The New Testament of our Lord and Saviour Jesus Christ

Matiu 1

1 Yiisa Masia yeejamm piinue na: u din tee Defid yaaboonne, ki Defid mun tee Abraham yaaboonn. 2 Abraham din mar Aisak, ki Aisak mar Jakɔb, ki Jakɔb mun mar Juda nan u waarii. 3 Juda din mar Peres nan Sera, ki bi naa tee Tamar; ki Peres din mar Hesronn, ki Hesronn mar Ram. 4 Ram din mar Aminadab, ki Aminadab mar Nasonn, ki Nasonn mun mar Salmonn. 5 Salmonn din mar Boas, wunba naa din tee Rahab na; ki Boas mar Obed, wunba naa din tee Ruf na; ki Obed mun mar Jese. 6 Jese din mar Kpanbar Defid; ki Defid mun mar Solomonn, ki u naa din tee Yuraya pakɔɔk. 7 Solomonn din mar Rehoboam, ki Rehoboam mar Abia, ki Abia mun mar Asa. 8 Asa din mar Jehosafat, ki Jehosafat mar Joram, ki Joram mun mar Yusaya. 9 Yusaya din mar Jotam, ki Jotam mar Ahas, ki Ahas mun mar Hesekaya. 10 Hesekaya din mar Manase, ki Manase mar Amonn, ki Amonn mun mar Josaya, 11 ki Josaya mar Jekonaya nan u waarii, baa din soor Israel teeb ki saan namm Babilɔnn yoo nba na. 12 Baa din soorib ki saan namm Babilɔnn na poorpo, ki Jekonaya mar Salatiel, ki Salatiel mun mar Serubabel. 13 Serubabel din mar Abiud, ki Abiud mar Elayakim, ki Elayakim mun mar Asor. 14 Asor din mar Sadok, ki Sadok mar Akim, ki Akim mun mar Eliud. 15 Eliud din mar Eleasar, ki Eleasar mar Matann ki Matann mun mar Jakɔb. 16 Jakɔb din mar Joosef, ki Joosef mun tee Meeri sɔrɔ, ki Meeri mar Yiisa nba ki bi yiu Yennu Niganntɔɔ Masia na. 17 Laa din nyii Abraham yoo ki tan tuu Defid yoo din tee yeejamm piik nan bannae. Ki Defid yoo ki tan tuu yoo nba ki bi din soor niib maŋ ki saan namm Babilɔnn na, din tee yeejamm piik nan banna. Laa din nyii li yoo ki tan tuu Masia maaru yoo, mun din tee yeejamm piik nan bannae. 18 Baa din mar Yiisa Masia biaŋinbae na: u naa Meeri din tee Joosef sarkpeŋe, ki bi daa ki kɔɔn leeb, ŋaan ki bi din tan la ki u mɔk poor, Yennu Seyeeŋ paŋ nie ki u soor poor maŋ. 19 Joosef nba ki u din yaa wun kunɔ na din tee Yennu nipeemɔe. Li paak, u din ki loon wun nyinnir paanu ki lin dinn Meeri fei, ŋaan u din lor u par nie nan u ji kan kɔɔnɔ. 20 Waa ji din dukii linba na po nae, ki Yennu malaka baar u boor, damiit ni, ki tan betɔ a "Fin Joosef nba tee Defid yaaboonn, daa yeen a sarkpeŋ Meeri kɔɔnu, kimaan waa mɔk poor nba na, Yennu Seyeeŋ paŋe te ki u soor poor maŋ. 21 U tan saa mar bonjake, ki a saa purɔ Yiisa a, kimaan u tan saa nyinn u niib bi biit ni." 22 Linba na kur din tun, a lin gbeen linba ki ti Yomdaanɔ Yennu din te ki u sɔkiniisɔɔ pak li po nae a, 23 "Sapaammunn tan saa soor poor ki mar bonjak, ki bi saa purɔ Emmanuel." (Li paak tee a "Yennu be nant.") 24 Joosef nba din tan fiir gɔɔn ni yoo nba, ki u tun nan Yennu malaka na nba betɔ biaŋinba na, ki ji sak ki gaar u sarkpeŋ Meeri, 25 ŋaan u din ki kɔɔnɔ nan waa din tan mar u sapaammar, bonjak na. Ki Joosef din pur u sann Yiisa.

Matiu 2

1 Bi din mar Yiisa dosau nna ni, ki bi yir Betlehem, ki li be Judea tingbouŋ ni. Bi din marɔ Bat Herod yooe. Li yoo na ki banntesiab nyii yondopo ki baar Jerusalem ki tan boi niib a 2 "Israel teeb kpanbar saakɔɔ nba ki bi marɔ na, u be lee? Ti daan la u ŋmaabire yondopo ki baar a ti tan jiantɔ." 3 Bat Herod nba din gbat nna maŋ, ki li biir ŋɔɔ nan Jerusalem teeb kur para, ki bi ji ki fit kari. 4 Ki u yiin Yennu jiantu yudamm nan sennu wannteeb ki tan boib a "Lee ki bi saa mar Yennu Niganntɔɔ Masia na?" 5 Ki bi jiinɔ a "Betlehem doo nba be Judea tingbouŋ ni na; kimaan Yennu sɔkinii na din sɔb ki yaa Yennu yet a: 6 'Fin Betlehem nba be Juda tingbouŋ ni na, a ki tee tinbik kaa Juda yiar ni, kimaan batsɔɔ tan saa nyi a nie, ki ŋɔɔe tan sii yen n niib Israel teeb.'" 7 Linba na poorpoe ki Bat Herod yiin bannteeb maŋ woonin ni, ki tan boib, ki fiitib fanu a wun bann yoo nba ki ŋmaabir na daan nyii; 8 ki yetib a, "I saa man Betlehem ki saa lon bik maŋ fanu; yoo nba ki i lau, yin jenna ki tan betin ki n mun saan ki jiantɔ." 9 Bat na nba din pak nna ki gbenn yoo nba, ki bi nyii soor sɔnu; baa saa maŋ, ki bi la ŋmaabir nba daan nyii yondopo na. Baa la ŋmaabir maŋ na ki bi para penn bonchiann. Ki li gar bi tɔɔnn, ki saan set bik maŋ nba be ŋaak nba na ni, sanpaapo. 11 Ki bi kɔɔ ŋaak maŋ ni, ki la bik na nan u naa Meeri; ŋanne ki bi gbaan ki jiant bik maŋ, ŋaan biit bi paka ki nyinn piinii ki turɔ; piinii maŋ din tee salima nan tulaari nba ki bi yir frankinsens nan tulaarleer nba ki bi yir mir. 12 Tɔn, ki Yennu pak ki turib damiit ni, a bi ji daa ŋmat Bat Herod boor; li paak, ki bi ji din tɔkin sanjogauŋ ki ŋmat kun bi doo ni. 13 Bannteeb na nba din kun na poorpoe ki Yennu malaka baar Joosef boor damiit ni, ki betɔ a "Fiit ki jii sanpantik maŋ nan u naa kii tiin kii saa Ijipt tingbouŋ ni, ki saa kar leŋ nan yoo nba ki n tan saa tura mɔb, kimaan Bat Herod saa lon bik na boore a wun kpiu." 14 Ki u din fiir nyiɔk ki jii bik na nan u naa ki chiar saan namm Ijipt tingbouŋ ni. 15 U din be leŋe nan yoo nba ki Bat Herod tan kpo. Linba na kur din tun ki gbeen linba ki Yennu te ki u sɔkiniisɔɔ pak li po na a "N din yiin n bija maŋ Ijipt tingbouŋ nie." 16 Herod nba din tan bann nan bannteeb maŋ kparɔe na, ki li gbatɔ bonchiann, ki u tun kunkɔnkɔnna a bin saan Betlehem nan li digbanbis ni ki saa kpi bonjabis kur; ki bi din kpii sanpantii nan binba tee bina ŋanlelee, nan waa daan boi bannteeb maŋ ki bann yoo nba ki ŋmaabir na daan nyii na. 17 Waa kpii waas na biaŋinba na ki li din gbeen linba ki Yennu sɔkinii Jeremaya din pak na po a: 18 "Rama tiŋ nɔɔk nie ki bi gbia fuut nba tee kpemɔnii nan fabinii, ki Rachel mɔ u waas paak, ki bi barimɔ ki tan goo, kimaan u waas kpowa." 19 Tɔn, ki Bat Herod tan kpo; ki u kuun poorpo ki Yennu malaka bia saan Joosef boor damiit ni, Ijipt tingbouŋ ni, 20 ki yetɔ a, "Fiit ki jii bik maŋ nan u naa, ki ŋmat saan Israel tingbouŋ ni, kimaan binba din lor a bin kpi bik maŋ na kpowa." 21 Ki Joosef fiir ki jii bik maŋ nan u naa ki ŋmat saan Israel tingbouŋ ni. 22 Waa din tan gbat a Akelaus dii naan ki kar u baa Herod naangbant paak Judea tiŋ ni na, ki jaŋmaanii soorɔ nan wun kun leŋ; ki Yennu bia wannɔ damiit ni a wun ŋmat saan Galilii tingbouŋ ni. 23 Ki u din saan ki saa kar doo nba ki bi yi Nasaref na ni, ki li gbeen maan nba ki Yennu sɔkiniinba din sɔb na a, "Bi tan sii yiu Nasaref nirɔe."

Matiu 3

1 Li poor po, Jɔɔnn nba wuur niib Yennu nyunwuru na be muuk ni, Judea tingbouŋ ni, ki mɔɔntir Yennu barŋanii ki yeen a 2 "Nyikin man i biit, kimaan Yennu ŋaanaan dinu per na." 3 Yennu sɔkinii Aisaya din poŋ sɔb ŋɔɔ Jɔɔnn poewa a "Nisɔɔ tan sii be muuk ni ki hoot ki yaa 'Ŋammit man ti Yomdaanɔ baaru sɔnu ki turɔ, ki bia ŋamm u sɔnii ki lii took.'" 4 Jɔɔnn din lia laagumii kobit liatire, ki bia boob gbann u siak ni, ki u jeet tee naasuut nan siat. 5 Li yoo ki Jerusalem doo ni teeb, nan Judea tingbouŋ ni kur teeb, nan Jɔɔdann mɔkir tingbouŋ ni kur teeb, saan u boor, 6 ki fiit bi toonbiit, ki u wurib Yennu nyunwuru Jɔɔdann mɔkir na ni. 7 Waa din tan la ki Farisiinba nan Sajusiinba b bonchiann mun baat u boor ni a wun wurib Yennu nyunwuru na, ki u yetib a, "Yimm waalabirii na! Ŋmee kpaani a yin tin nyi Yennu wutoor nba yaa lin baar i paak na ni? 8 Yii tuun linba saa wann nan i set nyik i biita. 9 I daa mɔk parbifaant nan Abraham tee i yeeja. N beerie nan Yennu saa fit fiin tana nba na ki lin kpant Abraham yaaboonawa. 10 Pajar poŋ teen siira a wun chɔɔ tiinii; ki tiik nba kur ki loon lɔɔnŋana, bi saa chɔɔre ki lur muu ni. 11 Min ŋarin wuuri nyun ki li want nan i nyik i biita, ŋaan wunba yaa wun baar n poor po na cheen; ki n poŋ ki jaŋ nan ki n jii u taasaati; ŋɔɔe saa jii Yennu Seyeeŋ nan muu ki wuur i para. 12 U dia u dilenn ŋmaniie ki yaa wun lenn fanu, ki nyinn dibin ki wuun u bɔɔr ni, ŋaan joo fouŋ na muu nba kan mi kpeenni." 13 Li yoo maŋ ki Yiisa nyii Galilii ki saan Jɔɔdann mɔkir po, ki baar Jɔɔnn boor a wun wurɔ Yennu nyunwuru. 14 Ki Jɔɔnn ki saki, ki yetɔ a "Mine bo saa baar a boor ki a wurin, ŋaan ki a mun tan baat n boor ni-i?" 15 Ŋaan ki Yiisa yetɔ a "Ŋaant ki lin tun nna mɔtana, kimaan nnae ŋan nan tin tun toonŋana kura." Li yoo na ki Jɔɔnn sak. 16 Waa wur Yiisa Yennu nyunwuru ki gbenn yoo nba, ki Yiisa nyii nyun na ni; li taakpaak ni ki sanpagbouŋ loot, ki u la ki Yennu Seyeeŋ siik u paak ki naan ŋmann, ki tan jakin u paak. 17 Ki kunkɔr nyii sanpaapo ki yet a "N Bilonkake na, ŋɔɔe ki n numm gboou."

Matiu 4

1 Ki Yennu Seyeeŋ te ki Yiisa kɔɔ muuk ni a Sintaanii n saa jammɔ. 2 U din be leŋ ki ki dii siar dapiinna yonnu ni nan nyiɔk, ki kon tan soorɔ. 3 Ki Sintaanii baar u boor ki yetɔ a "Li-i tee ki a set tee Yennu Bijaie, fan yet tana na ki lin kpant jeet ki a di." 4 Ki Yiisa jiin a, "Li sɔb Yennu gbouŋ ni a 'Jeet kuukɔɔ paak kaa te ki nirɔ be, ŋaan maan nba kur ki Yennu pak na paake.'" 5 Li tonton na ki Sintaanii jiiu ki saan nanɔ Jerusalem, ki saa donnɔ Yennu jiantu ŋasaakak mɔpinyerik paak, ŋaan betɔ a 6 "Li-i tee ki a set tee Yennu Bijaie, fan yukir mɔb nna na, kimaan li sɔb Yennu gbouŋ ni a 'U saa te ki u malakanba-ii guua; bi sii dia-a nan bi nii, ki a taar kan gbiat tann gbaa ki a la daŋi.'" 7 Ki Yiisa yetɔ a, "Li bia sɔb Yennu gbouŋ ni a 'Sɔɔ daa bikii u Yomdaanɔ Yennu.'" 8 Ki Sintaanii bia jiiu ki saan nanɔ jɔɔr nba fɔk bonchiann paak ki saa wannɔ tingbouŋ na yent kur nan li mɔkint, 9 ŋaan betɔ a, "Li-i tee ki a bo saa gbaan ki jiantin, n bo saa tura yent maŋ kura." 10 Ki Yiisa betɔ a, "Seetir nna Sintaanii. Li sɔb Yennu gbouŋ ni a 'Nirɔ-ii jiantir u Yomdaanɔ Yennu kuukɔɔ, kii bia kii waa ŋɔɔ kuukɔɔe.'" 11 Ŋanne ki Sintaanii ji yaat ŋaan nyikɔ, ki Yennu malakanba sik ki tan teenɔ saauŋ. 12 Yiisa nba din tan gbat nan bi kɔɔn Jɔɔnn dansarik na, ki u saan Galilii. 13 Waa din baar Nasaref na u din ki yukir leŋi, ŋaan gar saan Kapenaum doo nba be mɔk-kpiŋ, Sebulunn nan Naftali tiŋ ni na. 14 Linba na din tun a lin gbeen Yennu sɔkinii Aisaya nba din pak linba na poe a, 15 "Sebulunn tiŋ nan Naftali tiŋ nba be Jɔɔdann mɔk-pootir po, ki bia be mɔkgbeŋŋir boor: Galilii tiŋ nba ki binba ki tee Juu teeb kar na; 16 yimm nba be bunbɔnn ni na la yentjaann; binba kar kuun bunbɔnn yent ni na la ki yentu na yentir ki baatib." 17 Li yoo maŋ ki Yiisa piin ki mɔɔntir a, "Nyikin i toonbiit man, kimaan Yennu ŋaanaan dinu per na." 18 Yiisa nba din somm Galilii mɔkgbeŋŋir kpiŋ na, ki u tan la nirɔ nba ki bi yiu Simonn ki bia yiu Piita na, nan u waarɔ Andru, ki bi lubin janlaauŋ mɔkgbiɔŋ, kimaan bi din tee jansoorae. 19 Ki u yetib a "I waan man, ki n saa te ki yii daak niib kii teenin." 20 Ki bi set nyik bi janlaant yiama ŋaan waau. 21 Waa din nyii leŋ ki saan tɔɔnn waaminna, ki u la Sebedii nan u waas banlee, Jeems nan u waarɔ Jɔɔnn, ki bi be burgbetir ni, ki lik bi janlaant; ki u yiimm. 22 Li taakpaak ni, ki bi nyik burgbetir na nan bi baa, ŋaan waa Yiisa. 23 Yiisa din lin Galilii tiŋ kur po, ki want niib Yennu maan, jiantu diit ni, ki mɔɔntir Yennu naan barŋanii mɔɔntii ki teemm, ki te ki binba mɔk yiarboorii boorii nan binba mɔk gbanantont kur paak. 24 Ki bi din lin mɔɔnt u sann Siria tingbouŋ kur po. Ki bi din jikit baatbooru booru kur, ki baat namm u boor: binba din yiar yiarbooru nba kur, li gbanantont, nan binba din gbee nan narinbiit, nan binba baa gbitgbiia, nan gbanankpeena damm, ki u te ki bi paak. 25 Ki nibur nyii Galilii, nan Doi-piik, nan Jerusalem, nan Judea, nan Jɔɔdann mɔk-pootir ki bit waau.

Matiu 5

1 Yiisa nba din la nibur maŋ na, ki u doo kunkonn paak ki kar; ki u poorpoweiteeb lakin u boor. 2 Ki u piin ki wantib Yennu maan ki yeen a, 3 "Binba mi bi mɔŋ nan bi tee tarie seek ni na, parpeenn tee bi yare, ŋamme tee Yennu naan ni yab. 4 "Binba mɔ ki fabin, parpeenn tee bi yare, kimaan Yennu saa maan bi parawa. 5 "Binba sikin bi mɔŋ, parpeenn tee bi yare, kimaan ŋamme tan sii yen tingbouŋ na. 6 "Binba ninbina mɔn ki bi para lakib nan Yennu toona, parpeenn tee bi yare, kimaan Yennu saa gboomm bi para nba lakib linba paaka. 7 "Binba mɔk ninbatinu nan bi leeb, parpeenn tee bi yare, ŋamme ki Yennu mun saa timm ninbaauk. 8 "Binba para yeen, parpeenn tee bi yare, kimaan ŋamme saa la Yennu. 9 "Binba tee sindantinna nan kunkɔnpat teeb, parpeenn tee bi yare, kimaan ŋamme ki Yennu yib u waas. 10 "Binba jiantir Yennu ki bi mukisib na, parpeenn tee bi yare, ŋamme tee Yennu naan yab. 11 "Niib-i sukii-i, ki mukisi, ki fa fabooru kur ki biiri, kimaan yaa tee n poorpoweiteeb na paak, parpeenn tee i yare. 12 Bi-i taŋŋi teei nna, yii mɔk parpeenn bonchiann man, kimaan i nyɔɔt tan sii yab Yendɔuŋ ni; nnae ki bi din mukis Yennu sɔkiniinba nba din be yaayoo ni na. 13 "I tee nan yaarin nae tingbouŋ na ni. Yaarim-i taŋŋi biir ki ji ki mani, a saa teen nlee ki lin maŋi? Li ji kaa nyɔɔti; see ki bi kpaar mɔɔn tiŋ ni, ki niib somm li paak. 14 "Yimme tee tingbouŋ na yentu; doo nba ki bi maa ki senn kunkonn paak, kan fit bɔri. 15 Sɔɔ mun kan joo fitir ŋaan jii ŋmaŋ ki chibini; see ki u jiir ki tɔɔn linba fɔk paak ki lin tur ŋaak na niib kur yentu. 16 Yii mun-ii be nna; ŋaant ki i yentu n yent tur nisaarii, ki bii laat i toonŋana kii dont i Baa Yennu nba be Yendɔuŋ ni na. 17 "I daa dukii nan n baar maa n tan kpeen Yennu sennu nan u sɔkiniinba maan na; n ki baar maa n tan kpeenn kaa, ŋaan n baar maa n sakir nan barmɔniie; 18 kimaan barmɔniie ki n beeri na, sanpaak nan tingbouŋ na tan saa gbenn, ŋaan Yennu sennu na nan li bonmintika kan mi bot, see ki li kur tan tun gbenn. 19 Li paak, wunba y‡t Yennu sennu maŋ yennkɔɔ gbaa, ki bia wann leeb nna maŋ, u tan sii tee tarike Yennu naan ni; ŋaan wunba waa sennu maŋ fanu, ki bia want u leeb fanu, ŋɔɔe tan sii tee nijaann Yennu naan na ni. 20 Kimaan mine beeri nan see ki i toonŋana yab ki gar sennu wannteeb nan Farisiinba c yar, li-i kii tee nnai kaa, i kan mi kɔɔ Yennu naan ni. 21 "I poŋ gbat ki bi din yeen yaayoo ni niib a 'Daa kpi nirɔ, kimaan wunba kpii nirɔ tan sii be barii ni barbudaar;' 22 ŋaan min ŋarin beerie nan wunba dont wutoor u naa bik paak (yann yann, ki li kaa paaki,) u tan sii be barii ni barbudaar; ki wunba sukir u naa bik a 'Bon-yann na,' u tan sii be barii ni; ki wunba bia sukir u naa bik a 'Bonjatir na,' u tan sii be barii ni ki kɔɔ muu nba kan mi kpeen na ni. 23 Li paak, wunba kɔɔ Yennu diiuk ni a wun pi Yennu piinii, ŋaan tiar nan u mɔk biit nan u naa bik, 24 wun nyik u piinii maŋ leŋ, ŋaan ŋmat saan u naa bik na boor ki bin saa ŋamm bi barii ki gbenna, ki wun jen ki jii u piinii maŋ ki tur Yennu. 25 "Fin nan sɔɔ-i mɔk maan, ki saa barii maŋ buut, fan ŋaan ki yin taan mɔb ki ŋamm i barii maŋ yoo nba ki i daa be sɔnu ni na; li-i kii tee nnai kaa, daanɔ maŋ saa jiia ki saan nana barbuurɔ boor, ki barbuurɔ na n mun jiia ki teena dansarguurɔ nuu ni, ki wun kɔɔna dansarik. 26 Barmɔniie ki n beera na, a kan mi nyi leŋi, see ki a tan pa pann kur nba kur ki bi jiiara, ki kobu kan tenni. 27 "I poŋ din gbia ki bi yeen a 'I mi ki a baa joonn;' 28 ŋaan min ŋarin beerie nan wunba got poo ki u niɔŋ kɔɔu, u baa joonn u par niwa. 29 Li-i tee ki a diitu po ninbinnie te ki a yaa tun toonbiit, fan kpakirɔ lu, kimaan li-i tee ki a kɔŋ a ninbinn yennkɔɔ, li chee nan Yennu n tan kɔɔn a gbanant kur muu nba kan mi kpeen na ni. 30 Li-i tee ki a niidiitue te ki a yaa tun toonbiit, fan potɔ lu, kimaan li-i tee ki a kɔŋ a nuu yennkɔɔ, li chee nan a gbanant kur n tan kɔɔ muu ni. 31 "Bi bia din yeen a 'Wunba loon ki wun y‡t u ŋaapoo, wun turɔ pooy‡tu gbouŋ;' 32 ŋaan min ŋarin beerie nan wunba kur y‡t u ŋaapoo, ki li ki tee u tun bonchonchontoonn kaa, ŋɔɔe saa te ki u poo maŋ n tun bonchonchontoonn, li-i tee ki u kun jɔɔ, ki wunba kɔɔn poo nba ki bi y‡tɔ maŋ mun bia tun bonchonchontoonna. 33 "I poŋ gbia ki bi yeen yaayoo ni niib a 'I mi ki a por faak mɔpor, ŋaan li-i tee ki a por mɔpor Yennu sann ni, li ŋan ki a tun gbeen a mɔpor maŋ;' 34 ŋaan min ŋarin beerie, nan i mi ki a por mɔpor gbaa; daa yeen a 'N por sanpaapo,' kimaan li tee Yennu naangbouŋo; 35 daa yeen a 'N por tingbouŋ,' kimaan li tee Yennu taapaŋŋmaatire; a bia daa yeen a 'N por Jerusalemi,' kimaan li tee yabint Yennu dooe; 36 a bia daa yeen a 'N por n yuri,' kimaan a kan fit te ki a yukobuk yennkɔɔ n penn koo ki bɔnni; 37 ŋaan ŋaant man ki i jiinu-ii tee, 'Nn,' koo 'Aaii,' kimaan li-i tee ki a por siar ki pukin linba na paak, li ji nyii sintaani boore. 38 "I poŋ din gbia ki bi yeen a 'Sɔɔ-i kpakir a ninbinn, fan mun kpakir u yar ki jiin pann; sɔɔ-i faa-a ki fokit a nyann, fan mun faau ki fokit u yar ki jiin pann;' 39 ŋaan min ŋarin beerie nan i daa jiint leeb pana; sɔɔ-i peba tanpak a niidiitu po kpianu, fan ŋmant a gaŋ po biak ki wun peb; 40 sɔɔ-i saa nana buut boor a wun gaar a soot, fan sak ki wun tont a liatgbakitir biak kii saa; 41 sɔɔ-i mia-a a fan jii u jik-kpiatir ki saan nann maar yennkɔɔ, fan jii ki saan nann maar ŋanlee. 42 Wunba miara siar, fan turɔ; ki wunba mun bia loon ki a kpentɔ siar, fan kpentɔ ki daa miinɔ. 43 "I poŋ din gbia ki bi yeen a, 'I loon a naa waas ŋaan kii nan a datai;' 44 ŋaan min ŋarin beerie nan yii loon i datai man, kii yeen wunba sukii-i na a 'Yennu mɔsoŋŋann-ii be a paak;' kii tuun linba ŋan kii teen binba nami; kii mei Yennu kii teen binba dinti biak na. 45 Ŋanne saa te ki i set tee ti Baa Yennu nba be sanpaapo na waas, kimaan ŋɔɔe te ki yonnu do nibiit nan niŋamm paak, ki bia te saak baa nibiit nan niŋamm doi ni. 46 Li-i tee ki i loon binba looni na kɔɔie, nyɔlantpoe ki i saa la Yennu boori? Li ki tee nna kaa ki nibiit na mun tuumii? 47 Ki li-i tee ki i foont i naa waas kɔɔie, toonŋanlannpoe ki i tun ki gar leebi? Nna kaa ki binba ki waa Yennu sɔnu na mun tuumii? 48 Li paak, yii be man fanu nan i Baa Yennu nba be sanpaapo na.

Matiu 6

1 "I daa tuun toonŋana a niib n la ki pakii kaa, kimaan i-i tuun nna, i kan la nyɔɔt i Baa Yennu nba be sanpaapo na boori. 2 "Li-i tee ki a yaa a tur talasdaanɔ piiniie, faa daa mɔɔntir nan kpinkpannii damm nba tuun biaŋinba Yennu jiantu diit ni, nan doi ni, a niib n la bi toonŋana ki pakib na. Barmɔniie ki n beeri na, bi poŋ gaar bi nyɔɔta. 3 Ŋaan li-i tee ki a yaa a pi talasdaanɔe, fan piu, ki daa te ki a yɔɔnimɔŋ gbaa mi li po. 4 Tumin woonin ni, ki a Baa Yennu nba laat woonin ni na saa pa-a [paanu ni.] 5 "Li-i tee ki a yaa a miar Yennu, faa daa tuun nan kpinkpannii damm nba tuun biaŋinba na, kimaan bi loon bii see Yennu jiantu diit nie, nan sɔnpaataa nba be doi ni, kii mei Yennu a niib-ii laatib. Barmɔniie ki n beeri na, bi poŋ gaar bi nyɔɔta. 6 Ŋaan li-i tee ki a yaa a miar Yennuie, fan kɔɔ a diiuk ni ki loon gann, ŋaan miar a Baa Yennu nba be woonin ni na, ki a Baa Yennu nba laat linba ki a tuun woonin ni na saa pa-a [paanu ni.] 7 "Li-i tee ki a mei Yennuie, faa daa mantik mei mɔbona nba yab nan patmannteeb nba mei biaŋinba na; bi dukii nan bi miaru bonchiann na paake ki bi pata saa gbat. 8 I daa tee nan ŋamm na, kimaan i Baa Yennu poŋ mi linba ki i loon ki i daa ki miarɔ. 9 Yaa sii mei Yennu biaŋinbae na: 'Ti Baa Yennu nba be sanpaapo, ŋaant ki a sann n la baakir; 10 ŋaant ki a naan n baar; ŋaant ki a loomm n tun tingbouŋ nna, nan laa tuun Yendɔuŋ ni biaŋinba na. 11 Luunt dinna mann. 12 Nyikin chab ti toonbiit nan taa mun nyikit ki chabit binba tuumit biit biaŋinba na. 13 A daa te ki ti kɔɔ jinjammii ni, ŋaan a nyinnit bonbiir d ni. [Kimaan fine yen naan nan yiikoo nan baakir mɔkmɔk nan mɔkmɔk.]' 14 "Li-i tee ki i nyikit i leeb biit ki chabitibi, i Baa Yennu nba be sanpaapo na mun saa nyik chabiiwa; 15 ŋaan i-i kii nyikit chabit i leeb biiti, i Baa Yennu mun kan nyik chab i biiti. 16 "Li-i tee ki i yaa i lor mɔiie, yaa daa biir i nunii po nan kpinkpannii damm na, kimaan bi tuu biir bi nunii po, a sɔɔ kur n la ki bann nan bi lor mɔiie. Barmɔniie ki n beeri na, bi poŋ gaar bi nyɔɔta. 17 Li-i tee ki a lor mɔbie, fan yibir a numm po ki saat a yut fanu; 18 linba nae saa te ki leeb kan bann nan a lor mɔbi, ŋaan a Baa Yennu nba be woonin ni na kuukɔɔe sii mi; ki a Baa Yennu nba laat linba ki a tuun woonin ni ki teenɔ na saa pa-a [paanu ni.] 19 "Daa bɔrii a mɔkint tingbouŋ na ni, siaminba ki bonŋmiŋmabit nan tintanii saa biirir; ki nanyukib bia saa kɔɔ ki jami; 20 ŋaan bɔrin a mɔkint Yendɔuŋ ni, siaminba ki bonŋmiŋmabit nan tintanii kan fit biirir, ki nanyukib bia kan fit kɔɔ jami; 21 siaminba ki a mɔkint be na, a dudukit mun be leŋe. 22 "A ninbinae tee a gbanant fitir. Li paak, a ninbina-i ŋani, a gbanant kur po sii mɔk yentu; 23 ŋaan a ninbina-i kii ŋani, a gbanant kur sii bɔne. Li paak, li-i tee ki yentu nba be a ni na tan bɔni, li sii tee bunbɔnchiɔŋo. 24 "Sɔɔ kan fit tun ki tur yomdamm banlee; u sii nan yenɔe ŋaan loon lɔɔ; koo u sii nian yenɔe, ŋaan sian lɔɔ na. I kan fit kii waa Yennu ki bia waa mɔkinti. 25 "Li paake te ki n beeri a i daa te ki li mukisi i binbeŋ po nan yaa saa di linba koo ki nyu linba; ki bia daa te ki li mukisi i gbanant po nan yaa saa lia linba. Manfoor ki gar jeetii? ki gbanant mun bia ki gar tiatii? 26 Gotir nɔɔnii nba yuuk ki lin na; bi ki buuri; bi bia ki jaan ki wuu suka nan naapaat ni, ŋaan ki i Baa Yennu nba be sanpaapo na dintib. I ki mɔk nyɔɔt ki gar nɔɔnii-i? 27 I manfoor paak daamii kan fit fɔkin i manfoor. 28 "Bee ki i mukis i mɔŋ liant paaki? Gotir man puuk nan li ŋant; ŋaan bi ki tuun koo ki luu bi mɔŋ tiati, 29 ŋaan n beerie, Kpanbar Solomonn nba lek din mɔk taŋana biaŋinba, ŋaan u din ki mi lia liant ki li ŋan nan puut na gbaa. 30 Yennu-i faŋŋit mɔɔt nba be dinna, ŋaan wonn ki bi joo muuwa na, u kan lannini? Yimm yadkanpɔɔna damm na! 31 "Li paak, i daa te ki li mukisi ki i dukii a 'N saa di bee?' koo 'N saa nyu bee?' koo 'N saa lia bee?' 32 Binba ki mi Yennu na tuu mukis bi dudukit linba na kur paake; ŋaan i Baa Yennu nba be sanpaapo na set mi nan i loon linba na kura. 33 Ŋaant man ki i baka-ii be Yennu naan ni nan yentinu labaar ni, ki u saa jii bona nba na kur ki turi. 34 Li paak, daa te ki wonn barii mukisiini, kimaan wonne saa dukin u mɔŋ po; daar kur mɔk daamii nba jaŋitɔe.

Matiu 7

1 "I daa bu leeb buuti, ki Yennu mun kan bu i buuti, 2 kimaan yaa bu leeb buut biaŋinba na, nnae ki Yennu mun tan saa bu i buut; biaŋinba ki i bikii teen i leeb na, nnae ki Yennu mun saa bikin turi. 3 Bee ki a laat mɔɔnu nba be a lɔɔ ninbinn ni, ŋaan ki la jaantarik nba be a mɔŋ mɔŋ ninbinn ni na? 4 Nlee ki a saa bet a lɔɔ a, 'N yɔɔk, ŋaant ki n nyinn mɔɔnu nba be a ninbinn ni na,' ŋaan ki ki laat jaantarik nba be a mɔŋ ninbinn ni na. 5 Fin kpinkpannii daanɔ na, nyint jaantarik nba be a ninbinn ni na sinsinn, ki ji fit la fanu ki nyinn mɔɔnu nba be a lɔɔ ninbinn ni na. 6 "I daa jikit linba tee Yennu yar ki teen bɔi, kimaan bi saa ŋmat juntie; i daa jikit linba mɔk nyɔɔt ki teen doorii, kimaan bi saa ŋmat ŋmat nan tante. 7 "Miat Yennu, ki u saa turi; lomin man, ki i saa la; kpaan gann, ki u saa loot ki turiwa, 8 kimaan wunba kur mei Yennu gaane; ki wunba mun loon, u laate; ki wunba kpaan gann, ki bi lootir teenɔ. 9 Ki yimm baanba, i ŋmee ki u bik saa miarɔ jeet ki wun jii tann ki turɔ? 10 koo ŋmee ki u bik saa miarɔ jaŋ ki wun turɔ waauku? 11 Ki li-i tee yimm nba tee biitdamm na mi biaŋinba ki i saa tur i waas bonŋana, i Baa Yennu nba be sanpaapo nae mantik saa tur binba meiɔ na bonŋana. 12 "Biaŋinba ki a loon sɔɔ-ii tuun kii teena na, i mun-ii tuun nna kii teen leeb; kimaan Yennu sennu nan u sɔkiniinba wannu na ni want nnae. 13 "Kɔɔn man tammɔyebik na ni; kimaan tammɔb nba kɔɔ muu nba kan mi kpeen na ni na yarin hei, ki li sɔnu bia man nan sommir; ki niib bonchianne kɔɔ tammɔb maŋ ni. 14 Ki manfoor tammɔb na ŋarin tee bonyebike, ki li sɔnu bia paar nan tɔkinu; ki niib waaminnae kɔɔ tammɔb maŋ ni. 15 "I mi man faak sɔkiniinba na po, binba baat i boor ki naan pei, ŋaan tee kinkata nan barmɔnii na. 16 Bi toona nie ki i saa bann baa tee binba; kunkoŋ ki loon gaa; ki pɔɔna mun ki loon kinkana-a. 17 Tiŋaŋ kur loon lɔɔnŋanae; ki tikpeeuŋ kur loon lɔɔnbiit. 18 Tiŋaŋ kan lon lɔɔnbiiti; tikpeeuŋ mun kan lon lɔɔnŋana. 19 Tiik kur nba ki loon lɔɔnŋana, bi saa chɔɔre ki lu muu ni. 20 Li paak, faak sɔkiniinba toona nie ki i saa bannib. 21 "Li ki tee binba yin 'N Yomdaanɔ, n Yomdaanɔ' na kur kaa tan saa kɔɔ Yennu naan ni, see binba sak n Baa Yennu nba be sanpaapo na mɔb. 22 Daar maŋ-i taŋŋi baar, niib bonchianne tan sii yin ki yeen a 'Ti Yomdaanɔ, ti Yomdaanɔ, ti din ki sɔkint Yennu maan a sann ni-i? A sann nie ki ti din nyint narinbiit niib ni, a sann nie ki ti bia tun bakitnauŋ toonjaana.' 23 Li yoo ki n mun tan saa jiin ki yetib a, 'N ki miini, yimm toonbiit damm na, seetir nna man!' 24 "Li paak, wunba kur gbia n maan na ki waa-r fanu, n saa nannɔ nan yandaansɔɔ nba din maa u ŋaak tanpiiuk paak nae; 25 ki saak tan baa, ki nyun gbee ki yat nan doo, ki wouŋ da, ki nyunpana koon ki liat ŋaak maŋ dikpina, ŋaan ki li lek see ken ken ki ki baa, kimaan u maar tanpiiuk paake. 26 "Wunba kur gbia n maan na, ŋaan y‡t li weiu, n saa nannɔ nan jajatuk nba din maa u ŋaak tanbiinii ni nae; 27 ki saak tan baa, ki nyun gbee yat nan doo, ki wouŋ da, ki nyunpana koon ki liat ŋaak maŋ dikpina, ki li bet baa wamm, ho, baa biiuk jiakii!" 28 Yiisa nba din pak mɔbona na ki gbenn yoo nba, ki u wannu maŋ bakit nibur na bonchiann, 29 kimaan u wannib nan daanɔ nba yen yiikoo nae, ki li ki tee nan sennu wannteeb nba wantib biaŋinba na.

Matiu 8

1 Yiisa nba din nyii kunkonn maŋ paak ki sik yoo nba, ki niib bonchiann wei u poor. 2 Ŋanne ki gbaatsɔɔ baar ki tan gbaan u tɔɔnn ki yeen a "N Yomdaanɔ, li-i tee ki a loon, a saa fit te ki n ŋaauk na n gbenna." 3 Ki Yiisa tant nuu ki siiu ki yetɔ a "N loon nna. A ŋaauk maŋ n gbenn!" Li taakpaak ni ki u ŋaauk na set gbenn. 4 Ŋaan ki Yiisa kpaanɔ a "I mi ki a bet sɔɔ barii na, ŋaan i saa Yennu manntɔɔ boor ki jii a mɔŋ ki wannɔ, ki bia mann maruŋ ki tur Yennu nan u sɔkinii Moses nba din senn ki jiin gbaata tebu po na, ki sɔɔ kur n bann nan a ŋaauk maŋ set gbenna." 5 Yiisa nba din kɔɔ Kapenaum yoo nba, ki Rom e tiŋ kunkɔnkɔnna yudaansɔɔ chetɔ sɔnu ni ki barimɔ ki yeen a 6 "N Yomdaanɔ, n toontunnɔ yiar; u gbanant kpowa, ki li mukisɔ bonchiann, ki u dɔɔ diiuk ni." 7 Ki Yiisa betɔ a "N saa saan ki te wun paaka." 8 Ki u jiin a "N Yomdaanɔ, daa bakint a mɔŋ ki baati; kimaan, n ki ŋan nan fan baar kɔɔ n ŋaak ni; ŋaan pakin mɔbonne, ki n toontunnɔ na n la laafia. 9 Kimaan n mɔk binba garin ki yenin, ki n mun dia kunkɔnkɔnna ki yemm, ki fit tian yenɔ paak a 'Baat,' ki u baat; ki tian lɔɔ paak a 'Saant,' ki u saa; ki bia te ki n daabir tuun maa loon biaŋinba." 10 Yiisa nba din gbat linba na, ki li yaarlitɔ; ki u jiant got niib nba waa u poor po na ki betib a "Barmɔniie ki n beeri na, n daa ki mi la sɔɔ ki u teenin yada na booru yimm Israel teeb ni gbaa. 11 N beerie, niib bonchiann tan saa nyi yondo po nan yonbaa po, ki ŋamm nan Abraham, nan Aisak, nan Jakɔb tan saa lakin kar ki di jeet Yennu naan ni; 12 ŋaan ki yimm nba tee naan maŋ niib na, bin jii-i ki lu-i nanyer po, bunbɔnn ni; leŋ maŋe ki i tan sii fabin mɔ ki ŋman nyana." 13 Ki Yiisa ŋmant ki yet kunkɔnkɔnna yudaanɔ maŋ a "I kun! Faa teen yada biaŋinba na, lin tun nna ki tura." Ki u toontunnɔ na set din paak li yoo na. 14 Tɔn, ki Yiisa saan kɔɔ Piita ŋaak ki la Piita dianpook dɔɔ yiar gbanantouŋ. 15 Ki Yiisa sii u nuu; ki u gbanantouŋ na gbenn, ki u fiir ki teemm saauŋ. 16 Li daar maŋ daajoouk, bi din jii niib bonchiann nba ki narinbiit be bi ni na, ki baar namm Yiisa boor; ki u kpan pak mɔbonn ki nyinn narinbiit na; ki bia tur binba yiar na kur laafia. 17 Waa din tuun biaŋinba na tee nan Yennu sɔkinii Aisaya nba din pak nae a, "U mɔŋ mɔŋe gaar ti gbanantouŋ nan ti yiarbooru booru ki jii yaat nann." 18 Yiisa nba din la ki nibur lintɔ yoo nba, ki u yet u poorpoweiteeb na a bin fiir ki bin saan mɔkgbeŋŋir na pootir po. 19 Ki Yennu sennu wanntɔsɔɔ baar ki tan yetɔ a, "Wanntɔɔ, n saa weia siaminba kur ki a saa." 20 Ki Yiisa yetɔ a, "Lunlona mɔk fɔrii, ki nɔɔnii mun bia mɔk tiat, ŋaan min nisaarik Bik ki mɔk dindɔɔboori." 21 Tɔn, ki u poorpoweiteeb yenɔ mun tan yetɔ a, "N Yomdaanɔ, ŋaant ki n saan pii n baa sinsinna." 22 Ki Yiisa jiinɔ a, "I waan, ŋaan nyik ki kpeemm-ii f pii bi leeb." 23 Yiisa nba din kɔɔ burgbetir ni yoo nba, ki u poorpoweiteeb na mun wei kɔɔ. 24 Ki wounpaaruk fikit ki da mɔkgbeŋŋir maŋ paak, ki nyunpana pir kɔɔ burgbetir na ni ki tan yaa lin gbee; ŋaan ki Yiisa dɔɔ gɔɔnt. 25 Ki u poorpoweiteeb na baar ki fiinɔ, ki betɔ a "Ti Yomdaanɔ, tintit, ti be kuun nie." 26 Ki Yiisa yetib a "Yimm yadkanpɔɔna damm na, bee ki i tiin jaŋmaanii?" ŋaan fiir ki tian wouŋ nan nyunpana na paak a bin ŋmin, ki bi set ŋmin soon. 27 Ki li yaar litib, ki bi ji boi leeb a "Nirɔ na tee niboor bee? ki wouŋ nan nyunpana saak u mɔb gbaa." 28 Yiisa nba din poot Galilii mɔkgbeŋŋir ki kɔɔ Gerasa tiŋ ni na, ki jab banlee nba gbee nan narinbiit na nyii kaat ni ki chetɔ; bi din mɔk jaŋmaansooruk hei, ki sɔɔ ki fit gaar baa be siami. 29 Ki bi din yikin sanpaapowa ki yeen a, "Fin Yennu Bija, timm nan fin, nlee mantiki? A baar nna a fan dinnit farae-e? ŋaan ki li yoo daa ki baari." 30 Tɔn, doorii bonchiann din see kpiŋ po nna, ki di, ki ki fɔk nammi. 31 Ki narinbiit maŋ din barin Yiisa bonchiann ki yetɔ a, "Li-i tee ki a nyinnitie, fan chabit ki tin saan kɔɔ doorii na ni." 32 Ki Yiisa betib a "I saa man." Ki bi nyii jab maŋ ni, ki saan kɔɔ doorii na ni; ki doorii na kur tin birrr, ki sik jɔɔr na ki saan baa mɔkgbeŋŋir na ni ki dii nyun. 33 Ki binba guu doorii maŋ fiir ki chiar saan doo ni, ki saa mɔɔnt linba kur teen, nan biaŋinba ki narinbiit nyii jab na ni. 34 Ki doo na niib kur bit ki saan ki saa took Yiisa; baa din lau yoo nba, ki bi barimɔ a wun nyi bi tiŋ ni.

Matiu 9

1 Ŋanne ki Yiisa ŋmat kɔɔ burgbetir na ni ki poot mɔkgbeŋŋir na gbingbanleer ki kun u doo ni. 2 Nisiab din tan jii jasɔɔ nna ki u gbanant kpowa; ki bi paanɔ liaŋ paak ki baar nanɔ Yiisa boor. Yiisa nba la baa teenɔ yada biaŋinba na, ki u yet baatɔɔ na a "N bik, i mɔk parcheenn; n nyik chab a biita." 3 Ki sennu wanntesiab ji dukii bi para ni a "Jɔɔ na yekint u mɔŋ nan Yennue." 4 Yiisa ŋarin din bann bi dudukit maŋa, ki boib a "Bee teen ki i dukii dudukbiit na i para ni? 5 Maa yet baatɔɔ na a 'N nyik chab a biit' koo maa saa yetɔ a 'Fiit kii somm na,' maan munlee na lannpoe paari? 6 N ji saa wanni nan min nisaarik Bik mɔk yiikoo tingbouŋ na ni ki saa nyik chab niib bi biit;" ŋaan jiant bet jɔɔ nba ki u gbanant kpo na a "Fiit ki jii a liaŋ kii kun a ŋaak ni." 7 Ki jɔɔ maŋ fiir ki kun. 8 Nibur na nba la nna maŋ ki jaŋmaanii soorib; ki bi piak dont Yennu nan waa tur nisaarik yiikoo na booru. 9 Ki Yiisa nyii leŋ ki saa, ki saa la jasɔɔ nna, ki bi yiu Matiu, ki u kar u toonn paak lampogaar diiuk ni; ki Yiisa betɔ a "Fiit kii waan." Ki u fiir ki waau. 10 Yiisa nba din saan Matiu maŋ ŋaak ki saa kar di jeet yoo nba ki lampogaarteeb nan biitdamm bonchiann kɔɔ ki tan kar pukin Yiisa nan u poorpoweiteeb po ki di namm. 11 Farisiinba na nba din la nna maŋ, ki bi boi u poorpoweiteeb na a "Bee ki i wanntɔɔ maŋ di nan nibooru na?" 12 Ki Yiisa gbat bi pinpauk maŋ ki yetib a "Binba mɔk laafia ki loon tebtɔɔ; binba yiar, ŋamme loon tebtɔɔ. 13 Li sɔb Yennu gbouŋ ni a 'Yennu loon ninbatinue ki gar maruŋ.' I saa man ki saa tumii ki bann linba na paak. N ki baar a n yiin popeendamm kaa; ŋaan n baar a n yiin biitdamme, ki bin nyik bi biit." 14 Ki Jɔɔnn nba wuur niib Yennu nyunwuru na poor-poweiteeb tan baar Yiisa boor ki boiɔ a "Timm nan Farisiinba lorin mɔi yoo kura; bee teen ki a poorpoweiteeb ki lorimi?" 15 Ki Yiisa jiin ki boib a "Poochiann-i be, saamm sii mɔk parbiir yoo nba ki pooyookir sɔrɔ daa be bi boor ni nawa-a? Aaii. Ŋaan yoo baat, ki bi tan saa nyinn pooyookir sɔrɔ na bi boor; li yooe ki bi saa lor mɔi. 16 "Sɔɔ kan jii chabpaann ki lik takperi; li-i tee ki u teen nnaie, chabpaann na saa pat takper nae, ki li patimin saa ŋamm pukin. 17 Sɔɔ bia kan sak liak dapaanin dalenkper ni; wunba tun nna, dapaanin na-i taŋŋi mɔ, li saa put dalenkper nae, ki daan na n mɔɔn; ŋaan bi tuu jii dapaanin ki liak lenpaann nie, a li kura daa biiri." 18 Yiisa nba din daa piak ki teemm yoo nba na, ki yudaansɔɔ nna baar ki tan gbaan u tɔɔnn, ki yetɔ a "N bipoo dɔɔ ki kpowa; li paak, baat ki tan jii a nuu ki yii u paak, ki wun la manfoor." 19 Ki Yiisa fiir jii u poorpoweiteeb, ki bi saan. 20 Poosɔɔ nna mun din be, ki siik fabouŋ ki tan jaŋ bina piik nan ŋanlee; ki din tan baar ki bar lint Yiisa poorpo ki sii u liatir mɔgbann; 21 kimaan u poŋ din dukin u par niewa a, "Mi-i lekii sii u liatir gbaa, n saa la laafiawa." 22 Ki Yiisa jiant ki la poo na, ki betɔ a, "N niipoo, i mɔk parcheenn. Faa teenin yada na paake te ki a la laafia." Li taakpaak ni, ki u set la laafia. 23 Yiisa nba din saa baar yudaanɔ maŋ ŋaak ni yoo nba, ki u la yerpebira peeb yerii, ki nibur bia bui kpemɔnii ki fabin. 24 Ki u betib a "Yii nyi man; bonpobik na ki kpo kaa, ŋaan u gɔɔnte." Ki bi laau. 25 Ŋanne ki bi ber niib maŋ ki nyinnib; li yoo na ki Yiisa kɔɔ ki soor bonpobik na nuu, ki u yeent ki fiir. 26 Ki bi din mɔɔnt li labaar tingbouŋ maŋ kur po. 27 Yiisa nba din nyii leŋ ki gaar saa tɔɔnn po na, ki jab nna banlee tee jɔɔnii ki waa u poorpo, ki yikin yeen a "Fin Defid yaaboonn, a tint ninbaauk." 28 Yiisa nba din saan ki saa kɔɔ ŋasiak nna ni yoo nba, ki jɔɔnii na baar ki kɔɔ leŋ. Ŋanne ki u boib a "I teen yada nan n saa fit tun nnawa?" Ki bi jiin a "Ti Yomdaanɔ, nn." 29 Ŋanne ki u jii u nuu ki sii bi ninbina, ki betib a "Yaa teen yada biaŋinba na, lin tun nnae ki turi." 30 Ki bi ninbina maŋ nyɔɔnt; ki u kpaamm fanu a bii mi ki bin bet sɔɔ li po. 31 Ŋaan ki bi nyii ki mɔɔnt u labaar tiŋ maŋ ni kura. 32 Baa din fiir ki nyii yoo nba, ki siab mun baar nan jasɔɔ, wunba ki narinbimuuk be u ni na, Yiisa boor. 33 Ki Yiisa nyinn narinbimuuk na jɔɔ na ni, ki u ji piin ki piak li yoo. Li din yaar lit nibur maŋ, ki bi ji yeen a "Ti daa ki mi la bonbooru na timm Israel teeb tiŋ ni na." 34 Ŋaan ki Farisiinba na daan nyatuk a "Narinbiit bate teenɔ yiikoo a wuu nyint narinbiit niib ni." 35 Tɔn, Yiisa din kak lin doi nan digbanbis kur ni, ki kɔɔ Yennu jiantu diit ni, ki mɔɔntir Yennu naan barŋanii ki want niib, ki te ki binba yiar yiarboorii boorii nan binba yiar yiarbiit kur paak. 36 Waa din tan la nibur maŋ ki ninbaauk soorɔ, kimaan bi din tee tatimme ki kaa sommtɔɔ, ki naan pei nba kaa pekpaarik. 37 Ŋanne ki u bet u poorpoweiteeb a "Dii na beer ki bia yaba, ŋaan ki dijaara waar. 38 Li paak, yii mei man dii maŋ daanɔ ki wun ŋamm pukin dijaara ki te ki bin saan jaan u dii maŋ."

Matiu 10

1 Yiisa tan yiin u poorpoweiteeb piik nan banlee na, ki chabib yiikoo a bii nyint narinbiit niib ni; ki te ki yiarboorii damm kur n paak, nan binba ki yiarbiit diab na kura. 2 U toomiinba g piik nan banlee maŋ sanae na: Sinsinn yɔɔe tee Simonn, wunba sann bia tee Piita na; nan u waarɔ Andru; nan Jeems nan u waarɔ Jɔɔnn, binba din tee Sebedii waas na; 3 nan Filip nan Batolomiu; nan Tomas, nan Matiu wunba din tee lampogaartɔɔ na; nan Jeems nba din tee Alfeus bija na, nan Tadeus; 4 nan Simonn nba din loon ŋamm Juu teeb-ii yen bi mɔŋ na nan Judas Iskariot wunba din tan nyii Yiisa poor na. 5 Ki Yiisa tun u poorpoweiteeb piik nan banlee maŋ, ŋaan kpaamm a bii mi ki bin saan binba ki tee ŋamm Israel teeb na boor, a bii mi ki bin kɔɔ Samaria teeb doi ni, 6 a ŋaan bin saan Israel teeb nba tee nan pei nba bot na boor kuukɔɔ; 7 ki yetib a, "Yaa saa na, yii mɔɔntir Yennu naan barŋanii na, kii yeen a 'Yennu naan dinu per na,' 8 ki te ki baatib i paakit, kii fiint kpeemm, ki bia te ki gbaata i paakit, kii bia kii nyint narinbiit niib ni. I gaar yanne, i mun-ii teen man yann. 9 I daa jikit likirii. I mi man ki yin jii kobu gbaa ki teen i likbɔɔrii ni. 10 I mi man ki yin jii paka ki saan i sɔnu maŋ koo liata ŋanlelee, koo taasaati, koo kii dia patii; kimaan li ŋan ki toontunnɔ n di u toona ni. 11 "Ŋaan digbangbeŋŋa koo digbanbis nba ni ki i saa kɔɔ, yin boi ki la popeendaanɔ ŋaaka, ki kɔɔ kii be leŋ nan i fiiru daar. 12 Ki yoo nba ki i yaa i kɔɔ ŋaak nba ni, yin foont ŋaak maŋ ni teeb fanu. 13 Ŋaak maŋ teeb-i tee burchimm, i parmaasir n biar ŋaak maŋ teeb paak; ŋaan burchimm-i kaa leŋi, i parmaasir maŋ n jen i paak. 14 Wunba saa y‡t i gaaru, ki bia y‡t wun gbat i barŋanii mɔɔntii maŋi, yoo nba ki i nyi ŋaak maŋ ni koo doo maŋ ni, yin pit pit i taapant ni tant ki lu bi doo ni. 15 Barmɔniie ki n beeri na, daar nba ki Yennu tan saa bu niib buut na, doo maŋ niib tubdatu tan saa gar Sodom nan Gomora teeb yarawa. 16 "Gotir man, n tuumie ki i sii tee nan pei nba be kinkata sinsuuk ni na. Yii sub man nan wai h na, ŋaan kii be soon nna nan ŋmana na. 17 I mi man niib po, kimaan bi tan saa soori ki saan nani barbuteeb boor, ki bia booi bi jiantii diit ni. 18 Bi tan saa saan nani tiŋ yudamm nan kpanbara boor ki bin bu i buut, kimaan yaa waan na paak; ŋaan i tan saa bet ŋamm nan binba ki tee Juu teeb na n barŋanii. 19 Ŋaan bi-i taŋŋi saan nani buut damm boor, i daa te ki li daamii-i nan yaa saa pak linba nan biaŋinba ki i saa pak, kimaan li yooe ki Yennu Seyeeŋ saa turi mɔbona nba ki i saa pak jiinib, 20 kimaan li ki tee yimm kaa tan saa paki, ŋaan i Baa Yennu Seyeeŋe tan sii be i ni ki piak. 21 "Li yoo maŋ, nirɔ tuu tan saa fikis u mɔŋ mɔŋ ninja ki bin kpiu; ki baanba mun tan saa fikis bi waas ki bin kpib; ki waas mun bia tan saa kɔn nan bi damm ki chabib nan kuun. 22 Ki sɔɔ kur tan sii namii kimaan yaa waan na paak; ŋaan wunba tan gubin nan biak yoo na joontu tan saa la tinnuwa. 23 Bi-i taŋŋi mukisi digban-yenn ni, yin nyi leŋ ki lɔɔr digbanleer ni; ŋaan barmɔniie ki n beeri na, i kan fit lin ki gbenn Juu teeb digbana kur kaawa, ki min nisaarik Bik jenna. 24 "Tɔn, tumiitɔɔ ki gar u wanntɔɔ; daabir mun bia ki gar u yomdaanɔ. 25 Li ŋan ki tumiitɔɔ binbeŋ-ii tee nan u wanntɔɔ binbeŋ na; ki daabir binbeŋ-ii munii tee nan u yomdaanɔ binbeŋ na. Bi-i taŋŋi pur ŋaadaanɔ narinbiit bat Beelsebuli, ki bi ji sii yi u ŋaateeb bia? 26 "I daa tiin niib jaŋmaanii, kimaan barsai kaa ki be woonin ni ki tan kan wooti, koo ki bɔr ki tan kan nyi paanu. 27 Linba ki n beeri bunbɔnn ni na, ŋaan nyintir man yeenin ni; ki linba ki n lɔkinii na, nyintir man paanu ni. 28 I daa tiin binba saa fit kpi i gbanant, ŋaan kan fit kpi i sei; i tiin man Yennu, wunba saa fit biir i gbanant nan i sei kura muu ni na. 29 Bi kɔi jinjera banlee jinjen kuukɔɔe, ŋaan li-i kii tee ti Baa Yennu loommi, bi yenɔkɔɔ gbaa kan baa tiŋ ni. 30 Yimm ŋarin, Yennu mi i yut kann. 31 Li paak, i daa tiin jaŋmaanii, kimaan i mɔk nyɔɔt ki gar jinjera bonchiann. 32 "Wunba nyint u mɔŋ paanu niib boor ni nan u tee n weirɔe, nnae ki n mun tan saa nyinnɔ paanu n Baa Yennu nba be sanpaapo na boor. 33 Wunba yaa u ki tee n weirɔ niib ni, nnae ki n mun tan saa yet a n ki miu n Baa nba be sanpaapo na boor. 34 "I daa dukii nan n baar nan parmaasire tingbouŋ na teeb paak; n ki baar nan parmaasir kaa, ŋaan n baar nan bɔkitue. 35 N baar maa n tan tukin bonjake nan u baa, bonpook nan u naa, poo nan u siponaa. 36 Nirɔ mɔŋ mɔŋ ŋaateebe tan sii tee u datai. 37 "Wunba loon u naa koo u baa ki garin, u ki ŋan nan wun teen n poorpoweitɔɔ; wunba mun bia loon u bija koo u bipoo ki garin, u ki ŋan nan wun teen n poorpoweitɔɔ. 38 Wunba ki jii u kuun dapunpunn ki waami, u ki ŋan nan wun teen n poorpo-weitɔɔ. 39 Wunba dekii u manfoor tan saa kɔŋŋira, ŋaan wunba likin u saaŋmaŋ n paak, u tan saa la u manfoora. 40 "Wunba gaari saauŋ, u gaar mine; ki wunba mun gaarin saauŋ, u gaar Yennu nba tumin nae. 41 Wunba gaar Yennu sɔkinii saauŋ nan waa tee Yennu sɔkinii na paaki, u tan saa gaar Yennu sɔkinii nyɔɔte. Wunba gaar popeendaanɔ saauŋ nan waa tee popeendaanɔ na paaki, u tan saa gaar popeendaanɔ nyɔɔte. 42 Wunba finn nyummaasin waaminna ki tur n poorpoweitɔɔ yenɔ nba pɔ i ni gbaa, nan waa tee n poorpoweitɔɔ na paak, barmɔniie ki n beeri na, u kan mi kɔŋ li nyɔɔti."

Matiu 11

1 Yiisa nba din wann u poorpoweiteeb piik nan banlee na ki gbenn yoo nba, ki u nyii leŋ ki saan bi doi ni ki mɔɔntir Yennu maan ki want niib. 2 Tɔn, Jɔɔnn nba din wuur niib Yennu nyunwuru na din be dansarik ni, ki tan gbat Yiisa Masia toona po; ki tun u poorpoweiteeb Yiisa boor 3 a bin saa boiɔ a "Fine tee wunba yaa wun tan baar na koo tii daa kii guu sɔɔ?" 4 Ki Yiisa bet Jɔɔnn toomiinba maŋ a "I ŋmat man ki saa bet Jɔɔnn linba ki i gbat ki bia la na, 5 a i la ki jɔɔnii nyɔɔntir, ki wɔbii taa naatir ki bi somm, ki gbaata ŋaat gbent, ki tuukpaa ji gbia, ki kpeemm fi kuun ni, ki talasdamm gbiintir barŋanii na mɔɔntii. 6 Parpeenn be wunba ki birisin na paak." 7 Tɔn, Jɔɔnn toomiinba na nba nyii leŋ ki ŋmat kun yoo nba, ki Yiisa ji piin ki boi niib maŋ buboit ki jiin Jɔɔnn po a "Yaa daan saan Jɔɔnn peŋ muuk ni na, i daan dukii a i saa la bee? I daan mi a i saa la muuk nba ki wouŋ damm nae-e? 8 I mantik jia daan saan a i la bee? Nirɔ ki u lia taŋant amii? Binba lia taŋant be kpanbara ŋei nie. 9 Ŋaan i mantik jia daan saan a i la bee? I daan dukii a i saa la Yennu sɔkiniie-e? Barmɔniie ki n beeri na, Jɔɔnn ŋarin gar sɔkiniiwa. 10 U poe ki Yennu gbouŋ poŋ din sɔb ki want na a, 'N saa tun toomu ki wun liit ki ŋamm a baaru sɔnu.'" 11 Ki Yiisa bia yetib a "Barmɔniie ki n beeri na, bi daa ki mi mar sɔɔ ki u chee Jɔɔnn nba daan wuur niib Yennu nyunwuru na, ŋaan wunba joont tarik Yennu naan ni chee Jɔɔnn. 12 Laa nyii Jɔɔnn maŋ yoo ki tan tuu mɔtana, binba ninbina mɔn nan bin tan kɔɔ Yennu naan ni na, dia nan nimmɔnne a bin tan kɔɔ nan paŋ. 13 Yennu sennu nan u sɔkiniinba maan na poŋ din pak ŋɔɔ Yennu naan poewa, ki Jɔɔnn tan baar. 14 Li-i tee ki i loon yin teen linba na yadaie, ŋɔɔ Jɔɔnne tee sɔkinii Elaija, wunba yaa wun tan baar na. 15 Wunba mɔk tuba, wun gbiint." 16 Ki Yiisa bia yet a "Yimm, mɔtana nigbouŋ na, n saa bikini nan bee na? I naan nan waas nba tuu tikir kar daak ni ki tian leeb paak nae a 17 'Ti peeb yerii ki teeni, ŋaan ki i ki waa. Ti mɔ kpemɔnii ki teeni, ŋaan ki i ki fabini.' 18 Yimm mɔtana nigbouŋ na naan waas maŋe, kimaan Jɔɔnn din baar ki ki di jemɔnt, ki bia ki nyu daamii, ki i yaa u waate; 19 ki min nisaarik Bik mun tan baar ki di ki nyu, ki i bia yaa 'Gotir man, a u tee podaanɔ nan danyuuruko, ki bia tee lampogaarteeb nan biitdamm yɔɔk.' Tɔn, Yennu toona nie want nan u bannu na tee barmɔnii." 20 Li yooe ki Yiisa piin ki piak biir doi nba daan la u bakitnauŋ toonjaana nba ki u tun leŋ, ŋaan y‡t bin nyik bi toonbiit na. 21 Ki u yet a, "Li tan sii bi yimm Korasinn teeb paak; li tan sii bi yimm Befsaida teeb paak mun; kimaan mi-i bonni tun bakitnauŋ toonjaana Taya nan Saidonn doi ni nan maa daan tun i doi ni na, bi daan bo saa nyik bi toonbiite yiama, ki puk bi mɔŋ tanpent ki ŋak faauk ki lin wann nan bi dii sindanta. 22 Ŋaan n beerie, daar nba ki Yennu tan saa bu niib buut na, i tubdatu tan saa gar Taya nan Saidonn teeb yarawa. 23 Ki yimm Kapenaum teeb, Yennu tan saa donni sanpaapowa-a? Aaii. U tan saa sikini kpeen tiŋe, kimaan mi-i bonni tun bakitnauŋ toonjaana Sodom doo ni nan maa daan tun i doo ni na, Sodom doo maŋ bo daa be man. 24 Ŋaan n beerie, barbuut daar maŋ, i tubdatu tan saa gar Sodom teeb yarawa." 25 Li yoo maŋ ki Yiisa yet a "N Baa Yennu nba tee sanpaapo nan tingbouŋ na Yomdaanɔ, n piaka, kimaan a bɔr a maan na subindamm nan miteebe, ŋaan fiit wann waas; 26 kimaan nnae ki a tuun a toona ki li mana. 27 "Tɔn, n Baa Yennue wannin barii na kura; ki sɔɔ ki mi maa tee wunba, see n Baa maŋ; ki sɔɔ mun bia ki mi n Baa maŋi, see min, u Bija na, nan binba ki n loon ki n fiit wannib na. 28 "Yimm nba tun toona ki jii jik-kpiata ki bak na, baat n boor man, ki n turi foon. 29 Yi sak n weiu man, kii tumii n wannu, ki i saa la foon ki tur i sei, kimaan n tee sikin-n-mɔŋ daanɔe, ki n par mei. 30 N weiu ki paari; ki n jikir bia ki kpai."

Matiu 12

1 Li yoo maŋ ki Yiisa nan u poorpoweiteeb gaar dii kpaab ni foon daar; ki kon mɔk u poorpoweiteeb na, ki bi kɔnii dikara ki pinii ŋman. 2 Farisiinba na nba la nna maŋ, ki bi bet Yiisa a "Gotir, a poorpoweiteeb na tuun linba ki ti sennu ki chab nan tii tuun foon daari." 3 Ki Yiisa jiin ki boib a "I ki karin Yennu gbouŋ ni Defid nba din tun biaŋinba-a? Kon nba din soor ŋɔɔ nan u jɔɔmu, 4 ki u kɔɔ Yennu ŋaak ni ki saa jii Yennu boroboro, ki ŋɔɔ nan u jɔɔmu na ŋman; ŋaan ki sennu na din ki chab nan bi sɔɔ n di Yennu boroboro maŋi, see Yennu mannteeb kuukɔɔ. 5 Koo i ki karin Yennu sennu gbouŋ ni, mannteeb nba din tuun biaŋinba-a? Bi din tuu yɔɔ tuun toona Yennu jiantu ŋasaakak ni foon daar kura ki biir sennu na, ŋaan kaa biiti. 6 Ŋaan n beerie, wunba chee Yennu jiantu ŋasaakak na be nna. 7 Li sɔb Yennu gbouŋ ni a 'Yennu loon ninbatinue ki gar maruŋ;' li-i tee ki i bo bann linba na paaki, i bo kii piak ki biir binba kaa biiti; 8 kimaan min nisaarik Bike yen foon daar." 9 Ki Yiisa nyii leŋ ki saan kɔɔ bi jiantu diiuk ni. 10 Ki jasɔɔ nna mun din be leŋ, ki u nuu kpo. Ki siab din loon bin la Yiisa biit ki biirɔ; li paak, ki bi boiɔ a "Ti sennu sak a nirɔ n te ki baatɔɔ n paak foon daarii?" 11 Ki u mun ŋmant boib a "I yenɔ-i mɔk peyenɔkɔɔ, ki peeuk maŋ tan baa bunbunn ni foon daar, u kan donnɔ foon daar na-a? 12 I ki mi nan nisaarik mɔk nyɔɔt ki gar peeuku? Li paak, sennu na chab a tii tuun toonŋana foon daar." 13 Ŋanne ki u ŋmant bet nuukpeenn daanɔ na a "Tantir a nuu na." Ki u tant ki li la paŋ ki tee nan leer na. 14 Ki Farisiinba na nyii nanyer ki lor nan leeb baa saa teen biaŋinba ki kpi Yiisa. 15 Ki Yiisa bann bi lor maŋ po, ki din nyii leŋ. Ki niib bonchiann waa u poor; ki u te ki baatib kura paak; 16 ŋaan kpaamm nan ninmɔnn a bi daa mɔɔntirɔ. 17 U din tun nnae a linba ki Yennu sɔkinii Aisaya din sɔkin na n gbee a, 18 "Gotir, maa gann n bik nbae na, ŋɔɔe ki n mantik loonɔ; n numm mantik gboouwa. N saa jii n Seyeeŋ ki teen u ni. U tan saa mɔɔnt buut nba took ki tur binba ki tee Juu teeb. 19 U tan kii mɔk mɔniɔk; ki bia tan kii tee kpayɔk daanɔ, ki bia tan kii mɔk fuut yann yann sanjot ni. 20 U tan kan kɔnn lanbankɔɔnn ki tonti, ki bia tan kan kpeen fitir nba ki di fanu. U tan saa te ki barbuut nba took n la nyannu. 21 U sann paake, ki binba ki tee Juu teeb na tan sii mɔk dindann." 22 Li yoo na ki nisiab baar nan jasɔɔ ki narinbiit be u ni, ki teenɔ muuk ki bia teenɔ jɔɔŋ; ki Yiisa te ki u paak, ki u ninbina nyɔɔnt, ki u ji laat, ki bia muut ki ji piak. 23 Ki li yaar lit niib na kur bonchiann, ki bi boi bi leeb Yiisa po a "Jɔɔ nae nɔk tee Defid yaaboonn na-a?" 24 Ŋaan Farisiinba na nba gbat nna maŋ, ki bi yet a "Narinbiit bat Beelsebule i teen jɔɔ maŋ yiikoo, a wuu nyint narinbiit niib ni." 25 Ki Yiisa bann baa dukii linba, ki betib a "Naan niib-i ŋmat kɔn ki tookit bi leeb, bi naan maŋ saa biira. Ki doyennkɔɔ niib koo ŋayeŋkɔɔ niib-i ŋmat kɔn nan leeb, li kan seti. 26 Li-i tee ki Sintaanii nyint Sintaanii, li want nan u kɔn ki bɔkitir u mɔŋe; nlee ki u naan na saa seti? 27 Ki li-i tee Beelsebul teenin yiikoo a mii nyint narinbiit niib ni, ki yimm muni, ŋmee chab i niib a bii nyint narinbiiti? I mɔŋ niib maŋ toonae want nan i ki mɔk mɔnii. 28 Ŋaan min ŋarin, Yennu Seyeeŋ paake ki n nyint narinbiit niib ni; ŋanne mun bia want nan Yennu naan be i boor ni. 29 "Sɔɔ kan fit kɔɔ jawakitir j ŋaak ni ki bakir u bona ki nyi nann, li-i kii tee li yɔɔ dɔŋ lorɔ ŋmiiti kaawa, ŋaan fit kɔɔ ki bakir u bona maŋi. 30 "Wunba ki see n poor, u kɔn nanime; ki wunba mun ki tikii niib ki teenimi, u yatibe. 31 Li paake ki n beeri na, Yennu saa nyik chab nisaarik u biit nan barbiit kura; ŋaan wunba sukii Yennu Seyeeŋ, Yennu kan mi nyik chab li daanɔ. 32 Wunba piak barbiit ki teen min nisaarik Bik, Yennu saa nyik chabɔ; ŋaan wunba piak barbiit ki teen Yennu Seyeeŋi, Yennu kan mi nyik chab li daanɔ durinya na ni, koo durinya nba tan saa baar na ni." 33 Ki Yiisa bia yet a "Li-i tee ki tiik ŋan, u loon lɔɔnŋanae; ŋaan li-i tee ki tiik ki ŋani, u loon lɔɔnbiite, kimaan tiik lɔɔna nie ki bi bantɔ. 34 Yimm waalabirii booru na, yaa tee nifobiit biaŋinba na, nlee ki barŋanii saa nyi i mɔi ni? Kimaan linba ki nisaarik dukii u par ni, ŋanne bia nyi u mɔb ni. 35 Niŋanɔe tuun toonŋana, kimaan u par ni ŋan; ki nibiiuk mun tuun toonbiit, kimaan u par ni bi. 36 "N beerie, barbuut daar Yennu tan saa bu niib buut nan baa pak baryana kur nba paak, 37 kimaan sɔɔ kur pinpako tan saa nyinnɔ koo ki kɔɔnɔ daar maŋ ni." 38 Ŋanne ki sennu wannteeb nan Farisiinba na bet Yiisa a "Wanntɔɔ, ti loon ki a tun bakitnauŋ nyinne ki wannit." 39 Ki u jiin a, "Mɔtana nigbouŋ nba tee biitdamm ki bia ki waa Yennu na loon bin la bakitnauŋ nyinae; ŋaan n kan mi tun nyinsiar ki turibi; Yennu sɔkinii Jona nyinbooru na kɔɔe ki n saa wannib; 40 kimaan Jona nba din be jangbeŋŋir poor ni yonnu nan nyiɔk ki saan jaŋ daa ŋantaa na, nnae ki min nisaarik Bik mun sii be tiŋ ni yonnu nan nyiɔk ki saa jaŋ daa ŋantaa. 41 Buut daar, Ninefa teeb tan saa set wann nan mɔtana nigbouŋ na mɔk biit; kimaan Jona nba din mɔɔnt Yennu maan ki turib na, bi din nyik bi biite; gotir man, wunba chee Jona be nna. 42 Buut daar, poobat nba din nyii niidiitu po na mun bia tan saa set wann nan mɔtana nigbouŋ na mɔk biit, kimaan u din nyii digbann banfɔkirewa ki tan baar a wun gbiint Bat Solomonn yanfoon na pinpauk; gotir man, wunba chee Solomonn be nna. 43 "Li-i tee narinbiiuk tan nyii nirɔ ni, u tuu yeeke ki lin mɔkooŋ ni, ki loon foon boor, ŋaan ki ki laati; 44 li paak, u tuu tan yet u mɔŋe a 'N saa ŋmat saan ŋaak nba ki n daan nyii na nie;' wu ji kii ŋmat baar, ki la ki li dɔɔ yann, ki bi piar ŋamma, 45 u ji saa ŋmat nyie ki saa yiin narinbileeb banlore, binba bi ki chee u, ki baar namm, ki bin kɔɔ ki lakin be; nirɔ maŋ binbeŋ ji sii bi bonchiann ki gar waa daan tuu be sinsinn biaŋinba na. Linba nae tan saa baar mɔtana nigbouŋ nba tee biitdamm na paak." 46 Yiisa nba din daa piak ki teen niib na yoo nba, ki u naa nan u waarii baar ki see nanyer po, ki tun sɔɔ a wun yiinɔ ki bin pak nanɔ. 47 Ŋanne ki sɔɔ betɔ a "Gotir, a naa nan a waarii see nanyer po ki loon bin pak nana." 48 Ŋanne ki Yiisa boi nirɔ nba betɔ na a "Ŋmee tee n naa? ki lamme tee n waarii?" 49 ŋaan tant u nuu ki wann u poorpoweiteeb ki yet a "Gotirii, n naa nan n waariie na; 50 wunba kur tuun n Baa Yennu nba be sanpaapo na loommu, ŋɔɔe tee n ninja, nan n niipoo nan n naa."

Matiu 13

1 Li daar maŋ ki Yiisa nyii ŋaak na ni ki saan kar mɔkgbeŋŋir kpiŋ. 2 Ki nibur lakin u boor; ŋanne ki u saan kɔɔ kar burgbetir ni, ŋaan ki nibur na see gbingbann. 3 Ki u yimm barjokit bonchiann ki yet a "Jasɔɔ din doo kpaab a wun saa bur tan. 4 Waa din buur na ki bonboorii na yenninba yat baa sanjouk ni, ki nɔɔnii baar ki dii. 5 Ki leer mun baa tanpuut paak, siaminba ki tant ki yabi, ki pia ki kpaat yiama, kimaan tant ki yab leŋi, 6 ŋaan yonnu nba din tan toŋ yoo nba, ki li jɔɔk. Laa din ki fit sikin jiina na paak, li kur din kpoe. 7 Ki leer mun bia baa kunkonii jiina ni, ki tan lakin pia ki kpaat nan kunkonii na, ŋaan ki kunkonii na ŋmabirir. 8 Ki leer mun baa tinŋaŋ ni, ki nan naaŋŋauŋ; ki siab nan kobik kobik, siab piinloob loob, ki siab mun piintataa. 9 "Wunba mɔk tuba, wun gbiint!" 10 Ŋanne ki Yiisa poorpoweiteeb na baar u boor ki tan boiɔ a "Bee ki a piak barjokit kuukɔɔ ki teen niib na?" 11 Ki u jiin ki betib a "Yimm ŋarin, Yennu chabii a yin bann woonin ni barii ki jiin u naan po, ŋaan ŋamm ŋarin, u ki chabibi. 12 Tɔn, wunba mɔk Yennu bannu, ŋɔɔe sii laat pukii ki mɔk bonchiann, ŋaan wunba ki mɔki, u saa kɔŋ linba ki u mɔk na gbaa. 13 Li paake te ki n yiimm barjokit, kimaan bi goriie, ŋaan ki ki laati, ki bia gbia, ŋaan ki ki bant li paaki. 14 Bi binbeŋ na paake te ki Yennu sɔkinii Aisaya nba din sɔkin linba na set tan gbee nan mɔnii. U din yaa Yennu yet a 'Niib maŋ set saa gbat, ŋaan bi kan bann li paaki. Bi set saa la, ŋaan bi kan bann baa la linba maŋ paaki. 15 Kimaan niib na yan dɔkine, bi tuba mun paar, bi bia mun bi ninbinae, kimaan bi ki loon bin la siari, ki bia ki loon bin gbati, ki bia ki loon bi yan n dɔkiti, ki bia ki loon bin nyik bi toonbiit, ki man tinnibi.' 16 "Tɔn, yimm ŋarin, parpeenn tee i yare, kimaan i ninbina laat; ki i tuba bia gbia maan. 17 Ŋaan barmɔniie ki n beeri, Yennu sɔkiniinba nan yentinna bonchiann din loon bin la linba ki i laat na, ŋaan din ki la, ki bia din loon bin gbat labaar nba ki i gbia na, ŋaan din ki gbati." 18 Ki Yiisa yet u poorpoweiteeb a "Gbiintir man ki bann tanburtɔɔ barjouk na paak. 19 Nirɔ-i gbat Yennu naan barŋanii, ŋaan ki bann li paaki, Sintaanii tuu baare ki tan nyinn linba bo kɔɔ li daanɔ par ni na; ŋanne tee bonboorii nba baa sanjouk na paak. 20 Bonboorii nba mun baa tanpuut paak na tee nan wunba gbat Yennu maan ki gaar yiama nan parpeenn; 21 ŋaan ki li daa ki sik u par ni fanu, u tuu yabir waaminna; ŋaan biak nan mukisuku baarɔ Yennu maan na paak, u tuu foke lu yiama. 22 Bonboorii nba baa kunkonii jiina ni na mun tee nan wunba gbat Yennu maan na, ŋaan ki tingbouŋ na daamii nan mɔkint lomm nyakin maan maŋ u par ni, li kan nami. 23 Ki bonboorii nba baa tinŋaŋ ni na tee nan wunba gbat Yennu maan na, ki bann li paak, ki li tan kpaat ki nan; ki siab nan kobik kobik, siab mun nan piinloob loob, ki siab mun bia nan piintataa nae." 24 Ki Yiisa bia yimm barjouk na ki pukin a "Yennu naan tee nan jasɔɔ nba din doo u kpaab ni ki saa bur diboorŋanii, ŋaan ŋmat kun. 25 Ki niib tan dɔɔr, ki u dataak saan bur dinatimii ki kɔɔn diboorŋanii na ni, ŋaan yaat. 26 Dii na nba din tan puk ki ji maar yoo nba, ki bi ji bann nan dinatimii be leŋ. 27 Ŋanne ki u ŋaatoontunna baar ki boiɔ a 'Chanbaa, diboorŋanii kuukɔɔ kaa ki a daan bur a kpaab na ni-i? Ŋaan li teen nlee ki dinatimii tan be leŋi?' 28 Ki u betib a, 'Datasɔɔe tun nna.' Ki bi boiɔ a 'Ki a loon tin saan ki ŋabir dinatimii maŋii?' 29 Ŋanne ki u jiin a 'Aaii, kimaan i-i yaa yin ŋabiri, i tan saa kpet ŋabir dimɔniie. 30 Li paak, nyikin man ki lii be nan dijaan yoo; ki dijaan yooe ki n tan saa bet dijaan teeb na ki bin chɔɔ dinatimii na sinsinn ki poon ki joo muu; ŋaan kpen nan diŋanii na ki tan wuun, n dii sinsoŋ ni.'" 31 Ki Yiisa bia yimm barjouk na ki pukin a "Yennu naan tee nan kanpɔtik binn nba ki nirɔ din jii ki bur u kpaab ni, 32 ki li waar ki gar bonboorii kur, ŋaan ki li tan pia ki kpaat ki yab tiinii kura, ki tan teen tiwakutuk, ki nɔɔnii baat ki jak li yiinii paak nae." 33 Ki Yiisa bia yimm barjouk na ki pukin a "Yennu naan tee nan datiŋ nba ki poo tuu jii ki ŋmat nan boroboro yon nba yab, ki lin tan miik ki ji fuut do nae." 34 Yiisa din yiin barjokite ki piak linba na kur ki teen nibur na. U din ki pak siar ki turib ki li ki tee barjouk ni kaa. 35 U tun nnae a linba ki Yennu sɔkiniisɔɔ din sɔkin na n gbee a, "N tan saa yaat n mɔb ki yet barjokite, ki pak fiit wann woonin ni bona nba din woon ki ki nyii paanu durinya piinu niwa ki tan tuu mɔtana na." 36 Ŋanne ki Yiisa nyik nibur maŋ leŋ, ŋaan saan kɔɔ u ŋadɔɔtik ni. Ki u poorpoweiteeb baar u boor ki tan yetɔ a "Betirit dinatimii barjouk na paak." 37 Ki u betib a "Min nisaarik Bike tee wunba bur diboorŋanii na. 38 Tingbouŋ nae tee kpaab na; ki diboorŋanii na tee Yennu naan ni niib; ŋaan ki dinatimii na mun tee Sintaanii niib. 39 Dataak nba bur dinatimii na mun tee Sintaanii; ki dijaan yoo na tee durinya na gbennu; ki dijaanteeb na mun tee Yennu malakanba. 40 Biaŋinba ki bi tikir dinatimii ki joo muu na, nnae ki li tan sii tee durinya na gbennu daar. 41 Min nisaarik Bik tan saa tun n malakanba ki bin gann nibiit kur nba te ki leeb tuun toonbiit, nan biitdamm kur nba be n yent ni, 42 ki lub musaakau ni; leŋe ki niib tan sii mɔ fabin ki ŋman bi nyana. 43 Ŋaan li yoo maŋ, yentinna kur tan sii be bi Baa Yennu ŋaanaan niewa, ki nyirii nan yonnu nba nyirii na. Wunba mɔk tuba, wun gbiint. 44 "Yennu naan tee nan mɔkint nba din pii tiŋ ni sɔɔ kpaab ni nae; ki jasɔɔ tan baar ki la ki ŋamm gbiir tant piinir, ŋaan saan nan parpeenn ki saa kɔi waa mɔk linba kura, ki jen tan daa kpaab maŋ. 45 "Tɔn, Yennu naan bia tee nan daakɔɔrɔ nba din kak lin ki loon tuliat nba ŋan, a wun daa nae. 46 U din saa la yenn ki li daauk paar bonchiann; ki u ŋmat saa kɔi waa mɔk linba kur, ki saan daa tuliat maŋ. 47 "Yennu naan bia tee nan janlaauŋ nba ki bi lu nyun ni ki soor janbooru booru nae. 48 Laa din gbee yoo nba ki bi dat donn gbingbann, ki kar gann janŋanii ki teen chubit ni, ŋaan lu janbiit na. 49 Li tan sii tee nnae durinya na gbennu daar; Yennu malakanba tan saa baare ki gann niŋamm, ŋaan nyik nibiit. 50 Bi tan saa jii nibiit maŋ ki lub musaakau ni. Leŋewa, ki niib tan sii mɔ fabin ki ŋman bi nyana." 51 Ŋanne ki Yiisa boib a "I bann barjokit maŋ kur paaka?" Ki bi sak a "Nn." 52 Ki u betib a "Li paak, Yennu sennu wanntɔɔ nba kur tumii n wannu, ki jiin Yennu naan po ki bann li paak fanu, u tee nan ŋaadaanɔ nba nyint bonkpera nan bonpaana u mɔkint ni nae." 53 Yiisa nba din yin barjokit na ki gbenn yoo nba, ki u nyii leŋ, 54 ki kun u mɔŋ mɔŋ doo ni, ki saa want niib Yennu maan jiantu diiuk ni. U wannu maŋ din teen niib na bakitnauŋ bonchiann, ki bi boi bi leeb a "Lee ki jɔɔ na la yanbooru na? Lee ki u la paŋ ki tuun bakitnauŋ toonjaana na? 55 Waa, kanpinta bik na kaa na-a? U naa kaa tee Meeri na-a? U waarii kaa tee Jeems nan Joosef nan Simonn nan Judas na-a? 56 U niipoob kaa ki timm nan ŋamm lakin be doo na na-a? U la bannu na kur lee?" 57 Li paak, bi din ki teenɔ yada. Ŋanne ki u betib a "Yennu sɔkinii ki kɔŋŋit baakiri, see u mɔŋ mɔŋ doo ni, nan u ŋaateeb boor." 58 Li paak, u din ki tun bakitnauŋ toonjaana bonchiann leŋi, kimaan niib maŋ nba ki teenɔ yada na paak.

Matiu 14

1 Li yoo maŋ ki Galilii batsaakɔɔ Herod gbat Yiisa bakitnauŋ toonjaana na po, 2 ki yet u jiamm a "Jɔɔnn nba daan wuur niib Yennu nyunwuru na fiir kuun nie na, li paak te ki u mɔk paŋ ki tuun bakitnauŋ toonjaana na." 3 Ŋaan sɔɔ Herod maŋ poŋ kpii Jɔɔnn na. Biaŋinba ki u daan kpiiu na tee nnae: Herod din fat u mɔŋ mɔŋ waarɔ Filip ŋaapoo Herodiase ki kɔɔnɔ. Ki Jɔɔnn din tuu beerɔ a "Yennu sennu ki chaba nan fan fat a waarɔ ŋaapoo ki kɔɔni." Li paak, ki Herod soor Jɔɔnn ki kɔɔnɔ dansarik, ki baanɔ bant, 5 ki loon wun kpiu, ŋaan tiin niib jaŋmaanii, kimaan sɔɔ kur mantik din teen Jɔɔnn yada nan u tee Yennu sɔkiniie. 6 Ki Bat Herod maaru jaamm daar tan baar; ki Herodias maŋ bipoo baar ki waa siak bi tɔɔnn, ki li maŋ Bat Herod bonchiann. 7 Li paak, ki u por mɔpor a u saa tur bonpobik na linba kur ki u saa yet a u loon. 8 Ŋanne ki u naa Herodias wannɔ waa saa boi linba po, ki bonpobik maŋ bet Bat Herod a wun pot Jɔɔnn wunba wuur niib Yennu nyunwuru na yur ki kpeen tatilaauk ni ki turɔ. 9 Linba na din biir bat na par hei; ŋaan waa dɔŋ por mɔpor saamm na tɔɔnn na paak, u ji ki fit y‡ti; ki chab a bin saan tun nna, 10 ki tun siab a bin saan dansarik ni ki saa pot Jɔɔnn yur. 11 Ki bi saan ki saa pot u yur ki kpeen tatilaauk ni, ki tan tur bonpobik maŋ; ki u mun gaar saan tur u naa. 12 Ŋanne ki Jɔɔnn poorpoweiteeb baar ki tan jii u gbanant ki pii; ŋaan ji saan ki saa bet Yiisa. 13 Yiisa nba gbat Jɔɔnn kpinu po yoo nba, ki u fiir leŋ ki kɔɔ burgbetir, ki poot kɔɔ muuk. Nibur na nba la nna maŋ, ki bi somm taatiŋ ki kokin mɔkir na ki saa chetɔ muuk maŋ ni. 14 Yiisa nba nyii burgbetir ni ki la nibur maŋ na, ki ninbaauk soorɔ bonchiann, ki u te binba yiar ki be leŋ na kura paak. 15 Yonnu nba tan maakit yoo nba, ki u poorpoweiteeb baar u boor ni, ki yetɔ a "Nna na tee muuk nie, ki yonnu mun yaa lin baae; li paak, ŋaant ki niib na n saan digbanbis nba kpia na ki la jeet ki daa." 16 Ŋanne ki u betib a "Bi daa saa. I mɔŋ n turib jeet ki bin di." 17 Ki bi betɔ a "Boroboro kuna ŋaŋŋmu nan janbis ŋanlee kuukɔɔe be ti boor ni." 18 Ŋanne ki u betib a "Jiin turin man," 19 ŋaan bet nibur na a bin lakin kar mɔɔt paak; ki jii boroboro kuna ŋaŋŋmu nan janbis ŋanlee na, ki gokit got sanpaapo, ki tur Yennu niipoouk jeet na paak, ki ji ŋmit ŋmit boroboro na ki tur u poorpoweiteeb, ki bi tor nibur na. 20 Ki bi kur dii gboo ki tenn. Ki u poorpoweiteeb lakin jeet nba tenn na, ki li gbee kpanchubit piik nan ŋanlee. 21 Jab nba din dii maŋ teen nan tusaa ŋaŋŋmu nawa, ŋaan ki poob nan waas kann ki pukin leŋi. 22 Li poorpo ki Yiisa te ki u poorpoweiteeb kɔɔ burgbetir ni ki tɔk nyunpaanu saa u tɔɔnn po pootir, ŋaan ki u biar a wun chab nibur na. 23 Waa chab nibur na ki gbenn yoo nba ki u doo jɔɔr paak a wun miar Yennu. Ki nyiɔk tan baar ki u bia daa be leŋ u kɔɔ. 24 Li yoo ki u poorpoweiteeb ŋarin ji be burgbetir na nie nyun ni, ki fɔk nan gbingbana ki nyunpana dia ki labimm, kimaan bi din tookit wouŋo. 25 Li poorpoe ki Yiisa tan nyii jɔɔr na paak kojomɔɔk ki sik somm nyun paak, ki saa bi boor. 26 U poorpoweiteeb nba tan la ki u somm nyun paak ki baat na, ki jaŋmaanii soorib bon-chiann, ki bi yaa "Gotir man, kpeemɔe!" ŋaan yikin ja-ŋmaanwuyikinii. 27 Li taakpaak ni ki u betib a "Cheen i para man, li tee mine; i daa tiin jaŋmaanii." 28 Ki Piita jiin ki betɔ a "N Yomdaanɔ, li-i setikii tee finie, fan te ki n somm nyun na paak ki cheta." 29 Ki u jiin bet Piita a "Baat na." Ki Piita nyii burgbetir na ni ki sik nyun na paak, ki piin somm ki che Yiisa. 30 Waa la ki wouŋ pir nyunpana ki baat yoo nba, ki jaŋmaanii soorɔ, ki u piint kpii li yoo, ŋaan yikin a "N Yomdaanɔ, tintin!" 31 Ki Yiisa tant nuu yiama ki soorɔ, ŋaan boiɔ a "Fin yadkanpɔɔn daanɔ na, bee ki a birisimi?" 32 Baa ŋmat saan kɔɔ burgbetir na ni yoo nba, ki wouŋ na nyik danu. 33 Ki binba be burgbetir na ni baar ki tan gbaan jiantir Yiisa ŋaan yeen a "Barmɔniie, a set tee Yennu Bijae." 34 Baa saa baar mɔkgbeŋŋir na pootir yoo nba, ki bi nyii doo Genesaret. 35 Doo maŋ teeb nba bann Yiisa na paak, ki bi mɔɔnt tur leŋ niib kura, ki bi tikir bi baatib kur ki baar namm u boor ni, 36 ki tan barimɔ a wun sak ki baatib maŋ n sii u liatir mɔgbann. Ki binba siir na kura la laafia.

Matiu 15

1 Li yoo na ki Farisiinba nan sennu wannteeb nyii Jerusalem ki baar tan boi Yiisa a 2 "Bee ki a poorpoweiteeb ki waa ti yeejamm kaari? Kimaan bi ki waa ti kaar nba yaa ti tuu nit ti niiwa ki di na." 3 Ki u mun boib a "Bee ki yimm ki sak Yennu sennu weiu ŋaan waa i yeejamm kaari? 4 Yennue din senn u sennu a 'Turin a baa nan a naa baakir; ŋaan wunba tan sukir u naa koo u baa, bin kpiu;' 5 ŋaan yimm ŋarin yaa 'Nirɔ-i bet u naa koo u baa a Maa bo saa tura linba na, li kpant Yennu yara;' li ki tee miar kaa nan wun tur u damm siari. 6 Yaa tuun biaŋinba na, i ki dia Yennu sennu na, kimaan i yeejamm kaar weiu na paak. 7 Yimm kpinkpannii damm na, Yennu sɔkinii Aisaya nba din pak i po biaŋinba na set tee barmɔniie. U din yet a Yennu yaa, 8 'Niib na teenin baakir mɔi nie, ŋaan bi para fɔk nanin saama. 9 Bi jiantirin yanne, kimaan bi dia nisaarii kaare ki want niib, li ki tee min Yennu sennu kaa.'" 10 Ŋanne ki Yiisa yiin nibur na ki tan yetib a "Gbiintir man, ki bann linba ki n yaa n yeti na paak; 11 linba kɔɔ nisaarik mɔb ni ki fit tee jakint u par ni; ŋaan linba be nisaarik par ni ki nyi u mɔb nie teenɔ jakint." 12 Ŋanne ki u poorpoweiteeb baar u boor ki tan boiɔ a "A mi nan Farisiinba na nba gbat a maan maŋ, bi wutoa doo a paaka?" 13 Ki u jiin a "Tiik nba kur ki n Baa Yennu nba be sanpaapo na ki bur, see ki bi tan ŋabire ki lu. 14 Li paak, ŋaantib man ki bii saa, kimaan bi tee nan jɔɔnii nae ki daar bi jɔɔnlei; ki li-i tee ki jɔɔŋ daar u lɔɔ, see ki bi kur baa bootuk ni." 15 Ŋanne ki Piita betɔ a, "Wantit barjouk na paak." 16 Ki Yiisa jiin a "I mun bia lek daa ki bant n maan na paakii? 17 I ki mi nan linba kɔɔ mɔb ni, li yaa lin sik poor nie, ki kpant bint ki nyii-i? 18 Ŋaan barbiit nba ki nisaarik piak u mɔb ni, li nyii u par nie, ŋann mune teenɔ jakint. 19 Nirɔ par nie ki dudukbiit na nyi; nikpinu, nan bonchonchonn toona, nan nanyukin, nan faak siara, nan sanjaauŋ. 20 Linba na nbae teen nisaarik jakint, ŋaan niijakina dinu kan fit teen nirɔ jakinti." 21 Tɔn, ki Yiisa nyii leŋ ki saan Taya nan Saidonn bɔkir po. 22 Ŋanne ki Keenann tiŋ ni poosɔɔ nna mun be bɔkir maŋ po, ki tan baar Yiisa boor ki yet a "N Yomdaanɔ, Defid yaaboonn, tinimin ninbaauk! Narinbiiuk be n bipoo ni, ki mukisɔ bon-chiann." 23 Ki Yiisa ki jiin siari; ŋaan ki u poorpoweiteeb betɔ a, "Berin poo na, kimaan u waa-t ki mɔk fuut." 24 Ŋanne ki Yiisa jiin a, "Israel teeb nba tee nan pei nba bot na, ŋamm kuukɔɔe ki Yennu tumin a man saan bi boor." 25 Ki poo maŋ baar ki tan gbaan Yiisa tɔɔnn ŋaan yetɔ a "N Yomdaanɔ, sommitin." 26 Ki Yiisa jiinɔ a "Li ki ŋan ki nirɔ n jii waas jeet ki tur bɔi." 27 Ŋanne ki poo na jiin a "N Yomdaanɔ, li set tee mɔniie; ŋaan bɔi nba dɔɔ bi daamm saaŋmanii boor ki kɔŋŋit jebura nba baa tiŋ ni ki tɔkii di." 28 Ŋanne ki Yiisa ji yetɔ a "Poo, a teenin yada bonchiann. Linba ki a loon na, lin tun nna ki tura." Li taakpaak ni ki u bipoo maŋ la laafia. 29 Li poorpoe ki Yiisa nyii leŋ ki gar Galilii mɔkgbeŋŋir kpiŋ, ki saan doo jɔɔr paak ki kar. 30 Ki nibur baar u boor ki dia wɔbii, nan jɔɔnii, nan mui, nan dianii, nan binba yiar yiarbooru booru kur, ki tan birib u tɔɔnn; ki u te ki bi kura paak. 31 Ki nibur na nba la ki mui piak, ki dianii paak, ki wɔbii somm, ki jɔɔnii laat na; ki li yaar litib, ki bi piak dont ŋamm Israel teeb yabint Yennu na sann. 32 Ki Yiisa yiin u poorpoweiteeb ki tan yetib a "Ninbaauk mɔkin nan niib na, kimaan daa ŋantaae na ki bi be n boor nna, ki ki mɔk jeet ki di. N ki loon man kunnib komi, ki bi tan saa mann fib kon." 33 Ki u poorpoweiteeb boiɔ a "Lee ki ti saa la jeet muuk na ni ki tur nichiɔŋ na ki bin di gboo, kimaan baa yab biaŋinba na?" 34 Ki u boib a "I mɔk boroboro kuna ŋaŋŋae?" Ki bi jiin a "Ŋanlore, nan janbis waaminna." 35 Ki u bet niib na a bin kar tiŋ ni; 36 ŋaan jii boroboro kuna ŋanlore nan janbis na, ki tur Yennu niipoouk li paak, ŋaan ŋmit ŋmit tur u poorpoweiteeb, ki bi jii tor niib maŋ. 37 Ki niib na kur dii ki gboo ŋaan ki li tenn; ki u poorpoweiteeb lakin jeet nba tenn na, ki li gbee kpanchubit ŋanlore. 38 Ki jab nba dii jeet na din tee tusaa ŋanna, ki poob nan waas kann ki pukin leŋi. 39 Li poorpo ki Yiisa chab niib maŋ, ŋaan kɔɔ burgbetir ki poot kɔɔ Magadann tingbouŋ ni.

Matiu 16

1 Ŋanne ki Farisiinba nan Sajusiinba baar Yiisa boor. Baa loon ki bin jammɔ na paak, ki bi yetɔ a wun tun bakitnauŋ nyinn ki lin wann nan Yennu set mi u po. 2 Ki u jiin a "Li-i tee ki sanpagbant mɔn daajoouk, i tuu yet a 'Wonn ŋarin, daar won sii yeen.' 3 Ŋaan li-i tee ki sanyiɔk ni sanpagbant mɔn ŋaan tan bɔnt, i tuu yet a 'Dinna ŋarin, saak saa baawa.' I fit buntir sanpagbant nyina, ŋaan kan fit bukit mɔtana yoo na-a? 4 Mɔtana niib, biitdamm nba ki waa Yennu na loon bin la bakitnauŋ nyina; ŋaan n kan mi tun nyinsiar ki turibi; Yennu sɔkinii Jona nyinbooru na kɔɔe ki n saa wannib." U yet nnae, ŋaan seet ki nyikib. 5 Tɔn, Yiisa nan u poorpoweiteeb nba din saa poot mɔk-gbeŋŋir na pootir yoo nba, ki u poorpoweiteeb na ji tiar nan bi ki jii boroboro. 6 Ki u betib a "I mi man Farisiinba nan Sajusiinba datinii na po." 7 Ki bi ji piin ki beer bi leeb a "Taa ki baar nan boroboro na paake te ki u yeen nna." 8 Ŋanne ki u bann baa yeen linba maŋ, ki boib a "Yimm yadkanpɔɔna damm na, bee ki i beer i leeb nan yaa ki baar nan boroboro na paake? 9 I bia lek daa ki bann li paakii? I ki tian maa daan jii boroboro kuna ŋaŋŋmu ki dinn jab tusaa ŋaŋŋmu na-a? Kpanchubit ŋaŋŋae ki i daan lakin jeet nba tenn na? 10 Ki i bia ki tian jab tusaa ŋanna nba ki n daan jii boroboro kuna ŋanlore ki dinnib na-a? I daan lakin jeet nba tenn na ki gbeen chubit ŋaŋŋae? 11 Bee ki i ki bann nan li ki tee boroboro po kaa ki n piaki? I mi man Farisiinba nan Sajusiinba datinii na po." 12 Ŋanne ki u poorpoweiteeb ji bann nan li ki tee datinmɔŋ po kaa ki u piak a bii guu bi mɔŋi; ŋaan Farisiinba nan Sajusiinba wannu na poe. 13 Yiisa nba tan baar Siisarea Filipi tiŋ ni yoo nba, ki u boi u poorpoweiteeb a "Niib yaa min nisaarik Bik tee ŋmee?" 14 Ŋanne ki bi jiin a "Siab yaa a tee Jɔɔnn nba daan wuur niib Yennu nyunwuru nae, ki siab yaa a tee Elaijae, ki siab mun yaa a tee Jeremayae koo Yennu sɔkiniisɔɔ nba din be yaayoo niwa nae." 15 Ki u ji boib a "Ki yimm muni, i yaa n tee ŋmee?" 16 Ŋanne ki Simonn Piita yetɔ a "Fine tee manfodaanɔ Yennu Bija Masia, wunba ki u gannɔ na." 17 Ki Yiisa betɔ a "Fin Simonn, wunba tee Jona bija na, parpeenn be a paak, kimaan nisaarik kaa fiit barii na ki wannani, ŋaan n Baa Yennu nba be sanpaapo nae fiit ki wanna. 18 Fin Piita, min ŋarin beerae, a tee tanne; ki tanpiiuk k na paake ki n saa jii n niib ki senn; ki kuun kan fit nyannibi. 19 N saa tura Yennu naan tammɔb gann peenii; li paak, linba ki a tan lor ki yaa li kɔɔ tingbouŋ na ni, ŋanne mun bia poŋ kɔɔ Yendɔuŋ ni; ki linba ki a bia yaa li ki kɔɔ, ŋanne mun bia poŋ ki kɔɔ Yendɔuŋ ni." 20 Ŋanne ki Yiisa kpaan u poorpoweiteeb na nan ninmɔnn a bii mi ki bin bet sɔɔ nan ŋɔɔe tee Yennu Niganntɔɔ Masia na. 21 Laa din nyii li yoo maŋ ki jii saa, ki Yiisa piin ki beer u poorpoweiteeb a "See ki n fabir saan Jerusalem, ŋaan ti tiŋ saakab, nan Yennu mannteeb yudamm, nan sennu wannteeb saa dinnin biak bonchiann, ki bia tan saa kpima; ŋaan daa ŋantaa daar, Yennu saa fiinin kuun ni." 22 Ki Piita yiinɔ kpiŋ po, ki kpaanɔ a "N Yomdaanɔ, Yennu n bɔr bonbiir na ki li daa baat a paaki." 23 Ŋanne ki Yiisa jiant bet Piita a "Sintaanii na, seetir nna na. A tee tangbiatkare n sɔnu ni, kimaan a ki dukii linba tee Yennu yar po, ŋaan dukii linba tee nisaarik yar," 24 ŋaan bet u poorpoweiteeb a "Wunba-i loon wun wein, see ki u likin u saaŋmaŋ ki jii u kuun dapunpunn kii waan, 25 kimaan wunba ki sak wun jii u manfoor ki turin, ŋɔɔe tan saa kɔŋŋir, ŋaan wunba likin u saaŋmaŋ n paak, ŋɔɔe tan saa la u manfoor nan barmɔnii. 26 Li-i tee ki nirɔ yen tingbouŋ na mɔkint kura, ŋaan tan kɔŋ u manfoor, nyɔlantpoe ki u la-a? Sɔɔ kan fit jii siar ki daa u manfoori. 27 Kimaan min nisaarik Bik tan saa jen nan n Baa Yennu paŋ, nan n malakanba, li yoo maŋ n tan saa pa sɔɔ kur nan u toona nba tee biaŋinba. 28 Barmɔniie ki n beeri na, siab be nna, ki kan kpo see ki bi tan la min nisaarik Bik naan dinu."

Matiu 17

1 Li daa ŋanloob daar, ki Yiisa jii Piita, nan Jeems nan u naa bik Jɔɔnn, ki doo namm jɔɔr nba fɔk bonchiann paak, bi kuukɔɔ. 2 Li yoo na ki bi la ki u lebit; ki u numm po kpint nyirii nan yonnu na; ki u liant penn ki nyirik nan yentu na. 3 Ki bi la Moses nan Elaija lekit yomm, ki see piak nanɔ. 4 Ŋanne ki Piita yetɔ a, "N Yomdaanɔ, li ŋan nan taa be nna na. Li-i tee ki a bo saa saki, n bo saa faa lanbont ŋantaae, ki yenn-ii tee a yar, ki leer-ii tee Moses yar, ki leer-ii munii tee Elaija yar." 5 Ki Piita mɔb daa ki baa tiŋi, ki sanpagbanpeeuŋ sik bakin bi paak; ki bi gbat kunkɔsiar nyii sanpagbann na ni, ki yet a "N Bilonkake na, wunba ki n numm gboou, gbiintir u mɔb man." 6 Ki Yiisa poorpoweiteeb na nba gbat kunkɔr maŋ, ki jaŋmaanii soorib, ki bi gbaan tiŋ ni. 7 Ki Yiisa baar ki tan yii yiib, ŋaan betib a "Fiit man. I daa tiin jaŋmaanii." 8 Ki bi gokit bi yura, ŋaan ji ki la sɔɔ bi boor, see Yiisa kuukɔɔ. 9 Baa nyii jɔɔr na paak ki siik yoo nba, ki Yiisa kpaamm a "I daa beer sɔɔ linba ki i la na, ki saa tuu yoo nba ki min nisaarik Bik tan saa fiir kuun ni." 10 Ŋanne ki u poorpoweiteeb boiɔ a "Bee ki sennu wannteeb yaa see ki Yennu sɔkinii Elaija baar Masia sinsinni?" 11 Ki u jiin betib a "Li set tee mɔniie nan see ki Elaija maŋ baar sinsinn ki tan ŋamm bonsiar kur ki sennir li sɔnu ni. 12 Ŋaan mine beeri na, Elaija poŋ din baara, ŋaan bi din ki bannɔ, ki diau gbaka gbaka nna, nan baa loon biaŋinba. Nnae ki bi mun bia saa teen min nisaarik Bik na, ki dinnin biak." 13 Ŋanne ki u poorpoweiteeb na ji bann nan u piak Jɔɔnn wunba din wuur niib Yennu nyunwuru na poe. 14 Ki Yiisa nan u poorpoweiteeb bantaa maŋ tan baar nibur na boor; ki jasɔɔ baar ki tan gbaan Yiisa tɔɔnn, ŋaan yetɔ a 15 "N Yomdaanɔ, tinin n bija na ninbaauk, kimaan u baa gbitgbiire; li daamɔ bonchiann ki u baa muu ni, ki bia baa nyun ni yoo kur. 16 Ki n baar nanɔ a poorpoweiteeb boor ni, ki bi gbar u tebu." 17 Ki Yiisa jiin boib a "Yimm mɔtana niib nba mantik kaa yada, ki bia ki waa Yennu fanu na, n saa yukir nani nlee? Yoo nlee ki n saa di sukuru nani mantiki? Baat nan bik maŋ nna." Ki bi baar nanɔ. 18 Ki Yiisa tian narinbiiuk na paak, ki u chiar nyii ŋaan nyik bik na. Li yoo na ki u paak ken ken. 19 Li poorpo, ki Yiisa poorpoweiteeb baar u boor, bi kuukɔɔ, ki tan boiɔ a "Bee ki timm ŋarin bo ki fit nyinn narinbiiuk maŋi?" 20 Ki u jiin a, "I yada kaarin paak. Barmɔniie ki n beeri na, li-i tee ki i teen Yennu yada ki li yab nan kanpɔtik binn na, i saa fit yet jɔɔr na a 'Fiit ki saa baa nawa,' ki li set saa fiire; i bo saa fit tun bonsiar kura. 21 Ŋaan narinbiiuk na booru ŋanimi, i kan fit nyinn see ki i lor mɔi ki mei Yennu." 22 Tɔn, Yiisa poorpoweiteeb nba tan lakin leeb Galilii tiŋ ni na, ki u betib a "Bi tan saa jii min nisaarik Bik ki kubin niib nuu ni 23 ki bin kpin, ŋaan daa ŋantaa daar ki n saa fiir kuun ni." Ki li ji biir u poorpoweiteeb para bonchiann. 24 Yiisa nan u poorpoweiteeb nba baar Kapenaum yoo nba, ki Yennu jiantu ŋasaakak likgaarteeb baar ki tan boi Simonn Piita a "A wanntɔɔ ki pa likirii maŋi?" 25 Ki Piita jiin a "U pa," ŋaan kɔɔ ŋaak ni. Li yoo na ki Yiisa dɔŋ piin li barii ki boiɔ a "Simonn, a dukii nlee? Lamme tuu pa lampo ki teen tingbouŋ na kpanbara. Bi mɔŋ booru ni niib amii saamme?" 26 Ki u jiin a "Saamme." Ki Yiisa yetɔ a "Tɔn, li-i tee nnaie, li want nan bi mɔŋ booru nuu kaa li ni. 27 Ŋaan taa ki loon ki tin biir bi para na paak, i saa mɔkgbeŋŋir na ni, ki saa lu janpeenu ki dat jaŋ nba ki a soorɔ sinsinn na ki donn; li-i tee ki a yaat u mɔb, a saa la likirii nba saa fit pa min nan fin paak; ki fan jii ki pa."

Matiu 18

1 Li yoo na ki u poorpoweiteeb baar u boor ni ki tan boiɔ a "Ŋmee tee nijaann Yennu naan ni?" 2 Ki u yiin bik nna ki tan sennɔ bi sinsuuk ni, 3 ŋaan betib a "Barmɔniie ki n beeri na, wunba ki lebit u binbeŋ ki li tee nan bik binbeŋ na, u kan kɔɔ Yennu naan ni kaawa. 4 Wunba sikint u mɔŋ ki u binbeŋ tee nan bik na binbeŋ na, ŋɔɔe tan sii tee nijaann Yennu naan ni. 5 Wunba gaar bik na booru n sann paak, mine ki u gaarin." 6 "Waas nba teenin yada na ŋarin, wunba te ki bi yenɔkɔɔ tun toonbiit, bi-i bonni lann naar li daanɔ turu ni ki tut lu-u mɔkgbeŋŋir ni ki u dii nyun gbaa, li bo sii sɔ ki turɔ. 7 Bonbiir sii be tingbouŋ na teeb nba kpann bi leeb ki bi tuun toonbiit na paak. Jinjammii set saa baara, ŋaan li sii bi ki tur wunba te ki jinjammii maŋ baat niib paak. 8 "Li-i tee ki a niipauŋ koo a taapauŋ te ki a yaa tun toonbiit, fan potir lu. Li-i tee ki a mɔk niipauŋ yennkɔɔ, koo taapan-yennkɔɔ, ki la manfoor nba kaa gbennu, li chee fii mɔk a niipant kur nan a taapant kur ŋaan Yennu n tan kɔɔna muu nba kan mi kpeen na ni. 9 A ninbinn-i te ki a yaa tun toonbiit, fan kpakirɔ lu. Li-i tee ki a mɔk ninbin-yenn ki la manfoor maŋ, li chee fii mɔk ninbina ŋanlee ŋaan Yennu n tan kɔɔna muu maŋ ni. 10 "I mi man ki sɔɔ n sian waas maŋ yenɔkɔɔ; kimaan li tee barmɔniie, bi malakanba nba be sanpaapo na be Yennu tɔɔnne yoo kur. 11 Tɔn, min nisaarik Bik baar a n tan tinn binba bote. 12 "Li-i tee ki nirɔ mɔk pei kobik, ŋaan ki yenɔkɔɔ tan boti, i dukii u saa teen nlee? See ki u nyik pei piinyia nan banyia na jɔɔr paak, ŋaan saan ki saa lon pebotikauk na. 13 U lau yoo nba, barmɔniie ki n beeri na, u sii mɔk parpeenn nan mɔnii pebotikauk nba ki u lau na paak, ki gar pei piinyia nan banyia nba ki bot na. 14 Nnae mun ki i Baa Yennu nba be sanpaapo na ki loon waas na ni yenɔ n boti. 15 "A naa bik-i tun siar ki biira, fan saan u boor ni yoo nba ki u be u kuukɔɔ na, ki pak wannɔ u biit; ki li-i tee ki u bann u biiti, i bia ŋamm teen naa waase na. 16 Ŋaan li-i tee ki u ki sak wun gbat turani, fan yiin niyenɔ koo niib banlee ki pukin a paak, ki yin saan u boor ki niib banlee koo bantaa maŋ n gbat barii maŋ ki teen a siara damm. 17 Li-i tee ki u bia ki sak wun gbat ki turibi, fan wann Yennu niib kura; ki li-i tee ki u bia ki sak wun gbat ki tur Yennu niibi, yin ji ŋaan ki wuu tee nan wunba ki tee Yenweirɔ na, koo lampogaartɔɔ na. 18 "Barmɔniie ki n beeri na, linba ki i tan lor ki yaa li kɔɔ tingbouŋ na ni, ŋanne mun poŋ kɔɔ Yendɔuŋ ni; ki linba ki i bia yaa li ki kɔɔ, ŋanne mun poŋ ki kɔɔ Yendɔuŋ ni. 19 "N bia beerie, i ni banlee-i taan mɔb tingbouŋ na ni ki mei n Baa Yennu nba be sanpaapo na siar paak, u saa tun yaa loon biaŋinba ki turiiwa. 20 Kimaan siaminba ki niib banlee koo bantaa taan leeb n sann ni, leŋe ki n mun be bi sinsuuk ni." 21 Ŋanne ki Piita baar Yiisa boor ki tan boiɔ a "N Yomdaanɔ, li-i tee ki n naa bik tumin biit, taar muŋŋae ki n saa nyik chabɔ? Taar munloree-e?" 22 Ki Yiisa jiin a "Aaii, taar munlore kuukɔɔ kaa, ŋaan taar piinlore ki saa jaŋ taar munlore. 23 Li paak, Yennu naan tee nan batsɔɔ nba din tan yiin u ŋaadaaba a wun kan bi likirii pana nae. 24 Waa piin kanu yoo nba ki bi kɔɔ nan jasɔɔ nna, ki u dia bat na pann bɔtook tusbamm bonchiann. 25 Ki u kan fit la pa; ki bat na tur mɔb a bin kɔi ŋɔɔ nan u ŋaapoo nan u waas, nan waa mɔk linba kur, ki tan pa pann maŋ. 26 Ŋanne ki jɔɔ maŋ gbaan bat na tɔɔnn nan baruŋ, ki yeen a 'Chanbaa, n saa pa li kura; lek din sukuru.' 27 Ki ninbaauk soor bat na bonchiann, ki u chabɔ pann maŋ, a wuu saa. 28 "Jɔɔ maŋ nba ŋarin nyii yoo nba ki chet u daabilɔɔ, ki u mun dia u pann likirii waaminna; ki u soor u turu ni, ki faa birintɔ, ŋaan beerɔ a 'Pan n pann na mɔtana.' 29 Ki u lɔɔ na mun gbaan u tɔɔnn nan baruŋ, ki yeen a 'Din sukuru, ki n saa paawa.' 30 Ki jɔɔ na ŋarin ji ki sak u lɔɔ na baruŋ na, ŋaan te ki bi jiiu ki kɔɔnɔ dansarik, a see ki u tan pa pann na, ki wun nyinnɔ. 31 Ki u daabileeb na nba la nna yoo nba, ki li biir bi para bonchiann, ki bi ŋmat ki saa bet, bat na linba kur tun. 32 Ki bat na tun a bin yiin jɔɔ maŋ na; ki piin u sukit a 'Fin bonyoonn na, faa bo barimin na paak, ki n chaba faa dia n pann nba kur. 33 Li mun bo ŋan nan fan chab a lɔɔ na ki tinɔ ninbaauk, nan maa bo chaba biaŋinba na.' 34 Bat na wutoor nba doo bonchiann biaŋinba na, ki u jii jɔɔ maŋ ki saan kɔɔnɔ dansarik a wuu be leŋ ki saa tuu daar nba ki u tan saa pa pann na kur." 35 Barjouk na poorpo ki Yiisa ji yet a "Li-i tee ki i ki nyikit chabit i leeb nan i para kuri, nnae ki n Baa Yennu nba be sanpaapo na saa teeni mun."

Matiu 19

1 Yiisa nba pak mɔbona na ki gbenn yoo nba, ki u nyii Galilii ki saan Judea tiŋ nba be Jɔɔdann mɔk-pootir po na. 2 Ki nibur waa u poorpo, ki u te binba yiar na kura paak leŋ. 3 Ki Farisiinba siab baar u boor ki loon bin jammɔ, ki boiɔ a "Yennu sennu chabit nan jɔɔ n y‡t u ŋaapoo yannii?" 4 Ki u jiin a "I ki karin Yennu gbouŋ nba yet biaŋinba na-a? a 'Piinu niwa, Yennu din nan poo nan jɔɔe, 5 ki yet a, Linba na paak ki jɔɔ nan u ŋaapoo tuu saa nyik bi damm, ŋaan kɔɔn leeb, ki bi niib banlee n taan teen gbananyennkɔɔ.' 6 Tɔn, li-i tee nna, bi ji ki tee niib banlee kaa, ŋaan ji tee niyenɔkɔɔe. Li paak, binba ki Yennu taamm, nisaarik-ii mi ki wun bɔkitib." 7 Ki Farisiinba na boiɔ a "Bee ki Moses ŋarin din tur yaak u sennu na ni, nan jɔɔ saa fit tur u ŋaapoo y‡tu gbouŋ ŋaan y‡tɔɔ?" 8 Ki Yiisa jiin betib a "I tubkangbatin paake ki Moses din tur yaak a yii y‡en i ŋaapoob, ŋaan piinu ni li din ki tee nna kaa. 9 Barmɔniie ki n beeri, wunba y‡t u ŋaapoo, ki li ki tee poo na tun bonchonchontoonni, ŋaan kɔɔn pooganɔ, jɔɔ maŋ tun bonchonchontoonna; ki wunba mun kɔɔn poo nba ki u sɔrɔ y‡tɔ na, u mun tun bonchonchontoonna." 10 Ki Yiisa poorpoweiteeb na yetɔ a "Li-i tee nnaie jɔɔ nan u ŋaapoo sinsuuk ni, ŋann ŋarin jɔɔ-i kii kɔɔn poo, li sɔ." 11 Ki u yetib a "Sɔɔ kur kan fit dia wannu maŋi; binba ki Yennu turib li yaak na, ŋamm kɔɔe saa fit diar. 12 Kimaan bona bonchianne te ki jasiab ki kɔɔnt poobi; bi tuu mar siab, ki bi ki tee jabi; siab mun niibe tuu teemm jatɔɔka; ki siab mun, Yennu naan paake tuu te bin y‡t poo kɔɔnu; ŋaan wunba saa fit dia wannu maŋ, wun diar." 13 Tɔn, ki nisiab tan baar nan bi waas Yiisa boor, a wun yii u nii bi paak ki miar Yennu ki turib; ŋaan ki u poorpoweiteeb tian niib maŋ paak. 14 Ki Yiisa yet a "Ŋaant man ki waas maŋ-ii baat n boor na, ki daa tiammi, kimaan bi boorue yen Yennu naan," 15 ŋaan jii u nii ki yii yii bi paak, ŋaan ji seet saan. 16 Tɔn, ki naasimɔ nna baar Yiisa boor ki tan boiɔ a "Wanntɔɔ, toonŋanlannpoe ki n saa tun, ki la manfoor nba kaa gbennu?" 17 Ki Yiisa jiinɔ a "Bee ki a boin toonŋann po? Niyenɔ kɔɔe tee niŋanɔ; ŋaan li-i tee ki a loon manfoor nba kaa gbennu, fii dia Yennu sennu na." 18 Ki naasimɔ na boi Yiisa a "Sennlanupoe?" Ki u betɔ a "Daa kpi nirɔ; daa tuun bonchonchonsin; daa jaami; daa tee faak siara; 19 i teen a baa nan a naa baakir; kii loon a lɔɔ nan faa loon a mɔŋ biaŋinba na." 20 Ki naasimɔ na betɔ a "N poŋ waa sennu na kura. Lannpoe ki n bia saa tun pukin linba na paaki?" 21 Ki Yiisa betɔ a "Li-i tee ki a loon a binbeŋ-ii tee fanu nan barmɔnii, fii saa ki saa kɔi faa mɔk linba kur ki jii li likirii ki tur talasdamm, ki jenna kii waan ki a tan saa la mɔkint Yendɔuŋ ni." 22 Naasimɔ na nba gbat nna yoo nba, ki u seet nan parbiir, kimaan u mɔk mɔkint bonchiann. 23 Ŋanne ki Yiisa ji yet u poorpoweiteeb a "Barmɔniie ki n beeri na, li sii paar bonchiann nan mɔkitɔɔ n tan kɔɔ Yennu naan ni. 24 N bia yaa n beti leere nan li paar nan mɔkitɔɔ n kɔɔ Yennu naan ni nan laagumii nba kan fit kɔɔ kparpeenu miar ni na." 25 Ki u poorpoweiteeb nba gbat nna maŋ, ki li yaar litib bonchiann, ki bi piin ki boi bi leeb a "Li-i tee nnaie, ŋmee ji saa fit la tinnu?" 26 Ŋanne ki Yiisa gokit gotib ŋaan yet a "Linba na paar ki tur nisaarike, ŋaan siar ki paar Yennu boori." 27 Li yoo na ki Piita yetɔ a "Gotir, timm ŋarin nyik ti bonsiar kure ŋaan waa-a. Ti nyɔɔt tan sii tee bee?" 28 Ŋanne ki Yiisa betib a "Barmɔniie ki n beeri na, yoo nba ki min nisaarik Bik na tan kar n naangbant paak nan paŋ bonchiann, durinya paann na ni, yimm nba tee n poorpoweiteeb na mun tan saa kar naangbant piik nan ŋanlee paake, kii bu Israel teeb booru piik nan ŋanlee na buut. 29 Ki wunba kur nyik u ŋaak, koo u yɔɔrib, koo u waarii, koo u baa, koo u naa, koo u waas, koo u kpaant, n sann paak, u tan saa la li booru kobik, ki bia la manfoor nba kaa gbennu. 30 Ŋaan niib bonchiann nba dɔŋ tɔɔnn mɔtana bi tan saa joont poora; ki bonchiann nba mun bia joont poor mɔtana tan saa gar tɔɔnna."

Matiu 20

1 "Kimaan Yennu naan tee nan ŋaadaanɔ nba din nyii sanyapob ni ki loon niib a wun jiib ki bin ko u kpaab nae. 2 Ki bi dii daauk ki u sak ki saa pab daar paauk, ŋanne ki bi doo ki saa jak konu. 3 Laa tan baar kut munyia yoo nba, ki ŋaadaanɔ maŋ fiir saan daak ni, ki saa la siab ki bi see ki ki tuun siari. 4 Ki u betib a 'I do man n kpaab ni kii saki ko, ki n pai linba jaŋ.' 5 Ki bi doo. Ki li tan baar kut piik nan munlee yoo, ki u bia ŋmat teen nna; ki kut muntaa yoo, ki u bia ŋmat ki teen nna. 6 Ki li baar kut muŋŋmu, ki u bia ŋmat saan ki la siab ki bi lakin see, ki u boib a 'Bee ki i see nna yann damunn ki ki tuun siari?' 7 Ki bi jiin a 'Sɔɔ ki jiit toonni.' Ŋanne ki u betib a 'I mun-ii do man n kpaab ni kii saki ko.' 8 "Laa tan bɔnt yoo nba, ki ŋaadaanɔ na bet u toontunna saakɔɔ a 'I saa ki yiin kpaara maŋ na, ki tan pab. Fii yaa a pab yoo nba, fan piin kii pa binba bo joont baar na, ki tan joont binba bo dɔŋ baar na.' 9 Ki u toontunna saakɔɔ maŋ piin ki pa binba bo joont baar na daar paauk. 10 Tɔn, laa tan baar binba bo baar sanyapob niwa na paak yoo nba ki bi dukii a bi yar sii yabe, ŋaan ki u pab daar paauk mun biak. 11 Baa gaar bi likirii gbenn yoo nba, ki bi piin ki burin sukii ŋaadaanɔ na, 12 ki yeen a 'Gotir, binba joont ki doo kut muŋŋmu na koo yoo waaminnae, ŋaan ki timm nba ŋarin la fara sanyiɔk niwa, ki yonnu faat bonchiann na, ŋaan ki timm nan ŋamm tan lakin gaar payouŋ kuukɔɔ.' 13 "Ŋanne ki ŋaadaanɔ na yet bi yenɔ a 'N yɔɔk, gbiintir, n ki ŋmabani, kimaan ti bo dii daauko ki a sak daar paauk. 14 Li paak, jiin a yar kii saa. Li tee n lomme nan ki n pa fin nan binba bo joont baar maŋ yomm. 15 N ki mɔk yaak ki saa jii n likirii ki tun maa loon biaŋinba-a? Koo a mɔk funfunn nan maa ki wuun na paake-e?'" 16 Yiisa nba din yin barjouk na ki gbenn na poorpoe, ki u ji betib a "Li paak, binba joont poor tan saa dɔŋ tɔɔnn, ki binba dɔŋ tɔɔnn tan saa joont poor." 17 Yiisa nba din tan do Jerusalem na, ki u yiin u poorpo-weiteeb piik nan banlee na ki tan bɔr betib a 18 "Gotir man, ti do Jerusaleme na; ki bi tan saa jii min nisaarik Bik ki teen Yennu jiantu yudamm nan sennu wannteeb nuu ni, ki bi saa bu n buut ki yet a n ŋan nan kuume. 19 Bi tan saa jiin ki tur binba ki tee Juu teeb ki bin fiakin, ki boon kpaasir, l ki kpaa tabinin dapunpunn paak ki man kpo, ŋaan li daa ŋantaa daar, n saa fiir kuun niwa." 20 Li yoo na ki Sebedii ŋaapoo jii u waas banlee Jeems nan Jɔɔnn ki baar namm Yiisa boor ki tan gbaan u tɔɔnn, ŋaan miarɔ sommir po. 21 Ki Yiisa boiɔ a "A loon bee?" Ki u jiin a "Turimin mɔsonn nan n waas na yenɔ tan saa kar a diitu po, ki lɔɔ na mun n kar a gaŋ po, yoo nba ki a tan dii a naan na." 22 Ki Yiisa betib a, "I ki mi yaa mei linba. I saa fit jii jik-kpiatir nba ki n yaa n jii nawa-a?" Ki bi jiin a "Ti saa fita." 23 Ki Yiisa betib a, "Tɔn, i set saa jii n jik-kpiatir nawa; ŋaan n ki mɔk yaak, li ki tee min kaa saa gann wunba tan saa kar n diitu po koo n gaŋ po, kimaan n Baa Yennu mɔŋ mɔŋe gann binba tan saa kar li kinkaanii paak." 24 Yiisa poorpoweiteleeb na nba gbat nna maŋ yoo nba ki bi wutoa doo bi banlee maŋ paak. 25 Ki Yiisa yiin bi kura ki lakimm u boor ni, ki betib a "I mɔŋ mi nan tingbouŋ na ŋaateeb yudamm dont bi mɔŋe; ki nijaana bia dia bi niib nan ninmɔnne; 26 ŋaan yimm ŋarin, li daa tee nna i sinsuuk ni. Li-i tee ki sɔɔ loon yudant i ni, li ŋan wun kpant tarik kii tuun kii teen i kura. 27 Ki li-i bia tee ki sɔɔ loon wun tan gar sinsinni, wun kpant i daabir, 28 nan min nisaarik Bik nba tee biaŋinba na, kimaan n ki baar maa niib n tun turin kaa, ŋaan n baar maa n tun ki tur niibe, ki bia kpo ki lin te niib bonchiann n la tinnu." 29 Tɔn, baa din tan nyi Jeriko yoo nba ki nibur waa Yiisa poorpo. 30 Ki jɔɔnii banlee kar sanjokpiŋ ki gbat a Yiisa baat a wun gar leŋ. Ki bi piin ki yikin sanpaapowa a "Ti Yomdaanɔ nba tee Defid yaaboonn, tinimit ninbaauk!" 31 Ŋanne ki nibur na tian bi paak a bin ŋmin. Ŋaan ki bi ŋamm yikin sanpaapowa a "Ti Yomdaanɔ nba tee Defid yaa-boonn, tinimit ninbaauk." 32 Ki Yiisa set ŋaan yiimm ki tan boib a "I loon ki n tun bee ki turiini?" 33 Ki bi jiinɔ a "Ti Yomdaanɔ, ti loon ki a nyɔɔnt ti ninbinae." 34 Ki ninbaauk soorɔ, ki u sii sii bi ninbina maŋ, ki li nyɔɔnt, ki bi ji waau.

Matiu 21

1 Baa din tan per Jerusalem ki baar Befej doo nba biak kunkonn nba ki bi yir Olif Tiinii kunkonn na, ki Yiisa tun u poorpoweiteeb na banlee u tɔɔnn po, 2 ki betib a "I saa man digbanbik nba be i tɔɔnn po na ni. I saa la ki bi lor bonnaaŋ nan u bik; ki yin lotib ki baar namm n boor ni na. 3 Li-i tee ki sɔɔ boi-i siarie, yin betɔ a i Yomdaanɔe loomm, ki u saa chabi ki yin baar namm." 4 Linba na din tun a lin gbeen linba ki Yennu sɔkinii Aisaya din sɔkin nae, a 5 "Yetir Sayɔnn doo teeb a 'Gotir man, i bat nae baat i boor ni na. U tee wunba sikint u mɔŋe ki jak boŋ nba set tee bonpaaŋ na paak.'" 6 Ki Yiisa poorpoweiteeb na set saan ki saa tun nan waa betib biaŋinba na. 7 Ki baar nan bonnaaŋ na nan u bik, ki tan jii bi liata ki paan bi bɔɔna paak a Yiisa n jak. 8 Ki niib na siab lat bi tiat sanjouk ni ki leeb mun chɔɔn tiinii yiinii nan tutuut ki lat sanjouk na ni. 9 Ki nibur nba gar u tɔɔnn po nan binba din waa u poorpo ji yikin ki yeen a "Hosaana, m I piak man Defid yaaboonn maŋ. Mɔsoŋŋann-ii be wunba baat Yennu sann ni na paak. Yii hoot man Hosaana sanpaapo." 10 Waa din tan kɔɔ Jerusalem yoo nba, ki doo maŋ niib kur fiir, ki boi leeb a "Ŋmee na?" 11 Ki nibur na jiin a "Yiisa, wunba tee Yennu sɔkinii ki nyii Nasaref nba be Galilii tingbouŋ ni na." 12 Yiisa din kɔɔ Yennu jiantu ŋasaakak ni ki saa ber nyinn binba kɔi nan binba daa na kura, ki labir chibin likkpenta teebura nan ŋmankɔi teeb kokii na 13 ki betib a "Li sɔb Yennu gbouŋ ni a ŋɔɔ Yennu yet a 'N ŋaak na sii tee Yenmiaru ŋaake,' ŋaan yimme kpintir ki teen fatiteeb kinkar boor." 14 Ki jɔɔnii nan wɔbii baar u boor Yennu jiantu ŋasaakak na ni, ki u te ki bi kura paak. 15 Ŋaan Yennu jiantu yudamm nan sennu wannteeb nba la bakitnauŋ toona nba ki u tun na, ki bia gbat ki waas yikin Yennu jiantu ŋasaakak ni ki yeen a "Hosaana! I piak man Defid yaaboonn na," ki li donn bi wutoa. 16 Ki bi boiɔ a "A gbat baa yeen linba na wa-a?" Ki u jiin a "Nn, ŋaan li sɔb Yennu gbouŋ ni a 'A te ki waas nan sanpantii piaka fanu;' i ki mi karimii?" 17 Ŋanne ki u nyikib ŋaan nyii Jerusalem ki saan Betani ki saa dɔɔ. 18 Laa din yent ki Yiisa nyii leŋ ki ŋmat Jerusalem. Ki kon mɔkɔ; 19 ki u la kinkaŋ see sɔnjokpiŋ. Ki u saan a wun pɔɔr kinkana, ki sɔɔ siar kaa kinkaŋ na paaki see faat kuukɔɔ. Ŋanne ki u yet tiik na a "Laa nyii dinna ki saa, a kan mi lon lɔɔna." Li taakpaak ni, ki tiik na koor. 20 U poorpoweiteeb na nba la nna yoo nba, ki li bakitib, ki bi boi bi leeb a "Li teen nlee ki kinkaŋ na taan koor yiama na?" 21 Ŋanne ki u betib a "Barmɔniie ki n beeri na, li-i tee ki i teen Yennu yada nan barmɔnii ki ki birisɔ, i mun sii tuun nan maa tun tiik na biaŋinba nae; ŋaan li ki tee nna kuukɔɔ kaa ki i saa tumi, ŋaan li-i tee ki i bet jɔɔr na gbaa a wun fikit ki saa baa mɔkgbeŋŋir na ni, u saa fikita. 22 Siar kur nba ki i saa miar Yennu li po na, li-i tee ki i teen yada a i saa la, i set saa lawa." 23 Yiisa nba din saan kɔɔ Yennu jiantu ŋasaakak ni ki want niib Yennu maan yoo nba na, ki Yennu jiantu yudamm nan tiŋ maŋ ni saakab baar u boor ki tan boiɔ a "Yiikoo lannpoe ki a mɔk ki tuun linba na kuri? Ki ŋmee chaba li yiikoo?" 24 Ki Yiisa jiin a "N mun mɔk buboit ki saa boi-i; li-i tee ki i fit jiini, n mun saa wanni yiikobooru nba ki n dia ki tuun linba na: 25 Jɔɔnn nba daan wuur niib Yennu nyunwuru na, Yennue chabɔ li yiikoo amii nisaarikee?" Ŋanne ki bi ji faa bi leeb labaar ki yeen a "Ti-i yet a Yennue chabɔ li yiikoo, u saa boit a ki bee teen ki ti ki teenɔ yada; 26 ki ti mun bia tiin nibur na jaŋmaanii nan tin yet a 'Niibe chabɔ li yiikoo,' kimaan sɔɔ kur teen yada nan Jɔɔnn set daan tee Yennu sɔkiniie." 27 Ŋanne ki bi jiin ki bet Yiisa a "Ti ki mi." Ki Yiisa mun betib a "Tɔn, n mun kan beti wunba chabin li yiikoo ki n tuun linba na." 28 Li poorpoe ki Yiisa boib a "I dukii nlee linba na po? Jasɔɔ nna din mɔk u waas banlee, ki tan yet wunba tee saakɔɔ po na a 'N bik, don kpaab ni ki saa ko dinna.' 29 Ŋaan ki u bet u baa a u kan do. Ŋanne ki u baa nyikɔ ki ji yet bonbik po nan waa bo bet u yɔɔrɔ biaŋinba na. Ki ŋɔɔ ŋarin sak ki jiin a 'N baa, min saa dowa,' ŋaan ki ki doo. Li poorpoe ki saakɔɔ na ji tan lebit u dudukit ki doo." 31 Yiisa nba din yimm barjouk maŋ ki gbenn na, ki u ji boi niib na a "Waas banlee na ni, ŋmee tun u baa lommu?" Ki bi jiin a "Saakɔɔ po na." Ki Yiisa betib a "Barmɔniie ki n beeri na, lampogaarteeb nan bonchonchona tan saa dɔŋi Yennu naan ni kɔɔnuwa, 32 kimaan Jɔɔnn nba daan wuur niib Yennu nyunwuru na daan baar i boor ki wanni yentinu binbeŋa, ŋaan ki i ki teenɔ yada, ŋaan ki lampogaarteeb nan bonchonchona teenɔ yada. Yaa lek la linba na nba kur poorpo, i ki lebit i dudukit ki teenɔ yada." 33 Ki Yiisa bia betib a "Gbiintir man barjouk leer. Ŋaadaansɔɔ nnae din be ki wuu tilontii u kpaab ni, ki chaan gungouŋ ki lintir, ki bia gbiir gbiouk nba ki bi tuu sii ŋmaki tiinii maŋ lɔɔna nyun leŋ, ki bia maa sukir leŋ; ŋaan jii kpaab na ki teen toontunna nii ni a bii gorii. A li-i taŋŋi jaŋ nan pɔɔru, bin pɔɔr ki turɔ, ŋaan mun pɔɔr bi yar. Li poorpo ki u yaat saan digbansiar. 34 Ki tilɔɔna maŋ punpɔɔr yoo tan baar, ki ŋaadaanɔ na tun u daaba a bin saan toontunna na boor ki saa gaar u tilɔɔna na. 35 Ŋaan toontunna na din soor u daaba maŋe, ki boo yenɔ bonchiann, ki kpii lɔɔ, ŋaan jaat lɔɔ na mun tana. 36 Ŋanne ki u bia ŋamm tun daabileeb, ki bi yab ki gar sinsinn yab na, ki toontunna na bia teemm nna. 37 Linba na poorpo ki u ji tun u mɔŋ mɔŋ bija, ŋaan yeen a 'N mi nan bi saa baak n bija nawa.' 38 Ŋaan toontunna na nba din tun ninbinn ki la u bija na baat, ki bi bet bi leeb a 'U fadiirɔe na; ŋaant tin kpiu, ŋaan ki faar na n kpant ti yar.' 39 Ki bi din soorɔ ki nyii nanɔ kpaab na kpiŋ ki saa kpiiu." 40 Yiisa nba yin barjouk na ki gbenn na ki u boib a "Tɔn, kpadaanɔ maŋ-i taŋŋi baari, u saa teen toontunna maŋ nlee?" 41 Ki bi jiin a, "U saa kpi toonbiit damm maŋ gbenna, ŋaan jii u kpaab maŋ ki tur toontunsiab nba saa sak kii yɔɔ kii teenɔ li lɔɔna, punpɔɔr yoo." 42 Ki Yiisa boib a "I daa ki mi karin laa sɔb Yennu gbouŋ ni biaŋinba-a? Li sɔb a: 'Tann nba ki tanmaara y‡tir na, ŋanne set tee lɔtik ni tanŋann, Yennue teen nna, ki li teent bakitnauŋ.'" 43 Ki Yiisa ji betib a "Barmɔniie ki n beeri na, Yennu tan saa gaar u naan i boor ki tur nibooru nba saa te ki wun di u naan nyɔɔt. 44 Ŋaan wunba tan baa tann maŋ paak, u saa but bute, ŋaan tann maŋ-i baa wunba paak, bimm, see ki li nannɔ buk buk nan yon na." 45 Yennu jiantu yudamm nan Farisiinba na nba din gbat barjokit na ki gbenn, ki bi bann nan Yiisa yin barjokit na ki denn ŋamme. 46 Ki bi ji din loon bin soorɔ, ŋaan tiin nibur na jaŋmaanii, kimaan sɔɔ kur teen yada nan u set tee Yennu sɔkiniie.

Matiu 22

1 Ki Yiisa bia piin ki piak teen niib maŋ nan barjokit a 2 "Yennu naan tee nan batsɔɔ nba din teen siir a wun teen poochiann jaamm ki tur u bija nae. 3 Ki u din tan tun u daaba a bin saan bet niib nba ki u daan poib na a bin baar; ŋaan ki bi ki loon bin baari. 4 Ki u ŋamm tun daabileeb ki betib a 'I saa man ki bet niib nba ki n daan poib na a jaamm jeet teen siira; n poŋ kpii naajai nan bonkob-kpamma, ki li kur teen siira; li paak, bii saana ki tan di jaamm maŋ.' 5 Ŋaan waa din poi binba maŋ din ki gbiint ki tur u daaba, ŋaan yaat yaat ki saan bi toona ni: ki yenɔ doo u kpaab ni, ki lɔɔ mun saan bont kɔiu daak ni. 6 Ŋaan ki siab mun soor u daaba na ki boob ki saa kpiib. 7 Ŋanne ki bat na wutoor doo bonchiann; ki u tun u kunkɔnkɔnna, ki bi saan ki saa kpii nikpiira maŋ, ŋaan joo bi doo muu. 8 Li poorpo bat na ji din yiin u daaba ki tan betib a 'Poochiann jeet na teen siira, ŋaan niib nba ki n daan dɔŋ poib na ji ki ŋan nanni. 9 Li paak, i saa man sɔnjara paak, ki yiin binba kur ki i lab, ki bin baar na ki tan di jaamm maŋ.' 10 Ki u daaba na nyii ki saan sɔnjara paak, ki saa yiin binba kur ki bi lab, li nibiit nan niŋamm; ki bi baar tan gbee poochiann ŋaak na ken ken. 11 "Tɔn, ki bat na tan kɔɔ a wun gɔn poochiann niib maŋ, ki la jasɔɔ nna ki u foo bi sinsuuk ni ki ki lia poochiann jaamm tiati. 12 Ki bat na boiɔ a 'N yɔɔk, a teen nlee ki tan kɔɔ nna ŋaan ki ki lia poochiann jaamm na tiati?' Ki jɔɔ na ki jiin siari. 13 Ki bat na bet u ŋaajab na a, 'Lorimɔ man, u nii nan u taa, ki nyi saa lu-u nanyer po bunbɔnn ni. Leŋewa ki u sii mɔ fabin ki ŋman nyana.'" 14 Ki Yiisa joont, ki yet a "Yennu yiin niib bonchianne, ŋaan u tan saa gann waaminnae." 15 Ki Farisiinba na saan ki saa lor soor baa saa teen biaŋinba ki la Yiisa mɔbonkpetir. 16 Ŋanne ki bi tun bi poorpoweiteeb nan Bat Herod poorpojɔɔmu Yiisa boor, ki bi saa boiɔ a "Wanntɔɔ, ti mi nan a tee barmɔnpakirɔɔe, ki want niib Yennu sɔnu nan barmɔnii, ki ki fiin niib po, kimaan a baka kaa nan nisaarik nba tee wunba. 17 Li paak, betirit, a dukii nlee ki jiin lampo panu po? Ti sennu chabit nan tii pa lampo kii teen Rom tiŋ kpanbar Siisa, amii ti daa pa?" 18 Yiisa din mi bi dudukbiit maŋ. Li paak, ki u jiin betib a "Yimm kpinkpannii damm na, bee ki i loon yin kɔɔnin jinjammii ni? 19 Wantin man likirib nba ki ti saa jii pa lampo maŋ." Ki bi jii likirib ki turɔ. 20 Ki u boib a "Ŋmee naauŋ nan sanne be likirib na paaki?" 21 Ki bi jiin a "Siisa yare." Ki Yiisa betib a "Tɔn, i yenn-ii pa man kii teen Siisa linba tee u yar, ŋaan mun bia kii pa kii teen Yennu linba tee Yennu yar." 22 Baa gbat linba na ki li ji bakitib, ki bi seet nyii, ŋaan nyikɔ. 23 Li daar maŋ ki Sajusiinba siab baar Yiisa boor. (Ŋamme din tuu yaa kpeemm tan kan fiir kuun ni na.) 24 Ki bi din bet Yiisa a "Wanntɔɔ, Moses din wann nan li-i tee ki jɔɔ kɔɔn u poo ŋaan kpo ki ki mar biki, a u naabik n faar u pakɔɔk maŋ ki mar waas tur kpeemɔ na. 25 Ki jab banlore nba tee naanɔɔk din be doo na ni, ki saakɔɔ po tan kɔɔn poo ki ki mar biki, ŋaan kpo, ki u naabik faarɔ. 26 Ki li tun nna ki tur wunba pukin banlee, nan wunba pukin bantaa ni, ki saa gbenn jab banlore maŋ kur. 27 Li poorpo ki poo na tan joont kpo. 28 Li paak, li-i tee ki kpeemm fiiru daar baari, bi ŋmee tan sii yen poo maŋi? Kimaan bi kur din kɔɔnɔwa." 29 Ki Yiisa betib a "I bota, kimaan i ki mi Yennu gbouŋ, ki bia ki mi waa mɔk paŋ biaŋinba; 30 kpeemm-i taŋŋi fiir kuun ni, bi sii tee nan malakanba nba be Yendɔuŋ ni nae. Pookɔɔnt nan jakunt tan sii kaa. 31 Tɔn, ki jiin kpeemm fiiru po, i ki mi karin linba ki Yennu piaki u gbouŋ ni na-a? 32 a, 'Mine tee Abraham Yennu, nan Aisak Yennu, nan Jakɔb Yennu.' Niib na nba din poŋ kpo li yoowa na, ŋaan bi bia lek daa fo, kimaan Yennu ki tee kpeemm Yennu kaa, u tee footib Yennue." 33 Niib na nba din gbat u wannu maŋ ki li bakitib. 34 Farisiinba na nba din gbat a Yiisa mɔmaan na nyann Sajusiinba na, ki bi taan leeb ki baar. 35 Ki bi ni yenɔ nba tee sennu wanntɔɔ na boi Yiisa buboit a wun jammɔ, a 36 "Wanntɔɔ, sennlanupoe tee sennjaann ki gar sennii na kuri?" 37 Ki Yiisa jiinɔ a " 'I loon a Yomdaanɔ Yennu kii mantik-ii loonɔ nan a par kura, nan a seek kura, nan a dudukit kura.' 38 Sennu maŋ tee sennjaanne ki bia tee sinsinn sennu. 39 Linba pukin ŋanlee ni ki tee barkpann mun bia tee nnae, 'I loon a lɔɔ nan faa loon a mɔŋ biaŋinba na.' 40 Moses sennu na kura, nan Yennu sɔkiniinba wannu na kura, gaa sennii ŋanlee na paake." 41 Farisiinba na nba din lakin leeb yoo nba ki Yiisa boib a 42 "I dukin nlee ki jiin Yennu Niganntɔɔ Masia na po? U tee ŋmee yaaboonne?" Ki bi jiin a "U tee Defid yaaboonne." 43 Ki u ji boib a "Ki bee ki Defid din yiinɔ a 'Yomdaanɔ?' Yennu Seyeeŋ nba din gbee Defid na ki u yet a 44 'Yennu din yet n Yomdaanɔ a, Karin n niidiitu po mɔkmɔk nan maa tan saa te fan ŋmaa a datai a taapauŋ ni.' 45 Li paak, Defid nba din yiin Masia a 'Yomdaanɔ' na, nlee ki Masia tee ŋɔɔ Defid yaaboonni?" 46 Sɔɔ din ki fit jiin u buboit maŋi; li paak, laa nyii li daar maŋ ki jii saa, sɔɔ ji din ki mɔk par ki saa boi Yiisa buboisiati.

Matiu 23

1 Ŋanne ki Yiisa piin ki piak teen nibur na nan u poorpoweiteeb a, 2 "Sennu wannteeb nan Farisiinba nae ki bi turib yaak nan bii sɔkint Moses sennu na. 3 Li paak, li ŋan ki yii saak kii waa baa wanti linba na kura, ŋƒan kii mi man ki yin gaar bi binbeŋ, kimaan bi ki tuun baa want linba maŋi. 4 Bi jint niib jik-kpiata nba paar nan jiinu, ŋaan kan sak jii bi niibir gbaa ki babir sɔɔ ki wun jii. 5 Linba kur ki bi tuun na, bi tuun a niib n la ki pakibe. Gotir baa jii Yennu sennu na waan nba sɔb gbanbis paak ki lor lor bi yugbia nan bi nii paak ki li yarin biaŋinba; bia gotir bi liatbaant mɔgbana nba fɔk ki bia yarin biaŋinba. 6 Bi-i saan jaamm ni, bi tuu loon bin kar yudamm kinkaanii paak; bi-i kɔɔ Yennu jiantu diit ni, bi bia loon nijaana kaanii boae. 7 Bi bia tuu loon ki niib-i foontib burchinfoontii dai ni, kii yib a 'Wannteeb.' 8 Ŋaan yimm ŋarin, i daa te ki bi yi-i 'Wannteebi,' kimaan i kura tee naa waase nan leeb, ki mɔk i Wanntɔɔ yenɔkɔɔ. 9 I daa yi sɔɔ 'Baa' tingbouŋ na ni, kimaan i mɔk Baa yenɔkɔɔe; ŋɔɔe tee Yennu nba be sanpaapo na. 10 I bia daa te ki niib yi-i 'Yomdammi,' kimaan i mɔk Yomdaanɔ yenɔkɔɔe; ŋɔɔe tee min Yiisa Masia. 11 Wunba tee nijaann i ni, wun teen u mɔŋ i kura toontunnɔ. 12 Wunba dont u mɔŋ, Yennu tan saa sikinɔwa; ŋaan wunba sikint u mɔŋ, Yennue tan saa donnɔ." 13 Ki Yiisa bia yet a "Yimm sennu wannteeb nan Farisiinba nba tee kpinkpannii damm na, li sii bi turi, kimaan yimme loo Yennu naan tammɔb a niib daa kɔɔ. I mɔŋ mɔŋ ki kɔɔ, ŋaan dɔk binba loon bin kɔɔ tammɔb maŋ na. 14 [Yimm sennu wannteeb nan Farisiinba nba tee kpinkpannii damm na, li sii bi turi, kimaan i gaan pakɔi ŋei, ki mei Yennu ki yukii ki kpann a i tee yentinnae, i tubdatu tan sii bi bonchiann.] 15 "Yimm sennu wannteeb nan Farisiinba nba tee kpinkpannii damm na, li sii bi turi, kimaan i pootir mɔka ki gaar digbana ki loon wunba saa kpint u binbeŋ kii waa i poorpoe, ki li-i tee ki i tan la sɔɔ ki u waaini, i tuu te ki u biit nba jikitɔ saa Sintaanii muu ni na n ŋamm pukin taar munlee-e ki gar i yara. 16 "Yimm jɔɔnii nba daar i leeb na, li sii bi turi. I want niib na a 'Sɔɔ-i por Yennu diiuk, li ki kpaa talasi, ŋaan li-i tee ki sɔɔ por likirii nba be diiuk maŋ ni na, a see ki u gbeen u mɔpor na.' 17 Yimm jɔɔnii nba daar i leeb na, bona ŋanlee na ni, lannpoe tee barkpanni, likirii na amii Yennu diiuk nba te ki likirii na tee Yennu yar na? 18 Ki i bia yet a 'Li-i tee ki sɔɔ por mannu binbintiri, li ki kpaa talasi, ŋaan li-i tee ki sɔɔ por mannu bonkobuk nba paa binbintir na paak na, see ki u gbeen u mɔpor maŋ.' 19 I set tee jɔɔniie nan barmɔnii. Bona ŋanlee na ni, lannpoe tee barkpanni, mannu bonkobuk na koo binbintir nba te ki li tee Yennu yar na? 20 Li paak, li-i tee ki sɔɔ por mannu binbintiri, li want nan u por binbintir na nan linba kur paa li paak nae. 21 Li-i tee ki sɔɔ bia por Yennu diiuk, li want nan u por diiuk maŋ nan Yennu nba be leŋ nae. 22 Li-i bia tee ki sɔɔ por Yendɔuŋ, u por Yennu naangbouŋ nan wunba kar li paak maŋe. 23 "Yimm sennu wannteeb nan Farisiinba nba tee kpinkpannii damm na, li sii bi turi. I jikit baarii nan bukuŋ nan narii nan li bonlia piik nɔɔk ni yennkɔɔ ki teen Yennu, ŋaan nyik linba tee barkpana u sennu ni; ŋanne tee barbunu nba took, nan ninbatinu, nan yada teenu. Linba na nbae bo ŋan nan yii tuun, ki daa nyikit li yenninba tumu. 24 Yimm jɔɔnii nba daar i leeb na, i tuu lot kpajuuke nyun ni ki lu, ŋaan nak laagumii nan nyun! 25 "Yimm sennu wannteeb nan Farisiinba nba tee kpinkpannii damm na, li sii bi turi, kimaan i sokii nyun-nyuŋmanii nan senii poorpoe, ŋaan ki nɔɔk ni gbee nan fatuk nan jawuuk. 26 Yimm Farisiinba nba tee jɔɔnii na, sokit man nyunnyuŋmanii nan senii nɔi ni sinsinn, ki li poorpo saa nyiwa. 27 "Yimm sennu wannteeb nan Farisiinba nba tee kpinkpannii damm na, li sii bi turi. I tee nan kaat nba ki bi maa ki pent nae, ki li poorpo fan, ŋaan ki li nɔɔk ni gbee nan kpaba nan pɔyuu. 28 Nnae ki niib gorii i nanyer po ki i fan, ŋaan i para gbee nan fai nan toonbiit. 29 "Yimm sennu wannteeb nan Farisiinba nba tee kpin-kpannii damm na, li sii bi turi. I maa Yennu sɔkiniinba kaat, ki jabib, ki sent, ki li tee linba saa tiar niib yentinna kuun po, 30 ŋaan yeen a 'Ti-i diŋŋi bonni be ti yeejamm yoo, ti din bo kan tun baa din tun linba ki kpii Yennu sɔkiniinba na.' 31 Linba na want nan i set sak nan i tee binba din kpii Yennu sɔkiniinba na yaaboonae. 32 Li paak, i yeejamm nba din piin ki tun toonbiit biaŋinba na, tontir man. 33 Yimm wai; yimm waalabirii waas na, nlee ki i tan saa nyi tubdatu, muu nba kan mi kpeen na ni? 34 Li paake ki n beeri na, n tan saa tun Yennu sɔkiniinba nan yandamm nan wannteeb i boor ni, ŋaan i tan saa kpi bi siabe, ki kpaa siab dapunpuna paak, ki boo siab Yennu jiantu diit ni, ki bia wei tɔkii bi taa ki nyi doyenu ni ki tɔɔtir doleu ni. 35 Li paak, baa din kpii yentinna nba na kura tubdatu be i paak, laa nyii nipeemɔ Abel ki saa tuu Berakia bija Sekaria, wunba ki bi din kpiu Yennu diiuk nan mannu binbintir sinsuuk ni na. 36 Barmɔniie ki n beeri na, mɔtana nigbouŋ na tan saa la tubdatu, toonbiit maŋ kur paake. 37 "Nbaayoo-o, Jerusalem teeb, yimm nba kpi Yennu sɔkiniinba, ki bia jaat u toomiinba nba ki u tumm i boor na tana, bikinu taar muŋŋae ki n gbaa maa n lakini yomm nan korik nba tuu lakin u kobis u kpinkpant ni na, ki i ki saki. 38 Gotir man, Yennu nyik i jiantu ŋaak nae, ki li nyint yann. 39 N beerie, laa nyii dinna ki saa i kan mi lan ki saa tuu daar nba ki i tan saa yet a 'Mɔsoŋŋann be wunba baat Yennu sann ni na paak.'"

Matiu 24

1 Yiisa nba din nyii Yennu jiantu ŋasaakak ni ki saa na, ki u poorpoweiteeb baar u boor ki tan wantɔ jiantu ŋaak maŋ diit. 2 Ŋanne ki u boib a "I la linba na nba kura? Barmɔniie ki n beeri na, bi tan saa tut li kur ki lu tiŋ niwa, ki li tann yennkɔɔ tan kan biar ki paa leer paaki." 3 Yiisa nba din tan saan kar kunkonn nba ki bi yir Olif Tiinii kunkonn paak na, ki u poorpoweiteeb baar u boor, bi kuukɔɔ, ki boiɔ a "Betirit, bia yooe ki linba na kur tan sii tee? Bee tan sii tee a baaru nyinn, nan durinya na gbennu nyinni?" 4 Ki u betib a "I mi man ki sɔɔ n tan kpanni, 5 kimaan niib bonchiann tan saa jii n sanne ki baar ki yeen a ŋamme tee min Masia na, ki kpann niib bonchiann. 6 I tan saa gbat tɔb fuut i kɔɔnn ni, nan li labaar banfɔka, ŋaan i daa jee, kimaan li kpaa talase nan linba na kur n tun, ŋaan li ki want nan durinya gbennu baare na. 7 Nibooru nan nibooru tan saa kɔn nan leeb, ki kpanbara nan kpanbara mun tan saa took ki kɔn nan leeb. Ki kon nan tiŋ jekiruk tan sii be loka kur po. 8 Linba na nba kur tan sii tee nan matyiaru pinpiik nae. 9 "Li yoo maŋ bi tan saa soori ki dinni biak, ki kpi-i, ki booru kur tan sii nami kimaan yaa waan na paak. 10 Li yoo maŋ, niib bonchiann tan saa y‡t n weiu, ki fikisir leeb, ki bia nan leeb. 11 Ki faak sɔkiniinba tan saa nyi ki kpann niib bonchiann. 12 Biit nba tan saa mantik yabit tingbouŋ na ni na paak, niib bonchiann lomm tan saa maak. 13 Ŋaan wunba tan gubin nan biak yoo maŋ joontu tan saa la tinnuwa. 14 Ki bi tan saa mɔɔnt Yennu naan barŋanii mɔɔntii na tingbouŋ na kur po, a nibooru kur n gbata, ki durinya gbennu n yen fit baar. 15 "I tan saa la bonbiir nba ki Yennu sɔkinii Daniel din yet li po na, linba ki Yennu kɔɔ na, ki li see Yennu jiantu ŋasaakak ni." (Wunba kur tan karin sɔbu na, wun bann laa want linba.) 16 "Li yoo maŋ, binba tan be Judea tiŋ ni, bin chiar kii do jɔɔt, 17 ki wunba tan be u ŋaak yur paak, waa daa gbaa kɔɔ u diiuk ni a wun jii u siari, 18 ki wunba tan be u kpaab ni, u daa ŋmat a wun jii u liatiri. 19 Yoo maŋ ni, podamm nan binba dia walai tan saa di biak bonchiann. 20 Yii mei man Yennu ki u daa te ki biak na baat sabouŋ yoo, koo foon daari. 21 Kimaan li yoo maŋ, biak sii be; Yennu nba nan durinyawa nan dinna, li biak booru daa ki mi baari; li booru mun bia ji kan mi baar linba na poor po. 22 Yennu-i taŋŋi kii wat daa maŋ yabinti, sɔɔ tan kan tinni; ŋaan u nigannkab paak ki u tan saa wat daa maŋ yabint. 23 "Li yoo maŋ, sɔɔ-i taŋŋi beti a 'Gotir man, Masia be nna,' amii 'U be nnawa,' i daa teeu yada, 24 kimaan li yoo maŋ, faak Masianba nan faak sɔkiniinba tan saa nyi ki tuun nyina nan bakitnauŋ toonjaana a bin kpann niib; ki li-i taŋŋi fit gbaa, bi tan saa kpann Yennu nigannkab tiɔŋa. 25 Gbiintir man, n dɔŋ betiewa, ki yoo maŋ daa ki baari. 26 "Li paak, bi-i taŋŋi beti a 'Gotir man, u be muuk ni,' i daa saa; koo bi-i beti a 'Gotir man, u be diiuk ni,' i daa tee yada, 27 kimaan min nisaarik Bik baaru tan sii tee nan saak nba tuu nyikint ki nyi yondo po ki saan sik yonbaa po nae. 28 "Siaminba ki bonkpeenn be, leŋe ki juut tikii. 29 "Biak na poorpo ki yonnu tan saa bɔnn, ki ŋmaarik ji kan yenti; ki ŋmaabira tan saa nyi sanpaapo ki baa, ki linba kur be sanpaapo tan saa damm ki ŋmat ŋmat. 30 Li yoo maŋ niib tan saa la min nisaarik Bik jenu nyinn sanpaapo, ki nibooru booru nba be tingbouŋ na ni kur tan sii fabin, ki la min nisaarik Bik ki n be sanpagbann ni ki siik nan paŋ nan yentsaakar. 31 Gatgaak tan saa bui, ki n tun n malakanba ki bin saan ki tikir n nigannkab nba be tingbouŋ na kur po, ki baar namm. 32 "Yi jii sinsabik ki tumii yan man; yaa tuu la ki tiik maŋ bintir yoo nba, i ji tuu bann nan siɔk pere na. 33 Nnae mun, yoo nba ki i tan laat ki linba na nba kur tuun, yin bann nan n jenu maŋ pere na, li ji kan yukiri. 34 Barmɔniie ki n beeri na, mɔtana nigbouŋ na kan kpo ki gbenn kaawa ki linba na kur n tumi. 35 Sanpaak nan tiŋ tan saa gara, ŋaan n maan ŋarin kan mi gari. 36 "Ŋaan sɔɔ ki mi daar maŋ koo yoo nba ki n saa jeni; li sanpaapo malakanba, koo min Yennu Bija mɔŋ ki mi, see n Baa Yennu kɔɔe mi. 37 Laa din tee biaŋinba Nowa yoo na, li mun bia tan sii tee nnae min nisaarik Bik jenu yoo. 38 Nowa yoo maŋ, yoo nba ki nyunchiɔŋ din daa ki baar na, niib din di ki nyu, ki kɔɔnt poob, ki jikit bi waas ki teemm jab, ki tan tuu daar nba ki Nowa kɔɔ ŋarungbeŋŋir ni na. 39 Niib maŋ din bia daa ki bann linba tuumi, ki tan tuu daa nba ki nyunsaakan baar ki dii bi kur na. Li bia tan sii tee nnae yoo nba ki min nisaarik Bik tan saa jen. 40 Daar maŋ ni, jab banlee tan sii bɔɔ kpaab ni ki ko, ki n tan saa jii yenɔ ŋaan nyik lɔɔ. 41 Poob banlee tan sii lakin bɔɔ naan dii, ki n tan saa jii yenɔ ŋaan nyik lɔɔ. 42 "Li paak, yii chek i mɔŋ paak man, kimaan i ki mi daar nba ki min i Yomdaanɔ saa jeni. 43 Ŋaan bant nan li-i tee ki ŋaadaanɔ poŋ mi yoo nba ki nanyukɔɔ yaa wun baar u ŋaak ni nyiɔku, u sii kare guu; u kan sak ki nanyukɔɔ n tan kɔɔ ki jamɔ. 44 Li paak, li ŋan ki i mun teen siir yoo kura, kimaan min nisaarik Bik mun bia tan saa jen yoo nba ki i ki dukii n jenu poe. 45 "Daabilanɔe tee yandaanɔ ki tuun u yomdaanɔ nba wantɔ biaŋinba? Ŋɔɔe tee wunba ki u yomdaanɔ saa teenɔ daabi-yudaanɔ a wuu gorii u daabileeb, kii teemm mann nan li sɔnu. 46 Li-i tee ki u yomdaanɔ tan kpen ki la ki u tuun nna, parpeenn sii tee daabir maŋ yare. 47 Barmɔniie ki n beeri na, ŋaadaanɔ maŋ saa jii u mɔkint kur ki teen daabir maŋ nuu ni, a wuu gorii. 48 Ŋaan li-i tee ki daabir maŋ tee daabiyoonn ki dukin u par ni a u yomdaanɔ kan kpen yiami, 49 ki piin ki boo u daabileeb, ki ŋɔɔ nan danyuura bia lakin ki nyu ki di, 50 u yomdaanɔ maŋ tan saa kpen daar nba ki u ŋaa u kpenu tamae, nan yoo nba ki u ki mi. 51 U yomdaanɔ na saa dat u tubir bonbiir, ki teenɔ nan waa tuu tee kpinkpannii damm biaŋinba na. Leŋ maŋe ki u ji sii mɔ fabin ki ŋman nyana.

Matiu 25

1 "Yennu naan labaar tee nan sapaamm piik nba din jii bi fita ki saa a bin took pooyookir sɔrɔ nae. 2 Sapaamm maŋ ni baŋŋmu din tee jatite, ki baŋŋmu mun tee subindamm. 3 Sapaanjata na din jii bi fita, ŋaan ki jii kpan ki guun bi mɔŋi, 4 ki sapaansubindamm na ŋarin jii kpan ki liak liak salena ni ki dia pukin bi fita po. 5 Pooyookir sɔrɔ maŋ din ki baar yiami, ki gɔɔn tan soor sapaamm na kura, ki bi gɔɔn. 6 "Ki tansuunii ki bi tan gbat wuyikiŋ a 'Gotir, pooyookir sɔrɔ nae baat na. Nyin man ki tin tookɔ.' 7 Ki sapaamm piik na kur fiir ki ŋak bi fita na. 8 Ŋanne ki sapaanjata na miar subindamm na a 'I kan turit i kpan na waamii? Kimaan ti fita na loon lin kpeene.' 9 Ki subindamm na jiin a 'Aaii, li kan jaŋ timm nan yimmi. I saa man binba kɔi kpan boor ki saa daa i yara.' 10 Sapaanjata na nba din yaat ki saan a bin daa kpan yoo nba, ki pooyookir sɔrɔ na dɔkit. Subindamm baŋŋmu nba din teen siir na din wei pooyookir sɔrɔ maŋe, ki saan poochiann ŋaak na ni ki kɔɔ diiuk ni, ki bi loon gann ki kpar. 11 "Li poorpo, sapaanjata na nba tan jen yoo nba, ki bi baar see tammɔb na boor ki yi a 'Ti yomdaanɔ, ti yomdaanɔ, lootir gann ki tin kɔɔ.' 12 Ki pooyookir sɔrɔ na jiin a, 'Barmɔniie ki n beeri na, n ki miini.'" 13 Yiisa bia din betib a "I mi man, kimaan i ki mi daar nba koo yoo nba ki min i Yomdaanɔ tan saa jeni." 14 "Yennu naan labaar bia tee nan ŋaadaansɔɔ nba din lor a wun saan sɔnu, ŋaan yiin u daaba ki tan chentib likirii a bin gaar kii kpentir nae. 15 U din tur sinsinn yɔɔ na bɔtoot tusbamm ŋaŋŋmu, ki tur wunba paa na tusbamm ŋanlee, ki tur wunba joont na tusbamm yennkɔɔ. U din tur sɔɔ kur nan waa mi li yɔɔ kotir nba tee biaŋinbae, ŋaan yaat saan. 16 Ki wunba din gaar tusbamm ŋaŋŋmu na nyii nan u likirii yiama ki piin kpin-kpouŋ, ki la nyɔɔt tusbamm ŋaŋŋmu ki pukin li paak. 17 Nnae ki wunba din gaar tusbamm ŋanlee na mun nyii ki kpentir ki la nyɔɔt tusbamm ŋanlee ki pukin li paak. 18 Ŋaan wunba gaar tusbamm yenn na ŋarin din nyiie, ki gbiir bootuk, ki pii u yomdaanɔ likirii na. 19 "Li din yukir bonchiann, ki ŋaadaanɔ maŋ tan jen, ki yiin u daaba na, a wun kan bi likirii maŋ, ki la baa la nyɔɔt biaŋinba. 20 Ki wunba din gaar tusbamm ŋaŋŋmu na nba kɔɔ yoo nba, ki u jii tusbamm ŋaŋŋmu leer ki pukin tur u yomdaanɔ, ŋaan yet a 'N yomdaanɔ, a din turin tusbamm ŋaŋŋmue, ŋaan gotir, n mun bia la nyɔɔt tusbamm ŋaŋŋmu.' 21 Ki u yomdaanɔ na betɔ a 'N faan, a tee daabiŋanɔe, ki bia tuun fanu; faa dia waaminna fanu biaŋinba na, li paak, n saa jii saamewa ki teen a nuu ni. Parpeenn nba ki n mɔk na, li ji tee min nan fin yare.' 22 "Ki wunba mun din gaar tusbamm ŋanlee na kɔɔ ki baar u yomdaanɔ na boor, ki yetɔ a 'N yomdaanɔ, gotir, a din turin tusbamm ŋanlee-e, ŋaan n kpent ki la nyɔɔt tusbamm ŋanlee pukin.' 23 Ki u yomdaanɔ yetɔ a 'N faan, a tee daabiŋanɔe, ki bia tuun fanu; faa dia waaminna fanu biaŋinba na, li paak, n saa jii saamewa ki teen a nuu ni. Parpeenn nba ki n mɔk na, li ji tee min nan fin yare.' 24 "Ki wunba mun din gaar tusbamm yenn na ŋarin kɔɔ ki baar u yomdaanɔ boor ki yetɔ a 'N yomdaanɔ, n mi nan a tuu tee wunba di fobite, kimaan linba ki a ki dii fara li paak na, fin ŋarin loon ŋaninbae ki fii di; siaminba ki a lek ki buri ŋaan fin ŋarin jaan leŋe. 25 Li paak n daan tiina jaŋmaaniie, ki jii a tusbamm yenn na ki gbiir pii tiŋ ni. Li paak, ŋanne na! Gaat a bont.' 26 "Ŋanne ki u yomdaanɔ na betɔ a 'Fin daabiyoonn na, a tee gbannyakdaanɔe; a poŋ mi nan n tee wunba di linba ki n ki dii fara li paake, ki bia mi nan n jaan siaminba ki n ki bure, 27 ki bee ki a ki kpent niib n likirii maŋ ki bin tan paanin nyɔɔti? Maa bo tan jen na n bo saa la n bont ki nyɔɔt paa li paake. 28 Li paak, gaat likirii maŋ u boor man, ki pukin wunba mɔk tusbamm piik na; 29 kimaan wunba kur mɔk bona, bi saa pukinɔ ki wun mɔkit bonchiann; ŋaan wunba kɔŋ bont, bi bia saa tont bonmintik nba ki u mɔk nae. 30 Ŋaan jayann na ŋarin, jiimɔ man kii nyi ki saa lu-u nanyer po bunbɔnn ni. Leŋewa ki u sii mɔ fabin ki ŋman nyana.' 31 "Tɔn, min nisaarik Bik-i taŋŋi jen nan n paŋ nan malakanba kur yoo nba, n saa kar n naangbouŋ paak, ki la baakchiɔŋ, 32 ki lakin tingbouŋ na nibooru kur n tɔɔnn, ki bɔkitib nan pekpaarik nba tuu bɔkit pei nan buunii biaŋinba na. 33 N tan saa jii pei ki sennib n niidiitu po, ŋaan jii buunii na mun ki sennib n niigaŋ po. 34 Ki min Bat saa yet binba see n niidiitu po na a 'Yimm nba ki n Baa Yennu senn mɔsoŋŋann i paak na, i saana man ki tan kɔɔ naan nba ki Yennu ŋamm ki guuni durinya piinu niwa na, 35 kimaan kon din mɔkin, ki i dinnin; ki nyun-nyukiru mɔkin ki i turin nyun. N din tee saamɔe, ki i gaarin saauŋ i ŋei ni. 36 N din somm yanne, ki i turin tiat; ki n yiar, ki i sommin; bi din kɔɔnin dansarik, ki i yɔɔ gɔntin.' 37 "Ki yentinna na tan saa jiin ki boin a 'Ti Yomdaanɔ, bee yooe ki ti din la-a ki kon mɔka ki ti dinnani? koo bee yooe ki nyunnyukiru din mɔka ki ti tura nyumi? 38 koo bee yooe ki ti din la-a ki a tee saamɔ ki ti gaara saauŋ ti ŋei ni? koo ki a somm yann ki ti tura tiati? 39 koo bee daare ki ti din la ki a yiar ki ti sommani? koo ki a kɔɔ dansarik, ki ti baar ki gɔnani?' 40 Ki min Bat mun tan saa jiin a 'Barmɔniie ki n beeri na, yaa din tun linba ki tur wunba tee tatimɔɔ n naa waas sinsuuk ni na, i din tuun ki teen mine.' 41 "Li poorpo, n tan saa jiant ki bet binba see n niigaŋ po na a 'Yimm nibiit nba ŋan nan tubdatu na, seetir nna. I saa man ki saa kɔɔ muu nba di ki kaa kpeenu, ki Yennu ŋamm ki guun Sintaanii nan u niib na ni, 42 kimaan kon din mɔkin, ŋaan ki i minnin jeet; ki nyunnyukiru mɔkin, ŋaan ki i minnin nyun. 43 N din tee saamɔe, ki i ki sak gaarin i ŋei ni; ki n din tan somm yann, ŋaan ki i minnin tiat; ki n din tan yiar ki i ki sommin, ki n bia tan kɔɔ dansarik, ki i ki gɔnin.' 44 "Li yoo ki bi mun tan saa ŋmat ki boin a 'Ti Yomdaanɔ, bee yooe ki ti din la-a ki kon mɔka, koo nyunnyukiru mɔka, koo ki a tee saamɔ, koo ki a somm yann, koo ki a yiar, koo ki a kɔɔ dansarik, ŋaan ki ti y‡t a sommiri?' 45 Li yoo maŋe ki n saa jiin a, 'Barmɔniie ki n beeri na, yaa din y‡t yin tun linba ki tur wunba tee tatimɔɔ n naa waas sinsuuk ni na, i din y‡t yin tun ki tur mine.' 46 Binba na tan saa saan ki saa la tubdatu nba kaa gbennu na, ŋaan ki yentinna na n mun saan ki saa be manfoor nba kaa gbennu na ni."

Matiu 26

1 Yiisa nba din pak maan na kur ki gbenn yoo nba ki u bet u poorpoweiteeb a 2 "I mi nan daarpoe tee yukitgar tiaru jaamm, ki bi daan saa jii min nisaarik Bik ki tur niib ki bin kpaan dapunpunn paak." 3 Li yoo maŋ ki Yennu jiantu yudamm nan Juu teeb saakab tikir leeb Kayafas ŋaak ni, wunba tee Yennu jiantu yudamm saakɔɔ na. 4 Bi din lor baa saa teen biaŋinba ki bɔr soor Yiisae ki kpiu. 5 Ŋaan bi din lor nan bi kan soorɔ jaamm daa na ni, kimaan bi-i teen nna see ki kpikpiruk baar. 6 Tɔn, Yiisa nba din be Betani doo ni, Simonn nba din tee gbaatir na ŋaak, ki kar di jeet, ki poosɔɔ kɔɔ ki dia salenŋann, ki li gbee nan tulaarii nba daauk paar bon-chiann, ki u baar tan but Yiisa yur paak. 8 Ki Yiisa poor-poweiteeb na nba la nna yoo nba ki bi burin nan leeb nan wutoor ki yeen a "Bee ki poo na biir tulaarii na nna mani? 9 Bi bo saa fit kɔir ki gaar likirii bonchiann ki somm talasdamm." 10 Ki Yiisa bann bi bunburimii maŋ paak, ki boib a "Bee teen ki i burin ki daamii poo na? Bonŋanne ki u tun ki turin maŋ. 11 Talasdamm ŋarin sii yɔɔ be i boore yoo kura, ŋaan min ŋarin kii yɔɔ be nna kaa. 12 Tulaarii nba ki u but n paak na, u teen n piinu siire. 13 Barmɔniie ki n beeri na, siaminba kur ki bi saa mɔɔnt barŋanii na tingbouŋ na ni, bi bia saa mɔɔnt poo maŋ nba tun linba na, ki li sii tee tiarin ki jiin u po." 14 Li yoo na ki Yiisa poorpoweiteeb na ni yenɔ, wunba ki bi yiu Judas Iskariot na, nyii ki saan Yennu jiantu yudamm boor, 15 ki saa boib a "I saa turin bee ŋaan ki n lon sɔnii ki Yiisa n kɔɔ i nuu ni?" Ki bi kan salimpeena likbina piintaa ki turɔ. 16 Laa din nyii li yoo maŋ ki u lon sɔnii nba ki u saa jii Yiisa ki kubin bi nuu ni. 17 Boroboro nba ki bi din ki tee datiŋ na jaamm piinu daar, ki Yiisa poorpoweiteeb baar u boor, ki tan boiɔ a "A loon ki tin saan lee ki teen siir ki guuna yukitgar tiaru jaamm na dinu?" 18 Ki u betib a "I saa man doo na ni, jasɔɔ nna ŋaak ni, ki saa betɔ a 'Ti Wanntɔɔe tunt a ti tan beta a u yoo per na, ki u loon ŋɔɔ nan u poorpoweiteeb n di yukitgar tiaru jaamm a ŋaak na ni.'" 19 Ki u poorpoweiteeb na mun tun nan waa wannib biaŋinba na, ki teen jaamm maŋ jeet siir. 20 Daajoouk nba din tan baar, ki Yiisa nan u poorpoweiteeb piik nan banlee na kɔɔ ki kar a bin di. 21 Baa din di yoo nba ki Yiisa yetib a "Barmɔniie ki n beeri na, i ni yenɔ saa nyi n poor." 22 Ki u poorpoweiteeb na para biir bonchiann, ki bi piin ki boiɔ yenɔ yenɔ a "N Yomdaanɔ, barmɔnii, a yeen mine-e?" 23 Ki u jiin a, "Wunba ki min nan ŋɔɔ lakin sukii kpinsenyeŋ ni nae saa nyi n poor. 24 Min nisaarik Bik set saa kpo nan Yennu gbouŋ nba wann biaŋinba nae, ŋaan bonbiir sii be wunba yaa wun nyi n poor na paak. Bi-i bonni diŋŋi kii mar li daanɔ gbaa, li din bo sɔ." 25 Ŋanne ki Judas nba yaa wun nyi u poor na mun boiɔ a "Wanntɔɔ, a yeen mine-e?" Ki Yiisa jiin a "Nn, fine yaa." 26 Baa tan kar di jeet yoo nba ki Yiisa jii boroboro, ki tur Yennu niipoouk, ŋaan ŋmit ŋmit, ki tur u poorpoweiteeb na, ki betib a "Gaat man ki di. Linba nae tee n gbanant," 27 ki bia jii nyunnyuŋmaŋ nan tilɔɔna nyun, ki tur Yennu niipoouk ki jii turib, ki betib a, "Gaat man, ki i kura n nyu. 28 Linba nae tee n sɔn nba saa te ki Yennu mɔsonn n set nan barmɔnii, sɔn nba tan saa nyi n gbanant ni, nisaarii bonchiann paak, ki Yennu n nyik chab bi biite na. 29 N beerie, n ji kan mi nyu tilɔɔna nyun na, see daar nba ki min nan yimm tan saa lakin nyu li nyunpaanin, n Baa Yennu naan ni." 30 Ŋanne ki bi yin Yennu jiantu yanii, ŋaan nyii ki saan Olif Tiinii kunkonn paak. 31 Li yoo na ki Yiisa betib a "Nyiɔk na, i kura saa tin ŋaan nyikima, kimaan li sɔb Yennu gbouŋ ni a 'Yennu tan saa kpi pekpaarik na, ki pei nba ki u tuu kpaarib na saa tin yat.' 32 Ŋaan mi-i taŋŋi fiir kuun ni, li poorpo, n saa liit i tɔɔnn ki saan Galilii." 33 Ki Piita jiin a, "N Yomdaanɔ, sɔɔ kur-i lekii taŋŋi tin nyika, ŋaan min ŋarin kan mi tin ki nyikani." 34 Ki Yiisa betɔ a "Barmɔniie ki n beera na, dinna nyiɔk na, nan kojosinsinn n tan bui na, ki a nɔi taar muntaawa nan a ki mimi." 35 Ki Piita jiin a, "Li-i lekii baar nan min nan fin n lakin kpo gbaa, n kan mi nɔi nan n ki miani." Ki Yiisa poorpoweiteeb na kura mun bia yet nna. 36 Ŋanne ki Yiisa nan u poorpoweiteeb saan siaminba ki bi yi Gefsemane na; ki u saa betib a "Yii be nna man, ŋaan ki n gar i tɔɔnn po na ki saa miar Yennu." 37 Ki u jii Piita nan Sebedii waas banlee na ki pukin u mɔŋ po, ki bi saan. Ki u saa la parbiir nan yanyetuk, 38 ki betib a "Parbibooru nba soorin na per lin kpima. Biat nna man kii nyɔi ki pukin n po." 39 Ŋanne ki u chat saan waaminna bi tɔɔnn, ki gbaan tiŋ ni, ŋaan mei Yennu ki yeen a "N Baa, li-i bonni saa fiti, fan ŋaan ki biak nba baat n paak na n yakirin. Ŋaan ŋaant ki a loommo n tun, ki li daa tee n loommu." 40 Ki u tan ŋmat u poorpoweiteeb bantaa na boor, ki baar sɔɔ ki bi gɔɔnt; ki u boi Piita a "I lek kan fit kii nyɔi ki pukin n po yoo waamii? 41 Yii nyɔi man ŋaan kii mei Yennu, ki i tan daa kɔɔ jinjammii ni, kimaan i sei ŋarin loon lin tun linba ŋan, ŋaan ki i gbanant kaa yaaki." 42 Ki din ŋmat taar munlee ni ki saa mei Yennu ki yeen a "N Baa, li-i tee ki biak nba baat n paak na kan fit garin ŋann see ki n diir, ŋaant ki a loomm n tun." 43 Ki u ŋmat ki saa baar sɔɔ ki u poorpoweiteeb na bia gɔɔna, kimaan gɔɔn din mɔkib bonchiann. 44 Ki u bia ŋmat taar muntaa ni, ki saa mei Yennu ki yeen li biaŋ nan waa bo miar sinsinn na, 45 ki tan ŋmat baar u poor-poweiteeb maŋ boor ki boib a "I bia lek daa foi, ki gɔɔntii? Gotir man, yoo maŋ per na. Bi jii min nisaarik Bik na, ki teen biitdamm nuu niwa. 46 Fiit man, ki tin saan. Gotir man, wunba nyii n poor na pera." 47 U mɔb daa ki baa tiŋ kaawa, ki Judas, wunba tee u poor-poweiteeb na yenɔ, dɔkit nan nibur, ki siab dia jukbanjai, ki siab mun dia gbajara, ki nyii Yennu jiantu yudamm nan saakab boor. 48 Judas, wunba nyii u poor na poŋ daan wann niib maŋ nyinsiare a "Mi-i saki foont wunba ki mɔɔt u tankpinn, yii mi nan ŋɔɔe na, ki yin soorɔ ken ken man." 49 Judas nba tan baar yoo nba, li taakpaak ni ki u saan ki saa set Yiisa peŋ ki yetɔ a "Wanntɔ, a nyiɔk po," ŋaan mɔɔt u tankpinn. 50 Ki Yiisa jiant betɔ a "N yɔɔk, toonbooru nba ki a baar a fan tun na paakii?" Li yoo na ki niib na ji wuur baar ki tan bib Yiisa. 51 Ŋanne ki u poorpoweiteeb na ni yenɔ kakit nɔɔt jukbanjiak ki chɔɔ pot Yennu jiantu yudaanɔ daabir tubir. 52 Ŋanne ki Yiisa betɔ a "Jiint a jukbanjiak maŋ ki nɔɔn li took ni, kimaan wunba kɔn nan juk, u kpenn juk kuume. 53 A ki mi nan n bo saa fit miar n Baa Yennu sommir po, ki u bo saa tun malakanba yiama, ki bin gar tusaa piik nan ŋanlee? 54 Ŋaan mi-i teen nna, nlee ki li saa tun ki gbeen linba sɔb Yennu gbouŋ ni ki yet a see ki n dii biak nba baat na?" 55 Ŋanne ki u boi nibur na a, "I baar nan jukii nan gbajara a i tan soorin nan n tee fatitɔɔe na-a? N daan tuu be Yennu jiantu ŋasaakak ni daar kura ki want niib Yennu maan, ŋaan ki i tuu ki somi. 56 Ŋaan linba na kur tun a lin gbeen Yennu sɔkiniinba nba din sɔb linba Yennu gbouŋ ni nae." Li yoo ki u poorpoweiteeb na kur chiar ŋaan nyikɔ. 57 Ki binba soor Yiisa na jiiu ki saan nanɔ Yennu jiantu yudaanɔ Kayafas ŋaak, siaminba ki sennu wannteeb nan tiŋ na ni saakab kar ki guu na. 58 Baa saa nan Yiisa na, ki Piita waa u poorpo banfɔkira, ki saa baar see Yennu jiantu yudaanɔ maŋ ŋaananyer po, ki tan kɔɔ dundouŋ ni, ki saan kar toontunna na boor, a wun la li joontu. 59 Ki Yennu jiantu yudamm nan saakab maŋ kur yabir bi mɔŋ paak a bin gbat faak siara damm mɔi ni ki la Yiisa biit ki kpiu. 60 Ki niib bonchiann set dii faak siara u paak, ŋaan kɔŋ u biit. Li poorpo ki jab banlee nyii set ki yet a 61 "Jɔɔ na daan yet a u mɔk yiikoo ki saa fit bet Yennu jiantu ŋasaakak na, ŋaan bia jii daa ŋantaa ki maar." 62 Ŋanne ki Yennu jiantu yudaanɔ maŋ fiir set, ki boi Yiisa a, "Linba ki jab na piak ki jiin a po na, paak tee bee? A ki mɔk li jiinu-u?" 63 Ŋaan ki Yiisa ki jiin siari. Ki Yennu jiantu yudaanɔ maŋ ŋamm boiɔ a, "Betirit manfodaanɔ Yennu paak, fine set tee u Niganntɔɔ Masia ki bia tee u Bija na-a?" 64 Ki Yiisa jiin a "Nn, fine yaa. Ŋaan n beerie, laa nyii mɔtana ki saa, i tan saa la min nisaarik Bik kar Yabint Yennu niidiitu po, ki bia tan lan ki n be sanpagbana ni ki siik." 65 Ŋanne ki Yennu jiantu yudaanɔ maŋ fɔb u mɔŋ liatir ki pat, ŋaan tian a "U yekint u mɔŋ nan Yennue. Ki ti poŋ ji loon siaradamm a ti teen bia? I kura na gbat waa yekint n u mɔŋ nan Yennu biaŋinbawa. 66 Ki i la nlee?" Ki bi jiin a "Li tee wun kpoe." 67 Li yoo na, ki bi ji siin mɔsant u paak, ki boou, ki siab pebitɔ tanpakii, 68 ŋaan yeen a "Fin Masia, buntir wunba pebita na." 69 Piita nba kar Yennu jiantu yudaanɔ ŋaadindouŋ ni na, ki ŋaak maŋ ni bonposiak baar u boor ki tan betɔ a "A mun tuu yɔɔ be nan Yiisa nba nyii Galilii na." 70 Ki Piita yet niib maŋ kur boor a "N ki mi faa piak linba na paaki;" 71 ŋaan fiir nyii ki saa kar nanyer po. Ki ŋaak maŋ ni bonpoleek bia nyii lau, ki yet binba be leŋ na a "Jɔɔ na mun tuu yɔɔ be nan Yiisa nba nyii Nasaref na." 72 Ki Piita nɔi ki por a ŋɔɔ taan ki mi jɔɔ maŋi. 73 Ki li yann waaminna ki jab nba see leŋ na baar ki tan yet Piita a "A set tee bi ni yenɔe, kimaan a maame want." 74 Ki Piita por mɔb a li-i tee ki u faar faakie, Yennu n dat u tubir, a ŋɔɔ ki mi jɔɔ maŋi. Li yoo maŋ ki kojouk bui. 75 Ki Piita ji tiar Yiisa nba bo betɔ linba na a "Kojouk tan kan bui sinsinn daanni ki a tan saa nɔi taar muntaa a a ki mimi." Ki Piita nyii nanyer po ki saa bui fabin bonchiann.

Matiu 27

1 Laa yent sanyapob ni, ki Yennu mannteeb yudamm nan saakab lor baa saa kpi Yiisa biaŋinba. 2 Ki bi lorɔ ŋmiit ki jiiu ki saan nanɔ tiŋ yudaanɔ nba ki bi yiu Pailat o na boor. 3 Judas, mɔlanfikdaanɔ na nba gbat ki bi bu joont ki yaa bi saa kpi Yiisa na, ki u par biir bonchiann; ki u jii salimpeena likbina piintaa na ki ŋmat saa jiin tur Yennu mannteeb yudamm nan saakab maŋ, 4 ŋaan yet a "N tun biita, kimaan n fikis wunba kaa biita." Ŋanne ki bi jiin ki boiɔ a "Ti baka mun ji be linba na ni-i? Li tee a maame." 5 Ki Judas jii likirii na ki lu Yennu jiantu ŋasaakak na ni, ŋaan nyii ki saan jɔnn u mɔŋ. 6 Ŋanne ki Yennu jiantu yudamm tɔkir likirii maŋ ŋaan yet a "Linba na ji tee sɔn likiriie, ki ti sennu nba tee biaŋinba na, ti kan fit jii pukin Yennu jiantu ŋasaakak likirii ni." 7 Li paak, ki bi kar dukin likirii maŋ po, ki tan jii ki saan daa yɔkmarɔɔ tiŋ, a bii pii saamm leŋ. 8 Li paake ki bi yi tiŋ maŋ a "Sɔn Tiŋ" ki tan tuu dinna. 9 Ki li gbeen Yennu sɔkinii Jeremaya nba din pak linba na a, "Bi jii salimpeena piintaa nba ki Israel tesiab din pa ki li tee u daauk na, 10 ki daa yɔkmarɔɔ tiŋ, nan Yennu nba wannib biaŋinba na." 11 Ki Yiisa see tiŋ maŋ yudaanɔ Pailat tɔɔnn; ki Pailat boiɔ a "Fine set tee Juu teeb kpanbar na-a?" Ki u jiinɔ a "Nn, fine yaa." 12 Ŋaan Yennu jiantu yudamm nan saakab nba fikisirɔ na ŋarin, u ki jiimm siari. 13 Ki Pailat bia boiɔ a "A ki gbia baa piak biira biaŋinba maŋi?" 14 Ŋaan Yiisa ji ki pak siar ki jiinɔ, ki li ji bakit Pailat bonchiann. 15 Tɔn, yukitgar tiaru jaamm dinu daar-i taŋŋi baar, tiŋ maŋ yudaanɔ tuu nyinn niyenɔkɔɔe dansarik ni, wunba ki niib na loonɔ, ki ŋaau. 16 Sɔɔ din be dansarik ni li yoo, ki u sann yi Barabas, ki niib na miu fanu nan u toona nba tee biaŋinba. 17 Baa tan lakin yoo nba ki Pailat boib a "Ŋmee ki i loon ki n nyinnɔ dansarik ni ki ŋaau? Barabas koo Yiisa nba ki bi yiu Masia na?" 18 kimaan Pailat mi nan naŋ paake ki bi soor Yiisa ki teen u nuu ni. 19 Pailat nba daa kar buut kok paak na, ki u ŋaapoo tun toomii ki tan betɔ a "Nyint a nuu Yennu nipeemɔ na maan ni, kimaan nyiɔk n won la daamuk bonchiann n daamiit ni u paak." 20 Ki Yennu jiantu yudamm nan saakab maŋ biir niib na a bin yet Pailat a wun nyinn Barabas ŋaan kpi Yiisa. 21 Ki Pailat bia ŋamm boib a "Niib banlee na ni, i loon ki n nyinn ŋmee ki ŋaau?" Ki bi jiin a "Barabas." 22 Ki Pailat bia ŋamm boib a "Ki Yiisa nba ki bi yiu Masia na ŋanimi, i loon ki n teenɔ nlee?" Ki bi kura jiin a "Kpaamɔ ki tabinɔ dapunpunn paak." 23 Ki Pailat boib a "Bee paake? U biit mantik tee lannpoe?" Ki bi ŋamm teen fuur, ki jiin sanpaapowa a "Kpaamɔ tabin dapunpunn paak." 24 Pailat nba bann nan wuu piak saa, li kaa nyɔɔt, ki bia saa baar nan dataar nan mɔy‡tuk na, ki u jii nyun ki wuur wuur u nii, niib na numm ni, ŋaan yet a "N nuu kaa jɔɔ nba kaa biit na sɔn nyinnu ni. Li tee i maame." 25 Ki niib na jiin a "Nn, u sɔn n jii timm nan ti waas yura paak." 26 Ŋanne ki Pailat nyinn Barabas ki ŋaau, ŋaan te ki bi boo Yiisa kpaasir, ki jiiu tur kunkɔnkɔnna a bin saan kpaau dapunpunn paak. 27 Ki tiŋ yudaanɔ Pailat kunkɔnkɔnna na jii Yiisa ki kɔɔ nanɔ dindouŋ ni, ki bi kunkɔnkɔnna leeb na kur tikir ki lintɔ. 28 Bi din liat u liant nae, ŋaan jii liatmuŋ nna ki lannɔ, 29 ki luu kunkonii fokirik ki yirimɔ, ki jii patu p ki kubin u niidiitu ni, ki gbaan u tɔɔnn ki sarikitɔ ki yeen a "Juu teeb bat, ti foonta!" 30 Ki piin ki siin mɔsant u paak, ŋaan gaar patu nba ki bi bo kubinɔ na ki faa u yur paak. 31 Baa tan sarikɔ gbenn yoo nba, ki bi liat liatmuŋ na, ŋaan jii u mɔŋ liant na ki lannɔ, a bin ji saan ki saa kpaa tabinɔ dapunpunn paak. 32 Baa din saa na, ki bi chet Sairene tiŋ ni jasɔɔ nba ki u sann tee Simonn, ki soorɔ, ki miau jinnɔ Yiisa kuun dapunpunn na. 33 Baa saa baar siaminba ki bi yi Golgota, ki li paak tee "Yukpabuk boor na" 34 ki bi jii daan nba ŋmat nan bonkobuk yan q ki turɔ a wun nyu; ŋaan waa lemm yoo nba ki u y‡t nyunu. 35 Baa kpaau ki tabinɔ dapunpunn paak gbenn yoo nba, ki bi tɔ naatɔɔt ki chent u tiat na, 36 ŋaan ji kar leŋ ki guu-u. 37 Bi din sɔb baa yaa u tun biit nba na, ki tabin u dapunpunn na yur paake. Baa din sɔb linba na want a "Yiisa nba tee Juu teeb Kpanbar nae na." 38 Bi mun bia din kpaa fatiteeb banlee dapunpuna paak leŋ, ki pukin Yiisa po, ki yenɔ be u niidiitu po, ki lɔɔ mun be u niigaŋ po. 39 Ki binba somm gaar leŋ na gumii bi yura ki sukiiɔ, 40 ki yeen a "Fin nba yaa a saa fit bet Yennu jiantu ŋasaakak na ŋaan bia jii daa ŋantaa ki maar na, fine na, tint a mɔŋ. Li-i tee ki a set tee Yennu Bijaie, fan nyi dapunpunn na paak ki sik." 41 Nnae biak ki Yennu jiantu yudamm nan sennu wannteeb nan saakab kura mun din sarikitɔ 42 ki yeen a "U tuu tint leebe, ŋaan kan fit ki tinn u mɔŋi. Tɔn, u yaa u tee Israel teeb bate, wun sikin u mɔŋ dapunpunn na paak ki tin mantik teenɔ yada. 43 U teen Yennu yadawa, ki yaa u tee Yennu Bijae. Tɔn, li-i tee ki Yennu set loonɔ, ŋaant wun tinnɔ mɔtana." 44 Ki baa kpaa fatiteeb nba banlee ki pukin u po na mun bia sarikitɔ nna. 45 Laa tan baar yensuuk ni, ki tingbouŋ na kur ji bɔnn ki saa tuu yenlekir kut muntaa. 46 Kut muntaa maŋ yooe, ki Yiisa yikin sanpaapowa a "Eli, Eli, lema sabaktani?" Li paak tee a "N Yennu, n Yennu, bee ki a nyikimi?" 47 Binba see leŋ na nba gbat u yiini maŋ ki bi siab beer leeb a, "U yi Elaijae na." 48 Ki bi ni yenɔ tin saa jii saapo ki suunt damiituk nna ni, ki jii sakin daauk paak, ki donn turɔ a wun nyu. 49 Ki u leeb na beerɔ a wun nyikɔ, ki laan Elaija saa baar ki tan tinnɔwa-a? 50 Ki Yiisa ŋamm yikin sanpaapowa ŋaan ji kpo. 51 Li yoo na ki chinchenn nba tuu jɔɔn ki puun Yennu ŋasaakak sinsuuk ni na bɔkit li yur paak ki tan sik tiŋ ni; tiŋ din damme, ki tanpiit bɔkit, 52 ki kaat bia loot, ki kpeemm nba din kpo ki tee Yennu niib na bonchiann fiir kuun ni, 53 ki nyii bi kaat ni; ki Yiisa kuun fiiru poorpo ki bi kɔɔ Jerusalem, ki niib bonchiann lab nan bi ninbina. 54 Ki kunkɔnkɔnna saakɔɔ nan kunkɔnkɔnna nba pukin u po ki guu Yiisa na nba la tiŋ dammu nan linba tun na yoo nba, ki jaŋmaanii soorib bonchiann, ki bi yeen bi leeb a "Barmɔnii, jɔɔ na set tee Yennu Bijae." 55 Ki poob nba din tuu waa Yiisa ki nyii Galilii ki sommitɔ na, ji wokir see banfɔkira ŋaan gorii linba tuun maŋ. 56 Bi yemme din tee Meeri Magdaliinn, nan Sebedii waas naa, nan Meeri nba din tee Jeems nan Joosef naa na. 57 Ki daajoouk nba tan baar yoo nba ki Arimatea doo ni mɔkitsɔɔ baar, ki u sann tee Joosef. U mun bia din tee Yiisa jɔɔe. 58 Ki u saan yudaanɔ Pailat boor ni, ki saa miarɔ a wun chabɔ ki wun kpaat Yiisa gbanant ki pii. Ki Pailat tur yaak a bin saan ki jii Yiisa ki turɔ. 59 Ki Joosef saan ki jii Yiisa gbanant ki pɔbinɔ katinyeeŋ ni, 60 ki jiiu saan ki saa piiu u mɔŋ mɔŋ kapaauŋ nba ki u din gbiir tanpiiuk lokir ni na, ŋaan birint katangbeŋŋir ki biin kamɔb, ŋaan ji ŋmat kun. 61 Ki Meeri Magdaliinn nan Meeri lɔɔ na ji kar kpia leŋ ki gorii kaauk maŋ. 62 Laa yent sanyiɔk, daar nba tee ŋamm Juu teeb foon daar na, ki Yennu jiantu yudamm nan Farisiinba saan Pailat boor ki saa betɔ a 63 "Chanbaa, ti tian nan faak daanɔ maŋ nba daan be na, u daan yet a li-i tee ki u tan kpo, a ŋaan daa ŋantaa daar u bia saa fiir kuun niwa. 64 Li paak, turin kunkɔnkɔnna na mɔb ki bin saan kii guu u kaauk maŋ boŋŋann ki saa tuu daa ŋantaa maŋ daar; li-i kii tee nnai kaa, u poorpoweiteeb tan saa baar ki piitɔe, ŋaan yet niib a u fiir kuun nie. Ki kpinkpannii maŋ tan saa gar sinsinn yar na paak." 65 Ki Pailat betib a "Jiin guuteeb man ki bin saan kii guu kaauk maŋ nan yaa saa fit guur biaŋinba." 66 Ki bi jii guuteeb ki bi saan saa guu kaauk na, ŋaan buun tant ki pɔr kaauk na fanu.

