boo nawed magkilala sa Diyos, da nawed magtoltol sa Pirmida ka Barita para sa tamo Panginoon Hisos. 9 Da batay padosa sa kora ba wala arasan kaliman kahidapan da- kapaswayan sa Panginoon da- nawed:da tay kaban-aw sa konin kalakolan. 10 Batay mangyadi tiya sa odas batay bait da Panginoon para tabangen da papodi ibat sa konin mga hinidang, da- da palakol boo mag-isarig sa konin. Koyo kabilang din sata, panawen koyo tinabang da Pirmida ka Barita yamen pinaaram sa koyo. 11 Kaya koyo layen yamen nagpaanggat sa yamen mga darangin sa Diyos, amba panawenen ngani- Diyos pag pomili sa koyo para koyo bagay gidte da- mamiyag toltol sa alabet Diyos. Konin kay ngani- taboyon sa koyo da konin eyat para koyo kapanawen boo piya koyo alabet panawenen, para koyo panawenen gidte koyo mga panawen, bokar koyo pag-isarig. 12 Sa makay naba, koyo tay apakanan kalakolan da ngaran tamo Panginoon Hisos, koyo kay konin batay pinakan kalakolan toltol sa kapiyaanan remrem Diyos da- Panginoon Hisos Kiristo.
1 Para kay sa tay bait da tam Panginoon Hisos Kiristo da- para sa tamo tay konin rinimpon sa konin sadiri, ba yamen gidte nagsabi sa koyo mga kaarianan, 2 amba, Koyo ayaw tay maneksekal, ayaw agad tay akbesan remrem sa barita amba, Bait:ta da aldaw Panginoon. Koyo ayaw magpaniwala kayno kora nagsabi amba, Tiya ba papawa e tokawanan, e no nawed man ba amba sorat ibat sa yamen. 3 Sa nakayman ka amatangan koyo ayaw tay nadaya:a tawa man. Da aldaw Panginoon ba ned tay bait anggan nawed nayadi da paoriyan banggaan mga barokawit maglaban sa Diyos, anggan sombok da Masowayen, da hinanda:a sa wala arasan kapadosahan. 4 Kon tay sinongarngar da boo nagpodi iraya e kora nagremrem banal. Konin tay pinaatatas da konin sadiri, da- tay semled sa lakol ka balay Diyos; iya tay tomongka sata da- kon tay pinaaram sa mga iraya amba iya da Diyos. 5 Nawed:da ma koyo nagkaaremreman da boo tiya pag naay:ya sinabi sa koyo pag ako koyo dapo pal-anggat? 6 Nawed dapo ngani abaya mangyadi tiya panawen maki dapo maghadang. Koyo amatangan no nakay naba. Da Masowayen ba batay sombok no rateng:nga da odas hinanda. 7 Maki kapangyadihan soway sa Diyos maglilo:wani magpamanawen mona da- boo odas batay makay naba anggan nawed nagkaalis da maghadang. No naalis:sani da maghadang, 8 ba batay:ya sombok da Masowayen. No amba, iya tay simpo Panginoon Hisos sa iya tay bait; konin inawa da tay sompo, da- konin kasorap rawa da batay omareng. 9 Batay sombok da Masowayen nagsakray din da kapangyadihan laki Satanas. Iya tay mamanawen boo ka kalasi pasoli katakataka da- mga kadaya ka tanda. 10 Da- iya batay gomamit boo ka kalasi andadaya sa mga batay natay, mga iraya batay disin naribri no kora disin tinabang da- inalabet da katotohanan para sa laki Hisos. 11 Panawen nawed kora tinabang da katotohanan ba nagpababa Diyos sa kora da sai ka kapangyadihan batay magdaya sa kora para kora maniwala sa kaboslian, 12 para padosahan da boo nawed tomabang sa katotohanan no nawed ba pomili sa kadaetan. 13 Bagay gidte yamen layen magpasalamat sa Diyos panawen sa koyo, mga kaarianan nagpalayaw Panginoon, panawen koyo ba konin hinidang para monaan parongawan karibriyan, koyo hinidang sa kapangyadihan Ispirito Banal pag magpabanal sa koyo da- panawen sa koyo magpaniwala gidte sa katotohanan. 14 Koyo ba pinili Diyos ibat sa yamen pinapawa sa koyo da Pirmida ka Barita, para koyo kaanggat sa kalakolan tam Panginoon Hisos Kiristo. 15 Kaya nga, mga kaarianan sa pag-isarig, koyo boo odas magtionay sa mga katotohanan yamen tindo sa koyo, sa mga tokawanan e kayno sa mga sorat man. 16 Koyo paangasan ngani- tamo Panginoon Hisos Kiristo da- tam Diyos Apang pag pomalayaw sa tamo da- sa konin kayawtean ba tomaboy sa tamo ag nawed magbago eyat sa remrem da- maonay ka nag-asahan. 17 Koyo konin kay ngani- pakanen maonay ka remrem para koyo kay asabi da- apanawen da boo piya.
1 Sa paoriyan, mga kaarianan, yamen koyo kay daranginen para da tokawanan Panginoon ba agad karateng sa Roma-Roma ka poro, da- palakolon gidte iraya makay din pag koyo pinanawen. 2 Yamen koyo din daranginen para yamen ba naribri sa mga barokawit da- daet ka iraya; panawen nawed boo ba magpaniwala sa tokawanan Diyos. 3 Maggawa da Panginoon toltol sa konin sabi. Koyo konin tay pinakan eyat da- koyo tay rinibri sa laki Satanas. 4 Panawen sa Panginoon, lakol gidte da yamen pag-isarig amba koyo:wa pinanawen da- batay dapo pinanawen da mga yamen sinabi sa koyo. 5 Koyo akayen kay ngani- Panginoon anggan sa palayaw Diyos da- sa matiyaga magpanya sa laki Kiristo. 6 Mga kaarianan, yamen nagsogo sa koyo sa ngaran tam Panginoon Hisos Kiristo, koyo pakaadayo sa mga pangkalen, sa mga dayo mamiyag toltol sa yamen mga bilin sa koyo boo. 7 Koyo kay amatangan da yamen pinanawen ba bagay din koyo toladan. Panawen pag yamen ba saba dapo sa koyo ba da yamen ogali ba piya gidte. 8 Yamen nawed tomabang nakayman wala bayad sa tawa man. Yamen magrokayan aldaw da- madlem para nawed kay magpamabyat sa tawa man sa koyo. 9 Yamen pinanawen naba, nawed sa yamen ba wala kapangyadihan magtabang koyo tolong, no nawed ba para koyo ba pakanen sai ka toladan bagay gidte koyo panawenen. 10 Pag yamen koyo dapo pal-anggat, tiya da yamen tinaboy bilin sa koyo amba, Ayaw koyo pakanen pamangnen da tawa man dayo mamanawen. 11 Yamen sinabi naba panawen yamen abaritaan sa koyo maki nawed naw maoson kono ka iraya dayo mamanawen, wala:a kora nagpanawen no nawed makiaram sa biyag mga Roma. 12 Sa ngaran Panginoon Hisos Kiristo, yamen gidte nagbilin sa mga iraya makay naba amba, Koyo kay magsarak batay kabiyagan sa koyo sadiri, da- koyo mamiyag sa piya ka ogali. 13 Mga kaarianan, koyo ayaw tay manhinawa sa magpamanawen piya. 14 Koyo gidte tandaan da- paora-wingan da tawa man dayo tomoltol sa yamen mga bilin sa sorat tiya para iya akayaan. 15 Ngani ayaw kay koyo pagremremen iya kabangga no nawed ba iya koyo pangadaran makay arian. 16 Da Panginoon, ag ibatan gidte kaginhawahan, iya ngani- da batay magtaboy sa koyo kaginhawahan sa boo nakayman sa boo odas. Sa koyo boo ngani- da Panginoon. 17 Ako gidte laki Pablo da somorat pag tanong tiya sa koyo amba, Makay nakay kay koyo saba? Tiya da naay tanda sa boo naay sadiri sorat. Makay tiya ako somorat. 18 Da naay darangin ba, Sa koyo boo ngani- da parongaw tam Panginoon Hisos Kiristo.
1 Ako laki Pablo da magsorat sa komo laki Timotiyo naay gidte onga sa mag-isarig. Ako ba pinili sogoan laki Kiristo Hisos toltol sa Bilin Diyos pag tamo Tagaribri da- sa laki Kiristo Hisos pag tamo nag-asahan. Sa komo:wa ngani- da parongaw, kayawtean da- kaginhawahan ibat sa Diyos Apang da- sa laki Kiristo Hisos pag tam Panginoon. 3 Makay pag naay aringi sa komo pag ako batay paraoy sa kotanan Masidonya, naay alabet kawo ba paogon saba sa goraan Ipiso panawen maki iraya saba magtodo mga nawed raoy ka todo. Kora komo sabiyan amba, Ayaw:wani magtodo mga nawed raoy ka todo, 4 da- kora kay komo sabiyan amba, Koyo ayaw magboyboy mga panoltolon wala kaparosan e mga maaba ka talaan mga pangapoan. Tiya ngani da ibatan mga songarngaran da- nawed batay katolong sa magpanawen pakana Diyos. Sa mag-isarig ngani batay amatangan iraya da pakana Diyos. 5 Da pakay tiya ba para da mga mag-isarig kamaki palayaw ibat sa boo gidte ka poso da- malinis ka ispirito da- ibat sa piya ka mag-isarig. 6 Maki iraya bomalindis sa mga nakayman tiya da- napasimang sa dalan panawen sa wala kaparosan ka songarngaran. 7 Kora alabet kora ba tagatodo Bilin tinaboy sa laki Moysis, ngani nawed kay kora amatangan da kora nagsabi, kayno da mga nakayman kora nagtodo makay totoo. 8 Kita kay amatangan piya da Bilin tinaboy sa laki Moysis no naggamit sa piya ka padaan. 9 Kita remremen amba da mga maniho ba nawed pinanawen para sa mga mataldeng ka iraya no nawed ba para sa mga dayo tomoltol sa mga maniho da- para sa mga daet ka iraya, mga dayo kilala sa Diyos, mga makadaetan, mga wala galang, mga dayo gidte sa kabanalan, mga magbono sa apang da- sa adang, mga amomono iraya. 10 Da mga maniho ba pinanawen din para sa mga alabet gidte sa kakayaan, mga lalaki mag-arikoy sa kapowa lalaki, mga kamomogot, mga boslien, mga boslien ka sistigo da- para sa tawa man magsarongat sa piya ka adar, 11 pag adar toltol sa Pirmida ka Barita. Tiya pag lakol ka adar ba ibat sa marongaw ka Diyos da- tiya konin inintiriga sa naay para paaramen. 12 Ako magpasalamat sa laki Kiristo Hisos tamo Panginoon pag tomaboy eyat sa naay para sa panawenen tiya, panawen ako konin rinemrem ako abaya gidte da- hinidang 13 para magpamanawen para sa konin kayno pag monaan ba ako tomokawanan laban sa konin. Poyida tiya iya naay pinahidapan da- linaes. Kayno amba ako ba kinayawtean Diyos panawen nawed naay nagkaamatangan da naay nagpanawen pag nawed dapo ako magpaniwala sa laki Kiristo. 14 Tinaboy tamo Panginoon sa naay da konin nawed:da abilang ka parongaw, pag-isarig da- palayaw panawen sa ako maki kasaiyan sa laki Kiristo Hisos. 15 Tiya ba sai ka katotohanan kailangan tabangen da- paniwalaan boo iraya amba laki Kiristo Hisos ba paraoy towa sa paranawan para ribriyen da mga makadaetan da- ako gidte da daet sa boo. 16 Ngani ako ba kinayawtean Diyos para, sa nangyadi sa naay ba abaya paban-awen laki Kiristo Hisos no omaning iya maagwantahen da- tiya ba para kahalimbawa sa mga batay misarig sa konin da- batay tinaboyan biyag gidte wala arasan. 17 Podiyen da- palakolon kaagoton man da sai ngani ka Diyos, Hadi wala arasan, wala katayan da- nawed nagkaakitan! Amba:a ngani-. 18 Timotiyo naay onga, da mga nakayman tiya ba naay nagbilin sa komo makay narwaan binarita ibat sa Diyos para sa komo. Da barita ngani- tiya da magpaeyat sa komo sa kawo maglaban, 19 sa naggenan da pag-isarig da- maki malinis ka ispirito. Maki mga iraya nawed tomoltol sa sabi kora ispirito, da- panawen saba ba kora sinida da kora pag-isarig. 20 Kabilang naba kolaki Himinyo da- Alihanro. Sidawa naay:ya tinaboy sa laki Satanas para sidawa tod-an amba ayaw magtokawanan laban sa Diyos.
1 Da monaan sa boo, naay nag-aringi sa koyo, Koyo paratengen sa Diyos da koyo ay-ayan, darangin para sa sadiri, aringi para sa mga Roma da- pasalamat para sa boo iraya. 2 Makay din naba koyo daranginen da mga hadi da- mga maki kapangyadihan, para tamo kapamiyag piya gidte maki kaginhawahan da- kapiyaan da- kabanalan. 3 Tiya ba piya da- kapaangas sa Diyos pag tamo Tagaribri. 4 Da kon alabet ba naribri da boo iraya da- kamatang da totoo. 5 Panawen maki sai ngani ka Diyos da- maki sai ngani ka tagapapiya sa Diyos da- sa mga iraya, naba da iraya laki Kiristo Hisos 6 pag tinaboy da konin biyag para toboson da boo. Sa makay tiya konin pinatonay amba da alabet Diyos ba naribri da boo iraya sa bagay ka pagkaodas. 7 Panawen saba, ako ba hinidang Diyos para tagapangadar, pinili sogoan da- tagatodo sa mga Nawed Diw para sa pag-isarig da- sa totoo tiya. Totoo gidte da naay nagsabi, ako nawed magpamosli. 8 Da naay alabet ba da mga lalaki sa boo poro ba magdarangin maki malinis ka remrem, wala nagkaadaetan sa remrem e bais sa kapowa. 9 Da kailangan kay sa mga babayi ba ayaw kakaya da nagsool no nawed maayos da- sibay da bado da- sokray da obok. Da pampaganda sa konin ba nawed mga pangipit da- salabay ginto, mga pirlas, nawed din mga mahal ka bado 10 no nawed ba konin mga piya ka panawen pag bagay sa mga babayi mag-isarig sa Diyos. 11 Da kailangan sa mga babayi ba ayaw magkasamang sa odas magtodo da- magpasangato gidte. 12 Naay nag-ayawan da mga babayi ba magtodo, kayno magmaniho sa mga lalaki; kora kailangan ayaw magkasamang. 13 Koyo remremen amba laki Adan da monaan rinarang baygira bayi Iba. 14 Nawed laki Adan no nawed bayi Iba da nadaya da- nalabo sa kadaetan. 15 Ngani batay naribri da babayi sa iya mamolahan, no iya mamiyag sa pag-isarig, palayaw da- kabanalan, maki din ababa ka remrem.
1 Totoo da kasabiyan tiya amba, Da mag-alabet magkoyay sa rimponan ba mag-alabet sa sai ka piya ka panawen. 2 Kaya kailangan iya ba boo gidte, sai ngani ka sawa, kamatang magpigil sa sadiri, mada- han, magalang, boka da pamatawan da- piya ka tagatodo. 3 Kailangan din iya nawed maalabeten sa alak, nawed bog-ot no nawed ba ababa da remrem, maalabeten sa kaginhawahan, nawed angangaken kwarta, 4 kailangan iya ba magmaniho piya sa konin sadiri mag-anak, para iya naggalang da- nagtoltol konin mga onga. 5 Omaning tay magkoyay maayos sa rimponan mga mag-isarig sa Diyos da sai ka iraya no da konin ngani mag-anak ba nawed akayanan manihohan? 6 Kailangan iya maagot:tani mag-isarig sa laki Kiristo, no nawed ba kaaram iya batay magpalawlaw da- batay agad hinosay sa padosahan makay din ag aponin kadaetan. 7 Kailangan din iya ba naggalang mga iraya nawed kapowa mag-isarig, para nawed iya apolaan da- nawed batay nalabo sa sied aponin kadaetan. 8 Kailangan kay da mga batay tagapamanawen sa rimponan ba piya, nawed boslien, nawed maalabeten sa maoson alak, nawed angangaken kwarta, 9 kailangan kora gidte dahanan da pag-isarig pag mona ngani amatangan da- kora maki malinis ka ispirito. 10 Kailangan kora ba masdan dapo da- no akitan kora wala kadaetan ba abaya kora koyo gaw-en tagapamanawen sa rimponan. 11 Amba din, kailangan da mga babayi tagapamanawen ba piya, nawed magpanida podi sa Roma no nawed mabait, da- aasahan sa boo nakayman. 12 Da lalaki tagapamanawen sa rimponan ba kailangan din sai ngani da sawa, maayos magmaniho sa konin sadiri mag-anak da- piya magpatoltol sa konin mga onga. 13 Da tagapamanawen aasahan sa konin katongkolan ba batay ginalang boo, da- abaya konin paaramen wala kaliman da pag-isarig ag sa laki Kiristo Hisos. 14 Naay gidte nag-asahan ako batay kaparaoy sa komo sa nawed maagot ka odas. Kayno amba, naay nagsorat da mga bilin tiya 15 para kayno nawed man agad ako karateng ba abaya komo din amatangan da kailangan panawenen koyo kamag-anakan Diyos, naba ba pag mga mag-isarig sa Diyos biyagan. Da rimponan ba makay arigi da- sarigan katotohanan. 16 Lakol gidte da totoo mona ngani amatangan para sa tamo nagsarigan. Iya Pinaban-Aw Diyos pag iya sa lawas iraya, Iya sinistigohan Ispirito Banal Iya akitan mga anghil Iya pinangadar sa mga lasyon Iya pinaniwalaan kayno saan Iya tinabang:ngakay sa soksokowan.
1 Mapawa da nagsabi Ispirito Banal amba, Sa paoriyan odas da kalaati ba batay inogonan da pag-isarig. Kora batay tinoltol da mga andadaya ka ispirito da- da mga todo mga daet ka ispirito. 2 Panawen sa pandaya mga boslien ka tagatodo ba da kora ispirito ba makay pinasi pag binaga bakal anggan natay. 3 Kora nag-ayawan da mangisawa anggan mga Roma ka kalasi ka pamangnen, mga pamangnen rinarang Diyos para namangan maki pasalamat mga mag-isarig da- mga nagkaamatangan gidte da totoo. 4 Da boo rinarang Diyos ba piya da- wala nakayman nawed abaya tabangen. Da boo ba abaya tabangen maki pasalamat 5 panawen naba ba nagbagay tokawanan Diyos da- darangin. 6 No komo batay tindo sa mga kaarianan da mga naba ba kawo batay piya ka tagapamanawen laki Kiristo Hisos. Komo biyag ispirito ba komo batay pinaeyat sa mga tokawanan para sa pag-isarig da- sa mga piya ka todo komo gidte nagtoltol. 7 Ayaw kawo maki eray sa magboyboy mga panoltolon wala kaparosan, no nawed ba kawo magsanay sa kabanalan. 8 Maki din pakinabang da magsanay sa lawas ngani labi dapo da pakinabang sa magsanay sa kabanalan panawen maki pangako nawed ngani sa biyag tiya no nawed anggan sa batay rateng ka biyag kalawey katayan. 9 Totoo da kasabiyan tiya da- kailangan paniwalaan boo remrem. 10 Panawen saba ba tamo magpakahidap da- tamo magsikap panawen tamo mag-asa sa Diyos biyagan, ag Tagaribri boo iraya, lalo:ani iya Tagaribri mga mag-isarig sa konin. 11 Komo tod-on da- papanawenen da boo naba. 12 Ayaw komo paban-awen dahilanan da tawa man para kawo kora apolaan kayno kawo badya onga dapo, no nawed, kailangan kawo sai ka toladan mga mag-isarig sa magtokawanan, mamiyag, magpalayaw, mag-isarig da- mamiyag malinis. 13 Komo gamiten komo odas sa magbasa Kasoratan sa kaosonan, sa magpangadar da- sa magtodo anggan ako Romateng. 14 Ayaw komo pabayaan nawed naggamit da taboy pag tinaboy Ispirito Banal sa komo makay pag sinabi mga tagabarita ibat sa Diyos da- sa odas pinatimpo sa komo da alima mga koyay sa rimponan mga mag-isarig. 15 Komo panawenen gidte da mga katongkolan naba da- komo handaen boo komo sadiri sa mga naba para akitan boo da kawo magpiya. 16 Komo dahanan da komo nagpanawen da- komo nagtodo. Toloy:yani komo panawenen da mga nakayman naba para naribri nawed ngani da komo sadiri no nawed anggan pag mga magpakarngey sa komo.
1 Ayaw komo pagboragan da lalaki koyay dapo sa komo, no nawed iya komo aringien makay pag mag-aringi sa komo apang. Komo paremremen makay komo mga arian da mga binatilyo 2 amba din da mga koyay babayi makay komo adang, da- amba din da mga kadaragahan makay din komo arian sa malinis gayed ka remrem. 3 Komo galangen da- tolongan da mga babayi gidte balo pag wala:a Roma nag-asahan sa biyag. 4 No da sai ka babayi balo maki mga onga, kayno mga apo, kora da kailangan mag-alaga sa kora koyay babayi nabalo makay magbayad sa magpatobo sa kora, panawen tiya ba magpaangas sa Diyos. 5 Da babayi gidte balo ba pag iya sai:ya ngani nagkabiyag. Da Diyos ngani da konin nag-asahan, kaya iya layen magdarangin da- mag-aringi sa Diyos aldaw da- madlem. 6 Ngani da babayi balo magtalandi ba makay natay:yani kayno biyagan dapo. 7 Komo papanawenen sa kora tiya pag bilin tiya para kora nawed asidaan. 8 Da tawa man nawed mag-alaga sa konin mga kaseledan lalo:ani sa mga magpaserer sa konin balay ba magpaawak sa konin pag-isarig da- iya lalo dapo daet sa mga wala pag-isarig. 9 Da mga makay tiya ka babayi balo da komo paanggaten sa talaan-pag nawed ngani animnapo ka dagon da kakoyayen, sai ngani da sawa 10 da- amatangan gidte magpanawen piya, pinatobo piya da konin mga onga, angasan tomabang sa mga ana mag-ay-ay mamataw te sa konin balay, nawed kawasaen sa mga boo panawen para sa mga hinidang Diyos, tomolong sa mga maki kailangan da- hinanda da konin sadiri sa boo piya ka panawen. 11 Ayaw komo paanggaten sa talaan da mga onga dapo ka babayi balo panawen no magremrem gidte alabet:takay mangisawa ba kora batay apabayaan da kora nagpanawen para sa laki Kiristo. 12 Panawen saba kora batay pinola panawen kora ba magsida sa kora monaan pangako sa laki Kiristo, 13 da- kora batay naggawa pangkalen da- maglaslaso:a ngani sa mga balay. Da- daet dapo gayed tiya kora batay magpakiaram sa biyag mga Roma da- magboyboy mga nawed bagay sabiyen. 14 Kaya makay sa naay da mga babayi balo onga dapo ba piya dapo da kora mangisawa:akay, magkamaki onga, da- alagaan piya da kora sadiri balay para wala dahilan da tamo mga kalaban para tamo kora namorisrisan daet. 15 Naay nagsabi tiya panawen maki:yani mga babayi balo naranggot laki Satanas. 16 Kailangan alagaan mga babayi mag-isarig da kora kaseledan mga babayi balo para nawed magpamabyat sa rimponan mga mag-isarig. Sa makay naba, da alomana rimponan ba sa mga babayi gidte balo wala:a Roma nag-asahan sa biyag. 17 Koyo pagtaboyon lakol gidte sa mga koyay magkoyay piya sa rimponan mga mag-isarig, lalo:ani sa mga magpakatiyaga sa magpangadar da- sa magtodo tokawanan Diyos. 18 Tiya da nagsabi Kasoratan amba, Ayaw komo pagbogsongan da baka no sa maggiek. Nagkasorat din amba, Da magpamanawen ba kailangan bayadan. 19 Ayaw komo pagtabangen da padatos laban sa sai ka koyay sa rimponan no wala sistigo darwa anggan tatlo ka iraya. 20 Komo pagsabiyan sa ropangan boo da tawa man koyay dayo empet sa magpanawen daet para aliman da boo. 21 Sa ban-aw Diyos da- sa laki Kiristo Hisos da- sa mga banal ka anghil naay nagbilin sa komo amba, Komo panawenen da mga bilin naba wala nag-alin da- wala nagpatabi. 22 Ayaw agad komo pagpatimpowan komo alima da tawa man pag odas iya ba binokod para mamanawen sa rimponan. Komo dahanan para ayaw napadamay sa kadaetan mga Roma para kawo layen wala kadaetan. 23 Ayaw sapa ngani da komo pag-inemen. Kawo minem kay din alak te makay katolong sa kom pantonaw panawen layen kawo nagkasmoraan. 24 Maki mga iraya da kadaetan ba nagkaakitan:nani sa nawed dapo rateng sa hosayan. Da kadaetan kay mga Roma ba paoriyan:nani bayo akitan. 25 Amba kay din maki mga piya ka panawen agad nagkaamasdanan, no nawed man amasdanan agad naba ba nawed batay alihim maagot.
1 Kailangan galangen mga tagoanggat da kora amboy-amboyan para wala batay asabi daet laban sa ngaran Diyos da- sa tamo nagtodo. 2 Nawed abaya polaan mga tagoanggat da kora amboy-amboyan panawen kora ba talkakaan sa pag-isarig. Lalo dapo ngani- pakapiyaen da kora nagpanawen panawen da kora nagpanawenan ba mga nagpalayaw ka mga mag-isarig. Komo tod-on sa mga iraya da- papanawenen sa kora da mga nakayman naba. 3 Da tawa man magtodo Roma ka todo da- nawed toltol sa piya ka tokawanan Panginoon Hisos Kiristo da- sa mga todo para sa kabanalan 4 ba iya ba magpalawlaw ngani wala amatangan. Da makay sakit sa konin ba magpola da- magsongarngaran sa tokawanan; da bokar naba ba amagan, paltomangan, magpanawan, magpadatos, 5 da- magsongarngaran sa mga daet da remrem da- nawed magkilala sa katotohanan, mga iraya magmaras amba da kabanalan ba para ngani maki karon-an. 6 Lakol gidte da pakinabang kabanalan no da iraya ba asyagan. 7 Tamo wala nagbaba nakayman sa odas tamo inonga sa paranawan da- wala din tamo batay ababa sa odas tamo omalis towa. 8 Kaya, tamo kailangan asyagan no tamo maki:ya pamangnen da- nagsool. 9 Ngani da mga iraya mag-alabet maki karon-an ba batay nalabo sa togso da- sa sied da- sa mga wala kaparosan da- daet ka alabet, pag batay magpalimes sa mga iraya sa kapadosahan da- sa katayan. 10 Panawen da mag-alabet sa kwarta naba da makay ibatan boo kadaetan. Maki mga iraya panawen sa makay magpanraying sa kwarta ba omadayo sa pag-isarig sa Diyos da- timbek maoson ka kahidapan sa kora poso. 11 Ngani kawo pag tagapamanawen Diyos ba kawo omalas sa boo mga nakayman naba. Kawo boo remrem mamiyag sa mataldeng, banal, masarigen, maalabeten, maagwantahen da- sa maamo. 12 Komo panawenen da boo komo akayanan para kawo ba sai ka matoltolon ka tagatoltol laki Kiristo, komo gidte genan da biyag gidte wala arasan. Para saba ba kawo pinili Diyos maraw komo Pinaban-Aw sa ropangan maoson ka sistigo da kawo mag-isarig. 13 Sa ban-aw Diyos pag magtaboy biyag sa boo rinarang da- sa banaw laki Kiristo Hisos pag somistigo piya sata sa ropangan koyay Ponsiyo Pilato, naay nagbilin sa komo amba, 14 Da mga bilin naba komo panawenen sa kawo malinis da- boo gayed anggan sa Romateng da Panginoon Hisos Kiristo. 15 Sa odas hinanda iya batay Pinaban-Aw pag marongawen ka Diyos, ag makapangyadihan, Hadi dapo mga hadi da- Panginoon dapo mga panginoon. 16 Da Diyos ngani da wala katayan da- magpamataw sa kapawaan nawed batay apabaliyan tawa man. Iya nawed tang akitan da- nawed batay abaya akitan tawa man. Sa konin da kalakolan da- da wala arasan kapangyadihan. Amba:a ngani-. 17 Komo pagsabiyen sa mga maki karon-an amba kora ayaw magpalawlaw, kora ayaw mag-asa sa karon-an batay nawala, no nawed ba kora mag-asa sa Diyos pag magtaboy sagana boo nakayman para magpaasyagan sa tamo. 18 Kora komo tod-an magpanawen piya, magpakaoson sa piya ka panawen, mataboyon da- matolongon sa kapowa. 19 Sa makay naba ba kora batay magtipon tayma sai sa konin sadiri sai ka piya batay asarigan da- kora batay agenan da biyag gidte. 20 Timotiyo, komo pakadahanan da inintiriga sa komo. Komo alasen da mga tokawanan makaparanawan, nawed kapaangas sa Diyos da- mga irgohan para kono sa kadonongan ngani nawed amba kadonongan. 21 Da mga magsabi gidte amba maki makay naba ka kadonongan ba naba da somimang sa pag-isarig. Sa koyo:wa ngani- da parongaw Diyos.
1 Ako laki Pablo da magsorat tiya sa komo Timotiyo naay nagpalayaw onga. Panawen sa kaliyagan Diyos ako ba pinili sogoan laki Kiristo Hisos para mangadar para sa biyag pinangako Diyos amba tamo batay tinabang panawen sa tamo kasaiyan sa laki Kiristo Hisos. Sa komo:wa ngani- da parongaw, kayawtean da- kaginhawahan ibat sa Diyos Apang da- sa laki Kiristo Hisos pag tam Panginoon. 3 Ako magpasalamat sa Diyos pag naay nagpanawenan gidte maki malinis ka poso makay din pag pinanawen naay mga pangapoan. Ako ngani- magpasalamat sa Diyos tayma kawo naay nagdarangin aldaw da- madlem. 4 Naay alabet:ta gayed ako magban-aw sa komo para ako kapno kaangasan, lalo:a no naay aremreman kawo ba magkabibingas. 5 Nawed naay nagkaalingwanan da kawo mag-isarig gidte, makay din ag pag-isarig komo apo bayi Loida da- komo adang bayi Ionisi. Naay nagkaapiho kawo kay din anggan mona ba mag-isarig makay naba. 6 Panawen saba, naay nagparemrem sa komo amba paigangen da apoy pag taboy tinaboy Diyos sa komo pag kawo naay pinatimpowan alima. 7 Panawen nawed ispirito kaliman da tinaboy Diyos sa tamo, no nawed ba kapangyadihan, kapalayawan da- kapigilan sa sadiri da konin tinaboy sa tamo. 8 Kaya ayaw kawo akayaan magsistigo para sa Panginoon da- sa ako ba nagkapiriso panawen sa Panginoon. No nawed ba komo handaen da komo remrem para mag-agwanta mga kahidapan anggat sa mga Roma panawen sa Pirmida ka Barita sa kapangyadihan Diyos 9 pag romibri da- pomili sa tamo para tamo konin mga kairayaan. Naba ba konin pinanawen nawed sa tamo mga pinanawen no nawed toltol sa konin pakana da- kapiyaanan remrem pag konin tinaboy sa tamo panawen sa tamo kasaiyan sa laki Kiristo Hisos ibat dapo pag wala ibatan ka mga dag-on. 10 Ngani mona ngani Pinaban-Aw tiya maraw Romateng laki Kiristo Hisos tamo Tagaribri. Konin binono da kapangyadihan katayan da- Pinaban-Aw da biyag gidte wala arasan panawen sa Pirmida ka Barita. 11 Ako hinidang Diyos para tagapangadar, pinili sogoan da- tagatodo sa mga Nawed Diw para sa Pirmida ka Barita tiya. 12 Naba da dahilan kaya ako mag-agwanta makay tiya. Amba man ako nawed akayaan sa mga magpangyadi naba sa naay panawen naay gidte akilalaan da naay Panginoon pag naay nag-isarigan da- naay gidte nagkaapiho konin batay adahanan da naay:yani inintiriga sa konin anggan sa aldaw naba. 13 Komo toladan da mga totoo ka tokawanan komo arngeyan sa naay sa pag-isarig da- sa palayaw pag sa tamo kasaiyan sa laki Kiristo Hisos. 14 Sa tolong Ispirito Banal pag magpamataw sa tamo, komo dahanan da boo inintiriga sa komo. 15 Komo gidte amatangan amba ako pinabayaan boo mga arian sa lopa Asiya, kabilang kolaki Pigilo da- Hirmoginis. 16 Kayawtean kay ngani- Panginoon da mag-anak laki Onisiporo, panawen maoson ka odas ako konin rinibang. Iya nawed akayaan sa naay kayno ako ba sai ka piriso. 17 No nawed, maraw iya Romateng sa goraan Roma ako konin gidte sinarak anggan ako konin akitan. 18 Iya kayawtean kay ngani- Panginoon sa aldaw naba. Komo gidte amatangan no kaomaning kakol ako konin pinanawenan sa goraan Ipiso.
1 Ngani kawo Timotiyo, naay onga, kawo magpakaeyat sa kapiyaanan remrem Diyos ibat sa tamo kasaiyan sa laki Kiristo Hisos. 2 Da mga todo komo arngeyan ibat sa naay sa ropangan maoson ka sistigo, komo kay pakatiwalaen sa mga iraya batay akatiwalaan da- maki kaya magtodo sa mga Roma. 3 Komo handaen da komo remrem para mag-agwanta sa mga kahidapan anggat sa mga Roma makay sai ka piya ka sondalo laki Kiristo Hisos. 4 Da sai ka sondalo ba nawed abaya maboyo sa nakayman nawed abaya panawenen mga sondalo no alabet iya magtaboy kaangasan sa konin komindanti. 5 Nawed batay mandaeg da sai ka anggagarawan no nawed iya tomoltol sa mga nagpapanawen. 6 Da mag-aalaman magpakatiyaga ba kailangan iya tomabang sa monaan eray ani. 7 Komo remremen piya da naay nagsabi sa komo. Kawo batay tinolongan Panginoon para komo amatangan gidte da boo tiya. 8 Komo remremen laki Hisos Kiristo pag biniyag:gakay sa mga nangatay da- pag omibat sa kaapoan hadi Dabid. Da boo tiya ba toltol sa Pirmida ka Barita pag naay nagpangadar. 9 Panawen naay nagpangadar da Pirmida ka Barita kaya ako mag-agwanta mga kahidapan tiya, da- makay sai ka tampalasan ba nagkaga-pos. Ngani nawed abaya naggaposan da Tokawanan Diyos. 10 Kaya naay nag-agwantahan da boo nakayman ba para ngani- sa mga hinidang Diyos para kora kay din tomabang karibriyan ibat sa laki Kiristo Hisos pag magtaboy wala arasan kalakolan. 11 Tiya da kasabiyan asarigan amba, No tamo natay:yani anggat sa laki Kiristo, tamo batay gidte ngani- nabiyag anggat sa konin. 12 No tamo man ba mag-agwanta kahidapan, tamo batay din maghadi anggat sa konin. No iya tamo tinanggiyan sa ropangan mga iraya ba tamo konin tay tinanggiyan. 13 No tamo ba nawed magpanawen tamo nagsabi, Laki Kiristo ba magpanawen dapo din konin nagsabi Panawen nawed abaya konin tanggiyan da konin sadiri. Naba:a ngani. 14 Komo paremremen sa komo rimponan mga mag-isarig da mga nakayman naba da- kora komo bilinan gidte sa ban-aw Diyos amba, Ayaw magtomangan para sa mga tokawanan. Wala batay binokar piya da makay naba ka magtomangan panawen magpasida ngani sa mga magpakarngey. 15 Komo sikapen para kawo abaya gidte sa ropangan Diyos, tagapamanawen wala nakayman kakayaan da- mataldeng magtodo pag katotohanan. 16 Komo alasen da wala kaparosan da- maloswa ka irgohan panawen da mga magpamanawen mga naba ba lalo dapo nagkaranggot para magpaadayo sa Diyos. 17 Da kora mga todo ba makay kansir pag magkayap sa lawas. Amba din da pinanawen kolaki Himinyo da- Pilito. 18 Sidawa somimang sa katotohanan da- nagsida da pag-isarig mga Roma. Sidawa nagtodo amba kalawey:yani da magbiyag:gakay mga nangatay. 19 Ngani maonay gidte da sarigan pinalagay Diyos da- tinandaan makay tiya amba, Akilalaan Panginoon no tawa-tawa da sa konin, da- amba, Da tayma magsabi amba iya ba sa Panginoon ba kailangan pomaadayo sa kadaetan. 20 Sa sai ka lakol ka balay ba nawed da boo kagamitan ba ginto da- pilak, maki din mga yadi sa kayo da- sa lopa makay daka. Da mga yadi sa ginto da- pilak ba nawed layen naggamit panawen da mga naba ba mahalaga gidte sa aponin, da mga yadi sa kayo da- lopa ba naggamit aldaw-aldaw. 21 Kaya da tawa man magpaadayo sa kadaetan ba batay sai ka kagamitan mahalaga gidte, nagpakinabangan da- nagkahanda sa konin panginoon da- layen handa sa nakayman piya ka panawen. 22 Kaya komo alasen da mga daet ka alabet mga kaongaan. Komo sikapen para kawo mataldeng, batay aasahan da- mapalayawen. Kawo mamiyag sa kaginhawahan, anggat sa mga iraya magdarangin sa Panginoon ibat sa malinis ka poso. 23 Komo alasen da tolingag da- wala kaparosan ka magtomangan panawen komo amatangan da mga naba ba batay ngani magbokar maglaban. 24 Da tagoanggat Diyos ba nawed bagay magpal-awayan no nawed ba iya kailangan maamo sa boo, mahosay da- matiyaga ka tagatodo. 25 Da kailangan ba malomanay da remrem konin taldengen da mga magsarongat sa konin, kaaram sa makay naba ba kora pakanen Diyos odas para magsisi da- mag-ogon kadaetan para kora amatangan da katotohanan. 26 No amba, batay pomawa da kora remrem da- kora batay kabal-an sa sied laki Satanas pag domakep sa kora para kora magtoltol sa konin alabet.
1 Naay alabet komo amatangan amba sa mga pangoriyan aldaw ba batay gidte magkamaki mga kahidapan. 2 Da mga iraya ba batay makasadiri, angangaken kwarta, magpakaatatas sa sadiri, mayabang, ananawan, masowayen sa mga koyay, wala galang, salambaw sa Diyos. 3 Poyida tiya kora batay beteng, wala kayawtean, magpanida podi, bog-oton, tamtamaan da- kora batay nagkaabaisan sa nakayman piya. 4 Nawed ngani naba, kora batay mga taksil, wala sangga, magpaatatas sa sadiri, maalabeten sa kaangasan lawas labi dapo mag-alabet sa Diyos. 5 Kora magpasoli kora mag-isarig ngani nawed kay akitan sa kora biyag da kapangyadihan pag-isarig. Kawo paadayo sa mga makay naba ka iraya. 6 Da kalaati sa kora ba magseled sa mga balay mga babayi tolingag. Kora nagmanihohan da mga babayi mahina da remrem, ag maki gidte kadaetan da- tagoanggat sadi-sadi ka nag-alabet. 7 Pag mga babayi naba ba layen alabet disin kamatang ngani kayno kaagoton man ba nawed:da gidte batay amatangan da katotohanan. 8 Makay kolaki Hanis da- Hamris ba somarongat sa laki Moysis, da mga lalaki naba ba magsarongat din sa katotohanan. Daet da kora remrem da- palso da kora pag-isarig. 9 Ngani nawed batay kayadi da kora alabet panawenen panawen batay akitan boo da kora katolingagan, makay pag nangyadi sa kolaki Hanis da- Hamris. 10 Ngani komo gidte amatangan da naay todo, naay ogali da- naay pakay sa biyag. Komo minasdan da naay pag-isarig, katiyagaan, kapalayawan, da- naay kaonayen. 11 Komo amatangan no omaning da naay inagwanta da mga pahidap makay din ag naay inagwanta sa mga goraan Antiyokya, Ikoniyo da- Listra. Ngani sa boo mga kahidapan naba ba ako kay ba rinibri Panginoon. 12 Da boo alabet mamiyag sa kabanalan makay gidte mga tagatoltol laki Kiristo Hisos ba batay gidte pinahidapan mga Roma. 13 Ngani da mga magpamanawen kadaetan ba lalo:a batay domaet, da mga magpandaya ba batay dapo magpandaya da- kora din da batay nadaya. 14 Ngani kawo kay ba boo odas kawo toloy sa mga todo komo inadaran da- komo sinarigan gidte panawen komo akilalaan da tomdo tiya sa komo. 15 Ibat sa kawo onga dapo ba komo amatangan da Banal ka Kasoratan pag kataboy kadonongan sa komo da- pag mag-akay sa komo sa karibriyan no kawo mag-isarig sa laki Kiristo Hisos. 16 Da boo Banal ka Kasoratan ba pinaremrem Diyos da- maki gidte pakinabang sa magtodo, sa mag-ayaw sa daet, sa magsaway, sa magpakamatang sa kataldengan, 17 para da mga iraya magpamanawen para sa Diyos ba batay wala korang, layen handa sa nakayman piya ka panawen.
1 Kawo naay gidte nagbilinan amba, Sa ban-aw Diyos da- laki Kiristo Hisos pag batay maghosay sa mga iraya biyagan da- mga nangatay:yani, da- panawen batay:yakay towa laki Kiristo da- iya batay maghadi, 2 ba komo pangadaren da Tokawanan Diyos kayno nakay pag odas, komo paaramen sa mga iraya da para sa kadaetan, komo sawayen, komo pagsabiyan da- paeyaten da remrem mga iraya panawen sa kawo matiyaga magtodo. 3 Panawen batay rateng da odas da mga iraya ba dayo:ani magpakarngey sa piya ka todo, no nawed ba da kora alabet da kora batay tinoltol. Kora batay magpaoson mga tagatodo pag wala batay tindo no nawed ba da kora ngani alabet pakarngeyan. 4 Da kora batay alabet remremen ba mga pamoyboyon ngani, da- nawed:dani kora batay pinakarngeyan da katotohanan. 5 Kaya kawo kay ba kailangan mapigilen sa boo odas. Komo agwantahen da mga kahidapan. Komo gidte panawenen da katongkolan sai ka tagapangadar Pirmida ka Barita. Komo din panawenen da boo komo mga katongkolan makay sai ka tagapamanawen Diyos. 6 Ako batay:yani tinaboy sa katayan, rateng:ngani da odas ako batay:ya natay. 7 Ako lomaban piya gidte ka maglaban. Kalbas:sani da boo naay panawenen. Naay nadahanan da pag-isarig. 8 Naay batay tinabang da taboy pag bokar naay pandaeg. Da Panginoon pag mataldeng ka maghosay da batay tomaboy sa naay ag taboy sa aldaw naba panawen iya angasan sa ako mandaeg. Da- nawed ngani sa naay iya batay tomaboy no nawed ba sa boo magpanya gidte maki palayaw sa iya batay:yakay towa. 9 Komo sikapen karateng towa sa nawed maagot ka odas. 10 Ako inogonan:nani laki Dimas panawen sa iya magpalayaw pag mga nakayman makaparanawan. Iya pomaraoy sa goraan Tisalonika. Laki Kirisinti kay ba pomaraoy sa lopa Galasiya, laki Tito kay sa lopa Dalmasiya. 11 Laki Lokas:sa ngani da naay pal-anggat. Komo kaonon laki Markos da- komo paanggaten towa panawen lakol gidte da konin batay atolong sa naay mga panawen. 12 Naay pinaparaoy sa goraan Ipiso laki Tikiko. 13 Sa odas kawo batay:yakay towa ba komo babaen da naay pandimla naay aogonan sa kora Karpo sa Toroas. Komo din babaen towa da naay mga ribro, lalo:ani pag yadi sa balat hayop. 14 Maoson daet da pinanawen sa naay laki Alihanro pag pandayan tangso. Da Panginoon iya da batay magpadosa sa konin sibay sa konin pinanawen. 15 Kawo magdahan sa konin panawen konin gidte sinarongat da tamo nagpangadar. 16 Wala somando sa naay pag ako monaan magdamay sa naay sadiri sa hosayan. Kora boo ba omogon sa naay ako ngani. Kora kay ngani- patawaden Diyos. 17 Da Panginoon ba anggat sa naay da- ako ba konin pinakan eyat para paaramen da Pirmida ka Barita para kapakarngey da boo mga Nawed Diw. Ako rinibri Panginoon sa katayan. 18 Da Panginoon da batay magribri sa naay sa boo kadaetan, da- iya din da batay magtonton sa naay sa konin kahadian sa soksokowan. Iya ngani-da podiyen kaagoton man. Amba:a ngani-. 19 Komo kay tanongon para sa naay da talsawa Prisila da- Akila, da- da mag-anak laki Onisiporo. 20 Laki Irasto ba naogonan sa goraan Korinto, laki Toropimo kay ba naay inogonan sa goraan Milito panawen iya ba maki maskit. 21 Komo kay sikapen karateng towa bayo rateng da tagdimla. Kawo ba nagtanong kora Yobolo, Podinti, Lino, Kalaodya da- boo mga arian. 22 Sa komo ispirito ngani- da Panginoon. Sa koyo:wa ngani- da parongaw Diyos.
1 Ako laki Pablo da magsorat tiya sa komo Tito, naay gidte onga sa pag-isarig pag tinaboy sa tamo boo. Ako ba tagoanggat Diyos da- pinili sogoan laki Hisos Kiristo, para paonayen da pag-isarig mga hinidang Diyos, da-dagdagan da kora amatangan para sa katotohanan pag kapabali sa tamo sa Diyos, 2 da- pakanen pag-asa sa biyag gidte wala arasan. Ibat dapo pag wala ibatan da mga dag-on, da biyag naba ba pinangako:a Diyos pag nawed agpamosli. 3 Konin kay Pinaban-Aw naba pag biyag sa konin tokawanan sa odas hinanda Diyos da- konin inintiriga naba pag barita sa naay para pangadaren, toltol sa sogo Diyos pag tamo Tagaribri. 4 Sa komo:wa ngani- da parongaw da- kaginhawahan ibat sa Diyos Apang da- ibat sa tamo Tagaribri, naba ba laki Kiristo Hisos. 5 Kawo naay inogonan sa Kirita para komo panawenen da mga nakayman nawed dapo pinanawen da- pomili mga magkoyay sa mga rimponan mga mag-isarig sa tayma goraan, toltol sa naay binilin sa komo. 6 Da kailangan komo pilien ba da iraya wala kasidaan, sai ngani da sawa, da konin mga onga ba mag-isarig da- nawed daet da biyag da- nawed masowayen. 7 Da sai ka koyay sa rimponan mga mag-isarig ba kailangan wala kasidaan, panawen iya ba mag-asikaso sa panawen Diyos. Kailangan iya ba nawed mapalawlaw, nawed baisen, nawed maalabeten sa maoson inemen kalibed, nawed bog-ot, nawed angangaken kwarta, 8 no nawed ba boka da pamatawan, maalabeten sa kapiyaanan, mapigilen da remrem, mataldeng, matoltolon sa Diyos, da- kamatang magpigil sa sadiri. 9 Kailangan iya maonay mag-gegen sa totoo ka adar para konin atodo sa Roma da- paaramen sa mga magsarongat sa todo da kora nawed raoy. 10 Maoson da maglaban sa adar naba da- magdaya da Roma sa mga tokawanan wala kaparosan. Kaosonan sa magpanawen naba ba mga Diw mag-isarig. 11 Kailangan pairomon da kora mga bibi panawen kora nagpani-da da boo kamag-anakan. Kaban-aw ngani kwarta ba kora magtodo mga nakayman nawed bagay tod-on. 12 Da sai:ya din sa mga tagahola taga Kirita da somabi amba, Da mga taga Kirita ba boslien, makay daet ka hayop, lasot da- pangkalen. 13 Totoo da konin sinabi. Panawen saba, kora komo magilasik sowayen para kora ba batay mamiyag piya toltol sa kora pag-isarig, 14 da- para ayaw:wani kora magpaniwala sa mga pamoyboyon mga Diw, kayno sa todo mga iraya pomaawak sa katotohanan. 15 Malinis da boo nakayman sa mga malinis da remrem, ngani sa mga daet da- nawed mag-isarig sa laki Hisos ba wala nakayman malinis panawen madomi da kora ispirito da- remrem. 16 Da kora sabi ba amba kora kilala da Diyos, ngani tiya ba nagpamoslian kora mga nagpanawen. Kora ba kapangemres da- masowayen da- nawed bagay sa nakayman piya ka panawen.
1 Kawo kay, komo tod-on da piya ka todo. 2 Komo sabiyen sa mga koyay lalaki amba kora magpigilen sa sadiri, piya, madahan, maonay sa pag-isarig, sa palayaw da- sa katiyagaan. 3 Sa mga koyay babayi kay ba komo sabiyen amba kora mamiyag piya makay ag kailangan sa mga babayi mag-isarig, ayaw magpanida podi da- ayaw maalabeten sa maoson inemen kalibed, no nawed ba kora ba magtodo pag mga kapiyaanan 4 para kora atod-an da mga babayi onga dapo amba magpalayaw sa sadiri sawa da- sa sadiri mga onga, 5 mapigilen sa sadiri, malinis da remrem, masipag sa balay, mabait da- matoltolon sa kora-kora sawa para wala asabi laban sa tokawanan Diyos. 6 Komo din pagbilinan da mga lalaki onga dapo amba kora magpigil sa sadiri. 7 Sa boo nakayman ba kawo magpaban-aw kawo ba sai ka maganda ka toladan sa mga piya ka panawen. Kailangan kawo mataldeng sa komo nagtodo da- ayaw pagremremen naba ba ga- raw ngani. 8 Layen komo gamiten da sibay ka tokawanan sa kawo magtodo para nawed batay apolaan tawa man. Sa makay naba batay napaakayaan da tamo mga kalaban panawen wala kora asabi daet laban sa tamo. 9 Komo kay din pagbilinan da mga tagoanggat amba kora kailangan matoltolon sa kora mga amboy-amboyan, da- ayaw magdiklamo. Kora sikapen para kaangas-angas kora mga amboy-amboyan da boo kora nagpamanawen. 10 Komo sabiyen sa kora amba ayaw magpanakaw, no nawed ba kawo mataldeng sa boo nakayman, para kora apaban-aw da kagandahan mga todo Diyos pag tamo Tagaribri. 11 Panawen Pinaban-Aw Diyos da konin kapiyaanan remrem pag mag-patawtaw karibriyan sa boo iraya, 12 da- magtodo sa tamo para tamo benglayen da baliko ka biyag da- makaparanawan ka alabet. Kaya tamo batay:ya kapamiyag piya, mataldeng da- kaangas-angas sa Diyos mona pag odas sa paranawan tiya, 13 sa tamo nagpanyaan da tamo makaangas ka nag-asahan, naba da aldaw gidte pag batay amatangan da kalakolan tamo makapangyadihan Diyos da- Tagaribri, naba ba laki Hisos Kiristo. 14 Konin tinaboy da konin sadiri para sa tamo para tamo konin ribriyen sa boo kabalikoan da- tamo konin linisen para tamo konin:na gidte kairayaan pag handa mamanawen piya. 15 Komo sabiyen da boo mga todo tiya da- paremremen da- sawayen maki boo kapangyadihan. Ayaw komo paban-awan dahilanan da tawa man para kawo apolaan.
1 Komo paremremen sa komo rimponan mga mag-isarig amba, Koyo pasangato sa mga pamoonan da- sa mga maki kapangyadihan, toltolon da mga naba, da- layen handa sa magpanawen piya. 2 Komo pag-ayawan kora magtokawanan daet para sa tawa man, ayaw mapalto-mang, no nawed ba mabait da- maki malomanay ka remrem sa boo iraya. 3 Narwaan tamo ba mga tolingag din, mga masowayen, nasimang sa dalan, tagoanggat mga daet ka alabet da- mga kaangasan para sa sadiri. Tamo ba mamiyag sa kadaetan da- amagan. Tamo ba namaisan mga Roma da- kora ba tamo namaisan. 4 Ngani maraw Pinaban-Aw da kapiyaanan remrem da- palayaw Diyos pag tamo Tagaribri, 5 tamo ba konin rinibri nawed ibat sa tamo mga piya ka panawen, no nawed ba panawen sa konin kayawtean. Tamo ba konin inoyasan sa tamo bayo:wakay inonga da- tamo ba konin:nani binago ibat sa Ispirito Banal. 6 Ibat sa laki Hisos Kiristo pag tamo Tagaribri tamo ba pinakapnoan Diyos Ispirito Banal 7 para tamo ba taboyan Diyos kataldengan panawen sa konin kapiyaanan remrem da- para tamo apoon da biyag gidte wala arasan pag tamo nag-asahan. 8 Tiya pag kasabiyan ba asarigan. Kaya naay alabet ba boo tiyaga komo tod-on tiya sa mga mag-isarig sa Diyos para kora handaen da kora sadiri sa magpanawen piya. Da mga naba ba piya gidte da- apakinabangan mga iraya. 9 Komo alasen da wala kaparosan ka magtomangan, da magpanoltol mga maaba ka talaan koyo mga pangapoan, da magsongar-ngaran da- maglaban para sa Bilin tinaboy sa laki Moysis. Da mga naba ba wala batay binokar piya. 10 Komo sabiyan anggan ikadarwa da tawa man magmidsa pag magkaeray-eray kalbas no iya dayo maniwala ba komo:wa sikwayen 11 panawen komo amatangan da iraya makay naba ba daet da- da konin mga kadaetan da magpaban-aw iya ba nawed raoy. 12 Naay batay pinaparaoy saba laki Artimas no nawed ba laki Tikiko. No tawa sa sidawa ba Romateng:nga saba, komo gidte sikapen agad kaparaoy towa sa naay sa Nikopolis. Towa:ani ako batay magpamataw anggan kalawey da tagdimla. 13 Komo gidte sikapen atolongan laki Apolos da- laki Sinas pag abogado para sidawa agad kakadang. Kawo da kamatang para sibay gidte da boo sidawa kailangan. 14 Komo tod-an da tamo mga arian amba kora gamiten da boo odas sa magpanawen piya para kora katolong sa mga maki kailangan para batay mabokar da kora biyag. 15 Kawo ba nagtanong boo naay mga pal-anggat towa. Komo kay tanongon para sa yamen da boo mga arian sa pag-isarig. Sa koyo:wa ngani- boo da parongaw Diyos.
1 Ako laki Pablo nagkapiriso panawen sa laki Kiristo Hisos da magsorat tiya. Laki Timotiyo tamo arian ba anggat din sa magpababa tiya sa komo, Pilimon pag yamen nagpalayaw kamamanawen 2 da- sa bayi Apya yamen arian da- sa laki Arkipo kapowa sondalo da- sa rimponan mga mag-isarig pag magrimponan sa komo balay. 3 Sa koyo:wa ngani- da parongaw da- kaginhawahan ibat sa Diyos tamo Apang da- sa Panginoon Hisos Kiristo. 4 Ako layen magpasalamat sa naay Diyos tayma kawo naay gidte nagpaanggat sa naay darangin, 5 panawen naay abaritaan da para sa komo palayaw da- pag-isarig sa Panginoon Hisos da- sa boo mga hinidang Diyos. 6 Naay nagdarangin amba da tamo pagkabegkes sa sai ngani ka pag-isarig ba mamokar ngani- kaamatangan sa mga kapiyaanan taboy pag tamo kasaiyan sa laki Kiristo. 7 Arian, da komo palayaw ba tomaboy sa naay lakol gidte ka kaangasan da- kasyagan sa remrem, panawen ibat sa komo ba somigla da poso mga hinidang Diyos. 8 Kayno sa kapangyadihan tinaboy laki Kiristo sa naay para kawo naay sabiyan amba komo panawenen tiya, 9 amba man da kapalayawan da pomaremrem sa naay para ako mag-ay-ay sa komo. Ako laki Pablo ba sogo laki Kiristo Hisos da- mona ba ako nagkapiriso para sa konin. 10 Da naay nag-ay-ayan sa komo ba para sa laki Onisimo, ag naay inonga sa pag-isarig sa laki Hisos sa odas ako towa sa piriso. 11 Pag monaan ba kawo wala pakinabang sa konin, ngani mona ba iya ba lakol gidte ka tolong sa kita darwa. 12 Iya naay nagpaoli sa komo kayno iya ba palayaw gidte sa naay. 13 Naay disin alabet ba iya baywi dapo towa sa naay para kahalili sa komo ba iya magpamanawen para sa naay anggan ako ba sa piriso panawen sa Pirmida ka Barita. 14 Ngani ako dayo magpanawen naba no iya nawed komo nagbal-anan, para nawed makay sa lopod no nawed ba ibat gidte sa komo sadiri remrem da komo tolong sa naay. 15 Kaaram laki Onisimo ba napasway sa komo ned naw maagot ka odas para sa iya paoli:akay iya ba layen:nakay mag-anggat sa komo 16 nawed:da makay tagoanggat no nawed ba makay sai ka nagpalayaw arian. Iya ba palayaw sa naay mona, ngani iya batay lalo:a palayaw din sa komo, nawed ngani makay sai ka tagoanggat no nawed ba arian dapo sa Panginoon. 17 Kaya no ako komo nagremrem ako komo gidte kamamanawen iya komo tabangen makay din kawo batay tomabang sa naay no ako rateng. 18 No iya man ba pomanawen daet sa komo, kayno iya omotang sa komo, ba ako da bahala. 19 Ako da magsorat tiya amba, Ako laki Pablo da batay magbayad sa komo. (Nawed naay:yani alabet olbaten amba komo otang sa naay da komo pagkilala sa laki Kiristo.) 20 Ako mag-ay-ay sa komo para ngani- sa Panginoon, ako komo pakanen pag naay nag-ay-ayan, komo paangasen da naay poso makay arian sa laki Kiristo. 21 Ako gidte ba magpaniwala komo batay pinanawen da nagkasorat sa sorat tiya da- labi dapo. 22 Ako komo kay din handaan batay apama-tawan, panawen ako mag-asa batay tinolongan Diyos para ako kaparaoy saba, makay pag koyo nagdarangin. 23 Kawo ba nagtanong laki Ipapras pag naay din pal-anggat nagkapiriso panawen sa laki Kiristo Hisos, 24 amba din kora Markos, Aristarko, Dimas da- Lokas pag naay mga kamamanawen. 25 Sa koyo ispirito ngani- da parongaw Panginoon Hisos Kiristo.
1 Tangona dapo, pinatokawanan Diyos sa tamo mga pangapoan da konin mga tagabarita sa Roma-Roma:akay ka odas da- sa Roma-Roma:akay ka padaan, 2 ngani mona kay, ag paoriyan mga aldaw tiya, konin pinatokawanan da konin Onga para sa tamo. Iya da hinidang Diyos para mag-apo boo nakayman da- sa konin ba pinapanawen Diyos da sinokoban. 3 Iya da marawa gidte ka balawas Diyos, da- no makay nakay da Diyos ba makay gidte din naba da Onga. Iya da magpapirmi boo sinokoban sa kapangyadihan konin Tokawanan. Maraw konin:na nail-nis da kadaetan mga iraya ba iya tomongka sa soksokowan sa kapet kanan Diyos ag Makapangyadihan sa boo. 4 No omaning da ngaran ginawa Diyos sa konin Onga ba nawed bido sa ngaran mga anghil, amba kay din, iya ba nawed gidte bido sa mga anghil. 5 Panawen nawed tang sinabi Diyos sa kayno sai sa mga anghil amba, Kawo da naay Onga da- ako da komo Apang. Naba:a ngani. Da- nawed din konin sinabi para sa kayno sai sa mga anghil amba, Ako ba batay konin Apang da- iya kay ba batay naay Onga. 6 Ngani maraw konin nagpaidaw da konin panganay lalaki sa paranawan ba konin sinabi amba, Kailangan iya ba sambahen boo mga anghil Diyos. 7 Para kay sa mga anghil ba konin sinabi amba, Konin naggawa makay koaya da konin mga anghil, da- makay mga igang apoy da konin mga tagapamanawen. 8 Ngani sa konin Onga kay ba konin sinabi amba, Diyos, da kawo maghadi ba batay mamirmi kaagoton man. Mataldeng da kawo maghadi. 9 Kawo angasan sa mataldeng da- dayo gidte kay sa daet. Kaya kawo ba naay hinidang, ako ag komo Diyos, da- binoboan langis para kawo maghadi maki kaangasan, panawen kawo naay ginalang labi dapo sa komo mga kaanggat. Naba:a ngani. 10 Konin dapo sinabi, Panginoon, sa ompisa dapo kawo da pomalagay patibayan lopa, da- da kalangitan ba pinanawen kom alima. 11 Da mga naba ba batay nangawala ngani kawo ba batay mamirmi. Da mga naba ba batay nangaloma makay mga nagsool, 12 da- komo batay kinomkomos makay sai ka islen da- batay pinalitan makay din golanit. Ngani kawo ba nawed gidte batay magbago Da- nawed batay natay kaagot man. Naba:a ngani. 13 Nawed tang din sinabi Diyos sa kayno sai sa mga anghil amba, Kawo magtongka sa naay kanan kapet, anggan nawed dapo naay napasagalem sa komo araprapa da komo mga kalaban. Naba:a ngani. 14 Nawed ma da boo mga anghil ba mga ispirito magpamanawen sa Diyos da- konin mga nagpaidaw para magtolong sa mga batay naribri?
1 Kaya ngani-, lalo dapo kailangan tamo dahanan da mga katotohanan tamo akarngeyan para tamo nawed napaadayo saba. 2 Da tokawanan pinangadar mga anghil ba napatonayan totoo da- da iya lomaban kayno somway saba ba tomabang padosa kailangan sa konin. 3 Amba kay din, omaning tamo batay kaalas sa padosa no nawed tamo pinahalagahan da mahalaga gidte ka karibriyan naba? Da Panginoon da monaan pomangadar para sa karibriyan naba da- ag mga karngey sa konin da pomatonay sa tamo amba naba ba totoo. 4 Naba ba pinatonayan din Diyos sa konin mga tanda, mga kapanggilalas da- Roma-Roma ka makapangyadihan ka panawen da- sa mga taboy Ispirito Banal namakan toltol sa konin alabet. 5 Nawed sa mga anghil pinasagalem da roran batay rateng ag naay nagtodyo. 6 No nawed ba maki magpatonay sa sai ka eray Banal ka Kasoratan amba, Nakay da iraya para iya ba komo remremen e da onga iraya para iya ba komo alagaan? 7 Sa nawed te maagot ka odas iya ba komo pinaababa sa mga anghil, Iya komo tinaboyan kalakolan da- galang kailangan sa sai ka hadi, 8 da- da boo nakayman ba komo pinasagalem sa konin kapangyadihan. Naba:a ngani. Maraw pinasagalem Diyos sa kapangyadihan ag iraya da boo nakayman ba wala nakayman nawed pinasagalem sa konin. Ngani mona ba nawed dapo tamo akitan amba pinasagalem:mani sa konin da boo nakayman. 9 Ngani tamo amatangan amba sa nawed te maagot ka odas ba laki Hisos ba pinaababa sa mga anghil para iya natay para sa tamo boo, panawen sa palayaw Diyos. Da- mona ba tamo amatangan iya ba tinaboyan kalakolan da- galang kailangan sa sai ka hadi, panawen sa katayan konin inagwanta. 10 Sa iya omagwanta ba kaya iya ba sibay gidte, para da kaosonan ba kaeray sa konin kalakolan. Bagay gidte naba ba pinanawen Diyos, ag Romarang da- pomapirmi sa boo nakayman, panawen laki Hisos da ibatan kora karibriyan. 11 Laki Hisos ag maglinis sa kora kadaetan, da- ag mga lininis ba sai ngani da kora Apang. Kaya iya nawed akayaan omawit sa kora amba "mga arian". 12 Makay tiya da konin sinabi sa Diyos, Naay batay sinabi sa naay arian sa pag-isarig da para sa komo da- ako batay omigway papodi sa komo sa kora karimponan. Naba:a ngani. 13 Konin din sinabi amba, Ako batay gidte mag-isarig sa Diyos. Naba:a ngani. Da- amba, Ako da- da mga onga tinaboy Diyos sa naay ba towa. Naba:a ngani. 14 Ganyang da tinodyo mga onga ba iraya ba nagawa din iraya laki Hisos makay din kora-maki ener da- daya. Konin pinanawen naba para, sa konin katayan ba konin walaen da aponin kadaetan, ag maki kapangyadihan sa katayan. 15 Sa makay naba ba konin binal-anan da boo mga tinagoanggat sa boo kora biyag panawen sa kora aliman sa katayan. 16 Nawed gidte da mga anghil da konin nagtolongan no nawed ba da mga kaapoan laki Abraham. 17 Kaya iya kailangan makay din ag konin mga arian sa boo padaan, para iya ba kora koyay lakol magpamanawen para sa Diyos, makayawteen da- asarigan gidte sa iya magpamanawen para sa Diyos. Sa makay tiya ba da mga kadaetan mga iraya ba apatawad. 18 Panawen iya ba tinogso da- omagwanta hidap kaya mona ba konin atolongan da mga nagtogso.
1 Kaya ngani-, mga arian sa pag-isarig da- kaeray sa hidang Diyos, koyo gidte remremen laki Hisos, ag sinogo Diyos da- ginawa koyay lakol magpamanawen para sa Diyos para sa boo tamo amba tamo nag-isarigan. 2 Iya ba asarigan gidte sa ban-aw Diyos, ag homidang sa konin, makay din laki Moysis ba asarigan sa balay Diyos. 3 No omaning da tagalobo balay ba labi dapo mahalaga sa balay, amba kay din, labi gidte kapodi-podi laki Hisos sa laki Moysis. 4 Maki tagalobo da tayma balay ngani da Diyos da Romarang boo nakayman. 5 Laki Moysis ba asarigan gidte sa boo kamag-anakan Diyos makay tagapamanawen somistigo sa mga nakayman batay dapo pinangadar Diyos. 6 Ngani laki Kiristo kay ba asarigan gidte makay Onga magpamahala sa kamag-anakan Diyos. Da- tamo da konin kamag-anakan, no tamo wala kaliman da- maonay da tamo paniwala sa tamo nag-asahan. 7 Kaya makay ag sinabi Ispirito Banal amba, Mona no koyo arngeyan da tokawanan Diyos ba 8 Ayaw:wa maskil da koyo olo makay ag koyo mga pangapoan sa poro nawed apirmihan iraya ag kora magporba sa konin. 9 Kaya da Diyos ba amba, Sata ako pinahidapan da- pinorbahan ag koyo mga pangapoan, kayno kora akitan da mga naay pinanawen sa kora sa apatnapo ka dag-on. 10 Kaya naay namaisan da kairayaan naba, da- naay sinabi amba, Kora ba layen te etean. Kora dayo tomoltol sa naay mga bilin. 11 Kaya sa naay bais ba naay pinadahan amba, Koyo nawed gidte batay kasled sa naay pahingahan. Naba:a ngani. 12 Mga arian sa pag-isarig, koyo dahanan malinis da koyo poso da- maonay da pag-isarig para koyo ayaw magpaawak sa Diyos biyagan. 13 No nawed ba koyo magpaytolongan aldaw-aldaw, anggan da tokawanan "mona" sa Banal ka Kasoratan ba magtokawanan dapo sa koyo, para da tawa man sa koyo ba ayaw nadaya kadaetan da- ayaw batay maskil da olo. 14 No tamo magpamirmi anggan arasan sa tamo pag-isarig sa konin ba tamo boo ba kaanggat laki Kiristo sa agpanawen. 15 Makay ag sinabi sa Banal ka Kasoratan amba, Mona ba no koyo akarngeyan da Tokawanan Diyos ba ayaw:wa maskil da koyo olo makay ag koyo mga pangapoan ag kora magpaete sa Diyos. Naba:a ngani. 16 Mga tawa da paete sa Diyos kayno kora akarngeyan da konin tokawanan? Nawed ma da boo mga pinalwas laki Moysis sa lopa Ihipto? 17 Da- sa tawa abaisan da Diyos sa apatnapo ka dag-on? Nawed ma sa mga nalabo sa kadaetan da- nangatay sa poro nawed apirmihan iraya? 18 da- tawa da konin nagtodyo maraw konin pinadahan amba, Koyo nawed gidte batay kasled sa naay pahingahan? Nawed ma da mga etean? 19 Kaya tamo amatangan kora nawed kasled sa lopa naay pinangako panawen sa kora nawed mag-isarig sa Diyos.
1 Kaya, ganyang pirmi dapo da pangako magseled sa konin pahingahan ba tamo magdahan kaaram maki sa tamo aratnganan nawed kasled sa pahingahan pinangako Diyos. 2 Panawen pinangadar:ra din sa tamo da Pirmida ka Barita naba, makay din sa kora, ngani wala pakinabang sa kora da kora akarngeyan panawen kora ba dayo mag-isarig sa kora arngeyan. 3 Tamo kay, ag mga magpaniwala, da batay kasled sa pahingahan pinangako Diyos amba, Sa naay bais ba naay gidte pinadahan amba, Kora nawed gidte batay kasled sa naay pahingahan. Naba:a ngani. Konin sinabi naba kayno konin:na yinadi da konin panawen kalbas rinarang da paranawan. 4 Sa sai ka eray Banal ka Kasoratan ba sinorat para sa ikapito ka aldaw amba, Sa ikapito ka aldaw ba magpahinga da Diyos sa boo konin panawenen. Naba:a ngani. 5 Da- sinorat din, Kora ba nawed gidte batay kasled sa naay pahingahan. Naba:a ngani. 6 Da mga monaan karngey sa Pirmida ka Barita ba nawed kasled sa pahingahan panawen sa kora dayo mag-isarig. Ngani maki dapo batay kasled sata, 7 kaya da Diyos ba pomoyida:akay sai ka aldaw, naba ba mona. Kalawey maoson ka dag-on konin:nakay pinasabi sa hadi Dabid ag monaan:na kon sinabi amba, Mona, no koyo arngeyan da naay tokawanan ba ayaw:wa maskil da koyo olo. Naba:a ngani. 8 No kora ba apapahinga disin laki Hoswi ba nawed:da disin agtokawanan da Diyos para sa sai dapo ka aldaw. 9 Kaya da Diyos ba maki dapo kapahingahan, makay din sa Aldaw Magpahinga, para sa mga mag-isarig sa konin. 10 Da iya kasled sa pahingahan Diyos ba kapahinga sa konin mga panawen, makay din ag Diyos ba magpahinga sa boo konin panawenen. 11 Kaya tamo gidte sikapen tamo kasled sa pahingahan naba, para wala sa tamo nawed kahayon makay kora, panawen sa kora dayo mag-isarig. 12 Panawen da Tokawanan Diyos ba biyagan da- makapangyadihan, labi dapo kaerep sa kayno nakay ka pisaw mangkabila ba tarem. Naba ba magsardek kayno sa palsowayan gisarem da- ispirito, mga los-an da- ariyayas. Naba da kapaban-aw mga nagremrem da- mga pakana sa remrem mga iraya. 13 Wala atago sa Diyos. Da boo ba nabandira da- maglandayan sa konin serey, da- sa konin ropangan ba tamo batay manoltol sa tamo sadiri. 14 Kaya ngani-, tamo ba magpakaonay sa tamo amba tamo nag-isarigan, ganyang tamo ba maki sai ka koyay lakol magpamanawen para sa Diyos somarimpat sa mga kalangitan anggan sa ropangan Diyos, wala Roma no nawed laki Hisos ag Onga Diyos. 15 Tamo gidte koyay lakol naba ba kamatang tamo mga kahinaan panawen iya ba tinogso sa boo padaan makay din tamo, ngani nawed nalabo sa kadaetan. 16 Kaya tamo wala kaliman magseled sa ropangan ag makayawteen ka Diyos. Sa konin tamo batay tinabang da kayawtean da- palayaw sa odas tamo kailangan.
1 Pinili Diyos ibat sa kora kalasyon da tayma koyay lakol magpamanawen para sa konin da- iya ba hinidang para iya ba magtaboy sa Diyos ag hayin da- mga hayop batay binono para sa mga kadaetan mga iraya. 2 Panawen iya ba mahina makay din kora ba malomanay konin nagkaatolongan da mga magsala sa kora nagpanawen panawen nawed kora amatangan. 3 Da- panawen din saba ba kailangan iya magbono hayop nawed ngani para sa mga kadaetan mga iraya no nawed ba para din sa konin mga kadaetan. 4 Wala kagaro ag katongkolan naba sa konin sadiri no nawed ba iya naghidang Diyos, makay din laki Aaron. 5 Amba kay din, nawed laki Kiristo da pomaatatas sa konin sadiri para iya ba koyay lakol magpamanawen para sa Diyos no nawed ba iya ba hinidang Diyos ag somabi sa konin amba, Kawo da naay Onga da- mona ba ako da kom Apang. Naba:a ngani. 6 Konin din sinabi sa Roma ka eray Banal ka Kasoratan amba, Kawo ba koyay magpamanawen para sa Diyos kaagoton man, makay din laki Milkisidik. Naba:a ngani. 7 Ag laki Hisos ba towa dapo sa paranawan ba iya ba magdarangin da- mag-aringi maeyat magkabibingas sa Diyos, ag karibri sa konin sa katayan. Da- iya pinakarngeyan Diyos panawen sa iya magpasangato gidte maki ababa ka remrem. 8 Kayno iya ba Onga Diyos ba konin naadaran da magtoltol gidte sa iya ba mag-agwanta. 9 Da- maraw iya ba pinasibay:ya gidte, iya ba abaya gidte magribri kaagoton man sa boo magtoltol sa konin. 10 Kaya sinabi gidte Diyos amba, Kawo da koyay lakol magpamanawen para sa naay makay din laki Milkisidik. Naba:a ngani. 11 Yamen ba maoson dapo disin batay asabi para sa mga nakayman naba, ngani mahidap papawaen sa koyo panawen koyo magramira sa kaamatangan. 12 Kailangan disin koyo ba mga tagatodo:ani ngani anggan mona ba koyo kailangan dapo tod-an mga pangonaan adaren sa Tokawanan Diyos. Da kailangan disin sa koyo ba maskil ka pamangnen, ngani anggan mona ba yatas dapo da koyo kailangan. 13 Da nagkabiyag sa yatas ba onga dapo te; iya wala dapo amatangan para sa piya da- daet. 14 Ngani da maskil kay ka pamangnen ba para sa mga koyay:yani nabiyasa:ani sa piya da- daet.
1 Kaya ayaw:wa da mga pangonaan adaren para sa laki Kiristo no nawed ba tamo toloy:yani anggan sibay da tamo kaamatangan. Ayaw tamo pagpalagyen:nakay da patibayan tamo pag-isarig-naba ba da magsisi da- mag-ogon sa mga panawen wala kaparosan sa serey Diyos-da- da mag-isarig sa konin, 2 da adar para sa mga baotismo, da- sa magpatimpo alima, da- sa batay:yakay biniyag da mga nangatay, da- sa padosa wala arasan. 3 Naba da tamo tay pinanawen no kaliyagan Diyos. 4 Panawen nawed gidte abaya magsisi dapo da- kapaoli:akay sa Diyos da mga paawak:kani sa mag-isarig. Ag monaan ba kora ba apawaan:nani, da- katimos:sa taboy Diyos, da- kora ba kabilang:nga din sa mga tomabang Ispirito Banal, 5 da- kora kamatang:nga din amba da Tokawanan Diyos ba piya da- kora kadamdam:ma din kapangyadihan ag odas da Diyos ba batay maghadi. 6 No kora paawak kalbas kora katimos mga naba ba kora nawed:da abaya magsisi dapo da- apaoli sa Diyos, panawen makay kora:akay pinako sa kodos da- binandira sa kakayaan da Onga Diyos. 7 Nagparongawan Diyos da lopa ag magsepsep odan layen te magtoro sata da- nagsobkan alaman nagpakinabangan ag mga maki eray sa alamanan naba. 8 Ngani no gamasen madogi da sombok sata ba wala kaparosan da makay naba ka lopa da- batay sinompa Diyos da- batay inareng. 9 Mga nagpalayaw arian sa laki Hisos, kayno makay tiya da yamen sinabi, amba man ba yamen nagkapiho amba labi dapo piya da parongaw Diyos sa koyo para sa karibriyan. 10 Da Diyos ba mataldeng. Nawed konin batay alingwanan da koyo pinanawen da- da palayaw koyo nagpaban-aw para sa konin sa koyo magpanawen sa koyo mga kapowa mag-isarig. 11 Da yamen gidte alabet ba da tayma sai sa koyo ba toloy gidte magsikap anggan, para koyo gidte natabang da koyo nag-asahan. 12 Kaya koyo ayaw latod no nawed ba koyo tomolad sa mga iraya mag-isarig sa Diyos da- magtiyaga da- sa makay naba ba kora magtabang mga pinangako Diyos. 13 Maraw da Diyos ba mangako sa laki Abraham ba iya ba manompa sa konin sadiri ngaran panawen wala:a Roma labi dapo sa konin ag konin batay apanompaan. 14 Konin sinabi amba, Naay gidte nagpangako sa komo amba, Kawo naay batay gidte pinarongawan da- batay pinaoson da komo kaapoan. Naba:a ngani. 15 Matiyaga magpanya laki Abraham kaya konin nga tinabang da pinangako Diyos sa konin. 16 Da mga iraya ba magpanompa sa ngaran sai ka makapangyadihan dapo sa kora da- sa makay naba ba kalbas:sani da osapen. 17 Amba kay din, sa iya manompa ba pinakaonay Diyos da konin pangako para pakilalaen sa konin mga pinangakoan amba nawed magbago da konin pakana. 18 Nawed gidte abaya magbago, nawed din magpamosli da Diyos para sa darwa tiya-sa pangako da- sompa. Panawen saba tamo ag mga magpasaog sa konin ba maki maeyat ka remrem magpamirmi sa nag-asahan pinalagay sa tamo ropangan. 19 Da nag-asahan naba ba makay maonay da- piho ka pamondo ag tamo biyag. Da- naba ba magrateng anggan sa kabila dako sagodang balay Diyos sa soksokowan, sata dako sa rado banal gidte. 20 Para sa tamo ba sata semled laki Hisos ag magpangonaan sa tamo. Sata iya da koyay lakol magpamanawen para sa Diyos kaagoton man, makay din laki Milkisidik.