Matiu 28

1 Ki Juu teeb foon daar na gar, ki lasir daar sanyafaar ki Meeri Magdaliinn nan Meeri lɔɔ na nyii saan a bin gɔn kaauk na. 2 Tɔn, tiŋ din damm bonchiann, kimaan Yennu malakae nyii sanpaapo sik, ki tan bikit katangbeŋŋir na ki loot kamɔb ki ŋmant kar li paak. 3 Ki u gbanant nyirii nan sanyikintii na, ki u liant peen nan sanpagbanpeeuŋ na. 4 Ki jaŋmaanii soor guuteeb na bonchiann, ki bi ji jekir ki tan baa ki dɔɔ dɔɔ nan kpeemm na. 5 Ki malaka na bet poob maŋ a "Yimm daa tiin jaŋmaanii. N mi nan i loon Yiisa nba ki bi daan kpaau dapunpunn paak nae. 6 U kaa nna, u fiir kuun niwa nan waa daan yet biaŋinba na. I saana man ki tan got waa daan dɔɔ siaminba. 7 I saa man yian yian, ki saa yet u poorpoweiteeb a u fiir kuun ni ki gar saan Galiliiwa. Leŋewa ki i saa lau. Barmɔniie ki n beeri na." 8 Ki poob na nyii kaauk maŋ boor ki chiar saan a bin saa bet u poorpoweiteeb; ki jaŋmaanii lek mɔkib, ŋaan ki bi bia mɔk parpeenn bonchiann. 9 Baa din saa na, ki Yiisa chetib sɔnu ni ki foontib; ki bi gbaan u tɔɔnn ki jiantɔ. 10 Ki u betib a "I daa tiin jaŋmaanii; i saa man ki saa bet n naa waas maŋ a bin saan Galilii; leŋewa ki bi saa lan." 11 Poob maŋ nba din saa na, ki guuteeb nba guu kaauk na siab ŋmat saan doo ni, ki saa wann Yennu jiantu yudamm na linba teen na kur. 12 Ŋanne ki Yennu jiantu yudamm maŋ nan saakab na lakin kar ki lor lor; ki tur guuteeb na likirii bonchiann, 13 ŋaan betib a "Yi yet a Yiisa poorpoweiteebe baar tansuunii, yoo nba ki i gɔɔnt na, ki tan jan piit u gbanant; 14 ŋaan li-i tee ki tiŋ yudaanɔ na gbat nnaie, timm saa dɔkin i paak u boor ni ki nyinni." 15 Ki guuteeb maŋ gaar likirii na, ŋaan ŋmat ki saa bet niib nan baa wannib biaŋinba na. Ki Juu teeb gaar maan na ki teen barmɔnii mɔkmɔk nan dinna. 16 Ki Yiisa poorpoweiteeb piik nan yenɔkɔɔ na saan Galilii jɔsiar paak, siaminba ki Yiisa din wannib a bin saan na. Ki bi din tan lau leŋ. 17 Baa lau yoo nba ki bi gbaan ki jiantɔ; ŋaan bi siab din birisɔe. 18 Ŋanne ki u chat nakimm, ŋaan yet a "Yennu turin sanpaak nan tiŋ yent kurawa. 19 Li paak, i saa man tingbouŋ na ni, nibooru kura boor ki teemm n poorpoweiteeb, ki wurib Yennu nyunwuru, n Baa Yennu sann ni, nan min u Bija sann ni, nan Seyeeŋ sann ni, 20 ki wannib ki bin sak linba ki n wanni na kur. Ŋaan yii tian man nan n sii be i boor yoo kura mɔkmɔk nan durinya gbennu."

Mak 1

1 Labamann na jiin Yennu Bija Yiisa Masia poe. 2 Li din piin ki tee nan Yennu Sɔkinii Aisaya nba din sɔb biaŋinba nae a, "Yennu yet a 'Nnara, n toomue na, ki n yaa n tumɔ ki wun dɔŋ gar a tɔɔnn, ki ŋamm a sɔnii ki tura.' 3 Sɔɔ be muuk ni ki hoot ki yaa 'Ŋammit man ti Yomdaanɔ baaru sɔnii ki lii took ki turɔ.'" 4 Jɔɔnn din be muuk ni, ki wuur niib Yennu nyunwuru, ki mɔɔntir ki teen niib a bin nyik bi toonbiit ki wun wurib Yennu nyunwuru ki Yennu n nyik chabib. 5 Ki niib bonchiann nyii Judea tiŋ ni nan Jerusalem doo ni, ki baar Jɔɔnn boor ki tan fiit bi toonbiit, ki Jɔɔnn wurib Yennu nyunwuru, Jɔɔdann mɔkir ni. 6 Jɔɔnn din lia laagumii kobit liatire, ki bia boob gbann u siak ni, ki u jeet tee naasuut nan siat. 7 Ki u mɔɔntir ki teen niib a "Nirɔ nba yaa wun tan wei n poor ki baar na cheen, ki n ki jaŋ nan ki n gbaan u tɔɔnn ki lot u taasaŋmii gbaa. 8 Min ŋarin wuuri nan nyume, ŋaan ŋɔɔ tan saa jii Yennu Seyeeŋ ki wuur i para." 9 Li yoo na ki Yiisa nyii Nasaref doo nba be Galilii tiŋ ni na, ki baar Jɔɔnn boor, ki Jɔɔnn wurɔ Yennu nyunwuru Jɔɔdann mɔkir ni. 10 Yiisa nba nyii nyun maŋ ni ki doo yoo nba, li taakpaak ni ki u la ki sanpaak loot, ki Yennu Seyeeŋ sik tɔɔn u paak ki naan ŋmann; 11 ki u gbat kunkɔr sanpaapo, ki kunkɔr na yet a "Fine tee n Bilonkak; fine ki n numm gboo." 12 Ŋanne ki Yennu Seyeeŋ te ki Yiisa kɔɔ muuk ni; ki u din be muuk maŋ ni ki saa jaŋ dapiinna, ki Sintaanii tan jammɔ. 13 Yiisa nan muuk ni bonkobite din be; ki Yennu malakanba sik ki teenɔ saauŋ. 14 Tɔn, ki bi tan soor Jɔɔnn wunba wuur niib Yennu nyunwuru na, ki kɔɔnɔ dansarik; ki li poorpo ki Yiisa saan Galilii tiŋ ni, ki mɔɔntir Yennu barŋanii 15 ki yeen a "Yoo baara, ki Yennu ŋaanaan baaru per na; li paak, teent man barŋanii maŋ yada ŋaan nyik i toonbiit." 16 Yiisa nba din somm Galilii mɔkgbeŋŋir kpiŋ na, ki u tan la Simonn nan u waarɔ Andru, ki bi lubin janlaauŋ mɔkgbeŋŋir na ni, kimaan bi din tee jansoorae. 17 Ki u yetib a "I waan man, ki n saa te ki yii daak niib kii teenin." 18 Li taakpaak ni ki bi nyik bi janlaant na, ŋaan fiir ki waau. 19 Ki u bia saan tɔɔnn po waaminna ki la Jeems nan u waarɔ Jɔɔnn, binba din tee Sebedii waas na, ki bi be bi burgbetir ni ki lik bi janlaant. 20 Li taakpaak ni ki u yiimm; ki bi nyik bi baa Sebedii nan u toontunna burgbetir maŋ ni, ŋaan waau. 21 Ki Yiisa nan ŋamm saan kɔɔ Kapenaum doo ni; ki Juu teeb foon daar tan baar, ki Yiisa kɔɔ Yennu jiantu diiuk ni, ki piin ki want niib Yennu maan. 22 Ki u wannu maŋ bakitib bonchiann, kimaan u wannib nan u tee daanɔ nba yen yiikoo nae, ki ki wannib nan sennu wannteeb nba tuu wantib biaŋinba na. 23 Ki li yoo na ki jɔɔ nba narinbiiuk be u ni na be Yennu jiantu diiuk na ni, ki yikin sanpaapo ki yeen a 24 "Fin Yiisa, Nasaref nirɔ na, timm nan fin nlee mantiki? A baar a a tan biiritee? N mi faa tee wunba; a tee Yennu Popeendaanɔ nae." 25 Ki Yiisa tian u paak a, "Ŋminin fuut, ŋaan nyi u ni." 26 Ki narinbiiuk na fuun jɔɔ na ki tan lu-u ŋaan yikin sanpaapowa, ki ji nyii u ni. 27 Li din teen bi kur yaarlituko, ki bi boi leeb a "Bee na? Wannsaann jiaki? U mɔk yiikoo ki yeen narinbiit, ki bi saak u mɔb." 28 Li taakpaak ni ki u sann mɔɔnt ki lin Galilii tiŋ ni kur. 29 Baa din nyii Yennu jiantu diiuk maŋ ni na, ki ŋɔɔ nan Jeems nan Jɔɔnn saan kɔɔ Simonn nan Andru ŋaak ni. 30 Ki Simonn dianpook dɔɔ nan gbanantouŋ, ki bi bet Yiisa u yiaru maŋ po. 31 Ki Yiisa saan soor u nuu ki fiinɔ kaan, ki u gbanantouŋ maŋ gbenn, ki u fiir ki teenib saauŋ. 32 Li daar maŋ daajonyiɔk, ki niib jii baatib nan binba ki narinbiit be bi ni na, ki baar namm Yiisa boor. 33 Ki doo maŋ ni niib kura lakin ki tan yia diiuk na tammɔb. 34 Ki u te ki niib bonchiann nba yiar yiarbooru kura paak, ki bia nyinn narinbiit niib bonchiann ni, ŋaan ki ki sak narinbiit maŋ n yet siari, kimaan bi din mi waa tee wunba. 35 Ki Yiisa dɔŋ nyii ŋaak na ni ki kojouk daa ki mɔ, ki kɔɔ muuk ni ki saa mei Yennu. 36 Ki Simonn nan u leeb na ji din lin ki loon u boor, 37 ki saa lau ki betɔ a "Sɔɔ kura loon bin la faa be siame." 38 Ki u yetib a "Ŋaant man ki tin saan digbana nba be ti tɔɔnn po na, ki n saa mɔɔnt barŋanii na leŋ mun, kimaan li paake te ki n baar." 39 Ki u din lin Galilii tingbouŋ ni kura, ki mɔɔntir barŋanii maŋ Yennu jiantu diit ni, ki bia nyint narinbiit niib ni. 40 Tɔn, ki gbaatsɔɔ baar Yiisa boor, ki tan gbaan u tɔɔnn ki barimɔ a "Li-i tee ki a loon, a saa fit te ki n ŋaauk na n gbenna." 41 Ki ninbaauk soor Yiisa, ki u tant u nuu ki siiu, ŋaan yetɔ a "N loon nna. A ŋaauk maŋ n gbenn," 42 Li taakpaak ni ki jɔɔ maŋ ŋaauk gbenn, ki u gbanant ji jen li bannu ni. 43 Ki Yiisa kpaanɔ fanu, 44 ki yetɔ a, "I mi ki a bet sɔɔ li barii; i saa jii a mɔŋ ki wann Yennu manntɔɔ na, ki mann mannu nba ki Yennu sɔkinii Moses din senn ki jiin gbaata paaku po na, ki sɔɔ kur n bann nan a ŋaauk maŋ set gbenna," ŋaan ji nyikɔ ki u saan. 45 Ŋanne ki jɔɔ na saan ki mɔɔnt u paaku maŋ labaar lokir kura po; ŋanne din te ki Yiisa ki fit nyi paanu ki kɔɔ digbansiar ni, ŋaan ji kpan be muuk ni; ki niib bonchiann nyi lokir kur po ki baat u boor.

Mak 2

1 Ki li din teen daa ŋaŋŋaa nna, ki Yiisa bia ŋmat Kapenaum; ki bi mɔɔnt nan u ŋmat ŋaak powa. 2 Ki niib bonchiann tikir, nan yiar bommintik nnawa tan kaa ŋaak maŋ ni, ki sɔɔ saa fit baar tammɔb ni; ki u mɔɔntir Yennu maan ki teemm. 3 Niib banna din tan jii baatsɔɔ ki u gbanant kpowa; ki bi paanɔ liaŋ paak a bin baar nanɔ Yiisa boor. 4 Bi din ki fit baar u boor kimaan niib nba din yabit na paak, ŋanne ki bi chɔɔ loot diiuk na yur a paak, ki sikin baatɔɔ na nan liaŋ ki tan birɔ Yiisa tɔɔnn. 5 Yiisa nba din la baa teenɔ yada biaŋinba na, ki u yet baatɔɔ na a "N bik, n nyik chab a biita." 6 Li yoo na ki Yennu sennu wanntesiab kar leŋ maŋ ki boi bi para ni a, 7 "Bee teen ki jɔɔ na piak nna? U yekint u mɔŋ nan Yennue. Ŋmee saa fit nyik chab nirɔ biiti, ki li ki tee Yennu kuukɔɔ kaa?" 8 Dudukit na nba din be bi para ni yoo nba na, ki Yiisa bann ki boib a "Bee ki i dukii linba na? 9 Maa yet baatɔɔ na a 'N nyik chab a biit' koo maa saa yetɔ a 'Fiit ki jii a liaŋ kii somm na,' maan munlee na lannpoe paarii? 10 Ŋaan n saa wanni nan min nisaarik Bik mɔk yiikoo tingbouŋ na ni, ki saa fit nyik chab nirɔ biit;" ŋanne ki u jiant bet wunba ki u gbanant kpo na a 11 "N beerae, fiit, ki jii a liaŋ kii kun a ŋaak ni." 12 Li taakpaak ni ki u fiir jii u liaŋ ki nyii bi kura ninbina ni; ki li bakitib bonchiann; ki bi piak dont Yennu sann ki yeen a "Ti daa ki mi la bakitnauŋ toona na booru." 13 Li poorpoe ki Yiisa bia ŋmat mɔkgbeŋŋir na kpiŋ, ki niib bonchiann tikir u boor ki lintɔwa, ki u wanntib Yennu labaar. 14 Ŋanne ki u tan gar tɔɔnn po ki saa la jasɔɔ nna ki u sann tee Liifai, wunba din tee Alfeus bik, ki u kar u toonn paak lampogaar diiuk ni; ki Yiisa betɔ a "Fiit kii waan." Ki u fiir ki waau. 15 Ki Liifai maŋ teen jaamm u ŋaak ni ki tur Yiisa; ki lampogaarteeb bonchiann nan biitdamm bonchiann lakin kar nan Yiisa nan u poorpoweiteeb ki di jeet. Bi din yab bonchiann ki waau. 16 Ki sennu wannteeb, binba din tee Farisiinba na, la ki Yiisa di jeet nan biitdamm nan lampogaarteeb na; ki bi boi u poorpoweiteeb na a "Bee ki u lakin di nan nibooru na?" 17 Yiisa nba gbat nna ki u betib a "Binba mɔk laafia ki loon tebtɔɔ; ŋaan binba yiar, ŋamme loon tebtɔɔ. N ki baar a n yiin popeendamm kaa, ŋaan n baar a n yiin biitdamme." 18 Ŋanne ki Jɔɔnn, wunba din wuur niib Yennu nyunwuru na poorpoweiteeb nan Farsiinba din lorin mɔi; ki nisiab baar ki boi Yiisa a "Jɔɔnn poorpoweiteeb nan Farsiinba poorpoweiteeb lorin mɔi; bee teen ki a poorpoweiteeb ki lorimi?" 19 Ki Yiisa boib a "Poochiann-i be, saamm saa lor mɔi yoo nba ki pooyookir sɔrɔ daa be bi boor ni nawa-a? Aaii. Pooyookir sɔrɔ nba daa be bi boor ni na, bi kan lor mɔi. 20 Ŋaan yoo baat ki bi tan saa nyinn pooyookir sɔrɔ na bi boor; li yooe ki bi saa lor mɔi. 21 "Sɔɔ kan sak jii chabpaann ki lik takperi; li-i tee ki u teen nnaie, chabpaann na saa pat takper nae, ki li patimin saa ŋamm pukin. 22 Nnae mun ki sɔɔ kan jii dapaanin ki liak dalenkper ni; li-i tee ki u teen nnaie, ki dapaanin na tan mɔ yoo nba li saa yeer dalenkper nae, ki daan maŋ n mɔɔn yann, ki linlenn na n mun yeer. Li paak, bi jikit dapaanin ki liakit linlenpaann nie." 23 Tɔn, Juu teeb foon dasiar, ki Yiisa nan u poorpoweiteeb gaar dii kpaab ni. Baa saa maŋ ki u poorpoweiteeb na toktir dikara ki pinii ŋman ŋaan saa. 24 Ŋanne ki Farisiinba na boiɔ a "Gotir, bee ki bi tuun linba ki ti sennu ki chab a tii tuun foon daari?" 25 Ki u yetib a "I ki mi karin Yennu gbouŋ ni Defid nba din tun biaŋinba-a? Yoo nba ki kon din gbat ŋɔɔ nan u jɔɔmu, ki bi ki mɔk jeet na, 26 ki u din kɔɔ Yennu ŋasaakak ni, ki saa jii boroboro nba ki bi tur Yennu na ki ŋman, yoo nba ki Abiata din tee mannteeb yudaanɔ na. Ki sennu na din ki chab nan sɔɔ n di boroboro maŋ see Yennu mannteeb kuukɔɔ; ŋaan Defid maŋ din ŋmame, ki bia tur u jɔɔmu na gbaa ki bi mun ŋman." 27 Ki Yiisa ŋamm yetib a "Nisaarik sommir paake ki Yennu senn foon daar; li ki tee foon daar paak kaa ki u din nan nisaariki. 28 Li paak, min nisaarik Bike tee foon daar na Yomdaanɔ."

Mak 3

1 Ŋanne ki Yiisa ŋmat kɔɔ Yennu jiantu diiuk ni, ki jasɔɔ be leŋ ki u nuu kpo. 2 Ki nisiab be leŋ ki gorii Yiisa, a bin laan u saa te ki nuukpeenn daanɔ maŋ n paak foon daarii, ki bin pak biirɔ. 3 Ŋanne ki Yiisa yiin nuukpeenn daanɔ na a "Baat nna," 4 ŋaan boi niib na a "Ti sennu chab a tii sommit niib foon daar koo ti biiribe? Ti fat niib ki lu koo ti kpibi?" Ŋaan ki bi ŋmina. 5 Ki u got ki lintib nan wutoor, kimaan u par din biir bonchiann bi ninkoonii na paak; ki u ŋmant ki bet jɔɔ maŋ a "Tantir a nuu maŋ." Ki u tant, ki li la laafia. 6 Li yoo na ki Farisiinba ŋmat nyii, ki ŋamm nan Bat Herod poorpojɔɔmu lor soor nan leeb baa saa teen biaŋinba ki kpi Yiisa. 7 Ki Yiisa nan u poorpoweiteeb fiir ki sik mɔkgbeŋŋir na kpiŋ, ki nibur waa u poor po, binba din nyii Galilii nan Judea 8 nan Jerusalem nan Idumea nan Jɔɔdann mɔk-pootir, nan Taya nan Saidonn tingbouŋ ni, ki yab bonchiann ki tikir u boor; baa gbat nan u tuun toongbeŋŋa na paak, ki bi baar u boor mɔkgbeŋŋir na kpiŋ. 9 Ki u bet u poorpoweiteeb a bin la burgbetir ki turɔ ki wun kɔɔ kar ki wann niib maŋ Yennu maan, ki nibur na tan daa tutɔ, 10 kimaan waa din te ki baatib bonchiann paak na paake ki binba kur yiar ji nakii a bin siiu. 11 Narinbiit nba din tuu lau yoo nba kur, bi din tuu baa u tɔɔnne ki faa wuyikiŋ ki yeen a "Fine tee Yennu Bija." 12 Ki u kpaamm nan ninmɔnn a bi daa mɔɔntirɔ ki teen niibi. 13 Li poor po ki Yiisa doo jɔɔr paak ŋaan yiin binba ki u loon na, ki bi baar u boor. 14 Ki u gann niib piik nan banlee, ki yib toomiinba, a bii be u boor ki wuu tuumm ki bii mɔɔntir u barŋanii, 15 kii bia kii mɔk yiikoo kii nyint narinbiit niib ni. 16 Waa din gann niib nba piik nan banlee na, bi sanae na: Simonn, wunba ki Yiisa din purɔ Piita na; 17 nan Jeems nan u naa bik Jɔɔnn binba din tee Sebedii waas na, ki Yiisa purib Boanejes, ki li paak tee satianii waas; 18 nan Andru nan Filip, nan Batolomiu, nan Matiu, nan Tomas, nan Jeems wunba tee Alfeus bija na, nan Tadeus, nan Simonn, wunba din loon ŋamm Juu teeb-ii yen bi mɔŋ na, 19 nan Judas, wunba din tan nyii Yiisa poor na. 20 Li poor po ki Yiisa kun; ki nibur tikir ŋɔɔ nan u poorpoweiteeb boor, ki bi tan kɔŋ yaak nan jeet dinu. 21 U ŋaateeb nba din gbat nna, ki bi baar a bin soorɔ, kimaan niib din yeen a u waate. 22 Ki Yennu sennu wanntesiab nba nyii Jerusalem na mun din yet a "Narinbiit bat Beelsebul nae be u yur ni, ki u nyint narinbiit niib ni ŋɔɔ Beelsebul yiikoo ni." 23 Ki Yiisa yiin wannteeb maŋ a bii baat na, ŋaan yimm barjokit ki boib a "Sintaanii saa sak nyinn u mɔŋa-a? 24 Naan niib-i ŋmat kɔn ki tookit bi leeb, bi naan maŋ kan fit seti. 25 Ki ŋaak niib-i ŋmat kɔn nan leeb, bi ŋaak maŋ kan fit seti. 26 Ki Sintaanii-i ŋmat kɔn nan u mɔŋi, u kan fit seti, u joontue na. 27 "Sɔɔ kan fit kɔɔ paŋ daanɔ ŋaak ni ki saa jan u mɔkinti, see ki u dɔŋ lorɔ ŋaan yen ji fat u ŋaak maŋ." 28 Ki Yiisa tukin ki yetib a "Barmɔniie ki n beeri na, Yennu saa nyik chab nisaarii bi biit nan bi barbiit kura; 29 ŋaan wunba kur piak barbiit ki teen Yennu Seyeeŋ, Yennu kan mi nyik chab li daanɔ faba." 30 Linba din te ki Yiisa pak nna maŋ tee nnae, baa din yet a "Narinbiiuko be u yur ni." 31 Li yoo na ki Yiisa naa nan u waarii baar ki see nanyer po, ŋaan tun sɔɔ a wun yiinɔ na. 32 Ki nibur kar ki lintɔwa, ki u be sinsuuk ni; ki bi yetɔ a "A naa nan a waarii be nanyer po ki loona." 33 Ki u boib a "Ŋmee daa tee n naa, ki lamme mun tee n waarii?" 34 ŋaan got binba kar u boor na ki yet a, "N naa nan n waariie be nna na. 35 Wunba kur tuun Yennu loomm, ŋɔɔe tee n ninja nan n niipoo nan n naa."

Mak 4

1 Ŋanne ki Yiisa yaan piin ki want niib Yennu maan Galilii mɔkgbeŋŋir kpiŋ, ki nibur baar u boor. Waa la ki nigbanu na yabit na, ki u kɔɔ burgbetsiar ni, ki sik nyun ni, ŋaan ki niib na biar see gbingbann. 2 U din yiimm barjokite ki wantib barii bonchiann. 3 U din yin a, "Jasɔɔ din doo u kpaab a wun saa bur tan. 4 Waa din buur na, ki bonboorii na yenninba yat baa sanjouk ni, ki nɔɔnii wei tɔkir. 5 Ki leer mun baa tanpuut paak, siaminba ki tant ki yabi. Tant nba ki yab na, ki li pia ki kpaat yiama, 6 ŋaan yonnu nba tan toŋ yoo nba, ki li jɔɔk. Laa din ki fit sikin jiina na paak, li kur din kpoe. 7 Ki leer mun baa kunkonii jiina ni, ki tan lakin pia ki kpaat nan kunkonii na, ŋaan ki kunkonii na ŋmabirir ki li ki fit nan. 8 Ŋaan ki leer mun baa tiŋŋaŋ ni, ki pia, ki kpaat fanu, ki nan naaŋŋauŋ, ki yenninba nan bin piinntataa, ki leer nba mun nan piinloob loob, ki siab mun nan kobik kobik." 9 Yiisa nba yin barjouk na ki gbenn yoo nba ki u yet a "Wunba mɔk tuba ki saa gbat, wun gbiint." 10 Li poorpoe ki nisiab nba din tuu be Yiisa peŋ, ŋamm nan u poorpoweiteeb piik nan banlee na, baar u boor yoo nba ki u be u kuukɔɔ na, ki tan boiɔ barjokit na paak. 11 Ki u yetib a "Yimm ŋarin, Yennu fiit woonin ni barii nba jiin u naan po na ki wanniiwa, ŋaan binba ki be i ni na ŋarin gbia bonsiar kura barjokit nie 12 a 'Bin got ŋaan daa laat, ki bia gbiint ŋaan daa bant li paaki; kimaan bi-i la ki bann bi saa jen ki baar Yennu boore ki wun nyik chab bi biit.'" 13 Ŋanne ki Yiisa boib a, "I ki bann barjouk na paakii? Ki nlee ki i ji saa mi bann barjokit paaki? 14 Tanburtɔɔ na tee nan wunba piak Yennu maan nae. 15 Ki nisiab naan bonboorii nba baa sanjouk paak na; bi-i gbat Yennu maan yoo nba, ŋaan Sintaanii tuu baar ki nyinnir bi para nie yiama. 16 Nisiab mun naan bonboorii nba baa tanpuut paak nae; bi tuu gbat ki gaar maan maŋ nan parpeenne, 17 ŋaan maan maŋ ki fit siik baa jiina bi para ni fanu, li paak bi ki diar ki yuki; yoo nba ki niib dintib fara, koo mukisuk tan baarib maan maŋ paak, bi tuu lue yiama. 18 Ki nisiab mun bia naan bonboorii nba baa kunkonii ni na. Bii gbat maan maŋ, 19 ŋaan tingbouŋ na daamii, nan mɔkint loomm, nan bonbooru booru lomm tuu kɔɔ nyakin maan maŋe ki li kan nami. 20 Ŋaan nisiab ŋarin tee nan bonboorii nba tuu baa tiŋŋaŋ ni nae. Bi gbia maan maŋ ki gaan, ki li naan. Siab naan piinntataa, ki siab naan piinloob loob, ki siab mun bia naan kobik kobik." 21 Ki u bia boib a, "Sɔɔ mi ki kɔɔ nan fitir ŋaak ni ki chibin ŋmaŋ li paak, koo ki gurir gado lɔuŋ ni-i? Aaii. See ki u jiir ki tɔɔn bonsiar nba fɔk paak. 22 Barii nba kur woo, see ki li tan woot nyii paanu, ki linba kur mun liik, see ki li likit. 23 Wunba mɔk tuba ki saa gbat, wun gbiint." 24 Ki u bia yetib a, "Gbiintir man, ŋaan kii mi yaa gbia maan biaŋinba. Yaa gbat biaŋinba, nnae mun ki Yennu saa turi u maan ki lin gar nna; 25 wunba gbat ki gaar boŋŋann, ŋɔɔe saa ŋamm gaar ki pukin, ŋaan wunba ki gbiintir, u saa kɔŋ linba ki u mɔk waan nawa." 26 Ki Yiisa bia ŋamm yet a, "Yennu naan naan nnae: li tee nan nirɔ nba tuu bur tan u kpaab ni, 27 ki tuu dɔɔr gɔɔn nyiɔk, ki tan fiir sanyiɔk ni, ki sɔɔ bonboorii na kura pia ki kpaata; ŋaan ki u ki mi laa tee biaŋinba ki pia kpaatiri. 28 Tiŋ nae tuu te ki bonboorii maŋ pia ki kpaatir ki bia naan bin. Nyakire tuu nyi sinsinn, li poor po ki faat n nyi, ki dipukaa n nyi ki wei. 29 Dii maŋ-i beer yoo nba, kpaarɔ na ji tuu piin li jaamue nan u dijaanjuk, kimaan jaamu yoo ji baare na." 30 Linba na poor po ki Yiisa boib a "Ti daa saa bikin Yennu naan nan lannpoe? Ti saa yin barjouk lanne ki lin yent niib nunii po? 31 Li tee nan kanpɔtik binn nba ki sɔɔ jii ki bur kpaab ni, ki li waar ki gar tingbouŋ na bonboorii kur, 32 ki li tan pia ki kpaat ki ji yab tiinii kura, ki mɔk yiingbeŋŋa; ki nɔɔnii ji tia tiat li yiinii na paak." 33 Yiisa din yin barjokit bonchiann nan linba na na, ki nyint Yennu maan ki teen niib baa saa fit bann biaŋinba. 34 U ki mi pak namm maan see barjokit kuukɔɔ. Ŋaan u din tuu tan ŋamm wann u poorpoweiteeb barjokit maŋ kur paak, yoo nba ki bi tuu tan biar be bi kuukɔɔ na. 35 Li daar maŋ daajoouk ki Yiisa bet u poorpoweiteeb a, "Ŋaant man ki tin poot mɔkgbeŋŋir na pootir." 36 Li yooe ki bi nyik nibur na, ki kɔɔ waa kar burgbetir nba na ni; ki ŋamm nan ŋɔɔ lakin saan. Ŋaan burgbetlia bia din be leŋ. 37 Baa be burgbetir maŋ ni ki ki mi yiitian, ŋamm tan sɔɔ wounpaaruk fikite, ki nyunpana piin liat ki kɔɔ burgbetir maŋ ni, ki li tan yaa lin gbee. 38 Li yoo Yiisa din dɔɔ burgbetir maŋ poor po ki kpaak yukpaktir ki gɔɔnt. Ŋanne ki u poorpoweiteeb fiinɔ ki yaa, "Chanbaa, taa yaa ti kpo na, a baka kaa ti po-o?" 39 Ki u fiir set ki tian wounpaaruk na paak, ki bia bet nyunpana na mun a "Dɔɔt soon nna." Ki wounpaaruk maŋ nyik, ki nyun na mun ji dɔɔ ki muu dik dik. 40 Ŋanne ki u boi u poorpoweiteeb maŋ a "Bee ki i tiin jaŋmaanii? I bia daa ki mɔk yada-a?" 41 Ki jaŋmaanii soorib bonchiann, ki bi boi bi leeb a "Jaboor bee na? Wouŋ nan nyunpana gbaa saak u mɔbe."

Mak 5

1 Ki Yiisa nan u poorpoweiteeb poot Galilii mɔkgbeŋŋir na gbingbanleer po, Gerasa tingbouŋ ni. 2 Yiisa nba nyii burgbetir na ni yoo nba, li taakpaak ni ki jasɔɔ nyii kaat ni ki chetɔ. Narinbiiuk din be jɔɔ na ni, 3 ki u dɔɔ kaat na ni. Sɔɔ din kaa ki saa fit baanɔ banti, ki bia kan fit lorɔ jarit gbaa; 4 kimaan bi-i baan u nii nan u taa bant, ŋaan u din tuu yan bant na kure ki bia biir kut nba be u taa ni na. U din mɔk paŋ bonchiann, ki sɔɔ ki fit gɔi-ɔ. 5 Nyiɔk nan yonnu ni kur ki u lin kaat nan jɔɔt ni ki yikin ŋaan dia tana ki ŋma u mɔŋ. 6 Waa din daa be banfɔkira ŋaan la Yiisa yoo nba, ki u tin ki tan gbaan Yiisa tɔɔnn, 7 ŋaan yikin sanpaapowa ki yet a "Yiisa, Yabint Yennu Bija, min nan fin nlee mantiki? Yennu paak ki n barima, a daa mukisimi." 8 U yet nna, kimaan Yiisa poŋ yakii nan narinbiiuk na a "Fin narinbiiuk na, nyimin jɔɔ na ni." 9 Li poorpo ki Yiisa boiɔ a, "A sannii?" Ki u jiin a "N sann tee Bure, kimaan ti yab bonchiann." 10 Ki narinbiit na te ki jɔɔ na barin Yiisa a u daa nyintib ki bi saa tingaŋ ni. 11 Doorii bonchiann din see jɔɔr na paak ki di. 12 Ki narinbiit na barin Yiisa a, "Chabint ki tin saan kɔɔ doorii na ni." 13 Ki Yiisa chabib sɔnu, ki bi nyii jɔɔ na ni, ki kɔɔ doorii na ni. Ki doorii na tin sik mɔkgbeŋŋir na ni, ki dii nyun, bi kur. Doorii na kann din teen nan tusaa ŋanlee nawa. 14 Ki binba guu doorii na fiir chiar ki saa mɔɔnt li labaar doo ni nan kpaant ni. Ki niib baar a bin la linba kur tun maŋ. 15 Baa baar Yiisa boor yoo nba ki la jɔɔ nba ki narinbibur tuu be u ni na kar leŋ nan laafia nan u dudukit kura fanu ki ji lia tiat, ki jaŋmaanii soorib. 16 Ki binba lar na betib linba tun ki tur jɔɔ na, ki bia betib doorii na labaar. 17 Ŋanne ki niib na ji barin Yiisa a wun nyi bi tiŋ ni. 18 Yiisa nba din tee siir a wun kɔɔ burgbetir na yoo nba, ki jɔɔ nba ki Yiisa nyinn narinbiit u ni na barimɔ a, "Ŋaant min nan fin n lakin saan." 19 Ŋaan ki Yiisa ki saki, ki betɔ a, "I ŋmat kii kun a niib boor ki saa betib Yennu nba tina ninbaauk ki bia tun toonjaann ki tura biaŋinba." 20 Ŋanne ki jɔɔ na ji lin tingbouŋ nba ki bi yir Doi-piik na ni, ki mɔɔntir linba kur ki Yiisa tun turɔ maŋ, ki li teen sɔɔ kur yaarlituk. 21 Li poorpo ki Yiisa bia ŋmat poot mɔkgbeŋŋir na gbingbanleer. Waa saa baar mɔk-pootir na, ki nibur tikir ki lintɔ. 22 Ki jasɔɔ baar leŋ, ki u sann yi Jairus; u din tee Yennu jiantu diiuk ni saakɔsɔɔe. Jɔɔ na nba la Yiisa yoo nba ki u gbaan Yiisa tɔɔnn, 23 ki barimɔ nan u par kur a "N bonpobike yiar ki per kuuma. A kan baar na ki tan yii a nii u paak ki wun lek la laafia ki tinnii?" 24 Ŋanne ki ŋɔɔ nan Yiisa ji saa u ŋaak ni. Ki nibur mun bia waa ki muk ki tut Yiisa. 25 Poosɔɔ nna mun din be ki siik fabouŋ ki tan jaŋ bina piik nan ŋanlee, 26 ki lin tebteeb bonchiann boor a wun teb u mɔŋ, ki tan gbenn u faar, ŋaan ki yiaru na bia pukii yoo kur. 27 Ki poo na tan gbat Yiisa po; li paak, ki u baar nibur na ni, ki waa u poorpo, ŋaan bikii u par ni a 28 "Mi-i lekii sii u liatir kuukɔɔ gbaa, n saa la laafiawa;" 29 Ki set tan sii u liatir. Li taakpaak ni ki u fabouŋ na jit; ki u bann u gbanant ni nan u la laafiawa. 30 Li yoo ki Yiisa bann u par ni nan paŋ nyii u niwa. Ki u jiant boi niib na a "Ŋmee sii n liatiri?" 31 Ki u poorpoweiteeb na mun ŋmant boiɔ a, "Fin la nibur na muk nna, ŋaan ki a boit a ŋmee sii a ni?" 32 Ŋaan ki u lek bia gorii lintir, a wun la nirɔ nbae siiu. 33 Poo na nba bann linba tun u gbanant ni na paak, ki jaŋmaanii soorɔ, ki u jekir yɔr yɔr, ki baar tan gbaan Yiisa tɔɔnn, ki betɔ barmɔnii kur. 34 Ŋanne ki Yiisa betɔ a "N niipoo, faa teenin yada na paake te ki a la laafia. I saa nan parmaasir, a yiaru kur gbenna." 35 Yiisa nba daa piak linba na ki siab nyii Jairus na ŋaak ki baar yet Jairus maŋ a, "A bonpobik na taan kpowa. Bee ki a ji daamii Wanntɔɔ na?" 36 Ki Yiisa lek teen nan u ki gbat na, ŋaan bet Jairus maŋ a, "Daa tiin jaŋmaanii. Teentin yada." 37 Ŋanne ki Yiisa ki sak ki sɔɔ n weiɔ saan ŋaak na ni, see Piita nan Jeems nan u waarɔ Jɔɔnn. 38 Baa din baar ŋaak na ni yoo nba ki Yiisa gbat fuut nan kpemɔnii. 39 Ŋanne ki u kɔɔ boib a "Bee fuute mani? Bee ki i bui? Bik na ki kpo kaa, u gɔɔnte." 40 Baa gbat u barii na ki bi laau. Ŋanne ki u ber nyinnib, ŋaan jii bik na baa nan u naa ki pukin u poorpoweiteeb bantaa na po, ki bi kɔɔ diiuk ni, bik na nba dɔɔ siaminba na. 41 Baa kɔɔ yoo nba, ki u soor bik na nuu ŋaan yetɔ a "Talita kumi." Li paak tee, "Bonpobik, n yeen fine, fiit." 42 Li taakpaak ni ki bonpobik na fiir set kakibii, ki somm lin. (U din tee bina piik nan ŋanlee bike.) Ki li din yaar litib bonchiann. 43 Ŋaan ki Yiisa kpaamm a bii mi ki bin yet sɔɔ, ki bia betib a bin tur bik na jeet ki wun di.

Mak 6

1 Li poorpoe ki Yiisa nan u poorpoweiteeb nyii leŋ ki ŋmat kun u mɔŋ doo ni. 2 Ki foon daar ki u tan kɔɔ Yenjiantu diiuk ni a wun wann nibur nba be leŋ na Yennu maan. Niib na nba gbat u wannu na ki li yaarlit bi kura, ki bi boi leeb a, "Yanboor lannpoe ki u mɔk mani? U teen nlee ki tuun bakitnauŋ toonjaana na? U la linba na kur lee? 3 Kanpinta na kaa na-a? Meeri bija na kaa-a? Ŋɔɔ kaa tee Jeems nan Joosef nan Judas nan Simonn yɔɔrɔ na-a? U niipoob kaa be nna na-a?" Li paak ki bi y‡tɔ. 4 Ŋanne ki u betib a "Yennu sɔkinii ki kɔŋŋit baakir see u mɔŋ mɔŋ doo ni nan u tiɔŋ niib boor ni, nan u mɔŋ mɔŋ ŋaak ni." 5 U din ki tun bakitnauŋ toonjaana leŋi, see baatib baŋŋa nnae ki u din yii u nii bi paak, ki bi la laafia, 6 kimaan niib maŋ nba ki teenɔ yada na; ki li yaar litɔ bonchiann. Ŋanne ki Yiisa lin digbanbis ni ki want niib Yennu maan, 7 ki din tan lakin u poorpoweiteeb piik nan banlee na ki turib paŋ a bii nyint narinbiit niib ni, ki tumm banlelee; 8 ki betib a "Yoo nba ki i saa, i daa jikit siar ki saa, see patii kuukɔɔ. I daa dia jeeti, i bia daa dia paka, i bia daa wuu likirii. 9 Yi pir taasaat, ŋaan i bia daa jikit liata ki pukii." 10 Ki u bia betib a "Li-i tee ki i baar ŋaak nba ni, ki bi gaari, yii be leŋ nan i nyinu daar. 11 Li-i tee ki i baar doo nba ni, ki niib na ki gaari, ki bia ki gbiintir i mɔmaan, yin nyi doo maŋ ni, ki pit i taapant ni tant bir li doo ni, ki lin teen siarbiiuk ki turib." 12 Ki u poorpoweiteeb fiir saan ki mɔɔntir Yennu maan ki beer niib a bin nyik bi toonbiit, 13 ki bia nyint narinbiit niib bonchiann ni, ki bia jii kpan ki sɔɔr baatib bonchiann ki bi la laafia. 14 Tɔn, Bat Herod din gbat Yiisa labaar, kimaan u sann din doo bonchiann. Ki nisiab yeen a "Jɔɔnn nba daan wuur niib Yennu nyunwuru nae fiir kuun ni. Ŋanne te ki u mɔk paŋ ki tuun bakitnauŋ toona na." 15 Ki siab mun yaa "U tee Yennu sɔkinii Elaijae;" ki leeb mun bia yaa "U tee Yennu sɔkiniie nan yaayoo ni sɔkiniinba na yenɔ." 16 Bat Herod ŋarin nba gbat nna yoo nba ki u yet a "U tee Jɔɔnn, wunba ki n daan te ki bi pot u yur nae, ŋaan ki u jen be u manfoor ni." 17 Kimaan Herode daan te ki bi soor Jɔɔnn ki baanɔ bant ki kɔɔnɔ dansarik, ŋɔɔ Herod waarɔ Filip ŋaapoo paak; ki bi din yi poo maŋ Herodias, ki Herod fatɔ ki kɔɔn. 18 Jɔɔnn din tuu beer Herod a Yennu sennu ki chabɔ nan wun fat u waarɔ ŋaapoo ki kɔɔni. 19 Linba na paake Herodias ji din nƒn Jɔɔnn, ki loon wun kpiu, ŋaan ki ki fiti, kimaan Herod mɔŋ mɔŋ din ki saki. 20 Herod din tiin Jɔɔnn, kimaan u mi nan Jɔɔnn tee popeendaanɔ nba tiin Yennue. Li paak ki u tinn Jɔɔnn. Ki Jɔɔnn nba mɔɔntir Yennu maan na, ki li ŋmat Herod yan bonchiann, ŋaan ki u lek gubin ki gbiintir u maan maŋ. 21 Li poorpo ki Herodias lora din tan soor Jɔɔnn. Herod maaru jaamm daar nba tan baar, ki u yiin u naan kpaaka, nan kunkɔnkɔnna yudamm, nan Galilii tiŋ ni saakab kur. 22 Ŋanne ki Herodias bipoo baar ki waa siak, ki Bat Herod nan u saamm para penn, ki u boi bonpobik maŋ a "Bee ki a loon ki n turani? N saa tura linba kur ki a loon," 23 ki tur bonpobik na mɔsonn a, "N saa tura linba kur ki a loon, hali li-i lekii baar ki n tura n naan na bɔkir gbaa." 24 Ŋanne ki bonpobik na nyii, ki saa boi u naa a "N taan saa yetɔ a n loon bee na?" Ki u naa jiin a "Betirɔ a a loon Jɔɔnn nba wuur niib Yennu nyunwuru na yure." 25 Li yoo na ki bonpobik na ŋmat yiama ki saan Bat Herod boor ki betɔ a "N loon Jɔɔnn nba wuur niib Yennu nyunwuru na yure ki a kpeen tatilaauk ni ki turin mɔtana." 26 Ki linba na tur bat na parbiir bonchiann, ŋaan u ji din kan fit y‡t bik maŋ nba loon linba na, kimaan u dɔŋ senn mɔsonn saamm na boora. 27 Ŋanne ki u tun kunkɔnkɔnnɔ li taakpaak ni, ki betɔ a wun jen nan Jɔɔnn yur ki turɔ. Ki kunkɔnkɔnnɔ na saan dansarik ni ki saa pot Jɔɔnn yur, 28 ki kpeenn tatilaauk ni, ki jen nann ki tan tur bonpobik maŋ, ki u mun jiir ki tur u naa. 29 Jɔɔnn poorpoweiteeb nba gbat nna yoo nba, ki bi baar ki tan jii u gbanant ki pii. 30 Li poorpoe ki Yiisa toomiinba maŋ ŋmat jen u boor ki tan yetɔ linba kur ki bi tun ki bia wann niib. 31 Nigbouŋ lek din tut, ki siab baat ki siab ŋmat, ki Yiisa nan u poorpoweiteeb kɔŋ yaak nan bin di jeet. Li paak ki u betib a "Ŋaant ki ti yaat saan muuk ni, ti kuukɔɔ, ki foi waan." 32 Ŋanne ki bi kɔɔ burgbetir na ni, bi kuukɔɔ, ki poot saan muuk ni. 33 Baa din saa yoo nba, ki niib bonchiann lab ki bannib, ki nyii bi doi ni ki tin kokin mɔkgbeŋŋir na kpiŋ ki dɔŋ chetib. 34 Yiisa nba tan nyii burgbetir na ni, ki u la ki nigbanu na poŋ tikir ki muk, ki ninbaauk soorɔ bonchiann, kimaan bi binbeŋ din tee nan pei nba ki mɔk pekpaarik nae. Ki u piin li yoo ki wantib maan bonchiann. 35 Yoo nba tan gar, ki u poorpoweiteeb baar u boor ni ki yetɔ a "Yoo gara, ki nna na mun tee muuk nie. 36 Nyikin niib maŋ ki bin saan doo ni nan digbanbis nba kpia na ni ki la jeet ki daa ki di." 37 Ŋanne ki u mun jiin yetib a "I mɔŋ n turib jeet ki bin di." Ki bi ŋmant boiɔ "A loon ki ti jii salimpeena b kobii ŋanleewa ki saan daa jeet ki tan turib ki bin di-i?" 38 Ki u boib a "I mɔk boroboro kuna ŋaŋŋae? I saa got man." Baa saan got ki bann yoo nba ki bi jen ki tan betɔ a "Li tee boroboro kuna ŋaŋŋmue nan janbis ŋanlee." 39 Ŋanne ki u bet nibur na a bin bɔkit kar mɔpaauŋ paak wora wora. 40 Ki bi bɔkit koonn kobik ki kar paabu piiŋŋmuŋmu. 41 Ki u jii boroboro na, nan janii ŋanlee na, ki yaat got sanpaapo, ki tur Yennu niipoouk, ŋaan ŋmit ŋmit boroboro kuna na ki tur u poorpoweiteeb a bin tor niib maŋ; ki u bia ŋmit ŋmit janii ŋanlee na, ki bi tor sɔɔ kur. 42 Ki sɔɔ kur dii ki tan tenn. 43 Ki u poorpoweiteeb lakin jeet nba tenn na, ki li gbee kpanchubit piik nan ŋanlee. 44 Jab nba din dii jeet maŋ din tee tusaa ŋaŋŋmue. 45 Linba na poorpoe ki Yiisa te ki u poorpoweiteeb na kɔɔ burgbetir ki gar u tɔɔnn ki poot mɔk-pootleer po, ki saa Befsaida; ŋaan ki ŋɔɔ biar a wun chab nibur na. 46 Waa chab niib maŋ gbenn yoo nba ki u doo jɔsiar paak ki mei Yennu. 47 Li din tan baar yiɔk, ki burgbetir na daa be nyun sinsuuk ni, ŋaan ki u mun daa be jɔɔr maŋ paak u kuukɔɔ, 48 ki tan la ki u poorpoweiteeb gbaa nan burgbetir kanu, kimaan bi din kan tookit wouŋo. Ŋanne ki u fiir somm nyun paak ki saa bi boor sanyafaar. Waa tan baat yoo nba, ki u teen nan u yaa wun garibe na. 49 Ki bi lau ki u somm nyun paak, ki bi mi a li tee kpeemɔe, ki yikin sanpaapowa, 50 kimaan bi kur lauwa, ki jaŋmaanii soorib bonchiann. Li taakpaak ni ki u yetib a "Cheen i para man. Li tee mine; i daa tiin jaŋmaanii," 51 ŋaan kɔɔ ki pukimm burgbetir maŋ ni; ki wouŋ na ji ŋmin soon. Ki li bakitib bonchiann, 52 kimaan bi daa din ki bann waa won jii boroboro ki tun bakitnauŋ toonn biaŋinba na paaki. Bi dudukit daa din ki soorir fanu. 53 Baa tan nyii mɔkgbeŋŋir na ni ki doo kunkonn paak Genesaret tiŋ ni na, ki bi lor bi burgbetir ki senn. 54 Ki leŋ niib na nba la Yiisa, ki bi bannɔ yiama, 55 ki tiin saa tingbouŋ maŋ loka kur po ki jikit bi baatib ki baat u boor. Baa tuu gbat ki u be siaminba kur bi din tuu jii bi baatib lianii paake ki saan namm u boor. 56 Wuu dɔkit doi nan digbanbis nba kur ni, ki niib bonchiann dia bi baatib ki tookitɔ nan dai niwa, ki barimɔ a wun te ki bi baatib n lek sii u tiat mɔgbana, ki binba din siir na kur la laafia.

Mak 7

1 Tɔn, ki Farisiinba nan sennu wannteeb din tan nyii Jerusalem ki baar Yiisa boor. 2 Ŋanne ki bi la ki u poorpoweitesiab ki waa bi yeejamm kaar, kimaan bi di jeet, ŋaan ki nit bi nii. 3 (Kimaan Farisiinba nan Juu teeb nileeb kur din tuu ki gbia bi di jeet see ki bi nit bi nii fanu nan bi yeejamm kaar nba din want biaŋinba na. 4 Li-i tee ki bi daa siar daak ni, bi ki di see ki bi tan wuur sinsinna ki fit lian di. Bi bia din tuu dia kaar bonchiann ki pukin linba na po. Bi din tuu dia kaar nba jiin nyunnyuŋmanii sokiru, nan bi boba sokiru, nan bi dundɔɔnii wuuru poe.) 5 Ki Farisiinba nan sennu wannteeb maŋ boi Yiisa a "Bee ki a poorpoweiteeb na ki dia ti damm kaar nba ki ti yeejamm din wannit na, ŋaan kpan gbia bi di jeet ki ki nit bi nii?" 6 Ki Yiisa jiin yetib a "Yennu sɔkinii Aisaya nba din yet linba po na set tee mɔniie. I tee kpinkpannii damme nan waa din sɔb biaŋinba na a 'Yennu yet a: Niib na teenin baakir bi mɔi ni kuukɔɔe, ŋaan bi para set fɔk nanin bonchiann. 7 Bi jiantirin yanne, kimaan bi dia nisaarik kaar ki want niib, ki yaa li tee min Yennu sennue.'" 8 Ki Yiisa tukin yet a "I bakin Yennu sennue ki bir siar powa, ŋaan sak nisaarii kaar nba want linba. 9 Yimm, i lek y‡t Yennu sennu weiu, a yin dia i mɔŋ mɔŋ kaare; 10 kimaan Moses din senn a, 'Sɔɔ kur n teen u naa nan u baa baakir; ki wunba sukir u naa koo u baa, bin kpan kpiu.' 11 Ŋaan yimm ŋarin yaa nirɔ-i bet u naa koo u baa a 'Maa bo saa tura linba na kpant Yennu yara;' 12 a u ji mɔk yaak ki kan somm u naa koo u baa. 13 Yaa want niib kaar maŋ biaŋinba na, ŋaan i y‡en Yennu bariie na. I bia tee bonsia bonchiann ki li naan linba na booru." 14 Ŋanne ki Yiisa ŋamm yiin nibur na u boor ki tan betib a "Yimm nba kur be nna na, gbiintir man ki bann maa yaa n pak linba na paak. 15 Bonsiar kaa ki saa kɔɔ nisaarik mɔb ni ki teen jakint u par ni. Ŋaan linba nyi nisaarik par nie fit teenɔ jakint. 16 Wunba kur mɔk tuba, wun gbiint." 17 Waa betib nna gbenn yoo nba ki u nyik niib maŋ, ŋaan saan kɔɔ ŋasiak nna ni. Ki u poorpoweiteeb boiɔ a wun wannib barii maŋ paak. 18 Ŋanne ki u boib a, "I mun bia lek daa tee yankpeenae? I ki mi a linba kur ki nisaarik di, li ki teenɔ jakintii? 19 kimaan li ki kɔɔ u par ni kaa, ŋaan u poor nie ki li kɔɔ, ki bia kpant bint ki nyi." (Waa yet biaŋinba na want nan jeet kura ŋan.) 20 Ki u yet pukin a, "Linba set nyi nisaarik par nie teenɔ jakint, 21 kimaan u par nie ki dudukbiit baat nan poo weiu nan jab weiu, nan nanyukin, nan nikpinu, 22 nan bonchonchon-toona, nan joonbaanu, nan nianchiɔŋ, nan biitbooru booru, nan faak, nan toon-yana, nan funfunn, nan sanjaauŋ, nan karinbaanii, nan jat toona. 23 Linba na kur nyi nirɔ par nie ki teenɔ jakint." 24 Linba na poorpo ki Yiisa nyii leŋ ki saan Taya nan Saidonn yent ni, ki kɔɔ ŋasiak nna ni, ki ki loon sɔɔ n bann nan u be leŋi; ŋaan u din ki fit bɔr u mɔŋi. 25 Ki poosɔɔ nba ki narinbiiuk be u bonpobik ni na gbat u po, ki baar u boor ki tan gbaan u tɔɔnn. 26 Poo maŋ din ki tee Juu nirɔ kaa; bi din marɔ Fonisia tiŋ nie, Siria tingbouŋ ni. Ki u barin Yiisa a wun nyinn narinbiiuk na u bonpobik maŋ ni. 27 Ŋanne ki Yiisa betɔ a, "Ŋaant ki ti dinn waas bi jeet sinsinn, kimaan li ki ŋan ki nirɔ n jii waas jeet ki tur bɔi." 28 Ki poo na jiin a "N Yomdaanɔ, li set tee mɔniie, ŋaan bɔi nba tuu dɔɔ teebur lɔuŋ ni na mun tɔkii waas jebura nba baa na." 29 Ki Yiisa betɔ a "A jiinu nba na paak, i kun; a saa baar sɔɔ ki narinbiiuk na nyii a bonpobik na niwa." 30 Ki poo maŋ fiir kun ki saa baar la ki u bik na dɔɔ u dindɔɔnu paak, ki narinbiiuk na set nyiiwa. 31 Tɔn, Yiisa ji din nyik Taya yakir na, ŋaan tɔkin nyii Saidonn yakir, nan tiŋ nba ki bi din yi Doi-piik na mɔkmɔk ki saa baar Galilii mɔkgbeŋŋir na. 32 Ki nisiab baar nan jasɔɔ ki u tee muuk; ki bi barimɔ a wun yii u nuu jɔɔ maŋ paak. 33 Ki Yiisa jiiu ki bi nyii kpiŋ po, bi kuukɔɔ, ki jii u niibira ki tun jɔɔ maŋ tuba ni, ki siir mɔsant ŋaan sii jɔɔ maŋ jerinn, 34 ki got sanpaapo ŋaan kurint sikin, ki bet jɔɔ maŋ a "Efata," ki li paak tee "Lootir." 35 Li taakpaak ni ki jɔɔ na ji gbia, ki bia fit piak fanu. 36 Ŋanne ki Yiisa kpaan niib na a bii mi ki bin bet sɔɔ linba ki u tun maŋ po; ŋaan ki bi lek ŋami yarin barii maŋ. 37 Ki binba kur gbat labaar maŋ, ki li teemm bakitnauŋ bonchiann; ki bi boi leeb a "Toonŋanboor bee ki jɔɔ na tuun na mani? ki tuukpaa gbaa tan fit gbia, ki mui bia fit piak."

Mak 8

1 Linba na poorpo, li din ki yukiri ki nibur yaan lakin leeb Yiisa boor ki ki mɔk jeet; ki Yiisa yiin u poorpoweiteeb na ki tan betib a 2 "Ninbaauk soorin bonchiann nibur na paak, kimaan daa ŋantaae na ki bi be nanin, ŋaan ki ki mɔk jeet ki di. 3 Mi-i kunnib komi, bi saa fib sɔnu niwa, kimaan bi siab doi fɔka." 4 Ki u poorpoweiteeb na boiɔ a "Ti saa la jeet lee muuk na ni ki lin jaŋ nibur na kuri?" 5 Ki u boib a "Boroboro kuna ŋaŋŋae be i boor ni?" Ki bi betɔ a "Ŋanlore." 6 Li yooe ki u te ki nibur na kur kar tiŋ ni. Ŋanne ki u jii boroboro kuna ŋanlore na, ki tur Yennu niipoouk ŋaan ŋmit ŋmit ki tur u poorpoweiteeb na a bin tor nibur maŋ. 7 Bi bia din mɔk janbis waan bi boor; ki u bia tur Yennu niipoouk li paak, ŋaan bet u poorpoweiteeb maŋ a bin jii torib. 8 Ki sɔɔ kur dii waa loon biaŋinba. Bi din teen nan niib tusaa ŋanna nawa. Ki u poorpoweiteeb tikir jeet nba tenn na, ki li gbee kpanchubit ŋanlore. Ki u ji chab niib maŋ, 10 ŋaan ki ŋɔɔ nan u poorpoweiteeb kakit ki kɔɔ burgbetir, ki saan Dalmanuta tiŋ ni. 11 Li poorpoe ki Farisiinba siab baar Yiisa boor ki tan tee serimii, a bin bikinɔ ki la u mɔbonkpetir, ki yetɔ a wun tun nyinn ki lin wann nan Yennu set mi u po. 12 Li yoo ki u kurint u yan ni ŋaan boib a "Bee teen ki mɔtana nibooru na loon nyinni? Barmɔniie ki n beeri, n kan tun nyinn ki tur mɔtana niib na." 13 Li poorpo ki u nyikib, ŋaan ŋmat kɔɔ burgbetir na ni, ki poot mɔkgbeŋŋir na pootir po. 14 Tɔn, Yiisa poorpoweiteeb din tamm ki ki dia jeet ki li yabi. Bi din dia boroboro kunn yennkɔɔe burgbetir na ni. 15 Ki Yiisa kpaanib a "I mi man, kii guu i mɔŋ nan Farisiinba nan Herod datiŋ na po." 16 Ŋanne ki bi ji piak bi leeb sinsuuk ni a "Taa ki dia boroboro nae ki u piak linba na." 17 Ŋaan ki u bann baa piak linba na, ki boib a "Bee ki i piak ki yaa i ki dia boroboro? I daa ki bann siar biakii? I dudukit ni bia daa ki yentii? 18 I mɔk ninbina, ŋaan bee ki i ki laati? I bia mɔk tuba, ŋaan bee ki i ki gbia? 19 I tian yoo nba ki n ŋmit boroboro kuna ŋaŋŋmu ki dinn niib tusaa ŋaŋŋmu na-a? Kpanchubit ŋaŋŋae ki i tikir boroboro nba tenni?" Ki bi jiin a "Piik nan ŋanlee." 20 Ki u bia boib a, "Ki yoo nba ki n ŋmit boroboro kuna ŋanlore ki dinn niib tusaa ŋanna na, kpanchubit ŋaŋŋae ki i tikiri?" Ki bi jiin a "Ŋanlore." 21 Ŋanne ki u boib a "Ŋaan ki i bia lek daa ki bann siarii?" 22 Ki bi din tan baar Befsaida; ki nisiab jii jajɔɔŋ nna ki baar nanɔ Yiisa boor ki tan barimɔ a wun siiu. 23 Ki Yiisa soor u nuu ki nyii nanɔ doo kpiŋ, ki siir mɔsant jɔɔ na ninbina ni, ki jii u nii ki yii u paak, ŋaan boiɔ a "A laat siarii?" 24 Ŋanne ki jɔɔ maŋ gokit got, ŋaan yet a, "Nn, n laat niib, ŋaan bi naan tiiniie ki somm." 25 Ki Yiisa bia jii u nii ki yii jɔɔ maŋ ninbina paak; li yoo na ki jɔɔ maŋ ji got sirrr, ki sɔɔ ki u ninbina mɔk laafia, ki u ji laat bonsiar kur pur pur. 26 Ki Yiisa kpaanɔ a wuu mi ki wun ŋmat doo maŋ ni jik, ŋaan te ki u kun u ŋaak ni. 27 Ŋanne ki Yiisa nan u poorpoweiteeb yaat ki saa Siisarea Filipi tingbouŋ ni. Baa daa be sɔnu paak ki saa na ki u boib a "Betirin man, niib na yaa n tee ŋmee?" 28 Ki bi betɔ a "Nisiab yeen a a tee Jɔɔnn nba daan wuur niib Yennu nyunwuru nae, ki siab mun yaa a tee Elaijae, ki siab mun bia yaa a tee Yennu sɔkiniinba na yenɔe." 29 Ŋanne ki u boib a, "Ki yimm muni, i yaa n tee ŋmee?" Ki Piita yetɔ a "Fine tee Yennu Niganntɔɔ Masia na." 30 Ŋanne ki Yiisa kpaamm a bii mi ki bin bet sɔɔ labaar maŋ. 31 Ki Yiisa ji want u poorpoweiteeb a "See ki min nisaarik Bik dii biak ki tiŋ saakab nan Yennu jiantu yudamm nan sennu wannteeb n tan y‡tin, ki bia kpin; ŋaan li daa ŋantaa daar ki n saa fiir kuun ni." 32 U din pak linba na ki yent bi kura numpoe fanu. Ŋanne ki Piita yiinɔ ki nyii nanɔ kpiŋ po ki saa yakii nanɔ a u ji daa mi yeen nna. 33 Ki Yiisa jiant got u poorpoweiteeb na, ki mun yakii nan Piita a "Sintaanii na, seetir nna na. A ki dukii linba tee Yennu yar po kaa, ŋaan dukii linba tee nisaarik yar." 34 Ŋanne ki Yiisa yiin u poorpoweiteeb nan nibur nba waau na, ki tan betib a "Wunba-i loon wun wein, see ki u likin u saaŋmaŋ, ki jii u kuun dapunpunn kii waan, 35 kimaan wunba ki sak wun jii u manfoor ki turin, ŋɔɔe tan saa kɔŋŋir, ŋaan wunba likin u saaŋmaŋ, min nan barŋanii na paak, ŋɔɔe tan saa la u manfoor nan barmɔnii. 36 Nirɔ-i la tingbouŋ na mɔkint kura ŋaan kɔŋ u manfoor, nyɔlannpoe ki u la? 37 koo nirɔ saa fit jii bee ki daa manfoori? 38 Ki wunba-i tiin fei ki jiin min nan n wannu na po tingbouŋ na biitdamm nan tubkangbata damm paak, min nisaarik Bik-i taŋŋi jen nan n Baa Yennu paŋ nan u malakanba, n tan saa tin fei nan man jiiu ki pukin n niib niwa."

Mak 9

1 Tɔn, linba na poorpo ki Yiisa bia yet a, "Barmɔniie ki n yaa n beti na, siab be nna ki kan kpo see ki bi tan la Yennu naan baaru nan li paŋ." 2 Li daa ŋanloob daar, ki Yiisa jii Piita nan Jeems nan Jɔɔnn ki doo namm jɔɔr nba fɔk bonchiann paak, bi kuukɔɔ. Li yoo ki bi la ki u lebit; 3 ki u tiat nyirik ki peen par par. Ki sɔɔ kaa tingbouŋ na ni ki saa fit penn tiat nan ŋann na. 4 Ki bi la ki Elaija nan Moses lekit yomm ki piak nanɔ. 5 Ŋanne Piita yet Yiisa a "Chanbaa, li ŋan nan taa be nna na. Ti saa faa lanbont ŋantaae, ki yenn-i tee a yar, ki leer-i tee Moses yar, ki leer mun-i tee Elaija yar." 6 Jaŋmaanii nba din soor Piita nan u leeb maŋ bonchiann na paake ki u din ki mi waa yeen linba. 7 Li yoo ki sanpagbouŋ dɔkit ki piimm; ki bi gbat kunkɔr sanpagbouŋ na ni, ki li yet a "N Bilonkake na; gbiintir u mɔb man." 8 Ki bi jiant got, ŋaan ji ki la sɔɔ bi boor, see Yiisa kuukɔɔ. 9 Baa nyii jɔɔr maŋ paak ki siik, ki Yiisa kpaamm a bi daa beer sɔɔ linba ki bi la na ki saa tuu yoo nba ki ŋɔɔ nisaarik Bik tan saa fiir kuun ni. 10 Ki bi sak u kpaanii na, ki dia labaar maŋ bi sinsuuk ni; bi bia boi bi leeb a " 'Kuun fiiru' na paak tee bee?" 11 Ki bi tan boiɔ a "Bee teen ki sennu wannteeb yaa see ki Yennu sɔkinii Elaija baar Masia sinsinni?" 12 Ki Yiisa betib a "Elaija set baar sinsinn a wun tan ŋamm bonsiar kur fanu. Ŋaan li bia sɔb nlee Yennu gbouŋ ni? Li sɔb a see min nisaarik Bik lek tan dii biak ki niib bia tan saa siannin. 13 N beerie, Elaija poŋ baara, ki niib diau gbaka gbaka nna baa loon biaŋinba, nan laa sɔb Yennu gbouŋ ni biaŋinba na." 14 Tɔn, Yiisa nan Piita nan Jeems nan Jɔɔnn nba din tan baar u poorpoweiteleeb boor yoo nba, ki bi la nibur lakin; ki sennu wannteeb nɔi namm mɔniɔk. 15 Nibur maŋ nba la Yiisa yoo nba ki li teemm bakitnauŋ, ki bi tin baar ki foontɔɔ. 16 Ŋanne ki u boi u poorpoweiteeb na a "I nɔi namm lann paake?" 17 Ki jasɔɔ nyii nibur maŋ ni ki jiin a "Chanbaa, mine baar nan n bija a boor, kimaan narinbiiuk be u ni ki te ki u ki fit piaki. 18 Siaminba kur ki narinbiiuk maŋ fiir, li tuu lu-u tiŋ nie, ki mɔsankunkouŋ nyi, ki u nyana n sar nan leer, ki u gbanant kur n wakir ken ken; ki n barin a poorpoweiteeb na a bin nyinn narinbiiuk maŋ, ŋaan ki bi gbar." 19 Li yoo ki Yiisa ji yakii ki yeen a "Yimm mɔtana niib yada mantik pɔ hei; n saa yukir nani nlee? Yoo nlee ki n saa di sukuru naniini? Baat nan bik maŋ nna." 20 Ki bi baar nanɔ Yiisa boor. Narinbiiuk na nba la Yiisa yoo nba ki li fiir bik na ni ki lu-u tiŋ ni, ki u dɔɔ birin, ki mɔsankunkouŋ nyi. 21 Ki Yiisa boi u baa a "Nlee yooe ki li piin ki teeu nna?" Ki u jiin a "Li piinɔ u bisin niewa. 22 Yoo bonchianne ki narinbiiuk na tuu te ki u baa muu ni, nan nyun ni, a wun lek kpiu. Li-i tee ki a saa fit teen siari, fan lek tint ninbaauk ki sommit." 23 Ki Yiisa jiin a, "Nn, a mɔŋ-i saa fit teenin yadaie, bonsiar ki paar wunba teen yada na boor." 24 Ki jɔɔ na yikin sanpaapowa a "N teena yadawa, ŋaan sommitin ki n teena yada ki pukin." 25 Yiisa nba la ki nibur na ŋammit tut baat bi boor na, ki u tian narinbiiuk na paak a "Fin narinbimu-tuukpaar na, mine tura mɔb, nyimin u ni ki ji daa mi jent u ni." 26 Ki narinbiiuk na yikin ki tɔkir bik maŋ ki lu-u tiŋ ni gbab, ŋaan nyii u ni; ki bik maŋ ji naan nan u kpoe na, ki niib na bonchiann fabin a "U kpowa." 27 Ŋaan ki Yiisa soor bik maŋ nuu ki sommɔ ki u fiir set. 28 Yiisa nba din tan kɔɔ ŋaak na ni yoo nba, ki u poorpoweiteeb boiɔ, bi kuukɔɔ, a "Bee ki timm ŋarin bo ki fit nyinn narinbiiuk na?" 29 Ki u betib a, "I kan fit nyinn narinbiiuk na booru see ki i [lor mɔi ki] mei Yennu." 30 Ki Yiisa nan u poorpoweiteeb maŋ nyii leŋ ki tɔkin Galilii tingbouŋ po. Ŋaan u din ki loon sɔɔ n bann waa be siaminba, 31 kimaan u din want u poorpoweiteeb na ki beerib a "Bi tan saa jii min nisaarik Bik ki teenin niib nuu ni ki bin kpin, ŋaan li daa ŋantaa daar n tan saa fiir kuun niwa." 32 Ki u poorpoweiteeb maŋ ki bann barii maŋ paaki, ŋaan bia tiin jaŋmaanii nan bin boiɔ. 33 Tɔn, ki Yiisa nan u poorpoweiteeb nba baar Kapenaum ki tan kɔɔ ŋaak ni yoo nba ki u boib a "I bo dia labalannpoe sɔnu ni na?" 34 Ŋaan ki bi ŋmina, kimaan sɔnu ni bi nɔi nan bi leeb yudan-tuk paake. 35 Ŋanne ki u ŋmant kar, ŋaan yiin u poorpoweiteeb piik nan banlee na, ki betib a "Wunba kur loon wun teen yudaanɔ, see ki u kpint u mɔŋ ki teen tarik i kur ni, ki bia teen i kur yommik," 36 ŋaan jii bik nna ki sennɔ bi sinsuuk ni, ki puur u nii ki wɔb bik maŋ, ŋaan betib a 37 "Wunba kur gaar bik na booru n sann paak, mine ki u gaarin; ki wunba gaarin, u ki gaar n kuukɔɔ kaa, ŋaan u gaar wunba tumin nae mun biak." 38 Tɔn, ki Jɔɔnn bet Yiisa a "Wanntɔɔ, ti la ki jasɔɔ nna mun taan a sann ki nyint narinbiit niib ni, ki ti yakii nanɔ a wun nyik, kimaan u ki tee ti ni yenɔ." 39 Ki Yiisa betib a "I daa beerɔ mani, kimaan wunba saa taa n sann ki tun bakitnauŋ toonn, li poorpo u ji kan fit pak siar ki biirimi. 40 Wunba kur ki kɔn nant, u see ti poore. 41 Barmɔniie ki n beeri na, wunba kur turi nyun, yaa tee n yab na paak, li daanɔ tan kan mi kɔŋ u paauku." 42 Ki Yiisa bia ŋamm yet a "Wunba te ki waas nba teenin yada na yenɔkɔɔ tun toonbiit, bi-i bonni lann naar li daanɔ turu ni ki tut lu-u mɔkgbeŋŋir ni gbaa, li bo sii sɔ ki turɔ. 43 Li paak, a niipauŋu te ki a yaa a tun toonbiit, fan potir lu. Li sɔ ki nirɔ-ii mɔk niipauŋ yennkɔɔ ki la manfoor nba kaa gbennu, ki gar wun tan kɔɔ muu nba kan mi kpeen na ni nan u niipant kur. 45 A taapauŋu te ki a yaa a tun toonbiit, fan potir lu. Li sɔ ki nirɔ-ii mɔk taapanyenn ki la manfoor nba kaa gbennu, ki gar wuu mɔk taa ŋanlee ŋaan Yennu n tan kɔɔnɔ muu maŋ ni. 47 A ninbinn-i te ki a yaa a tun toonbiit, fan kpakir lu. Li sɔ ki fan tan kɔɔ Yennu naan ni nan ninbinn yennkɔɔ ki gar fan tan kɔɔ muu maŋ ni nan ninbina ŋanlee. 48 Leŋe ki 'nanwuba nba dib kan kpo, ki muu na bia ki kpeent.' 49 "Yennu tan saa jii muue ki ŋamm sɔɔ kur nan baa tuu jii yaarin ki ŋamm maruŋ nant biaŋinba na. 50 "Yaarin man; ŋaan yaarin manu-i taŋŋi saat, nlee ki a ji saa te lin maŋi? "Yii ŋaan ki i binbeŋ-ii tee nan yaarin na, ki manu-ii be yimm nan i leeb sinsuuk ni."

Mak 10

1 Ki Yiisa nyii leŋ ki saan Judea tiŋ ni nan Jɔɔdann mɔk-pootir po; ki niib bonchiann lakin u boor ni, ki u yaan wantib Yennu maan nan waa poŋ tuu want biaŋinba na. 2 Ki Farisiinba baar u boor ki loon bin bikinɔ, ki boiɔ a "Sennu na chabit nan jɔɔ n y‡t u ŋaapoo?" 3 Ŋanne ki u mun jiin buboit ki gatib a "Moses din turi sennu nlee ki jiin li po?" 4 Ki bi jiin a "Moses din chab yaak a jɔɔ saa fit sɔb pooy‡tu gbouŋ ki y‡t u ŋaapoo." 5 Ki Yiisa betib a "I tubkangbatin paake din te ki Moses sɔb sennu maŋ ki turi. 6 Ŋaan Yennu nba din nan durinya pinpiik ni, 'U din nan jɔɔ nan pooe.' 7 Linba na paak ki jɔɔ saa nyik u baa nan u naa ŋaan kɔɔn u poo, 8 ki bi niib banlee n taan ki teen gbanan-yennkɔɔ, bi ji ki tee niib banlee kaa, ŋaan bi ji tee niyenɔkɔɔe. 9 Li paak, binba ki Yennu taamm na, nisaarik-ii mi ki wun bɔkitib." 10 Baa din tan jen ŋaak ni yoo nba, ki u poorpoweiteeb na boiɔ barii maŋ paak. 11 Ki u jiin a, "Jɔɔ nba y‡t u ŋaapoo ŋaan kɔɔn pooganɔ, u tun bonchonchonn toonne, waa y‡t u poo nba ŋaan kɔɔn lɔɔ na paak. 12 Nnae mun biak, poo-i y‡t u sɔrɔ ŋaan saan kun jaganɔ, u mun tun bonchonchonn toonne na." 13 Tɔn, ki nisiab tan baat nan bi waas Yiisa boor, a wun yii u nii bi paak; ŋaan ki u poorpoweiteeb tian bi paak. 14 Waa tan la ki bi tian bi paak na, ki u wutoor doo, ki u betib a "Ŋaant man ki waas maŋ-ii baat n boor ni na, ki daa tiammi, kimaan bi boorue yen Yennu naan. 15 Barmɔniie ki n beeri na, wunba ki gaar Yennu naan nan u tee bik na, u kan mi kɔɔ li ni faba," 16 ŋaan gaar waas maŋ u nii ni, ki yii yii u nii bi paak, ki teen piisin bi paak. 17 Yiisa nba din nyii leŋ ki saa maŋ, ki jasɔɔ tin chetɔ ki gbaan u tɔɔnn, ŋaan boiɔ a, "Wanntɔŋanɔ, n saa teen nlee ki tan la manfoor nba kaa gbennu?" 18 Ki Yiisa jiin boiɔ a "Bee ki a yin niŋanɔ? Sɔɔ kaa ki tee niŋanɔ see Yennu kuukɔɔ. 19 A poŋ mi Yennu sennii nba want biaŋinba, a 'Daa kpi nirɔ; daa baa joona; daa jaami; daa tee faaksiara; daa ŋmab nirɔ; i baakit a baa nan a naa.'" 20 Ki jɔɔ na yetɔ a "Wanntɔɔ, n poŋ sak linba na kur n bisin niewa." 21 Ki Yiisa gotɔ sirrr nan lomm, ŋaan betɔ a "Bonyennkɔɔe pɔta; i kun ki saa kɔi linba kur ki a mɔk, ki jii li likirii ki tur talasdamm, ki jenna kii waan, ki a tan saa la mɔkint sanpaapo." 22 Jɔɔ na nba din gbat linba na, ki u par ni biir bonchiann, ki u ŋmat kun nan parbiir, kimaan u mɔk mɔkint bonchiann. 23 Ki Yiisa ŋmant got u poorpoweiteeb na ki lint, ŋaan yetib a "Li sii paar bonchiann nan mɔkita n tan kɔɔ Yennu naan ni." 24 Ki u barii maŋ yaar litib; ki u bia ŋamm yetib a "N waas, li set paar nan nirɔ n kɔɔ Yennu naan ni. 25 Li paar nan mɔkitɔɔ n kɔɔ Yennu naan ni ki gar laagumii n kɔɔ kparpeenu miar niwa." 26 Ki barii maŋ yaar litib bonchiann, ki bi boi bi leeb a "Li-i tee nnaie, ŋmee ji saa fit la tinnu?" 27 Ki u kpaa u nunii bi paak, ŋaan tan betib a "Linba na paar ki tur nisaarike, ŋaan li ki paar Yennu yaa boori, kimaan Yennu saa fit tun bonsiar kur." 28 Ŋanne ki Piita tɔr yetɔ a "Gotirii, timm ŋarin nyik bonsiar kure ŋaan waa-a." 29 Ki Yiisa betib a "Barmɔniie ki n beeri na, wunba kur nyik u ŋaak, koo u ninjamm, koo u niipoob, koo u naanba, koo u baanba, koo u waas, koo u kpaant, n sann paak nan barŋanii na paak, 30 u tan saa la bona ki lin gar waa nyik linba na. U tan saa la ŋei, nan ninjamm, nan niipoob, nan naanba, nan waas, nan kpaant, kobii-kobiie tingbouŋ na ni, ki bia gaar mukisuk ki pukin; ki yoo nba baat na ki u tan saa la manfoor nba kaa gbennu. 31 Ŋaan niib bonchiann nba dɔŋ tɔɔnn mɔtana na, bi tan saa joont poora, ki bonchiann nba mun bia joont poor mɔtana tan saa gar tɔɔnn na." 32 Li yoo na ki Yiisa nan u poorpoweiteeb nyii sɔnu ni ki do Jerusalem, ki u gar bi tɔɔnn po; ki li yaar litib, ki jaŋmaanii bia soor nibur nba waa na. Ŋanne ki u yaan nyii nan u poorpo-weiteeb piik nan banlee na kpiŋ po, ki betib linba saa teenɔ, 33 a "Nnara, ti do Jerusaleme, siaminba ki bi saa jii min nisaarik Bik ki kɔɔn Yennu jiantu yudamm nan sennu wannteeb nii ni ki bin bu n buut a bin kpin, ki jiin tur binba ki tee Juu teeb na; 34 ki bi saa sarikin, ki siin mɔsant n paak, ki boon kpaasir, ki bia tan kpin, ŋaan li daa ŋantaa daar ki n saa fiir kuun ni." 35 Li yoo ki Jeems nan Jɔɔnn, binba din tee Sebedii waas na, baar Yiisa boor ki tan yetɔ a "Wanntɔɔ, ti loon ki a tun siare ki turit." 36 Ki u boib a "I loon ki n tun bee ki turiini?" 37 Ki bi jiin a "Yoo nba ki a tan saa di a naan nan baakir na, a tan ŋaan ki ti yenɔ n kar a niidiitu po, ki lɔɔ mun n kar a niigaŋ po." 38 Ki u jiin betib a "I ki mi yaa mei linba po. I saa fit jii jik-kpiatir nba ki n yaa n jii nawa-a? koo i saa fit di biak nan maa saa di biaŋinba nawa-a?" 39 Ki bi jiin a "Ti saa fita." Ki u betib a "I set saa jii n jik-kpiatir nawa, ki bia di biak nan maa saa di biaŋinba nawa. 40 Ŋaan li ki tee min kaa saa gann wunba tan saa kar n niidiitu po nan n niigaŋ po. Yennue gann binba tan saa kar li kinkaanii paak." 41 Ki Yiisa poorpoweiteleeb piik na nba gbat nna yoo nba, ki bi wutoa doo Jeems nan Jɔɔnn paak. 42 Ki Yiisa yiin bi kura ki lakimm u boor, ki betib a, "I mɔŋ mi nan binba yi bi mɔŋ tingbouŋ na yudamm na dont bi mɔŋe; ki nijaana mun bia dia bi niib nan ninmɔnn; 43 ŋaan yimm ŋarin, li daa tee nna i sinsuuk ni. I sɔɔ-i loon wun teen nijaann, see ki u teen u mɔŋ sɔɔ kura yommik; 44 ki wunba mun loon wun teen yudaanɔ, see ki u teen sɔɔ kura daabir; 45 kimaan min nisaarik Bik ki baar maa niib n tun turin kaa, ŋaan n baar maa n tun ki tur niibe, ki bia kpo a niib bonchiann n la tinnu." 46 Tɔn, ki Yiisa nan u poorpoweiteeb baar Jeriko, ki tan nyi, ki ŋamm nan niib bonchiann tɔk saa; ki jɔɔnsɔɔ be ki tee miatɔ, ki kar sɔnjokpiŋ, ki u sann tee Bartimeus, wunba tee Timeus bija na. 47 Waa tan gbat a Yiisa nba tee Nasaref nirɔ na be yoo nba, ki u yikin sanpaapowa a "Yiisa, Defid yaaboonn, tinimin ninbaauk." 48 Ki niib bonchiann tian u paak a wun ŋmin. Ŋaan ki u bia ŋamm yikin sanpaapowa a "Defid yaaboonn, tinimin ninbaauk." 49 Ki Yiisa set ki yet a "Yiintɔ na man." Ki bi yiinɔ, ki betɔ a "Cheen a par. U yiia. Fiit ki set." 50 Ŋanne ki jɔɔŋ maŋ liat u liatir ki bir, ŋaan fiir set, ki baar Yiisa boor. Ki Yiisa boiɔ a "A loon ki n tun bee ki turani?" 51 Ki jɔɔŋ maŋ jiin a "Chanbaa, n loon ki a nyɔɔnt n ninbinae." 52 Ki Yiisa betɔ a "Tɔn, i saa. Faa teenin yada nae te ki a nyɔɔnt." Li taakpaak ni ki u ninbina nyɔɔnt, ki u ji laat, ki waa Yiisa, ki bi saa.

Mak 11

1 Tɔn, ki Yiisa nan u poorpoweiteeb nba din tan per Jerusalem ki baar doi nba ki bi yi Befej nan Betani na, ki li biak kunkonn nba ki bi yir Olif Tiinii kunkonn na, ki u tun u poorpoweiteeb na ni banlee, ki yetib a 2 "I saa doo nba be tɔɔnn po na ni man. I-i saki baar, i saa la boŋ nba ki sɔɔ daa ki mi jakɔ, ki u lor nanyer po. Yin lotɔ ki baar nanɔ n boor nna. 3 Sɔɔ-i boi-i, a bee ki i lot boŋ maŋi, yin betɔ a i yomdaanɔe loonɔ, ŋaan u saa jiinɔ mɔtana." 4 Ŋanne ki bi set saan la boŋ lor ŋasiak nna nanyer po. Baa set lotɔ yoo nba 5 ki nisiab nna see leŋ ki boib a "Bee ki i lot boŋ maŋi?" 6 Ki bi betib nan Yiisa nba bo yaa bin yet biaŋinba na; ki niib maŋ biar ŋmin, ki bi lotɔ ki saan. 7 Baa din baar nan boŋ maŋ Yiisa boor yoo nba, ki bi jii bi tiat ki paan boŋ maŋ bɔɔnn paak, ki Yiisa jak. 8 Ki niib bonchiann jikit bi chinchena ki lat sɔnu ni, ki siab mun ŋat faamaasa ki lat sɔnu ni. 9 Binba din gar Yiisa tɔɔnn nan binba waa u poor po kura din yikin ki yeen a "Hosaana, mɔsoŋŋann-ii be wunba baat Yennu sann ni na paak. 10 Yennu mɔsoŋŋann-ii bia kii be ti yeeja Defid naan nba baat na paak. Yii hoot man Hosaana, sanpaapo." 11 Ki Yiisa baar Jerusalem ki kɔɔ Yennu jiantu ŋasaakak ni, ki lin got bonsiar kur; ŋaan laa din yaa lin bɔnn na paak, ki ŋɔɔ nan u poorpoweiteeb piik nan banlee na nyii ki ŋmat saan Betani. 12 Li sanyafannuko ki Yiisa nan u poorpoweiteeb nyii Betani ki jent Jerusalem; ki kon mɔkɔ. 13 Ki u la kinkaŋ nba mɔk faamaasa see banfɔkira. Ki u saan tiik maŋ nyakir a wun saa la siar li paak ki di; ŋaan waa baar leŋ ki u ki la siari, see faat kuukɔɔ, kimaan kinkana yoo daa ki baari. 14 Ŋanne ki u yet tiik na a "Sɔɔ ji kan mi di a lɔɔna laa nyii dinna ki saa." U poorpo-weiteeb na din gbat u mɔmaan maŋa. 15 Tɔn, ki bi tan baar Jerusalem; ki Yiisa saan kɔɔ Yennu jiantu ŋasaakak ni, ki beer kɔiteeb nan daateeb kur ki nyintib, ki tut likkpenta teebura ki lubin, ki tabit binba kɔi ŋmana na kokii ki lubin, 16 ki lek ki sak ki sɔɔ n jii bonsiar gar nann Yennu jiantu ŋasaakak na barintir ni 17 ki ji want niib na a, "Li sɔb Yennu gbouŋ ni a ŋɔɔ Yennu yet a 'Bi sii yi n ŋaak na nibooru kur Yenmiaru ŋaake,' ŋaan yimme kpintir ki teen fatiteeb kinkar boor." 18 Ki Yennu jiantu yudamm nan sennu wannteeb gbat waa tun biaŋinba na; ki bi ji loon sɔnu nba saa kpiu, ŋaan tiinɔ jaŋmaanii, kimaan u wannu din teen nibur na kura yaarlituk bonchiann. 19 Daajoouk nba tan baar yoo nba ki ŋɔɔ nan u poorpoweiteeb nyii Jerusalem. 20 Li sanyafannuko biak ki bi somm sɔnu ni ki gaar, ki la ki kinkaŋ na koor nan jiina niwa ki see. 21 Piita nba tiar Yiisa nba won yet linba na, ki u betɔ a "Wanntɔɔ, gotir, faa won yet kinkaŋ nba Yennu mɔtomm na koora." 22 Ki Yiisa betib a, "Teent Yennu yada man. 23 Barmɔniie ki n beeri na, wunba kur yet jɔɔr na a lin fikit ki saa baa mɔkgbeŋŋir ni, ki ki mɔk birsuk u par ni, ŋaan teen yada nan waa yet linba maŋ saa tuma, li set saa tun turɔwa. 24 Li paake ki n beeri, li-i tee ki i mei Yennu ki boiɔ siar po, yii mɔk yada i para ni nan i poŋ gaar bont maŋa, ki i set saa lawa. 25 Li-i tee ki i yaa yin miar Yennu, ŋaan tiar nan sɔɔ tun ki biiri, yin nyik chabɔ, ki i Baa Yennu nba be sanpaapo na mun saa nyik i toonbiit nba ki i tun ki chabi. 26 Ŋaan li-i tee ki i ki nyikit chabit i leeb bi biit, i Baa Yennu nba be sanpaapo na mun kan nyik chab i biiti." 27 Tɔn, ki Yiisa nan u poorpoweiteeb maŋ yaan tan jen Jerusalem, ki u kɔɔ Yennu jiantu ŋasaakak ni ki somm lin. Ki mannteeb, nan sennu wannteeb, nan tiŋ maŋ ni saakab, baar u boor, 28 ki tan boiɔ a "Yiikoo lannpoe ki a mɔk ki tuun linba na kuri? Ŋmee chaba li yiikoo?" 29 Ki u yetib a "Ŋaant ki n boi-i buboit yennkɔɔ sinsinn. Li-i tee ki i saa fit turin li gatu, ŋann, n saa wanni yiikoo booru nba ki n la ki tuun linba na kura. 30 Jɔɔnn nba daan wuur niib Yennu nyunwuru na, Yennue chabɔ li yiikoo koo nisaarike? Betirin man!" 31 Ki bi ŋmant faa bi leeb labaar ki yeen a "Ti-i yet a Yennue chabɔ li yiikoo, u saa boit a ki bee te ki ti ki teenɔ yada; 32 ki ti saa fit yet a nisaariie chabɔ-ɔ?" (Bi din tiin niib na, kimaan sɔɔ kur sak nan Jɔɔnn maŋ daan tee Yennu sɔkiniie nan barmɔnii.) 33 Li paak, ki bi jiin ki yet Yiisa a "Ti ki mi." Ki u mun betib a "Tɔn, n mun kan beti wunba chabin yiikoo ki n tuun linba na."

Mak 12

1 Li yoo ki Yiisa jak barjokit yinu a "Jasɔɔ din wuu tilontii u kpaab ni, ki chaan gungouŋ lintir, ŋaan gbiir gbiouk nba ki bi tuu sii ŋmaki tiinii maŋ lɔɔna nyun leŋ; ki bia maa sukir kpaab na ni; ki jii kpaab na ki teen toontunna nii ni a bii gorii. Li-i taŋŋi jaŋ nan pɔɔru, bin pɔɔr ki turɔ, ŋaan mun pɔɔr bi yar. Li poorpoe, ki u din yaat saan digbansiar. 2 Ki lɔɔna na punpɔɔr yoo tan baar, ki u tun daabir a wun saan gaar tilɔɔna u toontunna na boor; ki u saan. 3 Ki toontunna na saa soorɔ ki boou fanu, ŋaan berɔ, ki u kun yann. 4 Ki kpadaanɔ maŋ bia tun daabilɔɔ, ki toontunna na bia saa faa u yur ki pat, ki dinnɔ fei. 5 Ki kpadaanɔ na bia ŋamm tun daabilɔɔ bi boor ni, ŋaan ki bi saa kpii ŋɔɔ. Li poorpo ki u bia ŋamm tun daabileeb bonchiann bi boor ni, ki bi bia saa tun nna, ki boo siab, ŋaan kpii leeb. 6 Kpadaanɔ maŋ tiɔŋ bilonkake din tan biar, ki u tumɔ toontunna maŋ boor ni, ki yet a 'Bi saa baak n tiɔŋ bija nawa.' 7 Ŋaan ki toontunna maŋ yet bi leeb a 'U fadiirɔe na, ŋaant tin kpiu, ŋaan ki faar na n kpant ti yar.' 8 Ki bi soorɔ ki kpiiu ki nyii nanɔ kpakpiŋ ki lu." 9 Yiisa nba pak nna gbenn ki u boib a "I dukin ki kpadaanɔ na saa teen nlee? U saa baar ki tan kpi toontunna maŋe, ŋaan jii kpaab na ki teen toontunsiab nii ni. 10 I daa ki mi karin laa sɔb Yennu gbouŋ ni biaŋinba-a? Li sɔb a 'Tann nba ki tanmaara y‡tir na, ŋanne din set tee lɔtik ni tanŋann, Yennue teen nna, ki li teent bakitnauŋ.'" 12 Yiisa nba pak nna gbenn yoo nba, ki Juu teeb yudamm na mi nan waa yin barjouk nba na, saan gaan bi paake, ki bi yiab a bin soorɔ, ŋaan tiin nibur na jaŋmaanii; li paak ki bi nyikɔ ŋaan yaat. 13 Ŋanne ki bi tun Farisiinba siab nan Bat Herod poorpojɔɔmu na siab Yiisa boor a bin tan boiɔ buboit ki la u mɔbonkpetir. 14 Ki bi tan baar ki yetɔ a "Wanntɔɔ, ti mi nan a piak barmɔnii, ki ki mɔk jaŋmaanii nan niib nba saa dukin li po biaŋinba. A bia want niib Yennu sɔnu nan barmɔnii, ki a baka bia kaa nan nirɔ nba tee wunba. Li paak, betirit, ti sennu chabit nan tii pa lampo kii teen Rom c tiŋ kpanbar Siisa, koo ti daa pa?" 15 Ki Yiisa bann ser nba ki bi tee na, ki jiimm a "Bee ki i loon yin kɔɔnin jinjammii ni? Baat nan likirib na ki n got." 16 Ki bi baar nann. Ŋanne ki u boib a "Ŋmee naauŋ nan sanne be li paak na?" Ki bi yetɔ a "Siisa yare." 17 Ki Yiisa yetib a "Tɔn, yii yenn-ii pa kii teen Siisa linba tee u yar, ŋaan kii mun-ii pa kii teen Yennu linba tee Yennu yar." Ki li yaarlitib bonchiann nan u jiinu maŋ. 18 Ŋanne ki Sajusiinba, binba din tuu yaa niib tan kan fiir kuun ni na, baar Yiisa boor ki tan yetɔ a 19 "Wanntɔɔ, Moses din sɔb sennu ki yet a 'Jɔɔ-i kpo ki nyik u ŋaapoo nba ki marɔ bik, li ŋan ki u naabik n faar pakɔɔk na ki mar waas ki tur kpeemɔ na.' 20 Tɔn, jab banlore din be ki tee naanɔɔk, ki saakɔɔ po tan kɔɔn poo, ŋaan kpo ki ki mar waasi. 21 Ŋanne ki wunba waa u paak na faar poo maŋ, ŋaan mun tan kpo ki waas kaa; ki wunba waa bantaa na ni mun faar poo maŋ biak, ŋaan mun tan kpo, ki ki mar waas nanɔ. 22 Nnae ki binba waa na kura kɔɔn poo maŋ, ŋaan tan kpo, ki bi sɔɔ ki mar bik nanɔ. Li poorpo, ki poo maŋ mun tan kpo joont. 23 Tɔn, ki kpeemm fiiru daar, bi ŋmee tan sii yen poo maŋi? Kimaan bi banlore maŋ kura kɔɔnɔwa." 24 Ki Yiisa yetib a "I ki mi siari. Linba teen ki i ki mi na tee nnae: i ki mi Yennu gbouŋ, ki bia ki mi waa mɔk paŋ biaŋinba; 25 kpeemm-i taŋŋi fiir kuun ni, bi tan sii tee nan malakanba nba be Yendɔuŋ ni nae; pookɔɔnt nan jakunt tan sii kaa. 26 Tɔn, ki jiin kpeemm fiiru po, i ki mi karin Yennu sɔkinii Moses sɔbu ni siaminba yeen jagotuk po na-a? Li sɔb ki yet a Yennu din bet Moses a ŋɔɔ Yennue tee Abraham Yennu, nan Aisak Yennu, nan Jakɔb Yennu. 27 Niib na nba din poŋ kpo li yoowa na, ŋaan bi bia lek daa fo, kimaan Yennu ki tee kpeemm Yennu kaa, u tee footib Yennue. Yaa want nan niib tan kan fiir kuun ni na, li ki tooki." 28 Tɔn, sennu wanntɔsɔɔ din be leŋ ki gbat Yiisa nan Sajusiinba na labafaanu maŋ, ki la Yiisa nba gat bi buboit maŋ fanu biaŋinba. Li paak ki u baar Yiisa boor, ki mun tan boiɔ a "Ki sennlanupoe kpan tee sennjaanni?" 29 Ki u jiinɔ a "Linba tee sennjaann tee nnae: 'Israel teeb, gbiintir man, ti Yomdaanɔ Yennu tee Yen-yenɔkɔɔe; 30 i loonɔ nan a par kur, nan a seek kur, nan a dudukit kur, nan a paŋ kura.' 31 Sennjaann nba pukin ŋanlee tee nnae: 'I loon a lɔɔ nan faa loon a mɔŋ biaŋinba na.' Sennsau ji kaa ki gar sennii ŋanlee nba na." 32 Ki sennu wanntɔɔ maŋ yet Yiisa a "Wanntɔɔ, niipoouk. A pak barmɔniie, a ti Yomdaanɔ Yennu tee Yen-yenɔkɔɔe, ki yensɔu ji kaa ki pukin u po; 33 a nisaarik-ii loon Yennue nan u par kura, nan u dudukit kura, nan u paŋ kura, kii biakii loon u lɔɔ nan waa loon u mɔŋ biaŋinba na. Li kpaa talas bonchiann nan nirɔ n sak senniinba ŋanlee na ki gar wun jii bonkobit ki mann mannsɔu ki tur Yennu." 34 Yiisa nba la ki u gat nan yan na, ki u betɔ a "A ki fɔk nan Yennu ŋaanaami." Linba na poorpo sɔɔ ji din ki mɔk par nan wun boi Yiisa buboisiati. 35 Yiisa nba din tumii niib Yennu diiuk ni na, ki u tan boib buboit a "Bee ki sennu wannteeb yaa Yennu Niganntɔɔ Masia tee Defid yaaboonni? 36 kimaan Yennu Seyeeŋe din gbee nan Defid ki u yet a, 'Yennu din bet n Yomdaanɔ a Karin n niidiitu po mɔkmɔk nan maa tan saa te fan ŋmaa a datai a taapauŋ ni.' 37 Defid mɔŋ mɔŋ nba din yiin Masia a, 'yomdaanɔ' na, ki nlee ki Masia tee ŋɔɔ Defid yaaboonni?" Niib bonchiann din gbiint Yiisa wannu maŋ nan parpeenn. 38 Waa wannib na, ki u yetib a, "I mi sennu wannteeb binbeŋ na po man; ŋamme loon bii lia baant kii lin kii somm, ki biaki gaan burchinfoontii dai ni na; 39 bi-i kɔɔ Yennu jiantu diit ni, bi loon bii kaar nijaana kaanii nie; bi-i saan jaamm ni, bi bia loon yudamm kinkaanii boae; 40 ŋamme bia di pakɔi fobit, ŋaan ji tuu jenna ki mei Yennu ki yukii, ki kpann a bi tee yentinae. Bi tubdatu tan sii bi bonchiann." 41 Tɔn, ki Yiisa kar Yennu jiantu ŋasaakak na ni ki kpia Yennu piinii lakir na, ki gorii niib nba kpee likirii biaŋinba. Ki mɔkita bonchiann kpee likyura; 42 ŋaan ki pakɔtalas-daansɔɔ mun tan baar kpeen likbina ŋanlee; ŋanne tee kobu na. 43 Ki Yiisa yiin u poorpoweiteeb na ki betib a "Barmɔniie ki n beeri na, pakɔtalasdaanɔ na kpeen piinii nba yab lakir na ni ki gar sɔɔ kura, 44 kimaan bi kur gann bi piinii bi mɔkin-chiɔŋ nie, ŋaan pakɔtalasdaanɔ na ŋarin tur linba kur ki u mɔke."

Mak 13

1 Yiisa nba nyii Yennu jiantu ŋasaakak ni yoo nba, ki u poorpoweiteeb na yenɔ yetɔ a "Wanntɔɔ, gotir digbeŋŋa na, nan tangbeŋŋa nba ki bi din jii ki maa diit maŋ." 2 Ki u jiin a "I la digbeŋŋa maŋaa? Ŋaan bi tan saa tut li kur ki lu tiŋ niwa, ki li tanyennkɔɔ tan kan biar ki paa leer paaki." 3 Ki Yiisa tan saan kar Olif Tiinii kunkonn na paak, ki li be Yennu jiantu ŋasaakak tɔɔnn po; ki Piita nan Jeems nan Jɔɔnn nan Andru tan baar u boor, bi kuukɔɔ, ki boiɔ a 4 "Betirit, bee yooe ki linba na kur tan sii tee? ki bee tan saa tun ki wann nan yoo maŋ pera ki li kura n teeni." 5 Ki u betib a "I chek i mɔŋ paak man, ki daa te ki sɔɔ n kpannii. 6 Niib bonchiann tan saa baar ki jii n sann, ki kpannii a ŋamme tee min Masia, ki kpann niib bonchiann. 7 I tan sii gbia tɔbii dammir nna, nan banfɔka; ŋaan i daa tiin jaŋmaanii. Li bonbooru tan saa fabira li tun, ŋaan li joontu kaa na. 8 "Nibooru nan nibooru tan saa kɔn nan leeb; ki kpanbar nan kpanbar mun tan saa kɔn ki took leeb. Tiŋ jijekit tan sii be tingbouŋ na loka kur po. Ki kon tan sii be. Linba na tan sii tee nan matyiaru pinpiik nae. 9 "I chek i mɔŋ paak man. Bi tan saa soori ki saan nani buutdamm boor ki booi Yennu jiantu diit ni. I tan saa set tinii yudamm nan kpanbara tɔɔnn n sann paak, ki betib n barŋanii na. 10 Bi tan saa mɔɔnt barŋanii na tur nibooru kure waa, ki yoo maŋ n baar. 11 Bi-i taŋŋi soori ki saan nani buut boor yoo nba, yaa daa te ki li daamii-i nan yaa saa pak linba; li yoo-i taŋŋi baar, yin pak linba ki Yennu saa wanni li yoo maŋ, kimaan barii nba ki i tan saa pak na kii tee i mɔŋ mɔŋ barii kaa, li tan sii nyi Yennu Seyeeŋ boore. 12 Li yoo maŋ, nirɔ tuu tan saa fikis u mɔŋ mɔŋ ninja ki bin kpiu; baanba mun tan saa tun nnae ki tur bi mɔŋ mɔŋ waas; ki waas mun bia tan saa kɔn nan bi damm, ki te bin kpib. 13 Ki sɔɔ kura tan sii nami kimaan yaa waan na paak, ŋaan wunba tan gubin nan biak yoo maŋ joontu tan saa la tinnuwa. 14 "I tan saa la ki bonbiir see laa bo ki ŋan nan lii see siaminba." (Wunba tan karin sɔbu na, wun bann laa want linba.) "Li yoo maŋ, binba tan be Judea tiŋ ni, bin chiar ki do jɔɔt. 15 Wunba tan be u ŋaak yur d paak, u tan daa siik ki kɔɔ diiuk ni a wun jii siari. 16 Wunba tan be kpaab ni, u daa ŋmat a wun jii u liatiri. 17 Li yoo maŋ, podamm nan binba dia walai tan saa di biak bonchiann. 18 I mei Yennu man ki u daa te ki biak na baat sabouŋ, 19 kimaan Yennu nba din nan durinya na pinpiik niwa ki tan tuu mɔtana, sɔɔ daa ki mi la biak ki li bi ki baar biak nba tan sii be daa maŋ ni na. Ki biaksiar mun ji kan mi baar nan ŋann na. 20 Ŋaan ti Yomdaanɔ wat daa maŋ yabinta. Li-i tee ki u bo ki watiri, sɔɔ bo tan kan tinni, ŋaan u nigannkab paak ki u wat daa maŋ yabint. 21 "Li yoo maŋ, sɔɔ-i taŋŋi beti a 'Gotir man, Masia be nna;' koo 'U be leŋe,' i daa teeu yada, 22 kimaan faak Masianba nan faak sɔkiniinba tan saa baar ki tuun nyina nan bakitnauŋ toona, a bin kpann niib. Ki li-i taŋŋi fit gbaa, bi tan saa kpann binba tee Yennu nigannkab tiɔŋɔ. 23 N poŋ beti bonsiar kure waa, ki yoo maŋ daa ki baari. I chek man fanu. 24 "Daamii na poorpoe, ki yonnu tan saa bɔnn, ki ŋmaarik ji kan yenti, 25 ki ŋmaabira tan saa nyi sanpaapo ki baa, ki linba kur be sanpaapo tan saa damm ki ŋmat ŋmat. 26 Li yoo maŋ min nisaarik Bik tan saa dɔkit sanpagbana ni nan panchiɔŋ nan yentsaakar. 27 N tan saa tun malakanba tingbouŋ na kur po, ki bin tikir Yennu nigannkab ki lakimm. 28 "Yi jii sinsabik ki tumii yan man; yaa tuu la ki tiik maŋ bintir yoo nba na, i ji tuu mi nan siɔk pere na. 29 Nnae mun, yoo nba ki i tan laat linba na nba kur tuun, yin bann nan n jenu maŋ pera, li ji kan yukiri. 30 Barmɔniie ki n beeri na, mɔtana nigbouŋ na kan kpo gbenn kaawa ki linba na n tumii. 31 Sanpaak nan tiŋ tan saa gara, ŋaan n maan ŋarin kan mi gar faba. 32 "Ŋaan sɔɔ ki mi daar maŋ koo yoo nba ki n saa jeni; malakanba nba be Yendɔuŋ ni ki mi; min Yennu Bik bia ki mi; n Baa Yennu kɔɔe mi. 33 I mi man, kii chek, kimaan i ki mi yoo nba ki n saa jeni. 34 Li tan sii tee nan jasɔɔ nba yaa wun nyi u ŋaak ni ki yaat saan sɔnbanfɔkir, ki chab u ŋaajab yaak a bii dia u ŋaak, ki bia chent bi kura toona, ŋaan bet u ŋaguurɔɔ a wuu guu, ŋaan saan nae. 35 I mun-ii guu man, kimaan i ki mi yoo nba ki min i Yomdaanɔ saa jeni; li pasiar daajoouko, koo tansuuniie, koo sanyafaare, koo sanyiɔk nie. 36 Li-i tee ki n tan jen yiama, li ki ŋan man lai ki i gɔɔnti. 37 Li paak, maa beeri linba na, n beer sɔɔ kure, i guu man."

Mak 14

1 Tɔn, daa ŋanlee din biar nan yukitgar tiaru jaamm nan daa nba ki bi di boroboro nba ki bi din tuu ki tee datiŋ na n piin, ki Yennu mannteeb nan sennu wannteeb loon sɔnu a bin bɔr soor Yiisa ki kpiu, ki yeen a 2 "Ti daa sou jaamm daa na ni, kimaan li pasiar ki kpikpiruk n tan fiir." 3 Tɔn, Yiisa din be Betani, jɔɔ nba din tuu tee gbaatir, ki bi yiu Simonn na ŋaak ni, ki di jeet. Li yoo ki poosɔɔ tan kɔɔ nan salenŋann, ki li gbee nan tulaarii nba mɔk nubiru bonchiann, ki li daauk bia paar bonchiann, ki bi yir naad na. Ki poo maŋ biit salenn na ki but tulaarii maŋ Yiisa yur paak. 4 Ki niib nba be leŋ na siab piak nan wutoa ki yeen a "Bee teen ki u biir tulaarii na nna? 5 Bi bo saa fit kɔir ki la likirii ki lin gar salimpeena e kobii ŋantaawa, ki bo jii somm talasdamm." Ki bi jii poo maŋ nan duŋ. 6 Ki Yiisa yetib a, "Nyikin poo maŋ. Bonŋanne ki u tun ki turin, ki bee ki i kpirimɔ nna? 7 Talasdamm sii yɔɔ be i boor ni yoo kura, ki i saa fit sommib yoo nba kur ki i loon; ŋaan min ŋarin kii yɔɔ be nna kaa. 8 Poo maŋ tun waa saa fit tun linbae ki turin. Waa but tulaarii nba n gbanant paak na, u teen n kuun piinu siire. 9 Barmɔniie ki n beeri na, siaminba kur ki bi saa mɔɔnt n barŋanii na tingbouŋ na ni, bi bia saa mɔɔnt poo maŋ nba tun linba na, ki li sii tee tiarin ki jiin u po." 10 Ŋanne ki Yiisa poorpoweiteeb piik nan banlee na yenɔ, wunba ki bi yiu Judas Iskariot na, saan Yennu jiantu yudamm boor a wun kɔi Yiisa. 11 Ki bi para penn, waa yaa wun yetib linba Yiisa po na, ki bi senn mɔsonn a bi saa pau likirii li paak. Ki u ji piin loon sɔnu nba ki u saa jii Yiisa ki kubin bi nuu ni. 12 Tɔn, daar nba din tee dasinsinn nba ki bi tuu di boroboro nba ki bi ki tee datiŋ na, li yooe bi din tuu kpi pegana ki tee yukitgar tiaru jaamm jeet na, ki Yiisa poorpoweiteeb boiɔ a "A loon ki tin saan lee ki teen jaamm maŋ jeet siir ki turani?" 13 Ki u tun bi ni banlee ki betib a "I saa doo na ni man. I saa la jasɔɔ ki u jii nyunsɔɔr. I waau man 14 nan ŋaak nba ki u saa kɔɔ na ni, ki bet li ŋaadaanɔ a 'Wanntɔɔ na yaa ti boia a saamm diiuk nba ki ŋɔɔ nan u poorpoweiteeb saa di yukitgar tiaru jaamm jeet na be lee?' 15 Ki u saa wanni ditɔɔtuk nba yab ki bi poŋ teen bonsiar kur siira; ki yin teen jeet maŋ leŋ." 16 Ki Yiisa poorpoweiteeb banlee maŋ saan doo maŋ ni, ki set saa la ki siar kura tun li biaŋ ni nan waa betib biaŋinba na. Ki bi teen jaamm maŋ jeet. 17 Ki Yiisa nan u poorpoweiteeb piik nan banlee na tan baar daajoouk. 18 Baa kar ki di jeet yoo nba, ki u tan betib a, "Barmɔniie ki n beeri na, min nan yimm nba di jeet na, i yenɔe yaa wun nyi n poor." 19 Ki li biir bi para; ki bi boiɔ yenɔ yenɔ a "A yeen mine-e?" 20 Ki u jiin a, "Li lek tee i piik nan banlee na ni yenɔ nba ki min nan ŋɔɔ lakii tuun senyeŋ ni ki di nae. 21 Min nisaarik Bik set saa kpo nan laa sɔb Yennu gbouŋ ni biaŋinba nae, ŋaan bonbiir sii be daanɔ nba yaa wun nyi n poor na paak. Bi-i diŋŋi bonni kii mar li daanɔ gbaa, li din bo sɔ u po." 22 Baa kar ki di jeet maŋ yoo nba na ki Yiisa jii boroboro ki tur Yennu niipoouk, ŋaan ŋmit ŋmit ki tur u poorpoweiteeb, ki betib a "Gaat man. Linba nae tee n gbanant." 23 Ŋanne ki u bia jii nyunnyuŋmaŋ nan tilɔɔna nyun ki tur Yennu niipoouk, ki jii turib. Ki bi kura nyuu. 24 Ki u yetib a "Linba nae tee n sɔn, ki n sɔn maŋ saa nyi n gbanant ni nisaarii bonchiann paak, ki wann nan Yennu senn mɔsonpaann na. 25 Barmɔniie ki n beeri na, n ji kan mi nyu tilɔɔna nyun na see daar nba ki n tan saa nyu li nyunpaanin Yennu naan ni na." 26 Ŋanne ki bi yin Yennu jiantu yanii, ŋaan nyii ki saan Olif Tiinii kunkonn na paak. 27 Ki Yiisa betib a "I kura na tan saa tin ki nyikima, kimaan li sɔb Yennu gbouŋ ni a 'Yennu tan saa kpi pekpaarik na, ki pei na n tin yat.' 28 Ŋaan mi-i taŋŋi fiir kuun ni, n saa dɔŋ gar i tɔɔnn ki saan Galilii." 29 Ki Piita yet a, "N leeb na kur-i lekii nyika, ŋaan min ŋarin kan nyikani." 30 Ki Yiisa betɔ a "Barmɔniie ki n beera na, nyiɔk na, a saa nɔi nan a ki min taar muntaaewa ki kojouk n bui leer." 31 Ki Piita ŋamm yet nan ninmɔnn a "Li-i lekii tee min nan fin n lakin kpo gbaa, ŋaan n kan mi nɔi nan n ki miani." Ki u leeb na mun bia yet nna. 32 Li poorpo ki bi saan siaminba bi yi Gefsemane na. Leŋe ki Yiisa bet u poorpoweiteeb a "Karin nna man ŋaan ki n saan ki saa miar Yennu." 33 U din jii Piitae nan Jeems nan Jɔɔnn ki bi saan. Ki u par biir ki li tee nan u yaa wun kpoe na; 34 ki u yetib a "Parbiir booru nba soorin na per lin kpima. Biat nna man kii nyɔi." 35 Ŋanne ki u chat saan tɔɔnn waaminna, ki gbaan tiŋ ni, ki mei Yennu, a li-i bonni saa fiti, Yennu n ŋaan ki biak nba baat u paak na n yakirɔ, ki yet a 36 "N Baa, n Baa, siar ki paar a boori. Daa ŋaant ki n kɔɔ bonbiir nba baat n paak na ni; ŋaan daa te ki li tee maa loon biaŋinba kaa, ŋaan lin teen faa loon biaŋinbae." 37 Ŋanne ki u jen u poorpoweiteeb bantaa na boor, ki sɔɔ ki bi taan gɔɔna. Ki u boi Piita a "Simonn, a gɔɔntee? A kan fit kii nyɔi waamii?" 38 ŋaan betib a, "I nyɔi man ŋaan kii mei Yennu ki i tan daa kɔɔ jinjammii ni. I sei ŋarin loon lin tun linba ŋan, ŋaan ki i gbanant kaa yaaki." 39 Ki u bia ŋmat Yenmiaru ki saa mei nan waa bo miar sinsinn biaŋinba na, 40 ki bia jen ki baar sɔɔ ki u poorpoweiteeb na bia gɔɔna, kimaan gɔɔn din mɔkib bonchiann. Ki bi ki mi baa saa yetɔ linba li yoo na. 41 Waa tan jen taapauŋ muntaa ni, ki u boib a "I bia lek daa dɔɔ gɔɔnt ki foi-i? Li jaŋa man. Yoo maŋ baara. Bi jii min nisaarik Bik ki teen biitdamm nuu niwa. 42 Fiit man ki tin saan. Gotir, wunba nyii n poor na pera." 43 Yiisa nba daa piak na, ki u poorpoweiteeb piik nan banlee na ni yenɔ, wunba ki bi din yiu Judas na, baar nan nibur nba ki Yennu jiantu yudamm nan sennu wannteeb nan saakab tumm na, ki bi siab dia jukbanjai, ki siab mun dia gbajara. 44 Ki mɔlanfik daanɔ Judas maŋ poŋ wannib nyinsiara a "Mi-i saki foont wunba ki mɔɔt u tankpinn, yii mi nan ŋɔɔe na. Yin soorɔ kii diau fanu kii saa nanɔ." 45 Judas nba baar yoo nba, li taakpaak ni ki u saan Yiisa boor ki yiin a, "Wanntɔɔ" ŋaan mɔɔt u tankpinn. 46 Ki niib na ji soor Yiisa ki diau ken ken. 47 Ŋaan ki u poorpoweiteeb na ni yenɔ nba see leŋ na nɔɔt u jukbanjiak ki chɔɔ Yennu jiantu yudaanɔ daabir tubir ki pot. 48 Ŋanne ki Yiisa boib a "I baar nan jukbanjai nan gbajara na a yin tan soorin nan n tee fatitɔɔe na-a? 49 N daan tuu be i boor Yennu jiantu ŋasaakak ni daar kura ki want niib Yennu maan, ki i tuu ki somi; ŋaan li kpaa talas nan Yennu gbouŋ ni maan maŋ n gbee." 50 Ki u poorpoweiteeb na kur ji chiar ŋaan nyikɔ. 51 Ki naasimɔ nna gbab chinchenn kuukɔɔ ki waa Yiisa poorpo. Ki bi tan bibɔ ki soor u chinchenn, 52 ki u nyik u chin-chenn maŋ bi nuu ni, ŋaan chiar yann. 53 Ki bi jii Yiisa ki saan nanɔ Yennu jiantu yudaanɔ ŋaak, siaminba ki jiantu yudaanɔ, nan tiŋ na ni saakab, nan sennu wannteeb lakin na. 54 Ŋaan ki Piita be Yiisa poorpo ki waa banfɔkira mɔkmɔk nan baa tan kɔɔ Yennu jiantu yudaanɔ maŋ ŋaak. Ki Piita saan kar ki pukin toontunna na po, ki bi nanii muu. 55 Ŋanne ki Yennu jiantu yudamm nan saakab maŋ kur yabir bi mɔŋ paak a bin gbat siaradamm mɔi ni, ki la Yiisa biit ki kpiu, ŋaan kɔŋ u biit. 56 Siaradamm bonchiann din faa fai ki teenɔ, ŋaan ki bi fai maŋ ki waa leeri. 57 Li yoo ki jasiab fiir set ki faar faak paanɔ a, 58 "Ti gbat ki u yet a u saa bet Yennu jiantu ŋasaakak nba ki niib din maa na, ŋaan jii daa ŋantaa ki maar, ki li ji kii tee nirɔ kaa maari." 59 Ŋaan li kur yann; bi fai maŋ lek bia din ki wei leeri. 60 Ŋanne ki Yennu jiantu yudaanɔ na fiir ki boi Yiisa a "Barii nba ki jab na piak ki jiin a po na, paak tee bee? A ki mɔk li jiinu-u?" 61 Ŋaan ki Yiisa lek ŋmina, ki ki jiin siari. Ki u bia ŋamm boiɔ a "Fine set tee Yennu Niganntɔɔ Masia wunba tee ŋɔɔ Yennu Bija na-a?" 62 Ki Yiisa jiin a "Nn, mine na. I tan saa la min nisaarik Bik ki n kar Yabint Yennu niidiitu po, ki bia tan saa lan ki n be sanpagbant ni ki siik." 63 Ŋanne ki Yennu jiantu yudaanɔ maŋ soor u mɔŋ tiat ki pat, ŋaan yet a "Ti poŋ ji ki loon siarsia. 64 I mɔŋ gbat waa yekint u mɔŋ nan Yennu biaŋinba. I dukii nlee?" Ki bi kur sak a u biira, ki u kpan ŋan nan kuume. 65 Ki bi siab siin mɔsant u paak; ki pii u numm po, ŋaan pebitɔ ki yeen a "Buntir wunba peba na." Ki toontunna na gaarɔ, ki jakɔ nan tanpakii. 66 Tɔn, Piita lek daa din be nanyer po ki nanii muu, ki Yennu jiantu yudaanɔ ŋaasapaantoontunyenɔ tan baar lau, 67 ki gotɔ sirrr, ki tan yetɔ a, "A mun tuu waa Nasaref nirɔ Yiisa maŋ." 68 Ki Piita nɔi a, "Min ki miu, min ki mi barbooru nba ki a piak na paaki;" ŋaan fiir nyii. Li taakpaak ni ki kojouk bui. 69 Ki sapaamɔ na bia lau leŋ ki ŋammit beer nisiab nba see leŋ na a "Jɔɔ na mun tee u poorpoweiteeb na yenɔe." 70 Ki Piita bia ŋamm nɔi. Ki li bia yann waaminna ki binba see leŋ maŋ ŋamm jak Piita a "A set tee niib na ni yenɔe, kimaan a mun tee Galilii nirɔ." 71 Ŋanne ki Piita por a, "Li-i tee ki n faar faakie, Yennu n dat n tubir, min ki mi yaa yeen jɔɔ nba na po." 72 Li yoo maŋ ki kojouk bui pukin taapauŋ munlee; ki Piita ji tiar biaŋinba ki Yiisa bo betɔ na a, "A saa yet a a ki min taar muntaaewa, a ki kojouk n tan fit lian bui leer." Li yoo ki dudukit ji baar Piita, ki u mɔ.

Mak 15

1 Ki Yennu jiantu yudamm, nan tiŋ na ni saakab, nan sennu wannteeb, nan Juu teeb saakab kur lakin sanyapob ni, ki lor lora, ki baan Yiisa bant ki jiiu saan nanɔ tiŋ yudaanɔ nba ki bi yiu Pailat f na boor. 2 Ki Pailat boiɔ a "Fine set tee Juu teeb Kpanbar na-a?" Ki Yiisa jiin a "Fine yeen nna." 3 Ki Yennu jiantu yudamm maŋ lek bia dia sɔnii bonchiann ki piak biir Yiisa. 4 Ki Pailat bia boiɔ a "A kan jiin siarii? Gbiintir baa piak ki biira biaŋinba." 5 Ŋaan ki Yiisa lek y‡t jiinu; ki li ji bakit Pailat. 6 Tɔn, yukitgar tiaru jaamm dinu yoo kur, Pailat tuu nyinn niyenɔkɔɔe dansarik ni, wunba ki niib na loonɔ, ki ŋaau. 7 Li yoo maŋ jasɔɔ din be dansarik ni, ki u sann tee Barabas. Ŋɔɔ nan nisiab din be dansarik ni kimaan bi mɔy‡tuk nba ki bi tuu mɔk doo na ni ki kpi niib na paak. 8 Ŋanne ki nibur maŋ din lakin ki mei Pailat a wun yaan tun burchint. 9 Ki u boib a, "I loon ki n nyinn Juu teeb bat nae?" 10 Kimaan u mi fanu nan naŋ paake ki Yennu jiantu yudamm jii Yiisa ki teen u nuu ni. 11 Ŋanne ki Yennu jiantu yudamm maŋ ŋamm pak tur nibur na a bin betɔ ki wun nyinn Barabase turib. 12 Ki Pailat bia ŋamm boib a, "Ki wunba ki i yiu Juu teeb kpanbar na, i loon ki n teenɔ nlee?" 13 Ki bi tian jiin sanpaapowa a "Kpaamɔ dapunpunn paak." 14 Ki Pailat boib a "Bee paaki? U biit mantik tee lannpoe?" Ki bi bia ŋamm tian sanpaapowa a "Kpaamɔ dapunpunn paak." 15 Ki Pailat loon wun penn nibur maŋ para, li paak ki u nyinn Barabas turib, ŋaan te ki u kunkɔnkɔnna na boo Yiisa, ki u jiiu turib a bin kpaau dapunpunn paak. 16 Ki kunkɔnkɔnna na jii Yiisa ki kɔɔ nanɔ tiŋ na yudaanɔ Pailat ŋaadindouŋ ni, ki yiin bi leeb kur. 17 Ki bi jii baanmuŋ nna ki lannɔ, ŋaan jii kunkonii ki luu naan fokirik ki yirimɔ, 18 ŋaan ji foontɔ nan baa foont bat biaŋinba na, ki yeen a "Juu teeb Bat, naa-a naa-a." 19 ŋaan jii lanbann ki faa u yur paak, ki siin mɔsant u paak, ki gbaa bi duna paak u tɔɔnn. 20 Baa daanɔ nyatuk ki gbenn yoo nba, ki bi liat baanmuŋ na, ŋaan jii u mɔŋ mɔŋ tiat na ki lannɔ, ki jiiu ki nyii nanɔ a bin saan kpaau dapunpunn paak. 21 Baa be sɔnu ni ki saa yoo nba ki bi chet jasɔɔ nna ki u sann tee Simonn. Ki kunkɔnkɔnna maŋ miau a wun gaar Yiisa kuun dapunpunn na. (Li jɔɔ din tee Sairene jɔɔe, ki nyii digbanbik ni ki baat Jerusalem. U din tee Aleksander nan Rufus baae.) 22 Ki bi jii Yiisa ki saa nanɔ siaminba ki bi yir Golgota, ki li paak tee "Yukpabuk boor na." 23 Leŋe ki nisiab din turɔ daan nba ŋmat nan nyɔku nba ki bi yir mir na, ŋaan ki u y‡t li nyunu. 24 Ŋanne ki bi kpaau dapunpunn na paak, ki ji tɔ naatɔɔt ki chent u tiat maŋ. 25 Bi din kpaau sanyiɔk nie, kut munyia yoo. 26 Ki bi din sɔb baa yaa bi la u biit nba na ki tabin u dapunpunn na paak, ki li yaa "Juu teeb Kpanbar maŋe na." 27 Bi bia din kpaa fatiteeb banlee dapunpuna paak ki pukin u po, ki yenɔ be u niidiitu po, ki lɔɔ na mun be u niigaŋ po. 28 Ki li gbeen linba sɔb Yennu gbouŋ ni a "Bi jiiu teen biitdamm sinsuuk ni." 29 Tɔn, ki binba somm gaar leŋ na gumii bi yura ki sukiiɔ, ki yeen a "Fine yaa a saa fit bet Yennu jiantu diiuk na ŋaan bia jii daa ŋantaa ki maar. 30 Ŋann, nyimin dapunpunn na paak ki sik ki tinn a mɔŋ." 31 Nnae ki Yennu jiantu yudamm nan sennu wannteeb mun bia sukiiɔ, ŋaan yeen bi leeb a "U tuu tint leeb, ŋaan tan kan fit tinn u mɔŋi. 32 Juu teeb bat nba tee Yennu Niganntɔɔ Masia na n nyi dapunpunn na paak ki sik nna mɔtana, ki tin la ki teenɔ yada." Ki binba ki bi pukimm u po ki kpaab na mun bia sukiiɔ. 33 Laa din tan baar yensuuk ni, ki tingbouŋ na kur ji bɔnn ki saa tuu yenlekir kut muntaa. 34 Kut muntaa maŋ yooe, ki Yiisa yikin sanpaapowa nan kunkɔsaakar, ki yet a "Eloi, Eloi, lema sabaktani?" ki li paak tee a "N Yennu, n Yennu, bee ki a nyikimi?" 35 Ki binba see leŋ na gbat u yiini maŋ, ki bi siab yet a "Gbiintir man, u yi Elaijae." 36 Ŋanne ki bi ni yenɔ tin ki saan jii saapo ki suunt damiituk nna ni, ki jii sakin daauk paak, ŋaan donn ki turɔ a wun nyu, ki bia yet a "Yii ŋaan ki tii guu ki laan Elaija saa baar ki sikinɔ dapunpunn na paaka." 37 Ki Yiisa ŋamm yikin nan kunkɔsaakar, ŋaan ji kpo li yoo. 38 Li yoo na ki chinchenn nba tuu jɔɔn ki puun Yennu diiuk sinsuuk ni na bɔkit yur paak ki tan sik tiŋ ni. 39 Ki kunkɔnkɔnna yudaanɔ nba din see dapunpunn maŋ boor na nba la biaŋinba ki Yiisa kpo na, ki u ji yet a "Barmɔniie, jɔɔ na set tee Yennu Bijae." 40 Tɔn, Meeri Magdaliinn nan Meeri nba din tee Jooses nan Jeemsbik naa na, nan Salome, din pukin poosiab po ki see banfɔkira ŋaan gorii. 41 Bi poŋ din waa Yiisa yoo nba ki u din be Galilii nae wa, ki sommitɔ. Pooleeb bonchiann nba wei Yiisa ki baar Jerusalem na mun bia din be leŋ. 42 Li daar daajoouk ki Arimatea doo ni jɔɔ nba sann tee Joosef na din baar. U din tee Juu teeb barbuura saakayenɔe, ki tee burchimɔ nan barmɔnii, ki din guu Yennu naan baaru. Li daar sanyafannuk din sii tee foon daare; li paak, ki u din saan nan parcheenn ki yet Pailat a wun chabɔ Yiisa gbanant. 44 Pailat nba gbat a Yiisa poŋ kpowa na, ki li ji yaarlitɔ; ki u yiin kunkɔnkɔnna yudaanɔ na ki tan boiɔ a, "Yiisa nba kpo li yukira-a?" 45 Yoo nba ki u gbat yudaanɔ maŋ mɔb ni na, ki u yiin Joosef maŋ ki tan chabɔ a wun jii Yiisa gbanant na. 46 Joosef poŋ din daa katiŋe waa, ki kpaat Yiisa gbanant dapunpunn na paak, ki pɔbinɔ leŋ, ki jiiu pii kaauk nba ki bi poŋ din jiar tanpiiuk ni na, ki bikit katangbeŋŋir, ki biin li mɔb. 47 Ki Meeri Magdaliinn nan Meeri, wunba din tee Joosef naa na la siaminba ki bi pii Yiisa gbanant na.

Mak 16

1 Foon daar nba din tan gar, ki Meeri Magdaliinn, nan Salome, nan Meeri, wunba tee Jeems naa na, din saan ki saa daa bonnunubit a bin saan but Yiisa gbanant paak. 2 Lasir daar sanyapob ni ki bi saan kaauk maŋ boor ni. 3 Baa daa din be sɔnu ni yoo nba, ki bi boi bi leeb a, "Ŋmee sa saa birint katanu kaauk maŋ mɔb paak ki turiti?" (Li katanu din gbeŋ bonchiann.) Ŋanne ki bi tan per leŋ, ki got la ki katanu maŋ poŋ birinta ki dɔɔ li kɔɔ. 5 Ki bi kɔɔ kaauk maŋ ni, ki saa la naasimɔ nna lia baanpiouŋ ki kar niidiitu po. Ki li teemm jijeet bonchiann. 6 Ki naasimɔ maŋ yetib a "I daa jee siar mani. N mi nan i loon Nasaref nirɔ Yiisa nba ki bi kpiiu dapunpunn paak nae. U kaa nna; u fiir kuun niwa. Gotir man, baa daan birɔ siaminbae na. 7 Yi ŋmat ki saa bet u poorpoweiteeb nan Piita a u gar bi tɔɔnn ki saan Galiliiwa; leŋe ki bi saa lau nan waa poŋ daan betib biaŋinba na." 8 Ki li yaar lit poob maŋ, ki bi gbanant jek bonchiann, ki bi nyii kaauk na ni, ki chiar, ŋaan lek ki faa sɔɔ li labaari, kimaan jaŋmaanii soorib bonchiann. 9 Tɔn, Yiisa nba din fiir kuun ni lasir daar sanyiɔk ni na, u din dɔŋ dɔkit Meeri Magdaliinn paake, wunba ki u din nyinn narinbiit banlore u ni na. 10 Ki poo maŋ saan saa bet Yiisa weinanleeb nba mɔ ki fabin na; 11 baa gbat ki u yaa Yiisa jen u manfoor ni ki u lau na, ŋaan bi din ki teenɔ yada. 12 Linba na poorpoe ki Yiisa poorpoweiteeb banlee din nyii doo na ni ki somm sɔnu ni. Ki u lebit u mɔŋ ki dɔkit bi paak. 13 Ki bi ŋmat jen doo na ni ki tan yet bi leeb, ŋaan ki bi lek ki teemm yada. 14 Li poorpo biak ki Yiisa poorpoweiteeb piik nan yenɔkɔɔ na din kar ki di jeet, ki u tan dɔkit bi paak, ki sarikitib bi yada pɔɔrin, nan bi tuba nba kpaa biaŋinba na paak kimaan baa ki teen binba lau ki u fiir kuun ni yada na. 15 Ki u bia yetib a "Yii saa kii mɔɔntir barŋanii na ki tur sɔɔ kur tingbouŋ na kur po. 16 Wunba kur teenin yada, ki bi wurɔ Yennu nyunwuru, u saa la tinnu; ŋaan wunba ki teenin yada, Yennu saa bu u buut ki biirɔwa. 17 Ŋaan binba teenin yada saa tun yaarlituk toona nae: bi sii taan n sann ki nyint narinbiit niib ni; ki bia pak barganii nba ki bi ki mi pakii; 18 bi-i taŋŋi soor wai, koo bi-i taŋŋi nyuu nyɔkbiiuk, li kan teemm siari; bi bia saa yii bi nii baatib paak, ki bin la laafia." 19 Tɔn, Yiisa nba pak barii na ki gbenn yoo nba, ki Yennu te ki u doo Yendɔuŋ ni ki saa kar ŋɔɔ Yennu niidiitu po. 20 Ŋanne ki u poorpoweiteeb na saan ki saa mɔɔntir u barŋanii na lokir kur po, ki ti Yomdaanɔ be namm, ki te ki bi tuun yaarlituk toona, ki li toona wann siara nan bi mɔɔntii maŋ set tee barmɔniie.

Luk 1

1 Chanbaa Teofilus: N loon ki a bann nan maan nba ki bi poŋ daan wanna na, li tee barmɔnii mɔniie. Li piinu ni, nisiab din la linba piin ki teen ti leeb sinsuuk ni na, nan bi ninbina. Ŋamme tee binba din mɔɔntir maan maŋ, ki niib bonchiann kot bi mɔŋ paak ki sɔb linba ki bi wannib na. Li paak, n mɔŋ mɔŋ boi ki fiitir boŋŋann ki la nan li bonsiar kur nba tee biaŋinba li piinu ni, nan laa saa biaŋinba, ki n dukin nan li ŋan nan ki n sɔb ki lii tɔɔk sɔnu, ki tura. 5 Yoo nba ki Herod din tee Judea tiŋ batsaakɔɔ na, ki Yennu manntɔsɔɔ be ki u sann tee Sekaria, ki u tee manntɔɔ Abija paabu ni nirɔ, ki u ŋaapoo tee manntɔɔ Arɔnn yaaboonn, ki u sann tee Elisabef. 6 Bi banlee maŋ binbeŋ din ŋan Yennu boor, ki bi sak u wannu nan sennu kur nyiknyik; 7 ŋaan bi din ki mɔk biki, kimaan Elisabef din tee pookammatire, ki bi kur bia poŋ kpet nan matuka. 8 Ŋanne dasiar ki Sekaria toontunyoo tan baar u paabu ni, ki u din tan yaa wun tun u toonn ki tur Yennu nan waa tuu tuun ki teenɔ biaŋinba na. 9 Li yoo na ki bi tɔ naatɔɔt nan bi mannteeb kaar nba tee biaŋinba, a bin gann wunba sii kɔɔ Yennu ŋaak na ni kii wubint bonnunubit. Baa tɔ, ki Sekaria dii. Li paak ki u tan saan kɔɔ ŋaak maŋ ni, 10 ŋaan ki nibur na kur biar see nanyer ki mei Yennu, yoo nba ki u daa wubint bonnunubit na. 11 Li yooe ki Yennu malaka dɔkit Sekaria paak, ki set bonnunubit binbintir na diitu po. 12 Sekaria nba din tan lau yoo nba, ki u yan put ŋmat, ki jaŋmaanii soorɔ. 13 Ki malaka maŋ betɔ a, "Sekaria, daa tiin jaŋmaanii. Yennu poŋ gbat a miaruwa, ki a ŋaapoo Elisabef tan saa mar bonjak ki tura, ki a saa pur u sann Jɔɔnn. 14 Ki li tan saa maŋa ki a par n penn, ki niib bonchiann para mun tan saa penn u maaru maŋ paak. 15 U tan sii tee nijaanne Yennu tɔɔnn, ki bia tan kii nyu dabooru kur. U tan saa gbee nan Yennu Seyeeŋ u matuk yooewa. 16 U tan saa te ki Israel teeb bonchiann n jen bi Yomdaanɔ Yennu boor. 17 U sii mɔk Yennu Seyeeŋ nan paŋ, nan Yennu sɔkinii Elaija nba din mɔk biaŋinba na, ki tan saa dɔŋ liit ti Yomdaanɔ, ki tunn mɔtana nigbouŋ na yan, ki bin gaar bi yeejamm danbont, ki bia tunn mɔy‡tdamm yan ki bin bann yentinbinbeŋ, ki u bia tan saa te ki niib n teen siir kii guu bi Yomdaanɔ." 18 Ki Sekaria bet malaka maŋ a, "N saa teen nlee ki bann nan linba na tee mɔnii? Kimaan n kpeta, ki n ŋaapoo mun bia kpeta." 19 Ki malaka maŋ jiinɔ a, "Mine tee Gabriel wunba kar Yennu tɔɔnn na; ki u tumin a boor, a n tan pak nana ki wanna barŋanii na. 20 Ŋaan a saa muu ki kii fit piaki nan li yoo nba tan saa baar ki lin teen mɔnii, kimaan a ki teen n maan nba saa teen mɔnii na yada." 21 Tɔn, niib nba biar see nanyer ki guu Sekaria na, li din bakitib kimaan waa yukir Yennu jiantu ŋasaakak ni biaŋinba na. 22 Waa ji din tan nyii yoo nba, u din ki fit piaki, ki bi ji din bann nan u la yirintue Yennu jiantu ŋasaakak na ni; ki u ji piak muutir ki labin nii ki teemm. 23 Yoo nba ki u toona din tan gbenn Yennu jiantu ŋasaakak ni na, ki u kun ŋaak ni. 24 Li poorpoe ki u ŋaapoo Elisabef din soor poor, ŋaan bɔrii u mɔŋ ŋaak ni tatata nan ŋmaarii ŋaŋŋmu, 25 ki din tan yet u mɔŋ a, "Linba nae ki Yennu tun turin ki tinin ninbaauk ki nyinnin fei ni." 26 Tɔn, Elisabef poor sooru ŋmaarii ŋanloob nie, ki Yennu tun u malaka Gabriel a wun saan doo nba be Galilii tiŋ ni, ki bi yi doo maŋ Nasaref na, 27 ki saa pak tur sapaammunn nba ki u sann tee Meeri na. Sapaamɔ maŋ din tee jasɔɔ sarkpeŋe, ki u sann tee Joosef. Joosef din tee Kpanbar Defid yaaboonne. 28 Ki malaka na tan baar Meeri boor ki yetɔ a, "N foonta. Yennu par mei a paak, ki u bia be nana." 29 Waa yet biaŋinba na, ki Meeri yan ji put ki saa baa nɔɔk ni, ki u ji dukii maan maŋ paak. 30 Ki malaka na bia betɔ a, "Meeri, daa tiin jaŋmaanii, kimaan Yennu par mei a paak. 31 A tan saa soor poor ki mar bonjak, ki tan saa pur u sann Yiisa. 32 U tan sii tee nijaanne, ki bi yiu Yabint Yennu Bija. Ti Yomdaanɔ Yennu saa te ki wun di u yeeja Defid naan, 33 ki u sii tee Jakɔb yaaboona ni kpanbar mɔkmɔk nan mɔkmɔk, ki u naan bia kan mi gbenni." 34 Ŋanne ki Meeri boi malaka maŋ, "N daa tee sapaam-munne, ki nlee ki n saa soor poori?" 35 Ki malaka na yetɔ a, "Yennu Seyeeŋ saa sik a ni, ki Yabint Yennu paŋ n bakin a paak; li paak, bik nba ki a tan saa marɔ maŋ sii tee popeendaanɔe, ki bi yiu Yennu Bija. 36 Ŋaan bant nan a niipoo Elisabef, wunba kpeta na, mɔtana u soor poora ki saa mar bonjak, u ŋmaarii ŋanloobu na, ŋɔɔ nba ki bi din yiu pookammatir na; 37 kimaan siar kaa ki Yennu kan fit tumi." 38 Ki Meeri betɔ a, "Tɔn, n tee Yennu daabire. Ŋaant ki lin teen nan faa betin biaŋinba na." Ki malaka na ji yaat nyikɔ. 39 Li poorpo ki Meeri fiir yiama ki saan kunkona nba be Juda tingbouŋ ni na po, ki saa baar dosau ni, 40 ki kɔɔ Sekaria ŋaak ki foont Elisabef. 41 Yoo nba ki Elisabef gbat Meeri foontii na, ki bik nba daa be Elisabef poor ni na ji kpir kutib. Li yoo na ki Yennu Seyeeŋ gbee Elisabef, 42 ki u yikin sanpaapowa a, "Wuya, wuya, Yennu piisin be a paak ki gar pooleeb kura, ki u piisin bia be bik nba be a poor ni na paak. 43 Li teenin nlee na ki n Yomdaanɔ naa tan baar n boori? 44 Maa gbat a foontii yoo nba, ki bik nba be n poor ni na ji kutib nan parpeenn. 45 Fin nba teen yada nan Yennu maan nba ki u pak tura na tan saa teen mɔnii, parpeenn tee a yare." 46 Ŋanne ki Meeri ji din yet a "N piak Yennu n par ni, 47 ki mɔk parpeenn, Yennu nba tee n Tinntɔɔ na paak, 48 kimaan u tin min nba tee u sapaandaabir na ninbaauk, ŋaan ki n poŋ ki tee siari. Laa jii dinna ki saa, nigbouŋ kur tan sii yeen a n tee parpeenn daanɔe, 49 kimaan paŋ daanɔ Yennu tun toonjaana ki turin, ki u sann tee kasii. 50 U bia mɔk ninbatinu nan nigbouŋ kur nba tiinɔ. 51 U tant u nuu ki tun paŋ toona, ki yat karinbaandamm ki biir bi lora, 52 ki liat kpanbara, ŋaan donn tatimm, 53 ki gboon komma jeŋant, ŋaan te ki mɔkita ŋmat niikoonii. 54 Waa din senn mɔsonn ki tur ti yeejamm Israel teeb nba tee u toontunna na, u tian li po ki sommitib. 55 U bia tian ki tiin Abraham nan u yaaboona ninbaauk mɔkmɔk nan mɔkmɔk." 56 Tɔn, li din teen nan ŋmaarii ŋantaa na ki Meeri daa be Elisabef boor, ki tan ŋmat kun. 57 Li poorpoe ki Elisabef matuk yoo tan baar, ki u mar bonjak. 58 Ki bi ŋakpiasinba nan u ninjamm din gbat biaŋinba ki Yennu tinɔ ninbaauk bonchiann na, ki bi kur ji din mɔk parpeenn nanɔ. 59 Tɔn, ki li daa ŋanniin daare ki bi baar a bin pot bik maŋ punn, ki loon bin jii u baa sann ki purɔ; 60 ŋaan ki u naa gatib a, "Aaii, u sanne tee Jɔɔnn." 61 Ki bi yetɔ a, "Ŋaak na ni, sɔɔ sann ki yi Jɔɔnni." 62 Ŋanne ki bi pak muutir nan bik maŋ baa, a bin boi ki laan u loon bii yi u bik maŋ sann bee; 63 ki u wann muutir ni a bin jii dapɔk turɔ. Baa jii ki turɔ ki u sɔb a, "Bik maŋ sanne tee Jɔɔnn." Ki li ji bakit bi kura. 64 Li taakpaak ni ki Sekaria muut ki ji piin maan paku ki piak Yennu. 65 Ki jaŋmaanii soor bi doo niib kura. Ki labaar na mɔɔnt yat digbana kur nba be Judea kunkona paak, 66 ki li tur binba kur gbat nna maŋ dudukit, ki bi boi bi leeb a, "Bik na tan sii tee niboor bee na?" kimaan bi poŋ la nan Yennu paŋ be nanɔ. 67 Li yoo na ki Yennu Seyeeŋ din gbee Jɔɔnn baa Sekaria, ki u sɔkint Yennu maan ki yet a: 68 "Ŋaant man ki tin pak timm Israel teeb Yomdaanɔ Yennu, kimaan u baar a wun somm u niib ki fat ŋaabe. 69 U turit Tinntɔɔ wunba mɔk paŋ ki tee Yennu toontunnɔ Defid yaaboonn. 70 Yaayoo ni Yennu din pak nan u popeenn sɔkiniinba ki turit, 71 ki yet a u tan saa nyinnit ti datai nii ni, ki bia tan saa nyinnit binba kur namit na nii ni. 72 U bia yet a u sii mɔk ninbatinu nan ti yeejamm, ki kan mi tamm u popeenn mɔsonn 73 nba ki u din senn ki tur ti yeeja Abraham na. 74 U din senn a u saa nyinnit ti datai nii ni, ki tin fit jiantɔ ki jaŋmaanii daa mɔkiti, 75 ki ti sii tee popeendamm nan burchimm u boor nan ti manfoa gbennu. 76 N bik, bi tan sii yia 'Yabint Yennu sɔkiniie.' A saa gar Yennu tɔɔnne ki saa ŋamm u sɔnii ki turɔ, 77 ki wann u niib ki bin bann nan u tan saa tinnib yoo nba ki u nyik chab bi biit na. 78 Barmɔniie, Yennu mɔk ninbatinu nan burchint, ki ti tinnu daar maŋ tan sii tee nan yondoor nae, 79 ki li tan saa yent sanpaapo ki tur binba be kuun bunbɔnn ni na; ki li bia tan saa yent ti taa ni ki tin tɔkin parmaasir sɔnjouk na." 80 Li poorpoe ki bik maŋ din tan kpaatir ki pukii nan Yennu bannu, ki kɔɔ muuk ki saa be tatata nan yoo nba tan baar nan wun dɔkit Israel teeb paak.

Luk 2

1 Li yoo na ki kpanbara yudaanɔ Ɔgustus tur mɔb u yent ni a bin sɔb sɔɔ kur sann nikant ni. 2 Ŋanne tee sinsinn nikant sɔbu, ki Kirinius tee Siria tiŋ yudaanɔ li yoo. 3 Li paak, sɔɔ kur din kun u doo ni a bin saa sɔb u sann, 4 ki Joosef mun din nyii Nasaref nba be Galilii tingbouŋ ni na, ki saan Judea tingbouŋ ni, ki kun kpanbar Defid doo ni, ki bi yi doo maŋ Betlehem; kimaan u din tee Defid yaaboonne. 5 Li paak, ki u kpen a bin sɔb ŋɔɔ nan u sarkpeŋ Meeri sana; li yoo, ki Meeri mɔk poor. 6 Baa din daa be Betlehem na, ki Meeri maaru yoo tan jaŋ, 7 ki u mar bonjabik, u sapaammar, ki jii tana ki bobinɔ, ki birɔ bonkobit burgbetir ni, kimaan saamm diiuk ji din ki mɔk yiar nba ki bi saa dɔɔri. 8 Pekpaarii mun din be doo maŋ ni ki kpaar pei nyiɔk muuk ni. 9 Ki Yennu malaka tan dɔkit bi paak, ki Yennu yentsaakar yent lintib. Ki jaŋmaanii nan waat soorib bonchiann. 10 Ŋaan ki malaka na betib a, "Daa tiin jaŋmaanii man, kimaan n baar nan barŋaniie maa n wanni, linba saa tur niib kur parpeenn. 11 Dinna nyiɔk na bi mar i Tinntɔɔ, wunba tee Yennu Niganntɔɔ Masia na. Bi marɔ Defid doo nie. 12 I saa la sanpantik na boob tana ki dɔɔ bonkobit burgbetir ni; linba nae sii tee nyinn ki turi." 13 Li yoo na ki Yendɔuŋ ni malakanba bonchiann dɔkit ki pukin malaka na po, ki piak Yennu ki yiin a: 14 "Dont Yennu sann sanpaapo man; parmaasir-ii be u nigannkab paak, tingbouŋ na ni." 15 Ki malakanba na tan nyik pekpaarii na, ŋaan ŋmat doo Yendɔuŋ ni. Ki bi yet bi leeb a, "Ŋaant man ki tin saan Betlehem ki saa got linba tun, ki ti Yomdaanɔ Yennu betit na." 16 Ŋanne ki bi fiir saan yian yian ki saa baar ki la Meeri nan Joosef; ki sanpantik maŋ dɔɔ bonkobit burgbetir ni. 17 Baa baar lau yoo nba ki bi mɔɔnt linba ki malaka na betib ki jiin bik maŋ po. 18 Ki binba gbat pekpaarii na nba mɔɔnt linba na, ki li bakit bi kur. 19 Ŋaan Meeri din tian linba tun na kur, ki dukii li po u par ni bonchiann. 20 Li poorpoe ki pekpaarii na ŋmat bi pei boor muuk na ni. Baa saa na, ki bi piak dont Yennu sann, linba kur ki bi gbat ki la na paak; ki li set tee nan malaka nba betib biaŋinba na. 21 U maaru daa ŋanniin nie ki bi din pot u punn ki pur u sann Yiisa, sann nba ki malaka din pur ŋaan ki u poor daa ki soor. 22 Tɔn, li din tan jaŋ nan Joosef nan Meeri n tun nan Moses sennu nba wann biaŋinba, ki mann maruŋ ki ŋamm bi mɔŋ Yennu boor na. Ŋanne ki bi ji din jii bik na ki saan nanɔ Jerusalem, a bin saa jiiu ki tur Yennu, 23 nan laa sɔb Yennu sennu ni na a, "Bikperik kur nba tee bonjak sii tee Yennu yɔɔe." 24 Ki bi bia mann maruŋ nan Yennu nba din senn biaŋinba na a, "Bin lon lanjerii banlee koo ŋmanbira banlee ki mann." 25 Li yoo na ki jasɔɔ nna be Jerusalem, ki u sann tee Simeonn. U din tee burchimɔ nan yentinnɔe, ki Yennu Seyeeŋ be u ni, ki u guu yoo nba ki Yennu tan saa tinn Israel teeb. 26 Yennu Seyeeŋ maŋ poŋ din fiit ki wannɔ a u kan kpo see ki u tan la Yennu Niganntɔɔ Masia, wunba ki u din senn mɔsonn a u saa tumɔ na. 27 Li yoo na ki Yennu Seyeeŋ maŋ te ki Simeonn kɔɔ Yennu jiantu ŋasaakak ni, ki saa la Yiisa baa nan u naa ki bi baar nanɔ a bin teenɔ nan sennu nba wann biaŋinba na. 28 Ki Simeonn gaar bik maŋ ŋaan pak Yennu ki yet a: 29 "N Yomdaanɔ, min nba tee a daabir na, ŋaant ki n saan nan parmaasir nan faa poŋ din betin biaŋinba na, 30 kimaan n mɔŋ mɔŋ ninbinn la Tinntɔɔ nba ki a tumɔ nawa, 31 wunba ki a gann sennɔ ki tur nibooru kura. 32 U sii tee yentu ki fiit a sɔnu ki wann binba ki tee Israel teeb na, ki bia baar nan dontir ki tur a niib Israel teeb." 33 Tɔn, Simeonn nba pakib ki jiin bik maŋ po biaŋinba na, ki li bakit bik na baa nan u naa bonchiann. 34 Ki Simeonn miar Yennu mɔsoŋŋann bi paak, ŋaan bet bik na naa Meeri a, "Nnara, Yennu nyinn bik na ki sennɔ a Israel teeb bonchiann n baa yann u paak; ki leeb bonchiann mun bia tan saa tinn u paake. Ŋɔɔe tan sii tee nyinn nba ki niib bonchiann saa pak ki biir na; 35 linba na saa te ki bi woonin ni dudukit n nyi paanu. Ŋaan bonsiar tan saa tun ki biir a mɔŋ mɔŋ par bonchiann." 36 Tɔn, ki Yennu sɔkiniilɔɔ mun be leŋ ki tee poo, ki u sann tee Anna, wunba tee Fanuel bik, ki bia tee Aser booru ni nirɔ, ki din tee pookperchianwoŋ, wunba din yoo bina ŋanlore, 37 ki u sɔrɔ kpo ŋaan nyikɔ pakɔɔk ki u ji tee binpiinniin nan ŋanna; ŋaan u din tuu ki nak Yennu jiantu ŋasaakak na ni yonnu nan nyiɔk, ki jiantir Yennu ki lorin mɔb ki meiɔ. 38 Li yoo na ki u baar ki lab ki teen Yennu niipoouk, ki din piak bik na po ki teen binba kur din guu yoo nba ki Yennu yaa wun tinn Jerusalem teeb na. 39 Ki Joosef nan Meeri nba din tun gbenn Yennu sennu nba wann biaŋinba na, li yoo ki bi ŋmat kun Nasaref nba be Galilii tiŋ ni na. 40 Ki bik na tan kpaat nan paŋ nan subinii bonchiann, ki Yennu par mei u paak. 41 Tɔn, binn kur ki Yiisa baa nan u naa tuu saan Jerusalem ki saa di yukitgar tiaru jaamm. 42 Yoo nba ki Yiisa din tan baar binpiik nan ŋanlee na, ki bi saan a bin saa di jaamm maŋ nan biaŋinba ki bi tuu tee na. 43 Jaamm daa maŋ nba din tan gbenn yoo nba, ki bi ji piin kunu, ŋaan Yiisa biar be Jerusalem, ki u damm ki mi nan u biari. 44 Bi din dukii a u be nibur na nie, ki bi somm daar maŋ kur; ŋanne ki bi ji loonɔ bi niib ni nan bi leeb ni, 45 ŋaan ki ki lau. Ki bi din ŋmat saan Jerusalem ki saa loonɔ leŋ. 46 Daa ŋantaa daar ki bi tan lau Yennu jiantu ŋasaakak ni, ki u lakin kar nan wannteeb yudamm ki gbiintir bi maan ŋaan bia boib buboit. 47 Ki binba kur gbiintirɔ na, ki li bakitib nan waa teen biaŋinba ki mɔk bannu ki piak ki jiintib na. 48 Ki u baa nan u naa nba lau leŋ na, ki li bakitib bonchiann; ki u naa ji boiɔ a, "N bik, bee ki a teent nna? A ki mi a min nan a baa la parbiir hei ki loomani?" 49 Ki u jiin ki boib a, "Bee ki i loonimi? I ki mi nan n saa fabir kii be n Baa toona nie-e?" 50 Ŋaan bi din ki bann u maan maŋ paaki. 51 Ŋanne ki bi din ŋmat nan Yiisa ki sik Nasaref, ki u saak bi mɔb. Ki u naa tian linba tun na kur u par ni. 52 Ki Yiisa kpaatir ki pukii nan subinii, ki Yennu nan nisaarii para mei u paak.

Luk 3

1 Yoo nba ki kpanbara yudaanɔ Taiberias din dii naan bina piik nan ŋaŋŋmu, ki Ponsius Pailat mun tee Judea yudaanɔ, ki Herod mun tee Galilii batsaakɔɔ na, ki u waarɔ Filip mun tee Iturea nan Trakonitis batsaakɔɔ, ki Laisanias tee Abilene batsaakɔɔ, 2 ki Annas nan Kayafas mun tee Yennu jiantu yudamm, li yoo na ki Yennu jii u maan ki tur Jɔɔnn nba tee Sekaria bija na; ki u din be muuk ni. 3 Ŋanne ki Jɔɔnn din lin Jɔɔdann mɔkir po kur, ki mɔɔntir ki teen niib a bin nyik bi toonbiit ki wun wurib Yennu nyunwuru, ki Yennu n nyik chabib. 4 Linba na tee nan Yennu sɔkinii Aisaya nba din sɔb Yennu gbouŋ ni biaŋinba nae a; "Nisɔɔ be muuk ni ki hoot ki yaa 'Ŋammit man ti Yomdaanɔ baaru sɔnu ki turɔ, ki ŋamm u sɔnii ki lii took. 5 Baat kur saa gbee ki naa; ki jɔɔt nan kunkona kur saa bit ki naa. Sɔnu nba ŋmar siaminba kur, li saa sont fanu; sɔnboota saa piin ki lat naa, 6 ki tingbouŋ niib kur saa la biaŋinba ki Yennu saa tinnib.'" 7 Ŋann maŋe ki niib bonchiann din baar Jɔɔnn boor a wun wurib Yennu nyunwuru; ki u betib a, "Yimm waalabirii na! Ŋmee kpaani a i tin nyi Yennu wutoor nba yaa lin baar i paak na ni? 8 Yii tuun man linba saa wann nan i set nyik i toonbiita. I daa daan i para ni nan Abraham tee i yeeja. N beerie, Yennu saa fit fiin tana nba na ki lin kpant Abraham yaaboona. 9 Pajar poŋ teen siira a wun chɔɔ tiinii; ki tiik nba kur ki loon lɔɔnŋana, bi saa chɔɔre ki lu muu ni." 10 Ki nibur maŋ din boiɔ a, "Ki ti ji saa teen nlee?" 11 Ki u jiin a, "Wunba mɔk liata ŋanlee, see ki u paat yenn ki tur wunba ki mɔki, ki wunba mɔk jeet, wun wat tur wunba ki mɔki." 12 Ŋanne ki lampogaartesiab mun baar a wun wurib Yennu nyunwuru, ŋaan boiɔ a, "Chanbaa, timm saa teen nlee?" 13 Ki u betib a, "I daa gaan likirii ki gaar baa senni biaŋinba na." 14 Ki kunkɔnkɔnna mun baar ki tan boiɔ a, "Ki timm muni, ti saa teen nlee?" Ki u betib a, "I daa mukisir sɔɔ ki gaan siari, koo ki fa faak niib po; i numm n gboo i paauk nba ki i gaan na." 15 Tɔn, ki niib ji piin ki dukii dudukit bi para ni ki mɔk dindann Jɔɔnn po, a li pasiar u sii tee Yennu Niganntɔɔ Masiae. 16 Li yoo maŋ ki Jɔɔnn bet bi kur a, "Min ŋarin wuuri nyume, ŋaan wunba cheen baat. N ki ŋan nan ki n lot u taasaŋmii. Ŋɔɔe saa jii Yennu Seyeeŋ nan muu ki wuur i para. 17 U dia dilenn ŋmanii a wun lenn boŋŋann, ki nyinn dibin ki wuun u bɔɔr ni, ŋaan joo fouŋ na muu nba kan mi kpeeni." 18 Jɔɔnn nba din mɔɔntir barŋanii maŋ ki teen niib na, u din pak pinpakbooru booru ki kpaamm. 19 U bia din kpaan batsaakɔɔ Herod, kimaan u din fat u mɔŋ waarɔ ŋaapoo Herodias ki kɔɔnɔ, ki bia tun toonbiit bonchiann. 20 Li poorpoe ki u tan kɔɔn Jɔɔnn dansarik, ki li mantik tee bonbiir. 21 Yoo nba ki Jɔɔnn din wur niib na kur Yennu nyunwuru na, ki Yiisa tan baar u boor ki u wur u mun Yennu nyunwuru. Leŋ maŋe ki Yiisa mei Yennu, ki sanpaapo tan loot, 22 ki Yennu Seyeeŋ sik u paak nan gbanant nba naan nan ŋmann na, ki kunkɔr nyii sanpaapo ki yet a, "Fine tee n Bilonkak; fine ki n numm gboo." 23 Yoo nba ki Yiisa din piin Yennu toonn na, ki u tee nan bina piintaa na. Niib din mi a u tee Joosef bijae; ki Joosef baa tee Heli, 24 ki Heli baa tee Matat, ki Matat baa tee Liifai, ki Liifai baa tee Melki, ki Melki baa tee Jannai, ki Jannai baa tee Joosef, 25 ki Joosef baa tee Matatias, ki Matatias baa tee Amos, ki Amos baa tee Nahum, ki Nahum baa tee Esli, ki Esli baa tee Nagai, 26 ki Nagai baa tee Maat, ki Maat baa tee Matatias, ki Matatias baa tee Semeinn, ki Semeinn baa tee Josek, ki Josek baa tee Joda, 27 ki Joda baa tee Joanann, ki Joanann baa tee Resa, ki Resa baa tee Serubabel, ki Serubabel baa tee Sealtiel, ki Sealtiel baa tee Neri, 28 ki Neri baa tee Melki, ki Melki baa tee Adi, ki Adi baa tee Kosam, ki Kosam baa tee Elmadam, ki Elmadam baa tee Er, 29 ki Er baa tee Joosua, ki Joosua baa tee Elieser, ki Elieser baa tee Jorim, ki Jorim baa tee Matat, ki Matat baa tee Liifai, 30 ki Liifai baa tee Simeonn, ki Simeonn baa tee Juda, ki Juda baa tee Joosef, ki Joosef baa tee Joonam, ki Joonam baa tee Elayakim, 31 ki Elayakim baa tee Melea, ki Melea baa tee Menna, ki Menna baa tee Matata, ki Matata baa tee Natann, ki Natann baa tee Defid, 32 ki Defid baa tee Jese, ki Jese baa tee Obed, ki Obed baa tee Boas, ki Boas baa tee Sela, ki Sela baa tee Nasonn, 33 ki Nasonn baa tee Aminadab, ki Aminadab baa tee Adminn, ki Adminn baa tee Arni, ki Arni baa tee Hesronn, ki Hesronn baa tee Peres, ki Peres baa tee Juda, 34 ki Juda baa tee Jakɔb, ki Jakɔb baa tee Aisak, ki Aisak baa tan tee Abraham, ki Abraham baa tee Tera, ki Tera baa tee Nahor, 35 ki Nahor baa tee Serug, ki Serug baa tee Reu, ki Reu baa tee Peleg, ki Peleg baa tee Eber, ki Eber baa tee Sela, 36 ki Sela baa tee Kainann ki Kainann baa tee Afaksad, ki Afaksad baa tee Sem, ki Sem baa tee Nowa, ki Nowa baa tee Lamek, 37 ki Lamek baa tee Metusela, ki Metusela baa tee Enok, ki Enok baa tee Jared, ki Jared baa tee Mahalaleel, ki Mahalaleel baa tee Kainann 38 ki Kainann baa tee Enos, ki Enos baa tee Sef, ki Sef baa tee Adam, ki Adam baa tee Yennu.

Luk 4

1 Li yoo na ki Yiisa nyii Jɔɔdann mɔkir po, ki gbee nan Yennu Seyeeŋ, ki Seyeeŋ maŋ te ki u kɔɔ muuk ni, 2 ki be leŋ ki Sintaanii saa jammɔ daa piinna. Ki u ki dii siar yoo maŋ ni; ki kon ji din tan soorɔ. 3 Ki Sintaanii yetɔ a, "Li-i tee ki a set tee Yennu Bijaie, fan yet tann na ki lin kpant jeet." 4 Ki Yiisa yetɔ a, "Li sɔb Yennu gbouŋ ni a, 'Jeet kuukɔɔ kaa te ki nirɔ be.'" 5 Li poorpoe ki Sintaanii ji jiiu ki doo nanɔ sanpaapo ki saa wannɔ tingbouŋ na yent kur li tonton na, 6 ŋaan betɔ a, "N bo saa tura paŋ nan mɔkint na kur. Bi din tur mine paŋ nan mɔkint maŋ, ki n mun saa fit tur wunba ki n loon. Li-i tee ki a bo saa gbaan ki jiantin, li kur bo sii tee a yare." 8 Ki Yiisa betɔ a, "Li sɔb Yennu gbouŋ ni a, 'Nirɔ-ii jiantir u Yomdaanɔ Yennu kuukɔɔe, kii bia kii waa ŋɔɔ kuukɔɔ."' 9 Ŋanne ki Sintaanii bia jiiu ki saan nanɔ Jerusalem, ki saa doo nanɔ Yennu jiantu ŋasaakak mɔpinyerik paak, ŋaan betɔ a, "Li-i tee ki a set tee Yennu Bijaie, fan yukir mɔb nna na, 10 kimaan li sɔb Yennu gbouŋ ni a, 'U saa te ki u malakanba-ii guua fanu.' 11 Li bia sɔb a, 'Bi sii dia-a nan bi nii ki a taar kan gbiat tann gbaa ki la daŋi.'" 12 Ki Yiisa yetɔ a, "Yennu gbouŋ bia yet a, 'Sɔɔ daa bikii u Yomdaanɔ Yennu.'" 13 Sintaanii nba jamm Yiisa ki tan goo na, ki u daa nyikɔ. 14 Yiisa din gbee nan Yennu Seyeeŋ paŋ, ki tan ŋmat saan Galilii. Ki bi mɔɔnt u labaar ki li yat tiŋ maŋ kur po. 15 U din wantib Yennu maan bi Yennu jiantu diit ni; ki niib kur piakɔ. 16 Li poorpoe ki Yiisa din saan Nasaref, siaminba ki u din tan ŋmant nirɔ na. Ki foon daar ki u tan kɔɔ Yennu jiantu diiuk ni nan waa poŋ din tuu kɔɔ biaŋinba na, ki tan fiir a wun karin Yennu gbouŋ. 17 Ki bi jii gbouŋ nba ki Yennu sɔkinii Aisaya din sɔb na ki turɔ; ki u pint gbouŋ na ki la siaminba ki li sɔb ki yet a: 18 "Yennu Seek be n ni, ki u gannin a n mɔɔnt barŋanii ki tur tatimm. U tumin a n tan bet yommii a n saa nyinnib yann, ki bia bet jɔɔnii ki bin nyɔɔnt, ki bia fat binba be biak ni ki lub yann, 19 ki bia mɔɔnt a li jaŋ nan Yennu n tinn u niiba." 20 Yiisa nba karin gbenn yoo nba ki u pin gbouŋ na ki jiin tur Yennu jiantu diiuk toontunnɔ, ŋaan kar. Ki niib kur nba be diiuk na ni ji goriiɔ. 21 Ki u piin piak ki teemm a, "Maan nba ki n karin Yennu gbouŋ ni na, li teen barmɔnii dinna, yoo nba ki li baa i tuba ni na." 22 Ki bi kur ji piakɔ; ki li bakitib nan mamamm nba ki u pak na, ki bi ji boi bi leeb a, "Joosef bija na kaa na-a?" 23 Li yoo na ki u betib a, "N kan biris nan i tan saa betin barjouk nae a, 'Fin tebtɔɔ, tebin a mɔŋ mɔŋ,' ki bia tan saa betin a n tun bakitnauŋ toonjaana n mɔŋ doo ni nan biaŋinba ki i gbat ki n tun Kapenaum na. 24 Barmɔniie ki n beeri na, niib kan gaar Yennu sɔkinii u mɔŋ mɔŋ doo ni. 25 Barmɔniie, pakɔi bonchiann din be Israel tiŋ ni, yoo nba ki Elaija daa din be na. Li yoo maŋ, saak din ki baa bina ŋantaa nan ŋmaarii ŋanloob, ki kon din tan baa bonchiann tiŋ maŋ kur ni, 26 ŋaan Yennu din ki tun Elaija sɔɔ boor faba tiŋ maŋ ni; u din tumɔ pakɔɔk nba din be Sarefaf doo nba be Saidonn tiŋ ni na boore. 27 Yoo nba ki Elaisa daa din be na, gbaata bonchiann din be Israel tiŋ ni, ŋaan bi sɔɔ din ki la laafia tiŋ maŋ ni; Neemann nba din tee Siria jɔɔ na, ŋɔɔ kuukɔɔe din la laafia." 28 Ki niib kur nba be Yennu jiantu diiuk maŋ ni nba gbat Yiisa maan maŋ na, ki bi ji donn wutoa u paak, 29 ki fiir ber nyinnɔ doo na ni, ki saa donnɔ kunkonn nba ki bi maa bi doo na paak a bin lu-u baauk ni, 30 ŋaan ki u buut bi ni ki yaat. 31 Li poorpo ki Yiisa sik Kapenaum nba be Galilii tiŋ ni na. Foon daar ki u kɔɔ Yennu jiantu diiuk ni ki want niib Yennu maan; 32 ki u wannu maŋ bakitib bonchiann, kimaan u maan na din mɔk paŋ. 33 Ki jasɔɔ nba ki narinbiiuk be u ni na din be Yennu jiantu diiuk na ni ki tian sanpaapo a 34 "Fin Yiisa nba tee Nasaref nirɔ na, timm nan fin, nlee mantiki? A baar a a tan biirite-e? N mi faa tee wunba; a tee Yennu popeendaanɔ nae." 35 Ki Yiisa kpaan narinbiiuk maŋ a, "Ŋminin fuut, ŋaan nyi jɔɔ na ni." Ki narinbiiuk na lu jɔɔ na tiŋ ni bi sinsuuk ni, ŋaan nyii u ni; waa lek lu-u tiŋ ni na, ŋaan u ki paanɔ daŋi. 36 Ki li teen sɔɔ kur yaarlituk, ki bi boi bi leeb a "Mɔbonboor bee na? U mɔk yiikoo nan paŋ ki teen narinbiit mɔb, ki bi nyi niib ni." 37 Li paak, ki bi din mɔɔnt Yiisa sann tiŋ maŋ kur po. 38 Li yoo na ki Yiisa nyii Yennu jiantu diiuk na ni ki saan Simonn ŋaak, ki saa la Simonn dianpook yiar yiaru nba paar, ki bi fabin tur Yiisa ki jiin poo na po. 39 Ki Yiisa baar ki set waa dɔɔ siaminba na, ŋaan tur yiaru na mɔb, ki li gbenn; ki poo na fiir yiama ki teemm saauŋ. 40 Yoo nba ki yonnu din tan baa na, ki binba kur mɔk baatib bi ŋei ni na jiib ki baar namm Yiisa boor; ki bi yiar yiarbooru booru. Ki u yii u nii baatib na kur paak ki te ki bi la laafia. 41 U bia din te ki narinbiit nyii niib bonchiann ni. Baa nyi yoo nba ki bi tian sanpaapo a, "A tee Yennu Bijae." Ŋaan ki u din ki sak ki bi pak jiki, kimaan bi mi nan u tee Yennu Niganntɔɔ Masiae. 42 Laa din yent ki Yiisa nyii doo na ni ki saan muuk ni; ki niib na din tan lin loonɔ ki saa lau. Baa lau yoo nba ki bi ji gɔɔrɔ a u daa yaatir ŋaan nyikitibi. 43 Ki u betib a "See ki n saan digbanlia biak kii saki mɔɔntir barŋanii nba jiin Yennu naan po, kimaan li paake te ki Yennu tumin." 44 Ŋanne ki u lin Judea digbana ki kɔɔ Yennu jiantu diit ni ki want niib barii maŋ.

Luk 5

1 Dasiar ki Yiisa din saan see Genesaret mɔkgbeŋŋir paak ki want niib Yennu maan; ki nibur tut baat a bin gbiint u maan maŋ. 2 Ki burgbeta ŋanlee be mɔkgbeŋŋir maŋ gbingbann, ki jansoor teeb nyikir ŋaan chat saan a bin wuur bi janlaant. Yiisa nba din la burgbeta maŋ yoo nba, 3 ki u kɔɔ Simonn yar ni, ŋaan betɔ a wun chatir waan ki sikin nyun ni. Waa chat sikin na, ki Yiisa kar burgbetir maŋ ni, ŋaan want nibur na Yennu maan. 4 Waa din wann niib ki gbenn yoo nba ki u bet Simonn a "Jirin nyun sunsuŋ po ki lu i janlaant ki soor janii." 5 Ŋaan ki Simonn jiin a, "Chanbaa, wonn nyiɔk munna tin won yabir a ti soor janii, ŋaan ki fit soor siari. Tɔn, faa pak linba na, ŋann n saa lu ki got." 6 Ki Simonn nan u leeb na ji lu bi janlaant na ki soor janii bonchiann; ki bi janlaant ji yaa lin pat. 7 Li paak, ki bi kabint bi leeb nba be burgbetleer na ni a bin baar ki sommib. Baa baar yoo nba ki bi donn janii ki tan gbeen bi burgbeta ŋanlee na kur, ki li din kpiak ki ji yaa lin kpii nyun ni. 8 Ki Simonn Piita nba la linba tun na, ki u gbaan Yiisa tɔɔnn ŋaan yetɔ a "N Yomdaanɔ, n tee biitdaanɔe. N ki ŋan nan ki n nakinani. Nyikimin ŋaan kii saa," 9 kimaan baa soor janii bonchiann biaŋinba na, ki li bakit Simonn Piita nan u naasinyɔɔsinba na kur, 10 nan u leeb, Jeems nan Jɔɔnn nba din tee Sebedii waas na. Ki Yiisa bet Simonn a "Daa tiin jaŋmaanii. Laa jii dinna ki saa, a saa saan kii daak niib kii baat namm n boor." 11 Ŋanne ki bi ji din tut bi burgbeta maŋ ki donn gbingbann, ki nyik bi bont kur leŋ ŋaan waa Yiisa. 12 Sianyoo ki Yiisa din be dosau nna ni, ki gbaatir be leŋ ki yiaru na be u paak bonchiann. Waa din tan la Yiisa yoo nba, ki u baar ki fabin u tɔɔnn ki miarɔ a "N Yomdaanɔ, li-i tee ki a loon, a saa fit te ki n ŋaauk na n gbenna." 13 Ki Yiisa tant nuu ki siiu, ki yetɔ a "N loon nna. A ŋaauk maŋ n gbenn." Li taakpaak ni ki u ŋaauk na set gbenn. 14 Ŋaan ki Yiisa kpaanɔ a "Daa piak sɔɔ barii na. I saa Yennu manntɔɔ boor ki jii a mɔŋ ki wannɔ, ki bia mann maruŋ ki tur Yennu nan Moses nba din senn ki jiin gbaata laafia lanu po na, ki sɔɔ kur n bann nan a ŋaauk maŋ set gbenna." 15 Barmɔnii, Yiisa sann set din doo bonchiann ki gar sinsinn yoo na, ki nibur din lakin u boor a bin gbiint u maan, ki baatib nba be leŋ na bia loon bii laat paaku. 16 Ŋaan u din tuu yɔɔ nyie ki saa muuk ni ki mei Yennu. 17 Sianyoo ki Farisiinba nan sennu wannteeb mun din nyii Galilii doi kur ni, nan Judea doi kur ni, nan Jerusalem doo ni, ki baar Yiisa boor. Li daar ki Yiisa want niib Yennu maan ŋasiak nna diiuk ni, ki Farisiinba nan sennu wannteeb maŋ kar leŋ, ki Yennu paŋ din be Yiisa ni a wun te ki niib n paak. 18 Ki nisiab tan baat ki jii baatɔɔ liaŋ paak, wunba ki u gbanant kpowa, ki bi koor a bin kɔɔ nanɔ diiuk maŋ ni ki birɔ Yiisa tɔɔnn, 19 ŋaan bi din ki la yiar nba saa kɔɔ, kimaan niib din yabit bonchiann. Li paak ki bi jiiu ki doo nanɔ diiuk na yur a paak, ki chɔɔ loot ki sikinɔ nan liaŋ na ki tan birɔ Yiisa tɔɔnn, niib na sinsuuk ni. 20 Yiisa nba la baa teenɔ yada biaŋinba na, ki u bet jɔɔ na a "N yɔɔk, n nyik chab a biita." 21 Ki sennu wannteeb nan Farisiinba na ji dukii bi para ni a "Nilanɔpoe mun piak nna ki yekint u mɔŋ nan Yennu? Ŋmee saa fit nyik chab nirɔ biiti, ki li ki tee Yennu kuukɔɔ kaa?" 22 Yiisa ŋarin din mi baa dukii biaŋinba, ki u boib a "Bee ki i dukii nna? 23 Maa yet baatɔɔ na a 'N nyik chab a biit,' koo maa saa yetɔ a 'Fiit kii somm na,' maan munlee na lannpoe paari? 24 N ji saa wanni nan min nisaarik Bik mɔk yiikoo tingbouŋ na ni ki saa nyik chab niib bi biit." Ŋanne ki u jiant bet jɔɔ nba ki u gbanant kpo na a "Fini, fiit ki jii a liaŋ kii kun a ŋaak ni." 25 Li taakpaak ni ki jɔɔ maŋ fiir set bi numm po, ki jii u liaŋ maŋ, ki kun; waa saa na ki u piak dontir Yennu. 26 Ki li bakit bi kura, ki jaŋmaanii bia soorib; ki bi piak dont Yennu ki yeen a "Dinna ti jia la durinya." 27 Li poorpoe ki Yiisa din nyii ŋaak maŋ ni ki saa, ki saa la lampogaartɔɔ, ki u sann tee Liifai, ki u kar u toonn paak lampogaar diiuk ni; ki Yiisa betɔ a "Fiit kii waan." 28 Ki u nyik bont kur ŋaan fiir ki waau. 29 Ŋanne ki u tan teen jaangbeŋŋir u ŋaak ni ki tur Yiisa; ki lampogaarteeb nan niib bonchiann din baar ki lakin dii namm. 30 Ki Farisiinba siab nan sennu wannteeb nba tee Farisiinba na baar ki burin nan Yiisa poorpoweiteeb a, "Bee ki i di ki nyu nan lampogaarteeb nan biitdammi?" 31 Ki Yiisa jiant ki gatib a "Binba mɔk laafia ki loon tebtɔɔ; binba yiar, ŋamme loon. 32 N ki baar a n yiin popeenn damm kaa, ŋaan n baar maa n bet biitdamme a bin nyik bi toonbiit." 33 Ŋanne ki nisiab din yet Yiisa a "Jɔɔnn poorpoweiteeb yɔɔ lorin mɔi ki mei Yennu, ki Farisiinba poorpoweiteeb mun bia tee nna, ŋaan a poorpoweiteeb ŋarin di ki nyu." 34 Ki u boib a, "Poochiann-i be, sɔɔ saa fit ki te ki saamm n lor mɔi yoo nba ki pooyookir sɔrɔ daa be bi boor ni nawa-a? Aaii. 35 Ŋaan yoo baat ki bi tan saa nyinn pooyookir sɔrɔ na bi boor; li yooe ki bi saa lor mɔi." 36 Yiisa din yimm barjouk biak a "Sɔɔ kan pat tapaann chabir ki lik takperi. Li-i tee ki u teen nnaie, u saa biir tapaann maŋe, ŋaan chabpaann nan takper maŋ bia lek kii jami. 37 Nnae mun ki sɔɔ kan jii dapaanin ki liak dalenkper ni. Li-i tee ki u teen nnaie, dapaanin na-i mɔ yoo nba, li saa yeer dalenkper nae, ki daan maŋ n mɔɔn yann. 38 See ki a jii dapaanin ki liak linlenpaann ni. 39 Tɔn, li-i tee ki wunba nyu dakperiie, u-i la dapaanin, u ki faatiri; u saa yet a 'Dakpere man.'"

Luk 6

1 Tɔn, foon dasiar ki Yiisa nan u poorpoweiteeb din gaar dii kpaab ni, ki u poorpoweiteeb na din somm kɔnii dikara ki pinii ŋman. 2 Ki Farisiinba siab boib a "Bee ki i tuun linba ki ti sennu want nan ti daa tuun foon daari?" 3 Ki Yiisa jiin ki boib a "I ki mi karin Yennu gbouŋ ni Defid nba din tun biaŋinba na-a? Kon nba din mɔk ŋɔɔ nan u jɔɔmu na, 4 ki u din kɔɔ Yennu ŋaak ni ki saa jii Yennu boroboro ki ŋman, ki bia tur u jɔɔmu na, ŋaan sennu na din ki chab nan sɔɔ n di boroboro maŋ see mannteeb kuukɔɔ." 5 Ki Yiisa bia betib a "Min nisaarik Bike yen foon daar." 6 Foon daleer ki Yiisa kɔɔ Yennu jiantu diiuk ni ki wann niib Yennu maan, ki jasɔɔ be leŋ ki u niidiitu kpo. 7 Ki sennu wannteeb nan Farisiinba siab mun din be leŋ, ki gorii Yiisa a bin laan u saa turɔ laafia foon daarii, kimaan bi din loon bin la linba ki bi saa biirɔe. 8 Ŋaan Yiisa din mi bi dudukit ni, ki bet jɔɔ nba ki u nuu kpo na a "Fiit ki set tɔɔnn po." Ki jɔɔ maŋ fiir set. 9 Ki Yiisa yetib a "N yaa n boi-ie ki laan ti sennu sak nan ti somm niib foon daar koo ti biiribi? Ti fat niib lu koo ti kpibi?" 10 Ŋanne ki u got lint niib maŋ kura ŋaan bet nuukpeenn daanɔ na a, "Tantir a nuu maŋ." Ki u tant, ki li la paŋ. 11 Ki sennu wannteeb nan Farisiinba na ji din yaa bin put nan wutoa, ki ji piin ki piak beer leeb baa saa teen Yiisa biaŋinba. 12 Li daa nba tan gar ki Yiisa doo kunkonn paak a wun saa miar Yennu, ki din saa mei Yennu nyiɔk nan laa tan yent. 13 Ki sanyiɔk ni ki u yiin u poorpoweiteeb ki tan gann piik nan banlee ki yib toomiinba. 14 U din gann Simonn (wunba ki u din purɔ Piita na) nan Simonn waarɔ Andru, nan Jeems nan Jɔɔnn, nan Filip nan Batolomiu, 15 nan Matiu nan Tomas, nan Jeems nba din tee Alfeus bija na, nan Simonn (wunba ki bi din yiu Nikakitik na), 16 nan Judas nba din tee Jeems bija na, nan Judas Iskariot (wunba din tan nyii Yiisa poor na). 17 Yiisa nba din nyii kunkonn na paak ki sik namm yoo nba, ki u saan set paanu ni; ki u poorpojɔɔmu lakin bonchiann; ki niib bonchiann mun dɔŋ nyii Judea nan Jerusalem ki pukin Taya nan Saidonn doi kur nba kpia mɔkgbeŋŋir na, 18 ki baar a bin gbiint u maan, ki bia loon wun te ki bin paak. Binba ki narinbiit daamiib na mun din baar ki u te ki bi paak. 19 Ki sɔɔ kur nba yiar loon bin sii Yiisa, kimaan paŋ din nyi u nie ki te ki bi kur paakit. 20 Li yoo na ki Yiisa got u poorpoweiteeb ŋaan yet a "Yimm tatimm, parpeenn tee i yare, kimaan Yennu naan tee i yare. 21 Yimm nba ki kon mɔki mɔtana, parpeenn tee i yare, kimaan i tan saa gboowa. Yimm nba mɔ mɔtana, parpeenn tee i yare, kimaan i tan sii laae. 22 "Niib-i nami ki bɔkitiri, ki sukii-i ki biir i sana, kimaan yaa waa min nisaarik Bik na paak, parpeenn tee i yare. 23 Yii mɔk parpeenn kii kpamm, kimaan i nyɔɔt tan sii yab Yendɔuŋ ni; bi yeejamm mun din tee Yennu sɔkiniinba na nnae. 24 "Yimm mɔkita, li sii bi i paak, kimaan i dɔŋ la i yanbɔɔta. 25 "Yimm nba gboo mɔtana, li sii bi i paak, kimaan kon tan saa gbatiiwa. "Yimm nba laa mɔtana, li sii bi i paak, kimaan i tan sii fabin ki mɔ. 26 "Yimm nba ki niib kur piaki, li sii bi i paak; bi yeejamm mun din piak faak sɔkiniinba na nnae. 27 "Yimm nba gbiintir n maan na, n beerie, yii mɔk lomm nan i datai, kii tuun linba ŋan kii teen binba nami na. 28 Binba porintirii mɔpora, yin jiimm a 'Yennu mɔsoŋŋann-ii be i paak.' Binba sarikiti, yii mei Yennu kii teemm. 29 Wunba peba tanpak, fan ŋmant leer po mun ki wun peb. Wunba jii a chinchenn, fan sak ki wun gaar a soot pukin. 30 Wunba kur miara siar, fan turɔ. Wunba fat a bona, a ji daa waa gaani. 31 Biaŋinba ki i loon niib-ii tuun kii teeni na, i mun-ii tuun nna kii teen i leeb. 32 "Li-i tee ki i loon binba looni na kuukɔɔie, nlee ki Yennu saa pukiniini? Biitdamm mun loon binba loomm na gbaa. 33 Li-i tee ki i tuun linba ŋan ki teen binba tuun linba ŋan ki teeni na, nlee ki Yennu saa pukiniini? Biitdamm mun tuun linba na gbaa. 34 Li-i tee ki i kpentir ki teen binba ki i daan nan i tan saa gaar, nlee ki Yennu saa pukiniini? Biitdamm mun kpentir nnae, ki teen bi leeb ki bia tuu tan gaar bi bont biaŋ. 35 "Li paak, yii mɔk lomm nan i datai man, kii tuun linba ŋan kii teemm. Li-i tee ki i kpent nirɔ ki li yukir, yaa daa biir i para li paaki, kimaan i nyɔɔt tan sii yab, ki i bia tan sii tee Yabint Yennu waas, kimaan ŋɔɔe tuun linba ŋan ki teen binba ki teenɔ niipoouk, nan binba tee biitdamm na. 36 Yii mɔk ninbatinu man nan i Baa Yennu nba mɔk ninbatinu biaŋinba na. 37 "I daa bu leeb buuti, ki Yennu kan bu i buuti. Daa piak biir nirɔ ki gbentɔ, ki Yennu kan biir ki gbennini. Nyikin chab niib ki Yennu saa nyik chabii mun. 38 Yii teen niib, ki Yennu mun sii teenii. Li sii tee nan Yennu nba saa jii u ŋmanbaŋ ki chaat dii, ki lin tan gbee nan mɔgbana ki wun ji dinn ki lin tan gbee ki saa mɔ, ki jii turi biaŋinba ki i saa fit dia nae. Yaa jikit ŋmanbaŋ ki chaatir bont biaŋinba ki teen niib na, Yennu mun saa chaat nnae ki turi." 39 Li poorpo ki Yiisa yimm barjouk na a, "Jɔɔŋ kan fit daar u lɔɔ. Bi kur saa baa bootuk nie. 40 Tumiitɔɔ ki gar u wanntɔɔ; ki tumiitɔɔ-i bann gbenn, ŋaan ŋɔɔ nan u wanntɔɔ sii jame. 41 "Bee ki a laat mɔɔnu nba be a lɔɔ ninbinn ni, ŋaan ki ki la jaantarik nba be a mɔŋ mɔŋ ninbinn ni na? 42 Nlee ki a saa bet a lɔɔ a 'N yɔɔk, ŋaant ki n nyinn mɔɔnu nba be a ninbinn ni na,' ŋaan ki ki laat jaantarik nba be a mɔŋ ninbinn ni na? Fin kpinkpannii daanɔ na, nyint jaantarik nba be a ninbinn ni na sinsinn, ki ji fit la fanu ki nyinn mɔɔnu nba be a lɔɔ ninbinn ni na. 43 "Tiŋaŋ kan lon lɔɔnbiiti, ki tikpeeuŋ mun kan lon lɔɔnŋana. 44 Tiik lɔɔna nie ki bi bantɔ. Bi ki pɔ kinkana kunkoŋ paak ki bia ki pɔ gaa jagotuk paaki. 45 Niŋanɔe tuun toonŋana, kimaan u par ni ŋan; ki nibiiuk mun tuun toonbiit, kimaan u par ni bi. Linba be nirɔ par ni, ŋanne ki u piak. 46 "Bee ki i yin i Yomdaanɔ ŋaan ki tuun maa loon biaŋinba? 47 Wunba kur baat n boor ki gbiintir n maan ki saak ki tuun li biaŋ, n saa wanni waa naan wunba; 48 u naan jɔɔ nba din maa u ŋaak nae. Sinsinn u din gbiir fiakir ki li suŋ, ki saa tuu tanpiiuk, ki u ji fɔkin fiakir maŋ li paak. Li poorpo ki saak tan baa bonchiann, ki kpenu gbee ki nyummɔnn doo ki yir ŋaak maŋ, ŋaan ki li ki baa, kimaan u din maar boŋŋanne. 49 Ŋaan wunba gbiintir n maan ŋaan y‡t li weiu, u naan nan jɔɔ nba mun din maa u ŋaak tanbiinii ni, ŋaan ki ki gbiir fiakir nae, ki nyum-mɔnn din tan gbee ki saa doo ki yir ŋaak maŋ, ki li baa yiama. Bia ninbɔŋe na jiaki!"

Luk 7

1 Yiisa nba din wann niib bont kur ki gbenn na, ki u ji gar saan Kapenaum. 2 Ki Rom tiŋ kunkɔnkɔnna yudaansɔɔ be leŋ ki mɔk u daabilonkak, ki yiaru soorɔ ki u per kuuma. 3 Li yoo maŋ ki kunkɔnkɔnna yudaanɔ na gbat Yiisa po ki tun Juu teeb saakab u boor a bin saan ki saa barimɔ ki wun baar ki tan te ki u daabir na n paak. 4 Ki bi saan Yiisa boor ki saa barimɔ bonchiann ki yetɔ a, "Jɔɔ maŋ jaŋ nan fan sommɔwa, 5 kimaan u loon ti niib. U bia maa Yennu jiantu diiuk ki turita gbaa." 6 Ŋanne ki Yiisa din weib saan. Waa saa per ŋaak maŋ yoo nba, ki kunkɔnkɔnna yudaanɔ maŋ tun u yɔɔsinba ki betib a bin yet Yiisa a, "N Yomdaanɔ, daa bakint a mɔŋ ki baati, kimaan n ki ŋan nan fan baar kɔɔ n ŋaak ni. 7 N bia ki ŋan nan ki n nakin a boori. Ŋaan pakin mɔbonne, ki n daabir n la laafia, 8 kimaan n mɔk binba garin ki yenin, ki n mun dia kunkɔnkɔnna ki yemm, ki fit tian yenɔ paak a, 'Baat,' ki u baat; ki tian lɔɔ paak a 'Saant,' ki u saa; ki bia te ki n daabir tuun maa loon biaŋinba." 9 Yiisa nba din gbat linba na, ki li yaar litɔ, ki u jiant ki got nibur nba waa u poorpo na ki betib a "N beerie, n daa ki mi la sɔɔ ki u teenin yada na booru yimm Israel teeb booru ni gbaa." 10 Li yoo maŋe ki kunkɔnkɔnna yudaanɔ maŋ yɔɔsinba na ŋmat ki saan u ŋaak ni ki saa baar sɔɔ daabir maŋ paaka. 11 Li din yente ki Yiisa saa doo nba ki bi yi Neenn na, ki u poorpoweiteeb nan nibur waau. 12 Waa din saa baar doo maŋ tammɔb ni yoo nba, ki u la ki niib bonchiann nyii doo maŋ ni ki jii kuun a bin saan pii. Kpeemɔ maŋ naa din tee pakɔɔke; ŋɔɔe tee u bijayemmir. 13 Yiisa nba la pakɔɔk na, ki ninbaauk soorɔ, ki u yetɔ a "Daa mɔ," 14 ŋaan saan sii kuun na liaŋ, ki binba jiiu na set. Ki Yiisa yet a "Ŋaajɔɔ, fiit." 15 Ki kpeemɔ maŋ manfoor jen, ki u fiir ki kar ki piin piak. Ki Yiisa jiiu ki kubin u naa. 16 Ki jaŋmaanii ji soor niib nba be leŋ na kur, ki bi din dont Yennu sann ki yeen leeb a "Yennu sɔkiniijaann be ti sinsuuk ni;" ki bia yeen bi leeb a "Yennue sik a wun somm u niib." 17 Yiisa labaar na din yat Judea tiŋ nan digbankpinii nba kpia leŋ maŋ kur. 18 Li poorpoe ki Jɔɔnn nba wuur niib Yennu nyunwuru na poorpoweiteeb din saan ki saa betɔ li labaar kur; ki u tan yiin u poorpoweiteeb banlee, 19 ki tumm Yiisa boor, a bin saa boiɔ a "Fine tee wunba yaa wun tan baar na, koo tii daa kii guu sɔɔ?" 20 Ki bi din saan Yiisa peŋ ki saa betɔ a "Jɔɔnn nba wuur niib Yennu nyunwuru nae tunt a peŋ a ti tan boia ki laan fine tee wunba yaa wun tan baar na koo tii daa kii guu sɔɔ?" 21 Li yoo maŋe na ki Yiisa din te ki baatib nan yiarpaarii damm bonchiann paak, ki u bia nyinn narinbiit siab ni, ki nyɔɔnt jɔɔnii bonchiann; 22 ki u ji bet Jɔɔnn toomii na a, "Yii ŋmat man ki saa bet Jɔɔnn linba ki i la ki bia gbat na; a i la ki jɔɔnii nyɔɔntir, ki wɔbii taa naatir ki bi somm, ki gbaata ŋaat gbent, ki tuukpaa ji gbia, ki kpeemm fi kuun ni, ki talasdamm gbiintir barŋanii na mɔɔntii. 23 Parpeenn be wunba ki birisin na paak." 24 Jɔɔnn toomiinba nba din ŋmat na poorpoe ki Yiisa ji piin ki boi niib maŋ buboit ki jiin Jɔɔnn po a "Yaa daan saan Jɔɔnn peŋ muuk ni na, i daan dukii a i saa la bee? I daan mi a i saa la muuk nba ki wouŋ damm nae-e? 25 I mantik jia daan saan a i saa la bee? Nirɔ ki u lia taŋantii? Niib nba lia taŋant ki be bi yama ni na, be kpanbara ŋei nie. 26 Tɔn, wantin man nibooru nba ki i daan saan muuk na ni a i saa la. I daan dukin nan i saa la Yennu sɔkinii? Barmɔniie ki n beeri na, Jɔɔnn ŋarin gar sɔkiniiwa. 27 U poe ki li sɔb Yennu gbouŋ ni a, 'N saa tun n toomu ki wun liit a tɔɔnn po, ki ŋamm a baaru sɔnu'" 28 Ki Yiisa bia yetib a "N beerie, bi daa ki mi mar sɔɔ ki u chee Jɔɔnni, ŋaan wunba joont tarik Yennu naan ni chee Jɔɔnn." 29 Ki niib kur nan lampogaarteeb din sak a Yennu ŋan, kimaan bi din gbat Jɔɔnn mɔɔntii, ki te ki u wurib Yennu nyunwuru, 30 ŋaan ki Farisiinba nan sennu wannteeb na ki gaar linba ki Yennu lor turib na, kimaan bi din ki sak a Jɔɔnn n wurib Yennu nyunwuru. 31 Ki Yiisa bia yetib a "Yimm mɔtana nigbouŋ na, n saa bikini nan bee na? N taan mi i tee niboor bee na? 32 I naan nan waas nba tuu tikir kar daak ni ki tian leeb paak nae a 'Ti peeb yerii ki teeni, ŋaan ki i ki waa. Ti mɔ kpemɔnii ki teeni, ŋaan ki i ki fabini.' 33 Yimm mɔtana nigbouŋ na naan waas maŋe, kimaan Jɔɔnn din baar ki ki di jemɔnti, ki bia ki nyu daamii, ki i yaa u waate; 34 ki min nisaarik Bik mun tan baar ki di ki nyu, ki i bia yaa 'Gotir man, u tee podaanɔ nan danyuuruko; ki bia tee lampogaarteeb nan biitdamm yɔɔk.' 35 Tɔn, binba gaar Yennu bannu nae want nan li tee barmɔnii." 36 Farisiisɔɔ din be, ki tan yiin Yiisa a wun baar ki di jeet u ŋaak ni; ki Yiisa saan jɔɔ maŋ ŋaak, ki bi saa lakin kar ki dii. 37 Poosɔɔ mun din be doo maŋ ni ki tee bonchonchonn; waa tan gbat a Yiisa di jeet ŋaak maŋ ni na, ki u baar nan salenŋann nba gbee nan tulaarii, 38 ki din set Yiisa poor po, u taa boor, ŋaan mɔ; ki u ninnyuut baa Yiisa taa paak ki tan matik; ki u din jii u yut ki fian Yiisa taa, ki barin pit, ki tan but tulaarii na u taa paak. 39 Ki Farisii nirɔ nba yiin Yiisa na nba la linba na, ki u dukin u par ni a "Jɔɔ na-i bonni tee Yennu sɔkiniie nan barmɔnii, u bo saa bann poo nba siinɔ na nba tee wunbae. U bo saa bann nan u tee biitdaanɔe." 40 Ŋanne ki Yiisa yet Farisii maŋ a "Simonn, n mɔk mɔbonsiar ki yaa n beta." Ki Simonn jiin a, "Wanntɔɔ, betirin." 41 Ki Yiisa yetɔ a "Jab banlee din be ki mɔk likkpent-tɔɔ pann. Yenɔ din mɔk u pann salimpeena kobii ŋaŋŋmu, ki lɔɔ na mun mɔk u pann salimpeena b piiŋŋmu. 42 Bi banlee maŋ sɔɔ din ki fit pa. Ŋanne ki u chab bi kura a bii saa. Tɔn, i dukii nan ŋmee mantik sii loon likkpent-tɔɔ maŋi?" 43 Ki Simonn jiin a, "N dukin nan li sii tee wunba pann yab ki u chabɔ nae." Ki Yiisa yetɔ a "A mɔk mɔnii," 44 ki din jiant got poo na, ŋaan bet Simonn a, "A la poo na-a? N kɔɔ a ŋaak nna, ki a ki turin nyun ki n wuur n taapant, ŋaan poo na ŋarin wuur n taapant nan u ninnyuut, ki bia jii u yut ki fiarin. 45 Fin ŋarin ki barpitimi, ŋaan ŋɔɔ ŋarin bo ki nyik n taabarimu maa baar yoo nbawa nan mɔtana. 46 A bia lek ki sɔɔr n yut kpami, ŋaan poo maŋ bia jii tulaarii ki sɔɔr n taapanta. 47 N beerae, n nyik u biit nba yab ki chabɔwa, li paake ki u mantik loonin. Ŋaan wunba ki n nyik chab u biit waaminna, u mun loonin waaminnae." 48 Ŋanne Yiisa jiant ki yet poo na a "N nyik a biit ki chabawa." 49 Ki niib nba kar ki di na ji piin boi bi leeb a "Wuya, ŋmapoe saa fit nyik chab nirɔ biiti?" 50 Ki Yiisa bet poo na a, "Faa teenin yada na, a la tinnuwa. Li paak, i saa nan parmaasir."