1 Naba ag laki Milkisidik ba Hadi sa goraan lakol Salim da- koyay magpamanawen para sa Diyos ag Atatas gidte sa boo. Maraw laki Abraham ba paoli:ani ibat sa iya sompo sa mga hadi ba somalobong sa konin laki Milkisidik da- sinabi sa konin amba, Kawo parongawan ngani- Diyos! 2 Tinaboy sa konin laki Abraham da ikasampo ka eray boo konin nagaro sa labanan. Da monaan alabet sabiyen ngaran Milkisidik ba hadi kataldengan da- da alabet kay sabiyen hadi sa Salim ba hadi kaginhawahan. 3 Wala gidte nagkasabi para sa konin apang da- adang, kayno mga pangapoan, wala din nagkasabi sa iya inonga kayno sa iya natay. Iya makay din ag Onga Diyos sa iya ba koyay magpamanawen para sa Diyos kaagoton man. 4 Koyo gidte remremen no omaning iya ba makapangyadihan! Tinaboy sa konin koyay Abraham ag tamo pangapoan da ikasampo ka eray boo konin nagaro sa labanan. 5 Toltol sa Bilin tinaboy sa laki Moysis ba ag mga kaapoan ngani laki Libi da magpamanawen para sa Diyos. Kora da kailangan taboyan kora kalasyon ag ikasampo ka eray boo kora akitan, kayno kora kalasyon ba kaapoan din laki Abraham. 6 Laki Milkisidik ba nawed kabilang sa kaapoan laki Libi, ngani iya tomabang ag ikasampo ka eray ibat sa laki Abraham, da- konin pinarongawan kayno iya da pinangakoan Diyos. 7 Piho gidte da magparongaw ba labi dapo makapangyadihan sa nagparongawan. 8 Da mga kaapoan laki Libi, ag tomabang pag ikasampo ka eray ba mga iraya nagkatay din, ngani laki Milkisidik kay ag pinakan laki Abraham ikasampo ka eray ba biyagan. 9 Kaya tamo batay asabi amba laki Libi, kayno iya tomabang ikasampo ka eray ba tomaboy din ikasampo ka eray panawen iya ba makay sa lawas dapo laki Abraham, ag konin pangapoan, maraw konin asma laki Milkisidik. 11 Da Bilin ba tinaboy Diyos sa mga taga Israil sa patoonan mga koyay magpamanawen para sa Diyos wala Roma no nawed ba ag mga kaapoan laki Libi. No sibay:ya disin da pinanawen mga kaapoan laki Libi para sa Diyos ba nawed:da disin kailangan maki Roma dapo ka koyay magpamanawen para sa Diyos makay ag laki Milkisidik da- nawed:dani makay ag laki Aaron. 12 No binago:wakay da kalasi mga koyay magpamanawen para sa Diyos ba kailangan din bagowen da Bilin. 13 Da tamo Panginoon ag iya ba tinodyo sa Banal ka Kasoratan ba ibat sa Roma ka andana; wala kayno sai ibat sa andana naba mamanawen sa arengan. 14 Mapawa gidte da tamo Panginoon ba ibat sa andana laki Hoda, da- para sa andana naba ba wala gidte sinabi laki Moysis kora maki eray sa panawen sa balay Diyos. 15 Naba ba lalo dapo mapawa maraw maki rateng da sai ka bayo:wakay ka kalasi koyay magpamanawen para sa Diyos makay din laki Milkisidik. 16 Iya ba ginawa koyay magpamanawen para sa Diyos ngani nawed ibat sa maniho para sa konin andana no nawed ba sa kapangyadihan sai ka biyag kaagoton man ba nawed tay kalbas. 17 Panawen naba da sinabi Banal ka Kasoratan para sa konin amba, Kawo ba koyay gidte magpamanawen para sa Diyos kaagoton man, makay din laki Milkisidik. Naba:a ngani. 18 No amba ba inalis da monaan maniho panawen naba ba ablayan da- wala pakinabang, 19 panawen wala abaya pasibayen ibat sa Bilin tinaboy sa laki Moysis. Ngani labi gidte piya da bayo ka nag-asahan tamo tinabang. Panawen saba ba kapabali:ya tamo sa Diyos. 20 Da- labi dapo saba! Sa iya ginawa koyay magpamanawen para sa Diyos ba maki gidte maonay ka pangako. Da mga Roma ba ginawa koyay magpamanawen para sa Diyos wala pangako, 21 ngani ag laki Hisos ba ginawa koyay magpamanawen ba manompa gidte da Diyos amba, Da Panginoon ba magpanompa gidte, da- iya nawed batay magbago konin remrem, Kawo da koyay magpamanawen para sa naay kaagoton man. Naba:a ngani. 22 Panawen saba ba sa laki Hisos ba tamo apiho tamo kamaki sai ka kasaiyan pinanawen Diyos nawed bido sa monaan kasaiyan. 23 Sa monaan kasaiyan ba maoson ka koyay magpamanawen da halilihanan, panawen kora ba nagpangatay da- nawed katoloy sa kora katongkolan. 24 Ngani laki Hisos kay ba biyagan kaagoton man da- iya nawed ahalinghan sa iya magpamanawen para sa Diyos. 25 Panawen saba konin gidte aribri da boo konin napabali sa Diyos, panawen iya ba nagkabiyag kaagoton man para magdarangin sa Diyos para sa kora. 26 No amba laki Hisos da koyay lakol magpamanawen para sa Diyos abaya tomolong sa tamo sa boo padaan. Iya ba banal, mataldeng da- wala kadaetan. Iya ba pinoyida sa mga makadaetan da- pinaatatas Diyos anggan sa soksokowan. 27 Iya nawed makay ag mga Roma ka koyay lakol magpamanawen para sa Diyos ag kailangan magbono mga hayop aldaw-aldaw, da monaan ba para sa kora sadiri mga kadaetan, kalbas ba para sa mga kadaetan mga iraya. Laki Hisos ba kasai ngani tomaboy sa Diyos, maraw konin tinaboy da konin sadiri sa katayan. 28 Da mga koyay lakol magpamanawen para sa Diyos ag mga hinidang toltol sa Bilin tinaboy sa laki Moysis ba maki kahinaan. Ngani da Onga, ag pinanawen sibay gidte kaagoton man, iya da hinidang Diyos para koyay lakol magpamanawen para sa konin maki maonay ka sompa Diyos paoriyan rateng sa Bilin.
1 Tiya gidte da bosol ag yamen nagsabi. Tamo maki gidte koyay lakol magpamanawen magtongka sa soksokowan sa kanan dako tongkaan Diyos ag Atatas gidte sa boo. 2 Iya ba koyay lakol ag magpamanawen sata sa banal gidte ka pagsambahan, naba ag totoo ka torda nawed limbo iraya no nawed ba da Panginoon. 3 Tayma koyay lakol magpamanawen para sa Diyos ba hinidang para magtaboy mga hayin da- mga hayop batay binono, kaya kailangan da tamo koyay lakol magpamanawen para sa Diyos ba maki din batay tinaboy. 4 Towa sa lopa iya ba nawed gidte abaya koyay lakol magpamanawen panawen maki:yani mga koyay magpamanawen magtaboy mga kailangan taboyon toltol sa Bilin. 5 Da kora nagpanawen ba toladan da- anino ngani ag sa soksokowan. Makay din ag nangyadi maraw batay:ya ginawa laki Moysis da torda ba iya ba sinabiyan gidte Diyos amba, Komo panawenen da boo makay ag naay Pinaban-Aw sa komo sa bogsor. Naba:a ngani. 6 Ngani mona laki Hisos ba tinaboyan sai ka panawen labi mahalaga sa panawen tinaboy sa kora, makay ag kasaiyan konin inabaya ba piya dapo sa monaan kasaiyan, panawen naba ba nagkasarig sa lalo piya ka nakayman pinangako. 7 No wala korang da monaan kasaiyan, nawed:da disin kailangan da bayo:wakay. 8 Ngani panawen akitan Diyos da kakorangan konin mga kairayaan kaya konin sinabi amba, Batay rateng da aldaw ako batay pomanawen bayo:wakay ka kasaiyan sa mga taga Israil da- taga Hoda, 9 Nawed makay ag kasaiyan naay pinanawen sa kora mga kakoyayan, maraw kora naay inakay da- pinalwas ibat sa lopa Ihipto. Kora ba nawed toloy sa kasaiyan naay pinanawen kaya kora naay pinabayaan. 10 Kaya ako amba, Tiya da naay batay pinanawen kasaiyan sa mga taga Israil sa mga aldaw batay rateng. Naay batay tinanem sa kora mga remrem naay mga bilin, da mga naba ba batay mamirmi sa kora poso. Ako da kora batay Diyos da- kora kay ba naay batay kairayaan. 11 Nawed:da kailangan tod-on dapo tawa man sa konin kalasyon, kayno sabiyen sa konin arian amba, Komo kilalaen da Panginoon, panawen kora boo ba batay komilala sa naay, ibat sa pinakaanlagay ka iraya anggan sa makapangyadihan. 12 Panawen naay batay pinatawad da kora mga kabalikoan da- nawed:da naay batay rinemrem da kora mga kadaetan. Naba:a ngani. 13 Maraw sinabi Diyos para sa bayo ka kasaiyan konin batay pinanawen ba konin:na winal-an halaga da monaan. Da- da nakayman nagkawal-an halaga da- nagkaloma ba bali:ya nawala.
1 Sa monaan kasaiyan pinanawen Diyos ba maki mga maniho sa magsamba da- sambahan ginawa iraya. 2 Pinanawen da sai ka torda pagsambahan maki darwa ka rado. Da monaan ba nag-awit rado banal. Sata da solo-, da palagyan maki mga tinapay taboy sa Diyos. 3 Da ikadarwa ba sa kabila dako sagodang. Naba kay ba nag-awit rado banal gidte. 4 Sata da arengan mga maayooy, da palagyan ag katonayan konin kasaiyan sa konin mga kairayaan pinaikapetan ginto sa lowas. Sa galem palagyan naba da palagyan pamangnen ibat sa soksokowan ag nag-awit mana. Ag palagyan naba ba yadi din sa ginto. Sata din da bakolo laki Aaron ag domaon, da- da mga sapsap bato sinoratan kasaiyan. 5 Da- sa ngaway ag palagyan ba maki darwa makay tagabantay maki lagay magpaban-aw amba sata da Diyos. Nagliloman kora lagay da takleb palagyan pagpatawadan mga kadaetan. Ngani da mga naba ba nawed:da yamen batay pinapawa sai-sai mona. 6 Amba da magpamalagay mga kagamitan. Da mga koyay magpamanawen ba magseled aldaw-aldaw sa monaan rado para kora tepden da kora katongkolan. 7 Ngani da koyay lakol magpamanawen ngani da kasled sa ikadarwa ka rado, da- kasai ngani sa sai ka dag-on. Kailangan konin babaen da daya sai ka hayop nagtaboy sa Diyos panawen sa konin mga kadaetan da- sa mga kadaetan mga iraya, ag kora napanawen nawed kora amatangan. 8 Sa makay naba ka magpamalagay ba nagpaban-aw Ispirito Banal amba da paseled sa totoo ka torda ba nawed dapo boka anggan baywi dapo da monaan torda. 9 Toladan ngani naba para paban-awen sa tamo da mahalaga sa odas tiya. Da mga hayin da- mga taboy hayop binono nagtaboy sata ba nawed kapasibay sa poso mga magsamba, 10 panawen da ginamit saba ba pamangnen ngani, da- inemen da- Roma Roma ka maglinis. Da mga naba ba panlowas ngani mga maniho kora nagpanawen anggan nawed nagbago Diyos da boo nakayman. 11 Ngani rateng:ngani laki Kiristo, da- iya gidte da koyay lakol magpamanawen para sa Diyos ag magtaboy mga piya ka kadanasan ag towa:ani. Konin sinarisa da mahalaga dapo da- lalo sibay ka torda ag nawed pinanawen alima, da alabet sabiyen ba nawed ibat sa pagrarang tiya, 12 da- kasai ngani iya semled sa rado banal gidte sa soksokowan da- sibay:yani kaagoton man. Nawed daya mga kambing da- bol-o baka da konin binaba taboy, no nawed ba konin sadiri daya da binobo para tamo atabang da wala arasan ka katbosan. 13 Da daya mga kambing da- mga toro baka da- da abowan domaraga ka baka ba nagwisik sa mga iraya madomi toltol sa kora kaogalian. Naba da magpalinis da- pambaraw kora kadomiyan. 14 Ngani da daya laki Kiristo ba lalo dapo nawed bido sa daya mga hayop. Sa pinanawen Ispirito wala arasan sa konin ba konin tinaboy sa Diyos da konin sadiri sa katayan makay sai ka taboy sibay gidte. Da konin daya da maglinis sa tamo poso para tamo ogonan da tamo mga panawen wala kaparosan da- mamanawen sa Diyos biyagan. 15 Panawen naba ba laki Kiristo da tagaawat sai ka bayo ka kasaiyan pinanawen Diyos para da mga pinatwagan ba katabang mana wala arasan, naba da mga parongaw pinangako Diyos. Naba ba abaya mangyadi panawen iya ba natay para atbos da mga iraya nalabo sa kadaetan ag kora ba sa galem dapo monaan kasaiyan. 16 No da sai ka koyay ba maki sinorat para sa mana ba no natay da somorat naba ba kailangan magpatonay amba natay:yani iya, 17 panawen naba ba wala kaparosan anggan iya ba biyagan dapo, bayo batay maki kaparosan sa iya ba natay:yani. 18 Kayno da monaan kasaiyan ba nawed pinaonay no wala daya. 19 Maraw pinangadar laki Moysis sa mga iraya da boo maniho binilin Diyos ba konin ginaro da daya mga bol-o baka da- mga kambing maki kaliog sapa, da- mga sanga te alaman isopo ingketan bolbol topa tina mapola da- konin winisik sa Ribro sinoratan Bilin da- sa boo mga iraya. 20 Konin sinabi amba, Tiya da daya magpaonay sa kasaiyan pag nagbilin Diyos amba, Koyo panawenen. 21 Konin din winisikan daya da torda ag kasaiyan da- da boo mga kagamitan sa magsamba. 22 Toltol sa Bilin ba halos da boo nakayman ba lininis daya nabobo da- wala kapatawadan sa kadaetan no wala binobo daya. 23 Da mga nakayman sa sambahan naba ag makay din ag sa soksokowan, ba kailangan din linisen sa makay naba ka padaan. Ngani ag sa soksokowan ba kailangan mga taboy lalo dapo piya. 24 Panawen laki Kiristo ba semled nawed sa sai ka rado banal pinanawen iraya, makay din ag tonay gayed no nawed ba sa soksokowan gidte. da- mona iya ba mag-awat sa tamo sa ropangan Diyos. 25 Da koyay lakol magpamanawen para sa Diyos ba magseled sa rado banal gidte dag-on dag-on, maki nagbaba daya hayop. Ngani laki Kiristo ba nawed kailangan layen te magseled para taboyon da konin sadiri. 26 No amba, kailangan disin iya ba nagkatay-katay ibat dapo rinarang da paranawan. Ngani iya kasai ngani paban-aw, mona sa paoriyan odas tiya, para barawen da kadaetan sa iya tomaboy konin sadiri sa katayan. 27 Inokol sa mga iraya da natay kasai da- kalbas ba batay hinosay Diyos. 28 Amba kay din, da Kiristo ba kasai ngani tinaboy da konin sadiri sa katayan makay taboy para magbaraw mga kadaetan maoson iraya. Iya ba batay:yakay rateng, nawed para taboyon:nakay da konin sadiri para sa kadaetan no nawed ba para ribriyen da mga magpanya gidte sa konin.
1 Da Bilin ba nawed amba naba gidte no nawed ba makay kolabo ngani ka anino mga piya ka nakayman batay rateng. Kaya da mga hayop binono layen-layen nagtaboy para sa Diyos toltol sa Bilin ba nawed gidte abaya kapasibay sa mga magpabali sa Diyos. 2 No disin napatawad:dani da mga kadaetan mga magsamba sa Diyos sa makay naba ka taboy, kora disin ba wala:a batay rinemrem da kora kadaetan. Sa makay naba ba nawed:da kailangan magtaboy dapo. 3 Ngani da mga taboy naba ag layen-layen nagtaboy ba paremrem ngani sa mga iraya sa kora mga kadaetan, 4 panawen da daya mga toro baka da- da daya mga kambing ba nawed gidte kabaraw mga kadaetan. 5 Panawen saba, maraw laki Kiristo ba batay:ya lompot sa paranawan ba konin sinabi sa Diyos amba, Da mga hayin da- mga taboy hayop ba nawed komo alabet, ngani komo hinanda da sai ka lawas para sa naay. 6 Kawo nawed angasan sa mga taboy boo inareng kayno sa mga taboy para sa kadaetan. 7 Kaya naay sinabi amba, Naay Diyos, ako towa para tepden da komo kaliyagan, makay ag nasorat sa Bilin para sa naay. Naba:a ngani. 8 Da monaan konin sinabi ba amba, Nawed komo alabet kayno kinaangasan da mga hayin da- taboy hayop, mga taboy boo inareng da- mga taboy para sa kadaetan-kayno da mga naba ba nagtaboy toltol sa Bilin. 9 Konin dapo sinabi amba, Naay Diyos, ako towa para tepden da komo kaliyagan. Naba:a ngani. Kaya inalis Diyos da monaan mga taboy da- hinalinghan laki Kiristo. 10 Panawen laki Hisos Kiristo ba temped gidte sa kaliyagan Diyos ba tamo konin lininis sa tamo mga kadaetan, sa kasai ngani konin tinaboy da konin sadiri sa katayan, da- naba ba sibay:yani. 11 Tayma koyay magpamanawen sa balay Diyos ba magpamanawen aldaw-aldaw da- magtaboy taboy mga hayop, ngani nawed kabaraw mga kadaetan da mga taboy naba. 12 Ngani laki Kiristo kay ba kasai ngani tomaboy konin sadiri para sa mga kadaetan, sai ka taboy sibay gidte kaagot man, bayo iya tomongka sa kanan dako Diyos. 13 Da- iya magpanya sata anggan da konin mga kalaban ba nawed dapo pinasagalem Diyos sa konin araprapa. 14 Sa kasai ngani konin tinaboy da konin sadiri ba da konin mga lininis ba abaya sibay gidte kaagoton man. 15 Da Ispirito Banal da magsistigo din sa tamo para saba. Da monaan konin sinabi ba amba, 16 Sinabi Panginoon Diyos amba, Tiya da naay kasaiyan sa kora ag naay batay pinanawen sa mga aldaw batay rateng: naay batay tinanem sa kora mga poso da naay mga bilin da- batay sinorat sa kora mga remrem da mga naba. Naba:a ngani. 17 Da- konin dapo sinabi amba, Nawed:da naay batay rinemrem da kora mga kadaetan da- mga kabalikoan. Naba:a ngani. 18 No napatawad:dani da mga kadaetan ba nawed:da kailangan magtaboy dapo para sa kadaetan. 19 Kaya ngani-, mga arian sa laki Hisos, wala:a hadang tamo abaya kasled sa rado banal gidte sa soksokowan panawen sa katayan laki Hisos. 20 Sa iya tomaboy konin sadiri sa katayan ba konin binokaan para sa tamo da sai ka bayo ka dalan paparaoy sa biyag gidte toloy anggan sa kabila dako sagodang-naba da konin lawas. 21 Tamo ba maki sai ka koyay lakol magpamanawen para sa Diyos magpamahala sa balay Diyos. 22 Kaya tamo pabali sa Diyos boo poso da- maki maonay ka pag-isarig sa konin; da- tamo nalinis:sani sa sai ka daet ka poso da- naoyasan:nani sa malislisaw ka sapa da tamo mga lawas. 23 Tamo magpakaonay sa tamo nag-asahan tamo nagpanoltol panawen abaya gidte tamo sarigan da mangako sa tamo. 24 Da- tamo sikapen magpaytolongan sa sai-sai para magpalayawan sa sai-sai da- magpanawen piya. 25 Da- ayaw magpalya sa tamo magtipon makay ag nagpanawen mga Roma, no nawed ba paeyaten da remrem tayma sai, lalo:a mona ag tamo amatangan nagkabali:yani da aldaw batay:yakay towa da Panginoon. 26 No tamo:wa amatangan da katotohanan da- tamo toloy dapo magpanawen kadaetan ba wala:a hayin dapo para barawen da tamo kadaetan. 27 Wala:a natra no nawed ba da kapangirabot magpanya sa iya batay hinosay Diyos, da- sa magragara apoy batay mamangan sa mga maglaban sa Diyos. 28 Da dayo tomoltol sa Bilin tinaboy sa laki Moysis ba wala kayawtean binono sa sistigo darwa kayno tatlo ka pomatonay. 29 Sa koyo remrem ba kaomaning kabyat da padosa kailangan sa iraya yomadak sa Onga Diyos, da- womala halaga sa daya ag pomaonay sa kasaiyan pinanawen Diyos da- maglinis sa konin kadaetan da- tomongayaw sa makayawteen ka Ispirito? 30 Panawen tamo nagkilala da magsabi makay tiya, Ako da batay gomanti da- batay magpadosa. Naba:a ngani. da- amba, Batay hinosgahan Panginoon da konin kairayaan. Naba:a ngani. 31 Kapangirabot gidte sa iraya batay hinosgahan ag Diyos biyagan. 32 Koyo gidte remremen da mga aldaw kalawey, no omaning koyo apawaan Diyos da- koyo mag-agwanta masyado hidap kalbas koyo magmantimir. 33 No ina koyo naglaes da- nagpahidapan sa ropangan mga kaosonan da- no ina kay ba koyo handa anggat sa mga nagpahidapan makay din naba. 34 Koyo dinamayan da mga nagkapiriso, da- koyo angasan dapo din maraw inagaw sa koyo da koyo mga nag-apo, panawen koyo amatangan koyo maki mga nag-apo lalo dapo piya da- baywi kaagoton man. 35 Kaya koyo ayaw awal-an remrem da- koyo batay atabang da sibay ka parongaw. 36 Koyo kailangan magmantimir para koyo atped da kaliyagan Diyos da- atabang da konin pinangako. 37 Panawen, makay ag nasorat sa Banal ka Kasoratan amba, Bali:ya te da odas iya ag magparaoy towa ba batay rateng, nawed:da batay maagot. 38 Da naay mga mataldeng ka iraya ba batay maki biyag sa kora mag-isarig sa naay. Ngani no maki sa kora ba paawak sa naay ba kora nawed naay batay kinaangasan. Naba:a ngani. 39 Tamo kay ba nawed kabilang sa mga magpaawak da- nagkaomaning no nawed ba sata sa mga mag-isarig da- naribri.
1 Da mag-isarig ba no tamo nagpiho amba batay gidte mangyadi da mga tamo nag-asahan, no tamo maniwala gidte amba totoo da mga nawed dapo nagkaakitan. 2 Kinaangasan Diyos da mga iraya ag monaan panawen sa kora mag-isarig sa konin. 3 Panawen sa tamo mag-isarig sa Diyos, tamo amatangan da sinokoban ba nararang sa konin tokawanan, kaya da mga nagkaakitan ba ibat sa nawed nagkaakitan. 4 Panawen sa iya mag-isarig sa Diyos, laki Abil ba tomaboy piya dapo gidte ka taboy sa tinaboy kay laki Kain. Panawen din saba ba iya kinilala Diyos amba mataldeng maraw tinabang Diyos da konin mga taboy. Kayno iya ba natay:yani ba iya ba makay magtokawanan dapo panawen sa iya mag-isarig sa Diyos. 5 Panawen sa iya mag-isarig sa Diyos, laki Inok ba nawed:da natay no nawed ba ginaro:wa Diyos. Iya ba nawed:da akitan panawen ginaro:wa Diyos. Nagsabi sa Banal ka Kasoratan amba, Laki Inok ba kinaangasan Diyos bayo iya ginaro. 6 Nawed abaya kinaangasan Diyos da nawed mag-isarig sa konin, panawen da iya magpabali sa Diyos ba kailangan gidte maniwala amba maki Diyos da- iya da magtaboy mga parongaw sa mga magpabali sa konin. 7 Panawen sa iya mag-isarig sa Diyos ba pinakarngeyan laki Noyi da padahan Diyos para sa mga nakayman batay mangyadi ag nawed dapo nagkaakitan. Konin tinoltol da Diyos da- gomawa sai ka dawong para kora mag-anak ba naribri. Sa konin pinanawen naba ba hinosgahan da mga sa paranawan, da- iya ba binilang Diyos amba iya mataldeng panawen sa iya mag-isarig. 8 Panawen sa iya mag-isarig, laki Abraham ba tomoltol sa Diyos ag pomalwas sa konin da- pomaparaoy sa poro konin pinangako sa konin. Da- iya mangadang kayno nawed konin amatangan no saan dako batay paraoy. 9 Panawen din sa konin pag-isarig ba iya ba mamatawan makay sai ka manalyowan sa lopa pinangako Diyos sa konin. Iya mamatawan sa mga torda makay din sidawa Isaak da- Hakob, ag batay din tomabang naba pag pangako ibat sa Diyos, 10 panawen iya mag-asa sa goraan lakol maki maonay ka sarigan, ag pinakana da- pinanawen Diyos. 11 Panawen sa mag-isarig laki Abraham ba kayno iya ba koyay:yani da- konin sawa bayi Sara ba baog ba sidawa agkaonga dapo din panawen iya mag-isarig gidte amba matepeden da mangako sa konin. 12 Kaya ibat sa iraya naba ag bali:ya natay ba omibat dapo da maoson ka kaapoan, kaoson ag magirem sa langit, da- boangin sa pangpang dagat nawed abilang. 13 Da boo mga naba ba nangatay maki pag-isarig sa Diyos. Nawed kora natabang da mga pinangako Diyos sa kora, ngani kora akitan sa adayo da- kora ba nangaangasan. Kora magpanoltol amba, Yamen mana ba mga manalyowan ngani towa, da- nawed taga towa sa lopa. 14 Nagpakilala mga iraya magtokawanan amba kora magsarak dapo kora sadiri gidte pamatawan. 15 No da kora nagremrem ba da lopa kora inibatan ba kora abaya dapo paoli:akay sata. 16 Ngani da kora nag-asahan ba sai ka pamatawan lalo gidte piya-wala Roma no nawed ba ag sa soksokowan. Nawed nakaya da Diyos sa iya ba kora Diyos, kaya konin hinanda sa kora da sai ka pamatawan. 17 Panawen laki Abraham ba mag-isarig sa Diyos, ag odas iya ba pinorbahan Diyos ba iya ba handa magtaboy konin sai ngani ka onga makay taboy sa Diyos, kayno laki Isaak da pinangakoan Diyos sa laki Abraham amba, Sa konin batay omibat da komo batay mga kaapoan. 19 Iya maniwala amba batay kapabiyag:gakay da Diyos sa laki Isaak-da- sa makay naba ba makay konin:nakay tinabang laki Isaak ibat sa katayan. 20 Sa iya mag-isarig sa Diyos, sinabi laki Isaak sa sidawa Hakob da- Isaw da piya ka batay pinanawen Diyos batay gidte mangyadi sa sidawa. 21 Sa iya mag-isarig sa Diyos, sinabi laki Hakob sa darwa ka onga lalaki laki Hosi da piya ka batay pinanawen Diyos sa sidawa, bayo iya natay, da- iya magsamba sa Diyos mag-isongo sa poon konin bakolo. 22 Panawen sa iya mag-isarig sa Diyos sinabi laki Hosi maraw iya bali:ya natay da batay omalis sa lopa Ihipto da mga kaapoan laki Israil, da- konin binilin amba babaen da konin mga bongkalo. 23 Panawen sa sidawa mag-isarig sa Diyos, da apang da- adang laki Moysis ba nawed aliman somway sa bilin hadi. Maraw sidawa akitan maganda da polahan ba sidawa tinago tatlo ka bolan. 24 Panawen sa iya mag-isarig sa Diyos, laki Moysis, maraw iya koyay:ya din ba dayo pakilala amba iya ba onga ag onga babayi hadi sa Ihipto. 25 Konin dapo alabet da pahidapan anggat sa mga kairayaan Diyos sa angasan kay sa kadaetan kayno nawed te maagot. 26 Labi dapo mahalaga sa konin da mag-agwanta laesen para sa Kiristo sa mga karon-an kay sa Ihipto, panawen iya mag-itoon gidte sa mga parongaw batay rateng. 27 Panawen din sa iya mag-isarig sa Diyos, inogonan laki Moysis da Ihipto nawed aliman sa kabaisan hadi, da- maonay gidte da konin remrem panawen makay konin nagkaakitan da Diyos nawed nagkaakitan. 28 Panawen din sa iya mag-isarig konin inompisa da kasayahan Paskwa mga Diw da- binilin da magwisik daya sa mga sakbawan balay para ayaw bonoon ag anghil Anonopo da mga onga panganay mga kaapoan laki Israil. 29 Panawen din sa kora mag-isarig sa Diyos ba kaipay da mga kaapoan laki Israil sa dagat nag-awit Mapola sa wala:a sapa. Ngani maraw pomorba omipay da mga taga Ihipto ba kora ba nangalimes. 30 Panawen sa mag-isarig da mga taga Israil ba naranggas da mga dalingding sa goraan Hiriko maraw kora naribok pito ka aldaw. 31 Panawen sa iya mag-isarig sa Diyos bayi Rahab, ag babayi talandi, ba nawed binono kaanggat ag mga masowayen sa Diyos, panawen iya angasan gidte tomabang ag mga tiktik. 32 Ako batay dapo dia toloy? Nawed:da sibay da odas para naay panoltolon da para sa kora Gidyon, Barak, Samson, Hipti, Dabid, Samwil da- para sa mga tagabarita ibat sa Diyos. 33 Panawen sa kora mag-isarig sa Diyos kora kadaeg mga kahadian; kora mamanawen mataldeng da- tomabang mga pinangako Diyos sa kora. Kora pinateem da mga bibi liyon, 34 bomono ag magbalangabang apoy da- naribri sa pisaw. Kora ba nawed maeyat ngani kora ba pinakan Diyos kapangyadihan, kora ba magilasik sa labanan da- kora mandaeg mga armi mga taga Roma ka lopa. 35 Panawen sa kora mag-isarig sa Diyos ba pinaoli sa mga babayi da kora mga nangatay sa kora biniyag:gakay. Da Roma ba pinahidapan anggan natay da- dayo bal-anan, para katabang ag labi dapo piya ka biyag sa odas kora biniyag:gakay. 36 Maki kay linibak, hinaplit, ginapos da- piniriso. 37 Kora ba nagpamato anggan natay da- linagadi papotol, da- binono sa pisaw. Kora ba magkadangan kayno saan da- da kora ngani nagsool ba mga balat topa da- kambing. Kora ba hikawos da- pinahidapan da- winal-an gidte koyinta, 38 kayno wala katepeng sa kora sa paranawan. Kora ba maggaragara sa mga poro nawed apirmihan iraya da- kabogsoran. Kora ba magpamataw sa mga leyang da- mga lobot lopa. 39 Panawen sa kora mag-isarig, kora ba kinaangasan gidte Diyos. Kayno amba ba nawed kora tinabang da pinangako, 40 panawen da Diyos ba maki lalo dapo maganda ka pakana para sa tamo-para tamo boo ba anggat-anggat ba batay pinasibay.
1 Kaya ganyang tamo ba nagkaaparibokan maoson gidte ka mga sistigo, tamo sikwayen da nakayman ka kasolangbed da- da kadaetan magbegkel sa tamo da- tamo toloy:yani magdalaganan anggan, sa dalaganen tamo nagropang. 2 Sa tamo magdalaganan ba tamo magserey gidte sa laki Hisos. Sa konin omibat da- batay pinasibay da tamo Pag-isarig. Panawen sa kaangasan konin nagpanyaan ba iya ba mag-agwanta sa kodos da- konin winala koyinta da kakayaan naba, da- mona ba iya magtongka sa kanan tongkaan Diyos. 3 Koyo gidte remremen no kaomaning da konin inagwanta ag iya ba linabanan mga makadaetan, para koyo nawed alognoyan da- manhina da remrem. 4 Sa koyo aglaban sa kadaetan ba koyo nawed dapo maglaban anggan sa tomro da daya. 5 Koyo:wa dia alingwanan da mga tokawanan pampaeyat sa koyo remrem ag sinabi Diyos panawen koyo ba konin mga onga amba, Naay onga, ayaw komo agwalaen koyinta da agpataldeng Panginoon sa komo, da- ayaw manhina da remrem no kawo ba konin nagsabiyan, 6 panawen nagpataldeng Panginoon da konin mga nagpalayaw, da- konin nagbabala da konin nag-awit konin onga. Naba:a ngani. 7 Koyo agwantahen da boo makay ag magpataldeng sai ka apang. Naba gidte da magpakilala amba koyo konin mga onga. Tawa pag onga da nawed tinaldeng konin apang? 8 No koyo ba nawed pinataldeng makay ag konin onga gidte ba koyo ba nawed gidte konin onga no nawed ba makay onga sa kalonya. 9 Poyida saba ba tamo nagpataldeng tamo mga apang sa lawas onggang, da- panawen saba ba kora tamo naggalang. Nawed ma lalo kailangan tamo pasangato sa Diyos ag tamo Apang sa soksokowan para tamo nagkabiyag? 10 Sa nawed maagot ka odas tamo nagtaldeng tamo mga apang toltol sa kora amba piya gidte. Ngani tamo kay ba nagtaldeng Diyos para sa tamo kapiyaanan para tamo ba batay banal makay din iya. 11 Sa odas tamo nagtaldeng ba tamo nawed nagkaangasan no nawed ba nagkaalognoyan. Ngani no kadalan kay naba ba tamo batay kadanas kaginhawahan ag bokar sai ka mataldeng ka biyag. 12 Kaya koyo paeyaten da koyo mga mahina ka alima, da- mga toor magpanartaroy 13 da- koyo taldengen da koyo kadang para da paa makay ketet ba nawed toloy ketet no nawed ba pomiya. 14 Koyo sikapen mamiyag maki kaginhawahan sa boo iraya da- magpakabanal, panawen da iya wala kabanalan ba nawed batay akitan da Panginoon. 15 Koyo dahanan ayaw paawakan tawa man da palayaw Diyos; ayaw disin maki sa koyo makay sai ka wakat mapait gidte sombok da- batay agpadaet sa Roma. 16 Koyo magdahan ayaw maki sa koyo magpangalonya kayno nawed aggalang sa Diyos makay laki Isaw, ag pomalit sa sai ka bao pamangnen konin parongaw panawen sa iya ba panganay. 17 Koyo amatangan maraw kalbas ba konin inay-ayan sa konin apang da konin disin parongaw ngani iya ba sinikway panawen nawed:da konin batay abago-bago da konin pinanawen kayno:wa iya magpirit da- magpanangis. 18 Nawed:da koyo pabali sa bogsor abaya apegel, sa apoy agbalangabang, sa mongit-mongit kadeleman, sa maghagohak koaya, 19 sa mag-alengan beet bodyong da- sa sai ka magtokawanan. Maraw arngeyan mga taga Israil da tokawanan Diyos naba ba kora inateet gidte empet:tani da magtokawanan sa kora, 20 panawen nawed kora akayanan agwantahen da bilin amba, Kayno da sai ka hayop ba no lomaed sa bogsor ba kailangan batowen anggan natay. 21 Kapangirabot:ta gidte da kora apatpaan kaya laki din Moysis ba magsabi amba, Ako magpanartaroy sa kaliman. 22 Ngani koyo kay ba pabali:yani sa bogsor nag-awit Sion, da- sa goraan lakol ag Diyos biyagan, naba da Hirosalim sa soksokowan, ag sata da mga ragsa ka anghil. 23 Koyo pabali:yani sa masaya ka magrimpon, sa rimponan mga makay panganay Diyos ag mga maki ngaran nasorat sa soksokowan. Koyo pabali:yani sa Diyos ag anhohosay sa boo da- sa mga ispirito mga iraya pinasibay:ya Diyos. 24 Koyo pabali:ya din sa laki Hisos ag inabaya bayo ka kasaiyan Diyos, da- sa daya konin binobo ag makaparosan dapo sa daya laki Abil. 25 Kaya koyo ayaw magdayo magpakarngey sa magtokawanan. Panawen no da dayo pakarngey sa tomokawanan sa kora towa sa lopa ba nawed kaalas sa padosa ba lalo dapo tamo no tamo dayo pakarngey sa tokawanan ibat sa soksokowan. 26 Panawen sa konin tokawanan ba yomoyoan da lopa. Ngani mona konin nagpangako amba, Kasai dapo naay batay yinoyo, nawed ngani da lopa no nawed ba anggan ag langit. 27 Da mga tokawanan "Kasai dapo" ba magpaban-aw gidte amba batay inalis da mga rinarang abaya yoyoon para mamirmi ag mga nakayman nawed abaya yoyoon. 28 Kaya tamo magpasalamat sa Diyos panawen tamo nagtabang da sai ka kahadian nawed abaya yoyoon. Tamo sambahen da Diyos sa sai ka padaan kaangas gidte sa konin, da alabet sabiyen ba maki galang da- maki kaliman, 29 panawen da tamo Diyos ba makay apoy angangareng.
1 Koyo toloy:yani sa magpalayawan sa sai-sai makay ag kailangan sa mga talkakaan sa laki Kiristo. 2 Layen koyo tabangen da mga manalyowan. Maki:ya mamanawen naba da- kora natabang da mga anghil nawed kora amatangan. 3 Koyo magremrem sa mga nagkapiriso makay koyo ba nagkapiriso din kora kaanggat. Amba din da mga nagpahidapan makay koyo ba nagpahidapan din kora kaanggat. 4 Ayaw agwalaen koyinta boo da magpal-isawa. Bagay sa talsawa da maki gidte kasaiyan panawen batay pinadosahan Diyos da magtaban da- da magpangalonya. 5 Koyo ayaw makay magpanraying sa kwarta, no nawed ba koyo angasan:na sa nakayman sa koyo, panawen sinabi Diyos amba, Koyo nawed gidte naay batay inogonan kayno pinabayaan. Naba: a ngani. 6 Kaya tamo batay gidte asabi maki kapihohan amba, Da Panginoon da magtolong sa naay kaya ako nawed batay aliman. Nakay da batay apanawen sa naay mga iraya? Naba:a ngani. 7 Koyo remremen da mga mamahala sa koyo ag mangadar Tokawanan Diyos sa koyo. Koyo remremen no omaning kora mamiyag anggan kora natay da- koyo tomolad sa kora pag-isarig sa Diyos. 8 Laki Hisos Kiristo ba nawed gidte magbago ibat sa kadalan da- mona da- kaagoton man. 9 Koyo ayaw paranggot sa Roma-Roma ka pasoli ka todo. Piya no koyo paonayen da koyo remrem sa palayaw Diyos, da- nawed sa magtoltol sa mga bilin para sa pamangnen ag wala pakinabang sa mga magtoltol saba. 10 Sa tamo sambahan ba tamo maki taboy nawed abaya namangan ag mga magpamanawen sa sambahan mga Diw. 11 Da daya mga hayop ba nagbaba ag koyay lakol magpamanawen para sa Diyos sa rado banal gidte dag-on-dag-on para taboy sa mga kadaetan, ngani da lawas ag mga binono ba nag-areng sa lowas kora pamatawanan. 12 Amba kay din laki Hisos ba natay sa lowas goraan lakol para konin apabanal da mga iraya sa konin daya. 13 Kaya tamo makay paraoy sa konin sa lowas pamatawanan da- tamo ba makisai sa kakayaan konin sinalaket. 14 Panawen tamo ba wala pirmi ka goraan towa sa lopa ngani tamo nagsarak da goraan batay rateng. 15 Kaya panawen sa laki Hisos ba tamo boo odas magtaboy hayin magpodi sa Diyos-naba ba taboy tamo bibi magsabi iya da Panginoon. 16 Koyo layen gidte magpamanawen piya da- magtolong sa Roma, panawen naba da taboy kaangas-angas sa Diyos. 17 Koyo tomoltol da- pasangato sa mga magpamahala sa koyo. Koyo ba layen gidte kora nag-alagaan ganyang kora ba batay manoltol sa Diyos doma no omaning kora timped da kora katongkolan. No kora batay koyo tinoltol ba kora batay angasan magteped sa kora katongkolan. No nawed ba batay marongkot mamanawen da- wala batay pakinabang sa koyo. 18 Ayaw empet magdarangin para sa yamen. Yamen apiho malinis da yamen poso, da- yamen nag-alabet mamiyag piya sa boo yamen biyag. 19 Naay gidte nag-ateet koyo magdarangin para ako agad:dakay kaparaoy sa koyo. 20 Da Diyos ag kataboy kaginhawahan da- bomiyag:gakay sa tamo Panginoon Hisos, ag iya da tagaalaga gidte mga topa panawen sa konin daya binobo ag magpaonay sa kasaiyan pinanawen Diyos wala arasan ba 21 taboyon ngani- sa koyo da boo piya koyo kailangan para apanawen da konin kaliyagan. Da- konin ngani-papanawenen sa laki Hisos Kiristo da makaangas sa konin sa tamo biyag. Palakolon ngani- laki Kiristo kaagoton man. Amba:a ngani-. 22 Naay nag-ateet sa koyo, mga arian sa laki Hisos, koyo mag-agwanta sa magpakarngey sa naay mga nangadar pampaeyat sa koyo pag-isarig, panawen kabeste ngani kay da naay sorat tiya. 23 Naay alabet koyo amatangan kabal-an:nani sa piriso tamo arian laki Timotiyo, da- no iya agad rateng ba iya naay batay kaanggat magparaoy saba sa koyo. 24 Koyo tanongon sa mga magpamahala sa koyo da- sa boo mga arian sa laki Hisos amba, Makay kay nakay koyo saba? Koyo ba nagtanong mga arian sa lopa Italya amba, Makay kay nakay koyo saba? 25 Sa koyo ngani- boo da palayaw Diyos.
1 Ako laki Tiyago, tagoanggat Diyos da- Panginoon Hisos Kiristo, da magtanong sa koyo mga hinidang manambolat sa Roma-Roma ka poro amba, Makay nakay koyo saba? 2 Naay mga arian sa laki Hisos, koyo angasan gidte no koyo magdanas Roma-Roma kay ka porba, 3 panawen da porba koyo pag-isarig ba naba da batay magpatiyaga sa koyo. 4 Kaya kailangan koyo magpakatiyaga anggan sa arasan para koyo semker gidte da- wala korang. 5 Ngani no korang kadonongan da tawa man sa koyo ba iya kailangan omay-ay sa Diyos da- iya batay pinakan; panawen da Diyos ba ananaboy gidte da- nawed gidte mag-ayaw. 6 Ngani da mag-ay-ay ba omay-ay maki gidte pag-isarig sa Diyos da- ayaw ag-alingangaan. Panawen da mag-alingangaan ba makay baniraw dagat nagsabokay koaya kayno saan dako. 7 Ayaw mag-asa batay tomabang nakayman ibat sa Panginoon da iraya magbago-bago da remrem da- nawed amatangan no nakay da konin gidte alabet. 9 Kailangan magmalapodi da mahidapen ka arian sa laki Hisos sa iya nagpaatatas Diyos, 10 da- da makaron-an kay ka arian sa iya nagpaababa Diyos, panawen da mga makaron-an ba batay nakras makay botakan gamasen. 11 Da gamasen ba nagkalayo da- nabatad sa nagsingkalan aldaw; nagkaragas da konin mga botakan da- nagkawala:a da konin ganda. Amba kay din, da makaron-an ba batay natay sa tenga konin mga kaabarahan. 12 Angasan da iraya magtionay anggan sa porba panawen kalbas:sa iya pinorbahan ba konin batay tinabang da biyag gidte wala arasan, naba da taboy pinangako Diyos sa mga magpalayaw gidte sa konin. 13 Da iya magdanas porba ba ayaw agsabiyen amba iya ba nagtogso Diyos. Panawen da Diyos ba nawed atogso daet da- nawed kay konin nagtogso da tawa man. 14 Ngani da iraya ba nagkatogso no iya naranggot da- naabel konin daet ka alabet. 15 No da iraya ba naranggot:tani daet ka alabet ba da batay bokar ba kadaetan, da- da kadaetan kay ba no lakol:lani ba batay mamokar katayan. 16 Koyo ayaw batay nadaya tawa man, naay mga nagpalayaw arian sa laki Hisos. 17 Da tayma piya da- sibay gidte ka taboy ba ibat sa soksokowan, ibat sa Aponin mga kapawaan, ag nawed gidte magbago. Tamo nawed konin nag-ogonan da- nawed din nagpabayaan sa delem. 18 Konin gidte kaliyagan ba sa konin tokawanan totoo ba tamo ba konin rinarang. 19 Koyo gidte remremen, naay mga nagpalayaw arian! Kailangan koyo boo ba kamatang gidte agpakarngey, magdahan sa agtokawanan da- nawed agad nagkaabaisan. 20 Panawen da iraya nagkaabaisan ba nawed kapaban-aw kataldengan Diyos sa konin biyag. 21 Kaya koyo benglayen da koyo madomi ka panawen da- alisen da mga daet ka asal da- tabangen maki malomanay ka remrem da tokawanan natanem sa koyo poso-naba da batay karibri sa koyo. 22 Kaya koyo mamiyag toltol gidte sa tokawanan Diyos. Panawen no koyo ngani nagpakarngeyan da- nawed kay nagpanawen ba koyo ngani nagdaya da koyo sadiri. 23 Panawen da magpakarngey ngani tokawanan da- nawed kay nagpanawen ba makay sai ka iraya paloba sa salamin 24 da- omalis kalbas akitan da konin sadiri. Agad alingwanan no makay nakay iya. 25 Ngani da iya mag-oninaw gidte sa sibay gidte ka Bilin, ag magbal-an sa iraya, da- toloy panawenen, da- da iya magpakarngey da- no kalbas ba nawed alingwanan, ba da iraya naba ba batay pinarongawan Diyos sa boo konin nagpanawen. 26 No da sai ka iraya ba magremrem amba iya piya gidte ka mag-isarig ngani nawed kay magdahan sa konin nagsabi, konin ngani nagdaya konin sadiri da- wala kaparosan da iya layen te magsamba. 27 Ngani da nagtolongan da mga olila da- da mga babayi balo sa kora kahidapan, da- nagdahanan da sadiri ayaw amansahan ibat sa paranawan tiya, ba naba gidte da piya da- magpaangas ka magsamba sa ban-aw Diyos Apang.
1 Mga arian sa laki Hisos, makay tamo ag maki pag-isarig sa tamo makapangyadihan ka Panginoon Hisos Kiristo, ba ayaw tamo magpatabi iraya. 2 Halimbawa, maki semled sa koyo karimponan sai ka iraya maki singsing ginto da- maki golanit maganda, da- sai kay ka mahidapen tatap:pa tayian da golanit. 3 No koyo nag-asikaso piya da iraya maki maganda ka golanit da- koyo nagsabi sa konin amba, Tiya da pili ka tongkaan para sa komo! da- koyo kay nagsabi sa mahidapen amba, Kawo saba:a ngani patindeg! No nawed ba, Towa sa basagan kawo tomongka sa naay dako paa! 4 Nawed ma koyo ba magpatabi:ya iraya da- maghosga maki daet ka remrem? 5 Koyo gidte pakarngeyan, mga naay nagpalayaw arian! Hinidang Diyos da mga mahidapen sa paranawan para kora kay makaron-an sa pag-isarig da- para maki eray sa kahadian konin pinangako sa mga magpalayaw sa konin. 6 Ngani koyo nagwala koyinta da mahidapen! Nawed ma koyo ba nagpahidapan ag mga makaron-an? Nawed ma kora da maggaladgad sa koyo sa hosayan? 7 Nawed ma kora din naglaes da ngaran tinaboy Diyos sa koyo, ag kailangan disin galangen? 8 No koyo nagteped gidte da Bilin Diyos ag maghadi sa tamo, ag nagkabasa sa Banal ka Kasoratan amba, Komo palayawen da komo kapowa makay din komo sadiri, ba piya da koyo nagpanawen. 9 Ngani no nawed pariho da koyo nagpanawen sa iraya ba koyo ba maki:ya kadaetan da- toltol sa Bilin kailangan koyo padosahan makay masowayen sa Bilin. 10 Da magsabi amba iya magteped sa Bilin ngani nawed kay magteped sa sai te ka eray naba ba nawed din iya magteped sa boo Bilin. 11 Panawen da magsabi amba, Kawo ayaw magpangalonya ba iya din da magsabi amba, Kawo ayaw magpamono. No kawo nawed magpangalonya, ngani magpamono kay, kawo nawed din magteped sa Bilin. 12 Kaya koyo agtokawanan da- mamanawen makay ag mga batay hinosay Diyos toltol sa Bilin magribri sa kora. 13 Panawen da hosay Diyos ba wala kayawtean sata sa iraya wala Pinaban-Aw kayawtean. Da- da kayawtean ba batay mandaeg sa hosgahan. 14 Mga arian sa laki Hisos, nakay da pakinabang sai ka iraya magsabi amba iya maki pag-isarig sa Diyos ngani nawed kay konin nagpatonayan sa konin nagpanawen? Iya dia batay naribri no makay naba da konin pag-isarig? 15 Halimbawa : koyo arian kayno lalaki kayno babayi ba wala asool da- wala pamangnen. 16 No da sai sa koyo ba magsabi sa kora amba, Koyo kay parongawan Diyos. Koyo mag-islen da- magpakabsoy! Naba:a ngani. Ngani nawed kay konin nagpakan kora kailangan ba wala gidte din kaparosan naba! 17 Amba kay din, makay natay da pag-isarig wala kaanggat panawen. 18 Abaya maki magsabi amba, Kawo maki pag-isarig da- ako kay ba maki panawen. Naay kay tebag ba amba, Komo patonayan sa naay da komo pag-isarig sa wala kaanggat panawen, naay kay batay pinatonay sa komo da naay pag-isarig sa maki kaanggat panawen. 19 Kawo magpaniwala amba sai ngani ka Diyos. Nawed ma piya nga naba! Kayno da mga daet ka ispirito ba magpaniwala din da- magpanartaroy dapo. 20 Kawo nawed kamatangen! Komo dapo dia alabet naay patonayan sa komo amba wala kaparosan da pag-isarig wala kaanggat panawen? 21 Nawed ma ag tamo pangapoan laki Abraham ba binilang mataldeng sa konin pinanawen maraw konin tinaboy konin onga laki Isaak sa arengan? 22 Saba ba komo amatangan mal-anggat da pag-isarig da- panawen, da- sibay gidte da konin pag-isarig sa iya maki panawen. 23 Natped da nagsabi Banal ka Kasoratan amba, Laki Abraham ba misarig gidte da- panawen saba, iya ba nabilang mataldeng. Kaya da Diyos ba pomatwag sa konin amba, Naay abyan laki Abraham. 24 Saba tamo amatangan binilang mataldeng da sai ka iraya sa iya magpanawen, nawed sa iya mag-isarig ngani. 25 Amba kay din bayi Rahab pag babayi talandi ba binilang din mataldeng sa iya magpanawen, panawen konin tinabang da mga tiktik taga Israil da- konin dapo tindo sa sida- wa da Roma ka dalan para sidawa kadalagan. 26 No omaning da lawas wala ispirito ba natay, amba kay din da pag-isarig wala panawen ba natay din.
1 Mga arian sa laki Hisos, ayaw tagatodo da maoson sa koyo, ganyang koyo amatangan yamen mga tagatodo ba batay hinosga labi dapo mahigpit sa Roma. 2 Tamo boo ba layen te nagkasala. Da iya nawed tang magtokawanan daet ba da iraya naba ba sibay gidte da- mapigilen gidte sa sadiri. 3 No pinalagyan lobid da orong anwang ba naba ba abaya napatoltol kayno saan da tamo alabet. 4 Amba kay din da pad dawong. Kayno naba ba lakol gidte da- nagsikway maeyat ka koaya ba naba ba nagkapiri sa sai ka ibente ka timon saan man alabet ag arayis. 5 Amba kay din da dila iraya. Ibente te ka eray lawas ngani lakol da nagkapanawen kapalawlawan. Koyo:wa ngani remremen! Da malapad ka kamalwakan ba abaya paragaraen sa ibente ka apoy. 6 Da dila ba makay sai ka apoy, makay paranawan naghadian kadaetan, magpadomi sa boo tamo pagkairaya da- nagtebed apoy ibat sa kapadosahan wala arasan da boo nagsigara iraya. 7 Da boo kalasi hayop, ibon, otan da- isda ba apaamo da- napaamo:ani iraya. 8 Ngani wala kapaamo sa dila. Naba ba daet gidte da- nawed akayanan apigil, kapno lala batay katay. 9 Naba da tamo naggamit sa magpodi sa tamo Panginoon da- Apang da- naba din da tamo naggamit sa magpanompa sa iraya rinarang kaladawan Diyos. 10 Sa sai ngani ka bibi ag-ibat da magpodi da- magpanompa. Mga arian, naba ba nawed abaya mangyadi! 11 Magbokbokal dia sa sai ngani ka toboran da sapa matab-ang da- maalat? 12 Mga arian, nawed gidte batay mamokar da kalang-a sa poon oloy kayno da oloy sa poon abokado. Nawed din magbokbokal sa toboran matab-ang da sapa maalat. 13 Tawa sa koyo da madonong da- kamatangen? Konin paban-awen da konin kadonongan sa iya magpamiyag mataldeng maki ababa ka remrem, bokar konin kadonongan. 14 Ngani no da maghadi sa koyo poso ba amagan, daet ka remrem da- makasadiri alabet ba koyo ayaw agpamanawen daet laban sa katotohanan sa koyo magpalawlaw sa koyo madonong. 15 Nawed ibat sa Diyos da kadonongan naba no nawed ba ibat sa paranawan, da- makasadiri da- ibat sa aponin kadaetan. 16 Panawen no saan maghadi da amagan da- makasadiri alabet ba sata din maghadi da kagolohan da- da boo kalasi daet ka panawen. 17 Ngani da maki kadonongan ibat sa Diyos ba magpamokar malinis ka pamiyag, da- angasan gidte sa kaginhawahan, malomanay, matoltolon, makayawteen gidte da- sibay gidte sa magpamanawen piya, wala nagpatabi da- nawed magpasoli. 18 Kataldengan da batay inani ag mga maggawa kasaiyan omasik para sa kaginhawahan.
1 Nakay da ibatan koyo magpalbaisan da- maglabanan? Nawed ma da koyo mga daet ka alabet da maglaban sa koyo mga remrem? 2 Koyo maki gidte nag-alabet ngani nawed koyo nagkatabang. Kaya koyo handa bomono iraya. Koyo ba amagan, ngani nawed koyo agaro da koyo alabet. Kaya koyo magpalbaisan da- maglabanan. Nawed koyo nagkatabang da koyo alabet panawen koyo ba nawed mag-ay-ay sa Diyos. 3 Da- kayno koyo omay-ay ba wala din koyo nagkatabang panawen nawed koyo omay-ay piya. Da koyo nag-ay-ayan ba para ngani sa koyo sadiri daet ka alabet. 4 Koyo mga nawed matepeden sa Diyos! Nawed ma koyo amatangan no koyo kaabyan paranawan ba koyo kay kalaban Diyos? Kaya da iya alabet kaabyan paranawan ba kalaban kay Diyos. 5 Kaaram koyo amba wala kaparosan da nagkasorat sa Banal ka Kasoratan amba, Maimbolowen da Diyos para sa ispirito konin tinaboy sa tamo para mamiyag. 6 Ngani labi dapo maeyat da kapiyaanan remrem nagtaboy sa tamo. Panawen da sabi sa Banal ka Kasoratan ba amba, Da Diyos ba magsarongat sa mga mapalaw-law, ngani magparongaw kay sa mga magpakaababa da remrem. 7 Kaya ngani-, koyo pasangato sa Diyos, da- koyo sarongaten da aponin kadaetan da- iya batay domalagan sa koyo. 8 Koyo pabali sa Diyos da- iya kay ba batay pabali sa koyo. Koyo linisen da koyo mga alima, koyo ag mga makadaetan! Koyo linisen da koyo poso, koyo ag maki darwa ka nagremrem. 9 Koyo kailangan marongkot da- magpanangis da- mag-orasik. Koyo palitan agpanangis da koyo agpatawa, da- rongkot da koyo kaangasan. 10 Koyo magpakaababa sa ropangan Diyos da- koyo batay konin pinaatatas. 11 Naay mga arian sa laki Hisos, koyo ayaw magpaypolaan sa sai-sai. Da iya magpamola sa konin arian ba magpamola sa Bilin da- da iya maghosga sa konin arian ba maghosga din sa Bilin. No kawo maghosga sa Bilin ba kawo ba nawed:da tagateped sa Bilin no nawed ba sai ka tagahosga. 12 Sai ngani da tomaboy Bilin da- iya din da Tagahosga. Iya ngani da maki kapangyadihan agribri da- agsopo. Ngani kawo kay, tawa kay kawo para pomola sa komo kapowa? 13 Koyo gidte pakarngeyan, koyo mga agsabi amba, Mona, kayno girabas yamen batay paraoy sata kayno sa nakay pag goraan, da- sai ka dag-on batay magpamataw sata da- batay magligosyo da- batay kaban-aw maoson. 14 Nawed kay koyo amatangan da batay mangyadi sa koyo sa girabas aldaw! Panawen da koyo biyag ba makay ribobo agad maglowas da- agad din nagkawala. 15 Amba disin da kailangan koyo sabiyen, No naba da kaliyagan Panginoon ba yamen batay dapo biyagan da- yamen batay pinanawen naba. 16 Ngani mona ba koyo agpalawlaw sa koyo batay pinanawen. Daet naba! 17 Kaya da iya kamatang ag piya kailangan konin panawenen da- nawed kay nagpanawen naba ba maki kadaetan.
1 Koyo gidte pakarngeyan tiya, koyo ag mga makaron-an! Koyo kailangan mamagpanangis da- mamagpakongkong panawen sa mga kahidapan batay rateng sa koyo. 2 Rokas:sani da koyo pad karon-an da- namangan:na bangkoka da koyo mga golanit. 3 Kinarawang:ngani da koyo pad ginto da- pilak, da- da karawang din naba da patonayan laban sa koyo da- makay apoy batay temebed koyo ener. Koyo pinaoson da mga karon-an para sa mga paoriyan aldaw. 4 Koyo gidte pakarngeyan! Magpango laban sa koyo da mga kabayadan nawed koyo tinaboy sa mga omani koyo parayan. Arngeyan:na Diyos, ag Panginoon Makapangyadihan sa boo, da mga takap ag mga omani koyo dinaya! 5 Koyo ararakan da- mamiyag sa kasyagan towa sa paranawan. Koyo pinataba da koyo sadiri makay mga hayop batay binono. 6 Koyo hinosgahan da- nagpamono da mga mataldeng. Nawed kora aglaban sa koyo. 7 Kaya ngani-, naay mga arian sa laki Hisos ba koyo magtiyaga anggan sa bait da Panginoon. Koyo ban-awan da an-aalaman. Boo tiyaga gidte konin nagpanyaan da mahalaga gidte ka bokar konin tinanem sa konin alamanan, da- da monaan da- da tangboan odan. 8 Kailangan din koyo magtiyaga. Magpakaonay koyo remrem, panawen bali:ya te batay towa da Panginoon. 9 Koyo ayaw agdiklamo sa sai-sai, mga arian, para koyo ayaw hinosay Diyos panawen bali:ya te batay towa da Tagahosga. 10 Naay mga arian, koyo tomolad sa mga tagabarita tomokawanan sa ngaran Panginoon. Boo gidte tiyaga kora omagwanta kahidapan. 11 Tamo nagsabi amba angasan da mga matiyaga. Koyo:wa arngeyan da para sa omagwanta laki Hob, da- da pinanawen Panginoon sa konin kalbas iya omagwanta, panawen da Diyos ba makayawteen gidte da- mapalayaw. 12 Ngani labi sa boo, naay mga arian, ayaw:wa koyo manompa sa koyo magpangako. Ayaw koyo agsabiyen amba, Naay sistigo da langit, kayno lopa, e kayno nakayman. No hee ba sibay:ya koyo sabiyen, hee, da- no nawed ba sibay:ya koyo sabiyen nawed, para koyo nawed hinosga Diyos. 13 Maki dia kahidapan da tawa man sa koyo? Iya magdarangin. Maki dia iraya asyagan? Iya omigway papodi sa Diyos. 14 Maki dia maki sakit sa koyo? Konin paparaoyon da mga koyay sa rimponan para iya ba da- ranginen da- pairan langis sa ngaran Panginoon. 15 Da- batay pinapiya da maki maskit panawen sa darangin maki pag-isarig. Iya batay binangon Panginoon, da- batay pinatawad no iya maki kadaetan. 16 Kaya ngani-, koyo sisiyen sa sai-sai da koyo mga kadaetan da- daranginen da sai-sai para koyo pomiya. Lakol da nag-kaapanawen da darangin sai ka iraya mataldeng. 17 Laki Iliyas ba iraya din makay tamo. Iya domarangin gidte amba ayaw omodan da- sa tatlo ka dag-on da- anim ka bolan ba nawed nga omodan. 18 Maraw kalbas naba ba iya domarangin:nakay da- omodan:nakay ngani-, da- mamokar:rakay da mga alaman. 19 Naay mga arian sa laki Hisos, no da tawa man sa koyo ba napaalas sa katotohanan da- napaoli:akay tawa man, 20 koyo gidte remremen! Da iya kapaoli sa sai ka makadaetan ibat sa nawed raoy ka biyag ba magribri ag gisarem naba sa katayan, da- sa makay naba ba nabaraw da maoson ka kadaetan.
1 Ako laki Pidro, pinili sogoan laki Hisos Kiristo, da magsorat sa mga hinidang Diyos, pag mga magpangalat da- manalyowan ag magpamataw sa Roma-Roma ka looban, sa mga Ponto, Galasiya, Kapadosya, Asiya da- Bitinya. 2 Koyo ba hinidang Diyos Apang toltol sa konin kaamatangan ibat dapo sa monaan para koyo ba pabanalen Ispirito Banal, para matoltolon koyo sa laki Hisos Kiristo da- malinis sa kapangyadihan konin daya. Sa koyo:wa ngani- da parongaw da- kaginhawahan anggan kapno mga naba da koyo biyag. 3 Tamo podiyen da Diyos ag Apang tamo Panginoon Hisos Kiristo. Panawen sa konin lakol ka kayawtean sa tamo, tamo ba inonga sa sai ka bayo:wakay ka biyag sa kapangyadihan Diyos pag bomiyag:gakay sa laki Hisos Kiristo. Pag bayo ka biyag naba da tomaboy sa tamo sai ka piho ka sarig, 4 da- tamo batay inamele da sai ka mana pag nawed nagkasida, boo gayed da- nawed batay naoraw. Naba ba nagdahanan sata sa soksokowan para sa koyo. 5 Panawen koyo mag-isarig ba koyo ba nagdahanan kapangyadihan Diyos anggan koyo dapo nagpanyaan da karibriyan pag batay Pinaban-Aw sa mga paoriyan ka dag-on. 6 Kaaram koyo batay dapo domanas pag Roma-Roma ka kalasi kahida- pan sa nawed naw maagot ka odas, kayno man da mga naba ba bagay magpaangas sa koyo. 7 Da ginto, pag abaya nasida, ba nagpadalan sa apoy para amatangan no wala:a domi. Amba kay din, da koyo pag-isarig pag lalo dapo mahalaga sa ginto, ba nagpadalan sa mga kahidapan para amatangan no totoo gidte. Sa makay naba koyo ba batay pinodi, pinalakol da- pinagalang sa aldaw laki Hisos Kiristo ba batay paban-aw. 8 Iya ba nawed tang koyo akitan, kayno amba ba koyo:wa pinalayaw. Nawed dapo din koyo nagkaakitan iya anggan mona, ngani koyo mag-isarig:ga sa konin. Panawen saba ba da kasyagan pag nawed abaya papawaen sa tokawanan ba magsorbak sa koyo mga remrem, 9 panawen koyo:wa nagtabang da bokar koyo pag-isarig, naba da koyo karibriyan. 10 Para sa karibriyan naba, mada- han gidte tomanong da- somarak da mga tagabarita ibat sa Diyos para sa taboy tiya pag batay tomaboy Diyos sa koyo. 11 Kora tinanong gidte para amatangan no kaomaning kaagot da- no omaning tiya ba batay mangyadi. Naba pag odas naba da tinodyo Ispirito laki Kiristo pag sa kora, pag monaan konin sinabi sa kora da mga kahidapan batay inagwanta laki Kiristo da- da kalakolan pag konin batay tinabang. 12 Pag pinapawa sa kora da mga katotohanan tiya ba pinaaram Diyos sa kora amba da kora nagpanawen ba para sa koyo pakinabang da- nawed sa kora sadiri. Da mga katotohanan tiya ba koyo:wani arngeyan ibat sa mga tagapangadar Pirmida ka Barita para sa laki Kiristo. Kora ba mangadar sa koyo sa kapangyadihan Ispirito Banal pag pinaparaoy ibat sa soksokowan. Kayno mga anghil sa soksokowan ba alabet:ta gidte kora amatangan da mga katotohanan naba. 13 Kaya koyo handaen da koyo mga remrem. Koyo magpakaonay da- mag-sarig gidte sa parongaw koyo batay inamele sa odas laki Hisos Kiristo ba batay paban-aw. 14 Makay mga matoltolon ka onga, koyo toltolon da Diyos da- ayaw:wani da mga daet ka alabet lawas makay pag koyo pinanawen pag koyo wala dapo kaamatangan gidte. 15 No nawed ba koyo magpakabanal sa nakayman koyo nagpanawen makay din da Diyos pag homidang sa koyo ba banal, 16 toltol sa nagkasorat sa Banal ka Kasoratan amba, Koyo magpakabanal panawen ako ba banal. Naba:a ngani. 17 Da Diyos ba wala nagpatabi, ngani iya maghosga mataldeng da tayma sai toltol sa konin mga pinanawen. Da- panawen da Diyos ba koyo nag-awit Apang, iya ba koyo galangen anggan koyo nagkabiyag towa sa paranawan. 18 Koyo amatangan no kayo da panbos sa koyo ibat sa wala kaparosan ka pamiyag pag koyo minana sa koyo mga pangapoan. Da panbos sa koyo ba nawed mga nakayman nagkasida da- nagkaoraw makay ginto kayno pilak, 19 no nawed ba da mahalaga ka daya laki Kiristo, pag nabobo pag iya ba ginasta makay sai ka Topa te pag wala korang da- wala kasidaan. 20 Iya ba hinidang Diyos bayo dapo rinarang da paranawan, da- para ngani- sa koyo kapiyaanan iya ba Pinaban-Aw mona sa mga paoriyan dag-on. 21 Panawen sa laki Kiristo koyo ba mag-isarig sa Diyos pag bomiyag:gakay da- pomalakol sa konin, para da koyo pag-isarig ba sa Diyos da- da koyo sarig ba maonay. 22 Panawen sa koyo magtoltol sa katotohanan para sa laki Kiristo ba koyo ba lininis da koyo sadiri, da- da magpalayawan gidte makay talkakaan sa laki Kiristo da maghadi:ani sa koyo. Kaya koyo magpalayawan gidte sa sai-sai ibat sa boo remrem. 23 Panawen koyo ba inonga:akay nawed sa mga iraya pag maki katayan, no nawed ba sa Diyos pag wala katayan da- sa kapangyadihan pag biyagan da- wala arasan Tokawanan Diyos. 24 Toltol sa nagkasorat sa Banal ka Kasoratan amba, Da boo iraya ba makay gamasen, Makay pag botakan gamasen da boo kora kagandahan. Da gamasen ba nagkalayo da- da botakan ba nagkakras, 25 ngani da Tokawanan Panginoon ba nawed batay nawala anggan kadomaen. Naba:a ngani. Tiya da Pirmida ka Barita pag pinangadar sa koyo.
1 Kaya ngani- koyo:wa benglayen da boo mga kadaetan-da boo panawen magdaya, magpasoli, amagan, magpanida podi. 2 Makay din mga polahan bayo pinreg koyo layen asesen:na gidte sa yatas bagay sa ispirito da- wala kaliog daet para koyo lomakol sa pag-isarig anggan koyo atabang da boo karibriyan. 3 Panawen makay pag nagsabi sa Banal ka Kasoratan amba, Koyo:wa adimdiman da kapiyaanan Panginoon. Naba:a ngani. 4 Koyo pabali sa laki Kiristo. Iya:ani da toar maeyat, inimbanda mga iraya, ngani hinidang Diyos da- mahalaga gidte sa konin. 5 Koyo din ba makay mga toar maeyat para koyo ba mga eray olian Diyos. Da- makay mga tagapamanawen binokod para sa Diyos, koyo magtaboy sa Diyos pag mga taboy bagay sa ispirito, ag kaangas-angas sa Diyos panawen sa laki Hisos Kiristo. 6 Panawen nagsabi sa Banal ka Kasoratan amba, Koyo gidte pakarngeyan! Naay naglobo sa goraan lakol Sion-naba ba sa Hirosalim- Da sai ka arigi maonay sa sorokan, hinidang da- mahalaga, Nawed batay magpakaya sa tawa man iraya mag-isarig sa konin. Naba:a ngani. 7 Kaya ngani- tiya pag arigi ba mahalaga sa koyo mga mag-isarig. Ngani sa mga nawed mag-isarig totoo da nagsabi Banal ka Kasoratan amba, Da toar inimbanda mga maglobo balay Ba naba da batay arigi maonay sa sorokan. Naba:a ngani. 8 Da- amba, Batay makay bato kasongkoan Da- bato batay katwangan mga iraya. Naba:a ngani. Kora ba asongko panawen kora nawed tomoltol sa Tokawanan Diyos. Naba gidte da hinanda para sa kora. 9 Ngani koyo kay ba sai ka kairayaan pinili Diyos. Makay din sa mga tagapamanawen sa lakol ka balay Diyos koyo ba magpamanawen para sa sai ka hadi. Koyo ba sai ka lasyon binokod para sa Diyos. Koyo ba pinili Diyos para koyo ba konin:na sadiri da- para koyo ba magpaban-aw pag katakataka ka panawen Diyos pag pomili sa koyo ibat sa kadeleman paparaoy sa konin kapanggilalas ka kapawaan. 10 Narwaan koyo ba lain kairayaan Diyos, ngani mona kay ba koyo ba konin:na pinili para koyo konin:na sadiri kairayaan. Narwaan ba koyo ba nawed tomabang konin kayawtean, ngani mona koyo ba konin kinayawtean. 11 Naay mga nagpalayaw arian, naay nag-aringi sa koyo, makay mga manalyowan magpamatawan sa paranawan tiya, koyo:wa ogonan da mga daet ka alabet lawas pag maglaban sa koyo ispirito. 12 Koyo mamiyag mataldeng sa ban-aw mga nawed mag-isarig sa Panginoon, para kayno kaaram mona ba koyo kora nagpatoonan amba daet, kora batay magpodi sa Diyos sa aldaw batay:ya bait laki Kiristo, panawen kora akitan da koyo piya ka panawen. 13 Para ngani- sa Panginoon, koyo magpasangato sa boo maki kapangyadihan sa lasyon, lalo sa pinagkakoyay panawen iya da atatas gidte sa boo maki kapangyadihan. 14 Koyo magpasangato din sa mga gobirnador pag mga sogo pinagkakoyay para kora ba magpadosa sa mga magpamanawen daet da- para kora ba magpalakol sa mga magpamanawen piya. 15 Panawen da alabet Diyos ba da koyo piya ka nagpamanawen ba magpaepet sa mga nagsabi mga bongog panawen sa kora katolingagan. 16 Koyo ba bal-an:nani. Ayaw koyo remremen koyo abaya mamanawen daet panawen koyo ba bal-an, no nawed ba koyo mamiyag piya makay mga tagapamanawen Diyos. 17 Koyo kay galangen da boo iraya da- palayawen da mga talkakaan sa laki Kiristo. Koyo mamiyag maki kaliman magpamanawen daet laban sa Diyos da- maki galang sa pinagkakoyay. 18 Mga sosoy, koyo galangen da- toltolon da koyo mga amboy-amboyan, nawed ngani da mga mabait da- da mga piya no nawed ba anggan da mga nawed piya. 19 Panawen nagkaangasenan Diyos no koyo nawed magdiklamo sa padosa koyo nag-agwanta sa koyo wala nagpanawen daet no koyo amatangan tiya da alabet Diyos. 20 Da iya mag-agwanta padosa no sa magpamanawen ngani daet kayno iya nawed magdiklamo ba nawed abaya iya malapodiyen. Ngani no koyo nawed magdiklamo sa mag-agwanta padosa panawen sa koyo pinanawen piya ba koyo batay kinaangasan Diyos. 21 Sa makay din naba koyo ba hinidang Diyos, panawen laki Kiristo din ba mag-agwanta kahidapan panawen ngani sa koyo da- koyo ba konin pinakan kahalimbawa pag bagay gidte koyo toladan. 22 Iya ba nawed mamanawen kayno nakayman ka kadaetan, nawed gidte din mamosli. 23 Pag iya minoda ba iya ba nawed gomanti. Pag iya ba pinahidapan ba iya nawed din manlimo, no nawed ba iya ba manarig gidte sa Diyos pag mataldeng gidte maghosga. 24 Sa natay laki Kiristo sa kodos ba konin binaba sa konin lawas da boo kabyatan tamo kadaetan para toloy:ya gidte tamo:wa ogonan da magpamanawen daet da- mamiyag toltol sa alabet Diyos. Koyo ba pomiya panawen ngani sa konin mga golat. 25 Narwaan koyo ba mangiya-iya makay mga topa nalingo sa dalan, ngani mona ba koyo tinipon:nakay pag Pastor da- Tagaalaga koyo mga gisarem.