Luk 8

1 Li poorpoe ki Yiisa din lin digbansaakara ni nan digbanbis ni, ki mɔɔntir Yennu naan baaru po, ki u poorpoweiteeb piik nan banlee na waau. 2 Poob nba ki u din nyinn narinbiit bi ni, ki bia te ki bi yiarii gbenn na mun din be leŋ maŋ ki waau. Yenɔ din tee Meeri (wunba ki bi din yiu Magdaliinn na). Ŋɔɔe tee wunba ki Yiisa din nyinn narinbiit banlore u ni na; 3 ki leeb mun tee Chusa ŋaapoo Joana (Chusa din tee Herod ŋaatoontunna saakɔɔe), nan Susanna, nan pooleeb bonchiann. Ki bi kur din jikit bi mɔŋ mɔŋ bona ki teen Yiisa, ki sommit ŋɔɔ nan u poorpoweiteeb na. 4 Niib lek din nyi digbana ki baat Yiisa boor, ki nibur din lakin, ki Yiisa yimm barjouk a: 5 "Jasɔɔ din doo kpaab a wun saa bur dii. Waa din buur yoo nba, ki bonboorii na yenninba yat baa sanjouk ni; ki niib gaar ŋmaat li paak, ki nɔɔnii bia tɔkii ki di. 6 Ki leer mun baa tanpuut paak. Bonboorii maŋ nba din tan pia yoo nba, ki li kpo, kimaan li din ki baa maatuk ni. 7 Ki leer mun baa kunkonii jiina ni, ki tan lakin pia ki kpaat namm, ŋaan ki kunkonii na ŋmabirir. 8 Ŋaan ki leer mun baa tinŋaŋ ni, ki pia kpaat boŋŋann, ki tan nan nyik nyik nyik." Yiisa nba yimm barjouk maŋ ki gbenn na, ki u yet a "Wunba mɔk tuba ki saa gbat, wun gbiint." 9 Li poorpoe ki u poorpoweiteeb na boiɔ a "Barjouk na paakii?" 10 Ki u jiin ki betib a "Yimm ŋarin, Yennu chab a yin bann woonin ni barii ki jiin u naan po, ŋaan nileeb ŋarin, u yiimm barjokite, a bin got ŋaan daa laati, ki bia gbiint, ŋaan daa bant li paaki." 11 "Barjouk na paak tee nnae: Bonboorii nae tee Yennu maan. 12 Ki linba baa sanjouk ni na naan niib nba ki n maan kɔɔ bi tuba ni, ŋaan ki Sintaanii baar ki nyinnir bi para ni, a bi ji daa tee-n yada ki laat tinnu na. 13 Ki linba mun baa tanpuut paak na naan binba gbat n maan nan parpeenn, ŋaan ki li daa ki sik bi para ni fanu, ki bi tuu teenin yada yoo waaminna, ŋaan yoo nba ki jinjammii baarib, bi tuu y‡t n weiue. 14 Ki linba mun baa kunkonii ni na naan binba gbat n maan maŋ, ŋaan binbeŋ na daamii nan mɔkint lomm nan nianbiiuk nba be tingbouŋ na ni tuu nyakin maan maŋ bi para ni, ki lin ŋakit. 15 Ki linba mun baa tinŋaŋ ni na ŋarin naan nan popeendamm nba gbat n maan maŋ, ki bi para ni be fanu, ki bi dia maan na kenken, ki bia mɔk sukuru, ki nan boŋŋann nae. 16 "Sɔɔ kan joo fitir ŋaan likin ŋmaŋ li paaki, koo ki gurir gado lɔuŋ ni. See ki u jiir tɔɔn bont nba fɔk paak, ki lin yent, ki niib-i jikii kɔɔ yoo nba, bii laat yentu na. 17 Barii nba kur woo, see ki li tan woot nyii paanu; ki linba mun liik, see ki li likit. 18 "Li paak, i mi man yaa gbiintir Yennu maan biaŋinba. Tɔn, wunba gbat ki gaar boŋŋann, u saa ŋamm gaar ki pukin, ŋaan wunba ki gbiintir, u saa kɔŋ linba ki u dukii a u mɔk na gbaa." 19 Li yoo na ki Yiisa naa nan u waarii baar, ŋaan ki ki fit la sɔnu nba ki bi saa nakinɔ, kimaan niib din yabita. 20 Ki sɔɔ tan betɔ a "A naa nan a waarii be nanyer po ki loon bin la-a." 21 Ŋanne ki u yetib a "Binba gbia Yennu maan ki saak ki bia tuun li biaŋ, ŋamme tee n naa nan n waarii." 22 Dasiar ki Yiisa nan u poorpoweiteeb din kɔɔ burgbetir ni; ki u betib a, "Ŋaant man ki tin poot mɔkgbeŋŋir na gbingbanleer po." Ki bi piin saanu. 23 Baa saa yoo nba ki Yiisa dɔɔr gɔɔn. Ki wounpaaruk tan fikit ki da mɔkgbeŋŋir maŋ paak, ki nyunpana pir ki kɔɔ burgbetir na ni ki tan yaa lin gbee, ki bi ji kɔɔ ninbɔŋ ni. 24 Ki u poorpoweiteeb baar ki fiintɔ ki yi a "Chanbaa, chanbaa, ti be kuun nie." Ki u fiir ki tian wouŋ nan nyunpana na paak a bin ŋmin, ki li ji din maak ki ŋmin soon. 25 Ki u jiant boi u poorpoweiteeb na a, "I ki teenin yada-a?" Ki jaŋmaanii din soorib, ki li bia yaar litib, ki bi boi bi leeb a "Jaboor bee na? Ki u yeen ki wouŋ nan nyunpana saak u mɔbu." 26 Ki bi tan baar Gerasa tiŋ ni, ki set, ŋaan ki Galilii tiŋ biar pootir po. 27 Ki Yiisa nba nyii burgbetir na ni, ki Gerasa jasɔɔ chetɔ; ki narinbiit be jɔɔ maŋ ni; ki u din ki lia siar ki li yukir hei. U bia din ki saak kaar ŋaak ni, ŋaan dɔɔ kaat ni. 28 Yoo kur narinbiit maŋ din tuu fiir u nie, ki u doo ni teeb din tuu guu-u, ki baan u nii nan u taa jarit, ŋaan wun yan jarit na; ki narinbiit maŋ beerɔ ki kɔɔntɔ muuk. Waa din la Yiisa yoo nba, ki u yikin sanpaapowa, ŋaan gbaan Yiisa tɔɔnn ki tian yet a "Yiisa, wunba tee Yabint Yennu Bija, min nan fin, nlee mantiki? N barimae, a daa mukisirimi." U din yet nna kimaan Yiisa poŋ yakii nan narinbiiuk na a wun nyi jɔɔ na ni. 30 Ki Yiisa boiɔ a, "A sannii?" Ki u jiin a "N sann tee bure;" li paak tee narinbiit bonchianne be u ni. 31 Li yoo na ki narinbiit maŋ ji din barin Yiisa a u daa te ki bi saa bootsunsuŋ na ni. 32 Doorii bonchiann din be kunkonn na paak ki di; ki narinbiit na barin Yiisa a wun chabib ki bin saan kɔɔ doorii maŋ ni; ki Yiisa chabib sɔnu. 33 Ŋanne ki narinbiit na nyii jɔɔ na ni ki saan kɔɔ doorii na ni; ki doorii na kur tin burburbur, ki nyii kunkonn na paak, ki sik ki saa baa mɔkgbeŋŋir na ni, ki dii nyun. 34 Dookpaarii na nba din la linba teen maŋ, ki bi chiar li yoo na, ki saan mɔɔnt li labaar doo ni nan kpaant ni. 35 Ki niib baar a bin la linba tun na, ki baar Yiisa boor, ki sɔɔ jɔɔ nba ki narinbiit poŋ nyii u ni na kar Yiisa boor ki mɔk laafia nan u dudukit kura fanu, ki ji lia tiat; ki jaŋmaanii soor niib na. 36 Ki binba lar nan bi nunii na betib biaŋinba ki Yiisa te ki jɔɔ na paak. 37 Ŋanne ki Gerasa tiŋ ni niib kur baar Yiisa boor ki barimɔ a wun seet kii saa, kimaan jaŋmaanii soorib hei. Ki Yiisa ji kɔɔ burgbetir na ni a wun ŋmat; 38 ŋaan waa din yaa wun ŋmat yoo nba na, ki jɔɔ nba ki narinbiit nyii u ni na barimɔ ki yeen a "Ŋaant ki min nan fin n lakin saan." Ki Yiisa te ki u nyik ŋaan betɔ a, 39 "I ŋmat kii kun a ŋaak ni ki saa mɔɔnt toonjaann nba ki Yennu tun ki tura na." Ki u ŋmat ki lin doo na kur po ki mɔɔntir toonjaann nba ki Yiisa tun ki turɔ na. 40 Yoo nba ki Yiisa din ŋmat ki saa poot mɔkgbeŋŋir na, ki sɔɔ ki nibur tookitɔ nan parpeenn, kimaan bi kur poŋ din guu u baarue. 41 Jasɔɔ nna din be leŋ ki bi yiu Jairus; ki u tee Yennu jiantu diiuk saakɔɔ; ki u tan baar ki gbaan Yiisa tɔɔnn ki barimɔ a wun baar u ŋaak ni, 42 kimaan u bonpoyemmir nba tee bina piik nan ŋanlee bik nae yiar, ki per kuuma. Ŋanne ki ŋɔɔ nan Yiisa din saan. Yiisa nba din saa na ki nibur na mun waau ki gbin muk ki tutɔ. 43 Ki poosɔɔ nna mun be leŋ, ki tee wunba siik fabouŋ ki tan jaŋ bina piik nan ŋanlee, ki u din tan yat u bont kur ki tur tebteeb, ŋaan bi sɔɔ din ki fit tebɔ ki u paaki; 44 ki u tan baar Yiisa poor po ki sii u liatir mɔgbann. Li taakpaak ni, ki u fabouŋ na ji jit. 45 Ki Yiisa boi a "Ŋmee siimi?" Ki sɔɔ kur nba be leŋ na yeen a "Min kaa, min kaa." Ki Piita tan boiɔ a "Chanbaa, a ki la nibur nba mukii?" 46 Ŋaan ki Yiisa yet a "Sɔɔ siima, kimaan n bann nan paŋ nyii n niwa." 47 Ŋanne ki poo na ji bann nan u kan fit bɔr u mɔŋ Yiisa boori, ki ji din nyii paanu ki jekir, ki tan gbaan Yiisa tɔɔnn, ŋaan yetɔ sɔɔ kur numm ni linba paak ki u siiu, nan biaŋinba ki u paak yiama. 48 Ki Yiisa betɔ a, "N niipoo, faa teenin yada na paake ki a la laafia. I saa nan parmaasir." 49 Yoo nba ki Yiisa daa din see ki piak na, ki toomu nyii saakɔɔ maŋ ŋaak ni ki baar yet a "A bonpobik na taan kpowa; ki a ji daa bakint Wanntɔɔ." 50 Ki Yiisa gbat nna maŋ ki jiant bet saakɔɔ na a "Daa tiin jaŋmaanii; teent yada kuukɔɔ, ki u saa la laafia." 51 Yiisa nba baar kɔɔ ŋaak maŋ ni yoo nba, ki u la nibur be leŋ ki bui kpemɔnii ki fabin bik maŋ paak; ki Yiisa betib a "I daa mɔ man; bik na ki kpo kaa, u gɔɔnte." Ŋaan ki bi laau, kimaan bi mi nan bik na poŋ kpowa. Li yoo na ki u ki sak ki sɔɔ n weiɔ ki kɔɔ kpediiuk na ni, see Piita nan Jɔɔnn nan Jeems ki pukin bik na baa nan u naa. 54 Ki Yiisa soor bik na nuu ŋaan yiin a "N bik, fiit." 55 Ki u jen u manfoor ni ki fiir yiama. Ki li ji bakit u baa nan u naa bonchiann. Ki Yiisa betib a bin tur bik na jeet ki wun di; ŋaan bia kpaamm a bii mi ki bin bet sɔɔ linba tun na.

Luk 9

1 Li poorpo ki Yiisa din tan yiin u poorpoweiteeb piik nan banlee na ki lakimm, ki turib yiikoo nan paŋ nba ki bi sii nyint narinbiit kur, ki bia te ki baatib paakit, 2 ki ji yetib a bin yat kii lin kii mɔɔntir Yennu naan po, ki bia te ki baatib-ii paakit; 3 ŋaan betib a "I daa jikit siar ki saa nanni; i daa dia patii, koo miat-kɔra, koo jeet, koo likirii, koo liata ŋanlelee. 4 Ŋaak nba ki i saa kɔɔ, yin biar leŋ nan yaa tan saa nyi doo maŋ ni. 5 Siaminba kur ki niib ki tooki nan parpeenni, yoo nba ki i nyi doo maŋ ni, yin pit i taapant ni tant bir li doo ni, ki lin wannib nan bi mɔk biit." 6 Ŋanne ki u poorpoweiteeb na nyii lin digbanbis kur ni ki mɔɔntir Yennu barŋanii, ki bia te ki baatib paakit siar kur po. 7 Ki Galilii batsaakɔɔ Herod tan gbat linba tun na kur, ki li ŋmat u yan, kimaan siab din yaa Jɔɔnne fiir kuun ni, 8 ki leeb yaa yaayoo ni sɔkinii Elaijae dɔkit, ki leeb mun yaa yaayoo ni sɔkiniinba yenɔe fiir kuun ni; 9 ki Herod yet a "N daan te ki bi pot Jɔɔnn yura, ŋaan ŋmee ki n gbia u po na muni?" Ki u ji din koor li yoo na a wun la Yiisa. 10 Li poorpoe ki toomiinba maŋ tan jen ki bet Yiisa linba ki bi saan tun. Ki u ji din jiib ki bi saan dosau nba ki bi yi Befsaida, bi kuukɔɔ. 11 Nibur na nba din gbat nna maŋ, ki bi wei Yiisa ki saan. Waa la ki bi baat yoo nba ki u tookib nan parpeenn, ki wannib Yennu naan po, ki bia te ki binba loon laafia na paak. 12 Yoo nba ki yonnu din tan maakit na, ki u poorpoweiteeb piik nan banlee na baar u boor ki yetɔ a "Ŋaant ki nibur na n saan digbanbis nan kpaant nba kpia na ni ki la jeet nan dindɔɔboa, kimaan nna na tee muuk nie." 13 Ki u jiin a, "I mɔŋ n turib jeet ki bin di." Ki bi yetɔ a "Ti ki mɔk siar ki pukin boroboro kuna ŋaŋŋmu nan janii ŋanlee na po, nɔkira ki ti saan saa daa jeet ki tan dinn nibur na kur." 14 (Jab nba din be leŋ na teen nan tusaa ŋaŋŋmu nawa.) Ki u bet u poorpoweiteeb na a, "Ŋaant ki niib na n bɔkit kar piiŋŋmuŋmu." 15 Ki u poorpoweiteeb te ki bi kur bɔkit kar kar. 16 Ki u jii boroboro kuna ŋaŋŋmu nan janii ŋanlee na, ki yaat got sanpaapo, ki tur Yennu niipoouk jeet na paak, ki ji ŋmit ŋmit ki tur u poorpoweiteeb na a bii toor nibur na. 17 Ki bi kur dii ki gboo. Ki u poorpoweiteeb lakin jeet nba ki niib na dii ki tan tenn na, ki li gbee kpanchubit piik nan ŋanlee. 18 Sianyoo ki Yiisa din mei Yennu u kuukɔɔ, ki u poorpo-weiteeb tan baar u boor li yoo na; ki u boib a "Nibur na yaa n tee ŋmee?" 19 Ki bi jiin a, "Siab yaa a tee Jɔɔnn nba din wuur niib Yennu nyunwuru nae, ki leeb yaa a tee Elaijae, ki siab mun yaa yaayoo ni sɔkiniinba yenɔe fiir kuun ni." 20 Ki u boib a "Ki yimm ŋarin yaa n tee ŋmee?" Ki Piita jiinɔ a, "Fine tee Masia, wunba ki Yennu gannɔ na." 21 Ŋanne ki Yiisa kpaamm nan ninmɔnn a bi daa beer sɔɔ labaar maŋi, 22 ki bia yetib a "Li kpaa talas nan min nisaarik Bik n di biak bonchiann; ki ti tiŋ ni saakab nan Yennu mannteeb yudamm nan sennu wannteeb saa y‡tin, ki bia kpima, ŋaan li daa ŋantaa daar, Yennu saa fiinin kuun ni." 23 Ŋanne ki u yet bi kur a "Wunba-i loon wun wein, see ki u likin u saaŋmaŋ ki jii u kuun dapunpunn daar kur kii waa-n. 24 Wunba ki saak wun jii u manfoor ki turin, ŋɔɔe tan saa kɔŋ u manfoor, ŋaan wunba likin u saaŋmaŋ n paak, ŋɔɔe tan saa la u manfoor nan barmɔnii. 25 Nirɔ-i la tingbouŋ na mɔkint kur, ŋaan biir u mɔŋ binbeŋ ki kɔŋ u manfoor, nyɔlantpoe ki u saa la? 26 Wunba tiin fei ki jiin min nan n wannu na po, min nisaarik Bik-i taŋŋi jen nan n paŋ, nan n Baa Yennu paŋ, nan u malakanba paŋ, li yoo maŋ n tan saa tin fei nan man jii li daanɔ ki pukin n niib niwa. 27 Barmɔniie ki n beeri na, siab be nna ki kan kpo see ki bi tan la Yennu naan baaru yoo." 28 Waa din pak nna ki gbenn maŋ, li poorpoe ki li teen nan daa ŋanniin na, ki u jii Piita nan Jɔɔnn nan Jeems, ki doo namm kunkonn paak a wun saa miar Yennu. 29 Waa din mei Yennu na ki u numm po tan kpint, ki u tiat penn ki nyirik. 30 Li yoo na ki jab banlee nna lekit leŋ, ki bi tiat nan bi gbanant nyirii. Jab maŋ din tee Moses nan Elaijae; 31 ki bi piak nan Yiisa ki jiin u kuun po, nan biaŋinba ki u saa kpo Jerusalem ki tun Yennu loomm na. 32 Ŋaan gɔɔn din soor Piita nan u leeb bonchiann, ki bi gɔɔn ki tan yerik ki fiir, ki la ki yentsaakar yent ki lint Yiisa, ki bia la jab banlee nba din see u boor na. 33 Jab maŋ nba din tan nyikit Yiisa na, ki Piita yetɔ a "Chanbaa, li ŋan nan taa be nna na. Ti saa faa lanbont ŋantaae, ki yenn-ii tee a yar, ki leer-ii tee Moses yar, ki leer mun-ii tee Elaija yar." Piita nba din piak linba maŋ, u kpan din gbia a u piake. 34 Waa din daa piak nna maŋ, ki sanpagbann dɔkit ki piimm, ki jaŋmaanii soor u poorpoweiteeb na nan sanpagbann nba dɔkit ki piimm na. 35 Ki bi gbat kunkɔr sanpagbann na ni, ki li yet a "N Bija nba ki n gannɔe na. Gbiintir u mɔb man." 36 Kunkɔr na nba din pak gbenn yoo nba, ki bi ji la Yiisa kɔɔe biar see. Li poorpoe ki bi ji din biar ŋmin ki jiin baa la linba na po, ki ki kumii sɔɔ labaar maŋ, ki li yoo tan gar. 37 Li din tan yent ki Yiisa nan u poorpoweiteeb nyii kunkonn na paak ki sik, ki nibur tookɔ. 38 Jasɔɔ din be nibur na ni, ki tian yiin Yiisa a "Wanntɔɔ, n barimae, tan gotir n bija na; kimaan ŋɔɔe kpan tee n biyemmir, 39 ki narinbiiuk tuu fiir u ni ki te wun yikin ki baa gbitgbiir ki tabit, ki mɔsankunkouŋ nyi u mɔb ni, ki li ŋammit fi u ni ki gbiau ki tuu tan barikɔ waaminna, ŋaan ki ki nyikitɔ. 40 Ki n barin a poorpoweiteeb a bin nyinnɔ, ki bi gbar." 41 Ki Yiisa yetib a "Yimm mɔtana niib nba kaa yada, ki bia ki waa Yennu fanu na, n saa yukir nani nlee ki di sukuru nani mantiki?" Ki u bia bet jɔɔ maŋ a "Baat nan a bija maŋ." 42 Ki bik na nba baat Yiisa boor yoo nba ki narinbiiuk na libirɔ nan tiŋ gbakit, ki u dɔɔ tabit. Li yoo maŋe ki Yiisa tian narinbiiuk na paak, ki te ki bik na paak, ki u jiiu ki tur u baa. 43 Ŋanne ki li yaar lit niib na kur nan Yennu paŋ nba yab biaŋinba. Li daa din bakit nibur nae nan waa tuun linba kur na, ki Yiisa ŋmat bet u poorpoweiteeb na a, 44 "Lootir i tuba man ki gbat linba ki n yaa n paki na fanu; bi tan saa jii min nisaarik Bik ki kubin niib nuu ni." 45 Ŋaan bi lek din ki bann li paaki, kimaan Yennu din dɔkin bi yame a bi daa banti; ki bi bia tiin jaŋmaanii nan bin boiɔ li maan paak. 46 Li poorpoe ki mɔniɔk tan baar u poorpoweiteeb na sinsuuk ni, ki bi nɔi ki yaa "Ŋmee tee nijaann ti sinsuuk ni na?" 47 Ki Yiisa bann baa dukii biaŋinba. Ŋanne ki u jii bik nna ki senn u numm ni, 48 ŋaan betib a "Wunba gaar bik nba na n sann paak, u gaar mine; ki wunba mun sak ki gaarin, u gaar wunba tumin nae mun; ŋaan wunba mun tee tarik i ni, ŋɔɔe tee nijaann ki gar i kura." 49 Ŋanne ki Jɔɔnn betɔ a "Chanbaa, ti daan la jasɔɔ ki u taan a sann ki nyint narinbiit niib ni, ki ti betɔ a wun nyik, kimaan u ki tee ti ni yenɔ." 50 Ki Yiisa betɔ a, "I daa beerɔ mani, kimaan wunba kur ki kɔn nanii, u see i poore." 51 Tɔn, yoo nba din tan per nan Yiisa n do Yendɔuŋ ni na, ki u faa par ki soor sɔnu a wun saan Jerusalem, 52 ŋaan tur mɔb a bin gar ki saa yet a u be sɔnu, ki bin teen siir ki sɔɔ ki u baar, ki bi dɔŋ gar ki saa baar Samaria teeb digbanbik nna ni; 53 ki leŋ niib na ki sak u baaru maŋi, kimaan bi din mi nan u saa Jerusaleme. 54 Ki u poorpoweiteeb Jeems nan Jɔɔnn nba gbat nna maŋ, ki bi boiɔ a "Ti Yomdaanɔ, a loon ki ti te ki muu n nyi sanpaapo ki sik di biiribii?" 55 Ki Yiisa jiant ki gaar jat bi paak a bin nyika. 56 Ki bi nyik, ŋaan saan digbanleer ni. 57 Yoo nba ki bi din saa na ki jasɔɔ tan yet Yiisa a "N saa weia siaminba kur ki a saa." 58 Ki Yiisa yetɔ a "Lunlona mɔk fɔrii, ki nɔɔnii mun bia mɔk tiat, ŋaan min nisaarik Bik ki mɔk dindɔɔboori." 59 Ki u bia tan yet jalɔɔ a "I waa-n." Ki jɔɔ maŋ betɔ a "N Yomdaanɔ, ŋaant ki n saan ki pii n baa sinsinna." 60 Ki Yiisa betɔ a, "Ŋaant ki kpeemm-ii c pii bi kpeenleeb. Fin, i saawa kii sakii mɔɔntir Yennu naan po kii teen niib." 61 Ki lɔɔ mun yetɔ a "N Yomdaanɔ, n saa weiawa, ŋaan ŋaant ki n kun ki saa chab n ŋaateeb sinsinna ki fit lian weia." 62 Ki Yiisa betɔ a "Sɔɔ kan fit dia naasɔk ki ko, ŋaan gorii poor po. Li-i tee wunba gorii nna maŋ, u ki ŋan wun teen Yennu naan toontunnɔ."

Luk 10

1 Li poorpoe ki ti Yomdaanɔ Yiisa ŋamm gann jaleeb piinlore nan banlee ki yaa wun tumm banlelee ki bin dɔŋ gar doi ni, siaminba po kur ki u saa baar. 2 Ŋanne ki u betib a "Dii na beer ki yaba, ŋaan ki dijaara waar. Li paak, yii mei man dii na daanɔ ki wun ŋamm pukin dijaara, ki te ki bin jaan dii maŋ. 3 I saa man. Gotir, n tuumiie, ki i sii tee nan pebis na kinkata sinsuuk ni. 4 Ŋaan i daa jikit likbɔɔrii koo miat-ŋmanii koo taasaati. I bia daa see sɔnu ni ki foont sɔɔ. 5 Ŋaan ŋaak nbae ni ki i saa kɔɔ, yin dɔŋ yet a 'Parmaasir-ii be ŋaak na niib paak.' 6 Ki ŋaadaanɔ maŋ-i loon parmaasir, u saa gaara. Li-i kii tee nna, parmaasir maŋ bia saa jen i paaka. 7 Li-i tee ki i kɔɔ ŋaak nbae ni, yii be leŋ kii di kii nyu linba ki bi teeni, kimaan toontunnɔ ŋan ki wun gaar u paauko. I daa lin lɔɔn ŋei ki dɔɔ. 8 Li-i tee ki i baar doo nbae ni ki bi tooki nan parpeenn, ki turi jeet nba, yin di; 9 ŋaan bia te ki baatib n paak doo maŋ ni, kii beer niib maŋ a 'Yennu naan nakiniiwa.' 10 Li-i tee ki i baar doo nbae ni, ki niib na ki gaarii, yin nyi set sɔnii ni ŋaan kii yeen a 11 'Ti taa nba tab i doo na tanbiinii nba na, ti pit ŋanne ki lubin ki chabitii. I mi man nan Yennu naan poŋ baar ki nakiniiwa.' 12 N beerie nan buut daar, doo maŋ niib tubdatu tan saa gar Sodom teeb yara." 13 "Li sii bi yimm Korasinn teeb paak; li sii bi yimm Befsaida teeb mun yaa paak; kimaan mi-i bonni tun bakitnauŋ toonjaana Taya nan Saidonn doi ni nan maa daan tun i doi ni na, bi bo saa nyik bi toonbiite yiama, ki puk bi mɔŋ tanpent ki ŋak faauk ki lin wann nan bi dii sindanta. 14 Daar nba ki Yennu tan saa bu niib buut na, i tubdatu tan saa gar Taya nan Saidonn teeb yarawa. 15 Yimm Kapenaum teeb, Yennu saa donni sanpaapo wa-a? Aaii, u tan saa sikini kpeen tiŋe." 16 Li yoo na ki u bet u poorpoweiteeb a "Wunba gbia i maan, u gbia n maame; ŋaan wunba y‡ti, u y‡t mine; ki wunba y‡t min, u y‡t Yennu nba tumin nae mun biak." 17 Ŋanne ki jab piinlore nan banlee na din tan jen nan parpeenn ki betɔ a "Ti Yomdaanɔ, a sann paŋ nie ki narinbiit gbaa saak ti mɔi." 18 Ki u betib a "N la Sintaanii nyii sanpaapo nan sanyikintii na ki tan baa. 19 Gbiintir man, n poŋ turi yiikoo nba ki i sii ŋmaat wai nan nanii paak, kii nyant i dataak Sintaanii paŋ kur; ki siar kan teenii. 20 Ŋaan i daa mɔk parpeenn nan narinbiit nba saak i mɔi na paaki, ŋaan kii jikii mɔk parpeenn man nan baa poŋ sɔb i sana Yendɔuŋ ni na paak." 21 Li yoo maŋ ki Yennu Seyeeŋ te ki Yiisa mɔk parpeenn hei, ki ji yet a "N Baa Yennu, wunba tee sanpaapo nan tingbouŋ na Yomdaanɔ, n piaka, kimaan a bɔr labaar maŋ subindamm nan bannteeb, ŋaan fiit wann waase; kimaan nnae ki a loon ki tun, ki li mana." 22 Ki Yiisa ŋamm yet a "N Baa Yennue wannin barii na kura; ki sɔɔ ki mi maa tee wunba see n Baa maŋ, ŋaan sɔɔ mun bia ki mi n Baa maŋ nba tee wunba, see min u Bija na, nan binba ki n loon ki fiitir wantib na." 23 Li yoo na ki Yiisa ji ŋmat got u poorpoweiteeb ŋaan bɔr betib a, "Parpeenn tee i yare, kimaan i ninbina nba laat linba na. 24 N beerie nan Yennu sɔkiniinba nan kpanbara bonchiann din loon bin la linba ki i laat na, ŋaan ki la, ki bia din loon bin gbat labaar nba ki i gbia na, ŋaan ki gbati." 25 Li poorpo ki sennu wanntɔsɔɔ din fiir ki set ki loon wun bikin Yiisa, ki boiɔ a "Wanntɔɔ, n saa teen nlee ki la manfoor nba kaa gbennu?" 26 Ki Yiisa jiin ki boiɔ a "Li sɔb nlee Yennu sennu gbouŋ ni? A karin ki laat nlee?" 27 Ki jɔɔ na jiin a "I loon a Yomdaanɔ Yennu; kii mantik kii loonɔ nan a par kur, kii bia kii loonɔ nan a seek kur, nan a paŋ kur, nan a dudukit kur, kii bia kii loon a lɔɔ nan faa loon a mɔŋ biaŋinba na." 28 Ki Yiisa yetɔ a "A jiinu na ŋan. I tuun nna ki tan la manfoor maŋ." 29 Ŋaan ki sennu wanntɔɔ na lek loon wun wann nan u ki mɔk biiti ki jiin sennu na po, ki boi Yiisa a "Tɔn, ki ŋmee tee n lɔɔ?" 30 Ki Yiisa jiinɔ a, "Jasɔɔ din nyii Jerusalem ki siik Jeriko; ki fatiteeb tan pikinɔ ki liat u tiat ki fat, ki boou bonchiann, ki tan tenn u kuun darik darik nna, ŋaan nyikɔ. 31 Li poor po ki Yennu manntɔɔ nna mun tɔk li sɔnu ki siik ki tan la jɔɔ na dɔɔ, ki u lɔk gar ŋaan nyikɔ. 32 Ŋanne na biak, ki Liifai jasɔɔ mun din baat ki tan la jɔɔ maŋ ki bia lɔk ki gar ŋaan nyikɔ. 33 Ki Samaria jasɔɔ mun tɔk li sɔnu ki baat ki tan dɔkit jɔɔ maŋ paak ki lau, ki ninbaauk soorɔ bonchiann, 34 ki u baar ki jii kpan nan daan ki wuur u fiat na ŋaan fin tana, ki jiiu paan u boŋ paak, ki saan nanɔ saamm ŋaak ni ki saa gotɔ. 35 Laa din tan yent yoo nba ki u jii salimpeena d ŋanlee ki tur wunba gorii saamm ŋaak na, ŋaan betɔ a, 'I gorii jɔɔ na, ki mi-i taŋŋi jen daar nba, n saa pa-a linba ki a dinnɔ ki pukin na paak.'" 36 Yiisa nba pak nna ki gbenn, ki u boi sennu wanntɔɔ na a "Jab bantaa na ni, ŋmee want nan u tee wunba ki fatiteeb fatɔ na lɔɔ? A dukii nlee?" 37 Ki u jiin a "Wunba tinɔ ninbaauk na." Ki Yiisa yetɔ a "Tɔn, i saa kii tuun li biaŋ mun." 38 Li poorpoe ki Yiisa nan u poorpoweiteeb din saa bi sɔnu, ki saa baar digbanbik nna ni; ki poosɔɔ be leŋ ki bi yiu Maata, ki u din gaar Yiisa nan parpeenn u ŋaak ni. 39 U din mɔk u niipowaarik ki u sann tee Meeri; ki Meeri maŋ baar ki tan kar tiŋ ni, ki nakin Yiisa taa po ki gbiintir u maan. 40 Ŋaan ki Maata mun gbaa nan saauŋ kur kur, ki tan baar bet Yiisa a "N Yomdaanɔ, maa gbaa nan saauŋ, n kuukɔɔ, ŋaan ki n niipoo ki sommitin na, a baka kaa li po-o? Betirɔ ki wun baar ki tan sommin." 41 Ki Yiisa jiinɔ a "Maata, n mi nan a gbaa nan bona bon-chiann, ki li mukisaa ki biir a par, 42 ŋaan bonyennkɔɔe kpaa talas. Meeri ŋarin gann linba ŋane, ki sɔɔ kan nyinnir u ni."

Luk 11

1 Yiisa din be siarpo ki mei Yennu. Waa miar gbenn yoo nba, ki u poorpoweiteeb yenɔ tan betɔ a, "Ti Yomdaanɔ, wantit taa sii mei Yennu biaŋinba nan Jɔɔnn nba din wann u poorpoweiteeb na." 2 Ki Yiisa betib a "Yaa sii mei Yennu biaŋinbae na: Ti Baa, ŋaant ki a sann n la baakir. Ŋaant ki a naan n baar. 3 Luunt dinna mann. 4 Nyikin chab ti biit nan taa mun nyikit ki chabit binba tuumit biit biaŋinba na. A daa te ki ti kɔɔ jinjammii ni." 5 Li yoo maŋ ki Yiisa bia betib a "Li-i tee ki saamɔ baar a ŋaak ni nyiɔk, ki a ki mɔk jeet ki saa turɔ, ŋaan ki a mun mɔk a yɔɔk ki saan u ŋaak ni tansuunii, ki betɔ a wun kpenta boroboro kuna ŋantaa, a ki saamɔ baar a ŋaak ni; a yɔɔk sii be u diiuk ni ŋaan beta a 'Daa mukisimi; n poŋ kpar gann na; min nan n waas bia dɔɔra; n kan fit fiir turani.' 8 Barmɔnii, u kan sak fiir ki tura jeet maŋ, a faa tee u yɔɔk na paaki; ŋaan li-i tee ki a ki tiin fei ki bia meiɔ, see ki u tan tat fiir ki tura biaŋinba ki a loon. 9 "Li paak, n beeriie, miat Yennu man, ki u saa turi; lomin man, ki i saa lawa; kpaan gann man, ki u saa loot ki turi; 10 kimaan wunba kur mei Yennu, u gaane; ki wunba mun loon, u laate; ki wunba kpaan gann, bi lootir teenɔ. 11 Yimm baanba, i ŋmee ki u bija saa miarɔ jaŋ ki wun jii waauk ki turɔ? 12 koo ŋmee ki u saa miarɔ jenn ki wun jii naŋ ki turɔ? 13 Ki li-i tee yimm nba tee biitdamm na mi biaŋinba ki i saa tur i waas bonŋana, i Baa Yennu nba be sanpaapo na mantik kan jii u Seyeeŋ maŋ ki tur binba meiɔ li po na-a?" 14 Tɔn, jɔɔ nba ki narinbiiuk teenɔ muuk na din be leŋ. Ki Yiisa nyinn narinbiiuk maŋ jɔɔ na ni; ki u muut, ki ji fit piak. Ki li bakit nibur na bonchiann. 15 Ŋaan ki yemm din yet a "Narinbiit bat Beelsebule e teen Yiisa yiikoo a wuu nyint narin-biit niib ni." 16 Ŋaan ki yemm mun din loon ki bin bikin Yiisa, ki yaa wun tun nyinn ki lin wann nan Yennu set mi u po. 17 Ki Yiisa bann baa dukii linba, ki betib a "Naan niib-i ŋmat ki kɔn tookit bi leebi, bi naan maŋ saa biira; ki ŋaak niib-i munii ŋmat kɔn nan leebi, li kan seti. 18 Nnae mun biak, li-i tee ki Sintaanii yent bɔkitir u mɔŋ ki kɔn nan leeb, nlee ki li saa seti? 19 I yaa Beelsebule teenin yiikoo a mii nyint narinbiit niib ni; ki yimm muni, ŋmee chab i niib a bii nyint narinbiiti? I mɔŋ niib maŋ toonae want nan i ki mɔk mɔni. 20 Tɔn, min ŋarin, Yennu paŋ nie ki n nyint narinbiit niib ni; ŋanne mun bia want nan Yennu naan poŋ baar i boor niwa. 21 "Jawakitir nba teen siir nan u jatiat ki guu u ŋaak, sɔɔ kan fit fat u siari, 22 ŋaan u paarɔ mun-i taŋŋi pikinɔ ki paakɔ, u saa fat u jatiat nba ki u maa li paak nae, ki bia jii u mɔkint na ki tor niib. 23 "Wunba ki see n poor, u kɔn nanime; ki wunba mun ki tikii niib ki teenimi, u yatibe. 24 "Li-i tee ki narinbiiuk tan nyii nirɔ ni, u tuu yeeke ki lin mɔkooŋ ni, ki loon foonboor, ŋaan ki ki laati; li paak, u tuu tan yet u mɔŋe a 'N saa ŋmat saan ŋaak nba ni ki n daan nyii na nie;' 25 wu ji kii ŋmat baari, wun la ki bi piar ki ŋamma, 26 u ji saa ŋmat nyie ki saa yiin narinbileeb banlore nba bi ki cheeu, ki baar namm, ki bin kɔɔ ki lakin be; ki nirɔ maŋ binbeŋ ji sii bi bonchiann ki gar waa tuu be sinsinn biaŋinba na." 27 Yiisa nba din daa yeen nna maŋ, ki poosɔɔ nna be nibur na ni ki yet sanpaapowa a "Poo nba mara ki mɔɔna na, parpeenn tee u yare." 28 Ki Yiisa jiinɔ a, "Binba gbia Yennu maan ki saakir na, ŋamme ki parpeenn tee bi yar." 29 Nibur nba din gbin Yiisa boor yoo nba na, ki u yetib a "Mɔtana nigbouŋ na tee biitdamme, kimaan bi loon bin la nyinn, ŋaan n kan mi wannib nyinsiari; Joona nyinbooru na kuukɔɔe ki n saa wannib. 30 Biaŋinba ki Joona din tee nyinn ki kpaan Ninefa teeb na, li biaŋe mun ki min nisaarik Bik saa teen nyinn ki kpaan mɔtana nigbouŋ na. 31 Buut daar, poobat nba din nyii diitu po na tan saa set wann nan mɔtana nigbouŋ na mɔk biit, kimaan u din nyii digban-banfɔkirewa ki tan baar a wun gbiint Bat Solomonn yanfoon na pinpauk; ki gotir manii, wunba chee Solomonn be nna. 32 Buut daar, Ninefa teeb tan saa set wann nan mɔtana nigbouŋ na mɔk biit, kimaan Joona nba din mɔɔnt Yennu maan ki turib na, bi din nyik bi biite; ki gotir manii, wunba chee Joona be nna." 33 "Sɔɔ kan joo fitir ŋaan jii ki teen woonin ni, koo ki likin ŋmaŋ li paaki. See ki u jiir ki tɔɔn bont nba fɔk paak ki lin yent, ki niib-i jikii kɔɔ yoo nba, bii laat yentu na. 34 A ninbinae tee a gbanant fitir; a ninbina-i ŋani, a gbanant kur sii mɔk yentue; ŋaan a ninbina-i kii ŋani, a gbanant kur sii bɔne. 35 I mi man ki yentu nba be i ni na daa tee bunbɔnni. 36 Tɔn, a gbanant kur-i yeen boŋŋann ki siar po ki bɔni, li sii yeene ki nyirii pirpirpir, ki naan fitir nba yeen ki teena yeenŋanu na." 37 Yoo nba ki Yiisa pak gbenn na, ki Farisiisɔɔ betɔ a wun weiɔ ki bin saa di jeet. Ki u din wei saan ki saa kɔɔ ki kar a wun di. 38 Ki li teen Farisii nirɔ na bakitnauŋ nan Yiisa nba ki niti ŋaan yaa wun di maŋ. 39 Ki ti Yomdaanɔ Yiisa yetɔ a "Yimm Farisiinba, i sokii ŋmanii nan senii poorpo kuukɔɔe; ŋaan ki i para ni gbee nan fatu nan bonbiir. 40 Yimm jatit na! Yennu nba din nan nanyer po na, ŋɔɔ kaa din nan nɔɔk ni-i? 41 Turin talasdamm linba be i ŋmanii ni nan i senii ni, ki i nanyer po nan nɔɔk ni kur sii yeen. 42 "Yimm Farisiinba, li sii bi turi. I jikit baarii nan nanjoi nan li bonlia piik nɔɔk ni yennkɔɔ, ki teen Yennu, ŋƒan bakin buut bunu nba took, ki bia ki loon Yennu. Linba na nbae ŋan ki yii tuun, ki daa nyikit yenninba tumu. 43 "Yimm Farisiinba, li sii bi turi, kimaan i loon nijaana kaanii boa Yennu jiantu diit ni, ki bia loon niib-ii foonti baakir foontii dai ni. 44 Li sii bi turi. I tee nan kaat nba ki niib tuu somm li paak ŋaan ki laat nae." 45 Ŋanne ki sennu wanntɔyenɔ betɔ a, "Wanntɔɔ, faa yet nna na, ŋann a sukiite na mun." 46 Ki Yiisa yetɔ a "Yimm sennu wannteeb, li sii bi turi mun, kimaan i jint niib jik-kpiata nba paar nan bin jii, ŋaan i mɔŋ ki saak ki yii siin jika maŋ kii sommitibi. 47 Li sii bi turi, kimaan i maa sɔkiniinba kaat ki sent boŋŋann; ŋamm maŋe tee sɔkiniinba nba ki i yeejamm din kpiib na. 48 Yaa tuun nna na, ŋanne want niib nan i set sak i yeejamm nba din tun biaŋinba nawa. Ŋamme din kpii sɔkiniinba maŋ, ŋaan ki i mun saan ki maa bi kaat na. 49 Li paak, ki Yandaanɔ Yennu yet a 'N saa tun sɔkiniinba nan toomiinba bi boor; ki bi saa kpi siab ŋaan mukis leeb,' 50 a mɔtana nigbouŋ n tan la tubdatu sɔkiniinba kur kpinu na paak. Kpinu maŋ din piin durinya namu yooewa, 51 baa din kpii Abel yoo nba na, ki li jii tan baar Sekaria kpinu, wunba ki bi din kpiiu Yennu mannu binbintir nan jiantu ŋasaakak sinsuuk ni na. N beeri barmɔniie, mɔtana nigbouŋ na tan saa la tubdatu sɔkiniinba kur kpinu na paaka. 52 "Yimm sennu wannteeb, li sii bi turi, kimaan i dɔkin Yennu maan, a niib daa bant li paak. I mɔŋ y‡t li bannue, ki bia dɔk binba koor a bin bannir na." 53 Yiisa nba seet leŋ na, ki sennu wannteeb nan Farisiinba wutoa ji doo bonchiann, ki bi ji piin boiɔ buboit ki jiin labaar bonchiann po, 54 ki lek koor a bin la u mɔbonkpetir ki fit biirɔ.

Luk 12

1 Li yoo maŋ ki niib tusaa tusaa din muk lakin leeb, ki tan ŋmaat leeb taagbina, ki Yiisa din pak nan u poorpoweiteeb sinsinn ki yaa, "I mi man Farisiinba binbeŋ po, kimaan bi tee kpinkpannii damme. 2 Barsai kaa ki dɔɔk ki tan kan nyi paanu; siar mun ki be woonin ni ki bi tan kan banniri. 3 Li paak, labaar nba ki i pak woonin ni, ŋaan see ki li tan nyii paanu; linba ki i lek lɔkin diit ni gbaa, ŋaan li tan saa woot ki nyiwa." 4 "N yɔɔsinba, gbiintir, i daa tiin niib jaŋmaanii man, kimaan bi saa fit kpi i gbanant kuukɔɔe; ŋaan i kuun poorpo bi ji kan fit teeni siari. 5 N yaa n wannii wunba ki i sii tiinɔe. Tinin Yennu, wunba saa fit kpi ki bia mɔk yiikoo nba saa lui muu nba kan mi kpeen na ni. N beerie, tinin ŋɔɔe man." 6 "Bi kɔi jinjera baŋŋmu kobu kuukɔɔe, ŋaan Yennu ki mi tamm nan bi yenɔkɔɔwa po. 7 Yennu mi i yura paak yut kann gbaa. Li paak, i daa tiin jaŋmaanii, kimaan i mɔk nyɔɔt ki gar jinjera bonchiann. 8 "Wunba nyint u mɔŋ paanu niib boor nan u tee n weirɔe, min nisaarik Bik mun tan saa nyinnɔ paanu Yennu malakanba boor, 9 ŋaan wunba yaa u ki tee n weirɔ, niib ni, min nisaarik Bik mun tan saa yet a n ki miu, Yennu malakanba boor. 10 "Wunba pak mɔbonn ki biir min nisaarik Bik, Yennu saa fit nyik chabɔ; ŋaan wunba sukii Yennu Seyeeŋ, Yennu kan nyik chab li daanɔ. 11 "Bi-i soori ki baar nani Yennu jiantu diit ni, koo kpanbara boor, koo tiŋ yudamm boor, i daa te ki li daamii-i nan yaa saa pak jiin biaŋinba, koo yaa saa pak linba, 12 kimaan li yooe ki Yennu Seyeeŋ saa wanni biaŋinba ki i saa pak." 13 Li yoo maŋ ki jasɔɔ be nibur na ni ki yet Yiisa a "Wanntɔɔ, betir n yɔɔrɔ na ki wun bɔkit ti baa faar ki turin." 14 Ki Yiisa yetɔ a "Li ki lami nan ki n teen i barbuurɔ ki bɔkit i faar ki turi." 15 Ŋanne ki Yiisa ŋamm pak nibur na a "I mi man mɔkint lonchiɔŋ po. Mɔkint bonchiann kaa saa te ki nirɔ-ii mɔk manfoori." 16 Ŋanne ki u yimm barjouk na a, "Mɔkitsɔɔ din be ki mɔk kpaab, ki u kpaab na teenɔ jeet bonchiann; 17 ki u tan dukin dudukit a 'N saa teen nlee, kimaan n ki mɔk yiar nba ki n ji saa teen n jeet na kur leŋi.' 18 Li poor po ki u yet a, 'N saa teen nnae; n saa yeer n bɔkpera nae ŋaan ŋamm maa bɔsaakara. Leŋe ki n ji saa teen n dii nan n bonkokoot kura; 19 ki n ji saa yet n mɔŋ a: N mɔk jeet nba saa jaŋin nan bina bonchiann; n ji sii foie ki di ki nyu ki mɔk parpeenn.' 20 Ŋanne ki Yennu yetɔ a, 'Jajatuk na! Nyiɔk na, a manfoor saa kat. Ki laan a mɔkint nba ki a mɔk na, ŋmee saa yenti?' 21 "Tɔn, wunba kur tikii mɔkint ki teen u mɔŋ, ŋaan ki mɔk mɔkint Yennu boori, u mun tee nan jajatuk na nae." 22 Ŋanne ki Yiisa yet u poorpoweiteeb a, "Li paak ki n beeri, i daa te ki li mukisi i binbeŋ po nan yaa saa di linba, ki bia daa te ki li mukisi i gbanant po nan yaa saa lia linba, 23 kimaan manfoor gar jeeta, ki gbanant mun gar tiata. 24 Gotir nɔɔnii: Bi ki buur jeeti; ki bia ki jaami; ki bia ki mɔk dii naapaat koo suka, ŋaan Yennu dintib; i ki mɔk nyɔɔt bonchiann ki gar nɔɔnii-i? 25 I ŋmee saa fit fɔkin u manfoor u dudukit nba mukisɔ na paaki? 26 Yaa ki fit tun bonbik na, bee ki li sii damii-i nan bongbeŋŋir tumu? 27 Gotir man puuk nan li ŋant. Bi ki tuun toona koo ki luu bi mɔŋ chinchena; ŋaan n beeriie, kpanbar Solomonn nba lek din mɔk taŋant biaŋinba, u din ki mi lia tiat ki li ŋan nan puuk na gbaa. 28 Mɔɔt nba be dinna, ŋaan wonn na ki bi joo muuwa, Yennu nba faŋŋitir biaŋinba na, u kan lannini-i? Yimm yadkan-pɔɔna damm na! 29 "I daa gbaa nan yaa saa di linba koo yaa saa nyu linba, ki bia daa mukis i dudukit, 30 kimaan nibooru kur nba be tingbouŋ na ni tuu mukis bi dudukit linba na paake. Ŋaan yimm ŋarin, i Baa Yennu poŋ mi nan i loon linba na. 31 Li paak, ŋaant ki i baka-ii be Yennu naan ni, ki u saa jii bona nba na ki turi. 32 "Yimm n niib nba ki yab na, i daa tiin jaŋmaanii, kimaan i Baa Yennue yaa wun turi naan maŋ, ki bia mɔk parpeenn nan waa saa turi na paak. 33 Li paak, kɔin i bona nba ki i mɔk ki jii li likirii ki tur talasdamm, ki i tan saa la mɔkint nba ki mɔk gbennu. Mɔkint maŋ sii be Yendɔuŋ ni, ki kan wati, kimaan nanyukɔɔ kan kpian leŋi, ki bonŋmiŋmabit bia kan ŋmamiri. 34 Siaminba ki a mɔkint be na, a dudukit mun be leŋe. 35 "Teent siir man ki daa yokitir i tiati, ki ŋaan ki i fita-ii di, 36 kii tee nan niib nba tuu guu bi chanbaa nba saa nyi poochiann ki kpent, ki tan baar yiin, ki bin loot yiama na. 37 Daaba nba ki bi chanbaa kpen ki lab ki bi guu u kpenu, parpeenn tee bi yare. Barmɔniie ki n beeri na, bi chanbaa na saa te ki u daaba n kar ki wun baar nan jeet ki turib ki bin di. 38 Li-i tee ki bi chanbaa tan kpen tansuunii koo kojomɔɔk, ki la ki bi guu-u, parpeenn sii tee daaba maŋ yare. 39 "Nnara, li-i tee ki ŋaadaanɔ poŋ mi yoo nba ki nanyukɔɔ saa baarie, u kan ŋaan ki wun baar kɔɔ; u sii guue. 40 Yimm mun-ii teen siir kii guu, kimaan min nisaarik Bik tan saa jen yoo nba ki i ki daane." 41 Ŋanne ki Piita boi Yiisa a "N Yomdaanɔ, a yiin timme barjouk na amii sɔɔ kure?" 42 Ki Yiisa jiinɔ a, "Daabilanɔe tee yandaanɔ ki tuun u chanbaa nba wantɔ biaŋinba? Ŋɔɔe tee wunba ki u chanbaa saa teenɔ daabiyudaanɔ ki wuu gorii daaba kur nba be u ŋaak ni, kii teemm mann yoo nba jaŋ. 43 Li-i tee ki u chanbaa tan kpen ki la ki u tuun nna, parpeenn sii tee daabir maŋ yare. 44 Barmɔniie ki n beeri na, ŋaadaanɔ maŋ saa jii u mɔkint kur ki teen daabir maŋ nuu nie a wuu goriir. 45 Ŋaan li-i tee ki daabir maŋ yet u mɔŋ a u chanbaa kan jen yiami, ki ji piin boo daabilia na, li jab nan poob, ki bia di ki nyu daan ki yib, 46 u chanbaa tan saa jen daar nba nan yoo nba ki daabir maŋ ki daan nan u saa jene, ki dat u tubir bonbiir, ki teenɔ nan waa tuu teen mɔy‡tdamm biaŋinba na. 47 "Daabir-i mi linba ki u chanbaa loon wun tun, ŋaan ki teen u mɔŋ siiri, ki bia ki tumi, bi saa boou kpaasir bonchiann. 48 Daabir-i kii mi linba ki u chanbaa loon wun tun, ki kpet tun bonkpetir nba jaŋ nan boot, bi saa boou waaminnae ŋaan ŋaau. "Wunba ki bi turɔ ki li yab, ŋɔɔe ki bi tan saa boi gaar linba yab; ŋaan wunba ki bi turɔ ki li yab bonchiann na ŋɔɔe ki bi tan saa boi ki gaar bonchiann mun. 49 "N baar maa n lu muue tingbouŋ na ni, ŋaan n summan ki li poŋ yinna. 50 Bi saa te ki n sik nyun yiaka, ki lin turin parbiir bonchiann mɔkmɔk nan laa tan saa tun ki gbenn. 51 I dukii nan n baar nan parmaasire tingbouŋ na ni-i? Aaii. N beerie, n baar nan bɔkitue. 52 Laa jii dinna ki saa, niib baŋŋmu tan sii be ŋaak ni, ki tan saa bɔkit; ki bantaa sii biir banlee, ki banlee na mun biir bantaa maŋ. 53 Baanba tan sii biir bi waas, ki waas mun biir bi baanba; ki naanba tan sii biir bi bonpoi, ki bonpoi mun biir bi naanba; ki siponaanba tan sii biir bi sipoi, ki sipoi na mun biir bi siponaanba." 54 Li yoo maŋ ki Yiisa pak tur nibur na a, "Yoo nba ki i tuu tan la sanpagbant do poorpo na, i tuu yete yiama a saak saa baawa, wun set tan baa. 55 Yoo nba ki i laat niigaŋ po wouŋ da, i tuu yaa naauk sii be, ki lin set tan toŋ. 56 Yimm kpinkpannii damm na, i fit bukitir saak nan naauk baaru yoo, ŋaan bee teen ki i kan fit bann mɔtana yoo na paaki? 57 "Bee teen ki i kan fit dukin i mɔŋ ki bu linba took ki turiini? 58 Li-i tee ki fin nan sɔɔ mɔk maan kii saa nan maan maŋ bat boor, yaa daa be sɔnu paak ki saa na, li bo ŋan ki i kot ki ŋamm maan maŋ. Li-i kii tee nnai kaa, u saa dat baar nana barbuurɔ boor, ki barbuurɔ na mun saa jiia ki teena dansarguutɔɔ nuu ni, ki dansarguutɔɔ na mun saa kɔɔna dansarik. 59 N beerie, bi kan mi ŋaa-ani, see ki a tan pa likirii nba ki bi jiiara na kur, nan jinjema kan tenni."

Luk 13

1 Li yoo na ki nisiab baar ki yet Yiisa ki jiin Galilii teeb kpinu po, binba ki Pailat f din kpiib yoo nba ki bi mann maruŋ ki teen Yennu na. 2 Ki Yiisa boib a, "Galilii teeb nba la biak maŋ biaŋinba na, i dukii a bi mantik din tee biitdamm ki gar bi leeb kure? 3 Aaii; ŋaan n beerie, li-i tee ki i ki nyik i toonbiiti, i kur mun tan saa kpo nnae. 4 Dɔnfoouk nba din be Sailoam ki tan baa ki nyak niib piik nan banniin ki kpiib na, i dukii a niib maŋ din jia mantik tee biitdamm ki gar leeb nba kur be Jerusalem nae? 5 Aaii; ŋaan n beerie, li-i tee ki i ki nyik i toonbiit, i kur mun tan saa kpo nnae." 6 Ŋanne ki Yiisa yimm barjouk a, "Jasɔɔ din wuu tilontik u kpaab ni, ki tan baar a wun pɔɔr lɔɔna, ŋaan ki la siari. 7 Ŋanne ki u bet u kpaguurɔ na a 'Nnara, bina ŋantaae na ki n yɔɔ baat tiik na boor maa n tuu pɔɔr lɔɔna, ŋaan ki laat siari. Chɔɔmɔ lu. Bee ki li sii see biir tiŋ yanni?' 8 Ki u kpaguurɔ na yetɔ a, 'Chanbaa, daa nyikin binn na, ki n gbiir li nyakir ni ki pii lulin, 9 ki tin got laan li saa lon lɔɔna binn po-o? Li-i tee ki li ki loniie, fan ji ŋaan bin chɔɔu.'" 10 Foon dasiar ki Yiisa din want niib Yennu maan, Yennu jiantu diiuk ni; 11 ki poosɔɔ be diiuk maŋ ni, ki narinbiiuk be u ni, ki teenɔ yiaru binpiik nan ŋanniin, ki ji tan teenɔ waagorik, ki u ki fit naatir faba. 12 Yiisa nba tan lau, ki u yiinɔ a wun baar, ki yetɔ a "A yiaru maŋ ŋaawa," 13 ŋaan jii u nii ki yii poo maŋ paak. Li taakpaak ni ki u fiir set naat u mɔŋ ki ji piak Yennu. 14 Ŋanne ki Yennu jiantu diiuk yudaanɔ wutoor doo, kimaan Yiisa nba te ki nirɔ paak foon daar na paak; ki u bet niib na a "Daa ŋanloobe ki ti tuu sii tuun toonn. I tuu baar li daa ni kii laat laafia, ŋaan i daa baat foon daar ki loon laafia." 15 Ki Yiisa betɔ a "Yimm kpinkpannii damm na, i kur tuu lootir i nei nan bonii bonkobloi ni ki saa namm ki nyuntib foon daa. 16 Ki poo na nba tee Abraham yaaboonn na, ŋɔɔe ki Sintaanii teenɔ yommik binpiik nan ŋanniin, li ki jaŋ nan n nyinnɔ yommsin ni foon daarii?" 17 Yiisa nba pak linba na yoo nba, ki u datai na kur ji dii fei; ki nibur na ji din mɔk parpeenn nan waa tuun bakitnauŋ toona nba na kur. 18 Li poorpo ki Yiisa boi niib maŋ a, "N saa bikin Yennu naan nan lannpoe? Koo ki nannir nan bia? 19 Li naan nan kanpɔtik binn nba ki nirɔ tuu jii ki bur u kpaab ni, ki lin kpaat ki teen tiik, ki nɔɔnii baat ki tia tiat li yiinii paak nae." 20 Ki Yiisa bia ŋamm boib a, "N saa bikin Yennu naan nan lannpoe? 21 Yennu naan tee nan datiŋ nba ki poo tuu jii ki ŋmat nan boroboro yon nba yab, ki lin tan miik ki ji fuut do nae." 22 Yoo nba ki Yiisa din be sɔnu paak ki saa Jerusalem na, u din gaar digbangbeŋŋa nan digbanbis ni, ki want niib Yennu maan; 23 ki sɔɔ tan boiɔ a, "Chanbaa, niib nba tan saa la tinnu na, bi tan sii tee waaminna koo bi sii yaba?" Ki u yetib a 24 "See ki i mukis i mɔŋ ki yebin kɔɔ tammɔ-yebik na ni. N beerie, niib bonchiann tan sii loon bin kɔɔ leŋ, ŋaan gbar kɔɔnu. 25 Ŋaadaanɔ-i taŋŋi fiir ki loon tammɔb na, ŋaan ki i biar see nanyer po, ki kpaan tammɔb ki yi ki yaa, 'Chanbaa, lootir turit,' ŋaan li yoo, u tan saa jiini a, 'N ki miini; i nyii lee?' 26 Ki i tan saa jiinɔ a, 'Ti din tuu di ki nyu nana; ki a wantit Yennu maan ti doi ni.' 27 Ki u bia saa jiin ki beti a 'N ki mi yaa nyii siami, yimm biitdamm na kur, seetir nna man.' 28 Ki u tan saa jii-i ki lui nanyer; ŋaan ki i gorii Abraham nan Aisak nan Jakɔb nan sɔkiniinba kura, ki bi be Yennu naan ni; ŋaan ki i sii mɔ fabin ki ŋman nyana. 29 Niib tan saa nyi yondo po nan yonbaa po nan diitu po nan gaŋ po, ki tan kɔɔ Yennu naan ni ki kar ki di jeet. 30 Nisiab nba joont tan saa saan liik, ki siab nba mun dɔŋ liik na tan saa joont." 31 Li yoo na ki Farisiinba siab baar Yiisa boor ki yetɔ a, "See ki a nyii nna ki saan siar po, kimaan Herod loon wun kpiae." 32 Ki Yiisa betib a "Ŋɔɔ woŋ nanaat, i saa man, ki saa yetɔ a 'Gotir, dinna nan wonne ki n sii beer narinbiit niib ni ŋaan bia te ki bii paakit, ki daa ŋantaa daar n saa gbenn n toonn.' 33 Laa jii dinna nan wonn ki saa, see ki n lek fabir somm n somma. Bi kan kpi Yennu sɔkinii siar po, li-i kii tee Jerusalemi kaa. 34 "Jerusalem teeb, nbaayoo-o, yimm nba kpi Yennu sɔk-iniinba, ki bia jaat u toomiinba nba ki u tumm i boor ni na tana, bikinu taar muŋŋae ki n gbaa maa n lakini yomm, nan korik nba tuu lakin u kobis u kpinkpant ni na, ki i ki saki. 35 Gotir man, Yennu nyik i jiantu ŋaak nawa. N beerie, laa nyii dinna ki saa, i ji kan mi lan ki saa tuu daar nba ki i tan saa yet a 'Yennu mɔsoŋŋann-ii be wunba baat Yennu sann ni na paak.'"

Luk 14

1 Tɔn, foon dasiar ki Yiisa din tan kɔɔ Farisiinba yudaansɔɔ ŋaak, a wun di jeet; ki binba be leŋ maŋ diisirɔ. 2 Li yoo na ki baatsɔɔ baar u tɔɔnn, wunba ki bonwuunkar wuunɔ. 3 Ŋanne ki Yiisa boi sennu wannteeb nan Farisiinba maŋ a "Ti sennu sak a nirɔ n te ki baatɔɔ n paak foon daarii?" 4 Ki bi ŋmina. Ki Yiisa gaar baatɔɔ maŋ ki te ki u paak. Li poorpo ki u chabɔ a u saa; 5 ŋaan betib a "I yenɔ-i mɔk boŋ koo naab ki u tan baa bunbunn ni foon daar, u kan donnɔ foon daar maŋii?" 6 Ki bi ki fit jiinɔ siari. 7 Li yoo na ki Yiisa la binba tikir na loon bin gann yudamm kaanii boor ki kar. Li paak, ki u yimm barjouk na a 8 "Bi-i yiina poochiann ki a baar, faa daa kaar yudamm kaanii boori, li pasiar bi poŋ bo yiin sɔɔewa, wunba cheea, 9 ki yiintɔɔ maŋ saa baar a boor ki tan yeta a, 'Fiit ŋaan turɔ kaanu.' Li yoo na, ki fan ji di fei ki fiir ki saan kar kpiŋ. 10 Tɔn, bi-i yiina poochiann ki a baar, fan kar kpiŋ; ki yiintɔɔ n tan fit baar ki yiina a, 'N yɔɔk, baat ki tan kar yudamm kaanii boor.' Li yoo na ki a saa la baakir a leeb boor. 11 Kimaan wunba kur dont u mɔŋ, Yennu tan saa sikinɔ; ŋaan wunba sikint u mɔŋ, Yennu tan saa donnɔ." 12 Ŋanne ki Yiisa bia yet wunba yiinɔ na a "Li-i tee ki a yiin jaamm, faa daa yi a yɔɔsinba koo a yɔɔrib koo a ninjamm koo a mɔkitleebi, kimaan ŋamm tan saa jiinawa, ki a gaar a pann. 13 Li-i tee ki a yiin jaamue, fan yiin talasdamm nan wɔbii nan dianii nan jɔɔnii, 14 ki Yennu saa pukina, kimaan bi kan fit jiina baa dii linba na. Yennue tan saa jiina daar nba ki burchimm tan saa fiir kuun ni na." 15 Binba din di nan Yiisa na yenɔ nba gbat linba ki Yiisa pak na, ki u yetɔ a "Binba tan saa di jaamm Yendɔuŋ naan ni na, parpeenn tee bi yare." 16 Ki Yiisa yetɔ a "Jasɔɔ din be ki tan yaa wun di u jaangbeŋŋir, ki poi niib bonchiann. 17 Jaamm na yoo nba tan baar, ki u tun u daabir a wun yiin niib nba ki u daan poib na, ki jeet na kur teen siira. 18 Ki bi kur piin ki loon sɔnu nba ki bi saa y‡t saanu: Ki sinsinn yɔɔ na bet daabir na a, 'N daa kpapaaŋ. Li paak, chabimin ki n saan saa got;' 19 ki lɔɔ na betɔ a 'N daa naakookii piik; li paak, chabimin ki n saan bikimm;' 20 ki lɔɔ na mun bia betɔ a 'N daa yonn poopaaŋe, li paake ki n kan fit baari.' 21 Ŋanne ki daabir maŋ ŋmat ki saa bet u yomdaanɔ linba na kur. Ki u yomdaanɔ na wutoor doo bonchiann, ki u bet daabir na a, 'Nyimin ki saan doo ni yian yian, ki saa got sɔnii ni, ki yiin talasdamm nan wɔbii nan dianii nan jɔɔnii ki jen namm na.' 22 Li poorpoe ki u daabir na saan ki jen yet a 'Chanbaa, n tun faa yet linba nawa, ŋaan ki yiar bia tenn.' 23 Ŋanne ki u yomdaanɔ na yetɔ a, 'Nyimin biak ki saan digbankpinii ki saa got pana paak nan sanjobis ni, ki te niib n baar, ki n ŋaak na n gbee. 24 Ŋaan binba ki n daan yiimm ki bi y‡t baaru na, bi sɔɔ poŋ kan lemm n jaamm jeet na kaawa.'" 25 Sianyoo ki nibur waa Yiisa; ki u tan jiant yetib a 26 "Wunba loon wuu be nanin, see ki u loonin ki gar waa loon u baa, nan u naa, nan u poo, nan u waas, nan u yɔɔrib, nan u waarii, nan u mɔŋ manfoor biaŋinba na. Li-i kii tee nnai kaa, u kan fit teen n poorpoweitɔɔ. 27 Wunba ki likin u saaŋmaŋ ki jii u kuun dapunpunn ki waami, u kan fit teen n poorpoweitɔɔ. 28 "Wunba loon wun maa dɔuŋ, see ki u kar sinsinn, ki dukin waa saa teen biaŋinba ki soor li mɔb, ki laan u likirii saa jaŋ koo li kan jaŋi; 29 kimaan li-i kii jaŋi, ŋaan ki u fɔkin fiakir ki tan ki fit kaar maaru maŋi, ki niib tan la nan u ki fit kaar dɔuŋ maŋi, bi ji sii laaue ki sarikitɔ. 30 Bi ji sii yeen a 'Jɔɔ na daan fɔkin u dɔuŋ ŋaan tan gbar kaaruwa.' 31 "Kpanbar-i mɔk niib tusaa piinlee ki saan namm a wun took u kpanbar lɔɔ nan u niib tuspiik mun, nlee ki kpanbar nba mɔk niib tuspiik na saa teeni? See ki u kar sinsinn ki dukin ki bann baa saa jaŋ nan baa kan jaŋ nan u tooku. 32 Bi-i kii jaŋie, see ki u tun toomii ki bi ŋak faauk, waa daa be banfɔkira na. 33 "Tɔn, nirɔ-i kii nyik u mɔkint kuri, u kan fit teen n poorpoweitɔɔ. 34 "Yaarin man; ŋaan li manu-i taŋŋi saat, nlee ki li ji sii mani? 35 Li lek kii ŋan ki a jiir ki pak kpaab ni, ki bia ki ŋan ki a pukin lulin po. See ki a lu. Wunba mɔk tuba, wun gbiint."

Luk 15

1 Sianyoo ki lampogaarteeb nan biitdamm bonchiann din baat Yiisa boor ki gbiintir u maan; 2 ki Farisiinba nan sennu wannteeb burin ki yeen a "Jɔɔ na gaan biitdamm ki bia di namm." 3 Li paak, ki Yiisa yimm barjouk na a 4 "I yenɔ-i mɔk pei kobik, ki yenɔ tan boti, u saa teen nlee? See ki u nyik pei piinyia nan banyia na muuk ni, ŋaan saan lon peeuk nba bot na nan waa tan saa lau. 5 Wuu lau yoo nba ki u ji mɔk parpeenn. Li yoo wun jiiu ki bukɔ bɔpiat paak 6 ki kun ŋaak ni, ki yiin u yɔɔsinba nan ŋakpiasinba ki lakimm ki yet a, 'Yii mɔk parpeenn man, kimaan n la n pebotikauk nawa.' 7 "Ŋanne mun ki n beeri, biitdaanyenɔ-i nyik u biit, par-peenn sii be Yendɔuŋ ni ki jiin li daanɔ po, ki gar laa sii be biaŋinba niburchimm piinyia nan banyia nba li ji ki kpaa talas bin lebit na po. 8 "Ki poo mun-i mɔk likbina piik, ki yenn tan boti, u saa teen nlee? See ki u joo fitir ki piar u diiuk, ki lon fanu nan waa tan saa lar. 9 Wuu jiki lar yoo nba, wun yiin u yɔɔsinba nan u ŋakpias nba ki lakimm ki yet a 'Yii mɔk parpeenn man, kimaan n laa n likbinn nawa.' 10 "Ŋanne mun ki n beeri, li-i tee ki biitdaanyenɔ nyik u biit, Yennu malakanba sii mɔk parpeenn ki jiin u po." 11 Ŋanne ki Yiisa ŋamm yet a "Jasɔɔ din mɔk bonjai banlee, 12 ki waarɔ po tan yet u baa a 'N baa, n loon ki a jii faar nba ki n tan saa gaar nae ki turin.' Ŋanne ki u baa bɔkit faar maŋ ki turɔ. 13 Li ki yukiri ki waarɔ po na jii u mɔkint kur ki yaat saan digbann banfɔkira. 14 Waa saa be doo na ni ki u teen yana yana ki biir u likirii kur. Waa gbenn likirii na yoo nba, ki kon baa tiŋ maŋ ni bonchiann, ki gbatɔɔ hei. 15 Ŋanne ki u ji saan be jasɔɔ ŋaak doo maŋ ni, ki u tuumɔ u kpaab ni ki u dint u doorii. 16 Ki u tuu loon wun di doorii jeet na; ŋaan ki sɔɔ ki teenɔ jesiati. 17 Li poorpo ki u yan jen, ki u yet a 'N baa toontunna kura laat jeet di ki li jaŋitib, ki bia tent, ŋaan ki n tan kpenn kon nna na. 18 Laa ji be na, n saa kun n baa boore ki saa yetɔ a, Chanbaa, n tun bonbiir ki biir Yennu nanawa. 19 N ji ki ŋan nan ki a yiinin a bija. Teentin a toontunna na yenɔ.' 20 Ŋanne ki u ji fiir ki ŋmat kun u baa boor. "Yoo nba ki u daa be banfɔkir ki kpent na, ki u baa lau; ki ninbaauk soorɔ bonchiann, ki u chiar ki baar soor u bɔpiat ki puur wɔbɔ. 21 Ŋanne ki bik na yet a, 'N baa, n tun bonbiir ki biir Yennu nanawa. N ji ki ŋan nan ki a yiinin a bija.' 22 Ŋaan ki u baa yet u daaba na a, 'Teent yiama ki jii chinchenŋann na, nan baŋ, nan taasaat, ki gbabinɔ, ki bia pirimɔ baŋ nan taasaat na, 23 ŋaan kii saa man ki saa soor naajakpammir na ki tan kpiu ki tin teen jaamm. 24 N tuu mi a n bija na kpoe, ŋaan ki u be; ki bia mi a u bote, ŋaan ki u tan jenna.' Ŋanne ki bi ji piin bi jaamm dinu nan parpeenn. 25 "Li yoo na ki u bijakper na daa be kpaab ni, ki ji tan kpent ki per ŋaak ki gbat fuut, ki jeruk jerin ki siak waa. 26 Ki u yiin u baa toontunyenɔ ki tan boiɔ a, 'Bee fuute fu ŋaak ni na?' 27 Ki toontunnɔ na yetɔ a 'A waarɔ nae kpen, ki a baa te ki bi kpii naajakpammir, kimaan u jen nan laafiae.' 28 Ŋanne ki u yɔɔrɔ maŋ wutoor ji doo hei, ki u y‡t ŋaak na ni kɔɔnu. Ki u baa nyii ki barimɔ a wun baar kɔɔ. 29 Ŋaan ki u yet u baa a, 'Nnara, mine tuuma bina bonchiann. N bia ki mi y‡t a mɔbu, ŋaan a poŋ taan ki mi turin buuk ki n kpii ki yiin n yɔɔsinba, ki ti dii ki mɔk parpeenni. 30 A bija nae biir a faar kur, ki wei poob. Waa tan jen yoo nba, ki a bia kpii naajakpammir ki turɔ.' 31 Ki u baa yetɔ a 'N bik, fin ŋarin poŋ tuu be nanin yoo kure; ki linba kur ki n mɔk, li tuu tee a yare. 32 Li poŋ ŋan nan tin teen jaamm kii mɔk parpeenn, kimaan n tuu mia a waarɔ na kpoe, ŋaan ki u be; ki bia mi a u bote, ŋaan ki u tan jenna.'"

Luk 16

1 Ki Yiisa yet u poorpoweiteeb a "Mɔkitsɔɔ din be ki mɔk u toona saakɔɔ, ki bi din tan kumii mɔkitɔɔ na a u toona saakɔɔ na biir u likirii nan u bona. 2 Ŋanne ki mɔkitɔɔ na yiinɔ ki tan boiɔ a, 'Bee teen ki n gbia a po nna? A ji kan mi teen n toona saakɔɔ. I saa ki sɔb faa mɔk n bona nba ki tan turin.' 3 Ki toona saakɔɔ maŋ tan dukin dudukit a 'N chanbaa yaa wun berin u toonn nie na. N saa teen nlee? N ki mɔk paŋ nba saa ko, ki n bia tiin fei nan mii mei. 4 N mi maa saa teen biaŋinba ki niib n gaarin bi ŋei ni yoo nba ki n chanbaa nyikin ki gbenn na.' 5 Ŋanne ki u yiin u chanbaa pandamm na kur yenɔ yenɔ; ki boi sinsinn yɔɔ a, 'A mɔk n chanbaa pann yiŋŋae?' 6 Ki u jiin a, 'Kpasirii kobike.' Ki u betɔ a, 'Jiin kadaauk ki saan kar yian ki sɔb kpasirii piiŋŋmu.' 7 Ki u bia yiin lɔɔ ki tan boiɔ a, 'Fini, yiŋŋae ki a mɔk n chanbaa panni?' Ki u jiinɔ a 'Dii bootii kobike.' Ki u yetɔ a 'Jiin kadaauk ki sɔb dii bootii piinniin.' 8 Tɔn, yoo nba ki u chanbaa na gbat u toona saakɔɔ fobdiirɔ na nba tun biaŋinba na, ki u pakɔ, a u tun nan yame." Ki Yiisa ŋamm yetib a "Binba waa tingbouŋ na sɔnue mɔk yan bi mɔŋ niib sinsuuk ni ki gar binba waa yentu sɔnu na. 9 Mine beeri na, yii dia tingbouŋ na likirii kii sommit niib; ki likirii na-i taŋŋi gbenn yoo nba, Yennu saa gaari Yendɔuŋ ni, ŋei nba sii yɔɔ be na ni. 10 Wunba tuun toonbik fanu, u bia saa tun toongbeŋŋir fanue. Wunba di fobit nan likmintik, u bia saa di fobit nnae nan likchiɔŋ. 11 Li-i tee ki a di fobit tingbouŋ na ni, Yennu saa jii sanpaapo mɔkint ki teen a nuu ni wa-a? 12 Li-i tee ki a di leeb yar fobit, ŋmee saa tura a yari? 13 "Tɔn, daabir kan fit tun ki tur chanbaanba banlee. U sii nan yenɔe ŋaan loon lɔɔ; koo u sii chɔrin yenɔe ŋaan sian lɔɔ na. A kan fit waa Yennu ki bia waa likirii." 14 Yoo nba ki Farisiinba gbat linba na, ki bi ji daan Yiisa nyatuk, kimaan bi din tee liklonnae. 15 Ki Yiisa yetib a "Yimm nba want i mɔŋ nan i tee niburchimme na, ŋaan Yennu mi i para ni. Linba ki nirɔ dukii nan li tee bonjaanne ŋaan li ki mɔk nyɔɔt Yennu boor. 16 "Moses sennu nan Yennu sɔkiniinba sɔbu din mɔk paŋ mɔkmɔk nan Jɔɔnn nba din tan baar. Laa nyii Jɔɔnn baaru yoowa, ki bi mɔɔntir Yennu barŋanii ki jiin Yennu naan po, ki sɔɔ kur mukis u mɔŋ a wun kɔɔ Yennu naan maŋ ni. 17 Sanpaak nan tiŋ tan saa gbenn ŋaan Yennu sennu nan bonmintika kan gbenne. 18 "Wunba y‡t u ŋaapoo ŋaan kɔɔn pooganɔ, ŋanne tee bonchonchontoonn; ki wunba mun kɔɔn poo nba ki u sɔrɔ y‡tɔ na, u mun bia tee bonchonchonne." 19 Ki Yiisa bia yetib a "Mɔkitsɔɔ din be, ki daaryeejaŋaakur ki u lia taŋant, ki be u yama ni nan parpeenn. 20 Ki talasdaansɔɔ mun din be, ki u sann tee Lasarus, ki u mɔk fiat hei. Ki bi tuu baar nanɔ ki wun kar mɔkitɔɔ na ŋaatammɔb ni, 21 ki tuu loon wun di mɔkitɔɔ na jebura nba baa na; ki bɔi tuu baar gbaa ki lenii u fiat na. 22 "Li poorpoe ki talasdaanɔ na tan kpo, ki Yennu malaka-nba jiiu ki saan nanɔ Abraham boor Yendɔuŋ ni. Ki mɔkitɔɔ na mun tan kpo, ki bi piiu; 23 ki u be kpeentiŋ biak boor, ki li din mukisɔ bonchiann. Ki u tan yƒat got ki la Abraham banfɔkira, nan Lasarus ki u be Abraham boor. 24 Ŋanne ki mɔkitɔɔ na yikin ki yet a, 'Chanbaa Abraham, tinimin ninbaauk, ki tun Lasarus ki wun pak u niibir nyun ni, ki tan teen n jerinn paak ki lin maak, kimaan n di biake muu ni na.' 25 Ki Abraham yetɔ a 'N bik, tiat faa tuu be a manfoor ni na, a tuu mɔk bonŋŋanae, ŋaan Lasarus mun mɔk bonbiit. Mɔtana u be u yama nie nna na, ŋaan fine ji be biak ni na. 26 Ki linba pukin, Yennu bir bootsunsuŋ timm nan fin sinsuuk ni, ki sɔɔ kan fit nyi ki lɔɔr saan a boor ni, ki sɔɔ mun kan fit nyi a boor ki lɔɔr ti boor ni na.' 27 Ŋanne ki mɔkitɔɔ na yetɔ a 'Chanbaa, li-i tee nnaie, n barimae, tumin Lasarus n baa ŋaak, 28 ki wun saan kpaan n waarii baŋŋmu nba biar na, ki bi ji tan daa baat biak boor na ni.' 29 Ki Abraham yetɔ a 'A waarii mɔk Moses nan Yennu sɔkiniinba gbouŋ. Bin gbiint li maan.' 30 Ki mɔkitɔɔ na yetɔ a 'Chanbaa Abraham, aaii, nna kan saki; sɔɔ-i fiir kuun ni ki saan bi boori, ŋanne ki bi saa nyik bi biit.' 31 Ki Abraham yetɔ a 'Bi-i kii gbiint Moses nan Yennu sɔkiniinba maan, nirɔ-i lekii fiir kuun ni gbaa, ŋaan bi kan sak u mɔbi.'"

Luk 17

1 Li yoo maŋ ki Yiisa yet u poorpoweiteeb a "I daa dukii nan jinjammii kan baari; ŋaan li sii bi ki teen wunba te jinjammii baat niib paak na. 2 Bi-i bonni jii naar ki lann u turu ni ki lu-u mɔkir ni, li bo sii sɔ nan wun te waas na yenɔkɔɔ n tun toonbiit. 3 Soot i mɔŋ! "A naa bik-i tun bonbiir, fan kpaanɔ; ki li-i tee ki u yaa u biira, fan nyik u biit ki chabɔ. 4 Li-i tee ki u tun ki biira taar munlore daar nɔɔk ni, ŋaan tuu baar a boor ni taar munlore ki yaa u biira, fan nyik chabɔ." 5 Li yoo maŋ ki Yiisa toomiinba yetɔ a "Pukint ti yada." 6 Ki u yetib a, "Li-i tee ki i bo mɔk yada ki li yab ki baar nan kanpɔtik binn na, i bo tuu saa fit yet kpiik na a, 'Ŋabit ki saan wuu mɔkgbeŋŋir ni,' ki kpiik maŋ saa sak i mɔb ki set ŋabir. 7 "Tɔn, i yenɔ-i mɔk daabir ki u ko tammɔnn koo ki kpaar pei, ki daabir na-i nyii kpaab ki kpen ŋaak ni, a kan yetɔ a 'Baat yian ki tan kar ki di jeeti.' 8 See ki a betɔ a 'Liatir a kpakoliata ki bir, ŋaan lia tayeenii, ki teen jeet ki sennin ki n baar na ki di ki nyu. Li poorpo ki a mun di ki nyu.' 9 Chanbaa maŋ saa tur u daabir na niipoouk kimaan waa sak u mɔb na paaka? Aaii. 10 Li mun bia tee nnae i boor. Yoo nba ki i tun toonn nba ki Yennu turi na ki gbenn, yin yet a 'Ti tee daabiyoonae. Ti kpan tuu tun linba ki ti bo saa tun na kɔɔe.'" 11 Yiisa nba din saa Jerusalem yoo nba na, ki u gar Samaria nan Galilii sinsuuk ni, 12 ki tan baar digbansiar; ki gbaata piik chetɔ leŋ, ki set banfɔkira, 13 ŋaan yikin sanpaapo ki yeen a "Chanbaa Yiisa, tinimit ninbaauk." 14 Yiisa nba lab yoo nba ki u yetib a, "I saa man Yennu mannteeb boor ki bin bikini got." Ki bi ŋmat saa Yennu mannteeb boor; ki bi ŋaat maŋ ji saa gbenn sɔnu ni. 15 Ki bi yenɔ nba bann nan u ŋaauk gbenn na, ki u ŋmat Yiisa peŋ ki saa pak Yennu nan kunkɔsaakar, 16 ŋaan baar gbaan funfabir Yiisa tɔɔnn ki turɔ niipoouk; jɔɔ maŋ din tee Samaria nirɔe. 17 Ki Yiisa boi a "Niib piik kaa bo la laafia-a? Ŋaan niib banyia na be lia? 18 Bi sɔɔ ki jen a bin tur Yennu niipoouk see boorganu na kɔɔe-e?" 19 Ŋaan bet jɔɔ maŋ a "Fiit kii saa. Faa teenin yada na paake te ki a la laafia." 20 Tɔn, ki Farisiinba na boi Yiisa a, "Yennu naan saa baar nlee yooe?" Ŋanne ki u betib a "Li ki tee i saa got la Yennu naan nba saa baar biaŋinba kaa. 21 Sɔɔ kan yet a 'Gotir, ŋanne na,' amii 'Li be nawa,' kimaan Yennu naan na be i ni." 22 Ŋanne ki u bet u poorpoweiteeb na a, "Yoo baat ki i tan sii summan ki i la min nisaarik Bik baaru, ŋaan kan la. 23 Bi tan saa beti a, 'Gotir, u be leŋ,' koo 'Gotir, u be nna na.' I daa saa gorii, ki bia daa waabi; 24 kimaan min nisaarik Bik baaru tan sii tee nan sanyikintii nba tuu nyikint ki yent sanpaapo kur nae. 25 Ŋaan sinsinn n tan saa di biak bonchiann; ki mɔtana nigbouŋ na bia tan saa y‡tin. 26 Nowa yoo nba din tee biaŋinba na, li mun bia tan sii tee nnae min nisaarik Bik baaru yoo. 27 Nowa yoo, bi din di jeet ki nyu, ki kɔɔnt poob, ki jikit bi waas ki teemm jab, ki tan tuu daar nba ki Nowa kɔɔ ŋarungbeŋŋir ni ŋaan nyikib; ki nyunchiɔŋ baar ki dii bi kur. 28 Lot yoo mun bia din tee nnae; ki bi di ki nyu, ki daa bona ki kɔi bonkukɔit, ki buur tan, ki maa ŋei; 29 ŋaan daar nba ki Lot din nyii Sodom, ki sarwuutaa nan muu nyii sanpaapo ki tan baa ki dii bi kur. 30 Daar nba ki min nisaarik Bik tan saa dɔkit, li mun tan sii tee nnae. 31 "Li daar maŋ, jɔɔ nba be ŋaak yur g paak, u daa siik ki kɔɔ u diiuk ni a wun jii u bona; ki wunba mun bia be kpaab ni, u daa ŋmat jikin siari. 32 Tiat Lot ŋaapoo h labaar na po. 33 Tɔn, wunba ki sak wun likin u saaŋmaŋ n paak, u tan saa kɔŋ u manfoor; ŋaan wunba likin u saaŋmaŋ n paak, ŋɔɔe tan saa la barmɔnii manfoor. 34 N beerie, yoo nba ki n saa baar na, niib banlee tan sii dɔɔ dɔɔnu ni, ki n tan saa jii yenɔ ŋaan nyik lɔɔ. 35 Poob banlee tan sii be ki naan dii, ki n tan saa jii yenɔ ŋaan nyik lɔɔ. 36 Jab banlee mun tan sii be kpaab ni, ki n tan saa jii yenɔ ŋaan nyik lɔɔ." 37 Ki u poorpoweiteeb na boiɔ a "Ti Yomdaanɔ, lee?" Ki u jiin a, "Siaminba ki pɔit be, leŋe juut tikii."

Luk 18

1 Li yoo na ki Yiisa yimm barjouk a wun wannib nan li ŋan ki bii mei Yennu yoo kura, ki daa mɔk kpinkpangbatuku, ki betib a 2 "Barbuurɔ din be dosau nna ni, ki ki tiin Yennu ki boi wun baakit nirɔ. 3 Pakɔɔk mun din be doo maŋ ni ki din tuu yɔɔ baat u boor yoo kur ki yeenɔ a 'Bumin n maan na ki turin ki n nyi nirɔ nba mukisirin na nuu ni.' 4 Ŋaan ki barbuurɔ na tuu y‡t. Li poorpo ki u tan dukin a, 'N poŋ taan ki tiin Yennu, ki bia ki baakit nirɔ gbaa, 5 ŋaan pakɔɔk na daamii paak, n saa tat bu u maan maŋe ki turɔ, nna-i kaa, u baaru saa turin bakinta.'" 6 Ki Yiisa ŋamm yetib a "Gbiintir barbutouŋ na nba dukin biaŋinba. 7 Waa yaa u saa turɔ mɔnii na, ki Yennu nigannteeb nba meiɔ yonnu nan nyiɔk na, ŋɔɔ Yennu kan bu ki turibii? U saa taantira? 8 N beerie, u saa bu ki turibe yian yian. Ŋaan min nisaarik Bik-i baar yoo nba, n saa la niib nba teenin yadawa-a?" 9 Ŋanne ki Yiisa yin barjouk na ki tur binba dukii boŋŋann bi mɔŋ paak, ŋaan sian bi leeb na a: 10 "Jab banlee din saan kɔɔ Yennu jiantu ŋasaakak ni a bin miar Yennu, ki yenɔ tee Farisii nirɔ, ki lɔɔ mun tee lampogaartɔɔ. 11 Ki Farisii nirɔ na set ŋaan miar u mɔŋ dudukit ni ki yet a, 'Yennu, n teena niipoouk, kimaan n ki tee biitdaanɔ nan leeb na. N ki tee ninfɔkdaanɔ, ki bia ki di fobiti, ki bia ki tee joonbaaruku. Niipoouk nan maa ki tee nan lampogaartɔɔ na na. 12 N lorin mɔb taar munlee daa ŋanlore nɔɔk ni; maa tuu la linba, n bia teena yennkɔɔ piik nɔɔk ni.' 13 Ki lampogaartɔɔ na ŋarin set dannuwa, ki ki loon wun yaat got sanpaapo, ŋaan pak yur ki yet a 'Yennu, tinimin ninbaauk, kimaan n tee biitdaanɔe.'" 14 Ki Yiisa ŋamm yetib a "N beerie, lampogaartɔɔ nae, li ki tee Farisii nirɔ na kaa, waa din tan kun, Yennu din gaar u miaru ki turɔ mɔnii; kimaan wunba kur dont u mɔŋ, Yennu saa sikinɔ; ŋaan wunba mun sikint u mɔŋ, Yennu tan saa donnɔ." 15 Tɔn, nisiab din baat nan bi waas Yiisa boor, a wun yii u nii bi paak, ŋaan ki u poorpoweiteeb nba la ki bi baat nan waas maŋ na, ki bi tian bi paak. 16 Ŋaan ki Yiisa yiin waas maŋ a bii baat u boor na, ki yet u poorpoweiteeb na a "Ŋaant ki waas maŋ-ii baat n boor na man, ki daa tiammi, kimaan bi boorue yen Yennu naan. 17 Barmɔniie ki n beeri na, wunba ki gaar Yennu naan na, nan u tee bik na, u kan mi kɔɔ li ni faba." 18 Li yoo na ki yudaansɔɔ baar Yiisa boor ki tan boiɔ a, "Wanntɔŋanɔ, n saa teen nlee ki la manfoor nba kaa gbennu?" 19 Ki Yiisa ŋmat boiɔ a, "Bee ki a yin niŋanɔ? Niŋansɔɔ kaa see Yennu kuukɔɔ. 20 A poŋ mi Yennu sennu. Ŋanne tee: Daa tuun bonchonchontoona, daa kpi nirɔ, daa jaami, daa tee faak siara, i baakit a baa nan a naa." 21 Ki jɔɔ maŋ jiinɔ a, "N poŋ sak linba na kur n bisin niewa." 22 Yiisa nba gbat u jiinu na ki u betɔ a "Bonyennkɔɔe pɔta; kɔin linba kur ki a mɔk ki jii li likirii ki tur talasdamm, ki a tan saa la mɔkint Yendɔuŋ ni, ki jenna kii waan." 23 Waa gbat linba na ki u par ji biir, kimaan u din mɔk mɔkint bonchiann. 24 Yiisa nba bann nan u la parbiir na, ki u yet a "Li paar nan mɔkita n kɔɔ Yennu naan ni. 25 Li mantik paar nan mɔkitɔɔ n kɔɔ Yennu naan ni nan laagumii nba kan fit kɔɔ kparpeenu miar ni biaŋinba nae." 26 Niib na nba gbat waa piak biaŋinba na ki bi boiɔ a, "Li-i tee nna-ie, ŋmee ji saa fit la tinnu?" 27 Ki u betib a, "Linba ki nirɔ kan fit tumi, ŋaan Yennu saa fit tuma." 28 Ki Piita yetɔ a, "Gotir, timm ŋarin nyik linba ki ti mɔk nae ŋaan waa-a." 29 Ki Yiisa betib a, "Barmɔniie ki n beeri, wunba kur nyik u ŋaak, koo u baa, koo u naa, koo u poo, koo u waas, koo u yɔɔrib, koo u waarii Yennu naan paaki, 30 u saa la li booru tingbouŋ na ni, ki lin gar waa nyik linba na; ki yoo nba baat na, u bia tan saa la manfoor nba kaa gbennu." 31 Li yoo na ki Yiisa yiin u poorpoweiteeb na ki nyii namm kpiŋ ki saa betib a "Gotir man, ti saa Jerusaleme, leŋe ki bi saa teen min nisaarik Bik linba kur ki Yennu sɔkiniinba din sɔb ki jiin n po na, 32 kimaan bi tan saa soorin ki teenin binba ki tee Juu teeb na nuu ni, ki bi tan saa daanin nyatuk ki sukiin ki siin mɔsant n paak, 33 ki boon kpaasir, ki bia tan kpin; ŋaan daa ŋantaa daar ki n saa fiir kuun ni." 34 Ŋaan u poorpoweiteeb na din ki bann barii na paaki, kimaan Yennu dɔkin bi yama. Ŋanne din te ki bi ki bann linba ki u piak na paaki. 35 Yiisa nba din tan per Jeriko na, ki jɔɔnsɔɔ kar sanjokpiŋ, ki mei, 36 ki tan gbat ki nibur gaar, ki u boi a "Bee tee?" 37 Ki bi betɔ a "Yiisa nba tee Nasaref nirɔ nae gaar." 38 Ki u yikin sanpaapowa a "Yiisa, Defid yaaboonn, tinimin ninbaauk." 39 Ki sɔnliita na tian u paak a wun ŋmin; ŋaan ki u bia ŋamii yikin sanpaapowa a "Defid yaaboonn, tinimin ninbaauk." 40 Ki Yiisa set, ŋaan betib a bin dat jɔɔŋ maŋ ki baar nanɔ u boor. Waa baar kpian Yiisa yoo nba ki Yiisa boiɔ a 41 "A loon ki n tun bee ki turani?" Ki u jiin a, "N Yomdaanɔ, n loon ki a nyɔɔnt n ninbinae." 42 Ki Yiisa betɔ a "Nyɔɔntir! Faa teenin yada nae te ki a ninbina na la laafia." 43 Li taakpaak ni ki u ninbina nyɔɔnt ki u ji laat, ki waa Yiisa ki saa ki dontir Yennu sann. Yoo nba ki niib na la nna maŋ, ki bi kura ji piak Yennu.

Luk 19

1 Li poorpoe ki Yiisa din baar Jeriko ki gaar. 2 Ki jasɔɔ be leŋ maŋ ki tee lampogaarteeb yudaanɔ, ki u sann tee Sakeus; ki u mɔk mɔkint bonchiann. 3 Ki u din koor a wun la Yiisa nba tee wunba, ŋaan ki fit lau. Niib din yabit nan wun lauwa, kimaan u din tee jajinjiŋe. 4 Li paak ki u chiar ki gar tɔɔnn po ki saa doo sinsabik a wun la Yiisa, kimaan u yaa wun gar leŋe. 5 Yiisa nba tan baar sinsabik maŋ boor, ki u yaat gotɔ ki yetɔ a "Sakeus, kakitir ki sik na. See ki n dii a ŋaak ni dinna." 6 Ki Sakeus kakit sik yiama ki foontɔ nan parpeenn, ki bi tɔk saan u ŋaak ni. 7 Niib na nba din la linba na ki bi ji burin ki yeen a "Jɔɔ na saan kɔɔ biitdaanɔ ŋaak nie." 8 Li poorpo ki Sakeus fiir set ki yet Yiisa a, "N Yomdaanɔ, gotir, n saa bɔkit n mɔkint kur ki tur talasdamm na, ki wunba ki n mi diiu fobit, n saa jiinɔ taar munna." 9 Ki Yiisa yetɔ a "Tinnu baar ŋaak na niib paak dinnawa, kimaan jɔɔ na mun tee Abraham yaaboonne. 10 Min nisaarik Bik baar a n lon binba bot nae ki lab ki tinnib." 11 Ŋanne ki Yiisa yin niib nba gbiintir maan maŋ na barjouk, kimaan bi dukii a Yiisa nba per Jerusalem na, li paak Yennu naan saa baar yiame. 12 Ki u yetib a, "Nijaansɔɔ din be ki tan nyii saan digbann banfɔkira, a bin dinnɔ naan, li poorpo ki wun jen kpen ŋaak ni. 13 Waa daa din ki saan yoo nba na, ki u yiin u daaba piik ki turib salinkuna i yenn yenn, ki betib a, 'I saa man kii kpentir kpinkpouŋ nan likirii maŋ nan maa tan saa jen.' 14 Ŋaan ki u doo ni niib na namɔ. Waa saan yoo nba ki bi tun toomii kpanbar na boor, a bi ki sak ki jɔɔ na n teen bi bati. 15 "Tɔn, ki nijaann na saan ki saa dii naan maŋ ki jen. Waa jen yoo nba, ki u te ki bi yiin u daaba nba ki u daan turib likirii na, a u loon wun bann nyɔɔt nba ki bi la likirii nba ki u daan turib na ni. 16 Ki sinsinn yɔɔ na baar u boor ki tan yetɔ a 'Chanbaa, salinkunn nba ki a daan turin na, n kpent kpinkpouŋ ki la salinkuna piik.' 17 Ki u yomdaanɔ na yetɔ a 'N faan, a tee daabiŋanɔe. Faa fit dia bonmintik fanu biaŋinba na, li paak, n saa tura doi piik yudant.' 18 Ki wunba mun paa u paak na baar u yomdaanɔ na boor ki tan yetɔ a 'Chanbaa, salinkunn nba ki a daan turin na, n kpent kpinkpouŋ ki la salinkuna ŋaŋŋmue.' 19 Ki u yomdaanɔ na yetɔ a 'N saa tura doi ŋaŋŋmu yudante.' 20 "Ki lɔɔ mun bia baar ki tan yetɔ a 'Chanbaa, gotir a salinkunn nae na. N daan gbin n ninfiaŋ nie ki bɔr, 21 kimaan n tiina a tonu na paake. A tuu jikit linba ki tee a yar, ki bia jaan linba ki a ki buri.' 22 Ki u yomdaanɔ na yetɔ a 'Fin daabibiiuk na, n saa jii a mɔŋ mɔŋ mɔmaame ki pak gbenna. A poŋ mi nan n tuu tee nitouŋo, ki tuu jikit linba ki tee n yar, ki bia jaan linba ki n ki buri. 23 Bee teen ki a ki kpent niib n likirii maŋ, ki bin tan paanin nyɔɔti? Maa bo tan jen na, n bo saa la n likirii nyɔɔta,' 24 ŋaan yet binba see leŋ na a 'Gaat salinkunn maŋ u nuu ni, ki tur wunba mɔk salinkuna piik na.' 25 Ki bi betɔ a 'Chanbaa, u poŋ mɔk salinkuna piik.' 26 Ki u jiimm a 'N beerie, wunba mɔk bona, bi saa pukinɔ; ŋaan wunba kɔŋ bont, bi bia saa tont bonmintik nba ki u mɔk nae. 27 Tɔn, n datai na nba ki loon ki n teen bi bat na, ŋann baat namm nna na ki tan kpib n numm nna.'" 28 Yiisa nba pak ki gbenn na ki u gar bi tɔɔnn, ki bi saa Jerusalem. 29 Ki bi tan per Befej nan Betani doi nba kpia kunkonn nba ki bi yir Olif Tiinii kunkonn na; ki Yiisa tun u poorpoweiteeb na banlee, 30 ki betib a "Yi saa digbanbik nba be i tɔɔnn po na ni. I-i saki baar, i saa la bonjak lor, ki sɔɔ daa ki mi jakɔ. Yin lotɔ ki baar nanɔ; 31 ki wunbai boi-i a 'Bee teen ki i lotɔ?' yin betɔ a 'Ti Yomdaanɔe loonɔ.'" 32 Ki bi saan la bont kur nan Yiisa nba pakib biaŋinba na. 33 Baa saan ki saa lot boŋ maŋ yoo nba ki bondamm lab ki boib a "Bee ki i lot boŋ maŋi?" 34 Ki bi jiin a, "Ti Yomdaanɔe loonɔ," 35 ŋaan dat boŋ maŋ ki baar nanɔ Yiisa boor. Ki u poorpoweiteeb jii bi liant, ki paan boŋ na paak ki jakin Yiisa. 36 Waa jak boŋ na yoo nba ki nisiab jikit bi chinchena nan bi liata ki lat sɔnu ni. 37 Waa tan per Jerusalem ki baar sɔnsinsikir nba nyi Olif Tiinii kunkonn paak na, leŋe ki u poorpojɔɔmu na bonchiann piin ki piak Yennu nan kpianpaarii nan parpeenn, kimaan baa din la bakitnauŋ toonjaana nba kur ki Yiisa tun na; ki bi yeen a 38 "Yennu mɔsoŋŋann be kpanbar nba baat Yennu sann ni na paak. Parmaasir be Yendɔuŋ ni; i dontir Yennu sann sanpaapo man." 39 Ŋanne ki Farisiinba siab nba be nibur na ni yet Yiisa a, "Wanntɔɔ, betir a poorpojɔɔmu na ki bin ŋmin." 40 Ki Yiisa yetib a "N beeriie, niib maŋ-i ŋmin, ŋaan tana gbaa sii yikin piak Yennue." 41 Waa din per Jerusalem na ki u gotir ki mɔ doo na teeb paak, 42 ki yet a "Li-i bonni tee ki i bann parmaasir sɔnu dinna, li bo sii ŋan turi. Ŋaan mɔtana li liir i yan, ki i ki fit banni. 43 Yoo baat ki i datai tan saa baar, ki maa joonjouk ki lint i doo ki loon i paak lokir kur po, 44 ki libit i kur nan tiŋ ki kpi-i perrr. Bi tan saa biir i ŋei maŋe chain, ki tangbiinn gbaa kan tenni. Mukisuk na kur tan saa tun, kimaan yaa ki bann Yennu tinnu yoo na paak." 45 Li poorpoe ki Yiisa saan kɔɔ Yennu jiantu ŋasaakak ni, ki ber binba kɔi bonkobit na, ki nyinnib, 46 ŋaan yetib a "Li sɔb Yennu gbouŋ ni a 'N ŋaak sii tee Yenmiaru ŋaake,' ŋaan yimme kpintir ki teen fatiteeb kinkar boor." 47 Tɔn, daar kur ki Yiisa be Yennu jiantu ŋasaakak ni ki want niib Yennu maan. Ki Yennu jiantu yudamm nan sennu wannteeb nan tiŋ maŋ yudamm loon bin kpiu, 48 ŋaan ki fit la sɔnu nba ki bi saa kpiu, kimaan niib na kur din chaa tubae ki gbiin u maan.

Luk 20

1 Dasiar Yiisa nba be Yennu jiantu ŋasaakak ni ki mɔɔntir Yennu barŋanii ki want niib li paak na, ki Yennu jiantu yudamm nan sennu wannteeb nan saakab baar u boor 2 ki tan yetɔ a "Betirit, ŋmee yiikoo nie ki a tuun linba na? Ŋmee chaba yiikoo maŋi?" 3 Ki u jiin a "N mun mɔk buboit ki saa boi-i. Betirin man, 4 Jɔɔnn nba daan wuur niib Yennu nyunwuru na, Yennue daan chabɔ li yiikoo amii nisaarike?" 5 Ki bi ŋmant faa leeb labaar ki yeen a "Ti-i yet a Yennue chabɔ li yiikoo, u saa boit a bee teen ki ti ki teenɔ yada. 6 Ki ti-i biakii yet a nisaariie chabɔ, niib na kur saa jaatit tanawa, kimaan bi teen yada nan Jɔɔnn din tee Yennu sɔkiniie." 7 Li paak, ki bi yet Yiisa a bi ki mi u yiikoo nba nyii siami. 8 Ki Yiisa betib a "Tɔn, n mun kan beti wunba chabin yiikoo ki n tuun linba na." 9 Li yoo na ki Yiisa yin niib na barjouk a, "Jasɔɔ din wuu tilontii u kpaab ni, ŋaan jii kpaab na ki teen toontunna nii ni a bii gorii, ki tan yaat saan siar po ki saa yukir. 10 Ki punpɔɔr yoo tan baar ki u tun u daabir a wun saan toontunna na boor ki bin turɔ tilɔɔna na waan. Ki toontunna na saa boo daabir na ki jiinɔ yann. 11 Ŋanne ki u bia tun daabilɔɔ; ki toontunna na bia saa boou ki dinnɔ fei ki bia jiinɔ yann. 12 Ki kpadaanɔ maŋ bia tun daabilɔɔ; ki bi saa paan ŋɔɔ daŋ ki jiiu lu. 13 Ŋanne ki kpadaanɔ na yet a 'N saa teen nlee na? Laa ji be na, n saa tun n mɔŋ mɔŋ bilonkake. Ŋɔɔ ŋarin, li pasiar bi saa turɔ baakira.' 14 Ŋaan toontunna na nba din tun ninbinn ki la u bik na baat na, ki bi bet bi leeb a 'Kpadaanɔ maŋ fadiirɔe na. Ŋaant tin kpiu man, ki u faar maŋ n ji teen ti yar.' 15 Ki bi soorɔ ki nyii nanɔ kpaab na kpiŋ ki saa kpiiu. "Tɔn, toontunna maŋ nba tun biaŋinba na, kpadaanɔ na saa teemm nlee? 16 U saa baar ki kpibe, ŋaan bia jii kpaab maŋ ki tur siab." Niib maŋ nba gbat linba na ki bi yet a "Yennu n bɔr ŋann." 17 Ki Yiisa gotib ŋaan yet a "Li sɔb Yennu gbouŋ ni a 'Tann nba ki tanmaara y‡tir na, ŋanne din set tee lɔtik ni tanŋann.' Maan maŋ paak tee bee? 18 Tɔn, wunba kur baa tann maŋ paak saa but bute; ŋaan tann maŋ-i baa wunba paak, see ki li nannɔ buk buk nan yon na." 19 Ki sennu wannteeb nan Yennu jiantu yudamm bann nan Yiisa nba yin barjouk nba na saan gaan bi paake; li paak, ki bi ji din koor a bin soorɔ li tonton na, ŋaan tiin niib na jaŋmaanii. 20 Li paak, ki bi ji waa pikiiɔ, ŋaan bia tun pikiiteeb nba kpann a bi tee popeendamme, a bin la u mɔbonkpetir, ki fit soorɔ ki teenɔ tiŋ yudaanɔ nuu ni. 21 Ki pikiiteeb maŋ tan baar bet Yiisa a "Wanntɔɔ, ti mi nan faa yeen linba ki bia want na ŋan. A bia ki tee lukitindaanɔ, ŋaan fine bia want Yennu sɔnu nan barmɔnii. 22 Tɔn, ti sennu chabit nan tii pa lampo kii teen Rom tiŋ kpan-bar Siisa amii ti daa pa?" 23 Ki Yiisa bann ser nba ki bi tee na, ki yetib a, 24 "Wantin likirib. Tɔn, ki ŋmee naauŋ nan sanne be likirib na paaki?" Ki bi yetɔ a "Kpanbar Siisa yare." 25 Ki Yiisa betib a "Tɔn, yii yenn-ii pa kii teen Siisa linba tee u yar, ŋaan mun-ii pa kii teen Yennu linba tee Yennu yar." 26 Ki pikiiteeb na lek ki la u mɔbonkpetir niib na tɔɔnni; Yiisa jiinu maŋ teemm yaarlituko, ki bi ji ŋmin. 27 Ki Sajusiinba siab baar Yiisa boor, ŋamme din tuu yaa niib tan kan fiir kuun ni na. Bi din betɔ a, 28 "Wanntɔɔ, Moses din sɔb sennu ki yet a 'Nirɔ-i kɔɔn u poo ki ki mar waas ŋaan kpo, li ŋan ki u naabik n faar pakɔɔk na ki mar waas ki tur kpeemɔ na.' 29 Tɔn, jab banlore din be ki tee naanɔɔk, ki saakɔɔ po tan kɔɔn poo, ki ki mar waasi, ŋaan kpo; 30 ki wunba mun paa u paak na faar poo maŋ, ki mun bia ki mari, ŋaan kpo; 31 ki binba biar na kura tan faar poo na ki ki mari ŋaan mun tan kpo. 32 Li poor po ki poo maŋ mun tan kpo. 33 Ki laa ji be na, kuun fiiru daari, bi ŋmee tan sii yen poo maŋi? kimaan bi banlore na kur kɔɔnɔwa." 34 Ki Yiisa yetib a "Tingbouŋ na ŋaateeb kɔɔnt poob ki bia teen bi waas jab, 35 ŋaan binba ŋan nan kuun fiiru ki tan saa fiir kii be durinya paann ni na, tan kii kɔɔnt poobi, bi bia kii teen bi waas jabi, 36 kimaan bi ji kan mi kpo; bi sii tee nan malakanba nae, ki bia tee Yennu waas, kimaan bi fiir kuun niwa. 37 Tɔn, Mosese mun din poŋ wann nan kpeemm tan saa fiir kuun niwa. Moses nba din sɔb ki jiin jagotuk po na, u din yi Yennu a, 'Abraham Yennu, nan Aisak Yennu, nan Jakɔb Yennu.' 38 Niib maŋ nba din kpowa na, ŋaan bi bia lek daa fo, kimaan Yennu ki tee kpeemm Yennu kaa, u tee footib Yennue, kimaan u tɔɔnn, bi kur tee footibe." 39 Ŋanne ki sennu wanntesiab yet Yiisa a "Wanntɔɔ, a jiin boŋŋanna." 40 Ki bi ji din jee nan bin boi Yiisa buboisiat. 41 Ŋanne ki Yiisa boib a "Nlee ki bi yeen a Yennu Niganntɔɔ Masia tee Defid yaaboonni? 42 Kimaan Yennu gbouŋ ni ki Defid mɔŋ mɔŋ sɔb yanii gbouŋ ni a 'Yennu yet n Yomdaanɔ a: Karin n niidiitu po 43 mɔkmɔk nan maa tan saa jii a datai ki teemm a taakpakta.' 44 Defid nba din yiin Masia a 'Yomdaanɔ' na, nlee ki Masia tee ŋɔɔ Defid yaaboonni?" 45 Niib na kur numm ni ki Yiisa din yet u poorpoweiteeb a 46 "Soot i mɔŋ man nan sennu wannteeb; ŋamme loon bii lia liatbaant, kii lin kii somm, ki bia gaan burchinfoontii dai ni; bi-i kɔɔ Yennu jiantu diit ni, bi loon bii kaar nijaana kaanii nie; bi-i saan jaamm ni, bi bia loon yudamm kinkaanii boae; 47 ŋamme bia di pakɔi fobit; ŋaan ji tuu jenna ki mei Yennu ki yukii ki kpann a bi tee yentinnae. Bi tubdatu tan sii bi bonchiann."

Luk 21

1 Ŋanne ki Yiisa got lint ki la mɔkita kpeent likirii Yennu piinii lakir ni; 2 ki u bia la pakɔtalasdaanɔ mun kpeen likbina ŋanlee Yennu piinii lakir na ni. 3 Ki Yiisa yet a "Barmɔniie ki n beeri na, pakɔtalasdaanɔ na kpeen ki gar sɔɔ kura, 4 kimaan bi kur paat bi likchiant na nie, ŋaan pakɔtalasdaanɔ na kpan jii linba ki u yaa wun di na kure ki kpeen." 5 Ŋanne ki siab din piak Yennu jiantu ŋasaakak na po, ki yeen baa faŋŋir nan tanŋana nan piini nba ki bi tur Yennu na biaŋinba. Ki Yiisa yetib a 6 "Yaa laat linba kur na, ŋaan yoo baat ki bi tan saa tut li kur ki lu tiŋ ni, ki li tanyennkɔɔ kan tenn ki paa leer paaki." 7 Waa pak nna maŋe ki bi boiɔ a "Wanntɔɔ, bee yooe ki linba na tan sii tee? ki li nyinn bia tan sii tee nlee, li-i yaa lin teeni?" 8 Ki u yetib a "I mi man ki bi tan saa kpanni. Niib bonchiann tan saa jii n sann ki yeen a 'Mine tee Masia,' koo 'Masia yent yoo pera.' Li nibooru, i daa waabi. 9 I saa gbat tɔbii nan kunkɔna po, ŋaan i daa te ki li mɔki jaŋmaansooruku, kimaan li kpaa talas nan linba na kur n tun sinsinna, ŋaan li kan wann nan durinya gbennu baat li tonton na." 10 Ki u ŋamm yetib a "Nibooru nan nibooru tan saa kɔn nan leeb, ki kpanbar nan kpanbar mun tan saa took ki kɔn nan leeb. 11 Tiŋ jijekjaana nan nikuuk nan kon tan saa baa tingbouŋ na lokir kur po boor boor. Niib bia tan sii laat linba sii mɔkib jaŋmaansooruk, nan nyinsaakara, sanpaapo. 12 Ŋaan linba na kur kan teen daann kaawa, ki bi saa soori ki dinni biak, ki kubini Yennu jiantu diit yudamm nii ni, ki kɔɔni dansarii; ki bi tan saa saan nani kpanbara nan tiŋ yudamm boor ki bin bu i buut, kimaan yaa waan na paak. 13 Ŋanne tan saa te ki i la yaak nba saa pak n po ki turib. 14 Li paak, i tan soor i mɔŋ man ki daa te ki li daamii nan yaa saa pak jiin biaŋinba buut maŋ yoo, 15 kimaan li yooe ki n saa turi yan nan mɔbona nba ki i tan saa pak, ki i datai kan fit nyann i mɔbona koo ki nɔini. 16 Ŋaan i baanba nan i naanba, nan i yɔɔrib nan i waarii nan i ŋaateeb nan i yɔɔsinba mɔŋ tan saa nyi i poor ki fikisiri; ki bi tan saa kpi i siab. 17 Ki sɔɔ kur tan sii nami, kimaan yaa waa-n na paak. 18 Ŋaan i yut yennkɔɔ gbaa kan guti. 19 I-i kii nyik n weiu, i tan saa la manfoor nba kaa gbennuwa. 20 "Ŋaan yoo nba ki i tan la kunkɔnkɔnna lint Jerusalem, yin bann nan li yaa lin biire na. 21 Li yoo maŋ, binba tan be Judea tiŋ ni, bin chiar ki do kunkona; ki binba mun be Jerusalem, bin nyi ki yaat; ki binba mun be digbankpinii-kpinii na ji daa baat doo maŋ ni, 22 kimaan li yoo tan sii tee tubdatu yooe. Linba na kur tan saa teen nan laa sɔb Yennu gbouŋ ni biaŋinba nae. 23 Yoo maŋ ni, li tan sii bi ki teen podamm nan binba dia walai, kimaan biak bonchiann tan saa baar tiŋ na paak, ki Yennu wutoor tan saa do niib maŋ paak. 24 Ki kunkɔnkɔnna tan saa baar ki kpi bi siab nan jukbanjai, ki bia tan saa soor siab ki saan namm tinii kur po, ki teemm daaba. Ki binba ki tee Juu teeb na tan saa yent Jerusalem mɔkmɔk nan bi yoo nba tan saa gbenn. 25 "Nyina tan sii be yonnu ni nan ŋmaarik ni nan ŋmaabira ni. Ki tingbouŋ na ni mun, parbiir tan saa baar digbana ni, ki jaŋmaanii bia tan sii be, kimaan mɔkgbeŋŋir nyunpana nba tan sii fu bonchiann na paak. 26 Ki linba be sanpaapo kur tan saa damm ki ŋmat, li paak ki jaŋmaanii tan saa jek niib, yoo nba ki bi guu linba yaa lin tan baar tingbouŋ na ni. 27 Li yooe ki bi tan saa la ki min nisaarik Bik dɔkit sanpagbouŋ ni ki baat nan panchiɔŋ nan yentsaakar. 28 Ki linba na nba-i tan piin teenu, yii mɔk parcheenn kimaan i tinnu yoo pera." 29 Ŋanne ki Yiisa yimm barjouk a "Gotir sinsabik nan tiinii kur. 30 Yaa tuu la ki tiinii maŋ faat bintir, i ji tuu bann nan siɔk pere na. 31 Nnae mun biak, yoo nba ki i tan laat ki linba na nba kur tuun, yin bann nan Yennu naan pera. 32 "Barmɔniie ki n beeri na, mɔtana nigbouŋ na kan kpo ki gbenn kaawa ki linba na kur n tumi. 33 Sanpaak nan tiŋ tan saa gara, ŋaan n maan ŋarin kan mi gari. 34 "I mi man ki daa te binbeŋ na daamii-i, nan dayibu nan li yiaru boontii, ki n baaru daar tan saa kpir baar, 35 ki daar maŋ tan saa nyak niib kur nba be tingbouŋ na ni nan tanbar nae. 36 Yii guu man kii mei Yennu yoo kur ki wun turi paŋ nba saa te ki i nyann bikinu kur nba tan saa baar na, ki bia set min nisaarik Bik tɔɔnn." 37 Tɔn, yonnu nie ki Yiisa din be Yennu jiantu ŋasaakak ni ki want niib Yennu maan, ki din tuu tan saan nyiɔk ki saa be kunkonn nba ki bi yir Olif Tiinii kunkonn na paak; 38 ŋaan sanyiɔk ni ki niib kur baat u boor Yennu jiantu ŋasaakak ni ki gbiintir u maan.

Luk 22

1 Yoo nba din tan per nan bin teen jaamm ki ŋman boroboro nba kaa datiŋ, ki bi yi jaamm maŋ yukitgar j tiaru jaamm na, 2 ki Yennu jiantu yudamm nan sennu wannteeb din koor a bin la sɔnu nba ki bi saa kpi Yiisa, ŋaan tiin niib na jaŋmaanii. 3 Li yoo na ki Sintaanii kɔɔ Judas, wunba ki bi yiu Iskariot ki u bia tee Yiisa poorpoweiteeb piik nan banlee na yenɔ. 4 Ki ŋɔɔ Judas saan ki saa pak nan Yennu jiantu yudamm nan bi kunkɔnkɔnna yudamm biaŋinba ki u saa wannib ki bin soor Yiisa. 5 Ki bi ji mɔk parpeenn ki sak nan bi saa pa Judas likirii. 6 Ki u sak bi lor maŋ ki ji piin loon sɔnu nba ki u saa jii Yiisa ki kubin bi nuu ni yoo nba ki niib na kaa. 7 Boroboro nba kaa datiŋ na jaamm daar nba ki bi yaa bin kpi pegana ki teen yukitgar tiaru jaamm jeet na, 8 ki Yiisa tun Piita nan Jɔɔnn doo na ni, ki betib a, "I saa man ki saa teen yukitgar tiaru jeet na siir ki tin di." 9 Ki bi boiɔ a "Lee ki a loon tin saan teen siiri?" 10 Ki u betib a "Yoo nba ki i baat doo na ni, i saa la jasɔɔ ki u jii nyunsɔɔr. Yii waau nan ŋaak nba ki u saa kɔɔ; 11 yin bet li ŋaak daanɔ a 'Wanntɔɔ na yaa ti boia a saamm diiuk nba ki ŋɔɔ nan u poorpoweiteeb yaa bin kɔɔ di yukitgar tiaru jaamm jeet na be lee?' 12 Ki u saa wanni ditɔɔtuk nba yab ki poŋ teen siira; ki yin teen jeet maŋ leŋ." 13 Ki bi din saan ki set saa la bont kur nan Yiisa nba betib biaŋinba na; ki bi ji teen jaamm maŋ jeet siir. 14 Jaamm na jeet dinu yoo nba tan baar, ki Yiisa kar a wun di; ki u toomiinba piik nan banlee na mun kar a bin di nanɔ. 15 Ki u yetib a "Li mantik want n par ni nan min nan yimm n lakin di yukitgar tiaru jaamm jeet daannewa ki biak n lian baarin. 16 N beerie, n ji kan mi ki di jaamm na mɔkmɔk nan yoo nba ki barmɔnii jaamm na tan saa teen Yennu naan ni." 17 Ŋanne ki u jii nyunnyuŋmaŋ nan tilɔɔna nyun, ki tur Yennu niipoouk, ŋaan yetib a "Gaat na man ki chent i leeb ki nyu. 18 N beerie nan laa jii dinna ki saa, n ji kan mi nyu tilɔɔna nyun na, see ki Yennu naan tan baar." 19 Ŋanne ki u jii boroboro ki tur Yennu niipoouk, ki ŋmit ŋmit ki turib ŋaan yetib a "Linba nae tee n gbanant ki n yaa n jii chab i paak. Yii yɔɔ kii tee nna kii tian n po." 20 Dinu na poorpoe ki u bia jii nyunnyuŋmaŋ na nan tilɔɔna nyun na, ki yetib a "Tilɔɔna nyun na tee Yennu mɔlorpaanne, linba ki n lor nan n sɔn, ki li nyii i tinnu paak. 21 "Gotir man, wunba yaa wun nyi n poore na, ŋɔɔe kar ki di nanin na. 22 Min nisaarik Bik set saa kpo nan Yennu nba senn biaŋinba nae, ŋaan bonbiir sii be wunba yaa wun nyi n poor na paak." 23 Ki bi ji din piin ki boi bi leeb a, "Ti ŋmapoe yaa wun tun linba na?" 24 Li yooe ki mɔniɔk baar u poorpoweiteeb maŋ sinsuuk ni, ki bi nɔi ki yeen a lamme chee leebi. 25 Ki Yiisa yetib a "Tingbouŋ na ŋaateeb kpanbara dia bi niib nan nimmɔnne, ki niib bia yi bi yudamm 'bi sommteeb,' 26 ŋaan yimm ŋarin, li ki tee nna. Wunba tee nijaann i ni, see ki u teen nan tarik na; ki yudaanɔ mun n teen nan daabir na. 27 Tɔn, ŋmee tee nijaann ki gar lɔɔ, wunba di jeet, koo wunba teene? Li ki tee wunba di na kaa-a? Ŋaan min ŋarin be i sinsuuk ni nan toontunnɔ nae. 28 "Yimm poŋ be nanin n jinjammii ni yoo kur. 29 N Baa Yennu nba gannin ki dinnin naan biaŋinba na, nnae mun ki n yaa n ganni 30 ki yin di ki nyu nanin n naan ni, ki i tan saa kar naangbant paak ki bu Israel teeb booru piik nan banlee na buut." 31 Ki Yiisa yet Simonn Piita a "Simonn, Simonn, gbiintir, Sintaanii barin a wun la yaak nba ki u saa bikin i kur, ki lenni nan dii nba ki bi tuu lenn fouŋ ni na, ki laan i tee dii amii fouŋo. 32 Ŋaan fin Simonn, mine miar Yennu a paak, maa a yada daa baa; ki yoo nba ki a ji jen n boor ni, a tot a naa waas." 33 Ki Piita jiin a, "N Yomdaanɔ, li-i lekii tee dansarik koo kuumie, n teen siira nan min nan fin n saan." 34 Ki Yiisa betɔ a "Piita, n beerae, nyiɔk na kojouk daa kan bui kaawa ki a saa nɔi taar muntaa a a ki mimi." 35 Ŋanne ki Yiisa boib a "Maa din tumi doi ni, ki i ki dia likbɔɔrii nan kaliit nan taasaat na, i din kɔŋ siari?" Ki bi jiin a, "Aaii." 36 Ki u yetib a "Mɔtana, wunba mɔk likbɔɔrik koo kaliiuk, wun jiir; ki wunba mun ki mɔk jukbanjiak, wun kɔi u liatir ki daa. 37 Mine beeri na, li sɔb Yennu gbouŋ ni a 'Bi teenɔ nan baa tee mɔy‡tdamm biaŋinba nae.' Ki bi set saa teenin nnae, kimaan linba kur ki bi sɔb ki jiin n po Yennu gbouŋ ni na, li set saa tuma." 38 Ki bi yetɔ a "Ti Yomdaanɔ, gotir, jukbanjai ŋanlee-e na." Ki u yetib a "Ŋaant man." 39 Ŋanne ki u nyii leŋ ki saan Olif Tiinii kunkonn paak, nan waa poŋ tuu tee biaŋinba na, ki u poorpoweiteeb weiɔ saan. 40 Waa saa baar leŋ ki u betib a "I mei Yennu man ki i tan daa kɔɔ jinjammii ni." 41 Ŋanne ki u chat bi boor ki saan nan faa tuu jaa tann ki lin fɔkit biaŋinba na, ki saa gbaan tiŋ ni ki miar Yennu, 42 ki yet a "N Baa, li-i tee a loomm, daa ŋaant ki n kɔɔ bonbiir nba baat n paak na ni; ŋaan ŋaant ki a loommo n tun, ki li daa tee n loommu." 43 Ki malaka nyii sanpaapo ki dɔkit u paak ki totɔ. 44 U din dii biak bonchiann ki miar Yennu nan u yaak kur, ki naauk tan pu ki toot ki naan sɔn. 45 Ki u tan fiir Yenmiaru ni ki ŋmat u poorpoweiteeb na boor, ki saa la ki bi gɔɔnt, kimaan parbiir nba baŋŋib na paak. 46 Ki u boib a "Bee teen ki i gɔɔnti? Fiit kii mei Yennu man ki i tan daa kɔɔ jinjammii ni." 47 Waa din daa piak namm na, ki u la ki nibur baat. Ki Judas nba tee u poorpoweiteeb piik nan banlee na yenɔ, gar bi tɔɔnn, ki tan baar Yiisa boor a wun mɔɔt u tankpinn. 48 Ki Yiisa boiɔ a "Judas, a mɔɔtir n tankpinn a a nyi min nisaarik Bik poore-e?" 49 Li yoo na ki u poorpoweiteeb na la linba yaa lin teen na, ki boi Yiisa a "Ti Yomdaanɔ, ti kɔn namm nan jukbanjai-ii?" 50 Ŋaan ki bi yenɔ taan kakit chɔɔ Yennu jiantu yudaanɔ daabir niidiitu po tubir ki pot. 51 Ki Yiisa betib a "Nyikin man," ŋaan jiin tubir maŋ ki tabin li biaŋ. 52 Ŋanne ki Yiisa boi Yennu jiantu yudamm nan bi kunkɔn-kɔnna yudamm nan saakab nba baar a bin soorɔ na a "N tee fatitɔɔe ki i baar nan jukbanjai nan gbajara-a? 53 N poŋ tuu yɔɔ be nani daar kur Yennu jiantu ŋasaakak ni, ŋaan ki i ki somi. Tɔn, ŋaan yoo na lek tee yimm nan bunbɔnn paŋ daanɔ yare." 54 Li yoo na ki bi ji din soor Yiisa ki saan nanɔ Yennu jiantu yudaanɔ ŋaak ni; ki Piita ji saa waa u poorpo banfɔkira. 55 Ŋaak maŋ ni, niib din joo muu dindounsinsuuk ni ki kar linta, ki Piita tan kɔɔ ki kar pukimm. 56 Waa kar leŋ, ki bonpotoontunyenɔ lau muu yentu ni, ki gotɔ sirrr, ki tan yet a "Jɔɔ na tuu be nanɔ." 57 Ki Piita yetɔ a "Bonpobik, n ki miu." 58 Laa yann waaminna, ki jasɔɔ mun lau ki yetɔ a "Fini, a tee u poorpoweiteeb yenɔe." Ki Piita yetɔ a "Jɔɔ na, kai, li ki tee min kaa." 59 Laa bia yann waaminna, ki jalɔɔ nna mun bia yet a "Yaunwa, barmɔniie, jɔɔ na tuu be nanɔ, kimaan u mun bia tee Galilii nirɔe." 60 Ki Piita jiinɔ a, "Jɔɔ na, min taan ki mi linba ki a yeen na kaawa." Waa daa piak nae ki kojouk fan bui li tonton na. 61 Ki Yiisa jiant got Piita; ki Piita ji tiar ŋɔɔ Yiisa mɔbona na, waa yet biaŋinba a "Nyiɔk na kojouk daa kan bui kaawa ki a saa nɔi taar muntaa a a ki mimi." 62 Ki Piita ji nyii nanyer ki saa bui fabin bonchiann. 63 Li poorpoe ki Yiisa guuteeb na daanɔ nyatuk ki boou, 64 ki jii chinchenn ki bobin u numm po ŋaan faau ki bia yeenɔ a, "Bukitir wunba faa-a na." 65 Ki bi pak biir u sann bonchiann ki sukiiɔ. 66 Laa yent sanyiɔk ni ki Juu teeb saakab nan Yennu jiantu yudamm nan sennu wannteeb taan kar bi yudamm tituk kaanu; ki guuteeb na baar nan Yiisa bi boor. 67 Ki bi betɔ a "Fi-i setikii tee Yennu Niganntɔɔ Masiaie, fan betit." Ki u jiin a, "Mi-i beti, ŋaan i poŋ kan teenin yada gbaa, 68 ki mi-i munii biakii boi-i buboit, i kan sak jiin n buboit maŋi. 69 Li kan yukirii ki min nisaarik Bik sii kar Yabint Yennu niidiitu po." 70 Ki bi kura boiɔ a, "Ki ŋann fine tee Yennu Bija-a?" Ki u jiinib a, "Nan yaa kpan yaa na." 71 Ki bi yet bi leeb a "Ti poŋ ji loon siaradamm bia poe na? kimaan ti gbat u mɔŋ mɔmaama."

Luk 23

1 Ŋanne ki niib na kura fiir jii Yiisa ki saan nanɔ Pailat k boor. 2 Leŋe ki bi ji din piin ki want u biit ki yeen a "Ti la nirɔ na ki u biir ti niib ki yaa bi daa pa lampo ki teen Kpanbar Siisa, ki yeen a ŋɔɔe tee Yennu Niganntɔɔ Masia, ki bia tee kpanbar." 3 Ki Pailat boiɔ a "Fine tee Juu teeb kpanbar na-a?" Ki u jiin ki yet a "Fine yaa." 4 Ki Pailat yet Yennu jiantu yudamm nan nibur na a, "N ki la jɔɔ na biit-i." 5 Ki niib na bia yakii nan Pailat ki yeen a "U want niib wannu nba te ki bi fiir jirjir. U din piin ki want Galilii niibe ki tan saan Judea doi ni kura nan waa tan baar nna na." 6 Pailat nba gbat nna na ki u boib a "Jɔɔ na tee Galilii nirɔe-e?" 7 Waa bann nan Yiisa nyii Galilii tiŋ nba ki Bat Herod yen na, ki u ŋaan ki bi saan nanɔ Herod boor, kimaan ŋɔɔ Herod mun din be Jerusalem li yoo. 8 Herod poŋ din tuu gbia Yiisa po, ki loon wun lau ki li yukira. Waa din tan la Yiisa yoo nba ki u ji mɔk parpeenn bonchiann, ki loon Yiisa n tun bakitnauŋ toonn ki wun la. 9 Li paak, ki u boi Yiisa buboit bonchiann; ŋaan ki u ki jiinɔ siari. 10 Yennu jiantu yudamm nan sennu wannteeb mun din see leŋ ki piak nan paŋ ki biir Yiisa. 11 Ki Herod nan u kunkɔnkɔnna ji sian Yiisa ki daanɔ nyatuk, ki tan gbabinɔ chinchenŋann ki jiinɔ Pailat boor. 12 Li daar maŋ ki Pailat nan Herod soor leeb yɔɔs, ŋaan bi din tuu tee dataie. 13 Ki Pailat yiin Yennu jiantu yudamm nan Juu teeb yudamm nan nileeb 14 ki tan yetib a "I baar nan nirɔ na ki yaa u kpann niibe. Gotir, n bu u buut i numm ni nae, ki ki la u biit nba ki i yaa u tun maŋi. 15 Herod mun bia ki la u biiti. Li paake ki u jiintɔ ki teent na. I lawa-a? Jɔɔ na ki tun bisiat ki li jaŋ nan kuumi. 16 Ŋann amii n saa boou kpaasire, ki ŋaau ki wu saa." 17 Binn kur yukitgar tiaru jaamm yoo, Pailat din tuu fabir ki nyinn dansarkɔɔrɔe ki ŋaan ki wun saan yann. 18 Ki nibur na din tian sanpaapo ki yeen a "Kpin jɔɔ na. Nyint Barabas ki ŋaau." 19 (Barabas mɔyetuk nba ki u din mɔk doo na ni nan u nikpinu na paake ki bi din kɔɔnɔ dansarik.) 20 Ŋaan ki Pailat bia lek loon wun nyinn Yiisa ki ŋaau, li paak ki u bia ŋamm pak nan nibur na; 21 ki niib na mun bia tian sanpaapo ki jiint Pailat a "Kpaamɔ dapunpunn paak! Kpaamɔ dapunpunn paak!" 22 Ki Pailat boib taar muntaa ni a, "Bee paake? U biit mantik tee lannpoe? N ki la linba ki u tun ki li jaŋ nan kuumi. Ŋannamii n saa boou kpaasire, ki ŋaau ki wu saa." 23 Ŋaan ki niib na bia lek tian tintianii a wun kpaa Yiisa ki tabinɔ dapunpunn paak; ki bi tintianii maŋ tan nyann Pailat. 24 Ki Pailat ji chab a baa loon biaŋinba na lin tun nna, 25 ki nyinn jɔɔ nba ki bi loon wun ŋaau na, wunba ki bi din kɔɔnɔ dansarik kimaan u mɔy‡tuk nan u nikpinu paak na, ŋaan chabib Yiisa nan baa loon lin teen biaŋinba maŋ. 26 Li yoo na ki kunkɔnkɔnna jii Yiisa ki saa nanɔ, ki saa took jasɔɔ ki u sann tee Simonn, wunba din tee Sairene jɔɔ, ki u nyii digbankpiŋ nna ni ki baat Jerusalem; ki bi soorɔ ki jii Yiisa dapunpunn na ki bukinɔ ki u waa Yiisa poor. 27 Ki nibur din waa Yiisa ki bi tɔk saa. Bi ni maŋ poosiab din waa ki bui fabin u paak. 28 Ki Yiisa tan jiant bi paak ki yetib a "Jerusalem poob, i daa bui n paaki, ŋaan kii bui i mɔŋ nan i waas paak. 29 Gotir, yoo baat ki niib tan sii yeen a 'Pookammata nba ki mar waas ki mɔɔmm biiri, ŋamme mɔk parpeenn.' 30 Li yoo maŋe ki niib tan sii yeen jɔɔt nan kunkona a 'Baan ti paak ki piint!' 31 Muu-i di tana, ki dagbira jikii?" 32 Ŋanne ki bi ji din jii doyeerteeb banlee ki pukin Yiisa paak a bin kpib. 33 Baa din baar siaminba ki bi yi Yukpabuk na, leŋe ki bi kpaa Yiisa ki tabinɔ dapunpunn paak, ki bia kpaa doyeerteeb banlee na dapunpuna paak, ki yenɔ be Yiisa niidiitu po, ki lɔɔ na mun be u niigaŋ po. 34 Ki Yiisa yet a, "N Baa Yennu, nyikin chab niib na, kimaan bi ki bann baa tuun linba na paaki." Ki bi din chent u tiat ŋaan tɔ naatɔɔt a bin la wunba saa di linba. 35 Ki niib na see ki gorii; ŋaan ki Juu teeb yudamm na daanɔ nyatuk ki yeen a "U tuu tint leeb; li-i tee ki u set tee Yennu Niganntɔɔ Masia naie, wun tinn u mɔŋ." 36 Ki kunkɔnkɔnna na bia daanɔ nyatuk, ki tan baar nan damiituk ki teenɔ, 37 ŋaan yaa "Li-i tee ki a set tee Juu teeb kpanbarie, fan tinn a mɔŋ." 38 Bi bia din sɔb sɔbinii ki tabin dapunpunn na yur paak, ki li yet a "Juu teeb kpanbare na." 39 Li yoo na ki doyeerteeb nba taab na yenɔ sukii Yiisa ki yaa "A ki tee Masia kaa-a? Tint a mɔŋ ŋaan mun tinnit." 40 Ki lɔɔ na tiau ki yet a "A ki tiin Yennu-u? kimaan fin nan ŋɔɔ be tubdatyennkɔɔ nie na. 41 Timm ŋarin ŋan nan li tubdatu, kimaan bi jiintit pankpera nba ki ti tuu tuun nae; ŋaan jɔɔ na ŋarin ki tun bisiati," 42 ŋaan bet Yiisa a "Yiisa, yoo nba ki a dii a naan, a tan tiar n po." 43 Ki Yiisa betɔ a "Barmɔniie ki n beera na, dinna min nan fin sii be Paradais l ni." 44 Li din tee yensuuk nie, ki yonnu ji dɔkin, ki tingbouŋ na kur ji bɔnn mɔkmɔk nan yenlekir, kut muntaa yoo. 45 Ki chinchenn nba din tuu jɔɔn ki puun Yennu jiantu diiuk sinsuuk ni na ji soor bɔkit taar munlee. 46 Ki Yiisa tan yikin sanpaapo ki yet a "N Baa Yennu, n jikit n seek ki tee a nuu ni." U yet nnae ŋaan ji kpo. 47 Ki kunkɔnkɔnna yudaanɔ nba la linba teen na, ki u pak Yennu ki yet a "Barmɔniie, jɔɔ na set tee popeendaanɔe." 48 Ki nibur nba lakin leŋ a bin la linba tee na, din la linba tun na, ki ji ŋmat kun nan parbiir ki pakin yura. 49 Ki u yɔɔsinba kur nan poob nba nyii Galilii nanɔ din be leŋ ki see banfɔkira ŋaan gorii linba tuun. 50 Jasɔɔ din be ki u sann tee Joosef, ki u nyii Juu teeb doo nba ki bi yir Arimatea na, ki din tee niŋanɔ nba tee burchimɔ, ki guu Yennu naan baaru. U din tee Juu teeb yudaanyenɔe, ŋaan u din ki sak nan Juu teeb yudaanleeb lora nan bi toona nba ki bi tuun teen Yiisa na. 52 Ki jɔɔ maŋ saan Pailat boor ki saa miarɔ a wun turɔ Yiisa gbanant; ki u chabɔ. 53 Ŋanne ki u saan kpaat gbanant na dapunpunn na paak, ki jiiu ki pɔbinɔ katiŋ ni, ki piiu kapaauŋ ni, linba ki bi poŋ din jiar tanpiiuk lokir ni na, ki bi din daa ki pii sɔɔ kaauk maŋ ni. 54 Li din tee daar nba ki bi tee siir foon daar paake, ki foon daar na piint. 55 Ki poob nba nyii Galilii ki waa Yiisa na din wei Joosef, ki saa la Yiisa kaauk nan baa piiu biaŋinba. 56 Ŋanne ki bi ji din ŋmat kun ŋaak ni, ki saa teen siir ki ŋamm kpanunubit nan tulaarii. Ki foon daar ki bi din foi nan Yennu sennu nba want biaŋinba na.

Luk 24

1 Lasir daar sanyafaar, ki poob maŋ nyii saan kaauk na boor nan bi kpanunubit nan tulaarii nba ki bi poŋ ŋamm na. 2 Baa baar leŋ ki bi la ki katangbeŋŋir na nyakit kaauk na mɔb paaka, ki birint ki saa dɔɔ. 3 Ki bi kɔɔ kaauk maŋ ni ki ki la Yiisa gbanant, 4 ki ji biar see jiiaa. Li taakpaak ni ki jab banlee dɔkit set ki lia liatnyinyira; 5 ki li teen poob na jaŋmaansooruk, ki bi gbaan tiŋ ni. Ki jab na boib a "Bee ki i loon footɔ kpeemm ni? 6 U kaa nna. U fiira. Tiat man waa daa yeti biaŋinba, yoo nba ki u daan be Galilii na, 7 a bi tan saa soor ŋɔɔ nisaarik Bik ki jiiu teen biitdamm nuu ni ki bin kpaau tabin dapunpunn paak, ŋaan u tan saa fiir kuun ni daa ŋantaa daar." 8 Ŋanne ki poob na ji tiar u maan maŋ, 9 ki ji seet kaauk na boor ki ŋmat kun, ki saa yet linba kur tun, ki tur u poorpo-weiteeb piik nan yenɔkɔɔ na, nan binba be leŋ na kura. 10 Poob maŋ sanae din tee Meeri Magdaliinn, nan Joana, nan Meeri nba din tee Jeems naa na; ki pooleeb pukin bi po ki be namm. 11 Ŋamme din bet Yiisa toomiinba barii maŋ; ki toomiinba na ŋarin dukii nan li tee poob maame, ki bi ki teemm yada. 12 Ŋaan ki Piita ŋarin fiir chiar saan kaauk na boor, ki saa tibin ki got ki la katiŋ na dɔɔ li kuukɔɔ; ki u ji ŋmat kun ŋaak ni nan yaarlituk, linba tun maŋ paak. 13 Li daar maŋe ki bi ni banlee din saa digbanbik nba ki bi yi Emmaus na. Leŋ nan Jerusalem din tee nan maar ŋanlore nae. 14 Ki bi din somm piak nan leeb ki jiin linba kur tun na po. 15 Baa piak ki faa labaar nan leeb yoo nba na, ki Yiisa mɔŋ nakimm ki lakin tɔk namm; 16 ŋaan ki li liirib ki bi ki bannɔ. 17 Ki u boib a "I somm piak bee?" Ki bi set nan ninbiik. 18 Ŋanne ki bi yenɔ, wunba sann yi Kleopas na boiɔ a "A kuukɔɔe tee saamɔ nba be Jerusalem, ki tan ki gbat linba tun leŋ daa ŋanlelee na-a?" 19 Ki u boib a "Lannpoe?" Ki bi yetɔ a "Ki jiin Nasaref nirɔ Yiisa na po; jɔɔ na daan tee Yennu sɔkiniie, ki tun toonjaana; ki u maan bia daan mɔk paŋ; ki u pent Yennu nan niib kur para. 20 Ki ti yudamm nan Yennu jiantu yudamm jiiu ki teenɔ barbuurɔ nuu ni a wun bu u buut, ki yet a u ŋan nan kuume; ki bi tan kpaau dapunpunn paak. 21 Ti tuu daan nan ŋɔɔe tan saa nyinn timm Israel teeb ti datai nuu ni; ŋaan dinna tee daa ŋantaae na laa tun. 22 Ŋanne biak, ki ti ni poosiab pakit u po ki li yaar litit, kimaan baa saan kaauk maŋ boor saanyafaar na, 23 bi saa ki la u gbananti. Baa jen yoo nba ki bi betit a ŋamm saa la Yennu malakanba nan bi numm; ki malakanba maŋ yetib a Yiisa jen u manfoor niwa. 24 Ŋanne ki ti siab tan saan kaauk maŋ boor, ki saa la nan poob nba dɔŋ betit biaŋinba na, ŋaan bi ki la Yiisa." 25 Ki ŋɔɔ Yiisa betib a "Bee yankpeensime ki i mantik mɔki, ki mei nan yin teen sɔkiniinba maan kur yada. 26 Li kpaa talase nan Yennu Niganntɔɔ Masia n di biak maŋ, ki tan la baakir." 27 Ŋanne ki u wantib u barii nba sɔb Yennu gbouŋ ni na kur paak, ki piin Moses sɔbu ni ki saan tuu sɔkiniinba kura sɔbu ni. 28 Tɔn, ki bi tan per digbanbik nba ki bi saa na; ki Yiisa teen nan u gaare na. 29 Ki bi gɔɔrɔ a "Biat nant nna, kimaan yonnu baawa ki li ji bɔnte." Li paak ki u ji kɔɔ namm ki biar bi boor. 30 Ki u tan kar a wun di namm; ŋanne ki u jii boroboro na ki tur Yennu niipoouk ŋaan bɔkit ki turib. 31 Li yoo na ki bi numm po ji yent ki bi bannɔ. Li taakpaak ni ki u lir bot. 32 Ki bi ji beer leeb a "Waa bo piak nant sɔnu ni ki wantit linba sɔb Yennu gbouŋ ni paak na, li bo ki tee nan muu na kaa ti para ni-i?" 33 Li taakpaak ni ki bi fiir ŋmat Jerusalem, ki saa la u poorpoweiteeb piik nan yenɔ na nan siab, ki bi lakin leeb. 34 Ŋanne ki u poorpoweiteeb na betib a "Ti Yomdaanɔ set fiire nan barmɔnii. U dɔkit Simonn paaka." 35 Ki niib banlee na mun betib linba teen sɔnu ni, nan waa tan bɔkit boroboro yoo nba ki bi bannɔ. 36 Baa beerib linba na, li taakpaak ni ki Yiisa set bi sinsuuk ni ki yetib a, "Parmaasir-ii be i paak." 37 Ki jijekit nan jaŋmaanii kɔɔb hei, kimaan bi mi a bi la siarabonfuntikare. 38 Ŋanne ki u boib a, "Bee ki i yan puti? Bee ki birsuk be i ni? 39 Gotir n nii nan n taa man, ki bann nan li set tee mine. Siiminki bann nan mine. Bonfuntikar ki mɔk gbanant nan kpaba, nan yaa la kin mɔk biaŋinba na." 40 Waa yet nna maŋ ki u wannib u nii nan u taa. 41 Ŋaan ki bi para penn paak ki bi ki teen yada nan li teeŋɔɔe; ki li yaar litib. Ki u boib a, "I mɔk jesiat nna-a?" 42 Ki bi jii janpurikir bonjinn ki turɔ; 43 ki u gaar ŋman bi numm ni. 44 Ŋanne ki u betib a "Ii tian man n mɔmaan nba ki n daan wantimaa daan be i boor yoo nba na, a n barii kur nba sɔb Moses sennu ni,nan Yennu sɔkiniinba sɔbu ni, nan Yennu gbouŋ nba ki bi yi yanii nani kpaa talas nan li kur n tan tun ki gbeen." 45 Ŋanne ki u ji yênt bi numm, a bin bann linba sɔb Yennu gbouŋni na paak, 46 ki yetib a "Li sɔb a Yennu Niganntɔɔ Masia saa di biak kikpo, ki tan fiir kuun ni daa ŋantaa daar; 47 a bin saan ki mɔɔnt u sann ni, a niibi-i nyik bi biit, Yennusaa nyik chabib; a bin piin mɔɔnt barii maŋ ki tur Jerusalem teeb,ki bia mɔɔnt tur nibooru kur." 48 Ki u betib a "Yimme tee linba na siara damm. 49 Nnara, mine yaa n tan turi n Baa Yennu Seyeeŋ nba ki u sennmɔsonn a u saa turi na. Ii daa biar kii be Jerusalem na mɔkmɔk nanyoo nba ki Yennu Seyeeŋ maŋ saa nyi sanpaapo ki sik i paak ki turipaŋ na." 50 Ŋanne ki Yiisa nyii namm doo maŋ ni ki saan per Betani. Leŋeki u saa donn u nii sanpaapo ki teen piisin bi paak. 51 Waa teen piisin bi paak yoo nba, ki u nyikib ŋaan doo Yendɔuŋni. 52 Ki bi ji jiantɔ ki tan ŋmat Jerusalem nan parpeenn bonchiann, 53 ki ji din be Yenjiantu ŋasaakak ni yoo kura, ki piak dont Yennusann.

Jɔɔnn 1

1 Sintansimm dinn ki sɔɔ ki siar daa din kaa na, ŋaan wunba ki bi yiu Yennu Mɔb na ŋarin poŋ din be-e, ki Yennu Mɔb maŋ taa nan Yennu. Ŋɔɔe bia tee Yennu. 2 Yennu Mɔb maŋe din be nan Yennu sinsinn, 3 ki u nie ki Yennu nan bont kur, ki siar din kaa ki Yennu nan ki li ki nyii u ni, 4 ki u nie biak ki manfoor be, ki u jikit teen niib, ki manfoor maŋe teen niib yentu, 5 ki yentir bunbɔnn, ki bunbɔnn na ki fit kpeent yentu maŋi. 6 Jasɔɔ nna din be ki u sann yi Jɔɔnn, wunba wuur niib Yennu nyunwuru na, ki Yennu tumɔ 7 a wun baar ki tan mɔɔnt yentu na po, ki bin gbat ki teen yada. 8 Ŋaan Jɔɔnn maŋ kaa din tee yentu na. Ŋɔɔ kpan din baar a wun bet niib yentu maŋ poe. 9 Yiisae tee barmɔnii yentu nba din baar tingbouŋ na ni, ki yentir niib kur ni. 10 Waa din baar tingbouŋ na ni na, ŋaan tingbouŋ na ŋaateeb lek din ki bannɔ, ŋaan u nie setik ki Yennu din nan tingbouŋ na. 11 Waa din baar tingbouŋ na ni, u din be u tiɔŋ niib Israel teeb nie, ŋaan bi lek din ki gaarɔ. 12 Ŋaan binba kur gaarɔ ki teenɔ yada ki jii bi mɔŋ ki turɔ, ŋamme ki u chabib yaak ki bi ji teen Yennu waas. 13 Yennu nba din turib u manfopaann na paak ki bi teen Yennu waas. Li ki tee nisaarii kaa din turib li manfoor, baa marib yoo nba na, ŋaan li din tee Yennue. 14 Yoo nba ki Yennu Mɔb maŋ din baar ki tee nisaarik na, u din be nant tingbouŋ na ni, ki gbee nan ninbatinu, nan barmɔnii wannu, ki timm nba din be nanɔ na laat u yentsaakar, ki li yentsaakar nyii u Baa Yennu boor, kimaan u tee u Biyenne. 15 Yoo nba ki Jɔɔnn nba din wuur niib Yennu nyunwuru na tan lau, ki u nyinn u siara ki yikin sanpaapowa a, "Daanɔ nba ki n daan beeri ki yaa u tan saa baar ki cheen, ki poŋ din beewa ki bi tan marin na, ŋɔɔe na jik." 16 Tɔn, waa gbee nan ŋant biaŋinba na, ki ti kur la u ŋant maŋ, ki bia laat sommir yoo kur. 17 Moses din turit Yennu sennue, ŋaan Yiisa Masia ŋarin din baar nan ninbatinue ki turit, ki bia wannit barmɔnii wannu. 18 Sɔɔ kaa ki mi la Yennu; u mɔŋ biyenn nba mantik kpiau ki bia jan nanɔ na, ŋɔɔe fiitɔ ki turit. 19 Tɔn, ki Juu teeb yudamm nba din be Jerusalem na tun Yennu jiantu yudamm nan Liifai teeb Jɔɔnn boor, a bin boiɔ a, "A tee ŋmee?" 20 Ki Jɔɔnn mun din ki y‡t jiinu, ŋaan pak yentib paanu ni a, "Min kaa tee Yennu Niganntɔɔ Masia." 21 Ŋanne ki bi boiɔ a, "Ki a tee ŋmee? A tee Elaijae?" Ki u jiin a, "N ki tee ŋɔɔ kaa." Ki bi bia boiɔ a, "Ki a tee sɔkinii nba nae-e?" Ki u jiin a, "N ki tee ŋɔɔ kaa biaki." 22 Ŋanne ki bi boiɔ a, "Ki a tee ŋmee? Wantit faa tee wunba ki tin ŋmat saa bet binba tunt na. A yaa mɔŋ po, a tee ŋmee?" 23 Ki Jɔɔnn yaa: "Mine tee kunkɔr nba be muuk ni na, ki hoot a: Teent ti Yomdaanɔ baaru siir na." Jɔɔnn din jii Yennu sɔkinii Aisaya gbouŋ ni maame, ki pak na ki wann waa tee wunba. 24 Tɔn, niib maŋ din nyii Farisiinba a boor nie. 25 Bi bia din boi Jɔɔnn a, "Li-i tee ki a ki tee Masia, ki bia ki tee Elaija, ki bia mun ki tee sɔkinii nba na, ki li teen nlee ki a wuur niib Yennu nyunwuru?" 26 Ki Jɔɔnn yaa, "Min ŋarin wuur niib nyume, ŋaan sɔɔ be i sinsuuk ni na ki i ki miu. 27 Ŋɔɔe tee wunba yaa wun wei n poor, ŋaan n ki jaŋ nan ki n lot u taasaŋmii gbaa." 28 Tɔn, bi din boiɔ buboit na doo nba sann yi Betani, ki be Jɔɔdann mɔk-pootir na nie. Leŋe ki Jɔɔnn din wuur niib Yennu nyunwuru. 29 Laa yent sanyiɔk, ki Jɔɔnn maŋ la Yiisa ki u baat, ki u bet niib na a, "Gotir man! Yennu maruŋ Peganne na. Ŋɔɔe saa nyinn tingbouŋ na ŋaateeb biit. 30 Ŋɔɔe tee daanɔ nba ki n won beeri a u tan saa wei n poor kii tuun Yennu toona, ŋaan bia chee-n na. U poŋ din beewa ki bi tan marin. 31 N tuu ki bann a ŋɔɔe na, ŋaan n daan baar maa n wur niib Yennu nyunwurue, ki lin wann Israel teeb waa tee wunba." 32 Ki Jɔɔnn bia yet niib na a, "Maa daan daa ki bann waa tee wunba maŋ, ki Yennu nba tumin a n tan wur niib u nyunwuru na betin a 'Daanɔ nba ki a tan la ki n Seyeeŋ siik ki tan tɔɔn u paak ki biar be nanɔ, fan bann nan ŋɔɔe tee wunba saa jii n Seyeeŋ ki wuur niib para.' Ki n set la Yennu Seyeeŋ, ki u nyii Yendɔuŋ ni ki siik, ki naan ŋmann, ki tan tɔɔn Yiisa paak ki biar be nanɔ. 34 N set la nna, ki beeri nan ŋɔɔe tee Yennu Bija." 35 Laa bia yent, ki Jɔɔnn see nan u poorpoweiteeb na banlee, 36 ki tan la Yiisa gaar, ki u yet a, "Gotir man, Yennu maruŋ Pegann nae na!" 37 Jɔɔnn poorpoweiteeb banlee na nba gbat ki Jɔɔnn yet nna maŋ, ki bi nyikɔ, ŋaan waa Yiisa. 38 Ki Yiisa saa jiant ki la ki bi waau, ki u boib a, "I loon bee?" Ki bi jiin a, "Wanntɔɔ, ti loon ki ti bann faa be siame." 39 Ki Yiisa yetib a, "Yii waa man ki saa la maa be siaminba." Li din tee kut munna yooe jayenn, ki bi weiɔ ki saa la waa be siaminba, ki ji biar be nanɔ daar maŋ ni. 40 Bi banlee maŋ nba din dɔŋ gbat Jɔɔnn nba yet linba, ki waa Yiisa na, bi yenɔe din tee Andru, wunba tee Simonn Piita waarɔ na. 41 Waa din nyii Yiisa boor na poorpoe, ki u saan yiama ki saa lon u yɔɔrɔ Simonn boor, ki betɔ a, "Ti la Masia nawa," (ki Masia paak tee Yennu Niganntɔɔ,) 42 ŋaan baar nanɔ Yiisa boor. Ki Yiisa gotɔ sirrr, ki tan betɔ a, "Fine tee Simonn, wunba tee Jɔɔnn bija, ŋaan a sann bia sii yi Siifase." (Siifas nan Piita tee yomme, ki li paak tee tann.) 43 Li sanyafannuko ki Yiisa loon wun saan Galilii, ki la Filip ki betɔ a, "I waa-n." 44 Filip din nyii Befsaidae. Leŋe tee doo nba ki Andru nan Piita mun din nyii na. 45 Ki Filip mun saan ki saa lon Natanael boor ki betɔ a, "Ti la wunba ki Moses din sɔb u po Yennu sennu gbouŋ ni, ki sɔkiniinba bia din sɔb u po, ki pak a u saa baar na. Ŋɔɔe tee Yiisa, wunba tee Joosef bija, ki u nyii Nasaref na." 46 Ki Natanael yetɔ a, "Nasarefi? Bonŋann saa fit nyi Nasarefa?" Ki Filip betɔ a, "A mɔŋ mɔŋ mun n baar ki tan got." 47 Yiisa nba la Natanael baat u peŋ na, ki u pak u po a, "Israel nimɔnɔe na, kimaan u tee burchimɔe." 48 Ki Natanael boiɔ a, "A teen nlee ki mimi?" Ki Yiisa yetɔ a, "Filip nba daa bo ki baar ki yiina na, ŋaan sɔɔ ki n poŋ la-awa, ki a kar kinkaŋ nyakir." 49 Ki Natanael yetɔ a, "Wanntɔɔ, a tee Yennu Bijae, ki bia tee Israel teeb kpanbar." 50 Ki Yiisa boiɔ a, "Maa yet a n la-a ki a kar kinkaŋ nyakir nae, ki a teenin yada-a? ŋaan a sii laat toonjaana ki lin gar linba na paak. 51 Barmɔniie ki n beeri na, i saa la sanpaapo loot, ki Yennu malakanba siik Nisaarik Bik na paak, ki ŋmat do sanpaapo."

Jɔɔnn 2

1 Li daa ŋantaa daar, ki poochiann be doo nba sann tee Keena, ki be Galilii tiŋ ni na. Ki bi poi Yiisa naa, 2 ŋaan mun bia yiin Yiisa nan u poorpoweiteeb, a bin baar. 3 Tɔn, ki tilɔɔna daan nba ki bi din nyu na tan gbenn. Ki Yiisa naa baar bet Yiisa a, "Poochiann daan na gbenna." 4 Ki Yiisa betɔ a, "N naa, ki a yaa n teen nlee? N yoo daa ki baari." 5 Ŋanne ki u naa maŋ bet toontunna na a, "Linba ki u beti a i tun, yin tun nna." 6 Tɔn, ki bui ŋanloob see leŋ, linba ki Israel teeb tuu tee nyun ki fini nit, nan bi jiantu nba tee biaŋinba na, li bui din fit kɔɔ nyun galint nan piinlee-lee koo piintaa-taa nawa. 7 Ki Yiisa bet toontunna na a, "Gbeent bui na nyun." Ki bi gbeen nan mɔgbanawa. 8 Ki u ji betib a, "Durin nyun maŋ, ki saan tur jaamm na saakɔɔ." Ki bi jii saan turɔ. 9 Ki u gaar lemm ki sɔɔ ki li kpant daama, ŋaan ki u ki mi daan na nba nyii siami, ŋaan toontunna nba dur nyun bui na ni ŋarin mi. Ŋanne ki saakɔɔ na yiin poo na sɔrɔ 10 ki betɔ a, "Sɔɔ kur tuu tor damamm sin-sinnewa. Li-i tee ki bi nyuu saama, wun ji tor linba ki man fanu na, ŋaan yimm ŋarin ŋmina, ki ji tan joont toor daan nba man ki gar siar kur na!" 11 Tɔn, Yiisa nba din tun toonjaann maŋ Keena nba be Galilii tiŋ ni na, ŋanne din tee u sinsinn nyinn, ki li wann niib waa mɔk Yennu yiikoo biaŋinba; ki u poorpoweiteeb na teenɔ yada. 12 Li poorpo ki Yiisa nan u naa nan u waarii nan u poorpoweiteeb na saan Kapenaum, ki saa be leŋ daa ŋanlee nna. 13 Ŋanne ki Israel teeb yukitgar b tiaru jaamm tan per, ki Yiisa saan Jerusalem, a wun saa di jaamm maŋ. 14 Waa baar Jerusalem yoo nba ki u kɔɔ Yennu jiantu ŋasaakak na ni, ki la jab ki bi kɔi nei nan pei nan ŋmana, ki bia la likkpenta ki bi kar kpentir likirii. 15 Ki u jii ŋmiit ki pian kpaasir, ki ber bonkobit na kur, ki nyinnib Yennu jiantu ŋasaakak maŋ ni, ŋaan tut tut likkpenta teebura na ki lu, ki likirii na baa yat; 16 ŋaan bia bet binba kɔi ŋmana na a bin nyinn ŋmana maŋ, ki bia yetib a, "I daa tee n Baa ŋaak kpinkpent boori." 17 Li yoo na ki u poorpo-weiteeb na ji tiar Yennu gbouŋ nba yet biaŋinba na a, "N numm mɔn n Baa jiantu ŋasaakak na paak bonchiann." 18 Ŋanne ki Juu teeb yudamm na boi Yiisa a, "A saa tun nyinlannpoe ki wannit nan a mɔk yiikooe ki tun linba na?" 19 Ki Yiisa jiin a, "Tɔn, yi yeer Yennu jiantu diiuk na, ŋaan n saa jii daa ŋantaae ki maar." 20 Ki bi yet a, "Waa! Bi jii bina piinna nan ŋanloobo ki maa Yennu jiantu ŋasaakak na, ŋaan ki fin tan yaa a saa jii daa ŋantaa kuukɔɔe ki maa!" 21 Yennu diiuk nba ki Yiisa din pak na tee u mɔŋ gbanante. 22 Yennu nba din fiinɔ kuun ni na poorpoe, ki u poorpoweiteeb tiar linba ki u daan yet na, ki ji teen Yennu gbouŋ nba want Yiisa kuunfiiru po na yada, ki bia teen Yiisa maan na yada. 23 Yukitgar tiaru jaamm na yooe ki Yiisa din be Jerusalem, ki tuun bakitnauŋ toona, ki niib bonchiann la ki teenɔ yada, 24 ŋaan Yiisa din ki jii u mɔŋ ki chabibi, kimaan u mi sɔɔ kur nba tee wunba. 25 U din mi niib dudukit bonŋann. Li paak u din ki loon sɔɔ n wannɔ nisaarik binbeŋ-i.

Jɔɔnn 3

1 Jɔɔ nna din be ki u sann tee Nikodemus. U din tee Juu teeb yudaanɔe, ki bia tee Farisii nirɔ; 2 ki nyɔsiɔk ki u tan baar Yiisa boor, ki yetɔ a, "Chanbaa, ti mi nan a tee wanntɔɔ nba nyii Yennu boore, kimaan sɔɔ kan fit tun toonjaana nba ki a tuun na booru, ki li ki tee Yennu be nanɔ." 3 Ki Yiisa betɔ a, "Barmɔniie ki n beera na, sɔɔ kan fit kɔɔ Yennu naan ni, bii kii ŋamm marɔ-i kaa." 4 Ki Nikodemus boiɔ a, "Nlee ki bi saa ŋamm mar nirɔ nba ki tee biki? Kimaan u ji kan fit ŋmat kɔɔ u naa poor ni, ki wun marɔ." 5 Ki Yiisa yetɔ a, "Barmɔniie ki n beera na, sɔɔ kan fit kɔɔ Yennu naan ni, see ki u la maaru munlee, ki li tee Yennu Seyeeŋ nan Yennu nyunwuru. 6 Nisaarik ŋarin maar nisaarike, ŋaan Seyeeŋ na maar Seyeeŋ yɔɔe. 7 Li paak, a daa te ki li teea bakitnauŋ nan maa yaa 'See ki bi ŋamm mari na.' 8 Wouŋ da ki saa laa loon siaminbae, ki a ki mi waa nyi sian ki da. A bia ki mi waa saa siami, ŋaan a gbia ki u dae. Li mun bia tee nnae ki tur sɔɔ kur nba ki Yennu Seyeeŋ marɔ." 9 Ki Nikodemus boiɔ a, "Nlee ki li saa teen nna?" 10 Ki Yiisa jiinɔ a, "A tee daanɔ nba want Israel teeb Yennu maame, ŋaan tan ki mi linba na paakii? 11 Barmɔniie ki n beera na, ti beeri linba ki ti mi, nan taa bia la linbae, ŋaan ki i ki gaan ti maami. 12 Li-i tee ki i ki teenin yada, nan maa beeri tingbouŋ na bona po na, li-i tee ki n beti Yendɔuŋ ni bona po, nlee ki i ji saa teenin yada? 13 Sɔɔ kaa ki mi doo Yendɔuŋ ni see min Nisaarik Bik nba nyii Yendɔuŋ ni na." 14 Moses nba din jii kut waauk ki fin daauk paak ki donnɔ muuk ni biaŋinba na, li mun bia tee nnae ki bi tan saa jii Nisaarik Bik ki donnɔ sanpaapo, 15 ki wunba teenɔ yada, u saa la manfoor nba kaa gbennu. 16 Kimaan Yennu mantik loon tingbouŋ na bonchiann; li paak, ki u turit u Bijayemmir, ki wunba teen u Bija maŋ yada u tan kan kɔɔ muu ni, ŋaan u sii mɔk manfoor nba kaa gbennue, 17 kimaan Yennu nba din tun u Bija tingbouŋ na ni, u din ki tumɔ a wun tan bu tingbouŋ na niib buut ki biirib kaa, ŋaan u din yaa wun tinnibe. 18 Ki daanɔ nba teen Yennu Bija maŋ yada, Yennu kan bu u buut ki biirɔ, ŋaan wunba ki teenɔ yada, Yennu poŋ bu u yaa buut ki biirɔwa, kimaan waa ki teen ŋɔɔ Yennu Bijayemmir maŋ yada na. 19 Linba paak te ki Yennu bu bi buut ki biirib maŋ tee nnae: Yennu Bija na din baar tingbouŋ na ni a wun yent tingbouŋ na niib numpoe, ŋaan ki nisaarii loon bunbɔnn ki gar yentu, kimaan bi toona nba bi biaŋinba na paak. 20 Daanɔ nba kur tuun toonbiit, u nƒn yentue, ki ki loon wuu nakiir, kimaan u ki loon u toonbiit na n nyi paanu. 21 Ŋaan wunba waa Yennu barmɔnii wannu na ki bia tuun li biaŋ, ŋɔɔe baat yentu boor, a sɔɔ kur n bann nan Yennu be u toona kur ni. 22 Li poorpoe ki Yiisa nan u poorpoweiteeb din nyii leŋ ki saan Judea siar po, ki saa be leŋ nan daa ŋaŋŋa na, ki wuur niib Yennu nyunwuru. 23 Li yoo na ki sɔɔ Jɔɔnn nba wuur niib Yennu nyunwuru na daa ki kɔɔ dansariki, ki be Enonn, siaminba ki nyun din yab na, ki niib din tuu baat u boor, ki u wuurib Yennu nyunwuru. Enonn din ki fɔk nan Salimi. 25 Ŋanne ki mɔniɔk tan fiir Jɔɔnn maŋ poorpoweiteeb nan Juu nirɔ nna sinsuuk ni ki jiin Yennu nyunwuru po. 26 Ki Jɔɔnn poorpoweiteeb na saan u boor, ki saa betɔ a, "Chanbaa, nirɔ nba ki a daan be nanɔ Jɔɔdann mɔk-pootir, ki yaa u tee Yennu Niganntɔɔ na, ti gbat ki u wuur niib Yennu nyunwuru, ki sɔɔ kur saa u boor ki u wuurib." 27 Ki Jɔɔnn betib a, "Yennue nyint sɔɔ kur nan u toona. Nirɔ kan fit tun siar ki li ki tee Yennu nyinnɔ. 28 I mɔŋ poŋ mi gbat ki n yet maa min kaa tee Yennu Niganntɔɔ Masia, ŋaan min ŋarin, Yennu dɔŋ tumime, a n tan teen u baaru siir. 29 Poosɔrɔe tee wunba yen pooyookir. Wunba tee poosɔrɔ na yɔɔk, ki be u boor ki gbiin na, ŋɔɔe mɔk parpeenn yoo nba ki u gbat poosɔrɔ na kunkɔr. Nnae ki n mun set mɔk parpeenn bonchiann Masia paak. 30 "Li kpaa talas ŋɔɔ Masia sannii yabitir, ŋaan ki n sannii waabit." 31 Wunba nyii sanpaapo, ŋɔɔe chee sɔɔ kur; ŋaan binba nyii tingbouŋ na ni, ŋamm tee tingbouŋ na teebe, ki bia piak nisaarii maan. Wunba nyii Yendɔuŋ ni, ŋɔɔe chee sɔɔ kur, 32 ki bia jenna ki beer niib linba ki u la ki bia gbat, ŋaan sɔɔ ki gaan u maami. 33 Ki wunba gaar u maan maŋ, li want nan ŋɔɔe sak nan Yennu maan tee barmɔnii. 34 Yennu Bija nba ki u tumɔ na piak Yennu maame, kimaan Yennu tur u Bija maŋ Seyeeŋ nba yab ki kaa bikinu. 35 Yennu loon u Bija, ki kubin bona kur u nuu ni. 36 Daanɔ nba teen Yennu Bija yada, u sii mɔk manfoor nba kaa gbennu, ki daanɔ nba mun ki saak Yennu Bija na mɔb kan la manfoor maŋi, ŋaan Yennu wutoor saa do u paak ki kan gbenni.

Jɔɔnn 4

1 Tɔn, ki Farisiinba din gbat a Yiisa daak niib ki wuurib Yennu nyunwuru ki bi tee u poorpoweiteeb, ki yab gar Jɔɔnn yab. 2 Barmɔnii ŋarime, Yiisa din ki wur niib u mɔŋi, ŋaan u poorpoweiteebe din wuurib. 3 Yiisa nba bann nan Farisiinba na gbat nna maŋ, ki u nyii Judea tiŋ ni ki ŋmat saa Galilii tiŋ ni. 4 Ki u sɔnu maŋ ni, ki li tee talase nan wun gar Samaria tiŋ ni. 5 Ki yensuuk ni, waa din tan per Samaria teeb digbansiar ki bi yir Saika, ki u baar Jakɔb bunbunn boor. Leŋ din ki fɔk nan kpaab nba ki Jakɔb tur u bik Joosef na. Waa din baar bunbunn na boor, ki bakint ji soorɔ kimaan sommir na paak, ki u biar kar bunbunn na nyakir. 7 Ŋanne ki Samaria poosɔɔ tan baar bunbunn maŋ boor, a wun luun nyun. Ki Yiisa yetɔ a, "Turimin nyun ki n nyu." 8 Li yoo na ki sɔɔ ki u poorpoweiteeb poŋ saan doo niwa, a bin saa daa jeet, ŋaan ki u biar u kuukɔɔ. 9 Juu teeb na din tuu siŋ Samaria teebe, ki ki loon bii taant nammi. Li paak, ki poo na boiɔ a, "A tee Juu nirɔe, ki n mun tee Samaria poo, ki li teen nleewa ki a tan mein nyumi?" 10 Ki Yiisa jiinɔ a, "Li-i tee ki a bo mi bakitnauŋ piinii nba ki Yennu loon wun pia na, ki bia mi maa tee wunba ki meia nyun na, a bo saa boin a n tura manfoor nyun, ki n set bo saa turawa." 11 Ki poo na yetɔ a, "Chanbaa, bunbunn na sumii hei, ki a mun bia ki mɔk gooka. Lee ki a saa luun manfoor nyun maŋi? 12 Ti yeeja Jakɔbe din lukir bunbunn na, ki ŋɔɔ nan u waas nan u bonkobit kur nyu leŋ. A dukii nan a gar Jakɔba koo?" 13 Ki Yiisa yetɔ a, "Wunba nyuu bunbunn na nyun, nyun-nyukiru tan saa ŋamm soorɔwa, 14 ŋaan mi-i tur wunba n nyun na ki u nyuu, nyunnyukiru kan mi soorɔ, kimaan mi-i tur wunba n nyun na, li sii bunii manfoor nyume u ni, ki bia turɔ manfoor nba kaa gbennu." 15 Ki poo na yetɔ a, "Chanbaa, turimin li nyun, ki nyunnyukiru ji daa mi somi, ki n bia ji daa mi ki baat nna ki tan lu nyumi." 16 Ki Yiisa betɔ a, "I saa ki yiin a sɔrɔ ki jen nanɔ na." 17 Ki u betɔ a, "N ki mɔk sɔrɔ." Ki Yiisa jiinɔ a, "Faa yaa a ki mɔk sɔrɔ na, ŋann a mɔk mɔnii, 18 kimaan a poŋ kun jab baŋŋmuwa, ki jɔɔ nba ki a daa be nanɔ mɔtana na ki tee a sɔrɔ kaa. A set pak mɔniie." 19 Ki poo na yetɔ a, "Chanbaa, n ji bann nan a tee Yennu sɔkiniie. 20 Timm Samaria teeb yeejamm din jiantir Yennu jɔɔr na paake, ŋaan ki yimm Juu teeb ŋarin yaa Jerusaleme tee siaminba ŋan nan Yennu jiantu." 21 Ki Yiisa betɔ a, "N niipoo, teent n maan yada, yoo baat ki niib tan kii jiantir ti Baa Yennu jɔɔr na paaki, ki bia tan kii jiantirɔ Jerusalemi. 22 Yimm Samaria teeb ki mi yaa jiantir wunba, ŋaan timm Juu teeb ŋarin mi taa jiantir wunba, kimaan tinnu labaar nyii Juu teeb nie. 23 Ŋaan yoo baat, ki poŋ set baara, ki binba jiantir ti Baa Yennu nan barmɔnii na sii jiantirɔ u Seyeeŋ paŋ nie ki mi waa tee wunba, kimaan li niboorue ki Yennu loon bii jiantirɔ nna. 24 Yennu tee Seeke, ki binba jiantirɔ na, li kpaa talase bii jiantirɔ nan barmɔnii, u Seyeeŋ paŋ ni." 25 Ki poo na yetɔ a, "N mi nan Masia nba ki bi yiu Yennu niganntɔɔ na tan saa baara. U-u taŋŋi baar yoo nba, u saa betit barii kura." 26 Ki Yiisa jiinɔ a, "Mine na, min nba piak nana na." 27 Li yoo maŋe ki Yiisa poorpoweiteeb jen, ki li teemm bakitnauŋ nan Yiisa nba piak nan poo na, ŋaan bi sɔɔ ki boi poo na a u loon bee, ki bia ki boi Yiisa a bee ki u piak nanɔ. 28 Ŋanne ki poo na nyik u nyunsɔɔr na, ŋaan ŋmat saan doo na ni, ki saa yet niib a 29 "Baat man, ki tan got jɔɔ nba betin bonsiar kur nba ki n poŋ mi tun. I dukii nan ŋɔɔe tee Yennu Niganntɔɔ Masia na-a?" 30 Baa gbat nna yoo nba ki bi nyii doo na ni ki saan Yiisa peŋ. 31 Li yoo maŋ, ki Yiisa poorpoweiteeb barimɔ, ki yeen a, "Chanbaa, dimin jeet." 32 Ki Yiisa jiimm a, "Min mɔk jeet nba ki n saa di, ŋaan ki i ki mi li po." 33 Ki u poorpoweiteeb na ji boi bi leeb a, "I mi sɔɔ tan sii turɔ jeeti?" 34 Ki Yiisa jiimm a, "Min yaa jeet tee ki mii tuun Yennu nba tumin na yanbɔɔtoonae ki gbenn. 35 "I tuu yaa li tenn ŋmaarii ŋannae nan bin jaan dii. Ŋaan n beeriie, gotir kpaant man, jeet na poŋ teen siir nan jaamuwa. 36 Ki dijaara tan saa gaar bi paauk, ki dii nba ki bi jaan na mun, ŋamme tee niib nba tan saa la manfoor nba kaa gbennu, ki damm nba buur nan binba jaan, bi kur tan sii mɔk parpeenn dii maŋ paak. 37 Ti mɔk barjouk a, 'Yenɔe buur, ki lɔɔ jaan,' ki li set tee mɔnii. 38 N te ki i jaan siaminba ki i ki kooe. Siabe poŋ koowa, ki bi konu maŋ sommii ki i la dii." 39 Ŋanne ki Samaria doo ni niib bonchiann gbat poo na nba beerib a, "Yiisa betin bonsiar kur nba ki n poŋ mi tun," ki bi teen Yiisa yada, 40 ki saan bunbunn na boor Yiisa peŋ, ki barimɔ a wun biar kii be namm. Ki Yiisa sak ki biar be namm daa ŋanlee, 41 ki piak u maan ki teemm. Baa din gbat nna ki bi bonchiann teenɔ yada. 42 Li yoo na ki bi ji bet poo na a, "Taa teenɔ yada mɔtana na, li ki tee faa betit u po na kuukɔɔ kaa, ŋaan taa gbat u mɔŋ mɔb ni na paak ki ti teenɔ yada, ki bann nan ŋɔɔe set tee tingbouŋ na Tinntɔɔ." 43 Li daa ŋanlee poorpoe ki Yiisa nyii leŋ ki saan Galilii tiŋ ni, 44 kimaan u mɔŋ poŋ yet a, "Yennu sɔkinii kan la baakir u mɔŋ doo ni." 45 Ŋaan waa baar Galilii yoo nba, ki niib na gaarɔ, kimaan baa daan saan yukitgar tiaru jaamm Jerusalem na, bi daan la linba kur ki u tun Jerusalem jaamm yoo nawa. 46 Waa din lin Galilii tiŋ ni na, ki u saan Keena, siaminba ki u din te ki nyun kpant tilɔɔna daan na. Ki yudaansɔɔ din be Kapenaum, ki u bija yiar. 47 Ki u gbat a Yiisa nyii Judea ki baar Galilii tiŋ ni. Ki u baar u peŋ, ki barimɔ a wun baar Kapenaum, ki te ki u bija n la laafia, kimaan u yaa wun kpoe. 48 Ki Yiisa betɔ a, "Li-i tee ki i ki la nyina nan bakitnauŋ toonjaana, i kan teenin yada." 49 Ki yudaanɔ na jiin a, "Chanbaa, ŋaant tin saan, ki n bik maŋ daa ki kpo na." 50 Ki Yiisa betɔ a, "I kun. A bija na paaka." Ŋanne ki yudaanɔ na teen yada nan Yiisa nba pakɔ linba maŋ, ki ji ŋmat kun. 51 U be sɔnu nie ki u toontunna chetɔ nan labaar a, "A bik na paaka." 52 Ki u boib a, "Nlee yooe ki bik maŋ paaki?" Ki bi yetɔ a, "Wonn, kut youŋ yenlekire ki u gbanu won maak." 53 Ki jɔɔ na tiar nan li yooe ki Yiisa won betɔ a, "A bija na paaka." Li paak ki ŋɔɔ nan u ŋaateeb kura teen Yiisa yada. 54 Yiisa nba din tun toonjaann maŋ na, li din tee toonjaann nba ki u tun pukin ŋanlee-e yoo nba ki u nyii Judea tiŋ ni ki baar Galilii tiŋ ni na.

Jɔɔnn 5

1 Li poorpoe ki Juu teeb jaansiar tan baar, ki Yiisa saan Jerusalem. 2 Leŋe ki kukintuk dɔɔ nan nyun, ki lanbont ŋaŋŋmu chaan linta, ki Juu teeb maan ni, ki bi yir Befsata, ki li kpia Pei Tammɔb. 3 Ki baatib bonchiann din tuu dɔɔ leŋ, ki siab tee jɔɔnii, ki siab tee dianii, ki siab mun tee gbanankpeena damm. [Bi tuu dɔɔ ki guu nyun na dammue. 4 Yosau Yennu malakasɔɔ tuu sike ki damm nyun maŋ. Yoo nba ki u damm nyun na, ki baatɔɔ nba sint sik li ni, u yiaru tuu gbenne.] 5 Tɔn, jasɔɔ din be leŋ, ki yiar bina piintaa nan ŋanniin. 6 Ki Yiisa tan baar la ki u dɔɔ leŋ, ki u bann nan jɔɔ maŋ yiaru yukira, ki u boiɔ a, "A loon ki a la laafia-a?" 7 Ki baatɔɔ na jiin a, "Chanbaa, nyun na-i damm yoo nba, n ki mɔk wunba saa jiin sikinin li ni. Ki mi-i yaa n sik, sɔɔ tuu dɔŋ sike, ŋaan nyikin." 8 Ki Yiisa betɔ a, "Fiit, ki jii a dɔɔnu kii somm." 9 Li taakpaak ni ki jɔɔ na paak, ki fiir ki jii u dɔɔnu ki ji somm. Daar nba ki jɔɔ na la laafia na din tee foon daare. 10 Li paake teen ki Juu teeb yudamm din betɔ a, "Dinna tee foon daare. Ti sennu ki chab nan fan jii a dɔɔnu kii somm nanni." 11 Ki u jiin a, "Jɔɔ nba te ki n paak na, ŋɔɔe yetin a n jii n dɔɔnu kii saa nann." 12 Ki bi boiɔ a, "Jalanɔpoe yeta a a jii a dɔɔnu kii saa nanni?" 13 Ŋaan jɔɔ na ji din ki mi wunba te ki u paaki kimaan Yiisa ji din nyii leŋa, kimaan niib bonchiann nba din tikir leŋ na paak. 14 Li poorpoe ki Yiisa tan lau Yennu jiantu ŋasaakak ni, ki betɔ a, "Gotir, a la laafiawa, ŋaan a ji daa mi tuun toonbiiti, ki bonbisiar tan saa kpet baara ki gar na." 15 Yiisa nba pak nan jɔɔ na ki gbenn yoo nba, ki jɔɔ na nyii ki saan Juu teeb yudamm na boor ki saa betib a, "Yiisae te ki n paak." 16 Ki yudamm maŋ ji piin Yiisa mukisuk, kimaan waa te ki jɔɔ na paak foon daar na. 17 Ki Yiisa betib a, "N Baa Yennu yɔɔ tuume, ki n mun tuun nnae." 18 Yiisa nba yet nna yoo nba ki Juu teeb maŋ ŋamm donn wutoor, ki loon bin kpiu ki gar sinsinn na, kimaan li ki tee waa biir foon daar sennu na kuukɔɔ paak kaa, ŋaan waa bia yaa Yennu tee u Baa ki yek u mɔŋ nan Yennu na paak. 19 Ŋanne ki Yiisa betib a, "Barmɔniie ki n beeri na, min Yennu Bija laat n Baa Yennu nba tuun linbae ki mun tuun. N kan fit tun siar nan n mɔŋ yiikoo. N Baa maŋ nba tuun linba, n mun tuun ŋanne, 20 kimaan n Baa maŋ loonin, maa tee u Bija na, ki u wantin linba kur ki u mɔŋ mɔŋ tuun. Ki bia jenna, u saa wannin toonjaana mii tuun, ki lin gar linba na, ki li saa teeni bakitnauŋ. 21 N Baa nba fiint kpeemm ki teemm manfoa biaŋinba na, nnae mun, ki min nba tee u Bija na mun saa tur binba ki n gann na manfoa. 22 "N Baa ki bu sɔɔ buuti, ŋaan u chab min, u Bijae, a mii bu niib buut, 23 a ki sɔɔ kur-ii teenin baakir nan baa teen n Baa Yennu baakir biaŋinba na. Wunba ki teenin baakir, li want nan u ki teen n Baa Yennu nba tumin na baakiri. 24 "Barmɔniie ki n beeri na, daanɔ nba gbat n maan na, ki bia teen wunba tumin na yada, ŋɔɔe mɔk manfoor nba kaa gbennu; ki Yennu kan bu u buut ki biirɔ. U bia poŋ nyii kuun nuu niwa, ki be manfoor maŋ nie. 25 "Barmɔniie ki n beeri na, yoo baat, ki poŋ baara, ki kpeemm tan saa gbat min Yennu Bija kunkɔr, ki binba gbat n kunkɔr maŋ saa la manfoor nba kaa gbennu. 26 N Baa nba yen manfoor ki teen niib na, nnae mun ki u te ki min u Bija mun yen manfoor ki teen niib, 27 ki u bia turin yiikoo a mii bu niib buut, kimaan n tee Nisaarik Bike. 28 I daa te ki li teei yaarlituku. Yoo baat ki niib nba kur poŋ kpowa na tan saa gbat n kunkɔr, 29 ki fiir kuun ni; ki binba tun bonŋann tan saa fiir ki be bi manfoa nba ki mɔk gbennu na ni, ki binba mun tun toonbiit na tan saa fiir, ki n bu bi buut ki biirib. 30 "N kan fit tun siar nan n mɔŋ yiikoo. Mi-i bu nirɔ buut biaŋinba, Yennue tuu betin a n bu nna. Li paak teen ki n buut took, kimaan n ki loon ki n tun n mɔŋ yanbɔɔtoona kaa, ŋaan n tuun Yennu nba tumin na yanbɔɔtoonae. 31 "N pinpauk na-i want maa tee wunba, ŋann niib kan gaar n tiɔŋ maan maŋi. 32 Ŋaan sɔɔe bewa ki piak linba want niib maa tee wunba. Ŋɔɔe tee Yennu; ki n mi nan waa piak linba n po maŋ na tee barmɔniie. 33 "Tɔn, i tun i niib Jɔɔnn nba daan wuur niib Yennu nyun-wuru na boor, a yin gbiint u maan, ki waa daan piak linba ki teen niib n po na, li tee barmɔniie. 34 Li ki kpaa talas kaa nan nirɔ n pak n po, ŋaan n beeri linba na a yin la tinnue. 35 Jɔɔnn maŋ daan tee nan fitir nba ki bi tuu joo, ki li yentu nyɔkit nae, ki i daan jii yoo waaminna ki nian u yentu maŋ. 36 "Bakitnauŋ toonjaana nba ki n tuun na, ŋanne want n siara ki chee Jɔɔnn siara na. Ki bia jenna, toonjaana nba ki n tuun na, n Baae yaa mii tuun, ki toona maŋ tee siara nan n Baa Yennue tumin. 37 "Ki bia jenna, n Baa Yennu nba tumin nae mun tee n siara. I ki mi gbat u kunkɔri, ki bia ki mi lau nan i ninbina. 38 Ki u tumin i boor, ŋaan ki i ki teenin yada; ŋanne want nan u maan kaa i para ni. 39 "Tɔn, i tuu karin Yennu gbouŋ, kimaan i mi nan i saa la manfoor nba kaa gbennu leŋe, ki Yennu gbouŋ maŋ want n poe, 40 ŋaan ki i lek y‡t yin baar n peŋ ki n turi manfoor maŋ. 41 "N ki loon dontir nisaarii boor. 42 N poŋ mi nan i ki loon Yennu i yan ni faba. 43 N baar n Baa Yennu sann nie, ki i ki gaarimi. Ŋaan li-i tee ki sɔɔ baar u mɔŋ sann ni, i tuu gaarɔe. 44 I loon ki yii laat dontir i leeb boor, ŋaan i ki fiin nan ki i la dontir ŋɔɔ Yennu nba tee Yen-yemmir na boori. Li paak mune te ki i set kan fit teenin yada. 45 I daa dukii nan n saa pak maan ki biiri n Baa Yennu boori. Daanɔ nba saa pak biiri, ŋɔɔe tee Moses nba ki i teenɔ yada na. 46 I setikii bonni teen Moses sɔbu na yada, i bo saa teenin yadawa mun, kimaan u din sɔb ki pak n poe. 47 Ŋaan yaa ki teen waa sɔb linba maŋ yada na, nlee ki i ji saa teen n mɔmaan na yada?"