1 Amba kay din, koyo mga babayi, koyo magpasangato sa koyo pad sawa, para no tawa man sa kora ba nawed dapo mag-isarig sa Tokawanan Diyos ba kora batay din naranggot sa mag-isarig panawen sa koyo piya ka nagpanawen, da- sa kora akitan da koyo magalang da- malinis ka biyag, kayno koyo nawed magpapawa pag Tokawanan Diyos sa kora. 3 Da koyo kagandahan ba ayaw sa nagkaakitan ngani mata makay sa kaayosan koyo obok da- sa magsool pamada, salabay da- maganda ka bado. 4 Nawed gira amba, koyo paosonon da ganda mag-ibat sa galem gidte poso, ag ganda nawed tay napra ibat sa maamo da- malomanay ka ispirito. Naba ba mahalaga gidte sa ban-aw Diyos. 5 Sa monaan dapo mga dag-on, naba din da kagandahan pinaoson pag mga babayi amomodi gidte da- mag-isarig sa Diyos. Kora din magpasangato sa kora sadiri sawa, 6 makay din ag pinanawen bayi Sara. Konin tinoltol da konin sawa laki Abraham da- iya konin nag-awit Koyay. Da- mona koyo makay din mga onga bayi Sara no koyo ba mamanawen mataldeng da- wala kalimanan nakayman. 7 Koyo kay, mga lalaki, koyo kay pakoanggatan piya da koyo pad sawa. Kailangan koyo remremen amba nawed makay lalaki da kora akayanan, kaya kora koyo galangen panawen kora ba koyo kaanggat sa maki kapangyadihan tabangen biyag gidte wala arasan pag tinaboy Diyos. No amba ba wala batay hadang sa koyo darangin. 8 Tiya dapo da naay tay sinabi sa koyo boo amba, Koyo maki kasaiyan, magremrem piya sa damdamen sai-sai. Koyo magpalayawan makay talkakaan, da- alomanahen da- ababa da remrem. 9 Da iya mamanawen daet sa koyo ba ayaw koyo paggantiyan daet. Da magmoda sa koyo ba ayaw koyo modahen. Nawed gira amba, koyo kay daranginen para kora ba parongawan Diyos. Panawen koyo ba pinili Diyos para tomabang pag konin parongaw. 10 Toltol sa nagkasorat sa Banal ka Kasoratan amba, Da iya maki alabet magpalayaw sa biyag da- batay kaban-aw ginhawa ka biyag, ba ayaw:wa magtokawanan daet da- epeten da magpamosli. 11 Iya paadayo sa tayma daet ka panawen, da- mamanawen piya. Da- konin saraken anggan wala arasan da maki kaginhawahan. 12 Panawen nagdahanan Panginoon da mga mataldeng Da- konin arngeyan da kora mga darangin Ngani da Diyos ba maglaban sa boo magpamanawen daet. Naba:a ngani. 13 No da koyo nag-alabet gidte ba layen kataldengan ba tawa kay da batay kapadaet sa koyo? 14 Ngani kayno koyo mag-agwanta panawen sa koyo magpamanawen piya, maparongaw dapo din koyo. Koyo ayaw aliman sa kora mga panlimo da- koyo ayaw alingangaan da koyo remrem. 15 Koyo galangen sa koyo poso laki Kiristo da- gawen iya da Panginoon. Koyo layen handa magpapawa sa tawa man batay magtanong sa koyo para sa nag-asahan koyo boo. 16 Ngani koyo ba malomanay da- magalang sa koyo magpapawa. Kailangan layen malinis da koyo ispirito para no kora akitan da koyo piya ka nagpanawen ba naba da magpakaya sa mga magmoda da- ananawan sa koyo piya ka nagpanawen, panawen koyo ba mga tagapamanawen laki Kiristo. 17 No da alabet Diyos ba koyo mag-agwanta kahidapan panawen sa koyo piya ka panawen, lalo:a piya naba sa koyo mag-agwanta kahidapan panawen sa koyo daet ka panawen. 18 Laki Kiristo da natay kasai ngani para sa kadaetan mga iraya, pag wala gidte kadaetan kahalang sa mga makadaetan, para koyo ba konin apaloba sa Diyos. Da konin lawas onggang ba binono, ngani iya ba biniyag:gakay toltol sa ispirito. 19 Kalbas sa makay tiya, konin pinaraoyan da- nangadaran da mga ispirito nagkapiriso. 20 Naba da mga ispirito dayo tomoltol pag kora nagpanyaan gidte Diyos sa mga dag-on tangona laki Noyi sa boo dag-on konin naggawa da dawong. Sa galem pag dawong naba ba nawed naw maoson ka iraya, naba ba walo ngani, da naribri panawen sa lakol ka sapa. 21 Da sapa naba ba ladawan baotismo pag magribri mona sa koyo. Da baotismo ba nawed pag maglinis sa lebag sa lawas, no nawed ba sai ka pangako sa Diyos ibat sa sai ka iraya maki malinis ka ispirito. Sa koyo nagbaotismohan koyo ba nagribri kapangyadihan pag bomiyag:gakay sa laki Hisos Kiristo, 22 pag pomaraoy sa soksokowan da- mona iya ba magtongka sa kapet dako kanan Diyos. Iya maghadi sata sa mga anghil da- sa mga kapoonan da- kapangyadihan sa kalaw-awan.
1 Laki Kiristo ba mag-agwanta kahidapan sa konin biyag towa sa paranawan. Kaya ngani-, koyo din ba kailangan handa da koyo remrem para mag-agwanta. Panawen da iya mag-agwanta kahidapan sa konin biyag towa sa paranawan ba pomaawak:kani sa magpamanawen daet, 2 para aldaw da- madlem anggan iya ba biyagan towa sa paranawan ba iya batay mamiyag toltol sa alabet Diyos da- nawed:dani toltol sa mga daet ka alabet lawas. 3 Sibay:yani da mga kalawey dag-on da- aldaw koyo sinida sa magpamanawen pag mga nakayman nag-alabet mga nawed mag-isarig sa laki Kiristo-mga kakayaan, mga daet ka alabet lawas, mga maglasing, mga labis ka kasyagan makaparanawan, mga magbarikan da- kapangemres ka magsamba sa mga nawed gidte Diyos. 4 Kora ba magtaka gidte no kaytang mona nawed:dani koyo mag-anggat sa kora wala sanggahan ka pamiyag, kaya koyo ba kora nagdaet. 5 Ngani kora din da batay magsabi sa Diyos pag handa maghosga sa mga biyagan dapo da- sa mga nangatay:yani para sa mga naba. 6 Kaya pinangadar din da Pirmida ka Barita sa mga nangatay:yani para kora din ba kapamiyag sa Ispirito makay sa Diyos, kayno sa lawas ba kora hinosga makay din ag boo iraya. 7 Bali:yani da arasan boo nakayman. Kaya koyo mapigilen sa sadiri da- layen mapawa da remrem para koyo kadarangin. 8 Labi sa boo ba kailangan layen koyo magpalayawan gidte, panawen da maki kapalayawan ba magpatawad sa maoson ka kadaetan. 9 Ayaw mabyat da koyo remrem sa magtabang sa mga arian. 10 Para koyo ba mga piya ka tagaasikaso mga Roma-Roma ka taboy Diyos ba kailangan da tayma sai sa koyo ba gamiten para sa kapiyaanan boo mga mag-isarig da akayanan tinaboy sa konin. 11 No da tawa man ba tagapangadar ba konin pangadaren da Tokawanan Diyos. No da tawa man ba tagapamanawen ba konin gamiten sa magpamanawen da eyat tinaboy Diyos sa konin, para da Diyos da batay pinodi sa boo nakayman, panawen sa laki Kiristo Hisos. Sa konin ngani- da kapangyadihan da- kalakolan anggan kaagoton man. Amba:a ngani-. 12 Naay mga nagpalayaw arian, ayaw koyo magtaka para sa mabyat ka porba pag koyo nagdanas da- ayaw magremrem amba kapanggilalas da porba naba. 13 No nawed ba, koyo angasan sa maki eray sa mga kahidapan laki Kiristo para labi dapo da koyo kaangasan sa odas batay Pinaban-Aw da konin kalakolan. 14 Koyo angasan no koyo ba dinaet panawen koyo ba mag-isarig sa laki Kiristo, panawen sa koyo da Ispirito gidte kalakolan, naba ba da Ispirito Diyos. 15 Sa koyo batay inagwanta kahidapan ba ayaw tiya ba panawen koyo ba agbono iraya, magpanakaw, magpamanawen daet da- magpakiaram sa panawen Roma. 16 Ngani ayaw akayaan da tawa man no iya ba pinadosahan panawen sa iya mag-isarig sa laki Kiristo, no nawed gira iya ba magpasalamat sa Diyos panawen iya ba kilala gidte iya ba sai ka mag-isarig sa laki Kiristo. 17 Rateng:ngani da odas maghosga da- da monaan batay hinosgahan ba da mga hinidang Diyos. No sa tamo batay omompisa da maghosga, nakay dia da batay mangyadi sa mga nawed magtoltol sa Pirmida ka Barita Diyos? 18 Makay pag nagsabi sa Banal ka Kasoratan amba, No da mga mataldeng ba badya:a ngani nawed aribri, Nakay dia da batay nangyadi sa mga makadaetan Da- sa mga nawed kilala sa Diyos? Naba:a ngani. 19 Kaya da mga mag-agwanta kahidapan toltol sa kaliyagan Diyos ba kailangan magpamanawen piya da- mag-intiriga da kora sadiri sa Tagararang pag layen magpamanawen pag konin mga pangako.
1 Ako maki aringi sa mga koyay sa koyo mga rimponan mga mag-isarig. Ako kay din ba sai ka koyay sa rimponan. Naay:ya amatangan da mga kahidapan inagwanta laki Kiristo da- ako kay ba batay kaeray sa kalakolan pag batay Pinaban-Aw. 2 Da naay nag-aringi ba amba, Koyo alagaan da barkadahan pag inintiriga Diyos sa koyo. Poonan tiya sa alabet da- nawed sa lopod ngani panawen naba da alabet Diyos. Koyo panawenen da nagpapanawen sa koyo, ayaw sa asesen kwarta no nawed ba sa masipag sa magpamanawen para sa mga Roma. 3 Nawed abaya koyo ba makay tagasogo sa koyo kasakopan no nawed ba koyo ba toladan koyo mga nag-alagaan. 4 Da- no batay towa da Poon Pastor ba koyo batay tomabang ag sai ka taboy sa koyo piya ka magkoyay: pag taboy naba ba nawed batay nasida anggan kaagoton man. 5 Da- koyo kay, mga onga dapo, koyo pasagalem sa mga koyay. Koyo boo ba magpakaababa da- magpaytolongan sa sai-sai, toltol sa nagkasorat sa Banal ka Kasoratan amba, Naghadangan Diyos da mga magpaatatas sa sadiri Ngani konin nagtaboyan kapiyaanan da mga ababa da remrem. Naba:a ngani. 6 Kaya ngani-, koyo magpakaababa da- magpasagalem sa kapangyadihan Diyos da- koyo batay konin pinaatatas sa odas konin batay pinili. 7 Koyo intirigahen sa Diyos da boo koyo mga kahidapan sa remrem panawen iya da mag-alaga sa koyo. 8 Koyo mapigilen sa sadiri da- magbantay. Da koyo kalaban laki Satanas ba makay din pag hayop liyon magpan-ongal, magkadang-kadang magsarak konin batay hinabhab. 9 Iya koyo:wa hadangan maki maonay ka pag-isarig sa Diyos. Koyo din amatangan nawed ngani koyo da mag-agwanta pag makay naba ka kahidapan, no nawed ba pati da koyo mga arian sa boo paranawan. 10 Kalbas koyo kaagwanta kaagot te ka kahidapan, da Diyos pag ibatan boo parongaw ba iya da batay magtaboy sa koyo kabooan, kaonayan, kaeyatan, da- sai ka maonay ka sarigan pag nawed tay aleblebey. Iya din da homidang sa koyo para koyo kaeray sa konin wala arasan ka kalakolan sa koyo maki kasaiyan sa laki Kiristo. 11 Sa konin ngani- da kapangyadihan kaagoton man. Amba:a ngani-. 12 Koyo ba naay sinoratan sa tolong laki Silbano, sai ka tamo arian pag naay gidte nagkaasarigan. Sa tiya pag kabeste te ka sorat ba naay alabet paeyaten da koyo remrem da- naay din nagsabi amba, Pag naay sinorat ba para gidte sa totoo ka taboy Diyos. Kaya koyo magpakaonay saba. 13 Koyo ba nagtanong mga arian sa Babilonya amba, Makay kay nakay koyo saba? Kora ba mga hinidang Diyos makay din koyo. Koyo ba nagtanong din laki Markos pag naay palayaw ka onga sa pag-isarig. 14 Mga kaarianan sa laki Kiristo, koyo magtanongan maki palayaw sa sai-sai. Da kaginhawahan ba sa koyo boo ngani- pag mga maki kasaiyan sa laki Kiristo.
1 Ako laki Simon Pidro, tagoanggat da- pinili sogoan laki Hisos Kiristo da magsorat sa koyo ag makay yamen ba tomabang sai ngani ka mahalaga ka pag-isarig ibat sa tamo Diyos da- Tagaribri laki Hisos Kiristo toltol sa konin kataldengan. 2 Koyo kapno ngani- parongaw da- kaginhawahan panawen sa koyo magkilala sa Diyos da- sa tamo Panginoon Hisos. 3 Da kapangyadihan Diyos ba tomaboy sa tamo ag boo tamo kailangan para tamo mamiyag piya da- banal. Tiya ba panawen sa tamo magkilala sa laki Hisos, da- iya din da pomili sa tamo para tamo ba maki eray sa konin kalakolan da- kapiyaanan. 4 Sa makay naba ka padaan konin:nani tinaboy sa tamo da konin mga makapangyadihan da- mahalaga ka pangako para koyo kaalas sa ka-rokasan sa paranawan, bokar daet ka alabet lawas, da- para koyo ba maki batay eray sa konin pagka Diyos. 5 Panawen tiya, koyo sikapen sa koyo pag-isarig ba dagdagen da kapiyaanan, sa kapiyaanan ba dagdagen da kaamatangan, 6 sa kaamatangan ba dagdagen da pagpigil sa sadiri, sa pagpigil sa sadiri ba dagdagen da kaonayan, sa kaonayan ba dagdagen da kataldengan, 7 sa kataldengan ba dagdagen da piya sa arian, sa piya sa arian ba dagdagen da palayaw. 8 Panawen no koyo maki makay naba ka mga ogali sa koyo biyag da- koyo paosonon da mga naba, ba nawed batay wala kaparosan da- nawed batay wala kapakinabangan da koyo kilala sa tamo Panginoon Hisos Kiristo. 9 Da tawa man wala makay naba ka mga ogali sa konin biyag ba kolabo da remrem da- nawed kaban-aw sa adayo. Konin:na alingwanan amba iya ba lininis:sani sa konin mga kadaetan. 10 Mga arian, koyo sikapen paban-awen gidte sa koyo biyag amba koyo ba pinili da- hinidang Diyos. No amba da koyo batay pinanawen ba koyo nawed:da gidte batay apasimang da koyo biyag. 11 Kaya piho gidte sa wala arasan ka kahadian tamo Panginoon da- Tagaribri, wala Roma no nawed ba laki Hisos Kiristo. 12 Kayno koyo:wa amatangan ag mga naay aray sinorat da- koyo ba maonay sa totoo koyo:wa tinabang, amba man layen koyo ba naay batay nagparemreman para sa mga naba. 13 Sa naay remrem ba piya no anggan ako nagkabiyag ba koyo ba naay paremremen para sa mga naba. 14 Naay amatangan nawed:da tay maagot da naay biyag towa sa paranawan, toltol sa Pinaban-Aw:wani sa naay tamo Panginoon Hisos Kiristo. 15 Kaya naay batay pinanawen da boo naay akayanan para kayno ako doma ba natay:yani, koyo dapo din layen batay aremreman da mga nakayman naba. 16 Ag yamen pinaaram sa koyo para sa makapangyadihan rateng tamo Panginoon Hisos Kiristo, ba nawed yamen ginamit da mga panoltolon maras ngani mga iraya, no nawed ba yamen gidte akitan yamen sadiri mata da konin kalakolan, 17 panawen konin tinabang galang da- kapodiyan ibat sa Diyos Apang da- maki din arngeyan tokawanan mag-ibat sa soksokowan amba, Tiya da naay gidte nagpalayaw Onga, naay gidte kaangasan. Naba:a ngani. 18 Yamen gidte arngeyan da mga tokawanan naba mag-ibat sa kangawayan panawen yamen ba konin kaanggat sa banal ka bogsor. 19 Kaya kay lalo dapo omonay da yamen paniwala sa mga tinokawanan mga tagabarita ibat sa Diyos. Piya gidte sa koyo no layen koyo nagremrem tiya panawen tiya ba makay sai ka solo- magrawa sa poro kadeleman anggan sa nagkaomaga da aldaw batay:yakay towa da Panginoon da- da rawa ag tala sa omaga gidte ba Romawa sa koyo poso. 20 Labi sa boo, koyo gidte remremen amba wala tawa man iraya batay kapapawa nakayman kabarita binarita mga tagabarita ibat sa Diyos sa Banal ka Kasoratan ibat sa konin sadiri akayanan. 21 Panawen rateng da barita ibat sa Diyos nawed sa alabet iraya kaagot man, no nawed ba da mga iraya ba tomokawanan ibat sa Diyos, kora ba pinaremrem Ispirito Banal.
1 Lomwas:sani sa lasyon Israil da mga boslien ka tagabarita da- sa koyo din ba maki batay lomwas da mga boslien ka tagatodo. Koyo ba kora batay inaboso sa kora magtodo mga nawed raoy ka adar ag batay kasida sa koyo pag-isarig. Kora batay tinanggiyan da Panginoon ag tombos sa kora, kaya kora:a din da makay mag-ay-ay para agad padosahan da kora sadiri. 2 Da- maoson ka iraya da batay tomolad sa kora kakaya-kaya ka panawen, da- panawen sa kora pinanawen daet ba nawed batay ginalang da dalan katotohanan. 3 Da mga boslien ka tagatodo ba angangaken, kaya koyo ba kora batay dinaya sa kora nawed raoy ka todo para kora ba taboyan kwarta. Maagot:tani handa da kapadosahan para sa kora da- agpanya dapo. Da Anonopo sa kora ba nawed nagkakalek. 4 Koyo gidte remremen, nawed pinatawad Diyos da mga anghil ag pomanawen daet, no nawed ba kora ba konin binenglay sa kalaleman wala toko da- tinagikaraan sa kadeleman para sata panyaan da aldaw batay hinosga. 5 Koyo dapo remremen, nawed din pinatawad Diyos da mga iraya sa paranawan ag odas laki Noyi, ngani konin pinababa da oyaw sa mga makadaetan da- kora ba konin simpo. Ngani laki Noyi ag tagapangadar kataldengan da rinibri Diyos da- pito dapo ka iraya da konin kaanggat. 6 Koyo dapo remremen hinosga Diyos da mga goraan lakol Sodoma da- Gomora sa kora batay simpo kaya konin inareng anggan inabowa-nan. Da nangyadi sa kora ba sai ka halimbawa sa batay rateng sa mga magpamiyag sa kadaetan. 7 Koyo dapo remremen, ngani rinibri Diyos laki Lot ag mataldeng. Nagkaabotogan gidte da konin remrem panawen sa mga madomi ka panawen mga iraya makadaetan. 8 Panawen da kora nagpanawen daet ag nagkaakitan da- nagkaarngeyan ag mataldeng ka iraya naba ag iya magpamataw anggat sa kora ba nagkahidapan gidte da konin mataldeng ka remrem aldaw-aldaw. 9 Amatangan Panginoon no omaning konin batay rinibri ibat sa mga porba da mga mataldeng ka iraya, da- no omaning konin batay pinadosahan da mga daet ka iraya ag konin nagban-tayan anggan sa aldaw kora batay hinosgahan. 10 Tiya gidte da piho batay aratnganan da mga magtoltol sa mga daet ka alabet lawas da- da mga dayo komilala sa tawa man maki kapangyadihan. Wala gidte hadang da- malawlaw da mga boslien ka tagatodo naba. Kora nawed aliman magpawala galang ag boo mga piya ka maki kapangyadihan sa kangawayan da- agpola sa kora. 11 Ngani da mga anghil kayno makapangyadihan dapo sa mga boslien ka tagatodo naba ba nawed kora magtokawanan kabaisan magsombong laban sa kora sa ropangan Panginoon. 12 Ag mga boslien ka tagatodo naba ba makay mga mabangis ka hayop ag wala remrem, inonga para abelen da- bonoon. Kora magtokawanan daet kayno para sa mga nakayman ag nawed kora amatangan, kaya makay mga mabangis ka hayop ba kora din batay simpo. 13 Kora batay pinahida- pan makay bayad sa kora pomahidap sa Roma. Da kora gidte kasyagan ba magpamanawen kapangemres ka kasyagan kayno aldaw. Kora ba kakaya gidte da- kasidaan podi sa koyo pakoanggat tayma kora ba akitan agpasaro sa koyo agpamangan panawen da kora kasyagan ba naba da magdaya sa koyo. 14 Layen agpanla-pad da kora mga mata. Kora ba wala epet sa magpamanawen daet. Kora nagranggot sa magpamanawen daet da mga nawed maonay da remrem. Kora ba biyasa gidte sa magpangaken. Kora ba mga sa galem sompa Diyos. 15 Kora inogonan da mataldeng ka dalan da- nalingo:wa kora, da- kora nagtoltol da dalan dinalanan laki Balaam onga laki Bior, ag alabet gidte sa makay opa sa konin kabalikoan. 16 Ngani iya ba sinabiyan konin nagsakyan asno panawen sa konin kadaetan. Kayno nawed madonong magtokawanan da asno ba iya ba tomokawanan makay din iraya para laki Balaam ag tagabarita ba paepeten sa konin katolingagan. 17 Ag mga boslien ka tagatodo naba ba makay mga bokalan naikat:tani, makay mga altikook nagpalid koaya. Hinanda:ani Diyos para sa kora sai ka poro sa kadeleman gidte. 18 Kora agpalawlaw gidte sa magtokawanan katarengtengan. Kora nagpolaw da daet ka alabet lawas para da mga badya:a ngani dapo kapaadayo sa mga iraya mamiyag sa kabarokawitan ba kaalabet paoli sa kadaetan. 19 Kayno kora ba agtokawanan amba wala gidte batay hadang sa mamanawen daet, ba kora sadiri ba tagoanggat kabalikoan. Saba gidte akitan amba totoo da iraya ba tagoanggat nakayman magdaeg sa konin. 20 No kaalas:sani sa kadaetan paranawan da mga iraya komilala sa laki Hisos Kiristo tamo Panginoon da- Tagaribri, ngani kalbas no kora ba alabet:takay sa monaan daet ka panawen da- nadaeg mga naba ba da kora biyag ba labi dapo daet sa monaan. 21 Piya dapo da nawed tang kora amatangan da dalan kataldengan, sa kora kay amatangan:nani da- kalbas ba kora inogonan da banal ka bilin ag inintiriga Diyos sa kora. 22 No amba da nangyadi ba bagay gidte sa kora da kasabiyan amba, Da ido ba namangan:nakay da konin aray sinoka. Naba:a ngani. da- da sai:yakay ka kasabiyan amba, Da malawen ka baboy kayno inoyasan ba batay:yakay sa konin panleglegedan. Naba:a ngani.
1 Mga nagpalayaw, tiya da naay ikadarwa ka sorat sa koyo. Sa darwa ka sorat tiya naay sinarak paremremen sa koyo da mga nakayman naba para polawen sa koyo da malinis ka remrem. 2 Da naay alabet ba layen koyo remremen da mga tinokawanan mga banal ka tagabarita tangona dapo da- da bilin tamo Panginoon da- Tagaribri ag tindo mga pinili sogoan sa koyo. 3 Monaan sa boo, kailangan gidte koyo amatangan amba sa mga paoriyan aldaw batay:ya rateng ba batay bait mga iraya magtoltol sa kora sadiri mga daet ka alabet lawas. Kora batay magpola sa koyo 4 amba, Agpangako kono laki Kiristo amba iya batay:yakay towa. Saan iya mona? Nangatay da tamo mga pangapoan ngani wala dapo din kaRomahan ibat sa rinarang da paranawan tiya. Naba:a ngani. 5 Sadya kora naglingo da totoo amba, Da ibatan da langit da- lopa ba rinarang Diyos sa kapangyadihan konin Tokawanan. Da lopa ba rinarang Diyos ibat sa sapa da- sa tenga din sapa. 6 Da sapa din naba da pinabaha sa paranawan da- sompo sa mga biyagan sa boo paranawan. 7 Sa kapangyadihan din Tokawanan Diyos tiya, da langit da- lopa ba nagdahanan para arengen sa odas batay rateng da aldaw da Diyos ba batay maghosga da- magpadosa sa mga daet ka iraya. 8 Mga nagpalayaw, ayaw alingwanan da totoo amba, Sa Panginoon da sai ka aldaw ba makay din sai ka ribo ka dag-on, da- da sai ka ribo ka dag-on ba makay din sai ka aldaw. 9 Da Panginoon ba nawed agpalya sa konin pinangako makay ag nagremrem mga Roma. Ngani iya maki gidte parowar para sa koyo, panawen iya dayo kayno tawa man ba sa kapadosahan. Da alabet Panginoon ba da boo iraya ba magsisi da- mag-ogon kadaetan. 10 Ngani da batay bait aldaw Panginoon ba makay din pag batay bait da batay manakaw. Sa aldaw naba da kangawayan ba batay nakbes maki beet lakol kalimo. Da aldaw, bolan da- mga magirem ba batay tinalpog lakol ka ibeng apoy da- da lopa kaanggat da boo nakayman sa lopa ba batay naareng. 11 Panawen sa makay naba batay tinalpog da boo nakayman, omaning da kailangan koyo ogali? Kailangan koyo boo ba mamiyag banal da- mataldeng, 12 anggan nawed dapo rateng da aldaw Diyos da- agpanawen para agad rateng da aldaw naba. Sa aldaw naba da kangawayan ba batay tinalpog apoy da- da aldaw, bolan da- mga magirem ba batay tinonaw sa lakol ka ibeng apoy. 13 Ngani toltol sa pinangako Diyos, tamo ba maki nagpanyaan bayo ka langit da- bayo ka lopa ag nagpamatawan kataldengan. 14 Kaya ngani-, mga nagpalayaw, anggan koyo ba magpanya dapo sa mga naba ag batay mangyadi, koyo sikapen mamiyag malinis, boo gayed da- maki kaginhawahan sa ropangan Diyos. 15 Koyo remremen amba kaya maki gidte parowar da Panginoon ba para koyo ba pakanen odas para ribriyen. Naba din da inolbat tamo palayaw arian laki Pablo ag iya somorat sa koyo toltol sa kadonongan tinaboy Diyos sa konin. 16 Sa boo konin sorat para sa totoo tiya ba makay tiya da layen konin nagparemrem. Maki te mga eray sa konin mga sorat ba mahidap amatangan da alabet sabiyen, da- da mga wala amatangan da- da mga nawed maonay ba sadya kora ba magtaboy nawed raoy ka papawa. Amba din da kora nagpanawen sa Roma ka eray Banal ka Kasoratan, da- tiya ba magbokar sa kora sadiri kapadosahan. 17 Mga nagpalayaw arian, mona panawen koyo:wa amatangan da batay mangyadi, koyo kailangan magdahan kaaram koyo batay pinaadayo ag todo mga iraya daet da ogali. Sa makay naba, koyo batay napasway ibat sa koyo maonay ka sarigan. 18 No nawed gira koyo toloy:ya maglakol sa kapiyaanan remrem da- sa kaamatangan para sa tamo Panginoon da- Tagaribri Hisos Kiristo. Sa konin:na da kalakolan mona da- anggan kaagoton man. Amba:a ngani-.
1 Yamen magsorat sa koyo para sa Tokawanan magtaboy biyag gidte. Sa ompisa dapo iya:ani da biyagan. Iya yamen arngeyan da- akitan, amasdan da- akapkapan. 2 Pinaban-Aw da biyag gidte naba, iya ba yamen akitan da- yamen gidte nagsistigo sa koyo. Yamen nagpangadar sa koyo da biyag gidte wala arasan, pag pal-anggat Diyos Apang, kalbas ba Pinaban-Aw sa yamen. 3 Yamen nga nagpaban-aw sa koyo da yamen akitan da- arngeyan, para koyo kasai din sa yamen barkadahan, da- yamen:nani kasai sa Apang da- sa kon Onga laki Hisos Kiristo. 4 Yamen nagsorat tiya para semleb gidte da tam kaangasan. 5 Tiya da yamen arngeyan sa Onga Diyos, da- yamen nagpaban-aw sa koyo-da Diyos ba kapawaan da- wala nakayman kadeleman sa konin. 6 No tamo nagsabi tamo ba maki kasaiyan sa konin, ngani tamo magpamiyag makay sa kadeleman ba tamo ba boslien. Tamo nawed magpamiyag sa katotohanan. 7 Ngani no tamo magpamiyag sa mapawa, no omaning iya ba sa mapawa, ba tamo ba magpal-anggatan, da- da tamo boo kadaetan ba nag-oyasan daya laki Hisos pag Onga Diyos. 8 No tamo nagsabi tamo ba wala kadaetan, tamo nagdaya da tamo sadiri, da- wala sa tamo da katotohanan. 9 No tamo nagsisi da tamo mga kadaetan sa Diyos ba tamo ba batay pinatawad Diyos sa mga naba, da- batay inoyasan sa boo tamo kadaetan, panawen da Diyos ba mataldeng da- batay pinanawen da konin nagsabi. 10 No tamo nagsabi amba tamo nawed mamanawen daet ba tamo maglaban sa Diyos amba boslien da Diyos da- wala sa tamo da konin tokawanan.
1 Naay mga onga, naay nagsorat sa koyo tiya para koyo ayaw magpamanawen daet. Ngani no maki kapamanawen daet da tawa man, tamo maki sai ka tagaawat-wala Roma no nawed laki Hisos Kiristo pag wala daet. 2 Panawen laki Kiristo da taboy Diyos sa katayan para da Diyos ba magpatawad sa tamo mga kadaetan. Nawed ngani sa tamo mga kadaetan no nawed ba sa kadaetan boo iraya. 3 No tamo nagtoltol da konin mga bilin, tamo apiho gidte tamo akilalaan da Diyos. 4 Da magtokawanan amba, Iya naay akilalaan, ngani iya magsimang kay sa mga bilin Diyos ba boslien. Wala sa konin da katotohanan. 5 Ngani da magpamanawen sa Tokawanan Diyos ba semleb gidte da konin palayaw sa Diyos. Makay naba tamo amatangan tamo ba sa konin:nani. 6 Da magtokawanan amba, Ako ba boo odas sa Diyos, ba kailangan iya magpamiyag makay din mamiyag laki Hisos Kiristo. 7 Naay mga nagpalayaw, nawed sai ka bayo ka bilin da naay nagsorat sa koyo, no nawed ba pag monaan ka bilin sa koyo:wani pag monaan dapo koyo arngeyan. Naba ba pag tokawanan yamen:nani tindo sa koyo. 8 Amba man ba makay bayo:wakay ka bilin da naay nagsorat sa koyo. Bayo gidte ka bilin, panawen naawas:sani da kadeleman da- magrawa:ani da kapawaan gidte. Pag katotohanan naba ba sinistigohan sa biyag laki Kiristo, da- nagkaakitan din sa koyo biyag. 9 Da magtokawanan amba, Ako sa mapawa, ngani nagkaabaisan sa konin arian sa pag-isarig ba iya sa kadeleman dapo. 10 Da magpalayaw sa konin arian ba boo odas sa mapawa. Iya wala ogali batay kasolangbed sa mga Roma sa kadaetan. 11 Ngani da nagkaabaisan dapo sa konin arian ba iya sa kadeleman dapo; iya magkadangan dapo sa kadeleman, nawed konin amatangan da konin tay pinaraoyan, panawen sinepet kadeleman. 12 Mga onga, ako ba magsorat sa koyo, panawen pinatawad:dani Diyos da koyo mga kadaetan panawen sa laki Kiristo. 13 Mga koyay, ako ba magsorat sa koyo, panawen koyo akilalaan da ibat sa ompisa dapo ba biyagan. Magsorat din ako sa koyo, koyo mga kaongaan dapo, panawen koyo dinaeg da aponin kadaetan. 14 Mga onga, koyo ba naay sinoratan, panawen koyo akilalaan da Diyos Apang. Mga koyay, koyo naay sinoratan, panawen koyo akilalaan da ibat sa ompisa dapo ba biyagan. Mga kaongaan, koyo naay sinoratan, panawen koyo maeyat dapo, boo odas sa koyo remrem da Tokawanan Diyos, da- koyo dinaeg da aponin kadaetan. 15 Koyo ayaw palayawen da paranawan anggan mga nakayman sa paranawan. Da iya magpalayaw sa paranawan ba nawed magpalayaw sa Diyos Apang. 16 Panawen da boo daet sa paranawan makay da mga magpolaw sa daet ka nag-alabet lawas, da mga magpaalabet sa daet ka nagkaakitan, da- da magpaatatas sa sadiri remrem, da mga makay naba ba nawed ibat sa Diyos Apang, no nawed ba ibat sa paranawan. 17 Panawen da paranawan da- da boo daet sa paranawan pag nag-alabet iraya ba nagkawala, ngani da iya magtoltol sa alabet Diyos ba batay nabiyag kaagoton man. 18 Mga onga, bali:yani da paoriyan odas! Makay pag koyo:wa arngeyan, batay bait da magpasoli amba iya da Kiristo; mona ngani- ba maoson:nani sombok mga magpasoli amba kora da Kiristo, kaya tamo amatangan bali:yani da paoriyan odas. 19 Kayno naba pag mga iraya narwaan ba tamo pal-anggat ba kora nawed gidte sai sa tamo. No kora ba sai gidte sa tamo, ba kora ba baywi dapo disin tamo pal-anggat. Ngani kora ba somway, kaya mapawa:a gidte kora boo ba nawed sai gidte sa tamo. 20 Ngani koyo kay ba pinakan laki Kiristo da Ispirito Banal da- panawen naba ba amatangan koyo boo da katotohanan. 21 Ako magsorat sa koyo, nawed sa nawed koyo amatangan da katotohanan, ngani sa koyo:wa amatangan da katotohanan. Koyo din amatangan wala bosli mag-ibat sa katotohanan. 22 Tawa nga mana da boslien, no nawed ba da iya nawed magpaniwala amba laki Hisos ba iya da Kiristo? Tiya ngani- da Magpasoli Kiristo, pag dayo kilalaen da Diyos Apang da- kon Onga laki Hisos. 23 Da iya dayo magkilala sa Onga Diyos ba nawed din magkilala sa Diyos Apang. Da tawa man magpatonay para sa Onga Diyos ba sa konin din da Diyos Apang. 24 Da koyo arngeyan ibat dapo sa monaan, koyo kay papirmihen sa koyo poso. No koyo gidte papirmihen sa koyo poso da koyo arngeyan ibat dapo sa monaan ba koyo batay mamirmi sa Onga Diyos da- sa Diyos Apang. 25 Da pinangako laki Kiristo sa tamo ba da biyag gidte wala arasan. 26 Da naay nagsorat sa koyo ba para sa mga mag-alabet maglingo sa koyo. 27 Tinaboy:ya Kiristo sa koyo da Ispirito Banal, ag magpamirmi sa koyo kaya koyo nawed kailangan tod-an tawa man. Da Ispirito Banal da magtodo sa koyo sa boo nakayman. Da konin nagtodo amba, Koyo boo odas ba sa laki Kiristo, ba totoo gidte da- nawed kaboslian. 28 Kaya nga, mga onga, tamo boo odas gidte sa konin, para no iya batay:yakay towa batay aginhawahan da tamo remrem da- tamo nawed tay akayaan sa konin sa aldaw naba. 29 No koyo amatangan laki Kiristo ba mataldeng, koyo din amatangan da tayma magpamanawen mataldeng ba onga Diyos.
1 Koyo remremen no kaomaning kakol da palayaw Diyos Apang sa tamo! Tamo konin nag-awit konin mga onga, da- naba da totoo. Kaya tamo nawed akilalaan mga iraya makaparanawan ba panawen nawed kora nagkilala da Diyos. 2 Naay mga nagpalayaw, mona tamo mga onga Diyos, ngani nawed dapo amatangan no tamo batay makay nakay doma. Amba man, tamo amatangan no laki Kiristo ba rateng:ngakay towa, tamo batay makay din iya, panawen tamo batay gidte akitan no makay nakay iya. 3 Kaya da tawa man maki makay tiya pag sarig sa konin ba magpakabanal makay din laki Kiristo ba banal. 4 Da kadaetan ba da magsoway sa mga bilin Diyos kaya da boo magpamanawen daet ba magsoway sa mga bilin Diyos. 5 Koyo amatangan pomaraoy towa laki Kiristo para awasen da tamo mga kadaetan. Koyo din amatangan iya ba wala kadaetan. 6 Kaya da iya boo odas sa laki Kiristo ba nawed:da anggan dapo magpamanawen daet. Da iya anggan dapo magpamanawen daet ba makay nawed batang kaban-aw sa laki Hisos, nawed din iya konin akilalaan. 7 Naay mga onga, koyo ayaw tay nadaya tawa man! Da iya magpamanawen mataldeng ba mataldeng, makay din laki Kiristo. 8 Da iya anggan dapo magpamanawen daet ba sakop dapo laki Satanas, panawen ibat da- po sa monaan ba magpamanawen:na daet laki Satanas. Towa pomaraoy da Onga Diyos para sidaen Da Mga Panawen laki Satanas. 9 Da inonga Diyos Apang ba nawed:da anggan dapo magpamanawen daet, panawen iya maki:ya bayo ka biyag ibat sa Diyos. Panawen da Diyos da kon Apang, iya nawed abaya anggan dapo magpamanawen daet. 10 Sa makay tiya tamo batay akilalaan no tawa da mga onga Diyos, da- no tawa kay da mga onga laki Satanas, da iya nawed magpamanawen mataldeng da- nawed magpalayaw sa konin arian sa pag-isarig ba nawed onga Diyos. 11 Tiya da todo koyo:wa arngeyan ibat dapo sa monaan amba, Tamo magpalayawan. 12 Tamo ba ayaw tay tomolad sa laki Kain; iya ba sakop laki Satanas. Konin binono konin arian. Kaytang? Panawen daet da konin mga panawen, ngani mataldeng kay Da Mga Panawen konin arian. 13 Kaya, mga arian sa laki Hisos, koyo ayaw magtaka no koyo ba nagpamaisan mga taga paranawan. 14 Tamo amatangan tamo ba somalyo:wa sa biyag gidte ibat sa katayan, panawen tamo magpalayaw sa mga arian sa laki Kiristo. Da iya nawed magpalayaw sa konin mga arian ba baywi dapo sa kapangyadihan katayan. 15 Amomono iraya da nagkaabaisan sa konin mga arian. Koyo amatangan da amomono iraya ba wala biyag gidte wala arasan. 16 Sa makay tiya tamo akilalaan da palayaw gidte, tinaboy laki Kiristo da konin biyag anggan sa katayan para sa tamo. Kaya kailangan din tamo taboyon da tamo biyag anggan sa katayan para sa mga arian sa laki Kiristo. 17 Ngani no sai ka iraya maki kay te karon-an sa biyag, da- konin akitan da konin arian ba magkai-langan te tolong, da- nawed konin tinolongan, omaning konin tay asabi iya ba magpalayaw sa Diyos? 18 Mga onga, tamo ba ayaw magpalayawan sa sai-sai sa mga tokawanan ngani, no nawed ba tamo paban-awen da kapalayawan gidte Diyos sa tamo mga panawen. 19 Sa makay naba tamo tay amatangan tamo ba sa Diyos pag totoo gidte, da- batay nawed kamaymayen da tamo remrem sa ropangan Diyos; 20 kayno tamo nagsombong man tamo ispirito ba da Diyos ba labi dapo kamatangen sa tamo ispirito, da- konin amatangan da boo nakayman. 21 Naay mga nagpalayaw, no tamo nawed nagsombong tamo ispirito ba wala kaliman tamo ba kapabali sa Diyos. 22 Tamo nagtabang da nakayman tamo nag-ay-ayan sa konin, panawen tamo nagtoltol da konin mga bilin da- nagpanawen da kapaangas sa konin. 23 Tiya da bilin Diyos amba, Tamo mag-isarig sa laki Hisos Kiristo konin Onga da- tamo magpalayawan, makay pag binilin laki Kiristo sa tamo. 24 Da magtoltol sa mga bilin Diyos ba boo odas ba sa Diyos da- sa konin din da Diyos boo odas. Panawen ngani sa Ispirito Banal konin tinaboy sa tamo, kaya tamo amatangan da Diyos ba boo odas ba sa tamo.