Jɔɔnn 6

1 Li poorpo ki Yiisa ŋmat poot Galilii mɔkgbeŋŋir nba ki bi bia yi Taiberias na. 2 Ki nibur waa u poor po, kimaan bi din la u bakitnauŋ toonjaana nba ki u tuun ki te ki baatib paakit na. 3 Ki ŋɔɔ nan u poorpoweiteeb doo jɔɔr paak ki saa kar. 4 Li yoo ki sɔɔ Juu teeb yukitgar tiaru jaamm pera. 5 Yiisa nba din kar maŋ na, ki u tan la ki nibur baat u peŋ. Ki u boi Filip a, "Ti saa la jeet lee ki daa, ki dinn niib na kuri?" 6 U din boi nna maŋ ki loon wun bikin Filipe, ŋaan ŋɔɔ ŋarin poŋ din mi waa saa tun linba. 7 Ki Filip jiin a, "Ti-i yaa ti daa boroboro ki tur niib na, li saa gar nan salimpeena c kobii ŋanlee nawa, ki sɔɔ kur n fit la waan." 8 Ki u poorpoweiteeb na yenɔ nba ki bi yiu Andru, ki u tee Simonn Piita waarɔ na, yet Yiisa a 9 "Bisiake be nna ki mɔk boroboro kunbis ŋaŋŋmu nan janbis ŋanlee. Ŋaan li mun kan jaŋ niib na kuri." 10 Ki Yiisa betib a, "Ŋaant man ki niib maŋ n kar." Mɔpaauŋ bonchiann din be leŋ, ki bi kar, ki jab tee tusaa ŋaŋŋmu. 11 Ki Yiisa jii boroboro na, ki tur Yennu niipoouk, ŋaan te ki bi tor niib nba kar maŋ; ki u bia jii janii na ki teen nna, ki bi kura dii ki saa jaŋ baa loon biaŋinba. 12 Baa gboo yoo nba ki u yet u poorpoweiteeb na a bin lakin jeet nba tenn na, ki li daa biiri. 13 Ki bi lakin baa dii boroboro kunbis ŋaŋŋmu na ŋaan tenn linba na, ki li gbee kpanchubit piik nan ŋanlee. 14 Niib maŋ nba la bakitnauŋ toonjaann nba ki Yiisa tun na, ki bi yet a, "Barmɔniie setik, nirɔ nae tee Yennu sɔkinii nba yaa wun baar tingbouŋ na ni na." 15 Ki Yiisa ji bann nan bi yaa bin soorɔ ki dinnɔ naame. Li paake te ki u din nyikib ŋaan ŋmat jɔɔr paak ki saa be u kuukɔɔ. 16 Daajoouk nba tan baar, ki Yiisa poorpoweiteeb sik mɔkgbeŋŋir na ni, 17 ki saan kɔɔ burgbetir ki kan saa a bin poot mɔkgbeŋŋir na, ki took Kapenaum. Ki li din tan bɔnn, ki sɔɔ Yiisa daa ki baar bi boori. 18 Ki wonpaaruk tan fikit ki da nyun na paak. 19 Yoo nba ki u poorpoweiteeb kan saan nan maar ŋantaa koo ŋanna na, ki bi la Yiisa somm nyun paak ki tookit burgbetir maŋ, ki jaŋmaanii ji soorib. 20 Ki Yiisa betib a, "I daa tiin jaŋmaanii mani. Li tee mine." 21 Baa bann nan Yiisae na, ki bi ji mɔk parpeenn nan wun kɔɔ burgbetir na ni. Li taakpaak ni ki burgbetir na baar siaminba ki bi saa na. 22 Niib nba din biar mɔk-pootir po na, ki li ji din tan yent sanyiɔk ni, ki bi la burgbetyennkɔɔ biar see leŋ, ki bi bann nan Yiisa won ki kɔɔ burgbetir na ki wei u poorpoweiteebi, kimaan baa won saa na, Yiisa won kaa bi ni. 23 Ki burgbetlia bia nyii Taiberias ki baat ki per siaminba niib won dii jeet nba ki Yiisa won tur Yennu niipoouk li paak na. 24 Nibur na nba la nan Yiisa kaa leŋ, ki u poorpoweiteeb bia kaa na, ki bi saan kɔɔ burgbeta na ni, ki saan Kapenaum, a bin lomɔ. 25 Niib na nba din poot mɔkgbeŋŋir maŋ na, ki bi la Yiisa, ki boiɔ a, "Chanbaa, a baar nna nlee yooe?" 26 Ki Yiisa yetib a, "Barmɔniie ki n beeri na, maa won turi jeet ki i dii gboo nae te ki i loonin na, ŋaan li ki tee yaa la n bakitnauŋ toonjaana na kaa. 27 I daa tuun toonn jeet nba biir paaki, ŋaan yii tuun toonn jeet nba mɔk manfoor nba kaa gbennu na paak. Min Nisaarik Bik saa turi li jebooru, kimaan n Baa Yennue turin yiikoo na a mii teeni, kimaan u numm gbooma." 28 Ŋanne ki bi boiɔ a, "Ti sii tuun bee ki li tee Yennu toona?" 29 Ki Yiisa jiimm a, "Toonn nae ki Yennu loon yii tuun: I teen wunba ki u tumɔ na yada." 30 Ki bi bia boiɔ a, "Toonjaanlannpoe ki a saa tun ki tin la ki teena yada? A saa tun bee? 31 Ti yeejamm nba din be muuk ni yoo nba na, bi din tuu di jeet nba ki bi yi mana na, nan laa sɔb Yennu gbouŋ ni biaŋinba na, a 'Moses din teemm jeet nba nyi Yendɔuŋ ni na a bii di.'" 32 Ki Yiisa yetib a, "Barmɔniie ki n beeri na, li ki tee Moses kaa din teeni jeet maŋi, ŋaan li din tee n Baa Yennue. Ki mɔtana ki u ji loon wun turi jeet nan mɔnii nba nyi u boor ni. 33 Jeet nba ki Yennu teeni maŋ, ŋanne tee wunba nyii Yendɔuŋ ni ki teen tingbouŋ na ŋaateeb manfoor." 34 Ki bi yetɔ a, "Chanbaa, i teent jeet maŋ daar kur." 35 Ki u betib a, "Mine tee manfoor jeet maŋ. Daanɔ nba baar n boor, kon kan mi soorɔ, ki wunba teenin yada, nyunnyukiru kan mi soorɔ. 36 "N poŋ beti nan i lama, ŋaan ki teenin yada. 37 Ŋaan wunba kur ki n Baa Yennu jiiu ki turin, u saa baar n boor ki teenin yadawa. N kan mi y‡t wunba baar n boori, 38 kimaan n nyii Yendɔuŋ ni ki sik maa n tun Yennu nba tumin na yanbɔɔ-toonne, ŋaan li ki tee n mɔŋ yanbɔɔt kaa. 39 Ŋɔɔ Yennu nba tumin na, u loomm tee a n daa boont binba ki u turin nae nan yenɔ kɔɔwa, ŋaan tan fiimm kuun ni durinya gbennu daar. 40 Nnae ki n Baa Yennu loon, a sɔɔ kur nba bann min, u Bija, ki teenin yada, u saa la manfoor nba kaa gbennu; ki n tan saa fiimm kuun ni durinya gbennu daar." 41 Ŋanne ki Juu teeb maŋ ji burin nan leeb, waa yaa ŋɔɔe tee jeet nba nyii Yendɔuŋ ni na paak. 42 Ki bi boi leeb a, "Yiisa nba tee Joosef bija na kaa na-a? Ti mi u baa nan u naa. Nlee ki u yaa u nyii Yendɔuŋ ni?" 43 Ki Yiisa betib a, "I daa burin nan leeb maa pak linba na paaki. 44 Sɔɔ kan fit baar n boor ki teen n yɔɔ, ki li ki tee ki n Baa Yennu nba tumin na kaa te ki u baari, ki n tan saa fiin li daanɔ kuun ni durinya gbennu daar. 45 Yennu sɔkiniinba din sɔb Yennu gbouŋ ni a 'Yennu saa wann sɔɔ kur.' Sɔɔ kur nba gbiintir n Baa Yennu ki bia gaan u maan, ŋɔɔe saa baar n boor ki kpant n yɔɔ. 46 Ŋaan sɔɔ daa ki mi la n Baa Yennu maŋi, see min nba nyii u boor na kɔɔe laatɔ. 47 "Barmɔniie ki n beeri na, daanɔ nba teenin yada, ŋɔɔe mɔk manfoor nba kaa gbennu. 48 Mine tee manfoor jeet na. 49 Yoo nba ki i yeejamm din be muuk ni na, bi din tuu di mana maŋe, ŋaan bi kpowa. 50 Ŋaan jeet nba nyi Yendɔuŋ ni na, wunba diir, u kan kpo. 51 Mine tee manfoor jeet nba nyii Yendɔuŋ ni na. Wunba dii jeet maŋ sii be nan yoo nba kaa gbennu, ki jeet nba ki n saa turɔ na tee n gbanante, ki n tan saa jii n gbanant maŋ ki chab, ki tingbouŋ na ŋaateeb n fit la manfoor maŋ." 52 Ŋanne ki mɔniɔk fiir Juu teeb maŋ sinsuuk ni ki jiin Yiisa nba pak linba na po, ki bi boi bi leeb a, "Nlee ki jɔɔ na saa turit u gbanant ki tin di?" 53 Ki Yiisa betib a, "Barmɔniie ki n beeri na, see ki i ŋman min Nisaarik Bik gbanant, ki bia nyuu n sɔn. Nna-i kaa, i kii mɔk manfoor maŋ i ni. 54 Ki daanɔ nba ŋman n gbanant ki bia nyuu n sɔn, u mɔk manfoor nba kaa gbennu, ki n tan saa fiinɔ kuun ni durinya gbennu daar. 55 Kimaan n gbanante tee jeet nan mɔnii, ki n sɔn mun tee bonnyukar nan mɔnii; 56 ki daanɔ nba ŋman n gbanant, ki bia nyuu n sɔn, ŋɔɔe be n ni, ki n mun be u ni. 57 "N Baa Yennu nba yen manfoor nae tumin, ki u paake ki n mun mɔk manfoor. Li mun bia sii tee nnae, wunba ŋman n gbanant, n paak u sii mɔk manfoor. 58 Mine tee jeet nba nyii Yendɔuŋ ni ki sik. Ki wunba dii jeet na, u sii yɔɔ be nan yoo nba kaa gbennu; ki jeet maŋ ki tee nan jeet nba ki i yeejamm din dii ki tan kpo na kaa." 59 Yiisae din pak linba na, waa daa din be Kapenaum, Yennu jiantu diiuk ni, ki want niib na. 60 Yiisa poorpoweiteeb bonchiann nba din gbat u wannu maŋ, ki bi yeen bi leeb a, "Wannu na paar ki turit. Ŋmee saa sak linba na?" 61 Sɔɔ din ki wann Yiisa ŋarimi, ŋaan u din bann nan u poorpoweiteeb na mɔk bunburimii u wannu maŋ paak. Ki u boib a, "Maan nae te ki i birisimii? 62 Li-i tee ki i la min Nisaarik Bik do Yendɔuŋ ni siaminba ki n din tuu be na, i ji sii dukii nlee? 63 Yennu Seyeeŋe teen niib manfoor; ŋaan gbanant na tee yanne. Mɔmaan nba ki n pak turi nae baat nan Yennu Seyeeŋ nba teen niib manfoor maŋ. 64 Ŋaan i siab lek ki teenin yada." Yiisa din pakib linba na, kimaan sinsinn u poŋ mi binba tan kan teenɔ yada, nan wunba mun tan saa nyi u poor. 65 Ki u bia ŋamm yet a, "Li paake te ki n beti a sɔɔ kan fit baar n boor ni ki teen n yɔɔ, see ki n Baa Yennue te ki u baar." 66 Li paake te ki u poorpoweiteeb bonchiann din ŋmat poor, ki ji ki tɔkii nanɔ. 67 Ŋanne ki u din boi u poorpoweiteeb piik nan banlee na a, "Ki i mun saa nyikimaa?" 68 Ki Simonn Piita jiinɔ a, "Ti Yomdaanɔ, ti mun ji saa nyika ŋaan saan ŋmee boori? Fine mɔk manfoor nba kaa gbennu wannu. 69 Ki mɔtana ti teena yadawa ki mi nan fine tee Yennu popeendaanɔ." 70 Ki Yiisa yetib a, "Yimm jab piik nan banlee na, mine ganni, ŋaan ki i ni yenɔ tee Sintaanii yɔɔ." 71 U din yet ki jiin Judas nba tee Simonn Iskariot bik na poe; ŋɔɔe din tee u poorpoweiteeb piik nan banlee na yenɔ, ŋaan lek yaa wun nyi u poor.

Jɔɔnn 7

1 Li poorpoe ki Yiisa ji din be Galilii tiŋ ni, ki lin leŋ digbana ni. U din ki loon wuu be Judea tiŋ ni, kimaan Juu teeb yudamm nba be leŋ na loon bin kpiue. 2 Ki Juu teeb jaamm nba ki bi yi lanbont jaamm na tan per. 3 Ŋanne ki Yiisa waarii yetɔ a, "Nyikin nna, ŋaan saan Judea tiŋ ni, ki a poorpoweiteeb nba be leŋ na n la toona nba ki a tuun na. 4 Li-i tee ki nirɔ loon wun wann u mɔŋ nan u tee sɔɔ, li ki ŋan ki wun bɔr toona nba ki u tuumi. Li-i tee ki a tuun toonjaana, fan wann niib paanu ni nan a set tee li daanɔe." 5 U waarii na lek daa din ki teenɔ yada; li paak ki bi pakɔ nna maŋ. 6 Ki Yiisa jiimm a, "N yoo daa ki baari. Yimm ŋarin, yoo kur ŋane ki turi, 7 kimaan tingbouŋ na ŋaateeb ki namiini, ŋaan min ŋarin bi namin, kimaan maa beerib a bi sɔnii ki ŋan na paak. 8 Tɔn, yimm-ii saa jaamm maŋ, ŋaan min ŋarin daa ki saa, kimaan n yoo daa ki baari." 9 U din betib nnae, ŋaan biar be Galilii. 10 Yiisa waarii na din saan jaamm naewa, ki Yiisa tan wei. U din ki saan paanu ni kaa, ŋaan u din bɔre ki saan. 11 Ki Juu teeb yudamm din lin loonɔ jaamm maŋ ni, ki boi niib a, "U be lee?" 12 Ki niib bonchiann nba be leŋ na burin bonchiann ki jiin u po; ki siab yaa, "U tee niŋanɔe," ki leeb yaa, "Aaii, u kpann niibe;" 13 ŋaan sɔɔ din ki pak u po paanu ni, kimaan bi tiin Juu teeb yudamm na jaŋmaaniie. 14 Baa dii jaamm na ki kɔɔ sinsuuk ni yoo nba, ki Yiisa saan kɔɔ Yennu jiantu ŋasaakak ni, ki piin want niib Yennu maan. 15 Juu teeb nba gbiintirɔ yoo nba ki li teemm bakitnauŋ; ki bi boi a, "Nlee ki nirɔ na jia mi gbouŋ nna, ŋaan ki kɔɔ ti sakursaakari?" 16 Ki Yiisa yetib a, "Maa want wannu nba na, li ki tee n mɔŋ wannu kaa, ŋaan li nyii Yennu nba tumin na boore. 17 Wunba loon wun tun Yennu yanbɔɔtoona, ŋɔɔe saa bann nan linba ki n piak ki want na nyii Yennu boor koo n boore. 18 Daanɔ nba piak u mɔŋ wannu, ŋɔɔ loon baakir ki teen u mɔŋe. Ŋaan wunba loon niib-ii baakit wunba tumɔ na, ŋɔɔe tee popeendaanɔ, ki ki mɔk biiti. 19 "Moses kaa din turi sennu na-a? Ŋaan i sɔɔ ki dia sennu maŋi. Ki bee ki i loon yin kpimi?" 20 Ki niib na yetɔ a, "Narinbiiuk be a ni! Ŋmee yaa wun kpiani?" 21 Ki Yiisa betib a, "N tun toonjaann foon daar ki te nirɔ la laafia, ki toonn maŋ teen i kura bakitnauŋ. 22 Ŋaan li-i tee ki i pot bonjabik foon daar, i mun tun toonn foon daare na. Mosese din senn a yii porii bonjabis, ŋaan i yeejamme din piin punpotu sinsinn. 23 Tɔn, li-i tee ki i porii bonjabis foon daar, a i daa kpet Moses sennuie, bee ki i donn wutoor n paak maa te ki baatɔɔ paak foon daar na? 24 Daa gorii nirɔ nanyer po binbeŋ ki bu u buuti, ŋaan i tuu dukin fanuwa ki la li barmɔnii." 25 Ŋanne ki Jerusalem nisiab boi bi leeb a, "Nirɔ nba nae ki bi yiab a bin kpiu na-a? 26 Gotir, u piak paanu nie ki sɔɔ mun bia ki pak siar a wun tiau. Li pasiar ti yudamm dukii a u tee Yennu Niganntɔɔ Masia nae. 27 Ti mi jɔɔ na nba nyii siaminba, ŋaan Yennu Niganntɔɔ Masia na-i taŋŋi baar, sɔɔ kan bann waa nyii siami." 28 Yiisa nba want niib Yennu jiantu ŋasaakak ni na, ki u tan pak sanpaapo ki yetib a, "I dukii nan i min bonŋann, ki bia dukii a i mi maa nyii sian. N ki baar n mɔŋ baaru kaa. Daanɔ nba tumin na, ŋɔɔe tee barmɔnii; ki i ki miu. 29 Ŋaan min miu, kimaan n nyii u boore, ŋɔɔe tumin." 30 Ŋanne ki bi ji yiab a bin soorɔ, ŋaan bi sɔɔ ki soorɔ, kimaan u sooru yoo daa din ki baari. 31 Nibur na ni bonchiann din teenɔ yada, ki boi bi leeb a, "Yennu Niganntɔɔ Masia na-i taŋŋi baar, u saa tun toonjaana ki gar jɔɔ na yara?" 32 Ki Farisiinba na gbat niib na burin ki jiin Yiisa po, ki ŋamm nan Yennu jiantu yudamm tun Yennu jiantu ŋasaakak guura a bin saan ki soor Yiisa. 33 Ŋaan ki Yiisa bet nibur na a, "N sii be nani yoo waaminnae, ki li poorpo ki n ŋmat ki saan wunba tumin na peŋ. 34 I tan saa lon n boor, ŋaan kan lami, kimaan siaminba ki n tan sii be na, i kan fit baar leŋi." 35 Ki Juu teeb na boi bi leeb a, "U yaa wun tan saan lee, ki ti kan lau? U yaa wun tan saan Griik doi ni, siaminba ki Juu teeb be na, kii sakii want Griik teeb na amii? 36 Waa yet a ti tan saa lon u boor ŋaan kan lau, ki bia tan kan fit saan siaminba ki u sii be na, li paak tee bee?" 37 Tɔn, jaamm maŋ gbennu daar din tee dajaanne. Li daar maŋe ki Yiisa fiir set ki pak sanpaapowa a, "Wunba ki nyun-nyukiru gbatɔ, wun baar n boor ki tan nyu, 38 kimaan Yennu gbouŋ yet a 'Wunba teenin yada, manfoor nyun sii tɔ nyun-kpanae ki nyi u par ni.'" 39 Yiisa nba din piak na, u din want Yennu Seyeeŋ poe; ki binba teen Yiisa yada na yaa bin tan la Seyeeŋ maŋ. Li yoo na Yennu daa din ki tur niib Seyeeŋ maŋi, kimaan u daa din ki donn Yiisa. 40 Niib bonchiann nba din be nibur na ni ki gbat ki u yet nna maŋ, ki bi yet a, "Jɔɔ na set tee Yennu sɔkiniie nan barmɔnii," 41 ki siab yaa, "U tee Yennu Niganntɔɔ Masiae," ki leeb mun yaa, "Yennu Niganntɔɔ Masia na kan nyi Galilii. 42 Yennu gbouŋ wann a Masia na tan sii tee Defid yaaboonne, ki bi bia tan saa marɔ Betlehem doo nba tee ŋɔɔ Defid doo na nie." 43 Ki niib na ji mɔk dudukit jiak jiak ki jiin Yiisa po. 44 Ki siab bia loon bin soorɔ, ŋaan ki bi sɔɔ ki soorɔ. 45 Li poorpoe ki guura na ji ŋmat Yennu jiantu yudamm nan Farisiinba na boor; ki bi boib a, "Bee teen ki i ki jen nanɔ?" 46 Ki guura na jiin a, "Sɔɔ daa ki mi pak mabooru nba ki jɔɔ na piak na." 47 Ki Farisiinba na boib a, "Ki u kpannii mune? 48 I tan mi la ki ti yudamm koo Farisiinba sɔɔ teenɔ yada-a? 49 Ŋaan nigbouŋ na nba ki mi Yennu sennu na, mɔpor be bi paak." 50 Ki Farisiinba maŋ ni yenɔe tee Nikodemus. Ŋɔɔe tee daanɔ nba din saan a wun saa la Yiisa na; ki u betib a 51 "Ti sennu ki wann nan ti bu nirɔ buut ki biirɔ, ŋaan daa ki gbat u mɔb ni ki bann waa tun linba." 52 Ki bi boiɔ a, "A mun tee Galilii nirɔ-ee? Gotir Yennu gbouŋ ni. A saa la nan Yennu sɔkinii ki mi nyii Galilii tiŋ ni."

Jɔɔnn 8

1 [Li poorpoe ki sɔɔ kur kun, ŋaan ki Yiisa doo Olif Tiinii kunkonn na paak. 2 Ki li yent sanyapob ni, ki u ŋmat kɔɔ Yennu jiantu ŋasaakak na ni; ki niib bonchiann tikir baar lintɔ, ki u kar ki wantib. 3 Ŋanne ki sennu wannteeb nan Farisiinba baar nan poo nba tun bonchonchontoonn, ki te ki u set Yiisa tɔɔnn, 4 ŋaan ki bi yet Yiisa a, "Wanntɔɔ, ti la poo na, ki u tuun chonchonn toonne, ki ti soorɔ li yoo na. 5 Ti sennu ni, Moses din senn a li poobooru ŋan ki bin jaatɔ tanae ki kpiu, ki fin ŋarin yaa bia?" 6 Bi din yet nna, ki loon bin kpar Yiisae, ki fit lian la u biit. Ki Yiisa tibin ki jii niibir ki sɔb tiŋ ni. 7 Baa bia lek see ki boiɔ buboit yoo nba na, ki u tibit ki betib a, "Wunba ki mi tun toonbiit, li yɔɔ n sint jaau tann," 8 ŋaan ŋamm tibin ki sɔbin tiŋ ni. 9 Baa gbat ki u yet nna maŋ, ki bi yat yenɔ yenɔ, ki nikpera na dɔŋ yaat. Ki Yiisa biar, ki poo na bia daa see u tɔɔnn. 10 Ki u tibit boiɔ a, "N niipoo, bi be lia? Sɔɔ ki biar a wun pak biiranii?" 11 Ki u jiin a, "Chanbaa, sɔɔ ki biari." Ki Yiisa yetɔ a, "N mun kan pak biirani. I kun. A ji daa mi tuun toonbiiti."] 12 Ŋanne ki Yiisa bia ŋamm pak nan niib Yennu jiantu ŋasaakak ni a, "Mine tee tingbouŋ na niib yentu, ki daanɔ nba waan, ŋɔɔe sii mɔk yentu nba yentir u binbeŋ, ki u kii turin bunbɔnn ni." 13 Ki Farisiinba na bia yetɔ a, "Faa piak ki want a mɔŋ po na, ŋaan li tee yanne." 14 Ki Yiisa betib a, "Mi-i lekii piak ki want n mɔŋ poie, ŋaan maa yeen linba, li tee mɔniie, kimaan min mi maa nyii siaminba, ki bia mi maa saa siaminba. Yimm ŋarin ki mi maa nyii siami, ki bia ki mi maa saa siami. 15 Yimm gorii nirɔ nanyer poe ki bu u buut, ŋaan min ŋarin ki bu sɔɔ buuti. 16 Mi-i poŋii yaa n bu nirɔ buut gbaa, n saa bu u buut nan barmɔniie, kimaan n ki bu buut n kuukɔɔ kaa, ŋaan n Baa nba tumin nae be nanin. 17 Tɔn, li poŋ sɔb i sennu ni a niib banlee siara-i jamii, ŋanne tee barmɔnii. 18 N piak want n mɔŋ po, ki n Baa nba tumin na mun bia piak want n po nnae." 19 Ki bi boiɔ a, "A baa maŋ be lee?" Ki Yiisa jiimm a, "I ki mimi, ki tan boi n Baa. I-i bonni mimie, i bia bo sii mi n Baa." 20 Yiisa din pak maan na yoo nba ki u din want niib; ki bi din be Yennu jiantu ŋasaakak ni siaminba ki bi sent Yennu piinii lakir nae; ŋaan sɔɔ ki soorɔ, kimaan u sooru yoo daa ki baari. 21 Ki Yiisa bia ŋamm yetib a, "N saa yaata, ki i tan saa lomin ki kan lami. I tan saa kpo ŋaan poŋ ki la nyikinchabi; i bia tan kan fit saan maa saa siami." 22 Ŋanne ki Juu teeb na yet a, "U yaa ti kan fit saan waa saa siami. U yaa wun kpi u mɔŋe?" 23 Ki Yiisa jiin a, "Yimm tee tiŋ na ni yabe, ŋaan min tee sanpaapo yɔɔe; yimm nyii tingbouŋ na nie, ŋaan min ki nyii tingbouŋ na ni kaa. 24 Li paake te ki n yeti maa i saa kpo ŋaan poŋ kan la nyikinchab na; ki li-i tee ki i ki teen yada nan n tee maa tee wunbae, i set saa kpo ŋaan poŋ ki la nyikinchabi." 25 Ki bi boiɔ a, "A tee ŋmee munii?" Ki u jiimm a, "N tee wunba ki n tuu yɔɔ beeri nae. 26 N bo sii fit piak maan bonchiann ki biiri; ŋaan wunba tumin nae tee barmɔnii daanɔ; ki n beer tingbouŋ na niib linba ki n gbia u boor nae." 27 Ŋaan niib na din ki mi nan u piak u Baa Yennu poe. 28 Li paak ki Yiisa betib a, "Yoo nba ki i saa jii min Nisaarik Bik ki donn sanpaapo na, li yooe ki i tan saa bann nan n tee maa tee wunbae, ki i bia saa bann nan n ki tuun siar nan n mɔŋ yiikoo, ŋaan n bia yeen linba ki n Baa wannin a n yete. 29 Ŋɔɔ nba tumin nae be nanin. U ki nyikitin, kimaan n tuun linba gboot u numme." 30 Niib bonchiann nba din gbat ki Yiisa pak nna maŋ, ki bi teenɔ yada. 31 Ŋanne ki Yiisa yet Juu teeb nba teenɔ yada na a, "Li-i tee ki i saak n mɔmaan, i set tee n poorpoweiteeb nan barmɔniie, ki i bia saa bann barmɔnii wannu, 32 ki barmɔnii wannu maŋ saa nyinni daabsin ni." 33 Ki bi yetɔ a, "Ti tee Abraham yaa-boonae, ti ki mi teen sɔɔ daaba. Nlee ki a yaa ti tan saa nyi daabisin ni?" 34 Ki u yetib a, "Barmɔniie ki n beeri na, sɔɔ kur nba tuun toonbiit, u tee biit daabire. 35 Daabir ki tee ŋaak yɔɔ kaa, ŋaan ŋaak bik ŋarin tee ŋaak yɔɔe yoo kur. 36 Li-i tee min Yennu Bija nyinti daabisin niie, i set saa nyi nan barmɔniiwa. 37 N mi nan i tee Abraham yaaboonae, ŋaan ki i lek yiab a yin kpin, kimaan n maan maŋ ki kɔɔ i tuba ni. 38 Maa tuu be n Baa peŋ ki laat linba, ŋanne ki n piak, ŋaan yimm tuun linba ki i baa beti a yii tuun nae." 39 Ki bi jiinɔ a, "Ti baa tee Abrahame." Ki Yiisa betib a, "Li-i tee ki i bo tee Abraham waas nan mɔniie, i bo sii tuun Abraham toonbooru nae, 40 ŋaan ki mɔtana ki i yiab a yin kpin, ŋaan ki n tee nirɔ nba beeri barmɔnii nba ki n gbat Yennu boor na. Abraham ŋarin din ki teen nna. 41 Ŋaan yimm tuun i baa nba tuun biaŋinbae." Ki bi jiin a, "Timm ki tee kpenŋmia kaa. Ti mɔk baa yenɔ-kɔɔe, ki ŋɔɔe tee Yennu." 42 Ki Yiisa betib a, "Li-i bonni tee ki Yennu mɔŋ tee i baa, i bo sii loonima, kimaan n nyii ŋɔɔ Yennu peŋe ki baar nna. N bia ki baar nan n mɔŋ yaak kaa, ŋaan ŋɔɔe tumin. 43 Bee teen ki i ki bann n maan na paaki? kimaan yaa ki fit gbiin n maan maŋ na. 44 I tee i baa Sintaanii waase, ki loon yii tuun i baa maŋ yanbɔɔtoona. Pinpiik niwa u poŋ tee nikpiiruko, ki bia fɔk nan barmɔnii, kimaan barmɔnii kaa u ni nan waama. Ki wuu faar faak li poŋ tee u toonkpere, kimaan waa tee faak daanɔ na. Fai kur nyi u boore. 45 Maa beeri barmɔnii nae te ki i ki teenin yada. 46 I ŋmee saa fit wann n biiti? Aaii, sɔɔ kaa. Maa beeri barmɔnii biaŋinba na, bee teen ki i ki teenin yada? 47 Wunba nyii Yennu boor, ŋɔɔe gbia Yennu maan; ŋaan yaa ki nyii Yennu boor na, li paake ki i ki gbia Yennu maan maŋi." 48 Ŋanne ki Juu teeb na yet Yiisa a, "Taa yet a, 'Fin Samaria nirɔ na, narinbiiuk be a ni' na, li ki tee nna?" 49 Ki Yiisa jiin a, "Narinbiiuk kaa n ni. Min baakit n Baa Yennu, ŋaan ki yimm ŋarin sianin. 50 Min kaa loon baakir ki teen n mɔŋi. Yennue loon ki niib n turin baakir, ki ŋɔɔe tee buut daanɔ. 51 Barmɔniie ki n beeri na, daanɔ nba saak n maan, u kan mi kpo." 52 Ki Juu teeb na betɔ a, "Mɔtana ti set bann nan narinbiiuk be a ni. Abraham din kpowa, ki Yennu sɔkiniinba bia kpowa, ŋaan ki a yaa daanɔ nba saak a maan kan mi kpo. 53 Ti chanbaa Abraham nba din kpo na, a mi a a cheeu-ee? Yennu sɔkiniinba bia din kpowa. I got! Fin mi a a tee ŋmee?" 54 Ki Yiisa jiimm a, "Mi-i bonni dontir n mɔŋie, li bo sii tee yanne, ŋaan wunba dontirin nae tee n Baa. Ŋɔɔe tee daanɔ nba ki i yaa u tee i Yennu na. 55 I ki miu, ŋaan min ŋarin miu. Li-i bonni tee ki n yaa n ki miu, n bo saa teen faak daanɔ nan yimm nawa. Ŋaan n miu, ki bia saak u maan. 56 I chanbaa Abraham din mɔk parpeenn bonchiann, nan waa yaa wun tan la yoo nba ki n saa sik tingbouŋ na ni; ki u set tan la yoo maŋa, ki li maŋɔ." 57 Ki Juu teeb na boiɔ a, "A daa ki baar binpiiŋŋmu, ŋaan din la Abrahamii?" 58 Ki Yiisa jiin a, "Barmɔniie ki n beeri na, baa din tan maar Abraham na, ŋaan sɔɔ ki min ŋarin kpan be-e." 59 Ŋanne ki bi ji tɔkii tana a bin jaatɔ ki kpiu; ki u lir ki nyii Yennu jiantu ŋasaakak na ni.

Jɔɔnn 9

1 Li poorpoe ki Yiisa din gɔrin saa, ki tan la jɔɔ nna, ki u tee jɔɔŋ u maaru niwa. 2 Ki u poorpoweiteeb boiɔ a, "Chanbaa, ŋmee toonbiite te ki bi mar jɔɔ na jɔɔŋi? Li daa tee u mɔŋ toonbiit amii u damme?" 3 Ki u jiimm a, "U toonbiit paak kaa te ki u jɔɔni. Li mun bia ki tee u damm toonbiit paak kaa, ŋaan u jɔɔn a Yennu n te ki wun nyɔɔnte, ki niib n la Yennu toonjaann. 4 Yoo nba ki yentu daa be na, li kpaa talase ki tii tuun wunba tumin na toona, kimaan nyiɔk baat, ki sɔɔ tan kan fit tun toonni. 5 Maa daa be tingbouŋ ni na, n tee tingbouŋ na niib yentue." 6 Waa yet nna maŋ poorpoe ki u siir mɔsant tiŋ ni, ki buun tant, ki pɔr jɔɔŋ na ninbina, 7 ŋaan betɔ a, "I saa Siloam biɔŋ ni ki saa yibir." (Siloam d paak tee "Te.") Ki u saan ki saa yibir, ki nyɔɔnt, ki kun. 8 Ŋanne ki u leeb nan niib nba tuu laatɔ ki u tee miatɔ na boi bi leeb a, "Jajɔɔŋ nba tuu mei na kaa na-a?" 9 Ki siab yaa, "Ŋɔɔe," ki leeb yaa, "Aaii, ŋɔɔ kaa. U naanɔe." Ŋanne ki jɔɔ maŋ tiɔŋ yet a, "Mine na." 10 Ki bi boiɔ a, "A teen nlee ki tan nyɔɔnti?" 11 Ki u jiimm a, "Jɔɔ nba ki bi yiu Yiisa na, ŋɔɔe buun tant ki pɔr n ninbina, ŋaan betin a mii saa Siloam biɔŋ ni ki saa yibir; ki n saan ki saa yibir ki nyɔɔnt." 12 Ki bi boiɔ a, "U be lee?" Ki u yetib a, "N ki mi." 13 Ŋanne ki bi jii jɔɔ maŋ ki saan nanɔ Farisiinba boor. 14 Daar nba ki Yiisa buun tant ki nyɔɔnt jɔɔŋ na din tee foon daare. 15 Ki Farisiinba na bia ŋamm boi jɔɔ na a u teen nlee ki nyɔɔnti. Ki u betib a, "Yiisae buun tant ki pɔr n ninbina, ki n yibir ki nyɔɔnt." 16 Ki Farisiinba na siab yet a, "Yiisa ki nyii Yennu boor kaa, kimaan u tuun toonn foon daar. Ŋanne want nan u ki dia foon daar sennu." Ki bi siab mun boi a, "Nlee ki biitdaanɔ sii fit tuun toonjaana na booru?" Ki bɔkitu baar Farisiinba na sinsuuk ni. 17 Li paak ki bi ŋamm boi jɔɔ na a, "Jɔɔ na nba nyɔɔnta na, a dukii nlee u po?" Ki u bia jiimm a, "U tee Yennu sɔkiniie." 18 Ki li lek paar nan Juu teeb yudamm na n teen yada nan bi marɔ jɔɔŋe ki u tan nyɔɔnt. Ŋanne ki bi yiin u damm, 19 ki tan boib a, "U tee i bijae-ee? I set yaa i marɔ jɔɔŋe? Ki li teen nlee ki u ji laat mɔtana?" 20 Ki bi jiin a, "Ti mi nan u tee ti bija ŋarime, ki ti bia mi nan ti marɔ jɔɔŋe. 21 Ŋaan ti ki mi laa teen biaŋinba ki u tan nyɔɔnt, ti bia ki mi wunba nyɔɔntɔ. U mɔŋ ji ki tee bik kaa. Boimɔ man. U saa fit pak u mɔŋ paaka." 22 U damm din yet nna maŋ, kimaan bi tiin Juu teeb yudamm na jaŋmaanii, kimaan yudamm maŋ poŋ taan mɔb ki yet a wunba yaa Yiisae tee Yennu Niganntɔɔ Masia, see ki bi nyinnɔ bi Yennu jiantu ni. 23 Li paak te ki u damm din yaa u ki tee bik kaa, a bin boi u mɔŋ. 24 Li taar munlee nie ki bi bia ŋamm yiin jɔɔ nba tuu tee jɔɔŋ ŋaan tan nyɔɔnt na, ki tan betɔ a, "I teen Yennue baakir nan niipoouk; kimaan ti mi nan Yiisa ŋarin tee biitdaanɔe." 25 Ki jɔɔ na yetib a, "Waa tee biitdaanɔ koo waa ki tee, n ki mi. Ŋaan bonyennkɔɔe ki n mi: n tuu tee jɔɔŋe, ŋaan mɔtana n ji laat." 26 Ki bi ŋamm bia boiɔ a, "U teen nlee ki nyɔɔntani?" 27 Ki u jiimm a, "N poŋ betiiwa, ŋaan ki i ki gbati. Bee ki i jin loon ki n betiini? I mun loon ki i teen u poorpoweiteebe?" 28 Ŋanne ki bi wutoor ji doo, ki bi sukiiɔ, ŋaan betɔ a, "Fine tee nirɔ maŋ poorpoweitɔɔ, ŋaan timm ŋarin tee Moses poorpoweiteebe. 29 Ti mi nan Yennu din piak nan Moses, ŋaan nirɔ na ŋarin, ti ki mi waa nyii siami." 30 Ki jɔɔ nba nyɔɔnt maŋ yetib a, "Bee paruko mani, ki i tan yaa i ki mi waa nyii siami, ŋaan u nyɔɔnt n nuniiwa. 31 Ti mi nan Yennu ki gbia biitdamm miaru, ŋaan gbia damm nba jiantirɔ ki tuun waa loon biaŋinbae. 32 Laa nyii durinya piinu niwa, ti daa ki mi gbat a sɔɔ nyɔɔnt wunba ki bi marɔ jɔɔŋi. 33 Li-i bonni tee ki jɔɔ maŋ ki nyii Yennu boori, u bo kan fit tun bakitnauŋ toonn na booru." 34 Ki bi jiin a, "Fin nba ki bi mara nan biit na po, a tee ŋmee ki want timmi?" Ki bi nyinnɔ bi Yennu jiantu ni. 35 Yiisa nba gbat a bi nyinnɔ bi Yennu jiantu ni na, ki u lomɔ ki tan lau, ki boiɔ a, "A teen Nisaarik Bik na yadawa-a?" 36 Ki u boiɔ a, "Chanbaa, ŋmee tee Nisaarik Biki? Betirin waa tee wunba, ki n teenɔ yada." 37 Ki Yiisa betɔ a, "A poŋ lauwa. Ŋɔɔe tee min nba piak nana na." 38 Ki jɔɔ na yetɔ a, "N Yomdaanɔ, n teena yadawa," ŋaan gbaan u tɔɔnn ki jiantɔɔ. 39 Ŋanne ki Yiisa yet a, "N baar tingbouŋ na ni a n bu niib buut, ki bia yent binba ki mɔk ninyentir na numm poe, ŋaan dɔkin binba mɔk ninyentir numm po." 40 Ki Farisiinba siab nba be leŋ na gbat ki u yet nna, ki bi boiɔ a, "A yaa ti mun ki mɔk ninyentire?" 41 Ki u jiimm a, "Li-i bonni tee ki i ki mɔk ninyentiri, i bo kii mɔk biiti, ŋaan yaa sat yaa i mɔk ninyentir na, i mɔk biit."

Jɔɔnn 10

1 Ki Yiisa ŋamm yetib a, "Barmɔniie ki n beeri na, nirɔ nba ki tɔkin pelook tammɔb ki kɔɔ, ŋaan doo joonn ki kɔɔ, li yɔɔe tee nanyukɔɔ. 2 Ŋaan nirɔ nba tɔkin pelook na tammɔb ki kɔɔ, li yɔɔe tee pei maŋ kpaarik. 3 U-i taŋŋi baat a wun kɔɔ, tammɔguurɔ na saa loote, ki wun kɔɔ; ki u yi u mɔŋ pei na sana, ki bi gbia u mɔb, ki u nyintib. 4 Wuu nyinn u mɔŋ pei kur yoo nba, u tuu gar bi tɔɔnne, ki bi waa u poor, kimaan bi mi u kunkɔr. 5 Ŋaan bi kan wei saamɔ ŋarimi, see ki bi chiar, kimaan bi ki mi u kunkɔri." 6 Yiisa din yimm barjouk na, ŋaan ki bi ki bann li paaki. 7 Li paak, ki u bia ŋamm betib a, "Barmɔniie ki n beeri na, mine tee pelook na tammɔb. 8 Binba kur gar n tɔɔnn ki baar na tee nanyukibe nan fatiteeb, ki pei na ki gbia bi mɔbu. 9 Mine tee tammɔb na, ki daanɔ nba tɔkin n ni ki kɔɔ, ŋɔɔe saa la tinnu, ki sii yɔɔ gaar kɔɔ, ki ŋmat nyi, ki laat jeŋant. 10 Nanyukɔɔ ŋarin baat a wun tan jan pei nae, ki bia kpib, ki bia biirib. Mine baar a bin la manfoor nba tee manfoor nan barmɔnii. 11 "Mine tee pekpaaŋaŋ, ki pekpaaŋaŋe kpenn u pei paak. 12 Ŋaan wunba kpaar pei likirii paak, ki ki tee pekpaarik nan mɔnii, ki bia ki yen pei na, li-i tee ki u la kinkatir baat yoo nba, see ki u chiar ŋaan nyik pei na; ki kinkatir na n ji baar ki soorib, ki binba tenn na n yat. 13 U tuu chiare, kimaan u kpaar pei na likirii paake, ki u baka kaa pei na po. 14 Mine tee pekpaaŋaŋ. N Baa Yennu nba mi-n, ki n mun miu na, li mun bia tee nnae ki n mi n pei, ki bi mun mi-n, ki n saa chibin n saaŋmaŋ bi paak. 16 Pelei be ki tee n yab, ŋaan ŋamm ki tee pelook na ni yabi. See ki n baar nan ŋamm mun biak, ki bi saa sak n mɔb, ki bi kur ji sii tee pebooryeŋ, ki mɔk pekpaaryeŋ kɔɔ. 17 "N Baa Yennu loonin, kimaan n yaa n nyinn n manfoore, ki lin te man ŋamm lar li poor po. 18 Sɔɔ kaa ki saa nyinn n manfoor maŋi, ŋaan n mɔŋe yaa n nyinnir, kimaan n mɔk yiikoo ki saa nyinnir, ki bia mɔk yiikoo ki tan saa lar. Nnae ki n Baa betin a n tun." 19 Waa yet nna yoo nba ki Juu teeb yudamm na bia ŋamm bɔkit; 20 ki bi bonchiann yaa, "Narinbiiuk be u ni, ki waatuk bia mɔkɔ; ki bee teen ki i gbiintir u maami?" 21 Ki leeb mun yaa, "Nirɔ nba ki narinbiiuk be u ni kii piak nna. Nlee ki nirɔ nba ki narinbiiuk be u ni saa fit nyɔɔnt jɔɔŋi?" 22 Li poorpoewa ki bi tan mɔk bi jaamm nba ki bi teen Yennu niipoouk bi jiantu ŋasaakak paak na. Jaamm maŋ din be Jerusaleme. Li yoo din tee waat yooe; 23 ki Yiisa din somm lin barintir nba ki bi yir Solomonn barintir na ni, ki li be Yennu jiantu ŋasaakak ni. 24 Ki Juu teeb yudamm din baar ki tikir lintɔ, ŋaan boiɔ a, "A yaa lin yukir nleewa, ki tin tan bann nan a tee Yennu Niganntɔɔ Masia? Li-i tee ki a tee ŋɔɔie, fan betit barmɔnii." 25 Ki Yiisa jiimm a, "N poŋ daan betiiwa, ŋaan ki i ki teenin yada. Toona nba ki n tuun n Baa Yennu yiikoo ni nae want maa tee wunba. 26 Ŋaan yaa ki tee n pei na paak ki i ki teenin yada. 27 N pei saak n mɔb, ki n mib, ki bi waan, 28 ki n teemm manfoa nba kaa gbennu, ki bi kan mi kpo, ki sɔɔ bia kaa ki saa fit fatib n nuu ni. 29 N Baa nba jiib ki teen n nuu ni na, ŋɔɔe gar sɔɔ kur. Li paak ki sɔɔ kan fit fatib n Baa maŋ nuu ni. 30 Min nan n Baa maŋ tee yomme." 31 Li yoo na ki Juu teeb yudamm na tɔkii tana a bin jaatɔ ki kpiu. 32 Ki Yiisa yetib a, "I poŋ la ki n tun toonŋana bonchiann, linba ki n Baa Yennu yaa n tun, ki toonŋana maŋ ni, lann paake te ki i ji yaa i jaatimi?" 33 Ki bi jiin a, "Ti ki loon ki tin jaata tana toonŋansiar paak kaa, ŋaan faa jikit a mɔŋ ki yek nan Yennu na paak. A kpan tee nirɔe, ŋaan yi a mɔŋ Yennu, li tee bonbilankante." 34 Ki Yiisa yetib a, "Li sɔb i mɔŋ sennu nba be Yennu gbouŋ ni na a ŋɔɔ Yennu yet a barbuura na tee u waase, 35 ki ti mun mi nan Yennu gbouŋ kan faar faak faba; ki ŋɔɔ Yennu yib u waas, kimaan ŋamme tee niib nba ki u din pak u maan ki turib na. 36 Ŋaan min ŋarin, n Baa Yennue gannin ki tumin tingbouŋ na ni; ki maa yet a n tee Yennu Bija na, nlee ki i yaa li tee bonbilankanti? 37 Li-i tee ki n ki tuun n Baa Yennu toonaie, ŋann i daa tee-n yada. 38 Ŋaan li-i tee ki n tuun ŋɔɔ Yennu toona maŋie, li-i lekii tee ki i ki teenin yada, ŋaan yin teen n toona maŋ yada. Ŋanne ki i saa bann barmɔnii nan n Baa Yennu be n ni, ki n mun bia be u ni." 39 Ŋanne ki Juu teeb na yaa bin soorɔ; ki u buut nyii, 40 ki ŋmat poot Jɔɔdann mɔk-pootir, ki saa be siaminba ki Jɔɔnn din tuu wuur niib Yennu nyunwuru na. 41 Niib bonchiann din baar Yiisa peŋ, ki piak nan bi leeb a, "Jɔɔnn ŋarin din ki tun toonjaansiari, ŋaan linba kur ki u din piak ki jiin Yiisa po na tee barmɔniie." 42 Ki niib bonchiann din teen Yiisa yada leŋ.

Jɔɔnn 11

1 Tɔn, jasɔɔ din be Betani, ki u sann tee Lasarus, ki din tan yiar. Betani din tee Meeri nan u yɔɔrɔ Maata dooe. 2 Meerie din tee daanɔ nba but tulaarii Yiisa taa paak, ŋaan jii u yut ki fiar na. Ki Meeri maŋ naabik Lasarus yiar. Waa yiar na, 3 ki u niipoob Meeri nan Maata tun toomii, a wun saan ki bet Yiisa a, "Ti Yomdaanɔ, a naasinyɔɔk nba ki a mantik loonɔ na yiare." 4 Yiisa nba gbat nna yoo nba ki u yet u poorpoweiteeb na a, "Lasarus nba yiar na, yiaru maŋ ki tee u manfoor terik kaa na, ŋaan li tee linba ki niib saa dont Yennu sann li paake, ki bia saa dont min Yennu Bija sann mun." 5 Tɔn, Yiisa lek din loon Maata nan Meeri nan Lasarus, 6 ŋaan waa gbat a Lasarus yiar na, ki u biar daa ŋanlee ki daa be leŋ. 7 Li poorpoe ki u tan bet u poorpoweiteeb na a, "Ŋaant man ki tin ŋmat saan Judea." 8 Ki bi yetɔ a, "Chanbaa, daa ŋanlelee nae ki Juu teeb yudamm na daan yaa bin jaata tana, ŋaan ki a bia yaa ti ŋmat leŋii?" 9 Ki Yiisa betib a, "Yentu tuu be sanyiɔk nie ki saa tuu daajoouk. Li-i tee ki nirɔ somm yonnu ni, u kan gbiati, kimaan waa laat tingbouŋ na yentu na. 10 Ŋaan wu somm nyiɔk, u gbiatire, kimaan yentu kaa." 11 Yiisa din yet nnae, ŋaan bia yet a, "Ti yɔɔk Lasarus gɔɔnte, ŋaan n saa saan fiinɔwa." 12 Ki u poorpoweiteeb na yetɔ a, "Ti Yomdaanɔ, li-i tee ki u gɔɔntie, u saa la laafiawa." 13 Yiisa din want nan Lasarus kpoe, ŋaan ŋamm din mi a u want a Lasarus gɔɔnte. 14 Li paak din te ki u ji betib gbenn a, "Lasarus kpowa, 15 ŋaan i paak n mɔk parpeenn nan maa daan kaa u boor na, kimaan ŋanne saa te ki i teenin yada. Ŋaant tin saan u peŋ man." 16 Ki Tomas, wunba ki bi yiu Jaak na yet u leeb maŋ a, "Ŋaant ki ti saan man. Li-i sakii tee kuun, timm nan ŋɔɔ n kpo." 17 Yoo nba ki bi tan per Betani na, ki u gbat a baa pii Lasarus, li daa ŋannae na. 18 Betani din ki fɔk nan Jerusalemi; li fɔkint din tee nan maar ŋanlee nae. 19 Li paak teen ki Juu teeb bonchiann din baar Maata nan Meeri peŋ, a bin maan bi para, kimaan bi naabik na kuun paak. 20 Maata nba tan gbat a Yiisa baat yoo nba ki u nyii chetɔ, ŋaan ki Meeri ŋarin biar be ŋaak ni. 21 Ki Maata bet Yiisa a, "N Yomdaanɔ, li-i tee ki a daan bo be nna na, n naabik na daan bo kan kpo. 22 Ŋaan n mi nan mɔtana gbaa, li-i tee ki a miar Yennu linba kur po, u saa turawa." 23 Ki u betɔ a, "A naabik na saa fiir kuun niwa." 24 Ki Maata jiinɔ a, "N mi nan u tan saa fiir kuun ni durinya gbennu daar, daar nba ki kpeemm tan saa fiir kuun ni na." 25 Ki Yiisa betɔ a, "Mine fiint kpeemm ki teemm manfoa. Daanɔ nba teenin yada, ŋɔɔe sii mɔk manfoor, wu lekii kpo gbaa; 26 ki daanɔ nba mɔk manfoor ŋaan teenin yada, u kan mi kpo. A teen yada nan linba nawa-a?" 27 Ki u jiin a, "N Yomdaanɔ, nn, n teen yada nan fine tee Yennu Niganntɔɔ Masia, ki bia tee ŋɔɔ Yennu Bija, wunba ki ti tuu daan u baaru na." 28 Maata nba yet nna maŋ, ŋaan ŋmat kun, ki saa yiin u waarɔ Meeri soon nna, ki betɔ a, "Wanntɔɔ na be nawaa, ŋaan yiia." 29 Meeri nba gbat nna yoo nba ki u fiir yiama, ki saan u boor. 30 Ki sɔɔ Yiisa daa ki baar digbanbik maŋi, ŋaan daa be siaminba ki Maata chetɔ na. 31 Ki Juu teeb nba be nan Meeri ŋaak ni ki maant u par na nba la ki u nyii yian na, ki bi mun wei nyii, kimaan bi mi a u saa kaauk boore a wun saa bui kpemɔnii. 32 Meeri nba baar Yiisa boor ki lau yoo nba ki u gbaan u tɔɔnn, ŋaan yetɔ a, "N Yomdaanɔ, li-i tee ki a daan bo be nna na, n naabik na daan bo kan kpo." 33 Ki Yiisa la ki u mɔ, ki Juu teeb nba weiɔ ki baar na mun mɔ, ki ninbaauk soor ŋɔɔ Yiisa bonchiann, ki u kurii u par ni, 34 ki tan boib a, "I piiu liapoe?" Ki bi betɔ a, "Ti Yomdaanɔ, baat ki tan got." 35 Ki Yiisa bui. 36 Ki Juu teeb na yet a, "Gotir man waa jia loon Lasarus biaŋinba." 37 Ki siab yaa, "Daanɔ nba daan nyɔɔnt jɔɔŋ na, u daan bo kan fit te ki Lasarus daa kpennii?" 38 Ki Yiisa par biir bonchiann, ki u saan kaauk na boor. Kaauk na din tee tanfiɔko, ki katanu bii li mɔb. 39 Ki Yiisa betib a, "Biitir kaauk maŋ man." Ki Maata, wunba tee kpeemɔ na niipoo na, yetɔ a, "N Yomdaanɔ, li sii pɔi hei, kimaan baa piiu, daa ŋannae na." 40 Ki Yiisa boiɔ a, "N bo ki beta a li-i tee ki a teenin yada, a saa la Yennu nba mɔk panchiɔŋ biaŋinba-a?" 41 Ŋanne ki bi biit kaauk na. Ki Yiisa gokit sanpaapo, ŋaan yet a, "N Baa Yennu, n teena niipoouk nan faa sak n miaru na. 42 N mi nan yoo kur a saak n miaru, ŋaan n yet nna, kimaan n loon nibur nba be nna na n gbat ki teen yadae nan fine tumin." 43 Waa yet nna maŋ, ki u yiin sanpaapowa a, "Lasarus, nyimin na." 44 Ki kpeemɔ na nyii; ki katiŋ fin u taa nan u nii, ki chinchenbik boob u numm po. Ki Yiisa betib a, "Fintir katiŋ maŋ ki ŋaau." 45 Ki Juu teeb bonchiann nba din baar a bin maan Meeri par na nba la linba ki Yiisa tun na, ki bi teenɔ yada. 46 Ŋaan ki bi siab saan Farisiinba peŋ, ki saa betib linba Yiisa tun. 47 Li paak ki Farisiinba maŋ nan Yennu jiantu yudamm yiin tintaankaanu, ki bi tikir ki boi leeb a, "Jɔɔ na tuun toonjaana bonchiann. Ti saa teen nlee? 48 Ti-i ŋaan ki u ŋammit tuun nna ki pukii, sɔɔ kur saa teenɔ yadawa, ki Rom teeb n baar ki yeer Yennu jiantu ŋasaakak na, ŋaan bia boont ti niib." 49 Ki bi yenɔ nba ki bi yiu Kayafas, ki u tee Yennu jiantu yudaanɔ li binn ni na, yetib a, "Yimm ŋarin ki mi siari. 50 I ki mi nan li ŋan ki niyenɔkɔɔ n gaar niib na kur paak ki kpo, ki gar ti niib kur n tan boontii?" 51 U din ki pak linba na nan u yan kaa, ŋaan waa din tee Yennu jiantu yudaanɔ binn maŋ ni na paak, ki Yennu te ki u pak masɔkinkar na, a Yiisa tan saa gaar Juu teeb paak ki kpo. 52 Ŋaan li ki tee Juu teeb kuukɔɔ kaa ki u tan saa gaar bi paak ki kpo, ŋaan nan binba kur tee Yennu niib ki yat be tingbouŋ na ni nae ki u saa gaar bi paak ki kpo, ki bin taan leeb kii tee yomm. 53 Laa nyii li daar ki saa ki Juu teeb yudamm na lor a bin kpi Yiisa. 54 Li paak ki u ji din ki somm paanu ni Juu teeb tiŋ ni, ŋaan tan yaat saan doo nba ki bi yi Efraim, ki li kpia kunkoouk na; ki ŋɔɔ nan u poorpoweiteeb ji be leŋ. 55 Tɔn, ki Juu teeb yukitgar tiaru jaamm tan per, ki niib bonchiann nyii digbana ki baar Jerusalem, a bin daa ŋamm bi mɔŋa, ki fit lian teen siir ki di jaamm na. 56 Ki niib na nba tikir Yennu jiantu ŋasaakak ni yoo nba ki bi loon Yiisa ki boi bi leeb a, "I dukii nlee? U set kan baar jaamm na-a?" 57 Ki Yennu jiantu yudamm nan Farisiinba na tur mɔb a, "Wunba mi u boor, wun baar ki tan ŋmaat taar ki tin soorɔ."

Jɔɔnn 12

1 Tɔn, daa ŋanloob din biar nan yukitgar tiaru jaamm n di, ki Yiisa nan u poorpoweiteeb saan Betani, doo nba ki Lasarus be na. Ŋɔɔe ki Yiisa din fiinɔ kuun ni na. 2 Leŋe ki bi din teen jeet, ki Maata jii baar nann ki tan turib; Lasarus din tee bi ni yenɔ nba kar ki di namme. 3 Ki Meeri jii tulaarii saama, linba daauk paar bonchiann. Bi din jii faat nba ki bi yir naade ki teen tulaarii maŋ; ki u jiir ki but Yiisa taapant paak, ŋaan soor u mɔŋ yut ki fiar fiar; ki ŋaak na ji nubir tulaarii na gbimm. 4 Ki Yiisa poorpoweiteyenɔ nba ki bi yiu Judas Iskariot, (ŋɔɔe din tee wunba yaa wun nyi Yiisa poor na,) yet a 5 "Bee teen ki bi bo ki kɔi tulaarii maŋ salimpeena e kobii ŋantaa ki jii li likirii ki tur talasdammi?" 6 Waa din yet nna maŋ, li din ki tee a u baka be talasdamm na ni kaa, ŋaan u din tee nanyukɔɔe. Ŋɔɔe din tee wunba dia likirii pakir ki tuu jaan. 7 Ki Yiisa yetɔ a, "Ŋaantɔ! U teen nna ki guun n piinu daare. 8 Talasdamm sii yɔɔ be nani yoo kura, ŋaan min ŋarin kii yɔɔ be nna kaa." 9 Ŋanne ki Juu teeb bonchiann gbat a Yiisa be Betani, ki bi saan leŋ. Bi din ki saan Yiisa kuukɔɔ paak kaa, ŋaan bi din loon bin saa la Lasaruse mun, wunba ki Yiisa fiinɔ kuun ni na. 10 Li paake ki Yennu jiantu yudamm din lorin a bin kpi Lasarus mun biak. 11 Li din tee Lasarus kuun fiiru paake ki Juu teeb bon-chiann nyik Yennu jiantu yudamm maŋ, ŋaan teen Yiisa yada, ki waau. 12 Li yent sanyiɔko ki nibur nba baar Jerusalem a bin di yukitgar tiaru jaamm na gbat a Yiisa baat. 13 Ki bi ji ŋat biabfaat ki che a bin tookɔ, ki yikin sanpaapowa a, "Hosaana, f Yennu mɔsoŋŋann-ii be daanɔ nba baat Yennu sann ni na paak. Yennu n teen u mɔsoŋŋann timm Israel teeb kpanbar paak." 14 Yiisa poŋ din te ki bi lon boŋewa ki u jak ki baat, nan laa sɔb Yennu gbouŋ ni biaŋinba na a: 15 "Sayɔnn doo teeb, i daa tiin jaŋmaanii. Gotir, i kpanbar jak bonpaaŋe ki baat." 16 Ki u poorpoweiteeb daa ki bann linba na paak li yoo maŋi. Ŋaan Yennu nba din tan donn Yiisa sanpaapo na, ŋanne ki bi ji din tiar nan linba na sɔb Yennu gbouŋ ni ki jiin u po, ki bia tiar nan niib na mun set din teenɔ nnae. 17 Nibur nba din be Yiisa boor Betani, yoo nba ki u yiin Lasarus a wun nyi kaauk ni, ki fiinɔ kuun ni na, din la ki mɔɔnt li barii. 18 Li paak niib bonchiann din chetɔ, kimaan baa gbat ki u tun toonjaann maŋ na paak. 19 Ŋanne ki Farisiinba na yeen bi leeb a, "Ti ji kan fit teen siari. Gotir, tingbouŋ na niib kura waaue." 20 Niib nba din saan Jerusalem a bin saa di yukitgar tiaru jaamm na, Griik siab din be bi ni; 21 ki bi tan saan Filip peŋ, wunba nyii Befsaida nba be Galilii tiŋ ni na; ki yetɔ a, "Chanbaa, ti loon ki ti la Yiisae." 22 Ki Filip mun saan ki saa bet Andru, ki Andru nan Filip ji saan ki bet Yiisa. 23 Ki Yiisa betib a, "Yoo nba ki Yennu saa donn Nisaarik Bik na sanpaapo na baara. 24 Barmɔniie ki n beeri na, li-i tee ki bi bur dibinn tiŋ ni, li tuu piae, ŋaan ki kpensook na n kpo. Li poorpo ki dib na n kpaat, ŋanne ji tuu te ki lin nan dii bonchiann. Ŋaan li-i tee ki bi ki bur dibinn maŋ, li kan kpo, ki bia kan nan; li sii yɔɔ tee dibinyenne. 25 Tɔn, daanɔ nba loon u manfoor ki gar waa loon min Yiisa biaŋinba, u saa kɔŋ u manfoore; ŋaan daanɔ nba loonin ki gar waa loon u manfoor biaŋinba tingbouŋ na ni, ŋɔɔe kan boon u manfoori; li tan sii tee manfoor nba kaa gbennue. 26 Daanɔ nba loon wuu tuun n toonn, see ki u waan, ki maa tan sii be siaminba, ki n toontunnɔ mun tan sii be leŋ. Ki bia jenna, daanɔ nba tuun n toonn, n Baa Yennu tan saa donnɔwa." 27 Ŋanne ki Yiisa yet a, "N mɔk parbiir bonchiann, ki ki mi maa saa teen biaŋinba. N nɔk boi n Baa Yennu ki wun nyinnin biak nba baat n paak na ni-i?" Ŋaan bia yaa, "Aaii, kimaan n baar tingbouŋ na ni maa n tan di biak maŋe," 28 ŋaan miar Yennu a, "N Baa, ŋaant ki a sann n la dontir." Ŋanne ki kunkɔr pak sanpaapo a, "N sann poŋ la dontira, ki bia saa ŋamm la dontir ki pukin." 29 Niib bonchiann nba din see leŋ na din gbat kunkɔr nba pak sanpaapo na, ki siab yaa, "Li tee satianiie," ki leeb yaa, "Malakae piak nanɔ." 30 Ŋaan ki Yiisa betib a, "Li ki tee n mɔŋ paak kaa ki kunkɔr na paki, ŋaan li tee i paake. 31 Yoo nba ki Yennu yaa wun tan bu tingbouŋ na ŋaateeb buut na, li yoo baat; ki u bia saa biir tingbouŋ na yudaanɔ Sintaanii paŋ. 32 Bi-i taŋŋi jii-n ki donnin sanpaapo yoo nba, n saa dak niib kur ki bin baar n peŋ." 33 U maan na din want waa tan saa kpo biaŋinbae. 34 Ki nibur na yetɔ a, "Yennu gbouŋ wantit a u niganntɔɔ Masia na sii mɔk manfoor nba kaa gbennue. Bee ki a yet a bi saa jii Nisaarik Bik na ki donnɔ? Ŋmee tee Nisaarik Bik maŋi?" 35 Ki u jiin a, "Min nba tee yentu na sii be i boor waaminnae. Li paak, i somm man yentu maŋ ni, laa daa be na, ki bunbɔnn daa baati, kimaan wunba somm bunbɔnn ni, u ki mi waa saa siaminba po. 36 Tɔn, min nba tee yentu na nba daa be na, teentin yada, ki i sii tee niib nba ki n yentu sii yentiri ni." Yiisa nba din yet nna maŋ poorpoe ki u nyii niib na ni, ki saan bɔr. 37 U lek din tun toonjaana bonchiann bi numm ni, ŋaan bi ki teenɔ yada. 38 Baa din ki teenɔ yada na, ŋanne te ki Yennu sɔkinii maan na ji fit gbee a: "Ti Yomdaanɔ, ŋmee gaar ti maami? Ŋmee ki Yennu fiit u paŋ ki wannɔ?" 39 Bi din ki fit teenɔ yada kimaan Yennu sɔkinii Aisaya mun bia yet a: 40 "Min Yennue teemm jɔɔnii, ki bia te ki bi gbar bannu, a bi numpo daa yentiri, ki bi bia daa bant li paaki, li paak bi kan fit baar n boor, ki n tan tinnibi." 41 Aisaya din yet nna, kimaan u din la Yiisa yentchiɔŋ, ki pak jiin u po. 42 Tɔn, Juu teeb yudamm gbaa bonchiann din teen Yiisa yadawa, ŋaan bi ki nyinn bi mɔŋ paanu, kimaan bi tiin jaŋmaanii a Farisiinba na saa nyinnib bi Yennu jiantu ni. 43 Linba na wann nan Juu teeb yudamm maŋ din loon niib n pakibe, ki gar Yennu n pakib. 44 Ŋanne ki Yiisa tan pak sanpaapowa a, "Daanɔ nba teenin yada, u ki teen min kɔɔ kaa yada, ŋaan u teen Yennu nba tumin nae yada. 45 Ki bia jenna, wunba laatin, u ki laat min kɔɔ kaa, ŋaan u laat Yennu nba tumin nae mun. 46 N baar tingbouŋ na ni a mii tee yentue ki tur niib, ki daanɔ nba teenin yada, u kan biar bunbɔnn ni. 47 Ki bia jenna, wunba gbat n maan na, ŋaan ki saki, min kaa saa bu u buut, kimaan n ki baar tingbouŋ na ni a man bu niib buut kaa, ŋaan n baar man tinnibe. 48 Ki wunba y‡enin ki ki saak n maan na, barbuurɔ be ki saa bu u buut; maan nba ki n pak ki u ki saak nae tan saa bu nanɔ durinya gbennu daar. 49 Ki bia jenna, maan nba ki n pak na, li ki tee n tiɔŋ maan kaa, ŋaan maa pak linba maŋ, li tee n Baa Yennu nba tumin nae betin a mii want. 50 Ki u maan maŋ teen niib manfoor nba kaa gbennu. Maa pak linba na, ŋanne ki n Baa Yennu yaa n pak."

Jɔɔnn 13

1 Yoo nba ki yukitgar tiaru jaamm daa ki piin na, ŋaan ki Yiisa mi nan u yoo baara, ki u saa nyi tingbouŋ na ni, ki ŋmat u Baa peŋ. U din loon u tiɔŋ poorpoweiteeb nba be tingbouŋ na ni na, ki ji yaa wun wannib biaŋinba ki u mantik loomm. 2 Li yoo na ki ŋɔɔ nan u poorpoweiteeb di jeet; ki Sintaanii poŋ dɔŋ te ki Judas Iskariot nba tee Simonn bija na dukin a wun nyi Yiisa poora. 3 Ŋaan Yiisa ŋarin din mi nan u Baa Yennu teen bont kur u nuu niwa, ki bia mi nan u nyii u Baa Yennu boore, ki saa ŋmat u peŋa. 4 Ŋanne ki u fiir jeet na paak, ki liat u liatir ki bir, ŋaan jii nunfiaŋ, ki gbab siak ni, 5 ki jii nyun ki wat teen tatilaauk ni, ki piin wu u poorpoweiteeb taapant, ŋaan tuu soor nunfiaŋ nba ki u gbab na ki fiar, 6 ki tan baar Simonn Piita boor. Ki Piita boiɔ a, "N Yomdaanɔ, a yaa a wuur n taapante?" 7 Ki Yiisa betɔ a, "Mɔtana, a daa ki bann maa tuun linba na paaki, ŋaan li poor po a saa banna." 8 Ki Piita betɔ a, "Min ŋarin, a kan wuur n taapant faba." Ki Yiisa betɔ a, "Mi-i kii wuur a taapant, a ji kan mi teen n yɔɔ." 9 Ŋanne ki Simonn Piita ji betɔ a, "N Yomdaanɔ, daa wu n taapant kɔɔ kaa, ŋaan wuut n nii nan n yur kura." 10 Ki Yiisa betɔ a, "Daanɔ nba poŋ wur, li yɔɔ ji ki mɔk jakinti. Li paak, li ki kpaa talas wun ŋamm ki wuri, see wun wuur u taapante. I kura ji ki mɔk jakinti, ŋaan yenɔ kuukɔɔe mɔk jakint." 11 Yiisa poŋ din mi wunba saa nyi u poor na. Li paake ki u din yet a, "Yenɔ kuukɔɔe mɔk jakint." 12 Yiisa nba wuur bi taapant ki gbenn yoo nba, ki u ji jii u liatir na ki lia, ki jen kar jeet na boor, ŋaan boib a, "I mi maa tun linba ki turi na paakii? 13 I yi-n Wanntɔɔe, nan i Yomdaanɔ. Li set ŋan nan yaa yi-n biaŋinba na, kimaan n set tee nnae. 14 Tɔn, ki min nba tee i Yomdaanɔ nan i Wanntɔɔ, ŋaan tan wuur i taapant na, li mun ŋan ki yii wu i leeb taapant; 15 kimaan n wanni nyinne na, ki yii mun-ii tuun nna man nan maa tun biaŋinba ki turi na. 16 Barmɔniie ki n beeri na, daabir ki chee u daanɔ, ki toomu mun ki chee wunba tumɔ na. 17 Mɔtana i ji mi linba na, ki li-i tee ki i tuun nna, parpeenn tee i yare. 18 "N ki piak i kura po kaa. N mi yimm nba ki n ganni na para ni. Li sɔb Yennu gbouŋ ni a 'Daanɔ nba ki min nan ŋɔɔ lakin di na, ŋɔɔe yaa wun nyi n poor.' See ki sɔbu na fabir gbee nan mɔnii. 19 N beeri labaar maŋe mɔtana na, ki li set tan saa teen, ki li-i taŋŋi tun gbenn yoo nba, yin teen yada nan n set tee maa tee wunbae. 20 "Barmɔniie ki n beeri na, daanɔ nba gaar n toomu, u gaar mine, ki wunba gaarin, u gaar Yennu nba tumin nae mun." 21 Yiisa nba yet nna poorpoe ki parbiir baarɔ bonchiann; ki u betib a, "Barmɔniie ki n beeri na, i ni yenɔ yaa wun nyi n poore." 22 Ki li ŋmat bi yan nan waa yeen wunbaie; ki bi jiantir gorii leeb. 23 Ki bi ni yenɔ nba ki Yiisa mantik loonɔ na kar kpiau. 24 Ki Simonn Piita kabintɔ, ki betɔ a, "Boimɔ ki laan u yeen ŋmapoe." 25 Ki u poorpoweitɔɔ maŋ dɔnn nakinɔ, ki boiɔ a, "N Yomdaanɔ, li tee ŋmee?" 26 Ki Yiisa jiin a, "Mi-i taŋŋi ŋmit boroboro ki suk kpint ki tur wunba, yin bann nan li yɔɔe na." Ŋanne ki u ŋmit boroboro na ki suk kpint ki jii tur Judas nba tee Simonn Iskariot bija na. 27 Judas nba gaar boroboro maŋ yoo nba, ki Sintaanii kɔɔ u ni. Ki Yiisa ji betɔ a, "Teent faa yaa a teen linba na yian." 28 Ŋaan bi sɔɔ din ki bann linba ki Yiisa pakɔ na paaki. 29 Kimaan Judas nba din tuu dia likirii pakir na, ki bi siab mi a Yiisa tumɔ a wun saan daa jaamm na jeete, koo u betɔ a wun saan tur talasdamme likirii. 30 Judas nba din gaar boroboro na, li tonton na ki u fiir nyii. Li din tee nyiɔko. 31 Judas nba din nyii na poorpo, ki Yiisa bet u poorpo-weiteeb a, "Mɔtanae ki min Nisaarik Bik saa la dontir, ki n nie Yennu mun saa la dontir. 32 Li-i tee ki Yennu la dontir n ni, li kan yukiri ki u mun saa te ki min Nisaarik Bik n la dontir u ni. 33 "N waas, n ji kan yukir nani bonchianni. I tan saa lomin, ŋaan kan lami, nan maa bet Juu teeb yudamm biaŋinba na, n bia beeri ŋanne na, a i kan fit baar siaminba ki n saa na. 34 "Mɔtana n teenii sennpaanne: a yii loon i leeb. Maa looni biaŋinba na, yii mun-ii loon i leeb nna. 35 Li-i tee ki i loon i leeb, sɔɔ kur saa bann nan i tee n poorpoweiteebe." 36 Ŋanne ki Simonn Piita boiɔ a, "N Yomdaanɔ, a yaa a tan saan lee?" Ki Yiisa jiin a, "Maa tan saa saan siaminba, i kan fit wei mɔtana, ŋaan li poorpo i saa weina." 37 Ki Piita bia boiɔ a, "N Yomdaanɔ, bee teen ki n kan fit weia mɔtana? Min ŋarin poŋ teen siir nan ki n gaar a paak ki kpowa." 38 Ki Yiisa boiɔ a, "A set teen siir nan mɔnii nan ki a gaar n paak ki kpo-o? Barmɔniie ki n beera na, kojouk daa kan bui kaawa, ki a saa nɔi taar muntaa a a ki mimi."

Jɔɔnn 14

1 Li yoo na ki Yiisa betib a, "I daa mɔk parbiiri. Teent Yennu yada, ki mun teenin yada. 2 Diit bonchiann be n Baa Yennu ŋaak, ki n kun maa n saa teen i diit siir. Li-i bonni kii tee barmɔnii, n bo kan betiini. 3 Ki mi-i kun ki saa teen diit na siir ki gbenn, n bia saa jenna ki tan jii-i, ki i tan sii be siaminba ki n be na. 4 Ki bia jenna, i poŋ mi maa saa siaminba, ki bia mi sɔnu nba saa leŋ." 5 Ki Tomas boiɔ a, "N Yomdaanɔ, ti ki mi faa saa siami. Nlee ki ti saa bann sɔnu nba ki ti saa saan leŋi?" 6 Ki Yiisa betɔ a, "Mine tee sɔnu na, ki bia tee mamɔmm, ki bia tee manfoor. Sɔɔ kaa ki saa baar n Baa Yennu boor, ki li ki tee ki u sint baarimi. 7 Li-i bonni tee ki i min, i bia bo sii mi n Baa nawa; ŋaan laa nyii mɔtana ki saa, i ji miu ki bia laatɔ." 8 Ki Filip yetɔ a, "N Yomdaanɔ, wantit a Baa maŋ, taa loon linba kure na." 9 Ki Yiisa jiin a, "Filip, n poŋ be nani ki li yukira, ŋaan ki a daa ki bannimii? Wunba lan, u set la n Baa maŋe na. Ki bee ki a yaa n wanni n Baa maŋi? 10 N be n Baa nie, ki n Baa mun be n ni; i ki teen linba na yada-a? Maan nba ki n pak ki turi na, li ki nyii n ni kaa, ŋaan li nyii n Baa Yennu boore. Ŋɔɔe be n ni ki tuun u toona maŋ. 11 Li paak, teentin yada nan n be n Baa Yennu ni, ki n Baa Yennu mun be n ni. Li-i kii tee nna biaki, yin teen bakitnauŋ toona nba ki n tuu tuun na yada. 12 "Barmɔniie ki n beeri na, daanɔ nba teenin yada, u sii tuun toonjaana nan maa tuun biaŋinba nae, ki u toonjaana maŋ gbaa saa gar n yara, kimaan n saa n Baa Yennu boore. 13 Ki linba kur ki i sii meiɔ n sann ni, n saa tuma, ki ŋɔɔ Yennu n la dontir n paak. 14 Ki li-i tee ki i meiɔ g linba kur po n sann ni, n saa tuma. 15 "Li-i tee ki i loonin, i sii saak n mɔb, 16 ki n saa miar n Baa Yennu, ki u saa turi Sommtɔlɔɔ. Ŋɔɔe tee u Seyeeŋ nba want barmɔnii wannu, ki sii be nani yoo nba kaa gbennu. 17 Ki tingbouŋ na ŋaateeb kan fit gaarɔ, kimaan bi ki miu, ki bia ki mi nan u be. Ŋaan yimm ŋarin miu, kimaan u be nani, ki bia sii yɔɔ be i ni. 18 "Mi-i taŋŋi yaat saan, ŋaan n kan nyiki yann ki sɔɔ ki goriini, kimaan n saa jen i peŋ na. 19 Ki li-i yann waaminna, tingbouŋ na ŋaateeb ji kan lami, ŋaan yimm ŋarin bia saa lama. Tɔn, maa saa jen n manfoor ni na, i mun tan saa jen i manfoa niwa. 20 Ki bia jenna, mi-i taŋŋi jen n manfoor ni yoo nba, i saa bann nan n be n Baa Yennu nie, ki i mun bia be n ni, ki n mun be i ni. 21 "Daanɔ nba bant n sennii ki bia saakir, li daanɔe loonin. N Baa Yennu sii loon ŋɔɔe, ki n mun sii loonɔ, ki saa fiit n mɔŋ ki wannɔ." 22 Ki Judas, (wunba ki tee Judas Iskariot na) boiɔ a, "N Yomdaanɔ, bee teen ki a saa fiit a mɔŋ ki wannit, ŋaan kan fiit a mɔŋ ki wann tingbouŋ na ŋaateebi?" 23 Ki Yiisa jiin a, "Daanɔ nba loonin, u sii saak n maan, ki n Baa Yennu sii loonɔ, ki min nan n Baa Yennu saa baar u boor ki sii yɔɔ be u ni. 24 Ŋaan daanɔ nba ki loonin, u ki saak n maami, ki yaa gbat maan nba na, li ki tee n yar kaa, ŋaan li tee n Baa Yennu nba tumin na yare. 25 "Maa daa be nani nae ki n beeri maan nba na. 26 Ŋaan n Baa Yennu saa tun Sommtɔɔ i boor, n sann ni. Li Sommtɔɔe tee u Seyeeŋ na; ŋɔɔe saa wanni barii kur, ki bia saa tiari linba kur ki n poŋ beti. 27 "Mi-i yaa n saan, n saa pi-i piinii nba tee n parmaasir na. Li ki tee tingbouŋ na parmaasir na booru kaa. I daa mɔk parbiiri. I bia daa tiin jaŋmaanii. 28 I poŋ gbat ki n yeti a 'N nyikitie, ŋaan n bia saa jen i boor niwa.' Ki li-i tee ki i loonimie, i sii mɔk parpeenn nan maa saa n Baa Yennu boor na, kimaan u cheen. 29 "N daa beeri linba tan saa tume, ki yoo nba ki li tan tumi, yin teen yada. 30 N kan pak nani ki yukiri, kimaan tingbouŋ na yudaanɔ Sintaanii baat, ŋaan u ki mɔk n yaaki. 31 N loon tingbouŋ na teebe n bann nan n loon n Baa Yennu nan mɔnii; li paake teen ki n tuu tuun linba ki u betin a n tun. "Ŋaant ki tin fiir yaat man."

Jɔɔnn 15

1 Li poorpoe ki Yiisa yet a, "Mine tee tilontik nan mɔnii, ki n Baa Yennu tee li ŋammtɔɔ; 2 ki u tuu chɔɔ yiinu nba kur gaa n paak ŋaan ki loon lɔɔna nae. Ŋaan yiinu nba kur ŋarin loon lɔɔna, u tuu gbat gbate, ki lin ŋamm lon lɔɔna bonchiann. 3 Mɔtana, yimme tee niŋamm, maan nba ki n pak ki turi na paak. 4 Yii gaa n paak man, ki n sii be i ni. Yiinu kan fit lon lɔɔna, see ki u gaa tiik paak. Li mun bia tee nnae, i kan fit lon lɔɔna, see ki i gaa n paak. 5 "Mine tee tilontik maŋ, ki i tee li yiinii. Wunba gaa n paak, ki n mun be u ni, ŋɔɔe sii loon lɔɔna bonchiann, kimaan mi-i kaa i ni, i kan fit tun siari. 6 Ki jenna, wunba ki yɔɔ gaa n paaki, Yennu saa chɔɔue ki lu, nan baa tuu chɔɔ yiinu lu ki lin koor na. Li yiinboorue ki bi tuu tikir ki joo muu. 7 Ki bia jenna, li-i tee ki i yɔɔ gaa n paak, ki n maan na be i ni, miat Yennu linba kur ki i loon, ki i saa lawa. 8 Li-i tee ki i loon lɔɔna bonchiann, ŋanne saa wann nan i set tee n poorpoweiteeb nan barmɔnii, ki n Baa Yennu saa la dontir. 9 "N Baa Yennu nba loonin biaŋinba na, n mun looni li biaŋe. Yii gaa n paak, ki n lomm sii be i ni. 10 Li-i tee ki i saak n mɔb, n lomm sii be i nie nan maa saak n Baa Yennu mɔb, ki u lomm be n ni na. 11 "N pak na ki turi a n parpeenn na boorue i be i ni, ki yin gbee nan parpeenn. 12 Nae tee n sennu ki n senn turi, maa yii loon i leeb nan maa loonii biaŋinba na. 13 Lonjaansiar kaa ki gar nirɔ n sak gaar u yɔɔsinba paak ki kpo. 14 "Li-i tee ki i tuun maa beti linba na, i tee n yɔɔsinbae. 15 N ji kan yiini daaba, kimaan daabir ki mi u yomdaanɔ dudukiti. Maa yi-i n yɔɔsinba na, kimaan labaar kur nba ki n gbat n Baa Yennu boor, ŋanne ki n wanni. 16 Yimm kaa gannimi, ŋaan mine gannii, ki turi toona maa yii saa kii loon lɔɔna bonchiann, lɔɔna nba sii be mɔkmɔk nan mɔkmɔk, a n Baa Yennu n turi linba kur ki i miarɔ n sann ni. 17 Linba nae ki n sennii, maa yii loon i leeb. 18 "Tɔn, li-i taŋŋi tee ki tingbouŋ na ŋaateeb nami, yin bann nan bi poŋ nan minewa. 19 Li-i bonni tee ki i tee tingbouŋ na ŋaaniibie, tingbouŋ na ŋaateeb bo sii looni nan baa loon bi mɔŋ niib biaŋinba nae. Ŋaan n ganni ki nyinni tingbouŋ na niib niwa, ki i ji ki tee tingbouŋ na ŋaateeb yabi; li paake teen ki bi nami. 20 Yii tian maan nba ki n paki na man, a 'Daabir kaa ki chee u yomdaanɔ.' Tɔn, bi-i mukisin, bi mun saa mukisiiwa; ki bi-i saak n maan, bi mun bia saa sak i maama. 21 Bi set saa mukisiiwa, kimaan yaa tee n yab na, ki jenna, baa ki mi Yennu nba tumin na paak. 22 "Mi-i diŋŋi kii baar ki tan pak turibi, bi bo kii mɔk biiti. Ŋaan maa sat baar pak turib na, sɔnsau ji kaa ki bi saa fit bɔr bi biiti. 23 Ŋaan wunba namin, u nan n Baa Yennue mun. 24 Mi-i bonni kii tuun toonjaana nba ki sɔɔ daa ki mi tun na bi boori, bi bia bo kii mɔk biiti. Bi lek la toonjaana nba ki n tuu tuun nawa, ŋaan nan min nan n Baa Yennu. 25 Linba na teen nnae, a baa din sɔb linba n po bi sennu ni na n fit teen mɔnii a: 'Bi namin, ki li ki mɔk paaki.' 26 "Tɔn, n saa tun Sommtɔɔ i peŋ, wunba tee Yennu Seyeeŋ ki want barmɔnii wannu na. U saa nyi n Baa Yennu boore ki baar i peŋ; ki pak n po. 27 Ki i mɔŋ mɔŋ sii piak n po ki teen niib, kimaan i poŋ yɔɔ be nanime, laa nyii yoo nba ki n din piin ki tuun n toonn nawa.

Jɔɔnn 16

1 "N poŋ mi paki mukisuk na poewa, a i tan daa nyikit n weiu. 2 Bi tan saa yɔɔ nyinni Yennu jiantu ni. Ki yoo baat ki wunba tan kpi-i, u sii mi a u tuun nna ki teen Yennue. 3 Bi tan saa tun linba na ki turiiwa, kimaan bi ki mimi, ki bia ki mi n Baa. 4 Ŋaan n beeri linba na mɔtana, a li yoo-i taŋŋi baar, i ji saa tiar maan nba ki n paki na. "N din ki beti linba na sinsinni, kimaan min nan yimme tuu be. 5 Mɔtana n saa Yennu nba tumin na peŋe. Ŋaan i sɔɔ ki boin ki laan n saa lee. 6 Ki maa beti linba mɔtana na, ki i ji mɔk parbiir bonchiann. 7 N beeri barmɔniie, nan li sii ŋan turii nan ki n yaat saan, kimaan mi-i kii saani, Sommtɔɔ na kan baar i peŋi. Ŋaan mi-i taŋŋi saan, n saa tumɔ i peŋ na. 8 "Wuu taŋŋi baar yoo nba, u saa wann tingbouŋ na ŋaateeb a bi mɔk biit. U bia saa wannib yentinu nba tee biaŋinba, ki bia wannib Yennu barbuut nba tan sii tee biaŋinba. 9 U saa wannib a bi mɔk biit, kimaan bi ki teenin yada. 10 Ki jenna, u saa wannib yentinu nba tee biaŋinba, kimaan n saa saan n Baa Yennu boor, ki i ji kan lami. 11 Ki bia jenna, u saa wannib Yennu barbuut nba tan sii tee biaŋinba, kimaan u poŋ bu tingbouŋ na teeb yudaanɔ Sintaanii buut ki biirɔwa. 12 "Maan be bonchiann ki n bo saa paki, ŋaan i kan fit gaar mɔtana. 13 Yennu Seyeeŋ nba want barmɔnii na, wuu taŋŋi baar yoo nba, u saa wanni barmɔnii kura. U tan kii piak u mɔŋ mɔŋ maan kaa, ŋaan u tan sii wanti linba ki u gbia Yennu boore, ki bia sii beeri linba tan saa teene. 14 Ki jenna, u bia tan sii dont n sann, kimaan u tan sii jikit n labaare ki fiitir ki wanti. 15 Linba kur ki n Baa Yennu mɔk, li tee n yare. Li paake teen ki n yet a Yennu Seyeeŋ sii jikit n labaar ki wanti. 16 "Li-i yann waaminna, i ji kan lami, ŋaan li-i biakii yann waaminna, i saa lama." 17 Ki u poorpoweitesiab boi bi leeb a, "Linba na paak tee bee? U yaa li-i yann waaminna, ti kan lau, a ŋaan li-i biakii yann waaminna, ti saa lauwa, ki bia yaa kimaan u saa u Baa peŋe. 18 'Li-i yann waaminna' paak tee bee? Ti ki bann waa piak linba na paaki." 19 Ki Yiisa bann nan bi yaa bin boiɔ buboite. Li paake ki u boib a, "Maa yaa li-i yann waaminna, i kan lami, ki bia yaa li-i bia yann waaminna, i saa lama na, i boi i leeb a i bann li paake? 20 Barmɔniie ki n beeri na, i tan sii mɔ fabin, ŋaan tingbouŋ na ŋaateeb ŋarin tan sii mɔk parpeenne. I sii mɔk parbiir, ŋaan li poorpo ki i parbiir maŋ saa tunn ki teen parpeenn. 21 "Li tee nan poo nba tuu yaa wun mar, ki mɔk parbiir nae, kimaan u biak yoo baara, ŋaan wuu taŋŋi mar bik yoo nba, u ji tuu tamm u biak na poe, ki ji mɔk parpeenn nan waa mar bik tingbouŋ ni na paak. 22 Li tan sii tee i mun nnae; mɔtana yaa mɔk parbiir na, ŋaan n bia tan saa laiwa, ki i para tan saa penn bonchiann, ki sɔɔ kaa ki tan saa nyinn parpeenn maŋ i ni. 23 "Li yoo-i taŋŋi baar, i tan kan boin buboiti, kimaan i tan sii mi li paak. Barmɔniie ki n beeri na, linba kur ki i miar n Baa Yennu n sann ni, u saa turiiwa. 24 Ŋaan nan mɔtana, i daa ki mi miarɔ bonsiar n sann ni. Yi miarɔ, ki i saa la, ki gbee nan parpeenn. 25 "N poŋ tuu yiini barjokite, yoo baat ki n ji kii yiini barjokiti, ŋaan n tan sii piak ki yentir i numm poe ki jiin n Baa Yennu po. 26 Li yoo-i taŋŋi baar, i tuu saa miarɔ n sann ni. Li bia tan kan kpaa talas nan ki n gaar i paak ki miarɔ ki turiini, 27 kimaan n Baa Yennu mɔŋ mɔŋ looni; waa looni linba paak tee nnae, kimaan yaa loonin ki bia teen yada nan n nyii n Baa maŋ boore na. 28 N din nyii n Baa maŋ peŋe ki baar tingbouŋ na ni, ki mɔtana n ji nyikit tingbouŋ maŋe na, ŋaan ŋmat u peŋ." 29 Ŋanne ki u poorpoweiteeb na yetɔ a, "Mɔtana a ji kpan piak yentir ti numm poe. A ki yiint barjokit kaa. 30 Mɔtana ti ji bann nan a mi bonsiar kur, ki poŋ bia mi ti buboit ŋaan ki ti daa ki boia. Li paake ki ti teen yada nan a nyii Yennu peŋe." 31 Ki Yiisa boib a, "I ji teenin yada mɔtanawa-a? 32 Yoo baat, ki poŋ baar gbenna, ki i kur tan saa yat kun, ŋaan ki n biar n kuukɔɔ. Ŋaan li set ki tee n tan sii be n kuukɔɔ kaa, kimaan min nan n Baa Yennue tan sii be. 33 N beti biak na baaru po a yin tan fit la parmaasire, kimaan yaa gaa n paak na. I tan saa di biak tingbouŋ na ni. Ŋaan yii mɔk parcheenn man, kimaan n nyann tingbouŋ nawa."

Jɔɔnn 17

1 Yiisa nba din pak nna maŋ, ŋaan gokit got sanpaapo, ki yet a, "N Baa, yoo maŋ baara. Ŋaant ki min a Bija n la dontir, ki lian te ki a mun la dontir, 2 kimaan fine turin yiikoo niib kur paak, a man fit tur niib kur nba ki a turin maŋ manfoor nba kaa gbennu. 3 Ki manfoor maŋe tee niib n bann fin nba tee Yennu nan barmɔnii, ki sɔɔ ji kaa; ki bia mun saa bann min Yiisa Masia nba ki a tumin na. 4 Toona nba ki a turin a n tun na, n tun gbenna, ki dont a sann tingbouŋ na ni. 5 N Baa, turimin dontir a boor mɔtana, dontbooru nba ki n din laat, maa din be a boor ki a daa ki nan durinya na. 6 "Niib nba ki a din gann ki turin na, n te ki bi bannawa. Bi din tee a yabe, ki a jiib ki turin, ki bi mun sak a maama. 7 Ki mɔtana bi mi nan bonsiar kur nba ki a turin na nyii a boore, 8 kimaan n pakib maan nba ki a turin nawa, ki bi mun gaara, ki mɔtana bi ji bann nan n set nyii a peŋe nan mɔnii, ki bi teen yada nan fine tumin. 9 "Tɔn, mɔtana n ji meia bi paake. N ki meia tingbouŋ na niib kur paak kaa, ŋaan n meia binba ki a turin na paake, kimaan bi tee a yabe. 10 N yab kur tee a yabe; ki a yab kur mun tee n yab; ki bi dont n sann. 11 Ki mɔtana n ji baat a boor nie na; n ji kii be tingbouŋ na ni, ŋaan ŋamm ŋarin daa saa biar tingbouŋ na niwa. Tɔn, n Baa, Popeendaanɔ, i diab fanu a sann ni, sann nba ki a din purin na, ki bin taan yomm nan min nan fin nba tee yomm na. 12 Maa daa be namm na, n diab fanu nan a sann nba ki a din purin na ni. N baak bi paak, ki bi ni sɔɔ ki teen yanni, see wunba tee Sintaanii yɔɔ na. Waa teen yann na, li teen nan laa sɔb fin Yennu gbouŋ ni biaŋinba nae. 13 Ki mɔtana n baat a peŋe; ki maa daa be tingbouŋ na ni na, n piak linba nae ki teemm, a bi para n gbee nan parpeenn nba ki n mɔk na. 14 "N pak a maan na turiba. Li paak ki tingbouŋ na ŋaateeb namm, kimaan bi ki tee tingbouŋ na ni yabi, nan maa mun ki tee tingbouŋ na ni yɔɔ na. 15 N ki meia maa a nyinnib tingbouŋ na ni kaa, ŋaan n meia maa fii baak bi paake fanu, ki bonbiiuk daanɔ Sintaanii daa baat ki biiribi. 16 Maa ki tee tingbouŋ na yɔɔ na, bi mun ki tee tingbouŋ na yabi. 17 "Wantib a maan nba set tee barmɔnii na, ki lin teemm popeendamm. 18 Faa din tumin tingbouŋ na ni biaŋinba na, nnae ki n mun tumm tingbouŋ na ni. 19 Ki bi paake ki n jikit n mɔŋ ki teena na, a bin teen a tiɔŋ yab nan barmɔnii. 20 "N ki meia ki teen ŋamm kuukɔɔ kaa; n meia ki teen nan binba tan saa teenin yada bi mɔɔntii paak naewa. 21 N bia meia maa bi kura n taan mɔyomme. N Baa, faa be n ni, ki n mun be a ni biaŋinba na, ŋaant ki bi mun n taan nant mɔyomm nna; ŋanne saa te ki tingbouŋ na ŋaateeb n teen yada nan fine tumin. 22 Popeenn binbeŋ nba ki a turin na, n mun turiba, ki bi saa taan mɔyomm, nan min nan fin nba taa mɔb biaŋinba na. 23 N be bi ni, ki a mun be n ni, a bin fit lian taan mɔb chib. Ŋanne saa te ki tingbouŋ na ŋaateeb n bann nan fine tumin, ki bi saa bann nan a loonib nan faa loonin biaŋinba na. 24 "N Baa, a turib mine, ki n loon bii taŋŋi be maa tan sii be siaminba, ki bin la faa dont n sann biaŋinba, kimaan a din loonime yoo nba ki a daa ki nan durinya na. 25 N Baa, Popeendaanɔ, tingbouŋ na ŋaateeb ŋarin ki miani, ŋaan min ŋarin mia, ki n poorpoweiteeb na mi nan fine tumin nna. 26 N fiit a binbeŋ ki wanniba, ki bia sii ŋammit fiitir a binbeŋ ki wantib, ki bii mɔk lomm nba ki a loonin na booru, ki n mun sii be bi ni."

Jɔɔnn 18

1 Yiisa nba din miar Yennu ki gbenn na poorpo, ki ŋɔɔ nan u poorpoweiteeb yaat saa, ki saa poot kpenu nba ki bi yi Kidronn na. Kpaab nna din be leŋ; ki bi saan kɔɔ kpaab maŋ ni. 2 Tɔn, Judas, wunba din nyii Yiisa poor na din mi kpaab maŋ boor, kimaan yoo kur Yiisa din tuu saa nan u poorpoweiteeb leŋe. 3 Ŋanne ki Judas tan baar kpaab maŋ ni nan kunkɔnkɔnna, nan Yennu jiantu yudamm nan Farisiinba toontunna; ki bi dia jatiat nan fita nan mulanbaabii. 4 Yiisa ŋarin din mi bonsiar kur nba yaa lin teenɔ, ŋanne ki u nyii tɔɔnn, ki boib a, "I loon ŋmee?" 5 Ki bi jiin a, "Yiisa nba tee Nasaref nirɔ na." Ki u betib a, "Mine na." Ki Judas, wunba nyii u poor na, see namm leŋ. 6 Yiisa nba ŋarin yet a, "Mine na" yoo nba, ki bi ŋmat potuntuna, ki baa baa tiŋ ni. 7 Ki Yiisa ŋamm boib a, "I loon ŋmee?" Ki bi bia yet a, "Yiisa nba tee Nasaref nirɔ na." 8 Ki Yiisa betib a, "N poŋ beti a mine na. Li-i tee ki i loon minie, yin ŋaan ki binba be nna-i saa." 9 U din yet nna maŋ, a waa poŋ yet Yennu linba a, "Faa turin binba kur na, bi sɔɔ ki teen yann," na n teen mɔniie. 10 Li yoo maŋ ki Simonn Piita dia jukbanjiak, ki nɔɔt chɔɔ Yennu mannteeb yudaanɔ daabir niidiitu po tubir ki pot. Daabir maŋ sann din tee Malkuse. 11 Ki Yiisa bet Piita a, "Jiint a jukbanjiak maŋ ki nɔɔn. A mi a biak nba ki n Baa turin na, n kan di-i?" 12 Ŋanne ki kunkɔnkɔnna nan bi yudaanɔ nan Juu teeb yudamm toontunna na ji soor Yiisa, ki lorɔ, 13 ki jiiu ki saan nanɔ Annas boor sinsinn. Annas din tee Kayafas diamme, ki Kayafas tee Yennu mannteeb yudaanɔ li binn. 14 Kayafas maŋe din bet Juu teeb yudamm a li ŋan ki niyenɔkɔɔ n gaar niib kur paak ki kpo, a ŋanne chee nan sɔɔ kur n kpo. 15 Baa din saa nan Yiisa na ki Simonn Piita nan Yiisa poorpoweitɔlɔɔ waa; ki poorpoweitɔɔ maŋ tee daanɔ nba ki Yennu jiantu yudaanɔ na miu. Li paak, ki u baar kɔɔ Yennu jiantu yudaanɔ na ŋaadindouŋ ni, siaminba ki Yiisa be na. 16 Ŋaan ki Piita ŋarin biar see nanyer po yaŋŋir tammɔb ni, ki poorpoweitɔlɔɔ nba ki Yennu jiantu yudaanɔ na miu na ŋmat yaŋŋir tammɔb na ni, ki pak nan sapaamɔ nba guu tammɔb na, ki u kɔɔn Piita dundouŋ na ni. 17 Ki sapaamɔ maŋ boi Piita a, "A ki tee jɔɔ na poorpoweiteyenɔ kaa-a?" Ki Piita jiinɔ a, "Aaii! N ki tee u poorpoweiteyenɔ kaa." 18 Waat din be li yoo, ki toontunna na nan kunkɔnkɔnna na joo sankɔɔna muu, ki see nanii, ki Piita tan saan taamm ki bi nanii. 19 Ŋanne ki Yennu jiantu yudaanɔ na boi Yiisa u poorpo-weiteeb nan u wannu na po. 20 Ki Yiisa betɔ a, "N poŋ tuu piak yeenin ni ki teen sɔɔ kur, ki ki bɔri n wannu kur nba ki n tuu wanti. N tuu want niib Yennu jiantu diit ni nan Yennu jiantu ŋasaakak ni, siaminba ki Juu teeb kur tuu baat lakint na. Min ŋarin ki mi pak siar ki wooni. 21 Ki bee teen ki a boimi? Boin binba gbat linba ki n tuu beerib na. Ŋamme mi maa tuu yeen linba." 22 Yiisa nba yet nna maŋ, ki kunkɔnkɔnna na yenɔ pebɔ tanpak, ŋaan boiɔ a, "Bi piak jiint Yennu jiantu yudaanɔ nnae?" 23 Ki Yiisa betɔ a, "Mi-i pak bonbisiarie, fan bet sɔɔ kur laa tee linba. Ŋaan mi-i pak linba tokinie, bee teen ki a ji pebimi?" 24 Li yooe ki Annas te ki bi jii Yiisa ki saan nanɔ Kayafas, wunba tee Yennu jiantu yudaanɔ na peŋ; ki Yiisa bia lek daa lor ŋmiit. 25 Piita nba din see ki nanii muu na, leŋ maŋ ki bi boiɔ a, "A ki tee u poorpoweiteyenɔ kaa-a?" Ki Piita nɔi, ki yetib a, "Aaii, n ki tee u poorpoweiteyenɔ kaa." 26 Ki Yennu jiantu yudaanɔ daabiyenɔ, wunba ninja ki Piita chɔɔ u tubir ki pot na boiɔ a, "N bo ki la ki a be nan Yiisa kpaab na ni-i?" 27 Ki Piita bia nɔi. Li taakpaak ni ki kojouk bui. 28 Kayafas nba din boi Yiisa buboit ki gbenn na poorpoe, ki Juu teeb yudamm jiiu ki saan nanɔ tiŋ na yudaanɔ nba ki bi yiu Pailat na ŋaak. Li din tee sanyapob nie. Juu teeb yudamm maŋ din ki loon bin kɔɔ ŋaak i maŋ ni, kimaan bi loon bin dia bi mɔŋe bonŋann Yennu boor, ki tan fit di yukitgar tiaru jaamm na. 29 Li paak ki Pailat nyii nanyer bi boor, ki boib a, "Jɔɔ na teen bee ki i biirɔ?" 30 Ki bi yaa, "Wuu bonni kii tun bonbiir, ti bo kan baar nanɔ a boori." 31 Ki Pailat betib a, "I mɔŋ n jiiu ki bu nanɔ, i sennu nba want biaŋinba." Ki Juu teeb yudamm maŋ yaa, "Ti ki mɔk yaak ki saa kpi nirɔ." 32 Yiisa nba din yaa kubooru nba ki u tan saa kpo na, li set tan teen nnae, ki fit gbee. 33 Ki Pailat ŋmat kɔɔ ŋaak na ni, ŋaan yiin Yiisa, ki boiɔ a, "A tee Juu teeb kpanbare?" 34 Ki Yiisa jiin boiɔ a, "Fine daa boin buboit na koo siabe beta n po?" 35 Ki Pailat boiɔ a, "N tee Juu nirɔ-ee? A mɔŋ niib nan Yennu jiantu yudamme jiia ki tan turin. A jia biir bee?" 36 Ki Yiisa yetɔ a, "N naan ki tee tingbouŋ na ni yar kaa. N naam-i bonni tee tingbouŋ na ni yarie, n poorpoweiteeb bo saa kɔn n paaka, ki Juu teeb yudamm bo kan soorimi. Aaii, n naan ki tee tingbouŋ na ni naami." 37 Ki Pailat boiɔ a, "A set tee kpanbare?" Ki Yiisa jiin a, "Nn, fine yet a n tee kpanbar. Bi din marin a n wann niib barmɔnii wannue. Li paake ki n baar tingbouŋ na ni; ki sɔɔ kur nba waa barmɔnii wannu maŋ gbia n maan." 38 Ki Pailat boiɔ a, "Bee tee barmɔnii?" ŋaan ŋmat nyii nanyer Juu teeb yudamm na boor ki betib a, "N ki la jɔɔ na biit ki saa biirɔ. 39 I mɔk siar ki tuun binn kur ni, ki n tuu nyinn dansarkɔɔyenɔ yukitgar tiaru jaamm yoo ki turi. I loon ki n nyinn Juu teeb kpanbar na ki turiinii?" 40 Ki bi tian ki yeen a, "Ti ki loon jɔɔ na kaa. Ti loon ki a nyinn Barabase ki turit." Barabas din tee fatitɔɔe.

Jɔɔnn 19

1 Li yoo na ki Pailat te ki bi boo Yiisa kpaasir. 2 Ki kunkɔnkɔnna na luu kunkonii fokirik ki yirimɔ, ki lannɔ baanmuŋ nna, 3 ki nyi baat ki gbaa u tɔɔnn, ki yeen a, "Juu teeb kpanbar, ti foonta," ŋaan pebitɔ tanpakii. 4 Ŋanne ki Pailat bia ŋamm nyii nanyer ki bet yudamm na a, "Gotir man, n baat nanɔ i boore, a yin bann nan n ki la u biiti." 5 Ŋanne ki bi baar nan Yiisa, niib na boor, ki u yir kunkonii fokirik ki bia lia baanmuŋ na. Ki Pailat betib a, "Gotir, nirɔ maŋe na." 6 Yennu jiantu yudamm nan bi toontunna nba lau yoo nba, ki bi tian a, "Kpaamɔ dapunpunn paak! Kpaamɔ dapunpunn paak!" Ki Pailat betib a, "I mɔŋ n jiiu ki kpaau dapunpunn paak, kimaan min ki la u biiti." 7 Ki Juu teeb yudamm na jiin a, "Ti mɔk sennsau, ki sennu maŋ want nan u kpan lek tee wun kpoe, kimaan u yaa u tee Yennu Bijae." 8 Pailat nba gbat nna maŋ, ki jaŋmaanii ji soorɔ bonchiann; 9 ki u ŋmat kɔɔ ŋaan yiin Yiisa, ki tan boiɔ a, "A nyii lee?" Ŋaan Yiisa din ki jiinɔ siari. 10 Ki Pailat bia boiɔ a, "A kan pak jiinimii? A ki mi nan n mɔk yiikoo ki saa te bin ŋaa-a, ki bia mɔk yiikoo ki saa te ki bin kpaa-a dapunpunn paaki?" 11 Ki Yiisa ji jiinɔ a, "Yennu-i bonni kii chaba yiikoo, a bo kii mɔk n paak yiikoo. Li paak, daanɔ nba soorin ki jiin kubina na, u biit yab ki gar a yara." 12 Pailat nba gbat nna maŋ, ki u lek ji loon ki wun ŋaau nan ninmɔnn, ŋaan ki Juu teeb yudamm na yakii ki yaa, "Li-i tee ki a ŋaau, ŋann a ji ki tee kpanbara yudaanɔ Siisa yɔɔk kaa, kimaan daanɔ nba pur u mɔŋ kpanbar, u tee kpanbara yudaanɔ na dataake." 13 Pailat nba gbat nna, ki u nyii nan Yiisa nanyer po, ki kar u buut kaanu paak, ki bi yir Tann Binbintir. (Juu teeb maan ni, bi yir Gabatae.) 14 Li din tee yonsuuk nie, ki li saa yent ki yukitgar tiaru jaamm n di. Ki Pailat yet Juu teeb yudamm na a, "I kpanbare na!" 15 Ki bi yakii ki yaa, "Kpimɔ! Kpimɔ! Kpaamɔ dapunpunn paak." Ki Pailat boib a, "I loon ki n kpaa i kpanbar dapunpunn paakii?" Ki Yennu jiantu yudamm na jiin a, "Ti ki mɔk kpanbarsɔɔ see kpanbara yudaanɔ Siisa kuukɔɔ." 16 Ki Pailat ji chab a bin kpaa Yiisa dapunpunn paak. Ŋanne ki Rom teeb kunkɔnkɔnna na ji gaar Yiisa, 17 ki nyii nanɔ doo na kpiŋ; ki u jii u kuun dapunpunn. Ki bi saa baar siaminba ki bi yir "Yukpabuk" na. (Juu teeb maan ni, bi yi leŋe "Golgota".) 18 Leŋe ki bi kpaau dapunpunn paak; ki bia kpaa niib banlee dapunpuna paak ki pukin Yiisa po, ki yenɔ be chianu ki lɔɔ mun be chianu, ŋaan ki Yiisa be sinsuuk ni. 19 Ki Pailat sɔb sɔbinii ki bi tabin Yiisa dapunpunn na paak, ki li yaa, "Nasaref nirɔ Yiisa nba tee Juu teeb kpanbare na." 20 Juu teeb bonchiann din karin sɔbu maŋa, kimaan siaminba ki bi din kpaa Yiisa dapunpunn paak na din ki fɔk nan Jerusalemi. Sɔbinii na din sɔb Juu teeb nan Rom teeb nan Griik teeb maan nie. 21 Ŋanne ki Juu teeb Yennu jiantu yudamm saan Pailat boor, ki saa betɔ a, "Li bo ki ŋan ki a sɔb a 'Juu teeb kpanbare na.' Li bo ŋan ki a sɔb a 'Jɔɔ na pur u mɔŋ Juu teeb kpanbare.'" 22 Ki Pailat jiin a, "Maa sat sɔb linba na, n sɔbe." 23 Kunkɔnkɔnna na nba kpaa Yiisa na poorpoe, ki bi jii u tiat ki chentir taar munna, ki kunkɔnkɔnnɔ kur gaar tor. Li poorpoe biak ki bi jii u tiŋ po liatfoouk, linba ki bi luur bonmunn, ki li ki mɔk nyarmu na; 24 ki yet bi leeb a, "I daa pati. Ŋaant ki ti tɔ tiatia ki laan wunba saa yentir." Li din teen nna, a Yennu gbouŋ nba din yet linba na n fit gbee-e a: "Bi chent n tiat, ki bia tɔ tiatia n tiŋ po liatfoouk na paak." Nnae ki kunkɔnkɔnna na set din tun. 25 Yiisa naa din see kpia u dapunpunn nae; ŋɔɔ nan u niipoo, ki bi yiu Meeri wunba tee Klopas ŋaapoo, nan Meeri Magdaliinn. 26 Ki Yiisa la u naa, ki bia la u poorpoweitɔɔ nba ki u mantik loonɔ na, ki u mun see leŋ, ki Yiisa yet u naa a, "N naa, a bijae na jik," 27 ŋaan bet u poorpoweitɔɔ maŋ a, "A mun, a naae na jik." Laa din nyii li yoo, ki poorpoweitɔɔ na ji jii Yiisa naa ki kun nanɔ u ŋaak ni. 28 Li poorpo, Yiisa din mi nan bonsiar kur nba ki u din tuun na ji gbenna, ki u yet a, "Nyunnyukiru mɔkin." U yet nna a lin gbeen linba sɔb Yennu gbouŋ ni nae. 29 Ŋmaŋ din see leŋ nan damiituk, ki bi jii saapo ki tun damiituk maŋ ni, ki jii daauk ki fin saapo na, ki teen u mɔb ni, 30 ki u fɔɔnt ki nak, ŋaan yet a, "Li gbenna," ki tibin ki chab Yennu u seek, ki kpo. 31 Tɔn, Juu teeb yudamm na din ki loon niib na-i be dapunpuna paak foondaari; laa saa yent ki tee foon daar na. Foondaar nba din saa yent maŋ din tee dajaanne. Li paak, ki bi din saan Pailat boor, a wun chab ki bin kɔnn kɔnn niib na taa, ki bin kpo yian, ki bin fit kpaatib dapunpuna maŋ paak. 32 Li paak, ki kunkɔnkɔnna na saan ki saa kɔnn binba lakin kpaa nan Yiisa na taa, 33 ŋaan baar Yiisa boor, ki sɔɔ ki u kpowa. Li paak bi din ki kɔnn u taa. 34 Ki kunkɔnkɔnna na yenɔ jii kpann ki ŋmuu Yiisa lokir ni. Li taakpaak ni ki sɔn nan nyun nyii. 35 Min nba sɔbin gbouŋ nae la baa teen biaŋinba nan n mɔŋ ninbina, ki teen siara, ki mi nan n siara maŋ tee barmɔniie, ki n sɔbin linba tee barmɔnii na a yin fit lian teen yada. 36 Li din teen Yiisa nna a lin gbeen linba sɔb Yennu gbouŋ ni a, "Bi kan kɔnn u kpabir nan yennkɔɔwa." 37 Ki Yennu gbouŋ bia yet siar boor a, "Niib tan sii gorii baa ŋmuu wunba kpann na." 38 Li poorpoe ki Joosef, wunba tee Arimatea nirɔ na, saan Pailat boor, ki saa miarɔ Yiisa gbanant. Joosef din tee Yiisa poorpoweitɔɔe, ŋaan u din waau woonin nie, kimaan u tiin Juu teeb yudamme jaŋmaanii. Ki Pailat chabɔ; ki u saan ki saa kpaat Yiisa ki jiiu. 39 Ki Nikodemus, wunba poŋ mi baar Yiisa boor nyiɔk na mun baar ki dia bonnunubit nba saa teen Yiisa gbanant, ki li tee nan bɔrikgbina piik nan ŋaŋŋmu na. (Bi din jii bona nba ki bi yir mir nan alos nae ki ŋmat ki teen bonnunubit maŋ.) 40 Ki bi jii Yiisa ki pɔbinɔ chinchenŋana ni nan bonnunubit na, nan Juu teeb kupiinu kaar nba tee biaŋinba na. 41 Baa din kpaa Yiisa siaminba na, kpaab din be leŋ, ki kapaauŋ poŋ be leŋ, ki bi din daa ki pii sɔɔ kaauk maŋ ni. 42 Juu teeb foon daar nba per na, ki kaauk na boor bia ki fɔk na, ki bi pii Yiisa leŋ.

Jɔɔnn 20

1 Ki Juu teeb foon daar tan gar, ki lasir daar sanyapob ni ki sɔɔ li daa bɔn, ki Meeri Magdaliinn saan Yiisa kaauk boor, ki la ki bi birint katanu kaauk maŋ mɔb paaka; 2 ki u chiar saan Simonn Piita nan Yiisa poorpoweitelɔɔ nba ki Yiisa mantik tuu loonɔ na peŋ, ki betib a, "Bi piit ti Yomdaanɔ kaauk na niwa, ki ti ki mi baa birɔ siaminba." 3 Ŋanne ki Piita nan Yiisa poorpoweitelɔɔ na nyii ki tiin saa, 4 ki Yiisa poorpoweitelɔɔ na tin paak Piita, ki saa dɔŋ baar kaauk maŋ boor, 5 ŋaan ki kɔɔ. U din tibine ki la katiŋ na. 6 Ki Simonn Piita tan yɔɔnt baar ki kɔɔ, ki la ki katiŋ na dɔɔ, 7 ki bia la chinchenbik nba ki bi daan fin Yiisa yur na, ki ŋann fin li biaŋ ki dɔɔ li kuukɔɔ. 8 Ŋanne ki Yiisa poorpoweitelɔɔ nba din dɔŋ baar na mun kɔɔ ki ji la li biaŋ, ki teen yada nan Yiisa fiir kuun nie. 9 Ŋaan bi daa din ki bann linba sɔb Yennu gbouŋ ni na paaki, a Yiisa saa fiir kuun ni na. 10 Ki bi ŋmat kun. 11 Meeri ŋarin din biar see kaauk maŋ boor nie ki mɔ, ki tan tibin ki got kaauk na ni, 12 ki la malakanba banlee lia tapeenii, ki yenɔ kar siaminba ki bi daan bir Yiisa na yur po, ki lɔɔ na mun kar li taa po. 13 Ki bi boiɔ a, "Poo na, bee ki a mɔ?" Ki u jiin a, "Bi piit n Yomdaanɔe, ki n ki mi baa teenɔ siami." 14 Waa yet nna, ki u ŋmant la ki Yiisa see, ŋaan ki u ki bann nan Yiisae na. 15 Ki Yiisa boiɔ a, "N niipoo, bee ki a mɔ? A loon ŋmee?" Meeri ŋarin din mi a u tee kpaab na toontunnɔe, ki u yetɔ a, "Li-i tee ki a jiiuie, fan betin faa teenɔ sian, ki n saan ki saa jiiu." 16 Ki Yiisa yiinɔ a, "Meeri." Ki u ŋmant ki tokinɔ, ki yiinɔ Juu teeb maan ni a, "Raboni!" (Li paak tee a, "Wanntɔɔ.") 17 Ki Yiisa betɔ a, "Daa somi, kimaan n daa ki doo sanpaapo n Baa boori; ŋaan i saa n naa waas boor, ki saa betib a n saa do sanpaapo, wunba tee n Baa nan i Baa na boora; ŋɔɔe bia tee n Yennu nan i Yennu na." 18 Ki Meeri Magdaliinn ŋmat Yiisa poorpoweiteeb peŋ ki saa betib a, "N la ti Yomdaanɔ nawa," ŋaan yetib waa betɔ linba. 19 Lasir daar maŋ nyiɔko, ki Yiisa poorpoweiteeb na tan lakin leeb ki be diiuk ni, ŋaan kpar gann, kimaan bi tiin Juu teeb yudamm na jaŋmaanii, ki tan sɔɔ Yiisa see bi sinsuuk ni, ki betib a, "Parmaasir-ii be i paak." 20 Waa yet nna poorpoe, ki u wannib u niipant ni fɔna nan u lokir ni fɔnn na. Ki u poorpoweiteeb nba lau maŋ, ki bi ji mɔk parpeenn bonchiann. 21 Ki Yiisa bia ŋamm yetib a, "Parmaasir-ii be i paak. N Baa nba tumin biaŋinba na, n mun yaa n tumi li biaŋe." 22 Li poorpoe ki u foont bi paak ŋaan yetib a, "Gaat Yennu Seyeeŋ man. 23 Li-i tee ki i nyik chab sɔɔ biit, u set la nyikinchab u biit maŋ paaka; ŋaan li-i tee ki i ki nyik chab sɔɔ biiti, u kan la nyikinchabi." 24 Ŋaan u poorpoweiteyenɔ nba tee Tomas, ki bi yiu Jaak na, din kaa yoo nba ki Yiisa baar bi boor na. 25 Ki Yiisa poorpowei-teleeb na betɔ a, "Ti la ti Yomdaanɔwa." Ki Tomas yetib a, "Min ŋarin, li-i kii tee ki n tan lau nan u niipant ni fɔna na, ki jii n niibir ki tun siaminba ki bi kpaa kpai na, ki bia jii n nuu ki tun u lokir na ni-i kaa, n kan teen yada." 26 Li daa ŋanniin daare ki Yiisa poorpoweiteeb na bia lakin leeb ki be diiuk ni, ki Tomas ji be bi ni, ki bi yaan kpar gann; ki Yiisa tan baar see bi ni, ki betib a, "Parmaasir-ii be i paak," 27 ŋaan bet Tomas a, "Jiin a niibir ki tun n niipant ni, ŋaan bia tant a nuu ki tun n lokir ni, ki ji daa birisi, ŋaan teenin yada." 28 Ki Tomas yetɔ a, "Fine tee n Yomdaanɔ ki bia tee n Yennu." 29 Ki Yiisa boiɔ a, "Faa ji lan na paake ki a teenin yada-a? Binba ki lan ŋaan teenin yada na, parpeenn tee bi yare." 30 Yiisa din tun bakitnauŋ toonjaana bonchiann u poorpoweiteeb peŋ, ŋaan li kur ki sɔb gbouŋ na ni. 31 Linba sɔb ki be gbouŋ na ni, bi sɔb a yin teen yada nan Yiisae tee Yennu Niganntɔɔ Masia, ki bia tee Yennu Bija. Li-i tee ki i teenɔ yada, u paake ki i saa la manfoor nba kaa gbennu.

Jɔɔnn 21

1 Li poorpoe ki Yiisa ŋamm dɔkit u poorpoweiteeb paak, mɔkgbeŋŋir nba ki bi yir Taiberias j na ni. Waa dɔkit biaŋinbae na: 2 Simonn Piita nan Tomas (wunba ki bi din yiu Jaak na) nan Natanael (ŋɔɔe din nyii Keena nba be Galilii tiŋ ni na), nan Sebedii waas, nan Yiisa poorpoweiteleeb banlee, din lakin be Taiberias mɔkgbeŋŋir maŋ ni. 3 Ki Simonn Piita tan bet u leeb na a, "N saa sik jansooruwa." Ki bi betɔ a, "Timm nan fine saa sik." Ki bi saan kɔɔ burgbetir ni, ki lubin bi janlaauŋ nyun na ni, ŋaan li nyiɔk bi din ki soor siari. 4 Li din tan yent saanyapob ni ki Yiisa see nyunkpiŋ, ŋaan ki u poorpoweiteeb ki mi a ŋɔɔe. 5 Ki u boib a, "Ŋaajab, i ki soor siarii?" Ki bi jiin a, "Nn." 6 Ki u betib a, "Lumin i janlaauŋ i diitu po, ki i saa soor janii." Ki bi lu janlaauŋ na, ki ji gbar donnu, kimaan janii nba ki bi soor na kpiatu din paaka. 7 Ŋanne ki Yiisa poorpoweitɔɔ nba ki u mantik loonɔ na yet Piita a, "Ti Yomdaanɔe!" Simonn Piita nba gbat a bi Yomdaanɔe na, ki u lia u liatir nba ki u bo liat bir na, ki yukir sik nyun ni ki baar Yiisa boor. 8 Leŋ din ki fɔk nan nyunkpiŋi; li fɔkint din tee nan taapauŋ kobii ŋantaa nae; ki Yiisa poorpoweiteleeb ji kan burgbetir na ki li daar janlaauŋ na, ki li gbee nan janii, ki baar nann nyunkpiŋ. 9 Baa nyii burgbetir na ni yoo nba ki bi la boroboro nan sankɔɔna muu, ki jaŋ paa muu na paak ki beet. 10 Ki Yiisa betib a, "Jiin janii nba ki i soor na waan, ki baar nann nna." 11 Ki Simonn Piita kɔɔ burgbetir na ni, ki dat janlaauŋ na ki donn kunkonn, ki li gbee nan jangbeŋŋa; ki bi kan, ki li tee janii kobik nan piiŋŋmu nan ŋantaa. Li din yab bonchiann, ŋaan janlaauŋ na lek ki pati. 12 Ŋanne ki Yiisa betib a, "Saana man ki tan ŋman." Ŋaan nan bi yenɔkɔɔwa lek ki mɔk parcheenn nan wun boiɔ a u tee ŋmee, kimaan bi mi nan u tee Yomdaanɔ nae. 13 Ki Yiisa jii boroboro na ki turib, ki bia jii jaŋ na ki turib. 14 Linba nae din tee taar muntaa ni ki Yiisa jii u mɔŋ ki wann u poorpoweiteeb, Yennu nba din fiinɔ kuun ni na poorpo. 15 Baa din dii jeet maŋ poorpoe, ki Yiisa boi Simonn Piita a, "Simonn, fin Jɔɔnn bija, a loonin ki gar linba nawa-a?" Ki u jiin a, "Nn, n Yomdaanɔ, a mi nan n loona." Ki u yetɔ a, "I dint n pebis." 16 Ki Yiisa bia boi Simonn Piita taar munlee ni a, "Simonn, Jɔɔnn bija, a loonimii?" Ki u jiin a, "Nn, n Yomdaanɔ, a mi nan n loona." Ki u betɔ a, "I kpaar n pei." 17 Ki taar muntaa ni ki Yiisa boiɔ a, "Simonn, fin Jɔɔnn bija, a loonimii?" Ki Piita par ji biir, kimaan Yiisa nba boiɔ taar muntaa a, "A loonimii?" na. Ki u yetɔ a, "N Yomdaanɔ, a mi bonsiar kur. A mi nan n loona." Ki Yiisa betɔ a, "I dint n pei. 18 Barmɔniie ki n beera na, faa din tee naasimɔ na, a din tuu bob a gbanne, ki saa siaminba ki a loon; ŋaan a-i taŋŋi kpet yoo nba, a saa tant a nii, ki sɔɔ saa lora gbann, ki mukisa ki saan nana siaminba ki a ki loon." 19 Yiisa nba yet linba na din want biaŋinba ki Piita tan saa kpo ki te Yennu sann n la dontire. Li poorpo ki Yiisa yetɔ a, "I waa-n." 20 Ki Piita tan jiant ki la Yiisa poorpoweitelɔɔ nba ki u mantik loonɔ na ki u waa; ŋɔɔ maŋe din kar ki kpia Yiisa yoo nba ki bi lakin di jeet, ki dɔnn boiɔ a, "Ŋmee yaa wun nyi a poor na?" 21 Piita nba lau yoo nba, ki u boi Yiisa a, "N Yomdaanɔ, ŋaan jɔɔ na ŋarimi?" 22 Ki Yiisa yetɔ a, "Mi-i loon ki wuu be nan maa tan saa jen, li ki laani. Fin-ii waan." 23 Li paake teen ki Yiisa poorpoweiteeb na din yeen a Yiisa poorpoweitɔɔ maŋ kan kpo. Ŋaan Yiisa din ki pak a u kan kpo kaa. U din yet a, "Mi-i loon wuu be nan maa tan saa jen, li ki laani." 24 Tɔn, Yiisa poorpoweitɔɔ maŋe tee wunba yeen niib barii maŋ, ki bia sɔbir gbouŋ na ni; ki ti mi nan waa yeen linba na tee barmɔniie. 25 Ŋaan bona bonchiann be ki Yiisa din tun ki pukin linba sɔb gbouŋ na ni paak. Bi-i bonni sɔb linba kur ki u din tun maŋ, n dukin nan gbant nba ki bi bo saa sɔb na bo kan la yiar tingbouŋ na ni kii be.

Toona 1

1 Chanbaa Teofilus: N sinsinn sɔbu na ni min Luk din sɔb bona bonchiann nba ki Yiisa din tuun ki bia want niib, u toonn pinpiin yoo na mɔkmɔk nan Yennu nba din tan donnɔ Yendɔuŋ ni. 2 Waa daa din ki doo na, Yennu Seyeeŋ sommir nie ki u din wann waa gann binba ki teemm u toomiinba na nba sii tuun biaŋinba. 3 U kuun poorpoe ki u din jii dapiinna ki yɔɔ want u mɔŋ ki teemm, ki li want nan birsuk kaa nan u set jen u manfoor niwa, ki bi din tuu yɔɔ laatɔ, ki u piak namm ki jiin Yennu naan po. 4 Yosau yaann ki u tan lakin be namm, ki din tan turib mɔb a, "I daa nyi Jerusalemi, ŋaan kii be kii guu wunba ki n Baa Yennu senn mɔsonn a wu saa turi, nan maa poŋ beti u po na. 5 Jɔɔnn ŋarin din wuur niib nan nyume, ŋaan daa ŋanlelee na ni Yennu Seyeeŋ saa gbee i ni." 6 Toomiinba nba din lakin nan Yiisa yoo nba, ki bi boiɔ a, "Ti Yomdaanɔ, yoo nba nae ki a yaa a fat timm Israel teeb yent ki jiint koo nlee?" 7 Ki Yiisa yetib a, "Li ki lai nan yin bann yoo nba ki n Baa Yennu senn a lin tun na; ŋɔɔe mɔk yaak ki senn u yoo. 8 Ŋaan yoo nba ki u Seyeeŋ saa sik i paak na, i saa la paŋ, ki tan sii tee n siara damm Jerusalem, nan Judea tiŋ kur ni, nan Samaria tiŋ ni, nan tingbouŋ na lokir kur po." 9 Waa pak maan maŋ ki gbenn yoo nba, ki bi la ki Yennu te ki u do sanpaapo, ki bi goriiɔ, ki u saa kɔɔ sanpagbant ni, ki bi ji ki lau. 10 Ŋaan baa lek biar see ki kpaa nunii ki gorii sanpaapo na, ki sɔɔ malakanba banlee see ki lia tapeenii ki naan jab, 11 ki boib a, "Yimm Galilii teeb, bee ki i see nna ki gorii sanpaapo nna? Yiisa nba nyii i boor ki doo Yendɔuŋ ni biaŋinba na, u bia tan saa nyi Yendɔuŋ maŋ ni ki jen sik nan yaa goriiɔ ki u do sanpaapo biaŋinba nae." 12 Li yoo na ki Yiisa toomiinba na nyii Olif Tiinii kunkonn na paak ki ŋmat Jerusalem. Leŋ maŋ nan Jerusalem din tee nan maar jinn nae. 13 Baa baar Jerusalem yoo nba ki bi saan kɔɔ ŋaak nba ki bi tuu be na ni ki doo ditɔɔtuk paak. Binba din kɔɔ maŋ tee Piita nan Jɔɔnn nan Jeems nan Andru nan Filip nan Tomas nan Batolomiu nan Matiu, nan Jeems wunba din tee Alfeus bija, nan Simonn Nikakitik, nan Judas wunba tee Jeems bija na; 14 ki bi kura tuu yɔɔ lakint nan leeb ki pukin poosiab nan Yiisa naa Mari, nan Yiisa waarii, ki mei Yennu nan dudukyent ki ki naki. 15 Ŋanne ki daa ŋanlee nna tan gar, ki Yiisaweira teen nan kobik nan piinlee nawa ki taan kar, ki Piita tan fiir set 16 ki yet a, "N naa waas, linba ki Yennu Seyeeŋ din te ki Defid din sint bunt buntir ki jiin Judas po, ki li sɔb Yennu gbouŋ ni na, li kpaa talase ki lin set tan gbee. Judas maŋe tee daanɔ nba daan wann niib ki bi soor Yiisa na. 17 Ŋaan Yiisa din gann timm nan ŋɔɔe a tii tuun Yennu toonn nba ki ti tuun na, ki u din pukin ti kann ni." 18 (Judas toonbiit likirii nba ki u la nae, ki u jii ki daa kpaab; leŋe ki u bia baa ki put poor, ki u nɔɔt kur nyii. 19 Ki Jerusalem teeb kur gbat nna maŋ, ki pur kpaab maŋ sann bi mɔŋ maan ni a Akeldama, ki li paak tee "Sɔnkpaab.") 20 "Tɔn, li sɔb yaŋ gbouŋ nba be Yennu gbouŋ nɔɔk ni na a: 'Ŋaant ki u ŋaak n set langbouŋ ki sɔɔ daa kɔɔ leŋi.' Ki bia jen sɔb a: 'Li ŋan ki sɔɔ n gaar u toonn yiar na.' 21 "Li paak ti loon ki tin gann niyenɔe ki pukinɔ ti po, ki wun teen Yiisa kuunfiiru siara daanɔ, li ŋan ki wuu tee timm nba daan tuu yɔɔ lin nan ti Yomdaanɔ Yiisa maŋ ni yenɔ, yoo nba ki Jɔɔnn din wuur niib Yennu nyunwuru mɔkmɔk ki tan baar yoo nba ki Yiisa nyii ti boor, ki Yennu donnɔ Yendɔuŋ ni na." 23 Ŋanne ki bi nyinn jab banlee; Joosef wunba ki bi din yiu Basabas na (bi din bia yi ŋɔɔe Justus na), nan Matias, 24 ki ji miar Yennu a, "Ti Yomdaanɔ, fine mi sɔɔ kur par ni, li paak, wantit jab banlee na ni, wunba ki a gann, 25 ki wun teen toomii ki gaar a toonn yiar nba ki Judas nyik ŋaan saan saa be siaminba ŋan nanɔ na." 26 Baa miar Yennu ki gbenn yoo nba, ki bi tɔ tiatia, a bin gann bi banlee maŋ ni yenɔ, ki Matias dii, ki bi jiiu ki pukinɔ toomiinba piik nan yenɔkɔɔ na ni.

Toona 2

1 Tɔn, ki jaamm nba ki bi yir Pentekost na daar baar; daar maŋe ki Yiisaweira kura lakin leeb boyennkɔɔ ni. 2 Li taakpaak ni ki fuur nyii sanpaapo ki fu nan wonpaaruko da na, ki sik gbee diiuk nba ki bi kar na ni. 3 Ki bi la ki siar naan nan mupeeuŋ na, ki yat tɔɔ sɔɔ kur paak, 4 ki Yennu Seyeeŋ gbee sɔɔ kur ni, ki bi piin piak barganii nan Yennu Seyeeŋ nba wannib biaŋinba na. 5 Ki Juu teeb nba tee yentinna na mun din be Jerusalem li yoo, binba nyii tingbouŋ na tinii kur po ki baar leŋ. 6 Baa gbat fuut maŋ yoo nba, ki nibur tikir leŋ, ki li teemm yaarlituk, kimaan Yiisaweira maŋ piak barganii sɔɔ kur maan ni ki u gbia. 7 Ki li teemm bakitnauŋ ki yaarlitib, ki bi boi bi leeb a, "Niib nba piak na kur ki tee Galilii teeb kaa-a? 8 Ki li teen nlee ki ti kura tan jia gbia ki bi piak ti mɔŋ mɔŋ maan nna? 9 Ti siab nyii Patia nan Media nan Elam nan Mesopotamia nan Judea nan Kapadosia nan Pontus nan Asia, 10 nan Frijia nan Pamfilia nan Ijipt, nan Libia yaka po siaminba kpia nan Sairene na; ki ti yemm mun bia nyii Rom; 11 ki ti siab tee Juu teeb, ki siab mun bia tee boorganu nba din lebit bi jiantu ki waa Juu teeb Yennu na; ki ti yemm mun bia nyii Kreet nan Arabia, ŋaan ki ti kura lek gbia ki bi piak ti mɔŋ mɔŋ maan ni, ki dont Yennu sann nan u bakitnauŋ toona nba ki u tun na." 12 Ki li bakit ki yaar litib ki ŋmat bi yan, ki bi boi bi leeb a, "Linba na paak tee bee?" 13 Ki siab mun bia laa ki sarikit Yiisaweira maŋ a, "Bi nyuu daame ki yib." 14 Ŋanne ki Piita nan u leeb piik nan yenɔkɔɔ na fiir set nibur na tɔɔnn; ki Piita pak sanpaapowa a "Yimm Juu teeb, nan yimm nba kur be Jerusalem na, gbiintir maa yaa n paki linba na man, kimaan n mɔk siare ki loon ki i bann. 15 Yaa dukii nan ti yibe na, ŋaan ti ki nyuu siari, kimaan li daa tee sanyayendanne. 16 Li tee linba ki Yennu sɔkinii Joel din bunt ki yaa li tan saa teene a: 17 'Yennu yet a: Durinya joontu yoo n tan saa tun linba nae: n tan saa sikin n Seek sɔɔ kur paak, ki i bonjabis nan i bonpobis tan sii sɔkint n maan, ki i naasimm mun tan sii laat yirintu, ki i jakpera tan sii damii damiit. 18 Ki li yoo maŋ n tan saa sikin n Seek n daaba nba tee jab nan binba tee poob na paak, ki bi mun bia tan sii sɔkint n maan. 19 N tan saa tun toonjaana sanpaapo, nan bakitnauŋ nyina tingbouŋ na ni; ki sɔn nan muu nan munyuuk tan sii be, 20 ki yonnu tan saa kpint ki bɔnn, ki ŋmaarik mun tan saa kpint ki mɔnn nan sɔn na. Li tan saa teen nnaewa, ki min Yennu n sik tingbouŋ na ni ki bu niib buut; daar maŋ tan sii tee dajaanne; 21 ki sɔɔ kur nba tan yiin n sann saa la tinnu.'" 22 Ŋanne ki Piita bia ŋamm yet a, "Yimm Israel teeb, gbiintir man linba ki n yaa n beti ki jiin Yiisa nba tee Nasaref nirɔ na po; i mɔŋ mi nan Yennue te ki u tuu tuun bakitnauŋ toona nan nyina i boor ni, ki li set want nan Yennue tumɔ. 23 Ŋaan Yennu mi linba yaa lin tan teen. Li paak ki u dɔŋ lor ki kubinɔ i nuu ni, ki i te ki biitdamm kpaa tabinɔ dapunpunn paak ki u kpo, ki li want nan yimme set kpiiu. 24 "Waa daan kpo ki daa be kuun nii ni na, ki Yennu fatɔ ki fiinɔ kuun ni, kimaan kuun ki mɔk paŋ ki saa diau. 25 Defid din bunt buntir ki jiin Yiisa po ki yaa 'N mi nan Yennu yɔɔ be nanin, ki u bia see n poorpo ki guun ki n ki laat daŋi. 26 Li paak n mɔk parpeenn ki piak parpeenn maan. Mi-i lekii taŋŋi kpo, ŋaan n sii mɔk dindann, 27 kimaan u tan kan nyik n seek ki lin kpakin kpeentiŋi. N tee u popeendaanɔe, ki u kan sak ki n gbanant n tan bati; 28 ki u bia te ki n bann manfoor sɔnii, ki tan saa baar kii be u tɔɔnn kii mɔk parpeenn bonchiann.'" 29 Ki Piita bia ŋamm yet a, "N naa waas, n yaa n pak yent i numpoe ki jiin ti yeejasaakɔɔ Defid po. U din kpo, ki bi piiu, ki u kaauk daa be nna na. 30 U din tee Yennu sɔkiniie, ki din mi nan Yennu senn mɔsonn ki turɔ, ki yet a li-i tee ki u kpo, u tan saa jii u yaaboonyenɔ ki dinnɔ u naan. 31 Defid din mi linba ki Yennu yaa wun tan teen. Li paak ki u din pak Yennu Niganntɔɔ Masia kuunfiiru po, ki yet a Yennu Niganntɔɔ tan kan kpakin kpeentiŋ, ki u gbanant bia kan bati." 32 Ki Piita bia ŋamm yet a, "Yiisa nba nae ki Yennu daan fiinɔ kuun ni, ki ti kura na mun tee u kuunfiiru maŋ siara damm. 33 Ki Yennu bia donnɔ a wun kar u niidiitu po. Waa kar yoo nba, ki u gaar Seyeeŋ nba ki Yennu din senn mɔsonn ki yaa u tan saa turit na, ki sikin ti ni. Tɔn, Seyeeŋ maŋe ki i laat ki bia gbia na. 34 Defid nba ŋarin din kpo na, u din ki doo Yendɔuŋ ni nan u gbananti. Tɔn, u buntir maŋ din ki want u mɔŋ donu po kaa, ŋaan u din want Yiisa poe, ki yet a: 'Yennu yet n Yomdaanɔ a: Karin n niidiitu po 35 mɔkmɔk nan maa tan saa jii a datai ki teemm a taakpakta.'" 36 Ki Piita bia yet a, "Li ŋan ki yimm Israel teeb kur n bann nan Yiisa nba ki i daan te ki bi kpaau dapunpunn paak na, ŋɔɔe ki Yennu wann nan u tee u Niganntɔɔ Masia, ki bia tee ti Yomdaanɔ." 37 Niib na nba gbat nna maŋ, ki bi para biir bonchiann. Ki bi boi Piita nan u leeb na a, "Ei! ti naa waas, ti saa teen nlee?" 38 Ki Piita betib a, "See ki i kur nyik toonbiit tumu ki tin wuri Yennu nyunwuru Yiisa Masia sann ni, ki Yennu n nyik i biit ki chabi, ki turi piinii nba tee u Seyeeŋ na; 39 kimaan u poŋ senn mɔsonn a u saa jii u Seyeeŋ na ki tur yimm nan i waas, nan binba kur be banfɔka, yimm nba kur ki u tan saa yiini ki yin sak u mɔb na." 40 Li poorpoe ki Piita pak mɔmaan bonchiann ki nyinn siara, ŋaan bia kpaamm a, "Hei! Nyint i mɔŋ man Yennu tubdatu nba baat mɔtana nibiit paak na." 41 Ki bi bonchiann sak u maan maŋ, ki teen nan niib tusaa ŋantaa nawa, ki bi wurib Yennu nyunwuru, ki bi pukin bi paak li daar maŋ. 42 Ki bi ŋammit tumii ki bant toomiinba maŋ wannu, ki jii bi yoo ki taan dia leeb nan mɔtaauk, ki lakint di jeet, ki bia tikii mei Yennu. 43 Ki jijeet ji mɔk sɔɔ kur kimaan toomiinba na tun bakitnauŋ toona bonchiann Yennu paŋ ni. 44 Ki Yiisaweira maŋ kura bia lek dia leeb nan mɔtaauk, ki chentir bi bona ki teen leeb, 45 ki tuu kɔi bi faar ki jikit li likirii ki toor leeb, ki jaŋit sɔɔ kur nba loon biaŋinba. 46 Daar kur bi bia lek tuu taan leebe Yennu jiantu ŋasaakak ni ki jiant Yennu, ŋaan ji nyi ki lakint baa jedikpaguur bi ŋei ni, ki di jeet nan leeb ki mɔk parpeenn, ki ninfɔkin kaa nan leebi. 47 Ki yoo kur ki bi piak dont Yennu sann, ki sɔɔ kur par mei bi paak. Ki daar kur ki ti Yomdaanɔ bia ŋammit te ki niib laat tinnu ki pukii bi paak.

Toona 3

1 Dasiar yenlekir ki Piita nan Jɔɔnn tan saa Yennu jiantu ŋasaakak ni Yenmiar yoo. 2 Ŋanne ki bi saa yaa bin kɔɔ Yennu jiantu ŋasaakak tammɔb nba ki bi yi Tammɔŋaŋ na, ki la jasɔɔ nna kar leŋ, ki poŋ tee wɔbik u maaru niwa; ki daar yeejaŋaakur ki bi din tuu jiiu ki baar nanɔ tammɔb maŋ boor, a wuu mei niib nba baat Yennu jiantu ŋasaakak maŋ ni na likirii. 3 Yoo nba ki u tan la Piita nan Jɔɔnn ki bi yaa bin kɔɔ na, ki u miarib likirii. 4 Ki bi jiant ki goriiɔ sirrr; ki Piita tan yetɔ a, "I goriit." 5 Ŋanne ki u ji nur nunii ki goriib, ki mi a u saa gaar siare bi peŋ. 6 Ŋaan ki Piita betɔ a, "Ti ki mɔk likirii, ŋaan taa mɔk linbae ki ti yaa tin tura. N tura mɔb Yiisa Masia nba tee Nasaref nirɔ na sann ni, fiit kii somm," 7 ŋaan soor u niidiitu ki fiinɔ. Li taakpaak ni ki jɔɔ na taapant kakit, 8 ki u tab fiir set, ki ji piin somm ki lin, ki tan weib kɔɔ Yennu jiantu ŋasaakak maŋ ni, ki yuuk mobit nan parpeenn, ki piak dont Yennu sann. 9 Ki niib kur lau ki u somm ki piak dont Yennu sann. 10 Baa ji din bann nan ŋɔɔe tee miatɔ nba tuu kaar ki mei niib likirii Yennu jiantu ŋasaakak tammɔŋaŋ ni na, ki li ji yaar litib nan waa paak na. 11 Ki wɔbik maŋ puur wɔb Piita nan Jɔɔnn; ki li teen niib na kura bakitnauŋ bonchiann, ki bi chiar lakin bi boor. Baa lakin sian na yi Solomonn barintire. 12 Piita nba la niib na yoo nba ki u yet a, "Yimm Israel teeb, bee ki li yaar liti nirɔ na po? Bee ki i barii timm nna? Taa te ki wɔbik na fiir somm na, i dukii a li tee ti mɔŋ paŋ koo ti mɔŋ yentinu paak-e? 13 Yennu nba din tee Abraham nan Aisak nan Jakɔb nan ti yeejaleeb Yennu na, ŋɔɔe tee daanɔ nba donn u Toontunnɔ Yiisa ki turɔ u mɔŋ yabint. Yiisa maŋe ki i jiiu ki teenɔ ti yudamm nuu ni na, ki Pailat din poŋ bikin sinsinn a wun ŋaau, ki i bia y‡tɔ Pailat boor na. 14 Ŋɔɔe lek tee Yennu nirɔ, ki jenna tee Popeendaanɔ, ŋaan ki i y‡tɔ, ŋaan miar Pailat a wun nyinn nikpiiruk ki turi. 15 Li paak, yimme te ki bi kpii Manfoturtɔɔ maŋ; ŋaan ki Yennu fiinɔ kuun ni, ki timme tee linba na siara damm. 16 "Yiisa maŋ sann paŋ nba ki ti yi nae te ki jɔɔ na paak. Wɔbik na tee wunba ki i poŋ tuu miu ki bia laatɔe, ŋaan ki u tan paak, kimaan waa teen Yiisa sann yada na paak. Waa teen Yiisa yada na paake te ki u paak ki see i numm ni na. 17 "Tɔn, n naa waas, n mi nan yimm nan i yudamm nba daan te ki bi kpii Yiisa na, i daan ki bann yaa tun linba maŋ paaki. 18 Ŋaan Yennu din pak u maan ki tur ti sɔkiniinba, ki bi mun bia pak tur niib, ki bi yet a see ki u Niganntɔɔ Masia n lek di biak. Tɔn, Yennu set tan te ki li teen mɔnii, nan yaa tun biaŋinba na. 19 "Li paak, i nyik biit tumu man, kii waa Yennu sɔnu, ki wun nyik chab i toonbiit, 20 ki turi foon, ki bia tan tun Yiisa Masia i boor, wunba ki u poŋ gannɔ ki turi na; 21 ŋaan Yiisa maŋ lek sii be Yendɔuŋ ni, ki Yennu n tan ŋamm bona kura, nan waa din te ki u popeenn sɔkiniinba nba din be yaayoo ni na yet biaŋinba, ki bi mun pak turit na. 22 "Ŋann maŋe ki Moses mun din yet a 'I Yomdaanɔ Yennu saa turi sɔkiniisɔɔ, ki u sii tee i mɔŋ nirɔ, nan waa nyinnin biaŋinba ki teenin u sɔkinii i boor ni na. Gbiintirɔ man ki tun linba kur ki u saa pak turi; 23 ki daanɔ nba ki gbiint sɔkinii maŋ maami, Yennu saa nyinn li yɔɔ u niib ni ki biirɔ.' 24 "Yennu sɔkinii Samuel nan sɔkiniinba nba wei u paak, ki din piak Yennu maan, bi kura din want linba tan saa teen Yennu Niganntɔɔ Masia ti yoo nae. 25 Yennu mɔsona nba ki u din senn ki tur u sɔkiniinba maŋ, li mɔsona tee i yare; ki lor nba ki u din lor nan ti yeejamm na, li lor mun bia tee i yare, kimaan u din yet Abraham a 'A yaaboonyenɔ nie ki tingbouŋ na teeb kura tan saa la n piisin.' 26 Li paak ki Yennu gann u Toontunnɔ Masia maŋ ki tumɔ i boor sinsinn, a wun te ki i kur n nyik i biit tumu ki la piisin maŋ."

Toona 4

1 Yoo nba ki Piita nan Jɔɔnn daa see ki piak teen niib maŋ na, ki Yennu jiantu ŋasaakak kunkɔnkɔnna yudaanɔ nan Sajusiinba nan Yennu jiantu yudamm kpir baar Piitanba boor, 2 kimaan bi wutoa doo Piita nan Jɔɔnn nba want niib a Yiisa daan fiir kuun ni na paak, ki li want nan kpeemm tan saa fiir kuun ni ki jen bi manfoor ni biak. 3 Li paak ki bi soorib ki kɔɔmm dansarik a lin yenta, kimaan yoo poŋ gara. 4 Ŋaan niib bonchiann nba gbat Piita maan maŋ na teen Yiisa yada, ki pukin Yiisaweira po. Ki jab na kur kann tee nan tusaa ŋaŋŋmu na. 5 Laa tan yent sanyiɔk, ki Juu teeb yudamm nan saakab nan sennu wannteeb lakin bi tituk kaanu ni Jersualem; 6 ki bi lakin nan Yennu jiantu yudaanɔ Annas, nan Kayafas, nan Jɔɔnn nan Aleksander nan jiantu yudaanɔ maŋ ŋaatesiab, 7 ki te ki Piita nan Jɔɔnn fiir set bi sinsuuk ni, ki bi boib a, "Panboor bee ki i mɔki? Ki ŋmee sann nie ki i fiin wɔbik nba na?" 8 Ŋanne ki Yennu Seyeeŋ fiir Piita ni, ki u yetib a, "Yimm chanbaanba nan saakab, gbiintir man, 9 li-i tee ki i boit dinna na ki jiin toonŋann nba ki ti tun ki tur wɔbik na, nan waa la laafia na paakie, 10 ŋann li ŋan ki i kura n bann, ki Israel teeb kur n mun bann nan Nasaref nirɔ Yiisa Masia sann nie ki jɔɔ maŋ la laafia ki see i numm ni na. Li Yiisae ki i daan te ki bi kpaau dapunpunn paak, ŋaan ki Yennu fiinɔ kuun ni na. 11 Ŋɔɔe tee daanɔ nba ki Yennu gbouŋ piak u po na, a 'Tann nba ki yimm tanmaara y‡tir na, ŋanne set tee lɔtik ni tanŋann.' 12 Ki sɔɔ sann ji kaa tingbouŋ na ni ki Yennu tur niib a bin la tinnu, see Yiisa kuukɔɔ." 13 Tituk teeb maŋ nba din la Piita nan Jɔɔnn parcheenn nba ki bi mɔk na, ki bia bann nan bi tee damm nba ki mi gbouŋ bonŋann na, li din yaar litibe, ki bi ji bann nan bi tuu tee Yiisa weinanleebe. 14 Baa la jɔɔ nba ki bi won te ki u la laafia na see Piita nan Jɔɔnn boor na, ki bi ji ki mɔk mɔb nba saa pak biiribi. 15 Ŋanne ki bi daa ŋaan ki bi nyii bi lakinu diiuk maŋ ni, ŋaan ki bi biar faa leeb sawara, 16 ki boi bi leeb a, "Ti saa teen jab na nlee na? kimaan sɔɔ kur nba be Jerusalem poŋ mi yaarlituk toonn nba ki bi tun na. Li paak ti ji kan fit nɔi; 17 ŋaan ŋaant man ki tin kpaamm, ki bi ji daa mi yi Yiisa sann ki teen niibi, ki Yiisa maan maŋ ji daa bia yat ki saa niib boor." 18 Ŋanne ki bi yiimm, ki bi jen kɔɔ diiuk na ni; ki bi betib a, "I mi man ki i jii Yiisa sann ki pak wann sɔɔ." 19 Ki Piita nan Jɔɔnn jiin a, "Ki i yaa mɔŋ mɔŋ po ŋarin, i dukin nan lanne took Yennu boori? Ti ji sak i mɔb ŋaan nyik Yennu mɔb koo nlee? 20 kimaan timm kan fit nyik pinpauk, linba po ki ti la ki bia gbati." 21 Ki tituk teeb maŋ lek kpaamm nan ninmɔnjar, ŋaan ŋaab a bii saa, kimaan bi ki la sɔnu nba ki bi saa dat bi tuba, kimaan niib na din piak ki dont Yennu sanne, baa din fiin wɔbik na paak. 22 Jɔɔ nba ki bi te ki u la laafia na bina din gar piinnawa. 23 Baa ŋaa Piita nan Jɔɔnn yoo nba, ki bi ŋmat kun bi leeb boor, ki saa yetib linba ki Yennu jiantu yudamm nan saakab maŋ pakib. 24 Baa mun gbat nna maŋ ki bi kur taan leeb nan dudukyent ki miar Yennu a, "Ti Yabint Yomdaanɔ, fine nan sanpaak nan tiŋ, nan mɔkgbeŋŋa nan linba kur be li ni, 25 ki a Seyeeŋ maŋ nie ki a din wann ti yeeja Defid, wunba tee a toontunnɔ, ki u bunt buntir ki yet a: 'Binba ki tee Israel teeb na pir nan wutoa, ki Israel teeb lorin lor yana, 26 ki tingbouŋ na kpanbara nan yudamm taan leeb ki took a bin kɔn nan Yennu nan u Niganntɔɔ Masia na.' 27 "Li tee barmɔniie nan Herod nan Ponsius Pailat nan binba ki tee Israel teeb na nan Israel teeb set daan lakin doo na ni, ki lor lora a bin kpi a popeenn toontunnɔ Yiisa, wunba ki a gann ki sennɔ na. 28 Ŋanne ki bi lakin, a bin tun linba kur ki a poŋ din dukin a yanbɔɔt ni nan a paŋ, ki yaa li tan saa teen na. 29 Tɔn, mɔtana, ti Yomdaanɔ, gbiintir niib na nba fɔ kɔnfɔɔt nan ninmɔnn ti paak na, ki ŋaan timm nba tee a daaba na-ii piak a maan nan parcheenn bonchiann, 30 ki tant a nuu ki te baatib n la laafia, ki ŋaan ki tii tuun bakitnauŋ toona, nan a popeenn toontunnɔ Yiisa sann paŋ ni." 31 Baa gbenn Yenmiaru na yoo nba, ki siaminba ki bi tikir na ji jek, ki bi kura gbee nan Yennu Seyeeŋ, ki piin piak Yennu maan nan parcheenn. 32 Li yoo na ki Yiisaweira maŋ kura taan leeb nan dudukyent ki chentir bi bona ki teen bi leeb. Bi sɔɔ din ki yaa u yen siari. 33 Li yoo na jik ki toomiinba maŋ nyint ti Yomdaanɔ Yiisa kuunfiiru siara, ki siara maŋ mɔk paŋ bonchiann, ki Yennu piisin bonchiann be bi kur ni. 34 Ki sɔɔ din kaa bi ni ki pɔt siari, kimaan binba din mɔk bi mɔŋ mɔŋ kpaant nan bi ŋei din tuu kɔie, ki gaar li likirii ki baar nann, 35 ki tan tur toomiinba na, ki bi chentir ki teen bi leeb nan baa loon biaŋinba. 36 Jasɔɔ din be leŋ ki u sann tee Joosef, ki u tee Liifai booru ni nirɔ, wunba ki bi marɔ Saiprus, ki toomiinba na yiu Banabas (ki li paak tee Sommtɔɔ), 37 ki u tan kɔi u kpaab, ki gaar li likirii ki baar nann, ki tur toomiinba na.

Toona 5

1 Jasɔɔ nna mun din be ki u sann tee Ananias, ki u ŋaapoo sann mun tee Safaira, ki u din tan kɔi u kpaab ki gaar li likirii, 2 ki paat likirii maŋ paak ki bɔr, ki u ŋaapoo mi li po, ŋaan jii linba tenn na, ki baar nann ki tan tur toomiinba maŋ. 3 Ki Piita boiɔ a, "Ananias, bee ki a ŋaan Sintaanii kɔɔ yent a pari, ki a faar faak ki loon ki a kpann Yennu Seyeeŋi, ki paat likirii nba ki a kɔi a kpaab na paaki? 4 Faa daan daa ki kɔi a kpaab maŋ na, li daan ki tee a yar kaa-a? Ki faa bia kɔir na, likirii maŋ bia ki be a yent ni kaa-a? Bee teen ki a lor a par ni ki tun linba na? A ki faar faak maŋ ki tur nirɔ kaa, ŋaan a faar ki tur Yennue." 5 Ananias nba gbat nna maŋ yoo nba, ki u kpo ki baa li yoo na. Ki jaŋmaanchiɔŋ kɔɔ binba kur gbat u kuun maŋ po. 6 Ki naasimm fiir ki jiiu ki pɔbinɔ chinchenn ni, ki nyii nanɔ ki saan pii. 7 Ŋanne ki li yann waaminna, ki u ŋaapoo baar kɔɔ, ŋaan daa ki bann linba teeni. 8 Ki Piita bia boiɔ a, "Betirin, li set tee barmɔniie nan fin nan a sɔrɔ kpaab likirii nba ki i gaar na kurii na-a?" Ki u jiin a, "Nn, li kure na." 9 Ki Piita boiɔ a, "Bee ki fin nan a sɔrɔ taan mɔb, ki lor a yin bikin ti Yomdaanɔ Seyeeŋi? Naasimm nba jii a sɔrɔ ki saan piiu na, ŋamme kɔɔ tammɔb ni na, ki bi mun bia saa jiia nnae ki saan piia." 10 Li taakpaak ni, ki u kpo ki baa, ki naasimm na kɔɔ ki la ki u kpowa, ki bi bia jiiu ki nyii ki saan piiu ki kpian u sɔrɔ. 11 Li yoo na ki jaŋmaanchiɔŋ soor Yiisaweira kur nan binba kur gbat maan maŋ. 12 Tɔn, ki toomiinba na tuun nyina nan yaarlituk toona bonchiann niib na ni. Ki Yiisaweira kura tuu taan leeb Yennu ŋasaakak bɔkir nba ki bi yir Solomonn barintir na ni. 13 Binba ki tee Yiisaweira na din ki mɔk par nba saa lakin nammi, ŋaan niib din piak dont Yiisaweira na bonchiann, 14 ki jab nan poob bonchiann teen yada ki pukin Yiisaweira na po. 15 Ŋanne niib din nyi nan baatib, ki dɔɔntib gadoi nan dundɔɔnii paak sanjokpinii a Piita-i taŋŋi gaar yoo nba, u yunyuŋ n lek baa bi paak, ki bin la laafia. 16 Ki niib nba din be Jerusalem digbanbis ni mun jikit baatib, nan binba ki narinbiit daamiib na, ki baat namm, ki bi kura laat laafia. 17 Li paak ki Yennu jiantu yudaanɔ nan u weinanleeb kur nba tee Sajusiinba na fiin punponn bonchiann nan toomiinba na, ki te ki bi saan 18 soor toomiinba maŋ ki kɔɔmm dansarik. 19 Li nyiɔk maŋe ki Yennu malaka sik loot dansarik na tammɔi, ki nyinn toomiinba maŋ, ŋaan betib a 20 "I saa man Yennu ŋasaakak ni, ki saa set, ki mɔɔnt tur niib manfopaann na po." 21 Baa gbat u maan maŋ, ki bi saan ki saa kɔɔ Yennu ŋa-saakak maŋ ni, sanyapob ni, ki ji piin ki want niib manfopaann na maan. Ki Yennu jiantu yudaanɔ nan u weinanleeb na yiin Israel teeb yudamm kura, ki lakimm tituk kaanu, ki bi tan tun a bin nyinn toomiinba maŋ ki baar namm na. 22 Ŋanne ki bi saan dansarik maŋ ni ki saa got, ki ki labi, ki ŋmat tituk maŋ ni ki saa betib a 23 "Taa baar dansarik na boor yoo nba, ti la ki tammɔi kpare kenkenkema, ki dansarguura na be tammɔi boor ki guu, ki ti loot tammɔi na, ŋaan ki ki la sɔɔ dansarik diiuk maŋ ni." 24 Yennu jiantu ŋasaakak yudaanɔ nan jiantu yudamm nba gbat nna maŋ, ki li teemm yaarlituk toomiinba na po, ki bi ji biris linba saa teen. 25 Ki taan sɔɔ jasɔɔ nna kɔɔ, ki yetib a, "Gotir man, jab nba ki i won kɔɔmm dansarik na see Yennu jiantu ŋasaakak ni ki want niib Yennu maan." 26 Li yoo na ki yudaanɔ na jii u jab, ki bi saan ki saa nyinn toomiinba maŋ ki jen namm, ŋaan bi ki nyinnib nan paŋ kaa, kimaan bi tiin jaŋmaanii a niib na tan saa mann jaatib tana. 27 Baa baar namm yoo nba, ki bi te ki bi saan set tituk teeb na sinsuuk ni. Ki Yennu jiantu yudaanɔ na yetib a 28 "Ti daan turi mɔb nan ninbimɔnii, ki yaa i daa want niib Yiisa sann ni, ŋaan gotir yaa tan tun linba na, yaa jii i wannu maŋ ki yat Jerusalem kur po, ŋaan ji loon yin nyiirit Yiisa kuun paak." 29 Ki Piita nan toomiinba leeb na jiin a, "See ki ti lek sak Yennu mɔb ki gar nisaarik mɔb. 30 Yiisa maŋe ki i daan poŋ kpaa tabinɔ dapunpunn paak ki u kpo na, ŋaan Yennu nba tee ti yeejamm Yennu na, ŋɔɔe fiin Yiisa kuun ni, 31 ki jiiu donnɔ ki kaanɔ u niidiitu po, ki teenɔ Yudaanɔ nan Tinntɔɔ, a Israel teeb n nyik biit tumu, ki wun nyik bi biit ki chabib. 32 Timm nan Yennu Seyeeŋe tee Yiisa kuunfiiru maŋ siara damm; ki Yennu jii u Seek maŋ ki tur wunba saak u mɔb." 33 Yudamm maŋ nba gbat nna yoo nba, ki bi wutoa fiir, ki bi ji yaa bin kpi toomiinba maŋ. 34 Ŋaan Farisiisɔɔ nna din be tituk na ni, ki u sann tee Gamaliel, ki u tee sennu wanntɔɔ, ki niib kur teeu baakir, ki u fiir set, ki yet a bin daa nyinn toomiinba na nanyer po; 35 ŋaan bet tituk kaanu damm maŋ a, "Hei, Israel teeb, i mi man yaa yaa yin teen niib na linba na. 36 Sianyoo dinn, ki Tiudas want u mɔŋ nan u tee nijaansɔɔe, ki niib nan kobii ŋanna na tee u poorpojɔɔmu, ŋaan baa din tan kpiiu, u jɔɔmu na kur din yate, ki u jagberin na gbenn. 37 Ki ŋann gar, ki Judas, wunba din tee Galilii nirɔ na mun nyii set nikant yoo, ki want u mɔŋ, ki tunn niib bonchiann yan ki bi waau; ki niib bia mun din tan kpiiu, ki u jɔɔmu na kur yat. 38 Mɔtana, kpan ŋaant Yiisaweira maŋ, ki daa teeb siari; ki li-i tee bi lora nan bi toona na tee nisaarik yarie, li tan saa gbenna. 39 Ŋaan li-i tee Yennu yarie, i kan fit nyannibi. I saa la ki i kpet kɔn nan Yennue gbaa." Ŋanne ki tituk teeb maŋ ji sak Gamaliel mɔb na, 40 ki yiin toomiinba maŋ ki kɔɔmm, ki te ki bi boob kpaasir ŋaan ŋaab, ki turib mɔb a, "I mi man ki i jikii yi Yiisa sann maŋ." 41 Ŋanne ki toomiinba maŋ nyii tituk kaanu na ni nan parpeenn, kimaan Yennu nba la ki bi jaŋ nan fedinu Yiisa sann paak na. 42 Ki daar kur ki bi saa Yennu jiantu ŋasaakak ni, ki bia lin niib ŋei ni, ki want niib a Yiisa tee Yennu Niganntɔɔ Masiae, ki bia mɔɔntir u barŋanii na, ki ki nyikiti.

Toona 6

1 Li poorpoe ki Yiisaweira ŋammit pukii, ki bunburimii tan baar Juu teeb nba piak Griik maan, nan Juu teeb nba piak bi mɔŋ maan na sinsuuk ni; kimaan binba piak Griik maan na din yet a bi-i toor jeet daar kur, bi pakɔi ki laat bi tora nan leeb na. 2 Ŋanne ki toomiinba piik nan banlee na yiin Yiisaweira maŋ kura, ki tan yetib a, "Ti naa waas, li ki ŋan ki tin nyik Yennu maan mɔɔntii ŋaan biar jeet toru ni. 3 Li paak, gotir ki gann jab banlore i sinsuuk ni, binba ki i mi nan bi binbeŋ ŋan, ki bi bia mantik gbee nan Yennu Seyeeŋ nan yanfantir, ki tin teemm toona na yudamm; 4 ŋaan timm n jii ti mɔŋ yoo ki teen Yenmiaru ni, nan Yennu maan wannu ni, ki daa naki." 5 Ki niib na kur ji din mɔk parpeenn toomiinba maan maŋ paak. Ŋanne ki bi gann Stiifenn, wunba mantik gbee nan Yennu Seyeeŋ nan yada na, nan Filip, nan Prokorus, nan Nikanor, nan Timonn, nan Pamenas, nan Nikolaus, wunba nyii Antiok, ki ki tee Juu nirɔ, ŋaan din kpint u jiantu ki waa Juu teeb jiantu na. 6 Niib na nba gannib yoo nba, ki bi te ki bi saan set toomiinba na tɔɔnn, ki toomiinba maŋ yii bi nii bi paak ŋaan miar Yennu ki turib. 7 Li poorpoe ki Yennu maan ŋammit yat kɔɔ niib ni, ki Yiisaweira mun bia yabitir ki pukii bonchiann Jerusalem, ki Yennu mannteeb bonchiann sak Yiisa barŋanii na ki teenɔ yada. 8 Stiifenn din la Yennu sommir nan yiikoo bonchiann, ki din tuun bakitnauŋ toonjaana niib na sinsuuk ni. 9 Ŋaan nisiab din ki sakɔ. Binba din nɔi nan Stiifenn maŋ tee Juu teeb nba din tee daaba, ki bi ŋaab bi daabsin ni na. Ki bi nyii Sairene nan Aleksandria nan Silisia nan Asia nae. Bi mun din mɔk bi mɔŋ Yennu jiantu diiuko. 10 Ki Yennu Seyeeŋ tur Stiifenn yanfantir bonchiann, ki bi ki fit nyannɔ u maan maŋ ni. 11 Baa din ki fit nyannɔ na, ki bi din kɔɔ nisiab a bin yet a, "Ti gbat ki u piak bonbilankant ki biir Moses nan Yennu." 12 Baa yet nna maŋ yoo nba, ki niib na nan saakab nan sennu wannteeb na wutoa doo, ki bi fiir ki soorɔ, ki saan nanɔ bi yudamm tituk boor; 13 ki bi tan baar nan nisiab nna biak a bin faar faak, ki yet a, "Yoo kur jɔɔ na yɔɔ piak ki biir Yennu jiantu ŋasaakak, nan Moses sennu nae, 14 kimaan ti gbat ki u yeen a Yiisa nba tee Nasaref nirɔ na saa bet Yennu ŋasaakak na, ki bia lebit Moses kaar nba ki u din senn na." 15 Binba kur din lakin kar tituk maŋ ni din kpaa bi ninbina ki gorii Stiifenn, ki tan la ki u numpo lebit ki ji naan malaka numpo.

Toona 7

1 Ŋanne ki Yennu jiantu yudaanɔ boi Stiifenn a, "Li set tee mɔnii-e?" 2 Ki Stiifenn yaa: "Chanbaanba nan n naa waas, gbiintir man. Yoo nba ki ti yeeja Abraham din be Mesopotamia yakir, Kaldea tiŋ ni na, li yoo ki u din daa ki saan Harann, ki paŋ daanɔ Yennu dɔkit u paak, 3 ki yetɔ a 'Fiit ki nyik a tiŋ nan a niib, ŋaan saan siaminba ki n saa wanna.' 4 Li yooe ki u fiir ki nyik Kaldea tiŋ maŋ, ŋaan saan ki saa kar Harann doo ni. U baa kuun poorpoe ki Yennu bia te ki u fiir, ki baar tiŋ nba ki ti be na ni. 5 Ŋaan Yennu daa din ki turɔ tiŋ na nan bonmintika a wun yenti, ŋaan senn mɔsonn a u tan saa turɔ tiŋ na, ki ŋɔɔ nan u yaaboona-ii yen. Yennu nba din senn mɔsonn na yoo nba na, ki sɔɔ Abraham daa ki mɔk biki. 6 Yennu din yetɔ a 'A yaaboona tan sii be tingaŋ niewa, ki tee daaba leŋ, ki tan saa la mukisuk bonchiann, ki saa tuu bina kobii ŋanna. 7 Ŋaan tiŋ maŋ niib nba ki bi sii tuun ki teemm na, n tan saa dat bi tuba. Li poorpo, a yaaboona maŋ saa nyi tiŋ maŋ ni, ki baar tiŋ na ni, ki jiantin.' 8 "Yennu din senn mɔsonn ki tur Abraham, ki bia wannɔ mɔsonn maŋ nyinn, a ŋɔɔ nan u yaaboona-ii porii puna. Ki Abraham din tan mar Aisak, ki li daa ŋanniin daar ki u potɔ; ki Aisak mun din tan pot u bik Jakɔb; ki Jakɔb mun din tan pot u waas piik nan banlee, binba tee ti yeejajaana na. 9 Ki Jakɔb waas maŋ din tan mɔk punponn nan bi waarɔ Joosef, ki din soorɔ ki kɔiɔ, ki siab daau ki saan nanɔ Ijipt tiŋ ni, ŋaan Yennu din be nanɔ, 10 ki nyinnɔ biak kura ni, ki bia turɔ yan ki te Ijipt kpanbar Faaro nianɔ ki jiiu teenɔ yudaanɔ Ijipt tiŋ ni, ki bia te ki u tee yudaanɔ u ŋaak ni. 11 "Li poorpo ki kon tan baa Ijipt tiŋ ni nan Keenann, tiŋ nba ki Israel teeb be na kura, ki kon soor niib bonbiir, ki ti yeejamm kɔŋ jeet. 12 Jakɔb nba din gbat a jeet be Ijipt yoo nba, ki u tun u waas leŋ. Ŋanne din tee bi sinsinn saanu. 13 "Ki bi saanu taar munlee nie, ki Joosef ji din te ki u naa waas maŋ bannɔ. Ŋanne ki Faaro ji din bann Joosef baa ŋaateeb. 14 Ki Joosef ji tumm a bin ŋmat kun u baa Jakɔb boor, ki saa jii ŋɔɔ nan u ŋaateeb kur ki jen namm Ijipt na; ki bi din tee niib piinlore nan baŋŋmu. 15 "Ŋanne ki Jakɔb nan u ŋaateeb maŋ fiir saan Ijipt ki saa kar; li poorpo ki ŋɔɔ nan u waas din tan kpo gbenn leŋ. 16 Ki bi jii u gbanant ki kun nann Sekem nba be Keenann tiŋ ni na, ki saa pii kaauk nba ki Abraham din daa Hamor ŋaateeb boor na ni. 17 "Yoo nba din tan per nan Yennu n gbeen u mɔsonn nba ki u senn Abraham na, li yoo maŋ, ti niib Israel teeb nba be Ijipt na ji din yab bonchiann. 18 Li poorpoe ki sɔɔ dii Ijipt naan, ŋaan ŋɔɔ din ki mi Joosef po. 19 Ki kpanbar maŋ din dia ti niib diabiiuk, ki ton namm bonchiann, ki bia tuu miab a bin nyinn bi sanpantii ŋei ni ki lub ki bin kpo. 20 "Ŋanne ki bi din tan mar Moses, ki u fan bonchiann, ki be u baa ŋaak ŋmaarii ŋantaa. 21 Baa din tan nyinnɔ ŋaak ni yoo nba, ki kpanbar na sapaamɔ lau, ki gaarɔ ki wubiiɔ; ki u ji tee u mɔŋ bik. 22 Ki bi din wann ŋɔɔ Moses yan kur nba ki Ijipt teeb mɔk, ki u tan tee wunba mi pinpauk bonchiann, ki bia tuun paŋ toona. 23 "Moses nba din tan teen binpiinna yoo nba, dasiar ki u tan dukin a wun gɔn u mɔŋ booru Israel teeb. 24 Waa lin gɔntib na, ki u tan la ki Ijipt nirɔ boo Israel nirɔ; ki u baar a wun fatɔ, ki kpii Ijipt nirɔ na. 25 (U din mi a u naa waas na saa bann nan Yennu tan saa te ki ŋɔɔe n nyinnib daabsin ni, ŋaan bi din ki bann nna.) 26 Ki li yent sanyiɔk, ki u bia la Israel niib banlee kɔn; ki u loon wun taamm ki bin maŋ nan leeb, ki yetib a 'Gotir man, i tee naa waase, ki bee teen ki i boo leeb ki teen leeb danii?' 27 Ki wunba tur u lɔɔ daŋ na pii Moses, ŋaan betɔ a, 'Sɔɔ ki ganna a fan teen ti yudaanɔ koo ti barbuurɔ. 28 A yaan loon ki a kpin nan faa won kpii Ijipt nirɔ nae-e?' 29 Moses nba gbat nna yoo nba, ki u chiar nyii Ijipt tiŋ ni, ki saan Midiann tiŋ ni ki be leŋ, ki tan kɔɔn poo ki mar bonjai banlee. 30 "Bina piinna nba din tan gar, li poorpo, ki u tan saan muuk ni dasiar, ki saa baar Sainai jɔɔr boor ki la mupeenu, ki li di jagotuk paak ki lenii, ki malaka dɔkit muu maŋ ni. 31 "Moses nba din la nna maŋ ki li teenɔ yaarlituk. Ki u chat nakin a wun ŋamm got, ki ji gbat Yennu kunkɔr ki u beerɔ a, 32 'Mine tee Abraham Yennu, ki bia tee Aisak Yennu nan Jakɔb Yennu na. Mine tee a yeejamm maŋ Yennu.' Moses nba gbat nna yoo nba, ki jaŋmaanii kɔɔu, ki u ji see ki jekir ki ki mɔk par nan wun goti. 33 Ki Yennu betɔ a 'Pitir taasaat nba ki a pir na, kimaan siaminba ki a see na tee boor nba yeene. 34 Tɔn, n la Ijipt teeb nba dint n mɔŋ niib Israel teeb biak Ijipt tiŋ ni biaŋinba, ki n gbia bi fabinii. Ŋanne ki n sik maa n fatib. Li paak n saa tuma Ijipt.'" 35 Ŋanne ki Stiifenn bia lek piak ki saa a, "Moses nba nae ki Israel teeb din y‡tɔ na, ki betɔ a, 'Sɔɔ ki ganna a fan teen ti yudaanɔ koo ti barbuurɔ,' ŋaan ŋɔɔe ki Yennu gannɔ a wuu tee bi yudaanɔ nan bi fatitɔɔ; ki ŋɔɔ Yennu te ki malaka pak nanɔ jagotuk paak muu ni ki tumɔ na. 36 Ŋɔɔ Mosese din tee daanɔ nba nyinnib Ijipt tiŋ ni, ki bia tun bakitnauŋ toona Ijipt tiŋ ni, nan baa din saa poot Mɔkmuŋ na, nan baa bia din be muuk ni binpiinna na. 37 Li Mosese bia din yet Israel teeb a 'Yennu tan saa tun sɔkiniisɔɔ i boor nan waa tumin biaŋinba na, ki u sii tee i booru ni nirɔ.' 38 "Moses maŋe bia din be nan ti niib Israel teeb bi lakinu ni, muuk ni na. U din be leŋe ki tan doo Sainai jɔɔr paak, ki saa be nan Yennu malaka, ki malaka maŋ pak nan Moses, a Moses n sɔkin ti yeejamm Israel teeb na. Li yooe ki Moses gaar Yennu manfoor maan na ki turit. 39 Ŋaan ti yeejamm din ki loon bin sakɔ. Li paak ki bi y‡tɔ, kimaan bi yan tunn Ijipta; 40 ŋaan din bet Arɔnn a wun maa pata, ki bii tee bi ŋmakit teeb ki bii waab, ki bia yetɔ a 'Moses ŋarin, wunba nyinnit Ijipt na, ti ki mi linba teenɔ.' 41 Ŋanne ki bi maa tingbann ki nannɔ naajabik, ki mann maruŋ li paak, ki teen jaamm a bin mantik donnɔ, linba ki bi maa nan bi mɔŋ nii na. 42 "Li paak ki Yennu ji ki goriibi, ŋaan chabib ki bi ji jiantir ŋmaabira, nan laa sɔb biaŋinba Yennu sɔkiniinba gbounyeuŋ ni na, a Yennu yet a: 'Israel teeb, yaa din kpi bonkobit ki mann maruŋ muuk ni bina piinna na, i din ki mann maruŋ maŋ ki teen min kaa. 43 I din tuu jikit tingbann Molek lanbouŋo, ki bia jikit ŋmaabir Refann naauŋo, ki li tee tingbann, ki saa namm. Ŋamm tee yenninante ki i maa ki jiantir. Li paak, n saa te ki i datai n nyinni i tiŋ ni ki saan nani siaminba fɔk ki gar Babilɔnn.'" 44 Ŋanne ki Stiifenn bia piak a, "Ti yeejamm din faa Yennu lanbouŋ muuk ni, ki li want a Yennu be namm. Yennue din wann Moses baa sii faa lanbouŋ maŋ biaŋinba, ki bi faa. Li din tee nan Yennu nba te ki Moses lar biaŋinba nae. 45 "Li poorpo ki ti yeejamm ji tan jii lanbouŋ maŋ ki tur bi waas, ki bi gaar ki mun jikit ki saa nann, ki ŋamm nan Joosua tan baar nna, ki fat tiŋ nba ki niboorganii daa din yen li yoo na. Yennue din ber nyinn niib maŋ ti yeejamm tɔɔnn, ki lanbouŋ na ji din be nna dik dik nan Defid yoo mun. 46 Yennu numm din gboot Defid maŋ, ki u tan miar Yennu a wun chabɔ ki wun maa ŋaak ki tur ŋɔɔ Yennu nba tee u yeeja Jakɔb Yennu na. 47 Ŋaan ŋɔɔ Defid bija Solomonne din tan maa ŋaak maŋ. 48 "Ti lek mi nan Yabint Yennu ki kaar ŋei nba ki niib maa ni kaa. Li tee nan Yennu sɔkinii nba din yet a: 49 'Yennu yet a, Sanpaak tee n naangbouŋo, ki tingbouŋ na mun tee n taakpaktir. I kan fit maa ŋaak ki turin, ki n foi leŋi. 50 Min kaa nan bona na kurii?'" 51 Ŋanne ki Stiifenn lek bia piak ki saa a, "I mantik tee nigbaba hei, ki i dudukit bia fɔk nan Yennu bonchiann, ki i ki sak yin gbiint Yennu maan. I kpan mun kɔn nan Yennu Seyeeŋ nan i yeejamm nba din tun biaŋinba nae. 52 Yennu sɔkinii sɔɔ kaa ki i yeejamm ki mukisɔ. Bi bia din kpii binba poŋ sɔkint a Yennu Popeendaanɔ Masia tan saa baar nawa. Tɔn, mɔtana yimme tee damm nba nyii u poor ki bia tee u kpiira. 53 Yimme bia tee damm nba din gaar Yennu sennu nba ki i yeejamm din gaar malakanba nuu ni, ŋaan bia lek ki sakir na." 54 Tituk kaanu damm na nba gbiint Stiifenn maan maŋ, ki bi donn wutoor bonchiann ki gbab mɔgbaba. 55 Ŋanne ki Yennu Seyeeŋ fiir Stiifenn ni, ki u yaat got Yendɔuŋ ni, ki la Yennu yentsaakar, ki Yiisa see ŋɔɔ Yennu niidiitu po; 56 ki u yet a, "Gotir, n la ki Yendɔuŋ loot ki Nisaarik Bik see leŋ, Yennu niidiitu po." 57 Ŋanne ki tituk teeb na yikin sanpaapo, ŋaan pii bi tuba; ki bi kura wuur baar ki worɔ, 58 ki ber nyinnɔ doo maŋ ni, ki liat bi liata ki bir naasimɔ nba ki bi yiu Sɔɔl na boor, a wuu guu, ŋaan jaat Stiifenn tana. 59 Bi din jaatɔe dik dik; ki u din tan yiin ti Yomdaanɔ a, "N Yomdaanɔ Yiisa, gaat n seek;" 60 ŋaan gbaan ki yikin sanpaapowa a, "N Yomdaanɔ, daa jikit bi biit na ki biiribi." U yet nnae ŋaan ji kpo.

Toona 8

1 Ki Sɔɔl sak baa kpiiu na. Li daar maŋe ki mukisubiiuk baar Yiisaweira nba be Jerusalem na paak; ki bi kur nyii yat ki saan Judea nan Samaria yaka po, ŋaan nyik toomiinba na kuukɔɔ leŋ. 2 Ki yentinsiab jii Stiifenn, ki saan saa piiu, ŋaan mɔ ki yikin ki fabin bonchiann u paak. 3 Sɔɔl ŋarin din loon wun biir Yiisaweirae, ki lin kɔɔ ŋaak ŋaak, ki so Yiisaweira, jab nan poob, ki nyintib ki saa kɔɔntib dansarii. 4 Yiisaweira nba din yat na ji din saa lokir kur poe ki mɔɔntir Yiisa maan maŋ; 5 ki Filip nyii sik Samaria doo ni, ki saa mɔɔnt Yennu Niganntɔɔ Masia na po ki tur leŋ niib. 6 Ki nibur tikir ki gbiint Filip mɔɔntii maŋ, ki bia la u bakitnauŋ toona nba ki u tuun; u din nyinn narinbiit niib bonchiann ni, ki bi yikin sanpaapo ki nyi; ki u bia te ki gbanankpeena damm nan wɔbii bonchiann la laafia. Li paak din teen ki bi mantik gbiint u maan fanu nan dudukyent. 8 Ki parpeenn be doo maŋ ni bonchiann. 9 Jasɔɔ nna mun din be doo maŋ ni, ki tee nyɔkdaanɔ, ki u sann tee Simonn, ki yosau ki u tuu tan tun bakitnauŋ toona, ki lin bakit niib kur nba be doo maŋ ni, ki u yi u mɔŋ nijaann. 10 Niib kur din baakitɔɔe, li nijaana nan tarii, ki yaa, "Jɔɔ na mɔk paŋ nba nyii Yennu boore." Li paak ki bi yiu Panchiɔŋ Daanɔ. 11 U bakitnauŋ toona maŋ din yaar litib ki yukira. Li paak ki bi din teenɔ baakir ki bia gbiin u maan. 12 Ŋaan ki Filip nba din tan baar ki mɔɔntir Yennu naan barŋanii nan Yiisa Masia po na, jab nan poob din sak u mɔɔntii maŋ, ki u wurib Yennu nyunwuru. 13 Simonn mɔŋ mun din teen yada, ki u wurɔ. Ki u teen Filip weinanlɔɔ, ki laat bakitnauŋ toona nba ki u tuun na, ki li tuu yaar litɔ. 14 Ki Yiisa toomiinba nba din be Jerusalem na gbat a Samaria teeb gaar Yennu maan maŋa; ki bi tun Piita nan Jɔɔnn, 15 ki bi saan Samaria ki saa miar Yennu ki turib, a bin gaar Yennu Seyeeŋ, 16 kimaan Yennu Seyeeŋ maŋ daa din ki sik bi sɔɔ ni. Bi kpan din wurib Yennu nyunwuru ti Yomdaanɔ Yiisa sann ni kuukɔɔe. 17 Ki Piita nan Jɔɔnn yii bi nii bi paak, ki bi gaar Yennu Seyeeŋ. 18 Simonn nba din la ki toomiinba na yii bi nii niib na paak, ki Yennu teemm Seyeeŋ na, ki u yaa wun tur toomiinba na likirii, 19 ki yetib a, "Chabimin yiikoo na man, ki n mun tuu yii nii sɔɔ paak, ki wun gaar Seyeeŋ maŋ." 20 Ŋaan ki Piita betɔ a, "A saa kpo yiake nan a likirii maŋ, kimaan a mi a a saa jii likiriie gaar Yennu piinii. 21 A lek kan tun siar ti toonn na ni, kimaan a par ki be fanu nan Yennu. 22 Li paak, nyikin dudukbiit maŋ, ki lebit a binbeŋ ŋaan kii mei Yennu; li pasiari u saa nyik chaba dudukbiit maŋa, 23 kimaan n la nan a gbee nan nɔɔntonte, ki bia tee biit yommik." 24 Ki Simonn betib a, "Miat i Yomdaanɔ ki turin man, ki linba ki i yet na ji daa baat n paaki." 25 Tɔn, li poorpoe ki Piita nan Jɔɔnn pak siara ti Yomdaanɔ po ki tur niib, ki bia mɔɔnt u maan, ŋaan ŋmat saan Jerusalem. Baa din saa nae ki bi mɔɔntir Yiisa barŋanii, Samaria digbanbis bonchiann ni. 26 Ŋanne ki ti Yomdaanɔ malaka tan baar ki bet Filip a, "Fiit saan tɔkin sɔnu nba nyi Jerusalem ki gaar kunkoouk paak ki siik Gasa na." 27 Ki Filip fiir ki saan. Tɔn, ki Etiopia jatɔɔkir nna mun din nyii u sɔnu ki kun. Jɔɔ maŋ tee nijaann nba tee Etiopia poobat nba ki bi yiu Kandes na likirii karachinba yudaanɔe. U din saan Jerusaleme, a wun saa jiant Yennu, ki tan ŋmat kun, ki kar u toruk ni, ki taanii daarɔ. Waa saa yoo nba, ki u karin Yennu sɔkinii Aisaya gbouŋ ni. 29 Ki Yennu Seyeeŋ yet Filip a, "I saa nakin toruk na." 30 Ki u chiar saan leŋ, ki gbat ki u karin Yennu sɔkinii Aisaya gbouŋ na. Ki u boiɔ a, "A bant linba ki a karin na paakii?" 31 Ki u jiin a, "Nlee ki n saa bann li paaki, ki li ki tee sɔɔ wannin kaa?" ŋaan barin Filip a wun kɔɔ wannɔ. Ki u kɔɔ toruk maŋ ni ki bi lakin kar. 32 Yennu gbouŋ ni maan nba ki jatɔɔkir maŋ din karin na, ŋanne na a: "Ki u sak saan nan peeuk nba ki bi daarɔ a bin saa kpiu na, ki ŋmin nan pegann nba ki bi tuu porii u kobit ki u ŋmin na, ki ki yaat u mɔbi, 33 ki bi sikin u baakir ki y‡t bin bu u buut bonŋann, u din ki mɔk yaaboona, kimaan u manfoor jit tingbouŋ na niwa." 34 Ki jatɔɔkir na boi Filip a, "Betirin, ŋmee ki sɔkinii na piak u po? U yeen u mɔŋ po amii sɔɔe?" 35 Ki Filip piin siaminba ki jatɔɔkir maŋ karin na ki saa, ki piak Yiisa barŋanii. 36 Baa tɔk sɔnu maŋ ki siik yoo nba, ki bi la nyun nna dɔɔ. Ki jatɔɔkir na yetɔ a, "Gotir, nyume na, bee yaa lin teen ki a kan wurin Yennu nyunwuru?" 37 [Ki Filip yetɔ a, "Li-i tee ki a teen Yiisa yada nan a par kura, n saa wurawa." Ki u jiin a, "N teen yada nan Yiisa Masia tee Yennu Bijae."] 38 Ki jatɔɔkir maŋ te taanii na set, ki ŋɔɔ nan Filip sik nyun na ni, ki Filip wurɔ Yennu nyunwuru. 39 Ki bi tan nyii nyun na ni ki doo; ki Yennu Seyeeŋ jii Filip ki yaat nanɔ, ki jatɔɔkir na ji ki lau; ki u ŋamm soor u sɔnu ki kun nan parpeenn. 40 Filip ji din saa be Asotusewa, ki lin digbana kur ki mɔɔntir Yiisa barŋanii mɔkmɔk nan waa tan baar Siisarea.

Toona 9

1 Tɔn, Sɔɔl lek bia din fɔɔ kɔnfɔɔt, ki yeen a u sii dint ti Yomdaanɔ Yiisa poorpoweiteeb biake, ki kpib; ki tan saan Yennu jiantu yudaanɔ boor ni, 2 a wun gaar kadaat, ki saan Damaskus ki saa wann Yennu jiantu diit yudamm, a wu la wunba waa Yiisa sɔnu maŋ, li jab koo poob, wun soorib ki lorib ki jen namm Jerusalem. 3 Tɔn, waa ji din saa yoo nba ki saa per Damaskus, ki yentu nyii sanpaapo, ki sik yent lintɔ. 4 Ki u baa tiŋ ni, ki gbat ki kunkɔr yiu a, "Sɔɔl, Sɔɔl, bee ki a mukisirimi?" 5 Ki u boi a, "Yomdaanɔ, fin ŋmee?" Ki kunkɔr na jiin a, "Min Yiisae ki a mukis. 6 Ŋaan fiit ki saan doo na ni, ki bi saa beta faa saa teen biaŋinba." 7 Li yoo na, ki jab nba chiant Sɔɔl na ji biar set surimm. Bi din gbia kunkɔr na ŋarin, ŋaan ki laat sɔɔ. 8 Ki Sɔɔl tan fiir tiŋ ni, ki munt u nunii, ŋaan ki laati. Ŋanne ki bi dat u nuu ki saan nanɔ Damaskus. 9 Damunjaa ŋantaa ki u ki fit laat. Li daa maŋ ni, u din ki dii koo ki nyuu siari. 10 Ki Yiisaweisɔɔ din be Damaskus maŋ, ki u sann tee Ananias, ki ti Yomdaanɔ yiinɔ yirintu ni a, "Ananias!" Ki u jiin a, "Mine na, n Yomdaanɔ." 11 Ki ti Yomdaanɔ yetɔ a, "Fiit ki saan tɔkin sɔnu nba yi Sɔnsunsonn na ki saa kɔɔ Judas ŋaak ki boi jɔɔ nba nyii Tarsus ki u sann tee Sɔɔl na po. U mei Yennue mɔtana, 12 ki la jasɔɔ yirintu ni, ki u sann tee Ananias, ki u kɔɔ ki jii u nii ki yii u paak, a wuu jikii laat." 13 Ki Ananias jiin a, "N Yomdaanɔ, niib bonchianne piak jɔɔ na po, ki jiin linba kur ki u tuun a mɔŋ niib Jerusalem. 14 U daan gaar yiikoo jiantu yudamm boor ki baar nna, a wun soor wunba kur yi a sann." 15 Ki ti Yomdaanɔ betɔ a, "Fini saawa, ŋɔɔe tee wunba ki n gannɔ a wuu tuun n toonn, ki te boorganu nan bi kpanbara nan Israel teeb n bann n sann, 16 ki n mɔŋ saa wannɔ biak nba kur ki u saa di n paak." 17 Ŋanne ki Ananias saan kɔɔ ŋaak na ni, ki yii u nii Sɔɔl paak, ŋaan yetɔ a, "N naa bik Sɔɔl, n Yomdaanɔ Yiisae tumin. Ŋɔɔe tee daanɔ nba ki a daan baat nna ki tan lau sɔnu paak na, ki u tumin a n tan te ki fii jikii laat, ki bia gbee nan Yennu Seyeeŋ." 18 Li taakpaak ni ki siar nyii u ninbina ni ki baa, ki naan wɔkii, ki u ji laat ki fiir set; ki bi wurɔ Yennu nyunwuru, 19 ki u dii jeet ki paŋ jen. Li yoo na ki Sɔɔl lakin be nan Yiisaweira nan daa ŋanlee na Damaskus, 20 ki tan saan yiama Yennu jiantu diit ni, ki mɔɔntir Yiisa po, a Yiisa kpan set tee Yennu Bijae. 21 Binba kur din gbat u mɔɔntii maŋ, li din teemm yaarlituko, ki bi boi a, "Jɔɔ na kaa daan kpi binba yi Yiisa sann Jerusalem na-a? U yaan ki baar a wun soor ki lor Yiisaweira, ki ŋmat namm ki saa turib Yennu jiantu yudamm kaa na-a?" 22 Ŋaan ki Sɔɔl mɔɔntii maŋ bia lek ŋammit pukii nan Yennu paŋ, ki u maan maŋ want nan Yiisae set tee Yennu Niganntɔɔ Masia ki birsuk kaa; ki Juu teeb nba be Damaskus na ki fit jiinɔ siari. 23 Ki daa bonchiann tan gar, ki Juu teeb na lakin leeb ki lor a bin kpi Sɔɔl, 24 ki yonnu nan nyiɔk ki bi guu doo maŋ tammɔi bonŋann a bin kpiu. Ki sɔɔ tan kumiiɔ baa lorin u paak biaŋinba; 25 ŋaan nyayouŋ ki u weinanleeb tan jiiu ki teenɔ chibuk ni, ki nyinnɔ doo maŋ joonfɔnn ni, ki sikinɔ tiŋ ni. 26 Ŋanne ki Sɔɔl saan Jerusalem ki saa yabir u mɔŋ paak a wun lakin nan Yiisaweira na, ŋaan ki bi ki teenɔ yada nan u ji tee Yiisaweirɔ, ki tiinɔ jaŋmaanii. 27 Ki Banabas tan jiiu ki baar nanɔ toomiinba na boor, ki kat wannib biaŋinba ki Sɔɔl daan la ti Yomdaanɔ Yiisa sɔnu ni, nan waa pak nanɔ biaŋinba, ki bia ŋamm wannib Sɔɔl nba daan mɔɔntir Yiisa po nan parcheenn Damaskus biaŋinba. 28 Banabas nba wannib linba na, ki Sɔɔl lakin be namm, ki bi kak lin Jerusalem kur po, ki mɔɔntir ti Yomdaanɔ sann nan parcheenn. 29 U bia din pak nan Juu teeb nba piak Griik maan na ki jiin Yiisa po, ŋaan ki bi nɔi nanɔ, ki koor a bin kpiu. 30 Ŋaan yoo nba ki Yiisaweira bann nna maŋ, ki bi jii Sɔɔl ki sik nanɔ Siisarea, ki te ki u kun Tarsus. 31 Ŋanne ki Yiisaweira nba be Judea nan Galilii nan Samaria na ji ki laat mukisuk, ki ŋammit tumii ti Yomdaanɔ barii, ki tee yentinna, ki Yennu Seyeeŋ be namm ki kɔɔntib para, ki bi pukii. 32 Li poorpoe ki Piita lin lokir kur po, ki tan sik a wun gɔn Yennu niib nba be Lida na. 33 Leŋe ki u din saa la jasɔɔ nna, ki u sann tee Eneas, ki u tee gbanankpeenn daanɔ, ki din ki fit fi u dɔɔnu ni teee nan bina ŋanniin. 34 Ki Piita tan yetɔ a, "Eneas, Yiisa Masia te ki a paaka. Fiit ki ŋamm a dɔɔnu." Li taakpaak ni ki u fiir. 35 Ki Lida nan Saronn doi niib kur lau, ki lebit bi binbeŋ, ki waa ti Yomdaanɔ. 36 Poosɔɔ mun din be Jɔpa, ki u sann tee Tabiita, ŋaan Griik maan ni, ki bi yiu Dɔkas, ki li paak tee piarɔ. U din tee Yiisaweirɔe, ki tuun toonŋana bonchiann ki teen niib, ki bia sommit talasdamm. 37 Ki u din tan yiar ki kpo, ki bi wurɔ, ki doo nanɔ ditɔɔtuk ni ki saa birɔ. 38 Jɔpa mun din ki fɔk nan Lida saami, ki Yiisaweira nba be Jɔpa na gbat nan Piita be Lida, ki bi tun jab banlee u boor a wun kakit ki baar na. Ki jab banlee maŋ saan ki barin Piita. 39 Ki u fiir ki bi jen nanɔ. Waa baar yoo nba, ki bi jiiu ki doo nanɔ ditɔɔtuk maŋ ni. Ki pakɔi be diiuk na ni, ki bi kur ŋaa lint Piita, ŋaan mɔ, ki jikit bi liata nan chinchena ki wantɔ, ki yeen a, "Dɔkas nba tuu be u manfoor ni ki nyar linba ki teente na." 40 Ŋanne ki Piita nyinn bi kur diiuk na ni, ŋaan gbaan ki miar Yennu, ki tan ŋmant kpeemɔ na paak, ki yiin a, "Tabiita, fiit!" Ki u munt ki la Piita, ki ji fiir kar. 41 Ki Piita dɔnn soor u nuu ki fiin sennɔ, ŋaan yiin pakɔi na nan Yennu nileeb, ki tan jiiu ki wannib nan u jen u manfoor niwa. 42 Ki li labaar yat saan Jɔpa kur po; ki niib bonchiann teen ti Yomdaanɔ Yiisa yada. 43 Ki Piita ji biar be Jɔpa daa bonchiann; u din be jasɔɔ nba tee gbanfabirtɔɔ ki bi yiu Simonn na ŋaak nie.

Toona 10

1 Tɔn, jasɔɔ nna din be Siisarea, ki u sann tee Kɔnelius. U din tee lanjimanba yudaanɔe, ki dia lanjimanba kobik u paabu ni. Ki paabu maŋ yi Itali tiŋ paabu. 2 U din tee Yenjiant-tɔɔe; ki ŋɔɔ nan u ŋaateeb kura jiantir Yennu. U din sommit Juu teeb talasdamm bonchiann, ki bia mei Yennu yoo kur. 3 Li din tan tee yenlekire, ki u la Yennu malaka nan barmɔnii yirintu ni, ki u kɔɔ ŋɔɔ Kɔnelius diiuk ni ki tan yiin a, "Kɔnelius." 4 Kɔnelius nba la malaka maŋ na, ki jaŋmaanii soorɔ, ki u yet a, "N yomdaanɔ, bee?" Ki malaka maŋ jiin a, "Yennu gaar a miaru, ki bia sak a ninkpabauŋ toona nba ki a tuun ki teen niib nawa, ki tian a po. 5 Mɔtana, tumin siab Jɔpa, ki bin saa yiin jɔɔ nba ki bi yiu Simonn, ki u sanleer tee Piita na. 6 U tee saamɔe ki be gbanfabirtɔɔ nba ki bi yiu Simonn na ŋaak, ki u ŋaak maŋ kpia nan mɔkgbeŋŋir na." 7 Malaka nba pak nanɔ maŋ ji din yaat, ki Kɔnelius yiin u ŋaatoontunna banlee nan lanjima nna, wunba din tee Yenjiant-tɔɔ, ki tee u kpaakyenɔ. 8 Waa betib linba kur teen na poorpoe ki u tumm Jɔpa. 9 Laa yent sanyiɔk, ki bi saa, ki saa per Jɔpa; li yoo na ki Piita mun doo ditɔɔtuk paak yensuuk ni, a wun miar Yennu. 10 Ki kon tan gbatɔ, ki u ji loon jeet wun di, ŋaan ki bi daa tee jeet siir; li yooe ki u la yirintu, 11 ki sanpaapo loot ki bonsiar nna naan chinchenn ki nyii sanpaapo, ki bi dia li mɔgbana ŋanna ki sikint tiŋ ni, 12 ki u la ŋamm Juu teeb kɔɔt booru kur ki li be chinchenn maŋ ni, bonkobit nan bonfurinkaa nan bonyuyukit linba kur kɔɔ; 13 ki u gbat kunkɔr yiin a, "Piita, fiit ki kpi ŋman." 14 Ŋaan ki Piita jiin a, "O! O! O! N Yomdaanɔ, nna kaa. N ki mi dii ti kɔɔti." 15 Ki kunkɔr na bia ŋamm yetɔ a, "Linba ki Yennu ŋammir ki li yeen, daa yaa li kɔɔ." 16 Li din teen nna ki jaŋ taar muntaa, ki bi jiin bont maŋ sanpaapo. 17 Piita din daa biris waa la yirintu nba na paake. Li yoo na ki Kɔnelius toomii na boi ki bi wannib Simonn ŋaak, ki bi baar ŋaak maŋ tammɔb ni ki set, 18 ŋaan yiin ki boi a, "Sɔɔ be nna ki u sann tee Simonn Piita-a?" 19 Ki Piita daa koor a wun bann yirintu maŋ paak, ki Yennu Seyeeŋ yetɔ a, "Gotir, jab bantaa be nna ki loona. 20 Li paak, fiit ki sik, ki daa biris nan a tɔk nammi, kimaan mine tumm." 21 Ŋanne ki Piita sik, ki bet jab na a, "Mine ki i loon na. Bee teen ki i baari?" 22 Ki bi jiin a, "Chanbaa Kɔneliuse tunt. U tee lanjimanba yudaanɔe, ki bia tee niburchimɔ, ki jiantir Yennu, ki Juu teeb kur teenɔ baakir. Tɔn, Yennu malaka won baar betɔ a wun yiina ki a baar u ŋaak ni, ki wun tan gbat linba ki a saa pakɔ." 23 Ki Piita yiin jab na a bin kɔɔ kii be ki sanyiɔk n yenta. Laa tan yent, ki u teen siir ki bi saa; ki Yiisaweira nba be Jɔpa na siab chianɔ. 24 Li din tan bɔnn ki yentewa ki bi baar Siisarea, ki sɔɔ Kɔnelius poŋ yiin u ninjamm nan u yɔɔsinba, ki bi kur ji kar guu Piita baarue. 25 Piita nba tan baar ki yaa wun kɔɔ, ki Kɔnelius chetɔ tammɔb ni, ki gbaan pukiiɔ. 26 Ki Piita yetɔ a, "Fiit, n mɔŋ tee nirɔe," ŋaan fiinɔ. 27 Waa din piak nan Kɔnelius ŋaan kɔɔ ŋaak maŋ ni na, ki u la niib bonchiann tikir ki guu-u. 28 Ki u betib a, "I mɔŋ mun mi nan timm Juu teeb sennu ki chabit nan tin saan gɔn binba ki tee Juu teebi, koo ki taan nammi; ŋaan Yennu wannin a n daa y‡en sɔɔ, waa ki tee Juu nirɔ na paaki. 29 Li paak, yaa yiinin na, n baar, ki ki birisi. Ŋanne ki n boi-i maa n laan bee teen ki i tun ki yiinimi." 30 Ki Kɔnelius yetɔ a, "Li daan tee nna yooe dinna daar kut muntaa yenlekir, ki n mei Yennu n ŋaak ni. Li yoo na ki n la ki sɔɔ nna see ki lia tannyinyira n tɔɔnn po, 31 ki yet a 'Kɔnelius, Yennu gbat a miaruwa, ki bia tian a ninkpabauŋ toona po. 32 Li paak, tumin sɔɔ Jɔpa, ki wun saa yiin wunba ki bi yiu Simonn, ki u sanleer tee Piita na. U tee saamɔe, ki be gbanfabirtɔɔ Simonn ŋaak nba kpia nan mɔkir na.' 33 Li paake ki n daan tun a po yiama, ki a mun tun bonŋann ki baar na. Tɔn, ti kura be Yennu tɔɔnn, ki ji guu a ti gbat linba ki ti Yomdaanɔ Yennu tura mɔb a fan pak turit." 34 Ŋanne ki Piita piin paku ki yaa, "N ji bann nan li tee mɔniie nan Yennu set ki lukitir sɔɔ, 35 ŋaan nibooru kur ni, daansɔɔ nba jiantirɔ ki bia teenɔ baakir, ki bia tee popeendaanɔ, ŋɔɔe ŋan nan Yennu. 36 I mi nan Yennu din tur Israel teeb u maan nba want barŋanii na po, a Yiisa Masia nie ki timm nan Yennu n maŋ nan leeb; ŋɔɔ Yiisa Masiae tee ti kur Yomdaanɔ. 37 I poŋ mi nan Jɔɔnn nba din mɔɔnt u nyunwuru po ki gbenn na, li poorpoe ki Nasaref nirɔ Yiisa din piin ki tuun u toonn Galilii tiŋ ni, ki tan saan tuun Judea tiŋ kur ni. 38 I bia poŋ mi biaŋinba ki Yennu nyinn Yiisa maŋ, ki turɔ u Seyeeŋ nan u paŋ, ki u lin tuun toonŋana, ki bia te binba kur ki Sintaanii teemm baatib na la laafia, kimaan Yennu be nanɔ. 39 Ki ti la toona kur nba ki u tun Juu teeb tingbouŋ ni nan Jerusalem, ki ti tee u siara damm. Ki bi kpaau dapunpunn paak ki u kpo. 40 Ŋaan ki Yennu fiinɔ kuun ni daa ŋantaa daar, ki ti din laatɔ. 41 Ŋaan niib kur kaawa din lau. Timm nba ki Yennu gannit a tii tee u siara damm nae din lau, ki bia dii ki nyuu nanɔ u kuunfiiru maŋ poorpo. 42 Ki u chabit mɔb a tii mɔɔntir Yennu barŋanii kii teen niib, kii beerib nan ninmɔnn a Yiisae tee daanɔ nba ki Yennu nyinn a wuu tee footib nan kpeemm barbuurɔ. 43 Yiisa nba nae ki Yennu sɔkiniinba kur din piak u po, ki yeen a sɔɔ kur nba teenɔ yada, Yennu saa nyik chab u toonbiit Yiisa maŋ sann ni na." 44 Piita nba din daa piak na, ki Yennu Seyeeŋ sik kɔɔ binba kur gbiin maan maŋ ni. 45 Ki Yiisaweira nba tee Juu teeb ki nyii Jɔpa ki chian Piita na, ki li teemm bakitnauŋ nan Yennu nba jii u piinii nba tee u Seyeeŋ, ki tur binba ki tee Juu teeb na mun, 46 kimaan bi gbia ki bi piak barganii ki dont Yennu sann. Ŋanne ki Piita yet a 47 "Niib na gaar Yennu Seyeeŋ nan taa mun din gaar nae, ki sɔɔ be nna ki saa tiat a ti daa wuurib Yennu nyunwuru-u?" 48 ŋaan chab a bin wurib; ki bi wurib Yennu nyunwuru Yiisa Masia sann ni. Ŋanne ki bi gɔɔr Piita a wun biar namm nan daa ŋanlee na.