1 Naay mga nagpalayaw, koyo ayaw agad magpaniwala sa tayma ispirito, no nawed ba kora ba koyo dapo porbahan para koyo amatangan no ibat ngani- sa Diyos pag ispirito naba, panawen maoson:na ka magpasoli tagabarita da manra- teng:ngani sa Roma-Roma ka poro sa paranawan. 2 Tiya da tay akilalaan da Ispirito Diyos-da tayma ispirito magsistigo gidte amba, Laki Hisos Kiristo ag Onga Diyos ba pomaraoy towa sa lawas iraya, ba iya da Ispirito Banal ibat sa Diyos. 3 Ngani da ispirito nawed magsistigo gidte amba, Laki Hisos Kiristo ag Onga Diyos ba pomaraoy towa sa lawas iraya, ba nawed ibat sa Diyos, no nawed ba naba da ispirito ag magpasoli Kiristo. Nasabi:ya sa koyo amba naba pag ispirito ba batay bait, da- mona nga ba sa paranawan:nani. 4 Mga onga, koyo ba sa Diyos da- koyo:wa dinaeg da mga magpasoli tagabarita naba, panawen da Ispirito Banal, pag sa koyo ba makapangyadihan dapo sa ispirito sa mga iraya makaparanawan. 5 Kora ba sa paranawan, kaya ibat sa paranawan da kora nagtodo, da- magpanalinga sa kora todo da mga taga paranawan. 6 Ngani tamo ba sa Diyos. Da tawa man magkilala sa Diyos ba magpanalinga sa tamo todo, ngani nawed magpanalinga sa tamo todo da tawa man nawed sa Diyos. Sa makay nga naba tamo akilalaan da ispirito katotohanan da- da ispirito kadaetan. 7 Naay mga nagpalayaw, tamo magpalayawan, panawen ibat sa Diyos da palayaw. Da tayma magpalayaw sa Roma ba onga Diyos da- iya magkilala sa Diyos. 8 Da nawed magpalayaw sa Roma ba nawed magkilala sa Diyos, panawen da Diyos ba mapalayawen. 9 Pinaban-Aw Diyos da konin palayaw sa tamo maraw konin pinaparaoy towa sa paranawan da konin sai ngani ka onga, para tamo maki biyag gidte wala arasan panawen sa konin pinanawen. 10 Tiya da palayaw, nawed sa tamo pinalayaw da Diyos no nawed ba tamo da konin pinalayaw, da- pinaparaoy towa sa paranawan da konin onga para iya ba taboy anggan sa katayan sa batay kapatawad sa tamo mga kadaetan. 11 Naay mga nagpalayaw, panawen kaamba kakol da palayaw Diyos sa tamo, kailangan din tamo magpalayawan. 12 Wala iraya kaban-aw sa Diyos ibat dapo tangona, ngani no tamo magpalayawan ba sa tamo da Diyos da- magsereb gidte sa tamo da konin palayaw. 13 Tamo amatangan tamo ba sa Diyos boo odas, da- iya ba sa tamo boo odas panawen tamo ba konin pinakan konin Ispirito Banal. 14 Yamen akitan da- yamen nagsabi sa koyo amba, Pinaparaoy towa Diyos Apang da konin Onga para Tagaribri mga iraya sa paranawan. 15 Da magsistigo amba laki Hisos da Onga Diyos ba sa Diyos boo odas da- da Diyos ba sa konin boo odas. 16 Tamo amatangan da- nag-isarigan da palayaw Diyos sa tamo. Da Diyos ba mapalayawen. Da iya anggan dapo magpalayaw sa mga kaarianan ba sa Diyos boo odas, da- sa konin kay din da Diyos boo odas. 17 Tamo nawed batay aliman sa aldaw da Diyos ba batay maghosay sa mga iraya, panawen da palayaw Diyos ba magsereb sa tamo, da- panawen tamo ba makay:yani laki Kiristo, kayno tamo towa dapo sa paranawan. 18 Wala kaanggat kaliman da palayaw gidte ibat sa Diyos, panawen nag-awas palayaw ibat sa Diyos da nakayman kaliman. Nawed dapo semreb da palayaw ibat sa Diyos sa ta- wa man nagkaaliman dapo, panawen da kaliman ba maki kapadosahan. 19 Tamo ba magpalayaw sa Diyos panawen da Diyos da monaan poma-layaw sa tamo. 20 Da magtokawanan amba, Naay nagpalayaw da Diyos, da- nagpamaisan kay da konin mga arian ba boslien. No pag konin:na kaarianan konin nagkaakitan ba nawed konin apalayaw, omaning konin tay apalayaw da Diyos pag nawed konin nagkaakitan? 21 Tiya da bilin tinaboy Diyos sa tamo amba, Da iya magpalayaw sa Diyos ba kailangan din konin palayawen da konin mga arian.
1 Da iya mag-isarig amba laki Hisos da Kiristo, ba iya nag-adi onga Diyos; da- da tawa man magpalayaw sa Apang ba magpalayaw sa konin mga onga. 2 Saba tamo batay amatangan tamo magpalayaw sa mga onga Diyos-no tamo nagpalayaw da Diyos da- nagpanawen da konin mga bilin, 3 panawen da magpalayaw gidte sa Diyos ba pag magpamanawen konin mga bilin. Nawed kay mabyat toltolon da konin mga bilin, 4 panawen da boo mga onga Diyos ba kapandaeg sa kapangyadihan kadaetan sa paranawan; da- sa pag-isarig sa Diyos ngani ba tamo kapandaeg sa kapangyadihan naba. 5 Tawa da batay kapandaeg laban sa kapangyadihan kadaetan sa paranawan? Da iya mag-isarig amba laki Hisos da Onga Diyos, iya da batay kapandaeg. 6 Laki Hisos Kiristo da pomaraoy towa sa paranawan, iya ba binao-tismohan sa sapa, da- sa odas iya ba binono sa kodos, konin daya ba binobo. Iya pomaraoy towa nawed ngani sa sapa, no nawed sa sapa da- sa daya. Nagsistigo Ispirito Banal amba, Totoo gidte naba pag darwa, panawen da Ispirito Banal ba katotohanan. 7 Maki tatlo da magsistigo: 8 da Ispirito Banal, da sapa da- da daya; da tatlo ba sai ngani ka sistigo. 9 Tamo magpaniwala sa sistigo mga iraya, ngani lalo gidte maonay da sistigo Diyos, naba da sistigo Diyos para sa konin Onga. 10 Da iya mag-isarig sa Onga Diyos ba magpaniwala sa sistigo naba. Ngani da dayo magpaniwala sa Diyos ba iya maglaban sa Diyos amba boslien da Diyos, panawen iya ba nawed magpaniwala sa sistigo Diyos para sa konin Onga. 11 Tiya da sistigo: tinaboy Diyos sa tamo da biyag gidte wala arasan, ag ibat sa konin Onga laki Hisos. 12 Da nagpamatawan Onga Diyos ba maki biyag gidte wala arasan, ngani da nawed nagpamatawan Onga Diyos ba wala sa konin pag biyag tiya. 13 Naay sinorat sa koyo da mga naba para koyo amatangan amba koyo ag mga mag-isarig sa Onga Diyos ba maki:ya biyag gidte wala arasan. 14 Kaya nawed tamo magpaete pabali sa Diyos, panawen tamo nagkaama-tangan da nakayman tamo ay-ayan sa konin no toltol sa konin alabet, ba tamo konin batay pinakan. 15 da- panawen tamo amatangan tamo ba konin ngani- nagpakarngeyan, tamo din amatangan konin nagtaboy da tamo nag-ay-ayan sa konin. 16 No akitan tawa man da konin sai ka arian ba magpamanawen kadaetan nawed tay katay sa konin gisarem ba konin kay daranginen da arian naba, da- naba ba batay pinakan Diyos bayo ka biyag. Naba ba para sa mga arian da kora kadaetan ba nawed tay katay sa kora gisarem. Maki kadaetan batay katay sa gisarem, da- nawed naay nagsabi amba koyo kay daranginen da tawa man magpamanawen naba. 17 Da boo panawen nawed mataldeng ba kadaetan, ngani maki kadaetan nawed tay katay sa gisarem. 18 Tamo amatangan da mga onga Diyos ba nawed:da anggan dapo magpamanawen daet, panawen kora ba nagdahanan laki Hisos Kiristo da- kora ba nawed abaya padaeten laki Satanas. 19 Tamo amatangan tamo ba mga onga Diyos, da- da boo iraya sa paranawan ba sa kapangyadihan laki Satanas. 20 Tamo din amatangan towa:a pomaraoy da Onga Diyos. Tamo konin pinakan kaamatangan para tamo akilalaan da Diyos gidte, da- tamo ba sa Diyos gidte da- sa konin Onga laki Hisos Kiristo. Iya da Diyos gidte da- da biyag gidte wala arasan. 21 Naay mga onga, koyo paadayo sa mga nawed amba Diyos.
1 Ako da koyay da magsorat sa Inayloman hinidang Diyos da- sa konin mga onga. Koyo naay nagpalayaw gidte, nawed ngani ako da magpalayaw sa koyo no nawed ba da boo kakilala katotohanan, 2 panawen sa katotohanan pag sa tamo mona, da- pag batay sa tamo kaagoton man. 3 Da Diyos Apang da- laki Hisos Kiristo pag konin Onga ba magtaboy ngani- sa tamo rongaw, kayawtean da- kaginhawahan panawen da Diyos ba totoo da- mapalayawen. 4 Ako nagkaangasan:na gidte pag naay akitan da kalaati komo mga onga ba magpamiyag toltol sa katotohanan, makay pag binilin Diyos Apang sa tamo. 5 Mona, Inayloman, ako ba maki tay inateet sa komo. Tamo boo ba magpalayawan. Tiya ba nawed sai ka bayo ka bilin da naay nagsorat sa komo, no nawed ba pag monaan dapo ka bilin, pag monaan dapo ba sa tamo:wani. 6 Tiya da bilin tindo sa koyo pag monaan dapo-koyo magpamiyag toltol sa magpalayaw sa Diyos da- sa mga kaarianan. Da- tiya da alabet sabiyen pag palayaw naay nagsambet amba, Tamo magpamiyag toltol sa mga bilin Diyos. 7 Panawen magrokyab sa paranawan da mga andadaya -mga iraya nawed magsistigo amba, Laki Hisos Kiristo, ag Onga Diyos ba pomaraoy towa sa lawas iraya. Da makay naba ka iraya ba andadaya da- magpasoli Kiristo. 8 Koyo magdahan ngani- para ayaw nawala da bokar koyo magrokayan, no nawed ba koyo gidte ameleen da parongaw. 9 Da iya nawed boo odas magpamirmi sa todo laki Kiristo, no nawed ba magdagdag saba ba wala sa konin da Diyos. Ngani da iya boo odas magpamirmi sa todo laki Kiristo ba sa konin da Diyos Apang da- konin Onga laki Kiristo. 10 Tawa man bait sa koyo da- nawed makay naba da konin nagtodo ba koyo ayaw pagpasleden sa koyo balay, ayaw din iya koyo pagtanongon, 11 panawen da iya magtanong sa konin ba sai din sa konin boo daet ka panawen. 12 Maoson dapo disin batay naay sinabi sa koyo, ngani nawed:da sa sorat. No nawed ba ako mag-asa batay kaparaoy saba sa koyo da- kaparopang manokawanan sa koyo, para semreb gidte da tamo kaangasan. 13 Da tanong mga onga komo kaka babayi, pag hinidang din Diyos makay kawo ba amba, Makay nakay kay kawo saba.
1 Ako da koyay da magsorat sa laki Gayo naay nagpalayaw gidte. 2 Naay nagpalayaw Gayo, naay nagdarangin kawo disin ginhawa, da- malanobo kay da lawas, makay naay amatangan ginhawa komo biyag sa gisarem. 3 Ako ba angasan gidte maraw bait da mga kaarianan sa laki Hisos, da- binarita amba kawo ba anggan dapo magpamiyag gidte toltol sa katotohanan. 4 Wala:a tay lomabi magpaasyagan sa naay arngeyan da barita amba da naay mga onga ba magpamiyag toltol sa katotohanan. 5 Naay nagpalayaw abyan, da komo tolong sa mga kaarianan, kayno sa mga nawed komo akilalaan ba magpaban-aw kawo ba anggan dapo magpamanawen totoo gidte. 6 Kora pag nawed komo akilalaan ba somistigo sa mga rimponan mga mag-isarig sa Diyos towa amba kawo magpalayaw sa mga kaarianan. Lalo gayed piya no kora komo tay atolongan sa kora tay magkadangan, makay pag bagay sa mga tagapamanawen Diyos. 7 Panawen kora ba Romaem para magbarita sa magpamanawen sa laki Kiristo da- nawed magtabang nakayman ka tolong sa mga nawed mag-isarig sa Diyos. 8 Kailangan kay kora ba tamo kosintiyen para tamo maki eray sa kora sa magpalaganap katotohanan. 9 Ako somorat sa rimponan mga mag-isarig, ngani ako nawed ginalang laki Diyotiripis, panawen da konin alabet ba iya da koyay sa koyo. 10 Kaya no ako bait saba, naay batay inolbat da boo konin pinanawen da- da mga kaboslian konin sinabi laban sa yamen. Nawed ngani naba da konin nagpanawen no nawed ba dayo:a konin tabangen da mga kaarianan magpanbait da- konin dapo naghadangan da- nagpasway sa rimponan mga mag-isarig sa Diyos ag mga alabet tomabang sa mga kaarianan. 11 Naay nagpalayaw abyan, ayaw kay komo pagtoladan da daet ka panawen no nawed ba da piya. Da iya magpamanawen piya ba onga Diyos; da iya kay magpamanawen daet ba nawed kilala sa Diyos. 12 Da boo iraya ba magsistigo amba piya laki Dimitiriyo. Pag konin piya ka panawen ba magsistigo din makay naba da- amba din da yamen sistigo. Komo amatangan totoo da yamen nagsabi. 13 Ako maoson dapo disin tay sinabi sa koyo, ngani nawed:da sa sorat. 14 Naay gidte nag-asahan nawed maagot ka odas kita batay malban-aw para batay manokawanan. 15 Sa koyo:wa ngani- da kaginhawahan Diyos. Kawo nagtanong kita mga abyan towa amba, Makay nakay kay kawo saba? Ako komo din tanongon sa kita mga abyan saba, sa tayma sai sa kora amba, Makay nakay kay kawo saba?
1 Ako laki Hodas ag tagoanggat laki Hisos Kiristo da- arian laki Tiyago da agsorat tiya, sa mga pinili Diyos, mga nagpalayaw Diyos Apang da- nagdahanan laki Hisos Kiristo. 2 Sa koyo: wa ngani-da kayawtean, kaginhawahan da-palayaw anggan kapno mga naba da koyo biyag. 3 Mga nagpalayaw arian, da naay gidte disin alabet soraten sa koyo ba para sa karibriyan nagtabang tamo boo. Ngani lalo kay kailangan ako agsorat sa koyo makay ako ba mag-ateet sa koyo amba koyo hadangan da mga maglaban sa totoo para sa tamo pag-isarig. Tiya pag pag-isarig ba kasai ngani inintiriga sa mga bina-nal Diyos. 4 Panawen maki lomiog sa koyo mga daet ka iraya sa nawed koyo amatangan. Kora ba agpirit pag totoo ka todo para sa kayawtean Diyos para kora panawenen mga madomi ka panawen. Kora nag-imbanda laki Hisos Kiristo pag tamo sai ngani ka Poon da- Panginoon. Ag monaan dapo ba sinabi:yani Banal ka Kasoratan da batay padosa ba handa:ani sa kora. 5 Kayno da boo tiya ba tindo:ani sa koyo ba naay din alabet paremremen dapo sa koyo amba, rinibri Panginoon da lasyon Israil ibat sa kotanan Ihipto, kalbas te ba konin simpo da mga nawed ag-isarig sa konin. 6 Koyo din remremen da mga anghil pag lomawlaw sa sokat kora katongkolan da- kora inogonan da kora gidte pamatawan. Kora ba ginapos Diyos mga nawed tay nagto tagikara da- kora konin piniriso sa toko kadeleman sa galem toyongan anggan sa rateng da aldaw batay hinosga. 7 Koyo din remremen da mga goraan lakol Sodoma da- Gomora da- da mga kadatig ka goraan lakol. Panawen sa kora agrobroboy sa madomi ka panawen da- mag-arikoy, kora ba pinadosa sa apoy wala arasan makay pamparemrem sa mga iraya para ayaw panawenen da makay naba. 8 Amba din naba pag mga boslien ka tagatodo. Panawen sa kora mga tabang, kora nagsida da sadiri lawas, kora nag-imbanda da kapangyadihan Diyos da- nagdaet da mga piya ka maki makapangyadihan sa kangawayan. 9 Kayno laki Migil, pag poon anghil, ag iya agtomang sa aponin kadaetan para sa bangkay laki Moysis ba nawed nangahas aghosga padosa makay agdaet sa konin, ngani konin sinabi amba, Kawo ngani- sawayen Panginoon. Naba:a ngani. 10 Ngani nagdaeg mga iraya naba da kayno nakayman nawed kora amatangan. Da- da mga nakayman kora kagisengan amatangan makay pag mga mailap ka hayop mga naba da batay kora katayan. 11 Kapangirabot gidte da kora batay aratengan, panawen kora ba tomolad sa pinanawen laki Kain. Makay din laki Balaam, kora rinapang da nawed raoy para ngani kaabel kwarta. Makay din laki Kori, kora ba lomaban da- nangas-po. 12 Lakol gidte ka kakayaan da- kasidaan podi da kora ag-anggat sa koyo sa magpasaro makay talkakaan sa laki Hisos, panawen sa kora wala sanggahan ka mamangan da- mag-inem. Wala kora nagremrem no nawed ba da kora sadiri. Kora ba makay mga yaong nagbaba koaya da- nawed agbaba odan. Kora ba makay mga poon kayo nawed mamokar kayno sa odas tagbokar, yinabot anggan wakat da- natay:ya gidte. 13 Kora ba makay baniraw sa dagat pag maki bora, naba da ladawan sa kora mga kakaya ka panawen. Kora ba makay mga lingo ka magirem. Hee, da mga boslien ka tagatodo tiya ba da hinandaan Diyos sai ka poro sa toko kadeleman wala arasan. 14 Ibat sa laki Adan laki Inok ba da ikaanim ka kaapoan. Tangona dapo laki Inok ba agsabi para din sa mga iraya naba amba, Koyo gidte pakarngeyan! Rateng:ngani da Panginoon kaanggat da ribo-ribo ka konin mga anghil, 15 para hosgahen da boo, da- hosayen sa padosa da boo nawed agkilala sa Diyos, panawen sa boo kora daet ka panawen da- panawen sa kora agdaet sa Diyos. 16 Da mga iraya naba ba diklamowen da- agpasida podi, mga agrobroboy sa daet ka alabet lawas, mga agpalapodi sa sadiri da- maggalang sa Roma para ngani nagaro da kora alabet. 17 Mga nagpalayaw, layen koyo remremen da mga tindo sa koyo tangona mga pinili sogoan tamo Panginoon Hisos Kiristo. 18 Sata dapo kora:a pinasked sa koyo amba, Batay lomwas sa mga paoriyan ka dag-on da mga anlilibak, mga iraya agtoltol sa kora sadiri mga daet ka alabet lawas. Naba:a ngani. 19 Da mga iraya naba ba mamanawen mga pagkaeray-eray, mga iraya nag-apo kora mga daet ka panawen, da- mga nawed nagpamatawan Ispirito Banal. 20 Ngani koyo, mga nagpalayaw, magpakaonayan koyo sadiri sa sarigan koyo banal gidte ka pag-isarig. Koyo manarangin sa tolong Ispirito Banal. 21 Koyo mamataw layen sa palayaw Diyos anggan agpanya dapo sa tamo Panginoon Hisos Kiristo sa iya batay tomaboy sa koyo pag biyag wala arasan panawen sa konin kayawtean sa koyo. 22 Koyo tolongan da mga ag-alingangaan, 23 koyo sagapen da mga batay:ya disin sa apoy. Koyo kayawtean ag mga madomi gidte da kora panawen kaya anggan kora nagsool ba pinadaet. Ngani koyo agdahan agdayo kayno sa kora nagsool. Kaaram koyo kay batay alitan. 24 Mona sa Diyos pag maki kaya magdahan sa koyo para koyo ayaw nalabo sa kadaetan da- maki kapangyadihan sa koyo agparopang boo gayed da- maki lakol ka kaangasan sa ropangan konin kalakolan, 25 sa konin pag sai ngani ka Diyos tamo Tagaribri panawen ngani sa laki Hisos Kiristo pag tamo Panginoon, sa konin ngani- da kapodiyan, da galang, da kalakolan da- da kapangyadihan ibat dapo monaan, mona, da- kaagoton man. Amba:a ngani-.
1 Tiya da Pinaban-Aw Diyos sa laki Hisos Kiristo, para konin:nakay paban-awen sa konin mga tagapamanawen da mga nakayman bali:yani batay mangyadi. Pinaparaoy laki Hisos da sai ka anghil sa laki Howan ag konin tagapamanawen 2 da- pinatonayan sa ribro tiya laki Howan da boo konin akitan para sa tokawanan Diyos da- sa totoo gidte Pinaban-Aw laki Hisos Kiristo. 3 Angasan da magbasa pag barita tiya ibat sa Diyos da- angasan da mga magpakarngey da- magpamanawen ag nagkasorat saba, panawen da boo tiya ba bali:yani batay mangyadi. 4 Ako laki Howan da magsorat sa mga pito ka rimponan mga mag-isarig sa laki Kiristo sa lopa Asiya amba, Sa koyo:wa ngani- da parongaw da- kaginhawahan ibat sa Diyos-iya da Diyos ibat sa tangona anggan mona da- anggan kadomaen-da- ibat sa mga pito ka ispirito sa ropangan konin tongkaan da- ibat sa laki Hisos Kiristo. Iya da asarigan ka sistigo, da monaan biniyag:gakay sa mga nangatay, da Hadi sa mga hadi towa sa paranawan. Tamo ba konin nagpalayaw da- sa iya natay da- nabobo da konin daya ba tamo ba konin rinibri ibat sa tamo mga kadaetan, 6 da- tamo ba konin ginawa sai ka lasyon mga hadi, ag magpamanawen para sa Diyos ag Apang laki Hisos. Sa laki Hisos Kiristo ngani- da kalakolan da- kapangyadihan anggan kaagoton man. Amba:a ngani-. 7 Koyo gidte pakarngeyan! Iya ba magrateng:ngani sa ngaway ag yaong. Iya ba batay akitan boo iraya anggan pag somandak sa konin tagiriran. Panawen sa konin ba da boo mga lasyon sa paranawan ba batay magpanangis. Piho gidte amba da batay mangyadi. Amba:a ngani-. 8 Da Panginoon Diyos, ag Makapangyadihan sa boo ba amba, Ako da monaan da- da paoriyan. Ako da Diyos sa mona da- sa kalawey da- sa batay rateng. 9 Ako laki Howan da koyo arian sa laki Hisos. Panawen sa tamo kasaiyan sa laki Hisos tamo kaeray sa mga kahidapan, sa konin kahadian da- sa mag-agwanta. Ag narwaan, ako ba sa inelangan nag-awit Patmos panawen naay pinangadar da tokawanan Diyos da- da totoo Pinaban-Aw laki Hisos. 10 Naba pag odas ba aldaw Panginoon. Ako ba sa kapangyadihan Ispirito Banal da- naay arngeyan ibat sa naay dako paoriyan sai ka magtokawanan maeyat makay beet bodyong da konin kaisngilen. 11 Amba da nagsabi, Komo soraten sa sai ka ribro da komo nagkaakitan da- naba ba komo pababaen sa pito ka rimponan mga mag-isarig sa laki Hisos sa mga goraan Ipiso, Ismirna, Pirgamo, Tiatira, Sardis, Piladilpiya da- sa Laodisiya. Naba:a ngani. 12 Maraw ako ba mamaliwi para ban-awan da magtokawanan sa naay ba da naay akitan ba pito ka patimpowan solo- yadi sa ginto. 13 Magpatindeg sa tenga pag mga solo- da sai ka makay lalaki magsool golanit maaba, da- maki pamegkes yadi ginto sa konin soot. 14 Mapoti da konin obok makay abokay e makay borak layagan, da- konin mga mata ba mag-igang makay apoy. 15 Da konin mga paa ba magbildang makay tangso pinadalan sa apoy da- pinabildang. Da konin tokawanan ba makay mag-ebas basaran. 16 Sa konin kanan alima ba maki naggenan pito ka magirem, da- maglowas sa konin bibi da sai ka maerep gidte ka pisaw kabilaan ba tarem. Kasorap gidte da konin kiray makay pag sorap aldaw da anino ba nagsayawan. 17 Maraw ako kaban-aw sa konin ba ako ba nalpa sa konin paahan nawed:da halos mag-inawa. Ngani konin pinatimpo sa naay da konin kanan alima da- sinabi amba, Kawo ayaw aliman. Ako da monaan da- da paoriyan. 18 Ako da biyagan. Ako ba batang natay ngani komo gidte pakarngeyan! Mona ba ako ba biyagan da- nawed:dani batay natay kaagoton man. Sakop sa naay kapangyadihan da katayan da- da pagpanyaan mga nangatay. 19 Kaya ngani-, komo:wa soraten da komo akitan, da agpangya-di mona da- da batay dapo mangyadi. 20 Tiya da alabet sabiyen pag mga pito ka magirem sa naay kanan alima da- pag pito ka patimpowan solo- yadi sa ginto: Da pito ka magirem ba naba da mga anghil mag-alaga sa pito ka rimponan mga mag-isarig, da- da pito ka patimpowan solo- yadi sa ginto ba naba da pito ka rimponan.
1 Sa anghil pag rimponan mga mag-isarig sa laki Hisos sa goraan Ipiso ba komo soraten amba, Tiya da nagpasked pag maki naggenan pito ka magirem sa konin kanan alima, pag magkadangan sa tenga pag mga pito ka patimpowan solo- yadi sa ginto. 2 Naay amatangan da komo mga pinanawen, da komo magpahidap da- magtiyaga. Naay din amatangan kawo ba dayo gidte sa mga daet ka iraya, da- komo:wani pinorbahan da mga magpasoli amba kora ba mga pinili sogoan, da- komo gidte amatangan kora ba mga boslien. 3 Naay din amatangan kawo ba matiyaga. Kawo omagwanta pag maoson ka kahidapan para ngani- sa naay, da- nawed manlobay da komo pag-isarig. 4 Ngani tiya da nawed naay alabet sa komo : kawo ba magpandimla:a sa naay. Ako mona ba nawed:da komo nagpalayaw makay ag monaan. 5 Komo remremen da komo monaan ka biyag, kawo magsisi da- komo ogonan da komo mga daet ka panawen, da- komo:wakay panawenen da piya komo pinanawen ag monaan. No kawo nawed magsisi da- mag-ogon komo mga daet ka panawen ba ako batay saba sa komo da- naay:ya batay inalis da patimpowan komo solo- ibat sa konin pagpalagyan. 6 Ngani maki din piya sa komo amba, Makay din ako ba kawo magbais gidte sa nagpanawen pag mga Nikolaita. 7 Da iya maki talinga ba pakarngeyan gidte da nagsabi Ispirito Banal sa mga rimponan mga mag-isarig. Da iya magpandaeg ba naay batay tinaboy sa konin da kapangyadihan para mamangan ag bokar kayo magtaboy biyag gidte ag sa alamanan Diyos. 8 Sa anghil pag rimponan mga mag-isarig sa laki Hisos sa goraan Ismirna ba komo soraten amba, Ako ag monaan da- paoriyan, pag natay da- nabiyag:gakay, da magpas-ked tiya, 9 Naay amatangan da mga kahidapan komo nagdanasan. Naay amatangan kawo ba mahidapen-ngani da totoo ba kawo ba maki karon-an. Naay din amatangan kawo ba nagsidaan podi mga magpasoli amba kora ba mga Diw ngani da totoo ba kora ba sai ka barkada- han sakop sa laki Satanas. 10 Kawo ayaw aliman sa mga nakayman bali:ya komo batay inagwanta. Komo gidte pakarngeyan! Da kalaati sa koyo ba batay pinapiriso laki Satanas para koyo ba porbahan da- koyo batay mag-agwanta kahidapan sampo ka aldaw. Kawo matoltolon sa naay kayno anggan kawo batay:ya binono, da- naay batay tinaboy sa komo da biyag gidte makay bokar sa kawo mandaeg. 11 Da iya maki talinga ba pakarngeyan gidte da nagsabi Ispirito Banal sa mga rimponan mga mag-isarig. Da iya magpandaeg ba nawed gidte batay pinahidapan ag ikadarwa ka katayan. 12 Sa anghil pag rimponan mga mag-isarig sa goraan Pirgamo ba komo soraten amba, Tiya da nagpasked pag maki maerep gidte ka pisaw kabilaan ba tarem. 13 Naay amatangan no saan kawo ag-oli; saba maghadi gidte laki Satanas. Kayno amba, kawo maonay magteped sa naay. Nawed komo inogonan da komo pag-isarig sa naay, kayno pag odas laki Antipas pag naay matoltolon ka sistigo ba binono saba sa komo poro pag olian din laki Satanas. 14 Ngani mga tiya da nawed naay alabet sa komo. Da kalaati sa koyo ba agtoltol sa todo laki Balaam. Laki Balaam ba tomdo sa laki Balak para ranggoton da mga taga Israil sa magpanawen daet. Panawen naba, kora mamangan pamangnen tinaboy sa mga nawed gidte amba Diyos da- kora pomanawen mga kakaya-kaya. 15 Da kalaati kay sa koyo ba magtoltol sa todo mga Nikolaita. 16 Kaya ngani-, koyo magsisi da- ogonan da koyo mga kadaetan. No nawed ba ako batay saba sa ned te maagot ka odas da- naay batay linabanan da mga iraya naba sa maggamit pisaw ag maglowas sa naay bibi. 17 Da iya maki talinga ba pakarngeyan gidte da nagsabi Ispirito Banal sa mga rimponan mga mag-isarig. Da iya magpandaeg ba naay batay tinaboyan sai ka eray pag pamangnen nag-ibat sa soksokowan ag nag-awit mana. Iya naay din batay pinakan sai ka bato mapoti ag nagrirokan bayo:wakay ka ngaran. Wala tawa man batay kamatang no nawed ba pag batay tomabang naba. 18 Sa anghil pag rimponan mga mag-isarig sa goraan Tiatira ba komo soraten amba, Tiya da nagpasked pag Onga Diyos ag maki mga mata mag-igang makay apoy da- mga paa magbildang makay tangso pinabildang. 19 Naay amatangan da komo mga nagpanawen, da kawo magpalayaw, mag-isarig, magpamanawen para sa naay da- kawo magtiyaga. Naay amatangan da komo nagpanawen mona ba labi dapo sa monaan. 20 Ngani tiya da nawed naay alabet sa komo amba komo nagpabayaan bayi Hisibil, naba pag babayi pag magpasoli iya ba tagabarita ibat sa Diyos. Iya ba magtodo da- magpalingo sa naay mga tagoanggat para magpanawen kakaya-kaya da- mamangan ag pamangnen tinaboy:ya sa mga nawed gidte Diyos. 21 Iya ba naay tinaboyan sibay ka odas para magsisi da- ogonan da konin kamadomi ka panawen, ngani iya dayo mag-ogon konin kamadomi ka panawen. 22 Komo gidte pakarngeyan! Iya batay pinatimalmay sa kalkanan anggat din da mga mamanawen makakaya anggat sa konin. Kora boo batay domanas lakol ka kahidapan no nawed kora magsisi da- inogonan da kora kadaetan kora pinanawen kaanggat sa bayi Hisibil. 23 Naay din batay binono da konin mga onga para amatangan ag boo mga rimponan mga mag-isarig sa laki Hisos amba, Ako gidte da magsayasak sa poso da- sa remrem mga iraya. Naay batay tinaboyan da tayma sai sa koyo toltol sa konin-konin mga pinanawen. 24 Ngani sa mga Roma ka mag-isarig sa goraan Tiatira, sa mga nawed magtoltol sa daet ka todo bayi Hisibil da- nawed kamatang pag nag-awit alalem ka todo laki Satanas, ba naay nagpasked amba, Koyo ba nawed naay batay tinaboyan Roma ka mabyat ka baba. 25 Ngani ayaw koyo agbal-anan anggan ako rateng da mga piya ka nakayman ag komo:wa timped. 26 Da iya magpandaeg da- magteped sa naay alabet anggan arasan ba iya naay batay tinaboyan ag magpamahala sa mga lasyon makay din da naay tinabang sa naay Apang. 27 Iya batay magpamahala sa kora maki naggenan panampok bakal da- konin batay dinodog da mga lasyon makay ag magdodog sa keden. 28 Naay din batay tinaboy sa konin da tala sa omaga gidte. 29 Da iya maki talinga ba pakarngeyan gidte da nagsabi Ispirito Banal sa mga rimponan mga mag-isarig.
1 Sa anghil pag rimponan mga mag-isarig sa laki Hisos sa goraan Sardis ba komo soraten amba, Tiya da nagpasked ag maki pito ka ispirito Diyos da- maki pito ka magirem. Naay amatangan da komo nagpanawen. Nagremrem mga iraya amba kawo ba biyagan ngani da totoo ba kawo ba nagkatay. 2 Mangon:na kawo da- paonayen da mga nakayman nagkatra sa komo da- badya nagkatay:yani. Naay akitan da komo pinanawen ba nawed boo gayed sa ban-aw naay Diyos. 3 Kaya kawo gidte magremrem sa mga todo komo tinabang da- akarngeyan. Komo panawenen da mga naba da- kawo magsisi da- ogonan da komo mga kadaetan. No kawo nawed batay mangon, ako batay rateng saba makay ag magrateng sai ka magpanakaw da- nawed komo batay amatangan da odas ako batay rateng. 4 Kayno amba, da kalaati saba sa koyo sa Sardis ba madahan gidte para wala lebag da kora nagsool. Kaya kora batay mangadang anggat sa naay da- batay sinool mapoti ka golanit panawen kora ba bagay gidte. 5 Da iya magpandaeg ba batay din pinasoolan mapoti da- nawed:da gidte naay batay binaraw da konin ngaran sa listahan mga maki:ya biyag. Iya ba naay batay pinakilala sa ropangan naay Apang da- sa ropangan konin mga anghil. 6 Da iya maki talinga ba makarngey gidte sa nagsabi Ispirito Banal sa mga rimponan mga mag-isarig. 7 Sa anghil pag rimponan mga mag-isarig sa laki Hisos sa goraan Piladilpiya ba komo soraten amba, Tiya da nagpasked ag Banal da- asarigan gidte, ag maki ag sosi hadi Dabid amba, Da konin binokaan ba wala batay kasada, da konin kay sinadhan ba wala batay kaboka. 8 Naay amatangan da komo mga panawen. Naay amatangan amba kayno ibente da komo kapangyadihan ba komo din tinoltol da naay todo da- kawo nawed akayaan magsistigo sa naay. 9 Komo gidte pakarngeyan! Naay batay pinaparaoy sa komo da- batay pinaisongo sa komo ropangan da barkadahan sakop sa laki Satanas ag magpamosli da- magpasoli amba kora ba mga Diw para kora amatangan kawo ba naay nagpalayaw. 10 Panawen komo tinoltol da bilin amba, Kawo magtiyaga, naay kay batay dinahanan kawo ba ribri sa odas ag porba, no batay pinorbahan da boo iraya sa boo paranawan. 11 Ako batay rateng sa ned te maagot ka odas. Ayaw komo agbal-anan da mga piya ka nakayman ag komo:wa timped para nawed aagaw tawa man sa komo da bokar sa kawo mandaeg. 12 Da iya magpandaeg ba naay batay ginawa sai ka arigi sa lakol ka balay naay Diyos, da- iya nawed:da batay lomwas sata kaagoton man. Naay batay sinorat sa konin da ngaran naay Diyos da- da ngaran goraan lakol naay Diyos, naba ba da bayo ka Hirosalim ag batay lompot ibat sa soksokowan sa naay Diyos. Naay din batay sinorat sa konin da naay bayo ka ngaran. 13 Da iya maki talinga ba makarngey gidte sa nagsabi Ispirito Banal sa mga rimponan mga mag-isarig. 14 Sa anghil pag rimponan mga mag-isarig sa laki Hisos sa goraan Laodisiya ba komo soraten amba, Tiya da nagpasked ag nag-awit laki Amba:a ngani-. Iya da asarigan da- totoo gidte ka sistigo, da ibatan boo rinarang Diyos. 15 Naay amatangan da komo mga pinanawen. Naay amatangan kawo ba nawed maibeng, da- nawed din madimla. Naay disin alabet kawo ba maibeng da- no nawed, kayno madimla. 16 Ngani panawen kawo ba kalemleman da- nawed maibeng kayno madimla ba kawo ba naay batay inowa ibat sa naay bibi. 17 Panawen kawo amba, Ako ba maki gidte karon-an da- maoson da naay nag-apo da- nawed:da ako agkailangan nakayman. Ngani nawed komo amatangan kawo ba mahidapen, makayawte, boysit, wala nagsool da- nawed kaban-aw. 18 Kaya ngani-, para kawo ba batay maki gidte karon-an ba naay gidte nagsabi sa komo amba, Kawo bomili sa naay ginto pinadalan sa apoy para malinis. Da- para nawed:dani akitan da komo kakaya ka lawas wala nagsool ba kawo din bomili mapoti ka golanit para soolon. Da- kawo bomili gamot sa mata da- pairan komo mata para kawo kaban-aw. 19 Naay nagsaway da- nagsogpo da boo naay nagpalayaw. Kaya ngani-, kawo magpilit gayed, magsisi da- ogonan da komo mga kadaetan. 20 Komo gidte pakarngeyan! Ako ba agpatindeg sa lowas takep sakbawan da- agpangaham. No maki tawa man kamalay sa naay aham da- batay binoka da takep sakbawan ba ako batay semled sa konin balay da- kita batay maysaro sa pamangnen. 21 No omaning panawen ako ba mandaeg da- mona ba ako magtongka sa tebteb naay Apang sa konin tongkaan hadi ba makay din da iya magpandaeg ba naay batay pinakan kapangyadihan tomongka sa naay tebteb sa naay tongkaan hadi. 22 Da iya maki talinga ba pakarngeyan gidte da nagsabi Ispirito Banal sa mga rimponan mga mag-isarig.