Toona 11

1 Li yoo na ki Yiisa toomiinba nan Yiisaweira nba be Judea lokir kur po na gbat a binba ki tee Juu teeb na mun gaar Yennu maama. 2 Li paak, Piita nba din tan doo Jerusalem, ki bisiab nba dukii nan punpotu kpaa talas ki tur Yiisaweira kur na yakii nanɔ, ki betɔ a 3 "A saan ki saa be binba ki pot ŋaak ni, ki bia di namm gbaa." 4 Ŋanne ki Piita piin li pinpiik, ki kat wannib linba kur tun a, 5 "N daan be Jɔpa ki mei Yennue ki tan la yirintu, ki bonsiar nna naan chinchengbeŋŋir ki nyii sanpaapo, ki bi dia li mɔgbana ŋanna ki sikint n boor. 6 Ki n dɔɔnt li nɔɔk ni, ki la ti kɔɔt booru booru kur, bonkobit nan bonsusoot nan bonfurinkaa nan bon-yuyukit kura. 7 Ŋanne ki n gbat ki kunkɔr yet a 'Piita, fiit, ki kpi ŋman.' 8 Maa, 'O! O! O! N Yomdaanɔ, nna kaa. N poŋ ki mi dii ti kɔɔti.' 9 Ki kunkɔr na bia ŋamm yet Yendɔuŋ ni a 'Linba ki Yennu ŋamm ki li yeen, a daa yaa li kɔɔ.' 10 Li daan teen nna ki jaŋ taar muntaae, ki bi jiin donn sanpaapo. 11 "Li tonton na ki Siisarea jab bantaa nba ki bi daan tumm n peŋ na baar ŋaak nba ki n be na ni. 12 Ŋanne ki Yennu Seyeeŋ betin a n tɔk namm ki daa birisi. Ki Yiisaweira nba be Jɔpa na, bi ni banloob nba be nna na mun chianin ki ti saan Siisarea, ki ti kura baar kɔɔ Kɔnelius ŋaak. 13 Ki u betit biaŋinba ki u la malaka baar set u ŋaak ni ki betɔ a 'Tumin sɔɔ Jɔpa, ki wun saa yiin jɔɔ nba ki bi yiu Simonn, ki u sanleer tee Piita na, 14 ki u saa pak maan ki tura ki fin nan a ŋaateeb kura n la tinnu.' 15 "Tɔn, maa piin maan paku yoo nba, ki Yennu Seyeeŋ sik bi paak nan waa din sik ti paak li pinpiik biaŋinba na. 16 Ŋanne ki n tiar ti Yomdaanɔ Yiisa nba din yet a 'Jɔɔnn ŋarin din wuur niib nan nyume, ŋaan yimm ŋarin saa gbee nan Yennu Seyeeŋe.' 17 Tɔn, li-i tee ki Yennu set pib u Seyeeŋ maŋ nan waa din pit biaŋinba, yoo nba ki ti din teen ti Yomdaanɔ Yiisa Masia yada naie, n tee ŋmee ki mun sii yaa n tia Yennu ki u daa te boorganu tee u niibi?" 18 Baa din gbat nna maŋ yoo nba, ki bi ji nyik kpayakit na, ŋaan donn Yennu sann, ki yeen a, "Yennu chab binba ki tee Juu teeb mun a bin nyik biit tumu ki teen Yiisaweira ki la manfoor nba kaa gbennu." 19 Tɔn, Stiifenn kpinu poorpoe ki mukisuk baar Yiisaweira paak, ki bi yat; ki bi siab yaat saan Fonisia, nan Saiprus, nan Antiok, ki mɔɔntir Yiisa maan ki teen Juu teeb kuukɔɔ. 20 Ŋaan ki Yiisaweira siab nba tee Saiprus teeb, nan Sairene teeb na, saan Antiok, ki saa mɔɔntir ti Yomdaanɔ Yiisa barŋanii ki teen binba ki tee Juu teeb na; 21 ki ti Yomdaanɔ paŋ be namm, ki niib bonchiann teenɔ yada ki lebit bi binbeŋ ki teen u weira. 22 Ki Yiisaweira nba be Jerusalem na gbat labaar maŋ, ki tun Banabas a wun saan Antiok. 23 Waa din saa baar leŋ ki la Yennu nba turib sommir biaŋinba, ki li turɔ parpeenn bonchiann, ki u chee bi para, ki kpaan bi kur a bi daa nyikit Yiisa weiu. 24 Banabas din tee niŋanɔe, ki mantik gbee nan Yennu Seyeeŋ nan yada, ki nigbouŋ bonchiann din teen ti Yomdaanɔ Yiisa yada ki waau. 25 Ŋanne ki Banabas tan saan Tarsus, a wun saa lon Sɔɔl. 26 Waa saa lau yoo nba ki u jen nanɔ Antiok, ki bi jii bimmunn ki taan nan leŋ Yiisaweira, ki wann niib bonchiann Yennu maan. Li din tee Antioko ki bi din sint pur Yiisaweira, "Kristo yab." 27 Li yoo maŋe ki Yennu sɔkiniinba siab nyii Jerusalem ki sik Antiok. 28 Bi yenɔ sann din tee Agabus, ki Yennu Seyeeŋ ni ki u fiir set ki bunt buntir, ki yet a kon bonchiann tan saa baa tingbouŋ na kur po; ki kon maŋ din set tan baa yoo nba ki Klɔdius din tee kpanbara yudaanɔ na. 29 Yoo nba ki Yiisaweira gbat a kon yaa lin baa na, ki bi lor a bi saa tur sommir; a wunba fit nyann biaŋinba lek, wun tur Yiisaweira nba be Judea na. 30 Ki bi teen nna, ki tun Banabas nan Sɔɔl nan likirii na, a bin saan tur Yiisaweira saakab Judea tiŋ ni.

Toona 12

1 Li yoo na ki batsaakɔɔ Herod din jak Yiisaweira na siab nan mukisuk, 2 ki te ki bi kpii Jɔɔnn yɔɔrɔ Jeems nan jukbanjiak; 3 ki li penn Juu teeb na para. Bat Herod nba bann nan waa tun biaŋinba na penn bi para na, ki u ŋammit tee nna, ki tan soor Piita, yosau nba ki bi din mɔk jaamm ki di boroboro nba kaa datiŋ na. 4 Waa soor Piita yoo nba ki u kɔɔnɔ dansarik, ki turɔ dansarguura. Bi din tee paabu munnae ki guu-u, ki paabu kur mɔk guura banna; ki Herod lor a jaamm maŋ poorpoewa ki u saa nyinn Piita, ki Juu teeb n bu u buut ki kpiu. 5 Ki Piita daa be dansarik ni, ŋaan ki Yiisaweira paa Yenmiaru paak ki jiin u po nan ninmɔnn. 6 Tɔn, ki Herod din lor nan li-i yent sanyiɔk u saa nyinn Piita ki bu u buut, li daar nyiɔk maŋ ki Piita daa lor nan jarit ŋanlee, ki gɔɔnt guura banlee na sinsuuk ni, ki guura maŋ siab mun guu dansarik diiuk na tammɔi. 7 Li taakpaak ni ki ti Yomdaanɔ malaka dɔkit, ki yentu yent dansarik diiuk na ni, ki u nik nik Piita bɔpiɔk ki muntɔ, ki yetɔ a, "Fiit yian yian!" Ki u fiir. Waa fiir yoo nba, ki jarit na pit u nii ni ki baa. 8 Ki malaka na yetɔ a, "Lian a tiat, ki pir a taasaat." Ki Piita teen nna. Ki u bia betɔ a, "Gbabin a chinchenn kii waan." 9 Ki u gbab ki waau; ki bi nyii dansarik diiuk na ni, ŋaan Piita din ki bann nan malaka nba tuun linba na tee mɔniie. U din mi a u laat yirintue. 10 Ki bi din baar gar sinsinn guurɔ na boor, ki bia tan baar gar lɔɔ na boor, ki ji saa baar kutganjoontik na boor. Ki gann maŋ loot li tiɔŋ ki turib. Ki bi nyii nanyer, ki tɔkin sɔnu ki saa, ki malaka na lir bot ŋaan nyikɔ. 11 Ŋanne ki Piita ji yerik, ki yet a, "Mɔtanae ki n ji daa bann nan li set tee mɔniie nan Yennue tun u malaka ki u baar nyinnin Bat Herod nuu ni, ki bia nyinnin Juu teeb nba lor a bin tumin biaŋinba na ni." 12 Waa bann u mɔŋ po na, ki u saan Jɔɔnn Mak naa Meeri ŋaak; ki sɔɔ niib bonchiann poŋ tikir leŋ ki mei Yennu. 13 Ki u kpaa kpaa nanyer po gann, ki sapaantoontunnɔ, wunba sann tee Roda na, baar gann maŋ peŋ a wun laan ŋmee, 14 ki ji bann Piita kunkɔr, ki chiar ŋmat nan parpeenn niib na ni, ŋaan ji ki loot gann na, ki yetib a, "Piita be nanyer po." 15 Ki bi betɔ a, "Waatuko mɔka." Ŋaan ki u bia ŋammit lek yeen a u be; ki bi yaa, "Li tee u malakae." 16 Ki Piita bia lek see ki kpaan gann na; ki bi tan loot gann maŋ ki lau, ki li ji yaar litib. 17 Ki u donn nuu a bin ŋmin, ŋaan wannib biaŋinba ki ti Yomdaanɔ nyinnɔ dansarik ni; ki u betib a, "I saa man, ki saa bet Jeems nan Yiisaweira leeb linba na po." Li poorpo ki u nyikib ŋaan yaat saan siar po. 18 Ŋanne ki li yent sanyiɔk, ki mukir muk dansarguura na, ki li ki tee jeruku, kimaan bi ki mi Piita nba ji be siami. 19 Ki Bat Herod tur mɔb a bin lon u boor, ki bi lomɔ ki ki lau; ki u boi guura maŋ buboit, ŋaan tur mɔb a bin kpib. Li poorpo ki Bat Herod nyii Judea ki sik Siisarea, ki yann leŋ waan. 20 Bat Herod par din biir bonchiann Taya nan Saidonn teeb paak. Bi din tuu laat jeet Bat Herod yent nie; li paak, ki bi lakin leeb a bin saan lau. Sinsinn baa baar ki la Blastus, wunba tee Bat Herod saakayenɔ na, ki bi marik mɔi ki maŋ nanɔ, ki tan saan Bat Herod boor ni ki saa diiu sindant. 21 Ŋanne ki Bat Herod senn daar, ki tan lia u kpanbar liatgbeŋŋa, ki nyii kar u naangbouŋ paak, ŋaan pak tur niib na, ki bi wuus a 22 "Nisaarik kunkɔr kaa na. U tee yensɔɔe." 23 Li taakpaak ni ki ti Yomdaanɔ Yennu malaka te ki yiarbiiuk baa u paak, ki tee gungobii ki mɔɔu ki u kpo, kimaan u din ki tur Yennu dontir maŋi. 24 Li yoo maŋe ki Yennu maan ŋammit yat ki kɔɔ niib ni. 25 Yoo nba ki Banabas nan Sɔɔl gbenn bi toona nba ki bi saan a bin tun na, ki bi ji jii Jɔɔnn Mak ki nyii Jerusalem ki ŋmat kun Antiok.

Toona 13

1 Yennu sɔkiniinba siab nan wanntesiab din be Yiisaweira na ni Antiok. Ŋamme din tee Banabas nan Simeonn (wunba ki bi yiu Jabɔŋ na), nan Lusius, wunba nyii Sairene na, nan Manaenn (bi din lakin wubii Manaenn nan Bat Herode bi bisin ni), nan Sɔɔl. 2 Ki dasiar ki bi daa be ki jiantir ti Yomdaanɔ ki lor mɔi, ki Yennu Seyeeŋ tan betib a, "Nyint Banabas nan Sɔɔl, ki bin tun toonn nba ki n yiimm a bin tun na." Ki bi nyinnib. 3 Li poorpo ki bi bia lor mɔi ki miar Yennu, ki yii nii bi paak ŋaan chabib. 4 Yoo nba ki Yennu Seyeeŋ tun Banabas nan Sɔɔl a bin saan tun u toonn na, ki bi sik Selusia ki kɔɔ ŋaruŋ, ki saa baar Salamis nba be Saiprus tiŋ ni na, 5 ki nyii ŋaruŋ na ni, ki saa Juu teeb Yennu jiantu diit ni, ki mɔɔntir Yennu maan ki teemm. Ki Jɔɔnn Mak tee bi kpaakir ki be namm. 6 Li poorpoe ki bi nyii Salamis, ki gar tiŋ maŋ doi kur ni, ki saa baar Pafos. Leŋe ki bi din la nyɔkdaanɔ, ki u sann tee Bajiisus, ki u tee Juu nirɔ nba kpann a u tee Yennu sɔkiniie. 7 U din be Saiprus tiŋ yudaanɔ boore; ki yudaanɔ maŋ sann tee Sejius Pɔɔlus; u din tee yandaanɔe, ki din yiin Banabas nan Sɔɔl a bin tan pak Yennu maan ki wun gbat. 8 Ŋaan ki nyɔkdaanɔ maŋ, wunba sann tee Elimas, Griik maan ni na, ki sakibi, ŋaan koor a wun tia yudaanɔ maŋ ki u daa tee Yiisa yada. 9 Ŋanne ki Yennu Seyeeŋ fiir Sɔɔl, wunba sann bia tee Pɔɔl na ni, ki u got nyɔkdaanɔ na sirrr, 10 ki tan yetɔ a, "Fin nibiiuk nba gbee nan kpinkpannii na! Fine tee Sintaanii bik, ki bia tee toonŋana kur dataak. Fin ŋarin, yoo kur a jikit Yennu barmɔnii ki kpintir faake. 11 Tɔn, Yennu saa sikin nuu a paak ki a jɔɔn ki kan la yentu ki lin yann." Li taakpaak ni, ki wunn nba bɔn baa u ninbina ni, ki u ji somm turin, ki loon sɔɔ n datɔ. 12 Ki yudaanɔ na nba la linba teen na, ki u teen Yiisaweirɔ, kimaan linba ki u bann ki jiin ti Yomdaanɔ po na yaarlitɔ bonchiann. 13 Li poorpoe jik ki Pɔɔl nan u weinanleeb kɔɔ ŋaruŋ, ki nyii Pafos ki saan Pega nba be Pamfilia tiŋ ni na. Leŋe ki Jɔɔnn Mak nyikib ŋaan ŋmat saan Jerusalem. 14 Ki bi nyii Pega, ki tɔɔt baar Antiok nba din be Pisidia tiŋ ni na. Ki foon daar ki bi saan kɔɔ Yennu jiantu diiuk ni ki kar, 15 ki la ki bi karin Moses sennu ni nan Yennu sɔkiniinba sɔbu ni. Ki Yennu jiantu diiuk maŋ ni saakab yetib a bin yet Pɔɔl nan Banabas a, "Ti naa waas, li-i tee ki i mɔk labaŋann nbaie ki saa pakiti, yin pak." 16 Ki Pɔɔl fiir set ki donn nuu ŋaan piin paku a, "Yimm Israel teeb nan yimm nba kur be ki jiantir Yennu na, gbiintir man. 17 Timm Israel teeb, Yennu din gann ti yeejamme ki te ki bi yabit bonchiann, yoo nba ki bi daa din tee saamm ki be Ijipt tiŋ ni na; ki ŋɔɔ Yennu jii u paŋ ki nyinnib leŋ. 18 Ki baa din be muuk ni binpiinna na, ki u goriib. 19 Li poorpo ki u biir nibooru munlore nba be Keenann tiŋ ni na, ŋaan te ki u mɔŋ niib Israel teeb yent tiŋ maŋ. 20 Linba na kur din tun bina kobii ŋanna nan piiŋŋmu sinsuuk nie. "Yoo nba ki bi din yent tiŋ maŋ na, ki u turib yudamm a bii bu bi maan daann nan yoo nba ki Yennu sɔkinii Samuel tan saa baar. 21 Li poorpo, bi bia din tan boi Yennu a wun turib bat. Ŋanne ki Yennu gann Sɔɔl ki turib a wuu tee bi bat. U din tee Kis bijae, Benjaminn booru ni nirɔ, ki dii naan maŋ bina piinna. 22 Ki Yennu din tan liat u naan na, ŋaan dinn Defid a wuu tee bi bat jik. Nnae ki Yennu din pak Defid po a 'N la nan Defid nba tee Jese bik na mantik gboo n numm, kimaan u saa tun linba kur ki n loona.' 23 "Jɔɔ na yaaboona nie ki Yennu nyinn ti Tinntɔɔ Yiisa, a wun tinn Israel teeb, nan waa din senn mɔsonn biaŋinba na. 24 Ŋaan Jɔɔnne din dɔŋ baaru ki mɔɔntir teen Israel teeb kura a bin nyik biit tumu, ki wun wurib Yennu nyunwuru. 25 U toonn nba ji din tan gbent na, ki u boib a 'I dukii a n tee ŋmee? N ki tee Yennu Niganntɔɔ Masia na kaa. Gotir man, ŋɔɔe yaa wun tan baar n poorpo, ki n ki ŋan nan ki n pit u taasaati.'" 26 Ŋanne ki Pɔɔl bia yet a, "N naa waas, yimm nba tee Abraham yaaboona, nan i kur nba be nna ki jiantir Yennu na, maan nba ki Yennu turit ki li want tinnu maŋ po na tee ti yare. 27 Niib nba be Jerusalem, nan bi yudamm na, din ki mi nan nirɔ nba nae tee Yennu Niganntɔɔ, ki bia ki bann Yennu sɔkiniinba maan nba ki bi tuu karin foon daar kur na paaki; ŋaan baa din pak biirɔ na, bi din gbeen Yennu sɔkiniinba maan maŋa. 28 Bi din ki la u biit nba tee linba nan bin kpiu, ŋaan lek bia yaa Pailat n kpiu. 29 Baa din tun Yiisa linba kur ki gbenn nan Yennu gbouŋ nba want biaŋinba na, ki bi kpaatɔ dapunpunn na paak, ki sikinɔ ki piiu kaauk ni; 30 ŋaan ki Yennu fiinɔ kuun ni. 31 Ki binba din tɔk nanɔ ki nyii Galilii ki lin teee ki tan baar Jerusalem na, ji din laatɔ daa bonchiann, waa din fiir na. Li paak ki bi ji tee u siara damm mɔtana ki teen niib. 32 "Ŋanne te ki ti baar i peŋ a tin wanni Yennu barŋanii na. Tɔn, Yennu nba din senn ti yeejamm mɔsonn na, u gbeen tur timm nba tee bi yaaboona nawa, nan waa din fiin Yiisa kuun ni na. Nnae ki li sɔb Yennu gbouŋ ni, yanii nba pukin munlee na ni, a ŋɔɔ Yennu yetɔ a: 'Fine tee n Bija, ki dinnae ki n teen a Baa.' 34 Ki bia jenna, Yennu din yet a u saa fiin Yiisa kuun ni, ki u ji daa mi kpenni, ŋaan yetɔ a: 'Mɔsona nba ki n mɔŋ mɔŋ din senn Defid na, see ki n set tur fin nba tee u yaaboonn na.' 35 Ki bia jenna, gbouŋ na siarpo, Defid din yet Yennu a: 'A kan sak ki a Popeendaanɔ gbanant n bat kaauk ni.' 36 Tɔn, Defid din tun linba ki Yennu wannɔ ki gbenn; li poorpoe ki u kpo, ki bi piiu u yeejamm kaauk ni, ki u gbanant bat. 37 Ŋaan Yennu nba din fiin Yiisa kuun ni na, ŋɔɔ yaa gbanant ki bati. 38 "N naa waas, li paak, i kura n bann nan li set tee barmɔniie ki n beeri, li-i tee ki i teen Yiisa yada, u paake ki Yennu saa nyik chab i biit. N beerie nan daanɔ nba kur teen Yiisa yada, ŋɔɔ wur nyii biit niwa; ŋaan Moses sennu na ŋarin, nirɔ kan fit wur nyi biit ni. 40 "Li paak, soot i mɔŋ man, ki daa te ki Yennu sɔkiniinba nba din yet linba na n nyanni. Nnae ki Yennu din yet a: 41 'Gotir man, yimm garuk damm na, ŋaant ki lin bakiti; toona nba ki n tuun i yoo na, sɔɔ-i lekii beti li po nyik nyik gbaa, li tee linba ki i kan mi teen yadae. Li paak, see ki i kpo.'" 42 Baa gbenn lakinu yoo nba, ki Pɔɔl nan Banabas nyii Yennu jiantu diiuk na ni, ki niib na barimm a bin teen paaru ki daan jen foon daar nba baat na, ki tan wannib labaar maŋ biak. 43 Boorganu bonchiann nba din lebit bi jiantu ki waa Juu teeb jiantu na, nan Juu teeb bonchiann ji din waa Pɔɔl nan Banabas. Ki bi piak namm ki kpaamm a, "I kpaŋŋii dia nna man, kii waa Yennu ki yabir la Yennu ninbatinu." 44 Ki foon daleer nba baar, li din biar waaminnae nan doo na ni sɔɔ kur n baar ki gbat Yennu maan. 45 Juu teeb nba din la nibur tikir na, ki bi fiin punponn, ki piak biir Pɔɔl wannu, ki bia sukiiɔ. 46 Ŋaan ki Pɔɔl nan Banabas lek bia yeen nan parcheenn a, "Li kpaa talase nan tin sint pak Yennu maan ki tur yimm Juu teeb. Ŋaan yaa y‡t maan maŋ, ki bia dukin nan i ki ŋan nan yin la manfoor nba kaa gbennu na, li paake te ki ti nyikiti, ŋaan saa binba ki tee Juu teeb na boor, 47 kimaan ti Yomdaanɔ turit mɔb nan laa sɔb u gbouŋ ni ki yet Yiisa Masia a: 'Mine ganna a fii tee yentu, kii yentir kii teen binba ki tee Juu teeb, kii bia kii baat nan tinnu kii teen tingbouŋ nateeb kur.'" 48 Tɔn, binba ki tee Juu teeb maŋ nba din gbat nna, ki bi ji mɔk parpeenn, ki piak dont Yennu maan. Ki binba ki Yennu gannib a bin la manfoor nba kaa gbennu na teen Yiisa Masia yada. 49 Ki ti Yomdaanɔ maan maŋ yat tiŋ na lokir kur po. 50 Li yoo na ki Juu teeb na fiin Antiok yudamm, nan poojaana nba tee yentinna wutoa, ki bi jak Pɔɔl nan Banabas mukisuk, ki ber nyinnib bi yent ni. 51 Ki toomiinba na ji yet a, "Ti nii nan ti taae na," ŋaan yaat saan Ikonium. 52 Ki Yiisaweira nba biar Antiok na gbee nan Yennu Seyeeŋ nan parpeenn.

Toona 14

1 Pɔɔl nan Banabas nba din baar Ikonium, ki bi saan Juu teeb Yennu jiantu diiuk ni, ki mɔɔntir Yiisa barŋanii, li paak ki nibur teen Yiisa yada; bi siab din tee Juu teeb, ki siab mun tee Griik teeb. 2 Ŋaan ki Juu teeb nba tee kangbata na biir Yiisaweira sann, ki fiin boorganu na wutoa. 3 Ki toomiinba na ji jii yoo bonchiann ki be leŋ, ki ŋammit piak nan parcheenn ki jiin ti Yomdaanɔ Yiisa po, ki u turib paŋ a bii tuun bakitnauŋ toona, ki li want nan baa piak u ninbatinu po na, li maan set nyii u boore. 4 Ki doo na niib bɔkit, ki siab see Juu teeb poor, ki leeb na mun see toomiinba na poor. 5 Ŋanne ki Juu teeb nan boorganu na lakin leeb nan bi doo maŋ yudamm, ki lor a bin dinn toomiinba na biak ki jaatib tana; 6 Baa ji tan bann nan bi yaa bin jaatibe na, ki bi chiar saan Listra nan Debe, nan digban-bis nba be, Likaonia yent ni. 7 Baa din saa baar leŋ yoo nba, ki bi mɔɔnt Yiisa barŋanii na. 8 Ki jasɔɔ nna be Listra ki tee wɔbik. Bi din marɔ ki u tee wɔbike, ki ki mi sommi. 9 Ki u tan gbat Pɔɔl mɔɔntii na. Ki Pɔɔl gotɔ sirrr, ki tan bann nan u mɔk yada nba saa la laafiawa. 10 Ki u yetɔ sanpaapowa a, "Fiit ki set a taa paak." Ki u tɔb naat ki fiir ki ji somm. 11 Niib na nba din la Pɔɔl nba tun linba maŋ na, ki bi ji piin yikin bi mɔŋ maan ni a, "Ti yennii sik ti boor ni ki kpant nisaarii." 12 Ki bi taan pur Banabas a Seus, ki Pɔɔl mun, ki bi purɔ Hemes, kimaan ŋɔɔe din tee barpakirɔ. 13 Ki bi yennu Seus tingbandaanɔ nyii poochianfeek ni, (poochianfeek maŋ din see doo na tɔɔnn poe,) ki baar nan naajai nan tipuut doo na tammɔb ni, ki ŋɔɔ nan nibur na tikir a bin mann mannu ki tur toomiinba maŋ. 14 Banabas nan Pɔɔl nba gbat baa yaa bin tun biaŋinba na, ki bi para biir, ki bi pat pat bi liata, ki chiar kɔɔ nibur na ni, ŋaan yikin a, 15 "Bee ki i tee nna? Ti mun tee nisaariie nan yimm na, ki mɔɔntir Yiisa barŋanii, a tin ŋmanti ki yin nyik bon-yana maŋ, ŋaan kii waa manfodaanɔ Yennu, wunba nan sanpaak nan tiŋ nan mɔkgbeŋŋa nan linba kur be li ni. 16 Yaayoo niewa ki u din ŋaan nibooru kur tuun bi yama ni mɔkmɔk nan mɔtana, 17 ŋaan yoo kur u tuun bonŋana, ki li set want nan u be; ki u te ki saak nyi sanpaapo ki baa ki teeni, ki bia teeni dii dijaan-yoo, ki gboonti jeet, ki i laat parpeenn." 18 Toomiinba na nba pak nna maŋ, ŋaan bi din la faraewa ki tan gɔɔr nibur maŋ a bi daa mann mannu ki teemmi. 19 Li poorpoe ki Juu tesiab nyii Antiok nba be Pisidia tiŋ ni, nan Ikonium, ki baar ki pak tunn nibur na yan a bin biir Banabas nan Pɔɔl. Ŋanne ki nibur na jaat Pɔɔl tana, ki ji fuurɔ nyinn doo na ni, kimaan bi mi a u kpoe. 20 Ki Yiisaweira baar ki set lintɔ; ki u tan fiir, ki ŋamm nan ŋɔɔ ŋmat doo na ni biak. Ki li yent sanyiɔk, ki Pɔɔl nan Banabas saan Debe ki saa mɔɔnt Yiisa barŋanii na leŋ, 21 ki dak niib bonchiann, ki bi teen Yiisaweira. Ŋaan ki bi ŋmat saan Listra nan Ikonium nan Antiok nba be Pisidia tiŋ ni na, 22 ki ŋammit want Yiisaweira u maan, ki cheen bi para doi maŋ ni, ki beerib a, "I kpaŋŋii dia i yada maŋ nna man," ki wantib a, "Nan tin tan kɔɔ Yennu naan ni na, see ki ti dii biak bonchiann." 23 Ki doi kur ni ki bi tuu gann Yiisaweira saakab, ki mei Yennu ki lorin mɔi, ki jikit Yiisaweira nan bi saakab na ki kubintib bi Yomdaanɔ Yiisa nuu ni, wunba ki bi poŋ teenɔ yada na. 24 Baa din gar Pisidia digbanbis na poorpoe ki bi baar Pega nba be Pamfilia tiŋ ni na, 25 ki pak Yiisa maan leŋ ki fit lian sik Atalia. 26 Leŋe ki bi din kɔɔ ŋaruŋ, ki ŋmat saan Antiok nba be Siria tiŋ ni na, ŋaan sɔɔ leŋ ki Yiisaweira poŋ teemm Yennu nuu niwa, a wun sommib bi toonn ni. Ki mɔtana bi tun toonn maŋ ki gbenna. 27 Bi baaru Antiok maŋ nie, ki bi tikir Yiisaweira na, ki tan betib linba kur ki Yennu tun namm, nan waa loot sɔnu biaŋinba ki tur binba ki tee Juu teeb a bin teen Yiisa yada kii waau. 28 Ŋaan ki bi ji din biar leŋ ki yukir bonchiann.

Toona 15

1 Li yoo na ki jasiab nna nyii Judea ki sik Antiok, ki want Yiisaweira na a, "Li kpaa talase ki i pot i puna, nan Moses sennu nba wann biaŋinba na. Ŋann-i kaa, i kan la tinnu." 2 Ki Pɔɔl nan Banabas nan ŋamm nɔi nan leeb nan ninmɔnn, ki Yiisaweira na tan lor ki nyinn Pɔɔl nan Banabas nan bi ni siab, a bin saan Jerusalem, ki saa la toomiinba nan Yiisaweira saakab na, maan maŋ po. 3 Tɔn, ki Yiisaweira na turib sɔnu, ki bi saa ki gaar Fonisia nan Samaria yaka po, ki bet Yiisaweira nba be leŋ na a binba ki tee Juu teeb na siab lebit bi binbeŋ ki teen Yiisaweirawa. Ki labaar maŋ turib parpeenn ki li saa yakir. 4 Baa baar Jerusalem yoo nba, ki Yiisaweira nan bi saakab nan toomiinba na gaarib saauŋ. Ŋanne ki Pɔɔl nan Banabas betib linba kur ki Yennu te ki bi tun. 5 Ŋaan ki Yiisaweira na siab nba tee Farisiinba na fiir set, ki yet a, "Li kpaa talase ki boorganu na n pot bi puna, ki bia dia Moses sennu." 6 Li paak ki toomiinba nan saakab na lakin leeb, a bin dukin maan maŋ po. 7 Ŋanne ki bi din pak yukir nan leeb, ki Piita tan fiir ki yet a, "N naa waas, i mi nan yoo nba gar Yennu din gannin a n wann Yiisa barŋanii na ki tur boorganue, ki bin fit lian gbat ki teen Yiisa yada. 8 Yennu nba mi nisaarik par ni na, ŋɔɔe tur boorganu u Seyeeŋ nan waa kpan din turit na, ki li wann nan boorganu nba teen yada nae ki u gaarib. 9 U ki mɔk lukitimi, kimaan baa teen Yiisa yada na paak, ki u nyik bi biit ki chabib nan waa din nyik chab timm na. 10 Li paak, bee ki i loon ki i bikin Yennu? Bee ki i loon ki i te ki boorganu nba tee Yiisaweira na n dia sennu nba ki timm nan ti yeejamm gbaa din ki fit dia na. 11 Ti daa tee nna. Timm nan ŋamm jame; ti kur teen ti Yomdaanɔ Yiisa yada ki la tinnu u ninbatinu paake." 12 Ŋanne ki Yiisaweira na kur ŋmin, ŋaan ji gbiin Banabas nan Pɔɔl. Ki bi beerib bakitnauŋ toona nba ki Yennu din te ki bi tun ki tur boorganu na. 13 Baa betib gbenn yoo nba, ki Jeems yetib a, "N naa waas, gbiintir man, 14 Simonn betit biaŋinba ki Yennu sint tin boorganu ninbaauk, ki nyinn bi siab a bii tee u mɔŋ yab. 15 Ki Yennu sɔkiniinba mɔmaan mun bia pak nnae, kimaan li sɔb Yennu gbouŋ ni a: 16 'Li poorpo min Yennu saa jen, ŋaan Defid yaaboona nba lek ki dia u naan na, see ki n dinn u yaaboonyenɔ, ki ŋamm naan maŋ, 17 li paak, niib kur nba be tingbouŋ na ni ki ki tee Israel teebi, ŋaan ki n gannib a bin nakin min nba tee bi Yomdaanɔ. 18 Nnae ki Yennu, wunba te ki bi bann linba na yaayoo niwa na din yet.'" 19 Ki Jeems bia yet pukin a, "Li tee n dudukite nan ti daa jikit linba paar ki teen boorganu nba lebit ki waa Yennu sɔnu na. 20 Laa sii tee biaŋinba, li ŋan ki tin sɔb gbouŋo, ki betib ki bi daa di linba ki bi mann pata, kii so bi mɔŋ nan bonchonchontoona, nan joonbaanu, ki daa ŋman bonkobuk nba ki bi ŋmakir kpii, ki bia daa di sɔmi. 21 Moses sennu na ŋarin, binba mɔɔntir sennu maŋ poŋ bee doo kur ni yaayoo niewa ki tan tuu dinna, ki bi karin u sennu maŋ ni, Yennu jiantu diit ni, foon daar kur." 22 Ŋanne toomiinba maŋ nan saakab na nan Yiisaweira na kura lor ki nyinn siab bi ni, a bin tun ŋamm nan Pɔɔl nan Banabas ki bin saan Antiok. Ŋamme din tee Judas, wunba sann tee Basabas na, nan Sailas. Bi jab banlee maŋ din tee Yiisaweira yudamm na yemme. 23 Ki bi din yaa bin tumm nan gbouŋ, ki sɔb a: "Timm Yiisa toomiinba nan Yiisaweira saakab sɔbin gbouŋ na ki foont yimm ti naa waas nba ki tee Juu teeb ki be Antiok nan Siria nan Silisia na. 24 Ti gbat a ti siab baar i peŋ, ki piaki barsai ki li damii-i ki ŋmat i yan, ŋaan ti ki tumm-ii, 25 li paake te ki ti taan leeb ki soor ki gann Judas nan Sailas, ki tuumm i boor, ki ŋamm nan ti naa walonkai Pɔɔl nan Banabase saa, 26 binba likin bi saaŋmanii ti Yomdaanɔ Yiisa Masia toona paak na. 27 Judas nan Sailas bia saa beti linba ki ti sɔbin na. 28 Yennu Seyeeŋ nan timm kure sak nan li ŋan ki ti te ki i dia sennu nba kpaa talase, ŋaan daa pukii linba paari. 29 Yaa sii tuun linba maŋe na: I daa di jeet nba ki bi mann pata. I bia daa di sɔmi. I biakii mi ki i ŋman bonkobuk nba ki bi ŋmakir kpii, ki bia soor i mɔŋ nan bonchon-chontoona nan joonbaanu. Li-i tee ki i dia i mɔŋ nna, li sii ŋan i po. Li kure na." 30 Ŋanne ki bi tumm, ki bi sik Antiok, ki saa lakin Yiisaweira na kur, ki turib gbouŋ na. 31 Niib na nba karin gbouŋ maŋ yoo nba, ki bi la parpeenn bi kpaanii maŋ paak. 32 Ki Judas nan Sailas nba tee sɔkiniinba na yukir namm ki betib Yennu maan bonchiann, ki cheen Yiisaweira maŋ para ki totib. 33 Bi yukiru maŋ poorpoe ki Yiisaweira na chabib, ŋaan yetib a, "Yennu n turi taaŋann." Ki bi ŋmat kun binba tumm na boor. 34 [Ŋaan ki li maŋ Sailas ki u biar Antiok.] 35 Pɔɔl nan Banabas mun bia din yukir Antioka. Ki ŋamm nan leeb bonchiann mɔɔntir ti Yomdaanɔ maan ki teen niib ki bia wantib li paak. 36 Li din yann waame ki Pɔɔl yet Banabas a, "Ŋaant ki tin ŋmat gɔn ti naa waas nba be digbana nba kur ki ti din saan ki saa mɔɔnt ti Yomdaanɔ maan na, ki laan baa be biaŋinba." 37 Ki Banabas loon bin jii Jɔɔnn Mak, 38 ŋaan Pɔɔl din ki sak bin jiiu, kimaan u din tan ki joont namm bi toona na ni, ki nyikib Pamfilia, ŋaan ŋmat kun. 39 Ki mɔniɔk fiir Pɔɔl nan Banabas sinsuuk ni, ki bi bɔkit leeb. Ki Banabas jii Mak, ki bi kɔɔ ŋaruŋ ki saan Saiprus. 40 Ki Pɔɔl mun gann Sailas, Yiisaweira na ni. Ki Yiisaweira na jiib ki kubimm Yennu nuu ni, a wun sommib. 41 Ki bi din saan, ki saa gar Siria nan Silisia yaka po. Ki Pɔɔl piak ki cheen Yiisaweira para doi na ni.

Toona 16

1 Li poorpoe ki Pɔɔl nan Sailas tan baar Debe nan Listra, ki la Yiisaweitɔsɔɔ, ki u sann tee Timoti, ki u be leŋ. U naa din tee Juu nirɔ nba tee Yiisaweirɔe, ŋaan ki u baa tee Griik nirɔ. 2 Yiisaweira kur nba din be Listra nan Ikonium na din pak Timoti po bonŋann. 3 Pɔɔl din loon wun jiiu ki bii saa sɔnii. Ŋaan Juu teeb nba din be digbann na ni yakir kur din mi nan Timoti baa tee Griik nirɔe. Li paak ki Pɔɔl pot Timoti punn. 4 Ki bi din saa doi ni, ki teen Yiisaweira na sennu nba ki Yiisa toomiinba na nan saakab din senn Jerusalem na. 5 Ki linba na chee Yiisaweira maŋ para u sɔnu ni. Ki niib bia tee yada ki pukii Yiisaweira po daar kur. 6 Ki bi gar saan Frijia nan Galasia yaka po, ki loon bin saan Asia tiŋ ni, ŋaan Yennu Seyeeŋ din ki sak bin pak Yiisa maan Asia tiŋ ni. 7 Baa din tan baar Misia kpaar paak, ki bi koor a bin saan Bitinia yakir po, ŋaan ki Yiisa Seyeeŋ ki sak bin saani. 8 Ŋanne ki bi gar Misia, ki sik Troas. 9 Leŋe ki Pɔɔl la yirintu nyiɔk, ki u la ki Masedonia nirɔ baar see ki barimɔ a, "Pootir mɔkgbeŋŋir na ki baar Masedonia na, ki tan sommit." 10 Pɔɔl nba la yirintu maŋ na, li taakpaak ni ki ti teen siir a tin saan Masedonia, kimaan ti ji din la nan Yennue betit a tin saan kii sakii mɔɔntir Yiisa barŋanii kii teen niib na leŋ. 11 Ŋanne ki ti bia kɔɔ ŋaruŋ, ki nyii Troas, ki tɔkin baar Samotras, ki li yent ki ti baar Neapolis. Leŋe ki ti nyik ŋaruŋ na, 12 ŋaan gar baar Filipi, doo nba tee digbansaakar Masedonia yent ni na. Doo maŋ din tee Rom teeb yente. Ti din be doo maŋ ni ki li mann daa ŋaŋŋaawa. 13 Ki foon daar ki ti nyii sik doo maŋ kpenu ni. Ti din mi a Juu teeb Yenmiaru boor tee leŋe, ki ti baar kar ki pak nan poob nba tikir leŋ na. 14 Poob nba gbat ti maan maŋ, bi yenɔ sann din tee Lidia. U din nyii Tiatairae, ki tee chinchenmuŋ nba ki li daauk paar na kɔɔtitɔɔ, ki bia tee wunba jiantir Yennu. Ki Yennu loot u par ni a wun sak Pɔɔl maan nba ki u piak na. 15 Ki ti din wur ŋɔɔ nan u ŋaateeb Yennu nyunwuru. Ki u din gɔɔrit, ki yet a, "Li-i tee ki i mi nan n set teen ti Yomdaanɔ yada nan barmɔniie, yin baar kii be n ŋaak ni." Ki ti baar be. 16 Dasiar ki ti tan ŋmat saan Yenmiarboor, ki sapaandaabir nna mɔk u yomdamm, ki tan chetit. Narinbiiuk din be u ni ki yentɔ, ki teenɔ ninnyɔɔntɔɔ. U ninnyɔɔnsin maŋ ni, ki u laat likirii bonchiann ki teen u yomdamm maŋ. 17 Ki u waa timm nan Pɔɔl poor ki tian sanpaapowa a, "Niib na tee Yabint Yennu daabae. Bi mɔɔntir ki teen yimm doo na teeb biaŋinba ki i saa la tinnue." 18 U din tian ki yikin nna ki li mann daa ŋaŋŋawa. Ŋanne ki Pɔɔl ji tan miat nan u yikinii maŋ, ki jiant bet narin-biiuk nba be u ni na a, "Yiisa Masia sann ni, n tura mɔb, nyimin u ni!" Li taakpaak ni ki narinbiiuk na nyii u ni. 19 U yomdamm nba bann nan bi lik-kpaan sɔnu na gbenne na, ki bi soor Pɔɔl nan Sailas, ki dat baar namm bi yudamm linlakin boor. 20 Baa baar namm Rom teeb barbuura boor yoo nba, ki bi yet a, "Niib na tee Juu teebe, ki baat nan daamii bonchiann ti doo paak, 21 ki wantit bi kasia nba ki ti sennu ki chab a tin gaari, kimaan ti tee Rom teebe." 22 Ŋanne ki nibur nba be leŋ na mun lekib. Ki barbuura na soor Pɔɔl nan Sailas liata, ki fɔb liat liat, ŋaan te ki bi boob lanbann. 23 Baa boob bonchiann ki gbenn yoo nba, ki bi ji saan kɔɔmm dansarik, ŋaan bet dansarguurɔ na a wun kparib kenkema. 24 Waa gbat bi mɔb maŋ, ki u mun jiib ki kɔɔmm dansarik diiuk maŋ ni piba, ki baamm daat baana. 25 Ki li din tan baar tansuunii, ki Pɔɔl nan Sailas mei Yennu ki yiin yanii ki piakɔ, ki dansarkɔɔleeb na ji gbiin. 26 Li taakpaak ni ki tiŋ jek bonchiann ki ŋak dansarik na fiakir. Li taakpaak ni ki tammɔi loot, ki jarit nan baana na yabit yommii na kur nii nan bi taa ni, ki baa baa. 27 Li yoo na ki dansarguurɔ na fiir gɔɔn ni, ki la yommii diit tammɔi na loot yaa yaa, ki u mi a yommii maŋ kur nyiie, ki u nɔɔt u jukbanjiak a wun kpi u mɔŋ. 28 Ki Pɔɔl tian sanpaapowa a, "Daa tee a mɔŋ daŋi, kimaan ti kur be." 29 Ŋanne ki guurɔ na yaa bin turɔ muu, ŋaan faar kɔɔ yommii diiuk maŋ ni, ki gbaan ki jekir Pɔɔl nan Sailas tɔɔnn, 30 ki tan fiir nyinnib, ŋaan boib a, "Chanbaa nba, n saa teen nlee ki la tinnu?" 31 Ki bi jiin a, "Teent ti Yomdaanɔ Yiisa yada, ki a ŋaateeb n mun teenɔ yada, ki i saa la tinnu," 32 ŋaan pak ti Yomdaanɔ barŋanii na ki tur ŋɔɔ nan u ŋaateeb kura. 33 Li nyiɔk na, ki u jiib ki wuur bi fiat na. Li poorpoe ki bi wur ŋɔɔ nan u ŋaateeb na kur Yennu nyunwuru. 34 Ki u bia jii Pɔɔl nan Sailas ki saan namm u ŋaak ni, ki saa turib jeet ki bi dii. Ki ŋɔɔ nan u ŋaateeb ji mɔk parpeenn ki li saa yakir, kimaan baa teen Yennu yada ki kpint teen Yiisaweira na paak. 35 Li din yent sanyiɔko, ki Rom teeb barbuura na tun lanjimanba dansarguurɔ na boor a bin yetɔ a, "Ŋaan jab maŋ ki bii saa." 36 Ki dansarguurɔ na bet Pɔɔl a, "Barbuura na tun lanjimanba a n te ki fin nan Sailas n nyi. Li paak, i nyi man kii saa nan laafia." 37 Ki Pɔɔl jiant bet lanjimanba na a, "Bi daa ki bu ti buuti, ŋaan won boot lanbann niwor ni, ŋaan ki ti lek tee binba ki Rom teeb chabit a bi yaak nae, ki i barbuura bia won jiit ki lut dansarik ni, ki mɔtana ki bi ji loon bin bɔr nyinnitii? Waa! Ŋann kan teeni. Ŋaant barbuura maŋ n baar bi mɔŋ ki tan nyinnit." 38 Ki lanjimanba na ŋmat ki saa bet barbuura maŋ Pɔɔl nba pak biaŋinba na. Barbuura maŋ nba ji bann nan Pɔɔl nan Sailas tee binba ki Rom teeb chabib bi yaake na, ki jaŋmaanii soorib. 39 Li paak, ki bi baar Pɔɔl nan Sailas peŋ, ki tan teemm gafara, ŋaan nyinnib dansarik na ni, ki barimm a bin lek nyi bi doo ni. 40 Ki Pɔɔl nan Sailas seet leŋ, ki saan kɔɔ Lidia ŋaak. Ki Yiisaweira tan baar; ki bi pak Yiisa maan ki chee bi para, ŋaan yaat.

Toona 17

1 Tɔn, ki bi ji gar Amfipolis nan Apolonia, ki baar Tesalonika. Leŋe ki Juu teeb jiantu diiuk din be. 2 Ki Pɔɔl tan saan kɔɔ leŋ nan waa din tuu kɔɔ biaŋinba na. U din jii foon daa ŋantaae ki kɔɔ leŋ, ki fiitir Yennu gbouŋ, 3 ki want binba be leŋ na, ki karin Yennu gbouŋ ni, a li wann nan see ki Yennu Niganntɔɔ Masia na n di biak ki kpo ki bia tan fiir kuun ni a, "Yiisa nba nae ki n piaki u po, ŋɔɔe tee Yennu Niganntɔɔ Masia maŋ." 4 Ki u din tan pak tunn bi siab yan, ki bi ji baar taan ŋɔɔ nan Sailas. Ki Griik teeb bonchiann nba jiantir Yennu na, nan poojaana bonchiann, ki bi mun pukin bi po ki waa Pɔɔl nan Sailas. 5 Juu teeb nba din la nna maŋ yoo nba, ki bi jii punponn, ki lin tikir niyinyeka ki taamm, ki te ki bi muk doo na, ki tan baar lek Jasonn ŋaak, ki loon Pɔɔl nan Sailas, a bin nyinnib ki baar namm niib na boor. 6 Baa ki lab yoo nba, ki bi soor Jasonn nan Yiisaweitesiab, ki dat baar namm doo na yudamm boor, ki tian a, "Niib na lin labii tingbouŋ na ki te ki mukir muk niib, ki mɔtana ki bi ji tan baar ti doo na, 7 ki Jasonn gaarib u ŋaak ni, ki bi lin ki want niib barsaanii ki biir ti kpanbar yudaanɔ Siisa sennu, ki yaa kpanbarlɔɔ mun be, ki bi yiu Yiisa." 8 Baa yet nna yoo nba, ki li daan nibur na nan yudamm na para bonchiann. 9 Ki yudamm na te ki Jasonn-nba pa likirii ŋaan ki bi ŋaab. 10 Nyiɔk nba tan bɔnn yoo nba, ki Yiisaweira na chab Pɔɔl nan Sailas, ki bi saan Berea, ki saa kɔɔ Juu teeb jiantu diiuk ni. 11 Leŋ niib yan din kɔɔ Yiisa maan maŋ ni ki gar Tesalonika teeba, ki bi sak maan na nan bi para kur, ki daa kur ki bi karin Yennu gbouŋ, ki gorii, a bin laan Pɔɔl nba piak linba maŋ set tee mɔnii koo nlee. 12 Ŋanne ki bi bonchiann teen yada ki lebit ki teen Yiisaweira. Ki Griik jab nan poojaana bonchiann mun teen yada ki lebit ki teen Yiisaweira. 13 Ŋaan Juu teeb nba be Tesalonika na din gbat a Pɔɔl bia mɔɔntir Yennu maan Berea, ki bi baar leŋ ki pak biir Pɔɔl, ki fiin nibur na wutoa, a bin kpirɔ. 14 Li taakpaak ni ki Yiisaweira na chab Pɔɔl nan binba chiantɔ na, ki bi nyii tɔkin sɔnu ki baar mɔkgbeŋŋir na ni, ŋaan ki Sailas nan Timoti ŋarin biar Berea. 15 Niib nba din chiant Pɔɔl na din baar nanɔ Atensewa, ki tan yaa bin ŋmat kun, ki Pɔɔl betib a bin saa bet Sailas nan Timoti ki bin yabir ki baar yian na. Ki niib na ji din ŋmat kun Berea. 16 Pɔɔl nba din daa be Atens ki guu Sailas nan Timoti na, ki u la tingbana gbee doo maŋ ni, ki li biir u par bonchiann. 17 Ki u tuu kɔɔ Yennu jiantu diiuk ni ki faa labaar nan Juu teeb nan boorganu nba jiantir Yennu na, ki bia tuu saan bi linlakin boor daa kur, ki saa faa labaar nan binba baat leŋ na ki jiin Yiisa barŋanii na po. 18 Ki saakayandaansiab nna din be, ki bi yi bi yemm Epikurus teeb, ki yi leeb mun Stoik teeb, ki bi mun tan baar ki faa labaar nan Pɔɔl. Ki bi siab tan pak nan bi leeb a, "Barifofoouk daanɔ nba want u mɔŋ na mun yeen bee na?" Ki bi yemm jiin a, "Li taan tee nan u piak digbangana yennii poe na." Bi din yet nna maŋ, kimaan Pɔɔl mɔɔntir Yiisa nan u kuunfiiru poe. 19 Ŋanne ki bi jii Pɔɔl ki baar nanɔ bi saakab tintaankaanu boor nba ki bi yi Areos Kunkonn na, ki yet Pɔɔl a, "Ti sii loon tin bann barsaann nba ki a want na, 20 kimaan a piak baryena, ki li tee barsaaniie ti peŋ, ki ti loon tin bann li paak." 21 (Atens niib kur nan binba nyii tinganii ki baar be na, din tuu jii bi yooe ki faa labaar, ki bia gbiintir barsaanii nba yɔɔnt baar na.) 22 Tɔn, ki Pɔɔl fiir bi tintaankaanu maŋ ni, ki set bi tɔɔnn, ki yetib a, "Atens teeb, n la nan i benu kur ni, i loon jiantu bonchiann; 23 kimaan maa kak lin i doo na, n got i tingbana, ki bia la jiantu binbintir ki li sɔb li paak a 'Yennu nba ki ti ki miu na.' N loon ki n wanni Yennu nba ki i pukiiɔ ŋaan ki miu nae. 24 Yennu maŋe din nan durinya nan bont kur nba be li ni. Ŋɔɔe tee sanpaak nan tiŋ Yomdaanɔ; u ki be poochianfei ni kaa. 25 Nisaarik kan fit tun siar nan u nuu ki turɔ ki lin pukinɔ siari, kimaan ŋɔɔe tee daanɔ nba teen nisaarii kur manfoa nan bona kur. 26 Ŋɔɔe te ki nibooru kur nyii yeeja yenɔkɔɔ ni, ki bia te ki bi be tingbouŋ na kur po, ki u mɔŋ mɔŋ senn yoo nba ki nibooru kur sii be, ki bia teen bi binbeboa terii. 27 U din teen nna maŋ a bin lomɔe, a li pasiari bin turin ki tan nakin bannɔ. Ŋaan ŋɔɔ Yennu set ki fɔk nan ti sɔɔ, 28 nan sɔɔ nba din yet a: 'Li tee Yennu paake ki ti be ki tuun.' I yandamm pinpakit mun bia lek want nna maŋe a: 'Ti mun tee Yennu waase.' 29 Tɔn, timm nba tee Yennu waas na, li ki ŋan ki tin dukin nan Yennu tee nan siara bonninauŋ nba tee salima koo tann nba ki nirɔ jii u yan koo u dudukit ki ŋammiri. 30 Yoo nba din gar, ki niib ki mi Yennu na, u din ki jii bi biiti. Ŋaan mɔtana u yeen a sɔɔ kur n nyik biit tumu, 31 kimaan ŋɔɔ Yennu poŋ senn daar nba ki u saa bu tingbouŋ na ŋaateeb kur buut chib chiba. U saa te ki wunba ki u gannɔ nae n bu buut maŋ, waa set fiinɔ kuun ni na, ki li tee nyinn ki tur sɔɔ kur a ŋɔɔe sii tee barbuurɔ." 32 Baa gbat ki Pɔɔl pak kuunfiiru po na, ki bisiab laa ki sarikitɔ, ŋaan ki siab mun yaa, "Ti bia loon ki tin ŋamm gbiint linba ki a saa pak nae." 33 Ŋanne ki Pɔɔl fiir ŋaan nyikib. 34 Ki bi siab mun teen yada ki lebit ki teen Yiisaweira. Ki bi yenɔ tee Dionisius, wunba din tee Areos Kunkonn barbuura yenɔ na. Ki poosɔɔ mun din be ki teen yada, ki u sann tee Damaris. Ki leeb mun be ki pukimm.

Toona 18

1 Li poorpoe ki Pɔɔl nyii Atens ki saan Korint doo nba be Akaya tiŋ ni na. 2 Leŋe ki u din saa la Juu nisɔɔ, ki u sann tee Akuila, ŋaan bi din marɔ Pontuse, ki ŋɔɔ nan u ŋaapoo Prisila nyii Itali ki baar Korint, kimaan kpanbara yudaanɔ Klɔdius din tur mɔb a Juu teeb kur n nyi Rom. Bi din daa ki yukir Korinti. Ki Pɔɔl tan baar bi ŋaak ni, 3 a wuu be namm, kimaan bi kur din tee gbanjabirae ki tuun nan leeb. 4 Ki foon daar kur u tuu kɔɔ Yennu jiantu diiuk ni, ki faa nan Juu teeb labaar ki jiin Yiisa po, ki yiab u mɔŋ a wun tunn Juu teeb nan Griik teeb yan ki jiin li po. 5 Li poorpoe ki Sailas nan Timoti tan nyii Masedonia ki baar. Ki Pɔɔl ji jii u yoo kur ki mɔɔntir Yiisa maan ki teen Juu teeb na, ki want nan ninmɔnn a Yiisae tee Yennu Niganntɔɔ Masia na. 6 Ŋaan ki bi lek ki sak maan maŋ, ki sukiiɔ. Ki u pit u nii nan u taa, ki betib a, "Li-i tee ki i tan kɔŋ i manfoori, li jii i mɔŋ mɔŋ yura paake. N nuu ji kaa li ni. Laa jii dinna ki saa, see ki n nyiki, ŋaan wann boorganu Yiisa maan maŋ." 7 Ŋanne ki u nyikib ŋaan saan be sɔɔ ŋaak, ki bi yiu Titius Justus. Ki u tee boorganu ki jiantir Yennu. U ŋaak maŋ din kpia Juu teeb jiantu diiuko. 8 Ki jiantu diiuk maŋ yudaanɔ Krispus nan u ŋaateeb kur teen Yiisa yada ki lebit ki waau. Ki Korint nileeb bonchiann mun gbat Yiisa maan na ki teenɔ yada ki ji waau. Ki bi wurib Yennu nyunwuru. 9 Dasiar nyiɔk ki Pɔɔl tan la yirintu. Ki u yirintu maŋ ni ki ti Yomdaanɔ Yiisa betɔ a, "Daa tiin jaŋmaanii, ŋaan kii mɔɔntir n maan maŋ ki daa nyikiti, 10 kimaan n be nana, ki sɔɔ kaa ki saa leka ki tura daŋi, kimaan niib bonchiann be doo na ni ki tee n yab." 11 Li paak Pɔɔl din be leŋ binn nan ŋmaarii ŋanloobe, ki want niib Yennu maan. 12 Tɔn, yoo nba ki Galio din tee Akaya tiŋ yudaanɔ nae ki Juu teeb tan taan leeb ki lek Pɔɔl ki soorɔ, ki saan nanɔ buut boor, 13 ki saa yet a, "Jɔɔ na kpann niib ki bi jiantir Yennu biaŋinba ki waa ti sennu." 14 Pɔɔl nba din yaa wun pak yoo nba, ki Galio yet Juu teeb maŋ a, "Yimm Juu teeb, li-i tee maan na tee mabiiuk koo mɔy‡tukue, li bo sii ŋan ki n di sukuru ki gbiint, 15 ŋaan laa tee maan nba jiin i mɔŋ mɔmaan, nan i sana, nan i mɔŋ sennu po na, i mɔŋ n got li ni, kimaan n ki sak man bu li mabooru," 16 ŋaan ber nyinnib buut boor maŋ. 17 Ŋanne ki bi soor Sosenes, wunba tee Juu teeb jiantu diiuk yudaanɔ na, ki boou buut boor, ŋaan ki Galio baka taan kaa li po. 18 Pɔɔl din be nan Yiisaweira nba be Korint na ŋmaarii bonchiann, ki tan chabib, ŋaan yaa wun saan Antiok nba be Siria tiŋ ni na. Ki ŋɔɔ nan Prisila nan Akuila saan Senkrea a bin kɔɔ ŋaruŋ. Baa yaa bin kɔɔ ŋaruŋ ki saan na, ki Pɔɔl por nan Yennu ŋaan koor u yut. 19 Ŋanne ki bi din saa ki saa baar Efesus, siaminba ki Prisila nan Akuila yaa bin biar na; ki Pɔɔl saan kɔɔ Juu teeb Yennu jiantu diiuk ni, ki faa labaar nan Juu teeb maŋ, ki jiin Yiisa Masia po. 20 Ki bi tan yaa wun biar namm ki yukir, ŋaan ki u ki saki. 21 Waa din yaa wun chabib ki saan na, ki u betib a, "Li-i tee ki Yennu saki, n bia saa jen i boora," ŋaan kɔɔ ŋaruŋ ki saa. 22 Waa tan baar Siisarea yoo nba ki u tɔɔt gar Jerusalem ki saa foont Yiisaweira, ŋaan gar sik Antiok biak, 23 ki saa yukir leŋ, ki bia tan nyii leŋ ki saan Galasia nan Frijia yaka po, ki saa cheen Yiisaweira kur para. 24 Ŋanne ki Juu jasɔɔ nna be, ki u sann tee Apolos, ŋaan bi din marɔ Aleksandriae, ki u tan baar Efesus. U din tee banntɔɔe, ki mi Yennu gbouŋ fanu. 25 Bi din poŋ wannɔ ti Yomdaanɔ Yiisa sɔnuwa. Ki u tan baar ki piak want Yiisa po bonŋann nan ninmɔnn, ŋaan u daa din ki bann Yiisa maan maŋ kuri, kimaan u kpan din mi Jɔɔnn nba din wuur niib Yennu nyunwuru biaŋinba na kuukɔɔe. 26 Ki u din piin piak Yennu maan nan parcheenn, Juu teeb jiantu diiuk ni. Ki Prisila nan Akuila gbat u maan maŋ, ki tan jiiu ki fiit Yennu sɔnu fanu ki wannɔ. 27 Li poorpoe ki Apolos lor a wun saan Akaya. Ki Yiisaweira nba be Efesus na sommɔ, ki sɔb gbouŋ ki tur Yiisaweira nba be Akaya na, a wuu taŋŋi baar, bin gaarɔ saauŋ. Waa tan baar leŋ yoo nba, ki u set tot binba teen yada Yennu ninbatinu paak na, 28 kimaan ŋɔɔ nan Juu teeb nba din tan nɔi nan leeb na, ki u jii Yennu gbouŋ, ki wantib a Yiisae set tee Yennu Niganntɔɔ Masia, ki pak nan paŋ ki nyannib niwor ni.

Toona 19

1 Apolos nba din daa be Korint na, Pɔɔl ŋarin din gar Galasia nan Frijia yaka poe ki saan Efesus. Leŋe ki u la Yiisaweisiab, 2 ki boib a, "Yaa teen Yiisa yada na, i din gaar Yennu Seyeeŋaa?" Ki bi jiin a, "Aaii. Ti poŋ ki mi gbat a Yennu Seyeeŋ be kaawa." 3 Ki Pɔɔl boib a, "Ki ŋann, bi wuri Yennu nyunwuru ŋmee sann ni-e?" Ki bi yetɔ a, "Bi wurit nan Jɔɔnn nba din wuur niib biaŋinba nae." 4 Ki Pɔɔl betib a, "Jɔɔnn din wuur niib Yennu nyunwuru, ki li want a bi nyik bi biite, ŋaan beerib a bin teen wunba tan saa baar na yada, ki ŋɔɔe tee Yiisa." 5 Baa gbat nna yoo nba, ki bi ji wurib Yennu nyunwuru ti Yomdaanɔ Yiisa sann ni. 6 Ki Pɔɔl jii u nii ki yii bi paak, ki Yennu Seyeeŋ sik bi ni, ki bi ji piak barganii, ki bia sɔkint Yennu maan. 7 Jab maŋ din tee nan piik nan banlee nae. 8 Ŋmaarii ŋantaa nie ki Pɔɔl ji saan Juu teeb jiantu diiuk ni, ki want niib na nan parcheenn, ki faa labaar namm, ki yiab a wun lebit bi yan ki jiin Yennu naan po. 9 Ŋaan niib na siab din tee tubkangbatae, ki ki sak maan na, ki piak barbiit nibur na ni, ki jiin ti Yomdaanɔ weiu po. Ŋanne ki Pɔɔl nyikib, ŋaan jii Yiisaweira na ki saan namm Tiranus wannu diiuk ni; ki daar kur jik ki u faa labaar leŋ. 10 Li din jii nna ki baar bina ŋanleewa. Li paak niib nba din be Asia tiŋ ni ki tee Juu teeb, nan nileeb na kura, din gbat ti Yomdaanɔ maan maŋa. 11 Li yoo na ki Yennu te ki Pɔɔl tuun toonjaana nba be li kɔɔ. 12 Ki niib tuu jii u nunfianii nan u liat paatii gbaa, ki paa baatib paak, ki bi yiarii gbent, ki narinbiit bia nyi baatib ni. 13 Li yoo na ki Juu nisiab be, ki tuu lin nyint narinbiit niib ni, ŋaan ji din tan yi ti Yomdaanɔ Yiisa sann a bii nyint narinbiit, ki din yeen narinbiit na a, "Timme turi mɔb Yiisa nba ki Pɔɔl mɔɔntir u maan na sann ni, nyimin man." 14 Binba din tuun nna maŋ din tee jab banlore nba din tee Juu teeb jiantu yudaanɔ Skefa na waase. 15 Baa tan yaa bin nyinn narinbiiuk jasɔɔ nna ni, ki narinbiiuk na yetib a, "N mi Yiisa po, ki bia mi Pɔɔl po, ŋaan yimm munii, i tee lamme?" 16 Ki jɔɔ nba ki narinbiiuk na be u ni na yukir ki tan chibib, bii! ki turib danii, ki bia pat pat bi tiat ki nyannib, ki bi kur chiar gbananbira, ki nyii u ŋaak ni. 17 Yoo nba ki Juu teeb nan binba ki tee Juu teeb ki be Efesus na kur gbat nna, ki jaŋmaanii soorib, ki bi dont ti Yomdaanɔ Yiisa sann bonchiann. 18 Ŋanne ki Yiisaweira na bonchiann pak kat bi biit niib ni, ki wann linba ki bi tuu tuun. 19 Ki nyɔkdamm bonchiann ji tikir bi gbant nan bi saba ki baar nann, ki tan joo muu niib kur nunii ni; ki bi bikin gbant na likirii, ki li yabint sii tee salimpeena b tusaa piiŋŋmu. 20 Ŋanne te ki ti Yomdaanɔ maan na ji din ŋammit yat kɔɔ niib ni, ki pukii nan paŋ. 21 Li poorpo ki Yennu Seyeeŋ te ki Pɔɔl lor a wun saan Masedonia nan Akaya, ŋaan saa paat saan Jerusalem, ki yet a, "Li poorpo, see ki n saan bann Rom." 22 Li paak ki u tun Timoti nan Erastus, u sommteeb na ni banlee, ki bi gar saan Masedonia, ŋaan ki u biar Asia tiŋ ni. 23 Li yoo maŋ kpikpiruk din fiir bonchiann ti Yomdaanɔ Yiisa weiu paak. 24 Jasɔɔ nna mun din be ki u sann tee Demetrius, ki u tuu jii salima ki maa bi tingbann nba ki bi yiu Diana na poochianfei bonninnana, ki kɔi; ki din jii niib ki bi tuun li toona, ki bi laat likirii bonchiann. 25 Ŋanne ki u tan yiimm ki taan bi kura, ki bia taan binba kur tuun li toonbooru na, ki betib a, "N ninjamm, i mi nan ti nyɔɔt nyi ti toona na nie. 26 I mɔŋ mɔŋ poŋ gbat ki bia la Pɔɔl nba yeen linbawa. U yaa nirɔ nba maa yennu nan u nii, a ŋann ki tee Yennu kaa, ki u maan na tunn niib yan bonchiann Efesus na, ki maan maŋ per lin cheb Asia tiŋ kura. 27 Li pasiar ti toona na sann n biir, ki bia jenna, ki ti tingbanjaann Diana poochianfeek tan saa mann teen yann, ki ti tingbann Diana baakir n waab, ŋɔɔe ki sɔɔ kur nba be Asia tiŋ ni nan tingbouŋ na kura jiantirɔ." 28 Nibur na nba gbat nna yoo nba, ki bi wutoa fiir, ki bi tian ki yaa, "Timm Efesus teeb tingbann Diana tee tingbanjaanne!" 29 Ki doo na kur muk. Ki bi soor Gayus nan Aristakus ki chiar saan kɔɔ namm tituk ni. Jab banlee maŋ din tee Masedonia niibe, binba ki Pɔɔl tuu tɔkii namm na. 30 Ki Pɔɔl loon wun kɔɔ niib na ni, ŋaan ki Yiisaweira na ki sak wun kɔɔ. 31 Ki doo na yudamm na siab nba tee Pɔɔl yɔɔsinba na tun toomii a Pɔɔl n di sukuru, ki daa kɔɔ tituk maŋ ni. 32 Li yoo na, tituk maŋ ni, siab din tian ki yakii jiak jiak, ki niib nba tikir na yan ŋmat saa gar, kimaan bi bonchiann din ki bann lakinn maŋ paaki. 33 Tɔn, ki Juu teeb nyinn jɔɔ nba ki bi yiu Aleksander na, ki sennɔ tɔɔnn, a wun pak bi paak. Ki Aleksander donn nuu sanpaapo, ŋaan ji loon wun pak tur nibur na, ki nyinn Juu teeb mɔniɔk maŋ ni. 34 Ŋaan baa tan bann nan u tee Juu nirɔe na, ki bi ji ki sak wun paki, ŋaan tian ki yeen a, "Timm Efesus teeb tingbann Diana tee tingbanjaanne." Ki bi kur tian nna ki li yukir bonchiann. 35 Li joontu ki doo maŋ saakɔɔ te ki nibur na ŋmin, ki u betib a, "Yimm Efesus teeb, sɔɔ kaa tingbouŋ na ni ki ki mi nan Efesus teebe guu yabint Diana poochianfeeki, ki bia guu tanŋann nba nyii sanpaapo ki tan baa na. 36 Sɔɔ kaa ki saa fit nɔi linba na. Li paak, li ŋan ki yii di sukuru, ki daa tee jatii. 37 I baar nan niib na nna na, ŋaan bi ki jan ti jiantu diit bona, koo ki pak biir ti tingbanni. 38 Li-i tee ki Demetrius nan u toontunleeb mɔk maan nan sɔɔie, ŋann buut boor poŋ be ki mɔk li daa, ki buut damm mun bia be. Ŋaant bin saan kii saki pootir bi leeb leŋ. 39 Ŋaan li-i tee ki i mɔk barii nba ki tee yin saan nann buut boor maŋi, li ŋan yin saan i mɔŋ yudamm boor. 40 "Li pasiar Rom teeb tan saa la ti biit, ki yet a ti tee doyeerteebe ki jiin linba tun dinna na po, li ki mɔk paaki, ki ti mun bia kan fit wann kpikpiruk na paak." 41 U yet nnae, ŋaan ji yat niib na.

Toona 20

1 Fuut maŋ nba din ŋmin na poorpoe ki Pɔɔl ji yiin Yiisaweira na, ki tan chee bi para, ŋaan chabib, ki yaat saan Masedonia tiŋ ni, 2 ki lin Masedonia tiŋ yaka po, ki bia pak Yiisaweira nba be leŋ na Yennu maan bonchiann ki kɔɔmm para, ŋaan gar saan Akaya, 3 ki ji be leŋ ki saa jaŋ ŋmaarii ŋantaa. Li poorpo, ki u ji tee siir a wun saan Siria, ŋaan bann nan Juu teeb lorin lora ki guu-u, ki u ji loon wun ŋmat ki saan gar Masedonia tiŋ ni. 4 Pirus bija Sopata, wunba nyii Berea na, nan Aristakus nan Sekondus, binba nyii Tesalonika na, nan Gayus, wunba nyii Debe na, nan Tikikus nan Trofimus, binba nyii Asia tiŋ ni na, nan Timoti, ŋamme din saan nan Pɔɔl. 5 Ki bi gar tɔɔnn ki ji saa guut Troas. 6 Jaamm nba ki bi tuu di boroboro nba kaa datiŋ na dinu poorpoe ki ti kɔɔ ŋaruŋ, ki nyii Filipi, ki saa Troas. Ki daa ŋaŋŋmu daar ki ti baar bi boor Troas, ki biar leŋ ki jaŋ daa ŋanlore. 7 Tɔn, ki foon daar daajoouk ki ti tikir leeb, ki taan nan Yiisaweira nba be leŋ na, a ti di ti Yomdaanɔ jeet. Ki Pɔɔl mɔɔnt Yennu maan dik dik nan tansuunii, kimaan laa saa yent ki wun gar na paak. 8 Ti din tikir ditɔɔtuk nna nie, ki bi joo fita bonchiann leŋ. 9 Ki naasinsɔɔ nna mun din be ki u sann tee Yutikus, ki u kar ditɔɔtuk na takorbonn paak. Ki Pɔɔl mɔɔntir Yennu maan ki li wei, ki u kar tiŋŋit, ki ji tan gɔɔn ki libit nyii ditɔɔtuk muntaa na ni, ki saa baa tiŋ ni. Ki bi sik jiiu, ki sɔɔ ki u kpowa. 10 Ki Pɔɔl nyii ditɔɔtuk na paak, ki somm sik ki tan wokin u paak, ki puur wabɔɔ, ŋaan yet a, "I daa te ki i para biiri. U fo," 11 ŋaan ŋmat ki doo ditɔɔtuk na ni, ki saa dii jeet. Li poorpo ki u bia mɔɔnt Yennu maan mɔkmɔk nan laa tan yent, ki u ji nyikib, ŋaan yaan gar. 12 Ki bi ji jii naasimɔ na, ki u mɔk manfoor, ki bi kun nanɔ nan parpeenn bonchiann. 13 Li poorpo ki ti bia kɔɔ ŋaruŋ, ki dɔŋ gar saan Asos. Leŋe ki ti din yaa ti jii Pɔɔl, kimaan ŋɔɔe betit a tin chetɔ. U din loon wun somm taatiŋe ki baar leŋ. 14 Waa din baar Asos yoo nba, ki u lat. Ki ti jiiu ki kɔɔnɔ ŋaruŋ na ni, ki saan Mitilene 15 ki bia tan tɔɔt leŋ ki baar Kios li sanyafannuk. Ki li yent ki ti baar Samos, ki li bia yent ki ti baar Miletus. 16 Pɔɔl din ki loon wun saan Efesusi, kimaan u din ki loon wun yukir Asia tiŋ ni, ŋaan loon yian a li-i saa fiti, wun baar Jerusalem dajaann nba ki bi yi Pentekost na daar. 17 Ŋanne ki Pɔɔl tun toomii a bin nyi Miletus doo ni, ki saan Efesus ki saa yiin Yiisaweira saakab na. 18 Baa baar yoo nba, ki u betib a, "I mi n binbeŋ nba tuu tee biaŋinba, maa baar Asia tiŋ ni na daar nba ki tan tuu dinna. 19 I bia mi maa din tuun Yennu toona ki mantik sikin n mɔŋ biaŋinba, ki be nan ninnyuut, ki bia dii biak Juu teeb lora ni. 20 Ki i bia mi nan maa din mɔɔntir Yennu maan, ki wanti niib ni nan i ŋei ni na, n din paki linba kur saa sommi, ki ki nyiki, ki bia ki tenn siari, 21 ki kpaan Juu teeb nan binba ki tee Juu teeb kur a bin nyik biit tumu kii waa Yennu sɔnu, ki teen ti Yomdaanɔ Yiisa yada. 22 "Tɔn, mɔtana Yennu Seyeeŋe mabin ki n yaa n saan Jerusalem, ŋaan n ki mi linba saa teenin leŋi. 23 Ŋaan maa lin doo na kur ni, Yennu Seyeeŋe tuu wantin nan ninmɔnn, a dansarik nan biak tan sii tee n yare Jerusalem. 24 Ŋaan n ki jii n manfoor ki li tee siari, kimaan min ŋarin loon ki n tun toona nba ki ti Yomdaanɔ Yiisa turin nae ki gbenn, ki li toona tee ki mii mɔɔntir barŋanii nba want Yennu ninbatinu na poe. 25 "Nnara, i mi nan n din lin i kura ŋei ni, ki mɔɔntir Yennu naan labaar. Tɔn, ki mɔtana, n mi nan i ji kan mi lami. 26 Li paake te ki n beeri dinna na, ahoo, wunba kɔŋ manfoor nba kaa gbennu na, n nuu ji kaa u ni, 27 kimaan n ki mi fɔrint nan man mɔɔnt Yennu maan maŋ kur ki wanniini. 28 Li paak, i dia i mɔŋ man bonŋann, ki bia dia Yiisaweira nba ki Yennu Seyeeŋ kubin i nuu ni, a yii tee bi yudamm kii goriib na. Ŋamme ki Yennu jiib ki teemm u niib, kimaan u Bija Yiisa nba din kpo na paak. 29 N mi nan mi-i kaa, nibiit tan saa baar i sinsuuk ni, ki biir Yiisa-weira siab nan kinkata nba tuu so pei biaŋinba na. 30 Yoo bia baat ki siab tan saa nyi i mɔŋ sinsuuk ni, ki fa fai ki jiin Yennu barmɔnii wannu na po, ki kpann Yiisaweira, ki tunii bi yan ki te ki bi waab. 31 Li paak, i guu man, ki daa tammit maa din kpaan i kur nan ninnyuut, ki ki nyik, yonnu nan nyiɔk, ki tan jaŋ bina ŋantaa na. 32 "Mɔtana, n jikiti ki tee Yennu nuu ni, ki bia mi nan yaa bann u maan nba want u ninbatinu po na, maan maŋ saa fit te yin weiɔ fanu, ki bia saa fit turi yiar sanpaapo, binba kur ki u teemm u niib na sinsuuk ni. 33 I mɔŋ bia mi nan n ki nian sɔɔ likirii koo tiati. 34 Maa din be i sinsuuk ni na, i mɔŋ mi nan n din dia n nii nae ki tuun, ki min nan n weinanleeb di ki bia lia. 35 Maa din tuun nna maŋ paake want nan see ki ti tun bonchiann ki fit somm talasdamm. Li ŋan ki ti tiar ti Yomdaanɔ Yiisa maan nba ki u yet a, 'Parpeenn tee daanɔ nba piin piinii yare, ki gar wunba gaan.'" 36 Pɔɔl nba gbenn maan maŋ yoo nba, ki bi kur lakin gbaan ki miar Yennu. 37 Baa ji yaa bin chab Pɔɔl yoo nba ki ninbaauk soorib, ki bi kura mɔ, ŋaan jii bi nii ki kokin kokinɔ, 38 kimaan bi para din mantik biir nan waa yaa bi ji kan lau nae. Ki bi chianɔ ki saan nanɔ mɔkgbeŋŋir na boor, a bin saa chabɔ ki wun kɔɔ ŋaruŋ.

Toona 21

1 Ŋanne ki ti tat nyik Yiisaweira saakab maŋ, ŋaan tɔkin baar Kos, ki li yent ki ti baar Rodes, ki bia nyii leŋ ki saan Patara. 2 Leŋe ki ti la ŋaruŋ nba saa Fonisia tiŋ ni, ki kɔɔ ŋaruŋ maŋ ki saa. 3 Taa tan laat Saiprus yoo nba na, ki ti gaar gaŋ po, ki tan baar Siria tiŋ ni, ki nyii ŋaruŋ na ni, doo nba ki bi yi Taya na ni, ki ŋaruŋ maŋ damm yaa bin nyinn tiat leŋ. 4 Leŋe ki ti la Yiisaweira, ki ji biar be bi boor ki saa jaŋ daa ŋanlore, ki Yennu Seyeeŋ te ki bi bet Pɔɔl a u ji daa saa Jerusalemi. 5 Ki ti saanu yoo tan baar ki ŋamm nan bi poob nan bi waas chianit, ki saa nyinnit doo na. Ki ti kur gbaan mɔk-kpiŋ ki miar Yennu. 6 Li poorpo ki ti chab leeb, ŋaan yaan kɔɔ ŋaruŋ ki saa, ki bi mun ŋmat kun. 7 Ŋanne ki ti nyii Taya ki baar Tolemais, ki saan foont Yiisaweira, ŋaan biar bi boor dayennkɔɔ. 8 Ki li yent sanyiɔk ki ti nyii Tolemais ki baar Siisarea ki saan kɔɔ Filip, wunba mɔɔntir Yiisa barŋanii na ŋaak ni ki be. U din tee jab banlore nba ki bi gannib Jerusalem a bii tee jetorteeb yudamm na yenɔe. 9 U din mɔk sapaamm banna, ki bi mun tee binba sɔkint Yennu maan. 10 Ti din be leŋ ki teen nan daa ŋaŋŋa nawa; ki Yennu sɔkinii nba ki bi yiu Agabus na tan nyii Judea ki sik, 11 ki baar ti boor, ki jii Pɔɔl gbann, ki lor u mɔŋ taa nan u nii, ŋaan yet a, "Yennu Seyeeŋ nba yaa biaŋinbae na, Juu teeb nba be Jerusalem na tan saa lor gbann na daanɔ nnae, ŋaan jiiu kubinɔ binba ki tee Juu teeb na nuu ni." 12 Taa ji din gbat nna maŋ, ki ti kura barin Pɔɔl a u ji daa saa Jerusalemi. 13 Ŋaan ki u jiin a, "Bee teen ki i mɔ ki saa kɔnn n kpinkpanti? Baa tan saa lorin Jerusalem kuukɔɔ paak kaa, ŋaan min poŋ teen siir nan ki n kpo ti Yomdaanɔ Yiisa paaka." 14 Waa yet nna, ki ti ji bann nan ti gbarɔe na, ki ti nyikɔ, ki ji biar ŋmin, ŋaan yet a, "Ŋaant ki ti Yomdaanɔ loomm n tun." 15 Ti yukiru maŋ poorpoe ki ti ji teen siir ki saa Jerusalem. 16 Ki Yiisaweira nba be Siisarea na siab mun weit ki saan, ki jiit, ki saan nant Minasonn ŋaak. Minasonn maŋ poŋ din tee Yiisaweikpere ki tee Saiprus nirɔ. 17 Taa baar Jerusalem yoo nba, ki leŋ Yiisaweira gaarit nan parpeenn bonchiann. 18 Ki li yent sanyiɔk, ki timm nan Pɔɔl saan a ti saa foont Jeems. Yiisaweira saakab kura mun din be leŋ li yoo. 19 Ŋanne ki Pɔɔl foontib, ŋaan kat wannib linba kur ki Yennu tun ki tur binba ki tee Juu teeb na, ki li nyii ŋɔɔ Pɔɔl mɔɔntii na ni. 20 Baa ji gbat u maan maŋ na, ki bi kura pak Yennu, ŋaan bet Pɔɔl a, "Ti naa bik, a mi Juu teeb nba tee tusaa biaŋinba ki teen Yiisa yada, ki bi kura bia dia Moses sennu ken ken ken, 21 ki bia gbat a po, a a tuu want Juu teeb kura nba be boorganu tinii ni a bin y‡t Moses sennu, ki bia beerib a bi daa porii bi waas puna, ki bia daa waa Juu teeb sennii na. 22 Ki ti saa teen nlee? kimaan Juu teeb nba tee Yiisaweira na lek saa gbat nan a baara. 23 Li paak, ti-i beta biaŋinba, fan tun li biaŋ. Jab bannae be nna ki por nan Yennu. 24 Tɔn, fin nan ŋamm-ii saa ki saa ŋamm i mɔŋ, ŋaan ki a pa likirii bi paak, ki bin koor bi yura, ki sɔɔ kur n fit lian bann nan maan nba ki bi tuu piak a po na ki tee mɔnii kaa, ŋaan a mɔŋ poŋ waa Moses sennu maŋ nan li sɔnu. 25 Binba ki tee Juu teeb ŋaan teen Yiisa yada ki waau na ŋarin, ti poŋ sɔb gbouŋ ki turib, ki betib a bi ji daa mi di jeet nba ki bi mann patiri, koo ki ŋman sɔmi, koo bonkobuk nba ki bi ŋmakir kpii, ki bia soor bi mɔŋ nan bonchonchontoona." 26 Ŋanne ki Pɔɔl jii jab maŋ, ki li tan yent sanyiɔk, ki ŋɔɔ nan ŋamm ji ŋamm bi mɔŋ, ki fit kɔɔ Yennu jiantu ŋasaakak ni, a bin wann daa nba ki bi sii be nan baa tan saa baar nan piinii ki tur Yennu, ki gbeen bi mɔpora maŋ. 27 Daa ŋanlore maŋ nba tan per gbennu yoo nba, ki Juu teeb nba nyii Asia ki baar Jerusalem ki be Yennu jiantu ŋasaakak ni na, tan la Pɔɔl, ki tian u paak, ki te ki niib na kur fiir jir jir ki soorɔ, 28 ŋaan bia tian a, "Juu teeb, sommit man! Jɔɔ nae lin lokir kur po, ki want niib ki biirib ki jiin Juu teeb, nan Moses sennu, nan Yennu jiantu ŋasaakak na po, ki bia baat nan binba ki tee Juu teeb gbaa ti jiantu ŋasaakak na ni, ki biir ti ŋaak nba yeen maŋ." 29 Baa dɔŋ la Pɔɔl nan Trofimus nba din tee Efesus nirɔ, ki bi be doo na ni na, ki bi mi a Pɔɔl kɔɔ nanɔ Yennu jiantu ŋasaakak na nie. 30 Ŋanne ki ŋmatir baar doo na kur po, ki niib na kura chiar, ki baar lek Pɔɔl, ki soorɔ ki pii nyinnɔ Yennu jiantu ŋasaakak na ni. Li taakpaak ni, ki siab loon ŋaak na tammɔi. 31 Ki niib na ji loon bin kpi Pɔɔl. Li yoo na ki Rom teeb lanjimanba yudaanɔ ji gbat a Jerusalem teeb kur fiir nan kpikpiruka. 32 Ki u kakit jii lanjimanba nan bi saakab, ki bi faar saan nibur na boor. Niib na nba lau nan lanjimanba na yoo nba, ki bi ji nyik Pɔɔl boot. 33 Ki lanjimanba yudaanɔ na saan soor Pɔɔl, ŋaan tur mɔb a bin baanɔ jarit ŋanlee, ki boib a, "Nirɔ na tee ŋmee? U biir bia?" 34 Ki nibur na ni, siab tian Pɔɔl paak jiak jiak. Bi barŋmatuk maŋ paak ki lanjimanba yudaanɔ na ki fit bann li paak bonŋanni. Li paak, ki u tur mɔb a bin jiiu ki saan nanɔ lanjimanba diiuk ni. 35 Baa baar li tammɔb taaŋmaata paak, ki lanjimanba na jiiu sanpaapo, kimaan nibur nba loon bin kpiu na paak. 36 Ki bi ji waa bi poor ki tian a, "Kpimɔ man! Kpimɔ man!" 37 Lanjimanba maŋ nba ji yaa bin kɔɔ nanɔ na, ki u boi lan-jimanba maŋ yudaanɔ na a, "Yiar sii be ki n pak siar ki turanii?" Ki u jiin boiɔ a, "A gbia Griik maamii? 38 N mi a tee Ijipt nirɔ nba te ki niib baar nan kunkɔnn doo na paak, ki jii nikpiirit tusaa ŋanna, ki saan namm ki be muuk ni yoo nba gar nae." 39 Ki Pɔɔl jiin a, "N tee Juu nirɔe, ki bi marin Tarsus ki li be Silisia yent ni. N tee digbangbeŋŋir ni nirɔe. N barimae, ŋaant ki n pak tur niib na." 40 Ki lanjimanba yudaanɔ na chabɔ mɔb. Ki Pɔɔl ŋmant set lanjimanba diiuk tammɔb taaŋmaata na paak, ŋaan ŋak u nuu ki tur niib na, a bin ŋmin. Baa ŋmin yoo nba, ki u pak namm Juu maan ni, ki yet a:

Toona 22

1 "Chanbaanba nan n naa waas, gbiintir man maan nba ki n yaa n pak turi na." 2 Baa gbat ki u piak bi mɔŋ maan ni na, ki bi ji ŋmin soon nna. Ki u piak ki saa a 3 "N tee Juu nirɔe, ki bi marin Tarsus ki li be Silisia yent ni, ŋaan ki n tan ŋmant nirɔ Jerusalem na. N wanntɔɔ din tee Gamaliele. Ki u din wannin ti yeejamm sennu chib chib. Ki n lek waa Yennu nan ninmɔnn, nan i kur nba waau dinna biaŋinba na. 4 Maa din tuu la niib nba waa Yiisa sɔnu na, n din tuu mukisiribe, ki poŋ kpib gbaa, ki bia so jasiab nan poosiab ki kɔɔntib dansarii. 5 "Li-i tee ki i loon siara li po, Yennu jiantu yudaanɔ nan ti yudamm kur saa fit teen siara linba ki n piak na po nan li set tee barmɔniie; ki dasiar ki n tan saan gaar gbant bi peŋ ki tur Juu teeb nba be Damaskus na, ŋaan saan leŋ maa n soor niib nba waa Yiisa na, ki baamm bant, ki jen namm Jerusalem na, ki bin dat bi tuba. 6 "Tɔn, ki dasiar ki n tan saa ki saa per Damaskus yonsuuk ni, min taantir na ki sɔɔ yentsaakar nyikint sanpaapo, ki sik yent ki lintima. 7 Ki n baa tiŋ ni, ki gbat kunkɔr yin a 'Sɔɔl, Sɔɔl, bee ki a mukisirimi?' 8 Ki n jiin boi maa 'N Yomdaanɔ, fin ŋmee?' Ki u betin a 'Min, Nasaref nirɔ Yiisae, ki a mukis.' 9 Niib nba din chiantin na ŋarin din la yentu nawa, ŋaan ŋamm din ki gbat kunkɔr nba piak nanin na. 10 "Ŋanne ki n boiɔ a, 'N Yomdaanɔ, n saa teen nlee?' Ki u betin a, 'Fiit kii saa Damaskus, ki bi saa wanna linba kur ki Yennu nyinna a fan tun.' 11 Tɔn, n din jɔɔna, kimaan yentu nba yent ki nyɔkit n ninbina ni na paak. Ki n tɔknanleeb na ji soor n nuu ki saan nanin Damaskus. 12 "Jasɔɔ nna mun din be Damaskus, ki u sann tee Ananias, ki u tee yentinnɔ, ki bia dia Moses sennu fanu, ki Juu teeb kura nba be Damaskus na din teenɔ baakir bonchiann. 13 Ki u din baar n boor ki set, ki yetin a 'N naa bik Sɔɔl, nyɔɔntir!' Li taakpaak ni ki n nyɔɔnt ki lau. 14 Ki u betin a 'Yennu nba tee ti yeejamm Yennu na poŋ ganna a fan bann u yanbɔɔtoona, ki bia la popeendaanɔ Masia, ki bia gbat u mɔŋ kunkɔr, 15 kimaan u loon fine n teen u siara daanɔ, kii piak kii teen sɔɔ kur faa la linba ki bia gbat linba. 16 Li paak a ji kar guu bia? Fiit, ki n wura Yennu nyunwuru ki a sii yi Yiisa sann ki Yennu saa nyik chab a toonbiit.' 17 "Tɔn, ki n ji din ŋmat Jerusalem, ki saa kɔɔ Yennu jiantu ŋasaakak na ni, ki mei Yennu, ki tan la yirintu. 18 Ki yirintu maŋ ni, ki n la ti Yomdaanɔ Yiisa, ki u betin a 'Kakitir ki nyi Jerusalem, kimaan li-i tee ki a beer Jerusalem teeb n maan, bi kan gaar maan maŋi.' 19 Ki n jiin a 'N Yomdaanɔ, bi poŋ mi nan mine tuu lin kɔɔ Yennu jiantu diit ni, ki so niib nba waa a sɔnu na, ki boob kɔɔntib dansarii. 20 Ki bia jenna, baa din yaa bin kpi a siara daanɔ Stiifenn na, n mɔŋ din be leŋ, ki sak nan bin kpiu. Mine bia din dia niib nba kpiiu na tiat.' 21 Ki ti Yomdaanɔ betin a 'Finii saawa, mine yaa n tuma niib nba be banfɔka ki ki tee Juu teeb na tinii ni.'" 22 Tɔn, Pɔɔl nba piak nna maŋ, ki niib na lek maak bi mɔŋ ki gbiint waa pak linba maŋ, ŋaan waa tan pak joont ki bi ji ki saki, ki tian sanpaapowa a, "Jɔɔ na ki ŋan nan wuu be tingbouŋ na ni. Yimm kpimɔ man." 23 Ki bi yikin wuyikinii ki tian, ki liatir bi tiat ki pat ŋakin, ki wo tant ki yarin sanpaapo, bi wutoa nba doo na paak. 24 Ŋanne ki Rom lanjimanba yudaanɔ na tur mɔb a bin jii Pɔɔl ki kɔɔ nanɔ bi diiuk na ni, ki bia betib a bin boou, ki ŋɔɔ yudaanɔ c n bann biit nba ki u tun ki Juu teeb tian tintianii maŋ. 25 Ki bi lorɔ, ki ji yaa bin boou. Ŋanne ki u boi lanjimanba saakabik nba see leŋ na a, "Min nba ki Rom teeb chabin yaak, yaa daa ki bu n buut na, sennu chabii a yin boomii?" 26 Lanjimanba saakabik maŋ nba gbat nna yoo nba, ki u saan bi yudaanɔ boor, ki saa yetɔ a, "A kar-e? Rom teebe tur jɔɔ na bi yaak." 27 Ki lanjimanba yudaanɔ na mun fiir, ki baar boi Pɔɔl a, "Betirin, Rom teeb set tura bi yaak na-e?" Ki Pɔɔl jiin a, "Nn." 28 Ki lanjimanba yudaanɔ na yetɔ a, "Min ŋarin din pa likirii saamewa ki bi chabin yaak maŋ." Ki Pɔɔl yetɔ a, "Min ŋarin, bi poŋ marin nan yaak maŋe." 29 Li taakpaak ni ki lanjimanba nba loon bin boo Pɔɔl ki boiɔ buboit na ji furin ki ŋmat potuntuna. Ki jaŋmaanii ji soor lan-jimanba yudaanɔ na, kimaan waa bann nan Rom teebe chab Pɔɔl bi yaak, nan waa bia te ki bi lorɔ na. 30 Ŋanne ki lanjimanba yudaanɔ maŋ lek yiab wun bann maan nba ki Juu teeb paan Pɔɔl na paak chib chib. Ki li ji tan yent sanyiɔk, ki u te ki bi lotɔ, ŋaan bia tur mɔb a Juu teeb jiantu yudamm na nan bi tituk kaanu damm kura n tikir na, ŋaan te ki Pɔɔl baar set bi tɔɔnn po.

Toona 23

1 Ŋanne ki Pɔɔl got tituk kaanu damm maŋ sirrr, ki tan yet a, "Chanbaanba nan n naa waas, maa be ki tan tuu mɔtana, n mi nan li fan nan Yennu." 2 Waa yet nna, ki jiantu yudaanɔ Ananias bet binba see ki kpia Pɔɔl na a bin faa Pɔɔl mɔb paak. 3 Ki Pɔɔl betɔ a, "Yennu saa faa fin kpinkpannii daanɔ na! A kar leŋ ki bu n buut nan ti sennu nba want biaŋinba na, ŋaan yaa bin faan, ki sennu na ki chab nna." 4 Ki binba see ki kpia Pɔɔl na betɔ a, "A tan sukii Yennu jiantu yudaanɔ-ɔ?" 5 Ki u jiin a, "N naa waas, n ki mi nan u tee jiantu yudaanɔe. Yennu gbouŋ poŋ yet a 'Li ki ŋan ki a pak barbiiuk ki jiin a yudaanɔ po.'" 6 Tɔn, Pɔɔl nba ji bann nan tituk kaanu maŋ siab tee Sajusiinbae, ki leeb mun tee Farisiinba na, ki u yet sanpaapowa a, "N naa waas, n tee Farisii nirɔe, Farisii bike teen. Ki n mɔk dindann nan kpeemm tan saa fiira. Li paake te ki bi bu n buut na." 7 Waa pak nna maŋ yoo nba, ki mɔniɔk ji fiir Farisiinba nan Sajusiinba maŋ sinsuuk ni, ki bi bɔkit leeb. 8 (Kimaan Sajusiinba na din yaa kpeemm fiiru kaa, ki malakanba bia kaa, ki sei bia kaa, ŋaan Farisiinba ŋarin teen li kur yadawa.) 9 Ŋanne ki bi tintianii na ŋammit do ki pukii. Ki sennu wannteeb nba tee Farisiinba na fiir pak nan ninmɔnn a, "Ti ki la jɔɔ na biiti. Li pasiar Yennue set tun seek koo malaka, ki u pak turɔ." 10 Ki mɔniɔk na ŋamm fiir bonchiann, ki lanjimanba yudaanɔ na mi a bi tan saa mann dat Pɔɔl ki pat patɔ. Li paak ki u tur mɔb a lanjimanba n saan ki nyinn Pɔɔl tituk kaanu damm maŋ ni, ki saan nanɔ bi ŋaak na ni. 11 Li daar nyiɔk, ki ti Yomdaanɔ Yiisa baar Pɔɔl boor, ki tan betɔ a, "I mɔk parcheenn. A poŋ turin siara Jerusalema, ki li tee talase ki a bia tun nna Rom." 12 Laa din tan yent sanyiɔk, ki Juu tesiab tikir, ki kar lor, ki por, a bi kan di siari koo ki nyu siar, see ki bi tan kpii Pɔɔla. 13 Binba din lor lor maŋ din yab gar niib piinnawa. 14 Ŋanne ki bi fiir saan jiantu yudamm nan saakab boor ki yetib a, "Ti por por nba paare a ti kan di siar koo ki nyu siari, see ki ti tan kpii Pɔɔla. 15 Li paak, yimm nan tituk kaanu teeb na n tun toomii Rom lanjimanba yudaanɔ na peŋ, ki wun nyinn Pɔɔl ki baar nanɔ i boor nna, ki li-i tee nan i loon ki i boiɔ buboite, ki bann u maan maŋ po chib chib na. U tan sii baat yoo nba na, ŋaan sɔɔ ki ti poŋ teen siir a tin kpiuwa." 16 Ŋaan ki Pɔɔl niipoo bija mun gbat bi lora maŋ ki saan lanjimanba diiuk na ni, ki saa bet Pɔɔl li bannu. 17 Pɔɔl nba gbat nna maŋ, ki u yiin lanjimanba saakɔyenɔ, ki tan betɔ a, "Jiin naasimɔ na, ki saan nanɔ a yudaanɔ boor, kimaan u mɔk siare ki yaa wun betɔ." 18 Ki lanjimanba saakɔyenɔ na jiiu ki saan nanɔ bi yudaanɔ na peŋ, ki yetɔ a, "Pɔɔl nba ki ti diau yommik na yet a n baar nan naasimɔ na a boor, a ki u mɔk siare ki loon wun beta." 19 Ki lanjimanba yudaanɔ na soor u nuu soon nna, ki saan nanɔ kpiŋ, ki saa boiɔ a, "A mɔk barlaniie ki loon a betimi?" 20 Ki u yetɔ a, "Juu teeb taan mɔb ki loon bin won boia ki a nyinn Pɔɔl ki sik nanɔ bi tituk ni, ki li-i tee nan bi loon bin boiɔ buboite, ki bann u po chib chib na. 21 Ŋaan a daa fiin bi po, kimaan Juu tesiab yab ki gar jab piinnawa, binba saa bɔr guu a bin kpiu. Bi kura por pore, ki yaa bi kan di jeet koo ki nyu siari, see ki bin tan kpiuwa. Bi kpan teen siirewa ŋaan ji guu a mɔb." 22 Ŋanne ki lanjimanba yudaanɔ na bet naasimɔ na a, "I mi ki a yet sɔɔ nan a kumiin li labaar," ŋaan te ki u ŋmat. 23 Ki lanjimanba yudaanɔ na yiin u saakab na ni banlee ki tan betib a, "Jiin lanjimanba kobiinlee, nan tanjakira piinlore, ki jii kpantɔɔra kobiinlee mun, ki teen siir ki saan Siisarea. Yi nyi gɔtomm yoo nyiɔk na, ki saan, 24 ki jii taamm ki tur Pɔɔl ki wun jak, ki tenn taanlei kii dia, kii saa nanɔ soon nna, ki saa baar yudaanɔ Fiiliks boor ki daa te ki u laat daŋi," 25 ŋaan sɔb gbouŋ ki turib, a bin saa tur yudaanɔ Fiiliks, ki li want a: 26 "Min Klɔdius Lisiase sɔbin gbouŋ na, ki teen Chanbaa, yent yudaanɔ Fiiliks, n foonta. 27 "Juu teebe daan soor jɔɔ na, ki bo saa kpiuwa, ŋaan ki n gbat a Rom teeb turɔ bi yaaka. Li paak ki n jii lanjimanba, ki saan fatɔ, 28 ki loon ki n bann linba paake ki bi paau mapipaat maŋ. Li paak ki n jiiu ki baar nanɔ bi tituk kaanu teeb boor, 29 ki bann nan li tee bi mɔŋ sennu paake ki bi paau maan maŋ. Ŋaan li ki tee bisiat kaa ki li bo jaŋ nan u kuumi, koo dansarkɔɔnu. 30 "Ŋanne ki bi kumiin a Juu teeb lorin a bin kpiu. Li paake ki n yaa lanjimanba n jiiu ki baar a peŋ yian yian, ŋaan ki n bia bet binba paau maan maŋ, a bin baar a boor, ki tan wanna u biit nba tee biaŋinba." 31 Ŋanne ki lanjimanba na jii Pɔɔl nan bi yudaanɔ nba turib mɔb biaŋinba na, ki saa nanɔ, ki saa baar doo nba ki bi yi Antipatris na, nyiɔk maŋ. 32 Ki li yent sanyiɔk, ki lanjimanba nba somm taatiŋ na ji ŋmat kun Jerusalem, lanjimanba ŋaak na ni, ŋaan chab tanjakira na a bin saan nanɔ. 33 Ki bi jiiu ki saan nanɔ Siisarea, ki saa jii gbouŋ na ki tur yudaanɔ Fiiliks ŋaan bia jii Pɔɔl ki kubinɔ. 34 Ki yudaanɔ maŋ gaar gbouŋ na ki karin, ki boi Pɔɔl a, "A nyii tinlaŋe?" Ki u jiinɔ a, "Silisia." Waa bann nna maŋ 35 ki u yetɔ a, "Binba paa-a maan maŋ-i baar yoo nba, n saa bu a buut," ŋaan tur mɔb a guuteeb-ii diau Bat Herod ŋaak ni.

Toona 24

1 Tɔn, daa ŋaŋŋmu daar, ki Yennu jiantu yudaanɔ Ananias, nan saakab, nan lɔya nba ki bi yiu Tetulus na, tan baar Siisarea ki saan yudaanɔ Fiiliks boor, ki bia yaa bin paan Pɔɔl maan. Ki Fiiliks te ki bi yiinɔ. 2 Li yoo na ki Tetulus jak ki paa Pɔɔl maan, ki yeen a, "Chanbaa Fiiliks, a paake ki ti tiŋ na mei, ki a minu paak ki a yiab ki ŋamii ti tiŋ na. 3 Siar kur po ti mɔk parpeenn linba na paak yoo kur, ki ti teena niipoouk bonchiann. 4 "N ki mantik loon ki n biir a yoo, ŋaan n barimae ki a di sukuru ki gbiint ti maan na waan. 5 "Ti la jɔɔ na ki u tee damii nirɔe, ki bia jenna, ki u tuk Juu teeb, tingbouŋ na kur ni. Ŋɔɔe bia tee Nasariinn jiantii yudaanɔ gbaa. 6 U daan loon wun biir Yennu jiantu ŋasaakake. Ŋanne te ki ti soorɔ ki daan bo loon tin bu u buut nan ti sennu nba want biaŋinba na, 7 ŋaan ki lanjimanba yudaanɔ Lisias baar, ki tan kpir ti niib nan paŋ ki fatɔ ti peŋ. 8 Li poorpoe ki Chanbaa Lisias maŋ bia tur mɔb a binba paau maan maŋ n baar a boor na, ki a mɔŋ mun n tan boi ki fiitɔ, ki bann taa paau linba paakie." 9 Ŋanne ki Juu teeb mun bia yaa, "Li kpan set tee mɔniie." 10 Li yoo na ki yudaanɔ na wann Pɔɔl nuu a wun fiir pak. Ki Pɔɔl yet a, "N mi nan faa teen timm Juu teeb barbuurɔ, li dii bina bonchiann. Li paak, li turin parpeenn nan maa yaa n pak n mɔŋ paak a boor na. 11 "Li-i tee ki a loon, a saa boi ki bann nan li ki gar dapiik nan ŋanlee ki n daan doo Jerusalem, maa n saa jiant Yennu. 12 Ki Juu teeb daan ki la ki n nɔi mɔniɔk nan sɔɔ Yennu jiantu ŋasaakak ni, koo ki tikii niib ki fiint bi wutoa Yennu jiantu diit ni, koo doo maŋ ni. 13 Bi bia kan fit wann nan maan nba ki bi paan na tee barmɔnii. 14 "Min beerae nan maa waa sɔnu nba ki Juu teeb yeen a li sɔnu ki ŋan na, ŋaan min lek jiantir ti yeejamm Yennue. Linba sɔb Moses sennu gbant ni nan Yennu sɔkiniinba gbant ni na, n teen li kura yadawa, 15 ki mɔk dindann ki binba paan maan na mɔŋ mun bia mɔk li dindann boorue, nan Yennu tan saa fiin binba tee niŋamm nan binba tee nibiit kur kuun ni. 16 Li paak, n yiab n mɔŋ yoo kur maa n tun linba took, ki n par-ii be fanu Yennu nan nisaarik boor. 17 "Tɔn, maa din nyii Jerusalem, li din yukir bonchiann, ki n ji tan ŋmat leŋ maa n tur n niib nba tee talas damm na likirii, ŋaan bia mann mannu ki tur Yennu. 18 Tɔn, sinsinn, maa daan ŋamm n mɔŋ gbenn na, ki n daa be Yennu jiantu ŋasaakak ni, ki daa mann mannu maŋ, ki bi kɔɔ ki lan leŋ. Li yoo na niib daan ki yab ŋaak maŋ ni, ki fuut mun bia kaa. 19 Ŋaan ki Juu tesiab nba daan nyii Asia tiŋ ni na ŋarin be Yennu jiantu ŋasaakak na ni. Li-i bonni tee bi la n biit, li bo kpaa talas ki bin baar ki pak biirin. 20 Ŋann-i kaa, fan ŋaan ki niib nba be nna n wann biit nba ki bi daan la ki n tun, maa daan see bi tituk kaanu ni yoo nba na. 21 Bi daan ki la n biiti, see bonyennkɔɔ nba ki n daan yet bi sinsuuk ni na a, 'Buut nba ki i bu nanin na tee maa yet a kpeemm fiiru be na paake.'" 22 Fiiliks nba ŋarin mi Yiisa weiu po bonŋann na, ki u nyik maan na, ŋaan yaa, "Lanjimanba yudaanɔ Lisias-i taŋŋi baar yoo nba, n saa bu i maan maŋ," 23 ŋaan bet u lanjimanba saakɔyenɔ a wuu guu Pɔɔl, ki wuu be u yama ni, ŋaan bia chab Pɔɔl yɔɔsinba a bii teenɔ linba ki u loon. 24 Ŋanne ki daa ŋaŋŋa nna gar, ki Fiiliks baar u buut boor nan u ŋaapoo Drusila, wunba din tee Juu nirɔ na, ŋaan te ki bi yiin Pɔɔl ki baar nanɔ, ki Pɔɔl piak biaŋinba ki nirɔ saa teen Yiisa Masia yada. Ki ŋɔɔ Fiiliks gbiin. 25 Tɔn, Pɔɔl nba piak ki want yentinu nan mɔŋdianu nan buut daar baaru po yoo nba, ki jaŋmaanii ji soor Fiiliks, ki u yet a, "Mɔtana, i daa kii saa, ŋaan li-i tee ki n la yaak, n bia saa ŋamm yiina." 26 Ŋaan ki Fiiliks daan a Pɔɔl n turɔ likirii. Li paake te ki u din tuu yɔɔ yi Pɔɔl ki piak nanɔ. 27 Tɔn, bina ŋanlee poorpo ki Posius Festus mun gaar Fiiliks setu ki gaar yudant maŋ. Fiiliks nba din yaa wun nyik toonn na, ki u loon wun penn Juu teeb para, ki ŋaan ki Pɔɔl be dansarik ni.

Toona 25

1 Yudaanɔ Festus nba baar Siisarea, li daa ŋantaa poor poe ki u nyii leŋ ki doo Jerusalem. 2 Leŋe ki Yennu jiantu yudamm nan Juu teeb yudamm baar Festus peŋ ki paan Pɔɔl maan, ŋaan miar Festus 3 a wun te ki bi para-ii mei, ki te Pɔɔl n baar Jerusalem, ŋaan lor lor a bin bɔr laa ki kpi Pɔɔl sɔnu ni. 4 Ki Festus jiin a, "Pɔɔl be dansarik ni Siisarea, ŋaan n mɔŋ saa ŋmat saan leŋ daa ŋanlelee nawa. 5 Li paak, ŋaant man ki i yudamm n wein, ki tin sik Siisarea. Li-i tee ki jɔɔ na tun bon-biirie, bin biirɔ." 6 Festus din dii nan daa ŋanniin koo dapiik na ki be namm, ki tan fit ŋmat Siisarea. Ki li yent sanyiɔk ni, ki u ji kar u buut binbintir paak, ŋaan te ki bi nyinn Pɔɔl ki baar nanɔ. 7 Pɔɔl nba baar yoo nba, ki u ji jak buut bunu. Ki Juu teeb nba nyii Jerusalem na fiir ki lint Pɔɔl, ki pak bonbiir bonchiann ki biirɔ, ŋaan bia lek ki fit wann nan bi maan maŋ tee mɔnii. 8 Ŋanne ki Pɔɔl pak u mɔŋ paak, ki yet a, "N ki tun biir Juu teeb sennu. N bia ki tun biir Yennu jiantu ŋasaakak siari, koo Rom kpanbara yudaanɔ." 9 Ŋaan ki Festus loon wun penn Juu teeb para. Li paak, ki u boi Pɔɔl a, "A loon ki a saan Jerusalem, ki n saa bu a buut leŋii?" 10 Ki Pɔɔl yetɔ a, "N kpan daa see kpanbara yudaanɔ Siisa buut boore na, siaminba ŋan nan ki a bu n buut. N ki tun Juu teeb bisiati, ki a mɔŋ mun bia mi nna. 11 Mi-i bonni tee mɔy‡tdaanɔie, ki tun bonbiir nba jaŋ nan kuun, n kan yet a n nyi kuun ni. Ŋaan li-i tee ki bi paanin maamiie, sɔɔ kan fit jiin ki kubin bi nuu ni. Ŋaan see ki n gaan n maan maŋ ki tur kpanbara yudaanɔ Siisa." 12 Ŋanne ki Festus pak nan u saakab maan maŋ po, ŋaan bet Pɔɔl a, "A gaan a maan maŋ ki tur Siisawa. Li paak, a set saa saana." 13 Daa ŋanlee nna nba gar, ki Bat Agripa nan u ŋaapoo Beniis tan baar Siisarea a bin foont yudaanɔ Festus. 14 Ŋaan bi din teen leŋ daa ŋaŋŋawa, ki Festus tan wann bat na Pɔɔl maan nba tee biaŋinba, ki yet a, "Fiiliks daan yaat, ŋaan nyik sɔɔ dansarik ni, 15 ŋaan maa daan saan Jerusalem yoo nba na, ki Juu teeb saakab nan jiantu yudamm pak biirɔ, ki yaa n bu u maan maŋ ki biirɔ. 16 Ki n mun jiin ki betib a 'Timm Rom teeb yaa boor ŋarin, li ki tee ti kaar kaa ki tin chab nirɔ nba ki bi yaa u tee biirtɔɔ ki bin kpiu, ŋaan ki u biir teeb daa ki baar buut boor, ki ŋɔɔ nan ŋamm daa ki took leeb ki u pak a wun nyinn u mɔŋi.' 17 "Li paak, bi kura nba daan tan baar nna yoo nba, n ki taantiri, ki li yent sanyiɔk ki n kar n buut binbintir paak, ŋaan tur mɔb ki bi kɔɔ nan Pɔɔl. 18 "Ŋanne ki binba biirɔ maŋ fiir set a bin pak ki biirɔ, ŋaan ki fit la u biit nba tee linba nan maa daan bo dukii laa sii bi biaŋinba na, 19 ŋaan bi kpan nɔi mɔniɔk ki jiin bi mɔŋ Yennu jiantu poe, nan jɔɔ nba din kpo, ki u sann tee Yiisa, wunba ki Pɔɔl yeen a u be u manfoor ni na po. 20 "Ki li maan jarin. Li paak ki n bet Pɔɔl a li-i tee ki u loon wun saan Jerusalem ki n saa bu u maan leŋie, wun yetin. 21 Ki u yet a bii diau dansarik ni mɔkmɔk nan yoo nba ki bi tan saa saan nanɔ kpanbara yudaanɔ boor, ki wun saa jiar u maan maŋ. Ŋanne ki n tur mɔb maa bii guu-u, ki n tan te ki bin saan nanɔ kpanbara yudaanɔ maŋ peŋ." 22 Ki Bat Agripa yet Festus a, "N mɔŋ loon ki n gbat nirɔ maŋ mɔb ni." Ki Festus jiinɔ a, "Wonnewa ki a won saa gbat u mɔb ni." 23 Ki li yent sanyiɔk, ki Bat Agripa nan u ŋaapoo Beniis muk mukit, ki lanjimanba yudamm nan doo na yudamm wei bi poor ki baar kɔɔ buut diiuk na ni ki kar. Ki yudaanɔ Festus ji tun toomii a bin jii Pɔɔl ki baar nanɔ. 24 Ŋanne ki Festus yet a, "Bat Agripa nan yimm nba kur be nna na, i la jɔɔ nba na, ŋɔɔe ki Juu teeb nba be nna nan binba kur be Jerusalem baar n boor nan u maan, ki biirɔ, ki yakii nanin, ki yaa li ki ŋan ki wuu be. 25 Ŋaan min ŋarin la ki u ki tun bisiat ki li jaŋ nan kuumi. Ki u mɔŋ bia yaa u loon ki wun gaan u maan maŋ kpanbara yudaanɔ peŋe. "Tɔn, li paak ki n dukin maa n te ki wun saan. 26 Ŋaan n ki mi maa saa sɔb gbouŋ ki tur kpanbara yudaanɔ na ki pakɔ linba ki saan gaan u po. Ŋanne te ki n baar nanɔ i kur numm ni na, ŋaan li mantik kpaa fin Bat Agripae. Ki u buboit fiitu poorpo, n saa la maan nba ki n saa fit sɔb ki tur kpanbara yudaanɔ maŋ, 27 kimaan li kaa paak nan ki n te ki dansarkɔɔrɔ n saan kpan-bara yudaanɔ boor, ŋaan ki n kan fit wann waa biir linba."

Toona 26

1 Li yoo na ki Bat Agripa yet Pɔɔl a, "N chaba mɔb. Pakin nyinn a mɔŋ." Ki Pɔɔl donn u nuu a wun pak ki nyinn u mɔŋ, ki yet a: 2 "Bat Agripa, li maŋin bonchiann nan maa see a tɔɔnn dinna, ki yaa n pak ki nyinn n mɔŋ, ki jiin linba kur ki Juu teeb biirin na po. 3 Ki bia jenna, n mɔk parpeenn bonchiann nan maa see a tɔɔnn na, nan faa tee banntɔɔ, ki mi Juu teeb sennu nan bi mɔniɔk nba tee biaŋinba kur na. Li paak, chanbaa, n barimae, dimin sukuru ki gbiint maa yaa n pak linba na. 4 "Maa fiir n bisin niwa nan mɔtana, Juu teeb kur mi maa din tuu be biaŋinba n tiŋ ni nan Jerusalem. 5 Bi poŋ min ki li fɔk. Li-i tee ki bi loon, bi saa fit wann nan n tuu waa Farisiinba Yennu jiantu sɔnu nba mantik paar nae. 6 Ki mɔtana n ji see ki bi bu n buut, kimaan n mɔk dindann nan mɔsonn nba ki Yennu din senn tur ti yeejamm na. 7 Mɔsonn maŋ paake ki timm Juu teeb booru piik nan munlee tuu mɔk dindann ki dukii nan ti tan saa lar. Li paak ki bi jiantir Yennu nan ninmɔnn yonnu nan nyiɔk. Chanbaa Agripa, dindann maŋ paake ki Juu teeb piak ki biirin na. 8 Bee ki li paar i boor nan ki i teen yada a Yennu fiint kpeemmi? 9 "Sinsinn, n mɔŋ din dukin nan li kpaa talase ki n tun bonsiar kur ki biir Nasaref nirɔ Yiisa sann. 10 Nnae ki n din tuun Jerusalem. Yennu jiantu yudamm din tuu chabin yiikoo ki n so Yennu niib ki kɔɔntib dansarii. Baa din tuu bu bi maan ki tan gbenn ki chab a bin kpib na, n mɔŋ mun tuu pukin binba tuu chab a bin kpib na kann ni. 11 "Yoo kur n din tuu yɔɔ ki mukisiribe Yennu jiantu diit kur ni, ki loon ki bii nɔi a bi ki waa Yiisa. N din mantik donn wutoor bi paak, ki li saa yakira. Li paak, n bia lek din tuu saa doi nba be tinganii ni, ki saa dintib biak. 12 "Li paake ki n yaan tan fiir saa Damaskus, maa n dinn Yiisaweira biak nan Yennu jiantu yudamm nba chabin yiikoo, ki bia turin mɔb a n tun na. 13 "Tɔn, Chanbaa Agripa, li din tee yensuuk nie ki n be sɔnu paak ki saa, ki tan la ki yentu nyii sanpaapo ki yeen gar yonnu, ki yent nyɔkit ki lint min nan n tɔknanleeb na. 14 Ki ti kura baa tiŋ ni. Ki n gbat kunkɔr pak timm Juu teeb maan ni, ki yin a 'Sɔɔl, Sɔɔl, bee ki a mukisimi? Li tee jatiie nan fii kɔn nanin.' 15 "Ki n jiin ki boi a, 'N Yomdaanɔ, fin ŋmee?' Ki ti Yomdaanɔ jiin a 'Min Yiisae ki a mukis maŋ. 16 Ŋaan fiit ki set. N nyinn fine a a teen n toontunnɔ. Linba nae te ki n dɔkit a paak. Teent siara ki wann niib faa lan biaŋinba dinna, nan linba ki n sii fiitir wanta yoo nba waa. 17 Maa tan saa tuma siaminba na, n bia tan saa nyinna daar ni Juu teeb nan nileeb nii ni. 18 Fine tee wunba saa yent bi numm po, ki bin nyi bunbɔnn ni ki kɔɔ yentu ni, ki bia nyinnib Sintaanii nuu ni ki bin kɔɔ Yennu nuu ni, ki wun nyik bi biit ki chabib, ki bin la yiar, binba ki Yennu teemm u niib na sinsuuk ni, kimaan baa teenin yada na paak.' 19 "Li paak, Chanbaa Agripa, n din ki y‡t Yendɔuŋ ni yirintu maŋi. 20 Ŋaan sinsinn n din mɔɔnt Yennu maan ki tur Damaskus teebe, ki pukin Jerusalem nan Judea tiŋ ni doi nba be lokir kur po. Li poorpoewa ki n tan mɔɔnt tur binba ki tee Juu teeb. N wannu nba ki n teen niib na kur tee bin nyik biit tumue kii waa Yennu sɔnu, kii tuun bonŋana, ki lin wann nan bi set nyik bi toonbiit nan mɔnii. 21 "Li din tee linba na paake ki Juu teeb soorin, maa daa be Yennu jiantu ŋasaakak ni na, ki loon bin kpin, 22 ŋaan laa jii ki tan tuu dinna, ki Yennu guun, ki n ji be ki see ki mɔɔntir u maan ki teen tatimm nan paarib kur. Maa piak linba na, ŋann nan Moses nan Yennu sɔkiniinba nba din tuu piak linba kur ki mɔk bɔkitu. Ŋamm din piak linba tan sii tuune, 23 a Yennu Niganntɔɔ Masia tan saa fabir di biak ki kpo, ki ŋɔɔe bia sii tee sinsinn daanɔ nba tan saa fiir kuun ni, li paak ki u bia saa mɔɔnt ki tur Juu teeb nan binba ki tee Juu teeb ki beerib barii nba sii yentir bi numm po." 24 Pɔɔl nba din piak a wun nyinn u mɔŋ na, ŋanne ki Festus tian u paak a, "Pɔɔl, a waata! A bannchiɔŋ na paake te ki a waat." 25 Ki Pɔɔl jiin a, "Chanbaa Festus, n ki waat kaa. Maan nba ki n piak na tee barmɔniie, ki bia mɔk paak. 26 Chanbaa Agripa, n mɔk parcheenn ki saa pak tura, kimaan a mɔŋ mi linba na po, ki n bia teen yada nan barii nba jiin Yiisa po na ki bɔr a boori, kimaan linba din teen maŋ din ki woon kaa. 27 Chanbaa Agripa, a teen Yennu sɔkiniinba maan yadawa-a? Ŋaan n lek mi nan a teen yadawa." 28 Ki Bat Agripa jiin Pɔɔl a, "Fin mi a a pinpauk mintik na saa fit dakin ki n teen Yiisaweirɔwa." 29 Ki Pɔɔl jiin a, "N pinpauku fɔk koo laa ki fɔki, min yaa Yenmiaru tee ki fin nan niib na kura nba gbiint n maan na dinna na n teen Yiisaweira nan maa tee biaŋinba nae, ŋaan jarit nba na kuukɔɔe ki i kii mɔki." 30 Ŋanne ki Bat na nan yudaanɔ na nan Beniis, nan binba kur kar leŋ na fiir ki nyii. 31 Baa yaa bin yat yoo nba, ki bi ji beer bi leeb a, "Jɔɔ na taan ki tun biit ki li jaŋ nan bin kpiu, koo ki kɔɔnɔ dansariki." 32 Ki Bat Agripa yet Festus a, "Nirɔ na-i daan bonni kii miar a wun gaan u maan na ki tur kpanbara yudaanɔ Siisa, ti bo saa fit ŋaauwa."

Toona 27

1 Baa ji din tan lor a bin jii Pɔɔl ki saan nanɔ Rom, Itali tiŋ ni na, ki bi jii ŋɔɔ nan dansarkɔɔleeb, ki tur Rom lan-jimanba saakɔɔ nna, ki u sann tee Julius, ki u be lanjimanba paabu nba ki bi yi Kpanbara Yudaanɔ Paabu na, ki u jii lanjimanba na, 2 ki ti kur kɔɔ ŋaruŋ nba nyii Adramitium, kimaan ŋaruŋ maŋ poŋ teen siir nan wun nyi Siisarea ki saan Asia tiŋ ni doi nba kpia mɔkgbeŋŋir na; ki Masedonia nirɔ Aristakus, wunba nyii Tesalonika, nan min Luk mun bia chian Pɔɔl. 3 Ki li tan yent sanyiɔk ni, ki ti baar Saidonn. Ki lanjimanba saakɔɔ Julius dia Pɔɔl fanu, ki chabɔ a wun saan Yiisaweira nba be leŋ na peŋ, ki bii teenɔ u bonloŋŋa. 4 Ki ti tan nyii leŋ ki yaat saa, ki wouŋ fukit ki da tookit, ki ti pek kpian Saiprus tiŋ ki saa, ki tiŋ maŋ tia wouŋ na ki turit. 5 Taa puur mɔkgbeŋŋir na paak yoo nba ki ti per Silisia nan Pamfilia tinii ki ji baar Maira doo, Lisia tiŋ ni. 6 Leŋe ki lanjimanba saakɔɔ na la ŋaruŋ nba nyii Aleksandria ki saa Itali tiŋ ni. Ki u te ki ti lɔɔr ŋaruŋ maŋ; 7 ki saa waan waaminna, ki li tan gbatit. Ti din jii daa saamewa, ki tan baar Kinidus doo boor, Kreet tiŋ ni. Ki wouŋ na bia lek ki nyik tin saan taa saa siaminba po na. Li paak, ti din bɔkin ki gaar Kreet tiŋ maŋ poe. Li poe ki wouŋ din ki paari, ki ti tan kpian Salmone, Kreet tiŋ ni, ki gar. 8 Taa din saa na, li din paar bonchiann nan taa tan baar Kreet doo nba yi Setŋanu na. Leŋ ki fɔk nan Lasea doo, Kreet tiŋ ni. 9 Taa yukir bonchiann na, Juu teeb mɔloru dagbeŋŋir ji din gara, ki yoo nba ki ninbɔŋ tuu baar mɔkgbeŋŋir paak na tan baar; li paak ki Pɔɔl kpaanib a, 10 "N yɔɔsinba, n mi nan ti sɔnu na ni, ninbɔŋ saa baarit bonchiann, li ki tee tiat nba be ŋaruŋ na ni, koo ŋaruŋ na kuukɔɔ paak kaa, ŋaan ti mɔŋ manfoa gbaa sii be daŋ ni." 11 Ŋaan lanjimanba saakɔɔ na baka din taan kaa linba ki Pɔɔl pak na po, u din fiin ŋaruŋ na saakɔɔ nan li daanɔ na poe. 12 Ŋaan ŋaruŋ maŋ nba din see siaminba na din ki fan nan tin set leŋ sakoouko, li paak, bi bonchiann ji din yaa bin ŋaan ki bin fiir leŋ ki saan, a li pasiar bi saa baar Fiiniksa. Leŋ din tee Kreet tiŋ dooe, ki ŋaruŋ sinset boor be ki took yonbaa po, ki bi loon bii be leŋ sakoouk. 13 Li yoo na ki bi la wouŋ da niigaŋ po waan waaminna, ki bi ji dukin a li tee wounŋauŋ nba saa te ki bin fit nyann baa dukii biaŋinbae, li yoo na, ki bi ji fiir ki dat kutkpiatir nba so ŋaruŋ ki sent na, ki kɔɔn ŋaruŋ maŋ ni, ki yaan jak bi sɔnu ki saa, ki bɔɔk Kreet mɔk-kpiŋ. 14 Li ki yukiri ki wonpaaruk nba nyi yonput po na fikit tiŋ na ni, ki da siik mɔkgbeŋŋir na ni, 15 ki tan baar wurrr ŋaruŋ na paak ki tutir, ki li ji paar bonchiann nan nirɔ n fit kan ŋaruŋ maŋ ki took wouŋ na; ki ti tat nyik wouŋ na tooku, ki wouŋ na ji tut ŋaruŋ maŋ ki saa nann, 16 ki li jiit, ki ti saa baar ki gar tinbik nba ki bi yi Kɔda na boor. Taa gaar yoo nba ki tinbik maŋ gɔɔr wouŋ na ki u barik, ki ti gbaa gɔɔr burgbetir nba tuuk ŋaruŋ paak na, 17 ki bi ji dat burgbetir na ki kɔɔn ŋaruŋ na ni, ki bia lor ŋaruŋ na ŋmiit kenkema ki lint. Bi din tiin jaŋmaanii, ki mi a bi tan saa kpet kpian Libia tiŋ, siaminba ki nyun ki sumii, ki li tee ninbɔŋ boor na. Ŋanne ki bi sikin ŋaruŋ chinchenn na ki ji nyik ki wouŋ na yaan jiib ki saa. 18 Wonpaaruk nba din mantik da na, ki li yent sanyiɔk ni, ki bi piin ki nyint jikaa ŋaruŋ maŋ ni, 19 ki li sanyafannuk, ki bi jii bi mɔŋ nii ki nyinn ŋaruŋ maŋ bona, ki lu mɔkgbeŋŋir na ni. 20 Li din jii daa bonchiann ki sanpagbant dɔkin sanpaapo, ki ti ki fit la yonnu koo ŋmaabira, ki wouŋ na lek bia da nan paŋ. Ki ti ji ki mɔk dindann nan ti saa tinnii. 21 Li din yukir bonchiann ki bi ki dii, ki Pɔɔl tan fiir set ki yet a, "N yɔɔsinba, i daaŋŋi bonni sak n mɔb, li daan bo sii ŋan. I bo tan kii laat ninbɔŋ ki di fara na booru. 22 Ŋaan mɔtana, yi sak n mɔb kii mɔk parcheenn man. I sɔɔ nan yenɔ kɔɔwa kan kpo, ŋaruŋ na kɔɔe saa biir. 23 Kimaan Yennu nba ki n tee u yɔɔ ki jiantirɔ na, u malaka won baar n boor nyiɔk, 24 ki tan betin a 'Pɔɔl, daa tiin jaŋmaanii. See ki bi tan jiia ki saan nana kpanbara yudaanɔ Siisa boor. A paake ki Yennu yaa wun tinn niib kur nba be nana ŋaruŋ na ni.' 25 "Li paak, n yɔɔsinba, i mɔk parcheenn man, kimaan n teen Yennu yada nan li kpan sii tee nan waa betin nae. 26 Wouŋ na lek saa tutit nan paŋ, ki daamiit, ki te ki tin baar tinsiak nba ki nyun lintira." 27 Laa din tan teen nyatummuna piik nan ŋanna ki wouŋ na lek da ki saa nant mɔkgbeŋŋir nba ki bi yir Adria na paak, ki tansuunii ki ŋaruŋ kanna na ji mi a ti per tiŋe. 28 Ŋanne ki bi jii bonbikinkar, a bin bikin ki laan li sumii amii li ki sumii, ki bikin ki sɔɔ li sumii baar taapauŋ kobik nan piinleewa. Ki li yann waaminna, ki bi yaan bikin, ki sɔɔ li sumiiu ji tee taapauŋ piinyiae. 29 Ki jaŋmaanii kɔɔb, kimaan bi dukii a bi ŋaruŋ na tan saa kpet do tana paak. Li paak ki bi ji jii kutkpiata ŋanna nba so ŋaruŋ ki sent na, ki lu nyun ni, ki gaan ŋaruŋ maŋ poorpo, ŋaan lek ji mei Yennu a lin yent sanyiɔk. 30 Ŋanne ki ŋaruŋ kanna na ji loon bin bot ŋaan nyik ŋaruŋ na, ki sikint burgbetir na nyun paak, ŋaan ji tee ser ki li tee nan bi yaa bin sikin kutkpiata ŋaruŋ maŋ tɔɔnn poe na. 31 Ŋaan ki Pɔɔl yet lanjimanba nan bi saakɔɔ na a, "Ŋaruŋ kanna na-i kaa ŋaruŋ na ni, i sɔɔ kan tinni." 32 Ŋanne ki lanjimanba na pot pot ŋmiit nba ki bi lor burgbetir maŋ, ki te ki li baa nyun ni. 33 Tɔn, ki li yaan tan per yentu, ki Pɔɔl bet bi kura a bin di jeet, ki yet a, "Dinna li pukii daa piik nan ŋannae na ki i mɔk jaŋmaanii ki ki dii siari. 34 Li paak, n barimiie ki i lek di jeet, kimaan li tee linba saa te ki i ŋamm la paŋe. I sɔɔ kan la daŋi." 35 Pɔɔl nba pak nna, ki u jii boroboro, ki tur Yennu niipoouk bi numm ni, ki ji ŋmit dii. 36 Ŋanne ki bi para ji chee, ki bi kura jak jeet na ki di. 37 Ti kur kann din tee kobiinlee nan piinlore nan banloobo. 38 Sɔɔ kur nba dii jeet na ki jaŋ yoo nba, ki bi jii boroboro dii nba tenn ŋaruŋ maŋ ni na ki lu mɔkgbeŋŋir na ni. 39 Laa tan yent sanyiɔk, ki ŋaruŋ kanna na la tiŋ na ki ki banni, ŋaan la lɔtuk nna mɔkgbeŋŋir na kpiŋ, ki li mɔk gbin-gbanŋann, ki bi bikin a li-i saa fit, bin te ki ŋaruŋ na n saan kɔɔ leŋ ki fer tant ni. 40 Ŋanne ki bi ji pot ŋmiit na, ki kutkpiata maŋ baa nyun ni, ŋaan bia lot ŋmiit nba lor daat nba ki bi dia kan ŋaruŋ na, ki ji fit donn chinchenn ŋaruŋ na numm po, a wouŋ-ii da kii saa namm. Ŋanne ki bi tan per gbingbann, 41 ki ŋaruŋ na tɔɔnn po fer tiŋ ni. Li tɔɔnn po nba fer tiŋ ni biaŋinba na, ki ŋaruŋ na gbar saanu, ki nyunpana ji lia li poorpo nan paŋ ki yakit yakitir. 42 Tɔn, ki lanjimanba na ji loon bin kpi dansarkɔɔra na kur, a nnae kaa, li pasiar bin duk poot ki chiar bot. 43 Ŋaan ki lanjimanba maŋ saakɔɔ na ŋarin loon ki wun tinn Pɔɔl. Li paak, ki u tiab a bi daa kpibi, ŋaan tur mɔb a binba kur mi nyunduku, bin yukir baa nyun na ni sinsinn ki duk poot. 44 Ŋaan binba biar ki ki mi duku na n mun soor daat koo ŋarunyaka ki wɔb ki duk poot. Ti kura ji din teen nnae ki tinn.

Toona 28

1 Taa din tinn na poorpoe ki ti bann nan tiŋ maŋ sann tee Malta. 2 Leŋ niib din diat bonŋann, kimaan saak din baa, ki waat be bonchiann, ki bi joo mugann ki turit a ti nanii, ŋaan teen ti kur sommir sommir. 3 Ki Pɔɔl tan tikir daginganii bonchiann ki kpab nan waauk, ki teen muu na ni, ki muu na tonu gbat waauk na, ki u nyii, ki jun Pɔɔl nuu. 4 Ki leŋ niib nba la ki waauk na jɔɔn Pɔɔl nuu paak na, ki bi ji beer leeb a, "Jɔɔ na kpan tee nikpiiruko. Waa lek tinn u mɔŋ mɔkgbeŋŋir ni na, ŋaan kpeemm ŋarin kan nyikɔ ki wuu be u manfoor ni." 5 Ki Pɔɔl ŋak u nuu, ki waauk na baa muu na ni, ŋaan ki li ki teen Pɔɔl siar nan waama. 6 Ki bi ji daan a bin laan u siar po saa mɔr, koo u tan saa baa ki kpo. Baa ji daan daan ki tan bak ki ki la siar teenɔ na, ki bi lebit bi dudukit ki yaa u tee yensɔɔe. 7 Leŋ bia din ki fɔk nan bat Publius kpaanti. Ŋɔɔe din tee tiŋ maŋ ni bat. Ki u din gaarit saauŋ ki saa jaŋ damunjaa ŋantaa. 8 Ki Publius maŋ baa mun dɔɔ yiar gbanantouŋ nan nɔniikak ni. Ki Pɔɔl tan kɔɔ u diiuk ni, ki yii nii u paak, ki miar Yennu ki u la laafia. 9 Li paak ki baatleeb nba be leŋ na kur baar, ki u te ki bi la laafia. 10 Ki bi pit piinii bonchiann. Taa bia din tan fi a tin kɔɔ ŋaruŋ yoo nba, ki bi baar nan linba ki ti tan sii loon sɔnu ni, ki kɔɔn ŋaruŋ ni ki turit. 11 Ti benu leŋ ŋmaarii ŋantaa poorpoewa ki ti kɔɔ ŋaruŋ nba nyii Aleksandria ki be Malta sakoouk na, ki bi yi ŋaruŋ maŋ Yenjaasinba. Ki li fiir saa, 12 ki yaan tan baar doo nba ki bi yi Sairakus na, ki biar leŋ daa ŋantaa, 13 ki tan tɔɔt baar Regium doo. Ki li tan yent ki wouŋ yaan jak danu, ki nyii niigaŋ po ki tutit. Ki ti jii daa ŋanlee ki yaan baar Puteoli doo. 14 Leŋe ki ti la Yiisaweisiab. Ki bi gɔɔrit a tii be namm ki jaŋ daa ŋanlore. Ki ti be namm, ki tan nyii leŋ ki saa Rom doo ni. 15 Yiisaweira nba be Rom doo ni na nba gbat ti po, ki bi fiir chetit Apius daak na ni, ki siab mun chetit Saamŋei Ŋantaa nba kpia Rom na. Pɔɔl nba lab yoo nba, ki li turɔ parcheenn, ki u tur Yennu niipoouk. 16 Taa baar Rom yoo nba, ki bi chab Pɔɔl ki u be u kɔɔ, ki bi te ki lanjima guu-u. 17 Tɔn, li daa ŋantaa poor poe ki Pɔɔl yiin Juu teeb yudamm ki lakimm, ki yetib a, "N naa waas, n lek ki tun bonbisiar ki biir ti niib koo ti yeejamm sennu, ŋaan bi din soorin ki kɔɔnin dansarik Jerusaleme, ki jii kubinin Rom teeb. 18 Ki bi boin buboit, ki tan loon bin nyikin, kimaan bi ki la maa tun bonbisiar nba jaŋ nan bin kpimi. 19 Ŋaan Juu teeb nba din ki sak bin nyikin na, li paak ji din te ki n yaa n saa gaan n maan ki tur kpanbara yudaanɔ Siisae, ŋaan li din ki tee n loon ki n pak biir ti niib kaa. 20 "Li paake ki n yiini maa n tan lai ki beti labaar na. Maa mɔɔntir Yennu Niganntɔɔ, wunba ki Juu teeb mɔk dindann u po na, ŋanne te ki bi baanin jarit na." 21 Ki bi betɔ a, "Ti ki la gbant nyii Judea ki baar ki want a po, koo ti sɔɔ bia ki nyii leŋ ki baar nan labasiari, ki sɔɔ mun bia ki pak bonbisiar ki gaan a po. 22 Ŋaan ti loon ki tin bann a dudukit. Ti poŋ mi nan siar kur po, niib bonchiann piak ki biir jiantu nba ki a waa na." 23 Li paak ki bi senn daar. Ki niib bonchiann tan baar Pɔɔl peŋ daar maŋ ni. Ki u kat wannib nan ninmɔnn Yennu naan na po, sanyiɔk ni mɔkmɔk nan daajoouk, ki wantib Yiisa barii nba be Moses sennu ni nan Yennu sɔkiniinba sɔbu ni biaŋinba, ki yiab a wun tunn niib na yan ki jiin Yiisa po. 24 Ki bi siab yan din tunn ki kɔɔ Yiisa ni, u maan maŋ paak, ki siab mun ki teen yada. Ki bi jak leeb nan mɔniɔk, ki yaa bin yat. 25 Ŋanne ki Pɔɔl pak bonyennkɔɔ a, "Yoo nba ki Yennu Seyeeŋ din te ki u sɔkinii Aisaya pak tur ti yeejamm na, u din pak mɔniie, 26 ki yet a: 'I saa ki saa bet niib na a: I tan saa gbiint ki gbiint, ŋaan lek kan bann li paaki, ki bia tan saa got ki got, ŋaan lek kan la, 27 kimaan niib na tee yankpeena damme, ki bi bia kpaa bi tuba a bi daa gbia, ki bia mun bi nunii a bi daa laat. Bi-i bonni kii mun bi nunii, bi bo saa lawa, bii biakii bonni kii kpaa bi tuba, bi bo saa gbata, ki bi-i biakii bonni kii tee yankpeena, bi bo saa bann li paaka. Li-i kii teen nna bonni, bi bo saa nyik bi toonbiite, ki n te ki bin la laafia.'" 28 Ki Pɔɔl ŋamm yet a, "Li ŋan ki yin bann nan Yennu tinnu maan baar niib nba ki tee Juu teeb paaka, ki bi saa gbat." 29 Pɔɔl nba din pak nna yoo nba, ki Juu teeb na ji yat saa, ki jak leeb nan mɔniɔk bonchiann. 30 Pɔɔl nba din be siaminba na, u din pa likiriie, ki be leŋ bina ŋanlee. Nirɔ nba kur tan baar u boor, wun gaarɔ bonŋann. 31 Ki u din tuu mɔɔntir Yennu naan na po, ki want niib ti Yomdaanɔ Yiisa Masia po, ki piak u yama ni nan parcheenn.

Rom 1

1 Min Pɔɔl nba tee Yiisa Masia toontunnɔ, ki u yiinin a n teen u toomii, ki Yennu gannin a n mɔɔnt u barŋanii. 2 Yennu din dɔŋ senn u mɔsonn barŋanii maŋ poewa, ki u sɔkiniinba din mɔɔntir u mɔsonn maŋ, nan laa sɔb u kasii gbouŋ ni na. 3 Barŋanii maŋ want u Bija poe; ŋɔɔe tee ti Yomdaanɔ Yiisa Masia; waa teen nisaarik yoo nba, ki bi marɔ ki u tee Defid yaaboonn, 4 ki Yennu Seyeeŋ wann nan paŋ nan u set tee Yennu Bija u kuunfiiru paake. 5 U paake ki Yennu ninbatinu be n paak ki te ki n tee u toomii, ki n jii u sann ki saan nibooru kur boor, ki te ki bi teeu yada ki saak u mɔb; 6 ki i mun be daansiab nba ki Yiisa Masia gannib na kann ni. 7 Li paak ki n sɔbin gbouŋ na ki teen yimm nba be Rom doo ni, ki Yennu looni ki ganni a i teen u mɔŋ niib na. Ti Baa Yennu nan ti Yomdaanɔ Yiisa Masia n sommi, ki bia turi parmaasir. 8 Sinsinn, n teen Yennu niipoouk Yiisa Masia sann ni, i kura paak, kimaan tingbouŋ na teeb kur gbia i yada po. 9 Yennu tee n siara daanɔ nan n ki mi nyik Yenmiaru i kura paaki. Ŋɔɔe ki n waau nan n par kura ki mɔɔntir barŋanii nba jiin u Bija po na. 10 N meiɔ a li-i tee u loommie li kan yukir ki n saa baar i boor ki gɔni, 11 kimaan n mantik loon ki n sommi ki yin gaar Yennu Seyeeŋ piinsiar, ŋanne saa te ki yin set fanu kii mɔk paŋ u weiu ni. 12 Maa want linba tee a min nan yimm nba teen yada biaŋinba na, ti sii kɔɔnt leeb para, ti yada teenu na paake. 13 N naa waas, n loon yin bann nan n yabir nan taar muŋŋa nawa a n baar gɔni, ŋaan ki siar gɔin mɔkmɔk nan mɔtana ki n ki fit gɔniini. N loon ki n te ki niib nba be i boor na n wei ti Yomdaanɔ nan maa daan teen biaŋinba nileeb sinsuuk ni na. 14 Li kpaa talas ki n bet niib kura barŋanii na po, binba mɔk yan, nan binba ki mɔk yan, nan binba mɔk ninyentir nan binba ki mɔk ninyentir. 15 Li paak ki n ninbinn mɔn bonchiann a n mɔɔnt barŋanii maŋ ki tur yimm nba be Rom doo ni na. 16 Fei ki mɔkin nan ki n mɔɔnt barŋanii maŋ, kimaan li tee Yennu paŋ nba tint wunba kur teen Yiisa yadae; sinsinn li tee Juu teeb yare, ki bia tee booru kur yar. 17 Barŋanii maŋ want nan Yennu yeen a nirɔ tee niŋanɔ u tɔɔnn, yada teenu paake; nae nyii paanu ki tur binba teen Yiisa yada, nan laa sɔb Yennu gbouŋ ni biaŋinba na a, "Wunba teen niŋanɔ Yennu boor, u yada paak, li daanɔe mɔk manfoor nba kaa gbennu." 18 Yennu wann nisaarii a u donn wutoor bi paak, kimaan bi tuun toonbiit ki ki waa u sɔnu, ki bi biit sɔnii maŋ te ki niib ki bant u barmɔnii. 19 Yennu donn wutoor, kimaan nisaarik nba sii fit mi u po biaŋinba, ŋanne fiit ki be paanu ni, kimaan ŋɔɔ Yennu mɔŋ mɔŋe fiitir ki wannib. 20 Yoo nba ki Yennu din nan durinya na mɔkmɔk nan mɔtana, u naamii maŋ nie ki bi bann u benu nba ki nisaarik ninbinn ki fit laat na, ki bia mi nan u mɔk paŋ nba kaa gbennu, ki set tee Yennu. Li paak, bi ji ki mɔk yaak Yennu tɔɔnn ki saa yet a bi ki mi bi biiti. 21 Bi mi Yennu, ŋaan bi ki teenɔ baakir nba ki u yen na, bi bia ki teenɔ niipoouku. Bi mɔk jatdudukit, bi yan ki yenti, ki bia ki mɔk nyɔɔti. 22 Bi yaa bi mɔk yame, ŋaan tee jatit; 23 baa bo sii jiantir Yennu nba tun be na, bi ki saki, ŋaan jiantir yennii nba ki niib namir ki li naan nisaarii, koo nɔɔnii, koo bonkobit, koo bonfurinkaa na. 24 Li paak ki Yennu nyikib, ki bi tuun toonbiit nba ki bi para loon, ki dint bi mɔŋ fei, ŋamm nan bi leeb gbanant toona ni. 25 Bi jii linba tee Yennu barmɔniie ki lu, ŋaan sak faak, ki lebit ki jiantir linba tee Yennu naamii, ŋaan nyik Yennu mɔŋ mɔŋ, wunba yen baakir kur mɔkmɔk nan yoo nba kaa gbennu na. Mamɔmm. 26 Li paak ki Yennu nyikib, ki bi tuun bi mɔŋ loomm nba mɔk fei, ki bi poob nyik bii dɔɔ nan jab ŋaan ŋmat ki dɔɔ nan bi leeb; 27 ki jab mun nyik bii dɔɔ nan poob ŋaan ŋmat ki dɔɔ nan bi leeb, ki bi niɔŋ be bi leeb ni bonchiann, ki jab tee bonsia nba mɔk fei nan bi leeb, li paak ki bi laat tubdatu nba jaŋ nan bin gaar bi gbanant ni, bi biit maŋ paak. 28 Nisaarii nba din ki loon bin bann Yennu na, li paake ki Yennu nyikib nan bi dudukbiit, ki bi tuun toona nba bi bonchiann. 29 Ki biit kur be bi ni, ki bi gbee nan biit nan nianchiɔŋ nan yanbɔmm nan funfunbiit nan nikpinu nan kunkɔna nan fai nan dudukbiit, ki bia tee sanjaanjanna; 30 ki piak biir bi leeb, ki ki loon Yennu, ki sukii bi leeb, ki mɔk garuk ki dont bi mɔŋ, ki bia ŋamii dukii biit sɔnii, ki ki teen bi naanba nan bi baanba baakir. 31 Bi bia ki mɔk yansian bi ni; bi ki waa bi mɔsona biaki; bi ki mɔk lomm nan ninbatinu nan bi leebi. 32 Bi mi nan Yennu sennu wann nan binba tuun linba na booru, bi nyɔɔt tee kuume, ŋaan bi lek kpan tuun ŋanne, ki bia mɔk parpeenn nan binba tuun li toonbooru mun.

Rom 2

1 Li paak, nisaarik nba want u lɔɔ biit, u ki mɔk sɔnu, kimaan faa want a lɔɔ biit na, li want nan a mɔŋ mɔŋ mɔk biit, kimaan faa want a lɔɔ biit na, a mɔŋ mun tuun nnae. 2 Ti mi nan Yennu tan saa bu binba tuun nna na buuta; ki u buut maŋ tee barmɔniie. 3 Faa want leeb nba tuun biit biaŋinba, ŋaan mun tuun nna na, a dukii Yennu kan dat a tubirii? 4 Koo a yisin loonchiɔŋ nan sukuru bonchiann nba ki Yennu mɔk nant nae-e? A ki mi nan Yennu mɔk burchint nana a wun te ki a nyik a biit na ŋaan kii be fanue-e? 5 Ŋaan a par wakii ki a lek ki sak nan fan nyik toonbiit tumu, li paak, a pukii a mɔŋ tubdatu nba ki a tan saa la daar nba ki Yennu wutoor saa nyi paanu ki u saa bu niib buut nan barmɔnii nae; 6 kimaan sɔɔ kur saa la nyɔɔt u toona nba tee biaŋinbae. 7 Nisiab mɔk mintir ki tuun toonŋana ki loon Yennu n pakib ki turib nyɔɔt nan manfoor, ŋamme set saa la manfoor nba ki mɔk gbennu. 8 Ŋaan binba mɔk kunkɔna, ki ki sak barmɔnii na, ŋaan tuun toonbiit, Yennu wutoor saa do bi paaka. 9 U saa jii biak nan mukisuk ki tur nisaarii nba kur tuun toonbiit na; Juu teeb nae saa la tubdatu, ki binba ki tee Juu teeb na n mun bia la; 10 ŋaan Yennu saa jii paku nan baakir nan parmaasir ki tur binba kur tuun toonŋana na; Juu teebe saa gaar, ki binba ki tee Juu teeb na n mun bia gaar; 11 kimaan Yennu ki mɔk ningannii. 12 Binba kur ki mi Yennu sennu, ki tuun toonbiit na, bi saa kpo bi toonbiit tumu na paake, li ki tee baa ki dia sennu maŋ na kaa. Binba kur mi Yennu sennu, ŋaan tuun toonbiit na, Yennu saa jii sennu maŋe ki bu namm. 13 Binba gbia sennu na, ŋamm kaa tee niŋamm Yennu boori, ŋaan binba tuun biaŋinba ki sennu na wann na, ŋamme tee niŋamm u boor. 14 Binba ki tee Juu teeb na, bi ki mɔk sennu na, ŋaan bi-i tuun sennu na nba wann biaŋinba nan bi tiɔŋ yamie, bi mɔk bi tiɔŋ sennu bi para ni, nan baa lek ki mɔk sennu maŋ nawa. 15 Baa tuun biaŋinba na want nan sennu na nba yaa biaŋinba na be bi para ni, ki bi yanganin mun wantib linba ŋan nan linba ki ŋan, kimaan sianyoo bi dudukit tuu tan sak bi toon-yena nan li ŋan, ŋaan yosau bi dudukit n bia y‡t bi toonlia paak nan li ki ŋani. 16 Tɔn, li tan sii tee nnae daar nba ki Yennu saa bu niib kur para ni buut Yiisa Masia paak, nan maa mɔɔntir barŋanii maŋ biaŋinba na. 17 Gotir, a yi a mɔŋ Juu nirɔe, ki mɔk parbifaant nan sennu na tee a yare, a li paak a tee Yennu yɔɔe, 18 ki mi linba ki Yennu loon fii tuun, ki a bia tumii sennu na ki mi linba ŋan nan tumu, 19 ki teen yada nan a fit want jɔɔnii sɔnu, ki bia tee yentu ki tur binba be bunbɔnn ni na; 20 ki fit kpaan jatit, ki bia want binba ki mi, kimaan a mi barmɔnii na nba sɔb biaŋinba sennu gbouŋ na ni. 21 A want leeb barmɔnii na, ŋaan bee ki a ki want a mɔŋi? A want leeb a bi daa jaami, ŋaan fin ki jaamii? 22 Fine want niib a bi daa tuun bonchonchonn toona, ŋaan fin ki chommii? Fin nba ki loon pata maan na, ŋaan a ki jaan pat jiantu diit ni bona-a? 23 Fin nba nyu bara sennu maŋ paak na, a y‡en sennu maŋ ki dint Yennu fei, 24 nan laa sɔb Yennu gbouŋ ni a, "Yimm Juu teeb paake ki binba ki tee Juu teeb na piak bonbiir ki jiin Yennu po." 25 Fi-i sak Yennu sennu, a punpotu mɔk nyɔɔt, ŋaan fi-i kii sak sennu na, li ŋman a ki poti. 26 Binba ki tee Juu teeb ki ki pot, ŋaan sak sennu maŋ mɔbona ki waar, Yennu saa gaarib nan wunba pot nae. 27 Yimm Juu teeb mɔk sennu maŋ ki li sɔb gbouŋ ni; ki i bia porii puna, ŋaan yimme bia biir sennu na; ki binba ki pot bi puna ŋaan waa sennu na, ŋamme saa bu i buut ki biiri. 28 Nirɔ nba tee Juu nirɔ paanu ni kuukɔɔ, u ki tee Juu nirɔ nan mɔnii. Potu nan mɔnii mun ki tee gbanant potu nba be paanu ni kaa. 29 Juu nirɔ nan barmɔnii tee wunba tee Juu nirɔ par nie. Potu nan mɔnii mun tee par nie, ki li potu tee Yennu Seyeeŋ toonne; li ki tee gbanant paak kaa. Li daanɔ laat paku Yennu boore, li ki tee nisaarik boor kaa.

Rom 3

1 Tɔn, nyɔlante ki Juu teeb la ki gar binba ki tee Juu teebi? Bi punpotu mɔk nyɔɔtii? 2 Li mɔk nyɔɔt bonchiann. Sinsinn tee Yennu din jii u sennu mɔbona na ki guun Juu teebe; 3 ki bi siab-i diŋŋi kii tee yadateenteeb, li want nan Yennu ki tee barmɔnii daanɔ amii? 4 Aaii, li ki want nna kaa. Niib kur-i bonni tee fai damm, ŋaan Yennu ŋarin tee barmɔnpakirɔɔe. Li waa nan laa sɔb Yennu gbouŋ ni biaŋinba nae a: "Fin Yennu-i pak, bi saa la nan a mɔk mɔnii, ki bii bu a buut, a bia saa di mɔniie." 5 Ŋaan ti toonbiit-i fiit wann nan Yennu mɔk mɔnii, ki ti saa yet a bee? Waa daar ti tuba na paake ki ti ji saa yet a u mɔk biiti? (Nisaarik dudukite ki n yet nna.) Aaii, n kan yet nna kaa. 6 Yennu-i kii be fanu, u kan fit bu tingbouŋ na niib buuti. 7 Tɔn, sɔɔ-i boi a, "N faak na-i want nan Yennu set tee barmɔnii daanɔ, ki te ki niib teenɔ baakir, bee teen ki u saa dat n tubir a n tee biitdaanɔ?" 8 Siab bia yeen a, "Ŋaant ti tun toonbiit ki bonŋann n baar." Nisiab sukiin ki yeen a mine yet nna. Yennu saa dat bi tuba nan laa jaŋib biaŋinba. 9 Ki li tee nlee? Timm nba tee Juu teeb na binbeŋ chee binba ki tee Juu teeb na binbeŋ amii? Aaii, ti binbeŋ ki chee bi yari. N poŋ dɔŋ yet a Juu teeb nan binba ki tee Juu teeb be biit yiikoo nie 10 nan laa sɔb Yennu gbouŋ ni a: "Sɔɔ kaa ki tee niŋanɔ, aaii, nan yenɔkɔɔwa gbaa. 11 Sɔɔ kaa ki mɔk minu, sɔɔ kaa ki loon Yennu. 12 Sɔɔ kur kpet sɔnuwa, sɔɔ kur tuun biite; sɔɔ kaa ki tuun toonŋana, sɔɔ kaa, nan yenɔkɔɔwa gbaa; 13 bi mɔi yaa nan kayaant nae, ki fai nyi bi jerima paak, ki linba nyi bi mɔi ni tee nan waauk lɔbii na; 14 mɔpora nan mɔtont kuukɔɔe nyi bi mɔi ni. 15 Bi saa kpi nirɔ yiamewa; 16 ki siaminba kur ki bi gar, parbiir tuu baar leŋe. 17 Bi ki mi sɔnu nba ki bi saa tɔkin ki lin baar nan parmaasiri. 18 Bi binbeŋ ni, bi ki tiin Yennu." 19 Tɔn, ti mi nan Yennu sennu-i yet linba, li yeen ki teen binba be li yiikoo nie, li paake ki niib kur sii muu bi mɔi, ki tingbouŋ na teeb kur be Yennu buut ni, ki u tɔɔnn sɔɔ kaa ki mɔk mɔnii. 20 Sɔɔ kaa ki saa fit wei sennu na nba wann biaŋinba ki teen niŋanɔ Yennu tɔɔnn; sennu na paake te ki nisaarik bann nan u tuun toonbiit. 21 Ŋaan mɔtana, Yennu mɔŋ nba lon sɔnsau nba saa te ki nisaarik n teen niŋanɔ na ji be yeenin nie, ki u sɔkiniinba maan nan sennu nae wantit li po, ŋaan li ki nyi sennu na saku ni kaa. 22 Yennue te ki nisaarii nba teen Yiisa Masia yada na tee niŋamm u tɔɔnn, li nyii baa teen Yiisa Masia yada nae, ki lukitin kaa, 23 kimaan nisaarii kur tun toonbiit ki ki be fanu nan Yennu nba loon biaŋinba na. 24 Yennu ninbatinu paake ki u yet a bi tee niŋamm u tɔɔnn; li tee piiniie, kimaan Yiisa Masia pa bi paak ki nyinnib daabsin niwa. 25 Yennue te ki Yiisa Masia nyii yeenin ni, ki bia te ki u sɔn nba nyii u ni na tee maruŋ ti biit paak, ki ti-i teen linba na yada, Yennu saa nyik chab ti biita; ŋanne wann nan Yennu be fanu. Yoo nba gar, Yennu din ki dat nisaarii tuba bi toonbiit paaki, kimaan u sukuru paak; 26 ŋaan mɔtana u nyik chabit ki loon wun wann nan u set be fanu, ki bia yet a wunba teen Yiisa yada na mun tee niŋanɔe ŋɔɔ Yennu tɔɔnn. 27 Li paak, siar be ki ti mɔk parbifaant nannii? Aaii, li ki tee a nisaarik nba waa sennu na paak kaa ki ti saa la tinnu, ŋaan li tee taa teen Yiisa Masia yada na paake. 28 Ti yeen a nisaarik yada teenu paake ki Yennu yet a u tee niŋanɔ; li ki tee waa waa sennu na paak kaa. 29 Yennu tee Juu teeb kuukɔɔ Yennue-e? Aaii, u tee Juu teeb nan binba ki tee Juu teeb na Yennue. 30 Yennu tee Yen-yenɔkɔɔe ki saa yet a Juu teeb nan binba ki tee Juu teeb na kur n teen niŋamm u tɔɔnn, bi yada teenu paak. 31 Tɔn, taa yet a nisaarik laat tinnu u yada teenu nie na, ŋanne saa te ki sennu na n teen yannii? Aaii, li ki tee nna kaa. Ti lek see sennu na poe.

Rom 4

1 Tɔn, ti saa yet a bee ki jiin ti yeeja Abraham nan u binbeŋ po? 2 Waa din waa sennu na-i diŋŋi te ki Yennu yet a u tee niŋanɔ u tɔɔnn, u bo sii mɔk linba saa te ki u mɔk parbifaant, ŋaan u ki mɔk parbifaant Yennu tɔɔnni. 3 Li sɔb Yennu gbouŋ ni a, "Abraham din teen Yennu yadae, ki u yada maŋ paak ki Yennu jiiu ki u tee niŋanɔ u tɔɔnn." 4 Li-i tee ki nirɔ tuun toona, u nyɔɔt kii tee piinii kaa, ŋaan li sii tee paauko. 5 Nirɔ nba ki teen sennu weiu na yada, ŋaan teen Yennu nba nyikit biitdamm ki chabitib na yada, Yennu saa jii li daanɔ ki u tee niŋanɔ u tɔɔnn; li daanɔ yada paake ki Yennu saa jiiu. 6 Nnae ki Defid din yet a daanɔ nba ki Yennu jiiu ki u tee niŋanɔ u tɔɔnn ki li ki tee u toonŋana paaki, li daanɔ mɔk parpeenn bonchiann. 7 Defid din yet a: "Damm nba ki Yennu nyik bi biit ki chabib ki kpeen bi biit na, bi mɔk parpeenn; 8 Damm nba ki Yennu ki tian bi toonbiit po, bi mɔk parpeenn." 9 Li parpeenn tee binba pot na kuukɔɔ yar amii? Aaii, nan binba ki pot nawa. Ti poŋ bo yet a li sɔb Yennu gbouŋ ni a, "Abraham din teen Yennu yada, ki u yada maŋ paake ki Yennu jiiu ki u tee niŋanɔ u tɔɔnn." 10 Nlee yooe ki Yennu din tun nna? Yennu din yiu niŋanɔewa ki u tan pot amii u din potewa ki Yennu yiu niŋanɔ? Yennu poŋ din yiu niŋanɔewa ki u tan pot. 11 U din pota, ŋaan u potu maŋ tee siara nba want nan u yada maŋ paake ki Yennu poŋ din jiiu ki u tee niŋanɔ, li poorpoewa ki u ji tan pot. Li paak, binba kur teen Yennu yada ŋaan ki pot na, Abraham tee bi baae; baa teen Yennu yada na paake ki Yennu yib niŋamm. 12 Abraham tee binba pot na mun yaa baae, li ki tee a baa pot na paak kaa, ŋaan baa bia teen Yennu yada nan biaŋinba ki ti baa Abraham din teen na, u din teen yadaewa ki tan pot; bi yada paake ki Abraham tee bi baa. 13 Yennu din senn mɔsonn ki tur Abraham nan u yaaboona a tingbouŋ na tan sii tee bi yare, li din ki tee Abraham nba waa sennu na paak kaa ki Yennu senn li mɔsonni, ŋaan li din tee u yada paake ki Yennu jiiu ki u tee niŋanɔ u tɔɔnn. 14 Li-i bonni tee ki Yennu mɔsonn na tee binba dia sennu maŋ yarie, ŋann ŋarin, nirɔ yada bo sii tee yanne, ki Yennu mɔsonn bo kii mɔk nyɔɔti. 15 Sennu na y‡tue baat nan Yennu wutoor, ŋaan sennu-i kaa, mɔy‡tuk sii kaa. 16 Yennu mɔsonn na tee binba teenɔ yada na yare; u ninbatinu paak, ki u senn mɔsonn maŋ ki li set tee Abraham yaaboona kur yar, li ki tee binba waa sennu na kuukɔɔ yar kaa, ŋaan binba kur teen Yennu yada nan Abraham nba din teen biaŋinba na, li tee bi yare, kimaan ŋɔɔ Abrahame tee ti kura baa, 17 nan laa sɔb Yennu gbouŋ ni a, "N teena nibooru bonchiann baae." Li paak, Yennu boor Abraham tee ti baae, Yennu nba ki Abraham teenɔ yada na, ŋɔɔe te ki kpeemm laat manfoa, ki tuu te linba kaa ki li ji be. 18 Siar din ki want dindann, ŋaan Abraham lek din mɔk dindann nan Yennu saa turɔ bika, ki bia teen yada, ki u yada teenu paake ki u teen nibooru bonchiann baa nan Yennu nba yetɔ a, "A yaaboona tan saa pɔt bonchiann." 19 Abraham din la nan bina kobik nawa, ki mi nan u gbanant baŋŋa, ki u ŋaapoo Sara bia tee pookammatire, ŋaan nan li kura gbaa, Abraham yada din ki wati. 20 U mantik din teen Yennu yada, ki ki mɔk birsuk nan Yennu mɔsonn na, u yadae din te ki u mɔk paŋ bonchiann, ki piak Yennu. 21 U mantik din teen Yennu yada ki ki birisi, ki mi nan Yennu nba senn biaŋinba, u set saa fit tuma. 22 Li paak ki "Yennu jiiu ki u tee niŋanɔ," kimaan waa teen Yennu yada na. 23 Ŋaan Abraham kuukɔɔ paak kaa ki li sɔb Yennu gbouŋ ni a, "Yennu jiiu ki u tee niŋanɔ," 24 ŋaan li sɔb ki teen timm nba ki Yennu saa gaarit mun ki ti tee niŋamm u tɔɔnn nae, kimaan taa teen ŋɔɔ Yennu nba fiin ti Yomdaanɔ Yiisa kuun ni yada na. 25 Ŋɔɔe din jii Yiisa ki chab ki bi kpiiu ti toonbiit paak, ŋaan bia fiinɔ kuun ni, a wun te ki tii tee niŋamm u boor.

Rom 5

1 Tɔn, taa teen Yiisa yada na paake ki Yennu yet a ti tee niŋamm u boor, ki parmaasir ji be timm nan Yennu sinsuuk ni, ti Yomdaanɔ Yiisa Masia paak. 2 U paake ki Yennu tint ninbaauk, ti yada maŋ paak; ki ti la u ninbatinu maŋ ki mɔk parpeenn, kimaan ti mɔk dindann nan ti tan sii mɔk binbenŋaŋ nba ki Yennu saa turit na. 3 Ti bia mɔk parpeenn ti biak dinu ni, kimaan ti mi nan biak dinu baat nan sukurue, 4 ki sukuru mun baat nan binbenŋaŋ, ki binbenŋaŋ mun baat nan dindann, 5 ki dindann maŋ ni ti tan kan di fei, kimaan Yennu jii lomm nba ki u mɔk nae ki teen ti para ni, u Seyeeŋ nba ki u turit na paak. 6 Kimaan yoo nba ki ti daa din ki mɔk sommir na, ki Masia gaar timm biitdamm paak ki kpo, ki li tee yoo nba ki Yennu gann. 7 Li paar nan nirɔ n gaar nipeemɔ paak ki kpo, ŋaan li pasiar a saa la sɔɔ n gaar niŋanɔ paak ki kpo; 8 ŋaan Yennu wann nan u set loonit bonchiann kimaan taa din tee biitdamm na ki Yiisa Masia gaar ti paak ki kpo. 9 U sɔn paak, ki Yennu yet a ti tee niŋamme; li paak mun u kpan saa nyinnit tubdatu nba baat ti paak na niwa. 10 Ti din tuu tee Yennu dataie, ŋaan mɔtana jik u teent u yɔɔsinbae, kimaan u Bija nba din kpo na sɔn paak, ki taa tee u yɔɔsinba na, birsuk ji kaa, u saa tinnit u manfoor paaka. 11 Ŋaan li kur kaa na; ti bia mɔk parpeenn Yennu nba sommit bonchiann biaŋinba, ti Yomdaanɔ Yiisa Masia paak na, kimaan u paake ki Yennu ji teent u yɔɔsinba. 12 Tɔn, niyenɔkɔɔe din te ki biit baar tingbouŋ na ni, ki u biit na paake te ki kuun be. Li paake te ki kuun kpi niib kur, kimaan nisaarik kur tun toonbiita. 13 Biit din be tingbouŋ na niewa ki Yennu tan tur Moses sennu na, ŋaan sennu-i kaa, sɔɔ kan fit yet nirɔ a u biir sennu. 14 Laa nyii Adam yoowa ki tan tuu Moses yoo, kuun lek mɔk yiikoo sɔɔ kur paak, ki kpi binba mɔk biit nba ki tee nan Adam biit nba din tee biaŋinba na. Tɔn, Adam din tee wunba din yaa wun wei poor na ninnauŋo. 15 Ŋaan bi banlee na ki jan, kimaan Yennu piinii nba ki u pit yann na ki tee nan Adam toonbiit na kaa. Li tee mɔniie nan niib bonchiann kpo niyenɔkɔɔ maŋ toonbiit paake; Yennu ninkpabauŋ yab, ki u piinii nba ki u teen niib bonchiann, ki li tee yenɔkɔɔ Yiisa Masia ninkpabauŋ paak na mun bia yab. 16 Bɔkitu be Yennu piinii nan niyenɔkɔɔ Adam toonbiiuk sinsuuk ni; kimaan niyenɔkɔɔ Adam toonbiiuk maŋ poorpo ki Yennu din bu u buut ki yet a u toonbiiuk maŋ ŋan nan tubdatu; ŋaan ŋɔɔ Yiisa Masia piinii nba ki u pit yann na tee nyikinchabe, toonbichiɔŋ poorpo. 17 Niyenɔkɔɔ toonbiiuk paake ki kuun kpi sɔɔ kur, kimaan niyenɔ maŋ paak; ŋaan linba wei, niyenɔkɔɔ Yiisa Masia toonn na gar nnawa; niib nba kur la Yennu ninbatinu nba yab, nan u piinii nba tee nyikinchab na, bi saa la nyannu nan manfoor Yiisa Masia paak. 18 Niyenɔkɔɔ maŋ toonbiiuk paake te ki sɔɔ kur ŋan nan tubdatu, nnae mun, niyenɔkɔɔ toonŋann paake te ki sɔɔ kur laat tinnu nan manfoor. 19 Niyenɔkɔɔ nba ki bi yiu Adam na mɔy‡tuk paake te ki niib kur teen biitdamm; li mun tee nnae nan niyenɔkɔɔ nba ki bi yiu Masia na mɔsaku paake ki niib bonchiann teen niŋamm Yennu boor. 20 Sennu na baar a lin ŋamm fiit wann toonbiit nba yab biaŋinbae; ki toonbiit nba yab na, Yennu ninbatinu mun yab ki gar nnawa. 21 Li paak, biit nba din te ki nisaarii kpenn biaŋinba na, nnae mun ki Yennu ninbatinu paak ki u yet a bi tee niŋamm u boor, ki turib manfoor nba kaa gbennu, ti Yomdaanɔ Yiisa Masia paak.

Rom 6

1 Li paak, ti saa yet nlee? Ti bia sii be ti toonbiit tumu nie ki Yennu ninbatinu na n pukin amii-i? 2 Aaii, nna kaa. Li tee nan ti kpo nae, li paak biit ki mɔk ti yaaki. Ŋann amii ti kan biar toonbiit tumu ni. 3 Timm nba ki bi wurit Yennu nyunwuru Yiisa Masia sann ni na, li tee nan ti lakin kpo nanɔ nae. 4 Li paak, ti din kpoe nan Yiisa Masia ki bi piit nanɔ Yennu nyunwuru ni; ki u Baa Yennu jii u paŋ ki fiinɔ kuun ni, nnae ki ti mun fiir a tii be manfopaann na ni. 5 Li-i tee ki timm nan Masia lakin kpo, nnae ki ti bia saa lakin fiir kuun ni nan waa din fiir biaŋinba na. 6 Ti mi nan ti binbenkper na lakin kpo nan Yiisa u dapunpunn paak, a ti binbenkper na ji daa mɔk yaak, ki ti ji kii tee daaba biit paŋ ni. 7 Nirɔ-i kpo, u nyii biit paŋ niwa. 8 Taa kpo nan Masia na, ti mɔk yada nan ti sii mɔk manfoor nanɔ. 9 Ti mi nan Yennu fiin Masia kuun niwa ki u ji kan mi kpo; kuun ki mɔk u yaaki. 10 U din kpo ti biit paake taar yomm, ŋaan waa ji be u manfoor ni na, ŋɔɔ nan Yennue lakin be. 11 Li paak, i mun jii i mɔŋ ki lii tee nan i kpoe na ki biit ji ki mɔk i yaaki, ŋaan Yiisa Masia paak i ji be i man-foor ni Yennu boor. 12 Li paak, i daa te ki biit n yent i gbanant ki te ki i tuun biit loommu. 13 Daa teen i gbanant siar po yaak ki li tuun toonbiit, ŋaan jii i mɔŋ ki tur Yennu, kii tee nan i nyii kuun nie ki kɔɔ manfoor ni na; jiin i mɔŋ kur ki tur Yennu ki wun jii-i ki tun yentinu toona. 14 Biit daa mɔk i yaaki, kimaan sennu na ki yenii ni, ŋaan Yennu ninbatinu nae yeni. 15 Tɔn, sennu na nba ki yent, ŋaan ki Yennu ninbatinu nae yent na, ti saa biar toonbiit tumu ni amii? Aaii, ti kan teen nna kaa. 16 Fi-i jii a mɔŋ ki pet nirɔ ki tee u daabir ki saak u mɔb, li tee mɔniie nan a set tee u daabire. Fi-i sak ki tuun toonbiit, a tee biit daabire, ki li joontu tee kuume; ŋaan fi-i sak Yennu mɔb, a tee mɔsakdaanɔe, ŋanne saa te ki a teen niŋanɔ Yennu boor. 17 Sianyoo, biit din mɔk i yaak, ŋaan mɔtana i mantik saak barmɔnii wannu nba ki bi din wanti na; li paake, ki n teen Yennu niipoouk. 18 Mɔtana i ji ki tee biit daaba, ŋaan yentinue ji mɔk i yaak. 19 (Yimm nisaarii nba ki fit bant Yennu maan yian na paake ki n yaa n pak nisaarik yan ki wanni u labaar.) Yaa din jii i mɔŋ ki tuun toonbiit ki li nɔb na, mɔtana jiin man i mɔŋ kii tuun yentinu toona kii tee popeendamm. 20 Yaa din tuu tee biit daaba na, i din tuu ki tee yentinu yabi. 21 Toona nba ki i din tun ki li mɔki fei mɔtana na, li mɔk nyɔlante ki turiini? Li toonbooru baat nan kuume. 22 Ŋaan mɔtana i ji nyii biit daabsin niwa ki ji tee Yennu daabae; li paak ki i teen popeendamm, ki mɔk manfoor nba kaa gbennu; ŋanne tee i nyɔɔt. 23 Kimaan biit nyɔɔt tee kuume, ŋaan Yennu piinii tee manfoor nba kaa gbennue, ti Yomdaanɔ Yiisa Masia paak.

Rom 7

1 N naa waas, i kur mi sennu na po, li paak, i saa fit soor maa yaa n yet linba na paaka. Sennu na so wunba be u manfoor nie. 2 Li paak, sennu na nɔɔk ni, li kpaa talas nan poo n taan nan u sɔrɔ yoo nba ki u sɔrɔ daa be u manfoor ni na, ŋaan u sɔrɔ na-i taŋŋi kpo yoo nba, sennu na ji ki so poo na. 3 Ŋann amii, yoo nba ki u sɔrɔ daa be u manfoor ni na, li-i tee ki u waa jaganɔ, bi sii yiu poochonchonne; ŋaan li-i tee ki u sɔrɔ kpo, sennu na ji kan soorɔ. Li-i tee ki u ji kun jaganɔ u sɔrɔ na kuun poorpo, u ki tee poochonchonni. 4 N naa waas, li mun tee nnae ki turi; i tee Masia gbanant bɔkire, ki din kpoe ki sennu na ji ki soi; ŋaan mɔtana i gaa nan Masia nba din fiir kuun ni a tii tuun linba ŋan ki tur Yennu nae. 5 Yoo nba ki ti din tuun ti gbanant loomm nae ki sennu na te ki ti mɔk nianbiiuk ki li tuun ti gbanant ni, ki baat nan linba tee kuun ti paak. 6 Mɔtana ŋarin, sennu na ki diati, kimaan ti din kpoe ki sennu na ji ki mɔk ti yaaki. Li paak, ti ji fit tuun ki teen Yennu nan manfopaann nba ki u Seyeeŋ turit na; ti ji ki tuun nan sennkperu nba ki bi din sɔb gbouŋ ni na kaa. 7 Li paak, ti saa yet a bia? Ti yet a sennu na ki ŋan amii? Ti kan yet nna kaa. Sennu na-i bonni kaa, n bo kan bann biit nba tee linba. Sennu na-i bonni kii wann a n daa mɔk niɔŋ n lɔɔ bont paaki, n bo kan bann niɔŋ nba tee linba, 8 ŋaan ki biit la yaak sennu na ni, ki te nianbooru booru bonchiann fiir n par ni. Sennu na-i bonni kaa, biit bo sii tee bonkpeenne. 9 Yoo nba ki n din ki mi sennu maŋ na, n din mɔk manfoore; ŋaan maa tan bann sennu maŋ, ki biit nba be n par ni na fiir, ki n kpo. 10 Sennu nba bo yaa li baat nan manfoor na, ki li ji baar nan kuun ki turin. 11 Biit la yaak sennu na nie ki kpannin, ki kpiin. 12 Sennu nan wannu na tiɔŋ ŋarin yeene, ki tee barmɔnii ki bia fan. 13 Tɔn, li want nan linba ŋane baar nan kuun n paaki? Aaii, li ki want nna kaa. Biit na wei linba ŋane ki baar nan kuun turin, a lin wann biit nba tee linba. Ŋanne ki ti ji bann nan biit tee bonbilankante. 14 Ti mi nan sennu na tee Yennu Seyeeŋ yare, ŋaan min ŋarin tee nisaarike, ki tee biit daabir, 15 kimaan linba ki n tuun na, n ki mi li paaki: N ki tuun toonŋana nba ki n looni; ŋaan toonbiit nba ki n nan na, ŋanne ki n tuun. 16 Mi-i tun toonbiit nba ki n bo ki loon ki n tun na, li want nan n sak nan sennu na ŋane. 17 Li paak, li ki tee n mɔŋ kaa tuumiri, ŋaan biit nba be n ni nae te ki n tuun. 18 N mi nan bonŋansiar kaa n par ni; n loon ki n tun linba ŋan, ŋaan n kan fit tumi; 19 kimaan maa loon ki n tun toonŋana nba, n ki tuumiri, ŋaan toonbiit nba ki n ki loon ki n tun na, ŋanne ki n tuun. 20 Li paak, mi-i tuun linba ki n bo ki loon mii tuumi, li ji ki tee min kaa tuumi, ŋaan li tee biit nba be n ni nae tuun. 21 N la ki bonsiar be n ni yoo kura, mi-i yaa n tun linba ŋan, ŋaan biit bia lek tuu be nanin. 22 Yennu sennu nae te ki n par peen, 23 ŋaan ki n laat sennsiar nba tuun n gbanant ni, ki li ki sak nan sennu nba ki n par loon na, ki lorin nan dansarkɔɔrɔ na, a n sak biit nba be n ni na. 24 Aba, n tee parbiir daanɔe. Ŋmee saa fatin ki nyinnin gbanant nba saa nanin kuun ni na? 25 N piak Yennu nba fatin ki lun, kimaan Yiisa Masia paak na. Li paak, n mɔŋ waa Yennu sennu na n par ni, ŋaan ki n gbanant waa biit sɔnu na.

Rom 8

1 Tɔn, mɔtana Yennu kan bu ki biir binba be Yiisa Masia ni na. 2 Kimaan maa tee Yiisa Masia yɔɔ na paake ki Seyeeŋ nba teent manfoor na fatin biit nba baat nan kuun na nuu ni ki lun. 3 Yennue tun u mɔŋ Bija tingbouŋ na ni, ki u baar nan gbanant nba naan nan timm biitdamm gbanant na, ki tan gaar ti paak ki kpo. Ki u kuun maŋ paak ki Yennu biir biit nba be timm nisaarii para ni na paŋ. Sennu na ki fit tun nna, kimaan timm nisaarii ki fit diar fanu. 4 Yennue tun nna, a timm nba ki ti binbeŋ waa Yennu Seyeeŋ ki li ki tee nisaarii loomm na, saa sak ki wei barmɔnii sɔnu, nan sennu nba wann biaŋinba na. 5 Binba binbeŋ waa nisaarik loomm na jikit bi dudukit ki tee nisaarik loomm nie, ŋaan binba binbeŋ waa Yennu Seyeeŋ na mun jikit bi dudukite ki tee Seyeeŋ na loomm ni. 6 Fi-i jii a yan ki gaan nan nisaarik loomm, li tee kuume, ŋaan fi-i jii a yan ki gaan nan Yennu Seyeeŋ loomm na, li tee manfoore nan parmaasir. 7 Fi-i jii a yan ki gaan nan nisaarik loomm, a tee Yennu dataake, ki ki saak Yennu sennu, ki set kan fit sakiri. 8 Wunba waa nisaarik loomm kan fit penn Yennu pari. 9 Yennu Seyeeŋ-i setikii be i ni, i benu kii waa nisaarik loommi, ŋaan li sii waa Yennu Seyeeŋ na loomme. Wunba ki mɔk Masia Seyeeŋ maŋ u ni, li daanɔ ki tee Masia yɔɔ. 10 I gbanant nba lek kpo biit paak na, ŋaan Masia-i be i ni, i sei mɔk manfoor, kimaan Yennu yet a i tee niŋamme u boor. 11 Ki ŋɔɔ Yennu nba fiin Yiisa kuun ni na, u Seyeeŋ na-i be i ni, ŋɔɔ nba fiin Masia kuun ni na, ŋɔɔe bia saa tur i gbanant manfopaann, u Seyeeŋ nba be i ni na paak. 12 Li paak, n naa waas, i mi man tin wei gbanant loomm. 13 Li-i tee ki i waa gbanant loomm, i saa kpowa, ŋaan li-i tee ki i kpi gbanant loomm Yennu Seyeeŋ paŋ na paak, i saa la man-foora. 14 Binba ki Yennu Seyeeŋ ŋmakitirib sɔnu na, ŋamme tee Yennu waas. 15 U Seyeeŋ nba ki u turi na, u ki te ki i tee daaba nan jaŋmaandamm kaa, ŋaan u te ki i tee Yennu waase ki yi Yennu a, "Ti Baa." 16 Yennu Seyeeŋ maŋe te ki ti mɔŋ sei mi bonŋann nan ti tee Yennu waas. 17 Taa set tee u waas na paak, ti saa la bonŋann nba ki u bir ki guun u niib nawa; ti bia tan saa lakin nan Masia ki gaarira. Kimaan ti-i di biak Masia paak, u tan saa donnit u boora. 18 N mi nan biak nba ki ti di mɔtana na, li kan fit yekin nan parpeenn nba ki ti tan saa la Yendɔuŋ ni na. 19 Durinya bona kur nba ki Yennu nann na guu nan nimmɔnne nan yoo nba ki Yennu tan saa nyinn u waas yeenin ni, 20 kimaan durinya bona kur din biira ki ji ki mɔk nyɔɔti, li din ki tee li loomm kaa, li din tee Yennu loomme ki li teen nna; ŋaan ki u bia lek ŋaan ki li mɔk dindann. 21 Dasiar be ki durinya bona maŋ tan saa nyi kuun daabsin ni, ki kuun ji kan diar, ki li mun tan sii mɔk parpeenn nba ki Yennu waas tan saa gaar na. 22 Ti mi nan li yiar durinya bona maŋ ki li kurii ki tan tuu mɔtana nan poo nba tuu mɔ matyiaru ki kurii biaŋinba nae. 23 Li ki tee durinya bona na kuukɔɔ kaa kurii, ŋaan timm nba mɔk Yennu Seyeeŋ nba tee sinsinn piinii na mun kuriie ti para ni, ki guu yoo nba ki Yennu tan saa nyinn ki wann yeenin ni a ti tee u waase, ki te ki ti gbanant n nyi daabsin ni na. 24 Taa la tinnu nae ki ti mɔk dindann. Tɔn, nirɔ-i la linba ki u bo mɔk dindann li paak na, ŋann ŋarin, li ji ki tee dindanni. Ki ŋmee ji sii mɔk dindann linba ki u poŋ lar paaki? 25 Ŋaan ti-i mɔk dindann linba ki ti ki laat paak, ŋann ti ji tuu guu nan sukurue. 26 Nnae mun ki Yennu Seyeeŋ na baar a wun sommit ti bakint ni, kimaan ti ki mi biaŋinba ki ti sii mei Yennu. Ŋɔɔ Yennu Seyeeŋ mɔŋe mei Yennu ki teent ki te ki ti kurii ki mei ti para ni ki ti mɔbona kan fit pakiri. 27 Yennu nba laat nisaarik par ni mi Seyeeŋ na dudukit nba tee, kimaan Seyeeŋ na mei Yennu, u niib paak, ki li waa nan ŋɔɔ Yennu nba loon biaŋinba na. 28 Binba ki Yennu yiimm na, u mɔk linba paak ki u yiimme, ki bi mɔk lomm nanɔ, ki ti mi nan linba kur tuun, u te ki li tee bonŋann ki teen ŋamme. 29 U poŋ din senn nan binba ki u yiimm na, bi binbeŋ-ii tee nan u Bija binbeŋ nae, ki u Bija na n teen Bikperik, waas bonchiann sinsuuk ni. 30 Yennue yiin binba ki u senn na, ki binba ki u yiimm na, ki u yet a bi tee niŋamm u boor, ki binba ki u yet a bi tee niŋamm u boor na, ki u donnib. 31 Ti-i got linba na kur, ti saa yet a bia? Li-i tee ki Yennu be ti po, ŋmee ji be ki saa biiriti? 32 Yennu ki minnit u mɔŋ Bija na, ŋaan jiiu ki u tee maruŋ ti paak; ŋɔɔ Yennue turit u Bija maŋ, ki nlee ki u ji kan turit linba kur biari? 33 Ŋmee saa pak biir Yennu nigannkabi? Yennue nyinnib ki bi ki tee biitdamm u boori. 34 Ŋmee be ki saa bu bi buut ki biirribi? Sɔɔ kaa. Yiisa Masia nba din kpo ki fiir kuun ni na amii? Yiisa Masia nba be Yennu niidiitu po ki tee ti sindantinnɔ na amii? 35 Ŋmee saa fit nyinnit Yiisa Masia lomm ni? Ti biak dinu amii maan amii sukit amii kon amii namu amii parbiir amii kuume? Aaii. 36 Li teen ki turit nan laa sɔb biaŋinba Yennu gbouŋ ni nae a: "A paake ki ti be kuun ninbɔŋ ni sanyiɔk niwa ki tan tuu daajoouk na, ki ti tee nan peeuk nba ki bi tuu tee siir a bin kpiu na." 37 Ŋaan linba na kur tee yanne, kimaan ti la nyannu kur Yiisa Masia, wunba loont na paaka. 38 N mi fanu nan siar kaa ki saa fit bɔkit timm nan Masia lommi; kuun amii manfoor amii malakanba amii kpanbara amii yentdamm amii linba tuun mɔtana amii linba tan saa tun 39 amii linba be sanpaapo amii tinpɔɔr ni amii; siar kaa naauŋ kur ni ki saa fit bɔkit timm nan Yennu lommi, lomm nba nyii ti Yomdaanɔ Yiisa Masia ni na.

Rom 9

1 N tee Masia yɔɔe ki ki fa faaki. Yennu Seyeeŋ nae yen n dudukit ki teen siara a n ki fa faak, linba ki n yaa n pak na tee mɔniie; 2 n mɔk parbiir nba kaa gbennu, 3 n mɔŋ booru paak. Li-i bonni saa fit ki n set n niib paak ki Masia n biirin, n bo saa sak nnawa. 4 Ŋamme tee Israel teeb, ki Yennu din gannib ki te ki bi tee u waas, ki wannib u yentsaakar, ki turib mɔlora, ki bia turib u sennu, ki wannib barmɔnii jiantu, ki senn mɔsona ki turib. 5 Bi yeejamm din tee nijaanae, ki Masia nba din kpant nisaarik yoo nba na ki u teen bi booru ni yenɔ. Yennu nba yen bont kur na n la paku nba ki mɔk gbennu. Mamɔmm. 6 N ki yeen a Yennu mɔsonn na ki tuun kaa, kimaan Israel niib kur kaa tee Israel teeb nan barmɔnii. 7 Abraham yaaboona kur kaa mun tee u yaaboona nan mɔnii, kimaan Yennu din yet Abraham a, "Aisak boorue tan sii tee a yaaboona." 8 Li paak, binba ki Abraham marib nisaarik maaru na ki tee Yennu waasi. Binba tee Yennu mɔsonn maaru waas na, ŋamme set tee Yennu waas. 9 Yennu mɔsonn na din tee a, "N saa jen binn nna yoo ki sɔɔ Sara mar bonjaka." 10 Ŋaan li kur kaa na. Ti yaa Rebeka din mar waas banlee ki bi taa baa, ŋɔɔe tee ti yeeja Aisak. 11 Yoo nba ki bi daa din ki marib ki bi ki tun linba ŋan koo linba bi na, ki Yennu yet a bikperik nae tan sii tee waarɔ po na jiamɔ. Yennu yet nna a u loomme n tun. Li paak, u loomm tee wun gann niibe, li ki tee bi toona paak; ŋaan li tee waa loon ki gann biaŋinbae. 13 Li tee nan Yennu nba yet u gbouŋ ni biaŋinba nae a, "N gann Jakɔbe ŋaan y‡t Esɔɔ." 14 Ki ti ji saa yet a bee? Ti saa yet a Yennu ki tun linba ŋan amii? Aaii, ti kan yet nna kaa. 15 Yennu din yet Moses a, "Binba ki n loon ki n tinib ninbaauk na, ŋamme ki n saa tinib ninbaauk." 16 Li ki tee nisaarik loomm koo waa tuun linba kaa, ŋaan li tee Yennu ninbatinu paake. 17 Li sɔb Yennu gbouŋ ni ki yet bat Faaro a, "Min Yennu dinna naan linba na paake, a n jiia ki wann n paŋ, ki te ki n sann n mɔɔnt lin tingbouŋ na kur po." 18 Li paak, binba ki Yennu loon ki wun tinib ninbaauk na, ŋamme ki u tiinib ninbaauk, ki bia teen siab kangbata nan waa loon biaŋinba na. 19 Tɔn, li pasiar ki i yenɔ n boin a ki li-i tee nnaie, nlee ki Yennu laat nisaarik biiti? Ŋmee saa fit y‡t Yennu loommi? 20 Ŋaan n yɔɔk, a tee ŋmee ki saa pak jiin Yennu? Bobir kan fit boi bobmaarɔ a, "Bee ki a maan ki n tee nna?" 21 Bobmaarɔ mɔk yaak ki saa jii yɔuk bur ki maa bobŋann nan bobir nba ki ŋan. 22 Nnae ki Yennu tun ki loon wun wann u wutoor ki niib kura n bann u paŋ. Li paak ki u mɔk mintir nan binba ki u wutoor doo bi paak ki li bo jaŋ nan wun biiriba na; 23 ki u bia dɔŋ gann niib nba ki u tinib ninbaauk na, a wun donnib ki wann waa mɔk burchint bonchiann biaŋinba. 24 Li tee timm nba ki u gann nae; li ki tee Juu teeb kuukɔɔ kaa, ŋaan nan binba ki tee Juu teeb nawa. 25 Li tee nan Hosea nba din sɔb biaŋinba, a Yennu yet a, "Niib nba din ki tee n niib na, ŋamme ki n saa jiib ki bii tee n niib; ki booru nba ki n din ki loon na, ŋamme ki n saa yiimm booru nba ki n loon; 26 ki siaminba ki bi din yetib a bi ki tee n niib na, leŋe biak ki bi saa yiimm Manfodaanɔ Yennu waas." 27 Yennu sɔkinii Aisaya din pak jiin Israel teeb po ki yet a, "Israel teeb-i lekii yab nan mɔkir tanbiinii na, ŋaan bi waaminnae saa tinn; 28 kimaan Yennu saa dat tingbouŋ na teeb tuba ki gbenn yian nan waa yet biaŋinba nae." 29 Li tee nan Aisaya nba din yet nae a, "Ti yabint Yomdaanɔ-i bonni kii tennit waas, li bo tan saa tun turit nan laa din tun Sodom nan Gomora doi ni niib biaŋinba nae." 30 Tɔn, ti saa yet nlee? Binba ki tee Juu teeb na din ki koor a bin teen niŋamm Yennu boori, ŋaan ki Yennu yet a bi tee niŋamm u tɔɔnn, bi yada paak. 31 Ŋaan Israel teeb nba koor a bin la sennu nba saa te ki Yennu n yet a bi tee niŋamm u tɔɔnn na ji kɔŋ. 32 Bee ki bi din kɔŋi? Bi ki koor a Yennu n yet a bi tee niŋamm u tɔɔnn bi yada paaki; bi din koor a Yennu n yet a bi tee niŋamm u tɔɔnn bi toona paake; ki bi gbiat tangbiatkar na ki baa, 33 tann nba ki bi sɔb li po Yennu gbouŋ ni a "Gotir, min Yennu bir tanne Sayɔnn doo ni, linba saa te ki niib n gbiat; ki tee tann nba saa te ki niib baa. Ŋaan wunba teenɔ yada kan di fei."