1 Maraw kadalan naba ba ako ba maningara da- naay akitan sa soksokowan da sai ka sakbawan boka. Da- naay:yakay akarngeyan da tomokawanan maeyat makay beet bodyong da konin kaisngilen. Iya ba agtokawanan:nakay sa naay amba, Kawo towa paraoy sa ngaway dako da- naay batay Pinaban-Aw sa komo da mga nakayman batay gidte mangyadi doma. Naba:a ngani. 2 Agad ako ba sa kapangyadihan Ispirito Banal da- koyo gidte pakarngeyan! Naay akitan sa soksokowan da sai ka tongkaan hadi da- ag magtongka sata. 3 Da agtongka sata ba makay pag mga mahalaga ka bato marawa pag nag-awit haspi da- kornalina. Maki sai ka balangaw kolay birdi makay kamanga ba mag-alikopkop sa paribok konin tongkaan. 4 Sa paribok ag aray tongkaan ba maki dalwampo da- apat ka tongkaan mga maki kapangyadihan. Da- da magtongka sata da dalwampo da- apat ka mga koyay. Mapoti da kora nagsool da- maki nagsorbong sa kora mga olo mga talawak yadi sa ginto. 5 Ibat sa tongkaan hadi magbildang da koldap, anggat din da maeyat ka aleng da- dalegdeg. Sa ropangan tongkaan hadi ba maki pito ka solo- mag-igang, naba ba da pito ka ispirito Diyos. 6 Sa ropangan din ag tongkaan hadi ba maki makay dagat bobog kalislisaw din istampa. Sa tenga ag tongkaan hadi da- sa paribok ag tongkaan hadi ba maki apat ka rinarang maki biyag. Kora ba tatap gidte mga mata kayno sa boyon dako da- kayno sa awak dako. 7 Da ikasai ka rinarang maki biyag ba makay hayop liyon. Da ikadarwa ka rinarang maki biyag ba makay kay toro baka. Da ikatatlo kay ka rinarang maki biyag ba maki kiray makay iraya. Da ikaapat kay ka rinarang maki biyag ba makay sai ka agila ag-ilayog. 8 Tig anim da lagay ag apat ka rinarang maki biyag. Kora lagay ba tatap:pa mata sa boo awak da- sa galem. Wala epet kora mag-awit podi aldaw da- madlem amba, Banal, banal, banal da Panginoon Diyos pag Makapangyadihan sa boo. Iya da Diyos ibat sa tangona, anggan mona, da- anggan kadomaen. Naba:a ngani. 9 Sa odas da apat ka rinarang maki biyag ba magpodi, magpalakol da- magpasalamat sa magtongka sa tongkaan hadi, ag nagkabiyagan anggan wala arasan 10 ba da dalwampo da- apat ka koyay kay ba maglohod sa ropangan tongkaan hadi da- kora nagsamba da agtongka sata, ag nagkabiyag wala arasan. Da kora mga talawak yadi sa ginto ba kora nag-palagay sa ropangan tongkaan hadi da- mag-awit amba, 11 Yamen Panginoon da- yamen Diyos Kawo da abaya gidte tomabang papodi da- galang da- kapangyadihan panawen kawo da Romarang sa boo nakayman da- panawen sa komo alabet ba da mga naba ba komo rinarang da- tinaboyan biyag. Naba:a ngani.
1 Da- naay akitan sa kanan alima pag agtongka sa tongkaan hadi da sai ka kasoratan nagbaroron maki sorat da mangkabila dako da- maki pito ka eket pinaikapetan taro sa botngolan para nawed kaboka. 2 Da- naay din akitan da sai ka anghil makapangyadihan magtokawanan maeyat amba, Tawa da abaya gidte omokad ag mga eket da- bomiklad ag kasoratan nagbaroron? Naba:a ngani. 3 Kayno sa langit, kayno sa lopa, kayno sa galem lopa ba wala akitan tawa man kabiklad ag kasoratan, da- wala din tawa man kaserey sa nagkasorat sata. 4 Ako magpakongkong gidte anggan, panawen wala akitan tawa man abaya gidte bomiklad ag kasoratan da- magserey sa nagkasorat. 5 Kaya pinasked sa naay sai sa mga koyay amba, Kawo ayaw magpanangis. Komo gidte pakarngeyan! Da Liyon ibat sa andana Hoda, da makapangyadihan kaapoan hadi Dabid, iya da mandaeg:gani. Iya da abaya gidte omokad ag pito ka eket da- bomiklad ag kasoratan nagbaroron. Naba:a ngani. 6 Maraw kalbas, naay akitan sai ka Topa te agpatindeg sa palteng-anan pag tongkaan hadi da- sa mga apat ka rinarang maki biyag da- sa mga koyay. Da Topa te ba maki hidsoda makay iya batang:ngani binono. Iya ba maki pito ka songay da- pito ka mata, naba ba da pito ka ispirito Diyos pag pinaparaoy sa boo paranawan. 7 Da- pabali da Topa te da- konin ginaro da kasoratan nagbaroron ibat sa kanan dako alima ag magtongka sa tongkaan hadi. 8 Maraw naba ba konin ginaro ba lomohod sa ropangan Topa te da apat ka rinarang maki biyag da- da dalwampo da- apat ka mga koyay. Da- tayma sai sa kora ba maki naggenan makay kodyapi da- maki din talambo yadi sa ginto kapno maayooy, naba ba mga darangin mga hinidang Diyos. 9 Kora nag-awitan sai ka bayo ka awit amba, Kawo da abaya gidte gomaro ag kasoratan nagbaroron da- omokad mga eket sata. Panawen kawo ba binono da- da komo daya ba nabobo, naba da panbos sa mga iraya ibat sa tayma andana, tokawanan, kairayaan da- lasyon, para kora sakop:pani sa Diyos. 10 Kora ba komo ginawa sai ka lasyon mga hadi da- mga magpamanawen para sa tamo Diyos, da- kora batay maghadi sa paranawan. Naba:a ngani. 11 Maraw kalbas naba, ako ba semrey:yakay da- naay akarngeyan da tokawanan mga ribo-ribo da- ragas-ragsa ka anghil. Kora ba agparibok sa tongkaan hadi da- sa apat ka rinarang maki biyag da- sa mga koyay. 12 Kora boo ba malsabayan agtokawanan maeyat amba, Da Topa te da binono da abaya gidte tomabang kapangyadihan, karon-an, kadonongan da- kaeyatan, kagalangan, kalakolan da- papodi. Naba:a ngani. 13 Da- naay akarngeyan ag boo mga rinarang maki biyag, kayno sa langit, kayno sa lopa, kayno sa galem lopa da- kayno sa dagat ba malsabayan magtokawanan amba, Sa magtongka sa tongkaan hadi da- sa Topa te, sa sidawa ngani- da kapodiyan, kagalangan, kalakolan da- kapangyadihan anggan wala arasan. Naba:a ngani. 14 Da- da apat ka rinarang maki biyag ba magtokawanan amba, Amba:a ngani-. Da- lomohod da mga koyay da- somamba sa sidawa.
1 Maraw kalbas ba naay akitan da Topa te ba mag-okad ag monaan sa pito ka eket da- naay akarngeyan sai sa apat ka rinarang maki biyag ba magtokawanan makay dalegdeg da aleng konin tokawanan. Iya amba, Apora kawo! 2 Maraw ako semrey ba naay akitan da sai ka kabayo mapoti da- da magsakay sa kabayo ba maki naggenan sai ka talangan. Iya ba pinakan talawak tanda sa iya ba mandaeg da- iya ag andadaeg ba mangadang para mandaeg dapo anggan. 3 Maraw da Topa te ba mag-okad ag ikadarwa ka eket ba naay akarngeyan da ikadarwa ka rinarang maki biyag ba amba, Apora kawo! 4 Da- lomwas kay da sai kay ka kabayo mapola gidte. Da magsakay kay saba ba pinakan kapangyadihan para alisen da kaginhawahan sa lopa para magpamonoan da mga iraya. Da- iya ba tinaboyan sai lakol ka pisaw. 5 Maraw da Topa te ba mag-okad ag ikatatlo ka eket ba naay akarngeyan da ikatatlo ka rinarang maki biyag ba amba, Apora kawo! Maraw ako semrey ba naay akitan da sai ka kabayo maitem da- da magsakay saba ba maki nagbitbit sai ka bantowasan. 6 Da- naay akarngeyan maki makay magtokawanan ibat sa tenga apat ka rinarang maki biyag amba, Da akitan makay bayad sa sai ka aldaw magpamanawen ba sibay ngani sa agbili sai ka pitis begas da- da akitan makay bayad sa sai ka aldaw magpamanawen ba sibay ngani sa agbili tatlo ka pitis batad. Ngani ayaw agsidaen da langis olibo da- da alak. Naba:a ngani. 7 Maraw da Topa te ba mag-okad ag ikaapat ka eket ba naay akarngeyan da ikaapat ka rinarang maki biyag ba amba, Apora kawo! 8 Da- naay kay akitan da sai ka kabayo kolay lomad da- katayan da ngaran ag magsakay saba da- da sa awak kay naba ba da nag-awit Hadis, da alabet sabiyen ba pagpanyaan mga nangatay. Sidawa ba tinaboyan kapangyadihan sa sai ka ikaapat ka eray mga taga paranawan para bonoon sa pisaw lakol, sa tagbayog, sa pandalan da- sa mga mabangis ka hayop. 9 Maraw da Topa te ba mag-okad ag ikalima ka eket ba naay asereyan da arengan mga maayooy. Sa ngato pag arengan naay akitan da mga gisarem mga iraya binono panawen sa tokawanan Diyos da- panawen sa kora ba mateped sa magsistigo. 10 Kora magtokawanan maeyat amba, Panginoon, kawo da makapangyadihan, kawo da banal da- da totoo; kaomaning dapo kaagot yamen batay agpanya? Kaomaning dapo kaagot komo batay hinosga sa padosahan da mga magpamataw sa paranawan panawen sa kora mono sa yamen? Naba:a ngani. 11 Da tayma sai sa kora ba pinakan mapoti ka golanit da- sinabiyan amba, Koyo magpahinga dapo te anggan sibay:yani da bilang koyo mga arian sa pag-isarig da- kamamanawen para sa laki Kiristo, ag batay din binono makay din koyo. 12 Maraw da Topa te ba mag-okad ag ikaanim ka eket ba ako ba semrey. Lomindol:la maeyat, da aldaw kay ba demelem gayed, makay golanit manta, da bilog bolan ba mapola gidte makay daya. 13 Da mga magirem ba nangaragrag ibat sa langit makay mga apo kayo igos ba nangaragas no maeyat da koaya. 14 Nalingo da kalaw-awan makay sai ka kasoratan nagbaroron ba binaroron, da- da tayma bogsor da- da tayma inelangan sa dagat ba nagaro ibat sa konin-konin rogar. 15 Tomago sa mga leyang da- sa mga letak bato sa bogsor da mga hadi sa paranawan, da mga magpamahala, da mga kapitan sondalo, da mga maki karon-an, da mga maki kapangyadihan, da- boo iraya, kayno tagoanggat, kayno nawed tagoanggat, 16 da- kora ba magpawag sa mga bogsor da- sa mga bato amba, Yamen koyo benbenan para yamen nawed batay akitan ag magtongka sa tongkaan hadi da- para nawed yamen adanasan da kabaisan Topa te. 17 Panawen rateng:ngani da makalimo gidte ka aldaw sidawa batay Pinaban-Aw kabaisan. Tawa da batay kaagwanta.
1 Maraw kadalan naba ako maki akitan apat ka anghil magpatindeg sa apat ka sorokan paranawan. Kora nagpaepet da apat ka koaya para ayaw dapo somarokay sa dagat da- sa kayno nakayman sa lopa, kayno sa sai ka poon kayo. 2 Da- naay akitan sai dapo ka anghil agsalbon sa sedakan dako aldaw. Iya maki naggenan sai ka pantanda ibat sa Diyos biyagan. Iya mamatwag maeyat sa apat ka anghil ag pinakan Diyos kapangyadihan para sidaen da lopa da- da dagat, 3 amba, Ayaw dapo koyo sidaen da lopa kayno da dagat kayno da mga poon kayo anggan nawed dapo yamen atandaan sa alitang da mga tagapamanawen tamo Diyos. 4 Kalbas, maki pinasked sa naay no kaomaning kaoson da mga tinandaan. Kora boo ba sai ka daan apatnapo da- apat ka ribo ibat sa boo kaapoan laki Israil. 5 Sa tayma andana laki Israil ba sampo da- darwa ka ribo da tinandaan-sa mga andana kora Hoda, Robin, Gad, 6 Asa, Niptali, Manasis, 7 Simyon, Libi, Isakar, 8 Sabolon, Hosi da- Binhamin. 9 Maraw kalbas naba, naay akitan da kaban gidte ka iraya ag nawed gidte abilang tawa man. Kora ba ibat sa tayma lasyon, andana, kairayaan, da- kalasi tokawanan. Kora ba agpatindeg sa ropangan ag tongkaan hadi da- sa ropangan ag Topa te. Kora boo ba magsool mapoti gidte ka golanit da- maki naggenan mga daon barawan, 10 da- mamagtokawanan maeyat amba, Da karibriyan ba ibat sa tamo Diyos ag magtongka sa tongkaan hadi da- ibat sa Topa te. Naba:a ngani. 11 Da boo mga anghil ba patindeg sa paribok tongkaan hadi da- sa mga koyay da- sa mga apat ka rinarang maki biyag. Kora ba lomohod sa ropangan tongkaan hadi da- somamba sa Diyos 12 amba, Amba:a ngani-. Sa tamo Diyos ngani- da kapodiyan, da kalakolan, da kadonongan, da pasalamat, da galang, da kapangyadihan da- da kaeyatan anggan wala arasan. Amba:a ngani-. 13 Ako ba tinokaw sai sa mga koyay amba, Tawa-tawa da mga iraya naba, ag magsool golanit mapoti, da- saan batang kora? Naba:a ngani. 14 Ako ba tembag amba, Koyay, kawo kay da kamatang. Naba:a ngani. Kaya iya amba sa naay, Da mga naba ba ag mga iraya batang domalan sa lakol ka kahidapan. Kora inoyasan da kora golanit da- pinapoti sa daya Topa te. 15 Kaya ngani- kora ba sa ropangan tongkaan Diyos da- kora ba magpamanawen para sa konin aldaw da- madlem sa konin kahadian. Da magtongka sa tongkaan hadi da batay lememlem sa kora. 16 Kora nawed:dani batay nabayog da- nawed:da batay makainem. Kora nawed:dani batay aibengan aldaw da- nawed:da din batay apasi ibeng. 17 Kada da Topa te ag sa tenga sa maki tongkaan hadi ba batay kora Tagaalaga. Kora konin batay pinaanggat sa mga bokalan sapa pag magtaboy biyag gidte da- batay pinair Diyos da boo mga bingas sa kora mga mata.
1 Maraw da Topa te ba mag-okad ag ikapito ka eket, ba wala beet arngeyan sa boo langit kaagot sai ka kalinabonan. 2 Maraw kalbas naba ba naay asereyan da pito ka anghil pag magpatindeg sa ropangan Diyos da- tayma sai sa kora ba pinakan bodyong. 3 Sai dapo ka anghil da rateng maki nagbaba talambo yadi sa ginto pag-arengan maayooy. Iya ba patindeg sa ropangan arengan. Iya ba pinakan maoson ka maayooy para arengen sa arengan yadi sa ginto sa ropangan tongkaan hadi anggat sa mga darangin mga hinidang Diyos. 4 Ibat sa naggenan alima anghil ba tomorosan da kaso ag bango maglibosawan sa ropangan Diyos ibat sa maayooy anggat sa mga darangin mga hinidang Diyos. 5 Maraw kalbas, ginaro anghil da talambo maayooy da- pinakapno baya ibat sa arengan da- linabo naba sa paranawan. Kangani ba domalegdeg, omalengan, komoldap, da- lomindol. 6 Kalbas ba da pito ka anghil ba homanda para magbodyong. 7 Maraw pinoypoyan ag monaan anghil da konin bodyong agad inodan yilo makay baritarwan da- apoy liniogan daya da paranawan. Nasonog:gani da ikatatlo ka eray lopa, da ikatatlo ka eray poon kayo da- da boo sadiwa ka gamasen. 8 Maraw pinoypoyan ag ikadarwa ka anghil da konin bodyong, manlipog sa dagat da sai ka makay lakol ka bogsor magbalangabang, 9 daya:ani da ikatatlo ka eray dagat, nangatay:yani da ikatatlo ka eray nagkabiyag sa dagat. Nangaranggas:sani da ikatatlo ka eray sa bilang mga sakyanan dagat. 10 Maraw pinoypoyan ag ikatatlo ka anghil da konin bodyong ba sai ka tala magbalangabang makay solo-batang sa kangawayan ba natrag sa ikatatlo ka eray mga salog da- bokalan. 11 Da tala ba nag-awit Kapaitan. Pomait da ikatatlo ka eray sapa, da- maoson ka iraya da nangatay maraw minem naba, panawen sa pait sapa. 12 Maraw pinoypoyan ag ikaapat ka anghil da konin bodyong ba nasida da ikatatlo ka eray aldaw, bolan da- mga magirem, kaya demelem da ikatatlo ka eray rawa mga naba. Da ikatatlo ka eray tayma aldaw ba wala rawa, da- wala din Romawa sa ikatatlo ka eray madlem. 13 Kalbas naay asereyan da sai ka agila mag-ilayog sa kalaw-awan, da- naay arngeyan magsabi maeyat amba, Daet gidte ngani- da batay aratengan da boo mga iraya sa paranawan, sa aleng mga bodyong batay dapo pinoypoyan tatlo dapo ka anghil.
1 Maraw pinoypoyan ag ikalima ka anghil da konin bodyong ba naay asereyan da sai dapo ka magirem nalabo sa lopa ibat sa kangawayan. Tinaboy sa konin da sosi kalaleman wala toko. 2 Binokaan magirem da kalaleman wala toko da- lomwas saba da lakol ka loon makay ag mag-ibat sa lakol ka timbonan; da- demelem da aldaw da- da kalaw-awan panawen sa loon naba. 3 Manlowas da mga pangsiran ibat sa loon da- komalat sa paranawan. Kora ba pinakan kapangyadihan magpakaskit makay alitangan. 4 Sinabi sa kora amba, Ayaw koyo sidaen da mga gamasen, poon kayo, da- nakayman ka alaman. Da mga iraya ag wala tanda Diyos sa kora alitang ba kora ngani da koyo batay pinakaskitan. 5 Inayawan da mga pangsiran bonoon da mga iraya tiya, no nawed ba pakaskitan gidte sa boo lima ka bolan. Da maskit ba makay ag kayat alitangan. 6 Sa boo odas naba ba kora batay sinarak da katayan ngani nawed batay asbokan. Da kora batay alabet ba natay:ya disin, ngani nawed gidte batay natay. 7 Da mga pangsiran ba makay mga kabayo handa batay maggira. Kora ba maki makay talawak yadi sa ginto sa kora olo da- da kora kiray ba makay kiray iraya. 8 Da kora obok ba makay obok babayi, da- kora ngipen ba makay ngipen lawo. 9 Da panakleb sa kora soot ba makay balayang, da- da beet kora lagay ba magyanig makay kalkalagan mga kariton yadi sa balayang da- makay maoson ka pad kabayo magdalaganan sa labanan. 10 Kora ba maki ikoy makay alitangan da- maki din kisot. Sa kora ikoy da kapangyadihan agpakaskit sa mga iraya sa lima ka bolan. 11 Kora ba maki pinagkanghadi; naba da anghil kalaleman wala toko. Da konin ngaran sa tokawanan Hibriyo ba Abadon, sa Girigo kay ba Apolyon, da alabet sabiyen naba ba Aninida. 12 Kadalan:na da monaan lakol ka kahidapan; darwa dapo da batay rateng. 13 Maraw pinoypoyan ag ikaanim ka anghil da konin bodyong, naay arngeyan sai ka pang-o ibat sa apat ka sorokan arengan yadi sa ginto sa ropangan Diyos. 14 Konin sinabi sa ikaanim ka anghil maki bodyong amba, Komo okadan da apat ka anghil ag nagapos sa tebteb lakol ka salog Iwpratis. 15 Da- binal-anan da apat ka anghil para bonoon da ikatatlo ka eray mga iraya; kora apat ba hinanda gayed para sa odas, da- aldaw, da- bolan da- dag-on tiya. 16 Sinabi sa naay da bilang mga sondalo angangabayo ba angaw-angaw. 17 Naay akitan sa makay akalkan da mga kabayo da- da mga magsakay saba maki pad takleb balayang sa soot makay din kolay apoy, da- posyaw makay ag bato da ngaran ba sapiro, da- madilaw makay asopri. Da olo mga kabayo ba makay olo liyon. Ibat sa kora bibi ba maglowas da apoy, loon da- asopri. 18 Ag tatlo ka lakol gidte ka kahidapan tiya da bomono sa ikatatlo ka eray kairayaan : ag apoy, loon da- asopri ag lomwas sa bibi mga kabayo. 19 Da kapangyadihan mga kabayo ba sa kora bibi da- sa kora ikoy ag makay otan da- maki olo naggamit sa magpakaskit. 20 Da natra sa mga iraya, ag nawed natay sa mga lakol ka kahidapan naba, ba nawed dapo din magsisi da- inogonan da kora magsamba sa mga daet ka ispirito da- sa mga nawed amba Diyos kora pinanawen, ag mga ginto da- pilak da- tangso da- bato da- kayo, nawed kaserey, nawed din karngey e nawed din kakadang. 21 Nawed din kora inogonan da kora magpamono, da- magmarayaw, da- magtabanan, da- magpanakaw.
1 Maraw kadalan naba naay dapo akitan da sai dapo ka anghil makapangyadihan palpot ibat sa soksokowan. Iya ba sa galem sai ka yaong da- maki balangaw sa konin dako olo. Magbalawas makay aldaw da konin kiray da- makay arigi mag-igang da konin binti. 2 Iya maki naggegen sai ka ibente ka kasoratan boka. Konin pinalaed sa dagat konin kanan paa, sa lopa kay da kaliwa. 3 Da- iya mang-o lakol makay man-ongal liyon. Maraw iya mang-o ba magtokawanan da pito ka dalegdeg. 4 Maraw kalbas da agtokawanan ba ako disin ba batay somorat ngani naay akarngeyan da sai ka tokawanan ibat sa soksokowan amba, Komo takleban da sabi ag pito ka dalegdeg da- ayaw:wa komo soraten. 5 Da- da anghil ag naay akitan magpatindeg sa dagat da- sa lopa ba pinaatatas da konin kanan alima 6 da- manompa sa ngaran Diyos ag nagkabiyag kaagoton man, ag Romarang langit da- lopa, dagat da- boo nakayman sata. Amba da anghil, Nawed:da batay maagot! Rateng:nga da odas! 7 No pinoypoyan:nani ag ikapito ka anghil da konin bodyong ba batay:ya gidte pinanawen Diyos da konin pakana ag nawed dapo amatangan mga iraya, makay ag konin pinapawa sa mga tagabarita konin tagapamanawen. 8 Maraw kalbas ba magtokawanan:nakay sa naay ag naay arngeyan agtokawanan ibat sa soksokowan amba, Kawo pabali sa anghil ag agpatindeg sa dagat da- sa lopa da- komo gawen da kasoratan boka konin naggenan. 9 Naay nga pinabaliyan da anghil da- naay inay-ayan da ibente ka kasoratan. Iya amba, Komo gawen da- kainen. Batay mapait sa komo sandok-sandok ngani sa komo kay bibi ba batay matam-is makay deges. 10 Naay tinabang da- namangan da ibente ka kasoratan. Matam-is nga makay deges sa naay bibi ngani maraw naay:ya tinlen ba pomait:ta da naay sandok-sandok. 11 Da- sinabi dapo sa naay amba, Kailangan kawo magbarita:akay para sa maoson kairayaan, lasyon, tokawanan da- hadi.
1 Maraw kadalan ba tinaboy sa naay ag anghil da sai ka panokat makay anos da- sinabi sa naay amba, Kawo handa:ani da- komo sokaten da lakol ka balay Diyos da- da arengan, da- komo bilangen da mga agsamba sata. 2 Ngani ayaw komo agsokaten da ayanmanan sa lowas balay Diyos, panawen tinaboy:ya naba sa mga iraya nawed magkilala sa Diyos. Kora batay nanlaedan da goraan lakol hinidang Diyos-naba ba da Hirosalim-sa apatnapo da- darwa ka bolan. 3 Ngani da naay darwa ka sistigo magkolabong ba naay tinaboyan kapangyadihan magbarita ibat sa naay sa sai ka ribo darwa ka daan da- animnapo ka aldaw naba. 4 Da mga sistigo naba ba da darwa ka poon olibo da- darwa ka solo-, ag magpatindeg sa ropangan Panginoon ag lopa. 5 No maki alabet magpahidap sa sidawa ba maglowas sa sidawa bibi da apoy mag-areng sa sidawa kalaban. Makay naba da batay katayan tawa man alabet magpakaskit sa sidawa. 6 Sidawa ba maki kapangyadihan magpaepet odan sa odas sidawa magbarita ibat sa Diyos. Sidawa ba maki din kapangyadihan gaw-en daya da sapa, da- magpababa sadi-sadi ka lakol ka kahidapan sa lopa tayma sidawa alabet. 7 Maraw kalbas sidawa magsistigo ba batay tomokad da hayop makay ag sarapinti ag sa kalaleman wala toko da- batay aglaban sa sidawa. Sidawa batay nadaeg da- batay nabono ag hayop, 8 da- da sidawa bangkay ba batay magtilagay sa baysak goraan lakol, sa nag-awit ngani Sodoma e Ihipto. Saba din pinako sa kodos da sidawa Panginoon. 9 Sa tatlo ka aldaw da- kalaati, da sidawa bangkay ba batay nagserey mga iraya ibat sa Roma-Roma ka lasyon, andana, tokawanan, da- kairayaan, da- kora nawed batay pomayag lebengen da sidawa bangkay. 10 Batay gidte angasan da boo mga iraya sa paranawan panawen natay ag darwa naba. Kora batay gidte magkasaya da- batay magpaltaboyan, panawen da darwa ka tagabarita naba ba tomaboy gidte masyado kahidapan sa kora. 11 Ngani maraw kalawey tatlo ka aldaw da- kalaati ba sidawa ba biniyag:gakay Diyos, da- sidawa patindeg. Nangalpa gidte da mga magserey. 12 Maraw kalbas ba sidawa akarngeyan da sai ka maeyat ka tokawanan ibat sa soksokowan amba, Kandawa towa paraoy! Da- sa odas magserey da sidawa mga kalaban ba sidawa kay ba pinasalbon:na sa sai ka yaong. 13 Sa odas din naba ba lomindol maeyat gidte. Nangaregnas da ikasampo ka eray goraan lakol, da- pito ka ribo ka iraya da nangatay. Da mga iraya kay nangatra ba nangaaliman, da- kora pinalakol da Diyos ag sa soksokowan. 14 Natped:dani da ikadarwa ka kahidapan lakol da- sa nawed:da te batay maagot ba batay din natped da ikatatlo. 15 Maraw pinoypoyan ag ikapito ka anghil da konin bodyong ba maki pad maeyat ka tokawanan ibat sa soksokowan magsabi amba, Da maghadi sa paranawan ba sa tamo:wani Panginoon Diyos da- sa konin Kiristo. Iya tay maghadi kaagoton man! 16 Da- da dalwampo da- apat ka pad koyay magtongka sa konin-konin tongkaan mga maki kapangyadihan sa ropangan Diyos ba lomohod da- somamba sa konin. 17 Kora amba, Yamen ba magpasalamat sa komo, Panginoon Diyos makapangyadihan sa boo, Diyos sa odas tiya da- sa kadalan! Komo ginamit da komo lakol ka kapangyadihan da- kawo:wani da maghadi. 18 Abaisan da mga nawed mag-isarig sa komo, ngani rateng:nga da odas komo kabaisan, odas kawo batay magpadosa sa mga nangatay:yani da- magtaboy bayad sa mga tagabarita ag komo tagapamanawen, da- sa boo komo mga hinidang ag maki kaliman sa komo, kayno ag maki kapangyadihan kayno ag wala. Odas:sa din para komo sopoon da mga anonopo sa paranawan. Naba:a ngani. 19 Nabokaan da rado banal gidte sa soksokowan, da- akitan da palagyan, ag katonayan kasaiyan Diyos sa konin mga kairayaan. Agad ba komoldap da- bomeet, da- domalegdeg, da- lomindol, da- omodan yilo makay lakol ka baritarwan.
1 Maraw kalawey naba ba akitan sa langit da sai ka katakataka gidte ka tandaanan : sai ka babayi nagkaabarotan aldaw da- magtimpo sa bolan. Da konin olo ba maki talawak yadi sa labindarwa ka magirem. 2 Iya bali:yani mamreg, kaya iya ba magpang-o panawen sa masyado magpamarian da- hidap. 3 Sai dapo ka tandaanan da akitan sa langit : sai ka tandaanan da akitan sa langit:sai ka mapola ka daragon lakol gidte maki pito ka olo da- sampo ka songay, da- maki talawak hadi da tayma olo, ag tanda kora kapangyadihan. 4 Inopyas konin ikoy da ikatatlo ka eray mga magirem sa langit da- da mga naba ba binenglay sa lopa. Maraw kadalan naba ba iya patindeg sa ropangan ag babayi batay:ya mamreg para kainen da polahan sa odas gidte iya pinreg. 5 Da- da babayi ba pemreg sai ka polahan lalaki ngani iya ba binaba sa Diyos sa konin tongkaan hadi. Da polahan naba da batay magpamahala sa boo mga lasyon maki panampok bakal. 6 Da babayi kay ba domalagan paraoy sa poro nawed apirmihan iraya, sa sai ka poro hinanda Diyos para sa konin para iya ba naalagaan sata sa sai ka ribo darwa ka daan da- animnapo ka aldaw. 7 Maraw kadalan naba, somikrab da labanan sa langit! Maglaban laki Migil, ag poon mga anghil, kaanggat konin pad anghil da- da daragon kay, anggat din da konin pad anghil. 8 Nadaeg da daragon da- konin pad anghil, da- kora ba namoyawan:nani sa langit. 9 Binenglay da lakol ka daragon, naba da koyay otan da ngaran ba aponin kadaetan e Satanas, ag andadaya sa boo paranawan. Iya binenglay sa lopa da- ag konin mga anghil. 10 Da- naay akarngeyan da magtokawanan maeyat magsabi amba, Rateng:ngani da karibriyan, da kapangyadihan da- da kahadian tamo Diyos da- da kapamahalaan konin Kiristo, panawen binenglay:yani da andadatos sa mga arian sa pag-isarig, ag sa kora ba magpandatos aldaw da- madlem sa ropangan tamo Diyos. 11 Iya ba kora dinaeg panawen sa daya Topa te da- sa kora magsistigo sa katotohanan; kora ba nawed manhinayang kora biyag kayno anggan sa katayan. 12 Kaya koyo angasan gidte, koyo boo mga ispirito magpamataw sa kalangitan! Ngani daet gidte sa mga agpamataw sa lopa da- sa dagat! Panawen da kabaisan gidte aponin kadaetan ba rempa:ani sa koyo, panawen konin amatangan kabeste:a da odas para sa konin. 13 Maraw akitan ag daragon iya ba binenglay:ya sa lopa ba konin inagak da babayi pemreg sa polahan lalaki. 14 Ngani da babayi ba pinakan darwa ka lagay agila lakol para kailayog paparaoy sa poro hinanda sa konin sa poro nawed apirmihan iraya para iya ba aribri sa otan. Sata iya batay inalagaan sa tatlo ka dag-on da- anim ka bolan. 15 Panawen saba da otan ba magparantoy sapa makay salog lakol ibat sa konin bibi para anodon da babayi. 16 Ngani bomoka da lopa da- ineyep da sapa pinarantoy ag daragon, kaya tinolongan da babayi. 17 Mag-apoy-apoy da kabaisan ag daragon sa babayi kaya iya omalis da- konin:nakay nag-arampoy da Roma ka onga ag babayi, ag mga magtoltol sa bilin Diyos da- matepeden anggan sa kora magsistigo para sa laki Hisos. 18 Da- patindeg ag daragon sa boanginan dagat.
1 Maraw kalbas naay akitan tomakdang sa dagat da sai ka hayop maki pito ka olo da- sampo ka songay. Maki talawak da tayma songay da- sa tayma olo ba maki sorat sai ka ngaran magtongayaw sa Diyos. 2 Makay hayop liyopardo (makay amid lakol gidte) da hayop. Konin paa ba makay paa hayop oso da- da konin bibi ba makay bibi hayop liyon. Tinaboy ag daragon sa hayop da konin kapangyadihan makay hadi, da- lakol ka kapamahalaan. 3 Da sai sa mga olo hayop ba makay maki golat makay batay katay ngani pomiya din. Nahanga da boo sa paranawan sa hayop da- kora tomongroy sa konin. 4 Kora boo ba somamba sa daragon panawen konin tinaboy da konin kapamahalaan sa hayop. Kora din sinamba da hayop. Kora amba, Tawa kaya da makay ag hayop? Tawa kaya da kalaban sa konin? 5 Iya ba tinaboyan kapangyadihan magtokawanan mga kapalawlawan da- mga katongayawan sa Diyos da- magpamahala sa apatnapo a-darwa ka bolan. 6 Konin nga tinongayaw da Diyos, da konin ngaran, da konin pamatawan, da- da boo magpamataw sa soksokowan. 7 Tinaboy din sa konin kapangyadihan maglaban da- daegen da mga hinidang Diyos, da- magpamahala sa tayma lasyon, andana, tokawanan da- kairayaan. 8 Batay somamba sa konin da boo nagkabiyag sa lopa, poyida ngani da mga iraya da kora ngaran ba nasorat sa listahan mga maki:ya biyag, ibat dapo rinarang da paranawan. Da listahan naba ba nagdahanan Topa te ag binono. 9 Da tawa man maki pakarngey ba makarngey! 10 Da tawa man para sa alila ba batay naalila. Da iya para natay sa pisaw ba sa pisaw batay natay. Naba da odas kailangan da mga hinidang Diyos ba mag-agwanta da- mag-isarig anggan. 11 Da- naay akitan da sai dapo ka hayop lomwas sa lopa. Iya maki darwa ka songay makay songay topa, ngani da konin tokawanan ba makay tokawanan daragon. 12 Konin ginamit da boo kapangyadihan ag monaan hayop sa konin ropangan. Da boo iraya sa paranawan ba konin limpod para kora magsamba sa monaan hayop maki golat batay katay ngani pomiya din. 13 Katakataka gidte da mga tandaanan pinanawen ag ikadarwa ka hayop, kada iya ba kaparagrag apoy sa lopa ibat sa langit akitan gidte mga iraya. 14 Konin nadaya da boo iraya sa lopa sa iya ba inabaya kapamanawen katakataka sa ropangan ag monaan hayop. Kora ba konin naranggot pomanawen sai ka ladawan monaan hayop agolatan pisaw batay natay ngani pomiya kay. 15 Pinayagan din ag ikadarwa ka hayop pakanen inawa da ladawan ag monaan hayop. Kaya katokawanan da ladawan da- konin nagpabono da boo dayo somamba sa konin. 16 Sa lopod batay tinandaan hayop da boo mga iraya sa kora kanan alima e sa kiray. Da boo ba tinandaan, kayno ibente da- lakol, kayno mga maoson nag-apo da- mahidapen, kayno bal-an da- tagoanggat. 17 Da- wala abaya bomili e magpabili no nawed ba ag maki tanda ngaran hayop e bilang konin ngaran. 18 Da kailangan towa ba gamiten da kadonongan. Abaya amatangan ag tawa man madonong da alabet sabiyen bilang ag ngaran hayop, panawen naba ba ngaran sai ka iraya. Da bilang ba anim ka daan da- animnapo da- anim.
1 Maraw kadalan naba ba ako semrey da- koyo gidte pakarngeyan! Sata da Topa te magpatindeg sa bogsor Sion, kaanggat da sai ka daan apatnapo da- apat ka ribo ka iraya maki sorat ngaran Topa te da- ngaran konin Apang sa konin-konin kiray. 2 Da- naay akarngeyan sai ka beet ibat sa soksokowan makay ayas basaran sapa da- makay laboo dalegdeg. Da beet naay akarngeyan ba makay beet mga aninibray kodyapi. 3 Kora ba mag-igway sai ka bayo ka igway sa ropangan tongkaan hadi, da- sa ropangan ag apat ka rinarang maki biyag da- ag dalwampo da- apat ka pad koyay. Wala kamatang ag igway naba no nawed ba ag sai ka daan apatnapo da- apat ka ribo timbos ibat sa paranawan. 4 Naba da mga lalaki nawed gomaraw sa babayi, panawen kora ba binata gidte. Kora mag-anggat sa Topa te kayno saan iya paraoy. Kora ba makay monaan bokar sa mga timbos pinoyida para sa Diyos da- sa Topa te. 5 Kora ba nawed mamosli kaagot man. Kora ba wala gidte kasidaan. 6 Da- naay akitan da sai dapo ka anghil mag-ilayog sa kalaw-awan nagbaba da sai ka piya ka barita wala arasan para pangadaren sa mga magpamataw sa lopa, sa boo lasyon, andana, tokawanan, kairayaan. 7 Konin sinabi maeyat amba, Koyo aliman sa Diyos da- koyo podiyen da konin kalakolan, panawen rateng:nga da odas iya maghosga sa mga iraya! Koyo sambahen da Diyos ag Romarang langit da- lopa, dagat da- mga toboran. 8 Tomongroy da ikadarwa ka anghil magsabi amba, Naregnas, naregnas:sani da makapangyadihan ka goraan lakol Babilonya! Iya da pomainem sa boo mga iraya ag konin kakaya-kaya ka panawen makay mapaang ka inemen kalibed. 9 Tomongroy:yakay da ikatatlo ka anghil da- maeyat magsabi amba, Da tawa man magsamba sa hayop da- sa konin ladawan da- magtabang konin tanda sa alima e sa kiray 10 ba batay minem inemen kalibed ag kabaisan Diyos, ag binobo wala liog sa ineman konin kabaisan. Kora batay pinahidapan gidte sa apoy da- asopri sa ropangan mga banal ka anghil da- sa ropangan ag Topa te. 11 Da loon ibat sa apoy ag magpahidap sa kora ba batay lomipetek kaagot man. Aldaw da- madlem ba wala kapahingahan da mga magsamba sa hayop da- sa konin ladawan, da- da tawa man magtabang konin tanda. 12 Kaya kailangan magpakaonay da mga hinidang Diyos, ag magpamirmi sa mga bilin Diyos da- sa pag-isarig sa laki Hisos. 13 Da- naay akarngeyan da sai ka magtokawanan ibat sa soksokowan amba, Komo soraten tiya : Ibat mona ba angasan da mga nangatay maki kasaiyan sa Panginoon! Sinabi Ispirito Banal amba, Hee ngani-! Kora batay magpahinga sa kora mabyat ka panawen, panawen kora batay inanggatan ag bokar kora mga pinanawen. 14 Maraw kalbas ba ako semrey da- koyo gidte pakarngeyan! Naay akitan da sai ka mapoti ka yaong, da- magtongka sata da sai ka makay din iraya maki talawak ginto da- maki naggenan sai ka maerep ka yatab. 15 Sai dapo ka anghil da lomwas ibat sa balay Diyos da- maeyat magtokawanan sa magtongka sa yaong amba, Komo:wa gamiten da komo yatab da- kawo omani:yani panawen odas:sani. Hinog:ga da aniyen sa lopa! 16 Winakiwas ag magtongka sa yaong da konin yatab da- naani da aniyen sa lopa. 17 Da- sai dapo ka anghil da naay akitan lomwas sa balay Diyos sa soksokowan. Iya ba maki naggenan sai ka maerep ka karit. 18 Lomwas kay ibat sa arengan mga maayooy da sai dapo ka anghil, ag magpamahala sa apoy. Konin sinabi maeyat sa anghil maki maerep ka karit amba, Komo:wa gamiten da komo karit da- komo aniyen da mga obas sa boo obasan sa lopa, panawen hinog:gani. 19 Kaya winakiwas ag anghil da konin karit. Inani da mga obas da- binenglay sa lesaan kabaisan gidte Diyos. 20 Linesa sa lowas goraan da mga obas da- ibat sa lesaan ba bomaha da daya, tatlo ka daan ka kilomitro da aba da- pantay sa iraya da lalem.
1 Naay akitan da sai dapo ka katakataka gidte ka tandaanan sa langit: Pito ka anghil maki nagbaba pito ka lakol ka kahidapan. Tiya da paoriyan ka mga kahidapan panawen towa batay tangboan da kabaisan Diyos. 2 Ako maki:yakay akitan makay sai ka dagat bobog magbalangabang. Naay din akitan da mga mandaeg sa hayop da- sa konin ladawan da- sa bilang konin ngaran. Kora magpatindeg sa tebteb dagat makay bobog naggenan da mga kodyapi tinaboy Diyos sa kora. 3 Da- kora nag-igway da igway koyay Moysis ag tagapamanawen Diyos, da- da igway Topa te amba, Panginoon Diyos ag Makapangyadihan sa boo, Makapangyadihan da- katakataka da komo mga panawen! Kawo da Hadi mga lasyon, Mataldeng da- totoo da komo mga dalan! 4 Panginoon, da boo iraya ba batay aliman sa komo da- batay magpalakol sa komo ngaran. Kawo ngani da Banal! Da boo mga lasyon ba batay pabali da- batay somamba sa komo, panawen akitan boo da mataldeng komo mga panawen. 5 Maraw kalbas naba naay din akitan naboka sa soksokowan da lakol ka balay Diyos da- sa galem naba da torda ag kasaiyan Diyos sa konin mga kairayaan. 6 Lomwas sa balay Diyos da pito ka anghil maki nagbaba pito ka lakol ka kahidapan. Kora magsool malinis da- mapoti ka golanit da- maki pamegkes yadi sa ginto sa soot. 7 Tinaboy sa kora ag sai sa apat ka rinarang maki biyag da pito ka ineman yadi sa ginto. Da mga naba ba kapno gidte kabaisan Diyos ag nagkabiyag kaagot man. 8 Da- da balay Diyos ba nakapno loon ibat sa kalakolan da- kapangyadihan Diyos, da- wala kasled sata anggan nawed kalbas da pito ka kahidapan ag nagbaba pito ka anghil.
1 Ibat sa balay Diyos sa soksokowan naay akarngeyan da sai ka maeyat ka magbilin sa pito ka anghil amba, Idaw:wa koyo da- koyo boboon sa lopa da laman koyo nagbaba ineman, naba da kabaisan Diyos! 2 Mangadang da monaan anghil da- konin binobo sa lopa da laman konin nagbaba ineman. Panawen naba ba maki:ya apres da- karingring ka golat da mga iraya maki tanda hayop da- somamba sa konin ladawan. 3 Binobo ag ikadarwa ka anghil sa dagat da laman ag konin nagbaba ineman. Da sapa ba nagawa makay:ya daya iraya natay:yani, da- nangatay da tayma rinarang maki biyag sa dagat. 4 Binobo kay ag ikatatlo ka anghil sa mga salog da- toboran da laman konin nagbaba ineman, da- nagawa:a din daya da mga naba. 5 Da- naay akarngeyan da sinabi ag anghil magpamahala sa mga sapa amba, Yamen Diyos, kawo mataldeng sa kawo maghosga, Kawo da Diyos mona da- kadalan, kawo da Banal! 6 Panawen kora binobo da daya mga hinidang da- mga tagabarita ibat sa Diyos, da- kora ba komo pinakan daya para inemen. Naba da bagay sa kora. 7 Da- naay:yakay akarngeyan ibat sa arengan pagsambahan da tokawanan tiya, Panginoon Diyos ag makapangyadihan sa boo Mataldeng da- totoo gidte da komo padosa! 8 Binobo ag ikaapat ka anghil sa aldaw da laman konin nagbaba ineman. Da- naba ba pinakan kapangyadihan para apasi da mga iraya sa konin gidte ibeng. 9 Kora nga ba nangapasi ngani kora dayo dapo din magsisi da- mag-ogon kora mga kadaetan da- magpodi sa Diyos no nawed ba kora dapo tinongayaw da ngaran Diyos ag maki kapangyadihan agpababa ag makay naba ka kahidapan. 10 Binobo ag ikalima ka anghil da laman konin nagbaba ineman sa tongkaan hayop, da- demelem da konin kahadian. Panawen sa masyado ka hidap ba kinayat mga iraya kora dila, 11 da- kora tinongayaw da Diyos panawen sa kora nagdanasan hidap da- sa kora pad golat. Kayno amba ba nawed dapo din kora magsisi da- mag-ogon sa kora mga daet ka nagpanawen. 12 Binobo ag ikaanim ka anghil da laman konin nagbaba ineman sa lakol ka salog Iwpratis. Naikat da salog, da- agkamaki dalan para sa mga hadi ibat sa Sirangan. 13 Da- naay akitan lomwas ibat sa pad bibi daragon, da- hayop da- magpasoli tagabarita, da tatlo ka kapangemres ka ispirito makay pad palaka. 14 Naba ba mga daet ka ispirito magpamanawen katakataka. Nagparaoyan ag mga naba da boo mga hadi sa boo paranawan para kora ba iponon para sa labanan sa piyor ka aldaw Diyos ag makapangyadihan sa boo. 15 Amba da Diyos, Koyo gidte pakarngeyan! Ako ba batay:ya rateng makay ag agpanakaw! Angasan da iya handa boo odas, da- da nawed magloso konin nagsool. Iya nawed batay mangadang maglandayan da- nawed batay akayaan sa kaosonan. Naba:a ngani. 16 Da- inipon ag mga ispirito da mga hadi sa poro nag-awit Armagidon sa tokawanan Hibriyo. 17 Binobo ag ikapito ka anghil da laman konin nagbaba ineman sa kaltengan. Da- maki magtokawanan maeyat ibat sa tongkaan hadi sa balay Diyos amba, Natped:dani. 18 Komoldap da- domalegdeg, omalengan da- lomindol maeyat gidte. Wala dapo makay naba kaeyat ka lindol ibat:ta maki:ya iraya sa paranawan; naba ba sai ka lindol maeyat gidte da- kapangirabot. 19 Nangapisang sa tatlo ka eray da lakol ka goraan, da- nangaregnas da boo lakol ka goraan sa boo paranawan. Nawed alingwanan Diyos da lakol ka goraan Babilonya para iya ba pakanen inemen kalibed ag konin gidte kabaisan. 20 Nalingo da boo inelangan, nangatpas da boo bogsor. 21 Omodan yilo makay pad lakol ka baritarwan nawed ngani sai ka kaban da kabyatan tayma sai, da- manragrag sa mga iraya. Da- kora tinongayaw da Diyos panawen kapangirabot gidte da lakol ka kahidapan naba.
1 Maraw kalbas ba sai sa pito ka anghil maki binaba pito ka ineman ba pabali. Iya amba, Apora kawo! Naay batay Pinaban-Aw sa komo no omaning batay pinadosahan da ananalandi ka babayi, pag goraan lakol ag magtongka sa tebteb maoson ka salog. 2 Iya da kinalonyaan mga hadi sa lopa, da- makay nalibed sa inemen da boo iraya sa paranawan sa iya magkalonya sa kora. 3 Ako sa kapangyadihan Ispirito Banal, da- binaba anghil sa poro nawed apirmihan iraya. Naay akitan sata da sai ka babayi magsakay sa sai ka mapola ka hayop. Da hayop ba maki pito ka olo da- sampo ka songay. Iya ba maki sorat sa boo lawas ag boo tokawanan panongayaw sa Diyos. 4 Da golanit ag babayi ba makay tina obi da- mapola; da konin pangganda ba yadi sa ginto, mahalaga ka bato da- pirlas. Iya maki naggegen ineman yadi sa ginto kapno kapangemres da- mga madomi ka panawen ibat sa iya ba magpangalonya. 5 Da- sa konin kiray ba maki sorat sai ka ngaran nawed amatangan da alabet sabiyen amba, Da goraan lakol Babilonya, da adang ag mga ananalandi da- boo kapangemres ka kakaya-kaya sa lopa. 6 Da- naay akitan da babayi naba ba libed sa daya mga hinidang da- sa daya mga binono panawen sa kora pag-isarig sa laki Hisos. Ako ba masyado gidte manggilalas maraw iya naay akitan. 7 Ako tinanong ag anghil amba, Kaytang kawo magtaka? Naay batay sinabi sa komo da alabet sabiyen ag babayi da- konin nagsakyan hayop ag maki pito ka olo da- sampo ka songay, ag nawed dapo amatangan mga iraya. 8 Ag hayop komo akitan ag monaan ba biyagan ngani mona ba natay:yani. Naba ba batay:yakay paban-aw ibat sa kalaleman wala toko da- batay gidte naalyang. Da mga iraya nagkabiyag sa lopa, ag nawed nasorat da kora ngaran sa listahan mga maki:ya biyag ibat dapo rinarang da paranawan ba batay gidte manggilalas no kora akitan da hayop, panawen ag monaan ba biyagan ngani mona ba iya ba binono:ani ngani batay:yakay paban-aw. 9 Tiya ba nawed batay amatangan iraya no nawed batay rinemrem piya. Da pito ka olo ba pito ka bogsor nagtongkaan ag babayi. 10 Nagladawan din tiya da pito ka hadi : da lima sa kora ba nangatay:yani, maghadi dapo da sai da- da paoriyan ba nawed dapo rateng. No iya rateng ba kailangan iya maghadi ngani nawed te maagot. 11 Da- da hayop ag monaan ba biyagan ngani mona ba wala:ani ba iya da ikawalo ka hadi, amba man iya ba sai sa pito. Iya batay:ya gidte naalyang. 12 Da sampo ka songay ag komo akitan ba sampo ka hadi nawed dapo maghadi, ngani kora ba batay mamahala kaanggat hayop sa sai ka odas. 13 Sai ngani da remrem ag sampo naba, da- kora ba batay pinasagalem sa hayop da kora kapangyadihan da- kapamahalaan. 14 Kora batay linabanan da Topa te ngani kora ba konin batay dinaeg panawen iya da Panginoon boo mga panginoon, da- da Hadi boo mga hadi. Batay kaeray sa iya mandaeg da mga pinatwagan da- hinidang da- mateped ka konin tagatoltol. 15 Sinabi din sa naay ag anghil amba, Ag komo akitan sapa nagtongkaan ag ananalandi ka babayi ba naba da mga iraya ibat sa tayma kairayaan, kaosonan, lasyon, da- kalasi tokawanan. 16 Da sampo ka songay ag komo akitan da- da hayop ba batay abaisan sa ananalandi ka babayi. Kora batay ginaro da boo konin nag-apo da- iya ba batay inogonan maglandayan. Kora batay namangan da konin ener da- batay gidte inareng. 17 Panawen pinaremrem Diyos sa kora da konin alabet papanawenen sa kora amba kora ba magkasai da- kora pasagalemen sa hayop da kora kapamahalaan da- kapangyadihan, anggan nawed dapo natped da boo mga tokawanan Diyos. 18 Da babayi komo akitan ba da lakol ka goraan pag maghadi sa mga hadi sa lopa.
1 Maraw kalbas naba ba naay akitan lompot ibat sa soksokowan da sai dapo ka anghil maki lakol ka kapangyadihan. Apawaan da boo paranawan panawen sa konin kasorap ka rawa. 2 Iya tomokawanan maeyat gidte amba, Nangaregnas, nangaregnas:sani da lakol ka goraan Babilonya! Iya ba pamatawan:na ngani mga bokaw, olian mga daet ka ispirito da- pogadan mga kapangemres ka mga ibon. 3 Panawen konin pinainem makalibed kaskeran konin mga madomi ka panawen da boo mga lasyon. Mangalonya sa konin da mga hadi sa lopa, da- da mga magtindahan ba omoson da kora nag-apo sa konin makakaya gidte ka pamiyag. 4 Naay akarngeyan ibat sa soksokowan da sai dapo ka magtokawanan amba, Naay kairayaan, koyo paadayo sa konin para koyo ayaw maki eray sa konin mga kadaetan da- ayaw apadosahan anggat sa konin, 5 panawen somko:wa da konin mga kadaetan anggan sa soksokowan da- nawed alingwanan Diyos da konin mga daet ka panawen. 6 Koyo panawenen sa konin da konin pinanawen sa koyo, koyo doblihen da ganti sa konin pinanawen. Koyo pakapnoon da konin ineman ag inemen lalo dapo mapait sa konin liniog sa koyo. 7 No kaomaning kaoson iya pomalakol sa konin sadiri da- pomanawen kakaya-kaya ba amba din koyo padamdamen sa konin da pahidap da- karongkotan gidte. Iya magpalawlaw sa konin remrem amba, Ako ba hadi gidte. Ako magtongka sa naay tongkaan hadi. Ako ba nawed balo da- nawed batay magpanangis kaagot man. 8 Panawen saba ba sa sai ngani ka aldaw ba batay rateng sa konin da mga kahidapan tiya : pandalan da- karongkotan gidte da- tagbayog. Iya batay inareng apoy panawen makapangyadihan da Panginoon Diyos ag maghosga sa konin. 9 Batay magpanangis da- omog-wang da mga hadi sa lopa ag mangalonya da- mamiyag sagana anggat sa konin maraw kora apatpaan ma-gloon da nagkaareng goraan lakol. 10 Kora batay ngani patindeg sa adayo panawen kora aliman nadamay sa iya maghidap. Kora batay sinabi amba, Kapangirabot, kapangirabot gidte da nangyadi sa lakol da- makapangyadihan ka goraan Babilonya! Sa sai ngani te ka odas ba natped:da da konin padosa. 11 Panawen sa konin ba batay din magpanangis da- marongkot da mga magtindahan sa paranawan panawen wala:a magbili ag kora mga nagtinda: 12 mga ginto, pilak, mahalaga ka bato da- pirlas; Roma-Roma ka kalasi papa, ag nag-awit lino da- sida, mga papa makay tina obi e kondiman, da boo kalasi mabango ka kayo, da boo mga nakayman yadi sa pangil hayop ilipanti; mga mahal ka kayo, tangso, bakal, da- marmol; 13 sai ka pampalasa da ngaran ba kanila, mga panoka, mga maayooy, sai ka mabango ka reta da ngaran ba mira, bansamira, inemen kalibed da- langis, ginalpong da- tirigo, mga baka da- topa, mga kabayo da- kalisa, da- mga iraya, naba ba tagoanggat. 14 Batay sinabi sa konin mga magtindahan amba, Wala:a da boo mga piya ka nakayman komo alabet, nawed:da batay komo akitan:nakay da boo komo karon-an anggan da komo kagandahan! Panawen da mga naba ba wala:ani. 15 Nawed tay pabali da mga magtindahan omoson kora nag-apo sa goraan lakol naba panawen kora ba aliman nadamay sa iya maghidap. Kora batay agpanangis da- batay marongkot gidte. 16 Kora batay sinabi amba, Kapangirabot! Kapangirabot gidte da nangyadi sa goraan lakol! Ag monaan ba somool mga maganda gidte ka papa, mga papa tina obi da- kondiman, da- maki pampaganda yadi sa ginto, mga mahalaga ka bato da- pirlas! 17 Sa sai ngani te ka odas ba nangawala:ani da boo konin nag-apo. Ibat sa adayo ba mamatpa da mga kapitan mapor da- da mga magpanakayan da- da mga magpamanawen sa mapor, da- da boo nagkabiyag sa magpandagat, 18 da- maraw kora akitan da loon ag nagkaareng goraan lakol ba kora mamagtokawanan maeyat amba, Nakay ka goraan da makay ag goraan lakol naba? 19 Kora pinalagyan abowan da kora olo da- kora ba magpakongkong lakol amba, Kapangirabot! Kapangirabot gidte da nangyadi sa goraan lakol! Iya da inibatan maoson nag-apo da boo maki sakayan sa dagat. Sa sai ngani te ka odas ba naoraw:wani da boo. Naba:a ngani. 20 Koyo angasan, koyo boo sa langit, sa nangyadi sa konin! Koyo angasan, koyo mga hinidang, mga pinili sogoan, da- mga tagabarita ibat sa Diyos! Panawen iya ba pinadosahan:nani Diyos panawen sa konin pinanawen sa koyo! 21 Kalbas, sai kay ka makapangyadihan ka anghil da gomaro sai ka bato makay lakol ka gilingan bato. Naba ba konin binenglay sa dagat da- sinabi amba, Maeyat gidte makay naba batay rinegnas da lakol ka goraan Babilonya, da- iya ba nawed:da tay akitan:nakay! 22 Nawed:da batay akarngeyan sa komo kaagot man da mga beet kodyapi, angingigway, bangsi da- patarorot! Nawed:da batay akitan:nakay sa komo da mga pandayan sa nakayman ka kalasi panawen da- nawed:da din batay akarngeyan sa komo da beet mga gilingan bato! 23 Kawo nawed:da batay arawaan kayno sai ka solo-, nawed:da din batay akarngeyan sa komo da masaya ka tokawanan lalaki da- babayi batay kinasal. Panawen da komo mga magtindahan ba mga makapangyadihan sa paranawan da- komo dinaya da boo mga lasyon sa kawo magmarayaw. Naba:a ngani. 24 Da- sa konin ba asbokan da daya ag mga tagabarita ibat sa Diyos, da- mga hinidang da- boo binono sa paranawan.
1 Maraw kadalan naba naay akarngeyan da makay maeyat ka lalaean kaosonan gidte iraya sa soksokowan mag-igway makay tiya: Podiyen da Diyos! Da karibriyan da- kalakolan da- kapangyadihan ba sa tamo Diyos! 2 Totoo da- mataldeng da konin hosga! Panawen konin hinosga da ananalandi pomadaet sa paranawan panawen sa iya mangalonya. Iya pinadosahan:na Diyos panawen sa iya bomono konin mga tagapamanawen. 3 Da- kora magsabi:yakay amba, Podiyen da Diyos! Maglipetek da loon sa nagkaareng lakol ka goraan kaagoton man. 4 Da dalwampo da- apat ka mga koyay da- da apat ka rinarang maki biyag ba lomohod da- somamba sa Diyos ag magtongka sa tongkaan hadi amba, Amba:a ngani-! Podiyen da Diyos! 5 Da- ibat sa tongkaan hadi ba maki magsabi amba, Koyo podiyen da tamo Diyos, koyo boo konin tagapamanawen, kayno makapangyadihan da- mahidapen, koyo mga nagkaaliman sa konin! 6 Maraw kadalan ba naay akarngeyan da makay sai ka lalaean maoson gidte ka iraya, makay ayas maoson ka sapa da- dalineg mga dalegdeg amba, Podiyen da Diyos! Panawen maghadi da Panginoon tamo Diyos ag Makapangyadihan sa boo! 7 Tamo angasan da- asyagan! Iya tamo palakolon! Panawen rateng:nga da magkasal Topa te da- da konin sawa ba handa:ani. 8 Iya ba pinasoolan malinis gidte da- makinang ka golanit, naba da mga mataldeng ka panawen mga hinidang Diyos. 9 Da- sinabi sa naay ag anghil amba, Komo soraten tiya: Angasan da mga nagpaparaoy sa handaan sa kasal Topa te. Iya amba dapo, Naba gidte da sinabi Diyos. 10 Ako lomohod sa konin ropangan para iya ba sambahen ngani konin sinabi sa naay amba, Ayaw! Ako ba tagapamanawen Diyos makay din kawo da- mga komo arian matepeden sa kora somistigo para sa laki Hisos. Da Diyos da komo sambahen! Naba:a ngani. Panawen da katotohanan Pinaban-Aw laki Hisos ba naba da magparemrem sa mga tagabarita ibat sa Diyos. 11 Maraw kadalan naba ba nabokaan da langit da- koyo gidte pakarngeyan! Naay akitan da sai ka kabayo mapoti. Da agsakay saba ba inawit Asarigan gidte da- Totoo. Mataldeng iya maghosga da- maglaban. 12 Makay mag-igang apoy da konin mga mata da- iya ba nagkaasorbongan maoson ka talawak ag tanda sa iya maghadi:a gidte. Sinorat sa konin lawas da sai ka ngaran wala kamatang no nawed ba iya ngani. 13 Binabad sa daya da konin bado da- da konin ngaran ba Tokawanan Diyos. 14 Anggat sa konin da mga sondalo Diyos, magsool malinis da- mapoti gidte ka golanit da- magsakay din sa mga kabayo mapoti. 15 Maki lomwas maerep ka pisaw sa konin bibi para daegen da mga lasyon. Kora ba konin batay pinamahalaan sa panampok bakal da- konin batay nanlaedan da obas sa lesaan ag kabaisan gidte Diyos ag Makapangyadihan sa boo. 16 Sa konin nagsool da- sa konin panobo ba maki sorat ngaran amba, Hadi boo mga hadi, da- Panginoon boo mga panginoon. 17 Maraw kalbas, naay akitan da sai ka anghil magpatindeg sa aldaw. Konin sinabiyan maeyat da boo mga ibon mag-ilayog sa kalaw-awan amba, Koyo towa paraoy, da- magrimpon para sa lakol ka handaan Diyos! 18 Apora:a koyo! Koyo kainen da ener mga hadi, mga pinagkangpoon mga sondalo, mga iraya makapangyadihan, da- pad kabayo da- da kora mga sakay. Koyo kainen da ener boo mga iraya, tagoanggat da- bal-an, mahidapen da- makapangyadihan. 19 Da- naay akitan magrimpon da hayop da- da pad hadi sa paranawan, kaanggat da kora mga sondalo para labanan da magsakay sa kabayo da- da konin mga sondalo. 20 Naabel:la ag hayop da- naabel:la din da magpasoli tagabarita, ag mamanawen mga kapanggilalas sa ropangan hayop. Ag pad kapanggilalas naba da konin ginamit sa mandaya sa mga iraya maki tanda hayop da- somamba sa konin ladawan. Da darwa naba ba binenglay biyagan sa dagat magbalangabang asopri. 21 Kora pad sondalo ba binono sa pisaw aglowas sa bibi ag magsakay sa kabayo da- magsawa:a da pad ibon sa magkain sa kora pad bangkay.
1 Maraw kalbas, naay akitan da sai ka anghil maglopot ibat sa soksokowan, maki naggenan da sosi kalaleman wala toko da- sai ka tagikara lakol. 2 Konin inabel da daragon, ag koyay otan ibat ag monaan dapo da ngaran ba aponin kadaetan da- Satanas, da- iya ba konin ginapos sa sai ka ribo ka dag-on. 3 Da- iya ba binenglay ag anghil sa kalaleman wala toko, da- tineplan da- pinatibayan gidte da takep naba para iya nawed kalwas da- kapandaya dapo sa mga lasyon anggan nawed kalbas da sai ka ribo ka dag-on. No kalawey naba iya batay binal-anan sa nawed te maagot. 4 Naay akitan maki mga tongkaan mga maki kapangyadihan da- da mga magtongka sata ba pinakan kapangyadihan mamahala. Naay din akitan da mga gisarem ag mga iraya pintolan leey panawen sa kora somistigo para sa laki Hisos da- pomangadar Tokawanan Diyos. Kora nawed somamba sa hayop kayno sa ladawan naba, nawed din tomabang tanda hayop sa kora kiray kayno sa alima. Kora biniyag:gakay para maghadi kaanggat laki Kiristo sa sai ka ribo ka dag-on. 5 Naba da monaan pagkabiyag:gakay mga nangatay. Batay din biniyag da Roma dapo ka mga nangatay no kadalan da sai ka ribo ka dag-on. 6 Angasan gidte da mga maki eray sa monaan pagkabiyag:gakay. Kora ba pinoyida gidte Diyos. Wala kapangyadihan sa kora da ikadarwa ka katayan. Kora ba batay mamanawen para sa Diyos da- para sa laki Kiristo da- kora batay maghadi kaanggat sa laki Kiristo sa sai ka ribo ka dag-on. 7 Maraw kalbas da sai ka ribo ka dag-on ba batay binal-anan laki Satanas sa konin pirisohan. 8 Iya batay lomwas para dayaen da boo mga lasyon sa paranawan, naba da Gog da- da Magog. Kora ba konin batay rinimpon da- pinaanggat sa maglabanan. Kora ba kaoson boangin sa dagat. 9 Kora komayap sa boo paranawan da- pinaribokan da pamatawanan mga hinidang Diyos da- da konin gidte nagpalayaw goraan lakol. Ngani naragrag da apoy ibat sa soksokowan da- kora ba inareng. 10 Da- da aponin kadaetan ag domaya sa kora ba binenglay sa dagat magbalangabang asopri, ag pagbenglayan din hayop da- magpasoli tagabarita. Kora batay gidte pinahidapan aldaw da- madlem kaagoton man. 11 Maraw kalbas naba naay akitan sai ka lakol ka tongkaan hadi mapoti da- da magtongka sata. Nagkaoraw:wani da lopa da- da langit sa konin ropangan, da- nawed:da akitan:nakay. 12 Da- naay akitan magpatindeg sa ropangan tongkaan da mga nangatay, kayno makapangyadihan da- mahidapen, da- binokaan da pad kasoratan maki listahan boo pinanawen mga iraya. Binokaan da sai dapo ka kasoratan, naba da listahan mga maki:ya biyag. Hinosgahan da mga nangatay toltol sa kora pinanawen, makay ag nagkasorat sa mga kasoratan. 13 Inowa ag dagat da mga nangalimes. Pinalwas din ag katayan da- ag pagpanyaan mga nangatay da mga sata. Kora boo ba hinosgahan toltol sa kora pinanawen. 14 Maraw kalbas ba binenglay sa dagat agbalangabang asopri da katayan da- da pagpanyaan mga nangatay. Da dagat agbalangabang ba naba da ikadarwa ka katayan. 15 Binenglay sa dagat agbalangabang da tawa man nawed nasorat da konin ngaran sa listahan mga maki:ya biyag.
1 Maraw kalbas naba naay akitan da sai ka bayo:wakay ka langit da- bayo:wakay ka lopa panawen wala:ani da monaan langit da- lopa; wala:a din da dagat. 2 Da- naay akitan da goraan lakol hinidang Diyos, naba ba da bayo:wakay ka Hirosalim, maglopot ibat sa Diyos sa soksokowan, handa gidte makay sai ka babayi batay kinasal pinaganda da- handa somalobong sa konin batay sawa. 3 Da- naay arngeyan da sai ka maeyat ka tokawanan ibat sa tongkaan Diyos amba, Koyo gidte pakarngeyan! Ibat mona ba da Diyos ba batay kaliog sa mga iraya! Iya batay mamataw kora kaanggat da- kora ba batay konin mga kairayaan. Iya ba kora batay kaanggat da- iya da kora batay Diyos. 4 Da- konin batay pinair da boo mga bingas sa kora mga mata. Wala:a katayan, wala:a kahidapan, wala:a magpanangis, wala:a din maskit panawen nawala:ani da monaan mga nakayman. 5 Maraw kalbas sinabi Diyos, ag magtongka sa tongkaan hadi, amba, Koyo gidte pakarngeyan! Bayo:wakay da boo nakayman! Naba da naay nagpanawen. Da- konin sinabi sa naay amba, Komo soraten tiya panawen asarigan da- totoo gidte da mga tokawanan tiya. 6 Sinabi dapo din sa naay amba, Natped:dani! Ako da Alpa da- da Omiga, da monaan da- da paoriyan. Da tawa man makainem ba naay batay pinakan wala bayad sapa ibat sa toboran sapa magtaboy biyag gidte. 7 Naba da batay tinabang ag batay mandaeg. Ako ba konin batay Diyos, da- iya kay ba naay batay onga. 8 Ngani sa mga bolalaen, sa mga nawed toloy mag-isarig sa Diyos, sa mga maki kapangemres ka kasaiyan sa daet ka ispirito, sa mga amomono iraya, sa mga magpangalonya, sa mga marayawan, sa mga magsamba sa nawed gidte Diyos, da- sa boo mga boslien ba kora ba batay sa dagat agbalangabang asopri, naba da ikadarwa ka katayan. 9 Da sai sa pito ka anghil maki binaba pito ka ineman kapno pito ka paoriyan mga kahidapan ba pabali sa naay. Iya amba, Apora kawo! da- naay batay Pinaban-Aw sa komo da babayi batay kinasal, ag batay sawa Topa te. 10 Ako ba sa kapangyadihan Ispirito Banal, da- tinonton ag anghil sa ngaway sai ka atatas gidte ka bogsor. Konin Pinaban-Aw sa naay da Hirosalim, da goraan lakol hinidang Diyos, da maglopot ibat sa Diyos sa soksokowan. 11 Naba ba marawa panawen sa rawa Diyos magpamildang makay mahal gidte ka bato da ngaran ba haspi kasorap gidte makay pasilag. 12 Maki lakol da- atatas ka dingding sa paribok goraan lakol maki labindarwa ka sakbawan; tayma sai ba maki anghil magbantay. Sa tayma sakbawan ba maki sorat ngaran sai sa labindarwa ka andana Israil. 13 Tatlo da sakbawan sa tayma mangkabila. 14 Da dingding lakol ka goraan ba maki labindarwa ka bato patibayan da- maki tig sai ka ngaran mga labindarwa ka pinili sogoan Topa te. 15 Da anghil magtokawanan sa naay ba maki naggenan panokat yadi sa ginto para sokaten da goraan lakol, da pad sakbawan da- da dingding naba. 16 Parihohan da goraan lakol. Kaamba din da aba da- da lapad. Sinokat ag anghil da goraan lakol: anim ka daan ka linabonan kadangen da aba da- kaamba din da lapad, da- kaamba din da katatasen. 17 Konin din sinokat da dingding : anim ka kawayan da katatasen toltol sa panokat iraya ag ginamit anghil. 18 Da dingding ba mahal ka bato da ngaran ba haspi, da- da goraan lakol ba panay ginto, magpamildang makay pasilag. 19 Da tayma patibayan dingding ba maki sadi-sadi ka kalasi mahal gidte ka bato maki sadi-sadi kay ka kolay. 21 Da mga sakbawan ba yadi sa pirlas, tayma sakbawan ba sai ngani ka pirlas. Panay ginto da danay-danayan goraan lakol da- magpamildang makay pasilag. 22 Ako ba wala akitan lakol ka balay Diyos sa goraan panawen da Panginoon Diyos ag Makapangyadihan sa boo da- da Topa te ba sidawa:a da nagsambahan. 23 Nawed:da kailangan da aldaw kayno bolan para apawaan da goraan lakol panawen da kasorap rawa:a Diyos da magtaboy pawa sata, da- da Topa te ba iya da solo-. 24 Sa konin nagkaarawaan ba batay agkadangan boo iraya, da- batay binaba sata mga hadi sa lopa da kora mga karon-an. 25 Batay layen boka sa boo aldaw da mga sakbawan goraan panawen wala batay madlem sata. 26 Batay din magbaba ag mga lasyon sata sa goraan da kora mga karon-an da- mahalaga ka taboy. 27 Ngani nawed batay kasled sata da nakayman madomi sa serey Diyos, e da iya magpamanawen kakayaan, e da iya mamosli. No nawed ba ag mga ngani maki:ya ngaran sa ribro Topa te, ag listahan mga maki:ya biyag.
1 Pinaban-aw din sa naay ag anghil da salog magtaboy biyag. Da sapa naba ba malislisaw makay pasilag. Magbokbokal sa tebteb tongkaan Diyos da- Topa te 2 da- mag-anod sa tenga danay-danayan goraan lakol. Sa mangkabila ag salog ba maki poon kayo magtaboy biyag, bolan-bolan ba magpamokar. Da- da mga daon naba ba pampapiya sa mga kairayaan. 3 Wala batay akitan sata nakayman sinompa Diyos. Sata sa goraan da tongkaan Diyos da- Topa te da- da Diyos ba batay sinamba konin mga tagoanggat. 4 Iya ba kora batay akitan kirayan da- batay nasorat sa kora kiray da konin ngaran. 5 Sata ba wala:a madlem, da- kora nawed:da batay agpangailangan solo- kayno pawa aldaw, panawen da Panginoon kora Diyos da batay kora solo-, da- kora batay maghadi kaagoton man. 6 Da- sinabi sa naay ag anghil amba, Asarigan gidte da- totoo da boo mga tokawanan naba. Da Panginoon Diyos, ag tomaboy konin Ispirito para magparemrem sa konin mga tagabarita, ba iya da pomaidaw sa konin anghil para pangadaren sa konin mga tagapamanawen da mga nakayman batay natped sa nawed:da tay maagot ka odas. 7 Laki Hisos amba, Koyo gidte pakarngeyan! Ako batay:ya rateng! Angasan da magteped sa mga barita sa ribro tiya! Naba:a ngani. 8 Ako laki Howan da karngey da- kaban-aw boo naba. Maraw naay:ya akarngeyan da- akitan da boo, ako ba lomohod sa ropangan ag anghil ag pomaban-aw sa naay mga naba para iya ba sambahen. 9 Ngani konin sinabi sa naay amba, Ayaw! Ako ba tagapamanawen din Diyos makay kawo, makay din ag mga tagabarita ibat sa Diyos, komo mga arian sa pag-isarig, da- boo magtoltol sa mga tokawanan sa ribro tiya. Da Diyos da komo sambahen! 10 Da- konin din sinabi sa naay amba, Ayaw komo aglihimen da pad barita sa ribro tiya, panawen bali:ya natped da mga naba. 11 Da mga daet ba toloy:ya magpamanawen daet, da madomi ba toloy:ya magpamanawen madomi, ngani da mataldeng kay ba toloy:ya magpakataldeng da- da iya boo gidte para sa Diyos ba toloy:ya magpakabanal. 12 Amba laki Hisos, Koyo gidte pakarngeyan! Ako batay:ya rateng! Naay nagbaba naay mga taboy batay tinaboy sa tayma sai para sa konin pinanawen. 13 Ako da Alpa da- da Omiga, da monaan da- da paoriyan, da ompisa da- da da arasan. 14 Angasan da maglinis kora nagsool para kora batay pinakan kapangyadihan para kasled sa goraan lakol da- mamangan bokar ag poon kayo magtaboy biyag. 15 Ngani batay naogonan sa lowas goraan da mga bait aso, da- da mga magmarayaw, mga agpangalonya, mga magpamono iraya da- magsamba sa nawed gidte Diyos, da- magpamosli-sa tokawanan da- sa panawen. 16 Ako laki Hisos da somogo naay anghil para da mga nakayman naba ba pangadaren sa koyo ag sa mga rimponan. Ako da kaapoan gidte Hadi Dabid. Ako da marawa ka tala sa omaga gidte. 17 Nagsabi ag Ispirito da- ag babayi batay kinasal amba, Apora kawo! Da- da iya karngey tiya ba kailangan din magsabi, Apora kawo! Pabali da iya makainem, gomaro da iya alabet sapa magtaboy biyag-naba ba wala bayad! 18 Ako laki Howan ba magpada- han sa tawa man karngey sa mga barita sa ribro tiya amba, Sa iya magdagdag sa nagsabi sa ribro tiya ba batay din dinagdagan Diyos sa konin padosa da mga kahidapan nasorat towa. 19 Da- da iya mag-alis nakayman sa mga barita sa ribro tiya ba batay din inalis Diyos da konin kapangyadihan mamangan bokar magtaboy biyag gidte da- kasled sa goraan lakol hinidang, ag nagtodyo towa. 20 Nagsabi ag magsistigo sa boo tiya amba, Piho:wa ngani-! Ako batay:ya rateng! Naba:a ngani. Amba:a ngani-! Kawo rateng:nga disin, Panginoon Hisos! 21 Da parongaw Panginoon Hisos ngani- da sa boo konin mga kairayaan.