Rom 10

1 N naa waas, n mei Yennu nan n par kure a wun tinn n mɔŋ booru Juu teeb. 2 N saa fit teen bi siara nan bi waa Yennu nan nimmɔnnii; ŋaan bi ki mi u sɔnu nan barmɔnii. 3 Bi ki mi sɔnu nba te ki Yennu yet a niib tee niŋamm u boor, ŋaan loon bi mɔŋ sɔnu, ki li paak, bi ki jii bi mɔŋ ki lor nan Yennu sɔnu na. 4 Kimaan Moses sennu weiu ji kan te ki Yennu n yet a sɔɔ tee niŋanɔ u boori; ŋaan wunba kur teen Masia yada, Yennu saa yet a li daanɔe tee niŋanɔ u boor. 5 Moses din sɔb a, "Wunba tee popeendaanɔ nan sennu nba wann biaŋinba na, u saa la manfoor li paaka." 6 Ŋaan binben-ŋaŋ nba waa yada teenu na paake, Yennu gbouŋ yet nnae a, "A daa dukii a par ni a Ŋmee tan saa do Yendɔuŋ ni?" (Li paak tee a Ŋmee saa do Yendɔuŋ ni ki te Masia n siki?) 7 "A bia daa boi a Ŋmee tan saa sik kpeentiŋi?" (Li paak tee a Ŋmee saa sik ki te Masia n fiir kuun ni?) 8 Yennu gbouŋ nba want biaŋinba na tee a, "Yennu barŋanii na nakinawa; li be a mɔb ni nan a par ni." Barŋanii maŋ tee yada labaar nba ki ti mɔɔntir nae. 9 Li-i tee ki a set pak kat a mɔb ni ki yet a Yiisa tee Yomdaanɔ, ki bia teen yada a par ni nan Yennu set fiinɔ kuun ni, Yennu saa tinnawa. 10 Kimaan nirɔ nba teen Yiisa yada u par ni na paake, ki Yennu yet a u tee niŋanɔ u tɔɔnn, waa pak kat na paake ki u la tinnu. 11 Li sɔb Yennu gbouŋ ni a, "Daanɔ nba teenɔ yada, u kan mi di fei." 12 Bɔkitu kaa Juu teeb nan binba ki tee Juu teeb sinsuuk ni. Yennu kuukɔɔe tee ti kura Yomdaanɔ, ki binba kur meiɔ, u sommitib nan burchint. 13 Li sɔb Yennu gbouŋ ni a, "Wunba kur mei ti Yomdaanɔ sommir po, u saa la tinnu." 14 Tɔn, niib-i kii teenɔ yada, bi saa teen nlee ki miarɔ sommir po? Ki bi-i kii gbat barŋanii maŋi, bi saa teen nlee ki teenɔ yada? Ki bi-i kii mɔɔnt barŋanii maŋi, nlee ki niib saa gbat li po? 15 Ki Yennu-i kii tun toomiinba, nlee ki barŋanii maŋ saa mɔɔnti? Li sɔb Yennu gbouŋ ni a, "Binba lin mɔɔntir barŋanii na baaru ŋan bonchiann." 16 Ŋaan niib kur kaa sak barŋanii maŋi. Aisaya din sɔb Yennu gbouŋ ni a, "Yennu, ŋmee sak barŋanii na?" 17 Li paak, nirɔ-i gbat barŋanii na, ŋanne saa te ki wun teen Masia yada; ki niib-i mɔɔntir Masia barŋanii na, li mun saa te ki wun gbat. 18 N loon ki n boi ki laan niib ki gbat barŋanii maŋ amii? Mamɔmm, bi gbata. Li sɔb Yennu gbouŋ ni a "Niib gbat bi kunkɔra nan bi mɔmaan tingbouŋ na lokir kur powa." 19 N yaa n ŋamm boie ki laan Israel teeb din ki bann li paak amii? Moses tiɔŋo din dɔŋ jiin sinsinn, a Yennu din yet Israel teeb, a u saa te ki bii mɔk funfunn nan niib nba ki mɔk booru na, ki te ki bi wutoa n do booru nba tee jatit na paak. 20 Ki Aisaya mɔk par, ki yet a Yennu yaa niib nba ki fiin u po na, bi tan lauwa; ki niib nba ki boi u po na, ki u fiit u mɔŋ ki wannib. 21 Ŋaan ki u pak jiin Israel teeb po a u tian u nuu yonnu nan nyiɔk a wun gaarib, ŋaan ki bi tee tubkangbata ki ki saak u mɔbi.

Rom 11

1 N loon ki n boi laan Yennu nyik u mɔŋ niib Israel teeb amii? Aaii, u ki nyikib kaa. N mɔŋ tee Israel nirɔe, ki tee Abraham yaaboonn, ki nyii Benjaminn naakuuk ni. 2 Yennu ki y‡t u niib nba ki u dɔŋ gannib na. I mi laa sɔb Yennu gbouŋ ni ki want Elaija nba din beer Yennu, Israel teeb biit po biaŋinba a 3 "N Yomdaanɔ, bi kpii a sɔkiniinba kura, ki biir a binbinta na, ki n kuukɔɔe biar, ki bi koor a bin kpin." 4 Yennu din jiin a bia? Yennu din jiin a u mɔk niib tusaa ŋanlore, binba daa ki mi jiant tingbann Baal na. 5 Li tee nnae mɔtana. Israel teeb waaminnae daa be ki Yennu gannib u ninbatinu paak. 6 Yennu-i gann niib, u ninbatinu paake ki u gannib, li ki tee bi toona paak kaa. Yennu-i bonni gani niib bi toona paakie, u ninbatinu na bo kii tee barmɔnii ninbatinu. 7 Tɔn, li want nan Israel teeb ki la baa loon linba. Bi waaminnae ki Yennu gannib ki bi lar; ŋaan ki binba biar na teen tubkangbata. 8 Li tee nan laa sɔb Yennu gbouŋ ni a, "Bina nba gar ki tan tuu dinna, Yennu te ki bi yan lin, ki bi ki laati, ki bia ki gbia." 9 Ki li ji sɔb Yennu gbouŋ ni a Defid yet a: "Yennu n te linba ki nibooru na jiantir na, lii tee tanbar ki soorib, ki bin di biak; 10 ki te ki bi ninbina n jɔɔn, ki bi daa laati, ki bii bɔɔ ki bi sai daa naatiri." 11 N loon ki n boi laan Israel teeb din gbiat baa ki boonte-e? Aaii, li ki tee nna kaa. Baa tun toonbiit na paak, ki Yennu tinn binba ki tee Juu teeb na. Yennu tun nna a ŋamm Juu teeb na-ii mɔk funfunn nan binba ki tee Juu teeb na paake. 12 Ki Juu teeb biit paake te ki tingbouŋ na teeb la tinnu; ki ŋamm Juu teeb nba din ki tun Yennu loomm nae te ki binba ki tee Juu teeb na la tinnu, li paak, Juu teeb maŋ kur-i munii nyik bi biit ki la tinnu, tingbouŋ na teeb saa mantik la piisin ki gar nnawa. 13 N piak ki teen yimm nba ki tee Juu teeb nae: Yennu nba te ki n tee Masia toomii i boor na, n sii mɔk yuugontir n toonn maŋ paak. 14 Mi-i bonni saa fit te ki n mɔŋ niib Juu teeb-ii mɔk funfunn binba ki tee Juu teeb na paak, li pasiar ŋanne bo saa te ki Juu teeb na siab n tinn. 15 Yennu nba din y‡t Juu teeb na, ki u ji te ki tingbouŋ na teeb soorɔ yɔɔs; Yennu-i ŋmat gaarib ki bi tee u niib, li ji sii tee nlee? Li sii tee manfoore ki tur kpeemm. 16 Li-i tee ki sinsinn boroboro na tee Yennu yarie, linba biar na mun bia tee u yare. Li-i tee ki tiik jiina tee Yennu yarie, li yiinii na mun bia tee u yare. 17 Juu teeb na tee nan ŋaak ni tiik nba ŋan nae, ki Yennu kɔnn tiik na yiinsia, ki jii muuk ni tiik yiinii, ki tukin nan ŋaak ni yar na, ki li taan yomm. Yimm nba ki tee Juu teeb na tee nan muuk ni tiik yiinu nae, ki gaan Yennu barŋanii nba nyii Juu teeb boor na, ki tee nan muuk ni tiik yiinu nba gaan bonŋann nba nyii ŋaak ni tiik ni na. 18 Li paak, a daa mɔk parbifaant nan yiinii nba ki Yennu kɔnnib ki lu ki bi tee nan ŋaak ni tiik yiinii na. Daa mɔk parbifaant, kimaan a tee yiinue, nyakire teena sommir, fin kaa teen nyakir na sommiri. 19 Ŋaan a saa jiin a, "Mɔniie, Yennu kɔnn yiinii na ki tur min nba tee muuk ni yiinu na yiare." 20 Li set tee mɔniie; baa ki teen yada na paak ki u kɔnnib, ki fin nba teen yada na paake ki u jiia tukin li paak. Ŋann amii a ji daa mɔk parbifaant li paaki, ŋaan kii mɔk jaŋmaanii. 21 Juu teeb nba tee nan ŋaak ni tiik na, Yennu din dat bi tuba; li paak, i daa dukii nan u kan fit dat i tuba muni. 22 Gotir Yennu nba mɔk ninbatinu ŋaan bia mɔk ninkoonii biaŋinba. U mɔk ninkoonii ki tur binba ki teen yada, ŋaan u tiina ninbaauk; fi-i kpaŋŋi teen yada, u bia sii tiina ninbaauk, ŋaan li-i kii tee nna, u mun bia saa kɔnnae ki lu. 23 Juu teeb-i lebit bi dudukit ki ŋmat teen Yiisa yada, Yennu saa te ki bin tukin nan ŋaak ni tiik na, kimaan u saa fit tun nnawa. 24 Yimm nba ki tee Juu teeb na tee nan muuk ni tiik yiinu nae, ki Yennu kɔnnir ki tukinir nan ŋaak ni tiik na. Li ki paar ki wun jii yiinii nba ki u kɔnn ŋaak ni tiik paak na, ki bia tukin nan li mɔŋ tiiki. 25 N naa waas, n loon ki yin bann woonin ni bonsiar, ki lin te ki i daa dukii nan i tee yandammi: Ki li tee a Juu tesiab tee tubkangbatae, ki li sii tee nnae ki tan tuu yoo nba ki binba kur ki tee Juu teeb ki Yennu gannib na n tan teen Yiisa yab. 26 Nnae ki Juu teeb kur saa la tinnu. Li tee nan laa sɔb Yennu gbouŋ ni a, "Tinntɔɔ saa nyi Sayɔnn doo nie, ki baar ki tan nyinn Jakɔb yaaboona biit kur ni. 27 N saa lor mɔlor nba na namm, yoo nba ki n nyinnib bi biit ni." 28 Juu teeb nba din ki sak Yiisa barŋanii na paake ki bi teen Yennu datai, ki li te yimm nba ki tee Juu teeb na la tinnu; Yennu nba din gann Juu teeb booru ki loomm na, bi yeejamm paake te ki u loomm; 29 kimaan Yennu-i gann niib ki turib piinii, u ji ki lebitir u pari. 30 Yimm nba ki tee Juu teeb na, i din ki sak Yennu mɔb; ki mɔtana ki u ji tini ninbaauk, kimaan Juu teeb nba ki sakɔ na paak. 31 Mɔtana, Juu teeb ki sak Yennu nan yaa din ki sakɔ biaŋinba nae; Yennu nba din tini ninbaauk biaŋinba na, u saa tinib ninbaauk nnae mun. 32 Yennu loon ki niib kur n bann nan bi tee mɔy‡tuk dammewa, ki wun fit tinib ninbaauk. 33 Yennu mɔkint ki mɔk gbennu; ki u yan nan bannu sumii bonchiann. Ŋmee mi ŋɔɔ Yennu dudukit ki saa fit bann u sɔnii? 34 Li sɔb Yennu gbouŋ ni a: "Ŋmee mi Yennu dudukit ki saa kpaanɔɔ? 35 Ŋmee mi tur Yennu siar ki li tee wun pa jiinɔ?" 36 Yennue din nan bonsiar kur, ki dia li kura, ki u paake ki li kur be. Ŋaant ki wun la paku mɔkmɔk nan mɔkmɔk. Mamɔmm.

Rom 12

1 Li paak, n naa waas, Yennu ninbatinu paake te ki n barimi maa yi jii i gbanant ki turɔ, ki lii tee mannu nba fo, kii waa ŋɔɔ kuukɔɔ, ki lin maŋɔ; ŋanne tee Yennu jiantu nan barmɔnii. 2 I daa te ki i binbeŋ tee nan tingbouŋ na niib binbeŋ na. Ŋaant ki Yennu n lebit i dudukit nan barmɔnii, ki ŋamm i binbeŋ fanu; ŋanne ki i saa bann Yennu yanbɔɔt nba ŋan ki bia tee fanu biaŋinba. 3 Yennu nba tinin ninbaauk na paake ki n yeen i kur a i sɔɔ daa dukii u par ni a u tee nijaann ki gar waa tee biaŋinba; ŋaant ki sɔɔ kur n dukin ki bann yada nba ki Yennu turɔ na bikinu. 4 Tɔn, nirɔ gbanant bɔkite, ki bɔkir kur mɔk li toonn, ŋaan taan ki tee gbananyennkɔɔ. 5 Li mun bia tee nnae nan taa yab bonchiann na, ŋaan timm nan Masia lakin tee gbananyennkɔɔe, ki ti kura na gbanant taan ki ji teen gbananyenn. 6 Li paak, sɔɔ kur n jii piinii nba ki Yennu Seyeeŋ turɔ na ki tun nan Yennu nba turɔ yaak biaŋinba na. A piinii na-i tee fii sɔkint Yennu maamiie, li ŋan fan tun a yada biaŋ; 7 ki a piinii na-i tee a somm leebiie, li ŋan fan somm; li-i tee fii want leebiie, li ŋan fan wann; 8 li-i tee ki a kpaan a leeb kpaaniie, fan tun nna; fin nba mun pi piinii, i tuun nan burchint; wunba mun mɔk yiikoo niib paak, li ŋan ki wuu tuun yiikoo toonn maŋ bonŋann; ki wunba mun mɔk ninbatinu nan niib, li ŋan wuu mɔk ninbatinu maŋ nan parpeenn. 9 Ŋaant ki lomm-ii tee barmɔnii lomm, ki soor linba ŋan na fanu, ŋaan kii nƒn biit. 10 I loon leeb man bonŋann nan nirɔ nan u naa bik nba tuu loon leeb biaŋinba na, ki kot kii baakit leeb; 11 kii tee nikakitii, ki daa tiin gbannyakiri, ŋaan kii tuun ti Yomdaanɔ toona nan i para kura, 12 kii mɔk parpeenn i dindann paak, kii mɔk mintir i biak dinu ni, kii mei Yennu yoo kur; 13 ki paat linba ki i mɔk ki tur Yennu niib nba ki mɔk na, kii gaan Yennu niib nba tee saamm kii chantirib i ŋei ni. 14 Binba mukisi, yin yetib a, "Yennu mɔsoŋŋann-ii be i paak." Mamɔmm, i yetib nna, i ji daa teemm mɔpor. 15 Nirɔ-i mɔk parpeenn, yii mun-ii mɔk parpeenn nanɔ; ki wunba mɔk parbiir, yii mun-ii mɔk parbiir nanɔ. 16 Yii mɔk man duduk-yennkɔɔ ki daa mɔk dont-n-mɔŋ; ŋaan kii saak toona nba ki mɔk dont-n-mɔŋi, ki daa dukii nan i mɔk ninyentiri. 17 I daa tuun biit ki jiint biit paaki; kotir i mɔŋ kii tuun linba ki niib kur saa la ki li ŋan. 18 Yii yabir i mɔŋ man kii mɔk parmaasir nan niib kur. 19 N naa walonkai, i kpan daa tuun biit ki jiint biit paaki, ŋaant ki Yennu n pa pann maŋ. Li sɔb Yennu gbouŋ ni a, "Min kuukɔɔe mɔk yiikoo nba saa dat niib tuba; mine saa pa pann maŋ, min Yennue pak na." 20 Yii tee nan laa sɔb Yennu gbouŋ ni na a, "A dataak-i mɔ kon, fan dinnɔ, nyunnyukiru-i soorɔ, fan turɔ nyun wun nyu; ki fi-i tee nna, a dintɔ feie." 21 Daa ŋaant ki biit n nyannani, ŋaan jii toonŋana ki nyann biit.

Rom 13

1 Nirɔ kur-ii saak yent damm mɔi; kimaan sɔɔ ki mɔk u mɔŋ yiikoo ki li ki nyii Yennu boori. Yennue te ki binba mɔk yiikoo na mɔk yiikoo. 2 Wunba ki saak yent damm sennu, li want nan u bia ki saak Yennu mɔbi; ki wunba kur tuun nna baat nan tubdatue u mɔŋ paak. 3 Binba tuun toonbiit nae tiin yent damm jaŋmaanii, ŋaan binba ki tuun toonbiiti, bi ki tiin yent damm jaŋmaanii. I-i kii loon yii tiin yent daanɔ, li ŋan ki yii tuun linba ŋan, ki wun paki; 4 u tee Yennu toontunnɔe ki tuun linba ŋan ki teeni; ŋaan fi-i tuun toonbiit, fii tiinɔ, kimaan u mɔk yaak nba saa dat a tubir. U tee Yennu toontunnɔe ki see Yennu taar ni ki daar binba tuun toonbiit na tuba. 5 Li paak, li kpaa talas ki a gaar yent damm mɔi, ki li ki tee a mantik tiin tubdatu na kaa, ŋaan a mi nan li tee linba ŋane. 6 Li paake te ki ti pa lampo, kimaan Yennue senn yent damm na a yoo kur bin jiir ki dia tingbouŋ na bonŋann. 7 Li paak, turimm linba tee bi yar; li-i jaŋ nan bin gaar niib lampo, amii linba ki a mɔk paak lampo, fan pa turib; li-i jaŋ nan ki a baak nirɔ, fan baakɔ; li-i biakii jaŋ nan fii tiin nirɔ, fan tinɔ. 8 Daa mɔk sɔɔ panni. Yaa sii mɔk pann nba tee, yii loon i leeb man. Wunba loon u lɔɔ, li daanɔ gbeen Yennu sennu na kura. 9 Yennu sennu na yet a, "Daa chommi; daa kpi a lɔɔ; daa jaami; daa mɔk niɔŋ a lɔɔ bont paaki;" ki senn-yena biar ki pukin linba na paak ki li kur taan ki yet a, "I loon a lɔɔ nan faa loon a mɔŋ biaŋinba na." 10 Ki fi-i loon a lɔɔ, a kan tun bonbiir ki turɔ; kimaan lomme tee Yennu sennu na kur saku. 11 Yii tee nna man kimaan yaa mi yoo na nba tee biaŋinba na paak. Yoo maŋ baar nan yin fiir gɔɔn niwa. Ti tinnu daar pera, ki ki fɔk nan laa din fɔk biaŋinba yoo nba ki ti din piin ki teen Yiisa Masia yada na. 12 Nyiɔk na gaare, ki li ji yentir. Li paak, ŋaant man ki tin nyik bunbɔnn ni toona na, ŋaan jii yentu tɔbtiat. 13 Ŋaant ki ti toona-ii yeen nan niib nba tuu be yentu ni na, ki daa nyu daan ki yibi, ki daa tuun yuukpeentoona, koo ki chomm ki tuun jakint toona, koo ki tuun toonbiit booru booru, koo ki kɔn kunkɔna, koo ki mɔk funfunn nan leebi. 14 Yii tee nan ti Yomdaanɔ Yiisa Masia nba tee biaŋinba na, ŋaan nyik i gbanant loonbiit, ki ji daa dukii li po.

Rom 14

1 Gaat yadkanpɔɔna damm na man, ki daa nɔi namm mɔniɔk bi yada po. 2 Sɔɔ yadae te ki u di jeet kur, ki wunba yada ki paar na mun kɔɔ nant. 3 Ki wunba di jeet kura na daa yisin wunba kɔɔ jesiati, ki wunba mun kɔɔ jesiat na daa biir wunba di jeet kur na sanni, kimaan Yennu gaarɔwa. 4 A tee ŋmee ki saa biir sɔɔ toontunnɔ? Li tee u mɔŋ Yomdaanɔ nae n yet waa do koo waa baa, ki u set saa dowa, kimaan ti Yomdaanɔ mɔk paŋ nba saa te ki wun do. 5 Tɔn, nisiab mun dukii a dayena ŋan ki gar dalia, ki siab mun jii daa kur ki li jan. Sɔɔ kuri-i dia waa teen linba yada. 6 Wunba dukii a dayena ŋan ki gar dalia na, u tuun nna ki teen ti Yomdaanɔ baakire; ki wunba mun di jeet kur na, u tee nna ki teen ti Yomdaanɔ baakire mun, kimaan u teen Yennu niipoouk jeet na paak; ki wunba mun kɔɔ jesiat na mun tuun nna ki teen ti Yomdaanɔ baakir, ki mun bia teen Yennu niipoouk. 7 Sɔɔ kaa ki be ki fo u yur po, koo ki kpenn u loomm kuumi. 8 Ti-i fo, ti Yomdaanɔ paake te ki ti fo; ki ti-i kpo, u loomm paake ki ti kpo. Li paak, taa fo amii taa kpo, ti tee ti Yomdaanɔ yabe. 9 Masia din kpo ki bia fiir kuun ni a wun teen footib nan kpeemm Yomdaanɔe. 10 Ki fini, bee teen ki a biir a naa biki? Bee teen ki a yisin a naa biki? Ti kur tan saa set Yennu tɔɔnne ki wun bu ti buut. 11 Li sɔb Yennu gbouŋ ni a, "Maa set be na, booru kur saa gbaan n tɔɔnn, ki sɔɔ kur saa yet a n set tee Yennu. Min Yennue pak na." 12 Li paak, sɔɔ kur tan saa fiit u mɔŋe ki tur Yennu. 13 Li paak, ti daa biir leeb sana, ŋaan kii mi i para ni nan i kan te ki i naa bik n baa. 14 Min nan ti Yomdaanɔ Yiisa nba taan leeb ki ji tee niyenɔ nae teen ki n bann nan jeet kaa ki kɔɔ. Ŋaan sɔɔ-i dukin nan jesiat kɔɔ, ŋann li kɔɔ u boor. 15 Fi-i te ki a naa bik par biir jeet nba ki a di na paak, ŋann a ji ki tuun lomm toonn kaa. Nirɔ nba ki Masia din gaar u paak ki kpo na, a daa te ki wun nyik Yennu sɔnu a jedinu paaki. 16 Linba ki a dukii a li ŋan, a daa te ki niib n pak biit ki jiin li po. 17 Kimaan Yennu naan labaar ki tee dinu koo nyunu labaar kaa, ŋaan li tee popeenn nan parmaasir nan parpeenn yare ki Yennu Seyeeŋ turit. 18 Wunba waa Masia nna, Yennu sii mɔk parpeenn nanɔ, ki niib bia teenɔ baakir. 19 Li paak, ŋaant man ki tin yabir ki tun linba baat nan parmaasir, nan linba saa somm ti leeb. 20 I mi ki a biir Yennu toona, jeet paak. Jeet kur ŋane, ŋaan li ki ŋan ki a di jeet nba saa te ki a naa bik n baa. 21 Linba ŋan tee ki a nyik linba saa te ki a naa bik n baae, li-i lekii tee nant ŋmamu koo daan nyunu. 22 Faa teen yada ki jiin jeet dinu po biaŋinba na, ŋaant ki lii be fin nan Yennu sinsuuk ni. Wunba tun linba ki u dukin nan li ŋan, ki ki mɔk birsuk li paaki, parpeenn tee u yare. 23 Ŋaan wunba mɔk birsuk linba ki u di na paak, ŋaan di, u mɔk biit, kimaan u ki dir nan yada kaa. Nirɔ-i kii teen yada nan bonsiar ŋani, ŋaan tan tun li bont, li tee biite.

Rom 15

1 Timm nba ki ti yada chee na, li ŋan ki tii mɔk sukuru ki somm ti leeb nba yada daa ki chee na, ki daa tuun ti mɔŋ loomm kuukɔɔ kaa. 2 Ŋaant man ki ti kura baka-ii be ti naa waas ni ki sommib ki bin wei Yiisa Masia sɔnu fanu. 3 Ŋɔɔ Masia din ki loon wun tun u mɔŋ loommi. Li sɔb Yennu gbouŋ ni a, "Binba sukii fin Yennu na, bi sukii mine." 4 Linba kur sɔb Yennu gbouŋ ni na, li sɔb a tii tumiie. U gbouŋ maŋ teent sukuru, ki bia kɔɔntit para, a tii mɔk dindann. 5 Yennu nba teent sukuru ki kɔɔntit para na, wun turi dudukyennkɔɔ nan Yiisa Masia nba loon biaŋinba na; 6 ki i kura sii mɔk dudukyennkɔɔ ki dont Yennu nba tee ti Yomdaanɔ Yiisa Masia Baa na. 7 Yii gaan leeb man nan Masia nba gaari biaŋinba na, ki Yennu sann n la paku. 8 Maa yeen linba na paak tee a Masia din kpint u mɔŋ ki tee Juu teeb na toontunnɔe, ki wann nan Yennu set tee mamɔmm daanɔ, ki gbeen Yennu mɔsona nba ki u din senn ki tur bi yeejajaana na, 9 ki te ki binba ki tee Juu teeb na dont Yennu sann u ninbatinu paak. Li sɔb nnae Yennu gbouŋ ni a Defid yet a: "N saa tura niipoouk binba ki tee Juu teeb na boor, ki yin yanii ki paka." 10 Li bia sɔb ki yet a: "Yimm nba ki tee Juu teeb na, yii mɔk man parpeenn, yimm nan Yennu niib." 11 Li bia sɔb a: "Yimm nba ki tee Juu teeb na, pakin man ti Yomdaanɔ Yennu; nibooru kur n pakɔ bonŋann." 12 Aisaya mun din sɔb Yennu gbouŋ ni a: "Jese yaaboonn tan saa baar ki Yennu saa chabɔ yaak, ki u tan sii tee binba ki tee Juu teeb na yudaanɔ, ki bi tan sii mɔk dindann u ni." 13 Yennu nba turit dindann na, yaa teenɔ yada na paak, u saa turi parmaasir nan parpeenn bonchiann, ki ŋɔɔ Yennu Seyeeŋ paŋ saa te ki i dindann na n ŋamm yabit. 14 N naa waas, n mi n par ni nan i binbeŋ ŋan, ki i mi Yennu maan bonŋann ki fit ki kpaan i leeb; 15 ki maa sɔbin gbouŋ nba ki teeni na, n mɔk parcheenn ki yaa n tiari baryenii, kimaan Yennu mɔk ninbatinu n paak 16 ki te ki n tee Yiisa Masia toontunnɔ, a n mɔɔnt u barŋanii ki tur binba ki tee Juu teeb na, ki bi sii tee piinii ki teenɔ, ki u Seyeeŋ na saa te ki bin teen niŋamm ki penn u par. 17 Yiisa Masia paake ki n mɔk yuugontir Yennu toonn ni; 18 n loon ki n wanni toona nba ki Masia te ki n tun nae, ŋaan n kan fit pak nisiab toona po; u te ki n mɔɔnt u labaar na ki tur binba ki tee Juu teeb, ki bia tun bakitnauŋ toona nba din te ki bi sak u mɔb. 19 Yennu Seyeeŋ paŋ nae te ki n tuun bakitnauŋ toona na, ŋanne te ki bi bann paŋ nba ki u mɔk. Ki n nyii Jerusalem ki lin doi ni ki tan baar Ilirikum tiŋ ni ki mɔɔntir Masia barŋanii na siar kur po. 20 Ŋanne ki n lin nan ninmɔnn ki mɔɔntir Masia barŋanii na ki teen niib nba ki mi gbati; n ki loon mii lin kii lei siaminba ki niib poŋ dɔŋ mɔɔnti, 21 kimaan li sɔb Yennu gbouŋ ni a: "Niib nba ki bi daa ki mɔɔnt u maan ki turib na saa lar, ki binba daa ki gbat u po na saa bannir." 22 Tɔn, bona bonchiann tuu gɔɔr n sɔnu ki n ki fit baat ki gɔntiini. 23 Ŋaan mɔtanae ki n ji daa gbenn n toona nba be yaka na ni, li jii bina bonchianne ki n tuu loon man gɔni, 24 mɔtana n saa gɔniiwa; ki n gɔnu maŋ poorpo li kan wei, ki n sii loon yin sommin ki n saan Speenn tiŋ ni. 25 Ŋaan sinsinn n saa saan Jerusaleme, Yennu niib sommir paak, 26 kimaan Yiisaweira nba be Masedonia nan Akaya tinii ni na dukin dudukit ki yent bi para a bin lakin likirii ki tur Yennu niib nba tee tatimm ki be Jerusalem na. 27 Li tee mɔniie nan bi mɔŋ loomme ki bi teemm piinii na. Li ŋan bin turib, kimaan Yennu barŋanii nba nyii Jerusalem niib boor ki baarib na paak. Ŋanne te ki li ŋan nan bin teen piinii maŋ. 28 Mi-i baar Jerusalem ki turib piinii maŋ, n saa nyi leŋ ki gar i boor ki saan Speenn tiŋ ni. 29 N mi nan mi-i baar i boor, Masia sommir sii be ti ni bonchiann. 30 Tɔn, n naa waas, ti Yomdaanɔ Yiisa Masia sann paak, nan Yennu Seyeeŋ lomm paak, n barimii, a yii mei Yennu nan ninmɔnn n paak ki taanin, 31 ki wuu guun ki Judea tiŋ ni niib nba ki teen Yiisa Masia yada na daa kpimi; kii biakii meiɔ a piinii nba ki n saa tur Yennu niib na, bin gaar nan parpeenn. 32 Li-i tee ki i miar Yennu nna ki turin, ki u sak, n sii mɔk parpeenn, ki baar ki tan foi waan i boor. 33 Yennu nba teent parmaasir na i be nani. Mamɔmm.

Rom 16

1 Tɔn, n loon ki n wanni ti niipoo Fiibe po; u be Senkrea doo ni ki sommit Yiisaweira leŋ; li-i tee ki u baar i boor, 2 yin gaarɔ ti Yomdaanɔ Masia sann paak nan Yennu niib nba bo sii gaan bi leeb biaŋinba na, ki sommɔ waa loon linba i boor, kimaan u mun tuu sommit niib bonchiann, nan n mɔŋ gbaa. 3 N foont Akuila nan u ŋaapoo Prisila, binba tee n toontunleeb Yiisa Masia toona ni na. 4 Bi din jii bi manfoa ki tinn n manfoor, li paak ki n teemm niipoouk; li ki tee n kuukɔɔ kaa teemm niipoouku, ŋaan nan binba ki tee Juu teeb ki tee Yiisaweira nawa. 5 Ŋaan bia foont Yiisaweira nba lakii ki jiantir Yennu bi ŋaak ni na. Ki foont n yɔŋaŋ Epanetus, wunba din tee Asia tiŋ ni sinsinn nirɔ nba teen Masiaweirɔ na. 6 Ki foont Meeri, wunba din tuun bonchiann ki teeni na; 7 ki foont Andronikus nan Junias, binba tee n booru ni niib, ki min nan ŋamm din lakin kɔɔ dansarik; ki Masia toomiinba mib bonŋann na, ŋamme din sint teen Masiaweirawa ki n tan wei. 8 Ki foont n yɔŋaŋ Ampliatus, wunba ki n loonɔ ti Yomdaanɔ paak na. 9 Ki foont Urbanus, wunba tee ti toontunlɔɔ Masia toona ni na; ki foont n yɔŋaŋ Stakis mun biak. 10 Ki bia foont Apeles, wunba din la bikinu ŋaan lek bia daa waa Masia nan barmɔnii na; ki foont Aristobulus ŋaateeb; 11 ki foont n booru ni nirɔ nba ki bi yiu Herodionn na; ki foont Nasisus ŋaateeb nba teen ti Yomdaanɔ yada na. 12 Ki foont Traifena nan Traifosa, binba tuun ti Yomdaanɔ toona na; ki foont n yɔŋaŋ Pesis, wunba tuun ti Yomdaanɔ toona bonchiann na. 13 Ki foont Rufus, wunba mantik waa ti Yomdaanɔ sɔnu bonŋann na; ki foont u naa, wunba tuu loonin nan n tee u mɔŋ bike na. 14 Ki foont Asinkritus nan Flegonn nan Hemes nan Patrobas nan Hemas nan Masia niib kur nba be namm na. 15 Ki foont Filologus nan Julia nan Nereus nan u niipoo, nan Olimpas nan Yennu niib kur nba be namm na. 16 Yii foont leeb kii kpamii man; Masiaweira nba be lokir kur po foonti. 17 N naa waas, n kpaaniie, i mi man binba bɔkitir Yiisa niib ki dɔkib u sɔnu ni ki bia ki saak wannu nba ki i gaar na; lɔkitirib man; 18 li nibooru ki waa ti Yomdaanɔ Masia kaa, bi waa bi mɔŋ niɔŋo. Bi dia mɔmante ki kpann binba yaa dudukit ki chee na. 19 Tɔn, sɔɔ kur gbat yaa gaar Masia barŋanii biaŋinbawa, li paake ki n mɔk parpeenn nani. N loon ki yii mɔk yan ki jiin linba ŋan po, ŋaan daa saak bonbiiri. 20 Li kan yukir ki Yennu nba teent parmaasir na saa te ki yin ŋmaa Sintaanii yur paak. Ti Yomdaanɔ Yiisa Masia n sommi. 21 Tɔn, n toontunlɔɔ Timoti foonti; ki n ninjamm Lusius nan Jasonn nan Sosipata mun bia foonti. 22 Min Tesius nba sɔbin linba ki Pɔɔl pak na foonti, ti Yomdaanɔ sann ni. 23 Gayus, wunba tee min Pɔɔl ŋaadaanɔ, ki Masiaweira jiantir u ŋaak ni na mun foonti. Erastus, wunba tee doo na likguutɔɔ na, ŋɔɔ nan ti naa bik Kɔɔtus mun foonti. 24 [Ti Yomdaanɔ Yiisa Masia n somm i kura.] 25 Li ŋan ki tin baak Yennu, kimaan u fit te ki i set waau fanu nan maa mɔɔnt barŋanii ki jiin Yiisa Masia po, ki li fiit woonin ni barmɔnii nba din bɔr bina bina na. 26 Ŋɔɔ Yennu sɔkiniinba gaar ki sɔbir gbouŋ ni ki li fiit barmɔnii na; ki Yennu nba yɔɔ be maŋ tur mɔb a booru kur n bannir, ki la yaak ki teen Masia yada ki sak u mɔb; 27 ŋɔɔ kɔɔe tee Yennu ki tee yandaanɔ; niib kur n pakɔ mɔkmɔk nan mɔkmɔk, Yiisa Masia sann paak. Mamɔmm.

1 Korint 1

1 Min Pɔɔl nba ki Yiisa Masia yiinin a n teen u toomii Yennu loomm ni, min nan ti naa bik Sosenes sɔbin gbouŋ na 2 ki teen yimm Yenweira nba be Korint doo ni, yimm nba ki Yennu yiini ki i tee u popeenn damm na, yimme tee u yab ki taa nan Yiisa Masia, ki pukin niib nba be siaminba kur ki jiantir ti Yomdaanɔ Yiisa Masia; ŋɔɔe tee bi Yomdaanɔ, ki mun bia tee ti Yomdaanɔ na. 3 Ti Baa Yennu nan ti Yomdaanɔ Yiisa Masia n sommi ki bia turi parmaasir. 4 N teen Yennu niipoouk yoo kur i paak nan waa turi sommir Yiisa Masia paak na, 5 kimaan i la bonsiar kur i pinpakit ni nan i minu ni u boore. 6 Masia labaar nba ki ti din wanni na, i gaarir fanuwa. 7 Li paak, i ki pɔt Yennu Seyeeŋ piinii na yenn gbaa nan yaa guu daar nba ki ti Yomdaanɔ Yiisa Masia tan saa jen na. 8 U sii guui nan ti Yomdaanɔ Yiisa Masia jenu daar maŋ ki i tan kii mɔk biiti. 9 Yennu-i yaa u saa tun linba, u tuun ŋanne. U yiinie a yimm nan u bik ti Yomdaanɔ Yiisa Masia-ii mɔk mɔtaauk nan leeb. 10 N naa waas, n barimiie ti Yomdaanɔ Yiisa Masia sann ni a yin taan mɔb, ki mɔniɔk daa be i sinsuuk ni, ki yii taa mɔyemmkɔɔ nan dudukyennkɔɔ. 11 N naa waas, Kloe ŋaatesiab betin a i mɔk mɔniɔk nan leeb. 12 Linba ki n yeen na tee a i siab yaa bi tee Pɔɔl yabe, ki leeb mun yaa bi tee Apolos yabe, ki siab mun bia yaa bi tee Piita yabe, ki yemm mun yaa bi tee Masia yabe. 13 Masia maŋ bɔkit bɔkite-e? Bi din kpaa min Pɔɔl dapunpunn paak i paakii? koo bi wuri Yennu nyunwuru min Pɔɔl sann paakii? 14 N teen Yennu niipoouk nan maa ki wur i sɔɔ Yennu nyunwuru na, see Krispus nan Gayus. 15 Li paak, sɔɔ kan fit yet a bi wurɔ Yennu nyunwuru n sann ni. 16 N bia wur Stefanas ŋaateeb Yennu nyunwuru, ŋaan n ji ki tian maa wur wunba ki pukini. 17 Kimaan Masia ki tumin a n tan wur niib; u tumin a n tan mɔɔnt u barŋanii nae ki tur niib. Li ki tee a n jikit nisaarik mir kaa ki beeribi; mi-i bonni kii tuun nna, li bo saa te ki Masia nba kpo dapunpunn paak na, u kuun n teen yanna. 18 Binba bot Yennu sɔnu ni na jii Masia kuun dapunpunn paak labaar na ki li tee yanne, ŋaan timm nba tinn na mi nan li tee Yennu paŋe. 19 Li sɔb Yennu gbouŋ ni a u yet a, "N saa biir yandamm minu na ki te ki bannteeb bannu na n biar yann na." 20 Li paak, tingbouŋ na yandamm nan bannteeb nan mɔnɔdamm na be lee? Yennu te ki tingbouŋ na yandamm teen yanna. 21 Yennu nba mɔk yan na te ki tingbouŋ na teeb yan kan fit te ki niib n bannɔ. Li paak, ki u te ki binba teen Yiisa yada na tinn, jatii labaar nba ki ti mɔɔntir ki teen niib na paak. 22 Juu teeb loon bin la bakitnauŋ toonaewa ki fit lian teen yada; ki Griik teeb mun loon yan; 23 timm ŋarin mɔɔntir ki wantib biaŋinba ki Masia kpo dapunpunn paak nae, ki maan maŋ dont Juu teeb wutoa, ki bia tee jatmaan ki teen binba ki tee Juu teebi. 24 Juu teeb nba ki Yennu gannib na nan binba ki tee Juu teeb ki Yennu bia gannib na ŋarin mi nan Masia kuun labaar na tee Yennu paŋ nan u yame. 25 Linba ki Yennu tuun ki nisaarik jiir ki li tee jatii na, li mɔk yan ki gar nisaarik yan; ki linba ki Yennu teen ki nisaarik dukii a li ki mɔk paŋ na, ŋaan li mɔk paŋ ki gar nisaarik yar. 26 N naa waas, dukint man yaa din tee biaŋinba yoo nba ki Yennu yiinii na. Nisaarik minu ni, i waaminnae din mɔk yan koo paŋ koo ki tee nijaana. 27 Ŋaan Yennue gann binba tee jatit tingbouŋ na teeb boor, a wun te ki yandamm n di fei; ki bia gann tatimm tingbouŋ na teeb boor a wun te ki paŋ damm n di fei. 28 Yennue gann tarii, nan binba ki mɔk nyɔɔt, nan binba ki tee siar, a wun teen linba ki niib dukii a li mɔk nyɔɔt na yann. 29 Yennu teen nnae a sɔɔ daa nyu bara u tɔɔnn. 30 Ŋɔɔ Yennue taan timm nan Yiisa Masia ki u tee ti yan. U paake ki Yennu nyinnit daabsin ni, ki yet a ti tee niŋamm u boor, ki ji tee u niib. 31 Li paak, yii tuun linba sɔb Yennu gbouŋ ni na a, "Wunba nyu bara, wun nyu bara maŋ Yennu nba tun linba paak."

1 Korint 2

1 N naa waas, maa din baar i boor ni na, n din ki mɔɔntir Yennu labaar na ki teeni nan mɔmant koo nisaarik minu kaa. 2 Ŋaan maa din be nani na, n din ki mɔk duduksiat ki pukin Yiisa Masia nan u dapunpunn paak kuun na po. 3 Maa baar i boor yoo nba, n din chɔke, ki jaŋmaanii nan jijekit soorin. 4 N ki pak labaar maŋ nan minu nba saa maŋ niib kaawa ki bin sakiri, ŋaan n pake ki Yennu Seyeeŋ na wann u paŋ. 5 Yaa teen Yiisa Masia yada na, li ki tee nisaarik yan paak kaa, ŋaan li tee Yennu paŋ paake. 6 Mamɔmm, ti piak nan yame ki teen binba ki bi para chee Yiisaweiu ni na. Li ki tee tingbouŋ na niib yan koo tingbouŋ na paŋ damm nba ki bi panii saa teen yann na kaa. 7 Yan nba ki ti piak na tee Yennu woonin ni yan nba wooe ki nirɔ ki mi, linba ki Yennu dɔŋ gann a wun donnit, ki sɔɔ durinya daa din ki nan na. 8 Tingbouŋ na yudamm sɔɔ kaa ki mi yan na. Bi-i bonni mir, bi din bo kan kpaa ti Yomdaanɔ, wunba yen paku kura na dapun-punn paaki. 9 Li sɔb Yennu gbouŋ ni a: "Linba ki nirɔ ki la, ki bia ki gbati, ki bia ki dukin a li saa fit teen na, ŋanne ki Yennu teen siir ki guun binba loonɔ na." 10 Ŋanne ki Yennu Seyeeŋ na te ki ti bannir, kimaan Seyeeŋ na mi bont kur nan Yennu woonin ni maan gbaa. 11 Nisaarik seek nba be u ni na kuukɔɔe mi nisaarik dudukit. Nnae mun, sɔɔ ki mi Yennu dudukit see Yennu Seyeeŋ na kɔɔ. 12 Seek nba ki ti gaar na, u ki tee tingbouŋ na seek kaa, ŋaan u tee Yennu Seyeeŋ nba saa te ki tin bann piinii nba ki u turit nae. 13 Li paak, ti ki piak maan nba tee nisaarik yan wannu; ŋaan ti piak linba ki Yennu Seyeeŋ wantit, ki bia want Yennu barmɔnii ki teen niib nba ki Yennu Seyeeŋ be bi ni nae; 14 ŋaan wunba ki mɔk Yennu Seyeeŋ maŋ, li yɔɔ ki gaan Yennu Seyeeŋ na maami, kimaan li tee jatiie ki turɔ, ki u kan bann li paaki, kimaan li bannu nyi Seyeeŋ na nie. 15 Ki wunba mɔk Seyeeŋ na bant bona kur paake, ŋaan nirɔ kan fit bann u binbeŋ ni, 16 nan laa sɔb Yennu gbouŋ ni a: "Ŋmee saa fit bann Yennu dudukit ki ŋmakitɔɔ?" Ŋaan timm ŋarin mɔk Masia dudukit.

1 Korint 3

1 N naa waas, li tee mɔniie, n din ki fit pak ki turi nan maa din bo saa pak ki tur niib nba mɔk Yennu Seyeeŋ na; n din pak ki turi nan maa bo saa pak tur tingbouŋ na teeb nae, ki i binbeŋ bia tee nan waas binbeŋ nae Masia sɔnu ni. 2 N mɔɔnti biime, li ki tee jekpakira kaa, kimaan i ki jaŋ nanni. Mɔtana gbaa i bia lek daa ki jaŋ nanni, 3 kimaan i binbeŋ bia daa tee nan tingbouŋ na niib binbeŋ nae; kimaan funfunn nan mɔniɔku be i sinsuuk ni, i ki waa tingbouŋ na teeb binbeŋ kaa-a? 4 Ki sɔɔ-i yet a u tee Pɔɔl yɔɔe, ki lɔɔ mun yet a u tee Apolos yɔɔe, ŋann i ki tuun nan tingbouŋ na teeb na kaa-a? 5 Ŋmee tee Pɔɔli, ki ŋmee mun tee Apolosi? Ti kpan tee Yennu toontunna nba din te ki i sak Yiisa mɔb nae. Ti kur na tuun toona nba ki ti Yomdaanɔ turit a tii tuume. 6 Min din bur bonbooriie, ki Apolos mun maant nyun, ŋaan Yennue te ki li pia kpaat. 7 Wunba bur nan wunba maant nyun ŋarin ki tee siar-i; Yennue tee siar, kimaan ŋɔɔe te ki li kpaatir. 8 Bɔkitu kaa wunba buur nan wunba maant nyun na sinsuuk ni. Yennue saa turib nyɔɔt, baa tun linba na paak. 9 Ti lakin tuun ki teen Yennue. I tee nan Yennu kpaab nae, ki bia tee nan Yennu diiuk na. 10 Yennu nba sommin biaŋinba na paak, n tee nan tanmaaŋanɔ nae, ki piin fiakir, ki sɔɔ mun maa tɔɔnt li paak. Ŋaan wunba kur maa ki tɔɔnt li paak, wun soor u mɔŋ. 11 Yennu din jii Yiisa Masia ki u tee fiakire, ki fiaksiar ji kaa ki sɔɔ saa fit piinii. 12 Siab saa jii salimae, koo nabint, koo tanchincheena, ki maa fiakir maŋ paak; siab mun saa jii daate, koo mɔɔt, koo kakaa, ki chaan fiakir maŋ paak. 13 Masia baaru daar maŋ nie ki sɔɔ kur toona nba tee biaŋinba tan saa nyi paanu. Muue tan saa bikin sɔɔ kur toona ki fiit wann laa tee biaŋinba. 14 Muu-i kii dii linba ki nirɔ maa tɔɔn fiakir maŋ paak na, ŋann ŋarin u saa la nyɔɔta. 15 Wunba yar dii muu, u saa kɔŋ li nyɔɔta, ŋaan u mɔŋ ŋarin saa tinna ki li sii tee nan u chiar nyii muu ni nae. 16 I tee Yennu diiuko, ki Yennu Seyeeŋ be i ni; i ki mi nna-a? 17 Li paak, wunba biir Yennu diiuk, Yennu mun saa biir li yɔɔwa. Kimaan Yennu diiuk tee diyeeŋe; ki yimme tee diiuk maŋ. 18 Sɔɔ daa kpann u mɔŋi. Sɔɔ-i be i sinsuuk ni ki dukii nan u tee yandaanɔe tingbouŋ na binbeŋ ni, li ŋan wun kpant u mɔŋ jatuk ki set teen yan daanɔ. 19 Linba ki tingbouŋ na teeb dukin ki li tee yan na, li tee jatiie Yennu boor, nan laa sɔb Yennu gbouŋ ni a, "Yennu biir yan damm bannu," 20 ki bia sɔb leer boor a, "Ti Yomdaanɔ mi nan yan damm dudukit tee yanne." 21 Li paak, sɔɔ daa mɔk dont-n-mɔŋ nisaarik paaki. Siar kur tee i yare; 22 min Pɔɔl nan Apolos nan Piita nan tingbouŋ na, nan manfoor nan kuun, nan mɔtana nan yoo nba baat na, yimme yen linba na kura. 23 Ki Masia mun yeni, ki Yennu mun yen Masia.

1 Korint 4

1 Ŋann i jiit ki tii tee Masia toontunna nba ki Yennu gann ki guunit u woonin ni maan na. 2 Li paak, linba tee majaann tee nnae, li ŋan ki toontunnɔ-i tuun nan barmɔnii. 3 Ŋaan li-i tee ki i bu n buut nan nisaarii nba tuu bu bi leeb buut na, n baka kaa; n ki bu n mɔŋ buut gbaa. 4 N nɔɔk ni yeene, ŋaan li ki want a n ki tuun biiti, ŋaan ti Yomdaanɔe tee wunba bu n buut. 5 Li paak, i daa bu sɔɔ buut mɔtana, kii guu yoo nba ki ti Yomdaanɔ tan saa baar na, ŋɔɔe tan saa jii linba be bunbɔnn ni ki wannir paanu ni, ki fiit para ni maan paanu ni; li yooe sɔɔ kur tan saa la u nyɔɔt nba tee linba Yennu boor. 6 N naa waas, i paake ki n bikin linba na kur ki tur n mɔŋ nan Apolos, a i tumii ti boor ki wei Yennu gbouŋ nba wann biaŋinba na bonŋann, ki sɔɔ daa dont u mɔŋ ti yenɔ paak ki gaar lɔɔ na. 7 Ŋmee tura saakatuk leeb ni? Yennu kaa tura linba kur ki a mɔk na-a? Ki bee teen ki a dont a mɔŋ, ki li tee nan linba ki a mɔk maŋ ki tee piinii kaa na? 8 I poŋ mɔk linba kur ki i loonii? I poŋ teen gordammaa? Taa lek kaa i boor ni na, ŋaan i tee kpanbara-a? N summan kii set tee kpanbarae ki timm nan yimm n taan ki tee kpanbara. 9 Min yaa boor n dukin nan Yennu gann timm nba tee toomiinba na ki ti tee tariie, ki tee nan niib nba ki bi saa kpib paanu ni, ki teemm yaarlituk niib, ki tingbouŋ na teeb kur nan malakanba gorii. 10 Ti tee jatite Masia paak, ŋaan yimm ŋarin tee yandamme Masia sɔnu ni; ti ki mɔk paŋ, ŋaan yimm ŋarin mɔk paŋ; ki niib teeni baakir ŋaan yisin timm. 11 Laa nyii sianyoowa mɔkmɔk nan mɔtana, ti lin kome nan nyunnyukiru, ki lia tachiat, ki bi boot, ki ti lin yirib ki kaa binbeboori. 12 Ti niŋinie ki ti tuun ki di; bi-i sukirit, ti tuu jiimm maŋamme; bi-i dintit fara, ti tuu mɔk sukurue; 13 bi-i pak biir ti sana, ti tuu pak jiimm nan lomme. Ti kpant tariie, ki tee nan tingbouŋ na tanpenn paak mɔɔt na, ki bia tee nan tingbouŋ na jakint na ki tan tuu mɔtana. 14 N ki sɔbin na ki teeni a n dinni fei kaa, ŋaan n kpaaniie yaa tee n walonkai na paak. 15 Ŋaan li-i tee ki i lek mɔk wannteeb tusaa piik Masia ni, i ki mɔk baanba bonchianni; kimaan Yiisa Masia nie ki n mari barŋanii nba ki n wanni na paak. 16 N barimiie, yii waa n binbeŋ man. 17 Linba na paake ki n tuun Timoti i boor, wunba tee n bilonkak ki tee barmɔnii daanɔ ti Yomdaanɔ ni; u saa tiari maa be biaŋinba Masia ni, nan maa lin want Masiaweira biaŋinba siaminba kur. 18 Siab mɔk dont-n-mɔŋe, ki dukii a n kan baar ki gɔniini. 19 Li-i tee ki ti Yomdaanɔ loon, n saa gɔni mɔtana, ki la dont-n-mɔŋ damm na, li ki tee bi pinpakit paak kaa, ŋaan n yaa n laan bi set mɔk paŋ amii bi ki mɔki. 20 Yennu naan ki tee mɔb ni yetu kaa, li tee paŋe. 21 I loon lanne? I loon ki n baar i boor nan ninmɔnn amii n baar soon nnae?

1 Korint 5

1 Li set tee mɔniie ki bi yeen a joonbaanu be i ni, linba ki binba ki waa Yiisa Masia na mɔŋ kan tumi. N gbat a sɔɔ be i sinsuuk ni ki dɔɔ nan u baa poo; 2 ŋaan ki i mɔk dont-n-mɔŋ ki ki tiin fei li paaki. Li ki jaŋ nan i para n biirii? Li ŋan ki yin nyinn li nibooru i ni. 3 Maa lek be banfɔkir nani na, ŋaan n dudukit be i ni, ki n poŋ dukin ki bu daanɔ maŋ buut ti Yomdaanɔ Yiisa sann niwa, ki li tee nan n lakin be nani nae. 4 Ti Yomdaanɔ Yiisa sann paak, n seek nan yimm-i taŋŋi lakin, ti Yomdaanɔ Yiisa paŋ ni yoo nba, 5 yin jii nirɔ nba tun toonbiit maŋ ki teenɔ Sintaanii nuu ni ki wun biir u gbanant, ki lin te u seek n tan la tinnu ti Yomdaanɔ baaru daar na ni. 6 I dont-n-mɔŋ maŋ ki ŋani. I ki mi a datiŋ waaminnae te ki boroboro yon kur fuutir piirii? 7 Li paak, yi nyik binbenkper biit na, kii tee nipaamm, nan i set tee niib nba nyik biit tumue na, kimaan Masia nba tee ti maruŋ na gaar ti paak ki kpowa. 8 Li paak, taa waa u sɔnu biaŋinba na, ŋaant ki tin nyik binbenkper na, ki nyinn dudukbiit nan biit kur, kii jikii tee u weira nan barmɔnii, ki biit kaa ti ni. 9 N poŋ sɔb gbouŋ ki turi ki yet a i daa waa joonbaariti. 10 Li ki tee n yaa i nyinn i mɔŋ tingbouŋ na joonbaarit ni, koo nianchiɔŋ damm ni, koo nanyukii, koo patmannteeb ni kaa; li-i tee nna ŋanimi, see ki i nyii tingbouŋ na ni. 11 N sɔb ki yeeni a i daa tɔkii nan daanɔ nba yaa ŋɔɔ waa Masiae ŋaan baa joona, koo ki mɔk nianchiɔŋ, koo ki mann pata, koo ki mɔk sanjaauŋ, koo ki tee danyuyuukpeenn, koo ki tee nanyukɔɔ na; i poŋ daa kaar nan li daanɔ ki di jeeti. 12 Li ki tee n toonn kaa ki n sii bu binba ki waa Masia na buuti. Yennue saa bu bi buut; ŋaan i leeb nba tee Masiaweira nae ki i sii bu bi buut. 13 Li poŋ sɔb Yennu gbouŋ ni a, "I ber biitdaanɔ na ki nyinnɔ i ni."

1 Korint 6

1 I yenɔ-i mɔk maan nan u lɔɔ nba waa Masia, ŋaan kii ki saan nann Masiaweira boor ki bi saa ŋammir, ŋaan saan nann binba ki waa Masia na buut boor, li sii mɔk fei hei. 2 I ki mi a Masiaweirae tan saa bu tingbouŋ na teeb buutii? Ki li-i tee ki i tan saa bu tingbouŋ na teeb buut, ŋann i kan fit bu barbisbis mɔtana? 3 I ki mi a ti tan saa bu malakanba buutii? Nlee ki i kan fit bu mɔtana binbeŋ na barii? 4 Li-i tee ki i mɔk maan, bee ki i jikitir ki saa nann binba ki tee Masiaweira na boori? 5 Linba na tee feie ki turi. Mɔniɔku baar yimm Masia niib sinsuuk ni, sɔɔ kaa i ni ki mɔk yan nba saa fit ŋamm maan maŋi? 6 Ŋaan i naawayemm saa nan bi leeb barbuurɔ nba ki teen Masia yada na boor, ki u bu bi buut. 7 Yaa lek mɔk barii nan i naa waas na gbaa, ŋaan li tee biite. A naa bik-i tun biira koo ki ŋmaba, ki a kurint sikin, li ki sɔ-ɔ? 8 Ŋaan yimme tuun biit ki teen leeb ki jaan leeb, ki bia lek tee nna ki teen i leeb nba tee Masiaweira na. 9 I ki mi nan biitdamm tan kan kɔɔ Yennu naan ni-i? I daa kpann i mɔŋ; binba tee joonbaarit koo bonchonchona koo patmannteeb koo jab nba mɔk niɔŋ ki dɔɔ nan bi jaleeb 10 koo nanyukii koo nianchiɔŋ damm koo danyuyuukpeena koo sanjaanjanna koo fatiteeb, binba na kur nan bi yenɔkɔɔwa kan kɔɔ Yennu naan ni. 11 I siab din tuu tee nnae; ŋaan ki Yennu wuur i biit na, ki i ji tee u niib ki bia tee popeendamm u peŋ, ti Yomdaanɔ Yiisa Masia nan Yennu Seyeeŋ na paak. 12 I siab yeen a, "Siar ki kɔɔ." Li tee mɔniie; ŋaan bont kur kaa ŋan ki turiini. I yaa siar ki kɔɔ, li set tee mɔniie, ŋaan min ŋarin kan sak ki bonsiar n yentimi. 13 I siab yeen a, "Jeet tee poor yare, ki poor mun tee jeet yar." Mɔniie; ŋaan Yennu saa gɔɔr li ŋanlee na kur. Yennu ki nan ti gbanant a tin jiir kii chommi, ŋaan a ti jiir ki lii tee ti Yomdaanɔ yar. Ti Yomdaanɔe yen ti gbanant na. 14 Yennue din fiin ti Yomdaanɔ kuun ni, ki u mun tan saa jii u paŋ ki fiinta. 15 I ki mi nan i gbanant na gaa nan Masia gbanantee? Li paak, daa jikit gbanant nba gaa nan Masia gbanant na ki gaant nan poochonchona. 16 Wunba jii u mɔŋ ki taan nan poochonchonn, ŋɔɔ nan li daanɔ ŋarin taan gbananyennkɔɔe na. Li sɔb Yennu gbouŋ ni a, "Jɔɔ nan u poo saa taan ki tee gbananyennkɔɔe." 17 Wunba taan u mɔŋ nan ti Yomdaanɔ, ti Yomdaanɔ nan li daanɔ taan ki tee seyennkɔɔe. 18 Yi nyinn i mɔŋ man bonchonchonsin ni. Toonbiit kur nba biar, li ki tuun gbanant ni; ŋaan wunba chomm ŋarin biir u mɔŋ gbanante. 19 I gbanant na tee Seyeeŋ nba ki i gaar Yennu boor na diiuko, ki u be i ni. I ki mi nnae-e? I ki yen i mɔŋi, Yennue yeni; 20 u daaie; li paak, yi jii i gbanant kii tuun linba sii dont u sann.

1 Korint 7

1 N yaa n jiin i buboit nba ki i daan sɔb turin nae. Li ki ŋan ki jɔɔ n kpian poo; 2 ŋaan bonchonchonsin paak, li ŋan ki jɔɔ kur-ii mɔk u mɔŋ poo, ki poo kur-ii munii mɔk u mɔŋ sɔrɔ. 3 Li ŋan ki jɔɔ n jii u mɔŋ ki chab u poo, ki poo mun n jii u mɔŋ ki chab u sɔrɔ. 4 Poo ki yen u mɔŋ gbananti, u sɔrɔe yen. Jɔɔ mun ki yen u mɔŋ gbananti, u pooe yen. 5 I daa y‡en leeb i gbanant loommi, see yoo nba ki i tan taan mɔyommkɔɔ a yin miar Yennu; ki li poorpo yin bia taan leeb, ki Sintaanii daa fit bikinti ki nyanti, yaa kan fit soor i mɔŋ na paak. 6 Li tee maame ki n yet, ŋaan li ki tee sennu kaa. 7 N bo loon ki sɔɔ kur-ii be nan maa be biaŋinba nae, ŋaan sɔɔ kur nan u piiniie ki li nyii Yennu boor jiak jiak. 8 N yeen na ki teen jakpaka nan pookarankaana nan pakɔie, a bi-i saa sak kii be bi kɔɔ nan maa be biaŋinba na, li bo sii ŋan ki turib. 9 Ŋaan bi-i kii fit so bi mɔŋi, ŋann bin kɔɔn poob, ki poob mun n kun jab; li sɔ nan yaa sii mɔk li niɔŋ ŋaan kan fit maakiri. 10 Binba mɔk jab, n teenii sennue, li ki tee min kaa senni, ŋaan ti Yomdaanɔe senn, a poo daa mi nyikit u sɔrɔ. 11 Ŋaan wuu nyik u sɔrɔ, u ji daa kun jaganɔ, ŋaan kii tee pookaran-kaann; koo wun di sindant ki ŋmat u sɔrɔ boor. Jɔɔ-ii munii mi wun y‡t u ŋaapoo. 12 N piak na ki teen binba biar nae, ti Yomdaanɔ kaa paki, nan Masiaweirɔ-i mɔk poo, ki poo na ki tee Masiaweirɔ, ŋaan ki li tee poo maŋ loommue a wuu be u boor, jɔɔ na daa lubinɔ. 13 Poo nba tee Masiaweirɔ mun-i mɔk sɔrɔ nba ki tee Masiaweirɔ, ŋaan ki li tee jɔɔ maŋ loommue a wuu diau, poo maŋ daa yaatir ŋaan nyikit u sɔrɔ na. 14 Jɔɔ nba ki tee Masiaweirɔ, ŋaan ki u ŋaapoo tee Masiaweirɔ, poo maŋ paake saa te ki jɔɔ na tan yeen; ki poo nba ki tee Masiaweirɔ na mun, ŋaan ki u sɔrɔ tee Masiaweirɔ, jɔɔ maŋ paake saa te ki poo na tan yeen. Li-i bonni kii tee nna, bi waas bo kii yeeni, ŋaan laa tee nna na paak, bi waas mun tan sii yeene. 15 Ŋaan wunba ki tee Masiaweirɔ-i loon wun y‡t u lɔɔ, wun ŋaan ki wuu saa. Ŋann ŋarin sennu ji ki so bi sɔɔ. Yennue yiinit a tii be nan parmaasir. 16 Fin poo, a teen nlee bann nan a kan tinn a sɔrɔ? Ki fin jɔɔ muni, a teen nlee bann nan a kan tinn a poo? 17 I be binbeŋ nba ni ki Yennu senna, nan faa be biaŋinba ki u yiina na. 18 Wunba dɔŋ pot u punn ŋaan tan teen Masiaweirɔ, ŋaant ki wun dian nna; wunba mun ki pot ŋaan teen Masia-weirɔ, wuu kii loon u ji daa porii u punni. 19 Wunba pot nan wunba ki pot, li kur tee yanne. Linba mantik tee barkpann tee i dia Yennu sennu na bonŋann. 20 Sɔɔ kur-ii be binbeŋ nba ni ki u tuu bewa ki tan teen Masiaweirɔ na. 21 Li-i tee ki a din tee daabir yoo nba ki a teen Masiaweirɔ na, a daa te ki li daamiia ni, ŋaan fi-i saa la yaak ki nyinn a mɔŋ daabsin ni, fan teen nna. 22 Wunba poŋ tee daabir yoo nba ki u teen Masiaweirɔ na, u ji tee ti Yomdaanɔ yɔɔe; nnae mun, li-i tee ki a yen a mɔŋ yoo nba ki a teen Masiaweirɔ na, a ji tee Masia daabire. 23 Yennue daai; li paak, i daa tee niib daaba. 24 N naa waas, i be nan Yennu man nan yaa daan be binbeŋ nba ni yoo nba ki i teen Masiaweira na. 25 Mɔtana, n ji piak ki teen binba daa ki kɔɔn poob koo ki daa ki kun jab nae, ŋaan ti Yomdaanɔ ki chabin a n betib nna; ti Yomdaanɔ ninbatinu paake ki n teen barmɔnii daanɔ. 26 Mɔtana ninmɔnn na paak, n dukin nan li ŋan ki nirɔ-ii be biaŋinba ki u tuu be na. 27 Li-i tee ki a mɔk poo, ŋann ŋarin a daa beerɔ. Li-i tee ki a ki kɔɔn poo, faa ji daa kɔɔnt. 28 Fi-i kɔɔn poo, li ki tee biiti; poo mun-i kun jɔɔ, li ki tee biiti; ŋaan n loon ki n nyinni mukisuk nba ki binba mɔk poob nan binba mɔk sɔrib laat tingbouŋ na nie. 29 N naa waas, n loon ki n wanni nan yoo na ki fɔk, li paak laa nyii mɔtana ki saa li ŋan ki binba mɔk poob-ii be nan bi ki kɔɔn poob na; 30 ki binba mɔ, bii be nan bi ki mɔ na; ki binba mɔk parpeenn, bii be nan bi ki mɔk parpeenn na; ki binba kpentir, bii be nan bi ki mɔk na; 31 ki binba di tingbouŋ na manu, li ŋan ki bii be nan bi baka kaa leŋ na. Kimaan tingbouŋ na nba tee biaŋinba mɔtana na, li kan yukir nan garu. 32 N ki loon ki siar n daamiini. Jakpakir ŋarin gorii waa saa teen biaŋinba ki tun ti Yomdaanɔ toonae ki lin penn ti Yomdaanɔ par; 33 ŋaan pookɔɔntɔɔ baka be tingbouŋ na bona nie, waa saa teen biaŋinba ki penn u ŋaapoo par. 34 Li paak, u dudukit bɔkit munlee-e. Pookarankaann koo sapaamɔ baka mun be ti Yomdaanɔ toona nie nan waa saa teen biaŋinba ki u gbanant nan u seek-ii taŋŋii tee Yennu yar fanu; ŋaan wunba mɔk jɔɔ ŋarin gorii tingbouŋ na bona nan waa saa teen biaŋinba ki penn u sɔrɔ pare. 35 N piak linba na i mɔŋ sommir paake, li ki tee a n yaa n bari baruk kaa, ŋaan n loon yii be fanue, ki jii i mɔŋ pet ti Yomdaanɔ. 36 Jɔɔ-i mɔk sarkpeŋ ki u tan beer poo, ki jɔɔ na mɔk dudukit u po ki kan fit soor u mɔŋi, ŋaant ki wun tun biaŋinba ki u loon; li ŋan ki bin kɔɔn leeb. Li ki mɔk biit bi sinsuuk ni. 37 Ŋaan wunba par chee, ki u mi nan siar kan daamɔ, ki u saa fit soor u mɔŋ niɔŋ, ki dukin u par ni a u kan kɔɔnɔ, ŋanne ŋan. 38 Li paak, wunba kɔɔn u sarkpeŋ, li ŋan; wunba mun ki kɔɔn u sarkpeŋ, u tun linba ŋan ki gar wunba kɔɔn nawa. 39 Poo-i mɔk u sɔrɔ ki u daa be u manfoor ni, u ki yen u mɔŋi; ŋaan u sɔrɔ-i kpo, u ji mɔk yaak ki saa kun wunba ki u loon, ŋaan li ŋan ki u jɔɔ maŋ-ii tee Masiaweirɔ. 40 Ŋaan min yaa boor ŋarin, n dukin nan li-i tee ki u be ki ki kun jɔɔ, li sii manɔ ki gar waa bo saa kun jɔɔ; nnae ki n dukin, ŋaan n mi nan n mɔŋ mɔk Yennu Seyeeŋ.

1 Korint 8

1 Tɔn, ki jiin pata nant po, ti mi nan ti kur mɔk bannu, ki li set tee mɔnii. Bannu te ki nirɔ dont u mɔŋ, ŋaan lomm ŋarin sommit nirɔe Masia weiu ni. 2 Wunba dukii nan u mi siar, li daanɔ daa ki bann nan waa bo sii mi biaŋinba na. 3 Daanɔ nba loon Yennu, ŋɔɔe ki Yennu miu. 4 Tɔn, ki jiin nant nba ki bi mann pata na ŋmamu po; ti mi nan patir tee bont nba ki foe, ki bia mi nan Yen-yenɔkɔɔe be. 5 Pata-i lekii ji be gbaa, ki be sanpaapo koo tingbouŋ na ni, kimaan pata bonchiann nan yomdamm nba ki niib jiantir na bonchiann be, 6 ŋaan timm yaa boor ni ŋarin, Yen-yenɔkɔɔe be; ŋɔɔe tee ti Baa Yennu nba din nan bonsiar kur, ki u nie ki ti fo; ki Yomdaan-yenɔkɔɔe be, wunba tee Yiisa Masia. U paake ki bonsiar kur nan; u paake biak ki ti fo. 7 Sɔɔ kur kaa mɔk li yami. Siab mantik maan pata ki yukira, li paak, bi-i dii li jeboorik, bi bia tuu daa dukii nan nant maŋ set tee patir nante. Bi dudukit ki paari, ki bi dukii a bi mɔk biit. 8 Ŋaan nant kaa saa te ki ti fɔk nan Yennu; kimaan ti-i dii, li ki pukiit siari; ti-i biakii kii dii, li bia ki jiintit poori. 9 I mi man yin tan jii i yaak na ki lin kpant baruk ki tur niib nba yada waar na. 10 Ki wunba yada waar-i la yimm nba mɔk bannu na ki i be poochianfeek ni ki di, li saa te ki ŋɔɔ n ji di jeet nba tee pata yare. 11 Fin nba tee banntɔɔ na, a bannu na saa biir a naa bik nba yada ki paar nae, wunba ki Masia din gaar u paak ki kpo na. 12 Fi-i tee nna ki tuun biit ki teen a naa waas, ki biir bi dudukit nba ki chee na, li want nan a tuun biit ki teen Masiae. 13 Li-i tee jeet nba ki n di na paakie te ki n baant n naa biki, ŋann n ji kan ŋman nant ki lin te wun baa.

1 Korint 9

1 N ki yen n mɔŋii? N ki tee Masia toomii kaa-a? N ki la ti Yomdaanɔ Yiisa-a? N toona nba ki n tuun ki teen ti Yomdaanɔ na paak kaa ki i mun tee mɔsakdammii? 2 Siab-i kii sak a n tee Masia toomii, ŋaan yimm ŋarin, li kpaa talas yin sak, kimaan yaa tee mɔsakdamm na, ŋanne saa wann nan n set tee toomiie. 3 Niib-i piak ki biir n sann, n saa jii nae ki nyi leŋ: 4 Ti ki mɔk yaak nba ki ti sii di ki nyu-u? 5 Ti bia ki mɔk yaak nba saa jii ti poob kii lin namm nan toomiinba siab nan ti Yomdaanɔ naa waas nan Piita nba tee biaŋinba na-a? 6 I dukii a min nan Banabas kuukɔɔe sii tuun ti poor paak-ii? 7 Kunkɔnkɔnnɔ lanɔe tuun toonn ŋaan pa u mɔŋi? Ki ŋmee sii wuu tiinii ŋaan kan di li lɔɔna? koo ŋmee sii kpaar bonkobit ŋaan kan nyu bi biimi? 8 N jii nisaarik binbeŋe ki yet nna; ŋaan Moses sennu na ki yet nna kaa-a? 9 Li sɔb sennu maŋ ni a, "Naab-i ŋmaan dii a wun nyinn dibin, faa daa bobint u mɔbi." Yennu baka be nei kuukɔɔ nie? 10 koo u ki mantik yeen timm kaa-a? Mamɔmm, li sɔb ki teen timme. Wunba ko nan wunba jaan tuun nnae ki mɔk dindann nan bi tan saa chent dii maŋ. 11 Ti din turi Yennu Seyeeŋ yare; ki li bo ki jaŋ nan yin turit gbanant yarii? 12 Siab-i mɔk yaak ki saa gaar bona i boor, timm ŋarin ki mɔk li yaakii? Ŋaan ti ki jii yaak na ki tun nann toonni, ŋaan ti di fara bonsiar kur ni, kimaan ti ki loon ki tin te ki Masia barŋanii na n jir poori. 13 I poŋ mi nan binba tuun Yennu jiantu ŋasaakak ni na, bi jeet nyi bi toonn maŋ nie; ki binba mann mannu ki teen Yennu ki ŋamii binbintir na mun gaan bi yar leŋe. 14 Nnae mun ki Yennu tur mɔb a binba mɔɔntir u barŋanii na, bi jeet mun sii nyi leŋe. 15 Ŋaan n ki jii yaak na ki tun nann toonni, ki bia ki sɔbin na a yin turin siari. Mi-i kpo, li sɔ nan sɔɔ n te ki n parbifaant-ii tee yann. 16 Li ki tee a n mɔk parbifaanu barŋanii nba ki n mɔɔntir na paak kaa, kimaan li kpaa talas ki n mɔɔntir. Mi-i kii mɔn barŋanii na, parbiir sii tee n yare. 17 Mi-i bonni gann toonn maŋ n tiɔŋue, n bo saa la nyɔɔta, ŋaan min kaa gann n mɔŋi, Yennue guunin toonn maŋ. 18 Lanne tee n nyɔɔti? N nyɔɔt tee maa mɔɔntir barŋanii maŋ yann nae, ki ki jii yaak nba ki n mɔk barŋanii toona ni na ki gaan siari. 19 N ki tee sɔɔ daabiri, ŋaan n jii n mɔŋ ki kpant daabire ki tur sɔɔ kur a n te niib bonchiann n baar Yiisa Masia boor. 20 Juu teeb boor, n jii n mɔŋ ki teen nan ŋamm nae a n te bin tinn. Binba mun waa Moses sennu na, n jii n mɔŋ ki teen nan bi yenɔ nae, ŋaan n mɔŋ ki be sennu na ni, ki loon binba waa sennu na n tinn. 21 Binba ki waa sennu na, ki n jii n mɔŋ ki teen nan bi yenɔ na, a bin tinn. Linba na ki wann nan n ki waa Yennu sennu na; n waa Masia sennu na. 22 Binba yada waar na ki n kpint ki teen nan bi yenɔ na a bin tinn. N lebit n mɔŋ bonsiar kur ni ki tur niib kur ki loon bi siab n tinn. 23 Barŋanii na paake ki n tee linba na kur a n tan la li nyɔɔt. 24 Li-i tee nantaar, nantatinna kur tuu tiine, ŋaan yenɔkɔɔe tuu tan di ki gaar paatii. Li paak, yabit ki tin di ki gaar paatii maŋ. 25 Nantatinna kur so bi mɔŋe bont kur ni a bin gaar paatii nba ki wa nan lin gbenni; ŋaan timm so ti mɔŋ a ti tan gaar paatii nba kaa gbennue. 26 Ŋanne teen ki n tiin a n saa baar li paak; ŋanne teen ki n tee nan niikur faarɔ nba ki lubin u niikura yann na. 27 N ki loon min nba mɔɔntir barŋanii ki teen niib na n tan kɔŋ paatii na. Ŋanne teen ki n mukis n gbanant ki u saakin.

1 Korint 10

1 N naa waas, n loon ki yin bann nan sanpagbouŋ din tuu baak ti yeejamm kur paake, ki bi kur bia poot mɔkgbeŋŋir na. 2 Li naan nnae nan bi kur lakin wur Yennu nyunwurue sanpagbouŋ nan mɔkgbeŋŋir na ni, ki ŋamm nan Moses lakin teen yomm. 3 Ki bi kur lakin dii jeet nba ki Yennu Seyeeŋ turib na; 4 ki bia lakin nyuu nyun nba ki Seyeeŋ maŋ turib na; kimaan bi lakin nyuu nyun nba nyii Yennu seek tanpiiuk nba chiamm na ni. Tanpiiuk maŋ din tee Masiae. 5 Ŋaan linba na kura, Yennu din ki mɔk parpeenn nan bi siabi, ki te ki bi kpo kpo, ki bi gbanant yat dɔɔ dɔɔ fɔɔr ni. 6 Li paak, li tee nyinne ki kpaanit a ti daa loon biit nan baa din loon biaŋinba na; 7 ti bia daa jiantir tingbana nan bi siab nba din tuun na; ki li sɔb Yennu gbouŋ ni a, "Ki niib na kar ki dii ki nyuu, ŋaan ji fiir ki chomm leŋ." 8 Ti daa tuun bonchon-chonsin, nan bi siab nba din tuun na, dayennkɔɔ ki niib tusaa piinlee nan ŋantaa kpo. 9 Ti daa bikii ti Yomdaanɔ, nan bi siab nba din tun, ki wai kpiib na. 10 Ti daa mɔk bunburimii, nan bi siab nba din mɔk, ki kuun malaka kpiib na. 11 Linba na kur tun ki turib ki li tee kpaanii ki tur leeb, ki li sɔb Yennu gbouŋ ni ki tee kpaanii ki tur timm nba be yoo nba ki durinya loon gbennu na. 12 Li paak, wunba mi nan u be fanu, wun soor u mɔŋ ki daa baa. 13 Bikinu nba kur baari, li tee linba yɔɔ baat niibe; ŋaan Yennu tee barmɔnii daanɔ ki kan te ki bikinu n baari ki gar i paŋ teriki; ŋaan yoo nba ki bikinu baari u saa turi paŋ nba ki i saa nyannir ki nyi leŋ. 14 N naa waas, li paak, yi nyinn i mɔŋ patbooru booru ni. 15 N piak ki teen yimm yan damme, i mun dukin linba ki n pak ki turi na. 16 Ŋmanbinyuutik nba ki ti tuu tur Yennu niipoouk ŋaan nyu leŋ na, ŋanne tee Masia sɔn; ki boroboro nba ki ti tuu ŋmit ŋmit ki ŋman na, ŋanne mun bia tee Masia gbanant na. 17 Laa tee boroboro kunn na, timm ŋarin yaba ŋaan ti taane ki tee gbananyenn, kimaan ti kur lakin ŋman boroboro kunn nae. 18 Gotir Israel teeb nba mann mannu ki teen Yennu ki di li nant na; ŋamm nan Yennu taan yomme na. 19 Maa yeen linba na, li wann nan patir nan li nant nba ki bi mann na mɔk nyɔɔtii? Aaii, li ki mɔk nyɔɔti. 20 N yeen a binba mann mannu ki teen pata na, bi set mann ki teen Sintaaniie, li ki tee Yennu kaa. N ki loon ki sɔɔ n taan nan Sintaanii. 21 N kan sak ki i lakin kar ki nyu ti Yomdaanɔ Masia ŋmanbinyuutik ni ki bia lakin kar ki nyu Sintaanii ŋmanbaŋ ni. 22 Ti koor a ti donn ti Yomdaanɔ wutoore-e? Ti paarɔe-e? 23 Siab yeen a, "Sɔnu be nan ti tun bont kur." Mamɔmm; ŋaan bont kur kaa ŋani, bont kur kaa bia mɔk nyɔɔti. 24 Daa dukii a mɔŋ kuukɔɔ po, i biakii dukii a leeb po. 25 Yi ŋman nant nba ki bi kɔi daak ni, ŋaan daa boi ki laan bee nante, ki daa te ki li daamii a dudukiti, 26 kimaan li sɔb Yennu gbouŋ ni a, "Tingbouŋ na nan li bont kur tee Yennu yare." 27 Wunba ki tee Masiaweirɔ ŋaan tan baanta jeet, fii diwa, ki daa boi buboit jeet maŋ po, ki daa te ki li daamii a dudukit ni. 28 Ŋaan sɔɔ-i wanna a bi mann nant na patire, faa daa di, ki a tan saa ŋmat u yan. Ŋaan sɔɔ saa boi a, "Li saa teen nlee ki n yan nba loon linba saa biir lɔɔ dudukiti? 30 Li-i tee ki n tur Yennu niipoouk n jeet na paak, nlee ki sɔɔ saa pak ki biir n sann jeet nba ki n tur Yennu niipoouk na paaki?" 31 Tɔn, li-i tee ki i di, koo ki nyu bonnyunnyuut, koo ki tuun linba kur, yii tee man linba saa tur Yennu baakir. 32 Daa tee linba ki ŋan Juu nirɔ numm ni, koo Griik nirɔ numm ni, koo Yennu niib numm ni. 33 Yii tuun man nan maa tuun biaŋinba na; n loon ki n tun ki penn sɔɔ kur par bont kur ni; ŋaan li ki tee a n tuun linba ki n loon, koo linba ŋan ki turin kaa; ŋaan n tuun linba ŋan ki turibe, kimaan n loon ŋanne n tinnib.

1 Korint 11

1 Li paak, i waa n binbeŋ nan maa waa Masia binbeŋ biaŋinba na. 2 N naa waas, n mɔk parpeenn nan yaa tian linba kur ki n wanni, ki tuun na. 3 Ŋaan bonyennkɔɔe be ki n loon ki n tiari, a Masiae tee jɔɔ kur yudaanɔ, ki jɔɔ kur mun tee u poo yudaanɔ, ki Yennu mun tee Masia yudaanɔ. 4 Li paak, jɔɔ nba yaa wun miar Yennu koo ki mɔɔnt barŋanii na, ŋaan yir siar ki dɔkin u yur, u ki tur Masia baakiri. 5 Poo nba yaa wun miar Yennu, koo ki mɔɔnt barŋanii na ŋaan ki ki yir siar, u dinn u sɔrɔe fei; li tee nan u koor u yur nae. 6 Ŋaan li-i tee ki poo ki yir siar ki dɔkin u yur, ŋann li ŋan wun koor u yut; ŋaan laa tee fei ki poo n koor u yut, koo ki pɔɔ u yut na, li ŋan wun yir siar ki dɔkin u yur maŋ. 7 Li ki tee jɔɔ n yir siari, kimaan u naan Yennue ki bia tee Yenpaku; ŋaan poo ŋarin tee jɔɔ pakue. 8 Kimaan jɔɔ naauŋ ki nyii poo ni kaa, ŋaan poo naauŋo nyii jɔɔ ni. 9 Yennu ki nan jɔɔ ki tur poo kaa, ŋaan u nan pooe ki tur jɔɔ. 10 Ki malakanba paak, li ŋan ki poo n yir siar ki dɔkin u yur ki lin wann nan jɔɔ na mɔk poo yaak. 11 Ŋaan ti Yomdaanɔ boor ŋarin, jɔɔ-i bonni kaa, poo mun bo sii kaa, ki poo-i munii kaa, jɔɔ sii kaa; 12 kimaan sintansimm dinn Yennu din jii jɔɔ kapirue ki nan poo, ki pooe mun maar jɔɔ, ŋaan bont kur nyi Yennu boore. 13 Yi boi i mɔŋ ki laan li ŋan ki poo-ii mei Yennu ki daa dɔk u yur siari-i. 14 Ŋaan ti binbeŋ ni, li poŋ wann nan jɔɔ-i mɔk yuumunt li tee feie ki turɔ; 15 ŋaan poo yut-ie tee yuumunt, li teenɔ fante, kimaan poo yuumunt tee u bobike. 16 Ŋaan sɔɔ-i loon wun nɔi mɔniɔk ki jiin li po, n saa yet a timm koo Yen-weileeb nba be kur ki mɔk sennleer ki pukin na po. 17 Maa yaa n beti linba na ŋarin, n ki piaki kaa li paaki, kimaan yaa tuu lakin leeb ki tuun biaŋinba na, li ki mɔk nyɔɔt ki turiini, ŋaan li tee biite. 18 Sinsinn, n gbia ki bi yeen a yaa tuu lakin leeb na, lukitin be i sinsuuk ni, ki n set gaar yenninba ki li tee mamɔmme. 19 Li set tee mɔniie nan lukitin be i sinsuuk ni, kimaan ŋanne saa wann binba set waa barmɔnii sɔnu na yeenin ni. 20 Li-i tee ki i lakin leeb ki di, li ki tee ti Yomdaanɔ jeet kaa ki i dii. 21 Kimaan yaa lakin leeb yoo nba na, sɔɔ kur di u dinue, ki siab mɔ kon, ki yemm gboot. 22 I ki mɔk i mɔŋ ŋei nba ki i sii be ki di ki nyu-u? koo i loon yin sian Yennu niibe ki dinn tarii fei-i? N saa yeti a nlee? N saa paki linba na paaka-a? Aaii, n kan pakiini. 23 N gaar wannu na ti Yomdaanɔ boore ki mun tɔɔt ki turi: a nyiɔk nba ki bi din fikit ti Yomdaanɔ Yiisa na, ki u jii boroboro 24 ki tur Yennu niipoouk, ki ŋmit ŋmit ki tur u poorpoweiteeb a bin ŋman, ŋaan yetib a, "Nae tee n gbanant nba ki n yaa n tur ki bin kpir i paak na, li paak, yii yɔɔ kii tee nna kii tian n po." 25 Jeet na dinu poorpo, ki u bia jii nyunnyuŋmaŋ nan tilɔɔna nyun, ki yetib a, "Tilɔɔna nyun nae tee n sɔn nyinn, ki wann nan Yennu senn mɔsonpaann ki tur niib; ki yoo nba kur ki i yaa i nyu, yin nyu kii tian n po." 26 Linba na wantit nan yoo nba kur ki i tan ŋman ti Yomdaanɔ boroboro ki nyuu tilɔɔna nyun maŋ, li want nan u din kpo ti paake. I sii tee nnae mɔkmɔk nan yoo nba ki u tan saa jen. 27 Ŋann amii, wunba kur ŋman ti Yomdaanɔ boroboro na ki nyuu u tilɔɔna nyun na, ŋaan bo ki jaŋ nan wun tun nna, li daanɔ tun biit ki tur ti Yomdaanɔ gbanant nan u sɔn nawa. 28 Sɔɔ kur n ŋamm u mɔŋ fanuwa, ki lian fit ŋman boroboro na ki bia nyu tilɔɔna nyun na. 29 Wunba ki bann ti Yomdaanɔ gbanant na paak ŋaan ŋman ki nyuu, u saa la tubdatu nba bi, waa ŋman ki nyuu na paak. 30 Ŋanne teen ki i bonchiann chɔk ki yiar, ki siab mun kpo. 31 Ŋaan li-i tee ki i ŋamm i mɔŋ fanu ki ŋman, i kan la tubdatu. 32 Ŋaan ti Yomdaanɔ-i bu ti buut ki ti la tubdatu, u ji tan kan biir timm yoo nba ki u tan saa biir tingbouŋ na nileeb na. 33 Li paak, n naa waas, li-i tee ki i lakin leeb a i di ti Yomdaanɔ jeet, yin guur leeb. 34 Ŋaan wunba ki kon mɔkɔ, ki u kan fit guur ti Yomdaanɔ jeet dinu na, ŋann wun di u ŋaak niwa, ki fit lian baar, ŋanne kan baar nan tubdatu ki turɔ yoo nba ki i lakin leeb na. Maan nba biar na, mi-i taŋŋi baar, n saa pak turi.

1 Korint 12

1 N naa waas, n loon yin bann Yennu Seyeeŋ piinii nba tee biaŋinbae nan barmɔnii. 2 I mi nan yoo nba ki i daa din ki teen Masia yada na, i din waa patae, linba ki piak, ki li kɔɔnti bonbiir ni. 3 N loon yin bann nan Yennu Seyeeŋ na-i be wunba ni, li daanɔ kan fit yet mɔb ki biir Yiisa; sɔɔ mun kan fit yet a Yiisae tee ti Yomdaanɔ, see Yennu Seyeeŋ na be u ni ki te ki u yet nna. 4 Seyeeŋ piinbooru booru be, ŋaan Seyeeŋ yenɔkɔɔe be. 5 Yenjiantbooru booru mun be; ŋaan Yomdaan-yenɔkɔɔe be. 6 Toonbooru booru mun be, ŋaan Yen-yenɔkɔɔe te ki sɔɔ kur tuun u toonn. 7 Seyeeŋ na teen Masiaweira kur linba want Seyeeŋ na benue, a tin somm Masiaweira na kur. 8 Seyeeŋ na saa tur sɔɔ yan maan; ki bia tur sɔɔ bannu ki u piak bannu maan; ŋaan li kur nyi Seyeeŋ yenɔ nie. 9 Seyeeŋ maŋe teen sɔɔ yada, ki bia teen sɔɔ paŋ nba te ki baatib paakit na; 10 ki bia teen sɔɔ yaak ki u tuun bakitnauŋ toona; ki bia teen sɔɔ yan ki u sɔkint Yennu maan; ki bia teen sɔɔ yan ki u bant piinii nba nyi Yennu Seyeeŋ boor nan linba ki nyi Seyeeŋ boor; ki bia teen sɔɔ yan ki u piak mabooru booru; ki bia teen sɔɔ ki u fit kpintir mabooru maŋ. 11 Linba na kur tee Seyeeŋ maŋ toonae, ki u pi sɔɔ kur li piinii nan ŋɔɔ Seyeeŋ nba loon biaŋinba. 12 Masia tee nan gbanant nae; gbanant tee yennkɔɔe ŋaan ji bɔkit bɔkit, ŋaan laa lek bɔkit bɔkit na gbaa li tee gbananyenne. 13 Ti kura nba tee Juu teeb, nan binba ki tee Juu teebi, nan daaba, nan yent-n-mɔŋ damm, bi wur ti kur Yennu nyunwuru, u Seyeeŋ yenɔkɔɔ sann nie a ti taan teen gbananyennkɔɔ; ki Seyeeŋ yenɔkɔɔ maŋe gbee ti kura. 14 Gbanant na ki tee bɔk yennkɔɔ kaa, ŋaan li yaba. 15 Li-i tee ki taar yet a u ki tee gbanant bɔkirii, kimaan u ki tee nuu, ŋann kaa saa te ki u ki tee gbananti. 16 Ki tubir mun-i yet a waa ki tee ninbinn na, li paak amii u ki tee gbanant bɔkirii, ŋann kaa saa te ki u ki tee gbananti. 17 Gbanant na kur-i taan ki tee ninbinnie, li saa teen nlee kii gbia? Ki li-i taan tee tubir, nlee ki li saa gbat nubiru? 18 Ŋaan Yennue taan gbanant na kur ki teen gbananyennkɔɔ waa loon biaŋinba. 19 Li kur-i bonni taan tee bonyennkɔɔ, li bo sii tee gbanantaa? 20 Laa tee biaŋinbae na, linba gaa gaa gbanant paak yaba, ŋaan li tee gbananyennkɔɔe. 21 Ninbinn kan fit yet nuu a u ki loonɔ; ki yur mun kan fit bet taabira a u ki loommii. 22 Ki ti gbananbɔka nba gaa gbanant paak ki tee nan bi ki mɔk paŋ na-i kaa, gbanant na kan tun siar. 23 Gbananbɔka yenn yenn nba gaa gaa ki ti gorii ki li ki ŋan na, ŋamme mantik fan toona nba ki li tuun na ni ki gar gbananbɔka nba gaa gaa ki ti gorii ki li fan na. 24 Gbananbɔka yenn yenn nba gaa ki ŋan na, li ki loon sommiri. Yennu maŋe ŋamm li gbanant, ki tur gbananlia nba gaa gaa na ki ti gorii ki bi ki mɔk nyɔɔt, ki ji teen gbananlia na fant ki gar. 25 Li paak, ti gbanant ki mɔk lukitimi. Gbanant kur nba gaa gaa na, bi fiin bi leeb po. 26 Gbananbɔkir yennkɔɔ-i di fara, gbananbɔklia na mun tuu di li farae; gbananbɔkir yennkɔɔ-i la baakir, lia na mun tuu mɔk parpeenne. 27 Yimme lakin tee Masia gbanant, ki sɔɔ kur tee u gbanant nba gaa na yenninba. 28 Ŋanne ki Yennu gann toomiinba u niib sinsuuk ni, ki bi tee saakab; ki wei gann sɔkiniinba; ki gann wannteeb; ki wei paan binba tuun bakitnauŋ toona; ki gann binba te ki baatib paakit, ki gann sommteeb; ki wei paan saakab nba ŋan ki gorii toona paak; ki wei paan binba piak mabooru booru. 29 Ti kur kaa tee toomiinba, koo sɔkiniinba, koo wannteebi. Ti kur kaa sii mɔk yiikoo ki saa tun bakitnauŋ toona. 30 Ti kur kaa bia mɔk yiikoo ki saa te ki baatib n paaki, koo ki pak barganii, koo ki kpint barganii. 31 Yii loon man piinii nba tee piinjaana nan ninmɔnn. N saa wanni sɔnu nba gar li kur.

1 Korint 13

1 Tɔn, mi-i lekii fit piak barganii kur, koo ki fit piak malakanba maan, ŋaan ki ki mɔk lommi, n tee nan gingann koo gbekuru fuut nae. 2 Mi-i fit sɔkint Yennu maan, ki bant woonin ni maan kur, ki mɔk bannu, ki mɔk yada nba saa fit te ki jɔɔr n fikit ki saan leer po, ŋaan ki ki mɔk lommi, n tee yanne. 3 Mi-i jii n mɔkint kur ki tur tatimm, ki lek jii n gbanant chab ki bi joo muu gbaa Masia paak, ŋaan ki ki mɔk lommi, n ki mɔk nyɔɔti. 4 Wunba mɔk lomm, u mɔk sukurue nan burchint niib paak; u ki mɔk funfunn, ki bia ki mɔk want-n-mɔŋ, ki bia ki mɔk dont-n-mɔŋi. 5 U ki mɔk nyatuku; u ki loon u mɔŋ nyɔɔt kuukɔɔ kaa; u ki dont wutoor yann yanni; u bia ki dia bonbiir nba ki bi tumɔ. 6 Wunba mɔk lomm, u ki mɔk parpeenn nan biit po, ŋaan mɔk parpeenn nan barmɔnii poe. 7 Wunba mɔk lomm ki bakit; u yada nan u dindann nan u sukuru ki mɔk baanu. 8 Lomm ki mɔk gbennu. Barsɔkinu nan barganii paku nan bannu tan saa gara. 9 Ti bannu nan barsɔkinu na waar; 10 ŋaan linba na kur-i taŋŋi baar, li yoo na ki ti saa nyik linba waar na kur. 11 Maa din tuu tee bik, n pinpakit nan n bannu nan n dudukit din tuu tee bisuko; ŋaan maa ji tan beer nirɔ, n nyik bisin ni bonae. 12 Taa mi linba mɔtana waar, ki tee nan taa saa got nyun ni ki li bɔn biaŋinba nae; ŋaan ti tan saa lare yeenin ni. Maa mi linba na, li daa waar; ŋaan n tan sii mir fanu nan Yennu nba min biaŋinba nae. 13 Tɔn, yada nan dindann nan lomm, li bona ŋantaa na be; ŋaan lomme gar li kur.

1 Korint 14

1 Yii loon lomm ki gar bont kur; ŋaan kii biakii loon Yennu Seyeeŋ piinii nan nimmɔnjar; kii mantik-ii loon piinii nba tee barsɔkinu. 2 Wunba piak barganii nba ki Yennu Seyeeŋ wannɔ na, u piak teen Yennue, u ki piak teen niib kaa, kimaan sɔɔ ki bant li paak, waa piak woonin ni maan Seyeeŋ paŋ ni na; 3 ŋaan wunba sɔkint Yennu maan ki teen niib, u teemm paŋe, ki kɔɔntib para, ki bia teemm parpeenn. 4 Wunba piak barganii, u sommit u mɔŋ kuukɔɔe; ŋaan wunba sɔkint Yennu maan, u sommit Masiaweirae. 5 N loon ki sɔɔ kur-ii piak barganii, ŋaan n mantik loon ki i kura-ii sɔkint Yennu maame. Wunba sɔkint Yennu maan, li mɔk nyɔɔt ki gar wunba piak barganii, see ki sɔɔ be ki fit kpint maan na ki wann Masiaweira ki lin sommib. 6 N naa waas, mi-i baar i boor ki tan piak barganii, somm lanne ki n sommitiini? Sommir kaa; see ki n baar ki fiit bona nba nyii Yennu boor ki wanni, koo yan, koo ki sɔkin Yennu maan ki turi, koo wannsau. 7 Li-i lekii tee bona nba ki mɔk manfoor nan yerik koo biɔk nna, ki li ki tee a li mɔ kɔɔt kɔɔt ŋaan lakin taan mɔyomm, a saa teen nlee ki bann yerik mɔnii nan biɔk mɔnii? 8 Wunba peeb naatunn nae kii peb ninmɔnn pebu faanu, ŋmee saa teen siir nan tɔbu? 9 Nnae mun, li-i tee ki i piak barganii, nlee ki bi saa bann yaa piak linba; li paku sii tee yanne; see ki i piak linba ki bi saa fit bann li paak. 10 Mabooru bonchiann be tingbouŋ na ni, ŋaan li kur mɔk paak. Ŋaan mi-i kii mi maan paak, n tee saamɔe ki tur wunba piak nanin na; wunba mun piak ki teenin na mun tee saamɔe n boor. 11 /Naan mi-i kii mi maan paak, n tee boorganue ki tur wunba piak nanin na; wunba mun piak ki teenin na tee boorganue n boor. 12 Yaa set loon Seyeeŋ piinii na, yii loon piinii nba saa somm Masiaweira. 13 Wunba piak barganii, wuu mei Yennu ki wun te wun fit sɔkin linba ki u piak maŋ. 14 Mi-i mei Yennu barganii ni, n seeke mei, ŋaan n yan kaa leŋi. 15 N saa teen nlee? N saa miar Yennu nan n seeke, ki bia miarɔ nan n yan; ki yin yanii ki tur Yennu nan n seek, ki bia yin yanii nan n yan. 16 Fi-i jii barganii ki dontir Yennu nan u Seyeeŋ paŋi, ki nirɔ nba ki a be nanɔ na ki mi faa yeen linba, u saa teen nleewa ki sak nan a niipoouk turu na tee mamɔmme? 17 A niipoouk turu na lek ŋan, ŋaan li ki mɔk sommir ki teen sɔɔ. 18 N tur Yennu niipoouk nan maa piak barganii ki gar i kur na; 19 ŋaan mi-i be Masiaweira sinsuuk ni, n sii loon man pak mɔbona ŋaŋŋmu nba mɔk paake ki lin somm leeb na, ki gar man pak mɔbona tusir barganii ni. 20 N naa waas, i daa dia bisin dudukiti, ŋaan biit ni, i tee nan sanpantii nae; ŋaant man ki i dudukit-ii tee subir teeb dudukit. 21 Li sɔb Yennu gbouŋ ni a, "N tan saa tun siab bin nyi siarpo ki tan pak barganii ki tur n niib, ŋaan bi lek kan gbat li paaki." 22 Li paak, barganii tee nyinne ki tur binba ki teen Masia yada na, li ki tee binba teenɔ yada na kaa. Ŋaan sɔkinii maan tee wannue ki tur yada damm, ki li ki tee binba ki teen Masia yada na kaa. 23 Masiaweira kur-i lakin leeb, ki sɔɔ kur piin piak barganii, ki binba ki tee Masiaweira koo binba ki mi li po tan kɔɔ, bi kan yet a i waate-e? 24 ŋaan Masiaweira-i lakin leeb, ki gaan Yennu maan ki sɔkint teen niib, ki wunba ki tee Masiaweirɔ koo wunba ki mi li po tan kɔɔ ki gbat baa sɔkint linba na, ŋanne saa te ki wun bann u biit ki bu u mɔŋ buut, 25 ki u saa bann u woonin ni dudukit ki li dɔɔ yeenin ni, ki u saa gbaan ki pukii Yennu ki yet a, "Mamɔmm, Yennu be nani." 26 N naa waas, n ji saa yet a bia? Li-i tee ki i lakin leeb a yin jiant Yennu, ki sɔɔ mɔk yaŋ, ki sɔɔ mɔk wannu, ki sɔɔ mɔk mafiitkar ki saa wann, ki sɔɔ mɔk barganii paku, ki sɔɔ mun mɔk barganii maŋ kpintu; i tuun linba na kur a lin somm Masiaweira. 27 Bi-i loon bin pak barganii, bi daa gaar niib banlee koo bantaa, bii piak yenɔ yenɔ ŋaan ki sɔɔ mun-ii kpintir li paak yenn yenn. 28 Wunba saa fit kpint maan na paaki kaa, wunba piak barganii na n ŋmin Masiaweira na sinsuuk ni, ŋaan pak ki tur u mɔŋ nan Yennu. 29 Ŋaant man sɔkiniinba banlee koo bantaa n pak, ki binba biar na n got maan na ni. 30 Ŋaan li-i tee ki sɔɔ be i sinsuuk ni ki tan yaa wun sɔkin Yennu maan, wunba bo piak na n ŋmin. 31 I kur saa fit sɔkin Yennu maan yenɔ yenɔ, ki lin te sɔɔ kur n tumii ki lin chee u par. 32 Yennu sɔkinii saa fit soor u mɔŋ yoo nba ki li baarɔ; 33 kimaan Yennu ki yiinit a tii tee kpir kpir kaa; ŋaan u yiinit a tii tee soon nnae. 34 Poob n ŋmin bi mɔi soon nna Masiaweira sinsuuk ni nan laa tee biaŋinba Masiaweileeb kur sinsuuk ni na. Yaak kaa ki bi saa pak, nan Yennu sennu nba wann a bi ki mɔk yaak nan bin pak siar koo ki teen yudamm na. 35 Siar-i be ki bi loon bin boi bann, bin boi bi sɔrib ŋei niwa. Li tee feie ki poo n pak Masia-weira tintaankaanu ni. 36 Labaarii? Yennu mɔmaan na nyii i boore? Li baar i kuukɔɔ boore? 37 Wunba mi nan u tee Yennu sɔkinii koo ki mɔk Yennu Seyeeŋ piinii, wun bann nan linba ki n sɔbin ki teeni na tee ti Yomdaanɔ sennue. 38 Ŋaan wunba y‡t, i mun daa gaan u yari. 39 Li paak, n naa waas, yii loon Yennu maan sɔkinu man, ŋaan bia daa y‡en barganii paku. 40 Ŋaant ki bont kura n tun bonŋann kii waa leer.

1 Korint 15

1 N naa waas, n loon ki n tiari barŋanii nba ki n din mɔɔnt ki turi, ki i gaar ki diar fanu na poe. 2 Li-i tee ki i diar fanu, i saa tinna, nna-i kaa, i yada na sii tee yanne. 3 Kimaan n din beti labaar nba ki n mun din gaar na, ki li tee barjaann ki gar barii kura; a Masia din gaar timm biit damm paak ki kpo, nan laa sɔb Yennu gbouŋ ni biaŋinba na; 4 ki bi piiu; ki u fiir kuun ni daaŋantaa daar nan laa sɔb Yennu gbouŋ ni biaŋinba na; 5 ki u dɔkit Piita paak, ki bia dɔkit toomiinba piik nan banlee na paak. 6 Li poorpo biak ki u dɔkit yomm ki wann u poorpoweiteeb nba yab gar niib kobii ŋaŋŋmuwa na. Bi bonchiann daa be bi manfoa ni, ki bi siab mun kpowa. 7 Li poorpoe ki u bia tan dɔkit Jeems paak, ki ji tan dɔkit toomiinba kura paak. 8 Linba na kur poorpo, ki u bia dɔkit n paak, min nba tee nan ponyiir na. 9 Toomiinba na kur ŋaan mine tan joont, ki n bo ki jaŋ nan bii yin toomii, kimaan maa din dinn Yiisaweira biak na paak. 10 Ŋaan Yennu sommir paake ki n tee maa tee wunba, ki sommir nba ki u turin na, li ki teen yanni; n tun ki gar toomiinba na kura, ŋaan min kaa tumi, Yennu sommir nba be n ni nae tun. 11 Li-i tee minie, koo ŋammie, ŋanne ki ti kur want niib, ŋanne ki i mun teen yada. 12 Li paak, taa mɔɔntir barii nba a Masia din fiir kuun ni na, ki nlee ki i siab yeen a binba kpo na tan kan fiiri? 13 Li-i tee ki kuun fiiru kaaie, li want nan Masia din ki fiir kuun ni; 14 ki Masia-i diŋŋi kii fiir kuun ni-ie, ŋann ŋarin ti ki mɔk labaar nba ki ti ji saa mɔɔnti; ki i mun ki mɔk linba ki i saa teen yada. 15 Ki li-i tee nnaie, ŋann ŋarin ti teen fai siara damme na ki tur Yennu, kimaan ti poŋ teen Yennu siara damm, a u din fiin Masia kuun niwa; ŋaan kuun fiiru-i kaa, u set din ki fiinɔ kuun ni. 16 Kpeemm fiiru-i kaa, ŋann ŋarin Yennu din ki fiin Masia kuun ni. 17 Masia-i diŋŋi kii fiir kuun ni, i yada tee yanne, ki i bia daa be i toonbiit ni. 18 Li bo bia want nan binba teen Yiisa yada ŋaan kpo na, bi bote. 19 Taa teen Masia yada na, li-i tee ki li mɔk nyɔɔt tingbouŋ na benu ni kuukɔɔie, ŋann ŋarin ti bo sii mɔk ninbaauk ki gar sɔɔ kur. 20 Ŋaan li tee barmɔniie, Yennu set din fiin Masia kuun niwa. Ŋɔɔ Masiae tee daanɔ nba fiir kuun ni sinsinn; ki li want nan binba kur kpo na mun tan saa fiir kuun niwa. 21 Nirɔe baar nan kuun tingbouŋ na ni; nnae mun ki nirɔ bia baar nan kuun fiiru. 22 Kimaan Adam paake ki nisaarik kur kpenn; nnae mun Masia paak nisaarii saa la manfoa. 23 Sɔɔ kur saa fiir u kuun fiiru yoo; Masiae fiir sinsinn, ki binba tee u niib na mun tan saa fiir u baaru daar maŋ. 24 Li poorpo ki joontu n baar, ki u tan saa nyann naan yent nan paŋ kur; ki jii naan maŋ ki tur u Baa Yennu. 25 Masia tan sii yen yent kur mɔkmɔk ki tan tuu yoo nba ki Yennu saa nyann u datai kur ki teemm u nuu ni. 26 Dataak nba ki u tan saa joont biirɔ tee kuume. 27 Li sɔb Yennu gbouŋ ni a, "U jii bont kur ki teen u nuu ni;" ŋaan li ki wann a Yennu mɔŋ pukin bont kur maŋ ni. 28 Ki bont kur-i taŋŋi be Masia nuu ni yoo nba, ŋann u mɔŋ tan sii be Yennu nuu nie, wunba te ki bont kur be u nuu ni na; ki Yennu yen bont kur. 29 Nirɔ-i kii fi kuun ni, bee ki bi wur siab Yennu nyunwuru ki ki wurib bi mɔŋ paak, ŋaan wurib kpeemm paakii? Kpeemm-i kii fi, bee ki bi tee nna? 30 Ki bee ki ti kɔɔ maan ni yoo kuri? 31 N naa waas, n mɔk parbifaant i paak nan yaa be biaŋinba nan ti Yomdaanɔ Yiisa Masia na, linba na paake ki n yeen a n tookit kuun yoo kur na. 32 Ki min nan Efesus doo ni bonkobibiit kɔn, ki mi-i tee nisaarik nba kan fiir kuun nie, li nyɔɔt tee lanne ki turimi? Kpeemm-i kii fi kuun ni, ŋaant man ki tii di kii nyu ŋaan kii mi nan ti won saa kpowa. 33 I daa saak ki sɔɔ n kpannii. Niŋamm nan nibiit-i tɔkii, li saa biir niŋamm maŋ binbeŋa. 34 Ŋaant ki i yan n jen, ki ji daa tuun toonbiiti. I siab ki mi Yennu; ŋanne ki n sɔbin na ki yaa n dinni fei. 35 Sɔɔ saa boi a, "Nlee ki binba kpo na tan saa fiir kuun ni? Bi gbanant tan sii tee nlee?" 36 Jatuk na, linba ki a bur, li kan fit pia li yoo; see ki li kpo daanna ki tan fit lian pia. 37 Fi-i bur bonboorik, li kii tee nan linba saa pia na kaa; a buur bonboorik nae, li pasiar fan bur dii koo linba kur; 38 ŋaan Yennue saa te bonboorik maŋ n pia ki tee nan waa loon biaŋinba na; ki bon-boorik kur mɔk li mɔŋ naauŋo. 39 Gbanant kur ki taa naauŋu, nisaarii gbanant tee yomme, ki bonkobit yar mun tee yomm, ki nɔɔnii yar mun tee yomm, ki janii yar tee yomm. 40 Sanpaapo bona mɔk bi gbanant li kɔɔe, ki tingbouŋ na ni bona mun mɔk bi gbanant li kɔɔ. Sanpaapo bona gbanant fant be li kɔɔe, ki tingbouŋ na bona gbanant fant mun be li kɔɔ; 41 yonnu mɔk yentu li kɔɔe, ki ŋmaarik mun mɔk yentu li kɔɔ, ki ŋmaabira mɔk yentu li kɔɔ, ki ŋmaabira mɔk yentu kɔɔt kɔɔt. 42 Li tee nnae kuun fiiru ni; bi-i pii gbanant tiŋ ni li tuu tan pɔɔke, ŋaan li-i taŋŋi fiir, li kan pɔɔki. 43 Bi ki piit nan fanti, ŋaan ti tan saa fiir nan fante; bi bia ki piit nan paŋi, ŋaan ti tan saa fiir nan paŋe. 44 Bi piit nan tingbouŋ na gbanante, ŋaan ti-i fiir ti sii tee gbanant nba tee Seyeeŋ yare. Gbanant nba tee tingbouŋ na yar be; ki gbanant nba tee Seyeeŋ yar mun be. 45 Kimaan li sɔb Yennu gbouŋ ni a, "Sinsinn nirɔ Adam na din tee nisaarike;" ŋaan nirɔ nba joont ki baar na tee Seyeeŋ nba teent manfoor nae. 46 Gbanant nba tee Seyeeŋ yar na kaa baar sinsinni, ŋaan tingbouŋ na gbanant nae baar sinsinn, li poorpo ki Seyeeŋ yar na wei. 47 Sinsinn nirɔ na din nyii tant nie, ki nirɔ nba wei na nyii Yendɔuŋ ni. 48 Tingbouŋ na teeb tee nan jɔɔ nba ki Yennu jii tant ki namɔ nae; ki binba tee Yendɔuŋ ni yab tee nan jɔɔ nba nyii Yendɔuŋ ni na. 49 Ti kura gbanant tee nan Adam nba nyii tant ni na yar nae; dasiar ti bia tan sii tee nan jɔɔ nba nyii Yendɔuŋ ni nae. 50 N naa waas, n beerie nan gbanant nba tee nant nan sɔn na kan fit kɔɔ Yendɔuŋ ni; ki gbanant nba pɔɔk kan fit la manfoor nba kaa gbennu. 51 N yaa n beti woonin ni maame. Ti siab tan saa kpo; ki siab mun tan sii be mɔkmɔk nan Yiisa baaru daar; ŋaan ti kur saa lebita. 52 Li daar kikaak-i taŋŋi bui, ti kur saa lebit yomme yiama nan ninbinn kabintu na; kikaak saa bui, ki kpeemm n fiir nan gbanant nba kan mi kpo, ki timm nba tan be manfoor ni daar maŋ na, ti gbanant saa lebite. 53 Li kpaa talas nan gbanant nba pɔɔkit na n tan kpant gbanant nba ki pɔɔkit, ki gbanant nba kpenn na tan saa kpant gbanant nba ki kpennii. 54 Li paak, linba na kur-i tan teen, li yoo na linba sɔb Yennu gbouŋ ni na saa gbee, a "U nyann kuun gbenna." Li bia sɔb a: "Kuun, a nyannu na be lia? Kuun, a tonu na be lia?" 56 Kuun tonu tee biite, ki biit kpit sennu paŋ ni. 57 Ti teen Yennu niipoouk nan waa teent nyannu ti Yomdaanɔ Yiisa Masia paak na. 58 Li paak, n naa waas, i be man fanu ki daa baa Masiaweiu ni. Yii jii i mɔŋ kii tuun ti Yomdaanɔ toona yoo kur, kimaan i mi nan toona nba ki i tuun ki teen ti Yomdaanɔ na, li tan kan baa yanni.

1 Korint 16

1 Tɔn, n loon ki n wanni ki jiin likirii nba ki i lakin ki yaa i somm Yennu niib nba be Judea tiŋ ni na poe; i tun nan biaŋinba ki n wann Masiaweira nba be Galasia tiŋ ni na. 2 Lasir daar kur, sɔɔ kur n tuu nyinn likirii, waa tun ki la biaŋinba, ki bir, ki mi-i taŋŋi baar, ki i ji daa lakii likirii. 3 Mi-i taŋŋi baar, n tan saa sɔb gbouŋ ki tun binba ki i gann na ki bin saan nan i piinii maŋ Jerusalem. 4 Li-i taŋŋi jaŋ nan man saan n mɔŋ, tin tɔk saan. 5 N lor ki n tɔkin nyi Masedonia tiŋ nie; li poorpo ki n ji baar gɔni. 6 Lipasiar n tan sii be i boor yoo waaminna koo piar na kur; ki i tan saa sommin ki n gar saan siaminba kur ki n saa. 7 N ki loon ki n baar i boor ki gɔni yoo waaminna kaa ŋaan gari, ŋaan ti Yomdaanɔ-i saa sak, n saa yukir bonchiann i boor. 8 N sii be Efesus doo ni na mɔkmɔk nan yukitgar tiaru jaamm dapiiŋŋmu poorpo. 9 Sɔnu loot ki yaa bonchiann ki turin ki n saa tun Yiisa toona, ŋaan datai bonchiann mun be. 10 Timoti-i taŋŋi baar i boor, i mi man ki yin kɔɔnɔ ja-ŋmaanii, kimaan u tuun ti Yomdaanɔ toonae nan maa mun tuun biaŋinba na. 11 I mi man ki sɔɔ n sianɔ, ŋaan i te ki wun nyi nan parmaasir ki baar n boor, kimaan n gorii ŋɔɔ nan ti naa waas sɔnu po. 12 Ti naa bik Apolos ŋarin, n barimɔe ki loon ŋɔɔ nan ti naa waas na n tɔk baar i boor, ŋaan u ki loon wun baar mɔtana; li-i tee ki u la yoo, u saa baara. 13 Yii guu man kii be fanu i yada ni, kii mɔk par nan paŋ. 14 Yii tuun man bont kur nan lomm. 15 I poŋ mi Stefanas nan u ŋaateeb po, ŋamme din tee sinsinn niib nba be Akaya tiŋ ni ki din teen Masiaweira, ki jii bi mɔŋ ki tuun ki teen Yennu niib. 16 N naa waas, n barimiie, yii tokii nibooru na binbeŋ nan bi toontunleeb kur binbeŋ, nan binba tuun bonchiann ki teen Yennu niib na. 17 N mɔk parpeenn Stefanas nan Fotunatus nan Akaikus baaru na paak, kimaan yaa daan kaa n boor ni na, n daan mɔk parbiir, ŋaan baa baar na, n ji ki mɔk parbiiri, 18 kimaan bi chee min nan yimm parawa; li paak, i tur li nibooru baakir. 19 Masiaweira nba be Asia tiŋ ni na foonti. Akuila nan Prisila nan Masiaweira nba lakii ki jiantir Yennu bi ŋaak ni na foonti fanu ti Yomdaanɔ sann ni. 20 Ti naa waas na kur foonti. I foont leeb ki kpamii man. 21 Min Pɔɔle jii n mɔŋ nuu ki sɔbin foonti. 22 Wunba kur ki loon ti Yomdaanɔ, mɔpor-ii be u paak. Maranata ; li paak tee "Ti Yomdaanɔ, baat." 23 Ti Yomdaanɔ Yiisa n sommi. 24 N loon i kur nan barmɔnii Yiisa Masia sann paak. Mamɔmm.

2 Korint 1

1 Min Pɔɔl nba ki Yennu loomm paak ki u teenin Yiisa Masia toomii na, min nan ti naa bik Timotie sɔbin gbouŋ na ki teen Yennu niib nba be Korint, nan u niib kur nba be Akaya tingbouŋ kur ni. 2 Ti Baa Yennu nan ti Yomdaanɔ Yiisa Masia n sommi ki bia turi parmaasir. 3 Ŋaant ki ti tur Yennu nba tee ti Yomdaanɔ Yiisa Masia Baa na niipoouk; ŋɔɔe tinit ninbaauk; u boor nie ki ti parmaann kur nyi. 4 Ŋɔɔe maant ti para ti biak kur ni, a tin mun fit maan binba be biak booru booru ni na para, nan Yennu nba maan ti para biaŋinba na. 5 Ti biak dinu Masia sann paak nba yab biaŋinba, nnae ki ti parmaann mun bia yab kimaan ŋɔɔ Masia paak. 6 Taa loon ki tin maan i para ki te ki yin la tinnu na paake te ki ti di biak. Ti-i la parmaann, li tee i paake, a tin mun maan i para, ki yin mun la sukuru ki di biak nan taa dir biaŋinba na. 7 Li paak, ti mɔk dindann ki jiin i po nan i saa saan tɔɔnna, kimaan ti mi nan yaa di biak nan taa mun di biaŋinba na, nnae ki i mun bia sii laat parmaann nan taa laat biaŋinba na. 8 N naa waas, n loon ki n tiari biak nba ki ti din dii Asia yent ni na poe. Biak maŋ din mantik gar ti paŋ terik ki tan te ki ti ŋaa dindann ti mɔŋ manfoa powa, 9 kimaan ti ji din tan dukii nan kuun ki fɔk nanti, ŋaan linba na din tun a lin wannit nan li ki ŋan ki tii maa ti mɔŋ paaki, ŋaan kii maa Yennu nba fiint kpeemm na paak; 10 ŋɔɔe din nyinnit kuun dangbeŋŋir na ni. U saa tinnita, ki ti mɔk dindann nan u bia saa tinnit yoo nan yoo. 11 Yi mun bia sommit nan Yenmiaru man, ki Yennu saa gat niib bonchiann miaru nba ki bi mei ki teent na, ki saa sommit, ki niib bonchiann saa turɔ niipoouk ti paak. 12 Linba te ki ti mɔk yuugontir na tee nnae: ti dudukite wantit nan ti mɔk barmɔnpaku nan yentinu tingbouŋ na niib boor, mantik taa daa be nani ki timm nan yimm tee weinanleeb na; Yennu sommir paake te ki ti be nna maŋ, li ki tee nisaarii yan paak kaa. 13 Ti sɔbin linba ki i saa fit karin ki bann li paake ki teeni na, ŋaan mɔk dindann nan i tan saa bann fanu 14 nan yaa poŋ bann waaminna biaŋinba na, a i tan saa fit kii mɔk yuugontir ti paak, nan taa mun sii mɔk yuugontir i paak, ti Yomdaanɔ Yiisa jenu daar biaŋinba na. 15 Maa bann linba na paake ki n daan lor maa n poŋ jen i boor, ki yin la sommir taar munlee, 16 kimaan n daan lor nan mi-i taŋŋi gaar saa Masedonia man bot gɔniie, ki mi-i taŋŋi jent man bia bot gɔni, ki la sommir i boor, linba saa sommin ki n ŋmat saan Judea. 17 Ki n lor maŋ daan tee laat lore-e? koo maa daan lor maa n tun linba maŋ daan tee nan tingbouŋ na yab nba tuu yet a, "Nn, nn," ŋaan bia tan yet a "Aaii, aaii" nae-e? 18 Ŋaan Yennu nba tee barmɔnii daanɔ na paak, n mɔsonn nba ki n daan turi na ki tee "Nn" nan "Aaii" kaa. 19 Kimaan Yiisa Masia nba tee Yennu Bija, wunba ki min nan Sailas nan Timoti din mɔɔnt u po ki turi na, u ki tee "Nn" nan "Aaii" kaa, ŋaan u tee "Mme." 20 Kimaan ŋɔɔe tee "Nn" Yennu mɔsona kur ni. Linba na paake te ki ti yet a "Mamɔmm" Yiisa Masia ni, ki li dont Yennu sann. 21 Yennue din gannit ki ti be ti kɔɔ, ki senn timm nan yimm fanu Masia ni. 22 Ŋɔɔe jii u Seyeeŋ ki teen ti para ni, ki li tee dɔk ti paak, ki want nan u tan saa turit linba kur ki u bir guunit nawa. 23 Yennue tee n siaradaanɔ nan linba daan te ki n ki baar Korint i boor na tee n ki loon ki n dat i tubae. 24 Ti kan fit mukisi ki wanni yaa saa teen yada biaŋinba, kimaan ti mi nan i mɔk yada ki see fanu, ŋaan ti tuun nani a tii wanti yaa saa teen biaŋinba kii mɔk parpeenne.

2 Korint 2

1 Li paake ki n ji daan lor n par ni nan n kan baar i boor ki tan turi parbiiri. 2 Li-i tee ki n baar ki tan biir i para, ŋmee ji saa penn n pari, see yimm nba ki n biir i para na. 3 Li paake ki n din sɔbi gbouŋ, maa n ki loon ki n baar ki tan la parbiir yimm nba bo saa penn n par na boori. Kimaan n teen yada nan n parpeenn tee i mun yaa parpeenne. 4 Maa din sɔbin gbouŋ na ki teenii, n din sɔbir nan parbiir bonchiann nan ninnyuute; li din ki tee a n loon ki n biir i para kaa, ŋaan n din loon ki yin bann lomm nba ki n mɔk ki jiin i poe. 5 Li-i tee ki sɔɔ tun i yenɔ biit, u ki biir min kɔɔ kaa, ŋaan u biir i kuraewa, maa ki loon lin mantikii tee ninmɔnn na paake ki n yeen linba na. 6 I kure daan lakin ki dat u tubir, li paak, li jaŋa, 7 li ŋan ki i nyik chabɔ, ŋaan kii maant u par, ki daa te ki u baa tarrri. 8 N barimiie, ŋaant ki wun bann nan i bia daa loonɔ bonchiann. 9 Linba na paake ki n din sɔbin maa n laan i set saak n mɔb bonsiar kur ni-i. 10 Li-i tee ki i nyik chab wunba u biit paak, n mun nyik chabɔe na, kimaan mi-i nyik chabɔ linba paak, i paake te ki n nyik chabɔ Masia tɔɔnn; 11 a Sintaanii daa laat yaaki, kimaan ti mi u sɔnii nba tee biaŋinba. 12 Maa din tan baar Troas doo ni maa n mɔɔnt Yiisa barŋanii nae ki n bann nan Yennu set loot u toona sanjouk leŋa. 13 Ŋaan maa din ki la n naa bik Taitus leŋ na paake ki n ki la pardɔɔnn; li paak ki n chab leŋ teeb, ŋaan gar saan Masedonia. 14 Ŋaan ti teen Yennu niipoouk, kimaan taa gaa nan Masia na paake ki ti nyant bonsiar kur. Yennu jiit a ti fiit Masiae ki wann sɔɔ kur; ki u barŋanii bannu tee nan tulaarii nba nubir man biaŋinba nae. 15 Ti tee nan bonnunubmana nae ki Masia jiit ki wubint ki teen Yennu, ki li yat kɔɔ binba laat tinnu nan binba ki laat tinnu na kura. 16 Binba ki laat tinnu na boor, ti tee nan nubiru nba baat nan kuun nae, ŋaan binba laat tinnu na ŋanimiie, ti tee nan nubiru nba baat nan manfoor nae. Ŋmee jaŋ nan toona maŋi? 17 Tɔn, ti ki tee nan binba dia Yennu mɔmaan maŋ ki li tee kpinkpouŋ ki turib na kaa, ŋaan ti piak barmɔniie, kimaan ŋɔɔ Yennue tunt; li paak ki ti be u tɔɔnn, ki mɔɔntir u mɔmaan Yiisa yiikoo ni.

2 Korint 3

1 Ki linba na want nan ti bia want ti mɔŋe-e? Li tee talase nan sɔɔ n sɔb ti siara gbant ki turinii? Koo ti gaar ti siara gbant i boor nan siab nba tuun biaŋinba na-a? Aaii. 2 Yimme tee ti siara gbouŋ ki taab ti para ni a sɔɔ kur n karin ki bann. 3 Li dɔɔ paanu nie nan yimme tee Masia gbouŋ maŋ ki u sɔb ki tunt nann; li ki tee gbouŋ nba ki nisaarik jii makmɔɔnu ki sɔb tanpatlai paak kaa, ŋaan manfodaanɔ Yennu Seyeeŋe sɔbir nisaarii para ni. 4 Linba paak ki ti piak nna na tee taa teen Yennu yada Masia sann paak nae. 5 Ti ki want ti mɔŋ nan ti saa fit tun siar nan ti mɔŋ paŋ kaa, ŋaan Yennu sommir paake ki ti fit tuun toonn na. 6 Ŋɔɔe din te ki ti jaŋ nan u mɔlorpaann toonn na; ki mɔlorpaann maŋ ki tee Moses sennu nba ki u din sɔb na kaa, li tee Seyeeŋ yare; kimaan sennu maŋ din baat nan kuume, ŋaan ki Yennu Seyeeŋ teent manfoor nba kaa gbennu. 7 Yoo nba ki Moses din sɔb sennu maŋ tann paak na, li yooe ki Yennu yentsaakar sik ki nyirik Moses numm po; ki li nyiriiu paak, ki Israel teeb na lek ki fit goriiɔ. Ki li-i tee ki sennu nba din baat nan kuun ki bia gaar na din baar nan yentsaakar, 8 i mi a nlee ki Seyeeŋ sɔnu kii be nan yentsaakar ki gariri? 9 Li-i tee ki sennu nba wann niib a bi mɔk biit na din baar nan yentsaakar, Seyeeŋ sɔnu nba te ki niib tee niŋamm na be nan yentsaakar ki garira. 10 Sennu nba din tuu be nan yentsaakar na din tan kɔŋ li yentsaakara, kimaan yentsaakar nba yab garir na paak. 11 Li-i tee ki sennu nba din gar na din baar nan yentsaakar, Seyeeŋ sɔnu nba sii be nan yoo nba kaa gbennu na, li yentsaakar sii yab bonchiann ki gar nna. 12 Taa mɔk dindann nba na paake ki ti mɔk parcheenn. 13 Ŋaan ti ki tee nan Moses na kaa; ŋɔɔe din jii chinchenn ki pin u numm po a Israel teeb daa laat yentu nba be sennu nba yaa lin gar na ni. 14 Ŋaan ki bi dudukit din ki yenti; bi-i karin Yennu gbounkper na yoo nba, li tee nan chinchenn maŋ bia daa dɔɔk bi dudukit nae nan dinna, see wunba jii u mɔŋ ki tabin nan Masiae ki chinchenn maŋ tuu dɔkit u dudukit. 15 Ki tan tuu dinna, bi-i karin Moses sennu na, chinchenn na bia daa dɔɔk bi para. 16 Ŋaan li-i tee ki nirɔ ŋmat waa ti Yomdaanɔie, chinchenn maŋ saa dɔkite. 17 Ki ti Yomdaanɔ tee Seyeeŋ nae; ki siaminba ti Yomdaanɔ Seyeeŋ na be, yent-n-mɔŋ be leŋe. 18 Li paak, chinchenn maŋ ji ki dɔɔk ti numm po, ki ti laat ti Yomdaanɔ nba mɔk ŋant bonchiann biaŋinba, ki li kpintit ki ti naanɔ, ki ti ŋant bia pukii yoo kura, ki ŋant maŋ nyi ti Yomdaanɔ nba tee Seyeeŋ na boore.

2 Korint 4

1 Yennu ninbatinu paake ki u jii toona na ki teen ti nii ni, ki li te ki ti ki mɔk kpinkpangbatuku. 2 Li paake ki ti y‡t bunbɔnn ni toona, nan bontiteet nba baat nan fei, ti ki tuun ki dɔk niib na, ti ki lebit Yennu maan ki kpann niibi, ŋaan ti mɔŋ be Yennu tɔɔnn ki mɔɔntir u maan paanu ni nan barmɔnii, a sɔɔ daa mɔk dudukbiit ki jiin ti bontiteet po. 3 Li paak, li-i tee ki Yennu barŋanii bɔrie, li bɔr binba kpet Yennu sɔnu na boore. 4 Bi ki teen Masia yada, kimaan Sintaanii nba ki tingbouŋ na niib jiantirɔ na dɔkin bi dudukita. Ŋɔɔe dɔkint bi numm po a bi daa laat yentu nba dɔkit bi paak na. Li yentu nyi barŋanii nba want Masia paŋ na boore; ŋɔɔe tee Yennu ninnauŋ. 5 Ti ki mɔɔntir ti mɔŋ po kaa, ŋaan ti mɔɔntir Yiisa Masia poe, a ŋɔɔe tee ti Yomdaanɔ na, ŋaan want nan timme tee u toontunna ki teeni, u sann paak. 6 Yennu nba din yet a "Yentu n yent bunbɔnn ni na" ŋɔɔe te ki u yentu na yentir ti para ni, a ti bann u yentsaakar nba tee biaŋinba; li yentue yeen Yiisa Masia numm po. 7 Ŋaan timm nba mɔk Seyeeŋ mɔkint na tee nan yɔkboba nae, ki li want nan paŋ nba gar paŋ kur tee Yennu yare, li ki tee ti yar kaa. 8 Ti di biak bonchiann yoo kur, ŋaan li kan fit nyannit; ti tuu kɔŋ sommir sianyoo, ŋaan ti ki kɔŋŋit dindann; 9 bi dintit biak, ŋaan Yennu ki nyikititi; bi lut tiŋ ni, ŋaan ki fit kpiiti; 10 Yiisa kuun na be ti gbanant ni yoo kur, a lin te ki u manfoor na n mun nyi paanu ti gbanant ni. 11 Yoo nba ki ti fo na ti be kuun nuu nie Yiisa paak, a u manfoor nba be ti gbanant nba yaa lin tan kpo na ni n nyi paanu. 12 Ki kuun dia ti nii, a yimm n la manfopaann. 13 Li sɔb Yennu gbouŋ ni a "Maa teen yada na paake ki n pak," ki ti mun mɔk Seyeeŋ nba din te ki nirɔ maŋ teen yada na, li paak, ti mun teen yadae ki piak na. 14 Kimaan ti mi nan Yennu nba din fiin ti Yomdaanɔ Yiisa kuun ni na, ŋɔɔe tan saa fiin timm nan yimm nba waa Yiisa maŋ kuun ni mun, ki baar nant u mɔŋ boor. 15 Kimaan linba na kur be a lin somm yimme, ki niib bonchiann nba tan saa la Yennu ninbatinu na tan saa turɔ niipoouk bonchiann, ki dont u sann. 16 Li paake ki ti ki mɔk kpinkpangbatuku; hali nan ti gbanant nba kpet saa na gbaa, ŋaan Yennu pantir ti seeke daar n tuu daar. 17 Li paak, biak waaminna nba ki ti di ki li kan yukir na, tan saa baar nan parpeenn nba yab ki kaa gbennu ki turit, ki parpeenn maŋ tan sii yab ki gar ti biak na bonchiann, 18 kimaan ti baka kaa linba ki ti laat na po, ŋaan ti baka be linba ki ti ki laat na poe; kimaan linba ki ti laat na, li kan yukiri ki li saa gar, ŋaan linba ki ti ki laat na ŋarin tan sii be nan yoo nba kaa gbennu.

2 Korint 5

1 Tɔn, ti mi nan gbanant nba ki ti mɔk mɔtana na-i taŋŋi kpo, ti mɔk ŋaak nba ki Yennu saa turit sanpaapo, ki li ki tee nisaarik kaa maa ŋaak maŋi, ki li bia tan sii be nan yoo nba kaa gbennu. 2 Li paak, ti ji kar kpiine ki guu daar nba ki Yennu tan saa jii ti sei ki kɔɔn ŋaak maŋ ni. 3 Kimaan ti-i taŋŋi kɔɔ leŋ, ti sei ji kan mi kɔŋ binbeboori. 4 Ŋaan ti sei nba daa woo gbanant na ni na, ti kuriie. Li ki tee a ti ji ki loon gbanant na benu kaa, ŋaan ti loon sanpaapo gbanant na, a li daar manfoor na n tan nak kuun ki lin gbenn. 5 Yennue ŋammit ki ti teen siir lebitu na po, ki turit u Seyeeŋ, ki li wantit linba ki u tan saa turit na po. 6 Li paak, ti mɔk parcheenn yoo kura, ki bann nan ti sei-i be tingbouŋ na gbanant na ni, ti kaa sanpaapo ti Yomdaanɔ boori; 7 kimaan ti waa yada sɔnue, ti ki waa linba ki ti ninbinn laat na kaa. 8 Ti mɔk parcheenn ki summan tin nyi gbanant na nie ki kun ti Yomdaanɔ boor. 9 Li paak, ti-i be tingbouŋ na ni, koo ti-i taŋŋi be u boor, ti ninbinn mɔn tin penn u pare. 10 Kimaan ti kur binbeŋ tan saa nyi paanu Masia tɔɔnn barbuut daar, ki sɔɔ kur tan saa gaar paauk nan u toona nba tuu tee biaŋinba tingbouŋ na ni nae, laa tan ŋanii, laa bii, li fan nana. 11 Taa tiin ti Yomdaanɔ biaŋinba na, li paak ki ti daak niib. Yennu mi ti binbeŋ nba tee biaŋinba; ki n mɔk dindann nan i mun bia mi i para ni n binbeŋ nba tee biaŋinba. 12 Ti ki dont ti mɔŋ kaa i boori, ŋaan ti loon ki tin turi yaake ki yin fit faa parbia ti paak, ki pak tur binba gorii nisaarik nanyer po ki mɔk yuugontir u paak, ŋaan ki gorii u binbeŋ na. 13 Ti-i tee nin-kammaŋit dammiie, Yennu paake ki ti tee nna; ŋaan ti-i munii kii tee ninkammaŋit dammi, i paake te ki ti ki tee nna. 14 Masia lommu diat; taa ji bann nan ŋɔɔ niyenɔkɔɔe din gaar sɔɔ kur paak ki kpo na, li want nan sɔɔ kur kpo nanɔe. 15 Ŋɔɔe din gaar sɔɔ kur paak ki kpo, a binba fo na daa be ki tur bi mɔŋ-i, ŋaan kii be ki tur wunba din gaar bi paak ki kpo ki bia fiir kuun ni nae. 16 Li paak, ti ji ki gorii nirɔ nanyer po kaa; taa din got Masia nanyer po biaŋinba na, ŋaan ti ji ki goriiɔ nna kaa. 17 Li paak, nirɔ nba be Masia ni, li yɔɔ ji tee nipaamɔɔe; u binbenkper kur ji gara; gotir man, binbenpaaŋ ji baar li yɔɔ niwa. 18 Linba na kur nyi Yennu boore. Ŋɔɔe ŋammitit Masia paak, a ti ji daa tee u datai, ŋaan kii tee u yɔɔsinbae, ki bia turit u toona a ti te ki niib n mun teen u yɔɔsinba. 19 Li want nan Masia nba din kpo na, ŋanne tur Yennu sɔnu a wun teen tingbouŋ na niib u yɔɔsinba, ki nyik chab bi toonbiit, ŋaan jii u barŋanii nba wantib biaŋinba ki u teeb u yɔɔsinba na, ki teen ti nuu ni. 20 Li paak ki ti ji tee Masia taatara ki Yennu te ki ti yi niib. Masia paak ki ti barimii a yin tunn ki teen Yennu yɔɔsinba. 21 Kimaan ti paake ki Yennu din te ki Masia, wunba ki mi tun biit na, set timm biitdamm seenu ni, a tin la yentinu binbeŋ ŋɔɔ Masia ni.

2 Korint 6

1 Li paak, timm nba tuun Yennu toona u sommir paak na, ti barimiie, i daa te ki u ninbatinu na tee yanni. 2 Kimaan Yennu yet a: "Yoo nba din tan jaŋ na, n din gbiint i miaruwa. Ki yoo nba din tan jaŋ nan ki n tinnii na, n din tinniiwa." Gbiintir man, dinnae tee daar nba jaŋ. Dinnae ki yaak be ki niib saa la tinnu maŋ. 3 Timm ŋarin ki tuun linba saa gɔɔr sɔɔ Yiisa Masia sɔnu ni, ki sɔɔ n tan mann yet a ti toona ki ŋanii. 4 Ti binbeŋ nba tee biaŋinba nae want niib nan ti set tee Yennu toontunnae, kimaan ti laat biak, nan mukisuk, nan maan, ŋaan lek di sukuru li kur na ni. 5 Niib dia kpaasaa ki boot, ki loontit dansarii; ti paak ki niib fu fuut; ki ti lek tuun toona ki ki gɔɔnt nyiɔku, ki ki di yenn yoo gbaa. 6 Ti tee popeendamme, ki mi Yennu mɔmaan, ki mɔk sukuru nan burchint, ki gbee nan Yennu Seyeeŋ, ki loon niib, 7 ki beerib Yennu mɔmaan nba tee barmɔnii na, ki mɔk ŋɔɔ Yennu paŋ; ki bia mɔk yentinu binbeŋ nba tee jatiat nba be ti niidiitu ni nan ti niigaŋ ni na. 8 Nisiab teent baakir, ki siab mun sukiit, siab biir ti sana, ki siab mun piakit; siab yeen a ti lin kpann niibe, ŋaan ki ti piak barmɔniie. 9 Ti ki mɔk sann niib boori, ŋaan ti mɔk sann Yennu boor. Kuun tiin ki waate, ŋaan ki ti lek mɔk manfoor; Yennue te ki biak baatit, ŋaan u ki te ki li kpiti. 10 Ti mɔk parbiir ŋarin, ŋaan Yiisa paak ti mɔk parpeenne yoo kura. Ti tee tariie, ŋaan timme te ki niib bonchiann tee mɔkita Yennu boor. Ti ki mɔk tingbouŋ na mɔkint siari, ŋaan ti mɔk linba gar mɔkint kura. Linba na kura want nan ti set tee Yennu toontunnae. 11 Yimm Korint doo ni teeb, ti poŋ beti ti nɔɔk ni barii kura. Ti looni bonchiann; 12 li ki tee timm kaa ki looniini; yimme ki loonit. 13 N piak teeni nan nirɔ nba bo saa pak u tiɔŋ waas biaŋinba nae; yii loonin man nan maa looni biaŋinba na. 14 I daa mɔk weinanleeb nan niib nba ki teen Masia yada na. Linba ŋan nan linba ki ŋan saa fit lakin be nan leeba? Yentu nan bunbɔnn saa fit lakin taan mɔb ki be nan leeba? 15 Masia nan Sintaanii saa fit taan mɔba? Nirɔ nba waa Yiisa sɔnu nan wunba ki waa-r saa fit taan binbenyeŋa? 16 Yennu diiuk nan poochian-feek tee yomme-e? Aaii. Timme tee diiuk ki tur manfodaanɔ Yennu, kimaan ŋɔɔ Yennu din yet a: "N sii be n niib para nie, kii be namm. N sii tee bi Yennue, ki bi mun tee n niib." 17 Li paak ki Yennu bia yet a, "Bɔkitir i mɔŋ man, ki nyi tingbouŋ na niib sinsuuk ni, ki nyik biit kur tumu, ki n saa gaari. 18 N sii tee i Baae, ki i tee n naasimm nan n sapaamm. Min, Yabint Yennue pak na."

2 Korint 7

1 N naa walonkai, Yennu nba senn mɔsona ki turit na paak, yi ŋaan ki ti nyik linba kur tee toonbiit, nan linba kur tee dudukbiit, ŋaan kii tiin Yennu, kii tee popeendamm nan barmɔnii. 2 Yii loonit man. Ti ki mi tun sɔɔ bonbiiri, koo ki tun siar ki biir sɔɔ, koo ki ŋmab sɔɔ. 3 N ki sɔb nna a n biiri kaa. Ti lek looni, nan maa poŋ beti biaŋinba na. Mi-i lekii kpo koo mii be n manfoor ni, ŋaan ti lek sii looni. 4 N ki mɔk birsuk i paaki; n mɔk yuugontir nani, ki n par mei i paak bonchiann. Ti biak dinu kur ni ŋaan n mɔk parpeenn nani. 5 Taa din baar Masedonia ti din ki fit foi. Ti din la mukisuk lokir kur po; niib din kɔn nant Yennu mɔmaan na paak; ki jaŋmaanii din be ti para ni, 6 ŋaan Yennu nba maant binba mɔk parbiir para na daan te ki Taitus baar ti boor ki tan maan ti parawa. U baaru ti boore daan te ki ti para maak. 7 Ŋann kuukɔɔ kaa daan maak ti para, ŋaan u bia daan betit i binbeŋ nba tee biaŋinba; ŋanne bia daan te ki ti para maak. U daan betit a i ninbinn mɔn nan ki i bia lan, a i mɔk parbiir i toonbiit paak, ki i ninbinn mɔn nan ki i sak n mɔb. Linba nae te ki n mantik mɔk parpeenn. 8 Maa din sɔb gbouŋ nba ki turi na, li gbouŋ din turi parbiir waama, ki n mɔ kɔɔbia i parbiir maŋ paaka, mɔtana n ji ki mɔ kɔɔbia li paaki, 9 ŋaan n ji mɔk parpeenne. I parbiir maŋ paak kaa te ki n mɔk parpeenni. I parbiir nba te ki i nyik i toonbiit na paake ki n mɔk parpeenn. Yennue din te ki i para biir i toonbiit paak, li paake ki li gbouŋ mɔk nyɔɔt turi. 10 Kimaan Yennu-i te ki nisɔɔ la parbiir u biit paak, ŋanne saa te ki wun nyik u biit tumu ki la tinnu, ki li kan mi biir u par jikii; ŋaan tingbouŋ na parbiir ŋarin baat nan kuume. 11 Yennu nba te ki i la parbiir na, i mɔŋ la biaŋinba ki li turi nyɔɔta; i baka be Yennu labaar ni, ki i bia loon yin wann nan i ki mɔk biiti; i bia tiin Yennu; i loon ki i bia lan; i bia loon yin tun Yennu loomm; i poŋ dat biitdaanɔ na tubira. Yaa tun nna maŋ, li set want nan i ki mɔk bisiat maan maŋ ni. 12 Maa din sɔb gbouŋ maŋ ki turi na, li ki tee nirɔ nba tun toonbiit na paak kaa ki n din sɔbiri, li bia din ki tee nirɔ nba ki u biirɔ na paak kaa ki n sɔbiri. N din loon yin bann i baka nba be ti po biaŋinba Yennu boore, ŋanne din te ki n sɔbir. 13 Mɔtana ti para maak i paaka. Ti bia mɔk parpeenn bonchiann, kimaan Taitus daan la pardɔɔnn i kur paak, ki li daan turɔ parpeenn, li paake te ki ti mun mɔk parpeenn. 14 N poŋ din paki u boor niwa, ki i ki te ki n dii fei. Taa tun beeri labaar nba kur na, li tee barmɔniie. Nnae mun, taa din piaki Taitus boor ni na, ti din piak mɔniie. 15 U tiar yaa daan gaarɔ saauŋ biaŋinba ki baakɔ, ki bia baak waa beti linba ki saakir na. Ŋanne te ki u mantik looni. 16 N mi nan i lek bia sii ŋammit tuun linba kur ŋane. Li paake ki n mɔk parpeenn bonchiann.

2 Korint 8

1 Ti naa waas, ti loon ki yin bann Masiaweira nba be Masedonia na nba tur Yennu piinii biaŋinbae. 2 Bi din dii biak ki la bikinn nan namu bonchiann, ŋaan lek mɔk parpeenn. Bi namu ni ŋaan bi din wann burchint ki tur Yennu piinii bonchiann. 3 N saa fit teen bi siara nan baa din mɔk linba, bi din turɔ nan bi paŋ terike, ki poŋ din saa gar baa bo saa turɔ biaŋinba gbaa; 4 ki din barint a tin gaar bi piinii maŋ ki tur Yennu niib nba tee tarii na. Li din tee bi yanbɔɔte nan bin turib. 5 Bi din tur ki li gar taa poŋ din dukii baa saa tur biaŋinbawa. Sinsinn bi din jii bi mɔŋe ki tur ti Yomdaanɔ, ki lian fit jii bi mɔŋ ki turit, Yennu loomm ni. 6 Ŋaan yimm ŋarin, Taituse daan te ki i piin gaan likirii ki teen Yennu. Ti din betɔ a wun yabir ki sommi ki yin tun likirii toona maŋ kur ki gbenn nan lomm. 7 Tɔn, i teen Yiisa yada, ki mi u labaar fanu, ki fit piak leeb u mɔmaan, ki waau nan ninmɔnn, ki bia loonit; yaa tun linba na kur nan ninmɔnn na, ti loon ki yii tuun toonŋana maŋ mun nnae nan ninmɔnn. 8 Maa yeeni linba na, li ki tee n mukisi kaa a yin turi; n wannii Yennu nisiab numm nba mɔn biaŋinba nan bin turɔ piinii kimaan n loon ki n bann yaa loonɔ biaŋinbae. 9 I mi ti Yomdaanɔ Yiisa Masia nuu nba yaa biaŋinba. U din tee mɔkitɔɔe, ŋaan ki i paak ki u kpant tarik, ki u tarik kpantu maŋ paak te ki yimm ji teen mɔkita. 10 Maa saa beti mɔbonn nba tee nnae: yaa din piin ki gaan likirii nba binn po na, li ŋan ki yin gaar ki tont mɔtana. Yimme din dɔŋ leeb ki loon Yennu piinii turu, ki bia piin ki teen piinii maŋ. Yi yabir i mɔŋ paak ki gaarir tont. 11 I ninbinn din mɔn nan piinii maŋ turu. Yi ŋaan ki i ninbinn-ii biakii mɔn piinii maŋ turu paak, nan yaa saa fit tur biaŋinba, ki gaar linba tenn na tont. 12 Nirɔ nba loon ki wun tur Yennu piinii, ki turɔ nan waa mɔk biaŋinba, Yennu saa gaara. Yennu ki loon ki nirɔ n turɔ ki gar waa mɔk biaŋinba. 13 N ki loon ki yin tur leeb ŋaan di fara li paaki. N loon ki i kur-ii jame. 14 Linba te ki n yeen na tee nnae: yaa mɔk ki li yab mɔtana na, li ŋan ki yin somm binba ki mɔk na, ki li-i tee ki i mun tan ki mɔk yoo nba, ŋaan ki bi mun mɔk ki li yab, bi mun saa sommiiwa. Ŋanne saa te ki i kur jan, 15 nan laa sɔb Yennu gbouŋ ni biaŋinba na a, "Wunba din la bonchiann na, u din ki dii tenni; ki wunba la waaminna na, li din ki pɔtɔ." 16 Ti piak Yennu nan waa te ki Taitus baka be i ni nan ti baka nba mun be i ni biaŋinba na; 17 kimaan taa barimɔ a wun saan i boor na, u saka; ki u mɔŋ numm mɔn nan wun baar i boor; ki u yaa wun baar nan u mɔŋ loomme. 18 Ti tan saa te ki ti naa bisɔɔ n weiɔ ki baar i boor. Ti naa bik maŋ nba mɔɔntir Masia barŋanii biaŋinba na paak te ki Masiaweira kur piakɔ bonchiann. 19 Bi bia gannɔ a wuu waa-t ki tin somm Yennu niib nba tee tarii na. Linba nae saa dont ti Yomdaanɔ sann, ki bia wann nan ti set loon ti leeb sommir. 20 Ti tan saa jii likirii bonchiann ki saa sommib, ŋaan ti ki loon ki sɔɔ n pak biir ti sann a ti loon likirii na ni siari. 21 Yennu mi nan ti tuun nan li sɔnu, ki ti loon ki niib n mun bann nan ti set tuun nan li sɔnue. 22 Li paak, ti saa tun ti naa bilɔɔ mun ki wun chian Taitus nan u weinanlɔɔ ki bin baar i boor. Yoo kur, ti laat ti naa bik maŋ binbeŋ nba tee biaŋinba, ki bann nan u numm set mɔn Yennu toona paak, kimaan u ki mɔk birsuk i paaki. Ŋanne te ki u mantik loon ki wun saan i boor. 23 Nisiab-i boi-i Taitus po, yin betib nan u tee n toontunlɔɔe, wunba sommitin ki n beeri Masia barŋanii. Nisɔɔ-i boi-i ti naa waas nba waa Taitus na po, yin betɔ a bi tee Masiaweira toontunnae, ki bi binbenŋaŋ paake te ki niib dont Masia sann. 24 Yi wann ti naa waas maŋ nan Masiaweira kura yaa loomm biaŋinba, ki bin bann nan taa daan piaki biaŋinba bi boor na tee mɔniie.

2 Korint 9

1 Li ji ki kpaa talas ki n sɔb gbouŋ ki beti biaŋinba ki i saa somm Yennu niibi. 2 N mi nan i loon ki yin sommib. N daan paki Masedonia teeb boor, ki betib biaŋinba ki yimm nba be Akaya tiŋ ni na din loon yin somm Yennu niib binn po. I numm nba din mɔn Yennu niib sommir paak na, li din te ki Masedonia teeb mun loon bin sommibe. 3 N loon ki n te ti naa waas na n baar i boor nie ki la nan taa piaki biaŋinba na set tee mɔniie; i be nan maa yetib biaŋinba na ki teen siir ki tur likirii na. 4 Nna-i kaa, Masedonia tiŋ ni niib maŋ-i taŋŋi wein ki baar i boori, ki sɔɔ ki i daa ki teen siiri, li saa dinnin feiwa; ki li kii tee min kuukɔɔ kaa saa di fei, ti kurae saa di fei, kimaan ti daan paki bi boor niwa. 5 Li paak, n dukin nan li ŋan ki n barin ti naa waas na ki bin gar n tɔɔnn ki baar i boor ki sommi ki yin gaar likirii maŋ nan yaa daan senn i mɔsonn biaŋinba na, ki mi-i taŋŋi baar yoo nba man la ki i poŋ gaar tonta. Ŋanne saa wann nan i tur nan i mɔŋ loommo ŋaan sɔɔ kaa mia-i ki i turi. 6 N beerie, wunba bur waaminna tan saa jaan waaminnae; ki wunba mun bur saama mun tan saa jaan saame. 7 Wunba kur dukin u par ni a wun pi piinii biaŋinba, li yɔɔ n pi nna, ki daa piin nan parbiiri, koo ki pi nan mukisuku, kimaan Yennu loon nirɔ nba piin piinii nan parpeenne. 8 Yennu saa fit turi bont kur ki i kan kɔŋ siari. I saa la ki lin gar yaa loon biaŋinba, ki fit somm binba kur ki mɔk na, 9 nan laa sɔb Yennu gbouŋ ni a "Wunba nuu ŋarin tian ki teen tarii, u burchintuk kan mi gbenni." 10 Yennu nba teen niib bonboorii ki bi buur, ki bia teemm jeet ki bi di na, ŋɔɔe saa turi bont kur ki lin jaŋi ki saa gar, ki yin ji mantik somm niib. 11 Li-i tee ki i sommit niib bonchiann, Yennu saa sommi bonchiann. Yaa turit piinii a ti somm leeb na, niib bonchiann saa pak Yennu i piinii maŋ paak. 12 Li-i tee ki i sommit Yennu niib ki teemm linba ki bi ki mɔk, li saa te ki niib bonchiann n tur Yennu niipoouk. 13 Li-i tee ki i sommitib, ŋanne saa wannib nan i set gaar Masia barŋanii na ki sakira, ki i nuu tian ki i chentir namm, ki bia chentir nan niib kur yaa mɔk linba. Ŋanne saa te ki bin dont Yennu sann, 14 ki miarɔ ki turi, kii looni, kimaan Yennue te ki i nuu tian bonchiann. 15 Ŋaant man ki tin tur Yennu niipoouk, kimaan ŋɔɔe turit u Bija nba gar piinii kur na.

2 Korint 10

1 Tɔn, i siab yeen a mii be i boor ni, n ki mɔk par, a ŋaan mi-i saan ki be siarpo, n tuu mɔk pare, ki ji sɔbin gbant ki kpaani. Min Pɔɔl tiɔŋ, n mɔk baakir ki be soon nna nan Masia nba be biaŋinba na, ki barimii a yin ŋamm i binbeŋ, 2 ki mi-i taŋŋi baar i boor yoo nba, n kan dat i siab tuba. N mi nan mi-i baar i boor yoo nba, see ki n dat binba yaa ti waa tingbouŋ na niib nba waa linbae na tuba. 3 Li tee barmɔniie nan ti mun lek tee nisaariie, ŋaan ti ki kɔn kunkɔnn nba tee nisaarii yar kaa, 4 li paak, ti ki jikit nisaarik paŋ kaa a ti kɔn li kɔnni, ti jikit Yennu paŋ nba saa biir Sintaanii paŋ kur nae ki kɔn. Ti piak ki nyant niib nba ki saak Yennu mɔmaan nae, 5 ki nyant niib nba mɔk karinbaanii ki dukii a bi mɔk yan ki gar Yennu na, a ti te ki sɔɔ kur dudukit n sak gaar Masia. 6 Ti-i bonni mi binba be i sinsuuk ni ki sak Yennu mɔb na, ti bo saa dat binba ki sak na tubae. 7 Yimm gorii nisaarik numm po kuukɔɔe. Sɔɔ-i be i sinsuuk ni ki yaa u tee Masia yɔɔe, li yɔɔ n tiar nan ti mun tee Masia niibe nan waa tee biaŋinba na. 8 Ti Yomdaanɔ din turin yudantuk na a n sommie ki yin fit weiɔ fanu, u din ki turin a n biiri kaa. Mi-i lekii nyu bara ki gar maa bo saa nyu biaŋinba, ŋaan n kan di fei. 9 I daa dukii nan n loon ki n sɔb gbouŋ nba saa jeeniie. 10 Nisiab yeen a n sɔbin gbant ki li tee nan pandaansɔɔ yar nae, a ŋaan mi-i taŋŋi baar i boor yoo nba n ji tuu ki mɔk paŋ, a ki n mɔbona na ji tuu tee yanne. 11 Li ŋan ki li niib n bann nan taa sɔbin ti gbant ni a ti saa tun biaŋinba na, ti-i taŋŋi baar yoo nba, li biaŋe ki ti set saa tun. 12 Mamɔmm, ti ki loon ki tin jii ti mɔŋ ki bikin nan siab nba dont bi mɔŋ na, ki bia ki loon ki tii tee nan bi yemm na. Bi ki mɔk yami, bi gorii leeb binbeŋ nba tee biaŋinbae ki bikii nan bi mɔŋ. 13 Ŋaan timm ŋarin, ti ki dont ti mɔŋ ki gaar ti toona nba tee biaŋinba. Ti mɔk yuugontir toona nba ki Yennu nyinnit ki turit na paake. Taa beeri Yennu mɔmaan nba nae tee toona maŋ yenninba. 14 Ti din dɔŋ siabe ki baar i boor ki beti Masia labaar. Taa tuun linba nae tee Masia nba sennit linba a tii tuun. 15 Ti ki loon tin gaar paku siab toona paaki. Ti mɔk dindann nan i saa ŋamm teen Yiisa yada bonchiann, ki sommit ki tin ŋamm tun Yennu toona bonchiann i boor nan waa jiir ki turit a ti tunn biaŋinba na. 16 Ki ti saa fit saan doi nba fɔk ki gar i doo na, ki mɔɔnt li barŋanii. Ti kan saan siaminba ki siab poŋ tun na, ti ki loon tin gaar paku nisiab toona paaki. 17 Li sɔb Yennu gbouŋ ni a, "Nirɔ nba loon parbifaant, li ŋan ki wun faa parbiir linba ki Yennu tun paake." 18 Kimaan nirɔ nba piak u mɔŋ, li ki want nan Yennu numm gboou kaa; ti Yomdaanɔ-i piak wunba, ŋanne want nan Yennu numm gboou.

2 Korint 11

1 Mi-i piak jatiie, ŋaan yimm n lek yabir i mɔŋ ki di sukuru nanin. 2 N looni bonchiann nan Yennu nba looni biaŋinba na. I tee nan sapaamɔ nba ki mi jɔɔ nae, ki n loon ki n jii-i ki tur Masia ki yii waa ŋɔɔ kuukɔɔ. 3 N mɔk jijeet i paak maa n mi niib tan saa mann kpanni a i ji daa waa Masia fanu, nan Sintaanii nba din kpann Adam ŋaapoo Iif biaŋinba na. 4 Nisɔɔ nba tuu baar i boor ki beeri labalia nba ki tee Yiisa labaar nba ki ti din beti na, bee teen ki i tuu di sukuru nan li yɔɔ? Bee teen ki i gaan maan nba ki tee Yiisa barŋanii; ki i bia gaan seek nba ki tee Yennu Seyeeŋi? 5 Niib nba kpanni a bi tee Yiisa toomiinba na, n ki dukin bi garimi. 6 Li-i lekii tee ki n ki mi barii paku fanu, ŋaan n mi Yennu mɔmaan na nan li sɔnu, ki yoo kur ti bia wanti li kura paanu ni. 7 N lek sikin n mɔŋe maa n donni, kimaan maa din beti Yennu barŋanii maŋ na, n ki gaar i siar li paaki. Ki maa din tun nna maŋ, n mɔk biite li paakii? 8 Maa din beeri Yennu mɔmaan na, Masia nisiabe din tuu pan li paak, ŋaan ki yimme bo saa turin li sommir. 9 Maa din be i boor ni yoo nba ki ki mɔk siar na, ŋaan n lek din ki mukisi maa yin sommin nan siari. Ti naa waas nba din nyii Masedonia nae baar nan bont kur nba ki n loon. Maa lek din be biaŋinba li yoo na, n bia lek sii be nnae; n kan mukisi a yin sommin nan bonsiari. 10 Mamɔmme ki n piak Masia paak, n kan mi mukis i sɔɔ, Akaya tingbouŋ ni lokir kur po, a li yɔɔ n sommin nan bonsiari. 11 Bia paake? Linba na want a n ki loonie-e? Yennu ŋarin mi nan n looni. 12 N lek bia sii beeri Yennu maan na, ŋaan n kan mi boi-i li paatii po. Li paak, kpinkpannii damm maŋ nba gaan paatii na kan fit donn bi mɔŋ ki yet a bi mun tee nan timm na. 13 Li nibooru kpanniie a bi tee Masia toomiinba, ŋaan bi ki tee u toomiinba kaa. Baa tuun biaŋinba na, bi kpanniie. 14 Baa tuun nna maŋ, i daa te ki li teei yaarlituku; nnae ki Sintaanii tiɔŋ nant u mɔŋ yentu malaka. 15 Li paak, Sintaanii toontunna-i kpann a bi tee Yennu yab, i daa te ki li teei yaarlituku. Yennue tan saa dat bi tuba nan bi toona nba jaŋib biaŋinba. 16 N saa ŋamm betiiwa, i daa dukii nan n tee jatuku. Li-i tee ki i lek dukii nnaie, ŋaan yin di sukuru nanin ki n pak n mɔŋ waaminna. 17 Maa yaa n beti linba na ki tee ti Yomdaanɔ maan kaa. Mi-i piak n mɔŋ maan, n set piak nan n tee jatuk nae. 18 Niib bonchiann want bi mɔŋe; li paak, n mun saa wann n mɔŋa. 19 I dukii a i mɔk yame, ŋaan bee teen ki i di sukuru nan jatit, ki mɔk parpeenn nammi? 20 Maa yeen linba na tee nnae: nisɔɔ-i soori ki teeni u daaba, ki ŋmab i bont, ki kpanni, ki mɔk karinbaanii, ki pebiti tanpakii, ŋaan i tuu di sukuru nan li yɔɔe. 21 Taa din ki teeni nna na paake ki i biir ti sana a ti ki mɔk paŋ amii nlee? Nisɔɔ-i mɔk par ki want u mɔŋ, n mun saa teen nnae. N set piak nan jatuk nae! 22 Kpinkpannii damm maŋ-i yi bi mɔŋ Juu teebie, n mun tee Juu nirɔe; bi-i yi bi mɔŋ Israel teebie, n mun tee Israel nirɔe; bi-i tee Abraham yaaboonaie, n mun bia tee yenɔe; 23 bi-i yi bi mɔŋ Masia toontunnaie, mine set tuun mantik; (n piak nan jatuk nae; teentin gafara man!) mine set tun Masia toona bonchiann nan barmɔnii, ki kɔɔ dansarii bonchiann. Niib boon kpaasa bonchiann Masia paak. N din la ninbɔŋ ki per kuuma. 24 Taar muŋŋmu ki Juu teeb boon kpaasa piintaa nan ŋannyiia. 25 Rom teeb din boon lanbana taar muntaa. Niib din jaatin tana sianyoo. Ŋarint din libit chaan nanin nyun ni taar muntaa; ki yentummunn nan nyatum-munn ki n be dajingbir paak mɔkgbeŋŋir ni. 26 N din tuu somm yoo kur ki saa n sɔnii, ki laat nyun ni ninbɔŋ, ki bia laat ninbɔŋ fatiteeb boor, nan n tiɔŋ niib boor, nan boorganu boor, ki bia laat ninbɔŋ digbangbeŋŋa ni, nan muuk ni, nan mɔkgbeŋŋa ni, nan nisiab nba kpann a bi tee Masiaweira na boor. 27 N din set tuun Yiisa Masia toona nan ninmɔnn, ki di biak, ki ki gɔɔnti, kon nan nyunnyukiru din tuu soorin; ki n bia lorin mɔb yoo nan yoo; ki waat son; ki n bongbabkar ki jaŋitimi. 28 Linba na kuukɔɔ kaa din tee ninbɔŋ nba ki n laati; n din tuu mɔk parbiire daar kura Masiaweira kur paak. 29 Nisɔɔ-i tee yadapɔɔrin daanɔ, li mun tuu baŋ n kpinkpante; nisɔɔ-i te ki u lɔɔ tun toonbiit, li dont n wutoore. 30 Mi-i faa parbiir, n sii faa parbiir n kpinkpant baŋŋu paake. 31 Ti Yomdaanɔ Yiisa Baa Yennu, wunba yen paku nan yoo nba kaa gbennu na, ŋɔɔe mi nan n piak barmɔniie; 32 kimaan maa din be Damaskus doo ni, Bat Aretas yoo na, doo maŋ ni saakɔɔ din loon wun soorime, ki din te ki lanjimanba see doo maŋ tammɔb ni, ki gorii a bin soorin. 33 Ŋanne ki n yɔɔsinba jiin ki kpeenin kpanchubigbeŋŋir ni, ki dɔɔnt sikinin takoru nba be doo maŋ joonn ni na, ki n nyii jɔɔ maŋ nuu ni.

2 Korint 12

1 Li kpaa talas ki mii lekii mɔk parbifaant, ŋaan li ki mɔk nyɔɔti. Mɔtana n saa beti ti Yomdaanɔ nba wannin bakitnant nba, ki kat labaar nba ki wannin. 2 Li bina piik nan ŋannae na, ki Yennu din jiin ki donnin u boor sanpaapo; n ki fit bann waa din jii n seek kɔɔe ki doo nann, koo u din jii n seek nan n gbanante, ŋɔɔ kuukɔɔe mi. 3 Maa mi linba tee waa din jii-n ki donnin u boor sanpaapo, Paradais a ni nae; leŋe ki n din gbat labasia nba ki n kan fit kumii sɔɔ; Yennu kan sak man kumiiri. 5 Li bakitnauŋ bont kuukɔɔ paak ki n sii mɔk parbifaant; n kan pak n mɔŋi; see n butuŋ po. 6 Mi-i loon ki n faa parbiir, ŋaan n kii tee nan jatuk na kaa, kimaan mamɔmm kɔɔe ki n kpan sii piak; ŋaan min poŋ ki loon ki n faa parbiiri. Min ki loon ki nisɔɔ n pakin ki gar paku nba jaŋ nanin. N loon ki bin got n binbeŋ nba tee biaŋinbae, ki gbat maa piak biaŋinba, li poorpo ki bin bann maa tee nibooru nba. 7 Yennu nba din wannin bakitnant bonchiann na, ŋaan u ki loon ki n donn n mɔŋ li paaki; ki din te ki mukisuk nyii Sintaanii boor ki baarin. Li mukisuk yiarin nan kunkonn nba tuu ŋmuu nirɔ ki li yiarɔ biaŋinba nae. 8 N miar ti Yomdaanɔ taar muntaa maa wun nyinn li mukisuk n ni; 9 ŋaan u lek ki saki, ki betin a "N sommir na saa te ki a nyann mukisuk maŋa, kimaan wunba ki mɔk u mɔŋ paŋ na set saa la n paŋe." Li paak, n sii faa parbiir n butuŋ na paak nan parpeenne, a Masia paŋ-ii be n ni. 10 Li-i tee Masia paak ki n di butinn, ki laat sukit, ki di biak nan mukisuk, ki laat barii, n mɔk parpeenn, kimaan mi-i taŋŋi kii mɔk n tiɔŋ paŋ yoo nba na, li yooe ki n laat Masia paŋ. 11 Li-i bonni tee ki yimme piakin, ŋanne bo sii ŋan; ŋaan yaa ki piakin na paake ki n piak n mɔŋ nan n tee jatuk na. Mi-i kii tee siar, ŋaan binba kpann a bi tee Masia toomiinba na ki garimi. 12 Maa din be i boor ni ki tuun bakitnauŋ nyina nan toonjaana, ki di sukuru yoo kur na, ŋanne want nan n set tee Masia toomii. 13 Nlee ki Masiaweileeb na cheeini? Maa ki boi-i sommir po na, ŋanne te ki bi cheeini? Li-i tee ŋanniie te ki n mɔk biit, yin teenin gafara man! 14 Li taar muntaae na ki n tuu tee siir maa n baar i boor. Ŋaan n ki yaa n baar ki loon siar kaa i boor, n loon yimme, li ki tee n loon i likirii kaa. Waas kaa loon bont ki teen bi dammi. Wadamme loon bont ki teen bi waas. I tee n waase; 15 li paake ki li manin nan man jii n mɔŋ ki turi, ki tun nan ninmɔnn ki sommi. Ki mi-i looni bonchiann, yimm sii loonin waaminnae-e? 16 Li tee barmɔniie, n din ki mukisi a yin turin bonsiar, ŋaan ki i siab yeen a n din kpanniie ki fati. Nlee ki n din fatiini? 17 Maa din tun niib nba i boor na, bi sɔɔ din mi ki ŋmab i bonsiar ki dii ŋaan tenn ki tan turimii? Aaii. 18 N din barin Taitus maa wun saan i boor, ki bia te ki ti naa bisɔɔ weiɔ. Taitus din mi ki ŋmab i bontii? Aaii. Ti ki mɔk li dudukiti. Maa tuun biaŋinba, u mun tuun nnae. Maa waa sɔnu nba, u mun waa ŋanne. 19 I dukii taa piak na, ti loon ki ti nyinn ti mɔŋ barii nie-e? Li ki tee nna kaa. Ti be Yennu tɔɔnne, ki piak Masia nba loon biaŋinba. Ti naa walonkai, ti loon ki ti sommie ki yin wei Yennu sɔnu fanu. Ŋanne te ki ti piakii linba na. 20 N yan put i paake nan maa tan saa baar i boor ki kan la ki i be nan maa loon yii be biaŋinba na; ki i mun kan la ki n be nan yaa loon mii be biaŋinba na: n mɔk jijeet nan n saa lai ki i kɔn nan leeb, ki mɔk funfunn nan leeb, ki dont wutoor leeb paak, ki lukitir leeb, ki sukii leeb, ki biir leeb, ki mɔk karinbaanii, ki tee kpirkpir; 21 n bia mɔk jijeet nan Yennu saa te ki n di fei i paak; ki n par saa biir i bonchiann paak, kimaan bi poŋ tun toonbiit, nan jakint toona, nan bonchonchonn toona, nan joonbaanu, ki ji ki tiin fei, ki bia ki nyik bi biit maŋ tumu.

2 Korint 13

1 N saa baar ki tan foonti ki pukin taar muntaa. Li-i tee ki i jii sɔɔ taari, n kan saki, see ki siaradamm banlee koo bantaa pak biir li yɔɔ. 2 Maa din baar i boor taar munlee ni na, n din kpaan yimm nba poŋ tun toonbiit na, nan i leeb kura. Maa ji ki be i boor ni na, ŋaan n lek kpaani nan maa din poŋ kpaani biaŋinba sinsinn nae; mi-i taŋŋi baar, n saa dat bi tubawa. 3 Ŋanne saa wann nan Masiae te ki n piak. U ki tee butimɔ kaa i sinsuuk ni, u mɔk paŋ i boor. 4 U din jii u paŋ maŋe ki bakin bir ŋaan sak ki bi kpaau dapunpunn paak. Mɔtana, Yennu paŋ paak ki u be manfoor ni. Timm nba lakin be u ni na ki mɔk paŋi, ŋaan taa lakin taan nanɔ na paak, ti mun mɔk manfoor Yennu paŋ paake, ki fit wantii li paŋ. 5 Gotir i mɔŋ binbeŋ ni ki laan i set teen Yiisa Masia yada amii i ki teeni; li kpaa talas ki yii gorii i mɔŋ binbeŋ nba tee biaŋinba. I ki mi nan Yiisa Masia be i nie-e? U set be i ni, kimaan li-i tee ki u ki be i ni, ŋann i ki tee u niib nan barmɔnii. 6 N mɔk dindann nan i saa bann nan timm ŋarin tee u niibe nan barmɔnii. 7 Ti mei Yennu teeni a i daa tuun toonbiiti. Li ki tee ti want ti mɔŋ a ti tee barmɔnii damm kaa; li-i lekii tee ki i dukii a timm ki tee Masiaweira, ŋaan ti loon ki yii tuun toonŋanae, 8 kimaan ti ki loon ki tin jiin Yennu mɔmaan poori; ti loon ki mɔmaan maŋe n dɔŋ tɔɔnn. 9 Li-i tee ki i mɔk paŋ ki tuun toona nba ŋan, ŋanne saa maŋ ti para, kimaan ti ki loon ki tin wanni ti paŋ kaa; li paake ki ti mei Yennu ki teeni, a yin ŋamm i binbeŋ. 10 Li paak, maa ki be i boor nae ki n sɔbin gbouŋ na ki teeni, a mi-i taŋŋi baar i boor yoo nba, li kii kpaa talas ki n dat i tuba ki wanni n paŋi. Ti Yomdaanɔe din turin yudantuk na a n sommi ki yin wei u sɔnu fanu. U din ki turin yudantuk maŋ a n biiri kaa. 11 N naa waas, linba ji biar tee min chabie. Ŋammit i sɔnu kii saak n kpaanii man, kii mɔk mɔtaauk nan parmaasir; ki Yennu nba loonit ki teent parmaasir na sii be nani. 12 I foont i leeb kpamii man. 13 Yennu niib nba kur be nna na foonti. 14 Ti Yomdaanɔ Yiisa Masia sommir, nan Yennu lomm, nan Seyeeŋ mɔtaauk na-ii be nan i kura.

Galasia 1

1 Min Pɔɔl nba tee Masia toomii, nan ti naa waas nba be nna na kur foont Masiaweira nba be Galasia tiŋ ni. Nisaarik kaa teenin Masia toomii, nisaarii kaa bia tumin, ŋaan ti Baa Yennu nan Yiisa Masia nba ki u din fiinɔ kuun ni nae gannin. 3 Ti Baa Yennu nan ti Yomdaanɔ Yiisa Masia n sommi ki bia turi parmaasir. 4 Yiisa Masiae din sak ti Baa Yennu loomm ki kpo ti biit paak a wun fatit tingbouŋ na biit daabsin ni. 5 Ŋɔɔ Yennu kɔɔe yen dontir mɔkmɔk nan mɔkmɔk. Mamɔmm. 6 Li bakitime nan yaa gaar labagann na yiama, ŋaan nyik Yennu nba yiini Masia ninbatinu paak na. 7 Nisiab be ki yiab a bin lebit Masia barŋanii na ki ŋmat i dudukit; ŋaan barmɔniie, barŋansiar ji kaa. 8 Li-i lekii tee Yendɔuŋ ni malaka koo timmie mɔɔnt barŋansiar ki li be li kuukɔɔ ki ki tee taa poŋ din mɔɔnt linba turi na, mɔpor-ii be li yɔɔ paak. 9 Ti poŋ din betiewa, ŋaan n bia ŋammit beerie mɔtana: nisɔɔ-i mɔɔnt labaar ki turi ki li ki tee linba ki i din gaar na, mɔpor-ii be u paak. 10 N ki yiab maa n gaar nisaarik paku kaa, ŋaan Yennu yare ki n loon, kimaan mi-i loon nisaarik pakue, n bo kan teen Masia daabiri. 11 N naa waas, n yaa n tiari nan barŋanii nba ki n mɔɔntir teeni na ki nyii nisaarik nba din pak linba na ni kaa. 12 Nisaarik kaa din wannin ki n gaar, ŋaan Yiisa Masia mɔŋ mɔŋe din fiit wannin. 13 I poŋ gbat maa din tuun biaŋinba, yoo nba ki n din waa Juu teeb jiantu na, nan n din tuu mukisir Yiisaweira bonchiann, ki yiab a maa n biirib ki gbenn. 14 Timm Juu teeb jiantu sɔnu ni, mine din gar tɔɔnn ti waakir ni, kimaan n din jii n par kura ki waa ti yeejamm kaar nba want linbae. 15 Ŋaan Yennu ninbatinu paak, ki u din gannin ki bi daa ki marimi, ki yiinin a man tun u toona. 16 Ki waa din dukin ki nyinn u Bik maŋ paanu ni ki wannin a n mɔɔnt u barŋanii ki tur binba ki tee Juu teeb yoo nba, n din ki saan nisaarik boor ki faa sɔɔ baanni. 17 N bia din ki saan Jerusalem ki saa la binba teen toomiinba n liik na, ŋaan n din fiire li taakpaak ni ki saan Arabia tiŋ ni; li poorpoe ki n ŋmat saan Damaskus doo ni. 18 Ki bina ŋantaa poorpowa ki n tan saan Jerusalem ki foont Piita, ki biar u boor daa piik nan ŋaŋŋmu. 19 Li-i kii tee ti Yomdaanɔ Yiisa naa bik Jems-i kaa, n din ki la toomiinba na sɔɔ. 20 Yennu mɔŋ mi nan maa sɔb linba na tee barmɔniie, ki faak kaa leŋi. 21 Li poorpoe ki n din saan Siria nan Silisia tinii ni, 22 ŋaan li yoo na Masiaweira nba be Judea tiŋ ni na din ki mimi. 23 Baa din mi linba tee bi leeb nba din yeen a "Jɔɔ nba tuu mukisirit na mun ji dia barŋanii nba ki u din yaa wun biir nae ki mɔɔntir teen niib." 24 Ki bi piak Yennu n paak.

Galasia 2

1 Tɔn, li bina piik nan ŋanna poorpoe ki min nan Banabas din ŋmat saan Jerusalem, ki n jii Taitus; 2 Yennue din fiit li sɔnu saanu paanu ni ki wannin, li paake ki n saan. Leŋe ki n yiin saakab na, ti kuukɔɔ, ki wannib maa mɔɔntir barŋanii maŋ biaŋinba ki teen binba ki tee Juu teeb na, kimaan n ki loon maa tun linba, nan maa saa tun linba na n tan biar yanni. 3 Tɔn, n tɔknanlɔɔ Taitus tee Griik nirɔe, ŋaan sɔɔ din ki miau a wun pot u punni. 4 Binba be ki fa faak bi mɔŋ paak a bi mun tee Masiaweira na ŋarin din loon ki Taitus n tun nnae. Li niib din woo ti sinsuuk ni, a bin bann taa mɔk yent-n-mɔŋ nba Yiisa Masia ni na. Bi loon tii tee Moses sennu na daabae, 5 ŋaan taa mun loon tin dia barŋanii nan li barmɔnii sɔnu ki turi na paak, ti ki sakib nan waaminnawa. 6 Ŋaan binba ki bi yib saakab na, (baa tee nijaana koo baa ki tee, li ki kpaa talas min yaa boor, kimaan Yennu ki bikii nan ningannii;) ŋamm nba ki bi yib saakab na din ki turin kpaanpaanii. 7 Ŋaan baa set la linba n boor tee Yennu nba gannin a n mɔɔnt u barŋanii ki tur binba ki tee Juu teeb nan biaŋinba ki u din gann Piita a wun mɔɔnt li barŋanii ki tur Juu teeb nae. 8 Kimaan Yennu paŋ paak, Piita nba din tee toomii ki tur Juu teeb biaŋinba na, nnae ki n mun tee toomii ki tur binba ki tee Juu teeb. 9 Jeems nan Piita nan Jɔɔnn mɔŋ nba ki bi yib saakab na, ŋaan bi mɔŋ din bann nan Yennue turin toongaŋŋir na; li paak min nan Banabas nan ŋamm din foont leeb ki yokin leeb nii ni, ŋanne din want nan ti kura mɔk mɔtaauk nan leeb. Timm nan ŋamm din sake a min nan Banabas-i mɔɔntir barŋanii kii teen binba ki tee Juu teeb na, ki bii mun-i mɔɔntir kii teen Juu teeb. 10 Linba na kuukɔɔe ki bi din betit: a ti daa tammit talasdamm nba be bi sinsuuk ni na po. Li mune ki n set poŋ din loon tumu. 11 Ŋanne ki n tan yakii nan Piita, waa din be Antiok yoo nba na, kimaan u din mɔk biit. 12 Jeems din tun Juu tesiab Antiok doo ni. Baa din daa ki baar yoo nba na, Piita nan binba ki tee Juu teeb na din lakin di jeet, ŋaan baa tan baar yoo nba ki u ji ki sak wun di nammi, kimaan u din tiin niib nba teen punpotu yada nae. 13 Li paak, ki Juu leeb na mun piin tuun jaŋmaan-toona, ki waa Piita nba tun linba maŋ, ki Banabas mɔŋ mun ŋmat waa bi jaŋmaantoona maŋ. 14 Maa din la ki bi ki tɔk barŋanii sɔnu maŋ fanu yoo nba, ki n bet Piita bi kur numm ni maa "A tee Juu nirɔe, ŋaan a binbeŋ tee nan wunba ki tee Juu nirɔ nae, ki bee ki a mukisib a bii tee nan Juu teeb na?" 15 Tɔn, ti tee Juu teeb matiie, ti ki tee niboorganu nba ki bi yib biitdamm na kaa, 16 ŋaan ti mi nan see ki nirɔ n teen Yiisa Masia yada, ŋanne saa te ki Yennu n yet a u tee niŋanɔ u boor; li ki tee taa tuun sennu nba yaa tii tuun linba kaa; li paak, ti mɔŋ mun teen Yiisa Masia yada a Yennu n yet a ti tee niŋamm u boor, yada maŋ paake, ŋaan li ki tee sennu toona tumu paak kaa. Kimaan Yennu kan yet a sɔɔ tee niŋanɔ u boor sennu maŋ toona tumu paaki. 17 Li-i tee taa yiab a Yennu n yet a ti tee niŋamm u boor Masia paak na, ŋaan ki ti lek bia tee biitdamme nan binba ki tee Juu teeb na, linba na want nan Masia ki kɔn toonbiit paak amii? Aaii, li ki want nna kaa. 18 Kimaan mi-i jiŋŋi piin ki sent sennu sɔnu nba ki n din biira naie, ŋann want nan n mɔŋ tee sennu maŋ biirtɔɔe na. 19 Ŋaan sennu na paak ki n kpo sennu maŋ boor, a mii mɔk manfoor Yennu boor. Li tee nan bi din taan kpaa min nan Masia dapunpunn paake na. 20 Li paak, li ji ki tee min nba fo na kaa, ŋaan li tee Masia nba fo ki be n ni nae. Mɔtana, maa mɔk manfoor ki be n gbanant ni na, n teen Yennu Bija Masiae yada, li paake ki n be; ŋɔɔe loonin ki din gaar n paak ki kpo. 21 N ki y‡t Yennu ninbatinu na; li-i tee ki Yennu bo saa yet a nirɔ nba sak sennu nae tee niŋanɔ u boor, li bo want nan Masia kuun maŋ tee yanne.

Galasia 3

1 Yimm Galasia teeb, bonjatana! Yimm nba poŋ mi Yiisa Masia dapunpunn paak kuun po nyik nyik na, ŋmee tan kpanniini? 2 I betin bonyennkɔɔ man, yaa din tuun sennu na toona paake ki i gaar Yennu Seyeeŋ amii yaa din gbat barŋanii na ki teen yada na paake ki i gaarɔ? 3 Bee teen ki i ki mɔk yami? I din piin Masiaweiu nan Yennu Seyeeŋ paŋe; bee ki i ji loon yin gbenn nan i mɔŋ paŋi? 4 Yaa din la Yennu yaarlituk toona nba na kura kaa nyɔɔt nan waama i boorii? N dukin li mɔk nyɔɔt. 5 Yaa din tuun sennu toona na paake ki Yennu turi Seyeeŋ, ki tuun yaarlituk toona i sinsuuk ni amii yaa gbat barŋanii ki teen yada na paake? 6 Li sɔb Yennu gbouŋ ni a "Abraham din teen Yennu yada, li paake, ki ŋɔɔ Yennu din yet a u tee niŋanɔ u boor." 7 Ŋanne want nan niib nba teen Yiisa yada nae tee Abraham yaaboona. 8 Ki li bia sɔb Yennu gbouŋ ni a ŋɔɔ Yennu din poŋ mi nan u tan saa yet a binba ki tee Juu teeb mun tee niŋamm u boor, bi yada paak. Ŋann paake ki u poŋ din yet Abraham barŋanii maŋ a: "A paake ki n tan saa teen mɔsoŋŋann booru kur paak." 9 Li paak, Yennu tee mɔsoŋŋann binba teenɔ yada na paak, nan waa din teen mɔsoŋŋann Abraham nba din teenɔ yada na paak nae. 10 Binba waa sennu ki dukii a sennu na saa tinnib na, Yennu mɔtomm be bi paak, kimaan li sɔb Yennu gbouŋ ni a "Wunba ki waa sennu nba sɔb gbouŋ ni na kur, Yennu mɔtomm be u paak." 11 Ŋanne want fanu nan sennu dianu kan fit te ki nirɔ-ii tee niŋanɔ Yennu boori, kimaan li sɔb Yennu gbouŋ ni a "Wunba teen Yennu yada ki Yennu yet a u tee niŋanɔ u boor, li yɔɔ yada paak, u sii mɔk manfoor nba kaa gbennu." 12 Ŋaan sennu dianu nan yada teenu bɔkita; kimaan li sɔb Yennu gbouŋ ni a "Daanɔ nba waa sennu na fanu, u sii mɔk manfoor." 13 Ŋaan ti din be Yennu mɔtomm nie, kimaan ti din ki fit wei sennu maŋ fanu, ŋaan Masia tiɔŋo din gaar ti paak, ki be mɔtomm maŋ ni ki nyinnit li mɔtomm ni, kimaan li sɔb Yennu gbouŋ ni a "Wunba ki bi kpaau dapunpunn paak na, Yennu mɔtomm be u paak." 14 Yiisa Masia din tun linba na a ŋɔɔ yaa paak ki binba ki tee Juu teeb n mun la mɔsoŋŋann nba ki Yennu teen Abraham paak na; a ti-i teen yada, tin gaar Seyeeŋ nba ki Yennu din senn mɔsonn a wu saa turit na. 15 N naa waas, ŋaant ki n jii nisaarik nan u lɔɔ binbeŋ ki bikin ki yin bann linba ki n beeri na paak: niib banlee-i sak ki lor lor a bin tun siar, ki sɔb bi sana, bi yenɔ ji kan fit nyi u lɔɔ na poor nan waama. 16 Yennu nba din tur Abraham nan u yaa-boonn u mɔsona maŋ yoo nba, u din ki yet a "A yaaboona" kaa, ŋaan u din yet a "A yaaboonn," yenɔkɔɔ, wunba tee Masia na. 17 Maa want linba tee nnae: Yennu din senn mɔsonjaann; ki sennu nba din tan baar bina kobii ŋanna nan piintaa poorpo na, kan fit kpeen Yennu mɔsonn maŋi. 18 Kimaan li-i tee sennu dianu paakie ki Yennu teen niib u piinii, ŋann li wann nan u bo kan tur sɔɔ piinii u mɔsonn na paak; ŋaan li din tee Yennu mɔsonn na paake ki u tur Abraham u piinii maŋ. 19 Li-i bonni tee nnaie, sennu na nyɔɔt tee bee? Toonbiit paake ki Yennu din tur nisaarii sennu na ki pukin u mɔsonn na paak, ki loon sennu maŋ-ii diab mɔkmɔk nan yoo nba ki Abraham yaaboonn nba ki ŋɔɔ Yennu senn mɔsonn ki turɔ na tan saa baar. Ki malakanba jii sennu maŋ ki teen nisaarik nuu ni a wuu tee sɔkintɔɔ, 20 ŋaan Yennu tiɔŋo din tur Abraham u mɔsonn maŋ, li din ki tee sɔkintɔɔ kaa turɔ. 21 Tɔn, ŋanne want nan sennu na kɔn nan Yennu mɔsona-a? Aaii, li ki want nna kaa; ŋaan Yennu-i bonni senn sennu nba saa fit tur nirɔ manfoor, u bo saa yet a niib tee niŋamm u boor sennu maŋ weiu paake. 22 Ŋaan li sɔb Yennu gbouŋ ni a sɔɔ kur mɔk biit, a Yennu n tur binba teen Yiisa Masia yada na piinii nba ki u din senn mɔsonn a u saa turib na; bi yada maŋ paake ki u saa turib. 23 Sennu na din tuu diat nan ti be dansarii ni nae ki tan baar yoo nba ki Yennu fiit yada teenu labaar ki wannit. 24 Li paak, sennu na din ŋman ti yomdaanɔe ki diat mɔkmɔk nan yoo nba ki Masia tan baar, a tin teenɔ yada ki Yennu n yet a ti tee niŋamm u boor. 25 Ŋaan mɔtana ti teen Masia yadawa; li paak, sennu na ji ki tee ti yomdaanɔ. 26 Yaa teen Yiisa Masia yada ki be u ni na, li paake ki i tee Yennu waas. 27 Yimm nba ki bi din wuri Yennu nyunwuru Masia sann ni na, yimme gaar u mɔŋ binbeŋ. 28 Li paak, bɔkitu ji ki be binba tee Juu teeb nan binba ki tee Juu teeb sinsuuk ni, li bia ki be binba tee daaba nan yent-n-mɔŋ damm sinsuuk ni, li ki be poob nan jab sinsuuk ni; yaa be Yiisa Masia ni na paake ki i kura tee yenɔkɔɔ. 29 Ki yi-i tee Masia yabie, ŋann i tee Abraham yaaboonae, ki tan saa gaar piinii nba ki Yennu din senn mɔsonn a u saa turɔ na.

Galasia 4

1 Tɔn, n bia ŋamii yeen a ŋaak bik nba lek tuu yaa wun tan di u baa faar na, ŋaan yoo nba ki u daa tee bonbunn na, bi tuu diau nan daabir nae. 2 Yoo nba ki u tee bonbunn na, nisiabe tuu diau ki wubiiɔ mɔkmɔk nan waa tan saa beer jɔɔ, ki jaŋ yoo nba ki u baa senn na. 3 Ti mun tee nnae; yoo nba ki ti din ki mi Yiisa na ti din tee nan bonbuna nae, ki durinya ni na seek paŋ din diat. 4 Ŋaan yoo nba din tan jaŋ na, ki Yennu tun u mɔŋ Bija, ki poo marɔ, ki u sak Juu teeb sennu, 5 a wun tinn binba be sennu maŋ ni na, ki tin kpant Yennu waas. 6 Taa tee u waas na paake ki u tun u Bija maŋ Seyeeŋ na ki u be ti para ni, ki ti yi ŋɔɔ Yennu a "N Baa, n Baa." 7 Li paak, a ji ki tee daabir kaa, ŋaan a ji tee Yennu bike; ki faa tee u bik na paak, u saa tura linba kur ki u mɔk ki teen u waas nawa. 8 Sianyoo i din tuu ki mi Yennu, li yoo i din tuu tee daaba ki tur linba set ki tee Yennue, 9 ŋaan mɔtana i bann Yennuwa, ki Yennu mun mi-i, li ji teen nlee ki i loon yin ŋmat wei bona nba ki mɔk yaak nba saa sommi na? Bee teen ki i jin loon ki i kpant bi daaba? 10 I mantik ŋaan ki i baka be dagannkaa, nan ŋmaagannkaa nan sakgannkaa nan bingannkaa ni bonchiann, 11 ki li te ki n mɔk jijeet i paak nan maa tun linba kur turi na biar yanna. 12 N naa waas, n barimiie, yii tee nan min na man, kimaan n mɔŋ mun ji tee nan yimm nae. I ki tun siar biirimi. 13 Maa din yiar na paake ki n sint mɔɔnt barŋanii na ki turi. 14 Li yoo maŋ n yiaru na din daamiiwa, ŋaan i lek din ki y‡timi; i din gaarin nan yaa bo saa gaar Yennu malaka biaŋinba nae, ki bia gaarin nan yaa bo saa gaar Yiisa Masia biaŋinba na. 15 I din mɔk parpeenn; ki bee teen ki i ji ki mɔki? N mɔŋ saa yet nan li-i diŋŋi bonni saa fit, i din bo saa sak ki nyinn i mɔŋ ninbina ki turima; 16 ki mɔtana, maa beeri barmɔnii na, n ji kpant i dataake? 17 Nisiab bikii a bi mɔk lomm bonchiann nanii, ŋaan bi dudukit ki ŋani. Bi lorin a bin bɔkit min nan yimme, ki yin tunn kii waab. 18 Nirɔ baka-i be sɔnŋanu ni yoo saaka, li ŋan, mi-i lekii be i boor koo mi-i kaa. 19 N walonkai, li yiarin bonchiann i paak mɔkmɔk nan yoo nba ki Masia binbeŋ na tan saa gbee i ni. 20 N yan ŋmat i paake. Ki n summan ki n be i boor mɔtana ki lek ŋamm jii binbeŋ nba sɔ nanii. 21 Yimm nba loon ki sennu-i dia-i na, i ki gbat sennu maŋ nba yet biaŋinba-a? 22 Abraham din mɔk bonjai banlee; ki bi yenɔ naa tee daabir, ki lɔɔ naa mun din tee pookuur poo. 23 Ki daabir na din mar u bonjabik maŋ nan niib nba maar biaŋinba nae, ŋaan ki pookuur poo na mar u bonjabik na nan biaŋinba ki Yennu din senn mɔsonn turɔ na. 24 Bi poob banlee na see Yennu mɔlora ŋanlee na seenu nie. Daabir maŋ sann din tee Hagar; ki u see mɔlor nba ki Yennu senn Sainai jɔɔr paak na seenu ni, ki din mar u bik daabsin ni, 25 kimaan Hagar see Sainai jɔɔr nba be Arabia tiŋ ni na seenu nie, ki ŋman nan tingbouŋ na ni Jerusalem na, ki ŋɔɔ nan u waas tee daaba, 26 ŋaan sanpaapo Jerusalem na tee yent-n-mɔŋ dooe, ki bia tee ti naa; 27 kimaan li sɔb Yennu gbouŋ ni a: "Yimm pookammata, yii mɔk parpeenn! Yimm nba ki mi matyiaru tonu na, yii yiin parpeenn yanii man! Kimaan poo nba be u kuukɔɔ tan sii mɔk waas bonchiann ki gar poo nba sɔrɔ daa ki mi gɔrin ki nyikɔ." 28 Tɔn, n naa waas, timme mun tee Yennu mɔsonn waas nan Aisak nba din tee biaŋinba na. 29 Baa din mar bonjabik nba nan niib nba maar biaŋinba na din tuu mukis wunba ki bi din marɔ Seyeeŋ yiikoo paak nae, ki li mun bia lek tee nnae nan mɔtana. 30 Ŋaan li sɔb nlee Yennu gbouŋ ni? Li sɔb a "Berin poo nba tee daabir na nan u bonjabik na, kimaan daabir bonjabik na kan mi lakin di bi baa faar nan pookuur bonjabik na." 31 N naa waas, maa yeen linba tee a ti ki tee poo nba tee daabir na waas kaa, ŋaan ti tee pookuur poo na waase.

Galasia 5

1 Yiisa Masia poŋ fat timma, ki ti be ti yama nie. Li paak, i daa te siar ji dia-i ki i tee li daaba. 2 Min Pɔɔl mɔŋe beeri a li-i tee ki i sak ki dia punpotu sennu na, li want nan Masia ki mɔk nyɔsiat turiini. 3 N ŋammit beer daanɔ nba waa punpotu sɔnu nae, nan li kpaa talase ki wun wei sennu na kur. 4 Yimm nba yiab a Yennu n yet a i tee niŋamm u boor sennu weiu paak na, i poŋ bɔkit i mɔŋ nan Masia, ki bia nyinn i mɔŋ Yennu ninbatinu niwa. 5 Ŋaan timm teen Masiae yada, ki u Seyeeŋ mun be ti ni; li paak, ti mɔk dindann ki guu yoo nba ki Yennu saa yet a ti tee niŋamme u boor. 6 Kimaan ti-i be Yiisa Masia ni, ti-i lekii pot ti puna amii ti-i kii poti, li ki kpaa talasi. Ti-i teen Yiisa Masia yada ki loon leeb, ŋanne tee linba kpaa talas. 7 Yaa din tuun fanu na, ŋmee tan te ki i nyik barmɔnii maŋ weiu? 8 Yennu nba ganni na kaa tun linba na. 9 Bi tuu yeen a "Datiŋ waaminnae te ki boroboro yon kur fuutir piir." 10 Ŋaan ti Yomdaanɔ paak, n bia mɔk yada a i sii mɔk dudukyenn nanin; ki li-i tee nirɔ nbae ŋmat i dudukit, Yennu saa dat daanɔ maŋ tubira. 11 N naa waas, mi-i biakii mɔɔntir a niib-ii porii bi puna gbaa, bee ki bi bia mukisimi? Li-i bonni tee barmɔniie ki n mɔɔntir punpotu po nan maa mɔɔntir dapunpunn po na, ŋann li bo kii mɔk mukisuku. 12 Min bo summan ki binba ŋmat i dudukit na n nyik punpotue, ŋaan tɔɔ bi mɔŋ. 13 N naa waas, Yennu yiini yent-n-mɔŋ nie, ŋaan i daa te ki i yent-n-mɔŋ maŋ n tan te ki i niɔŋ n nyanniini. Ŋaan yimm n jii lomm ki somm i leeb man. 14 Kimaan sennu maŋ yur yet a "I loon a lɔɔ nan faa loon a mɔŋ biaŋinba na." 15 Ŋaan li-i tee ki i tee i leeb danii ki biir i leeb nan muuk ni bonkobit na, i set saa baan i leeba. 16 Ŋaan n beerie, ŋaant ki Seyeeŋ-ii dia i binbeŋ man, ki daa te ki i niɔŋ tuun nisaarik loommu. 17 Kimaan nisaarik loomm nan Seyeeŋ maŋ loomm ki waa leeri. Loomm nba taar munlee na tee dataie nan leeb i ni; li paak, i kan fit tun yaa loon linba fanu. 18 Li-i tee ki i saak ki Yennu Seyeeŋ ŋmakitiri sɔnu, i ji ki be sennu maŋ ni. 19 Nisaarik binbeŋ nba want li mɔŋ linba ni tee bonchon-chonsime, nan jakint toona, nan lammiok, 20 nan pamannu, nan nyɔkdinu, nan dataar, nan kunkɔna, nan funfunbiiuk, nan wutoor, nan bɔkitu, nan lukitin, 21 nan punponn, nan dayibu, nan lor kpeena, ki bia jii bonlia nba naan nna ki pukin; n beeri nan maa poŋ beti biaŋinba na, binba tuun linba na kan mi kɔɔ Yennu naan ni. 22 Ŋaan Yennu Seyeeŋe te ki nirɔ mɔk lomm, nan parpeenn, nan parmaasir, nan sukuru, nan burchint, nan ŋamm, nan yada, 23 nan sikin-n-mɔŋ, nan mɔŋdianu. Sennsau ji kaa ki saa biir wunba diari. 24 Ki Yiisa Masia nba yen binba na ŋarin poŋ kpii bi nisaarik binbeŋ nan li loonbiit kura. 25 Yennu Seyeeŋ nba turit manfoor na, ŋɔɔe ŋan ki tii waau. 26 Li ki ŋan ki tii mɔk karinbaanii, koo tii fiint ti leeb wutoa, koo tii mɔk funfunbiit nan ti leebi.

Galasia 6

1 N naa waas, li-i tee ki i la sɔɔ tun toonbiit, yimm nba be nan Yennu Seyeeŋ na, li ŋan ki yin sommɔ nan lomm, sɔnii kur ni, ki wun ŋamm set fanu, ki yii mi ki bikinu saa te ki i mun bot. 2 Yi jii i leeb jik-kpiata man, ki gbeen Masia sennu. 3 Sɔɔ-i kii tee siar, ŋaan bikii a u mun tee sɔɔe, u kpann u mɔŋe. 4 Li ŋan ki sɔɔ kur n bikin u mɔŋ binbeŋa, ki fit kii mɔk yuugontir u mɔŋ toonŋana paak, ki daa bikii waa tun linba nan u lɔɔ toona, 5 kimaan li kpaa talase ki sɔɔ kur n tun u mɔŋ toona. 6 Nirɔ nba ki bi wantɔ Yiisa Masia barŋanii na, li ŋan ki li yɔɔ n mun jii linba ki u mɔk kur ki chent nan u wanntɔɔ maŋ. 7 I daa kpann i mɔŋ mani; sɔɔ kan fit kpann Yennu; nisaarik nba bur linba, ŋanne ki u kpan tan saa jaan. 8 Wunba bur u mɔŋ gbanant loomm, u tan saa jaan kuume u gbanant loonbiit maŋ paak; ŋaan wunba bur Seyeeŋ nba loon biaŋinba na, u tan saa jaan manfoor nba kaa gbennue, Seyeeŋ maŋ paak. 9 Li paak, ti daa bakit nan toonŋana tumu mani, kimaan ti-i kii nyik toonŋana, ti tan saa gaar li nyɔɔt yoo nba jaŋe. 10 Li paak, ti-i la yaak, tin tun linba ŋan ki tur sɔɔ kura; ŋaan mantik kii tuun kii teen binba teen Masia yada ki waau na. 11 Tɔn, i la maa sɔb sɔbingbeŋŋa na nan n mɔŋ mɔŋ nuu. 12 Niib nba loon bin penn Juu teeb para na, ŋamme mukisi a yin pot i puna, ki Juu teeb maŋ daa dintib biak Masia dapunpunn na paaki. 13 Binba porii bi puna na mɔŋ ki waa Yennu sennu, ŋaan bi loon ki yin pote ki bii mɔk japaat i punpotu maŋ paak; 14 ŋaan min ŋarin kan mi faa parbiir see ti Yomdaanɔ Yiisa Masia dapunpunn na kuukɔɔ paak; kimaan u dapunpunn maŋ paake ki n kpii tingbouŋ na niɔŋ n gbanant ni, ki tingbouŋ na niɔŋ mun nyii n gbanant ni. 15 Bɔkitu kaa wunba pot nan wunba ki pot sinsuuk ni. Linba ji kpaa talas tee binbenpaaŋ nba ki Yennu turit nae. 16 Parmaasir nan ninbatinu-ii be binba kur waa wannu nba na paak; bi tee Yennu niibe. 17 I mi man ki sɔɔ n ji turin daamii, kimaan n poŋ mɔk biak dɔkit n gbanant paak, ki li want nan n tee Yiisa daabire. 18 N naa waas, ti Yomdaanɔ Yiisa Masia n sommi i para ni. Mamɔmm.

Efesus 1

1 Min Pɔɔl nba ki Yennu gannin a n teen Yiisa Masia toomii na foont Yiisa Masiaweira nba teenɔ yada ki be Efesus doo ni na. 2 Ti Baa Yennu nan ti Yomdaanɔ Yiisa Masia n sommi, ki bia turi parmaasir. 3 Ŋaant ki ti tur Yennu, wunba tee ti Yomdaanɔ Yiisa Masia Baa na niipoouk man, kimaan taa be Yiisa Masia ni na paak ki ŋɔɔ Yennu turit Seyeeŋ piinii kur nba be sanpaapo. 4 Yennu nba poŋ daa din ki nan tingbouŋ yoo nba naewa ki u din gannit a tii tee u niib Yiisa Masia paak, kii tee popeendamm ki daa mɔk biit u boori. Kimaan Yennu loonit, 5 li paak, u loomm nan u lora ni u poŋ din dukinewa a Yiisa Masia nie ki u saa teenit u waas. 6 Ŋaant ki tin pak Yennu kimaan u ninbatinu nba yab bonchiann biaŋinba, nan waa tint ninbaauk u Bilonkak paak na. 7 Kimaan Yennu nyik chab ti biit ki nyinnit daabsin ni u Bilonkak maŋ sɔn paake. 8 Gotir, Yennu ninbatinu nba be ti paak ki ki mɔk bikinu biaŋinba. Yennu nba mɔk yan nan bannu bonchiann biaŋinba na, ki u tun waa dukin biaŋinba 9 ki fiit wannit woonin ni lora nba ki u din senn a wun tan tun Masia ni na. 10 Yoo maŋ-i taŋŋi jaŋ, u ji saa tun gbenn u lora maŋ, ki lakin u naamii kur nba be sanpaapo nan tiŋ ni ki Masia-ii tee yudaanɔ. 11 Yennu tun siar kur u dudukit nan u lora nie, ki gannit a tii tee u niib, nan u bibikit nba tee biaŋinba pinpiik niwa na. 12 Timm nba dɔŋ mɔk dindann Masia ni na, tii piak Yennu kii dontir u sann man. 13 Ŋaan yimme mun din gbat tinnu barŋanii nba tee bar-mɔnii maŋ ki teen Yiisa Masia niib. Yaa teen Masia yada na paak ki Yennu jii u Seyeeŋ nba tee u yent dɔk na ki turi nan waa din lor biaŋinba na. 14 Ŋanne tee siara nan ti tan saa la ti yiar Yennu boor, ki bia want nan u saa tur u niib yent-n-mɔŋ nan barmɔnii. Tii piakɔ kii dontir u sann man. 15 Li paak, yoo nba ki n din gbat yaa teen ti Yomdaanɔ Yiisa yada nan yaa loon Yennu niib biaŋinba na nan dinna, 16 n teen Yennu niipoouk i paak ki ki nyikit. N tuu tian i poe n miaru ni, 17 ki lek mei ti Baa Yennu, wunba tee paŋ daanɔ ki bia tee ti Yomdaanɔ Yiisa Masia Yennu, a wun turi Seyeeŋ nba saa turi yan ki fiit Yennu wanni ki i ŋamm bannɔ. 18 N bia meiɔ maa wun yent i numpo ki yin bann dindann nba paak ki u yiini na, ki bia bann nan bona nba ki u tan saa tur u niib na ŋan bonchiann, 19 ki bia bann u paŋ nba yab biaŋinba ki saa somm timm nba teenɔ yada na. 20 U panchiɔŋ maŋe ki u din jii ki fiin Masia kuun ni ki kaanɔ Yendɔuŋ ni u niidiitu po na. 21 Masiae yen sanpaapo yent damm, nan yiikoo damm, nan paŋ damm, nan yomdamm kur; ŋɔɔe mɔk sann nba gar yiikoo kur sana nba be durinya na ni nan durinya nba baat na ni. 22 Yennu jii bonsiar kur ki teen Masia nuu nie. U jii ŋɔɔe a wuu tee ŋɔɔ Yennu nigannkab kura Yomdaanɔ. 23 U nigannkab maŋe tee u gbanant, ki u gbanant maŋ gbee nan u paŋ, ki u mun gbee nan Yennu paŋ.

Efesus 2

1 Yoo nba din gar na, i mɔy‡tuk nan biit tumu paak, ki li tee nan i kpoe na. 2 I din waa tingbouŋ na narinbiit sɔnue ki sak tingbouŋ na bat Sintaanii nba dia niib nba ki saak Yennu mɔb na. 3 Barmɔnii, ti kura mun din naan nan li nibooru nae, ki waa ti gbanant niɔŋ, ki tuun ti gbanant nan ti dudukit loomm. Timm nan ŋamm toona din baat nan Yennu wutoore ti kura paak. 4 Ŋaan Yennu lomm nan u ninbatinu yab bonchiann ki kaa bikinu, 5 li paak, taa din y‡t Yennu mɔb ki li tee nan ti kpoe na yoo nba, li yooe, ki u nyinnit kuun ni, ki kɔɔnit manfoor ni Masia paak; Yennu ninbatinu paak ki i tinn. 6 Taa be Yiisa Masia ni na paake ki Yennu din lakin fiin timm nan ŋɔɔ, ki ti lakin dii naan nanɔ Yendɔuŋ ni. 7 U din tun linba na a wun wann sɔɔ kura u ninbatinu nba yab biaŋinbae, ki tun burchint turit Yiisa Masia paak. 8 Yennu ninbatinu na paake ki i tinn, kimaan yaa teen Masia yada na. 9 Sɔɔ kan fit nyu bara li paaki, kimaan li ki tee u tiɔŋ toona paak kaa; li tee Yennu piiniie. 10 Yiisa Masia nie ki Yennu teent taa tee binba, ki turit toonŋana binbeŋ a tii tuun linba ki u din poŋ lor a ti tun na. 11 Yimm nba ki tee Juu teeb na, Juu teeb yi yimm ŋarin punjoote, ŋaan yi bi mɔŋ sankpana; yi tian man yaa din tee nibooru nba yoo nba gar na. 12 I din ki mi Masia li yoo. I din tee saamme, ki bi ki kaanii ki pukint Yennu nigannkab ni. I din be tingbouŋ na ni ki ki mi Yennu, ki bia ki mɔk dindann, kimaan waa din tur u niib mɔsona nba, i din ki pukin li ni; 13 ŋaan mɔtana i ji be Yiisa Masia nie, li paak yimm nba tuu be banfɔkira maŋ ji nyat nakinɔɔe u kuun paak, 14 kimaan ŋɔɔe taan Juu teeb nan binba ki tee Juu teeb ki teemm niyenɔkɔɔ, ki parmaasir baar; waa kpo na paak ki u biir dataar nba din tuu puun bi sinsuuk ni na. 15 U din kpeen Juu teeb sennu nan li kɔɔt na kura a wun te parmaasir n baar nibooru munlee maŋ sinsuuk ni, ki bii be u ni ki taan kii tee nipaamm booryeŋ. 16 U dapunpunn paak kuun maŋ te ki u biir dataar maŋ bi sinsuuk ni, ki jiib ki taamm booru yennkɔɔ ki jen namm Yennu boor. 17 Li paak, Masia din baar mɔɔnt parmaasir barŋanii mɔɔntii ki tur yimm nba ki tee Juu teeb, ki din fɔk nan Yennu na, ki bia baar nann ki tur Juu teeb nba kpiau na. 18 Masia paake ki Juu teeb nan binba ki tee Juu teeb na kura fit baar ti Baa Yennu maŋ boor, u Seyeeŋ yenɔkɔɔ ni. 19 Mɔtana, yimm nba ki tee Juu teeb nan Yennu niib na tee tinyeŋkɔɔ waase, ki ji tee Yennu ŋaateeb; i ji ki tee saamm kaa. 20 Fiakir yennkɔɔ nba ki sɔkiniinba nan toomiinba din fɔkin na paake ki bi mun tɔɔn, ki Yiisa Masia mɔŋ tee li tanjaann. 21 Ŋɔɔe dia Yennu niib maŋ ki bi be fanu ki kpaatir ti Yomdaanɔ boor. 22 Yimm nan ŋɔɔ nba taan nan leeb na paak, ki yimm nan ŋamm mun bia taan teen diiuk nba tee Yennu yar ki u Seyeeŋ be li ni na.

Efesus 3

1 Linba na paake ki min Pɔɔl nba kɔɔ dansarik Yiisa Masia toona paak na lek mei Yennu yimm nba ki tee Juu teeb na paak. 2 N ki biris nan i poŋ gbat nan Yennu turin toona na, i sommir paaki. 3 U din fiit u woonin ni lor na ki wannima. 4 (I-i karin maa din sɔb linba waaminna na, i saa bann nan n set mi siar ki jiin Masia po.) 5 Mɔtana Yennu ji ŋaan ki u Seyeeŋ fiit u woonin ni lor na ki wann u toomiinba nan u sɔkiniinba nba ki u gannib na, ŋaan li din ki tee nna sianyoo. 6 U woonin ni lor maŋ tee nnae: barŋanii maŋ paak ki binba ki tee Juu teeb na ji fit taan ki la yiar Yendɔuŋ ni nan Juu teeb; ki bia taan namm ki tee gbananyennkɔɔ ki fit mɔk waa din senn mɔsonn nba Yiisa Masia ni na. 7 Yennu ninbatinu paak ki u din turin yaak a n teen u toomii kii mɔɔntir u barŋanii, nan waa turin paŋ biaŋinba na. 8 Yennu niib sinsuuk ni, mine tan joont ki ki tee siar, ŋaan Yennu tur mine yaak a man jii barŋanii nba wantit Masia nba sii teen binba ki tee Juu teeb na bonŋana bonchiann biaŋinba, 9 ki bia te ki niib kur nunii n yent, ki bann biaŋinba ki Yennu woonin ni lor maŋ tuun ki gbeent Masia ni. Yaayoo niewa ki Yennu nba nan bonsiar kur na din diar woonin ni 10 a Masia niib paak malakanba ni yent damm nan Yendɔuŋ ni yiikoo damm n tumii mɔtana u subinbooru booru na. 11 Ti Yomdaanɔ Yiisa Masia nie ki u din tun linba na nan waa din lor biaŋinba na. 12 Taa teen Masia yada ki be u ni na paake, ki ti mɔk yuugontir ki saa baar Yennu boor nan parcheenn. 13 Li paak, n barimiie, i daa te ki i para biir nan maa di biak i paak na, kimaan li tee i sommir paake. 14 Linba na paak ki n gbaa n duna paak ti Baa Yennu tɔɔnn, 15 wunba yaa boor ki Yendɔuŋ ni nan tingbouŋ na ni maaru kur gaan sann nba tee Baa na. 16 Yennu paŋ nba yab bonchiann biaŋinba na, n meiɔ a wun turi paŋ maŋ u Seyeeŋ paak, ki paŋ maŋ-ii be i ni, 17 n bia meiɔ a Masia n jii i para ki teen u binbeboor, i yada paak, ki meiɔ a wun te ki yin fit set chib, ki baa jiina ki fɔkin fiakir, ki lomm na-ii paar, 18 ki yimm nan Yennu niib kur n fit bann Masia lomm yarimu, nan li fɔkint, nan li sumiiu nba jan biaŋinba, 19 ki bann Masia lomm nba gar siar kur, ki i benu-ii tee nan Yennu benu na. 20 Yennu paŋ nba tuun ti ni na paak, u saa fit tun bonsiar kur ki turit ki gar taa dukii linba ki meiɔ; 21 ŋɔɔ Yennu tan saa la baakir Yiisa Masia nan u weira paak, yoo kur, yaa yoo sii yoo. Mamɔmm.

Efesus 4

1 Min nba kɔɔ dansarik ti Yomdaanɔ toona paak na, n kpaaniie a yin ŋaan ki i binbeŋ-ii tee fanu nan Yennu nba loon ki lii tee biaŋinba na. 2 Yii sikint i mɔŋ, kii be soon nna nan sukuru, kii mɔk yandiŋir nan i leeb, nan lomm. 3 Yennu Seyeeŋ nba din turi mɔtaauk nba na, yi yabir i mɔŋ kii be nan par-maasir. 4 Masia niib tee gbananyenne, ki Yennu Seyeeŋ yenɔkɔɔe be, ki Yennu tinni ki turi dindann yennkɔɔ. Yomdaan-yenɔkɔɔe be, ki ti taan ki teenɔ yada, ki Yennu nyunwuru mun tee yennkɔɔ. 6 Yennu tee yenɔkɔɔe ki tee nisaarii kura Baa, ki bia tee sɔɔ kura Yomdaanɔ nba tuun siar kur, ki bia be siar kur ni. 7 Masia nba turit linba na, ti kura gaar piingaŋire, 8 nan laa poŋ sɔb Yennu gbouŋ ni biaŋinba na a: "Waa din doo sanpaapo yoo nba, ki u nyinn yommii ki ŋaab yann, ki tur nisaarii piinii." 9 Tɔn, "U din doo sanpaapo" paak tee bee? Li want nan sinsinn u din sik tingbouŋ na nie. 10 Ŋɔɔ nba din sik tingbouŋ na ni maŋe bia doo sanpanagbeŋ a wun gbee yent durinya na. 11 Ŋɔɔe tur nisaarii piinii, ki gann siab ki teemm toomiinba, ki leeb tee sɔkiniinba, ki yemm mun teen barŋanii mɔɔnt teeb, ki siab mun tee ŋɔɔ Masia niib diara nan wannteeb. 12 U tun linba na a binba tee Yennu niib na kura n fit jaŋ nan u toona maŋe, ki chee ŋɔɔ Masiaweira para. 13 Li paak, taa teen Yennu Bija yada ki bannɔ na, ti saa taan yomme kii tee niib nba binbeŋ ŋan, ki tee nan ŋɔɔ Masia yar na. 14 Ti ji kii tee waas kaa, ki nibiit nan kpinkpannii damm sii diat laŋ nan baa tee nileeb biaŋinba na. 15 Ŋaan ti sii piak barmɔniie nan lomm kii nɔb kii pukii, ki Masia tee ti yudaanɔ. 16 Ŋɔɔe te ki gbanant bɔka kur dia bi leeb, ki gbanant maŋ tukita dia nan leer; li kura-i bonni tuun nan leeb chib chib, gbanant maŋ bo sii nɔbe. 17 Ti Yomdaanɔ sann paak, n kpaaniie, i ji daa be nan binba ki mi Yennu, ki bi dudukit be bunbɔnn ni, ki ki mɔk nyɔɔt na. 18 Bi tee tubkangbatae ki ki bant siari, li paak, bi ki pukin Yennu nba tur manfopaann nba na ni. 19 Bi ki tiin fei, ki lin tuun jakint toona, ki ki dia bi mɔŋ nan waaminnawa. 20 Ŋaan yimm din ki tumii ŋann kaa Masia boori. 21 I din gbat u po, ki teen u weirae, ki bi bia wanni barmɔnii nba be u niwa. 22 Li paak, yabit i mɔŋ man ki nyann i binbenkperik niɔŋ nba tuu biiri na. 23 Ŋaant ki i dudukit nan i para n ŋamm pant, 24 kii dia binbenpaaŋ nba ki Yennu turi na, kii naan Yennu, kii be fanu, kii tee popeendamm nan barmɔnii. 25 Li paak, yi nyik faak, ŋaan sɔɔ kur-ii piak barmɔnii kii teen u lɔɔ, kimaan ti tee niyenɔkɔɔe Masia ni. 26 Li-i tee ki a donn wutoor ŋaan faa daa tuun toonbiiti, ki bia daa diar a par ni ki yonnu baa, 27 ki daa teen Sintaanii yaaki. 28 Wunba tuu jaan u leeb bont na, wun ji nyik jamu, ŋaan yabir tun toona ki di, ki bia fit tur tatimm linba ki bi loon. 29 I daa piak mɔbonbiit ki teen i leebi, ŋaan te ki i mɔbona-ii tee linba kpaa talas ki mɔk nyɔɔt, ki i leeb-i gbat, lin pukimm binbeŋ nba fan. 30 I daa tuun linba saa te ki Seyeeŋ nba tee Yennu yent dɔk i paak na n la parbiiri. Ŋɔɔe tee dɔk nba want nan Daar baate ki Yennu tan saa turi yent-n-mɔŋ nan barmɔnii. 31 Yi nyik tonu binbeŋ kur, ki daa mɔk wutoori. Sɔɔ ji daa mɔk kunkɔchiɔk nan u lɔɔ, sɔɔ daa sukii u lɔɔ, ki bia nyik naŋ dudukit kura i ni. 32 Yii tee burchimm nan ninkpabauŋ damm man i leeb boor. Yii nyikit leeb biit kii chabitib nan Yennu nba nyikit i yara ki chabiti biaŋinba Masia paak na.

Efesus 5

1 Yaa tee Yennu walonkai na, yi yabir i mɔŋ kii tee nan ŋɔɔ na, 2 ki ŋaan ki lomm-ii dia-i nan Masia nba din loont bonchiann ki gaar ti paak ki kpo ki teen maruŋ nba ki Yennu loon na. 3 Yaa tee Yennu waas na paak, li poŋ ki ŋan nan bonchon-chonsin, koo jakint toona, koo nianchiɔŋ toona i be i sinsuuk ni. 4 Yii teen Yennu niipoouk yoo kura, ŋaan daa te ki bonchonchonsin barii koo jakint barii koo baryana nyi i mɔi ni. 5 Li ŋan yii mi nan wunba tee bonchonchonn koo joonbaaruk koo jakint daanɔ koo nianchiɔŋ daanɔ, ŋɔɔe kan la yiar Masia nan Yennu naan ni; nianchiɔŋ tee nan patmannu nae. 6 Li toonbiit tumu paake te ki Yennu wutoor baat mɔy‡tdamm paak. I daa te ki sɔɔ n jii u jat wannu ki kpanniini. 7 I bɔkit i mɔŋ, ŋaan nyik li damm. 8 I ji tee Yennu waase, ki be yentu ni; i ki be bunbɔnn ni kaa nan yaa din tuu be na; li ŋan ki yii tee yentu na waas, 9 kimaan linba tee barmɔnii nan yentinu nan toonŋana kura tee yentu yare. 10 Li paak, yi yabir i mɔŋ ki tumii linba saa penn ti Yomdaanɔ par, 11 ki daa tokii binba tuun bunbɔnn ni toona ki nyɔɔt kaa li ni na, ŋaan te ki bi bunbɔnn ni toona maŋ n kɔɔ yentu ni. 12 Linba ki bi tuun bunbɔnn ni na mɔk fei bonchiann nan tii piak li po gbaa. 13 Ŋaan baa tan saa nyinn bonsiar kur yeenin ni yoo nba, bi bunbɔnn ni binbeŋ maŋ kura saa fiite perrr. 14 Kimaan linba kur ki bi fiit li gbina, li ji tuu dɔɔ yeenin nie. Li paake ki li din sɔb Yennu gbouŋ ni a: "Fin nba gɔɔnt, fan fiir gɔɔn ni, ki fiir kuun ni, ki Masia saa tura u yentu." 15 Li paak, i daa be jatbenu, ŋaan kii tee subindamm. 16 Yi jii i yoo kii tuun fanu, kimaan yoo na tee yobiiuko. 17 Li paak, yii bant linba tee ti Yomdaanɔ loomm ki daa tee i mɔŋ jatiti. 18 Yi daa nyu daan ki yibi; ŋann saa biirie, ŋaan yii yabir i mɔŋ paak kii gbee nan Yennu Seyeeŋ. 19 Yii yiin yanii kii piak ti Yomdaanɔ i para ni, kii yiin nan i leeb Yennu gbouŋ ni yanii nan Seyeeŋ yanii. 20 Yoo kur yii teen ti Baa Yennu niipoouk bonsiar kur paak, ti Yomdaanɔ Yiisa Masia sann ni. 21 Masia paak, yi sikin i mɔŋ ki tur i leeb man. 22 Poob, yaa baakit Masia biaŋinba na, yii saak i sɔrib mɔi nna, 23 kimaan Masia nba mɔk yaak u niib paak biaŋinba na, nnae ki jɔɔ mun mɔk yaak u poo paak. Masia niib tee u gbanante ki u tee bi Tinntɔɔ. 24 Poob mun-ii saak bi sɔrib mɔi bont kura ni nan Masia niib nba saakɔ biaŋinba na. 25 Jab, yii loon i poob nan Masia nba loon u niib ki gaar bi paak ki kpo biaŋinba na. 26 U din tun linba na, ki bia jii Yennu barii nan nyun ki wurib, a wun ŋammib fanu 27 ki jiin teemm u mɔŋ nuu ni nan fant, ki bi fant na daa mɔk dansiari, kii bia kii tee popeendamm ki daa mɔk biit nan waaminnawa. 28 Jɔɔ nba loon u poo, u loon u mɔŋe, li paak, li ŋan ki jab-ii loon bi poob nan baa loon bi mɔŋ gbanant biaŋinba na. 29 (Sɔɔ ki mi y‡t u mɔŋ gbananti; sɔɔ kura gorii u gbanante fanu ki dint u mɔŋ nan Masia nba tuun biaŋinba teen u niib na. 30 Timme tee u gbanant maŋ.) 31 Yennu gbouŋ yet nnae a, "Linba na paak li ŋan ki jɔɔ n nyik u naa nan u baa, ŋaan jii u mɔŋ ki taan nan u ŋaapoo ki bin ji teen yomm." 32 Yennu mɔmaan na sumii bonchiann, ŋaan min mi nan li want Masia nan u niib poe. 33 Ŋaan li bia want yimme a li ŋan ki jɔɔ kura-ii loon u poo nan waa loon u mɔŋ biaŋinba na, ki poo kur-ii munii baakit u sɔrɔ.

Efesus 6

1 Waas, yii saak i damm mɔi ti Yomdaanɔ Masia paak, kimaan ŋanne took nan yin tun. 2 Sennu nba ki Yennu mɔsonn pukin li paak sinsinn na tee a, "Turin a naa nan a baa baakir, 3 ki a bont kur n somm fanu, ki a manfoor n bia fɔkit tingbouŋ na ni." 4 Baanba, i daa dia i waas diabiiuk ki dont bi wutoa, ŋaan kii wantib kii kpaamm ti Yomdaanɔ nba loon biaŋinba. 5 Tɔn, yimm nba tee daaba mun-ii saak i chanbaanba mɔi, kii tiimm jaŋmaanii, kii tuun toonn kii teemm nan i para kura nan yaa bo sii tuun ki teen Masia biaŋinba na. 6 I daa tuun ki teemm yoo nba ki bi gorii-i na kuukɔɔ kaa, a bin pakii, ŋaan yi jii i mɔŋ ki teen Masia daaba kii tuun linba tee Yennu loomm nan i para kura. 7 Yii tuun i toona nan parpeenn ki lii want nan i tuun ki teen ti Yomdaanɔ Masiae, ŋaan daa dukii nan i tuun teen nisaarike; 8 kii tian nan ti Yomdaanɔ tan saa tur wunba yen u mɔŋ nan daabir kura bi toonŋana paauko. 9 Chanbaanba, yii mun-ii dia i daaba bonŋann ki daa diab nan nimmɔnni, kii biakii tian nan yimm nan i daaba maŋ kur taan mɔk Yomdaanɔ yenɔkɔɔe Yendɔuŋ ni, ki u ki mɔk lukitimi. 10 Linba joont tee nnae, yi chee i para ti Yomdaanɔ ni, kii mɔk yabint paŋ nba ki u turi na. 11 Yi jii Yennu naagbankɔŋŋir na ki lia, ki lin te ki yin fit nyann Sintaanii lorbiiuk na. 12 Kimaan ti ki kɔn nan wunba mɔk gbanant nan sɔn kaa, ŋaan ti kɔn nan narinbiit kure nan bi yiikoo damm, nan mɔtana durinya bunbɔnn ni yudamm, nan sanpagbann ni narinbiit. 13 Li paak, yi jii Yennu naagbankɔŋŋir na ki lia, ki fit set dabiir nba tan saa baar maŋ ni ki daa nyikiti. 14 Yi set man, ki jii barmɔnii ki bobin i sai ni, kii mɔk yentinu nba tee nan naagbankɔŋŋir na, 15 ki teen siir kii mɔɔntir barŋanii nba teen niib parmaasir ki tee nan taasaat na. 16 Linba pukin na paak tee, yi jii yada nba tee nan naagbankɔŋŋir nba ki i saa fit kpeen Sintaanii peenii nba mɔk muu na, 17 ki dia i tinnu nba tee nan kut fokirik na, ki bia dia Yennu barii nba tee nan jukbanjiak nba ki u Seyeeŋ tuun nann na. 18 Yii mei Yennu yoo kur nan ninmɔnn, u Seyeeŋ nba sommiti biaŋinba na; ki chekin i mɔŋ nan gbankur ki pukin Yenmiaru kii teen Masiaweira kura, 19 ki bia miar Yennu ki tur n mun ki man fit la sɔnu ki pak nan parcheenn ki mɔn woonin ni barŋanii na, 20 kimaan li paake ki n tee toomii ki be dansarik ni. Yii mei Yennu kii teenin ki man mɔn barŋanii maŋ nan parcheenn nan laa kpaa talas nan man pak biaŋinba na. 21 Mɔtana ti naa bilonkak Tikikus, wunba tee ti Yomdaanɔ toontunnɔ nan barmɔnii na saa beti maa be biaŋinba, nan linba ki n tuun. 22 Li paake ki n tuumɔ i boor, maa wun turi labaar ki yin bann taa be biaŋinba, ki bia chekini. 23 Ti Baa Yennu nan ti Yomdaanɔ Yiisa Masia n tur yimm Masiaweira kur parmaasir nan lomm nan yada. 24 Yennu n somm binba kur loon ti Yomdaanɔ Yiisa Masia na nan lomm nba kaa gbennu.

Filipi 1

1 Min Pɔɔl nan Timoti, timm nba tee Yiisa Masia toontunna nae sɔbin gbouŋ na ki teen Yennu niŋamm kur nba tee Yiisa Masiaweira ki be Filipi doo ni na, nan bi yudamm nan bi sommteeb. 2 Ti Baa Yennu nan ti Yomdaanɔ Yiisa Masia n sommi, ki bia turi parmaasir. 3 N teen Yennu niipoouk yoo nba kur ki n tiar i po. 4 Yoo kur mi-i mei Yennu teeni, n tuu mei nan parpeenne, 5 kimaan yaa sommitin biaŋinba barŋanii maŋ toona ni pinpiik niwa ki tan tuu mɔtana na paak. 6 Li paak, n ki mɔk birsuk nan Yennu nba din piin toonŋann na i para ni na sii diar nna mɔkmɔk nan yoo nba ki u tan saa gbenn toonŋann maŋ Yiisa Masia daar na. 7 N yan be i ni. Ki mi-i dukii i po nna, li set ŋan, kimaan laa nyii yoo nba ki n din be n yama ni ki gbaa barŋanii maŋ paak maa n sennir nawa, ki tan baar yoo nba ki n ji kɔɔ dansarik na, i kura sommin nan toonn nba ki Yennu turin maŋa. 8 Yennue tee n siara daanɔ nan n yan set be i ni nan Yiisa Masia mɔŋ mɔŋ lomm. 9 N mei Yennu maa i lomm-ii yɔɔ kii pukii yoo nan yoo, ki i barmɔnii bannu nan i subinii kura-i biakii pukii, 10 ki yin fit gann linba mantik ŋan, ki li poorpo ki i tan daa mɔk jakint koo biit Masia daar maŋ ni, 11 ki i binbeŋ-ii mɔk yentinu ki yii tuun toonŋana bonchiann, Yiisa Masia paŋ ni, ki Yennu sann n la dontir nan paku. 12 N naa waas, n loon ki yin bann nan linba kura tumin na somm barŋanii maŋ a lin saan tɔɔnne nan barmɔnii. 13 Li paak, kpanbar gbanjot nan nileeb nba be nna na kur bann nan maa tee Masia toontunnɔ na paake ki n be dansarik ni na. 14 N sarik ni benu na tur ti naa waas bonchiann yuugontir ti Yomdaanɔ sɔnu ni, ki pukii yoo kur, ki bi mɔɔntir Yennu maan nan parcheenn, ki jaŋmaanii ji kaa. 15 Siab mɔɔntir Masia maan maŋ kimaan bi tee punpon-damm nan kunkɔnkɔnnae, ŋaan ki siab mun mɔɔntir nan barmɔnii lomm. 16 Binba tuun nan bi lomm na mi nan Yennue poŋ turin barŋanii toona na. 17 Nisiab ki mɔɔntir Masia po nan bi para, ŋaan bi tuun nan funfunne; ki dukii nan bi pukii mine biak yoo nba ki n daa be dansarik ni na. 18 Ŋaan ŋann ki biiri. N mɔk parpeenn li paak, ŋamme saa fit mɔɔnt Masia maan maŋ sɔnbooru nba kur ni; bi-i mɔɔntir bi dudukŋant ni koo bi dudukbiit ni, min lek bia sii mɔk parpeenn li paak, 19 kimaan n mi nan i Yenmiaru nan i sommir nba nyi Yiisa Masia Seyeeŋ boor na paak, n saa nyi dansarik na niwa. 20 N par loomm nan n dindann tee ki n daa dint n mɔŋ feie, ŋaan kii mɔk parcheenn mɔtana nan yoo kura, ki mi-i lekii kpo amii maa be, ŋaan n saa te ki Masia sann n la dontira, 21 kimaan mi-i be n manfoor ni, li tee Masia paake; ŋaan li-i tee kuun ki n kpo, ŋanne saa mantik turin nyɔɔt. 22 Li-i tee ki n sii be n manfoor ni, n saa fit ŋamm tun toona nba kpaa talasa, li paak, n ki fit bann n par ni linba ki n saa gann. 23 Li bona ŋanlee nae daarin; n mantik bo loon man nyik manfosiar nba nae, ki saan kii sakii be Masia boor, ŋanne bo sii ŋan ki gar. 24 Ŋaan i paake te ki li mantik kpaa talas nan mii be n manfoor ni. 25 N mi nan ŋanne ŋan ki birsuk kaa, li paake ki n mi nan n sii be-e. N sii be i kura boor, ki i sii mɔk parpeenn ki i yada n chee, 26 ki mi-i taŋŋi jen i boor yoo nba, n binbeŋ saa turii yugontir Masia paak bon-chiann, kii saa pakɔ n paak. 27 Tɔn, linba kpaa talas tee yi ŋaan ki i binbeŋ-i tee nan Masia barŋanii nba wann biaŋinba na, ki mi-i lekii fit baar lai koo mi-i kii laini, ŋaan n saa gbat a i see fanu nan dudukyennkɔɔ, ki taa mɔb ki yiab i mɔŋ ki barŋanii maŋ saa tɔɔnn. 28 I daa tiin i datai mani; yii mɔk parcheenn ki lin wannib nan ŋamme tan saa baa ŋaan ki yin do, kimaan Yennue teeni li nyannu. 29 I poŋ mɔk yaak nan yin tun ki tur Masia, ki li ki tee yaa teenɔ yada na kuukɔɔ paak kaa, ŋaan yaa bia di biak u paak, 30 ki gbaa nan yaa poŋ din la maa gbaa biaŋinba, ki mɔtana i bia gbat nan n daa gbaa nna.

Filipi 2

1 Yaa be Masia ni biaŋinbae teeni paŋ, ki u lomm maŋit i para, ki i mɔk burchint nan ninbatinu i leeb paak, ki mɔk Seyeeŋ weinanleeb, 2 ŋanne te ki n beeri maa yii mɔk duduk-yennkɔɔ ki pukinin parpeenn na, kii mɔk lomm yennkɔɔ ki i dudukit kura-ii tee yomm. 3 I daa tuun siar ki li nyi i funfunn nan karinbaanii loomm ni, ŋaan kii be soon nna nan i leeb man, kii dont i leeb ki gar yaa dont i mɔŋ biaŋinba na. 4 I daa te ki i baka be i kuukɔɔ bona ni, ŋaan te ki i baka-ii be i leeb bona ni biak. 5 Yi ŋaan binbebooru nba ki Yiisa Masia din mɔk na mun-ii be i ni: 6 U din yɔɔ be nan Yennu nae, ŋaan u din ki mi dukin a wun jii u mɔŋ ki yekin nan Yennu, 7 ŋaan sak nan u mɔŋ mɔŋ loomm ni ki nyik waa mɔk linba na, ki kpint u mɔŋ ki teen nan daabir na, ki teen nisaarik, ki tan dɔkit ki tee nisaarik. 8 U din sikin u mɔŋ, ki sak ki kpo dapunpunn paak gbaa. 9 Linba na paake ki Yennu donnɔ ki gar sɔɔ kur, ki turɔ sann nba tee sanjaann ki gar sana kur, 10 a lin te ki binba be sanpaapo nan tingbouŋ na ni nan kpeentiŋ, bi kur n tan gbaan bi duna paak ki tur ŋɔɔ Yiisa sann maŋ baakir, 11 ki sɔɔ kura tan saa yet a ŋɔɔ Yiisa Masiae tee Yomdaanɔ, ki lin dont ti Baa Yennu sann. 12 N naa walonkai, maa din be i boor ki i sak n mɔb biaŋinba na, maa lek kaa i boor na, ŋaan li kpaa talas ki yin sak n mɔb. Yii biakii tuun nan yentinu nan gbananjijekit man, kii naan nan niib nba tinn na, 13 kimaan Yennu yɔɔ tuun nanie, a yii loon u loomm tumu kii biakii tuun u loomm maŋ. 14 Yii tuun bont kur yaa daa burimi, koo ki mɔk mɔniɔku; 15 a lin te ki i daa mɔk biit, ŋaan kii tee popeenn damm, kii tee Yennu waas nba ki mɔk daŋ, kimaan i be niyoona nan biitdamm sinsuuk nie na. Li kpaa talas ki yii nyirii bi sinsuuk ni nan ŋmaajara nba nyirii sanpaapo biaŋinba na, 16 ŋaan yetib manfoor labaar. Li-i tee ki i tuun nna, n tan sii mɔk yaak nan mii mɔk yuugontir i paak Masia daar maŋ, kimaan li tan saa wann nan n fara nan n toona ki teen yanni. 17 Li-i tee ki n lu n miar na ki pukin fara nba ki n poŋ dii maa n te ki yin teen yada na, li bo sii manin, ki min nan yimm kur mɔk parpeenn. 18 Nnae mun ki li kpaa talas ki yimm nan min kura-ii mɔk parpeenn. 19 N mɔk dindann ti Yomdaanɔ Yiisa ni nan man tun Timoti i boor mɔtana, ki gbat i labaar ki n par n dɔɔr. 20 Ŋɔɔ kuukɔɔe fiin i po nan barmɔnii nan maa fiin i po biaŋinba na. 21 Sɔɔ kur nba ji biar gbaa nan u mɔŋ yare, ki ki fiin linba tee Yiisa Masia yar na po. 22 I mɔŋ mi waa tun ki wann u kotir biaŋinba, ki tuun nanin barŋanii toona na ni nan bik nba tuu tuun nan u baa biaŋinba na. 23 Mi-i la bont nba yaa lin ŋmakit biaŋinba, n mɔk dindann maa n tumɔ yiama. 24 Ti Yomdaanɔ paak, n mɔk yada nan n mɔŋ saa fit baar i boor mɔtanawa. 25 N dukin li kpaa talase nan man tun ti naa bik Epafro-daitus, wunba tuun nan ninmɔnn ki gbaa a wun sommin nan Masia toonn na, ŋɔɔe bia tee wunba ki i daan teenɔ i toomii ki u sommin na. 26 U set loon wun la i kura. U par daan biir bonchiann nan yaa daan gbat a u yiar na. 27 Li set tee bar-mɔniie, u daan yiar ki per kuuma, ŋaan Yennue daan tinɔ ninbaauk, ki li ki tee u kuukɔɔ kaa, ŋaan u bia tin n mune ninbaauk, ki nyinnin parbijaann ni. 28 Li paak, n jekire nan man tumɔ i boor, ki yi-i lau yoo nba yin yaan la parpeenn, ki n mɔŋ parbiir n bot. 29 Yi gaarɔ nan parpeenn man nan i naa bik na ti Yomdaanɔ ni. Yi tur nibooru nba tee nan ŋɔɔ na baakir man, 30 kimaan u daan ki kɔn u manfoor paak, ki tan yaa wun kpo Masia toonn na paak gbaa, a wun turin sommir nba ki i daan ki fit turin na.

Filipi 3

1 N naa waas, li gbennu tee yii mɔk parpeenne yimm nan ti Yomdaanɔ benu ni. Min yaa baka kaa nan man ŋamm sɔb linba ki n poŋ daan sɔb turi sinsinn na; mi-i tuun nna, li sii tee i yumanne. 2 I mi man biitdamm na po, binba naan bɔi ki porii gbanant na. 3 Timm jiantir Yennu u Seyeeŋ nie, ki mɔk yuugontir Yiisa Masia paak; linba nae tee barmɔnii punpotu. Timm ki teen nisaarik yar kaa yada. 4 Wunba-i dukii a ŋɔɔ saa fit teen nisaarik yar yada, min mɔŋ saa fit teen li bonbooru yadawa. N mɔk linba te ki n saa tun nna, 5 ŋanne tee n mun din tee daa ŋanniin bike ki bi pot n punn. Bi marin ki n tee Juu nirɔe, Benjaminn booru ni, ki tee Juu nirɔ nan barmɔnii. Li-i tee Juu teeb sennu dianu nba tee biaŋinba naie, n din waa sennu maŋ nan Farisiinba nba waa biaŋinba nae nan ninmɔnn, 6 ki din tan mukis Masia niib gbaa. Nirɔ-i saa sak sennue ki fit kii tee yentinnɔ, min din ki mɔk bisiat ki jiin li po. 7 Ki n din bo saa fit kan linba na kur nan li mɔk nyɔɔt, ŋaan min yiinir linba kaa nyɔɔte Masia paak. 8 Li ki tee li kuukɔɔ kaa ki mɔk nyɔɔt turimi; min yiin bonsiar kura linba kaa nyɔɔte; kimaan maa bann n Yomdaanɔ Yiisa Masia ki li bannu nyɔɔt yab bonchiann na paak, kimaan u paake ki n fok bonsiar kur ki lu; min yi li kur tanpenn paak mɔɔte, maa n tan la Masia nan n ninbinn, 9 kii be nanɔ nan barmɔnii. N ji ki mɔk n tiɔŋ yentinu nba be sennu weiu ni na kaa. Mɔtana, maa teen Yiisa Masia yada nae ki n gaar yentinbooru nba na, li yentinu gaa yada paake, ki nyi Yennu boor. 10 Linba kur ki n ji loon tee ki n bann Masiae, ki bann u kuun fiiru paŋ, ki di biak nanɔ, ki n binbenkperik na n kpo nan waa din kpo biaŋinba na, 11 ki n mɔŋ-ii mɔk dindann nan n tan saa fiir kuun ni ki la manfoora. 12 N ki yaa n poŋ nyann ki yent binbeŋ maŋ koo n ji be fanu kaa; n gbaae maa n nyann ki yent binbeŋ maŋ; kimaan Yiisa Masia din fatime, ki n ji tee u yɔɔ. 13 N naa waas, n ki dukii a n poŋ nyannir ki li tee n yari, ŋaan bonyennkɔɔe ki n tuun, n tammit linba be n poorpoe, ŋaan gbaa maa n baar linba be n tɔɔnn po na. 14 Li paake ki n tɔk poot sɔnu maŋ ki tiin sunsonn ki saa nyannu bɔɔnu maŋ peŋ, maa n saa gaar paauk nba tee sanpaapo manfoor, ki Yennu yiinin li paak Yiisa Masia ni na. 15 Li kpaa talase ki timm nba kur tee subirteeb Seyeeŋ ni na-ii mɔk dudukit maŋ booru, ŋaan i siab-i mɔk dudukgantie, Yennu saa te lin yent li damm nunii powa. 16 Ŋaant man ti tukin kii dia barmɔnii na kuukɔɔ nan taa din dia biaŋinba nan mɔtana na. 17 N naa waas, yii biakii tokiin man. Yi jii i dudukit ki teen damm nba waa siarŋana nba ki ti din senn turi na ni. 18 N poŋ din beti linba na po yoo nba gar nawa, ŋaan n bia ŋammit beerie mɔtana nan ninnyuut, a nisiab be ki bi binbeŋ jiib teemm Masia dapunpunn paak kuun na datai. 19 Bi tan saa joont nan tubdatu nba kaa gbennue, kimaan bi poore tee bi yennu. Bi mɔk yuugontir nan linba dintib fei nae. Bi dukii linba tee tingbouŋ na bona kuukɔɔ poe. 20 Ŋaan timm ŋarin tee Yendɔuŋ ni waase, ki jekir ki guu ti Tinntɔɔ, wunba tee ti Yomdaanɔ Yiisa Masia, a wun nyi Yendɔuŋ ni ki baar. 21 U tan saa lebit ti gbananchɔkint nba saa kpo na ki li naan u Yendɔuŋ ni gbananpaant nae. U tan saa jii paŋ nba te ki u yen bonsiar kur nae ki tun nna.

Filipi 4

1 Li paak, n naa waas, yimm nba ki n looni, ki loon ki n lai na, yimme te ki n mɔk parpeenn nan yuugontir. N naa walonkai, setir fanu man Yennu sɔnu ni, ti Yomdaanɔ tɔɔnn. 2 N niipoob Yuwodia nan Sintike, n barimiie, yi yabir kii be nan parmaasir nan i leeb ti Yomdaanɔ paak. 3 Ki fin nba mun tee n weinanlɔɔ nan barmɔnii na, n loon ki fin somm poob banlee na, kimaan ŋamm nan Klement nan binba kur tee n toontun-leeb, ki bi sana be Yennu manfoor gbouŋ ni na, din lakin tun nanin bonchiann, barŋanii maŋ mɔnu ni. 4 Yii mɔk parpeenn ti Yomdaanɔ ni yoo kur. N bia ŋammit beeriie yii mɔk parpeenn man. 5 Yi ŋaan ki sɔɔ kur n bann i niŋantin. Ti Yomdaanɔ baate mɔtana. 6 I daa biir i para bonsiar paaki. Yimm-ii mei Yennu linba kpaa talas turi paak. Yii mei Yennu, kii teenɔ niipoouk i para ni yoo kura, ki betɔ yaa loon linba. 7 Ki Yennu parmaasir nba gar nirɔ bannu terik na saa dia i para nan i dudukit Yiisa Masia ni. 8 N naa waas, linba joont tee nnae, yi ŋaan ki i dudukit n gbee nan barii nba tee mɔnii, nan linba ŋan nan baakir, nan linba ŋan, nan linba mɔk burchint, nan linba took, nan linba yeen, nan linba mɔk fant, nan linba ŋan nan paku. 9 Jiin linba ki i tumii nan linba ki i gaar n boor, nan n mɔbona nan n toona na, kii tuun nann. Ki Yennu nba teent parmaasir na sii be nani. 10 N mɔk parpeenn bonchiann ti Yomdaanɔ ni nan laa yukira ŋaan ki i fiin n po na; setik nan mɔnii, i loonima, ŋaan i daan ki mɔk yaake. 11 N ki dukii nan i tamm n po kaa ki n yeen linba na, kimaan min poŋ tumii biaŋinba ki n numm saa gboo linba ki n mɔka. 12 N mi kɔŋŋir ni binbeŋ nan jaŋir ni binbeŋ. N poŋ tumii li kura; li paak, mi-i be siaminba kur ki li tee kon, koo gboor, li-i lekii yab koo li-i waar, ŋaan n numm gboot linba ki n mɔke yoo kur. 13 Masia nba teenin paŋ na paak, n saa fit kii be binbeŋ kur niwa. 14 Ŋaan i daan tun fanu bonchiann nan yaa daan sommin n fara dinu ni na. 15 Yimm Filipi teeb mi nan maa din mɔɔntir Masia barŋanii pinpiik ni, yoo nba ki n din nyii Masedonia tiŋ niwa, i kɔɔe din tee Masia niib nba sommitin; ki i din gaan piinii nba tee Yennu Seyeeŋ yar na n boor, ŋaan mun teenin i piinii nba tee tingbouŋ na yar. 16 Maa din tan be fara ni Tesalonika doo ni na, yimme din tun teenin sommir. 17 Li ki tee a n kpan loon piinii kaa i boor, ŋaan n loon ki yin gaar Seyeeŋ nyɔɔt nba be piinii turu nie. 18 N gaar i piinii na munna ki li jaŋima. Piinii nba ki i daan tun Epafrodaitus nann na te ki n gboowa. Li piinii naan nan mannu nba nubir man nae ki teen Yennu, ki penn u par, ki u gaarir. 19 Li paak, Yennu saa turi linba ki i loon kur, ki lin nyi u mɔkint nba yab sanpaapo na, Yiisa Masia paak. 20 Niib-ii dontir ti Baa Yennu sann mɔkmɔk nan mɔkmɔk. Mamɔmm. 21 Yi foont Yiisa Masia popeendamm kura. Yiisaweira nba be nanin nna na foonti. 22 U popeendamm na kur foonti, mantik binba tee Kpanbar Siisa ŋaatoontunna na. 23 Ti Yomdaanɔ Yiisa Masia n sommi, i para ni.

Kolosa 1

1 Min Pɔɔl, wunba tee Yiisa Masia toomii Yennu loomm paak na, nan ti naa bik Timoti, sɔbin gbouŋ na 2 ki teen Yennu niib nba be Kolosa doo ni, ki tee ti naa waas nba teen Masia yada na. Ti Baa Yennu n sommi, ki bia turi parmaasir. 3 Ti-i mei Yennu i paak yoo nba, ti teen ŋɔɔ Yennu nba tee ti Yomdaanɔ Yiisa Masia Baa na niipoouko yoo kura, 4 kimaan ti gbat yaa teen Yiisa Masia yada biaŋinba, ki bia loon Yennu niib kura na, 5 kimaan pinpiik ni, yaa din gbat barŋanii nba tee barmɔnii yoo nba, i din gbat bonŋana nba guui Yendɔuŋ ni na poe. 6 Ki barŋanii maŋe baari nan laa yat ki kpaatir tingbouŋ na kur po ki ŋammit niib binbeŋ, ki bia tuun nna i mɔŋ boor ni, laa nyii daar nba ki i din gbat ki bann Yennu ninbatinu nan barmɔnii maŋ nba tee biaŋinba nawa. 7 I din tumii Yennu ninbatinu maŋ po ti toontunlɔɔ Epafras, wunba ki ti loonɔ na boore; ŋɔɔe tee Masia toontunnɔ nba tuun nan barmɔnii i boor ki turit, 8 ki bia betit i lomm nba tee biaŋinba Yennu Seyeeŋ ni. 9 Linba na paak, taa daan gbat i po, ti ki nyik Yenmiaru i paaki, a ŋɔɔ Yennu n te ki i bann u loomm nba tee biaŋinba, ki turi Seyeeŋ yan nan li subinii kur, 10 ki yin fit kii be nan ti Yomdaanɔ nba loon biaŋinba na, ki bia fit kii tuun linba sii pent u par, ki fit kii tuun toonŋana kur, ki ŋammit bant Yennu. 11 Ŋɔɔ Yennu n turi paŋ bonchiann nan waa mɔk paŋ kur biaŋinba na, linba saa te ki i mɔk gbankur nan sukuru nan parpeenn bonsiar kur ni. 12 Yii teen ti Baa Yennu niipoouk man. Ŋɔɔe te ki ti jaŋ nan tin la yiar u boor, yentu ni, u niib sinsuuk ni, 13 ki bia nyinnit Sintaanii bunbɔnn naan ni, ki jiit ki kɔɔnt u Bilonkak maŋ naan ni. 14 U Bija maŋ paak ki u nyik chab ti biit ki nyinnit daabsin ni. 15 Sɔɔ kan fit la Yennu, ŋaan u Bija Masiae tee u naauŋ. Ŋɔɔe gar bont kura, ki tee Yennu bonnankaa kur yur, 16 kimaan u nie ki Yennu din nan bonsiar kur nba be sanpaapo nan tingbouŋ na ni. Ŋɔɔe din nan taa laat bona nba nan taa ki laat bona nba kur, narimii nba tee yentdamm, nan yomdamm, nan yudamm, nan yiikoo damm. Li din nyii Masia nie ki Yennu nan bonsiar kura ki jii bonsiar kur turɔ. 17 Ŋɔɔ Masia din be ki sɔɔ siar daa kaa, ki u paake ki bont kur be. 18 Ŋɔɔe tee u niib yur, ki bi tee u gbanant. U niib maŋ manfoor nyi u boore. Ŋɔɔe tee Yennu Bija, wunba din kpo ki fiir kuun ni sinsinn, a u kuukɔɔ-ii tee bonsiar kur yudaanɔ, 19 kimaan li din maŋ Yennu tiɔŋ nan Masia-ii mɔk ŋɔɔ Yennu binbeŋ nan barmɔnii. 20 U Bija maŋ paake ki Yennu te bont kur nba be sanpaapo nan tiŋ ni ŋamm teen u yɔɔsinba nan parmaasir; ki sɔn nba nyii u Bija maŋ ni dapunpunn paak na paake ki u te ki parmaasir be timm nan ŋɔɔ Yennu sinsuuk ni. 21 Sianyoo, i dudukbiit nan i toonbiite din te ki i tee Yennu datai, ki fɔk nanɔ, 22 ŋaan mɔtana, u Bija gbanant kuun maŋ paak ki u ji teeni u yɔɔsinba a wun jii-i ki yii tee popeendamm, ki daa mɔk jakint koo biit, ki baar u boor. 23 Li paak, yii yiab nan barmɔnii kii be i yada ni kii see chimm, ki daa fɔrii nyi i dindann ni; dindann nba ki i la yoo nba ki i din gbat barŋanii na; ki bi din mɔɔnt barŋanii maŋ ki tur niib kur nba be tingbouŋ na ni; ki min Pɔɔl teen li toontunnɔ na. 24 Mɔtana n mɔk parpeenn n biak dinu ni i paak, kimaan maa di biak maŋ biaŋinba na, n tontir biak nba ki Masia din senn a n di, u gbanant nba tee u weira paak nae. 25 Ki Yennu nba turin toonn maŋ a n tun na, ŋɔɔe teenin Masia niib maŋ daabir i sommir paak, a niib n bann Yennu barii maŋ. 26 Barii maŋe tee woonin ni maan nba ki Yennu din woon sianyoo, ki nibooru kur ki bannir, ŋaan ki u tan fiit wann u niib mɔtana na. 27 Yennu lor a wun fiit woonin ni maan na ki wann u niib maŋe. U woonin ni maan maŋ ŋan bonchiann, ki tee niib kur yar. Li want nan Masia be i ni; li paak, i mɔk dindann nan i set tan sii be fanu. 28 Li paak, Masia maŋ poe ki ti mɔɔntir, ki kpaan sɔɔ kura, ki dia yanbooru kur ki want sɔɔ kur, a tin te sɔɔ kur n chee Masia weiu ni, ki jiib tur Yennu. 29 Linba na paak ki n lek yiab nan paŋ kur nba ki Masia turin ki li yab bonchiann na.

Kolosa 2

1 N loon yin bann n baka nba be yimm, nan Masia niib nba be Laodisea na, nan binba daa ki mi lan na ni biaŋinbae. 2 N yaa bi para n chee-e, ki bin lakin taan leeb nan lomm, ki bann Yiisa barii paak, ki teenɔ yada nan barmɔnii nba tee piisin, ki bann Yennu woonin ni maan nba tee Masia na; 3 ŋɔɔ kuukɔɔe mɔk barmɔnii yan nan bannu kura. 4 Li paake ki n beeri, i daa te ki sɔɔ n jii mɔmant ki kpanniini, 5 kimaan maa lek ki be i peŋ nan n gbanant na, ŋaan n seek be nani, ki n par peen i paak, maa la yaa be fanu biaŋinba, nan yaa teen Masia yada nan barmɔnii biaŋinba na. 6 Biaŋinba ki i din gaar Yiisa Masia a wuu tee i Yomdaanɔ na, yii be u ni nna man, 7 ki sikin i yada jiina u ni, ki i yada-ii be u ni, kii mɔk paŋ nan baa din wanni biaŋinba na, kii teenɔ niipoouk yoo kur. 8 Li paak, i daa te ki sɔɔ dia nisaarik yan kpinkpann-yana ki kpanni; linba ki gaa nan Masia, ŋaan tee tingbouŋ na yan nan nisaarik wannu, 9 kimaan Masia gbanant nie ki Yennu binbeŋ be, 10 ki i gaar barmɔnii manfoor kimaan yaa gaa nanɔ na paak. Ŋɔɔe tee yudamm nan paŋ damm kura saakɔɔ. 11 Yimm nan u benu paake ki i gaar punpotu; ŋaan li ki tee nisaarik nba jii u nuu ki pot i gbanant na kaa; Masia punpotu nae nyinnit biit ni, 12 kimaan baa din wuri Yennu nyunwuru yoo nba na i din pukin Masia poe ki bi pii-i, ki i bia fiir nanɔ nyunwuru maŋ ni, i yada nba be Yennu paŋ toona nba din fiin Masia kuun ni na paak. 13 I din tee kpeemme sianyoo, kimaan i toonbiit paak nan yaa din ki tee Juu teeb, ki bia ki mɔk sennu na paak. Ŋaan mɔtana Yennu nyik chab i toonbiite, ki turi manfoor, Masia ni. 14 Baa din kpaau dapunpunn paak yoo nba na, u din kpeen ti biit pann nba din sɔb dɔɔ na nan li sennu munna. 15 Dapunpunn maŋ paake ki Masia din biir Sintaanii nan narinbiit paŋ kura, ki nyinn waa din nyannib biaŋinba na siara paanu ni. 16 Li paak, i daa te ki sɔɔ senti sennu yaa sii di linba, koo yaa sii nyu linba; i daa te sɔɔ ganii jaamm dagaŋŋa, koo ŋmaapaaŋ daa, koo foon daa ki teeniini. 17 Li sennu booru din tee yunyuŋo ki want nan sɔɔ baat; li yɔɔe tee Masia. 18 Sɔɔ-i yaa ŋɔɔe gar leeb ki laat yirintii ki loon yin sikin i mɔŋ kii jiantir malakanba, i daa saak-i; nna saa biirie. Li daanɔ dont u mɔŋ u dudukbiit ni, ki li kaa paaki; 19 u ji ki dia Masia; Masiae tee u niib yur, ki taamm, ki bi gaa nan leeb ki tee nan gbanant tukita nan li jiina na, ŋɔɔ Masiae dintib ki bi nɔbii nan Yennu nba loon biaŋinba na. 20 I kpo nan Masiae, ki u fati durinya na narimii paŋ yent ni, ki bee ki i jin be nan i bia daa tee tingbouŋ na yabe na? Bee teen ki i jɔbi i mɔŋ ki teen sennii nba yaa 21 "A daa dia na," koo "A daa lemi linba na," koo "A daa siit na?" 22 linba ki nirɔ saa di ki lin biir ki kan yukiri. Li sennii tee nisaarii wannue. 23 Setik nan mɔnii, li sennbooru naan linba mɔk yame, ŋaan li ki mɔki; bi jiantir baa loon biaŋinbae, ki kpann a bi sikint bi mɔŋe, ki mukis bi gbanant; ŋaan nirɔ-i wei linba na kur, li kan fit sommɔ ki wun dia u gbanant loommu.

Kolosa 3

1 I din fiir nan Masia kuun niwa, li paak yi jii i para ki gaan nan sanpaapo bona, siaminba ki Masia kar Yennu niidiitu po na. 2 Yi lor i dudukit nan leŋ bona, ŋaan daa lorin nan tin-gbouŋ na bona kaa, 3 kimaan i poŋ din kpo nan Masiae, ki i manfoor be nanɔ Yennu boor. 4 Masia nba teent manfoor na nba tan saa dɔkit yoo nba, i mun tan saa dɔkit nanɔe nan yentchiɔŋ. 5 Li paak, yi nyik tingbouŋ na ni niɔŋ nba tuun toona i ni na; li yenninbae tee bonchonchonsin, nan jakint toona, nan kunkɔmaasu, nan dudukbiit, nan nianchiɔŋ. Nianchiɔŋ tee patmannu boorue. 6 Linba na nba paake ki Yennu wutoor tan saa do binba ki sak u mɔb na paak. 7 Sianyoo linba na nbae din tuu yeni, ki i be li ni. 8 Ŋaan mɔtana yi fian linba na nba munn ki lu; ŋanne tee naŋ, nan wutoor, nan nifobiisin. Ki niib sanbiiuk, nan barbiit ji daa nyi i mɔi ni. 9 I daa fa faak ki teen leebi, kimaan i poŋ nyik linba tuu tee i binbenkper na nan li toonawa; 10 ŋaan ji mɔk linba tee binbenpaaŋe. Binbenpaaŋ nae ki Yennu nba tee li nantɔɔ na pantir yoo kura, ki li naan u mɔŋ binbeŋ, a wun te ki yin bannɔ setik nan mɔnii. 11 Li paak, bɔkitu ji kaa binba tee Juu teeb nan binba ki tee Juu teeb sinsuuk ni; binba pot puna nan binba ki pot kura ji ki mɔk bɔkitu nan leebi; bɔkitu ji kaa muuk ni niib nan doo ni yab sinsuuk ni; bɔkitu bia kaa daaba nan yent-n-mɔŋ damm sinsuuk ni, ŋaan i kur tee Masia yabe, ki u be i kur ni. 12 Li paak, yaa tee Yennu nigannkab ki tee popeendamm ki bia tee u walonkai na, yii mɔk ninkpabauŋ, nan burchint, nan sikin-n-mɔŋ, nan soon nna binbeŋ, nan sukuru, 13 kii di sukuru nan leeb; ki sɔɔ-i mɔk bunburimii nan u lɔɔ, wun nyik chabɔ. Li kpaa talas ki yin mun nyik chab leeb nan ti Yomdaanɔ nba poŋ nyik chabi biaŋinba na. 14 Yi pukin lomm; ŋanne fan ki gar binbeŋ kur, ki taan dia li kur nan barmɔnii mɔtaauk. 15 Yi ŋaan ki Masia parmaasir na-ii ŋmakitir yaa dukii linba; Yennu lakin yiini gbananyennkɔɔ ni a yii mɔk parmaasir maŋe. Li paak, yii teen Yennu niipoouk man. 16 Li kpaa talas ki Masia labaar na-ii be i para ni chib chib, ki yii want i leeb, kii bia kii kpaan i leeb nan i yan kur; kii yiin Yennu gbouŋ ni yanii, nan yenpaku yanii, nan Seyeeŋ yanii; kii yiin yanii nan niipoturu para kii teen Yennu. 17 Li paak, yaa tuun linba, koo yaa yeen linba, yii tuun ti Yomdaanɔ Yiisa sann ni, kii teen ti Baa Yennu niipoouk u paak. 18 Poob, yi jii i mɔŋ tur i sɔrib, nan laa kpaa talas ki Masia niib-ii tuun biaŋinba na. 19 Jab, yii loon i poob man, ki daa diab nan tonu. 20 Waas, yii saak i damm mɔi yoo kura, kimaan ŋanne pent Yennu par. 21 Baanba, i daa dont i waas wutoa, yi-i tee nna bi ji kii mɔk kpaŋ-n-mɔŋi. 22 Daaba, yii saak i yomdamm mɔi bonsiar kur ni, ki li daa tee yoo nba ki bi gorii-i na kuukɔɔ kaa, a yin penn bi para ki bin pakii, ŋaan yii tuun nan ninmɔnn yoo kura, kimaan yaa baakit ti Yomdaanɔ na. 23 I-i tuun linba kur, yin tun nan ninmɔnn nan i tuun teen ti Yomdaanɔe na, ki li ki tee nisaarik kaa. 24 Yii tian man nan ti Yom-daanɔ maŋ tan saa turi nyɔɔt nba tee u niib yar sanpaapo, kimaan Masiae tee barmɔnii Yomdaanɔ ki i tuun teenɔ. 25 Ki biitdaanɔ mun tan saa gaar u toonbiit tubdatu, waa tun linba paake, kimaan Yennu tan saa dat u tubir, ki lukitin kaa.

Kolosa 4

1 Yomdamm, yii tuun fanu kii teen i daaba man, kii mi nan i mɔŋ mun mɔk Yomdaanɔ Yendɔuŋ ni. 2 Yii yiab nan Yenmiaru man, kii mei ŋɔɔ Yennu nan ninmɔnn, kii teenɔ niipoouk, 3 kii biakii meiɔ kii teent ki tin fit la yaak ki mɔɔnt barŋanii, ki fiit Masia woonin ni barii, kimaan barii maŋ paake ki n be dansarik ni na. 4 Li paak, yii mei Yennu kii teenin ki n fit pak nan laa kpaa talas min pak fanu biaŋinba na. 5 I mi man i binbeŋ nba tee biaŋinba ki tur binba ki tee Masia niib na, ki jii i yoo kii piak u po. 6 Li kpaa talas ki i mɔbona-i man, kii mɔk baakir, ki yii mi biaŋinba ki i saa gat buboit ki lii took ki tur sɔɔ kur. 7 Ti naa bilonkak Tikikus, wunba tee ti barmɔnii toontunnɔ, ki bia tee ti toontunnanlɔɔ ti Yomdaanɔ toona ni na saa beti n po. 8 Li paake ki n tumɔ i boor, a wun beti ti kur nba be biaŋinba, ki i para n dɔɔr. 9 Ŋɔɔ nan Onesimus, ti naa bilonkak nba ki ti teenɔ yada ki u tee i yɔɔ nae saa baar. Bi saa beti bonsiar kur nba tuun nna na. 10 Aristakus nba ki min nan ŋɔɔ be dansarik ni na foonti, ki Banabas niipoo bija Mak mun bia foonti. (I daan poŋ gaar n kpaanii nan Mak-i taŋŋi baar i boor, yin gaarɔ.) 11 Joosua, wunba sanleer tee Justus na mun teeni u foontii. Bi bantaa nba na kɔɔe tee Juu teeb nba waa Masia ki tuun nanin Yennu naan toona maŋ. Ŋamme maant n par. 12 Epafras, wunba mun tee i yenɔ ki bia tee Yiisa Masia toontunnɔ na foonti. U mei Yennu nan ninmɔnn yoo kura ki teeni a Yennu n te yin set kenken, kii tee subirteeb nba tuun Yennu loomm, 13 kimaan n dii u siara nan u set tun bonchiann ki somm yimm nan Laodisea teeb nan Hierapolis teeb. 14 Ti naa bilonkak Luk, wunba tee dɔkita na, ŋɔɔ nan Demas foonti. 15 Yi foont ti naa walonkai nba be Laodisea na, ki bia foont ti niipoo Nimfa nan Masiaweira nba lakint leeb u ŋaak ni ki jiantir Yennu na. 16 I-i karin gbouŋ na gbenn yoo nba, yin yabir ki bia karin ki tur Masiaweira nba mun be Laodisea na, ki bia karin Laodisea teeb gbouŋ nba ki n daan sɔb turib na. 17 Yi bet Akipus a wun yabir u mɔŋ kii tuun toona nba ki ti Yomdaanɔ din turɔ na fanu. 18 N sɔb linba na nan n tiɔŋ nuue: Min Pɔɔl foonti. I daa tammit nan n be nan bante. Yennu n sommi.

1 Tesalonika 1

1 Min Pɔɔl nan Sailas nan Timotie sɔbin gbouŋ na ki teen niib nba be Tesalonika ki tee ti Baa Yennu nan ti Yomdaanɔ Yiisa Masia nigannkab na; ŋɔɔ Yennu n sommi, ki bia turi parmaasir. 2 Ti teen Yennu niipoouk i kura paak, ki tian i po yoo kur ti Yenmiaru ni. 3 Yennu nba tee ti Baa na tɔɔnn, ti tian biaŋinba ki i teenɔ yada ki tuun toonŋana, nan i lomm nba te ki i tuun nan ninmɔnn biaŋinba, ki i dindann be ti Yomdaanɔ Yiisa Masia ni chib chib na. 4 Ti naa waas, ti mi nan Yennue looni ki poŋ ganni a yii tee u yab, 5 kimaan barŋanii na din ki tee ti mɔb ni maan kuukɔɔ kaa ki ti din baar turiini, ŋaan li bia din mɔk Seyeeŋ yiikooe ki ti piakir ki birsuk kaa. Yoo nba ki ti din be i peŋ na, i mi taa din be biaŋinba; nan taa sommii biaŋinba. 6 I din tokii taa waa ti Yomdaanɔ biaŋinbae, ki gaar barŋanii maŋ i farchiɔŋ ni nan parpeenn nba nyi Seyeeŋ boor na. 7 Ki yaa din be biaŋinba na din wann ti naa waas nba be Masedonia nan Akaya tinii ni na baa sii be biaŋinbae. 8 Kimaan ti Yomdaanɔ barŋanii maŋ din nyii i boore, ki lin Masedonia nan Akaya tinii ni; ki linba bia pukin, yaa teen Yennu yada biaŋinba poŋ lin lokir kur powa. Li paak, li ji ki kpaa talas ki ti pak siar bi boori. 9 Niib na kur piak jiint yaa din gaarit biaŋinbae taa din foonti yoo nba na, nan biaŋinba ki i nyik pata ŋaan baar Yennu boor, a yii jiantir ŋɔɔ Yennu nba tee manfodaanɔ na, 10 ki guu u Bija Yiisa, wunba tan saa nyi Yendɔuŋ ni ki baar na; wunba ki Yennu din fiinɔ kuun ni, ki u fatit ŋɔɔ Yennu wutoor nba baat na ni na.

1 Tesalonika 2

1 Ti naa waas, i mɔŋ mi nan taa din baar foonti na tan ki teen yanni. 2 I mi nan taa din be Filipi doo ni, ki bi dintit biak nan fei biaŋinba, ŋaan taa din baar i boor, ti din mɔk parcheenn nba nyi Yennu boor nan tin mɔɔnt barŋanii maŋ turi. Niib lek din see ti paak bonchiann. 3 Kimaan taa din beeri linba na ki tee linba nyii faak nan dudukbiit ni, ti din ki kpanni kaa, 4 ŋaan ti mɔɔntir Yennu nba loon tii mɔɔntir u maan biaŋinbae, kimaan u poŋ la ki ti jaŋ nan tin dia barŋanii maŋa. Li paak, ti ki mɔɔntir a ti penn nisaarik par kaa, ŋaan ti loon tin penn Yennu nba bikii ti dudukit na pare. 5 Kimaan i mɔŋ mi fanu nan Yennu tee ti siara daanɔ nan ti din ki baar i boor nan mɔmant, koo maan nba dɔkint nianchiɔŋ kaa. 6 Ti din ki loon i sɔɔ n pakiti. 7 Taa tee Masia toomiinba na, ti din mɔk yaak nba ki ti saa boi sommir powa, ŋaan ti din be i sinsuuk ni soon nnae, ki din tee nan poo nba tuu mɔɔnt waas biaŋinba na. 8 Taa din looni bonchiann na paake ki ti din mɔɔntir Yennu barŋanii ki teeni; li kuukɔɔ kaa, ŋaan ti bia din teen siir nan tin chibin ti saaŋmanii i paak, kimaan i mantik teen ti nilonkab ki li yabita. 9 Ti naa waas, setik nan mɔniie, i mi taa din tuun ki di fara biaŋinba. Taa din be i boor ki mɔɔntir Yennu barŋanii maŋ ki teeni na, ti din tuun yonnu nan nyiɔko, a ti daa tee jikir i sɔɔ paaki. 10 Yimm nan Yennue tee ti siaradamm ki jiin taa din be nani nan binbenyeeŋ nan yentinu, ki kaa biit biaŋinba. 11 I mi biaŋinba ki ti din kpaani nan jɔɔ nba tuu kpaan u waas biaŋinba na, 12 ki maant i para, ki tun kpaani a yii be binbensiak nba saa gboo Yennu numm. Ŋɔɔe yiini a wun kɔɔni u tiɔŋ naan ni nan yentchiɔŋ ni. 13 Linba yaa paak bia te ki ti piak Yennu yoo kura na tee nnae: Taa din baar nan Yennu maan i boor na, i din gbat ki gaarir; i din ki gaarir nan nisaarik yar na kaa, ŋaan gaarir ki li tee Yennu yar. Ki li set tee ŋanne, kimaan yimm nba teenɔ yada na, maan maŋ tuun i para ni. 14 Ti naa waas, mukisbooru nba baari na, li mukisboorue mun din baar binba tee Yennu niib Yiisa Masia paak Judea tiŋ ni na; yimm nan ŋamm dii mukisiboor-yeŋe. I mɔŋ mɔŋ niib nba mukisi biaŋinba na, li mukisboorue ki bi niib, Juu teeb, mun din mukisib. 15 Ŋamm Juu teebe din kpii ti Yomdaanɔ Yiisa Masia nan Yennu sɔkiniinba, ki bia mukis timm na. Linba na paak, bi ki penn Yennu pari, ki bia tee sɔɔ kur datai. 16 Bi yiab bi mɔŋ paak gbaa a bin gɔɔrit ki ti daa mɔɔntir Yennu barŋanii ki teen binba ki tee Juu teeb na ki bi laat tinnu. Linba nae want nan bi pukii toonbiit nba ki bi tuu tuun nae nan Yennu wutoor nba ji tan baar nan tubdatu bi paak. 17 Ti naa waas, laa jii yoo waaminna ki ti ki be i boor ni na, ti tee nan kpeebii nae, ŋaan ti dudukit ŋarin be nani, ki ti lek bia yiab a tin baar lai nan ti ninbina, 18 kimaan yoo kur, min Pɔɔl lek loon ki n baar i boore, ŋaan ki Sintaanii gɔin sɔnu. 19 Ti Yomdaanɔ Yiisa-i jen yoo nba, yimme sii tee ti dindann nan ti nyɔɔt, ki i paake ki ti tan saa set u boor nan parpeenn nan yuugontir. 20 Setik nan mɔnii, i paake ki ti mɔk sann nan parpeenn.

1 Tesalonika 3

1 Li paak, laa ji daan tan paak ti nii yoo nba, ti daan sak biar Atens doo nie ti kuukɔɔ, 2 ŋaan tun ti naa bik Timoti, wunba ki timm nan ŋɔɔ taan tuun ki teen Yennu ki mɔɔntir Masia barŋanii na, a wun chee i yada ki kɔɔni para, 3 ki lin te ki i sɔɔ daa ŋmat poor mukisuk na paaki. I mɔŋ mi nan li mukisbooru tee Yennu loomme ki turit, 4 kimaan taa din daa be i boor ni yoo nba na, ti din beti a bi tan saa mukisit; ki mɔtana i mɔŋ mi fanu nan li set tan teen nnae chib chib. 5 Li paak, laa daan tan paak n nii yoo nba, ki n tun Timoti, a wun saan ki laan i nyik Masia sɔnu koo Sintaanii bikini, ki ti toona fara kur teen yanne-e? 6 Mɔtana Timoti poŋ jenna, ki turit labaar nba penn ti para ki jiin i yada nan i lomm po. U betit a i kpan tun tian ti poe fanu, ki loon yin lat nan taa loon tin lai biaŋinba na. 7 Ti naa waas, ti be biak nan parbiir kur ni, ŋaan taa gbat i yada po, li te ki ti para dɔɔre. 8 Mɔtana, li set maŋit nan yaa set chib ti Yomdaanɔ sɔnu ni na. 9 Ti teen Yennu niipoouk bonchiann i paak, kimaan taa mɔk parpeenn biaŋinba u boor i paak na. 10 Yonnu nan nyiɔk kur ti meiɔ nan ti para kura a wun te ki timm nan yimm n la leeb ki tin ŋamm gbeen i yada. 11 Ti Baa Yennu tiɔŋ nan ti Yomdaanɔ Yiisa n ŋamm sɔnu turit ki tin baar i boor. 12 Yaa loon i leeb nan sɔɔ kur biaŋinba na, wun te ki i lomm maŋ n pukin bonchiann nan taa looni biaŋinba na. 13 Nnae ki u saa chee i para, ki i sii tee popeendamm nba ki mɔk biit ti Baa Yennu boor, yoo nba ki ti Yomdaanɔ Yiisa tan saa jen nan u yab kur.

1 Tesalonika 4

1 Ti naa waas, yaa din tumii ti peŋ yaa sii tuun biaŋinba ki pent Yennu par na, nnae ki i poŋ tuun. Mɔtana, ti barimiie ki kpaani ti Yomdaanɔ Yiisa sann paak, yii ŋammit kii tuun nna man, 2 kimaan i mi kpaanii nba ki ti din turi ti Yomdaanɔ Yiisa sann ni na. 3 Kimaan Yennu loon ki yii tee popeendamme ki daa tuun bonchonchontoona. 4 Sɔɔ kur n bann waa sii be nan u poo, binbenyeeŋ nan baakir sɔnu biaŋinba, 5 ki daa tuun nna nan nianbiiuk binbeŋ nan binba ki mi Yennu nba be biaŋinba na. 6 Sɔɔ daa tuun biir u lɔɔ nba waa Masia nan li biitbooru, koo ki ŋmaab u lɔɔ. Ti poŋ din beti li powa, ŋaan bia kpaani nan ninmɔnn a Yennu tan saa dat binba tuun nna tuba. 7 Yennu ki yiint a tii tee biitdamm kaa, ŋaan u yaa tii tee popeendamme. 8 Li paak, wunba ki sak wannu nba na, li ki tee nisaarik yar kaa ki u y‡ti, ŋaan u y‡t Yennu nba teeni u Seyeeŋ na mɔŋ mɔŋe. 9 Li ki kpaa talas ki tin sɔb gbouŋ ki tiari yaa sii loon Masiaweira biaŋinba. Yennu poŋ wanni biaŋinba ki i sii loon i leeba. 10 Ki i set tuun li biaŋe na, ki loon ti naa waas kur nba be Masedonia tiŋ ni na. Ti naa waas, ti barimiie, yii ŋammit kii tuun nna man, 11 ki ŋaan ki lii tee i dudukit ki yii be soon nna, ki i baka-ii be i mɔŋ toona ni, kii tuun kii di, nan taa poŋ din beti biaŋinba sinsinn na. 12 Ŋanne saa te ki binba ki tee Masiaweira na n turi baakir, ki li ji kii kpaa talas ki yin jɔɔb i mɔŋ ki denn sɔɔ i bonlonkara paaki. 13 Ti naa waas, ti loon yin bann barmɔniie ki jiin Masiaweira nba kpo na po, ki daa mɔk parbiir nan binba ki mɔk dindann nba mɔk na. 14 Ti teen yada nan Yiisa din kpo ŋaan bia fiir kuun niwa; li paak ki ti bia teen yada nan Yennu tan saa te Yiisa n jen nan u weira nba kpo na. 15 Taa wanti linba na tee ti Yomdaanɔ mɔmaame: ti Yomdaanɔ maŋ jenu daar, damm nba tan sii be bi manfoa ni na kan dɔŋ binba kpo na ki chet Masia sanpaapo, 16 kimaan ti Yomdaanɔ tan saa nyi Yendɔuŋ ni ki sik nan tintian paari, nan malaka saakɔɔ yiinii, nan Yennu kikaak mɔnii, ki Masiaweira nba kpo na tan saa fiir sinsinn; 17 li yoo, damm nba tan sii be bi manfoa ni na nan ŋamm saa chet ti Yomdaanɔ sanpaapo; ki timm nan ti Yomdaanɔ ji saa taan leeb ki be mɔkmɔk nan mɔkmɔk. 18 Li paak, yii dia mɔmaan na kii maant i leeb para.

1 Tesalonika 5

1 Ti naa waas, li ki kpaa talas ki tin sɔb wanni yoo nba ki linba na tan saa tumi, 2 kimaan i mɔŋ poŋ mi fanu nan ti Yomdaanɔ jenu daar maŋ tan sii tee nan nanyukɔɔ nba tuu baar nyiɔk biaŋinba nae. 3 Yoo nba ki niib tan sii yeen a "Parmaasir nan laafia be na," li yoo maŋe ki biiru tan saa baarib yiama nan matyiaru nba tuu baar poo biaŋinba na, ŋaan bi tan kan fit nyi li biiru ni. 4 Ti naa waas, yimm ki be bunbɔnn ni kaa; li paak, li daar tan kii tee nan nanyukɔɔ baaru na kaa i boori, 5 kimaan i tee yentu waase, ti ki tee nyiɔk yab kaa; ti ki be bunbɔnn ni. 6 Li paak, ti daa dɔɔ gɔɔnt nan nisiab nba tuun biaŋinba na, ŋaan tii nyɔi kii sub, 7 kimaan binba gɔɔnt na gɔɔnt nyiɔko, ki binba nyu daan yib na mun yib nyiɔk. 8 Ŋaan timm nba ki tee nyiɔk yab na, tii sub, ki jii yada nan lomm ki lia ki lii tee nan naagbankɔŋŋir na, ki bia jii tinnu dindann ki yir ki lii tee nan naamianjenn na. 9 Yennu din ki gannit a wun tan dat ti tuba kaa, ŋaan u gannit a tin la tinnue ti Yomdaanɔ Yiisa Masia paak; 10 ŋɔɔe din gaar ti paak ki kpo, a ti-i lekii kpo amii ti-i be u jenu yoo maŋ, timm nan ŋɔɔ n taan kii be. 11 Li paak, yii kɔɔnt i leeb para ki somm i leeb nan yaa poŋ tuun biaŋinba mɔtana na. 12 Ti naa waas, ti barimiie a i baka-ii be binba tuun ti Yomdaanɔ toonn i boor, ki tee i yudamm u sɔnu ni, ki teeni kpaanii na ni. 13 Yii teemm baakir nan lomm nba yab, kimaan bi toona nba ki bi tuun na paak. Yii be nan leeb nan parmaasir man. 14 Ti naa waas, ti barimiie a yi kpaan gbannyakdamm, ki chee jaŋmaandamm para, ki somm tarii, ki di sukuru nan sɔɔ kura. 15 I daa tuun biit ki jiint biit paaki, ŋaan yi te ki lii tee i lor yoo kur nan yin tun linba ŋan ki tur i leeb nan sɔɔ kur. 16 Yii mɔk parpeenn yoo kur man, 17 kii mei Yennu yoo kur, 18 kii teen Yennu niipoouk bonsiar kur ni, kimaan Yennu nba loon biaŋinbae na, yaa tee Yiisa Masiaweira na paak. 19 I daa gɔi Yennu Seyeeŋ nba loon biaŋinba; 20 i daa fiakit Yennu sɔkiniinba maami, 21 ŋaan yi tuu mintaa ki bikin bonsiar kur, ki gaar linba ŋan, 22 ki nyi biitbooru kur ni. 23 Yennu nba teent parmaasir na tiɔŋ n teeni popeendamm nan barmɔnii, ki dia i sei nan i manfoa nan i gbanant mun, ki li daa mɔk biit ti Yomdaanɔ Yiisa Masia jenu yoo maŋ. 24 Yennu nba yiini na saa tun nnawa, kimaan u tee barmɔnii daanɔe. 25 Ti naa waas, yii mei Yennu kii teent man. 26 Yi foont Masiaweira na kura ki kpamii. 27 Ti Yomdaanɔ sann nie ki n kpaani, yi karin gbouŋ na ki tur Masiaweira kur. 28 Ti Yomdaanɔ Yiisa Masia n sommi.

2 Tesalonika 1

1 Min Pɔɔl nan Sailas nan Timotie sɔbin gbouŋ na ki teen ti Yomdaanɔ Yiisa Masiaweira nba be Tesalonika ki bia tee Yennu yab na. 2 Ti Baa Yennu nan ti Yomdaanɔ Yiisa Masia n sommi, ki bia turi parmaasir. 3 Ti naa waas, li kpaa talase nan tii teen Yennu niipoouk yoo kur i paak. Ti-i tuun nna, li ŋan, kimaan i yada mantik pukii bonchiann, ki yaa mɔk lomm nba ki teen i leeb na pukii. 4 Ti mɔk yuugontir i paak Yennu niib boor, kimaan sukiru nan yada nba ki i mɔk i mukisuk nan i biak ni, ki be nan gbankur na. 5 Linba nae want nan Yennu buut tee mɔnii; li paak ki u tan saa yet a i jaŋ nan yii be u naan ni; u naan maŋ paake ki i di biak maŋ. 6 Yennue tuun linba took; u saa te ki binba dinti fara maŋ n mun di fara nnae, 7 ki u saa fat yimm nba di fara na, ki mun bia fatit. Yennu tan saa tun linba na yoo nba ki ti Yomdaanɔ Yiisa nan u yabint malakanba saa nyi Yendɔuŋ ni ki baar nan mupeenu nae, 8 ki dat binba ki sak u barŋanii ki bia ki mi Yennu na tuba; 9 ki ti yabint Yomdaanɔ nba be yentchiɔŋ ni tan saa nyinnib u boor, ki bi saa la biiru nba kaa gbennu; 10 u tan saa tun nnae daar nba ki u saa baar ki gaar dontir nan paku u weira kur nba teenɔ yada na boor. I mun tan sii tee bi yemme, kimaan i poŋ teen barŋanii nba ki ti din beti na yadawa. 11 Li paake ki ti mei Yennu yoo kur ki teeni. Ti meiɔ a wun te ki yin jaŋ nan manfoor nba ki u din ganni a yii taŋŋi be leŋ nae. Ti meiɔ a wun jii u paŋ ki te ki yii tuun toonŋana kur nba ki i loon yii tuun na, ki gbenn toona kur nba ki i tuun i yada paak na. 12 Nnae saa te ki ti Yomdaanɔ Yiisa sann na n la dontir i paak, ki yin mun la dontir u paak, Yennu nan ti Yomdaanɔ Yiisa Masia ninbatinu paak.

2 Tesalonika 2

1 N naa waas, ki jiin ti Yomdaanɔ jenu maŋ nan timm nan ŋɔɔ nba tan saa chet leeb ki taan be na po, 2 n loon ki n beti ki i daa mɔk jijeet i para ni, koo jekiruk nan siab nba yaa daar maŋ poŋ baara na. Li pasiar bi beeri a timme din yet nna sɔkinii mɔmaan wannu ni, koo barii ni, koo gbouŋ ni. 3 I daa te ki sɔɔ kpanni nan waama, kimaan li daar kan baar see ki mɔy‡tuk yoo baar sinsinn, yoo nba ki niib bonchiann tan saa y‡t Yennu mɔb na; ki nibiiuk na bia tan saa nyi paanu; Yennue poŋ senn a wun biirɔ. 4 U tan kan sak Yennu jiantu nan jiantii kura, ŋaan teen u mɔŋ yudaanɔ nba gar linba ki niib jiantir kura. U tan saa kɔɔ Yennu jiantu diiuk ni gbaa ki pur u mɔŋ Yennu. 5 Maa din be i boor yoo nba na n din beti linba na kura; i ki tianii? 6 Siare lek daa diau; i mi laa tee linba, ŋaan u tan saa dɔkit Yennu tiɔŋ yoo nie. 7 Nibiit ŋarin poŋ be ki tuun bi toona woonin ni, ki wunba diab nae lek daa sii diab mɔkmɔk nan yoo nba ki Yennu tan saa berɔ. 8 Ki yoo maŋ ki nibiiuk na tan saa nyi paanu, ki ti Yomdaanɔ Yiisa saa kpiu nan ŋɔɔ Yiisa mɔmaan, ki ŋɔɔ Yiisa baaru nan u yentchiɔŋ saa biirɔ. 9 Nibiiuk maŋ tan saa baar nan Sintaanii yaake ki tuun yaarlituk nan bakitnauŋ toonbooru kur a wun kpann niib. 10 U tan saa jɔɔb faabooru kur ki kpann binba ki Yennu tan saa biirib na. U tan saa biiriba, kimaan baa ki loon barmɔnii nba bo saa tinnib ki y‡tir na paak. 11 Li paake ki Yennu te ki faak paŋ tuun bi ni, ki bi tee linba ki tee barmɔnii na yada. 12 Yennu tan saa biir binba ki teen barmɔnii maŋ yada ŋaan loon toonbiit tumu nae. 13 Ti naa waas, yimm nba ki ti Yomdaanɔ looni na, li kpaa talas ki ti pak Yennu yoo kur i paak, kimaan Yennu din ganni pinpiik niewa a yin la tinnu. I din teen barmɔnii barŋanii na yada, ki u Seyeeŋ bia ŋammi ki teeni popeendamm, li paak ki i la tinnu na. 14 Taa din mɔɔnt barŋanii nba ki turi nae ki Yennu yiini ki tinni a yii be fanu nan ti Yomdaanɔ Yiisa Masia nba be biaŋinba na. 15 Ti naa waas, li paak, setir man chib, ki dia wannu nba ki ti din wanni ti mɔmaan ni, nan ti gbouŋ ni na. 16 Ti Yomdaanɔ Yiisa Masia nan ti Baa Yennu nba loonit ki turit pardɔɔnn nba kaa gbennu nan dindann nba yab u ninbatinu paak na 17 n kɔɔni para ki turi paŋ, ki yin fit tun linba ŋan kii biaki piak barii nba ŋan yoo kur.

2 Tesalonika 3

1 Ti naa waas, linba joont tee nnae, yii mei Yennu kii teent, ki ti Yomdaanɔ barŋanii maŋ n lin yian yian kii mɔk yiikoo nan laa din tee i boor ni biaŋinba na. 2 I biakii mei Yennu ki wun nyinnit nibiit nan biitdamm nuu ni, kimaan sɔɔ kur kaa teen barŋanii maŋ yada. 3 Ŋaan ti Yomdaanɔ tee barmɔnii daanɔe, ki saa turi paŋ kii guui ki biitdaanɔ Sintaanii kan fit teeni siari. 4 Ti Yomdaanɔ paak ki ti teen yada nan i tuun taa din beti linba na, kii bia sii tuun nna yoo kura. 5 Ti Yomdaanɔ maŋ n sommi ki yin bann Yennu nba loont biaŋinba, kii mɔk gbankur nba ki Masia teent na. 6 Ti naa waas, ti Yomdaanɔ Yiisa Masia sann nie ki ti beeri, yi nyinn i mɔŋ ti naa wasiat nba tee gbannyakdamm ki ki waa taa daan turii kpaanii nba na. 7 I mɔŋ poŋ mi fanu nan li kpaa talase ki yii tuun nan taa din tuun biaŋinba na. Taa din be i boor na, ti din ki tiin gbannyakiri. 8 Ti din ki mi gaar sɔɔ sommir yann ki ki pa li paaki. Ŋaan ti kpan din tuune ki nyi naauk, ki lek tuun yonnu nan nyiɔk, a ti daa tee jikir i sɔɔ paaki. 9 Taa din tuun nna maŋ, li ki want nan ti ki mɔk yiikoo nba saa boi sommir po kaa; ti din tun nna a ti teen nyinne ki turi ki yin weir. 10 Taa din be i boor na ti din tuu yɔɔ beeri a "Wunba kur ki saak toona, li yɔɔ ki ŋan nan wun di." 11 Ti gbia a siab be i sinsuuk ni ki ki loon toona, ŋaan lin kɔɔ bi leeb barii nie, li paake ki ti beeri linba na. 12 Ti Yomdaanɔ Yiisa Masia sann nie ki ti beer niib maŋ ki kpaamm a bi baka-ii be bi tiɔŋ toona ni, kii be soon nna, kii di bi naauk. 13 Ti naa waas, yii mi ki i bak nan toonŋana tumu man. 14 Li pasiar taa teeni labaar nba ti gbouŋ na ni na, sɔɔ kan sakiri. Li-i tee nnaie, yin bann i yan ni nan li yɔɔ, ki i baka daa be u po, ki wun di fei. 15 Ŋaan i daa teeu nan u tee i dataake na, yi kpaanɔ nan u tee i naa bike na. 16 Ti Yomdaanɔ nba teent parmaasir na n turi parmaasir yoo kur, siar kur ni. Ti Yomdaanɔ-ii be nan i kur. 17 Min Pɔɔl sɔbin nan n mɔŋ mɔŋ nuue ki foonti na. N gbant kura siarae na; n sɔbin ki joontir n gbant nnae. 18 Ti Yomdaanɔ Yiisa Masia n somm i kura.

1 Timoti 1

1 Min Pɔɔl tee Yiisa Masia toomiie, kimaan ti Tinntɔɔ Yennu nan Yiisa Masia, binba tee ti dindann nae turin yaak; 2 mine sɔbin gbouŋ na ki teen fin Timoti, wunba tee n bimɔŋ, ti yada paak na. Ti Baa Yennu nan ti Yomdaanɔ Yiisa Masia n somma, ki tina ninbaauk, ki bia tura parmaasir. 3 I be Efesus nan maa poŋ wanna biaŋinba, yoo nba ki n din be sɔnu paak ki saa Masedonia na. A kpaan nisiab nba want faak wannu na ki bin nyik 4 ki daa fiin bi yeejamm ni tianii nan yaadindonfɔkit nba baat nan mɔniɔk na. Ŋann ki mɔk sommir ki teen niib ki bi saa tumii Yennu sɔnu; yada paake ki ti bannir. 5 Ŋaan n kpaanii maŋ paak tee a lin fiin lomm nan popeenn nan dudukŋant nan barmɔnii yadae. 6 Ki nisiab nyik linba nawa, ŋaan bot kɔɔ jat labafaant ni. 7 Bi loon bii tee Yennu sennu wannteebe, ŋaan ki mi bi mɔŋ mɔŋ mɔbona paak, ki bia ki mi baa piak linba maŋ paaki. 8 Ti mi nan sennu maŋ ŋan, li-i tee ki sɔɔ diar ki tuun nan laa want a tii tuun nann biaŋinba na. 9 I tian nan sennu ki see niŋamm paak kaa, ŋaan li see binba tee mɔy‡tdamm na paake, nan binba ki tiin Yennu, nan biitdamm, nan jakint damm, nan binba ki teen Yennu baakir na paak, nan binba kpi bi baanba nan bi naanba, nan nikpiira, 10 nan binba tuun bonchonchon-sin, nan binba mɔk niɔŋ ki dɔɔ nan bi jaleeb, nan binba jaan niib, nan binba tee faak damm, nan binba di faak siara na, nan linba kur ki waa barmɔnii wannu na paak; 11 ki Masia barŋanii nba wann Yennu nba ŋan bonchiann biaŋinba na mun wann nnae; ki ŋɔɔ Yennu din teen barŋanii maŋ n nuu ni ki n mɔɔntir. 12 N teen ti Yomdaanɔ Yiisa Masia niipoouk, ŋɔɔe turin paŋ a man tun u toona kimaan u yet a n jaŋ nan toona maŋa, ki te ki n tuun teenɔ, 13 Maa lek din biir u sann ki mukis u niib, ki sukiiɔ na, ŋaan u bia gaarin u ninbatinu niwa, kimaan n din ki mie, ki bia ki teenɔ yada, ki tuun nna. 14 Ki ti Yomdaanɔ Yiisa Masia tan tinin ninbaauk nba yab ki kaa bikinu, ki te ki n teenɔ yada ki loonɔ. 15 Ŋɔɔ Yiisa Masia din baar tingbouŋ na ni, a wun tinn biitdamme; labaar maŋ tee barmɔniie ki ŋan ki ti gaarir ki teenn yada; ki mine din bi ki gar biitdamm kura, 16 ŋaan ki u tin min nba din tee biitdamm yudaanɔ na ninbaauk ki dii sukuru nanin, a lii tee siara ki wann binba tan saa teenɔ yada ki gaar manfoor nba kaa gbennu na. 17 Dontir nan baakir tee Yennu yare mɔkmɔk nan mɔkmɔk. Ŋɔɔe tee kpanbar nba kan mi kpo, ki sii be yaa yoo nan yaa yoo; ki sɔɔ ki laatɔ; ki u tee Yen-yemmir na. Mamɔmm. 18 N bik Timoti, n jikit kpaanii maŋ ki tee a nuu ni. Kpaanii maŋ tee nan mɔbona nba ki sɔkiniinba din poŋ pak a po sianyoo nae. Jiin barii maŋ ki lii tee jatiat ki a kɔn fanu, 19 ki teen barmɔnii wannu yada, kii tuun linba ki a mi nan li tee toonŋana. Nisiab ki sak nna; li paake ki bi yada biir gbenn. 20 Bi siabe tee Haimeneus nan Aleksander, binba ki n daan jiib teemm Sintaanii nuu ni a wun mukisib na. Linba nae saa wannib yan ki bin nyik Yennu sann biiru.

1 Timoti 2

1 Li paak, linba kpaa talas tee yii puk Yennu, kii meiɔ, kii boiɔ, kii teenɔ niipoouk niib kur paake. 2 Yii mei Yennu, batnba nan binba kur tee yiikoo damm na paak, a tii be nan laafia nan parmaasir, kii tee yentinna, kii be soon nna. 3 Ŋanne ŋan ki pent ti Tinntɔɔ Yennu par; 4 ŋɔɔe loon sɔɔ kur n bann u maan nba tee barmɔnii ki wun tinnib; 5 kimaan Yen-yenɔkɔɔe be, ki sindantinnɔ tee yenɔkɔɔ ki be Yennu nan nisaarik sinsuuk ni; li yɔɔe tee Yiisa Masia, 6 wunba din jii u mɔŋ ki mann mannu ki tur sɔɔ kur a wun nyinnib daabsin ni na; ki bi mɔɔnt barŋanii maŋ yoo nba jaŋ. 7 Li paak ki Yennu gannin ki n tee Masia toomii, ki mɔɔntir barŋanii maŋ ki teen binba ki tee Juu teeb na, ki wantib ŋɔɔ Masia maan nba tee barmɔnii na, a bin teenɔ yada. Maa beeri linba na, n ki fa faak kaa, li tee barmɔniie. 8 N loon ki jab-ii mei Yennu siar kur boor. Jab nba set tee popeendamm ki ki mɔk wutoor koo mɔniɔk na saa fit donn bi nii sanpaapo ki miar Yennu. 9 N bia loon ki poob na mun-ii be nan Yiisaweira nba bo sii be biaŋinba na, ki bann chinchengbabu nan talianu nba jaŋ nan Yiisaweira na. Bi-i lorin bi yut nan kut nyinyirit, koo ki piir salinbana amii laan nyinyirit nan tiat nba ki li daauk paar, linba na kaa saa turib fanti; 10 linba saa turib fant tee binbenŋaŋe nan pooyentinna nba bo sii be biaŋinba na. 11 Poob-ii be soon nna kii tumii nan mɔsaku kur. 12 Min ki sak ki poosɔɔ n wann jab, amii wuu mɔk yaak ki gar jabi; poo-ii be soon nna; 13 kimaan Yennu din nan Adame sinsinn, ki li poorpo ki u nan Adam ŋaapoo Iif. 14 Ki nyik nna, Sintaanii din fit kpann Iife ki u biir Yennu sennu na, u din ki kpann Adam kaa. 15 Ŋaan poo-i teen Yiisa yada, ki loon niib, ki tee popeendaanɔ, ki be soon nna, Yennu saa tinnɔ u matuk niwa.

1 Timoti 3

1 Barii nba na tee barmɔniie, ki jɔɔ nba loon wun teen Masiaweira yudaanɔ, li tee toonŋanne ki u loon. 2 Li ki ŋan ki Masiaweira yudaanɔ-ii mɔk bisiati. Li kpaa talase ki wuu mɔk poo yenɔkɔɔ, kii tee subindaanɔ, kii dia u mɔŋ fanu, kii gaan saamm u ŋaak ni kii chantirib, kii tee wunba saa fit wann niib Yennu maan, 3 ki daa nyu daan ki yibi, ki daa loon fuut nan kunkɔna, ŋaan kii be soon nna nan parmaasir, ki daa tee liklonchiɔŋ daanɔ. 4 Li kpaa talase ki wun fit dia u mɔŋ ŋaak niib fanu, ki te ki u waas n sak u mɔb kii mɔk baakir. 5 Ŋaadaanɔ-i kii mi waa saa dia u ŋaak niib biaŋinba, nlee ki u saa fit dia Yennu niibi? 6 Li kpaa talas ki wuu tee daanɔ nba poŋ waa Masia ki li yukira; nna-i kaa, u tan saa mann donn u mɔŋ nan karinbaantii ki la tubdatu nan Sintaanii nba din tun biaŋinba ki la tubdatu na. 7 Li kpaa talas ki wuu tee daanɔ nba ki binba ki waa Masia na gbaa n yet a u binbeŋ ŋan, ki u daa di fei ki Sintaanii baruk tan saa mann soorɔ. 8 Li bia kpaa talas ki Masia niib sommteeb-ii munii mɔk bin-benŋaŋ, ki daa tee mɔleemii dammi. Bi daa nyu daan bon-chiann, ki bia daa mɔk liklonchiɔŋu. 9 Li kpaa talas ki bii dia yada barii nba ki Yennu fiit wannit na fanu, ki daa mɔk biiti. 10 Li kpaa talas ki bin bikimm sinsinn; bi-i kii mɔk biit bi bikinu maŋ ni, bi sii fit tuun sommteeb toona. 11 Li kpaa talas ki bi poob-ii munii mɔk binbenŋaŋ, ŋaan daa tee sanjaanjanna. Li kpaa talas ki bii tee subindamm kii tuun bi toona kur fanu. 12 Li kpaa talas ki Masiaweira sommtɔɔ-ii mɔk poo yenɔkɔɔ, ki bia fit dia u waas nan u ŋaak niib fanu. 13 Masiaweira sommteeb nba tuun bi toona fanu na saa la baakir Yiisa Masiaweira boor, ki bia mɔk parcheenn ki bet niib baa teen Yiisa yada biaŋinba. 14 Maa sɔbin gbouŋ nba teena na, ŋaan n mɔk dindann nan man baar mɔtana ki la-a, 15 ŋaan li-i yukir ki n ki baar, gbouŋ na saa te ki a bann taa sii be biaŋinba Yennu ŋaaniib sinsuuk ni, binba ki ŋɔɔ Manfodaanɔ Yennu gannib na. Ŋamme dia barŋanii nba tee barmɔnii na, ki bia see li paak. 16 Li tee barmɔniie nan Masia labaar nba ki Yennu fiit wannit na sumii bonchiann: U din dɔkit nan gbanante, Yennu Seyeeŋ wann nan u be fanu; ki malakanba din lau. Ki niib din mɔɔnt u labaar ki tur nibooru booru, ki bi teenɔ yada tingbouŋ na ni, ki Yennu tan donnɔ sanpaapo ki u la dontir.

1 Timoti 4

1 Tɔn, Yennu Seyeeŋ set wantit yeenin ni nan yoo nba waa poorpo na, nisiab tan saa nyik Masia labaar nawa, ŋaan sak narinbiit nba saa kpannib na, ki bia wei Sintaanii wannu na. 2 Binba want li kpinkpannii wannu na fa faake, ki bi dudukit ji ki mukisib li paaki. 3 Li nibooru want a jakunt nan pookɔɔnt ki ŋani, a ki jesiat bia ki ŋan nan dinu; ŋaan timm nba bann Masia barŋanii ki teenɔ yada na, ti mi nan Yennu nan jebooru kura a niib n tuu turɔ niipoouko li paak ŋaan di. 4 Bonsiar kur nba ki Yennu nan na, li ŋan ki tee jeete; ti-i turɔ niipoouk li paak ki di, li ŋan nan dinu; ti daa y‡en li siari, 5 kimaan Yennu yet a li kura ŋan; ki taa meiɔ ki teenɔ niipoouk li paak na, ŋanne bia te ki jeet maŋ yeen. 6 Li-i tee ki a jii kpaanii nba na ki tur Yiisa Masiaweira na, a sii tee u toontunŋanɔe, ki sii dint a mɔŋ nan maan nba ki ti teen yada na nan wannŋanu nba ki a waa maŋ na. 7 Daa saak faak maan kimaan li ki tee Yennu yari; li ki mɔk nyɔɔti; ŋaan a tumii yentinu binbeŋ nan ninmɔnn. 8 Toonn tumiiu nba pukii gbanant paŋ na mɔk nyɔɔt waaminnae, ŋaan yentinu tumiiu nyɔɔte mantik yab. Kimaan li mɔk nyɔɔt ki turit tingbouŋ na ni mɔtana, nan Yendɔuŋ ni yoo nba baat na. 9 Linba na tee barmɔniie, ki li ŋan ki i gaarir. 10 Ti gbaae ki tuun nan ninmɔnn kimaan ti mɔk dindann Manfodaanɔ Yennu boor, ŋɔɔe tee sɔɔ kur Tinntɔɔ, ki saa tinn sɔɔ kur nba teenɔ yada. 11 Wantib ki kpaamm linba na kura. 12 Daa te ki sɔɔ n siana faa pɔ na paaki. A te ki a pinpauk nan a binbenŋaŋ, nan a lomm, nan a yada, nan a binbenyeeŋ n wann Masiaweira nba bo sii be biaŋinba. 13 Jiin a yoo nan a yaak kii karin Yennu gbouŋ kii wanntib li paak, kii mɔɔntir Masia barii mɔkmɔk nan yoo nba ki n tan saa baar. 14 Daa tammit Yennu Seyeeŋ piinii nba be a ni na po; Yennu din tura piinii maŋ yoo nba ki sɔkiniinba din pak a po, ki yudamm bia yii bi nii a paak nae. 15 I tuun linba na nan ninmɔnn, ki sɔɔ kur n la a kpaatu Yiisa toona ni. 16 I mi a mɔŋ nan a wannu po. I dia wannu nba na, kimaan li-i tee ki a diar, a saa tinn a mɔŋ nan binba ki a wantib nawa.

1 Timoti 5

1 A daa yakii nan jakpersɔɔ, ŋaan pak turɔ nan a mɔŋ baa na, kii dia naasimm nan a mɔŋ ninjamm na, 2 ki jii pookpera na ki bii tee nan a naanba na, ki poopaanii na-ii tee nan a mɔŋ niipoob na nan binbenyeeŋ kura ni. 3 I teen pakɔi nba be bi kuukɔɔ na sommir, 4 ŋaan pakɔɔk nba mɔk waas koo yaaboona, u waas koo yaaboona maŋ n piin ki tumii bi yentinu toona nba tee linba ki tur bi mɔŋ ŋei ni, nnae ki bi damm mun saa di bi niwubit nyɔɔt, kimaan linba ki Yennu loone na. 5 Pakɔɔk nba be u kuukɔɔ ki kaa sɔɔ, ŋaan ki u dindann be Yennu ni, ki u mei Yennu yoo kur, ŋɔɔe tee barmɔnii pakɔɔk. 6 Ŋaan pakɔɔk nba tuun chonchonsin, u poŋ kpoewa ŋaan daa be maŋ. 7 Wantib kpaanii na ki bii waa ki daa mɔk biiti. 8 Wunba ki gorii u nikpiimm, mantik wuu kii fiin u mɔŋ ŋaak niib po, li daanɔ kɔŋ yadawa; ki wunba ki tee Masiaweirɔ gbaa sɔu. 9 A daa kaan pakɔi nba daa ki kpet gar bina piinloob na ki kɔɔnt pakɔi kann ni. Linba pukin, li kpaa talas ki wuu tee wunba din kun jɔɔ yenɔkɔɔ, 10 ki poŋ tuu mɔk sanŋann u toona paak, ki tee wunba tuu mi waas wubiru fanu, ki gaan saamm u ŋaak ni, ki a tuun sikin-n-mɔŋ toona ki teen u leeb nba waa Masia na, ki sommit niib nba be fara ni, ki jii u mɔŋ kur teen toonŋana tumu ni. 11 Ŋaan a daa pukii pakɔpoopaanii na pakɔi kann ni, kimaan bi-i taŋŋi loon jakunt yoo nba, bi nyikit Masia li yooe, 12 ki pot bi mɔsonn nba ki bi din senn turɔ na, ki kɔɔ biit ni. 13 Linba pukin, bi bia biir bi yoo ki ki loon toona, ŋaan lin lɔɔn ŋei ki tumii sanjaauŋ, nan niib barkpeena ni kɔɔnu, ki lin piak linba ki ŋan nan bii piaki. 14 Li paak, min bo sii loon ki pakɔi nba tee poobis na n kun jabe ki mar waas, ki got bi ŋei fanu, ki ti datai daa laat yaak ki piak biit ki jiint ti po, 15 kimaan pakɔsiab poŋ tunn waa Sintaaniie. 16 Ŋaan poosɔɔ nba tee Masiaweirɔ ki mɔk pakɔi u ŋaak ni, li kpaa talas ki wun gotib fanu, ki daa jikit bi jik-kpiata ki jint Masia niibi, ki Masia niib mun n got pakɔi nba be bi kuukɔɔ na fanu. 17 Masia niib yudamm nba diab fanu na ŋan nan baakir bonchiann; ki binba mɔɔntir Masia labaar ki wantib li paak na, ŋamme mantik ŋan nan baakir; 18 kimaan li sɔb Yennu gbouŋ ni a "Naab-i ŋmaan dii ki pinii dibin, faa daa bobint u mɔbi," ki bia sɔb a "Toontunnɔ ŋan ki wun gaar u paauko." 19 Tɔn, bi-i paan saakasɔɔ barii, a daa te ki a baka be li ni, nɔkira siara damm teen niib banlee amii bin gar nna. 20 Binba tuun toonbiit na, a yakii namm niib ni, ki binba biar na n tin jaŋmaanii. 21 Yennu nan Yiisa Masia nan ŋɔɔ Yennu malakanba tɔɔnne ki n teena kpaanii nba na, a fan sak wannu na ki daa mɔk ningannii koo lukitin nan sɔɔ bonsiar kur ni. 22 A daa mantik jekir ki yiin nii sɔɔ paak a wun teen Masiaweira yudaanɔ. A daa kɔɔnt a nuu siab toonbiit tumu ni; i dia a mɔŋ fanu. 23 A laafia nba ki jaŋa na paak, a daa nyu nyun kuukɔɔ, ŋaan a tuu nyu daan waan ki lin somm a nɔɔk ni. 24 Nisiab toonbiit poŋ dɔɔ paanu nie ŋaan ki bi daa ki bu bi buuti; ki siab toonbiit mun saa nyi paanu bi buut bunu poorpoe. 25 Toonŋana mun bia tee nnae, li yenninba nyii paanuwa, linba lek ki nyii paanu na gbaa, ŋaan li kan fit bɔri.

1 Timoti 6

1 Li kpaa talase ki binba tee daaba na n tur bi yomdamm baakir, ki sɔɔ daa piak biir Yennu sann nan u wannu. 2 Binba ki bi yomdamm tee Masiaweira na daa fiakit bi yomdamm maŋ, baa yib bi naa waas na paaki, ŋaan li kpaa talas ki ŋamme n mantik tun fanu, kimaan bi yomdamm nba gaan bi toona nyɔɔt na teen Masia yadawa, ki Yennu loonib. I wantib kii kpaamm toona na po. 3 Sɔɔ-i want wannganu ki ki wei ti Yomdaanɔ Yiisa Masia mɔbona nan Yennu sɔnu wannu na, 4 u gbee nan karinbaaniie ki ki mi siari, ki bia mɔk mɔniɔk nan kunkɔna niɔŋ, ki li baat nan funfunn, nan kunkɔna, nan nisukit, nan pinpakbiit, 5 nan mɔniɔk yoo kura nibiit boor; ŋamm yaa dudukit ki somm fanu, ki ji ki mɔk barmɔnii; bi dukii nan Yennu weiu tee a nirɔ n teen mɔkitɔɔe. 6 Li-i tee ki nirɔ numm gboot waa mɔk linba, Yennu weiu set mɔk nyɔɔte, 7 kimaan ti din ki baar nan bonsiar tingbouŋ na ni, ki ti bia tan kan nyi nan siar tingbouŋ na ni, 8 ŋaan ti-i mɔk jeet nan tiat, li ŋan ki ti numm n gboor; 9 ŋaan binba loon bii tee mɔkita, ŋamme kɔɔ jinjammii ni, nan barit ni, nan jatii niɔŋ nba biir niib ki baantib yann na ni, 10 kimaan likirii lomme tee bonbiir kur jiinn. Nisiab poŋ jii bi mɔŋ ki teen likilonbiiuk nie; ki ji ki teen Masia yada. Ŋanne teen ki bi laat parbibooru booru. 11 Ŋaan fin Timoti nba tee Yennu nirɔ na, li ŋan ki a dɔŋ nyi linba na kura ni, ŋaan kii loon fii be fanu, kii mɔk yentinu, kii tuun Yennu toona fanu, kii loon niib, kii mɔk sukuru, kii be soon nna. 12 Yabit a mɔŋ kii waa yada sɔnu nan ninmɔnn, kii dia manfoor nba kaa gbennu na; Yennu din yiina ki a gaar manfoor maŋe yoo nba ki a din nyinn a mɔŋ siarŋann, niib bonchiann numm ni na. 13 N kpaana kpaanii nae Yennu nba teen bont kura manfoor na, nan Yiisa Masia nba din nyinn u mɔŋ siarŋann Ponsius Pailat numm ni na tɔɔnn, a fii dia Yennu sennu fanu ki li daa mɔk biit-ii mɔkmɔk nan daar nba ki ti Yomdaanɔ Yiisa Masia tan saa dɔkit. 15 Yennu nba ki ti piakɔ na, ŋɔɔ kuukɔɔe tee Yudaanɔ, ki tee kpanbara kur Kpanbar, ki bia tee yomdamm kur Yomdaanɔ; ŋɔɔe tan saa te ki Yiisa n dɔkit yoo nba jaŋ; 16 ŋɔɔ kuukɔɔe kan kpo; u be yentchiɔŋ nba ki nirɔ kan fit nakin na ni; ŋɔɔe ki sɔɔ daa ki mi lau koo ki saa fit lau; ŋɔɔe yen paku nan paŋ yoo nba kaa gbennu. Mamɔmm. 17 A kpaan mɔkita na ki bi daa mɔk dont-n-mɔŋ koo ki tee bi dindann mɔkint ni, kimaan li mɔkint tee wouŋo; ŋaan bin teen bi dindann kur Yennu ni; ŋɔɔe turit bont kur a ti gaar kii mɔk parpeenn. 18 Bii tuun toonŋana, ki bi toonŋana maŋ-ii yab; ki bi nii-ii yaa nan piinii turu. 19 Nnae saa te ki bii mɔk mɔkint sanpaapo ki li guub nan yoo nba tan saa baar; ki bi sii fit mɔk manfoor nba tee barmɔnii manfoor. 20 Timoti, i guu barŋanii nba ki Yennu jii teen a nuu ni na. A nyik jat mɔniɔk nan labafaanu nba ki mɔk nyɔɔt ki bia ki tee Yennu yar, ki siab yir "bannu" na; 21 kimaan siab poŋ yaa ŋamm mɔkir, ki li paak ki bi nyik Masia sɔnu na. Yennu sommir-ii be i ni.

2 Timoti 1

1 Min Pɔɔl, wunba teen Yiisa Masia toomii Yennu loomm paak, a n mɔɔnt manfoor nba ki Yennu din lor turit Yiisa Masia paak na, 2 n sɔbin gbouŋ na ki teen n bilonkak Timoti. Ti Baa Yennu nan ti Yomdaanɔ Yiisa Masia n somma, ki tina ninbaauk, ki bia tura parmaasir. 3 Yennu nba ki n jiantirɔ nan dudukŋant nan n yeejamm nba din tuun biaŋinba na, mi-i meiɔ n tian a po yoo kura n miaru maŋ ni, nyiɔk nan yonnu ni, ki teenɔ niipoouk a paak. 4 N tian a ninnyuut po, ki lek loon ki n la-a kii mɔk parpeenn bonchiann. 5 N tian faa teen Yiisa Masia yada nan barmɔnii biaŋinba; ki a yaa Lowis nan a naa Yunis mun poŋ din teenɔ yadawa. N ki mɔk birsuk, a mun bia teenɔ yadawa. 6 Li paak ki n tiana maa fan fiin piinii nba ki Yennu tura yoo nba ki n din yii n nii a paak na, 7 kimaan Seyeeŋ nba ki Yennu turit na ki teenit jaŋmaandamm kaa, ŋaan Seyeeŋ maŋ teent paŋ nan lomm, nan dia-n-mɔŋ binbeŋe. 8 Li paak, i mɔɔntir ti Yomdaanɔ labaar na ki daa tiin fei. A bia daa tiin fei nan maa be dansarik ni u paak na, ŋaan sak biakdinu u barŋanii maŋ paak, nan Yennu nba tura paŋ biaŋinba na. 9 Ŋɔɔ Yennue tinnit ki yiinit a tii tee popeendamm; waa yiinit biaŋinba, li ki tee ti toonŋana paak kaa, ŋaan u mɔŋe din senn a u saa tint ninbaauk Yiisa Masia paak; u din senn nnae yoo nba ki u daa ki nan durinya na. 10 Ŋaan ti Tinntɔɔ Yiisa Masia baaru paake ki u fiit wannit li po; ki ŋɔɔ Yiisa Masia din biir kuun paŋ, ŋaan bia wannit a ti-i sak u barŋanii maŋ ti saa la manfoor nba kaa gbennu. 11 Yennu poŋ din yiinin a n teen toomii nan wanntɔɔ ki mɔɔnt barŋanii maŋe. 12 Li paake ki n di biak ŋaan ki tiin fei, kimaan n mi maa jii n mɔŋ ki teen wunba nuu ni, n mi ki birsuk kaa nan u saa fit dia linba ki u jii teen n nuu ni na fanu mɔkmɔk nan joontu Daar na ni. 13 I dia maa din wanna barŋanii sɔnu nba na fanu, kii waa-r nan yada nan lomm nba ki Yiisa Masia teent na. 14 Yennu Seyeeŋ paŋ nba be ti ni na paak, i dia barŋanii nba ki u jii teen a nuu ni na. 15 A poŋ mi nan sɔɔ kur nba be Asia tiŋ ni na nyikima; bi siabe tee Fijelus nan Hemojenes. 16 Ti Yomdaanɔ n tin Onesiforus ŋaateeb ninbaauk, kimaan u daan yɔɔ cheen n par, ki ki tin fei nan maa be dansarik ni na. 17 Waa daan tan baar Rom doo ni yoo nba, ki u piin loon maa be siaminba nan waa tan la n boor. 18 Ti Yomdaanɔ n tinɔ ninbaauk joontu Daar maŋ ni. A mɔŋ mi fanu waa din sommin bonchiann biaŋinba, Efesus doo ni.

2 Timoti 2

1 N bik, fin ŋanimin chee a par Yiisa Masia nba somma biaŋinba u ninbatinu ni na paak. 2 Faa poŋ din gbat wannu nba n peŋ niib bonchiann numm ni na, a jiir ki wann nisiab nba tee yadadamm, binba saa fit wann leeb mun. 3 A sak biakdinu Yiisa Masia paak nan lanjiŋŋanɔ nba tuu di biak na. 4 Lanjima nba loon u saakɔɔ numm n gboou, u ji ki ŋmat u binbeŋ nan linba ki tee lanjimanba toona. 5 Wunba tiin poot nantaar kan fit nyann ki gaar li nyɔɔt, see ki u sak wei poot sennu kur. 6 Li kpaa talas ki kpaarɔ nba tun nan ninmɔnn n sint gaar jeet na tor. 7 I dukii linba ki n beera na po, kimaan ti Yomdaanɔ saa te ki fan fit bann li kura paak. 8 I tian Yiisa Masia po; u din fiir kuun ni, ki tee Defid yaaboonn, nan maa mɔn barŋanii na ki wann niib biaŋinba na; 9 barŋanii maŋ paak, ki n be nan jarit ki di biak nan n tee biitdaanɔ na; Yennu barii maŋ ŋarin ki be jarit ni. 10 Ŋaan Yennu nigannkab na paak ki n lek di sukuru biak kur ni, a bin mun la tinnu Yiisa Masia paak, kii mɔk parpeenn nba kaa gbennu na. 11 Barii nae tee mamɔmm a: "Ti-i kpo nanɔ, ti mun tan sii mɔk manfoor nanɔe. 12 Ti-i ŋammit yabii, ti mun tan saa di naan nanɔe; ŋaan ti-i yaa ti ki miu, u mun tan sii yaa u ki miti; 13 ti-i kii mɔk yada, ŋaan ŋɔɔ tee barmɔnii daanɔe, kimaan u kan mi nɔi u mɔŋ binbeŋi." 14 A tiar a niib linba na, ki turib kpaanii Yennu boor a bi daa kɔn mɔbona paaki; ŋann ki mɔk nyɔɔt, ŋaan li biir binba gbiin nae. 15 Yabit a mɔŋ paak ki Yennu n paka, kii tee toontunnɔ nba dia barmɔnii mɔmaan ki want niib fanu, ki tan daa di fei u toona paaki. 16 A nyinn a mɔŋ labafaanu nba ki tee Yennu yar ki bia ki mɔk nyɔɔt ki saa te ki niib n fɔkit nan Yennu na ni. 17 Li wann-booru tee nan fiauk nba tuu di gbanant nae. Haimeneus nan Filetus daan want li wann boorue. 18 Bi ki want niib barmɔnii labaar, ŋaan tuni siab yada ki yaa kuun fiiru yoo na poŋ baar gara; 19 ŋaan Yennu nigannkab ŋarin see-e, ki kan mi dammi; ki mɔbona nba sɔb bi paak tee nnae a: "Ti Yomdaanɔ mi binba tee u yab," ki bia sɔb a, "Wunba kur yet a u tee ti Yomdaanɔ yɔɔe, li kpaa talas ki wun nyik toonbiit tumu." 20 Ŋmanbooru booru be ŋasaakak ni; kutsɔnt kuukɔɔ kaa be li ni, siab tee ŋmanii ki siab mun tee yɔk. Ki li siab nyɔɔt yab bonchiann, ki siab nyɔɔt ki yabi. 21 Wunba-i nyik toonbiit ki tee popeendaanɔ, u sii tee nan ŋmaŋ nba mɔk nyɔɔt ti Yomdaanɔ boor, ki jaŋ nanɔ, ki teen siir a wun tun toonŋana kura nae. 22 Nyint a mɔŋ naasimm nianbiiuk na ni, ŋaan kot ki fin nan binba para yeen ki bi yi ti Yomdaanɔ ki loon sommir na n wei yentinu sɔnu, nan yada sɔnu, nan lomm sɔnu, nan parmaasir sɔnu. 23 A tin nyik jatii nan li mɔniat. A poŋ mi nan li joontir nan kunkɔnae. 24 Li ki ŋan ki ti Yomdaanɔ toontunnɔ-ii kɔn nan niibi. Li ŋan ki wuu tee burchimɔe sɔɔ kur boor, kii tee wanntɔŋanɔ nba mɔk sukuru, 25 kii tee wunba be soon nna kii kpaan binba nɔi nanɔ na, li pasiar Yennu n tan turib yaak ki bin nyik bi dudukbiit maŋ ki bann barmɔnii wannu, 26 ki la yan ki lɔkit Sintaanii barit, ki sak ŋɔɔ Yennu loomm.

2 Timoti 3

1 I mi nan tingbouŋ na dajoontii yoo tan sii paar. 2 Niib tan sii tee jawudamme, nan liklonna, nan karinbaan damm, nan want-n-mɔŋ damm, nan binba sukii niib, nan binba ki saak bi damm mɔi, nan binba ki tian ŋamm po, nan binba ki tiin Yennu; 3 bi tan kii mɔk lomm nan niibi, bi tan sii tee mɔlanfikdamme, ki kan soor bi mɔŋi, ki sii tee kpikpiruk damm; ki naan bonsusoot; bi tan sii nan toonŋanae, 4 bi tan sii nyi leeb poae, ki tee kaatkaat damm, ki dont bi mɔŋ; bi tan sii loon bi mɔŋ loomme ki gar Yennu, 5 bi tan sii dia Yennu jiantu sanne, ŋaan ki saak Yennu paŋ. Nyint a mɔŋ li nibooru ni. 6 Bi siabe lin ki doi ŋei ki kpann ki nyant pooliinii nba tuun toonbiit bonchiann ki waa bi para nianbiit booru booru na. 7 Yoo kura, li poob tumiie ŋaan kan mi bann barmɔnii sɔnu. 8 Janes nan Jamberes nba din ki sak nan Moses biaŋinba na, li jabooru mun tee nnae, bi kɔn nan barmɔniie, bi dudukit ki ŋani, bi bia ki waa yada sɔnu; 9 ŋaan bi kan fit kpann niib ki yukiri, kimaan sɔɔ kur tan saa la bi jatii nba tee biaŋinba nan baa din la Janes nan Jamberes jatii biaŋinba na. 10 Ŋaan fin ŋarin poŋ wei n wannu nan n binbeŋ, nan n dudukita. A poŋ mi maa teen Masia yada biaŋinba, nan n sukuru, nan n lomm nan niib, nan n gbankur, 11 nan niib nba mukisin biaŋinba, nan n biakdinu ni. A mi linba kur tumin Antiok, nan Ikonium nan Listra doi ni. A mi maa din la mukisubiit biaŋinba; ŋaan ti Yomdaanɔe nyinnin li kur ni. 12 Barmɔniie, niib saa mukis wunba kur tee Yiisa Masia yɔɔ ki loon wuu tee yentinnɔ na; 13 ki nibiit nan kpinkpannii damm lek tan sii ŋammit pukii bi toonbiit, ki kpann leeb, ki bi leeb mun saa kpannib. 14 Ŋaan fin ŋarin, i dia barii nba ki a tumii ki teenir yada na, kimaan a poŋ mi nan binba din tee a wannteeb na tee barmɔnii damme; 15 ki a bisin niwa a poŋ mi Yennu gbouŋ nba fit teena yan ki wanta faa saa teen Yiisa Masia yada ki tinn biaŋinba. 16 Maan nba kur be Yennu gbouŋ ni na nyii u mɔb nie, ki li kur mɔk nyɔɔte, ki wantit u po, ki kpaanit, ki ŋammit ti benu, ki wantit yentinu sɔnu, 17 a nirɔ nba jiantir Yennu binbeŋ-ii ŋan, ki wun teen siir kii tuun toonŋana booru kur.

2 Timoti 4

1 Yiisa Masia nba tan saa jen ki di naan ki bu footib nan kpeemm buut na, ŋɔɔ nan Yennu tɔɔnn poe ki n beera, 2 a fii mɔɔntir u barii; ki yoo-i lekii jaŋ koo li-i kii jaŋi, finii mɔɔntir, kii piak niib bi toonbiit po, kii kpaanib, kii kɔɔntib para, kii wantib barii maŋ nan sukuru yoo kura, 3 kimaan yoo baat ki niib ji tan kii gbiin wannŋanu, ŋaan tan sii waa bi mɔŋ mɔŋ nianbiite, ki sii gbiin wannteeb bonchiann nba sii wantib baa loon bii gbia linba. 4 Bi kan gbiint barmɔnii maŋi, ŋaan loon bii gbiin labagana. 5 Ŋaan finii tee subindaanɔ yoo kur, kii saak biakdinu, kii mɔɔntir Yiisa Masia barŋanii, kii tuun toona kur nba ki Yennu tura na. 6 Kimaan min ŋarin, yoo baar nan man lu n miara; yoo baar nan man nyi tingbouŋ na niwa. 7 N gbaa gbigbaaŋanna; ki tun n toonn gbenna; n lek dia yada labaar. 8 Li paak, nyɔɔt nba tee yentinu nyɔɔt dɔɔ guun sanpaapo; ki ti Yomdaanɔ, wunba bu niib buut nan barmɔnii na tan saa turin nyɔɔt maŋ buut daar. U tan kan tur min kuukɔɔ kaa, ŋaan u tan saa tur binba kur mun loon wun jen nae. 9 Yabit ki baar n peŋ yian yian na. Kreskens saan Galasiawa, ki Taitus mun saan Dalmasiawa, 10 Demas mantik loon tingbouŋ na bona bonchiann, li paak u nyikin ki mun saan Tesalonikawa. 11 Luk kuukɔɔe ji be nanin. Jiin Mak baar nanɔ na, kimaan u toona mɔk nyɔɔt ki turin bonchiann. 12 N tun Tikikus a wun saan Efesus. 13 Fi-i baat yoo nba, fan jii n liatir nba ki n daan nyik Troas, ki li be Kapus boor na; a bia jii n gbounpinkara nan n kadagbant na. 14 Aleksander, wunba kur saauk na din tumin linba bi bonchiann; Yennu saa dat u tubir, waa tun linba na paak. 15 I mi a mɔŋ nanɔ, kimaan u kɔn nan barŋanii nba ki ti mɔɔntir na bonchiann. 16 Maa daan kɔn n mɔŋ paak sinsinn na, sɔɔ ki set n poorpo; bi kur nyikima; Yennu daa teemm biit li paaki. 17 Ŋaan ti Yomdaanɔ daan be nanin ki turin paŋ ki n fit mɔn barŋanii maŋ kur ki tur binba ki tee Juu teeb na kura a bin gbat. Ŋɔɔe daan nyinnin yambɔr mɔb ni. 18 Ŋɔɔe bia saa nyinnin bonbiir kur ni, ki kunnin ki kɔɔnin u naan nba be sanpaapo na ni nan laafia. Ŋɔɔe yen dontir mɔkmɔk nan mɔkmɔk. Mamɔmm. 19 N jikit n foontii ki teen Prisila nan Akuila, nan Onesiforus ŋaateeb. 20 Erastus daan biar Korinta. Trofimus daan kaa laafia ki n nyikɔ Miletus. 21 Yabit ki baar nnawa ki tinkook n do. Yubulus nan Pudens nan Linus nan Klɔdia teena bi foontii; ki Masiaweira kura bia foonta. 22 Ti Yomdaanɔ-ii be nana. Yennu sommir-ii be i ni.

Taitus 1

1 Min Pɔɔl, wunba tee Yennu daabir nan Yiisa Masia toomii na, mine ki Yennu gannin ki tumin u nigannkab boor a n chee bi yada, ki te bin bann u barmɔnii labaar nba wantit yentinu sɔnu na, 2 ki bia teemm dindann nan bi sii mɔk manfoor nba kaa gbennu. Yennu nba ki fa faak na din senn mɔsonn yaayoo niwa, a u saa turit manfoor maŋ, 3 ki yoo nba din tan jaŋ na ki u fiit wann li labaar u maan ni; ki jii labaar maŋ ki teen n nuu ni, ki n mɔɔntir nan ti Tinntɔɔ Yennu nba turin mɔb na. 4 N sɔbin gbouŋ na ki teen fin Taitus nba tee n bimɔŋ, yada yennkɔɔ ni nae. Ti Baa Yennu nan ti Tinntɔɔ Yiisa Masia n somma, ki bia tura parmaasir. 5 N din te ki a biar Kreet tiŋ ni maa a ŋamm bonsiar kur nba kpaa talase, ki gann Masiaweira saakab doo kur ni nan maa wanna biaŋinba na; 6 li kpaa talas ki Masiaweira saakɔɔ daa mɔk biiti; kii mɔk poo yenɔkɔɔ; ki u waas n teen Masia yada, ki daa tee waabiit nan tubkangbata; 7 kimaan Masiaweira yu-daanɔe yen Yennu toona; li paak, li kpaa talas ki u daa mɔk biiti; u daa tee bongaann, koo wunba dont wutoor yann yanni, koo wunba nyu daan ki yibi, koo wunba loon kunkɔna, koo wunba mantik mɔk liklonchiɔŋu. 8 Li kpaa talas ki wuu mi saamm gaaru, kii loon toonŋana tumu, kii sub, kii be fanu, kii tee popeendaanɔ, kii mi mɔŋdianu, 9 kii dia barmɔnii labaar nba ki bi din wannɔ na. Ŋanne saa te wun fit wann niib wannu nba took, ki fit nyann binba ki saak barmɔnii wannu maŋ. 10 N beera linba na, kimaan mɔy‡tdamm be bonchiann, ki Juu tesiab mantik teen nnae, ki dia bi mɔmaan nba kaa nyɔɔt ki kpann leeb. 11 Li kpaa talas ki fin gɔɔr bi labaar maŋ, kimaan bi liklonbiiuk paak ki bi lin want niib linba ki ŋan nan bii want, ki ŋmat ŋasai niib dudukit. 12 Kreet jasɔɔ, wunba din tee bi tiɔŋ sɔkinii na din yet a: "Kreet teeb fa faak yoo kura; bi tee nan bonkobibiit nae, ki bia tee forinfoona nba loon diina kuukɔɔ." Waa din yet biaŋinba na tee barmɔniie. Li paak, li kpaa talas ki a yakii namm fanu, ki bin dia Masia labaar na nan barmɔnii, 14 ki ji daa gbiintir Juu teeb faak labaar, ki bia daa gbiintir niib nba ki saak barmɔnii labaar na wannu. 15 Popeendamm boor, bonsiar kur yeene; ŋaan biitdamm nba ki teen Masia yada na, siar ki yeen bi boori, kimaan bi dudukit nan bi yan ki yeeni. 16 Bi yi bi mɔŋ Yenmiirae, ŋaan ki bi toona want nan bi ki bann Yennu. Bi tee mɔy‡tdamme, ki nubir Yennu boor, ki kan fit tun toonŋansiari.

Taitus 2

1 Taitus, fin-ii want wannmɔnu na. 2 A kpaan jasaakab na ki bii be soon nna, kii sub, kii dia bi mɔŋ, kii dia Masia labaar fanu, kii loon niib, kii mɔk gbankur. 3 A bia kpaan poosaakab na ki bii tee popeendamm. Bi daa tee sanjaanjanna, ki daa nyu daan ki yibi. Li kpaa talas ki bii want linba ŋan, 4 kii want poobis na ki bii loon bi sɔrib nan bi waas, 5 kii dia bi mɔŋ, kii tee popeendamm, kii tee ŋapooŋamm, kii be fanu, kii saak bi sɔrib mɔi. Ŋanne saa te ki sɔɔ kan fit pak bonbiir ki jiin Yennu labaar na po. 6 A bia kpaan naasimm ki bin dia bi mɔŋ. 7 A mɔŋ-ii be fanu bonsiar kur ni, kii want leeb baa sii be fanu biaŋinba. A wann niib Masia labaar nan barmɔnii, kii sub, 8 kii piak linba took ki sɔɔ kan mi yiinir yanni, ki binba loon ki bii kɔn nant daa laat bonbiir nba ki bi saa pak ti po; ŋanne saa te ki bin di fei. 9 Li ŋan ki daaba-ii saak bi yomdamm mɔi, kii pent bi para bonsiar kur ni. Bi daa nɔi nan bi yomdamm-i, 10 ki daa jaan bi siari. Li kpaa talas ki bin wann bi mɔŋ nan bi be fanu nan barmɔnii yoo kur; ŋanne ki bi binbeŋ kur saa wann nan ti Tinntɔɔ Yennu wannu na ŋan bonchiann. 11 Kimaan Yennu tur nisaarik kur sɔnu a wun la tinnu; ŋanne fiit wann u ninbatinu nba yab biaŋinba. 12 Li ninbatinue wannit a tin nyik linba kur ki tee yentinu na, nan tingbouŋ na loonbiit, ŋaan dia ti mɔŋ, kii be fanu, kii tiin Yennu tingbouŋ na ni, 13 kimaan ti guu ki mɔk dindann nba turit parpeenn nan ti yabint Yennu nan ti Tinntɔɔ Yiisa Masia saa dɔkit yentsaakar ni; 14 ŋɔɔe din gaar ti paak ki kpo a wun nyinnit biit kur daabsin ni, ki te ki ti tee popeendamm nba tee u kuukɔɔ yab, ki tee niib nba numm mɔn nan toonŋana tumu. 15 Wantib linba na kura, kii cheen bi para, kii kpaanib Yennu nba tura yudant biaŋinba na. Sɔɔ daa goriia yanni.

Taitus 3

1 A tiarib ki bin tur bi tiŋ yudamm nan yentdamm baakir, ki sak bi mɔi, ki teen siir ki tun toonŋana kura. 2 Betirib ki bi daa piak barbiit sɔɔ paaki, ki daa kɔn nan leebi, kii be soon nna, ki tur sɔɔ kur baakir; 3 kimaan sianyoo ti mɔŋ din ki mɔk yami, ti din tee mɔy‡tdamme, ki waa sɔnu nba ki tooki, ki waa nianbiit sɔnbooru booru. Ti din tuu ki mi dudukit nba ŋan; ki tee fun-funn damm, ki ki loon ti leeb, ki bi mun ki loont. 4 Ŋaan ti Tinntɔɔ Yennu lomm nan u burchint nba din tan fiit nyii paanu yoo nba, 5 ki u tinnit. Li ki tee ti tiɔŋ toonŋana paak kaa, ŋaan u mɔŋ ninbatinu paake ki u tinnit, ki din wurit ki nyinn ti biit, ki te ki u Seyeeŋ ŋamm nant, ki turit manfopaann, 6 ki jii u Seyeeŋ maŋ ki turit, ti Tinntɔɔ Yiisa Masia paak. 7 Yennu ninbatinu paak ki u tun nna a wun teent niŋamm u boor; ki bia teent u waas nba mɔk dindann a ti saa la manfoor nba kaa gbennu. 8 Barii na tee barmɔniie. N loon ki a jii a dudukit kur kii wantib linba na, ki binba teen Yennu yada na n jii bi yoo ki tun linba ŋan; ŋanne ŋan ki mɔk nyɔɔt ki tur sɔɔ kur. 9 Ŋaan nyik mɔnɔyana, nan yeejamm ni yaadindouŋ kanu, ki daa kɔn nan leeb, ki bia daa nɔi mɔniɔk sennu paak, kimaan linba na kura ki ŋan, ki bia ki mɔk nyɔsiati. 10 Nirɔ-i tee tukinadaanɔ, fan kpaanɔ yomm koo munlee; ki u baka-i kaa li kpaanii ni, fan nyikɔ ki daa fiin u po, 11 kimaan a mi nan li nibooru nyik Masia weiuwa, ki u toonbiit nae want u biit. 12 Mi-i tun Atemas koo Tikikus a boor yoo nba, fan yabir ki chetin Nikopolis doo ni, kimaan n sii be leŋe wonfufuk yoo. 13 Yabit a mɔŋ ki somm Senas, wunba tee barbuurɔ na, nan Apolos, ki bin la baa loon linba kur ki piin bi somma na. 14 Li kpaa talas ki Masiaweira-ii tuun toonŋana kii sommit niib bi fara ni, ki daa be binbeŋ nba kaa nyɔɔti. 15 Binba be n boor na kura foonta. A foont binba teen Masia yada ki loonit na. Yennu n somm i kura.

Filemonn 1

1 Min Pɔɔl nba be dansarik ni Yiisa Masia sann paak na, nan ti naa bik Timotie sɔbin gbouŋ na ki teen fin ti toontunlɔɔ Filemonn nba ki ti loona na, 2 nan Masiaweira nba lakii jiantir Yennu a ŋaak ni na; ki bia teen ti niipoo Afia nan ti toontunlɔɔ Akipus. 3 Ti Baa Yennu nan ti Yomdaanɔ Yiisa Masia n sommi ki bia turi parmaasir. 4 N naa bik Filemonn, yoo nba kur ki n tiar a po n miaru ni, n teen Yennu niipoouk, 5 kimaan n gbat faa teen ti Yomdaanɔ Yiisa yada ki loon u yab kur biaŋinba. 6 N mei Yennu, a timm nan fin nba taan ki teen Masia yada na, lin te ki tin bann fanu binbeŋŋaŋ nba tee ti yar u ni na. 7 N naa bik, a lomm maŋ turin parpeenn nan pardɔɔnn bonchiann, kimaan a cheen Yiisa yab kur para. 8 Tɔn, Masia paak n bo kii mɔk jaŋmaanii nan man chaba ki fan tun linba tooki, 9 ŋaan lomm paak ki n meia, min Pɔɔl nba tee saakɔɔ ki bia be dansarik ni mɔtana Yiisa Masia paak na, 10 n meia ki teen Onesimus, wunba tee n bik na, kimaan maa be dansarik ni nae ki n pakɔɔ barŋanii na ki u teen yada. 11 Sinsinn, u daan tuu ki mɔk nyɔɔt ki turani, ŋaan mɔtana u ji mɔk nyɔɔt bonchiann ki teen min nan fin kura. 12 Mɔtana, n tuumɔ a wun ŋmat a boor; ki n par kur be u ni. 13 N bo loon ki mii diau n boor nna na ki wun gaar a paak ki sommin yoo nba ki n be dansarik ni Masia barŋanii paak na. 14 N ki loon ki n mukisa kaa ki a sommimi, ŋaan n loon ki a sommin nan a mɔŋ loomme. N ki loon ki n tun siar ki li ki tee a loommi. 15 Li pasiar u yaatu na paak saa te ki a ji diau yoo kur. 16 Mɔtana u ji ki tee daabir kaa, ŋaan u gar daabira, u tee ti naa bilonkake; maa loonɔ bonchiann biaŋinba na, ŋaan a sii loonɔ ki gar nnawa, kimaan u tee a daabire ki bia tee a naa bik ti Yomdaanɔ ni. 17 Li paak, li-i tee ki a dukii a n tee a yɔɔkie, fan gaarɔ nan faa bo saa gaarin biaŋinba na. 18 Li-i tee ki u biira siar koo ki u dia a pansiarie, fan te ki n pa. 19 N sɔbin nan n mɔŋ mɔŋ nuue na: Min Pɔɔle saa pa-a; ŋaan min kaa saa beta, a mɔŋ mi nan a dia n pann a manfoor paak. 20 Li paak, n naa bik, sommitin ti Yomdaanɔ paak, ki dɔɔn n par, taa tee weinanleeb Masia ni na paak. 21 N sɔbin gbouŋ na ki teena, ki ki mɔk birsuk nan a saa sak tun ki lin gar maa beta linba na kura. 22 A bia lon diiuk ki guunin, kimaan i Yenmiaru paak, n mɔk dindann nan Yennu saa te ki n baar foontiwa. 23 Epafras, wunba ki min nan ŋɔɔ be dansarik ni Yiisa Masia paak na teena u foontii; 24 ki n toontunleeb, Mak, nan Aristakus, nan Demas, nan Luk, mun bia teena bi foontii wa. 25 Ti Yomdaanɔ Yiisa Masia n sommi i para ni.

Hiibru 1

1 Yaayoo ni, Yennu din jikit yoo bonchiann nan sɔnii bon-chianne ki te ki sɔkiniinba piak teen timm Juu teeb yeejamm; 2 ŋaan mɔtana u te ki u Bija nba ki u gannɔ a wun yent bonsiar kur nae pak nan timm; ki u din te ki u Bija maŋ nan durinya na kur. 3 Ŋɔɔe tee Yennu mɔŋ mɔŋ ninnauŋ, ki yentir Yennu yentu na, ki dia durinya yaka kur nan u mɔmaan nba mɔk paŋ. Waa din tun linba saa te ki niib n la nyikinchab bi biit paak yoo nba na, ki u ji kar yabint Yennu niidiitu po Yendɔuŋ ni. 4 Yennu nba te ki u Bija maŋ sann gbeŋ gar malakanba sana biaŋinba na, nnae ki u Bija maŋ set garib. 5 Kimaan Yennu daa ki mi yet malakasɔɔ a: "Fine tee n Bija, dinnae ki n teen a Baa." Yennu bia ki mi pak malakasɔɔ po a: "N tan sii tee u Baa, ki u tee n Bija." 6 Yennu nba din tan yaa wun baar nan u Bija, wunba tee bonnankaa yur tingbouŋ na ni yoo nba, ki u gbouŋ yet u po a "Li kpaa talas ki Yennu malakanba kura n jiantɔ." 7 Ŋaan malakanba na po ŋarin ŋɔɔ Yennu din yet a: "U te ki u malakanba tee sei, ki bia teemm ki bi tee mupeenu." 8 Ŋaan u yet u Bija na ŋarin a: "Yennu, a naan na sii be mɔkmɔk nan mɔkmɔk. Ki yentinu dammir na tee a naan dammir. 9 Faa loon yentinu ŋaan nƒn biit na paak te ki min Yennu ganna ki tura parpeenn bonchiann ki gar maa tur a yɔɔsinba biaŋinba." 10 Yennu gbouŋ bia din yet a "Yennu, pinpiik niwa fine din nan tingbouŋ na, ki nan sanpaak nan a mɔŋ nii. 11 Bi tan saa kpowa, ŋaan fin lek sii yɔɔ be-e; bi kur tan saa kpete ki chat nan chinchenn na, 12 ki fan pɔbimm nan baauŋ na, ki bin lebit nan chinchenn na. Ŋaan fin ŋarin kpan sii yɔɔ tee yomme ki a manfoor na kaa joontu." 13 Tɔn, Yennu daa ki mi bet malakasɔɔ a: "Karin n niidiitu po nna na mɔkmɔk ki man tan jii a datai ki teemm a taakpakita." 14 Li paak, malakanba tee bee? Bi kur tee sei nba jiantir Yennue, ki ŋɔɔ Yennu tuumm a bii sommit niib nba la tinnu na.

Hiibru 2

1 Li kpaa talase ki tin gbiint barmɔnii nba ki ti din gbat na fanu ki tan daa kɔŋŋitiri. 2 Labaar nba ki malakanba din mɔn ki tur ti yeejamm na tee barmɔniie, ki wunba din ki sak ki weir din tuu la tubdatu nba jaŋɔe. 3 Li paak, ti-i kii sak ki gbiint tinnjaann maŋ labaar fanu, ti saa teen nlee ki nyi tubdatu ni? Ti Yomdaanɔ tiɔŋo din dɔŋ mɔn tinnu labaar maŋ, ki binba gbat na din wannit a li set tee barmɔniie; 4 ki Yennu nba tuun bakitnauŋ nan yaarlituk toona nan nyina, ki bia teemm u Seyeeŋ piinii u lomm ni biaŋinba na pukii u siara bi wannu maŋ paak. 5 Durinya nba baat ki ti pak li po na, Yennu din ki yaa malakanbae tee li yudammi. 6 Li sɔb siar po Yennu gbouŋ ni a: "Yennu, nisaarik tee bee ki a dukii u po; u mun tee bee ki a baka be u ni? 7 A din te ki u pɔ malakanba yoo waaminna, ki bia te ki u la dontir nan paku, 8 ki te ki u yen bonsiar kura." Li yet a Yennu din teen nisaarike "bonsiar kur yudaanɔ." Li want nan u yen bont kurewa, ŋaan mɔtana nisaarik daa ki yent bonsiar kuri. 9 Ŋaan ti laat Yiisae. Ŋɔɔe ki Yennu din te ki u pɔ malakanba yoo waaminna, a wun gaar sɔɔ kur paak ki kpo, ŋɔɔ Yennu ninbatinu ni na. U kuun biak dinu maŋ paak ki Yennu te ki u la dontir nan paku. 10 Yennu nba nan bonsiar kur ki bia dia li kur na, waa jii u waas bonchiann ki kɔɔmm u naan na ni, ki li took u boor a wun te ki bi tinnu daanɔ Yiisa n teen bi Tinntɔɔ nan barmɔnii, u biak dinu paak. 11 Ŋɔɔe te ki nisaarii teen Yennu niib, ki ŋɔɔ nan ŋamm kur ji taan ki mɔk Baa yenɔkɔɔ. Li paake ki Yiisa ki tiin fei nan wun yiimm u naa waasi. 12 U bet Yennu a, "N tan saa mɔɔnt a sann n naa waas boor; n tan saa paka bi lakinn ni." 13 U bia yet a, "N tan saa teen Yennu yada," ki bia yet a, "Min nan waas nba ki Yennu turin nae be na." 14 Tɔn, Yennu waas nba tee nisaarii na paak, Yiisa mun din tee nisaarike nan ŋamm na, a u kuun ni wun tan biir Sintaanii nba mɔk kuun paŋ na, 15 ki nyinn binba tiin kuun jaŋmaanii na bi jaŋmaanii maŋ ni, kimaan bi din tee jaŋmaanii yommiie bi manfoa kur ni. 16 Barmɔniie, li ki tee malakanba kaa ki u sommiti, ŋaan Abraham yaaboonae ki u sommit. 17 Linba na want nan li din kpaa talase wuu tee nan u naa waas na u binbeŋ kur ni, ki teen bi manntɔyudaanɔ nba tee ninbatinu daanɔ, ki bia tee barmɔnii daanɔ, ki jii u mɔŋ ki teen maruŋ ki tur nisaarii Yennu boor, ki wun nyik chab bi biit. 18 Ki u saa fit somm binba yaa bin kɔɔ jinjammii ni, kimaan jinjammii din jamm u tiɔŋ ki dinnɔ biaka.

Hiibru 3

1 N naa waas nba tee Yennu niib ki u ganni na, yii dukii Yiisa po, wunba ki Yennu din tumɔ a wun teen manntɔyudaanɔ ti Yennu jiantu sɔnu ni na. 2 Moses nba din tee barmɔnii toontunnɔ Yennu ŋaateeb sinsuuk ni biaŋinba na, nnae ki Yiisa mun tee barmɔnii toontunnɔ Yennu nba gannɔ na boor. 3 Ŋamaarɔe jaŋ nan bii teenɔ baakir ki gar ŋaak nba ki u maa na; nnae ki Yiisa jaŋ nan bii teenɔ baakir ki gar baa teen Moses biaŋinba na. 4 Ŋaak-i taŋŋi see, sɔɔe sennir; ki Yennue sent bonsiar kur. 5 Moses din tee barmɔnii toontunnɔ Yennu ŋaateeb sinsuuk ni, ki wann linba ki Yennu yaa wun tan pak sianyoo na. 6 Masia ŋarin tee barmɔnii daanɔ nba yen Yennu ŋaak maŋe ki tee u Bija. Ti-i mɔk parcheenn nan yuugontir ti dindann paak, ŋann timme tee Yennu ŋaateeb maŋ. 7 Li paak, i sak man Seyeeŋ nba yet biaŋinba na a: "I-i gbat Yennu kunkɔr dinna, 8 yaa daa nyar i tuba nan i yeejamm nba din nyar bi tuba biaŋinba ki kɔn nanɔ, ki bikinɔ, baa din be muuk ni yoo nba na. 9 Yennu din yet a, 'Bi poŋ din la maa tun linba kur ki saa jaŋ bina piinna na, ŋaan leŋe ki bi din bikinin. 10 Ŋanne din te ki n donn wutoor niib maŋ paak ki yet a, Bi para ni, bi y‡tima, ki ki waa n sɔnii. 11 N din donn wutoor ki betib a bi kan mi baar maa bo yaa n turib foon tiŋ nba na ni.'" 12 Tɔn, n yɔɔsinba, yi bann i yan ni ki sɔɔ daa tee biitdaanɔ ki kɔŋŋit yada ki tan mann ŋmat poor ki nyik manfodaanɔ Yennu na. 13 Ŋaan i sommit leeb man daar n tuu daar, taa daa be ti manfoor ni yoo nba na, ki biit daa kpanni ki i tee tubkangbata. 14 Kimaan ti-i dia ti sinsinn yada na chib ki saa baar ti manfoor joontu, timm nan Masia sii tee toontunleebe. 15 Nnae ki bi din sɔb Yennu gbouŋ ni a: "I-i gbat Yennu kunkɔr dinna, yaa daa nyar i tuba nan i yeejamm nba din nyar bi tuba biaŋinba, ki din kɔn nan Yennu ki y‡tɔ na." 16 Ki lamme din gbat u kunkɔr ŋaan kɔn nanɔ ki y‡tɔɔ? Ŋamm kaa din tee binba nyii Ijipt ki Moses tee bi tɔɔndaanɔ na-a? 17 Ki lamme biak ki Yennu wutoor doo bi paak ki saa jaŋ bina piinna na? Li ki tee binba din tun toonbiit, ki tan kpo muuk ni na kaa-a? 18 Yennu daa din bet lamme a, "Bi kan mi baar maa bo yaa n turib foon tiŋ nba na ni." Li din tee binba y‡t u mɔb nae. 19 Li paak, bi din ki fit kɔɔ tiŋ maŋ ni, kimaan bi yada-kaarin paak.

Hiibru 4

1 Mɔtana Yennu ji tur timme mɔlor maŋ a tin la foon nba ki u din pak li po na. Li paak, i bann i yanni man ki daa te ki sɔɔ n tan kɔŋ foon maŋi. 2 Ti gbat barŋanii na nan baa mun din gbatir biaŋinba nae, ŋaan li din ki turib nyɔɔti, kimaan baa din gbatir yoo nba bi ki gaarir nan yada. 3 Li paak, timm nba teen yada na, ti la foon maŋa. Li din tun nan Yennu nba yet biaŋinba nae a: "N wutoore doo, ki n betib a bi tan kan kɔɔ foon tiŋ nba ki n bo yaa n turib na ni." Ŋaan waa din tan yet linba na, ki sɔɔ ki u tun u naamii toona ki gbenn pinpiik niwa. 4 Kimaan Yennu gbouŋ ni siar po li poŋ yet daaŋannlore daar maŋ po a, "Yennu din nyik u toona kur ki foi daaŋannlore daar." 5 Ŋaan ki u bia yet nna a, "Bi tan kan mi kɔɔ n foon tiŋ nba ki n bo yaa n turib na ni." 6 Binba din gbat barŋanii na sinsinn na din ki la li foon, kimaan bi din y‡t Yennu mɔbe. Li paak, nisiab be ki tan saa la foon maŋ. 7 Yennu bia senn daleer ki yi daar maŋ "Dinna." Ki bina bonchiann din gar, ki Yennu te ki Defid yet li po nan laa poŋ pak biaŋinba na a: "I-i gbat Yennu kunkɔr dinna, yaa daa nyar i tuba." 8 Kimaan Joosua-i diŋŋi turib foon, Yennu ji bo kan pak daleer po. 9 Li paak, foon dasiar bia daa be ki tee Yennu niib yar, nan waa din foi daaŋannlore daar biaŋinba na. 10 Kimaan wunba la Yennu foon maŋ, u nyik u toonae nan Yennu nba din nyik u naamii toona biaŋinba na. 11 Li paak, ŋaant man ki tin yabir ti mɔŋ ki la foon maŋ, ki ti sɔɔ tan daa kɔŋŋit nan baa din y‡t Yennu mɔb ki kɔŋŋir biaŋinba na. 12 Kimaan Yennu mɔmaan maŋ tee barii nba foe, ki mɔk paŋ, ki bia di ki gar jukbanjiak nba ŋma mɔi ŋanlee na. Yennu mɔmaan fit ŋma ki kɔɔ baat nisaarik seek nan u manfoor boor ni, ki kɔɔ baat u tukita nan u kpaba beesin ni, ki kɔɔ bɔkitir u dudukit nan u par ni bibikit. 13 Ki bonnankar kur dɔɔ yeenin nie, ki Yennu nba tan saa bu bi buut na ninbina laatib; ki siar kaa ki bɔri. 14 Ŋaant man ki tii dia ti yada nba ki ti fiit wann na kenken, kimaan ti mɔk manntɔyudaanjaann, ŋɔɔe tee Yennu Bija Yiisa, wunba poŋ gar saan Yennu tiɔŋ boora na. 15 Ti manntɔyudaanɔ maŋ ki tee wunba kan fit tint ninbaauk ti butuŋ paak kaa, ŋaan u mɔŋ din la bikinu sɔnii booru kur ni nan taa mun laat biaŋinba na, ŋaan u lek din ki tun biiti. 16 Li paak, ŋaant man ki tii mɔk parcheenn ki baar Yennu nba tee burchindaanɔ na naangbouŋ boor, ki la ninbatinu nan sommir ki lin sommit yoo nba ki ti loon.

Hiibru 5

1 Tɔn, mannteeb yudaanɔ kur nba ki bi gannɔ niib sinsuuk ni na, bi sennɔ a wun gaar u leeb paake kii mann mannu ki tur Yennu bi biit paak. 2 Ŋaan u mɔŋ nba tee butumɔɔ sɔnii bonchiann ni na paak, u sii fit dia binba pɔɔr yan ki kpet sɔnu na soon nna, 3 ki u mɔŋ nba tee butumɔɔ na paak, li kpaa talas ki wun mann mannu u mɔŋ toonbiit paak nan waa mann niib toonbiit paak biaŋinba na. 4 Sɔɔ ki fit dont u mɔŋ a wuu tee mannteeb yudaanɔ, see ki Yennu gannɔ nan waa din gann Arɔnn ki teenɔ mannteeb yudaanɔ biaŋinba na. 5 Nnae mun, Masia din ki donn u mɔŋ ki gann u mɔŋ a wuu tee manntɔyudaanɔ, ŋaan Yennue din yetɔ a: "Fine tee n Bija; dinnae ki n teen a Baa." 6 Ki siar po u bia yet a: "A tan sii tee manntɔɔ mɔkmɔk nan mɔkmɔk, kii tee Melkisedek paabu ni manntɔɔ." 7 Tɔn, Yiisa nba din be tingbouŋ na ni yoo nba na, u din mei Yennu ki barimɔ, ki bui nan ninnyuut Yennu nba saa fit fatɔ kuun ni na boor. Waa din baakit Yennu na paak ki Yennu gbat u miaru. 8 U tee Yennu Bijae, ŋaan u lek dii biake Yennu mɔsaku ni, 9 ki tan gbenn biak dinu maŋ, ki te ki binba kur saak u mɔb na la tinnu nba kaa gbennu. 10 Ŋanne ki Yennu yiinɔ mannteeb yudaanɔ, Melkisedek paabu ni. 11 Ti bo saa pak Masia nan Melkisedek po bonchiann, ŋaan li paar nan ki ti wanni, kimaan i ki bant li paak yiami. 12 Nna yoo li ji bo kpaa talas ki yii tee wannteebe, ŋaan i bia loon ki sɔɔ n wanni Yennu mɔmaan pinpiik ni sɔnii na. I bia daa ŋan nan biime, i ki jaŋ nan jeŋmankati, 13 kimaan wunba daa mɔɔr biin tee bibunne, ki daa ki bann yentinu wannu na fanu. 14 Ŋaan jeŋmankat tee saakab yare, ŋamme tuu tumii ki bann bonbiir nan bonŋann bɔkitu.

Hiibru 6

1 Li paak, ŋaant man ki tii dia saakayan kii tumii Masia barii kii saa tɔɔnn; ki ŋamm tumii u barii bonchiann ki pukin pinpiik ni wannu na po; li ji ki kpaa talas bin ŋamm wanni a: nyikin toonbiit nba tee kuun sɔnu, ki teen Yennu yada, 2 ki bia wanni Yennu nyunwuru po, nan niiyiinu niib paak, nan kpeemm fiiru po, nan tubdatu nba kaa gbennu na po. 3 Yennu-i sak, ti saa saan tɔɔnne. 4 Masiaweira nba y‡t u weiu, li tan sii paar nan bin jen ki lebit bi dudukit. Sianyoo bi din tuu be Yennu yentu nie, ki gaar bi tora nba tee Yennu Seyeeŋ na, ki lemm Yendɔuŋ ni piiniiwa, 5 ki din tuu mi Yennu mɔmaan na manu po, ki mi durinya nba baat na paŋ po, 6 ŋaan ji tan y‡t Masia weiu. Li ji paar nan bin jen ki lebit bi dudukit, kimaan bi kpi Yennu Bija maŋe dapunpunn paak ki dintɔ fei paanu ni. 7 Tɔn, tiŋ nba ki saak baa li paak ki li maakit ki tee jeet teen binba ŋammitir na, Yennue teen piisin tiŋ maŋ paak; 8 ŋaan tiŋ maŋ-i pia kunkonii nan mɔbiit, li ki mɔk nyɔɔti, li kan yukir ki Yennu saa porir mɔb ki lin di muu ki biir. 9 Ti naa walonkai, taa lek piak linba na, ŋaan ti ki mɔk birsuk i po. Ti mi nan i benue chee, kii mɔk tinnu. 10 Kimaan Yennue ŋan, ki kan tamm yaa tun linba ki turɔ, koo yaa loonɔ biaŋinba ki somm Masiaweira, ki bia daa sommitib na. 11 Ti loon ki i sɔɔ kur n yabir u mɔŋ paake mɔkmɔk nan li joontu, ki yaa mɔk dindann biaŋinba na set saa teen mɔnii ki turi. 12 Ti ki loon ki yii tee gbannyakdammi, ŋaan ti loon ki yii tee binba teen Masia yadae, kii mɔk sukuru, ki tan gaar linba ki Yennu senn mɔsonn li po na. 13 Yennu nba din senn u mɔsonn tur Abraham yoo nba na, u din sat mɔb a u tan saa tun waa senn mɔsonn nba nawa. Sɔɔ ki be ki chee Yennu tiɔŋ; li paak, u din jii u mɔŋ sanne ki sat mɔb. 14 U din yetɔ a, "Li tee barmɔniie, n set saa teen piisin a paak ki bia tura yaaboona bonchiann." 15 Abraham din mɔk sukurue, ki tan gaar linba ki Yennu senn a u tan saa turɔ na. 16 Nirɔ-i sat mɔb, u tuu jii wunba garɔ sanne ki sat, ki mɔb nba ki u sat na n kpi mɔniɔk kur. 17 Tɔn, binba din yaa bin gaar Yennu nba din senn mɔsonn nba na, u din loon wun wannib nan u kan mi lebit u dudukiti; li paak ki u din sat mɔb ki pukin u mɔsonn maŋ paak. 18 Tɔn, bona ŋanlee nba kaa lebitu na be ki wann nan Yennu set saa gbeen u mɔsonn maŋa. Li paak, timm nba chiar saan u boor ki tinn na mɔk parcheenn, ki gaar dindann nba be ti tɔɔnn po na chib. 19 Dindann nba ki ti mɔk na tee nan manfoor jaantarik nba dia ti manfoor fanu nae. Li tee dindann nba gar Yendɔuŋ ni diiuk kaaruk nie ki kɔɔ diiuk maŋ linn po. 20 Leŋe ki Yiisa poŋ din gaar ti paak ki gar ki tee sɔnliitɔɔ, ki teen ti manntɔyudaanɔ mɔkmɔk nan mɔkmɔk, ki bia tee Melkisedek paabu ni manntɔɔ.

Hiibru 7

1 Melkisedek maŋ din tee Salem doo bate ki bia tee yabint Yennu manntɔɔ. Abraham nba din tan nyii tɔb nba ki u kɔn nyann batnba banna na, ki Melkisedek chetɔ ki teen piisin u paak; 2 ki Abraham nyinn bona piik ni yennkɔɔ waa kɔn fat bont nba na kur ni ki turɔ. (Melkisedek sann maŋ paak tee a, "Yentinu Bat," U din tee Salem doo bate; ki Salem paak tee parmaasir, li paak ki u bia tee "Parmaasir Bat.") 3 Labasiar ki be ki want Melkisedek baa po, koo u naa po, koo u yee-jamm po. Labasiar kaa ki want u maru po, koo u kuun po. U naan Yennu Bijae ki yɔɔ tee Yennu manntɔɔ mɔkmɔk nan mɔkmɔk. 4 Li paak, i la waa tee nijaann biaŋinba, kimaan ti yeeja-jaann Abraham din nyinn waa kɔn fat bona nba tɔb ni piik ni yennkɔɔ ki turɔ. 5 Ki sennu din wann a Liifai teeb yaaboona nba tee mannteeb na n tuu gaar bi niib Juu teeb nba mɔk linba li bona piik ni yennkɔɔ, ŋaan bi niib maŋ mun bia lek din tee Abraham yaaboonae. 6 Melkisedek din ki tee Liifai teeb yaaboonn kaa, ŋaan u din gaar bona piik ni yennkɔɔ Abraham boor, ki bia teen piisin ŋɔɔ Abraham nba din gaar Yennu mɔsona na paak. 7 Mɔniɔk kaa nan nirɔ nba teen piisime tee nijaann ki gar wunba gaan piisin maŋ. 8 Mannteeb nba din tuu gaan niib nba mɔk linba li bona piik ni yennkɔɔ na din tee nisaariie ki tuu tan kpo; ŋaan Melkisedek, wunba din gaar Abraham bona piik ni yennkɔɔ na ŋarin be, nan Yennu gbouŋ nba wann biaŋinba na. 9 Ti saa fit yet a yoo nba ki Abraham din nyinn u bona piik ni yennkɔɔ na, u yaaboona Liifai teeb nba din tan gaan bona piik ni yennkɔɔ maŋ, mun din mi bi bona piik ni yennkɔɔ nyinnu, 10 kimaan baa lek daa din ki mar Liifai na, ŋaan ti saa fit yet a yoo nba ki Melkisedek din chet Abraham na, ŋɔɔ Liifai din be u yeeja Abraham maŋ ni. 11 Yennu din tur Juu teeb sennu ki wann Liifai teeb bi mannu toona nba sii tee biaŋinbae. Ki Liifai teeb mannteeb toona-i diŋŋi be fanuie, li din bo kii kpaa talas ki manntɔganɔ, wunba ki nyii Arɔnn maaru ni ŋaan see Melkisedek setu ni na n baari. 12 Kimaan yoo nba ki mannteeb yudantuk lebitu din tuu tan baar ki bin lebit na, sennu mun bia din tuu lebite, 13 ki ti Yomdaanɔ Yiisa, wunba tee manntɔganɔ maŋ nyii boorganu nba ki bi sɔɔ ki mi tun mannu toonn na nie. 14 Sɔɔ kur poŋ mi nan ŋɔɔ Yiisa nyii Juda booru nie, booru nba ki Moses din ki mi pak siar bi po ki jiin mannteeb po. 15 Yoo nba ki manntɔganɔ nba tee nan Melkisedek na din tan baar nae ki ti mantik bann barii maŋ paak. 16 Ŋɔɔe tee manntɔɔ, ki nisaarik sennii ni kaa ki u teen manntɔɔ, ŋaan manfoor nba kaa gbennu na paŋ nie ki u teen manntɔɔ. 17 Kimaan bi din sɔb u po Yennu gbouŋ ni a, "A tan sii tee manntɔɔe mɔkmɔk nan mɔkmɔk, ki tee Melkisedek paabu ni manntɔɔ." 18 Li paak, sennkperu na ji din bakine, kimaan li ji ki mɔk paŋi, ki bia ki mɔk nyɔɔti. 19 Moses sennu maŋ din kan fit te ki siar be fanu. Ŋaan mɔtana ti ji mɔk linba teent dindann nba chee na, ki li nie ki ti chat nakin Yennu. 20 Ki Yennu bia sat mɔb ki pukin li paak. Yennu din tuu ki sat mɔb yoo nba ki bi kaant mannteleeb na. 21 Ŋaan Yiisa din teen manntɔɔ yoo nba ki Yennu din sat mɔb ki betɔ a: "Min Yennu sat mɔb ki ji kan lebit n dudukit, ki yet a 'Fine sii tee manntɔɔ mɔkmɔk nan mɔkmɔk.'" 22 Li paak, Yiisae tee wunba wann nan mɔlor nba chee na be ki kaa lotu. 23 Tɔn, yaayoo ni mannteeb maŋ din tuu tan kpoe, ki bi leeb na n mun gaar bi toona; li paak ki bi din yab. 24 Ŋaan Yiisa ŋarin sii yɔɔ be-e ki tee manntɔɔ mɔkmɔk nan mɔkmɔk, ki u toona na kan mi nyi u nuu ni ki sɔɔ n gaariri. 25 Li paak, binba chat nakin Yennu, ŋɔɔ Yiisa sann ni na, u saa fit tinnib mɔtana nan yaayoo siiyoo, kimaan u be u manfoor ni yoo kur, ki mei Yennu ki teemm. 26 Li paak, Yiisae tee ti manntɔyudaanɔ nba sommitit taa loon biaŋinba. Ŋɔɔe tee popeendaanɔ, ki ki mɔk bisiati; u be u kɔɔe ki ki tee nan biitdamm na, ki Yennu donnɔ ki gar Yendɔuŋ ni teeb kur. 27 Mannteyudaanleeb na din tuu mann maruŋ daar n tuu daare bi tiɔŋ biit paak sinsinn, ki bia mann maruŋ niib paak; ŋɔɔ Yiisa ki tee nna kaa; u din jii u mɔŋ ki mann maruŋ yomkɔɔe, ki maruŋ siar ji kaa. 28 Moses sennu na tuu gann nisaariie ki teemm mannteeb yudamm; ŋaan ki bi ki be fanu gbenni. Sennu maŋ poorpoe ki Yennu din sat mɔb nan u Bija Yiisa, wunba sii yɔɔ be fanu mɔkmɔk nan mɔkmɔk, ki teenɔ manntɔɔ.

Hiibru 8

1 Barii na barnɔɔk want nan ti mɔk manntɔyudaanɔ nba tee nna mun, ki kar Yennu nba mɔk paŋ kur na naangbouŋ niidiitu po Yendɔuŋ ni, 2 ki tuun mannteeb yudant toona Yennu diiuk ni; li diiuko tee barmɔnii jiantu diiuk ki ti Yomdaanɔ din ŋammir, linba ki tee nisaarik ŋammu. 3 Manntɔɔ kur nba ki bi gannɔ, li tuu kpaa talase ki wun jii piinii ki bia mann maruŋ ki tur Yennu, nnae ki li mun kpaa talas ki ti manntɔyudaanɔ n tur siar. 4 Li-i bonni tee ki u be tingbouŋ na ni, u bo kii tee manntɔɔ faba, kimaan mannteeb nba teen Yennu piinii, nan Juu teeb sennu nba tee biaŋinba na, poŋ be. 5 Baa tuun linba na tee Yendɔuŋ ni diiuk toona ninnauŋo; Moses nba din tun linba na naan nnae; kimaan Moses nba din yaa wun faa Yennu jiantu lanbouŋ yoo nba na, Yennu din kpaanɔ ki yet a, "A tun bonsiar kur nan maa wanna jɔɔr na paak biaŋinba na." 6 Ŋaan Yennu tur Yiisa mannu toona nba chee bi mannu toona na, nan u mɔlor nba chee ki be Yennu nan nisaarii sinsuuk ni biaŋinba na, kimaan u mɔlor maŋ gaa nan mɔsona nba chee Moses yar nae. 7 Kimaan sinsinn mɔlor na-i diŋŋi fit te ki nisaarii be fanu, li ji din bo kii kpaa talas ki Yennu n tur mɔlor pukin taar munlee. 8 Ŋaan Yennu din la nisaarii biite yoo nba ki u yet a: "Min Yennu beeri a: yoo baat, ki n tan saa lor mɔlorpaann ki tur Israel nan Juda teeb. 9 Li tan kii tee nan mɔlor nba ki n din senn tur bi yeejamm daar nba ki n kub bi nii ki nyinnib Ijipt tiŋ ni na kaa. Bi din ki teen mɔlor nba ki n lor turib na yada, li paak, ki n baka din kaa bi po. 10 Min Yennu yet nan n saa senn mɔlor nba nae ki tur Israel teeb daa nba baat na ni: n ji saa tabin n sennii maŋ bi dudukit nie, ki sɔbir bi para ni. Mine sii tee bi Yennu, ki bi tee n niib. 11 Li ji kii kpaa talas ki bi sɔɔ n wann u lɔɔ koo ki bet u lɔɔ a 'Fini, bant Yennu,' kimaan bi kura tan sii min, binba tee nijaana nan tarii kura. 12 N tan saa nyik bi biit ki chabib, ki ji kii tian bi biit na po." 13 Yennu nba pak mɔlorpaann maŋ po nae, ki sinsinn mɔlor na teen mɔlorkper; ki bonsiar nba kpet ki kokir, li ji kan yukir nan botu.

Hiibru 9

1 Tɔn, Yennu nba din lor sinsinn mɔlor ki turib na, ki u bia turib sennii nba ki bi sii waar kii jiantirɔ fanu; ki bi bia mɔk siaminba ki bi sii jiantirɔ. 2 Bi din faa bonkobgbant lanbouŋo, ki li mɔk paklooru nan linn po, ki yi paklooru na kasii boor. Bi din senn fitire paklooru na ni, ki teebur see leŋ, ki boroboro tɔɔ li paak ki bi teen Yennu. 3 Li linn po na mun ki bi yi leŋ kasii yaa kasii boor. 4 Salima binbintir din be, ki bi jokit bonnunubit li paak ki teen Yennu, ki Yennu mɔlor lakir be ki bi tabin salima li kur po, ki salima bobir be lakir na ni nan jeet nba yi mana na. Ki Arɔnn patu nba din bint fapaant na kpee lakir maŋ ni, ki tana ŋanlee nba ki bi din jabir ki sennii sɔb li paak na kpee li ni. 5 Bonsia nba mɔk kpinkpant ki bi yir cherubim na din tɔɔ lakir maŋ paak, ki bi kpinkpant baak siaminba tee toonbiit nyikinchab boor na, ki li want nan Yennu be leŋ. Ŋaan mɔtana kaa tee yoo nba ki ti saa pak bont maŋ po nan li barnɔɔk kuri. 6 Baa din senn bona kur nna nae, ki mannteeb din tuu kɔɔ Yennu jiantu lanbouŋ maŋ paklooru ni daar kur ki tuun Yennu jiantu toona. 7 Ŋaan mannteeb yudaanɔ kuukɔɔe din tuu kɔɔ lanbouŋ na linn po yomkɔɔ binn nɔɔk ni. U din tuu jii sɔme ki tur Yennu, u mɔŋ toonbiit paak, nan niib nba tuu kpet tun toonbiit na paak. 8 Yennu Seyeeŋ din want Yennu jiantu lanbouŋ na po fanu, a siaminba tee kasii yaa kasii boor na daa ki loot yoo nba ki paklooru maŋ daa be na. 9 Linba na tee barjokite ki tur timm nba be mɔtana, ki want nan binba din jiantir Yennu na nba din tuu teenɔ bi piinii nan bi bonkobit sɔn nba na kan fit wuur bi para ni biit Yennu boor, 10 kimaan ŋann din tuu tee jeet nan bonnyun-nyuut nba kɔɔ nan linba ki kɔɔe, nan gbanant ŋammu po. Linba na kur din tee gbanant paak senniie a bii waar mɔkmɔk nan yoo nba ki Yennu tan saa senn u sennpaann. 11 Ŋaan Masia, wunba tee sɔnŋanu na manntɔyudaanɔ baara. Waa kɔɔ jiantu lanbouŋ nba ni ki tuun na tee lanbonjaann nba be fanu nan barmɔniie; li ki tee nisaarik nba faa linba kaa, li bia ki tee tingbouŋ na ni yar kaa. 12 Masia nba din saan kɔɔ jiantu lanbouŋ maŋ ni ki saa baar kasii yaa kasii boor yomkɔɔ yoo nba, ki li gbenn nna, u din ki jii buunii nan naajai sɔn kaa ki mann maruŋ, ŋaan u din jii u mɔŋ sɔme ki pa ki nyinnit daabsin ni mɔkmɔk nan mɔkmɔk. 13 Bi din tuu jii buunii nan naajai sɔme, ki bia jii naasar ki mann ki joo muu, ki jii li tanpent nan sɔn na ki mii mii niib nba mɔk yanbɔmm Yennu tɔɔnn na paak, a lin ŋamm bi gbanant ki bii yeen. 14 Linba na-i ŋamm gbanant, ŋaan Masia sɔme mantik saa nyinn biit ti para ni ki tii waa manfodaanɔ Yennu, kimaan Seyeeŋ nba yɔɔ be na paŋ nie ki ŋɔɔ Masia jii u mɔŋ ki mann maruŋ nba be fanu fanu ki tur Yennu. 15 Li paak, Masiae tee wunba ŋamii mɔlorpaann na, a Yennu nba yiin binba na n la yiar sanpaapo mɔkmɔk nan mɔkmɔk nan ŋɔɔ Yennu nba lor na. Bi saa la yiar maŋ, kimaan Masia poŋ din kpowa; li paak, binba din tuun toonbiit yoo nba ki sinsinn mɔlor daa din see na, u kuun maŋ nyinnib toonbiit maŋ tubdatu niwa. 16 Tɔn, nirɔ-i sɔb u fadinu gbouŋ, see ki bi tan wann nan wunba sɔb gbouŋ na kpowa, 17 kimaan yoo nba ki wunba sɔb fadinu gbouŋ maŋ daa be u manfoor ni na, gbouŋ maŋ ki mɔk yiikoo. Li yiikoo be u kuun poorpoewa. 18 Li paake te ki sinsinn mɔlor na din tuu mɔk yiikoo sɔn maruŋ poorpo. 19 Sinsinn, Moses din tuu mɔn Yennu sennu na kure nan laa sɔb biaŋinba na. Li poorpo wun jii dufatlai ki lor nan pekobmɔnt ki pakii naajai nan buunii sɔn nba ŋmat nan nyun na, ki miit sennu gbouŋ na paak, nan niib maŋ kur paak, 20 ki beerib a, "Mɔlor nba ki Yennu senn turi a yin sakir na sɔme na." 21 Moses bia din tuu mii sɔn maŋ Yennu jiantu lanbouŋ na paake, nan bona kur nba ki bi dia jiantir Yennu na paak. 22 Barmɔniie, Yennu sennu wannu ni, sɔme din tuu ŋamm bont kur ki li be fanu ki ki mɔk biiti, ki sɔm-i kii nyii, Yennu kan nyik chab niib biiti. 23 Li paak, li din tuu kpaa talase ki bin mann maruŋ ki ŋamm bona nba tee Yendɔuŋ ni bona ninnauŋ na; ŋaan maruŋ nba chee na saa ŋamm Yendɔuŋ ni bona tiɔŋo. 24 Nisaarik nba din ŋamm boor nba tee kasii ki nannir nan Yendɔuŋ ni bont nba tee li barmɔnii na, Masia din ki saan kɔɔ leŋ kaa, ŋaan u din saan kɔɔ Yendɔuŋ mɔŋ mɔŋ nie, siaminba ki u be Yennu tɔɔnn ti paak na. 25 Juu teeb mannteeb yudaanɔ na din tuu kɔɔ nan bonkobit sɔn siaminba tee kasii yaa kasii boor na yomkɔɔe binn kur nɔɔk ni; ŋaan Masia ŋarin ki yaa wun mann maruŋ taar muŋŋa kaa. 26 Li-i diŋŋi bonni tee nnaie, ŋann laa din nyii durinya namu pinpiik niwa, u din bo saa di biak taar muŋŋaewa. Ŋaan mɔtana, yoo nba per joontu na ki u dɔkit a wun jii u mɔŋ ki mann maruŋ ki kpeen biit. 27 Yennu senn a see ki nirɔ kur n kpo yomkɔɔ, ki li poorpo ki wun bu u buut. 28 Li paak, Masia nba din jii u mɔŋ ki mann maruŋ yomkɔɔ ki nyinn nisaarii bonchiann biit na tan saa jena, ki ji tan kan boi biit po kaa, ŋaan u tan saa tinn binba guu-u nan bi para kur nae.

Hiibru 10

1 Juu teeb sennu na din tuu tee Yendɔuŋ ni bonŋana ninnauŋ nba din be sɔnu ki baat nae, ŋaan li din tuu ki tee li mɔŋ mɔŋ kaa. Li paak, binn kur maruŋ nba din ki gbent na kan fit teen binba baat nan maruŋ na kasii. 2 Li maruŋ-i bonni fit ŋamm bi para, bi din bo saa mann yomkɔɔe ŋaan ji nyik, ki biit ji kii waabi. 3 Ŋaan binn n tuu binn maruŋ toona na kpan din tian niib na bi biit poe. 4 Kimaan naajai nan buunii sɔn na kan fit nyinn biiti. 5 Li paak, Masia nba din yaa wun sik tingbouŋ na ni yoo nba na, u din bet Yennu a: "A ki loon maruŋ nan piinii kaa, ŋaan a ŋamm gbanante ki turin. 6 A ki mɔk parpeenn nan bonkobit nba ki bi mann maruŋ ki jokitir muu, biit paak na. 7 Li paake te ki n din yet a, 'Yennu, mine na, n saa tun a loomm nan laa sɔb a gbouŋ ni ki yet n po biaŋinba nawa.'" 8 Sinsinn, u din yet a, "A ki mɔk parpeenn nan maruŋ nan piinii, nan bonkobit nba ki bi mann maruŋ ki jokitir muu na, nan maruŋ nba ki bi tuu mann biit paak na kaa." Bi din tuu mann maruŋ maŋ kura nan sennu nba wann biaŋinba nae. 9 Li poorpo ki u bia yet a, "Yennu, mine na, n saa tun a loomma." Li paak, Yennu faa kpeen marunkpera kura, ŋaan jii Masia maruŋ na ki senn li seenu ni. 10 Yiisa Masia din tun linba ki Yennu loon wun tun nae, ki jii u gbanant ki mann maruŋ yomkɔɔ ki te ki ti teen Yennu niib. 11 Mannbooryeŋ nba ki Juu teeb manntɔɔ kur tuun daar n tuu daar na kan fit nyinn biiti. 12 Ŋaan Masia ŋarin din mann maruŋ yomkɔɔe, linba mɔk yiikoo yoo kur biit paak, ŋaan ŋmat doo Yendɔuŋ ni ki kar Yennu niidiitu po. 13 Leŋe ki u be ki guu mɔkmɔk nan Yennu nba tan saa teen u datai u taakpakita. 14 Li paak, ŋɔɔ din mann marunyemmire ki te ki binba ki u nyinnib biit ni na be fanu yoo nba kaa gbennu. 15 Ki Yennu Seyeeŋ mun bia teent u siara a: 16 "Yennu yet a 'Maa yaa n turib mɔlor nbae na daar maŋ poorpo; n tan saa teen n sennii bi para ni, ki sɔbir bi dudukit ni.'" 17 Li poorpo ki u bia ŋamm yet a, "N ji kan mi tiar bi yanbɔmm nan bi biit po." 18 Yennu nba nyik chab biit na, u ji ki loon marunsiar biit paaki. 19 N naa waas, Yiisa kuun maŋ paak ti mɔk parcheenn nan tin kɔɔ boor nba tee kasii yaa kasii na ni. 20 Yiisa gbanant nba tee sɔnpaanu nan sɔnu nba mɔk manfoor nae loot tammɔb maŋ. 21 Ti manntɔjaann nba yen Yennu ŋaak maŋ na paak, 22 yi ŋaan ki tin chat nakin Yennu man nan para nba be fanu, nan barmɔnii yada, ki daa mɔk birsuk, nan ti para nba ki Yiisa sɔn nyinn dudukbiit li ni na, nan ti gbanant nba ki ti din wuur nan nyun nba kaa jakint na. 23 Yi ŋaan ki tii dia dindann nba ki ti fiit wann na fanu ki daa birisi, kimaan wunba din senn mɔsonn ki turit na tee barmɔnii daanɔe. 24 Yi ŋaan tin yabir ki fiin leeb lomm nan bi toonŋana, 25 ki daa nyikit lakinu nan leeb, nan siab nba nyikit biaŋinba na, ŋaan i sommit leeb man, taa ji mantik laat ti Yomdaanɔ daar maŋ nba nyarii nakii biaŋinba na paak. 26 Taa bann barmɔnii nba ki bi fiit wannit na, ti-i biakii ŋammit tuun toonbiit, marunsiar ji kaa ki saa wuur ti biit maŋi. 27 Linba ji biar tee buut bunu nba mɔk jaŋmaaniie, nan muchiɔŋ nba baat ki tan saa biir binba y‡t Yennu na. 28 Wunba din y‡t Moses sennu na weiu, ki niib bann ki teen siaradamm banlee koo ki gar niib banlee, bi din tuu kpiu, ki ninbatinu kaa. 29 Li paak, nirɔ nba fiak Yennu Bija maŋ ki ki baakit sɔn nba ŋamm Yennu mɔlor ki nyinnɔ u biit ni na, ki sukii burchinseyeeŋ na, bikint li yɔɔ nba tan saa jaŋ nan tubdatu nba. 30 Kimaan ti mi wunba din yet a, "Mine saa pa pann ki jiin biit." Li bia sɔb a, "Yennue tan saa bu u niib buut." 31 Li tee jaŋmaansooruko nan sɔɔ n kɔɔ manfodaanɔ Yennu wutoor ni. 32 I tian man yoo nba gar na labaar; Yennu yentu nba din yent i paak yoo nba na, i din dii biak bonchiann, ŋaan li biaksiar din ki nyanniini. 33 Sianyoo bi din tuu sukii-i paanu ni, ki daamii-i bonbiir, ki yenn yoo ki i tuu tan teen siir nan yin pukin binba ki bi tumm nna maŋ paak ki di biak namm. 34 I din mɔk ninbatinu nan binba be dansarii ni; ki sianyoo bi din tuu fat i yent, ŋaan ki i lek mɔk parpeenn, kimaan i mi nan yaa bia mɔk yent nba chee ki bia ki mɔk gbennu yaayoo. 35 Li paak, i daa nyikit yabiru mani, kimaan i yabiru na baat nan nyɔchiɔŋo. 36 Li ŋan ki yii mɔk sukuru, ki fit tun Yennu loomm, ki la waa din senn mɔsonn a u saa turit linba na. 37 Li sɔb Yennu gbouŋ ni a: "Li tenn yoo waaminnae ki wunba baat na saa baar, ki kan yukir nan baaru. 38 Ŋaan n niŋamm na ŋarin tan saa teenin yada kii waan; ŋaan bi yenɔ-i ŋmat poor, n tan kii mɔk parpeenn nanɔ." 39 Timm ki tee nisiab nba ŋmat poor ki baa yann kaa, ŋaan ti teen Masia yada ki u tinnita.

Hiibru 11

1 Yada tee, taa ki mɔk birsuk nan bont nba ki ti mɔk dindann li paak, ki mi nan linba ki ti ki laat nan ti ninbinn set be nae. 2 Yennu din pak yaayoo ni niib na bi yada paake. 3 Ti yada paake ki ti bann nan Yennu mɔmaame din nan durinya na, ki taa laat bona nba na u din ki jii bonsiar kaa ki nanni. 4 Abel yada paake ki u din mann mannu tur Yennu ki li mannu ŋan gar Keenn yar. U yada paake ki Yennu din pakɔ ki purɔ yentinnɔ, kimaan ŋɔɔ Yennu din gaar u piinii nawa. Abel din kpowa, ŋaan u yada paake ki u bia lek daa piak. 5 Enok yada paake ki u din tan ki kpo, ŋaan ki Yennu jiiu ki doo nanɔ Yendɔuŋ ni, ki sɔɔ ji ki lau; kimaan Yennue jiiu. Ki li sɔb Yennu gbouŋ ni a yoo nba ki Yennu daa din ki jiiu na, ŋɔɔ Yennu numm din gboouwa. 6 Nirɔ-i kii teen Yennu yada, li yɔɔ kan fit penn ŋɔɔ Yennu pari, kimaan wunba kur baat Yennu boor, li kpaa talas ki li yɔɔ n teen yada nan Yennu set be ki teen binba loonɔ na nyɔɔt. 7 Nowa yada paake din te ki u gbat Yennu kpaanii ki jiin bona nba ki u daa kan fit lar nan u ninbinn na po. U din sak Yennu mɔb ki kpaa ŋarungbeŋŋir ki ŋɔɔ nan u ŋaateeb kɔɔ leŋ ki tinn. Ŋanne din wann nan tingbouŋ na niib mɔk biit; ŋaan ki u yada maŋ paak ki Yennu din purɔ yentinnɔ. 8 Yada paake din te ki Abraham sak Yennu yiinii ki saan tiŋ nba ki Yennu senn mɔsonn a u saa turɔ na ni. U din nyik u mɔŋ dooe ŋaan ki ki mi waa saa sian. 9 U yada paake ki u din saa tee saamɔ tiŋ nba ki Yennu senn mɔsonn a u saa turɔ na ni. U din be bonkobgbant lanbont nie; u waas Aisak nan Jakɔb nba din tan gaar Yennu mɔsonn na mun din be li biaŋe. 10 Kimaan Abraham din guu a wun tan kɔɔ doo nba ki Yennu bɔɔn ki maa na nie, ki li doo tee linba sii yɔɔ be. 11 U ŋaapoo Sara mun din kpeta ki ji kan fit mari, ŋaan ŋɔɔ Sara yada paake ki u din tan soor poor ki mar, kimaan u mi nan Yennu nba senn mɔsonn na tee barmɔnii daanɔe. 12 Li paak, Abraham nba din ji tan ki fɔk nan kuun na, ŋaan u kuukɔɔ yaaboonae tan yab nan ŋmaabira nba yab biaŋinba na, ki bia yab nan mɔktanbiinii nba yab ki kaa kann biaŋinba na. 13 Niib nba na kur din tuu tan kpo nan bi yada, ŋaan daa ki gaar Yennu nba senn mɔsonn a u saa turib linba na, ŋaan bi yada maŋ paak, bi din dɔŋ lar banfɔkirewa, kimaan bi din bann ki sak nan bi tee saamme ki bia tee nitintaaka tingbouŋ na ni. 14 Niib-i yeen linba na, li set fiit ki want nan bi lek daa gorii bi tiɔŋ digbann siar poe. 15 Ki niib maŋ baka kaa baa poŋ din nyii digbansiar nba na po. Bi-i diŋŋi dukii li po, bi din bo saa fit ŋmata. 16 Ŋaan bi baka din be siaminba chee ki tee yendɔuŋ na poe. Ki li paak Yennu mɔk yuugontir nan bin yiinɔ bi Yennu, kimaan u poŋ din ŋamm dosaue ki guumm. 17 Yoo nba ki Yennu din bikin Abraham na, u yada paake ki u din jii u bija Aisak, a wun mann mannu ki tur ŋɔɔ Yennu. Gotir, ŋɔɔ Abraham nba din gaar Yennu mɔsona maŋ na, ŋɔɔe bia din jii u bijayemmir a wun mann mannu ki tur Yennu. 18 Yennu din yetɔ a, "Aisak nie ki a tan saa la yaaboona nba ki n senn mɔsonn a n saa tura na." 19 Ki Abraham ji bann nan Yennu fit fiint niib kuun ni; ki li set want nan Abraham din gaar Aisak kuun nie. 20 Aisak yada paake din te ki u senn mɔsoŋŋann nba yaa lin tan baar Jakɔb nan Esɔɔ paak. 21 Yoo nba ki Jakɔb din yaa wun kpo na, u yada paake din te ki u senn mɔsoŋŋann Joosef bonjai na paak, ki din tan diin u patu ki jiant Yennu. 22 Joosef manfoor nba din tan yaa lin gbenn yoo nba na, u yada paake ki u din pak Israel teeb nyinu po Ijipt tiŋ ni, ki wannib baa tan saa teen u kpaba biaŋinba. 23 Moses baa nan u naa nba din marɔ yoo nba ki la ki u fan bonchiann na, bi yada paak ki bi din bɔrɔ ki tan jaŋ ŋmaarii ŋantaa, ki din ki jee bat sennu na. 24 Moses nba din tan kpaat yoo nba, u yada paake ki u din ki sak bii yiu Bat Faaro bipoo bija. 25 U din sak nan wun di biak nan Yennu niibe ŋaan ki ki sak toonbiit parpeenn nba tee waaminna na. 26 U din dukin a bi-i sukiiɔ Masia paak, li mɔk nyɔɔt bonchiann ki chee Ijipt tiŋ ni mɔkint kur, kimaan u ninbinn din kpaa nyɔɔt nba baat na paake. 27 Ŋɔɔ Moses yada paake din te ki u nyii Ijipt ki ki jee bat na wutoori, ŋaan lek saa tɔɔnn nan u set la Yennu nba ki sɔɔ ki laatɔ nan ninbinn nae. 28 U yada paake te ki u din piin yukitgar jaamm, ki senn sennu a bin mii sɔn bi ŋei tammɔi paak, ki kuun malaka na tan daa kpi Israel teeb bijakpera. 29 Israel teeb yada paake ki mɔkmuŋ na din bɔkit ki teen tinkooŋ ki turib ki bi poot, ki Ijipt teeb na mun yabir a bin poot, ŋaan ki mɔkir maŋ nyun jiin mubin ki diib. 30 Israel teeb nba din tan baar Jeriko yoo nba, bi yada paake ki bi din somm lint li joona daa ŋanlore, ki li baa. 31 Poochonchonn nba ki bi yiu Rahab na yada paake din te ki Israel teeb ki kpiiu, ŋaan kpii binba din ki gbat Yennu mɔb na, kimaan Israel niib nba din baar a bin diis doo maŋ na, ŋɔɔe gaarib saauŋ. 32 N bia beti siab labaar ki pukinii? Yoo-i bonni yab, n bo saa beti Gideonn labaar, nan Barak labaar, nan Samsonn labaar, nan Jefta labaar, nan Defid labaar, nan Samuel labaar, nan Yennu sɔkiniinba labaara. 33 Bi yada paak ki bi siab din kɔn nyann tinii, ki siab mun tun linba tee fanu, ki siab mun gaar Yennu mɔsona, ki siab soor yambɔra mɔi, 34 ki siab mun kpeen muchiɔŋ, ki siab tin nyii jukbanjai kuun ni. Ki siab mun tee tariie ŋaan din tan kpant paarib, ki siab mun took tɔbii nan paŋ ki te ki boorganu lanjimanba chiar. 35 Ki poosiab la bi nikpiimm nba din kpo na fiir kuun ni. Ki siab nba din teen Yennu yada na paak ki bi boo kpiib, ki bi ki y‡t Yennu weiu a bin nyi kuun maŋ ni, kimaan bi loon bin fiir kuun ni ki la manfoor nba chee. 36 Ki niib din daan siab nyatuk, ki bia boob kpaasir; ki bi baan bi siab jarit, ki jiib saan kɔɔmm dansarii. 37 Bi din jaat bi siab tanae, ki ŋma bi siab ki poriib; ki bi jikit jukbanjai ki kpi bi siab; ki leeb din lia pegbant, ki leeb bia lia bugbant ki lin namu, ki niib mukisib ki dintib biak. 38 Tingbouŋ na teeb din ki jaŋ nan bii be nammi. Ki bi din lin yeek kunkoot paak nan jɔɔt ni, ki lin dɔɔ tanfiat nan fɔrii ni. 39 Binba na kur yada paake ki Yennu din pakib, ŋaan ki bi daa ki gaar linba ki u senn a u saa turib na, 40 kimaan ti paake ki u din mantik dukii bonsiar nba chee na po, ŋanne ki u saa te ki timm nan ŋamm n tan lakin kii be fanu nan barmɔnii.

Hiibru 12

1 Binba na kur tee siaradamme ki lintit. Li paak, yi ŋaan ki tin yabir ki fok lu linba kur saa gɔɔrit Masia sɔnu ni, nan biit nba saa soorit; yi ŋaan man ki tii di sukuru ki gbaa gbaar nba yaa lin baarit na. 2 Ŋaant ki tin kpan kpaa ti ninbina Yiisa paak; ŋɔɔe ki ti yada gaa u paak li pinpiik niwa nan li joontu na ni. Dapunpunn na din ki te ki u nyik yabiru, kimaan parpeenn nba din baat u paak na paak, u din ki dukin ki li mɔkɔ fei nan wun kpo li dapunpunn paaki, ŋanne te ki u ji kar Yennu naangbouŋ paak u niidiitu po mɔtana. 3 I lek bikin waa din gaar naŋ biitdamm boor biaŋinba. Li paak, i daa te ki i gbanu baŋŋit ki i nyikit yabiru. 4 Kimaan yaa yabii ki kɔn nan biit na ŋaan i sɔɔ daa ki mi yabir ki li saa baar kuumi. 5 I ki tian Yennu nba kpaani nan baa nba tuu kpaan u waas biaŋinba na-a? Li sɔb a: "N bik, Yennu-i teena kpaanii yoo nba, fan gbiint, li-i tee ki u dat a tubir, faa daa nyikit a yabiru, 6 kimaan Yennu kpaan wunba ki u loonɔe, ki wuu gaar wunba ki teenɔ u bik, li yɔɔe ki u daar u tubir." 7 Yabit i fardinu ni nan bik nba ki u baa tuu dat u tubir ki wun di fara biaŋinba na. Yennue teeni tubdatu yaa tee u waas na paak, kimaan bik kaa ki ki laat tubdatu u baa boori. 8 Li-i tee ki u ki dat i tuba nan waa tee u waas kur biaŋinba na, ŋann li want nan i tee kpenŋmiae, i ki tee u waas kaa. 9 Ti baanba nba be tin-gbouŋ na ni daar ti tubae, ki ti teemm baakir. Li paak, li ŋan ki ti mantik sikin ti mɔŋ ki tur Yennu, wunba tee sei Baa na, ki la manfoor. 10 Ti baanba nba be tingbouŋ na ni jikit yoo waaminna ki daar ti tuba baa loon biaŋinbae, ŋaan Yennu ŋarin daar ti tuba ti mɔŋ sommir paake, a ti binbeŋ n ŋamm kii yeen nan ŋɔɔ Yennu binbeŋ na. 11 Tubdatu yoo tone, li ki mɔk parpeenni, ŋaan li poorpoewa ki binba dii tubdatu fara na ji tuu la nyɔɔt nba tee parmaasir nan yentinu binbeŋ. 12 Li paak, kakitir i dunkpeena, ki chekin i nii nba baŋ na, 13 kii tɔk sɔnu nba took, ki wunba ki waa barmɔnii na n set fanu ki daa baa. 14 Yabit kii mɔk parmaasir i leeb sinsuuk ni, kii mɔk binben-yeeŋ, kimaan sɔɔ-i kii mɔk ŋann, li yɔɔ tan kan la ti Yomdaanɔ. 15 I guu i mɔŋ man ki tan daa kɔŋŋit Yennu ninbatinu na. I sɔɔ daa mɔk tonu u par ni, ki li tonu na n baar nan parbiir leeb paak, ki biir niburchiɔŋu. 16 I sɔɔ daa chommi koo ki gorii Yennu barii yann ki tee nan Esɔɔ, wunba din jii u saakatuk ki kpent jeet ki dii yomm na. 17 I mi nan li poorpo u din tan loon wun gaar u baa mɔsoŋŋann ki mɔ nan ninnyuut ŋaan ki lar, kimaan u ji din ki la sɔnu nba ki u saa tɔkin ki lebit waa poŋ biir linba na. 18 Tɔn, yimm ki baar bonsiar nba ki i saa fit siir nan Israel teeb nba din baar Sainai jɔɔr boor na kaa, siaminba ki muchiɔŋ di ki bunbɔnchiɔŋ be, ki wounpaaruk da, 19 ki kikaak bui, ki kunkɔr pak na. Baa din gbat li kunkɔr yoo nba, bi din jak baruŋo ki ji ki loon li kunkɔr n pak pukini, 20 kimaan sennu nba ki bi gbat na paak bi niiwa. Li din yet a, "Bonkobuku lekii sii jɔɔr maŋ gbaa, bin jaatɔ tana ki kpiu." 21 Li boor din mɔk jaŋmaansooruk bonchiann, ki Moses yet a, "Jaŋmaanii mɔkin, ki n gbanant jekir." 22 Ŋaan yimm ŋarin baar jɔɔr nba sann tee Sayɔnn, linba tee manfodaanɔ Yennu doo ki tee Yendɔuŋ ni Jerusalem, siaminba ki malakanba tusaa tusaa lakin nan parpeenn nae. 23 Yimm tan baar niib nba ki Yennu teemm u waas ki bi sana sɔb Yendɔuŋ ni na boore. I baar Yennu nba tee nisaarik kur barbuurɔ na boore, nan popeendamm nba ki Yennu te ki bi sei be fanu na boor. 24 I baar Yiisa, wunba tee sindantinnɔ na boor, ki bia baar Yennu mɔlorpaann na boor. Ki u sɔn nba din nyii na want barii nba ŋan ki gar Abel sɔn. 25 Li paak, i mi man ki i y‡t wunba kpaani na mɔb, kimaan Israel teeb nba din y‡t wunba din kpaamm tingbouŋ na ni mɔb na, u din tan ki nyik bi tubdatu; ki ti-i y‡t u kpaanii nba nyii Yendɔuŋ ni na, ti tan saa teen nlee ki nyi tubdatu ni? 26 Li yoo na, u kunkɔr din nik tingbouŋ nae, ŋaan mɔtana u senn mɔsonn ki yet a, "N ji kan nik tingbouŋ na kuukɔɔ kaa, ŋaan n tan saa nik tingbouŋ na nan sanpaapoewa." 27 Mɔbona nba yet a, "N ji tan" na, li fiit want nan bonnankaa kur tan saa nik ki bot li binbeboore, ŋaan linba tan kan fit nik na ŋarin tan saa biar li binbeboae. 28 Li paak, taa gaar naan nba kan mi ki nik na paak, yi ŋaan ki tii teen Yennu niipoouk man, ki jiantɔ nan baakir nan jaŋmaanii ki u numm n gboo, 29 kimaan Yennu maŋ tee nan mudikau nae.

Hiibru 13

1 Yaa tee Masia niib na paak, i loon i leeb man yoo kur. 2 I daa tammit saamm gaaru po, kimaan nisiab din tan gaar malakanba saauŋ, ŋaan ki ki mi a bi tee malakanbae. 3 Yii tian nisiab nba be dansarii ni na po, nan yimm nan ŋamme lakin be li ni na; kii tian nisiab nba laat mukisuk na po, kimaan i mun daa be tingbouŋ na nie nan i gbanant. 4 Yii mɔk baakir nan i leeb, i pookɔɔnt nan i jakunt ni, ki daa chommi, kimaan Yennu tan saa dat bonchonchona nan joon-baarit nan sapaanwɔbira nan naasinwɔbira tubawa. 5 Yi nyinn i niɔŋ liklomm ni, ŋaan te ki i numm n gboo yaa mɔk linba; kimaan Yennu yet a, "N kan mi ki nyikani, n bia kan mi ki ŋaanani." 6 Li paak, ŋaant ki tii mɔk parcheenn ki yet a: "Yennue tee n sommtɔɔ, n kan tin jaŋmaanii, nisaarik saa teenin bee?" 7 I tian man i yudamm nba din tuu piak Yennu maan ki teeni na po; kii dukii bi binbeŋ nyɔɔt nba tee biaŋinba, kii tokii bi yada. 8 Yiisa Masia nba won tee biaŋinba wonn na, u bia tee nnae dinna, u bia sii tun tee nnae mɔkmɔk nan mɔkmɔk. 9 I daa ŋaant ki wannsaanbooru booru n booniini, ki i tan saa mann tut sɔnŋanu maŋ. Li ŋan ki Yennu sommir n tur nirɔ paŋ u par ni; jeet sennii nba jiin jeet dinu po weiu kan turɔ paŋi. Nisiab nba dia jeet sennii na poŋ ki laat sommsiar li ni. 10 Tɔn, binba mann mannu Juu teeb Yenjiantu boor na ki mɔk yaak nan bii di linba be ti mannu binbintir na paaki. 11 Ki Juu teeb mannteeb yudaanɔ tuu kɔɔ nan bonkobit sɔn Yennu diiuk ni, kasii yaa kasii boor na, ki mann maruŋ biit paak, ŋaan joo bonkobit maŋ nant muu bi doo na kpiŋ po. 12 Li paak ki Yiisa mun din kpo doo na kpiŋ, a wun nyinn niib bi biit ni, nan u mɔŋ sɔn. 13 Li paak, ŋaant ki tin nyi ki saan u boor man, ki sak di fei nanɔ. 14 Kimaan doo nba saa biar kaa tingbouŋ na ni; dosau nba baat nae ki ti guur. 15 Li paak, yi ŋaan ki tii dontir Yennu sann yoo kur Yiisa sann ni; paku nba nyi ti mɔi ni nae tee mannu ki turɔ. 16 I daa nyikit toonŋana tumu, kii chentir yaa mɔk linba nan i leeb. Li mannboorue pent Yennu par. 17 Yii saak i yudamm mɔi ki sikin i mɔŋ ki turib, kimaan bi baka be i benu ni, kimaan bi tan saa wann Yennu bi toona nba ki bi din tuun nawa. Ŋaant ki bin tan wannɔ nan parpeenn, ŋaan tan daa wantɔ nan parbiiri. Ŋann tan kii mɔk nyɔɔt ki turiini. 18 I mei Yennu man ti paak. Ti ki mɔk dudukbisiat ti toona ni, kimaan ti loon tin tun linba tooke yoo kur. 19 Ŋaan n mantik barimiie, i mei Yennu man kii teenin ki wun te ki n jen i boor mɔtana. 20 Yennu nba teent parmaasir nae din fiin ti Yomdaanɔ Yiisa kuun ni. Ŋɔɔ Yiisae tee ti guutɔjaann, kimaan u din kpo, ki u sɔn ŋamm Yennu mɔlor nba sii see mɔkmɔk nan mɔkmɔk na; 21 ŋɔɔ Yennu n ŋamm i binbeŋ fanu ki yii tuun u loomm, kii tuun toonŋana kur; Yiisa Masia paak wun te ki tii tee binba sii pent u par. Ŋɔɔe yen dontir mɔkmɔk nan mɔkmɔk. Mamɔmm. 22 N naa waas, n barimiie, yi di sukuru ki gbiint kpaanii na; kimaan maa sɔb gbouŋ nba turi na ki fɔki. 23 N loon ki i bann nan bi nyinn ti naa bik Timoti dansarik niwa. Li-i tee ki u baar n boor mɔtana, i saa la min nan ŋɔɔ. 24 Yi foont i yudamm kura nan Yennu niib na kura ki turit. Ti naa waas nba nyii Itali tiŋ ni na foonti. 25 Yennu sommir-ii be i kura ni.

Jeems 1

1 Min Jeems nba tee Yennu toontunnɔ ki bia tee ti Yomdaanɔ Yiisa Masia toontunnɔ na foont Israel booru piik nan banlee nba yat ki be tingbouŋ na kur po. 2 N naa waas, yii mɔk man parpeenn yoo nba ki i di farbooru booru na, 3 kimaan i poŋ mi nan fara maŋe baati ki i bant nan i set teen Yiisa Masia yada nan barmɔnii, ki li teeni gbankur. 4 I ŋamm kii mɔk gbankur fanu nan li joontu, ki i tan kan kɔŋ binbenŋaŋŋi. 5 Li-i tee ki i sɔɔ pɔt yan, wun miar Yennu nba pi sɔɔ kur piinii nan burchint, ki ki dint sɔɔ fei na, ki u saa turɔwa. 6 Fi-i mei Yennu, fan teen yada ki daa mɔk birsuku; ŋaan fin nba meiɔ nan birsuk, a tee nan mɔkgbeŋŋir nyunpana nba ki wouŋ tuu da ki li fi ki baa nae. 7 Li nibooru daa dukii nan u saa la siar Yennu boori, 8 kimaan u mɔk dudukit munlee-lee-e. 9 Li ŋan ki ti naa waas nba tee nandamm-ii mɔk yuugontir Yennu nba donnib na paak, 10 ki ti naa waas nba tee mɔkita-ii munii mɔk yuugontir Yennu nba sikinib na paak, kimaan li kan yukiri ki bi saa gar nan mɔɔt puuk nba tuu koor ki baa na; 11 kimaan yonnu-i nyii ki yekit puuk, li tuu koore ki baa, ki li ŋant n ji biir. Li mun bia tee nnae ki tur mɔkita; yoo nba ki bi dukii bi toona nba saa saan tɔɔnn biaŋinba na, li yooe ki bi tuu kpo. 12 Binba nyann bikinu, parpeenn tee bi yare, kimaan Yennu saa turib nyɔɔt nba tee manfoor nba ki u din senn mɔsonn a u saa tur binba loonɔ na. 13 Sɔɔ-i la jammii, u daa yaa Yennue jammɔɔ. Siar kaa ki saa fit jamm Yennu, Yennu mun ki jammit sɔɔ. 14 Nirɔ-i loon wun tun u mɔŋ nianbiiuk toona, ŋanne tee jammii. 15 Nianbiiuku soor nirɔ, li tuu baar nan toonbiite, ki toonbiit joontu tee kuume. 16 N naa walonkai, i daa te ki siar kpanniini. 17 Bonŋann kur nyii sanpaapoe ti Baa Yennu boor, wunba din nan sanpaapo yentu kura. Ŋɔɔ ŋarin ki lebitir nan sanpaapo yentu nba lebitir biaŋinba na; u bia daa tee ŋɔɔ Yennue. 18 U mɔŋ loommo ki u teent u waas, u maan nba tee barmɔnii na paak, a tii chee u bonninant kura. 19 N naa waas, n loon yin bann linba nae; yii gbiintir yian yian ŋaan kii mi biaŋinba ki i piak, ki bia daa dont wutoor yian yian, 20 kimaan nisaarik wutoor ki tuun Yennu toonŋana. 21 Li paak, n naa waas, yi nyik i yanbɔmm nan biit kur nba be i para ni na, ŋaan sikin i mɔŋ Yennu tɔɔnn, ki gaar u maan nba ki u kɔɔnt i para ni na, kimaan maan maŋe mɔk paŋ nba saa nyinni kuun ni. 22 Ŋaan i tuun biaŋinba ki maan maŋ wann na; li-i tee ki i gbat maan maŋ, ŋaan ki ki tuun biaŋinba ki li wann na, i kpann i mɔŋe. 23 Wunba kur gbat maan maŋ, ŋaan ki ki tuun biaŋinba ki li wanni, u tee nan nirɔ nba tuu got ki la u mɔŋ mianu ni nae; 24 kimaan u got ki la u mɔŋ mianu ni, ŋaan seet, u ji tuu tamm waa bo got ki la u mɔŋ ki u tee biaŋinba nae. 25 Ŋaan wunba dukii sennŋann nba fit nyint niib biit daabsin ni, ki ki tammir, ŋaan mɔk gbankur ki tuun biaŋinba ki li wann na, parpeenn tee li daanɔ yare, kimaan u toonn na paak. 26 Wunba mi nan u tee Yiisaweirɔ ŋaan ki ki so u mɔbi, li daanɔ kpann u mɔŋe. Li want nan u weiu na tee yanne. 27 Wunba sommit kpeebii nan pakɔi bi fara ni, ki bia nyinn u mɔŋ tingbouŋ na toonbiit ni, ŋɔɔe set tee Yiisaweirɔ nan barmɔnii, ki ki mɔk biit ti Baa Yennu boori.

Jeems 2

1 N naa waas, yaa teen ti Yomdaanɔ Yiisa Masia nba tee paŋ daanɔ yada biaŋinba na, i daa mɔk ningannii. 2 Li-i tee ki mɔkitɔɔ nba lia taŋant ki pir salimbaŋ kɔɔ i Yennu jiantu diiuk ni, ki nandaanɔ nba lia tachiat mun kɔɔ, 3 ki i tur mɔkitɔɔ na baakir, ki betɔ a wun kar tɔɔnn po, ŋaan bet nandaanɔ na a wuu see koo wun kar tiŋ ni, 4 n naa waas, li-i tee ki i tuun nna, i tee niib nba mɔk ningannii nan i leebe, ki bia mɔk dudukbiit. 5 N naa walonkai, gbiintir man, Yennue gann binba tee nandamm tingbouŋ na niib boor, a bin teen mɔkita u boor, kimaan bi teenɔ yadae, ki teen u waas nba saa di naan nba ki u senn mɔsonn a u saa tur binba loonɔ na. 6 Ŋaan yimme yisin nandamm. Mɔkita nae mukisiri, ki so-i ki saa nani buut boor. Nna kaa-a? 7 Ŋamme bia piak biir Yiisa Masia sanŋann nba ki Yennu turi na. 8 Li sɔb Yennu gbouŋ ni a, "I loon a lɔɔ nan faa loon a mɔŋ biaŋinba na." Li-i tee ki i waa Yennu naan sennu maŋ, li ŋan, 9 ŋaan li-i tee ki i mɔk ningannii nan leeb, li tee biite, ki sennu maŋ fiitir ki want nan i set tee sennu biirteebe. 10 Wunba sak ki waa sennii na kur, ŋaan tan biir sennii maŋ yenn, li want nan u biir sennii na kure. 11 Sennii maŋ ni, Yennu nba yet a, "Daa chomm na," ŋɔɔe bia yet a, "Daa kpi nirɔ." Li paak, li-i tee ki a ki chomm, ŋaan kpi, a biir sennii maŋ kura. 12 Yii piak ŋaan kii tuun kii mi nan Yennu tan saa jii sennu nba nyint niib biit daabsin ni nae ki bu i buut. 13 Binba ki tin bi leeb ninbaauk, Yennu saa bu bi buut ki kan tinib ninbaauku; ŋaan ninbatinue nyant tubdatu. 14 N naa waas, daanɔ nba yaa u teen Yiisa Masia yada, ŋaan ji ki tuun popeenn toona, li mɔk nyɔɔtii? U yada maŋ booru saa fit tinnɔwa-a? 15 Li-i tee ki a naa bik be ki ki laat gbab, ki bia ki laat di, 16 ki a ji beerɔ a, "N naa bik, a kun manuwa, kii gbab, kii biaki di," ŋaan ki turɔ siari, li mɔk nyɔɔtii? 17 Yada kuukɔɔ-i be, ŋaan toonŋana kaa, yada maŋ tee yadakpeenne. 18 Li-i tee ki nirɔ yet a, "Sɔɔe mɔk yada, ki lɔɔ mun tuun toonŋana," n mun saa jiin a, "Li-i tee ki a ki tuun toonŋana, lannpoe want nan a set mɔk yada? Ŋaan n toonŋana nae wanta nan min set mɔk yada." 19 A teen yada nan Yen-yenɔkɔɔe be-e? Li ŋan. Narinbiit mun teen yada nan Yen-yenɔkɔɔe be, ki bi jekir nan jaŋmaanii. 20 Fin jatuk na, li-i tee ki a mɔk yada ŋaan toonŋana kaa, li tee yanne; a loon ki a bann na-a? 21 Ti yeeja Abraham nba din jii u bik Aisak ki paanɔ binbintir paak a wun kpiu ki mann maruŋ ki tur Yennu na, toonn maŋ paake ki Yennu din yet a u tee niŋanɔ u boor. 22 A la nnawa-a? Waa teen Yennu mɔmaan yada na paake ki u din tun toonn maŋ; toonn maŋe mun wann nan u teen Yennu yada nan barmɔnii. 23 Ki Yennu mɔmaan nba sɔb u gbouŋ ni nae tan teen mamɔmm, li sɔb a, "Abraham din teen Yennu yada, li paak ki Yennu yaa u tee niŋanɔ u boor." Li paak ki bi yiu Yennu yɔɔk. 24 A la nnawa-a? Nirɔ toonŋana paake ki Yennu saa yet a li daanɔ tee niŋanɔ u boor; li ki tee u yada kuukɔɔ paak kaa. 25 Li din tee nnae mun ki tur poochonchonn nba sann din tee Rahab na. Waa din gaar toomiinba nba ki Israel teeb din tumm, ki bia wannib sɔnu nba ki bi tɔkin ŋmat kun na, u toonn maŋ paake ki Yennu din yet a u tee niŋanɔ u boor. 26 Li paak, gbanant nba kaa seek, li tee gbanankpeenne, yada-i munii be ki toonŋana kaa, li mun bia tee yadakpeenne.

Jeems 3

1 N naa waas, i bonchiann daa loon yin teen wannteebi, kimaan i poŋ mi nan binba tee wannteeb na, bi buut tan sii paar ki gar binba ki tee wannteeb. 2 Ti kur tuun linba ki took sɔnii bonchiann ni, ŋaan wunba ki piak mabiit, li daanɔe set tee niŋanɔ ki saa fit soor u gbanant kura. 3 Ti-i jii tangarika ki wukin taanii a bii tuun taa loon biaŋinba, bi gbanant paŋ kur be ti nuu nie. 4 Bia dukint ŋaruŋ po; li yab bonchiann, ŋaan wounpaaruku da, li saae, ŋaan dabik nnae ki kantɔɔ na dia ki kan ki li saa waa loon siaminba. 5 Jerinn mun tee bonbik nnae, ŋaan mɔk yaak bonchiann. Gotir, mupunpɔɔrik nnae tuu di fɔgbeŋŋir. 6 Jerinn tee nan muu nae; li be ti gbanant ni ki mɔk biitbooru booru kura, ki saa fit biir ti gbanant kur ki bia di nisaarik binbeŋ nan muu na; li muu nyii Sintaanii boore. 7 Nisaarike mɔk bonkobit nan nɔɔnii nan wai nan nyun ni bona kur yaak, 8 ŋaan nisaarik kan fit soor jerinn; li mɔk biite, ki gbee nan lɔbii nba baat nan kuun, ki bia ki foi. 9 Jerinn nba ki ti dia ki piak dont ti Baa Yennu nba tee ti Yomdaanɔ na, li jerinne ki ti bia dia ki piak mabiit nisaarii paak, binba ki Yennu din namm ki bi naan nan u mɔŋ na. 10 Mɔb nba ki maŋamm nyi na, li mɔb nie ki mabiit bia nyi. N naa waas, li-i tee nnaie, li ki ŋani. 11 Bunbunn nba bunii nyummanin nae bia bunii nyuntouŋu? 12 Ki kinkaŋ saa fit lon saanawa-a? Koo gaak saa fit lon kinkanawa-a? Nnae mun ki bunbunmimiruk kan fit bunn nyummammi. 13 Ŋmee mɔk yan nan bannu i sinsuuk ni? Sɔɔ-i be, wuu be fanu ki sikin u mɔŋ kii tuun toonŋana, ki lin wann nan u set mɔk yan. 14 Ŋaan li-i tee ki i mɔk funfunn nan dont-n-mɔŋ i para ni, ŋann i daa nyu bara, ki fa faak, ki y‡en barmɔnii. 15 Li yan ki nyi Yennu boor kaa, li tee tingbouŋ na nan gbanant loomm nan Sintaanii yare, 16 kimaan funfunn nan dont-n-mɔŋ nba be sian, daamii nan biitbooru booru kur be leŋe. 17 Ŋaan yan nba nyi Yennu boor, li ki mɔk biiti; wunba mɔk yan maŋ, u mɔk parmaasire ki be soon nna, ki gbia u leeb maan; ki mɔk ninbatinu yoo kur, ki bia tuun toonŋana bonchiann; u ki mɔk lukitin, ki bia ki mɔk kpinkpannii. 18 Binba mɔk parmaasir ki te ki parmaasir baat niib sinsuuk ni na, ŋamme te ki yentinu be.

Jeems 4

1 Bee te ki i kɔn ki nɔi nan leebi? Nianbiiuk nba be i para ni nae kɔn. 2 I loon bonsia ŋaan ki laat, ki ji teen siir nan nikpinu. I mɔk funfunn i leeb bona paak, ŋaan ki laat, li paak ki kunkɔna nan mɔniat be i sinsuuk ni. I ki laat yaa loon linba, kimaan i ki mei Yennu li po. 3 I mei Yennu ki ki laat kimaan i meiɔ ki loon i mɔŋ nianbiiuk yare. 4 I nyik Yennuwa, ki waa bonliae. Li-i tee ki i tee tingbouŋ na yɔɔsinbaie, i tee Yennu dataie; I ki mi nna-a? Wunba loon wuu tee tingbouŋ na yɔɔk, li yɔɔ teen u mɔŋ Yennu dataake. 5 Li sɔb Yennu gbouŋ ni a, "U loon Seek nba ki u teent na bonchiann." 6 Ŋaan u bia teent sommir bonchiann. Li paak, li sɔb Yennu gbouŋ ni a, "Yennu kɔn nan karinbaandamme, ŋaan sommit binba sikint bi mɔŋ." 7 Li paak, yii saak Yennu mɔb man, ŋaan y‡t Sintaanii, ki u saa chiar nyiki. 8 Chatir nakin Yennu man, ki u mun saa nakini. Yimm biitdamm, wuut i nii man; yimm dudukit ŋanlelee damm, ŋammit i para man. 9 Yii mɔk parbiir kii bui kii fabin i biit paak; i ji daa laa, yii mɔ man; ki ŋaan ki i parpeenn n kpant parbiir. 10 Sikint i mɔŋ Yennu tɔɔnn, ki wun donni. 11 N naa waas, i daa piak mabiit leeb paaki. Wunba piak mabiit u naa bik paak ki biirɔ, u piak biir Yennu sennue. Li-i tee ki a biir sennu na, a ki tee wunba waa-r kaa, ŋaan a tee li biirtɔɔe. 12 Yennu kuukɔɔe mɔk yaak ki saa fit senn sennu, ki bia saa fit bu ti buut, ki bia mɔk paŋ nba saa fit tinn niib, ki bia saa fit biirib, ki ŋmee mun be ki mɔk yaak ki saa bu u lɔɔ buuti? 13 Gotir man, yimm nba tuu yeen a, "Dinna koo wonn, ti saa saan digbann, ki saa di binn kii kpentir kpinkpouŋ ki la nyɔɔt bonchiann," 14 i ki mi linba saa baar wonni. I manfoor tee bee? Li tee nan wunn nba tuu baa sanyiɔk ni, ŋaan li-i yann lin yant nae. 15 Li paak, li ŋan tin tuu yet a, "Li-i tee Yennu loommie, ti sii mɔk manfoor, ki tun na nan na." 16 Ŋaan i mɔk karinbaaniie ki nyu bara. Yaa nyu bara biaŋinba na, li ki ŋani. 17 Li paak, wunba mi toonŋana tumu, ŋaan ki tuumi, li daanɔ mɔk biit.

Jeems 5

1 Yimm gordamm, gbiintir man! yii mɔ man kii fabin kimaan biak nba baat i paak na. 2 I mɔkint na kur biir, ki wobii mɔɔ i tiata. 3 I likirii na mun biira, ki li tan saa wann nan i mɔk biit, ki li saa biir i gbanant nan muu nba di biaŋinba na. I sent i mɔkint maŋe ki guunt i buut daar. 4 I ŋmab i toontunna nba jaan i dii kpaant ni na, ki ki pabi, ki bi mɔ; ki bi mɔnii na kɔɔ yabint Yennu tuba ni. 5 Yaa be tingbouŋ na ni na, i be i yama nie, ki waa i gbanant niɔŋ; i dint i mɔŋe, ŋaan i lek tee nan naajakpamma nba ki bi saa kpib nae. 6 I din piak ki biir popeendamme ki kpib, ŋaan bi ki kɔn nani. 7 N naa waas, yii mɔk sukuru man kii guu ti Yomdaanɔ baaru daar maŋ. Gotir man kpaarɔ nba tuu mɔk sukuru ki guu kpafusaak mɔkmɔk nan sajoontik ki u jeet n ji tan nan bonŋann na. 8 Li paak, i mun-ii mɔk sukuru, ki chee i para, kimaan ti Yomdaanɔ baaru daar per na. 9 N naa waas, i daa mɔk bunburimii i leeb paaki, li-i tee ki i burin, Yennu saa bu i buuta. Gotir man, barbuurɔ na nakin ki see i tammɔi ni. 10 N naa waas, Yennu sɔkiniinba nba din pak u sann ni na, gotir baa din laat biak ki mɔk sukuru biaŋinba ki lii tee wannu ki turi. 11 Baa din mɔk gbankur na, ti yib parpeenn damme. I poŋ gbat Job nba din mɔk sukuru nan gbankur biaŋinba, ki li poorpo ki Yennu tan nyinnɔ u biak ni. Li want Yennu nba mɔk ninbatinu ki tiinit ninbaauk biaŋinbae. 12 N naa waas, linba kpaa talas tee nae: i daa poor mɔpora. I daa yi sanpaapo koo tiŋ ni bonsiar sann ki poor mɔpori. Ŋaant ki i "nn" ii tee i "nn" ki i "aaii" ii tee "aaii", ki Yennu tan daa daar i tuba. 13 Sɔɔ-i be i ni ki mɔk parbiir, wun miar Yennu. Wunba mun mɔk parpeenn, wun yin yanii ki pak Yennu. 14 Sɔɔ-i be i boor ki yiar, wun yiin Masiaweira saakab ki bin tan sɔɔrɔ kpan ti Yomdaanɔ Masia sann ni, ŋaan miar Yennu ki turɔ. 15 Bi-i miar nan yada, u saa la laafiawa, ti Yomdaanɔe saa te ki wun paak; ki li-i tee ki u tun toonbiitie, Yennu saa nyik u biit maŋ ki chabɔ. 16 Fiitir i toonbiit ki wann leeb, ki miar Yennu ki tur leeb, ki Yennu saa te ki i la laafia. Popeendaanɔ-i miar Yennu nan ninmɔnn, li mɔk paŋ bonchiann. 17 Elaija din tee nisaarike nan timm na, ŋaan din miar Yennu nan ninmɔnn a saak daa baa, ki saak set din ki baa ki saa jaŋ bina ŋantaa nan ŋmaarii ŋanloob. 18 Li poorpo ki u bia miar Yennu, ki saak ji baa, ki tiŋ maak, ki jeet nan fanu. 19 N naa waas, sɔɔ-i nyii mamɔmm sɔnu na ni, ki sɔɔ jen nanɔ, 20 i mi nan daanɔ nba nyinn biitdaanɔ u sɔnbiiuk na ni, u nyinn li daanɔ manfoor kuun nie, ki te ki Yennu nyik chab toonbiit bonchiann.

1 Piita 1

1 Min Piita nba tee Yiisa Masia toomii nae sɔbin gbouŋ na ki teen Masiaweira nba yat ki be Pontus nan Galasia nan Kapadosia nan Asia nan Bitinia tinii ni ki tee saamm na. 2 Ti Baa Yennu dɔŋ ganni ki mi nan i tan saa teen u niiba, ki u Seyeeŋ te ki i tee popeendamm, ki u ganni a yii saak Yiisa Masia mɔb, ki u wuur i para nan u sɔn. Yennu n sommi, ki bia turi parmaasir bonchiann. 3 Pakin Yennu nba tee ti Yomdaanɔ Yiisa Masia Baa na man, kimaan u tint ninbaauk bonchiann ki turit manfopaann Yiisa Masia kuun fiiru paak. Linba nae te ki ti mɔk dindann nan ti tan sii mɔk manfoor, 4 ki la linba tee Yennu waas yar, ki li sii be mɔkmɔk nan mɔkmɔk, ki kan biir, li fant bia kan siiri; ki li be Yendɔuŋ ni 5 ki guu yimm nba ki Yennu paŋ dia-i, i yada paak, a yin la i tinnu nyɔɔt nba teen siir ki saa nyi paanu dajoontii na. 6 Li paak, i mɔk parpeenn man; li-i lekii tee kii mɔk parbiir yoo waaminna mɔtana, yaa la biakbooru booru na paak, i mɔk parpeenn. 7 Biak maŋ bikii-i a lin laan i teen Masia yada fanuwa-a? Li tee nan baa tuu jii salima ki teen muu ni a bin la li ŋant nae. I yada teenu ŋan Yennu boor ki gar salima gbaa. I yada teenu-i ŋan, ŋanne saa te ki yin la paku nan dontir nan baakir yoo nba ki Yiisa Masia tan saa nyi paanu na. 8 I ki mi lau ŋaan loonɔ; i bia ki laatɔ mɔtana, ŋaan teenɔ yada, ki mɔk parpeenn bonchiann nba ki nirɔ kan fit wann laa tee biaŋinba. 9 Yaa teenɔ yada na paak, i la tinnuwa. 10 Tinnu nae ki sɔkiniinba din loon bin bann li paak nan ninmɔnn, ki sɔkint a yimme ki Yennu saa tini ninbaauk na. 11 Masia Seyeeŋ nba din be bi ni na din wannib a u tan saa di biak; ki li poorpo ki u bia tan saa la baakir bonchiann; ki bi koor a bin bann yoo nba ki li tan saa tun, ki bia loon bin bann laa tan saa tun biaŋinba. 12 Ki Yennu fiit wannib a bi ki sɔkint bi mɔŋ sommir paak kaa, ŋaan i sommir poe ki bi sɔkint. Yennu Seyeeŋ nba ki u din tumɔ a wun nyi Yendɔuŋ ni nae mun te ki binba mɔɔntir barŋanii na beeri barii maŋ. Linba nae ki malakanba mun loon bin bann li paak. 13 Li paak, yi teen i dudukit siir nan yan, ki soor i mɔŋ, kii mɔk dindann nan barmɔnii nan i saa di manu bonchiann yoo nba ki Yiisa Masia tan saa nyi paanu na. 14 I sak Yennu mɔb man, ki ji daa waa loonbiit nba ki i din waa yoo nba ki i din ki mi Yiisa Masia na. 15 Yennu nba yiini na tee Popeendaanɔe, li paak, i mun-ii tee popeendamm man, 16 kimaan li sɔb Yennu gbouŋ ni a "Yii tee popeendamm man, kimaan min Yennu tee Popeendaanɔe." 17 Li-i tee ki i mei Yennu, i yiu Baae; ŋɔɔe bu niib kur buut nan baa tun biaŋinba na, ki ningannii kaa; li paak, yoo nba kur ki i be tingbouŋ na ni, yii tiinɔ man. 18 I mi nan Yennu nba nyinni binbenbiiuk nba ki i din gaar i baanba boor na, u ki jii bont nba saa biir nan likirii na kaa ki pa, 19 ŋaan u jii Yiisa Masia sɔn nba ŋan gar likirii kure; ki li tee nan mannu pegann nba ki mɔk biit koo dɔk u paak na. 20 Yennu nba daa din ki nan durinya yoo nba na, ŋaan ki u poŋ gann Masia a wuu tee mannu maŋ, ki u tan nyii paanu dajoontii na ni ti paak. 21 U paake ki i teen Yennu yada; ŋɔɔe din fiinɔ kuun ni ki turɔ paŋ; li paake ki i mɔk yada nan dindann Yennu boor. 22 Yaa gaar Masia labaar nae ki i nyii biit ni, ki ji loon i naa waas nan barmɔnii; li paak, yii loon i leeb man nan i para kura. 23 I la manfopaanna; li manfoor ki nyii bonboorik nba kpenn ni kaa, ŋaan li nyii bonboorik nba ki kpenn na nie; Yennu maan nba mɔk manfoor ki sii be mɔkmɔk nan mɔkmɔk nae turi manfoor maŋ. 24 Li sɔb Yennu gbouŋ ni a: "Nisaarik kur tee nan mɔɔt nae, ki u fant tee nan mɔɔt puuk na. Mɔɔt jɔɔkit ki li puut suur baa, 25 ŋaan Yennu maan na ŋarin kaa gbennu." Maan maŋe tee barŋanii nba ki bi din mɔɔntir ki teeni na.

1 Piita 2

1 Li paak, yi nyik biit kur, nan faak kur, nan kpinkpannii, nan funfunn, nan sanjaauŋ. 2 I poŋ la nan ti Yomdaanɔ ŋane, li paak, yii loon Yennu mɔmaan man nan sanpantik nba loon biin biaŋinba na; kimaan maan maŋe saa te ki yin kpaat tinnu sɔnu ni. 4 Baat u boor man; ŋɔɔe tee manfoor tann nba ki niib y‡tɔ, ŋaan ki Yennu gannɔ ki u ŋan bonchiann na. 5 Ŋaant man ki Yennu n jii-i ki yi tee nan manfoor tana na ki wun maa ŋaak nba ki u Seyeeŋ sii be li ni; ki i sii tee Yennu mɔŋ mɔŋ toontunna kii tuun u toonn nan u Seyeeŋ paŋ, ki u saa gaar li toonn Yiisa Masia paake; 6 kimaan li sɔb Yennu gbouŋ ni a: "Gotir, n gann tann ki bir Sayɔnn doo ni, ki li tee lɔtik ni tann, ki bia ŋan bonchiann, ki wunba kur teenɔ yada, u kan di fei." 7 Yimm nba teenɔ yada na mi nan u ŋan bonchiann ki turi; ŋaan binba ki teenɔ yada na, bii mi nan li sɔb Yennu gbouŋ ni a: "Tann nba ki tanmaara y‡tir na, ŋanne set tee lɔtik ni tanŋann." 8 Li bia sɔb a: "Tann maŋe ki niib saa gbiat, tanpiiuk maŋe saa te ki niib n baa." Baa ki sak Yennu mɔmaan paake ki bi gbiatir nan waa din sennib biaŋinba na. 9 Ŋaan yimm ŋarin tee Yennu nigannkabe, ki bia tee u naan ni niib nba jiantirɔ, ki bia tee nibooru nba tee popeendamm, ki bia tee u tiɔŋ niib, ki yii mɔɔntir ŋɔɔ nba nyinni bunbɔnn ni, ki baar nani u bakitnauŋ yentu ni na burchintuk po. 10 Sianyoo i din ki tee Yennu niibi, ŋaan mɔtana i ji tee u niibe; sianyoo u din ki tini ninbaauku, ŋaan mɔtana u tini ninbaauka. 11 N naa walonkai, yaa tee saamm tingbouŋ na ni na, n kpaaniie a yi nyik gbanant loonbiit nba kɔn nan i sei na, 12 ŋaan kii be fanu tingbouŋ na niib sinsuuk ni, ki li-i tee ki bi sukii-i a i tee biitdamm, bin la i toonŋana ki dont Yennu, daar nba ki u tan saa baar na. 13 Ti Yomdaanɔ paak, yii saak man yentdamm mɔi; yii saak kpanbar nba tee yent kur daanɔ na mɔb; 14 ki waa senn sennu damm nba a bii daar binba tuun toonbiit na tuba, ŋaan kii piak binba tuun toonŋana na, yii saak bi mɔi man. 15 Kimaan Yennu loomm tee yii tuun toonŋanae ki gɔɔr jatit maan nba ki mɔk nyɔɔti. 16 I be yent-n-mɔŋ binbeŋ; ŋaan i daa dia i yent-n-mɔŋ binbeŋ maŋ ki li tee yaak ki i tuun toonbiiti, ŋaan kii mɔk Yennu daaba binbeŋ. 17 Yii teen sɔɔ kur baakir, kii loon Masiaweira, kii tiin Yennu, kii teen kpanbar maŋ baakir. 18 Yimm nba tee daaba na, yii saak i saakab mɔi kii teemm baakir, ki li daa tee niŋamm kuukɔɔ kaa, ŋaan nan nibiita. 19 Li-i tee ki a la tubdatu a toonŋana paak, ki dukii Yennu po ki di sukuru, ŋanne saa penn u par; 20 ŋaan fi-i tun biit ki bi dat a tubir, ki a gaar tubdatu na soon nna, nlee ki bi saa pakani? Ŋaan fi-i tun linba ŋan ki gaar tubdatu li paak soon nna, ŋanne saa penn Yennu par. 21 Yennu din yiinit a tii di biak, kimaan Masia tiɔŋ din dii biak ti paak, a tii gorii u binbeŋ kii waa u taabana. 22 U din ki tun biit gbaa; ki faak bia ki mi nyii u mɔb ni. 23 Baa din sukiiɔ, u din ki jiin sukiti; baa din dintɔ biak na, u ki jeen sɔɔ, ŋaan jii u mɔŋ ki teen Yennu nba bu niib buut barmɔnii na nuu ni. 24 Ŋɔɔ Masia mɔŋ mɔŋe din jii ti toonbiit u gbanant ni, ki bi kpaau dapunpunn paak, a tin nyi biit ni kii tee niŋamm. U daŋ paake ki i la laafia. 25 I din tuu tee nan pebotkai nae, ŋaan mɔtana i jen i kpaaritɔɔ, wunba guu i sei na boora.

1 Piita 3

1 Poob, sakin man i sɔrib mɔi, bi siab-i kii teen barŋanii na yada, ŋaan li pasiar i binbenŋaŋ paak, bi saa teen yadawa, ki li ki kpaa talas yin yet siar gbaa, 2 kimaan bi-i la nan yimm nba teen Yiisa yada na binbeŋ ŋani, bi mun saa teenɔ yadawa. 3 Poob, daa jikit i mɔŋ ki want i fant nan yuloru, koo salima tuliat, koo chinchenŋana gbabu kaa. 4 Ŋaant man ki i fant-ii tee para nba be soon nna nan ŋminŋminn; ŋanne tee fant nba kan biiri, ki bia ŋan bonchiann Yennu boor. 5 Yaayoo ni pooŋamm nba din teen Yennu yada na, nnae ki bi din faŋŋit bi mɔŋ, ki saak bi sɔrib mɔi. 6 Nnae ki Sara din saak u sɔrɔ Abraham mɔb ki yiu u yomdaanɔ. Li-i tee ki i tuun ki li ŋan, ki ki tiin siari, ŋann i tee Sara maŋ bonpoie. 7 Jab, i mun-ii be fanu man nan i poob, kii mi nan bi tee tariie i boor, kii teemm baakir, kimaan yimm nan ŋamm kur tan saa gaar Yennu piinŋann nba tee manfoor na; ŋanne saa te ki Yennu n gaar i miaru. 8 Linba biar tee nnae; i kur-ii mɔk dudukyenn man, ki i baka-ii be i leeb ni, kii mɔk lomm nan Masiaweira, kii tiin i leeb ninbaauk, kii sikint i mɔŋ. 9 I daa tuun biit ki jiint biit paaki, i bia daa sukii ki jiint wunba sukiini, ŋaan jiinɔ a "Yennu n teen piisin a paak," kimaan Yennu din yiini a yin gaar piisime. 10 Li sɔb Yennu gbouŋ ni a: "Wunba loon manfoor nba mɔk parpeenn, ki loon wun tan la daa nba ŋan, wun nyinn u mɔŋ barbiit nan faak maan ni, 11 ki nyik biit tumu, ŋaan kii tuun toonŋana, ki lon parmaasir sɔnu kii waa-r, 12 kimaan ti Yomdaanɔ kpaa u ninbina niŋamm paake, ki bia gbia bi miaru yoo kura; ŋaan kɔn nan toonbiit damm na." 13 Li-i tee ki i numm mɔn nan toonŋana tumu, sɔɔ be ki saa teeni siar-ii? 14 Li-i lekii tee ki i la tubdatu i toonŋana paak, parpeenn sii tee i yare; i daa tiin nisaarik, i bia daa te ki li daamiini. 15 Tinin ti Yomdaanɔ Masia i para ni; yoo kur, yi teen siir ki jiin wunba boi-i yaa mɔk dindann nba na po. 16 Yi gatɔ soon nna kii tiin Yennu, ki ŋaan ki i benu-ii ŋan, ki bi-i sukii-i yaa tuun toonŋana Masia paak na, bin di fei bi sukit maŋ ni. 17 Li-i tee Yennu loomm nan i di biak toonŋana paak, li chee yin di biak toonbiit paak; 18 kimaan Masia din gaar biitdamm kur paak ki kpo yomkɔɔe; niŋanɔ maŋe din gaar biitdamm paak ki kpo, a wun te tin saan Yennu boor. Bi din kpiiu, ŋaan ki u bia fiir kuun ni Yennu Seyeeŋ paŋ ni. 19 Li Seyeeŋ nie ki u din saan sei nba kɔɔ sarik kpeentiŋ na boor, ki saa pak Yennu maan ki turib; 20 ŋamme din tee niib nba ki sak Yennu mɔb yoo nba ki u din dii sukuru Nowa yoo na, yoo nba ki ŋɔɔ Nowa din ŋamm ŋarungbeŋŋir; ki niib banniin kuukɔɔ din kɔɔ ŋaruŋ maŋ ki tinn nyun ni na. 21 Nyun maŋe tee Yennu nyunwuru ninnauŋ nba tinnit mɔtana; li ki tee ti gbanant paak wuru kaa, ŋaan li tee taa mei Yennu a wun wuur ti para, Yiisa Masia kuunfiiru na paake. 22 U saan Yendɔuŋ nie ki be Yennu niidiitu po, ki malakanba nan sanpaapo yentdamm kur saak u mɔb.

1 Piita 4

1 Masia nba din dii biak ti paak na, i mun chee i para kii dukii nna, kimaan wunba dii gbanant paak biak, u nyii toonbiit tumu niwa. 2 Laa jii yoo na ki saa, i daa jikit i gbanant ki tuun nisaarik loonbiiti, ŋaan kii waa Yennu loomm. 3 Yoo nba gar, i din jii i yoo ki tuun toonbiit, i din tuun i mɔŋ loonbiite, ki nyu daan yib, ki di diina ki mɔk fuut, ki tikii leeb danyuboa, ki mann pata, ki tuun nan binba ki tee Masiaweira na nba loon biaŋinba na. 4 Ŋaan mɔtana, yaa ki waab ki tuun li toonbiit na, li bakitibe, ki bi ji biir i sana. 5 Ŋaan bi tan saa pak bi mɔŋ biit ki tur Yennu nba teen siir a wun bu footib nan kpeemm buut na. 6 Ŋanne teen ki Masia din pak barŋanii na ki tur binba kpo na gbaa; bi lek din kpo nan sɔɔ kur nba kpenn biaŋinba nae; ki u din pak barŋanii maŋe ki turib a bin la yaak kii mɔk manfoa bi sei ni, Yennu paak. 7 Bona kur gbennu ji ki fɔk; li paak, yi soor i mɔŋ kii sub ki fit kii mei Yennu. 8 Linba gar bont kur tee yii loon i leebe fanu, kimaan lomm dɔkint biit bonchiann. 9 I gaan leeb saauŋ ki daa burimi. 10 Sɔɔ kur nan waa gaar yan nba nyii Yennu boore, i diar fanu ki jii yan maŋ ki somm i leeb. 11 Wunba ki Yennu sennɔ a wuu mɔɔntir barŋanii na, wuu mɔɔntir linba ki Yennu teenɔ nae; wunba mun ki Yennu sennɔ a wuu sommit leeb, wuu sommitib nan u paŋ nba ki Yennu teenɔ na, ki Yennu n la paku bonsiar kur ni Yiisa Masia paak; ŋɔɔ Yennue yen paku nan paŋ kur mɔkmɔk nan mɔkmɔk. Mamɔmm. 12 N naa walonkai, yaa di biak nba bikii-i na, i daa te ki li bakitiri ki tee bonsaann i boori. 13 I-i di biak Masia paak na, yii mɔk parpeenn man, ki yoo nba ki u tan saa nyi paanu nan yentsaakar na, i saa la parpeenn bonchiann. 14 Bi-i sukii-i Masia sann paak, parpeenn tee i yare, kimaan Yennu Seyeeŋ nba mɔk paŋ bonchiann na be i ni. 15 Ŋaan sɔɔ biak dinu-i tee nikpinu koo nanyuk koo toonbiit tumu koo kpikpiruk toona paak, li ki ŋani; 16 fi-i di biak faa tee Masiaweirɔ na paak, a daa tiin fei, ŋaan dont Yennu, Masia sann paak. 17 Yoo baara ki Yennu saa piin ki bu niib buut; u saa bu u tiɔŋ niib buute sinsinn; ki li-i tee ki u bu timm nba tee u niib na buut sinsinn, ki binba ki sak u barŋanii na yar ji sii tee nlee? 18 Li sɔb Yennu gbouŋ ni a "Li-i paar ki niŋamm n tinn, ki biitdamm nan binba ki tiin Yennu na ji saa teen nlee ki tinni?" 19 Li paak, binba di biak Yennu loomm paak na, bii tuun toonŋana, ki jii bi mɔŋ ki pet bi nantɔɔ Yennu nba tee barmɔnii daanɔ na.

1 Piita 5

1 Yimm tɔɔndamm nba be Yiisaweira sinsuuk ni na, n kpaaniie, min nba mun tee tɔɔndaanɔ, ki n ninbinn din la Masia nba dii biak biaŋinba, ki n bia saa lakin di manu bonchiann nba tan saa nyi paanu na, 2 n kpaaniie, yii guu Yennu niib nba be i nuu ni na, ki li daa tee miar kaa, ŋaan kii tee i yanbɔɔte, Yennu nba loon biaŋinba; ki li bia daa tee likirii paaki; ŋaan tee i kpan koor a i tume. 3 Daa mantik dia niib nba ki Yennu turi na nan nimmɔnni, ŋaan te ki i binbenŋaŋ n wannib baa sii be biaŋinba. 4 Ki Masia nba tee yudamm kur yudaanɔ na-i taŋŋi jen, i saa la nyɔɔt nba kan biiri. 5 Nnae mun, yimm nba tee nipaauŋ, yii saak saakab mɔi; ki i kur-ii gaan leeb mɔi, ki teen tarii i leeb boa, kimaan li sɔb Yennu gbouŋ ni a "Ŋɔɔ Yennu y‡en karinbaandamme, ŋaan sommit binba sikint bi mɔŋ na." 6 Li paak, yi sikin i mɔŋ ki teen Yabint Yennu nuu ni, ki u saa donni yoo nba ki u loon. 7 Jiin man i daamii kur ki turɔ, kimaan u baka be i ni. 8 Yii dia i mɔŋ man, kii mi i dataak nba tee Sintaanii na po; u line nan yambɔr na, ki loon wun la sɔɔ ki soor. 9 Y‡tirɔ man, ŋaan teen Masia yada fanu, kimaan i mi nan Masiaweira leeb nba be tingbouŋ na ni mun di biak nan yaa di biaŋinba nae. 10 Ŋaan li-i tee ki i dii biak yoo waaminna, Yennu nba mɔk ninbatinu kur na saa ŋamm i binbeŋ, ki chee i para, ki turi paŋ; ŋɔɔe din yiini Masia paak a yii di u manu nba kaa gbennu na. 11 Ŋɔɔe mɔk paŋ kura mɔkmɔk nan mɔkmɔk. Mamɔmm. 12 Sailas nba ki n mi nan u tee Masiaweirɔ nan barmɔnii na, ŋɔɔe sommin ki n sɔb gbouŋ nba ki fɔk na a n chee i para, ki kpaani, nan ŋanne tee Yennu maan nan barmɔnii. Li paak, yii diar fanu man. 13 I leeb nba be Babilɔnn ki Yennu din gannib na foontii. N bija Mak mun foonti. 14 Yi foont i leeb nan lomm. Parmaasir-ii be yimm nba kur tee Masiaweira na paak.

2 Piita 1

1 Min Simonn Piita nba tee Yiisa Masia daabir nan u toomii nae sɔbin gbouŋ na ki teen binba teen Yiisa Masia nba tee ti Tinntɔɔ nan Yennu yada u burchint paak, nan taa mun teen yada biaŋinba na. 2 Yaa bann Yennu nan ti Yomdaanɔ Yiisa na, ninbatinu nan parmaasir n ŋamm pukin i paak. 3 Yennu paŋ yab bonchiann; ki u teent linba kur tee manfoor nan yentinu yar kimaan taa miu na paak; ŋɔɔe din yiinit u yentsaakar nan binbenŋaŋ ni. 4 Li paak, ki u senn mɔsonjaana nba ŋan bonchiann ki turit a tin nyi kuun nba be tingbouŋ na ni loonbiit paak na, ŋaan gaar u binbeŋ. 5 Linba na paak, yii yabir i mɔŋ ki pukin binbenŋaŋ i yada paak man; ki bia pukin Yennu bannu i binbenŋaŋ maŋ paak; 6 ki bia pukin mɔŋdianu i bannu maŋ paak; ki bia pukin gbankur i mɔŋdianu maŋ paak; ki bia pukin yentinu i gbankur maŋ paak; 7 ki bia pukin naataann i yentinu maŋ paak; ki bia pukin lomm i naataann maŋ paak. 8 I binbeŋ-i be nnaie, li saa te ki i ŋamii bant ti Yomdaanɔ Yiisa Masia yoo kur, kii mɔk nyɔɔt bonchiann ki turɔ. 9 Ŋaan nirɔ nba ki mɔk binbenbooru maŋi, li yɔɔ jɔɔne, ki poŋ tamm nan Yiisa din nyinn u toonbiit sianyoowa. 10 N naa waas, Yennue yiini ki ganni, li paak, yi ŋamm yabir i mɔŋ paak man, ki te ki lin set wann nan i tee u niibe. Li-i tee ki i tuun linba na, i kan mi baa; 11 ki Yennu saa te ki yin tan kɔɔ ti Yomdaanɔ Yiisa Masia nba tee ti Tinntɔɔ na naan ni; u naan maŋe yɔɔ be ki ki mɔk gbennu. 12 Li paak, n sii yɔɔ tiani labaar nae yoo kur; n lek mi nan i poŋ gbatira, ki mir fanu, ki diar chimm; 13 ŋaan n dukin nan li ŋan ki n ŋamm tiari, ki fiin i dudukit, maa daa be n manfoor ni na. 14 N mi nan li kan yukiri ki n saa nyi n gbanant ni nan ti Yomdaanɔ Yiisa Masia nba din betin na. 15 Li paake ki n yabir n mɔŋ ki sɔb gbouŋ na a lii tiani labaar na po yoo kur, n kuun poorpo. 16 Taa poŋ din beti nan ti Yomdaanɔ Yiisa Masia tee paŋ daanɔe, ki bia tan saa jen na, labaar maŋ ki tee faak kaa, li tee barmɔniie. Ti ninbinae din la waa mɔk paŋ biaŋinba. 17 Ki ti din be nanɔ yoo nba ki ti Baa Yennu turɔ baakir yentsaakar ni. Li yoo maŋe ki kunkɔr nyii ti yabint Yennu nba tee yentsaakar daanɔ na boor ki yet a, "N Bilonkakii na, wunba ki n numm gboou nae na." 18 Ti mɔŋ mɔŋ tubae din gbat kunkɔr maŋ ki li nyii Yendɔuŋ ni na. Li yooe ki ti din be nanɔ jɔɔr nba ki Yennu gannir na paak. 19 Ŋanne mantik kat wannit nan Yennu sɔkiniinba nba din pak Yiisa labaar nba na tee barmɔniie. Li ŋan ki yin gbiint baa din yet linba na fanu. Bi mɔbona maŋ tee nan fitir nba teen yentu bunbɔnn ni biaŋinba nae mɔkmɔk nan yoo nba ki Yiisa tan saa jen; ŋanne saa te ki i numm n yent fanu. 20 Ŋaan linba gar li kur tee nnae; yii tian man nan Yennu sɔkiniinba nba din sɔb Yennu gbouŋ ni barii nba na ki tee bi tiɔŋ mɔmaan kaa, 21 kimaan Yennu sɔkiniinba sɔɔ din ki mi dukin u mɔŋ loomm ni ki paki, ŋaan Yennu Seyeeŋe din wantib biaŋinba ki bi saa pak labaar nba nyii ŋɔɔ Yennu boor na.

2 Piita 2

1 Faak sɔkiniinba nba din be Juu teeb sinsuuk ni sianyoo biaŋinba na, nnae ki faak wannteeb mun bia sii be i sinsuuk ni, ki wanti faak wannu woonin ni, linba saa biiri. Bi saa y‡t ti Yomdaanɔ Yiisa, wunba din daab na gbaa; ki Yennu saa dat bi tuba yiama. 2 Niib bonchiann saa weib ki mun tuun bi mɔŋ loonbiit. Bi paak ki niib saa fiak barmɔnii sɔnu na. 3 Bi sii mɔk nianchiɔŋ, ki sii kpanni ki ŋmabi. Yoo nba din gar na Yennu poŋ din yet a bi tee biitdamme, ŋaan li kan yukir ki u saa dat bi tuba. 4 Malakanba nba din tun toonbiit na, Yennu din ki nyik bi tubdatu. U din jii jarite lorib ki lub muu nba kan mi kpeen na ni; muu maŋ be bootuk nba sumii ki bia bɔn bonchiann nie; bi sii be leŋe mɔkmɔk nan daar nba ki u tan saa bu bi buut. 5 Nnae biak, u din ki nyik yaayoo ni tingbouŋ niib na. U din te nyume dii tingbouŋ maŋ, ki kpii binba kur ki tiinɔ na, ŋaan tinn Nowa, wunba din mɔɔntir Yenweiu po, ki tinn u ŋaateeb banlore ki pukin. 6 Ŋɔɔ Yennu bia din biir doi nba tee Sodom nan Gomora na, ki te ki li dii muu ki kpant tanpent, ki doi maŋ ni niib kura kpo. Linba nae tee siara ki want biitdamm waa tan saa dat bi tuba biaŋinba. 7 U bia din tinn Lot, wunba din tee niŋanɔ na. Biitdamm nba din tuun bi gbanant loonbiit biaŋinba na, li din biir ŋɔɔ Lot par bonchiann. 8 Lot, jaŋanɔ maŋ, din be, ki laat bi toonbiit, ki gbia baa piak mɔbonbiit biaŋinba. Baa din tuun toonbiit yoo kur biaŋinba na, li din biir u par bonchiann, kimaan u din tee niŋanɔe. 9 Ti Yomdaanɔ Yennu mi biaŋinba ki u saa fat niib nba tiinɔ, ki nyinnib mukisuk ni, ŋaan dat biitdamm tuba mɔkmɔk nan daar nba ki u tan saa bu bi buut. 10 Niib nba waa bi gbanant loonbiit ki chomm, ki sian yudamm, Yennu tan saa dat li damm tuba ki gar waa tan saa dat nileeb tuba biaŋinbawa. Faak wannteeb nba be i sinsuuk ni na tee tubkangbatae, bi ki tiin sɔɔ. Bi sukii malakanbae ki ki mɔk jaŋmaanii. 11 Malakanba mɔk paŋ nan yiikoo ki gariba, ŋaan bi ki yeen biit ki sukiib Yennu boori. 12 Li nibooru ki mi malakanba nba be biaŋinba, ŋaan sukiib. Niib maŋ ki mɔk dudukiti; bi tuun linba ki bi loone, ki naan muuk ni bonkobibiit nba ki niib tuu soorib ki kpi na. Bi mɔŋ toonbiite saa mantik biirib; 13 bi toonbiit nyɔɔt sii tee biirue. Bi tuun bi gbanant loonbiit yeenin nie. Bi-i be i ni yoo nba, bi tee nan jakint nba tuu taab chinchenn paak biaŋinba nae. Bi-i di jeet nani yoo nba, ŋaan bi lek dukii bi toonbiit na poe. 14 Bi-i la poo, bi ki nyikit u bandakiri, ki bia kan nyik bi biiti. Bi kpann niib nba ki mi Yennu sɔnu fanu nae ki boontib. Bi para ni, bi tumii nianchiɔŋo, ki te ki Yennu mɔtomm be bi paak. 15 Bi ki saak ki waa sɔnu nba tooki, ŋaan tɔkii sɔnganu; bi waa Beor bija Balaam nba din waa sɔnu nba nae. U din loon toonbiit tumu nyɔɔte, 16 ki Yennu kpaanɔ u toonbiit paak, ki u boŋ pak nanɔ nan nisaarik kunkɔr ki kpaanɔ a wun nyik u waatuk toona maŋ. 17 Niib maŋ booru tee nan bunbunn nba kaa nyun nae; bi tee nan sayuŋ nba ki wouŋ tuu gaanɔ nae. Yennu tan saa jiib ki lub bunbɔnchiɔŋ ni, mɔkmɔk nan mɔkmɔk. 18 Bi piak karinbaanbarii nba ki mɔk nyɔɔte a bin kpann niib nba yiab bi mɔŋ a bin nyi biitdamm ni na, ki kpannib a bii tuun gbanant loonbiit nan bonchonchonsin, 19 ki beerib a bi tan saa la fat-n-mɔŋ, ŋaan ki bi mɔŋ tee biit daaba, kimaan bonsiar nba nyann nirɔ, li bont tuu te nirɔ maŋ be daabsin nie. 20 Niib nba din mi ti Yomdaanɔ Yiisa Masia, wunba tee ti Tinntɔɔ, ki poŋ din nyik biit nba be tingbouŋ na ni na, li biit maŋ-i taŋŋi jen ki nyannib, bi joontu sii bi ki gar bi pinpiik nba din tee biaŋinbawa. 21 Bi-i bonni kii mi popeenn binbeŋ, li bo sii sɔ nan baa bannir ŋaan ji ki sak barŋanii nba ki bi din gbat na. 22 Bi tuun ki gbeent barjokit nba yet biaŋinba nae a "Bɔke tuu ŋmat ki di u mɔŋ siit," ki "Doorik-i wur nyun ŋaan u tuu ŋmat ki gbar u mɔŋ bakire."

2 Piita 3

1 N naa walonkai, maa sɔbin gbouŋ nba ki teeni na ji pukii gbant ŋanlee-e na. Li gbant ŋanlee kur ni, n poŋ tiari bona na powa, maa n fiin i dudukŋant. 2 N loon ki yii tian mɔmaan nba ki Yennu sɔkiniinba din pak li po yaayoo ni na, kii biakii tian sennii nba ki ti Yomdaanɔ, wunba tee ti Tinntɔɔ din pak na, ki timm nba tee u toomiinba beti na. 3 Sinsinn, n loon ki yii tian nan nisiab nba waa bi para loonbiit tan sii be dajoontii ni, ki sarikiti, 4 ki yeen a, "Yiisa Masia nba din senn mɔsonn a u tan saa jen na, ŋɔɔ lia-a? Ti baanba nba kpowa nan dinna, bonsiar kur kpan tee nan laa poŋ din tee biaŋinba durinya pinpiik ni nae." 5 Li niib ki saak bin tiar nan Yennu din yet mɔmaame ki nan sanpaak nan tiŋ yaayoo ni; ki din nyinn tiŋ na nyun ni, ki te ki li be nyun na sinsuuk ni, 6 ki bia te ki nyun dii tingbouŋ maŋ ki li biir. 7 Ŋaan ŋɔɔ Yennu mɔmaame bia lek sii dia sanpaak nan tiŋ nba be mɔtana na mɔkmɔk nan yoo nba ki u tan saa te ki li kura n di muu, ki biir biitdamm, kimaan li daar u tan saa bu bi buut ki biiriba. 8 N naa walonkai, i daa tammit barii na po; Yennu boor ŋarin, dayennkɔɔ tee nan bina tusaa nae; ki bina tusaa mun tee nan dayennkɔɔ na. 9 Nisiab dukii a li yukir nan Yennu n tun mɔsonn nba ki u din senn nawa, ŋaan li ki tee nna; u mɔk sukurue nani; u ki loon sɔɔ n tan kɔɔ muu ni, u loon ki sɔɔ kur n nyik u biite ki tinn. 10 Ti Yomdaanɔ daar maŋ baaru tan sii tee nan nanyukɔɔ baaru nae. Li daar maŋ, sanpaapo saa gbenn nan fujaann; ki muu nba di bonchiann tan saa di sanpaapo bonsiar kur, ki tingbouŋ na nan bonsiar kur nba be leŋ tan saa di muue ki boont. 11 Ki bont na kur nba tan saa di muu nna na, i dukin li ŋan ki yii tee niboor bee mani? Li ŋan ki yii mɔk binbenyeeŋ, kii tiin Yennu, 12 kii guu Yennu daar maŋ, ki yabir i mɔŋ paak ki daar maŋ n baar yian. Li daare ki sanpaapo tan saa kab ki biir, ki muu na tonu saa nann sanpaapo bonnankaa. 13 Ŋaan ti guu yoo nba ki sanpaapo paann nan tinpaann tan sii be nan Yennu nba din senn mɔsonn nba nae, ki popeenn toona kuukɔɔ sii be leŋ. 14 N naa walonkai, yaa guu bona maŋ na paak, yi yabir i mɔŋ kii mɔk parmaasir, nan binbenyeeŋ, ki daa mɔk biit Yennu boori. 15 Ti Yomdaanɔ nba di sukuru ki daa ki jen na, u loon ki yin bann nan u teen niibe yaak a bin tinna ki wun jen. Ti naa bilonkak Pɔɔl mun daan sɔb gbounsiɔk ki turi ki beti linba nawa, nan Yennu nba turɔ yan ki u be biaŋinba na. 16 U gbant kur ni, u din sɔbin ki piak Yennu daar maŋ poe ki wanti li labaar. Labasia be u gbant na ni ki paar nan nirɔ n bann li paak, ki nisiab nba ki mɔk yan, ki bia ki mɔk baa see sian na, jikitir ki kpintir faake, nan baa tuu kpintir Yennu gbouŋ maŋ paak, bolia ni biaŋinba na. Linba na paake ki Yennu tan saa dat bi tuba. 17 N naa walonkai, i poŋ mi baa tee biaŋinba. Yimm nba waa barmɔnii na, yi bann i yan ni, ki daa waa biitdamm faak sɔnii na, ŋaan yabir ki daa baa. 18 Yi ŋamm gaar ti Yomdaanɔ Yiisa Masia nba tee ti Tinntɔɔ na sommir ki pukin man, kii tumii u mɔmaan na. Ŋɔɔe yen dontir mɔkmɔk nan mɔkmɔk. Mamɔmm.

1 Jɔɔnn 1

1 N sɔbin gbouŋ na ki teeni a man wanni wunba ki bi yiu Yennu Mɔb nba teen niib manfoa na poe. Yoo nba ki Yennu din tan naan durinya na, ŋaan sɔɔ ki Mɔb maŋ poŋ bee-e. Mɔmaan maŋ nba din sik tingbouŋ na ni yoo nba, ki ti gbiint u pinpauk, ki bia laatɔ nan ti ninbina ki goriiɔ, ki ti nii bia siitɔ, 2 ki u din fiit ki ti set lau, ki mɔɔntir li siara ki teeni ki jiin manfoor nba kaa gbennu na po. Manfoor maŋe din be ti Baa Yennu peŋ, ki ti Baa maŋ jiiu ki wannit. 3 Linba ki ti la ki bia gbate ki ti mɔɔntir ki teeni na, a yin fit taan nant mɔtaauk. Barmɔniie setik, ti mɔtaauk ni, ti taant nan ti Baa Yennu nan u Bija Yiisa Masia, 4 ki ti loon ki ti kur n ŋamm la parpeenn bonchiann. Li paake teen ki n sɔbin teeni na. 5 Tɔn, barii nba ki ti din gbat ŋɔɔ Yiisa Masia boor ki mɔɔntir teeni na, li tee nnae: Yennu tee yentue, ki bunbɔnn kaa u ni. 6 Ki ti-i yaa timm nan Yennu mɔk mɔtaauk nan leeb, ŋaan ki bunbɔnn be ti ni, ŋann ti fa faake ti mɔi ni, ki ti toona set want nan ti fa faake. 7 Ŋaan li-i tee ki ti waa yentu sɔnu yoo kur, nan Yennu nba be yentu ni biaŋinba na, ŋann ti mɔk mɔtaauk nan ti leeb, ki u Bija Yiisa sɔme yentir ti para ni ki nyint biit kur. 8 Tɔn, ti-i yaa ti ki mɔk biit, ŋann ti kpann ti mɔŋe, ki barmɔnii kaa ti ni. 9 Ŋaan ti-i yɔɔ nyint ti toonbiit ki teen Yennu, tii mi nan u sii nyikit chabit ti toonbiit, ki bia yentir ti para ni ki nyint biit kur, kimaan u tee barmɔnii daanɔe ki bia tee popeendaanɔ. 10 Ti-i yaa ti ki tuun toonbiit, ŋann ti teenɔ faak daanɔe na, ki u maan maŋ kaa ti ni.

1 Jɔɔnn 2

1 N waas, n ki loon ki yii tuun toonbiiti. Li paake ki n sɔbin teeni na, ŋaan li-i tee ki sɔɔ tun toonbiit, ti mɔk sindantinnɔ ti Baa Yennu boor, ki ŋɔɔe tee Yiisa Masia, wunba tee popeendaanɔ na. 2 Waa din sik ki tan gaar ti paak ki kpo na, ŋɔɔe ji teen ti maruŋ Yennu boor ti toonbiit paak; ki u maruŋ maŋ ki tee timm Masiaweira kuukɔɔ toonbiit paak kaa, ŋaan li tee timm nan tingbouŋ na ŋaateeb kur toonbiit paake. 3 Ti-i dia Yennu sennii, ŋanne saa wann nan ti set miu, 4 ki li-i tee ki sɔɔ yet a "N miu," ŋaan bia ki dia u sennii, li yɔɔ tee faak daanɔe, ki barmɔnii kaa u ni. 5 Ki wunba dia ŋɔɔ Yennu maan, ŋɔɔe set loonɔ nan u yan kur. Ki jenna, daanɔ nba yaa u gaa nanɔ, see ki u binbeŋ tee nan Yiisa binbeŋ nba din tee biaŋinba na. Ŋanne ki u saa bann nan u set gaa nan Yennu. 7 N walonkai, maa sɔbin lomm sennu nba ki teeni na, li ki tee sennpaann kaa, ŋaan li tee sennu nba ki i din dɔŋ gbat ki li yukira na poe, ki sennkperu maŋe tee Yiisa maan nba ki i din gbat na. 8 Ŋaan mɔtana li bia daa tee nan sennpaann nae ki n sɔbin ki teeni, kimaan yoo lebitire, ki bunbɔnn yentir, ki niib nunii po yentir nan Yiisa barŋanii. Sennu nae ki Yiisa binbeŋ ni din want nan mɔnii, ki i binbeŋ na mun bia want nnae. 9 Li-i tee ki wunba yaa u be yentu ni ŋaan nƒn u naa bik, ŋann bunbɔnn lek daa be u ni; 10 ki daanɔ nba loon u naa bik, u be yentu na ni, li paak, siar kaa u ni ki saa te wun tun biiti. 11 Ŋaan wunba nƒn u naa bik, bunbɔnn be u ni, ki u benu ni mun bia bɔne, ki bunbɔnn maŋ dɔkin u numm powa, ki u ki laat waa saa siaminba po. 12 N waas, Yennu nyik chabi i biita, Yiisa Masia sann ni; li paake ki n sɔbin teeni na. 13 N chanbaanba, i mi Yiisa nba poŋ din yɔɔ be mɔkmɔk nan mɔkmɔk na; li paake ki n sɔbin teeni na. Naasimm, i nyann Sintaanii, bonbiiuk daanɔ nawa; li paake ki n sɔbin teeni na. 14 N waas, yaa mi ti Baa Yennu na, li paake ki n sɔbin teeni na. N chanbaanba, yaa mi Yiisa nba poŋ din yɔɔ be mɔkmɔk nan mɔkmɔk na, li paake ki n sɔbin teeni na. Naasimm, yaa mɔk paŋ, ki Yennu mɔmaan bia be i ni, ki i nyann Sintaanii, bonbiiuk daanɔ maŋ na, li paake ki n sɔbin teeni na. 15 I daa loon tingbouŋ na ŋaateeb sɔnu. I bia daa loon tingbouŋ na bona. Li-i tee ki sɔɔ loon tingbouŋ na ŋaateeb sɔnii, u ki loon ti Baa Yennu. 16 Niib mɔk niɔŋ nan bin tun bi mɔŋ loomm, ki bia nian bona nba ki bi laat na, ki bia mɔk parbifaant, ŋaan linba na kur lek tee tingbouŋ na ŋaateeb niɔŋo; li ki nyii ti Baa Yennu boor kaa. 17 Tingbouŋ na tan saa gbenn, ki tingbouŋ na ŋaateeb niɔŋ na mun bia saa gbenn, ŋaan wunba tuun Yennu yanbɔɔtoona, ŋɔɔe tan sii be mɔkmɔk nan mɔkmɔk. 18 N waas, durinya gbennu yoo baat. I poŋ mi gbat a Masia dataak na saa baar; ki mɔtana, Masia datai bonchiann poŋ baara, ŋanne te ki ti set bann nan durinya gbennu yoo baat. 19 Masia datai maŋ nyii ti nie; ŋaan bi ki tee ti yab kaa. Bi-i bonni tee ti yabie, timm nan ŋamme bo sii lakin be; ŋaan bi nyikita, ki li want nan bi kur ki tee ti yab setik nan mɔnii. 20 Yiisa Masia nba tee popeendaanɔ nae sikin u Seyeeŋ i paak, ki u te ki i kur mi wannu nba took. 21 Tɔn, li ki tee a i ki mi wannu nba took kaa ki n sɔbin ki teeni na, ŋaan yaa poŋ mi wannu maŋ na paake, ki bia mi nan faak wannu fɔk nan barmɔnii wannu na. 22 Ki ŋmee tee faak daanɔ? Li tee wunba yaa Yiisa ki tee Yennu Niganntɔɔ Masia, wunba ki u din tumɔ tingbouŋ na ni nae. Ŋɔɔe tee Yiisa dataak maŋ, ki y‡en ti Baa Yennu nan u Bija Yiisa maŋ. 23 Daanɔ nba y‡en Yennu Bija Yiisa, ti Baa Yennu ki be nanɔ, ŋaan wunba piak ki yeen a u teen yada nan Yiisa tee Yennu Bijae, ti Baa Yennu be nanɔ. 24 Yaa din sint gbat Yiisa maan nba pinpiik ni na, yii dia nna man. Li-i tee ki i dia maan maŋ, i sii gaa nan ti Baa Yennu nan u Bija Yiisae, 25 ki mɔsonn nba ki u senn ki turit na tee manfoor nba kaa gbennue. 26 N sɔbin linba na ki teeni ki chekinti ki jiin niib nba yaa bin kpanni na poe; 27 ŋaan yimm ŋarin, Yiisa sikin u Seyeeŋ maŋ i paaka. Seyeeŋ maŋ nba biar be i ni na, i ji kii loon sɔɔ n wannii, kimaan Seyeeŋ maŋ mɔŋe wanti bont kur, ki u wannu maŋe tee barmɔnii wannu, ki ki tee faak wannu kaa. Li paak, i yɔɔ kii gaa nan Yiisa man, nan Seyeeŋ maŋ nba wanti biaŋinba na. 28 Tɔn, n waas, yii gaa nan Yiisa man. Li-i tee ki i yɔɔ gaa nanɔ-ie, ti sii mɔk parcheenn, ki kan di fei u boor yoo nba ki u tan saa jen na. 29 I mi nan Yiisa Masia tee popeendaanɔe; li paak, i mun bann nan binba kur tuun popeenn toona, bi mun tee Yennu waase.

1 Jɔɔnn 3

1 Lek gotir man lonbooru nba ki ti Baa Yennu mantik loont na. U lomm maŋ ji saa yabite, ki u teent u waas, ki ti set mun tee u waase. Ŋaan tingbouŋ na ŋaateeb ki mi taa tee nibooru nba, kimaan bi ki mi Yennu. 2 N walonkai, mɔtana ti tee Yennu waase, ŋaan li lek daa ki wann yent taa tan sii be biaŋinba. Ŋaan taa daa mi linbae na, a Yiisa-i taŋŋi jen, ti tan saa la waa set tee biaŋinbawa, li paak, ti tan saa kpint ki tee nan ŋɔɔ nae. 3 Ki bia jenna, binba kur daan u jenu maŋ po, ŋamme dia bi mɔŋ fanu, nan waa be fanu biaŋinba na. 4 Binba kur tuun biit, ŋamme biir Yennu sennu, kimaan toonbiit tumu biir Yennu sennue. 5 I mi nan Yiisa Masia din baar tingbouŋ na ni a wun nyinn niib biite; ki biit kaa u ni. 6 Ki wunba kur gaa nanɔ, u ki tuun biiti. Ŋaan wunba tuun biit, u daa ki bann Yiisa nba tee wunba, ki bia ki miu. 7 N waas, i daa saak sɔɔ n kpanniini: daanɔ nba tuun popeentoona, ŋɔɔe tee popeendaanɔ, nan Yiisa nba tee popeendaanɔ na. 8 Sintaanii poŋ tee biitdaanɔe piinu niwa nan mɔtana, ki daanɔ nba tuun biit, ŋɔɔe tee Sintaanii yɔɔ. Yennu Bija Yiisa baar a wun biir Sintaanii toonae. 9 Binba kur tee Yennu waas nyii bi Baa Yennue, ki ki tuun biiti. Bi ki fit tuun biiti, kimaan baa gaar bi Baa Yennu binbeŋ na paak. 10 Ŋaan binba kur ki tuun popeenn toona, bi ki tee Yennu waas kaa. Ki bia jenna, binba kur ki loon bi naa waas, bi ki tee Yennu waas kaa. Ŋanne want binba tee Yennu waas nan binba tee Sintaanii waas. 11 Yaa din dɔŋ gbat Yiisa maan nba pinpiik ni na tee nnae: a tii loon ti leeb. 12 Li ki ŋan ki tii be nan Keenn nba din be biaŋinba na; ŋɔɔ din tee bonbiiuk daanɔ Sintaanii yɔɔe, ki kpii u waarɔ. Bee paake ki u din kpiiu? Kimaan u waarɔ toona din ŋan, ŋaan ki u yar bi. 13 Tɔn, n naa waas, li-i tee ki tingbouŋ na ŋaateeb nami, i daa te ki li teei bakitnauŋu. 14 Taa loon ti naa waas na, ŋanne want nan ti nyii kuun paŋ ni, ki be manfoor nba kaa gbennu ni. Ŋaan daanɔ nba ki mɔk li lonbooru, ŋɔɔ ŋarin biar be kuun paŋ nie. 15 Ki jenna, wunba mun nƒn u naa bik, u tee nikpiiruko; ki i mi nan manfoor nba kaa gbennu kaa nikpiiruk ni. 16 Gotir man, Yiisa nba din gaar ti paak ki kpo nae wantit lomm nba tee biaŋinba; ki li mun kpaa talase ki tin chibin ti saaŋmanii ti naa waas paak. 17 Daanɔ nba mɔk ki li jaŋitɔ, ŋaan la ki u naa bik pɔt siar, ki u baka kaa u ni, Yennu lomm kaa daanɔ maŋ ni. 18 N waas, ti lomm maŋ daa be ti mɔi ni kuukɔɔ kaa; ŋaan kii tee barmɔnii lomm nba sommit niibe. 19 Li-i tee ki ti tuun nna, ŋanne ki ti saa bann nan ti waa barmɔnii wannu, ki bia sii mɔk parcheenn Yennu boor. 20 Li-i tee ki ti dudukit wantit nan ti mɔk biit, ŋaant man ki ti tiar nan Yennue chee ti dudukit ki bia mi barii kur. 21 Tɔn, n walonkai, ti dudukit-i kii wannit nan ti tun bonkpetiri, ŋann ti mɔk parcheenn Yennu boor. 22 Ki jenna, ti-i dia u sennii ki tuun linba pent u parie, ŋanne saa te ki u teent linba ki ti meiɔ. 23 Linba nae tee u sennu maŋ, a ti teen u Bija Yiisa Masia yada kii loon ti leeb nan waa sennit biaŋinba na. 24 Binba kur dia u sennii maŋ, ŋamme gaa nanɔ, ki u mun be bi ni. Ŋanne teen ki ti bann nan u yɔɔ be ti ni, kimaan u Seyeeŋ na be ti ni.

1 Jɔɔnn 4

1 N walonkai, i daa tee binba kur yaa bi mɔk Yennu Seyeeŋ na maan yada, ŋaan bikintib man, ki laan bi sei maŋ nyii Yennu boor amii lee, kimaan faak sɔkiniinba bonchiann nba kpann niib na poŋ baara, ki lin niib ni. 2 Wunba kur ki seek piak u ni, ki u yaa u teen yada a bi din mar Yiisa Masia nisaarike, ŋɔɔe mɔk Seek nba nyii Yennu peŋ. Li-i tee ki u yeen nna, ŋanne ki ti saa bann nan li tee Yennu Seyeeŋe. 3 Ŋaan wunba ki seek piak u ni, ki u yaa u ki teen yada nan bi mar Yiisa nisaarike, ŋɔɔe ki mɔk Yennu Seyeeŋi. Li seek tee Yiisa dataak na yare. Bi din poŋ beti nan Yiisa dataak maŋ saa baara, ki mɔtana u poŋ baar tingbouŋ na niwa. 4 N waas, yimm tee Yennu yabe, ki Yennu Seyeeŋ be i ni, ki mɔk paŋ ki gar Sintaanii nba be tingbouŋ na ni. Ŋanne te ki i nyann faak sɔkiniinba maŋ. 5 Ŋamme tee tingbouŋ na yab. Li paak te ki bi piak tingbouŋ na niɔŋ po, ki tingbouŋ na ŋaateeb fiin bi po. 6 Ŋaan timm ŋarin tee Yennu yabe; ki binba mi Yennu, ŋamme fiin ti maan ni. Ŋaan binba ki tee Yennu yabi, bi ki fiin ti po. Ŋanne te ki ti saa bann wunba mɔk Yennu Seyeeŋ nba want barmɔnii wannu, nan wunba mɔk Sintaanii seek nba want faak wannu na. 7 N walonkai, tii loon ti leeb man, kimaan lomm tee Yennu yare, ki binba mɔk lomm, ŋamme tee Yennu waas ki bia miu. 8 Yennu tee lomme, ki binba ki mɔk lommu, bi ki miu. 9 Yennu din sikin u Bijayemmir tingbouŋ na ni a tin la manfoor u paak, ki nae fiit wannit nan Yennu set loont. 10 Lomm nba set tee lomm nan barmɔnii ki tee timm kaa loon ŋɔɔ Yennu, ŋaan li tee ŋɔɔ Yennue din loont, ki sikin u Bija tingbouŋ na ni ki u gaar ti paak ki kpo, ki teen ti maruŋ ŋɔɔ Yennu boor, a tin la nyikin-chab ti biit paak. 11 N walonkai, Yennu nba loont biaŋinba na, li kpaa talas ki tii munii loon ti leeb nna. 12 Sɔɔ kaa ki mi la Yennu nan u ninbina, ŋaan ti-i loon ti leebie, Yennu sii yɔɔ be ti ni, ki ti sii mɔk lomm nba ki u teent na nan barmɔnii. 13 Ŋɔɔe bia sikin u Seyeeŋ ki turit, ŋanne te ki ti bann nan ti gaa nanɔ, ki u mun be ti ni. 14 Linba pukin biak, ti din laat u Bija, ki mɔtana ti mɔɔntir nan u Baa Yennue sikinɔ tingbouŋ na ni, a wuu tee tingbouŋ na ŋaateeb Tinntɔɔ. 15 Wunba yaa u teen yada nan Yiisa tee Yennu Bija, ŋɔɔe ki Yennu be u ni, ki u mun bia gaa nan Yennu. 16 Ki ti mɔŋ mɔŋ mun bann Yennu nba loont biaŋinba, ki bia teen yada nan u set loont. Yennu tee lomme, ki daanɔ nba yɔɔ mɔk lomm nna, ŋɔɔe gaa nan Yennu, ki Yennu mun be u ni. 17 Ki jenna, li-i tee ki ti waa lomm sɔnu nan barmɔnii, Yennu buut daar-i taŋŋi baar, ti kii mɔk jijeet, kimaan Yiisa binbeŋ nba tee biaŋinba na, ti binbeŋ mun tee nnae tingbouŋ na ni. 18 Ti-i mɔk lomm, jijeet sii kaa. Li-i tee ki lomm mantik be nan mɔnii mɔnii, jijeet kan la yaak kii be ti ni, kimaan tubdatu paake ki ti tuu jee. Li-i tee ki nirɔ mɔk jijeet, u ki mɔk lomm nan barmɔnii. 19 Yennue sint loonit; ŋanne teen ki ti mun mɔk lomm. 20 Daanɔ nba yaa u loon Yennu, ŋaan bia nƒn u naa bik, u tee faak daanɔe. Li-i tee ki u ki loon u naa bik nba ki u laatɔ nan u ninbina, nlee ki u sii fit loon Yennu nba ki u ki laatɔ nan u ninbina na? 21 Yiisa din senn sennu ki yet a wunba loon Yennu, see ki u loon u naa bik mun.

1 Jɔɔnn 5

1 Binba kur teen yada nan Yiisa tee Yennu Niganntɔɔ Masia na, li yabe tee Yennu waas. Ki daanɔ nba loon nirɔ, u bia sii loon nirɔ maŋ waase. 2 Li-i tee ki ti loon Yennu ki tuun linba ki u sennii want na, ŋanne saa te ki tin bann nan ti loon Yennu waas; 3 ki li-i biakii tee ki ti dia u sennu, ŋanne want nan ti loonɔ. Ki bia jenna, u sennu maŋ ki paari, 4 kimaan binba kur tee Yennu waas, ŋammii fit nyant tingbouŋ na ni jinjammii. Linba te ki ti nyant tingbouŋ na jinjammii na tee ti yada teenu nie. 5 Ki ŋmee sii nyant jinjammii maŋi? Wunba teen yada nan Yiisa tee Yennu Bija. 6 Ŋɔɔ Yiisa Masiae tee wunba din baar nan nyun nan sɔn; u din ki baar nan nyun kuukɔɔ kaa, ŋaan u din baar nan sɔn biak. Ki Yennu Seyeeŋ tee siaradaanɔ, kimaan Seyeeŋ maŋe tee barmɔnii daanɔ. 7 Tɔn, binba tee siaradamm maŋ tee bantaae; 8 ŋamme tee Yennu Seyeeŋ, nan nyun nan sɔn maŋ; ki bi bantaa na taan mɔyomm ki tee siara. 9 Nnae ki Yennu teen siara u Bija Yiisa po, ki u siara maŋ chee nirɔ yar. Ti-i tee nirɔ siara yadaie, ŋann ti saa teen Yennu siarae yada ki gar nirɔ yar. 10 Wunba teen Yennu Bija maŋ yada, ŋɔɔe mɔk Yennu siara maŋ u par ni; ki wunba ki teen u siara maŋ yada, u teenɔ faak daanɔe na, kimaan u ki teen yada nan siara nba ki Yennu teen u Bija po na tee mɔnii. 11 Yennu siara maŋ tee nnae: a u turit manfoor nba kaa gbennu, ki manfoor maŋ nyii u Bija Yiisa nie. 12 Wunba gaa nan Yennu Bija na, ŋɔɔe mɔk manfoor maŋ; ŋaan wunba ki gaa nan Yennu Bija maŋ-i, u ki mɔk li manfoori. 13 N sɔbin gbouŋ na ki teen yimm nba teen Yennu Bija yada nae, kimaan n loon ki i bann nan i mɔk manfoor nba kaa gbennu. 14 Tɔn, ti mei Yennu nan parcheenn, kimaan ti mi nan li-i tee ki ti meiɔ linba ki u loon wun turit na, tii mi nan u gaan ti miaru. 15 Ti-i mi nan u set gaan ti miaru, tin bann nan ti poŋ gaar linba ki ti miarɔ li po nawa. 16 Sɔɔ-i laat u naa bik ki u tuun biit nba kan baar nan kuumi, li daanɔ-ii mei Yennu u paak, ki Yennu n chab biitdaanɔ maŋ ki turɔ manfoor, kimaan u chabit binba tuun biit nba ki tee kuun yar ki teemm manfoa. Ŋaan toonbisiar be, ki tee kuun toonn. N ki yaa yii mei Yennu kii teen binba tuun biit maŋ booru kaa. 17 Toona kur nba ki ŋan lek tee biite, ŋaan toonbisai be ki kan baar nan kuumi. 18 Ki ti mi nan damm nba tee Yennu yab, bi ki tuun biiti, kimaan Yennu Bija Yiisa guub, ki bonbiiuk daanɔ Sintaanii kan fit teemm siari. 19 Ki ti bia mi nan timm Masiaweira tee Yennu yabe, ŋaan tingbouŋ na ŋaateeb kur nba ki tee Masiaweira na be Sintaanii nuu nie. 20 Ti mi nan Yennu Bija Yiisa din sik tingbouŋ na ni ki tan turit yan a tin bann barmɔnii Yennu. Taa gaa nan u Bija Yiisa Masia na paak, ŋanne bia te ki ti gaa nan u Baa Yennu; ki ŋɔɔe set tee barmɔnii Yennu, ki bia tee daanɔ nba teent manfoor nba kaa gbennu. 21 N waas, nyint i mɔŋ pata ni man.

2 Jɔɔnn 1

1 Min Jɔɔnn nba tee Masiaweira saakɔɔ nae sɔbin gbouŋ na ki teen fin n niipoo nba ki Yennu ganna na, nan a waas. N looni nan barmɔnii, ŋaan min kuukɔɔ kaa looniini. Binba kur saak Yennu barmɔnii wannu na mun bia looni nnae. 2 Min nan ŋamme looni, kimaan barmɔnii wannu be ti para ni ki sii yɔɔ be ti ni mɔkmɔk nan mɔkmɔk. 3 Ti Baa Yennu nan u Bija Yiisa Masia sommir nan bi ninbatinu nan bi parmaasir sii be ti paak, nan taa waa barmɔnii wannu nan lomm sɔnu biaŋinba na. 4 N daan mɔk parpeenn bonchiann nan maa la a wasiat, ki bi waa barmɔnii wannu nba ki ti Baa Yennu sennit na. 5 N niipoo, n meia, ŋaant ki ti kur-ii loon ti naa waleeb. Linba na ki tee sennpaann kaa ki n sɔbani, ŋaan li tee sennu nba ki ti din dɔŋ gbat pinpiik niwa mɔkmɔk nan dinnae. 6 Ti-i yɔɔ saak Yennu sennu, ŋanne want nan ti loonɔ nan mɔnii, ki sennu maŋ nba ki ti din gbia pinpiik niwa mɔkmɔk nan dinna na, li sennu yaa tii waa lomm sɔnu. 7 Tɔn, kpinkpannii damm bonchiann poŋ yat saan lokir kur po tingbouŋ na niwa, binba yaa ŋamm ki teen yada a bi mar Yiisa ki u tee nisaarik na. Li nibooru tee kpinkpannii damme, ki bia tee Yiisa datai. 8 Li paak, i mi man kii tan kɔŋ linba ki i yiab li paak na, ki tan la i nyɔɔt kur Yennu boor. 9 Daansɔɔ nba ki gaan Yiisa Masia wannu bonŋann ŋaan pukii u mɔŋ yar, Yennu ki be nanɔ, ŋaan wunba saak wannu maŋ ki ki nyikiti, ti Baa Yennu nan u Bija Yiisa Masia be u ni. 10 Li-i tee ki daanɔ nba baar i boor, ki ki want Yiisa Masia wannu nba tooki, i daa gaanɔ i ŋei ni, ki taan daa foontɔ gbaa, 11 kimaan wunba foontɔ, u mɔŋ taa daanɔ maŋ toonbiit poe na. 12 N mɔk mɔbona bonchiann ki loon ki n bo turi, ŋaan n ki loon ki n sɔb gbouŋ ni kaa ki turiini, n mɔk dindann nan n saa baar ki gɔni, ki tin pak nan leeb, ki li-i tun nna, li saa maŋit bonchiann. 13 A niipoo nba ki Yennu gannɔ na waas foonta.

3 Jɔɔnn 1

1 Min Jɔɔnn nba tee Masiaweira saakɔɔ nae sɔbin gbouŋ na ki teen n yɔɔk Gayus, fine ki n nian nan mɔnii. 2 N yɔɔk, n mei Yennu a paak a fii mɔk laafia, ki a bont kur n somm fanu nan a seek nba be fanu Yennu boor biaŋinba na. 3 N mɔk parpeenn bonchiann nan ti naa wasiat nba daan baar, ki tan betin faa waa Yennu barmɔnii wannu na biaŋinba, ki a benu nae bia want li sɔnu nan mɔnii. 4 Siar ki penn n par ki mantik baar maa gbat a n waas waa wannu nba took na. 5 N yɔɔk, faa sommit ti naa waas nan binba lek tee saamm na, a tuun linba ŋane. 6 Baa tuu baar Masiaweira lakinu ni yoo nba, bi tuu tiar a burchint maŋ po. Li paak, bi-i tuu kii baar a boor, ki a ŋammit bi sɔnii ki sommitibie, ŋann a tuun bonŋanne na. I diab bonŋann kimaan bi tee Yennu yabe. 7 Laa tee Yiisa sann paak nae ki bi lin mɔɔntir u maan maŋ, ŋaan ki gaan siar binba ki tee Masiaweira na boori. 8 Li paak, timm Masiaweira ŋarin, li kpaa talase nan tii gaan li nibooru saauŋ. Ŋanne saa te ki timm nan ŋamm-ii taa Yiisa barmɔnii na wannu mɔɔntii. 9 N poŋ mi sɔb barsai nna ki tur Masiaweira nba be a boor na, ŋaan ki Diotrefes y‡en n mɔb, kimaan u loon wun pur u mɔŋ nijaanne. 10 Li paak, mi-i taŋŋi baar, n saa fiit linba kur ki u tun, ki li tee bonbiir nan faak nba ki u pak biirit na. Ŋaan biit nba ki u tuun maŋ, li lek daa ki gboo u nummu. Ti naa waas nba tuu baar u boor na, u tuu ki gaanibi, ki damm nba tuu loon bin gaar ti naa waas maŋ saauŋ, u bia tuu ber nyinnib Masiaweira lakinu maŋ nie. 11 N yɔɔk, daa tokii sɔɔ toonbiiti, ŋaan kii tuun linba ŋan. Wunba tuun bonŋann, u tee Yennu yɔɔe; ŋaan wunba tuun toon-biit, u ki bann Yennu. 12 Sɔɔ kur piak Demetriuse; ki u benu nae want nan u waa barmɔnii wannu; ki ti mɔŋ mun piakɔ; ki a mi nan ti set tee barmɔnii damme. 13 N bia mɔk maan bonchiann ki loon ki n pak tura, ŋaan n ki loon ki n sɔbir gbouŋ ni kaa ki turani. 14 Ŋaan n mɔk dindann nan n saa baar ki la-a daa ŋanlelee na, ki tin pak nan leeb. 15 Parmaasir-ii be a paak. Ti yɔɔsinba foonta. Ti yɔɔsinba nba mun bia be a boor ni na, a foont bi kur yenɔ yenɔ.

Juud 1

1 Min Juud nba tee Yiisa Masia toontunnɔ, ki bia tee Jeems naa bik nae sɔbin gbouŋ na ki teen niib nba ki ti Baa Yennu gannib ki loonib, ki Yiisa Masia guub na. 2 Yennu n tini ninbaauk, ki turi parmaasir nan lomm bonchiann. 3 N naa walonkai, n ninbinn daan mɔn nan ki n sɔb gbouŋ ki turi, ki saan gaan tinnu nba tee ti kur yar na po; ŋaan mɔtana li ji kpaa talas ki n sɔb kpaaniie ki yin yabir i mɔŋ ki dia yada labaar nba ki Yennu tur u niib na fanu, ki daa saak ki sɔɔ lebitiri, 4 kimaan nisiab nba ki tiin Yennu na kɔɔ i sinsuuk ni woonin nie, ki lebit ŋɔɔ Yennu ninbatinu labaar na a bii tuun bi gbanant loonbiit; ki ki saak Yiisa Masia mɔbi; ŋɔɔ kuukɔɔe tee ti Yudaanɔ nan ti Yomdaanɔ. Biitdamm maŋ tubdatu poŋ sɔb Yennu gbouŋ ni ki li yukira. 5 Maa yaa n beti linba na, i poŋ gbat li kura, ki mir, ŋaan n loon ki n tiari li poe; ti Yomdaanɔ Yennu din fat u niib ki nyinnib Ijipt tiŋ ni, ŋaan li poorpo ki u kpii bi siab nba ki teenɔ yada na. 6 Nnae biak, malakanba nba din ki dia yaak nba ki Yennu turib na nan li sɔnu na, ki bia din ki biar be bi binbeboa sanpaapo na, ki Yennu baamm bant ki lub sarik bootsunsuŋ nba bɔn ni, ki guu dagbeŋŋir nba ki u saa bu bi buut na. 7 Nnae biak ki doi nba tee Sodom nan Gomora nan digbana nba kpiar na niib din tuun chonchonsin, ki waa niɔŋ nba bi bonchiann, ki bi la tubdatu nba tee muu ki li di mɔkmɔk nan mɔkmɔk; ki li tee kpaanii ki tur sɔɔ kur. 8 Nibooru maŋ mun bia daa mɔk dudukit nba ki bi tuun biir bi gbanant, ki tee tubkangbata, ki bia sukii Yennu malakanba. 9 Ŋaan malakanba saakɔɔ nba ki u sann tee Maikel na, ŋɔɔ nan Sintaanii nba din kɔn Moses gbanant paak na, ŋaan Maikel mɔŋ din ki sukir Sintaanii, u din betɔe a "Yennu saa wanna yan." 10 Ŋaan niib na ŋarin sukii bont kur nba ki bi ki bann li paake, ki tuun linba kur ki bi loon nan bonkobit nba ki mɔk dudukit na, ki biir bi mɔŋ. 11 Parbiir be bi paak; kimaan bi wei Keenn sɔnbiiuk nawa; bi bia tee kpinkpannii damme likirii paak nan Balaam nba din tee biaŋinba na; ki bia tuun nan Kora nba din tun ki ki sak Yennu mɔb ki tan kpo na; bi mun tan saa kpo nnae. 12 Bi tee barite i mɔtaauk jaamm dinu ni, ki lakin di nan leeb, ki ki tiin Yennu, ki mɔk jawuuk ki dint bi mɔŋ kuukɔɔ. Bi tee nan sanpagbant nba ki baat nan saak ŋaan ki wouŋ da nae; ki bia tee nan tiinii nba ki loon li lomm yoo na, bi kpoe ki tɔr, kimaan bi jiina kur fikite ki koor. 13 Bi tee nan mɔkgbeŋŋir nyunpana nba fi ki pukir nan jakint nae. Bi bia tee nan ŋmaabira nba tuu ŋabir ki lin nae; ki bunbɔnchiɔŋ nba kaa gbennu be ki guub. 14 Enok, wunba waa Adam yaaboona munlore ni na, din sɔkin ki yet bi po a "Yennu nan u kasii malakanba tusaa tusaa baat 15 a wun bu nisaarik kur buut, ki biir binba kur ki tiinɔ, baa tuun toonbiit, ki ki saak u mɔb biaŋinba; nan biitdamm kur nba piak mabiit nba kur ki biirɔ, ki bi baka kaa nanɔ biaŋinba na." 16 Bi tee bunburimii damme; bi numm ki mi gboo; ki bi tuun bi mɔŋ loonbiit, ki mɔk parbifaant bonchiann, ki korin niib a bin la baa loon linba. 17 N naa walonkai, i tian man maan nba ki ti Yomdaanɔ Yiisa Masia toomiinba din yet na. 18 Bi din yet a "Dajoontii maŋ ni, niib nba waa bi mɔŋ gbanant loonbiit na tan saa fiir ki sarikiti." 19 Li niboorue baat nan bɔkitu i sinsuuk ni; bi gbanant loomm kɔɔe diab, Yennu Seyeeŋ na kaa bi ni. 20 N naa walonkai, yii chee i para man Masia labayeenn nba ki i teenir yada na paak, kii mei Yennu u Seyeeŋ paŋ ni, 21 kii tee niib nba ki Yennu loonib, kii guu yoo nba ki ti Yomdaanɔ Yiisa Masia saa turi manfoor nba kaa gbennu, u ninbatinu na paak. 22 Binba dudukit laŋ na, yi tinib ninbaauk, 23 ki fatib ki nyinnib Sintaanii muu ni; ki binba mɔk bi loonbiit dɔk na, yi tinib ninbaauk, ki bia kii mɔk jaŋmaanii, ki daa nakii bi biit boori. 24 Yennu saa fit guui ki i daa baa, ki saa baar nani u tɔɔnn yentsaakar ni, ki i ki mɔk biit, ki i sii mɔk parpeenn bonchiann; 25 ŋɔɔ nba tee Yen-yenɔkɔɔ ki tinnit ti Yomdaanɔ Yiisa Masia paak na, u yen paku nan yent nan paŋ nan bont kur yudant, yoo nba din gar na, nan mɔtana, nan mɔkmɔk nan mɔkmɔk. Mamɔmm.

Fiitu 1

1 Maan nba ki Yiisa Masia din fiit na sɔb gbouŋ na nie. Yennue din turɔ maan maŋ a wun wann u toontunna linba saa teen mɔtana. Masia din tun u malaka u toontunnɔ Jɔɔnn boor, a wun betɔ maan maŋ kur. 2 Ŋanne ki Jɔɔnn fiit linba ki u la na kur ki wann, ki li tee barii nba nyii Yennu boor, nan linba ki Yiisa Masia fiit ki wannɔ na. 3 Wunba karin sɔkinii mɔmaan nba sɔb gbouŋ na ni, parpeenn tee u yare, ki binba gbia mɔmaan maŋ ki saakir, parpeenn tee bi yare mun, kimaan yoo na pera ki linba na kur saa tun. 4 Min Jɔɔnne sɔbin gbouŋ na ki teen Masiaweira nba be digbana ŋanlore ni, Asia yent ni na. Yennu nba din be, ki bia daa be, ki bia tan sii be mɔkmɔk nan mɔkmɔk ki sei ŋanlore be u naangbouŋ tɔɔnn na, nan Yiisa Masia, wunba mɔɔntir Yennu maan nan barmɔnii, ki tee sinsinn daanɔ nba din kpo ki fiir kuun ni, ki bia tee tingbouŋ na kpanbara kur Kpanbar na, bin turi sommir nan parmaasir. U loont, ki gaar ti paak ki kpo, ki nyinnit ti toonbiit daabsin ni; 6 ŋaan te ki ti tee u naan ni niib nba tee mannteeb, a tin tun u Baa Yennu toonn; ŋɔɔe yen paku nan paŋ mɔkmɔk nan mɔkmɔk. Mamɔmm. 7 Gotir man, ŋɔɔe be sanpagbant ni ki baat na. Sɔɔ kur ninbina tan saa lau, nan binba din ŋmu-u na gbaa. Yoo nba ki u tan sii baat na, tingbouŋ na niib kur saa bui u paak. Mamɔmm, li saa teen nnawa. 8 Ti Yomdaanɔ Yennu, wunba mɔk paŋ kur, ki din be, ki bia daa be, ki bia tan sii be mɔkmɔk nan mɔkmɔk na, ŋɔɔe yeen a "Mine tee bont kur pinpiik nan li gbennu." 9 Tɔn, min Jɔɔnn nba tee i naa bik ki taan nani ki di biak nan sukuru Yiisa paak na, maa din lin ki mɔɔntir Yennu maan, nan Yiisa barŋanii na paake, ki bi jiin ki saan nanin Patmos tiŋ nba ki nyun lintir na ni. 10 Ki lasir dasiar ki Yennu Seyeeŋ fiir n ni, ki n gbat kunkɔsaakar ki li naan kikaak ki piak n poorpo, 11 ki betin a n sɔb linba ki n laat na ki teen gbouŋ ni, ki nakin tur Masiaweira nba be digbana ŋanlore na ni, binba be Efesus nan Simirna nan Pegamum nan Tiataira nan Saadis nan Filadelfia nan Laodisea na. 12 Ki n ŋmant ki yaa n got wunba piak ki teenin na; maa ŋmant yoo nba ki n la salima fita ŋanlore see. 13 Ki sɔɔ be li sinsuuk ni ki naan nisaarik Bik, ki lia liatfoouk ki li siit u taapant, ki salima gbann boob u nyaauk ni, 14 ki u yut peen nan gungunt na, ki u ninbina naan mupeenu, 15 ki u taapant nyirii nan kut nba ki bi tuu pur muu ni ki li nyirii biaŋinba na, ki u kunkɔr fu nan siɔk kpenu nba tuu fu biaŋinba na. 16 Ki u kub ŋmaabira ŋanlore u niidiitu, ki jukbanjiak nba di mɔleemii tant nyii u mɔb ni, ki u numm po yeen nan yonnu nba tuu yeen yensuuk ni na. 17 Maa lau yoo nba ki n baa dɔɔr u tɔɔnn nan kpeemɔ na. Ki u jii u niidiitu ki yii n paak, ŋaan yet a "Daa tiin jaŋmaanii; mine tee bont kur pinpiik nan li gbennu; 18 ki bia tee footɔɔ na, ki din kpo, ŋaan mɔtana n fiira ki sii fo mɔkmɔk nan mɔkmɔk, ki bia mɔk kuun nan kpeentiŋ paŋ; 19 li paak a sɔb linba ki a la mɔtana, nan linba be mɔtana, nan linba tan saa tun yoo nba waa; 20 ŋmaabira ŋanlore nba ki a la n niidiitu ni, nan salima fita ŋanlore na woonin ni paak tee nnae: ŋmaabira ŋanlore nae tee n weira nba be digbana ŋanlore na malakanba, ki fita ŋanlore na mun tee n weira bujir munlore maŋ."

Fiitu 2

1 Ki wunba ki n lau na betin a n sɔb labaar na ki tur u weira nba lakin be Efesus doo ni na malaka a "Labaar na nyii wunba dia ŋmaabira ŋanlore u niidiitu ni, ki bia somm salima fita ŋanlore sinsuuk ni na boore: 2 ŋɔɔe yet a 'N mi i toona nba tee biaŋinba, nan yaa yabir ki tuun toonŋana nan sukuru biaŋinba, ki bia mi nan i ki loon nibiit i sinsuuk ni, li paake ki i din bikin binba tuu yaa bi tee n toomiinba ŋaan ki ki tee na, ki bann nan bi tee fai damme. 3 N mi nan i mɔk sukuru ki dii biak n paak, ŋaan i ki nyikimi. 4 Ŋaan i biit tee nnae: i ji ki loonin nan yaa din sint loonin biaŋinba na. 5 Tiat man yaa din tuu be biaŋinba ŋaan ji tan lebit na. Nyikin i biit maŋ ŋaan kii tuun yaa poŋ tuu tuun biaŋinba sinsinn ki li ŋan na; li-i tee ki i kan nyik i toonbiiti, n saa baar i boor ki jii i fitir na li sinset boor, ŋaan beri. 6 Ŋaan yaa tuun linba ki li ŋane na; i ki loon toona nba ki Nikola teeb tuun na, nan n mɔŋ nba ki loon toona nba ki bi tuun na. 7 "Wunba mɔk tubir, wun gbiint linba ki Yennu Seyeeŋ na yeen ki teen Masiaweira na. "Wunba nyann nyannu na, ŋɔɔe ki n saa turɔ sɔnu ki wun di manfoor tilɔɔna nba be Yennu boor, siaminba ki bi yir Paradais a na.'" 8 Ki wunba ki n lau na bia betin a n sɔb labaar na ki tur u weira nba lakin be Simirna doo ni na malaka a "Labaar na nyii wunba tee bont kura pinpiik nan li gbennu na boore; ŋɔɔe din kpo ki tan bia fiir kuun ni na; 9 ŋɔɔe yet a 'N mi i biak dinu po, ki bia mi nan i tee nandamme, ŋaan mamɔmm, Yennu boor, i tee mɔkitae; ki n mi nan nisiab piak ki biir i sana, ki bia yaa bi tee Juu teebe, ŋaan ki ki tee nna; bi tee Sintaanii niibe. 10 I daa tiin jaŋmaanii nan biak nba baat i paak na. Gotir man, Sintaanii saa te bin soor i siab ki kɔɔmm dansarik ki bikimm, i bia tan saa di biak ki saa dian daa piik; ŋaan yi teenin yada mɔkmɔk nan i kuun, ki n tan saa pi-i piinii nba tee manfoor. 11 "Wunba mɔk tubir, wun gbiint linba ki Yennu Seyeeŋ na yeen ki teen Masiaweira na. "Wunba nyann nyannu maŋ, u kan la kuun nba pukin mun-lee na.'" 12 Ki wunba ki n lau na bia betin a n sɔb labaar na ki tur u weira nba lakin be Pegamum doo ni na malaka, ki yet a "Labaar na nyii wunba mɔk jukbanjiak nba di mɔleemii na boore: 13 ŋɔɔe yet a 'N mi nan siaminba ki i be na tee siaminba ki Sintaanii naangbouŋ na be-e, ki n mi nan i set dia n sann; yoo nba ki bi din tan kpii Antipas nba din tee n siara daanɔ nan barmɔnii, i mɔŋ doo nba ki Sintaanii be na, li yoo maŋ gbaa ki i ki y‡t n sɔnu. 14 Ŋaan mamɔmm, i mɔk biit ŋanlee nnae, ki n yaa n wanni: siab be i sinsuuk ni ki dia Balaam sennu; ŋɔɔe din wann Balak waa saa teen biaŋinba ki te ki Israel teeb n tun biit na. U din te ki bi ŋman tingbann nant, ki bia te ki bi chomm nan leeb. b 15 Li mun bia tee nnae i sinsuuk ni, ki i siab mun waa Nikola teeb maŋ wannu. 16 Li paak, yi nyik i toonbiit maŋ; li-i kii tee nnai kaa, n saa baar mɔtana nan jukbanjiak nba tantir ki nyi n mɔb ni na, ki kɔn biir li nibooru. 17 "Wunba mɔk tubir, wun gbiint linba ki Yennu Seyeeŋ na yeen ki teen Masiaweira na. "Wunba nyann nyannu na, ŋɔɔe ki n saa turɔ woonin ni jeet nba ki bi yi mana na ki wun di, ki n bia saa turɔ tanpeenn nba ki sanpaann sɔb li paak ki sɔɔ ki mir, see fin nba gaar na kuukɔɔ.'" 18 Ki wunba ki n lau na bia betin a n sɔb labaar na ki tur u weira nba lakin be Tiataira doo ni na malaka a "Labaar na nyii Yennu Bija nba ki u ninbina naan mupeenu, ki u taapant bia nyirii nan baa tuu nyirik kut mɔnt biaŋinba na boore; 19 ŋɔɔe yet a 'N mi i binbeŋ nba tee biaŋinba, ki bia mi i lomm, nan i yada teenu, nan i toona, nan yaa mɔk mintir biaŋinba, ki bia mi nan i toonŋana tumu pukii ki gar i sinsinn toona nawa. 20 Ŋaan i biit tee nnae: yaa sak poo nba ki bi yiu Jesebel ki u yaa u tee Yennu sɔkiniie, ki ji taan be i boor ki kpann n toontunna ki wantib a bii chomm nan leeb kii biakii di pata jeet na. 21 N turɔ yoo a wun lebit u binbeŋ, ŋaan ki u ki sak wun nyik u chon-chonsin na. 22 Li paak, n saa jiiu ki lu-u biak gado paak nan binba tuu lakin chomm nanɔ na kur; li-i kii tee ki bi nyik biit nba ki bi lakin tuun nanɔ na, n saa kɔɔmm biak gbeŋŋir ni, 23 ki kpi u weira na kur; ki n weira saa bann nan mine tee wunba mi niib dudukit nan bi loomm nba tee biaŋinba, ki saa tur sɔɔ kur u toona nyɔɔt nba tee biaŋinba. 24 "Yimm nba biar Tiataira ki ki waa poo maŋ wannbiiuk, ki bia ki waa linba ki siab yir Sintaanii woonin ni labaar na, n yeen yimme a n kan jinni jik-kpiata. 25 Yii dia man linba ki i mɔk na fanu mɔkmɔk nan yoo nba ki n tan saa baar. 26 Wunba nyann nyannu na, ki tuun n loomm ki ki nyiki, n saa turɔ paŋ nba ki n gaar n Baa boor na booru, ki wuu mɔk tingbouŋ na nibooru kur yiikoo ki sii diab nan paŋ ki saa fit biirib nan faa tuu dia kut patu ki faa boba yee biaŋinba na. 28 N bia saa tur li yɔɔ sanyafaar ŋmaabir na. 29 "Wunba mɔk tubir, wun gbiint linba ki Yennu Seyeeŋ na yeen ki teen Masiaweira na.'"

Fiitu 3

1 Ki wunba ki n lau na bia betin a n sɔb labaar na ki tur u weira nba lakin be Saadis doo ni na malaka a "Labaar na nyii wunba mɔk Yennu Sei ŋanlore nan ŋmaabira ŋanlore na boore: ŋɔɔe yet a 'N mi i toona nba tee biaŋinba, ki bia mi nan niib dukii a i fo, ŋaan i ki fo. 2 Li paak, fiit man ki yabir ki i binbeŋ nba biar na daa kpenn gbenti, kimaan toona nba ki i tuun na ki gboot Yennu nummi. 3 Li paak, yii tian man wannu nba ki i din gbat ki waa na. Yii diar man ŋaan nyik i toonbiit tumu na; ŋaan li-i tee ki i ki fiir, n saa baar i boor nan nanyukɔɔ nba tuu baar biaŋinba nae, ki i kan bann n baaru yoo. 4 Ŋaan i siab be Saadis ki bi para ki mɔk jakinti. Ŋamme saa lia tapeenii, ki min nan ŋamm sii tɔk, kimaan baa jaŋ nann na paak. 5 Wunba nyann nyannu na, u tan saa lia tapeenii na, ki n tan kan kpeen u sann manfopaann damm gbouŋ na ni, ki n tan saa yet n Baa nan u malakanba na paanu ni a li daanɔ tee n yɔɔe. 6 "Wunba mɔk tubir, wun gbiint linba ki Yennu Seyeeŋ na yeen ki teen Masiaweira na.'" 7 Ki wunba ki n lau na bia betin a n sɔb labaar na ki tur u weira nba lakin be Filadelfia doo ni na malaka a "Labaar na nyii wunba tee Popeendaanɔ, ki bia tee Barmɔnii daanɔ na boore; ki u dia Defid peenu c na, ki li-i tee ki u loot gann, sɔɔ kan fit looni; ki wuu biakii loon, sɔɔ kan fit looti: 8 ŋɔɔe yet a 'N mi i toona nba tee biaŋinba, gotir, n loot gann ki turi, ki sɔɔ kan fit looni. N mi nan paŋ nba ki i mɔk na waar, ŋaan nanna kura, i bia lek dia n wannu na, ki ki nɔi nan i ki mimi. 9 Nnara, binba tee Sintaanii niib, fai damm nba yaa bi tee Juu teeb ŋaan ki ki tee na, n saa te ki bin baar ki gbaan i tɔɔnn po ki bann nan n set looni. 10 Kimaan yaa sak n maan ki mɔk mintir na paak, n saa dia-i bonŋann ki i tan kan kɔɔ bonbiir nba baat durinya na kur paak a lin bikin tingbouŋ na niib na. 11 N baate mɔtana. Yii dia man linba ki i mɔk na fanu ki sɔɔ tan daa fiar i nyɔɔt maŋi. 12 Wunba nyann nyannu na, n saa teenɔ Yennu diiuk ni jaantarike, ki u ji kan nyi leŋi. Ki n bia saa sɔb Yennu sann u paak, ki sɔb Yennu doo sann u paak, ki bia sɔb n mɔŋ sanpaann na u paak. Yennu doo maŋe tee Jerusalem paann nba saa nyi Yendɔuŋ ni, Yennu boor, ki sik tiŋ na ni na. 13 "Wunba mɔk tubir, wun gbiint linba ki Yennu Seyeeŋ na yeen ki teen Masiaweira na.'" 14 Ki wunba ki n lau na bia betin a n sɔb labaar na ki tur u weira nba lakin be Laodisea doo ni na malaka a "Labaar na nyii wunba sann tee Mɔnii na boore; ki u tee siara daanɔ nba tee barmɔnii daanɔ ki tee siara fanu; ki bia tee linba kur ki Yennu nan na yudaanɔ: 15 ŋɔɔe yet a 'N mi i toona nba tee biaŋinba; i ki toni, i bia ki mei, ŋaan n bo loon ki yii tee li yenne; 16 ŋaan yaa ki ton ki bia ki mei na, n saa siiri pia teriku. 17 "Yimme yeen a i tee mɔkitae ki mɔk linba kur ki i loon, ki siar kan pɔtiini, ŋaan ki ki mi yaa mɔk parbiir nan ninbaauk biaŋinba. I tee nandamme, ki somm yana, ki tee jɔɔnii. 18 Li paak, n kpaaniie a yi daa salima nba tee salimmɔna n boor ki set la mɔkint, ki bia daa tapeenii ki dɔkin i fei na, ki bia daa kpan ki baŋ i ninbina kii laat. 19 Binba kur ki n loonib na, n kpaamme ki daar bi tuba. Li paak, nyikin man i toonbiit ki daa jerimi. 20 Nnara, n see tammɔb ni ki kpaan gann; wunba gbat n kunkɔr ki loot gann maŋ, n saa kɔɔ u boor, ki min nan ŋɔɔ saa lakin di. 21 Wunba nyann nyannu na, n saa turɔ yaak ki wun tan lakin kar nanin n naangbouŋ na paak, nan maa nyann nyannu kur ki lakin kar nan n Baa Yennu u naangbouŋ paak biaŋinba na. 22 "Wunba mɔk tubir, wun gbiint linba ki Yennu Seyeeŋ na yeen ki teen Masiaweira na.'"

Fiitu 4

1 Li poorpo ki n bia la Yendɔuŋ gann loot, ki n gbat kunkɔr nba ki n poŋ gbat na, ki li bia piak ki teenin, ki naan kikaak nba tuu mɔ biaŋinba na; ki kunkɔr maŋ betin a, "Domin nna ki n saa wanna linba saa tun na poorpo." 2 Li taakpaak ni ki Yennu Seyeeŋ na fiir n ni, ki n la ki sɔɔ kar naangbouŋ paak Yendɔuŋ ni, 3 ki u numm po nyirii nan tana nba ki bi yi jaspa d nan kaneliann d na, ki naatooruk bɔɔn ki lint naangbouŋ na, ki naa-tooruk maŋ tee nan bonbɔnwuwur na. 4 Ki naangbant piinlee nan ŋanna dɔɔ lint naangbouŋ maŋ. Ki saakab piinlee nan banna lia tapeenii ki yir salima fokirii, ki kar naangbant piinlee nan ŋanna maŋ paak. 5 Ki sanyikintii nyi naangbouŋ maŋ ni nan fuut nan satianii. Ki fita ŋanlore lakin di naangbouŋ na tɔɔnn, ŋanne tee Yennu Sei ŋanlore na. 6 Ki siar naan mɔkgbeŋŋir ki dɔɔ naangbouŋ na tɔɔnn ki nyirii nan mianu na. Ki bonfoa banna be leŋ ki lint naangbouŋ na, ki mɔk ninbina bonchiann bi numm po nan bi poorpo kur. 7 Ki sinsinn bonfoor na naan yambɔr, ki wunba waa banlee na mun naan naajak, ki wunba waa bantaa na numm po naan nisaarik numm po, ki wunba waa banna na mun naan kanbiɔk nba yukir. 8 Ki bonfoa banna na kur mɔk kpinkpant ŋanloob-loob, ki bia mɔk ninbina bonchiann bi gbanant kur po. Ki yonnu nan nyiɔk kur bi ki nyikit yanii yinu. Bi yiin a, "Kasii, kasii kasiie tee ti Yomdaanɔ Yennu nba mɔk paŋ kura, ki din be, ki bia daa be, ki bia tan sii be mɔkmɔk nan mɔkmɔk." 9 Bonfoa banna na-i taŋŋi teen wunba kar naangbouŋ na paak ki be mɔkmɔk nan mɔkmɔk na niipoouk nan dontir nan paku, 10 li yooe ki saakab piinlee nan banna na tuu baa ki gbaan wunba kar naangbouŋ maŋ paak na tɔɔnn, ki pukii ŋɔɔ nba be mɔkmɔk nan mɔkmɔk na. Bi bia tuu yit bi fokirii nae ki bir naangbouŋ na tɔɔnn ŋaan yeen a, 11 "Ti Yomdaanɔ Yennu, li jaŋ nan tin jianta, ki tura baakir nan pakuwa, kimaan fine din nan bont kura. A loomm paake ki a naamii maŋ kur be, ki mɔk manfoor."

Fiitu 5

1 Ŋanne ki n bia la ki sɔɔ kar naangbouŋ na paak ki dia gbanpɔɔbir u niidiitu, ki gbouŋ maŋ mɔk sɔbnii li numm po nan li poor po, ki bi jii tiik yiit ki tabin li mɔi ŋanlore na. 2 Ki n la malaka nba mɔk paŋ, ki u mɔɔntir nan kunkɔsaakar a "Ŋmee jaŋ nan wun tabit gbanpɔɔbir na yiit ki pɔbitiri-i?" 3 Ŋaan ki sɔɔ kaa Yendɔuŋ ni koo tingbouŋ na ni koo kpeentiŋ ki jaŋ nan wun pɔbit gbanpɔɔbir na ki got li nɔɔk ni. 4 Ki n bui bonchiann kimaan sɔɔ nba kaa ki jaŋ nan wun pɔbit gbanpɔɔbir na ki got li nɔɔk ni na. 5 Ŋanne ki saakab na yenɔ yetin a n daa bui, a n got wunba nyii Juda maaru ni ki u sann tee Juda Yambɔr na, wunba tee Defid Yaaboonjaann ki nyann bonsiar kur na, ŋɔɔe saa fit tabit yiit ŋanlore na ki pɔbit gbanpɔɔbir maŋ. 6 Ki n la Pegann ki u see naangbouŋ na boor, ki bonfoa banna nan saakab na see ki lintɔ; ki Pegann na tee nan Pegann nba ki bi kpiiu ŋaan ki u fiir kuun ni na, ki mɔk yina ŋanlore, ki bia mɔk ninbina ŋanlore nba tee Yennu Sei ŋanlore nba ki u tumm tingbouŋ na kur ni na. 7 Ki Pegann na saan gaar gbanpɔɔbir na daanɔ nba kar naangbouŋ paak na niidiitu ni. 8 Waa gaar gbanpɔɔbir na yoo nba ki bonfoa banna nan saakab piinlee nan banna na gbaan u tɔɔnn, ki saakab na kur dia biat nan salima senii, ki bonnunubit nba see Yennu niib miaru taar ni na gbee senii na. 9 Ki bi yiin yanpaanii ki teen Pegann na ki yeen a: "A set jaŋ nan fan gaar gbanpɔɔbir na ki tabit li yiit ŋanlore nawa, kimaan a din kpoe ki jii a sɔn ki daa niib ki tur Yennu; niib maŋ nyii booru kur ni, nan mabooru kur ni, nan maaru kur ni, nan tingbouŋ na yent kur nie. 10 A bia te ki bi tee a naan ni niib nba tee mannteeb, a bin tun Yennu toona; ki bi sii yen tingbouŋ na teeb." 11 Li poorpo biak ki n got la malakanba tusa tusa tusa, ki bia gbat bi kunkɔra, ki bi ŋaa lint bonfoa banna nan saakab nan naangbouŋ na. 12 Ki n gbat ki bi yeen nan kunkɔsaakar a: "Pegann nba ki bi din kpiiu ki u fiir na, ŋɔɔe jaŋ nan wun gaar paŋ nan mɔkint nan yan nan nyannu nan baakir nan dontir nan paku." 13 Ki linba kur Yennu din nan, ki li be sanpaapo, nan tingbouŋ na ni, nan kpeentiŋ, nan linba be mɔkgbeŋŋa ni na, n gbat bi kur yeen a, "Paku nan baakir nan dontir nan paŋ kur-ii be wunba kar naangbouŋ na paak nan Pegann na paak mɔkmɔk nan mɔkmɔk." 14 Ki bonfoa banna na sak ki yet a "Mamɔmm." Ki saakab na kur gbaan Yennu nan Pegann na tɔɔnn ki jiantib.

Fiitu 6

1 Li poorpo ki n la Pegann na tabit yiit ŋanlore na yenn, ki n gbat bonfoa banna na yenɔ kunkɔr ki li tee nan satianii na ki yiin a "Baat." 2 Ki n got ki la taanpeeŋ, ki wunba jak u paak na dia tadaauk, ki bi turɔ naan fokirik, ki u nyii, ki tee paŋ daanɔ, a wun kɔn nyann bonsiar kur. 3 Ki Pegann na bia tabit yiit nba pukin ŋanlee na, ki n gbat bonfoor nba pukin banlee na kunkɔr ki u yiin a "Baat." 4 Ŋanne ki n la taanmɔŋ nyii ki set, ki bi tur wunba jakɔ na yaak, a wun nyinn parmaasir tingbouŋ na ni, ki te ki niib-ii kpi bi leeb; ki bi bia kubinɔ jukbanjagbeŋŋir. 5 Ki Pegann maŋ bia tabit yiit nba pukin ŋantaa na, ki n bia gbat ki bonfoor nba pukin bantaa na yiin a "Baat." Ki n bia la ki taanbɔŋ see leŋ, ki wunba jakɔ na dia linba ki bi bikii bona na u nuu ni. 6 Ki n gbat fuut ki li tee nan kunkɔr na ki nyii bonfoa banna na ni, ki yeen a, "Boroboro dii ŋmanbaŋ tee daar paauko, ki karwɔntaa ŋmanbaŋ muntaa mun tee daar paauk; a ŋaan daa biir kpan nan daan na." 7 Ki Pegann na tabit yiit nba pukin ŋanna na; ki n gbat kunkɔr nyii bonfoor nba pukin banna na ni, ki yiin a "Baat." 8 Ŋanne ki n la taanpeenwuwur, ki wunba jakɔ na sann tee Kuun; ki kpeentiŋ mun waa u poor; ki Yennu turib yiikoo a bin kpi tingbouŋ na niib bɔkitu munna yenn, a bin kpib tɔbii ni nan kon nan yiarii, ki bia te tingbouŋ na bonkobibiit n kpib. 9 Ki Pegann na bia tabit yiit nba pukin ŋaŋŋmu na, ki n la binba ki niib din kpiib kimaan baa din dia Yennu maan, nan barŋanii nba ki bi din mɔk na paak, ki bi be binbintir na nyakir ni, 10 ki yikin sanpaapo ki yeen a, "Ti Yomdaanɔ Yennu, fin nba tee popeendaanɔ ki bia tee barmɔnii daanɔ, li saa yukir nleewa ki a tan bu tingbouŋ na niib buut ki dat bi tuba, baa kpiit na paaki?" 11 Ŋanne ki bi tur bi kur liatfopeenii, ŋaan yetib a "Yi foi waan kii guu yoo nba ki bi tan saa kpi i toontunleeb nan i naa waas ki gbenn, nan baa din kpii-i biaŋinba na." 12 Ki n la Pegann na tabit yiit nba pukin ŋanloob na; ki tiŋ jek bonchiann, ki yonnu bɔnn chimm, ki ŋmaarik mun mɔnn nan sɔn na. 13 Ki ŋmaabira nyii sanpaapo ki baa tiŋ ni nan wouŋ nba tuu nik kinkaŋ, ki u lɔɔna n baa biaŋinba na. 14 Ki sanpaak pɔbin pɔbin nan gbanpɔɔbir na ki bot, ki jɔɔt nan gbingbana kur chat chat siaminba ki li tuu be na. 15 Ŋanne ki tingbouŋ na kpanbara, nan nijaana, nan lanjimanba yudamm, nan nitarin-yika, nan pandamm, nan sɔɔ kur, binba tee daaba, nan binba yen bi mɔŋ, ki bi kur chiar ki kɔɔ tanfiat nan jɔlɔnt ni, 16 ki yeen a jɔɔt nan tana na n baa bi paak, ki wunba kar naangbouŋ paak na daa laatib, ki Pegann na mun daa laatib, ki u wutoor daa do bi paak, 17 kimaan wunba kar naangbouŋ paak na nan Pegann na wutoor dagbeŋŋir daar maŋ baara, ki sɔɔ kaa ki saa set bi wutoor maŋ tɔɔnni.

Fiitu 7

1 Li poorpo ki n la malakanba banna ki bi see tingbouŋ na loka ŋanna na ni, ki dia wouŋ nba nyi loka kur po na, a li daa da tiŋ na ni, koo mɔkgbeŋŋa ni, koo tisiak paaki. 2 Li yoo ki n la malakaganɔ ki u nyii yondopo ki dia dɔk nba tee manfodaanɔ Yennu yar na; ki u yikin nan kunkɔsaakar ki yeen malakanba banna nba ki Yennu turib yaak a bin biir tiŋ nan mɔkgbeŋŋa na, 3 a bi daa biir tingbouŋ na nan mɔkgbeŋŋa na nan tiinii na, see ki bi tan dɔk Yennu toontunna bi yugbia paak sinsinna. 4 Ki n gbat binba ki bi dɔkib Yennu dɔk na kann, ki li tee niib tuskobik nan tusaa piinna nan tusaa ŋanna, binba nyii Israel booru kur ni. Ki niib tusaa piik nan ŋanlee nyii Juda booru ni, ki niib tusaa piik nan ŋanlee nyii Rubenn booru ni, ki niib tusaa piik nan ŋanlee nyii Gaad booru ni, ki niib tusaa piik nan ŋanlee nyii Aser booru ni, ki niib tusaa piik nan ŋanlee nyii Naftali booru ni, ki niib tusaa piik nan ŋanlee nyii Manase booru ni, ki niib tusaa piik nan ŋanlee nyii Simeonn booru ni, ki niib tusaa piik nan ŋanlee nyii Liifai booru ni, ki niib tusaa piik nan ŋanlee nyii Isakar booru ni, ki niib tusaa piik nan ŋanlee nyii Sebulunn booru ni, ki niib tusaa piik nan ŋanlee nyii Joosef booru ni, ki niib tusaa piik nan ŋanlee mun nyii Benjaminn booru ni. 9 Li poorpoe ki n la nibur ki bi kaa kann, ki nyii tingbouŋ na yent kur ni, nan nibooru kur ni, nan maaru kur ni, nan mabooru kur ni, ki lia liatfopeenii ki see naangbouŋ nan Pegann na tɔɔnn, ki dia biabfaat bi nii ni, ki yikin nan kunkɔsaakara ki yeen a, 10 "Tinnu nyi ti Yomdaanɔ Yennu nba kar naangbouŋ paak na boore, ŋɔɔ nan Pegann na." 11 Ki malakanba na kur set ki lint naangbouŋ na, nan saakab na, nan bonfoa banna na, ki baa funfaba naangbouŋ na tɔɔnn ki jiantir Yennu, 12 ki yeen a, "Mamɔmm, paku nan dontir nan yan nan niipoturu nan baakir nan paŋ nan yiikoo tee Yennu yare mɔkmɔk nan mɔkmɔk. Mamɔmm." 13 Ki saakab na yenɔ boin a "Ki binba lia liatfopeenii na tee lamme, bi nyii lee?" 14 Ki n jiin ki yetɔ a, "Chanbaa, fine mi, ŋaan min ki mi." Ki u yetin a, "Niib na nyii biakgbeŋŋir na nie, ki wuur bi liatfɔkit Pegann na sɔn ni ki li ji peen, 15 li paake ki bi see Yennu naangbouŋ na tɔɔnn ki tuun teenɔ, yonnu nan nyiɔk, u jiantu diiuk na ni, ki ŋɔɔ Yennu nba kar naangbouŋ na paak na sii be namm, ki u maasu sii dɔɔk bi paak; 16 ki kon koo nyunnyukiru kan mi soorib, ki yonnu tonu koo tongbeŋsiar kan mi toŋ bi gbanu, 17 ki Pegann nba be naangbouŋ tɔɔnn na sii guub, ki saan namm nyunbuur nba teen manfoor na boor, ki Yennu saa fiar bi ninnyuut kur."

Fiitu 8

1 Pegann na nba tabit yiit nba pukin ŋanlore na yoo nba, ki Yendɔuŋ ni ŋmin surimm, ki yann waan. 2 Li poorpoe ki n la malakanba banlore nba see Yennu tɔɔnn na gaar kikai ŋanlore. 3 Ki n bia la malakaganɔ ki u dia salima seŋ ki saan set binbintir na tɔɔnn. Ki Yennu turɔ bonnunubit bonchiann a wun pukin Yennu niib kur miaru na ni ki jii paan salima binbintir nba see naangbouŋ tɔɔnn po na, ki tur Yennu. 4 Ki bonnunubit na munyuut nan Yennu niib na miaru nyii malaka nba see Yennu tɔɔnn na nii ni ki do sanpaapo. 5 Ki malaka na jii salima seŋ na ki mɔɔr muu binbintir na paak ki gbeen seŋ na ki kpaar mɔɔn tingbouŋ na ni. Ki saak tian, ki fuut fu, ki sanyikintii nyikii, ki tiŋ damm. 6 Ki malakanba banlore nba dia kikai ŋanlore na teen siir nan bin peb kikai maŋ. 7 Sinsinn malaka na nba dɔŋ pebir u kikaak na, ki sakaana nan muu ŋmat nan sɔn ki mɔɔn tingbouŋ na ni, ki tingbouŋ na bɔkitu muntaa ni yenn dii muu, ki tiinii bɔkitu muntaa ni yenn mun dii muu, ki li mɔmaasa kur dii muu. 8 Malaka nba pukin banlee na nba pebir u kikaak na, ki bi lu siar ki li naan jɔgbeŋŋir, ki di muu, ki tan baa tingbouŋ na mɔkgbeŋŋa kur ni, ki mɔkgbeŋŋa na bɔkitu muntaa ni yenn kpant sɔn, 9 ki linba be mɔkgbeŋŋa nyun na ni bɔkitu muntaa ni yenn kpo kpo, ki ŋarint nba paa mɔkgbeŋŋa nyun paak na, ki li bɔkitu muntaa ni yenn biir. 10 Malaka nba pukin bantaa na nba pebir u kikaak na, ki ŋmaabir gbeŋŋir nba di ki naan muu na nyii sanpaapo ki tan baa kpenii nan nyuntona nba be tingbouŋ na ni li bɔkitu muntataa yenn ni. 11 (Ŋmaabir na sann din tee "Ton.") Ki nyun na bɔkitu muntaa ni yenn toŋ; ki niib bonchiann nba nyuu nyun na kpo, kimaan nyun na nba ton na paak. 12 Malaka nba pukin banna na nba pebir u kikaak na, ki yonnu nan ŋmaarik nan ŋmaabira bɔkitu muntaa ni yenn bɔnn. Ki yonnu nan ŋmaarik nan ŋmaabira yentu na bɔkitu muntaa ni yenn bɔnn. Ki yentu nba tuu yeen yonnu ni na bɔkitu muntaa ni yenn ji ki yeeni, ki ŋmaarik nan ŋmaabira na mun ji ki yeeni, ki nyiɔk bɔnnu mun bɔkit li biaŋ ki bɔnn nna. 13 Li yooe ki n la kanbagbeŋŋir yuuk sanpagbant ni, ki yikin nan kunkɔsaakar a "Parbiir, parbiir, parbiir, malakanba bantaa nba biar na-i taŋŋi pebir kikai na, ki li bui, parbiir sii be tingbouŋ na niib paak."

Fiitu 9

1 Ki malaka nba pukin baŋŋmu na pebir u kikaak na, ki n la ki ŋmaabir nyii sanpagbant ni ki tan baa tingbouŋ na ni; ki bi turɔ bootuk nba sumii ki kaa terik na peenu. 2 Ki ŋmaabir na loot bootuk maŋ, ki munyuut nyii leŋ ki tee nan musaakau munyuut na, ki li munyuut dɔkin yonnu, ki tingbouŋ na bɔnn. 3 Ki tɔɔrii nyii munyuut na ni ki sik tingbouŋ na ni, ki Yennu turib yaak nan nanii nba mɔk yaak tingbouŋ na ni biaŋinba na. 4 Ki Yennu yetib a bi daa biir mɔɔt nan titubira nan tiini faat, ŋaan mukis niib nba ki mɔk Yennu dɔk bi yugbia paak na; 5 ki u turib mɔb a bi daa kpi niib maŋ, ŋaan te bin di biak ki saa dian ŋmaarii ŋaŋŋmu, bi-i jun nirɔ, li tonu sii tee nan naŋ tonu nae. 6 Li yoo, li nibooru saa lon kuun ŋaan kan la, bi bia tan sii loon bin kpo, ŋaan kuun saa chiar ki nyikibe. 7 Tɔɔrii na tee nan taanii nba tuu teen siir a bin took tɔb nae; ki yir linba naan salima naan fokirii, ki bi numm po naan nisaarii numm po, 8 ki bi yut tee nan poob yut na, ki bi nyana naan yambɔra nyana. 9 Ki bi lia naagbankɔŋŋa ki li naan kut ki dɔɔk bi parbia, ki bi kpinkpant fu fuut nan tɔb taanii nba tuu teen siir ki daar torit ki tookit tɔb na. 10 Ki bi mɔk joa nba mɔk lɔbii ki li naan nanii yar, ki lɔbii maŋ mɔk paŋ ki saa mukis nisaarii ki saa jaŋ ŋmaarii ŋaŋŋmu na. 11 Ki malaka nba guu bootsunsuŋ maŋ tee bi bat, ki Hiibru maan ni bi yiu Abadonn, ki Griik maan ni bi mun yiu Apolionn. (Sann maŋ paak tee "Biirtɔɔ.") 12 Sinsinn parbiir na gara, ŋaan parbiir munlee biar ki waa poor. 13 Ki malaka nba pukin banloob na pebir u kikaak, ki n gbat ki kunkɔr nyii salima binbintir nba see Yennu tɔɔnn na mɔgbanjoontii ŋanna na ni, 14 ki kunkɔr na yet malaka nba pukin banloob ki dia kikaak na a wun loot malakanba banna nba ki bi lorib kpenu nba ki bi yir Yufretes ni na ki lub; 15 ki u lootib; Yennue din diab ki teemm siir guun daar nba ki bi saa kpi nisaarii bɔkitu muntaa ni yenn na; 16 ki n gbat ki bi yeen lanjimanba nba tee taanjakira na kann, ki li tee tusbamm kobii ŋanlee. 17 Ki n yirintu maŋ ni ki n la taanii nan bi jakira na ki bi tee nna: ki taanjakira na lia naagbankɔŋŋa nba dɔɔk bi parbia, ki li mɔn nan muu na ki tee nan bonbɔnwuwur na, ki bia mɔn nan dukpan na; ki taanii na yura naan yambɔra yura. Ki muu nan munyuut nan sarwuutaa nyi bi mɔi ni. 18 Ki muu nan munyuut nan sarwuutaa nba nyi taanii na mɔi ni na kpii nisaarii, bɔkitu muntaa ni yenn. 19 Taanii maŋ yiikoo be bi mɔi nan bi joa nie, ki bi joa na naan wai ki mɔk yura, ki bi dia junt niib. 20 Ki niib nba biar ki bonbiir maŋ ki kpiib na din ki nyik baa jiantir bi mɔŋ bonninant; ki jiantir narinbiit nan chicherii nan pata nba tee salimmɔna nan salimpeena nan kut mɔnt nan tana nan daat, linba ki nyɔi, ki bia ki gbia, ki bia ki sommi. 21 Niib maŋ bia ki nyik nikpinu, nan jabaa bunu, nan chonchonsin, nan bi nanyuk toona.

Fiitu 10

1 Li yoo ki n bia la malakasɔɔ ki u nyii Yendɔuŋ ni ki siik, ki gbab sanpagbouŋ nan chinchenn na, ki naatooruk bɔɔn lint u yur, ki u numm po naan yonnu, ki u taa naan jaantarii nba di muu. 2 Ki u dia gbanpɔɔb-bik u nuu ni ki li pɔbit, ki u diitu taar tɔɔ mɔkgbeŋŋir paak, ki u gaŋ taar mun see tiŋ ni; 3 ki u tian nan kunkɔsaakar nan yambɔr nba tuu beet biaŋinba na. Waa tian gbenn yoo nba, ki satianii ŋanlore mun tian ki jiin. 4 Satianii maŋ poorpo ki n teen siir maa n sɔb waa pak linba, ŋaan gbat kunkɔsiar nyii Yendɔuŋ ni ki yet a n bɔr satianii ŋanlore nba yet maan nba na ki lii be n ni, ki daa sɔbin. 5 Malaka nba ki n lau ki u see mɔkgbeŋŋir paak nan tiŋ ni na donn u niidiitu sanpaapo, 6 ki por nan Yennu nba yɔɔ be mɔkmɔk nan mɔkmɔk na, wunba din nan sanpaak nan tingbouŋ nan mɔkgbeŋŋa nan bona nba kur be li ni na, ki yet a li ji kan yukiri; 7 ŋaan malaka nba pukin banlore na-i taŋŋi pebir u kikaak na daar nba, Yennu tan saa jii woonin ni maan ki tun nann toonn, nan waa din yet ki tur u sɔkiniinba nba tee u toontunna biaŋinba na. 8 Ki kunkɔr nba ki n gbat ki li nyii Yendɔuŋ ni ki piak teenin na bia pakin a man saan gaar gbanpɔɔb-bik nba pɔbit ki be malaka nba see mɔkgbeŋŋir nan tiŋ ni na nuu ni. 9 Ŋanne ki n saan malaka na boor a n gaar gbanpɔɔb-bik maŋ, ki u chabin a n gaar ŋman; a li sii tone n nɔɔk ni, ŋaan n mɔb ni ŋarin li sii man nan siat nae. 10 Ŋanne ki n gaar gbanpɔɔb-bik maŋ ki ŋman, ki li man nan siat na n mɔb ni, ŋaan laa sik n poor ni, ki li ji ton. 11 Ŋanne ki bi betin a "Li kpaa talas nan fan ŋamm sɔkin Yennu maan ki tur nibooru bonchiann nan tingbouŋ na yent bonchiann nan mabooru bonchiann nan kpanbara bonchiann."

Fiitu 11

1 Ŋanne ki sɔɔ turin bikinu patu ki yetin a "Fiit ki saan bikin Yennu diiuk nan li binbintir, ki bia kan binba jiantir Yennu leŋ maŋ; 2 ŋaan daa bikii li dundouŋ yabinti, kimaan n jii ŋanne ki tur binba ki tee Juu teeb na, ki bi tan saa yent Yennu doo na ŋmaarii piinna nan ŋanlee; 3 ŋaan n tan saa te ki n siaradamm banlee n lia bɔtoliant, ki n saa turib yaak ki bi sɔkint n maan ki teen niib ki saa jaŋ daa tusir nan kobiinlee nan piinloob maŋ." 4 Siara damm banlee nae tee Olif tiinii ŋanlee nan fita ŋanlee nba see Yennu tɔɔnn; ŋɔɔe yen tingbouŋ na. 5 Ki sɔɔ-i taŋŋi loon wun turib daŋ, muu saa nyi bi mɔi ni ki di bi dataak maŋ; ki wunba kur loon wun turib daŋ, nnae ki bi saa teenɔ wun kpo. 6 Bi bia mɔk yiikoo ki saa soor saak, ki saak kan baa yoo nba ki bi mɔɔntir Yennu maan na, ki bia mɔk yiikoo ki saa te ki nyun n kpant sɔn, ki bia saa fit te ki biak bonchiann n baar tingbouŋ na ni yoo nba kur ki bi loon. 7 Yoo nba ki bi tan saa gbenn bi siara toona na, bonkobsiɔk nba be bootsunsuŋ nba kaa terik ni na saa nyi ki tookib nan tɔb, ki nyannib ki kpib. 8 Ki bi gbanant tan sii dɔɔ dogbeŋŋir sɔnjouk ni, siaminba ki bi din kpaa ti Yomdaanɔ dapunpunn paak na. Yennu pur doo maŋ Sodom koo Ijipte. 9 Ki niib nba nyii maaru kur ni, nan booru kur ni, nan mabooru kur ni, nan tingbouŋ na yent kur ni, tan saa tikir ki got bi gbanant damuna ŋantaa nan bonjinn, ki kan chab ki bin pii gbanant maŋi. 10 Tingbouŋ na niib sii mɔk parpeenn bonchiann niib banlee na kuun paak, ki bi saa jerin ki pi bi leeb piinii, kimaan bee paaki, sɔkiniinba banlee na te ki tingbouŋ na niib dii biak bonchiann. 11 Ki daa ŋantaa nan bonjinn na nba gar, ki foon nba teen manfoor na nyii Yennu boor ki baar kɔɔb, ki bi manfoor jen, ki bi fiir set; ki jaŋmaanii soor binba lab na bonchiann. 12 Li yoo na ki sɔkiniinba banlee na gbat kunkɔsiar nyii sanpaapo ki yetib a "Domin nna na." Li yooe ki bi kɔɔ sanpagbouŋ ni ki doo Yendɔuŋ ni, ki bi datai na see ki gorii. 13 Li taakpaak ni ki tiŋ damm, ki dogbeŋŋir maŋ bɔkitu piik ni yenn biir, ki niib tusaa ŋanlore kpo tiŋ maŋ dammu ni, ki jaŋmaanii soor binba biar na, ki bi donn Yennu nba be Yendɔuŋ ni na sann. 14 Gotir man, parbiir nba pukin munlee na gara, ŋaan parbiir nba pukin muntaa na saa baar mɔtana. 15 Li yoo ki malaka nba pukin banlore na pebir u kikaak, ki kunkɔsaakara yeen Yendɔuŋ ni a "Tingbouŋ na naan kur kpant ti Yomdaanɔ Yennu nan u Niganntɔɔ Masia yara, ki u saa diab mɔkmɔk nan mɔkmɔk." 16 Ki saakab piinlee nan banna nba kar bi naangbant paak Yennu tɔɔnn na baa funfaba ki ji jiantir Yennu, 17 ki yeen a "Ti Yomdaanɔ Yennu, fin nba mɔk paŋ kur, ki din yɔɔ be, ki bia daa be na ti teena niipoouk, kimaan a jii a pangbeŋŋir ki dii tingbouŋ na naan. 18 Binba ki waa-a nae donn wutoor, ki a wutoor mun doo. Ki yoo baar nan ki a bu binba kpo na buut, ki pa a toontunna nba tee a sɔkiniinba na, nan a niib kura nba jiantira na, binba tee nijaana nan tarii kur, ki yoo bia baar nan ki a biir binba biir tingbouŋ na na." 19 Ŋanne ki Yennu jiantu diiuk nba be Yendɔuŋ ni na loot, ki n la lakir nba ki Yennu sennu be li ni na, diiuk maŋ ni. Ki sanyikintii nyikintir, ki satianii tian nan fuut, ki tiŋ damm, ki sakaangbeŋŋa bonchiann baa.

Fiitu 12

1 Li poorpo ki nyingbeŋŋir dɔkit sanpaapo; ki poosɔɔ gbab yonnu nan chinchenn na, ki see ŋmaarik paak, ki ŋmaabira piik nan ŋanlee bia be u yur paak ki tee naan fokirik; 2 ki poo maŋ mɔk poor ki bui matyiaru. 3 Ŋanne ki nyinleer bia dɔkit sanpaapo; ki waakperbiiuk nba tee bonmuŋ see ki mɔk yura ŋanlore nan yina piik; ki naanfokirii ŋanlore yir u yura ŋanlore na paak. 4 Ki u jii u joor ki dat ŋmaabira na bɔkitu ŋantaa ni yenn ki nyinnir sanpaapo ki lu tingbouŋ na ni. Ŋanne ki u ji see poo nba mɔ matyiaru na tɔɔnn, ki guu wun mar gbenna, ki wun ŋman sanpantik na. 5 Ki poo maŋ tan mar bonjak, wunba yaa wun tan dia nibooru kur nan paŋ na; ki bi nyiar bik na ki saan nanɔ Yennu boor, u naangbouŋ paak. 6 Ki poo na mun chiar ki saan muuk ni, siaminba ki Yennu teen siir ki guunɔ, ki sii dintɔ ki saa dian daa tusir nan kobiinlee nan piinloob na. 7 Ŋanne ki tɔb fiir Yendɔuŋ ni. Ki malaka nba ki u sann tee Makel, ki ŋɔɔ nan u malakaleeb kɔn ki tookit waakperbiiuk nan u mun yaa malakanba na; 8 ki bi nyann waakperbiiuk nan u malakanba na, ki ki chabib a bii be Yendɔuŋ ni; 9 ki bi nyinn waakperbiiuk na; u poŋ tuu tee waauk nba be-ewa, ki u sann tee Sanbiirtɔɔ koo Sintaanii, ki tuu kpann tingbouŋ na teeb kur na. Ki bi nyinn ŋɔɔ nan u malakanba ki lub tingbouŋ na ni. 10 Li yoo ki n gbat kunkɔsaakar Yendɔuŋ ni, ki li yeen a "Mɔtana, ti Yomdaanɔ Yennu tinnu, nan u paŋ, nan u naan, nan u Niganntɔɔ Masia yiikoo baara, kimaan bia? Bi nyinn Sintaanii na Yendɔuŋ niwa; ŋɔɔ Sintaaniie tee wunba din biir Masiaweira Yennu boor yoo kur na; 11 Pegann na sɔn nan u barŋanii nba ki bi mɔɔntir na paake ki bi nyann Sintaanii; ki bi ki tiin bi manfoa nyinu ki sak nan kuum-i baarib, bi saa gaara. 12 Li paak, yimm nba be Yendɔuŋ ni na, i mɔk parpeenn maŋ. Ŋaan tingbouŋ na niib nan binba be mɔkgbeŋŋa ni na ŋarin, parbiir be bi paak, kimaan Sintaanii sik bi paak nan wutogbeŋŋire, waa mi nan u yoo ji ki yab na paak." 13 Waakperbiiuk na nba la nan bi jiiu ki lu tingbouŋ na ni na, ki u ji waa poo nba mar bonjak na a wun soorɔ. 14 Ki Yennu jii kanbagbeŋŋir kpinkpant ŋanlee ki tur poo na a wun yukir ŋaan nyik waakperbiiuk na, ki saan muuk ni kii sakii be siaminba ki bi sii dintɔ bina ŋantaa nan bonjinn. 15 Ki waakperbiiuk na puut nyunpana poo na paak nan kpenu ni nyun na, a nyun na n diu; 16 ŋaan ki tiŋ somm poo na ki yaat ŋaan jiin mubin nyun nba nyii waakperbiiuk mɔb ni na paak. 17 Ki waakperbiiuk na wutoor doo nan poo na bonchiann, ki u saan a wun saa kɔn nan poo na booru nba biar ki waa Yennu sennu ki dia Yiisa barŋanii na, 18 ki saan see mɔkgbeŋŋir kpiŋ.

Fiitu 13

1 Ki n la ki muuk ni bonkobuk nyii mɔkgbeŋŋir ni, ki mɔk yina piik nan yura ŋanlore, ki naanfokirii piik yir u yina piik na paak; ki sana nba sukii Yennu na sɔb u yura na paak. 2 Ki muuk ni bonkobuk nba ki n la na naan naamuuk, ki mɔk taanyargbeŋŋa, ki u mɔb naan yambɔr mɔb. Ki waakperbiiuk na tur muuk ni bonkobuk na u mɔŋ paŋ nan u naangbouŋ nan u yiikoo nba yab. 3 Ki n la muuk ni bonkobuk na yuyenn ki li naan bi chɔɔ pate na, ŋaan ki u lek paaka; ki li bakit tingbouŋ na teeb kur, ki bi ji waau. 4 Ki niib ji jiantir waakperbiiuk na, kimaan waa jii u paŋ ki tur muuk ni bonkobuk na paak. Ki niib na bia jiantir muuk ni bonkobuk na ki yeen a "Ŋmee paŋe tee nan muuk ni bonkobuk na paŋ na? Ki ŋmee saa fit kɔn nan muuk ni bonkobuk maŋi?" 5 Ki Yennu chab muuk ni bonkobuk na yaak ki u piak nan karinbaanii ki sukii ŋɔɔ Yennu; ki bia chabɔ yiikoo ki saa dian ŋmaarii piinna nan ŋanlee. 6 Ki u piin ki piak sukii Yennu nan u sann nan siaminba ki u be na, nan binba kur be Yendɔuŋ ni maŋ. 7 Ki u bia chabɔ yaak a wun kɔn nan Yennu niib ki nyannib, ki bia chabɔ yiikoo ki u saa yent maaru kur nan nibooru kur nan mabooru kur nan tingbouŋ na yent kur nba be. 8 Niib kur nba be tingbouŋ na ni, ki bi sana ki sɔb manfoor gbouŋ ni yoo nba ki durinya daa din kaa na, bi saa jiant muuk ni bonkobuk na. Manfoor gbouŋ na tee Pegann nba ki bi din kpiiu na yare. 9 Li paak, wunba mɔk tubir, wun gbiint. 10 Wunba ki Yennu senn nan u sii tee daabir, u set sii tee daabire. Ki wunba dia jukbanjiak ki kpi u leeb, bi mun bia tan saa jii jukbanjiake ki kpiu. Li paak, li ŋan ki Yennu niib-ii mɔk mintir ki teenɔ yada fanu. 11 Li poorpo ki n bia la muuk ni bonkoblɔɔ ki u nyii tiŋ ni ki mɔk yina ŋanlee nba naan Pegann yina, ki u piak ki u kunkɔr naan waakperbiiuk na kunkɔr; 12 ki see muuk ni bonkobsinsinn na tɔɔnn po, ki jii muuk ni bonkobsinsinn maŋ yiikoo nba yab na, ki mukis tingbouŋ na teeb kur a bii jiantir muuk ni bonkobsinsinn nba la daŋ nba yaa lin kpiu ki u tan paak na. 13 Ki bonkobuk nba pukin banlee na bia tun bakitnauŋ nyina, ki te ki muu nyii sanpaapo ki sik tiŋ na ni, niib ninbina ni. 14 Ki Yennu nba chabɔ ki u tuun bakitnauŋ nyina, muuk ni bonkobsinsinn tɔɔnn na, ki u kpann tingbouŋ na teeb, ki betib a bin maa tingbann ki lii naan muuk ni bonkobuk nba la jukbanjiak daŋ ŋaan tan ki kpo na. 15 Ki Yennu chab muuk ni bonkobuk nba pukin banlee na yaak ki u foont foon ki tur tingbann nba naan muuk ni bonkobsinsinn na, ki tingbann maŋ fit piak, ki te ki bi kpi binba ki sak bin jiantɔ na. 16 Ki muuk ni bonkobuk maŋ bia mukis niib kur, binba tee nitarii nan binba tee nijaana, mɔkita nan fara damm, daaba nan yent-n-mɔŋ damm, a wun dɔk bi niidiitu koo bi yugbia paak; 17 Nirɔ nba ki dɔk na kaa u paak, u kan fit daa siar koo ki kɔi siari; ki dɔk nae tee muuk ni bonkobuk na sann koo u sann kann. 18 Linba na tee yanfantir yare. Wunba kur mɔk bannu yan, wun dukin bann muuk ni bonkobuk maŋ kann biaŋ. Kimaan bia, kann maŋ paak tee jasɔɔ sanne. Li kann tee kobii ŋanloob nan piinloob nan ŋanloobo.

Fiitu 14

1 Ki n yirintu maŋ ni ki n bia gokit ki la Pegann na ki u see jɔɔr nba ki bi yir Sayɔnn na paak, ki niib tuskobik nan tuspiinna nan tusaa ŋanna, binba mɔk u sann nan u Baa sann bi yugbia paak, ki bi lakin see nanɔ. 2 Ki n gbat ki kunkɔr nyii Yendɔuŋ ni ki fu nan sutik ni nyun na, ki bia naan satiangbeŋŋa nba tuu tian biaŋinba na, ki bia naan bafaara nba tuu faa biat ki li mɔ biaŋinba na. 3 Ki niib tuskobik nan tuspiinna nan tusaa ŋanna maŋ see naangbouŋ nan bonfoa banna na nan saakab na tɔɔnn po ki yiin yanpaanii nba ki sɔɔ ki fit tumii, see niib nba ki Yennu gannib tingbouŋ na ŋaateeb ni ki tinnib na kuukɔɔ. 4 Ŋamme tee jab nba dia bi mɔŋ fanu ki ki tuun chonchonsin, ki ki mi dɔɔ nan poo gbaa; ŋamme bia waa Pegann na ki saa siaminba kur ki u saa; ŋamme tee binba ki Yennu gannib nisaarii sinsuuk ni a bin teen sinsinn niib nba ki ŋɔɔ Yennu nan Pegann na gaarib. 5 Faak bia ki nyi bi mɔi ni; bi tee popeendamme. 6 Ki n bia la malakasɔɔ ki u yuuk sanpaapo ki dia barŋanii nba be mɔkmɔk nan mɔkmɔk ki mɔɔntir ki teen tingbouŋ na teeb: nibooru kur nan maaru kur nan mabooru kur nan yent kur niib nba be tingbouŋ na ni; 7 ki u yet nan kunkɔsaakar a "Yii tiin Yennu kii biakii dontir u sann, kimaan yoo nba ki u saa bu niib buut na baara; yii jiantir ŋɔɔ Yennu nba din nan sanpaak nan tingbouŋ nan mɔka nan nyuntona kur na." 8 Ki malaka nba pukin banlee na waa sinsinn yɔɔ na ki yet a, "Dogbeŋŋir Babilɔnn na baawa, u din te ki nibooru kur tun chonchonsin, li paak ki Yennu wutoor doo." 9 Ki malaka nba pukin bantaa na wei ki yet nan kunkɔsaakar a "Wunba kur jiantir muuk ni bonkobuk nan u ninnauŋ na, ki mɔk bi dɔk u yugbiar paak koo u nuu ni, 10 li daanɔ saa la Yennu wutoor nba tee nan dapaarin nba ki u kpaar daŋmanbaŋ ni na, li daanɔ bia tan saa la biak, muu nba di nan sarwuutaa na ni, Yennu malakanba nan Pegann na tɔɔnn po. 11 Ki bi mukisuk maŋ munyuut saa do sanpaapo mɔkmɔk nan mɔkmɔk; bi bia kan la foon yonnu ni ki boi nyiɔku. Ŋamme tee binba jiantir muuk ni bonkobuk na nan u ninnauŋ, ki mɔk u dɔk nba tee u sann bi paak na." 12 Li paak, li ŋan ki Yennu niib nba sak u mɔmaan ki teen Yiisa yada na-ii mɔk sukuru. 13 Ki n bia gbat kunkɔr nyii Yendɔuŋ ni ki yeen a man sɔb maan na, a "Laa nyii mɔtana ki saa, parpeenn be damm nba kpo ti Yomdaanɔ sɔnu ni na paak." Ki Yennu Seyeeŋ na sak a "Mamɔmm, bi saa la foon bi toongbeŋŋa paak, kimaan bi toona nyɔɔt nae waab." 14 Ki n bia gokit ki la sanpagbanpeeuŋ, ki sɔɔ kar li paak ki naan nisaarik bik, ki yir salima fokirik, ki dia gɔtuk nba di u nuu ni. 15 Ki malakasɔɔ nyii Yennu jiantu diiuk ni ki yeen nan kunkɔsaakar ki teen wunba kar sanpagbouŋ paak na a "Jiin a gɔtuk na ki jaan tingbouŋ na, kimaan jaanu maŋ yooe na, li kur beera." 16 Ki wunba kar sanpagbouŋ paak na jii u gɔtuk na ki jaan tingbouŋ na. 17 Ki malakasɔɔ mun nyii Yennu jiantu diiuk nba be Yendɔuŋ ni na ki dia gɔtuk nba di. 18 Li yoo ki malaka nba tee muu saakɔɔ na nyii binbintir na boor ki yeen nan kunkɔsaakar ki teen malaka nba dia gɔtuk nba di na a "Jiin a gɔtuk na ki pɔɔr tingbouŋ na tilɔɔna na, kimaan lɔɔna maŋ kur mɔnna." 19 Ki malaka na jii u gɔtuk na ki pɔɔr tingbouŋ na tilɔɔna, ki jii lɔɔna maŋ ki teen gbiouk nba ki bi ŋmakii lɔɔna li ni, ki nyun nyi na. Gbiouk na tee Yennu wutogbeŋŋir nyinne. 20 Ki bi ŋmakir lɔɔna na doo na kpiŋ, ki sɔn nyii siaminba ki bi ŋmakii lɔɔna na ki tan pubir, ki li fɔkint saan nan maar kobiinlee nawa, ki li sumiiu saa baar taabatii ŋaŋŋmuwa.

Fiitu 15

1 Li yoo ki n la bakitnauŋ nyinjaann sanpaapo, ki malakanba banlore dia biak booru munlore nba tee Yennu wutoor nba biar poor na. 2 Ki n la siar ki li naan mɔkgbeŋŋir ki yeen nan mianu na, ki ŋmat nan muu; ki n bia la binba kɔn ki nyann muuk ni bonkobuk nan u ninnauŋ nan u sann kann na, ki bi see kpia mianu mɔkir na, ki dia kɔnƒ nba ki Yennu turib na; 3 ki bi yiin yaŋ nba ki Yennu toontunnɔ Moses din tuu yiin na, nan Pegann na yaŋ a: "Ti Yomdaanɔ Yennu nba mɔk paŋ kur, a toona tee toonjaana nba yaar litite, a sɔnii took ki bia tee barmɔnii. Fine tee nibooru kur Kpanbar. 4 Ti Yomdaanɔ, ŋmee be ki kan tina ki bia kan dont a sanni? Kimaan fin kɔɔe tee popeendaanɔ. Nibooru kur tan saa baar ki jianta, kimaan a barmɔnii toona nyii paanu niwa." 5 Li poorpoe ki n bia la ki Yennu jiantu diiuk nba be Yendɔuŋ ni na loot, ki Yennu lanbouŋ na be leŋ. 6 Ki malakanba banlore nba dia biak booru ŋanlore na nyii jiantu diiuk maŋ ni ki lia tapeenii nba kaa jakinsiati, ki jii salima chinchenlotii ki lor bi nyaat ni. 7 Ki bonfoa banna na yenɔ jii salima senii ŋanlore ki tur malakanba banlore na; ki Yennu nba be mɔkmɔk nan mɔkmɔk na wutoor gbee senii maŋ, 8 ki Yennu yentsaakar nan u paŋ te ki munyuut gbee u jiantu diiuk na, ki sɔɔ ji ki fit kɔɔ leŋ nan yoo nba ki biak booru ŋanlore nba ki malakanba banlore dia na n tan gbenn.

Fiitu 16

1 Li poorpoe ki n bia gbat ki kunkɔsaakar nyii Yenjiantu diiuk na ni ki piak teen malakanba banlore na, a bin jii senii ŋanlore nba gbee nan Yennu wutoor na ki kpaar mɔɔn tingbouŋ na paak. 2 Ki sinsinn malaka na saan ki saa kpaar linba be u seŋ ni na ki mɔɔn tingbouŋ na paak, ki nara nba bi, ki ton bonchiann na soor binba mɔk bonkobuk na dɔk, nan binba jiantir li ninnauŋ na. 3 Ki malaka nba pukin banlee na mun kpaar linba be u seŋ ni na ki mɔɔn mɔkgbeŋŋa ni, ki nyun na kpant sɔn ki naan kpeemɔ yar, ki bonfoa nba kur be mɔkgbeŋŋa na ni kpo. 4 Ki malaka nba pukin bantaa na mun kpaar linba be u seŋ ni na, ki mɔɔn kpenii nan nyuntona ni, ki li nyun kpant sɔn. 5 Li poorpo, ki n gbat malaka nba tee nyun saakɔɔ na yeen a, "Ti Yomdaanɔ, Popeendaanɔ, fin nba tuu yɔɔ be ki bia daa be na a buut na tee linba tooke, 6 kimaan baa kpii a niib nan a sɔkinii-nba nae ki a jii sɔn ki turib a bin nyu. Ŋanne jaŋ namm." 7 Ki n bia gbat ki kunkɔr nyii binbintir na boor ki yeen a, "Ti Yomdaanɔ Yennu nba mɔk paŋ kur, a buut na tee mamɔmme, ki tee linba took." 8 Ki malaka nba pukin banna na kpaar linba be u seŋ ni na ki mɔɔn yonnu paak ki chabɔ yaak a li tonu na n ŋamm funn niib ki yekitib nan muu na. 9 Ki yonnu nba ŋamm yekitib nan muu na yoo nba, ki bi ji sukii Yennu nba mɔk biak na paŋ na sann, ŋaan bia lek ki sak bin lebit bi dudukit kii teenɔ baakiri. 10 Ki malaka nba pukin baŋŋmu na kpaar linba be u seŋ ni na ki mɔɔn bonkobuk na naangbouŋ paak, ki bonkobuk maŋ naan yent kur kpant bunbɔnn, ki niib ŋman bi nyana, tont na paak, 11 ki bia sukii Yennu nba be Yendɔuŋ ni na, kimaan bi tont nan bi nara na paak, ki bia ki sak bin nyik bi toonbiit na. 12 Ki malaka nba pukin banloob na mun kpaar linba be u seŋ ni na ki mɔɔn kpenu nba ki bi yir Yufretes na ni, ki li nyun na fɔɔr ki bir sɔnjouk, a kpanbara nba be yondopo na n poot. 13 Ki n la narinbiit bantaa ki bi naan pɔnta ki nyii waakperbiiuk na, nan bonkobuk na, nan faak sɔkinii na mɔi ni. 14 Bi tee narinbiit nba tuun bakitnauŋ toonae ki lin tingbouŋ na kpanbara kur boor, ki tikiib a bin took tɔb na, ti Yomdaanɔ Yennu, wunba mɔk paŋ kur na dagbeŋŋir maŋ daar. 15 Tɔn, Yiisa yet a "Nnara, n baat nan nanyukɔɔ nba tuu baar biaŋinba nae. Parpeenn be daanɔ nba ki gɔɔnt, ki lia u tiat ki ki somm yanni, ki niib kan la u fei na paak." 16 Ki narinbiit na tikir kpanbara na ki saan namm siaminba ki Israel teeb yi Amagedonn na. 17 Ki malaka nba pukin banlore na mun kpaar linba be u seŋ ni na ki mɔɔn wan ni; ki kunkɔsaakar nyii naangbouŋ nba be Yennu jiantu diiuk ni na ki yet a "Li tuma." 18 Ki sanyikintii nyikintir, ki satianii tian fu, ki tiŋ damm bonchiann. Li tiŋ dammu booru ki mi damm laa nyii yoo nba ki Yennu din nan nisaarii nawa, kimaan li damm bonchiann. 19 Ki dogbeŋŋir na bɔkit taar muntaa, ki nibooru kur digbana baa, kimaan Yennue tiar dogbeŋŋir Babilɔnn niib na biit po, ki u wutogbeŋŋir nba doo bi paak biaŋinba na, ki u dat bi tuba bonbiir. 20 Ki digbana nba ki nyun lintir na kur mirint, ki jɔɔt kura mun bia mirint. 21 Ki sakaana nba gbeŋ ki li yenn kpaiu tee nan naar na nyii sanpaapo ki tan baa niib paak, ki bi sukii Yennu, kimaan sakaangbeŋŋa nba baa bi paak na. Li din tee biak gbeŋŋire.

Fiitu 17

1 Li yoo ki malakanba banlore nba dia senii ŋanlore na yenɔ baar n boor ki betin a "Baat, ki n wanna poochon-chonbiiuk daanɔ nba kar nyun bonchiann paak na buut nba tan sii tee biaŋinba; 2 ki tingbouŋ na kpanbara chomm nanɔ, ki tingbouŋ na niib nyuu u bonchonchontoonn nba tee nan daan na ki yib." 3 Ki Yennu Seyeeŋ na sik n paak, ki malaka na jiin ki saan nanin muuk ni, ki n la poo ki u jak muuk ni bonkobmɔŋ paak, ki sana nba sukii Yennu sann na sɔb lint bonkobuk maŋ gbanant kur powa, ki bonkobuk maŋ mɔk yura ŋanlore nan yina piik. 4 Ki poo na lia tamɔnt, nan salima tiat, nan tana nba nyirii bonchiann, ki dia salima seŋ nba ki u bonchonchontoonn jakint nan linba nubir Yennu boor na gbee leŋa; 5 ki sann nba ki sɔɔ ki mi li paak sɔb u yugbiar paak a "Dogbeŋŋir Babilɔnn, poochon-chona nan tingbouŋ na bona nba nubir Yennu boor na naa." 6 Ki n la ki poo na nyuu popeendamm sɔn, nan Yiisaweira nba ki bi kpiib na sɔn ki yib. Maa lau nna maŋ ki li bakitin bonchiann. 7 Ki malaka na boin a bee ki li yaar litimi, a u saa wannin poo na nan bonkobuk nba ki u jak ki u mɔk yura ŋanlore nan yina piik na paak nba tee: 8 a bonkobuk nba ki n la na daan fo sianyoo, ŋaan ji ki fo, ŋaan saa nyi bootsunsuŋ nba kaa terik na ni ki do, ki saa saan siaminba ki bi saa biirɔ na; a ki niib nba be tingbouŋ na ni ki bi sana ki sɔb manfopaann teeb gbouŋ ni yoo nba ki durinya daa din ki piin na saa got bonkobuk na lin bakitib, kimaan bia? Bonkobuk na din fo, ŋaan ji ki fo, ŋaan bia tan sii fo; 9 a linba na loon yan nan bannue; a yura ŋanlore na tee jɔɔt ŋanlore nba ki poo na kar li paak nae; 10 ki bia tee kpanbara banlore, ki baŋŋmu kpo, ki wunba pukin banloob na tee kpanbar mɔtana, ki lɔɔ na daa ki dii naan; wuu taŋŋi dii naan, u naan maŋ kan yukiri; 11 a bonkobuk nba daan fo ki ji tan ki fo na pukin kpanbara banlore na ni ki pukin banniin, ki mun tan saa saan siaminba ki bi saa biirɔ na; 12 ki yina piik nba ki n la na tee kpanbara piik, ŋaan bi daa ki dii naan, ki ŋamm nan bonkobuk na tan saa lakin di naan ki yukir yoo waaminna, 13 ŋaan bi piik na tan saa taan mɔb ki jii bi paŋ nan bi yiikoo na ki tur bonkobuk na, 14 ki bi tan saa kɔn nan Pegann na, ki Pegann na saa nyannib, kimaan u tee yomdamm kur Yomdaanɔ, nan kpanbara kur Kpanbare, ki u poorpoweiteeb mun tee binba ki u yiinib ki gannib, ki bi bia tee nimɔmm. 15 Ŋanne ki malaka na bia betin a nyun nba ki n la ki poochonchonn kar li paak na tee nigbouŋ nba tee nibooru nan maaru nan mabooru kur niibe; 16 a yina piik nba ki n la na, ŋamm nan bonkobuk na sii nƒn poochonchonn na, ki fat linba kur ki u mɔk na ki nyikɔ gbananbir, ki pat u gbanant ki ŋman, ki bia joou muu, 17 kimaan Yennue te ki bi loon bin tun u loomm ki taan mɔb ki jii bi naangbouŋ ki tur bonkobuk na mɔkmɔk nan ŋɔɔ Yennu maan maŋ nba tan saa gbee; 18 a ki poo nba ki n la na mun tee dogbeŋŋir nba ki li kpanbar tee tingbouŋ na kpanbara yudaanɔe.

Fiitu 18

1 Li poorpo ki n bia la malakasɔɔ ki u mɔk yiikoo bon-chiann ki nyii Yendɔuŋ ni, ki u yentu ŋamm yent ki lint tingbouŋ na lokir kur po, 2 ki u yeen nan kunkɔsaakar a "Dogbeŋŋir Babilɔnn na baawa, li set baawa, ki ji kpant siaminba ki narinbiit kur nan nɔɔnbiit nba mɔk sinsint na be. 3 Kimaan booru kur poŋ nyuu u nianbiiuk nba tee nan daan nawa, ki tingbouŋ na kpanbara chomm nanɔ, ki tingbouŋ na kpinkpenta kpant mɔkita u nianbiiuk nba yabit na paak." 4 Ŋanne ki n bia gbat kunkɔsiar nyii Yendɔuŋ ni ki yeen a "N niib, nyint i mɔŋ u boor man, ki daa lakin tuun toonbiit nanɔ, ki u biit maŋ tubdatu daa taabitiini, 5 kimaan u biit na doo ki baar sanpagbanta, ki Yennu tian u biit maŋ po. 6 Tɔn, bin mun tun ki jiinɔ nan waa tuu tuun biaŋinba na, ki pau u biit pann taar munlee, ki dat u tubir bonbiir, kimaan u te ki niib tun toonbiit bonchiann; 7 bin te wun la mukisuk nan parbiir ki lin jaŋ nan waa din tuu be u yama ni ki dont u mɔŋ biaŋinba na, ki yeen u par ni a ŋɔɔ poobate kar na, a u ki tee pakɔɔk kaa, a li paak u kan mi la parbiiri. 8 Li paak, biak saa baarɔ dayenn, ki yiaru nan parbiir nan kon saa soorɔ, ki muu bia saa diu; kimaan ti Yomdaanɔ Yennu nba bu nanɔ na tee yabint daanɔe." 9 Tingbouŋ na kpanbara nba chomm nanɔ ki dii u mant na, bi-i taŋŋi la u mudinu munyuut na, bi saa bui ki fabin u paak. 10 Bi tan saa tin jaŋmaanii u biak na paak, ki see banfɔkira ki ji yeen a "Wuya, dogbeŋŋir na, wuya, Babilɔnn, doo nba mɔk paŋ na, a tubdatu baar yiama." 11 Ki tingbouŋ na kpinkpenta tan saa bui fabin u paak, kimaan sɔɔ nba tan sii kaa ki saa daa bi tiat na paak, 12 sɔɔ ji kan mi daa bi tiat nba tee salimmɔna, nan salimpeena, nan tanbinyinyira nba daauk paar, nan gbaknii, nan chinchenŋana, nan tammɔna chinchena, nan daat nba mantik fan, nan linba ki bi jii loobuk nyana ki nan, nan bona nba ki bi dia daat nba daauk paar ki naan na, nan kut, nan bont nba kur fan, 13 nan kakaduro, nan gasinbunn, nan tulaarii, nan tulaarbooru nba tee mir nan frankinsens na, nan daan, nan kpan, nan yon, nan dii, nan nei, nan pei, nan taanii nan li torit, nan daaba nan nisaarii manfoa gbaa. 14 Ki kpinkpenta na yeenɔ a "Tiat nba ki a bo loon fii mɔk na, nan a mɔkint na, nan taŋant na gara, a ji kan mi lar." 15 Ki kpinkpenta nba kpentir ki tan la gor doo maŋ ni na tan sii see banfɔkire ki mɔ fabin, kimaan bi tiin u biak na jaŋmaanii. 16 Bi saa bui fabin ki yeen a "Wuya, dogbeŋŋir nba naan poo nba gbab chinchenŋana nan tammɔna chinchena nan salima nan laanii nba daauk paar na, 17 yoo waaminna sinsuuk nie ki a mɔkint na kur biir." Ki binba tee ŋarint yudamm, nan binba kɔɔ ki saa bi sɔnii na, nan ŋarinkanna, nan binba kur tuun mɔkgbeŋŋa ni, ji see banfɔkir, 18 ŋaan yikin, baa la ki muu diu ki li munyuut do sanpaapo na, ki bia yeen a "Ti ki mi la dogbeŋŋir na booru;" 19 ki bi finii tant ki pukin bi yura, ki bui fabin ki yeen a, "Wuya, dogbeŋŋir nba ki niib mɔk ŋarint ki lin mɔkgbeŋŋa ni ki kpentir ki laat gor leŋ na, ki li kur biir yoo waaminna nɔɔk ni." 20 Yendɔuŋ ni teeb, nan Yennu niib, nan u sɔkiniinba, nan Yiisa toomiinba, i mɔk parpeenn man, kimaan Yennu bu do-gbeŋŋir maŋ buut ki biirɔ ki turiwa. 21 Ki malakapaarɔ tɔkir tann nba gbeŋ nan nagbeŋŋir na, ki lur mɔkgbeŋŋir ni, ŋaan yet a "Bi tan saa wokit dogbeŋŋir Babilɔnn na ki lu-u nnae wun biir, ki sɔɔ ji kan mi lau, 22 ki ji kan mi gbat ki bafaara faa biat, koo ki yan-yinna yiin yanii, koo ki yerpebira peeb yerii, koo ki naatunpebira peeb naatuna doo maŋ ni; ki toontunnɔ bia kan mi ki be leŋi, ki sɔɔ bia kan mi ki gbat naar fuut leŋi; 23 ki fitir yentu ji kan yent doo maŋ ni; ki jakunt nan pookɔɔnt ji sii kaa leŋ biaki. Doo maŋ ni kpinkpentae tuu tee tingbouŋ na paarib, ki doo maŋ niib bia lin dia nyɔkii ki kpann tingbouŋ na niib kur; 24 ki Yennu sɔkiniinba, nan u niib, nan binba ki niib kpiib tingbouŋ na kur ni na, bi sɔn be Babilɔnn maŋ paak, li paake Yennu dat bi tuba."

Fiitu 19

1 Linba na poorpo, ki n gbat fuut Yendɔuŋ ni ki li tee nibur pinpauk, ki bi yeen a "Haleluya, e tinnu nan dontir nan paŋ tee ŋɔɔ Yennu yare; 2 ki u buut ŋan ki bia tee mamɔmm; ki u bu poochonchonbiiuk daanɔ nba biir tingbouŋ na nan u chonchonsin na buut, ki dat u tubir, waa kpii ŋɔɔ Yennu toontunna na paak." 3 Ki nibur na bia yikin ki yeen a "Haleluya, doo nba ki bi joo na munyuut do sanpaapo mɔkmɔk nan mɔkmɔk." 4 Ki saakab piinlee nan banna na, nan bonfoa banna na gbaan tiŋ ni ki jiant ŋɔɔ Yennu nba kar naangbouŋ paak na, ki yeen a "Mamɔmm, haleluya." 5 Tɔn, ki kunkɔsiar nyii naangbouŋ na boor ki yet a "Pakin Yennu man, yimm nba kur tee u daaba, yimm nba tiinɔ, li nijaana nan tarii." 6 Ŋanne ki n bia gbat kunkɔsiar ki li fu nan nibur nba tuu piak ki fu na, ki bia fu nan sutik ni nyun na, ki bia fu nan satiangbeŋŋa na ki yeen a "Haleluya, kimaan ti Yomdaanɔ Yennu nba mɔk paŋ kur na dii naan kura. 7 Ŋaant man ki tii kpamm kii mɔk parpeenn kii dont u sann ki turɔ baakir, kimaan yoo na baara ki Pegann na loon wun kɔɔn u poo, ki u sarkpeŋ poŋ teen siira. 8 Ki Yennu tur sarkpeŋ na chinchenŋann nba nyirii ki yeen bonchiann, a wun gbab." (Chinchenŋann nae tee Yennu popeendamm binbenyeeŋ.) 9 Ki malaka na yetin a n sɔb a "Binba ki bi yiimm ki bi baar Pegann maŋ pookɔɔnt jaamm ni na, parpeenn tee bi yare." Ki malaka maŋ bia yetin ki pukin a "Maan na tee Yennu maame, ki tee mamɔmm." 10 Li yoo ki n gbaan u tɔɔnn a n jiantɔ. Ki u yetin a n daa tee nna kaa, a u tee min nan n naa waas nba dia Yiisa barŋanii na toontunlɔɔe, a n jiant Yennue. Yennu sɔkiniinba nba sɔkint ki yeen na, bi piak Yiisa poe. 11 Li poorpo ki n la ki Yendɔuŋ loot, ki taanpeeŋ see leŋ, ki wunba jakɔ na sana tee Nimɔnɔ nan Barmɔndaanɔ; ki u bu buut nan li barmɔnii ki bia tookit tɔbii nan barmɔnii; 12 ki u ninbina naan mupeenu, ki u yir naanfokirii ki li yaba u yur paak, ki sann sɔb u paak, ki sɔɔ ki mi sann maŋ paak see u kuukɔɔ. 13 Ki liatir nba ki u lia na gbar sɔn; ki sann nba ki bi yiu na tee "Yennu Mɔmaan." 14 Ki Yendɔuŋ ni tɔb niib jak taanpeenii, ki lia chin-chenŋana nba peen ki ki mɔk jakinti, ki waau. 15 Ki jukbanjiak nba di bonchiann tant ki nyii u mɔb ni, ki u saa jiir ki kɔn nyann nibooru kur, ki yentib nan paŋ, ki saa ŋmakirib siaminba ki bi ŋmakii tilɔɔna na, ki li tee Yennu nba mɔk paŋ kur na wutochiɔŋ. 16 Ki sansiar sɔb u liatir nan u pann paak a "Kpanbara kur Kpanbar, yomdamm kur Yomdaanɔ." 17 Ŋanne ki n la malaka ki u see yonnu ni ki tian ki yi nɔɔnii nba yuuk sanpaapo a bin tikir ki baar Yennu jaangbeŋŋir na ni, 18 ki tan di kpanbara, nan lanjimanba yudamm, nan paŋ damm, nan taanii nan taanjakira, nan niib kur, binba tee daaba nan yent-n-mɔŋ damm, nan nijaana nan binba tee tarii kur gbanant. 19 Ki n la muuk ni bonkobuk na, nan tingbouŋ na kpanbara nan bi tɔb niib, ki bi tikir a bin kɔn nan wunba jak taamm maŋ na nan u mun yaa tɔb niib. 20 Ki bi soor muuk ni bonkobuk na, nan u faak sɔkinii nba daan tuu tuun bakitnauŋ nyina u tɔɔnn po, ki kpann binba mɔk muuk ni bonkobuk maŋ dɔk na, nan binba daan jiantir u ninnauŋ na, ki lu muuk ni bonkobuk maŋ nan u faak sɔkinii na foot, bootsunsuŋ nba ki muu nan sarwuutaa di na ni. 21 Ki wunba jak taamm ki jukbanjiak tant nyii u mɔb ni na jii jukbanjiak maŋ ki kpii binba biar na, ki nɔɔnii dii bi gbanant ki tan gboo.

Fiitu 20

1 Ki n bia la malakasɔɔ ki u nyii Yendɔuŋ ni ki siik, ki dia bootsunsuŋ nba kaa terik na peenii nan jaruk nba gbeŋ u nuu ni; 2 ki soor waakperbiiuk nba din tun be ki tee Sanbiirtɔɔ koo Sintaanii na, ki lorɔ, 3 ki jiiu lu bootsunsuŋ na ni bintusir, ŋaan kpar ki kpaa kpai ki tabin, ki u ji kan fit kpann tingbouŋ na teeb booru kur bintusir na nɔɔk ni; ki bintusir na-i gar, bi saa lootɔ ki wun nyi paanu waan. 4 Ki n la naangbant, ki Yennu tur binba kar li paak na yaak a bin bu buut. Ki n bia la binba ki bi din pot bi yura na sei; baa din mɔɔntir Yiisa barŋanii nan Yennu mɔmaan na paake ki bi kpiib; bi din ki jiant bonkobuk na, koo li ninnauŋu, ki bia din ki gaar bonkobuk maŋ dɔk bi yugbia paak koo bi nii ni. Bi fiir kuun nie ki lakin dii naan nan Masia bintusir. Linba nae tee sinsinn kpeemm fiiru. 5 Kpeemm nba biar na ŋarin kan fiir kuun ni nan bintusir na nba tan saa gar. 6 Binba dɔŋ sinsinn kuun fiiru na ni, bi tee popeendamme, ki parpeenn bia tee bi yar; kuun nba pukin munlee na ji ki mɔk bi yiikoo; bi sii tee Yennu nan Masia mannteebe, ki saa lakin di naan nan Yiisa bintusir. 7 Bintusir na-i taŋŋi gar, bi saa loot Sintaanii bootsunsuŋ na ni ki ŋaau, 8 ki u saa nyi ki kpann nibooru nba be tingbouŋ na kur ni, binba ki bi yib Gɔk nan Magɔk na. Sintaanii saa tikir bi kura ki bin took tɔb; bi kann tee nan mɔkgbeŋŋir ni tanbiinii nae. 9 Ki bi nyii ki tia lint lokir kur po, ki tant ki saa bia lint Yennu niib nba be sian na, nan doo nba ki Yennu mantik loon na. Ki muu nyii Yendɔuŋ ni ki tan diib. 10 Ki malakanba jii Sintaanii nba kpann tingbouŋ na niib na, ki lu-u bootsunsuŋ nba ki muu nan sarwuutaa di na ni, siaminba ki bi dɔŋ lu bonkobuk na nan u faak sɔkinii na. Leŋe ki bi saa di biak yonnu nan nyiɔk mɔkmɔk nan mɔkmɔk. 11 Ki n bia la naangboungbeŋŋir nba peen bonchiann, nan wunba kar li paak na; ki tingbouŋ nan sanpaak mir bot u tɔɔnn, ki sɔɔ ji kan mi ki lab. 12 Ki n la binba din kpo, nijaana nan tarii na, ki bi see naangbouŋ na tɔɔnn po; ki sɔɔ pɔbit gbant, ki bia pɔbit gbanleer nba ki bi sɔb manfopaann damm sana ki teen leŋ na. Ki Yennu bu binba kpo na buut, ki li waa nan baa tuu tuun biaŋinba na, ki li sɔb gbant maŋ ni. 13 Ki mɔkgbeŋŋa nyinn kpeemm nba be nyun ni, ki kuun nan kpeentiŋ mun nyinn binba kpo ki be bi ni na. Ki Yennu bu bi buut nan baa tun biaŋinba na. 14 Ki bi jii kuun nan kpeentiŋ ki lub bootuk nba ki muu gbee leŋ na ni. Kuun nba pukin munlee nae tee muu bootsunsuŋ maŋ. 15 Ki wunba sann din ki sɔb manfopaann damm gbouŋ na ni, bi saa lu-u bootsunsuŋ nba ki muu gbee leŋ na nie.

Fiitu 21

1 Ki n bia la sanpaapo paann nan tingbounpaann. Ki sanpaapo kper na, nan tingbounkper na mirint; ki mɔka ji kaa. 2 Ki n la Yennu doo nba tee Jerusalem paann na, ki li nyii Yennu boor Yendɔuŋ ni, ki siik, ki tee nan pooyookir nba tuu teen siir ki faŋŋit u mɔŋ ki tookit u jɔɔ nba yaa wun kɔɔnɔ na. 3 Ki n gbat ki kunkɔsaakar nyii naangbouŋ na boor ki yeen a "Nnara, Yennu ŋaak ji be nisaarii boore, ki ŋɔɔ Yennu sii be namm, ki bi sii tee u niib, ki ŋɔɔ Yennu mɔŋ sii be bi boor ki tee bi Yennu, 4 ki saa fiar ninnyuut kur bi numm po; ki kuun koo parbiir koo mɔnii koo tont ji sii kaa, kimaan bonkpera na kur ji gara." 5 Ki wunba kar naangbouŋ maŋ paak na yet a "Nnara, n tee bont kur bonpaanne." Ŋanne ki u bia betin a n sɔbir, kimaan mɔbona na tee mɔniie ki tee linba ki yada be li ni. 6 Ki u bia yetin a "Li poŋ tuma. N tee Alfa nan Omegae; li paak tee piinu nan joontu. Binba ki nyunnyukiru mɔkib na, n saa pib manfoor nyun nba bunii ki nyi nyuntona ni na ki bin nyu yann; 7 ki wunba nyann nyannu na, u saa gaar linba na n boor, ki n sii tee u Yennu, ki u mun tee n bik. 8 Ŋaan jaŋmaandamm, nan yad-kanpɔɔna, nan jakint damm, nan nikpiirit, nan joonbaarit, nan jabaabuura, nan patjiant-teeb, nan fai damm kur, bi binbeboor tee bootsunsuŋ nba ki muu nan sarwuutaa di na nie; ŋanne tee kuun munlee na." 9 Li yoo na ki malakanba banlore nba daan dia senii ŋanlore ki li gbee nan biak booru munlore nba joont na yenɔ betin a n baar ki wun wannin Pegann na pooyookir. 10 Ŋanne ki Yennu Seyeeŋ sik n paak, ki malaka na jiin ki saan nanin jɔɔr nba fɔk paak, ki wannin Jerusalem nba tee Yennu doo na, ki li nyii Yendɔuŋ ni Yennu boor ki siik, 11 ki nyirii nan Yennu yentsaakar na, ki bia nyirii nan tanbinyinyir nba daauk paar ki bi yir jaspa na, ki yeen nan mianu na. 12 Ki doo maŋ mɔk joongbeŋ-foot; ki joona maŋ mɔk tammɔi piik nan ŋanlee, ki malakanba piik nan banlee guu tammɔi maŋ, ki Israel booru piik nan ŋanlee na sana sɔb tammɔi piik nan ŋanlee maŋ paak. 13 Ki tammɔi ŋantataa be joona ŋanna na paak, ŋantaae din be yondopo, ki ŋantaa be diitu po, ki ŋantaa be gaŋ po, ki ŋantaa be yonbaapo. 14 Doo maŋ fiakir see tana piik nan ŋanlee paake, ki Pegann na toomiinba piik nan banlee na sana sɔb tana piik nan ŋanlee na paak. 15 Ki malaka nba piak nanin na dia salima patu nba ki bi bikii na, a wun bikin doo maŋ nan li tammɔi nan li joona na. 16 Ki li mɔk joona ŋanna, ki joona maŋ fɔkint tee yomm. Ki malaka na bikin doo na nan u patu, ki li yarimu tee maar tusir nan kobiinlee, li yarimu nan li sanpaapo fɔkint nan li fɔkint tintann paak kur tee yomm. 17 Ki u bia bikin li joona, ki li tee taabana kobik nan piinna nan ŋanna. Malaka maŋ din bikin nan nisaarik nba tuu bikii bona biaŋinba nae. 18 Ki joona na maa nan tanbinyinyira nba daauk paar ki bi yi jaspa na, ŋaan ki doo na mɔŋ tee salimmɔna, ki yeen nan mianu na; 19 ki bi jii tana nba daauk paar bonchiann, booru booru, ki fɔkin fiakir na, ki tanbooru maŋ te ki li ŋan bonchiann. Sinsinn fiakir tann nae ki bi yi jaspa, ki tann nba pukin munlee na yi saafir, ki muntaa ni yar yi agat, ki munna ni yar yi emeral, ki muŋŋmu ni yar yi onik, ki munloob ni yar yi kaneliann, ki munlore ni yar yi krisolat, ki munniin ni yar yi beril, ki munyia ni yar yi topas, ki piik ni yar yi krisopas, ki linba pukin piik nan yenn na yi jasint, ki piik nan ŋanlee ni yar mun yi ametis. 21 Ki li gana piik nan ŋanlee na tee tanbooru nba ki bi yi peel na, li mun yaa piik nan ŋanlee, ki gann kur tee peel maŋ yenn yenn ki saa dian piik nan ŋanlee mun, ki doo na sɔnu tee salimmɔna, ki yeen nan mianu na. 22 N ki la Yenjiantu diiuk doo maŋ ni; kimaan ti Yomdaanɔ Yennu nba mɔk paŋ kur, nan Pegann na, ŋamme be leŋ ki niib jiantirib. 23 Ki doo maŋ ki loon ŋmaarik koo yonnu yentu, kimaan Yennu yentsaakar nae tee li yentu, ki Pegann na mun tee li fitir. 24 Ki tingbouŋ na niib sii be li yentu ni; ki tingbouŋ na kpanbara saa kɔɔ nan bi mɔkint ki bir leŋ. 25 Doo maŋ gana ki loo, kimaan nyiɔk kaa leŋ. 26 Ki tingbouŋ na nibooru kur saa kɔɔ doo na ni nan baakir nan mɔkint ki bir leŋ. 27 Linba tee jakint, nan wunba tuun fei toonn, nan fai damm, kan kɔɔ doo maŋ ni, see binba sana sɔb Pegann na manfopaann damm gbouŋ ni na kuukɔɔe saa kɔɔ doo maŋ ni.

Fiitu 22

1 Li yoo ki malaka na wannin manfoor nyun kpenu na, ki li nyi Yennu nan Pegann na naangbouŋ na ni, ki yeen nan mianu na, 2 ki puub gaar doo na sɔnjosinsuuk ni, ki tiik nba ki bi yir manfoor tiik na see kpenkpinii ŋanlee na kur po; ki tiik maŋ loon lɔɔna booru piik nan ŋanlee, ki binn nɔɔk ni, ki li loon taar piik nan munlee, ŋmaarik kur ni li loone; ki li faat na tee tebuk ki tur nibooru kur. 3 Yennu nba por linba mɔb, li ji kii be doo maŋ ni; Yennu nan Pegann na naangbouŋ maŋ sii be doo maŋ ni, ki u toontunna na sii jiantirɔ. 4 Ki bi saa la u numm po, ki u sann saa sɔb bi yugbia paak. 5 Nyiɔk ji tan sii kaa, bi tan kii loon fitir koo yonnu yentu, kimaan ti Yomdaanɔ Yennu sii tee bi yentu. Ki bi saa di naan kii be mɔkmɔk nan mɔkmɔk. 6 Ki malaka na bia yetin a "Mɔbona na tee mɔniie, ki yada bia be li ni. Ki ti Yomdaanɔ Yennu nba jikit u Seyeeŋ ki teen u sɔkiniinba na, ŋɔɔe tun u malaka a wun baar ki wann u toontunna linba saa tun mɔtana." 7 Ti Yomdaanɔ Yiisa yet a "Gotir man, n baate mɔtana." Tɔn, binba saak sɔkinii mɔmaan nba sɔb gbouŋ na ni na, parpeenn tee bi yare. 8 Min Jɔɔnne gbat ki bia la linba na kura. Maa gbat ki bia la na, li yooe ki n gbaan malaka nba wannin linba na tɔɔnn ki yaa n jiantɔ. 9 Ki u yetin a n daa tee nna kaa; a u mun tee min nan n naa waas nba tee sɔkiniinba nan binba saak linba be gbouŋ na ni na toontunlɔɔe; a n jiant Yennue. 10 Ki u bia betin a n daa bɔrii sɔkinii mɔmaan nba be gbouŋ na ni, kimaan yoo na pera; 11 ki wunba tuu tuun toonbiit, wun biar kii tuun nna, a ki wunba mun tuu tuun jakint toonn, wun biar kii tuun nna; ki wunba tuu tuun toonŋana, wun mun biar kii tuun nna, ki wunba tuu tee popeendaanɔ, wun mun biar kii tee nna. 12 Ti Yomdaanɔ Yiisa yet a "Gotir man, n baate mɔtana, ki dia sɔɔ kur toona nyɔɔt a n tan turɔ. 13 Mine tee Alfa nan Omega, sinsinn nan joontu, pinpiik nan gbennu." 14 Damm nba wuur bi para nan Yiisa sɔn na, parpeenn tee bi yare; li paak ki bi mɔk yaak nba saa di tilɔɔna nba teen manfoor na, ki saa kɔɔ tammɔb na ni ki saan doo na ni. 15 Ki nibiit, nan binba dia jabaat ki bu ki kpann niib, nan binba tuun jakint toona na, nan nikpiirit, nan patmanna, nan binba tee fai damm ki kpann niib na, bi kur tan sii be doo maŋ nanyer poe. 16 "Min Yiisae tun n malaka a wun tan fiit maan na ki tur n weira. Min Yiisa nae tee Defid yaaboonn ki bia tee sanyafaar ŋmaajar nba nyɔkit na." 17 Tɔn, ki Yennu Seyeeŋ nan Pegann na pooyookir na yet a "Baat." Ki wunba gbatir n mun yet a "Baat." Ki wunba kur ki nyunnyukiru soorɔ, wun baar; ki wunba loon nyun maŋ, wun gaar yann. 18 Min Jɔɔnn kpaan wunba kur gbat sɔkinii mɔmaan nba be gbouŋ na ni nan ninmɔnn: wunba pukin siar mɔmaan maŋ ni, Yennu saa jii biak booru booru nba sɔb gbouŋ na ni na, ki pukin u tubdatu po. 19 Ki wunba mun nyinn siar sɔkinii mɔmaan nba be gbouŋ na ni, Yennu saa nyinn u tor manfoor tiik, nan Yennu doo nba ki bi sɔb li po gbouŋ na ni na. 20 Tɔn, wunba pak linba na yet a "Mamɔmm, n baate mɔtana." Mamɔmm, ŋaant ki lii tee nna. Ti Yomdaanɔ Yiisa, baat. 21 Ti Yomdaanɔ Yiisa sommir-ii be nan u niib kur. Mamɔmm.